بعد ديك ليل لمشكوضرة لي كل واحد او كفاش دازت عليه فاق اكسيل بكري لاقي لغالية لابسة حوايجها دلخريج
اكسيل : فين غادة
لغالية : غادة لخدمة
اكسيل : (عقدهوم) شمن خدمة بسلامة ياك شادة كونجي ياك اصلا قلت ليك قدمي استقالتك
لغالية : فكرت فيها مزيان علاش اتقدم استقالتي بسلامة عطا الله لمناصب لي فشركة تتحول لشي واحد فيهم او واخة نبقى تا فخدمتي راه تحل سوء تفاهم لي كان
اكسيل : (صغر فيها عينيه) لغالية مالك وليتي هاكدا ؟
لغالية : كفاش وليت ؟ مبقيتش باغة نݣلس فدار غتمشي تقابل بنتك جديدة أو تبغي تعوضها على دوك سنين لي مكنتيش حداها ونبقا بوحدي انا فدار ؟ لا ابدا
اكسيل : علاما نحلو هاد زمر شوفيليك شي قنة خرى لمزهيم متخالطيش معا داك زمر تايلى تخالطو خلي حدود بيناتكوم
لغالية : بسلامة
اكسيل مدايش عليها عارفها بلي باقة مستوعبات هو براسو باقي مستوعب شواقع
~~~~~~~~~~~
دراري كانو ناعسين فطونوبيل ملي ضرباتهوم لفيقة لقاو بلي مجد او طونوبيلتو مكاينينش
إيهاب : فين غيكون مشا ؟
جود : غيكون مشا عندهوم لدار حيت راها خرجات من سبيطار
مجد : (بعدما ضرباتو لفيقة فلبلاصة ديمارة طونوبيل او مشا لديك دار فاش ساكنة مو ، بلاصة قدامها او نزل معصب كيدق فلباب او يغوت) وا حلي اسناء
سناء : (كانت ݣالسة فبيتها تا سمعات لغوات قشعاتو بلي مجد داكشي علاش خرجات عندو بزربة) ولدي يهديك الله شكادير دخل ندويو لداخل بلى شوهة
مجد : (غا كيغوت) ما ولدكش او شتي غا شوهة لي غتكون عيطو لشوف طيڤي احضرو لفضيحتنا
لحاجة : (جات كتجري) شواقع
سناء : (جراتو هي ولحاجة لداخل) اندويو لداخل صافي
لحاجة : مالك داير هاد لحالة كاملة مفرحانش حيت عندك ختك جديدة ؟
مجد : (رد شعرو لور مفقوص) واش عارفة شدرتي نتي واش عارفة شدرتي فيا ، شمن أم نتي غا قولي ليا لي تخبي على ولادها بلي عندهوم بنت أدوي شمن ام هادي اعيباض الله لي كتخبي شي حاجة بحال هادي
سناء : (بدات كتبكي ) تهدن عافاك ماشي لخاطري انا ميسحابليش اطيح معاها
مجد : (زاد فلغوات) واراني طحت معاها واراني كنت مصاحب معا لخوادرية ، وعباد الله قشار قرية او مكانوش كيطيحو معا خوتهوم
لحاجة : مالك كتكبر لموضوع لغلاط كيوقع دبا تنسا
مجد : (عصباتو لحاجة) شغنسا أدوي نسا بلي كنبغي ختي يسحاب ليك انا بحالك كنزبلهوم او ملي نهز تسبيح كنقول عفا الله عما سلف أدوي شكتخوري عليا من صباح
غزلان : (كانت ناعسة تا ضربات لفيقة على الصوت تاع مجد كيغوت ناضت بزربة خرجات عندو لاقياه محيح) مجد
مجد : (تشوكا ملي سمع صوتها بلاما يحس هز عينيه فيها حاس بقلبو كيضرب ، كانو عينيها او نيفها حمرين بلبكا)
غزلان : (قربات عندو معنقاه او خاشية راسها فعنقو مزيرة عليها بيديها او طالقة دموعها)
مجد : غزلان بعدي عافاك
غزلان : (زادت تخشات فيه) م.مغنبهدث نثا لحبيب ديالي ماثي حويا هي كيكدبو عنا {ممغنبعدش نتا لحبيب ديالي ماشي خويا غي كيكدبو عنا}
مجد : (حس بلمواس تغرسو فقلبو حس بشي واحد لاوي على عنقو كوردة او كيخنق فيه ، هادي لي معنقاه دبا هادي لي قلبي كيدق ليها ختو حرام عليه ، مد يديه كيدفع فيها تبعد والو لسقات فيه) غزلان ماديريش بحال هاكدا يرحم باك
لحاجة : (جات كتجرها) بعدي عليك ابنيتي حشومة
غزلان : (زادت عنقاتو او هي كتبكي) لا لا مغنبهدث كنبغيك امجد متحلينيث عافاك {لا لا مغنبعدش كنبغيك امجد متخلينيش عافاك}
مجد دفعها شوي بجهد او خرج من دار مخليها كتغوت كيف لهبيلة سناء او لحاجة لي شادينها باش متبعوش
غزلان : (كانت كي لمسطية) مجد لا لا مجد عافاك ماما قوليلو يرجع
سناء : (حسات بقلبها كيتقطع على حالة بنتها لي مرمية فلأرض او غكتبكي تحنات عندها معنقاها) ماديريش فراسك هاد لحالة عفاك ابنتي مديريهاش فراسك
غزلان : بغيث مجد اماما بغيثو
لحاجة : ديها لبيتها ترتاح ديها (ملي دخلات سناء غزلان لبيت أو عطاتها دوا خرجات لاقية لحاجة كتدوي معا اكسيل فطيليفون) جا اوليدي نوض صداع او مشا
اكسيل : فين مشا
لحاجة : معرفتش مكان باغي يدوي معا حد
اكسيل : سناء كاينة تما ؟
لحاجة : واه اولدي
اكسيل : قولها اسناني هاني جاي
لحاجة : واخة اولدي (قطعات معاه) بغا يدوي معاك اكسيل
سناء : (عرفاتو ايخرج فيها بقات كتسنا فيه تا سمعات دقان فلباب)
لحاجة : (مشات حلات ليه لباب) ولدي جيتي ؟
اكسيل : فين هي بنت خوك
لحاجة : راها لداخل
اكسيل : (دخل عندها) لحاجة خلينا بوحدنا
لحاجة : غا دوي اولدي او تهدن راه هادي ماين ولادك بنتك مريضة لدارخل
اكسيل : لوليدة منعاودهاش خرجي باغي ندوي معاها راس فراس
لحاجة : (شافت تا عيات هي تخرج مخلياهوم فلبيت بجوج)
اكسيل : (طرق لباب) ايوا الالة سناء عندك متقولي ليا ؟
سناء : عارفاك تقلقتي حيت خبيت عليك بلي عندنا بنت ولكن انا
اكسيل : مافهمتيش السؤال ديالي وقيلة دبا غزلان لي قلتي بنتي عندها 20 عام ملي كنتي حاملة بيها بين قوسين دفعتي الدعوة تاع طلاق او حيت كنتي على برا طولات جرة عاماين او شي حاجة عاد طالقنا يعني كانت عند غزلان تلتسنين تقريبا ، السؤال كتالي متأكدة انا هو باها ؟
سناء : (وسعات فيه عينيها قبل متدوي معصبة) عارفاك تصدمتي ولكن ماشي لدرجة انك تشك فيا شنو زعما كنت كنخونك ولا كيفاش ؟ إلى مكانتش بنتك بنتمن غتكون بنت جيران
اكسيل : شكون عرف حيت علاما عقلت او عقلتي آخر مرة نعسنا فيها بجوج بعدها حملتي بصباح اذن كي درتي تا حملتي مني بعد عماين ياكما ديني معاك شي حيوان منوي من عندي لفرانسا جمدتيه ونا مفخباريش دوي ؟
سناء : شششكتخربق نتا واش من نيتك شحال او حنا مزوجين او كتقول ليا آخر مرة ملي حملت بصباح شكنا كنديرو كنلعبو حابلة
اكسيل : نسولك نتي شنو كنا كنديرو ويلا نسيتي نفكرك كي كنا عايشين أدوي ؟ (بدا كيغوت) باش تجي تبهللي عليا لا عمرني سميتها فيك بتاتا ولكن هانتي حيت مكنتش كنشك فيك او باقي كنقول يمكن انا لي نسيت شي نهار انديرو تحليلة تاع لأبوة صافي
سناء : (بتقة) نديروها علاش لا غتخلعني او نشوفك فاش تندم ملي تعرفها بنتك
اكسيل : (دار يديه على عنقها قاجها شوي) طلبي الله تكون بنتي كيما قلتي حيت برب لكعبة إلى مكانتش بنتي داكشي لي ندير فيك عمرك تحلمي بيه ، الى لقيتك كنتي كتلعبي مور ضهري غنوريك وجهي لاخر سمعتيني
لحاجة : (دخلات عليهوم) يهديك الله اولدي طلقها او ستغفر مولاك
اكسيل : (جاوب لغالية لي كانت كتصوني عليه)
لغالية : (كان صوتها كيترعد) ا.اكسيل م.مجد دار كسيدة
اكسيل : شنو ؟ لغالية شكتقولي كفاش مجد دار كسيدة
لغالية : م.معرفتش صوني عليه سول فسبيطار
اكسيل : (دارت بيه دنيا او هز طيليفونو كيصوني على ولدو والو)
سناء : مال ولدي أ إكسيل مال مجد جاوبني
اكسيل : (صونات ليه واحد النمرة) الو شكون معايا
لمتصل : سيدي لابن ديالك راه دار حادثة او نقلناه لسبيطار ”””
اكسيل فشل ليه لما فركابي خرج حيجري لبرا مخلي سناء تابعاه او راكبة معاه هي ولحاجة فطونوبيل ، وصل لسبيطار لي قالو ليه لاقي جود او ايهاب او يحيى ورابحة ورقية تما
اكسيل : مال خوك ؟ دوي مالك ساكت
جود : (كان مسهوت وجهو صفر حوايجو عامرين دم)
سناء : (كانت منهارة بلبكا) مال خوك شنو وقع ليه دوي
إيهاب : عمي اكسيل ملي خرج مجد
~~~~~~~~~»
مجد : (خرج من عند سناء او معالم بيه غا الله الكل تاع غزلان او غواتها كيقطع ليه فقلبو ركب طونوبيلتو او ضيمارا)
جود : (ملي وصل هو او ايهاب او محسن لي كانو فطونوبيل وحدة لقاو مجد يالاه ركب طونوبيل او كسيري مبعد ، دور طونوبيل او تبعو كيكلاكسوني عليه احبس والو) صوني عليه
محسن : مكيجاوبش
مجد : (لي شافو غيقول هادا غا ضارب لقرقوبي مسهوت او مكسيري معارفش تا فين غادي ولا حاس بلي ضايرين بيه كيسمع شي حد كيعيط عليه او يكلاكصوني ويصوني ولكن والو بحالا فشي عالم بوحدو ، دخل لوتوروت او بقا غا غادي)
جود : (كسيرا تابعو او كيخرج راسو من شرجم كيعيط عليه او يغوت) مجد مجد حبس فين غادي مجد
زاد كسيرا تا هو بسرعة شاد معاه طريق لوتوروت ، مجد بقا غا مكسيري عقلو ممعاهش دازو قدامو لقطات فاش كان كيعنق غزلان كيبوسها كيتكا حداها هادشي كامل لي كان كيدير او داك لبغو لي كان كيبغيها بحالا كان كيديرو لصباح ، بغا ختو تباوس معا ختو او طمع فختو للحضة رجع راسو اللور بحالا فيه نعاس باغي ينعس
جود : (وسع عينيه ملي شاف طونوبيل بدات كتزيݣزاݣي فطريق عرفو ملي غيكون غفلو نعاس)
محسن : (خرج راسو هو او ايهاب من لفوق تاع طونوبيل كيغوتو) مجد وا مجد
مجد : (ديك لفيقة لي فاق لقا راسو مقادش اتحكم فطونوبيل)
جود : مجد لا لا لا
غوت ملي شاف الطونوبيل تاع خوه كتقلب قدامو ماشي قلبة ماشي جوج فرانا بجهد هابط عند خوه ، لي كانت الطونوبيلتو مقلوبة او الزاج مشخشخ انا هوا فكان كاملو دميات
جود : (مشا عند لباب كيحاول احلو هو او دراري) مجد
إيهاب : (شم ريحة دخان او بدا كيغوت مخلوع او هو كيضرب فلباب) دراري خرجوه طونوبيل غطرطق
جود : (ديك لحلة لي حلو لباب بدات لعافية متعب فطونوبيل بزربة جر خوه مبعدو على طونوبيل او هو كيبكي) مجد فيق خويا فيق
محسن&إيهاب : (حدهوم خرجو مجد بعدو على الطونوبيل كيجريو)
جود : (تسمع الصوت تاع طريق بجهد تحنا على خوه لتوصلو شي حاجة ، اما طونوبيلة فلعافية كلاتها)
محسن : (قاس تنفس تاع مجد لقاه ضعيف بزاف) لومبلونص بزربة
إيهاب : (صونا عليهوم) واحد لكسيدة فخط لوتوروت “”””
**** : كاينين شي ضحايا
إيهاب : (على اعصابو) كنقولك كسيدة او كتقولي واش كاينة شي ضحية طونوبيل تقلبات فلوتوروت الشيفور خرجناه قبل مطرطق طونوبيل حالتو خايبة بزاف النبض ديالو قليل
**** : ماماتش ؟
إيهاب : لا عاد ناوي يموت واش كتسطاو عليا
**** : (كاين واحد النوع كتحصل معاه غا باش تعيط لومبيلونص) وصف ليا لبلاصة فين راكوم قريبة ليكوم شي باحة لإستراحة
إيهاب : قدامي شيخ او ريح ابنادم غتشد طريق لوتوروت لي غادة ل””””” اتشم ريحة دم هوما حنا
جود : (لقا نفس تاع خوه تقطع طلع فوقو كيبرك ليك فوق صدرو بيديه لي كانو عامرين دم) لا لا مجد ماديرهاش اخويا ها لعار لا لا فيق فيق مجد عافاك اخويا شغنقول لبابا ، فيق راه ايتسطا الى مشيتي
لبوليس : (جات طونوبيلة ديالهوم معا لومبيلونص بعدما صونا عليهوم إيهاب)
مجد : (هزوه فلومبيلونص راكب معاه جود او ايهاب مخليين محسن أدوي معا لبوليس او يرض طونوبيل)
ايمن : (هو لبوليسي لي جا معا شي بوليس خرين) سدو طريق علاما نقية هادشي ، شنو وقع بضبط ؟
محسن : الصديق ديالي تقلبات بيه طونوبيل
ايمن : كان شارب ؟
محسن : لا لا غا هو كانو شي مشاكل
ايمن : كان تابعو شي حد
محسن : لا تا واحد مكان تابعو غا شي ضروف ملي شفناه صايݣ تبعناه نحبسوه
ايمن : متزدح معا تا واحد ؟
محسن : لا يمكن فقد السيطرة على طونوبيل تا تقلبات بيه
ايمن : (خدا منو لاكارط ديالو) نتا محسن تاجي ؟
محسن : واه هو انا كتعرفني ؟
ايمن : انا ولد لأستاذ الياس المرق لي قراك نتا وختك لغالية تربية إسلامية
محسن : آه عاد تفكرت (مكانش فحالة تسمح ليه اسلم عليه مزيان عقلو مشطون معا مجد)
ايمن : لموهيم تا يفيق صاحبك او نحققو معاه يمكن ليك تفضل
محسن : (ركب طونوبيل او مشا عند صباح اعلمها)
صباح : (ملي شافتو داخل لدار) من صباح ونا كنصوني عليك هانية تا مكتجاوبش ، شهاد دم فيك تجرحتي دوي امحسن
محسن : (دوك دموع لي كان شاد من صباح زلقو ليه) مجد دار كسيدة
صباح : شنو ؟ دار كسيدة ؟ فين هو بيخير ؟ دوي امحسن مالك ساكت واش هاد دم تاع مجد قول ليا متبقاش ساكت (نهارا بلبكا) ها لعار متبقاش ساكت
محسن : صباح تهدني يالاه نمشيو عندو لسبيطار
صباح : (لاحت درة على راسها او مشات معاه لسبيطار لاقية باها ݣالس لأرض داير يديه على راسو ، او مها منهارة بلبكا ، رابحة كتر منها ، قربات عند جود لي كان غا ساكت او كيشوف فلخوا غارق فدم خوه مشات عندو معنقاه او كتبكي) خويا
جود : (ماشي هنا بتاتا)
اكسيل : (حاجة وحدة لي كتخرج من فمو) لا حول و لا قوة الا بالله ، لا حول و لا قوة الا بالله
#عند لغالية#
بعدما مشات لشركة هاد صباح بقات فلبيرو ديالها كتخدم على شي ملفات تا طلبها فؤاد لعندو لمكتب
لغالية : (هزات داك لملف او دخلات عندو) مسيو فؤاد ها لملف ديالك
فؤاد : (ناض بزربة تبعها شاد ليها يديها قبل متخرج) ستناي باغي ندوي معاك
لغالية : (ملي حجات لملف ديالها كانت عوالة تخرج تا شدها فيديها محبسها نترات يديها بزربة) مسيو فؤاد نتمنا منعاودش دير هاد التصرف مرة خرى او تلزم لحدود ديالك حيت أنا مرا مزوجة
فؤاد : (رجع خطوة لور) سمحيلي مقصدتش تا ديك نهار عارف راسي غلطت ملي تهمتك ونا اصلا ممتأكدش
لغالية : مسيو فؤاد مكاينش عافاك لاش نعاودو نذكرو هاد لموضوع
فؤاد : سيفطو ليا بلي طلبتي تحويل من لقسم ديالنا
لغالية : واه او نتمنا توافق عليه
فؤاد : طلب ديالك مرفوض
لغالية : اذن مخليتي تاشي حل غنست….
قبل متكمل جملتها وصلها ميساج معرفات تا كيدارت جات طيليفون عادي قدام فؤاد بحالي مراهاش فلخدمة ، حلات لواتساپ لاقية نفس النمرة لي كتصوني عليها لي مسيفطة ليها ديك لحلة لي حلات لقات ميساج فيه 1/9 ، قبل تا متساءل على شنو كيعنيو هاد لأرقات نسيفطو ليها تصاور مجد او هو داير كسيدة ، شهقات سادة فمها او مطيحة طيليفونها لأرض
فؤاد : (شافها كفاش ولات كترعد مفهم والو تحنا عند تليفونها هازو من لأرض او ضارب فديك تصويرة) هادا لي دار كسيدة كيجيك
لغالية : (لعقل باش تجاوبو معندهاش خلات طيليفونها وصاكها او خرجات كتجري لبرا)
فؤاد : (مفهم تا وزة او بدا كيتبعها تا خرجو لجيهة طونوبيلات)
لغالية : (مشات لطونوبيل كتحاول تحلها والو) تحلي
فؤاد : لغالية ماشي طونوبيلتك هاديك (عرفها تالفة داكشي علاش جرها لطونوبيلتو ركبها او ركب حداها) شمن سبيطار فاش كاينين
لغالية : م.معرفتش (تما فين هزات طيليفونها او علمات اكسيل بلكسيدة او صونات على محسن يعطيها فين كاينين) سير لبيطار “”””
فؤاد : واخ غا تهدني مغيوقع والو كولشي ايكون بيخير
لغالية : (كانت كتبكي او حالتها حالة ، ملي دخلات لسبيطار بوحدها انا فؤاد بقا على برا ، قلبات عليهوم تا لقاتهوم عقدات حجبانها ملي شافت سناء معنقة اكسيل او كتبكي واخة هو ممبادلهاش لعناق ولكن هي معنقاه)
ياسمين : (كانت تا هي يالاه وصلات)
سناء : (محسات براسها تا عنقات اكسيل كتبكي ملي شافت بلي ماشي غا طبيب واحد لي دخل عندو اما لفرمليات خيطي بيطي عندهوم)
لغالية : (داكشي لي كان خاصها كملاتو ليها سناء مشات ݣلسات حدا صباح او ياسمين) طبيب مقال والو ؟
صباح : باقي مخرج عندنا
لغالية : الله ايدير تاوين دلخير
اكسيل : (مكانش بتاتا مركز معا سناء واش معنقاه واش لا ، ملي شاف لغالية مشات ݣلسات حدا لبنات قرب عندها)
لغالية : (هزات عينيها فيه مادا ليه شي كرطونات صغار معا قرعة دلما) هاك شرب دواك
اكسيل : (ݣلس قدامها) مالك
لغالية : ماماليش
اكسيل : وقعات شي حاجة ؟
لغالية : من بعد أو نقول ليك
اكسيل : واخ
طبيب : (بعدما دوز سوايع طوال فلعملية أخيرا سالاها او خرج عندهوم)
اكسيل : (مشا عندو بزربة)
طبيب : نتا لأب تاع لمريض ؟
اكسيل : (بان ليه وجه طبيب مهواش) واه انا باه كي بقا
طبيب : تجاوز مرحلة لخطر
لحاجة : لحمد الله على لطف الله على سلامتو
اكسيل : (حس بلي طبيب باقي مكمل هضرتو داكشي علاش بعد هو وياه عليهوم) دكتور كاينة شي حاجة خاصنا نعرفوها
طبيب : كيما قلت ليك ولدك تزاوز مرحلة لخطر ولكن لكسيدة دݣدݣاتو تهرس من يديه او واحد لعضلة تهرسات ليه او معا لأسف لعمود لفقري ديالو تضرب ضربة خايبة احتمال كبير أنو يتشلل من رجليه
اكسيل : (مابقا ميقول شعندو اصلا ميزيد ايقول خلى طبيب او رجع عندهوم)
صباح : (شافت سيفت باها تغيرات ولا بحالا صرفقو شي واحد) بابا شنو قال ليك طبيب ؟ مجد بيخير ؟
اكسيل : (ستجمع داك شوي تاع جهد لي بقا عندو او دوا) مجد اقدر ايكون تشلل
رابحة : (غاسمعات ديك تشلل طاحت سخفانة)
سناء : لا لا ميمكنش ايكون تشلل
اكسيل : باقي مبان لينا واش غيتشلل ولا لا ولكن بغيتكوم متقولو ليه ولا تبينو ليه شي حاجة طبيب قال بلي منهنا واحد تلاتة تاع سوايع نقدرو نشوفوه
إيهاب : (كان عاون يحيى تا داو رابحة لي كانت سخفانة لطبيب)
اكسيل : فين عمتك ؟
إيهاب : معرفتش قالت ليا بلي غادة تجيب ساكها نساتو فطونوبيل
اكسيل : (خرج لبرا غادي عندها تا لقاها واقفة معا فؤاد حاول ميبينش او مشا عندها) لغالية
لغالية : (ضارت عندو) اكسيل ، سي فؤاد شكرا او سمح ليا عدبتك معايا
فؤاد : لا شكر على واجب على سلامة ولدك
اكسيل : الله اسلمك
فؤاد : غدا بلاما تجي لخدمة يمكن ليك ترتاحي تا يفوت هادشي خليتك على خير
اكسيل : (بقا حاضيه تا مشا) شجاب هاد زمر لهنا ؟
لغالية : هو لي وصلني لسبيطار او نسيت ساكي عندو فطونوبيل داكشي علاش صونا عليا نجي ناخدو
اكسيل : بدلتي بلاصتك فلخدمة ولا باقي
لغالية : سوء تفاهم لي كان تحل او سيد عتاذر غنكمل فلخدمة
اكسيل : قدمي استقالتك انا غنشوف ليك شي شركة خرى هاد سيد مرتاحيتش ليه ماصافيش من جيهتك
لغالية : اكسيل دارني راسي مافية لي يساعف هاد لغيرة ديالك لي سمعك ايقول انا هي محور اكون لي جا ايطيح فيا ، سيد ممسوق ليا ماني مسوقة ليه عايش حياتو او زيدون مجامعانا غا لخدمة ، قبل منسا غنسافر ليوم بليل
اكسيل : فين بسلامة ؟
لغالية : داك لفرع تاع الشركة لي امريكا خاصنا نمشيو ليه على ود شي خدمة
اكسيل : واش انا كنقوليك لاستقالة ونتي كتقولي ليا تسافري لخاريج معا هاد زعاف منيتك
لغالية : من رئتي قلت ليك غادة ندوز معاه شهر لعسل عاد لخدمة معا عرام دلبشار من غيرو
اكسيل : لغالية بلاما نوضوها عاود انا مفهمتش مالك هاد ليامات غا معصبة او كتقلبي على اننا ندابزو
لغالية : ياك آسيدي دبا انا فاش كاين ديفو مزيان تبارك الله ، راك نتا لي باغي دابز معايا على حساب فؤاد مالك مادويتيش على ديك لكلبة لي كانت ضالة معنقاك فسبيطار دوي
اكسيل : واش من نيتك مشفتيش لحالة فاش كنا شكون داك لي كان داخل لبلوك ولد الجيران دوي
لغالية : شحال من عام او هي ممحاشياهاش ليه دبا عاد طاحة عليها لكبدة ولا دايراها سبة باش تلسقك ؟ (حسات بضو شبر معاها فكرشها)
اكسيل : مالك ؟
لغالية : والو يمكن لمسران لي تنفخ ليا
اكسيل : رجعي لدار لكنتي عيانة
لغالية : خلي تا يفيق مجد او نرجع لدار (دخل هو وياها لداخل او تسناو تا فاق مجد عاد دخل عندو غي اكسيل او يحيى او رابحة وسناء)
اكسيل : (دخل عند مجد لبيت لاقي راسو او يديه كاملها فاصمة وجهو محرود او باين عليه لعيا بدرع باش حال عينيه ، قرب عندو بايس ليه راسو بحنية) كي بقيتي شوية
مجد : (ماشافش جيهة سناء بتاتا) حمد الله غا صحتي تقيلة عليا
اكسيل : عادي باقي لبنج مفاتكش مية فلمية
مجد : ضران كنحس بيه فيدي او راسي ولكن رجلي مكنحسش بيهوم بتاتا
مجد : (شاف رابحة غا كتبكي) لواليد راني بيخير صافي بلى بكا لي شافك ايقول غا مت ملا تشللت
سناء : الله انجيك راها غا كانت خايفة عليك
طبيب : (دخل عندو) مجد كي كنحس براسك مزيان ؟
مجد : مزيان غا هو مكنحسش برجلي واش لبنج لي باقي شاد فيهوم ؟
طبيب : مكتهسش بيهوم نهائيا ؟
مجد : لا
طبيب : (هز واحد لمطرقة تاع لحديد صغيرة) انا انضربك لرجليك او قول ليا واش كتحس ولا لا
مجد : (ضربو طبيب ولكن محس بوالو ماشي مرة ماشي جوج ضار عند باه مطرطق عينيه او مخلوع) بابا مكنحس بوالو بابا مكنحسش برجلي علاش
طبيب : (خرج هو واكسيل لبرا) سي إكسيل معا لأسف داكشي مناش خفنا هو لي وقع لإبن ديالك تشلل
اكسيل : (حس بلعافية شاعلة فيه او الدموع على طرف عينيه ولكن عارف بلي ماشي لوقت تاع الضعف) شنو خاصو باش يرجع يمشي على رجليه ترويض ؟ عملية ؟
طبيب : منقدرش نجاوبك بوالو خص تا ابرا شوي او يعاود لينا تحاليل عاد يمكن لينا نشوفو شنو كاين
اكسيل : (دخل عند ولدو بعدما بقا غا هو وياه فشومبغ)
مجد : شنو قاليك طبيب غنتمشا على رجليا ؟ متشلتش ياك ابابا
اكسيل : (قرب عندو معنقو) كولشي غيولي مزيان تتطلب لأمر أي حاجة غنديرها تا تعاود توقف على رجليك نتا غا مديرش فبالك باك باقي عايش
مجد : (آخر شمعة كانت مشهورة لداخل ديالو تطفات على هاد لخبر) معندك مادير انا صافي تعوقت
اكسيل : (شد ليه راسو بيديه) ماتقولش هاد لخضرة مابغيتش نسمعها منك مرة خرى نتا فإنك تبرى او يولي هادشي غا تعاويد ، ايلى مهزك هاد لكتف اهزك لكتف لاخر نتا غا متفقدش يقينك بالله ، ربي كبير
مجد : (مادواش مقال والو قلب وجهو لجيهة لوخرة) باغي نعس
اكسيل : (قاد ليه لغطا) نعس انا نمشي نجيب ليك متاكل
لغالية : (شافت اكسيل خرج من عندو او هو ماشي تال لهيه) امضرى كي بقا ؟
اكسيل : خلينا نرجعو لدار ولدي إيهاب بقا هنا علاما نمشي نجيب ليه مياكل او نرجع
سناء : انا نبقا معاه
اكسيل : فهاد لحالة لاش واصل كنضن أنو آخر وحدة يبغي ايشوفها هي نتي عطيه شوي تاع لوقت اعرف راسو من ساسو
جود : تا انا انبقا
اكسيل : كولشي ايرجع لدار ايبقا غا إيهاب بلخصوص نتا كون تسمع لهضرة او رجع لدار بدل عليك او نعس شوي
لغالية : (خرجو من سبيطار او كل واحد فيهوم خدا طونوبيلتو ومشا بحالو ، هي لي كانت صايݣة باكسيل ، مدات يديها شادة يديه) ماديرش فبالك كولشي فيكون مزيان قانو يبرا او يوقف على رجليه مرة خرى
اكسيل : ان شاء الله
لغالية : (وصلو لدار او طلعات لبيتها مخلية اكسيل كيوجد لماكلة لمجد ، كانت عيانة او مسخسة لون مخطوف من وجها قالت تمشي تنعس شوي ديك تحييدة لي حيدات ليك لكاشة لقات الناموسية كاملها دم ، بقات مصدومة تا صونا طيليفونها) ا.الو ؟
فؤاد : لغالية هادا انا فؤاد كنت بغيت غا نعلمك بلي ليوم عندنا طيارة الى معدالش ليك تمشي تا تلحقي عنا
لغالية : (طولات شوفة فداك دم) لا لا غنمشي معاكوم
فؤاد : صافي جوج تكوني فلماطار
لغالية : (قطعات معاه او مشات بزربة هزات لبريزة ديالها حلاتها او بدات كتحط فيها لحوايج)
اكسيل : (بعدما سالا طياب جمع كولشي فواحد شبكة او هز داكشي لي بقا مطلعو لغالية تاكل تا ضرب فيها كتجمع حوايجها) فين غادة
لغالية : ياك ياك قلت ليك عندي طيارة ليوم معا جوج
اكسيل : (حط لبلاطو معصب) او يمكن قلت ليك مغتمشيش غتبقاي هنا ؟
لغالية : واه انبقا هنا (تنيرڤات او مشات معرية على ديك الناموسية او جابدة دوك تصاور لي كان حط ليها هاداك فلماريو او تصويرة تاع مجد داير كسيدة) نبقا هنا باش توصل نوبتي اويجي داك زمر ايبالي بيا كيما دار لمجد
اكسيل : شكون هاد زمر او شهاد لحالة فدار
لغالية : نسولك نتا نيت ولد داك زعتر كيقلب عليا أ إكسيل حالقها فيا داخل عندي تال لبيت أو كيهددني بهاد دمايات او هاد تصاور ، سيفطلي تصويرة تاع مجد قبل تا متهزو لومبلونص شنو معنات هادشي او باغيني نبقا هنا
اكسيل : تهدني مغيوقع والو الغالية انا معاك مغيقربش ليك ماحدي كاين نتي غا اهدني بقاي هنا ايلى مشيتي سافرتي غتبقاي بوحدك
لغالية : اكسيل واش كطنز عليا كنقول ليك دخل لبيت ديالي انا وياك لي تا صحاب دار مكيدخلوش ليها او حط لي بغا يحط ونتا كتقولي نتا حدايا مغيوقع ليا والو ؟ فهاد يوماين راك ملاهي كون صفاها ليا مغتجيبش لخبار يعلم الله شكون مورا لكسيدة تاع مجد منقدرش نبقا هنا خليني نمشي علاما تهدا لأمور او نرجع
اكسيل : واش كتبان ليك مقادش نحميك او نحمي عئيلتي تا باغة تهربي ، واش هاد لعوام كاملة قاسك شي حد ونا معاك
لغالية : مابقيتيش قاد تحميني أ إكسيل من لول مكنتيش قاد تحميني داكشي علاش وصل ليا بهاد الزربة ، تا من لقضية بقا شوي او تحل حيت مابقاش داك خينا هو لي شادها ، أيمن قريب افتح لقضية ويلا تحلات غيتبت عليا بلي انا لي قت’لت باه ماباغاش ندخل لحبس أ إكسيل
لغالية : غدي نسافر لأمريكة علأقل تما ميمكنش ليه اوصل ليا ماقديتيش تحميني هنا خليني نحمي راسي أ إكسيل ملي ابرد طرح غنرجع كنواعدك
اكسيل : عندك لحق هاد لعوام كاملة مقديتش نحميك ياك ، يمكن ليك تسافري ها لباب (سكت قبل ميدوي بجدية) ولكن متحتاجيش ترجعي صافي او مابقاش علاش نصدع راسي فديك لقضية ، عندي ولدي محتاجني نتلاها معاه بركة عليا
لغالية : علاش كتقول بحال هاد لهضرة دبا كيفاش بلاما ترجعي واش باغي تسمح فيا ولا شنو أ إكسيل ، علاش نتا اناني تال هاد درجة قلت ليك انمشي نبعدة واحد لمدة قصيرة او نرجع علاش خديتيها ما مبدأ اني تخليت عليك
اكسيل : انا قلت ليك لي كاين باغة تمشي باغة تسافري ها لباب قدامك مغنحبسكش (خرج رادخ لباب بجهد من موراه)
لغالية : (رجعات ݣلسات مكملة بكاها احساس انك متبقاش تحس بلأمان فدار فبيتك معا عئيلتك ، انك تحس بلي فأي لحضة تقدر تفقد حياتك انك تكون فبيتك او يقدر ايكون شي واحد كبتجسس عليك ، بقات فبيتها شحال كتسناه ارجع سعا والو ملي وصلات ليها لوحد ونص هزات سلكها او باريزتها وخرجات)
صباح : (ضربات فيها) لغالية فين غادة عندك شي غراض ؟
لغالية : عندي طيارة معا جوج خرجات ليا شي خدمة خاصني نصافر ضروري
صباح : مكتشوفيش شوي لوقت ماشي مناسب ميمكنش ليك تأجليها راك شتي حالة مجد بابا مكاين لي يوقف معاه
لغالية : تا انا مادميتش هاد السفر ردي لباب لباباك عافاك علاما نرجع ، راني سيفط ليك ليستا تاع ريجيم ديالو او حضي معاه اشرب دوا
لحاجة : هادا هو لمضمون فبنات زنقة الى مشيتي تا سافرتي غي مترجعيش اصلا معندكش بلاصة بيناتنا
صباح : لحاجة متقوليش هاكدا واش مشات لخاطرها راه عندها لخدمة
لغالية : (مشات عند ياسمين) انا غنمشي دبا ملي نشري اكارط جديدة نصوني عليك صافي
ياسمين : صافي واخ
لغالية : (خرجات لغالية من دار شادة طريق لماطار او هي معالم بيها غالي خلقها ، ملي وصلات لقات لموضفين لي غيمشيو منهم تا فؤاد كيتسناو تما)
فؤاد : كولشي جا يالاه
كوتر : كي بقيتي شويا بنتيلي عيانة
لغالية : شوي
كوتر : قلتيلي ول لبارح ملي مشيتي دير شي تحاليل ياك مكاين باس
لغالية : من ربعشهور لبعشهور كنمشي ندير تاحاليل او صاف
كوتر : خرجو مزيان أبعدا
لغالية : (خدات بلاصتها فطيارة جات حدا كوتر موالية الشرجم) خرجو فوق مزيان
كوتر : مزيان تا كلي جبت معايا شي بيض مسلوق
لغالية : عطيني وحدة (مدات ليها كوتر وحدة عضات منها مخسرة سيفتها او دافلة الدغمة) هاد لبيضة خاسرة وقيلة فيها شي نسمة
كوتر : آري نشوف (عضات منها) مداقها عادي مافيها تا ريحة
لغالية : يمكن فمي لي حار (شربات من لعصير او دارت لبانضة على عينيها) غنعس شوي عييت
#عند مريم#
فاقت بكري هاد نهار او وجدات نهيلة باش ملي ايجي طرونسپور يديها لراوض يلقاها وجدات
ياسمين : (فاقت من نعاس مبوقة)
مريم : سيري عند ختك تجمع ليك شعرك علاما نوجد ليك متدي معاك
ياسمين : آجي لهنا (ݣلساتها قدامها وبدات كتصايب ليها لݣرينات فشعرها او دير ليها مقابط او لبانضات لملونين) انشوف انشوف الزين ديالي طابلية او صايا او سباط او لحنيكات او لكارطابل شهاد زين آ (جراتها من حناكها كتبوس فيها قبل متهز طيليفونها او تبدا تصور فيها)
مريم : (جابت ليها ديك لباطة فاش كيحطو لدراري صغار لماكلة لي ياكلو للمدرسة منعرف شسماه الله لموهم ماعلينا) ها غداك او يالاه راه سمعت لكلاكسون لتحت غيكونو كيتسناوك
يوسف : (ملي شاف نهيلة لابسة او خارجة مشا بغا يتبعها ملي مخلاتوش مريم بدا كيبكي)
ياسمين : سكتي معاك هاداك انا غنخرجها عندهوم (شدات ليد لياسمين او خرجاتها لطونسپور ركباتها ديك لي كتكون معا دراري لداخل) عافاك أختي ردي ليها لبال او عاودي وصي لأساتذة عليها راها حشومة بزاف
لبنت : كوني هانية
ياسمين : (بعدما ما مشاو كملات هي لحانوت خدات شي سقاطة او عودات رجعات لدار لاقية يوسف شبع بكا او تنفخ عليهوم) شوف شوف لبعلوك من دابا بديتي كتنفخ عنا آجي عندي ولا مغنعطيكش لحلوة
يوسف : (غا سمع لحلوة بدا كيتمد عندها) حوا حوا
ياسمين : عاود عاود شنو سميت هادي ؟
يوسف : حوا
ياسمين : هههههه هني السوق داي دنوب جدك من عاماين ، ايمتا غتمشي عند داك لمحاميين ؟
مريم : ناوية نمشي دبا باش نرجع قبل متجي ختك
ياسمين : (هنا فين سيفط ليها إيهاب ميساج كيقولها آجي راه مجد دار كسيدة)
مريم : (شافت سيفتها تبدلات) مالك شوقع ؟
ياسمين : مجد دار كسيدة خاصني نمشي عندو لسبيطار
مريم : ستناي ندير جلابتي او نلحق عليك
ياسمين : لا نتي غي سيري قضي لغراض معا لمحامي دي معاك يوسف
مريم : واخ باشما كاين علميني
ياسمين : كوني هانية
خرجات ياسمين من دار كتجري لسبيطار فحين مريم لبسات يوسف او لاحت عليها جلابتها وخرجات شدات طاكسي لفين نعتو ليها بلي لمحامي كاين ، طلعات لديك لعمارة تاع لقات لمكتب ديالو
مريم : سلام عليكم
سكرطيرة : وعليكم السلام
مريم : انا لي دويت معاك فطيليفون هاد صباح او قلتيلي نجي معا 3
سكرطيرة : آه مريم عكاوي غي تخرج السيدة لي عندو دخلي نتي
مريم : واخ (مشات ݣلسات فوق لكرسي هازة يوسف عندها تا خوا لمحامي او عيطو عليها ، دخلات لمكتب ضاربة فواحد لكمارة مغريباش عليها)
لمحامي : (كان راجل طويل او مفورمي شوي زينو خاتر تكون عندو ديك 36 عام ، وسع عينيه ملي شاف مريم) مريم ؟ نتي هادي ؟
مريم : (سرطات ريقها ) أ.أيوب
أيوب : تفضلي ݣلسي
مريم : (ݣلسات مقابلة معاه لامحة كرط ڤيزيت ديالو عرفاتو هو لمحامي)
أيوب : (ت.تلفات ليه لهضرة قدامها) كي دايرة لباس عليك هادا لي عندك ولدك ؟
مريم : واه
أيوب : صدفة زوينة لي لاقاتنا بعد هاد لعوام كاملين
مريم : (مدات ليه لملف ديالها واخة مكانتش باغاه ايكون لمحامي ديالها) جيت لهنا قالولي بلي كاين شي محامي حيت باغة نرفع دعوة تاع طلاق
أيوب : (حل لملف ديالها كيقرا فيه او بدا كيسولها كمحامي ديالها او فنفس لوقت كواحد عندو لفضول على كي عاشت فهاد سنين كاملة) شحال عندك من ولد منو وشحال فعمرهوم ؟ كيقراو ؟
مريم : عندي تلاتة لكبيرة ياسمين عندها 16 او شي شهورة مكتقراش ، موراها نهيلة يالاه دارت 5 هادا او عام عندها فراوض ، او يوسف هو صغير عماين
أيوب : فاش خدام راجلك ؟
مريم : استاذ فتانوية
أيوب : عارفة السالير ديالو ؟
مريم : لا ولكن لي عارفة هو بلي ناجح فسلم 11
أيوب : او شنو سبب علاش باغة طلقي
مريم : لعنف لمنزلي او لخيانة
أيوب : شادة عليه شي دلائل
مريم : (جبدات واحد لملف آخر مداتو ليه)
أيوب : (حل داك لملف لاقي فيه الشواهد الطبية ديالها ، او تصاور لمجها كاملو زرق او لطبايع لي فصحتها ، او شي تصاور تاعو معا شي بنات ، خسر سيفتو لداك لمنضر لي شاف قدامو) علاش صبرتي هاد لعوام كاملة ؟ علاش مطلقنيش شحال هادي ؟
مريم : حيت عبد الله هو لي كان كيصلاح ليا
أيوب : (سكتاتو بديك لهضرة) غنرفعو عليه دعوة تاع لخيانة او لعنف معا دعوة تاع طلاق ، باش تاخدي حقك منو
مريم : مكاينش لاش دفع عليه دعوة تا لخيانة ولا لعنف مابغيت منو والو ، باغة غا نطلق او ناخد ولادي تا نفقة مبغيتهاش منو
أيوب : ولكن راه عندك باش تغرقيه علاش ادوزيها ليه
مريم : نتمنى دير داكشي لي قلت ليك حيت مافيا لي يتبع جرة لمحاكيم
سالات داكشي لي عندها او هزات ولدها ومشات راجعة لدار ، ولكن فطريقها تصادفات معا عبد الله
عبد الله : (فهاد ليامات كاملين كان عاس على ياسمين تا عرف مريم فين كاينة ، بقا قدام لباب تا جات) قولي كنتي مخبية هنا
مريم : (تقطعات فيها ولكن حاولات متبينش) شكادير نتا هنا
عبد الله : (كيحاول أدوي بشوي حيت كانو فزنقة) جيت نرضك لدار ولا ياكما تلفات عليك
مريم : مترضني منرضك عطيني تيساع بيناتنا لمحكمة
عبد الله : لمحكمة ؟ هههههههه ياكما ناوية طلقي
مريم : غادي نطلق ماشي ناوية
عبد الله : هههههه كتبقاي فيا امريم واش طسيلة لي عندك باش طلقي او يقابلوك ولا ياكما معولة على ديك شمكارة تاع بنتك ؟
مريم : بزاف عليك بنتي نمشي نسعا او منبقاش معاك نهار آخر
عبد الله : (قرب عندها باغي ياخد يوسف لي كان كيتمد عندو)
يوسف : پاپا
مريم : (رجعات خطوة لور) غتقرب ليا غنجمع عليك أمة محمد
عبد الله : هههههههه تحل ليك لفم تا نتي امريم نسيتي ياماتك ولكن لي فجهدك ديريه او طلاق هو لي متحلميش بيه
دار عطاها بضهر ومشى بحالو مخليها داخلة لدار او سادة عليها
#عند اكسيل#
بعدم تهاز هو ولغالية خرج منيرڤي او غا عقدهوم او هضرتها كضور فبالو ، وصل لسبيطار داخل عند ولدو اعطيه مياكل سعا لقاه ناعس ، شد لكرسي حداه تا سمع شي تقرقيب برا خرج لاقي غزلان لي واقف قدامو
غزلان : ف.فين مجد باعة نثوفو ، هو بيحير ياك {ف.فين مجد باغة نشوفو ، هو بيخير ياك}
اكسيل : (منعها مخلاهاش دخل) من لأحسن مدخليش عندو
غزلان : ما ما عندير والو باعة عا نثوفو عافاك {ما ما غندير والو باغة غا نشوفو عافاك}
اكسيل : ناعس دبا او مور هادشي لي وقع حسن تخليو مسافة بيناتكوم (هبط عينيه عليها لاقيها جاية پيجامتها او رجليها كاملين تسلخو او تجرحو حيت جات بلحفا ، ݣلسها فوق واحد لكرسي او دخل جايب لباطة لي فيها لفاصمة ودوا من بيت مجد ، وتحنا عند رجليها كيعقم ليها لجروح ، عاد لوا ليها لفاصمة على رجليها بجوج ، او حيد لفيسة ديالو لايحها على كتافها) تبقاي تلبسي قبل متخرجي شوفي رجليك كي ولاو
اكسيل : (هز طيليفون معيط على سناء لسبيطار)
سناء : (ملي مالقاتش غزلان فبيتها خرجات كتقلب عليها كي لهبيلة تا لقاتها فسبيطار معا اكسيل او طبيب واقف معاهوم بعدما حيد شي حاجة من غزلان) شكادير نتا ؟
اكسيل : جبت طبيب ياخد منا باش ايدير تحليل
سناء : شمن تحليل
اكسيل : تحليل لأبوة
سناء : (تخطف اللون من وجها) واش تسطيتي ؟ كفاش تحليل واش كتشك فيا بلي كنت كنخونك ؟ دوي ؟ واش هبلتي
اكسيل : مالكي كترطاي ياك قلتي بنتي ايوا بغيت غا نتأكد باش نقيدها فلحالة لمدنية اولا ؟
سناء : دير تا عشرة تاع تحاليل انا مالي عطيني غا تيساع انا وبنتي
اكسيل : (صونا ليه طيليفون) أخلي وصلتي ؟ راحنا فسبيطار فلجناح تالت
سناء : واش با جا ؟
اكسيل : واه هو وخوتك
سناء : نتا لي عيطي ليهوم ؟
اكسيل : معلوم وقيلة حفيدهوم لي راه داخل لسبيطار زيد عليها خاصهوم اتعرفو على حفيدتهوم اولا ؟
سناء : (ملي سمعات باها جاي معرفات مادير ، ولكن قشعات عبد الله تما شي لي خلاها تزيد تخلع) خلي خلي غزلان معاك غنمشي لحمام
بعدات عليهوم غادة عند عبد الله جاراه لبرا
عبد الله : شموقفك معاه
سناء : واش تسطيتي لاش تابعني لهنا بغيتيه ايشوفنا با راه جا لهنا الى شافونا خلات عنا
عبد الله : كدبتي عليا اسناء درتيني كلب عندك شبعتي فيا ضحك ياك قلتيلي بلي مابقيتيش كتخلي اكسيل اقيسك منهار حملتي بنتك لخرة ، ياك كنتي كتقولي ليا ديالي بوحدي ونتي كنتي مخلية راجلك كينعس معاك او زايداها تا حملي منو ، عند بالك مغنسيقش ليك لخبار كنتي كتلعبي مور ضهري
سناء : حتارم راس أو دوي بشوي قبل متجي تحل عليا فمك شوف غا راسك ، علاه شكون لي كان كلعب مور ضهر لاخر أدوي ، ويلا نسيتي نفكرك ملي لقيتك كنتي طايح معا لخدامة ديالي دوي ياكما نسيتي علاش تخاصمنا 20 عام هادي ، انا كنت غادة معاك بنيتي خليت ولادي او ولد خالتي لي مزوج بيا او طلعت لفرانسا غا باش نكون معاك او دبا ݣالس كتحل عليا فمك
عبد الله : عارف راسي غلطت فيك ولكن نتي عارفاني كنبغيك أسناء هاد لعوام كاملة مقديتش نساك ، أو فهاد سنين كاملة كنرجعو او نتفارقو ولكن باقي كنبغيو بعضياتنا دبا ملي عندك بنت خرى معاه كنزيد نتعصب كنتخنق ملي كنتفكر بلي كنتي كتنعسي معاه
سناء : حيد عليا دبا من هاد لهضرة او عاوني
عبد الله : فاش نعاونك ؟
سناء : بغيتك تبدل ليا تحاليل بغيتك تعاوني با او خوتي او تا اكسيل الى عرفو بلي غزلان ماشي بنتو ايصفيوها ليا مفيهاش
عبد الله : بلاتي بلاتي نفهم كفاش ماشي بنت اكسيل او بنتمن بسلامة ؟
سناء : بنتك اعبد الله بنتنا بعدما تفارقنا عرفت راسي حاملة
عبد الله : (صدماتو) بنتا عنا بنت او مقيلهاش ليا هاد لعوام كاملة
سناء : حيت مافيك امان تا كنقول تقاديتي او نرجع نلقاك معا شي وحدة خفت على بنتي داكشي علاش
عبد الله : دبا من لخر غزلان بنتي او بغيتيني نرضها بنت داك تامل ؟ بغيتي بنتي آنا تقول لشي حد آخر من غيري بابا
سناء : واش منيتك داوي شغنقول انا لبا او لخوتي ملي يعرفوني والدة من راجل غير راجلي ، شغنقول لإكسيل براسو واش فخبارك الى عرفني كنت كنخوني افضيهوم ليا او يتبعك موراي ، جود فايت حصلنا ملي كان صغير او راك شتيه كي نافر مني الى عرف بلي والدة منك راه والله تا يشوهني او يضرب ليا طر فصحافة ، صباح راها هبيلة الى ساقت لخبار لڤيزيبلات غيتقطعو ليها ، او مجد شتيه كي مريض مابغيتش نزيد عليه ، هادا بلا شمكارة تاع بنتك الى ساقت لخبار تشعل فينا لعافية والله متحير ، صبرنا اعبد الله نزيدو نصبرو او نخليو فضيحتها مستورة
عبد الله : (ملي ضرب لحساب لقا بلي غا غادي يتفرشو) صافي انا انتكلف بطبيب
سناء : صافي واخة سير دبا قبل ميشوفك شي حد
عبد الله : هاني غادي
سناء : (مشا عبد الله بحالو او رجعات هي عند غزلان لاقية خوتها بجوج او باها ومها) مي
مها : (كانت كتبكي غا شافت بنتها عنقاتها) على سلامتو ابنيتي ، الله ايشافيه
باها : على سلامتو غاملي رجع لينا
اكسيل : الله اسلمك اخالي
باها : شكون هاد لبنية ؟
اكسيل : هادي (شاف فسناء مسمرة) هادي حفيدتكوم جديدة ، بنت سناء لي كانت مخبياها عنا
باها : شنو ؟
خوها : ولد عمتي شكتخربق
اكسيل : هاد الساعة ختك لي كتخربق قالك هادي بنتها لي ولدات عشرين عام هادي ولداتها مني علاما قالت ولكن حيت بغات طلق خبات عنا
باها : سناء هادشي بصح
سناء : واه واه ابا حرارت لعيشة بيناتنا او مكنتش بغيت نبقا معاه
خوها : او لاش خازناها
اكسيل : حيت خافت اتعرف بلي ماشي انا باها
خوها : (لكبير جا شنق عليه) شكتخرق نتا واش كتقول ختي خانتك ولا كيفاش
اكسيل : (خنزر فيه ناتر ليه يديه) جمع يديك اولد خالي باغيني متيق عندي بنت بعد هاد سنين كاملة دوي ؟ انا سيفط تحليل لدار الى طلعات بنتي كيفما قالت متسالوني غا نديرها عندي ونعوضها على لي فات ، ولكن برب لكعبة إلى صدقات بنتك اخالي لعبات مور ضهري داكشي لي غتشوف مني مغيعجبهاش
مها : تاقي لي خلقك أو عرف شنو كتقول ماشي من عوايدك تخرج لعيب من فمك اولدي راكوم كنتو مزوجين عشرة او دراري جامعينكوم
باها : غتندم على هاد لهضرة لي قلتي اولد ختي ، كولشي نسمح ليك فيه الى شرف بنتي
اكسيل : (كان كاعي تا لحد) اعلى ربي نخرج غالط آسيدي حيت الى داكشي لي فبالي كان صحيح غا بلاما توريني كمراتها
خوها : (شعل) شتك كتهدد فلخوادرية ولكن ها غدا غيبان كولشي
اكسيل : فراني اولد خالي وبلاما تبدا تهز عليا لنقسمك من نص او مكاينش لاش نوضوها مجد ناعس مابغيتوش ايفيق
مها : يالاه يالاه ابنتي نمشيو لدار هادا بانلي خرج ليه لعقل
سناء : غزلان بنتي يالاه نمشيو نرجعو لدار تعطل لحال يالاه
غزلان : (خارج تغطية جراتها سناء مرجعاها لدار)
اكسيل : (عاود دخل عند ولدو لاقيه حال عينيه) فقتي نوجد ليك متاكل
مجد : (بحالا هزيت ولد او حطيتي ولد طايح عليه ضيم او ساخط) لا شكون كان على برا
اكسيل : مك او طسيلتها
مجد : (رجع ضربها بسكة مغمض عينيه تا داه نعاس)
اكسيل : (شاف فشرجم لقا لحال بدا كيضوي ولا نقولو ضوا حيت كانت لعشرة ونص تاع صباح ، بدات كتصوني عليه واحد النمرة هو ايجاوبها) الو شكون معايا ؟
لغالية : (غا حطاتها طيارة اول حاجة دارتها شرات اكارط جديدة او صونات على اكسيل تعلمو بلي وصلات او احاول طيب خاطرو) اكسيل انا لغالية هادي نمرتي تاع…
اكسيل : (مدارش ليها فين تكمل هضرتها هو يقطع عليها خاشي طيليفونو فجيبو او خرج يشري ليه شي قهوة اصحصح بيها)
لغالية : (بقا فيها لحال ملي شافتو قطع عليها حولات تصوني عليه شحال من مرة ولكن مكيجاوبهاش ، تا من لميساجات سيفطات ليه عرام تا لقراية مكيقراهومش ، “اكسيل عافاك دوي معايا ، غوت عليا غا متقطعش معايا لهضرة ، اكسيل”)
فؤاد : (جا كيفرق عليهوم سوارت تاع لبيوتة ديالهوم واحد بواحد) سيرو ترتاحو من السفر او تحيدو لعيا باش نقدرو نبداو لخدمة
كوتر : (جرات لغالية ومشات معاها لبيت فين شادين) لجو فميريكان ناضي اخيتي ، مالك طايح عليك ضيم تقولي غارقين ليك لبابر
لغالية : غا عييت بسفر او صاف مجبتيش معاك شي زعتر ؟
كوتر : لا علاش
لغالية : ضراتني لمعدة شوي قلت نشربو
كوتر : بسيف ضرك ونتي طريق كاملة غا كتبوعي يمكن مكتقديش على طيارة او لعلو ، مجبتش زعتر ولكن عندي لكينة تاع لمعدة نعطيها ليك ؟
لغالية : لا بلاش غندوش او نرتاح
دخلات لدوش دوشات او حيدات عليها لعرق تاع سفر عاد مشات تمغطات او نعسات فلبلاصة
#عند سناء#
بقات مشطونة معا تحاليل ليل كامل تا سيفط ليها عبد الله مساج كيعلمها فيه بلي صافي طبيب ضمنوه او سكتو بلفلوس ، عاد رتاحت اورجع ضو لوجها
مها : (دخلات عليها) بنتي
سناء : مي
مها : (مشات ݣلسات حداها شادة ليها فيديها) بنيتي دوي معايا انا مك غزلان بصح بنتك ؟
سناء : واه امي بنتم غتكون
مها : وعلاش خبيتيها عنا
سناء : خفتكوم ديرو ليا كيما درتو ليا لولين ملي كنت بغيت نطلق فلول بززتو عليا نبقا على قبل لحبالة ديالي بجود بعدها ملي بغيت نطلق عاود قلتو لا صبري على بنتك ، خفت با ابزز عليا نبقا معاه كون عرفني حاملة
مها : ولكن مكانش خاصك ديري بحال هاكدا اكسيل ولد الناس ابنتي دارلك داكشي لي مخلاكش باك ديري
سناء : نتوما فاش كاين ديفو نتوما لي بززتو عليا زواج عمركي حسيتي بيا امي ملي عرفتيني مزوجة بلى خاطري ؟ عمركي حسيتي بيا ونا والدة من واحدة مكنبغيعش ؟ ݣلستي عليا حنا عارفين مصلاحتك ها مصلاحتي فين وصلات زواج مكان ليه تا معنى بارد او دراري تفرقو بعد طلاق
مها : كنا كنقول اتعيشي معاه بيخير
سناء : كنتو كتخربقو كان كيهمكوم غا داكشي لي نتوما باغين سناء معندك مادير بلقراية نتي غا بنت خرتك زواج ، سناء تزوجي باغة تبقاي تا تبوري سناء سناء سناء عمركوم سولتو هاد سناء شنو بغات داكشي علاش باركة من هاد لخضرة طلعات لي فراسي طبت
مها : نتي تعرفي ابنيتي
سناء : (خرجات مها من عندها وبقات هي فبيتها ݣالسة تا فات او عيط عليها باها يمشيو عند اكسيل لدار حيت كولشي تجمع عندو تما)
وصلو لدار لاقيين كولشي حاضر لحاج ، لحاجة او ولادها ، جود صباح محسن ياسمين
اكسيل : وصلتو
لحاجة : دير برايي اولدي او بلاما تشاوه معا خالك او تخسرو
اكسيل : (مدارش بهضرتها) جمعتكوم ليوم باش نشوفو نتيجة تحاليل مجموعين ، مد ليا اخالي تحاليل لي جبتي معاك
باها : هاك
اكسيل : (شدهوم من عندو او فتحهوم مادهوم لجود اقراهوم ليه)
لحاجة : شمكتوب بنتو ياك
جود : عاطيين بلي اكسيل آيت اوسو لأب لبيولوجي تاع غزلان
سناء : (عاد زادت رتاحات)
مها : شتي كنت عارفاك ابنتي مديالتش هادشي
باها : شنو ندير فيك دبا اولد ختي دوي
مها : الله ياخد فيك لحق على هاد شوهة لي كنتي باغي دير لينا
اكسيل : هادا هو جهدك اسناء ؟ شحال حطيتي باش تبدلي تحليلة ؟ آ ؟
سناء : ش.شمن نبدل تحليلة واش نتا هبلتي مقديتيش تيقني لهلا مابغيت منك والو
خوها : باقي زايد دوي باقي مباغي تحشم ؟
لحاجة : نعلو شيطان او متخليوهش ادخل بيناتنا
اكسيل : لحاج دوك تحاليل ؟
لحاج : (عطاه شي جويان خرين) هاك اولدي
لحاجة : شنو داكشي
اكسيل : كنت عارفك اسناء مغتبقايش رأسية داكشي علاش سيفط تحليل ادارو فبلايص مختلافة ويلى فعلا بنتي غيبان فيهوم كاملين اولا
خوها : باقي مبغيتي تحشم خاص تا نهرسو ليك سنانك شكون قال بلي بدلتي تحاليل
سناء : (بقا شوي اوديرهوم تحتها)
اكسيل : (بتاسم ليه) انا ماشي ختم باش ندير دوك لفعايل جود قرأ دوك تحاليل
جود : (كانو عندو ربعة تاع تحليلات من مختبرات مختالفة بدا كيحل فيهوم)
لحاجة : شكيقولو نفس شي ياك
جود : عاطيين بلي اكسيل آيت اوسو لأب تاع غزلان (شاف فمو رتاحت ملي سمعات شقال هو يبتتسم) طبعا باها فلأحلام او لمخيلة تاع لوليدة ، لوليد ماشي لأب لبيولوجي تاع غزلان
لحاجة : شنو
اكسيل : شكون خاصو ايدير فلاخر دبا اخالي
مها : لا لا ميمكنش سناء دوي دفعي على راسك ابنتي مالك ساكتة
سناء : (قلبها بغا يسكت)
باها : (كان معصب) سناء دوي واش تحاليل صحاح واش اكسيل ماشي باين بنتك
لحاجة : دوي طلقينا
سناء : (جاتها لبكية غتفرش قدامهوم كاملين بعد هاد سنين كاملة ولكن مكان عندها دبا باش تغطي على راسها ) اكسيل ما ماشي باين غزلان
مها : (ضربات فخاضها) هاويلي على ماشي باها هاويلي على لحمارة شدارت
باها : (هز يديه تال سما او نزل عليها بواحد صقلة) سايرة تݣولي فيها بوجهك حمر ، ماشي بنتو يالكافرة بالله او بنتمن دوي قبل منصفيها لجدك
سناء : (شافت تا عيات قالت تقلبها تمتيلية هي تبدا تبكي حادرة راسها) ملي كنت فرانسا تعدا عليا واحد نصراني أو نقولها شي واحد فيكوم او ترضو عليا لومة
باها : (حس بدنيا ضارت بيه ملي سمعها قالت بلي شي حد تعدا عليا)
جود : (مدارش ليهوم فين اتعاطفو معاها تا زاد خطوة لقدام)
صباح : (شداتو فيديه متبتاه) الى هي خايبة نتا متكونش خايب
جود : (مدارش بهضرة ختو او قرب عند سناء معنقها) متبكيش اماما
سناء : (ملي شافتو عنقها قالت هادا او تا لوخرين تعاطفو معاها تا سمعات تكركير ديالو حدا ودنيها)
جود : (بعد عليها كيضحك) منسالكش الوليدة كان خاصك ديري تمتيل عضتي دور تاع لمغتصة بامتزاز
مها : هاكدا كتدوي معا مك أدوي اجود هادا هو صواب
جود : بنتك مابقا معاها بو صواب جدي خوالي غا بلاما ضحك عليكوم بهاد جوج كلمات ديالها حيت لوليدة بلعربية تاعرابت نتغداو عليها مبززو عليها مشات بخاطرها معا داك نصاراني أ ، شمن نصراني تا انا بغيت نقول لكزاوي ديالنا عبد الله ياك الوليدة
سناء : (وسعات عينيها فيه مادماتوش افضحها) شكتخربق نتا شكون هاد عبد الله
جود : شكون عبد الله ؟ صحيبك لي هو باين لمادام حبيب لقلب لقديم
مها : (طرشاتو) ماشي حشومة طيح لباطل على مك
خوها : (جا شنق عليه) شكتخربق نتا دوي ؟ عارف شكتقول
اكسيل : (ملي شافو شنق على جود مشا قاصدو ناتر ليه يديه او شنق عليه هو) من لبارح منا كي دجاج كتقاقي اولد خالي مباغيش تهنينا (ضربو بݣنݣ طيحو لأرض فاقد لوعي) ايوا هنينا دبا ، ونتا اجود شكتقول من صباح شجاب عبد الله لمك فين تا كتعرفو باش تلحق تولد معاه
جود : كتعرفو او كتعرفو مزيان لدرجة انو آخر عطلة دوزات فبلجيكا دوزاتها معاه بدليل ݣاع تبغيني نوريهوم ، تبغيني نوريك تصاور بنتك معا لعزارة اجدي ، تبغيوني نوريكوم لمصونة تاع بنتكوم شحال كانت كتلعب مور ضعركوم او ضهر راجلها ؟ (جبد طيليفونو موريهوم واحد تصويرة تاع سناء او عبد الله مشادين ليدين) حي جاتكوم هادي علاش صرب بابا لدوك سنين كاملة ، كي جاتكوم بنتكوم لي لاحة ولادها باش تبقا معا صحيبها
سناء : (تجننات او طرشاتو) جمع فمك
لحاجة : (بقات صابرة تا عيات هي تمشي تشدها من شعرها هي وصفية مخليين مها كتحاول تفكها) دوي الكلبة هادو هوما فعايلك ونا لي كنت كنقول بنت خويا لعفة مديرش هاد لمصايب ونتي غير طحبة
صفية : عاطانا وجه او دايرة وجه آخر مخلية خويا كيتمحن معا تربية تاع دراري او نتي مشيتي مفرعة رجليك أدوي لخانزة لفرج
لحاجة : ونا لي كنت باغة نرض طحبة تاع جدك لولدي هادي هي تيقتي فيك
سناء : (عيات مها تحاول تفكها والو نتفوها تاع لمعقول ، متفكات منهوم غا بلكشايف او مشات كتجري خارجة بحالها ليقتلوها)
لحاجة : عجباتك هاد لفضيحة لي دارت بنتك اخويا ؟
باها : (او خوتها طاحت عليهوم لفضيحة او ملقاو باش ادويو معا اكسيل ، مرمدات بيه بنتو لأرض) اكسيل
اكسيل : خالي مكاينش لاش ندويو باش منتخاسروش معا بعضياتنا انا غنرجع لسبيطار خليت ولدي بوحدو
لحاج : ستنا غنمشي معاك باغي نشوف مجد كي بقا عزيز بقا معا مك
عزيز : واخة الواليد
خرجات عئيلة سناء من دار مخليين لحاجة كتجدب
لحاجة : هاويلي على غدايدي هاويلي على فقصتي هاويلي على شوهتي ، زوجت ولدي من دمو قلت بنت ناس او هي غا طحبة هاويلي على غدايدي
صباح : محسن خلينا نمشيو نخرجو هاد لجو كيخنق
محسن : واخ
ياسمين : (تبعات جود لبيت) كنتي عارف بلي مك كانت كضور ببا ؟
جود : (كان معصب) صححي عندك باك هو لي ضار بمي نهار لول باك لي تامل فينما كاينة شي تقبة باغي يحط تبو فيها
ياسمين : با تامل او مك طحبة ، ݣالسة معاه هاد لعوام كاملين كيرشرش عليها لفلوس او مخلي مرتو فدار بجوع
جود : شوفي يرحم باك بلاما نوضوها راه طالعين ليا سوا مي سوا باك بجوجهوم سلعة وحدة داكشي علاش بلاما نوضوها حنا
ياسمين : واش من نيتك داوي كنتي عارف اجود او مقلتيش ليا كنتي مخبي عليا بلي با طايح معا مك
جود : باش نافعك تعرفيه معا مي ولا معا جيران
ياسمين : نافع بزاف علأقل مكنتش نتصدم بحيلي بحال ناس بلي عندي ختي من داك لخرا
جود : باش كنتي اتعرفي عندك ختك ونا لي كنت عارفها معاه مكنتش عارفهوم والدين
ياسمين : (تزايد هو وياها شوي فلهضرة)
جود : عيواض متجي تبقاي تبرديهوم فيا سيري عند باك هو لي ضار بمرا مزوجة خلاها تلوح ولادها باش تبقا معاه متجيش ضريني فمخي تقول انا لي عرفتهوم على بعضياتهوم تخربيق
ياسمين : (دخل لحمام رادخ لباب بجهد موراه مخليها كتغلي بلأعصاب) قولي نتي هي طحبة لي بقات لاسقة فيه
#عند اكسيل#
كان فطونوبيل معا لحاج سايݣ لسبيطار
لحاج : (بان ليه ولدو ساكت) واش كنتي عارف ؟
اكسيل : شنو عارف ؟
لحاج : عارف بلي غزلان ماشي بنتك او بلي سناء كانت كتخونك معا خو مرتك
اكسيل : غزلان كانت متأكد بلي ماشي بنتي ولكن كنت كنقول سناء غتكون غا رباتها ، ولكن مدميتش تكون كانت كتلعب مور ضهري
لحاج : شنو غدير دبا
اكسيل : هي ماعندي ماندير ليها اما داك تامل غنتفاهم معا ولديه
لحاج : زعما مكنتي عارف ؟ مموالفاش تفلت ليك شي حاجة
اكسيل : لواليد انا راني ممركبش لكمرات لبشار ناس لي كيهموني لاش كنسيق لخبار او فأغلب لأمور كنكون غا قدرت شواقع من ملامحهم ولا تصرفاتهوم حيت كنكون عاشرتهوم او حفضتهوم لا غير ، سناء مكنتش حاضيها فرانسا بتاتا مكناش اصلا كندويو بزاف
لحاج : ندمتي حيت سيفطيها لفرانسا ؟ او حيت خانتك ؟
اكسيل : ملي كنت راجلها كان مفروض عليا تدعمها دير داكشي لي بغات اما حيت خانتني لي باعني برخيص ابا كنبيعو فابور تا كنت سقت ليها لخبار فداك لوقت مكنتش ندير ليها والو ، حيت مكنلسقش فلباشار ولا كيهمني نسمع اعذارو
لحاج : (بغا اغير لموضوع) فين لغالية مبانتش ليا ؟
اكسيل : سافرات
لحاج : هانية ؟
اكسيل : كانت عندها شي خدمة او سافرات على حسابها
لحاج : مزيان
اكسيل : لحاج سير نتا عند مجد طل عليه انا غنمشي نقضي شي غراض
لحاج : رجلي برجليك لداك لغراض لدير شي مصيبة
اكسيل : (مقدرش اقنع لحاج اهبط داكشي علاش داه معاه فلأخير)
كملو طريقهوم تا وصلو واحد ديپو خاوي ، بلاصتو طونوبيل قدامو او دخلو ليه لاقيين عبد الله تما معلق من يديه
لحاج : نهار على كنتأكد بلي راك ولدي
عبد الله : هبطني لاش معلقني هبطني لاش جايبنا لهنا
اكسيل : (حيد لفيسة ديالو ) لواليد متوحشتيش يامات زمان ؟
لحاج : دير حقي انا غادي نݣلس مابقا عندي جهد كي زمان
اكسيل : على خاطرك (هز صباعية لبسهوم عاد هز واحد لخشبة عاطي بيها واحد دقة لكرش عبد الله) هادي لمباركة تاع لبنت جديدة ديالك خسارة غزلان تكون بنتك
عبد الله : (عرفو بلي عاق بيهوم) نزلنا ندويو راجل لراجل
اكسيل : ندويو راجل لراجل ؟ علاه نتا راجل ؟ (عاود ضربو) لاش تكدب ، ولكن عرفتي انا ماجبتكش هنا على حساب سناء راكوم مواتيين معا بعضياتكوم
عبد الله : (كيتوجع) او علاش جبتيني
اكسيل : جيتك على حساب ديك سيدة لي تعرضتي ليها لبارح ديك سيدة لي كنتي كتسلخها فهاد لعوام كاملين عندك 17 رعام تاع زواج كلا نهار بسلخة على هاد لحساب خاصني نصفيهوم ليك ، ولكن الى صفيتهوم ليك مغنقدش نفدي دقتي تاع لغالية وياسمين انا عندي حانوت او كنموت على لحسابات ولكن مكنحملش لكريدي (هز بغا اضربو سها حبسو لحاج)
لحاج : هدا هدا تعدو لا اولدي ، الضلم ميبغيه لا ربي لعبدو حشومة دير فسيد هاكدا او تهز باغي ضربو
عبد الله : سمع لباك عندو لحق هادا سميتو اختطاف ، نقدر ندعيك عليه او نغرقك فلحبس على حساب هدشي
اكسيل : ويلى مسكتيناش غتولي سميتو اغت’صاب
لحاج : عطيه فرصة اولدي عطيه
اكسيل : كنت غنسا ، سمح ليا انسيبي شحال هادي محرما شي حد تا نسيت طريقة ولكن جاب الله لحاج معايا فكرني ، نتا أستاذ ياك تاع اشمن مادة
عبد الله : (عرفو ناوي على شي حاجة مهياش) ل.لعربية
اكسيل : احسن حاجة كتقري تا انا كتعجبني اللغة لعربية خصوصا الشعر تا قولي شي نويطة
عبد الله : لأشمن شاعر
اكسيل : هاني نسهل عليك عطيني غي من تاع نزار قباني
عبد الله : محافضهومش
اكسيل : (عطاه جوج دقات لكرش قاطع فيه النفس) محافضش او دافع الجبهة ، ها حنا انسهلو عليك قولنا غا شي نويطة من تاع الشاعر بربرة
عبد الله : (تجنن) شعرفني انا بهاد بربرة انا استاذ تاع لماط
اكسيل : (بدا كيضرب فيه بلخشبة) او ملي استاد تاع لماط آش قرب جدك لعربية قلقتي لينا الشاعر بربرة ديالنا
لحاج : داك الشاعر وشحال زين كان كيعجبني عندو داك لبيت شعري ، ” يقول الشاعر بربرة لا تخرى تحت الشجرة ، ولا تمسح بلحجرة كلا توسع لقرقرة” مشا الشعر معا ناس زمان إيه اليام
اكسيل : غنهنيوك ليومة اسي عبد الله من لقرقة غا تهنا ، بما انك استاد تاع لماط جي نسولك خصوصا انو تخصص ديالك *تزلال جدر اثنان* علاما قالو لعالم فيه سبع ملاير دلبشار الى درنا لعيالات ربعة دلملاين حسب ليا …
عبد الله : هدا هدا شمن لعالم بسط خليني نمشي
اكسيل : سامحاس هانتا آسيدي قالو لمغريب فيه 40 مليون دلباشار نديرو نسا 25 عمليون راني كنعطيك ارقام بساط ، عطيني شحال من وحدة عزبة فلمغريب
عبد الله : (عرف هادي اللخرة ليه يديه ضروه بتعلاق اما كرشو او كمارتو مندويش عليهوم كاملين زرقين او عامرين دمايات) طلقني الله احفضك شعرفني فلعزبات
اكسيل : (قطع لحبل مخليه طايح لأرض ، هبط عندو شادو من شعرو) عندك لحق اشعرف واحد بحالك بلعزبات او بنات الناس باركة عليك غا طحبات لي معاشر لخانزين لي بحالك مولفين غا بوخرار ، آه او ديك لمرا لي كل مرة تصدعها او مباغيش تعطيها تيساع نسيق ليك لخبار ضرتي بيها ولا عمرتي درب فاش ساكنة غنقطع لجدك هاد سانتيم او نص لي عندك (زير على شعرو متبسم ليه) آه قبل منسا بصحتك شياطة ديالي جيتو معا بعضياتكوم ، لحاج يالاه
لحاج : واخة
خرج هو ولحاج من داك ديپو او مشاو لسبيطار عند مجد لقاوه فايق او كيحاول اعكز على لكوافوز اينوض من لفراش تا زلق او طاح لأرض
اكسيل : (مشا عندو كيجري ملي شافو طاح لأرض) مجد راك بيخير
مجد : (كان باه كيحاول اهزو يحطو فوق لبياص ، نار يديه بجهد) متعاونيش غنوض راسي
اكسيل : (حس بلمواس كيشرݣو فقلبو ملي شاف ولدو كيعافر اينوض ولكن مقادش)
مجد : (كان كيحاول تا عيا او تعصب وبدا كيضرب فرجليه او هو كيبكي) لاش صالحين لاش
اكسيل : (كان فلول كيقول اخليه شوي غيتهدن سعا عاد مزاد جعر او بدا كيضرب فرجليها بجهد تا جا طبيب دق ليه الشوكة باش اتهدن ، او هزوه فوق لبياص من جديد)
طبيب : كنضن بلي ولدك باقي مقاد اتقبل بلي تشلل او هدشي غيأتر عليه تا فشفاء ديالو حيت لحالة النفسية مهمة لمريض فهاد فحالة
اكسيل : وشنو لمعمول دبا
طبيب : ليوم غيرجع لدار من لأفضل تشوفو ليه شي طبيب نفساني اعاونو
اكسيل : واخ
لحاج : (خرج طبيب من عندهوم او مشا هو طبطب على كتف ولدو) دبا يبرا او يرجع كيف لول او حسن ݣاع غا مديرش نتا فبالك او صبر راك عارفة ماشي ساهل عليه هادشي مناش كيدوز
اكسيل : ايكون خير غنمشي نعمر لوراق باش اخرج
خرج من لبيت أو هبط لتحت كيقاد لوراق باش اخرج مجد تا سالاهوم او بغا يرجع لبيت تا لقا لحاج واقف معا لبوليس
لحاج : مشا غا لهنا وغيرجع هاهو جا اكسيل ولدي لبوليس بغاوك
اكسيل : شحب لخاطر آسيدي
أيمن : سي إكسيل خاصك تفضل معانا لقسم الشرطة عبد الله تاجي قدم شكاية فحقك
اكسيل : (مبرد) واخة لواليد عيط على دراري جود او محسن ايجيو ايعاونوك
لحاج : غنسافط خوك الحقك
اكسيل : لا بلاش مغنتعطلش
ايمن : كنضن حسن ايجي عندك شي حد حيت أتعطل
اكسيل : (متسوقش ليه او زاد فحالو معاهوم تا وصلو لكوميسارية دخلوه لبيت فاش كيحققو او ݣلس أيمن مقابل معاه)
ايمن : (هو لمسؤول على لقضية) سي إكسيل نتا عارف علاش جبناك لهنا ياك ؟
اكسيل : كي غندير نعرف
ايمن : عبد الله تاجي رفع عليك دعوة تاع لخطف او ضرب
اكسيل : بصح ؟ عندو شي دليل على أنني انا لي ضربتو ؟
ايمن : عندك شي حجة لغياب كدل بلي كنتي هاد صباح فشي قنة او ماشي معا عبد الله
اكسيل : معلوم عندي يمكن ليكوم تحققو من لكمرة تاع لڤيلة لي عندي مشيت ليها انا ولوليد بقينا فيها تا مشينا لسبيطار
ايمن : فنضرك شنو لي اخليه يرفع عليك دعوة غا هاكداك او بلأخص انك عݣوز بنتو او حتى راجل ختو لغالية
اكسيل : كنضن هاد السؤال هو لي غاص اجاوب عليه اولا ، الى مبقاش عندك مضيف انا غنمشي
ايمن : ݣلس باقي مساليناش لغالية مرتك ياك
اكسيل : علاما كنعرف واه
ايمن : واش يمكن ليك تفسر ليا سبب اختلاف كتبتها على خوتها ؟
اكسيل : هادشي ليه علاقة بلقضية علاش جبتوني تاع لخطف او ضرب ؟
ايمن : لغالية خت الضحية يعني خاصنا نعرفو لمعلومات
اكسيل : معند ديك لمعلومة باش تفيدكوم بلعكس تقدر تلفكوم حيت تخلاط فلحوايج كيضر فلمعدة اشاف
ايمن : شنو نفهم من هضرتك زعما كتحذرني ولا كيفاش
اكسيل : (شاف فيه مبتاسم) تأ تأ علاش غنحضرك نتا كبير عارف شنو كدير وشنو باغي انا مشغليش فيك
أيمن : (باقا حاضيه كفاش كان خارج كيتمشا بالنخوة ، واخة جبد ليه لغالية مالقا تا حاجة تحركات فيه) عرفتي الغالية مورآش تخباي ، ولكن هاحنا انشوفو واش غيبقا حاميك كتر
اكسيل : (ملي خرج لبرا هز طيليفونو او صونا لواحد النمرة) حيضي معا أيمن لمرق طواليط هي لخرة الى دخل ليها بغيت نعرف
#عند ياسمين#
كانت فطريقها عند مها تشوفها تا بانت ليها واقفة معا أيوب قدام لباب ، هبطات من طاكسي كتمشا جهتهوم لابسة سلوپيط معا توني بيض طالقة شعرها او دايرة نضاضر كوحل
مريم : لاش جيتي لهنا ؟
أيوب : جيت غا نوصل ليك هاد لوراق باش تسنيهوم
مريم : واخ
ياسمين : لوليدة
مريم : (تلفات شوي ملي شافتها) ياسمين جيتي
أيوب : (ضار شاف فياسمين بفضول موسع عينيه شوي كون مكانتش مريم قدامو كون قال مريم هادي ملي كانت مراهقة)
ياسمين : شكون نتا ؟
أيوب : انا أيوب لمحامي تاع ماماك
ياسمين : متشرفين (هبطات نضاضرها شوي لتحت شايفة فيه) لمحامي ديالنا مزوج ؟
مريم : (قرصاتها من لور) هنينا ، يمكن ليك تمشي دبا غتكون عندك لخدمة بزاف
أيوب : خليتكوم على خير
مريم : (ملي مشا زدحات ياسمين لضهر) شدوك لأسئلة
ياسمين : آي انا بغيت غا نعرف واش ادخلي ضرة ولا تزوجي عادي
مريم : شكتخربقي
ياسمين : غا ديري معارفاش ايا لغدر امريم مدرتي فين طلقي تا جبتي لخطاب ولكن معليش كيستاهل شوف شوف لمشية
مريم : زيدي زيدي باركة من لهبال ديالك
ياسمين : مالي على لهبال قلت شي عيب اندير ليك لعرس متخافيش او نحضر فيه تا خوالك او طسيلتك
مريم : تحضريهوم فݣنازتي منعرف
ياسمين : ايمتى عندك لجلسة تاع لمحكمة ؟
مريم : تنين الجاية
ياسمين : مزيان انا غنمشي دبا
مريم : يالاه جيتي
ياسمين : كنت راجعة من لحانوت او قلت ندوز او صاف خاصني نرجع لدار
مريم : كي بقا لوسك ؟
ياسمين : ليوم ايجيبوه لدار عاد انشوفو
مريم : مزيان الله ايجيب شيفا
ياسمين : (سلمات عليها او رجعات لدار لاقية مجد جابوه من سبيطار او داوه لبيتو فطريقها لبستها دازت على لبيرو تاع اكسيل) عمي اكسيل
اكسيل : لباس عليك ؟ كي غادة لخدمة ؟
ياسمين : لبارح ستفنا السلعة جديدة
اكسيل : مزيان مبغا تقولي والو على حساب غزلان ؟
ياسمين : معندي منقول عاد جاني حاجة عادية اقدر متكونش غا غزلان لي عندو راه مكترهوم
اكسيل : فين وصلات ماماك
ياسمين : اول جلسة تاع لمحكمة عندها تنين
اكسيل : مزيان ياكما محتاجة شي حاجة ؟
ياسمين : لا لمحامي لاش سيفطينا قال بلي غيتكلف بكولشي
اكسيل : مزيان ، دويتي معا عمتك هاد ليامات ؟
ياسمين : دويت معاها لبارح صونات تسول على مجد او سولات فيك تا نتا
اكسيل : الى عودات دوات متقوليش ليها سولت
ياسمين : كون هاني
اكسيل : سيري دبا ترتاحي
ياسمين : واخ (خرجات من لمكتب ديالو او مشات داخلة لبيتها)
جود : (مدارش ليها تا فين تسد لباب مزيان تا كالاها معا لحيط كيبوس فيها)
ياسمين : (غفلها بلبوسان او غا حكم فمها مابغاش اطلقو ، قطع فيها ولد لحرام نفس تا عضاتو فلسانو عاد بعد عليها شوي)
جود : (كان غا بشورط او شعرو فازݣ حيت يالاه دوش ، خرج لسانو كيقيس فين عضاتو) واش جهلتي
ياسمين : نتا لي واش مكاليني معا لحيط او كتبوس فيا بلى عليم
جود : هانتي قلتيها غا بسناك معضيناكش من صباح ونا كنصوني عليك تعطلتي دوشت جدك جوج مرات
ياسمين : سرك هبط نشوف لسانك هبط
جود : (تحنا عندها مخرج لسانو كيوريه ليها)
ياسمين : شي باس مكاين عندك (دارت صبعها بان شورط او لحم او جراتو عندها شاداه من لسانو)
جود : (ماشي من لعاݣزين دار يديه على طغمتها هازها لعندو او مضور رجليها على خصرو)
ياسمين : (دورات يديها على عنقو مقرباه ليها كتر)
جود : (وصلها لفوطويات او ݣلس مݣلسها فوق او يديه كيحيدو ليها فحوايجها ، فحين فمو حكم صدرها)
ياسمين : (بانو ليها لباريزات ديالو ، مدات يديها شادة ليه شعر راسو من لور محاولة تدوي عادي) غتسافر ليوم ؟
جود : (تكاها لأرض كيبوس ليها فكرشها) تمنية خاصني نكون تما ميصلاحش ليك تمشي معايا ؟
ياسمين : لا
جود : (رجع لفمها كيبوس فيه) غي واحد سمانة او رجعي ؟ ولا تا غي يوماين ؟
ياسمين : ميعدالش ليا
جود : (حيد متبقا من حوايجو او قلب لوضعية رجع هو لي متكي لتحت او هي ݣلسة فوقو) ايوا عوضيني على لأيام
ياسمين : لاسورانس انا باش نعوضك
#عند صباح#
محسن : غدا انمشي نجيب حوايجك لهنا
صباح : غا حوايجي حوايجك نتا لا ؟
محسن : مكنضنش انا واش غنݣلس هنا
صباح : (شدات ليه يديه) جيبهوم او بقا معايا هنا عافاك راك عارف منقدرش نخليه بابا وخويا فهاد لوقت او عاود منقدرش نخليك نتا
محسن : (شد خصلة من شعرها كيلعب فيها) خاصني لمقابل تاع ݣلاسي هنا اولا ؟
صباح : (فهمات قصدو شي لي خلى حناكها اتزنݣو شوي) ماسخ لاخر
محسن : (جارها لعندو) دبا ولينا ماسخين غا حيت قلنا نشطو معاك شوي هاد ليلة
صباح : مغتنشط لا ليوم لا غدا لا بعدو هاد خمسيام كونجي لراجلي لعزيز
محسن : ديك سلݣوكة مكتجي غا فلأوقات لمهمة
صباح : زهرك
محسن : مصونيتيش على مك تسولي فيها
صباح : عندها بنتها تسول فيها ولا تݣلس انا مالي
محسن : حشومة كتبقا ماماك واخة صدماتنا صدقات عندي بنت خويا قدي فلعمر
صباح : خوك لي شايط عليه تبو تقبا لي بانت ليه مكيقيلهاش
محسن : هاداك راه واحد لمكبوت مامنو جوج
صباح : جاب ليه وحدة بحالو سلاݣط كيواتيو بعضياتهوم ، خلينا مندويوش فيهوم عيفت دنوبهوم ، أجي هاه ياكما تا نتا شابه خوك بعدا وفايت خاشيه فشي تقبة ؟
محسن : الله قداش قلتيها مشتيش ترعيدة لي كانت شداتني معاك اول مرة حالة شي واحد فايت تخشى فشي تقبة ؟ زيد عليها باك راه فلاني مزياني او قلب فضواسا كون لقاني كنت معا شي بنت والله منحلم نتزوج بيك ، تا خوتك كون كانو فايتين دارو شي حاجة والله ميزوجهوم
صباح : زعما ؟ ديك جرانة كانت كتبان ليا مدوزة
محسن : شمدوزة هاديك راها دايو الشنعة باطل هههههه او واحد باك هو من شروط لي كان شرط عليا نكون بنت بغيت نقول زعما باقي مدرت ، خلاها نزار سبيتي ديتيني بميكتي
صباح : ههههههههه عندك زهر داك لڤيديو تاع لخيط منزلش فلوقت لي كنا انتزوجو ايما اتبقا لواليد جربو فيك ايشوفك واش عويتقة ولا لا (نفاجرات بضحك) ههههههه وع كنتخايلها امحسن
محسن : (خشا راسو فعنقها) حمد الله على لطف الله
صباح : قالك واحد سيد بلي داك لخيط تاع تتقاف ههه
محسن : ديك سيدة كلماتها او لاخر كتر منها شنو زعمة لكوا يصغر الراس ولا كيغلض لعنق
صباح : حسيت براسي صغار نضاضر بداو كيطيحو ليا هههههه
محسن : الى صغار غا راس هانية
صباح : نتا خلاص عندك كولشي يصغار الى مسعودة و زينة وزاينة
محسن : مسعودة عرفتها طغمتك ولكن زينة و زاينة ، لبزولة ليسرية لي زينة وليمنية زاينة ؟
صباح : الا ديمة متلفهوم زينة هي ليمنية حيت صغيرة شوي اما زاينة هي ليسرية
محسن : لعفو كولشي مسمياه بقات ليك غا تقبة
صباح : شكون قالك ممسمياهاش
محسن : وايلي تا قولي شمسمياهوم ؟
صباح : كنفكر نسميها حنان
محسن : ههههههه ياربي لعفو
صباح : او مالك كضحك شكون بحالك فيا حنان او مسعودة او زينة وزاينة متحتاجش ݣاع تقلب على شي سمية من برة أصلن الله يعميها ليك تقلب
محسن : جمعي رجليك ليضرب لبرد حنان او تهزي نمشيو نعسو لتصدقي مسميالي قشاوشي نوضي
#عند جود#
بعد داك لماتش لي لعب معا ياسمين بقاو مغطين فداك داك لفوطوي شي فوق شي رجليهوم مشابكين او ياسمين حاطة راسها على صدرو وهو كيلعب فشعرها
ياسمين : عطيني طيليفونك
جود : (مدو ليها) هاكي
ياسمين : (هزات طيليفونو او دخلات ليوتيوبت سركل فيه شوي ) أجي جود شنو بان ليك ندير روتيني لياومي
جود : غادا غا ضحكي فينا لبشار ، او زيدون مكيتوفروش فيك شروط
ياسمين : شمن شروط ؟
جود : لول خاصاك هردوزية الالة ولا تلاجة پرو ماكس ملي تمشاي تبداي تبونباي
ياسمين : يمكن نبين فورمتي زوينة واخة مكبيراش بزاف
جود : خاصك پيجامات واسعين بلى سليپ من لتحت او ليبات مشبكين
ياسمين : ساهل حال هادو
جود : او وجهك ايكون قاصح باش تقبلي لانتقاد او شوهة
ياسمين : اندير لكمامة لكمارتي ونا كنموت فشوهة ولانتقادات
جود : صاف ملي لقيتي لحل لهاد تلاتة تاع شوروط بقالك غا شرط لخر او لأهم هو ايكون راجلك ديوتي ملقب بحسحوس باش اعمل ليك لمونطاج لڤيديووات
ياسمين : هههههههه هادي صعيبة شوية
جود : شوفي وكان
ياسمين : رباط فيها بنات زوينين ؟
جود : لا
ياسمين : حققتي فيهوم شوفة أبعدا
جود : قصدت مشتهومش باش نقولك راه خايبين او هادي حاجة مؤكدة فين غيبانو قدامك ولا يديرو منك تا صبع درجليك
ياسمين : (بدات كتفرنس عاجبها لحال)
جود : “مدوز سطاج عند لواليد او تجي تبغي تنكديها عليا ابدا”
ياسمين : احقا جبتيلي ديك 1000 درهم ديالي
جود : شمن الف درهم ؟
ياسمين : ياك قلتي ليا الى كميت بكية وحدة فعشرين يوم غتعطيني الف درهم اوا كحبها
جود : ونتي كميتي غا بكية فعشرين يوم ؟
ياسمين : واه او شيط منها جوج
جود : تا حلفي
ياسمين : مكتيقنيش ولا ؟
جود : لا لا غا ضاحك معاك راني خليتها ليك فلمجر تاع لكوافوز
اكسيل : (ملي سالا لهضرة معا ياسمين هبط لكوزينة لاقي لحاجة مطيبة لعشا نقص لمجد او طلع عندو لبيت ، دق عليه قبل كيدخل عندو لاقيه فايق) جبت ليك عشاك
مجد : مفياش جوع
اكسيل : مشا حط لپلاطو على رجليه) لا غتاكل راك مكليتو والو حونما سيروم يعلم الله شغيوقع فيك
مجد : شغيوقع ݣاع كتر من هادشي لي واقع ليا
اكسيل : (شد ليه يديه بحنية) متقولش هاكدا اولدي هادي غا محنة وغدوز فإنك توقف على رجليك مرة خرى ، ربي ملي كيبغي لعباد ديالو كيبتليهوم باش اعرف لي غيصبر ولي لا ، نتا باقي صغير قانك دير لعملية او توقف على رجليك مرة خرى
مجد : مغنعاودش نمشي على رجلي غنبقا هاكدا معاق حياتي حاملة تا طواليط منقدش نمشي ليها ، تا ديك بعملية مغتنجحش او هانتا غتشوف
اكسيل : علاش كتقول هكدا باش شفتيها مغتنجحش بنتا ، علاش متشاءم تال هاد الدرجة ؟ علاش فاقد لأمل فراسك
مجد : حيت ماباغيش نزيد نتصدم ماباغيش فكل مرة تقول ليوم نوض غدا نوض تا نلقا راسي شرفت او تا طواليط مقادش نوض ليها بوحدي حوايجي ومقادش نلبسهوم
اكسيل : ونا شكندير فشغلي أدوي لحاجة لي تقالت عليك خفافة عليا ، لحاجة لي مقديتيش ديرها انا نديرها ليك غا متبقاش تفكر بهاد طريقة هادشي لي طالب منك (وقف جبد واحد طيليفون من جيبو وعطاه لي) هاك هاد طيليفون خدم بيه بما انو طيليفونك تهرس ، او تعشا منبغيش ملي نرجع عند لماعن نلقاهوم عامرين
مجد : (خرج اكسيل من عندو مخليه مخنوق بين ليلة ونهار لقا راسو عاجز مقاد ايدير تا حاجة ، محاسش بتاتا برجليه ولا قاد استعملهوم ، عيا من دابا او لاقي راسو ولا عالة على باه او خوتو)
جود : (خلا ياسمين ناعسة ومشا عند مجد داخل عليه لاقيه باقي فايق) باقي منعستي اعشيري
مجد : باقي شتك لابس
جود : راجع لرباط سالا لكونجي (مشا جر لكرسي ݣالس حداه) فخبارك آخر لأخبار
مجد : شمن اخبار ؟
جود : غزلان بنت عبد الله
مجد : (بقا ساكت)
جود : كنتي عارف ؟
مجد : لا ولكن مجاتنيش شي حاجة عجب شحال من عام او هي معاه لباس ملي ولدو غا وحدة
جود : كنتي عارفها معاه ؟ وعلاش مقلتيهاش ؟
مجد : وعلاش مقلتيهاش نتا ملي عرفتي
جود : جاتني فضيحة نقول لشي حد لاقي لوليدة فلفراش معا واحد آخر واخة كانت ديك ساعة عاد طالقات هي ولوالدي ولكن صعيبة اعشيري
مجد : كانت كتخلط تا فاش كانت معا لواليد شحال دوات معاه آپيل ڤيديو وهي زبطة الله يغفر ليه ، لي بقا فيا هو خبينا على لواليد علأقل كون قلناها كون طالق هو وياها من شحال هادي او مبانش هو لخايب
جود : جدي او خوالي طاحت عليهوم لفضيحة ملي عرفو بنتهوم خارجة طريق ، لي بقا فيا كون غا كانت كتحشم او تعرف بلفضيحة لي دارت لاهي لا داك تامل عاد مزايدين فيه ، حلف ميطلق خالتي مريم او يعلم الله عقلو فاش كيفكر
مجد : داك النوع كيعجبو ضدد غيبقا معكس تا ياخد دراري او يخرجها بلى ريال
جود : لي فجهدو يديرو لقاضي ديالنا او لمحامي ديالنا معندو ميصور
مجد : باقي مغيرجعوك تخدم فكازا ؟
جود : هاد ساعة باقي مبان الى كان عندي شي زهر تكون شي قضية يحتاجوني فيها وصافي من هاكدا خاص تا نلقا لي بغا ايدير تبادل بين كازا ورباط
مجد : شداك نتا من لول لتما
جود : دودة اعشيري دودة وزيد كنت منوضها معا ياسمين قلت نبعد
مجد : حسن ، فين إيهاب مبانش ليا
جود : رجع لسپانيا سالات ليه لعطلة ، نخليك انا دبا غيخصني نمشي تهلا فراسك بيناتنا طيليفون
مجد : ان شاء الله
جود : (خرج من بيت مجد او مشا لبيتو لاقي ياسمين غارقة فنعاسها مشا كيحرك فيها) نوضي ياسمين
ياسمين : (حلات عينيها مغوبشة) شباغي لاش نفيقني
جود : غادي نسافر متنوضي تقولي لينا بسلامة متنوضي تقولي انوجد ليك فطورك اراجلي لعزيز قبل متمشي
ياسمين : واش تفرجتي ليا فشي فيلم تاع شي مدلولة او جاي باغي طبقو فيا نوض تجمع عليا قبل متصدقك نتا لي موجد ليا لفطور اراجلي لعزيز
جود : معندش جدك معا رمنسية غا شي بوسة شنو زعما نتي والو
ياسمين : شداتك لحالة حالة هههههه (قربات عندو باستو) يالاه تلاح
جود : هاني غادي
#عند اكسيل#
بقا ليل كامل فائق توادع معا جود او رجع لبيتو كيشرب فهوتو او كيلعب فطيليفونو تا عيا هو يصوني على لغالية
فؤاد : الو
اكسيل : (غوبش) شكون نتا ؟
فؤاد : انا فؤاد
اكسيل : قصدت باشمن صفة تجاوب على طيليفون مرتي ، عطيها طيليفون
فؤاد : ميعدالش تجاوبك دبا مشغولة ملي تسالي أو نقولها تصوني عليك
اكسيل : (قطع عليه فؤاد مخليه كيغلي بلأعصاب)
لغالية : (كانت فلبيت معا كوتر) مشتيش طيليفوني ؟
كوتر : لا يمكن تكوني نسيتيه فقاعة لاجتماع
لغالية : على زهر (خرجات كتجري تا وصلات لقاعة فاش كارو لإجتماع او بدات كتقلب على طيليفونها والو ملقاتوش هي تدوي معا سكرطيرة لي كانت انݣليزية) ملقيتوش شي طيليفون هنا ملي كنتو كتجمعو ؟
سكرطيرة : لا مسيو فؤاد هز طيليفونك معاه حيت نسيتيه
لغالية : فين هو دبا
سكرطيرة : يمكن فبيتو
لغالية : (مشات لبيت فؤاد مترددة دقات عليه او بدات كتسناه تا حل ليها)
فؤاد : (حل لباب او هو لابس غا شورط بلا توني حيت يالاه دوش او كان كيسحاب ليه بلي لماكلة لي جلب لي وصلاتو مادماش واش لغالية) لغالية ؟
لغالية : (ملي هزات عينيها او ضربات فيه غا بشورط قلبات عينيها لأرض ) مسيو فؤاد جيت ناخد طيليفون ديالي نسيتو فلقاعة او قالولي بلي خديتيه
فؤاد : آه خفتهوم اوضروه داكشي علاش خديتو
لغالية : عطيه ليا عافاك
فؤاد : دخلي خوديه انا ممساليش عندي شي خدمة
لغالية : ندخل ناخدو ؟
فؤاد : مغناكلكش (دخل لداخل لبس عليه واحد توني)
لغالية : سي فؤاد ملي تسالي خدمتك وصل ليا طيليفوني مغندخلش عندك
فؤاد : (حط دوك لوراق او خرج عندها عاطيها طيليفونها معا شي ملف) علاش بسلامة ؟
لغالية : بان ليا نسيتي انا مرأة مزوجة او بلا تا زواج مزيان لوقر بين راجل او لمرا
فؤاد : (بتاسم على هضرتها كيعجبوه لعيالات لي حيرسمو لحدود ديالهوم) ها طيليفونك او هاد لملفات بغيتك تراجعيهوم مزيان
لغالية : (هامها غا طيليفونها ملي شافت لقات اكسيل صونا عليها ولكن لاپيل متجاوبة عليها) واش صونا شي حد عليا ؟
فؤاد : صونا راجلك فلول ميسحابليش طيليفونك او دازت لي لخط بلغلاط
لغالية : (معجبهاش لحال حيت جاوب اكسيل) نتمنا لمرة جاية ميسحابش ليك
فؤاد : (مشات لغالية بحالها مخلياه تابعها بعينيه نهار على نهار كيلقا راسو طايح فيها او فشخصيتها)
لغالية : (صونات على اكسيل فلبلاصة ولكن مجاوبها تال تعييطة تانية عاد جاوبها)
اكسيل : الو
لغالية : (توحشات صوتو) الو اكسيل ص.صونيتي عليا
اكسيل : صونيت ليك او جاوبني سي لمودير ديالك
لغالية : (عرفات من صوتو بلي كاعي او تا من طريقة تاع هضرتو باينة فيه بلي مقلق عليها تال لحد) بلهبال ديالي نسيت طيليفوني فلقاعة تاع لاجتماع او لقاه لمودير ولا منعرف شكون لقاه
اكسيل : شباغة دبا ؟
لغالية : (دوات بحنان) توحشتك نتا متوحشتينيش
اكسيل : شنو خليتي فيا نتوحش فيك
لغالية : متقولش بحال هاكدا عافاك نتا عارفني كنبغيك او منسخاش بيه ماشي لخاطري مشيت
اكسيل : شوفي هادي آخر هضرة عندي ليك الغالية غنعطيك سيمانة رجعتي فيها تبارك الله مرجعتيش غا بلاما تعاودي تسولي فيا
لغالية : علاش دبا كدير ليا هاكدا والله تا حرام عليك ديرلي هاكدا
اكسيل : قلت ليك لي عندي بسلامة
لغالية : ستنا بغيت نقول ليك واحد لحاجة
اكسيل : ملي ترجعي قوليها
لغالية : (قطع عليها لاپيل) ݣلس تسمعني غا شنو بغيت نقولك يا ناري
كوتر : تي معامن داوية ؟ شتك وليتي تدوي بينك او بين راسك
لغالية : أجي نتيا جينا لميريكان يوماين هادي مخرجنا تا نشوفو زناقيهوم
كوتر : داكشي علاش لقيتيني جاية عندك ناس كيحرݣو باش ايجيو لهنا حنا جايين او ممساريينش او ياختي شت شي زين زعورية او زروقية لعينين ، او سورية ولحروشية او تجبيت لعينين زين ينطح زين
لغالية : شتها تحلات ليك ياكما ناوية تبدلي موراد اصݣعة
كوتر : علاش لا الى لقيت شي زين أختي باقي مدرت لعقد
لغالية : نتي هبيلة
كوتر : هانتي تشوفي الزين او يحوالو ليك لعينين
لغالية : بنتلك انا واقفة عليهوم راني الحبيبة واخة لحروشية وزين او لعينين ملونين نكمل ولا براكة
كوتر : باركة يا خيتي باركة راه تي لي مزوجة عقبان ليا ، نخرجو ولكن واش منتوضروش ؟
لغالية : لي عندو فمو ميتلف ، أجي نلقاو لكبال كيتباع عندهوم ؟
كوتر : الله وعلم شحاف عليك عليه لمغريب كامل كبال متفكرتيه تلهنا
لغالية : نقشتي طاحتلي عليه يغيت ناكلو آح ويلا كان مشوي او مغطوس فلملحة ولما سخون
كوتر : جمعي جمعي فمك ريوݣك طاحو درتي عليا كي لموحمة
لغالية : زيد زيدي نمشيو نتساراو
خرجات هي وكوتر بوحدهوم كيضورو تما تا طابو رجليهومو
كوتر : فيا جوع
لغالية : مبان بيا تا واحد كيبيع درا ولا لماكلة حلال
كوتر : شغنديرو دبا ؟
لغالية : ساهلة انمشيو لشي سناك كي ناس او ناكلو
كوتر : عندك صح واخة لحلوف حرام ولكن لضرورة احكام
لغالية : خوديليك شي بيرة معاه تي تجمعي عليا شمن حرام او لضرورة احكام ، غنمشيو نطلبو ماكلة نباتية
كوتر : هاه ولكن واش بغيتينا ناكلو لقزبور او زط لخبز كي لماعز شمن ماكلة كاينة بلى لحم
لغالية : نتي لحم هو لماكلة او لمقرونية او شلايض او لخضرة معجبكش هادشي ناخدو لحوت
كوتر : عاد تفكرت ههههه يالله يالاه ندخلو ناكلو (دخلو لداك ريسطو طلبو ليهوم لعشا وبداو كياكلو او يتجمعو ، تا بدا كيصوني ليها طيليفون) الو فؤاد
فؤاد : الو فينكوم ؟
كوتر : خرجنا لبرا نضورو شوي او هاحنا كنتعشاو دبا
فؤاد : شوفو شحال فلوقت دبا ايمتا غترجعو او باش اترجعو ؟ او غدا تابعنا جتماع معا نبوري
كوتر : حنا غا غنتعشاو نشوفو شي طاكسي ترضنا
فؤاد : ملي تعشاو صوتية عليا نجي نرضكوم
كوتر : واخة
لغالية : علاش صونا عليك ؟
كوتر : قالك ملي تسالي لعشا اوصلنا حيت تعطل لحال او ميخفاش عليك الى تعرض لينا شي حد آجا ميفكنا
لغالية : معرفتيش ايمتا انساليو لخدمة هنا ؟
كوتر : حاليا كنقولو واحد شهراين ولكن على حساب لخدمة علاش ؟
لغالية : معرفتش مبغاش نطول بزاف او ميعدالش ليا تا نمشي فلويكاند
كوتر : صبري شهراين ولا تلتشهور دغيا غدوز
لغالية : (خلصو داكشي لي كلاو او خرجو لبرا كيتسناو فؤاد تا جا وصلهوم لوطيل فاش ݣالسين ، طلعات هي لبيتها نيشن نعسات)
#عند عبد الله #
كان فدار سناء مغط فلفراش او كيتفرج فتلفازة حالتو حالة كاملة واكل لعصا وزرق
سناء : (جات عندو هازة واحد لپلاطو فيه لماكلة) هاك تاكل غيكون فيك الجوع ، شري دوا أبعدا
عبد الله : (شد ليها يديها) لهلا يخطيك عليا
سناء : (مدات يديها لوجهو) الله اربي لحبيب شدار فيك داك لمصعور ، دعيتيه ؟
عبد الله : دعيتو ولكن منعرف كي دار ليها عندو لحجة بعينية شتو فلكمرة دخل لواحد لڤيلة هو وباه او ݣلسو فيها شحال عاد خرجو
سناء : يعلم الله شمن تقوليبة دار ولكن علاش ضربك زعما حيت عرفنا كنا معا بعضياتنا ؟
عبد الله : ضربتي على حساب ديك لكلبة تاع مريم حيت تعرضت ليها
سناء : ونتا شبغيتي عندها ياك غا طلاق لي بغات طلقها او خلينا نعيشو بجوج
عبد الله : نطلقها باش تدي ليا ولدي هاديك لي متكون ليها
سناء : او شنو لمعمول دبا
عبد الله : غنشوف ليها شي حاجة لي تخليها تمشي او تخلي دراري شنو درتي نتي معا باك او خوتك ماقالو ليك والو ؟
سناء : طلع ليهوم زعاف او ملقاو ميقولوا ليا ومشاو بحالهوم مي ملي دويت معاها قالت ليا با باقي طالع ليه دم او ناباغيش أدوي معايا
عبد الله : ماديريش فبالك ملي نتزوجو غيتصالح معاك ، فين هي غزلان ؟
سناء : راها سادة عليها فبيتها
عبد الله : كلات أبعدا ؟
سناء : دخلت ليها لماكلة لداخل
غزلان : (كانت فبيتها متكية مابغاتش تخرج تݣلس معاهوم شافت تعيات هي تنوض لماريو ديالها جبدات منو واحد لقبية واسعة بلحمر او سروال تاع لكيطمة كحل ، او دارت سبرديلة فوق راسها وخرجات من لبيت)
سناء : بنتي فين غادة
غزلان : مجوباتهاش
عبد الله : غزلان خارجة ابنتي ؟
غزلان : (وقفات فبلاصتها ملي سمعات منو ديك كلمة بنتي ضارت عندو او دوات بتردد شوي) حارجة نجري {خارجة نجري}
عبد الله : متعطليش برا ليل هادا نعطيك طونوبيلتي تمشي بيها ؟
غزلان : لا بلاث
عبد الله : (سمع لباب تحل او تسد عرفها اتكون خرجات)
سناء : (شدات ليه يديه) عطيها غا شوي تاع لوقت علاما تقبل بلي نتا باباها راه مساهلش عليها
عبد الله : عارف
غزلان : (ملي خرجات شدات ليها واحد الطاكسي او مشات لفيرمة تاع إكسيل خلصات مول طاكسي او مشات نقزات الصور جبهة لي مافيهاش لكاميرات او بدات كتسلت تا وصلات لتحت لبالكو دبيت مجد وبدات كتشوف مناش طلع ليه)
ياسمين : متأكدة باغة تنقزي لبالكو ؟
غزلان : (هزات عينيها لاقية ياسمين واقفة فلبالكو ديالها بكسوة تاع نعاس سميطات شادة لݣارو فيديها باغة تبدا لكميان فيه) حاثني نثوفو ضروري {خاصني نشوفو ضروري}
ياسمين : نلوح ليك شي حبل ولا نحل ليك لباب ؟
غزلان : لا اندوز من هنا {نقزات واحد النقزة او تعلقات فلحديد تاع لبالكو دمجد او دخلات عندو لاقياه متكي او مغمض عينيه ، قربات عندو بشوي ومشات تكات حداه مخشية فيه او دايرة راسها فوق صدرو)
مجد : (لي كان ناعس ضرباتو ملي حس بشي حاجة متقلة ليه فوق صدرو او ريحة مغريباش عليه طلعات معا نيفو) غزلان ؟
غزلان : (زيرات فتعناق ديالو شادة دموعها بزز)
مجد : شنو جاية ديري هنا ؟ شافك شي حد ؟ غزلان بعدي عافاك
غزلان : حليني هي ثوي هافاك لآحر مرة {خليني غا شوي عافاك لآخر مرة}
مجد : غزلان عافاك ماديريش بحال هاكدا وسيري هادشي لي كديري راه غلط
غزلان : (هزات فيه عينيها مطيحة دموعها قبل متنوض من حداه) انا هنرجع لتركيا غدا جيت هي نقولك بثلامة ، او ثمح ليا بثبابي وقع ليك هادثي {انا غنرجع لتركيا غدا جيت غي نقولك بسلامة ، او سمح ليا بسبابي وقع ليك هادشي}
مجد : (بقا غا ساكت مقدر ايقول ليها والو)
غزلان : (ملي شافتو ساكت قررات تمشي بحالها ولكن هاد لمرة خرجات من لبالكو او دازت لبالكو فين كاينة ياسمين)
ياسمين : (كانت كتخوي راسها كاس تاع لمناضة) تشربي ؟
غزلان : لا
ياسمين : على خاطرك
غزلان : مهتقولي والو ؟ {مغتقولي والو ؟}
ياسمين : بخصوصاش آش ؟
غزلان : بحثوث أنا ونثي حواتات {بخصوص أنا ونتي خواتات}
ياسمين : انا ونتي خواتات ؟ من اشمن ناحية كتعتابري ختي حيت صدقتي تا نتي كنتي حيوانة منوية فتب عبد الله ؟
غزلان : مبهاث نكونو حوت ؟ او نثاركك فباك ؟ انا مهنفرقكث عليه كيبقى باك كثر ماهو با {مبغاش نكونو خوت ؟ او نشاركك فباك ؟ انا مغنفرقكش عليه كيبقى باك كثر ماهو با }
ياسمين : ههههه هانتي خلينا نديرو واحد لبلان انا كان با 16 رعام ياك ايوا دبا نوبتك ايكون باك خوديه تا يموت سمحت ليك فيه ، معنديش مشكيل انك صدقتي ختي ولكن الى قلت بلي ختي يعني غنزيد نتربط بداك تامل اذن لا شكرا مابغاش
غزلان : هلاث مبغاث باك كيبان ضريف {علاش مبغاش باك كيبان ضريف }
ياسمين : هو ضريف انا لي خايبة ههههههه انا مسخوط لواليدين تصبحي على خير
غزلان : (مشات ياسمين تنعس او نقزات هي خارجة بحالها تا تزادحات معا محسن)
محسن : (كان راجع لدار بعدما سالا خدمتو) شنو كديري هنا ؟
غزلان : (بقات ساكتة)
محسن : (عرفها جات تشوف مجد) زيدي نوصلك لدار ليل هادا
غزلان : بلاث {بلاش}
محسن : زيدي زيدي نوصلك مغنخليش بنت خويا تمشي فهاد ليل بوحدها
غزلان : (جاتها فشكل ديك بنت خويا رابطة عائلية عمرها كانت عندها)
محسن : (ركبات معاه فطونوبيل او مشا وصلها تال فين ساكنة عاد رجع بحالو لدار)
لحاجة : على سلامتك ملي تفكرتي بلي راك مزوج او رجعتي لدار فهاد لوقت
محسن : “ساعة الله” باقة فايقة الحاجة سهير ممزيانش لصحتك
لحاجة : او لبنات هوما مزيانين فهاد ليل ؟
صباح : (كانت نازلة معا دروج) شمن بنات ؟
لحاجة : شوفي راجلك يعلم الله شكون هادي لي وصل فهاد نصاصة دليل
صباح : لحاجة سيري تنعسي ليل هادا بديتي كتخرفي (شدات ليد لمحسن او طلعو بجوج لبيتهوم)
محسن : وصلت غا غزلان لقيتها هنا يمكن جات تشوف مجد بتخبية
صباح : عارفة شتك دخل دوش راني وجدت ليك لحمام غتكون عييتي
محسن : تسخسخت والله ماساليت ديك طونوبيل فتصاييب تا قلت بناقص
صباح : (ملي دخل هو لحمام مشات هي جبدات ليه لپيجامة او لحوايج لي غيلبس)
محسن : (خرج من لحمام او لبس لحوايج لي جبدات ليه ، لاقيها هازة شي زيت او شي ݣريمات معاها)
صباح : جي تكا هنا ندلك ليك ضهرك
محسن : واخ (مشا تمغط فوق الناموسية غا بلبوكسور ديالو مخلي صباح دير شرع يديها فيه)
صباح : (طلعات فوقو كدلك ليه او فنفس لوقت كتعاود ليه تفاصيل نهارها كيف داز تا حسات بلحمو ترخا مابقاش مشدود ، هي تحنا عندو داوية جيهة ودنيه) ندلك ليك تايكة ؟
محسن : ههههههه خلي عليك تايكة لتصدقي مخورانا مافيك تيقة
صباح : (دوزات يديها تحتو باغة دوز لمعلم) ايوا صاف خليني ندلك لخضر
محسن : (شد ليها يديها ممخليهاش تقيسو) لا انا لا لخضر عندنا الجهد باغين نعسو
صباح : شوف اوكان اندلكو ليك يرتاح
محسن : كلاتك حنان ؟ خليني نعس راه صبع هو لخر مقادش نهزو
صباح : (كانت غا كضحك معاه ، تكات حداه مغطياه او مغطية راسها او جاراه عندها معنقاه او كطبطب على ضهرة) نعس نعس اولدي
محسن : (خاشي كمارتو فعنقها) ايمتا لحقت نكون ولدك آ
صباح : او مالك راه ملي كنتي نتا فكرش مك انا كنت كنتمشا ونعلف لخبز البعلوك
محسن : هههههه شارفة وبلا عقل
~~~~~~~~~~
ملي دخلات غزلان لدار لقات بلي عبد الله باقي فايق منعسش
عبد الله : جيتي ، تشطنت عليك فين تعطلتي ابنتي فهاد ليل
غزلان : كنت غا هنا
عبد الله : (كانو شوفاتو ليها عامرين حنية وشوق) قالت ليا ماماك بلي جمعتي حوايجك باش ترجعي لتركيا بصح ؟
غزلان : واه
عبد الله : (مد يديه شاد ليها يديها) متقديش تأجلي هاد لمشية ديالك ؟ راك عارفة يالاه عرفت بلي نتي بنتي او تانتي عرفتي بلي انا باك ، مكرهتش ندوزو شوي تاع لوقت معا بعضياتنا نعوضو بيه شوي دوك سنين لي تحرمنا فيهوم من بعضياتنا شنو قلتي ؟
غزلان : (بقات غا ساكتة داك لفراغ لي كان لداخل ديالها حسات بيه بدا كيعمر ، احساس لأبوة لي مكانتش كتعرفو قدات تحسبيه من هضرة عبد الله ، سنين هادي او هي كانت باغة تكون عندها أسرة كاملة ولكن ملي كملات لأسرة ديالها فقدات طرف من روحها او شخص عزيز عليها ، شي مرات كتقول كون غا بقيت فاقدة داك لاحساس تاع عندي أب ولكن علأقل يبقى معايا مجد ، ولكن فاش كتشوف باها كفاش كيحاول اتقرب منها او يقوي علاقتهوم كنحس براسها غارقة فلحنان او لحب لي كانت محتاجة)
عبد الله : عارف بلي ماشي ساهل عليك تقبليني كأب ليك بهاد لبساطة ولكن تيقي بيا غنوطدو هاد لعلاقة او نعوضو داكشي لي فات داكشي علاش بلاما تمشي دبا وبقاي معانا انا وماماك حيت محتاجينك
غزلان : وا واح {واخ}
عبد الله : الله يرضي عليك سيري دبا تنعسي غتكوني عييتي
غزلان : بونوي
رجعات لبيتها بعدما دوات معاه او مشات تكات نعسات كيما دار تا عبد الله براسو
سناء : (كان متكي حداها) دويتي معاها ؟
عبد الله : دويت معاها شوي اتزيد تبقا معانا كوني هانية
#بعد اسبوع#
كان ليوم تنين أول جلسة تاع لمحكمة عند مريم على وديت طلاق ، فاقت بكري وجدات راسها مخلية دراري معا ياسمين ، وصلات لمحكمة لاقية أيوب سابقها لتما
ايوب : جيتي ، بلاما توتري انا غندوي فبلاصتك كوني هانية
عبد الله : (كان جاي هو او لمحامي ديالو تا ضرب فمريم او أيوب واقفين بجوج دقق الشوفة فأيوب مصغر فيه عينيه ، وقبل تا ميقول شي حاجة كان لوقت تاع لمحاكمة وصل)
دخلو كاملين لداخل او بدات لمحاكمة أيوب كان قدم جميع تصاور او دلائل تاع لعنف في تعرضات ليه مريم مرفوق بحجج لي كتبث أنو عبد الله هو مول لفعلة ، فحين لمحامي تاع عبد الله حاول ما أمكن أنو ينفي تهم او فلأخير تأجل لحكم لجلسة خرى
مريم : (خرجات من لمحكمة وهي عيانة نفسيا بمعنى الكلمه)
عبد الله : مبروك عليك
مريم : مبروك عليا آش شكتقول ؟
عبد الله : مبروك عليك ملي عاودتي تلاقيتي بحبيب لقلب بعد هاد سنين كاملة كي داير أ أيوب بخير عليك
أيوب : (خنزر فيه ماباغيش يدوي ويصدق سالخو) باقي نتا هو نتا دون مستوى
عبد الله : هههههههه تا نتا باقي كيما نتا كتعجبك شياطة بحال مشحال هادي
مريم : (مكان فيها لي يسمع لهضرت حيت صافي تݣهمات بيها زادت او خلاتهوم شادة ليها طاكسي او رجعات لدار لاقية ياسمين تما طالبة پيتزا لدراري)
ياسمين : رجعتي كي دازت لمحكمة
مريم : لهلا يدي ليها شي مسلم غا تمارة ، باقة جلسة ولا جلسات خرين
ياسمين : ايكونو تا ميا لموهيم تفكي
يوسف : پيزا
ياسمين : هاك پيتزا هاك ، عبد الله
مريم : مالو
ياسمين : صدقات عندو بنت
مريم : وايلي
ياسمين : او كبر مني بتلتسنين او صرف ولكن خيسي على شكون مها
مريم : شي جارتنا ؟
ياسمين : لا ماين جود
مريم : (ضربات فخاضها شاهقة) ويل الشيطان هادو هوما فعايل بقات ليه غا عݣوزتك على قلت طحبات
ياسمين : هاديك طحبة پروفيسيون داكشي علاش لاسق فيها
مريم : ستغفرت الله العظيم انا غنمشي نعس حسن ليا
ياسمين : (جاوبات على طيليفونها لي كان كيصوني) الو
جود : الو راك مسالية ولا كتغداي ؟
ياسمين : لا راني غا ݣالسة
جود : رجعات مك كي دونات لجلسة
ياسمين : مزيان (كانو كيدويو منهنا من لهيه تا لقاو راسهوم جابدين دين) الى كان غا على ربي لي تحنا ليه كيسامحو غا هاكداك
جود : (آخر مرة كانت تاصلات بيه طبيب شرحات ليه بلي ياسمين عندها مغالطات كتيرة فدين شي لي كيخليها تنفر منو) واخة ربي غفور رحيم و لكن راه شديد لعقاب ، شي حاويج لواحد امكن يصلحهوم بلعبادة او حوايج لا
ياسمين : ياك كتقولو لي تاب صافي
جود : عرفتي راه صعيب لواحد ايتوب متلا واحد مكانش منضابك فصلا ديالو يعني هادا رتاكب ذنب بينو او بين لي خلقو الى تاب او كتر من لإستغفار او ضبط لوقت تاع صلاة ربي غيسامحو ، ولكن واحد لي كان كيتعدا على ناس هاداك راه واخة يصلي ولا منعرف آش إيدير خاص دوك ناس اسمحو ليه عاد ربي يغفر ليه ، او زيدون ماشي غالي صلى راه صلاتو دايزة كاين لي نهار كامل او هو كيزبلها وعاطيها لفاحشة او جاي اصلي او يطلب ربي يسمح ليه او غا كيوصل ليل كترجع حليمة اعادتها القديمة
ياسمين : ايوا ملي لواحد مضامنش بلي ايتغفر ليه او جهنام كيتسناه لاش تعدب راسو على شي حاجة مضامنهاش
جود : وراه داكشي علاش طريق لحرام ساهلة ولحلال صعيبة ، راه واخة نقول ليك بلي اقدر ميتغفروليكش شي حوايج واخة صليتي وصمتي ولكن راه داك شوي دلخير لي كيدير لواحد كيتصرف فيه
ياسمين : (كانت كتسنط لشنو كيقول ليها)
جود : (فاش كيلقا راسو كيتناقش معاها او هي كتسنط ليه كيحس بصيص أمل فيها) باقة مكملة علاياش تافقنا ولا لا ؟
ياسمين : علاياش تافقنا ؟
جود : بحال آخر مرة بكية فعشرين يوم ألف درهم
ياسمين : عاقلة
جود : او عاقلة بلي الى مدرتيهاش ممنوع تنزلي شي حاجة فلأنسطا ؟
ياسمين : (خسرات سيفتها) واه عاقلة
جود : جي درتي شي لايڤ لبارح ؟
ياسمين : لا
جود : متأكدة
ياسمين : غنكدب عليك ازماني
جود : (سيفط ليها لڤيديو ديالها لي سجل او هي دايرة لايڤ) لعراقية ديالي متشرفين كتفهمي شوي دارجة ديالنا ياك ؟
ياسمين : تأ الشهرة صعيبة
جود : قلت ميدار لي صعيبة
ياسمين : متقلقش لمرة جاية نطلعك معايا فلايڤ
جود : او نبقاو نقولو كبسو كبسو ياك ؟
ياسمين : هههههه لا أنا غنبقا نقول ليك لاش انسحرو ليك شفيك نتسخرو ليك حنا او نطيح سخفانة
جود : او مرض عليك انا شريت ليها صندالة عمرها حلمات بيها شريت ليها جوج تواب على مزتاتهوم ، او فلخر نبقا عليك لملوليلي جيبولي لملولي
ياسمين : ههههههه كون درنا شي قناة كانت اطلع
جود : واه اطلعنا فكرورنا منعرف
ياسمين : مالك تا حنا نطلعو لطوندونس او نديرو بفلوس لآتسنز مشروع مالك ماشي طموح
ياسمين : (ملي سالات لاپيل معا جود كانت مها فاقت) سلم عليك جود
مريم : شخبارو ؟
ياسمين : مزيان ، قبل منسا غتجي عندنا غزلان
مريم : خطيبة مجد ؟
ياسمين : لي كانت اتكون خطيبتو او صدقات بنت سناء
مريم : كان ايتزوج بختو ؟ علاه مفخباروش بلي عندو ختو
ياسمين : سيدة خبات على كولشي بلي عندها بنت تا من بنتها خبات عليها تال نهار لخطبة عاد شي عرف شي أو عاد عرفات بلي داك تامل هو باها
مريم : ستر اربي ستر ، نوض نقاد شي حاجة لترضيضة على هاد لحساب
ياسمين : لا بلاش جات تشوف غا دراري غنخرجو غا لهنا او نرجعو (تسمع سرسار فلباب)
مريم : سيري حلي ليها انا غنمشي نبدل لدراري
ياسمين : واخ (مشات حلات لغزلان لباب) دخلي غنمشي نبدل عليا ونجي
غزلان : (بقات واقفة اوسط دار تا جات مريم سلمات عليها)
ياسمين : (لبسات ليها واحد جلابة مخزانية بلاموطار مطروزة طرزة خفيفة او جمعات شعرها لفوق دايرة حالاقات كبار فودنيها او مكياج خفيف ، مبين عويناتها لي بلقهوي)
مريم : (حلات فمها ملي شافتها لابسة جلابة) مات شي يهودي فجامع تا لابسة جلابة ؟
ياسمين : (هربات بعينيها) وغا مبغيناهاش تغمل فلماريو
مريم : تي الله اعز لحكام شمن غمولية
ياسمين : ش.شمن حكام بسلامة غا حوايج او لبسناهوم
مريم : سيري سيري شوفي علامن طلقي ديك سلوݣية ديالك
ياسمين : هانا غادة تعطلنا نهيلة يوسف يالاه (خرجو من دار او ركبو طونوبيل تاع عبد الله لي كان مخلي لغزلان)
نهيلة : فين انمسيو ؟
ياسمين : (كانت كتقاد راسها فلمراية ) غنمشي لمدينة نشري ليك لحوايج نتي وسوسو
يوسف : (بقا غا كيشوف فغزلان) يامين
ياسمين : شنو ؟ معرفتيش شكون هادي ؟ هادي غزلان ختك لكبيرة
نهيلة : ختنا ؟
ياسمين : واه باك عندو بنت كبيرة
نهيلة : وعلاش مكنعلفوهاش ؟
ياسمين : حيت كانت كتقرا برا عاد رجعات
غزلان : (كانت كتصوݣ او هي ساكتة نهار على نهار كتلقى راسها غارقة فلجو لعائلي لي جديد عليها ، من ديمة بوحدها ودبا صدقو عندها تلاتة تاع خوتها)
ياسمين : زݣاي متحركيش (مدات يديها لشعرها مصورة لقطة او ناشراها فسطوري تاع لأنسطا ، او معا غزلان كان شعرها قصير بان بحال تاع دري)
جود : (كانت يالاه سالات ليه واحد لجلسة تاع لمحكمة وكان راجع لدار تا شاف سطوري تاع ياسمين او صونا عليها بزربة) شكون داك زمر معامن مصورة
ياسمين : سكت حشومة غيتقلق عليك سيد
جود : ازمر عليا ضوري لكميرا نشوف هاد تامل
غزلان : ثامل هو نثا
جود : (ملي سمع صوت غزلان فهم لبلان) ربي شعر ربي شعر غلطنا فيك
ياسمين : وانتا لي على سبا لحضية فيك
جود : لبستي جلابة
ياسمين : واه لبستها ونتا سيفطي لقرفية علاش تافقنا
جود : شحال ليوم فشهر ؟
ياسمين : خمسة فشهر ياك يالاه هاد السيمانة تخلصتي
جود : حنا فين كاينين ؟
ياسمين : لمغريب
جود : ايوا الالة راه جوج فشهر لقاني دݣدݣت لمانضة حدك كتجبد لفلوس من لبنكة صافي كيطيرو فلبلاصة
ياسمين : واه مساكن كيطيرو علاه شكون كيشري لحوايج لي مصالحينش أدوي ؟
جود : انا ؟ ايمتى شريت شي حاجة مصالحاش ؟
ياسمين : مشريتيش شهر لي فات لپارابول بشي 30 الف ريال او فلخر بعتيه لمول لافيراي بميتين ريال
جود : وا مرة مرة كيحوفو عنا وخلاص فين غادين
ياسمين : خارجين نشريو لدراري شي حوايج
جود : (كانت كتسمعو غا هي) عندك باش تقضي
ياسمين : واه تخلصت لبارح
جود : لموهيم قضي من عندك تا نسالي او ندوز لبنكة نسيفط ليك لفلوس
ياسمين : واخة
جود : يناري معامن انا انا زعما متقوليش متعدبش راسك اراجلي لعزيز انا غنسرف من عندي ونا خدامة وكذا ولمساوات ونص بنص
ياسمين : داك لهبال ماشي معايا ياك نتا لي لبارح قلتيلي فدين راجل خاصو اتكفل بلمصاريف تاع مرتو كاملين واخة تكون خدامة او لاباس عليها كتر منو لمسكة هي لخرة هو يشريها فين هادشي كامل
جود : لباس كتعجبني كتعقلي غا على داكشي لي كيعجبك
ياسمين : كدبت ؟
جود : مكدبتيش غا زعما متقوليناش شي كلمة زوينة ، بحال شكرا احبيبة اخليك ليلي ربي ، او ختميها بتوحشتك او شكرا ازين والو والو خضرة
ياسمين : شتي هانتا كتضلمني انا ماباغاش نزيد عليك او نشعلك او نتا بعيد معندك لي يبردك طلع فلويكاند او نشكرك بطريقة خرا اما لخضرة متشري خضرة
جود : ههههه ماسخة ههههه حمستيني جدك تفو قايلاهالي بنهار تنين حيت عارفة منقدش نجي
ياسمين : هههههه سرك يالاه غنقطع دبا وصلنا وخاصني نمشي
جود : واخ تا ترجعي لدار او صوني عليا
ياسمين : واخ
خرجات هي وغزلان من طونوبيل يوسف هازاه غزلان او هي شادة ليد لنهيلة ، دخلو لشي محلات تما شارية لخوتها شي حوايج جداد او غاليين مضارباش لحساب لفلوس عندها جمافو ، خدات تال مها شي پياسات فحين غزلان شرات ليوسف او نهيلة شي ألعاب او پوپيات كبار بدرع باش وصلوهوم لطونوبيل عاد مشاو يتعشاو فشي قنة
ملي دخلو لواحد الريسطو تصادفو معا عبد الله او سناء تما ݣالسين كيترومنساو معا بعضياتهوم
سناء : (هزات عينيها فغزلان) غزلان ؟ جيتي تعشاي
غزلان : جيث انا وياثمين ودراري نثعتاو {جيت انا وياسمين ودراري نتعشاو}
عبد الله : جيتي معا ياسمين (ضرب فياسمين واقفة) شجاية ديري هنا ؟
ياسمين : جاية نحيد منك الشوق جاية نتعشا كي ناس
عبد الله : (وقف عند يوسف بايسو) لحبيب ديالي
ياسمين : (بعدات يوسف عليه)
سناء : (دارت الضحكة الصفرة) ݣلسو نتعشاو مجموعين
ياسمين : لا شكرا على لعراضة نعوضوها ليك فشي ݣنازة (مشات بعدات شادة واحد طبلة ليها او لخوتها فحين غزلان مخلاوهاش تنوض من طبلة داكشي علاش دارت معا ياسمين غا يتعشاو تنوض توصلها) شنو تبغي تاكلي ؟
نهيلة : (كانت كتشوف فباها لي مكانش مسوق ليها او ݣالس كيفرنس معا سناء او يوكل غزلان او يطبطب عليها عئيلة فقمة سعادة ولهدوء) بابا ليوم فرحان واش حيت مݣلسش معانا ؟ ولا حيت عزيزة عليه ختي غزلان ؟
ياسمين : حيت كلاتو داكشي علاش فرحان
نهيلة : شكون هادي لي كلاتو
ياسمين : معدتو ، يالاه ختاري شنو تاكلي
نهيلة : بغيت هادا
ياسمين : لا ݣلاص خليه هو لخر ناكلو بعدا شي حاجة مالحة
طلبات ليها وليهوم لماكلة او بقاو كياكلو تا عمرو كرشهوم عاد ناضت غزلان وصلاتهوم لدار مخلية عبد الله او سناء باقين فريسطو
عبد الله : (ملي مشاو دراري او بقا غا هو او سناء ، مشا تا جاب واحد لبوكي تاع لورد لحمرة عطاهوم لسناء او تحنا قدامها فاتح واحد لباطة حمرة فيها خاتم) تقبلي تزوجي بيا ؟
سناء : (وسعات عينيها شادة فمها بصدمة مادماتوش اطلبها لزواج بتاتا ، فاقت من صدمتها وعينيها تغرغرو بدموع مدات يديها ليه باش اركب ليها لخاتم) قابلة نتزوج بيك او نكمل معاك حياتي
عبد الله : (ركب ليها لخاتم معنقها او هوا ناشط)
سناء : (كانت بدات لمسيقى داكشي علاش ستغلو لفرصة باش اشطحو على هاد لمناسبة) أنا فرحانة بزاف والله عمرني تخايلت هاد نهار ايجي
عبد الله : صبرنا بزاف او ها ربي فاجاها عنا او غنقدرو نتزوجو فأقرب وقت
سناء : او بلان مريم شنو غدير فيه ؟
عبد الله : قريب نتفك منها لقيتها شادة ليا صحيبها لقديم محامي ليها ملي لقاضي يعرف بعلاقتهوم مغيخليش ليها دراري
سناء : على هاد لحساب باقي خاصنا نستناو 6 شهور ولا كتر عاد نقدرو نتزوجو
عبد الله : لا ميحتاجش غنخليها تسني ليا على لموافقة باش نتزوجو بزربة
سناء : هههه فكرتي فكولشي
عبد الله : معلوم
#عند اكسيل#
بعدما عطا لغالية سيمانة باش ترجع بقا كيقول ليوم تجي غدا تجي والو تا عيا او صونا عليها
لغالية : الو اكسيل
اكسيل : جيتي ولا باقي ؟
لغالية : (بتوتر) ب.باقي
اكسيل : ايمتا اتجي ؟
لغالية : معرفتش غي تسالي خدمتي نجي
اكسيل : هي من لخر هضرتي مساوية عندك والو ؟
لغالية : لا ماشي هاكداك جاتني لخبار بلي دوك لي كانو شادين لقضية تاع الياس تبدلو كاملين او تحولات لناس خرين او أيمن مسؤول بنفسو عليها يعني فأي لحضة تقدر لقضية ترجع تحل او يبدا فيها تحقيق من لول فين غنوليو ؟
اكسيل : (كيحاول أدوي معاها بهدوء بلاما يغوت) نتي غي رجعي لهنا متبقايش تما او كولشي على حسابي مكاين لي غيقيسك نسفرك تال قنة خرى
لغالية : منقدش أ إكسيل نغامر او نجي انا خايفة نرجع
اكسيل : على خاطرك درت ليك تمنسومانت هادا جهدي عليك
لغالية : (قطع عليها اكسيل او واخة عاودات صونات عليه مجوبهاش ، رجعات تكات كانت مدݣدݣة رواح دار فيها مابغا)
كوتر : موليتيش شويا ؟ نمشي نجيب ليك دوا من لفرماسيان
لغالية : بلاما تعدبي راسك انمشي نجيبو راسي باغة اضربني شوي لبرد نتي غا كملي خدمتك
كوتر : على خاطرك
لغالية : (هزات طيليفونها سيفطات لإكسيل واحد تصويرة او ناضت لبسات حوايجها ودارت عليها واحد لكاپ حيت كانت فيها سخانة)
فؤاد : (كان تا هو خارج يشري شي حاجة تا ضرب فلغالية) فين غادة بوحدك ؟
لغالية : غادا لفرماسيان
فؤاد : مالك مريضة ؟
لغالية : ضربني رواح
فؤاد : غا رجعي لبيتك انا خارج خارج نجيب ليك دوا معايا
لغالية : لا خاصني نمشي راسي
فؤاد : ايوا زيدي نوصلك مغتقديش تمشي بوحدك
لغالية : (كانت فعلا مقاداش تحرك داكشي علاش ركبات معاه فطونوبيل)
فؤاد : (صاݣ بيها تا وصلو لواحد لفرماسيان عاد نزلو داخلين ليه)
لغالية : (دوات معا مولات لفرماسيان بلونݣلي) بغيت عافاك هاد دوا لي فهاد لورقة او شي دوا تاع رواح يمكن لمرا لحاملة تشربو
لبنت : (مشات جابت ليها دوا معا شي ڤيطامينات) هادو مزيانين لصحة لجنين
لغالية : شكرا (خلصاتها او دارت عند فؤاد لي كان واقف ممستوعبش) مشينا ؟
فؤاد : (زاد لطونوبيل او هو كيفكر غا فديك مرا حاملة)
لغالية : (ركبات لور كيفما موالفة او تسندات على زاج تاع طونوبيل مغمضة عينيها بتعب تا صدق غا فلها نعاس ، ملي حسات بلي طونوبيل وقفات حلات عويناتها) وصلنا ؟
فؤاد : (خرج من طونوبيل او مشا ݣلس على لقدام ديالها كيشوف فلبحر او كيتنهد)
لغالية : (خرجات من طونوبيل لاقية بلي ماشي جيهة لوطيل هنا) فين حنا ؟
فؤاد : جيت اضربنا شوي تاع لبرد تغماق تاع لبيت ممزيانش ليك
لغالية : (طولات الشوفة فلمواج حاسة براسها باغة تغوت باغة تبكي تا تخوي ݣليبها ، باغا تنعس وتفيق او تلقا راسها بين حضان حبيبها)
فؤاد : نتي حاملة بصح ؟
لغالية : لا ضحك هههههه جاتك عجب ؟
فؤاد : شحال عندك من شهر ؟
لغالية : سيمانة او نكمل شهراين
فؤاد : ماشي تسرعتي ؟ متأكدة داك الراجل معامن باغة ديري ولادك بلأخص ونتي باقة صغيرة
لغالية : الى مدرتش لولاد معا راجلي معامن خاصني نديرهوم ؟
فؤاد : سمعت بلي متزوجتيش بيه لخاطرك بلأخص أنو فجوة لعمر لي بيناتكوم لا يمكن ايكون زواج بدون اجبار
لغالية : سمعتي ولا قلبتي ؟
فؤاد : ماشي موهيم باش عرفت لموهين هو واش هادشي لي باغة الغالية ، تبقاي عايشة معا واحد قد باك مزوجة بيه بزز عليك عندو ولاد كبر منك ، واش هادا لي مسولش فيك او سيفطك لهنا ونتي حاملة هو معامن باغة ديري دراري
لغالية : راك غالط بزاف الى كان كيسحاب ليك ݣالسة معاه بلى هوايا معرفتش شنو لقصة لي لقيتي عليا ولكن نتمنا متاخدش فكرة غالطة على علاقتي براجلي ، او انني نجي لهنا ولا لا كتبقا حاجة خاصة بيا
فؤاد : على هاد لحساب مقلتيش ليه بلي حاملة منو ولا مابغيتيش تقوليها ليه او جيتي لهنا باش تهربي منو ياك ، لهاد درجة خالق فيك الرعب او خانقك (قرب منها واحد لخطوة) خليني نعاونك تفكي منو او بداي صفحة جديدة فحياتك عيشيها كيما بغيتي ، انا مستاعد ندير لي بغيتي غا تكوني مرتاحة نتي وهادشي لي فكرشك
لغالية : لي نفريض هادشي لي قلتي صحيح او أنا معايشاش معا راجلي مزيان باشمن صفة باغة تعاوني هادي كاملة مسؤولية فيك تجاه موضفة عندك ؟
فؤاد : علاش متقوليش مسؤولية واحد تجاه وحدة كيبغيها
لغالية : (تبورشات عليها صحتها او تفكرات شنو كان قال ليها اكسيل عليه ، دغيا سترجعات احاسيسها او بعدات عليه غريزيا مغوبشة او داوية برود شوي) غندير راسي مسمعتش شنو قلتي او دير راسك نتا مقلتي والو حيت ضغط تاع لخدمة حمقك
فؤاد : (نفاعل شوي) مقلتش ليك هادشي باش تنسايه او مكاين لي حمقني قدك ماباغاش تخرجيلي من بالي منهار شتك ونا كنفكر فيك ، باغيك الغالية او مستاعد نتحمل مسؤوليتك او مسؤولية ولادك تا هوما نتي غا قبلي
لغالية : (جهد باش ايجادلو معندهاش نفسيتها عيانة خلوق) عندي راجلي لي يتحمل مسؤوليتي او ولادي بباهوم ، كنتفهم مشاعرك او مكنلومكش عليهوم ولكن متحاولش دير على عينيك ضبابة ، راجلي كنبغيه او كيبغيني ونتمنا ميتعاودش نفس لبلان تاع ليوم
فؤاد : (اصعب احساس اقدر احس بيه لواحد هو ملي يكون الشخص لي قدامك هو الروح بالنسبة ليك ولكن بالنسبة ليه نتا مجرد شخص مر عليه فقطار لحياة ، محس براسو تا نفاعل عليها كتر) باش حسن مني هو تا مبغاش تفرقي عليه ، مديهاش فيك ولا فلي فكرشك ، كبير عليك قد باك مزوجينك ليه بزز عليك ، قبل على راسو اتزوج بنت صغيرة ، شخصيتو متحكمة بزاف شنو لي مزيان فيه غا قولي ليا
لغالية : (تنهدات بتعب) خلينا نسدو هاد لموضوع او بالنسبة لباش هو حسن منك او علاش ديما غنختارو هو غيجي لوقت لي نجاوبك على السؤال ملي يوصل وقت
ركبات فطونوبيل مخلياه واقف على برا تا تهدن شوي عاد دخل تا هو لطونوبيل او رجع بيها لوطيل ، طلعات لبيتها بلاما دوي معاه ولا هو يدوي معاها ، حلات طيليفونها باغة تشوف واش اكسيل قرأ لميساج ديالها او تصويرة تاع لجنين فكرشها لي سيفطات ليه سعا والو كان ساد موصلاتوش بتاتا ، فهاد لوقت مكرهاتش كون كان حداها ادعمها او يقويها كيفما موالف ايدير معاها ديما ، ولكن هي عاضراه او عارفة بلي كدوز عليه كتر منها ، فبعض لأوقات كيتفرض على لواحد افكر بأنانية او يختار لهروب على لمواجهة ، داك نهار فاش دار مجد كسيدة او مشات لسبيطار خدات تحاليل ديالها كيفما موالفة كتلقى خبر لي فرحها او جبر بخاطرها على هاد سنين كاملة مناش تحرمات ، ولكن فرحتها كانت ناقصة او عاد مزاد خوفها تخسر ولدها للمرة تانية بلأخص أنو تهديدات ايمن او لحاجة كانو ضايرين بيها واكسيل الدرع لحامي ديالها ، كان خاصو يوقف او يساند ولدو فلمحنة مناش كيدوز ، لغالية ملي عطات بضهرها لإكسيل او مشات كانت غريزة لأمومة او لخوف لي متحكمين فيها
#عند أيوب#
كان فلمكتب ديالو كيراجع لوراق تاع لجلسة تانية دمريم لي كانت وصلات عليها بعد جوج سيمانات من لجلسة لولة ، ملي بقات ليه نص ساعة لجلسة توجه لمحكمة لاقي مريم سابقاه لتما
أيوب : وصلتي ؟
مريم : واه عاد دبا ، بانلي عبد الله ناشط واقعة شي حاجة ؟
أيوب : معارف هاد ساعة والو ولكن ماديريش فبالك ايكون خير ، يالاه ندخلو راه نوبتنا
مريم : ( دخلات هي وأيوب لمحكمة خداو بلايصهوم او بقاو كيتسناو تا جا لقاضي )
لمحامي : ( جا لوقت لي يسول فيه مريم ) نتي هنا كطالبي طلاق من راجلك عبد الله تاجي او كطالبي بحضانة لأطفال بحجة أنو موكلي كان كيعنفك جسديا ونفسيا ياك ولا لا ؟
مريم : واه
لمحامي : او نتي فنضارك بلي راك مضلومة او هوا ضالم ولكن شنو كتقولي فجنحة لخيانة الزوجية لمنسوبة ليك ؟
أيوب : اعترض سيدي لقاضي ، مكاين تاشي دليل كيتبت بلي لماكلة ديالي كانت فعلاقة معا رجل من غير زوج ديالها
لمحامي : (مشا مد شي تصاور لقاضي او لأيوب او مريم) شنو كتقولي فهاد تصاور ؟
مريم : (بقات غا كتشوف فدوك تصاور لي قدامها ، صور ليها هي او أيوب واقفين فزنقة)
أيوب : اعتراض سيدي لقاضي هاد الصور مكتبث تا حاجة او من لبديهي ايكون لقاءات بين لمحامي او لموكلة ديالو
لمحامي : طبعا من طبيعي ايكونو لقاءات ولكن واش نتا متأكد انهم كانو مجرد لقاءات بريءة في إطار لعمل ماشي لقائات تذكيرية ؟ سيدي لقاضي زوجة موكلي او لمحامي ديالها كانت كتربطهوم علاقة منذ حوالي 18 رعام او ازيد ودليل قدامك لسعادة لقاضي صور لخطوبة ديالهوم كتبث داكشي لي قلت ، مريم واش نتي كنتي على علاقة معا أيوب قبل متزوجين بزوج ديالك ؟ واش متأكدة علاقتك بيه سالات ملي تزوجتي ولا ستمرو لقاءات ؟
مريم : (طولات شوفة فعبد الله مشمأزة منو مادماتوش اتصرف بهاد الرخص هي او مقدماتش ضواسا تاع لخيانة ديالو لمحكمة غا باش تفك بلى شوهة) فعلا كانت كتجمعنا علاقة او كنا مخطوبين لو قريب نتزوجو او حيت وقعو شي خصومات كل واحد فينا شد طريقو او صدفة كان هو لمحامي لي تكلف بلقضية ديالي
لمحامي : متأكدة كل واحد شد طريقو ؟
مريم : متأكدة انا خويت مدينتي او قبل تا منتزوج كان هو خوا لبلاد او معاودناش تلاقينا تا جيت نرفع دعوة طلاق
لمحامي : واش يمكن ليك تقولينا سبب لخلاف لي ضار بيكوم تا نهيتو داكشي لي بديتو
مريم : اسباب خاصة ميمكنش ليا نقولها
أيوب : ( شاف بلي لقضية حماضت او تقلب كولشي عليهوم ولكن مكانتش نهاية ، لقاضي اجل لحكم عاود تال لجلسة تالتة بعد شهر علاما كل واحد اقدم داكشي لي عندو )
مريم : ( خرجات من لمحكمة معصبة ) علاش درتي هاكداك ؟ شباغي من عندي ؟
عبد الله : باغي لحضانة تاع ولدي او لموافقة تا زواج
مريم : نعطيك تا ميات موافقة عطيني غا تيساع او خليلي وليدي وعطيني براتي نتهنا منك
أيوب : ماشي لصالحك تاخد لمحكمة هاد لاتجاه غضطرنا نجبدو دلائل لخيانة تاعك بلحجة او البرهان ونا متأكد بلي مغيعجبكش لحكم داكشي علاش خلي لما منين ايدوز او متصعبش على راسك
عبد الله : مشغلكش نتا ونتي لموافقة نبغي نلقاها مسينية ولا ميعجبك حال
مريم : شغادير ݣاع فملك الله ونتا من صباح تهدد او ترهب ياكما تخالط ليك معا راسك أو يسحاب ليك انا خلاطة بحالك
عبد الله : الى خلط جات معايا راجل مكنتعابش كيتك نتي الي موالفة بلفضايح ايوا هاني غادي
مريم : مشية بلى رجعة
أيوب : (مشا عبد الله مخليهوم غي بجوج) مريم باغي ندوي معاك
مريم : شنو الله اسمعنا خبار لخير
أيوب : (كان على وجهو لحزن) سمحي ليا على داكشي لي وقع عارف راسي مدرت فيها ميصلاح او تخليت عليك ولكن انا مستاعد نعوضك على داكشي لي داز
مريم : تعوضني ؟ علاياش اتعوضني ا أيوب على داك الضرب ولا داك لجحيم فاش عشت 17 رعام هادي دوي على شكون فيهوم علاياش باغي تعوضني ، داك نهار سالا فيه كولشي او صفحتك طويتها شحال هادي فدفتار بالي مبغاش نعاود نفتحها ملي تسالي لقضية كلا غيشد طريقو كي داك نهار
أيوب : عارف راسي كنت شماتة معاك او بسبابي تزوجتي بهاد تامل ولكن
مريم : مكاين بو ولكن نسا أ أيوب نسا
مشات مريم رجعات لضار مخلياه حاس بلمواس لي سنين هادي او هوما مخشيين فقلبو ، ملي كيشوفها دبا قدامو كيف شي شمعة مطفية ولا وردة دابلة ، قهرها زمان او ليام او كحل الراس كيتفكر ديك لوردة لحمرة لي كانت تصر ناضرين ديك الشمعة لمضوية لي كانت تجري على ضلامو او تدفيه ، ضحكة لي كانت كتخرج من لقلب ولات فبلاصتها تبسيمة محصرة وملامح ذابلة ، هادا هو زمان مكيتهنا تا كيقلب لميزان او لحوال ، ديك ليلة نعسات مريم او سط ولادها حاضناهوم او مزيرة عليهوم تا داها نعاس بكترت لعيا او تسخسيخ
بعدما رجعو من سواري ، كل واحد فيهوم مشا ينعس
سناء : (كانت يالاه دوشات او مشات دخلات على غزلان لبيت قربات عندها او ݣلسات حداها كدوز ليها على شعرها او كتأملها وهي ناعسة) لحبيبة ديالي بنتي كولشي لمصلحتك (نزلات باستها فحنكها قبل متنوض تغطيها او تخرج من لبيت)
فهاد لوقت كان عبد الله فبيت سناء كيقلب على شي وراق كان حاطهوم عندها فلمجر تا طاح على واحد لورقة بحال ديك علاياش كيقلب ، بدا كيقرا فيها باش اتأكد واش هي
سناء : (دخلات عليه) شنو كدير ؟ علاياش كتقلب ؟
عبد الله : كنقلب على لورقة تاع طبيب ديالي ولكن مفهمتش
سناء : شنو لي مفهمتيش ؟
عبد الله : علاش فهاد لورقة دايرين ليك بلي دايرة عملية باش متبقايش تولدي ، قبل حتى متحملي بغزلان
سناء : (تخطف لون من وجها او قربات عندو ناترة ليه لورقة من يديه او خباتها) لاش كتشوف فحوايجي
عبد الله : سناء شرحي ليا كي درتي تا حملتي بغزلان ونتي دايرة عملية باش متولديش ؟
سناء : من ايمتا وليتي طبيب ؟ تا كتفهم تحاليل غا من راسك ؟
عبد الله : بلاما تحاولي تقلبي عليا لقفة او شرحيلي شنو هادشي (دار يديه على فمو موسع عينيه) سناء متقوليهاش لا لا ميمكنش تكوني درتيها وكدبتي عليا ؟
سناء : (كان باين عليها بلي ممرتاحاش) ملي تسالي هاد تخربيق ديالك سير تنعس انا غادة نعس انا عييت
عبد الله : (شدها من يديها مزير عليها) معندك فين تمشي تا تجاوبيني ، غزلان بنتك ولا لا اسناء ؟
سناء : (شافت لقردة طالعة ليه لسطح مدات يديها شادة ليه فيديه) تهدن اعبد الله بلاما تعصب
عبد الله : (غوت عليها) علامن كطنزي ؟ شرحي ليا شهاد لخ’رى ولا بربي تنهرس مك ياكما يسحابلك انا هو داك ميخي تاع راجلك لول مبرد او ممسوقش ليك راني نهرسك اسناء او منحنش فيك
سناء : (نفضات يديه بجهد) سمعني نقول ليك ياكما يسحابليك انا هي دمدومة تاع مريم اتبقا تهز عليا او نسكت ليك راك مكتعرفنيش مزيان والله تا نجرجر طاسيلتك فلحباسات الى متسݣتيش معايا او نزلتي كواريك ، او بلاما تفرعلي مخي خاصك تبوس رجلي او تعاود حيت مخليتش بنت لخدامة معامن خنتيني تلاح لزنقة حنيت فيها او درتها كتر من بنتي باش تجي تهز عليا دبا
عبد الله : (بحالا خوا عليه شي حد سطل تاع لما بارد مفهم والو) ش.شمن بنت لخدامة أسناء ياك قلتيلي نتي لي ولدتيها او حملتي بيها ياك تا من تصاور تاع لجنين او هي يالاه تجريبية وريتيهوم ليا
سناء : تهدن او ݣلس نشرح ليك او نعاود ليك شنو وقع بعدما مشيتي بحالك
#فلاش باك قبل 21 عام#
سناء : (كانت ݣالسة فبيتها او قدامها پيسي من دوك طارويات لكبار لاسقة فيه واحد لكمرة ، ودايرة كاسك فودنيها) توحشتك
عبد الله : (كان باقي جون يالاه عندو عشرين عام ، كبر من سناء بعام لابس غا شورط او مقابل معاها) تا انا توحشتك ايمتى غطلعي لفرانسا ؟ ولا غا لكازا الى متلاقيناش فرانسا نتلاقاو فكازا كيما موالفين
سناء : منقدش راك عارف قرب يدخل شهري اقدر نولد فأي وقت او داك زمر مكيخلينيش تا نوض من بلاصتي لعساك نمشي لكازا
عبد الله : معرفتش شنو باقي مخليك معاه حنا كنبغيو بعضياتنا علاش مطلقيش باش نقدرو نتلاقاو فخاطرنا زيد عليها كلما كنشوف كرشك لمنفوخة ولي فيها ولد ولا بنت داك سيد كنتجنن ، ياك واعدتني متخليهش اقربك علاش دبا وليتي فلحبالة
سناء : كون مامشيتيش معا ديك الطحبة مكنتش نتعصب او نرض ليك ضقة بيه شتي فين وصلنا او زيد عليها الى بغيت نجي عندك لفرانسا خاصني ندفع نقرا تما او نخلص على لمدرسة او لڤيزة حيت لمنحة مكافياش غا بوحدها زيد لماكلة او بوحدو اكسيل لي يقد اصرف عليا ، هو واعدني غا نولد ايسيفطني لفرانسا
عبد الله : داكشي لي قلتي ليا فاش يالاه تزوجتي قلتي غا نسالي لباك صدقتي حاملة او قلتي ليا تا توبدي او يسيفطك او ولدتي او ماجيتي فين تجي تا عاودتي حملتي
سناء : غي متقلقش قريب قريب نجي غا متعصبش
اكسيل : (معا تسعة تاع ليل رجع لدار مسخسخ او عيان من لخدمة ، ضارب فصوت تاع جود كيبكي ، سربا لخطاوي لاقيه فصالون بوحدو طايح من فوق سداري ، مشا بزربة هزو كيسكت فيه) صافي ابابا صافي موقع والو صافي صافي شششش مكين باس فين مك عاود
سناء : (كانت كتحلون معا عبد الله تا سمعات تقرقيب فلباب هي تقطع بزربة) رجعتي ؟
اكسيل : واه رجعت شكاديري هنا فلبيت بوحدك ؟
سناء : مشايفنيش كتخدم فلپيسي ؟
اكسيل : كنتي تخلي جود حداك فلبيت ترضي ليه لبال
سناء : مكيخلينيش نركز فقرايتي داكشي علاش حطيتو يلعب فصالون
اكسيل : دبا واش داوية نيشن دري يالاه داير عام تا لمشية مكيمشيش مزيان حاطاه فوق سداري فصالون بوحدو كون طاح على شي حاجة طرطقات ليه عينيه الله يستر فاش غنوليو
سناء : دبا واش جاي باغي دابز ؟ من صباح ونتا غا كتغوت
اكسيل : (تنهد) سامحاس مكنتش باغي نغوت ، عطيتيه ياكل ؟
سناء : تقاضا ليه لحليب ونا متقلة مقاداش نخرج نشريه
اكسيل : كنتي تمعسيلو لخضرة راه ميت من جوع (شافها مكملة لكتابة ديالها فلوراق ممسوقاش ليه هو يمشي لناموسية ابدل ليكوش لجود لاقيه عامر يمكن منين بدل ليه هو معاوداتش بدلات ليه طول ليكوش او دخل لحمام اغسل ديك لحالة او خرج كينشف ليه عاد حبس من لبكا او حس بيه رتاح) سناء كنعيا معاك تبدلي لدري ليكوش شوفي كي طابت ليه الجلدة او ولات حمرة منقدش ندير ليه تا ليكوش دبا حيت تسلخ
سناء : نسيت أ إكسيل
اكسيل : ديما كتنساي نتي خلاص
سناء : (دوات بنفيعال شوي معا بحة تاع لبكا) واش مكتشوفنيش كيف متقلة كرشي لفمي بدرع تا باش كنوض لطواليط ماكلتي او مكنقدش نطيبها او زيد لقراية بي مزيرة عندي او مبغيتينيش نسا واش مكتراعيش ليا شوي راني عييت
اكسيل : (ملي شاف عينيها تغرغرو تنادم معاه لحال ݣاع علاش دوا ، تقل او لحبالة او لهرمونات تخالطو عليها ، حط جود فوق ناموسية او ناض عندها معنقها او بايسها فحنكها) سمحيلي عارف الضغط بزاف عليك
سناء : (مكرهاتش دفعو عليها حيت كتحس براسها كتخون عبد الله فهاد اللحضة)
اكسيل : (كيحاول ايراضيها) تعشيتي ؟ فيك جوع ؟ نمشي نوجد ليك شي حاجة تاكليها ؟ تشهيتي شي حاجة نطيبها ؟
سناء : غالي طيبتي
اكسيل : (تحنا عند كرشها بايسها فيها ، قبل مينوض اهز جود عندو او يهبطو لتحت) نمشيو نطيبو متاكل ماماك ابابانو آ
جود : (كان ملاهي فشعر اكسيل كيعض فيه)
اكسيل : (هبط لكوزينة او حط جود فلكرسي ديالو ، وحل تلاجة ايشوف واش فيها ميعطي لجود لقا شوي تاع لحليب سخنو شوي او قطع اوسطو لبابة تاع لخبز او خلاه افزݣ مزيان علاما مشا نصب لروز او لخضرة فلكوكوط ورجع كيوكل فولدو)
جود : (مسكين كان ميت بجوع كلا ديك زلافة كاملة)
اكسيل : (ملي سالا جود لماكلة هزو عندو او طفا لعشا وحطو فطبسيل) سناء وا سناء نزلي تعشاي
سناء : هاني نازلة (هبطات عندو لتحت لبيت ݣالسة مقابلة معاه كتعشا) عندك شي فلوس ؟
اكسيل : باغة شي حاجة ؟
سناء : خاصني طيليفون
اكسيل : ياك عندك واحد
سناء : تا هاد لخرخاش حاسبو طيليفون
اكسيل : ضروري محتاجاه متأجليهاش شوي غا علامة اولدي او ندوزو سبوع ؟
سناء : ملي ندوزو سبوع غتبقا عليا عاود حقا ليكوش حقا لحليب ايمتى غنشري انا هاد طيليفون ؟ هادا بلى حوايج خرين خاصيني مقلتهومش
اكسيل : راك عارفة شهر جاي غتولدي داكشي علاش سبقت شريت لحولي بداكشي لي خازن عندي او يالاه جبت سلعة جديدة يعني لحركة شوي مزيرة
سناء : داكشي كامل لي جمعتي خسرتيه فحولي ؟
اكسيل : عاد لعام لكسيبة غالية او داكشي لي شيط تابعينا مصاريف بزاف خاصنا باش نخلصوهوم
سناء : ديما نتا هاكا فينما نقولك بغيت شي حاجة تقول ليا حقا معنديش ، معندكش او مكتبغيش تاخد لفلوس من باك
اكسيل : خديت لفلوس من با تا فاش كنت صغير غا ناخدهوم من عندو ونا بولادي
سناء : مكاينش لاش نتصادعو عاود فهاد ليل هاد نفخة لي فيك هي لي خارجة عنا نمشي نعس حسن ليا ارا جود نطلعو لبلاصتو ينعس
اكسيل : (طلعات او خلاتو كيكمل عشاه بوحدو ، عاد جمع لماعن او طلع لبيت دوش او لبس حوايج تاع دار) جود نعس ؟
سناء : (كانت كتدهن لكريم ليديها) واه
اكسيل : (قرب عندها معنقها من لور و مدخل وجهو فعنقها كيبوس فيها) ريحتك زوينة
سناء : ت.تعطل لحال ماناويش تمشي تنعس
اكسيل : (زاد تخشا فيها مبورشها) ماحد جود نعس قلت نبقاو شوي راس فراس توحشت ندوي معاك هاد ليامات كنت مشغول فيها
سناء : بغيتي دوي واخة ولكن بعد شوي راك خنقتيني
اكسيل : (بعد عليها مضورها لعندو مخلي يديه على خصرها) قطعتي شعرك ؟
سناء : واه
اكسيل : (حط جبهتو على جبهتها) ياك كنقول ليك متقطعيش شعرك خليه طويل حيت كيعجبني
سناء : خفاف ليا او قطعتو
اكسيل : (ستغل فرصة انها كانت كتدوي هو يزيد اقرب منها دامج شفايفهوم بجوج فقبل كان هو لوحيد لي خدام فيها)
سناء : (بعداتو عليها بشوي) اكسيل مافيا لي يدير تا حاجة باغة نعس
اكسيل : (نزل لعنقها او كتافها كيبوس فيهوم) بزربة غنساليو
سناء : (حسات بيه شعل) اكسيل راني قلت ليك مقاداش او تا طبيب نصحاتني منديرش
اكسيل : عارف داكشي علاش خلينا نديروه غا سطحي همم ؟
سناء : مافيا لي يدير لا سطحي ولا سيدي بوزݣري باغة غا نعس
اكسيل : (بعد عليها داوي بشوي) سيري تنعسي غتكوني عييتي
مشات هي تخشات فبلاصتها ونعسات فحين هو رجع لحمام دوش بما بارد كيفما موالف كل مرة تا حس براسو برد او ولا مزيان عاد خرج مخشي حداها فناموسية وناعس بتعب
اكسيل كان طايح دودة ناعس على كرشو مسخسخ تاع لمعقول تا بدا طيليفونو كيصوني
اكسيل : (مد يديه لنوكيا پيل لي عندو مجاوب بصوت مبحوح) الو
يحيى : (كان تالف) خويا شدني لوجع فطريق باغي نولد راني فسبيطار دبا
اكسيل : (وقف مفاهم والو) يحيى شكتخربق ايمتا حملتي باش تولد
يحيى : معرفتش رابحة وقع ليها كيما وقع عند سعد او ريحانة شدها لوجع باغة تولد شي بزقول كنا فطريقنا مسافرين تا بدات كتوجع او راحنا فسبيطار تاع مكناس
اكسيل : برد برد نلبس عليا ونجي عيطي لبا ؟
يحيى : راهوم معايا سبقوك او شدو ليا دراري
اكسيل : (قطع معا خوه ومشا جبد حوايجو لبسهوم بزربة وفيق سناء) سناء
سناء : شنو لاش مفيقني شواقع
اكسيل : رابحة فسبيطار كتولد غنمشي عندها ونتي عافاك ردي لبال لجود
سناء : (مدوخة بنعاس) واخ غي طفي ضو باغة نعس
اكسيل : (خرج من دار كيجري شد طاكسي او مشا لحق عليهوم فسبيطار) امضرا ؟
لحاجة : وليدي جيتي
اكسيل : ولدات ؟
لحاجة : باقي اولدي قال طبيب بلي اتولد بلفتيح
اكسيل : ايكون خير الله افك وحايلها على خير ماديرش فبالك اخويا ايكون خير
لحاج : (كان باقي صغير شوي شعرو مشابش كامل أصلن تا من ولادو كانو باقين شباب بلأخص اكسيل لي كانت عندو 24 عام غا كتافو هازينو وصاف) فين سناء مجاتش معاك ؟
اكسيل : خليتها ناعسة راك عارف متقلة او زيد مكاين لي غيبقا معا جود فدار
لحاج : حسن تبقا معا دري شهر جاي ادخل شهرها ياك ؟
اكسيل : واه
بقاو تما كيتسناو مودة تا خرج عندهوم طبيب كيطمأنهوم بلي رابحة ولدات على غير او دري مزيان غا هو مو عيانة شوية او خاصهوم ايديوها تنعس فسبيطار تاع كازا
رقية : انا غنمشي معاها لسبيطار نبقا معاها او نقابل ليها دراري ولكن تريبة شنو نديرو فيها تا رضاعة ولا صحة باش تقابلها متقدش
يحيى : لموشكيل كنا مسافرين لكازا باش تنعس فسبيطار حيت مريضة مل تولي شوي أو نكملو تسافيرتنا ، سعا زادت عليها لولادة هي تكمل ملي شتها تا لهضرة مكتهضرش
لحاجة : لبنج اوليدي دروك تولي مزيان ندي دري عندي يانا نقابلو
اكسيل : لحاجة مابقا عندك جهد لدراري صغار الى بغيتو انا غندي دري عندي نقابلو
يحيى : او ماشي بزاف عليك جود باقي صغير او سناء قريب تولد
اكسيل : نزاحموهوم ماحدهوم صغار اكبرو دقة وحدة ، غنديه عندي ندوزو سبوعو تا يكبر شوي ملي تبرا مو او نشوفو شنو نديرو
يحيى : (عنق خوه) الله احفضك اخويا
لحاج : مغنشوفوش دري ؟
يحيى : باقي شويا علاما تفيق مو عاد نشوفوه قبل منمشيو لكازا
رابحة : (بعد شي سوايع عاد قدات تفيق من لبنج مزيان)
يحيى : رابحة كتسمعيني
رابحة : واه
يحيى : (باس ليها راسها) على سلامتك
لحاجة : على سلامتك ابنيتي ولدتي وليد على مزيناتو
رابحة : الله اسلمك اخالتي (شافت اكسيل هاز دري عندو) مناويش تعطيني نشوف ولدي ولا باغي تديه معاك
اكسيل : (كان كيأدن لمجد فودنيه ملي سالا شاف فيها كيفرنس) ايلى مشيت تا ديتو لداري موحال واش نرضو ليك ارابحة
رابحة : ههههههه سمع سمع ايحيى بغا ينكرنا فدري
اكسيل : (عطاها دري) خديت لكلمة من راجلك صافي مكتعرفونيش ولحاج شاهد
يحيى : دغيا قلبتيها عليا
رابحة : ههههههه صافي الى كنتي تهلى فيه غي خليه عندك منلقاش حسن منك تربيلي ولدي
يحيى : تبراي او نرجعو من سفر وناخدو دري منعقلوش عليه
عزيز : (كان دري كيبكي ليهوم فيديهوم تا هزو اكسيل عاد سكت) بان ليا دري لي ميبغيش اتفرق على اكسيل شتو من دبا لاسق فيه هههههه
اكسيل : (شاد مجد عندو كيبوس فيه) مالك محساد
عزيز : نحسدك هاز بنت عندك يحيى براسو كون كانت بنت والله واخة يعرف يتزوج تانية غيباش تقابلها ليه او ميخليهاش عندك ولكن جات فدري
رابحة : رقية بالي بداك لي حداك مافيا لي ينوض عندو يوريه لمرا تانية
عزيز : غا ضحكت ارابحة مابقا حد يضحك معاكوم
لحاج : خرجو خرجو خليوها ترتاح راه تابعهوم طريق
رابحة : (كان باين فيها لعيا نيت او زادها لحريق عارفة راسها مقاداش تقابل ولدها داكشي علاش خلاتو عند اكسيل من بينهم كاملين حيت عارفاه ايديرو اوسط عينيه) انمشيو دبا ؟
يحيى : واه
رابحة : اكسيل ايدي دري دبا ولا ايمشي معانا ؟
يحيى : الى قبلو اخرجو دري غيمشي معاه ليوم لدار الى والو ايبقا ناعس عليه فسبيطار هنا تا يقد اخرجو ، ميعدالش تابعنا لكازا راك عارفة عندو دري صغير او مرتو حاملة او خدام
رابحة : فيها خير
اكسيل : (بقا معاهم فسبيطار تا صبح صباح او مشات رقية معا يحيى او رابحة لسبيطار او قبل توادعات معا ولدها ، عاد هو خرج مجد من سبيطار او رجع بيه لدار معا لحاج او لحاجة او خوتو ) مرحبا بولدي فدار
لحاجة : سناء باقة ناعسة ؟
اكسيل : لا غتكون فاقت غنطلع نشوفها ݣلسو نتوما ترتاحو
يتبع
التعليقات 0