وإن سألوه عن الجمال أجابهم بــزيـــنــــة❤️
❤️حــــســــنــــاء الــــخــِـلــــقــــة
❤️بــــريــــئــــة العــــيـــــون
❤️آســــرة الفـــــؤاذ
❤️🔥وإن زاد غزلا فهي له موقظة الغرام
لخص جمالها بفتنة الزمن وسط كل النساء حسنها مباح ولما لا فهي:
❤️ زيـــنـــه ❤️
❤️🔥كل هذا كان عندما كان عاشقا لها وفجاة اصبح شيطانا في حبها آسرها ومعذبها في قصة عشقهما أصبح هو:
🔥الــنّــمــرود🔥
وإن سألوه عن الجمال أجابهم بــزيـــنــــة ... كان عاشقا لها وفجأة اصبح هو الــنّــمــرود❤️🔥
الصباح والصقيل ناس قليلة خارجة لشغلها فداك الجو البارد السماء ملبدة غيوم و الأرض فازݣة من بعد ليلة كاملة والشتا كطيح يوم شتوي من أيام شهر ديسمبر لي غيدوز بارد كيف المعتاد ولي معندو ميدير فالزنقة راه مخشي فدارو دافي وسط الكاشة وهي وحدة منهم ملوية ففراشها سخونة شادة الطيليفون شافت الساعة كانت 7:50دالصباح من عوايدها تتفيق بكري بعدما تتصلي الفجر صافي عينيها كتحلو ومكتعاودش ترجع تنعس تحركات بشوية وحيدات عليها الفراش تكعدات شافت خوتها ناعسين مكوزين كلا ومعاش قاري تكسلات وناضت خرجات من الصالون فين كنعسو بحكم أنهم عائلة متواضعة وبسيطة دار على قد الحال خشات رجيلاتها فالبانطوفة ومشات لطواليط قضات حاجتها غسلات وخرجات نيشان قصدات الكوزينة كلشي مزال ناعس من غير التقرقيب ديالها هي لكتكلف بالفطور دارت لما يسخن جبدات شي مسمن كان باقي من الثلاجة دارتو حتى هو يسخن ورجعات للصالون تجمع لفراش وفنفس الوقت تفيق خوتها لي قارين مع 9:00 بدات تتزعزع فخوها لي ميت ماشي غير ناعس وحال فمو وبصوت خافت مخاطباه:يوسف يوسف فيق فات عليك الحال نووض
تقلب على جنبو وهي مشات لختها تاهي نفس الشي خلاتهم بتذمر كتقلبو فبلايصهم بداو كفيقو وهي كطوي الفراش:تهزو راه مبقاش الحااال
سكينة وهي تتفوه:كاين شي فطور؟
زينة:كاين غير نوضي تغسلي ولبسي عليك
وداكشي لكان رجعات لكوزينتها وخوتها فاقو وكلا واحد فين صد كستاعدو للمدرسة وزينة بعدما عمرات آتاي تاجهات كتحط الطبلة فهاد اللحظة سمعات الساروت ضار طلات من الصالون وبٱبتسامة خاطباتها:مي صباح الخير
مسعودة سدات لباب:بنيتي فقتو كصبحتي
زينة وهي تتعاونها تحيد الجلابة:الحمدلله فايقة من قبيلة حسيت بيك فاش خرجتي مور ما صليت غير مكتخلينيش نوض نطيب لك الفطور شي نهار تسخفي الله يحفض
مسعودة تتلهت:معليش كلها تلاتة السوايع وتنرجع جلسي نفطرو فين هما لوخرين يوسف سكينة
تجمعو على الطبلة كفطرو فصمت وقت قليل وكلا واحد ناض لشغلو مسعودة تكات ترتاح شوية لأنها مع الخمسة دالصباح خرجات لميناج فالشركة لي خدامة فيها كخدمو من لخمسة لتمنية كنقيوها ويجمعو لي غيتجمع علاما يجيو الموظفين واخا الصحة مشات ولكن الزمان صعييب والحمل غادي وكتقال
زينة لي كانت كتقاد فطور خاص لباها بحكم أنه مريض شاد لفراش كتلقى عناية خاصة من عندها ماكلتو بوحدها مناسبة للدواه وجدات ليه ومجات فين تخرج حتى دخلات عندها ختها:حبي هاني غادية شعري مقاد
زينة ضارت عندها بتاسمات ليها وهي تتشوف فيها قربات وبدات تتقاد ليها شعرها والكول ديال الطابلية وهي تتوصيها:ردي لبال لراسك إلى مقريتيش جي بحالك وعنداك تاكلي شي حاجة من عند شي وحدة وياااك
سكينة حركات راسها بآه حفضات هاد الموال من عندها كل صباح زينة دارت يديها فجيبها وجبدات لها 10دراهم:هاكي قسميها نت ويوسف ان شاءالله العشية خدامة عند واحد السيدة غنشد شي فلوس ونشري لك القميجة لي بغيتي صافي
سكينة تلاحت عليها عنقاتها تتموت فيها هي أمها الثانية ماشي ختها فقط خوات الدار بقات غير زينة ومسعودة وباها لي هزات الفطور ودخلات عندو بتاسمات شوية بعدما حطات البلاطو وجلسات تتسناه تايسالي كان كصلي وجالس فبلاصتو تنهدات وهي تتشوفيه الصحة خانتو حتى الصلاة ولا كصليها جالس بعدما كان كيف الحيط ولكن غذرو الزمان عينيها غرغرو تملكات نفسها هادي هي الدنيا وسنة الحياة حتى حاجة مدايمة بتاسمات ابتسامة عريضة فاش سالا وشاف فيها نطقات مخاطباه بالامازيغية:صباح الخير ابا كصبحتي ليوم؟
تيباري بنفس اللهجة:الحمدلله ابنتي الحمدلله
جبدات دواه وبدات تتعطيه الحبة لي كياخد قبل الفطور وعطاتو يفطر وبالامازيغية موجهة ليه كلامها:انا نمشي نجمع الدار ابا مين تسالي غنجي نعطيك الدوا لي ورا الماكلة متشرب تواحد لتغلط تانجي صافي
تيباري وهو كرشف من الكأس دآتاي حرك راسو بآه وهي خرجات متاجهة لكوزينة تكمل شغالها وفنفس الوقت تنصب الغدا تبعاتها مسعودة تاهي تشوف شكاين وتتهضر مع بنتها وكلامهم كولو بالأمازيغية
مسعودة:نديرو غير شوية العدس اليوم
زينة تتغسل الماعن:واخا أنا غنقيه ونصب
مسعودة:معاش غادية عند السيدة
زينة:قاتلي مع الزوج نكون عندها إن شاء الله
مسعودة جبدات طاسة الربيع غتنقيه جلسات فالسداري لي دايرين فالكوزينة وتتهضر:وسيري الله يرضي علييك ويعاونك ياربي كيفما هازة الحمل ومحيدة عليا شلا هموم بغيت ربي يفاجيها عليك المرضية
زينة تنهدات:أمين ياربيي امين اميمتي
كملات شقاها نصبات الغدا وجمعات لي غيتجمع مشات طلات على باها حلات السرجم نفسات عليه البيت وضارت بالدار شوية من بعد مشات جلسات ترتاح شوية قبل ميوصل وقت الخدمة ضربات 12:30دخلو خوتها وتجمعو فالصالون نطقات مسعودة من الكوزينة:شحال فالساعة؟
سكينة:الوحدة امي حطي لينا باش نمشيو
زينة لي كانت جالسة تتفرج بعدما سمعات الوحدة فالساعة ناضت لبيت كان باها جالس شاد التسبيح فيدو وكذكر الله جبدات حوايجها لبسات ووجدات راسها مبقى والو ويقرب الوقت لدايرة فيه مع السيدة خرجات لقات الغدا محطوط خوتها تتغداو نقبات معاهم دغيا وناضت لبسات فرجليها لاحت عليها مونطو طويل ودارت اللمسات الأخيرة وهي تتشوف فالمراية وجات خارجة:مي هانا مشيت
مسعودة خرجات من الكوزينة تتمسح فتزارتها:سيري ابنيتي الله يعاونك وردي البال فالطريق وبشوية على صحتك
زينة باستها على راسها:واخا امي دعي معايا
مسعودة:ديما داعية معاك المرضية الله يسهل عليك ويفتح لك بيبان الخير ياربي
زينة هزات يديها:ياربي اميين با هانا مشييت ديوها فقرايتكم نتوما وردو لبال
ودعوها وزادت خرجات جرات لباب ديال الدار قديم ومغبر وراها وزادت مع الحومة لكانت خاوية صابة الشتا كلشي مخبي دارت يديها فجيب المونطو كنزات على راسها لأنها حسات بالبرد وزادت تتخمم وتفكر فشنو ناوية دير لأن هاد الحال دخدمة الديور مدايمش ومستحيل تبقى عليه وهي بديبلومها ولكن هو للقات حاليا باش تغطي احتياجاتها واحتياجات عائلتها هي لي هازاهم وتتجري عليهم هي ومها لي صحتها طاحت فالميناج💔
هادي زينة 22عام اسم على مسمى زينة الوجه والأفعال ومكاينش لي يشوفها وميشهدش بزينها الفتان لي يعرفوها كجبدوها بحسن الأخلاق وبلي الله يعمرها سلعة ومن خيرة الناس بنية تبغي ݣاع البنات يكونو بحالها داخلة سوق راسها وعيبها بعيد تقاتلات ومزال تتقاتل مع الزمان فسن صغير باش تهز دارهم لي مفحالهمش وباها لي طاح طريح الفراش وبقات هي المسؤول عليهم من بعدما ختها لكبيرة خوات لمدينة قارية وبديبلومها ولكن مزال مجابش الله الوظيفة واخا عيات تدفع بحالها بحال بزاف فالمغرب والوقت لي جالسة تسنى فيه شي شركة ترد البال لسيڤي ديالها هاهي جالسة تتشقى فديور الناس لي عندها شي شغل تجمعو لها ولا شي طياب طيبو معروووفة بحداݣتها وتاويلها من صغرها بحكم أنها من البادية وقبل 5سنين جاو لكازا هادشي لخلاها تدير كليانات كحتاجوها فهادشي ومن المعروف أن بنات البوادي فنانات فشغل الدار وتاويلو ميخليو ليك متقول ولا منين تشدهم
وصلات من بعد مدة وهي غادية على رجليها فلوس الطاكسي زايدين فيها وقفات قدام العمارة وهزات راسها تتشوف بني جديد وراقي علام الله لي ساكنين فيه كيف دايرين سمات الله وتقدمات برجليها اليمنى متاجهة للدار فين غتخدم ثواني قليلة خرجات من السانسور ونيشان تقدمات تتقلب على رقم الدار لقالت لها السيدة وداكشي لكان صونات بعدما لقاتو ووقفات بهدوء تتسنى يتفتح لباب داكشي لكان بتاسمات فوجه مولات الدار لي وقفات ثواني قليلة تتصكاني هادي لي قدامها بدون مقدمات أو سلام نطقات:مولات لميناج؟؟
زينة جمعات الابتسامة شوية ونطقات بصوت رقيق:آه هي هادي ياك متعطلتش بعدا
بلاما تجاوبها تحاكزات لها باش تدخل:دخلي
وداكشي لكان دخلات زينة بعدما قرات هاد ختنا وعرفات غتكون مكنزة بحكم التجربة جربات بزاف ولا تتعرف كل مولات الدار كدايرة ولي هي بدورها فاش جات تسد لباب دلات قنانفها دليل على علامة استفهام جاتها فشكل هادي غتجمع لها مع ضارت لقات زينة واقفة تتشوف فيها وهي تنطق:شنو تتسناي باش تبداي؟
زينة وراتها الصاشي:خاصني فين نبدل
نعتات لها وكلامها كولو بنبرة باردة:را الطواليط
تلفتات فين نعتات لها وزادت خلاتها متبعاها ومطلعة حاجب وهي تطلع وتنزل فيها من اللور هادي لغتحنى على الجفاف وتجمع وتخمل جاتها صغيرة وزوينة حيت حنا ديما عندنا ديك المرا دالميناج مرسومة فجلابة وزيف وصابو ومكرفسة مسكينة هاملة راسها تطيح وتنوض وتجري على دوك زوج ريالات لغتشد من بعدما غطيح صحتها عليهم رغم أن زينة واخا لابسة العصري ولكن بسيط مع ذلك أثارت انتباهها خرجات هازة حوايجها لي حيدات ودارتهم فالصاشي بعدما لبسات بيجامة سروال والفوق ديالها ودارت الطابلية فوق منها وحزمات شعرها بزيف حياتي مولات الدار سمعات الحس تلقات ليها وهي تطلع وتنزل:حطي حوايجك هنا واجي نوريك منين غتبداي
داكشي لدارت تبعاتها نيشان لواحد الصالة لشافتها زينة طلعات حجبانها وهي تتشوف كلينيكس مرمي فالأرض وشي كواغط لهاد الدرجة باردة لكتاف أبسط حاجة تقدر ديرها غتجمع داكشي لي فالأرض وترميه فوق الطبلة تتجي هي تجمع كلشي متخليهش لداز يتخطاه هكاك تلفتات عندها:غتبداي بالصالة جبديها ليا مزيااااان وتفرتيتة هي اللخرة متبقاش من بعد الكوزينة راه تاهي مرونة ومن بعد الحمام وحتى تسالي ودوزي البالكو مسحي الزاج وحتى هو خاصو يتجفف
زينة حركات راسها بآه وهي تتشوف فالروينة وتتبلاني باش غتبدا مولات الدار شافتها ساكتة:مالك جاك هادشي بزاف واش قادة بعدا؟؟
زينة شافت فيها:كون مكنتش قادة الالة بخدمتي مكانتش اتوصلك نمرتي ولا نحط رجلي هنا
مولات الدار:ايوا هاحنا غنشوفو يلاه بداي وطلقي راسك بغيت 17:30 كلشي يكون هو هداك
زادت تتبومبا وتعوج وطرطق فالمسكة خلات زينة دخلات للصالة وهي تتحرك راسها بلا لشاف الدار والحالة والماكياج يقول هنا نبات ساعة لا صواب لا آداب على دوك زوج ريالات لغتعطيها جالسة تآمر وتنهي مخفاوش عليها دوك الشوفات لكدير فيها هكاك تقول عمرها شافت بنادم تنهدات وهي تطلب الله يهدي ماخلق الناس طوب وحجر وكل مرة خدامة عند وحدة فشكل بدات لخدمة ولوخرا جالسة شادة التيليفون دايرة رجل على رجل فواحد الجليسة حاضياها مبغاتش تغفل عليها هاد النوع تتعرفو مزيان مخاصش الرجل يجي ويلقاها كضور هنا غير ببيجامة وعاطية للعين هي مرا وبقات تتشوف فيها وعاد زيد باقى صغيرة داكشي باش طلبات منها تسربي دغيا شغلها وتزيد بحالها ندمات لاش عيطات لها لأنها متتعرفهاش غير شكروها لها شي ناس وجابتها ديبانيها هادشي لكانت تتفكر فيه وهي حاضية تحركاتها رغم أنها حتى هي فأواخر العشرينات يعني مزال صغيرة ولكن سم العيالات ميقد عليه حد جاية غير تجمع لها وسخها ومحملاتهاش
داز وقت طويل وزينة غارقة فالشغل تتجمع من هنا وتقاد من لهيه شطبات جففات حتى طاحو عليها كتافها وتقسم عليها ظهرها ولوخرا كضور عليها ديري هادي مسحي لهيه وهي عارفة خدمتها شغدير فيها عصباتها مين هاد الفهامات كاملة فيها لاش جايباها وهي لقات قنات الدار فيهم الخز واخا تكون زحافة لشاف الزواق يقول هنا نبات العكر على الخنونة سمعات الباب تحل متسوقاتش كانت فالكوزينة تتغسل الماعن غير سمعات الحس قريب لها تلفتات تشوف شكون كان الرجل ديال الدار لغير شافها تراجع حسابلو الكوزينة خاوية نطق بصوت خافت ومطولش فيها الشوفة دليل على الإحترام:السلام عليكم
زينة ضارت منزلة راسها:وعليكم السلام اسيدي
قصد الثلاجة حلها وجبد قرعة الما وضار لجيهتها:كاس اختي الله يحفضك
داكشي لكان مداتو ليه زينة شرب الما ورجع كلشي لبلاصتو بهدوء بلاما كل واحد فيهم يشوف جيهة الآخر مجا فين يخرج حتى جاية مرتو تتجري حجبانها معقودين دارت يديها على خصرها ونطقات:اشكدير فالكوزينة؟
-وعليكم السلام دخلت شحفان وشربت كاين شي مانع؟
مرتو غير مع جنابها غطرطق:جيتي من الخدمة خاصك تمشي لبيت نيشان واقلة لا؟
-غتبداي عوتاااني جاي باغي نرتاااح عفاك
بغى يتخطاها ويزيد وهي تشد فيه ناوية تلصقو:اجي لهنا متهربش فين عمرك دخلتي لكوزيينة ولا حيييت كاين البراني ياااك جمعتو مزياان
-بعصبية:السيدة معرفتها ݣاع واش كاينة ونت خاصك غير علاش تلصقي راه هاد الشك ديالك غيوصلنا لشي كارثة انا راه مبقيتش قادر نصبر على هاد التخربيق زدتيي فييه
فهاد اللحظة حولات عينيها لكنفتو الشرار لزينة لغير واقفة وتتشوف فيهم وصفارت تتشوف الباطل بعينيه:ونت الالة عاجبك الحاااال ياك كدخلو لديور الناس ناويين على الغذر هادو هما فعايل الشايطات
زينة يلاه جات تدوي وهو يتدخل راجلها:الله يهديك يا هاد المرا خلي أعراض الناس فالتيقار
زادت شعلات تقول خاصها غير فين تعض بصوت عالي ردات عليه:ياك اسييدي اذن شريتو معرفة مين كدااافع عليها ياااك خرجييي عليااا نت الموسخة خرجييي
زينة مسكينة لي صفارت معرفات باش تبلات والباطل كطيح عليها:اختي الله يهديك راه ربي شاهد عليا مكاين هادشي لتتقولي وزيد راني قربت نكمل واش طيحت صحتي غير هكاك فاللخر نخرج بلا ريال بلا زوج والباطل من الفوق حراام علييك
من الأول محملاتهاش وبغات ليها غير السبة ودابا لقاتها طلاحت عليها جراتها من ذراعها وبدات تتدفع فيها:مزال عندك الوجه لتهضري فيه على الفلوس خرجييي علياااا خرجييي اللفعة خطاافات الرجال خرااابات البيييوت
كدفع فيها وهي لا حول لها ولا قوة تحنات هزات الصاشي دحوايجها مجات فين ترميها على الباب حتى تدخل راجلها وجا وسط منهم شد فمرتو وغوت فيها:وقفييي واش الشك والباطل وزايداها بنكران عرق الناس فين غادية بهادشي فييين طغيتييي بزاااف عيت مندير فالخاطر ونت غير مزايدة فيه ولكن غير صبرييي
دار يدو فجيهو جبد بزطامو خرج منو 300درهم وضار عند زينة لي وراه مخبية دموعها طايحين تنهد ونطق:هاكي اختي رزقك سيري الله يسهل عليك وسمحي لينااا
ديك المصعورة المريضة مزال زايدة فيه بغات طلاح عليها:عندك الزهر اللفعة أما والله متاخدي الريال
زينة مبقاتش قادرة تستحمل حلات الباب بالزربة وخرجات تتشهق و تتجري مع الدروج غتكركب منهم باغية غير تخرج طج بحالها شهاد الأشكال وشهاد الشر فالناس مكتعرفها عمرها شافتها وتطيح عليها فالباطل وكطعن فشرفها معرفات راسها وصلات لتحت غير على صوت الطوموبيلات غاديين جايين والكلاكصون قلبها كضرب ووجها مخطوف دموعها طايحين عاد رجع عليها داك الخوف والدهشة كثر رجليها تحشو عليها جلسات فباب العمارة وشدات فراسها وهي تتبكي مرضاااتش مخلات فيها غير لنسات ومجاوباتهاش اتبقى واحلة لها تتبكي وتشهق كون بغات الوسخ كن مشات تطير ليه وتدير منو الفلوس ماشي تجي تجمع الخنز وطيح صحتها لداز يشوفيها ويقول علام الله بيها مسكينة وهي دوك الدموع حلفو لحبسو ممسوقاش راه الزنقة الباطل صعيب خصوصا قذف المحصنات وهي عمرها هزات العين فشي راجل وربي شاهد
-مالك ابنتي ياك لباااس؟
فهاد اللحظة هزات راسها وجها حمر ودموعها نازلين كان العساس لي غير شافها حط يدو على كتفها وزاد كسول فيها:مالك ابنتي اشبيك ماشي نت لدخلتي قبيلة ياك اشواقع واش شي مشكيل مع شي حد هنا عندنا فالعمارة
بلاما تحس حركات راسها باه شي لخلا العساس يدير صبعو على فمو كفكر وهو ينطق:متكون غير ديك الجلاخة لساكنة فالطروازيام باينة لعمى تكون قالت لك شفتي ليا فراجلي بحال غاهي لضاربة الكاغط لا حول ولا قوة الا بالله
زينة لكانو دموعها طايحين على سبة وكلها تترعد هازة راسها تتشوف فيه وجالسة فالارض مكمشة دارت يديها على صدرها وبدات تتحلف وتعطي لقلبها:والله اعمي مدرت ليها شي حاجة بغيت ربي يطيرني أقسم بالله
العساس مسكين شد فيها:ياعود بالله راني عارف عارف ابنتي اشكاين مدعيش على راسك نوضي نوضي حيدي من الارض جلسي على الكرسي
نوضها وعطاها الكرسي ديالو تجلس وهي تتمسح دموعها وكلها تترجف ولداز يشوف فيها جابليها مسكين قرعة لما شربات وغسلات وجها بقات بشوية بشوية حتى تهدنات دغيا لاحت عليها المونطو ديالها وناضت:الله يرحم الولدين اعمي سمحليا بزاااف
العساس:مكاين باس ابنتي الله يهدي ماخلق تانت اشجابك عند هاد الجلاخة كن عرفتك من الأول قاصداها نحبسك العمارة كاملة دابزات معاها وراجلها الله يعمرها سلعة لصقات فيه لصقة ليهود
زينة تنهدات:طرف دالخبز صعيب اعمي
العساس كشوف فيها مسكينة باينة من وجها بنت الناس سماهم على وجوههم وتتقاتل مع الزمان:سيري ابنتي الله يسهل عليك وحضي راسك خدمة الديور صعيبة والحلال أصعب ولكن ربي كشوف
زينة وهي حزينة عينيها فالارض:الله يطعمنا حلال أعمي الله يسر لك تانت شكرا بزااااف
ودعاتو وزادت وهي غادية تتخطوي خطاويها بغات تحيد من تما دموعها تحجرو فعينيها مرضاتش يطيح عليها الباطل ومقادراش مزال تبكي وسط الزنقة الغصة واقفة فحلقها وهي فهاد الحال صونا طيليفونها دغيا جبداتو وتتمسح دموعها كانت نمرة غريبة جمعات النفس ودارتو فوذنيها:آلو سلام عليكم
-وعليكم سلام واش مادموزيل زينة آيت الحاج؟
زينة عقدات حجبانها شوية:أياه هي هادي شكون معايا عفاك؟
-حنا من شركةEl Wazani Fashionكنت دافعة السيڤي ديالك على قبل poste secrétaire ياك؟
زينة دغيا وقفات وهي تتهضر قلبها كضرب:أياه
-المهم غدا انشاءالله مع 9:00 بغيناك عندنا فالشركة
زينة فهاد اللحظة حسات بالثلج تكب عليها قلبها تهز وفرفر وهي تتسمع اجي عندنا لشركة وكدا دموعها لكانت كطيح نشفو محساتش براسها حتى نطقات بفرحة وهي ممتيقاش:بصح بصح واش انا بغيتوني انا ياااك
-اياه الالة غدا ان شاءالله لتاحقي بالشركة عندنا ونكملو الهضرة
زينة بفرحة:واخا اختي انا غدا مع الصباح طلقاوني تما مغاديش نتعطل شكرا بزاااااف
قطعات معاها وهي غطير بالفرحة بعدما كانت مغبونة غير ثواني قبل كضحك غير بوحدها فالزنقة فرحات فرحات غادي طيير نسات حزنها نسات كلشي اخيرا اللحظة المنتظرة شي شركة تعيط ليها هزات عينيها للسما فرحانة تتشكر سيدي ربي لي مخيبهاش كانت كظل تصلي وتدعي حتى ستاجب ليها معمرها قنطات من رحمتو مسحات دموعها دغيا وزادت تتجري فرحانة لدار تفرح ميمتها وباباها
مسعودة خرجات عينيها بالفرحة:الله يا بنيتي الحمدلله شحال دعيت وربي مخيبناش
زينة طلاحت عليها عنقاتها:الحمدلله يا ربي الحمد لله ربي كبير كلشي غادي يتقاد ان شاءالله
مسعودة:الله يسهل عليك وينقي طريقك راك مرضية وعمر ربي ميخيبك الحبيبة
زينة باست يديها:امين العزيزة امين
مسعودة:كدازت الخدمة عند ديك السيدة بعدا
زينة مورالها طالع بهاد الفرحة لي سمعات مبغاتش تقلب ولا تفكر داكشي:الحمدلله دابا خدمة البيرو امسعودة نساي الجفاف
مسعودة:انا حاسة بنيتي غتولي منها للمدير ان شاءالله ياربييي
زينة تتحيد المونطو:ݣااع ياودي فاش مكان مهم خدمة بحالي بحال الناس بقرايتي
مسعودة:بدلي عليك انا غادي نحط الصينية
داكشي لكان زينة مشات لبيت جبدات بيجامتها بدلات عليها صلات صلاة المغرب ومشات قاصدة الكوزينة تعاون مها حتى سمعات الدقان فلباب تاجهات ليه حلاتو وهي ترسم ابتسامة عريضة:بااا فين كنت دااايع ههههه شكرا اخويا عبد الكريم
عبد الكريم عينيه على زينة لي مطولش فيها الشوفة بزاف:الله اودي اختي زينة با تيباري راه بحال الوليد
تيباري:الله يرضي عليك اولديي
شدات فيه ودخلاتو بعدما كانو خارج شوية يتمشى ويجلس فقهوة الحومة وكتكلف بيه مولاها لي هو عبد الكريم كرد ليه لبال ومين كبغي يرجع كجيبو شاد فيه حتال الدار مدخلاه بشوية وهي شادة فيه حتى داتو للصالة جلس وجلسات حداه يديها مفلتوش منو نهائيا عويناتها كبريو بالفرحة باغية تفرحو
نيشان نطقات وهي فرحانة:با غادي نخدم عيطو ليا الشركة وغدا غادي نمشي عندهم ههههههه
تيباري كشوف فبنتو وفرحتها شي لخلاه يبتاسم ليها شوية:الحمدلله ابنتي الله يسهل عليك ويعاونك الحمدلله
زينة تمسكات بيه كثر:ان شاءالله ابا غادي نحط جهدي كامل فهاد الخدمة والعملية غادي ديرها غير عول عليا ونعس على جنب الراحة
تيباري بشوية هز فيها صبعو:شوفي الأهم عندي دابا هو تخدمي وطلقاي راحتك متهزيش الهم ليا أنا الحمدلله دابا ولجات من عند الله مرحبا بيهاا
زينة:ندير أي حاجة ابا باش ترجع لينا بصحيحتك الله يخليك لينا ويطول فعمرك ياربي
مع كملات كلامها طلاحت عليه عنقاتو وحتى هو كدعي معاها وفنفس الوقت قلبو كحرقو عليها بعدات عليه وطبعات قبلة على راسو شعلات ليه الأخبار وزادت لكوزينة خلاتو شاد التسبيح بين صباعو ومتبعها كشوف فيها لي زايد على صحتو هو تأنيب الضمير لي كعيش فيه دابا من جيهتها كن ما دارش داكشي كن راها عايشة فالعز دابا ومرتاحة ماشي كتكرفس وطيح وتنوض وهي مزال صغيرة ولكزيد عليه أنه محاقداش عليه نهائيا ونعم البنت الصالحة والبارة لواليديها باغية تخدم باش تدير ليه العملية مقابلاه دايرة جهدها كان كتمتم بذكر الله بشوية حتى خرج تنهيدة طويلة بحرقة نطق بهمس:ياربي تسامحني وتغفر ليا
سكينة تتقطع التفاح:فرحتيني احوبي والله
زينة حداها تتحط العشى ومبتاسمة باينة الفرحة غير من حركاتها:الحمد لله لخصاتك دابا غادي ناخدها ليك وبا غيدير العملية ان شاءالله
يوسف:غير صبري الخوادرية نشد غا الباك وفينما كان شي بريكول غنتخشى فيه تانا خاص نعاون
سكينة:حتى أنا والله غادي نخدم فالصيف فماكدو ولا مرجان واخا نعاونو غير شوية
زينة فهاد اللحظة حطات الكوكوط وشافت فيهم بزوج:مكاين لا خدمة لا زمر غتديوها فقرايتكم وفالصيف غتدخلو تقراو الفرنسية أنا قادة براسي
يوسف:ولا لا لا أنا هو الرجل ديال الدار
زينة:وحتى دير دارك وولادك داك الساع صرف عليهم نت دابا باقي ولدي أنا
بداو كضحكو كاملين وناضو تلاحو عليها عنقوها ضورات يديها عليهم وباست كلا واحد ونطقات:ديوها غير فقرايتكم متهزو لهم لحتى حاجة أنا قادة براسي وبيكم وبكلشي بغيتكم غير تقراو و نشوفكم حسن مني ان شاءالله
سكينة:واخا منعرف فين نوصل اتبقاي نت هي مثلي الأعلى درتيي بزاااف على قبلنا ومنقدروش نوفيو ليك هادشي واخا منعرف شنو نديرو
زينة شدات فختها وبحنية شافت فيها:وصافي راه غتبكينييي نت راك بنتييي ماشي ختي
يوسف هز يديه للسما:ياربي شي مرا بحال الخوادرية تيتيزة وديال الزمان
فهاد اللحظة زينة ضرباتو على كتفو وبداو كضحك جو زوين وعائلي طاغية عليه البساطة والمعنى الحقيقي ديال ماشي ضروري تكون لباس عليك باش تخلق السعادة ولا تعيش فراحة حطو العشى وتعشاو مجموعين من بعد جمعو الماعن وكل واحد شد سداري كستعدو باش ينعسو زينة لكانت فلبيت مع باها عطاتو دواه وكوجد باش ينعس جات مسعودة تكات حتى هي حداه وغطاتهم وهما كدعيو معاها بالتيسير لغدا لي غتبدا فيه مشوار جديد مسعودة:وسيري اميمتي تنعسي باش تفيقي غدا مع الوقت إن شاء الله
زينة:واخا امي نزيد عليكم شي مانطة
تيباري:لا لا براكة سير ابنتي ترتاحي بحرا تفيقي الله يرضي عليك سيري
زينة:واخا ابا يلاه تصبحو على خير
خرجات وخلاتهم ونيشان مشات لصالة فين كنعسو لقات خوتها فرشو وتكاو تلاحت حداهم تاهي شادة الطيلي كانت كدوي ميساجات مع ختهم لكبيرة لي مزوجة فمدينة أخرى فرحاتها حتى هي بالخبر وكلامهم كولو كان بالأمازيغية
راضية:الله يسهل عليك احبيبتي ياربي والله حتى كنت هازة ليك الهم
زينة:الحمد لله ربي كبير كنت نيت فواحد الخديمة ليوم جبت لقسم الله باش نديباني
راضية:فكرتيني غدا إن شاء الله غنسيفط لك واحد 500درهم عاوني بيها خدمت الحلوى لواحد السيدة دارت العرس لبنتها
زينة:خلي ليك فلوسك عاوني بيهم راسك وراجلك حنا متهزيش لينا الهم
راضية:غنسيفطهم جبديهم ولا خليهم واخا غير الدوا لبا مالك مراضياش ههه
زينة:ماشي هكاك اختي ونت وراجلك يلاه مكافيين مع الزمان وكتكونو راسكم
راضية:راكم عائلتي وواجب عليا تانا نعاون باشما قديت وزيد با مريض والحمل كولو عليك يد وحدة متتصفقش يلاه آخر مرة علاما تشدي الخلصة مزيانة هادي؟
زينة تنهدات وهي تتكتب ليها:ايوا اشغادي نقوليك
راضية:معلينا متخلعيش غدا لبسي مزيان وفطري مزيان راه كاين لبرد وديري التيليفون يفيقك ان شاءالله ميكون غير الخير الله يسهل عليك احبيبتي
زينة ضحكات:واخا الحوب ديالي هههه يا ربي امين
راضية:دويت قبيلة مع ماما لقيتك خرجتي خدامة
زينة تفكرات ديك الحريرة لي كن ما ابيل دالخدمة نساتها فيها كن راه جالسة تنخصص دابا:اييه يختي تمارة منعاودش لك
راضية:ان شاءالله تكون هي اللخرة مع هاد الخديمة
بقاو شحال كهضرو حتى جا وقت النعاس نيت توادعو دارت الطيلي يفيقها وتكات بقات شحال تتفكر فغدا كيف غيدوز تتمنى يكون كلشي هو هداك وربي ميخيبهاش من بعد مدة قصيرة وهي تتخمم غفات
نهار جديد🌸
كتشوف فالمراية وتتماصي لعكر بصبيعاتها آخر لمسة دارت وهي تتشوف راسها كيف جات ميكاب خفيف و حوايج بساط تريكو لاصق طالع على العنق سروال جينز بوي فراند صبادغي ومونطو طويل لان الجو بارد جمعات شعرها كودشوفال ودارت حلقات صغار المهم حويجاتها على قد حالها ولكن كلها انوثة ديك البساطة زادتها جمال على جمالها رشات شوية دالريحة وهزات ساكها تلفتات عند باها لي كان جالس والتسابح فيديه كدعي معاها فنفسو قصداتو وقبلات راسو:انا مشييت ابا دعي معايا ورد لبال لراسك
تيباري تنهد:الله يرضي عليك ويسر لك ويدير لك لفيها الخير ياربي ديما داعي معاك
زينة تبسمات:عارفة لكاين راني قاديت لك كلشي كلا دوا ومعاش غتاخدو فوقت الغدا غنعيط لك صافي
تيباري:متهزيش الهم ليا ردي لبال لراسك و ركزي دابا فخدمتك أنا بيخيير وعلى خير
تبسمات كثر وقبلات يدو وخرجات طلات على خوتها لمقاريينش هاد الصباح بزوج كانو ناعسين شافت الساعة 7:30دالصباح ونيشان قصدات لباب مع فتحات توكلات على الله وسبقات رجليها اليمنى وخرجات كتقرا القرآن فنفسها وكطلب الله يسر لها كانت السما صافية داك الصباح وشوية البرد شي لخلاها تخشي يديها فجياب المونطو الدنيا عامرة الناس خارجة تقضي شغالها لوليدات غاديين للمدرسة بعدا إلا خدمات مين اتبدا تخرج فهاد الوقت معندها مناش تخاف كاين الناس وقفات فالبلاكة دالطوبيس ماشي بزاف حتى وصل ركبات قطعات وريقة وجلسات وفمها محبسش من الذكر دالله طلبا منه أنه يسر ليها وتكون هادي هي الخدمة المنتظرة لي بغاتها من شحاال وصلات من بعد ساعة نزلات شافت فجنابها طلعات النفس وزادت خطوات قليلة حتى وصلات مع وقفات قدام لباب وهي تهز راسها تتشوف فديك الشركة تبارك الله قالتها فخاطرها محساتش حتى بتاسمات وقلبها غيطير من الفرحة
من برا بانت ليها شركة هماوية شي لخلا قلبها يبدا يضرب بالجهد عاد طلعات معاها جمعات النفس تاني تتوجد راسها كيف اتهضر وتجاوب توكلات على الله ودخلات وهي مسبقة رجليها اليمنى نيشان قصدات ريسيبشن
زينة بٱبتسامة بشوشة:سلام عليكم
البنت شافت فيها:وعليكم السلام لالة شنو حب لخاطر
زينة:انا جيت على ود بوسط secrétaire عيطتو لي لبارح
لبنت: عطيني سميتك عفاك
زينة:زينة آيت الحاج
البنت قلبات فلبيسي:اه وي آجي معايا عفاك
تبعاتها زينة وقلبها كضرب وهي تتشوف الموظفين غادين جايين باللباس رسمي أنييق وداكشي بانليها كلاص تتشوف فجنابها وكتراقب الوضع والناس كغاديين الأجواء البنت دقات ودخلو بزوجات:مريم هاهي la secrétaire الجدييدة
زينة فهاد اللحظة قلبها تفاجا وهي تتسمع السكريتيرة الجديدة واخا باقي مدارو معاها والو قالت فنفسها من فمك لسيدي ربي
مريم هزات راسها شافت فزينة:سلام لباس جلسي تفضلي
بتاسمات زينة وحسات بالراحة بشوية التعامل زوين بحكم أول ايكسبيغيونص:حمدلله ونت بيخير
مريم:حمدلله زينة ياك واااجدة ليوم غتبداي نيشان
زينة بابتسامة عريضة:واجدة لهلا يحشمنا ياربي
مريم نيشان مدات ليها واحد الورقة:مهم زينة هاهي الكونطرا ديالك نخليك واحد خمسة الدقايق قرايها على خاطرك وإلا عجبك الحال نتوكلو على الله هاهو ستيلو
زينة فهاد اللحظة مع سمعات الكونطرا سيني الشروط تصرفقات شافت فيها بصدمة:واش غادي نخدم نيشان حسابلي غندوز شيentretienحيت معنديش تجربة
مريم رجعات جلسات بعدما كانت واقفة غتخرج:بحكم أننا محتاجين بنت فهاد البوسط فأقرب وقت حيت السيدة لكانت فيه مشات تولد على غفلة علمات بلي مبقاتش غادية ترجع عفيناك منو وزيد مع الوقت بشوية بشوية تعلمي معندكش شي حاجة صعيبة وكنظن غير لمبغيتيش تقبلي كلشي هو هداك
زينة مزال تتحاول تستوعب:ها لا لا قابلة
مريم بابتسامة:نخليك شوية وأنا معاااك
خرجات وخلاتها متبعاها مزال مسهوتة رجعات تتشوف فالورقة تتقرا عينيها طرطقو وهي تتشوف5000درهم فالصاليغ على الدخلة مكانتش متوقعاها وهي غتكون غير كاتبة عادية غيديكلاريو بيها لاكيص وريقاتها كلشي متردداتش حتى سينات ونطقات بفرحة وهي تتحرك يديها:yeeees
الضحكة مفارقاتش وجها مكرهاتش تنوض تشطح ولا تخرج تغوت لهم تما هزات راسها للسما وجامعة يديها بزوج فرحانة تتشكر الله تلفتات فاش دخلات عليها مريم لي هزات الكونطرا وبتاسمات ٱبتسامة عريضة وهي تتشوف سينات صافي نجحات فالمهمة ديالها مدات ليها يديها وصافحاتها:مرحبا بييك معااانااا من ليوم نت وحدة منا
زينة بفرحة وببرائة:شكراااا ربي خليك لهلا يحشمنا
مريم:اجي معايا المدير بغا يشوفك
تبعاتها وهي كلشي مجموع فيها الخلعة ديال غطلاقا المدير والفرحة أنها رسميا توظفات وقفو قدام البيرو طلعات النفس وهي تتشجع راسها دقات السيدة لي ستقبلاتها ودخلو بزوج بطريقة رسمية خاطبات المدير لكان عاطيهم بالظهر وكشوف من الزاج على برا:موسيو la secrétaireالجديدة وصلات قادينا كلشي ودابا راه رسميا معانا
متسناتوش يجاوبها ولا يضور عندها حطات الملف ديال زينة فوق البيرو وقبل متخرج شافت فيها وخرجات خلاتها واقفة الخلعة راكباها تتناسق كيف تعامل وشنو تقول مول الشي قدامها نيشان وغير من شعرو وطولو وشكلو من اللور عرفاتو مزال شاب ديما عندنا ديك الصورة أن المدير ايكون شارف قلبها كضرب بالجهد وهي تتسناه يضور عندها
مريم لي مع خرجات من لبيرو دلمدير وخلاتهم بزوج وقفو عليها الرادارات ديال الشركة:اجي لهنا امدرا اشدرتي
مريم:مكانتش صعيبة دغيااا سيناااات يختي ومبروك عليااا
بنت 2:هي شي ترقية جاية فالطريق موسيو الوزاني كعجبو لي ينجح ليه فالمهمات
مريم فخاطرها قول أعوذ برب الفلق:ايوا اختي الله يقدرناااا ويزيدنا فالمهمات
بنت1 بهمس:اجي ومعرفتيش علاش كلفك بهادشي تعصري عليها تسيني بزز زعما متكونش تتعرفو حيت معندها متزيدنا راه غكاتبة لاش هادشي كامل
مريم:موحالش كتبان مصرفقة هاد النوع ماشي النيڤو ديال موسيو الوزاني ايكون غير بغا يدير فيها شي خيير
بنت 2:خلي عليا هاد البلااان نطلع اشتما بيا ولا بيييهم حيت متقوليليش شي حاجة تما اويلي صاليغ مضخم على الدخلة وهي غير كاتبة وبلاentretienراسي كحرقني معرت اشتما
مريم:تانا ضارني راسي صافي حيدي خاصني نعلم مدام سااامية خاصها تعرف
تفرقووو وكلا وحدة زادت لخدمتها ومشات مريم تحطها سخونة لديك لدايراها عينيها ووذنيها فغيابها
مزال على نفس حالهم خمسة دقايق دازو وهي واقفة وهو عاطيها بالضهر يديه فجيابو مدارت حتى ردة فعل كضور عينيها فالبيرو وتتشوف حتى تلفت بشوية عليه عينيه نيشان جاو عليها وعلى وجها البشوش وملامحها البريئة الغزالة بسرعة البرق صكاناها من راسها لرجليها مزيان زينة فهاد اللحظة غير فيكسات عينيها عليه وشافتو حسات بقلبها تفزع وسطل دالما بارد تكب عليها تبلوكااات من هول الصدمة وكأن الزمن وقف عليها ذاتها سخنات وقلبها بدا كضرب بالجهد حسات بالخوف تزرع فيها وكلها تترجف الضو شعل معاها بالدهشة لي ضرباتها موقف صادم بالنسبة وآخر حاجة توقعاتها توقع ولزاد كمل عليها كلامو لنطق بيه بطريقة مستفزة مع تعابير وجهو المعقودة المرفوقة بنبرة صوت بينها وبين الترحيب غالإحسان:مرحبا بييك نورتينا
زينة الريق نشف فحلقها بدات تتنفس بالجهد وصفاارت كلها تترجف وهادشي لاحظو فيها هو شي لخلاه يزيد يكمل كلامو وطريقتو المستفزة محبساتش مع نبرة صوتو لي كملات على مابيها من خوف:هربتي حتى هربتي وجيتي برجليك تخلصي لي علييك
كلامو زاد على مابيها العرق بان فعنقها وجبهتها بقوة التوتر لي تتحس بيه فهاد اللحظة تتبلع ريقها وتترمش عينيها بالجهد تتحقق فيه واش هو ونيت راه هو بشحمو وبلحمو متبدلش مكتحلمش مقدراتش تستحمل قوة ديك الصدمة وداك الخوف ثواني قليلة حتى جات طايحة قدامو على طولتها فاقدة الوعي الصدمة كانت أقوى منها وموقف صعيب بالنسبة لها
متحركش من بلاصتو بقى على حالو كشوف فيها
ويديه فجيابو طايحة قدامو هكاك عينيه عليها وكفكر الدنيا ضارت وجابتها ليه يرد دقتو فيها مزيان زفر وحرك راسو بلا تقدم لبيرو ديالو هز الطيليفون وصونا على مريم:آلو وي موسيو
الوزاني:آجي دابا عندي لبيرو
قطع وشاف فزينة شوفة سريعة ورجع ضار كشوف من الزاج بحالا تاشي حاجة مواقعة مخليها طايحة فالأرض هكاك تسمع الدقان وعطى أمر بالدخول مريم مع دخلات عينيها مشاو لزينة فديك اللحظة نطق هو بلاما يشوفيهم:شوفيها مالها
مريم دغيا تقدمات عندها تحنات على ركابيها وبدات كضرب ليها على وجها بشوية:زييينة زييينة اويلي يلاه كانت مزيانة زييينة كتسمعيني
رجعات ناضت دغيا وخرجات تتجري وهو بقى على حالو عاطيها بالضهر بحالا مكايناش ماقرب عندها ماقاسها رجعات مريم فيديها قرعة الما بدات كتكب عليها حتى بشوية بشوية بدات كتحل عينيها وتتوعى تݣعدات يديها على راسها عطاتها تشرب بشوية وهي دايخة مريم:مالك شنو بيك واش مريضة
زينة عاد وعات بشنو ضاير بيها رجع قلبها كضرب بالجهد ونطقات بهمس وهي مقادراش تشوف جيهتو:والو غير الخلعة غلبات عليا سمحوليا
مريم شافت فيه:موسيو كنعتاذرو راك عارف لايكسبيغيونص الأولى ممولفاش
الوزاني قاطعها:وريها لبيرو ديالها تبدا خدمتها ضيعات الوقت بزاااف
مريم بلا حتى شي كلمة عاوناتها توقف وخرجو بزوجات دغيا قلبها كضرب بحالا كانت تتجري تطلع النفس بالجهد مريم بعدما سدات باب المكتب:مالك يلاه كنت مزيانة
زينة عينيها فالارض:معرفتش محسيتش براسي وصاف يمكن الخلعة والستريس
مريم:وغير ولفي ونساي الراحة راك la secrétaire ديالو مكبغيش كثرة الأغلاط خاصك تكوني ديما فايقة ولا يتيري فيك خخخخ
عينيها خرجو ومريم لي ختمات كلامها بالضحك وكأنه استهزاء لأنها موقف طريف سخفات قدام المدير ويلاه بادية نسات أن راه هي براسها واحد النهار كانت مبتدئة تبعاتها وراتها لبيرو ديالها لكان قريب بزاف و لاصق على المكتب ديالو خلاتها وزادت تتضحك عليها تعاودها للموظفين يشدو بيها الستون زينة مع جلسات شدات فراسها وهي تتنفس بالجهد الصدمة مزال متمكنة منها دارت يديها على خدودها غتندبهم داكشي لوقع خلا عينيها يغرغرو آخر واحد توقع تشوفو هو هدا وزيد سكرتيرة ديالو من الفوق على الدخلة تكون قريبة للمدير هكا وشكون هو كانت معولة تكون غير كاتبة عادية تقاد المواعيد تكون فالاستقبال ݣاع ديك الفرحة والحماس مشى لها فهاد اللحظة مكرهاتش غا غتغوت جابليها الله بحالا غير تتحلم وهي هكاك تتحاول تهدن راسها باش تبدا الخدمة على طول تسناتها معندها مدير سينات دابا لي عطى الله عطاه وعلى ود باها تصبر سمعات الدقان وهي تهز راسها غير شافت جقلة دالناس واقفين قدام باب مكتبها كرمات فبلاصتها بقات تتشوف فيهم مفهمات والو والغريب أنهم مبتاسمين كاملين نطقات وحدة منهم:نقدرو ندخلو
زينة تترمش عينيها بشوية وفمها محلول وهي تتشوف فيهم مفهمات والو حركات راسها بآه وهنا تدفقو كاملين عندها ضارو بيها وهي غتتشوف نطقات نفس البنت وابتسامة عريضة على وجها:عرفناك يلاه لتاحقتي وجينا نتعرفو عليك أنا لبنى résponsable de qualité
جا ولد من وراها تاهو مد ليها يديه ونطق بابتسامة عريضة:او أنا عادل لgraphique designer أو الفناان ديال الشركة سي الوزاني مكديرش شي إشهار بلا بياااا تحتاجي أي حاجة تلقايني فلbuvette تما كجيني الإلهام
جات بنت أخرى دفعاتو ونطقات ضاحكة حتى بانو ضروسها:حيد حيد قالاك الفنان سلااام زييين انا لمياء résponsable de production
ولد2:وأنا دريس lcomptable مرحبا بك
بنت4:وأنا عاليا directrice marketing
بنت5:هاي زين معاك سعاد وحدة من المصممين
زينة بقات غير تتشوف فيهم زربو عليها ولكن ديك الإبتسامة لي على وجوههم كاملين ولجيست لي دارو أنهم جاو يتعرفو عليها عجبها خلاها تنسى دغيا ناضت وهي راسمة ابتسامة على وجها ونطقات:وانا زينة la nouvelle secrétaire تشرفت بيييكم
كلهم دقة وحدة نطقو:مرحبا بييييييك
بدات كتسلم عليهم واحد بواحد وهي مبتسامة ابتسامة عريضة عجبها الحال بزاف و أي واحد كتسلم عليه كرحب بيها وعلى لسانهم كلهم إلا حتاجيتي شي حاجة جي عندي حسات بواحد الروح إيجابية كضور وسطهم وباين بلي كلشي مفاهم فهاد اللحظة وقف واحد الرجل كبير نظم ليهم كشوف فزينة ببشاشة ونطق:سلام عليكم أنا حميد المكلف بالأرشيف مرحبا بيك معانا ابنتي
كلشي شاف فزينة ووحدة منهم نطقات:هدا كنقولو ليه بابا هنا أقدم واحد فالشركة ميمكنش شي حد مستافدش من ليكسبيغيونص ديالو
زينة بابتسامة عريضة سلمات عليه:تشرفت بيك اعمي
بقاو هكاك لي دايز وشاف ديك الجقلة كجي يبغي يعرف شنو كاين كصدق حتى هو كسلم على زينة ومرحب بيها عجبها الحال بزااف فرحوها وعرفات أن روح الفريق والتعاون طاغية على الشركة هاد الجيست لبسيط خلاها تنسى شوية شنو وقع بقاو هكاك شوية من بعد تفرتكات الجقلة وكلمة مرحبا بك كتردد على لسان كلشي جلسات وهي مبتاسمة هاد لجيست فرحها بزااف مكاملة حتى دقيقة وهي تسمع الدقان كان عادل لgraphique designer وقفات وهو ينطق بعدما حط ليها شكلاطةkinder فوق لبيرو ديالها:سمعت مريم تتقول بلي توثرتي بزاف نهار الأول عادي هادشي اختي راه حتى الطونسيو وسطريس واعرين حضي منهم
زينة زادت عرضات ابتسامتها:شكرا بزاااف اخويا ربي خليك مكاين لاش تعذب راسك
عادل:مكاين لا عذاب لا والو دابا نت وحدة منا ومكاين لاش سطريس حنا هنا عائلة تخصك أي حاجة انا موجود
زينة حشمها بهاد الصواب والآداب:شكرا بزاف الله يكبر بيك
ستأذن منها وهي رجعات جلسات بشوية بشوية بدات كترخى وهي تتشوف المعاملة دلي ظايرين بيها أهم حاجة فراحة الإنسان هو المحيط لضاير بيه ثواني قليلة رجع لها التوتر فاش تفكرات شكون طلاقات وخدامة عندو من الفوق بلعات ريقها وبدات تتقلب فلبيرو باش خاصها تبدا خاص تكون دخلات فالخدمة دابا شعلات لبيسي وفهاد اللحظة نيت صونا تيليفون المكتب ديالها هزاتو وجاوبات:آلو
بنت:آلو سلام عليكم الكاتبة الجديدة
زينة:وعليكم سلام وي لالة هي هادي
بنت:متشرفين أنا هند لي كنت فلبوسط قبل منك تاصلت غير باش نشرح لك كثر طبيعة الخدمة كنت كنتسناك ههه
زينة:اااه كدايرة احبيبة لباس عليك تشرفت بيك تانا واخا شكرا بزاااف
هند:ربي خليك ازين هانت شعلي لبيسي راني مقادة كل ضوصي بوحدو ديال لي غونديڤو دموسيو الوزاني الديفيلي لي جاي وشكون الناس لي معروضين ليه الإجتماعات كلشي طلعو ليك
زينة تتشوف فلبيسي وهي كطابي:اياااه اختي هاهما قدامي كاملين
بقات كتشرح ليها مزيان واخا راه عندها الديبلوم دسكريتيرة ولكن خاص تعرف طبيعة الخدمة وعلاياش خاص تكمل نص ساعة وهي معاها فالخط تتشرح ليها:شوفي الضوصي اللخر لي مكتوب فيهMr El Wazani دخلي ليه
زينة داكشي لي دارت:هاهو
صغرات عينيها وبلعات ريقها وهي تتقرا وهند معاها فالخط:هانت راه قاديت ليك فيه ݣاع داكشي لكبغي والقهوة راه بلا سكر مع كدخل نيشان كبغيها وصافي هادشي لكاين فهمتي عندك شي سؤال
زينة دغيا خرجات من داك الضوسيي:لا اختي فهمت شكرا لك بزااااف والله يفكك على خيير
هند:امين ياربي الله يسر لك حتى نت
توادعات معاها وقطعات فهمات مزيان مكاملة حتى دقيقة عاود صونا بعدم مبالاة هزاتو جاوبات وعينيها على لبيسي غير سمعات صوت رجولي كآمرها قفزات وتقادات فالجلسة:اجي دابا عندي لبيرو
زينة قلبها كضرب غا بوحدها:واخا اموسيو
قطع عليها حطات التيليفون وهي تتشوف فيديها كيف كرجفو مزال الصدمة ديال أنها طلاقاتو ممستوعباهاش والإحراج أنها طاحت قدامو ميمكنش ناضت وهي تتحس برجفة خفيفة فذاتها وتتبلع ريقها خرجات قاصداه وكتفرك يديها مع بعض تتشوف غير فالأرض ومع تتقرب قلبها بدا يضرب بالجهد طلعات النفس دقات بشوية ومدات يديها لي تترجف لبوانيي بلعات ريقها وفتحات لباب بعدما سمعات إذن بالدخول سداتو من وراها وقصداتو ويديها لكترعدو ورا ضهرها باش ميبانش توثرها إحراجها مخليها تتشوف غير فالارض نطقات بصوت شبه خافت:وي موسيو
مجاوبهاش كانو عينيه على لبيسي بحالا مدخلاتش شافت فيه حجبانو معقودين مخنزر هكاك مقدراتش طول فيه الشوفة نزلات عينيها أما هو بشوية هز فيها راسو طلعها ونزلها دغيا وحول عينيه لجنبو فوق لبيرو كانو واحد الطاشمة ديال لوراق وحدة فوق وحدة وكثار نطق بصوت كآمراها مصاحباه نبرة جافة:هزي هادو
داكشي لدارت متردداتش هزاتهم بيديها بزوج وكانو شوية ثقال لأنهم كثار شافت فيه كتسنى يعطيها شنو دير رجع كشوف فلبيسي ومخاطبها بنفس النبرة:فيهم شي أخطاء قلبي عليهم وصحيهم بغيتهم ورا ساعة بالضبط
زينة مسمعاتوش مزيان فاللخر لأن التوثر والإحراج لاعبين عليها عاودات سولاتو عادي:واش من بعد ساعة؟؟
هنا هز فيها عينيه ونطق بنبرة كبين لها مالك معجبكش الحال:59 دقيقة
ورجع كشوف فلبيسي عادي تنهدات وضارت بشوية بلا حتى كلمة وهي غادية بحالها قاصدة لباب هز فيها عينيه ومخنزر كن كانو قرطاس كن تيراو فيها مشات لمكتب ديالها حطات داكشي لي تقريبا يكونو شي150ورقة هزات أول وحدة تتشوف هاد الأخطاء كان مقال صحفي على الشركة وفعلا لقات زوج وحدة فسميتو ولوخرا فاللوغو دالشركة هزات الثانية تتقرا بعينيها ولقات كلهم بحال بحال شافت الساعة 9:30 خاص ل10:30يكونو عندو سمات الله وبدات غتدير بلونكو فيهم كاملين عاد ترجع تكتب الكلمة فوقها كتحط بلونكو وتتحيد الورقة وكدوز لوخرا ولات بحال الماكينة مفهماتش مالهم شركة قد هكا لبيسيات عطاهم الله يعاودو يكتبو مقال مصحح جديد ويطبعوه ولكن بانليها غراضو ماشي فهادشي ذراوعها ضروها بالزربة كملات لبلونكو شافت التيليفون بقات نص ساعة غتكتب فوق منو الكلمة الصحيحة بلاما تسنى بدات كان الغلط فسميتو يزيد وهما دايرين له يانيس واللوغو دالشركةWكبيرة دلالة على اسم العائلة لي هو الوزاني الغلط مديور فيهVتتكتب فديك يزيد على وعدها وسعدها وتتزرب الستيلو عرق لها فيديها وصبعها ضرها بكثرة الكتبة مسالات حتى زهقات روحها شافت الساعة باقية زوج دقايق دغيا جمعات داك الكركور دالوراق وقصداتو لبيرو وقفات قدام لمكتب دقات بشوية ودخلات بعدما سمعات الإذن كان هاد المرة كهضر فالطيلي وكشوف من الزاج عاطيها بالضهر وقفات فبلاصتها حتى يسالي فهاد اللحظة غتانمات الفرصة أنها تقوي راسها لأن واحد الإحساس غريب كراودها مقادراش توصفو طاغي عليه الإحراج والصدمة لي مزال متملكاها وهي قريبة وقلبها كضرب بالجهد تتشوف فيديها لي هازين الوراق كيف كرجفو بلعات ريقها
ورجعات شافت فيه كيف كهضر وضاير نص ضورة عندها حجبانو المعقودين كبين على الجدية لي طاغية عليه وهادشي عادي لأنه مول الشي من سماتو الحدة والرسمية فالخدمة مع سالا شاف فيها هزات فيه عويناتها دغيا ورجعات نزلاتهم وهي كتنطق بصوت هادئ:هاهما اموسيو كيما طلبتي لقيت زوج ديال les fautes فيهم كاملين راه قاديتهم
تقدمات بشوية وحطاتهم قدامو فوق المكتب ورجعات لبلاصتها مراقبة ردة فعلو وتتسنى شي أمر جديد تنفذو يزيد بنفس الهدوء تقدم وهز دوك الوراق بلاما يشوفيهم نهائيا وقصد شبكة الزبل لي حدا لبيرو ديالو رماهم فيها ورجع جلس ببرود بحالا مدار والو وشاف فيها نص شوفة قبل ما يحط عينيه فلبيسي:صافي تقدري تمشي لخدمتك
بقات تتشوف فيه وتترمش عويناتها بشوية تتستوعب اشنو دار بلا حتى كلمة نزلات راسها وضارت خرجات بهدوء مع عطاتو بالضهر هز عينيه فيها متبعها مزال على حالو حجبانو معقودين مع سدات لباب ثواني قليلة تلفت لسلة دالزبل تقدم وهز منها ورقة كشوف فداكشي لي خدمات وتفكر متبدلاتش مزال بشخصيتها السكوتية وحانية الراس أما هي جلسات بشوية وكطلع النفس إحساس غريب جاها على ليام لي جاية مدارت حتى ردة فعل لأنها كانت متأكدة أنه كان باغي غير يجربها سكوتية وحشومية ولكن ماشي مكلخة وباغى يقيس حتى ردة فعلها حركات راسها بلا وتنهدات وهي تتنطق:لا حول ولا قوه إلا بالله
صباعها عواجو وهي تتقادهم ومخسر حتى ثانية يطل عليهم داز وقت طويل وهي قدام لبيسي تتحاول تندامج شوية فطبيعة الخدمة وزيد النهار الأول عادي تكون مصرفقة حتى فبوز دالغدا منزلاتش مكان فيها لا جوع لا والو من طبعها التوثر كسد لها الشهية كلات غير ديك الشكلاطة لي عطاها عادل حطات طيليفون بعدما سولات فيها مسعودة هزات عينيها لبرا بانليها دايز ومخنزر أكيد غادي يكون خارج بقات متبعاه حتى غبر وهي تحط راسها على يديها فوق المكتب وزفرات مقادراش توصف باش تتحس بسبب هاد الملاقية وخدمات عندو من لفوق هزات راسها وهي تتنهد المعنى الحقيقي ديال الدنيا صغييرة وعاد كلاامو لي دب فيها الرعب غير خليها عالله وصافي فنفسها طلبات الله يوقف معاها ويسهل عليها الخدمة كانت تتسناها من شحال معندها مديير وغتهز عليها بزاف واخا حسات بالخوف من لي جاي حيت منها ليه دابا غير من داكشي لدار قبيلة على البدية باينة غيخرجها من عين لبرا دير خدمتها على أكمل وجه ومتخليش ليه مين يشدها هادشي لكانت تقول فراسها لي مرفوع وتتشوف فلبيسي بقات هكاك تخدم وتخمم حتى جا وقت الخروج شافت الساعة كانت 17:00جمعات قشها وناضت بحالها سدات وراها لباب وزادت كان كلشي خارج ديك الساعة دارت يديها فمونطوها وتسللات من وسطهم حتى خرجات وشدات الطريق وهي مكمشة على راسها لبرد ومع العشية وقفات تتسنى الطوبيس وهي ساهية تتخمم موضوعو شغل بالها الصدمة ومدارت فيها ولي واقفة لها فالحلق هي ديك السخفة لي سخفات مرضاتش وملقات فين دير وجها فوقما تشوفو غتفكرها مفاقت من سهوتها غير واحد دخل فيها فاش بغا يطلع لطوبيس تنهدات وطلعات حتى هي ثاني الطريق كاملة وهي ساهية تتخمم فهاد الحريرة مدة عاد وصلات ونزلات بحالها ماشي بزاف حتى وصلات لحومتها لي كانت غطرطق بحكم أنها شعبية والعشية كملات طريقها جيهة دارهم وهي غادية سمعات شي حد كعيط لها تلفتات غير شافتو وقفات وتبسمات ليه وهو جاي عندها وقف وهو كشوف فيها مبسم وساهي فابتسامتها لكتحمقو محسش على راسو ݣاع حتى نطقات هي:عبد الكريم كداير لباس عليك؟
عبد الكريم حس على راسو نطق وزاد عرض ابتسامتو:الحمد لله ونت بيخير فين كنت خدامة؟
زينة حركات راسها باه:آه خدمت فواحد الشركة أخيرا ههه
عبد الكريم:مزياان الله يسر لك ردي لبال لراسك وإلا حتاجيتي أي حاجة راك عارفة
زينة بخجل:ربي خليك شكرا بزاااف اخويا عبد الكريم
زادت وخلاتو مبتاسم متبعها الحشمة كتقتلو فيها نسى أنها قالت ليه خويا واخا هو مكعتابرهاش ختو تنهد وزاد لخدمتو لي هي لقهوة فراس الحومة ديالهم حلات ليها لباب سكينة طلاحت عليها عنقاتها:حوبيي الدار خاوية بلا بيييك خليتي بلاصتك بزاااف
زينة معنقاها:كدايرة قريتي ليووم
سكينة:مقريتش فلعشية مكايناش الصيونص
زينة تتسد لباب:يوسف فين هو؟
سكينة رجعات جلسات تتفرج:مشى يلعب الكورة مع الدراري يلاه خرج دابا نيت
زينة قصدات لكوزينة:ميي واااميي هانا جيت
دخلات عندها لكوزينة سلمات عليها جلسات تتحيد سباطها:كدوزتو النهار
مسعودة:الحمدلله الدار خاوية بلا بيك ابنيتي قولي ليا كدرتي وكدوزتي النهار وكيف جاك داكشي
زينة مبغات تبين والو ولا تقول لها شنو وقع:الحمدلله كلشي مزيااان الناس الله يعمرها دار رحبو بيا
مسعودة:والحمدلله الله يسهل عليييك وفينما حطيتي يديك تربحيي راه مين مشيتي وانا كندعي معاك
زينة وقفات هازة سباطها وطبعات قبلة على راسها وزادت خرجات تتبدل حوايجها دغيا وقصدات باها لي متكي فالصالون كان ناعس مبغات تفيقو رجعات لكوزينة تعاون مها وهي ساكتة وساهية تتخمم غدا مخدامينش حيت الويكاند واليوم كان الجمعة بعدا ترتب أفكارها وظبط تصرفاتها فهاد اليومين وابتداء من نهار التنين غتكون واجدة إن شاءالله عمرو آتاي حطو الخبز وشي قراشل وحليوات مصيباهم زينة شوية الكوفيتير والزيت المهم ݣوتي متواضع ديال عائلة بسييطة ستفات الطبلة وقصدات باها تفيقو يشرب آتاي حل عينيه بشوية وتكعد طبعات قبلة على راسو وهي تتسول عليه كيف دوز النهار وعاوناتو قرب شوية للطبلة مع جلسو شاف فيها:كي دوزتي النهار
زينة حطات ليه كاسو حداه:الحمدلله كلشي بيخير شربتي دواك كيفما قلت لك
سكينة:آه عطيتو لييه أنا ماما عطيني حليوة
زينة:مزيان الله يرضي عليك ندير لك الزيت ابا؟
تيباري حرك راسو باه:كجاتك الطريق
زينة:صباح الدنيا عامرة الحمدلله كاينين الناس
تيباري هز كاسو بشوية:والله يسر ليك ابنتي
زينة:أمين ديوها ليا غير نتوما فصحيحتكم صافي
تجمعو على صينية آتاي كياكلو ويهضرو شادين الأولى الأخبار ديال السبعة بالفرنسية تيباري كيسول زينة على اشكقولو وشنو واقع فالدنيا مدة طويلة وهما مجموعين حتى ناضت جمعات الطبلة ومشات لكوزينة تنصب العشى جبدات الخضرة غسلاتها وجلسات تتقطع كل حاجة بوحدها وبالها شارد وباين فاش تتفكر هاد الملاقية خدات عقلها وبالها كولو حيت معمرها كانت متوقعاها واخا تتحاول تبان عادية قدام دارهم مبغاتش تشوشهم ولكن حالها عالم بيه غير الله وهادي غير لبدية وأول نهار وزيد التعامل ديالو هو معاها وشنو دار على البدية هو لخلاها هكا قلبها مقبوط عليها فلحظة حبسات شنو كانت كدير وقفات وعقلها شرد سهات تتفكر فشي حاجة قديمة ودازت محساتش وهي فداك الحال حتى عينيها غرغرو حطات داكشي من يديها وبدات تتمسح عويناتها دغيا لأنهم بزربة طاحو دموعها غاصت فأعماق عقلها وتفكرات المنسي لكانت ناسياه أو لا غير كانت دايرة راسها ناسياه حيت غير شافتو الصباح كلشي رجع عليها سمعات الحس ودغيا مسحات وجها وضارت هزات بصلة تتقطع فيها باش لجا يحسابلو مبكاياها غير هي كانت سكينة لي جايبة لها التيليفون وتتهضر مع ختهم الكبيرة راضية آبيل فيديو:هاهي
زينة شدات التيليفون وحطاتو قدامها فلبوطاجي تتقطع وتهضر معاها وعينيها كدمعو بالبصلة:كدايرة لباس عليك
راضية:الحمدلله وانت كيف دوزتي النهار كجاك داكشي
زينة حركات راسها:الحمدلله مزيان خديمة جابها الله كيفما كانت غتهزنا وتعاونا على الزمان
راضية:داكشي الله يسهل عليك ويسر لك يا ربي كدايرين الناس تما هضرتي مع شي حد
زينة:آمين احبي الحمد لله جاو سلمو عليا مساكن صراحة مزال متعرفت على حتى وحدة
راضية:لالقيتي راحتك بوحدك أحسن غا ردي بالك وصافي حقا شديت تاني واحد الكوموند غير ليوم
زينة:ايوا مزيان ديالاش عرس هدا عوتاني؟
راضية:سبوع يلاه دخلت كنت كنتقدا
سكينة:شنو غادي ديري الصابليي؟
راضية:ضروري منو هو لي ولا مطلوب وبغاو حتى كعب الغزال غنسربك الصابلي هو الأول عاد ندوز ليه
زينة:كشد ليد هو بزاااف الصابلي ديري غير الزواقة بالزرق والذهبي طلع من داكشي ودغيا باش تركزي مع الكعبة
راضية:الزواقة غوز عندهم بنت غندير طابع دسكاتة ولخميسة عجبات السيدة فالتصاور وشكل وحدة فوق وحدة والكعبة بغات غير ربعة دشكال
زينة:ايوا صافي الله يسر لك راه خاصك تبداي الليلة
راضية:هانا كنصلق اللوز وغنفسخو الليلة نحيدو عليا
بقاو كهضرو شحال بزوجهم حادݣات وعشرة لزيرو فالحلوى معلمينها مزيان وحدة فيهم دارتها حرفتها وزينة مرة مرة تتبريكولي نصبات العشى وجلسات حداه فالكوزينة شادة التيليفون كضور فانستا والفايس
داز الوقت تعشاو وجمعو الطبلة تفرجو شوية وكلا تلاح شد بلاصة زينة بعدما طلات على مها وباها فلبيت لي عندو شي دوا عطاتو ليه غطاتهم وخرجات قصدات الصالون فين تتنعس هي وخوتها لي كانو فرشو وكلا تلاح فبلاصة تكات تاهي وجلسو مجمعين على واحد درهم زريعة جابها يوسف معاه فاش كان خارج سكينة كانت تتاكل وتتهضر:قوليلي ازينة معجبك حتى شي واحد تما
زينة كتنقي الزريعة:أنا شفتهم بعدا راه يلاه النهار الأول
يوسف:شفتكم خديتو راحتكم لا كيفاش عجبك شي حد نت؟
سكينة:مالك ختي فنة طيح النص فالشركة تما المدير براسو يشوفها يتلف مالها شوف الزين مشاء الله
زينة غا سمعات المدير بلعات ريقها تكات وتغطات بلاما تهضر خلاتهم مشادين:وصراحة ختي بياسة ولكن ماشي ديال داكشي زينة خوك راه رجل ودراري كنعرفو بعضياتنا معندك مديري بتصاحيب القرب يولي من ولا ينعت ويقشر فيك فالشركة الشنعة والشوهة على والو
زينة شافت فيه وهي مطلعة حاجب:شوفليك موسطاج العفن كبر تاهو دابا فنظرك انا معارفاش هادشي
سكينة:كون غا خرا ومهضرش
يوسف:ختي راه قرطاسة كلشي غيحط عليها وأنا منبغيش لي يضحك عليها راك عارفة
زينة بتاسمات شوية من ديما هكا واخا صغير تتحس بيه فيه الرجولة كخاف عليها ويوصيها بلاما يحتاج عارفة حدودها تنهدات ونطقات:اودي أنا غادية ندير علاش نتلا ماشي نقابل الخوا لخاوي
يوسف:عارفك الخوادرية شكتسواي أنا غير داوي كن غير كانو ݣاع الدريات بحالك بالرب
سكينة:أنا حاسة بلي ختي غتكون هادي هي بداية مستقبلها الزوين ان شاءالله وشي زهر مطرطق سيد الرجال مبحالو حد على هادشي لدايرة علينا
زينة ضارت شافت فيها وبتاسمات:أنا هادشي مدايراهش باش يكون عندو مقابل بغيتكم غير تقراو وتضمنو مستقبلكم وتكونو حسن مني
يوسف:ان شالله الباك فالجيب ازين ديالي كوني هانيا
بقاو شحال مجمعين كهضرو كضحكو وشادين التيليفونات
فجيهة أخرى بعيدة على هادشي كامل وطبقة مختلفة لكن فنفس المدينة فواحد من الأحياء الراقية فكازا بالضبط فيلا”الوزاني”كانو مجموعين كتعشاو الطبلة طويلة مشكلة كتعشاو فصمت وحدة من الخدامات سالات فالكوزينة ونظامات ليهم فالطبلة كياكلو مع أهل الدار عاادي وهادشي كبين على الكبرانية والجود لي عايشين فيه وطينة الناس لي مخدمينهم عندهم تسمع الجرس ديال الدار وهنا دغيا وقفات وحدة من الخدامات ومشات تحل فريدة عينيها على لباب:هدا ميكون غير يزيد تعطل ليوم
روعة كتعمر طبسيلها:ايوا الشركة خدات وقتو كامل
فريدة لي كانو عينيها على لباب تتسناه بفارغ الصبر يتحل ويكون ولدها وفعلا بتاسمات ابتسامة عريضة فاش شافتو دخل لقى التحية على لخدامة وتما جاي قاصدها وقفات عنقاتو بحرارة وهي تتعاتبو بعد عليها طبع قبلة على يديها
فريدة يدها على وجهو:تعطلتي احبيبي خلعتيني عليييك
يزيد جر ليها الكرسي تجلس:غير الخدمة الوليدة كدايرة نت
فريدة:الحمدلله جلس جلس تعشى اولدي باين فيك عياان
يزيد:لا لا مفياش جيت غير نشوفكم ونمشي فين هو وليد
وليد لكان نازل:الخاوة ديالي فين غابر علينا
تسالمو بالوجه وجلسو مجموعين كهضرو فريدة:راه مبغاش ينزل معشي مع صحابو غا سمعك وجا كجري
يزيد ضرب لخوه على كتفو:كغادي لاصال فالوقت
وليد:غاديي مزيان نت لغبرتي ولكن بانو ليا الكتاف واقفين تبارك الله
يزيد:واخا الخدمة مكنزكلش ضروري منتحرك فالدار
روعة:يزيد هضر معاه غير نبان قدامو يبغي يدير عليا البوكس ديالو بقاليه غير شوية ويتريني فيااا
وليد:ونت لي فمك سخون نهضر معاك سمعي الهضرة
فريدة:أنا بعدا قهروني كيف المش مع الفأر نقوليه فعايلكم
ضحكو كاملين حيت كلهم كخافو منو ماشي حيت قبيح فيهم وإنما هبة الأخ الأكبر كتكون طاغية عليها الإحترام يزيد تلفت عند ختو وضور يديه عليها:ونت كغادية؟
روعة:الحمدلله اخويا مزيان مبقى والو لامتحانات كنوجد
يزيد قرب بشوية وطبع قبلة على راسها:ان شاءالله كلشي غيكون مزيان تايق فيييك غتفرحينا
روعة:ان شاءالله ياربي خليك ليلي
بقى معاهم شوية كهضرو وكضحكو جو عائلي زوين كجي يشوفهم ديما واخا ستاقر بوحدو ولكن ديما جاي يشوف ميمتو لي مقطر لها من العين بحكم أنه البكر ديالها عندو مكانة خاصة شاف شحال الساعة ووقف خاصو يمشي:الوليدة نخليكم دابا
فريدة تنهدات مكتسخاش بيه ومبغاتوش يخوي الدار من الأول ولكن معندها مدير وقفات وعنقاتو كترضي عليه بعد عليها طبع قبلة راسها ويديها:كول مزيان الله يرضي عليك ولبس مزيان ومتعصبش فالخدمة
يزيد حرك راسو بآه واخا كبير تتوصيه بحال شي وليد قلب الأم بوحدو:كوني هانيا تانت ردي لبال لراسك
روعة:ماما واش يزيد دخل فالثلاثينات ومزال تتقوليلو متعصبش وكول مزياااان هههه
فريدة وهي تتشوف فيه وحطات يديها على خدو وتتشوف فيه وكأنها تتفكر أيام طفولتو ودابا راجل قدامها:واخا تولي عندو تا 50عام غنبقى نوصيه الحبيب ديالي هدااا
يزيد شد يديها وباسها على كفها ورجعات عنقاتو بحالا غادي مهاجر وهو راه ديما جاي يشوفها خخخ وحدة من الخدامات:الكبدة صعيييبة ابنيتي
وليد تنهد:الله يسمح لينا من حق الوالدين
توادع معاهم وخرج ركب فالطوموبيل وزاااد غادي وتفكر عادي بالو مع الخدمة كبلاني شنو غيدير باش يطبق جاي واحد الديفيلي ومبقى والو للدفعة دالعام الجاي تخرج لمتأكد انها غتكتاسح السوق كيف ديما وزيد غيختمو هاد العام لي غيخرج ويشوفو شحال حققات الشركة من أرباح وفلحظة وهو غارق وسط أفكارو دالشركة داز عليه وجها فمخيلتو وهو يتفكرها دغيا عقد حجبانو وكرز على فكو تبدل تقول ماشي هو ليلاه كان ضاحك مع عائلتو خنزر وحقد وهو غادي عافط شاف يديه لي برزو عروقها شوية بلاما يحس كيف كرز على ديريكسون زفر هو براسو مزال لحد الآن ممتيقش أنه شافها بعدما سرطاتها الأرض هاد السنين كاملة دار يدو على دقنو ويدو لاخرة متحكم فديريكسون وكفكر مع شاف السيڤي ديالها وسط عرام عندهم تجربة عليها قالهم يعيطو لها وهو لعطى الأمر باش تدخل بلا اونتخوتياه وصالير زوين من الدقة الأولى باش طمع وتسيني معاهم كونطرا داك الساع معندها فين تهرب حيت عارف لشافتو تقدر تبغي تمشي بحالها ولكن صافي غادي يكون ربطها وعارف شخصيتها كتسكت على كلشي غتشوفو غتخاف وغتلبدها وداكشي لكان واخا وقت طويل داز ولكن غير لمحها فرمشة عين العافية شعلات ولكن بالنسبة ليه حاجة مزيانة ضارت الايام وجابتها ليه يديرها تحت السباط ويوريها داك الوجه لمكانتش تتعرفو ݣاع هادشي خلاه ينطق بصوتو الرجولي وهو وسط أفكارو:جابتك ليا ليام نفدي فيك لي داز ولجاي
تتوعد ليها بشنو جاي غتخلص مزيان والرجل هو الكلمة ومن طبعو هو إلا قال كطبق ومع نطق آخر كلمة زاد فالسرعة كثر مكسيري الطريق خاوية فداك الليل غير صوت الروايض تتحكو مع الارض
الويكاند داز عادي عند زينة فالتسياق وتخمال الدار والحمام وبحكم البرد والشتى مخرجات فين داز عادي وجا نهار دالخدمة لي هو التنين جاية بشوية بعدما حطها الطوبيس وصلات فالوقت نيشان دخلات ولجات عينها فعينو تتبتاسم ليه وتلقي عليه تحية الصباح كبقاو متبعين لها العين لأنها زوينة وزينها كجدب العين وزيد جديدة قبل مدخل لمكتب ديالها لمحات المكتب ديالو بلعات ريقها شوية مزال مجاش خاص مع يدخل تجيب ليه قهوتو دخلات وجلسات تتقاد لمكتب ديالها باش تبدا نهارها سمات الله شعلات لبيسي وبدات
داخلة مخنزرة مطلعة حاجب بالزربة تتمشى وصوت الطالون كاسر الدنيا مكدوي مع حد لي شافها جاية كخوي لها الطريق وقفات على مريم لي غير شافتها وقفات وتبسمات:صباح الخير مادموزيل سامية على سلامتك
سامية مخنزرة نيشان تيرات فيها:فين هي ديك خيتي
مريم بلاما دوي نعتات ليها لبيرو ديال زينة بصبعها قصداتها وهي مخنزرة كي الرعدة وقفات عليها كطلع وتنزل فيها زينة كانت خاشية راسها فلبيسي محساتش بيها سامية بدون مقدمات ولا أدب الكلام لي هو إلقاء التحية فالأول نيشان تيرات فيها تاهي:نت هي la secrétaire الجديدة؟؟
زينة هزات راسها معرفات باش تبلات ولا منين خرجات لها شافت فيها كيف مطلعة حاجب وكطلع وتنزل فيها قربات عندها تتسنى جوابها زينة وقفات وتترمش عويناتها بشوية يلاه غادي تنطق وهو يسبقها مع الوقفة جاوبها بصوتو الرجولي لأنه شاف لبلان:آه هي هادي
سامية فهاد اللحظة ضارت وزينة حتى هي شافت فيه وبلعات ريقها كان واقف ويديه فجيابو مشافش جيهتها ݣاع عينيه على سامية لي دغيا تبدلات وبصوت رقيق وبلطافة خاطباتو بعدما قربات وسلمات عليه بلابيز:يزيد صباح الخير ياك قلت ليك غير غنجي أنا غنتكلف بهاد الموضوع بغيت نختارو شي وحدة لي تستاهل نيت هاد لبوسط وتكون عندها اكسبيغيونص مزيااانة لغتنفع الشركة
كانت كدق عليه بأنها مخاصهاش تدخل بلا مقابلة عمل وزيد خاص تكون ديجا عندها تجربة لكن مبغاتش تبين ليه بلي راه عارفة هادي غير جاو وقبلوها ووصلوها لها غيعرف عندها لبرݣاݣة ديالها حيت كانت مسافرة زينة لي غير تتشوف فيهم وتتسمع على وذنيها تحشات لها الهضرة عين بين بقات غير مراقبة البلان وعينيها عليه تتشوفو باش غادي يجاوبها يزيد لي كان كسمع لسامية وتعابير وجهو عادية عكس كيف ككون مخنزر مع كملات كلامها شد ليها فيديها وجرها:اجي معايا لبيرو ونهضرو فهادشي
زينة دغيا نزلات عينيها ليديهم لي مشابكين قبل ميزيدو تلفتات عندها سامية ونطقات بنبرة أمر:كابوتشينو وكحلة بلا سكر لحقيهم علينا لبيرو دابا
وزادو وهي تتشوف فيهم مشادين مع غبرو من قدامها جلسات بالجهد معصبة وفنفس الوقت نفسها مكسرة قدامها تتقول ماشي أي واحد يجي لهاد البوسط وخاص تكون عندو تجربة مين هما هكا حتى يتافقو عاد يقبلوها ماشي شي كشرق وشي كغرب وحتى تسيني ويدخلو فالصح عاد تبدا تسمع الهضرة خاص واحد لي يقرر زفراات وهي تتمسح على وجها حسات بلغصة فحلقها ومبغاش تبرر لراسها علاش طلعات النفس مخاصش تبقى أي حاجة تأثر عليها هادو هما الشركات وسوق الشغل غادي تسمع الهضرة مزيان فبدايتك ولكن هي من طبعها حساسة بزاف معندها مدير من غير أنها تنهدات وطلبات ربي يكمل ما بقى على خير وناضت تجيب ليهم شنو طلبو
فجيهة أخرى غاديين ومشادين وسط الشركة سامية لي غادية مبسمة بغرور وعاجبها الحال وكلشي كشوف فيهم من ديما كقولو يمكن مول الشي وبنت عمو بيناتهم شي حاجة لأنهم ديما بزوج جامعاهم الخدمة والدم ودابا يقدرو نيت يتأكدو وهما كشوفو فيهم ليد فليد وهادشي لي عاجب سامية بزاااف وباغاه يكووون
مع دخلو وسدو لباب طلق منها وببرود بلاما يدوي مشى وقف قدام الزاج يديه فجيابو وكأنها مجاتش معاه ومكايناش شي لخلا سامية تعض على شفايفها وتكرز على يديها هاهو رجع لبرود ديالو ثاني كخليها تا ثيق راسها وكرجع اللور ثاني طلعات النفس وهدنات راسها تقدمات عندو بشوية حتى وقفات وراه حطات يديها على كتفو ونطقات:يزيد كنا دوينا فهاد الموضوع وتافقنا من مور ماتمشي هند بغينا شي وحدة لي تكون بحالها وكثر منها la secrétaire ديال مول الشي بوسط حساس وماشي أي وحدة تستاهلو كنت بغيت ندير اونكييط معمق باش نختارو المناسبة لشركتنا حيت حنا ماشي أي وحدين فالسوق وزيد هادي راه خدمتي أنا
يزيد كشوف من الزاج ومخليها تتهضر حتى سالات على خاطرها وضار عندها ونفس البرود نطق بيه:هانت بفمك قلتيها الكاتبة ديال مول الشي يعني ديالي أنا ختاريتها أنا حيت غتخدمني أنا فالشركة ديالي لي تاحد مغيعرف مصلحتها بحالي
سامية لعافية شعلات فيها ممسروطاش لها أنها داخلة بلا والو وزيد خدمتها هادي مديرة الموارد البشرية محملاتش تدار شي حاجة فغيابها وزيد بوسط لي قريب منو هو فنفس الوقت مباغياش تبين له أنهم موصلين لها لخبار مفصلة على شنو وقع:وشفتي السيڤي ديالها ديجا كانت فشي شركة أخرى وعندها شي ايكسبيغيونص راه خفت من شي غلط فهمني ايزيد
يزيد ضار ومشى لبيرو ديالو جلس وخلاها وراه شعل لبيسي ونطق بلاما يشوفيها:غير رتاحي لوقعات شي حاجة أنا لي غنتحمل مسؤوليتها حيت أنا لي قبلتها ودابا نقدرو نهضرو فداكشي لي مشيتي على قبلو ومكلفك بيه؟؟
شاف فيها من مور ما كمل كلامو زعما سالات لهضرة دوي فداكشي لي مكلفة بيه سرطات ديك القمعة وحركات راسها بآه جلسات وهي ممسروطاش ليها لأنه عطاها علاش تتقلب معندها فين تزيد لأنه هو مول الشي وهو لكتحكم واخا بيناتهم لقرابة الشركة ديالو تاهي غا خدامة بحال ݣاع الناس تما كانت ناوية تجيب وحدة فداك لبوسط مواعداها تخدمها باش تبقى تلقط لها الأخبار عليه وتكون هي وذنيها وعينيها فالشركة ولكن مصدقاتش لها هاد المرة فجيهة أخرى كانت زينة لي يلاه وصلات لbuvette ديال الشركة بعدما سولات عليه ونعتوه عليها شدات نوبتها تاهي حتى وصلات كانت امرأة كبيرة هي لكتاخد الطلبيات وزوج بنات كقادوهم بابتسامة زوينة خاطبات السيدة:سلام عفاك واحد نواغ بلا سكر وكابوتشينو
المراة بقات تتشوف فيها وتاهي بادلاتها الابتسامة ضارت عند لبنات عطاتهم الطلب ورجعات شافت فزينة لي وقفات فالجنب تتسنى مخلية لمجال لشي حد جا بغا يكوموندي تلفتات عند المرأة فاش سمعاتها مخاطباها:ماشي نت لي يلاه جيتي جديدة ياك لكاتبة؟
زينة بابتسامة صغيرة:ااه اخالتي دخلت لبارح
المراة:هادي القهوة ديال سي يزيد واقلة
زينة حركات راسها بآه هنا المرا ضارت عند لبنات لي شادين العصارة:نوار بلا سكر راه ديال سي يزيد
لي غتقادها حركات راسها بآه لكوموند ديال مول الشي إذن خاصها تكون دايزها الكلام ومعصرة ومنغمة مزياان ورجعات شافت فزينة:كجاك ولفتي شوية
زينة حركات راسها بآه والابتسامة مفارقاتش وجها:شوية ضروري بزز منا نولفو هههه
المرا بٱبتسامة:ايوا مرحبا بيك معانا ان شاءالله يعجبك لحال سي يزيد الله يعمرها دار ݣعما تلقاي معاه المشكل
زينة جمعات شوية الضحكة ونطقات:لهلا يحشمنا اخالتي
نطقات فخاطرها لهلا يوريك غالشوفة لدار فيها على البدية واخا هاد الصباح مشافش جيهتها ݣاع ولكن تتفكر أول نهار لها عينيه كن كانو قرطاس كن قرطسها دغيا نفضات داكشي من راسها وتقدمات فاش وجدات لكوموند ديالها مدات ليها السيدة لبلاطو:هاكي ابنتي بشوية عليك
زينة خداتو من عندها:شكرا بزاااااف
زادت قاصداهم تتبسم لأي واحد دازت من حداه ولي شافها كدير لها الطريق دوز هي الأولى وكبقاو متبعين لها لعين أكثرية الرجال بدات تتقرب لمكتب قلبها ثاني ناض عليها واخا غير غدخل تحط داكشي وتخرج ولكن غير ديك الثواني لي غتكون قريبة ليه ميمكنش باش غتحس وهادي غير لبداية ويلاه النهار الثاني وقفات قدام الباب طلعات النفس غا دخل وتخرج دغيا دقات بشوية حتى سمعات الإذن بالدخول دخلات حانية راسها البلاطو فيديها كرجف بلعات ريقها وتملكات نفسها تقدمات عندهم وحطات لهم داكشي من بعد شافت فيه ونطقات:موسيو مزال خاصة شي حاجة؟
يزيد لي كرشف من قهوتو وكهضر مع سامية دار لها حركة بيديه زعما صافي سيري بلاما يشوفيها داكشي لي دارت نساحبات بهدوء وخرجات مشات لمكتب ديالها وهي تتنفس بالجهد تقول كانت قدام المخزن كلها تتغزل تنهدات وكملات الخدمة داز وقت طويل حتى وصل لبوز ديال لغدا هزات واحد الصاك صغيور فيه غداها وزادت كانو ݣاع الموظفين خارجين نزلات راسها وتمات غادية تتحس بالأنظار عليها بحكم أنها جديدة ونفس الوقت زوووينة نازلة فالدروج حتى سمعات شي حد عيط لها تلفتات مزال متتعرف حد شكون غير قربات عندها بتاسمات لها:سلام لبااااس
زينة بابتسامة:حمدالله ونت لبنى ياك
لبنى:أياه شفتك من لهيه نازلة بوحدك قلت نعيط لك
بقاو نازلين بزوج عقلات عليها كانت وحدة من الناس لي جاو سلمو ورحبو بيها:انا كنجلس غير بوحدي واش تبغي نتغداو اونصوومبل
زينة:اهbien-sûr انا صراحة كنبغي ناكل ونهضر ههه
جلسو بزوجات فطبلة كان لbuvetteعامر بالموظفين لبنى قبل متجلس:نمشي نجيب موناضة بغيتي شي حاجة
زينة تتحل بزطامها:جيبي لي عفاك عصير دالليمون
لبنى:صافي غير خليييك
مخلاتش لها فين تهضر طارت داز شوية الوقت ورجعات بالطلب ديالهم بزوجات بغات تعطيها زينة لفلوس وبززات عليها لكن رفضات شكراتها وبداو كتغدااو وكهضرو:شحال ونت خداامة هنا؟
لبنى:فشهر 7 غنكمل 5سنين ان شاءالله
زينة:تبارك الله وزعما الناس هنا مزيانين
لبنى:شوفي كل بلاصة فيها الخايب والزوين هنا عندنا واحد الجو عائلي لطاح شي حد كلشي كعاون هادشي زرعو فينا موسيو يزيد خدامين بروح الفريق وأننا عائلة قبل منكونو موظفيين ممخلينش لنا الفرصة فين ينوض الصداع والمشاكيل كل واحد محسسو بلي عندو دور وخاصو يعطي ما فجهدو باش الشركة تزيد لقدام حنا كلنا بحال بحال واخا لي بوسط مختالفين صراحة لحد الآن عمرني شفت شي فلاش
زينة بقات تتسمع سياسة زوينة داير لهم واخا مزال مشافت والو هنا ولكن غير داك لجيست لدارو معاها راه باين كلشي لبنى كملات كلامها:غير هو واحد الزوجات قدما لقيتي بقاي بعيدة عليهم الأولى ديك مريم البرݣاݣة والثانية سامية بنت عم موسيو يزيد لي كحساب ليها راسها هي مولات الشي
زينة حسات بلي واقلة عرفاتها:واش ماشي لكانت لابسة لباج الصباح طويلة وشعرها كحل؟؟؟
لبنى:هي هادييك وديك مريم هي عينيها ووذنيها هنايا لي سمعاتو تتمشي تحطو لها سخووووون
زينة عاودات ليها الموقف بلي وقفات عليها كي الرعدة حتى جا يزيد وفكها منها:معرفت اختي باش تبلييت
لبنى:آه راه عند راسها هي الكل فلكل هنا حيت من عائلة مالين الشي قدامو هو راه مكتفنفنش قاطعها فيها ولكن مين مككونش مكتبقاش هازاها الأرض
زينة:تكون كيفما بغات تكون غا تبعد مني
لبنى:دابا غتبغي تحط عليك حيت شافتك جديدة ولكاتبة ديالو لقالت لك شي حاجة قولها مخداماش عندك نت
زينة:حجارها يشدوووها اختي شبغيتها
لبنى:لمدلولة تعطي غا قيمة لراسها كظل لاصقة فالسيد
زينة فهاد اللحظة تقرصات سرطات داكشي لكان فمها فاش تفكرات لقطة الصباح تشادو وزادو نزلات راسها بلا حتى كلمة وكملو ماكلتهم وبقاو جالسين شوية علاما يجي الوقت وهما كهضرو بزوجات حتى وقف عليهم:التيتيزات دالشركة كدايرييين بيخير؟
لبنى شافت فيه وبتاسمات:افييييين صافااا
سلم عليها وضار عند زينة لي بدورها سلمات عليه وابتسامتها عريضة على وجها نظم ليهم وجلسو مجموعين كان عادل لgraphique designer:شكتعاودو بخير
لبنى:الحمدلله ونت فين غابر مشفتكش هاد الصباح
عادل:مكونسونطري مع الإشهار الجديد وقتي كامل خداه
لبنى:هي شي حاجة واااو كيف ديما
عادل:راك عارفة دابا تشوفي
زينة لي كانت تتسمع كلامهم ومبتاسمة شافيها عادل ونطق:لبوݣوصة صاڤا ولفتي شوية
زينة ضحكات بخجل ونطقات بصوتها الانثوي:شوية هانا غادية
عادل شاف فلبنى:ولا عندنا الزين فالشركة
ضحكو كاملين وزينة تزنݣات لبنى ضرباتو على كتفو:يا خويا مكتعياش لعام لي جا يلقاك زدتي فلادوز ديال تزهوانيت
عادل:واختي الرجال عيبنا واحد ودابا هادي متخليكش تشوف فيها بزز منك جابوها لنا بغاونا نبقاو بلا خدمة حاضينها
زينة تزنݣاااات ومعرفات متقول من غير نزلات عينيها وكضحك بشوية نقزات لبنى:وصراحة غزالة مشاءالله
زينة بخجل:ربي خليك احبيبة عويناتك
بقاو جالسين مجموعين كضحكو عادل الكوميديا عشرة لزيرو زينة عجبها الحال معاهم على الأقل حسات بلي دارت معارف وماشي بوحدها داز الوقت سالا البوز دالغدا وكلا واحد ناض لخدمتو
جلسات وشعلات لبيسي بقات خدامة حتى صونا التيليفون دلبيرو بلعات ريقها يقدر يكون هو مدات يديها بشوية هزات السماعة دارتها فودنيها ونطقات بصوت الرقيق:آلو
يزيد:من هنا نص ساعة غيكون اجتماع علمي الكونطابل لgraphique designer وchef d’équipe و directrice marketing
زينة حركات راسها بآه بحالا راه قدامو:واخا اموسيو
قبل متكمل كلامها قطع عليها حطات السماعة وزفرات قلبها كان كضرب تقول كانت كدوي مع البوليس رجعات شافت فلبيسي سيفطات ديزيمايل لمطلوبين فالإجتماع عادل والمحاسب والرئيس ديال فرقة التصميم ومديرة التسويق تأكدات أنها سيفطات لكلشي وكملات خدمتها هزات الطيلي سولات فواليديها وخوتها حتى جا وقت الإجتماع تاهي خاص تكون حاضرة خرجات من المكتب ديالها طلاقات بعادل وزادو بزوج بيهم لقاعة الإجتماعات دخلو وكان فنفس الوقت الموظفين لوخرين المطلوبين وصلو شدو بلايصهم هي كانت حدا الباب مع دخل وجا يسدو شاف فيها وطلاقاو عينيهم بنظرتو المألوفة حجبانو المعقودين وفكو المشدود رمقها وضار وهي نيشان نزلات عينيها بلا حتى حركة بقات بلاصتها لقى السلام وصافح كل واحد فيهم ومشى لكرسي ديالو لي مترأس الطبلة شافيهم كاملين جالسين كتسناو تعليماتو قبل ما يبدا شاف فزينة لي واقفة تتشوف فيهم ونطق بنبرة باردة وفنفس الوقت ممزوجة بالعتاب:فين هي سامية تاهي خاص تحضر
زينة بصوتها الرقيق وعلى نيتها:مقلتيش ليا اموسيو نعلمها حتى هي
شي كان كشوف فيها وشي فيزيد وكاين لمتسوقش بالنسبة لهم موقف عادي دابا غيعيطو لها وغيبداو عكسو هو لي فهاد اللحظة بقى كشوف فيها وحتى هي لكن من تقاسيم وجهو معرفاتش ردة فعل معرفات مدير شككها فراسها متأكدة مقالش لها سامية نزلات عينيها وهي تتبلع ريقها حتى سمعات صوتو المتحجر لي ممزوج بنبرة حادة تيرا فيها قدام الناس:دابا نت جيتي غير لبارح اتوريني خدمتي؟
كلامو كان صفعة قوية بالنسبة لها الغصة وقفات فحلقها تشوكات ومعرفات باش تجاوب عينيه مفيكسين عليها كن كانو قرطاس كن تيراو فيها قلبها بدا كضرب بالجهد هزات فيه عويناتها لي حسات بيهم غيغرغرو دغيا من طبعها هكا حساسة بزاف وزيد قدام الناس وهي يلاه بادية عينيها دغيا حمارو وكلشي لاحظها شي لخلاهم يتدخلو وأولهم عادل:ماشي مشكل اسي يزيد موقع والو مزال عندنا الوقت
مديرة قسم الإشهار لكانت معاهم تاهي تدخلات:الغلط كوقع عادي
يزيد مداهاش فيهم وكأنهم مكاينينش شاف فالساعة ورجع شافيها:معطلين بخمسة الدقائق
زينة لبقات على نفس حالها حركات راسها بآه وعينيها فالأرض فهمات أنه خاص تمشي تكلمها نطقات بصوت خافت حاولات تمتلك نفسها ومتبينش أن فيه غصة خاصها غير طرطق وتسيل دموعها:سمحلي اموسيو مغاديش تعاود
يلاه غضور تمشي وهو يوقفها ثاني بصوتو رجعات شافت فيه عويناتها حمر:شوفيهم شنو غيشربو
مع كمل كلامو ناض عطاهم بالضهر كخدم الططاشو وهي قربات عندهم ووجها حمر ولات كيف مطيشة دغيا بانت فيها شافت فالسيدة لي جالسة:عفاك واحد كابوتشينو(بهمس)موقع والو احبيبة صافي هادشي عادي
زينة بتاسمات بالسيف عليها زعما مكاين والو خدات الطلب ديالهم كامل وضارت عند آخر واحد لكان هو عادل لي قبل مينطق شد فيها:موقع والو متقلقيش عفاك هادشي عادي فالبدية
زينة حركات راسها وهي مبتاسمة وفنفس الوقت بالها مع لاخر ليضور ويزيد يكمل عليها خدات الطلب ديالهم وخرجات سدات لباب وراها وزادت عينيها فالأرض مبغات حد يشوف حال وجها واقفة لها فالحلق غطرطق وقفات قدام لبيرو دسامية دقات بشوية حتى سمعات الإذن فتحات لباب بشوية ودخلات كانت تتشوف فلبيسي هزات راسها غشافتها طلعات حاجب ونطقات بتعجرف:شنو؟
زينة بصوت خافت:موسيو يزيد بغاك فالإجتماع دابا
سامية خرجات عينيها:كاين اجتماع معلمنييش
دغيا ناضت طايرة قبل متخرج وقفاتها زينة:شنو تشربي امادموزيل؟؟
سامية عقلها معاه وعلاش معلمهاش وكيفاش وشنو وقع زادت مخلياها وراها وتتهضر:مبغيت والو غا خرجييي
زينة والحزن كاسي وجها ضارت لbuvette غادية وعينيها فالأرض مباغية وجها يطلاقا بحد وصلات وحطات الكوموند مشات جلسات تتسنى تتشوف فظفارها وبزز حابسة الدموع متأكدة مليون بالمية أنه مقالهاش ليها عاقلة مزيان مرضاتش قدام الناس وكلشي كشوف فيها وكن غير كانت غالطة تقول نستاهل وعاد زيد مراعاش أنها جديدة عضات على شفايفها وحسات بالخنقة فحلقها بغات تبكي ومقدراتش قدام الناس بزز تتحبس فيها وهي تتحس دموعها سخان فطرف عينيها
هزات راسها بشوية فاش حسات بلي شي حد واقف عليها غير شافتها دغيا وقفات كانت لبنت لي فلكافيتيريا جايبة لها الكوموند ديالها:ناري يختي شحال عيطت لك ههههه
زينة بابتسامة كاسيها بزاف دالحزن:سمحيلي سهيييت
لبنت مدات لها البلاطو:ماشي مشكل الله يحسن العون بالصحة
خداتو من عندها وزادت منزلة راسها حتى وصلات قلبها رجع تقبض عليها دقات بشوية ودخلات حانية راسها سدات لباب برجليها وتقدمات عندهم لحطات ليه الكوموند ديالو كشكرها بإمتنان كحاولو يخففو عليها حتى وصلات لجيهتو مكانش فديك اللحظة حطات ليه قهوتو وجات ضور تمشي بحالها وهي تنقز سامية:مادموزيل الإجتماع كنعلمو الواحد على الأقل بنص ساعة قبل ماشي تالدقيقة 90 شهاد العبث
زينة الريق واقف فحلقها حركات راسها بآه ونطقات:مغاديش تعاود سمحولي
قلبات عينيها وضورات وجها دليل على تعجرفها وغرورها عادل فهاد اللحظة والكونطابل وݣاع الموظفين لوخرين تدخلو:صافي موقع والو هاحنا مزال مبدينا وزيد غير بيناتنا
عادل:مزيان يوقع هادشي بيناتنا باش مع البراني ميوقعش وزيد عادي سبحان لي ما يسهى ولا ينام
مديرة التسويق:آه ماشي مشكيل الله يحسن لعوان
كلشي ضار لسامية كمعنيو لها بلي غا سكتي راه تانت غاخدامة شي لخلاها تسكت وتبدا تنفخ لأن هادشي مكوقعش بزاف لا غلط شي حد كهضرو معاه ولكن مكحكروش عليه زينة وعينيها فالأرض حيدات من حداهم غادية جيهة لباب لي فديك اللحظة تفتح كان هو رمقها بنظرة باردة وهي بهمس وصوتها الرقيق وشبه باكي نطقات:موسيو مزال خاصكم شي حاجة
مع كملات كلامها دار ليها بيديه زعما صافي بلا تا كلمة تخطاها وزاد بداو الإجتماع وهي خرجات بحالها وسدات وراها عادل بقى متبعها وتنهد بداو الإجتماع جاتو غريبة عمر يزيد مدار هكا مع شي موظف عندو مموالفاش ليه هادشي لكان كقول فبالو سدات لباب وضورات الساروت مشات جلسات وتكات على يديها فوق البيرو وبدات تتبكي وتتشهق مرضاتش وبقى فيها الحال متأكدة مليون فالمية أنه مذكرش لها سميتها معرفاتو واش هو براسو نسى ولا غير خلق ليها هاد المشكل وقدام الناس لي حسو بيها ودافعو عليها ولكن صعيبة ينهصرك شي حد ونت مدايرة حتى غلط تݣعدات وهي تتبكي وتنخصص دموعها كطيحو سخان يديها على فمها تتبكي فصمت باش ميسمعها حد تقطع فالقلب عاد بدات تتحس بلي كان كعني كلامو لبارح أنه جات تخلص لي عليها كانت تتقول دير خدمتها على أكمل وجه ومعندو مين يشدها ولكن بانليها هو لي غيخلق لها المشاكيل باش يدير فيها شرع يديه وبانليهااا غيحرت عليها نيت ومايخلييش من جهدو
داز الوقت فبلاصة اخرى بالضبط ڤيلا الوزاني كانت جالسة فالصالون لي يجري فيه الخيل بكل تاويل وأناقة لابسة قفطان من داكشي وجالسة وسط صالونها التقليدي دايرة التيليفون فوذنيها وابتسامة عريضة على وجها:الله يجيبك على خير ياربي ومتسالني غير صدقة دايزها الكلام والله يتبث الأجر اسيد الحاج ترجع ليا بخير وعلى خير ياربي
كانت تتهضر مع راجلها مولا دارها الحاج الوزاني لي كان فالعمرة على الأقل كمشي كل عام قطعات معاه وهي تتودعو وكدعي معاه يرجع ليها سالم حطات التيليفون وضارت تتشوف من باب الصالة كتسنى لي تتعيط لها تبان:مليييكة واااا مليييكة زهرااا واا زهرااا
مليكة جاية من الكوزينة:نعام اللالة
فريدة:اجي عندي نت وزهرة
جاو عندها الخدامات بزوجات دخلو لصالة:نعام اللالة
فريدة:سيد الحاج غيرجع نهار الجمعة السبت ان شالله غنديرو صداقة هنا باش ربي يتبث الأجر والله يغفرلينا جميع
مليكة:على سلامتو اللالة الله يطول لينا فعمرو وخلي لكم صحيحتكم ياربي
زهرة هزات يديها كتدعي:الله يخلي لكم وليداتكم ويعطيكم كثر ما عندكم ولعام لجا يلقاكم لفوق الفوق ياربي
فريدة مبتاسمة:آمين ياربي آمين ولجميع المسلمين ياربي مهم الله يرضي عليكم من غدا نبداو جبدو ليا الصالات فين غيجلسو الناس ضورو ليا بالدار راكم عارفين شغالكم
مليكة:غدا على النبوري غيخرج سيدي وليد ولالة روعة لقراية نبداو ان شاءالله
فريدة:ان شاءالله لبقى العمر غنجيب لي يعاونكم نت ازهرة غتعطيني نمرة السيدة لي تتعرف تكلف ليا بالطياب
زهور:واخا اللالة مغديريش الطريطور
فريدة:لا غيتكلف لي بالحلوى واللحم سير جيب لي النمرة دالسيدة نعلمها دابا
زهور مشات طايرة:واخا هي الأولى اللالة
تفرتكو الخدامات وفريدة وبدات تدير الإتصالات تعيط توصي هدا وتكوموندي على هادي بغات توقف على هاد المناسبة الدينية بيديها كيف ديما موالفين بالصدقات يجمعو المعارف ويخرجو للناس المحتاجة باش ربي يسر ليهم وفعلا عايشين فالخير تبارك الله لي غادي وكتزاد عليهم
داز الوقت فبلاصة أخرى بعيدة على هاد الطبقة فدار زينة بالظبط كانت جالسة تتنقي الربيع يديها فالبانيو ولكن عقلها شارد من وجها تعرفها مراشقاش ليها ݣاع وفعلا داكشي لوقع قبيلة أثر عليها غير وصل وقت الخروج حدرات راسها وزادت مكانت باغية يشوفها حد خسر ليها نهارها ونكدها عليها داكشي لوقع وهي غارقة وسط أفكارها سمعات شي حد كعيط لها من السرجم
تيباري التسبيح فيدو:شي حد كعيط لك
زينة ضارت دفعات السرجم وطلات كانت مها هي وواحد جارتهم وسط الحومة لغطرطق تبسمات لهم:هنية كدايرة
هنية:الحمدلله ونت نزلي نزلي دغيا
مسعودة:نزلي ابنتي هنية بغاتك فشي حاجة
حركات راسها بآه ورجعات سدات السرجم ومشات خرجات لبسات فرجليها ونزلات عندهم سلمات عليهم حيت مها يلاه جات ملقاتهاش فاش رجعات من الخدمة سولو فبعضهم على الحال والأحوال زينة:طلعي
هنية:لا غنمشي جيت دغيا نهضر معاك خاص نمشي نجيب ولادي من السوايع شوفي جاتني واحد الخدمة غنطيب وضروري خاص لي يمشي معايا يعاوني وملقيتش من غيرك شغلك زوييين وثقة
زينة بٱهتمام:اياه مرحبا وفين وبعدا إينا نهار حيت راني خدامة
هنية:نهار السبت ناري غير شوفي كيف ديري باغاك معايا والله
زينة:صافي ماشي مشكل مكنخدمش لويكاند
مسعودة:ايوا صافي الحمدلله
هنية براحة:صافي والله مع قطعت مع السيدة نت أول وحدة طحتي فبالي تبارك الله حادكة وشغلك علام زيناتو ولي قسم الله نتقاسموه وزيد هادو عائله الخير والجود
زينة:مكاين حتى مشكل مرحبا تانت الله يعمرها دار
مسعودة:والله يلاقينا مع ما حسن منا
بقاو مجموعين حدا لباب حتى تفرتكو زينة ومسعودة طالعين وكهضرو دخلو لصالون وجلسو وموضوعهم على هنية وهاد الخدمة لي جابت شافت فمها:لي عطاتني راه زايد فيا
مسعودة تنهدات:والله يسهل عليك ابنيتي راه ربي كشوف طريق الحلال هي هادي
تيباري لكان تتفرج فتلفازة:مالكم شكون كان كعيط لك؟؟
مسعودة عاودات ليه البلان ومافيه وزينة حداهم تتنقي الربيع وساكتة مع كملات مسعودة كلامها ضار تيباري عند بنتو:غادي تمشي معاها؟
زينة شافت فيه:وشغندير ابا غنمشي رزيق جابو الله
تيباري:زوج خدمات بزاااف عليك
زينة حطات داكشي لي فيديها:ومن بعد ابا اشنو فيها بلاما تهز الهم راك عارفني كيف دايرة وزيد منجريش على رزقي نخدم السبت مع السيدة ونرتاح الأحد ان شاءالله
تيباري تنهد:والله يسهل عليك نت تعرفي
هزات داكشي بعدما كملات وزادت الكوزينة بقى متبعها والتسبيح كرز على يديه وهو كتنهد وكشوف فيها نفسو تتقتلو كل نهار بتأنيب الضمير وهادشي لمخلي حالتو الصحية كتزيد تدهور نهار على نهار هو سبابها فهاد التمارة لكضرب وكترس على الناس ومزال صغيرة تمارة متبغيها لحد ولكن كشوف راسو هو سبابها كن الطمع معماش عينيه كان غيكون عندها مستقبل زوين وعايشة فالخير الحرقة شاعلة فيه واحد الإحساس خايب نفسو تتعاتبو ولي كزيد عليه هو أنها هادشي كامل على قبلو دايراه بعدما خرج لها على مستقبلها نعم البنت البارة لواليديها من هي صغيرة واخا كان قبيح فيهم بزاف ولكن عمرها حقدات عليه تمتم فنفسو بحرقة وترجي:الله يسمح لي ياربي
داز الوقت كانت متكية وحداها ختها معنقاها ناعسين بزوج فالأرض سكينة شافت فيها:مالك اختي معاجبانيش ليوم
زينة سبابها داكشي وقع فالشركة بنهار تنهدات:والو احبيبة غير لعيا مزال مولفتش راك عارفة
سكينة:الله يسهل عليك ياربييي حقا جبت 16.5فالصيونص
زينة شافت فيوسف:ونت؟؟
يوسف عينيه فالتيلفون:بحالها
زينة تبسمات:هكاك الله يرضي عليكم نبغيكم ديما هكا عقبال الوطني ان شاءالله
بقاو هكاك مجمعين خوتها بزوج وهي تتفكر وتخمم وساكتة بالها مع لجاي متنكرش بدا كدخلها الخوف محتاجة ديك لخدمة على ود باها وتحدر الراس معندهاش مشكل ولكن إلا كانت غادي تظلم فراه متقدرش تستحمل ربي فوق من كلشي
نهار جدييد فلڤيلا دالوزاني لي كانت كلها مقلوبة بالتحضيرات للصدقة على ود رجوع الحاج الوزاني من الديار المقدسة
روعة:مغاديش ديري الطريطور ديالنا؟
فريدة:فالدجاج لا غنجيب السيدة لي غطيبو غيتكلف لي غا بدواز آتاي والشوا والديسير
روعة:السيدة غادي تجي طيب هنا؟؟
فريدة:آه نشمو ريحة طيابنا التقليدي يسخن لنا الدار طيابها من داكشي وغتجيب لبنت لتعاونها تاهي بحالها يلاه قطعت معاها دابا نيت
روعة:ايوا مزيان الله يسر توحشت بابا بزاف
فبلاصة أخرى بالضبط فالشركة كان بوز دالغدا سدات لبيسي ديالها وناضت تخرج تغدا تشهات غالرايب وشافت واحد المحلبة قريبة من الشركة وزيد لبنى مجاتش معاودش شافتها من نهار تغداو بزوج مع خرجات من المكتب ديالها تصادفات معاه جاو عينيها فعينيه مطولش فيها الشوفة قلب عينيه وداز من حداها بحالا مكايناش نزلات راسها وزادت كان قدامها تتحاول متزربش باش متقادش معاه فالطريق متوترة تخلطات مع الموظفين وهنا بعدات عليه بانليها خرج حتى هو بقات غادية حتى خرجات طلعات النفس كان الجو زوين البرد و الشميسة خشات يديها فالمونطو وقربات بشوية غتقطع الشانطي وقفات علاما يشعل الضو وهنا فلحظة سهاات محساتش براسها تا عقلها شرد ثواني قليلة مفيقها من سهوتها غير صوت الكلاكصون بالجهد تلفتات قافزة تتبان لها طوموبيل مكسييييريية قاصداها الصدمة شلاتها وهي تتشوفها تتقرب متحركاتش محساتش براسها حتى شهقاات فاش حسات براسها تجراات بالجهد ودخلات فداك لي جرها كلشي كتفرج والطوموبيل وقفات طل مولاها ونطق:واشوفي فجنابك البشاار تعرفو تجيبو علينا غالسبة وتلصقو لنا المونتيفات
زينة غير تتشوف مدهوشة الخلعة تتشللها هداك لي جرها طلق منها وقصدو وهو مخنزر:وشوف راسك نت ابناادم لي مورك فشارع عامر بالنااااس
ومع كمل كلااامو شنق عليه من السرجم دالطوموبيل جرو ونطق:نزل نهضرو راجل لراجل نزل
زينة مزال فبلاصتها الصدمة والخلعة كفشلوها ديما قلبها كضرب بالجهد وصفاارت الناس دغيا تجوقو لأن هداك لي جرها شنق على مول الطوموبيل كانو حتى شي موظفين خارجين يتغداو تاهما تدخلو مول الطوموبيل:راهي لي كانت خارجة على الطروطوار
لاخر مزال شانق عليه:هدا راه شارع عمومي كاينين الشركات كاينين مدارس نت لجاي عاافط فايت 100وزايدها بالتخزاز
الناس كلشي بدا صافي موقع والو صافي زينة فهاد اللحظة حسات على راسها ݣاع الناس تدخلو إلا هي الصداع نايض على ودها تقدمات بشوية وشدات فالسيد لي نقذها:صافي اخاي عفاك موقع والو
ضار شافيها هضرات بواحد الصوت كولو أنوثة وممزوج بنبرة خوف وزيد تترمش عويناتها الكبار الخضرين لمايلين للرمادي عاد لاحظ أنها غزالة وبزاف فالأول تدخل لأنو بانت ليه بنت فخطر وصافي وزيد جاها من اللور فنفس الوقت حتى داك مول الطوموبيل كشوف فيها مين نزل وقرب عندها بانليه الزين نطق بصوت مخالف للنبرة لدوا بيها معاها فالأول:مالك اختي اشعندك مشفتيش راسك كنت خارجة على الطروطوار وبزااف
زينة شافت فيه:سمحلي اخاي والله راني غير سهيت سمحلي صافي اخاي موقع والو عفاك
كانت تتشوف فكل واحد وتتهضر معاه بوحدو وساهيين فيها لي عتقها شانق على لاخر وعينيه عليها نسى راسو خخخ كلشي فهاد اللحظة بدا صافي موقع والو والجوقة عادل لي كان يلاه جاي حط السكوتر وجا تدخل وسط الجماعة واخا معارف اشكاين وكهضر:صافي صافي الله ينعل الشيطان
غير شاف زينة وهداك لعتقها وهو يزيد يتمخشش وشد فيها:زينة شواقع اشكاين منصور مالك الخاوة شكاين
زينة:مكاين والو موقعات حتى حاجة
عادل بدا كفك واخا معارف والو جر منصور لي هو نفسو منقذ زينة دخل بينو وبين مول الطوموبيل: منصور ماشي ديالك اصاحبي زينة سيري حيدي من الزحام اختي صاحبي صافي ركب وسير بحالك
عادل دخل فخمسة الثواني فرتك الجقلة بالخف مول الطوموبيل كطلع وينزل فيها:ردي لبال وسمحيليا اختي
زينة باغية غالسلاك:موقع والو سمحلي تانت
كلا زاد بحالو وتفرتكات الجقلة زينة جرها عادل ورجعو دخلو للشركة وهو كسولها شنو واقع عاودات ليه البلان تنهدات وحطات يديها على جبهتها:محسيتش براسي حتى سهيت مرونة هاد الأيام ودماغي عامر منقولكش
كانت تتهضر وتتعبر بوجها وعويناتها خلاتو غير كشوف فيها زيادة على الزين البرائة وجها بشوش وتبغي غير تبقى تشوفيها وسماهم على وجوههم زينة شافت فيه حسات على راسها بلي قوات الهضرة:سمحلي دويت بزاف
عادل بتاسم:خودي راحتك كدوي مع خوك مهم ردي لبال هاد الشانطي راه خايب بزاف وأي شانطي لواحد يكون على لقرص
زينة حركات راسها بآه فعلا الشانطي مفيه ثقة هي جات حتى ليه وسهات وجلسات تخمم عادل كمل على كلامو:لبارح كنت باغي ندوي معاك ولكن مين سالا الاجتماع ملقيتكش مديريش فبالك سي يزيد درويش غيكون غير كان معصب ساعتو الله ميديرش لك هكاك وهو عارفك يلاه جيتي إلا مكانت طالعة ليه الله يحسن العون
زينة جمعات شوية الضحكة فكرها فلبارح لي مزال تتحاول تناساه نطقات:أنا اصلا نسيت لبارح موقع والو
عادل:وهكاك منبغيكش تقلقي اجي تغديتي؟؟
زينة حركات راسها بلا:لا يلاه كنت غادية نتغدا حتى وقع داكشي
عادل دار لها إشارة بيديه ديال زيدي قدامي:تانا يلاه نمشيو نتغداو عارض عليك ازيين
زينة بخجل:لا لا اويليييي بلاما تكلف راسك
عادل:كيفاش اويلي عارض على ختي مالك بمناسبة الإلتحاق زيديي ولا نعيط لسي يزيد
زينة فهاد اللحظة ضحكات بخجل وحشمات وهو عاد ما زاد حكر عليها شي لخلاها شيرات ليه بصبعها:لكن المرة الجاية على حسابي
عادل:وغير زيديي نشوفو ليوم غدا معرفنا واش نبقاو حيين
زادو بزوج كضحكو مبغاتش ترجعها فوجهو وزيد من طبعها بعيدة على الرجال وكتحشم بزاف لكن عادل قراتو ولواحد تتحس بيه لكان نيتو صافية مين جات كحطها بختي ويهزها بختي واخا وقت قصير بزاف فين عرفاتو ولكن دار ديجيست زوينين وكدخل الخاطر
فبلاصة أخرى فcentre villeحدا الطرام بالضبط كانو جايين على موطور وقفو نزل عبد الكريم مول القهوة وشد فالتيباري بشوية حتى نزل تاهو جلس فواحد من الكراسة لي تما وشاف فعبد الكريم:تاحد من ولادي ولا مراتي ميعرف هادشي
عبد الكريم تنهد:غتقلق عليا بزاااف زينة ابا تيباري وحتى مي مسعودة مغنقدرش نشوف فيهم
تيباري:مشاركتي فحتى حاجة عيب وزيد مغنديرش الحرام
عبد الكريم تنهد معندو ميدير ميقدرش يخسر ليه:وشغادي نقولك ابا التيباري انا 7ان شاء الله غنجي عندك
تيباري حرك راسو بآه:واخا الله يرضي عليك
زاد وخلاه كيفما طلب منو تيباري كشوف فجنابو هاد الشارع هو القلب النابض ديال كازا ديما عااامر مكخواش ختارو باش يطبق داكشي لي فكر فيه بلاما يقول فبالو أنه يقدر يشوفو شي حد كعرفو تنهد معندو ميدير تاهو خاص يعاون فالمصروف
فالشركة زينة كانت فالبيرو ديالها خدامة على شي وراق كتدخلهم فالبيسي غارقة فالخدمة مزيان فجأة هزات الطيلي ديالها سمعاتها مريضة وديجا تبادلو النوامر ضروري تسول فيها دوزات الرقم مدة قصيرة جاوباتها نيشان نطقات:آلو لبنى حبيبة أنا زينة
لبنى بصوت تعبان مريضة:حبيبة كدايرة لباس عليك
زينة:حمدالله كبقيتي شوية سولت عليك سورية هي لقالت لي راك عيانة شوية دابا
لبنى:سول فيك الخير اختي آه غير مشيت لبارح وطحت على طولي منعاودش ليك
زينة:ميكون باس اختي راه هاد البرد غذار الليالي دخلات
مدة قصيرة هضرات معاها وسولات فيها من بعد قطعات وكملات خدمتها ماشي بزاف حتى صونا الطيلي ديال المكتب قلبها تهز طلعات النفس دغيا غيكون غير هو هزات السماعة ودارتها فوذنيها وبصوتها الرقيق نطقات:آلو
يزيد بدون مقدمات:كحلة بلا سكر
وقطع عليها شافت فالسماعة تتأكد لأنه جاب ليها الله ما دوات مع حد بكثرة ما زرب عليها تنهدات وناضت تسخر على قلبها حطات لكوموند ووقفات فالجنب مخلية لبلاصة للناس لغيجيو يكومونديو وهي واقفة جات السيدة لخدامة تما شافت فزينة تبسمات لها:كدايرة لباس
زينة بابتسامة بشوشة:حمدالله اخالتي ونت بيخير
المراة:حمدالله قلتي ليهم شنو بغيتي؟
زينة:اه اخالتي راه قلتها لبنت
بقات واقفة تتسنى حتى شوية تحركات من بلاصتها قاصدة واحد الشخص لمحاتو جالس تما كشرب قهوة طلعات النفس وبخجل تقدمات عندو غير وقفات عليه نطقات بأنوثة وابتسامة خفيفة مزينة وجها الغزال:سلام
الشخص هز راسو غير شافها وقف دغيا كان نفسو لي نقذها الصباح وكان معاها فداك الموقف بتاسم وهو كشوف فيها وكصكاني وجها وكشوف فيها مدواش من غير أنه كتسائل شكون هاد الزين كيفاش عمرو رد ليها البال فالشركة زينة حسات بشوفاتو نزلات راسها بخجل شي لخلاه يحس على راسو:احم سلام كدايرة لباس
زينة رجعات شافت فيه مرة مرة تتنزل عينيها نطقات:الحمدلله ربي خليك احم سمحلي إلا ديرونجيتك بغيت غير نشكرك على داكشي لي وقع قبيلة متاحتش ليا الفرصة حيت كان الزحام وتلفت
كشوف فيها كيف تتهضر وحشمانة لكزيد جمال المرأة هو الخجل وميكونش متصنع مع كملات كلامها تبسم لها:مكاين حتى مشكل مرحبا ردي لبال لراسك ياك بعدا شوية
زينة تبسمات كثر:الحمدلله ربي خليك وسمحليا
فهاد اللحظة عيطات السيدة لزينة تاخد الكوموند رجعات شافت فيه ونطقات دغيا:شكرا مرة اخرى خليك لك الراحة
زادت وخلاتو متبع لها العين وابتسامة صغيرة راسمة وجهو بزاف دالاسئلة فبالو أولهم شكون هي وامتى جات لشركة عمرو شافها قربات عند السيدة لي مدات لها البلاطو وعينيها كانو على منصور نفسو منقذ زينة لي مع خدات البلاطو شكراتها
المرا:هاك ابنتي ورد بالك مزيان وعرف معامن كتعاشر
زينة بقات تتشوف فيها مفهمات والو لكن حركات راسها بآه وشكراتها عتابراتها نصيحة من مرا قد مها داية وجايبة فالزمان زادت نيشان بحالها بلاما تحس بالعينين لي عليها لي دازت من حداه كدير لها الطريق كتشكرو حتى وصلات دقات ودخلات بشوية قليبها ناض كجري بالجهد مباغياش تشوف فيه باش متوترش كثر حطات ليه القهوة ومجات فين تخرج حتى نطق بصوتو الرجولي ونبرتو الجافة متبدلاتش:لكونطابل عطاك واحد الملف الصباح؟
زينة هزات فيه عينيها:اه نجيبو؟
يزيد ضور وجهو بلاما يشوفيها وحرك راسو بآه مجات فين تضور تمشي حتى تحل عليهم لباب بالجهد ودخلات:suprise
روعة ختو لكانت ضاحكة عينيها نيشان مشاو لخوها باش تشوف ردة فعلو دارت ليه مفاجأة وجات عندو للشركة يزيد فهاد اللحظة ناض وجا عندها سلم عليها بلابيز كسول فيها ويديه على شعرها:بيخير كدوزتيي مزيان
روعة:الحمدلله خرجت بكري وقلت نجي بلاما نعلمك ههههه
روعة فهاد اللحظة عينيها مشاو لزينة لي بالصدمة كانت واقفة كارمة فبلاصتها مقداتش تحرك تهرب ولاتخبى طلاقاو عينيهم من بعد مدة طويلة وهنا بلعات ريقها قلبها كضرب بالجهد روعة دغيا جمعات الضحكة تتشوف فيها وتتأكد واش هي ممتيقاش شافت فخوها لقاتو كشوف فيها عادي بحالا مكاين والو تصرفقات والضو شعل معاها نعتات فزينة بصبعها وهي تتشوف فيه وممتيقاش:هادي منين خرجات شنو جابها هنا؟
زينة صفارت ومشى منها اللون قلبها بدا كضرب بالجهد شافت فيزيد باش تشوف ردة فعلو كان عادي غاهما لي شاعلة فيهم لعافية نطق ببرود:خدامة هنا اجي جلسي(شاف فزينة)سيري نت لخدمتك
لاح كلامو على زينة وجر ختو لي مفاهمة والو زينة فهاد اللحظة بلعات ريقها نزلات راسها ونساحبات بهدوء دغيا مع سدات لباب روعة شافت جيهتو ورجعات شافت فخوها:يزيد شنو واقع عقلي غيحبس هادي منين خرجات وكيفاش حتى رجعات وفين غبرات مفهمتش
يزيد مزال على حالو هز كتافو ونطق:مواقع والو خدامة بحالها بحال الناس سكرتيرة ديالي
روعة عاد مكزيد عقلها يحبس:واش عادي هادشي زعما مكاين والو حيت أنا عارفة ونت عارف
يزيد ضور عينيه للبيسي:غاخوي راسك مكاين والو
روعة عينيها عليه تتحاول تقرا شنو كاين وتفهم:متأكد؟
يزيد ناض وجا جلس مقابل معاها شد فيديها ونطق:خلينا من هادشي غير التخربيق قوليلي نت كدوزتي
روعة مزال باغية تعرف وتفهم مزال مصدومة ألف سؤال فراسها باغية ترضي فضولها زفرات ونطقات:الحمدلله مزيان
يزيد:ان شاءالله يكون خيير عارفك قدها
روعة حركات راسها باه:ان شاءالله يااربيي توحشت بابا بغيت غير فوقاش يجي غدا
يزيد:مبقى والو ان شاءالله يجي على خير تشربي شي حاجة
روعة:لا لا مبغيت والو كغادية لكوليكسيو دلعام الجديد؟؟
يزيد حرك راسو باه:الحمدلله كلشي مزيان الوليدة مشغولة؟
روعة:بزاااااف مسكييينة واقفة على كلشي بوحدها
يزيد:وصاتني على شحال من حاجة خاص نجيبها لها
فهاد اللحظة جاه اتصال ناض كهضر وعاطيها بالضهر بقات تتشوف فيه وتتفكر شنو واقع شنو تحت راس خوها من ديما غامض ومكعطيهمش راس لخيط ضارت تتشوف فلباب لي مسدود مكرهاتش تمشي لها خاصها تعرف راسها ضرها بزاف يزيد كمل الأبيل ورجع عندها كان واقف ومحني على لبيسي كشوف شي حاجة مقدراتش تصبر حتى نطقات:يزيد ضرني راسي بزااف ونت عارفني فضولية
شاف فيها بمعنى شنو رجعات نطقات:شنو قصة هاديك؟
يزيد البرود هو جوابو فوقما تجبدات ليه رجع شاف فلبيسي ونطق:راه قلت لك خدامة هنا بحالها بحال الناس شفت السيڤي ديالها تقبلات عادي مكاينش داكشي لي فبالك
روعة:ومن امتى وهي خدامة هنا؟
يزيد بنفس النبرة:دابا نت واش جيتي ديري ليا لونكيط ولا شنو
قالها لها وهو عاقد حجبانو ولكن بطريقة كمازحها بيها روعة فهاد اللحظة ناضت عندو وشدات فيه وحتى هو حط يدو على خدها نطقات وهي كارزة عليه:كيفما نت ديما معايا وكتخاف عليا حتى أنا باغية ليك غير الخير
يزيد تبسم وهو كشوف فيها يدو على خدها ختو كبرات تاهي وولات خايفة عليه نطق وهو كطمنها:معندكش مناش تخافي مكاين والو ومغيوقع والو غير خوي راسك وركزي فامتحاناتك
غير ختم كلامو تلاحت عليه عنقاتو كتموت عليه خوها و سندها وحتى هو المدللة ديالو وآخر العنقود بيناتهم كاملين علاقة زوين مدايرش عليهم ديك السلطة وديك اللعبة ديال أنا لكبير بلعكس كلهم لقلب على لقلب
فجيهة أخرى زينة لكانت جالسة فالبيرو ديالها راسها غيطرطق الملف قدامها معرفات تديه ولا لا إلا داتو غتعاود تشوفها وإلا تعطلات غادي يلوح لها شي كلمة تبقى تحرق فيها كانت جالسة والدموع فطرف عينيها الموقف لي جمعها بيها محملاتوش أبدا لأنهم عمرهم كانو هكا بدات تتقول اشداني من نهار حطات رجليها هنا وهي صدمة من مور صدمة نهار دفعات مرضاتش لبال للكنية أبدا كانت غير كدفع فينما لقات تتحط السيڤي ديالها باغية غير تخدم تترمش عويناتها لي ولاو حمر وكبريو بالدموع لي باغين كنزلو شنو زعما الدنيا ضارت وجابتها تالعندهم داك السر كحرقها ليل ونهار ولكن متقدرش تبووح بيه أبدا مستحيل واخا غتعاااني وهادي غير لبداية ومزااال
دوزات يديها على عينيها وهزات قرعة الما شربات طلعات النفس وناضت هازة الملف معندها مدير خدمتها هادي ومكاين حتى مهرب صبرات على ما كثر ودازت من حوايج صعب فحياتها
مع خرجات تحل لباب ديال لبيرو ديالو بقات واقفة غير شافتها بلعات ريقها روعة سدات لباب مجات فين ضور وتزيد حتى طلاقاو عينيهم بقاو ثاني كشوفو فبعض كل وحدة تتشوف فلوخرا وتتفكر آخر مرة شافو بعضهم شنو داز وشنو فات كبرو بزوجات وكل وحدة ولات شابة ثواني قليلة تفكرو بزاف مع لمحو بعضهم روعة ملامح وجها تحولو لملامح حزينه تتقرب عندها بشوية وعينيها عليها حتى تقابلات معاها زينة مقدراتش تصبر نزلات دمعة حارة من عينيها وهي تتشوف فيها حتى نطقات روعة بصوت باكي:كن طلاقيتك فشي وقت آخر وبلاما يكون واقع داكشي لداز كنت غادي نعنقك وغنكووون فرحانة بزاااف حيت شفتك
سكتات وهي تتبلع ريقها من الغصة لي وقفات فحلقها وكملات كلامها بصوت باكي وعينيها دامعين تاهي:لأنك كنت صاااحبتي وكثر ولكن تاحد مكان ضارب حساب لك طلعتيي خبييثة وبزااف الله ياخد فيك الحق
مع كملات آخر كلمة زادت منزلة راسها ويديها على فمها كاتمة شهقاتها زينة فهاد اللحظة عضات على شفايفها حابسة دموعها مقدراتش تصبر بداو كطيحو سخان على خدودها الشهقة كطلع مع حلقها دارت يديها على فمها وهي كاتمة بكاها وشهقاتها عينيه عليها كيف القرطاس تتبكي وحالها كقطع القلب لكن محركات فيه شاف الموقف كامل حتى مشات ختو تيرا فيها بنبرة حادة وهو عند باب المكتب ديالو:آخر وحدة يجيها تأنيب الضمير هي نت
زينة شافت فيه بعويناتها الحمر ودامعين جمعات البكية ولكن مقدراتش صدرها كطلع وينزل قلبها كضرب بالجهد وهي تتشوفو كيف داير فيها الشوفة لي كشوف فيها هي غير شوفتو مع الناس مخنزر وعينيه كنفتو الشرار تما جاي قاصدها بلعات ريقها مع قرب حداها رجعات اللور وهي تتشوف فيه كيف داير فيها تتقول دابا غيجمع معاها دابا خطوى خطوة أخرى جيهتها شي لخلاها ترجع اللور تاني لكن تسطحات فالحيط لي حاصرها قدامو وعينيه متزحزحوش عليها كشوف فوجها لي ولا حمر وعينيها كذلك لي خضرين ولاو كبريو الدموع عطاوهم رونق خاص مركز فيهم ومفيكسي عينيه فعينيها لي كن جاتو فالوقت لي داز مكانش ايخليها فهاد الحالة لكن دابا محركات فيه والو الرجفة طلعات مع رجليها وهي تتشوف فيه وتتبلع ريقها بدات تتشوف فجنابها دابا غيدوز شي حد ويفسر قربهم بشي حاجة عوجة مقدراتش تستحمل شوفاتو هكاك وقربو ليها قلبها كضرب بالجهد لدرجة أنها نزلات راسها ودموعها مزال نازلين غمضات عينيها ونطقات صوت باكي ولكن تتحاول تجمعها:سي يزيد الناس غيشوفنا شي حد
يزيد فهاد اللحظة خطف من عندها الملف لكان فيديها رجعات شافت فيه وهي قافزة هز الملف فوجها ونطق بنبرتو المتصلبة:ديري خدمتك مزيان لبغيتي الناس ميتفرجوش فيك وخوي عقلك راه بانلي مشى بعييد
طلع ونزل فيها بنظراتو المشرارة وزاد خلاها فداك الحال مع قرب لمكتب ديالو عاود ضار شافيها ونطق ثاني بنبرتو المعتادة معاها:وجمعي عليا دوك الدموع المزوريين معندناش الكاستينغ هنا راه شركة هادي
وزاد زدح لباب وراه وخلاها فداك الحال دغيا دخلات وسدات عليها منين جات ضروري ما تبكي دارت يديها على وجها وهي تتبكي وتشهق عارفة نظرتهم عليها كاملين شنو هي وعارفة فاش كفكرو من جيهتها وزيد كلامو دابا لي تاهم فيها دموعها بأنها نابعة من أحاسيس كاذبة داكشي لي وقع مسخ صورتها معاهم كاملين وأولهم هو متقدرش أبدا تبوح بالسر لي غيسقط عليها جميع التهم ويبين برائتها لأن فيه ناس بزاف متقدرش تشوه صورتهم رغم أنهم عندهم يد فهاد المصيبة لي طايحة عليها ولكن مقدراتش تهضر ختارت السكوت وتبقى هي لي مشوهة عاذراه ولكن فنفس الوقت مقدراش تستحمل التعامل ديالو لي كيف السم وتصرفاتو معاها لي يلاه غير لبداية بكات بسبابو شحال من مرة مقدراتش لأنه فقط متنكر بلباس القساوة عمرو كان هكا لكن داكشي لي وقع بالسيف بقات تتبكي فصمت على حالها وعلى زهرها عانات بزاف فصغرها وهاهي مزال تتعاني فكل محطة من محطات حياتها لكن معندها مدير محتاجة هاد الخدمة وبزااف ملوية من اليد لي كضرها لأنها كبان ليها غير باها دابا
فجيهة أخرى كان هو لي غير دخل زدح لباب لاح داك الملف شتتو فالأرض وجمع يدو على شكل بوكس من طبعو كيضبط راسو أما كون دار لمكدارش محملش هاد الموقف مباغاهاش تكون قريبة من ختو ولا تهضر معاها باغى يصفي حسابو معاها الراس فالراس ومحملش يشوفها بدوك الدموع المزورة كشوفها كتلة من الكذوب والتمثيل ورا داك الوجه لي زينو فتان كاين الكذوب والغذر والخبث جلس وهو كزفر يديه على ذقنو وكتحلف غيندمها على هادشي لفيها وهادي غير لبدية وعلى المهل غيمشيها على كيفو واخا محاملش الشوفة فيها معساك يخدمها عندو لكن تاهو غيصبر على قربها ليه لأنه عندو مصلحة فهادشي غيخليها تخلص على لداز حتى يشوفها محطمة ومدمرة عاد ديك الساعة يرميها بحال شي زبل ويسالي هادشي
فبلاصة أخرى فدار الوزاني لي كانت كلها مقلوبة بالتحضيرات مبقى والو غدا غادي يجي الحاج الوزاني والأخ ديالو من الديار المقدسة الدار عامرة بالعائلة بداو كجيو باش يستقبلوهم فريدة لكانت تتجري هنا ولهيه ومعاوناها بنتها أنيسة لي هي الإبنة الثانية من بعد يزيد الڤيلا عامرة وريحة البخور عاطية وكذلك لحن الطرب الأندلسي غير هما بيناتهم العائلة وجالسين جلسة دالهمة والشان زهور حلات لباب وغير شافت روعة تبسمات:على سلامة لالة روعة كيف دورتي
روعة معندها خاطر تبسمات بالسيف عليها:الحمدلله فين ماما
أنيسة جاية من الصالة:حبيبتي جيتي كيف داز الإمتحان
روعة تعانقات هي وياها:الحمدلله
كانت كدوي معندها خاطر عقلها مرفوع شي لخلا أنيسة ترد لبال تتبان لها عيانة ومرفووعة:مالك اجي مكتاكليش الڤيتامين لخرجت لك؟
روعة:غير نسيتو ليوم كنت عيانة قوليلي فين ماما؟؟
أنيسة جراتها:أجي شوف العائلة بعدا كلشي كسول عليك
دخلات روعة بابتسامة صغيرة سلمات على كلشي لي جا ليوم ولكان معاهم لبارح جلسات شوية ومن بعد ستأذنات بحجة بغات تطلع ترتاح خرجات وقصدات مها لكانت فالتيليفون مع الطريطور وقفات تتسناها تسالي تتفكر كيف تقولها عاضة على لسانها باغية تسكت لكن مقدراتش أبدا قطعات فريدة وتلفتات لها:مالك ابنتي غطلع تنعس؟؟
روعة حركات راسها بآه:آه عيت مهم بغيت نهضر معااك
فريدة:واخا ابنتي قول دغيا راه مزال تابعني شحال من حاجة قول الله يسمعنا خير
روعة بقات كتشوف فيها مترددة وزيد مها مشغولة بزاف وعندهم مناسبة زوينة فالدار وكلهم فرحانين شي لخلاها فثواني قليلة تراجع وتحرك راسها بلا:صافي والو اماما خلي تنفيق ونهضرو مزيان عيانة دابا
فريدة شدات فراسها:هضر مااالك شنو كاين ياك لباس
روعة حركات راسها بلا:لا لا ماما ماشي شي حاجة خلي تنفيق
فريدة:وا على خاطرك يلاه طلع ترتاح
داكشي لكان ضارت ومشات وهي طالعة تتخمم مقدرات تقول والو فآخر لحظة عضات لسانها وسكتات دخلات لبيتها طلاحت فوق ناموسيتها كن قالتها كان غادي يطيح الخبر ثقيل على مها منين خرجات لهم ثاني زفرات وهادشي لكان كضور فبالها من هادشي كامل خايفة غير على خوها وصافي
داز الوقت كانت فالدار وبالضبط فالسطح لي كان ضو الدروج مضوي فيه وحتى الضو ديال الزنقة جالسة مكمشة فوق واحد الحصيرة متكية على الحيط وتتخمم مورالها طايح بزاف داكشي لاش ختارت تعزل بوحدها بريد خفيف ضرب فوجها مخلي شعرها كطير تنهدات مراشقاش لها الموقف دقبيلة وقف لها فالحلق فاش طلبات منو ميزيدش يقرب لأنها خافت يدوز شي حد ويفهمهم غلط وصدق رضها بلي عقلها مشى بعيد ضرها بزاف مكفلتش الفرصة فين يلوح لها شي كلمة تسممها وزيد أنه ظلم أحاسيسها بزاف وتاهم دموعها بلي دموع كاذبة وهي ربي لعالم بيها وعالم بنيتها
عينيها غرغرو والغصة وقفات فحلقها تفكرات ختو حتى هي أكثر حاجة ضرات خاطرها هي ديك الملاقية كلهم واخدين منها موقف وهي بريئة من كل التهم لي ملفقة لها لكن متقدرش تهضر أبدا معندها مدير من غير أنها تصبر لأنه مكاينش خيار آخر أو بديل
هزات راسها للسما تتشوف فالنجوم لي بحال النقيطات فسواد الليل القاتم عويناتها حمر ومغرغرين تنهدات وهي كطلب ربي يعطيها القوة باش تزيد تصبر حيت الطريق مزال طويلة بالنسبة باغية غير تخدم وتهز دارهم وباها يدير العملية بعيدة على الصداع ومن ديما غادية غير فجنب الحيط ربي راه كشوف وكل واحد غيتخلص على أفعالو بقات على حالها هكاك حتى سمعات مسعودة تتعيط ونزلات دازت ليلة عادية وجا نهار جديد الجو صافي وزوين من مورا مطاحت الشتا صفاتو مزيان شميسة ساطعة جايبة معاها الفرحة لدار الوزاني لي كانت عامرة بزااف الحاج الوزاني وخوه مبقى والو ويجيو كان كلشي جالس فالجردة كسمعو الطوموبيلات برا وصلو تفتح لباب لكبير ودخلو العائلة كاملة ناضو يزيد لي نزل ونيشان حل لباب للأب ديالو نزل عمو حتى هو وسامية لكانت معاهم تاهي والطوموبيل الثانية كانت فيها أنيسة وروعة ووليد كلهم مشاو يستقبلوهم من المطار أول وحدة تقدمات كانت هي فريدة هازة فيديها بلاطو دالتمر والحليب قدماتو لراجلها وحتى لوسها من بعد قربات عندو عينيها فعينيه ونطقات:على سلامتك اسيد الحاج الدار نورتيي دارك
مع كملات لآخر كلمة قرباتلو وعنقاتو وحتى هو كلشي كشوف فيهم رغم السنين لدازت على زواجهم إلا أن المودة والرحمة بينهم باقي هو هو واحد الحب صافي وغزال ناتج على سنين من الصبر بعدات عليه وهي فرحانة برجوعو كلشي تكب كسلم عليهم ومن بعد دخلو للدار لكان مكسورة بريحة البخور والقرآن الكريم دليل على أن مناسبة دينية فالدار كان برا التيليفون فيديه ممشاش للشركة ݣاع تفرغ لباه وعائلتو كعيط وكطمن بلي كلشي هو هداك فالخدمة يديه فجيابو وكقطع مع هدا ويعيط لاخر واخا مكاينش فالشركة بحالا حاضر قطع مع واحد ودوز واحد النمرة أخرى دار الطيلي فودنو عاقد حجبانو كتسنى تجاوب باش دغيا يقطع جاوبات بصوتها الرقيق:آلو
يزيد بنبرتو الجافة بدون مقدمات:آلو شوفي الإجتماع لكان غيكون نهار التلات غيرجع التنين علمي لكانو غيحضرو
زينة:واخا اموسيو كون هاني
يزيد بنفس النبرة:وسيري نساي شي حد عوتاني وتفرجي
مع كمل كلامو قطع عليها وكمل اتصالاتو دالخدمة لداخل كانو الصالات غيطرطقو الحاج الوزاني جالس وكعاود على داك المقام سامية كانت جالسة جنب باها معنقاه موحشاه بزاف حسات بشي حد نغزها تلفتات كانت مها لي همسات لها:درتي داكشي لي قلت لك كيف وصيتك
سامية حركات راسها بآه:مشيت معاه فالطوموبيل ومتحركتش من حدااه ݣاع
سعيدة:مزيان ونوض حتى دابا سير عندو وقف معاه ومتخليهش بوحدو باش يعرفك لالة وقادة وقادر يديرك فكتافو ويعول عليك خاص فينما يضور يلقاك جنبو
حركات راسها بآه وناضت خرجات تتقاد الشال لي لايحة عشوائيا على راسها لابسة جلابة عصرية مطرزة قصيرة شوية وطالون عالي داير الصوت مع كل خطوة كدير خرجات للجردة تتقلب وتما لقاتو قصداتو وقفات حداه حتى كمل كلامو وهي تحط يدها على كتفو تلفت شاف فيها وهي تنطق:يزيد تبغي نمشي بلاصتك لشركة ليوم
يزيد حرك راسو بلا عينيه على الطيلي:لا لا مايحتاجش قاديت كلشي رتاحي لك تانت ليووم وجلسي مع عمي
سامية بٱبتسامة وهي تتشوف فيه:آه نت عارفني أنا معاك وأي حاجة حتاجيتيها غتلقاني فجنبك
يزيد تبسم ابتسامة صغيرة ونطق:عارف لكاين هادشي مخافيش عليا حنا راه خوت ودم واحد
بلعات ريقها وكرزات على ظفارها حتافضات بٱبتسامتها الصفرة حسات بحال الصفعة من كلامو لكان قمعة خايبة لها مجات فين تسرطها حتى جاه اتصال قبل ميجاوب شاف فيها:سيري دخلي رتاحي اتكوني عيتي مع المطار
حركات راسها بآه وهنا ضار عطاها بالضهر وكهضر فالطيلي جمعات الضحكة وبلعات ريقها وهي معصبة دخلات وغطرطق حتى من لخدامة دخلات فيها طوعاتها ومشات خرجات لجيهة لوخرا دالجردة تتبرد هاد الشمتة
داز الوقت فالشركة زينة كانت غارقة مبقى والو ويخرجو خدامة على الإجتماع لي غيكون نهار الاثنين تتأكد واش سيفطات لكلشي وداخلها الشك ليقولها ثاني نسيتي شي حد علاه ماشي تحلف عليها فالتيلفون زفرات وهي تتشوف دوك لي مطلوبين سيفطات لهم ديزيمايل معندها لاش تبقى موسوسة وصل وقت الخروج طفات لبيسي جمعات قشها وخرجات حمدلله ليوم داز النهار عادي مرخوف حيت مجاش للشركة
نهار جديد سدات وراها لباب وهي خارجة تبسمات فاش شافتها تسالمو بزوج وزادو كانت 9دالصباح غاديين وكهضرو حتى خرجو للشانطي وقفو شوية كهضرو حتى وقف عليهم الشيفور لي نزل الزاجة ودوا مع هنية:نت هي هنية الطباخة
هنية:أياه اسيدي نت الشيفور ياك
الشيفور:آه طلعو اللالة
طلعو بزوج زينة عرفات بلي هادو ناس ديال الكبرانية لي مسيفطين لهم الشيفور يديهم تنهدات شحال خدمات فالديور ناس طوب وحجر ضارت عند هنية لي كدوي معاها
هنية:هاد الناس راه منعاودش ليك الخير والخمير والله يعمرها سلعة
زينة:ايوا لهلا يحاشمنا ياربي
طول هاد المدة كانت تتحاشى نظرات الشيفور لكان كطل عليها من المرايا رغم أنها لابسة عادي فقط جلابة سخونة مخزانية وضافرة شعرها لي واصل النص فضهرها وايكخو دالشمس مع ماسكارا وݣلوص خفيف لكن لزين زيين
ضورات وجها عصبها وتاهو مكانش من العاݣزين ونطق:هاد السيدة حتى هي كطيب
هنية شافت فزينة وشافت فيه:آه اسيدي هادي راه هي شميشة ديال الحومة عندنا مشاءالله
زينة نغزاتها باش تسكت شي لخلاه يتبسم وينطق: تبارك الله كاينة المعنى الزين والحداݣة هادي هي المرا ولا بلاش
زينة شافت فيه زعما منيتك قد باها وكيزهى عليها هنية شداتها الضحكة الشيبة العاصية حتى هو وصلو من بعد مدة تفتح لباب لكبير ديال الڤيلا ونزلو بزوجات زينة شافت فجنابها تبارك الله غير الدخلة دلفيلا يجري فيها الخيل باين عربون ماليها تحل لباب بعدما لخدامة سمعات الطوموبيل وصلات تسالمو:كدايرة لباس عليك طلاقينا فساعة دالخير يختي
هنية:ولاهيلا عاش من شافك يختي مليكة
مليكة:ربي خليك اجيو اجيو معايا ترتاحو بعدا
مدخلوش لكن داتهم لجيهة لوخرا ديال الڤيلا بالضبط حدا لابسين فين كاين جليسة تما كبيرة بلفوطويات:جلسو جلسو تفطرو أنا غادي نعلم لالة بلي راكم وصلتو
هنية عينيها على الطبلة ومبسمة:الله يخلف ويقوي لخير
خلاتهم وجلسو هي وزينة وبداو كفطرو الطويبلة مفرشة هالعصير هلكيكة هلكريب بلاطو دالحلوة تقول داكشي محطوط لأهل الدار تأكدات أنهم فعلا غيكون ناس دالخير هنية كدوي وفمها عامر ماكلة:شفتي قلت لك راه ناس دالجود كولي كولي بحالهم كنخدم عندهم مرة فربع سنين
زينة ضحكات وهي تتاكل فعلا كانت هازة الهم ليكونو شي مكنزين مقادة على ضغط وستريس يكفي لي عايشاه فالشركة فهاد اللحظة طلقى عليهم السلام:سلام عليكم بالصحة والراحة
تلفتو بزوجات كانت واقفة ومبسمة عينيها على هنية لي غير شافتها ناضت تتسلم عليها:كدايرة الالة لباس عليك كلشي مزيان على سلامة مول الدار
فريدة:الله يسلمك ربي خليك
زينة لكانت بالصدمة وقفات وهي تتشوف قلبها كضرب بالجهد وتتقول ميمكنش الماكلة وقفات فحلقها عينيها خارجين فريدة فهاد اللحظة تلفتات لسيدة لجات مع هنية وحتى هي نفس الشي غير شافتها الضحكة ختافات من وجها تترمش عينيها بالجهد ووتقول واش هي زينة توثرات وتلبكات نزلات راسها وهي تتفتف قلبها كضرب بالجهد والخلعة طلعات معاها من رجليها هنية لاحظات هادشي:لالة فريدة هادي هي السيدة لي جات تعاوني منعاودش لك عليها ماشاءالله
زينة مزال على حالها تتشوف فاللأرض مقدراتش تهز عينيها فيها فريدة لي فاقت من صدمتها ونطقات وعينيها كيف القرطاس عليها وهازة حاجب:مزيان هاحنا غنشوفو إلا ساليتو سبقيني لكوزينة أنا جاية نوريك باش يلاه نبداو
هنية:واخا الالة زينة زييدي يلاه
فريدة بقات فبلاصتها تتشوف فيها كيف بان فيها الذعر هزات صاكها زينة وتمات غادية منزلة راسها يلاه غتخطوي فريدة وهي تشد فيها من ذراعها بقبضة من حديد طلاقاو عينيهم وهما قراب لبعض وهي تيري فيها بنبرة قاصحة:عندك الزهر تربيت باب داري يكون ديما مفتوح فوجه أي واحد(طلقات منها وبعدات عليها شوية وهي كطلع وتنزل فيها باشمئزاز ونطقات كارزة على سنانها مبينة شحال حاقدة)واخا يكون كلب
وركات على ديك واخا يكون كلب وكانت كتعنيها مزيان ومن قلبها عينيهم على بعض وكل وحدة وشنو كيقولو عينيها فريدة الحقد والغضب وزينة الحزن ومغلوبة على أمرها لسانها مربوط نزلات راسها والغصة فحلقها كلام جارح وبزاف زادت دغيا وهي عاضة على شفايفها بلا حتى كلمة خلات فريدة واقفة وممتيقاش راها عاود بانت وكاينة فقلب دارها إلا مشاو حتى شافوها ولادها وبالضبط يزيد مصيبة خاصها تصرف ومبغات تحاجة تخسر هاد المناسبة لأنها مهمة وبزاف زينة عينيها حمرين ومغرغرين داخلة لڤيلا وتتندب فخاطرها اشنو داها ولاش جاية مكفاهاش الشركة هاهي عندهم فقلب دارهم وجات برجليها كيف غتقدر تشوفيهم واحد واحد والأكثرية هو غير داخلة ومقادراش تهز راسها أبدا خافت عينيها يجيو فشي حد فيهم ويلوح لها شي كلمة دالسم يكفي لي سمعات براكة
مليكة:ختي اختي اجي هالكوزينة
زينة هزات راسها وهي خايفة وتتبان ماشي على مودها حركات راسها بآه ومشات تتجري دخلات لقات هنية بدلات عليها ولبسات لباس الخدمة بلا حتى كلمة داكشي لي دارت وجلسو كوجدو باش غيبداو مليكة:هانتوما غطيبو على برا فالجردة على وديت الدخان وميرجعش عليكم الشوم دالبوطة
هنية:آه واخا نصبو هنا ونطيبو برا زينة يلاه نوجدو الطنجرة ونبداو بالبصلة
حركات راسها بآه وبداو كقادو الطناجر فاش غيطيبو كانو تلاتة كباااااريين بداو كراقبو واش كلشي حداهم لغيحتاجو قبل ميبداو فهاد اللحظة ومن لباب دالكوزينة لي على الجردة وقفات عليهم فريدة عينيها على زينة ونطقات:لالة هنية اجي عندي نهضر معااك عفاك
هنية وقفات تتقاد الطابلية:واخا الالة زينة بداي اختي
خرجات هنية لعند فريدة وخلات زينة وهي تتفكر حاسة أنهم غيصدروها دابا لأنها مستحيل يخليوها فدارهم من بعد داكشي أحسن ليها تمشي متقدرش تبقى وسطهم كل مرة يعطيها واحد
هنية بإستغراب:آه اللالة هادي متحتاجيش تسولي عليها كن مكانتش ثقة منجيبهاش ݣاع نخاف حتى على راسي أنا
فريدة مابغاتش تبين:احم زعما ماشي هكاك غاحيت بانتلي مزال صغيرة
هنية تبسمات:هاديك اللالة هي شوميشة دالحومة ههه لا هي لا مها طيابهم شهوة منو شغنقولك على حسابي وربي شاهد
فريدة تنهدات:واخا الله يسر زهرة غتبقى معاكم لخصاتكم شي حاجة صافي؟
هنية:واخا اللالة كوني هانية متسالينا غير تحميرة الوجه ان شاءالله
فريدة:يكون خير مين تمشي لكوزينة كلم لي زهرة عفاك
حركات راسها هنية بآه ومشات خلات فريدة تتخمم بغات تجري عليها متاقتش شيطانها بدا كقول غدير لهم شي حاجة دماغها ترون نيت شافتها الصدمة خربقاتها وفنفس الوقت عندها لغرض بيها ميمكنش الناس غيبداو يجيو متتحملش التحشيمة ديال آخر لحظة شحال وهي تتوجد وقفات عليها زهور:نعام اللالة
فريدة:نت غتبقاي فالكوزينة حدا الطيابات متحيدش عينيك عليهم وخصوصا ديك الصغيرة بانتلي تالفة لتمشي تغلط
زهرة حركات راسها بآه:واخا اللالة كوني هانيا
فريدة:او متخليهاش تخرج من الكوزينة ولا يدخل شي حد ويشوفها لبغا شي حاجة مديهالو من بعيد
زهرة مفهمات والو ولكن حركات راسها بآه وزادت خلاتها غارقة وسط أفكارها تنهدات دارتها فيد الله ومشات دخلات عند العائلة لي معمرة الڤيلا وتوقف على الترتيبات الأخرى فالكوزينة كانت زينة تتقطع فالبصلة عينيها حمرين ودموعها نازلين ولكن ماشي دموع الحريق بل دموعها هي تتقطع وتتبكي مستحلية ديك لبصلة لأن كلشي غيحسابلو بسبابها دموعها كطيحو ومبغات لي يسولها مالك فقط تبكي فصمت وتخوي قلبها على هاد الزهر لي عندها سمعات بما فيه الكفاية من الكلام الجارح لا هما فاهمين ولا هي قادرة تهضر وتشرح سكوتها مخليها تدفع الثمن وتبقى تسمع كلام متستاهلوش وكل مرة يطيح دموعها تتمسح عينيها لي ولاو حمرين بزاف بلاما تشكي عكس هنية لي عينيها حرقوها بزاف جات زهور نضامات لهم تتقطع معاهم:اهيا سيدي ربي على هاد البصلة ومدايرة فينا كن مكانت تتبنن منحطو فيها يدينا
هنية دموعها كطيحو:ولاهيلا غا بنينة فالطعام وقاصحة فالنصيب ههه قربيلي عفاك ديك الملحة
بقاو مدة وهما كقطعو البصلة ويقادو قوام الدجاج بالدغميرة غارقين فالكوزينة محسوش بلوقت ݣاع زينة كانت كدوز ليقامة على الدجاج كل وحدة تتغمسها مزيان وتخشي ليقامة فالثقابي لي دارت فالدجاجة كاملة باش تلقم مزيان وتكون المعنى فالبنة هنية برا مقابلة النار لي غيطيبو عليها وتتقاد درجة دالحرارة المناسبة زهور ملاهية مع الغدا ومليكة برا تتسخر وواقفة مع فريدة فالتحضيرات لوخرا زينة خدامة وعقلها مرفوع تتسمع الصداع برا وبنادم كثير بزاف وكلا وفين كجري صوت الهضرة والضحك قلبها كضرب كطلب ميبان حد تتعرفو وكعرفها وهي غارقة فالشغل حتى سمعات زهرة تتهضر وشي وليد صغير دخل تحنات زهرة هزاتو وهو كبوس ويعنق فيها:جيتي الحبيب ديالي توحشتك
كان كبوس فيها ويعاود بكل برائة ومبسم شي لخلا زينة تبتاسم شوية وهي تتشوف فيهم كان مسكين من أصحاب متلازمة داون ولكن شكلو بريئ وابتسامتو أكثر حطاتو زهرة دغيا وضارت لشغلها وبالها معاه فهاد اللحظة لوليد لمح زينة لغير جات عينيها فعينو تبسمات ليه وحتى هو واخا مكعرفهاش وبدا كضحك بالجهد وكأنه فرح حيت ضحكات معاه شي لخلاها تنطق وابتسامة عريضة على وجها الزوين:أجي بوسني
زهرة وهي ملاهية مع لغدا:سير بوس طاتي سير
بشوية بدا كقرب عندها وهو مبتاسم وهي تتشوف فيه خطف قلبها تشديه تاكليه صدق من قال أن متلازمة داون هي متلازمة البرائة قرب عندها وطبع قبلة حنينة على وجها وهو كشوف فيها حتى هي ملامحها بريئة وغزالة زهور تلفتات شافتهم تبسمات ونطقات:طاتي غزالة عجباتك هههه
فهاد اللحظة سمعو شي حد دايز من حدا الكوزينة كعيط زهرة ضارت دغيا جيهة باب الكوزينة:هاااهو اللالة أنيسة معايا فالكوزينة هاهو
مكاملاش دقيقة دخلات عليهم أنيسة غير شافت ولدها تبسمات:مخبي ليا فالكوزينة ياك هربتي عليا هههههه
زهرة:جا يشوفني وليدي الغزال
أنيسة تحنات هزات ولدها وهي تتهضر مع زهرة:كغادين مع تمارة الله يعاونكم
مع نطقات الله يعاونكم لي كانت موجهاها لطيابات زينة ثاني فديك اللحظة غير طلاقاو عينيهم الزمن وقف بلعات ريقها موقف ثاني مع شخص آخر وكلام سام غتسمع مرة أخرى قلبها بدا كضرب ونزلات راسها وهي كلها توثر وخوف كملات خدمتها ويديها كرجفو وأنيسة عينيها عليها تتأكد تاهي واش نفس الشخص لي على بالها الصدمة طغات عليها لكن مبيناتش فهاد اللحظة شافت فزهرة:هاكي كمال خرجيه للجردة أنا جاية دابا
زهور:واخا اجي احبيبي اجي متعطلش اللالة عفاك حيت مقابلة الغدا والعيالات لخصاتهم شي حاجة
أنيسة حركات راسها بآه وعينيها كيف القرطاس على زينة لي يديها كرجفو وهي تتخدم وقلبها كضرب بغاتها غير فوقاش تخرج موقف لا تحسد عليه أكيد غتسمع شي سم آخر دابا قربات عندها بشوية بخطوات تابثة صوت الطالون خلا زينة مع كل خطوة يتملكها الخوف كثر معندهاش الوجه لي تشوف فيها بيه مع وقفات عند راسها نطقات أنيسة:هادشي باش بدلتينا غير بالشقى وتمارة
زينة الغصة وقفات فحلقها ثاني دموعها فطرف عينيها لي حمرين هزات راسها فيها نفس الشي أنيسة عويناتها غرغرو فاش تفكرات لي فات نطقات بصوت شبه باكي:منستاهلوش منك لي درتي ازينة منستاهلوش
زينة معالم بيها غير الله تتبكي فصمت قدامها عينيها حمرين ودموعها نازلين أنيسة مسحات عينيها ورجعات شافت فيه وهاد المرة نطقات بحدة:جريتي على رزقك لي متستاهليهش
وزادت وخلاتها فحالها قلبها غادي يطرطق رمات داكشي من يديها وتكمشات على راسها وعطاتها لبكى فصمت كلام جارح بكل ما تحمل الكلمة من معنى من عندهم كاملين ولي كزيد عليها أنها متقدرش تهضر ولا تبرأ راسها أنيسة خارجة بالزربة وهي مرونة يزيد مخاصش يشوفها كيفاش ماماها قدرات تدخلها شهادشي واقع وهي غادية دخلات فشي حد غير هزات راسها شافت فيه وهي تعض على شفايفها ونيشان قربات ليه عنقاتو خاشية راسها فصدرو كارزة عليه وحابسة دموعها يزيد تبسم شوية مدا مجاب أصلا محانين بيناتهم ومفاهمين شي لخلاه ميسولش على سباب عناقها ليه هكا ضور يديه عليها وطبع قبلة على راسها بعدات عليه وهي تتشوف فيه شحال كبقى فيها خوها وبزاف حطات يديها على خدو وهي تتشوف فيه ميستاهلش مسكين ألف وحدة تمناه بدون ميتكلمو سحبات يديها عندها ونساحبات بهدوء خلاتو حتى هو زاد يشوف شنو خاص واقف معاهم على كلشي مين حل عينيه وهو كجري
هنية حاطة يديها على كتفها:من الأول كنت عارفة بيك شي حاجه سمحيلي بزاف جرجرتك معايا
زينة كتمسح عينيها:لا لا مكاين والو أنا باغية نخدم اختي هنية ساعتو الله وصافي زيدي نكملو
هنية تنهدات:الله يصاوب وصافي ݣاع القلوب طايبة
جابو الطنجرة الأولى ستفو فيها الدجاج وكلشي ديالو تعاونو وهزوها بزوج وخرجوها لبرا وحطوها فوق العافية قادوها ودازو لثانية تاهي والوقت كطير
روعة جلسات بشوية تقابلات مع ختها كانو بالضبط فالجلسة ديال الجردة:مالكي خلعتيني علاش جالسة هنا بوحدك والدار عامرة لداخل
أنيسة مرفوعة تنهدات وحطات ولدها بشوية فالارض:سير اماما تلعب وبشوية
تنهدات وضارت عند روعة وهي تنطق نيشان:زينة كاينة هنا فالدار وهي لكطيب معرفتش ماما فاش فكرات فاش جابتها وخلاتها تدخل للدار وزيد مزال ممتيقاش أنها هي عاودات بانت من جديد
روعة بقات تتشوف فيها تصدمات أنها فقلب الدار عندهم ولكن ماشي أول مرة تشوفها تنهدات ومسحات على وجها بلا حتى كلمة شي لخلا أنيسة تكمل كلامها:مخاصش يزيد يشوفها غتوقع شي مصيبة قدام الناس والعائلة حتى لي مكان عارف غايدي خبارنا وزيد مبغيتش خويا مسكين
روعة قاطعاتها:خدامة عندو فالشركة وهي la secrétaire ديالو غير رتاحي
أنيسة عينيها خرجو زادت صدمة على بعد صدمة نطقات:أويلي وكيفاش عرفتي نت ولا يااكماا
روعة حركات راسها بلا:منضنش فاش سولتو عليها هضر عادي حاولت نجبد منو شي كلمة ولكن والو نت عارفاه مكنعرفوش شنو تحت راسو ولا فاش كفكر
أنيسة راسها غادي يطرطق بكثرة الاسئلة شدات فجبهتها:انا مبقيت فاهمة والو مين خرجات عاوتاني هادي وكيفاش حتى خدمها عندو ونت من إمتى ساكتة على هادشي
روعة نطقات دغيا:شوفي ماما مقايلة لها والو سامية جاية قلبي الموضوع وكنواعدك غير نساليو هادشي نعاودلك كلشي
مع كملات كلامها وقفات عليهم سامية مبسمة وحيدات الشال على شعرها المطلوق جلسات ونطقو:لحيبانات نتوما هنا
أنيسة تكاحزات شوية:جلسي جانا الصهد وخرجنا بزوج
سامية عينيها على الطيليفون:وياه الناس مبقى لهم والو ويبداو كجيو
روعة وأنيسة وهما كشوفو فبعضهم كدويو غير بالعينين روعة دغيا نساحبات عرفات بلي ختها تتحرق باش تعرف وغتولي قايلة شي حاجة قدام سامية لي معروفة بتوصال لهضرة وفيها تاهي ديك علاش وكيفاش
فبلاصة أخرى بعيدة على هادشي
عبد الكريم:با تيباري هادشي راه ممسلكش زينة غتعرف غتعرف وغادي تقلق عليا
تيباري:معندها متقولك هاهي عرفات ݣاع نت ماليك والو شوف إلا كنت اتبقى ديما تمن عليا مغنبقاش نخليك تجيبني نت
عبد الكريم تنهد مسح على وجهو ونطق:غير على قبل صحتك ابا تيباري راك بحال الوليد
تيباري:أنا عارف شنو كندير بغيت نعاون بنتي حيت يد وحدة مكتصفقش وزيد راه وليت معروف شوية هنا
عبد الكريم تنهد فعلا كلشي عارف بلي زينة ضاربة تمارة واخا مزال صغيرة مسكينة ولكن هادشي كامل غير باش باها يرتاح ولكن راسو قاصح تنهد وصاه يرد لبال لراسو ومين غادي يوصل لوقت غيجي عندو باش يرجعو ركب فموطورو وزاد خلا تيباري جالس وكشوف الناس غاديين جايين الدنيا عامرة لويكاند ليوم وزيد خمسيام وهو كجي حس بلي ولا شوية معروف عند الناس لي ديما كدوزو من تم
داز الوقت فدار الوزاني لي بدات تتعمر والناس كجيو والظلام بدا كطيح كانت هنية وزينة لي غير كطل شوية من باب الكوزينة لي على الجردة كشوفو فالحوالا كتذبحو كانت عائلة الوزاني كاملة خارجة لوسط الجردة وخمسة دالحوالا مستفين زينة كانو عينيها عليه نيشان تتشوف فيه كان هو لطيح الحولي للأرض وشدو من رجليه وشي شباب دالعائلة حتى هما معاونينو مع كبرو بالله الحاج الوزاني دوز على الحولي الأول ونفس الشي مع الحولي الثاني وكان هاد المرة خو الحاج هو لي تكلف بالذبيحة ديالو هنية وهي تتشوف:تبارك الله على حوالا كلا ينسيك فلاخر وشوفي الناس كيف دايرين وشوفي الخير يختي الڤيلا علام زيناتها الناس لي عايشة الله يزيدها
زينة تتسمع هنية شنو تتقول ولكن راسها مرفوع عينيها عليه بالذات كيف شاد الحولي الثالث وكهضر مع باه ولا مو وعاطيهم لخاطر وكضحك تقول ماشي هو لي كتشوف فالشركة شافت سامية لي واقفة قريبة لي تتهضر معاه تاهي إلا شافتها دابا غضرب ليها الطر واخا خدمة الحلال مافيها عيب تنهدات ودخلات بحالها طايح عليها الضيم وقلبها معالم بيه غير الله بزز باش دوزات هاد النهار وقدرات تكمل ومغترتاح تتخرج من تما سمعات ما يكفي من خل وذنيها فهاد اللحظة دخلات مليكة الخدامة الثانية:تبارك الله عليكم الريحة عاطية وكلشي عجباتو
هنية بابتسامة:الله يكبر بك قوليلي يختي حتى هاد الحوالا غادي يطيبو تبارك الله علامن زيناتهم
مليكة:هادو يختي جايبهم الحاج من لفيرما ديالو فتازة ذبحهم وغيخرجهم صدقة للناس لي مفحالهمش
هنية:تبارك الله الناس ديال الجود الله يزيدهم
زينة وسط لكلام سهات وهي تتسمع تازة قلبها زاد تزير عليها الماضي تابعها وأي حاجة تتفكرها بيه ولو غير كلمة تقالت
داز الوقت وظلام الحال نيت كانت 9:00ديال الليل كملو الطياب وبقى غير يتعطاهم الأمر باش يحطوه كانت جالسة فالكوزينة كقادو أتاي للناس الصواني الرفيعة غير مستفين بكيسان دالبلار وبرارد بقوامهم بغات غير تحط راسها ريحة المسك والبخور عاطية فالدار تغلغلات لنيوفها وريحات قلبها كانو الناس وصلو والدنيا عامرة برا تتسمع صوت الذكر دالمسمعين لي حسات بقلبها تفاجا وهي تتسمعو وخففات شوية وكلما سمعات شي دعيوة بالتيسير والفرج كتردد فخاطرها آمين فهاد اللحظة هنية سولات زهرة على الطواليط نعتات لها لكن معرفاتش ومع الصداع والناس غادية جاية زادت معاها توريها لها مخليين زينة بوحدها جالسة وساهية وتتمسح الكيسان بالزيف وتردهم للصينية فهاد اللحظة دخل ويديه عامرين بلبلاطوات دالحلوة لي جاب الطريطور حطهم ومع ضار عيط زهرة عينيه تفيكساو عليها زينة مجات فين تضور تجاوب وتقول راه مكايناش حتى عينيها تاهي تفيكساو عليه لحظة صمت ودقيقة خلات العالم يتوقف بينهم وهما كشوفو فبعض تترمش بعويناتها الخضر فيه وتتبلع ريقها لي كانت خايفة منو طاحت فيه كانت كطلب ربي ميشوفهاش حتى تخرج بحال ولكن قدر الله ماشاء فعل تتشوف فيه كيف تقابل معاها كطلع وينزل فيها وكوجد الكلام لي غيتيري فيها بيه قلبها كضرب بالجهد وهي تتشوف ملامحو لي تعقدو فور ما شافوها عكس كيف كان وحتى كيف شافتو قبيلات واقف بقامتو هكاك كشوف فيها مخنزر وسط هادشي ردات البال للتقليدي لي لابس الجلابة لي جات معاه وبينات كتافو لعراض وطولتو المهيبة رغم خوفها لكنها لاحظات تفاصيل وسامتو الرجولية نزلات راسها بلا حتى كلمة شابكة يديها مع بعض هو كان كشوف فيها لابسة طابلية دالخدمة كلها ملطخة باينة شنو تدير عاقدة راسها بزيف حياتي وخصلات خفيفة ورقيقة دشعرها نازلة من لقدام جا وليد تاهو حط البلاطوات وخرج العساس نفس الشي وتاحد مدا مجاب من الموقف لي طاري لا هي قدرات تهز عينيها فيه لا هو تزحزح من بلاصتو كتحس بعينيه بحال القرطاس كتيريو فيها قرب عندها بشوية ومع كل خطوة تتحس بقلبها تتهز حتى نطق بصوتو الرجولي لي تتسمعو كيتيري فيها بيه فالخدمة:وجهك بزز باش كنصبر للشوفة فيه لهيه وزايداني حتى هنا
عضات على شفايفها وهي منزلة راسها بلا حتى كلمة الخلعة شداتها فقلبها كيف ديما كارزة على يديها ودموعها فطرف عينيها على سبة طلع ونزل فيها باستهزاء وهو ينطق:مكتزيديش القدام نت حياتك كاملة غير الجفاف؟
زادت عضات على شفايفها كثر عرفاتو مزيان علاياش كمعني لها يكفي السم لكعطيها فالشركة وزايدها دابا قبل ميرجع خطوة اللور وهو ينطق:اصلا هادشي لي يصلاح لك وهو مستواك جاتك فرصة فين طلعي النيڤو ولكن غاخليك كيفما نت هكا حسن
مع نطق آخر كلمة عطاها بالضهر مجا فين يخطوي أول خطوة وقفاتو بصوتها:حياتي كاملة وأنا كنضرب الجفاف ولكن حلال وهاذي صعيبة على بزاف فهاد الوقت
تبسم باستهزاء ولكن نظرتو الحادة وحجبانو المعقودين بقاو هما هما ضار نص ضورة وهو كشوف فيها وكطلع وينزل فيها تمام جاية عندو وعينيها عليه كانو حمرين وكبريو حالفة متبكي تتشوف فيه ببرود عكس العادة دغيا تقلبات تقابلات معاه وهي هازة راسها فيه لأنه طويل عليها مفيكسيا عينيها فعينيه الرماديين لي كن كانو قرطاس يتيريو فيها ولكن متزعزعاتش كيف موالفة وهادشي قراه هو كملات كلامها وبدون أي ذرة خوف لأنه طفح الكيل والكاس فاض:بغيتي تقلل مني وطيح بيا ولكن نسيتي فين ضربت الجفاف وفين لقيتيني دابا كنضربو راه غير فدارك وعند النص فعائلتك ضربتيني فمستوايا بلاما ترد البال أنك راك كلاشيتي راسك إذن مستوايا من مستواك دابا
كلامها كولو كان عندها فيه الحق بغا يتيري فيها بلاما يرد لبال لداك الماضي لي داز تزعزعات فاش شدها من ذراعها وكرز عليها لكن بقات تابثة حيت عرفات راها لعبات عليه كرز عليها ونطق بنبرة جافة كثر:نسيتي راسك يمكن ومعامن كدوي
زينة بنفس البرود:مديري فالشركة ولكن على برا بحالي بحالك
يزيد نيشان معطلهاش:راك واقلة فداري
سكتات وهي تتشوف فيه وتتحس بذراعها غيتقسم فيدو كارز عليها بزاف بلاما يحس كمل كلامو وجرها عندو كثر تتزدحات فصدرو بان خوفها هاد المرة كثر لكن تتكابر باش تبقى تابثة لأن الكاس فاض ورضات لقلبها بزاف كانو قراب لبعضهم بزاف أي واحد يدخل يضرب على هاد الموقف العجيب مول الدار مقنت الخدامة فالكوزينة راه ماشي غايمشي دماغو بعيد رغم كلشي ورغم أنها تعصبات ومقدراتش مزال تخبي مقدراتش تستحمل شوفاتو واخا هكاك خوفها منو تزرع ولا عندها بحال الفوبيا بسبب داكشي لي دوز عليها واخا فوقت قصير نزلات عينيها وهي تتنفس بالجهد بان فيها الخوف وهادشي لبغا باش يعرف أنه مافيها والو ومتبدلاتش نهائيا بلاما تحس حطات يديها على يديه لي كارز بيها ذراعها قصحها بزاف لكن متسوقش بنبرة جارحة كمل على كلامو وعطاها جواب كلامها
يزيد:لا فالشركة ولا هنا ولا فأي بلاصة نت تحت رجلي حياتك كاملة ونت لتحت وأنا غنزيد نهبطك راك مزال مشفتي والو جابتك ليا ليام نديرك تحت السباط ونعفط عليك ونت عارفاني مزيان إلا قلت الحاجة كنطبقها
ديك تحت السباط قالها وهو كارز على سنانو لأنه كان كعنيها وفعلا مزال مشافت والو حيت هادي غير لبدية وشوف شنو شافت منو دفعها بالجهد على لبوطاجي وزاد حاقد خلاها شادة فدراعها وتتشوف فيه غطرطق تتحس بلبكية وموجة ديال العصاب طالعة معاها من رجليها زادت خرجات من باب لكوزينة لي على الجردة تطلع النفس وتتحاول تهدن وتبرد راسها ولكن مكتقدرش كلامو قبيح واخا جاوباتو ولكن عطاها القاصح
دازو ساعتين كانو جالسين فالكوزينة تاهما حاطين لهم آتاي وبلاطو دالحلوة فلكوزينة هنية تتاكل الحلوة وتتهضر:زينة نكملو كيساننا ديال آتاي ونبداو نحطو
حركات راسها بآه وهي هازة حليوة تتاكل بشوية وهي ساكتة
هنية:هاد المسمعين صوتهم شحال غزال
زينة بصوت خافت:آه رتاحيت بزاف وأنا كنسمع ليهم
مليكة وقفات عليهم:عفاك تقدر وحدة تجي فيكم تجمع معانا الكيسان
تطوعات هنية تمشي تعاونهم وزينة بقات تما ناضت تتحل الطناجر وكدوق كتأكد لآخر مرة بلي كلشي هو هداك جاية تتشتف صوت الطالون كتقب الودنين تتقاد فالشال لي لاياحاه عشوائيا على راسها معنكشها ممولفاهش دخلات لكوزينة هي شادة فطرف من جلابتها مطلعة حاجب:زهرة كاس دالماا
زينة ضارت سامية مع شافتها خرجات عينيها ولكن نيشان تفرݣعات بالضحك وهي كطلع وتهبط فيها:هههههههه شكديرييي نت هنا جابوك بلاصة زهرة
زينة بلاما تديها فيها كملات شغلها عادي بلاما يتحرك فيها والو لأن هادي آخر وحدة تهز لها الهم فهاد اللحظة دخل الطريطور هاز بلاطو ديال الديسير مشكل حطو وخرج تبعو المساعد ديالو حط داكشي وخرج حتى هو زينة هزات راسها نطقات وهي تتمسح يديها فطابليتها:مهم كيفما كانت خدمة دالحلال ومغنمدش فيها يدي سوا فلبيرو ولا كنتسخر المهم خدمة وخدمة الكتاف كتهز الدل على لواحد
سامية قلبات عينيها وتطلع وتنزل فيها عجبها الحال تشوفها هكا وفهاد اللحظة كان داخل هاز فيديه لبلاطو ديال الديسير معاون الطريطور عاقد حجبانو وبلاما يشوفيهم بزوجات حطو وجا خارج بلا حتى كلمة لكن سامية وقفاتو:يزيد شوف شكون ههههه الكاتبة المصونة ديالك قلت ليها كن غير تعطيها شي بوسط فلbuvette حسن
زينة فهاد اللحظة تلفتات وخلاتها كضحك عطاتهم بالضهر مقابلة طناجرها سامية تتموت بالضحك وكتسنى يزيد يهضر لكن جمعاتها وبلعات ريقها فاش خنزر فيها كثر ماهو كان عاقدهم دار ليها إشارة براسو زعما خرجي وداكشي لكان نزلات راسها وخرجات وتبعها حتى هو بلاما يشوف جيهة لوخرا
فريدة خرجات فيها عينيها:ياك قلت ليك متحركيش من حداهم جايبة الطيابة تتجمع معاكم ومخلين لكوزينة خاوية
زهرة:حسابلي اللالة نحضيهم غير فالطياب راهم سالاو
فريدة:حط داكشي من يديك وسير لكوزينة وعلم الطيابات يحطو للناس يتعشاو يلاه كن تسمع
زهرة:نعام اللالة سمحلي
فريدة فهاد اللحظة تلفتات عند الناس تتبسم وترحب بيهم كطلب هادشي يسالي على خير حاضية مع ولدها تتحس براسها مضغوطة بزاف تنهدات وهي كطلب ربي يكمل كلشي بخير تدهات بزاف ومبقاتش مشات طلات عليها فلكوزينة ولكن عطاتها ريحة الطياب غزالة وشحال من واحد شكرها
أنيسة جرات روعة:أجي لهنا دابا غتعاودي لي شنو كاين زوج دالمرات وأنا كنشوف يزيد كدخل لكوزينة غنمشي نسولو
روعة:صبري اصاحبتي يسالي هادشي وغنعاودلك اتمشي تسوليه غيضور فيك وغتولي سامعاك ماما تاهي نوليو فشي شوهة قدام الناس
أنيسة الفضول غياكلها روعة فلتات منها بشوية:سيري راه راجلك كعيط لك
مخلاتش لها فين تهضر زادت وخلاتها واقفة متوثرة مين نزل عليهم هادشي تلفتات فاش سمعات صوت راجلها لي جا عندها وهاز ولدهم تبسمات بحالا مكاين والو
زهرة:هز اولدي الله يرضي عليك ودي للرجال
وليد هز الطبسيل ديال الدجاج:الله على رويحة
زهرة:سير وكول تتشبع
زينة كانت تتحاول تعطيهم بالضهر وهي كتحط باش ميشوفهاش وليد حتى دارت آخر لمسة على آخر طبسيل كانو مستفين الطباسل كبار قدامهم وكل واحد فيه خمسة الدجاجات مقادين بقوامهم وباحتراف تهزو الطباسل وخرجو للناس يتعشاو زينة جلسات فالأرض لايحة رجليها ومتكية على الحيط عياو بزاف
فريدة:لا غير حطلهم فالكوزينة وجمعي لهم يديو معاهم بينما يتعشاو الناس نجي نتحاسب معاهم ويوصلهم الشيفور
مليكة حركات راسها باه:واخا اللالة
زادت وخلاتها تترحب بالناس وحاضية كل واحد وشنو غيقول على الماكلة جلسات تاهي تعشى وتتخمم ماشي من عوايدها تخلي الخدم ياكلو فالكوزينة دارها هي الدار لكبيرة ولكن هاديك مستحيل تحط رجليها فقلب دارها ووسط ناسها وبزز مستحملاها فلكوزينة دارت لفورشيط ففمها تبننات مزيان رتاحت نسبيا داكشي زوين وكيفما بغات تنهدات وهي مزال تترحب بالناس من بلاصتها
وليد فمو عامر:كول اصاحبي مالك
يزيد حرك راسو بآه وهو كياكل بشوية عكس خوه كلشي عندو بالرزانة حتى من الماكلة كان كمدغ بشوية عاد كسرط حيت كان تبنن وميكذبش كاينة المعنى تعشاو بعدها وتحط اللحم المشوي والديسير كانو فالكوزينة بزوجات بعدما سالاو وكلاو تاهما زينة كانت تتغسل الماعن وهنية تتجفف دغيا دازو لطناجر لي طيبو فيهم كلا وحدة شدات طنجرة واخا مهمتهم الطياب ولكن ميخليوش الروينة وراهم عيب زينة هادشي تعلماتو من مها مكاينش شي طياب بلا تاويل وهنية كذلك حرايفية فهاد اللحظة دخلات فريدة هي الأولى مطلعة حاجب غير شافتهم خرجات عينيها:شكديرو اويلي لا لا مكاين لاش اللالة هنية
هنية تتمسح يديها:لواه اللالة عيب نخليو ورانا الروينة
فريدة عينيها على زينة لكانت برا على جيهة الجردة محنية على الطنجرة تتحك فيها وشافت فالكوزينة كيف مجموعة رجعات شافت فهنية:تبارك الله عليكم داكشي ديال تحميرة الوجه وهدا هو المظنون فيك
هنية بابتسامة:ربي خليك اللالة فريدة تانتوما الناس الله يعمرها دار والله يزيدكم
فريدة:امين ياربي ويسر ليكم حتى نتوما هانا اللالة هنية
مدات ليها ظرف فيه خلاصهم هنية تبسمات وخداتو:بسم الله الله يخلف اللالة فريدة وان شاء الله متكونش آخر مرة نخدمك
فريدة عينيها على زينة:ان شاءالله زهرة سير عند ديك السيدة علمها بلي صافي خدمتها سالات مكاين لاش كاين لغيجمع
ورجعات شافت فهنية:نطلاقاو فساعة الخير ان شاءالله وشكرا
هنية:ان شاءالله اللالة الله يكثر خيرك
ماشي بزاف حتى كانو لبسو جلالبهم زهرة عطات لكل وحدة صاك فيه الباروك ديال هاد الليلة توادعو مع زهرة ومليكة وخرجو من داك لباب دالكوزينة نيت لي على الجردة تحت طلب فريدة لزهور أنها تخرجهم من تما مبغاتش زينة دوز من قلب الدار غيلمحوها عينين كعرفوها أولهم ولدها خارج والطيلي فوذنيه وكهضر كان وسط الجردة نيت مع تلفت بانت ليه دايزة بعيدة عليه شوية منزلة راسها وكبان فيها التعب بقى كطلع وينزل فيها مطولش فيها الشوفة بزاف ودخل بحالو
هنية:صافي اسيدي غير هنا شكرا
الشيفور عينيه على زينة:تبارك الله عليكم وتبارك الله على لالة العيالات الزينة والحادݣة
زينة خنزرات فيها نزلات وزدحات لباب وراها وهنية كضحك دخلو لحومة كانت بالضبط 00:30 ديال الليل
طلاحت فوق السداري مهدودة عائلتها مزال فايقين بحكم الويكاند حيدات جلابتها بزز رجليها كزدحو عليها عظامها حالة خاصة سكينة حلات الصاك لي جابت ختها تتقلب عينيها خرجو مسعودة طلات عليه:الدجاج واللحم وبلاطو دالحلوة تبارك الله هي شي ناس همة وديال الخير
زينة فنفسها لوكان تعرفي شكون امي تبكي عليا نطقات بتعب:اه امي داز داكشي زوين حمدالله
سكينة:حتى ختي تستاهل غيكونو كلاو صباعهم ورا ماكلتها
مسعودة ناضت عندها عنقاتها وكرزات عليها زينة كانت محتاجة هاد الحضن تاهي عنقات ميمتها وحاولات ما أمكن تكتم دموعها قلبها طايب أخيب نهار دوزاتو فحياتها حسات براسها جفاف تدلات وتجرحات بزاف سمعات الهضرة على وذنيها تعصبات وحزنات فنفس الوقت كتماتها فقلبها متتبغيش تشطن واليديها واخا إلا عاودات غادي تخوي قلبها لكن مستحيل يعرفو مسعودة باستها بحنية:ربي كشوف مكضيعش لي تبع طريق الحلال غادي يخلف لك هاد تمارة ابنيتي
زينة بعدات عليها وهي شادة فيها:ياربي امين اميمتي هادشي لبغيت جبدو الدجاج كولووه جبدو الديسير
مسعودة:تعشينا خليه حتال غدا ونسخنوه للغدا نحط لك نت
زينة ناضت تتمشى بشوية هازة ساكها:تعشيت بغيت غانعس
ناضت لبيت خلات خوتها جبدو الديسير كياكلوه وعاجبهم الحال فيه🥭🍍🥝نادرا مكياكلوه لأنهم عادي ناس بساط بالنسبة لهم التفاح والبنان والليمون كافي مسعودة تاهي جلسات تتنقب معاهم أما زينة بعدما لقات باها ناعس باست راسو جبدات واحد الصندوقة وجلسات حداه حلاتها كانو فيها الفلوس لي تتجمع على ود العملية ديالو جبدات الفلوس لي تخلصات من هاد الليلة كانو1250درهم حطات الف درهم وخدات ليها250 هي باش غتصرف ودوز لي بقى من الشهر علاما تشد أول خلصة حسبات دوك الفلوس كاملين لي جامعة بلي زادت عليهم كانو19000درهم تنهدات مبقاش بزاف لزوج دلمليون وخاصها زوج دلمليون أخرى مزال بزاف ولكن تحاجة ماصعيبة خلصة الخدمة فالشركة غتهز عليها بزاف داكشي لاش صابرة للدل فيها جمعات صندوقتها وهي تتنهد كطلب ربي يسر ليها رجعاتها بلاصتها وخرجات مشات طلاحت فوق السداري مهدودة تتخمم تصدمات فاش قالت لها هنية عطاوهم2500درهم قسموها بزوج رغم كلشي تهلاو فيهم وهنا تعرف أن طينتهم مزيانة غير الشيطان لي دخل بينهم غمضات عينيها تنعس حتى حسات براسها تغطات حلات عينيها كان يوسف خوها تبسم وجلس شد رجليها وبدا كدير ليها مساج بغات تمنعو لكن محتاجاه عيانة وبزاف سكينة ختها جلسات عند راسها تتحك لها شعرها باش تجيب لها النعاس وترتاح هازين لها الهم تاهما
نهار جديد كانت جاية من الحمام هازة سطولها وساكها مزنكة وباينة فيها التحميمة مشات حيدات ريحة الطياب باش تبدا سيمانة جديدة فالخدمة طلعات مع دخلات نيشان لكوزينة شافت فيها مسعودة بابتسامة عريضة:عرفتي شكون جا؟
زينة جلسات وهي سخفانة:شكوون؟
مسعودة بقات تتشوف فيها وهي مبتاسمة بلاما تجاوب زينة خرجات عينيها ونطقات بفرحة:متقوليهااااش
مسعودة وهي كضحك:آه يلاه كخرجااات من عندنا
زينة فهاد اللحظة طارت من بلاصتها مبقاتش ݣاع سخفانة تتجري وتقول ماجريت بغات غير فوقاش تشوفها توحشاتها بزاف وزيد جات بلاما تعلمهم خرجات من دارهم ونيشان مشات للدار القاعية فالحومة كان لباب مردود دخلات طالعة مع الدروج طايرة وتتعيط:ماماتي ماااماااتي ماااماااتي
فهاد اللحظة مع وصلات لوسط الدار تتعيط وتقلب عليها لمحاتها خارجة من الكوزينة مبسمة وفاتحة ليها يديها زينة طارت عليها عنقاتها فرحانة غطير:توحشتك بزاااااف متخايليش قداش توحشتك
أم الغيث معنقاها بحرارة:حتى أنا حبيبتي
كانو معانقين وكبوسو فبعضهم كل وحدة تتحيد الشوق من الأخرى بعدات عليها زينة والفرحة باينة فعينيها لكبريو:علاش ماعلمتيناش بلي راك جاية كن قاديت شوية الحلوة والسفوف
أم الغيث بابتسامة بشوشة:بغيت نديرها مفاجأة هههه
زينة شادة فيها:وطلعات مفاجأة زويييينة
أم الغيث جراتها:خليك ليلي اجي جلسي عاوديلي الجديد راه قالت لي مسعودة خدمتي
زينة جلسات وتنهدات:اه واحد الشركة ديال الحوايج
أم الغيث:وبلاتي نجيب الصينية نقرقبو عليها الناب ونت يلاه جاية من الحمام ميصلاح ليك غير آتاي
زينة:غير خليك اماماتي انا نوض نجيبها
أم الغيث غادة لكوزينة:لا جلسي نت سخفانة راه واجدة
مشات أم الغيث وزينة بقات جالسة فرحانة برجوعها تلقات لها خدات من عندها الصينية وجلسو بزوج أم الغيث وهي تتكب آتاي:ايوا عاودي لي كيفاش عيطو ليك وكداير داكشي الناس مزيانين الاجواء
زينة:عيطو لي واحد العشية كنت يلاه خارجة من عند واحد الجلاخة صافي مشيت كانو محتاجين secrétaireدالمدير فأقرب وقت ايوا مدوزت لا مقابلة لا والو دارو ليا5000درهم فالصاليغ الناس مزيانين غير السلام صباح الخير التيقار هو المهم
أم الغيث:ايوا مبروك الله يسرلك ابنتي وهاي هاي منك للمدير يلالة مهم نت ردي غالبال مكاينة ثقة وراه ميلقاوش بحالك
زينة تترشف من كاسها:داكشي الحمدلله خدمة مستقرة كي الناس وصافي
أم الغيث بطنز:او المدير كداير شي بوݣوص ههههه
زينة بلاما تحس:ومن ناحية بوݣوص راه بوووݣووص
أم الغيث وهي كضحك:هاي هاي على العفرييتة ايوا غير لمبغيتييش ضربي الضربة هههه تانت راك الزين والظرافة وديال الزمان مزوج بعدا داير الخاتم؟
زينة من نهار دخلات عمرها طرحات هاد السؤال على راسها واش فحياتو شي وحدة من غير سامية لي لاصقة فيه لكن دغيا تفكرات شنو دايز عليها فالشركة معاه تنهدات ونزلات راسها ملامحها تقلبو للحزن:صراحة مكتعاملش معايا مزيان غير على ود با ومصاريف العملية صابرة والله أما تاحد ميقدر على داك الدل
مع كملات كلامها غرغرو عينيها قلبها طايب أم الغيث وهي مخرجة عينيها شدات فيها السيدة يلاه بادية وحالها هكا:علاه مالو واش كغوت عليك كعطيك الخدمة بزاف ݣاع مالين الشي هكا مين كشوفو شي حد يلاه بادي غير صبري ابنيتي راك يلاه بديتي كلشي فسبيل ليكسبيغيونص
زينة بداو دموعها كطيحو كان خاص غير تقيسها وطرطق:كن جات غير على الخدمة وتمارة ميغلبونيش مع كلشي مزيان إلا أنا يلاه بديت وقهرني
أم الغيث معجبها الحال:ومالو حمق حݣرة هادي خاصك تعرفي مالو معاك ياكما شي مرة زلق لسانك بشي كلمة عليه قدام شي حد من الموظفين
زينة سكتات شوية وشافت فيها وهي تتبلع ريقها:بيناتنا حساب وحساب خايب كخرجو مني دابا بشوية بشوية
أم الغيث بٱستغراب:شمن حساب عمرك عاودتي لي عليه شواقع
زينة زادت فبكاها فور ما تفكرات داكشي بقات ثاني مدة تتجمع قوتها شافت فيها بعيون دامعة وحمرا نطقات وهي تتشهق وقلبها كتقطع:كان خاطبني فاش كانت عندي 17عام ونهار العقد خليتو وهربت من العرس ومعاودش لقاني
أم الغيث عينيها خرجو بقات غير تتشوف فيها عمرهم قالو لها هادشي ولا عرفاتو عليهم:ونت مين مباغاهش من الأول رفضيه علاش هربتي حتى لنهار الفرح واش ببززوه عليك
زينة بقهرة ودموعها نازلين:ربي لي عالم بيا قداش كنت باغاه وفرحانة حيت غنتزوجو ولكن والله ما لخاطري وحتى دابا منقدرش نعاود ليه وحتى هو مغيبغيش يسمعني
أم الغيث:وشنو السبب دهادشي كامل عاوديلي
زينة تتمسح عينيها:قصة طويلة اماماتي داخل فيها با وعائلتو هدا هو السبب باش خلينا لڤيلاج وجينا لكازا حتى نعاودها ليك من بعد دابا مقادراش ندوي عليها والله قلبي كضرني على لفات بزاف
فهاد اللحظة أم الغيث عنقاتها وهي تتواسيها كانت محتاجة لشي حد تخوي عليه قلبها وتعاود ليه دموعها كنزلو وقلبها كضرها بزاف
أم الغيث:صافي احبيبتي كلشي غادي يتقاد صافي
بقات فيها بزاف وعلاقتهم زوينة من نهار جاو لكازا بانوليها جيران دراوش تقربو من بعض وبحكم أنها ميسورة ومعندها حد كتعاونهم ماديا ومين كتمشي لفرنسا عندها التقاعد ديال راجلها تما ودارها كتجيب لهم لحوايج عزاز عندها كاملين بحكم معندها ولاد بعدات عليها ومسحات لها دموعها وهي شادة وجها بين يديها:سمعيني حاولي شي مرة تشوفي كيف ديري وشرحي ليه أنا معارفاش شنو وقع ولكن شرحي ليه مدام ماشي لخاطرك
زينة داكشي معقد لدوات غادي يتشوه باها وشي وحدين من عائلتو وغينوض صداع خايب ويقدرو ميتيقوهاش ختارت تسكت ويتمسح فيها كلشي هي وزيد أنه حتى الشوفة مكطولهاش فيها بقى غير يسمع لها وموحال يبغي يجبد لي فات بالنسبة لها تخطاها ونساها
أم الغيث ولات باغياها غير تسكت بتاسمات:جبت ليك شي حويجات غزاليييين غيجيوك مع لخدمة وجبت ليك الشكلاط لكعجبك وجبت لدراري حتى هما
زينة وسط حزنها تبسمات:الله يعطيك الخير ديما مفكراني
أم الغيث رجعات عنقاتها:نت راك بنتي لي عطاتني الدنيا غير صبري كلشي ايتقاد بإذن الله
فبلاصة أخرى بالضبط دار الوزاني
كانت جالسة فالجردة دموعها كنزلو وساهية تتخمم عقلها مرفوع والبرد كضرب فيها مخلي دموعها كنشفو على خدودها كانو جايين بزوج باغين يهضرو معاها مع وقفو نطقات أنيسة:ماما بغينا نهضرو معااك اويلي مالك
روعة شدات فيها:مالك اماما ياك لباس
جلسو وشدو فيها بزوج مقدراتش تصبر قدامهم ونطقات بقهرة:توحشت خويا شفت لبارح العائلة مجموعة إلا هو بقى فيا الحال بزاف علام الله بيه مسكين
أنيسة عنقاتها:صافي اماما عفاك خالي الله يهديه راه هو لي قاطع معانا
روعة:وشحال من مرة بغينا نتصالحو معاه هو لي مابغاش صافي اماما عفاك كلشي غادي يتقاد ان شاءالله
فريدة بدات تتمسح دموعها:اعوذ بالله من الشيطان الرجيم الله يصاوب وصافي
انيسة تنهدات:امين ياربي
فريدة:شنو كنتو بغيتو تقولو ليا شكاين؟
روعة ناضت:والو صافي خليك حتى ترتاحي ونهضرو
فريدة:غير قولي جلسي أنا كنسمعك
فهاد اللحظة روعة شافت فأنيسة لي نطقات:علاش اماما جبتي زينة واش حنا ناقصين مشاكيل وفين لقيتيها؟
فريدة قبحات وجها:مسينا عالله معرفتها مين خرجات نجيبها عاشقة فيها راه جات مع السيدة الطيابة جاتني حتى لآخر لحظة مبغيت نخسر والو أما نجري عليها بالحجر والكلاب
روعة:أنا مين شفتها متيقتش كذبت عيني غير حتى بانت
أنيسة:عطيتها واحد زوووج كلمات علاياش تتقلب
روعة:تانا سمعتهم لها مزال كيفما هي متبدلاتش غير طالقة دوك الدموع ديال السينما وهي راه شر منها مكاين
أنيسة:أنا منها هي عرفت أن الزين معندو علاقة بالقلب هاهي آية من الجمال وخبيثة المظاهر خداعة
فريدة:كيفما فقصات ليا ولدي عمرها تشوف النهار الزوين متستاهلوش يجيب لالاها
أنيسة:دعاوينا وصلوها هاهي مزادتش القدام حياتها كاملة كضربها فالجفاف
فريدة:طعامنا وخيرنا يخرج فيها خليها دات معاها الباس معرفنا ولدي شنو كان غيشوف معاها مدام ربي حيدها علينا فيها خير
روعة وسط هاد الكلام كامل كانت تتسمع وساهية من مور المشكل لي وقع لهم معاها كلشي بقى فيه الحال لكن لي تأثر وهز الدقة هو يزيد وبزاف وحتى هي لأنها كانت صاحبتها وبزاف غذراتهم كاملين تنهدات:صافي خليوها منها لي خلقها
فريدة:ديك السيدة لوخرا طيابها غزال ولكن عمرني نعاود نعيط لها صافي لكانت اتجيب لي معاها غالمشاكيل واخا معليها والو جاتني حتى لآخر لحظة والطريطور معندو مايدير لي أما والله متحط رجليها فقلب داري اللفعة لوخرا
أنيسة:صافي نهار ودوزناه ودازت طريفة مشية بلا رجعة
فريدة:ممشات بحالها حتى قلبي بغا يخرج مهم خوك مشافهاش يخ منين خرجات لينا ثاني روناتنا وزادت
روعة وأنيسة شافو فبعضياتهم هما بوحدهم لي عارفين راه خدامة عندو وتافقو ميقولو والو لفريدة باش متفقصش على ولدها هو لي مخدمها هو لكعنيه الأمر بغا يقولها لها يقولها
نهار جديد بالضبط فالشركة جالسة فالمكتب ديالها مبقى والو للاجتماع لي عندهم مع شي وحدين أجانب غيدخلو معاهم فواحد لكوليكسيو ديال العام الجديد من بعد هادي لي جاية زينة كانت فبيروها حتى وقفات عليها لبنت ديال لاغصيبصيو:زينة الناس وصلو
زينة هزات التيليفون:موسيو يزيد الناس وصلو
يزيد:سبقوني لقاعة الإجتماعات وجدي كلشي
قطع عليها وناضت خرجات كانو زوج ديال الأجانب وبالضبط أمريكيين جالسين فبلاصة الإنتظار وقفات عليهم وبابتسامة خاطباتهم بالإنجليزية:تفضلوا معايا
ناضو تابعينها كشوفو فيها بزوج جديدة هادي لأنهم ماشي أول مرة يتعاملو مع الشركة دخلو كان عادل ومديرة التسويق وحتى سامية لقاو عليهم التحية وجلسو كتسناو يزيد زينة بدات تاخد شنو يشربو كاملين حتى وصلات عند الميريكاني:Moroccan tea,please (آتاي مغربي عفاك)
فهاد اللحظة دخل يزيد لقى التحية كيف ديما وجلس زينة خرجات تمشي تجيب لهم فهاد اللحظة واحد من دوك المريكانيين لكانو بزوج مزال شباب نطق وهو مبتاسم:The new secretary is very beautiful(السكرتيرة الجديدة زوينة بزاف هههه)
سامية فهاد اللحظة قلبات عينيها عادل والبقية ضحكو معاه لأن النصارى عندهم عادي كعتارفو بشنو كحسو يزيد كان عينيه على لبيسي مداهاش فيهم ݣاع واخا سمعو شقال رجعات زينة وحطات لكل واحد شنو بغا مع حطات لميريكاني أتاي شاف فيها بابتسامة وكان وسيم صراحة ونطق:thank you so much
بتاسمات زينة بخجل ومطولاتش فيه الشوفة عكسو هو لبقى كعبر فيها من راسها تالرجليها عاين باين ممسوقش لبنادم مع فرقات على كلشي رجعات اللور وجلسات معاهم كيف ديما فالإجتماعات هنا فهاد اللحظة تدفع لباب ودخلات وهي سخفانة:سمحولي هوووف سخفت
عادل:بقالينا غير مختافون ندوزوك فيها
مونيا بعدما سلمات عليهم بليد دغيا جلسات ونطقات:غير سكت
هنا يزيد مع انظمام آخر واحد لاجتماع هز راسو ووقف:نبداو
وقبل ما يبدا نيشان شاف فزينة ونطق ببرود:سيري لبيرو ديالك
زينة باستغراب:نعام وإلا خصات شي حاجة؟
يزيد بنفس النبرة وزاد عقد حواجبو:مخاصنا والو غير سيري
ناضت ونساحبات بهدوء وعينيه عليها مع خرجات شاف فالميريكاني بغا يقرا ردة فعلو مين حيدها قدامو دابا وسيفطها يبقى يتعنب عليها قدام الخلق شركة هادي ماشي برنامج قسمة ونصيب ولا ركن دالتعارف ضار وبداو الإجتماع ديالهم يزيد:هاد الديفيلي لجاي مهم وبزااف غتكون ثاني كوليكسيو لهاد العام لي داخل بعدما غنكونو يلاه خاتمين المبيعات وغنسدو هاد لعام لي غيتزاد فأرشيف الشركة وبالأرباح لي دخلات غتكون بداية جديدة كلشي حاضي بشنو غنسدو العام خاصة من مور آخر كوليكسيو لي كتاسحات السوق لا هنا لا لهيه لعينين غيكونو كثار وكثار هاد المرة وزيد غنشوفو شحال حققنا وشحال تزادينا على لعام لي فات يعني خدمة كثيرة عندنا فوقت لي قصير سمية فين وصلتي وشنو باقي ليك؟
سمية:التصاميم كلشي كمل بقاو غير لمسات أخيرة ويتدفعو للمصنع
سناء المكلفة بالعارضات:أنا ختاريت العارضات وقاديت مع الميكاب آرتيست بقى غير يوصل النهار ديال جلسة التصوير ان شاءالله
عادل:وجدت الديزاين ديال ليزانڤيطاسيو على حسب الألوان لي قالو كاينين فلكوليكسيو الواجهة لغتعرض فالمجلة وحتى الإشهار لي فلانترنيت
يزيد حرك راسو بآه وعينيه فالبيسي:لحد الآن كلشي مزيان
الميريكاني:الهدف هو أننا ندمجو الثقافة المغربية مع العصري بزاف ديال الكليان الأوفياء ديالنا متحمسين لهاد الدفعة لي غتخرج بحكم كلشي كيبغي المغرب
يزيد:جلسة التصوير غتكون قبل بنهار ولكن حتى تصويرة متخرج حتى يدوز الديفيلي نيشان للمجلة
بقاو كناقشو وكخططو تقريبا قادو كلشي من بعد مدة كلشي خرج وبقى غير لميريكانيين والمصممين دالشركة حيت هما الوحيدين لي عارفين الكوليكسيو شنو فيها حيت تاحد مكشوف التصاميم من غير المصممين والمدير تلنهار الديفيلي وهادشي تتعتابر من أسرار الخدمة تفاديا لأي سرقة حيت المنافسة قوية والعطاية كثار
كانت فالبيرو ديالها كطرطق صبعانها وهي معصبة غطرطق وزيد مع قريب تجيها ليغيݣل على سبة واخا متكونش فيها راه تعصب يبقى يحشر فيها قدام الناس ويجري عليها كن تعطلات ولا مكانتش يدير لها حالة زفرات ناضت لbuvetteمشهية لحلاوة والشكلاط بالضبط دارت يدها فجيبها تخشي بزطامها وهي تلقى عشرين درهم عقدات حجبانها مين جات هادي مكديرش لفلوس فالجيب هي ديما فبزطامها تنهدات مركزاتش بزاف يمكن معقلاتش وزيد عقلها مرون فالشركة مدام فجيبها إذن ديالها وقفات تتختار بعينيها الحلاوي دلاكريم أشكال وأنواع ختارت وحيدة ديال الشكلاط:عفاك عطيني هادي
يتبع
التعليقات 0