الفصل 1

الدنيا أقدار وتا شي حاجة مكتوقع لينا فيها وكنعيشوها مكتجي عبثا !!، ربي لي كيعطي ويفرق الأرزاق على عبادو ، وتا واحد مكياخد شي حاجة ماشي ليه كلشي غيوصلو رزقو في الوقت لي مكتاب ليه فيه .

مكيناش شي حاجة سميتها فاتك التران وتا حد مكيمشي من حياتك كان خاصو يكمل في المقابل مكاينش شي حد مكتوب ليه يكمل معاك غيمشي ، كلشي من الخير لقوله عز وجل “لا تحسبوه شرا لكم بل هو خيرا لكم ” كاع لي كيجي من عند الله قضاء وقدر ،هو اللطيف بالعباد ديالو وهو لي عارف ضعفهم وقوتهم وشنو فقلبهم وعارف امتى غيعطيهم وعلاش ولاش ،فمكاين لاش نشوفو فنعمة غيرنا ولا نهربو من اقدارنا لان الانسان واخا يعيا ما يجري المكتوب مامنو هرووب …

شكون فينا كان عارف فين غيتزاد ولا وقتاش ولا حتى والديه شكون من الناس البساط ولا من اللي ميخافوش الله ولا من قلالين النية والظلام

غنكبرو ولالا ،غندوزوها ولا غدوز علينا غنخدمو ولا غيخدمو علينا ولا غنكونو خديم ايما لوالدينا ولا لوليداتنا ولا ناخدو شي قليل العفة اللي يحرث علينا ،

كلشي عالم بيها سبحانه ربنا الوهاب ،واخة نعياو نتخايلو حياتنا كيف غتكون ونرسموها أشكال والوان ….كيبقى القدر هوا الحكم النهائي والباقي مجرد احلام …

سميتها “نجمة” نهار تولدات نهار باها سافر على ود الخدمة وطرف الخبز ….ومجا حتى نسى واش تزادت عندو شي بنت وكملات الصفحة اللخرة اللي في الحالة المدنية ….

خواتاتها وخوتها كلهم عرسو عاد جات لهاد الدنيا

لانو زمان كانو البنات يولدو مع المّات وتقدر مها تولد قبلها كاع ومكاين عيب مكاين تعاندات كلها كيولد اللي مكتبو ليه ربي بلا كثرة الفهامات اللي ولات ….

منهار تولدات وهيا عايشة ملاوطة بين دار باها ودار ختها الكبيرة اللي في عز شبابها ترملات ….مات الراجل وخلى في عنقها قشلة ولاد وكان لابد تجلس تعاون ختها في الولاد واخة هيا من الولاد وسنها صغير وخاص اللي يربيها ماشي تعاون في التربية

كانت صغيرة تربية مها شقاها حار … يوم عن يوم عقلها كبار وإيديها قصاحو ومما دازت تخلي الدنيا تشعل والنقى موراها ….

خرقت مع ختها كبرت وربات …وملي كبر كلشي عاد عاقت براسها بلي مقراتش وعقلها مجامع من حروف الدنيا والو

كانت فيما تدكر لختها المدرسة …تقولها تكافيت تا مع اللي عندي بقى ليا غير نتي ….

كانت ذكية وكتفهمها طايرة وفي الحساب مديرهاش بيها

لكن الغصة اللي في قلبها أنها متكتب متهجى وهادي حرقة وكبيرة بقات معاها حتى ربات الكتاف وبلغات ولسن لكارط وصلات واحتياجاتها زادو كثرو …..كتقول غنمشي لدارنا نجلس مع مي حسن ليا …وغير نهار ولا يومين وكتلقى رأسها توحشت ختها وولادها ..بالخصوص انو بنت من ولاد ختها تقريبا قدها وصحابات ….

كثرو المصاريف وقلو الفلوس وكلمة جيب وباغي وخاص وعارت …اللي كان صغير وكياكل غير طريف الخبز …دابا خبزة ويالله تكفيه والخلصة اللي خلا الحاج رمضان لفاطنة مبقاتش تكفيها ولا حتى تكمل ليها نص الشهر وبزاااف الفااام محلولة

وشكون من غير “نجمة” تعري على كتافها وتخدم باش تعاون في مصروف الدار والدراري

واخة من فم ختها مسمعتهاش ..لكن حسات بيها ملي ولا الحق الصغير يتعطى ليها

عولات على ربي ثم على دراعها وحالفة تتجيبها من فم السبع حتى هوما محسوبين ولادها وياما ربات

ومكاينش من غير الخياطة فداك الوقت كان اللي تقطع بيه الحبل يخدم فيها واللي جاي من دواور بعيدة!! ….واللي مكتوبها مكتوب!! …..مهم خدمة حلال ومسكته شلا فااام

كان وزين ديال نصراني والخلاص بالساعة ….ممقصرش وممفوتش مهم مدوز ليك الشهر وممخليكش مادة ليدين ورابط لسانات بنادم من القيل والقال

شهر يجر شهور, وعام ولا عيمان والوقت اللي هزت الراس وتفگدت راسها لقات بلي وصلات لخمسة وعشرين عام وباقة في بلاصتها متزاد عليها ثوب حرير ولا خاتم وسنسلة تبيعهم وقت الشدة ولا حتى ربع دار تخبى فيها وقت العيا والشدة

اول مشهر يسالي وتخلص تاني يوم تصرفهم على ختها وولادها وتكسي راسها …وهاهوما طارو تقول مفيهم حتى بركة رآه كيقولو الفلوس وسخ الدنيا غير كتشديهم كيطيرهم الريح مع الغبرة بالحق كانت قانعة وراضية بلي عندها مكتقول لا أي ولا عييت كانت بنت يتمناها كل راجل جامعة بين زين والتربية ، حروفها زوينين وسالفها طويل ويجدب العين

تسمع صونيت في الوزين ، وصلات

الوحدة ووقت خروج يوم السبت

نص نهار راحة من العيا وتماارة شي فرحان غيوجد للعرس اللي كاين بالليل وأغلب البنات معروضين ليه

وكاين اللي نهار السبت عندها كحل وزحل غدوزو شقا وصابون وممنوع لخروج وتمناو كون خدموه كامل وحتى الحد يخدمو نصو غير ميجلسوش في الدار

وكاين فئة كتجي السبت مقادة لأنها دايرة مع الخطيب ولا مع الصاحب وغيدوزو العشيه يامغدين يامبرتشين يا مدوزينها بحر

وكاينة نسبة قليلة اللي كتمشي ديريكت تغدا وتنعس ومتفيق تال لغد ليه تحيد العيا وترتاح….

مجموعين في الفيستيير كيضحكو وكل وحدة كتعاود لصحبتها اشنو غتلبس وفين غتصايب واش من كادو غتدي ولا غتعطي غير الفلوس

وهدا هوا حال المعروض للعرس كيبقى يخمم ليه كثر من العروسة

خاصو اش يلبس وفين يصاوب وشكون يديه شكون يجيبو وشحال غيغرم…..

تقسمو البنات لزوج مجموعات شي غيدي الكادوات والباقي غيعطي الفلوس

واكيد نجمة غتعطي الفلوس لصاحبتها عارفاها تسلفت وتكلفت باش دير العرس

وتمشي براسها مرفوع عند عائلة راجلها …حيث كلشي كيبقى معيور تمشي بعزك وشانك وعرسك ماشي هي تجري باليزتك وتزيدي خلفة مع طريق..

داكشي باش تافقت مع البنات يعطيوها الفلوس تعاون بيهم حسن من الكادوو…..

بعدما تافقو كلها خرجات زربانة تقضي اش وراها

الوقت كيطير والوحدة ولات الربعة دالعشية …جالسة نجمة في البيت مع بنت ختها كتقيس القفاطن اللي عندها باش ترصي لي غتحضر بيه

كتقيس على لحمها قفطان خظر مزوق ومخيط خياطة مخزانية وفيه الفتاحي من الجناب مبين سيقانها العامرين من فوق لگدام تال ركبة …جاها على طايتها هوا هدااك مبين قوامها وزاد زينو بنضرات الرضى اللي كتشوف بيهم خديجة للقفطان

بابتسامة قالت …كيف جاني ؟؟اما حسن هدا ولا لكحل !!!

خديجة حركات رأسها هازة القفطان لكحل بين ايديها ~~~ لالا اللي لابسة جاك حسن ..ومزال غتزيدي تباني حسن ملي تماكي وتقادي الشعر

واش غتطلقيه ولا تجمعيه كيف ديما !!

قالت في حيرة~~ والله معرفت ياختي لطلقتو غادي غير يعرگني

وتشد فيه العين ..راك شفتي فيما نطلقو كلها يسول بوحدو اشنو كندير ليه ..اللهم نجمعو

جوبتها خديجة بنبرة عالية ~ايوا صافي وملي مطلقيه لا في عرس لا في لامة أمته ناوية تمتعي عيون الرجالة بيه ..راك كتعرضي غير فيين وفيين …طلقيه قلاك وقادي الحالة مزيان متعرفي تجي مضبرة على راسك ..

بظحكة جوبتها حشمانة وايدها كتحيد الباندا …واللهيلا عندك الصح ..اليوم اللي ليها ليها والله تنضبر ههههه

دخلت عليهم فاطنة مرا عالية وعامرة لابسة قفطان سامبل ومشمرة على ايديها وكتافها بشمال تاع لاستيك….دايرة على رأسها زيف حياتي وخصلات من شعرها لحمر كتبان

شافت في ختها حققت فشنو لابسة وقالت بحدة ~~ واش داكشي لابسة…اجي ماشي قفطان خديجة هداك

جاوبتها بنتها ~~اه اماما خليها تلبسو فالعرس ديال اليوم

تمات غادة قاصداها باغة تنصلو ليها ~~لالالا الله ينعلها قاعدة اللي عندو شي لبس يلبسو التبدال تسلاف الحوايج خايب …لحم شي ماشي هو لحم اخر والمرض كيتسارا…

كلام ختها نزل عليها سم باااارد حسات بالحگرة والوحدانية ديما عازلاها على ولادها مع انها تربات معاهم عمرها فضلتها عليهم ولا تعاملت معاها كيفهم …استكثرت عليها شرويطة ممكن غير سلك يشرگها وهيا اللي متخلي متشري وتجيب ليهم كتقطع من لحمها وصحتها على ودهم وعمرها قالت آه

بلاما تقول حتى كلمة حيداتو بالزربة وحطاتو في ايد خديجة وقالت بصوت مرعود بالغصة ل فقلبها ~~ختي عندها الحق خبيه ولا عرفتي اشنو حطيه تنجي ونصبنو ليك رآه قيستو غنكون وسختو ولا طليتو بشي حاجة فيا وانا معارفاش

متسناتش تشوف في وجههم ولا تسمع كلامهم طلعت تجري تحسب في الدروج لسطح تخوي قلبها على شكل دموع

دموعها كيتسابقو مع دقات قلبها المجروح تمسح وتعاود وتجي تنوض تفكر كلام ختها وتهزها تنخصيصة تاني والألم الكبير ومتقدرش تقول حسبي الله ونعمة الوكيل جاتها الدقة في الظفر لكبير ماتقدر لا تقطعو لا داويه ممكن ليام تخليه يبرى

حسات بيد دافية وحنينة تحطات عليها كتواسي فيها بحال ديما وطيب خاطرها ~ قهرتي دوك لعينين بالبكاا ..باراكا عليك ،متبقايش تجمعي فقلبك ابنتي غتجيبيها غا فصحتك

ضارت لعندها كتمسح فدموع وايديها كيترعدو ~ بغيت نعرف غا شنو درت ليها اخالتي عيشة ، علاش ديما منغصاني ومكبرة فيا الحاجة زوينة واش منستاهلش

عييشة كتمسح على شعرها وكتدوي بابتسامة ودودة ~ تستاهلي كل خير راك عارفة فاطنة هي هاكداك وطبعها هاكداك داير واخا تبان ليك قاصحة معاك ولكن راه كتموت عليك

ردت بضيم ~ باينة غا من قفطان خديجة لي كانت غتنصلو من فوق ظهري غا حشمت

عيشة ~ ياك باغا غا باش تحضري لهلا يحوز بنتي شراوط عطاهم الله اجي معايا وحلي الماريو وخودي لي عجبات عينك تا حاجة متغلا عليك

جراتها من يدها دخلاتها لبيتها لي كاين في سطح وبدات تجبد لقفاطن وتحط قدامها ….عيشة جارة قديمة كارية عند فاطنة فحياة راجلها ورضيعتها شي كان يرضع ولاد شي تا ولاو كثر من خواتات ومن ديما معتابرة نجمة بحال ولادها وكتحن عليها مرة مرة بكليمة تلين قلبها ..

البكية رجعات ضحكة لي يشوف في وجها يقول قدامو بنت عشر سنين دغيا تبكي وفيساع ترجع هبطات كتجري وقفطان لي ختارت فيديها ، صوبت شعر وتزينت وتقادت وسبحان من صورها لي لبستها كتوتيها

وصل وقت العرس ومشات فين دارت تلاقا مع صحاباتها خارجة من دار لابسةة جلابة ولايحة عليها شال من لفوق ومنزلة عينيها الارض باغا تخبي داك شوية المكياج لي دايرة لقات لبنات راكبين في هوندا نظمت ليهم ونيشان لدار لعروسة كانت دايرة بنية قدام دار وصوت لجوق سمعوه من اول شارع لي عندها شي جلابة خشاتها في صاك ونزلو مقادين وحدة تنسيك في لوخرا لي يشوفهم في لوزين محنيين على ماكينة خياطة يحلف ماهما لي داخلين لعرس شعر وحدة يعاند تانية لوجه منور طايح عليهم السر بلا قوة صباغة …دايرين كيف نجوم وسط السما ووسط منهم نجمة مضوية بين الحضور الضحكة المرسومة على وجهها خلات عويناتها يتغمضو حروفها صغار وحرشين ماهيا من صحاب لعيون لخضرين ولا زرقين بالحق زينها ميلح ومسرارة

الحفلة مطرطقة بالمعروضين والكراسا عامرين ، وهما كيقلبو بعينيهم بانو ليهم بنات لي خدامين معاهم شادين ليهم لبلايص مشاو حداهم تحت انظار لي باغا تزوج ولدها ولي باغت فيمن تشد نميمة

– نطقت بنت صاحبتهم ~ تعطلتو اصحبتي مالكم على هاد الوقت ، مولات لعرس جات قبيلة من صالون ونتوما عاد دخلتو ، كتدوي وتحقق فيهم شوفة وحدة بوحدة حتى ستقرو عينيها عند نجمة وقالت ،صلاة على نبي الله يعطي لعما رجالة لي مخلين هاد زين بوحدو

جوبتها مزنگة ~ دابا يجيب الله ، الوقت لي جا الخير ينفع

– نجمة ، نجمة ، غا ضوري عينيك حاسة بيك ليوما تخرجي من هنا مضبرة مغتزگليش

حسات بمرفق صاحبتها “وردية ” كينغز فيديها ، بغات تشوف مالها لقاتها حاضية طابلة في جنبهم فيها شاف ديال الخدمة وشي رجال باينة صحابو من ضحك والملاغيا لي بيناتهم

– تي شوفي ليك زين لي مع الباطرون

شافت بلاما تعيق ~ امم

-كيفاش امم ماتقوليش ليا داك الزين كااامل ماعجبكش

عودات شافت جهتو بلا هواها و نطقات بلا ماتحس~ زوين

هادي هي الكلمة لي خرجات من فمها بخصوصو خلات لبنات كاايضحكو و حاضيينو حتى هما كاايتعنبو عليه بيناتهم،أما نجمة لسانها سكت ولكن عيونها كان ليهم رأي آخر… طول السهرة ديال العرس وهي عيونها كاايهربو ليه علاش لا وهي كاتشوف قدامها رجل وسيم بحروفو الحرشين، حجبان عراض و غامقين و لحية مزينة وجهو البشوش.. اما شعرو حكاية أخرى، كان كثيييف و لونو كاينافس الليل الحالك فسوادو…. فلحظة من اللحظات هز راسو بعفوية اتجاه طبلتهم ولاحظ نظراتها ليه، بتاسم ابتسامة خفيفة الشيء لي لاحظاتو نجمة و حدرات عينيها فالبلاصة مزنگة وهنا جا دورو هو يكتاشف جمالها لي سلبو من النظرة الأولى حتى هو ….

حاولات تلاهي راسها مع البنات و ماتشوفش جيهتو باش ماتحرجش حتى كاتحس بخيال وقف عند الطبلة ديالهم..

هزات راسها لقاتها مرات لپاطرون ديالهم انسانة متواااضعة و عندها معرفة بعاملات راجلها و خصوصا نجمة لي بعفويتها و هدوئها كادخل لقلب بدون استئذان ..

– نجمة سيلتوپلي احبيبة نووضي ونسيني جاني الملل فالطبلة بوحدي وسط الرجال دوخوني غير بالهضرة على السياسة

تحرجت معرفت متقول ~ احم گلسي معانا هنا

-نو فؤاد مابغاش نتفاوت من حداه بزز خلاني نوض باش نعيط ليك …..حسات بحناكها سخان وهي عارفة راسها غادي تگلس معاه فنفس الطبلة من دابا شوية حيت ماتقدرش ترفض طلب مرات لپاطرون و خاص دير ليها لخاااطر… ناضت بتوتر هازة جلايل لبستها بيد و اليد الثانية كاترجع خصلات شعرها البندقي اللور كاايتمااايل مع ظهرها مخلية فطبلتها نظرات الغيرة من البنات لي خدامين معاها … وصلو لطبلة وهي تنطق بصوتها الرقيق لي كون مكانتش الموسيقى حابسة ماايسمعوهش

نجمة ~سلام !

كلشي هز فيها راسو منو هو لي تكا على الكرسي مربع يديه كايسمع لصاااحبو لي نطق كايعرفهم عليها

الپاطرون ~كانعرفكم هادي نجمة من العاملات ديالي

قبل ماااينطق شي حد سبقهم هو دوا بخشووونة و صوت حرش

-متشرفين نجمة

بصوت شبه مسموع جوباتو ~الشرف ليا…نطقات مرات لپاطرون وهي جارة لنجمة الكرسي~گلسي گلسي جبتك مع العشا نيشان

جلسات نجمة و الابتسامة مرسومة على شفايفها عينيها كاايشوفو غير حداها ماقدراتش تهزهم و حمدات الله مني تحط لعشا و كلشي سكت مركزين مع الماكلة..

تهز لعشا و تحط الديسير كاين لي كلا و كاين لي لا، فهاد الأثناء توجهات عندهم مت لعروسة بابتسامة بشوشة

-مرحبا بسي فؤاد و مدامتو و صحابو نورتونا

فؤادحط يدو على صدرو ~ربي يخليك الحاجة

– نوضو تصورو مع نورة لبسات اللبسة اللخرة و مزال ماتصورتو معاها ،ناضو وقفو هو و مراتو و معاهم صاحبو لي نوضو فؤاد و بقات نجمة جالسة حتى نوضتها تاهيا ~نجمة نووضي حتى نتي گاع لبنات تصورو معاها إلا نتي راه زعمة صحبتك

نجمة ~ واخا ا خالتي

تبعات أم لعروسة و عينها مشاو تاني لحرش لحروف لي كان عاطيها بالظهر كايتمايل بكتافو لعراض… وقفات حدا المصور كاتشوف فالپاطرون و مراتو واقفين جهة لعروسة و صاحب لپاطرون واقف جهة لعريس كايستعدو باش يتصورو….

فؤاد شافها واقفة تما بوحدها~ اجي تصوري معانا

ياله بغات ترفض قاطعاتها مراتو

-اه اجي تصوري اجي

المصور ~ سيري اختي تصوري معاهم ،شافها غادية جهة الپاطرون و مراتو و نطق باش تجي التصويرة زوينة وقفي حداك هذاك السيد

يديها لي شادة بيهم جلايلها عرقو من كثرة الاحراج بحالا متافقين عليها هاد الليلة يجيبو ليها التمام…. قلبها دقاتو رتافعو مني وقفات حداه و طلعات معاها ريحتو هاد الاخير عينيه تبعوها مني كانت حدا المصور حتى جات حداه كلها مزنگة….

صورهم و قبل مايمشيو وقفهم هاز كارط ڤيزيت فيدو باغي يدير الاشهار حيت عرف بلي هذاك لپاطرون ديال لعروسة لي واقف تما

-التصاور جاااوكم زوينين واااش تبغيو تخرجوهم نوجدهم ليكم غدا

لپاطرون – انا مسافر غدا

صاحبو دورها فدماغو و خدا لكارط ڤيزيت ~أنا نمشي نجيبها ماعندي والو غدا

المصور شاف فنجمة ~حتى نتي غتاخدي التصويرة اختي يااااك

نجمة ~ اه فين كاااين اخويا

ياله غادي يقوليها فيين وهو يقاااطعو

-غدا غانجيو انا وياها شاف فيها مضيق عينيه كأنو كياكد عليها مترفضش ~انا عارف لبلاصة بالضبط

زرب عليها زربة خاااايبة ماعرفات ماتقد و ماتأخر ماتقدرش تقول لا و تقمعو قدامهم واخا هو اصلا مااسولهاش السيد مقرر من عندو خلاها غير كاتشوف و الحاجة لوحيدة لي جات فبالها هي أنه هادي هي فرصتها الوحيدة مع الشخص لي جذب انتباهها العرس كاامل حيت ممكن ماتشوفوش مرة أخرى….

زرب عليها زربة خاااايبة ماعرفات ماتقد و ماتأخر ماتقدرش تقول لا و تقمعو قدامهم واخا هو اصلا مااسولهاش السيد مقرر من عندو خلاها غير كاتشوف و الحاجة لوحيدة لي جات فبالها هي أنه هادي هي فرصتها الوحيدة مع الشخص لي جذب انتباهها العرس كاامل حيت ممكن ماتشوفوش مرة أخرى…. عقلها كاايفكر و عيونها سااارحة مفاقت غير عليه قرب حدا وذنها باش تسمعو وقال ~ عطيني نمرتك ؟؟

طلعتها تبوريشة بصوتو الهادي ل خلا الفراشات يلعبو بكرشها احساس غريب عليها كتعامل مع رجال في خدمة وهذا غيرهم تار انتباهها بالقلدة لي عطاه الله وبزينو الفتان بقات مترددة شحال قبل متقول وهي كتعصر في جلايل القفطان ~ معنديش تليفون قالتها بلاما تشوف فعينيه

حرك راسو بالايجاب حيت توقع ميكونش عندها فداك الوقت القليل والقلة لي كان عندهم اغلبية كانو عندهم تليفونات تاع دار مابغاش يحرجها كتر من هكا قال ليها تصبحي على خير و زاد مع الطريق من بعد ما لفت انتباهها وخلا راسو محفور في بالها….فالبلاصة ضااارو بيها البنات لي خدامين معاها كل وحدة اشنو كاتقول

-طيحتي لپوگوص ديال العرس

-لعااار كي درتي ليها من قبيلة و انا كنشطحو قدامو مداهاش فيا

-قلت ليييكم اليوم نجمة مغاديش تخرج بيديها خاويين

هما داويين وهي متبعة ظلو وهو خارج من العرس برفقة الپاطرون و مرة مرة كتشم ريحتو لي بقات لاصقة فجيوبها الانفية

كمل العرس ورجع ليهم لي داهم وغير ركبو وكلها نممات كيف بغات دجاج قليل ،سفة معجنة، الحلوة قليلة العريس خايب ….

وهذا حال الانسان تاحجا مكتملى عينو من غير التراب .

بان صباح دنهار الاحد ، ناس كلها صابحة ناعسة لي كيضل سيمانة وهو خدام ليوم روبو وتا لي عندها لبعالك كتصيفطهم المدرسة ليومة نهارها ، ما عادا الحاجة فاطنة عندها گاع الايام بحال بحال صباح عندها مع الفجر.. فايقة على بو نبور تحيد في طلامط وتجبد في المانط وتلوح في المراح وتنگر .

-اش هاد الحالة كلشي مسخ الا منقيت انا دود غيسرح مع دروج بزاف عليا هادشي

طاوية قميصها لعند الركبة ، لي كان تحتو سروال قندريسي بالطرز الرباطي دايرة على كتافها شمار جامعة بيه جلايلها وعاقدة راسها ،وجهها صافي ماهيا من لعيالات لمكحلات ولا من لمسوكات …غادا جايا وتخاصم كلشي فاق واولهم نجمة لي يله بدا يشد فيها نعاس بسيف مداخلة تال ستة صباح ، ناضت بزز منها تشوف مال ختها لقاتها عاقداهم قداش وسط جبهتها قالت كتاوب وكتحل عينيها صحة وراسها ضارها بسهير ليل ~ مالك اختي ياك لاباس

قاطعتها مخلاتهاش تكمل ~ كيفاش مالي ؟ واش هاد دار زبالة ولا كوري “غوتت بجهد” لواه تا لكوري بزاف عليها تكون بحالو حيت منقي لاحت عليها ملاية هاكي!! هاكي شمي ريحة الرجلين …شوفي ركاني كيف كحلين ، ريحة لحزاق تگلب انا عييت مني كلشي زنقة ودار وصابون وطياب وووو ومكاين لي يعاوني وحدة تحجج ليا بالقراية ونتي بايتة معرسة وصابحة ناعسة وانا تراسة عندكم هنا ولا كيفاش ، نشقى عليكم فصغري ونزيد تا كبري ؟؟

تنهدت بلاما تدوي عرفت بلي باغا غير منين دوز ليها وكان حيت ميمكنش تبات فرحانة وتصبح فرحانة ضروري خاصها تنكد عليها ، حفظتها هاد اغنية حشاكم بقوة مكتسمعها كل سيمانة وخصوصا دابا ، جاها العجب نهار علمتها بلي عندها العرس ومعارضاتش ساعة هي ممدوزاهاش ليها طريفة، بصوت خافت قالت وهي كتجمع داكشي لقنت ~ صافي غا سيري تجلسي انا غنغسل وجهي ونطلع هادشي لسطح

فاطنة بحالا كبيتي عليها الما العافية لي كانت شاعلة فيها طفات وولات رماد من ديما كيعجبها شقى ختها حيت حادگة وكتسناها غير متكونش خدامة باش تشم ريحة تيد وجافيل ، مشات جلسات وهي كتقول ~ الا طاب داك المقراج صاوبي لفطور عاد سيري ومتنستايش تمسحي داك الوجه ونتي دايرة كي شيخة الموسم دابا يفيق عبد الله مقادة على غواتو لعرس راه سالا ..

حركات ليها راسها بواخا ودخلتت نيشان حمام جات عينيها في المراية وشافت بقايا لكحل لي سايح في جناب وتزنيگة لي مزال على وجها بلاما تزيد تشوف كثر تنهدت وخشات وجهها تحت روبيني غسلاتو مزيان مخلات حتى حتى حاجة زايدة عليها لي سمع كلمة ماكياج يقول هادي مجيرة وهي فراس مالها غا عكر ..دازت لشعرها مشطاتو وخباتو فزيف حياتي ورجعات للواقع لي كتعيش فيه

الواقع لي فيه نجمة كتضرب الكرفي فالخدمة وخوه فدار ،الواقع لي فيه نجمة لي ممنحقهاش تفرح لي ديما خاصها تفكر بلي هي عايشة مع ختها باش تعاونها ماشي تحن عليها باش تربي معاها ولادها ماشي ديرها كيفهم …في كل دقة كيضرب فيه قلبها كتحس بيه كيضرها لو كان عندو لسان وخرج يهضر غيقول شلا كلام ويدوي على شلا غصات حاس بيهم طبطبت على راسها و هزت داكشي لي كان مليوح طلعتو هو الاول السطح … رقدت كل شي في التيد و نزلت توجد الفطور يد هنا و يد لهيه و عقل واحد كيفكر و قلب كيدعي وقتاش تفك ويحن عليها مولانا وتهنى تاهيا وتعيش الحياة … حطت لي قسم الله فوق الطبلة و تمت قاصدة شقاها … تسنات تسمع كلمة من ختها حبسي تفطري ساعة سمعت غا لي ميعجب الخاطر

فاطنة وهي كتراجع في اتاي ~ دوك الطلامط و المانط شتفي عليهم ولوحي كل شي على حيط السطح ضرب فيهم شمس علاما يفيقو دراري ويطلعو لوخرين تاهما دوزيهم

نجمة ~غير كوني هانية غنشتف عليهم ..” گمگت تحت منها ” بحال لي مشتوف عليا …

فاطنة من نوع الصعيب لي مكيعرفش يقول كلمة زوينة قلبها قاصح مع كلشي عديمة المشاعر والاحاسيس مكتعرفش شنو هو الحب ومكتبادلوش مكتعطيش الاهتمام ومكتطلبوش ، ماشي من الامهات لي يحوزو ولادهم ولا يطبطب عليهم ، لي يحس بلي معاه ملي يكون مريض ولا مقلق ولا عيان كان قلبها بحال حديد مرا قدييمة كتعرف لحاجة وحدةة تقاتل مع زمان وتربي ولادها تربية صالحةة سوا بالعصا ولا بالهضرة

صباح كلو وهي فسطح نسات جوع والعياا كانت كتشتف على لمانط بعصبية وبجهد محاساش بيه عرقت وتنفسها تسارع ومحبساتش بردت فيهم سمها كلو وملي كملات حطاتهم يقطرو وجلست حداهم كتلهت

سيقت السطح وجمعت روينة ونزلات لقات ختها جمعات دار وكترد في لغدا ولاد ختها الصغار شي خارج وشي مجبد قدام تلفازة مشات لبيت بدلات بيجامتها ساردة بوحدة ناشفة ودخلات كوزينة تعتق الروح ، سقطرات البراد من اتاي لي بقى فيه وخدات طرف خبز حافي دوزاتو بيه جالسة فوق الكرسي ديال العود فكوزينة حدا ختها مرة ايدها غادا لفمها ومرة كتقطع الخضرة فسكات

وصل وقت لغدا وتجمعو على قصرية كسكسو كاملين ولاد الحاجة فاطنة بربعة ولدها لكبير عبد الله هو لي كبر من نجمة اما الباقي كلهم صغار ” حسن وحسين ” وخديجة فتقادا ديالها سنوات قليلة لي كتفرقهم …كلشي ساكت كيتسمع غا صوت الماكلة لي كتصرط حتى نطق عبد الله بلاما يهز وجهو فيها ~ دوزتي عرسك لبارح مزيان قبل متصيفط اللقمة لفمها كانت جوباتو ~ اه اخوياا داز زوين

بحدة جوبها وهو غياكلها بعينيه ~ من عرس البارح عمرك باقا تعتبيها لشي عرس مافيهش عائلتك حنا راه عرب ماشي نصارى بغيتي ديري لي بغيتي سيري جلسي مع مك وخوتك تا الا وقعات ليك شي حاجة هما لمسؤولين عليك ..

حطت اللگمة من ايدها وجوباتو بصوت شبه مسموع ~ فين عمري مشيت لشي عرس تاع شي صاحبتي ياك اول مرة نديرها، وليتي تجري عليا من داركم اعبد الله ..؟؟

بغا يجاوبها قاطعاتهم فاطنة ~ سدو عليا هاد الهضرة دابا !! شكون هو لي غيجري عليك هادي دارك كيف هي دارو, والا كنتي كتعتابريه خوك تاع بصح غتصنطي لكلامو قاليك اخر عرس قوليه اه وصافي راه عندو صح صاحبتك ديري معاها الواجب دي ليها كادوها والعرس لي فيه رجال مخلطين وممعاك حد حاضيك بلاش منو ، جات بغات تهضر وهي تهز ايدها فوجها ~ كولي الا فيك جوع تسالات الهضرة

زادت لگمة ولا زوج دوزت بيهم الهضرة لي خرجات لا من ختها ولا ولدها كيف سم وناضت جلسات في القنت كتسنى ختها تفرق اللحم تعطيها حقها وتجمع طبلة ورا ميساليو

غتقولو اش مجلسها معاهم تمشي عند عائلتها ووالديها حسن ليها غنقوليكم نجمة من نهار ولات تعرف لقات ختها هي لي مربياها وولاد ختها كلشي في حياتها واخا عندها خوتها حقيقين الا انها قليل فين كتمشي عندهم ، باها مات وهي باقا صغيرة وفرق ورثو وهو حي عطا غير لولاد اما لبنات مخلا ليهم تا حيط يتكاو عليه ، ومها عيات وصحتها مشات بكري بقوة الولدات لي دوزات ودابا جالسة غير مع ولدها لكبير فدار و ولا بالاحرى فدار لي عطاه الحاج محمد “اب نجمة “

خواتاتها وخوتها لي بقاو كلهم مزوجين هي الوحيدة لي باقا بلاش جات ناقصة تجلس عند مرت لخو وجات عيب تجلس مع راجل ختها ، مزال فاطنة مرا هجالة واخا تنگر عليها حاطين راس على بعضياتهم وواخا يقولو ليها لي يقولو ميدوزوهاش منهم وفيهم يمضغوها وميسرطوهاش

ولفت حياتها معاهم بصهدها وبردها

جالسة في البيت كطوي في الحوايج وتحط حداها ،عزيز عليها لهبيش مكتعرفش تجلس وتسنط لعظامها واخا فيها نعاس وراجع عليها لعيا بالحق كاين شي نفس مكتهنيش مولاها ….قاطعت وحدتها خديجة لي دخلت كتلهت وهازة ميكة فيديها مخبياها داخلة كتسلت حتى خلعتها نطقت نجمة وهي قلبها كيضرب ~ مالك ازمرة داخلة بلا حس خلعتيني !!

تلاحت جلست فجنبها كترد الروح ~ مت غا بالخلعة خفتهم يشوفوني وانا طالعة راني تعطلت ،فين هي مي ؟؟

حركات ليها راسها جهة الكوزينة ~ خليتها كتعجن الخبز …هزت فيها حاجبها باستفسار فين كنتي بسلامة

بابتسامة وحدة عاد بادي معاها لبغو ~ كنت معاه قالتها وحطت يدها على قلبها كتنهد

~ وا يختي وتقولي واش كتخافي

هزت كتافة ~ وشنو غيوقع گاع اصحبتي ، واش نبقا بايرة من سونطر لدار غا سادة علينا ختك وولدها راه بورينا ليوم لحد كلشي خارج يمتع عويناتو خليني نبان لناس

نجمة بتحذير ~ شي نهار يحصلك عبد الله يعطيك قتلة لكلاب في زنقة ويصيفط مزرقة وديك ساع غتباني في التلفازة، المغرب كلو يشوفك

خديجة بضحكة شريرة ~ متخافيش بان ليا هز الموطور وخرج ورا متغدينا غيكون عندو شي ميعاد

نجمة ~ امم باش عرفتيها الالة تلقايه غا في قهوة مدلي رجليه

خديجة قالت مع غمزة~ رش من ريحة !!

حطات ايدها فوق راسها كتطلب سلامة ~ ولعفو معاك نتي مكتفوتك تاا حاجة

-ساست ميكة ل كانت دايرة فيها صايا ~ قبل ميحضيني نسبقو ونحضيه جامع لي قراه انا شيبت فقيهو

هزت نجمة صايا كتشوف فيها ~ هزيتيها ليا تاني ، وفين لبستيها في زنقة كيف ديما !!

– وشنو بغيتيني نلبس اختي گاع لبس لي عندي حفظني بيه مازال نتي مرة مرة كتفكري راسك وتشري ليك اما انا راه نذكر لفاطنة لحوايج تقوليا لقيت تا ما نوكلكم

– نجمة ~ وا باز مكتشبعيش ياك عاد ديتك خديتي سيرفيط وسبرديلة ؟؟

– تخشات فيها خديجة كتمخشش وقالت ~ عارفا انجيمتي وشكون يكره زيادة ، حگا مقلتيش ليا ضبرتي فالعرس ولا والو بقيتي مثبتة راني عارفاك

– حكات ليها على ضبرة وفكرتها فزين الوقفة ل معارفة تا سميتو ، لاحت فوطة من ايديها بنثير وقالت بغضب ~ اودي وحلوها ليا مخلاوني تا نفرح ونعيش في الواقع داكشي لي كنشوفو في الحلم …

عرفتها كتدوي على لكلام ل سسمها بيه خوها ~ متديش عليه نتي عارفاه معقد وكيبغي يدير فيها لحكام الخاوي ، كلشي من مي هي لي مكبرة ليه شان ومخلياه داير علينا فيها راجل دار …قالت كلامها بحرقة حيت تاهيا كيعاملها بحال معاملة نجمة معاملة أخ خايف على خواتاتو من الهضرة والسمعة الخايبة وليجيبو لعار لوالديهم

– بسرعة ضارت فيها نجمة وقالت بحدة ~ جمعي راسك مهما كان راه خوك هاذاك وبصح راه راجل الدار من بعد باك علاه شكون كان غيخدم عليكم كون ما هو، لي سمح في قرايتو وخرج ضرب الكرفي على قبلكم باش تقراي نتي و خوتك

ميقت فيها وقالت ~ واباز اختي ومازال كدافعي عليه ورا معيرك ؟؟

-بيني وبينو نتي بعيدة على هاد شبوقات …لاحت عليها شراوط على وجهها ~ ايوا كملي معاك هادشي ورجعيه لماريو وسيري ديري ليهم طويان قيلني عليك والله حتى نرجع نسوسو من جديد وتعاودي طويه

خديجة وهي كتضحك ~ صافي كوني هانية غير هي الا سولاتك مي عليا قوليها راه جيت قبيلة راني غا كذبت عليها قلت ليها مشيت ناخد دفتر من عند صاحبتي حركات ليها راسها ومشات عند ختها لقاتها خبزت الخبز وكتخبز في البطبوط عونتها ومجا فين يأذن المغرب تا حطو طرح تاع بطبوط مدهون بزبدة والعسل وبراد كبير تاع اتاي تجمعو عليه كاملين داروه كوطي وعشا فنفس الوقت وجلسو قدام تلفازة متبعين مسلسل مكسيكي بالكحل والبيض كان كيجي فدوك ليام مجا فين يوصل ليل وفين توصل تسعود حتى تلفازة سلات ولي عندو شي بلاصة راه مخشي في مانطة وشادها ..

كانت مفرشة في الأرض وناعسة مع ولاد ختها صغار بزوج حاطة راسها على وسادة وبقوة لعيا ونعاس لي مشابعاش فيه داتها عينيها بلاما تفكر فحتى حاجة مفاقت غير على صوت المگانة لي كان مجهد …فاقت قافزة حاسة براسها دغيا غمضت ناضت كتعگر وضهرها ضارها لقات فاطنة فايقة قبل منها ومخشية في كوزينة كتوجد لولدها ميدي لغدااه دخلات طواليط غسلات ووگدت شوية وبدات تلبس حوايجها فدوك الاثناء اتاي كان طايب وريحتو عطات فدار ، جلس على طبلة دالمراح عبد الله كتكب ليه مو وتعطيه يفطر باش يتوكل على الله نضمت ليهم نجمة شربت كويس بوحدو تحل بيه عينيها مكلات معاه والو كانت لابسة ملابس عادية ومستورة شعرها جامعاه ذيل حصان ،عينيها في الارض وايديها كتسخنهم بالكاس، كتسنا خوها يسالي باش يحطها لاقرب بلاصة ليها فطريقو حنحن وناض بعدما قال ~ يله الا غادا ونزل

سلمات على ختها وهزات ليه غداه لي كانت مصوباه ليه مو على حقو وطريقو ودايراه فصاكو تاع الخدمة اما تا نجمة باط الحوت وباريزيانة مع بيبسي فايتينها لديك جيه

وصلات لوزين قبل من الوقت بربع ساعة وهذا هو وقتها…. في الباب كانو عيالات ورجالة بكرارسهم كيترزقو الله و كيبيعو لفطور البلدي من حريرة وحسوة وبيصارة بيض مسلوق باريزيان اتاي سخون في صبح ، وكل مكيتعلق بالغدا مع لوحدة … جلست عند با حمد كيف ديما من نهار دخلات لخدمة وفطورها وغداها عندو هي وصحاباتها ، يله سخنت الكرسي وهما يجيو لبنات وحدة مور تانية كلها وبشنو تشهات تفطر وكان أول شهر لفلوس باقا موجودة

با محمدة كيفرق لكراسا على لبنات ~ بنتي نجمة باش بغيتي تفطري ؟؟

نجمة كتجبد من صاكها نص خبزة تاع دار جابتها معاها ~ هاك هاد الخبز دير ليا فيه بيضة بلدية وفرماجة وشوية زيت لعود وعطيني كاس اتاي يكون منعنع ابا محمد راني جيعانة

-هي لولة ابنتي ونتي اوردية شنو بغيتي ….بغيت لحريرة تشد ليا تال لغدا اتاي جايباه معايا في تيرموسا ..

-حط لكل وحدة فيهم شنو بغات فطرو بلاما يعقلو عليه هالي كملت كاسها واقفة هالي دخلت معاها خبز فيديها غادا وتاكل وهذا هو طرف الخبز ديال لحلال كيكون صعيب والله ومضربتي السروية وتكرفيص الا صورتيه…

دخلو نيشان لفيستيير لبسو بلوزات وصابوات الخدمة والهضرة كاملة كانت على العرس لي حضرو ليه لي ممشاتش ولا ل متعرضتش تسول لي مشات شنو دارو ليكم في ماكلة، لعريس زوين ولا خايب ، كيف طلعت شكون جا ، فلانة شنو لبست …حال جميع لبنات فاش كيتجمعو

دخلت نجمة نيشان للماكينة جلست شافت اش عندهم في الخدمة ليوم وديمارات بسكات هذا هو طبعها معندهاش مع قوة الهضرة مع بنات لوزين صاحبتها المقربة هي وردية … داز صباح عادي لغوات من هنا وجرا من لهيه تا وصل وقت لغدا خرجت بزربة تغدا حيت عندها غير تولوت ساعة خدات باريزيانة فيها طون وقرعة بيبسي يله بدات تاكل وهي تبعها صاحبتها.. كتغمز فيها من بعيد وتقول ~ جبت ليك خبيرة اصحيبتي من داكشي الرفيع غتبوسيني عليها

نجمة بعدم اهتمام ~ خليني الله يرحم باك نعقل على ماكلتي

هزت ايدها لسما وقالت ~ امين ياربي الله يرحمك ابا ويوسع عليك ، ولكن الا سمعتي اش جايبا ليك غترحميني تا أنا

-نجمة ~ امم هضري دغيا وگولي اش كاين

-وردية مدت صوبيرة عامرة حمص وكرعيين لبا محمد يسخنهم ليها وقالت ليه ~ عطيني معاك طبسيل شلاضة وكاس اتاي وزوج خبزات ودير ليا عفاك داكشي في طبسيل القزدير لي كيعجبني …غير حرك ليها راسو دارت عند نجمة نبزت من خبزها وجغمت من مونادا وقالت ~ زين صافي تاع نهار العرس جبت ليك ضوسيه كامل من سميتو تال خدمتو وعائلتو وفين كيسكن …خرجت فيها نجمة عينيها بتشكيك ~يكما درت عليه لونكيط

وردية ~ بلا متخرجي فيا دوك العينين عرفتو عجبك اصحيبتي وعلى قبلك خدمت مقدمة المهم انا عارفة راسك بدا كيضرك وبغيتي تسمعي اش عندي غير مرضيتيش تبيني ، ايوا الالة سميييتو مُعَاوِيَة !!

ماشي لي جات وضحكت ليك في وجهك راه صحبتك ، ماشي لي جمعاتك بيها طريق لخدمة تخوي عليها قلبك وديريها ختك، صحبة فيها وفيها ،كاينة لي كتصاحب معاك مصلحة ولا معمرة بيك وقتها وكاينة لي بصح كديرك ختها وكتسبقك على راسها ، كلمة صحبتي كتقال لصاحبة لي كتوقف معاك ديال بصح ، لي كتعيرك ومتخلي لي يعايرك لي كتدافع عليك فغيبتك ولي الا وضرتي طريقك كتوريه ليك… من نهار خدمت نجمة في لوزين وهي قلبها رتاح لوردية ، بنت درويشة خارجة مقاتلة مع زمان على قبل وليداتها معندهاش مع لفوحان ومكتشوفش في رزق غيرها ،دارت نجمة بحال ختها الصغيرة ،كتحن عليها مرة مرة بكليمة ونهار تكون فايضة بيها كتسكت وتسمع ليها ،كانت صحبتهم زوينة لي ملقاش وحدة يسول عليها لوخرا وموس واحد يدوز عليهم بزوج ..

~~~~~~

بلا متخرجي فيا دوك العينين عرفتو عجبك اصحيبتي وعلى قبلك خدمت مقدمة المهم انا عارفة راسك بدا كيضرك وبغيتي تسمعي اش عندي غير مرضيتيش تبيني ، ايوا الالة سميييتو مُعَاوِيَة !! قالت سميتو وسكتت تشوف رد فعل صاحبتها لقات نظرة اعجاب بانت فعينيها ~ عجباتك ياك !! تا انا عجبتني السمية رزيينة نجمة وهي مضيقة عينيها ~ ويا ختي لعفو منك …قاطعتها مخلاتهاش تكمل

وردية ~ اودي سكتي خليني نكمل السيد غا سميتو فيها ريحة النخوة … ما علينا راه خدام في العمالة في عمرو تمنية وعشرين عام تجيو مواتيين بزوج ، السيد هو المتوسط في خوتو تلاتة ديال الرجال و تلاتة العيالات … او تبارك الله سميتهم گاع ناس الدرب كضرب ليها لحساب ..بقات كتعاود ليها هي سهات في كلامها و كل حرف كتخرجو من فمها كتحفضو هي في راسها بقات على داك الحال حتى نغزتها…~ يا هاد البنت فين مشا عقلك ثاني

جوبتها نجمة منهدة ~ عقلي مشا لحياتي وعيشتي فيها وشنو مخبية ليا الوقت و شمن حريرة موجدة ليا و حتى من الراجل لي عشقاتو العين قبل القلب هاني كنسمع عليه و ماعرفت واش نشوفو تاني و لا غا الدنيا دارتو في طريقي هم و تقصيحة باش تفكرني بنحسي وبلي گاع لي كنعجبو من بعيد غا كيقرب حدايا مكيعاودش يرجع

عزت عليها نجمة وهي تعنقها بيد ~ ديري يقينك في ربي هو العالي و العالم عقدي نيتك فيه و تيقي بيه و الى مكتاب ليك راه لا انس ولا جن يحيدك ليه …جوبتها بنعمة بالله وحط ليهم با حمد لغدا كيف طلباتو حطات طبسيل حدا نجمة وقسمت الخبز وعطاتها ~ شدي وكولي على قبلك درت الكرعين في ليل عارفاهم كيعجبوك

…

بتاسمت ليها ابتسامة شكر حيت بحال وردية متلقاش ، ديما دايرة بحسابها فالغدا وعمرها منات عليها ولا كبرات الحاجة فيها….تغداو بزربة ودخلو يكملو خدمتهم باش يسلتو كيف ديما بكري ، ايدين نجمة كانو في الخدمة وعقلها مرة مرة يهرب عند بو عيون كحلين لي سلب ليها العقل و عشقاتو العين داعيا الله في خاطرها ميخيبهاش و ترجع تجي عينيها عليه..

مع خمسة كانت مكملةة خدمتها وداخلة لفييستيير كتبدل حوايجها وتقاد بينما خلطت عليها وردية ، وهي كتلبس في صباطها دخلات كتسووط وتعاير ~ الله يغبر ليها شقف ، الله يهزها علينا دايرة فيها باطرونة وهي غا خماسة تاع لخلا

نجمة بضحكة ~ معامن تاني منوضاها اديك الصگعه تخبطت حداها كتحل في صدافي لبلوزة ~ مع ديك هرمة شكون من غيرها جايا مگرضفة علبا حگا شحال ساع ولخروج مع سبغة ماشي الخمسة ساعة نگدتو ليها

عارفاها ديرها ووتفوتها لديك جيه ~ مديهاش فيها باغا تبين خدمتها بحال لي قبلها وصافي

تسمع صوت غليظ بحال دالراجل ~ شكون هادي لي باغا تبين خدمتها ….من صوتها عرفوها شكون جوبت نجمة عليها بلاحول ولا قوة الا بالله اما وردية خبطت صاك في الارض ومشات ليها ~ الالة الا عندك شي مشكيل معانا غدا ملي يجي سي فؤاد لباااطرووون “قالتها بالغوات ” سيري شكي عليه قوليها راه نجمة ووردية غير كيكملو خدمتهم وكيخرجو صافي …هزت صاكها من الارض وجرت نجمة في يديها وخرجو كيضحكو يشوفو ضو مولانا ويشمو هوا نقي يحيدو لعيا يحسو براسهم بلي مازال عايشين في دنياا …خارجة كتلعب في شعرها وضحكة واصلة ليها تال وذنين كتضحك من القلب حتى حست بدنيا وقفات وبصدى ضحكة صاحبتها كتسمعو بعيد ممتيقاش شنو كتشوف قدامها لهاد درجة ضحكت فوجهها الأيام

صوت كلاكسون لمجهد خلاها تفيق من سهوتها و توضاح ليها الصورة قدامها وتعرف بلي هي في حلم وواقع وبلي بصح هو ل قدامها ، واقف بهيبة معهودة وفارض وجود ديالو فينما كان واخا بوحدو كان لابس سروال دجين وتريكو صوف كول طالع ، متكي على موطورو وداير ايدو على ركابيه بقى كيشوف فيها مضيق عينيه بلاما يدير تا حركة ، توثرت معرفاتو جاي على قبلها ولا غير طريقو هادي.. تخلطو عليها لعرارم ونعازلات على العالم مكتحس بحتى حاجة من غير دقات قلبها لي كتسمعهم في وذنيها ، قرصتها وردية ودوات تحت سنانها ~ واش غتبقاي واقفة بحال ميت العصر ؟؟ داك سيد على قبل من جاي ؟ .. دفعتها بشوية بلاما يرد البال ~ تحركي قبل ميطيرو ليك بيه لبنات ، حسات برجلها ثقيلة وهي كتخطي بيها خطوة لقدام ،خايفة تحس بالاحراج الا تقدمت لعندو وهو ناسيها من البال بالحق غير شافت فيه شر ليها براسو تجي لعندو حسات بعبئ ونزاح من فوق كتافها ، طلعت معاه السخونية و حناكها حمارو بتزنيگة لحشم ، ايديها عرقو تمات غادا لجهتو حادرة راسها ومرة مرة كترطب حلقها لي نشف ، خطوات قليلة كتفصلهم قصر عليها المسافة وناض من فوق لموطور غادي لعندها ، حجب اشعة الشمس لي كانت ضاربة فعينيها ومضببة عليها رؤية باش تشوف مزيان ، وغير جات عينيها على عينيه معرفت متقول وهي كتشوفيه كيتأمل وجهها بلاصة بلاصة واخد راحتو باغي يكتاشف زينها وسبحان من صورها وبدع خلقها .

مد ايديه وقال بصوت رجولي محض ~ نجمةة !! ردات عليه وقالت نعاام ببلاهة كأنها كتكلم لشي حد ….هبط عينيه لجهة ايدو ل مادها ليها باش تسلم عليه ، تأسفت ليه بعينيها وسلمت عليه ضربها الضو وهي كتحسس خشونة ودفئ جلدو …رجع قال باش يكسر داك التوثر لي بيناتهم ~ لاباس عليك ، نهارك داز مزيان….تسللت من قبضتو وقالت ~ عادي لاباس نتا بخير ، جيتي تشوف لباطرون راه مكاينش ليوم

حرك راسو مع ابتسامة خفيفة ~ جيت نشوفك نتي اش بغيتو هو ، اشار لموطور وقال طلعي !! حلت فمها بعدم فهم ~ هاا؟؟ كيفاش طلعي فين غتديني ؟؟

معاوية طلع وخدا بلاصتو ~ متخافيش نمشي ناخدو غير تصاور ونرجعك منين هزيتك

بدون شعور ركبات وراه ، هزات ايدها باش تحطهم على ظهرو تشد فيه وجمعتهم باشمن صفة غديرها ، ديمارا بلا ميتكلم ولقات راسها بلاما تحس شادا في جناب ظهرو خايفة يطيرها بسرعة لي غادي بيها ، وقت قليل ووصلو الاستوديو كان خاوي ودري غير شافو عرفو وعقل عليه عطاه تصاور نسخة ليه وليها بغى تجبد تخلص وهو يحط ايدو على صاكها بلاما يشوف لجهتها وخلص هو ، مشافش تصويرة خشاها في جيبو وخرجو اما هي فلاتها وفلات كاع ناس لي فيها وقفو حدا الموطور وهي تشوفيه وقالت ~ شكرا اخويا ، جات زوينة ..بضحكة استهزاء قال ~ هانية !! تبغي نوصلك ولا تمشي راسك

بحالا صرفقها معرفت باش تبلات ~ لا لا ، نمشي بوحدي ماشي موشكيل بسلامة ….خشات تصويرة فصاكها وعطاتو بظهرها ومشات بخيبة أمل كتلوم فراسها لي طمع فلقاء حسن من هاكدا

تخيل توقف على مجمع ويكون فيه شخص عزيز وباغي غير امتى تسلم عليه وتحيد الشوق واللهفة وغير توصل لعندو ويقلب عليك بحالا عمرو عرفك، اوووف أكثر احسااااس ممكن يهرس لك قلبك طراااف طراااف بصح معرفاتوش مده كبيرة ومواعدها بحتى حاجة لكن اللي كتعيش وسط الجفاف الأسري كتولي تتسنى غير نقطة اهتماااام غير رمشة ماشي نظرة لكن تكون حاس بيها موجهة غير ليك ،الاحساس اللي حساتو قتلها من الداخل يمكن لانها اول مرة يعجبها شي حد وتتمنى يجي ويهدر معاها عكس انها تشوف رجال ويشوفوها …

بالابتسامة الصفرا ودعاتو ، لكن غير عطاتو بالظهر شهقة شهقة صاامته من اعماقها ، زعزعت قلبها وخلاتو يفيق على راسو من الأوهام فييين هوا وفيين هيا واش القاري والواعي واللي قدامو اكيد اشكال والوان وانواع غيشوف في نجمة بنت الوزين…. نجمة اللي معندها سعد مع دمها عاد يكون مع واحد شافتو ساعتين وقلبها عشقو ،كل خطوة كتخطيها كتعاتب العينين اللي شافوه والراس اللي فكر فيه والفم والسنينات اللي ابتاسمو ليه ،حسات بخيبة أمل فراسها ماشي فيه ، يمكن هي لي توهمات وتصورات حوايج هو مديرهمش في البال ، يمكن هي لي بنات احلام وهمية وظنات بلي عجباتو ولا ممكن تكون بيناتهم شي حاجة ، لكن غير عطاتو بظهرها وشدات طريق فاقت …فاقت من الگلبة ورجعات للواقع ديالها وقالت فين هوو وفين نتي انجمة ؟؟.. كملت طريقها كعطة على رجليها محسات گاع بيها غادا وتدوي مع راسها لي يشوفها من بعيد يقول الله يشوف من حالها ….مرة تحاسب راسها وتقول ~ يا نجمة حتى فمك تراجل و معرفتي ما تقولي ليه ،ومرة دير رجاها فالله وعوتاني تقول ~الا كان فمكتابي ربي غيجيبو ف طريقي… بقات على داك الحال كتهضر في عقلها و تجاوب حتى وصلات لباب دارهم… حلات و دخلت نيشان لبيت لجلاس دار خاوية مكاين حد حطت صاكها و وتجبدت في للأرض تريح رجليها من وقفة النهار … خبات حزنها و دخلت غسلت وبدلت حوايجها ، مشات كوزينة تشوف شنو كاين ملقات والو… ياالله غتعمر اتاي تسكت جوع وهي تسمع حس تقرقيب في السطح طلعت تشوف اش كاين لقات الزربية الكبيرة مجبودة و كتسنى .. غير شافتها تنهدت ورخات عينيها ~ امالك اختي فهاد لعشية ؟؟

فاطنة بحالا شافت الما في صحرا ~ … جيتي على سلامتك شووفي معاك هاد الزربية راه البرهوش خوا عليها الحليب الصباح ريحة زفورية تعطعط من راس الدرب

نجمة بخاطر مكسور ~واخا هانا غندوزها غير سيري !! ،نزلات وخلاتها هازة الشطابة وتتحك فيها وتعاود حتى سمعات غوووتة خلاتها تطيح گاع لي في يديها

كيغوت بسميتها فدار ، نبرة صوتو كتخلع كان معصب وشاعل ،قلبها بدا يضرب وزادت تأكدت بلي بصح معندها زهر غيكون شافها معاه ، شنو تقوليه وباش غتبرر ليه ،مقدرت تجاوبو لا بنعام ولا أنا هنا، اللقوة ضربتها ولسانها تشلل بالخلعة ، كيقلب في البيوت ومو وراه كتسول فيه ~ امالك اش بغيتيها ، ؟كان مكمش على ايديه وعينيه حمرين ، شاف فمو بيهم وقاليها ~ فيناهيا ديك ختك ؟؟

فاطنة متلاتش عرفت هذا لي واقف قدامها ،من ديما نوضاتو خيبين ولكن هاد المرة زايدة نغزة ~ مالها اش بغيتيها ..جوبها بنبرة تهديد ~ مي ، دخلي سووق رااسك وقولي ليا فين هي ؟؟ نعتات ليه الفوق وهو يطير من حداها بجرا ، فرمشة عين كان عندها لقاها واقفة كتشوف في الباب وجهها صفر مشى ليها عاض على سنانو من وجهو تعرفوو الروح غطيح … طلعات تبعاتو مووو كتجري و تنهج شادا فيه و تزاوگ لييه في البزولة لي رضع منها ،شوفت ولدها هكاك خلاها تخلع وتخاف من شنو جاي~ هااا العار اوليدي انا مزاوگة ليك في المرحوم نعل شيطانك …

عبد الله نتر يديه منها وصدرو كيطلع و يهبط حاس غا عافية وشاعلة فذاتو، مشا قصد الصگعة لي باقا معرفت تا شنو كاين تلاح شدها من شعرها ومنزلها تحت منو ~ ياك قلت ليك قصدي مك و خوتك و فوتيني عليك ، ياك قلت ليك متوسخيش سميتي

نجمة دموعها نازلين ما حيلتها للحر لي في راسها و لا الكلام لي كتسمع ~غا قوليااا شنو درت اخويا و شمن وسخ وسختك بيه

طلق ليها من شعرها و نزل عليها بخبطة للحنك خلا ودنيها كتسمع فيها صدا بعيد ،من حر الدقة شدات على وجها و عينيها عامرين دموع وكتشوفيه كيفاش عينيه خارجين ، خرّج كلمة من فمو لي غيندم عليها من بعد وقال فلحظة غضب ~ حنا مكنعيشوش مع ل ق ح ا ب

شهقت بصدمة ممتيقاش شنو قال وبشنو نعتها ، مقدرتش تشوف مازال فيه نزلت عينيها الارض طايحة على ركابيها فوق ديك الزربية مكتافية تقوليه ~ الله يرحم ليك الوالدين ،

بقات كتردد فيها وتبكي هو نزل وختها قربت لعندها كتسول فيها مالو وعلاش دار هاكدا مجوبتهاش ولا بالأحرى معرفتهاش شنو كتقول وذنيها كانت مصمكة وكتردد فيها غير كلمة لي توصفت بيها

لعشا وذن وهي مازال جالسة في قنت السطح مبقات كملت شقاها ولا نزلت سدت جوعها كلشي مخلط عليها مشاعرها كثيرة منها لباردة بحال ثلج ومنها ل شاعلة بحال العافية ، مبقاتش فيها الضربة قد ما بقات فيها الكلمة لي مازال كطلع وتنزل ، حسات بصوت خطوات طالعين هزات عينيها لقاتها خديجة لي كتشوف فيها بنظرات شفقة قربت منها جلسات حداها وقالت ~ عودت ليا مي شنو طرا ؟؟ علاش دار هاكداك انجمة واش وقعت شي حاجة …هزات ايدها في وجها وقالت بصوت مبحوح ~ عفاك اخديجة مافيا لي يدوي ل فيا مكفيني …

خديجة كطبطب على ظهرها ~ دابا يندم ويجي يطلب منك سماحة ، راه خرج قبيلة باقي مجا ومي لتحت طالع ليها طونسيو ، ناري ياختي والله حتى بقى فيا الحال

نجمة بتنهيدة ~ اودي الدفلة الا خرجت من الفم مكترجعش ، الا نتي بقى فيك الحال ،انا بقى فيا راسي وايامي وسنين عمري لي ضيعت معاكم ، صهري وكبري وربي ، شقاي وترسي وفي لخر نتضرب فعرضي ، عرفتي شنو نوضي نزلي وخليني بوحدي مافيا لي يدوي

خديجة ~ وهبطي اختي باراكا عليك ، راه البرد غيصوط فيك

نجمة ضربت على ركبتها ~ البرد ليه دوا على بنادم غير سيري وخليني !! خلاتها على خاطرها وناضت كملت تصبان ديك زربية وخلاتها تسقطر ، اما نجمة تما مبقاها مقادراش تنزل لتحت مقاداش تشوف فختها لي تحگرت قدامها ومدارت والو ، مقاداش تشوف فعينيه ويشوفها گاع ويحصلها يجي ينصحها يدوي معاها ماشي يسبها ،بقات جالسة حتى جات لعندها عيشة لي كلشي داز على عينيها ولكن مقدرتش تخرج لعندو بحكم دايرة نگاب ، جرتها من ايدها وزاوگت ليها في الله ودخلتها معاها لبيت تدفى ، بزز باش بغات وحتى عرفت بلي راجلها مسافر ومكاينش ، بسكات حطات لعشا وكتدفع ليها تاكل بلاما تدويها ولا تقول حتى كلمة حيت معندها بلش تنفعها الحاجة الا تهرست صعيب ترمم، بززت على راسها شوية وخدات مانطة تغطات بيها ونعسات حاسة بتبوريشة شاداها وبذاتها مريضة وسبابها مرارة الواقع وشقاء الأيام لي كتعيشها

~

صباح جديد وشقاء يوم وليد من البدايات ديالو وهادي هي الحياة حزن وتعب ،كانت جالسة على الماكينة خدامة قبل وقتها مفطرت ما تسنات صاحبتها كيف موالفة ، من وجهها وعينيها المنفوخة باينة باكية حتى ما قادة ، غير جات وردية وملقاتهاش على برا كتفطر دخلت تشوف لداخل هو لول ، حافظاها وعارفاها نهار كتكون ضاراها شي حاجة مكيبقى عندها نفس لوالو ، بانت ليها فبلاصتها كيف توقعت… مشات حداها جرات كرسي وقالت وهي كتفحصها بعينيها ~ مالك اش واقع ليك ؟

عينيها بحالا غير نفاخات عامرين وفرگعتيهم ، غير قالت كلامها نزلو دموع منهم سربوب دمعة على ختها حتى ولاو بحال جمرة ،حازتها ليها وخلاتها تبكي على خاطرها تا تفش وتشوف مالها ، ربع ساعة وهي على داك الحال حتى تفشات وناضت من على كتافها كتنهد وقالت بصوت مرعود ~ عبد الله شاف تصويرة لي تصورت في العرس

وشكون من غير وردية تعاود ليها باش تخفف على راسها…عودات ليها شنو وقع معاها ملي رجعات لدار تال دابا …وردية نفاعلت وبدون وعي خبطت فخاضها ~ اوييييلي !!! وشنو دار يكما ضربك ، بدات تقلب ليها في وجهها ولحمها واش فيها شي ضربة

نجمة بغصة ~غا تهناي اصحبتي الضربة مكايناش في لحمي كاينة هنا ،اشارت لجهة قلبها …مخلا فيا غير ل نساه ، كون سمعتي الهضرة لي قاليا تقولي اللهم ضربة بدمها ولا كلمة بسمها ، على اخر ايامي وليت ق ح ب ة ، ونتي شاهدة اختي عمري مشيت تال دار معطلة ، ياك دافنة شبابي بثوب لخدمة ناسية گاع واش انا مرا ، گراناتي راه ولدوثالت ورابع وانا مازال معاونة مع ختي على زمان وفي لخر يقوليا وسختي سميتي …هي تعاود ووردية تتحسر عليها ~ وهو باشمن حق يقلب ليك صاكك

نجمة حركات راسها ~لي عطا الله عطاه صاك مقلبوش ، كان محلول وتصويرة خرجات منو بحالا كتقوليه شووفني

وردية ~ ايوا وختك اش قالت …؟ ما نهاتو ما دخلت وسطكم مهما كان راك خالتو

نجمة ~ هاديك هي لي واحلة ليا هنا مسحت على قرجوطها ، مجات مني مدافعت عليا بحالا مكتعرفنيش تمنيت لموت ياختي ولا يوقع ليا لي وقع ، دنيا ظلامت فعيني ومبقى كيبان ليا والو ولدابا ، قلبي بحالا شديتي جمرة وكويتيه وخاطري حاسة بيه مريض ومعندوش دوا ، ملقياش عندمن نمشي نحط الراس ونتهنى والو…. عنقتها وردية وقالت بقلب كبير ~ لهلا يحوزك اصحبتي ، يله معايا توكان تصيبي خاطرك ، لي قسم الله نقسموه الا مهزاتكش دار نهزك على رموش عينيا

نجمة طبطبت عليها ~ عارفاك بنت الجود ولكن مجاتش ، منزيدش همي على همك رجانا في الله!! مدبرها حكيم

وردية باصرار ~ لا اجي گلسي عندي.. الصحابات إلى ماوقفوش مع بعضياتهم فهاد المواقف راه ماشي صحابات

نجمة تنهدات بحالا هازة جبل على كتافها ~ إلى بت فبلاصة من غير عند شي حد من عائلتي غادي تثبت عليا التهمة و نزيد نغرق فالظلم و الحگرة

كملو خدمتهم بخاطر مغير لا من هادي ولا ديك لا غدا عقلو عليه ولا ضحكة جات على وجههم حزن واحد قسموه ، وصل وقت لخروج توادعت مع صاحبتها وهي دايخة بيها معارفة فين تمشي واش تعفط على نفسها وتمشي لدار ختها ؟؟ صعيبة بزااف جرحها جديد ، كتحس براسها ما قاداش قررت تمشي لعند مها تجلس تما توكان تشوف شنو دير ، طريق من الخدمة لدار عند خوها مضوبلة على عشرة الا جات تمشي على رجليها مغتوصل تال لعشا وديك ساع خوها مغيعجيو حال قررات تشد المركوب ، ساعة وكانت قدام دارهم لقديمة لي كتفكرها فشلا ذكريات منها الخايبة وزينة ..

كانت تبارك الله كبيرة جات فحي شعبي فكازا على الشاريع ، سفلية كانت گاراجات مكرية ولفوق كانت طبقة تما فين ساكنين عائلة خوها ومعا بحال گاع ديور لي كانو فداك الوقت اكثرية عندهم غير طبقة ، دقات في الباب شحال من مرة عاد نزلت حلت ليها بنت خوها ، كانت صغر من نجمة في العمر زوينة بحالها ، الزين عندهم سلالة شافتها وسلمت عليها سلام عادي ما ناقص ما حار لي يشوفها ميقولش متشاوفوش هادي شهور ~ نجيمة لاباس عليك .؟؟.ببرود قالت ~ لاباس حمد لله ، طلعي راه جدة كاينة وسط الدار …

طالعة فالدروج وبنت خوها قدامها و جميع الذكريات ديال هاد الدار القديمة منها و الجديدة بداو كايزوروها وحدة ورا وحدة… مني كانت صغيرة و كاتجي مع فاطنة عند خوها لي كانت غير كاتلاقى مع بناتو تنوض الحرب فالدار مكايتفاهموش معاها من صغرهم بحكم انها مكابراش معاهم و كايشوفوها مرة فشحال بسبب البعد و قلة المواصلات… ديما كانو عازلينها وحيت قراب فالسن كانت كاتبغي تلعب معاهم و يجريو عليها ،يشريو شي حاجة تبغي يقسمو معاها مكايبغيوش حتى كاتجي ماماهم تحيد ليهم اشنو فيدهم و تعطيها إلى كانت لعبة و كاتقسم ليهم إلى كانت نعمة.. مرات خوها الله يعمرها دار لا هي لا خوها عمرها شافت منهم العيب لدرجة مكاتعيطش ليه بسميتو لا هو لا هي…محتارماهو ومكبرة بيهم هو كاتقوليه بابا “بترقيق الباء” وهي كاتقول ليها دادا، عندها عزاز مشكلتها غير مع البنات

ذكريات زارو ذهنها فلمح البصر وهي ساهية فالدروج حتى وصلات لباب الدار و دخلات مع لباب لقات دادا سعاد ملگية ليها~زااارتنا البركة….نجمة سلمات عليها ~كي دايرة ادادا و كي داير بابا لاباس عليه …سعاد عنقاتها فرحانة بيها ~لاباس الحمد ونتي اش خبارك و اش خبار فاطنة وولادها

نجمة ~ جمعي كلشي و قولي لاباس ..دورات عينيها وسط الدار نطقات بتساؤل ~ فيناهي مي ؟

سعاد ~عاد دخلات البيت كتسبح

توجهات لبيت فين كانت مها جالسة ودايرة مانطة صغيرة على ركابيها و كاتسبح مركزة گاعما سمعات صوت نجمة بسبب كبر سنها و السمع لي نقص ليها، ماعرفاتها گاع واش جات حتى وقفات عليها … هزات تاجة راسها و هي ضحك حتى تكمشو التجاعيد فوجهها و نطقات بصوت واهن ~ وريدتي جيتي …كان نسخة طبق الاصل على نجمة فعينيها … بابتسامة بااهتة ~جيت اميمتي جيت

عنقاتها بووحشة حيت شحال مشافتها كاتبوس راسها و يديها…. جلسات حداها كتسولها على الأحوال حتى لقات راسها بلا هواها حطات راسها موسدة ركبتها وهاد الأخيرة بدات كادوز يديها على شعرها بحنان، و قلب الأم تحرك فيها محسسها بلي بنتها بيها شي حاجة… بقات شحال ساكتة كاتسناها تهضر و تعاود ليها حتى نيسات وهي تنطق بدفئ

تاجة ~ مال عوينات وريدتي دابلين اش بيها

نجمة خبات همها لراسها مابغاتش تقولو لمها و تمرضها و تفقصها وهي صحتها على قدها، بلعات الغصة و نطقات بحالا مواقع والو ~ والو اميمتي غير توحشتك و جيت نشوفك

تاجة ~ ايوا هكاك ابنيتي مرة مرة جي طلي عليا راه الصحة مابقاتش باش نجي انا لدار ختك نشوفكم

نجمة جرات يدها عندها باسها ~ مايكون غير خاطرك

تحدرات على راس بنتها باستو و هي تبدا تعيط لبنت ولدها ~ نجيمة واااا نجيمة

نجيمة طلات عليها من باب البيت ~ نعام امي !!

تاجة ~عمري واحد لبريريد ديال اتاي لعمتك نجلسو نجمعو عليه !!

نجيمة بغير نفس ~ اممم واخة

خرجات هي من تما و هزات تاجة راسها من حجر مها بعد مباست جبينها~ نمشي نطل عليهم فالكوزينة ونجي

تاجة ~ سيري اوريدتي سيري

ناضت خرجات من لبيت كاتسمع فبنت خوها كاتخبط فالبراد فالكوزينة و مها كاتغوت عليها حتى وقفات عليهم… شافت فيها سعاد بابتسامة و نطقات ما باغة تبين والو

سعاد ~ نجمة فخبارك نجيمة دواو فيها شي نااس

نجمة تحلو عينيها بفرحة من ديما قلبها بيض و كاتفرح لغيرها بدون غل أو حسد ~ بالصح؟؟ والله ما فراسي ،شافت فيها ، الله يكمل عليك بخير

نجيمة ميقات فيها و نطقات ~ زعما زعما مفخبارك والو ،جيتي غا هاكداك

كالشموع نحن نبدو بمظهر صلب وثابت ولكن ما إن تمر علينا نيران الذكريات نذوب… ليتنا لم نكبر أبداً ..أنهكتنا الحياة بما يكفى وضاعت منا البراءه، أصبحنا غرباء حتى عن أنفسنا، إشتقنا لأيام كانت على بساطتها مرتعاً للسعاده والسكينه والطمأنينه … ثم …الدرس الوحيد الواجب أن نتعلمه فى هذه الحياة هو أن نعانى بدون أن نشكو ..💜

~~~~

نجمة حطت ايدها على جنبها وقالت ~كيفاش جيتي غير هكاك ؟ واش مازال مكبرتي فعقلك ، شحال هادي كنا كنقولو عقل صغر اما دابا راك تبارك الله وليتي عزبة غتزوجي وباقا مبغيتي تبدلي

نجيمة ضورات عينيها كتشحر في البراد ~ قولي ان شاء الله بعدا الا موقفتي لينا تاني فيه ، راه قاعدتك هادي توقفي فسعد بنات خوك

محسات بضربة حتى جاتها لظهر من مها سعاد ~ واقلة معرفتش نربيك راه عمتك هادي لي كتدوي معاك حتارميها

نجمة حفظتها مزيان~ صافي ادادا خليها انا گعما ندي عليها ، سمعو صوت خطاوي كبار وثقال ضربو طم كاملين حيث عرفو شكون داكشي علاش سدو الموضوع، داخل كيحنحن باش يعلمهم بمجيتو ويديرو بحسابو تا الا كانت وحدة من بناتو واخدة راحتها تلبس ، كيف ديما جاي هاز تا ماقاد لابس جلابة سخونة وداير قبها على راسو من البرد تلقات ليه نجمة في طريق تحنات على ايديه باستها وقالت ~ بترقيق الباء ، بابا لاباس عليك ؟

حط شنو فيدو وهزها من دراعها لعندو وخشاها فيه ، بنتي!! عاش من شافك كي درتي مزيان ؟

مسخاتش بحضنو لحنين تگعدت وقالت وهي كتشم ريحتو الدافية لي كتفكرها بباها ل مشبعتش منو ~ ايلا كنتي نتا على خير حنا راه لاباس

عبد الهادي الكبير في خوت نجمة وجات وراه فاطنة راجل ديال زمان بما تحمله الكلمة من معنى ، رجلة وحكام وشخصية ،خدام تاجر كيبيع ويشري في القمح ميسور الحال عندو مع سعاد زوج بنات وزوج وولاد واحد تبع حرفتو ولاخور باقي كيتعلم الصنعة اما لبنات لكبيرة سميتها نجاة وصغيرة نجيمة

~بابا عبد الهادي وهو غادي بيها لبيت فين كاينة تاجة ~ الله يرضي عليك ابنتي ، واحد فاطنة اش كتعاود هي ووولادها ، مجاتش معاك ؟

نجمة مشات جلسات حدا مها ~ لا من الخدمة جيت عندكم توحشتكم قلت نجي نشوفكم ، تحنى باس لمو راسها ويديها وحيد القب ،جلس جنب ختو صغيرة ولي معتابرها كثر من بنتو ، داااركم هاادي ، وطول ما انا عايش مكاين لي يقوليك أَهْ جي وقت لي بغيتي

هز عينيه لطابلة بانت ليه خاوية وهو يغوت بصوت مرتفع باش يسمعوه ~ واا مالين الدار ، واش مكاين سكر مكاين اتاي ، شفت طبلة خاوية

جات نجيمة هازة صينية مصاوبة على حقها وطريقها كيسان جداد والبراد لي عمر في الكوزينة بقى فيها وجابت واحد جديد خاوي ، قربت طبلة حدا باها وباست على يدو ، قال وهو كيگفض كمامو ~ الله يرضي عليك ابنتي ، هزي معاك السخرة لي حطيت حدا الباب للكوزينة

نجيمة بعينين نازلين الارض ~ واخا ابابا

بابا عبد الهادي ~ ايوا انجمة بنتي ، باقا معييتي من هاد الخدمة والفياق بكريي

جوبت بحشمة وصوت بالكاد مسموع ~ اللهم نخدم راك عارف واحد كتخصو شحال من حاجة ، بعتاب قال ~ عمرك تخصيتي وخليتك ؟

نجمة ~ حاشا ،حاشا ، ولكن راه تعيا ليد لي تمد متعيا لي تاخد

تاجة كتسبح وتمسح على راس بنتها ~ خليها اولدي تا تقنع وتشبع

عبد الهادي شتف فمو ~ على خاطرها امِّي ، وجه كلامو لنجمة ، وديري فبالك داركم هادي وباك انا لي حتاجيتيها انا موجود

ناضت لعندو باست ليه راسو تحت رضاه ورجعات تخشات في ميمتها ، من ديما معارض خدمتها معندوش مع خدمة لبنات ، تا وحدة في بناتو مخلاها تخدم ، سوا قراو سوا مقراوش غيدوزو يجلسو في دار تا يجيهم نصيبهم …

…تحطو لفنايق عامرين اتاي ونعناع وسكر وجابت نجيمة لباها يغسل يديه باش يعمر اتاي ، دخلت سعاد هازة فيديها بوخمير وفاكية فطباسل كبار حطاتهم بعد مسلمت على مول دار ، ونجيمة هازة طبگ عامر خبز الدار وطبگ فيه دوازو من زيت وزيتون وعسل وزبدة بلدية ،كلشي تجمع على ديك طبلة كيتسناو اتاي يطيب لي بقى جهد ساعة وهو يشحر فيه ويقلب ويشقلب حتى نزلت نجاة من سطح ….عرفت باها جاا من صباطو لي كاين عند الباب ،لاحت عليها درتها ودخلات سلمت على كلشي وجلست حداا ختها لي كانت كتناغز هي وياها من تحت الطبلة ، هزت عينها في باها لقاتو كيشوف فيها شوفات حارين وهي تنطق ~ عمتي كي دايرة ، وواحد عمتي فاطنة لاباس عليها

نجمة بابتسامة ~ الحمد لله ، ونتي صحتك مزيان مبنتيش ليا ملي جيت قلت يمكن ناعسة

نجاة ~ لا لا غير كنت في سطح كنحيد النشير قبل ميطيح عليه الظل ….

تسمع صوت اتاي كيتكب ، اتاي برزتو كحل كيرجع لمجاج فرق عليهم وحدة بختها كان صمت سيد اللحظة ،هضرة قليلة من عندو كيدوي الا بغى يبزز عليهم الماكلة ،وهادي قاعدة فيه كان ولد دار لكبيرة دار الخير والكرم كيفرح بالكبير وصغير الغابرة يجبدها ومكيعز ف خوتو ولا لي قصدو حتى حاجة ، جمع الوقفة بعدما قال لمرتو ~ ديري من لحم لي جبت ليوم شي طاجين بالبرقوق ياك مخاص والو ، نطقت بحمد ~ كلشي كاين

حرك ليها راسو ~ ايوا السلام عليكم هاد ساعة نمشي نتوضى باش نصلي المغرب في جامع ونجي ، نجاة بنتي ديري ليا ما سخون في الحمام

ناضت بجرا ~ هي اللولة ابابا …ناضت خلات نجمة متبعة ليها العين كتشوفيها وكتحسر على صداقة لي كانت جامعاهم ومشات فرمشة عين ودابا كيدويو بحال زوج برانيين ، نجاة ملي بداتها المراهقة وهي مومو عينيها عبد الله ، الا شافتو بحالا شافت لهلال ليلة العيد ، كتبغيه وكتمناه وفي كل ليلة من رمضان كتدعي الله يكون من نصيبها ، ما مرة ما زوج دوات مع نجمة ولمحات ليها وخوات ليها قلبها لكن ملقاتش ليها جهد ، الاولى منو هو حيت كيعرف شي بنت اخرا وباغيها لزواج وتانية من فاطنة لي غير كتلمح ليها نجمة بالهضرة وبكلمة خيرنا ميديه غيرها ، كتقسم وتحلف وتدعي على راسها الا دخلت عليها بنت من دمها عروسة لدار تحت ما يسمى بعد من دمك ليطليك ، هادشي خلا علاقتهم تتوثر ووداك المعزة لي كانت بيناتهم تتبخر من طرف نجاة بحالا عمرها كانت

بقات جالسة في البيت هي وتاجة بوحدها بعدما لبنات غبرو ورا مخرج باهم اما سعاد مشات تنصب لعشا ، تسناتهم تا عيات وناضت جمعت دوك لماعن داتهم لمرت خوها في الكوزينة بغات تغسلهم حلفات عليها مخلاتهاش بحجة غتوسخ حوايجها وعيات تعيط لبناتها يعطيوها بيجامة تا وحدة فيهم ما ردات في اللخر مشات لبيت مها لقاتها نايضة لماريو كتجبد ليها احسن بيجامة عندها ~ هاكي ابنتي لبسي من حوايجي حسن دافين ، حست بغصة كبيرة خدات من ايدها ومحسات براسها تا تلاحت عليها عنقتها وكتبكي بلا صوت قلبها عامر من گاع جوايه ~ كون غير كنت عايشة معاك امي ، علاش فرطتي فيا وعطيتيني فصغري

تاجة حسات بتأنيب الضمير ، كتمسح على ظهر بنتها وتدوي ~ فداك الوقت مكان عندنا ابنتي لا ري لا شوار ، كنا غير عبد مأمور ، باك لي قرر من عندو ورا ممات راجل ختك عطاك ليها تونسيها انا مصت منقول ،و تا دابا ابنتي رجعي ياك كبرو ولادها ،هاهي بلاصتك حدايا هادي هي دارنا ..مسحت عينيها قبل متدوي منهدة ~ لا لا انا فينما كنجي لهنا كنتأكد بلي مبقات ليا بلاصة معاكم ….؟؟

تاجة عرفتها علاش كتهضر~ متقوليش هاكدا ابنتي ، نتي معليك والو راه كلشي مقدر ومكتوب …..

تگعدت كتبدل في حوايجها ~ نقولو نجيمة هازة فقلبها مني حيت بسبابي تفسخت خطوبتها ايوا ونجاة مالها ؟؟انا شنو بيديا امي ،واش نقوليه تزوجها صحة نتي راك أدرى ببنتك مني راسها قصح من صخر ، مازال صخر ليه دوا يقدر يلين ويتفرتت اما هي راه والو دويت معاها ما مرة ما زوج كتخسر عليا خليني مع خويا مزيانة

تاجة ~ الا كانو مكتابين لبعضياتهم ومزوجين في سما راه لا انس ولا جن يفرقهم غا كوني هانيا يدور تا عيا ومتحلى ليه غا هي عروسة …..اما الا ممكتابيش راه واخا يكون عرسهم واقف ميكملش زواجهم وراه موقع مع نجيمة يعطيك لخبار

نجمة رجعت جلست حداها وقالت بندامة ~ مي واش انا خايبة ؟؟

تاجة ~ حاشة بنتي زينة لبنات دايرة كيف لوريدة في جنان …ضحكت بلا هواها وقالت ~ ماشي في زين في الفعل ؟؟ واش بصح انا خايبة وقفت في رزق نجيمة ، كيجي شي وقت كندم راسي لي دخلت فهادشي وقلت لبابا على سيد لي كان خاطبها ، كنقول كون درت عشرة على فمي ماشي تا خمسة ونخليها تزوج بيه حسن اش داني نقوليه راه بو بنات

قاطعتها بعتاب ~ سمعيني ، نتي مدرتي غير لي خاصو يدار ، شفتيه مع بنت خدامة معاك ما مرة ما خمسطاش وما دويتي وتكلمتي تا تأكدتي منها بلي باغيها لزواج شنو تسكتي على هادشي ، ديك ساع عاد غتسماي خايبة تاع بصح مال هاد نجيمة شايط عليها راسها تا تزوج زنداقي ، عوض متشوفك وتخنزر خاصها تشوفك وتبوس ليك راسك ،راك عتقتيها من تزويجة كانت غتدفن بيها راسها لعمر كامل ولايني معامن تدوي هذا حال لي مخشي فدار كيبطا عليه امتى يتزوج

نجمة ~ لمن تقولي هاد الهضرة ، وليت حاسة براسي ممزياناش …. تاجة طبطبت على رجليها ~ نهار غيجيها السعد لمگود ديك ساع غتعرف بحقك وهادشي كلو غيتبدل وغترطاب شوفتها من جيهتك غا خليها الوقت كتنسي …

نجمة ~ ان شاء الله ياربي ، من كل قلبها دعات ، حيت مبغاتش تبقى تبان لبنات خوها بصورة خايبة ، علاقتهم المتوثرة كتضرها في خاطرها وكتخليها ممرتاحاش خصوصا في حضور بابا عبد الهادي ، لي دقيق الملاحظة صحيح هو معارفش بشنو فقلب نجاة لعبد الله ولكن عارف بلي بنتو نجيمة علاقتها مبقاتش مع نجمة هي هاديك ورا معودت ليه على الخطيب ولاح ليه خاتمو وحوايجو ، داكشي علاش كيبقا حاضيهم في الطالعة والنازلة كيفاش غيتعاملو معاها حيت لي قلل من مقام ختو قلل من مقامو الشيء لي كيخليها تتفادا الصداع ومتجي عندهم غير فين وفين

نرجعو لعند لفاطنة لعند الأخت والأم لكبرت نجمة ول معتابراها بنتها وختها ، ورفيقتها لي هونت عليها الايام صعيبة لي دازت منها ، وصلت وقيتة دخولها من الخدمة ومعندها حس ، مرة تطلق وذنيها لجهة دروج تسمع واش طالعة ، ومرة تلوح عليها حايك وطل من شرجم تشوف واش جايا ، خبارها مقطوعة ، وماليها اثر حطات ايدها على خدها كتخمم وطلعت معاها الصهدة ملي حست بغيابها معرفت مدير وفين تقدر تمشي …بدا عقلها كيسول ” واش تقدر تتخلى عليها ” والقلب مقادرش يتيق ” لا نجمة مديرهاش ” .. باقا كتخمم وهو يدخل عبد الله من الخدمة ، لاح ليها سلام مردتش عليه حدها قالت بلوم وعتاب ~ معرفت ختي فين مشات وخلاتني هنا لا حنين لا رحيم … ضيق عينيه وشاف في البيت لقا خديجة وخوتها ضايرين على طبلة كيحفضو كلشي طايح عليه الظيم .. ودار مقطوع منها ضو نجمة ، وحسها ودفئها ولمتها غايبين ، زادت طلعات معاه الندامة ولام راسو لي مقدرش يتحكم في لسانو وخلاه يخرج للعيب مع الاخت لي ولداتها ليه الظروف ول عمرها جرحاتو بنص كلمة ، كان يحط حوايج مسخين ويلقاهم مصبنين ومطويين في بلاصتو ، كان غير يدخل من خدمة والماكلة تحط سخونة تال عندو ، كان يكون مقلق وتحس بيه كثر من مو لي ولداتو وتسول فيه مالك اخويا واش خاصك شي فلوس ، واش عندك شي مشكيل ، مقدرش يجلس في دار بلاما تكون فيها هز موطورو وخرج ، عارفها فين غتكون حيت معندها فين تمشي من غير خوها ، ما مرة ما زوج قالها ليها بالحق غير بفمو اما قلبو ميقدرش على فراق نجمة حيت هي الكل في الكل ، مسؤولية دار وخوتو صغار لي تحمل تربيتهم ومصروفهم ورا موت باه خلاتو يكون قاصح وصعيب ، زيد عليها حتى تربية كيفاش رباتو فاطنة كان ليها دور كبير… معطاتوش الحنان الكافي باش يعطيه ، معارفش شناهيا الخاوة ومعارفش شناهيا المحبة والمعزة ففاقد الشيء لا يعطيه ،كان كيقول نزير نلقى منطلق ، كان داك الأخ القاصح رغما عنه باش ميسمعش من الغير كلمة بنات وولاد الحاج رمضان ممربينش قسات عليه الحياة وهو قساا على ختو لي كانت واقفة معاه، طريق كلها وهو كيخمم معارفش شنو غيقول ، وباش غيعتاذر منها وباشمن وجه غيشوف فيها وف جداه وخالو بعدما تحكي ليهم نجمة ، طريق طويلة ضربها ومحسش بيها طاح ظلام عاد لقى راسو قدام الدار لي شحال مجا ليها ، وقف موطور ودق في الباب لي فلمح البصر تحل بحالا كانو كيتسناو فيه ، هز عينو بعدما كان منزل راسو الارض وهو يشوفها وشكون من غيرها نجاة لي حرم هاد الدار على قبلها

هز عينو بعدما كان منزل راسو الأرض وشكون من غيرها نجاة لي حرم الدار على قبلها ، غير شافتو عينيها بداو كيبريو ببريق الحب قلبها بدا كيضرب بجهد وتنفسها تخربق ولات كطلع النفس وتنزلها بالزربة ، بعد لتيساع وقال مضور عينيه بلاما يشوفيها ~ بابا كاين !؟ …

بلعت ريقها وبابتسامة ردت عليه حاضية ملامح وجهو لي توحشتهم ~ اه طلع كلشي كاين حتى، حتى عمتي نجمة كااينةة …اشار ليها براسو باش تفتح ليه الطريق يطلع قبل منها مفهمتش قصدو وبقات حالا فمها وهو يدوي بنبرة صوت اعلى شوية ~ واخا تخليني ندوز ….بارتباك تنحات لجنب ~ مرحبا بيك طلع !!…..غادي سابقها وهي وراه قلبها غينقز من بلاصتو ويفضحها قدام كلشي ، زاد زيان وشخصيتو حلات وملامحو وجهو حراشو كثر ، هادشي كلو قالت بينها وبين راسها وهي وراه دخل لصالون كان العشا يله تحط فوق طبلة ، لقى السلام تحت نظرات نجمة المتفاجئه ، سلم على كلشي وعليها حتى هي وداز ريح حدا بابا عبد الهادي لي قال وهو كيربت على رجلو ~ ولد ختي !! اش جاك حتى تفكرتينا …؟

عبد الله وعينيه في الارض ~ وا فصراحة جيت على وديت ختي نجمة ….نقزت تاجة بحيرة كتشوف فيها~ علاش شنو واقع ؟؟ قال عبد الهادي باعتراض ~ مكاينة هضرة والماكلة محطوطة ،بسم الله كولو بعدا وديك ساع ندويو مع براد تاع اتاي …عبد الله حرك ليه راسو ~ مقلتي عيب ابابا …كان على طبلة ولاد عبد الهادي الرجال فقط اما لبنات بقاو مع مهم في كوزينة فور مجا عبد الله….كلاو طجين لي كان طايب على حقو وطريقو وجا من وراه ديسير وختموها ببراد تاع اتاي يهضمو بيه ، هز عبد الهادي راسو لولد ختو وقال ~ ياك لاباس ؟؟ …كان كيشوف فنجمة لي كتحرك ليه راسها بمعنى سكت ، فهم بلي مفخبارهم والو حيت لو كان حكات ليهم لي وقع مكانش خالو غياخدو بالاحضان كان غيتلقاه بطرشة لوجه على الهضرة لي قال ، بالحق هادي هي نجمة القلب الكبير والحنين …ضور الهضرة في دماغو ونطق ~ غير نجمة نسات يمكن مقالت لمي بلي غتجي هنا وبقات مشوشة عليها ، قلت نجي نشوفها …..دار شافيها خوها بنظرات قاصحين ~ اش هادشي ، بغيتي تجي علمي متخليش ختك مشوشة …..بلعت ريقها ~ نسيت ابابا عند بالي قلتها ليها …

عبد الهادي ~هادشي مافيهش نسيت الله يرضي عليك ، مخلية دري جاي معذب من تم لهنا وليل هادا وخدام…..قالت لعبد الله وعينيها في الارض ~ سمح ليا اخويا …

جمع الوقفة وناض ~ مكاين لا عذاب لا والو ، مهم رتاحينا عليك ، يله نخليكم دابا نمشي نهني بال مي ، باس لتاجة يديها وراسها ~ لميمة تهلاي فراسك ودوزي عندنا ….تاجة برضى ~ ان شاء الله اولدي ..داز لعند عبد الهادي لي باس ليه بدورو يديه ~ سمح ليا ابابا على هاد الدخلة ، بصوت خشن جاوبو ~ داركم هادي سلم على فاطنة ودي ليها معاك واحد خنشة الزرع راه كاينة لتحت في دروج وريها ليه انجمة ….عاود باس ليه يدو ~ الله يخلف عليك ،يله تباتو فراحة الله …. سبقاتو نجمة لدروج وقف عند الباب معارفش باش يبدا اما هي عينيها كانو مخاصمينو مقادراش تتجاوز وتنسى وتشوف فيه قالت بكلام ناقص ~ راه خنشة لي قاليك بابا …جات بغات تطلع وقفها من يديها ~ نجمة تسناي ،!! وقفت عينيها مغرغرين وكابحة دموعها مبغاتهمش ينزلو …قال بصوت نادم ~ انا عارف راسي غلطت معاك سمحي ليا اختي ومتديش على خوك ، اللسان مافيه عظم ، رجعي لدار راه نتي عمودها وايلا خطيتيها غنتلفو وتريب وهاد الفم لي باقي يجرحك وايد لي تعاود تمد عليك نهرسها اختي …محساتش بدموعها حتى نزلو وحدة مور ختها كيتسابقو ، معرفتش باش تجاوبو ولا شنو تقوليه حدها قالت بصوت باكي~ سلم على ختي وطلعت كتجري ، جرحها جديد صعيب تنسى دغيا …مشا بحصرة من حقها تقلق حيت مقالوش قليل شنو كان كيتسنى منها تلبس حوايجها وتقوليه ديني معاك ، تاهيا عندها نفس وكبرياء …

تناص ليل لي جامع عيون ناعسة ،وعيون باكية، وعيون عشقانة …نبداو بهاد الأخيرة ،شوفة نجاة لعبد الله زادت حركت ليها الحب ل ساكن فقلبها ، ليل كلو وهي تنهد وتفكر فيه وتخيل حياتها هي وياه الا تزوجو كيف غتكون ، مخلاتش ختها تنعس بقوة تگلاب حتى فاقت معصبة ~ نجاة نعسي وخلينا حتى حنا نرگدو معاك ليل هادا ، ماالك واخا تكونو معرت شكون شفتي …

تسمعت تنهيدة طالعة من قلب وجوبتها معنقة مخدة ~ شفت حبيبي لي كنتسناه هادي شحال ،شفت دوايا وطبيبي ، زعمة يقدر يجي نهار يجمعني معاه سقف واحد اختي ، ناري !!! كنبغيه ومقاداش نتزوج ولا نشارك لفراش مع حتى حد غيرو شنو ندير …

نجيمة بقات فيها ~ كلشي من هاديك لي ناعسة فلبيت ، كون كانت عمة نيت وتاع تبراد القلب كوراه لبسك الخاتم شحال هادي ، شحال تعطي كلشي منها هي لي حرشت عمتي فاطنة ، غا هي فاتها تران وحالفا تا يفوتنا كاملين

نجاة جمعت الوقفة مخلوعة ~ ايوا وشنو نبقاو مربعين يدينا ….جوبتها بنظرة شر ~ غا تسناي لي مجا بالخاطر يجي صحة وشفتي الا كان غا عبد الله حسبيه راجلك يله غا نعسي وخلينا نغمضو فهاد ليل …كلامها رجع فختها داك البصيص الامل لي كان مشا ونعسو معانقين ، على عكس نجمة لي ليل كامل وهي تبكي ، ناعسة فلبيت مع مها لبلاصة تبدلت عليها ونعاس حلف لزارها وصورة عبد الله وهو نادم بين عينيها ، قلبها حنين ودغيا كتضعاف واخا كتمثل العكس ، بدا كيرجع ليها عقلها ذكرياتها مع ختها ملي كانت صغيرة ، وملي كانت كتعومها ،تبدل ليها وتلبسها وتخرجها معاها ، وكيفاش نقدتها من الاهمال ، تفكرت خديجة فاش كانو كيلعبو بزوج،ولاد ختها صغار ملي كدوش ليهم وتسلخهم وكلمة الحق عمر فاطنة قالت ليها علاش ضربتيهم ، شريط حياتها كلو لي دوزاتو معاها تعرض قدامها فداك ليل ، بغات غير امتى يصبح الحال وتمشي لخدمتها تشغل بالها شوية حتى وكان يعرفو قيمتها …..

تسمع صوت اذان الفجر وهي تنوض توجد راسها ، طريقها طويلة ومكاينش لي يديها ، ناضت قاطعة الحس بدلت حوايجها وخرجات كان كلشي مازال ناعس يله غتحل لباب وهو يخرج خوها من لبيت كان غادي لجامع يصلي باستفهام حرك ليا يدو وقال ~ فين غادا فهاد الوقت

نجمة بصوت غير مسموع ~ للخدمة ابابا هادا هو وقتي ……قال معاجبو حال ~ الحال مبكر ودنيا مقطوعة رجعي نعسي حتى يبان ضو وسيري الا بغيتي اش هاد الحالة ؟؟ …

معودتهاش معاه دخلات لبيت تكمشت في المانطة حتى بان ليها ضو صباح طلع وخرجات …شدات طاكسي حيت عارفة راسها غادا معطلة، وصلت مع تمنية كلشي شد بلاصتو ،لقات لباطرون عند الباب غير شافها شاف في مگانتو ~ اش هاد الوقت انجمة ؟؟ …جوباتو بعينين ذابلين باين عليها لعيا ~ غير سمح ليا اشاف عيانة ومناعساش ليل كامل جيت بزز ….

– مالكم متافقين عليا نتي وصاحبتك بغيتو تجلسو بزوجكم فنهار واحد ولا كيفاش ..- جوباتو بتساؤل ~ واش وردية مجاتش

– لا مجاتش سيري شوفي خدمتك حتى تجي ونتفاهم معاها ….مشات معجبة كيفاش متجيش ممولفاش ليها واخا تكون فيها لموت مكتبغيش تنقص سوايع ، نهار كامل وهي عقلها مشوش عليها بغات غير امتى تخرج باش تمشي لعند تشووف ماالها

داز عليها نهار كحل من جهة صاحبتها لمعرفت شنو عندها ميمكنش وردية متجيش لخدمة ، مولفة الا كان عندها شي ظرف قاهر كتعلم ، غير سالات خدمتها ولصقو فيها شي بنات خدامين معاهم تاهما بغاو يعرفو مالها شدو المركوب باش ميضيعوش الوقت ومشاو لفين ساكنة ، كان حي شعبي غير في النواحي ، حداه سويقة وصحاب خضرة والحوت ،والغوات على الجهد ، كل واحد كيبيع فقنت ، وحيت شحال مجاو نساو على دارها سولو مرا من تما وغير قالو ليها سمية وردية داتهم حتى لباب ، قبل ميدقو كل وحدة فيهم عطات لي قسم الله وخداو حليب وتخربيق لدراري صغار مبغاوش يدخلو خاويين ،كانت كارية سفلية فيها شرجم واحد على برا ، دقات وحدة من البنات بجهد دقة مور دقة حتى سمعو صوتها جايا وتنگر ~ وا بلاتي انا جااايااا وااه غتهرسو الباب ، لبنات زادو فدقان داروها ليها بلعاني كيضحكو بيناتهم ونجمة غير مسوخرة اللور بالها مشطون ، مع الحلة مع غتنزل سبان ولكن غير شافتهم غضبها تبخر ولمعو عينيها الذابلين ، حسات عندها قيمة ملي جاو يسولو فيها تلاحت عليهم وحدة بختها كتسلم وترحب ~ اهلا اهلا دخلو مرحبا بيكم …خلات نجمة هي اللخرة وكوشت عليها شدة وحدة مطلقتهاش قالت في وذنيها بهمس ~ وكون تشوفي ماواقع فختك

نجمة زادت تشطنت كثر وكثر ~ اش واقع مالكي؟؟ حركت ليها راسها بمعنى من بعد ودخلو ، دار كانت صغيرة على قد الحال بيت وصالة كبيرة ومريح صغير منو كوزينة منو جليسة عاد الحمام ، حيوطها كانو مبورين وفراشها قديم ، ولي حطيتي عليها يدك خاسرة من لبوانيات تال بولات تاع ضو ، جلستهم في صالون وابتسامة مفارقتش وجها رغم الظروف ~ مرحبا بيكم البنات ، متعرفوش مجيتكم عندي بدنيا ومافيها ..شافت الميكا لي فوق طبلة .مالكم عذبتو راسكم؟؟

– دوات بنت معاهم ~ ماشي من مقامك اختي تستاهلي كثر غير تشوشنا عليك گلنا نطلو ياكما مريضة

– دوات وحدة اخرا ~ ياك لاباس اوردية وجهك صفر ، بمزاح ضربتها لذراعها ، ياكما درتيها تاني المسخوطة ؟!

– وردية وهي مخرجة عينيها ~ اش بغيت ندير ،حطات يدها على كرشها ، زاعمة حاملة الله ينجيني اختي سيري انا بغيتهم ليك ويكونو توام …خلات كلشي كيضحك وهي هربانة عليها الضحكة تنهدت وكملت ~ غير دراري عيانين شوية مقدرتش نخليهم ونجي خفت يتزاد عليهم الحال وباهم مكاينش مشا لبلاد

– قالت نجمة مقوسة عينيها ~ ياك لاباس مالهم ياكما الريح ؟؟

– حركت راسها بنفي وقالت هازا ايديها لفوق ~ عييت اختي معرفتها من عند الله ولا من عند العبد ، طاحو طيحة وحدة بزوجهم وفمرة جهدهم مسالي راه صباح عاد ديتهم طبيب ودوا خديناه والرجا فالله هو الشافي كملت كلامها وتنهد

– يكون خير اوردية ختي الله يزيد فراحتهم دابا يوليو بخير ان شاء الله ويكبرو ويوليو عرسان وتولي عدوزة حارة مافيك ميتلبق …بغاو يضحكوها تنسى شوية الهم وقفت تمات غادا خارجة لكوزينة تعمر اتاي وهما يجمعو الوقفة كاملين ~ والله منتي دايرة حاجة غنمشيو جينا غير نطلو ونمشييو

– وردية ~ الا اصحبتي غا كويس ديال اتاي

– والله مديريه نشربوه في الافراح ان شاء الله هذا هو الوقت يله دوزي بخير ، وميكون عندهم باس ،سلمو عليها وحدة بختها ومشاو بقات غير نجمة ، سدات الباب ورجعت عندها كتعدد ~ تعالي اختي شوفي ولادي غيموتو ليا بزوج…ناضت تبعتها لبيت لقاتهم ناعسين فوق ناموسية كل واحد فجهة مغيبين وصفريين تقول نقطة دم مافيهمش لي شافهم يقول لموت داخلاهم

– نجمة قالت باستغراب ~ الله ياختي الله اش وصبهم لهاد الحالة واش عرفتي اش عندهم ياكما بوصفير ولا فقر دم اش قاليك طبيب

– جلست الارض كتخبط على فخاضها ~ هادشي مينفع فيه لادوا ولا طبة ،الحسين اختي زافين عليه ماليه باش يشد الطبلة

شحال هادي وحتى دابا سحر كان كثير ولي كيقلب عليه كثر منو ،كانت لمرا ملي تبغي تشد راجلها ياكلو ليها دماغها القاطعين يديهم من رحمة الله ، ب وكليه سحري ليه حتى كتولي حياتها كاملة عذاب وتابعه الفقها و عقلها كينسى الدين و رحمة سيدي ربي … وردية حياتها كانت عادية تزوجات زواج تقليدي لا هي شافتو و لا عينيها نظراتو، حتى لقات راسها مزوجة و مشايفاش حتى وجه السيد لي غتدي ومعرفت اصلو منين… حاجة وحدة ل عارفة عليه هي سميتو الحسين ناسيين شكون هاد السيد ولا منين هو باغين غير البنت تزوج خلاص حيت كان عيب و عار تفوت تمنطاش لعام … تزوجات ودوزات عرسها و عاشت مع راجلها حياة عادية كيف اي راجل و ومرتو، مدوزاتش بزاف حتى هزت اول ولد فكرشها ل من نهارو مريض و سخفان ضارت بيه گاع الطبة كل واحد كتمشي عندو كيقوليها معندو والو ،تلفات بيها الدنيا و داخت محسات براسها حتى لقات راسها حاملة بالولد الثاني دوزات بيه الحريق و العذاب حتى شافت عويناتو … و المشكيل لي في الكبير لقاتو في الصغير وداكشي لي دارت مع خوه تلاتو مع هذا … ولادها كيبكبرو قدامها مراض معرفت اش بيهم ولا اش واقع ليهم وزادها راجل لي اي خدمة كيدخل ليها مكيكملش شهر كيجريو عليه اي مشروع دارو كيفشل ليه ، تامن دارها ولات خربة لي صوبتها ليوم تخسر غدا ،عيات وتهدات حتى لنهار ل وقف قدامها الحسين و اعتارف ليها بلي كاين …

في صغرو كان مبلي بالخزاين و الزوهريين و الفقهى… فين ما يسمع كاينة خزينة فشي بلاد يمشي و يدي معاه فقيه و يجلس يحفر عند بالو غيلقى الذهب حتى لقى راسو غرق في هادشي و مبقاش عارف دينو و لا صلاتو و حتى القبلة مبقاش عارف منين عقلو داخ وو لا متبع كلام الفقهى و اش كيقولو ليه … ناسي بلي لا يعلم الغيب الا الله بقى مكمل على حالتو حتى ولا ينعس و يشوفهم مهددينو باس يشد يسحر ولا تجي ليه في العزيز … هنا عرف راسو اش دار و في اشمن طريق مشا مرض فيها مرضة خايبة وحتى من الفقهى لي كان يمشي عندهم ما نفعوه ولا دواوه لي هضر معاه يقوليه عطينا اتساع مقادين على مشاكل…هكا كانت حياتو قبل ميكون مع وردية ،عايش في الهم و الغم و حياتو عذاب و مرض كحل …تزوج وولد ونسى ولسرو خبى اش كان كيشوف حتى نهار مرضو ولادو ونهارت حياتو عاد علم وردية بشنو كاين وبلي ولادو مرضو بسبابو وبسباب شنو كان كيدير و حطها امام الامر الواقع ، الى ما قبلش بشنو بغاو غيبقاو هاكداك… رد من عندها كان طلاق الى مشا ف شي طريق مكترضيش الله ومن تما وهما على هاد الحال من مرضة لمرضة وتاهو كان ايمانو قليل مكيصلي مكيعبد الله محارب لا بقران لا بصلاة كان كيعاني ومازال وهادشي مأترش غيىر عليه وانما تا على ناس دايرين بيه ومعندهم حتى ذنب فماضيه

خرجت مع عند وردية بخاطر مكسور وبقلب مضيوم ،بقات فيها وبقاو فيها ولادها لي ملائكة مذنبهم حتى حاجة فهادشي من غير ان باهم مكانش كيخاف الله ، حمدت الله على مشاكلها، كيبقى حال حسن من الف حال ، شدات طريق العودة وهاد المرة لعند فاطنة باش تجمع حوايجها وترجع لعند مها ، وصلت لدريبة غادا وتسلم على لعيالات وتشير على لبنات بابتسامة…. محبوبة عند كلشي بصوابها وترابيها ، دفعت دفة الباب وطلعت، من دروج كتشم ريحة لحريرة باينة بنينة وكتهشي ،دقات في لفصيل بلاما تستعمل الساروت يله غتزيد دقة التانية وهو يتحل في وجهها ، وشكون من غيرها كانت فاطنة ل مشمرة كيف ديما هازا القفطان تال فوق وعاقداه بحزام لاستيك ومگفضة كمامها عند المرفق … عاقدة غوباشتها لي تفكت فور مشافت نجمة ،من قلبها فرحات ولكن مبينتش وهذا طبع خايب فيها ، شرعت الباب على جهدو وقالت وهي حاطة ايدها على جنابها ~ صافي جيتي تفشيتي ايوا دخلي ….نجمة بحزن قالت وهي غادا لبيت ~ جايا غير نجمع حوايجي وراجعة متخافيش مغنزيدش نتقل عليكم

بلاما تشعر تبعتها كتدوي بانفعال ~ ياك اختي، ياك انجمة وليتي تقلقي وباغا تمشي تغضبي نتي گاع ومالي اش درت ليك ، بدات تضرب فصدرها دقات خفاف …نستاهل انا لي كبرت وتكرفص وربيت الكبدة

نجمة خبطتت الصاك لي غتجمع فيه في الارض وضارت لعندها ونطقت بحدة ~ الا كبرتيني تانا كبرت معاك ولادك الا تكرفصتي عليا تا انا تكرفصت معاك غير هي باش تربي عليا كبدة موحال ابنت مي ، حيت باش تشوفيني كنتسوط قدامك ومتحركيش ايد ولا فم واخا نكون عدوتك ومديريهاش ، باش نبقى لعشية كلها مرمية في سطح جالسة ومطلعيش تا تبرديني بكليمة نرض بيها خاطري هادشي مضنيتوش فيك ، خدلتيني اختي وجاتني قاصحة منك نتي كثر من عبد الله …..قالت كلامها وعطاتها بظهر كتجمع حوايجها وكتبكي ، وفاطنة حاضياها وقلبها كيبكي من الداخل حيت العينين نشفو من دموع ، شنو دير طبعها هاكداك داير، الوقت ردات منها راجل ماشي تا مرا تزوجت صغيرة الراجل لول مات وتاني تاهو مات وتالث لي قالت تابث وغتعيش معاه وتولد وليداتها ويكبروهم هي وياه ، تاهو مشا عند لي خلقو وخلاها صغيرة بنت عشرين عام وواحل فعنقها ربعة لولاد شي تحت شي كيف دير حتى متغيبش عليها الضحكة وكيف دير تاهاد القلب ميقصاحش ويولي كحل ، لا أب حازها لا أم عونتها لا خو طبطب عليها كلها ينش على كبالتو ، ماشي هي لي ختارت تولي هاكدا الوقت لبدلاتها…شافت فنجمة حتى عيات وفلخر مشات سورتات الباب وطرقاتو وقالت ~ واشوفي منين تخرجي دابا معندك فين غادا …كملات جميعها ودار صاك على كتافها ووقفت عرست ليها ~ حلي اختي خليني نمشي عيانة بغيت غا نحط ذاتي ….

فاطنة ~ راا لبيت نعسي الا بغيتي شكون حبسك …..

جبدت ساروت من صاكها وعفطت على قلبها وقصحاتو ~ خليتك على خير اختي ، وسمح ليا الا كرفصتك

مع بغات تخرج سمعت كلمة لي حشت ليها ركابي مبقاتش قادا تزيد خطوة اخرا وراها ~ الا فتي داك الباب نهار نموت متعري على وجهي متشوفيه …قالت كلامها ونتفت نواضرهاا من جدر

اش عند الميت ميدير قدام غسالو ، مخرجتها من فمها الا وعارفاها غتقد بيها شنو دير تعفط على قلبها وتنسى الايام زوينة لي دوزو مجموعين وتمشي ولا تضغط على نفسها وتنسى الهضرة السامة لي تقالت فيها وتبقى ، واقفة فحيرة كبيرة قدام الباب مبقات قادة لا تخطي بخطوة القدام ولا ترجع بيها اللور ، باستسلام سدات الباب ولاحت داك صاك في الارض وقالت وهي غادا لبيت لعند ختها ~ علاش نتي انانية اختي ، علاش كتبغي تمشي كلشي على صباع يديك ، شنو فيها الا ضغطتي على ديك نفس عندك شوية وقلتي ليا انا باغاك معايا بلاصتك هنا متخلينيش ولا حتى سمحي ليا اش غيوقع ليك ..؟

فاطنة تنهدات عارفة عندها الحق فكل كلمة ,وهي حاطة ايدها علىةخدها قالت~ هادشي لي عطاني الله اختي….بقات كتشوفيها شحال مسلمة امرها لمولانا كتبقى ختها منها وفيها وكيقولو ايدك منك واخا تكون مجدامة ، هزات حوايجها لبيت مشات بدلات وتجبدت تما ترتاح من لعيا ، شوية سمعت صوت ولاد ختها وخديجة كلشي عرفها جات ، باينة في وجه فاطنة لي حلات ليهم الباب بجبهة مسرحة ومن ريحتها لي فالدار ،دخلو لعندها الحسن والحسين سلمو عليها وكلها كيتبرا من لاخور لي شوفهم يقول باقين صغار ، جرات عليهم خديجة باش تبقى معاها الراس فراس تلاحت وسط حضنها وقالت ~ ناري انجمة دار كانت حالتها بلا بيك ، كون زدتي نهار اخور نتسطى ، ولينا كلها فجيهة بوحدو اما مّي غا عاقداهم نجي ندوي معاها تطليني وخويا عبد الله مبقا يجلس معانا لا والو

نجمة حاطا عليها الراس ~ امم گاع هادشي وقع في غيابي مالي اش ديت ليكم …..بعدت من حضنها حاطاا ايديها على جنابها وكتعوج ~ واباز اختي وكتسولي راه باينة متحتاجش اجابة ، ديتي لينا الضحكة اختي ..باستفهام ضيقت عينيها ، مغتقوليش ليا علاش ناض هاد صداع كامل ياك انا مكنخبي عليك والو الحزقة هي لخرة كتكون فخبارك الا طلقتها

نجمة هزات حواجبها لفوق وقالت كضحك ~ الله يمسخك ،ايوا الالة خوك حصل في صاكي تصويرة تصورتها في العرس مع الباطرون ومرتو وصاحبو ، وكان جنبي على جنبو …

خرجت عينيها ~ شكون لباطرون …..نجمة حركت راسها بلا ~ على جنب صاحبو …خديجة حطات ايدها على فما ~ ناري على الصگعه ايوا وشنو دار

نجمة حطت مخدة فوق رجليها ~ قولي شنو مدارش ، نتي راك عارفاه ملي كيتعصب ايوا داك لعصاب كان مضوبل على ربعة عاير وسب وضرب وخرج اما واحد مك مطبطبت محزرت ماواسات نزلت وخلاتني في سطح منشورة مع ديك الزربية لي كنت كنحك

خديجة ضربت يد فيد ~ وانا نفهم ، ….داك نهار فاش جا من عند بابا لقيتو كيحرگ فشي حاجة ولاحها في طارو تاا تحرگو جنابو وتخنقنا بدخان ملي سولناه حلف لا عطانا راس الخيط ،بقى واقف تما حتى ولا غا رماد معرفنا شنو شوط ، ناري على صگعه معندك زهر عمرك حبيتي ونهار حبيتي طحتي على راسك

طلقتها بالضحكة على راسها وايامها حيت خديجة عندها الحق من ديما مسبقة لخلعة، لي وقف عليها بغا كليمة منها تهرب ، لي بغا يتعرف تعيرو ،عمرها خرجت مع دراري باش متحصلش ولي خافت منو هادي شحال طاحت فيه دابا ….خديجة ~ ايوا هاد الزين الصافي يستاهل تنوض عليه هاد الحرب بعدا ؟

سرحت بذاكرتها لنهار لي مشاو خداو تصاور وخلاها راجعة بوحدها مخسر عليها تا شنو سميتو وهي تقول ~ ميستاهلش ، غا عجاجة دايزة وخلات وراها الغبرة هادشي لي بقى فيا …

خديجة ~ حتى نتي العزارة عطاهم الله الا مصدقش هذا يصدق لاخور مهم نتي متهزيش راية الاستسلام ….

ضربتها بمخدة ~ نوضي تگدي بعدي من حدايا خليني ننعس كضحكي عليا قدك أنا قالت ليك راية الاستسلام حنا فحرب ومعارفينش…..

بقاو مجمعين محاسينش بالوقت حتى عيطت فاطنة لخديجة باش توجد معاها وهي تلعن نجمة شيطان وناضت، دخلت لكوزينة حطت زلايف وملاعق ، وخديجة حداها كتسخن في بطبوط معمر بالشحما ،فاطنة كانت كتقلب وتشقلب فاتاي وجدو كلشي فوق طبلة تاع لبيت وجلسو يتعشاو ، مع الجلسة مع دخل عبد الله من الخدمة ،رما سلام ومشا غسل وبدل وجا حداهم ، تفادات تشوفيه وتشحنت الگعدة حتى نطقت فاطنة ~ سمعوني نقوليكم نتوما بزوج !! هزو عينهم فيها كانت كتدوي كيف ديما بوجه مكيبشرش بالخير ، اخر مرة يوقع هادشي بيناتكم راه مسارن في الكرش وكيضاربو ، نتاا شافت في ولدها، اخر مرة تهز عليها يدك عندك شي مشكيل جيي عندي انا ،راني ماشي ديكور فدار …وعمري نسمعك خرجتي من فمك كلمة سيري لداركم ولا لعند خوتك هنا دارها خبطت على طبلة سمعتي !! ونتوما هما خووتها ، و راه خالتكم و من الواجب عليكم تحتارموها ك كتحتارموني ،حليتو عينيكم عليها وهي كبرت معاكم ختكم ماشي حتى بحال ختكم ونتي !! شافت فنجمة بحدة ~الا غلط هو وضربك ، فعوض متغضبي وتمشي من دار ،راه لبيت سدي عليك فيه وبقاي تما تا تفشي على خاطرك ….راكم نتوما ساس هاد دار !! متريبوهاش !!

نجمة منزلة راسها الارض معندها متقول اما عبد الله شابك صبعامو وقال ~ نقدر نكون تسرعت وعيرتك وضربتك ولكن هادشي مينكرش بلي راك غالطة ونتي عارفة مزيااان شنو درتي ،كون خديجة دارت نفس فعلتك كانت غتعاقب كثر منك يعني مدايريش فرق بيناتكم

فاطنة قاطعتو حسات بالمضوع متعلق بدراري ~ فهمني اش دارت متعرف تكون سامع غلاط ولا بغاو يحرشوك

عبد الله هز ايدو ~ ميي انا مسمعتش ، انا شفت وعيني مغيكذبونيش ومعندي علاش نقوليك شنو وقع داكشي نسيتو ونجمة راه ختي وقدامكم كنطلب منها سماحة على الهضرة لي قلت ليها وهادي اختي دارك مديش عليا الا كنت بعد مرات كنقسى عليك بكلمة سيري عند خوك ، انا هو خوك لكبير ومبقاك معانا هنا معندك فين تمشي من غير لدار لراجلك ولا لقبرك …

هزت عينيها لي كانو متاثرين ~ الله يسامح اخويا حتى نتا سمح ليا الا قلقتك ،…ناض باس على راسها وعنقها وهاكدا صفاو لخواطر بيناتهم وتعشاو كيف ديما ،حيت عمر ظفر ميطلع من اللحم

بوادر فصل الربيع بدات تبان ، الشمس حارة والجو صافي ، الخضورة في كل بلاصة ، بأناقة كانت خارجة من خدمة لابسة صاية جايا كحلة على طايتها حد الركبة وقميجة خفيفة موردة ، شعرها كان واخد راحتو كيمشي ويجي مع كل خطوة خطاتها ،كتمشى بدلال عفوي وعينين بنات ورجال على سيقانها لي كانو بيضين وعامرين من الكعبة حتال ركبة كيثيرو العين ،مكاينش لمهز عينو فيها ، وفضحكتها المأذبة وصوتها الهادئ ونبرتها الرنانة، غادا هي ووردية كيدويو ويضحكو حتى قاطع طريقها شخص تمحى من البال ،وقف قدامها بكامل رجوليتو ،كيلمحها بنظرة اعجاب ،هزت حاجبها فيه بغات تغير طريق وهو يشدها من ايدها وزيرر ~ نجمةةة !! بغيت ندوي معاك

بدون شعور تنترت منو حتى ضرتها ايدها وجوباتو كتعض على شفايفها بعصبية ~ معندنا فاش ندويو على ما اظن ،مكنعرفك مكتعرفني باش تجي توقف عليا قدام الخدمة ..

حس بيها مقلقة منو وهازة فخاطرها بزاف على اخر لقاء بينهم لخيب أمالها فيه ~ ميكونش راسك قاصح وقفي نهضرو عندي منقوليك

دوات وردية من تحت سنانها~ انا غنخليك ونمشي!! سمعي ليه اصحبتي شنو غتخسري …

مشات وخلاتها كطرطق فصبعانها ومبعدة عينيها منو ، حاسة براسها متوثرة نطق باغي يهدنها ~ ركبي معايا نمشيو لشي بلاصة مزيانة وندوية على راحتنا ، مجاتش نبقى واقف عليك حدا خدمتك

نجمة بانفعال ~ سمعني نقوليك !! انا ماشي لعبة تحركها بيديك كيف بغيتي يله معايا ، ركبي ،زيدي …الا مولف كضحك على لبنات هاكدا ،مرة كاين مرة غابر انا ماشي منهم باش تتفلى عليا ودوز وقتك تا تشبع وتقول ليا تمشيي راسك ولا نوصل …قالتها موركة عليها كتفكرو ففمو وماقال كانت كتدوي قاصحة وكتشوفيه بنظرة كلها حدة وتحدي …ودابا خوي ليا طريق ممسالياش ليك عندي عائلة كتسناني …

ضربت فيه ووزادت خلاتو متبع ليها العين وعاض على فكو من لدااخل مغدد من طريقتها ديال الهضرة ،منين جابت هاد قصوحية كاملة واش هادي هي لبنت ل شاف في العرس ولا وحدة اخرا ، زير على قبضة يديه حتى بغى يتبعها ونعل شيطان يبرد ساعة بساعة حسن منها ….اما هي غاظا مرتاحة قلبها مازال كيضرب وفما كل مرة تفلت منو ابتسامة تعجبت فراسها كيفاش واجهاتوو، مرة مرة تفكر العضرة لي قالت ليه ،وتقول …ياك مبينتش ليه بلي طايحة فيه ولا قلبي محروق عليه ولا بقى فيا الحال على اخر مرة …بقات هاكدك حتى وصلت لدار ، سلمت على ختها وبدلت حوايجها وطلقت الراديو كتسنط لاغاني طربية وكتشقى كتحس براسها كلها نشاط وحيوية

كملت الروينة لي فدار عزيز عليها تجبد ركاني معندهاش مع مسح ودوز ، خرجت ختها تجيب شنو خاص من الحانوت ونصبت حداها الطاجين جالسة كتقطع في الخضرة حتى كتسمع صوت لبكا وغوات خديجة واصل لعندها ،لاحت شنو فيديها بالخلعة وهبطت تجري لقات فاطنة جايا جاراها من شعرها وكلشي كيطال عليهم باغي يفك … هادو هوما جيران لحي شعبي غير يسمعو غوتة بلا متعاود تلقى الحومة ضربت من الطرف بعيباد الله و لي مقداتو الزنقة يطل من الشرجم ويقول هنا كيبان ليا مزيان … نجمة مرضاتش وهي كتشوف جوقة وكلشي يتفرج ولسانات ناس خاصها غير علامن تلوى مشات لعند ختها لي كانو عينيها مطرطقين ووجها حمر ~ ختي اش كديري

فاطنة محايرة فحد ، بغات نجمة تفك لبنت من يدها مبغات ليها زادت لوات الشعر على قبضة يديها ودخلت مع الباب طالعة وتخبط ~ اويلي على بنت الحرام بغات طيح ليا الروح في الدار ياك الغدارة تغدريني هكاك عيني في عينيك ،ياك ابنت الحرام هادي هي لقرايا لي كتمشي ليها هاا ؟؟ ناس يمشيو يتعلمو ونتي تعلمتي تحرميات

خديجة كتبكي زوج دموع من العين داك الوجه سرداتو بحالا كابة عليه سطل دالما ~انا مزاوگة امي هادي لخرة عمري باقا نعاود ..دخلو لوسط الدار وهي تدخل بيناتهم نجمة لي فمها خارج و الخلعة شاداها تتفك فيهم حتى نترت خديجة من تحت منها خلات زغب لاصق فيدها

نجمة ~ تي نعلي الشيطان الناس كتسنط ، قولو ليا اش وقع لهادشي كامل …خديجة عارفة راسها اش دايرة عاطياها غا البكا اما فاطنة جلست في نص المرح حاطة يديها على راسها و تعدد تقول عندها جنازة و ما جا ليها عزايا ~~ اويلي على ق ح ب ة رورو ولات تخرج بلبسة ودخل لدروجات تلبس لبسة خرى و تخرج و يعلم الله فين كتزيد ..هزت عينيها فيها كتحلف~ اليوم نقلبك ا بنت كرشي اويلي اخر يامي وجهي غنمرمدو في الرماد مع برهوشة تاع لخلا

خديجة تلاحت على مها كتبوس ليها في راسها ،~والله امي مدرت شي حاجة و لا تعريت لشي حد راني باقا كيما ولدتيني ..

نجمة حاطا ايدها على فمها~ اويلي نعلي الشيطان اختي واش معرفاش اش مربية نوضي توضاي وصلي جوج ركعات طلبي الله يسمح ليك

فاطنة هزات ايدها ~ منبرد تا نتاكد بعيني ، بامر قالت لنجمة…سيري جيبي ليا شمعة من الكوزينة زربي خلاص بدات تخبط في فخاضها من جديد ..اويلي ا عيباد الله على شوهتي ولمن نعاودها خنزرت في خديجة وقالت كضرب على صدرها ~ سري انااا لي دفنت حياتي وشبابي نهار دفت باكم في قبر ، معشت كيف لالياتي مخرجت وتفطحت وتبرعت ذهب كي لعيالات الحرات ، وا كبري جنس القصيف وتعراي عليه وفلخر يمرمد ليك وجهك في الغيس

خديجة عينيها طابو بالبكا وخافت خوها يدخل حيت وقتو وصل ~ والله امي الا فهمتي غاالطة رااه غا خفت خويا يشوفني لابسة لبسة لي بغيت علاش حيدتها ….ضربتها لفمها مقاطعاها وقالت ~ سكتييي يسكت لمك لحس دوزي قدامي لبيت و لي مدايرش ميخافش ياالله غتهضر نجمة رفعت فاطنة يديها في وجها ~ ساليييييييينا سيري جيبي اش قلت ليك ونتي باقا واقفة حدايا ؟؟

ناضت فاطنة البيت تتعتر في جلايلها و تندب و تشكي همها لميتين قبل الحيين … تبعتها خديجة غادا وتمسح دموعها ، لقات مها كتگفض شدتها الخلعة تقول داخلة تولد مبغاتش تحط فهاد الموقف وحشمات تعري راسها ليها ،بقات واقفة كتشوفيها بعينين كيترجاوها تحن فيها ودوزها ليها ومعامن هي طلعت فيها حاجبها وقالت بالغوات~ اش كتسناي ننصلهم ليك ، طلقيني خلاص ؟؟؟ ..نجمةة فينك ياكما مشيتي تشريها من الحانوت !!

تعرات قدامها من لتحت مخلات تا شرويطة كترعد عارفة راسها مدايرة والو ولكن الموقف لي تحطات فيه مبغاتوش ومرضاتش ، والنظرة باش شافت فيها مها محملتهاش واخا تستاهل حيت هي دارت علاش ، بالحق طيش المراهقة وميدير … جات نجمة هازة شمعة في يديها و دموع محجرين في عينيها حاسة بخديجة و الموقف لي هي فيه متبغيه لا ليها ولا لغيرها… مداتها لختها وعارفاها شنو باغت تصنع ، طلعت فوق سدار حشمانة تحل رجليها لي جلست قبالتهم فاطنة ضربتها ليهم وقالت ~ وقفيهم بحالا غا تولدي وقربي لعندي …دارت كيف امرتها رجليها كانو واقفين كيترعدو وسنانها كيتراقصو اما نجمة مقدراتش تبقى واقفة حداهم خرجات وقفت حدا باب البيت… حطت الشمعة نيشان على العضو ديالها داعية ربي متزيدش القدام و تبقى ديك الشمعة على برا و هكا تعرف بنتها باقا عزبة و مقايسها حد … و كيف تمنات الشمعة بقات على برا ،وهذا كان دليل برائتها وشرفها بنسبة لفاطنة تلاحت ليها على فخضها بعضة حتى غوتت غوتة حسات بقرجوطتها غتلوح منها الدم

فاطنة كتسب فيها وفالحيوط ~ ودابا تگعدي لبسي سروالك ابنت كرشي هادي دازت غنكويها في لحمي باش نسد هاد الفم ومنقول لخوك والو … ولكن تعاود راه انا لي غنحرك بيدي تا نسيل ليك القرجوطة

لبسات حوايجها وجلست في القنت كتنخصص ، مشات فاطنة لكوزينة ورجعت نجمة لعند خديجة طبطب عليها شوية وتواسيها واخا عارفا تا كلمة مغتبردها دابا ~ صافي سكتي ومسحي عينيك لبكا معندو باش غينفعك دابا يدخل خوك وتقوليه اش وقع وديك ساع حريرتنا ميجمعوها شراوط

خديجة كتقول كلمة وتوحل ليها لوخرا ~ على اخر يامي وليت نتقلب بشمعة ، مالي بنت زنقة غنوض نعطيه فابور

نجمة هزات صبعها فوجهها ~ لافوت فيك ديما كندوي معاك مكتسمعيش اختي ودابا تگعدي غسلي وجهك وسدي عليا هاد الموضوع

عشية نهار السبت واقفة قدام لمرايا كتقاد وتْمَكْيَجْ بعد سيمانة ديال تمارة دازت عليها فيها بالمعقول ، كانت مواعدة خديجة بخرجة ليهم بزوج ينساو بيها الهم لي كانو فيه وجاتها نيت مع لول الشهر ، صالير عاد خداتو وكيف ديما غتخرج تخسرو فالخوا الخاوي بلا متخمم ، هازة مشطة كتسرح شي زْغِيبَاتْ ملويين من شعرها البني ، وكتشوف في تفاصيل جسمهاا الانثوي ، كانت لابسة كسوة حمرة حد الركبة بكميمات قصار ، جايا لاصقة عليها من لفوق حتال جهة الخصر وتنفخت ، بينت قوامها وعطاتو جمالية وتا لونها عكس بياض وجهها وصفاء عينيها ، هزت كحل بلدي ودوزت عليهم بخط خفيف تزيد تبينهم ، مع عكر طبيعي تورد بيه شفايفها العامرين وحناكها الموردين لي زادو عمرو وزيانو ، قاطعت تأملها خديجة لداخلة عليها بحال العاصفة كتنگر ~ واش نبقى منشورة نتسناك لتحت لغادي وجاي كيشوفيا حابس الضحكة ملي يتفكر السلخة لي خديت من عند فاطنة ، صوتها بدا يتقطع بشكل تدريجي شدتها اللقوة وهي كتطلع وتنزل فيها بانبهار ..نطقت حالة فمها ورافعة حواجبها بتشكيك ~ واش متاكدة اختي غادين لقيسارية ولا غا دايراني طريق وغادا تشوفيه حيت هاد زين كامل حرام يشوفوه البياعة والشراية …بلاما تعيرها اهتمام ،كأنها مسمعت حتى حاجة ،هزت صندالة كعب متوسط وجلست على سداري كتلبس فيها ،كانت في الكحل وكتحزم بخيوطا جهة سيقان ..هزت معاها صاك بنفس اللون دارت فيه فلوسها وباش تجمع شعرها ، وضربت فيها وزادت بعدما قالت ~ الا كنتي غادا تبعيني !!

مشات وراها كتگمگم لقاو فاطنة في الباب طلعت بنتها بنص عين وشافت فيديها وقالت ~ ياكما هازا تاني شي لبسة غضربي دورة وتلبسيها ..

بتافأف قالت ~ وصافي امي نساي لي وقع راه دازت سيمانة وزايدون راني خارجة غير مع نجمة راه كثر منك وكرف منك …قالت نجمة وهي كتشتت نظرها بحشمة من ختها ~ مخاصك والو اختي نجيبو ليك معايا

فاطنة بتنبيه~ تكايسي على داك البزطام ، الناس راه كيخزنو فلوسهم في الذهب اما الشرويط دغيا كيتحبب …

حركت ليها راسها بواخا وشدات في خديجة ومشاو مزروبين غير فاتو الزنقة وهما يسوطو النفس بجهد ، وعقلو على مشيتهم ،قالت نجمة وهي كتمسى بخطوات رنانة ، صوت طالونها ، مُوسَقْ المارة خلا كلشي متبع ليها العين ~ الله ياختي الدنيا شحال زوينة ….

جوبتها خديجة بضحكة مستفزة ~ شفت هاد الايام غير كتضحكي ،ميكون غير الحب دق بابك اصگعه …

بشبه ابتسامة جوبت ~ معندي باب دايرة غا خامية …

خديجة عنقتها من ذراعها ~ ايوا حالك ساهل اختي ، غتغرقك حب وملقاو منعتقو فيك ، مقلتيش ليا اش خبار مول تصويرة مبقيتيش شفتيه …

سكتت شحال وقالت ونطقت ~ سميتو معاوية ماشي مول تصويرة …

خديجة بفضول باغا تعرف كثر ~ هي تعرفتو ، قولي ليا فين وكيفاش وشنو قاليك ،عودي ليا كلشي

نجمة بتوثر ~ مكاين ميتقال سالينا انا وياه قبل منبداو …

حست بظل تابعهم منين ما دازو ، حاولت متقول لخديجة والو باش متخلعش ، دازت من طريق اخرا باش تتأكد ، وشكها كان فمحلو ، دقات قلبها تسارعو حطات ايدها على طوينگات ذهب لي دايرة في وذنيها ول كانو ذكرى عزيزة من عند تاجة ، زادت فسرعتها حتى ولا صوت طالونها كيتسمع بجهد ، ردت ليها خديجة البال وهي تنطق بصوت مرعود ~ مالك شفتك غاظا زربانة اش كاين شكون شفتي ؟؟

نجمة من تحت سنانها ~ شي شفاار تابعنا من قبيلة مضوريش …گانها مدواتش ، دورات راسها سرقت شوفا وهي تحل عينيها وقالت ~ شفاار وزوين وعندو لحية من لفوق

غير سمعتها شنو قالت قلبها بدا يضرب بجهد ،خففات من ميشتها وبلعت ريقها باغا ضور ومقداش ، شنو زعمة يكون عاس عليها فباب دار كيتسناها تخرج ، حسات بضلو كيقرب لعندها وبصوت خشن ختارق مسامعها وقال ~ ممكن ندوي معاك …؟! .ميلت راسها وغير شافت وجهو تلاشات فرحتها ،مكانش هو ولا حتى كيشبه ليه بأي شكل واخا حتى هذا طويل وزوين وعندو اللحية بالحق زين ماشي بحال زين ، جمعت غوباشتها وشافت فيه هازة حاجبها لسما ~ لا اخويا گاعما يمكن ….حط يدو على ايدها ونطق ~ ميكونش راسك قاصح غادي غير نقوليك زوج كلمات وسيري ..

نجمة دوات بنبرة صوت معصبة كتخنزر فيدو فين حاطها ~ صمكة اخويا مكنسمعش واش صحة هادشي ، واسير قبل منجمع عليك عباد الله وتعلم تجمع يدك عندك ..ضربت فيه وجرت خديجة وزادو نطقت هاد الاخيرة بعتاب ~ عمري مشفت شي وحدة كتجري على رزقها بيديها تا شفتك نتي …

نجمة مخرجة عينيها ~ وشنو لي دوا معايا ندوي معاه مالي معندي ميدار بحالك …لي بغاك هاد الوقت راه كيقصد باب داركم مكيجيش من شرجم ،المعقول معروف اما ضوران في دروبة معندو لاش لايق غتشبعي غا تنعات صبعان من وراه ،خوديها مني كلمة تنفعك

كملو على طريقهم ومرة مرة تنهد تمناتو يكون معاوية كانت هاد المرة غتعطيك فرصة وتسمع ليه ، يمكن تقلق ،علاش لي مياخدش فبالو كيبقى راجل وبحال شخصيتو مغيرضاش البنت تنخلو مرة وزوج كيف دارت ليه نجمة ، رجع وقف عليها زوج مرات ورا اخر مرة فرغت لي فقلبها عليه ولكن بدون جدوى ،كان باغي يخلق ليهم بزوج فرصة تانية لكن كان كيلقى الصد من جهتها اما تخليه يدوي تا يشبع وتشد طاكسي وتطلع يا إما تضرب الدورة كيف تشوفو وقبل ميوصل عندها ، كانت فكل نهار تلبس احسن معندها وتأنق حيت عارفاه غيكون كيتسناها بالحق جايا دابا لربعيام مبقات لمحت خيالو ولا شافت طيفو ….

دخلو لقيسارية كيدورو من محل لمحل ، خدات شلا صايات وسراول وقويمجات ليها ولخديجة ، ومنساتش فاطنة وولاد ختها ، لي شافتها تعجبها وتجبد تخلص مضاربة حساب لفلوس ولا لتمارة لي كضل ضربها من سروية على قبلهم ، كانت مبرعة راسها وولاد ختها ممخلياهم مخصوصين من والو ، تقدات معاها شي حاجة لدار من ماعن وماكلة لعشية كلها وهما يدورو حتى عياو وتهدو … وقفت خديجة مبقاتش قادا تزيد خطوة خرا ~ عييت اختي وجاني جووع ..

نجمة كتنفس بجهد ~ تانا جاني جوع، و شهوتي فشوا ، عرفتي شنو ؟؟ كاين واحد المحل هنا معروف وعليه زحام تعالي ندوقو ماكلتو …

خديجة ريقها سال ~ ناري خلصتك گاع طرطقتيها اصگعه باش غتكملي شهر …؟؟

نجمة سبقتها كتدوي ~ ناكلو ليوما والرحيم الله غدا متعرفي نصبح ميتة اللهم نبرع راسي …

مشات لبلاصة لي مختصة في ماكلة مبعيداش بزااف على القيسارية ، كانت عامرة قلبت بعينيها على بلايص جلسو فيهم ،خلات بلاستيكات حدا خديجة وناضت توصي على شنو ياكلو ، مع بغات تحرك وهو يوقف عليها اخر شخص تتوقع تلاقاه هنا

نجمة دغيا تزنگت حسات حناكها غيطرطقو ~ نتااا ؟؟

معاوية ميل فمو بابتسامة ~ قلت ليك داك نهار شنو سميتي ولا عقلك مكانش معايا !!

صحيح من قال ،صدفة خير من ألف ميعاد ، شكون قال تتلاقا معاه وفهاد الوقت بالضبط لي كانت كتفكر بين راسها بلي صافي خسراتو من بين ايدها بسباب تصرفاتو ، شافتو متيقتش عينيها حسات بسخونية طالعة معاها و تزنگت حناكها كانو غيطرطقو قالت بصوت خافت ~ نتااا ؟؟

معاوية ميل فمو بابتسامة ~ قلت ليك داك نهار شنو سميتي ولا عقلك مكانش معايا !! اه انا شنو تاني غتهربي مني ولا تخليني داوي بوحدي وتنخليني راحنا بعقلنا اولا كبرنا على تبرهيش ..هو كيدوي وهي منزلة راسها الارض مقاداش تشوف فيه ..حكات عنقها بتوثر وقالت ~ شنو بغيتي انا كنسمع ؟؟

خنزر فيها بلاما ينطق حتى خلعها وقالت ~ شنوو ماالك ؟؟

معاوية كيطلعها من صباعها حاضي الرجلين لعريانين والعنق الطويل لي باينة بيوضيتو والشعرها المطلوق لي مرة مرة كضربو بيه الا تحركت قاليها بأمر وهو كيشوف ف دنيا لي مخلطة ~ شنو بغيتي تاكلي ؟؟

حركت ليه راسها مع بغات تدوي نطق من تحت سنانو ~ گولي شنو بغيتي وسيري ريحي الارض وغتجي الماكلة تال عندك ، مقدراتش تبقا تجاحد معاه خلعها ~ لي كان ماشي مشكيل ….قال وهو كيشوف فخديجة ~ البنت معاك ..حركت ليه راسها باه وزاد وخلاها وهو غادي سمعاتو دوا ~ سيري جلسي !!

مشات لبلاصتها بركابي محشوشين ،لقات وحدة جالسة ومتبعة الفيلم من الاول ومصدومة ،خرجت عينيها وقالت ~ نااري نجمة شكون داك القمر لي كنتي واقفة حداه ومن صباح ونتوما دودودودو ، نسيتي تنعات الصبعان لي كنتي كتدوي عليه قبيلة ولا سلب ليك هذا لعقل باش تفكري ..

تكات ظهرها على الكرسي وعينيها حاضينو كيفاش كيدوي مع شخص لي تما وكيحرك ايديه مع كل كلمة ~ هذا هو معاوية لي عودت ليك عليه

خديجة ~ هااااا !!!!! ويستاهل ياختي لعصا الا كليتيها بسبابو من عند عبد الله ، تي اش هاد تگلضيمة

نجمة ضربتها لايدها ~ لقوة سكتي دابا يسمعك .

خديجة خبطت في طبلة ~ شفتي هادا الا ضيعتيه من يدك عمرك تلقاي بحالو انا علمتك

تنهدات كتفكر مبقات عارفة مدير ، غير كيبعد ويغيب عليها كتولي تقول كون غير رجع نعطيه فرصة اخرا ، وملي كتشوفو من جديد قدامها كتسبقها الخلعة وكتخاف تحصل معاه ، خايفة تجبد ليها مشاكيل هي وياه ، ممولفة لا على دوران ولا على مواعيد مع دراري ،كتعرف غا دار والخدمة تا الا خرجت يا مع ختها ولا صاحبتها ..

تم جاي لعندهم هاز بلاطو تاع المشاوي والخبز فيد وبلاطو فيه مونادا والكيسان في يد لوخرا حطو ليهم فوق طبلة وسلم على خديجة بعينو ~ لاباس عليك

خديجة شرعت فمها حتال وذنين ~ لاباس ونتا ،جلس معانا

قال وهو كيشوف في نجمة ~ لا خويا كيتسناني ، غير جلسو براحتكم …تحنى لعند نجمة مضرگ عليها البشار بالكسدة لي عطاه الله ،قال وهو كيشوف فعينيها ~ غداا مع ثلاثة نلقاك حدا رومبوان لي فشارع ل حدا داركم متعطليش !! والا مجيتيش غنجي ليك تال تماا نحيح عليك.. مشى داير شبه ابتسامة خلاها مصدومة كيفاش تا عرفها فين ساكنة ، الخلعة قتلتها زعمة يقدر يديرها ويجي لدار الا ممشاتش

صافي هادي اللخرة ليك انجمة ~ قالتها بين راسها وهي شادا على كرشها بالوجع لي شدها

حاطة راسها على المخدة كتقلب على نعاس لي هرب عليها هاد ليلة ، دماغها عيا بقوة التفكير وفشنو دير غدا واش تسنط لقلبها ل باغي يعيش الحب ويذوق طعم ديالو ولا لعقلها لِ لَتبعاتو دير ربعين عام وغتبقى تاع راسها ، فكل مرة كتلاقا بيه كيشغل دماغها وكتزيد تفكر فيه ، ككل بنت كتمنى تزوج براجل ، راجل بشخصيتو ماشي بسميتو ، يكون عندو حقو في زين ، تولد تاهيا وليدات وتجرب حياة الزوجية لي كيعودو ليها عليها ، عيات من كلمة ….قرب شي عرس ولا والو!؟ ….وخاطرها كيضرها نهار كيوصل عيد ميلادها وكتلقى راسها تزادها عام فعمرها ومتزاد عليها والو فيه ، قطار الحياة كيدوز بزربة وهي باقا معاشت تا محطة من محطاتو لا زواج لا امومة ، خمسة وعشرين عام وعمرها دق شي حد بابهم طالب راغب فيها ، وتا الا جا يا كيكون بارد لكتاف طامعها تخدم عليه ، ولا كلشي فيه كيتعاب واخا الكمال لله سبحانه ….بنات ختها لي كبر منها ول صغر گاع تزوجو إما على سطاش ولا تمنطاش الا هي ، قوة تفكير فهادشي كيضرها فقلبها وخا كتجبرو بكلمة كلشي بالمكتاب لكن كلام الناس كيذبح …تنهدات باعلى صوت وعينيها على لمگانة ل فالحيط ول كانت فيها ثلاتة دصباح غمضت عينيها بسيف يالاه تلحق تنعس ليها شوية وفصباح مدبرها حكيم …

ناضت مع ختها فطرو وجمعات الدار وعلمتها بلي غتخرج مع بنات الخدمة غادين لعند وردية يطلو على ولادها قالتها ليها بعينيه هربانين حيث ممولفاش تخبي وتكذب ،دخلت خوات عليها سطل تاع الما بزربة غسلت شعرها ولحمها ، وخرجت لاوية على شعرها زيف حياتي لي رجع كيقطر بالما وختها حداها تنگر عليها بغيضربك البرد ، حطات ليها تاكل قبل منهم بحجة غتعطل على لبنات هزت شنو غتلبس لاحت عليها جلابة ومشات لصالون ..دخلت كتشوف في ساعة كانت زوج خافت تتعطل ويصدق جايها لدار وديك ساع معندهاش كيف دير تشوف مازال في وجه عبد الله حيت الا شافو غيعرفو

نجمة وهي كتقلب على شي كااسك خاوي ~مليكة ختي مسالية يااك حيت زربانة ؟؟

جوبتها بغمزة ~ وقولي غير سلام يكما عندك ليوم نهار شوفة وخايفة تتعطلي على ضياف……

حطات صاكها على الكرسي وقال وهي كتعري على شعرها ~ دابا منقادو شعرنا الا لكان علاش ،لهاظ الدرجة مبقاش لي يفرح براسو …

جرت الكرسي واشارت ليها تجلس ~ غير كنضحك معاك ازين ، شفتك غبرتي مالك شحال مجيتي لعندي تصوبي قلت غتكون غا نجمة بدلتني بعتيقة لحلت حداهم

نجمة بابتسامة ~ لا متخافيش الجد ليه جدة والبالي لتفرط فيه ، وا يله بغيتك تتهلاي فيا ، بغيتو مسرح حيت الا لويتو غيشد الوقت وهو ل معنديش ..

خدات المشطة كتسرح ليها فيه ~ كوني هانية ازين !!

مشطاتو ودوراتو على راسها ودخلتها تحت كاسك السخونية باش يتصاوب وخلاتو ربع ساعة ورجعت قلبتو لجهة اخرا ودارتو تحت كاسك من جديد ، مجات فين توصل ثلاتة حتى كانت لابسة صايا فوت ركبة شوية بلون فاتح وقاميجة بصديفات من جهة الكول كانت ملونة ،شعرها جاها زوين مع بيضاوية وجهها لي كانت مزيناخ بعكر غوز شبه باين ودارت منو حتى شوية فالحناك دارت ساعتها ولبست نفس صندالة لي كانت لابسة البارح وصاكها ، خلصت مليكة وخرجت من تما مصهودة ووجها حمر ،متوثرة وركابي فاشلين ،غادا وتلفت وراها ليكون عبد الله خارج ويعرفها ، خدات زيف من صاك لاحتو على شعرها ونزلت عينيها الارض مفادية تلاقا بشي حد ، وصللت فين دار معاها لقاتو راكب على موطور وحاضي الطريق لي غتجي منها ، زاد توثرها كل مكتقرب منو ، ستقرو عينيه عليها وبانت ابتسامتو لي كانت ممحية خوف من انها متجيش

وصللت فين دار معاها لقاتو راكب على موطور وحاضي الطريق لي غتجي منها ، زاد توثرها كل مكتقرب منو ، ستقرو عينيه عليها وبانت ابتسامتو لي كانت ممحية خوف من انها متجيش ، قرب لعندها ومد يدوو وقال ~ عاد لقيتيني غنمشي ندق عليك فالدار ..

سلمت عليه عاقدة حجبانها وكتفادا تشوف فعينيه باش متزيدش تغرق وقالت بحدة ~ ديك ساع كنتي عمرك مازال تشوفني فحياتك …جوبها وايدو مازال حاضنة على يديها مساخيش يطلق منها كتملس جلدها الرطب ~ مديش على كلامي غير كنظحك واش نقدر ناذيك .؟؟

هزت كتافها بطفولية غير متعمدة وعينيها في الارض~ الا قلت ليك لا غنتسمى منافقة حيت انا مزال مكنعرفك ومعرفت طباعك باش نعرف واش غتاذيني ولا لا…حرك ليها راسو وقال ~ واخا الالة دابا تعرفيني ومزيان ، طلعي نمشيو ..بتردد قالت ~ فيين ؟؟ انا راه جيت غير حيت خفت تجيني حتال دار لدار..

جاوبها هاز حواجبو وجارها باش تركب~ ياك الالة !! مهم غنديك تشوفي ليوم واحد الفيلم زوين …شاف فساعتو وقال ،باقي ليه ساعة ويبدا متعطليناش

لمعو عينيها ملي سمعت هضرتو وفرحات ، سينيما فداك الوقت كانت نقية وكان ليها الشان ، ماشي اي زوج بغاو يلقاو راحتهم كيمشيو لتما لا هادشي كاين فوقتنا دابا اما داك الجيل لا ، شوقهم لتلفازة والافلام كان كيخليهم يتسناو غير امتى يتعرضو في سينيما باش يمشيو يتفرجو فيها بلهفة وطعم ، ماشي بحال دابا الفيلم لي بغيتي بزر يطلع ولكن حلاوة الفرجة مفقودة

وصلو لسينيما غادا قدامو بحال بنتو صغيرة خايفها توضر عليه خداو بلايصهم الوسط وجلسو ،لفيلم باقي مبدا ودنيا بدات تعمر من لي كوبل حتال صحاب مع بعض، جلس حداها حاط ايدو على ركابيه ،التفت لعندها وقال بعدما حس بيها خايفة ~ صاافا مرتاحة ياكما نمشيو …؟؟

تكذب عليه ايلا قالت مرتاحة ، حاسه بقلبها غيخرج من بلاصتو بقوة الخلعة هادشي جديد عليها وممولفاش بيه ، الجنس الخشن في حياتها عرفاتو في اشخاص ك خوتها ولاد ختها فقط ، وهاهيا دابا جالسة حداه وقريبة منو وفبلاصة عامرة ومكتجمعهم حتى صفة ولا ورقة رسمية بللت فمها بريقها وقالت بتلفة ~ شنو بغيتي مني ؟؟ شنو اخرت هادشي

حس براسو مع بنت صغيرة جارها صحة ولا غيتعدى عليها ضحك وقال ~ كيفاش شنو بغيتي مني ، راه باينة اشار لكوبل قدامهم كيضحكو وماسك في يد حبيبتو ، هاداك شنو بغا منها فنظرك ،باغيي يتعرفو على بعضياتهم ، واش غيتوافقو واش القلب غيميل واش هي مناسبة ليه وان شاء الله من بعد غيكون كل خير ..

معرفت باش تجاوبو ،شحال خاصها تاع الوقت لهادشي ، عاد غتعرف وتخرج وتدخل وهي غا دابا حاسة براسها بحال لي داير جريمة وكلشي كيقلب عليها ، لي شاف فيها كتقول صافي عرفني كاذبة على عائلتي وخارجة ….اي واحد دخل كتقول هادا صاحب خويا وغيوصلها ليه مكانش على راحتها نهائيا ….

أُسدل الستار معلن على بداية الفلم ،تنهدت كتعض على فمها لطيباتو مسكين ، كتطلب من الله يدوز نهارها على خير ، بدون شعور دارت رجل فوق ختها ،رجليها لي كانو مقادين وبيضين ، ولي جدبووه من شوفتهم لكن طفى ضو وقاطع تأملو ..بحنحنة صغيرة تكى بارتياح على الكرسي وقال وهو مقرب فمو لوذنها ~ كنتمنى يعجبك لفيلم !!

حسات بلحمها تبورش كمشت على الكسوة وشافت قدامها وقالت نتمنى….كان فيلم مغربي كوميدي في لول كانت مشنقة ولكن شوية بشوية بدات تطلق وتستمع بالفرجة محستش بنص ساعة كيف دازت …وقفوه استراحة قبل ميكمل ،شعل ضو ولي بغى يقضي حاجتو ناض…ضار لعندها وقال ~ بغيتي شي حاجة ؟؟ ياكما تمشي اشار ليها بصبعو لحمام جوباتو بلا وقالت ~ لا لا مرتاحة اصلا قرب يسالي وديك ساع نمشيو ….بغات ضور عينيها وهي تجمد بلاصتها ملي بان ليها قدامها عبد الله ..كان جالس في الكراسا القدام مع صحبتو وجهها صفار حسات بدنيا كضور بيها وبسخفة شدتها… نزلات راسها لتحت قبل ميشوفها وهزت صاكها وناضت بلاما تقوليه حتى كلمة …خرجت كتجري معرف شنو عندها تبعها كيعيط بسميتها بصووت معصب وهي عاد مزادت في جرا وشعرها وراها كيطير مع الكسوة ، مشدها حتى كانت خرجت وقطعات شارع، شدها من يدها مزير عليها وقال من تحت سنانو معصب ديال معقول~ اش هاد لفعايل كديري فيهم ؟؟ عند بالي خارج مع مرا ناضجة ونتي فعايلك ديال بنات صغار

نجمة عينيها ولاو بحال جغمة دم ~ سمعني الله يرحم ليك الوالدين ، انااا ماشي ديال سينيما وماشي ديال لخروج ، انا بنت دارنا ومكنعرفش لهادشي ، بدات كتبكي بلاما تحس ، عرفتي شكون شفت لداخل هاا ؟؟ شفت خويا ل كون شافني معاك معرفتش شنو كان ممكن يدير فيا ، ولا شنو غيوقع ليا ، فعمري خمسة وعشرين عام وعمري خرجت مع شي حد ولا تصاحبت معاه حيت مربية وكنخاف من عائلتي ومبغيتش يديو عليا نظرة خايبة و نخيب صورتي قدامهم ،ترضيك رجوليتك تشوف ختك مع ولد هاا ؟؟ مترضاش ايوا تا انا مرضاهاش على خويا ومنبغيش نقلل من رجوليتو …مسحت عينيها ونترت يديها منو بزعف ونطقت… الا كنتي باغي اسيدي المعقول قصد الدار اما هاد نتعرفو ،ليوم سينيما غدا قنت اخور لا ..هادشي مايليق ليا و لا انا نليق ليه ~ رجعت قصحات عينيها فيه و بغات تمشي ~ مهم غنمشي بحالي دابا و كلامي قلتو ليك الى عينيك في المعقول اولد الناس دخل من الباب

معاوية ..بعصبيةة ~ اووووف الراس اليابس

سمحت فيه وخلاتو واقف تماا مزادت معاه حتى كلمة لي كاين قالتو عجباتو كاينة شي حاجة سميتها دارهم من غير هادشي بنسبة ليها تفلية ،خدات طوبيس ورجعت فحالها ، طريق كلها وهي كتعيد السينتا وكتفكر واش خوها شافها ولا لا ، اش داها لشي سينيما فين عمرها مشات ليها گاع ، وعلاش مشى من بالها بلي ليوما الاحد عبد الله كيخرج ، معقلت گاع على طريق تا لقات راسها وصلت لبلاكا ،نزلت قاصدة الدار غادا بعقل مرفوع عيات تعيط عليها عايشة مسمعتها گاع تا شدتها من يدها ~ وا نجمة !! مسمعتيش عيطي ولا مالك ..نجمة سلمت عليها وقالت باعتذار ~ غير سمحي ليا اختي عايشة والله مسمعتك ، كيدايرين دراري وواحد مول دار لاباس …عايشة كتدوي من تحت نقاب ~ لاباس راه جاا من لبلاد حتى طلعي عندي من بعد تاخدي شوية الباروك ، لقيتيني غادا معاه نتقداو كي شتي الا مكان هو انا راه منعرف فين نصد جا لقى كلشي مسالي …

نجمة طبطبت على ايدها~ انا نعاود نقولها ليك خصاتك شي حاجة ودريس مكاينش عيطي عليا نجيبها ليك حنا راه عائلة مبيناتناش …

عايشة ~ عارفة لي كاين ابنتي ،يله سيري وسلمي على فاطنة الله يسر ليك امرك والله يجيب ليك شي رزق يخاف الله فيك

قالت امين من كل قلبها وودعتها ومشات لقات ختها مفرگة رجليها وسط الدار كتنقي الزرع لي جاها من عند بابا ، وخديجة حداها معوناها بزز وفوق من القلب مكتحمل لا شقا لا سميتو ، رمات عليهم سلام ودخلت لبيت بدلت حوايجها ورجعت جلست حداهم معاوناهم بلاما تقول حتى كلمة حاسة براسها لي دوا معاها غتبكي ، شافت فيها فاطنة بنص عين وقالت ~ مالك رجعتي وجهك صفرر اش كاين …؟؟

قلبها بدا يضرب شافت فيها وقالت بارتباك ~ ها ،لا غيكون غير ضربني البرد وصافي ،ريح محرك ..

فاطنة ايديها خدامين كينقيو~ كي دايرة صاحبتك ،كيف بقاو ولادها

نجمة قوست عينيها بعدم فهم عاد تفكرت وقالت ~ اه وردية ، لا لا ولاو حسن ، مشينا دغيا شفناهم ورجعنا الحد هادا مبغيناش نبقاو جالسين

فاطنة ~ ايوا حسن مدرتو ، زربو خلاص نكملو هاد العبرة بعدا نصيفطها تطحن نصيب باش نعجن غدا

تعاونو عليه حتى كملوه وصيفطوه يتطحن ، جمعو دنيا وجلسو كيتفرجو وغير سمعت نجمة صوت الموطور وهي تنوض مفزوعة وقالت ~ حاسة براسي مريضة انا غنمشي نفرش ليا فداك البيت القنتاتي وننعس

هزت فاطنة عينيها فساعة ~ غتنعسي مع سبعة ، مغتعشايش ؟؟

نحمة قاصدة البيت ~ لا شبعانة اختي الماكلة تاع لغدا باقا واحلة في المعدة …تخشات في المانطة مغمية راسها وطالقة وذنيها باش تسمع نبرة صوتو وكتطلب في خاطرها

بايدين باردين بحال ثلج ~ ياربي غير هاد المرة ،ياربي ميكونش شافني وعمري باقي نعتبها مع شي قمقوم ، اش داني لهادشي كامل ..

جات لعندها خديجة حيدت عليها لغطا ~ تي مالك ،معاجبانيش ليوم؟؟ بغمزة قالت ..مقلتيش ليا كي دازت الخرجة …

خنزرت فيها ~ نوضي تهزي سيري بعدي مني اشمن خرجة ولا دخلة راني كنت غير عند صاحبتي

ضيقت فيها عينيها ممتيقاش ~ وداك الشعر لي مصايب والحوايج جداد وغادا غير عند صاحبتك

نجمة من تحت سنانها ~ خديجةةة!! غبري عليا زلافتك راه واصلة فيا لعظم تال غدا ونعاود ليك …

جلست حداها ممفاكاش ~ والله من حداك الا نضت تا تقولي ليا شنو كاين …

سلمت امرها لله وعودت ليها من طقطق لسلام وعليكم ، مجات فين تكمل تا لقات خديجة زوج دموع من العين بالضحك عليها ~ وناري ياختي على سويرتي عندك كيف داير ، وملي مشافكش سيري لشي قنت اخور وكملو خرجتك مالك هبيلة

نجمة تقادات في الجلسة وكتدوي بشوبة ~ علاه انا بقاو ليا شي ركابي فين نزيد لشي قنت اخور ، لا اختي باراكا عليا من هادشي قنعت وشبعت

خديجة ~ ونتي بديتي بعدا ايوا بقاي هاكدا متعرفي تبوسي متعرفي تنشطي تا يديوه لي كيعرفو ليه

دازو ايام حاولات تتناسى فيهم شنو وقع معاها ، لي طلبت الله عليه وقع عبد الله مشافهاش وهادشي كافي بنسبة ليها اما تا راسها اخر همها ، حتى حاجة مكتجي بزز وتا حد مكيمشي وهو مكتاب ليه يكمل معاك هاد الكلام صبرت بيه نفسها وبردت بيه قلبها ودفنت راسها في تمارة الخدمة من صباح لعشية كتمشي بحال شرويطة تاكل وتنعس وترجع تخدم ، بحال كل نهار جالسة على الماكينة حادرة راسها خدامة من نيتها كان اخر سروال هو لي بقى عندها فيديها تكملو وتخرج ، دورت وجهها لعند وردية بانت ليها باقا عليها الخدمة مكركرة وكيف ديما متقدرش تفوتها ولا تخرج بلا بيها ، ناضت تعاونت معاها حتى سالاو الخدمة وسالا معاها جهدهم ، وهما كيلبسو في حوايج باش يخرجو نطقت نجمة ~ مقلتيش ليا اوردية كيف بقاو دراري وداك الموضوع لي عودتي ليا اش دار مازال راجلك فيه …

تنهدت فكرتها ف الهم لي محطوط على كتافها وملاقياش لي يهزو معاها ~ اش غنقوليك اختي ، واقلة غنعصاو الله قالتها وبداتت تبكي ..

نجمة قربت لعندها كتسكت فيها ~ سكتي اصحبتي ونعلي شيطان واش مكاين غير هاد الحل ، ديرو الرقية واش راجلك مكيصليش

وردية هزات راسها بلا ~ ومنين اختي يله يتوضى يصلي ويوقف على صلاية حتى يطيح حداها يتركل ويتخبط وينطق بشي هضور مكنلقى تا شكون يگعدو معايا ، ملقيتش ليه جهد ومعندي حتى حل راك على عينيك شفتي ولادي نهار حيين وعشرة ميتين ، وراجل مكتفيين ليه ليدين كون ما هاد الخدمة كوراني تشردت بيهم ، وعلى عينيك شفتي الباطرون البولة الحمرة شاعلة ليه من جهتي هادشي كلو سبابو معروف منين

نجمة معاجبها حال ~ رجوع الله ، راه كلشي بيد الله ما بيد حد ، تقربي منو وطلبيه وبكي عليه راه هو القادر على كلشي وان شاء الله غير غيمة ودايزة

وردية مسحت دموعها وجمعت الوقفة ~ ونعمة بالله ، صافي نساي عليا هادي ويله نخرجو وقولي ليا بعدا ،مبقيتيش شفتي عنتر زمانو من نهار سينيما

نجمة شدتها الضحكة ~ لا من نهار خلاتو عبلة وهو غابر ..

قوة الهم كضحك ، خارجين كيضحكو على اتفه الاسباب ، حتى نطقت وردية حاطة يدها على خدها وكتحرك فراسها ~ فقيهك صحيح اشلحة ، هاا عنتر جاي على عودو كيشالي يا لالة

نجمة قلبها تقبط ،زيرت على يدها وقالت ~شكون ؟؟

وردية بضحكة ~ لي ديتي ليه القلب وسلبتي ليه لعيون ،لاحت عينيها فين كتشوف صاحبتها وهي تخرج عينيها مصدومة .. ضربتها وردية فيدها وقالت ~ انا مشيت نتلاقاو غدا ،وهاد المرة بغيت نسمع من عندك خبار زوينة …خلاتها مسمرة بلاصتها ومشات

جا لعندها بوجه مكيتفسرش مع بغات تمشي وهو يصدمها بهضرة خلات وذنيها يصفرو

كان واقف قدامها راسم على ملامح وجهو الجدية گارن حجبانو ومضيق عينيه نطق بصوت غليض وقال~ عمر مجا فبالي فكرة نتزوج وندير تا انا عائلة خصوصا فهاد السن كنقول مازال شوية تا نجمع راسي وندير تانا فين نسكن بعيد على الدار ،حتى جيتي نتي وزعزعتي دماغي ، من اول مرة شفتك في العرس كيفاش كتدوي وكيفاش تحركي وكيفاش محتارمة راسك ونتي دخلي لهنا ،اشار لعقلو ،قلت هْدَا امعاوية هادي هي لبنت لي تليق تكمل معاك حياتك زوينة وداخلة سوق راسها داكشي علاش بقيت تابعك ،راه كون معششتيش في المخ وكون مشفتش فيك تربية والديك وخوتك والله متلقايني صارط ليك هبالك ونجري وراك لبنات عطاهم الله …

هو كيدوي ونجمة لفراشات كيلعبو فكرشها بالفرحة من شنو كتسمع ..كمل على كلامو وقال ~ مهم ابنت ناس بلاما نطول عليك لكلام، دويت مع دار ووريتهم تصويرتك وان شاء الله غتجي عندكم لواليدة وختي هاد سيمانة يتعرفو عليكم

صدمها حسات وذنيها كيصفرو ممتيقاش شنو كتسمع شافت فيه وقالت ~ ولكن خاصك تسنط ليا ، خاصني نقوليك شي حوايج على راسي وعائلتي انا مربياني غير ختي ، وقفها بيدو ممخليهاش تكمل هضرتها وقال ~ انا باغي نجمة فهادشي كامل مكيهمني لا فين كبرت ولا شكون مربيها

هزات ليه راسها بحشمة ~ مقلتي عيب واخا قوليهم مرحبا بيكم ان شاء الله هاد سيمانة نتسناوهم راك عارف دار ختي فين جات انا غنعلمهاا

حرك ليها راسو بالايجاب كيتفحصها ، وهي شادا ايدها كتلعب بيهم بحال بنت صغيرة ، ميلت راسها وقالت ~ صافي يمكن ليا نمشي دابا لدار

طريقتها جابت ليه الضحكة مد ليها ايدو وقال ~ سيري الالة مازال عندي معاك الوقت مزربانش …سلمت عليه وهربت من حداه باش تفرح على خاطرها ، غادا بزربة خطوة كدير فيها زوج مكرهتش طير وتوصل لدار لعند ختها وتبشرها بهاد الخبار ، شكون يكره يتزوج ويدير عائلة ، كلشي غيفرح معاها ، كلشي كيتسنى نهار لي تزوج فيه نجمة …وصلت لدار طالعة في دروج كتنهج لقات ختها جالسة في لبيت وهي تدخل حاطا ايدها على قلبها مقاداش تنفس ~ ختي هاد سيمانة جاايين عندنا شي ناس

نجمة حاطا يدها على قلبها كتنهج ~ ختي هاد سيمانة غيجيو عندنا شي ناس ..

فاطنة كانت كتصاوب تريكو دصوف ،حطات القطبان من يدها وسولتها بعدم فهم ~ شكون هاد ناس لي غيجيو ، واش جاك شي خبار من عند بابا ومي غيجيو عندنا ولا شنو …

نجمة شربت كاس الما فدقة وحطات ظهرها على المخدة حشمانة تجبد معاها الموضوع ومعارفة منين تبدا ~ لا ماشي بابا ومي لي جايين ، هادو شي ناس جايين يشوفوني ويتعرفو عليك

هي گمگمت وفاطنة طيرتها فسما وعرفتها شنو بغات تقصد ~ شكون هادو ، واش شي حد كتعرفيه …

قاطعتها بكلمة لا وكملت ~ مكنعرفو مكيعرفني ، باقا تعقلي على العرس لي مشيت ليه ياك ..

فاطنة حركت ليهت راسها باه ~ عقلت عليه مالو كملي ..

نجمة عضات على شفايفها وبلعت ريقها وكملت ~ ايوا اختي هاد سيد راه شافني تما ، هو صاحب باطرون ديالي ، ليوم وقف عليا وقاليا راني ناوي المعقول ودارنا غيجيو يتعرفو عليكم …مهم هادشي لي كاين وراني قلتو ليك ..

سرسبت ليها الكلمات بزربة وجمعت الوقفة مشات لبيت تخشات فيه حشمانة من ختها ومعندهاش لوجه لي تهزو فيها مازال ، كانو عايشين في زمان الحشمة والاحترام لي قلال في هاد الوقت ، كان عيب تذكري حدا الناس لكبيرة حس زواج ، ولا تقزلي لختك كنعرف واحد ولا خارجة معاه داكشي لي ولا عادي دابا شحال هادي كان غير مباح ….حطات فاطنة ايدها على خدها كتحرك راسها من دابا كتخمم لهاد نهار ،نهار ليجي لنجمة رزقها وتخوي عليها الدار ، هادي هي سنة الحياة وداك النهار ولا بد منو ، ناضت تزيد تستفسر منها شنو يديرو وشنو يطيبو مهما كان ختها وفمثابة بنتها وخاصها تكبر بناس وترفع ليها راسهاا قدامهم

هاد نهار مقاداها فيه فرحة ،فايقة مع لفجر تنقي الدنيا وتقاد صالون لي صبنت ليه فراشو وزربيتو وحكات حيوطو تا خلاتهم يلمعو ، مقداتش تفطر صبحت هاربة ليها الشهية وشاداها الخلعة ، قادات سينية تاع اتاي ببراد وكيسان جداد وفنايق لي عمرتهم وحطتهم على طبلة لايحة عليهم سبنية ودازت لكوزينة تشوف ختها فين وصلات ، لقاتها طيبت لحم وكتعسل في البرقوق عبد الله خرج يجيب ليهم ديسير وموناضا ، مجات فين توصل زوج كان كلشي مقاد وموجود ودار كتشعل وريحة نقا عاطية ، كان داير معاها مع ثلاثة وفعلا غير وصل الوقت سمعات الدقان في الباب طلات من شرجم بانو ليها واقفين ، نزلت لعندهم تحل لباب كانت لابسة صايا عادية وشوميزة لفوق شعرها جامعاه بفليل ووجههاا صافي مدايرة ليه حتى حاجة نزلت كتزرب في دروج حلات عليهم بوجه بشوش وبابتسامة عذبة في المقدمة كانت الام ديال معاوية مرا كبيرة وعالية دايرة نقاب هبطاتو بيدها ومدات حنكها سلمت على نجمة وهي كتشوف فيها مزيان ~ سلام ابنتي لاباس عليك

نجمة جوبتها بحناك محقون فيهم دم~ لاباس اخالتي الله يكبر بيك …مدت حنكها تسلم على مرا مربوعة القد باينة من وجهها ختو لكبيرة دمعاوية سلمت عليها واشارت ليهم بيدها وقالت ~ طلعو مرحبا بيكم …

قالت مو بسم الله وخطات برجلها ليمنا وطلعات ووراها ختو لي هازة فيدها خمسة كيلو السكر ..تلقاتهم قدام لفصيل فاطنة لي كانت لابسة قفطان عادي ومشمرة كيف ديما ،تسالمو ومشات بيهم لصالون ومكاين على فمها غير مرحبا وزيد القدام ….جلسو مع بعضياتهم وتا نجمة معاهم كانت حادرة راسها مقاداش تهز عينيها وعينين ختو عليها كتعبرها من صبع رجلها لكبير تال شعرها ، نطقت فاطنة باش تكسر داك الصمت ~ مرحباا بيكم اش سماك الله الالة

بتاسمت حتى بان زينها لي واخد منو ولدها ومزية وجهها بوشام بين حجبانها وواحد تحت فمها ، اما فمها كانت مركبة سنة ديال الذهب كتبان كتلمع قالت بفرحة ~ ترحب بيك الجنة ،سميتي لكبيرة وهادي بنتي زهرة …

فاطنة بتاسمت ليهم ~ مرحبا بيكم الالة وبطريق لي جابتكم ، دار داركم خودو راحتكم غمزت نجمة بعينيها وناضت باش يضايفوهم ميجلسوش على طبلة خاوية ، غير ناضو وهي تنطق زهرة معاجبها حال وقالت لمها مخسرة سيفتها ~ لعروسة لي شايف لينا ولدك باينة مكتحشمش ، سيدة ضارباها بتعكيرة وتكحيلة محشماتش

اللوسة السوسة ،كلمة خرجوها العيالات لي كلاو العصى ولي دازت عليهم الدگاگة من طرف اللوسة … منهم لي حررت عليها العيشة كانت كي لفعة تبخ سمها في طلعة والنزلة تحرش عليها شيخ والعدوزة والراجل معاهم… و كاينة القاطعة يديها من رحمة الله ، تسحر ليك و تخليك كي الضبعة حالة فمك وتعبديها مولات الري وشوار ولي قالتها هي لي تكون ، وكاين لي كتخاف الله ولي دايرة مرت لخو حبيبتها ماشي عدوتها وهادي قليل فين تلقايها ، زهرة بينها وبين هاد اللخرة غير الخير والاحسان ، سمها باين في لسانها وقباحتها فعينيها باينة مساهلاش والعيشة معاها حارة …

هزت نجمة الصواني والفنايق وخوات الطبلة باش يحطو ل قسم الله ، جاابت طاس عطاتهم يغسلو بدات بالعدوزة لي كانت فجهة ليمن ولي كتشوفيها بوجه بشوش باينة فيها مرا ظريفة من الضحكة لي مخطاتهاش ملي دخلت ،مدت ليها نجمة تغسل وقالت بابتسامة مزنكة ~ غسلي يديك اخالتي !!، مرحبا بيك ..

لكبيرة مدت يدها بزوج غسلتهم وخدات مسحات ونطقت ~ حشاك ابنتي والله يرضي عليك ….دازت لعند زهرة لي كفضت على كمامها باغا تبين سرتلة الذهب لي فالذراع ، ناس يغسلو كف الايد وهي غسلات تا ظهر باغا توري خاتم ل شاد نص الصبع …جابت خديجة خبز الدار لي حطاتو سخون ..سلمات عليهم وعينيها في الارض كانت شابعة تقراص من عند فاطنة مورياها شنو دير ،رجعت جابت الموناضا وحطات الكيسان ، عاد تمات جايا فاطنة هازة طبسيل طاوس بالزرق عامر لحم وبرقوق واللوز مقلي حطاتو وقالت ~ دخلو دخلو تقادو مع طبلة مرحبا بيكم وقبلو علينا

لكبيرة وهي كتقاد في الجلسة ~ نتي مولات الخير ، غير ضحكة باش قابلتينا كافية علاش محنتي راسك

فاطنة حطت ايدها على صدرها بترحيب~ غدانا شاركناه معاكم مكايناش شي حاجة من مقامكم…دفعت طبسيل حداهم ، يله بسم الله

جلست كل من نجمة وخديجة حدا فاطنة كياكلو بثقالة والاعين على عروستنا كيفاش كتحرك كيفاش كتدوي ،وكتاكل فاطنة تقطع وتحط حدا ضياف لكبيرة عاجبها الحال ومعرية على سنانها اما زهرة كتشوف غا بقزيبة عينيها ، كملو الماكلة وجمعت كل من نجمة وخديجة طبلة عطاو لغسيل وتحط ديسير من بنان وتفاح وليمون ، كلاو فيه ل قسم الله وتمسحت الطبلة من جديد وتحطو عليها الصواني في الاثناء لي نجمة مشات ترد لما لاتاي، نطقت لكبيرة وقالت موجهة الهضرة لفاطنة ~ ايوا لالة فاطنة الله يخلف عليك ويكثر خيرك

فاطنة حركت راسها ~ بصحتكم الالة لكبيرة ،غير قبلو علينا …..جوبت وهي مقربة حداها ~ نتي لي قبلي علينا وسمحي ليا على هاد الدخلة لي ماشي من مقام بنتي نجمة ، قلت هاد مرة نتعارف معاكم والمرة جايا الا كتاب نتهلى فبنتي ، ايوا كي كتعرفي الالة وغتكوني عارفاني علاش جيت ، عندي ما شاء الله ثلاتة لوليدات ، واحد منهم هو لي بغيت نجمة بنتي تكون ليه الا كتاب وقبلتي علينا

نقزت زهرة محمرة في مها وضحكت ضحكة صفرة ~. هاء وعلاش لي ميقبلوش علينا ، مالنا ماشي من لمقام ، الولد راه كيعرف البنت والبنت راه كتعرفو وحنا راه غا وسيط بيناتهم

نقزت زهرة محمرة في مها وضحكت ضحكة صفرة ~. هاء وعلاش لي ميقبلوش علينا ، مالنا ماشي من لمقام ، الولد راه كيعرف البنت والبنت راه كتعرفو وحنا راه غا وسيط بيناتهم

فاطنة طلعت حاجبها وشافت فيها ~ كيفاش الولد كيعرف البنت وهي كتعرفو ، انا على مقالت ليا نجمة هو صاحب باطرون شافها غا في العرس ، مكتعرفو مكيعرفها …بغات تزيد زهرة تجاحد معاها وهي تنغزها مها من تحت طبلة وقالت ~ ايه تما فين شافها وسول عليها وكلمة الحق سمع غير لي كيسر الخاطر ، لبنت مربية ومن دار لخدمة وبغاها تكون مرتو وبغيتها انا تكون عروستي ملقاش حسن منها ..

فاطنة بغير نفس ~ ايوا غير ملي ولدك قصد الباب راه باينة فيه معقول ، وانا الالة منزيدهم غا الخير غا هو كلمتي ماشي هي الاخرة ،نتشاور مع خويا لكبير ومي لي هي خت الدرية والا كتابو الله يجعل كلشي مبارك ومسعود….

قالت زهرة باستفهام ~ علاه نتي ماشي مها ؟؟ مربياها ولا شنو …

فاطنة ~انا ختها لكبيرة وفمقام مها ،انا لي ربيتها وكبرتها مع ولادي كانها وحدة منهم ، ولكن مي مازال في الحياة وضروري من شورتها

ميقت فيها زهرة بفمها ولكبيرة جوبتها قالت ~ كلشي زين وبحال بحال حنا بينا البنت سوا نتي مها سوا لا ، لمهم باش مكان تشاوري وردي عليا راه نحطها فمقام بنياتي عندي ثلاتة ونديرها هي رابعة…وولدي معاوية منشكروش ليكم يديرها فعينيه وميخصها معاه خير مربي ومخلق وكلمة العيب متسمعهاش من فمو …..دخلت نجمة مع هاد الكلمة ،وذنيها طلعت معاهم سخونية ورجعو حمرين ،كانت هازة طاس جايب لغسيل لساقي لغيعمر اتاي وحلفت فاطنة على لكبيرة حتى هي لي تعمر كنوع من الكبرانية وداكشي لي كان وجدو اتاي بقواعدو لي رافقوه بشوية السلعة وجلسو يتبادلو لكلام …

لكبيرة جغمت من كاس وحطاتو في صينية وقال موجهة هضرتها لنجمة ~ ايوا ابنتي ، قابلة على ولدي معاوية …

طلقت ضحكة من عند زهرة لي عاقت براسها وتداركاتها في الاخير وقالت ~ وا مي تي مالك دخلي وتخرجي في الهضرة ، على هاد الحالة ل هي فيها تاع وحدة مقابلاش

نجمة تزيرت وبقات غير كتشوف معرفات متقول ، عرفت نوعها صعيب وباينة محاملاهاش من شوفة ،دوات لكبيرة باش تبرد الجو وقالت ~ غا هي ابنتي نجمة الا تفاهمتو ان شاء الله وقبلتو علينا ،غا تصبري علينا شوية بيدما كملنا لبني وديك ساع نديرو العرس ، طاج لي عندنا يله كافينا حنا سبعة نفوس نتيسعو وديك ساع احسن عرس يدار ليكم بيدما تاهو صاوب بيتو فين تنعسو

هنا دوات فاطنة ~ كلامك على راس والعين، غير باش تعرفي الا تفاهمو وتخطبت البنت حنا راه معندناش قضية البنت تخطب وتبقا دخل وخرج مع راجل بلا موجب شرع ، يضرب عليها خط زناتي هو لول ويبقى العرس بيدما وجد غا هو ميطولش ،تطوال خايف وكيجد غا صداع …

لكبيرة ~ مقلتي عيب نهار تردي علينا جواب ،نحددو نهار نجيبو فيه الخطبة وضريب صداق اش بان ليك

فاطنة ضربت في طبلة ~. لا اله الا الله عليهاا ….

خارجة مع بنتها بعد متافقات مع ناس ، غادا في طريق تشد مركوب تمشي لدارها نافخة وخاطرها مغير ومعاجبها حال على شنو دارت زهرة ،غادا حداها هازة شوكتها لسما وكتشوف غا الفوق ~ مالك قالبة عليا وجهك هادشي غا يله شفتي لعروسة كون جبتيها عندم لدار واقلة غتجري عليا الا جيت عندكم

هزات سبابتها بتهديد ~ سمعي نقوليك زوج كلمات !! خلي عليك البنت في تيقار ،مالك ملي شفتيها ونتي شاعلة وكتيري فيها بعينيك ،فينما ندوي تسكتيني بكلمة مكتعرفيش امي …..شكون ولد شكون ها ؟؟واش انا لي جايباك معايا ولا نتي لي جايباني ،

زهرة بغوات محيراش فناس ~ اويلي امي اش فيها الا هضرت واقلة راه خويا هاداك لي غيتزوج ، وخاصنا نعرفو بيمن غنزوجوه بغيتيه يتقولب راه زواج هذا ماشي اللعب

لكبيرة كتقلب بعينيها على طاكسي ~ مالها البنت مزيناتها تبارك الله شعر والحجبان وفم ونيف مقاد وطولة وتاويل وصواب والادب والعين متهزهاش فين غيلقى حسن منها

زهرة كتدوي بيدها ~ ايه زيدي كملي ، زين وعينين قالت ليك وهي عامرة ماكياج ، ويلقى حسن منها راهما في العروبية خاصو غا ينعت بيديه با يزوجو بلالات لبنات ،وهو جاي يشوف بنت معارفين لا اصلها لا فصلها جالسة غا حوازة عند ختها باينة عائلتها مگردين

لكبير هزات يدها فوق راسها ~ تي دخلي سوق راسك وكوني تحشمي اش بغينا عائلتها حنا بغيناها هي وانا قلبي رتاح ليها

زهرة عوجت فمها ~ ميغركش نهار اللول دابا يطوال ويعجبك الكبيرة وديك ساع قولي قالتها زهرة وهاهيا ، تحنات علمتها بصبعها في الارض وناضت

وقفت لكبيرة شيردت على طاكسي جاي وقالت ~ دخلي سوق راسك ، بيني معاها ،ياك نتي بدارك وولادك واقابليهم حسن ليك وطلبي سلامة راه تانتي عندك لبنات وغيوصلهم سن الزواج

وقف طاكسي قدامها طلعت زهرة هي لولة بعدنا قالت ~ الهضرة مع با ماشي معاك

ف واحد من الأحياء الشعبية بمدينة الدار البيضاء ، غادا لكبيرة قاصدة دارها بعدما نزلت من الطاكسي وزهرة حداها تنگر مبغاتش تسكت تعيب فالعروسة والماكلة ل تحطت وحتى من نوع كيسان فاش تكب اتاي مقالتهمش ، كانت مصمكة وذنيها مبغاتش تسمع ليها اش كتقول ، لبنت عجبتها مافيها ميتعاب و يكفي ولدها لِ ختارها كانت مرا ديال الزمان كلمة الحق تقولها ولو العيب فيها ، وواخا فيها محاسن كان عندها حتى عيوب كيبقى الكمال لله وحدة ، تلقات ليها جارتها سلمت عليها بود ، وشكون يقدر يشوف مرت سي خليفة دايزة فطريق ويميك عليها ،جورة قديمة و من ناس لقدام ل سكنو فهاد الحي اسمهم كيعرفو صغير قبل لكبير وكلشي داير ليهم لحساب ، معروفين بتگزارت خدمتهم كانت الگرنة ،كانو ناس الجود والكرم ضيفهم ديما غادي شبعان، سلمات على جارتها وكملت طريقها باغا امتى توصل عند مول الدار، تشارك معاه فرحتها بولدها ل مكرهتش دير ليه العرس اليوم قبل غدا … دخلات كتعيط لزمانها و غطا يامها و غير سميتو تخليها تحس بالدفا طاغي على دارها …

الكبيرة كتنصل في جلابتها ونگابها وتبرح~ وااا سي خلييييفة نزل يعطيك طولت العمر نهضرو في شنو بغى ولدي معاوية

نزل من عند لمعلمية ل فسطح راجل بقدو وبقامتو طويل والباب ميخرجو لابس فوقية لي جات مع عرض كتافو وداير طاگية مغطي شيب راسو ، مشا لعند مرتو لي غير شافتو ناضت بتبسيمة خدات يدو باستها وجلست حداه برزانة وقالت ~ سييد الرجال !؟ مغتسولنيش على ناس ،وكيف دايرة البنت

هز يدو ونطق ~ داكشي شغل لعيالات اش دخلني فيه لي درتوها مرحبا بيها تكلفتي نتي و بنتك الله يجعل شي براكة و الله يكمل بالخير ،دخلت بنتو زهرة هازة حاجبها جلست حدا باها فمها جامع شلا هضرة ، باست كتفو وقالت بنبرة صوت مقلقة ~ با لاباس عليك

خليفة رد ليها البال وقال ~ قولي شنو واحل ليك فالحلق لكبيرة كتحلف بعينيها ولا حياة لمن تنادي ، دارت راسها عمية وقالت وهي كتهز كتافها ~اش غنقوليك ابويا العروس لي جايب ولدك متحشم متقول الحشمة ها طريقي ،زيد عليها ماشي من سهمنا كون عليا سير لعروبية شوف ليه شي بنت لخير ،لمخير في دوار يعطيك بنتو فابور ، منها تزوجو ومنها تدگ لوتاد تما ودير لي يرد البال لدار ، ويحضي غيبتك

كان متكي على سداري مسند يديه على المخدة ورجليه تانيهم ويسمع اش بغات تقول والقرار لخر كيبقا تاعو مكيجي من وراه تا ري اخور واخا يعيا لي قدامو يلغي بلغاه ،هز يدو وقال لبنتو بحدة ~ مكاينش لي غيتكفن بالحرير كلنا كيف كيف ، ما بغات ترحم و لا تخلي رحمة سيدي ربي تنزل … ما حشمت من باها و لا رعات لغميز مها باش تنعل شيطانها ولات غير جيب يا فم و قول مخلية باها كيسمع لكلامهت و خاطرو ليها عاطيه بحكم هي لكبيرة فولادو خلاها حتى قالت اش بغات و دار عند مولات الدار وقال ~ اشنو درتو مع ناس العروس

الكبيرة قلبها برد ~ يعطيوني لجواب ونديو لبنت الخطبة وضريب صداق ونهار نكملو لبني يكون لعرس

خليفة سمع اذان المغرب دوا و ناض ~ الله يجعل كل شي مبارك ومسعود … ناض كيقول في الادعية ديالو و في طريقو هز صلايتو مخلي وراه وحدة قلبها كحل ما عاجبها حال و لا لخوها فرحات كلات فمها من الداخل و شافت في مها وقالن ~ يطوال و يعجبك الكبيرة و قولي زهرة قالتها

الكبيرة بتهديد ~ غتنوضي ذكري لي خلقك ولا نوض انا نيت نوريك طريقو و تگعدي من قدامي

حنا هكا نعشقو لي گاع ممسوق لينا و نجرحو لي كيموت علينا و لي يجي ينصحنا و يفتح لينا عينينا نجريو عليه ونقولو ليه ماشي سوقك فينا … الكلام فاش كيقولو اللسان يقدر يكون سم و لا هم، داكشي علاش دوز فمك بالسمن و عرف حروف الكلام ووزنو قبل ميخرج من الفم

جلسات فاطنة و معيطة لختها قدامها… خاصها تهضر و تخوي لي في قلبها امراة بحالها عارفة العين الى تهزت هي و الحاجب فيها غدر و حفير القبر … بقات نجمة قدامها تتحك في يديها و مقداش تشوف في ختها

فاطنة ~ العروس اش بان ليك في ناسك الى كتاب

نجمة بحشمة~ كتبان ليا المراة الله يعمرها دار فم بلا عار و قلب بلا سم و الله واعلم تاني

فاطنة ~ المراة الكبيرة من الناس لجواد و من وجها باين البرهان وعارفة بينها و بين الخالق … الى قرصاتك تقولك انا مولاتك ما فيها غدر ولا ليك تحفر

نجمة عجبها كلام ختها وعادي وعلاش لي متفرحش بيه فاطنة تقول مها و الى رضات ليها بالحاجة تقول بسم الله و بالفرحات عليها

فاطنة ~ شتك تبسمتي ابنت قلبي ..هزت فيها حاجبها وديك اللوسة و كيف كيقولو ماليها راها كتبقى سوسة عجبك اش قالت ..

نجمة على نيتها ~ لي نعرف ليه غنديرو ،شافت في ختها قدي دار الولاد و بلا منقوليك لي في عمري اش كيقولو عليهم

فاطنة بامر هزت صبعها ~ هي لسمعتي ليا و حليتي ليا وذنيك قيمة الكلب تنخالو و الى جاوبتيه تولي بحالو، هاد الكلام ماحليتش فمي بيه ليك غا هكاك، نبغيك من هنا لقدام ديريه فبالك و تحفضيه

نجمة فهمات كلام ختها و في راسها دخل و تفهم عارفة علامن معنات وكلامها لمن وجهات… ناضت عنقتها و باست ليها راسها داعية الله يخليها ليها و يطول ليها في عمرها

يتبع