الفصل 1

وقفة وسط البيت كتلوي فالشال على شعرها و ابتسامة خجولة مزينة وجها لي خالي من اي مستحضر تجميل ، مخلياه على طبيعتو .. سمعات صوت مها لي كتعيط عليها من الكوزينة و مشات بخطوات مسرعة لعندها

الغالية: نعام ا مي

رابحة: هزي الصينية في يديك و دخلي سلمي على الناس .. و جلسي حدايا

الغالية: واخة

دارت شنو قالت ليها و دخلات حشمانة كتسلم على الموجودين .. زوج عيالات و زوج رجال .. و مشات جلسات حدا مها كتفرك في يديها بتوتر و مرة مرة تخطف الشوف فالرجل لي كان مقابل معاها حتا تكلم الرجل الكبير لي جا عندهم مع باها ..

سي المختار: سي حميد .. راك عارف مرادنا من هاد المجية .. و الى كتاب ان شاء الله راحنا طالبين يد بنتك لولدنا خالييد الى قبلتو علينا

حميد؛ مرحبا بيكم و نهار كبير هذا و الى كانت البنت موافقة منزيدكم غير الخير

سي المختار: ما قلتي عيب اسي حميد .. وراه خاليد بحال ولدي و تربى مع الدراري ولادي راه عندو محالو خدام فيه و الدار راك كتعرفها منزيدش نوريك.. المهم نخليو لبنت تفكر على راحتها و يكون خير .. ياله خليناكم على خير

شاف فالمراة لي معاه باش تنوض و هي تغمزو يمشي و بقات جالسة معاهم حتا ناضو الرجال مشاو عاد تكلمات هي

طامو: تعالي ابنتي حدايا

ناضت الغالية بزز عليها جلسات حداها و لخرا عينيها كتفحصو فيها كاملة من ساسها لراسها و تقلب فيها بحال الى باغية تشري حولي دالعيد

طامو: حيدي الفولار ابنتي على شعرك

هزات الغالية عينيها فمها و ملي حركات ليها راسها حيداتو .. طامو غير شافت شعرها و بدات تقلب فيه واش خفيف ولا قوي .. واش طويل ولا قصير .. واش رطب ولا مجعد حتا ركبات ف الغالية العصاب عاد حيدات يديها و باش زادت كملاتها حطاتها ليها على صدرها حتا قفزات الغالية من بلاصتها و وقفات

طامو: مالك ياك لباس

الغالية: اويلي شنو كديري

رابحة: سيري ابنتي لكوزينة

مشات الغالية كتجري و قلبها كيضرب بالجهد بينما رابحة ضارت عند طامو محمرة عينيها

رابحة: اللا طامو البنت راك كتشوفي فيها مخبينا عليك والو ولكن باش تبداي تقلبي فيها هكاك راه بزاف حشومة

طامو: ويلي يا رابحة راه غير كنشوفو فالبنت

رابحة؛ و حتا حنا ندخلو راجل على ولدك يقلبو

تدخلات بنت طامو باش تبرد السوق حيت شافتهم غيشعلو بزوج

فاطمة: لواه اخالتي هه الراجل مكايتعاب غير من جيبو .. و على اي حال راه البنت عجباتنا و غنديروها بحال بنتنا و راه خاليد يتهلا فيها

رابحة: يكون خير ابنتي

طامو: خليناكم على خير هاد الساعة

ناضو خرجو فحالاتهم و رابحة مشات عند بنتها تشاور معاها..

رابحة: اش قلتي و كيف جاك العريس..

الغالية: معرفتش .. و مو جاتني قبيحة

رابحة: لواه ابنتي راه العيالات هكاك دايرين و هو راه ناس مزيانين و كنعرفوهم من شحال هادي و راه غيتهلاو فيك

ياله غتجاوبها الغالية دخل باها لابس جلابة فالمارون و داير تارازا على راسو

حميد: ايوا اش قلتو الناس راه كيتسناو فالجواب

رابحة: لي بان ليك نتا ا حميد حنا معندنا منقولو

حميد؛ الناس مزيانين و الدوار كامل كيهضر عليهم و راه بانين بالبريك البني الجديد و غيتهلاو فالدرية انا بعدا بغيتهم ليها ‘شاف ف الغالية’ اش قلتي ا الغالية

الغالية ‘حدرات راسها و نطقات بصوت خافت’: لي بان ليك ابا هي لي تكون..

حميد تبسم بافتخار؛ الله يرضي عليك ابنتي .. و وجدو راسكم انا نقول ليهم راه موافقين

طلقاتها رابحة بتغريتة و عنقات بنتها..

فالمساء من بعد ما تعشاو كل من الغالية و خوتها و واليديها ناضت لبلاصتها تنعس و قبل هزات تيلي مها بالتخبية و صيفطات ابيل موا .. ما هي غير ثواني حتا بدا التيلي كيفيبري فيدها و دغيا جوبات

الغالية: الو جنات لباس عليك

جنات: اهلا بالزين .. لباس و نتي اش خبارك امورك هانية

الغالية: الحمدلله .. فخبارك راني تعطيت

جنات ‘بفرحة’: مبروووك ههه راه قالتها ليا ماما هضرات مع خالتي قبيلة فالعشية و خبراتها لكلشي.. الله يكمل عليك بالخير و يسر ليك فزواجك احبيبتي والله حتا فرحت ليك

لغالية: ربي يخليك اختي.. ياك غتجي نهار الخطبة

جنات: والله منكذب عليك خاص حتا تعرفو امتا بعدا راك عارفة مع القراية و الدار صعيب عليا نجي ولكن كوني هانية فالعرس غنجي بسيمانة ههه حتا تملي مني و تبغيني غير نمشي

الغالية: واخة احبيبتي ربي يخليك .. ياله بسلامة و سلمي على مالين الدار

جنات: بيزو حبيبة من بعد و نصوني عليك

قطعات معاها و رجعات تسرحات فبلاصتها .. كتفكر فحياتها من هنا للقدام و التغيير لي غيطرا فيها و كيفاش غتعيش فدار ناسها مع راجلها حتا غفات و نعسات براحة

بعد مرور الايام فالتوجاد و الجري للخطوبة .. رابحة مكانتش بوحدها خواتاتها بزوجات كانو واقفين معاها .. فاطمة لي بعيدة عليها كانت غير توصي و تعاون من بعيد و خديجة لي كانت فالمدينة تكلفات ليها بكلشي و جات عندها قبل الخطبة بسيمانة جايبة معاها التقدية من المدينة باش تعاون ختها و بنتها لي حاسباها بحال جنات بنتها .. قادو شي اشكال من الحلويات واخة خديجة ما قصراتش و جابت معاها من الدار .. و فرشو لبيوت باش قسم الله .. البيت الكبير بالسدادر و غشاهم التقليدي و زوج الطوابل كبار .. كلشي من عند ختها لي راجلها داير مكازا ديال الاثات المنزلي منهم التقليدي و العصري و اكيد مغتبخلش على ختها بالفراش و هي كل مرة كتبدل فراش الدار مغايباش هذا قدام دياولها .. و بيت تاني صغير على هداك فرشوه غير بالطلامط و الزرابي فين يجلسو العيالات .. كلشي وجدوه على حقو و طريقو للغذ ليه فين كاينة الخطوبة.. من بعد ما كملو جلسو حدا براد د اتاي يتسراحو من عيا النهار حتا صونا الفون ديال خديجة خت رابحة

خديجة: الو جنات بخير

جنات: الحمدلله و نتوما اش خباركم وجدتو كلشي

خديجة: كلشي مقاد و متول معند بنادم فاش يهضر

جنات: ههه يرضي عليكم راني عارفاكم حادكات ..واش غلا كاينة حداك

خديجة: واييه هي و رابحة جالسين مجمعين و راه حتا ختك سلوى جات هاد العشية باش تحضر بقيتي غير نتي

جنات: راك عارفة كنت مضغوطة بالامتحانات غذا الى قدرت راه غنجي و سلمي ليا على ديك سليوى لي مشات بلاما دوز عندي الخوينزة .. اه و فتحي واتساب نهضرو فيديو نشوفكم..

قطعات خديجة و فتحات الواتساب عاد صونات جنات تاني و بقات تهضر معاهم و شادين فلالة لعروسة لي حشمانة و الحنيكات مزنكين بغاو يطوشو بالدم

جنات: و سلوى نوضي ديري للبنت الوصفات لوجها باش غذا يصبح واجد للمايكاب

سلوى: راه من الصباح و انا معاها باش تنوض نقاد ليها و مخلاتهاش خالتي رابحة قالت ليك تبقا هكاك طبيعية هانتي دوي معاها

تلفتات رابحة عندهم ملي سمعاتهم يدويو عليها و شدات الفون من عندهم تهضر حتا هي

رابحة: ااالو بنتي جنات تي اش خبارك و مالكي ماجيتي مع مياك عندنا راحنا توحشناك

جنات: يتوحشك الخير اخالتي والله ملقيت الوقت غذا و نجي .. و دبا خلي البنت تقاد وجهها الله يحفضك و يستر عليك ما خليها غير على قبلي..

من بعد ترجيات كل من جنات و سلوى خلاتهم و ناضو بزوجات و جنات معاهم بالخط كيقادو و يضحكو و ناشطين مجموعين و الغالية مقداها فرحة غير ضور و تشكر فيهم حيت واقفين معاها و معاونينها..

دارت ليها سلوى كااع الماسكات لي كانت جايبة معاها عاد دهنو وجاههم و ناضو ينعسو باش عينيهم ميصبحوش منفوخين..

صباح يوم جديد فاقو ناس الدوار بكري فطرو و جمعو الحالة عاد دازت سلوى كتقاد لغالية فشعرها و دارت ليها مكياج خفيف .. ما هي غير تواني حتا سمعو الناس جاو و رحبو بيهم حميد و حسن رجل خديجة .. دخلو الرجال للبيت الكبير و العيالات للبيت التاني الصغير عاد جات رابحة كتعيط على لغالية تنوض عند لعيالات

سلوى:اويلي اخالتي فين الدقايقية لي غيجيبو الخطبة ديال البنت

رابحة ‘الفقصة غتقتلها’: مكاين دقايقية مكاين والو حاشو ليا قبيلة ديال بنادم بلا لعب بغيت ليهم غبارة .. خطبتها جايبنها غير في يديهم

سلوى حلات عينيها على وسعهم و عوجات فمها بتمياق

سلوى: اويلي اخالتي و اليوم زعمة ضريب الصداق راه مجاتش .. خاص ضروري اللعب للعيالات باش تفرحو بيها ما بلان ما والو

خديجة: دبا مبقات هضرة خرجو البنت عند لعيالات حتا نشوفو اش نديرو

سلوى: عيطي لجنات تجي نطلقو واخة غير الموسيقى

خديجة: عيطت ليها معرفتها واش تجي ولا لا

الغالية’طلعات معاها التزنيكة و طايح عليها السر’: ب..بلاش غير جلسة عادية و صافي

سلوى:ويلي اصحبتي بغينا نشطحو و نردحو ههه.. سيري نتي انا غير نقاد وجهي و نعس اروى و نجي نجلس معاك

الغالية: و عطيني فولاري نديرو

خديجة: زيدي ابنتي راك غدخلي غير عند لبنات من بعد و ديريه

خرجو كل من رابحة و خديجة كيصليو على النبي و غالية وسطهم حادرة راسها و حشمانة حتا دخلوها للبيت فين كانو لعيالات..

فبيتها الوردي المملوء بالحيوية و النشاط .. واقفة بفستانها الاسود تحت الركبة و فيه سمطة رقيقة فالباج فالخصر ديالو .. قربات من المراية ديالها دارت مايكاب خفيف مكايبانش و جمعات شعرها ديل حصان عاد لبسات صندالة كحلة بلا و هزات صاكها جمعات فيه خصوصياتها و دارت نضاراتها الطبية و خرجات كتمشى وسط الشارع و لي دازت من حداه كتسلم عليه بابتسامة حتا وصلات لاخر الدرب و بان ليها راكب على السكوتر ديالو .. لابس سروال جينز و تيشرت اسود مع كويرة فوقو .. عينيه مراقبينها ملي بانت حتا قربات عندو و يدو كيدوزها على لاحيتو بخفة ..

عينيه مراقبينها ملي بانت حتا قربات عندو و يدو كيدوزها على لاحيتو بخفة .. وصلات باستو من حنكو و شدات من عندو الكاسك دارتو و ركبات من وراه معنقاه من خصرو و راسها على ضهرو و كسيرا بسرعة ما وقف حتا وصل للدوار ..

جنات: و اخيرا وصلنا ههه

فؤاد: ياله سيري دبا و ردي البال لراسك ملي توصلي صوني عليا باش نطمن عليك

جنات: واخة حبيبي بسلامة

جرها من يدها حتال عندو و باسها فخدها بخفة عاد طلقها مشات فطريقها و هي كتفرنس حتا وصلات لدار خالتها .. لقات الباب مفتوح دفعاتو و دخلات كتسمع فالهضرة مجهدة .. دازت ديريكت للكوزينة فين لقاتهم كيحطو فالغذا للناس ..

جنات ‘بابتسامة’:وقيلة تعطلت عليكم هه

رابحة هزات راسها و جات لعندعا كتسلم و تبوس فيها: مرحبا ب جنات لباس عليك

جنات: الحمدلله بخير و مبروك عليكم زواج لغالية

رابحة: الله يبارك فيك ابنتي

خديجة: مالك على هاد التعطيلة حتا قلنا موحالش تجي

جنات: و هاني جيت دبا .. غلا فينهي

خديجة: راها مع الناس دخلي و سلمي عليهم عاد جلسي

جنات: واخة

تمشات للبيت فين كاينين لعيالات بان ليها بنادم بزاف و البز كتير و الصهد بنادم غيكون عرقان .. شافت فيهم بابتسامة صفرا نطقات السلام و دازت كتخطوي حتا وصلات عند الغالية لي غير شافتها و بانت الضحكة على وجهها

لغالية: حبيبتي جيتي .. قلت صافي مبقيتيش تجي

جنات: و انا نقدر ههه راك ختي الحمقة ضروري نحضر معاك

عنقاتها و دازت عنقات ختها سلوى عاد جلسات وسطهم و عطاوها للضحك بيناتهم .. بينما العيالات شادين النميمة فالناس

– شكون هادي لي دخلات

= بنت خديجة اويلي معرفتيهاش

-علاه عندها شي بنت خرا عند بالي كاينة غير سلوى

= لا راه حتا هادي بنتها .. شوفي مافيها صواب دخلات و كعما سلمات و جاية مقزبة هوكاكي متحشم

– بنات اليوم هكاك دايرين و هي ساكنة فالمدينة و باها لباس عليه راه مضسرها

= الله يعفو عليهم هادو هوما لي شوهو ببناتنا حتا مبقا يجي فيهم حد كيقولو كلشي بحال بحال

دودودودو اللسان مافيه عضم و بنادم مكيدخل سوق راسو كلشي يدويو فيه مكايقيلو حد..

حطو ليهم الغذا تغذاو و بنادم كلا حتا خرج ليه من ودنيه الخير موجود و تهلاو فناسهم و كاين لي عمر كرشو و عمر ميكة يديها لولادو .. الحاصول سدو فم بنادم..

من بعد الغدا عيطو على العروسة للاكط .. دارت حجابها و دخلات للبيت فبن كانو الرجال مع العدول .. وقعات و شدات صداقها و تعالات الزغاريد .. نوضو العرسان دخلوهم لبيت بوحدهم باش يدويو و ياخدو راحتهم بينما العيالات جبدو الطعارج و الطارات كيضربو و فرحانين..

كانت جالسة على السرير لي كان متوسط البيت حادرة راسها و هو فجنبها حاط يديه على ركابيه .. شوية هزهم و شد فيدها شابكم مع بعض، شاف فيها مطولا عاد قرب لجبينها قبلها منو و شاف فعينيها

خالد: فرحانة

اكتفات انها تحرك راسها بالايجاب و قلبها كتحس بيه غيخرج من بلاصتو بكترة ما كيضرب بالجهد .. كتحس بالسخونية فحناكها و الفراشات كيلعبو فكرشها مقادراش تهز فيه العين على عكسو لي كان واخد راحتو و كيحدق فيها بكل جرأة و يتمعن النضر فيها .. قرب اكتر و حط شفايفو على شفايفها حتا قفزات و بغات تبعد ولكن كان سبق منها و حكمها عندو كيقبل فيها و هي حالة عينيها بصدمة و يديها ولا كيترعدو و السخفة شداها ما عتقها منو غير الدقان فالباب و صوت جنات كتعيط عليها

جنات: غلا حلي عليا بغيت نهز تيلي ديالي عفاك

ناضت الغالية كطير من حداه هربانة من شوفاتو فتحات الباب و وجهها بغا يطرطق بالحمورية .. شافت فيها جنات باستغراب و حطات يديها على حناكها كتقلب فيها

جنات: مالك هاكا واش مريضة ولا

لغالية مالقات متقول بدات غير كتمتم: ل..لا لا وووالو غي غير

تمات داخلة جنات مقاطعاها حتا وقفات كتشوف ف خاليد واقف خاشي يديه فجيوبو و كيشوف فيهم

جنات: هاء .. سمحووليا قاطعتكم ميسحابليش واش كاينين بزوج .. بغيت غير صاكي و نخرج سمحولي عفاكم

ضارت هزات صاكها و هي كتشوف ف الغالية حابسة الضحكة بينما لالة العروسة مكرهاتش تشق الارض و تبلعها ولات غير كتبحلق .. ياله غتخرج جنات و هي تحنقز عليها الغالية

الغالية: بلاااتي نمشي معاك راه غيبغيو يحنيو ليا ياك .. كيتسناو فيا ياك .. مي قالت ليك عيطي ليها تجي تنقش ياك ياك

هي كتغمز فيها باش توافق كلامها و جنات مغطية وجهها بالشعر و كتموت عليها بالضحك غير حسي مسي .. شاف فيها خالد شوفة حتا تجي بين يدي و كلام اخر عاد تكلم

خالد: خودو راحتكم انا خارج دبا الله يعاونكم

خرج عاد تنفسات الغالية و خرجات تنهيدة مسمووعة لي خلات جنات تخرج ضحكتها بالجهد و عينيها دايزين بالدموع

جنات: واااعععع هههههه اربييي الحبيييب ههههه صدرتيه مسكيين من دبا ههه الله و اكبر هههه اجي اجي عاودي ليا اش كنتو ديرو

الغالية: و صافي اجنات متعيقييش بفف خلينا نخرجو غيكونو كيتسناو

جنات: غنخرجو ولكن من بعد تعاودي ليا هه

الغالية: واااخة غير زيدي عرفاك لصقة

خرجو بزوجات رجعو عند لعيالات و جات النقاشة كتنقش للعروسة من بعد دازت للبنات كل واحد دارت ليه الفال عاد جمعو الحنة و طلقو الشعبي و عطاوها للشطيح و الرديح .. مكاين غير الله يعطي لباباك الصحة حتا سخفو و جلسو بلايصهم و الناس بدات كتمشي بحالها حتا خوات الدار و بقاو غير ناس العريس و ناس العروسة جالسين مجمعين مع بعضهم حتا نطقات طامو

طامو: للا رابحة البنت راه ولات مرت ولدي و راه عاد هضر معايا و قال ليا بغا يديها معاه اليوم

رابحة: ولكن اللا طامو راه مزال ما واجدة حوايجها ما مجموعين و هي براسها ماواجداش دبا حتال من ورا العرس و يكون خير

طامو: لا لا العرس مزال بعيد و انا عروستي بغيت نديها معايا و من الاحسن دكشي يسبق العرس راك عارفة بنادم نيتو ناقصة و خبيتة..

رابحة: يكون خير ولكن اليوم متمشيش مزال ما وجدت ليها والو حتال السيمانة جايا و جيو ديوها

دكشي لي كان تافقو بيناتهم و ناضو تسرحو بحالاتهم.. كل واحد قصد دارو يرتاح من هاد اليوم المتعب .. الغالية و جنات و سلوى مع بنتها اروى دغيا نعسو مع العيا اما خديجة و رابحة فبقاو كيجمعو فالروينة حتا كملو عاد غمضو شوية بينما ادن الفجر و ناضو لثلاتهم و شقاهم تاني..

فاليوم المقبل فاقو البنات معطلين قضاو اغراضهم و دازو يفطرو فالبيت فين كان محطوط لفطور و غير سالاو ناضت جنات مع سلوى سلمو على خالتهم و الغالية و ركبو مع باهم فاللوطو يمشيو فحالهم بينما خديجة فضلات تبقا مع ختها حتا تصيفط بنتها لدارها عاد ترجع..

فالمدينة قدام دار سي حسن و خديجة .. نزلو لبنات جنات هازة اروى ذات السنتين من عمرها كتلعب معاها و تضحك و سلوى هزات ساكها ديال حوايج بنتها و حوايجها عاد مشاو للدار .. و كل وحدة مشات لبيتها ترتاح .. سلوى هضرات مع راجلها يجي من وراها يديها و جنات صونات على فؤاد و بقات كتهضر معاه حتا طاب نعاسها و رجعات تنعس

داز اسبوع فلمح البصر .. كان كلو توجاد بالنسبة للعروسة .. مخلاو ما دارو ليها ها تمريرة .. ها التخليطة ديال العريسات ها الحنة هي و البيض للشعر و الماسكات للوجه بلاما ندويو عليهم لي كانت مكلفة بيهم خديجة و مقصراتش معاها..

فالصباح بكري ناضت رابحة حمات الحمام و دخلات ليه هي و بنتها فركاااتها مزيان حتا لحمها ولا حمر و رطيطب و دوك الخلطات لي كانت دير ليها كل يوم عطاو مفعولهم خلاو ليها لحمها رطب و بيض كتر ما هي بيضة .. خرجاتها ملوية فبينوارها الابيض كبياض جسمها ومشات للبيت عند خالتها فين كانت نوجدة ليها حوايجها .. ملابس داخلية بيضاء و فوقهم شورط لاسق على اللحم حتال للركبة حتا هو ابيض مع ديباردو عاد لبسات فوقهم قفيطين خفيف و جلسات تستاراح قدام كاس ديال الحليب باللويزة و براد ديال اتاي بتقاوتو .. بينما رابحة كملات حمامها و خرجات خلات ختها تدخل من وراها تحمحم و تحيد عليها العيا.. عاد خرجات حتا هي لابسة تشميرة خفيفة تبرد فيها مع الصهد .. جلسو يتحتو على داك البراد و يفقهو ف الغالية ها شنو ديري و شنو لا .. و ينصحو فيها و هي وسطهم غير حادرة راسها و كتسمع و تسجل كل كلمة قالوها ليها باش تعامل مع ناسها .. ناضو طيبو الغذا تغذاو و عيطو على النقاشة جات نقشات ليها يديها و رجليها و جاو لعبو ليها العيالات بالطعارج و الدربوكات فرحانين معاها حطو ليهم لي قسم الله و عشاوهم عاد ناضو مشاو و كل واحد تخشا فبلاصتو ينعس باش يفيق بكري..

اليوم فرحت العروسة متعطيها لحد واخة الخلعة راكباها من راسها لرجليها ولكن متشوقة لهاد المرحلة الجديدة لي غتدخل ليها.. فاقت بكري مشات توضات و صلات و دعات ربي يسر ليها فزواجها و يوفقها فيه عاد مشات عندهم للكوزينة فين كانو جالسين خديجة و رابحة كيوشوشو بيناتهم و غير شافوها سكتو و تبسمو فوجهها

خديجة: تبارك الله ما شاء الله على عروستنا صابحة منورة .. الله يحفضك ابنتي و يحجبك من العين

مشات عندها الغالية باستها فراسها و يديها و عنقاتها كشكر لوقفتها معاهم

الغالية؛ لهلا يخطيك اخالتي كون ما نتي منعرفو شنو نديرو الله يكبر بيك و يخليك لينا

خديجة: لواه ابنتي راك بحالك بحال جنات بناتي بزوج و راك كبرتي قدام عيني متبقايش تقولي هكاك ولا نتقلق عليك

الغالية: حتا نتي راك فمثابتة مي و ربي شاهد عليا

رابحة: ياله تعالو تفطرو راه خوتك و باك فطرو بكريي و خرجو بقينا غير حنا..

ناضو فطرو و جمعو الماعن و دخلات الغالية كتجمع فأغراضها و طايح عليها الضيم عينيها مغرغرين و بحال العقدة فحلقها مقادراش تسرطها .. كتشوف فالبيت لي دوزات فيه 17 سنة من حياتها و اليوم غتفرقو و تمشي لبيت اخر تكمل فيه ما بقا من عمرها .. طاحو دموعها على خدودها كيتجاراو و جلسات على السرير كتبكي بلا حس باش ميسمعوهاش … اما رابحة راه عينيها طابو بكترة ما بكات و خديجة تسكت فيها

رابحة: بغات تخوي عليا الدار و تخليني بوحدي

خديجة: و صافي ارابحة هادي هي سنة الحياة الغالية غتمشي لدار راجلها ماشي بلاصة اخرى وراه غير خمسة الدقايق و تلقاك عندها مسحي دموعك و نوضي براكة من هاد البكا

رابحة؛ راك حاسة بيا اختي .. بنتي درويشة و مكاتهزش فيا العين واخة نغوت عليها و نعايرها مكتجاوبنييش و هاهي غادية لدار راجلها خفتهم غير يتكرفصو ليا على بنتي

خديجة: لعني الشيطان و نوضي براكة من هاد الفال الله يهديك .. دخلي عند بنتك هضري معاها و وصيها كيفاش تعامل مع راجلها راه البنت باقة صغيرة متكون عارفة والو و مافيها باس تشرحي ليها

مسحات رابحة عينيها و عكفات راسها عاد تاجهات لبيت بنتها فين كانت جمعات اغراضها و جالسة كتطوي فالحوايج حتا دخلات مها .. تبسمات ليها و مشات عندها باست ليها راسها و يدها

الغالية: رضي عليا امي .. بغيتك ديما تبقاي هازة راسك و راصية عليا دنيا و اخرة

رابحة: الله يرضي عليك و يفرشك بالرضى و يغطيك بالرضى .. شوفي ابنتي راك واخة تزوجتي راحنا ديما معاك و واقفين فجنبك و لي قاستك قاستنا .. و نبغيك كيفما كتصرفي هنا تصرفي تما .. و كلام راجلك فوق راسك ابنتي باش تاخدي رضاه…

بقات كتهضر هي و ياها و هاد الوقت كانت وصلات جنات عندهم دخلات سلمات على مها و بقاو جالسين بزوج كيهضرو بينما خرجات خالتها و الغالية

جنات: ماما الغالية مزال صغيرة على الزواج ولا غير كيبان ليا

خديجة: مصغيرة والو مكتوبها جاها دبا و هي دبا مكتقراش و غير جالسة فالدار اللهم تزوج دير دارها .. و العقبة ليك حتا نتي نفرحو بيك

جنات: هههه قرييب تفرحي الالة و تهناي من كمارتي

خديجة كتجر ليها: هي كاين شي عريس .. عاودي لميمتك اشيطانة كتخبي عليا

جنات: ههه لا مخبيتش عليك ولكن قلت حتا يجي و تعرفيه بوحدك

خديجة: و شكون هذا و فاش خدام و منين هو و شحال فعمرو

جنات: مفخباريش وليتي خدامة مع سيف الدين محققة

خديجة: و غير بغيت نعرف لمن غنعطي كبيدتي

جنات: سميتو فؤاد و هو شيفور طاكسي عندو 28 عام

خديجة: ايوا لا كنتي بغاه و ناوي لحلال معندي منقول من غير الله يكمل بالخير ولكن ابنتي باك موحال يبغي

جنات ‘جمعات الضحكة’: علاش ميبغيش

خديجة: و انا غير قلت مالكي تسيفتي المهم خلي الهضرة لمن بعد دبا شوية غيجيو ناس الغالسة بغينا نكونو موجودين باش نمشيو معاها .. اه و نوضي جلسي شوية مع الغالية و هضرو بزوج و راني عارفاك كطيري وريها شوية فداكشي البنت مزال صغيرة معارفاش

جنات: هههه دبا بغيتي تحرفي ليا اخلاقي و نبدا داخلة بين العرسان هههه الالة خليها معارفاش هو يقدي الشغل بوووحدو ههههه

هزات خديجة البلغة و صيفطتها عليها: الله ينعل ترابييك الماسخة

مشات جنات كتضحك لبيت الغالية لقاتهم كملو و ناضو العيالات يقديو شغالهم و جنات و الغالية بقاو مجمعين بيناتهم حتا سمعو صوت الطموبيل عند الباب

جنات: كالم اصحبتي مالك صفاريتي ههه راه غير غاجلك قغة عينك هههه

الغالية: ناري شداتني القفقافة

جنات: متخافي مدهشي راه مغيطرا حتا حاجة خايبة اويلي راه عااادي

الغالية: اشمن عادي ياختي تخرجي من دار و دخلي لدار مكتعرفي فيها حد

جنات: و صافي دبا تولفي هادي هي سنة الحياة واخة تبقاي حتا تعياي غتزوجي و دوزي من هاد المرحلة

دخلات رابحة نوضات الغالية عطاتها جلابتها فالباج لبساتها و قدات حجابها و جنات تكلفات بالماكياج لي دارتو ليها خفيف و خرجو عندهم لي كانو فالصالون جالسين كيتسناو فيها .. جمعو شوية و شربو اتاي و دوازو عاد ناضو يمشيو للدار للاخرى يكملو سهرتهم

طامو: المهم راك عارفة ارابحة علاش جينا دبا و بغينا البنت .. الناس مافيهم تيقة و يمشيو يرميو عليها شي سحور ولا شي حاجة اللهم نسبقو هادشي على العرس و ديك الساعة وقت ما درنا العرس غنكونو مهنيين

رابحة: عرفت اختي يكون خير ان شاء الله

خرج العريس ركب فالطموبيل فاش غيمشيو و و الغالية و جنات غاديين كيتحتتو بيناتهم حتا قربو اللوطو .. كانت جنات غتفتح الباب القدامي حتا سبقاتها طامو و ركبات حدا ولدها .. شافت جنات في مها مخرجة عينيها و هي تغمزها خديجة باش تسكت.. ركبات الغالية و رابحة اللور و بقات خديجة و جنات حتا يتبعوهم

جنات: ياله نمشيو فاللوطو ديال سيف راه حطيتها لهيه فالضل

خديجة: اويلي نتي لي جبتيها

جنات: وااايه اماااما اناا و راه مية مرة قلت ليك كنعرف نسوووق و عند البيرمي متخافيش غير زيدي

مشات معاها خديجة و تبعو العرسان حتال باب الدار..

وقفات الغالية قدام الباب مع خالد .. لقاو في استقبالهم خت العريس بصينية فيها كيسان ديال الحليب و طبسيل بالتمر .. وكلها و وكلاتو و مشات جابت العسل في زلافة

ترية؛ هزي احبيبة العسل بصبعك و ديريه الفوق في الحايط

تبسمات الغالية و دارت شنو قالت ليها عاد دخلو تحت الزغاريد ..

دخلو الغالية لبيتها هي و مها اما خديجة و بنتها دخلوهم للصالون مع خواتاتو و عيالات خوتو غير العائلة القريبة

طامو: هذا هو بيتك نتي و خاليد ابنتي.. ها هو غيطلع ليك باليزاتك و بدلي و خرجي عندنا

الغالية: واخة اخالتي

خرجات طامو و خلاتهم بزوجات حتا طلع ليهم خالد الفاليزات ديالها .. جبدات قفطان فالغوز بيبي لبساتو و دارت حجابها و خرجات مع مها جلسو معاهم تغذاو و شطحو و غناو عاد بدا كيخف الجوق و الدار بدات تهذا … وصل الليل و بنادم بدا يديه النعاس نزلاتهم طامو للدار لتحتانية باش تخلي ولدها على خاطرو ولكن مقداتهمش.. شي ناعس على شي و لالة جنات عكسات ليهم حلفات لا باتت فبيت واحد مع العيالات

خديجة بهمس: يعطيك لوبة ما غمضي عينيك و تكاي حتا يصبح الحال مال مك شديتي الضد تصحابي كاينة فداركم

جنات بصوت عالي كيتسمع: و دبا غير طلقي مني نخرج غير للطوموبيل و هااانية مع مخي على رابطاني حداك ياه

سمعاتهم طامو و جات تشوف مالهم

طامو: ياك لباس اختي خديجة واش خاصكم شي غطا ولا شي حاجة

خديجة بضحيكة: لا لا مخاصنا والو غير بنتي بغات تمشي للدار فهاد الليل و مخليتهاش

طامو: و مالك ابنتي جلسي حتال الصباح و سيري لا كنتي مزروبة

جنات وجهها مكيتقسرش: اخالتي مكرهت نجلس ولكن الدار ضيقة و مكاين فين نبات و انا كتشدني الضيقة الى نعست فالزحام منقدر الحبيبة غير سمحو ليا

طامو حسات بيها كتمعني عليها و هي دير ضحكة صفرا: لا موجود التيساع طلعي للفوق و نعسي فالصالون راه خاوي ابنتي

جنات: منتقلش عليكم غير خليوني نمشي

طامو: لا غير ياله نعطيك غطا و نعسي الفوق ياك غير بوحدك مكاين باس

طلعات مع طامو و خلات خديجة بغات تلوح راسها من الشرجم على قسوحية راس بنتها شافت حتا عيات و سكتات و بقات مع ختها كيهضرو

اما الغالية حريرتها حرييرة .. بقات فالبيت بوحدها بقفطانها من بعد ما وصاتها مها و خرجات .. مشات جهة المرايا حيدات حجابها و الصمطة ديال القفطان .. ياله فتحيد القفطان و هو يتحل الباب و رجعات طلقاتو

خالد: لالة العروسة

معرفات باش تجاوب و كتافات تبسم فوجهو

قرب ليها جرها من يدها جلسها فوق السرير و جلس حداها كيلعب فصباعها و يشوف فيها .. و هي مرة تشوف فيه مرة تحدر راسها

خالد: عرفتي من شحال و انا كنتسنا هاد اللحضة .. تكوني مراتي و ديالي و مت ولادي .. ملي كنتي مزال كتقراي فالسادس و كنتي دوزي من هنا باش تمشي للكوليج .. كنت ديما كنبقا تابعك حتا كتوصلي عاد نرجع .. ولا كتكوني خارجة للجنان ديالكم ..شحال من مرة بقيت مراقبك حتا كترجعي لداركم .. مكرهتش كون ديك الساعة خطبتك و تزوجنا ولكن كنتي صغيرة .. صبرت حتال دبا لي كبرتي و هانتي قدامي مراتي و حبيبتي الغالية و راك غااالية عندي و مكانتك كبيرة فقلبي

الغالية كانت غير كتصنط و تبسم حتا حسات بقبلة على جبينها .. هزات فيه عينيها و حتا حط شفايفو على فما و بدا كيقبل فيها و هي مستسلمة مكدير حتا حركة مخلياه هو متحكم فالقبلة او بالاحرى فزمام الامور .. حيد ليها المقبط باش كانت شادة شعرها الاسود و طاح على كتافها .. خشا يديه وسطو كيلعب بيه و حاكم راسها باش متهربوش للور .. نزل بقبلاتو على طول رقبتها و يديه كتسارا ف ملكو كيف سماه هو .. اما هي مكانت عارفة مدير مخلياه هو يدير كلشي و مستسلمة ليه .. ما فطنات براسها حتا لقاتو جردها من ملابسها و هو كذلك .. حلات عينيها على وسعهم و طلقات غوتة حدا ودنو معلنة على فض بكارتها …

عند جنات كانت عاد حطات الفون عند راسها و غمضات عينيها في محاولة انها تنعس حتا قفزاتها الغوتة ديال الغالية خلاها تنوض قافزة و حاطة يدها على قلبها لي كيضرب بالجهد

جنات: هااناري ميمتي هذا ميكون غا فرعها .. هادي ما غوتة ديال الخير ‘تمات غادية جهة البيت و رجعات جلسات فبلاصتها’ اويلي منقد ندق عليهم و هوما فبيتهم .. ميمتي صوتها مبقا تسمع عنداك يكون قتلها الزغبي ..

الليل كامل منعسات ولا شافتو الخلعة طيرات عليها النعاس و خلاتها غير كتهلوس حتا صبح الحال و بدا بنادم يفيق .. ناضت قافزة جمعات داك الغطا لي كان مليوح حداها و هزات تليفونها و نزلات لتحت .. طلات على مها بانت ليها مع خالتها و طامو كيهضرو و خلاتهم و نزلات للطموبيل هزات لبسة من صاكها و طلعات لاقرب طواليط بدلات فيه و غسلات حالتها و مشطات شعرها عاد خرجات مشات للصالون فين كانت مها

خديجة: صباح الخير .. مال وجهك صفر

مشات جنات كتجري تخشات حداها و بدات تسرسب ليها

جنات: الخلعة الخلعة اميمتي كانت غتقتلني

خديجة: نتي فعار الله اويلي مالك

جنات: لبارح حتا بغيت النعس و انا نسمع غوات الغالية خلاني كلي كنترعد

خديجة ضحكات على بنتها و سكتات .. عارفة جنات اي حاجة كتأتر فيها و الخلعة عندها على سبة تقدر غير الى الى شافت فار داز من حداها كتخاف و كطيح ليهم عوجة دكشي علاش مها مداتهاش فيها و خلاتها كتزنزن حدا ودنها و هي بالها غير مع ختها حتا سمعات الزغاريت عاد تبسمات..

الغالية كانت مزال فالبيت حتا تدق عليها الباب لاحت الفلار على راسها و فتحات الباب .. دخلات مها و طامو كيطمنو عليها و هي كتجاوب حتا نطقات طامو

طامو؛ ايوا ابنتي فين صباحك بغينا نفرحو بيه

الغالية وجهها حمر و طايح عليها السر .. شافت في مها و طامو و فركات يديها مع بعض و نعتات ليهم فوق الكوافوزة

مشات طامو هزاتو كتشوف و ضحكات .. طلقات رابحة تزغريتة و عنقات بنتها كترضي عليها و تضحك و جات حتا طامو عنقاتها فرحانة بمرات ولدها

جات خديجة و جنات باركو ليها و خلاوها كتلبس و معاها جنات كتماكي ليها و تعاونها

جنات: كيف صبحتي

الغالية: بخير الحمدلله .. سدي ليا عفاك هاد الحزام اللور

سداتو ليها و قادات ليها وجهها و خرجو عندهم كيباركو ليها و فرحانين بيها..

و هكذا داز نهار غير فالدار و التعاويد حتا وصل الليل و جا وقت الوداع .. خديجة و بنتها توادعو معاهم حيت خاصهم يرجعو فحالهم و رابحة توادعات مع بنتها بالبكا مبغات تفرق عليها حتا تدخل خالد لي كان واقف معاهم

خالد: صافي براكة من البكا وقت ما بغيتي تمشي تشوفيهم نديك و بقاي معاهم حتا تشبعي و مسحي دموعك

باست راس مها و يديها و خلاتها تمشي و بقات هي معاهم بوحدها ما عارفة لا شنو تقدم ولا توخر داخلة فمرحلة جديدة من عمرها و عاد كتستكشف فيها..

دخلات لبيتها كتقاد فحوايجها فالماريو و تستف اغراضها حتا كملات عاد خرجات للصالون فين كانو جالسين خواتات خالد زوجات و بزوجات مزوجين و عيالات خوتو زوج وحدة ساكنة معاهم و التانية بوحدها فدوار اخر قريب ليهم

ثرية: ايوا الالة لعروسة من الصباح و نتي غابرة علينا بغينا غير نجمعو معاك

الغالية: لا اختي غير كنت كنجمع فحوايجي و تعطلت و غير ساليت جيت

ضحكات ثرية و قربات ليها: غير نضحك مع ختي خودي راحتك و متديش عليا كنبغي نقجم مع لبنات و صافي

الغالية: عارفة ربي يخليك اختي

بقاو مجمعين هضرة تجبد لخرى و مدخلين معاهم حتا الغالية باش تطلق معاهم فالهضرة حتا تحط لعشا و تعشاو و كل واحد مشا لبيتو ينعس

هزات الغالية صابون و دخلات غسلات وجهها عاد خرجات دهناتو بكريم ليلي و دارت غلوز من داكشي لي جابت ليها خالتها باش تهلا فراسها .. طلقات شعرها الاسود الطويل و بدات كتمشط فيه حتا حسات بيديه محطوطين على كتافها و وجهو بين عنقها و وجها كيقبل فيها

خالد: بغيتك

الغالية ‘شافت فيه و نطقات بترجي’: مزال مقسحة ماشي ليوم عفاك

نزل لشفايفها كيقبل فيهم و نطق و هو جارها عندو؛ غير بالشوية مغتقسحيش

مخلاهاش تجاوبو و كمل على مابداه..

يوم بعد يوم كيدوزو على الغالية فدار راجلها .. بدات كتولف شوية بشوية على ناسها و طلقات معاهم شوية واخة هي مكتهضرش بزاف و داخلة سوق راسها..

اليوم كان السابع فدارها فاقت بكري كيف موالفة قدات روتينها اليومي و صلات صلاتها عاد خرجات من البيت مشات للكوزينة فين كانت عكوزتها طامو و مرت لوسها كيوجدو فالفطور .. صبحات عليهم و هي تكلم طامو

طامو: ايوا ابنتي راه سبعيام ديال العروسة دازت.. خاصك تعاونينا فشقا الدار راه انا عيانة مبقيت قادة على شقا و فتيحة كتير عليها هدشي بوحدها .. ايوا ورينا حنة يديك و تربية رابحة

الغالية: واخة اخالتي مايكون غير خاطرك

كفدات على يديها و عكفات راسها بالفولارها باش ميبرزطهاش عاد قربات ليهم لقات فتيحة كتوجد فاتاي و القهوى و مشات هي هزات القصرية و طيبات الما و بدات تعجن ها المسمن ها البغرير ها البطبوط ..

مشات هي هزات القصرية و طيبات الما و بدات تعجن ها المسمن ها البغرير ها البطبوط .. ما كملات حتا وجهها ولا حمر و صهدات بالبوطة لي كانت مقابلة .. وجدو كلشي و حولوه للبيت فين كياكلو نزلو كلشي على الطبلة و كل وحدة مشات عيطات على راجلها تجمعو عليه كياكلو .. حتا شبعات لكريشة و ناضت الغالية جمعات الطبلة و غسلات لماعن و نقات الكوزينة مزيان عاد خرجات منها كتنشف في يديها حتا لقات طامو عند وجهها

طامو: اليوم غتجي رابحة عندنا تغذا .. و سيري الله يرضي عليك وجدي لينا شي قصرية ديال الكسكسو بسبع خضاري

محكراتش الغالية و رجعات للكوزينة فرحانة بزيارة مها .. تبعاتها طامو كتحط ليها فاللحم و الخضرة و مقابلاها تشوف طيابها كيف داير .. و حتا الغالية بردات ليها القلب شقاها متول و نقية الحاجة لي هزاتها تغسلها و ترضها لبلاصتها و حس الوسخ ماضايرش فالكوزينة .. بقات تما حتا فورات الكسكسو و سمعات صوت مها داخلة عاد نقصات البوطة و خرجات عندها فرحانة تبوس و تعنق و رابحة حتا هي معنقاها عندها و تسلم عليها بحال الى مدة طويلة ما شافتها

رابحة: توحشتك المرضية و خليتي بلاصتك قدااش فالدار

الغالية: حتا انا ا مي .. كيف دايرا نتي و با و كيف دايرين الدراري بخير

رابحة: كلشي بخير و كيسلمو عليك

دخلاتها للصالون و مشات هي رجعات لكوزينة عمرات اتاي حطاتو هو و تدوازو و جلسات حداها و مرة مرة تنوض طل على الطياب حتا شافتها طامو و نغزات فتيحة تنوض تكمل شغل

طامو: غير بركي ابنتي حدا مك غتكوني توحشتيها ها فتيحة تكمل الطياب

بقات جالسة حدا مها و طامو حتا عيطات ليها فتيحة و ناضت خلاتهم بزوج

رابحة: نتي لي طيبتي

الغالية: اه اليوم نضت نطيب و نشقا قالتها ليا خالتي مع الصباح

رابحة: اممم و كيف كيعاملوك و راجلك مزيان معاك

الغالية: دبا مزيان عمرهم هضرو معايا ولا قالو ليا شي حاجة و حتا خاليد مزيان معايا

دخلات طامو مقاطعة هضرتهم و جلسات تعاود هي و رابحة حتا تحط لغذا تغذاو لعيالات بوحدهم و الرجال حطو ليهم بوحدهم

وصلات ستة العشية و ناضت رابحة مشات بحالها اما الغالية جمعات الكوزينة و سيقات الدار عاد دخلات لبيتها تكات شوية تغمض عينها حتا فيقاتها طامو لي كتعيط عليها.. وقفات كتأفأف و مشات تشوفها لقاتها حاطة المشطة و الكحل و السواك قدامها هي و فتيحة لي غير ساكتة و قليل فين كدوي مع الغالية ..

جلسات حداهم و مدات ليها طامو سواك

طامو؛ هاكي ابنتي ديري هاد السواكة في فمك راه مزياان و دوا للفم

حركات الغالية راسها برفض قاطع: لا لا مبغيتوش كيحرقني ف فمي منديروش

شافت فيها طامو مخسرة سيفتها: اويلي على ماديريهش حكي بيه فمك يولي على من زيناتو

الغالية: لا اخالتي انا فمي كيحرقني منقدرش نديرو كيطيب ليا فمي

هزات فتيحة سواكا رماتها في فمها و كتكحل عينيهل بينما طامو شافت ف الغالية

طامو: ايوا نوضي طيبي لينا لعشا ملي مبغيتي ديري والو .. هدشي لي طبيعي متبغيوه و داك الزواق لي بالفلوس عاد كتبقاو تلبقو فيه

ناضت الغالية مجاوباتهاش دخلات لكوزينة تاني كطيب فالعشا حتا جاو الرجال و حطاتو ليهم..

فمدينة مراكش الحمراء و بالضبط فدار خديجة و حسن .. كانت جنات طالعة للسطح كدخل فالحوايج و تيلي في ودنها كتهضر و تفرنس حتا سمعات الحس فالدروج و هي تقطع و تلفتات بان ليها سيف الدين لابس سروال السيرفيت فالكحل و تيشرت فالغري هاز بكية الكارو و طالع يكمي فالسطح

جنات: المسيخييط اش داكشي

سيف الدين: سووق مك

جنات: لااا سووق با و هااني غادية نطلعو ليك يوريك الكماية كيف دايرا

تمات غادية كتجري حتا حسات براسها مجرورة من شعرها للور حتا تزدحات معاه و يدو ضارت على عنقها مجيفها

سيف الدين؛ و هانتي غتخصري معايا لمك اش جبدك ل حسن خلييه فالتيقار

جنات: و خنقتيني ازبل طلق طلق راه تجيفت ‘طلقها و هي تبعد كتضور فعينيها’ مد واحد 100 درهم الى مبغيتيش الوليد يشوفك كتبخ ولا والله حتا نوققو ليك كيف عزراين

شاف فيها سيف مخسر سيفتو: وليتي استغلالية ياك

جنات: ايوا الواحد هو لي يتنفع معاك هههه

و حيت سي سيف الدين كيحشم من باه و محتارمو لابعد حدود و عمرو شافو هاز الكارو في يدو خشا يديه فجيبو جبد منها 100 درهم مدها ليها عاد باستو من حنكو و نزلات كتحنقز فرحانة دخلات لبيتها لاحت دوك الحوايج لي دخلات و خبات المية فالساك و خرجات تعشا معاهم

حسن: وردة كيف غادية مع القرايا

جنات: الحمدلله راه كنحفض للامتحانات و ان شاء الله خير

خديجة: و قراي الله يرضي عليك مزيان و ديك الساعة لي بغيتيها ديالتك

سيف الدين لي كان نزل و شاركهم الاكل: اصلا هي ديما لي بغاتها كتعطيوها ليها اش مزال خاصها

حسن: بصحتها راه هي الوريدة ديال الدار

خديجة: و سميييتها جناات جناات اسي حسن متبقاش تقول ليها وردة وااه

حسن: انا فعيني وردة و ديما غتبقا وردة

هوما كيتناقشو على السمية و لالة جنات عاجبها الحال و تزادو فيها الضلوع و لقاتها الفرصة المناسبة

جنات: بابا عزيزي .. محتاجة واحد مية درهم غذا

حسن: لاش بغيتيها

جنات: و غير محتاجاها و صافي

حسن: هزيها من المجر لي فالبيت

شاف فيها سيف دين بشك و طمر ما قال والو حتا جمعو الطبلة و كل واحد مشا لبيتو عاد تبع جنات و دخل عليها للبيت لقاها لاحت تيشرت و بقات فديباردور فالكحل بغات تجبد ما تلبس باش تنعس

سيف الدين: جنات اش بغيتي ديك 200 درهم؟

جنات: غير بغيتها و صافي

سيف: البوليكوبات عندك كاملين و فلوس لفاك كل صباح كتشديهم يعني هاد الفلوس خاارجين على القراية ‘ نهض فيها’ لااش بغيتيهم

جنات: ب..بغيت نخرج مع صحاباتي للمول هدشي لي كاين

سيف الدين: و قوووليها من الصباح لاش مجعرة ديلمي ديك الساعة نعطيك الضوبل .. شحاال فيك ديال العكس

خرج خلاها كتغزز فشفايفها بندم و تأنيب الضمير و من بعد هزات بيجامة رطبة لبساتها و دخلات لفراشها نعسات

فالصباح بكري فاقت جنات لبسات سروال جينز قصير و شوميز فالكحل خشاتها فالسروال من القدام .. لبسات كونفيرس و جمعات شعرها كوتشوفال و دار ليبستيك .. نتابهات لورقة مطوية و محطوطة على الكوافوزة و حداها الفلوس هزاتهم و هزات الورقة لقات من خوها سيف الدين ‘استمتعي بوقتك و شري لي بغيتي’ ابتاسمات و خشاتهم فساكها و خرجات من البيت فطرات مع واليديها و نزلات شدات طاكسي وصلها حتال قدام كلية الادب و العلوم الانسانية .. دخلات حضرات لحصتها و من بعد خرجات مشات ديريكت للطاكسي لي لقاتو واقف كيتسنا فيها .. ركبات و قربات ليه باستو من حنكو

جنات: فؤااادي كيف صبحتي بخير

فؤاد: الحمدلله احبيبي و نتي

جنات: بحالك

فؤاد؛ اشمن وجهة

جنات: لداركم .. توحشت خالتي عزيزة بغيت نشوفها كيف بقات

حرك فؤاد راسو و تاجه لدارهم نزل جنات حل ليها الباب و دخلات اما هو مشا يكمل خدمتو .. دخلات و باينة عارفة الدار مزيان مشات ديريكت للبيت فين كانت ناعسة مراة كبيرة في العمر و حداها بنت تكون كبر من جنات .. دخلات عندهم سلمات على البنت عاد نزلات باست راس المراة لي كان مشلول ليها نصفها الايسر كامل مكيتحركش…

واقفة الغالية وسط الكوزينة هي و فتيحة كيطيبو و يتحدثو بيناتهم .. علاقتهم مزيانة مافيها لا مشاكل لا والو .. الغالية سكوتية و فتيحة عاطية بالتيقار كل وحدة شادة تيقارها و مقابلة شغلها حتا وقفات عليهم طامو مخسرة سيفتها

طامو؛ شفت هاد الغذا شرف معاكم .. خفو يديكم راه الدراري قربو يجيو

فتيحة: قربنا اخالتي غير سيري ترتاحي

طامو: نتوما تخليو لي يرتاح و ضحككم واصل حتال عندي .. ديوها فشغلكم و هنيونا

قلبات فتيحة عينيها و مجاوباتهاش و هي تشوف ف الغالية

طامو: ملي تكملي دوزي وجدي الحمام غندخلو ليه نخففو عضامنا

فتيحة بهمس: خفي غير ذنوبك عاد شوفي عضامك

طامو: اش كتكمكمي تما اديك اللفعة

فتيحة: ماقلت والو اخالتي غير نتي السمع بدا ينقص ليك

خنزرات فيها طامو و خرجات بحالها

الغالية: اويلي ههه عنداك تكون سمعاتك

فتيحة: و تسمع انا مالي .. شوفي اختي الغالية راه انا لي دوزت معاها عامين و شفتها على حقيقتها .. راه والله ما تكعدتي معاها من اللول حتا ديرك جفاف تحت رجليها .. انا راه مكرهت امتا يعزل ليا نتهنا من نكييرها راه العصاااب و ركبني معاها .. مصبرني غير راجلي لي مزيان معايا اما كراه طجيييت

الغالية: واش هي صعيبة بزاف

فتيحة ضحكات باستهزاء: هه صعيبة؟ لهلا يورييك نطلب ربي متعيشكش دكشي لي عشت معاها مرت ولدها لكبير كريمة راه هربات ليهم و مبغات ترجع حتا عزل ليها راجلها بوحدها عاد رجعات ليه

الغالية: الله يحفض و يسترنا

سدو الموضوع و الغالية بقا بالها مشطون مع كلام فتيحة .. ساست راسها و كملات طيابها و مشات سخنات الحمام و خلاتو .. رجعات حطات الغذا هي و فتيحة ملي جاو الرجال و تغذاو عاد دخلات طامو للحمام هي اللولة..

طامو: واااا الغالية

جات عندها الغالية كتجري: نعااام اخالتي

طامو: تي فين غبرتي دوزي دخلي حكي ليا راني مقادة نهز يدية

الغالية: و لكن اخالتي راه..

طامو ‘مقاطعاها’: دخلي خلاص راني سخفت هنا

دخلات الغالية على سعدها و وعدها حيدات حوايجها الفوقانيين و بقات بشورط و ديباردور مع الصهد ديال الحمام تخنقات .. هزات الكيس ديال الحكان و بدات تحك لطامو و هي كتشرط عليها حكي هنا .. بركي هنا .. خفي يديك .. تي مالك تقيلة .. الحاصول سخسخاااتها بالمعقول عاد خرجاتها مشللة و مريحة و خففات عضامها كيف بغات اما الغالية عاد تقالت ..

اليد باش تغسل مبقاتش عندها طاحت و راسها ولا كيتبخ بالسخونية و السخفة لي ركباتها .. دغيا غسلات و توضات و خرجات لبسات حوايجها .. دخلات للكوزينة لسانها لاصق و فمها بيض .. لقات فتيحة تما كتشرب

فتيحة: بالصحة .. مالكي خرجتي صفرا ههه

الغالية: سخفت اختي .. عفاك كاس د الحليب نرجع النفس راه تخنقت

جابتو ليها فتيحة هو و الما شرباتهم عاد تنفسات: امالكي ياختي دخلتي فشكل و خرجتي فشكل

الغالية: دخلت حتا عومتها عاد غسلت انا .. سخفاتني ياختي

فتيحة: نوضي تكاي ليك شوية انا غنقابل الدار و هاديك الى بغات شي حاجة نعطيها ليها غير رتاحي

الغالية: واخة الله يحفضك

ناضت دخلات لبيتها دهنات وجهها بكريم عاد نفسات عليها الدرة و تكات في بلاصتها ترتاح .. ياله غمضات عينها و هو يتحل الباب و دخل هو .. لاح الفيست لي كان لابس فوق الكوافوزة و بدا كيبدل فحوايجو .. حلات عينيها كتشوف فيه و رجعات غمضاتهم بعياء بينما هو عينيه كانو غير عليها .. مشا تخشا من وراها و جرها عندو كيبوس فعنقها و حناكها و يديه كيتساراو على سائر جسدها..

الغالية: خاليد عفاك مقادراش دبا عيانة

مداهاش فكلامها و بقا كيقبل فيها و مدورها عندو .. بعدات وجهها عليه و دفعاتو بيدها كتبعد فيه و هو ممسوقش ليها

الغالية: خاليد ماشي دبا .. بغيت نصلي ا خاليد خلي حتال الليل

خالد: انا بغيتك دبا هي دبا ماشي غنبقا نتسنا فيك حتال الليل .. حقي و بغيتو منك

ياله بغات تهضر و سرطات كلامها ملي حط شفايفو على ديالها كيقبل فيها و هي كتبعد فيه ملي مبغاش يحبس استسلمات ليه بضعف و خلاتو يدير ما بغا..

يوم بعد يوم كيدوزو على الغالية فدارها .. دايرا النوبة هي و فتيحة كل يوم كتشقى وحدة و الى كانت شي وحدة عيانة كتشقا ليها لخرا فنوبتها .. اما طامو ف لقات ما بغات الغالية ساكتة و هي طلعات فوق راسها .. و حتا الراجل لي يحامي عليها و يدوي مع مو ساااكت و معلابالوش .. كيعرف غير وقت ما بغاها يجي يلقاها واجدة ليه اما حاجة اخرى لا .. مها كتجي عندها مرة مرة و غير كتشوفها و ترجع .. كتجيب ليها معاها الكسوى و الحوايج علاش قدات و تمشي بحالها .. بينما طامو ممخلياش من حقها فين ما كانت شي شقية ولا شي شغل تنوضها ليه واخة تكون فوسط نعاسها مكيهمهاش لي مهم عندها هو تنصاع لكلامها و دير لي بغات .. هاكذا دازو ثلت اشهر على الغالية مع خالد لي ولا كيجيها بحال كاين بحال مكاينش ..

نازلة الغالية فالدروج كتزرب فتحات الباب .. و غير شافت مها واقفة و هي تضحك و تلاحت عليها تبوس و تعاود

الغالية: مي لباس عليك اش خبارك بخير

رابحة: بخير الغالية نتي اش خبارك .. ضعافيتي يا بنتي تقولي مكاتاكلييش

الغالية: دخلي امي توحشتك .. ماجاش معاك با

رابحة: لا خليتو مشا للجنان و جيت نطل عليك .. طامو كاينة

الغالية: اه راها لفوق طلعي عندها

طلعو بزوج للصالون فين كانت جالسة طامو كتقاد في فراش البراد بالكروشي و الخيط .. شافت رابحة و ناضت سلمات عليها و رحبات بيها بينما الغالية مشات عمرات اتاي و حطاتو هو و تقاوتو و جلسات معاهم..

رابحة: ايوا اختي طامو جيت غير نعلمك بلي عرس بنتي غنديروه فالعطلة ان شاء الله

طامو: اشمن عرس ا رابحة الله يهديك .. البنت تلت شهوور و هي عندنا عاد غنديرو ليها العرس .. و ديك الساعة ملي يجيو لعيالات و يبغيو يشوفو صباحها اش غنقولو ليهم

رابحة: شوفي اطامو نقول ليك من اللول تافقنا بنتي غدييير العرس متجييش حتال دبا و تعكسي ليا .. بنتي غنديها معايا ندير ليها عرسها و نفرح بيها بحال لبنات و نبينا عليه السلام .. بغيتو تجيو مرحبا بيكم مبغيتوش مرحبتين ولكن باش تمنعيني نفرح ب بنتي راه منسمحش لييك .. دهازها غتجيبوه ليها كيف لبنات و نفرح بيها .. بنت وحدة لي عندي و تقولي ليا ما ديريش العرس .. هدشي ما ديالك ا طامو .. و كوني قد كلمتك

طامو: و انا فكرت غير فالبنت ملي تبرز و هي فايتة اشمن عرس هذا

رابحة: الالة واخة تكون حتا والدة غنعرس ليها .. و نفرح بيها و نهزها فالعمارية كيف قراناتها..

طامو: واخة ا رابحة بغيتي تفرحي ب بنتك فرحي بيها ولكن حنا راه مبغينا عراسات بغيتي ديريه ديريه حنا معلينا غير نحضرو و دهازها راه مجموع نجيبوه ليها و نتوما تكلفو بعرسكم بوحدكم

رابحة: ما قلتي عيب.. ايوا حتا انا غنقول ليك ماتجيبي ليا حد من غير خوت العريس و نتي.. انا غنعرض على ناسي و نقد بيهم و الله يخلف .. الغالية نوضي جمعي حوايجك و عيطي لراجلك يجيبك للدار انا نسبقك

طامو: ما عندها فين تمشي .. غتبقا فدار راجلها حتا يقرب العرس و ديك الساعة جي ديها

رابحة: الله يهديك ا طامو راه العرس من هنا ل 2 سيمانات بغيت بنتي تعاوني فالشقا و تجلس معايا حتا نعرس ليها و ديك الساعة راه غتجي لدارها ماشي غتهرب

طامو: حتا يجي راجلها و ديك الساعة تشاور معاه اما دبا مبقات هضرة اطامو

الشمس حارة فجوايه تلاتة د العشية .. كانت الغالية فالسطح محطوطين قدامها المانط و الزرابي و الطلامط كتصبن فيهم و طامو واقفة على راسها مقفدة يديها و تشالي بيهم على الغالية

طامو: و ديك متعوسة ليااان و شتفيي على المانطة مزيان و نتي كتلوي عليا فرجليك

الغالية لي وجهها كان حمر بالشمس لي ضاربة فراسها و الصهد قتلها .. هزات يدها مغطية بيها عينيها من الشمس و شافت ف طامو: ا خالتي راه من الصباح و انا كنصبن راه رجلية و يدية طابو و عييت خلي هدشي حتال غذا

طامو: ياك اصفريطة وليتي كتردي عليا الهضرة هاااه صافي تقادو الكتاف .. والله و متكملي حتا نجي نكمل على والديك تربية تاخر الزماان يخ تفو

حدرات الغالية راسها بغات تبكي قلبها بغا يطرطق و سخفات مبقاتش قادرة تهز يدها .. وقفات كتعمر في الما باش تشلل دوك المانطات و هي تشوف فيها طامو: كملي هدشي لوحيه فوق السلك ينشف حتا نهبط نشوف فتيحة واش هزات السدادر و خملات الدنيا

مجاوباتهاش الغالية و نزلات على الما كتغسل فوجهها و دموعها تخلطو ليها مع الما .. كتحس بقلبها عامر بغات غير تخويه .. من يوم جات لهاد الدار و هي غير تمارة و الشقا من حاجة لحاجة .. مسحات دموعها و وجهها لي ولا حمر و كملات كتنشر فالمانط و نزلات على ركابيها كتغسل فالزرابي و تنشر .. ماكملات حتا ادن عليها المغرب فالسطح .. غسلات حالتها و نزلات لبيتها بدلات حوايجها لي كانو لاصقين عليها بالما .. هزات كريم مرطب دارتو ليديها لي طايبين ليها و خرجات للكوزينة وجدات ليها ما تاكل باش تعتق روحها حتا وقفات عليا فتيحة شادة فضهرها و كتنكر

فتيحة: سيري يا طامو بغيت ربي يطيرك فهاد النهار .. سيري يا طامو بغيت ليك تهريسة من الضهر باش تشدي القنتة .. سيري يا طامو بغيت ليك ..

الغالية: ا يهديك الله افتيحة مالك

فتيحة: اختي ضهري تهرس .. الدار كلها هزيتها بوحدي بغيت ليها موصيبة مبطا عليا امتا حميد يخرجني من هاد القهرة و يسكني بوحدي نرتاح من كمارتها تفووو

الغالية: انا راه النهار كامل و انا مقابلة مع عين الشمس حتا دوخت و يدية طابو بالتصبان

فتيحة: احح هادي تبقا تابعانا حتا تصفيها لينا متبقايش تخرجي للشمس راه غيتحرق ليك و نتي عرسك قرب

الغالية: راه حلفات عليا حتا نكمل كلشي و بقات واقفة عليا

فتيحة: انا غير يجي حميد و ندوي معاه يلقا ليا شي حل اويلي تقهرت معاها

الغالية: الله يدير لي فيها الخير

ادن العشاء .. كانت الغالية فوق سجادتها كتصلي و تدعي ربي يوقف معاها و يحميها و يسر ليها .. جمعات السجادة طواتها و طرفاتها هي و اسدال الصلاة عاد خرجات جلسات معاهم فالصالون كيرتاحو و يتفرجو فالتلفاز يلهيو الوقت

فتيحة: غذا ان شاء الله غنمشي نطل على مي مريضة

طامو: ياك لباس اش عندها

فتيحة: كيف ديما راك عارفاها عيات

طامو: امم و قلتيها لولدي حميد

فتيحة: اييه فخبارو و هو لي غيوصلني اخالتي

طامو: ايوا مزيان

الغالية: حتا انا خاص نمشي عند مي نزورها

طامو: معندك فين تمشي نتي .. بغيتو تمشيو بزوج و تخليوني بوحدي ولا .. شكون غيشقا و يرد البال للدار

الغالية: اخالتي راك عارفة علاش غنمشي و اصلا راه تلت شهوور هادي ممشيت لدارنا توحشت خوتي و با و بغيت نشوفهم علاش كديري هكا

طامو: ايوا الله يقل حياك يالحمارة جالسة تهزي عليا في صوتك محشمتيش!! والله حتا نقولها لولدي ملي يجي .. وليتي كتطاولي عليا غير بلاتي الى ما رباك راه مسميتيش طامو

الغالية: ايمتا طاولت عليك و شنو قلت ليك كااع واش ماشي من حقي نشوف دارنا حشومة عليك

طامو: نوضي درقي كمارتك من قدامي ياوجه النحس باقي ما كملتي حتا العام و بديتي تقلبي فجلدك كي اللفعة

ناضت من حداها الغالية بغات تنفاجر .. دخلات لبيتها و عطاتها للبما و نحييط حتا بردات على قلبها عاد ناضت غسلاتو و تخشات في بلاصتها طاحت دووودة محاساش من كترة العيا دغيا غفات .. ما فاقت غير على يديه كيحركو فيها من كتافها حتا حلات عينيها و شافت فيه

خالد؛ مالك متعشيتي

الغالية: مافياش الجوع بغيت غير نعس

خالد: مالك مع الوليدة

الغالية: ماماليش قول مالها هي معايا .. واش ماشي من حقي نشوف دارنا .. علاش مبغبتوش تخليوني نمشي نزورهم

خالد: حتا يقرب العرس و غندييك انا حتال عندهم ولكن دبا متقدريش تمشي و تخلي مي وحدها و حتا مرت حميد غادية

شافت فيه طالع ليها الدم و تقلبات عاطياه بضهرها بغات غير تنعس و ترتاح

خالد: الغالية ماشي وقت نعاس دبا حتا جيت انا عاد غتنعسي

الغالية: شنو بغيتي؟

خالد: كيفاش شنو بغيت!! بغيت حقي منك

الغالية بعصبية؛ شوف الله يرحم باك .. مك من الصباح و هي تحرت عليا النهار كامل محطيتش قاعي للارض و هي ناشراني نصبن و نخمل و نشر حتا راسي تبخ بالشمس و دبا ملي بغيت نرتاح تنكدها عليا!!

خالد: و شنوو انا نبقا هاكا

غالية: سير خوي عليك سطل دالما برد بيه .. واش مكتعياش!! بغيتيني فالصباح و في العشية مالي خدامة بالضو ولا شنو راااه حتا انا بنااادم ماشي مونيكة باش فين ما بغيتيني نتا و مك تلقاوني واقفة صحيحة .. و دبا الله يحفضك بعد مني خليني بغيت ننعس نرتاح

خالد: لديلمك وليتي تخرجي فيا عينيك عاين باين مبقات حشمة

الغالية: و مالي كذبت عليك قلت شي حاجة مكايناش .. مك غير يصبح الحال و تجي تهلكني بالشقا و نتا وقت ما رشقات ليك تجي ليا ياك لباس كون يسحاب ليا هاكا نبقا فدار با مخاصني خيير ميصدعني حد منصدع حد

هز يدو حتال لفوق و نزل عليها للوجه حتا غوتات .. جرها من شعرها حتا قربها لعند وجهو و هضر مغدد عليها: دبااا مبقيتيش فدار باك و داك الخنات الزايد غير نسايه و الوليدة ديريها فوووق راسك و الى معجبك حال نطح لمك راسك مع الحايط و انا وقتما بغييييتك نلقاك راني متزوجت بيك الا باش طيعيني ماشي تبداي تحلي عليا ف *** بغيتي بالخاطر مرحبا مبغيتيش غنخبط مك حتا تبغي بزز على طاسيلتك

دفعها عليه كتبكي و ناض هو كيحيد فحوايجو ديال الخدمة و يجبد فحوايج نقيين … مخليها كتمسح فنيفها لي رعفات منو و شعرها لي تشعكك ليها ملي نتفها…

فبيت فتيحة كانت متكية فبلاصتها ساهية ف اللاشيء حتا حسات بيديه ضارو عليها

حميد: فاش كتفكري؟

فتيحة ‘تلفتات عندو’:امتا غنسكنو بوحدنا ا حميد راني عييت و تقهرت .. واش ماشي من حقنا نعيشو بزوج و نشوفو ولادنا كيكبرو قدامنا .. دبا كريم كاين فالداخلية و مكنشوفوه على شحاال .. علاش لي منمشيوش نكريو تما و يسكن معانا ولدنا

حميد: قريب ان شاء الله غير نجمع شوية الفلوس لي يقدونا و نتحولو عندو غير بقاي ليا على راحتك ‘باسها فشفايفها و شاف فيها’ مزال ضارك ضهرك

فتيحة: بزاااف .. و زاد ثداعو اليوم ملي زيداتني خالتي نخمل الدار انا و الغالية مسكينة مخلاتناش نجلسو .. بقات فيا ديك البنت مزال عروسة و كدير ليها هكاك

حميد: غير صبرو و صافي راها مي واش نعاير و ناخد سخطها!! راه ملقيت مندير ليها

فتيحة: عااارفة ازماني و بات ولادي .. الله يهديها و خلاص هادشي راه معندها فاش ينفعها .. والله كون ما نتا و ولدي كريم كووون دلحت ميعرفوني فين زدت

حك حميد عينيه و سكت ما لقا مايقول عارف مو قبيييحة و حارة و فمها مبري منها و كتبغي كلشي يكون تحت يدها .. و عارف فتيحة مغتقول هاد الكلام الا و نييت خرجات فيها الشيب ..

الصباح لبسات فتيحة جلابتها و مشات مع راجلها وصلها حتال دار مها اما خالد و طامو كانو جالسين كيفطرو و يتعاودو بيناتهم

طامو: فين لغالية شفتها مفاقت طيبات فطور ما فطرات معانا مالها

خالد: صبحات عيانة امي خليها ترتاح و تكايسي شوية راه لبنت مزال صغيرة

طامو: و علاه انا شدرت ليها هاويلي حيت صبنات ليا جوج منطات باش كنت نتغطا

خالد:و انا غير قلت ليك و راه ليوم بالعشية غنديها لدارهم جاية لربع شهور ممشات تشوف ولديها

طامو:صافي دغيا عمرات ليك راسك و بغيتي تديها و انا شكون يبقا معايا

خالد: و ميي راه عرسها هذاك متمشيش تجعد مع عايلتها راه حشومة صبري هاد يومين حتا تجي فتيحة

طامو: واخة اولدي لي بان ليك

سكتات مباغياش تجبد صداع ما ولدها و خلات هضرتها لراسها بينما هو فطر و ناض دخل لبيتو لقاها مزال ناعسة و حالة فمها شوية منين كتنفس و نيوفها كتشخر بيهم شوية حيت مخنوقين نزل عند راسها كيلعب فشعرها و يبوس فراسها و حناكها حتا عنكشها و حلات عينيها مكمشاهم فيه غير استعقلات و ضورات راسها عليه غضبانة منو بينما هو رجع دورو ليها و باسها على شفايفها: مقلقة مني

مجاوباتوش و هزات عينيها فالساعة بانت ليها العشرة تالصباح و بغات تنوض ولكن منعاتها يدو لي جراتها عندو

خالد: مكنتش ناوي نضربك ا الغالية راك نتي لي عصبتيني حتا هزيت يدي عليك صافي سمحي ليا منعاودش

غالية ‘دموع واقفين ليها عند عينها’: انا مقلت ليك والو راه مشفتيش كيف داز عليا البارح هئ النهار كلو و انا منشورة تما فالسطح و الشمس حرقاتني و يدية ضروني من كترة التصبان كنت باغة غير نعس و نرتاح

هز يديها الصغيورين و رطيطبين حمرين و سخان باسهم من لفوق و من كفها و رجع باس راسها: و صافي دبا متبكيش راه هضرت مع مي و سكتات حتا نتي ماديريش فخاطرك و حسبيها بحال مك رابحة .. و ياله نوضي غسلي وجهك و وجدي راسك في العشية نديك لداركم

غالية ‘مسحات دموعها بكفها و شافت فيه بضحكة نابعة من قلبها’: بصح هه صافي غتديني ياك

خالد: ياله نوضي فطري و العشية نوصلك

ناضت غالية باستو من حنكو و عنقاتو فرحانة نسات شنو وقع لبارح و العياء لي كانت حاسة بيه .. فرحاتها نساتها فكلشي بغات غير امتا تمشي لدارهم

غالية: شكرا اخاليد توحشتهم بزاف

جبد خالد تلفون من جيبو و مدو ليها: هذا ديالك نبقاو نتواصلو بيه ملي تكوني فداركم

شداتو غالية بفرحة:شريتيه ليا؟

خالد: لا مخرتو هه

غالية: شكرا بزاف

ف احد الاحياء الشعبية .. الدراري كيلعبو قدام البيبان و العيالات مجمعين مع بعضهم و شادين النميمة فلي غادي و جاي .. كانت جنات محملة بقفة عامرة تقدية متنوعة من خضر و فواكه و مواد غذائية .. وقفات قدام واحد الباب و دقات زوج دقات عاد وقفات كتسنا حتا تحل الباب و بانت مرة كبييرة فالعمر لي واضح على ملامحها المجعدين .. و طولها لي غادي فتقلص .. بسمات ب لين ملي شافت جنات قدامها لي قربات ليها ضماها لصدرها

جنات: الحاجة لباس عليك

حفيضة: نحمدو الله و نشكروه ابنتي مرحبا بيك زارتنا البراكة

جنات: ترحب بيك الجنة الحاجة فين سي الحاج

حفيضة: راه فبيتو ابنتي عيان مبقات عندو صحة

جنات: الله يشافيه يارب و يطول بعمرو..

دخلات للبيت فين كان رجل المراة ناعس فبلاصتو و باين فيه المرض .. جلسات معاهم شوية و جبدات قدر من الفلوس مداتهم للمراة لي رضات عليها و دعات معاها عاد خرجات من تما عينيها مغرغرين و طايح عليها الضيم .. خرجات للشارع و لقات خوها كيتسنا فيها فاللوطو

جنات: سير للدار التانية

سيف الدين: لمك انا خدام عندك شيفور .. الناس كيرتاحو يوم الحد و انا عاد كنتسخسخ

جنات: و صافي ا سيف من بعد و ندير ليك مساج غير توكل على الله

ضورات وجهها معندها خاطر للهضرة و صدرها منفوخ دموعها فطرف عينيها بغات تبكي .. حس بيها سيف حيت هذا حالها فين ما جات للهنا

سيف الدين: علاش لبكا اجنات

تقول كانت كتسنا فيه غير يقول و تطرطق بالبكا من نيتها كتبكي و صوتها كيتجهد مع كل شهقة و هو ملقا ميدير من غير يضمها لعندو كيسكت فيها حتا تهدنات و بدات تمسح فدموعها

جنات: حشومة عليهم هئ علاش كيتخلاو عليهم ملي يكبرو و يكونو فأمس الحاجة ليهم!! علاش كيسمحو فيهم و يخليوهم يعانيو بوحدهم!!

سيف الدين: كلها و ظروفو ا جنات متحكميش على الواحد

جنات بعصبية: اشمن ظروووف هادو لي يخليوهم يسمحو فواليديهم .. حتا حاجة ما تستاهل تمشي و تخليهم

سكت سيف الدين معرف باش يجاوبها و كمل طريقو كيضور معاها على منازل الناس لي كتعرفهم في امس الحاجة للمساعدة .. واخة دخل عليهم غير حاجة بسيطة كتفرحها هي قبل متفرحهم هاكذا دايرا هي .. الى تبعتي مظهرها الخارجي كتشوف بنت طايشة و حاسة براسها كيف كنقولو .. متكبرة و متعجرفة .. ولكن الى تعمقتي فباطنها كتلقا طفلة هشة و سريعة الانكسار .. حساسة بلا قياس و قلبها بيض…

كملات تجوالها هي و سيف و لصقاتو يتغذاو بزوج .. دخلو لسناك ضمونضاو اش بغاو و جلسو كياكلو فجو لا يخلو من الضحك و التقشاب على بعضهم حتا صونا الفون ديال جنات .. جبداتو كتحقق فالنمرة باستغراب و جوبات: الووو

غالية: الو جنات لباس عليييك

جنات: اااااي غلا هذا ههه اش خبارك بخييير

غالية: الحمدلله ههه و نتي .. توحشتك بزااف

جنات: متكونيييش قدي ههه اش هاد الغبوور من نهار دفنوه ما زاروه لا برية لا تلفوون .. ولا راااااجلك نساك فينا

غالية: لا اختي والله ما هكاك راك عارفة معزتك عندي .. غير مكانش عندي تلفون عاد شراه ليا خاليد

جنات: غير كنضحك معاك احبيبتي و بصحتك تيلي .. مشيتي لداركم ولا مزال

غالية: عاد ناوية نمشي هاد العشية و نتوما امتا غتجيو عندنا

جنات: ماما تقدر تجي بكري باش تعاون خالتي ولكن انا موحالش نقدر منجي حتال الاخير عندي الامتحانات و خاصني نحفض

غالية: معليهش ربي معاك .. المهم هادي نمرتي باش نبقاو نهضرو

جنات: واخة حبيبة مع السلامة

ف منزل رابحة كانت جالسة هي و بنتها معنقاها عندها و يتعاودو كيف اي بنت تسولها على احوالها و كيفاش دايرا مع ناسها .. عودات ليها غالية كلشي بلاما تخبي عليها و ما كان من رابحة غير تصبرها و تدعي معاها و تنصحها كيف اي ام مع بنتها .. من بعد ناضو طيبو عشاهم تعشاو و ناضت غالية دخلات للبيت فين كانت تنعس .. بقات مدة واقفة كتشوف فيه و تبسيمة على فمها ماتنكرش بلي توحشات بيتها و لقات فيه الراحة لي ملقاتهاش فدار راجلها .. كتفيق وقت ما بغات و تشقا علاش قدات بلاما تضغط على راسها و لا يضغط عليها شي واحد .. عكس دار راجلها لي كانت تنوضها طامو تشقا بزز منها .. ماحيلتها لراجلها لي خاص تلبي رغبتو ولا لعكوزتها لي مدوزة عليها الدكاكة .. نفضات هاد الافكار من عقلها و مشات فرشات ليها فين تنعس و تكات فيها مرتاااحة …

دازت ايام قليلة على غالية فدارهم .. كانت كلها توجاد لعرسها .. و جات خالتها خديجة تعاون كيف ديما متخليش ختها بوحدها .. عرضو على الناس و حددو يوم العرس و علمو صحاب الخيمة لي كتقام قدام الدار و اصحاب الديدجي و النكافات .. كلشي تجهز و تعلم بسيمانة قبل .. باغة رابحة تكبر ب بنتها و تفرح بيها .. فهاد السيمانة جات جنات حتا هي لي مخلاتش غالية بوحدها و وقفات معاها بحال ختها .. برعاتها و برعات راسها بالماسكات و الكريمات كل يوم حتا رجعو كيشعشعو بالنقاوة و البيوضة .. فهاد الايام نسات غالية شنو وقع ليها فدار راجلها ولا المعاملة السيئة ديال طامو .. كانت فرحانة براسها و حتا جنات مخلاتهاش بوحدها كانت غير لاصقة فيها و تنصح فيها تقول دايز فيها الزواج .. الدار كانت عامرة بالعائلة لي من القريب و البعيد .. خواتات رابحة و بناتهم و خواتات راجلها و بناتهم و ريحة الشحمة فالشاقور كلشي حاضر و كلشي جاي قبل الوقت مخيم عندهم لقاو غير العطلة و تجمعو كلهم تما .. عاودو حناو ليها و عرضو على ناس الدوار فرحو معاهم و نشطو مجموعين حتال نصاصات الليل عاد كل واحد مشا لدارو العائلة كل واحد فين تلاح .. و من طبيييعة الحال لالة جنات تعكسات ليهم تاني و وقفات ليهم كي الحلقومة

خديجة: جنات جمعي راسك و جلسي للارض راه ماشي داركم هادي

جنات: و تي واخة تقتلووووني ماني ناعسة مع قبيلة البراهش .. يبقاو لبنات لي قدنا و البزاقل يخرجو برا

خديجة بغات تنتف راسها بالفقصة: اوييييلي على غدايدي واش لمك بغيتي ضحكي فيا الناااس و يقول خديجة ما ربات والو

جنات: ربيييتي و عرفتي ما تربيي راه واااقف مع رااجل و نص

خديجة: ترجلك رجلة و تركلك عجلة يالبغلة الكلبة الحماااارة

جنات: صافي اخديجة ندير ليك خاطرك غير سيري فحالك

خديجة: و هكاك ابنتي الله يرضي عليك

مشات و سدات من وراها جنات الباب .. لقات البزاقل منوضين الروبالة فالبيت و لبنات شادين تلفوناتهم مكاينينش هنا

مشات طفات الضو و تخشات حدا غالية كتوشوش معاها

جنات: هضر معاك رويجلك

غالية: اه قبيلة

جنات: اش قلتو و اش قتليك مبقيتيش عاودتي ليا كيف عايشين مع بعض .. اممم كتخبي عليا الرووومانسية يااك

غالية: هههه اشمن رومانسية حتا نتي .. خلي حتال غذا و نعاود ليك كلشي.. الحيوط كيسمعو

جنات: واخة حبيبتي نعسي دبا غذا تابعانا الكوافير و شلااا ما يدار .. تصبحي على الف خير اعروستي

فالصباح بكري فاقت غالية هي و جنات .. توضاو و صلاو صلاتهم عاد جلسو كيفطرو فالكوزينة حدا خديجة و رابحة و ختهم فاطمة لي جات تحضر للعرس .. كملو و ناضو لبسو حوايجهم كيتسناو فالعريس يجي باش يوصلهم للمدينة .. تسناو و تسناو و فين هو الراجل الله اعلم .. صوناو عليه حتا عياو بلا جواب حتا يأسو ولاو خايفين غير مايبقاش يجي و يخليهم منشورين تما..

جنات: تي مال هاد عريس الغفلة مزال ما جا و حتا تلفونو مكايجاوب فيه واخة يكون غابر فقاع قلة يسمعو

غالية: معرفت اختي .. ناري عنداك غير مايجيش و يرضني ضحكة قدام الناس

رابحة: ماحنا على فالك .. سكتي دبا يجي غيكون غير ناعس

جنات: ياله نمشيو والله مانزيد دقيقة كنتسنا فيه

خديجة: تبتي للارض ولا نووض لمك نشتف عليك

جنات: و تي بربي لا تسنيييتو ياله ا غالية

خديجة: و فااااش غتمشيو بعدا راه مكاين مركوب

جنات: غنوض سيف الدين يوصلنا راه جايب طموبيلتو و ناعس فديك الدار مع الرجال

مشات جنات كتخبط فرجليها دقات على الدار لي جنبهم حتا تحل الباب و بان قدامها رجل كبير يكون قد باها

الرجل: علامن كتسولي ابنتي

جنات: عفاك ا عمي كلم ليا خويا سيف الدين قوليه بغاتك جنات

الرجل: واخة ابنتي

دخل الرجل و بعد شوية تم جاي سيف الدين كيحك فعينيه و مزال شاد فيه النعاس .. لابس سروال سيرفيت فالكري و تيشرت بيض

سيف الدين: صباح لله اش بغيتي عندي تاني

جنات: العااار اخويا و البزيزيلة لي مشاركين ما ياله وصلنا للمدينة راه داك الحمار ديال راجلها مزال معطل

سيف الدين مخرج عينيه فيها: وااااش مكتوبة ليا فجبهتي شيييفور ديالك .. سيري عطيني التيقار لا نغلط فيك على بونوبيير

جنات: انا نسوووق غير ياله باش تخلينا ماما نمشيو و نتا كمل نعاسك فاللوطو

سيف الدين: دعيتك لله ياخد ليا منك حقي .. تسناي نبدل حوايجي

جنات: زييد هكاك راه غاديين للدار نجيب شي حاجة ديالي و بدل تم

دخل هز غير سوارتو و بسطامو و خرج ركب يوصلهم ولكن غير فات الباب و هو يبدل لبلاصة نع جنات و رجع اللور مكمل نعاسو مخليها هي تسوق .. كانو غادين كيتعاودو و يضحكو حتا صونا تيلي ديال غالية و جوبات

خالد: هاني جاي فالطريق

غالية: راه تحركنا و دبا فالطريق

جنات: مالك اخويا جاي على حمار عرج .. واخة تكون فالصحرا غتجي بكري

خالد: شكون حداك الغالية

غالية: بنت خالتي .. تبعنا للمدينة راه قربنا نوصلو بسلامة

وصلو للدار و فيقو سيف الدين دخل كمل نعاسو و هوما مشاو لبيت جنات لي كانت كتهز ف قفاطنها و مستلزماتها و تقيس و تقاد

جنات: ناري ياختي خاصني نعمر الجناب باش يتهز القفطان و يجي زوين

غالية: هاكي نسلفك شوي ههه

جنات كتحنزز فيها: وراك ربييتي الطرف اخييتي .. دناب خالد نفعك ههههه

غالية: دبا تربييهم حتا نتي ملي يجي مكتوبك

جنات: هااححح مكرهت امتا يوصل داك النهار ياختي غيحمقني عاد يجي

غالية: واش مزالة مع داك الشيفور ياك

جنات: اييه حوووبي هذاك

غالية: الله يجمعكم فالحلال ياربي

جنات: اميين .. شوفي غنلبس هذا راه فيه البونج ههههه نعمر جنابي ياختي

غالية: هههه والله حتا حمقة اويلي من نيتك

جنات: تي سكتي راه هدشي لي ولا .. غا هوما كيدوخونا باللحية و الشعر هازينو بالشامبو و حنا مدوخينهم بالطروفة ديال البووونج هههه

لبسات الشورط و دارت سوتيامات بونج عاد ديبردور و فوقهم جلابة فالشيبي بطرز خفيف من الفوق و نازل في جنابها .. لبسات معاها صندالة بلا و هزات قفاطنها هوما و صبايغها و مكياجها و خرجو من الدار .. دقات على سيف الدين علماتو بلي غيمشيو و خرجو من الدار غاديين مشادين و كيتعاودو و يضحكو بزوجات حتا وقف حداهم بالطاكسي ديالو .. ركبات غالية اللور و جنات القدام .. باستو من حنكو قدام غالية بلا حشمة و خلاتها هي حدرات راسها محرجة من الموقف و ساكتة حتا تكلمات جنات: فؤاد هادي من خالتي غلا عرسها اليوم .. و هذا فؤاد ا غلا حبييبي

فؤاد ‘بلا يهز فيها عينيه’: مبروك عليك اختي والله يكمل كلشي بخير

غالية: الله يبارك فيك شكرا

سكتات من بعدها مبقاتش دوات .. حتا وصلو قدام الصالون لي كان كبير و غير من شكلو باين العربون .. دخلو بزوجات و جنات منين ما دازت تسلم ها كريم ها سفيان ها مروى ها خديجة .. خلات غالية غير كتشوف فهاد المخلوقة حتا تلفتات ليها كتقدمها ليهم

جنات: هااا العروووسة .. نبغيكم تهلاولي فيها و كلشي يحل فمو فحمالها

سفيان؛ ما شاء الله هي اصلا زوينة ميحتاجش فيها الخدمة بزاف

جنات: نعول عليك ا سفيان دكشي يكون متقون كيف موالفاك

سفيان: متخافيش راك عشيرتنا

جنات: ياله نبداو دبا و شي واحد يتكلف بيا بغيت دكشي خفيف و في نفس الوقت تقيل فهمتيني ياك و شعري يكون مجموع و في نفي الوقت يبان حر فهمتي

دوخاتهم بمعنى الكلمة خلاتهم غير كيستغفرو معاها و يطلبو السلاك بينما غالية كانت مطيعة للبنت لي كانت مقابلاها

غالية كانت مطيعة و مهدنة مع البنت لي كانت كتقاد ليها .. خلاتها ديير خدمتها على راحتها ما تشكات ما تشرطات .. عكس جنات لي ضاسرة عليهم ما خلات اش طلبات .. لا بغيت هادي لا هدشي معجبنيش لا بدلو هاد اللون .. لي شافها يقول هي العروسة ماشي غالية .. كملو المايكاب و الشعر بزوجات و دازو يلصقو الدفار و يلبسو باش يجي سيف الدين و العريس يديوهم

جنات: شوفي ا مروى نتي غتمشي معانا باش تقادي ليها شعرها مع كل لبسة واخة؟ و متخافيش راه غير نساليو غيجيبك سيف الدين حتال داركم

مروى: واخة الالة غير سربيو لبيو راه مبقا والو و يجيو رجال

كانت تما حتا النكافة لي غتقابل غالية .. دخلات معاهم لبيت تبدال و بدات كتجبد فالتكشيطة ل غالية تلبسها و جنات كانت لبسات قفطانها فالخزي منبت من الصدر لي عندها مبندر و عامر .. و فيه فتحة فالوسط واصلة لركبتها .. لبسات طالون معاه و جلسات كتسنا ف غالية تكمل لباسها حتا سمعات الكلاكصون ديال اللوطو و خرجات تشوف شكون وصل .. و يا ريييتها ما خرجات .. داك الصبر لي كان عندها طاار ملي شافت خالد جايب طموبيل لي كيديو فيها البهائم للسوق باش يبيعوهم .. ريحتها عاطية من بعيد و شكلها ما ديال عراسات .. خرجات عينيها و قربات ليه باغة تخنقو ب يديها

جنات: اويلي اش هدشي واش كتحماق علينا ولا شنو؟

خالد: مفهمت

جنات: اوييلي على غدااايدي هادي طموبييل تمشي فيها عروووسة ما توصل حتا تخنق غير بريحة البهايم

خالد: شوفي االاخت هادي هي لي كاينة منين غنجيب ليها انا طموبيل زينة .. بغيتو تمشيو مرحبا مبغيتوش بلاش

جنات: سيير حيد هاد الشوهة و كري طموبيل تكون زينة ندوزو بيها العرس

خالد: ما عندي باش نكري ها العار نتكافى غير مع راسي .. و نتي دبا اش دخلك مالو عرسك نتي لي كتبومباي من الصباح .. فينهيا الغالية نديها و نمشي فحالي

جنات: يديك العام ان شاء الله تفوو على كمارة وجه المحطة يخ

دازت كتبخ بغات تنفاجر و صونات على خوها هو لي غيعتقها .. و دكشي لي كان جا سيف الدين باللوطو ديالو مغسولة و مزوقة و مكتوبة عليها حفل زفاف غلا و خالد .. ركبات النكافة القدام و غالية و خالد و جنات و مروى اللور غاديين مخنشين فبعضهم كي الفراخ و جنات عاقدة غوابشها ما عاجبها حال .. غير وصلو حدا الهدية ديال العروسة لي كانت بالطبالة و الدقايقية و هي تنزل جنات و مروى باش يخليو الكاميرامان يصور العرسان …

تخشات جنات هي و مروى مع العيالات كيشطحو و يضحكو بزوجات و الدقايقية كيضربو و يغنيو فالطريق حتا وصلو لقدام الدار ديال العروسة عاد حبسو و دخلوهم ضايفوهم و العروسة دخلوها للبيت لي مخليين ليها فين تبدل و كانت سبقوها البنات لي مع النكافة موجدين الكساوي لي غتلبس ..

تهزات الغالية في العمارية و ضارو بيها دورة شرفية على المعروضين لي كانو كيلوحو عليها فالورد و هي فرحانة كتسلم عليهم و تضحك .. عاد حطوها فالبرزة جلسات حدا خالد لي كان غير مهتم بهاد العرس اصلا و غير داير ليها الخاطر مكرهش امتا يسالي هدشي .. على عكس الغالية لي كانت فرحانة براسها و بواليديها لي كبرو بيها فهاد النهار … داز العرس على احسن ما يرام كلشي نشط و كلشي شطح حقو و جلس يستاراح .. بنادم كلا و شبع .. و نشط و فرح .. و نسا الهم .. و حتا الديدجي كان ناشط مع الغرامة لي غير كتشاير عليهم … ما كمل العرس حتال نصاصات الليل بحكم دارو العرس في النهار و تفرق المجمع فالليل كل واحد مشا تلاح ينعس بينما العروسة ركبات مع راجلها و مشات معاه لدارهم مخلية مها كتجمع ليها فحوايجها و الهدايا لي جاوها فالعرس و دكشي لي غتدي ليها فالصباح مع فطورها..

اما جنات كانت غتنعس واقفة بكثرة العيا .. مشات ديماكات وجهها و سرحات شعرها عاد بدلات حوايجها و تلاحت تنعس ماحاساش بشنو ضاير بيها..

فاقت جنات مع العشرة ديال الصباح بالصداع لي كان فالدار .. مشات غسلات حالتها و بدلات حوايجها و مشطات عاد دخلات على العائلة لي كانت كتفطر مجموعة و جلسات معاهم دايخة بالنعاس و عينيها مبوقين و منفوخين صبحات عليهم و هزات تلفونها كتبقشش فيه و تلعب حتا عيطات لها مها .. عطاتها كاس د القهوى قاسحة باش تصحصح و مسمنة فطرات بيها و خرجات جلسات برا كتهضر مع الغالية لي كانت فبيتها لابسة قفطان فالشيبي مطرز و بسميطة رقيقة و شعرها جامعاه الفوق على شكل كعكة مرخفة .. تحل عليها الباب و دخلات طامو بعجاجتها كتشالي في يديها: معاش غيجيو فاميلتك

الغالية: مزال معطلين اخالتي راه عاد كيوجدو فاافطور

طامو حطات يديها تحت صدرها كتمص فحناكها: ايوا ابنتي راه خاصهم يجيبو فطورك مكمول باش يشوفوه الناس

سكتات الغالية مقالت ليها والو و هي تخرج عند بناتها و عيالات ولادها كيشقاو و يجمعو فالدار و البيوت فين غيجلسو العيالات ..

هكذا داز نصف النهار غير فالتوجاد فدار رابحة لي كانت كطيب ما تدي لبنتها و خواتاتها كيغلفو فالحلوى و الفاكية و لي كملوها يحطوها فالطيافر لي غيديو معاهم .. حتا سالاو و جمعو كلشي و مشاو لدار العريس باللعب و الغنا حتا وصلو قدام الدار .. لقاو طامو و بنتها الكبيرة في استقبالهم و دخلوهم للصالون عاد مشاو عيطو على الغالية خرجات عندهم جلسات معاهم و العيالات عطاوها للغنا و الشطيح و الضرب على الطباسل و الطعارج و القعدة محطوطة حداهم كيركزو فوقها .. تقدم اتاي و الحلوى للناس و من بعدها تحط الغذا لي كانت جايباه معاها رابحة على قبل الناس لي جاو معاها .. هكا كمل اليوم حتال الليل و ناض بنادم تسرح فحالاتو و الغالية دخلات لبيتها هي و جنات لي كانت غادية راجعة فحالها و بغات توادع معاها .. ياله جلسو كيطرفو فدهازها بزوج و هي تدخل عليهم طامو هازة زوج مخاد في يديها و لاحتهم على الغالية لي شداتهم و حطاتهم على السرير

طامو: هاكي هاد المخاد و راه جوج باقين برا .. راه جابتهم ليك ختي فالعرس

جراتهم جنات تكات عليهم جاوها غلاض و تقال و هي تشوف ف الغالية كتفرنس

جنات: اهياناري هادو مخاد ولا ياجورات ههه تضربي بيهم عدوووك ماينوضش ههه .. شوفي خليهم هنا باش غير يعاير خالد ولا يقول ليك شي كلمة ماهياش و هزيهم نزلي عليه بيهم حتا يفقد الداكرة هههه

الغالية: هههه اربي منين كتجيبي هاد الافكار الحمقة

جنات: غير كنضحك عنداك ديريها بصح نوليو تابعينك فالكوميسريات هههه

الغالية: ايوا الله يعطيك عقل .. راك شرفتي و مزال ما درتي عقلك

جنات: خليييتو ليك الواحد هو لي يضرب الدنيا بركلة و يعيش الييز … اجي بعدا كعما بقيتي عاودتي ليا هاد طامطوما مكاتهضرش معاك زعمة

الغالية ناضت سدات الباب و رجعات جلسات حداها: لهلا يوريك ياختي خرجات فيا العجب راه غير صابرة ليها

جنات: ياك لباس عاودي ليا

بدات الغالية كتعاود ليها و جنات مسكتاتش من الدعاوي عليهم مخلاتش غير لي نسات من سبان و معيور حتا ولات الغالية كتسكت فيها بزز

الغالية: واعديني هدشي متقوليه لحتا واحد .. مبغيتش بنادم يدوي عليا و انا عاد عروسة غيقولو انا لي ممزياناش

جنات: يتقلو فعمرهم ديك الشرفة نهار اللول مارتاحيتش ليها من وراها الغذر.. اجي علاش ما تقوليش لراجلك يعزل ليك و سكني بوحدك مايصدعك حد متصدعي حد

الغالية: منضنش يبغي ولكن دبا نقولها ليه على الله

جنات: يكون خير احبيبتي و هانتي دبا دخلت ليك الواتساب و الفايس و الانستاغرام فاش نهضرو و ديك الساعة قولي ليا اش درتي .. ياله نخليك دبا غايكون جا سيف الدين يوصلنا بسلامة عليك احبيبتي و تهلاي ليا فراسك

دازت سيمانة على الغالية من بعد العرس .. رجعات المياه لمجاريها و رجعات طامو توقف عليها .. ممخلياهاش ترتاح و تقول عيب و حشومة مرت ولدي و كيف بنتي .. مكاين غير اراك للكرفي .. كتزيد فتيحة و الغالية يهزو الطحين بزوج يطلعوه يغسلوه و ينقيوه و تصيفطو هي يتطحن و تعطي منو لبنتها نقي غير هزي و عجني .. اما عيالات ولادها والله ما يطيح فكرشهم الى ما ضربو عليه تمارة .. حتا حميد لي كان ينوض ليها و تحشم منو مشا يخدم في بلاصة خرا باش يجمع الفلوس و يعزل لمرتو و خلاها هي معاهم صابرة على عكوزتها حتا يحن الله ..

خرجات الغالية من الدوش محمحمة و حنيكاتها حمرين بالسخونية .. لبسات حوايجها و صلات صلاتها لي فاتتها عاد تكات تستاراح من عيا الحمام .. حتا سمعات تعياط طامو و هي تقلب عينيها بعدم صبر و ناضت تشوف اش بغات

الغالية: نعام ا خالتي

طامو: تي فين غبرتي خليتي بلحوحتي غتخرج بالتعياط

الغالية: كنت كنصلي عاد كملت

طامو: ياله دخلي حكي ليا راه حكان ديك عوجة الفم ديال فتيحة مكنحملو

الغالية: اخالتي غادية نطيب دبا و مافياش راه عاد خرجت سخفانة مقادرة حتا نهز يدي بقا غير نحك

طامو خرجات عينيها فيها بغات تاكلها: ياك ابنت لحرااام كتقوليها ليا فوجهي .. خرجو رجليك الشواري و بغيتي تحكمي عليا ادويي اديك الصفريطة صافي تقادو لكتاف ولا قد القب قد السطل يالمجوعفة .. جبناك غير من وسط الروث و وليتي تحلي عليا فمك .. والله كون ما كنت انا لانتي مزوجة بولدي خاليد .. ولكن غلطت نييت ملي جبتك نتي .. نهار اللول مبينة لينا وجه و دبا بنتي بوجه خوور كي اللفعة الله يغرق ليك الشقف يالمنتوفة ..

الغالية: خليني محتارماك ا طامو صافي راه هدشي طلع ليا فراسي انا ماجيتش عندكم ترضوني خدامة عليكم .. فدار با راه داك الكاس اللخر مكنتش نهزو و دبا وليتو دايريني حمار و راكبين فوقي .. صبرت حتا عييت و الصبر كيضبر .. واش ماكتهديش .. ربع شهوور مدوزاها عليا حارة و مزال زايدة فيه .. انا مبقات ليا هضرة معاك .. حتا يجي خاليد و ديك الساعة يا يعزل ليا ولا يرضني لدار با حسن ليا انا مبقيت قادرة نصبر كتر من هاكا

دازت فيها و رجعات لبيتها خلاتها غير كتبرقق فعينيها مصدومة من الغالية و منين جابت هاد الهضرة و هي لي عمرها رفعات حتا صوتها قدامها .. بقات كطلع و تهبط ليها فصدرها ما راضياش على شنو قالت ليها .. كفضات على يديها و مشات هاجمة عليها لبيتها فتحاتو بلا دقان و تلاحت على الغالية جراتها من شعرها خرجاتها لبرا كتنتف و تشتف عليها و تعاير و الغالية تحتها كتغوت و تدفع فيها لكن لقاتها مزال صحيحة و غلبات عليها .. جبدات ليها شعرها كلو في يديها و الوجه نزلات ليه ب دفارها حتا كينقز الدم اما الركيل فبلاما ندويو عليه .. مخلات فيها حتا عضم صحييح غير كتبغي تهز الغالية يدها باش دافع على راسها كتلقاها سبقتها و نزلات عليها حتا تهدات هي و طامو ما عيات .. كتخبط و تعض و تقمش و فمها ما سكتش من المعيور: يا الفاجرة يا الموسخة يا المعفونة يا عيفة لبنات .. جبتك من وسط العفن و تحلي عليا فمك والله ليك لا كانت الى ما قتلتك ب يدية منتسماش طامو يالكلبة..

ما عتقها من يديها غير فتيحة لي كانت خارجة تقدا و رجعات .. طلعات كتجري ملي سمعات صوت طامو كيعلى و هي تصدم في الغالية تحت طامو و هي نازلة عليها بالعصا حتا مبقات تحركت .. غوتات بصدمة و مشات جرات طامو من عليها و بدات كتفيق ف الغالية

فتيحة: اويييلي اش درتي للبنت .. ناري بغات تقتلها الكافرة بالله .. الغااالية وااا الغااالية حلي عينيك ..

ناضت كتجري للكوزينة جابت الما كتخويه عليها و تفيق فيها بينما طامو دفلات عليها و مشات فحالها بحال الى مدارت والو و هي لي كانت غتقتل البنت على شوي

فتيحة: اويلي على العقيسة كيف دارت للبنت .. الغااالية فيقي اختي حلي عينيك

بدات الغالية كتنين و تحل ف عينيها و الدموع مغشين ليها الشوف .. طايحة الضبابة على عينيها و لحمها كتحس بيه كيوزوز .. بدات تبكي و تغوت و شهقاتها كيخرجو مجروحين من حلقها .. تبكي و تقول ما بكات على زهرها و فين لاحها .. حكرات عليها و دارت فيها ما بغات، ما قالت راها مزال صغيرة و لا راه عندي لبناات و كيف نبغي لبناتي نبغي لبنات الناس .. كلاتها ماااكلة و مخلات ليها جهد باش تحرك .. نوضاتها فتيحة كتحصر على حالتها كيف رداتها و دخلاتها للبيت ديالها..

فتيحة: اويلي مالها تلاحت عليك كي الهيشة اش وقع معاكم

الغالية: ما درت ليها والو هئهئ والله ما قربت ليها .. خرجت من الحمام و عيطات ليا ندخل نحك ليها ملي مبغيتش ناضت دارت ليا هاد الحالة

فتيحة: الله يا ختي وجهك كلو جراتو ليك يعطيها الهرس ف يديها .. نوضي غسلي وجهك و تعالي ندير ليك واحد البوماضة تحيد ليك هاد ليطراس

الغالية: غير سيري انا غنديرها بوحدي

خلاتها فتيحة على خاطرها مبغاتش تضغط عليها و مشات لبيتها اما الغالية ناضت على سعدها غسلات وجهها و جمعات شعرها لي كتحس بجلدتو كتوعتها من كترة ما جراتو ليها طامو .. هزات تلفونها و دوزات نمرة مها و دموعها مزال على خدها .. غير سمعات صوت مها و هي طلق شهقاتها حتا خلعتها

رابحة: الووو الغالية .. اويلي مالك كتبكي اش طاري ليييك .. و تي دوي معايا اش واقع معاك

الغالية: مييي جي ديني بحالي هئهئ منزيد نهار هنا هئهئ

رابحة: اويلي مالكي اش عندك .. كيفاش نجيبك اش واقع فهميني

الغالية: جي لعندي و نشرح ليك اش واقع

قطعات معاها و كملات بكاها .. بقا فيها الحال و قلبها ضرها من هاد الحكرة لي حكراتها .. تبكي و تنين و تمسح فخناينها حتا تبوقلو عينيها و وجها ولا حمممر .. عاد سمعات الدقان و صوت مها كتدوي مع فتيحة .. مسحات دموعها بكم بيجامتها و خرجات عندها تشكي عليها و تخوي قلبها على صدر مها .. هاد الاخيرة لي غير شافت وجه بنتها شهقات و حطات يدها على صدرها مخرجة فيها عينيها

رابحة: الله يربي الله شكون دار فيك هاد الحالة

الغالية: طامو امي طامو هئهئ تكرفصات عليا و مخلات فيا غير لي نسات

رابحة كتحرك راسها برفض: لا لا طامو ما ديرها .. اوييلي و الوجه منزل كلووو .. و علاش تا ديير هاكدا

الغالية بعصبية جرات شعرها نزلاتو تا هي كتغوت؛ واااش دبا غتكذبييييني .. سيري سولييييها واش هي ولا لا هئهئ .. ها فتيحة شاهدة عليها راه هي لي فكاتني منها

نزلات طامو عاكفة راسها و حواجبها مجموعين وسط جبهتها المجعدة: اييه انا لي درت هكاك و سوليها هي اش دارت ليا

رابحة: ياك اخيتي و مالك على هاد الحالة مالها اش دارت لييك كااع

طامو: قللات عليا الادب و نقصات مني و عيراتني .. انا عيالات ولادي بحال بناتي لي قلل مني ياكل العصا و دكشي لي درت .. و الى عوداتها ندير فيها كتر

رابحة عقدات حواجها و خرجات فيها عينيها: شوفي اطامو نهار جيتي طلبتي بنتي قلتي غديريها وحدة منكم ماشي ديريها تحت رجليك .. راه كلشي كيوصلني و كلشي في خباري و كنقول خليها دبا تهد و تمل و تعطيها شبر د التيقار .. ولكن نتي كتباني ليا مبغيتيش تبعدي من الصداع و ديري الما من يدوز .. راك نهار اللول جيتي لبنت صغييييرة مزال ما عارفة والو و بغيتيها هكاك تكبر على يديكم ماشي ديريها خدامة .. هدشي راه حشومة و عيب و عااار حتا من العرس ما خليتو ما درتو و الحمدلله داز بخير و دبا تهجمتي على الدرية كليتيها ماااكلة .. اش غتكون دارت كااع .. واخة ترد عليك الهضرة نتي مولات لعقل خاصك تهضري معاها بالشوية و تفهميها ماشي تخرجي ليها على وجهها و ترضيه ليها هاكا .. شوفي ا طامو بنت وحدة لي عندي و عطيتها ليك ماشي باش تكرفصي عليها .. و حتا دبا الى غتبقاي تعاملي معاها هاكا من دبا نديها معايا لدارهم واسعة و عريضة و مرحب بيها فاي وقت

طامو: ما عندها فين تمشي .. هنا تبقا فدار راجلها .. ولدي خالد مكاين فالدار و هو ما فراسو والو دكشي وقع بيني و بينها و كيف كااع العايلات كيوقعو المشاكل و هي راه غلطات معايا و انا مصبرت و هزيت يدي عليهت و الغلاط كيوقع ا رابحة .. الغالية غتبقا فدار راجلها وراه واخة نعايرها كتبقا بحال بنتي..

رابحة: هدشي منبغيه يتعاود اطامو ‘شافت فبنتها’ زيدي لبيتك ابنتي

جراتها دخلاتها لبيتها و سدات عليهم..

رابحة: علاش ناض بيناتكم الصداع

عاودات ليها الغالية كلشي و رابحة كتخمم و تضرب اخماس ف اسداس ما عاجبها حال

رابحة: و مالها ما نوضات فتيحة بنتي ليها غير نتي

الغالية: وراه مكتخلي حتا وحدة فينا .. ديما منوضة الصداع و تخاصم علينا و قهرانا بزوجات ما كنخليو ما نديرو غير باش ترضي علينة و تفوتها و هي والو لي فراسها ديرو

رابحة: ايوا هذا هو الزواج .. غير صبري و دبا ربي يفرج عليك و تبعد منك .. راه غير تحملي و تولدي ليهم و تنساك كعما تبقا تهضر معاك

الغالية؛ ولااا هئهئ و بغيت نمشي بحالي ديني معاك امي الله يحفض هئهئ مبقييتش بغيت هنا رجعيني فحالي

رابحة: واش لطاسيلت مك هترتي فين غتمشي و نتي عاد سيمانة باش درتي العرس بغيتي تفرجي فينا الجيران يقولو ماكملات حتا شهر و ردوها لدار باها .. راه غيدويو فيك غير نتي اما هو راه راجل و مو معروووفة فالدوار حتا واحد ما كيقولها فيها خايبة ..

مسحات الغالية دموعها و شدات ف يدين مها بترجي: عفاك امي غير ديني معاك والله مابقيت قادة نصبر .. راه كل يوم كتكرفص عليا مبقيت بغيت نجلس هنا جتا دقيقة الله يرحم ليك الوالدين

رابحة قسحات قلبها و شافت فبنتها مخنزرة: شوفي الغالية صبري واخة غير شهر الى بقات تعامل معاك هكاك نرجعك لداركم .. و ياك راجلك كيتعامل معاك مزيان خليها هي تعوم بحرها متدخليش فيها و جري راجلك لصفك باش يعزل ليك و يسكنك بوحدك .. واش تبغي تمشي دبا و تولي في فم كل واحد يقولو رجعات فسيمانتها .. القليييلة الى ماهضروش غيقولو لقاوها فايتة و رجعوها لباها .. تبغي تمرمدي وجه باك فالتراب و كلشي يولي ينعت فيه .. واخة عارفاك نتي ما منك والو ولكن الناس غير جيب يا فم و قول .. ملي كطيح البقرة كيكترو الجناوا .. غير صبري ابنتي الله يرضي عليك و ربي غايجازيك

شافت فيها الغالية حتا عيات و سكتات ما تقدر تزيد والو على كلام مها .. محتارماها و حطاها فوق راسها و عمرها هزات فيها العين و هدشي لي خلا طامو تركب فوقها و دير فيها ما بغاات .. سلمات عليها رابحة و خرجات مشات فحالها من بعد ما وصات بنتها و نصحاتها ..

غربات الشمس و الغالية مزال فبيتها ما خرجاتش عندهم باقي و مبقاتس تحاكات مع طامو، سدات عليها باب بيتها و جلسات شادة تيقارها .. كانت ساهية فالتلفون حتا تحل عليها الباب و بان ليها خالد جاي داخل عينيه غير عليها .. تمعن في وجهها و نطق سؤالو و هو كيبدل في حوايجو

خالد: مالك ما الواليدة

الغالية: ياك عودات ليك هي

خالد: و بغيت نسمع منك حتا نتي

الغالية: زوج كلمات لي غنقول ليك اخاليد يا اما تشوف ليا شي حل مع مك ولا نقفو هنا .. انا ماعندي جهد لمك

خالد: شكون دار ليك هاكا

الغالية: و شكون من غيرها .. مسحات بيا الدار كاملة و ما كفاهاش زايداها حتا بالمعيور

خالد: و علاش لي هزيتي عليها صوتك و عايرتيها .. واش مبقيتي تحتارمي حد ولا مالك .. قالت ليك حكي ليا راني مريضة حكي ليها و هنينا مالك باغة تجبدي الصداع

الغالية ‘عينيها غرغرو بالدموع’: انا ما قلت ليها والو هي لي كانت باغة ليا السبة واش انا خرجت سخفانة و ندخل نحك ليها مالها ما تعيط ل فتيحة كتشوفني غير انا

خالد: صافي ما وقع باس .. هاد المرة كوني تسمعي الهضرة .. و انا غنخرج نهضر مع مي و لي قالتها ليك ديريها ما قادين على صداع

يوم جديد من ايام الله .. كانت الغالية هي و فتيحة فالكوزينة كيوجدو فالغذا و يتعاودو بيناتهم .. من بعد المشكل لي وقع اخر مرة الغالية مابقاتش ضارت بساحة طامو واخة شحال من مرة كتبغي تجبدها ولكن كتلقا غير الخضوع من الغالية ماقادرة على صداع و مكتجبدو من اساسو .. وجهها كان صفا كيف الاول و ليطاش ديال القميش حيد مع مداومة الكريمات و الوصفات حتا رجع ليها احسن من قبل .. قريب لشهر لي داز على اخر مناتفة دارت ليها طامو من تما مبقاتش هضرات معاها الغالية ولا تشكات .. لي قالتها ليها كديرها واخة فوق نفسها .. كتفكر كلام مها و شنو قالت ليها و تخبي فقلبها و تصبر .. صحتها تراجعات للوراء من كترة التعب لي كيدوز عليها بالنهار مع طامو و فالليل مع خالد .. كتحس براسها فحال شي الة كتخدمهم بزوج وقت ما بغاوها يلقاوها .. الوحيدة لي كانت تفوج عليها فديك الدار هي فتيحة لي كانت مساعداها و دايراها فحال ختها .. بالاضافة للتلفون لي كانت فين ما سلات تصوني على جنات تهصر معاها و تضحك مع هبالها ..

فتيحة: ارجووع الله

الغالية: هااا هضرتي معايا

فتيحة مصغرة عينيها فيها و كتحرك راسها بنفي: لااا لاا حالتك ما عاجباني .. شفتك غير ساهية و مريضة و عينيك ناعسين ياك لباس مالك

الغالية: والو غير عيانة و فيا السخفة .. و حتا خاليد مزال ما جاب ليا دوا د فقر الدم راه هلكني

فتيحة: داك الحرامي حتا هو اش كيتسنا .. بقاي تفكريه كل مرة باش يجيبو

الغالية: ديما كنقوها ليه راه سيمانة باش تقادة ليا و مزال مبغا يجيبو

فتيحة: لحي عليه يجيب ليك دواك اويلي شوف كي صفاريتي .. و زيدي دبا نحطو ليهم ما يجغدو و من بعد هضري معاه .. تبعيني الخبز ازين

سبقات فتيحة هي اللولة هازة طبسيل كبير بين يديها و توجهات للبيت لي كياكلو فيه حتا سمعات خالد و طامو كيهضرو و هي توقف طالقة ودنيها عليهم تسمع اش كيقولو حتا وقفات عليها الغالية

– و دخلي مالك وقفتي هنا

فتيحة: سمعي سمعي هادو اش كيقولو

حطو الراس على الراس و طلقو ودنيهم على البيت كيتصنطو لكلامهم بينما خالد كان كيهضر مع مو

خالد: حميد عيط ليا قبيلة كيعاير مخلا ماقال ليا .. مرتو كتوصل ليه الهضرة

طامو: ديك زرقة الوجه خاصني نحيد ليها داك المشقووف باش متبقا تلقا باش تعيط .. لقات السيبة و ولات تعيط ليه تحرشو علينا

تلفتات الغالية شافت ف فتيحة: هادو كيهضرو عليك ياختي

خالد: هاديك قالت ليا نشري ليها الدوا تقادة ليها

طامو عوجات فمها: ايوا صافي التبوحييط ديال والو فاش تداوا بالعشوب تنوض صحييحة كي العودة جالسة تشرب ليا فداك الفانيد غا مزايد مرجعها اللور

خالد: عندك الحق

طامو: ايوا اوليدي غتشريه ليها؟

خالد: داكشي باش نشريه ليها يجيب ليا عروسة اخرى

هزات فتيحة عينيها ف الغالية: و دبا هاضرين عليك نتي اصكعة ليام ‘خنزرات فتيحة و جرات الغالية’ الى طاح فكرشكم راه ماولدات فيا مي غا الخلا

رجعو للكوزينة و جلسو بزوجات كياكلو حتا عمرو الكرش عاد وقفات فتيحة عمرات الطبسيل بكااع دكشي لي كان باقي و هزاتو حتال الفوق و ضرباتو مع الارض حتا قفزات الغالية

-اويلي حماقيتي اش ضرتي

فتيحة: سكتي نتي .. باش يتعلمو يهضرو علينا

تمات جايا طامو تجري كتشوف فطبسيل مهرس و الماكلة فالارض

طامو: اويلي اش درتي يالكافرة هرستيييه

فتيحة: ياربي السلامة و تلطف بينا .. كنت هزاه جايبة ليكم تغذاو حتا زلق ليا من يدي ‘مدات ليها يديها’ شوفي يديا مزال كيقفقفو اححح خلعني ولد الهم

طامو: سيري يتهرسو ليك الضلوع ابنتي لحرام بغيتي تفقصيني و تقتليني الله يغبر ليك الشقف و نتهنا منك ياوجه النحس تفوو

زادت طامو تبرغم و تعاير و بقا فيها الطبسيل لي تهرس بينما فتيحة و الغالية عطاوها للضحك و التكركير و ناضو جمعو دكشي من الارض

الغالية: ناري الدوخة شداني .. الارض كضووور بيا اوووف و فيا الردة

فتيحة: لباس عليك اختي زيدي لبيتك رتاحي ليك يفوتك الحال .. حالك مبقا يعجب

الغالية: كاس د الما عفاك نحيد بيه هاد الحموضة لي ف فمي

مشات فتيحة جابت ليها الما شرباتها و دخلاتها لبيتها تنعس و ترتاح بينما هي رجعات تكمل الشقا و غسيل الماعن حتا وقفات عليها طامو كتخنزر

– عطيني داك التلفون نهضر بيه مع ولدي

فتيحة: ممشارجيش

طامو: غا اريه انا نشرجيه

فتيحة: خاااااسر

طامو: تي مدي لهما كلاك خاسر الله يمسخك

فتيحة ضارت كاملة لعندها: شفتي غير داك التلفون والله لا شفتيه ولا شميتيه واخة طيحي تركلي قدامي منعطيه ليك ياله و بعدي من ساحتي الله يرحم باك انا راني ماشي الغالية باش نسكت ليك و نخليك تركبي فوق ضهري .. لا دوزتي عليا شي راك دوزتييييه قبل ما نولد اما دبا راه نهز حوايجي و نتبع راجلي واخة نسكنو غا فبييت ولا نبقا معاك

شافت فيها طامو بصدمة و خرجات عينيها فيها؛ ياك اللفعة تقادو لكتاف وليتي كلمتي بكلمتك و مشنتك داك الخانز لي والدة والله و بغيت نرضك لداركم لا رجعتي للهنا واخة تبوسي ليا رجلية يالخانزة ولكن غير بلاتي حتا يجي ولدي حميد و ديك الساعة هرة اخرى الى ما رديتك تبكيهم دم راني ماشي طامو

فتيحة: اعلى ما فخيلك ركبيه و بزااف عليك ولدي حتا خاانز سميتو كااااريم ولد سيدي حميد و الى ما خليتو يخرجني من هنا و يخليك راني ماشي فتيحة

طامو: دبا نشوفو اللفعة غير بلاتي

مشات طامو كتنفخ و تسوط ماعاجبها حال و خلات فتيحة كملات و هزات تفاح و ليمون و مشات جلسات فالصالون و عيطات على الغالية تونسها

فتيحة: شدي شدي كولي تفيفيحات يهزو ليك قلبك ههه و نتي عينيك مشقلبات

الغالية: حاسة براسي مريضة اختي

فتيحة: دبا يدوزك الحال اختي غير صبري

سمعو تعياط من لتحت كان خالد كيعيط على فتيحة و هي مكتجاوبش حتا طلع عندها

-كنعيط عليك مكاتجاوبي مالك .. نوضي هزي معايا واحد الخنشة د الطحين ندخلها ياله

فتيحة هازة لموس في يدها و رفعاتو عليه: غا تبعد مني ولا نقتلك و نشرب من دمك

ناضت مشات لبيتها و خلاتو كيشوف فيها حال فمو

خالد: مال هادي تاني ‘شاف فالغالية’ نوضي نتي هزي معايا دغيا ندخلوها

الغالية: سير جيب مراة خرى تهز معاك انا ماعندي صحة

خنزرات فيه و ناضت حتا هي مشات مخلينو كيرجع السينتة حتا تفكر كلامو مع مو و هو يسكت و زاد مع الطريق.. اما الغالية غير تفاوتات من حداه و عطاتها بجرية للطواليط ردات كاااع لي كان فجوفها حتا حسات فحنجرتها تجرحات و هي مزال غير كترض … غسلات وجهها ب يدين كيترعدو و عينيها فالتين و مضببين بالدموع لي غشاو ليها على الشوف ديالها .. خرجات من الطواليط و مشات للبيت تكات في بلاصتها كترجع النفس و تستنشق فالريحة باش تمشي منها الدوخة حتا صونا تلفونها و هزاتو جاوبات: جنات لباس عليك

جنات: بخير و نتي اش خبارك باقة فيك الدوخة

الغالية: عاد ما زادت مبقيتش كنقدر نوقف بزاف ولا ندير شي حاجة ضغيا كنسخف و نعيا و اليوم رديت كااع شنو كليت

جنات: هدشي ماشي نورمال .. متبعة دواك كيف وصفات ليك الطبيبة ياك

الغالية: سيمانة ما شربتو ولكن ماكنضنش واش يكون منو هو .. والله ما عرفت مالي هاد الايام كلي في شكل ماحاساش براسي مزيانة .. شي حاجة مغيرة فيا

سكتات جنات شوي و نطقات بشك: يا..ياكما حاااملة 😳

واقفة فالطواليط و شادة التيست بين يديها و التيلي على ودنها .. كتحس براسها غتسخف و هي كتعض فشفتها لتحتانية بغات طيرها .. متوترة و خايفة و مخلطة عندها القضية .. ماهدنها غير صوت جنات لي نساب لادنها

جنات: واش مزال ما طلع والو احبيبة

الغالية؛ لا والو اووفف .. ياربي مايكون والو اهئ مبغييتش نحمل منو .. دعي معايا اجنات ميكون والو

جنات: لعني الشيطان الغالية و تهدني يكون خير ان شاء الله .. الى مكتاب ماعندك ماديري و معرفتي يكون فال خير عليكم .. و علاش مبغيتيش تحملي منو ياك راجلك!! مالك غتجيبيه من الحرام

الغالية: نتي مفاهمة والو اهئ .. ماعارفاش العذاب لي كيدوز عليا .. راه بو وديييينة ولد موووو اختي مكيسمعش ليا اهئ اهئ كيعرفني غير فداكشي شي حاجة اخرى لاااا مووو لي محكمة فيه كيف بغااات و انا غتخرج ليا عقلي

جنات: الغالية تهدني عفاك .. دبا ماعلينا غير نصبرو نشوفو واش حاملة بصح ولا غير جابلينا الله .. وراه الى كنتي هازة نيت معندك ماديري داكشي لي فكرشك ما ذنبو والو اختي .. فكري شوية بعقلك .. انا لي كنشوف الدراري متشردين و باغيين غير لي يحتاويهم و امهات كيقلبو على الولاد بالريق الناشف و ملقاوهمش .. كل واحد و اش مكتب ليه الله اختي الغالية .. الى كتبو ليك الله راه من الخيير احبيبة امني بالله و ريحي بالك ولي بغاها ربي هي لي تكون

سكتات الغالية لبضع دقائق حتا عودات تكلمات جنات

-فين مشيتي

الغالية و عينيها مغرغرين: خخرجات النتيجة .. حاملة اجنات حاااملة

جنات تنهدات: مبرووك عليك اختي و يتربى فعزكم .. ملي يجي راجلك قوليها ليه و يكون خير

الغالية: معرفتش كيفاش وقع هدشي .. كنت واخدة الاحتياط ديالي

جنات: راه كتوقع .. اجي شكون جاب ليك الاختبار

الغالية: قلتها لفتيحة و هي لي خرجات جابتو ليا

جنات: اه واخة و سيري دبا رتاحي و من بعد نعيط ليك نطمن على حالتك وراه خاصك تجي تبعي عند شي طبيب على حالتك و حالة الجنين

الغالية: ان شاء الله يكون خير

كانو مجمعين كلهم فالصالون و قدامهم براد د اتاي يقادو بيه المجاج و الغالية جالسة حدا طامو لي كانت تضحك و تفرنس عاجبها الحال .. كتهضر و تضحك مع الغالية لي دخلها العجب منها كتقلب غير بوحدها .. معرفات كيفاش تعامل معاها

طامو: خاصني ندير ليك شي حجاب على العين لداك الدري لي فكرشك .. راه عين بنادم خااايبة يمشيو يقوسوك و نتي معندك صحة

الغالية؛ مكاين لاش اخالتي اصلا حتا واحد معارف من غيركم

طامو: سعدي و فرحي بولدي غيجيه عزري يعمر علينا الدار .. انا نسمي الدري ملي يتزاد

الغالية: ان شاء الله .. حتا يزيد و نسميوه سعييد

خالد: شحال غيكون عندك دبا

الغالية: معرفتش خاصني نمش عند الطبيب يشوفني

طامو: وايه سيرو يدوز ليك و نشوفو شحال باقي ليه و يتزاد راه مبطا عليا امتا نشوفو و على الله ميطلعش كي ولد ديك المتعوسة

فتيحة لي كانت جاية داخلة عندهم: و ماال ولدي اخالتي كيف جاك .. زين و مصوب و شهوة منو الله يحفضو ليا

طامو: مكايسمع هضرة و كيدير غير لي فراسو يقطعكم بزوج

فتيحة: الله يحفضنا و ينجينا .. دكشي لي بغات الوقت اما حنيان الراس مولاه شحال ما بقا يجيبها فراسو

خالد: غذا غنزلو لمدينة نشوفو الطبيب .. و فيقي بكري باش ياله نوصلو

الغالية: واخة يكون خير

عند جنات كانت مسرحة فوق سريرها على كرشها و كتلعب برجليها فالهوا شادة تيلي مكونيكطية و ناشطة غير بوحدها .. مرة مرة تحط يدها على عنقها كتلمس السلسلة لي دايرة و الفرحة غامراها .. تفتح الباب و دخل سيف الدين بتيشرت كحل و شورط ديال الدار .. تلاح حدا جنات و جرها عندو كيلعب ليها فشعرها و هي كتبعد معنكشها

جنات: و صاااحبي شعري لا وااه راك كتنتفني

سيف الدين: عمرك تقطعييه عندك زويين و طويل

جنات: سير تا تزوج و حكم فيها اما انا متصور مني تا باش تنقي سنانك

سيف الدين: ضبري ليا على عروسة راه خوك عيا بالتقلاب و مزال ماطاح على الزيين و التباتة و الرزانة و دكشي

جنات: من هدشي كااامل اش جايبك عندي

تقلب على كرشو و خشا راسو وسط مخادها كيهضر مغمض عينيه: ماصي ليا كتافي الله يعزك راهم ضاريني ‘ياله غتبدا تخاصم جنات و هو يسكتها’ و بحلاوتك اطماعة غير بداي

غير سمعات لفلوس و هي تنوض كتفرنس جابت الزيت لي كان عندها فبيتها و بدات كتماصي ليه بحنية و احترافية و هو مرخي معاها حتا صونا تلفونها لي كان حدا راسو .. هزو يشوف شكون و جاوب ملي قرا سميتها

-الغالية لباس عليك

تبسمات ملي سمعات صوتو و نطقات بهمس: الحمدلله اخويا سيف الدين و نتا اش خبارك

سيف: صفا

جنات: وااا الغالية اش درتييي مع راجلك

سكتات الغالية مقدراتش تهضر و هو يوقف سيف الدين كيحك فعينيه: هاكي هضري مع البنت و ملي تسالي دوزي عندي

جنات: سد معااك الباب ابب

خرج و خلاها تهضر على خاطرها هي و الغالية لي خبراتها بلي غتجي غذا بكري على قبل الطبيب و علماتها تصوني عليها ملي تقرب باش تلاقا معاها و توصلها هي لشي عيادة مزيانة عاد قطعات معاها و ناضت كتحنقز لبيت خوها لقاتو كيلبس فحوايجو

جنات: اححح على الزين المسرار .. كون ما كنتي خويا نطييح فيك

سيف الدين: رها فوق الكوافوزة و خرجي بعدي مني من الهضرة الخاوية

جنات قربات ليه كتبحلس: حبيبو .. كيف شفتي انا .. دبا راك عارف ختك الغزالة قلبها هشييش و حنيينة بزاف و و

سيف الدين: و طلقينا خلاص اش بيتي

جنات: واحد السيدة خاصها الدوا و و خاصني ضروري نساعدها

جبد سيف الفلوس مدهم ليها و طلب للمراة الشفاء و خرج يطللاقا مع صحابو

يوم جديد فاقت الغالية على صوت الغيفي .. خرجات وجدات لفطور و رجعات بدلات حوايجها بجلابة و سباط بلا فلونها .. قادات حجابها عاد نوضات خالد لي صابح ناعس .. بينما هي خرجات كتسناه برا حتا فطر و خرج عندها

خالد: ياله زيدي خلاص علاش مفطرتيش

الغالية: مبغيتش غادي غير نرجعو اللهم بلاش

خالد: ياله زيدي

هزات صاكها و تبعاتو شدو المركوب و تكات على الشرجم لي كان جنبها ساكتة و كتصنط لعضامها حتا قربو يوصلو و صونات على جنات علماتها

من بعد ما وصلو لقاو جنات في استقبالهم سلمات على الغالية و مدات يديها لخالد

جنات: ياله نفطرو فشي بلاصة عاد نمشيو ديك الساعة

خالد: ها هي معاك اختي ديها تشوف الطبيب و انا غنمشي نقدي واحد الغرض مهم و نرجع

جنات: اممم واخة غير سير ‘بهمس’ مشية بلا رجعة

الغالية: ياله حتا نشوف الطبيب عاد نفطرو عفاك دبا شهيتي مسدوودة

جنات: اوكي على راحتك بب

تمشاو بزوجات على رجليهم رافضة الغالية تركب فشي طاكسي بكترة ما كتشدها الدوخة و القيء حتا وصلو قدام العيادة دخلو شدو نوبتهم و عطاوها للتعاويد حتا وصلاتهم النوبة و دخلو عند الطبيب دوز ليها شاف حالتها عاد جلس مقابل معاها كيوصف ليها فالدوا

طبيب: عندك ربعة السيمانات و الحمدلله حالتك مستقرة لحد الان ولكن المشكل عندك نقص فبزاف ديال الفيطامينات

طبيب: عندك ربعة السيمانات و الحمدلله حالتك مستقرة لحد الان ولكن المشكل عندك نقص فبزاف ديال الفيطامينات دكشي علاش غنوصف ليك شي فيتامينات يعوضو ليك و خاصك داومي عليهم باش متلقايش مشكل من بعد اولا راه غتولي حياتك و حياة الجنين فخطر و مشكل نقص في الكريات الحمراء حتا هو خطر على حياتكم بزوج دكشي علاش غنوصف ليك دواء اخر لي غيلائم صحتك .. و حاولي فهاد المدة تكوني فبيئة ملائمة لصحة الجنين حيت باقي فمرحلة حساسة .. يعني تكوني بعيدة من الضغوطات و الاعصاب و متحركيش بزاف او تهزي شي حاجة لي تقيلة حتا تستقر حالة الجنين

جنات: واخة ادكتور شكرا .. يعني الى تبعات هاد النصائح غتكون صحتهم بزوج بخير

د: بإدن الله

الغالية بعفوية: دبا نقدرو نعرفو واش بنت لا ولد

ضحك الطبيب على كلامها و نطق: لا مزال صغير باش نعرفو جنس الجنين .. حتا يكبر شوية و ديك الساعة غنعرفو ان شاء الله

الغالية: اه واخة شكرا

خداو ورقة الادوية و شكروه عاد خرجو من تما فرحانات بزوج .. ماتقدرش تنكر انها ملي حسات بقطعة منها كتكون فاحشائها فرحات ولكن غير كتفكر معاملة طامو و خالد و كترجع عليها الغبينة .. خايفة من القادم و خايفة على هدشي لي فكرشها .. تنهدات و طلقاتها في يد الله و نفضات دوك الافكار السيئة لي كيطيحو فبالها .. ما فيقها من سهوتها غير جنات لي كانت جراها جهة سناك شعبي كيقدم جميع الاطباق الشعبية من الفطور و الغذاء و كل ما تشهات النفس

جنات: اجي نفطرو هنا راه مصارني كيشطو على الشعبي ياختي

الغالية: ماعنديش الشهية للماكلة .. لي طاحت فكرشي كترجع ديك الساعة

جنات: و غير بززي عليك شوية واش باغة تموتي اويلي شوفي كيف وليتي اصحبتي الجلدة لصقات على العضم ‘جراتها من دراعها’ زيدي الحب كولي ليك غير شوية و ختاري ما تشهات خاطرك

دخلو شدو طبلة بزوجات و ناضت جنات طلبات شنو بغات و رجعات جلسات حداها

جنات: تقدري تعاودي ليا .. كتباني ليا مهمومة

الغالية خرجات تنهيدة من اعماقها: زربت فزواجي اختي .. ضيعت حياتي مع هاد الناس .. لا عكوزة مزيانة لا راجل يبرد ليك القلب .. كون غير كان هو مزيان معايا ميهمنيش ولكن لاااا هو كيهمو غير راسو ‘همسات بالشوية تسمعها غير جنات’ كيعرفني غير وقت حاجتو .. دايرني بحال شي مونيكة كيخوي فيها كبتو اهئ .. تخيلي انني مبقييتش حملتو يقرب ليا .. همجي فتعاملو و تصرفاتو ..

الغالية: كيبغي يدير شي حوايج ماشي طبيعية اختي .. و حتا من الدوا مبقاش كيشريه ليا حتا كيقولها ليه راسو ..عييت صابرة و كنقول معليهش ولكن تقادا صبري .. و حتا مو ممزياناش مكرفصة عليا .. مكتخلينيش نجلس ولا نرتاح ديما النكيير و المعيور و السبان .. كتعاملني بحال شي خدامة .. غسلي هادي خملي هادي طرفي هادي جمعي هادي .. والله حتا تهلكت معاهم اجنات .. كنت كنتمنى غير شي ولد الناس لي يعاملني مزيان و يحتارمني و يقدرني ولكن هدشي ملقيتوش ف خاليد .. كرهوني فحياتي معاهم و حتا الوليدين لي نحط عليهم الراس تابعين ليا كلام الناس و حقا صبري و بيت المراة فدار راجلها واخة يدير ليها لي دار خاصها تصبر .. ايوا هاحنا صابرين حتا يحن الله

جنات باسف: الصراحة معرفتش شنو نقول ليك .. حطيت راسي فبلاصتك ولكن واخة هكاك منقدرش نحس بشنو كتحسي نتي .. شوفي الغالية الى مكنتيش مرتاحة معاه تفرقي عليه و حنا غنهضرو مع واليديك و نشرحو ليهم شنو كاين و كوني اكيدة انا ديما غنبقا فجنبك و واقفة معاك حتا توقفي على رجليك .. متنسايس انك اكتر من ختي ماشي غير بنت خالتي الغالية راه مكانتك كبيرة عندي

الغالية: ههه عارفة لي كاين و تااايقة فيك .. علاه لي كتساعد ناااس مكتعرفهمش و توقف معاهم .. غتقدر تخلى على وحدة من عائلتها هه اكيد لا .. انا عارفة مكانتي عندكم و ربي شاهد عليا بلي كنحسبكم واليدية ماشي غير من العائلة

جنات: المهم نساي علينا هدشي و خلينا ناكلو .. معرفت فين تعطل هاد خينا ميجيب لينا ناكلو حتا يموت لي يموت و يحيا لي يحيا ههه .. المهم انا خارجة نقدي واحد الغرض دغيا بينما حط لينا الماكلة .. بقاي غير هنا حتا نجي مغنتعطلش

الغالية؛ اويلي لا متمشيش و تخليني بوحدي تسناي نمشس معاك

جنات: دغيا نرجع ابب غير تسنايني و متمشي فيين

خلاتها و خرجات هي كتمشا ف جوانب المكان حتا بانت ليها صيدلية تما و هي تدخل ليها .. تبسمات للسيدة لي كانت تما و تكلمات معاها بلباقة

جنات: ممكن تعطيني هاد الادوية عفاك

جابتهم ليها السيدة و خلصاتها فيهم عاد جبدات ورقة اخرى و مداتها ليها

جنات: شوفيلي هادشي شحال التمن ديالو الله يخليك

سيدة: واخة اختي تسناي واحد الدقيقة

مشات جمعات الادوية و حطاتهم حداها شافت الاتمنة و قالتهم لجنات لي جبدات بسطامها كتحسب واش مزال عندها لي يكفيها ولا لا ..

لقات الفلوس هوما هادوك لا زيادة ولا نقصان .. و هي تحرك راسها بايجاب باش تجمعهم ليها

جنات: غناخد حتا هادو اختي غير جمعيهم ليا

شدات كلشي خلصاتو عاد خرجات متاجها لفين خلات الغالية

امام السناك واقف شخص طويل شوية و بنيته الجسدية معتدلة مغليضش و مرقيقش .. في القياس و مواتي مع طولتو .. لابس سروال فالاسود ديال السيرفيت و تيشرت ابيض مع صندالة خفيفة فرجليه كيجر فيها .. كانت طفلة صغيرة في عمر الثلاث سنوات او الاربع بين درعانو و يديها الصغيورين ملتفين على عنقو و وجهها الباكي محطوط في فجوة عنقو .. شعرها القصير مجموع قرينات الفوق ب باندات صغار فالوردي متواتي مع لون الكسوى الصيفية لي كانت لابسة ..حاط يديه على ضهرها كيسكت فيها و هي كتنخصص و وجها الدائري كيتمحكك مع صدرو .. تقدم بخطوات تقال للسناك و هو كيهضر معاها بلطف و يحاول يحزرها باش تهدا

– صافي احبيبة ديالي .. انا جبتك دابا نفطرو غير بزوج بينا و منخليو والو لهديك المسمومة لي غوتاات عليك واخة .. و غير نرجع نضربها باش متبقاش تبكي ليا اميرتي الغزالة .. ياله مسحي ليا الدميعات نشوف عوينات الكبيدة ديالي..

هزات الطفلة راسها من على عنقو و شدات فتيشرت ديالو بيدياتها الصغار كتمررو على وجهها مرورا بانفها لب كان عامر خناين دوزاتو عليه .. شاف فيها مخصر سيفتو و دوا بين سنانو ..

-مابقا لمي غير خناينك مسحيهم فيا راني فوطة ديالك

حطها فوق الكرسي و عطاها تلفونو تلعب بيه .. بينما هو هز منديل ورقي و بدا كيمسح فتيشرت ديالو من خناين البنيتة الصغيرة و هو متاجه يطلب ليهم الاكل …

في نفس الوقت كانت الغالية حطو ليها الفطور مشكل فوق الطبلة .. تسنات جنات تجي ولكن تعطلات .. بدات كتنقب من الاكل بالشوية و حادرة راسها على الطبلة كتخمم حتا حسات بالردان جاي طالع مع حلقها .. ناضت كطير بغات تمشي تستفرغ ولكن قبل ما توصل تساطحات مع شخص ذو بنية رجالية خلاها تزيد تدوخ اكتر ما هي دايخة .. حدرات راسها ماصابراش على الردان و هي تستفرغ في الارض .. او بمعنى اصح رجعات كلشي على رجلين الشخص لي كان امامها .. و هي حادرة راسها كتستفرغ و تعاود و عينيها نقزو ليها بالدموع .. كتحس براسها باغية ترد مصارنها .. لاحت يدها على مرفق السيد تشبتات فيه حيت رجليها كتحس بيهم مبقاوش هازينها

لاحت يدها على مرفق السيد تشبتات فيه حيت رجليها كتحس بيهم مبقاوش هازينها و هي تتشبت فالسيد لي كان راجع يجلس مع البنت الصغيرة حتا تلقات ليه الغالية غسلات ليه رجليه .. هز راسو كيتنفس ببطئ و عاض على شاربو بفقصة ولكن سرعان ما نزل عينيه ليها ملي حس بيديها على مرفقه كترعد و سخفانة .. شد فيها موقفها و مخليها حادرة راسها كتاخد نفسها .. طلقات منو كتمسح فوجهها و عينيها مدمعين كتشوف فرجليه لي عمرو ليه كاملين .. هزات عينيها ببطئ كتشوف فيه مخنزر و كيشوف فرجليه بسخط .. حط يديه بزوج على نصو و هز راسو لفوق

– الله ينعل الجد وليدين الكلب تااع بويا لي جااااي نحزر فالبراهش و نفطر فيهم فالزناقي .. الله يحرق جد بابات الحمار تاع مي لي داير الخاطر لهاد الضلعة العوجة و جاي نفطر معاها .. ناكل فيه السم الى بقيت خرجت شي مجننة تفطر ..

ما كان من الغالية غير تهز عينيها فيه حشمانة من راسها و الحالة لي دارت ليه .. غير شافتو مخنزر و هي طيح دموعها كتنخصص

الغالية: سمح ليا عفاااك والله مكنت قاصدة راه غير سبقني اهئ و جيتي قدامي اهئ اهئ عفاك سمح ليا

شاف فيها هاز حاجبو و حرك راسو بايجاب: مكاين مشكل .. ياك نتي بخير معندك والو

ياله غتنطق و هي تقاطعها جنات لي كانت عاد وصلات و شافتها واقفة كتهضر مع سيد عاطيها بالضهر

جنات: الغالية مالك ياك لباس

قربات ليها تشوف مالها و هي تخرج عينيها فالشخص لي قدامها .. اما هو كحل بالعمى تقول شاف قباض روحو

جنات: حكيييييم هذا نتا

حكيم؛ هاااا و انا كنقووول مال نهاري ما طالعة فيه الشمس قول غنشوف كمارة النحس قداااامي .. دعيتك لله يخلصك فهاظ النهار

جنات شافت حالتو و عطاتها للضحك: ويييلي على حالة هههه شكون دار ليك هدشي هههه

حكيم: هاد الطفلة خوات كرشها كلها عليا .. حلات فمها مبقات سداتو كي الروبيني

طلقات جنات ضحكة بالجهد و عينيها مغرغرين بالدموع: ههههههه و فالصراحة عبرااااات عليييك هههه تبارك الله عليها دارت خدمة نقية هههه

تلفتات كتشوف ف الغالية لقاتها مزيرة و وجهها معصور فيه الدم .. حشمات من الموقف و من هضرة حكيم مبقات عرفات متقول .. شدات فيها جنات كتمسح ليها فوجها و تكلمات مع حكيم

جنات: راه مريضة ا حكيم مدارتهاش بلعاني غير سمح لينا

حكيم: مكاين مشكل .. سيري جلسيها لهيه راها سخفانة و قابلي ليا هداية معاك حتا نمشي نغسل حالتي و نرجع عندها راه غيجيبو ليها مكلتها حضيييها معاك

جنات: واخة كون هاني راها تحت عيني

جرات الغالية جلساتها وفبلاصتها و عطاتها كاس د الما مع فنيدة من لي جابت تشربها

جنات: شربي هاد الفنيدة راه مزيان ليك باش متبقايش كتردي بزاف غتهدن عليك

الغالية: شكون جاب هدشي

جنات: واحد المرسووول

الغالية: جنات حشومة عليك انا مقلتش ليك شري ليا الدوا كان عليك تخلي حتا يجي خاليد و يشريه ليا هو .. علاش محسوب راجلي الى مكانش يشري ليا الدوا .. مكانش عليك تشريه و غير يجي نشد ليك الفلوس من عندو

جنات تقلقات من كلامها: شوفي الغالية ما شريتو ليك حتا حسبتك ختي و صحبتي و حبيبتي ماشي شي وحدة غريبة عليا .. انا مشيت باش نشري دوا لواحد السيدة مريضة و قلت ملي جيت نشري ليك حتا نتي .. انا قلت بلي مكاينش فرق بيناتنا لكن نتي بحال الى كتحسبيني غريبة عليك و برانية

الغالية: لا اختي راك فهمتيني غلط لي قصدت هو انه خالد هو لي خاصو يشريه مالو لاش لاق كيعرفني غير فوقت حاجتو اما دوايا و كساتي و ماكلتي ناسيني فيهم .. متقلقيش عليا اجنات نتي عارفاني معتابراك اكتر من ختي

جنات: متعاوديهاش الغالية .. الصحة ديالك اهم من ديك الهضرة ديال هو يدير و هو يفعل .. و دبا شربيها و كولي عتقي داك الدري مسكين راه غيموت غير من الجوع

الغالية: ناري قبيلة بديت ناكل و تهز ليا قلبي بالريحة و سبقني الوقت لحت كلشي على السيد عرفتي مبقيتش قادة نهز فيه راسي

ضحكات جنات ملي تفكرات حالتو و مشات جابت البنت الصغيرة جلساتها معاهم و بدات تعاود للغالية عليه

جنات: عرفتي هذاك اكبر منحوس شفتو فحياتي هههه .. راه فين ما مشا تابعاه المصائب الله يستر ههه ديك المرة كان كيعلمني نسوق و خسرات لينا الرويضة فالطريق و المشكلة حتا الرويضة سوكور كانت مفشوشة ههههه بقينا منشورين فواحد الخلا حتا جا سيف الدين جابنا هههه

الغالية: هههه فين كتعرفيه

جنات: داير مدرسة السياقة هنا و عندو فين خديت البيرمي .. اصلا هو كيعرف خويا و انا كنخرج مع سيف بزاف و طاع صحابو و صحاباتو كنعرفهم ههه

الغالية: نتي دايرا كي اتصالات المغرب فين ما دزتي تسلمي على بنادم مراكش كاملة كتعرفك

جنات: عندي سوابق معاهم هههه اجي نكمل ليك .. ديك المرة كان عيد ملاد بنتو هاد الكتكوتة و نسا الطاغت و ملي مشا كيجري يجيبها تم طالع فالدروج طاح هو وياها ههه عرفتي .. و واحد المرة كنت خارجة معاه نشريو لبيسات لهداية و داز من حدا واحد الشجر و بزق عليه الحمام هههه .. دكشي علاش مسمينو غير المنحووس هههه

الغالية: هههه مسكين عندو التابعة هههه .. شوف هاد البنية شحال غزالة ‘باست هداية’ مكتشبهش ليه يمكن ههه

جنات: لا كتشبه لماماها نفس الملامح

الغالية: الله يحفضها ليهم ..

كملو منوالهم على داك الحال كياكلو و يتعاودو حتا رجع حكيم مبدل ب سرواب جينز و تيشرت اسود و سبادرين فرجليه مع كاسكيط سوداء .. شاف ف الغالية شوفة مخطوفة و دوز عينيه لجنات لي تكلمات معاه

جنات: كيف بقات الوليدة لباس

حكيم: اللهم لك الحمد .. سولاتني عليك شحال من مرة مبقيتيش مشيتي عندها

جنات: يسول فيها الخير غير ماساليتش و حتا سيف لي يجيبني قليل فين كيسالي

حكيم: معليهش .. مرة اخرى جي عندها

جنات: ان شاء الله .. المهم خليناك على خير حتا نتلاقاو

حكيم: الله يبعد طريقي من طريقك .. غير كنشوفك كتوقع شي كارتة

ضحكات جنات و ناضت هي و الغالية لي مهزاتش فيه الراس كااع .. هزات ساكها و تبعاتها من اللور حتا خرجو شدو طاكسي وصلهم عند باب الدار .. دخلو لقاو خديجة في استقبالهم تبوس في الغالية و تعاود تقول اعوام ما شافتها

خديجة: و مبروووك عليك احبيبتي الله يجعلو خيير عليك ان شاء الله و يتربى فعزكم

الغالية: امين اخالتي لهلا يخطيك عليا

دخلاتهم خديجة للصالون و حطات قدامهم العصير و حلاوي و الكيكات و السقاطة باش يدوزو ساعة د االمكانة بالتعاويد و تقشاب بيناتهم حتا طاب لغذا .. ناضت خديجة تقلبو و توجد الشلايض لي تحط معاه حتا حسات بيه باس راسها و ح التقدية فوط الطبلة لي فالكوزينة

سيف الدين: الحادكة وجدتي الغذا

خديجة: موجود اوليدي .. اليوم خرجتي بكري

سيف الدين: لا جيت غير نوصل ليك التقدية و نتغذا معاك و نرجع

خديجة: ايوا صافي سيير جلس مع لبنات راهم فالصالون بينما حطيت

دخل عليهم لقاهم كيتعاودو بزوجات و يضحكو منساجمين مع بعض، جر ختو من شعرها و باس الغالية من جبينها كاحترام ليها عاد جلس بعيظ عليهم كيبقشش ف الفون ديالو

صونا تلفون الغالية و ناضت خرجات جوبات كان خالد لي سولها على مكانها نعتات ليه ولكن معرفش و هي ترجع عند جنات قالتها ليها

وقف سيف الدين كيلبس ف سبرديلتو و عاقد حواجبو ما عاجبو حال شاف في مو لي كطلب فيه هي و جنات و حل الباب غادي خارج

سيف الدين: دبا هذا بنادم لي حتا دار خالتها ماعرفها

جنات: و عفاك غير على وجه الغالية سير جيبو .. واش ترضى نمشي انا عند الراجل نجيبو

سيف الدين: هذاك محسوب عليكم ماشي علينا

خلاهم كيبرقو فعينيهم و خرج رادخ الباب و مشا لبلاصة فين دار معاه .. لقاه واقف شاد تلفون كيضحك معاه و متكي ضهرو على الحايط حتا وقف عليه سيف الدين .. سلم عليه و رجعو بزوج لقاو خديجة ياله غتحط لغذا .. اجتمعو عليه بالضحك و التعاويد كيف موالفين فدار جنات علاقتهم منفتحة مع بعض .. اما الغالية كتشاركهم غير مرة مرة الهضرة .. حتا كملو و ناضت خديجة جمعات الطبلة و حطات براد ديال اتاي يدوزو بيه الساعة …

جمع خالد الوقفة و شاف ف الغالية باش تنوض بينما هي حزنات ملامحها و وقفات معاه

خالد: هذا جهدنا .. الله يخلف عليكم خاصنا نمشيو دبا

خديجة: لواه اولدي مكاين فين تمشيو .. بنتي الغالية جات حتال عندي و متباتش حشومة

خالد: مرة اخرى ان شاء الله و نخليها .. خاصنا نمشيو دبا

خديجة: معندها فين تمشي اولدي خليها عندنا غير شي يومين و ديك الساعة جي ديها الى بغيتي

خالد: و دار غتبقا خاوية شكون يجلس مع مي

خديجة: ياك كاينة فتيحة راها معاها .. و زايدون اللا طامو مزال بصحتها تبارك الله قادة بشغالها

سكت خالد ملقا ميقول و حشم حتا من خديجة و سي حسن لي كان جالس و متكلمش ولا دخل بيناتهم .. شاف في الغالية و نطق..

-خلي تلفونك شاعل و غير يومين و رجعي

الغالية: واخة كون هاني

تبعاتو حتال باب الدار و وقفاتو

الغالية: خلي ليا فلوس الدوا راه كتبو ليا الطبيب و مزال مشريتو .. و بغيت نشري حتا شي حوايج ناقصيني

جبد فلوس من جيبو و مدهم ليها بلاما يسول ولا يستفسر شنو قال ليها الطبيب .. دغيا خرج زربان و خلاها واقفة كتشوف فالفلوس و في طريقو بحسرة .. مكلفش راسو حتا يسول على ولدو ولا بنتو لي جايين فالطريق .. و عساك يتهول عليها هي و يخاف على صحتها .. تنهدات بخنق و دخلات لبيت جنات فين كانت حاطة ساكها خشات فيه فلوسها و رجعات جلسات حدا جنات مكملين جماعتهم

الغالية: عدفتوو ياختي مبقيتش كنحمل فيه الشوفة

جنات: غيكون دكشي غير من الوحم جاك عليه هههه و مالك اصحبتي فين كنتي تشوفي نهار اللول.. انا بعدا راجلي خاص حتا نتعرف عليه عاد نتزوجو

يتبع