لغالية : (كتحاول تدوي بآداب او هدوء) مسيو الرضواني كنت متواجدة فالشركة معا تمنية قل دقيقة يمكن لكمرات تتبت هادشي يعني مكنتعتابرش تأخرت ، حاجة خرى انا باقي مسنيت معا حضرتكم لكونطرة يعني انا باقة موليت موضفة رسمية هنا مكنضنش أنو قوانين الشركة كتطبق على غير لموضفين
رضواني : (هز واحد لملف من من لمجر) وقعي هنا او نتمناه تكون هادي أول او آخر تأخر عندك وإلا مكنضنش واش غتكملي معايا لخدمة
لغالية : كون هاني مسيو رضواني (هزات ستيلو او سنات فداك لعقد بعدما قراتو مزيان)
رضواني : (صونا بطيليفونو لواحد النمرة او بعت دقيقة كانت دقات واحد لبنت او دخلات)
لبنت : مسيو فؤاد طلبتيني
فؤاد : دي معاك لغالية وريها لمكتب ديالها او وريها تا الشركة عرفيها على لموضفين تاع لقسم ديالنا
لبنت : واخة مسيو فؤاد تفضلي معايا
لغالية : (تبعاتها فسكات)
لبنت : هادا لبيرو ديالك ملاسق معا لبيرو تاع مسيو فؤاد او مقابل معا لموضفين تاع لقسم (مشات كدور بيها فشركة) الشركة ديالنا مختصة فسياحة عندنا مجموعة من لفنادق او المنتزهات التابعة لينا و لي كيقصدوها السياح ، بلاضاف لمشاريع خرى متعلقة بسياحة عندنا عدة فروع فلمغرب او قريب اولي تا خارج لمغرب ، مسيو علامي أسس هاد الشركة فشباب ديالو ولي فيها تسعة تاع طوابق كل طابق اوشنو شاد او شكون شادو ، طابق لول متكلف بلاستقبال او لأمن ، الطابق التاني او التالت تقديم لخدمات او لاستشارات للزبائن ، الطابق الرابع او الخامس متكلفين بلفنادق او ملنتزهات ، لقسم السادس متخصص فحل لمشاكل لي يمكن نواجه ها تعويضات او حتى الدعوات لقضائية حيت تما محامين تاع الشركة ، عاد لقسم التامن لي شادو مسيو فؤاد هو قسم لمالية اي ميزانية كتخسرها الشركة ولا كتحتاجها اي حاجة كتعلق بلفلوس قسمنا كيتكلف بيها ، او فطالق تاسع كاين خلاص مكتب الرئيس او النائب الرئيس
لغالية : (رجعات لمكتب ديالها هازة معاها قهوتها لقات شي ميلفات تما تلاهات معاهوم)
#فلعشية#
معا ستة ونص اخيرا خرجات من شركة ركبات طونوبيلتها او رجعات لدار طلعات لبيتها وتلاحت فوق ناموسية نيشن مسخسخة ، من زهرها غدا سبت او لحد مخداماش داكشي علاش غادة غا تنعس
لغالية : (جبداتها بنعسة تا وصلات تلاتة تاع ليل عاد فاقت ، او ديك نوضة لي بغات تنوض حسات بشي حاجة متقلة على خصرها ، مدات يديها لفيوزة شاعلة الضو او ضايرة لجيهة اكسيل بلعرض لبطيء مصدومة فيه) ا.اكسيل
اكسيل : (واخة كان حال عينيه ولكن لعيا باين على وجهو كانت يديه لي محطوطة على خصرها)
لغالية : (من يديها عندو كتأكد بلي فعلا فاق ولا غا كتحلم) ف.فقتي ؟
اكسيل : فين صباح ؟ خرجات من سبيطار ؟ شنو قال طبيب ؟ او مجد هو ؟
لغالية : (عرفاتو معقل على والو نقزات عليه معنقاه كضحك او كتبكي تخالطو عليها) كولشي بيخير غا ملي فقتي لينا حنا بيخير ، كنحس براسك مزيان غنمشي نقولها لدراري
اكسيل : ݣلسي ماشي دبا (عافر تا تݣعد شوي او حيد دوك لخيوطة لي مركبين ليه فيديه او تا لأكسيجين)
لغالية : علاش حيدتيهوم نعيط لطبيب
اكسيل : انا بيخير الغالية
لغالية : (عاودات عنقاتو) ممتيقاش بلي فقتي خفت لمتعاودش تحل عينيك باقي
اكسيل : شنو وقع معاقل على والو حدي اني كنت فطريقي لعند مجد حيت دار كسيدة
لغالية : غا درتي جوج خطاوي طحتي مغيب قالنا طبيب بلي طلع ليك السكر تا دخلتي فغيبوبة 5 مشهور هادي وصرف ونتا مغيب
اكسيل : 5 مشهور ونا مغيب او باقة داري فبلاصتها ؟
لغالية : ههههه حشومة تقول هاكدا راه دراري مكيحلاو ليهوم زبايل غا ونتا فايق
اكسيل : (ضحك بتعب صحتو تقيلة عليه)
لغالية : رجع تنعس ترتاح ليك شوي غتكون عييتي
اكسيل : (غمض عينيه بارهاق راجع ينعس)
لغالية : (مقداتش تعاود تنعس خايفة لتكون غا كتحلم بقات هاكداك حالة عينيها تا صبح صباح ، عيطات على طبيب فلبلاصة )
طبيب : (جا بجرا ملي سمعو فاق ، دخل لبيت ضارب فيه ݣلس فوق الناموسية كيشرب فلما) سي إكسيل على سلامتك حمد الله انك فقتي او تا الصحة ديالك مافيها تاشي آتار جانبية كنحس بشي ضران
اكسيل : لا ولكن صحتي تقيلة عليا
طبيب : داكشي عادي راك كنتي مغيب 5 شهور هادي معا شوي تاع تحراك غتستعسد النشاط ديالك غنعطيك شي ڤيطامينات تشربهوم او يكون خير
لغالية : (ملي خرج طبيب مشات تلاحت على اكسيل عاود بتعناق او لبوسات اخيرا تأكدات بلي فعلا فاق) توحشتك
اكسيل : ههههههه الى زدتي زيرتي عليا غا شوي غنصدق راجل لغيبوبة ديالي
لغالية : الله انجيك نمشي دبا نفيق دراري نصايب ليك متاكل ؟
اكسيل : باغي غا ندوش
لغالية : واخ (عاوناتو تا وقف على رجليه او داتو لحمام كتعاونو فتدواش)
بقات معاه لغالية تا دوش او حس براسو خفاف تا عضامو طلقو شوي ، نشف راسو او لبس حوايجو بنفسو
لغالية : نطلع ليك لفطور لهنا ؟
اكسيل : لا غنهبط ناكل معاكوم
لغالية : متأكد تقدر تنزل لتحت
اكسيل : (عنقها) واه
لغالية : (زادت تخشات فيه معنقاه تا هي توحشات دفأ ديالو) يالاه نزلو
اكسيل : يالاه (شد ليها فيديها مسند عليها او هبطو بجوج لتحت كانو دراري باقي مجاو لطبلة خدا بلاصتو او ݣلس كيتسناهوم ولغالية ݣالسة حداه)
صباح : (كانت خارجة من لكوزينة هازة طبسيل فيديها ملي ضربات فإكسيل ݣالس فطبلة طيحات الطبسيل او غوتات)
جود : صباح مالك لاش كتغ.. (سمع غواتها او جا كيجري هو محسن تا ضربو فإكسيل) بسم الله الرحمان الرحيم
اكسيل : (شير عليه بصرفاقة) شايف لمك جن
صباح : (جات كتجري عندو معنقاه) بابا
اكسيل : (بادلها لعناق) بنتي
جود : (قرب عندو بايس ليه يديه) لواليد على سلامتك
محسن : (تا هو باس ليه يديه) عمي اكسيل حمد الله على سلامتك
اكسيل : الله اسلمك اولدي ، فين مرتك نتا باقة ناعسة ؟
جود : (ݣلس مقابل معا باه او هو فرحانو ملي فاق باه او رجع ليه هاديك هي الدنيا او مافيها) لا راها فضارهوم
اكسيل : (وسع عينيه) غضبانة ؟
جود : وايلي الواليد على غضبانة ياسمين راه تسيفطني نغضب عند مي او متمشيش هي عند مها غضبانة ، راها غا بايتة عندها
لغالية : بصح ؟ مقالتش ليا بلي غتبات
جود : ملي خرجنا لي عيطات عليها مها قالت ليها آجي
اكسيل : مزيان او خوك هو مشعلش لعافية فتركيا ؟
جود : هدا عليا الواليد علاما كنعرف راه سالا سطاج ديالو باقي غا كيشوف واش ارجع لمغريب ولا ، ولكن راه شاد طيارة لمغريب ادوز فيها لعطلة تاع صيف ابعدا
اكسيل : مزيان انا غنطلع لبيتي نرتاح
لغالية : نعاونك ؟
اكسيل : لا غا ݣلسي انا غنطلع بوحدي
لغالية : واش أتمشي ليوم لقهوة
جود : انا مابقيت غنمشي لا لقهوة لا لحانوت مول شي فاق اشد رزقو انا غنمشي عند لمادام بسلامة
لغالية : ههههههه داير بحالا ولدتي ههههه اتجي تغدا ؟
جود : لا نسيبتي عارضة عليا لغدا
محسن : (كيعيب فيه) نسيبتي عارضة عليا لغدا فرحان
جود : (باغي غا بفقصو) معلوم فرحان ولكن راني عاضرك ربي سلط عليك واحد نسيبة تا قوم لوط او مكانتش عندهوم
محسن : ههههههههه سير سير
جود : (خرج من دار او شد طريق لدار نسابو بلاصات طونوبيل قدام لباب ، او نزل منها غادي كيدق عليهوم)
سعاد : (هي لي حلات ليه) دخل مرحبا
جود : (عطاها لميكة لي جاب معاه)
مريم : علاش عدبتي راسك اولدي
جود : ماشي موشكيل
مريم : دخل اولدي لصالون دخل راه ياسمين تما
جود : (دخل لصالان لاقي كولشي مجموع فيه مشا كيسلم عليهوم واحد بواحد عاد مشا ݣلس حدا ياسمين)
ياسمين : (كتدوي بشوي) لحب جيتي شعطلك
جود : لواليد فاق
ياسمين : (وسعات عينيها فيه) حلف
جود : غنكدب عليك
ياسمين : على سلامتو
لعݣوزة : (كانت مرا كبيرة فلعمر ضهرها تقوسات ݣاع او تكمشات ، ݣالسة مقابلة معاهوم ) شكون نتا
سليمان : (كيغوت باش تسمعو) عمتي هادا راجل ياسمين
لعݣوزة : ها ايوا فاش خدام اولدي
جود : قاضي اخالتي
لعݣوزة : مزيان مزيان درتو شي ولاد
جود : باقي
لعݣوزة : ايوا شكتسنا ليهوم
جود : باقي مكتاب
لعݣوزة : (مشا ليها ريزو) شسماك الله اوليدي
جود : جود اخالتي
لعݣوزة : آهاه او فاش خدام ؟
جود : قاضي
لعݣوزة : تبارك الله عندي واحد بنت ولد بنتي اسمها مريامو ضريفة او زينة باقة مامزوجاش نشوفلك معاها
ياسمين : (محسات تا غوبشات) امكاين لا ماريا لا مريامو غا لي بادية سميتها بلميم صورلي براجل ياك لاباس
لعݣوزة: شقلتي ابنيتي مسمعتكش
ياسمين : (جهدات صوتها باش تسمعها) وا قلت ليك الله ايجيب لمريامو ديالك شي طراكس تخبر شقف لجدخا ماشي غا النقرة ، هاد سيد مزوج انا مرتو سمعتيني دبا
لعݣوزة : هاه هادا راجلك او فاش خدام
ياسمين : خدام كيجمع عليا صحابات لميم
جود : اني ونتي غطيري على سيدة
ياسمين : خايفني نطير عليها ولا عاجبك تدويليك على نبݣة تاع مريامو
جود : هههههههه غا تكالماي اصݣعة
مريم : (حطات لݣصعة تاع كسكسو) زيدو تاكلو
ضارو بطبلة كياكلو تا عمرو لكرش عاد خرجو بجوج من الدار مشاو دازو لمدينة كيتسركلو فيها تا طاح ليل او صونا عليهوم جود ايجيو ايجيبوه من لماطار
جود : (وصلو لماطار لاقيين سي مجد شاد ليد للالة غزلان او كيفرنس هيجو عندهوم سلمو عليهوم)
مجد : فين تعطلتو
جود : شيفور تاع باك ؟
مجد : زين صاڤا ؟
جود : (غوبش) متجمعش فمك نتا شوي لا شنت زين
ياسمين : على مسموم متقولها لينا متخلي ناس ايقولوها لينا
جود : تحركي لطونوبيل قبل منغلط فيك
مجد : (ركبو مجموعين فطونوبيل او مشاو لدار)
لغالية : جيتي على سلامتك
مجد : الله اسلمك
لغالية : غزلان مرحبا بيك
زغلان : أرحب بيك لحير (لخير)
صباح : خويا مجد
مجد : لحبيبة دخوها كي دايرة بيخير
صباح : بيخير لحمد الله
مجد : (مشا سلم على محسن سلام رجولي) عشيري
محسن : اغبرة غبرتي
جود : (بطنز) واع غير شهر على قدو
لغالية : دخلو دخلو ترتاحو غتكونو عييتو
مجد : باقي لواليد مفاق ؟
جود : والو أخاي
مجد : غنطلع نشوفو
محسن : طلع طلع
لغالية : (شافتو طلع لفوق) حشومة عليكوم علاش مقلتوش ليه بلي فاق
محسن : خليه تا يسرسب ليه شي زبلة او ياكل من عندو سلخة تاع لعصا او غيعرفو بلي فاق
جود : هههههههه لحمو كلاه
مجد : (دخل عند باه لبيت لاقيه متكي او مغمض عينيه ، مشا باس ليه فوق راسو او ݣلس حداه) لواليد باقي مهداك الله تفيق ، واغا فيق اوسلخني حيت جبت صاحبتي لضار قولي الحمار خرجو رجليك شواري ضصرتي تا جايبلي عشيرتك لضار غا نوض او سلخني
اكسيل : (حل عينيه مغوبش او جمعها معاه بواحد تسرفيقة) ايما نتا عاد جايبلي صحبتك لدار
مجد : بحال هاكدا تصرفقني غا نوض (هز عينيه فباه موسعهوم) لواليد فقتي ؟
اكسيل : (شدو من شعر) فقت يابن لكيدار لاخر لقيتي طواسل مي ناعس درتي مابغيتي فدار جايبلي صحبتك عندي قهوة السعادة أدوي الكانبو
مجد : (مفك شعرو من يدين باه غا بلكشايف) ناري الواليد زعما كنتي فغيبوبة هاد الجهد كامل مناش جبتيه (مشا عنقو كيبوس فيه)
اكسيل : نوض عليا كدير غا لمصايب
مجد : (زاد عنقو) الله الواليد شحال توحشتك غنعس حداك
اكسيل : نوض تهز عليا شمن تنعس حدايا (عيا معاه اينوض تا سمعو كيشخر عرفو بلي عيا بسفر ، غمض عينيه هو براسو كان عيان صحتو زادت تقالت عليه مقدش دبا تا ينوض ، داك نهار فاش فاق قدر اينوض اتمشا شوي واخة كان كان كيجر رحيل او ضروري اشد فشي حاجة ولا يعاونو شواحد ولكن أبعدا حسن من دابا ، حاس بلحمو يابس)
لغالية : (طلعات طل على اكسيل لقاتو ناعس او مجد ناعس حداه بحال دري صغير ضحكات عليهوم او هبطات لتحت تكمل تفراج معا دراري)
محسن : كلى سلخة ؟
لغالية : منعرف شتو ناعس حداه
جود : النعسة مور السلخة بحلاوتها
غزلان : علاث ايثلحو ؟ (علاش ايسلخو ؟)
صباح : حيت بو زبايل كيدير زبلة او يعطي لعربون على لوخرة
لغالية : ياكما فيك نعاس نوريك بيتك ؟ ولا فيك الجوع ؟
غزلان : لا نعثت فطيارة او كليت فيها (لا نعست فطيارة)
لغالية : جبتو كونجي بزاف
غزلان : معرفتث مجد قال بلي باغي ادوز ثيف هنا (معرفتش مجد قال بلي باغي ادوز صيف هنا)
صباح : حسن ليكوم نيت يالاه تساليو روينت لعرس او ترجعو لداركوم
غزلان : ثمن عرث ؟ (شمن عرس)
لغالية : عرسك نتي ومجد
غزلان : هنا مغنتزوجوث (مغنتزوجوش)
محسن : ههههههه خاص غا عمي اكسيل اوقف على رجليه مزيان او غتشوفيه كيدوي معا كريطور على عرسكوم
غزلان : (بقات غا ساكتة مسكينة مفهمات فيهوم والو)
جود : يالاه تصبحو على خير انا غنطلع نعس
صباح : تصبح على خير تا حنا غنوضو نعسو
جود : (دخل لبيت ضارب فياسمين كتخدم فطيليفون) باقي منعستي ؟
ياسمين : كنت كنتسناك
جود : (مشا ݣلس حداه عاد بات ليه شنو لابسة) سعداتي ملي ولات ياسمين كتسناني
ياسمين : (كانت لابسة شوميز مشبكة منها لحمها تا دوپياس ملابساهومش من لتحت ، ݣلسات فوق رجليه مدورة وجها مور عنقو) متوحشتينيش ؟
جود : (زاد قربها لعندو) شوية
ياسمين (زادة قربات عندو عاضاه من ودنيه) متأكد غا شويا ماشي بزاف ؟
جود : (خطف بوسة من فمها فحين يديه كانو كيتساراو على صحتها) شحاف عليك ليومة
ياسمين : (حيدات ليه توني ديالو ) محاف عليا والو غا توحشتك او صاف
جود : غا توحشتيني او صاف (قلبها فوق ناموسية على ضهرها او طلع فوقها) على هاد لحساب خاصني نبقا نسيفطك عند مك باش توحشيني
ياسمين : هههههههه ونا شندير باش توحشني نسيفطك عند يزة ؟
جود : لا خليني غا هنا (طاح ليها على فمها كيبوس فيه او هي منساجمة معاه هو يجر او هي تجر)
ياسمين : (فصلات لقبلة داوية معاه قبل ميزيد يشعل) جود بحال كل مرة صافي
جود : خلينا ليوم نبدلو شويا منين تزوجنا او حنا غا سطحيا
ياسمين : (كتحاول تدوي بلطافة مباغاش تخصر لجو حيت راه ماشي اول مرة غيجيدو هاد لموضوع) جود راك عارف انا ماباغاش خلينا غا سطحيا او زايدون راه كيف كيف
جود : ماشي كيفكيف اياسمين راه سطحيا غا كنعديو بيها او صاف ، نتي نهار لي جا مكتبغيش فلول كنت كنقول يمكن فايقة متوترة باقة مامولفين على بعضياتنا ولكن دبا شمن عذر عندك بزاف على لخوف اياسمين
ياسمين : ماشي مسألة خوف اجود غا هو انا ماباغاش مامرتاحاش مقاداش ، ونتا كضغط عليا كل مرة
جود : شمن كنضغط عليك اياسمين راه والله تا بزاف على صبر قربنا نكملو عام او حنا غا بحالا كنحكو تعبيئة شي معقول لا ، هاد الرفض ديالك اياسمين ماشي منطقي علاش ماباغاش منعرف دايرة بحالا مخبية شي حاجة ، ياسمين واقعة شي حاجة مخبية عليا شي حاجة ؟ مباغانيش نعرف شي حاجة ؟ ياسمين : (حسات بقلبها بغا يخرج من بلاصتو ، توترات ولكن كتحاول تخبي) ش.شغنخبي عليك متلا قتلك مابغيتش هي مابغيتش ماكاين ما نخبي عليك
جود : منعرف ، سوا كنتي كتخبي شي حاجة سوا لا طال زمان ولا قصار غنعرف
ياسمين : (قربات عندو بايساه من فمو) خلينا مندابزوش ليوم عافاك صافي بلاما نهضر ليلتنا
جود : (ملي سولها كان لاحض التوتر فعينيها الشي لي خلى شوية تاع الشك اتولد عندو ، مابقات عندو ݣانة انا حاجة فينما يقربها تقوليه غا سطحي سطحي او ملي يسولاها علاش تقوليه مابغيتش ، طلعليه زعاف نيت ناض من فوقها) تا انا مكيعجبنيش السطحي ماباغيش نديرو
ياسمين : (هادشي لي خسر عليها او مشا تكا حداها طافي لفيوزة لي من جيهتو ، قربات عندو) دبا واش تقلقتي ولا شنو باغي غا تخصر لينا ليلتنا على حاجة تافهة بحال هادي (عيات تدوي معاه تا قالت بلي صافي نعس ، تعصبات او ناضت لفوطويات ݣلسات عليهوم جابدة ليها واحد لݣارو او بدات كتكمي)
جود عينيه كانو مغمضين ولكن عقلو ولا بغا ينعس غا كيفكر راسو ضرو او الشك غا مزاد ركب فيه ، هو ماشي من نوع لي يحاسب وحدة على شنو دوزات من قبل ولكن من طبيعة لحال ميبغيش تستحمرو ، عقلو خايب او بزاف الى مشا تا تأكد جزء بسيط من الشك ميقدش اكمل معاها بتاتا واخة يكون واكل عليها جوانط ، فهاد ليلة ماشي غا جود بوحدو لي مقدش انعس تا ياسمين ماقداتش تغمض عينيها ، كتبان من برا غير مبالية مامسوقاش لتا حد ولكن شي مرات داكشي لي لداخل ديالنا مكنقدوش نبينوه ، شي مرات كنفضلو نلتازمو سكات او نسطانعو لبرود غا باش منبانوش ضعاف ، ماشي كولشي كنقدو نقولوها او ماشي لكولشي نقدرو نقولوه
#عند مجد #
ضرباتو لفيقة معا نصاصة تاع ليل لقا راسو منشور حدا باه ناض بشوية باش ميفيقوش او خرج من لبيت غادي لجردة اضربو شوي لبرد ، عاد كيحس براسو مزيان او مرتاح لداخل ديالو ، يمكن كون وقعات شي حاجة ليحيى كان غيبقا فيه لحال ولكن ماشي بحال كيما بقا فيه لحال على اكسيل ، داكشي لي كلى منو تاع لعصا مكلاه غا هو ولكن عمرو تقلق ولا شد فخاطرو بلعكس كاين لمرات لي يدير الزبلة غا باش ياكل عليها لعصا ، حيت عارف انو لعصا لي كلى ميدير تا زغبة فداكشي لي دار اكسيل على قبلو ، ملي تزاد او مو مريضة مقاداش تقابلو هو لي هزو او دارو واحد من ولادو او عمرو تشكا منو بلعكس ديما حاس بيه كان باغيه ايكون معاهوم او ماعندوش موشكيل اعطي دم جوفو عليه ، واخة مكانش ساهل عليه اربي تلاتة تاع تريبيات غا بوحدو او يخدم عليهوم من لفوق ، ملي رجع ليه باه عاد بدا كيحس بروح رجعات ليه
صباح : (خرجات عندو لجردة) ضرباتك لفيقة ؟
مجد : واه نتي باقة منعستي
صباح : مشيت تكيت ولكن والو مجانيش نعاس قلت نهبط نشرب شي كويس دلويزة ياكما نعس ، نتا طار ليك نعاس ؟
مجد : لقيت راسي شبعت نعاس
صباح : ههههههه عاد شفت ضو رجع ليك لكمارتك
مجد : وايلي لواليد صحصح او ضو ميرجعش
صباح : لي بقا فيا تا زبايلك ايرجعو
مجد : ضاروري
صباح : هههههههه عرفتي غا لبارح تفكرت واحد نهار ملي كنا صغار او تلفتي لينا ههههه بابا مسكين من لعاصر او هو كيضور زناقي كي لهبيل تا صبح صباح نهار لاخر عاد تميتي راجع لينا لدار انا غا شرحلي سكنتي كدير
مجد : هههههههه كان فيا نعاس او بابا متخلنيش نعس جوايه لعاصر باش ميطيرش ليا نعاس ، قلت انمشي نلعب شوي باش نكبر نعاس ، ملي وصلت لقيت دنيا خاوية حيت شمس او داك لقادوس فاش كيتزلقو دخلات حيت فيه ضل هو يغفلني نعاس ملي ضرباتني لفيقة لقيت لحال ضلام او معا كنموت على نعاس تقلبت لجيهة لوخرى او كملت نعاسي تا صبح صباح ، الله اسمحنا من لواليد جيت لقيتو مسكين تسلخات ليه الجلدة تاع رجليه بلمشية تاع زناقي او صوتو بح بتقلاب
صباح : هههه مسكين تا من دموع نزلو ليه ، لي كيشوف هاكدا حاضيها فينما مشينا كيقول بلي غا حيت خايفنا نزبلوها ، ولكن هو مسكين بكترت لخوف ديالو مكرهتش كون ايديرنا لكاميرات ، يالاه نخليك انا دبا غنمشي نعس
مجد : تصبحي على خير
صباح : (ملي دخلات سمعات مجد كيعيط طلات عليه بلاما يشوفها)
مجد : (بان ليه الشرجم تاع بيت غزلان فيه ضو هز حجرة صغيرة او رماها على الزاج او هوا كيعيط بشوي) غزلان وا غزلان
غزلان : (كانت فبيتها متكية كتسنا نعاس ايجيها تا سمعات قريب فشرجم ملي طلات لقاتو مجد) ثكادير {شكادير}
مجد : نزلي
غزلان : علاث {علاش}
مجد : لحقاش المصيبة نزلي نتمشاو شوي ماحد لواليد ناعس ليصدق شاتف علينا
غزلان : واحة هاني جاية {واخة هاني جاية}
صباح : (ديك طلعة لي طلعات معا دروج لقات غزلان خارجة من بيتها) فين غادة ؟ عند مجد ياك
غزلان : واه
صباح : ݣلسي هنا ستنايني متخرجيش عندو (طلعات بجرا لبستها لاقية محسن كيتفرج) آجي نتا معايا عندي ليك واحد لبلان
محسن : شمن بلان
صباح : زيد تخرج عند مجد بلاصة غزلان نضحكو شوي زيد
محسن : (ملي لبلان فيه ضحك تبعها فلبلاصة)
صباح : عطيني شي حوايج ديالك واسعين
غزلان : (مفهمات والو ولكن مشات جبدات ليها واحد سروال او فيستا طيولة) هاكي
صباح : لبس نتا هادو ونتي سيفطي لداك لمجحوم الحق عليك لجردة لورانية
غزلان : ثكون لمجحوم {شكون لمجحوم}
صباح : مجد مجد
غزلان : واح {واخ}
محسن : هاني لبست
صباح : دير لقب او سير تسنا فجردة وعطيه بضهر سربي
مجد : (ملي وصلو لميساج مشا بجرى ايشوفها او معا ضلام فرز غا حوايجها قرب عندها شاد ليها ليد او هو كيفرنس) متوحشتينيش
محسن : (حابس الضحكة بزز او صباح كتصور فيه)
مجد : (سيد لفرحة مقداتوش ) غا وصلتي لمغريب حراشو يديك اصݣعة او كبرو تبارك الله تزيدي شوي متبقايش تنعسيهوم حداك ههههههههه
محسن : (مقدش اشد راسو او تزلع بضحك) طلع يدي يا تامل طلق
مجد : (شداتو اللقوة) أزمر شكادير هنا ولاش لابس حوايج غزلان
صباح : (قطعات لڤيديو او خرجات عندو هي وغزلان كيضحكو)
مجد : نتي مولات هاد لبلان
صباح : ونتا لي حافو عليك بليل
مجد : نتا هادي هي لعشرة غا قاتلك صباح جي نضحكو جيتي
محسن : (عنق صباح من لور) معلوم مرتي قاتلي أجي او منجيش
مجد : (يعيب فيه) مرتي قالت لي أجي منجيت تلاحو عليا
صباح : هاحنا غادين او خلي لبنت تطلع تنعس ليل هادا
مجد : (خلا محسن او صباح تا طلعو هو يشد غزلان من يديها) شنو زعما نتي مخلياهوم كيضحكو عليا او عاجبك لحال
غزلان : (عنقاتو مخشية فيه) غي ضحكنا معاك
مجد : نمشيو لبحر
غزلان : فهاد لوقت ؟
مجد : واه يالاه
مشاو بجوج ركبو طونوبيل غاديين فطريق تا وصلو لجيهة لبحر بقاو فطونوبيل مخرجوش منها حيت كان لبرد شوي ، خداو ليهوم شي كسكروطات فطريق او بقاو فطونوبيل كيتمنضرو فلبحر او كياكلو تا شبعو
غزلان : واث حنا غنحتاجو لموافقة تاع باباك باث نبقاو اونكوپل ؟ {واش حنا غنحتاجو لموافقة تاع باباك باش تبقاو اونكوپل ؟}
مجد : (رجع راسو لور مشابك يديهوم معا بعضياتهوم) متفكريش فهادشي دبا او زيدون مكاين لي يقولنا شي حاجة بابا لموهيم عندو هو نتزوجو
غزلان : واث لهاد الدرجة مهم زواج ؟ ميمكناث نبقاو غا هاكدا ؟ {واش …… ميمكناش}
مجد : لينتا غنبقاو بحال هاكدا ؟ ماباغاش تزوجي بيا
غزلان : bien sur no مي ماثي حاليا مكنفكرث فزواج {مي ماشي دبا حاليا مكنفكرش فزواج}
مجد : وعلاش مكتفكريش فزواج بسلامة
غزلان : J’aime beaucoup ناحدو وقتنا او نتعرفو على بعضياتنا مزيان زواج آخر حاجة نفكرو فيها حصوصا دبا {ناخدو …… خصوصا دبا}
مجد : خاصنا غا نقاد لامور تاع لخدمة او نجي نقنعك تزوجي بيا
غزلان : (دارت يديها تحت راسها) ويلى مقنعتينيث ؟ {مقنعتينيش}
مجد : (قرب عندها كيضحك) الى مقنعتكش نتزوج جدك بزز شقلتي
غزلان : ههههههههه
فديك لحضة لي كانو فيها غا بجوج فطونوبيل لعين علعين او لفم قريب من لفم ، فلوقت لي كان الشيطان تالتهما قبلة خفيفة جمعات دوك جوج عاشقين لي عمى لحب عينيهوم ، *في قاموس العشق كانت مجرد قبلة لا تروي عطش العاشقين ، لكنها كانت ذنبا في قاموس الخطايا*
مجد : (فصل لقبلة مساخيش حط راسو على راسها او دوا بهيام) كنحماق عليك
غزلان : (بتاسمات بخجل مبعدة عليه او راجعة كتشوف فلبحر )
#عند صباح#
دخلو بجوج لبيت محسن بقا كيشوف فطيليفونو فحين صباح مشات بدلات حوايجها بپيجامة تاع نعاس
صباح : مفيكش نعاس غدا قلتيلي بلي راك مسافر مخاصكش تنعس بكري ؟
محسن : خاصني نعس بكري ولكن خلينا لول (طلق موسيقى رومانسيه او هادية او قرب عندها منوضها لعندو) نشطحو شوي
صباح : (كانت كتشطح معاه) مرة مرة كيحوفو عليك
محسن : (خشا وجهو فعنقها محاوط خصرها او مكملين تمايلهوم معا الحان لموسيقى) متسافريش معايا ؟
صباح : منقدرش راك عارف بابا يالاه ناض او ناس ملي غيعرفو الدار غتعمر لغالية راها خدامة شكون غيقابل ضياف ياسمين بوحدها ولا غزلان لي ضيفة هي براسها
محسن : مرة خرى منفلتكش
صباح : صافي مشات ، شحال اتݣلس فناضور ؟
محسن : والله معرفت ولكن على لاقل 15 ريوم
صباح : ماشي بزاف ؟
محسن : غنمشي نضبر على شي حديد نقاد او نبيعو مصور لحركة شوية راك عارفة باش تقوم ݣاراج شحال خاصك
صباح : بقا هنا انا نعطيك لقدر لي خاصك
محسن : لا غنمشي الى خصوني شي فلوس او نتسلف منك البنكة ديالي
صباح : هههههههه ولكن نعلمك لفائدة عندي شويا طالعة
محسن : (بعد عليها محيد داك توني ديالو عاد رجع عندها ملاسقها معاه او دوا باغراء) الى مرضيتهومش هادي لجسد ديالي خوديه
صباح : (ولات حمرة شوي) علاه لجسديالك ماشي ديالي اصلا ؟
محسن : ههههههه ( رجع خشا راسو فعنقها) انا كاملين ديالك
صباح : على هاد لحساب انا غا نآمر ونتا تغامر ياك
محسن : هههههه نتي غا طلبي
#فصباح#
لغالية : (ملي فاقت لفجر لقات بلي مجد نعس فبيتو داكشي علاش غا صلات مشات نعسات حدا اكسيل )
اكسيل : (فاق هو و لغالية قد قد) صباح لخير
لغالية : (زادت تخشات فيه معنقاه) صباح النور شبعتي نعاس
اكسيل : جابولي جنابي بنعاس
لغالية : فيجي طبيب تاع ترويض ديالك ليوم
اكسيل : معاياش ؟
لغالية : معا لعشرة
اكسيل : واش طبيب ولا طبيبة ؟
لغالية : طبيب علاش
اكسيل : غا حيت سمعت بلي طبيبة فداكشي تاع ترويض حسن
لغالية : (ميقات فيه عينيها) ونا فداكشي تاع سليخ موهبة ، شتك باقي تا متوݣضتي مزيان او عينيك بداو كيدورو
اكسيل : هههههه عينيا الى ضارو غا تقبيهوم منقولش ليك علاش
لغالية : مقلتش ليك انا بديت لخدمة فواحد الشركة
اكسيل : خدمة ؟ ياك باقي مساليتي لقراية ديالك ؟
لغالية : ملي كنتي مريض كنت كنقنط بزاف ملي دوست معا لحاج باش تخدم سكريطيرة فواحد الشركة منها ناخد لخبرة حيت ماشي بحال فاش كتقرا على لحاجة بحال كتخدمها
اكسيل : ايمتا بديتي لخدمة
لغالية : مشي نهار واحد لي هو الجمعة سنين معاهوم لعقد او تعرفت على لموضفين
اكسيل : قلتي ليا بلي راك سكريطيرة عند شي مدير
لغالية : واه ياكما معجبكش لحال
اكسيل : باغة ديك لخدمة ؟
لغالية : واه
اكسيل : ايوا صاف
لغالية : ممقلقش ؟
اكسيل : علاش انتقلق
لغالية : (باستو فمو) ملي تولي مزيان غنوريك فين كاينة الشركة
اكسيل : ان شاء الله
#عند جود#
ليل كامل مداقش ريحة نعاس ملي وصلات ليه السبعة ناض دخل لحمام غسل وجهو او سنانو او خرج يلبس حوايجو ضارب فياسمين واقفة كتشوف فيه
ياسمين : صباح لخير
جود : (ملاهي معا قميجتو) صباحو
ياسمين : (كتحاول تجبد معاه لهضرة) غادي لخدمة
جود : وقيلة
ياسمين : عندك لخدمة بلحد ؟
جود : عندي شي خدمة وصاف
ياسمين : معاياش اتخرج لعشية ؟
جود : معا ستة
ياسمين : نخرجو نتعشاو برا ديك نهار خصرات عنا ماريا لعشا
جود : عندي شي خدمة نديرها فدار
ياسمين : صافي تال مرة خرى
جود : هاني غادي (هز طيليفونو او خرج من لبيت غادي لخدمتو)
ياسمين : (بقات غا متبعاه بلعين قلبها بغا يسكت كان كيجاوبها بلعبار او زاد ملي مشا خرج تا بوسة مباسهاش كيما مولف ، حسات براسها بدا كيطبغ شربات ليه دوليپران او مشات تنعس )
جود : (مشا لخدمة واخة كان لحد مشا باش ايجيب شي وراق تاع لقضية لي شاد ، او داز دوا معا شي بوليس باش يفهم شنو وقع ، رجع لدار معا سبعة طلع عند باه سلم عليه عاد دخل لبيتو مكانتش ياسمين فلبيت مشا بدل عليه او هز لپيسي ديالو مدوز لمكالمة لواحد لقاضي)
ياسمين : (كانت ݣالسة معاهوم لتحت كيتجمعو بان ليها جود دخل لدار سلم عليهوم او طلع بحالو لبيت ، هزات طيليفونها كتقلب فيه تا وصلها واحد لميساج بلفرحة تاعو معرفات تا كي دارت تا طلعيتا عند جود معناه او كتفرنس) عرفتي غا دابة
جود : (كان كيشرب قهوتو او كيقرا شي وراق ديك نقزة لي نقزات عليه ياسمين او عنقاتو تقاس لكاس او تخوا على لوراق ، دفعها عليه مخنزر فيه او كيحاول امسح لوراق قبل ميخسرو) واش مكتشوفيش بلي راني خدام شوفي دبا تبرهيش ديالك فين وصلنا
ياسمين : سمح ليا انا غتحمست او عنقتك عرفتي ليوم
جود : (زاد طلع ليه زعاف على هاد لوراق لي ضارو ليه تا ضار فيها ) معرفتش ليوم لي عارف هو ضربتيلي خطية لداكشي لي حفيت دماغي معا دين مو ، شغاندير انا بهاد لوراق دبا أدوي
ياسمين : دبا مالك كتغوت بحالا درتها بلعاني ، او زيدون انا أصلن مفهمتش مالك من صباح او نتا هاز شوكتك ياك اودي لباس ، غا يطلع ليك شي حد زعاف جي خرجو فيا انا (هي براسها طلعات ليها لقردة لسطح داكشي علاش مشات ݣلسات او شعلات ليها التلفازة كتفرج)
جود : (هز طيليفونو كيصوني لواحد النمرة ايشوف واش عندو النسخ تاع هاد لوراق او من زهرو كانو باقيين او تسيفطو ليه ، رجع شعرو اللور براحة عاد هز عينيه فياسمين مطول فيها الشوفة قبل مينوض إݣلس حداها) سمحيليا كنت مشطون معا دوك لوراق
ياسمين : (نفطات يديه لي تحطات عليها) جمع عليا يديك متقربنيش
جود : (عنقها من لور مزير عليها) وصافي متبقايش هاكدا مقلقة عارف راسي زت فيه او مكانش عليا نغوت عليك ، سمحي ليا
ياسمين : ديك سمحي ليا ديالك هنها فشي طرف تاع لخبز او كولها ماعندي ماندير بيها طلعاتلي فمخي بكترت ماسمعتها منك
جود : (كان بغا يدوي سعا طيليفونها بدا كيصوني كانت نمرة ممسمياش ، مد يديه مجاوب او مكبر الصوت)
لمتصل : لمشاركة ياسمين غيكون وصلك اشعار تأهلك لمرحلة جاية من لمسابقة ديانا مبروك عليك غدا ان شاء الله غيخصك تجي عندنا ل***** باش نخبروك بموعد الجولة تانية
ياسمين : (كانت مقلقة ولكن دبا رجعات ناشطة) واخة
جود : (ستناها تا قطعات عاد دوا) سمن مسابقة هادي بسلامة
ياسمين : واحد لمسابقة تاع لغنا
جود : مسابقة تاع لغنا ؟ ايمتا شاركتي فيها بسلامة ؟
ياسمين : قبل زواجنا بشوي أو عاد سالاو تصفيات
جود : غتمشي ؟
ياسمين : ضاروري نمشي شحال ونا كنتسنا هاد لفرصة
جود : من لأفضل متمشيش معندك ماديري بشي مسابقة تاع لغنا ، لي يسول ولي ميسواش ابقا يسمع فصوتك او يشوفك كتغني
ياسمين : وي يشوف لي بغا يشوف مالي لائحة حوايجي انا غادة نغني حيت كيعجبني نغني
جود : كيعجبك مقلتش ليك لا غني فدار معا لعئيلة ماشي معا لبراني ، طلعيلي فوق لخشبة او طلقي حلوقك تخلي توامل حالين فيك فمهوم هي لي متكونش
ياسمين : واش نتا شوية صاڤا باغيني نضيع لفرصة لي شحال ونا كنقلب عليها باش سي جود يبقالي على خاطرو مكتحسش راسك شوي اناني لا ؟ نتا درتي لي بغيتي فحياتك او دبا باغي دخل فحياتي
جود : مكنتش اندخل كون داكشي لي باغة ديري فحياتك شي حاجة مسݣدة ممزوجش بشيخة باش تمشي تغنيلي بين لباشار
ياسمين : خانات قلتيها باغة نغني ماشي نطحب شنو لموشكيل
جود : لموشكيل الالة حرام حرام الرحيلي بداك الصوت او تغني ، ياكما بنت ليك هنا أدومة نخليك تمشيلي لقصارات لي شداتو لقنطة أطلق صوت مرتي باش ترجعلو لݣانة
ياسمين : (بدا عاود كيطلع ليها) دم واش انا فينما ندوي معاك تݣلس عليا حلال حرام ، لغنا حرام ونا مالي باغة نغني كيعجبني نغني
جود : شتي نتي مرة مرة كنشك فيك واش شويا فعقلك كفاش حرام ونا مالي ماش مكاضربي حساب لحد تال لي خلقك ؟
ياسمين : دبا هاد ربي فاش كنكون انا محتاجاه فين كيكون تا كتبان ليه باغة نغني عاد ايجي عندي ولا شنو
جود : (جهلاتو) استغفر الله العظيم واش نتي وصل بيك باستهتار ديالك بالدين تال هاد الدرجة ، واش مكتفكريش فعاقبة هادشي لي كتقولي ، واش يسحاب ليك ربي صاحبك تبقاي طنزي عليه هاكدا ، واش مكتفكريش فعاقبتك
ياسمين : دبا لاش مرضني فمخي نفكر فعاقبتي ولا نݣلس ، آسيدي انا باغة نتشوا فجهنام صافي ، شتي انا ݣاع فرعون ايشد ليسر ونا غنتمغط فليمن تسالني شي حاجة ؟ عنداك غا مدخلش لجنة
جود : شتي ميعمر معاك السوق غا ليهود ، شوفي غنقول ليك حاجة وحدة غتمشي غدا لداك لخرا ديالتك متعاودش ، كنحلف ليك برب لكعبة اوتمشي غتشوفي مني شي حاجة مغتعجبكش
مشا تخشا فبلاصتو ونعس مخلي ياسمين باغي يسكت ليها لقلب ديما كيدير ليها ، بقات شحال غا ݣالسة وكتفكر واش تمشي ولا متمشيش تا داها نعاس ، او مضرباتها لفيقة تا كان جود خرج لخدمتو شافت فساعة لقاتها تمنية ناضت بجرى لبسات عليها او خرجات تشد طاكسي
#عند لغالية#
فاقت بكري او وجدات راسها باش تمشي لخدمتها ، ولكن قبل وجدات لإكسيل لفطور حطاتو حداه معا دوا ديالو عاد خرجات من دار ، ركبات طونوبيلتها او شدات طريق لشركة بلاصات تحتها او نزلات داخلة ليها ، طلعات لمكتب ديالها لاقية لموضفين باقي مجاو حطات ساكها او مسحات لبيرو ديالها لي كانت مشاركاه معا كوتر لبنت لي وراتها الشركة
كوتر : (جات لبيرو ديالها لاقية لغالية سبقاتها) صباح الخير
لغالية : صباح نور
كوتر : ليوم جيتي بكري
لغالية : جيت بكري او مشبعتش نعاس الستة لقاني لحال فايقة
كوتر : هههههههه معا لوقت غتولفي تا انا كنت كنقول نفس لهضرة فاش يالاه بديت لخدمة
لغالية : شحال هادي باش بديتي ؟
كوتر : شي 3 شهور هادي
لغالية : مزيان
كوتر : سمعت بلي يالاه قربتي تسالي عامك لول فلافاك شحال فعمرك
لغالية : عندي 20 عام قريب ندير 21 عام
كوتر : باقة صغيرة انا عندي 23 عام
فؤاد : (وقف عليهوم فلبيرو) ايلى ساليتو ركن التعارف ديالكوم نبداو لخدمة
كوتر : (دوات باحترام) مسيو فؤاد صباح لخير نقاد ليك لقهوة ديالك ؟
فؤاد : قاديها او وصليها ليا لقاعة لاجتماعات علمي لموضفين بلي منهنا عشرة دقايق كاين اجتماع ونتي تبعيني لبيرو
لغالية : (هزات لمذكرة ديالها او تبعاتو تسكات لبيرو)
فؤاد : (حيد لفيسة ديالو علقها او بدا كيدوي) تاصلي بوكالة تنضيم لحفلات لي متعاقدة معاها الشركة طلبي منهوم لوجدة لواحد لحفلة او ديري معاهوم موعد منها جوج سوايع باش غنكون تما مدوية على التفاصيل تاع لحفلة ، لموعد ديالي معا بنك **** لغيه ليوم اوشيفي شي وقت آخر لي مناسب ليا او ليهوم ، راجعي لملفات لي من 2005 تال 2019 او عطيني تقرير بخصوص لميزانية لي ستهلكاتها الشركة فهاد لمدة ، غدا فصباح ايكون تقرير فوق لبيرو ديالي ، بعدها تواصلي معا لقسم لمسؤول على لفنادق باش ايسيفطو لميزانية تاع هاد شهر (هز عينيه لقاها مكتكتبش) علاش مكتكتبيش هادشي لي كانقول
لغالية : مسيو فؤاد مقديتش نلحق عليك فلكتابة حيت كتزرب
فؤاد : ياكما خاصني نعاود هادشي باش تبعي معايا ، ولا جيبي نكتبلك فلورقة باش متعدبيش راسك
لغالية : (عرفاتو كيطنز عليها) متحتاجش مسيو فؤاد هادشي لي قلتي كامل غنديرو
فؤاد : مزيان ، يالاه
لغالية : فين ؟
فؤاد : للإجتماع
لغالية : (عاد تفكرات تبعاتو بسكات لقاعة تاع لاجتماعات ترأس هو الطبلة او ݣلسات هي فلكرسي لي حداه)
لغالية : (سالا لاجتماع او رجعات لبيرو ديالها باركة على داك ستيلو لي فيه التسجيل تاع فؤاد ملي كان كيقول ليها شنو دير) غديرها بيا اسي فوؤاد راني مفرجة المسلسلات كاملين تاع سيكريطارات
كوتر : معامن كدوي ؟
لغالية : معا راسي
كوتر : هزي ساكك او يالاه مسيو فؤاد كيتسنانا فطونوبيل بال نمشيو لاجتماع لي داير معا لمنضمين تاع لحفلة
لغالية : (هزات ساكها او تبعاتها لتحت لاقيينو كيتسناهوم فطونوبيلتو ، كان الشيفور هو لي سايݣ لغالية ركبات حدا الشيفور مخلية كوتر تركب حدا فؤاد)
فؤاد : دويتي معاهوم
لغالية : واه , غنلقاوهوم كيتسناونا فمطعم ***** (مشاو حضرو لداك لاجتماع لي تافقو فيه على كولشي بخصوص لحفلة عاد رجعو للشركة ، بقات ملاهية معا دوك لوراق تا وصلات ليها الستة دلعشية عاد رجعات لدار لاقية لحاجة او لحاج جاو) السلام عليكم
لحاج : (مكانت قاداه فرحة حيت ولدو رجع ليه) وعليكم السلام أبنتي
لحاجة : فين كنتي ؟
لغالية : كنت فلخدمة
لحاجة : فلخدمة ؟ علاه منيمتا كان ولدي قاطع عليك لمصروف تا خرجتي تخدمي
لغالية : (مكان فيها لي يتصادع معاها طلعات لبيتها لاقية اكسيل فايق كيتفرج فتلفازة)
اكسيل : جيتي
لغالية : (مشات باستو) عرفتي تسخسخت بزاف
اكسيل : (حطات راسها على صدرو) سخسخوك ليا
لغالية : داك لكلب عندمن خدامة عطاني نراجع لملفات من 2005 تال 2019 او غدا نعطيه تقرير
اكسيل : خدامة عند شي شيبة عاصية ؟
لغالية : واحد لكلب واحد زمر
اكسيل : هههههه قلبك عامر من جيهتو
لغالية : ههههه انا غنمشي نبدل عليا هاد لحوايج
#عند ياسمين#
رجعات لدار مور لغالية بشحال طلعات لبيتها لاقية جود ݣالس ݣيتسناها او باين السخط على وجهو
جود : مشيتي واخة دويت معاك لبارح او حذرتك
ياسمين : سير تا تكالما واجي ندويو بحال ناس دبا باغة نعس مافيا لي يدوي
جود : (كان طالع ليه لخز لراسو شدها من يديها مزير عليها) لا غندويو او دابا ولا ملي كنتي طالقة عليهوم حلقك كان عاجبك لحال ، شنو زعما قال ليك هاد الراس هادا غا داوي خاوي ولا شنو
ياسمين : (نترات منو معصبة تا هي) مالنا لاش طتغوت نمشي ولا منمشيش لاش هاد كترت لحضية
جود : كون كنتي شادة طريق بحال بنات ناس مكنتش نحضيك كون كنتي وحدة كتسنط ملي ندوي معاها مكنتش ندير عليك عساس
ياسمين : (نفاجرات عليه) علاش نتا هاكدا غا قول ليا علاش نتا ديمة كتفكر غا فراسك علاش ديمة مكتحسش بيا ، علاش باغي تشكلني على دوقك علاش ممتقبلنيش كيما انا , علاش ديمة باغي تغيرني علاش مكتقبلش انو انا ماشي بحالك لي ولدونو ماشي هوما لي ولدوك لوسط فاش عشت او طريقة باش عشت ماشي بحالك علاش باغي ترضني بحالك بزز علاش متغيرش راسك على قبلي
جود : نغير راسي ؟ باغاني نهز لݣارو او نضرب الطاسة باش تقولي هادا كيفهمني هادا من ستيل ديالي ، باغاني نكون بحال داك تامل تاع باك نخليك ديري داكشي ليبغيتي بغيتيني نوريك لبيران فين جاو باش تبقاي على خاطرك ، كون مكنتيش عوجة مكنتش غنعيا نحاول نقاد فيك
ياسمين : علاش فينما كنتناقشو كدخل ليا لݣارو شراب واش حيت أنا شمكارة مكنحسش ، علاش ديمة كتعاتبني انا او مكتشوفش راسك بحالي انا بوحدي لي غالطة ونتا لبريء فينا علاش ديمة انا لخايبة ونتا لمزيان
جود : الالة انا مكنسواش ولكن كنحاول نقاد من راسي اما نتي عاجبك هاد لوسخ فاش كاينة مباغاش تخرجي منو بتاتا
ياسمين : (سكتات مادواتش عند بالها نقاش عادي كيما نقاشات ديالهوم ولكن لجملة لي جات من بعد هاد سكات ريبات أحلام ربعسنين على قدها)
جود : (بقا ساكت مودة قبل ميرجعو شعرو اللور او يدوي بهدوء) بغيتي تغني من حقك حياتك هاديك مغندخلش فيها ، من لول تسرعنا فهاد زواج أو احسن قرار غناخدوه هو كل واحد فينا اشد طريقو او نطالقو
ياسمين : (على عكس لداخل ديالها لي كان هايج او قلبها لي بغا يسكت ، هزات فيه عينيها بهدوء طلعات او نزلاتو باينة فيه معصب نيت هايج كي تور او على عكس توقعو دوات بهدوء) واه خلينا نطالقو تا انا عييت منك او من التحكم ديالك باغي تشكلني كيفما بغيتي ، باغي تحكم فحياتي او تمشيني على هواك
جود : (كان ساخط تاع لمعقول) غتعاود نفس لهضرة علاه كون كنتي مقادة كنت نقادك ، كتشرقي ونا نغرب معرفتش شنو باغة تصنعي ݣاع كنحاول ناخدك على قد عقلك ولكن نتي ماباغاش تبدلي بتاتا
ياسمين : نتبدل ؟ علاش غنتبدل بسلامة ؟ آه ولا نسيت داكشي تاع طاعة الزوج او تخربيق بغيتي تجي تلقاني لابسة قشابة واسعة ميبان مني لا ساس لا راس ، نعرض ليك سطل تاع لما سخون او مكاين غا سيدي جود ، بغيتي تجي تلقاني كنقيم صلى ولا شنو هههههههه والله تا راك كتحلم بزاف ديك لمخيلة لي فراسك هي لي مغتكونش
جود : شتي غا دوي حيت عندك لحق من لول كان باين بلي طريق مكتجمعناش ، باغة تعيشي حياتك بطول او بلعرض تكمي تشربي ونا تابعك من بار لبار لا حقا حياتي هادي ندير فيها مابغيت ، لبسي لقصير او لمعري او باغاني نبقا ساكت ياكما بنت ليك كنعكر ، اما واحد صلى مندويش عليها كون كنت ندوي معا يهودي كون سلم ونتي والو ، معندك تاشي حس لا بدين لا بلمنطق او أنا عييت من هادشي كنقول ليوم تبدل غدا تبدل تال لينتا منعرف ، ولكن هادا جهدي معاك كيما تلاقينا خوت نتفارقو خوت او كل واحد فينا اشد طريقو
ياسمين : (سكتات مدواتش معاه خلاتو خارج زادح لباب او جبدات ليها هي واحد لݣارو كتكمي فيه او هي كتشد فدموعها) علاش غتبكي لما وشطابة تال قاع لبحر مطلقة او نتزوج غيرو غا هو لي زوين فهاد لبلاد ، كلب لاخر انا لي غنطلقك ماشي نتا او نزيدك النفقة من لفوق غا نتفك منك (صبرات تا عيات او فلخر نهارت بلبكا)
لغالية : (بقات كتراجع دوك لوراق تا درها راس هي تنوض تمشي عند ياسمين داقة عليها لباب)
ياسمين : (مسحات عينيها لي كانو حمرين بزربة) دخل
لغالية : (دخلات عليها) راك بوحدك جود مكاينش ؟
ياسمين : لا لقيتيه عاد خرج
لغالية : (ݣلسات حداها) ضرني راسي تسخسخت ليوم نيت ، مال عينيك حمرين كنتي كتبكي
ياسمين : لا غا دخان تاع لݣارو ولا كيدير ليا لحساسية فعينيا
لغالية : واشبغيتي داك زمر
ياسمين : (عينيها مركزين على تلفازة) عبد الله دار كسيدة هاد لفجر
لغالية : دار كسيدة ؟ مكاين لي قال ليا والو مشيتي شتيه
ياسمين : واه مشيت هاد صباح عندو
لغالية : او كيبقا
ياسمين : راه مش بسبعة تاع رواح تقسح غا شوي فرجليه او صاف
#فلاش باك#
بعدما لبسات حوايجها او خرجات شدات طاكسي باغة تمشي لفين منضمين هادوك لمسابقة ، دورات لهضرة فراسها مكان فيها لي يتخاصم معاه عاود داكشي علاش حبسات طاكسي قبل تا متوصل نص طريق او مشات ݣلسات فواحد لقهوة واخدة ليها عاصير او هازة طيليفونها مصونية على جود
ماريا : الو
ياسمين : (غوبشات) علاش مجاوبة فطيليفون راجلي
ماريا : جود عندو واحد لجلسة دبا او نسا طيليفونو هنا ، باغة تقولي ليه شي حاجة نوصلها ليه
ياسمين : بصح اتوصليها ليه شكرا بزاف قولي ليه ميتعطلش عليا راني كنتسناه هاد ليلة ، آه وقبل منسا قولوهي راني لابسة ليه شوميز لي كتعجبو ، عافاك قولي ليه هادشي لي قلت ليك بلحرف باي (قطعات عليها مخنزرة او غا كيسوط او ديك لحظة لي بغات تحط طيليفونها صونات عليها مها) الو ماما
مريم : جي لسبيطار **** راه باك دار كسيدة
ياسمين : شنو ؟ هاني جاية دابا
قطعات معاها او ناضت شادة طاكسي بزربة قلبها مقبوط عليها ، شي مرات قدما كرهنا شي شخص كنلقاو راسنا كنبغيوه بنفس لقدر ، واخة كانت مطلب لباها لموت ولكن كلبها ضرها انفوا سمعاتو دار كسيدة تا دموعها خانوها ، مابغاتش تمشي تشوفو ولكن لا اراديا لقات راسها غادية عندو او كتقلب عليه بين غرف لمستشفى ، باغة تشوف جثتو قدامها او فنفس لوقت مقاداش على فراقو ، قمة تناقض ياك بعد تقلاب او تقلاب اخيرا لقات مها او عمها وجدها وجداتها لي كانو كيتسناو حدا بيتو
كلتوم : ياسمين جيتي
ياسمين : فين هو عبد الله
سليمان : طبيب كاين عندو باقي مخرج
طبيب : نتوما عئيلة لمريض
كلتوم : واه اولدي كي بقا
طبيب : معندو باس الالة تقسح غا شوي فرجليه يمكن ليكوم دخلو تشوفوه
ياسمين : (تسنات تا دخلو عندو كاملين عاد دخلات عندو هي لبيت )
عبد الله : (مكانش كيشوف فوجه ياسمين بتاتا) شجابك نتي لهنا واش تا سبيطار تبعيني ليه
ياسمين : (هزات فيه عينيها لي كان فيهوم آتار دموع) جيت غا نشوف واش نتي ولا باقي سعى خصارة باقي غطول معانا وتزاحمنا فدنيا
عبد الله : (جمعها معاها بتسرفيقة) باغة لموت لباك الكلبة مكفاتكش لفقصة وشوهة لي دايرة ليا الشمكارة لݣارو وشراب كل نهار ، وزايداها كدعي عليا بلموت
ياسمين : (معا كل كلمة كتخرجها كان صوتها كيحمل واحد الرجفة) واه كندعي ليك بلموت فكل ليلة او فكل لحضة كنطلب ربي اهزك من دنيا ، ولكن عرفتي شكون لي مسطيني واخة كنطلب موتك ملي سمعتك فسبيطار جيت كنجري كي لكلبة باش نشوفك ، كي لكلبة جيت نشوفك
عبد الله : (بطنز) واه جيتي تشوفيني او تشفاي فيا ياك غا الشوهة علاش كنتي كتقلبي هانتي طليتيها ياك قتلك عطي لجد بويا تيساع ماتعرفيني منعرفك شجابك لعندي شجابك
ياسمين : (ضحكات او دموع محجرين فعينيها او صوتها مخنوق) عمرك حسيتي بيا عمرك تا سولتينا علاش انا هاكدا
عبد الله : اتبداي عليا ديك لاسطوانة ديالك نتا سباب نتا سباب ، ياكما انا لي كنشعليك لݣارو ولا كنخويليك لكاس دماحيا كل نهار أدوي نتي لي خرجو رجليك شواري
ياسمين : واه عندك لحق انا لي خرجتلها لراسي كميت او شربت حيت عمرني قديت نغمض عيني ونعس بحالي بحال الناس ، الى مكميتش تا تلفت على لقبلة منعسش حيت فكل مرة كنغمض عنيا كنشوف قدامي ديك لبنت لي مليوحة عند رجلين باها كتبوس فيهوم باش اديها معاه او يخرجها من لعافية لي فيها كلما غمضت عيني كتحضر قدامي صورت داك الراجل لي كان كيجي كل مرة ياخد فلوس دموع بنتو ويعطيها بضهر او يمشي ممكاترتش لتعياطها ، ماقديتش نسا او مغنقدش نسا حتى مني رجعت كنت كنقول غتهز فقلبك شوي تاع ندم من جيهتي هههههههه تخايل معايا كنت تا كنتسنا منك تعنقني وتقوليا سمحي ليا على كولشي ولكن كيما تخليتي عليا من قبل عاودتي تخليتي عليا مرة خرى ، ولكن تا انا عييت او مابقيتش قادة على صداعك بغيتي غا نقطعو علاقتنا من ليوم عتابر راسك موالدش شي وحدة سميتها ياسمين طبعا هادا لاكنتي معتابرني بنتك فلمقام لول
خرجات من عندو معصبة او مشات عند خوتها لدار ݣلسات معاهوم تا رجعات مها عاد مشات هي لدار
#نهاية لفلاش باك#
لغالية : غا ملي فلت فيها متهرس متشلل لاباس ايما كان ايشد لقنة لمك يالاه نخليك انا دبا نمشي نكمل لخدمة ديالي
ياسمين ملي خرجات لغالية بقات ݣالسة مودة شوي هي تنوض لماريو جبدات من فوقو واحد لبريزة حلاتها او بدات كتحط فيها لحوايج
جود : (بعد ديك لمهازة لي تهاز معا ياسمين خرج كاعي نيت)
مجد : (شاف خوه خرج قال واش غادي غا يتمشا هو يتبعو تا وصل لواحد التيران تاع لباسكيط لاقي جود كيلعب فيه) كاعي تا جاي تلعب فهاد ليل ؟
جود : (كان كيبرد غدايدو فكورة ، ملي شاف مجد لاح ليه كورة) شد
مجد : (شد منو كورة او بدا كيلعب هو وياه) شكون قلقك ؟ دابزتي معا ياسمين
جود : غا كاعي وصاف
مجد : اعشيري مكتشجعوناش على زواج
جود : مكنشجعك على زواج ؟ قتلك متزوجش هانتا ها لعدول
مجد : (طول فيه شوفة قبل ميدوي) ندمتي على زواجك
جود : (حبس شايف فيه) ماشي ندمت غا هو زواج حاجة او الزعطة حاجة خرى
مجد : هادشي نيت لي ممخلينيش زاعم لزواج
جود داك تعصاب ديالو كامل خرجو فلعم تا ولا كاملو كيقطر بلعرݣ عاد تم راجع لدار ، طلاق ماشي شي حاجة ساهلة عليه ولكن شي مرات كيكون طلاق افضل خيار باش شي ميجرح شي ، يمكن تسرع شوي ولكن من لول هاد زواج مكانش صحيح ، غيكدب على راسو الى قال بلي مكيبغيهاش ولكن راه لعيشة معاها صعيبة ، مولفة داك تفتح ممسوقة لا للعبد لا ليخلقها ، او هو مقدش اتقبل هادشي من ديما كان باغي مرتو تكون شي وحدة عارفة بينها او بين لي خلقها وحدة كتلبس لواسع مكانش باغي وحدة داكشي لي كيشوف كيشوفوه معاه ناس ، طلاق هو لحل لي بان ليه كل واحد فيهوم ايشد طريقو او يعيش حياتو كيما بغا حيت من لمستبعد انو ياسمين تبدل او تشد طريق
جود : (وصل لدار معا لخمسة تاع صباح دخل بتردد لبيت ، كان كيقول غيلقاها ناعسة صدق ضرب فيها كتجمع فحوايجها) شكاديري ؟
ياسمين : (سالات جميع تاع حوايجها او سدات لبريزة وبدات كتجمع دوك لقجاوج صغار) كنجمع حوايجي
جود : علاش كتجمعيهوم بسلامة
ياسمين : باغيني نخليليك حوايجي هنا ولاشنو ، ملي جيتي جيتي وصلني لدار
جود : معندك فين تمشي ردي حوايجك لماريو بقاي فدار تا نساليو لاجراءات تاع طلاق
ياسمين : حنا دبا أصلن معتابرين مطلقين مكاينش لاش نبقاو عايشين بجوج ، غا يصبح صباح نسلم على عمي اكسيل او نمشي بحالي لدارنا
جود : ݣلسي هنا باقي مدويت معا لواليد مجاتش يعرف ملي يشوفك غادة ، زيد عليها مغنبقاوش عايشين بجوج متخافيش انا غادي من دار
ياسمين : (مسولاتو لا فين غادي لا علاش ، حلات باريزتها او رضات حوايجها لماريو ، ومشات تكات فوق ناموسية ناعسة)
جود : (دخل لحمام دوش او لبس فيه نيت ديك لخرجة لي بغا يخرج قشع خاتمها تاع زواج محطوط حدا لاڤابو ، حس بخاطرو ضرو فديك اللحضة ولكن خرج لبرا لقاها ناعسة جمع حوايجو كاملين او مشا ݣلس فوق لفوطوي مقادش اغمض عينيه تا صبح عليه صباح او شاف بلي كولشي تجمع على طبلة كيفطر طبعا من غير باه ، مامشاش يفطر او طلع عند اكسيل داق عليه) لواليد
اكسيل : (كان كيشرب قهوتو فوق لفوطوي) دخل
جود : صباح لخير
اكسيل : صباح نور زيد ݣلس
جود : لا جيت غا نقول ليك بلي غنسافر
اكسيل : فين بسلامة ؟
جود : سيفطوني فلخدمة لرباط ندوز فيها شي شهورة
اكسيل : سيفطوك ولا نتا لي عمرتيها
جود : واحد صاحبي مرتو قريب تولد او قلت نمشي فبلاصتو
اكسيل : ياسمين : غتمشي معاك ؟
جود : لا اتبقا هنا عندكوم تا نرجع
اكسيل : (كان كيشرب قهوتو بلاما ايشوف فيه) كولشي مزيان بيناتكوم ؟
جود : واه علاش
اكسيل : غا سولتك طريق السلامة ايمتا غتمشي
جود : غنمشي دابة نيت
جود خرج من عند باه هز حوايجو دارهوم فطونوبيل او سلم على مالين دار عاد شد طريق لرباط
ياسمين : (بقات ناعسة تال تلاتة عاد فاقت غسلات وجها او ضربات عينيها بلقلم او لماسكارة مغطية ليهوم ديك لحمورية لي فعينيها ، مشات حلات لماريو لاقية بلي حوايجو مابقاوش هزات ليها واحد البيجامة لبساتها او طلعات شعرها لفوق عاد هبطات عندهوم) السلام عليكم
لغالية : (كانت عندها لعشية خاوية داكشي علاش رجعات لدار ، مدارتش يديها فلما سيهام هي لي طيبات اما شيماء غا تخطبات خرجات من لخدمة) عليكم سلام فقتي ، تبغي تفكري ولا نسخن ليك حقك تاع لغدا
لحاجة : خليها تا تعشا معانا نيت راه قرب وقتها ياك المزوجة راجلك معا نبوري شد طريق مسافر مامشيتي معاه كيما كيديرو لعيالات ، منضتي وجدتيليه تا لفطور او سيفطيه
لغالية : (كانت خايفة ياسمين دير شي حالة سعا هداها الله او مشات ݣلسات حداها) مالك ؟
ياسمين : غا ضرني شوي راسي يمكن لبرد لي ضربني
لحاجة : (ملي مالقاتش لحاج حداها دارت مابغات) حݣل لبرد اضربك ونتي ضلي تساراي ليا بسليپ سماطي
صباح : لحاجة حشومة
ياسمين : (طلقنا طلقنا مابقا دبا بو وجه مشاركنا اشارفة) لقيتيني لبارح تا انا كنقولها لجود ، قتليه خليني نلبس شي حاجة مستورة قالك والو سليپ سماطي او يكون فلحمر العمر ، تا مرضت بمسبتو
لغالية : (حبسات الضحكة غا بزز)
لحاجة : الله اقل حياك متحشمي مترمشي هادي هضرة ايقولوها ناس
ياسمين : لي سول على حاجة مكتعنيهش الحاجة كيسمع لهضرة لي مكتعجبوش ، كي شتي مكيدخل بين راجل او مرتو غا شيطان ايوا متكونيش الحاجة شيطان باش مترجميش بلكلام
لحاجة : اجميلك فلهضرة وحلان الرجلين اما تاويل او صواب مابينك او بينو غا لغير او لاحسان
ياسمين : الى كان تاويل او صواب ميخلينيش ندخل سوق راسي بناقص منو خليلي غا دوك جوج لولين كافييني
لحاجة : كون كانو دوك الجوج نافعينك ݣاع ميمشي راجلك او يخليك ، ولكن سرك خرك ايضورو بيه لمصوابات
ياسمين : (بقا فيها لحال لداخل ديالها خصوصا انو عارفة الجود بلي نوع تاع نسا لي كيعجبوه هوما هادو) هههههههه ايضوروبي لمصوابات مالو كعبة ولا قبة مولاي براهيم
لحاجة : ماهو كعبة ولا قبة هو جود آيت اوسو سيد رجال لمخيرة فلبنات تمناه
لغالية : (دوات بشوي) موضي بلاما تشادي معاها ، نوضي نعمرو اتاي
ياسمين : (ناضت تبعات عمتها لكوزينة) دبا ديك شيخة شباغة عندي ، ولدي سيد رجال مزوجة السلطان سليمان
لغالية : او مال جدك راجل مزوينش او ضريف
ياسمين : زوين كيقطر بزين او قاري او واعي او بعقلو مامبليش كيصلي كيصوم ، غا هو مسكين معندو زهر مزرف فيا
لغالية : هههههه علاش مزرف فيك فين يلقا حسن من بنت خوية الزين او الطولة وتجريدة ، صابرة ليه على تكشكيشة ديالو شباغي كتر خاصو يبوس يديه من لقدام او من لور صونيتي عليه واش وصل
ياسمين : لا
لغالية : ايوا صوني عليه دبا
ياسمين : خلي تا نطلع لبيتي
لغالية : صوني عليه هنا مافيك تيقة
ياسمين : (عرفاتها مغتفاكش معاها هي تهز طيليفونها او صونات عليه)
جود : الو
ياسمين : صونيت نشوف واش وصلتي
جود : (عرف بلي شي حد ايكون حداها) واه وصلت
لغالية : (كاشير ليها شنو تقول) قوليه ياكما عييتي احبيبي ياكما تمرتي
ياسمين : بسلامة
لغالية : (ضربات فخاضها) هاويلي على بسلامة ماتقولي زين ماتقولي توحشتيني ما تقولي توحشتك واش كتدوي معا خوك ولا راجلك
ياسمين : شغانقول ليه شمن حياتي ولا جداتي يالاه مشا وكان
لغالية : (صغرات فيها عينيها) ياكما تخاصمتو ؟
ياسمين : تهازينا شوي وصاف
لغالية : علاش ؟
ياسمين : بحال ديمة وصاف
لغالية : سمعيني نقول ليك الزواج ماشي هو تصاحيب زواج كي لميزان شوي من عندي وشوي من لاخر باش يالاه اتقادو ، راجل خاصاه تباتة او لمرا صبر بين الراجل او لمرا فزواج مكاين لا كرامة لا هم يحزنون كاينة لعشرة ولاحترام لي خدامين ، نتي وجود باقين صغار باقين مولفتوش على زواج أو مسؤوليتو باقي نتي تجري او هو يجر ، نهار لي تعرفو راسكوم بلي فباطو كلا خاصو يضرب جيهة باش تزيدو لقدام غتعيشو مزيان
ياسمين : (كانت ساكتة مدواتش باغة تقول لعمتها بلي داك لباطو وا غرق او كل واحد فيهوم شد طريقو ولكن قالت تا يرجع جود او يقولها ليهوم بنفسو)
صباح : (دخلات عليهوم لكوزينة) ياسمين عافاك طلعي لبابا لما يشرب
لغالية : انا غن… (شافت صباح غمزاتها تسكت) هاكي ها لقرعة ديالو
صباح : (ملي مشات ياسمين ضارت عند لغالية) نتي سيدة باغي يدوي معاها لواليد سيري لسقيه
لغالية : باش غنعرف انا بلي باغي يدوي معاها
صباح : أختي باز مكتمليش منو ؟
لغالية : (كتفرنس) اختشي مكنملش انا منو
طلعات ياسمين لبيت اكسيل دقات عليه عاد دخلات لقاتو ݣالس كيشوف فشي وراق تاع لخدمة
ياسمين : عمي ها لما ديالك
اكسيل : حطيه هنا وزيدي تݣلسي
ياسمين : (دارت كيما قال ليها)
اكسيل : وصل جود ؟
ياسمين : واه
اكسيل : (رجع ضهرو لور) كولشي مزيان بيناتكوم ؟
ياسمين : واه كولشي مزيان
اكسيل : علاش مدايراش خاتمك تاع زواج ؟
ياسمين : غا نسيتو فلحمام
اكسيل : مزيان ، ما مليتيش فدار
ياسمين : بزاف
اكسيل : مناوياش ديري شي حاجة تعمري بيها وقتك ؟ ترجعي تقراي متلا
ياسمين : لقرايا موحال
اكسيل : تكوين هو ؟ مبغا ديري فندقة مباغة ديري طبخ ماباغا ديري تكوافوريت
ياسمين : تا هادو محال
اكسيل : ايوا ملي تا هادو لا شنو باغة ديري بسلامة تحلي ماحال ؟
ياسمين : (نسات راسها) تاع ساكا ؟
اكسيل : تاع لبخور حسن
ياسمين : (بدات كتسرسب) لا ساكا حسن هي كتمشا خصوصا فصيف ، كتعرف واحد الساكة جات لداخل تاع حي *** غربتي شراب فيها ولا غا ماحيا كيبيعوه بمية درهم ليطرو ولكن الصارحة ماشي بحال ماحيا رخيص شي حاجة ناضية
اكسيل : (بقا غا كيشوف فيها) نعطي لبنتي باش تمشي تشري شي ايطرو
ياسمين : (ضربات طم عرفات راسها زبلها)
اكسيل : ملي ماباغة ديري لا تكوين لا قراية غتمشي تقابلي لمجال تاع لحوايج لي فلمدينة
ياسمين : غا خليني فدار ماعنديش معا لبيع او شرا
اكسيل : او عندك معا ماحيا وڤودكا ياك ؟ غدا السبعة نلقاك لتحت
ياسمين : كون غا عفيتيني اعمي
اكسيل : ستة تكوني لتحت
ياسمين : ياك يالاه قلتي سبعة
اكسيل : ضهرلي لخمسة حسن
ياسمين : لا خليها ستة
#عند صباح#
كانت كتدوي فطيليفون معا محسن لي كان مسافر
صباح : ايمتا قلتي اترجع ؟
محسن : واحد جوج سيمانات
صباح : راك ݣالس فلوطيل ولا كريتي شي دار
محسن : ݣالس عند ولد خالي ساكن هنا
صباح : مزيان
محسن : ملي نجي لكازا نمشيو لدار
صباح : واخ ، نخليك دبا غنمشي نشوف لواليد
محسن : سلمي عليه
صباح : مبلاغ (قطعات معاه او مشات عند اكسيل لاقياه عاد سالا صلى تاع لمغرب) بابا
اكسيل : صباح دخلي
صباح : (مشات عندو لبالكو) رتاحيتي شي شوية
اكسيل : مليت بكترت لݣلاس
صباح : هههه موفتيش كتݣلس شتك جابد شي وراق تاع لخدمة
اكسيل : غدا انمشي لحوانت او قلت نطل على لكارني
صباح : كون غا زدتي رتاحيتي فدار لخدمة خليها من بعد
اكسيل : باركة من لݣلاس فدار زيد عليها مرات خوك خاصني نديها معايا لمحل
صباح : علاش ؟
اكسيل : راها قانطة فدار او خوك مسافر مكاين لي يخرجها
صباح : كي شتيه كان كيخرجها ملي كان هنا ، بقا ملاهي معا لخدمة او مخليها فدار
اكسيل : داك دري خاص لي يعاود لطاسيلتو ترابي ، فين هو راجلك ؟
صباح : راه طلع لناضور عندو شي خدمة تما
اكسيل : الله يسر ليه ، كتمشي عند طبيبة بعدا ؟
صباح : واه
اكسيل : كتحسي براسك مزيان
صباح : واه كنحس براسي مزيان (مشات عنقاتو) سمح ليا ابابا بسبابي وقع ليك هدشي
اكسيل : (مجال فين يدوي معاها تا لقاها كتبكي) متبكيش موقع والو
صباح : كان يسحابلي غتوقع ليك شي حاجة
اكسيل : معندو كيوقع ليا انا باقي تا مدرت لبنتي لعرس
صباح : (هزات راسها فيه) شمن عرس ؟
اكسيل : (كيمسح ليها دموعها) عرسك علاه بنت اكسيل لوحيدة تمشي لدار راجلها بلى عرس
صباح : ههههه وايلي الواليد راه فاية 5 شهور باش تزوجت شمن عرس قاني دبا
اكسيل : راه أجلنا لعرس غا حيت داك سيد مات دبا غنديرو لعرس ايمتا غيرجع محسن
صباح : بعد جوج سيمانات
اكسيل : صافي غندوي معا لغالية تشوف شي قاعة او شي نݣافة يالاه نلحقو
صباح : (عيات معاه ولكن راسو قاسه قالها ايدير ليها لعرس هي غيدير ليها لعرس)
مجد : (دق عليهوم لباب او دخل) نتوما مجمعين هنا بلى بيا محشمتوش
اكسيل : شجابك ؟
مجد : (عنقو) حشومة تقول هاكدا جيت نشوفك
اكسيل : تشوفني نوض عليا غا مشات ليك صحبتك جاي تلسق فيا
صباح : فين مشات غزلان ؟
مجد : مشات عند مها
صباح : راها هنا فكازا ؟
مجد : وقيلة
اكسيل : وقيلة ؟ تا دارهوم معرفتيهوم فين جاو كي غدير تخطبها
مجد : نخطبها ؟ شمن خطبة ؟
اكسيل : ناوي تخيط ليا بيها زناقي بلى خطوبة بلى زواج ؟
مجد : انا غا قلت باقي لحال على هادشي غزلان مكتفكرش فزواج زيد عليها انا باقي مرسيت اموري
اكسيل : اذن تفارقو تا ترسي امورك او سير خطبها او تزوجو
مجد : هانتا خليني نفكر شوي او ندوي معاها او نمشيو غا نتعرفو على عئيلتها او نخطبوها وصاف زواج من بعد مانقاد اموري
صباح : تا هادا نضار ، يالاه ابابا ياخدو وقتهوم او يتعرفو على بعضياتهوم مزيان
اكسيل : هاحنا انشوفو داك تعارف ديالك ولكن هانياوي معاك شدات ليدين لا لقيسان لا لبوسان لا شتي حتى تخرجو غا بجوج لا
مجد : هاء شخلياينا قايدنا فدار لقرآن هاد الصيف حسن
اكسيل : علاه طواسلك كون كنتي قاري لقرآن كنتي تصاحب
مجد : لا هنا قنعتيني
بعدما جمعات لماعن تاع لعشا طلعات لبيتها نيشن غسلات وجها او حكات سنانها عاد مشات تكات حدا اكسيل
اكسيل : خاصنا نقلبو على شي قاعة
لغالية : قاعة ؟ تاعاش ؟
اكسيل : على حساب لعرس تاع صباح
لغالية : علاه نويتو ديرو لعرس ؟
اكسيل : ضاروري من لعرس
لغالية : صاف ملي يوصل ليا سبت او لحد غنمشي انا وياك نشوفو لقاعات ، دويتي معا ياسمين ؟
اكسيل : ضرك راسك باغة تعرفي علاش دوينا ؟
لغالية : بغيت غا نعرف واش دويتي معاها على حساب جود
اكسيل : لا دوست معاها غا على لخدمة وصاف انديها معايا تقابل واحد لحانوت
لغالية : مزيان
اكسيل : (جرها لعندو) معاياش خدامة صباح ؟
لغالية : سبعة خاصني نكون تما
اكسيل : دبا لعشرة هادي لحداعش تكوني ناعسة
لغالية : كفاش…. (مفهمات شنو قصد تا لقاتو خاشي راسو فعنقها بايسها منو بوسة خفيفة سالاها بعضة ، مدات يديها لشعرو شاداه منو او جابدة راسو لعندها بشوية دامجة شفايفهوم) توحشتك اشلح ديالي
اكسيل : (هزها لعدو مݣلسها على حجرو وطالق شعرها طويل) نموت فيك الكزاوية
#فبلاصة خرى#
بضبط فواحد لقهوة معروف انها كتحل ربعة وعشرين ساعة على ربعة وعشرين ساعة ، كان فؤاد ݣالس بين صحابو كيشرب قهوتو
صاحبو : (شاف فؤاد غا ساكت او ساهي) اسبحان الله اعشيري شتك ساهي بحالا غرقو ليك لبابر ياك لاباس
صاحبو : خليه خليه مسكين راه كيفكر فخيتنا
فؤاد : شمن خيتنا ؟
صاحبو : وايلي على شكون خيتنا السمرة لي فلعرس
صاحبو : اهي شمن سمرة وشمن عرس
صاحبو : شتي فلعرس لعرس تاع هشام ستقبلاتنا واحد لبنت سمرة وزوينة بلحليب او تمر فلباب ايوا سيد غا كلى تمر طاح او تزعط
صاحبو : نهار كبير هادا ملي السي فؤاد الرضواني بقدره تواضع قلبو او بغا شي بنت
فؤاد : غتبقاو تندغو عليا فلهضرة دبا ولا شنو هاني غادي
صاحبو : ݣلس ݣلس غا ضاحكين معاك
فؤاد : لا خاصني نمشي نعس غدا خدام (ناض من طبلة هز سوارتو او ركب طونوبيلتو غادي راجع لدار ، حل لباب بسوارت لي عندو ضارب فمو) لوليدة باقة منعستي
مو : لقيتيني عاد ساليت لهضرة معا خالك قاسم كيسلم عليك
فؤاد : اسلم عليه لخير فينو هو فين دراري
مو : كاينين بنت خالك راها دارت لعقد
فؤاد : صغيرة ولا لمتوسطة
مو : لمتوسطة ديك لي قلت ليك تزوجات واحد من النواحي تاع خنيفرة
فؤاد : الله اكمل عليها بلخير
مو : ونتا ماناويش تلقا ليك شي خير
فؤاد : عاود الوليدة نفس لموضوع مكتعيايش
مو : ونتا مكتعياش راك قربتي تقفل تلاتين او هانتا لا زواج لا وتاد
فؤاد : واش انا قلت ليك منتزوجش ؟ راه باقي مكتاب او صاف
مو : ياك عييت معاك نقلب ليك على شي بنت علاش ماباغيش
فؤاد : انا امي ماباغيش داك زواج تاع متعرفني منعرفك ملي نلقا لبنت لي نرتاح ليها غا نجي نديك تخطبيها ليا ، يالاه تصبحي على خير
مو : تصبح على خير
طلع لبيتو وتلاح فوق الناموسية كيفكر فيها مابغاتش تخرج من بالو نهائيا ملي شافها فلعرس كتمشا بنخوة او تباتة جاتو على ݣانتو ولكن قال غا نضرة وغدوز تا لقا راسو كتر من نص عام هادا وبالو مشغول بيها تا صدفة لقاها دافعة السيڤي ديالها لشركة بلاما حتى يقرى شنو فيه قبلها او رفض لوخرين ، كان كيحاول اركز غا على خدمتو تا كيلقا راسو حاضيها ، تنهد بتعب مغمض لاعب تا داه نعاس
#فصباح#
فاقت لغالية معا ستة لاقية اكسيل لابس حوايجو ، مدات يديها لپينوار لبساتو باش متبقاش عريانة
اكسيل : صباح لخير
لغالية : صباح نور (طلعات على على صبعانها بايساه من فمو) شحال دبا فساعة ؟
اكسيل : ستة وقسم هادي نوصلك لخدمة
لغالية : بلاما تعدبي راسك غيخصني نمشي بطونوبيلتي باش نرجع بيها
اكسيل : نتي تعرفي انا انمشي نفيق ياسمين
لغالية : (دخلات لحمام غسلات وجها عاد خرجات لبسات عليها حوايجها او مشات شدات طريق لشركة)
اكسيل : (وصل لقدام بيت ياسمين او بدا كيدق عليها او يعيط) ياسمين
ياسمين : (كانت خامرة مجايبة لدنيا خبار)
اكسيل : (هز طيليفونو كيصوني عليها والو مكتجاوبش ، شاف تا عيا هو يشعل موسيقى مجهدة او دوز ليها طيليفون تحت لباب)
ياسمين : (قفزها الصوت تاع لموسيقى ناضت مخلوعة حالة لباب او ضاربة فإكسيل) عمي اكسيل
اكسيل : (تحنا هز طيليفونو طافي لمسيقا) صباح لخير ستة او عشرين سيري لبسي حوايجك باش نمشيو
ياسمين : واخة (عرفاتو بلي مكانش كيضحك معاها لبارح دخلات لبيتها او لبسات عليها واحد السيفيطمة معا شورط حد لفخاض او خرجات عندو) نمشيو
اكسيل : (شاف شنو لبسات او دوا بشوية) من لاحسن تبدلي هاد لحوايج حيت التقييم الشمس ، خصوصا هاد لعام الحرارة مرتافعة ايتحرقو ليك يديك او رجليك تا لكساوي متقديش تلبسيهوم
ياسمين : (قنعها) انمشي نبدل
اكسيل : متلبسيش شي حاجة مزيرة غادي غا تصهدك شوفي ليك شي سروال واسع ولا صايا تاع التوب تبردك فهاد الصهد
ياسمين : واخة
ياسمين رجعات لبستها لبسات عليها واحد السروال واسع معا قميجة او خرجات عندو ، ركبو بجوجهوم فطونوبيل او مشاو لواحد لمحل تاع لحوايج عند اكسيل اوسط لمدينة دخلو ليه لاقيين لخدامة حلو لماحال
اكسيل : ها واحد السلام عليكم
دري : عمي اكسيل على سلامتك
اكسيل : الله اسلمك (دوا معا ياسمين) حيدي لكاسكيطة ديالك او جمعية شعرك بلبانضة لول
ياسمين : (دارت داكشي لي قال ليها) هاني
اكسيل : هادي ياسمين غتبدا معاكوم لخدمة من ليوم بغيتكوم تعلموها لبيع او شرا على حقو وطريقو ، بغيتها تهز لحرفة او تحفض لأتمنة تاع لحوايج (داها لجيهة واحد تريكويات) هادو تريكويات او سراول او شورطات تاع ربعمية فيهوم ليطاي نتي قابلي هاد الجيهة
ياسمين : (خلاها غا واقفة تما كتشوف او مشا هو ݣلس فلقنة)
دري : (شاف واحد السيدة عامرة داخلة لمحال متاجهة لجيهة تاع ياسمين بغا يمشي عندها سعا حبسو اكسيل)
اكسيل : ݣلس فين غادي
دري : هاديك راها واحد جلاخة تا لبنات لي هنا مكيتفاهموش معاها لعساك هادي لي جديدة
اكسيل : خليها بغيت نشوف شنو غدير
لمرا : (وقفات قدام ياسمين) شحال هاد تريكويات ؟
ياسمين : عشرين درهم
لمرا : او هاد سراول
ياسمين : سراول تريكويات او شورطات ربعمية
لمرا : (شيرات لواحد جيهة) تا هادوك لي لهيه ربعمية ؟
ياسمين : لا غا هادو لي فهاد الصف
لمرا : غا هاد لوان لي كاينين ؟
ياسمين : باقي اللون صفر او لبرومالين
لمرا : انقيس هاد رمادي
ياسمين : (حيدات ليها تريكو من لعلاقة ولكن ملي شافت لاطاي رداتو) انا غنشوف لاطاي ديالك هادي لإيل
لمرا : ماشي موشكيل واخة لL غنقيسو راهوم كيتيراو
ياسمين : كيتيراو ماشي كيتحلو ها XXL فرمادي قيسيها
لمرا : قلت ليك باغة نقيس هادا غتبقاي تشرطي عليا انا راه كنلبس ديما فطريكويات لL
ياسمين : (كتحاول تهدن راسها ) هاكي قيسيه ولكن الى شرݣتيه تخلصيه
لمرا : غتوريني صحتي (خدات منها تريكو او بقسوحية وجها دخلات قيسات تريكو او خرجات عندها طاوياه او راداه فميكتو) هاكي معجبنيش لونو مجاش معايا
ياسمين : بلاتي (شافتها بغات تمشي هي تحبسها حالة ديك لميكة او جابدة تريكو لاقياه تقطعات ليه لخياطة من الجنب) خلصي أبعدا تريكو لي قطعتي عاد سيري
لمرا : لي قطعت ؟ نخلص شي حاجة أصلن كانت مقطعة سيري شوفي فيمن تسبب سلعتكوم
ياسمين : (مكانتش كامية) شريفة بلاما نبقاو نعاطاو حطي ربعمية دريال او سيري بحالك باركة من جوع
لمرا : (مرضاتش او بدات كتغوت) كاين شي جيعانة قدك البرهوشة عاطاني نقيس تريكو مقطع باش تسبيه عليا
دري : (جا كيجري) لالة عيشة تهدني شوي
لمرا : واش مشتيش هادي بغات تسبي فيا تريكو مشرݣ
ياسمين : تريكو مشرݣ ؟ يا بنت لمشرݣة لوخرة معلمتكش بلي ماشي قياسك او ݣلستي عليا والو نقيسو تا شرݣتيه أدوي او باغة تلسقيها فسلعتنا
لمرا : (طرشاتها) جمعي فمك البرهوشة
ياسمين : (صافي شديها طرطق غا ضارت لمرا نقزات عليها شاداها من شعر مطيحاها) باغة تقيسي هيتورت لغزالة ونتي فيلة هاد لبزول تاع وحدة كتلبس لL
لمرا : (معا تبارك الله يديها كبار شدات ياسمين من شعر تا هي او بداو تتغني نتفك) ولاو لكروڤيطات اتهزو عنا
ياسمين : (دارت بحال النملة ولفيل الى مشات تا تقلبات فوقها تخنقها ولكن لي فيها معناها طلعات فوقها او ضرب منها ضربة فيها لوخرين كيفكو ولكن والو شوية هي تنزل عليها بواحد لعضة لحنك عاد هزها اكسيل من فوقها) طلقني اعمي اكسيل نعض لحنك لاخر ، والله ياونعاود نشوفك هنا افورمة فرس النهر تا نوريك لكروڤيطة شكتسوا
اكسيل : هداي ونتي نوضي الله ايعاونك
ياسمين : تا بربي متخرج تا تحط ربعمية
لمرا : (ولات باغة غا تمشي) ها ربعمية ديالك تفو على باشار
ياسمين : (لقطات من لأرض ديك ربعمية دريال لي لاحت عليها) ها فلوس تريكو
اكسيل : شهاد روينة فأول نهار تاع لخدمة جمعي هادشي لي طايح فلأرض ، علي نقص ليها خمسين درهم من فلوسها
ياسمين : خمسين درهم علاه شحال دايرلي فلخلاص أبعدا ؟
اكسيل : 50 درهم
ياسمين : (تبعاتو كتمسكن عليه) وشنو خليتي ليا اعمي اكسيل
اكسيل : غا بلى امسكين بغيتيني نرض ليك خلصتك ؟
ياسمين : واه
اكسيل : (دخل لداخل هز ليه واحد جوج كوربات او رجع عندها) خرجي ديري لفراشة برا او بيع ليا هاد لپيجامات تاع ستمية
ياسمين : ماشي حشومة عليك زعما راني مرات ولدك تعامل معانا شوي
اكسيل : بلى خمسين درهم بلى هم يحزنون دي هادو بيعيهوم او مترجعي عندي تا تكوني بعتي على لأقل نصهوم والا غتقلبي ليك فين تباتي هاد ليلة امرات ولدي
ياسمين : (ونا كنقول لمسموم تاع ولدك لمن شبه) هاني غادة نبيع هاد منعرف شنو
اكسيل : هادوك پيجامات قصار او سيفيطمات بشورط ستمية
#عند جود#
هادا نهار تاني ديالو هنا فرباط منين جا بقا غا فدار لي كرا ماعندو خاطر ايدير تا حاجة من دار لخدمة او من لخدمة لدار ، كيلقا غا كيفكر فيها شي مرات ݣاع كيدخل اتسركل عندها فلأنسطا او يشوف تصاور لي مصورة فطيليفونو ، سيد طايح عليه الضيم تقول هي لي طلقاتو ماشي لعكس ، يمكن بزاف كيقولو يمكن طلقها حيت مابغاتش تنعس معاه نعاس كامل ، ولا حيت مشات لمسابقة تا حاجة من هادشي هي لي خلاتو اطلقها واخة راه كيموت على جدها ، ولكن من لول هاد زواج تفرض عليه بواحد الطريقة مخلاتش ليه تا جهد ولا لخاطر باش اساعفها ، مزوج بيها ولكن كيحس براسو مقولب بحالا دارت بيه ، او تاني حاجة هي كتعرفو ملي كتكونو دايرين فبالكوم تصورات على شريك حياتكوم او لمواصفات لي بغيتها تكون فيه شنو غيكون احساسكوم الى لقيتو راسكوم باغيين شخص عكس هاد لمواصفات مزوج بشخص نتا عارفو بلي صعيب ولا من لمستحيل اتغير او يولي كيما بغيتيه نتا ، انك تعيش معا شخص كتحس براسك بلي معاكسين ماشي نفس طريقة التفكير ، طلاق مكانش شي حاجة ساهلة عليه بتاتا أنو اتطوع يمشي بلاصة صاحبو غا باش ابعد عليها غا باش ميضعافش قدامها بحال ديما ، لوقت لي كان فيه باه مريض لمسؤوليات كاملين طاحو عليه بين ليلة ونهار لقا راسو هاز مسؤولية مقادش عليها ، شي لي خلى تا لخاطر لي يساعفها فيه ميكونش عندو بتاتا
~~~~~~~~~~~~~
ياسمين او جود جوج أشخاص تكتب عليهوم اتجمعو فسن صغيرة ، بشخصياتهوم لمختالفة بزاف تاع التنائيات كيتزوجو صغار صغار لدرجة انو مكيكونوش قادين على مسؤولية الزواج ، ماشي ݣاع لأزواج صغار كيفتاقرو للحوار فعلاقتهوم بحال ياسمين او جود ولكن راه بزاف منهوم كيكون عندهوم نفس لموشكيل ، يمكن هادا راجع لتصور لي كيكون عندهوم على زواج كيقولو انفوا غنتزوج غنلقا شخص كيفهمني لماشاكيل مغيكونوش حيت حنا كنبغيو بعضياتنا ، *ديك الحياة الحلوة و الزواج احلى هههه* دوك لعوام لولة كل واحد باغي اشد لحزام لجيهتو الراجل كيقول مكاين غا طاعة الزوج او شا شا را را ، لبنت عاود با محكمش فيا لعساك راجلي غا غادي نتزوج مكاين غا لخريج الضروران لي مدرتو فدار با نديرو عند راجلي ، ونا لي ونا شراو تا كينساو بلي زواج كي كفوف لميزان قدما عطيتيني نعطيك باش تاشي كفة متميل ، معا لأسف لأزواج لي صغار ملي كيتزادحو معا هاد لمشاكل لبساط تا واحد فيهوم مكيبغي انزل كواريه حيت طيش صغر مامخليش ليهوم (طبعا ماشي كولشي) ، فهاد لحالة كيخصهوم لي يوعيهوم او يفهمهوم او يخلي لما يجري بيناتهوم باش اتقادو او ميفرتكوش زواج لي جامعهوم ، وألا حالهوم غيكونو كي بزاف تاع لبنيات صغار او دراري صغار طلقو قبل تا ميضور عليهوم لعام ، او ربي سبحانة ملي دار شروط تاع زواج محددش السن حيت لعمر كيبقا غا رقم ولكن شرط لعقل ، ياما ناس فاتو ربعين عام ولكن ماهوما من صحاب لعقل ولا صغر ، او شحال من وحدة تلقاها تا لكارط مدارتهاش ولكن قافزة او واعية او فاهمة ، معا لأسف بزاف كيقولو بلي زواج غا لياليه او صباح لمواليه ، ولكن زواج تلاتة لاحترام او صبر او المعاشرة الطيبة اما داك ليل فغا ملحة فوق طعام
~~~~~~~~~~~~~~~
خرجات ياسمين لبرا ساخطة على لوضعية فرشات لفراشة فلأرض او خوات لميكات تاع لپيجامات عليها كتسنا لي يقول ليها شحال ساعة لولة تانية تا عيات بشمس او مرضات
ياسمين : او مالو غيخلعني غا ضارو لي كاينة فلبلاد انمشي نبات عند مي ولكن تيليفوني عندو او تا من دار غيكون داك زمر تاع لواليد ، مال هاد بنادم غا كيدوز بلاما يشري لفقص
شافت تا عيات او طلعات على ديك لحجرة علاش كانت ݣالسة ، رضات لكاسكيطة اللور او جبدات واحد من دوك لݣندورات لقصار لي حد الركبة او بليدين نص كوم فيهوم سامپل لمخطط لمزوق ، او عاد توني بشورط ديالو كل حاجة هازاها فيد او بدات تبرح
ياسمين : لپيجامة ستمية ، توني وشورط ستمية تلاتين درهم العيالات تلاتين درهم البنيات ، الصهد او الصيف قتلتي راجلك بپيجامة طويلة او زيف دحياتي هاني جبت ليك ݣنضورة خفيفة وقصيرة ، يالاه مابقاش العيات مابقاش ستمية ماغلات على مسكين
لمرا : (يالاه بداو كيجيوها ناس) اشحال هادي البنت
ياسمين : لكولشي ستمية ويلا ديالي جوج بخمسين درهم يالاه يالاه مابقاش (ملي شافت لعيالات بداو كيتجمعو عليها كملات فتبراح ديالها) والي تايقة فراجل بلا كحل وبلا تعكار لفم ضربي عليه لقصير او حاولي على جيب يالاه مابقاش مابقاش
اكسيل : (كان واقف كيشوف فيها مبتاسم هز طيليفونو او دار ليها ڤيديو وهي كتبرح او كتبيع لناس)
ياسمين : (لقات راسها اوسط لعيالات هالي تبغي تشري او تخرم فلخر هالي تاخد او ترجع تزيد ، هالي كتسنا صرف لموهيم قاضية لغاراض او ماجات فين توصل ستة تا لقات راسها باعت تقريبا نص تاع سلعة جمعات فراشها او رجعات لحانوت)
#عند لغالية فلخدمة#
كانت فلبيرو ديالها كتراجع شي وراق تا وصلها ميساج من عند اكسيل ملي حلات لواتساپ لقاتو ڤيديو يالاه بغات تورك عليه لقات فؤاد واقف عليها
فؤاد : فلوقت تاع لخدمة نتمنا الطيليفون متستعملوه الا لضرورة
لغالية : (حطات طيليفونها بلاما تشوف لڤيديو)
فؤاد : رتبتي لإجتماع معا مدير فندق ****
لغالية : واه حجزة فمطعم لفندق طبلة لينا
فؤاد : نهز لفيسة ديالي او نمشيو كوتر بغيتك ترتبي ليا لملفات لي فلبيرو ديالي
كوتر : واخة مسيو فؤاد
لغالية : (تسناتو تا هو لفيسة ديالو او هزات هي طيليفونها وشي ملفات او تبعاتو لتحت لاقياه باغي يركب لقدام عرفاتو هو لي غيصوݣ)
فؤاد : ركبي نمشيو
لغالية : غا سير نتا فطونوبيلتك انا غنمشي فطونوبيلتي
فؤاد : ركبي واش غاديين لخدمة ولا غاديين نحوصو تا يدي كل واحد حديدتو
لغالية : (والو مالقات كي دير تجنب ركبة معاه هي تمشي تركب فلكوسان لور)
فؤاد : (دخل لطونوبيل شايف فيها من لمرايا) شيفور تاعك انا تا ركبالي اللور
لغالية : يا لور يا نمشي فطونوبيلتي
فؤاد : كتهديني ولا شنو
لغالية : حاشة تا نهددك انا كنعطيك غا لاختيار لي مناسب ليا وليك
فؤاد : (رجع شاف قدامو او كمل طريقو تا وصلو لداك لوطيل نزلو بجوج داخلين ليه ، لقاو لمدير تاع لفندق كيتسناهوم تما) سي ايوب
ايوب : (ايكون فربعينيات ديالو واقف او حداه سكريطيرة ديالو ضاربة لعكر او لميني ) مسيو فؤاد مرحبا بيك عندنا شرفتي لوطيل ديالنا نتا ولآنسة
لغالية : (مد ليها ايوب ليد تسلم عليه ، شافت فيه او دوات بهدوء معا ابتسامة خفيفة) سمحلي مكنسلمش
أيوب : (ملي شافها تحلات ليه ) ههههه تا نتي مابقاتش بو كورونا سلمي متخافيش
فؤاد : (شافو ماد ليها ليد عاود هو يمد يديه مسلم عليه) قالت ليك مكتسلمش
أيوب : (حس بلإحراج شوي) آه تتفضلو ݣلسو
لغالية : (ݣلسات حدا فؤاد مقابلة معا أيوب او سكريطيرة ديالو) هادو لملفات تاع شراكة ديالنا نتمنا طالعو عليها او تردو علينا إلى مكانتش شي حاجة واضحة
سكريطيرة : (خدات من عندها لملفات او حطاتهوم فجنب هازة راسها ففؤاد مركزة عليه شوفاتها او داوية بأنثوية) لاش الزربة نتغداو أبعدا مسيو أيوب طلب غدا خاص بيكوم نتمنا يعجبكوم
لغالية : (بقات غا كتشوف فيها وهي كدور جملة وحدة فبالها واش هادي معندهاش لوجه علاش تحشم ، كتقطر بزين ولكن مطيحة دل على راسها ، تحطات قدامهوم لماكلة نقبات فيها شوي او ستأذنات منهوم باش تمشي لحمام ، او غا بعدات عليهوم هزات طيليفونها مصونيا على اكسيل)
اكسيل : زين ديالي
لغالية : لعمر سمحلي قبيلة مقديتش نشوف داكشي لي سيفطي ليا كنت خدامة
اكسيل : ماشي موشكيل قربتي تخرجي
لغالية : والله معرفتش حنا دبا معا واحد لمودير تاع لوطيل خليتهوم كيتغداو او جيت ندوي معاك
اكسيل : علاش مݣلستيش تغداي معاهوم
لغالية : حاطين ليا بزقة فطبسيل ونا فيا لموت تاع الجوع ، شوف حياتي مكرهتش شي طاجين بلقوق او الجلبانة
اكسيل : غنقول لسيهام تقادو ليك
لغالية : لا مكرهتوش من يدياتك نتا تكون مرقتو معطرة او لحمو هشيش او ذايب او ريحة لفوق او جمبالة مطلوبة منو ، او فطبسيلة صغيرة كاين لحامض مصير او لحار مرقد
اكسيل : قربات تجيك هاديك تا كتشهاي عليا
لغالية : هههههه وقيلة صافي نعول عليك
اكسيل : طلبي الله نلقا لقوق عند شي خضار
لغالية : انا غنقطع دبا تا نجي كنحماق عليك بسلامة
اكسيل : بسلامة
لغالية : (رجعات عندهوم او هي ناشطة)
فؤاد بقاو كيناقشو مسألة الشراكة ديالهوم تا تافقو على كولشي عاد كل واحد فيهوم مشا بحالو ، لغالية ردها لطنوبيلتها ركباتها او رجعات لدار معا جوايه ديك تمنية
لحاجة : (ضربات فيها داخلة معا لباب) على سلامتك ملي تفكرتي دارك
اكسيل : لغالية رجعتي
لغالية : واه خالتي لباس عليك
اكسيل : فين تعطلتي منوالفاش ليك
لغالية : (مشات عنقاتو) عرفتي دبا عاد سالينا داك لاجتماع قاعي طاب بكترت لݣلاس او فيا لموت تاع الجوع
اكسيل : هههه طلعي بدلي عليك علاما نطلع ليك متاكلي
لغالية : واخة (طلعات لبيتها بدلات عليها بحوايج موريحين غسلات وجها او رجليها او توضات عاد خرجات من لحمام صلات او مشات ݣلسات فوق الناموسية تاخل عليها اكسيل بواحد لپلاطو فيه طجينة صغيرة او طبسيلة صغيرة فيها لحامض او لحار او لخبز او لما فجنب)
اكسيل : (حط ليها لپلاطو قدامها) هاكي كولي
لغالية : (حيدات لغطا على طاجين ضارباها ريحة الطاجين) الله على ريحة طيابك العفريت حسن من ديالي
اكسيل : (بفتخار) من طبيعة لحال
لغالية : ههههههه (دخلات فداك طاجين تا كرطاتو عاد هزات راسها عليه)
اكسيل : (مشا تا هبط لماعن او رجع ݣالس قدامها) كي دوزتي نهارك
لغالية : تسخسخت تاع لمعقول تا من رجليا ضروني دوك صحاب لأعمال شحال كيدويو ودنيا عياو ليا
اكسيل : مد يديه لواحد لكريم كانت فوق الناموسية او هز ليها رجليها لعندو)
لغالية : (شحال رتاحت ملي بدا كيدلك ليها رجليها وبدات غا كتعاود ليه على شنو دارت فنهارها بليديطاي تاع ليديطاي)
اكسيل : (كان كيسمع لشنو كتقول باهتمام مستمتع بهضرتها)
“يقولون أن أعمق درجات الهيام عندما يستمتع العاشق بالتفاصيل المملة لمعشوقته ، عندما يتمنى أن تتحدث له عن تفاصيل نبض قلبها طيلة فترة غيابه عنها ، فقط كي يطول الحديث بينهما “
لغالية : (بعدما سالا ليها تدلاك تاع رجليها تقلبات عاطياه راسها ادلكو) احقا مقلتيش ليا كي داز نهارك معا ياسمين ياكما دابزات ليك معا شي وحدة
اكسيل : غا وحدة وسكتي بنت خوك عينيها كبيرة مكدابزش معا جاية ديالها كتعلق فطايات لكبار (عاود ليها شنو وقع) ولكن منسالهاش علأقل خدات تمن تاع تريكو
لغالية : هههههههههه لعيشورية ديالي ولكن شكون قال ياسمين لي كانت كتشوف لمطايفة او تقلب طريق غتولي كتركش على ناس
اكسيل : شتي لڤيو لي سيفط ليك ديالها
لغالية : فكرتيني اندخل دابة نشوفو (مجات فين تكمل لڤيديو تا شداتها هستيرية تاع ضحك) هههههه واع امي كرشي ههههه على بنت شقالت الي تايقة فراجل بلا كحل وبلا تعكار لفم ضربي عليه لقصير او حاولي على جيب هههههههه حرام عليك أ إكسيل عندك هاد سلعة لي تهنيني من لپيجامة طويلة او زيف حياتي او مجبتيهاش ليا ههههههههه
اكسيل : آخر مكاين فتبراح
لغالية : فينها دبا ؟
اكسيل : غتكون منشورة فشي قنت ناعسة بتسخسيخ تاع ليوم او شمس
لغالية : (كتفكر لڤيديو او تفرشج بضحك) وليني ميقد عليك حد
اكسيل : نتفرجو فشي حاجة ؟
لغالية : واخة ختار نتا شنو بغيتي
اكسيل : (ناض تا ختار واحد لفيلم او رجع تكا حداها مخليها متكية على صدرو او كيتفرجو بجوج)
لغالية : كي جاتك لبطلة
اكسيل : تمتيلها زوين
لغالية : تمتيلها زوين ولكن كون كانت رقيقة شوي تجيها فضل
اكسيل : واه ولكن تا بهاكدا جا الدور مناسب ليها او زيد عليها لفيلم فاش متلات رقيقة مجاش معاها حسن ليها هاكدا
لغالية : (لقد وقعت في لفخ يا جورج) حسن ليها هاكدا ؟ مفخباريش بلي راه كتموت فلعامرات
اكسيل : (عرف بلي نكد باغي يبدا) انا كنموت عليك نتي او فرمتك
لغالية : ونا دبا رقيقة ولا غليضة
اكسيل : لا نتي هي هاديك كتحمقي بزين
لغالية : هي الى ضعافيت ولا زدت عمرت غنخياب
اكسيل : لا بلعكس نتي كيفما كنتي كتجي زوينة
لغالية : (رجعات تكات على صدرو) راك حافض
اكسيل : ههههههه (كملو تفراجهوم تا حس بيها ترخات عليه ملي طل عليها لقاها نعسات عرفها عيات بلخدمة داكشي علاش طفا تلفازة او غطاها مزيان مخليها متكيا على صدرو او نعس تا هو)
#عند مجد#
كان داير معا غزلان فواحد لقهوة معا تمنية بتخبية على باه جا لقاها كتسناه تما
مجد : ياكما تعطلت عليك
غزلان : ماثي بزاف {ماشي بزاف}
مجد : شنو بغي تشربي
غزلان : غا لما
مجد : غا لما علاش
غزلان : عندي مثابقة منهنا ثيمانة او حاصني نبعد على ثي حوايج {عندي مسابقة منهنا سيمانة او خاصني نبعد على شي حوايج}
مجد : بعد لمسابقة ديالك مكرهتش نحددو موعد معا عئيلتك نتعرفو عليهوم لواليد راه مصر الى متخطبناش منقدرش نخرجو
غزلان : عطيني وقث بعد لمثابقة غنحاول ندوي معا ماما فهاد لموضوع {عطيني وقت بعد لمسابقة غنحاول ندوي معا ماما فهاد لموضوع}
مجد : (شد ليها يديها بايسها ليها) نموت فيك
غزلان : مول اوثي {اوسي}
مجد : شنو بغيتي نجيب ليك فلكادو بعد لمسابقة ؟
غزلان : ثا نجح فيها أبعدا ونثوفو {تا نجح فيها أبعدا ونشوفو}
مجد : ماشي موهيم تنجحي ولا لا لموهيم هو انك درتي مجهودك شنو باغة
غزلان : مكرهتث نمثيو لواحد لبلاثة فنواحي تاع خريفنة ثميتها عين ربيع {مكرهتش نمشيو لواحد لبلاصة فواحي تاع خريفنة سميتها عين ربيع}
مجد : (طرطق بضحك) سميتها عيون مربيع ماشي عين ربيع ، او سميتها خنيفرة ماشي خريفنة هههههههه
غزلان : وثافي بلا ضحك ثديني {وصافي بلى ضحك}
مجد : نديك او بلفرحات عليا خاصني غا ندوي معا صباح او محسن او جود او ياسمين نجروهوم معانا باش لواليد اخلينا نمشيو بجوج
غزلان : واحة {واخة}
مجد : (بقاو عاطيينها لتجماعت او تعناب تا تعطل لحال عاد وصلها لحي فاش ساكنة عاد رجع هو لدار لاقي لحاجة باقة مفايقة) لحاجة
لحاجة : فين كنتي تال هاد لوقت ؟ معا ديك عوجة لسان
مجد : مي شهادشي كتقولي شمن عوجة لسان ولا زمر
لحاجة : او مالها ماشي عوجة لسان ياك تا سلام متقولهاش مسݣدة مسلمة ابعدة ؟
مجد : واهي من ناحية مسلمة مسلمة ولكن واش مسلمة نيت ولا نص نص منعرف
لحاجة : علاه كاين اوليدي لي مسلم نص نص
مجد : علاه نتي الحاجة ماشي نص نص ههههههه
لحاجة : الله امسخك اشيقدة
مجد : هههههه غا ضاحك تصبحي على خير
#بعد سيمانة#
وصل لويكاند بعد ديك السيمانة لي دازت على أبطالنا شي ملاهي معا لخدمة شي ملاهي معا تعناب او شي ملاهي معا ضران لݣلب ، صبحو مجموعين على طبلة وحدة كيفطرو تا من جود حيت السبت او لحد كان جا فهاد صباح او تا محسن كان كيفطر عندهوم
مجد : لواليد
اكسيل : شنو ؟
مجد : احن شحال هادي مامشيت لعيون مربيع او بغيت نمشي ليها الى كتاب
اكسيل : (شاف فيه مصغر عينيه) باغي تمشي ولا باغيين تمشيو
مجد : نمشيو انا جود محسن صباح ياسمين تا هي ياكو
جود : سير أخاي غا نتا انا ماغاديش خدام
مجد : ياك عند جدك لكونجي شمن خدام غتمشي
صباح : انا موحال نمشي خاصني نعاون لغالية فتوجاد تاع لعرس
لغالية : غا سيرو تخرجو شوي انا وباك غنتكلفو بتوجاد
اكسيل : ديو جوج طونوبيلات مجد يركب معا جود او غزلان تركب معا صباح ديوها معاكوم تسارا شوي
مجد : طونوبيلة محسن مريحة فلمشية غنركب فيها
اكسيل : اذن غزلان تركب معا ياسمين او جود اما باش تركب حداها ابدا في احلامك يروح بابا
مجد : ناري على مسموم تا نتا متبقاش معا لغالية الراس فراس كل واحد داي ليا مرتو ونا نبقا بلاش
اكسيل : هانتا قلتيها عيالاتهوم ملي تضرب عليها لكاغيط تلاسقو تا بلكولا مشغليش
مجد : تا اللهم لعمش ولا لعما نوضو جمعو عليا حوايجكوم
اكسيل : كملو فطوركوم أبعدا
جود : (ناض كولشي من فوق الطبلة إيلى هو حيت هوايجو أصلن كانو مجموعين ، سالا فطورو او طلع عند باه لي كان عيط عليه) لواليد
اكسيل : (كان واقف كيشوف فواحد ستيلو مزوق) سد لباب موراك
جود : (سد لباب او قرب عندو) نعام الواليد
اكسيل : شمشارك معا مرتك ؟
جود : والو
اكسيل : (شاف فيه بهدوء) والو او سيمانة هادي تا تسوال مكتسولش فيها
جود : لا كندويو فطيليفون
اكسيل : (غنزر فيه) كيدرتي لهاد لهضرة او طيليفونها مهرس سيمانة هادي ؟
جود : (ضرب طم عرف بلي لكدبة ديالو تفرشات)
اكسيل : شكنقول لجدك انا على لكدوب أدوي ؟ شمشارك معا مرتك تا مدايهاش معاك او مكتسولش فيها مخاصمين ؟
جود : لا مامخاصمينش
اكسيل : اوشنو ؟
جود : (دوا بتردد) انا ط.طلقت ياسمين ابا
اكسيل : (شنق عليه) عاود آش قلتي طلقتيها ؟ علاش بسلامة ؟
جود : لواليد غا بشوية غنشرح ليك كولشي نتا غا متعصبش راه مامزيانش ليك تعصاب
اكسيل : (طلقو او دار يديه على خصرو كيتسنط ليه) يالاه هادي هادي دوي علاش طلقتيها
جود : لواليد حنا مامفاهمينش هي كتشرق ونا كنغرب ديما مهازين على ابسط لأمور
اكسيل : واش باغي تسطي دين مي ولا كيفاش مكملتو حتى سبع شهور فزواجكوم او كتقول ليا مامفاهمينش ، ايمتا لحقتو دابزو او نوصلو لمشاكيل لي يخليوكوم طالقو غا قوليا ، واش عارف بلي زواج ماشي غا لعبة
جود : عارف الواليد داكشي علاش قبل منوصلو لشي مواصل خايبين حسن لينا كلا يشد طريقة
اكسيل : غنريب على جدك ديك طريق واش انا كنقول ليك زواج ماشي لعب راه طلاق آخر حاجة كيمشيو ليها لمزوجين فاش كيتسدو لبيبان قدمهام فاش مكيبقا للما ميجري بيناتهوم ، علاش تهدم دارك بيديك غا قول ليا شدارت ليك هاد لبنت بسلامة
جود : لواليد من لول هاد زواج كان بادي بلكدوب او لحاجة لي بادية بلكدوب مكتكملش ، ياسمين الواليد مغاديش تبدل بتاتا ضاربة دنيا بركلة آپار لݣارو او شراب ، راها مكتصليش الواليد منين تزوجتها عمرني شتها تا حطات راسها لارض ، موحال تا واش كتآمن بالله كنبغيها الواليد ولكن راه ميمكنش لينا نتجمعو
اكسيل : شوف فيا جوج ميحملوش لي خلقهوم واحد مو نصرانية او باه ايهودي ، وتاني رباه يهودي مسلم ، تاشي مسلم مينكر لي خلقو غالي مرض فعقلو تا سكايري ملي كيتݣرع شراب كيقول لحمد الله ، دير عقلك فراسك او رض مرتك عندك
جود : لواليد راه ياسمين مغتبدلش كون بانلي فيها غا شوي ضو كنت نبقا ولكن راها مكتغيرش دورت بلخاطر بلغوات والو لي فراسها فراسها او قاتلك دبا حقا بغات تولي عليا مغنية , قلت ليها متمشيش قلت ليها باغة تغني هاد الدار ولكن باش نمشي نتبعك من عرس لعرس نشد لغرامة لا ، او واخة هاكداك ضربات هضرتي معا لحيط او مشات
اكسيل : (صافي طلعات ليه لقردة لسطح تا غوت عليه) واش انا كنقول ليك دير لما مناش ايدوز او كتقولي صافي سالينا ، واش خاصني نهرس لجدك داك لوجه باش تشد معايا طريق سمعني غمقول ليك جوج حوايج راه تمشي تا طالق نتا وياها عمر جدك تحلم تعاود تزوج ، او غتهز عليا حوايجك او تخوي وتخليها هي هنا عندنا ماعنديش رجال لي كيطلقو عيالاتهوم على والو ، يا غادي ترض مرتك او تهنيني من صداعك ياغادي نتفاهم معاك
جود : دبا غا كندويو مالك معصب او زيدون واش راك با ولا باها باغي تجري على ولدك او تخلي عندك مرتو كي درتي ليها
اكسيل : غنخليها عندي او غنقلب ليها على شي راجل زوين ايديرها فعينيه نزوجها ليه او ݣلس نتا كي لكلب تموت وحداني
جود : (غوبش) شغتزوجها الواليد ياق
اكسيل : (تهدن شوي) شوف دوي معا مرتك او حاول تفهمها او تعرف لي ضارها ولي لا متكونش بحال باها او تحكم عليها من فعايلها ، راه لي خازنو لقلب معالم بيه غا الله ، فكر شوي فيها إلى طلقتيها فين غنمشي أدوي ترجع عند باها ؟ يقبل بيها مطلقة ؟ ولا عند مها لي مقالت عاد تهنيت على بنيتي او ضمنت ليها دارها ، راه زواج اولدي هو نتا تنازل او هي تنازل باش تعيشو بجوج ، ياسمين ماشي شي وحدة خايبة ولا مكتسمعش منهار تزوجتو عمرها شربات تا من حوايجها ولات كتلبس شوية طويل على قبل علاش اولدي مكتشوفش هاد لجوانب فيها ، علاش مكتشوفش بلي واخة كتغوت عليها تا قدام ناس دغيا كدوزها ليك تا فاش كتخاصمو او يسولخا شي حد مكتقولش ليه ، عارف بلي غلطات فاش ضحكات عليك نهار لول ولكن متنساش بلي راه يالاه عندها 16 رعام باقة باغة تلعب او دير زبايل او باقة باغة لي يدوز ليها هادشي ، دير عين كيكة على شي حوايج او دير راسك مسمعتيش شي حوايج ، ولي شفتيها دارت فيها لافوت غا بلغاطر ، غا من راسك شحال غوت عليك على لݣارو سلختك ݣاع محيدتيه تا رجع ليك عقلك ، متفرطش فمرتك بهاد لبساطة بحالا معشتو والو بجوج ، انا دبا دويت معاك ونتا تعرف شنو باغي باقي قدامك شخراين اونص يا تقادها يا تعميها
جود : غنشوف
اكسيل : سير وجد راسك باش تسافرو او حضي معاك ديك جرانة تبعد على لبنت
جود : كون هاني (خرج من عند باه او دخل لبيتو لاقي ياسمين لابسة سروال منير بحال كولون بلكحل معا سدرية كلحة تا هي)
ياسمين : (داز من حداها ودخل لبيت تبدال بدل عليه عاد خرج هاز ساكادو ديالو)
جود : هاد لبريزة لي غتدي ؟
ياسمين : واع
جود : ملي تسالي وهبطي باش نمشيو (هز ديك لبريزة صغيرة او خرج من لبيت)
ياسمين : (غوبشات ملي شافتو خرج بلاما يقول ليها والو على حوايجها ، بلعاني لبسات هاكدا مستنياه ايقولها بدليهوم ولا شي حاجة بحال هاكداك ، ولكن سيد ممسوقش لا ليها ولا للباسها ، هزات ماحد الريبيكا طويلة او تا يديها طوال او محتوحة من لقدام توبها خفيف بلون لبيض مزركش بألوان خرى ، طلقات شعرها او دارت نضاضر تاع شمس بعدما دارت ماسكارا او ݣلوز ، هزات طيليفونها او هبطات لتحت لاقياهوم كيتسناوها او تا من غزلان جات عندهوم)
مجد : يالاه ركبو الطونوبيل
اكسيل : (شاف مجد باغي يركب طونوبيلة محسن معا زغلان) طونوبيلة جود هي هاديك لي بلكحل كنفكرك لربما نسيتي
مجد : (غوبش) مانسيتش تفو على طونوبيلات لكحلات شوف طونوبيلة محسن بلقهوي على مزيناتها
جود : ركب ركب قبل منكحلها على خويا
مجد : (مشا ركب لور) ياسمين جي ركبي حدايا
ياسمين : واخ (مشات ركبات حداه اللور مخلية جود غا كيشوف او ساكت)
مجد : (شدو طريق لعيون مربيع ، هز طيليفونو صونا على غزلان تجمع معاها شوي عاد قطع)
ياسمين : شكادير لتعناب
مجد : الى متعنبتش على لحبيبة ديالي علامن خاصني نتعنب متلا ؟ على جود ؟
جود : شتي تا مشكوك فأمرك
مجد : هههههه طلق لينا شي مزيكا نشطو لجو
جود : هانتا ها طيليفون طلق شنو بغيتي
مجد : شنو باغة تسمعي ؟
ياسمين : (خدات من عندو طيليفون او دارت أغنية شيفورك احليمة)
مجد : (غا تطلقات لأغنية جهل هو وياسمين كيغنيو معاها او محيحين)
ياسمين : *مور لبيراج وقفو علينا جادرمية , ناري لبراج ودريات انا بقاو فيا ، سكر لهبيل والله مفايت جوج بيرات *
مجد&ياسمين : *شيفورك احليمة شيفورك احليمة وداو مول لاݣريمة ياو طاكسي مشارجية وعامرة بنات *
مجد : * طريق الناضور لپنو اطحن وطاسة الضور ، لكوسان اللور وساقي امد لباردات ، طاكسي اجري فلكونتور ميا شادين شكون الشيفور راشيد ولا وحدة فلبنات*
مجد&ياسمين : *شيفورك احليمة شيفورك احليمة وداو مول لاݣريمة ياو طاكسي مشارجية وعامرة بنات *
جود : (شاف لبوليس قدامو) وصحاب لحال
مجد : (يسحابلو كيغني معا لأغنية) هاديك هاديك *يا لݣلسة حلات وسطافيط جات هربو لبنات وحصلت انا معا لبنات …. صحاب لحال خلطو ولي وسكرة مشات*
جود : (بدا كيغوت) واحبسو عليا ديك لمسيقة راه صحاب لحال قدامنا
مجد : (مشافهوم تا وقفو قدامهوم) قفرناها
لبوليسي : عطيني لوراق تاع طونوبيل اشيفور
جود : هاهوما درت شي مخالفة ؟
لبوليسي : (ضرب طلة على ياسمين او مجد او دوا كيضحك) لالة حليمة مدارتش السمطة
جود : شمن سمطة ؟ (ملي ضار لقا دوك جوج تا واحد فيهم مداير السمطة غا سمعو شطيح نساو راسهوم) واش طواسلكوم محيدين عليا سمطة باش تشطحو جايب معايا شيخات
لبوليسي : نزلو نزلو (نزل جود او مجد لولين عاد تبعاتهوم ياسمين) عندك 14 الفريال تاع جوج سماطي
جود : (خنزر فيهوم عاد خلص لبوليسي لي رض ليه لوراق) شكرا
لبوليسي : (ناشط بدا كيغني لياسمين ملي شد فلوس لخطية) مور لباراج ، شيفورك آحليمة مول لاݣريمة خلص خطية السمطة
جود : (طول فيهوم الشوفة كاعي) حليمة ركبي لقدام ونتا ركب لور او دير السمطة يالاه
ياسمين او مجد مزادوش معاه لهضرة او كل واحد فيهوم ݣلس فجيهة او دار السمطة تا وصلو لعيون مربيع عاد بلاصاو طونوبيل او مشاو لفين كيتسناهوم محسن
محسن : تعطلتو أصاحبي
جود : واحد شيخات عندي هوما سباب
مجد : ايوا حاشاك ، ياكما تمرتي فمشية ؟
غزلان : لا
مجد : (شد ليها فيديها) يالاه نخليوكوم دبا نتلاقاو معا تلاتة باش نتغداو
جود : فين غادي بسلامة
مجد : غادي نتسارا معا غزلان ياكما باغي تلسقنا ها مرتك حداك ديها لشي قنة بسلامة
جود : (مالقا ميقول سيد جر صحبتو او مشا مخليهوم) ها زعتر عاود
محسن : خليه أصاحبي يمشي يتسارا شوي نخليوكوم دبا انمشيو نضورو شوي تا نتلاقاو
جود : (بقا غا هو وياسمين واقفين حدا طونوبيل) نطلعو لجيهة شلال ؟
ياسمين : واخ
جود : (شدو طلعة لجيهة فين كاين الشلال ولكن لقاوه قرب ينشف)
ياسمين : شد هاكدا صورني
جود : (شد من عندها طيليفون او بدا كيصور فيها )
ياسمين : (خدات من عندو طيليفون او بدات كتشوف فتصاور تا شافت جود زاد معا طريق تبعاتو فسكات لتلف او هي كتشوف فدوك لعشوشات لي كيبيعو لهدونات او موزون لموهيم مختصين فتقليدي لامازيغي)
جود : (مشا لجيهة لعشات لي كيتكراو ولي كانو على طرف لمجرا تاع لما كرا وحدة او دخل تكا فيها)
ياسمين : (مشات تا هي تكات ولكن بعيد عليه)
جود : (شاف فين ناعسة لقا بلي عاطية بضهرها لجيهة لي كيدوزو حداها ناس ديك ريبيكة قربات طاح تبين طغمتها داكشي علاش ناض تكا موراها مغطيها على الناس)
ياسمين : (حسات بيه فاش تكا حداها ولكن بقات شحال عاد زعمات او ضارت عندو لاقياه شابع نعاس طولات فيه الشوفة قبل كترجع تقلب تنعس تا هي)
مجد تسارا بغزلات عيون مربيع كاملة اوفينما كاينة شي قنت تصورو فيها ، ولي عجباتها كيشريها ليها من طبعو سخي يدو متقوبة ، او غزلان غا حالة فمها فلباشار قليل فاش كانت كتهبط لمغريب او غالبا مكتساراش كتبقا غا فدار تا كيوصل ليها وقت لمسابقة او كتمشي ، حسات براسها عيات داكشي علاش قالت لمجد امشيو اݣلسو معا جود ت ياسمين ، فطريقهوم تلاقاو معا صباح او محسن او كملو مجموعين لمشية تا وصلو لعند جود او ياسمين لاقينيهوم ناعسين او شي داخل فشي
مجد : (هز طيليفونو كيصور ڤيديو قبل ميغوت بجهد) لبوليس هزو يديكوم
ياسمين&جود : (فاقو مفزوعين بلخلعة هزو يديهوم لسما) مدرنا والو
صباح : (تزلعات عليهوم بضحك هي وغزلان) هههههههه
جود : (شير على مجد بوسادة) حيد عليا نتا وضحك لباسل ديالك
محسن : ݣلسو ݣلسو
صباح : مامشيتوش ضرتو شوي ؟
ياسمين : طلعنا تال جيهة داك شلال او هبطنا
مجد : معا قلالت التساقطات داك شلال قريب انشف فمرة
ياسمين : او تاعاش هاد لما لي كيجري هنا الى كان شلاش نشف
مجد : هاد لما تاع لعوينات لي مطرطقين هنا
محسن : طلبونا شي حاجة راه فيا الجوع
مجد : تا انا فيا لهيمري انمشي نشد شي طاجين (خرج من لعشة اومشا تا جاب الطاجين او لخبز عاد رجع عندهوم )
صباح : (بداو لماكلة) ملي نساليو لغدا نمشيو لأݣلمام نخيمو فيه ؟ باغة نعوم
مجد : تا هاداك نضار جبت معايا لخيمة ديالي انصبوها تما او ندوزو هاد السمانة فيه
جود : معلمتوناش نتقداو تاشي خضرة ولا لحم
صباح : هاديك ساهل حالها ارجع شي واحد فينا لخنيفرة اتقدا ويرجع
مجد : رجعي نتي ومحسن نيت تقداو لينا لخضرة او لحم او شي أتاي التوابل السقاطات لموهيم شي حاجة نقصيوها
محسن : ابتغي فينا لخدمة
مجد : ههههه بحال هاكداك
جود : غتمشيو ايوا نوضو يالاه انقادو امورنا قبل ميضلام لحال
ناض كاملين من فوق الطبلة خلصو داكشي لي كلاو او مشاو ركبو طونوبيلاتهوم ، محسن او صباح فوحدة او لماباقي فلوخرة ، جود قلب طريق لأݣلمام او محسن كمل لخنيفرة
ياسمين بعدما وصلو لأݣلمام نزلو كاملهوم اهزو لحوايج من غيرها هي لي بقات كتقاد فسيور تاع سبرديلتها ، مدات يديها لداك لمجر لي فطونوبيل جبدات منو لبكية تاع لݣارو او الريحة كانت حاطاهوم تمة على شمس او هي كتقلب على لبريكة ضربات فشي وراق خداتهوم تشوف شنو فيهوم او دغيا رجعاتهوم لبلاصتهوم واخدة ليها بريكتها او خرجات عندهوم ، هزات بريزتها او شي حوايج عاد مشاو كاملين
جود : (وصلو لواحد الجيهة هابطة او مضللة او فنفس لوقت مقابلة معا الضايا تاع اݣلمام ، قررو انصبو لخيمة تما ، جبد هو ومجد لقيطون معا لحديدات ديالو او بداو كيقادو فيه ، دور وجهو كيقلب بعينيه على ياسمين لقاها ݣلسات فوق واحد لحجرة كبيرة او حداها غزلان)
مجد : بانت ليا ياسمين مراشقاش ليه معجبهاش هنا ؟
جود : نتا مفيقها ديك لفيقة او باغيها ترشق ليها ، الى مفاقتش على ݣانتها كتعقدهوم نهار كامل
ياسمين : (طلعات فوق ديك لحجرة كتمنضر فضاية تاع لما لي مقابلة معاها ، مراشقاش ليها بتاتا هزات لبكية تاع لݣارو جبدات منها واحد دارتو فمها او شعلاتو كتكمي فيه)
غزلان : (ملي شافتها ݣالسة بوحدها جات ݣلسات حداها) مقلقة ؟
ياسمين : (نترات من لݣارو نترة طويلة قبل كتدوي وهية كتخرج دخان من فمها) لا
غزلان : ثحال فعمرك ؟ {شحال فعمرك}
ياسمين : 16 رعام
غزلان : ثطاعث رعام باكة ثغيرة انك ثكمي غيضرك فثحتك {سطاعش رعام باقة صغيرة انك تكمي غيضرك فصحتك}
ياسمين : لباشار كيضرو فالصحة كتر
غزلان : ههههه جوذ من ثباح او هو كيثوف فيك ممركذش مزيان {جود من صباح او هو كيشوف فيك ممركزش مزيان}
ياسمين : خليه ايشوف
غزلان : ههههه علاكتكوم فثكل {علاقتكوم فشكل}
ياسمين : من آشمن ناحية
غزلان : معرفتث مرا كتبانو ليا كي زيث او لما مرة كتبانو ليا منثاجمين {معرفتش مرا كتبانو ليا كي زيت او لما مرة كتبانو ليا منساجمين}
ياسمين : (شافت فيها او ردات وجها كتمكي ݣارو آخر)
غزلان : (بان ليها محسن او صباح جايين او هازين معاهوم تقل) انا انمثي نعاونهوم {انمشي نعاونهوم}
ياسمين : (مشات غزلان مخلياها بوحدها كتكمي تا ضلام عليها لحال عاد هبطات عندهوم لاقياهوم بناو لقيطون او فرشوه او نصبو لعشا)
مجد : جيتي هاكي باسطة ديالك
ياسمين : (خداتها من عندو او ݣلسات حدا محسن متكيا ليه على كتفو)
محسن : مريضة ؟
ياسمين : لا فيا غا نعاس
محسن : تعشاي او نعسي ديك الساعة
ياسمين : شاد ليكوم الريزو ولا غا انا لاش مشادش
جود : الريزو هنا ضعيفك قليل فين كيشد
مجد : علاما يطيب لعشا خلينا نلعبو شي حاجة
صباح : شنو نلعبو
مجد : بما انا حنا لي طيبنا اذن انا غنسول كلا وحدة فيكوم شنو كتعرف على ىدراجلها او معا كل سؤال خاطأ غتحط مولاتو 50 درهم
صباح : تمنيت شي نهار تلعب بلى فلوس اخويا تموت فريال
مجد : نموت فريال اوفغزلان
محسن : (زدحو لضهر) باركة من لعنب
مجد : يالاه نبداو على بركة الله بيك نيت الخوادرية عطيني سميت لبنت لي كان كيݣلس حداها محسن فراوض
محسن : شهاد لأسئلة اصحبي انا ومعارفش سميتها
مجد : جاوبي ولا حطي خمسين درهم
صباح : (حطات خمسين درهم) بربي ما بلان
مجد : هنينا غيزلان دبا شنو
محسن : باغي تسهل على صحبتك خلينا انا نسولها ، شنو كانت سميت لبنت لي كان طايح فيها مجد فلإعدادي بضبط تامنة
مجد : على أسئلة أصاحبي
غزلان : كنثي كثبغي ثي وحدة فثامنة ؟ {كنتي كتبغي شي وحدة فتامنة ؟}
مجد : (وحلات ليه) هههههه الله يهديك شمن بغو عقل صغر ها خمسين درهم انا انحطها دوزو لينا لياسمين قبل منصدقو مشادين ، ياسمين عطيني سميت لبنت لي كان كلى جود سلخة من خوها بلغلط
جود : (عقدهوم فيه) باش غتعرفها هي ..
ياسمين : ربيعة
مجد : (شاف فخوه) عاودتي ليها على ربيعة المرض ؟
جود : سول او هنينا
مجد : صباح عطيني نهار او التاريخ فاش تلاقيتي معا محسن
صباح : واحد شهر 12 2021
جود : (لاح عليها لوسادة لوجه) من 2021 او نتوما معارفين اولاد جد
محسن : مضربش أصاحبي
جود : (ضربو بلوسادة) بديتي تهز عليا البجغوط
محسن : نتيا خوك هادا اضربك او يعاود عادي ، غزلان قولينا سمن تاريخ فاش تلاقيتو نتوما
غزلان : معقلتث {معقلتش}
مجد : الغدر بدا (حط 50 درهم خرى) انتفاهمو على هاد تاريخ من بعد ، ونتي اياسمين قولي تاريخ ولا كحبي لفلوس
ياسمين : 4 شهر جوج 2018
جود : (تخنق بداك لما لي كان كيشرب) كح كح كح 2018 كي درتي ليها شهر تسعة 2021 شنقزك ل2018
مجد : حطي 50 درهم امرات خويا حطي
ياسمين : (طولات الشوفة فجود قبل متحط خمسين)
مجد : (بقا عليهوم بلأسئلة تا جمع لحصيصة من صباح او غزلان اما ياسمين فكانت حطات مرة وحدة صافي) وليني اياسمين مطلعتيش ساهلة عارفة عليه كولشي ماشي بحال شي ناس 6 شهور اناس ونا معاها فلخر نلقاها معارفاش تا عمري
غزلان : (دارت ليه الضحكة الصفرة) لعمر غا ارقام
محسن : ونتا مسلك شوي جي لهادي لي مزوجة بيا او معارفاش تا كنيتي
صباح : عارفاها قالها ديك نهار لعدول ولكن انا نسيت
جود : (حط لعشا) زيدو تاكلو
ياسمين : (كانت ݣالسة حدا غزال كتاكل تا غمسات هي وياها فلحارة وناضو كيزغرتو وكيقلبو على لما) شهاد زمر لاش دايرين فلفلة حارة يسحابلي واش لحلوة
صباح : هاكي لما شربي مكتقدوش على لحار بتاتا (بعدما كملو لعشا هبطات هي وغزلان او محسن او مجد اغسلو لماعن)
ياسمين : (بقات غا هي وجود فلقيطون حدها شافتو بغا يدوي معاها تكات عاطياه بضهر اونعسات)
جود : (كان باغي يدوي معاها ماحدهوم غا بجوج ولكن ملي لقاها عطاتو بضهر او نعسات خلاها تال مرة خرى)
محسن : (رجعو لخيمة لاقيين ياسمين ناعسة او ݣالس) باقي منعستي
جود : باقي
محسن : (مشا تكا حدا صباح لي غا وصلات تكات حيت عيات) ايوا نعس هه
مجد : شكادير آشريف
محسن : باغي نعس
مجد : عرفتك باغي تنعس قلت ليك باغي تشطح نوض تنشر فشي قنت خرا ياق ناعس حداها
محسن : (عنقها بلعاني باش افقصة) مرتي تسالني شي حاجة
جود : (عقدهوم او شحطو ليد) حيد يديك عليها ، بزعطة الى مرتك ولكن والله لا نعستي حداها نوض تݣعد
محسن : على ضدك لا
جود : واخة مجد
مجد : (مشا عاونو هزو جود من يديه او هزو هوا من رجليه تا نعسوه فلقنة عاد فيقو صباح لي كانت خامرة باش تمشي تݣحاز حدا لبنات او نعسو هوما فجيهة لوخرة مكاليين محسن )
ياسمين : (لي مكانت ناعسة بتاتا نعسات فلقنة عاطية بوجها لقيطون ، بقات مودة متكية تا حسات بلي كولشي نعس عاد ناضت خرجات بلحس بقات كتمشا مخلية لبرد اضربها تا شدها شي حد من يديها)
جود : فين خارجة (مكانش ناعس تا هو تعجب ملي بانت ليه خارجة فهاد نصاصة تاع الليل خاف ليشدها شي حد داكشي علاش تبعها)
ياسمين : (خلعها) طلقني لاش تابعني
جود : (حلف ميطلقها) قلت ليك فين غادة
ياسمين : غادة نبول غادة نخرى خاصني نتشاور معاك تا فهادو طلقني دبا نمشي راني مزيرة
جود : غنمشي معاك
ياسمين : معندك فين تمشي معايا
جود : واقلة يسحابلة راك فدارك ، شوفي هاد لخلى ولغابة سكايرية عطاهوم الله اوسيري نتي حيدي ليهوم سروال تما
ياسمين : ماتليتش غادة انا ݣاع غا طلقني
جود : (شعل لپيل تاع طيليفونو باش ايشوف طريق حيت لحجر بزاف ، ملي ضرب ضو فوجها قشع بلي عينيها حمرين باين بلي كانت كتبكي) علاش كنتي كتبكي ؟
ياسمين : ماشي شغلك نبكي ولا نݣلس مابقيتيش راجلي باش تبقا دخل فيا
جود : (زيرها معاه) باقي مطالقناش رسميا داكشي علاش راك باقة محسوبة عليا
ياسمين : محسوبة ولا مقسومة ماشي شغلي عطيني شبر تاع تيساع
جود : ياسمين خاصنا ندويو
ياسمين : ماعندنا فاش ندويو
جود : خلينا ندويو اياسمين خلينا نلقاو شي حل لراسنا
ياسمين : لحل راك لقيتيه اننا نطالقو هو احسن حاجة قررتي ، راني سميت ليك على وراق طلاق الدار او 250 مليون علاش تافقنا فحالة باغي طلق انا كنتنازل ليك عليك مباغة منك والو غا نسالي هاد زواج
جود : (باستسلام) عارف راسي غلط او تسرعت فاش قلت ليك نطالقو ولكن انا أنا مقادش نبعد عليك
ياسمين : مقادش تبعد عليا او فنفس مقادش تكون معايا شهاد تناقض فيك اجود
جود : عارف راسي متناقض ولكن عارف بلي منقدش نعيش بلى بيك (زاد قرب عندها دوي ببحة رجولية او هادية) كنبغيك اياسمين خلينا نبداو من جديد بلى كدوب
ياسمين : (شحاجة تحركات لداخل ديالها ملي سمعات هضرتو ، ولكن ديك لحاجة ضراتها فقلبها ، بدا كيقرب منها تا كان غيدمج شفايفهوم هي ضور وجها عليها) مكاينش لاش نبداو من جديد حيت نهاية وصلات
جود : (بعدات عليه او مشات وقفات عاطياه بضهر مخلياه غا كيشوف فيها)
ياسمين : (وقفات بعيدة عليه مغمضة عينيها بألم) ” شي مرات كنكونو باغين نسمعو شي حاجة فديك لحضة او فداك لوقت ، ولكن ملي كتقال ليك ديك لحاجة من بعد مكتبقاش تأتر فيك كيما داك لوقت فاش حتاجيتيها ، كلمة *كنبغيك* تسنيتها لمدة ربع سنين على قدها نسيت ايقولها ليا كيما قالها دبا ولكن ماشي فهاد لوقت لي واقفين فيه على طلاق ، يمكن كون قالها قبل شهر هادي كنت غنطير بلفرحة او منحسش بهاد لألم فقلبي كيما دبا ، ملي شفت لوراق تاع طلاق فلمجر عرفت بلي صافي سالينا”
جود : (حس بلبر تحرك شوي داكشي علاش حيد لفيسة ديالو او دارها ليها على كتافها)
ياسمين : (جبدات واحد لݣارو كتكمي فيه او دوات بهدوء) قلتي بغيتينا نبداو من جديد ؟ قول ليا شنو لون لي كيعجبني شكون لحاجة لي مكنحملش او شنو لماكلة لي كتعجبني ، شنو لحاجة لي كنخاف منها ؟ ههههههه نبداو من جديد باغيني نبدا معاك من جديد ونتا تا أبسط لمعلومات عليا مكتعرفهومش ، 4 شهر جوج 2018 هاد تاريخ مفكرك بتا حاجة ؟
جود : شنو وقع فهاد تاريخ تا لاسقة فيها عمرنا تلاقينا قبل منلاقاو فديك لقهوة ؟
ياسمين : 4 شهر جوج 2018 كنتي فسبيطار *** تاع كازا لقيتي بنت صغيرة كانت باغة تنت”احر او عتقتيها ، بعد ربعسين كاملة بغيت نقول ليك ملي تشوف شي حد باغي ينهي حياتو متمنعوش حيت بكل بساطة شي مرات موت لواحد حسن ليه من لعيشة لي عايش ، “علأقل كون معتقتينيش مكنتش غنولي كيما انا دبا” (قالت جملتها لأخيرة بينها او بين راسها)
جود : (ردات ليه لفيسة ديالو او دخلات لداخل تنعس مخلياه كيحاول استرجع الذكريات باش فكراتو ، بقا شحال كيحاول اتفكر هو لعشا تاع لبارح نساه ، بقا شحال عاد حضرات ليه صورت ديك لبنت صغيرة لي شافها فسبيطار قاطعة شعرها او باغة تخشي فراسها لموس ، حس بدنيا ضارت بيه كانت هاكيد ياسمين) ونا كنقول علاش سنسلة لي فعنقها فايت دازت قدامي
حس براسو ضرو هو يمشي ينعس تا هو
#عند لغالية#
لغالية لي قالت هاد سيمانة فاش صدرات دراري اتبقا هي واكسيل راس فراس واخة كتكون خدامة بنهار ولكن ماشي موشكيل تا لقات لحاجة او بنتها جايين معا نبوري حقا مات حقا ايعاونو فتوجاد تاع لعرس دصباح
لغالية : (كانت لابسة شوميز دنوي مشبكة او غا كتسارا فلبيت معصبة خصرو عليها نهارها)
اكسيل : (لي خرج من لحمام ضارب فلغالية بداك لباس مفهم والو ، مشا عنقها من لور شاحطها فطغمتها) شهاد الزين على صباح أدوي المسخوطة
لغالية : هاد الساعة لمسخوطة هي مك لي جاية معا نبوري تقول مطري عليها لحاج او صفية هي معندها راجل انا بعدا عمرني سافرت او خليتك
اكسيل : جات لحاجة او صفية ؟
لغالية : واه جاو قالك باش ايعاونو فتوجاد تاع لعرس دصباح سمعتهوم كيدويو معا سيهام
اكسيل : ايوا دبا نتي علاش مقلقة
لغالية : ونا لي قلت زعما صدرنا دراري او ليوم لحد مخداماش نديرو شي طرح على صباح سعا زهر مكوز
اكسيل : هههههههه شحاف عليك معا سبعة تاع صباح باغة تلعبي ماتش ، الى معدالش لينا دبا خلي تال ليل
لغالية : مور لعرس تاع صباح انمشي انا وياك شي سبت او حد ليشي قنة غا انا ونتا
اكسيل : على حسابك
لغالية : شوف شوف سي اكسيل طمعتيلي فديك جوج دريال ديالي
اكسيل : هههههه زعما ماتكونيش بحال دوك لعيالات لي كيشدو مانضتهوم او يقولو لرجالاتهوم هاك ازماني نتا مول دار صرف بيهوم
لغالية : ايوا طر على مول دار لي يصرف بفلوس مرتو مازال تعاونو عادي ولكن باش هي تصرف لا ، (قربات عندو) اونزيدك فلوسي دياولي او فلوسك دياولي عندك شي مانيع
اكسيل : (باسها من فمها كيضحك) نموت او ميكونش عندي مانع
لغالية : ايوا هاكداك ازين انا انمشي نبدل عليا حوايجي باش نزل عندهوم
اكسيل : انا غنمشي لمحال عندي شي خدمة صافي
لغالية : الله ايعاونك (خلاتو مشا هو او دخلات لبسات عليها كسوة قصيرة او قادات شعرها وحالتها ونزلات عندهوم) سلام عليكم
لحاجة : كوني تحشمي شهادشي لابسة
لغالية : والله يالحاجة تا غا ليوم لحد او دراري مسافرين قال ليا ولدك لبسي ليا شي حاجة قصيرة تا ملي لقاكوم جيتو بلى عليم او خرج لخدمة مسكين ، آه عنداكو تقلقو حيت قلت ليكوم جيتو بلى عليم راه ضار ضاركوم متحتاجوش لي يعرض عليكوم
لحاجة : نوضي عمرينا شي كاس داتاي نوضي
لغالية : سيهام وا سيهام
سيهام : نعام الالة
لغالية : عمري لحاجة او صفية شي براد داتاي انا يالاه سبغت ضفراني مابغيتهومش اخسرو ليا
سيهام : واخة الالة
لغالية : نخليكوم دبا غنخرج عندي شي غراض نقضيه بسلامة (طلعات لبيتها مخلياهوم كيتفقصو ، مسحات سباغة لي فيديها او لبسات كسوتها او دارت شالها وخرجات ، ركبات طونوبيلتها وصونات على واحد النمرة) الو شيماء
شيماء : الو لغالية وصلتي ولا باقي ؟
لغالية : نبلاصي غي طونوبيل (بلاصات طونوبيلتها او خرجات منها لاقية شيماء كتسناها قدام واحد لمحال تاع لحوايج) تعطلت عليك
شيماء : (سلمات عليها من لوجه) لا تا انا عاد وصلني علاء
لغالية : هاحنا عاود على شيماء كيوصلها لخاطيب
شيماء : (هزات ليها يديها لي فيها لخاتم تاع لمارياج) راجلي أختي بشرع والقانون
لغالية : كنسا بلي راك ضربتي لاكط شهر لي فات ، ايمتى لعرس
شيماء : غنديرو غا الصدقة لعرس مغنديروهش
لغالية : (دخلو لمحل كيشوفو فلحوايج او كيدويو) مابغاتش خالتي رقية دير ليك لعرس ولا ؟
شيماء : بلعكس خالتي رقية كانت باغة دير لعرس ولكن انا وعلاء مابغيناش لعرس بغينا نسافرو
لغالية : حسن ليك ، خالتي رقية مزيانة معاك ؟
شيماء : طريقة باش تعاملات معايا انا وعئيلتي ياختي دخلني شك فيها كنقول هاهي غتسيف هاهي غتقلب ولكن لحد لآن مزيانة ، تخايلي معايا سيمانة لي فاتت جابت لخوتي لألعاب او مي عمراتها توابات
لغالية : اكسيل قال ليا بلي تزوج عمي عازيز خالتي رقية كانت عئيلتهوم مافحالهاش بزاف كتر من عئيلة آيت اوسو فداك لوقت ، ايوا لحاجة كانت جامعة فبنت لخليفة لولدها ملي لقاتو لسق فرقية معجبهاش لحال او رضات عليها شقا كامل او باش تكمل لبهية تا عمي يحيى تزوج ختها ، تما دارت عليهوم رجل تاع لمعقول هوما يسݣيو لما هوما يعلفو لبهايم او لالة صفية متحني مدني ، لحاج كان ديما كيغوت عليها او معا كان هو ولادو كيسافرو بزاف راك عارفة شغل لخماسة فينما يلقاو مساكن طرف تاع لخبز يمشيو ، ولي زاد خلى يزة تعلي خنافرها ملي ولاو عندهوم لبلادات او باين رقية او رابحة هوما لي كيسرفو عليه من شي دهب الى باعوه ، عيات معا ولادها ايجيبو عليهوم ضرة تا عيات بلأخص أنو ولدو هاداك مابقاهوم تما عاد ميكات عليهوم ، او صارحة تقال رقية او رابحة مادارو فيا لخير ماقاسوني بشر داخلين سوقهوم ، رقية كانت باغة غا تزوج ولدها مكانش هامها شكون تكون مرتو نعقل واحد لعام ناضت شافت واحد طحبة حطات عليه لعين هي تقول لولدها الى عجباتك نخطبها ليك ، او علاء كيقول الله انجيني وهي كتقول ليه غا شوف اوكان هههههههه نتي غي تهلاي فرقية او عزيز تي واخة علاء ابغي يسوسك احيدوه من لحالة لمدنية او يديروك بلاصتو
لغالية : شنو باغة تشري بضبط ؟
شيماء : معرفتش شنو كتشرب لبنت ملي كتزوج ؟
لغالية : عندك لپيجامات لعصري تقليدي حوايج دخلانيين برانيين كولشي تقريبا
شيماء : دبا كاين علاء جابت ليا بزاف تاع تواب اوتا شي حوايج قلت نشوف شي خياط ايدير ليا شي جلالب او قفاطن قفازيين
لغالية : صافي نتقداو داكشي لي خاصنا او ندوزو لخياط لي موالفة كنخيط عندو ، باش نبداو لپيجامات ؟
شيماء : خاصني نشري شي پيجامة طويلة ؟
لغالية : غتسكني بوحدك ؟
شيماء : واه
لغالية : إذن اتشري لپيجامات صحابات لكولون ، او نص كوم او تاع لبرد او لپينوارات ، اما لپيجامات طوال اتشري ليك واحد تلاتة غايلى جا شي حد عندكوم ، حيت منضنش علاء اخليك تلبسي قدامهوم شي حاجة مزيرة ولا قصيرة
شيماء : راه شيبني من دابا قالك حقا ديري زيف
لغالية : ماتخليهش افرض عليك لا زيف لا نقاب ، زيف الى بغيتي ديريه خاصكي ديريه عن قناعة فلأخير راك كديريه لوجه الله ماشي للخلق ، طاعة الزوج واجبة على أمرا ولكن لامور الدينية الى مدارتش عن طيب خاطر او بنية مكيتخادش عليها لاجر ، ولكن هادشي مكيعنيش انك متفكريش فلحجاب عطي لراس كوقت او قنعي راسك براسك على خاطرك ، قيسي هاد لكسوة
شيماء : ولكن راها قصيرة بزاف عاود
لغالية : واش نتي لكساوي الى متلبسوش برا ميتلبسوش فدات ؟ تي كحلي وديري لعكر او سوكي وطلقي شعر ، وضحكي وعري على دوك السيݣان آلي تايقة فراجل
شيماء : (كانت كتهز فلحوايج لي عجبوها) لبارح سمعت وحدة كتعاود ملي تزوجات باش ميشوفش راجل جيهة خرى مخلات مشرات ، بقات عليه كل مرة ها حوايج لأرنبات او داكشي ها حوايج لممرضات ، ها لمشبك ها لمشرݣ فلخر خانها معا واحد لمجرتلة قالك حقا جاتو مجهدة عليه
لغالية : هههههه تا نتي شمايت داكشي باش كيبررو لبسات ليه لپيجامات او خانها لا هي لي فرطات ݣلسات عليه فلعرا او خانها هي لي فرطات ، غا هو لوحدة خاصها تاكل او تقيس مرة مرة تصدمو بشي پياسة معيقو بزاف مرا عادي حفات ݣاع بغا يبدل لجو عصبي لحامض او زيف حياتي او سيري عندو
شيماء : هههههههههه ضحكتيني زيدي نخلصو هادشي باش نمشيو ناكلو شي حاجة راه فيا لموت تاع جوع راني مفاطراش
لغالية : تا انا مفطرتش حرماتها عليا لحاجة او بنتها ايما كنت نفطر واحد لفطور علامزيناتو
شيماء : يالاه اوكان مشاو ؟ عاودو رجعو ؟
لغالية : قالك الالة بغاو اوجدو لعرس صباح
شيماء : ايوا شبغيتي اهنيوك من صداع رضي عليهوم كولشي
لغالية : هي لي متكونش ليهوم عرس خويا صغير انا لي نختار ولا هو ولا مرتو اما لحاجة والله لا ختارات فيه شي حاجة غا صبري وتشوفي
شيماء : زيدي زيدي ميقد عليك حد
لغالية : (مشات شدات ليها واحد الطبلة هي وشيماء فواحد لقهوة طلبو شنو بغاو لفطور)
شيماء : (صونا عليها علاء) الو
علاء : مشيتي تشري لحوايج
شيماء : واه راني معا لغالية تقدينا شي حوايج او بقاو شي حاويج نفطرو او نمشيو نكملوهوم
علاء : ولكن لبنكة مسيفطاتش ليا بلي خرجتي شي فلوس ؟
شيماء : لا راني هزيت من عندي
علاء : (عقدهوم) وعلاش بسلامة لاش عاطيك انا لاكارط
شيماء : وراني قلت ليك مامحتاجاهاش باقين عندي لفلوس
علاء : ونا قلت ليك لحوايج تاع لعرس اتشراو بفلوس لاكارط ماشي من فلوسك اولا
شيماء : دبا نتا مالك كتغوت راه عادي
علاء : معاديش انا غنقطع دبا عندي شي خدمة من بعد أو ندويو
شيماء : مال هادا والله تا قطع ، قالك علاش متشريش من لاكارط لي عطيتك وشوفي ليك نتي لهادا
لغالية : ونتي عطاك لاكارط شري منها اش خسرتي
شيماء : وقلت نحاول على سيد غا راس شهر عطاني مكاينش لاش نزيد تا حساب لحوايج يالاه شرا الضار كيفرشها
لغالية : جيتي ابنيتي تال بلاد فليو او قلتي ضربني لبرد ، واش ناقصين لفلوس تا تحاولي عليه هادك راه لحفيد لول تاع آيت اوسو نفسهوم هنا عندهوم لي ميشري لمرتو كولشي ميتحسبش من رجال ، راني كنت بحالك الى تفتفت شي حاجة حنشري بيها مكنبغيش نطلب لإكسيل زعما بلاما نتقل عليه ، نهار ساقلي لخبار شارية على مزيتي پيجامة ليا بفلوسي شرݣها وحرݣلي ديك 30 الف ريال لي كنت جامعة ههههههه وقال ليا شوفي دبا مناش تشريهوم لراسك هههههه تا وليت لحزقة لي خاصاني نقول ليه شريها ليا عاد كتحسي بيه رتاح لداخل ديالو ، تا لحاج نفس شي شيخك او خوه نفس شي او تا ولادهوم هاكداك ، راك كتشوفي غا مجد كيبان ليك من نوع لي تصرف عليه لمرا ايوا قولي لغيزلان ياك غا صحبتو تحط شي ريال من جيبها
شيماء : ياولفلوس لي كيعطيني شندير بيهوم نخليهوم تا نخرج بيهوم زكا
لغالية : هههههههه صدقي ياختي ديري لخير أو كتريه عمري لخوتك لكتاف اوديري ليهوم علاش ارجعو وديري تال راسك شري ضيور حلي قهوة ماحال شكون قالك خليهوم عندك لموهيم نتي قالك حوايجك اتشراو بفلوسو شريهوم بفلوسو شبغيتي شي صداع
يتبع
التعليقات 0