الفصل 2

خبار الناس ل جاو لنجمة تنشرات ولعند تاجة وبَابَا وصلات ، عديانها تفقصو وحبابها فرحو وكلشي يجري ويقول نهار لكبير مابقى ليه والو ، دازو ليام طايرة قضاوها طيور الحب محلقين فسما قبل ميدخلو للقفص الذهبي ، لكبيرة دهزات ووفات وفنجمة تهلات وفاطنة لتقضية لغتحتاج للخطبة حطات ، بداو يعرضو على الناس ،العائلة لقريبة ولبعيدة كبيرهم بصغيرهم كانت ممتيقاش راسها بلي نهارها وصل وبلي ربي ستاجب ليها وحقق رجاها وعطا لقلبها شنو بغى وما بخل ، راجل مكيتعاب من حتى حاجة خدمتو مع المخزن شاريها وكي لما لقليل داير ليها ، مأذب وعقلو موزون ورزين وهادشي لي كتمنَّى كل بنت مادة يدها للحنَّة ……

كملت خدمتها ناشطة وفرحانة ولي شاف فيها تبسم فوجهو وتعطيه صوابو كانت غادا لعند وردية تودعها قبل متخرج ،جاتها من ظهر قفزتها حتى تخلعت وقالت ~ الله يا نجمة الله مالك ديري غا حس راه العقل غايب وسارح شي نهار تزهقيه ليا بغمزة كي درتي لمعاوية …

راضاتها ببوسة في الحنك وقالت ~ حضريه معايا ومتخليهش يسرح راني محتاجاك معاه ، …

طلعتها ونزلتها وحركات راسها بدائرية ~ بايعاني تاني ليوم ، ولا انا يدي رطبيب ونتي ولفتي تشدي في لحروشين..قالت وضحكت بصياعة ..

شدات نجمة على فمها حشمانة وكتلفت ليسمعهم شي حد ~ تي سكتي دابا تشوهينا ، راك عارفة مكنتشاوفو حتال ضرورة راه عبد الله داير عليا مردة ،كون ما تحججت ليوم بالخاتم ل غنمشيو ناخدوه والله ميخليني ..

وردية شدات فيديها وقالت فرحانة ليها ~ لخطبة بقى ليها يومين وكي بغاكم تختارو وتاخدي عبار صبعك الا مقيستيه ، لمهم سيري اختي الله يكمل عليك بالخير ،ونوصيك ضربي الطم الحاجة المستورة كيكمل فيها الله

نجمة وهي مزيرة على يدها ~ عندك الصح اختي ، انا مشيت نتلاقاو نهار سبت وعنداك متجبش غنتسناك ،بتاكيد كتحلف عليها..راه نتقلق عليك

وردية باقا معارفا راسها من رجليها ~ يكون خير وعلاه انا كرهت نحضر لصحيبتي ونشطح وندردك ليها ،انا مع الوقت وضروف، دورت وجهها رجعات خدمت في ماكينة مخبية عينيها لعمرو بدموع الفرحة , يله سيري متخليش نسيبي يستنى لعينين را عليه !!

ودعتها ومشات حيدت توني دالخدمة ولبست دالخروج ، تأنقت وقادت شعرها وخرجات لعندو كتقلب عليه بلهفة لقاتو واقف كيتسناها في بلاصتو المعتادة ولي ولفاتها من نهار جات مو وهو كل نهار تلقاه عند راسها يدويو شوية ويمشي معاها حتى تركب ويرجع بحالو ، مدت يديها كتشوف فيه وبضاد باين فعينيها ~ لاباس عليك !!

حط كيف يدو لوخرا على يدها وقال بصوت مبحوح ~ كوني ليا غا نتي لاباس

سلب ليها داك شوية العقل لي باقا تساب عضات على فمها كلات دوك شفايف بعفوية حاسة بإحراج قالت بعد مسلتت يدها منو ~ يله نمشيو قبل منتعطلو …

ضحك على الحشمة لي كتعجبو فيها ول قلالت فوقتنا دابا ، ركبت وراه متفادية تشد فيديه قبل ميديماري قال ~ قرب لعند ودرگي وجهك بظهري على البرد

كيفما قال دارت لقات راسها بلا هواها مخشية فيه وحاطة راسها على ظهرو حسات بأمان وبشعور مختلف ، بدفئ غريب وباحتواء عمرها جرباتو بظهر وبسند متكية عليه ،حسات بهموم دنيا تنساو فرمشة عين وبمتاعب الحياة خفافو من على كتافها وما الرجل الا سند المراة بعد أبيها

دخلو لقيسارية الذهب غادا حداه واصلة لعند كتافو الا بغات تدوي معاه خاصها تهز عينيها والا بغا يشوفيها خاصو يحدر الراس، كتمشَّى فجنبو بحال الفراشة تا حاجة ممتقلة عليها ، كانت ساكتة فرحتها معاطياها لحد حاسة براسها فحلم ومبغاش تفيق منو ، حسات بيدو جرتها وصبعانو تملكو صبعانها هزت عينيها بعوينات كيبريو لقاتو كيشوف في لڤيترينات هز صبعو واشار ليها وقال ~ نجمة شوفي هنا الا عجبتك شي حاجة هاد سيد بان ليا عندو داكشي زوين ..!!

نجمة ضيقت عينيها كتشوف كلشي عجبها وحمقها وجدب ليها العين ،بلاما تحس قالت ~ هادشي باينة فيه ساوي الثمن

حسات بيه زير على يدها وهبط لعندها وقال ~ تا حاجة متغلى عليك ، لي عجباتك حطي عليها يديك وانا عليا نخلص

جاوباتو قارية همو ~ نتا يله حاط فلوسك فالبني عاد باقي مصاريف الخطبة والعرس بزاف عليك هادشي كلو

بحدة جاوب~ صافي هضرناا حقك هادا ومنحرمك من حتى حاجة والله يقدرني نبقى ديما مهلي فيك !!

قلبها بدا يخبط كتحمد الله فسرها ل كمل رجاها ونعم عليها بعاطاياه ، دوز الابهم ديالو على ظهر يديها وقال ~ شنو لي عجبك

قربت من الزاجة كتشوق وقالت تالفة كلشي حمقها ~ شارك معايا ذوقك وعوني راني تلفت !!….جا وراها وتكا كرشو على ظهرها حتى رفعها لسما سابعة وحسات براسها مكايناش فوق الارض ، حط صبعو على خاتم زوين وسامبل وقال ~ شوفي هادا !!

بإعجاب جوباتو ~ زوين ، ولكن باينة فيه ثقيل

سَبقْها قدامو ودخلو للمحل ،أمرو لبائع يعطيه ليه ومدو لنجمة تقيسو على يديها ، جا مع صباعها لغلاض مواتي ، وزاد ايديها زين فوق زينهم الطبيعي ، كتحرك فايديها وكتشوف وتضحك بحال بنية صغيرة فرحانة بشنو خدات ، تكى على الحيط دالمحل حاضيها وكيبتاسم معاها، خلاها حتى وعات براسها وشافت فيه وتبتت الارض وقالت مهربة عويناتها بحال لي داير زبلة وحصل ~ عجبني زوين ،جا معايا …

خدا ايدها حيدو مكايس على صبيعات يديها وقال ~ لقالب غالب، غلظ صوتو وقال بصوت عالي ~ بشحال هذا اشريييف ؟؟

مد لخاتم لصايغ وقال بصوت غليظ ~ بشحال هذا اشرييف ؟؟ هاك عبرو وقول ليا ،شاف فنجمة وتبادلو الابتسامة بيناتهم تحت نظرات الذهيبي لي خداه من عندو وقال ~ يتوزن هو لول ويكون خير ، حطو فوق الميزان وقاليه بعدما حسب ستالاف ريال

معاوية هز حاجبو مع غمزة رجولية وقال ~ تكايس !! زوين اه ولكن ماشي ديال هاد الثمن شي كلمة دالبيع

بدا يحلف كاي يبائع ويزوق في سلعتو ~ والله اسيدي الا ديتي حاجة مزيانة وذهب مليح ،بشوفات زايغة فنجمة كمل وراه لمليح كيلبسو غا لمليح

معاوية كان طافي ومكالمي وبهاد الكلمة شعلت ليه البولة الحمرة فراس وتعصب حس بيه قلل من رجوليتو وهو كيشوف في ايدين نجمة لي كانو قبالتو وغياكلها بعينيه ،عظ على فكو من لداخل وسوخر نجمة بأدب وجرو لعندو شانق عليه مخسر سيفتو وجهو كان غيطرطق بسخونية مكرهش يدفنو ~ عاود اش قلتي اشماتة ، نزل عليه بروصية واش انا بنت ليك مرا قدامك ولا شنو ،واش هادي مراتي ولا مرتك باش تاكلها بعينيك

نجمة معرفت باش تبلات ،تخلعت وهي كتشوفيه نازل على سيد سبان وكروشيات شداتو من يديه كتجر فيه ~ معاوية اش كدير طلق من راجل اويلي

بعدها بيديه بلاما يشوفيها وزاد جرو لعندو تا خلاه مقجوج ~ نتا راجل نتا طلع في لعيالات نتا باغي تبيع ولا باغي تزها ، ها دوي اشماتة

تجمو ناس ملي سمعو صوت لغوات ونجمة بالخلعة بدات تبكي معرفت باش تبلات عاد كانو هانين واش عين خرجات فيهم ولا مالهم

نعل شيطان ، طلق من الراجل راه غا سوء تفاهم ، مضيعش شبابك فيه ميستاهلش …

كانت هادي هضرة الناس كلها شنو يقوليه داخلين بيناتهم مفارقينهم بزز باش فكوه من بين يديه كينهج ويكحب كيرد الروح ، اما سيد الرجال مبردتش مازال كيقلب بعينيه على شي حاجة يهرس بيها الدنيا باش نارو تطفى وخاطرو تبرد ،جراتو نجمة لبرا كترجا فيه ولات باغا غا تفك مبقات عينيها لا فخاتم لا فخوه بلاش منو ، غادي حداها كيطلع النفس بزز ويصوط مدواش خاف يهضر يخسر الهضرة بقات غادا حداه مكمشة كتمسح في عينيها وهو سابقها بشوية حتى تمالك نفسو وجرهامن يدها شد فيها وبقاو سارحين برجليهم حتى وصلو لجردة جلسو مقداتش تدوي معاه خافت يضور فيها خلاتو على خاطرو حتى هز عينو فيها ببطئ بانو ليه بحال الدم ومازال مرة مرة تطلع معاها تنهيدة حط يدو على ظهرها كيطبطب عليهم وقال بصوت باح ~ نساي شنو وقع صافي متقلقيش ، يله ناخدو علاش جينا ؟؟

باعتراض جوباتو خايفة ~ صافي بلاش من هاد الخاتم والله

خنزر فيها ~ كيفاش بلاش منو ، مالو كاين غا هو الكلب تاع بوه لي كيبيع ذهب عطا الله رجال يله نوضي تاخدي شنو بغيتي ونساي عليا زمر محدي طفيت قبل منرجع ليه

وقفت كتنهد وهو يجرها لعندو كيمسح فعينيها باغي يراضيها واخا مداير والو ، بقى معاها حتى ضحكت عاد قضاو غرضهم علاش جاو

تزينات لالة نجمة و سبحان من سماها ،اسم على مسمى زوينة وتشبه لنجوم … القلب بيض و القالب قاليه مكتعرفش حنيكاتها ديما حمرين و مع الحب غير ما زاد طغى عليها لون الدم، معاوية عرف كيفاش يتسلل لقلبها برجوليتو و حروشيتو اما مواقفو مخلين ليها الفم يتلجم ما تعرف تقدم ولا توخر وراه … و جدات و زربات و نهار الخطبة حنات عرضات على حباباتها وصحاباتها وحتى لي يكن ليها الدغينة سلمات قلبها لمولانا و قالت ليه النهار الكبير فرح معايا …

بان خيط صباح نهار الخطبة فاقت فيه فرحانة و قلبها قرب يخرج من بلاصتو معارفة راسها شنو دير … خرجت من البيت لقات ختها فاطنة فايقة و على سطولة الحلوة واقفة تقاد و تستف و كل شكل تحط حداه خوه … ضارت لعند ختها و لاحت صباح الخير و كملات شغلها بعدما قالت كلامها

فاطنة ~ سيري فيقي ديك عُراجا تنوض تعاونا اليوم نهارك خاص كل شي يوجد قبل ميجيو ناس …~ غوتت بصوت عالي ~ وااا السكايري وااا المعواق تنوضي تبوولي ولا نجي ندير ليك ليكوش … ضحكات نجمة على كلام ختها و مشات تفيق خديجة لي لقاتها اصلا فايقة و مخسرة عليها سيفتها طايح عليها الضيم غيخوا عليها سداري ولبلاصة ومتلقى شكون تشكي عليه وتضحك معاه ونيستها في الحياة دارت ونيس وبقات هي وحدانية ~ متنوضيش زعمة تعونينا !!

خديجة جوبتها منهدة ~ صافي درتي ناس جداد وغتسمحي فينا …ضحكت بلاما تخبي سنانها وجوبتها ~ دابا يجي وقتك تا نتي ، وزايدون انا مازال معاك ليوم غادي غير نتكاتب وبت باقا نبت هنا ، جرت ليها يدها منوضاها يله نوضي

نفضت لعگز وناضت كملو شنو ناقص ووجدو شنو خاص ساعة وكان كلشي كان مجموع ومقاد على حقو وطريقو شوية تمت داخلة تاجة مع دادا سعاد جايا مع بناتها وحدة طلع وتهبط ولوخرا تعوج ومهم حداهم عيات تغمز وتحلف

فاطنة تلقات ليهم بترحيب ~ اهلا اهلا بمي سلمت عليها وقالت ايوا غبرتي كون ما هاد نهار لكبير متجيش ..

تاجة وهي كتقاد في الجلسة فوق السداري ~ ولفت خيمتي ابنتي منكدبش عليك ، منقدرش نرگد برا عليها …

دازت سلمات على سعاد وبناتها وقالت ~ نجيمة لاباس عليك ،ونتي انجاة كيدايرة

جوبت نجاة بعينين في الارض باغا ثير انتباه عمتها بالحشمة ~ حمد لله اعمتي ونتي صحيحتك مزيان

فاطنة هزت ايديها لسما ~ نحمدو الله ونشكروه

نطقت سعاد وقالت كتبارك ~ مبروك على نجمة عقبة لوليداتك لاخرين …

فاطنة قالتها موركة عليها ~ الله يبارك فيك اختي سعاد نوبة عبد الله دابا راه حاط العين على شي بنت يمكن من خدمة راه كنتسنى غا نتفرغ ونعمر ليه قولي لعقبة لعند نجاة

قالتها تحت مسامع هاد الاخيرة لي حسات بحلقها نشف ووحل ليها الريق ،بدات كتنش على وجهها بيدها وقالت مرتابكة ~ الحال سخون عندكم

فاطنة عيطت على نجمة وجوبتها ~ ايوا بسيف شهر سبعة كتكون الحرارة ،الله يرحمنا من حر لاخرة اما حر دنيا دايز

دخلت نجمة ل غير شافت مها تلاحت عليها تبوس وتعنق ودازت سلمات على دادا بعناق حار ودارت صواب مع بنات خوها ، تخشات حدا تاجة لي جبدت ليها من صاك قفطان حرير مزوق صوباتو ليها لهاد نهار ،خداتو من عندها كضحك وفرحانة بيه ويكون كيفما بغا يكون قيمتو كتغلا الا كان من عند ميمتها ،مشات بفرحة لبيت توجد عليها لبسات وتقدات ولشعرها طلقات ، دارت خيط ريح على جبتها ولبسات حوالقها وشربيل وخرجات لعندهم جلست وسط صالون في بلاصتها تحت نظرات ختها لمدمعين بالفرحة ،وتزغريت وتباريك مها ونظرات بنات خوها ليها بحرقة …فدوك الاثناء طيابة كانت فسطح كتطيب في اللحم ودجاج كانت حداها عايشة لي معاوناهم من بعيد وحاضية لفاطنة الشغل ….كثرت الهضرة واللغا وضحك والغنا ، دار عمرات بخواتات نجمة وخوتها وعيالاتهم ولقراب ، رجال شدو لبيت والعيالات فبيت كيتسناو في ناس …ل كانو جايين وجاييين، الحولي على خير تبارك الله جارينو والعريس هاز مشمومو وعائلتو وراه كلها اش هاز فيديه من فاكية وسكر وحلوة ودهاز لعروس ، تلقاو ليهم العائلة في الباب بترحيب ووجه مبشور كل واحد يرحب من جيه ، دخلو رجال عند الرجال ونسا مع نسا وبدات الحفلة ،قولها وضحك ،سول وسال خواتات لعريس جاو بثلاثة زهرة ل من وجها تحلف حتى جالسة على شوك ولوخرين رمانة مغمة ممعروفش شنو تحت راسهم ، لعروسة لي فيها كافيها والخلعة طالعاها من ساسها لرجليها

تحطو صواني وطباسل الحلوة وفاكية عطاو لام نجمة لالة تاجة الصينية لي جلست حدا لكبيرة تعرف عليها ، لكلام كان بحال اي كلام كيكون فبحال هاد نهارات الهضرة على زواج والعروس ولعريس وكلها يشكر لي ليه دوزو كيسانهم حتى جا لعدول جا لعبد الله لعند فاطنة يعطي لنجمة لكتاب تسني شداتو فيديها وصبعانها كيترعدو ختها توريها وهي كتخطط حتى كملت وسمعات زغاريت وفرمشة عين رجعات مرا مزوجة كيف كانت كتسنى وتمنى ،هي فحلم ولا فعلم ، واخيرا تهنات من اسم فاتها تران ، واخيرا مغتبقاش تسمع امتى يحن عليك الله ويصيفط ليك كيالك ، واخيرا غتولي مزوجة وماشي بايرة اللقب لي كتبصم بيه اي وحظة فاتت عشرين عام

زواج وتزوجات وللمعقول دخلات ولأشمن هم مخبية ليها دنيا مازال معرفات !!

دخلوها للبيت تبكي على خاطرها بالفرحة ،ايدها مزال كيترعدو كلشي مجموع عليها من مها وختها كيباركو ويسكتو فيها ، حتى جا عندها عبد الله باسها في جبينها وقال حابس دموع عينيه مهما كان ختو ومعمرة لبلاصة ~ مبروك عليك اختي !! الله يثبت ليك الغرس ، وانا غنبقى خوك وهادي غتبقى دارك وراك بحبابك …غلبوها دموعها وبدات تنخصص بصوت مسموع ، جات لعندها لكبيرة لي كانت كتشوف من بعيد اش كيوقع ناضت خداتها في حضنها وقالت وهي كتمسح ليها فعينيها ~ الله يقدرنا ونخليوك ديما فرحانة وهاد دموع متنزليهم غا بالفرحة ، شافت فعبد الله لي قدماتو ليها فاطنة وقالت ليه ~ شوف اولدي هادي أمانتكم من عندكم جات لعندي وان شاء الله نحافظو عليها ،ولدي منشكروش ليك مربي وحنين و عمر لكلمة الخايبة مغتسمعها من فمو والايام توريك ، وراك جلستي معاه هو ومول الدار وشفتيه

هز ليها عبد الله راسو ونطق ~ تا انا الالة وباش منكذبش عليك راه ختي هادي مشيت وسولت عليكم فين كتسكنو ومسمعت غير كل خير ، الله يجيبنا في صواب معاكم

طبطبت تاجة على ظهرو بلطف وقالت ~ هانتا دويتي اولدي !!،زواج راه سفينة وسط لبحر كل واحد منهم خاص يسيرها شوية مرة الحمل عليه ومرة عليها باش متغرقش ، لي نوصيهم عليه هو الصبر حتى حاجة مساهلة في البدية وبنتي تبارك الله راه ذبابة منخافش عليها

لكبيرة عنقت تاجة وباست على راسها ~ الله يطول فعمرك عليها كلمة ، وانا كنحمد الله ونشكرو لي طحت في نساب بحالكم …

ويله انجمة بنتي مسحي دموعك وفرحي راه نهار صداقك هادا بضحكة باغا تنشطها مازال ليك معاهم شوية الوقت تشبعي منهم وتقليد عليك هانا نقولها قدام مك وختك وخوك نهار تبغي تجي عندهم منحبسكش وتاهما فاي وقت يجيو عندك راه دار راجلك هي دارك ودارهم …..

عند الرجال كان جالس بابا عبد الهادي مترأس المجمع مع معاوية وباه خليفة ، كيديو ويجيبو في الهضرة …

بابا عبد الهادي قال كيوصي معاوية ~ ايوا بلاما نوصيك اولدي تهلى تهلى وساعف راك عارف لبنات واخا نجمة راه منشكرهاش ليك مرا بذراعها

بحشمة منزل راسو الارض ~ نحطها على راسي كون هاني كن هاني اسي عبد الهادي ميخصهاش خير معايا

نظم ليهم عبد الله ،كيشوف فيه عرفو هو لي كان في تصويرة ل لقا ،مهم قصد الدار ودخل من الباب ،دوا وقال ~ يكون غا المعقول اسي معاوية ونتا ملي دخلتي من الباب راه فيك ،

معاوية وهو كيشوفيه ~ تا نجمة مربية ومأذبة ومعقولة وعندها غا نيشان ،ربيتو وعرفتو اش تربيو وانا كيشرفني نتناسب معاكم دقاكعو باه وقال ~ والله وما تسالني حلوف اسي عبد الهادي ، الا كنت خايف راك عارف زواج راه لدوام كنقول كيدايرين هاد ناس وهاد العائلة وغير نضت مع صباح وصليت الله يقبل وشعلت الراديو وانا نسمع زغاريت قلتي ليهم هاد البنت باينة مزيانة فالها زين والحمد لله من وجوهكم باين العربون

تشكرو عبد الهادي براسو وبقاو مشاركين لحديث حتى وجدت الماكلة وتحطات ، دجاج وتبعو لحم وديسير وحلف عليهم ميمشيو تا ياكلو من لحم الحولي لي جابو لي كان تذبح في سطح وقت جاو

جالسة فبيت خاوي كتطرطق صباعها بالخلعة وهي كتسنا فيه يجي لعندها يودعها قبل ميمشيو ، لاول مرة غتوقف قدامو بصفتها مرتو ماشي خطيبتوو، احساس مغاير يله غتعيشو كانت حانية راسها ووذنيها كتسمع فيهم صوت قلبها لي كيضرب بقوة ، سمعت صوت خطوات قوية وحنحنة بصوتو الخشن لي ولات كتميزو وعارفة بحتو دخل لعندها وسد الباب شيء لي خلاها تفافا وبدات تحرك فرجليها بتوثر ، كيقرب منها وعينيه غياكلوها وتاها لبلدي وجات معاه ، كتبان قدامو مرا كاملة مكمولة من كلشي تحركت رجوليتو ومشا جلس حداها كيتنهد هز ايدها من فوق ركابيها وقربها لفمو كيبوس فيها مغمض عينيه ومنتشي ،قال بفحيح ~ مبرروك علينا انجمة !!

بلعت ريقها وبتاسمت بخجل وهزت عينيها لمحكلين ~ الله يبارك فيك

وهو كيتحسس ملمس ايديها الرطب نطق ~ فرحانة !!

نجمة كتحس بالفرشات فكرشها ~ وعدتي ووفيتي ومغنكونش فرحانة ، كنحمد الله ونشكرو لي عطاك ليا

رجع باسها وخدا راحتو في تقبيلها ~ انا لي كنحمد الله لي دارك في طريقي

نجمة حمارو ليها حناكها و يديها عرقو عليها في الداخل ديالها كتقول الله اربي شهادشي كنحس بيه … هزت عينيها فيه مبتاسمة شيء لي خلاه يزيد يقرب عندها كتر و كيشم في ريحتها لي كانت بحال الورد قرب شفايفو لحنكها و حط عليهم بوسة خفيفة،حست بقشعريرة و حلقها نشف … حس بيها و شد ليها ف يديها وهضر بكل نخوة ~ نهار جات عيني على عينيك حفرتك هنا ~ اشار على قلبو … و غرستك هنا ~ كان حط صبعو على راسو ~ و حلفت حتى نتي لي تكوني مولات ديك الدار و ماشي شي وحدة اخرى ، واعدتك بيني و بين راسي و الوعد دين

خشا يديه فجيب سروال وجبد منو جوا مدو ليها ~ هادا صدااقك والا مقدكش علميني كلشي ديالك

خداتو من عندو وقالت ~ بسم الله ، غيقدني ومغيخصني والو شكرااا

ضحك بجولية وباس جبينها ~ حقك هذا !! جمع الوقفة حس براسو مقادش يزيد يجلس حداها كثر وعارفها شرعا مراتو وقف مقاد حوايجو ووقفها معاه خاشيها فحضنو مودعها وكيلعب فشعرها ~ نتلاقاو غدا !! نجي لعندك باش نخرجو مع قبلة قال ،واخا !!

هزت ليه غير راسها لسانها تسرط ، لهاد درجة لحياة ضحكت في وجهها ، لهاد درجة جا لي يحميها ويحتويها ، لي تكى عليه ويبغيها وتبغيه ، ل ملي تكون فرحانة ولا غضبانا تخشى فيه ، كدعي الله فسرها باش متنكدش فرحتها ، مشا ودا قلبها وعقلها معاه وخلا غير بقايا انثى غارقة في بحر الحب

لبست احسن معندها ، صايا كلوش حد الركبة مع قميجة مهزوزة من لكتاف طلقات شعرها لي خلاتو على طبيعتو كان مازال مصايب ،زينت وجهها بلقليل مخليا جمال الرباني يبان ، كملت وجلست تسنا فيه يجي لعندها لدار باش يخرجو ، مبقى عندها دابا علاش تخبى ومعندها علاش تخرج فسر والكذوب ، براس مرفوع كتقوليهم خارجة معاه حيت عارفة تا حد معندو الحق يمنعها ،كتخرجي بتحميرة لوجه تشوفي فناس ماشي مخبية منهم وبراس عالي كتمشاي حداهم كتقولي للكل بمشيتك وشموخك بلي هذا راجلي ،حلالي وما اجمل الحلال !! كانت فرحانة ومبينة على بيوضية سنانها ، غا تفرنس دنيا مقاداهاش ، دازت ساعة وزوج وثلاتة على الوقت لي دارت معاه فيه ، ابتسامتها بدات كتلاشا والخلعة بدات كتبان عليه ووجهها طفى بعدما كان كيلمع ،تساؤلات كثيرة زارو ذهنها شنو واقع ؟؟ يكون نسى ؟؟ تكون وقعت ليه شي حاجة ؟؟ ياكما دارهم مشاو مقلقين من شي حاجة معجبتهمش …تساؤلات كثيرة ومساوئ أكثر توقعتهم ، عيات فيها فاطنة تحط حوايجها وتبدل ساعة بخرا الغايب حجتو معاه وهي ولا قدرات ،كيف تحط يديها عليهم تقول لا دابا يصوني بقات مكمشة فبلاصتها وشادا قدامها صاكها حتى تناص ليل عاد ناضت فاشلة بدلات وتخشات فالفراش وحلفت هي لنعسات …مطرطقة عينيها كتسنى امتى يصبح الحال وتخرج تاني من الخدمة وتلاقاه قدامها كيف عادتو ، بالحق خاب ضنها نهار تاني ملي ملقاتوش ، عيات واقفة ووردية حداها عزت عليها تخليها بوحدها وتمشي ، عنقها تعنز كل مرة تضور تقلب فكل جهة بحال الحمقة ، دام داك الحال يومين ولا خبار عليه ، جالسة نهار تالث خدامة وفقرارة نفسها كتقول تسالي خدمة وتمشي لعندو لدار تقلب عليها وتسول عليه مهم تبرد النار لي شاعلة قلبها، باغا تشوف مالو واش غير حالو ، شنو دارت ليه ،واش بخير ووووو

حتى كيجي عندها الباطرون ..لقاها شبه غايبة عن الوجود الخدمة قدامها مزال معرمة قاسها فكتافها ومحساتش بيه ، بقى يعيط عليها شحال كانت كتحس براسها فبير غارق وصوت جايها من بعيد حتى وقف قدامها عاد فاقت

قال بلاما يشوف فعينيها ~ نجمة تبعيني لبيرو

حسات بفقلبها تكمش عليها ، وتنفسها ولا بطيء رجلين لي يوصلو عليه جراتهم بزز باش مشات بيهم لعندو كان مقابل مع شرجم مع قالت ليه هانا شنو كاين ، دار لعندها بحزن وقال ~ احم لا والو غير معاوية عيط ليا وقاليا نديك لعندو بغاك ضروري

نجمة عينيها بداو يبكيو ~ كيفاش تديني عندو ، ياك مولف هو لي كيجي عندي ،

قرب من عندها وقال كارز على سنانو محكم فراسو ~ نجمةة !! سمعي مني !! يله معايا

سبقها وهي غادا وراه بحوايج الخدمة جثة هامدة فوق الارض كتحرك راسها بلا وحابسة دموعها قلبها ضارها ومعارفاش علاش ، ركبت معاه في طوموبيل وشحال طوالت عليها طريق ، كانت دايرة راسها على رجليها وكتحرك فيهم وتطلب الله وتقول ~ ياااربي !! وقف معايا غير هاد المرة ، ياربي متخسرش فرحتي راني منستاهلش نتنغص !!

حسات بطموبيل توقفات ووقف ليها معاها القلب ملي شافت قدام دار لوصلو ليها ناس داخلين خارجين ، وصوت لبكى ولغوات ، حل عليها فؤاد طوموبيل مازال كتستوعب شنو واقع وهي طير عليها زهرة كتبكي ~ جيتي هاا !! جيتي المنحوسة ، اقدام نحس ، بدات تضرب فيها بهستيرية ، خوووياا ماااااااات !! ماااااات المنحوسة !!!

شكون هادي لي تجيها ف البال عرسها يرجع جنازة ، والراجل لي كانت غدخل لبيتو عريس غتحطو في لقبر مغسل ومكفن… الراجل لي كانت غتحط عليه الراس و تشكي همها ليه غتحط عليه التراب و الحجر… الزمان تقلب عليها و لوجهو الثاني عطاها …سرق الضحكة من فمها ولمرار الحياة دوقها ، خلاها طايرة فوق سحابة بيضة وفرمشة عين مع الارض خبطها …نجمة صبرت على الطفولة ل عاشت مقسمة وملاوطة ،صبرت على التفرقة بينها وبين ولاد خوتها صبرت على تمارة والقهرة والكلام القبيح ، لكن شكون يصبرها على فقدان شخص حسات معاه بالحب بالدفئ والحنان ، شكون يصبرها على خسران راجل كانت باغا تكون ليه عروس ، شكون ل غيصبرها على كلمة منحوسة وفالها فكعابها الموت لاصق بجنابها ،شكون يداوي قليبها ويوقف بجنبها كتفو على كتفها، شكون يحيد عليها وصمة گدام الويل فحالة هيا اللي قتلاتو ، كون هيا ل ماتت كون قالو من الخير، ممكتاباش ليه لانو راجل وماكاينة حتى كلمة تجي عليه لكن هيا غير ولية في مجتمع ذكوري وكيف كيقولو حويط وقصير شحال قدها تصبر وتداري ل جاي ماشي ساهل

بقات جالسة مشللة فديك طوموبيل ومقاداش تنزل الهضرة كتعاود في وذنيها بحال صدى صوت فجبال بعيدة ، شكون هادا لي مات الا كان العقل ممستوعبهاش كي غيدير لقلب يتقلبها ، الدموع في عينيها تحجرو و حس اللغى عليها كثر و شحال من واحد ولا ينعت عليها بالصبع .. ها هي جات مرتو بسم الله الرحمن الرحيم دخلت عليهم بلموت .. وكاين لي مأمن بهضرة المرا يا دخل عليك بالفرح يا دخل عليك بالقرح … وكاين لي قاليها قدامك قدام الغراب و موكة ومنهم زهرة ل نعدروها في موت خوها مكوية والعقل هارب ليها و القلب العافية شاعلة فيه قطعة منها و تقطعت و كيف الوردة مشا ف عز شبابو … كلامها عليه خلا لي ميبكي بكا

زهرة ~ وا ربي على خويا وراااااه خويا عمرو شاف الطبة وراه حبيبي عمرو گال احح هادي ضرتني وراه حنيني غضرني و خلاني نقوليه غا البرد و يفوتك … وخويا الحنين اش هاد التمغطية لي درتي ~ بدات تهز في تراب كان في الارض و تندب بيه في حناكها~ وربي راني تشويت اربيييي واا معاوية نوض وقول راك كتضحك معانا … جاو عندها عيلات الحومة تجمعو عليها شي كيسكت فيها و شي كيبكي معاها بقات على حالها و الناس تسكت فيها و معلوم حرقة فراق الميت صعيبة كيتو كتكون حارة واخا تحط عليها الدوا ما تبرا ….حطات ايدها على قلبها ودخلت لدار بدموع فعينيها ،عينيها مضببين مكتشوفش قدامها ناس لي كيطالعوها من ساسها راسها دخلت وسط الدار لقات لكبيرة جالسة و كتبكي باش تبرد قلبها اما بمكتاب الله راضية ناس العزو و لصبرها تعجبو … سعدات من نزل عليها الصبر وهمد حرقتها …غير شافت نجمة وهي توقف وتمات جايا لعندها فاتحة دراعها ~ مشااا الغالي ،مشا معاوية وخلا ليا غا امانتو جرتها لصدرها كتبكي معاها

كيقولو الموت راحة للميت وعذاب للحي وكيقولو كية ل حط خدو لتراب معارفينش رآه كية ل بقى موراه تالف …

خشاتها لكبيرة فصدرها ايدها كيترعدو عليها ممتيقاش شنو كتسمع ، هزات راسها وبدات تخبط على حناكها باش الا كانت ناعسة تفيق ، قالت بالغوات والقلب عالم بيه غا ل خلقو ~ ماااات !! كيفاااش مات ،كيفاااش مات ، كتدوي موجهة هضرتها لعدوزتها ، ياك عاد كنتو عندنا وملي بغيتو تمشيو كان معايا ، وبيديه عطاني فلووس صدااق كيفاش مات اخالتي كيفاش مشاا ، واناا ها ؟؟ انا لمن خلاني …!!

هنا لكبيرة حطات ايديها على عينيها كتنخصص بالصوت حاسة بكبدتها كتشوى على زوج جوايه ومعندها جهد ، شدت ليها من ايدها وقالت كتمسح على وجه نجمة لي ولا معصور من حر الصدمة ~ بغاه الله وداه الله ابنتي !! هو عزيز وربي عز منو ، نعلي شيطان !! علاه لموت كتعلم ،ولا كتشاور ….

صاحت نجمة بغوتة تبكي الحجر ~ لاااااااا !! طاحت الارض حتال هادي ولاااا علاش اسيدي ربي علاش شنو درت تاا يوقع ليا هادشي ، اشمن دنب درت مانع فرحتي

كتبكي مألمة، حاسة بصهد طالع معاها من رجليها عاقت و فاقت على راسها راها ترملات صغيرة… نزلت عندنا لكبيرة وقفتها صحة وخشاتها من جديد فصدرها لحنين خلاتها تبكي حتى ما خلات في راسها جهد ~ بكي ابنتي بكي ولدي لي بغاك و ختارك من دون النسا كان كيلحق و سميتك ما فارقت لسانو ، بكي حتى تبردي

كلامها زاد خوا عليها سطل ديال ليصانص و شعلتيه فيها بدات كتغوت و معرفاش اشمن كلام من فمها كتخرج ~ وااا خالتي وا غير قولي ليا ياك انا سبابو ،دخلت عليه بالموت الغدارة لي خطفاتو قبل منشبع منو ، وقفت كتقلب بعينيها غير قولو ليا راجلي كيف مات ووريني وجهو وخليوني نتيق وقللبي يبرد

دخلوها لبيتو ل كان مصبوغ جديد ومفرش على ذوقو كلشي باقي بميكتو موجدو لمرتو، عينيها جات عليه نيشان مغط فوق سرير مغطي بليزار راسو لي كيبان ، غادا كتقرب منو وكتشهق ، كان وجهو منور ، غادي عريس فجنة لوجه بيض ومجبد واللحية كحلة مرتبة والابتسامة على فمو ، لي شافو يقول ناعس تكفات على ركافيها وخشات راسها في عنقو مهزاتو تا خلاتو سارد بدموعها ، نطقت لكبيرة وعينيها على ولدها كتشبع منو شوفان ~ من نهار ابنتي جينا من الخطبة وهو مليوح مريض ، قبل منجيو لعندكم كان ضال خدام واقف على عمال لي كيصاوبو في طريق ويعلقو رايات لعيد العرش ، تما ضربتو سالمة مشا لخطبة بزز وغير رجع لدار تلاح فديك البلاصة وهاهو باقي فيها مخلينا عرگة مخلينا مخينزة ،عند بالنا مرضة ودايزة ساعة متگعدش منها وليدي حبيبي ، قالتها وكسيرات بالبكا ….

حمد لله على كل حال دايم الله ، الموت حارة وموت الغفلة حر منها ، لكن لا اعتراض على قضاء الله “كلُّ نَفْسٍۢ ذَآئِقَةُ ٱلْمَوْتِ ۖ ثُمَّ إِلَيْنَا تُرْجَعُونَ”

لو كان لبكا يرجع لميت غتكون المقبرة خاوية ، بكات حتى نشفو دموعها وطابو وشنو بيدها مدير ولا تغير ، تا حاجة مكتبدل ،معاوية مات والجنازة خرجات وهي راه جالسة في صالون كي ليتيمة ولغميز عليها ، كانت منزلة عينيها الارض بحال لي كيتحاسب على زبلة مدايرهاش ، شوية وهي تم داخلة تاجة وفاطنة لي وصلتهم لخبار من عند باطرون الخدمة داخلين يقلبو بعينيهم على نجمة ، بانت ليهم ومشات لعندها فاطنة تجري ، هاديك تبكي ولوخرا تسكت فيها نجمة معنقة ختها وتنين ~ فيقيني اختي وقولي ليا راك غا كتحلمي ، قولي ليا راك غا كتهتهتي ،قولي ليا راه اصلا متخطبتي ولا تزوجتي

فاطنة قالت منهدة ~ معندك زهر ومعندك سعد بحالك بحالي ،غا مسحي دموعك وشدي فراسك هادشي ديال الله !! لبكا والمنذبة معندها باش تفيد .

جلسات حداها تاجة من جهة لوخرا بعدما عزات لكبيرة ، خدات نجمة في حضنها وقالت كلمة بلا متقصد خلاتها كتقطع فقلبها ~ فين كان مخبي ليك هادشي ، تطلقتي بلا عدول ابنتي !!

من لقريب وسمعتها واش بقى لغريب ميقول ،!!؟ كمدتها فقلبها وسكتت موجدة راسها ل باقي حيث هادي غا البدية ، داز الوقت ودانيا عمرت ولي جالس على برا كثر من لداخل ، تمات جايا زهرة عينيها گارناهم وناوية على خزيت هازة فيديها ميكة كحلة لي مع دخلة لاحتها شنو فيها على نجمة وقالت حاطة يديها على جنابها ~ نوضي شدي الحزن على راجلك ولبسي الابيض ولا خرجي مع الباب !! نجمة شافت فثوب حياتها لي قدامها ثوب البيض لون لي تمنات تلبسو فعرسها قبل گنازتها ، عينيها بداو يدوزو بدموع معارفة متقول وهي تنطق فاطنة واخدة الجلابة من حجرها ورداتها لزهرة وقالت ~ سيري فرقي عليك البنت لاش غتشد الحزن وهو مازال مدخل عليها

يله غتنوض معاها زهرة بالمعيور وهي تسمع صوت موقفها ~ زهرررة !! اش هادشي كديري فيه ، قرب منها سي خليفة مخنزر فيها وقال ، فرقي عليك البنت وعبري شبرك وجلسي عليه ولا غتكون ليا معاك هضرة قاصحة مغتعجبكش …مجا فين يكمل كلامو حتى غبرت من قدامو ، دخل تحت نظرات الكل لعند نجمة فاتح ذراعو عنقها وقال وكلشي كيسمع ~ ليوم ضربت على ولدي من الحالة المدنية وزدت فيها سمية بنية ، الا مات ولدي معاوية راه خلاك ليا امانة وعمري منفرط فيك حتى يدي مول امانة امانتو

طبطب على ظهرها بحنية وخرج مخليها كتبكي ، مشا نيشان لبرا فين كانو مجمعين رجال ، جر من بيناتهم رجل دين وقال ~ بغيت نتشاور معاك فشي هضرةة

طأطأ ليه راسو وقال ~ الله سمعنا خيرر !!

” واصبر لحكم ربك فإنك بأعيننا ” الله اذا احب عبدا ابتلاه ، ونجمة ربي كيبغيها وكيمتحن صبرها فدنيا ،هادشي لي كيوقع فحياتها من نهار تولدت لدابا ،ماشي صدفة فهو مكتوب بالقلم من نهار تخلق الكون ، ومعاوية لسبب ما حطو ربي في طريقها باش تتزوجو، اما موتو مقدرة عليه من نهار تزاد مكاين لا قدامها نحس ولا فالها خايب فالله شاء ، خلق ، قدَّر

~~~

هضرة سي خليفة خلات ناس في صالة يتوشوشو بيناتهم كل واحد كيف نواها فدماغو كاين لي قال !! باغيها ليه ، وكاينة ل قال غيسكنها معاه تا يشوف بيمن يزوجها ..كلها لغى بالغلاه واغلبية فهمو ل فهمت خت كبيرة لي كانت جالسة حداها حناكها نادباهم ودايرة حامض جهة نواضرها وشادا راسها بزيف حياتي ، حطت يدها على فمها ودوات بينها وبين ختها ~ لكبيرة ختي !! سي خليفة علاش ناوي ؟؟ ياكماا يا صگعه !!

لكبيرة مجرد تفكير فهادشي خلاها تخلع فما بالك يديرها بصح ، دوات عاضة على فمها طالبة ربي يدير تاويل ، عزت عليها نجمة وبقاتوفيها اه ولكن ماشي على سباب راحة بال ولادها ~ غاا سكتي ياربي ميكونش عينو فهاداك حيت الا فكر فيه هو ، بتنهيدة كملت ، ايامنا مغيطلعش فيهم صباح ، نتي عارفاه كيف داير ولبنت درويشة متقدش عليه غيمحنها ويعذبها

منانة هزت عينيها فنجمة شافتها دايرة بحال فريخ شتا صحتها على قدها وتخيلاتو كيف داير هو وهي تحرك راسها كتولول ~ مسكينة سعدها فيه صكعه معندها زهر ، الله يرحمك امعاوية كانت معاك سلاكا

على برا كان سي خليفة كيتناقش مع فقيه جامع واقفين بعيد على ناس لي باغين غير يديو ميعودو ، شابك صبعانو مع بعضياتهم وقال ~ بغيت نتشاور معاك اسي لفقيه !!

حرك ليه راسو وقال ~ الله يسمعنا خير ، انا كنسمع فيك !!

تنهد بصوت مسموع وقال هاز حواجبو وكيدوي مهموم ~ منكذبش عليك بقات فيا البنت لي خلا ولدي وراه ، بنية مازال صغيرة ومعارفة والو ، وصعيب عليها ترمل فهاد سن ، زيد عليها هضرة ناس لي مكتساليش ، داكشي علاش خديت واحد القرار وبغيت ناخد رأييك فيه نتا قاري عليا وواعي فأمور دين

لفقيع ~ الا كان فمقدوري نعاونك علاش لا ؟؟ قول نسمع

خليفة وهو حاضي شخص لي جاي لعندو~ بغيت ناخدها لولدي لكبير ، اللهم تبقى تحت جناحي ناخد فيها اجر تعيش قدام عينينا امانة ولدي منفرطوش فيها

لفقيه كيحاول يستوعب شنو سمع ~ اشمن واحد في ولادك اسي خليفة وااش كتقصد

خطفها ليه خليفة من فمو وقال ~ هاداك اسي لفقيه هاداك ، غُلاَمْ !!

نزل من طوموبيل وتم جا بخطوات ثقيلة قاصد باه، هاز گارو فيديه كينثر منو باغي يقاد دماغو ، كل مرة يجي لعندو واحد يعزيه ، كيكتفي يهز ليهم راسو ولا يحط ايدو على صدرو بامتنان معندو خاطر يهضر ،موت خوه جاتو قاصحة ملامح الحزن كانت باينة على وجهو وعينيه الناعسين طاغي عليهم حزن كبير ، لاح لگارو فور موصل لعند باه ل تحنى باس على راسو وسلم بعينيه على لفقيه ورجع وقف باستقامة موقف رجليه بزوج بثبات ~ لوالييد اش درنا ؟؟ قالها بنبرة صوت رجولية وبملامح حادة ومعقودة كيتسنى الجواب

خليفة باستفهام ~ فاش اولدي !! مفهمتش

غلام جر باه من يديه بعدما قال ~ سمح لنا الفقيه !! جرو لبعيد باش يدوي معاه راس فراس ، حط ايد فوق ايد قدامو وبتحديد جهة حجرو ونطق باختصار ~ الصدقة ؟؟ ليوم ولا غدا ؟؟

خليفة عاد فهم قصدو ~ ااه ، اش بان ليك نتا ؟؟، قرر اولدي نتا ف الكفاية انا عفيني

غلام دوز يديه على وجهو وخلاها مستقرة في لحيتو الطويلة ل كيسرح فيها بصبعانو ~ خليها ليوم ، نطعمو ناس لي جاو ، انا غنمشي نشوف شي ثور ندوزو لعند دراري لگرنة يدوزو عليه وفطريقي غندوز على صحاب العمالة يبنيو خزانة وهو كيشير ليه بيديه كيوريه ناس ل مجمعين ~ حشوووما كاع يبقاو واقفين على برا ..وسول لينا معاك الواليدة شنو خاصهم لداخل باش نصيفطو ليهم مع دراري بلا ديك سير وجي لحانوت ودنيا عامرة رجال

خليفة بسؤال ~ ونتا مغتجيش غتخليني مني لهادشي مغتوقفش حدايا

غلام على سبة دغيا كيشعل ~ وفيني انا دابا الواليد ؟؟ قالها بالغوات ورجع قاد من نبرة صوتو وهضر بشوية مهما كان باه وكيحتارمو ~ انا معاك ، معاك ، نقضي غا صوالح لي تابعيني ونجي لعندك ، ضيق فيه عينيه واش باغيني فشي حاجة

خليفة ~ ندوزو هاد لعشا وعندي ليك شي هضرة الله يرضي عليك

غلام وهو كيجبد سوارت طوموبيلتو وگارو من جيبو ~ ما تبقى غير على خاطرك لعشية انا هنا ، هز ايدو بزوج باستسلام وهاز معاهم حواجبو..وخليني دابا نقصد اش تابعني

خليفة وهو كيربث على ظهرو ل ولد ما ماتش ~ سير اولدي الله يرضي عليك …

قاليه تهلىى ومشا لطوموبيلتو تبعاتو زهرة لي كانت على برا تجري باغا تدوي معاه ~ غلااام !! غلاام وقف وقف سمع عندي ليك شي هضرة

خرج فيها عينيه وهو كيشوف فيها باش خارجة ~ تي سايبة ولا مالك ، شفتك خارجة ببيجامتك معندكش رجال

زهرة بدات كضور في عينيها كتسرط القمعة ~ خرجت زربانة بغيت غا نقوليك شي هضرة

حل طوموبيلتو ركب فيها بعدما قال ~ سيري دخلي فحالك الله يرحم باك دماغي مصدع متزيديش تشعليني

كسيرة وخلاها واقفة والهضرة واحلة ليها في الحلق

وهذا هو غلام دغيا يشعل وصعيب يطفى الولد البكر بعد زهرة فولاد خليفة هو لي مسير الخدمة كاملة وهازهم من كبيرهم لصغيرهم ومن ساسهم لراسهم ، طبعو صعيب وكيتنيرڤا على نقشة ، مكيعرفش شنو هو الضحك ولا تقشاب ، شخصيتو مع معاوية بحال الما والعافية

تقلبات الدنيا والدار عمرات ، لخزانة تبنات و البعيد سمع خبار موت خير الناس … ناسو كتار و عزيز على عباد الله ، قبل ميجيب غُلاَمْ الضحية كان العسل مع الزبدة تفرق و الناس شبعات كرشها و ريحة الكسكسو كاينة في كل دار و هادي هي العادة الى مات الميت الجيران كيتكلفو …عاد معاوية كانت سميتو سبقاه و بخيرو سمعتو نقية كاين لي بكى عليه و كاين لي موتو في عقلو متقبلهاش… وصل وقت لغدا و لي دار شي گصعة دخلها لدار سي خليفة كتهز وحدة و تحط لخرى … الكرش شبعت و لي عندو شي دار قصدها و لي جا من بعيد بقى تما … كان جالس سي خليفة في خزانة وحداه لفقيه كيكمل معاه الهضرة لي بقات واحلة فحلقو

خليفة مد كاس اتاي لفقيه~ … ايوا اسي الفيقه اش بان ليك ؟؟ نورني وگول ليا شنو ندير

– وهو كيمسح على جبهتو لي عرقت ، اش غنقوليه اسيدي ، هي فدين جائز ياخدها ولدك يدي فيها الاجر ، خاص غير تكمل العدة ديالها و توكلو على الله ديك ساع

خليفة حط كاسو من يدو وناض زربان ~ واعليه ليوم يطرق هاد المسمار بغيت ولدي يرتاح في تربتو ، جمع الوقفة و تم نايض لعند مرتو لي غير شافتو جاي قاصدها قلبها بدا يضرب ، اشار ليها براسو تمشي لعندو ستاذنت من ناس لي كيدويو معاها وتبعاتو كتقاد في زيفها وتمسح فعينيها لي ورمو بالبكا ، دخلت عليه لبيت نعاس لقاتو جالس فوق سداري كيخمم هز عينو فيها وقال بامر ~ سدي داك الباب وتعالي عندي ليك شي هضرة

لكبيرة طرقت ساقطة وتمت غادا حداه ~ الله يسمعنا خبار لخير مالك !!

خليفة دخل نيشان في موضوع ~ … هضرة وحدة غنقولها ليك و سمعيها متزيديش فوق منها كلمة !! بنتي نجمة ترملات وهي صغيرة و كلام الناس عليها كثر و غيزيد يكتر وانا منخليش مرت ولدي مكسورة الخاطر وتلاوط بعيد علينا وراه ولات منا وفينا داكشي علاش انا قررت غير تكمل فريضتها ونزوجها ل غلام

الكبيرة خبطت على فخاضها ~ الله اسي خليفة الله كي غدير ليها و هو الحجر تهرسو يعطيك الطوع وراسو ميتحنى ، ونتا عارفو مباغيش يتزوج ياك شحال عييتي معاه تشوف ليه شي بنت غيجي دابا غيقبل ليك

خليفة هز يدو معصب ~ الالة راه انا لي والدو ماشي هو ل والدني ، وكلامي هو لي غيمشي عليكم كاملين ولدك يحكم في راسو ماشي فيا الى قلت نجمة لغلام اذا راها ليه… تكمل العدة ديالها و ديك الساع يتكاتبو و من هاد الدار ماليها خروج منهنا لديك الوقت

لكبيرة حسات بنواضرها كيزدحو وطونسيو طلع ليها شدتها دوخة حركت ليه ايدها بلا وقالت ~ دويتي معاه فهادشي شاورتيه ، انا راه ميسمعش مني الكلمة …منك ليه !!

خليفة خنزر فيها ~ مالو غيقطع ليا راس ورا لعشا تكون فخبارو ولكن قبل خاصني ندوي مع لبنت

دخلت نجمة لبيت عند خليفة مع مها وختها والعقل لي تفكر بيه فشنو بغاها ماشي فبلاصتو هاد ساعا غايب عن الوجود ، كانت حادرة راسها عينيها مخيم عليهم الحزن ووجهها ذابل باين عليه لعيا اما قلبها كيبكي الدم لداخل ، كيشوف فيها كيضعف وكتبقى فيه باقا صغيرة على هاد الهم باش تهزو بوحدها ، ماشي ذنبها شنو كيوقع ، هذا غير القدر كيلعب لعبتو ، شابك يديه مع بعضياتهم وقال بصوت حنين ~ بنتي نجمة !!

شافت فيه بعينين مدمعين وقال بصوت مبحوح ~ نعام اعمي !!

خليفة تنهد بأسى ونطق ~ ينعم علينا وعليك رسول الله ، سمعيني ابنتي شنو غنقوليك قدام مك وختك !! ولدي معاوية الا مات فراه ممشى حتى خطب لخوه لكبير …

كتشوفيه كتسناه يكمل باش تفهم شنو بغا يقصد ، ناض لعندها خدا كرسي وجلس قدامها واخد يدها بحنان وعطف ابوي ~ عمري نفرقك ابنتي تا يدي مول الامانة امانتو داكشي علاش الا مات ولدي معاوية غناخدك لخوه لكبير غلام

حسات بالبيت كيدور بيها وبحناكها غيطرطقو وكلمة غناخدك لخوه هي لي كتعاود في وذنيها ،لسان باش تجاوبو تقال ومبقاتش متحكمة فيه ، تضببات قدامها الرؤية ، وختها حداها مخرجة عينيها فخليفة وكتدوي فبلاصتها ~ اش هاد الهضرة اشرييف !؟ بنتنا ممكتاباش ليكم صافي ،هي هنا دايرة معاكم صواب مجاتش تخليكم وتمشي حيث مهما كان لي مات راجلها وخاصها تعزا فيه وغير غيفوت لعشا وتفاريق ديك ساع عمركم مازال تشوفوها كل واحد يكمل حياتو فين وقفت

خرج تنهيدة من قلبو وطاحت دمعة من عينيه ~ حياتنا وقفات مع موت ولدي ، كبدتي الالة كتمزگ من لداخل مساهلش عليا فراقو عرفتي لي مصبرني شكون ، نعت جهة نجمة ..غير هاد البنت حيت كتفكرني فيه وربي حطها في حياتنا بلش تواسينا فموتو والا مشات تا فرقتنا ديك ساع عاد ندير گنازة ونتهرس ديال بصح

لكبيرة من نبرة صوتو باش كيدوي عرفات راجلها غير عاض في صبر وقلبو مألم محسات على راسها حتى بدات تبكي وتنخصص كأنها عاد مخرجين جنازة ولدها قدامها ، ضار لعند نجمة وقال ~ شنو قلتي ابنيتي !!

تاجة ضارت لجهتها لقاتها كتبكي بلا صوت معندها متقول ومعارفة باش غتجاوب ، كيفاش تتزوج بواحد وقلبها معلق بخوه ، كيف دير تشوف فيه بلاما تفكر فعينين حبيبها ، كيف دير تسمع ليه بلا تسترجع اخر كلام قالو بصفتو رجالها ، فكرت فكلشي الا هادي عمرها مطاحت على البال ، تزوج لخوت ،حست بيدو تحطت على ركبتها شافيها وقال ~ متجوبينيش دابا فكري ابنتي فكري بعقلك ، و عسى ان تكرهو شيئا وهو خير لكم

قال هضرتو وخرج مع الباب بعدما لاح قنبولة في وجههم ، تبعتو لكبيرة كتصبر راسها مخلياهم يدويو على خاطرهم ، يله بغات تدوي نجمة وهي تهز ايدها فاطنة وقالت بامر ~ متفكريييش فيها تا بضحك ، راجلك مات الله يرحمو نحضرو لعشا ونزيدو بحالنا مالك مونيكة دوزي من يد اليد

دابا يجيك رزقك عطا الله رجال لي يقبلو عليك

هاد لكلمة فحد ذاتها خلات نجمة تفيق بهضرتو ملي قال فكري بعقلك ، شكون هادا لي غيقبل بوحدة منحوسة نهار عقدت مع راجل مات ، معادا الا كان مطلق بولادو ولا شرف وبغا يجدد حياتو

كجثة هامدة كجسد بلا روح ،كفتاة اصابتها لعنة الشقاء والحزن كانت جالسة وسط الناس ، الناس لي مكترحمش لي مكتعذرش ل مكتحسش ، تا حد معالم على قلبها ل كيتألم ، على خاطرها لمجروح ، على نفسها المنهكة ….مكرهتش حضن حنين تخشى فيه ،يحميها ويحامي عليها ، مكرهتش نجمة اخرى تواسيها …مكرهتش عائلة ديال بصح توقف معاها فمحنتها وتنسيها ، عطاتهم الحب بلا مقابل وهي دابا قلبها عامر جروح، عطاتهم دفء بلا حساب وهي دابا كترعد بالبرد ، عطاتهم الامان وهي دابا فقمة الخوف من اللي جاي ،وصلتهم لبر الامان وهي دابا موضرة كتقلب على الطريق ….

الحياة قسات عليها بزاف والزمان والناس جاو عليها ، ولات منزلة عينيها باش متشوفهمش كيشوفو فيها ،مصمكة وذنيها باش متسمع هضرة تعگرها ، هضرة الناس لي دايرة بحال المرض الفتاك كتقتل الذات بحال سم ، مكرهتش تغوت ووتقول #رَحْمُونِي ، باراكا عليا انا انسانة من دم ولحم حتى انا كنحس ،حتى انا مات ليا راجلي والسند وكون غير مات احساسي معاه ، مكرهتش متبقاش تحس ، متجرحها هضرة ولا ياثر فيها كلام ولكن هي عبد ضعيف الهم لي جاا كياثر فيها ،قدرتها على التحمل ستنزفات وصبرها تقادا وجهد لي غتوقف بيه فوجه الناس وتستحمل سالا بينها وبين تفكير في انها توضع حد لحياتها خيط رفيع ممفكراش انو حرام وغدخل لجنهم قد مباغا تتهنى وتحكم على راسها بالاعدام ضد تهم الموجهة ليها …..

فاطنة هضرة خليفة مشافتهاش من الناحية الايجابية ، لا حكمت على ختها ترجع تواجه المجتمع كأرملة مازال نقش عرسها حمر فيديها ،بغات ترجع ليها نجمة الخدامة لي هازة معاها الدار ودراري ، لي كتصبن وترس على ولادها نجمة قليلة الحظ ل الحيط لي تبغي تحط عليه ظهرها يريب ويقصحوها حجارو ، كانت جالسة جنبها على جنب مها بغاو امتى يرجعو بحالهم دوات تحت من سنانها وقالت ~ ناس يله دافنين ولدهم وكيفكرو يزوجو لاخور ، اشمن كبدة كيدوي عليها

تاجة حركات راسها بحزن على بنتها ل جالسة حداها كتسمع فيها وقالت ~ اودي نسكت تانعيا ونقول بنتي معندها زهر ….

حسات بيها تنهدات من اعماق ملي قالت تاجة ديك الكلمة وهي تشد على يدها وقالت بدون قصد ~ كون تعرفي شحال دگيت عليك ابنتي من فنيدة ملي طحتي في كرشي باش نطيحك ولا نتي نزلتي ، كنت نطلعهم يشتفو عليا ومديت منك لا حق ولا باطل ، حلفتي نتي تاتجي لدنيا وتذوقي مرارها

نجمة بابتسامة ساخرة جوبتها ~ ديك ساع دفنيني حية باش نتهنى قبل منحل عينيا

فاطنة بعتاب ~ ومالك دابا اش خاصك ،ولا باغا ز ** بزز مات الله يهنيه ويرحمو ، انا راه قتلت ثلاثة كلنا غنعطيو وجهنا لتراب

ثور تدبح ووصلهم حتال عندهم مگرض بقوامو ، تقضية ديال لعشا تكلف بيها راجل الدار بعد سي خليفة ، ولدو وسندو وعزوتو ، غلام ل ديما رافع ليه راسو بين ناس قد فمو قد ذراعو خرج خدم على ولد ربعطاش عام ، تكرفس نعس في زناقي وربااه شانطي مزياان حتى ولا فحل ، ومكيخافش كلشي داير ليه حساب واعتبار من اصغر واحد فدرب لاكبرهم ، تجمعو ناس لي غيحضرو لعشا ول كانو كثار كلشي عيطو عليه، لخير موجود كول بيدك ورجليك ، في الاثناء ل كانو ناس كيتعشاو كان هو جالس في طوموبيل كيكمي ويتسنط لراسو ل خدام كيعيد ليه ذكرياتو مع خوه ، وبالضبط نهار العقد

~~~

معاوية تلاح عليه كيعنق فيه فرحان بشنو خدا ليه ~ الله يحفظك ليا اخويا ، هاد كوستيم فين يبان ل كنت غنلبس

غلام كان منزل يدو على كتافو كيطلع وينزل فيه بفرحة مخفية ~ بصحتك الخوادري ! حط يدو ف جيبو وقال ،شحال خاصك

معاوية بامتناع ~ لا لا عندي رزقي خلي فلوسك عندك دير علاش ترجع …

غلام جبد من جيبو بلا ميحسب وحطهم لخوه صحة ~ الله يلعن بو لفلوس ، سير جيبك عاامر راه خوك انا ، وعرسك متضرب ليه حساب ،خبط على عنگرتو ،نتا غير جلس وتفطح ليا معاك راجل

تلاح عليه معاوية عنقو محاسش بيه خوه فقط ،انما خوه وصاحبو وباه ، اما غلام خوتو دايرهم ولادو كيخاف عليهم وتجي فيه ومتجي فيهم …..

خرج من طوموبيل كيتنهد وكينثر دخان بزعف وهو كيتفكر اخر لحظة جمعاتهم بزوج والعرس لي كان مواعدو بيه رجع جنازة ،بدون شعور هز يدو حتال سما وخبطها مع زاجة ديال طوموبيل بقلب ميت وبلا احساس …سمع اسمو بنبرة صوت انثوية وبخطوات سريعة قربت منو ،حطت ايدها على يديه كتبكي باغا تشوف مالو بصوت كيرجف قالت ~ غلاام انشوف يدك ، دم بزااف

تنثر منها وخشا يدو من زاجة لي مهرسة خدا قرعة لما خواها على يديه حتى وضاحو ضرابي لي كانو محلولين وقال ~ سدي فمك وهنينا

صباح بخوف ~ يله نمشيو لايرجونص ؟؟ يخيطو ليك ،

لاح طفية في الارض وخبط عليها بالگاط لي لابس بجهد وحيد زيف من على راسها لواه على يدو وقال بزعف ~ سيري دخلي لعند بنتك وخليني نضبر روحي ..

صباح سبقتها دمعة وقربت منو خايفة عليه ~ روحك راه هي روحي ، علاش عزيز عليك تعذبني

ملص يديها منو ~ ديري حل لراسك ، حيث مغيجيك مني غير العذاب

بغات تزيد تقرب منو وهو يخنزر فيها بعينيه الحمرين وهاد شوفة عارفاها مزيان رجعت بخطوة لور وقالت ~ يله دخل معايا لدار نغسل ليك يديك ونداويها ومغنخرج من فمي حتى كلمة كنواعدك …..

الا دخلت معاك مغيعجبك حال ، الله يرحم باك غبري من قدامي ، راسي ومحانش فيه هاد ساعة

بصوت مرعود قالت ~ غلاااام

خبط على كابو تاع طونوبيلتو وغوت بحر جهدو ~ واسيري تتتت ***

دخلت معودتهاش معاه عارفاه غيبدا يسب وميحير لا فجيران لا فدارهم ، اللهم تخليه تيكون على برجو ، بقا متكي على طوموبيل حتى شاف ناس تعشات وغادا بحالها وهو يقصد الدار يشوف باه ، لقاه واقف في الباب كيقلب عليه غير شافو وهو يوسع عينيه وقال ~ جيتي اولدي ، يله زيد معايا ندويو لداخل

خرج يدو صحيحة لي كان خاشيها في جياب دجاكيط وقال باستفهام ~ فين غندخل الواليد راه كاينين غا لعيالات لداخل ..

خليفة بدون اهتمام ~ زيد وسكت كلامنا غنقولوه في سطح مكاين لي كيدور تما

ستسلم بزز منو معندو ميدير الا بغا الرضى خاصو يحدر الراس، طلع وراه منزل عينيه في الارض ، ماباغي يشوف حد حتى وصلو لسطح كانو تما شي كراسا كل واحد فيهم خدا واحد وجلس غلام متكي ظهرو براحة وجبد رجليه طوال وقال ~ قول نسمع ؟؟

~~~~

فنفس الوقت كانت نجمة في البيت مع لكبيرة جامعة يديها لعندها وراسها للأرض غير كتسمع معارفة متقول تلفت عليها الهضرة وكثر لغيط وقوة الرايات كلها يقول اش بغى وهي شكون سمع منها ،شكون حس بقلبها وطالع عليه ..قربت منها لالة لكبيرو… معنقاها بيديها بزوج ودموعها لي على سبة سابقينها ~ وافقي ابنتي وميخصك خير ولدي مغنشكروش ليك خرجي غا لدرب وسمعي بوذيناتك اش كيقولو عليه بلاما تحتاجي تسولي ….راجل وسيد الرجالة قد فمو قد ذراعو يجيبها من فم السبع خدام عليا انا وباه وخواتاتو لي مزوجين وحتى لي بلا زواج عمرو خصصنا من حاجة بخيرو حنا عايشين وبيهبتو باش مكملين وهازين راسنا وسط العائلة والناس محيد علينا الضسارة والبراني ميقد يحل علينا فمو حتى بنص كلمة

لبنات هما كيعرضو راسهم عليه دابا تزوجو وتعرفيه وتعودي عليه انا عارفاها صعيبة عليك بالحق كلشي يدوز هاهي مك حدايا تقوليك فين عمر شي وحدة فينا ختارت راجلها ياك كانو غا تا يلبسونا ويزينونا ها لحنا ها سواك ها الكحل هاحنا مسدود علينا فبيت مع راجل مع يقوليك سلام مع ينصل سروالو ويقضي الغرض متشوفيه كي داير بوجهو تا يبداو يغنيو فوق راسك صباح صباح ماليه وهو يفرنس خاشي يدو فجيبو كيخرج لبياض ، ضمتها ليها كتدوز على ظهرها بمواساة ~سمعي مني وتوكلي على الله هذا هو مكتوبك والمكتوب مامنو هروب

هزت عينيها الذابلين كتفكر فكلتا الحالات تا خيار مبغاه رجل فالعافية ولوخرا فشووك ، قررات تختار الاقل الضرر و قالت وهي راسها مهزوز… فين عمر الميت كيشد يد غسالو ، نزلو الدموع من عينيها سربوب هذا مكتابي وخاصني نرضى بيه

كتكون دنيا ضاحكة في وجهك وكتقول الحمد لله ل كنتمناه وصلت ليه بعد صبر طويل ومعاناة كثيرة وفجأة وفرمشة عين كلشي كيتبخر ، الضحكة لي كانت مرسومة على فمك كتمسح والقلب لي كان فرحان كتزرع فيه غصة ، والراحة لي حسيتي بيها بعد الفرج كتولي عذاب نفسي مضاعف ، كتدخل فشرك الله وكتبقا تلوم القدر وتقوول #علاش_انا ، علاش انا لي خاصني نبكي ، علاش انا لي خاصني نتحرم ,ل خاصني نعاني ، ل مكنوصل لحتى حاجة بساهل ، علاش انا لي مكتوب عليا الشقا ، ل ديما فرحتي مكاملاش ، علاش انا من دون الناس ،علاش انا وماشي هوما….

كيغلب علينا الحزن وكنساو بلي حنا مسيرون لسنا مخيرون ، كنساو بلي المؤمن مصاب وبلي الله اذا احب عبدا ابتلاه كنساو بلي حنا في امتحان وربي كيختابر صبرنا واكيد غيجازينا عليه بالاحسان وغيدهشنا بالعطاء ….

نجمة وافقت ،ماشي حبا في الزواج لكن هروب من كلام البراني وحتى ل حباب حيت الوقت ل خاص مها وختها يبردو نارها بكلمة زوينة وبكلمة حنا معاك كل وحدة فيهم سممتها بكلمة بلاما تعيق ، جلست مع راسها وفكرت ولقات بلي وهي فعز معاناتها النفسية وشنو سمعت منهم اما الا داز الوقت وسنين وبقات بلا زواج شنو غتزيد تسمع مازال ، لقات راسها بلي خاصها توافق ، سواء تزوجت ولا لا غتضرر اللهم تختار اقل ضرر لعله خير …قنعت راسها بلي الله مكتب ليها هاد شخص ماشي من دون الناس وبلي گاع ل وقع فحياتها كان سبب باش تتلاقا بيه ، لقات راسها كتقول اه قابلة هذا مكتابي وخاصني نرضى بيه ، مدايرة بشوار لا مها لا ختها ، هاد الاخيرة ل ضربتها لقوة مبقاتش قادة تدوي دغمات لي كلات في العشا حسات بيهم رجعو للحلق وخنقوها اما حتى تاجة عندها زايد ناقص ، لكبيرة فعز حزنها ملي سمعات موافقتها ضحكات وخشاتها في صدرها الحنين وطبطبات بدموع ف عينيها دعات ربي ل حط نجمة ف طريقها تطفي نارها واخا غير شوية …ناضت كتهرول تقلب على زمانها تعطيه لبشار وغير خوات بلاصتها وفاطنة طلقات لسانها ، زعزعت نجمة من كتافها وقالت مغددة ~ واش عقلك باقي فراسك ولا طار ؟؟ كيفااش قابلة تزوجي بيه ، معامن تشاورتي واش حنا عائلتك ولا غا زايدين ، لهاد الدرجة ميتة على هزان رجلين…

نجمة كتطركق في صباعها بتوثر ~ انا باغا سترة ، انا باغت نرتاح ، انا باغا نسد فام الناس ، مبغيتش نخلي قصتي حديث صواني ، مبغيتش نرجع ل يامي لقديمة ، مبغيتش لي يشوفني يقول ها كحلة العفطة جات …..

نجمة كتطرطق في صباعها بتوثر ~ انا باغا سترة ، انا باغا نرتاح ، انا باغا نسد فام الناس ، مبغيتش نخلي قصتي حديث صواني ، مبغيتش نرجع ل يامي لقديمة ، مبغيتش لي يشوفني يقول ها كحلة العفطة جات …..

كون ما زمان ومكان تلاح عليها تاكلها تقادات معاها وگفضت يدها وقالت ~ علاه مالها حياتك ؟ كنتي تنعسي في زنقة ؟؟ فرطنا فيك ، كنتي تباتي جيعانة ؟… واكلة شاربة ناعسة داخلة خارجة سيري شوفي ناس كيف عايشين وبوسي يديك ، زواج حلاوتو سيمانة وديك ساع غدوقي لي عمرك ذقتيه

نجمة قالت بلاما تحس ~ الا كان غا قطران راني ذايقاه من صغري كاين ما مُرْ منو ؟؟ رجعت قالت استغفر الله العظيم وقادات زيفها ودوات بصوت منخفض مهما كان ختها …بصوت حنين نطقت ~ واختي ؟؟ حني فيا شوية …واش مفكرتيش بلي راه العمر غادي ويجري ويزيد لقدام ، راني غادا ونكبر ، غدا ولا بعدو بطولة عمرك الا مشيتي نتي ، شنو اخرتي انا ، بنتك تزوج وولادك يتزوجو وانا شنو نتلاح لزنقة شكون غا يقبل عليا ،وانا معندو لا دار تغكيني من حر شمس ومن برد الشتا لا ولاد يترحمو عليا الا مت و يحنو فيا الا مرضت …

خسرات سيفتها وقالت غضبانة ~ لي داتو القرعة غا ديه مو شعور ، سالات الهضرة معاك هنا ابنت مي ، يصبح الحال وعمرك تشوفي كمارتي مازال وعومي ديك ساع بحرك ونهار تغرقي شوفي شكون يعتقك

تنهدات نجمة وضارت شافت في تاجة تسناها تقول شي حاجة تجي من صفها ولا تأيدها ،لقاتها منزلة راسها لتحت وكتحركو بأسى ، حطات ايدها على يديها وقالت ~ ونتي امي مغتقولي ليا والو ؟؟ تاجة طبطبت عليها ~ نتي تعرفي لي يصلاح ليك منقدر لا نزين لا نخيب ليك ….

باست لمها يديها وطمت قلبها ، قرار وخداتو ومغترجعش فيه وقابلة على حياتها من هنا لقدام كيفما كانت ، خلاوها المصريين ” قالو اللي رماك عل مر قال اللي أمر منو “

جالس وجهو في وجه باه كيتسناه يدوي ويقول اش عندو، بان ليه مطول وكيدخل ويخرج في الهضرة ومازال معطاه لمفيد ، حط مرافق يديه على ركابيه.. صباعو كيلعبو بلحيتو مضيق عينيه فيه وكيشوف ، خلاه حتى سالا ونطق عاض على فمو ~ واا بويا !! قول اش عندك ؟؟ خرجها من فمك دغيا راني حافظك … شاف ساعتو ، الوقت مشى خاصني نمشي …

خليفة بتاسم بخفة وهز حاجبو ~ معليكش، عرفتيني مازال مدخلت ليك ف المفيد …تنهدت مكمل ~ انا اولدي ، عطيت واحد العهد بيني وبين الله وبغيتك تعوني فيه

غلام بقلة صبر كيزعزع فرجليه معندو لا گانة لا خاطر ~ راني كنسمع فيك كمل كلامك …

خليفة ختاصرها في جملة وحدة ~ بغيتك تستر مرت خوك !!

تقاد في الجلسة كيطرطق فعينيه ،كيحاول يفهم باه شنو بغا يقصد ~ كيفاش زعمة نسترها ؟؟ بغيتيني نكسيها ولا نشري ليها نگااب ولا شنوو

خليفة نطق بحدة وبصوت مرتفع شوية ~ غلاااااام !! رااك قلعتيها فسما بلاما نحتاج نشرح ، بغيتيني نبسطها ليك واخا اسيدي ، غتزوج مرت خوك !!

كلمة كانت بحال فتيلة تلاحت على ذاتو وشعلاتو مزيان ، وقف على طولتو كيمشي ويجي و ويضحك بسخرية وكيدوي مزير على سنانو ~ تزوج مرت خوك !! زوييينة هادي ، بحالا كتقوليا جيب ليا معاك شي لعبة ، دار لعند باه ووهضر بدون شعور ممتحكمش فنبرة صوتو ~ واااااش كتسطى عليا ابويا ولا شنو ، راك قلتيها بفمك …بدا يخبط بكف يدو لموعتة في الحيط مع كل كلمة ، مرت خووووووك خوووك ،خوويا لي لبستو بيدي وصيفطتو يخطب ، خووويا لي شفتو بعيني قداش كان فرحان وهو غيتجمع مع لي كيبغي ، خووويا لي هزيتو على كتافي ملي مرض ، خوياا ل نزلتو بيدي وحطيتو في القبر ، باغيني نتزوج لييييييه بمرتو ….. هز كرسي لي كان جالس عليه قربو من الحيط وطلع فوق منو ، غير خليني نتلاح ون ق ت ل **** حسن ليا ….

هز كرسي لي كان جالس عليه قربو من الحيط وطلع فوق منو ، غير خليني نتلاح ون ق ت ل **** حسن ليا واش كتخربق عليا ولا شنو ، واش باغي تجهلني، عارف شنو كتقول ولا معارفش ؟؟

كيفاش غيحس هاد الشخص لي عاد دفن قطعة منو تحت التراب كان غيكون عرس و رجع گنازة عقلو لدابا متقبلهاش اما جوفو كيبخ منو الدم، حاس براسو تهرس وصابر و كيكابر بزز ،واقف ف جنازة خوه كيف كان غيوقف ليه في فرحو ، من برا كيبان سد عالي ومن لداخل مخبي حزن غارق ، مكرهش يعطيهم بظهر ويزيد تا يلقى راسو ويرجع ولكن مباغيش يخليهم وراه …وهو فعز حزنو كيقولو ليه تزوج مرت خوك

قرب منو باه كيحيد في الكرسي وقال ~ نزل ولا سخطي غا يبقى تابعك ليوم دين، نقز لعندو غلام مقرب و جهو ليه و كيخبط على صدرو ~ وااا بوياااا !! غا خود النفس لي كتطلع وتنزل فيا رجعها في خويا و دفني بلاصتو و متفتيش عليا هاد الخبيرات ديالك حيت مغنديرش بيهم …

خليفة وقف على طولتو مرجع يديه وراه بحالا كيقوليه كب عليك ليصانص و خوي عليك العافية كلامي هو ل كاين ~ فين عمر خليفة رجع في كلامو اولد الدار الكبيرة ااااااا دويييي ؟؟

غلام ضرب الكرسي برجليه حتى تهرس وطوا لسانو معصب دافل لمرار من فمو ،ضور وجهو للحيط لقا فيه جويجة معلقة نترها ولاحها لباه حدا رجليه ~ غاااا عمرها الحاج خْليفة و خويها فيا حيت كلامك ..ضرب في الحيط برجليه و نطق~ ضربوووو في هاد الحيط ، مغاديش يمشي عليا !!

من اين ذالك الشبل من ذاك الاسد، شعلت بيناتهم مزيان خليفة معصب وغلام قاليه دوز تجلس، صدرو كيطلع وينزل وكيسوط اش جا مهدنو داير بحال لبركان كيغلي ، كلشي كان في دروج من خوتو ومو كيتسنطو وحتى واحد معندو الجرأة يتدخل بيناتهم لكبيرة سروالها سرد وخواتاتو وجههم صفار ، دفع خليفة جويجة برجليه جهة غلام وقال ~ وليت على اخر يامي زبالة عند ولادي ، كلامي ولا يتقال عليه لا ، خودها اسيدي نتا نيت وخويها فيا ، ربيت ليك لكتاف حتى تقادو ووليتي تهز صوتك ويديك عليا ، وبلا حشمة بلا حيا كتقول ليا كلامك ضربو في الحيط …كيدوي وكيقرب من ولدو بلوم وعتاب ووجهو معصب ومخنزر ، غلام مزير على يديه بزوج ، وحظة منهم غارقة ف دمها دايرة طريق معاه منين ما داز ، كل كلمة قالها خليفة كيسرطها ليه كيدوزها ويعض على سنانو ويبرد حرو فنفسو ، شنو غيدير يهز ايديه على باه يضربو يرجع مسخوط يموت وميديرهاش كون كان شي حد في زنقة كون الله يرحمو ولكن جات من عند لحنين الغالي ، علا يديه سي خليفة وشنق على غلام من عنقو بيديه بزوج ونزلو لعندو بكل قوتو باش يتقاد معاه وقال ~ تكمل مرت خوك عدتها كيف قال سي لفقيه غتعقد عليها ، ولا ما نتا ولدي ما انا باك ….

كنزز على سنانو حتى تصورو عروقة جهة نواضرو وقال بصوت مغدد وداير ايديه وراه رابطهم مع بعض خايف ميتحكمش فراسو ~ جبددد ديك الحاااالة المدنية وشعل في صفحتي العاااافية نتااااا گاع ، الله يعطييييني معاااا ******. الغرق ماشي غاا السخط

محس غير بطرشة قاصحة جاتو لحنك من عند باه هاد الاخير لي ضربو بلاما يشعر. عمرو هز على ولدو ايديه فصغرو ودارها دابا حتى ولا راجل بلا وعي منو ، طلق من قرفادتو ودفعو على الحيط بجهدو كامل لكبر سنو حتى بدا ينهج اما غلام مازال محافظ على ليدين وراه وملامح وجهو مكتفسرش ، كان منزل عينيه الارض وزغب نيفو كيتحرك بالعصاب ، بدون ميشوف في باه نطق ~ من عندك عسل ابويااا ، هز سبابتو بتهديد كون دارها غيرك ، هز كرسي لاخور لاحو من سطح ، نلوح *****مو ، بحال هاد كرسي ومنحنش ، ضرب على صدرو وغوت ، ولكن ندوزها بگويييرو حيت جات من عندك ابويااا، جبد جوان مصاوب واخا عمرو كما قدام باه ولكن مقادرش خاصو يسكت عقلو لي كيفتي عليه بشي حوايج صعاب على قلبو ، لاح جوان ففمو وقال كيقادو حوايجو وكيمسح دم يديه في الحيط وقال ~ من ساعة اليوم عمرررك مازال مغتشوف ديلمو هاد الوجه ، نتا ل نسا عندك شي ولد سميتو غلااام

غنرجع حيدرة لقديم ل نتا زاوگتي تا نمحييه ، تهلااااااا برمقة اخيرة وهو كيشعل ترويقتو ، ابوووويا !!!!

اخر كلام خرج من فم غلام ،مكانش ضارب ليه خليفة لحساب ومكانش باغي يوصل ليه…..عارفو راس ولدو قاصح مكيرطابش ولكن حنين واخا مكيبينش ،كان كيقول بزوج كليمات وشوية تبوحيط غيكسبو فصفو وياخد موافقتو ،نسا معامن هو ونسا الاسد لي روضاتو الدنيا ، عارفو صعيب ومكينساش وبيديه كبرو على هاكدا و بكلامو قصحو و الدنيا لي سيفطو لعندها هي ل حقداتو… من ديما المشاكل تابعينو و لي خرج فيه عينيه يجبدهم ليه، و يا ويل لي يطاول على شرفو قرجوطتو يدليها ليه …. بلقب حيدرة سماوه ، كان ملك الدرب الكبير و الصغير يحدر ليه الراس ، ودوز ديال بصح ودازت عليه من حبس وتشرد ولكن كان راجل وباقي راجل ، مكيشفر مكيضلم كيخدم بذراعو عدوه الضساارة ولي يجي يدير فيها واعر فدرب يحدهم ليه ..

خليفة فاش سمع منو سمية لي مدبحش ليه عليها قلبو تكمش حتى قال تهد ونقص من وعوريتو شوية وهاهو غيرجع ليها وجهد لي يجري وراه سالا ..

شد القنت وهو كيردد في فمو وايدو كترعد ~ اش داني نهز عليك يدي ، اش داني كون تقطعت قبل منديرها اولدي

خرج غلام من السطح وجهو مكيتفسرش مع حل باب غينزل فدروج لقى ميمتو حدا رجليه شادة و مزاوگة فيه لعتبة الدار ميخطيهاش

الكبيرة ~ هالعار اولدي هااا بزيزيلة ميمتك بقى ليا متقتلنيش وانا حية واش دفنت معاوية و يمشي ليا لي هاز كتافي

طفى لگارو بصبعو ،وتحنى على مو حاط جبهتو على جبهتها ونفسو كطلع وتنزل ~ وراسك اميمتي مسامح فيك و لا في بو غلام غير هو الموت حسن ليا من الكلام لي خرج بويا من فمو داكشي علاش خليني نزيد فحالي راه الدم سخن و غنطيح شي بطانة و نوليو في مرضك و انا مقاد عليه …كانت مكوشة ليه على حوايجو وكتبكي ، ودموعها نقطة ضعفو هز يدو مسحهم وقال بخشونة ~ ميمتي !! الا كنتي كتبغيني طلقيني خليني نزيد راك عارفاني وا حني فيا شوية متزيديش عليا

معودتهاش معاه ، طلقت سراحو طبع قبلة على جبينها وهبط مدردب مع دروج مخلي خوتو لي يبكي لي مخلوع ولي كيتحلف ،نطقت زهرة وقالت لمها بعتاب ~ كلشي بسبابكم ،فضلتو لبراني على ولدكم هاهو زاد صيفطات لول وغتزيد تاني الله ياخد فيها الحق ، غنمشي نجري على الكلبة تمشي لجايحة ل ضربها

جات تمشي وهي تغوت عليها ~ تزيدي خطوة مغادي يعجبك حال فهاد ليل ، وغبرو عليا وجهكم سيرو عطيو ناس لغطا ول خاصاه شي حاجة مدوها ليه خليوني فهمي ننذب ونبكي عليه

مشاو وطلعت لعند راجلها تواسيه عارفاه غيكون مقلق مهما كان اول فرحتو اول واحد سمع منو كلمة بابا وجرب معاه احساس الابوة …لقاتو جالسة في الارض وهاز جويجو واقفة قدامو وحاط عليها راسو وكيخمم مشات حداه بدون لوم ولا عتاب قالت ~ متخافش !! عمرو غيفرط فينا يتنفخ تا يعيا ويتفش ،فين عمر العين علات على الحاجب اسيد الرجال

خليفة عارف اش والد واش مربي هز عينو في لالة العيالات و هضر بصوت مجروح ~ معاوية في الارض و غلام خوا ليا الظهر !! الدايم الله

~~~~

دازت ديك ليلة كيف مكتبها عليهم الله ، لكبيرة بايتة ناعسة تبكي وتنخصص وخليفة حلفو شفرانو لا تسدو زهرة كتحلف على نجمة وهاد الاخيرة كانت حاطة راسها على المخدة ودماغها كيديها ويجيبها بحال مواج لبحر ،عينيها مغسولين من نعاس ، فاطنة ناعسة حداها لابسة جلابتها كتسنى امتى ييبان ضو وتهز مها وتمشي بحالها ، تخليها منها لاختيارها مبغات توقف معاها في اش بغى عقلها اما حتى القلب و الخاطر راه دفناتو في التراب و مكرهت تلبس عليه البيض …بدا يبان خيط الصباح و يوضاح و كيف قال الفجر الله و اكبر ناضت فاطنة بلا متغسل وجها فيقت مها و جراتها قدامها … مجات فين نخرج مع الباب حتى وقفت عليهم نجمة دموعها ملاقين

نجمة ~ واختي واش غتخليني و تسمحي فيا هنا بوحدي

فاطنة مقصحة قلبها ~ معندي خواتات بايعات راسهم قلت ليك ابنت ميمتي زيدي قدامي و الخير لي ديري في راسك نساي اش طاري و عيشي حياتك

نجمة شدات ليها فيدها بترجي ~راني وجه الغراب و عفطتي عفطت موكة واش مكتسمعيش الناس وكلامهم عليا شكون هادي و لا هدا لي غيقبل بوحدة مزال مدخل عليها لي تجمعت سميتي مع سميتو ودا مول امانة امانتو

فاطنة~ ايوا وهاذا لي ناوين يزوجوك ليه كيفاش تا قبل عليه ؟ شفتيه عارفاه كيف داير ، غا جيتي وقلتي اه ، معرفتيه مزوج ولا مدوز ولا سكايري ولا ولا ولا …باغا تهناي من هضرة ناس وتلوحي راسك لزوبيا ،دايرة الخطوة ومعارفاش فين تحطيها

شافتهم لكبيرة واقفين حدا الباب كيتلاغطو وهي تجي لعندهم عينيها كل وحدة قدااش ~ ياك لاباس فين غادين مع الفجر !! نجمة بنتي شكون خسر خاطرك

نطقت فاطنة ~ نجمة جالسة حنا ل غادين ، الله يصبرك على فراق ولدك نتي بعدا حطيتي عليه تراب ،كيتك ل دفنو وهو مازال حي

قالتها وكتشوف ف نجمة كتحسسها بتأنيب الضمير

لكبيرة وهي شادة تاجة من يديها ~ والله منتوما خارجين دابا. مالكم ناعسين في لخلا ، تفطرو وتغداو گاع مديوش عليا انا الا مجلست معاكم وعطيتكم صوابكم القلب مضيووم والعقل مهواش هنا

تاجة حاسة بيها جوبتها بابتسامة~ معذوورة ، راك مقصرتيش … لكبيرة وهي مرجعاهم ~ وا زيدو ،دخلت عليكم بالله الا مدخلو ، زيدي الالة فاطنة داركم هادي رجعات جلسات فوق من قلبها حشمت من لمرا وكان ، بقات جالسة حاطة يديها على خدها وكتشوف مجات فين توصل ثمنية تا بداو يدخلو لفطورات من عند جيران ، كلها شنو جايبة اخر وحدة دخلات كانت صباح هازة طبسيل كبيرة عامر بوشيار حطاتو على طبلة ومشات لعند لكبيرة سلمت عليها مع بغات تجلس محسات بزهرة حتى قالت ~ نسيتي مسلمتي على مرت خويا ل مات ولاخور ل باقي حي

بداو يدخلو لفطورات من عند جيران ، كلها شنو جايبة اخر وحدة دخلات كانت صباح هازة طبسيل كبير عامر بوشيار حطاتو على طبلة ومشات لعند لكبيرة سلمت عليها مع بغات تجلس محسات بزهرة حتى قالت ~ نسيتي مسلمتي على مرت خويا ل مات ولاخور ل باقي حي

تفيكسات في بلاصتها رگدت عليها رجليها وتنملت ، جلست على سداري كتشوف في نجمة وحاضيا ملامح وجهها لي مفهمت فيهم والو ، مشات بعينيها جهة لكبيرة لقاتها كتحلف على زهرة من بعيد تما عرفت الموضوع ماشي غير هضرة ودايزة ..

من ديما صباح وزهرة مكيتحاملوش وحدة متشم لوخرا ، كيتعاطاو في طلعة ونزلة ، بسباب زهرة متجمعاتش صباح مع غلام ، كانت ظل تحرش باها بلي ممزياناش وخارجة لطريق وشي كلام ممنوش ، كانت انانية خوتها باغا تزوجهم بمعرفتها وعرايساتهم يكونو عبدات لعندها ويكبرو ليها شان وديرهم جفاف عندها باش تقول عليهم اه ، غلام من ديما باغا ليه طفلتها بالحق متشدش ليها كانت فينما تشوف وجه صباح تحشي ليها هضرة باش تفرق منو ولدابا مازال على نفس الحال ،داكشي علاش عند بالها غير دوات هاكداك باش تفقصها كيف ديما لكن نظرات لكبيرة خلاو شك يتسلل لقلبها …قربت صباح من زهرة بلاما تبين حدا عيالات الدرب واخا اغلبيتهم عارفينها طلقت من راجلها على ود حب قلبها لقديم ، جرتها من كم بيجامتها وقالت مخرجة عينيها ~ كيفاش مرت خويا ل باقي ،كتدوي على خوكم صغير ولا كتفلاي عليا راك فموت خوك زعمة تهدي واحد شوية ونعلي شيطان

زهرة بسخرية شافت فيها كتسممها~ بقيتي فيا !! عييتي ترطاي وتزوقي وتمشي وتجي حداه ودايرة ليه كي لما لقليل ، سمحتي في بات بنتك على ودو فلخر جا سي خليفة ل مرضاش بيك عروسة عندو، وقاليه ها سخطي ها رضايا تزوج مرت خوك

زهرة لفعة و تبخ و تعيط الشافي مولانا ميهمها خاطر حد تا الا تهرس ليه هداك هو النهار البيض عندها ،ناسية جبر القلوب عند الله عظيم

شعلت في قلب صباح العافية خلات ايديها بداو كيترعدو وكتبكي بلا صوت دموع من عينيها كيتسابقو خرجت من تما كتجري تلاقات بختها في لباب جايا دير صواب تاهيا ضربت فيها ودازت ، اما نجمة معرفات باش تبلات ومفهمت والو ، فاطنة مرا حرة بحال زهرة مدارش بيها قراتها مزيان وعرفت نيتها ، خااطرها مرتاحش على بنت قلبها تخليها وسط منهم…احتراما للجنازة تسنات ناس تفرتك باش تنوض وداكشي ل كان غير خرجو جمعت الوقفة وقالت ~ خليينا ليك الراحة الالة لكبيرة ،الله يجعلها نهاية الاحزان …

لكبيرة وهي كتحرك راسها ~ متشوفي شر فحياتك وامانتكم نجمة راه في حفظ وصون معانا متهولوش عليها

حركت ليها فاطنة راسها بلا وجرت نجمة موقفاها وكتشوف في زهرة مخنزرة ~ امانتنا غنديوها معانا ، بنتي مشايطاش عليا باش بنتك تحل عليها لفام قدام ناس

حركت ليها فاطنة راسها بلا وجرت نجمة موقفاها~ امانتنا غنديوها معانا ، بنتي مشايطاش عليا باش بنتك تحل عليها لفام قدام ناس ، متراعي لحتى حد

لكبيرة دارت بيها الدنيا ~ اش كتقولي الالة فاطنة ، شكون قلل من قيمتها ولا قيمتكم راكم محطوطين فوق الراس

فاطنة وهي كتقاد زيفها ~ كي كتسمعي الحاجة ، بنتنا غنديوها معانا راه مجابتها لا دار لا دوار تجلس وسط بناتك وولادك ، راجلها الله يتولاه برحمتو ، وديك الهضرة غير نسايها ممنها والو قولي لراجلك يسمح لينا زواج مكتاب والفراق جابو الله، الله يجيب ليكم محسن منا

خرجت زهرة حقدها ل حابساه وقالت بغليل ~ ياكما غنطلبوك ولا نزاوكو فيك ، شكون اصلا قبل على بنتكم ولا غيقبل عليها ، هجالة قتالة رجالة، صيفطات لول ولبارح كانت غترزينا ف تاني ، مزيان ملي فهمتو راسكم وراه الباب يفوت عشرة منكم

فاطنة هزت يدها قدام وجها وقالت مگرفضة ~ حطي خمسة على فمك وسرطي لسانك لقيتيني فداركم وكليت طعامكم ودزتي على وجه مك وباك ل مشفت منهم غير الخير اما نوريك وجهك ف لمرايا الا جاتك ختي درويشة وحيط قصير ساهل تنقزيه انا راه سواري عالية متوصليهمش ، سمك غنخليه يموت فيك وشرك راه باين ف عينيك عمرك طفريه شافت فيها عايفة وضارت قالت لنجمة ~ شبعتي وقنعتي ، ايوا دوزي قدامي ماليك عيشة مع هاد الناس …

جمعت الوقفة معودتهاش مع ختها ، فين غتجلس ومعامن غتبقى مع وحدة مكتحملهاش ، كتعيرها في وجها بلا حشمة حتى ل غيحامي عليا داه الله وخلاها وراه لا حنين لا رحيم ….اللهم ترجع للواقع ل عيات تهرب منو ، تدير لقطن لوذنها وتقصح قلبها وتدوز ايام المرة ل غتشوف بشربة الما ، خارجة مباغا لا تسمع بكا لكبيرة ومزاوگتها فيها باش تبقى عارفة راسها حنينة وغتضعف ~متخليناش ابنتي !! انا مزاوگة مسحي كلشي فيا وديري على وجه تراب وما خلا ، خليك معانا نشم فيك ريحة ولدي ل ترزيت فيه عزري ..

ولا تسمع معيور زهرة لي كيوجع القلب ويضر الخاطر ويذبح ~ عطينا تيساع !! فرقتي شملنا شتتي عائلتنا ، وجهك وجه النحس ، قتالة الرجاالة ، كون متي نتي وبقا خويا حي ، الله ياخد فيك الحق …

خرجات نجمة هربانة من شنو كتسمع غادا كتزرب وتعثر في جلايلها بلاما تلفت قلبها نايضة فيه روينة بحالو بحال دار زمانها ل خلاتها مقلوبة سفاها على علاها ، لكبيرة نتفت سلخت عضت وجرات على زهرة وقلبها مازال مبردتش اما خليفة ملي ساق لخبار وهو شاد لفراش ، سبحان من يبيتها فشان ويصبحها فشان الدار ل كانو ضواوها ميطفاوش ولات كحلة مغيم عليها الحزن لكثر من شهر ديال ليام ….والوجه لي كانت الضحكة متفارقوش ولا بحال سحابة منين ما داز يخلي وراه دموع

رجعت هي والحزن حباب وقريب يوليو صحاب ، الدّمعة نَسَاتْها كيف دايرة الضّحكة ….ولات عايشة وسط گَسْدَة ميت بروح حزينة ، مخشية بين ربعة الحيوط مكتشوف حتى حاجة من غير احلامها لقديمة ل عايشة وسط منهم ، تا حاجة متبدلات ، حتى حاجة ما جديدة فحياتها وذاتها من غير جروحها العنيدة ل مازال مبرات ومعرمهم يبراو مادام باقي ل كيرش عليهم الملح فكل ساعة….. لا خدمة رجعت ليها ولا حياة كملتها ، بنسبة ليها عيشتها وقفت نهار مات معاوية ،تا واحد معالم بشنو فقلبها قدها هي ، كتفيق صباح وكتسنى الليل يوصل ، ولات محكوم عليا بالحبس وسط قلب كيدفعها للهاوية….

حاطة راسها على المخدة كتقلب على الراحة ل مبقات لقاتها فحتى جيه وهو يتحل عليها باب البيت ، كانت خديجة ل دخلت لعندها كيف كل مرة ، لا تقل حزن عليها حاسة بختها وبقات فيها ومكرهتش تخفف عليها وتهز معاها واخا غير شوية ، قربت منها وقالت وهي حاضية عينيها ل باين عليه التعب ~ نجمةة ختي !! تكلمي لوردية صاحبتك

نجمة تگعدت كتجمع شعرها بعشوائية وقالت ~ قوليها اختي تدخل لعندي هنا ، شافت في البيت ل مرون وكملت ..وردية ماشي برانية

حركات ليها راسها ومشات تكلم ليها صاحبتها ، خدات مخدة دارتها على الحيط وتكات عليها ظهرها جامعة رجليها لعندها وجالسة بعينين ناعسين ل غير شافو وردية تحلو شوية ،هاد الاخيرة ل من نهار عرفات ل خبار من عند باطرون لخدمة وهي كتمشي وتجي عند صاحبتها تواسيها شوية عارفة راسها واخا تقول ولا دير لي دارت مغتخففش عليها ، دخلت لعندها متاسفة على حالتها ل مبقات تعجب سلمت عليها وجلسات حداها معارفة متقول ، تنهدت بضيم وقالت وهي كترد زغب ورا وذن نجمة ~ كي كتحسي براسك ليوم شوية !!؟

كانت متمالكة نفسها من برا ، ومن لداخل جوفها كيغوت بأنين ~ حمد لله على كل حال اختي ! مالك معذبة راسك تاني ومطولة عليك طريق ، عاذراك عندك وليدات …

جات قدامها وردية كتشوف في حوايج ل كل حاجة من بلاد وفي شعرها ل باينة عليه ممشوطش ، ووجها ل نشف وذبال بقلة الماكلة ونعاس ، قالت بعتاب ~ نجمةة !! فيقي اختي على راسك ، هو راه ماات ونتي شنو باغا تقتلي راسك بزز ، واش باغا تدخلي فمشيئة الله ، مكنتش ضناك ضعيفة تال هاد درجة ، جايا لشهر اصحبتي ونتي على هاد الحال ، واش كتشوفي راسك في لمرايا ولا لا ، شحال قدك تبقاي محبوسة فدار ، غير قولي ليا ؟؟ عند بالك غيرجع بهاد الحداد ل دايرة عليه ، كون كان يرجع كلنا نحزنو معاك ونبقاو نبكيو ونذبو تال غدا ولكن صافي لي عطا الله راه خداه ، شوفي حياااتك !!

نجمة جمعت حجبانها وقالت بردة فعل قاصحة ~ اشمن حياة كتدوي ليا عليها اوردية ، ل حياة ل بنت لحرام ندماتني علاش جيت لدنيا ، الحياة ل ذوقتني لمرار ملي حليت عينيا ولا لحياة ل مكبرة فيا لهنا وراحة البال …هزات ايدها وقالت ليها بتساؤل ~ واش عارفاهم

اش كيقولو عليا ف زنقة والعائلة ها ؟؟ باستهزاء كملات ، كيقولو عليا صگعه ومعندها زهر ، كيجيو بنية يعزيو وغرضهم يتغامزو عليا ويشوفو واش باقي عندي العقل ، ل حياة ل كتقولي ليا شوفيها ، شوفاتني لمرار وعلم الله شنو مخبية ليا مازال

عارفة عندها حق فكل كلمة ولكن هادي هي دنيا شي عطاتو وشي زواتو ، بمواساة قالت ~ تا دابا راه جلستك هاكدا معندها باش تنفعك ، راك غتبقاي كتدوري فنفس لبلاصتك غير كتفكري وتزيدي تألمي، رجعي لخدمتك تلفي الوقت معايا ومع لبنات ، والله ايلا باطرون قاليا والو سيري طلبيها وقوليها بلاصتك كتسناك ، حيدت عليها لغطا ، نوضي اصحبتي غسلي وبدلي ولوحي لحزن دابا ربي يفاجيها عليك

نجمة رجعت عليها المانطة ~ خاطري باقا ملقيتو، عفاك اوردية !! الله يعطيك الستر ،غير خليني نهار غنولي شوية غنرجع راسي وغنجي تال عندكم

دخلت عليهم فاطنة موجهة هضرتها لوردية ~ شفتي اش قلت ليك ، كون گاع عيالات دارو بحالها ورا مماتو رجالتهم كوراه نقارضنا ، هزت فيها نجمة عينيها بملامح باردة بلاما تهضر وهي تنطق فاطنة ~ ايوا شوفي فيا ، كون متي نتي كان غيحزن بحالك ، كوراه تزوج من لعشا والله ميتسناك وبقاي جالسة تما عششي فداك لبيت حتى ينبت فشعرك شيب وعاد ديك ساع ضربي لفگد فراسك ..نوضي اوردية بنتي تشربي كويس ديال اتاي راه الا كان داك الحيط يهضر غيقوليك شحال دويت معاها لا انا لا خوتها بلاما تعيي راسك…

مشات فاطنة مغددة لكوزينة تحط صينية وهي تدور وردية وجهها ليها لقاتها قالبة سيفتها وممحركاش لاحت المانطة عليها بزز ووقفتها صحة ~ نوضي والله حتى تنوضي ، زدتي فيه اصحبتي ومغنمشي من هنا تا نخرج انا وياك نضربو دويرة

نجمة بغوات ~ معندي فين نخرج عفاك اتاي واخا نشربو معاكم زنقة لا

ولات خايفة من زنقة بحال ل داير ذنب وكيتسنى لعقوبة نسات بلي الموت جابو الله ، جلسو كيشربو ف اتاي ويدويو بيناتهم وهي مرة مرة تدوي باه ولا تحرك راسها ، بقات جالسة معاهم وغير مشات وردية رجعات كيف العادة لبلاصتها سدت عليها وهاد المرة مشات لحوايج لعرس ، جبدت شنو جاب ليها وكل حاجة هزتها كينزل معاها شلال ديال دموع ، لقفاطن وجلالب وتواب وخلخال والخاتم ، رجعت بيها ذاكرتها لنهار كيشريو لخواتم ضحكت وبكات فنفس الوقت ذكرياتها معاه كيحطموها ، كيف غدير تنسى ولو تزوجات عمرها كانت تنساه خلا بصمتو فذاكرتها بحلوها ومرها

صبح الصباح عند دار سي خْليفة ، ل ربي بتلاه وراضي بحكمو وصابر ، مات ليه ولد فريعان شبابو متمنيه يكون عريس في الجنة والولد الثاني بيدو حافاه و لذياب الدنيا رماه ندم حتى مخلا لراسو فين يزيد و كلام الكبيرة واخا مصبرو عارفها تهرست وممبيناش، بسيف الكبدة كتحرق والقلب قاليها متعرفي والو وهذا هو حال الواليدين الله يسمح لينا منهم … جلسات نوارة الدار حداه مدات ليه تسبيح وخوات ليه كويس اتاي حاطا معاه شوية سلعة خداه من عندها وقال ~ الله يرضي عليك

باست على كتفو ~ الله يخليك لينا اعمارة الدار وضوها ودفاها وحسها ، لهلا يحرمنا منك ومن صوتك فيها

تگعد كيسبح بيد ولكاس فيد الثاني وقال بصوت حزين ~ بولات الدار طفاو الكبيرة ، واحد عطية الله عطاها لينا وخداها حمد لله انا راضي بالقضاء ديالو..تنهد وكمل ~ ايوا وولدك لاخور حلف ووفى ، قصح قلبو وكفر على والديه لهاد درجة مكنسواو عندو والو …

بلين خاطر جوباتو كتقاد لخواطر على ما تقدر ~ متقولش هاكدا ، نتا عارفو ميفوتناش راه تربى تحت يديك ، وراسو خارج قاصح ليك ، دابا يبرد ويجي يتحنى على رجليك يبوسها راه ولدك ونتا عارفو ميحتاجش نعاود ليك عليه …

خليفة حرك ليه راسو ب ان شاء الله وقال ~ شي خبار على بنتي نجمة !! مشتيها مبقيتي طليتي عليها…

لكبيرة هزات يدها بقلة حيلة ~ وكيف ندير اسيد الرجال ،نمشي ونخليك ،؟؟ حتى تگعد ان شاء الله ورجلي على رجليك ، نطيبو خاطرها على هضرة ل قالت ديك البنت …وهي كتدوي تسمع صوت الباب ل حلاتو وحدة من بناتها وجات لعندهم تجري ~ با !! مي !! هذا دريس جايب شي سخرة صيفطها خويا غلام

تگعد خليفة على وقفتو ملي سمع سيرت ولدو قلب نقز بالفرحة وقال موكض ~ سيري كلميه ليا ابنتي الله يرضي عليك قوليه دخل بغاك با …

مشات لعندو فين كان واقف قدام طوموبيل مقدرش يعتب ويدخل احتراما لحرمة دار وعارف غلام كيف دار ، ملي تعطاه لاذن نزل التقضية ل كان مصيفط ليهم حتى مقاد …مونا ل تكفيهم شهرين قدام من لحم وخير وخمير ياكلو ويفرقو ، حط سخرة وسط الدار وحدر راسو وهو كيدوي مع لكبيرة ~ مي لكبيرة ،قالت ليا بنتكم بلي سي خليفة بغاني…

بنبرة حنينة جوباتو ~ اه اولدي دخل عندو متحشمش راه فلبيت ، خلاتو على خاطرو معاه وهزات مع بناتها نعمة الله لكوزينة وعلى عينيها دموع مخلطة من اشتياق وفرحة وحزن

بادب كان جالس جنب سداري خايف يوسخو بحوايجو ل عامرين دم هاز بين يديه كاس اتاي وعينيه في الارض باحترام كيتسنط ~ غلام ل مصيفطك !! فين هو

ميل راسو وقال ~ خليتو في الگرنة ابا خليفة مازال مسالا مع لكزارة

رجع قاليه بتساؤل ~ جبتي طوموبيل

مصطفى وراه سوارت ~ هاهي ،ياكما خاصكم شي سخرة راه موصيني قاليا شوفهم شنو بغاو قضيه ليهم ..

ناض خليفة مضارب مع جلابتو كيلبس فيها ~ اه عندي شي غرض تما في البوطوار ديني معاك …

قالها بأمر وسبقو هاز عكاز يستند عليه ، مقدرش يقوليه لا ولا يعارضو بحتى كلمة ، اوامرو سيف على رقبتو كيمشيو حل ليه باب طوموبيل وزادو لعند ولد لبلا …….

صوت الصداااع كيتسمع منين ومنين مكتعرف اشنو كيقولو ولا معامن مضاربين، أما واحد مولاتي الريحة ياسلام ملي تشمها وتخرج من تم ،واخة تشري اغلى ريحة تجيك فيها ريحة البطانة والدم ….واقف ثور جيد عنقرتو مدلية وشادينو زوج بحبل من عنقو ومجوقين عليهم الناس وكلها يلغي بلغاه كلشي محمر في دوارتو قبل ميتذبح أما واحد العناصر تمن ل يتقال يزيدو فوقو الف درهم واخة مغيشريو مغيبيعو لكن يحميو السوق ويطلع الثمن باش حتى هوما ياخدو حلاوتهم و يرجع ليهم الصوت ل مشى بالتبراح …من بعد اللغط والمعيور ل خدام تكتابت الدوارة لمولاها وقبل ميهبط الثور للأرض ناض الشناق ومشى ديريكت لواحد الطابلة مكيبانش لي وراها بكثرة الشحم اللي فوقها خبط في الطابلة زوج مرات وهو يطل عليه غلام من الجنب گارن حجبانو

– با غلام اش تم لحم حمير ولا بعير

– غمزو مضيق عينيه ~ وايلي اصاحبي ملي تقصدني متحتاجش تسول كنلعبو هنا ولااا !وجد التوصيل والختم البطانة غطيح دابا

هدرة كتبان بالالغاز لكن معناها باين عند الحرايفية

تكاو الثور وبسم الله دمو غسل الأرض ومول الدوارة عينيه كيضورو وكيقول في نفسو ياربي تكون كبيرة ونقية باش حتى هوا يترزق فيها الله ويترزقو معاه اللي تحت منو مكيناش نص ساعة كان الثور كرشو محلولة ودوارتو مهزوزة والگزارة غير شافو لون لحمو كلشي وقف ويغوت شحال هاد الخير بغيت الربع بغيت النص وقوة الهضرة مكيتسمعش شنو تقال …مسكتهم غير عريض الكتاف بي بوط ديال الميكة واصل لركبة ومونطو كحل بلاستيك غوت بصوت زعزع المجمع

غلام ~ واااااا شاااااا !!!! مالنا !!! البطانة مبيوعة ، دوروو سووق قلبو على رزقكم

غير سمعو مول الشكارة تكلم يعني بلا كثرة الهضرة صافي طار الخير من يديهم كاين لي مشى لضروبات آخرين وكاين ل خرج جهة حوانت الشوى يضرب كفيتات على قلبو يهضم بيهم فقصة الثور لي فلت ليهم…… اما غلام زين الوقفة والسمية جلس في طبلتو وجاه براد اتاي حتال لعندو ، جبد جوان صاوبو على خاطرو يله غينتر منو نثرة يرد بيها مجاجو وهو يوقف عليه باه

~~~~~~~~

فاقت من شرودها على صوت دقان مجهد في باب زنقة ، ونبرة صوت فاطنة كطل وتغوت بشكون ، خرجت من البيت قلبها مفزوع مخلوعة حتى شافت فيها ختها بملامح استغراب وقالت ~ لووستك هادي ل فالباب اش غتكون بغات

نجمة بصدمة معرفت باش تبلات ، مية سؤال وسؤال جاها لراس منهم اش جايا دير، طالعة زهرة تجاوبها على تساؤلها لابسة جلابة ولايحة عليها زيف جايا مع شي مرا ، وقفت قدام نجمة وفاطنة وبلا سلام قالت ~ جيت ندي دهاز خويا وخاتمو وصداقو معندك متسالي فيهم وهو مازال مدخل عليك

سعدات ل قلبو بيض يبغي الخير لخوه و ميتمنى الشر لعدوه ….يسمح فحقو و الا شي حد أداه يكتفي يهز كفوفو لسما و يخليه منو لمولاه…

زهرة ما عايشة لا بقلب بيض و لا بغيرو عايشة بلا بيه و عندها گاع الناس خايبين ، تدوي في عيباد الله و تطعن في شرفهم… توصل لخبارات و تشعل العافية بين الحباب وتفرق لمزوج على مرتو ، ممخلياش بنادم يعيش مرتاح و لا يتصنط لهمو كدخل بين لعظام ،عزيز عليها الصداع والمشاكيل وحتى من ربي شركت بيه و العيادو بالله….

كلامها نزل على نجمة بحال شي رعدة شواتها وهرست ليها الظهر اما حتى القلب ولا غمامة كيتسنى الفرج ، طرقت فيها عينيها و عقلها ترفع من شنو سمعت الحاجة الوحيدة لي بقات ليها من عمر قلبها بغات هاد عدوة الله تحيدهم ليها… ضارت شافت في ختها كتقوليها عتقيني!! وحتى فاطنة مكانتش من العاگزين مراة حارة و تاع الزمان متولدي ويعيشلك لي داز على راسها مشافتش منو زهرة حتى الربع… دارت يديها على جنابها و عينيها خرجو عليها و دلاو …~ ا قياس الخير احنيننتي جايا بلا موجب شرع تفرعي علينا في الباب كنتي كتبني فيه

زهرة عوجت فيها ودوات ~ نتي غا مراة كبيرة رجل هنا و ختها لهيه و كلامي ماشي ليك ،شافت في نجمة لي كانت طافية و حتى الهضرة مقادة عليها ~ … كنهضر مع ختك موكة بغيت دهاز خويا رزقووو هداك و حنا اولى منك بييه

نخضت فاطنة نجمة وقالت ليها بصوت مرفوع~ هادو هوما الكنس لي باغة تفضليهم علينا وسمعي على ودنك خوها باقي ترابو منشف جايا باغة تكشطك فيه رآه كاينين شي كنس فحالها منهم عداد مكرهتش هيا تاخد خوها غير متشوفوش مع مراتو مرتاح ،ضارت عند الزوهرة ولي معاها وشادة في جنابها والحجبان تعلاو وقالت كتحرك فرجليها ~ رآه قالوها دخلناهم من السمرة بغاو ينوضو لينا لمرا ,وسمعي ازهرة !! يا لخبيزة اللي مكتنوض حتى يبولو عليها المشاش

ماشي لقيتي بنتي درويشة وصاقلة قلتي نديرها تحت الصباط مزال بحبابها والا وقفو معاها يضرگو الشمس …..شكون نتي بعدا اللي جاية تسولي على الدهاز والخاتم يكما شاريه ليها ولدك وانا مفخباريش ولا شارياه نتي ومعارفينش داكشي ديالها خلاه ليها راااااااجلها، “كتدوي مطرطقة عينيها وموركة على الهضرة ” ماشي واحد تصحبات معاه في الدورة ، راه الخطبة ولا تفرتكت ومكيرجعوش حوايجها عاد كتاب تكتب وتشهرو بيه بين الناس وزيدون هاد الهدرة كيقولوها الكبار أما مسامر الميدة سهمهم مهراز ويدقو يتخباو

الزوهرة تصدمت ولسانها تلجم ولكن لي قلبو قبيح سرو يسمع كثر من هكا رغم الكلام ل سمعات ل فراسها فراسها باغا الدهاز وربي كبير ~ ايوا يالهجالة حشاك تنشريه أنا ولا ولدي ملقيت مناخد ليه غير منحوسة كحلة القدام قدامها قدام النحس منهار عرفناها شبعت طوطيح مع خويا وبقات تابعاه حتى خطبها ومن وراها مرض علم الله اشنو دارت ليه حتى طاح في الفراش وانا مخارجة اليوم من هنا حتى ندي شغل خويا كامل مكمول متستاهلوش باش يجي على لحمها

فاطمة كلشي تسرطو حتال قلة الأعراض ايه تعاير ويعايروها لكن باش تنقص من تربيت اختها متقبلتهاش

مع كملت الزهرة كلامها تلاحت عليها والزهرة تاهيا مسهلاش

فاطنة مرة وقادة سلخت الزوهرة ولي معاها وختها لي كتفك تاهيا كلات العصا وكركبتهم مع الدروج حلات الباب ودفعتهم وقالت كتنهج ~ الا عندك لوجه تعالي عندي مرة خرا نوريك الهجالات بشحال والا عندكم شي حاجة كتسالوها تعالو رآه بابي قصير ولكن داخلو كبير عليكم

سدات الباب والجيران كلهم كيطالو ملي سمعو الصداع لانو دار فاطنة معروفة بالتيقار ومعندهمش مع المشاكل

طلعت كتنهج لفوق لقات نجمة كيف العادة كتصيق في وجها مشات ليها ديريكت شدتها شدت العمة في الضلمة وقالت ~….هادو هوما لي باغة مزال ترجعي ليهم ها دوي ؟؟ هادو هوما باش باغا تبدلينا ،هادو مزال حتى ممشيتي وشوفي اش قالو الله يعطيك العز أما الذل رآك غرقتي فيه ولكن قالوها ز*ب لمعرفة كيشرگ الكر

“تمات داخلة لكوزينة وتنگر “حگا عطينا الخاتم والدهاز …كنتي تشري فيهم امشگة القدام

جالس على الكرسي وقدامو طبلة الميكة محطوط عليها صينية اتاي برزتو وطفاية ووراق نيبرو ، داير رجل على رجل وكيقاد في مجاجو يله غينثر نثرة وهو يوقف عليه باه جمع الوقفة ودار لگارو ورا وذنيه وهو متكي على يد باه باغي يبوسها ، مع نزل مع نترها منو خليفة ورجع اللور …هز غلام حجبانو وقال معاجبوش الحال ~ بويا !! ضيق عينيه حاضي ملامح وجهو ل باين عليهم البرود ، مالك !!

خليفة وهو مقصح قلبو وعاض على كبدتوو ~ جيت كنقلب على نص ضروبة سمينة ، عندي صدقة ربعينية تاع المرحوم ولدي شوف ليا شي وحدة وقول ليا شحال جاني

بابتسامة خفيفة خازنة وراها شلا كلام مد ليه الكرسي وقال وهو كيحرك راسو ~ ايه علاش لا !! جلس بعدا متبقاش واقف نضايفوك ومن بعد نخدموك …صفق بجهد وعيط على خدام معاه ل جا كيجري ، دفع ليه صينية بجهد حتى تخوى اتاي و كيعض على فمو وقال وهو كيشوف في خليفة ~ جيب شي دكة بنعناع كيفما كيبغيها بويا وعلم دراري يگردو نص ضروبة ، شاف فيه وقال باستفهام ~ تبغيه مگرد ولا صاين

خليفو جالس بهيبة وحاط يديه بزوج على عكازو ~ غير گردوه، معنديش رجال فدار ل يفصلوه ليا وانا دوزت ايامي مشا جهدي باش نتعافر بوحدي

ميل غلام راسو للولد باش يدير كيف قاليه وهز راسو وهو كيشوف فباه وقال ~ مقبولة منك ابو غلام …

خليفة ضرب عكازو على الارض ~ بعدا باقي معتارف بلي عندك بوك

صاط بجهد وقرب كرسيه لعندو فاتح رجليه ~ وا نعل شيطان اباا !! كاين شي حد غينسا دمو راه غا نفس فينا ل حارة ديلمها الله يقطعها اما القلب بيض …

جاوبو بعتاب وهو مباغيش يشوفيه ~ باينة اولدي عندك القلب ، ل خليتي داركم وولديك فوقت محتاجينك وتنفختي وزدتي ، ناس ل بدلتينا بيهم باش حسن منا

غلام مسح لعرق من على جبينو وقاد الكاسكيط ~ عايش غا مجلوق وكنضرب تمارة وهو كيشير ليه للبسو ، حالتي تعطيك لخبار ،كون ما الهم لكحل ل كنعطيه لريتي تلقاني موضر ….كرز على سنانو مغمض عينيه ورجع حلها ~ نساا ابويا !! وقف لعندو وتحنى على راسو ويديه باسهم ليه بزز ، وسمح ليا الا هزيت صوتي عليك راك عارفني كي داير كنتعصب اه ولكن مندوزكمش لحمي ودمي نععطيه ليكم

خليفة وهو كيرخي ظهرو على الكرسي وكيجلس براحة ~ هاد ساعة ستر غا عرض خوك وخليه يموت مرتاح وقلبو ميبقاش معلق بمرتو

صاط غلام بصوت مرتافع وقال بنبرة عالية~ وااااااا بويا نسى عليا هاد الهضرة ،خنزر فيه خليفة وهو ينقص من صوتو ورجع كمل …وراه نتا ل كتشعلني ،كيف بغيتيني ندير ليها ، زواج مو عمرو جا فبالي ونهار تقول ليا تزوج تفرض عليا مرت خويا ، كي غندير نتقلبها مرتي وهي مرت خويا نتا عارفني كي داير عقلي بدا كيضرب على راسو مغاديش تدخل ليه ،جمع الوقفة انا غنمشي نشوف ليك سخرة ونجي

ناض من حداه منرڤز كيدوي مع راسو مغدد ~ قاليك تزوج مرت خوك ، تفو يلعنها حياة !! انا مرتي منبغيش خويا يشوفها وقاليك خود لي كان مزوج خوك

ضار عاطيه بضهرو يلعن و يحسبن على الحياة و فين حطاتو حتى جات في وذنو خبطة حس بالارض لي تحت منو تحركت … قلبو حس بيه وقف وعرف الدقة جايا من جيهة باه طالب الله يكون ماشي هو ولكن غير حرك عينيه جيهتو… بان ليه سي خليفة بطولتو و عرضو في الارض شاد على صدرو… هو في جيه و عكازو في جيه طار لعندو شاد فيه و كيغوت

غلام بخوف تحنى لعندو على ركابيه ~… باااا اش عندك حل عينيك وقول ليااا ماااااالك !!

خليفة كان كينين حاس بنخصة شااداه من قلبو دوا بهضرة مقطعة …~ عيط ليا على شي حد يوصلني لخيمتي نموت فيها

غلام حس بالعافية شاعلة فيه وبوه كيبعدو عليه و شكون هذا لي ببغي السخط من واليديه… متبقى ليه دنيا و لا حلاوتها لعن راسو على ما دار و هز باه بين يديه طاير بيه لطونوبيل لي غير ركب فيها ديمارا نيشان الدار … كيغوت و ينادي لمو بحرقة خايف على ضهرو و غطاه من الشتا وديك الخبطة مبشراتو بالخير … خرجت الكبيرة تتجري وغير جات عينيها على ولدها هاز باه غوتت غوتة خلات بناتها وولدها الصغير فخوتو خارجين طايرين … دخل بيه لبيتو لي غير حطو فيه يرتاح طاح حداه شاد في راسو ~ واش ابويا بغيتيني نقتل راسي غا قولها ليا متغلاش عليك الغالي … جات حداه الكبيرة وعلمت ولادها لخرين يخليوهم غا هوما … حطت يديها على ركبتو وهاد المرة دوات معاه بكلام خلاتو يتقلب ليه المخ

الكبيرة بنبرة حادة ~ ا سمع اولد كرشي و يا الراضع من صدري عامين ، هذا لي قبالتك يخطانا يتصداو علينا الحيوط … باك الا قاليك الحاجة من فمو حدر ليه الراس و سمع ليه تدي الرضا و حياتك تولي لفوق

غلام شاد راسو بين يديه~ … واش نحافي خويا و هاد الراس و نقبل بلي بغا بويا ،راه هاد الهضرة ميقبلها لا عقل و لا انسان خر

الكبيرة محمرة فيه ~ عمر كلام بوك كان غالط و لا تخربيق ديما يگول غا الكلام الحق و لي شافو هو الصحيح … واش غيسخى عليه يلوح ولادو ف زوبيا و لا يخلي حاجة خايبة توصل ليهم؟؟

سمع اولدي !! الدرية راه نقرة صافية نجمة و كيف سماوها و لا ختارها خوك عرفها بنت الذهب ما قايسو حد وديك قصوحية الراس ديرها على كلشي تا لينا حنا ” تمت نايضة ” و قبل منخرج من داك الباب بوك هاديك هي تمغيطتو ملي خوات عليه الدار و الى بغيتي تدفنو حدا ولدو راه قدامك اولد كرشي

باش ميتسماش مسخوط خاصو يدير شنو بغاو والديه، بحالا حاطين سيف على رقبتو وهادشي معندوش معاه يذبحوه وميفرضوش عليه ، مبغاش تدخل ليه لدماغ يتزوج مرت خوه ولا يتزوج من أصلو ، كيف يدير يحسبها مرتو وهي كانت حبيبت خوه ، كيف يدير يشوف فعينيها بلاما يتفكر راه كان كيشوفيها خوه ، كيف يدير حتى يتقبلها كعرضو وشرفو وحلالو وعقدت مع خوه قبل منو ، ضور عينيه عند باه لقاه كيشوف في السقف وكيستغفر ناض من حداه بلاما ينطق بحتى كلمة ، وجهو معصور فيه دم ومزير على يديه ، طلع لسطح ريح فيه كينثر ويسوط كيبرد دمو ويعطي سم لريتو بلاما يحن، حس بخطوات مو جايا لعندو…. هز راسو لقاها جايبة ليه اتاي فيديها ،حطاتو ليه فوق الميدة وجلست حداه وكتدوي بلين خاطر تكسبو بالعاطفة ماشي بزكير ~ متفكرش بزااف اولدي غتمرض ، توكل على الله واش حنا غنبغيو ليك الشر

غلام عفط على الگارو برجليه وساط بعيد ، عينيه ولاو بحال جغمة الدم بلاما يشوف جهة مو قال ~ غادي نتعدى على ذيك بنت الناس وذنبها غيبقى على رقبتكم ليوم دين

لكبيرة حطت ليه كاس اتاي قدامو ~ علاش غتعدى عليها مالك داير جنوي وكتگزر فبنادم

دار تقابل معاها بملامح حادة ~ لواليدة نتي عارفاني كيف داير ، ملايقش لزواج ولا نجيب شي بنت لمرا ، واش كاينة شي وحدة ل غتقبل على واحد بحالي

لكبيرة قاطعاتو كتربت على كتافو ~ مالك راجل وسيد رجال والف وحدة تتمناك زين وطولة وبذراعك معايب من حتى حاجة لا من جاه ولا من جمال

وهو مقوس حجبانو قال ~ عيب من هذا وهذا اشار لقلبو وفمو ، مكنعرفش ندوي بفمي كنسبق يدي …ناض من حداها ، كون كان عيني في زواج كوراه ولدي قدي فطووول انا راه خاطيني لعيالات حيت عارف راسي خضر مكنعرفش نتعامل وقلبي قاصح مكنحنش …

لكبيرة جوبت منهدة عيات معاه ~ ويهديك الله اغلام ، شحال قدك مديرش وليدات راك تبارك الله غادي وكتكبر وحنا مبقاش لينا في العمر قد ل دوزنا ،هذا هو الوقت ل تاحنا نفرحو بيك ونشوفو حفايدنا ونهزوهم بين يدينااا ،مع الوقت غتعلم ونجمةة بنتي مربية ومأذبة وغذبب معاك وغتعجبك علاه خوك غا جاا وبغاها

ضار شاف فيها مشربننن وناوي على خزيت قال بدون شعور ~ وهااا لمرض ل مباغيييش نطيح فيه ، وواش انا كنغيييير عليك من بااا ، وكتجي دابا كتقولي ليا تزوج وحدة كان باغيها خوك ، واش باغين تكرهوني فخويا وهو ميت ومداير ليا والو ، واش باغيني نكفر ولا شنو مفهمتكمش ، واش لهاد درجة انا قليل نفس ومعندي غيرة ،واش كنبان ليكم رعواني وماراجلش ناخد شياااطة ولا شنو

محسش براسو وهو كيدوي وكيهلل وصوتو واصل لفين وفين ناضت لعندو مقلقة وماعاجبها حاال ~ اشمن شياطة كتدوي عليها كنقوليك البنت نقرة صافية م مسوها يدين كتقوليا شياطة واش مبقاتش فيك حالة باك ل مليوح لتحت معرفنا عمر من سابق ، عندااك اغلام توقع ليه شي حاجة وتبدا تندم فراسك وتقول كون وكون عنداك راه والله حتى نعفط على هاد القلب ونشوي هاد الكبدة كيف محانش فينا منحنش فيك ..

غلام هز حجبانو بزوج لسما ولاح كاسطيك من راسو ل سخن عليه ~ دابا حيت مبغيتش نتزوج درتو هادشي كامل وليت ممزيان وزواجي هو ل غينوض با ويگعدو ويخليني مناخدش السخط ، ضرب بيدو على طبلة واااااخاااا اميي !! هز سبابتو بتهديد انا موافق غناخدها غنتزوج بيهاا ،وغنحطها ليكم فدار ولكن بربي وتجيو تحاسبو معايا ولا توريوني كيفاش نتعامل معاها يااما غيعجبكم حااال ، نعوم بحريي معاها باغين غا زواج انا غنتزوجها

خرج مخلي مو كضرب على فمها و شنو خرج منو … نزلت تتجري لعند راجلها وغير وصلت حدا راسو خبراتو بشنو قال ولدها ~ يا نوض اعمارة الدار ولدك راه قاليا ناخد بنتي نجمة غا هو ها العدو لباقيش تقولو مرت خوك ليعود شاعل في راسو العافية راه غا بوحدو كينفر كي الثور

خرج قدام الدار داير كرسي وكاس تاع اتاي حاطو في الارض وكيتسنط لدماغو ، حالتو حالة ومباغيش يتفاوت على دارهم خايف على باه يتزاد عليه الحال ،والديه هما عينيه ويسبقهم على راسو وإِلاَّ مكانش غيرضى يعفط على كرامتو ويقبل بهاد الزواج، ولكن جاتو من لعزاز لغالين ومعليه الا الرضوخ ويحني الراس، مع غيشعل گارو وقفت عليه صباح ل شحال وهي عاسة على دارهم قربات تتسطى باش تشوفو وتلاقا معاه كانت كل نهار حاضية طوموبيلتو واش مبلاصية وغير بانت ليها محيداتش من شرجم تا شافتو خارج ،لبست احسن جلابة عندها واخا معندها خاطر ولكن بينها وبين راسها كتدعي الهضرة ل قالت زهرة تكون غا كذوب وزعيت منها حيت مباغاش تخسرو ، من نهار حست بجنابها وهي كتشوفيه راجل كامل مكمول باغاه وربي كبير واخا عمرو عطاها وجه ولا شافيها شوفة زايغة كانت راسما معاه دار وعايشة معاه الحياة في احلامها الوردية فقط

هز عينو فيها وهو يرجع يتني جبهتو ويسخط على الوضع ~ وااش انا مَنْتْكِيَفْشْ بخاطري

بدون شعور بدات كتبكي ~ غلام واش بصح غتزوج

الحب صعيب وهي طايحة فيه حتال زنافرها منلوموهاش شنو فيه ميتبغاش ، مواقفو زوينة معاها كثار ، وقف معاها وقت ل ماتو والديها وكانت عليهم ضسارة هي وخواتاتها ،كان ل حل فمو عليهم يلقا غلام في الواجهة ، يشوفها في زنقة موقفها شي حد صحة يعطيه قتلة لعصا تا عمر ولد لمرا رجع طاف عليها ، كيف دير متبغيهش وهو ما مرة ما زوج كيدق عليهم مع كتحل كتلقى ميكات من لحمهم حتال عطريتهم محطوطين قدام الباب ، كان حاسبو خير وكيقول يتاما معندهمش خوتهم وانا سخرني ليهم الله وهي نواتها ليها وتعلقات فحبال الحب الوقت ل هو مكيشوفش فيها شووفة من غير ختو ، صارحاتو بتصرفاتها ودار راسو مكيفهمش ، وقالتها بفمها وميك عليها ، مباغيش يكرفص معاه شي بنت ناس وعارف راسو ممستعدش ، تزوجات باش تفقصو وتفقصت غير هي وجات مثقلة بذنوب ،بنت معندها حتى ذنب غير انها تعيش بعيد على باها بسباب طيش ام غير مسؤولة ام عند بالها زواج لعبة كتحرك مشاعر الغيرة فناس ، ام عند بالها زواج وسيلة باش تنسى ،صدقت لا هيا عاشت كيف لبنات لا نسات حب من طرف واحد

غلام حرك راسو باستفهام ومكمل على گاروه ~ علاش كتسولي نتزوج ولا نطلق نتي شنو مشى ليك

صباح كتمسح دموعها وينزلو من جديد ~ ياك اغلام تبدلني بمرت خوك

زادت حكت ليه على ضبرة ناض هاد المرة صاعر ~ شكووون نتي حتى نبدلك فين عمرك كنتي في حياتي باش نبدلك فيقي على راسك راني مراعي ليك ونتي ماباغاش تفهمي ،راني محتارمك ونتي غير كتلصقي ، تفوووو على ميكرووب ضرب لكاس برجليه وتم غادي لدارهم وهي تبعو ممفاكاش ، مع غيضور لقاها سدات لباب وعينيها حمرين ~ دابا وليت ميكروب يااك ؟؟ ميكرووب حيت شارياك بالغالي ونتا باش بعتيني برخيص ، بشيااطة

مع كملتها مبقاتش عقلت على راسها ، شدها من فكها خبطها مع الباب حتى طاحت في الارض سخفانة ، هبطت مو كتجري وتولول ، وخوتاتو غا كيشوفو نطقت لمتوسطة فيهم

مينة بخلعة سابقاها ~ ناااري عنداك تكون ماتت

غلام بدا يخبط في الباب بدووون شعوور ~ الله يعطيني معاكم غااا الحبس ، غترزييوني فرااااسي اميمتي هانا فين كنقولها ليك

بغا يخرج وهي تعرض ليه مو ممخلياهش ~ والله متخرج واخا تعرف تبعني ليها ، سير طلعع لفوق بدل ساعة بخرا ، هبطت تشوف صباح سمعتها كتنين ، راه غا سخفانة ، مييينة اري لياا قرعة لماا

طلعت تجري دير شنو قالت ليها مها وهو طلع لبيتو يخوي عليه لما يبرد نار ل شاعلة فلحمو ويبدل عليه …

كيقولو الذل برمة بلا يدين ل داز يهزها ويقول مسكينة على مزيناتها خصارة مهرسة ،كاينة ل كتحك وتحط حتى وكان تصايب وكاينة ل كتعجبها لمسة الذل وكتبقى عاطية الدق لقاعها من بوطة لبوطة واخرتها تكحال وتولي فوق الكانون في السطح كبيرها تسخن الما باش يعومو ولا يصلقو فيها الدجاج حتى كتولي كحلة ل داز من حداها تطليه وهادي حكاية صباح ل حبها ليه هبال صافي غير دار معاها المزيان ورد ليها البال خاصو يجازيها وياخدها حيت على حساب فهمها راه باغيها وكيتسنى في المكتاب

معرفاش انو هوا كان كيدير غير الخير ومكيشوفش اشنو هيا تشهات ومنها عدد ، شحال من وحدة حلات قلبها حتى ندمات وشحال من وحدة تبعات واحد ممسوقش ليها وطيحات بقيمتها في الارض وشحال وشحال

عزها تعزك دلها تدلك ، الا مدرناش القيمة لراسنا مكاينش ل غيديرها لينا ، الكرامة وعزة النفس مكيتشراوش …مكنقدروش نتحكمو في الحب ونمنعوه يدخل قلوبنا ولكن نقدرو نتحكمو في النفس ل كطلع وتنزل فينا عمرك متجري ورا واحد مباغيكش حيت ديما غيبقى يشوف فيك مدلولة مساوية والو، وتبعي لي شاريك وعارف قيمتك وكيشوفيك مرتو وام ولادو

~~

حلات عينيها لقات سقف مغاير عرفت راسها ماشي فدارهم ، بدات توگض وبدا تفكر شنو وقع ليها ولكلام ل جرح قلبها ، دقة مضراتهاش قد الهضرة ، بغات تنوض وهي تجي لعندها لكبيرة كتجري وجهها كان صفر بالخلعة على ولدها ل كون وقعت لبنت شي حاجة كان غيترزاا فشبابو ، قربت منها كتطبطب على كتفها وكتدوي وهي كتفلي فيها بعينيها ~ صباح بنتي شوية كتحسي براسك بخير

صباح تكعدت حاطا يديها على بلاصة دقة وكتنين ~ شفتي ولدك شنو دار امي لكبيرة

باست ليها على راسها وقالت ~ عدريه ابنتي ل كيدوز منو مساهلش عمرو هز ايدو على مرا ونتي عارفة قيمتكم عندو وقداش كيحتارمكم غير طالع ليه دم ودزتي فالغلط

صباح بدات كتبكي ~ انا مكندويش ليك على ضرب انا كندوي ليك على الغدر !! شحال من عام وانا كنتسناه غا قلبو يميل ويشوفيا شوفة رجالا لعيالات ولا غير يلمح ليا بكلمة والو ، مولف راجل لي يتقدم لمرا وانا مع ولدك درت العكس وضحك عليا وقال انا گعما سهم زواج ايوا وجاي دابا يتزوج وبيمن بوحدة كانت لخوه …كتنخصص بلا هواها ولكبيرة حداها تسكت وتعض على قنانفها وتولول …مناش عيبة انا ؟؟ اش ناقصني ؟؟

دخل عليهم لبيت ونطق بصوت غليظ وهو هاز سبابتو ~ عايبة من دماغك ل مباغيش يفهم انا راه ماليك لا نتي لا لوحدة لخرا انا نتكافا غير مع ك *** خرجي ت *** الله يرحم باط ومك فهاد نهار ولا غنصدق قاتلك

ناضت عندو مو كتدفع فيه وتضرب في صدرو ~ الله يهديك اولدي سيير شوف باك وخلي عليك البنت ، كتغمز فيه وتطلب فيه بعينيها ، خرجاتو على برا لبيت كتبوس في كتافو ~ انا مزاوكة راني مقاداش نزيد همك حتى نتا واش بغيتيني نطيح حدا باك اولدي و خوتك يتيتمو يرضيك هادشي ؟؟

طلع نفس حتا تنفخو مناخرو وبشوفة قتيلة قال ~ غنطلع لسطح نكمي نهبط نلقاها مازال فداك القنت غنلوح عدو ربها من شرجم حرك وذنيه بصبعو ، وهاا وذني منك الكبيرة

مشا ودخلت لعندها جلست حداها وكتقول اي هضرة مهم ترضي خاطرها ~ سمعي ابنتي هاد زواج راه فرضو عليه باه هو راه بحالا غندوزو على عنقو بموس حافي ، مباغيهش وعمرو يبغيه ، لبنت بقات فسي خليفة وعزت عليه وخاف عليها من هضرة الناس ل كتذبح وقال يتزوج بيها غلام يدي فيها اجر اما ولدي راه من نهار سمعها وهو متلف باب دار ومخاصمنا

هي كتدوي وصباح جلالة ل على عينيها بدا كتبرا والغمة ل فقلبها بدات كيزول وخاطرها تفاجا ~ يعني غلام مموافقش من لول على هاد زواج

لكبيرة تنهدات ~ بزز ابنتي وافق وغير على ود باه ل شد لفراش نهار قاليه لا وناضت فيها منذبة كبيرة ايوا وبطليب ورغيب قالينا نجيبها ليكم ومتعرفوني منعرفكم

كتدوي وحاضية مع دروج لينزل ~ ونوضي ابنتي كوراه خواتاتك وبنتك تهولو عليك ياك حاسة براسك مزيان مدايخاش …..جمعت الوقفة صباح كتقاد حوايجها ~ لا وليت مزيان اخالتي كبيرة انا غنمشي دابا خليت ليك الراحة ….خرجت من تما وكترمي سباب عصبيتو عليها بشنو كيدوز ، واخا عرفاتو غيتزوج ولكن يتحط اسمها جنب اسمو على الوراق ماشي هي تعمر قلبو

رد مجاجو ونزل عينيه دايخين دخل لبيت عند باه يشوفو كيف بقى لقاه موگض وجالس حاضي الباب غير بان ليه غلام تقاد في الوقفة ونطق بلا كثرة لكلام ~ وجد راسك غتمشي معايا عند خو لبنت هاد لعشية نعيطو ليهم لربغينية من واجب يحضرو

عض على فكو من لداخل وحرك راسو بثقالة ~ ل تشوفو ابويااا

كانت جابدة الخاتم لي خدا ليها معاوية كتشوفيه و تبكي و تحسر على أيامها و كيفاش مشبعاتش منو ، تحت عينيها كحل ماكلتها نقصات و في صحتها تهدات حتى من وجهها ضعاف بقلة النعاس وكثرة التفكير ، عينيها مصافينش بسباب لبكا ل ولا ونيسها ولفاتو وولفها ، نهارها ولا بحال ليلها و الدنيا ضاقت بيها …

بنادم باقي في الحياة كتفرقك معاه الوقت والظروف و كتحسري عليه وتبكي عليه واخا غيجي وقت وتقدري تشوفيه وعارفاه غيكون بيخير وكتصبري راسك بكلمة حنا ل بغينا لفراق ، ولكن ف الموت كتكون صعيبة ، قاصحة تخسري انسان فدقيقة وفلحظة نتي مضنيتيهاش ، خططتي نتي وياه لعيشة ومشا وخلاك بوحدك فيها قاصحة تصبري راسك على فراق انسان ونتي عارفة بلي عمرك مازال عينيك غتجي على عينيه ومغتبقايش تشوفي وجهو وتستمتعي بضحكتو وتسنطي لهضرتو تفكير فهادشي فحد ذاتو كيمرض والا العقل بقى فبلاصتو هذا من فضل الله على عبادو…

وهي في حالو ضياع وبكاء على الاطلال ما حست غير بالباب تحل بجهد حتى تخبط مع الحيط لتقشرت صباغتو ، كانت فاطنة لي دخلت لاوية على راسها زيف و نواضرها خارجين و باينة في وجها معصبة ، تلاحت على المانطة لي كانت ملوية عليها نجمة جرتها لايحاها في الضس و حطت يديها على جنابها ~ ا ربينا الخلا و الجلا ا مالك اختي ؟؟ درتي ليا جنازة تقول الميت عاد دفناه البارح … اشوري و نوضي تگعدي راه هاد الحالة انا طلعات ليا في الراس !! اويلي مالنا اش عندنا صافي بغيتيه راه داه مولاه ،وهي مطرطقة عينيها كي بومة قالت بأمر ونوضي !! نوضي ،دابزي مع لي خلقك استغفر الله عليها كلمة فقصتيني كون مت انا موحال ديري عليا هاكا

نجمة بعدم صبر بغات تندم ~و اااا حسي بيا اختي واش انا حجرة راه عندي قلب و دم كيفاش بغيتيني نسى ونعيش حياتي دغيا راه مساهلاش عليا

فاطنة ضيقت عينيها فيها معاجبها حال ~ … هاد الهضرة عوديها لداك الحيط وراك ، انا راه دفنت تلاتة بكيت جوج دمعات وراهم و الصلاة على النبي … شتي نتي ا بنت قلبي تشدك الدنيا و ترفس فيك و حرام واش تبقاي في الواحد … الى دينك قليل تگعدي توضاي ليك و سيري صلي جوج ركعات يخفافو عليك عضامك و منها ربي يوقف معاك ونتي شادة ليا خاتم و تخنني عليه ، بكي على ل خلقك يفرج همك ويبرد نارك اما خاتم معندو باش ينفعك

بانت ليها باقا ف بلاصتها مدارت حتى رد فعل من غير كمشت على شنو فيديها ~ واااا نوضي تگعدي تغداي الا باغا دوگيه زدتي فيه نتي گاع خرجات من البيت غادا وتنگر وفايضة بيها ، انا عييت وااه ، لمحزون ولا ليا فدار اش هادشي ومنين تسلط عليا لالة زينة وزادها نور الحمام …تخبط على سداري عاقدة غوباشتها حتى تمات جاية خديجة و فيديها طبسيل لعدس حطاتو على الطبلة معاجبها حال ~ واش كليناه ول البارح وناكلوه تاني ليوم امي كاين غا العدس راه قهرني في لمصران

فاطنة كان ناقصاها غير هاد الهضرة ويفيض الكاس هزات طبگية الخبز عطاتها ليها لراس بلاما تحن ~ ياكما دخلتي عليا الگفة منوعة ومطيبتش ليك ، حمدي الله لقيتي ليوم العدس غدا غتاكلي غا خبز حرفي تا اتاي لي دوزيه بيه راه تقادا هو والسكر ، داك دري راه طيبتو بخاص وارا عمرو يربي الريش معاكم مالو ولدكم ونساكم …

هضرة دازت على وذنين نحمة ل نفسها في مناخرها مرضاتش ، ناضت لصاكها خدت منو اش بغات وتمات جايا لعندهم جامعة شعرها لفوق ولابسة بيجامة طويلة حطات فوق طبلة فلوس الصداق ل كان عطاها معاوية ول ترددات شحال قبل متخسرهم ولكن معندها حتى خيار اخور ، مخازنة حتى شي حاجة باش تجبدها فوقت الضيق ،شراوط ل كانت ظل تشري فيهم راهما في ماريو مكمشين منفعوها بحتى حاجة ،بصوت باح قالت ~ قضي بهادو اختي وجيبي شنو خاصك

فاطنة هزاتهم بين يديها وقالت مخسرة سيفتها ~ هادو لنفعو ليوم غيتقداو بعدو ،رجعي لخدمتك هي ل دايمة ليك تنين ان شاء الله خرجي قلبي على راسك جلاس ف دار معندو باش ينفعك ….سكتات شوية ورجعات تفكرات ، وزايدون اجي نقوليك علاه هاد الراجل مخدامش معندو مانضة جري على وراقيك شوفي هاد الراجل اش خلا ليك واشمن فلوس عندو راه حقك هاداك

نجمة حركات ليه راسها باه بلاما دخل حتى كلمة من ل قالت لدماغها ، غمست معاهم فداك الطبسيل وناضت جمعت الروينة فدوك الاثناء كان غلام مع باه فحانوت بابا عبد الهادي هاد الاخير ل فرح بشوفة سي خليفة وعزاه فمفقودو وضايفهم كيف عادتو

داخل سوق شعبي وبالضبط وسط حانوت الزرع لتاجر معروف الكل كياخد من عندو لنزاهتو والجود ديالو مع ل عندو ول معندوش … كان جالس سي خليفة بملامح رضى وحداه بابا عبد الهادي ل مكيقلش عليه بشاشة مقابلين مع غلام ل ملي دخل وهو يلعب بسوارتو حجبانو مگرونين وعينيه كيضورو على المحال ل كان عامر وناس داخلة خارجة تشري والخدامة كيلبيو طلبات ديالهم ، كانت محطوط قدامهم صينية ديال اتاي، من لونو باين عليه قاصح ومشحر مزيان، مد عبد الهادي كويس برزتو لغلام وقال ~ بسم الله اولدي شرب ليا مع راسك ورد عليا لخبار

هز ليه غلام راسو وضيق عينيه وقال بعدما جغم من كاسو ~ الله يحفظك ليا العميم !! وا دكة واشمن دكة الله يعطيك للصحة

قالييه بصحتك ودار لعند خليفة وقال متأسف على شنو وقع معاهم ~ كي بقى خاطركم شوية غير سمح ليا عرفتها معطلة وراك عارف خدمة والمركوب قليل اما نفوتك لهيه

خليفة هز ليه راسو راضي بالمكتاب ~ الحمد لله والشكر لله ل جات من عند الله مرحبا بيها عاذرك وكون كان العكس متلقانيش جيت عندك ليوم

عبد الهادي وهو كيشوف في غلام ل كان كيبان من جلستو رزين وثقيل ومن ملامح وجهو كيشبه لباه ~ الله يجعل ليك البركة فلي بقى من وليداتك ضرب بخفة على رجل غلام ، تبارك الله بكرك هذا اسي خليفة

خليفة بملعة عين مفتاخر بعطية الله ل جاد عليه بيها فولد بسبعة الرجال ~ هو هذا اول لمصران ، عينيا في دنيا وعكازي في الكبر ، وظهر خوتو ورا ميدي مول الامانة امانتو

غلام شاف فباه ونطق بصوت غليظ ومجهد ~ الله ياخد من عمري ويعطيك الوليد ، نتا هو قوتنا ، وبرضاك باش مكملين في دنياا

بنظرة اعجاب جاوبو عبد الهادي ~ الله يرضي عليك اولدي هاكدا يكونو الرجال ، خود خود !! دوز كاسك واخا هاد المجية ممحسوباش هاد المرا لعراضة عندي فدااري نجلسو على خاطرنا تا حاجة من هادشي ما من مقامكم

قاطعو خليفة وهو كيگعد ظهرو من على الكرسي باش يدوي في المفيد علاش جا~ هاد المرة المجية عندنا حنا وداكشي علاش جيت عندك ليوم ؟؟

عبد الهادي تقاد في الجلسة مقوس عينيه كيتسنى فيه يكمل هضرتو ، نطق ورا مشافو كيشوف فولدو دخلو شك وعرف شي حاجة واقعة ~ ياك شي باس مكاين ؟؟

خليفة حاس بعبئ على كتافو وباغي امتى يلوحو ويصون امانة ولدو ويرتاح ~ كاين كل خير ، غير دايرين صدقة لولدي الله يواليه برحمة الله وقلت نعلمك تجيب مالين دار ومعاهم بنتي نجمة وتدوزو عندنا بعد غدا ،مهما كان راجلها هاداك خاصها تكون حاضرة معانا، وقصدتك نتا فمقام باها و راجل لعائلة مبغيتش نمشي ندق عليهم هما فدار واخا راها ولات وحدة من بناتي

عبد الهادي عجبو الحال حيث كبر بيه ودار بحسابو ودار بأصلو وجا دوا مع رجال وهادشي كيعجبو ، وغير هاد المسافة ل ضرب من دارو لعندو للمحل تخليه يهز راسو برضى ويوافق بلاما يفكر زوج المرات قال ~ الله يااودي ، حسبنا جيينا راه كون ما الموت الغدارة كنا غنتشاركو الدم وتوطد العاىلة ولكن كن فيكون من الخير ان شاء الله ، مهم غير علمني معاش نشوف فاش نجيو ندوز على نجمة نهزها هي وختي ونجيو لعندكم ، الله يجعلها في ميزان حسناتو ، عليك بالدعاء ليه هو ل كيتسال منا دابا

خليفة شاف فغلام ل باينة جالس ممرتاحش وباغي غير امتى ينوض باينة من سكاتو طول الجلسة وهو يوقف كيستند على العگاز حتى طار لعندو كالاه بيديه وگعدو كيقاد ليه حوايجو وكيميلو عليه معنقو من خصرو خايفو يفقد توازنو ويطيح الارض ، بصوت متاثر قال خليفة ~ بعد غداا شفتي ديك طوموبيل ل جينا فيها ، لتافت عبد الهادي شافيها وحرك راسو باستفهام بمعنى مالها ، وهو يكمل خليفة كلامو ونطق ،غتجي ورا المغرب تهزك نتا ومالين دار ودوز ديك ساع على بنتي جيبها معاك لعشا كونو عندنا باش نتسنطو لدرس مجموعين جلستنا راه مطولة ان شاء الله

عبد الهادي وهو كيهز راسو بلا ~ مكاين لاش تعذبو راسكم ،نشوف طاكسي كورسا ونوصلو تال عندكم

شد ليه خليفة فيديه وهو كيترعد ~ وا صلي على نبي وتسنط لهضرتي مهما كان راني كبر منك حمد لله راه ولينا عائلة ومابيناتناش هاد الحسابات

حدر ليه راسو باحترام ~ عليه افضل الصلاة والسلام ، كلامك هو الكبير واا عليه اسيدي لعشا تلقانا عندكم

وهو خارج بيه ولدو على برا قال ~ دخلنا عليك برزق ،خلينا ليك الراحة وسلم عليهم

عبد الهادي سلم ليه على راسو ~ الله يزيد فراحتك والله يصلح ليك الاولاد …ودع غلام ل مشى بنفس الوثيرة ل كيمشي بيها باه مخليه غادي براحتو ممزروبش ،حليه الباب القدامي عاونو حتى جلس وجمع ليه جلايل جلابتو وسد الباب ..

واحد قد ما كان قوي كيولي ضعيف قدام والديه ، قد ما كان قبيح كيولي ضريف حدا والديه ، قد ما كان كيمشي رافع الراس غيحنيه لله ووالديه ،وقدما قسات عليه الدنيا قدام والديه كيبان مرتاح ..ماشي غلام لي يطيح بكلمة باه وماشي غلام لي يخليها في قلب باااه

الموضوع كلو ضارو في راسو أما حتى قلبو ممضرورش بيه مكيعرفها مكتعرفو مبيناتهم ايام وليالي كانت مرت المرحوم وكان غيحطها في مقام خوه ل رعاه والعناية بانت عليه لكن ربي حسن من الخلق كاملين وبغاه

دابا خاصو يدير الخاطر ويكابر للوالدين لانو عْمَرْهُم ماشي قد لي راح هوا يقدر يصبر ومگوى الروح اللي غتعيش معاه لكن مزال شديد ومزال الدنيا تمرمد فيه كيف بغات ومزال ميقولش آح لكن باه كبر وعيا والمرض على سبه معاه وباغيه غير يرتاح أما راحتو هوا مع الايام غتبان

ربي مكيسد باب حتى كيحل باب ، كانت هادي هي لكلمة لقالتها ليها عايشة وهي جالسة في سطح تجمع في الحوايج ل صبنات ، بزز منها طلقات سراح نفسها من البيت ل كانت سادا على راسها فيه ، فكت عزلتها وخبات حزنها ، ستسلمت للامر الواقع حيت معندها عليه مهرب وقررت تسمع لهضرة الناس ،نهار لول تبكيها ، ونهار تاني تقلقها وايام ل بقات تكتاسب مناعة ضدها ودوزها كيف دوزات شلا هضرة قبل منها …هابطة هازة شبكة بين يديها ودخلات لدار كان ليل كلشي شد بلاصتو وتكى ما عادا فاطنة ل قلبها شاعل فيه العافية وغادا جايا حفيانة فداك لمراح صوت گدامها كيتسمع بقوة مع كل خطوة دارتها ، عبد الله تعطل على وقت دخولو لدار وهادشي خلاها تشطن ، لبست جلابتها وشافت فنجمة بزز باش قدرت تخرج الهضرة ~ انا غنخرج نشوف درب ودراري متعرفي يكون جا وجالس مع صحابو ولا شدو شي حد بالهضرة ، حطت يدها على قلبها ، ياااربي رااه وليدي انا مزاوگة متوقع ليه حتى حاجة تجي فيا ولا فيه

حطات نجمة الشبكة وهي كتشوف في المگانة كانت تسعود مكرهتش تقول لختها متخافيش ولكن هي بروحها رجليها بداو يفشلو عليها الا تعطل سبعة تلقاه فدار فين غيكون مشا فهاد ليل ~ تسناي رجلي على رجليك اختي نقلبو بزوج ….

فاطنة نوضت خديجة من تحت لمانطة ل كانت كتقطع بالوجع ~ تگعدي ردي البال الا جا ورانا خوك قوليه مشاو يشوفوك فين تعطلتي

وهي كتنين ناضت بزز منها شادة على كرشها ~ واخا امي سيرو ….خرجت هي ونجمة ل كانت لابسة جلابة ولايحة عليها زيف مغطية بيه تخبيلة شعرها يله عطاو وجهم لريح الزنقة جات قاصداهم وحدة من عيالات الدرب كتلاوح فرجليها وتزرب فمشيتها باش تشدهم ~ فاطنة واا فاطنة تي مالك وقفي !!

وقفت على قلبها وهي مخبية حالتها اسرارها مكتبغي تعاودهم لحد ~ ياك لاباس مالك …

مدت ليهم حناكها تسلم وتبرگك ~ غبرتو شحال مشفناكم ، شافت في نجمة وقالت كتدوز ايدها طلوع ونزل على ذراعها ~ ذباليتي وضعافيتي يا صگعه ما عندك زهر بحال ختك تقولو مسقيين من نفس المغرف

فاطنة شعلت فيها بحال بوطة ~ سيري لدارك تكمدي وتخشاي على البرد وشدي لسانك عندك لعواشر هادي ومبقى لرمضان والو ونتوما مقلتو حد سلامة ياربي ،جرت نجمة من يديها وقالت معصبة ~ زيدي خلاص قبل منصدق مبردة فيها غدايدي ونشتف عليها غا حاضين عباد الله

العقل فاش كيدوخ كيخلي الواحد ميعرف ما يدير و القلب فاش كيتغول كيرجع مولاه هبيل فاطنة معرفت باش تبلات ولدها مبقاش عاجبها و حالتو مكتبشر بالخير ، عينيها في الزناقي و فين ما لقات شي مجمع تلوح عينيها على ربي يبان فلذة كبدها ،غدا و تدعي ربي يكون بيخير و الاستغفار محيدش من فمها يا لاه غادة تبدا تبكي و طيح في دموعها حتى بانو ليها شي دراري جارين شي حد ، بقات غادة و تقرب حتى بان ليها ولدها راسو محني و رجليه طايحين و مجرورين فمو محلول وريگو دايزين عينيها جات عليه بحال العافية طفات ليها فيهم ، طارت هي و نجمة كيجريو عندو تتخبط ليه في حناكو و تويل و الدموع لقاو طريقهم في حناكها معرفت شكون تسول من غير واحد في الدراري لي هضر و قاليها ~ لقيناه مليوح حدا الجردة ا خالتي فاطنة

راجل بطولتو وتجريدتو ، فيه ولدها وخوها ومول دارها ، وغير كحبتو تخوف ولادها ويديرو ليه منها حساب ، عمرو قلقها ولا عز فيها فلوسو ولا قاليها مي عييت وطبت من كلمة ارا وبغيت تشوفو دابا طايحة ليه اليد مع الرجل ، بدات تخبط في جنابهاا وتغوت وتعدد عليه وهو مازالحي ~ وااااا وليييييدي ، واناري مالك

هزوه ليها لولاد لدار وعيالات الدرب كل وحدة تسول من جيه مال عبد الله ياك لاباس عقلها كان مرفوع وتعدد بالغوات تشوات دخل لبيت عينيه غايبين كتشم فيه ليكون شارب ولا شام ريحتو كانت كيف موالفة وهو ماشي ديال هادشي ،حط ايديه على راسو وكيغوت ~ وااامي وااامي راسي راسي

فاطنة جالسة حدا ولدها هو ينين وهي تنين معاه كون بيديها كون تقاسمت هي وياه الالم ل كيحس بيه ، كانت طافية عليهم ضو بطلب منو عمرها طاحت ليها فالبال الولد كان صحة سلام حتى يشد لفراش ، كانت كتترطى فبلاصتها بحال ل واكل سم واا عاضة على قنانفها وقلبها كيبكي دم ماشي غا دموع ، جيران كلها شنو قاليها

” مخطي سحور …موكلينو .. شقيقة ..سببي ليه .. جيبي لفقيه ….تلفت وشدت الارض كلها قصد دارو ينعس وجفونها حلفو لنعسو، غا يتحرك تتحرك معاه يتوجع توجع معاه بقاو على داك الحال حتى صبح عليها الحال غا بان ليها ضو سيدي ربي طارت على جلابتها و خرجت تجري هاديك رجليها حتى لعند العطار ، ولي لقاتو تشكي عليه على ربي يعطيوها حل و داكشي لي كان سمعت كلام العطار لي قاليها ولدك يا ضارباه المكلفة يا مسحور و تبعي الساهلة عاد دوزي لصعيبة ، عطاها تخلطية الكافرة وداعية ربي تكون غا سخانة و دايزة ، خدات لي خصها و الطريق و الجهد لي داها رجعها كون تقول الطير انا نطير في بلاصتك متكفيهاش….عبد الله راسو قاصح ومكيامنش بتشعويذ وكون جاتو وهو صحيح وقالت ليه اجي نبخرك يطليها ولكن لقاتو مسالي ولسانو راگد وإيديه مقاد يهزها كان كيف الامانة فوق داك سداري بقى ينوض يقضي حاجتو مع وقف مع طاح على طولتو مردوخ نجمة بلاما تحس جرات لعندو كتدوي بصوت مرعود ~ خوويا مالك !! اويلي وقف على رجليك وتوگض مولفناكش هاكدا…..

بعينين ناعسين وفم كيسيل ~ هانا اختي هانا !! بغا يكابر ومقد گعداتو ومكان عندو جهد بدات تبكي بلاما تبين وبكل قوتها واخا غا مرا ومعندها صحة جات قدامو وخدات ايديه دارتهم على كتافها وركباتو على ظهرها غادا محنية وربي نزل عليها جهد اضعاف ملي كانت كتصور ،كيبقى خوها وواخا كان كيقسى عليها بعد لمرات ولكن عمرها متمنى ليه شي حاجة خايبة تصيبو ، تلاقات ليها فاطنة ل كانت طالعة تنصل جلابتها من دروج غا شافت المنظر ل قدامها تسابقو دموع عينيها عرفتو وصلت فيه لعظم ملي خلاها تركبو شافت في خديجة شوفة شرانية ~ شفتك الكلبة كتفرجي فيها بلاصة متعونيها ،

خديجة تاهيا كتبكي خافتو يموت وتيتم عوتاني ~ مقدرتش امي مقدرتش ، تنهدت فاطنة وقالت ~ جبدي ليا مجمر من سطح عمريه فاخر وشعليه واريه …قالت كلامها ودخلت معا نجمة لطواليط خلاو حتى كمل و غسلو ليه ورجعوه لبلاصتو…جابت ليها خديجة مجمر لاحت فيه تبخيرة دورتها ليه على راسو على ما توجد ليه نجمة شنو ياكل وبدون فايدة حتى حاجة مبغات تدوز ليه مع قرجوطو ، دقة كانت صحيحة فاطنة عيات تخمم ومجاها حد في البال من غير زهرة شافت في نجمة ل كانت معاها ف البيت هي وولادها لوخرين وقالت ~ ولدي عايش جمب الحيط عمرو اذى شي حد هادي متكون غير ديك لفعة تاع طفلتك ،عائلة تاع لويل ل دخلتي علينا نهار حطات رجليها فهاد دار تقلبت حياتك وحياتنا

خلاتها تخوي قلبها وتبرد فقصتها فيها شنو عندها مدير الحاجة الخايبة ضروري تلصق فيها سوا كانت بيديها وسوا بلاش ،بقاو على داك الحال نهار بطولو كل ساعة يدخل واحد من جيران يشوفو عبد الله كي بقى ويزيدو يحكو على ضبرة نجمة تا تسيل… ولات مخزونة في الكوزينة مباغا تشوف حد حتى مشا كلشي ورجعت جمعات دنيا وسيقت يله غترد ليهم مياكلو وهي تسمع صوت لغا في دروج ،صوت مألوف وعارفاه تنهدات وحسات بواحد الراحة وعينيها تحلو على وسعهم مشات لعند فاطنة لبيت كتجري وقالت ليها ~ وااقلة بابا جا سمعت صوتو اختي

فاطنة فكت عگدت زيفها وغطات عنقها وهي كتقاد في الجلسة ~ سيري حلي الباب دغياا

مع غتخطي الخطوة سمعات صوتو الغليظ كيدوي قبل ميدق ~وا مااااالين الدار !! كااين شي حدد هناااا …

بمشية مزروبة حلات عليه كان جاي ايديه عامرين كيف ديما ملي كيبغي يدخل على خواتاتو ميقدرش يدخل طويل خاصو يجي ويجيب ، شاف فنجمة وحط ل فيدو مبتاسم وحل ليها ذراعو ~ اهلاا اهلا بنتي نجمة كي بقيتي

تحنات على يدو باستها ورجعات عنقاتو مخشية في عنقو ومبغاتش تطلق بحالا كتشكي عليه وكتقوليك ما لابتس والو ، شفتي اش وقع ليا واش جرا ليا وزمان لغدار وشنو دار فيا ، قالتها فخاطرا وكتفات بصمت حس بيها وباس على راسها وقال~ الله يرضي عليك ابنتي والله يصبرك رضاي بالمكتاب ، ربي كيبغيك بزااف

تنهدت وسط منو وزيرت عليه مبقى ليها تا حضن اخور حنين من غير حضنو، سمعت حس في دروج هزات راسها من على صدرو وهي تشوف تاجة طالعة درجة بختها تلقات ليها شاداها من يديها وواخدا رضاها ~ مي تانتي جيتي ؟؟

تاجة وهي شادة على قلبها مقاداش تهضر بنهجة ~ جيتي ابنتي جيت كيدايرة شوية ..حركت ليها راسها بحمد لله ، ورجعت قالت تاجة ،وا بلاتي ندخل سخفوني دروج

سمعو صوت فاطنة ل كانت واقفة قدام لبيت كتدوي بصوت عالي ~ دخلل اخويا زييد مالك واقف تماا تعالي امي …

عبد الهادي مشا لعندها سلم عليها ~ كاين شي عشا ابنت بويا

فاطنة بخاطر مغيرة ~ الا مكان نوجدوه مرحبا بيك دخل صالون …كي دايرة امي لاباس زيدي !!

خلاها تسلم ودخل مع رمى عينو مجات غا على سداري ل ممدود فوقو عبد الله مشا لعندو بان ليه ناعس ووجهو صفر عرفو ماهواش باستفهام قال لختو وهو مازال على وقفتو ~ مااال ولدك !!

بحالا خشا صبعو فعينيها بدات تبكي وتنخصص وصدرها يطلع وينزل ، تجمعو حداه كاملين وهي كتعاود ليهم شنو وقع ليه فهاد يومين ، شافيها مخنزر وبعتاب قال ~ فعوض متبخريه بتخربيقك جيبي ليه شي فقيه يقرا عليه شوية القران ولا قرايه عليه نتي ولا بنتك دري راه بغا كلام الله ل مكاين محسن منو

فاطنة ~ منعرفش اخويا راك عارفني كنصلي غا بالْحَمْدُ اش غنقرا عليه ،انا درت توكيلي فلي فوق مني والا مولاش شوية غنشوف شي فقيه ولا نزورو فشي سيد

جوبها بحدة ~ اشمن تزورييييه تي نعلي شيطان اختي ، هذا راه كيتسمى شرك ،سبحان ل ميعيا دري خدام ليل نهار شموسات وطرقات غيكون عيا

تاجة كانت حاطا يدها على راسو كتقيس فيه~ راسو سخون عنداك تكون ضارباه سالمة ، حطت يدها على حنكها بخوف وبالها تشوش ~ عندااك يوقع ليه مجرا لراجل نجمة

فاطنة تحنات على وجه ولدها كتبوس فيه ~ اناا متاايبة الله ،الله ينجيه ياربي وتحفظو ليا غيولي لاباس ويرجع يتگعد

عبد الهادي باطمئنان ~ مغيكون غير الخير ، سكت شوية قبل مينطق ، فيناهيا نجمةةة !! بدا يعيط ليها ، تعالي لعندي ابنتي بغيييتك ….

جات نجمة لعندو كتمسح ايدها ل عامرة ما بسربيتة ~ هانا ابابا بغيتيني ؟؟

فاطنة وهي كتغمز فيها تمشي لكوزينة ~ خليها اخويا توجد صينيا بعدا واش نجلسو على ميدة خاوية

وهو كيشوف ف مگانتو كان الحال بدا يمشي والوقت ل دار فيه مع خليفة وصل ~ شي ناس كيتسناو فينا خاصنا نمشيو واتاي غنشربوه عندهم وتانتي كنتي غذا معانا ولكن على قبل حالة ولدك غنعذرك جلسي قابليه

كيدوي بأوامر وبكلام غير قابل لنقاش

فاطنة حركات راسها باستفهام وهي هازة حاجبها ليمن ~ شكووون هادو ل كيتسناوكم ، فين غادين مع هاد الوقت

نجمة لا تقل على ختها فضول كانو بزوج بيهم كيتسناو جوابو ، نطق ببرود بسيف وهو ما عارفش شنو واقع معاهم ~ نااسك دايرين الربعينية لولدهم !! داز عليا شيخك البارح وطلبني باش نمشيو عندهم هو دار بأصلو وتا حنا مخطانا صواب لازم علينا وعليك نتي ابنتي بالخصوص تمشي راه راجلك هذااك ل مات

تقادات فاطنة فجلستها وقوست حجبانها ما عجبها حال خنزرت بغات تنطق خافت تبلز شي كلمة متعجبش خوها ساعة دارت بناقص وكتافت بقول ~ الا بغات تمشي تمشي انا كي قلتي منصيبش واخا راه واحد صوااب درنااه معاهم واخا بنتو مكتعرف صواب

عبد الهادي خسر سيفتو معاجبو حال ~ شفتك ابنت بويا غا كتخرفي ،سوق لعيالات مدخلينيش ليه انا عطيت كلمتي لراجل وباقي متزاد ل غيهبطها ليا لأرض ، غرفتي شنو !! مغندويش معاك ل فيك كافيك هز عينو فنجمة ونطق بصوت مجهد ~ لبسي جلابتك ولوحي عليك زيف ويله زيدي قدامي

معرفت باش تجاوبو مشات لبيت كتلبس مثقلة يديها ومخدمة دماغها ل كان حاير بين يقبل ويرفض واش تمشي ولا تجلس واش تعاود ليه شنو وقع من نهار حطت رجليها فديك دار ولا مكاين لاش ، واش تقوليه على شنو دارت زهرة ولا تخرجو داك سوق مخلاش ليها الفرصة حتى تشاور مع فاطنة وقف وسط الدار وكل مرة يحنحن بفينك وزيدي وسيد كيتسنى حتى خرجت لابسة جلابة من تاوعها كانت بالكحل وشال بنفس لون وجها طبيعي مدايرة ليه والو لبست صندالة وخرجات قدامو مخلية ختها وراها كتغدد وتسب فيها بخاطرها مكاين غا مدلولة وقليلة النفس كتشاير ، لقات قدامها في زنقة طوموبيل ركبت كيف دارو هما ومشاو ل طريق ل قلبت عليها مواجيع باقي طرية وفكرتها في نهار الكحل لي داز فحياتها كاملة ، النهار ل فقدت فيه نور دنيتها ول فقدت فيه بريقها وسعادتها ول عرفت معنى تعاسة ديال بصح …

كان صوت طلبة مسموع من بعيد وخزانة مبينة كبيرة شادا من راس راس ودنيا عامرة مع نزلو من طوموبيل تلقا ليهم شيخها ل كان داير عكاز وجالس على الكرسي ، شافهم ووقف سلم على خوها ومها وعنق نجمة ~ هادا هو العاهد ل عطيتيني ابنتي ،خنتيه ومشيتي !!

مجوباتوش عقلها مرفعوه وعينيها كانو مفيكسين فشنو كتشووف قدامها وقلبها كان كيترعد

واقف فباب الدار حاضي بعينيه كيف غادا دنيا واش كلشي مقاد ومكاين صداع بحكم ليل واخا حتى حد ميتجرأ على دارهم بالحق خاصو يوقف برجليه على صدقة تا دوز كيف بغا باه وكيف كيستاهل خوه ، لابس سروال بارا ف الخزي وتريكو نص كم بالكحل مزير ليه على صدرو لمزغب ومبين عرض كتافو ،مرة مرة كيدوز ايديه على لحيتو ل كانت كحلة مكتخللها حتى بيوضة من ملامح وجهو تعرفو رجل عربي قح حجبان غلاض وعينين مشفرين وجه صافي سبحان من خلقو وبدع ف حسنو ، كيهز ايديه مقوس على عينيه وهي عينيها عليه ممتيقاش شنو كتشوف ، تبهضات وبقات واقفة بحال حيط جامدة وكتسول راسها ~اش هادشي ياربي واش انا مزال في الواقع ولا صافي عقلي تصوطا وبدا يخرج على طوعي ….

ايدين خليفة ل تحطت على كتافها بزوج بإطمئنان خرجوها من حالة ذهول ل كانت فيها ، وبرمشة عين هزت راسها لقاتو تبخر مكاينش فين كان واقف ، دورات راسها كتقلب باش تزيد تتاكد ووالو بحال شبح جا يلهيها ويشتت انتباهها وتفكيرها وتبخر ، رجعات للواقع بعدما غاب على عينيها وعاد قدرات تسمع الهضرة واللغا وعتاب شيخها ليها ، شافتهم داخلين وحتى هي دخلت معاهم ومازال اثر الصدمة باين على وجهها…..

وسط صالة كبيرة طولها كبر من عرضها مفرشة بفراش يليق بعائلة سي خليفة ، زوج طوابل خشب دايرين فوق كل وحدة فيهم صواني عامرين بفنايقهم وطباسل الحلوة واللوز والگرگاع والتمر ،لعيالات كلشي قاطع الحس وساكت كيتسمع غير توشويش مرة مرة كلشي كان كيتسنط لدرس ل كيعطي لفقيه داخل لخزانة ول كان على الموت والصبر….

الانسان بعد فراق واحد من لحباب كيحزن بإخلاص ناسي قوله عز وجل للحبيب المصطفى “انت ميت وهم ميتون “

والموت مكتابة على جميع من في الأرض لقوله وكل من عليها فان ويبقى وجه ربك ذو الجلال والاكرام

لفقيه كيعطي الدرس بحكمة وموعضة وبتأني مخلي كلشي حال وذنو وهو كيسمع ليه ومنهم نجمة ل جالسة وسط عائلة تمنات تكون وحدة منهم وتمنات تدخل لهاد الدار ف الفرح وتمنات يزفوها بزغاريت ويستقبلوها بتمر …تهزو ليدين كيقولو امين ورا دعاء وغير كمل الحديث تسمعت كثرة الهضرة ، ول عندها شي لسان طلقاتو لكبيرة بدفينة بيضة ودايرة شمار على ظهرها ومحنكة حد وذنيها لكل وحدا منهم مزينة بنصوصة لفروج جات بين نجمة وتاجة وجلسات ايديها كدوزها على ظهر مرت ولدها بحنين وقال بصوت دافي ~ فرحتي منعطيها لحد ملي جيتي ليوم ، قلبك كبير ابنتي واخا داكشي ل قالت ليك بنتي اخر مرة فهاد لبلاصة نيت حدرتي راسك ومشديتيش فقلبك نهار على نهار كنزيد نتيقن بلي نتي بنت ناس ووالديك من ناس لخيار وولدي الله يرحمو عرف يختار

نجمة تلجم ليها لسان معرفت باش تجاوبها ،فهمت من هضرتها بلي معارفاش على مجية زهرة لعندهم هاد الاخيرة ل مبانتش ليها كدور حسها مكاينش ،بلعت ريقها وقالت بنية وهي حانية راسها ~ منقدرش نقول على كلام بابا لا

باستها من حنكها بعفوية ~ الله يرضي عليك !! دارت لعند تاجة ل جالسة فوق نفسها ~ واحد فاطنة علاش مجاتش معاكم ياكما باقت مقلقة دير ديك ساع غير على وجهي راه جايا عندي وولينا عائلة

تاجة باستعذار ~ قالت ليك غير سمحي ليها خرجو ليها شي ظروف مجايبة ليهم خبار

لكبيرة حركات ليها راسها عرفتها واخدة فقلبها من جهتهم ~ والله الالة تاجة ومتساليني حلوف حتى من داك نهار جريت على بنتي ولليوم مجاتش شحال وهي تبكي قبيلة فسطح على خواتاتي تا شبعت ورجعت لدارها ، مشفتش في وجهها لا أنا لا باها گاع ل تخسر خاطر بنتي نجمة من هنا اقدام مكيناش غنخليها حتى تعلم

كيفاش من هنا لقدام ، لاش كتلمح ~ كان هذا كلام نجمة فنفسها كتحاول تفهم اش بغات لكبيرة هاد الاخيرة ل عارفة كل كلمة خرجات من فمها فين صادا عارفة بلي ليوما نجمة غتخطب من عند خوها وتكون لولدها …تدفع لعشا وتطعمو ناس ودازت ربعينية على أكمل وجه خرجو لعيالات لقراب لديورهم وعائلة لبعيدة كل وحدة شنو كدير ، سمعتو صووت خليفة كيدوي بصوت مسموع وهو طالع مع الباب ~ خويييو طريق !!

خليفة كان متقدم لمشية ووراه عبد الهادي منزل راسو حتال الارض تابع غير رجلين أبو غلام فين غادين ، دخلو لبيت جلاس فنفس طبقة فين كانو لعيالات غير هو وياه بوحدهم عقل عبد الهادي تشوش وبالو تشطن ملي قاليه عندي ليك شي هضرة وهو يفكر فشنو بغا يقول ، حط خليفة العكاز ودار المخدة ورا ظهرو باش يريحو وشابك يديه ، وقت كيدوز وزوج ليل قربات توصل وخاصو يدخل لدار حنحن وهو كيشوف في خليفة وقال بجدية ~ دخل في موضوع ، خاصني نمشي تابعاني غدا الخدمة ومالين دار غيبقاو مشوشين وبلا نعاس الا مجينا

خليفة وهو مبتاسم ~ تسنى بعدا يجيبو لينا غير شي كويس تاع اتاي باش تحلى لينا الجلسة ونبللو بيه ريقنا راني عاد بغيت نريح معاك وندويو ..

عبد الهادي ~ واحد الخير راه كليناه غير قول بسم الله وبدا منكذبش عليك بالي بدا يتشطن ياك شي باس مكاين

خليفة ضار لعندو مقابل معاه في الجلسة وشافيه وهو كيدوي ~ مكاين غير لخير !! ايوا اش غنقوليك اسي عبد الهادي انا مساخييش بنسوبيتكم ومبغيتهاش تسالي هناا ؟

تگعد شوية وجلس على جنب سداري بانتباه راجل بحالو ماشي بليد لدرجة ميفهمش ، مع قال الكلمة عرف صلب الموضوع شنو هو ولكن بغا يتأكد ضيق عينيه وقال بأمر ~ كمل هضرتك بعدا اسي خليفة انا كنتسنط ، هز حاجبو بتأكيد بان ليا ففمك شلا كلام !!

خليفة بابتسامة خفيفة نطق ~ انا مبغيتش بنتي نجمة تخرج من هاد دار ، بغيت ناخدها لولدي غلام وراك شفتيه تبارك الله متعيبو تا حاجة بذراعو وبجيبو

مدار حتى ردة فعل ومفكرش زوج مرات هز راسو بلا وقال ~ صعييب اسي خليفة !! تا حنا مسخيناش بنسوبيتكم ولكن ل قدر علينا الله هو هادا ، اما باش نعطي درية ختي لولدك لكبير بعد ما مات لوسطاني قاصحة عليها وهي مازال حازنة وجرحتها جديدة راك عارف لعيالات دايرين كي دجاج رومي باش بحالنا

جاوبو خليفة بارتياح وبلاما يضرب حساب للسانو ~ لا لا الا كان غير على بنتي نجمة راني دويت معاها في الموضوع نهار وقعت الواقعة ووافقت مقالتش ليا لا ، وقلت نخلي لجرح يبرا ونرجع نفتح معاك نتا الموضوع ونطلبها من جديد و بالأصول هاد المرة ونقراو الفاتحة علاش لا

حس بالإخراج وتزير كيفاش ختو توافق بلاما دير بحسابو ولا بحساب حتى واحد لهاد درجة معندها حباب ، عقد حجبانو وقال ~ عيط ليا للبنت تجي لهنا هي وميي !!

ناض خليفة لوسط الدار كيعيط على مرتو ل جات عندو بجرية ممخلياهش يتسنى ~ هانا اعمارة داري مالك

خليفة وهو كيشير للبيت لفيه نجمة ~ عيطي على بنتي نجمة ومها وجي معاهم راني طرقت الموضوع ولوحي شي زيف طويل على راسك تستري وصيفكي شي حد يعيط على ولدك نقراو الفاتحة

لكبيرة بابتسامة فلتت بلا شوارها ~ واخا اموولا داري هي لولا دارت كيف قالت ليها جات هي وتاجة ونجمة ل كانو صوت دقات قلبها كيتسمعو في وذنيها ، شدتها الخلعة عرفات شيخها غيرجع يجبد الموضوع قدام خوها ل حشمانة منو ومعارفة متقول قدامو ، دخلت هي ومها لبيت لاحت عينيها على بابا عبد الهادي لقاتو كيشوفيها بشوفات حاريين جلسات حدااه مكمشة على يديها وعينيها مقاداش تهزهم فيه بلا مقدمات قال ليها بصوت سمعو كلشي ~ قاليا شيخك شي هضرة وبغيت نعرف واش بصح ونتاكد

خليفة بداو على ملامح وجهو الخيبة شاف فيه وقال مقلق ~ هي متيقتيش هضرتي!

قاطع كلامو كيتأسف وناض لعندو باس على راسو وهو كيقول ~ حاشا حاشا كلامك هو لكبير غا هي قبل منخرج شي كلمة ولا قرار من فمي خاصني نرجع لبنتييي ” قالها مورك عليها” باش منظلمهاش وكان ، شاف في نجمة مضيق عينيه وقال بعد مرجع جلس ~ واش واافقتي على هضرة ل قالك شيخك !! وافقتي ترجعي تكملي دينك وتزوجي لوسك ؟؟

نجمة لسانها خانها وبدات تمتم في الهضرة معرفت تقول اه ولا لا ، رجع دوا وهاد المرة نبرة صوتو باين عليها انها وصلت معاه لعظم ~ سمعيني هضرة مقادة

نجمة بصوت مرعود معرفت كيفاش تصرف تحطت امام الامر الواقع ~ اه اخويا وافقت

جمع الوقفة وقال وهو كيشوف فخليفة ~ والا لبنت عطات راسها معندي منزيد الله يكمل بالخير

دمعو عينيها هادشي هو ل مدارت ليه حساب معرفت منين تلقاها تقادها من جهة تخسر من جيه ، هزات راسها فخوها لقاتو ملفتت وجهو مباغيش يشوفيها ،كي غدير تشرح ليه بلي فلحظة ضعف وانهار وافقت فلحظة حسات بلي بوحدها وبلي ناس غياكلوها بعينيهم وينهشوها بسنانهم مسحت على وجهها بتوثر بعدما نطق خليفة لعبد الهادي~ رجعع لبلاصتك يجي غلام نقراو لفاتحة ووديك ساع توكل على الله الا بغيتي تمشي هاهو ولدي جااي

نطق قبل ميجلس ~ مكاينة فاتحة حتى تكمل شرع الله اسي خليفة لا زرب على صلاح واه

جاوبو هاز ليه راس بواخا ~ مقلتي عيب كلامك هو ل غيكون

رجع جلس بخيبة أمل فختو ل مكانش يتوقعها جالس حاني راس وممبينش كيتسناو فغلام ل جاي على خاطرو طالع كيتمشى بثقالة وراسو عالي للفوق دق في الباب دقات قووين وحلو ودخل بعدنا قال بصوت غلييظ ~ وااحد سلااام وعليكم !!

مقدراتش تهز راسها ولا تشوف فيه صدرها كان كيطلع وينزل دقات قلبها تسارعو حسات براسها مقاداش تتنفس حاضية رجليه ، نفس اللبس ل كان لابس شخص ل شافت فور موصلات مسحت دموع من عينيها وعلاتهم بخفة باغا تتاكد وترضي فضولها وهي تلمحو ويخلق من الشبه اربعين نفس الوجه ونفس اللحية

#اللحية_السوداء ل جدبت انتباهها فأول مرة شافت فيها معاوية ، كان حادر عينيه وهي كتخطف شوفات منو وكتبكي على راسها ، حيا ليها الماضي والحاضر ، فيق الامها ورجع لاح الملحة على جروحها……حدرت راسها كتبكي وتمسح دموعها قبل ميطيحو ف الارض اما هو مكلفش راسو يشوف ناحيتها ولو بنظرة خفيفة كان بحالا جاي فمهمة يأديها ويخرج ودوا مخلي كلشي يسمع ليه وهضرتو موجهها لبابا ~ سي عبد الهادي عندك شي شرووط

عبد الهادي هز ليه راسو باه وقال بحدة ~ ختي غتمشي معانا لدار حتى تديرو الازم وديك ساع الا بغيتي تشوفها ولا تخرجو ضبر راسكم ….

غلام بلل حلقو وقال بنبرةة صوت جدية ~ وانا اسيدي ورا مغنتكاتبو غتجي معايا ديك ساع مكاين لا نشوفها ولا تخرج معايا كيف كتخاف على عرضك وشرفك تا انا غتولي على سميتي وخاصها تكون تحت عيني ، وفهاد الوقت ل هي جالسة فيه معاكم زنقة مكيناش نعرفها كاينة غا عندك وانا عارفك رااجل غتصونها

جوبو عبد الهادي كيهز راسو بالايجاب~ كلامك معقول مقلتي عيب امانتك عندي تا تجي تديها

كتفى يهز ليه راسو وسلم عليه وخرج بلاما يشوف ولو لمحة صغيرة المرا ل غياخد كيف دايرة كان اخر همو شكلها ولا زينها ، الخاطر ل كان باغي يدير لوالديه هاهو دارو ولو على حساب نفسو مهم تجي فيه ومتجيش فيهم يكعى هو ويضحكو هما لعمر كلو …

تفرتك المجمع وطوموبيل ل جابتهم رجعتهم وهاد المرة نجمة مشات مع خوها ل قطع كلامها ماشي غير طريق حتى الايام ل كانت جالسة لعندو على متكمل عدتها عياات تشرح ليه لا هيا ولا مو بشنو وقع وبلي رجعت تراجعت ،وطلباتو يلغي موافقتو ولكن بدون فايدة عطا الكلمة ويموت وميرجعش فيها ..من الاول بنسبة ليه هي الغالطة حيت تسرعات، قرار زواج ماشي ساهل ومخاصهاش تجي وتوافق عليه …فاطنة سمعت لخبار وبغات تموت فأرضها ولكن تلهات مع مرض عبد الله وخلاتها تعوم بحرها

دازو الايام دغيا والعدة ل كانت مانعة زواجهم سالات والنهار ل كان مخليها بلا نعاس طول هاد مدة هاهو جا …كانت جالسة فبيت مها لابسة قفطان بيج خفيف ودايرة عليها شال وجهها مدايرة ليه حتى حاجة من غير كحل خفيف مكيبانش ، وهاد المرة ماشي بحال قبل دنيا كانت خاوية حتا واحد ممعروض حيت كلشي دايز سكوتي وحتى من فاطنة مبغاش تحضر ، سمعت صوت الباب كيتحل دورات وجهها لقات وحدة من بنات خوها ل جايا لعندها فوق قلبها كتعلمها بلي عدول وعريسها وصل ….كلشي غادي فلمح البصر ممتيقاش بلي صافي غترجع تتزوج من جديد بواحد مكتعرف عليه حتى حاجة ،سميتو هي اللخرة معارفاها ، دخل عندها عبد الهادي هاز فيدو كتاب عطاها تسيني على الورقة ل غتبدل حياتها للابد …خط ولا زوج حددوو مصيرها وقلبو حياتها ورجعات متزوجة بعدما كانت أرملة وهاد المرا ماشي بمعاوية وإنما بغلام لمباركي ل صحيح كيدي من ملامح معاوية لكن افعال كانت مغايرة وكانو مختالفين اختلاف الليل مع نهار النور والظلام الشمس والقمر……

الوقت كان غادي طاير ولحظة فراقها مع عائلتها قربات توصل عارفة راسها غتمشي معاهم ولكن نفسيا مواجداش واخا جامعة حوايجها ولكن معندها مدير سمعات صوت تسلام وعرفت راسها وصل وقتها جلست تفرك فيديها وتعض على قنانفها حتى تحل عليها الباب من جديد وهاد المرة ل دخل مكانتش متوقعاه كان هو

داخل بملامح ممحية جاي كيخنزر فيها قدرات تشوفو من لمرايا ل كانت لاصقة في ماريو جالسة على ناموسية عاطياه بظهرها كانت كتسنى منو كلمات يهدئو من روعها ساعة خسر عليها كلام كان بحال تصرفيقة لرجعاتها من جديد لأرض الواقع ….

غلام هز يديه بتحذير ~ نهار قبلتي تزوجي بيا ديك ساع حكمتي على راسك تكوني تحت يدي وتطيعي كلامي

زاد من نبرة صوتو القاصحة ~ من ليوم وغير غنمشيو من هنا الباب متفوتيهش وشعرك متعريهش سمييييتي غلااام “عاود قالها بتأكيد” فهمتييي غلاااااام !! ماشي غيري ومكنشبه لحتى وااااحد من غير راااسي ….معنديش لعيالات ل كيخدمو و ل كيسلمو على الرجال واهم حاجة نبغي تمحي من دماغك بلي كنتي مزوجة بخوويا ولا سميتو تجبد على فمك لا قدامي لا ورايا من ليوم نتي على ذمتيي على ذمة راااجل …عطاها بظهرو وقبل ميتحرك نطق ~ انا كنتسناك لتحت !!

~~~كالعادة الفرحة لم تكتمل ،وكالعادة أنا الملامة رغم اي شي او رغم القدر والحواجز

هيا حياتي التي لا تحبني ولا تأبى أن يحبني أحد ، ولا تتركني أهيم في أيامها وتترك لي الخيار ….هذه حياتي المضلمة التي لا تسمح لأي نور لتجاوزها ،او عبور اي خيط من خيوط الفجر

مع بداية الامل والإبتسامة تكشر أنيابها السوداء لتحجب الخيط الابيض ،وقبل أن تضهر الابتسامة ترجع إلى مسكنها المظلم البارد …

بانتظار ضهور خيط جديد وبدء المحاولة من جديد وبالاخير سيأتي الفرج فوعد ربي حق وبشر الصابرين

#الخاطرة بقلم غلا الروح

🥀نجمة ما كانت منحوسة ماكانو قدامها حارين

🥀نجمة كانت زينة و حنينة و مرضية الوالدين

🥀كان سالفها لا طلقاتو ختها تخاف عليها من العين

🥀حادگة و مسرارة و زينها كيسلب الحاضرين

🥀كانت واخا صغيرة منها الزاد و منها العوين

🥀تفيق مع الفجر و فالليل هي آخر النايمين

🥀هي الأخت و الخالة و البنت البارة و الصدر الحنين

🥀 بان فحياتها معاوية زين القلدة و حرش العينين

🥀 حبو قلبها و بغاتو تعوض معاه حگرة السنين

🥀 حتى هو من لقاها فحال لا لقى كنز ثمين

🥀 بالحق قبل مايدخلها لدارو توفاه الأجل مسكين

🥀 فراقو دبح قلبها فحال لا قطعتيه بسكين

🥀 لكن هادي هي الدنيا و ماشي خسارة فرب العالمين

⚘️واش غتبرا نجمتنا من هاد القهرة

⚘️و لا اللي بداتو الايام غتكملو زهرة

⚘️ واش غلام غيصون هاد الگمرة

⚘️ راها حنينة و تحط على الجرح يبرا

⚘️ ماطالبة فلوس و لا ذهب باغة غير السترة

⚘️ و لا عطاها القليل هي تردو ليه بالكثرة

⚘️ و إلا تأملها مزيان راه يعشقها من نظرة

⚘️ زينة و مسرارة و العيون ذباحة و خضرة

⚘️ غلام من نهارو خرج فيها العين الحمرة

⚘️ و قاليها مانبغيش تبان منك شعرة

⚘️ و نساي شي نهار كنتي لخويا امرأة

⚘️ واش يا ربي هاد البنت من حسرة لحسرة

⚘️ ما دارت عرس ما فرحت ما گلسات فبرزة

⚘️راعي ليها يا غلام راه عندك قلب ماشي حجرة

⚘️ حيد عليك ديك الغباشة و فرح و طلق البشرة

⚘️ راه ربي عطاك امرأة حلوة و تصون العشرة

الدنيا عدماتها وخلاتها تسني موتها وروحها مزال كطلع وتنزل ، فرضت عليها تعيش وتتسمى مزوجة تحت دراع خاوي ، راجل حگار مكفاهش الحياة ل ظلمتها زادها بظلمو وفرض عليها تعيش على ذمتو وغبر مبقاتش شافتو …طبعو بوحدو مكاينش شبيهو فيه مكيتفاهم لا بالخاطر لا باللين وكلمو متنزلش للأرض

واش ل ميقدروش عليه والديه غتقدر عليه بنت الناس اللي مزال طامعة يحن فيها ؟؟ اكيد لا !! نجمة بغات تهرب من سداري في دار ختها بالحق جات ولقاتو في دار مع عدوزتها ، معندها لا ماريو لا بيت لا دفة تسدها عليها وتتهنى، ولات تنعس في بيت الضياف وبعض المرات في صالون على الاقل عند ختها كان عندها فين دير حوايجها وكدخل وتخرج براحتها واخة فاطنة نكارة وكدير الفرزيات لكن مستحيل تفوتها اما هنا معندها حتى مانطة بسميتها حوايجها معرمين في قنت البيت وكتلبس غير من الحبل والراجل ل غيشوف من حالها ويدير ليها شان عطاها بالظهر وخشاها في القبر وهي حية …

كانت جالسة فقنت سداري شادة راسها وكيتعاود شريط حياتها قدامها !! مرة تنهد مرة تبكي مرة تلوم ايديها ل خلاتها تسني على ورقة اعدامها …حياتها هنا عذاب واعمال شاقة ..

نهار حطها قدام باب دارهم ورما عليها كلامو ل بحال سم

“ل بغيتيه وصلتيه ، دابا نتي مرتي وعلى سميتي وشرفك من شرفي ومن هاد الدقيقة تاع ليوم وجهك منشوفو لا في زنقة لا ف شراجم ،هاد الباب عتبتو نار بين رجليك وياويلك ديري عكس كلامي ديك ساع نوريك اللي معمرك شفتيه ” ولات محبوسة ظلم كتسنى امتى يجي نهار ويتطلق فيه سراحها …..

سالا الصيف ودخل لبرد وهي مازال على نفس الحال مرا بلا راجل …كلمة راجل اللي كانت كضن أنها الدنيا ومفيها وانها غتهنيها من لقب *بايرة* ولات هيا الكابوس ل منغص عليها حياتها ،ياريت كون ترجع بالزمان اللور وتقول مبغيتش غير خليوني أرملة ومنحوسة ولا زواج الذل لي وصلت ليه، غير خليوني نحرت على ختي وولادها نهار وماطال وبالليل نحط راسي ونغمض عيني وننعس مرتاحة ماشي فحال دابا العين مغمضة والدماغ خدام وبقاليه عرق ويوقف وشي حل ملقاه في كل صباح كتحل عينيها على نفس المخدة كتستغفر ربها وكتطلب منو يدير ليها مخرج …نجمة ل كانت منورة وعينيها كيضحكو ومضوية بحال الگمرة ذبلات وطفاها القدر ل مازال شاد خيوط حياتها بيديه ،نجمة ل كانت كيف طير الحر ولات مسدود عليها في قفز الزواج بلا زواج مكيجمعها مع راجلها من غير سطر جمع سميتها مع سميتو وسط ورقة سناو عليها بزوج …..

~~~~~

ناضت من بلاصتها كيف كل صباح جمعات البيت ل نعست فيه ودخلت لكوزينة ، ملقاتش الخبز وعلى سعدها ووعدها جبدت القصرية تعجن بطبوطات لفطور وهادا هوا حالها منهار جابها لدارهم الشقى بالليل والنهار ومو وخواتاتو كلشي جالس وهيا منها گراص وزيف الراس

وحتى من لعدوزة ل كانت متمنية فيها الخير تحسبها وحدة من بناتها وتهلا فيها تقلبات عليها ملي لقاتها حادگة ونقية وكتبرد القلب تسوخرت اللور وحطت الايد على الرجل وولات كل مرة مزيداها لتخميلة جديدة ولا حكان الماعن أما الصالون ولا يتخمل كل يومين

والعافية الزرگا تاع زهرة مكاينش النهار اللي متبكيهاش فيه على الأقل مرة ولا زوج بكلمة طالعة وكلمة نازلة وملي تشكي لعدوزتها متهدر متكلم وتجي من بنتها وتقولها مديريش راسك فيها خليها تقول اللي بغات نتي مولات الدار وهيا غير ظيفة راجلها خدام بعيد وغير يرجع تهز ولادها وتزيد …”مولات الدار” كلمة كَضَّحَكْ وهيا معندهاش حتى سلك فهاد الدار كتشوف راسها بحال الخدامة ل جابوها ترس عليهم فابور ، الحمام هوا اللخر عمرها مشات ليه ضروها جنابها ببرد التواليت ومع ذالك صابرة وساكتة وكتناجي ربها فجوف الليل واكيد مغيتخلاش عليها ….وهيا كتعجن دخلت عليها زهرة ناوية على خزيت بحال كل صباح، شعرها طالع لسما ومزال مغسلت حتى وجها وقالت وهي هازة حاجبها ليمن ل قرب يفوت جبهتها ~ ويلي مي !! عاد كتعجني ،؟ الحادكات وعيلات الرجال الحرات راهم حطو الفطور وسلاو …معاش غيفطر با بالسلامة ؟؟

شافت فيها نجمة بنضرة جديدة وعينين خارجين ، القلب قدما كان طايب رجع قاصح وعْمَرْ ومبقاش عندو فين يزيد ~ ايوا الا بغيتي باك يفطر ،نوضي شمري على دراعك وفيقي بكري ديري ليه لفطور نتي نيت !! أما انا غير بنت الناس ونتي ولا مني فيه …

زهرة سمعت الهضرة ومتيقيتش ومرضاتش تقوليها هكاك ولفات تعايرها وتسكت معارفاش بلي سكات كيولد الانفجار ،تمات غادة ليها وعينيها على وجهها ل من ديما حاسداها على صفااوتو باغا تجرو ليها وفنفس الوقت كتغوت ~ ياك المنحوسة يا قدام الشر ، يالي من نهار شفناك مشفنا النهار الزين، تحل لك الفم ووليتي ترادي على سيادك ل دارو فيك خير وستروك …

تلاحت عليها وهي تدفعها نجمة بيديها مبعداها على وجهها هادي تعطي ولوخرا تعطي تا وحدة مخلات من حقها ..محسو غير بالعدوزة وشيخ بيناتهم كيفكو هاد الاخير كيضرب في بنتو مقادش يقيس حرمة ولدو بقا حتى فكهم، نجمة حدرت راسها احتراما ليه وزهرة مزال كتغوت وتعاير حتى ضربها لراسها عاد سكتات …نطق معصب وايديه كيترعدو ~ صباح لله ، مالنا اش كاين ؟؟ كان كيشوف في زهرة كيتسناها تهضر

حتى نطقت نجمة قبل منها وهي كتشوف في حوايجها لتكون شي حاجة من لحمها بانت ~ شوف أعمي !! بنتك قجرت عليا خاصها فين ما تشوفني تعيرني معرفتش شنو درت ليها وااه انا عييت لي نمسي عليه نصبح عليه معاها

دار عندها شيخها وباس راسها بأسى وقال باغي يلين خاطرها حيت عارف بنتو لفعة سامة ~ مسحيها فيا ابنيتي ونتي مولات العقل وخليها ليا أنا غنتفاهم معاها ولدارت لك شيحاجة غير جي عندي مضاربوش تخليو خبارنا تخرج لجيران…

خنزر في بنتو ل كتبلع الريق بزز مزال مسرطت ل وقع وقال بنبرة تهديد ~ الهدرة معاك من بعد وهاهي قدامها كنبهك ها وذني منك الا تشكات منك شي مرة متلومي غير راسك ؟؟!

خرج كيستغفر وخلا العيلات بوحدهم ، ضورت لكبيرة عينيها عليهم بتناوب كتسول وزهرة كتعاود ل كاين ولي مكاينش حوايجها عامرين عجينة ل كانت فيد نجمة ،دارت لكبيرة عند مرت ولدها معصبة وبنبرة عتاب قالت ~ ياك ابنتي !! ايوا هادا المضمون فيك وليتي كتعايرينا بخبزة كتعجنيها وتاكليها معانا ، ايوا تباااارك الله عليك..طولتها معلية صوتها وايدها كل وحدة حاطاها على جنب ، بكلامها وصلات بنتها فين بغات ل شافت ف قليلة الزهر بقليان السم …

نجمة كانت مصدومة من هضرت لعدوزة ليها ، شنو كانت كتسنى تجي على بنتها معاها لعدوزة كتبقى عدوزة وعمرها ديرك وحدة من بناتها واخا تضوي ليها صباع يديك

كاملين ….خرجات لكبيرة مخلية بنتها تبرد فقصتها و تكمل ل بدات من معيور و بكلمات جداد سمات نجمة وخلاتها وراها كترعد ~ عرفتي مقامك شنو ؟؟ راك غير خدامة جابها خويا ترس علينا ، يعلم الله اش شاد عليك حتى لاحك علينا وزاد خلفة عايفك وعايف لبلاصة ل نتي فيها كي شفتي مكيحملش يقرب للحاجة لمقيوسة ، ختمت كلامها بغمزة بمعنى عيقي راك غا شياطة خوه وخرجت خلاتها بوحدها والكوزينا كدور بيها ، حطات ايدها على بوطاجي مسندة عليه هضرتها فيضت كاسها ،وشعلت العافية في ذاتها ولا صدرها كيطلع وينزل ، كبات ليها كاس الما كتشرب وتغدد وتحلف صافي هنا والله يجعل البركة مبقاش الراس غينزل ياربحة يا ذبحة مغنعيشوش قل ولا كثر من عمرنا ولمدرناش الحل لراسنا وهزيناه الفوق غيبقى ذليل تال يوم القيامة ، جمعت راسها ومشات لعند شيخها ل كان مع مرتو وولادو ل من بيناتهم زهرة جالسين يتسناو في فطور ومنها ينهي بنتو وهي تدخل عليهم نجمة وقالت ~ عمي أنا غنمشي نشوف داارنا

قطع هضرتها محنحن مخلاهاش حتى تكمل شنو بغات تقول بترجي نطق ~ بنتي !! الله يهديك ، راه راجلك مباغيكش تفوتي الباب وانا كون جات عليا نديك ونجيبك ولايني منقدرش ندخل بين لمرا وراجلها غير صبري حتى نهضر معاه ويكون خير ، انا غنوض نتوضى نصلي شي بينما وجد لفطور ، هرب منها حيت كتبقى فيها ومقادر يدير ليها والو ، شافت فيها لكبيرة وقالت باغا ترطب معاها الجو ~ واا بنيتي واش راجلك مانع عليك لخروج ونتي كتقولي نمشي ، تبتي عفا بنتي وهادشي ديال الصباح مبغيتوش يتعاود نتي مولات الدار وزهرة غير ضيفة وغتمشي جالسة تحاسبي معاها على شقا هادشي راه معندناش

بنبرة عتاب نطقت نجمة والحزن باين على عينيها~ مولات الدار ل معنديش فيها حتى بيت ،؟ مولات الدار ل كتصبن گراصن الضياف ولي تخمل كل يومين ودوش غير في التواليت حتى البرد هلكها في كلاويها ؟؟ بتحدي خرجت عينيها وقالت من جديد ~ شتي دار ختي هيا لي غمشي ليها واليوم والا شفتي لي كتقولي عليه راجلي قوليه مشات لدارهم راك مخديتيهاش مقطوعة من شجرة

خلاتهم مخرجين عينيهم فيها ممتيقينش ، اما هي راه لبسات جلابتها وزيفها وخرجات مخلياهم مستغربين منين جابت هاد الجرأة باش تجاوبهم وهيا من نهار جات على طرف لسانها غير نعام، وواخة، ولي بالك

مفخبارهمش بلي بضلمهم طفااو ديك البراءة لي فيها ، وولدو نجمة قاصحة بسبب معاملتهم معاها ، حتى واحد محاس بشنو فقلبها كلشي غير كيآمر ويغوت ويفتي عليها اشنو دير واشنو باغي ، و عمر شي حد قالها مالك ولا اشنو عندك ولا اشنو نتي باغا

يتبع