خرجات بسروال سيرفيت و تيشرت تسخر لامها و هازة تلفون كتلعب بيه .. فاتت الشارع لي ساكنة فيه و شافت فجنابها بغات تقطع الشانطي .. لاحت رجلها دايزة و هو يتم جاي من جهة لاخرى موطور بسرعة حتا تفافات .. رجعات بسرعة و الخوف تملكها و هو يوقف قدامها روايدو جهتها مقابلين معاها .. شافت فيه بعصبية و خشات تلفونها فالجيب ناوية تسب .. حتا حيد الكاسك على راسو و بان وجهه لي ولات كتمقتو .. ربعات يديها و شافت فيها ببرودة كتسنا تشوف اش غيدير
فؤاد: ركبي بغيت نهضر معاك
ضحكات بسخرية و هزات فيه راسها: من نيتك!! “هزات يدها قدامو” ولييت محسوبة على شخص اخر اخويا .. فوت ساحتي الله يرحم بيها الوالدين حسن ما نق*** السوايع دبصح
فؤاد: ركبي هي نهضرو و نرجعك منين هزيتك ياله
جنات: واش مكتفهمش العربية!!! قلت لييك عطيني التيييساع و بعد منيي حسن لييك .. واش كتقلب على خلا عشتك ولا شنووو .. راه اقسم بالله و يشوفك سيف الدين ولا فاتح هنا نهارك مطلع فييه الشمس
فؤاد: دبا مالك فرعتي لينا **** بهاد ال*** ديالك .. طلعي نهضرو و ديك الساعة ديري لي بغيتي .. واش دغيا نسيتي العشرة لي دازت بيناتنا .. حشومة عليك ديري هاكا والله
جنات: انا ماشي بنت المدرسة تلعب عليا بزوج كلمات .. تلاقينا خوت و تفارقنا خوووت .. صافي بعد من طريقي و فوت ساحتي الله يخليك .. منبغييش يتجبد ليا الصداع مع خطيبي
قاطعها صوت الهاتف و هزاتو شافت سميتها .. بعدات منو زوج خطوات و جوبات في الحين بابتسامة لي دغيا تلغات عند سماع صوتها الباكي
– اويلي مالك!! علاش كتبكيي شنو كاااين
الغالية بالتنخصيص: هءهءهءهء بغيييت نمشي فحااالي اختي مانزييدش دقييييقة هنااا هءهء جيي عندي عفاااك نتي لي تقدري تعاونيني مبغييتش نبقا هنااا هءهءهء
جنات: اعوذ بالله من الشيطان الرجيم .. الغالية سكتي من البكا و قولي ليا شنو كاين؟ .. واش تخاصمتي مع حكييم؟ شنوو واقع لييك مالك على لبكااا
الغالية و هي كتشهق: لا هءهء ماشي حكيييم .. تخاصمت مع سهيلة و ضاربنااا هءهءهء نكراات كلشييي بنت لحراام هءهءهء و سبااات فيا كااع دكشي لي كانت ديير قلبات عليا القفة قدام حكيييم هءهءهء .. والله منبقا هنااا هءهء جي ديني عفاك اختي
جنات: اففف واخة واخة انا نجي مي متقولي هدشي لحتا واحد نشوفو بعدا هاد الحريرة كيفاش جاري ليها .. نتي متخرجيييش من الدااار راه دارك هدييك
تمشات مع الطريق من بعد ما قطعات مع الاخيرة .. زاد قدامها فؤاد باصرار و نطق
– و ركبي نوصلك فين غادية
جنات بعصبية: و سيييير تخرااا ولا غنوصلو للكوميسارية نييت .. تفووو على بنادم كيف داير الله يعطيكم الانقراض
زادت كتسب و تلعن فيه و هو تابعها من اللور حتا قربات لدارهم و دخلات ليها جالسة فالصالون و كتخمم .. تمشي ماتمشيش .. خلاف واقع بيناتهم اش غتمشي ديير وسطهم .. خاص يتحل بين الزوجين هي معندها دخل بيناتهم .. فكرات حتا عيات و خرجات بقرار تخرج من باب واسع .. صونات على الغالية ولكن هاد المرة لقاتو طافي .. عودات شحال من مرة و بدون جواب حتا تخلعات عليها . عارفاها هبيلة و لي جاها فبالها كديرو بلاما تفكر…
* واقف قدام الباب و حاط راسو عليه .. عيا يدق عليها و هي تقول واش حلات عليه مخلياه غيطرطق غي وحدو …
حكيم: الغالية حلي غير نهضر معاك .. الله يهدييك غير نتفاهمو
الغالية: و سييير عندها هي و بعد منييي .. سير تفاهم معاها هي ياااك جيتي من جهتهااا و عطيني تساع
حكيم بهدوء: واخة ابنتي غير حلي دبا نهضر معاك و سدي
سكتات مجاوباتوش و حتا هو تقطع حسو حتا تسمع الساروت كيضور فالباب و هي تنوض قافزة غادية للدوش .. لكن كان اسرع منها و جرها قبل متدخل ليه
– مال مك على هاد الضد كااامل
ردت: سييير بعد منيي .. سيير عندها هييي سيير سيير
حكيم بهدوء شاد ليها يديها: مالنا على هاد الهضرة؟؟ .. واش قلت لييك شي حاجة باش تهزي شووكتك .. خلينا هي نهضرو بعدا
الغالية بالدموع: دبا ولييت هازة شوووكتي ياااك هءهءهء مالي عقرب نهز شووكتي هءهءهء ولييتي كتعايرني فوجهييي “دفعاتو” ايوا سيييير لعندهااا هي تطلق علييك عسلها اما انا هازة غي شوكتي هءهءهء
حكيم: الله يهدييك الغالية .. الله يرد بييك .. شنووو مشكلتك معاها علاش تخاصمتو
الغالية: سيير سولها هي هءهء ياك ضربتيني بمسبتها و سيير عندها و بعد منيي .. فضلتيها هي علياااا منسمحش ليييك والله منسمح لييك هءهءهء
حكيم: صافي الله يعطي لجد بويا القطييييع لي هزييت عليك يدي والله متعاود احبيبة غير لحضة غضب و صافي .. متبكييش ياله و مسحي دموعك
جلسات الغالية كتبكي حاطة يديها على وجههت مخبياه و هو كيشوف فيها .. جاتو عن غير العادة بكاها فات اللازم .. اه غلط فاااش ضربها ولكن ما حسش براسو حتا ضربهم بزوج و غير بالشوية باش يتفرقو .. جلس حداها كيطبطب عليها و يسكت فيها و هي تنطق تاني بعصبية
– و سيييير سيييير
وقف حتا هو غادي جهة الباب و هي توقفو تاني
– فين غادي
حكيم: ياك بغيتيني نمشي عندها ايوا هانا غادي
طارت عليه كي المجنونة بان ليها غير كتفو حتاتها عليييه بعضة حتا طلقات فيه سم سنااانها: اعععععععع ياااااله .. والله متمشي لعندها الكلبة لخرااااا دكشييي لي بغاااات نيييت
حلات الباب و دخلات من بعد ما رجعات من خدمتها .. سمعات تقرقيب فالكوزينة و دازت طلات عليها .. لقات مها كتوجد في الفطور و دخلات صبحات عليها و باستها
ميسون: صباح الورد الوريدة .. مالك فايقة بكري
امينة: نوجد لفطور قبل مايفيقو تاني .. سيري غسلي حالتك و نعسي رتاحي حتا يطيب
ميسون ساطت من مناخرها: مكايناش غير نتي فهاد الدار .. كيف ساكنين مجموعين النوووبة غتشد بيناتنا .. يدك بيديهم .. نتي ماشي خدامة عندهم تطيبي و تجفي و تغسلي
امينة: وااخة هي سيري تنعسي رتاحي لييك حتا يفيقو و تكون هضرة اخرى
سكتات ميسون و دخلات لبيتها المشترك مع ختها .. لقاتها مشقلبة بالنعاس .. حطات اغراضها و دازت للدوش تغسل .. نضفات وجهها و دازت للرف فين محطوطين الفوطات بغات تهز ديالتها حتا لقاتها مرطبة و محطوطة تما .. هزاتها بنرفزة و لاحتها فسلة التصبين و خرجات بوجهها كيتقطر حتال بيتها عاد مسحاتو .. بدلات ملابسها و تلاحت فبلاصتها مستسلمة للنعاس من كترة العياء..
فاقت على صوت جدها كيهضر بالجهد .. و ناضت لبسات صندالتها خارجة كتعتر فسروالها حتال الصالون فين كانو مجموعين .. غير شافها جدها و هو يوقف موجه ليها الهضرة
– دييييك الخدمة غضررربي عليهااا من اليوووم كتفهمييي .. بلااااصتك فالدااا حتا تزوووجيي و دييك الساعة منك ليييه
شافت فيه ميسون مدخشرة بالنعاس حتا استوعبات كلامو عاد هزات حواجبها بهدوء
– الحياة حياتي .. و القرار قراري .. و الخدمة خدمتي .. تبارك الله 25 عام مبقيتش صغيرة باش تقرر فبلاصتي .. و ديك الخدمة لي معاجياكش هي لي كاينة و هي لي غتكون .. و دبا صباح الخير اسي الحااااج “بسخرية”
الجد؛ اش هاااد قلة الترااابي و قلة الادب لي ولات فييك .. كتردي الهضرة عليااا فوجهي محشمتييش .. تزايدي فالكلام معايا و انا كنشوف
ميسون: لا حاشة .. كنفضل نصارحك و نقولها ليك على انك تشوفني بعينيك..
الجد: كلمة وحححدة قلتهاااا ديك الخدمة مبقاااتش من اليوووم بلاصتك فالكوزينة تعلمي لي ينفعك فدار راجلك و تهزي الصنعة ف يديييك
ميسون: صحيحتك على قد الحال الحاج.. متبقاااش تعصب راسك معايا بلا فايدة ” شافت فالطبلة لي موجدة بفطور شهي و هزات شنو بغات و تمات خارجة” بصحة فطوركم
خرجات خلاتو غينفاجر فمكانو و شاف ف صفاء لي كانت كتاكل ممسوقاش
– نوووضي تجمعي الله يعطيك الهرس و تشدي الركنة نتهنا منكم .. التريكة الناقصة
هزات صفاء بتيبان و خرجات كتقلب فعينيها
– الله يستر .. دايرينو هي مع جنابكم .. شي ينوضها و شي تحرمو عليه فطورو
الجد شاف ف ولد ولدو جالس كيفطر و هضر معاه بحنية: شنو درتي فالخدمة اولدي .. ميسرة الامور
هز اسامة راسو كيسرط فاللقمة و نطق كيتهرب بعينيه: اييه كلشي مزيان هي كون هاني اجدي
الجد؛ الله يرضي علييك .. خاصك تجمع راسك باش فالقريب نعرسو ليكم مكاين ما تسناو مزال
اسامة: يكون خير اجدي .. لي بغيتيها هي لي تكون
* جلسات فبيتها كتفطر على راحتها حتا كملات و هزات تلفونها صونات على جنات
– فيين غابرة؟ .. مسالية ليوم بغيت غير نخرج نبدل الجو شوية .. الى بقيت فالدار غنبقاو فالمعاطية كيف ديما .. واخة “بمرح” و جيبي معااك حتا ديك البنت لي من عائلتك ههه كتعجبني فنيونة ههه .. واخة ملي تخرجو عيطي ليا
* باركة فالصالون قالبة وجهها و مقابلة معاها سهيلة كتشتت فالنضر .. دخل هو كيحك فراسو معارف ما يدير مع هاد الجوجات و جلس على كرسي مقابلهم
– ياله شي وحدة تشرح ليا شنو كاين؟
سكتو بزوجات حتا وحدة مبغات تهضر و هو يشوف هو في الغالية: ياله احبيبة قولي ليا شنو المشكل بيناتكم
الغالية: دارت الماكياج لهداية و ملي مشيت هضرت معاها عليه سباتني هادشي لي كاين
شاف ف سهيلة: علاش سبيتيها؟ .. هي دوات لمصلحة هداية
سهيلة: ما سبييتهاش راه هي لي هضرات بعايا بواحد لافاصون ممحتارماش
حك عينيه مصبر راسو مع هاد الزوجات: شنو قضية الفلوس
الغالية: داك النهار جات عندي كترغب نسلفها و ملي مالقيتش عندي هزيت من فلوس لي حاط فالبيت
حكيم: لاش كنتي باغية لفلوس؟؟ شنو درتي بيهم؟
سهيلة باستنكار: ما شديييت حتا فلوووس راه غير كتكذب عليااا الكذابة المنافقة
حكيم بحدة: سهيييلة متشوفينيش ساكت طلعيي ليا فوق راسيي .. مغاتجيييش و تلصقهم فييك غير هكاك كون ما شديتيهم من عندها متقووولها .. راه مرتييي و كنعرفها حسن منك .. دبا قولي لياا لاااش كنتي باغة الفلوووس و نتي مخاااصك حتا خيير و عاد شديتي الخلصة ديالك .. راه كلشييي كيوصلني ماشي ناعس على ودنيي
سهيلة بارتباك: كك كانت كتسالهم ليا واحد البنت و عطيتهم ليها .. حتا دبا سمحو ليا فلوسكم غنردهم ليكم و كنعتاذر على المشكل لي تسببت فيه
حكيم: و علاااش كتكذبيي!! من اللول جي طلبي مني انااا لاش تقربي ليها .. شوفي اسهيلة .. راك بنت خالتي و بحااال ختي .. منبغييييش نشوف عليك الخايب
حكيم: و علاااش كتكذبيي!! من اللول جي طلبي مني انااا لاش تقربي ليها .. شوفي اسهيلة .. راك بنت خالتي و بحااال ختي .. منبغييييش نشوف عليك الخايب .. الى بغيتي الحاجة جيي عندي انااا و الغالية فوتيها منبقاااش نشوفك جيهتها اخر مرة نلقااا نفس الجيست دالصبااح ولااا غتكوون
هضرة اخرى .. مفاهمين؟
سهيلة: اه سمحو ليا مابقييتش نجبد ليكم الصداع
حكيم شاف فالغالية لي مخرجة فييه عينيها: تبعيني للبيت نهضر معاك
ناضت وقفات سبقاتو و خلاتو تابعها كيستغفر الله .. غير دخل نطقات مغددة معاجبها حال
– علااااش تخلييها معانااا .. قوليهااا تمشييي فحالها .. مكاين ما ديير هناا معانا .. ترجع لدارهم ولا تخرج تكرييي متبقاااش هنااا و لا انا لي نخرج مابقييتش حاملة نشووف وجهاا
حكيم بانزعااج كيحك فعينيه: الغالية الله يهدييك .. راها بنت خالتي و مها مخلياها امانة .. و هي جالسة مع الوليدة و الغلط كيوقع .. اليوم تخاصمو و غذا تصااالحوو .. واس بغيتيني نجريي عليها!! واش ترضاااي نتي تمشي عند شي واحد و يجري علييك!! حشوومة الغالية و نتي مولات العقل .. صبري عليها حتا تهز راسها بوحدها .. ها هيا جالسة معانا بخير و على خير حتا يحن الله و غتمشي فحالها بوحدها .. معرفتش شنو وااقع معاك هاد الاياام وليتي كتحسسي من اي حاجة .. شنو سبب هاد التغيير لي تغيرتي؟
الغالية بانفعال و دموعها دازو: متغيييرتش .. متغييير فيااا والو .. واااش نبقااا انا هي ساااكتة .. لي جاااا يمسح فيااا رجليييه .. لي جاااا يدوووز عليا الدكاااكة و نقول حشوومة و نحدر الرااااس .. حتاليين غنبقااا هاكااا .. صحتييي داوهااا ليا و انا مزااال عاد قلت بسم الله .. نزيييد نكمل عليها تاااني و نصبر على شي حاجة شايفاها بعينية!! .. و نتاااا كتشوووف فيها كتكذب علياااا فوجهييي و سااااكت ليها!! واااش ماحسيتيييش بيااا جالسة جنبك و هي كتكذب فيا باا حشمة بلا حياااا .. دايراني كيف كنت كيف ما كنت و يدي بيدهاااا تضرب فيااا و نخليييها معاياااا .. و هاااادي هي لي مغتكووونش .. صافي للصبر حدووود و هي فيضاااات الكااس سكت ليها المرة اللولة و التانية و التالتة واش نبقا انا غا ساااكتة؟
حكيم بهدوء: واخة الالة نخرج نكري ليها فين تسكن و نتي بقاي على خاطرك .. هي بوحدهت و نتي فدااارك مكاين لي يهضر معاك صافي؟
الغالية: علاااش تا تكرييي ليها تخرج ضبر بمحاينها ماشي سوووقنا حنااا .. متكري ليها متكريي لييك مالك ضارب بيها لاكط لي تسكنها بوحدها “سكتات حتا دارت ليها طن فالراس و تلفتات ليه فمها ناشف” ياااااكما بصاااح!! ياااكما مزوجهااااا و انااا اخر من يعلم .. داير عليااا الضرةةة .. والله يا حكييم و كانت بصح منسمح لييك لا دنيا لا اخرة
حكيم بانفعال: و صااافي زدتييي فيييه .. اش هاااد الهضرة تاني .. لي قلتها ليييك متعجبك و كتشدييي غيير لي بيتيي و تفهمي لي بغييتيي علاااش كتقلبييي .. واااش نلوووحها للزنقة!! .. اش نقووول لمهااا ملي تجييي تسول عليييها ” دوز على راسو بعصبية” نتي هييي تهدني و خوي رااااسك منها .. يااااك مبغبتيييهاش و صافي خليييها معانا و انا غنتكلف بكلشييي مالك مقسحة راااسك
طيحات الغالية دموعها و شهقتها خرجات بلا ارادتها .. حاية براسها معندها كلمة و غير زايدة ناقصة عندو .. هي شنوو كتقول و هو علااش مصر .. للحضة بدات تفكر تصرفاتو قبل الزواج و من بعد الزواج .. بحال الى تبدل و ولا واحظ اخر .. لا كلمة عندها و لا مكانة وسطهم محتارمينها .. جلسات على طرف السرير كتشهق و تبكي و الوجه حماار و النيوف تسدو .. غيير شافها بقات فييه و قرب جلس قدامها القرفصاء حاط يديه على وجهها كيمسح ليها الدموع و هي كتبعد فيه..
حكيم: ششش .. الله يحفضك الغالية ما سكتيي من لبكاا والله حتا دموعك غاااليين عليا و منبغي نشوووفهم .. هانتي عطيني مهلة كانز جوغ والله متبقا صافي؟ .. و تيقي فيا راه حلفت لييك بالله .. ياك كتيقي فيا!! و مسحي دموعك و لي بغيتيها هي لي تكون
تبكي و تشهق و تخنن عليه بغات تسخف حتا تقلبات ليها الكرش و ناضت تجري مخلياه متبعها مخلوع عليها .. دخلات و بدات ترد كل ما فوجها حتا كيتخنق فيها النفس و المعدة خاوية مكاين ما ترد .. حتا مصارنها كيبغيو يخرجو .. تكاها عليه كيغسل ليها فوجهها و هي مرخية فيديه و عينيها مقلوبين بالسخفة .. خرجها تكاها على الكادر دالناموسية و طبطب على حنكها بحنية حتا شافت فيه
– صفاا؟ .. مالك شنو واقع ليك .. شوفي حالتك كييف ولات واش مريضة؟
ضورات وجهها عليه و تكات عاطياه بضهرها: مكاين لي مرضني قدك .. معرفتك واش معايا ولا ضدي “تنهدات” ولكن ميبقاش فيا الحال عارفة سعدي فييه .. عمري زهري يتسكم
غمضات عينيها مستسلمة للنعاس و خلاتو هو تالف ما عرف شنو يدير معاها ..
وقف اللوطو قدام الكافي فين دايرا معاهم .. نزلات مهمومة و طايح عليها الضيم و نزل معاها حتا هو .. ضار عندها و شدها من وجهها باسها فجبهتها بحنية و نطق
– ريحي بالك الغالية .. و خلي كلشي عليا .. انا غنحل المشكل و مريضنا ما عندو باس .. هاد العصبية راه غتجيبيها غير فراسك و فصحتك
سكتات كتصنط ليه و درعها هو من كتتفها مدخلها للكافي كيقلب بعينيه حتا بانت ليه جنات و شي بنت معاها و هو يشير ليها حتا انتبهات ليهم و ناضت عندهم
حكيم: راها مريضة مكنتش غنخليها تخرج كون ما اصرارها .. ردي ليها البال الله يحفضك و ملي تبغيو ترجعو عيطو ليا نجي ليكم واخة؟
جنات: كون هاني هاحنا غير هنا ماغنمشيو لحتا بلاصة .. تجلس معانا يضربها البرد شوية راه الدار تاني كتقنط
حكيم بامتنان: و ها هي معااك الله يحفضك .. ياله نخلييكم حتا تعيطو
خلاها معاها و خرج بينما هوما تقدمو لبلاصة فين كانت ميسون جالسة و متبعة ليهم العين حتا جاو .. ابتسمات للغالية و نطقات بتساؤل
– لباس عليك؟
الغالية بنفس ديقة: هاحنا حامدين الله و شاكرينو
ميسون: الحمدلله على اي حال .. ايوا اجنات بديتي توجدي لعرسك
جنات: راخية كلشي على خديديج هي تعرف لداكشي هههه
ميسون: اييه و ملي تمشي لدار راجلك عيطي على خديجة ديك الساعة .. جمعي راسك اجنات راه دخلتي فعلاقة جدية ماشي لعب و ضحك .. راه تابعاك مسؤولية و واجبات .. خاصك من دبا تبداي تفكري ليهم ماشي حتا يوحل الفاس فالراس عاد نتي تقولي ليه حكاا مكنتش عارفة
جنات: اربي خلي هاد الهضرة لشي جلسة خاااصة و نقي ليا ودنية .. دبا خليك مني .. و خليني ندي الغاية لداكشي لي قالت الغالية قبيلة
الغالية بلوم: علاش ماجيتييش عندي قبيلة ملي قلتها لييك .. خليتيني كنتسنا و نتي جالسة مسرحة فالدار
جنات: و صحبتي راه حتا كنت جاية و تراجعت .. واش المشكل بين العائلة انا اش دخلني!! .. راه ماجاتش نتدخل فشي حاجة بعيدة عليا .. و نتي ما شرحتي ليا والو شنو وقع معاك
الغالية شافت بنص عين ف ميسون و نطقات: حتال من بعد خلينا دبا مهنيين شوية
تبسمات ميسون بطرف فمها و شافت فيها: مابيناش فيك الراحة .. لي شاف غير فعينيك غيبان ليه جبال الهموم على كتافك لي ممخليينش الراحة تتسلل لقلبك .. و ممكن هاد الهم لي متقل عليك فرمشة عيين يزول الى نتي كانت عندك رغبة اكيد .. ولكن فالصراحة كيبان ليا العكس..!!
شافت فيها جنات و غمضات عينيها
– ميسون ماشي دبا عفاك .. الغالية ماشي هي انا لا صفاء ولا غيرها .. نساي الموضوع
ميسون تلفتات لجنات: علاش! شنو خاصها هي؟ .. شنو لي فيكم نتوما و مافيهاش هي؟ .. و حتالين غتبقا هكا .. سمحي ليا مابغيتش نتدخل فامورها الشخصية .. مي مقدرتش نتحكم فراسي .. انا ما عندي دخل ولكن قادرة نمد يد المساعدة .. كيفما نبغي ليا ولا لختي غنبغي لبنات الناس “شافت فالغالية” اكيد الى هي كانت مستعدة تبدل من حالها .. و تفرض راسها .. تنسا هاد الضعف لي كنشوفها فيه!!
الغالية بانفعال: انا ماشي ضعييييفة و منسمحش لييك تهضري عليا هاكا
ميسون بهدوء و برودة: ضعيييفة و بزاااف .. مقادراش تفرضي حتا شخصيتك على راسك فما بالك على واحد اخر!!
الغالية: غييير كتخربقييي .. نتي اصلا فيين كتعرفيني ولا كنعرفك باااش تقولي عليا هاكا
ميسون: ماشي ضروري نكون كنعرفك شخصيا باش نفهم شخصيتك
جنات: ميسون الله يخليك ..
ميسون:جنات نوضي طلبيي لينا شي حاجة ناكلوها
جنات: شوفي غير..
قاطعاتها: غير كنهضرو مالك دبا
الغالية: انا غنمشي فحالي .. معنديي مندير هناا .. عيانة غنمشي للدار
ميسون: شفتيي مقادراااش حتا تواجهي الكلام لي كيتقال ليك .. هذا ماشي ضعف
الغالية: ماغنديرش راسي فييك .. مكنعرفكش اصلا باش نتعاطا معاك فالكلام
ميسون: مكتعرفينيش و كرهاني لهاد الدرجة؟
سكتات الغالية كتستوعب كلمتها و نطقات بارتباك: اش كتخربقي نتي .. علاش غنكرهك ولا نبغييك فين كنعرفك
ميسون: مقادراش حتا تعتارفي بالمشاعر لي كتكني لكل واحد .. خرجي لي فقلبك و فشيييه فلي يستاهل ماتبقااايش هاكا غتجيبيها غير فهذا “حطات يدها على قلبها” و ديك الساعة حتا واحد مغايعقل عليك .. و ديري كلامي حلقة فودنييك .. تقدري تقولي عليا لي بغيتي .. معقدة و متكبرة و خايبة و مكنسواش ولي بغيتي .. ولكن انا عارفة راسي اش كنسوا و شنو نكوون .. كلام الناس اخر همي .. نشوف لي غيفيدني انا و لي غيصلاح ليا .. ماشي لي غيصلاح للاخر و يضرني انا .. حيت ملي غنطييح عارفة راسي مغنلقا حتا شي حد جنبي .. خوديها نصيحة مني .. هاد الحالة لي كديري فراسك ماشي هي الحل الغالية … خليتك على خيير
لاحت ليها كلامها و هزات صاكها .. ابتسمات فوجهها و ناضت خرجات من تما .. غير خرجات طلقات الغالية دموعها لي كبحاتتهم بزز قدامها و مبغاتش تطيحهم خايفة لا تزييد تضعاف و يبان للعلن .. طبطبات عليها جنات من كتافها و خلاتها كتبكي حتا نشفو عينيها و راسها تزير عليها
ايام كتمر و الغالية مزال على حالها .. ديما مسهوتة و عقلها ممعاهاش .. مابقاتش كيف كانت في اللول تقول هزيتي وحدة و حطيتي الاخرى .. الهضرة بالنفخة و لي كلمها تنخلو و تخليه .. كتر فيها غي النعاس .. حالها ما بقا يعجب و هادشي لاحظو حكيم لي حار مع وضعها .. و ظن انها مزال مقلقة عليه و شادة فقلبها من جيهتو ..
كيف العادة فتحات الباب بالساروت لي عطاها حكيم و دخلات كتفرنس عاجبها الحال .. دازت على الصالون و هي تبان ليها اللا حليمة جالسة هي و امها لكبيرة .. استغربات لوجود امها و دخلات كتسلم عليهم و تعنق في مها .. هاد الاخيرة لي كتشوف فيها غير ببزة عينها .. جلسات معاهم كتسول على الحال و الاحوال حتا دخلات الغالية حطات ليهم اتاي و دوازو و دارت معاهم الصواب .. جلسات معاهم غير كتشوف بعيناتها و شادة هداية كتلعب معاها و متلفة معاها الوقت ..
دخل حكيم كيحك فراسو و جلس جنب الغالية لايح يدو وراها و كيتصنط لحديثهم و مرة مرة يشاركهم بشي كليمة .. ناضت سهيلة من حداهم مشات تبدل حوايجها و دخلات الغالية للكوزينة مع سعدية كيوجدو الغذا .. تكا حكيم براسو اللور باريحية حتا خاطباتو الكبيرة باستفسار
– ايوا اوليدي ياك لباس .. ملي عيطي ليا جييت في ساع نشوف اش كاين
حنحن حكيم و تكا على ركابيه بمرفقو كيشوف ف خالتو و نطق بجدية
– حم .. اللا لكبيرة عارفة معزتك عندي و نتي و الوليدة فمكانة وحدة .. ولادك كنحسبهم خوتي و الى بان ليا العييب نقولو على الله يتصلح
الكبيرة: الله يسمعنا خيير اولدي .. ياك مكاين باس
حكيم: سهيلة! … سمعي اللا الكبيرة انا ماجييت دويت دبا حتا صافي مالقيت ليها جهد .. هي اه كنحسبها بحال ختي ولكن راه منقدش انا نهضر ليها ولا شي حاجة .. كنبقا غير ولد خالتها .. عليا بالاحترام من جيهتها و نفس الحاجة ليها .. مابغيتش نطول فالهضرة بلا فايدة دكشي علاش غندخل فالموضوع نيشان .. سهيلة نهار جات تبقا معانا حليت ليها باب الدار و رحبت بيها و هزيتها على كفوف الراحة .. حتا من الخدمة قلبت ليها عليها و دخلتها .. ولكن باش تقلل الاحترام عليا و على مراتي راه منسمحش بهادشي فداري .. فاش نكون انا تبين وجه و فاش نخرج يبان وجه اخر .. سمعي اللا الكبيرة .. الغالية انا كنعرفها و حافضها مزيااان .. بنت درويشة والله يعمرها دار .. مكتجبد حد مكتقرب لحد .. هدشي مكيعنييش ان سهيلة لي خايبة ولا شي حاجة ..
هدشي مكيعنييش ان سهيلة لي خايبة ولا شي حاجة .. حيت المشكل كيوقع بين العيالات و كينوض الصداع .. و ممكن نحلوه بلا مشاكل … ولكن ملي توصل بيها تكذب على مراتي و عليا فوجهي .. و تشد الفلوووس تعطيهم لللل لحمار ديال الخلااا هنا سطوووب .. انا ماشي ناعس على ودني باش ديرها بيا هي ولا واحد اخر .. كنميك و نقول دبا تعييق دبا تحشم ولكن هادشي زاااد على حدو .. و زايدها خارجة عندو و مديا معاها بنتي مزال صغيرة معارفة والو شوف اش وكلوها حتا مرضت!! .. راه هداية مكتخبي عليا والو و كلشي كتعاودو يا صغيير يا كبيير .. و ها تصاور بنتك خارجة داخلة مع داك خيينا ما خلات معاه حتا قنت .. حتا من خدمتها نهار تمشي ليها و نهار تبطلوو .. واش هادشي يتسكت عليه!! .. لي بغييت نقول ليك اللا الكبيرة تهضري مع بنتك و تنصحيها .. نتي اقرب ليها و غتفهمك مزيان .. بغات تقاد معانا الطريق و تقابل خدمتها تبارك الله مبغاتش معندي مندير … هدشي لي كاين اللا لكبيرة
هز راسو فيها من بعد ما كمل كلامو لقاها مزيرة و وجهها رجع حممممر .. مرضاتش يتقال هاد الكلام و بدات تحلف على بنتها و تدعي و تعطيها و يمكن ليها .. مسحات على فمها بغضب و نطقات مصرة..
– كون هاني ياوليدي والله متبقا هنااا .. رجلي برجلها .. من هناااا لدارهم والله متزييد قسم دالمكانة
نطقات حليمة لي كانت الوقت كلو غير كتصنت و ساكتة
– يهديك الله اخيتي اش هاد الكلام .. راها جالسة فدار معانا مخاصها خيير .. و كلام حكيم معقول مقال عييب .. دوي معاها و رشديها و صافي
الكبيرة: لا لا ياختي و تقووول واش تبقا مزااال .. كاااع هدشي مدوزاااه و ساكتة و ضاربة الطم .. والله متبقااا فيها الكلبة .. الى مغززتها بسناااني مانيش الكبيرة
حكيم: مكاين لاش ديك الهضرة .. دوي معاها و صافي الضرب مبقاتش صغيرة لييه .. الواحد يتفاهم غير بالعقل
حركات راسها و وقفات متاجهة لبيت بنتها .. بينما حكيم عاد تنهد و رخى راسو اللور .. حاول يسل الشوكة بلا دم .. ماباغيش يخسر العلاقة بينو و بين خالتو و في نفس الوقت معاجبوش تصرفات سهيلة و زادو عن حدهم .. دكشي علاش فضل يعيط لمها و يحط ليها الوراق معريين تشوف على عينيها و هي تهضر معاها و هاكا حتا واحد ما يخرج للعيب …
اما الكبيرة غير دخلات على بنتها لقاتها متجمع فشعرها و هي تجرها منو لاحتها للارض و نزلات عليها بالخبييط و التقراص..
– باغة تشوووهيني ابنت الحرااااام مع ختييي يالكلبة هي لي بقااااات ليييك ادوييي .. خليييتك تخدمي و تجلسي تشدي لارض ولا تخرجي ت*** ليا مع ز**** والله اليوووم متبقاي هناااا .. اويلي غدايدي اويلي شوهاااتني مع ختيي و ولدهااا “قرصاتها حتا غوتات” و زااااايدها منوضة القربالة مع مرتوووو ادويي
سهيلة و هي كتوجع و تبكي: والله مادرت ليها شي حاجة راه هي لي ناضت كتعاير فياااا
لكبيرة: تعاااايرك قوليها لخالتك ولا لولدهااا ماشي تنوضي تصعصعي مع المراااا .. راها فداااارها نتي لي جاية جالسة عندهاااا “مشات كتجبد فالحوايج و تلوح” نوضي نوضي الحمارة جمعي قشك .. عليااااا بليمين متزيدي الضربة هناا .. ياله جمعي قشك
سهيلة بترجي: لا لا عفااااك اماما الله يخلي ليط صحيييحتك والله ما باقي نعاود الله يحفضك .. صافي والله حتا نطلب منهم السماحة اماما و عمري ندير شي حاجة .. ولله حتا غير كذبووو عليا مكاااين والو من دكشي عفااااك انا بغيييت نبقا خدامة هنااا الله يحفضك اماما
الكبيرة؛ كلمة وحدة قلتها .. جمعي حوايجك اليوم ترجعي فحالك باش تعلمي تخرجي تزندقي ليا مع لي يسوا و لي ميسواش
لاحت عليها حوايجها و خرجات .. اما سخيلة هزات تلفونها كتفتف و صونات على سمير .. بقا مدة كيصوني حتا جاوبها كيعرعر و يغوت عليها
سمير: يا بنت **** مزال عند **** مك الوجه تصوووني تاني!! بسبابك كلييت قتلة الكلااااب و مزال معيطة الله ***** يا بنت ***** ضربي على ***** ولا بربي تن***** نلقا **** مزال تصوني ليا والله منعقل عليك تريكت ال****
قطع عليها خلاها مصدومة فبلاصتها و دموعها طاحو كيتسابقو على خدودها
🔙
شدات طاكسي من الشارع و قالت ليه لبلاصة فين غادية .. غير دارية بالسيارة لي كانت من وراها ملي خرجات من الدار .. حطها الطاكسي قدام قهيوى صغيرة و معامراش بزاف .. نزلات كتنفخ و دخلات كتقلب عليه حتا قشعاتو كيشرب فكافي نواغ و اتجهات لعندو .. سلمات عليه بلابيز و جلسات قالبة وجهها
سمير: مال حبيبي مكشر
سهيلة: هادشي مابقا عاجبنييش اسمير .. ملي تعارفنا و نتا دبا نجي لداركم و شي ماشفنااه و زايدها قاتلني غير بسلفيني عطيني خاصني .. معرفت واش انا لي راجل ولا نتا!!
سمير: احبيبة هدشي كااامل كنديرو على قبلنااا! .. صبري معايا شوية حتا يتحرك المحل لي دخلت ليه شريك و ديك الساعة نتزوجو .. و فلوسك راهم فالحفظ و الصوون غير تولي الحركة و نردهم ليك
جبدات سهيلة شي فلوس من صاكها و مداتهم ليه: هدشي لي بقا عندي .. حتا فلوس الطاكسيات باش نمشي للخدمة مابقيت نكسابهم .. و صافي متبقاش تطلب مني شي حاجة اخرى
سمير: كوني هانيا احبيبة .. غير نتزوجو و نبرعك ديك الساعة لي حباتها خاطرك ديالك
سهيلة: ايوا دبا نشوفو .. المهم نخليك دبا مزال غادية للخدمة
سلمات عليه و هزات صاكها خرجات ..
ورا طبلتهم بالضبط كان جالس بنضرات شمسية و كاسكيط مغطية وجهه و طالق ودنيه عندهم كيسترق السمع .. غير ناضت سهيلة و هو يوقف هو عليه شاف فيه هاز حاجبو و نطق
– فين عرفتي سهيلة؟
سمير بتعجب: نعام؟
حكيم: فين كتعرف سهيلة؟
سمير: و نتا اش ليك اخا
جرو حكيم من تيشرتو حتا وقف و قرب لوجهه: يا غتخرج قدامي بخاطرك يا تخرج بزز
سمير نتر ليه يدو: طلق اصاحبي! ..
خرج قدامو كيتهز و يتحط حتال برا .. غير وقف و تلفت عند حكيم عطاه براسو حتا طاح و نيفو بدا يشرشر بالدم .. نزل عندو ضربو للحنك ببونية حتا ميلو ليه و هو ينطق مغزف عليه
– باقي نلقا **** كطوووف بساحتها كنقسم فمي بالله تا**** و عقل على هاد الوجه مزياااان يا ***** .. راك مزاااال معارفش راسك معامن طحتي بربي تن**** و حد ميسيق لاصل مك لخبار .. و دبا نوووض جمع **** من هنا و *** فحالاتك
خلاه طايح و ناض مشا ركب سيارتو و جبد تلفونو كيدوز فااتصاور لي صورهم .. سب بين سنانو بكلمات منحطة و جبد كارو كيسف فيه و صونا على خالتو علمها تجي عندهم لامر مهم .. كمل مكالمته و اتاجه لخدمتو .. لقا جنات منشغلة بخدمتها و عيط ليها تجي عندو … زوج دقات و حلات لباب مقدمة راسها
– ندخل؟
حكيم: راك دخلتي
ضحكات و جلسات مقابلة معاه باستفسار: ياك لباس الغالية بخير؟
حكيم: الحمدلله بغيتك على موضوعها نييت مكرهت تجي عندها شي نهار تجلسي معاها و لا تخرجو شوية حالتها مبقات عاجباني .. بيها شي حاجة واش ممعاودة ليك والو؟
جنات: لا مافخباريش! .. مي صافي كون هاني غذا مغانجيش لخدمة و ندوز نجلس معاها شوي.. نيت شحال ما تجمعنا كيف قبل .. يكون خير.. ماديرش فبالك الغالية هاكا دايرا.. مكتبغييش تفصح على شنو ضارها ولا معاجبهاش.. المهم انا نهضر معاها و نشوف
حكيم: ان شاء الله
🔚
* واقفة فالسويقة كتقدا لوازم لي خاصين للدار .. تقدا من عند هذا و لاخر و تشطر معاهم .. لباسها جد عادي .. سروال جينز و تيشرت نص كم مع كاسكيط على الشمس .. هزات الميكات ف يديها و دازت شدات طاكسي وصلها للدار .. غير دخلات لقات مها و مرت عمها فالكوزينة و ختها مكايناش مزال خارجة .. غسلات وجهها و يديها و دخلات للصالون فين لقات جدها و اسامة جالسين فيه .. هاد الاخير لي كان منشر فوق الطليق و شاد الكوموند ف يدو كيتفرج فالتيفي .. جلسات كتسوط من الشمس لي كانت حارة و مغمضة عينيها مسترخية راسها حتا سمعات صوتو مخاطبها
الجد: فييين كنتي دايعة من صباح ربي
ميسون حلات عينيها و شافت فيه: مشيت تقدييت ما تاكلو الحااج .. ملي مكاينين رجااال قلت نلعب دورهم
اسامة تكعد من بلاصتو مخنزر فيها: حتااارمي راسك نتيي
ميسون: الحمدلله محتارماه .. كيتك
رد بغيض: راه غنوض نن
قاطعو الجد: جلس اولدي .. هاد المسخوطة باغية غير تعصبك و صافي .. كراناتها دارو ديووور و هي جالسة حتا تضفر الشييب
ميسون تنهدات سارحة بخيالها: حتا يجيني راااااجل بمعنى الكلمة و فييه دكشي لي بغييت و غتهنا من كمارتي واخة عارفة راسي هناا بقيت ليك ههه
الجد بالسياسة: ايوا ها ولد عمك ماتلقاي ما حسن منوو .. منا و فيينا و كابر معاك و كتعرفييه اش بغيتي كتر
هزات ميسون حاجبها بابتسامة سخرية و تعكدات ناوية تنوض
– ايواا شتيي الحااج هانتا خسرتي معايا الهضرة!! .. انا قلت لييك بغيييت رااااجل الحاج مابقيتي كتفهمني!
الجد بعصبية و صوت عالي: و هااااذا اشناهوااا حايط!! .. وا سمعييي ابنيتي هاااادا لي مبغيييتيييش هو لي كااااين ليييك بغيتيي مزيان مابغيتيييش بزز منك
ميسون وقفات بغضب مخفي: وااا سمعنيي حتا نتا اجدييي .. هاااادا هو لي مبغيييتش و عمرييي نكون ليييه .. دييك ميسووون الصغيرة لي كنتي غالب عليها مبقاااتش و حتا دبا الى بقا فيييك و عاااجبك سير عنقو نتا!!!
لاحت كلامها و دخلات لبيتها هزات صاكها و خرجات مخلياه كيغوت من وراها و يسب فيها و ساخط على الوضع معرف هاد الخليقة منين خرجات ليه .. كاع بنات ولادو زوجهم و تهنا عليهم و كيسمعو لكلامو .. لي قالها هي لي تكون .. كلمتو ماطييحش للارض .. و هي خارجة ليه فعووودو الضد لي شادة معاه مخلييه كيبخ الدم و مقادر يدير ليها والو .. عيااا يتغاوت معاها و في الاخير كيجيبها فصحتو..
خرجات كتسوط و تنفخ معصبة غير مع راسها .. دازت جلسات فسناك طلبات ليها الغذا تغذات و بقات جالسة حاضية المارة حتا صونا تلفونها .. غير شافت السمية و هي تبتاسم تلقائيا و قبلات الخط
ميسون: بابااا لباس عليك
– الحمدلله ابنتي و نتي اش خبارك .. ختك لباس عليها
ميسون: كلشي بخير .. نتا كيف بقيتي؟ دوزتي الموعد لي كان عندك
– وي كلشي مزيان الحمدلله .. راه صيفط ليك الفلوس سيري خرجيهم و قضي بيهم شنو خاصكم نتي و مك و ختك
ميسون: مكانش عليك تصيفط راه عندي دياولي .. المهم تهلا فراسك و تبع دواك
– واخة ابابا ياله بسلامة
قطعات معاه و تمشات مع الطريق على رجليها في اتجاه البانك و جبدات تلفونها تشوف ختها فين غابرة .. ياله حطاتو على ودنها ما حسات حتا طار الصاك من يدها بالجهد حتا طاحت من قوة الجرة لي تجرات .. وقفات مخرجة عينيها فالزوج لي كانو على موطور و طيرو ليها الصاك .. بغات تتبعهم لقاتهم طارو .. طاحو دموعها مصدومة من لي وقع ليها و قلبها كيضرب بغا يخرج من بلاصتو .. مسحات يدها من الدم لي خرج حيت تحردات فيها و ضربااات طرييق نيت حتا وصلات قدام الكوميسارية تقدم شكوى .. جلسات على الكرسي كتسنا امتا يدخلوها تقدم شكوتها حتا داز من حداها سيف الدين مزروب .. لاح عينيه عليها بدون تركيز و كمل طريقو لكن سرعان ما رجع كيحقق فيها حتا تأكد
سيف الدين: ميسون!
هزات راسها فيه مخطوف منو اللون و وقفات ملي عرفاتو: سيف الدين .. تسرقت!
سيف الدين: اجي معايا اختي
داها معاه للمكتب ديالو و خلاها جلسات فوق الكرسي و جاب ليها كاس دالما .. شداتو مزال يديها كيترعدو عليها و جلس هو قدامها باستفسار
– شنو وقع ليك؟ و فين تسرقتي اشمن بلاصة؟
ميسون: حدا ***** كنت خارجة نتقدا شي حاجة كنت محتجاها و كنت راجعة حتا طيرو ليا الصاك
سيف الدين: واخة اختي تهدني .. ماشفتيهمش من وجههم ولا شي علامة نتابهتي ليها؟
ميسون: شفت واحد فيهم و لاخر كان وجهه مغطي ماشفتوش
بقا كيسولها و هي كتجاوب حتا كمل و ناض طبطب على كتفها
– كوني هانية ان شاء الله نلقاوهم
ميسون: ان شاء الله .. خليتك على خير
سيف الدين: خلي ليا نمرتك الى لقينا الصاك نصوني ليك
عطاتها ليه و خرجات مسهوتة مشات لدارهم و كيف ديما الصداع مكيخلاش من الدار .. الجد غير شاد الركينة و عاطيها للنكيير كي الولية ..
خرجات من الدوش الحنيكات مزنكين و الشعر فازك كتنشف فيه بالفوطة .. لقات هداية جالسة فمكانها بالبينوار ديالها و كتسنا فيها حتا جات .. جبدات ليها حوايجها لبساتها و نشفات ليها شعرها و خلاتها تخرج تلعب فالصالون حدا جداها .. اما هي ياله بدات تنشف فشعرها حتا التفو يديه على خصرها دافن وجهه فعنقها و كيوزع قبلاتو عليه .. دورها عندو مكاليها مع الكوافوزة و نزل راسو باسها فشفايفها بحنية
– توحشتك..
الغالية برقة: حتا انا
دورات يديها على عنقو و غمضات عينيها مستسلمة و متجاوبة مع قبلاتو الجامحة ليها …..
متكية راسها على كتفو و يديه كيلعبو فخصلات شعرها الاسود من جدورو حتال اطرافو .. هزات راسها مقابلة عيونها مع عيونو و رجعات تكات كدوز صبعها على صدره العاري ناطقة بغنج
– حكييم
حكيم: عيووونو
الغالية بتردد: ب بغيت نمشي عند شي طبيب
وقفات يدو من الحركة و هز ليها راسها حتا تقابلات معاه: ياك لباس؟؟ واش كضرك شي حاجة؟؟ حاسة براسك مريضة؟؟
الغالية: لا مامريضاش .. غير .. غير وليت كنحس بشي حوايج فشكل .. و و هاد المرة مجاتنيش هديك .. احم واقلة حاملة
بقا كيشوف فيها و يستوعب شنو قالت لمدة عاد تحركو شفايفو راسمين ابتسامة على ثغره .. تكعد كيشوف فيها و عرا ليها كرشها بفرحة
– واش بصح! صافييي عمرنا الكرييشة.. متأكدة!!
الغالية: غيير قلت ممتأكداش و حتا التيست مجربتوش مي شلا حوايج كيدلو على الحمل
جرها عصرها بين درعاني و باسها على راسها بسعادة
– ان شاء الله حاااملة انا متأكد غتكوني حاملة.. بقاي هنا نمشي نجيب التيست و نجي
ناض من حداها كيمشي و يجي تلفاتو الفرحة.. لبس حوايجو و نزل كيدردك فالدروج مشا لاقرب صيدلية شرا شنو بغا و رجع ادراجو و فمو غير مفرنس كيضحك للحيوط..
تلقات ليه هداية و هزها كيلوحها فالسما و يشدها و مخرج ليها عقلها بالضحك حتا كيدوزو دموعها فرحتو مشاركها مع كلشي.. داز عند اللا حليمة باس ليها راسها و طلب رضاها
– دعي دعي معانا لوليدة بشي درية صالحة الله يحفضك نعمرو عليك الدار هي بزاقل
حليمة: الله يرضي عليكم و يرزقكم الدرية الصالحة.. الله يخاوي ليكم هاد الصغيرة و يجيب ليها شي اخ يونسها و يعمر البلايص الخاوين
حكيم: اللهم امين ميمتي
باس راسها و طلق كيدير تلاتة الدرجات فخطوى وحدة حتا وصل لبيت لقاها مزال كتسنا فيه.. مد ليها الشاصي و دخلات للدوش تجربو بينما هو بقا برا حامية فيه البيضة
دخلات للدار بعد يوم متعب فالخدمة راجية تستفرد براسها ترتاح شوية .. ولكن شكوون خلاك .. كيف دخلات طلق جدها تاني الاسطوانة ديالو عليها خلاها غير كتستغفر فمولانا .. دازت غسلات وجهها و يديها و جلسات فكرسي على الطبلة فين حطات ليها مها ما تاكل..
الجد كيشوف فيها بنص عين: المسخوووط يالقاها يلقاها .. واخة يطيير للسما و ينزل للارض والله مايطفرووو .. لي ملقط سخط الوالدين ما هو فخيير
هزات ميسون راسها فيه من بعد ما سرطات لقمتها و نطقات؛ الحااج يهديييك الله واش مغتهناااش من هاد الهضرة!! حفضتهاااا حفضتها .. شنو باغي مزال يااك غي السخط لايحو عليا!! و هااا الفلوووس مشاو و ذنووبك خرجووو فيا و انااا مسخوطة و خايبة و منسوااااش صافي؟؟ و هنينا الله يرحم بيها الوالدين ؤاه راسي كيتبخ متزيدش عليا حتا نتا
الجد: الله يقل حياااك ابنت الحراااام وليتي ترضي عليا الهضرة عيني بعينك مبقيتي تحشمي مابقيتي ترمشيي
وقفات ميسون بعصبية واصلة ليها فين بغات: مكنحشمش انااا و كلشييي بسباااابك!! مكنحتااارمش و كلشييي بسباااابك .. مكنسمعش هضرتك و كلشي بسباااابك .. مكنديييرش بكلامك و كلشييي بسباااابك كتفهم!! .. اي حااااجة فيا نتااا سبابي و دبا متجيييش تلعب عليا دووور الجد المحترم حييت مابينك و بيين الاحترام غير السلام
هز يدو نزل عليها للحنك حتا تصورو صباعو .. غمضات عينيها من حر الضربة و عضات على شربها متحكمة فدموعها مينزلوش و هزات راسها فيه فمواجهة بينها و بينو .. اما مها غير واقفة هي و مرت لوسها و كيشوفو فالقضية غتشعل
الجد: لعنة الله علييك المسخوووطة .. من نهاار تزاديتي و النحس تابعنا الله يغبر لييك الشقف و في اللخر تنوضي تحاااسبي معاايا على شنو كنديير
فقدات ميسون اعصابها ولات غير كتطلق لي جا على لسانها .. و خرجات عينيها فيه مغددة
– ايييه نتحاااسب معااااك المنااااافق العنصريييي .. ااااه نتحااااسب معااااك و حقييي غناااخدو منك يوم الديين .. نتحاااااسب على كل ما قلتيييه فياااا و كل ما درتييييه لياااا … “كتحرك راسها بهستيرية” اه ولا كنتي بغيييتيني نخرج درييي لي ياااخد بلاصتك و يشد منصبك و خرج لييك الحسااااب فااالصو ياااك .. داااكشي علاااش همشتييني و لحتيييني نتكرفص مع لي يسوااا و لي ميسواااش يااااك اسي جدييي .. بااااش جدييي بااااش ..
– بااااش جدييي بااااش .. السيييد لي لا عيييد نتكساااو فيييه لااا مناااسبة يديينا ليها خااايف من كلاام الناااس يقولو راه عندووو لبنااات لااا مدررررسة خلاااانا نمشيييو ليييها لاااا تييقاااار عطاااه لييينااا .. السيييد لي ديييما مفضل الولااااد على البنااات و يحيد ليييهم و يعطيييهم هومااا عمري نعتابرو جد .. السيد لي حرمنييي من احلااامي و خلااا واحد اخر يحققهم عمري نحسبو جد .. السيييد لي كااان يكسي و يشري و يدلل فولدو و ناسي بنتو عمرييي نحسبو جد .. “خرجات عينيها فيه” انا مكنحسبوووش جد .. جدييي لي عندييي مااات الله يرحمووو اما نتااا عمري حسبتك و عمري نحسبك جدي “هزات يدها اليسرى امام عيونو” عرررفتي هاد اليد فكل مرة كنشوووف فيييها اش كيوقع ليااا؟؟ .. هههه لا لا مكنبكيييش لااا مكنحزنش و عمرييي نحزن .. كنعتبرها نقطة قوة دياااالييي .. ايييه انااا لي هرست كااااع القيوووود ديااالك و مزااااال غنهرسهم و عممممري غنديير دكشي لي بغييتي كتفهم!! عمرييي .. و هاااد المرة واخة تقتلنيي كتفهم واااخة تقتلني!! نفضل نموووت ولا نحنيي لييك الراس .. ديييك ميسووون لي كنتي باغي تخرجها بمعاملتك ليييها خرجااات ليييك فعووودك و دكشي لي كنتي غدييير ليها تقلب عليييك اسي الحاااج .. ههه قاليييك حاااج .. نتا بزاااف علييك داك المقااام لي زرتيي بزاااف عليك .. حسبي الله و نعم الوكييل فييك
ضربات فيه و خرجات خابطة الباب وراها .. غير سداتو طاحو دموعها و بدات كتشهق و طيحهم حجر .. احساس بالتهمييش ديما ملاحقها .. عمرها حسات بحنان جدها ولو غير شوي .. ديما هازها بالمسخوطة و حاطها ببنت لحرام .. عمرو شاف فيها ديك حفيدتو لي من دمو و لحمو .. لا بل ديما كيشوف فيها ديك البنت لي مصالحة لوالو من غير اازواج و الشقا فدار راجلها .. عمرو عطاها حتا فرصة تبين على قدراتها .. و كان ديما عاطي اهتمامو لولاد عمها و هاز بيهم راسو و كيفتاخر بيهم .. الاب لي يدير الهيبة لبناتو مكاينش و خارج البلاد .. كيجي مرة فشحاال يشوف حالهم و يوصي عليهم و يمشي و هو غير داري بشنو كيدوز عليهم ملي كيمشي .. دكشي لب كيوقع كيبقا تماا عمر شي واحظ تجرأ يوصل لهضرة .. و هنا فيين طغا الجد ولا داير لي فراسو و كيعامل كل واحد على حسب كانتو..
مسحات دموعها ملي خرجات للشارع و تمشات على رجليها حتا وصلات واحد الجردة و دخلات جلسات فيها كتصنط لعضامها و تسترجع كلامها لي خرجات .. متسوقاتش ولا عطات للامر اهمية و كأنه ماشي جدها هداك لي تكرعات عليه .. حسات براسها خوات لي ضارها فقلبها من جيهتو و رتاجت نسبيا .. جبدات تلفونها طالعة نازلة فوسائل التواصل حتا صونا تلفونها
بنمرة غير مسجلة .. جوبات بخفوت حتا نطق الطرف الاخر لي غير من صوتو عرفاتو
– ختي ميسون صفا؟ انا سيف الدين عرفتيني؟
ميسون: وي عرفتك .. لباس عليك؟
سيف: الحمدلله .. عيطت ليك غير على قبل صاكك .. الى كنتي مسالية نجيبو ليك
ميسون: لقيتوه؟ .. اه واخة انا نييت خارجة
سيف الدين: فينك نجي عندك
ميسون: ف*****
قطعات معاه و بقات فبلاصتها حتا عاود صونا و خرجات من الجردة حتا بان ليها فسيارتو و مشات ركبات حداه و سلمات عليه بابتسامة و مد ليها الصاك
سيف الدين: غذا و جي سني
ميسون: ان شاء الله
سيف الدين: نوصلك معايا؟
ردت بدون متشوف فوجه: لا غي بلاش منعذبك
ديما سيف الدين السيارة: هي زيدي نييت توحشت نهضر مع صديقة الطفولة هه
ميسون: مانسيتيهاش ههه
سيف الدين: لا .. ايام عمرها تنسا .. طفولة مكتعوضش ياك اميسو
ميسون بحنية: اممم .. مزال محتافضة بجميع الدكريات ههه و نتا
سيف الدين: حتا انا مزال عندي .. واخة انقطعنا من بعد و مابقاش التواصل بيناتنا مي بقات عندي واحد الصورة زوينة عليك .. كنتي نعمة الصديقة و مزالة هه
دورات وجهها طولات فيه الشوفة و نطقات بعيون براقة: حتا نتا كنتي افضل صديق و مزال لحد الان
دورات وجهها جهة الزاج عاضة على شفاها و مربعة يديها مزيرة على نفسها .. بينما هو ابتسم ابتسامة صغيرة و دور وجهه جيهتها
– شنو بقيتي درتي في فقرايتك!! الى باقي عاقل كنتي مولوعة بعلم النفس
ميسون بخنقة حابسة عليها التنفس
– لا .. علم النفس عمري قدرت نديرو ولكن كنقرا عليه .. و كنتمنى شي نهار نكمل قرايتي و نقراه كتخصص و نتخرج منو .. قريت التمريض و دبا خدامة فكلينيك
سيف الدين: حتا التمريض مزيان الله يوفقك ..
كمل طريقو حتا وصلها قدام دارهم .. ابتسمات ليه و شكراتو و نزلات في اتجاه دارهم .. و غير تحرك سيف الدين من تما قلبات الطريق كضوور فالمدينة حتا تناص الليل عاد رجعات حلات الباب بشوية و طلعات لبيتها بهدوء بدلات حوايجها و تلاحت تنعس
من بعد ما لبسات حوايجها و لبسات حتال هداية خرجات شادة ليها ف يدها .. لقات اللا حليمة جالسة فالصالون و دازت باست ليها راسها و خدات رضاها .. خرجات كتفرنس و الحنيكات مزنكين و الوجه منور من عند الله .. لقاتو كيتسناها قدام اللوطو و حل ليهم الباب ركبو داير ليهم كي الما القليل .. داز لبلاصتو و ديمارا اللوطو غادي بسرعة متوسطة و كيتحدث معاها
– اش تشهااو الكبيدات ديالي
هداية: بابي بابي نمشيو للبارك
حكيم: غنمشيو لبلاثة غتعجبك ازين ديالي “شاف فالغالية” مامات ولادي ممشهية والو دبا؟
الغالية: لا هههه “غطات وجهها بيديها” ولله حتا حمق ههه راه غي حاملة و نتا كتعامل معايا بحال شي بنية صغيرة ههه
حكيم: و حاااملة سهلتيها!! راك هازة ليا ولدييي ولا بنتي امدام .. و رااك مزال بنية ندلعك و نتدلع معاك
الغالية: هههه قول نتا طالب عليها و دايرني انا طريق احياني علييك
حكيم: و شنووو نتوحمو حتا حنا معااك هههه
كملو طريقهم فجو مليئ بالنشاط و كلام حكيم حتا وصلو للوجهتهم .. كانت فيرمة صغيرة شوية خارج المدينة .. دخلو من بعد ما بلاصة الطموبيل و لقاو لكليكة تما سابقينهم .. مول الفيرمة فاتح هو و جنات لي كانو اول من وصلو تما .. سيف الدين هو و نسمة لي جات معاه عاد صفاء و ميسون لي عيطات ليهم جنات و عرضات عليهم .. لقاو كلشي مجموع البنات كيوجدو فالطبلة و يستفو فالكراسا و الرجال كيقادو فالشوايا و يجيبو الفاخر و ما جاوره … دخل حكيم مدرع الغالية لي غير كتفرنس عاجبها الحال و معاهم هداية كتجري قدامها و ضفيراتها كيلعبو ورا ضهرها .. تقدم الكل كيسلم عليهم و يباركو للغالية حملها و يدعيو معاها و هي كتستقبلهم بشكر حاار و فرحة غامرة وجهها ..
جلسو البنات من بعد التسلام ضايرين بالطبلة و جنات حدا الغالية معنقاها من جنب
– الخاااينة كعما علمتيني انا اخر من يعلم
الغالية: هههه لا والله حتا نتي تاني من يعلم هههه من بعد حكيم قلتها ليك نتي اللولة
جنات: مبروووك عليك ازيين و الله يتبت حملك و يجيبو على خيير
الغالية: اميين احبيبتي .. والله الى فرحت فاش عرفتها هههه اما حكيم دار الحمااق شوهني مع خالتي
جنات: هههه ايوا راك عارفة نهار اللول تزوجتي حمق ههه
صفاء: ما شاء الله مواتيين بعضياتكم .. الله يخليكم ديما مجموعين
الغالية: امين اختي الله ينورك
ميسون: مبروك عليك اختي .. الله يتبت حملك يارب
فرحو معاها و دوزو داك النهار كامل غير فالفيرمة .. لي طابت كيتحط ليها نصيبها هي اللولة و مكبرين بيها و فرحانين معاها .. ما خلاو ما حطو ليها .. لي تشهات نفسها حضرات قدامها .. للحضة بدات كتقارن بين حملها الاول لي حتا واحد ما حاشاها ليها و بين دبا .. حمدات الله على على وجود حكيم فحياتها و بقات متبعاه بنضراتها منين ما داز حتا لاحضها و هو يجي يجلس حداها مدرعها
– حبيبي توحشني
الغالية: نووض سير عند صحابك ههه غتبقا مقابلني غير انا
حكيم: و علاه شحال عندي منك .. هي وحيدة قد الكميشة .. خاص نرد ليها البال لا طيير و تخليني
الغالية: لا صافي تقلت ههه مابقا لي فين نطيير
حكيم: تبغي ضوري شوية هنا نسرحو رجلينا .. نوضي ياله
ناضت معاه و مشات عند هداية تديها معاها ولكن مبغاتش و بقات كتلعب .. شافت فجنات حداها و وصاتها عليها عاد تبعاتو لقاتو غادي جهة اشجار الليمون و عنقاتو من جنبو حاطة راسها عليه
– بصح فرحان بحملي؟
حكيم: اش هاد السؤال
الغالية: ولكن ما درناش حساب ل هداية و معرفتش واش غتقبل الموضوع
حكيم: غتقبلو عادي و غتفرح بخوها .. كنعرف بنتي مزيااان و هي من ديما كانت تمنى يكونو عندها خووت .. المهم هداية انا غندوي معاها نتي غير كوني هانية و تهلاي فراسك .. خاصك تبعي مع شي طبيبة على قبل الحمل
الغالية: ان شاء الله حتال الاتنين و نمشيو عند شي وحدة
بسم ليها و درعها بجنبو كيتسارا بيها فالفيرمة حتا عيات عاد رجعو و كان بدا يضلام الحال شوية .. جلسو شوية كيتبادلو اطراف الكلام بيناتهم حتا نطق فاتح و عينيه على جنات..
– اللمة جاية ان شاء الله فعرسنا انا و هاد المعكسة
جنات: هههه و راه ماشي انا لي مكسة الموضوع و ما فييه العرس فييه شلا ما يدار و انا يدي تقيلة خاصني وقت و صافي
نقز سيف الدين: لا اخويا هي بالي خلاص و هزها عليا بيت نتزوج تا انا من وراها
جنات: شلاااا ما درتي .. بلاصتي بتبقا ليا كي تزوجت كي بقيييت اسي خويا العزيز
نسمة: بلاصتك عمرها تبدل احبيبة .. سيف قصد انه بغا حتا يتهنا عليك عاد يعمر دارو
سيف: و منديروش عرس رباعي و نهنيو البال
نسمة: ويلي لااا انا مزال معطلة على الزواج
جنات: و حتالين اختي راكم دوزتو كتر من عامين بزوج
نسمة: نتعرفو اكتر باش ملي نتزوجو مايكونش مشاكل
الغالية: عامين كنضن كافية و موفية تعرفيه
نسمة: ممكن
الغالية: الله يصاوب للجميع و يتاويكم بالخير
لبسات جليليبة جديدة فاغوز بيبي و لايحة اطراف الفولار ورا ضهرها .. شدات ف يد هداية ناوية تخرج حتا تدق الباب و مشات تحل باستغراب .. غير فتحاتو بانت ليها جارتها فاطمة واقفة قدامو بضحيكة و هازة بلاطو ف يدها فيه كيك .. ابتسمات ليها هي الاخرى بمجاملة و رحبات بيها مدخلاها للصالون هي و بنتها ..
الغالية: مرحبا بيك اختي
فاطمة: الله يكبر بيك ازوينة .. قلت نشاركو الطعام و نتعرفو اكتر الى حبيتي
الغالية: الله ياودي مرحبا
ناضت للكوزينة عمرات اتاي و خلات فاطمة فااصالون كتقلب فعينيها و تسكتشف فالدار حتا رجعات هازة بلاطو حطاتو و رجعات هازة بلاطو اخر بالحلويات حطاتهم امامها ..
فاطمة: هي سمحي ليا دخلت عليك على غفلة .. باينة كنتي غادية خارجة
الغالية: معليهش اختي مرحبا بيك
فاطمة: ايوا ولينا جيران قلت نتعرفو كتر و مرحبا بييك عندي حتا نتي وقتما بغيتي تجي ولا خصاتك شي حاجة مرحبا
الغالية بمجاملة: شكرا اختي
تبسمات فاطمة كضور فعينيها و نطقات باستفسار: ساكنة هي بوحدك نتي و سي حكيم؟
الغالية: لا معانا حتا خالتي
فاطمة: اه ايوا مزيان .. واخة العيشة بوحدك كتكون زوينة و كتاخدي راحتك فدارك
الغالية: حتا دبا الحمدلله واخدة راحتي .. خالتي فمتابتة الام ديالي و بيناتنا علاقة زوينة الله يخليها ليا
فاطمة: امييين .. غي هو و كان كاينين شي عكوزات الله ينجيك منهم السم كيتقطر و حتا من الراجل كيقلبوه عليك الله يلطف و صافي
الغالية: شربي اختي اتاي مرحبا
سدات عليها باب الفضول بهاد الكلمات و خلاتها كتضور فراسها و تبسم ليها .. قطعات من الحلوى لي جابت و مدات منها للغالية
– هاكي اختي نشاركو الطعام
الغالية باعتراض و تأسف: هي سمحي ليا .. الطبيب مانع عليا الحلاوى بصحتك اختي
فاطمة: ويلي بصح؟؟ .. علاش مالك مريضة ولا
قاطعها صونيت فالباب و شافت الغالية ف هداية
– نوضي اماما شوفي شكون الله يرضي عليك
مشات هداية كتجري شافت شكون و حلات .. بينما فاطمة تبعات ليها العين و شافت فالغالية
– هادي ربيبتك يااك .. هداية بنت سي حكيم
الغالية: بنت حكيم هي بنتي “شافت جنات داخلة كتشوف باستغراب ففاطمة” جناات ياكما تعطلت عليك
جنات: اييه و جييت حتال عندك يسحابلي وقعات ليك شي حاجة
جمعات فاطمة الوقفة: سمحو ليا شديتكم على شغلكم .. نعوضوها مرة اخرى ان شاء الله
وقفات معاها الغالية: ان شاء الله اختي
خرجات فاطمة جارة بنتها و الغالية بدات كتجمع فالطبلة و تحول للكوزينة
جنات: شكون هاد خيتي تاني
الغالية: ساكنة جنبنا .. معرفتها اش جاية ديير عندي
هزات داك الكيك كتشوف فيه و قلبها ممطمنهاش و هي تلوحو و خرجات من الكوزينة
– ياختي مارتاحييت ليها .. و كتدخل فلي مايعنيها معرفتها علاياش كتقلب
جنات: بعدي من كحل الراس راه فين غي المشاكل .. السلام سلام فالزنقة و صافي حدي ليها هاد دخول و الخروج للدار متعرفي بنم اش تحت راسو
الغالية: دكشي لي غندير نييت .. ياله نخرجو خلااص قال ليا حكيم نرجع بكري
جنات: اووووففف مابقا والو للعرس هههه شداتني الخلعة والله
الغالية: ايييه و تشوفي الخلعة دبصح حتال ليلتك عاد غتحسي بيها اما دبا كيف والو ههههه
جنات: سكتي ازبلة متخلعينيييش لي فيا كاااافيني
الغالية: هي باش تكوني على بال هههه .. و زيدي خلاص منخرجو حنا حتا يجي حكيم
شدات فيها و مشاو ركبو كيتجمعو و طالقين الاغاني و مشاركين حتا هداية فالهضرة واخة مفاهمة والو حتا وصلو للمول و دخلو كيتقداو و يتخيرو فملابس العريسات و جنات لي عجباتها كتهزها و تشطر مع مول المحل على التمن .. ما رجعو حتا صدعهم حكيم بالتعياط كل دقيقة عاد شدو الطرييق و دازت جنات شرات الشوارما للغالية لي سايلين ريوكها عليها .. بقات غير معجبة فيها و كتضحك عليها .. الغالية لي مكانتش تعجبها شوارما ها هي طايحة فيها عمية فعلا الحمل كيقلب مولاه سفاع على علاه .. وصلاتهم قدام الدار و نزلو كيفرنسو داخلين هازين صاشيات ف يديهم حتا لقاوه قدامهم عاقد حواجبو
– اش هاد الوقت امدام
قربات ليه الغالية بدلع: ولله حتا جنات لي دوقها صعيب ههه صافي سمح ليا ماباقيش نعاود
حكيم: لا هي عاودي نييت .. هادشي غير قلت ليك متعطلييش .. وليتي كديري غير لي قالها ليك راسك!!
الغالية: والله ما هكاك .. راه غير محسيناش بالوقت و صافي .. مابقاش تعاود
حكيم: سيرو تعشاو راه الماكلة مسخنة فالكوزينة .. الوليدة بايتة عند محسن اليوم حتال غذا عاد تجي
الغالية: نتا تعشيتي
حكيم: لا مافياش غير بالصحة
الغالية: واش تقلقتي!! راه والله ما قصدنا غير مرديناش البال للساعة
حكيم: معليهش ولكن هاد المرة متعاودش كلمة وحدة قلتها ليك متعطليييش هي متعطلييش الغالية .. و زايدة نتي حاملة مخاصكش تعيي راسك .. ياله سيري تعشاي و طلعي تنعسي
بقات غير كتبرق فعينيها .. الخروج هو لي غيعييها!! .. و ملي كانت كرشها واصلة لفمها و هازة دار على قدها بشقاها بتصبانها بتخمالها .. عمر شي واااحد سول حتا واش عييتي ولا قال ليها سيري رتاحي راك هازة رووح معاك .. فعلا الفرق شااااسع بالنسبة ليها .. لا مجاال للمقارنة بين زواجها الاول و زواجها ديال دبا .. حمدات الله لي عوضها برجل كيف حكيم و تبسمات معنقة هداية ليها ..
* كملات جنات طريقها غادية لدارهم و دازت من طريق مختصرة و خاوية .. حتا فجأة وقف قدامها بسكوتر ديالو .. تنهدات بقلة حيلة كتشوف فيه نزل جاي اتجاهها و هي تسد البيبان عليها هوما و الشراجم .. دق عليها حادر راسو عندها و هي دورات عينيها جيهته .. نزلات شوية من الزاج و شافت فيه باستفسار
– شنو بغيتي تاني
فؤاد بحدة: نزلييي
جنات: شنو بغيني
فؤاد بغيض: بصح تخطبتي لداك ****
جنات ببرود: على السلامة! عاد وصلاتك
فؤاد: نزلي ابنت ال**** نتفاهم مع ****
هزات الزاج عليها و بغات ديماري تمشي فحالها ما حسات حتا تخبط الزاج داللوطو بحجرة حتا تشقق .. غوتات مخلوعة منو و تلف عليها حتا كيفاش دير حتا تسوق .. تخبطات الزاجة القدامية تاني بحجرة كبيرة و هي مخلوعة و بدات تفتفت .. زادت القدام باللوطو و هو تابعها كيعرعر عليها و هي الخلعة تمكنات منها .. رجعات ماشاريان بدون قصد حتا خرجات فيه شقلباتو و كسيرات غادية و كتشوف وراها واش تابعها شي حد .. تنفسها كان غير منتضم و دموعها دازو بدون ارادتها مخلوعة من انه يكون تابعها .. هزات تلفونها كتفتفت و اول نمرة طلعات ليها صونات عليها كتبكي …
جنات: خويااااا عتقنييي عفاااك .. داك الحمااار تلقااا ليا و هرس عليا الطموبييل
سيف الدين مدعوق: كيفاااش!! فينك نتي دابا؟؟ واش بيخيير ما وقع ليك والو
جنات: انا بخيير .. و قريبة للدار .. جي عندي لل**** دغيا عفااك
بقا على تواصل معاها و ناض ركب سيارتو هو و سي فاتح لي كان جالس معاه فالقهوة .. غزز على سنانو بعصبية كياكل فشفاهه السفلى .. و كسيرا في اتجاهها .. وقفو قدامها لقاوها موقفة الطموبيل و جالسة فيها كترعد وجهها صفر و الخوف باين عليها .. دق عليها سيف فالزاجة لي تهرسات و هزات راسها مخلوعة .. غير شافتو نزلات كتبكي تلاحت ليه فصدرو كتنخصص
– معرفتش منين بعت عليا حتا لقيتو قدامي .. بدا كيدخل و يخرج فالهضرة و ملي مجاوبتوش هرس عليا الزاج
جرها فاتح لعندو كيتفحصها بعينيها و نطق مغزف على مول الفعلة: موقع ليك والو؟ مقاسكش؟
جنات: لااا سديت عليا البيبان و زدت بحالي
سيف الدين: صافي موقع باااس غي تخلعتي و صافي .. ياله نوصلك للدار و نرجع نشوف اش كاين هنا
فاتح: غي خليك هنا حتا نرجع انا نوصلها و نجي
جرها معاه لسيارتو ركبها و هي كتمسح فعينيها من بقايا الدموع و ركب جنبها متاجه للدار
– واش فايت ليه تلقا ليك؟
جنات: اممم شحال من مرة و ديما كنصدرو .. اليوم معرفت مالو بدا كيهرس عليها فالزاج
فاتح بغضب مكبوت: مكاين باس .. الحمدلله لي موقع ليك والو .. سيري رتاحي دبا و متخافيش حتا واحد ما كيفلت من الفعلة ديالو
حطها قدام الباب و رجع هو ادراجه لقا سيف كيتفحص فالطموبيل و الفقصة غتقتلو .. شافها فاتح مشا ليها الزاج و عض فشفته مغزز على فؤاد .. ضربو دورة فالنواحي و البلاصة لي نعتات ليهم جنات و مالقاو والو ..
سيف الدين: بربي تا ندخل **** يتعفن فالحباسات
فاتح: يصبح و يفتح .. سير دبا للدار و غذا الى لقيتيه علمني
سيف الدين: الى لقيتو غنقبر **** فبلاصتو
تفرقو من بعدها و كل واحد اتاجه لدارو..
*يوم جديد جديد فاقت جنات معطلة كتمسح على وجهها و جلسات كتفطر مع مها و باها اما حتا سيف الدين كيخرج بكري .. جمعات لماعن غسلاتهم و دخلات لبيتها كتبدل فحوايجها و تصوني ل فاتح .. ولكن لا من مجييب .. عودات و عاودات و والو .. حسات بشي حاجة ماشي هي هديك و هي تصوني لحكيم علماتو بغيابها .. نزلات شدات طاكسي وصلها حتال لاجونس ديالو ملقاتوش و رجعات ادراجها كتفكر فين غيكون .. تفكرات عنوان دارو لي كان وراها ليها و مشات ليها تا هي كدق فيها بلا جدوى .. تملكها الخوف بعض الشيء و جبدات تلفونها صونات لخوها
– فيينك؟ واش فالخدمة؟
سيف الدين: وي بغيتي شي حاجة؟
جنات: اا كنصوني ل فاتح و مكايجاوبنييش واش مادويتيش معاه؟
سكت سيف الدين لتواني و تنهد: جيي جي لعندي ها هو كاين هنااا
حطات جنات يدها على جبهتها و تمات نازلة من دروج العمارة كتهضر معاه: ياااكما دار شي حاجة لداك لحمااار .. اويلي واش شادينو ولا غيير داز عندك عادي؟
سيف الدين: علاه لي تبع طريقك بيخرج منها ساااالمة .. دوزي لعندي خلاص هانا كنتسناك .. عولي على عرسك دوزييه فالسيلول مع الحباسة اوجه النحس
دخلات للكوزينة وجدات الغذا و دازت كتخلط فشي كيك للتحلية .. صونات عليها امها و بقات شادة معاها لمدة حتا قطعات عاد جلسات كتكمل لشغلها .. دخل حكيم كيحط فالفيست ديالو علقها عند الباب و ملامحو غير مرتاحة .. سلم عليها و هز كاس ديال الما و طلع للبيت شرب فانيدة للمعدة .. تبعاتو كتستفسر منو على حالو و هو كيجاوب غير بلباس الحمدلله غي وجع خفيف .. ناض بعكز بدل حوايجو بوحدين بيتيين و تكا فمكانو كيتصنط للصداع لي فيه .. نزلات الغالية تبخات ليه الزعتر فالحليب و طلعاتو ليه يشربو و خلاتو يرتاح …
بقات جالسة حاطة يدها على حنكها و كتشوف فهداية كتلعب قدامها حتا جاها الجوع و ناضت حطات ليها وكلاتها .. طلعاتها لبيتها تنعس و نزلات وجدات بلاطو بالماكلة و طلعات عندو لقاتو ناعس .. حطات البلاطو فوق الكوافوزة و حركاتو بحنية من كتافو
– حكييم .. حكييم فيق كول شوي و شرب دوا
حرك حكيم عينيه مقوسين فيها و مخسر ملامحو: هي خليني مافياش
الغالية: غير بزز عليك شوية باش تشرب الدوا .. ياله غي شوية
تكعد من بلاصتو و هز فقط فنيدة و كاس الما شربهم و رجع تكا
– هي كولي نتي انا مافياش .. غير نعس شوية و يفوتني الحال ماديريش فبالك .. هداية فينهي؟
الغالية: نعسات .. مخاصك والو
حكيم: لا بغيت نعس و صافي
خلاتو متكي و نزلات هي كتلف فالوقت لتحت حتا بان ليها جاي نازل مبدل حوايجو و هاز سوارتو و تلفون
الغالية: فين غادي و نتا مريض
حكيم: عيطو ليا من الخدمة واقع شي مشكل .. نمشي نشوف شنو كاين و نرجع بلاما تشطني بالك
الغالية: عيط لجنات تشوف اش كاين و بقا نتا .. غتخرج هاكا مرييض
حكيم: مامريضش الغالية .. دغيا غنرجع نشوف اش كاين و هانا معاك
الغالية: نمشي معاك؟
حكيم بقلة صبر: الغاااالية راه قلت ليك ممريضش صافي!! بقاي فالدار مع هداية انا غير غادي نسالي و نجي مكاين لاش تمشي
الغالية: واخة على خاطرك .. المهم رد بالك و الى ماحسيتيش براسك مزيان رجع الخدمة مغاديش تهرب
مجاوبهاش اكتفى يحرك ليها راسو و خرج ركب سيارتو و كسيرا في اتجاه خدمتو .. قضا شغلو فيها و خرج من تما وجهو صفر .. حط يدو على صدرو مكوانسي منو و كيتعصر بالوجع و قرب لسيارتو ركب فيها مغمض عينيه كيهدن فراسو .. ديمارا اللوطو و كسيرا ديريكت جهة لكلينيك شاد جهة المعدة كيتعصر
طلات على المرضى لي مكلفة بيهم و مشاو وقفات مع احد الممرضات كيتداكرو فشتى المواضيع .. هزات عينيها ساهية غير مبالية لكلام لبنات لي معاها و هو يبان ليها جاي داخل سخفان و وجهه صفر .. حققات فيه النضر باش تتأكد واش هو او غير تشابه و قربات جهته كتستفسر على حاله..
– حكيم؟ مالك شنو عندك
حكيم بصعوبة: كنتقطع .. اففف المعدة المعدة
حركات راسها تالفة و ندات على احد الممرضات
– عيطي للطبيب انا غندخلو لغرفة الفحص
دخلاتو لاحد الغرف حتا تم داخل الطبيب كيفحصو و خرجات هي وقفات عند الباب شادة تلفون .. صونات على جنات ولكن حتا واحد ما جاوبها .. عاودات مرارا و تكرارا بلا فايدة .. شدات تلفون كتفكر لمن تعيط و هي معندهاش نمرة الغالية .. صونات على اختها و غير جوباتها نطقات
– عندك نوم ديال الغالية؟
صفاء: علاش؟ شنو بغيتيها؟
ميسون: و خلاااص .. عندك لا؟
صفاء: اه عندي
ميسون؛ صيفطيها ليا دبا
قطعات عليها و تسنات حتا صيفطاتها ليها صفاء و هي تصوني بعد تردد
* حلات الباب على اللا حليمة لي وصلها محسن .. سلمات عليها و دخلات لبيتها ترتاح بينما محسن رجع فحال سبيلو .. نزلات هداية و حطات ليها هي و اللا حليمة الكوطي اما هي معندها منين يدوز .. جالسة حداهم كتحرك رجلها بتوتر حتا صونا تلفونها و هزاتو ضنا منها انه حكيم .. غير شافت النمرة غير مسجلة و حطاتو بلا مبالاة .. رجع صونا و عاود حتا عصبها و هي تجاوب بصوت حاد
– الووو
ميسون؛ الو الغالية؟
الغالية: اه شكون معايا؟
ميسون: انا ميسون .. احم .. واخة معنديش الحق نعلمك مي قلت نقولها ليك..
الغالية: ياك لباس شنو واقع؟
ميسون؛ اا غير سي حكيم عاد جا للكلينيك مريض و قلت نعلمك
الغالية بهلع: اويلي!! شنووو عندوو واش تزاد علييه الحال؟ كيييف داير دبا؟؟ واش لباس عليه؟
ميسون: الغالية تهدني اختي .. دخل عندو الطبيب و مزال معرفتش شنو عندو
الغالية: اشمن سبيطار فين كاين
ميسون: ف****.. شوفي متخلعييش راه ماشي شي حاجى كغاف مكاين لاش تخلعي
شكراتها الغالية و طلعات كتبكي لفوق لبسات جلابتها و نزلات وصات اللا خليمة ترد البال لهداية معاه و خرجات شدات طاكسي مشات للسبيطار فين كاين.. صونات على مبسون نعتاتها فين تجي حتا وصلات عندها و لقات الطبيب عاد خرج
الغالية: شنو عندو ادكتور؟ واش لباس؟ نقدر ندخل نشوفو؟
د: للاسف عندو تسمم فالمعدة و خاصنا نديرو ليه غسل المعدة دبا!
دخلات للكوميسارية معصبة كتسوط و مشات ديريكت لمكتب خوها .. دقات و ملي سمعات الرد حلات و دخلات .. بان ليها خوها جالس فمكانو و فاتح مقابل مع فؤاد لي كان كلو مملوي في الفاصمة .. يدو فيها الجبيرة و وجهو كلو كضمات .. منخرو مغطي بلفاصمة و عينو مقوسة شوية و مايلة للزروقية.. دخلات موسعة عينيها كتشوف فيه و دوراتهم لخوها بتساؤل
– هذا اش كيدير هناا!!
سيف الدين: رافع عليك دعوة بلي خرجتي فيه بالطموبيل .. و دعوة على فاتح
خرجات فيه عينيها مصدومة منو و دارت لفؤاد بغات تغززو بسنانها
– غزييييت فيييك و كوون جاااات عليا كون فرشخت لييك الرااااس اولد لحرااام “شافت فخوها” تااااناااا باغة نرفع دعوة عليييه هزس ليا طموبيلتي و شخشخها الحمااار .. تاا شتي واخة نبيعوك كاااامل ماتجيب ليا تمااانها ا عدو الله .. قيييد اسي الكوميسييير تانا رافعة دعوة..
جلسات كتنفخ و تسوط غير بوحدها شوية و هي تهز راسها ففاتح جامعة حواجبها
– هدشييي لي بغيتي!! متعرفش تجمع يديييك تحتك و تهنييينا ياله هاحنا على اخر يامنا لينا نتجرجرو فالكوميساريات بسباب شمكاار دالخلااا
فؤاد بعصبية: حتاااارمي راسك ابنت لل
قاطعو فاتح بحدة و برود: يا تجمع فمك ولا نهدمو لديلمك
سيف الدين: دايرها قد راسك و زايدها بحلان الفم .. راكم بزوووج غالطين .. يا غتسحب شكوتك و تنوض **** فحالك ولا راه هوما غيقدمو شكوى ضدك .. و على اي حال راه هوما لي رابحيين
فؤاد: انا ممنازلش على حقي حتا يتعاقبو
جنات مربعة يديها: حتا انا ممنازلاش على حقي حتا يتعفن فالحبس .. قيييييد اسي الكوووميسييير .. محاااولة اغتصاااب هي اللولة و هرس ليا طموبيلتي و الضرب و الشتم و زيييد عليها التحرش كل مرة .. و التهدييييد
سيف الدين: من الاحسن تتنازل على الدعوة و لا راك نتا لي غتغرق حتا لودنييك .. كاينين شهوود على كلامها و هي غالباك
سكت فؤاد كيضور الكلام فراسو و نطق كيشوف بنص عيين ففاتح: غنتنازل لجنات ولكن منسمحش لهاد خينا
جنات: زييييد قيد اسي الكوميسييير .. السيد مدمييين مخدراااات و كيبيعهم ففف
فؤاد: واخة غنتنازل
جنات: ايوا من قبيلة دييرها كتبغييو غير الشوووهة الكنس القصيييف
تنازل ليهم فؤاد و ناض فحالو غادي كيعرج برجلو و يسب تحت سنانو معصب على الحالة لي وصل ليها و في الاخير ما دا منهم لا حق لا باطل ..
هز فاتح عينيه مخنزر فجنات و نطق تحت سنانو: نتي باش عرفتيه مدمن مخدرات؟
جنات كتبحلس بعينيها: و لاهيلا معارفاهاش غي طلقتهااا و صافي و صدق ولد الحرااام نيييت دايرهم!!
سيف الدين: سيير اخااا .. نتا و داك خينا لاخر خارجين ليا من الجنب غا لي سخن عليه راسو ينوض يبدا ينطح و يشلض فالبشاري .. العفوو لله
فاتح: شفناااك خمرتي و قلنا نشقيوك شوية .. زيدي نتي نوصلك .. مخداماش ليوم؟
جنات: لا .. علمت حكيم فالصباح “شافت فخوها” باااي سيوووفتي
خرجات قدام فاتح وبقا هو شوي مع سيف اادين عاد تبعها لقاها واقفة قدام سيارتو .. ركبو و مشاو لريسطو لي مولفين يجلسو فيه باش يتغذاو..
فاتح: خاص نمشيو نشوفو لخواتم!
جنات: واخة .. شوف شي وقيت تكون مسالي و نمشيو
فاتح: ان شاء الله .. ما خاصك والو؟ ..متحشميش مني الى بغيتي شي حاجة قوليها ليا انا .. عن قريب غتولي تحت مسؤوليتي و محسوبة عليا و تحت جناحي .. منبغييش تخبي عليا شي حاجة متافقين؟
جنات: ان شاء الله ..
بغات تسول و تراجعات حتا لاحضها و هز فيها حاجبو: غير سولي نشوف؟
جنات: والو .. مكاينة حتا حاجة هه
كانت ناوية تسولو على شنو وقع بينو و بين فؤاد و فضلات تخلي حتا تسول خوها .. حيت حتا رجل واخة معرت كيف يكون ما يرضى خطيبتو لي قريب تولي مرتو تهضر على شخص من غيرو و بالاخص الرجل لي كان يوما ما حبيبها .. سدات على الموضوع و كملات جموعها معاه فجو هادئ..
تحط امامهم الغذا مشكل و باشرو فالاكل .. من بعد ناض وصلها حتال قدام دارهم و طلعات كدندن فمقطع موسيقي .. دخلات على خديجة للكوزينة باستها و دازت لبيتها بدلات حوايجها و هزات تلفونها لي لقاتو طافي دارتو اتشارجا .. غير شعل انكبو عليها المكالمات و الميساجات تقول غبرات عامين .. اول وحدة بانت ليها مكترة المكالمات كانت الغالية و صونات ليها فساعتها .. تسنات شوية و هي تجاوب بصوت عيان
جنات: الو الغالية! .. لقيتك مصونية عليا بزاف و تلفوني كان طافي ياك مكاين باس
الغالية: حكيم لقاو عندو تسمم و دارو ليه غسل المعدة .. انا دبا فالكلينيك معاه .. الى قدرتي دوزي للدار طلي على خالتي و هداية و شوفي واش خصاهم شي حاجة و متقولي والو لخالتي
جنات: اويلي!! شنووو كلااا؟ .. حكيم مراقب مكلتو و مكاياكلش فينما كان!! منين جاه هاد التسمم؟؟
الغالية: معرفتش .. مزال معارفة والو .. راه الطبيب مزال مخرج من عندو ..
طلعوه للشومبر فين دخلات عندو الغالية كتبكي و تنخصص .. دقات ميسون في الباب و دخلات راسها كطل عليها
– نقدر ندخل
الغالية: دخلي اختي
قربات ليها ميسون و طبطبات على كتفها بحنية: ماديريش فبالك دبا ينوض على خيير .. الحمدلله على سلامتو و رتاحي حتا نتي راك حاملة متعييش راسك بزاف
الغالية: شكرا اختي .. جنات مزال مجاتش
ميسون: مزال .. ملي تجي غنصيفطها عندك غي كوني هانيا .. الحمدلله على سلامتو
خرجات ميسون و سدات عليهم الباب .. قربات الغالية جهة السرير و تكات راسها على يديها جنبو كتبكي .. تبكي على الزهر لي حتا كتقول ها هو وقف معايا و كيطييح طيحة وحدة بلا نوضة .. حتا كتقول صافي كلشي رجع مزيان و تصاوب و كتعواج ليها من شي قنت .. كتفكر اش ممكن يكون دار ليه تسمم و حتا حاجة مطاحت على بالها .. حكيم ماشي شي واحد لي فين ما كان ياكل .. لا بل كيبغي الحاجة نقية و مراقبة عاد ياكلها .. يا اما ياكل فالدار ولا فشي ريسطو دات جودة .. مسحات عينيها من الدموع رامية الافكار وراها حتا تسالي ليهم و هزات فيه راسها لقاتو حال عينيه كيشوف فيها .. تبسم ابتسامة صغيرة و نطق بصوت مبحوح
– مال حبيبي باكي
الغالية بالدموع: خلعتيني عليييك .. قلت لييك بلاما تخرج
حكيم بصوت تقيل: الحمدلله خرجات طريفة .. مسحي دموعك غتمرضي عينيك .. ياكما قلتي شي حاجة للا حليمة
الغالية: لا .. خليت خالتي مقابلة هداية حتا نرجع عندها نشوفها .. شنو كلتي لي دار ليك تسمم
حكيم: معرفتش .. ماكليت حتا شي حاجة ممزياناش .. اصلا وليت كناكل غير فالدار
الغالية: و منين جاك هادشي لي مبغاش يتفهم ليا انا
حكيم: متعمريش راسك بهادشي!! غيكون غير بالحموضة ديال الحريرة لي شربت فالليل و مبقيت كليت عليها والو.. صافي خوي بالك و نساي لي وقع
الغاليى: الحمدلله على سلامتك خلعتيني عليك
تحل عليهم الباب و دخلات جنات من وراها فاتح و سيف الدين جاو يطلو عليه .. سلمو عليه و جلسو جنبو كيدعيو معاه بالشفاء .. طلات عليهم ميسون بابتسامة و كانت مبدلة حوايجها ناوية تمشي فحالها .. دخلات مدات للغالية اغراض حكيم و ابتسمات ليه
– الحمدلله على سلامتك .. خرجتيها خلعة من الغالية ههه
حكيم: هي ختابرت حبها ليا هههه
قرصاتو الغالية باش يسكت بينما هو ضحك ليها و دار كيكمل جموعو مع صحابو
ميسون: المهم نخليكم دبا خاص نمشي
جنات: بقاي بلاتي و نوصلوك معانا
ميسون: لا بلا منعذبكم غنشد طاكسي
جنات: تي جلسي لارض مالك اش زاربك هاحنا شوي و نمشيو “شافت فسيف الدين” و هااا سيوووف يوصلك معاه ماكاين بو عذاب
سيف الدين: انا نوصلك هي كلسي
شافت حتا عيات و رجعات جلسات معاهم كيتعاودو و يضحكو و شادين ف حكيم لي غير كيتبسم ليهم .. حان وقت مغادرتهم و طلب منهم حكيم يوصلو حتا الغالية لي رفضات ولكن اصر عليها ترجع باش متبقاش هداية بوحدها و امتتلات لاوامرو .. خرجو مجموعين من بعد ما طمنو عليه و جنات ركبات مع فاتح من بعد ما قالتها لخوها و الغالية هي و ميسون مشاو مع سيف الدين ..
سيف الدين: ما خاصك والو الغالية؟
الغالية: ممكن دووز على المخبزة لي حدانا ناخد منها الخبز مبقاش فالدار
حرك ليها راسها و مشا فين قالت ليه .. خلاهم فااطموبيل و نزل هو خدا ليها القدر الكافي و رجع ركب .. وصل الغالية هي اللولة حطها عند الباب و تسناها حتا دخلت عاد ديمارا السيارة و زاد في اتجاه دار ميسون
سيف الدين: ايوا ازيين اش خبارك
ميسون: هاحنا الحمدلله .. و نتا امورك هانية؟
سيف الدين: بخير هاد الساعة الله يحفضك “ضحك” عرفتي شحال مابقينا تجمعنا سنيين نيت .. توحشت جموعك كنتي نتي المعقلة فينا هههه
ميسون: هههه بالعكس كنت سكوتية
سيف الديت: ساكتة على خزييت هههه .. حتا حد مكان يعرف اش تحت داك الحجرة دراسك
ميسون بابتسامة صغيرة: نتا كنت كنعاود ليك
سيف الدين: ماشي كلشي
ميسون: شي حوايج من الاحسن ميتعاودوش اولا!
صونا تلفونو مقاطعو و جاوب و عينيه فالطريق: وي نسمة! .. لا مزال خارج خصاك شي حاجة؟ .. ضروري منها ليوم؟ .. واخة شي شوية و نمشي نجيبها ليك .. نسمة هضرت معاك شوي و هانا معاك شويت الصبر!! .. صافي…
قطع عليها و تلفت عند ميسون لقاها مدورة راسها للجهة الاخرى: سمحي ليا قاطعت كلامك
ميسون: لا مكاين مشكل … نسمة لباس عليها
سيف الدين: تحمد الله .. هاحنا مزال صابرين عليها نشوفو هادشي فين غيتلا
ميسون: الله يتاويكم بالخير
سيف الدين: امين .. ايوا اللا ميسون مكاين حد فحياتك
سكتات لثواني و جوبات برفض: لا مكاينش و مغايكونش
سيف الدين: زعما!! معرفتي حد كااع
ميسون: معرفتش
سيف الدين: و اعجاب؟ ميمكنش تقولي لا ههه
ميسون: شحال هذا .. مي هو عينيه معميين
سيف الدين: ايوا الله يعطيه العما ههههه
ميسون: الله يحفض هههه
دخلات للدار بتعب لقات هداية كتفرج فرسومها المفضلين و حداها اللا حليمة كتسبح .. سلمات عليهم و طلعات لبيتها بدلات حوايجها عاد نزلات وجدات عشاء خفيف بالزربة و حطاتو ليهم..
هداية: مااامي فين بااابي
حليمة: ما مولفاش ليه يتعطل حتال هاد الوقت .. الله يسمعنا خير
فركات الغالية يديها كتشوف فيهم عاضة على شفاها معرفات تقولها ليهم ولا لا .. تفكرات حكيم ملي نبهها متقولهاش لحليمة و تنهدات بخفوت ناطقة
– غغير خرجات ليه شي خدمة و سافر اليوم .. مغايجي حتال غذا ان شاء الله
حليمة: الله يسر ليه و يعاونو
الغالية: اميين اخالتي .. كولي باش تشربي دواك
حليمة: الله يرضي عليك
الغالية بابتسامة: هداية! اليوم تنعسي معايا؟
هداية بسعادة: اه اه كيف درنا ديك المرة
الغالية: هههه واخة احبيبتي
تعشاو و ناضت جمعات الطبلة غسلات الماعن و طرفاتهم عاد مشات طلات على اللا حليمة لقاتها شربات دواها و تكات في بلاصتها كطيب نعاسها .. تمنات ليها ليلة سعيدة و شدات فهداية طلعاتها معاها للبيت بدلات ليها و نعسات معاها معنقاها ليها كتلعب ليها فخصلات شعرها و تعاود ليها بخفوت حتا نعسات و تبعاتها الغالية من كترة العياء دغيا غمضات…
*فالصباح بكري فاق الغالية وجدات ليهم الفطور و وكلات هداية و لبساتها حوايجها .. خرجات شادة ليها ف يدها و داتها للنادي .. في طريقها تلاقات ب فاطمة حتا هي وصلات بنتها و تبسمات ليها جاية كتسلم عليها..
– اهلا اهلا غبرتي
الغالية: مغابراش .. كالسة غير فداري
فاطمة: اممم ايوا مزيان .. اش خبارك كلشي لباس
الغالية: بخير لله الحمد
فاطمة: اه ايوا مزيان اختي .. الواحد الى لقا صحتو هاديك هي الدنيا و ما فيها
الغالية: دكشي لي كاين اختي .. سمحي ليا خاصني نمشي
فاطمة: ياك لباس فين غادية
الغالية: والو باس .. خليت ليك الراحة
زادت الغالية كتقلب فعينيها و تنفخ بينما فاطمة عوجات فمها و جبدات تلفونها صونات على الرقم و تسنات حتا سمعات الرد
فاطمة: الوووو .. اه عطيتو ليها فيين فلوووسي؟
– “بعصبية” اشمن فلووووس علاااش كدويي!! وااااش انا قلت ليييك عطييه ليها ولا عطيييه ليييه ابنت لحرااام ..
فاطمة: ايوا معرت لييهم انا دكشي لي طلبتي مني درتووو ماشي شغلي تعطيني فلوسي و السلام ولا راه والله حتا نفضحك
– غتفضحييي هي راسك اما انا مغتدي مني تا باش تنقي سنانك .. متنفعي ما ضرييي صيفطك ديريه ليها مشيتي درتيه ليه!! واش مكتفكريييش؟
فاطمة: شوفي اختي لبنى عفاك .. انا درت دكشي لي قلتي ليا .. خلط ليها دكشي فكيكة و دخلت عندها .. و درتو ليها حتا فاتاي .. اش بغيتيني ندير ليها؟؟ لي عليا راني درتو .. حتا دبا عطيني فلوسي و ما شفتيني ما شفتك
لبنى بنفخة: نتلاقاو من هنا ساعة ف**** نكمل ليك خلاصك و متعرفيني منعرفك
قطعات عليها و مشات كتنكر لدارها
– تفووو على ميكروبة كانت غتاكلني ففلوسي .. اش داني انا لهادشي من اللول تمرضها ولا تقتلها منها لييها اش جابني انا لصداع الراس يخ
*دخلات للسبيطار و ديريكت للشومبر فبن كاين حكيم .. حلات الباب بابتسامة لي صرعان ما بدات كتختافي ولكن ما عيقاتش و دخلات سلمات بمجاملة
– ختي ميسون لباس عليك
ميسون: الحمدلله و نتي كيف صبحتي؟
الغالية: الحمدلله
ميسون بسمات ليها: دكشي لي بغينا .. الحمدلله على سلامتك احكيم .. دبا شوي غيجي الطبيب للمراقبة
حكيم: الله يحفضك ازين
خرجات ميسون و ضارت الغالية مخرجة فيه عينيها
– كييفاش الزين؟ علاش تقول ليها زين؟
حكيم بعفوية: حيت زوينة قلت ليها الزين
الغالية: يااااك اسيدي!!! ايوا عيييط ليها هي تبقا معاااك الخااايب
بغات تنوض و هو يجرها كيضحك: هههه و هي هي زييين اما نتي العمر و الكبيييدة و القليييب و المعدة و المصرااان .. ما مشيتي حتا كوليتيه ليا هههه
الغالية: ياااه على ضحك عندك شحال باسل!! تكا ترتاح حتا يجي الطبيب يشوفك راك غتخرج اليوم
حكيم: يشوفني مالي فاتح!! راه غير شللت المعدة و كاان
الغالية: غييي المعدة و كاان .. الله يعطيني من برودية دمك!! علاش كتستخف من الحاجة
حكيم: كلشي بيد الله .. الحمدلله ماوقع والو صافي نساي .. هداية لباس
الغالية: بخير .. كل ساعة تسول عليك ههه مموالفاش فراقك
حكيم: وي فين ما مشيت كنت نديها معايا .. ياك مقلتي والو للعورة تحليمة
ضرباتو لكتفو بااضحك: سميييتها مك مكككك الكيدار
حكيم: هاي هاي على غلوووشة تحل ليها الفم!!
كتمشي و تجي قدام ختها و تعض فشفاها بعصبية .. خبطات فخدها بالغدايد و شافت ف لبنى جالسة
– هادي هي راااه غيقدي عليها!! شييي ما شفناااه فاااش تعطييه ليها هيااا عطاتو ليه هو!!
لبنى: و شنووو بغيتيني ندير ليها انااا .. ياك قدامك مشييت هضرت معاها و عطيتها فلوووس صحاح باش تعاونا و في اللخر مصدقش البلاان معندنا مندييرو .. نكملو لل*** فلوسها قبل مضرب بينا الطررر
كريمة بغل: مصدقش دكشي لي كنننت باغة .. ولكن غيير بلاتي والله حتا نحرق لييه قلبووو كي لعب علياااا و جراااا عليااا بلا ريال بلا نص والله متبقااا فيه لاما خليييتو يبكيييهم دم مانييش كريمة
لبنى: نتييي لي مافيييدكش كااان عليك ملي كان طالق لييك اللعب تجمعي ك** معاااه و نتي عاطياها غير للتق**** راه صييفطك لييه
كريمة: الخراااا لي طالق اللعب راه الق*** حاااضي سوااااريه مرة مرة يلوح ليا ريالات الى حليت فمي يديني نشري اش بغيت و صافي .. كان متبتني بالبوتييك ساعة خورنييي فاللخر
لبنى: ايوا و دبا اش غديري .. هاديك فاطمة مغتبغييش تعاونا هاد المرة غير نسايها
كريمة بحقد: انا عاارفة اش غنديير غير بلاتي عليهم والله متبقا فيييهم
* جا محسن اخ حكيم للسبيطار طمن عليه ملي ساق لخبار و هو لي تكلف يوصلهم حتال الدار .. طلع حكيم لبيتو يرتاح من بعد ما سلم على مو و بنتو و بقات الغالية وجدات الغذا و غذاه هو بوحدو .. حطات ليهم هوما اللولين حتا كلاو عاد طلعات حقها و غذاه حتال عندو و فيقاتو وكلاتو و عطاتو دواه عاد رجع نعس ضاير جهتها و تكات حتا هي جنبو .. حط يديه على كرشها و تبسم كيهرها منها
– كيف داير ولديي ياكما معذبك
الغالية: هاد الساعة لا ههه باش عرفتيه ولد؟
حكيم: بحال ولد بحال بنت .. لي جا مرحبا بييه وسطنا
الغالية بفرحة: مكرهت امتا يدووز الوقت باش نهزو بين يدية ههه
حكيم بحنية: متزربييش هانتي هازاه بين احشائك احبيبة افضل من يديك .. الله يتبتو و يجيبو على خيير
الغالية: اميين .. فالصراحة معرفتش اش غتقول هداية ملي تعرف و كيفاش غتصرف .. خفت غير متقبلش و تقلق ولا شي حاجة
حكيم: خوي راسك من هاد الوساويس الغالية .. هداية انا لي كنعرفها ماشي شي وحدة عدوانية ولا حقودة .. بالعكس كوني اكيدة غتفرح معانا و هي اصلا عزاز عليها لي بيبي.. من دبا خاصك ديري بلاصة لولدنا ولا بنتنا جنبها
الغالية: زعمة؟.. ولاهيلا خفت غير متقبلش مي ريحتيني بكلامك
#فلاش_باك
رحبات بيها الغالية فالصالون و ناضت عمرات اتاي .. دخلات البلاطو فيه الكيسان و البراد حطاتو و رجعات تجيب لبلاطو لي فيه الحلوى .. استغلات كريمة عدم وجودها و عرات البراد و ساست فيه شاصية صغيرة و يديها كيترعدو .. غطاتو و حطات يد على يد ملي شافت الغالية جاية و تبسمات بتوتر لي ملاحضاتوش الغالية .. من بعد ما جلسات فاطمة شوية و حاولات معاها تاكل من الكيك لي كان فيه نفس البودرة .. محاولاتها باءت بالفشل و ناضت خرجات كتسوط .. اما الغالية جمعات الطبلة و لاحت الكيك لي شكات فيها .. غطات براد داتاي و حطاتو فوق البوطة و خرجات مسرعة عند جنات…
* دخل للدار بعد ما كمل خدمتو و طلع خدا ليه دوش ريح فيه عضامو .. نزل كيطرطق فعنقو دخل للكوزينة و داز لميكرووند هز منها اكلو و حطو كياكل .. جمع الروينة لي دار و غسل الطبسيل فاش كال و قبل ما يخرج بان ليه البراد مغطي .. هزو و خوا ليه فكاس و خرج برا للجريدة كيكمي قبل ما يرجعو للدار على قبل هداية و يتنغم فكاسو غير داري بشنو فيه و شنو غيتسبب ليه داك الكويس لي كما بيه…
#نهاية_الفلاشباك
خرجات من الدوش من بعد ما غسلات و طرفات حالتها و دازت جلسات فالطبلة فالكوزينة .. حطات ليها مها ما تاكل و باشرات ف اكلها حتا قاطعاتها مرت عمها
– نوضي اميسون ركبي ليا البوطة خلاص راه تسالات ليا على العشاء
ميسون بلا مبالاة: عيطي لولدك مالو محني؟
مرت العم قلبات عينيها: ولدي ممسالي للكوزينة و اصلا ميعرف ليها
تبسمات ميسون باستهزاء و وقفات تركبها ليها: الرجلة مشااااات مع ماليها .. حنا بقييينا بايرين هنا على هاد الحساب
مرت العم بالتمياق: نتي يا بنيتي مكاين لي يقبل عليك يخاف تغالطي ليه مع حميدة مول الديشي
ميسون: براكة نتي مرا و ماما مرا و صفاء بنت ووو سيك ولدك معرفناااه من اشمن طينة هو!! خاص الراااجل فالدار و جدي مابقات عندو صحة .. هزي البوطة و فوتي ساحتي امرت عميي راه معندي لييك خاطر خليني محتارماك
مرت العم: لا شلاااا ما حتارمتي!! ما درتي بوجه جدك بقا هي اناااا .. قليلة الترابي من حول ربي فيييك عمرك طفرتييه و ديما راجعة هي اللور
ميسون: حتا طفروووه نتوما و تهزو قشكم علينا عاد نطفرو من وراااكم لي شاف خنشوشكم ما يبقااا الخيير يعتبووو .. كوون كانت فيكم النفس هي شوي تهزي الز*** تولدك و دردبي مع الطريييق الدار ما دارك و عمي لي كان جامعنا بيك الله يرحموو
خرجات مرت عمها عينيها و حطات يديها على جنابها: بت نبت هناااا والله منخرج منهااا .. كااالسة عند شيخي و عكوووزتي و نتي طيري نزلي منخرجش ليييك منهاااا
ميسون بسخرية: هه دار شيخك!! منين جاااتو “بحقد” لعبتو لبابا بعقلووو حتا كتب ليه النص و وليتو بااااغييين ديرو لي بغيتو .. مقدكمش ورتونا و حنااا حيين وليتو باغيين تمشيييو كلمتكم و شواااركم .. ولكن والله هدشي مغايكووون من حدي انا هنااا .. بالله حتا نبقا ليييكم شووووكة فحلقكم والله متهناااو ولا ترتاحو … درتوها بييينا ملي كنت مزااالة صغيرة معاااارفة والو و لكن دبا يا بيااا يا بيييكم اتريكة النصابة
– ميسوووون
تلفتات للصوت لي نادى عليها و زمات فمها كتشوف فيه مخنزر فيها .. حركات راسها من لتحت لفوق و عينيها مغرغرين ولكن حالفة مطيح حتا دمعة
– شنوو كدبت عليكم اجدي؟ .. ماشي خديتي لبابا النص فالدار لي فنا فيها حياتو باش دارها و دم جوووفو حطوو فيها و شديتوها ليه باااردة؟ .. ماشي نتا لي غير دخلتي لهاد الدار وليتي باغي تمشي كلامك و حكامك علينا؟ .. ماشي نتا لي كان يصيفط ليه بابا لفلوووس و يقول ليه مرتي و بنااااتي امانة فرقبتك و تمشي نتا تخسرهم على البرهوش ديال اسامة؟ .. ماشي نتا لي كنتي مانع علينا القراية لولا بابا لي كااان مصر اننا نقراو و مالقيتي كيفاش دير ليه؟ .. ماشي نتا لي ديما مفضل ولاد ولادك على بناتهم .. ماشي نتا لي كنتي باغي ترمينا للكلاب ملي تزادينا بناااات … ماشي نتا لي زيدتيييني للشفا و تمارة و انا باقة معارفة حتا نفرق بين ليمن و ليسر؟ .. “بغل” ماشي نتااا لي حطيييتي ليا يدييي فوق المجمر و خيرتيييني بين القراية ولا تحرق يديي !!! ماشي نتااا هممم ؟؟؟؟ .. بنت سطاااش العااام و ماحنيتيييش فيا “طاحو دموعها” بنت سطاااش العام حرقتيها و قلبك ملانش جيهتها .. علاااش تيقتي اسامة فبلاصة متسمعني انا هااا! حيت هو ولد! .. حيت ولد تيقتييه !! و نتا عاااارف بلي عمري غنشووف فشي ولد ولا نوقف معاااه بقااا هي تكون بيناتنا شي حاااجة !!! .. بنت سطاااش العااام و كنتي غتزف بيا لشاااارف قدك اجدييي .. كاااع هذا حقد فيييك علينا؟؟ .. انا بغيت نعرف حاجة وحدة .. بااااش غتقابل سيدك غير قول ليا !! انا بعدا منسمحش ليييك اجدييي منسمحش لييييك .. لا فالدنيا لا الاخرة ..
“كتحرك راسها بهستيرية” لقيييتي السيبة حيت مبقيناش قلنا والو لبابا هااا؟ .. ولكن متنساش اني مكنقول ليه والو باش ميرجعش يطييح هاد المرة بسكتة قلبية مينوووضش منها .. ماشي حييت خايفة منك اجديي .. دبا وليييت قادة ببرااااسي و هااااازة مسؤوليتي بوحدي .. متجيييش تفرض عليا قراراتك!!
فشات قلبها و خرجات دخلات لبيتها سدات عليها
* متكية فمكانها كتلعب فتلفونها و تزومي فااتصاور حتا خرج حكيم كيمسح فيديه من الما .. وقفات قدامو كتقاد ليه كول القميجة و مبتاسمة و هو محاوطها بيديه من جنابها
حكيم: حبيبي صابح ناشط شنو السر
الغالية: والو ههه .. حكييم بغيت نطلبك
حكيم: امري
جبدات تلفون و بدات دوز فتصاور النقش بالحناء بحماس حتا استقرات عينيها على وحدة
– بغيت بحال هادي .. بغيت نقش عفاك كتحمقني
حكيم: واخة ازيني .. انا نعيط ل سارة تجيب ليك لي ينقش ليك هنا غير بقاي على راحتك .. خاصاك شي حاجة اخرى؟
الغالية بدلع: يخليك ليلي الحبيب ديالي ههه “كتلوي فيديها على عنقو” نقدر نخرج انا و هداية للبارك
حكيم: حتا نجي و نخرجكم .. بقاي غير فالدار و متقويش على راسك .. راك سمعتي الطبيبة قالت ليك خاصك تبقاي مرتاحة و متهزيش للتقل
الغالية: واخة .. الله يسر ليك الامور
باسها و خرج مبسم: امين .. ردو لبال لراسكم
الغالية: كون هاني
بقات فالدار كتلف فالوقت لي جاها كطوييل و ناضت تستغلو فتحضير شي طارت .. حطات كاع لي تحتاج و بدات تخلط فيها حتا كملاتها عاد سمعات الدقان و مشات حلات .. لقات سارة واقفة هي و مرأة اخرى باينة النقاشة .. سلمات عليها سارة ببشاشة و لطف و دخلات كداعب كرش الغالية
سارة: ياكما معذبك ولد خويا ههه
الغالية: لا ههه غير شوية العياء و السخفة
سارة: الله يجيبو على خير .. ياله زيدي الالة نحنيو ليك هههه خليت الصالون محلول و جييت عندك نجري ملي قالها ليا كيمو خفتك تحكيها للتلاد فشي قنت هههه
الغالية: هههه كون غير صونيتي حتا على جنات كتعجبها الحناء و نيت نديرو شي جميعة بيناتنا
سارة؛ هي اللولة .. زيدي اختي دخلي مرحبا
دخلو النقاشة للصالون و مشات الغالية وجدات الصينية دخلاتها ليهم عاد بدلات حوايجها بوحدين خفاف مع الصهد و جلسات حداهم .. حطات سارة جلابتها و بقات بشورط فوق الركبة و ديباردور و جمعات شعرها عاد صونات على جنات دايرة الكام
سارة: افييين القردة
جنات: خدامة على ولادي
سارة: متجييش عندنا شي ساعة راه جالسين عند الغالية و حاطيين الحناااني نعام الالة
جنات: خدامة دبا راه غير داير معايا حكيم المزيان اما شحال من مرة مكنجيش كترت عليه
سارة: و تييي غيير جي ياك جاية عند مرتوو .. قوليه غير الغالية توحمات على شوفتي يجييبك هو نييت هههههه
جنات: هههه الله يمسخك .. المهم انا نقولها ليه و نجي ههه خليو ليا حقييي راه مشهياااها من شحااال
سارة: هي الغالية دارت مزية ههههه كلشي ينقش ولا بلاااش
الغالية: الله يستر ديرو راسكم فيااا .. خاص غي لي يجبدكن
جنات: علاه توحمي غير نتي هههه
الغالية: و جي خلاص هاحنا كنتسناو فيك
قطعات عليها و بدات الغالية هي اللولة كتنقش فالنقشة لي كانت عاجباها و فرحانة عاجبها الحال غير كتضحك و تشكر فالنقاشة ..
* دايزة كتقلب عليه من بعد ما شافت فالبيرو و مالقاتوش حتا تساطحت معاه عاد داخل كيحك فراسو و ساهي .. هز فيها عينيه بسهوة منو و حنحن كيلعب فالسوارت
– جنات؟
جنات: عاد جيتي .. كنت بغيت غير نطلب منك نخرج واحد الساعة و دغيا نجي
حكيم: ياك لباس؟ عندك شي حاجة؟
جنات: اا لا .. غير صونات ليا سارة و الغالية و
قاطعها: ااه صافي فهمت .. جبتي طموبيلتك ولا نوصلك
جنات: نن مزال مهرسة ههه
حكيم: اوكي زيدي نوصلك عاد نرجع
سبقها و رجعات هي حتا هزات اغراضها عاد تبعاتو كتفرنس ركبات جنبو و كسيرا حتا وصل امام الدار ..
نزل معاها فتح ليها الدار و دهل ملي سمع كترة الهضرة .. تم داخل للكوزينة يهز كاس دالما حتا بانت ليه فاطمة جالسة معاهم كتعاود و تضحك .. ركز شوفاتو فيها لمدة عاد عيط بصوت قوي على ختو حتا سكتو كاملين
– سااااارة
جات عندو سارة باستغراب كتشوف فيه عقد حواجبو: ياك لباس مالك
حكيم: ديك خيتي متزيدش دقيقة هنا .. خرجيها من الدار دبا
سارة: اويلي ياك لباس؟ مالها اش دارت راه جارتكم هادي
حكيم: خرجييي عليا المرررض منشوفهاش هنااا .. دبا تخرررج .. جريي عليها ولا خرجيها المهم منشوفش خلييقتها
سارة بضعقة: اهيا سلامة هي برررد هاحنا نخرجووها و نتا باغي تضارب غي وحدك ..
مشات كتجر فديك الصندالة حتال صالون و خلاتو هو جالس فكرسي فالكوزينة كيحك على راسو و يتفكر
🔙 من بعد ما خرج من الدار ركب سيارتو متاجه للخدمة .. و داز للنادي ديال هداية يستفسر على نشاطاتها .. كيف خرج من تما لمح لبنى واقفة مع شي مرة عاطياه بالضهر بجلابة كحلة و شال بنفس اللون .. معطاش للامر اهمية و توجه لطموبيلتو .. و غير ركب باغي يضور يمشي و هو يلمح فاطمة ملي ضارت و شدات جوا من عند لبنى و هي كتحرك فراسها .. مبقا متبع ليهم العين حتا تفارقو و لبنى كملات طريقها حاضية جنابها .. اما فاطمة جرات بنتها و مشات لدارها 🔚
سمع الباب تسد عاد وقف و دخلات عند ساؤة حاطة يديها على جنابها
سارة: صافي هاهي مشات قول ليا مالك معاها
حكيم: متبقاش تدخل لهنا مخاصنييي صدااع اخر .. مرافقة مع دوووك لل.. الكلبات ديال لبنى و ختها و منتيييقش انا فيها .. اللهم تعطينا التيقاؤ مخاصنا بجورتها
سارى: ايوا لي بان ليك .. خاصاك شي حاجة نوجدها ليك
حكيم: لا انا غادي للخدمة دبا غي تهلاي
سارة: غي كون هاني .. الله يسر
خرج حكيم من بعد ما طمن نسبيا من جهة فاطمة و خلا لبنات مجمعين و تاشطين بيناتهم شادين النوبة على النقاشة غير تكمل وحدة تجرها الاخرى و الصةر راه كيتشايرو بيناتهم
الغالية بلهفة: عرفتيييي اش تفكرت
جنات حطات يدها على راسها: تجلس حدا حمق متجلس حدا موحمة
سارة: هههه الله يمسخك تفرقي على لبنت يهديك الله .. قولي اختي اش مفكرة و اش خاصك مبغيناك تحكيها فيه هههه
الغالية: شي لبيييينة باررردة عاد منخوضة و زلافة د السميدة مفورة اححح تاكلي عليها صباعك
سارة: هذا و كان! .. غير كوني هانية انا نخرج نشريه ليك و نقادو الالة
الغالية: الااا داك المشريي كيكون باسل .. بغيت هداك لي كتقاد ماما
جنات: ايييوا هداك نطيرووو علييه ولا .. نوضي كمطي عقلك و قدي باش ماكان
الغالية: اووففف صافي بلاش مبقيت بغيتش “بدات دمع” انا عارفة راسي ما عندي زهر حتا من لبن الله يستر ما لقيتو كي بغيتو .. زهري و انا عارفاه
شافو فيها حاطين يديهم على حنكم و نطقات جنات كتعوج ففمها: الله يستر .. الحمل كيطير العقل غير الله يحفضنا .. سكتي من التبوحيط نعيط لخالتي توجدو ليك نجيبوه على سعدنا و وعدنا
الغالية بدات تفرنس: هههه عارفاااك الحب متخسريلييش
واقفة امام مرايتها كتعمل لمساتها الاخيرة .. بقفطان خفيف و قصير و سميطة رقيقة دايزة من خصره .. شعرها جامعاه من القدام بضفيرة و مخلياه اللور مرمي على ضهرها .. وجهها بمايكاب خفيف مبين ملامحها اكتر و زادت ابتسامتها جمال على جمالها .. تفتح الباب و دخلات الغالية كتسرط الدغمة لي كانت ففمها و مسحاتو عاد نطقات بعيون لامعة
– جيتي كتحمقييي ياختي .. ياله زيدي راه العدول جا و كيتسناو فيك
دوزات جنات يديها على وجهها بتوتر و شافت فالغالية: ياك كلشي هو هداك وجهي مقاد و شعري؟؟!
الغالية: زييينة اختي تحمقييي غير زيدي قدامي راه كيتسناو
خرجات من وراها حاضرة راسها كتفرك فصباعها بتوتر و دخلات للصالون فين كانو زوج رجال بجلباب مع باها و جنبهم فاتح هو و باه و خوها سيف الدين .. جلسات جنب باها حشمانة و وجهها تزنك و طلعات معاه الحمورة حتا وضاحو فخدودها .. بدا العدول بكلامو الاعتيادي و خاطب فاتح مستفسر على قبولو
فاتح: اه قابل
العدول: و نتي ابنتي موافقة
نطقات بصوت خافت بالكاد يتسمع: ق قابلة
العدول: مسمعتش
جنات: قابلة
مد ليهم الستيلو سنا فاتح هو اللول و تبعاتو ب يدين كيرجفو عاد تطلقات تزغريتة من عند الباب من طرف خديجة لي كانت فرحانة ببنتها .. بداو التهاني و المباركات و تسالمات جنات مع باها و هو كيرضي عليها عاد خوها لي سلم عليها بصمت و ابتسامة باهتة .. وقفات امامو بابتسامة لي بادلها ليها حتا هو و قرب قبلها من جبينها بحنية
بهمس: و اخيرا
جنات: مبروك علينا
فاتح: مبروك
خرجات من بعدها لقات مها عند العتبة غير شافتها و جراتها لحضنها كتبوس فيها و تبارك و فرحانة بيها .. سلمات عليها جنات مانعة دمعتها تنزل و دخلات للصالون التاني فين كانت الغالبة و مها و ختها سلزى و ام العريس و ختو .. بدات المباركات بيناتهم و جنات مزيرة غير تسوليها مالك تنفاجر .. عاد حسات بلي غتبعد على دارهم و غتدخل غريبة لدار اخرى مع ناس جداد عمرها عاشراتهم .. غتفرق مها لي ديما هازة هبالها و بوها لي هازها فوق راسو و خوها لي حاسباه اكتر من هكاك و اقرب شخص ليها .. مقدراتش تصبر اكتر و هي توقف بلطف و بسمة صفرا و خرجات لبيتها .. ديك الساعة تبعاتها الغالية و سدات من وراها الباب و هي تطرطق جنات بالبكا و الدموع نازلين على خدودها و تلاحت على الغالية كتبكي حتا بكاتها معاها ..
هي تبكي و الغالية تبكي و معنقاها .. فشو قلبهم فالبكا و الغالية رجعو عينيها حمرين و نيفها اكتر .. تهدات من البكا و هي تمسح وجهها و شافت فجنات حتا هي .. هاد الاخيرة لي راسها شفرانها فتزكين بالدموع و نطقات بصوت باح
– علاش كتبكي؟
الغالية: حيت نتي كتبكي
ضحكات جنات وسط دموعها و جراتها من راسها حتا خسرات ليها الفولار: و الهبيييلة لخرا مالك على سبة هههه غير لابكيت تبكي قلبك طااايب
الغالية: و رصاااي خسرتيلي شدي .. مالك كنتي تبكي
جنات: هي ملقيت مندير و قلت نبكي هههه
الغالية: ديعتي ليا دموعي غي هكاك .. حيدي بعدي مني و نوضي مسحي وجهك خرجي عند ناسك .. انا غنمشي راه صونا عليا حكييم
جنات: واخة سيري هانا جاية
ناضت الغالية مسحات الكحل لي ساح ليها و حيدات داك القفيطين خشاتو ف صاكو و لبسات جلابتها مع البلغة عاد خرجات دازت للكوزينة لقات فيها مها و خالتها كيسربيو الاكل و سلمات عليهم مودعاهم
– كون غير مشيتي معايا
رابحة: غي سيري ابنتي الله يرضي عليك .. هانا مع خديجة نعاونها منخليها بوحدها مع الشقا
الغالية: على راحتك .. ياله بسلامة غذا فالصباح و نرجع
رابحة: هاكي هاد الصوبيرة ديها معاك ملي مجلستيش تاكلي ديه معاك و هزي راه اللبن لي بغيتي و متكتريش منو شفتك غير كتجغمي
الغالية بفرحة: الله يحفضك ليا اميمتي ههه نييت تقادا هداك لي كنتي صيفطي ليا
صيفطات مساج لحكيم و ديك الساعة طلع للدار .. بقا واقف عند لباب ديال الفصيل و تسناها حتا خرجات عندو هي و هداية و رابحة لي كانت هازة قفة فيها الحليب و مشتقاته من زبدة و لبن و غيرهم من البادية مزال طريين .. باس على راسها و شكرها و شد من عندها الققة و الغالية شادة ف هداية .. عاد جر معاه الغالية مدرعها من كتافها و حادر راسو عندها
– سبتييي امدااام سبتييي
الغالية بدلع: علاااش ههه اش درت تاني
حكيم: بغيتي كتر من هاد الديار لي دايرة .. النهار كامل خاوية دارك محشوماش
الغالية؛ و صافي احبيبي راك عارف معزة جنات عندي خاص نوقف معاها في نهارها
حكيم: ماعلييهش الالة “نزل راسو عندها بهمس” متوحشتييش راجلك
الغالية بغنج: اللاااء ههههه
حكيم: هو بعدا توحشك
حل ليها الباب ركبات و ركب حتا هداية اللور عاد داز لبلاصتو .. فتحات الغالية وحدة من الصوبيرات لي جابت معاها فيها حلاوي معسلين و بدات كتاكل و تعطي لهداية .. لاحظها حكيم كترات منها و هو ينطق بجدية كيشوف فالطريق
– الغالية! متكتريش من داكشي .. راه ممزيانش ليك غتبقاي هي تاكلي فيه!! .. تكايسي شوية .. تشهيتيه مقلناش لا مي كولي بالتاويل .. غتغلاضي و تنفخي حتا المشي متبقاي تقدي تزيدي و ديك الساعة غتوحلي فالولادة
تزيرات من كلامو و شافت فيه بعنين مدمعين و فمها كيبري بالعسل ديال الحلوة .. بدات كتنفس بخنق و هي مزيرة حتا حمارو ليها حنوكها و هي تسد الصوبيرة و لاحتها قدامها مربعة يديها .. دورات وجهها للجهة الاخرى و لاحظها حكيم .. دوز يدو على دراعها و نطق بصوت خافت لي خلاها تنفاجر باكية..
– مالك
طلقات البكية لي كانت حابسة و غطات وجهها بيديها كتبكي حتا خلعاتو و حبس اللوطو فالجنب يشوف اش بيها
– علاش كتبكي مالك؟ .. واش ضراتك شي حاجة؟
الغالية كتشهق و تبعد ليه ف يديه: بعد منييي .. يااك مبقييتش عاجباك خليني نبكي ولا نكلس متهضرنيييش
حكيم بحيرة: اش هاد الكلااام تاني .. اش بييك علاش البكااا
الغالية بالبكا: مابقييتش عاجباك ياك .. صافي مبقيتش معمرة ليييك العيين .. غتمشي تقلب على وحدة اخرى يااك .. انا غلاضييت و خيابيت ياااك “ضرباتو لكتفو بقبضة يديها حتا تقسحات” اصصصلا كوووولشي بسباااابك نتا لي حملتيييني حتا وليييت غليييضة و خااايبة .. و بعد منيييي دبا .. بغيييتي غييير وحدة اخرى والله لا كانت ليييك ياله .. عييينيك نحيدهم من بلاصتهم باش متبقا تشووووف من غييري .. قالك غليييضة ماشي شغلي انا ياااااله
خرجات فيه عينيها خلاتو غي مدهشر و كيشوف .. تسيفات عليه مرة تبكي مرة تبدا تعاير و تحلف عليه .. معرف يسكتها من البكا ولا يسمع لمعيورها .. في الاخير خلاها تهضر و تفش قلييبها و رجع ديمارا غادي على انغامها حتا وصلو للدار دخلات كتسوط و هزات صبابرها دخلاتهم للكوزينة حطات ليها و لهداية و خلاتو هو كيبرقق فعينيه و يستغفر الله على حالها .. مابقاش عارف كيف يدير يتعامل معاها .. ولات حال و عقل مرة ضاحكة مرة معبسة .. مرة فرحانة مرة باكية .. لعب فيها الوحم بالمعقول و لقاتو هو صابر لهبالها
صباح الحال على الغالية ناضت مهلوكة كلشي ضارها .. دخلات للدوش طرفات حالتها عاد خرجات بكسوة صيفية تحت ركبة مطلوقة و نزلات لتحت لقات الفطور واجد .. استغربات فالاول و دغيا جلسات كتفطر حتا عمرات لكريشة عاد ناضت غسلات الماعن طرفاتهم و طلعات لبيوتة نضفاتهم و هواتهم .. جمعات الدار واخة العيا مسخفها غير كتنهج و تهز و تحط و الما بارد ما خاطيهاش .. وجدات الغدا على حقو و طريقو و تحلية حيت دكشي فاش كتلقا راحتها و كتفنن فيه عاد جلسات شادة تلفون كتلعب فيه بينما دخل حكيم و هداية..
* شادها من يدها و هي غير ساهية فينما جرها كتبعو .. شرا ليها الشوكولا لي كتعجبها و شدتها بغير نفس حطاتها على رجيلاتها مربعة يديها .. ركب جنبها حكيم كيتحاور معاها و هي مرة تجاوبو مرة تسكت و عقلها غايب مكاينش معاها .. وجهها مغير منو اللون و فمها كيترعد غير بوحدو .. وصلو للدار و حل عليها دخلات لاحت الشكارة عند الباب و تمات طالعة لبيتها .. تلقات ليها الغالية باباسامة و حالة يديها بغات تعنقها و هي تدفعها و طلعات كتجري خلات الغالية مستغربة من رد فعلها هي و حكيم .. تبعاتها من اللور تشوف مالها و غير حلات عليها الباب غوتات هداية بصوت باح حتا خلعات الغالية
– خرجيييييي بعدي منييييي
دخلات الغالية بهدنة تستفسر على سبب غصبها و هداية غير كتنتر: مالك احبيبة شنو عندك هممم واش مقلقة مني على شي حاجة اممم قولي ليا باش نتصالحو
هداية: بعديييي منيييي .. نتيييي خااااايبة و ممزياااانااااش نتيييي كدااااابة اهئ هئ بعديييي منيييي منسمحش ليييك اهئ اهئ
دخل حكيم ملي سمع غواتها و هو مفاهم والو
– مال حبيبة باباها اش عندها هممم قولي ليا نسمع
مشات هداية تلاحت عليه عنقاتو كتبكي و مكنزة على الشوميز بيدياتها و كتشهق بالبكا
– قوووول ليها تمشي اهئ اهئ هي خاااايبة و ممزياااانااااش هييي غير كذاااابة و خايبة اهئ اهئ نبقاو غير بزوج انا و نتا عفاااك
حكيم: شششش صافي متبكييش احبيبة و قولي ليا اش دارت ليك همم.. ياك هي ماماك و عزيزة عليك و ديما كتبغيها تبقا معاك و تنعس جنبك
هداية: لاااا مبغييييتش متبقاااااش معاناااا هي ممزيانااااش ابابا هئ هئ هي قبيحة و خاااايبة اهئ هءهءهء قووول ليها تمشييي عفاااك ابابيي
خرجات الغالية كتبكي معارفاش علاش كتقول ليها هكاك و خلاتها مع باها ..
خرجات من الدار بعدما علمات امها بخروجها و تمشات فالشارع حتا بانت ليها طموبيلتو .. قربات بخطوات خجولة و ابتسامة صغيرة و ركبات جنبو .. تلفتات عندو سلمات عليه بلابيز و رجعات لمكانها مخلياه متبع ليها العين بابتسامة .. هز يدها شابك اصابعه مع اصابعها و قبلها من يدها عاد انطلق لوجهته ..
جنات: فين غنمشيو ههه
فاتح: تشوفي دارك .. اش خاصها و شنو يتبدل فيها .. رجعيها على ذوقك ازين
جنات: حتا الدوق ديالك زويين كيعجبني .. كلشي كلاسيكي ههه واش كيعجبك لهاد الدرجة
فاتح بنصف ابتسامة: نتي لي عاجباني هاد الساعة .. ياله نزلي
تلفتات بان ليها وقف و هي تشوف حواليها ماشي هنا فين كاينة دارو .. حيدات السمطة و حل ليها الباب حتا نزلات و شدات فدراعو و هو تقدم بيها امام محل لبيع المجوهرات .. دخلو كيسرحو فعينيهم و يشوفو الاشكال و الموديلات و جنات حلات عينيها فداكشي .. بدات تهز و تخير و هو عاطيها الخاطر و يختار معاها حتا عزلات على راحتها .. عاد جبد خلص و شدات فيه هي فرحانة .. غير خرجو من المحل و هي تلاح على حنكو باستو كتضحك و معنقة دراعو
– شكرا ههه زوينين بزاف
فاتح: بصحتك
ركبو تاني و هاد المرة توجه لدارو .. وصلو و باركا الطموبيل عاد طلعو للدار .. جبد السوارت حل و دخلات هي كتسمي الله و تسرح عينيها فالدار لي شافها ميقولش راه ساكن فيها رجل .. منضمة و مرتبة و ريحة زكية عاطية منها .. كل حاجة فبلاصتها و مكانها المناسب .. بقات جنات غير كتعجب .. هي لي بنت و الى دخلتي لبيتها غتلقاي كل حاجة ممحطوطة فبلاصتها .. بدات كتسارا فالدار و دخلات للكوزينة بانت ليها مجهزة على حقها و طريقها و هي تبدا تبيض فدوك العينين .. شكون غيطيب فيها هي لي متعرف تقلي حتا بيضة؟ .. دوزات يدها عليها لقاتها نقية ممسوحة و مرتبة و خرجات للصالون حتا هو مفرش و مطرف فالبايج و المارو و دازت للبيت الضياف و الطواليط و هو سابقها كيوريها حتا وصل لبيت النعاس .. و تبسم كيفتح ليها فالباب
– و هذا بيتك الالة كيف جاك
دخلات مرتابكة غير بوحدها كتشوف فيه بعدم تركيز و هو وراها خاشي يديه فجيبو و متبع ليها العين .. تلفتات ليه كتمسح كتفرك فاصابعها و نطقات مكتشوفش فوجهه
– كلشي زوين مخاص والو .. صافي غي ياله نمشيو راه تعطلنا
قرب ليها بخطوات تابتة و هي كتشتت فالشوف ديالها حتا وقف قدامها: مالكي؟
جنات: ممالي؟ .. ماماليش! .. اش غيكون مالي؟ .. غنكونو تعطلنا و ماما غتشوش عليا
فاتح: معندها علاش تشوش راك كاينة مع راجلك .. واخة مترجعيش عادي دبا وليتي تحت مسؤوليتي انا
جنات بارتباك: و ووخة هكاك .. انا قلت ليها غي شي ساعة و راجعة .. يعني غتكون رادة البال معايا غي ياله نمشيو..
بغات تبعد و رجعها قدامو حتا تساطحت مع الحايط لي كان وراها .. تفافات و هزات فيه عينيها موسعاهم بينما هو كانو شبه نايمين و مركزين عليها
جنات: فففاتح
– ششش معندك علاش تخافي مغندير ليك والو .. واش متايقاش فيا!
جنات: تايقة غغير
قبل ما تكمل جملتها كان حط شفايفو المتعطشين على دياولها المرتجفتين كيقبل فيها بشوق و لهفة .. انفاسها اختلطو مع انفاسه و هي كتستقبل قبلاتو اللاسعة .. غمضات عينيها مستمتعة بقربو منها و هزات يدها حطاتها على صدرو .. هاد الاخير لي كان منغمس بقبلات فرنسية اختلط فيها ريقهم بزوج .. هز يدها و حطها على عنقو حتا دوراتها عليه و اصابعها اختلو بين خصلات شعره الاسود .. تنهدات بين شفابفو و حلات فمها مستقبلة لسانو لي غاص فبحر ثغرها .. اما يديه لي كانت كتماصي مؤخرة رأسها تحررت و نزلات على طول دراعها و جنبها .. دخل يدو من تحت الشوميز حتا قاست كرشها لي ارتعشت و دخلات من برودية يده .. ياله غيتجرأ اكتر و يطلع يدو و هي توعى جنات و استيقضت من عالمهما الخاص لي كانت غارقة فيه .. بعدات وجهها عليه مغمضة عينيها و حطات يدها على يدو مانعاه بصوت خافت هامس
– ماشي دبا عفاك
نزل يدو و حل عينيه المثملين فيها حتا قبلها من جبينها عاد بعد و دخل للدوش بينما هي بدات كتنش على وجهها و تقاد فحوايجها لي تعنكشو عاضة على شفايفها .. هزات عينيها فالمرايا لي كانت قدامها كتشوف فحنوكها لي زادو حمارو اكتر و حطات يدها على شفايفها بابتسامة لي دغيا حيداتها ملي سمعات صوت الباب تحل .. تحدرات هزات صاكها و جا عندها حط يدو على خصرها مسبقها قدامو حتا خرجو من العمارة و ركبو وصلها لقدام الدار و مشا هو فحال سبيلو..
طلعات مع الدروج كتجري فيهم حتا دخلات عليهم للصالون لقاتهم كيتذاكرو فموضوع العرس و يستاسرو مع بعضهم و هي تسول على الغالية .. قالو ليها راه ماجاتش و دخلات لبيتها سدات عليها كتفرنس غي بوحدها و مرة مرة تحط يدها على فمها كتحسسو
من بعد ما خرجات من عندهم جلسات فبيتها كتسنا ف حكيم يجي تفهم منو مال هداية .. كتفكر و تعاود واش دارت معاها شي حاجة ممزياناش .. واش خاصمات عليها؟ .. واش ضرباتها؟ .. واش غوتات عليها؟ .. والو ملقاتش مبرر لشنو واقع لهداية .. ياك غير الصباح عاد عنقاتها فرحانة و مشات لمدرستها شنو وقع ليها دبا؟ .. واش يكون حكيم هضر ليها على الحمل و رفضات دكشي علاش دارت هكاك .. زعمة تكون غارت من خوها .. واش مبغاتش هاد الحمل .. ياكما خافت نقابلو الجنين و ننساوها هي؟ .. كيفاش غيكون فتح معاها هاد الموضوع حتا خداتو بحساسية؟ .. افكار لخبطوها و خلاو راسها غيطرطق عليها بالصداع .. بقات تما كي الحنش المقطوع ليه راسو كتسنا شي خبار من عند حكيم..
من بعد ما هدنها و خلاها نعسات فمكانها توجه لبيتو .. لقا الغالية كتمشي و تجي و تاكل فضفرانها بتوتر حتا دخل و هي تقرب منو باستفسار
– امضرا قالت ليك مالها؟ .. علاش دارت هكاك واش بيها شي حاجة؟
جلس حكيم فوق السرير كيحك على عينيه و يتنهد: فففف معرفتش !! ما بغاتش تهضر غير كتبكي و صافي .. معرفتش شنو ندير معاها .. سكتات غي بزز و نعسات بكترة لبكا
الغالية بالدموع؛ والله ما درت ليها شي حاجة .. معرفتهاش مالها اليوم اهئ اهئ غير الصباح كانت بخير و دبا رجعات هاكا
جرها حتت جلسها على ركبتو كيمسح ليها فدموعها: ششش راني عارف ما درتي والو .. بغيت نعرف هي مالها معاك اما نتي عارفك مادرتي والو .. نوضي كولي ليك شوي راك حاملة و ممزيانش ليك هادشي .. ياله نوضي و رجعي رتاحي ليك
الغالية: واش قلتيها ليها على الحمل دكشي علاش دارت هكاك .. مكانش عليك تعلمها دبا حتا تلقا الوقت المناسب
حكيم: لا مزال ما قلت ليها والو .. ياله كنت ناوي نبدا نلمح ليها .. معلينا نوضي تاكلي
ناضت غسلات وجهها من البكا مسحاتو عاد خرجات متاجهة لبيت هداية طلات عليها بالتخبية .. بانت ليها ناعسة و هي تقرب ليها كتشوف فيها ب اسى .. اتر الدموع مزال على خدودها الحمرين.. و شعرها مسرح على الخدية مبعثر .. جلسات جنبها و حطات يدها على خصلات شعرها كتسرح فيهم بحنية و تخمم حتا حسات بيها بدات كتقلب و حلات عينيها مفزوعة.. هزات رجلها حتال لفوق و ركلات الغالية بالغوات بغات تموت بالبكا .. ديك الركلة بالجهد ماتجي غير فالغالية ضرباتها لكرشها خلاتها كتلوى و الصداع بدا كينوض عليها و تمسد فيه بيديها و وجهها رجع حمر مزيرة على سنانها
دخل حكيم مفزوع من غواتها لقاها كاسرة الدنيا بالبكا و كتركل فبلاصتها و تغوت .. و فالارض جالسة الغالية شادة على كرشها كتوجع من حر الضربة لي ضرباتها .. قرب منها مخلوع لا تكون وقعات ليها شي حاجة و و كيتفحص كرشها
– شنو بييك؟ واش طحتي ولا شنووو؟ .. اش واقع
الغالية: والو .. والو غي خليني .. انا غادية للبيت
وقفها و هي كتزفر من مناخرها و خرجات لبيتها بينما هو قرب للبنت لقاها غتحماق و كلمة وحدة ف فمها “غتدبحني” .. مافهم والو .. شكون و كيفاش و علاش كتقول هاد لكلام؟ .. جلس جنبها بغا يجرها لقاها بايلة فحوايجها .. زاد تشوش من جهتها و حالها مبقاش عاجبو .. مسح على وجهه و جرها عندو معنقها كيسكت فيها و هي كتنخصص فحجرو
هداية: بغات تذبحني اهئ اهئ خلاتني حتا نعست و بغات تدبحني باش تبقاو غير نتوما بزوج اهئ اهئ هي خايبة و ممزياناش ابابا قول ليها تمشي فحالها اهئ اهئ
حكيم: ششش صافي احبيبة متبكيش .. شكون قاليك هاد الكلام هممم .. ياك هيا ماماك تانية و عزيزة عليك .. علاش كتقولي عليها هكاك
هداية متشبتة فيه كترعد: مبقاتش عزيزة عليا اهئ اهئ هي بغات تقتلني و تبقا معاك بوحدها اهئ اهئ قول ليها تمشي فحالها عفاااك ابابا مبغيتهاش معانا
حكيم: ياله صافي متبكيش هانا معاك دبا .. ياله نغسلو حالتنا و ندويو من بعد واخة؟ .. ياك الاميرة ديالي مكتخبي عليا والو؟ .. و مكتبغيش تكذب على باباها .. خاص تقول ليه كلشي ياك .. باش هو ديييما يبقا يحميها واخة؟
حركات غير راسها و هزها عندو دخلها للدوش غسل ليها و لبسها حوايجها و هزها نزلها لتحت حط ليها ما تاكل عاد طلع من بعد ما خلاها منشغلة فالاكل
حل لباب و دخل .. بانت ليه متسطحة على السرير و مغمضة عينيها .. قرب جلس جنبها و حط يدو على كرشها كيدوزها عليها بحنية
– شنو وقع؟
حلات عينيها و شاف فيه: والو .. طليت عليها نشوفها و ملي فاقت و لقاتني جنبها بدات كتركل و ضرباتني لكرشي
رد: واش تقسحتي؟ .. كضرك شي حاجة نمشيو للطبيب؟
الغالية: مكاين لاش .. ماعندي والو غير قبيلة شدني شي وجع خفيف و صافي
حكيم: ياله نمشيو للطبيب .. عنداك تكون وقعات ليك شي حاجة
الغالية: مكاين والو احكيم صافي .. قول ليا مالها؟ .. واش عودات ليك شي حاجة
حكيم: لا .. غير كدخل و تخرج فالهضرة و تهلوس .. الى بقات هاكا غذا نديها عند طبيب نفسي يشوف حالتها
خلاها حكيم فالبيت متكية و نزل عند هداية لقاها ساهية .. هاد الاخيرة لي غير سمعات تقرقيب حداها و هي تقفز مرعودة و تلفتات جيهتو حتا بان ليها باها .. ناضت عندو عنقاتو من رجلو و هزها حتا هو متكيها على كتفو و كيلعب فشعرها
– الاميرة د بابا .. مزال مبغيتيش تقولي ليا مالك؟
تلقا الصمت من طرفها و غير ساكتة و كتشوف .. لي فالقلب هي و ربي لي عالم بيه و هو مخلياه كيترطا باغي يعرف سبب انهيارها هاكا .. سكت خلاها على راحتها حتا تهدن و تجي بوحدها ديك الساعة تعاود ليه .. و طلعها لبيتها لي بدل ليه لفراش بواحد نقي و جلس معاها كيحاول ينسيها و يجبد ليها لسانها ولكن وااالو صامتة و ساكتة و شادة مونيكتها كتلعب بيها .. غير كيبغي ينوض و تشدو من يدو ترجعو حداها .. بقا معاها حتا غفات عاد ناض طل على الغالية لقاها ناعسة و نزل لتحت وجد بلاطو فيه الاكل و طلعو ليها .. جلس جنبها كيفيق فيها و هي غاطسة فاانعاس ما ناضت ليه غير بزز .. زيدها تاكل بزز عليها عاد رجعت تنشرت فوق السرير مغمضة عينيها حتا حلاتهم على صوت تلفون كيصوني و هزاتو جاوبات
– الو جنات
جنات: مال صوتك هاكا عيانة؟
الغالية: لا غير كنت ناعسة
جنات: اممم هكاك .. المهم لا كنتي مسالية جي عندنا هنا .. جيبي هداية و جي حتال لليل و يرجع ليك حكيم
الغالية: معرفتش والله .. تسناي نسولو الى بغا شوية و نكون عندكم
قطعات معاها و ناضت من بلاصتها نزلات لقاتو جالس فالصالون مرجعش للخدمة و قالتها ليه
– سيري لبسي حوايجك انا نوصلك
الغالية: و هداية؟
حكيم: انا غنبقا معاها اصلا ناعسة دبا دغيا نديك و نرجع
طلعات بالخف لبسات جلابتها و نزلات وصلها لدار خالتها و رجع فحالو
كلسات معاهم فالصالون على براد اتاي كيتجمعو بيناتهم و هي مهمومة حتا حركاتها غي جنات
– اسبحان الله اشريفة فين سرحتي
الغالية: والو .. اش درتي نتي شفتي دارك
جنات: اممم و شريت حتا شي حاجة اجي نورييك
جراتها دخلاتها للبيت و حطات قدامها الحلقات لي شرات و البراصلي و السنسلة و كتوري فيها و الاخرى ساهية حتا حركاتها جنات مرة اخرى هازة حاجبها
– حالك معاجبنيش شنو عندك؟
الغالية: اوووف هداية معرفت مالها معايا اليوم ….
بدات كتعاود ليها و الاخرى طالقة ودنيها حتا كملات
جنات: ياكما قال ليها حكيم بلي راك حاملة و غارت
الغالية: لا .. هو ماقال ليها والو ياله كان ناوي يعاود ليها
يتبع
التعليقات 0