تحط الفطور كان كتير ومتنوع ولذييذ دراري حطو ليهم فلبيت حيت هاد المرة لعيالات للي مشاو للصالون حيت كتار وياخدو راحتهم..
نعيمة: ݣالتلي أمينة لبنت شرات الدار تبارك الله
زهرة: (تبسمت وحركت راسها باه شافت بفخر فملاك واخا كانت محلفة عليها)
نعيمة: الله يدخلها عليها بربح
زهرة: اللهم امين احبيبة
أمينة: فين شريتيها ابنتي؟!
ملاك: فالليدو.. دوك ديور للي كيتبناو جداد
أمينة: تماك فين كان الكاريان؟؟
ملاك: اه
أمينة: (حركت راسها باه) سكنت تماك انا وولدي شي 7 سنين ولا كتر
ملاك: فاش كنت كتقرا فلفاك كانو باقيين الكاريان اما دابا رجع حي آخر تبدل
أمينة: شحااااال من عام ممشيت لتماك لا انا لا مراد ضربنا على داك القنت
ملاك: (هزت حواجبها شافت فمها وطمرو كياكلو كتعاود ليهم على المعاناة للي دوزت تماك وعلى مراد للي كان كيسمح فقرايتو ويمشي يبيع الميكا ولا الملحة ويمشي للسوق يوصل مع الناس تقدية مهم كل مرة وفين.. جا عندهم مراد كيعيط على مو حتى قالتلو دخل حيت كانو ݣاع لبنات لابسين حجابهم)
اورطيغا: وغير اجي
أمينة: (خرجت عندو كانت ملاك قالتلو خلات شي حاجة فوق النموسية ومنين دخل لبيتو ملقى والو) واش الساعة؟؟!
اورطيغا: (معرفش شنو جابت) اه
أمينة: راني درتها فماريوك هادشي علاش معيطلي ومنوض صداع (مشا لبيتو هي رجعت الصالون، قلب جبد بواطة فلݣري مكتوب عليها #curren تبسم وحلها عجباتو واخا تكون خايبة غتعجبو ولكن بالصح عجباتووو
هانا على سمييمو مبقاتش مخيطة البزطام!!
(دار الساعة فيدو عجباتو رد لبواطة لماريو ديالو ومشا هو وعمر للجامع..)
غيثة: (كتاكل فديك رفيسة ودارت فزلافة ديال البلول 3 معالق كبااار ديال راس الحانوت.. كتشوف فيها مها)
مالكي؟!
الغالية: مالك على هاد الحالة نتي؟!
.غيثة: هه جعت هاد نهار بزاف وكنت مشهياها هاد الايام تطلع لية غير هي فالتيكطوك والانستغرام
اشرف: هاد لي ليزابلكاسيون لاحظت اي حاجة تنبغيوها تلقاهم سبقوني تيحطو تصاور
مرتو: اه عندك الحق حتى انا تنلاحظها
غيثة: (عجبها الحال تبدل الموضوع) حيت تيكونو تيتصنتو علينا على للي فهمت.. (كملو الماكلة تجمعات الطابلة وبدا جوفها كيتروع طلعت بشوية باش متعيقش مع غبرت مشات كتجري لبيتها نيشان طواليط ردت كولشي وهي مباغيااش!!)
~~~~~~~~~~~~~~
أمينة: ياك املوكة كولهم شافو الدار وخالتك أمينة لا
ملاك: (تبسمت) الا بغيتي نمشيو دابا
أمينة: خلي يجي مراد من الجامع
نجية: وݣولو يجبد من عمر لكلام على المرا للي باغيها
وفاء: (طرطقت عينها وهزت كاس دلما كتشرب وكتشوف فمو كتبان صعييبة وخوفها موحال واش تقبل بيها!! ومن حقها حيت هي عارفة شنو دوزت وعارفة عمر كيف داير)
أمينة: انا نسولو نيت بلاتي
نجية: خاطري هااارب، الولد جاي صحة سلام شوية بغا جواج
أمينة: ههه ومال جواج كيخلع اختي نعيمة!! غير نتي فرختي شحال ما بغيتي ودابا الولد بغيتي توݣفيلو فسعدو؟!
نجية: ماشي هكاك!! غير منين ݣال متعرفوهاش!!
نعيمة: الله يهديك اختي نعيمة ديري النية ولدك راه كبير وعقلو تبارك الله يوزن بلد كما خلاوها المصراوة
ملاك: ههه (ظحكت على مصراوة وهي تقرسها مها ضارت لقات حتى وفاء كتخنزر فيها راه موضوع حساااس وهي كظحك) احم (هزت تمرة كتاكل)
أمينة: (بقات كتقنعها باش مينوضش شي خصام مع ولدها)
ياسمين: حتى انا داكشي للي ݣلت لماما خويا عمر عارف واش يدير وهو من حقو يختار للي حبت خاطرو
وفاء: (كتحسب فراسها العجوزة قبيحة واللوسة ضرييفة!!)
رجعو رجال من الجامع لبنات كانو جمعو الكوزينة والدار خلاوها كتشعل اما ملاك كترد غير للي يرجع لبلاكار ولا الثلاجة.. دخل مراد يشرب لقاها هي ووفاء كيتهامسو
اورطيغا: هاي هاي على الفسيسرة ديالي طالقة علينا حداݣتها (قرد كيشرب لما وهي متبعاه)
ملاك: (فرنست) انا للي جمعت كولشي
اورطيغا: الحمدلله (وقف رد الكاس فلڤابو) من هاد انا للي جمعت كولشي تقت فيك..
ملاك: هههه والله حتى عاونت
اورطيغا: اممم.. (ممعتابرينش وفاء للي ضايرة كتمسح الكيسان مخطمة ابليكاسيون صم بكم عمي)
شنو فيها نسلتو شي سليتة!!
ملاك: مك بغات تشوف الدار
اورطيغا: اشمن دار؟!
ملاك: (هزت حواجبها بتعالي) داري..
اورطيغا: اممم.. وبغات تمشي للحومة؟
ملاك: هي عارفاها تماك
اورطيغا: عنداك تقولي انا ساكن تماك
ملاك: لا لا انا عارفاك مخبع ديك السكنة
اورطيغا: (هز يدو وراها الساعة)
ملاك: بصحتك جاتك زويييينة
اورطيغا: عويناتك العمييرة.. (عيطلو عمر وهو كيشوف فملاك دار راسو مسمعوش) اجي نوريك بيتي
ملاك: ههه واش حمق ولا أثرت عليك الحريرة
اورطيغا: بجوج!
وفاء: (تحصرت فالكوزينة مقدرتش حتى تخرج حيت الا خرجت حتى ملاك خاص تخرج)
أمينة: مراااااد مراااد (دخلت للكوزينة لقاتو متكي على الثلاجة كيشوف فملاك) من ݣبيل وانا نعيط
اورطيغا: شنو الوالدة عااود!!!
أمينة: ياله نخرجو شوية ونمشي نشوف دوييرة ديال ملاك
اورطيغا: ما فيهاش الضو.. نديك فصباح حسن، الا بغيتو دابا تخرجو لشي قنت نديكم
ملاك: (عرفاتو مبغاهاش تمشي لتماك)
أمينة: صافي نهضر معاهم يلبسو ونخرجو
اورطيغا: تتموتي على الخروج
أمينة: سمييتو التفواااج..
اورطيغا: (خرجت وفاء من الكوزينة حيت شافتهم باغيينك يبقاو بوحدهم وجات تخرج ملاك تتبعها هو يزرب عليها دخل دافعها بصدرو وهي دغيا كترجع باللور باش ميحاديش فيها حل باب الثلاجة مكلالي بيه باش متهربس وهي كتبسم مخرجة عينها للي داخل للكوزينة غيبان ليه غير هو وهي لداخل مخبعة باب الثلاجة)
شنو نتي؟!
ملاك: ههه لبرد سدها
اورطيغا: (حط يدو على صدرو) هاكا تنحس بالليل خاصني دفا فهاد شتا
ملاك: اممم (هزت حواجبها الحركة للي كتعجبو اوطوماتيك كيتبسم) عمر شي قرعة ديال جاڤيل قديمة بالما سخون وعنقها
اورطيغا: مكفياش
ملاك: شري شوڤاج (كتعوج وتبسم)
اورطيغا: بغيت لحم
ملاك: طلع شي سݣيطة ههه
اورطيغا: بغيتك نتي
ملاك: رمضان هدا اعوذ بالله من الشيطان الرجيم استغفر مولاك لاحول ولاقوة الا بالله العلي العظيم
اورطيغا: (كيشوف فيها وعينيه قربو ياكلووها وحتى هي كتبسم وكتشوف فعينيه) شي نهار ناكل مك
ملاك: مراد خليني نمشي راه تقبنا الورقة مع ماما
اورطيغا: منين تقيب تقيب اجي نتقبوها فمرة
ملاك: ههه (دفعاتو بيدها فصدرو بعد شوية وخرجت من الكوزينة مخليها.. من بعد ملبسو بغاو يخرجو وشتا بدات كتطيح مجهدة مع الريح دارو بناقص)
زهرة: (صونا عليها رشيد باش يجي ولكن مخلاتوش يجي فهاد العاصفة… أمينة مشات للكوزينة دارت الغلاي باش يعمرو أتاي تبعتها زهرة وخديجة)
خديجة: ياله معايا للدار اماما
أمينة: هانتوما جالسين هنا ازهرة
زهرة: لا نمشيو اختي الدار عندك عامرة نمشي مع بنتي على ميجي رشيد
أمينة: الدار تهزك نتي اللولة ازهرة هانتي جالسة نتي وملوكة وخديجة نردو لعشا ونتجمعو عليه… (عيات ترغبها وفالتالي قنعتها يجلسو ملاك جالسة فالصالون كتشوف وفاء متوترة بوجود نعيمة وبنتها واكترية منين كتسمع انها متخوفة من هاد العروسة للي باغي ولدها)
غيثة: (من بعد مردت ݣاع للي كلاتو فالفطور هبطت للكوزينة عاود عمرت زلافة ودارت 4 معالق كبار ديال المساخن طلعت لبيتها سدت عليها وجلست بغات تشربها.
مقدرتش تزيد تشرب البلول غير كتحط معلقة فشنايفها كتروع مكتقدرش وكتزيد ترد كولشي.. بقات كتبكي بغات تطيحو دغيا طلعت فوق النموسية ديالها وبقات كتنقز.. عيات وحتى حاجة مكتحس بيها من غير شي حريق خفييف بحال ديال الدورة كدخل لطواليط مكتلقى والو… دخلت للفايس ݣروب ديال بنات كتقرا المشاكل حتى هي كتبت بوسط كتقلب على شي حل باش تطيح لبيبي حيت ميمكنش تكفل بيه ومعندهاش مسؤوليتو وكتبت انها تغتاصبات باش يتعاطفو معاها ويقولو شنو دير خبات سميتها وحطاتو… كتسنى الأجوبة الادمنة مزال مقبلت لانونص ديالها وبقات كتسنى… صونا عليها ادم تفكرت دوا واش تشرب ولا شنو دير جاوبااتو ممكن يعطيها هو شي حل)
وي ادم؟!
ادم: حبيبة توحشتك بغيت نشوفك
غيثة: انا لا متوحشتكش ومتنبغيكش ويمكن تنكرهك ومتنحملش نشوف وجهك
ادم: ههه شنو وقع معاك؟!
غيثة: تظحك ادم؟! واخا خسارة فيك هاد سمية بغيت غير نفهم واش نتا ملحد؟!
ادم: ملحد!! شنو تتعني هاد الكلمة؟!
غيثة: هي مكتامنش بالله متتصومش مجرم بدلتيلي حياتي وخرجت عليها الله ياخد فيك الحق
ادم: نتي تتصومي احبيبة وتتصلي؟!؟
غيثة: (غير كتصوم) اه
ادم: متنظنش تتصلي للي تيصلي متيلبسش دوك لحوايج متيخليش ظفارو طوال وكل نهار صباغة فشكل متيطلقش شعرو متيديرش مكياج وليباغفان!! هاكا تنعرف على المسلمين ونتي تديري هادو كاملين!! زائد تتعطاي تتنعسي معايا تتشربي يعني عايشة حياتك كما بغيتي
غيثة: (كتبكي حيت زمتها) ولكن تنآمن بالله متنكميش فوسط نهار رمضان
ادم: ههه وشنو الفرق علاش العبادة كاينة غير فشهر رمضان وغير فصباح بالظبط!!!
غيثة: (معرفت باش تجاوب
ادم: شوفي هي يا بيض يا كحل ياديري داكشي ديال الارهاب كامل يا تعيشي طبيعية باش غدخليلي نتا ملحد متديرش هاكا غير تتكوني تتخربقي ميمكنش تنصحي ولا تعايري بشي حاجة نتي متديريهاش!! هدا تيتسمى تناقض وونفاق ديني احبيبة
غيثة: تنكرهك ادم
ادم: شنو دابا متخرجيش عندي احبيبة!!! توحشتك ومتنبغيش نكون مع شي وحدة أخرى من غيرك!!
غيثة: (كتحس بالاستفزاز.. قطعت عليه حيت كيغلبها بالهضرة رجعت شافت داك المنشور مزال كتقلب تكاات والدوخة قاتلااها….)
اورطيغا: (موالف كيخرج ولكن هاد نهار مبغاش واخا يوسف بغا يخرج يتقهوا والو مبغاش عيطو على شريف هو للدار للي كيتسناهم فالقهوة وجلسو مجموعين.. مو كانت هي وختها وزهرة كيطيبو لعشا ولبنات فالصالون.. صيفط ليها ميساج)
اورطيغا: زين نسلتو للمحال
ملاك: (تبسمت) دابا ولا بلاتي
اورطيغا: ڤري؟!
ملاك: (ظحكت وكملت كتشوف فياسمين كفاش كتهضر باداب وكلامها كولو متول ومرزن عرفت انها جامعية ودابا كتخدم مع باها فالمحال للي كيبيعو كل ما هو مغربي تماك)
خديجة: كيقولو الطبيعة تماك زوينة
ياسمين: واه الدنيا تما زييينة وفريييجة
ملاك: (اورطيغا كيصوني قطعت وكتبت ليه) وي!!!
اورطيغا: اجي لبيتي نوريك واحد لوسادة شريتها
ملاك: ههه غنحرش عليك ماما الا مبعدتينيش
اورطيغا: (تبسم وبقا مجمع شاف فعمر كيكتب فلواتس عرفو طايح على زنافرو وعارف وفاء قااادة ولكن حتى عمر إنسان معقول وصاارم معندو فين ينصحو مجاش يقولو كانت معايا واخا ميتزوجهاش مغينساهالوش!! وعاد شكون هو باش يوقف فباب رزقها راه حتى هو فنفس موقفها… قلب عينو..
كملو جموع قبل ميطيب لعشا جا رشيد كانت هدنات شتا شوية، عياو يشدووهم والو مشاو لصفرو ولوخرين بقاو تعشاو يوسف وخديجة مشاو لدارهم اورطيغا دخل لبيتو سد لباب دوز نمرة ديال ملاك وهو كيرد الساعة لبواطة ديالها عندو سوايع زوينين ولكن هادي ديال ملاك زاايدة نغييزة فقلبو جاوبت)
مبقا لرمضان واالو
ملاك: ههه غير 11 اليوم
اورطيغا: وااايلي!! حسابلي شي سيمانة
ملاك: ههه.. (كتنغزها وفاء تسولو) مراد فخبارك بلان وفاء وعمر؟!
اورطيغا: اممم
ملاك: مقالش امتى يخطب؟
اورطيغا: شغلو هداك
ملاك: ومهضرتش معاه نتا؟!
اورطيغا: فاش غنهضر املاك نقول شي حاجة للي نخرج بيها على لبنت؟!
ملاك: (تحرجت حيدت سبيكر ووفاء سقلت) شنو غتقول؟!
اورطيغا: ملاك خطينا من هادشي انا لي تيهمني هو نتي وموضوعنا نهضرو فيه
ملاك: لا غير زعما الواحد كيدخل بخيط بيض باش ربي حتى هو كيفاجيها عليه
اورطيغا: وهادشي للي داير حتى أنا قلتلو وفاء إنسانة مزيانة قلبها بيض ظريفة قارية وصافي هادشي للي تنعرف، وعاد منين دارت حجابها مخلاتلي فين نهضر
ملاك: بالصح.. (شافت وفاء خرجت ومبغاتش تزيد تهضر فالموضوع باش متسمعش الي يخليها دابز معاه..)
غيثة: (ضربتها الفيقة مع 2 قلبت تيليفونها لقات المنشور تقبل بقات كتقرا بلهفة مكاين غير للي كينعلها ويسبها حيت رمضان وبغات تطيح ودير ذنب فوق ذنب كاين للي كينصحها باش تبلغ على للي غتاصبها مدام هي مغالطاش كاين للي كتسبها انها غير دارت الاغتصاب حجة وان صاحبها للي حملها وبغات تزيد معصية على معصية زادت تدمرت مكاينة حتى وحدة هضرت معاها زوين ولا قالت ليها شي حل..
ملقات غير مسحت المنشور قلبها تنفخ ورداتها على عينها بلبكى معارفة مدير صونا عليها ادم جاوبت)
شنو شنو!
ادم: نجي عندك؟! تخرجي عندي؟!
غيثة: واش متخافش نحمل ؟!
ادم: ههه من ديما داير احتياطي عمرك تخافي من ديك الناحية
غيثة: (قلبها ضرب) كفاش داير احتياطك ؟
ادم: داير إبرة كل عام, يعني احبيبة معندك مناش تخافي جامي تحملي
غيثة: تتهضر بالصح
ادم: ماشي حمق اغيثة باش نغامر فهادشي وزايدوش شنو عندنا منديرو بشي صداع الراس انا تتعجبني لطاي ديالك هاكا مغنسخاش بيها ضيع على حساب تخربيق
غيثة: والا حملت؟
ادم: مني انا مستحيل!!
غيثة: كفاش منك نتا مستحيل!!؟ حسابلك انا كل مرة تنمشي مع واحد
ادم: شوفي نتي حيت اول مرة نعست معاك كنتي مديڤيرجيا وعاد كل مرة تتقولي سمية ومنساوش سيييهم اورطيغا للي كل مرة تلقاك حداه وعندو فالدار
غيثة: (قطعت طفات داك التيليفون للي عاطيها فمرة!! مناش كانت خايفة تأكدت منو ولكن شكون غيكون باه!!!
والمشكل كيهضر بثقة عااااالية)
~~~~~~~~~~~~
اورطيغا: (بقا سهران كيتفرج حتى تفكر صونا عليها جاوبت)
مزال منعستي؟!
ملاك: ياله تسحرت
اورطيغا: هداك حمزة شنو بلانو كل مرة لاسق فيكم؟!
ملاك: هو وبابا مكيتفارقوش عزيز عندو بزاف
اورطيغا: ونتي مزال تتهضري معاه؟
ملاك: سلام وصافي
اورطيغا: ولاش ديك السلام نسيتي شنو كان تيبلاني
ملاك: هو تبدل امراد (فيها نعاس) من موت ولدو تبدل
اورطيغا: ملااااك مزال تنهضر معاك بالعقل قلبي على زمر ولا!!
ملاك: واخا مراد واخا
اورطيغا: بقاي تتقولي واخا حتى ضبري عليها معايا… (كان فيها نعاس بزاف وباينة فيها هضرو شوية ومشات نعست اما هو دق عليه عمر وهبطو للجامع يصليو الفجر..)
ادم: (كان حدا دار غيثة ولكن مفهمش علاش جبدت حس الحمل وهو داير احياط وحريص ومتأكد مغتحملش وهو الوحيد للي كانت معاه!!!)
~~~~~~~~~~~~~~~
غيثة: (جمعت من النت وصفات بزااف ديال الاجهاض وجانب منها خاايف من الناحية الدينية.. لادروݣ مقطعاتوش مقدرتش غير كيدوز نهار مكتاخدوش كتبدا تعصب التيليفون باش كتهضر مع ادم طافيااه شغلت راسها شوية بلاتوليي باش حتى واحد ميعيق بيها..)
الياقوت: (كترضع ولدها وكتفكر فيوسف للي مبقاش داك المغرم والملهوف عليها رجع واحد مكتعرفوش تأكدت انها مبقاتش كتهمو مبقاش كيبغيها ويهتر بيها اخر مرة واخر لقاء بيناتهم بكا باش ميتفارقوش ومحنتش فيه!! جات عندها ختها كتسولها مالها ساهية)
الياقوت: تنفكر من مور رمضان فاش غتوصل الدعوة ليوسف شنو غيدير وباش غيحس واش غيتيق!!
….: مبقا والو 4 ايام وها العيد، خاصو حتى هو يتحمل مسؤوليتو
الياقوت: المشكل انا مكنتش باغا غير نربح الدعوة!! انا كنت حاسبة غرجو وولدنا يعيش بيناتنا
….: هو مزوج اختي دابا ميمكنش تبني سعادتك على حساب وحدة أخرى
الياقوت: راه هي للي بنات سعادتها على حسابي انا, متنسايش شحال دوزت مع يوسف
…: حتى دابا هو غيعتارف بولدو
الياقوت: وشنو نربيه بوحدي؟! صافي مشا مستقبلي!!!
…: اوا؟!
الياقوت: معرفتش نشوف!! واش غيدير معايا عقلو!! نشوف واش غيبغي ولدو ولا لا الا حن فيه غنعرف كفاش نشدو!!!
~~~~~~~~~~
ملاك: (كانت ليلة سبعة وعشرين خرجت أنير هي ووفاء داتو لمصور فين دراري صغار كيديرو التخليلة لبنات كيزوقو ليهم يلبسوهم البلدي ويطلعوهم فالعمارية وكذلك دراري كيلبسو البلدي ويتصورو فالعمارية ولا فوق العود.. كانت شرات ليه جبادور فالاخضر مع طريبيش عاد ماشية للمصور صونات على اورطيغا تلمح انها خارجة واش يصلاح يجي حيت هي صالح ليها خصوصا جدها باها عمامها كولشي بايت فالجامع)
اورطيغا: الفسرة فين شداها
ملاك: خديت أنير يتصور
اورطيغا: هانا على خضييرة صوريه لية نشوفو
ملاك: واخا.. حنا مزال معطلين برا
اورطيغا: متعطليش بزااف انا غنخلي التيليفون فالدار غنمشيو للجامع انا وعمر
ملاك: اممم الله يقبل..
اورطيغا: غنصلي على مك صلاة الإستخارة اليوم باش نشوف واش فيك شي ربح
ملاك: انا كيتصلى علية اكبيدة صلاة الشكر وخاصك كل نهار تحمد الله علية
اورطيغا: هههه هانا غنشووف…
صورت أنير للي شحال بكى مبغاش يطلع ليها فالخيل وحيت ديجا مخلصاه طلعاتو بالسيف عليه وزادت ركبت معاه واخا كيبكي تصورو هبطت من تماك لقات وفاء ماشي حتى لتماك
ملاك: مالكي؟!
وفاء: ماما قلت ليها على الخطبة قالتلي نجيو عندك لفاس ولكن باش يجيو لتازة لا
ملاك: علاش؟!
وفاء: قالتلك جداتي وخالتي معجبهمش الحال اكترية فاش هداك لحمار بقا كيرغب باش رجع اوا قالك مدرتش بوجهم
ملاك: تخربيق
وفاء: بانلي غير غنتحشم وصافي مع هاد ولد الناس
ملاك: صافي الا مبغاوش ديري فاس باش تفداي المشاكل
وفاء: وكفاش غنوصلها لعمر
ملاك: غتقولو شنو كاين باش حتى هو يفهم ان عليك الطلب ومكنتيش واقفة عليه ههه
وفاء: شي افكار عندك هه
ملاك: انا جاتني حسن حيت بابا مكانش غيخليني نجي عندك لتازة اللهم فاس.. والا بالصح غتكوني تماك ممرتاحش ويبدا حشيان الهضرة وداك تبرهيش اللهم هنا نهار دايز دايز
وفاء: الله يصااوب وصافي.. ياله رجعو بحرا نصليو شوية
ملاك: بركاااتك اخاي عمر
وفاء: ههه حتى حاجة مغتنفعني فهاد الوقت من غير صلاتي وندعي
ملاك: مزياان.. نشريو لهاد البرهوش شي حاجة ونمشيو..
~~~~~~~~~~~
خديجة: (لدابا مدارت التيست غدا غتكمل 10 أيام باش مجاتهاش الفرحة باينة عليها والمورال طااالع لدرجة عرضت على عݣوزتها وطيبت شهااوي وكولشي كان هماوي وشكرو فيها وبطبيعة الحال الغالية لا.. كانت كتغسل لماعن هي ومرت أشرف وغيثة مشات تنعس حيت كلات بزاااف رجال بغاو يهبطو يمشيو للجامع)
الغالية: يوسف ولدي بغيتك دقيقة
يوسف: صلا الوالدة!!
الغالية: غير دقيقة (سبقو لوخرين
وهي هضرت بشوية)
بغيتك تعرف الياقوت مشات المحامي ودفع طلبها للمحكمة
يوسف: (بقا كيشوف فيها)
مزيان غتوصلي داكشي للي بغيتي ولكن نهار ينوض بيني وبين ديك بنت الناس صداع غنكون واحد ااخر معاك الوالدة…
ليلة العيد كل واحد فاش مشغول مراد المحال عااامر كما العادة خديجة عند عݣوزتها حيت غيصبحو يعيدو معاهم جاتها الاجواء مملة عكس دارهم للي دارت معاهم أبيل ڤيديو ملاك ووفاء خرجو اللاطات لفران لقات حمزة حتى هو خارج باللاطة
حمزة: حطوهم هنا نديهم..
ملاك: لا لا بلا منعذبك اخويا
حمزة: صافي حطيهم هنا (كانت موت عݣزانة حطوهم مخالفين باش يصلاح يهزهم وهوما رجعو للدار بلا ميزيدو الهضرة بيناتهم، رجعت للدار كل واحد شنو كيدير واجواء العيد باينة عندهم)
وفاء: (صونا تيليفونها كان عمر طلعت لسطح بالزربة)
السلام
عمر: عليكم السلام لباس عليك اوفاء؟!
وفاء: الحمدلله ونتا مزيان؟!
عمر: الحمدلله.. انا ݣلت لمالين الدار من بعد سيمانة غنروحو عندكم لتازة
وفاء: عمر مغنكذبش عليك السيد للي كنت مزوجاه كنت قلت ليك ولد خالتي ومالين الدار مبغاوش يتحاشمو مع العائلة انا براسي معجبنيش الحال ولكن هاكا رايهم قالولي الخطبة نديروها فاس على حساب خالتي وجداتي، اصلا لدابا مزال كيرغبوني باش رجع ل… (سكت مدة) عمر!!
عمر: نتي مبغيتيش ترجعي معاه؟!
وفاء: لا انا وداك السيد مستحيل نرجعو واخا نعرف نموت مرجعش ليه مشفت معاه غير الشر ..
عمر: فاس واش عندك العائلة فيها؟!
وفاء: الدار لي كارية تماك غيجيو عندي فيها مالين الدار
عمر: (مكيجاوبش دغيا حتى كيوترها) سيمانة الجاية انشاءالله نكونو عندكم
وفاء: (تبسمت) ان شاء الله
عمر: خاصك شي حاجة اوفاء؟!
وفاء: الحمدلله مخاصني والو (كملو الهضرة باحترام قطعت وبقات كظحك مبيناتهم حتى غرام ديال الرومانسية ولكن مفرحها هبطت عند زهرة كتعاود ليها الجديد)
ضرووري تكوني معايا اخالتي
زهرة: الله يكمل عليك بالخير ابنتي
وفاء: اميييين اميين امين.. فينها ملاك؟!
زهرة؛ غتلقايها فبيتها مخبعة ولا فشي قنت!!! شغباتني ديك لبنت للي مزال كتهرب من شغال الدار..
#العيد
اورطيغا: (من بعد صلاة العيد مشا للرياض كانت شتا كطيح خفييفة صونا على ملاك مجاوبتش عارفها تكون مشغولة مع الدار للي عندهم عامرة كما قالتلو صباح دخل كالعادة سلم على شريف ومو والحاج اما سعد وشفيق والو مكيدورش ساحتهم وهوما كذالك حيت بصعيب باش شاد راسو عليهم…
وشي لاخر سلام الله عادي.. بقا مجمع مع مو والحاج حتى بقاو كيتهامسو هو ومو)
تكمل خطبة عمر ونمشيو حتى حنا نديرو الواجب مع ديك نص بنادم!!
أمينة: (فرحانة) وعلاش مديروش خطبة ولاكط مجموعين
اورطيغا: ونروحوها معانا علاش خسران المركوب
أمينة: ههه والعرس؟
اورطيغا: ديري القاعة عرضي على من بغيتي انا بعديلي غير تويشية ديالي راه تعذبت وطال صبري
أمينة: هاد الجحموم مكتحشمش هه
اورطيغا: مهم ازين انا غنمشي
أمينة: جلس تغدا معايا
اورطيغا: وكان كان لعدا غير معاك نجلس ولكن هاد جماعة بلااش وأصلا داير مع دراري
أمينة: جلس اولدي
اورطيغا: غتجي بالليل ؟!
أمينة: لا ولدي اليوم طايرين الطلبة اجي تحضر ليها
اورطيغا: (حرك راسو بلا) هو هدا ازين (تفوه) نمشي انا
أمينة: صبر نعطيك غداك من هاد التفويهة عارفاك غتمشي للدار تنعس
اورطيغا: معندي مندير بماكلتهم
أمينة: يانا للي مطيبااه وهدا رزقي حتى يانا ماشي كل مرة نعاودها ليك!! (مشات للكوزينة حتى خرجت ليه ساشي سلت باش ميشوفوش الحاج ومشا للدار صونا على ملاك جاوبت)
أفين نتي؟!
ملاك: (مكرهة) الدار عامرة تحلف الا عندنا قبة مولاي عابد كولشي جاي يزور
اورطيغا: هداك سميتو العيد وكولشي جاي يدير صلة الرحم
ملاك: مسامحاهم انا بغيت غير نعس
اورطيغا: انا حسدتك على ديك العائلة
ملاك: وانا عائلتك العمر لهلا يحوجك
اورطيغا: ههه انا راجع للدار
ملاك؛ علاش غتبقى بوحدك نهار العيد؟!
اورطيغا: هي الا جيتي عندي ولا نجي انا
ملاك: اممم مع ل5 صالح لية نسلت واحد سوييعة
اورطيغا: (عجباتو) سيييييير على الله…
غيثة: (جا عندهم ادم فالعيد للي مبقاش صونا عليها هو وعائلتو عرفت غيمشي لفرنسا هو وختو وحتى مو يجلسو شي شهر ولكن باه باقي ممنوع من مغادرة أرض الوطن حيت الملف ديالو باقي معطل حيت كل مرة المحامي كيعطلو باش ميدخلش الحبس!! وكيطلب استئناف للي كيخلصووووو عليها!!
طلب ادم يشوفها شوية خرجو برا وهي مربعة يدها مبعدة عليه)
غتمشي لفرنسا؟! (مكتقدرش حتى تكمل الشوفة فيه)
ادم: ضروري احبيبة خاص نمشي على حساب خدمتي
غيثة: اممم
ادم: علاش مبقيتيش تتبغي تخرجي معايا؟!
غيثة: حيت نتا غير تتستاغلني وصافي المشكل معارفاش حتى علاش مزال مطاوعاك على هادشي للي تدير فية!!
ادم: وعلاش غنستاغلك !!!
غيثة: صافي نسى
ادم: (مد ليها قريعة بحال للي كان عطاها شداتها بالزربة وخبعتها)
شكون تيستاغل لاخر دابا!
غيثة: (جات دايرة ماشية وهو يشدها من ذراعها)
رخي مني ادم
ادم: مالكي معايا كان تيعجبك الحال منين تنكونو بجوج!!
غيثة: واش متتخافش نحمل؟!
ادم: (بكل ثقة) لا حيت عارف مستحيل تحملي انا داير احتياطي معندك مناش تخافي (شايفها بحال ممتاكداش) غيثة!! بالصح تنهضر معاك راه مستحيل تحملي غير كوني هانية!!
غيثة: متيقتش داك الاحتياط
ادم: (مفهمس علاش كتحكر على قضية لحمل وهو كان كيهضر بالصح.. لدرجة مشات دغيا هزت عينها شافت خديجة كتهضر فلبالكو عارفاها غتمشي دابا لعند دارهم يتعشاو قررت تمشي معاهم حيت هاد الدار رجعت كتخنقها اما قضية لحمل رجعت كتنساها حتى تشوف شي حل!!!)
ادم: (بقا متبعها معرفش علاش تبدلت دغيا وعلاش كتعاود قضية لحمل واش تكون حاملة من شي واحد اخر!!! مستحيل هو فوقما عطاها دوز كبيرة كتكون معاه يعني مكتكونش مع شي واحد اخر.. خرج من تماك مشا فحالو على ميلحقو عائلتو…)
~~~~~~~~~~~~~
اورطيغا: (كان كيتسناها من مور التيرا للي موالفة كتجي ليها حتى بانت ليه هي وأنير طلعت مد حنكو جات تبعد وهاد المرة جرها سلم عليها وهي كظحك)
صافي هنينا!!!
ملاك: واش حماقييت ازمر؟!! (هز يدو وهي تهز حواجبها بمعنى بنيتك)
اورطيغا: (شد ذقنها كيحركو) شنو فيها!! نمشيو لقهيوة للي مشينا ليها داك نهار؟!
ملاك: ولكن منتعطلوش حيت غيجيو خديجة ومريم وكولشي غيتجمع!!
اورطيغا: مع تيسير الله…
ملاك: (مشاو فجو الظحك وكل مرة كيبغي يقيس فخضها يدها وهي كتصدو حتى حطات أنير على حجرها عاد رسا وصلو لتماك للقهوة للي كيمشيو ليها كانت عامرة دخلو شدو طابلة وأنير حطوه فكرسي الاطفال وحطات حداه لعابتو دخل مراد يجيب شي حاجة يشربوها حيت السرباي تعطل وكانت الدنيا عامرة على حساب العيد..
هي بقات كتشوف وتحنزز حتى كيبان ليها ولد خال باها هو مرتو خرجت عينها هزت أنير ومشات لبرا ساالتة صونات على اورطيغا للي جاوبها)
مراد ولد خال بابا كاين فالقهوة انا خرجت لبرا انا وأنير (قطع عليها ومشات حدا طموبيلتو ميمكنش تغاامر راه غتوصل سخونة لباها حتى شافتو جاي باين معاجبوش الحال)
اورطيغا: اش خرجك هنا نتي بوحدك؟؟
ملاك: مراد راه غيتجبد لية صداع
اورطيغا: عطي بظهر ابنادم حتى نجي
ملاك: امراد الله يهديك راه هدا الا شافني غيوصلها لبابا فلبلاصة
اورطيغا: اوا وانا نضييع!!
ملاك: (تبسمت) نمشيو بلاصة اخرى!!
(حل الطومبيل معصب هي ركبت أنير اللور وطلعت ركبت حداه كتشوف فيه)
مراد متقلقش واش تبغي بابا يتعصب علية وعاد مغيرضاش شي واحد يقولو شفت بنتك فشي قنت مع شي واحد براني زعما راك بديت كتعرف بابا
اورطيغا: شوفي ابنت صافي غير تكمل خطوبة عمر الغد ليه غنجي انا والوالدة
ملاك: (فرنست) صافي!!
اورطيغا: شنو صافي انا هادشي طلعلي فصحتي نتشاوفو بلݣرام الهضرة بلݣرام نتي مطالقاناش اللعب!! شنو رجع كف** على اخر يااامي
ملاك: (خرجت عينها) وااااا مراااااد!!!
اورطيغا: وشنو غنزوق ليك الهضرة!! صافي درنا عقلنا الله يخلف هاكا الواحد راه تيمشي يقلب عليها فنصاصات الليل بغيتك وبغيتيني شنو غنتسناو مزال!!
ملاك: (ميقت فيه) الواحد خاصو يخاف من الله قبل ميفكر يمشي للهاوية
اورطيغا: وحيت متاقي فيك الله مزال تتحلي فمك هاكا معايا
ملاك: واش نتا هضرتك كولها تهدييد!!
اورطيغا: ونتي هضرتك كولها ناشفة مكاينش حبيبي توحشتك تنبغيك شي حركة ابنادم راه قربت نبقى نشوفك عبد الغافور حدايا
ملاك: بزاااف عليك انا الأنوثة كتمشى على رجليها
اورطيغا: وبين ليا!!!
ملاك: حتى دير علاش
اورطيغا: (كيشوف فيها ميمكنش تسكت والهضرة تبقى واقفة عندها) مووصيبا نتي
ملاك: نتا كتقلب علية!!
اورطيغا: ( وزاد صايݣ مشاو لبلاصة كطل على جبال والطبيعة ووقف الطومبيل ضار عندها كيشوف فيها)
شنو تبوسني ولا نتلاحو من هنا
ملاك: ههه نتلاحو…
بقاو مجمعين شوية ورجعت الامور طبيعية شوية بدون مدابزة.. وتم راجع بيها لصفرو هي تعطلت وهو داير مع مو باش يخرجو يساريها شوية كما موالف كل عيد.. جات خارجة وهي تزعم باستو فحنكو بالزربة قايسة غير بشنايفها حنوكو تبسم شاف فيها هاز حواجبو
ملاك: باي (خرجت وحلت على أنير للي ناعس خرج حتى هو مربع يدو متكي على الطموبيل وكيشوف فيها)
بسلامة
اورطيغا: شنو زعما نتي.. شي يبوس وشي يشوف!!
ملاك: ههه بسلامة
اورطيغا: اجي (مشات وهو بقا متبعها حتى دخلت الدرب وهو رجع شاد طريق لصفرو كيهضر معاها فالتيليفون حتى دخلت للدار قطع وزاد كسيرا باش يلحق على مو..)
داز نهار عادي جات خديجة ويوسف وغيثة وجات مريم وولادها وراجلها كما العادة تجمعو تعشااو وكلها شد دارو ملاك كانت قليل فين كتجمع مع غيثة للي كل مرة كتجي العين فالعين كتلقاها سااهية فيها حست بالشفقة عليها وكنشوف فعينها حزن كبير لدرجة كتسائل واش سرقت منها اورطيغا؟!!!…
~~~~~~~~~~~~
الغد ليه جات وفاء سبقت واليديها للدار تشوف شنو ناقصها باش توجد للخطوبة كانت على تواصل دائم مع عمر حتى كتصدم بصاحبتها رجعت للدار.. بقات واقفة فبلاصتها
وفاء: امتى جيتي فاطمة الزهراء؟؟!
ف.ز: جيت قبل العيد (طلعتها وهبطتها فشنو لابسة كولشي طويل وواسع ووجها بلا مكياج) شنو درتي الزيف؟
وفاء: امم
ف.ز: هههه كظحكي!!!
وفاء: علاش غنظحك؟؟ مهم واش رجعتي فمرة؟!
ف.ز: دابا هاني جالسة بعد غدا دايرة سهيرة مع لبنات داكشي للي موالفة مور كل عيد راكي عارفة وحتى نتي معروضة ولكن بلا هاد شرااوط
وفاء: مصالحش أفاطمة الزهراء
ف.ز: اولا فاااتي سميتي فااتي واش غطبقي علية داكشي ديال قال الله وقال الرسول ههه وكفاش هاد مصالحش واش غيطلع عندك اورطيغا ؟!
وفاء: فاطمة الزهراء غنجيك نيشان غير شوفي شي كرا اخر انا باغيا نستاقر
ف.ز: واش نتي مريضة **** راه انا للي ضربت على هاد الكرية هنا من اللول وجبتك سكنتك معايا
وفاء: وانا كنجلس فيها كتر منك وبشهوووور نتي كتجي ليها مرة فمرة انا للي كنخلص كراها ضوها وماها ومرة مرة فين كتلوحي لية ديك 1000 درهم وانا اصلا كارية بالضووبل
ف.ز: شوفي نتي.. باينة ضبري على *** بشي بولحية باش دايرة ديك الخرقة ولكن ماشي على حسابي انا ديري فيها العفيفة الشريفة نعطيك لعشية غتهزي علية قشاوشك وشراوطك وضبري على راسك ماشي انا خاسرة فلوس صحيحة على السهرة ديال بعد غدا باش تجي نتي تبقاي تقح*** علية وتصدعلي *** دابا نفرييو مها
وفاء: حنا غنشوفو شكون غيخوي!!
(دخلت لبيتها زادحة لباب صونات على السمسار مجاوبش المرة التانية التالتة ملقات غير تصوني على اورطيغا جاوبها)
خويا مراد واش غتجي الحومة هاد نهار!!
اورطيغا: انا فيها
وفاء: نهبط عندك؟! بغيتك فشي حاجة مهمة حيت السمسار للي كيكري لينا مكيجاوبنيش وبغيتو ضرووري حيت صاحبك
اورطيغا: صافي نزلي عندي…
ملاك: (كانت عطات الحلوانية تقاد ليها الحلوى على حساب خطوبة وفاء.. وجلست حدا مها)
ماما مراد ومو بغاو يجيو فالويكاند
زهرة: والحاج؟!
ملاك: معرفتش يمكن حتى هو غيجي ولكن غير غيهضرو زعما ماشي خطوبة كبيرة بحال دوفاء
زهرة: ان شاء الله ابنتي قولي لباك راك دفعتي باش تنتاقلي ماشي حتى نهار يخرج ليك ويتصدم غيتقلق منك بزاااف
ملاك: علاه هو كيقولي كولشي؟! (هزت مها حاجبها) دايرين تلقاو مع عائلتك لا نتي لا هو نطقتو بشي كلمة؟!
زهرة: كتصنتي علينا؟!
ملاك: (خرجت عينها) أناااا!! لااااا!!
زهرة: اممم وقلتيها لمراد؟!
ملاك: (خرجت عينها) لااا!!!
زهرة: اوا راه فخبار مو باش تكوني عارفة انا معارفاش واش تكون قالتهالو ولا لا
ملاك: عارفها راها عارفة ولكن انا كنعرف واحد الحاجة ماشي شغل حتى شي واحد فشي حاجة ديالك كما حتى انا مشغليش فمو ولا باه ولا طاسيلتو وكفاش جا وشنو سبابهم داكشي كيبقى ديالهم معنديش الحق نهضر فيه من غير هو ولا هي بغات تعاود واخا خالتي امينة تبارك الله مستراتهمش
زهرة: (تبسمت عارفة عقلية بنتها كفاش دايرة راه بسباب هادشي تفارقت مع حمزة)
شي 15 اليوم من مور العيد غنتلقاهم هاكا قالو لباباك
ملاك: نمشي معاك!!
زهرة: (حركت راسها بلا) حتى نشوف بعدا
ملاك: غيكون معاك بابا ؟!
زهرة: نتي عارفة باباك مكيخلينيش بوحدي
ملاك: مسكين عمرو خلاك.. (تكات على ركبتها) صراحة بيناتكم حب زوين ولكن منين خانك كرهت مو
زهرة: (طرشتها بشوية) حمارة!!
ملاك: ههه غير كنظحك ماشي زعما كرهتو بمعنى كرهتو غير ديك لوقيتة نفرتو على حسابك
زهرة: خليك فالتيقار ابنتي باك واخا هكاك ميدوونيش لا انا لا نتوما
ملاك: انا فالتيقار اصلا داكشي للي دار عليك من شحال هادي كافي باش نساو شنو دار فينا
زهرة: ههه
ملاك: كنتخيلو فاش جدي طردو من الدار حيت خيرو بينك وبينو وختارك نتي مسخوووط ههه
زهرة: (تبسمت وهي كتفكر كفاش هرب معاها
موالفة لبنت للي كتهرب هنا العكس هو للي هرب معاها وفضلها على عائلتو لدرجة سخطو عليه فديك لوقيتة..)
#فلاش_باك
#قبل_40_عام
….فرشت فوطة صغيرة على الرملة وجلست طالقة رجليها مستمتعة بالجو والشمس ولهوى لابسة دوبياس فالبحر وكتشوف فالامواج الناس دراري صغار داز من حداها شاب فالعشرينات هاز جوج قراعي مونادا بقا كيشوف فيها تبسمت معاه ضهشرااتو مظنش غتبسم معاه حتى هو تبسم وعوجت راسها كتشوف فيه حتى زعزعو واحد معاه بالشلحة
رشيد: (بالشلحة) ضور شوف على غزالة كتشوف فيا
عم ملاك: (ضار وهي قلبت وجهها للجهة الاخرى) هادي غتكون ݣاورية
رشيد: ولكن زيييينة
عم ملاك: زيد اخويا شوفلك بنت بلادنا خيرلك خلينا من النصرانياات
رشيد: ومالي انا قلت ليك غنتزوجها حنا غير كنشوفو.. (مشاو للݣيطون فين كاينين صحابهم للي من لافاك طالعين يخيمو فصويرة ومنهم اب حمزة)
عم ملاك: دراري نشوفو الشواية ديال السردين واش وجدت؟!
اب حمزة: صافي غير جلسو نتوما متعذبوش عاود انا نجيب لغدا
رشيد: (كان مزال سارح كيفكر فيها) نمشي معاك (كان غراضو يشوف ديك لبنت رجع من نفس طريق كيقلب بعينيه عليها مشافهاش لا هي لا فوطتها حتى وقفت مقابلة معاه خلعاتو بقا غير كيشوف فيها بإعجاب)
بونجووغ
زهرة: (مدت يدها) شالوووم
رشيد: (تزعزع حسابلو أوروبية!! شاف فصاحبوو للي حتى هو كيشوف فيها مد يدو سلم بلا ميفكر) لباس عليك
زهرة: (كتهضر بدارجة معكلة ولكن مفهومة) لباس ونتا ؟!
رشيد: الحمدلله جيتي بوحدك هنا؟
زهرة: انا وعائلتي (ضارت شيرت لبعييد)
رشيد: انا رشيد ونتي؟!
زهرة: داليا (تبسم وقوس عينو) يعني بالمغربية زهرة هه
رشيد: اممم مشرفيين ساكنة هنا؟!
زهرة: لا فزخاريا اسرائيل ولكن حنا مغاربة هنا ديما كنجيو هنا
رشيد: زخاريا!!! (باستغرااب) واش قرية زكريا!! (كتشوف فيه باستغراب) هاكا اسمها
زهرة: (بنيتها) لا زخاريا
رشيد: اممم غير تأكدي هي سميتها قرية زكريا كانت معروفة باجود أنوار زيت الزيتون.. ولكن للأسف!!!
زهرة: (ديرونجات اصلا عائلتها مانعاها تقول انها يهودية ولا تلمح لشي واحد باش ميوقع ليها والو ماشي كولشي كيتقبل ليهود، يكفي تقول من الخارج باش متسمعش هادشي جات ماشية ورجع عيط ليها)
رشيد: داليا!!!
زهرة: (ضارت شافت فيه معاجبهاش الحال بعد من اب حمزة للي غير حال فمو فزينها)
رشيد: فين نعاود نشوفك؟!
زهرة: (باستغراب حيت حسابها غترفض عاود حيت من ديما كتبغي تكون صداقات ومعرفة فالمغرب ومكتصدقش ليها) مااا مم حنا فاوطيل ****
رشيد: نجي عندك مع 6؟
زهرة: (تبسمت محركة راسها باه هي مشات وهو بقا متبعها حتى شافها مشات عند عائلة تماك… رجع عند صاحبو)
اب حمزة: زوينة هاد لبنت ولكن يهودية دايزة فيها النكاح وذبيحة
رشيد: نتا للي دايزة فيك ذبيحة مزوج ومخرج عينك فيها!!!
اب حمزة: اواالو غرجع ونطلق فطوم انا باغي للي تولدلي ماشي نبقاو انا وياها خووت!!
وصلت 5 ونص كان لبس تيشورت واسع مع سروال قطيفة بونطالون ومشط شعرو وموسطاجو كان فأيامو بوݣووص.. مشا حدا لوطيل للي نعتت ليه وبقا كيتسناها مقال لحتى واحد غيمشي يتلقاها ولكن فراسو حاير بزااف هادشي للي كيدير ممقتانعش بيه ولكن زينها!!!! حتى خرجت عندو لابسة كسوة قصيرة فخاضها كولهم باينين وطالقة شعرها طويل وموج ودايرة نظاظر الشمس بعد شوية من حدا لوطيل وجات عندو
رشيد: داليا لباس عليك!!
زهرة: (بدارجة معكلة) لباس ونتا مقلتش غتجي عاود عندي نشوفو
رشيد: نعام!!
زهرة: (كتشرح بيدها) كنت بغيت نعاود نشوفك جوج مرات خفت متجيش
رشيد: سحرتيني من شووفتك مقدرتش منعاودش نشوفك
زهرة: (تبسمت مفرنسة) شنو سمية ديالك نتا
رشيد: رشيد
زهرة: زوينة… (مشاو حدا لبحر وجلس فوق الرملة وهي بقات واقفة)
رشيد: جلسي
زهرة: غنتوسخ
رشيد: هدا تراب بلادك مغيوسخكش الخايبة هي الا جلستي فتراب بلاد الناس ونتي حاسباه ترابك
زهرة: (جمعت الابتسامة)
رشيد: داليا!! جلسي متخافيش..
زهرة: علاش كتقولي هاكا نتوما دغيا كتحقدو علينا واخا حنا مسالمين
رشيد: جلسي بعدا (جلست ممرتاحاش كتهبط فكسوتها) انا كنقرا فلفاك فاس يعني عارف شنو كنقول ليك
زهرة: كيعلموكم الغلط
رشيد: ومسولتيش راسك نتي واش كيعلموكم الغلط؟! ممكن نتي للي معارفاش
زهرة: انا معنديش مشكل مع الفلسطينيين
رشيد: هوما عندهم مشكل معاكم وماشي غير هوما أي واحد إنساني عندو المشكل (جات ماشية بغات تمشي وشدها فذراعها وبقا هابط حتى شد فيدها كيهضر وهو كتبسم وبهدوء)
داليا نتناقشو وللي ربح فينا يحكم على لاخر باش بغا
زهرة: (هي براسها ممتأكداش ولكن ميمكنش متربحووش تبسمت… بقا كيعطيها تاريخ فلسطين للي فاش رجع من البحر قبيلة مع دراري راجعو مزيان باش ميهضرش بحال شي عبيط ويكون مندفع فقط مشاعريا خاص يكون منطقي فهضرتو..
معرفش علاش كان ممكن يبعد ولكن عجباتو بزااف وخصوصا فاش عطاتو ودن كتسمع زاد أكد وبغا يفهمها…
هي غير كتشوف فيه وفعينيه كانت كتقول هضرة هي براسها كتحسها غير منطقية ولكن هاكا قرات وكبرات.. حس بيها نية من طريقة كفاش كتصنت وتسمع ليه زاد لادوز كفاش كيدخل ليها المعلومات الدينية والتاريخية بطريقة سلسة محبووبة ماشي بطريقة متشددة محسو غير ظلام الحال ونساو رااسهم)
رشيد خاص نمشي
رشيد: امتى نشوفك عاود؟!
زهرة: غدا حيت بقات لينا سيمانة ونمشيو لزخاريا..
رشيد: قرية زكريا !!
زهرة: الا قلت هاكا قدام عائلتي مغيعجبهمش الحال
رشيد: واخا.. غدا امتى نشوفك؟
زهرة: اه نسيت غدا السبت مصالحش حتى نهار الاحد
رشيد: علاش مال السبت؟؟
زهرة: (بكل ثقة) نهار العبادة
رشيد: والايام لوخرين؟!
زهرة: احم عاديين..
#عدنا….
ملاك: (زهرة كانت ساااهية مع ذكريتها) ماماااااا وااااا ماما
زهرة: (فافااتها.. هاد الذكريات زوينين وفنفس الوقت قاااسحين ليها) نعام!!
ملاك: كتفكري فداركم؟! شكون غيجي بالظبط؟!
زهرة: معرفتش واخا تمنيت نشوف ماما وبابا ولكن مغيقبلوش واش للي بغا يقتلك غيبغي يعاود يشوفك ابنتي
ملاك: وينو على ماما وبابا يمشيو يخ*** ولاد ل (سرطت لسانها) احم ولاد الطاغية
زهرة: هه هاكا اخر مرة كنت كنعيط ليهم
ملاك: (حست بتأنيب الضمير حتى جاتها لبكية عنقت مها) انا فية اكبيدتي ماماك وباباك
زهرة؛ ههه نتي راك عويناتي ولكن غيديك علية ولد أمينة
ملاك؛ (هزت كتفها) منتزوجش
زهرة: أحياني عليك غير كتشوفيه كدوخي
ملاك: (تكات على رجل مها) زوين بزاف أول نهار شفتو حسابلي شفار عقلتي نهار عرس بنت خالة بابا للي مشينالو لفاس.. تماك شفتو
زهرة: هادشي قديم يا بنت الهم!!
ملاك: (تبسمت) متخيليش شحال مكانش كيحملني وانا كان داك السيد هو دم سناني ولكن داكشي كامل تبدل ورجع بالمحبة
زهرة: (كتلمس على ظهرها) الله يتاويكم للخير ابنتي غير خاصك ديري عقلك
ملاك: انا بعقلي
زهرة: عارفااك بعقلك ولكن كديريه غير فوقما بغيتي ومراد راه ولد الناس ونتي تبارك الله خدامة وبرزقك هو مواقفش عليك ولكن الا لقيتي فين تعاوني عاوني وعاد دويؤتك الا شريتي من عندك راه ممشاوش فلخلا
ملاك: ضرووري اماما، براكة غير شنو كيدير معايا مسكين حقا راه سراجم غدا يكونو واجدين
زهرة: (تبسمت وهزت عينيها كتشوف فلباب ساااهية هادشي كامل للي تفكرت رجع بيها سنييييين اللور…)
اورطيغا: (هبطت عندو وفاء مبعد على دراري)
شنو فيها!!
وفاء: رجعت فاطمة الزهراء!!
اورطيغا: صدريها
وفاء: مابغاتش وقالتلي انا للي نخرج راك عارفها كفاش دايرة وانا بعدت على صداع والمشاكل
اورطيغا: علاش بݣانتها !! هي للي غتخرج ت**** انا نهضر ليك مع السمسار
وفاء: خفت تنوض صداع راك عارفها هي عارفة كولشي وعاد غيجيو عائلة عمر خفت بزااف ترجع هنا
اورطيغا: (كيشوف) سيري عند ملاك حتى نعيط ليك واجي
وفاء: راه خاص نقاد الدار راك شفتيها ممفرشاش
اورطيغا: ديك الدار مغيدخلش ليها ولد خالتي اوفاء بغيتي تبداي صفحة جديدة نساي داك القنت الدار للي مقابلة معايا مفرشة غنجيب وحدة تنقيها هاد الليلة وديري فيها كولشي
وفاء: بشحال كتكرى؟!
اورطيغا: كادو من عندي الالة سيري عند صاحبتك رجعي عندها ولبديها غدا وبانو
وفاء: وحوايجي؟!
اورطيغا: سيري نتي كوني هانية!! (كانت هازة صاكها)
وفاء: نطلع نسد بيتي حيت نخافها تهز شي حاجة من حوايجي ونمشي
اورطيغا: زربي باش نوصلك للمحطة
(مشات طلعت دخلت اي حاجة كتعلق بيها وحوايجها وسدت لباب بالساروت ولوخرا كتنݣر عليها، وفاء فيها متنوض ليها وينوضو الݣييرة بيناتهم ميتفاكو حتى يجي للي يفك ولكن هي نهار قررت تبدل مبقاتش بغات ترجع لحياتها لقديمة.. ركبت حداه كتشرح ليه حتى نطقت)
مغتقولش لعمر…
اورطيغا: نساي اوفا الله يحن عليك داكشي
وفاء: انا ناسية اخويا وعارفاك نتا باغي تسترني
اورطيغا: شكون انا للي نستر ولا نهضر بك** كنت مقو**ا.. ربي للي تيستر اختي وتيعفو علينا ماشي البشار هاكا فكري نتي عمرك تقولي رقبتك غتكون تحت شي ق**** كما بغا يكون
وفاء: (حركت راسها باه نااادمة على كولشي دازت منو ودارتو بإرادتها متمنيا ربي يسمح ليها..)
وصلها للمحطة ركبت فكار الغزاوي كان هابط لصفرو وهو رجع فحالو مصوني على السمسار..
~~~~~~~~~~~~~
ملاك: (خرجت الحانوت تجيب اولويز مع راجعة تلقات مع أميمة للي كانت عاسة عليها وقفت عليها)
غتبقاي معمرة علية الدرب نتي!!
أميمة: ملاك بغيت نهضر معاك.. عفاك
ملاك: وانا مبغيتش!!
أميمة: عفاك اختي راه تأنيب الضمير كيقتل فية (بقات كتبكي) سمحيلي على داكشي للي درت ليك (كتشوف فيها ملاك باستغراب) مكنتش كنحس براسي شنو كنت كندير ولا كنقول فاللول كنت كنغير منك بزااف على حساب حمزة مقدرتش نااخد بلاصتك
ملاك: معندي سوق فهاد الهضرة!!
أميمة؛ (جات ماشية وهي ترجع توقف عليها) عفاك غير سمعيني انا للي وقفت بينك وبين حمزة هو كان كيبغيك بزاف وعمي الله يسمح ليه كان كيعمرني عليك ويزينو هو فعيني حتى بقيت مكنشوفش من غيرو وكنكرهك نتي
ملاك: عيقتي!! هاد الهضرة بخري بيها ودابا زولي من طريقي
أميمة: عفاك غير باش تفهميني راه مكنعسش..
هوما للي ضيعوني انا وحمزة مكانوش باغيينك نتي وعائلتك واخا مفهمتش ماماك اكتر وحدة شادة فينا الاسلام على حقو وطريقو
ملاك: ايييييه ماما خط حمر متهضريييش عليها
أميمة: والله اختي كنهضر غير بالخير وانا براسي داروني قنطرة
ملاك: انا مالي فهادشي!!
أميمة: بسبابهم اختي ملاك اما نتي عمرك آذيتيني انا الغلطة الوحيدة للي درت بغيت واحد قلبو مع وحدة أخرى وباقي كيتعذب مسكين لدابا
ملاك: اممم
أميمة: انا عارفاه غير داير دابا الخاطر اما هو مزال حمزة للي كتعرفي ومزال باغي كل حاجة فيك
ملاك: شنو دابا باغية تخطبيلي راجلك؟!! الا نتي عارفة هادشي عندك زوج دالحلول يا تصبري وتطلقي وانا نساوني عليكم ونتي بالذات أميمة ولا را…
أميمة: مسامحاني!!
ملاك: معرفتش فاش كتهمك سامحتي مهم انا معندي غراض ومهازاش فقلبي منك ونتي عندي زايدة ناقصة
أميمة: (جات تعنقها وهي ترجع اللور) احم شكرا بزاف اختي
ملاك: واخا ندووز!! (تجنبت فالحيط ودازت هي صافي بنادم معندهاش معاه صافي مكتبقاش دور بيه.. دخلت للدار حتى كتصوني عليها وفاء علمتها راه جاية حيت عندها مشكل فالدار…)
ف.ز: (كتشوف فالسمسار للي المشكل ماشي فيه هو المشكل فدوك الجوج دراري للي مخضرين من موراه واقفين فدروج كيشوفو فيها)
علاش نخرج من الدار؟! شنو درت انا؟!
السمسار: مول الدار باعها
ف.ز: ولكن متافقناش هاكا نهر اللول ولا تشكات ليكم لالاهم وفاء ياك حنا كولنا كرايا هنا
….: (واحد.من دوك الجوج كيهضر متقققققققل) داااااري بغيت ندخل ليها نرجع بالليل نلقاك فيها ن*** تفاهمنا!!!
ف.ز: (غير كتشوف مقدرتش تهضر حيت غيتحماو فيها وعارفة شماكرية هنا ميرحموهاش والحبس عندهم حسن من دارهم)
….: وماشي غير انا كاين حتى شي عشراان الضو لحمر للي كان شادنا عليكم تطلق 2 سوايع رجعو هنا (تبسم وسنانو مخززين بالݣارو)
انا مكرهتش نرجع لقاك
….: هي الا دخلنا دابا اعشيري
….: (هز صباعو بتقاالة) جوج سوايع ورجعو.. (هبطو دازو من حدا دار مراد للي كان كيتصنت دخل مرا كتنقي الدار لوخرا للي حداه عطاهم 50 درهم الواحد وهبطو)
ف.ز: شنو دابا ندير
السمسار: الدار تباعت اختي وانا هزيت مسؤوليتي من هنا لفراش ديال صاحبتك نتي عندك غير لبيت وحوايجك قالو راه باينين
ف.ز: محفظااكم
السمسار: متعطليش اختي انا لتحت باش ندوزك من دوك دراري نعيط ليك على هوندا؟!
ف.ز: وانا فين نمشي دابا معارفاش فين نكري
السمسار: كاينة عندي دار لتحت الا بغيتي تشوفيها
ف.ز: انا غنوريها فاطمة الزهراء علاش قادة
السمسار: غير الا بغيتي تجبدي على راسك نحل.. انا لتحت.. (خلاها كتغلي وهبط عيات تصوني على وفاء مجاوبتهاش وفالتالي بلوكاتها..)
انا نوريك لا نتي لداك العزي للي معنية بيه!!!
~~~~~~~~~~~
أمينة: (وصلت العائلة لفاس ختها وراجلها وولادهم ختها وعم عمر للي قبلو يجيو اما شي لاخر مقلق حيت كانو ناوين من صغر عمر غيتزوج بنت عمو.. عمر كرا دار مفرشة باش يجلسو مبغاش يتقل على خالتو صونات عليه)
اولدي فينكم؟!
عمر: حنا فاس
أمينة: شكون جا؟! (خرج برا قالها شكون عرفت عمو ميبغيش يجي وحتى ختها هي مبغاتهاش تجي حيت منافقة كبيرة وباش متجبدش صداع صافي خلات الامور هاكا غدا ويتلقاو فالخطبة… انا هو خرجو يتقداو داكشي دالخطوبة حتى لغدا يلحقو العائلة لوخرين…)
فاقوس صباح بكري…
مولات الحلوى للي دوموندات من عندها ملاك اعتذرت منها حيت توفى ليها شي واحد بغاو يمشيو عند وحدة أخرى وفاء حلفت بلا براكة غير فكرو فيها وهادشي كبر عندها بزاف!!!
مشاو للحمام ومن بعد وفاء مشات للصالون، علم مراد ملاك ان الدار واجدة غير يجيو وحتى فاطمة الزهراء مسكناتش فالحومة حيت تطبعت فيها حلفة حيت بقات كتسب..
وفاء صونات على مها كتستفسر فينهم لقاتهم صباح جاو لفاس ومعلموهاش حتى العشيرة ويجيو يحضرو للخطبة… والمشكل مزال كيسولوها واش مزال متفكرش ترجع طليقها للي غير سمع لخبار وتفقس ومرض…
~~~~~~~~~~~~~~~~
عند دار يوسف وخديجة
يوسف: (حل لباب كان العون قضائي غير قدم ليه راسو عرف شنو كاين خرج عندو برا جار من موراه لباب خدا الدعوة سنا وحل الورقة كما توقع الياقوت دايرة عليه دعوة ديال إثبات الأبوة!! صراحة كان ممتوقعهاش حسابلو غير تهديد منها يعني منين وصلت لهاد المرحلة إذا!!! سمع خديجة كتعيط ليه دخل جوا فسروالو حل لباب دخل راسم على ملامح وجهو انها عادية كما موالف)
خديجة: شكون؟!
يوسف: غييير.. خديجة حبيبة واخا تجلسي بغيت نهضر معاك فموضوع مهم!!
خديجة: (تبسمت) انا اللولة
يوسف: شنو احبيبة!!
خديجة: (مدات التيست ليه ودارت يد على فمها بصوت كيرجف وعينين دامعين) انا حاملة!!! (طرطقت كتبكي)
يوسف: (بقا مصدوم كيشوف فيها وصوت بكاها مسموع شاف فالتست كانو جوج شراطي حومر باينين، ناض متبسم عنقها بالجهد تخلط عليه كولشي)
مبروووك علينا احبيبة
خديجة: حمدتك يا ربي وشكرتك حمدتك يا ربي وشكرتك!!!
يوسف: الحمدلله على كل حال احبيبة
خديجة: (شافت فيه باكية وفرحانة) خاص نمشيو طبيبة نتأكدو يااك؟! باش منسبقوش الفرح بليلة!!
يوسف: اه دابا!!
خديجة: (كتمسح دموعها) تصدمتي هه
يوسف: هه كنتي عارفة؟!
خديجة: كنت شاكة ولكن حتى دابا خاص نتأكدو.. يااك التيست ممكن يغلط يا ربي يكون داكشي بالصح يا ربي راني مقداش على شي صدمة اخرى
يوسف: للي فيها الخير احبيبة ربي يديرها ان شاء الله (رجع معنقها) احسن خبر سمعت وأحسن حاجة وقعت فحياتي هي نتي ماماااه ولا ماماها معنديش مشكل المهم تكون منك نتي
خديجة: (زادت فرحت) نمشيو دابا
يوسف: ضروري احبيبة تفطري باش متسخفيليش، شوفي نتي سيري جلسي وانا نمشي نكمل لفطورواخا!!
يوسف: (بقا على أعصابو معرفش شنو يدير ميمكنش يقمع ديك الفرحة للي فيها خديجة راه سنين واعوام وهي كتسناها هو براسو معرف يفرح ولا شنو يدير للي متأكد انه مخانش خديجة بلعكس كان وفي معاها من نهار تعرف عليها وبكامل إرادتو حيت مباغيش يخون وهادشي من صفاااتو..
ولكن منين وصلت الورقة ومقالش ليها شنو كاين إذا غيتسمى كذاب وعاد غيحطمها
غير وجود الياقوت بيناتهم مزعج عاد منين تكون الياقوت وولدها.. صونا على شريف مجاوبش صونا على اورطيغا مجاوبشش!! بانتلو يصوني على ملاك ولكن فضل ميجبدش صداع وعارف اورطيغا مغيار!! وعاد راه ختها اولى ليها منو يعني غتقولها ليها!!..
حط داك الفطور كيحاول يبدع فيه شوية مشا عندها لقاها كظحك بوحدها تبسم وعينيه لا!! جلس فجو رومانسي معاها وهي كتعاود ليه على الفرحة لكبيييرة للي فيها دابا وأنها شحال كانت كتسنى هاد اللحظة كملو لفطور مشاو لبسو حوايجهم ماشين لطبيبة الي موالفة خديجة كتمشي ليها بقاو شادين النوبة دخلو بجوج وأكدت ليها طبيبة خبر الحمل للي المدة ديالو 6 السيمانات..
خديجة بقات غير كتبكي بالفرحة وكيسكتوها خرجت من تماك)
خديجة: حسيت براسي مشهية حب الملوك
يوسف: هههه نجيبو ليك حب الملوك
خديجة: ولكن ماشي وقتو دابا باقي شي 5 شهور ولا 6
يوسف: نمشي لمحالات ديال الموحمات
خديجة: فين؟!
يوسف: فتاجموعتي
خديجة: صافي.. يوسف انا عييت دابا مخاصنيش نتمشى بزاف ياك هاكا قالتلي طبيبة!! والتحاليل ؟!
يوسف: حتى لغدا متكونيش فاطرة
خديجة: والا وقعت شي حاجة ولدي ولا بنتي؟!
يوسف: حبيبة مغيوقع والو ان شاء الله، نتي غير خوي دماغك كوني مرتاحة وهانية هادشي للي تيبغي البيبي وحتى ليك احبيبة
خديجة: (تبسمت فرحانة) نتا هو راحتي اصلا، خاص نقولها لماما !!
يوسف: واخا حبيبة (مشا وصلها للدار عالمها مطيب والو وحتى هي طلقت فشووشها من نهار اللول مخليها تعيش الفرحة كما بغات اما هو مشا عند مو مكيضويييش!!!)
ملاك: (خلاها باها مشات مع وفاء حتى يجيب زهرة فلعشية دخلو للدار كانت نقية معطرة أثاث نقي وزوين)
زويييينة هاد الدار نقية بحال ساكنين فيها 6 دلعيالات… ديالمن؟
وفاء: هادي كتكرا بنهار ديال شي زماݣري يمكن على للي سمعت مول الدار نيت للي كرالي الدار الفوق
ملاك: زوينة هاد القضية تكرا بنهار خاصني نجربها
وفاء: بزااف مشروع مربح… ياله نمشيو لتريتور باش نوصيوه على لحم ودجاج لعشا ونشوفو باتيسري على بلاطو ديال الحلوى وشي طارط..
ملاك: هاي هاي دافعة الجهد
وفاء: صراحة عمر للي بزز علية فلوس باش كنجيب هادشي وقالي بلا ميجيب داكشي خضر نشريه طايب
ملاك: فقيه ومصواب فشكل
وفاء: هه.. ملاك بغيت نقولك واحد الحاجة مقدرتش نخبع عليك كتر
ملاك: ماشي بنت!!
وفاء: هههه ازمر راني مطلقة.. سمعي!!
عمر قالي غيجيب حتى العدول اليوم نعقدو
ملاك: ديرو لاكط؟!
وفاء: اه
ملاك: زربة خاايبة هادي وفين وراقكم؟؟
وفاء: صاوبتهم فتازة داك نهار كولشي موجداه وحتى هو
ملاك: هاي هاي هاي مزروبة حتى نتي
وفاء: اختي قالي لحلال حسن يخلينا نتلقاو على راحتنا هو كيحس براسو مقتانع بية وانا مغلقاش حتى انا حسن منو
ملاك: ولكن ماشي خاص تزيدي تعرفيه كتر
وفاء: شحال ما جلست نتعارف زواج راه حاجة اخرى املاك ميمكنش تعرفي الواحد 💯 ففترة المصاحبة ولا حتى الخطوبة راه العشرة وتكونو تحت سقف واحد شي حاجة اخرى وتماك فين كتعرفي الواحد على حقيقتو
ملاك: (حركت راسها باه) نتي تعرفي اختي
وفاء: اوا المشكل فعائلتو انا عارفاه غيكون قالها ليهم دابا ولكن انا متأكدة مغيبغيوش راك سمعتي مو داك نهار غير الخطوبة وممسروطاش ليها
ملاك: داكشي بينو وبين مو، المهم دابا نتي واش مقتانعة!!!
وفاء: (تبسمت) اه
ملاك: وقرايتك؟
وفاء: الوراق مغيخرجوش دابا باش نمشي معاه وانا هاد العام غنكملو ميمكنش نسمح فيها وهو عارف هادشي ومشجعني عليها
ملاك: ااااه وحتى الخدمة؟!!
وفاء: قالي معندوش مشكل تكون غير محتارمة شروطو راكي عارفة عمر وحتى انا رجع عندي نفس تفكيرو
ملاك: اوا اختي حالتك ماشي حالة وحدة غدير لاكط
وفاء: ههه قالي مغنديرو والو حتى نتوالفو ولكن غنمشي للصالون نتقاد مهم غير رصي الماكلة والحلوة اما راك شفتي الدار زوينة نقية
ملاك: وعائلتك قلتيها ليهم؟!
وفاء: راهم عند خالتي هنا مشاو يرغبوها عاد يجيو وصراحة بغاو هي هاديك مبغاوش حتى يتقبلوها على هاكر خواطرهم راني كبيرة وعارفة شنو كندير
ملاك: اممم..اوا ياله نزربو…
الغالية: اويلي على حاملة!!! واش حمااقت هادي!!!!
يوسف: كفاش واش حمااقت!!! عرفتي (كيضحك فلحيتو بجهالة) ماشي غيثة للي خاصها تعالج نتي للي خاصكي تعالجي
الغالية: (صعرت عليه) يوووووسف!!!!
يوسف: (بصوت عااالي) لخ*ا هدا ماشي يوسف!!! نتي سباب هاد لبلا نتي بديتيه نتي غتفكييه!!!
الغالية: تحمل مسؤوووليتك!!! تحمل مسؤوليتك اولدي!!
نتا للي كنتي عايش بحال شي ݣاوري مسكنها معاك وعايش الغراام ودابا جاي دير فيها فقيييه فاااين كنتي مشحال هادي فااين كان عقلك ولا جات للي عاد وراتك شنو الصح وشنو الغلط!!
يوسف: اه غلطت وبغيت نصحح غلط ديالي وشنو كنت كندير ولقيت بنت الناس معامن!! ولكن نتي للي نضتي تتجيبيها هنا تحفري ودايرة عقلك من عقل وحدة قد بنتك
الغالية: الياقوت جبتها انا ولا لا ولدك خاصو يحمل اسمك وبراكة ماااتهرب!!
يوسف: (تجنن ضرب الحيط بيدو) ماشي شغلك من اللول ماشي شغلك
الغالية: شغلي… شغلي ونص ماشي نشوفك تتغلط ونسكت تحمل مسؤوليتك متخليش ولدك يكون ولد لحرااام سترو وعطيه كنيتك راه منين غيكبر غيحقد عليك غير نتا
يوسف: (غير كيشوف) عيطي ليها تجي دابا
الغالية: مغنعيطش عليها تجي هنا ونتا فهاد الحالة
يوسف: (بصبع التهديد) تناااازل على منقولها لخديجة انا ماشي ديال المحاكم خدمتي غتخرج عليها ديك الموووسخة راه خدام بالسمعة ديالي وعاد منبغيش للي يآذي مرتي
الغالية: (هنا خافت عليه منين ذكر السمعة الخدمة!!)
يوسف: نتي للي غتفكي هادشي على مندير تحليلة الأبوة
الغالية: صافي انا غنهضر معاها ولكن التحليلة غديرها
يوسف: عمرني نسمح ليك الوالدة.. عمرني نسمح ليك… (خرج مكيشووفش وهي الما حمد ليها فركابي فشلت وقلبها كيضرب!!! ركب فالطموبيل وكسيرا مكيضويش ممنتابهش لعلامة قف يخفف السرعة حتى كيحس براسو مقلوب وودنيه تسدوو…)
الغالية: (هضرت مع الياقوت باش تجي دابا وكتجيبش ولدها، قطعت وصونات على شي مرا كتعرفها)
السلام عليكم..
انا هي الغالية ديال صالون***
كدايرة الحبيبة لباس عليك ؟؟؟
الحمد لله ربي يخليك.. لباس لباس…
قوليلي رااني حتاجيتك فداكشي للي كنا هضرنا فيه!…
(دخلت غيثة فاقدة الأمل حتى طبيبة مبغات تعاونها وزادها ادم منين مشا فحالو لفرنسا يعني بقات بوحدها فهاد المشكل وعاد أكد عليها انه داير احتياط ديالو وكان كيهضر بالصح وقرات على شنو قال ليعا وتأكدت ولكن معرفت واش كيهضر بالصح ولا لا حيت مبقاتش كتيق فيه!!
دخلت لقات مها كتهضر فالتيليفون عاطياها بظهر)
لقيت العاقسة حاملة..
اه مرت ابني…
وشنو ندير؟!!
شنو سميت هاد دوا للي ينزل هاد الفضيحة!!
غيثة: (طرطقت عينها فهمت خديجة حاملة والغالية غتشربها دوا باش طيحولها…)
الغالية: (كتبت سمية ديال دوا فلاجوندا)
وميقتلهاش؟!
ولو نخاف.. صافي الله يعطيك الخير..
غدا نتلقاو ان شاء الله..
ياك متأكدة مرت ابنك موقع ليها والو..
عاود حملات إوا مزيان حتى انا نبغيها تعاود تحمل ولكن ماشي فهاد الوقت..
عندهم مشاكل حتى يحلوها بعدا..
(قطعت وبقات غير واقفة غيثة دارت راسها عاد داخلة)
غيثة: ماما!!
الغالية: بنتي جيت؟!
غيثة: اه، مالكي تتباني معصبة؟!
الغالية: ماشي خديجة صدقت حاملة!!
غيثة: بالصح!! مبروك عليها غتكون فرحانة هي ويوسف (غتنبه يوسف وخديجة شنو غدير مها)
الغالية: اه وحتى انا طايرة بالفرحة طلع طلع بدل علية حوايجك
غيثة: ونيت نصوني عليها باركتي ليها؟!
الغالية: سير علية اغيثة!!
غيثة: واخا تعطيني ديك لاجوندا بغيت نجبد نمرة مشاتلي من التيليفون
الغالية: من بعد
غيثة: (خاصها تجبد سمية ديال ديك الكينة للي كتبت تماك بقات عاسة على مها للي محطتش ديك المذكرة وطلعتها لبيتها معاها واخا هكاك مغتفاكش تبعها حتى تعرف سمية ومن بعد مغتخليهاش تاذي خديجة..)
كولشي بارك وفرح لخديجة من خوتاتها زهرة وباها غيجيو يشوفوها عاد يمشيو الخطبة يوصلها رشيد عاد يرجع لصفرو حتى يكملو ويديهم لصفرو
ملاك: (كتهضر فالتيليفون مع خديجة) شوفي غير نكمل مع وفاء نجي نشوفك
خديجة: لا بلاش متخليهاش بوحدها فالليل غنشدك تباتي معايا
ملاك: معرفت واش يبغي بابا راكي عارفة
خديجة: غيبغي غيبغي.. فين وصلتو فالتوجاد
ملاك: وفاء قربت تكمل وغنمشيو للدار وغندوزو على باتيسري نهزو داكشي للي دموندينا ولعشا الليل غيجي شي تريتور زوين كيعرفو مراد غيجيب كولشي
خديجة: خاصها شي حاجة؟!
ملاك: معرفتش، موحال!! حيت حتى القفطان شرات واحد قبيلة كولشي عندها واجد
خديجة: ودارهم؟! جاو؟!
ملاك: اممم (مصالحش ليها تهضر حيت عصبو وفاء منين قالو ليها راه خالتك كعات وخاصك ديري حل مع ولدها للي تزوج ݣاورية برا وهي تبقى مرا تانية هنا فالمغرب)
خديجة: ياله سيري حتى تجي ماما ويوسف عاد نجي انا..
(قطعت لدابا الغالية مصوناتش عليها من غير غيثة للي باركت ليها. بانت فرحانة ولكن ديك كتأكد متاخد حتى شي ماكلة من عند شي واحد!! يمكن قصدت مها مكاينش للي كيكره خديجة فهاد العالم من غير الغالية..
حطت التيليفون تفكرت عمر طليقها للي شحال سبها وعايرها حيت عاݣرة نزلو دموعها عاشت ظلم خايب معاه ومع عائلتو وحتى حشيان هضرة عائلتها.. مكرهتش توصل ليه انها ماشي ناقصة كما كان كيقولها ومعيوبة ولكن هادشي غير تبرهيش وغتجبد عليها صداع فغنى علييه…
تكات وهي حاطة يدها على كرشها وكتخيل وتفكر ݣاع داكشي زوين للي جاي كفاش تسهر وترضع وتربي كان حلم قرب يكون مستحيل ورجع حقيقي بفضل الله ناضت من بلاصتها بشوية توضات وصلات كتشكر الله وكتدعي ربي يتمم فرحتها.. صونات على يوسف للي تعطل مجاوبش وعرفت من عند غيثة معندهمش فالدار جاتها فكرة يكون كيشري ليها شي كادو تبسمت ورجعت بلاصتها متكية مصونية عليها نعيمة شادين جمووع..)
يوسف: (خرجوه من الطموبيل بصعوبة جابدينو الناس حيت بقات مقلووبة بيه ومن حسن حظو كانت داير الصمطة يدو كانت عاطياه لحريق والدم كاين فنيفو وجرحة فحنكو غير كيشوف لغبابر الطموبيل للي دخلت فيه موقع ليها والو عكسو هو للي كلاتها..
بقا فالارض بحال شي واحد مصدوم كيهضرو معاه مكيجاوبش غير كيشوف.. كانت دورية ديال البوليس تماك جاو عاينو لبلاصة طمئنو عليه جات الاسعاف طلع وهو تماك جالس دااايخ)
بغيت التيليفون ديالي ووراقي بقاو فالطموبيل
(مشاو جبدولو كولشي ديالو على متجي الديباناج وحتى السيد لاخر متفهم دارو كوسطا حبية وداوه لاكلينيك للي طلب يمشي ليها صونا على شريف جاوبو وغيجي عندو عقلو بدا كيوعا وكيفكر غير فخديجة وولدو للي جاي والولد لاخر للي خاصو يعتارف بيه غمض عينيه راسو غيطرطق ختمها بكلمة)
#الحمد_لله
~~~~~~~~~~~~
اورطيغا: …وايلي واش شي حاجة خايبة
شريف: انا عاد غنهود لعندو
اورطيغا: صيفطلي دابا لادريس واش مرتو مفخبارها والو؟!
شريف: موحال.. (مشا عندو دخل كان مزال فالمستعجلات تسنى حتى خرجو من عندو دخل عندو كان متكي)
اش داكشي الغزال؟!
يوسف: مكتاب الله
شريف: عمرك شديتي حتى بروصي فطريق شنو وقع ليك!! الحمد لله بعدا على سلامتك
يوسف: (هز حواجبو وباينة فيه ماشي حتى لتم عاد مخلاهمش يديرو سكانير)
شريف: شنو عندك بعدا؟!
يوسف: مكتشوفش!!! تهرست من هنا (شير ليدو ) بنت ***** الياقوت صيفطات العون القضائي لداري
شريف: يااك!!
يوسف: وخديجة هاد صباح عرفت، زعما عرفنا جاينا وليد ولا بنيتة
شريف: (بقا غير كيشوف فيه فهم شنو سبب الشرود ديالو صونا اورطيغا كيسول عليه فين كاين علموه دخل قالولو شنو كاين! وبقاو غير ساكتين)
اورطيغا: حريرة محرحرة عندك ولكن معندك ليها بديل هضر مع **** تنازل على الدعوة وسير جمع وطوي مع ولدك ومتخليش ديك بنت الناس فدار غفلون.. واخا حاملة راها بنت الناس وعاقلة تقلق شوية وترجع
شريف: معندكش شي حل اخر من غير هدا ايوسف
اورطيغا: ونتا مغالطاش هادشي راه وقع من شحال هادي للي خاصك دير هو كفاش توصل الميساج وحتى حاجة متبدل غير الولد غتخليه ليك ولا باغياك غير تعتارف
يوسف: حدي غنعتارف نصرف عليه شي حاجة اخرى لا!!
خديجة: (جات عندها مها فرحت معاها بزاف دخلتهم للدار هي وباها كانت موجدة الضيافة ليهم سولوها على يوسف)
غيكون مشا للخدمة يمكن!!
رشيد: زهرة انا غنمشي ولا تبغيو نوصلكم عند الناس
زهرة: صافي غير سير نتا حنا يجي يوسف ويدينا
خديجة: انا نصوني عليه (صونات مجاوبش) غير يسالي غيصوني جلس ابابا
رشيد: نمشي ابنتي (ودعت باها للي جاه أبيل وهو راجع لصفرو خلاه مصدوم.. حتى الليل عاد يرجع ليهم)
زهرة: (صونات عليعا امينة) انا عند بنتي..
العقبال عندك الحبيبة ونشوفو ولاد ولادو…
ههه اميين..
غير سبقي حنا نتسناو راجل بنتي غيوصلنا لتماك…
بسلامة عليك
خديجة: (حيدت التيليون من ودنها) كنصوني عليه مكيجاوبش
زهرة: الغايب حجتو معاه..
خديجة: داكشي نيييت.. قوليلي اماما شنو ناكل شنو مناكلش شنو للي مزيانلي شنو للي قبيح!!!…
~~~~~~~~~~~~~~~
ملاك: (كانت فالدار مع وفاء للي دارت ميكاب خفيف بزاف طلقو بخور برائحة العود كولشي كان واجد جابو الحلويات مستفة فبلاطويات مغلفة حطو الفاكية حطو ݣاع الضيافة للي تغلفت على ميقربو يجيو ويحايدو لغلاف، حطو فااصالةن فين يجلسو رجال وفالصالة فين يجلسو لعيالات حيت باينة مغيتختالطوش.. صونات على مها لقاتهم مزال كيتسناو يوسف)
ماما مزال متجي هي وخديجة
وفاء: تعطلو بغيتهم هوما لوالة يكونو… ملاك زعما هادشي كافي؟!!
ملاك: اوا بقا غير جمل نذبحوه ونحطوه
وفاء: ههه (صوناو دارهم) يقدر يكونو وصلو (جاوبت طلات لقاتهم لتحت شيرت ليهم كانت جات مها باها وعمها ومرتو وللي متوقعتش حتى خالتها للي كانت عݣوزتها سابقا رجعت عند ملاك ماشية حالة لباب معصبة تعرض ليهم فدروج)
جايا ديك الخ**** معاهم
ملاك: شكون؟!
وفاء: خالتي يخويلها ركابي
ملاك: مزيان تجي تكحل عويناتها
وفاء: الله يهديك اختي راه غير غتجبد صداع وصافي ياك محاملانيش لاش جاية ييييخ على بنادم كداير!!
ملاك: ان شاء الله ميكون بو صدااع.. (صونات على اورطيغا ومشات للبيت جاوبها)
فينك ازعر
اورطيغا: هه انا مع عمر اطويلة، شي ساعة ويجيو حقا ختك مفراسهاش ولكن متقوليهاش هادشي للي غنقولك
ملاك: شنو؟!
اورطيغا: يوسف دار كسيدة
ملاك: اويلي!! واش هو مزيان؟!
اورطيغا: مزيان الحمدلله غير تهرس من يدو حفظو الله من كسيدة خايبة
ملاك: امم مسكيين، صافي بلا متقولها باش مضيعش خطوبة وفاء (سمعاتو كيظحك) ههه انا نصوني عليه
اورطيغا: انا ندوز لابيل متقطعيش (عرفات غير باش يسمع دوز لابيل شدت فيه وهو كيظحك أكد عليها متقول والو لخديجة باش متخلعش…)
نعيمة: (بقاو مصدومين من قرار ولدهم كفاش يعقد وكيقولها وهو متيقن من راسو يعني مكاينش نقاش من مور هاد القرار.. مو جات تهضر باها هز يدو باش تسكت وهي تسرط هضرتها)
اب عمر: صافي منين بغا يعقد هو راه عارف صالحو فين
نعيمة: ولكن هادشي خاصو توجاد ونفرح حتى يانا مع حبابي واهلي ونعرف الطفلة للي راه ماشي يخطب فيها ودرك بغا يعقد نيشان
عمر: هانتوما ماشين تعرفوها
اب عمر: فالعرس نشاعالله انعيمة
عمر: نشالله (شاف فمو) ولدك راه عارف واش يدير اما
نعيمة: (نظرات راجلها ممخلياها تقول والو) بينك وبين خوالك وعمامك (قلبت وجهها غير راضية)
عمر: حفلة للي يسالوهالي نديرهالهم قبل متروحو للسويد
نعيمة: اوا ووراقها؟!
عمر: غنݣادهم ليها فاش رجع
نعيمة: واش بغات جواج على قبل لوراق؟!
عمر: هي الا بغات الخارج غتمشيلو بقرايتها.. مهم مبقا والو ونمشيو واش خاص نديو ليها شي حاجة؟!
ياسمين: الخاتم اخويا ضرووري
عمر: شريتو (كانت شراتو هي منين صيفط ليها الفلوس)
نعيمة: (خرجت عينها) نشووف
عمر: انا نشوف مع العدول.. واش نخرجو نديولها حويجات ولا نعطيها فلوس تشريهم روحها
نعيمة: (بنفخة) ضروري نشريو.. (خرج برا مخلي من موراه مداولة عارف مغيلقاش مشكل فهادشي حيت زواج عندهم فالعائلة كيتزوجو وهوما صغار ولكن باش يعرفو الخلفية ديالها فين غيكون التشويش داكشي باش مقال والو مدام هو يتحمل مسؤولية اختيارو ميحتاجوش يعرفو قبل فين غيكونو مشاحانات ودبااز…)
~~~~~~~~~~~~
يوسف: (وصلت لخبار الغالية على كسيدة ولدها، قالها العساس ديال شي ڤيلا لعساس دڤيلا ديالهم.. هز تيليفونو واخا مبغاش يخلع خديجة صونا عليها ميخليهاش معارفة والو اصلا هو شوية ويخرج على ميرتاح شوية اما حتى شي لاخر مابغاش يديرو محاملش الجلسة هنا كيقلب فعقلو غير كفاش يقولها كولشي باش يرتاح)
وي حبيبة..
خديجة: فين مشيت من قبيلة كنصوني مكتجاوبش وكنتسناوك تدينا انا وماما لعند وفاء
يوسف: درت كسيدة صغيرة (سمعها كتولول) ماشي شي حاجة.. خديجة!! ماشي شي حاجة!! وااا سمعي ماشي شي حاجة ݣغااف انا مزيان الحمدلله شوية غنكون عندك باش تعرفي انا راه مزيان
خديجة: حلف واش نتا لباس؟!
يوسف: والله احبيبة الا بيخير الحمد لله على كل حال قبيلة مبغيتش نصوني نخلعك حتى نسالي
خديجة: فينك نجي عندك ؟!
يوسف: لا.. متجيش انا غنجي.. عفاك لخديجة انا مزيان مبغيتكش دخلي هنا غير صبري انا شوية ونكون عندك واخا!! (قطع والدوخة دايرة ليه ضبابة فعينيه…)
الغالية: (جات هي واشرف وراجلها وغيثة مخلوعين عليه لاكلينيك كان وقف باش يخرج هو وشريف كان جرح فحنكو صغير دايرين فاصمة ويد مجبصة طمئنهم ولكن ملامحو جامدة وخصوصا مع مو خلصو المصحة وخرجو برا)
ياله اولدي للدار
يوسف: غنمشي لداري.. حقا الوالد خديجة (تبسم) حاملة (فرح معاه هو وخوه وغيثة عنقاتو مو غير كتشوف ولدها مكيشوفش جيهتها فمرة عينو متلقاتش بعينها بقا فيها الحال حتى بغات تبكي على هاد العقاب القاسي للي دار معاها، واش هاكا غيرجع معاها؟!!)
انا غنمشي دابا حيت نسابي فالدار تيتسناوني يالهو معايا!!
(بانت غير دوزها عليهم ومنين عرفوه بيخير خلاوه على خاطرو خصوصا كيأكد بغا يرتاح من صداع فدارو، وصلو اشرف خوه للدار طلع ومشا لقا خديجة كتسناه على نااااار غير شافتو بقات كتقلبو شنو بيه وهو كيظحك وطمئنها على حالتو وحتى الخطوبة دارت منها بناقص باش تقابلو وعيطت ليها غيثة علماتها غيجيو هي وكولشي يتعشاو معاهم وغيجيبو لعشا وااجد)
غيثة: صافي انا قلتهالها اماما (مراقباها شنو دوا للي غدير لخديجة)
الغالية: عيط على نادية تسخر لية
غيثة: انا نتسخر ليك
الغالية: لا سير نتا لبس وتقاد شوية راك رجعتي صفرا حاالتك
غيثة: وصافي غير عطيني نتسخر راه خاصني حتى أنا من لفارمسيان نجيب ڤيتامين تسالالي
الغالية: (خرجت عينها) شكون قالك انا باغيا من الفرمسيان شي حاجة!!!
غيثة: غير قلت حيت شفتك معصبة وقلت بغيتي شي كالمون
الغالية: (بعصبية) الا بغيت شي حاجة تكالميني غنجي ناخد منك داك لادروݣ للي تظلي تشربي راك وليتي اختصاصية فهادشي
غيثة: (تجرحت من مها وبقات غير كتشوف ماشي أول مرة كتعايرها)
انا نطلع لبيتي
الغالية: (شكت بنتها تكون عرفت منين قالت الفرمسيان وهي دير بناقص هاد نهار على الاقل متكونش مراقبة من غيثة للي ولات كتفرشها عيني عيينك.. )
وفاء: (سمعت حشيان الهضرة من عند خالتها ودارت راسها مسمعت والو ورجعت كتعاودها ومبغاتش تسكت من نݣير)
خالتي!!! انا وولدك واخا تنطااابق الارض مع سما منرجعش معاه ولا مزال نشوف جيهتو!!
الخالة: وفين كان هادشي فين كنتي ترغبيه يرجع للمغرب وتزوجو ياك واخا طلقتو بقيتو بجوج ولا نسيتي!!
وفاء: اه عاقلة فاش مكانش عندي العقل
الخالة: وسبحان الله دغيا درتي عقلك للي لاح ولدي فيوماين
وفاء: خالتي واش زواج ماشي أرزاق وقسمة ونصيب ولدك منين كنت حاملة وكان كيدݣ فية حتى طيحولي وكنتي براسك كتقوليلي هربي بجلدك
الخالة: واش دابا اختي جبتيني هنا باش بنتك تسمعني الهضرة
وفاء: (شافت فمها للي كتخنزر) بالصح علاش جبتي خالتي وهي مباغاش ومقاداش على ولدها؟!
ام وفاء: حيت الا مكانتش ختي منجيش
وفاء: (سرطت لسانها حيت متحملة وباغيا هادشي يدوز على سلام.. صونا عليها عمر يعلمها انهم قربو يجيو بعدت سادة عليها باب الكوزينة)
عمر واش متأكد نديرو لاكط!!!
عمر: وفاء انا عرفتك ونتي عرفتي لوقيتة للي نضيعوها فالخطوبة غنديرو لاكط ولا!!!
وفاء: ولا شنو؟!
عمر: ولا نتي ممقتانعاش بية انا باغيك ابنت الناس فلحلال شي حاجة اخرى لا مغنقدرش ناخد راحتي معاك وانا كنتعرف عليك
وفاء: (تبسمت) واخ.. بسلامة
عمر: خاصك شي حاجة؟!
وفاء: شووفتك
عمر: (تبسم) شي ساعة نكونو عندكم ان شاء الله..
وفاء: مرحبا بيكم.. (ها باش عاجبها كيعطيها طاقة إيجابية خطييييييرة وراحة مفتاقداها من زمااان واخا مكيعضرش مكيعبرش ولكن باينة فيه باغيها!!
سهلت كتفكر فهادشي دقت ملاك للي مشات طلت على يوسف وتطمئن عليه وجابت ماماها معاها ودازت على أمينة جابتها حتى هي حيت اورطيغا مشغول شوية باش يصفى لبلاتي ويجي يحضر حتى هو..
رحبت بيهم وفاء مجاوبش بيديهم خاويين حيت دازو المحال جابو كادويات لوفاء زادو بلاطويات حلوى وجابت معاها أمينة من ماعنها سربيس ديال اتاي والقهوة داكشي ديال الهمة.. فرحت بزاف)
لهلا يخطيييكم علية..
جات عائلة عمر طلعو للدار حيت تعرض ليهم اورطيغا للي سلم عليهم كغرباء من غير عمر وشوية خالتو للي باينة مكانتش فرحاااانة لهادشي..
دخلو للدار تحت ترحييييب أمينة وام وفاء..
اما ملاك ووفاء كانو فلبيت مخبعين كيظحكو ومقشبين كانو لوخرين موجدين طبلة منوعة من كولشي من غير أتاي للي مزال متحط..
دخلو وكانت رائحة الدار عوود واجواء ديال الخطوبة عمر هاز بوكي دالورد ومو وختو هازين حوايج للي شراو جلسو لعيالات فجهة اما رجال دخلو للصالون تحت ترحيبات اب وفاء المساالم، دغيا هوما تفاهمو ودخلو فمواضيع الاخبار والتعارف…
نعيمة: (الصدمة منين جات وفاء هازة صينية ديال أتاي حطاتو وسلمت عليهم وحتى لي كانو معاها عاودت ليهم سلام، كانو جوج صدمات هاد لبنت هي للي شافتها كانت كتجي عند أمينة وشحال هضرت عليها وهي معاهم ومقالت والو ولكن الصدمة )
بنتي نتي.. قالتلي امينة كنتي مزوجة؟!
وفاء: (جلست لابسة قفطان جوهرة فوقو كاب وملاك لابسة كسوة شتوية، جلست حداها ملاك) اه اخالتي
ام وفاء: كانت مزوجة بولد خالتها
وفاء: (قبل متكمل مها) متفاهمناش على شي حوايج وتفارقنا خووت كما قالت ليك ماما ولد خالتي وبقا كولشي كما كان
نعيمة: اممم وشنو راكي ديري فحياتك؟
وفاء: كنكمل الماستر ديالي الا كتاب
نعيمة: حتى تطلقتي عاد بديتي تقراي؟؟ وعلاش طلقتي؟!
وفاء: (شافت فخالتها كانت الاعين عليها كل واحد وكفاش كيشوفها) اه حتى تطلقت وتفارقنا على شي حوايج متفاهمناش عليهم كما قلت ليك داكشي كيبقى فااايت بيني وبينو حتى واحد من العائلة مدخل مكتابش نكملو كولها شد طريقو وعاود حياتو ها خالتي للي كانت عݣوزتي بفرحتها لكبيرة بية جات تحضر لية
خالة وفاء: (صدمتها بقات غير كتشوف)
أمينة: اوا ختي نعيمة كيف خليتي الفاميلة ؟!
نعيمة: الحمدلله لوكان عرفو عمر يدير االكاغط لوكان جاو ساعة ولاد هاد الوقت حدهم يعرضوك
الخالة: غديري لاكط؟؟ ياك قلتي غير خطوبة !!
وفاء: انا نجيب القهوة (عصبتها خالتها تبعتها ملاك للي كتخنزر فخالتها وفنعيمة محملت حتى وحدة فيهم.. دخلو للكوزينة)
كنت عارفة هادشي غيوقع
ملاك: يمشيو يخ*** ݣاع مضيعي فرحتك على حسااابهم.. شفتي عمر بلكلاص؟!
وفاء: غير خطفت الشوفة مشفتش مزيان حتى هو داخل بحال شي تران مضار لا هاه لا هاه
ملاك: (جبدت تيليفونها وراتها لڤيديو) هانتي شوفي مزيان
وفاء: ههه مصخوطة صورتي ڤيديو ݣاع
ملاك: حيت عارفاك مرفووعة وهو مضهشر…
غيثة؛ (شافت فخديجة للي باينة فرحانة ومبقاتش مسوقة لسم الغالية دخلت للكوزينة باش توجد طباسل حيت لعشا قرب يجي تبعتها)
احم خديجة الا عطاتك ماما شي حاجة من عندها تاكليها متقبليش
خديجة: (خوفاتها) علاش؟!
غيثة: بلا متسوليني وعفاك متقولي والو لماما انا نقلت ليك والو!!
خديجة: صافي واخا
غيثة: باش منعيقوش غنجلس حداك ونتبدالو طباسل اصلا انا مافيا للي ياكل ونتي كولشي شوية باش ماما متعيقش
خديجة: (حركت راسها باه دابا غتاخد احتياط كبير من الغالية راه بنتها للي شهدت فيها وميمكنش تجي وتكذب عليها!!
تحط لعشا وتجمعو عليه الغالية كتحاول هي توكل يوسف لي كيتعامل معاها ببرود كبييير اما خديجة حتى الشهية مبقاتش ليها كتاكل غير من شلاظة للي صيبت هي ومرة مرة كتخرب فداك الطبسيل شافت فغيثة للي كتاكل من الطبسيل للي تبادلو مفهمتش واش مخافتش على راسها واخا متكونش حاملة ولكن داكشي للي غيدار غيأثر عليها حتى هي!!)
~~~~~~~~~~~~~~
اورطيغا: (ناض خرج من تماك بغا يكمي حتى صيفط ليه عمر ميساج باش يمشي يجيب لعدول لي عطاوهم العنوان وجاو هبط عندهم وطلعهم دخل للدار كان فصباح عمر مشا عندهم المكتب وعطاهم وراقو ووراق وفاء كولشي واجد بقات غير يسنيو.. ناضت أمينة تكلمت لولدها)
قولهم لعدول راه بداو
أمينة: العقبة ليك اولدي
اورطيغا: دابا الا بغيتي.. واقف عليها
أمينة: ههه مكرهتش ليك.. سير الجحموم راه مكتخلي بيناتنا احترام
اورطيغا: (مشا جلس العدول عيط على اب وفاء باش يعيط على بنتو دخلت وفاء لابسة قميص جوهرة فوقو كاپ، مقادة ميكاب خفيف ممعيقش جلست حدا باها هو قلب عينو مكيشووفش فيها كيحس بحالا كيخون ثقة ولد خالتو منين مقالو والو ولكن فجهة اخرى كيحس انه بسكاتو كينقذ سمعة بنت باغية السترة كما حتى هو كان طالب عليها وندم على الوسخ فاش كان عايش.. مبغا يفكر حتى شي ذكرى خايبة من الماضي وخصوصا مع وفاء سمع صداق للي كان 5000 شاف فوفاء للي كانت شي مرات كدخل كتر من هادشي بالضووبل تبسمت محركة راسها باه ناض عمر سنا وحتى هي تبعاتو وعاد باها ولي أمرها)
عمر: (مد يدو لوفاء) مبروك علينا
وفاء: (ظحكها.. مدت يدها حتى هي) الله يبارك فيك (خرجت كانو لعيالات واقفين كيشوفو بداو زغارت واورطيغا عارف صوت مو هي للي كتزغرت اصلا كتموت على النشاط، رجال باركو لعمر للي كيظحك جلس حدا اورطيغا)
اورطيغا: 5000 درهم اصاحبي!!
عمر: أقلهم مهرا أكثرهم بركة
اورطيغا: وااااه جاتك مسلكة!!
عمر: ههه يبقى غير صداق دراهمي هو دراهمها…
خديجة: (عوانات يوسف حتى فطواليط معافتوش ولا اشمئزت منو هو حشم فاللول ولكن موقفها معاه مغينساهش وهادشي كيزيد يمرضو حتى كيبغي يهضر ومكيغيش يطفيها ويطفي فرحتها واخا الخوف كاين ولكن فرحتها كاينة بلاصتها.. وحيت هاد الموضوع حساس بزااف بالنسبة ليها وبالنسبة لأي وحدة مزوجة وعاد بادية فزواجها!! مشات عاوناتو يتكى فلفوتوي باش يتفرجو)
بغيت شي حاجة احبيبي؟؟
يوسف: خديجة سمحيلي!!
خديجة: ههه من قبيلة ونتا كتقولها واش معييتش!!
يوسف: لا
خديجة: علاش لوكان وقعلي حتى انا بحالك هاكا مكنتيش غتهلى فية؟!
يوسف: نهزك حتى نموت
خديجة: الله يخليك لينا ويبعد عليك كل شر انا نمشي نقاد شي حاجة للسهرة
يوسف: ضيعت عليك حتى الخطوبة كنت عارفك باغية تحضري ليها
خديجة: وعلاش هاد الخطوبة حسن منك ومن هاد الجلسة الغزالة للي غنجلسووها العمر!!
(تبسمت ومشات لبيتها صونات على ملاك أبيل ڤيديو وهي كتبدل حوايجها دوزت ليها وفاء للي عرفتها عقدت وقربو يحطو لعشا باركت ليها ومشات للكوزينة قادات بلاطو دالخشب فيه انواع فرماج شوية ديسير مملحات شكلاط قادات لويزة ففنيجلات ومشات جلست حداه متكيين على بعضيااتهم دايرين فلم هو عقلو فهاد الموصيبة للي نزلت عليه وهي فرحانة بهاد البيبي للي فكرشها…)
~~~~~~~~~~~~~
غيثة: (مكتحس بوالو دايرة يدها على كرشها مزيراها واش هاد الكينة للي دارت ليها مها مغيكونش عندها اثار من اللول باش يكون تطياح لبيبي طبيعي ولا شنو!! عياات كتسنى شي حريق ووالو؟! والمشكل كرشها الا بقات على هاكا غتكبر وغيصعاب يطيح خاصها دير حل دغيا مشات خدات حبة وهي مترددة مباغاش تاذي للي فكرشها ولكن!! ردت الحبة للقرعة تزيد غدا تشوف الا زادت حالتها وتشربها ورجع تفكيرها عاامر شنو غدير ففضيحتها حتى ادم مشا فحالو وحتى ويكون مكان غيقضي ليها واالو!!)
~~~~~~~~~~~
أميمة: (خرجت من الطموبيل زاربة باش حتى واحد ميقشعها كانت مع واحد اخر من غير راجلها دخلت فالدرب ياله غتحل لباب عيط ليها حمزة ضارت مخلوعة كان جاي وهاز صاكو دالخدمة بلعت ريقها وتبسمت)
حمزة جيت؟
حمزة: فين كنتي؟!
أميمة: شفت دريس مول الحانوت واش حال
حمزة: فهاد الوقت من امتى كتخرجي من مور لعشا؟!
أميمة: غير تشهيت دانون ديال الاناناس
حمزة: دخلي انا نقلب عليه اخر مرة نعاود نشوفك خارجة فهاد الوقت بغيتي شي حاجة قوليهالي انا نجيبو ليك
أميمة: (تبسمت بخوف) واخا… (دخلت كانت خاايفة مفهمتش ياك كتكرهو مخاصهاش تخاف منو بلعكس خاصها تكون باردة معاه!!)
اورطيغا: (هز بلاطو ديال اتاي للكوزينة كيعاون باش مو مدخلش عندهم… ونيت غيحطو لعشا ناضت حتى ملاك بلعاني كتحداݣ تتبعاه ببلاطة دلحلوى تلقاو فالكولوار)
تويييتة!!
ملاك: (بدلع) نعاونك؟!
اورطيغا: (حاني عندها بهمس) نبغيك تعاونيني اشحييمة غير فاش تنزلي سنسلة سروالي..
ملاك: (صدمها طرطقت عينها ندمها علاش سولاتو ولا تبعاتو ولكن عجبها الحال من جوابو فنفس الوقت كتموت عليه فاش كيخرج على طريق!!
مشات للكوزينة وهو مشا كيتبسم، دخلت لقات أمينة ونعيمة فالكوزينة باينة لوخرا كانت كتبكي وتشكي) احم.. اممم انا نشوف (خرجت دغيا حيت باينة موضوع خااص)
نعيمة: فضيحة فضيييحة فضييحة !!
أمينة: أحاااي على فضيحة؟! نعلي الشيطان اختي نعيمة واسهداي بالله!! لبنت مزويناتها مربية ولدك بغاها وبغاتو نتي علاش دايرة هاد لمناحة؟!
نعيمة: شفت الكاغيط دابا فلكتاب راه كبر منو ب4 سنييين ومجوجة ومطلقة غير ݣولي مالو على هاد الزربة الشييينة!!
أمينة: نعلي الشيطان اختي راه عندك بنتك الله يستر يوقع ليها هاكا تبغي عݣوزتها تهضر هاكا فيها
نعيمة: واش نݣول لحبابي؟!
أمينة: ݣولهم ولدي ختار وانا معاه فأي حاجة بغاها وزايدون علاش تمشي تبقاي تعاودي شي حاجة للي ديال ولدك ومرتو ݣولهم هو نعت وحنا درنا صوابنا ومتعرفي تلݣاي الخير فهاد البنت ومتلݣايهاش فوحدة صغيرة وعزبة
نعيمة: شفت باه غير صاااقر باينة حتى هو معاجبو حال
أمينة: وراه العروس لولدك لا ليك نتي لا ليه هو للي دايرين هاد الحالة يخخخ تغربتو وباقين نتوما هوما نتوما!!
اورطيغا: (دخل الكوزينة) الوالدة مزال لعشا؟!؟
أمينة: هانا احبيبي دابا غنحطو نعيمة جمعي الوݣفة
نعيمة: راه مها للي خاصها تنوض وهي دايرااالي فيها ضيفة هي للي خاصها تجي دير هادشي وتجري فشغل بنتها
أمينة: مها حتى هي كييفك مباغيااش هاد زواج حيت باغيينها ترجع لراجلها لقديم ولد خالتها، باغيين يهبلو عليها حيت عرفو واش ضيعو وهو حتى هو بخييرو ولباس عليه
نعيمة: ولدي بزاااف عليهم!
أمينة: هي الا كبرتي بيه وزدتي فقستيهم وبيني الفرحة وشرݣي فمك بالظحك ورحبي بعرووستك طرطقي لباباهم المرارة، واخا غاااا تناافقي هاد الوقت
نعيمة: (كتفكر فكلامها)
اورطيغا: (شاف خالتو مشات تبع ليها العين حتى كيسمعوها زغرتت)
هه لااااا ولا متحمقونيش غتجمعي علية نتي وداك نص بنادم غتخليوني بحال شي بوهاالي!!!
أمينة: ههه بوديينة هاكا كدار بيه
اورطيغا: انا دابا بودينة؟؟
أمينة: نتا حبيبي وكتاافي ولكيييدة ديالي (تبسم) هاااا مݣلت رجال كاملين مسݣيين بمغرف وحدة!! بودينات!!
تحط لعشا كلاو رجال تجمع كولشي وتحطت لاطاغط للي دمونداتها مع طبيسلات وتحط العصير فالكيسان جابت ملاك بلاطو للي جابو من عند النݣافة فيه كيسان حليب مع العسل الحر وفبواطة حمرا كيان جوج خواتم..
دخلو حتى لعيالات تحت صلا وسلام ووفاء فوسطهم مݣوداها نعيمة كتشقلب عينها الخالة للي غير عااابسة ومحاملة حتى حاجة لدرجة جغمة دلما مهبطتهاش مع حلقها وغير هازة راسها بتكبر.. جابو عمر للي غير كيتبسم وقفوه حدا وفاء وياسمين ختو كتصور، ملاك مدت ليها كاس دلحليب ليها ولعمر ضارت شافت فاورطيغا للي هاز حواجبو بملامح جامدة بحال كيقولوها ترجع اللور دارت راسها مفهمت والو وبحال مشافتوش عطاتهم تمر وعينها تشرب لحليب من مور وفاء راه رجع عادة وتقليد عندها بكترة مشربت الحليب من مور لعريسات ريوݣها ويديها كيرجفو على داك لحليب بحال شي موحمة!!
هزت نعيمة الخاتم كان سامل زوين ولكن جاها رخيس بزاف وحتى صداق معطاهاش بزاف قالت يمكن لقا فهاد البنت القناعة ورتاح معاها واخا مبغاتش تدخل ليها قضية مطلقة وكبيرة عليه واخا مباينش عليها العمر كبير!! تبسمت مع وفاء مداتو لولدها لبسها الخاتم دخلت أمينة مخلطة فزليفة الحنا دارت ليهم دويرة دويرة ليها ولعمر كانو اجواء بساااط ولكن بسعادة كبييييييرة!!!
جلسو وجلس حداها اول مرة يكون قريب ليها هاكا.. تقطعت لاطاغط تفرقت، ملاك كتاكل ومجمعة مع مها وأمينة اورطيغا غير حاضيها يمكن نسات وجودو حيت كتاكل وتظحك ومشافتش فيه غتحمقو راه هو للي خاصو يكون محور انتباهها ساعة والو كل مرة وشنو كتعطيه كتخليه غير كيفكر فيها… صونا رشيد علمهم راه لتحت باش يردهم
ملاك: عفاك عفاك عفاك اماما الله يحن عليك عفاااك
أمينة: خليها مع صاحبتها ولا تمشي معايا تبات
زهرة: فين غتمشي أمينة واش كتزيدي الݣاز العافية!!!
أمينة: ههه وعلاه انا شنو كندير ؟!
زهرة: ملاك نتي عارفة باباك
ملاك: غنبقى مع وفاء هنا راه مها غتبقى معاها خالتها للي غتمشي
زهرة: والا راجلها بغا يبقى معاها؟
ملاك: لا قالها ميبقاش عفاك اماما عفااك
أمينة: خلي البنت ازهرة
زهرة: (كتشوف فبنتها) نقولها لباك بعدا عاد نجاوبك
ملاك: غيبغي.. (حطت طبسيل الحلوى دورت عينها ورجعت اللور كتشوف فالطبلة) فين زلافة دالحنة!!!
أمينة: (شافت فين حطاتها مكيناش) كانت هنا!!! بيدي حطيتها هنا!!
رشيد: (بقا كلام مراد فودنو منين عيطلو فالتيليفون واخا عمرو عطاه نمرتو ولكن النمرة ساهلة المشكل هو منين قالو بغيت بنتك لزواج ويدير معاه وقيتة يهبط عندو يهضرو فهادشي وجه لوجه باش من بعد يجيب مو.. رشيد مجاوبو لا بلا لا باه اصلا متوقعهاش منو قالو واخا بسلامة بسلامة وقطعو…
مشا لفاس للحومة وبقا كيتسنى مرتو فالطموبيل باش تهبط وحاجة كدورلو فراسو واش بنتو غيكون فراسها هادشي!!!)
~~~~~~~~~~~
ملاك: (بقات كدور عينها وهي تهمس) ..خالتي أمينة خالة وفاء ومها هوما للي مكينينش نمشيو نقنتوهم يعطيونا زلافتنا
أمينة: تبعيني
زهرة: أفين غتبعك جلسي نتي، انا نمشي نفك هادشي (ناضو بهدوء وفاء وعمر كيتوشوشو ومرة مرة كتشارك معاهم نعيمة الهضرة كتعارف معاها… خرجت نعيمة شافت ام وفاء واقفة حدا باب الدار كتسالم مع ختها)
أمينة: بلاتي واحد دقيقة الله يخليك
الخالة: إييييييوا ختي نخليييك مزروبة مزرووبة..
أمينة: (بقات غير كتشوف منين معطاتهاش وقت اذا فراسها لعجيينة.. عيطت لولدها) مرااد مراااد
اورطيغا: (خرج عندها خبراتو فودنو شنو يدير باش حتى واحد ميبان فالصورة..
هبط بالزربة سابق الخالة لي كتعيط بشوية وهي كتهضر فالتيليفون ودارت مع بنتها للي غتجي تديها بالطموبيل..
مشا عند جماعة ديال دراري جبد ݣارو كيكمي وهو كيهضر معاهم شوية مشا متسع حاضي حتى غير بعينيه كيشوفهم ضايرين بيها منين هبطت وبقات حدا الشانطي..
وقفو عليها كيݣريسيو فيها ولكن بشرط وراهم شنو غيجيبو، وغادي غير يخلعوها، واحد فيهم بقا كيقلبها لقا فالقب ديالها ميكا صغيرة شمها كان داكشي للي بغاو واحد جمع معاها بطرشة ظحك اورطيغا بهاد الطرشة حيت هداك للي ضرب مبوق عاد رخاوها كتبكي مرعووودة!!
مبقاتش فيه مدام الواحد كيفكر يآذي الواحد هاكا يستاهل كتر من هاد الحݣرة!! مشايفش رشيد للي شاف لبلان كامل واكيد مفاهمش النية ديالو شاف غير شنو وقع قدام عينيه!!)
اورطيغا: الله يحفظكم.. عشاكم نص ساعة وينزل عندكم،، اه كاين شي ضياف نسمع شي بسالة مغيعجبنيش الحال
…: كون هاني اخاي اورطيغا!!!
اورطيغا: (شد من عندهم الميكا وطلع للدار مد لمو لميكا كانت زهرة لابسة باش تمشي)
خالتي تبغي نوصلك
زهرة: لا ولدي راه عمك لتحت
اورطيغا: اه.. راه هضرت معاه على داكشي ديالنا انا ولالة ملاك
زهرة: (تبسمت) يكون خير اولدي
اورطيغا: انوصل معاك.. ملاك غتبقى!!
زهرة: غتبقى هنا مع صاحبتها.. (وصل معاها لتحت رشيد غير كيشوف ويرد عليه صوابو ومشاو فحالهم….. )
اورطيغا: (هبط مع زهرة لتحت، كيحس برشيد انه ماشي ودود معاه عكس زهرة ولكن تقبلها عادي ماشي بالضرورة كولشي الناس تبغيه من اللول حتى يعرفوه عاد يحكمو.. مشاو وهو بقا تماك
صونا على يوسف يسول فيه مجاوبش قال غيكون ناعس مرتاح ميوليش يصدعو صونا على ملاك جاوبااتو)
فين البنت؟!
ملاك: حنا كنجمعو شوية الدار
اورطيغا: اجي جَمْعِي معايا انا، مكرهتش نشوفك دابا
ملاك: (تبسمت) مصالحش
اورطيغا: علاش؟!
ملاك: الدار عامرة واصلا ماما حلفاتلي ههه
اورطيغا: اممم قولي نسيبة حالفاها فية انا!!
ملاك: وحتى انا بغيت نشوفك ولكن حلفاتلي معندي مندير
اورطيغا: اوا!!
ملاك: منقدرش نتلقاك بوحدنا، دابا نتا منين تحلفلي على شي حاجة منديرهاش ونواعدك، متبغيش نخليك تضرب الضورة وندير عكس داكشي!!
اورطيغا: مالي غناكلك غير غنشوفك ابنادم!!
ملاك: (حسابها غتأثر فيه بهاد الهضرة) واخا هكاك امراد
اورطيغا: ديريها فين تجيييك (بقات كظحك) انا نطلع تلاحي منافعة بوالو..
(قطع معاها جبد ݣارو كماه ممكملوش، عاد طلع شاف لوخرين كينوضو يوجدو باش يمشيو)
الوالدة!!
أمينة: (جات عندو) راه جا عندي الدري خدا عشاه.. مزال كتبقى بولد فاطمة
اورطيغا: مرة مرة
أمينة: امم واش هاد الدار كتكرا بفراشها؟!
اورطيغا: اممم
أمينة: اوا مكاين لاش لبنات يبقاو هنا راه كولشي غيمشي ومنخليوهمش يباتو فالحومة
اورطيغا: ناخدو معانا ملاك للدار وفا تبقى هنا مع عمر
أمينة: حتى عمر غيمشي مع واليديه
اورطيغا: (بقا كيرمش ويشوف) كفاش مع والديه علاش مغيبقاش مع مرتو؟؟
أمينة: مزال… (عارفااه) ودخل سوق راسك
اورطيغا: كفاش مزال ولاش هاد الحالة وعقد!! هاد الزربة الخاوية!!! (جا ماشي عندو وجراتو من جاكيطتو)
أمينة: ونتا ماالك!!! دخل سوق راسك هاد العااار!!
اورطيغا: وعلاش عقد؟!
أمينة: (هزت يدها على راسها) ياااااا ربي على هاد جلااااخة!!! ونتا ماالك انا من الاول مبغيتش يضاسر معاك غير بمسبة هادشي!! (مشات وهو بقا واقف دازت من حداه ملاك)
اجي اديك الوزغة؟!
ملاك: (شقلبت عينها) ملااااك سميتي ملاك
اورطيغا: ملاك!! ملاك ولا (غمزها) #ملييكة!!! (خرجت عينها) ادوي امليكة!!!
رشيد: (صايݣ بقا ساكت حتى نعس أنير فكرسيه من اللور) عيطلي ولد هاديك صاحبتك… داكشي باش معارفة معاها؟؟
زهرة: (باستغراب) كفاش؟!
رشيد: ولدها عيطلي!!
زهرة: مراد؟! وكفاش داكشي باش معارفة معاها؟!
رشيد: اييه مراد.. قالك بغا يجي يهضر معايا على لبنت
زهرة: (ملامح عدم الرضى باينة على وجهو) اوا مرحبا بييه!!
رشيد: كفاش مرحبا!!
زهرة: اه مرحبا بيه تبارك الله ولد الناس مأدب ومربي مرضي ميمتو وراجل ديال زمان
رشيد: أنا نعطي لبنتي هداك!!
زهرة: كفاش هداك!! واش حݣرتيه ولا شنو؟!!
رشيد: الالة محݣرت حد ولكن هداك هو للي ميتزوجش بنتي نخليها حدايا ومنعطيهالووش شحال وهي عاطية قيمة راسها وفالتالي!!
زهرة: (مبغاتش تعصب معاه) علاش؟! (شاف فيها) شنو للي شفت فيه قبيح باش متعطيهاش ليه؟!!!
رشيد: (بانفعال) هكاك وصافي، نربي نكبر وفالتالي نلوحها؟!
زهرة: علاش هو تولد وكبر فمحيبق؟! معندوش مو للي كبراتو وخدمت عليه ورباتو؟!
رشيد: زهرة!!!
زهرة: ياك كتقول النقاش هو كولشي فالحياة ونهار عرفتك عرفتك كتناااقش… اوا ناقشني!! فهمني علاش حاݣر هاد السيد ونتا مكتعرف عليه والو!! علاش حكمت عليه ونتا ممعاشرووش، ومتنساش كما كنقولو حنا المسلمين إن بعض الظن إثم!! ربي مكيبغيش هاد الحݣرة
رشيد: مكاين لا حݣرة لا والو ، انا شفتو مصالحش لبنتي داك نهار بغا يضرب خوالو ودفع خالتو وفالجنازة عاد!! وحتى مو مداهاش فيها وهاد نهار مصيفط شماكرية ݣريساو شي وحدة وضربوها قدام عيني
زهرة: ومفكيتهاش؟!!!
رشيد: كنهضر بالصح مكنظحكش
زهرة: من ديما كنتيقك الا فهادي ارشيد ولفتك رزيين وكتوزنها قبل متنطقها ولكن جيتي هنا وخربقتيها نتا عارف داك الولد مزيان كفاش كبر شتي نتا لوكان كنت فبلاصتو بعقايتك متوليش حتى ضور راسك لجهة خوالك بداكشي للي دارولو وهو مزال فكرش مو، وفلݣنازة راني كنت حاضرة هو مدفع ما ضرب ومو كيدير ليها بحال الريشة، وزعما عاودت ليك وشرحت ليك.. بااز بقات فقلبك لليوم باز والله حتى باز ولكن للي معندو زهر معندو حتى فخلا دار بوه عاد يكون عندو مع البراني
رشيد: (شاف فيها)
زهرة: وانا الا جا خطب بنتي غنعطيهاليه وعيني مغمضين ارشيد..
ملاك: (بقات مطرطقة عينها) شنو!!
اورطيغا: من ديما تنقول علاش متتجبديش كارت ناسيونال!!
ملاك: (غير مخرجة عينها)
اورطيغا: (جبد ورقة من جيبو مطوية على ربعة حلها كيقرا) إلى المالكة شقة 4 (شاف فيها) #مليكة شراف (جمع الورقة دايرة فجيبو) ومتحشميش!!! (طانز) عام ونتي تتقوليلي سميتك ملاك
ملاك: (تصدمت بلعت ريقها شحال وهي مخبية سميتها على الناس.. منين كانت كتقرا فالاعدادي كولشي رجع كيقولها ملاك واخا الأساتذة كانو كيعيطو ليها باسم مليكة، وعاد فاش مشات للمحكمة تدعي باها يبدل سمية وجدها حلف عليها بالسخط ولا رضى كتر من 6 سنين وهوما يرغبوه واالو جاتو عيب بنت دخل باها للمحكمة واخا امور شكلية الا متقبلهاش وبقات هكاك قليييل فالقليل للي عارفها باسم مليكة وحيت حساسة فهاد النقطة ولفوها باسم ملاك!!!)
اورطيغا: شنو!!
ملاك: (جاتها لبكية ومزال مخرجة عينها حست براسها تحشمت بزاف قدامو)
اورطيغا: اشهاد الكذوب للي فيك.. واش فاايت فيك شي عرق يهودي؟!!!
أمينة: (جات خارجة من الصالة جات فوذنها هاد الجملة شافت ولدها شاد ملاك مقنتين… ملاك نفسها كان غير منتظم بحرا كتنفس شافت فأمينة للي خرجت عينها)
اداك الجحمووم؟!
اورطيغا: تنهضر معاها الوالدة!! (مابغاش يقول على سمية للي فنيتو غير يشد فيها شوية اما مكتهموش غير يقرصها على داك الكذوب)
ملاك: (عينيها عمرو دموع تمت ماشية خارجة وهو مفهم والو)
اورطيغا: اهياااا!!!
أمينة: اش هاد الهضرة يا الصُّوڤاجي؟!؟ (مشات عندو) مكنعايروش الناس بهادشي ماشي عاودات ليك تنوض تعايرها بيها!!
اورطيغا: شنو!!! (معقلش اصلا شنو قال ولكن للي فهم حتى هي فخبارها بلان سميتها لحقيقية شافها طلعت دروج) ملااااك ملاك
ملاك: (طلعت لسطح هي ماشي حشمانة من خلفية مها ولكن خافت تخسرو على قبل مها حيت هنا كتسالي حدود اي واحد كان معاها.. لحقها شدها من ذراعها، ضارت وعينيها حومر)
شنو؟!
اورطيغا: نتي للي شنو!! هاد الحالة كاملة على سمية تكون سميتك حتى الضاوية شنو العييب!!!
ملاك: (ضورت راسها مكتشوفش فيه ولبكية واحلة فحلقها صافي تفرشت من كولشي بانت صغييرة حيت خبات سميتها وهاد أهم حاجة تفرشت فيها)
اورطيغا: ملااااك (شد فيدها) ملوووكة واا مِّيييلِكَا ديالي (شافت فيه) واش احبيبي سمية هي للي غتخليني مباغيكش؟!! نتي راه الرية ديالي منسمحش فيك ولو بالمووت…
رشيد: وليتي شادة الضد معايا الزهرة!!!
زهرة: ماشي قضية شادة الضد ولكن كلامك ماشي منطقي ارشيد انا الولد مشايفة منو حتى شي عيب… نتا وريني العيب وانا نرجع اللور بحالك
رشيد: غيبان عيبو
الزهرة: راه ݣاع فينا عيووب علاش نتا ماشي من بعد عشرة طويييلة نضتي تزوجتي علية هدا ماشي عيب !!!
رشيد: هادشي للي شايفة فية, انا ديما خايب!؟؟
الزهرة: مقلتش ليك نتا خايب ولكن جني وجنوني للي يحكم بالخايب على الواحد وهو ممعاشرووش جلس معاه عطيه وقت وحكم.. واخا بانلي نتا محملتيهش من اللول غير باطل يعني السيد واخا يكون نازل من الجنة غتمشي تسول وعلاش نزل!!
رشيد: (بقا ساكت حيت حسابلو غتكون نفس ردة فعلها ومتبغيهش ساعة لقاه كتحامي عليه كتر من مو) اصلا بنتي مغنقبلش بيه…
زهرة: رشيد نعل الشيطان عقلتي نهار بغيتك وحسيت بيك إنسان مزيان شنو درت على قبلك؟!
رشيد: علاه انا هو هداك؟!
زهرة: تقدر تكونو بحال بحال يقدر نتا حسن يقدر هو حسن انا مفهمتش علاش اصلا كتقارن!! هو راه يتيم تيتم مسكين من صغرو وهو فكرش مو، وهزها وهو وليد صغير قرانو كانو كيمشيو يقراو وهو هاز معاها الحمل مخلا فين مشا خدم وشنو باع باش يعاونها واخا بدرهم فنهار حتى نهار تزوجت واحد ربي مسك عليه مقبلش يشد فرنك من عندو غير الا خدم عليه وباقي لدابا وهكاك خلا داك الحاج يفضلو من بين ولادو وحاطلو شغل فيدو متشوفووش هاكا وتقول مفشش هداك تمارة لي دازت عليه عمرني شفتها دازت على غيرو
رشيد: وشنو داير فحياتو هاد خينا؟!
الزهرة: كيشري دارو وخدام فالمحال بعرق كتافو
رشيد: كولشي كيبقى ديال راجل مو!!
الزهرة: دابا هادشي علاش حاݣرو؟؟؟
رشيد: زهرة نتي عارفة رجالات بناتي كاملين عمرني سولت شي وحدة على فلوس ولا شي حاجة ياك حتى خديجة فزواجها اللول عرفتو معندوش ومهضرتش حيت بنتك لسقت فيه ولكن ملاك مغنلوحهاش تكرفس وتخدم على واحد
زهرة: لا علاقة بين هاد الجوج ارشيد، مراد راااجل وسيييدهم ومقامو غيكون ان شاء الله من مقام راجل مريم ونعيمة وخديجة وفاطمة
رشيد: صافي نتي عطيتي لبنت
زهرة: ربي الا كان مكتبهم انا نزيدهم غير الخير ومزال اصلا نشوفو مع بنتك للي ماشي ساهلة ودار بيها، دعي دعوة الخير ونويها زوينة باش ربي يسهل لينا فبناتنا وحفادنا (وصلو) اجي هز أنير راه نعس وغطيه مزياان..
اورطيغا: (لمس على حنكها بظهر صباعو) متعاوديش تكذبي علية املاك كاين شي حوايج تيتخباو متنقولكش فتي علية تفاصيل حياتك كاملة ولكن شي حوايج تتكذبي فيهم ميحتاجوش!!!
ملاك: (دافعة الصنطيحة) مجابتهاش الوقت باش نقولها ليك
اورطيغا: (هز حواجبو) عام!! ملقيتيش ݣاع الوقت
ملاك: (بإحراج) بففف
اورطيغا: بغيت غير نفهم فين المشكل فهاد سنية شنو الفرق بين ملاك ومليكة ؟!!
ملاك: وصافي امراد
اورطيغا: دابا عاد فهمت تنشوف خوتاتك مكاين غير فاطمة خديجة نعيمة تنقول علاش زعما نتي بوحدك للي ملاك وما فيك حتى حاجة مبيناك ملاك
ملاك: ههه وصااافي
اورطيغا: بشرط (هزت حاجبها) قولي لمِّي طاتي أمينة
ملاك: ههه (شافتو مجبدش معاها الموضوع للي مهم على اصل مها)
اورطيغا: (تكا على حيط دروج) غير بالفن ابنت ازهرة طلعتك لسطح
ملاك: (بقات كتبسم باينة فيه كيبغيها راه صدق هو للي كيرغبها حيت كذبت عليه..)
انا ولفت من صغري كولشي كيعيط لية هاكا اصلا قليل للي عارف سميتي لحقيقية داكشي باش..
اورطيغا: من هادشي كاامل غوز ولا زرق؟!
ملاك: شكون؟! (هزت حواجبها عاد فهمت كيهضر على ****) واش بنيتك فين كنكونو كنهضرو ونتا فين؟؟
اورطيغا: حيت هادشي للي تيهمني اكبييدة سمية اش غندير بيها!!
ملاك: (عصبها) قوووقي ومع الضو كحلللللل باش يمشي اصورتي معاك!! (تمت هابطة وهو مكرشخ بالظحك حتى ظحكها ولكن مبينتش.. وصلت للدار كتشوف عمر وعائلتو خارجين دخلت حانية راسها حتى كتسمع اورطيغا كيهضر مع عمر)
اورطيغا: اش هاد لبلان نتا عندك؟!
عمر: هه مراااااد!!!
اورطيغا: فهمهالي نتا غير بالخشيبات
عمر: (عائلتو هبطت لتحت) غدا ونجي عندك المحال
اورطيغا: بلاش اخااي حشمتيينا ولا يكما خاصك شي معلومات خوك راه مدوز الاخضر واليابس (دازت ملاك مخنزرة فيه)
غير الله يحفظ ويستر على شي ألوان ولكن هانية يتطفى الضو كولشي يكونو ناضي كناضي
عمر: ههه (عاطي ملاك بظهر) غدا ان شاء الله وندوز عندك..
مشا عمر كان ممكن تكون خلوة بينو وبين وفاء ولكن باغي كولشي يكون بلعقل ماشي يزرب فكولشي راه اول مرة يجلسو حدا بعضياتهم هو هاد نهار.. ركبو فالطموبيل ومشاو للدار للي كاريين…
أمينة: ياله نمشيو ابنتي
ملاك: (مها نبهاتها متمشيش) معليش نبقى مع وفاء رغباتني ومنين مغيبقاش راجلها ماشي مشكل نونسها
أمينة: فينما رتاحيتي ابنتي.. (كتعيط) مرااااد
ملاك: يمكن هبط..
أمينة: حݣا ابنتي، من عند من شريتي دارك؟!
ملاك: من عند السمسار دايرلو مول الدار التوكيل ولكن حتى سول بابا وقلب ولقى كولشي قانوني عاد توكلنا على الله
أمينة: ووو مراد للي وراها ليك؟!
ملاك: (معرفتش علاش كتحكر على مراد) انا كنت ساكنة هنا مع وفاء وعرفنا بزاف دلحوايج حتى مراد.. مراد عارف (جاوبتها بديبلوماسية)
أمينة: (حركت راسها باه) اوا مزال موريتيهالي !!
ملاك: غدا ان شاء الله يجيبك مراد صباح نيت على مقالي السمسار غدا يركبو سراجم ولبيبان
أمينة: ان شاء الله ابنتي الله يسهل عليك (تم جاي مراد حداهم) حتى مراد راه لقى دويرة وان شاء الله تكون من نصييبكم
ملاك: (تبسمت وشافت فيه غمزها) ان شاء الله
اورطيغا: شنو مشينا؟!
أمينة: ياله اولدي راه عييت نيت
اورطيغا: (لملاك) سيري لبسي نتي شي حاجة شتا بدات تتنش برا
ملاك: انا غنبقى مع وفاء (قوس عينو فيها.. زربت سلمت على أمينة بالوجه تبسمت معاه ومشات دخلت لقات وفاء ومها مطايفين على هاد لعقيد وخرجت مابغاتش تكون متطفلة أمينة مشات تلبس وهو لقاتو حدا لباب كيتسنى خرجت عندو)
اورطيغا: مليكة!!
ملاك: (كيطفيها، تمت داخلة وهو يشدها كيظحك) طلق ازمر
اورطيغا: غنكركب مك من دروج
ملاك: والله وتعاود تقولها مرة أخرى حتى..
اورطيغا: متعاوديش تحلفي علية!!!
ملاك: وحتى نتا متبقاش تقولي هكاك ااخر مرة..
جات أمينة فكت بيناتهم زاعفة على مراد حيت مزال كيحساب ليها كيهضر على موضوع الديانة، هي دخلت غضبانة وهو هبط معتابر الأمر عادي، نورمال خاصو هو يتقلق حيت خبات سميتها راه اول مرة يطيح فموقف بحال هاكا ولكن مدام مقروسة من هاد الناحية ومعاجباهاش مكيهمش هو ولفها باسم ملاك وعاجبو وحتى اسم مليكة زوينة، ومكيهموش سمية بكتر مكتهمو هي… ودع دراري للي شكروه على لعشا ركبو هو ومو ومشاو..
أمينة: مشريتش نمرة؟!
اورطيغا: (دار راسو مسمعهاش وبقا مراقب طريق) باينة غتشتي مزيااان هاد الليلة..
أمينة: (شافت لباربريز) اممم.. ݣول من مور مخرجنا من الحومة مشريتش شي نمرة؟! وبعتي بالصح النمرة ديال الدار ديالنا؟!
اورطيغا: اش فكرك فهادشي؟!
أمينة: حيت موليناش هضرنا فدشي من مور مخرجنا من براكتنا.. واش بعتها ولا خليتها عندك استافدت؟
اورطيغا: حقا شنو بانلك فديك دويرة واخا صغيرة ولكن عجبتني وحتى الثمن ميسر
أمينة: ولكن صغيرة بزاف معجبننيش
اورطيغا: وشنو غندير انا بشي كبر جوج بيوت صالون كافي
امينة: هداك ماشي صالون هاديك غير جلسة سداري ونص..
اورطيغا: كافينا..
امينة: مكتفييش.. وعلاه نتوما بالسلامة ميجيوكم ضياف متولدو غتبقاو بجوج الراس فالراس صبر تلݣى وحدة ب3 دلبيوت وصابون على الاقل يهز 4 دسدادر ديك للي شفنا السيمانة الفايتة حسن وقريبة لية
اورطيغا: بزاف
أمينة: ماااابزافشااي.. نتا شحال عندك؟!
اورطيغا: داكشي للي عندي مكافيش من غير نبيع هاد البرويطة
أمينة: لا هادي كادو من عند الحاج علاش متسلفش من عندو وكل مرة عطيه
اورطيغا: مغنتسلفش من عندو ومغلوحش راسي للزيار الوالدة باش نشري دار نتي عارفة هادشي
أمينة: وميمكنش اولدي شاري شاري
اورطيغا: الا مطرباتكش هادي كاينة وحدة أخرى نمشيو نشوفوها ديال كليان عندي
أمينة: حدايا؟!
اورطيغا: الوالدة الطموبيل راه كاينة
أمينة: واش فالسعادة نيت؟!
اورطيغا: اه ولكن ماشي فنفس السيكتور بعيدة شوية
أمينة: علاش متشوفش للي تحت مني
اورطيغا: واش عارفة شحال ساوية الدار تماك؟!
أمينة: راه صاحب الحاج نشوفو معاه بعدا تماك نقية ومتبعدش على المحال ديالك وكل مرة طلع طل على مرتك
اورطيغا: (بقا ساكت كيفكر فكلامها) يكون خير (وصلو) شنو نتي غتمشي لݣرسيف !!
أمينة: وشتي خالتك شحال رغبت نمشيو نحضرو لداكشي للي غدير لولدها
اورطيغا: وانا لاش جامعاني؟!
أمينة: حيت غتمشي حتى خالتك زهرة وباينة غتمشي معاها ملوووكة
(حرك راسو بلا حولة بقات شادة فيه نساها موضوع النمرة وطلعو للدار…)
وفاء وملاك نعسو فبيت نعاس كانو عائلة عمر جابو كادويات خفاف بوكي ورد شكلاط ببيجامة بشالها تفصيلة جلابة وتفصيلة جوهرة وهادشي مهمش وفاء براكة غير الرجفة دالفرحة للي فيها غلبهم نعاس حيت عياو فالتوجاد…
اصبحنا واصبح الملك لله
خديجة: (فاقت قدات لفطور مشات تفيق يوسف والو مبغاش يفيق حالتو بحال مغيب خاافت بقات كطرشو فحنوكو بشوية وكيحل عينيه بحال داايخ)
يوووسف يوووووسف!؟!!
يوسف: اممم (كيحل عينو بصعووبة مقادرش) انا غنفيق
خديجة: شنو ضاارك؟!!
يوسف: (رجع غيب كانت غتكون بالخلعة هزت تيليفونو بانتلها نمرة ديال خوه هي اللولة صونات عليه قالتلو شنو واقع رجعت كتفيق شوية بشوية بقات كتبغي تنوضو وكتحاول تنوضو شي 10 دقايق جاو اشرف معاه طبيبة والغالية للي خافت بزااف خرجو برا كيتسنااو)
الغالية: شنو وقع مع ابني؟؟
خديجة: معرفتش فقت وجدت الفطور مشيت نفيقو واخا مموالفاهش يبقى ناعس حتى لهاد الوقت قلت حيت نعس لبارح معذب بلحريق فيدو وظهرو
الغالية: (حاطة يديها بجوج على قلبها) الحبيب ديالي!!
خديجة: لبارح مكانش خاصو يخرج من صبيطار دغيا، خاصنا نرجعوه دابا لتماك
الغالية: (تفكرت انها هي سباب بقات كتبكي وباين وجهها شااااحب)
خديجة: (لمست على ذراعها) خالتي متخافيش ان شاء الله يكون خير، خاصنا غير نردوه نديرو التحاليل فكولشي باش نرتاحو من جيهتو
الغالية: يا ربي يا ربي وقف مع ولدي
خديجة: اميين يا ربي (خرجت طبيبة قالت ليهم ضروري يرجع يدير سكانير على راسو زادو خافو كتر شدت فكرشها بلا متحس خايفة عليه والغالية كتبكي بشكل هستيري حاولو يوقفووه)
يوسف: (دايخ) خدييييجة نتي حاملة متعذبيش راسك
خديجة: (مع قد قد فالطول تقريبا تعاونت هي واشرف وحتى مو جات تعنقو ودفعها بشوية زاد ذبحها مكيشوفش فيها هبطو لتحت) خالتي عفاك سدي معاك لباب (سدات لباب تااالفة تابعااهم كتزرب ركبوه فالطموبيل ومشا صايݣ خوه بشوية خايفين علييه…)
اورطيغا: (فاق بكري مشا للݣرنة مزال مكيذبحش ولكن كيوقف على الكموند ديالو وكيتأكد من لحم للي خارج من تماك مطبوع عاد كيديه لدابا مبانوش دوك شلاهبية للي تعرضو ليه وحتى سعد ولد الحاج مبقى لا كيخنزر لا كيلوحلو هضرة وكيزيد يأكد عليه الشبهة وأصلا متيق ملاك!! وصل للمحال كانت مو كتسناه حيت بغاو يمشيو يشوفو دار ملاك، عيطلو شريف قالو على شنو وقع ليوسف وظطرو يأجلو شوفة ديال الدار هو ومو واخا كانو دايرين مع ملاك غادي غير يدوز. عليها حتى لمن بعد.) انا منين خرج معجبنيش الحال
أمينة: مسيكين عويينة ومصلاتش على نبي
اورطيغا: كولشي من ديك رخيسة
أمينة: بالحݣ!!!
اورطيغا: (عاودلها اصلا هو ومو مكيخبعوش بحال هاد تبرݣيݣات….)
~~~~~~~~~~~~
ملاك: (دايرة يدها فجنابها معاجبها حال) شكون عطاك الحق اشريف توري الملكية ديالي لشي واحد!!!! ماشي هاكا تافقنا!! (ربعت يدها) هاكا غتخليني غير منتيقش فيك!!!
السمسار: الله يهديك اختي راه موريتها لحد!!
ملاك: وريتها قالاك موريتهاش
السمسار: لمن؟!
ملاك: (مابغاتش تذكر سميتو) مهم وصلني لخبار تبقى تحافض على خصوصية ديال الناس الله يخليييك
السمسار: اختي مليييكة
ملاك: ملاك غير كاين غلط فالوراقة راني كنقادو
السمسار: اختي ملاك راه موريتها لحتى واحد الله يهديك
ملاك: راه لبارح شفتها فيد واحد السيد ونتا كتقولي موريتها لحد, كنكذب انا؟!
السمسار: واش لاورطيغا ؟!
ملاك: (خرجت عينها ودارت صبعها فوجهاه ليها)
انا قلت شي اورطيغا!! مهم انا نطلع نشوف الدار
(هربت طلعت كتفكر غير منين مراد يعرف شي لاخر للي مخبية على مها.. دخلت للدار كانو دارو سراجم زادت الدار كتبان عجبها الحال دارو بيبان جداد كان قالها مراد تزيد شي حاجة فالفلوس غتعطيهاليه بلاتي..
دابا خاصها تبدا فالفايونص وحايرة بين الأرضية واش دير لاموزيك ولا الجليج!! حيت غتخليها غير لكرايا خاصها تقلب على للي ميتكرفسش وفنفس الوقت رخيس والمتين.. بقات كتفكر اشمن صباغة دير شافت فوق الدوش دارو ليها سدة كبيرة تهز بزااف حمقتها دارها كنحس بسعادة فشكل وكبيييرة.. صونات على مها أبيل ڤيديو كتوريها الدار وبانت بووحدها
زهرة: قالتلي زهرة غتجي عندك
ملاك: مزال مجاو… (حتى صونات خديجة)
ماما صبري نجاوب خديجة.. (قطعت)
ياله كنت غنجي نشوفكم
خديجة: (كانت كتبكي) يوسف جبناه لصبيطار من صباح هو يسخف وينوض
ملاك: وايلي!! علاش مسكين؟! ياك لبارح كان مزيان؟
خديجة: ممزيانش والو.. معرفتش مالو عاد دخلو يديرو ليه سكانير خافو يكون كلاها فراسو
ملاك: (بقا فيها) انا نجي عندك صيفطيلي لوكاليزاسيون
خديجة: حتى خالتي امينة ومراد جايين
ملاك: بالصح!! (مراد كيصوني) صافي انا غنجي.. (قطعت جاوبها كان لتحت جا ياخدوها يمشيو مجموعين…)
…مشا اورطيغا ومو وملاك كانت الدنيا عامرة بالعائلة.. واساو خديجة وغيثة كانت كتبكي على خوها غير شافت اورطيغا جات عندو عنقااتو بالجهد حاطة راسها على صدرو ويديها مدوراهم على جنابو شاف فملاك للي شقلبت عينها مشات عند خديجة ختها اما هو كيبعد غيثة شوية بشوية
اورطيغا: شششت ان شاء الله ميكون والو غير الدوخة ديال لكسيدة تدير هاكا
غيثة: بسبابي خويا مبقاش تيفكر مزيان انا للي خليت خويا غير مشطون بسبابي دار الكسيدة
اورطيغا: هدا قضاء الله وقدره اختي غيثة متقوليش هاكا
(جات أمينة عنقاتها قلب بعينو على ملاك لقاها هي وختها بوحدهم مشا عندهم كانت خديجة كتعاود شنو وقع معاه فصباح..)
لبارح قالولو دير سكانير وهو مابغاش
خديجة: مسيكين مابغاش يخلعني (باستغراب كتشوف فالياقوت) شنو كدير هادي عاود هنا؟؟!
الياقوت: (مشات عند الغالية للي خلات جماعة ومشات عندها) طاتي فين يوسف؟!!
الغالية: (جرتها مبعدة) واش تنازلتي؟!
الياقوت: قلت للمحامي ديالي يتنازل على الدعوة اهم حاجة صحة يوسف دابا ولكن اطاتي!
الغالية: غير يصح ولدي غيدير واجب ديالو
الياقوت: ان شاء الله يكون خير (شافت فخديجة) متكونش غير تتكذب عليه؟!!
الغالية: لا مشاو لطبيبة!!
الياقوت: اوا غنسكتو؟! بلعاني ناضت تتحمل
الغالية: الياقوت راه ولدي لي لداخل واش انا دابا فهادشي!! ومتتشوفيش حالتها حتى هي!! (شافت خديجة عيط ليها طبيب مشات لجهة لبيرو) انا ماماه
خديجة: اجي اخالتي حتى نتي (شافت فطبيب) عفاك ادكتور راه حتى هي عالم بيها غير الله ومشوية على ولدها بزااف (سمح ليها دخل وهي سااكتة محستبلهاش خديجة غدير معاها هاكا!! شرح ليهم انه عندو ارتجاج ومن حسن الحظ موصلش لدماغ يعني ديك الدوخة وراسو للي كيضرو من هادشي، شي أيام ويرجع مزيان اهم حاجة يبعد على الستريس ويرتاح لأيام كتبلو شهادة طبية على حساب خدمتو)
تنعاود نقولها لك امدام خاصو الراحة ويتبع دوا ديالو ويبعد على المشاكل وصداع
خديجة: حنا الحمد لله ادكتور معندناش شي صداع بلعكس ربي غيرزقنا بوليد ولا بنيتة وكان فرحان بزااف
الغالية: (كتزيد تغرق فإحساسها بتأنيب ال ضمير وغير ساكتة.. خرجو من تماك)
خاص نجيو للدار باش نتهلا فيه
خديجة: اجي عندنا اخالتي راه بحال عندك بحال فدار ولدك
الغالية: (بقات غير ساكتة جات الياقوت وخديجة مشات كيسولوها شنو قالو على ميخليوهم يزورووه…)
وفاء: (مشاو عائلتها قادات راسها حيت عمر غيجي عندها ويخرجوو بجوج اما دارهم رجعو فحالهم لجرسيف بكري باش يشرحو للعائلة وياخدو بخاطرهم على ميوجدو شي حفلة.. تدق لباب دارت شالها ولكن ماشي مزير عليها لقاتو هو تبسمت تعلات سلمت بالوجه)
دخل.. مرحبااا انا دغيا نجيب صاكي ونمشيو
عمر: (دخل وسد لباب كيشوفها) نبقاو شوية ونخرجو
وفاء: ههه واخا (جلست وجا جلس حداها كيشوف فيها لمس على حنكها وغمضت عينها ورجعت حلتهم شافت فيه متبسمة)
عمر: زييينة بزاااف
وفاء: (بصوت خافت) عويناتك (كتشوف عينيه للي كوحل ورموشو حسن من دياولها)
عمر: (شد يدها وباسها… بقاو مجمعين حتى قلبوها بوسان ولكن حدو هنا على ميزيدو يتعرفو كتر…)
نخرجو حسن!!
وفاء: ههه واخا.. نجيب صاكي ونخرجو!!
~~~~~~~~~~~~~~~
اورطيغا: (خرج من عند يوسف عاطي لملاك إشارة يخرجو عارفها تقلقت.. لحقت عليه)
التوتووز
ملاك: انا خاص نمشي دابا غدا عندي الخدمة بزاف ومعرفتش خديجة واش نبقى معاها فنفس الوقت مبغيتهاش تبقى بوحدها مسكينة!!
اورطيغا: بقاي باتي وانا صباح نوصلك بكري
ملاك: الا كانت غتمشي لدار حماتها منبقاش
اورطيغا: بقاي معايا انا
ملاك: متحتاجش عندك غيثة غير كترما عليك
اورطيغا: هانتي قلتيها بفمك هي ماشي انا!!
ملوكة حبيبة راه غيثة كبرت معانا داكشي باش عندها هادشي عادي
ملاك: معاديش الا هي عندها عادي نورمال نتا مخاصش يكون عندك عادي الواحد كيعرف كفاش يرسم حدود غير نتا واش اصلا باغي ترسمهم ولا لا
اورطيغا: نرسم احبيبة غير خوي راسك..
ملاك: ها انا مع حمزة ميقدرش حتى يسلم علية (شافت ملامح وجهو كيتسيفو) اوا شتي!!
اورطيغا: المرة جاية نتي للي مغيبقاوش فيك عينين يشوفو
ملاك: (عوجت فمها صونا تيليفونها كان باها) صبر نجاوب بابا
اورطيغا: (حرك راسو بأه، مقالش ليها ديجا هضر معاه حتى يهبط يهضرو وجه لوجه معاه عاد يقولها)
ملاك: بالصح جيتو!!..
انا نصيفط ليك فالواتساب لوكاليزاسيون..
اه كولشي كاين..
صافي واخا..
(قطعت ورجعت حدا اورطيغا للي مربع يديه حاضيها)
بابا وماما جايين وحتى جدي (حرك راسو باه) بففف معرفتش شنو ندير وعاد انا جاية بطموبيلتي !!
اورطيغا: (لمس حنكها بظهر صباعو بحنية، بعدت وجهها مخرجة عينها) انا غنمشي دابا المحال حتى تقولي شنو غديري وعلميني
ملاك: صافي غتمشي؟!
اورطيغا: عندي شي خدمة خاص نزرب عليها مهم انا نزغرت عليك (تبسمت) قوليها الوالدة باش متقلبش علية
(تم ماشي مبغاش رشيد يشوفو هنا باش ميشكش ان بنتو كتعرفو غيبعد من ساحتها باش ميعكسش ليه…)
جاو عائلة ملاك كولشي كيطمئنو على يوسف وبطلب منو باش ميمشيش عند مو للي كتقولهم غيمشي عندو هضر مع طبيب باش يقولهم غيبات تماك.. وهنا خديجة أصرت هي للي تكون معاه… كان هادي شوية ولكن غير شاف الياقوت تعصب
الغالية: احم الياقوت اجي معايا (خرجو برا) بنتي صافي سيري عند ولدك
الياقوت: واش مزال مبغانيش نكون حداه ݣاع.. لهاد الدرجة!!!
الغالية: اه, حيت قالك جبدتيلو صداع مع الخدمة ونتي عارفة يوسف والخدمة ديالو
الياقوت: وهو مبغاش يدير معايا حل خاص يعتارف بولدو، وشوف شنو غدير معاه هاديك الا مبغاتش ولدو يعيش بعيد عليه
الغالية: الياقوت ماشي وقت هاد الكلام واش متتشوفيش ولدي ناعس فصبيطارات ونتي همك غير تخاصمي مع مرتو
الياقوت: باغدون طاتي انا غير… نتي عارفاني تتهمني صحة يوسف اولى
الغالية: صافي سيري دابا حتى نصوني عليك
الياقوت: واخا طاتي.. (سلمت عليها ومشات ولوخرا دخلت ماشيفينش ملاك للي مخبعة فالدورة دايرة التيليفون فودنها كتهضر مع اورطيغا وقاطعة الزي كتصنت عليهم)
اورطيغا: ملاك ملااااك!! (عارفها فالخط) وااااااا مليكة
ملاك: وااا زمر!!
اورطيغا: هه مال متتجاوبيش
ملاك: عرفتي شنو سمعت!!! واقلة الغالية وديك العزافة متافقين على يوسف باغيين يطيحوه فالشبكة ويضيعوها على ختي قالك ما قالك العزافة عندها ولد منو!!
اورطيغا: (غيفهمها من بعد) عنداك تقولي لختك شي حاجة
ملاك: (بقات كدور عينها) اويلي!! واش ڤري؟!!
اورطيغا: متهضريش تماك حتى تكوني بوحدك ونفهمك راه هادشي للي خلا يوسف فديك الحالة وعلى بونت كان غيودع
ملاك: الااا !!!!
اورطيغا: هنييينا حتى تكوني بووحدك
ملاك: انا غنبات مع خديجة مخلاهاش يوسف تبقى معاه غيبقى معاه شريف وخوه
اورطيغا: اممم مهم متجبديش الهضرة منين تكوني حدا ختك من بعد ونصوني عليك ولا انا غنجي عندكم باش نوصلكم للدار…
يتبع
التعليقات 0