العشية تعاشات..الليل خيم على الدنيا وضو القمر مضوي هو ونجومو.. منظر جميل ولوحة فنية مرسومة فالسما كاتبعت الطمأنينة فالنفس ديال الواحد وكاتخليه يتنفس بأريحية ويحلم كييف بغا
..مرجان فالشرجم ديال بيتها كاطل..عينيها على القمر المنور بابتسامة وعيون خضراء لماعة كاتشوف فالنجوم لي حاايطين بيه وفسرها كاتقول قريب حتا أنا نكون منكم ونولي نجمة ساطعة بحالكم..كلشي كايشوفني..ولكن صعيب يوصلو ليا
..تيتريت فالبالكون ديال بيتها حاضية السما والقمر بنظرات حزيينة ودمعة مشتاقة على خدها..كاتفكر فالأب ديالها وفوحشها الكبير ليه..
فتارودانت.. الحاج محمد فالسطح ديال دارو..گالس على زربية مفرشة تما..حاضي واحد النجمة كاتبري فالسما بنظرات حزيينة كاتفكرو فنجمتو وكايدعي ليها ربي يوفقها ويكون معاها..
فڤيلا المنصوري..ميلين فالبالكون الكبيير ديال بيتها الفخم عينيها على السواد ديال الليل ليمخبي القمر وسطو ومامخليهش يبان..كاتشوف لفووق وتحول نظراتها على الظلام الدامس بنظرة وابتسامة غامضة على محياها
سهام فالجردة ديال الڤيلا بالپينوار البيض ديالها جامعة شعرها بقراسة وعينيها على السماء السودااء ودمعة يتيمة نازلة من عينيها الخوضر على خدها..كاتشوف وتنهد ونظرات تعباانة مغطيين عينيها..
كريم فجنب البحر فوق واحد من الكراسة ديال الحديد لي كايكونو فالطروطوار..راسو معليه للسما كايشوف النجوم بعينيين باهتين ونظرات تاائهة كايقلب وسط داك السواد بعينيه مسرحهم فيه..
زينب حاطة يديها على الشرجم لي فبيتها مستمعة بنسييم خفييف كايدخل منو وكاتشوف للسما مبتاسمة بهدووء..كاتمعن فالقمر بنظرات مرتااحة هادءة ومطمئنة..
الليل جامعهم كلهم هاد الليلة مخليهم حاضين سماؤو وراسلين ليه رسائلهم المختالفة..كلا واحد وشنو كايطلب ..شنو باغي وشنو متمني ..ومن بين هاد العيون الإثناعشر وفمكان ما من بقاع هاد العالم..كاينين جوج عينين آخرين فجنااااح فخم مظلم..عينين كايبريو وسط الضلام..ديال شخص ضخم البنية من ظلو لي مبينو القمر..واقف وسط الجناح المظلم متاجهة أنظااارو للقمر لي مقابل معاه مباشرة بنظرة حزم وعزم وعتاب وحزن وحقد وقرف وحنين..بدون مايرمش بدون مايتحرك..فقط موجه أنظارو ليه..فوسط الظلام..وفسواد الليل
بنوم هنيييئ وسعييد ومريييح مغطية كلها بكوڤرلي بيض..مشغطة وسط فراشها كايتسعو غير أصوات تنفسها المنتاظمة والسقييل فالبيت..قاطع داك الهدوء صوت رنيين الهاتف المزعج معا دايرة فالنغمة الشعبي ويلي ويلي ناضت قاااافزة بحالا كبيتي عليها سطل ديال الما وشعرها القصير طلع الفووق شاد الرادار..ضارت لجيهت طيلي مخسرة سيفتها..هزاتو وهي تبان ليها سميت مرجان فالشاشة قندشات كتر ملي شافت شحال فالساعة وجاوبات معصبة..
زينب: ياابنت الكلبة يالخرية يالقردة المااسخة بايتة تحلمي بيااا ءءء؟
مرجان: صباح النووور حبي
زينب: “عصباتها” غانشد الزامل بوك ننطحك الطحبة
مرجان: حتا انا ازين ديالي طوحشتك وسبحان الله كي فقت جيت عندك
زينب: فين جايا فييين؟
مرجان: لداااركم..يالله الحييبانة ديالي سيري لبسي عليك ونزلي عندي هانا لتحت
زينب: علاش اختي غانزل وانا ماقارية ماخارية..سيري قودي لداركم الله يرحم باك وخليني نكمل نعاسي
مرجان: واخة يالله هانا كانتسناك عنداك تعطلي عليا
زينب: واااابنادمة وااالرباط راه گلناا ليي…..قطعات عليها..شافت فطيلي مخنزرة وحطات راسها على المخدة شوية وعاود هزاتو فايقة كاتنگر..”تفوو على ديلمي آاانا لي جايبا ليها الخرا أنااا لي خاصني العصاا” …مشات لپلاكارها هزات حوايجها ودخلات للحمام تغسل وتلبس..
فالتحت ديال الموبل واقفة بكسوة حمرة خفيفة منقطة بالبيض مع صبيبيط بيض وشعرها طالقاه على راحتو..يديها فالجيب ديال الكسوة غير ضاحكة وكلا مرة تسد عينيها وتجمع النفس وطلقها مبتاااااسمة..حتى كاتسمع الباب تحل وزينب جايا قاصداها بدجين بيض مزير وبودي بيض بكتابة كحلة فالوسط مع سپادرية غوز وساكادو غوز طالقة شعرها القصير وجايا قاصداها..شافتها مرجان مخنزرة وهي ضحك
مرجان: ههه طلقي البشرة اصاحبتي اليوم راه فرح زعما
زينب: خرا گالاك مانعسة حتال الربعة ومفيقاني مع السبعة كيدرتي ليها
مرجان: “قرصاتها لحنكها” اييوا ابب نتي لي كاتسهري واخة عارفة اليوم عندنا شلا مايدار
زينب: الدار لديلمي انا لي جايباليك الخز داار ليا ااانا
مرجان: وادابا باراكا من النگيير الخااوي وزيدي راه الوقت ماغايكفيناش
زينب: لاش؟ وفين غادين بعدا؟
مرجان: وييلي علاه مافخباركش
زينب: أشغايكون فخباري بالسلامة
مرجان: أسامة ياالالة..ضبر ليه باه فخدمة فواااحد البوتيك..وااعر يااختي..كايبيع غيير داكشي ديال الفرييع وليماارك المخيرييين
زينب: إييوا ومن هاادشي نتي مالك وانا مالي وهو مالو
مرجان: مالو احبيبتي ماااالو..ماشي راه خاصينا شي كساوي زوينين للحفلة..ولا ياكما بغيتينا نمشيو بالدجين تولي تبهديلتنا تبهديلة
زينب: دابة غيير گولي ليا ماكفيتش انايا تنكديها عليا فهاد الصباح..باغا تزيدي حتى الدري مسيكين
مرجان: “بابتساامة مستفزة” اااه ابب ماكافيانييش وازيدي قدامي خلاص راه باقي تابعنا شلا حواايج…شداتها من يديها كاضحك ومشاو للشاريع الكبير وقفو كايتسناو طاكسي..وقف ليهم واحد وطلعو فيه ومشاو..
فالسونطر ديال تمارة وفواحد البوتيك راقي كبيير وقف الطاكسي بالبنات..نزلوو كايضحكو وزينب تناسات التقليقة ورجعات فرحانة لفرح صاحبتها.. خلصو الطاكسي وتمو داخلين للبوتيك غادين نييشان لفين كاينين ليغوب وصواريات..كلا مرة يجبدو حاجة ويطلو ويتفحصو حاجة اخرى..حتى وقفات عليهم واحد البنت لابسة ساية كحلة وقاميجة مع ڤيسط وفالجنب مكتوبة سميتها “إحسان” تبسمات لمرجان وگالت: شحب الخاطر الالة كاين فاش نعاونكم
مرجان: هه اااه بصراحة احبيبة بغيت أسامة هو ليغايعرفني علاش كانقلب..تقدري تكلميه ليا عافاك
إحسان: انا نعاونك الالة غير گولو ليا علاش كاتقلبي ونحضرو ليكم
مرجان: لا غير عيطي ليا عليه هو لي غايفهمني
إحسان: انا راه قديمة هنا فالبوتيك ولي بغيتو نوجدو ليكم لي غوب ليصواغي لي ميني..لي بغيتو
مرجان: “بابتسامة” أساامة..بغيت أسااامة ابب
إحسان: اوكي الالة راحتك….تحنات ليها ومشات
ومرجان: “قلبات عينيها” الله يستر لصقة صاافي ….زينب شادة واحد الصوارية كحلة كاتفحصها بعنيها وگالت: هادشي اييلا بغا يعاونك مازاال..الدري خرجتي عليه مسكين ببلاناتك
مرجان: غاايعااون ابب وبزز منو …غير كملاتها وهو يبان ليها جاي..گالت ليه البنت راه جوج بنات كايسولو عليك وناض مستغرب مافبالوووش بلي مرجان وزينب هوما ليجايين عندو..غير شافهم وهو يكحل بالعما بحالا شاف قباض روحو..اما مرجان تبسمات ابتساامة عريضة وتماش لجيهتو كاتلوا وتحلونوتصطانع البريستييج
مرجان: أسااامة بيبي
أسامة: “تحت سنانو مغدد باش مايعيقش قدام البنت” بغيتو ينقبك داااك بيبي
مرجان: وي بب ماسمعتكش
أسامة: “ابتاسم بتوتر لديك البنت” .صافي اإحسان غير سيري نتي انا غانتكلف بيهم
إحسان: داكوغ..تشربو بعدا شي حاجة امادموزيل
مرجان: نوو حبيبة ميغسي هاهو اسامة غايتكلف ياك ابب “ابتسامة مستفزة”
أسامة: الله اااودي نتكلف نتكلاااف..علاش لي مانتكلفشااي..على الرااااس والعيين بغييت ربيي يعطيني للعييين
مرجان: “قربات قرصاتو فحنكو” اووو سووو كيووت….زينب حاضياها كي كاتصرف بحال دوك المبعكات جابت ليها الضحكة
مرجان: شحال ضريف هااد اساااامة..ماخاصكمش تفرطو فيه راه نقرة صاافية ماتلقااوش بحالو ابب
إحسان: مرحبا امدموزيل حنا فالخدمة..
مرجان: هههه ميييغسي حبيبتي…..أسامة داير ضحكة ديال الغدايد عارف راسو فينما كايشوف وجهها ماكايطلع عندو رباح ديييما خارجة عليه
أسامة: هه لهلاا يخطيك احبييييبة انا رهن الإشاااارة..غير سيري اإحسان انا غانتكلف بيهم كوني هانية
إحسان: اوكي وإلى حتاجيتو شي حاجة عيطو ليا….مشات وهوما دايرين ضحكة قداامها وغير غبراات غبراات معاها الضحكة وضار عندها بغا يااكلها بسنانو
أسامة: اشنوو بغيتي تاااني يالمصييبة شجاايا دييري عندي هنا
مرجان: ااا شتك كاتغوت عليا؟ حشووومة عليك وانا عاد كنت كانشكر فييك قدام السيدة
أسامة: كااديريها بلعااني يااك بااغة تخرجي عليا..بااينة شي زبلة تااني هادي وباغة دخليني فييها والله حتى بااااينة
مرجان: نوو بيييبي بالعكس..توحشناااك وجيينا نشوفوك يااك ازيينب؟
زينب: “كاتشوف الكساوي” وي بب داكشي
مرجان: حنا عاارفين باباك داار لك حالة على الطوموبيل لي خديتي ليه بلا خبارو وجييت نشوفك كي بقيتي ونطلب منك السماحة..حييت بسباابي اماشيغي وقع لك داكشي.. يااك ازينب؟
زينب: وي بب داكشي
مرجان: ومنها نييت نصيلو معااك الرحم ونباركو ليك الخدمة الجدييدة “غمزاتو” داايمة إن شاء الله..يااك ازينب؟
زينب: وي بب داكشي
أسامة: شفتو..تشفيتو..باركتو..تقلاويتو..يالله دورو تراميكم وقودو
مرجان: لاه لاه ياا افندم دا كدا عيب والله.. حنا جينا جينا مانمشيوش بيدينا خااويين..هحح هادشي زيين زين
أسامة: “ضحك ليها” شتي دااكشي لي كاتفكري فيييه..والله لا كاان لك غابرديها..ودوك بلاناتك لي بحال زكك غاخليهم عندك ماسوقيش فيهم
مرجان: غييير ملي راهم بحال زكي راهم بلاناااات واشمنهم بلاناات يااك ازينب؟
زينب: “باقة كاتقلب فالكساوي مامسوقااش ليهم” وي بب داكشي
أسامة: واتاراه برررب لاكانت ليك سحابلك نسيت بلانك لخر لي بسبابو كان الواليد غايجري عليا من الدار
مرجان: لاء ماتأولهاااش
أسامة: اييه تشفاي تشفاااي اناا لي نستااهل تابع هبيلة..ولكن عممممر دااود ماايعااود
مرجان: يااااك؟
أسامة: اييييّٓه
مرجان: واااخا اسيدي..”ضارت لجيهت زينب وكاتشوفيه بنص عين”احم احم زينب أجي عافا حبيبة
زينب: وييي بب
مرجان: عاقلة على سميرة “اسامة تقلشو ودنيه”
زينب: شكون سميرة
مرجان: وييلي اصاحبتي سميرة بنت الگزار
زينب: اااه دييك المزغبة؟
مرجان: ويي بب هياا هااديك
زينب: ماالها مسكينة؟
مرجان: وييلي ماشي مسيكينة خرجو عليها ايشاعة
زينب: ايشاعة؟
مرجان: وااييه إشاااعة..گاالك حگا ما حگا كاتعرف شي وااحد ومصاحبة معاه
زينب: وشنو فيها؟
مرجان: واايلي اصاحبتي علاه نتي ماكاتعرفيش باها كيف دااير
زينب: كيف دااير؟
مرجان: خااايب خيوبية مااابعدها خيووبيا ومااكايرضااااش ولهلااا يوريك…
زينب: اوييلي شنو دااار؟
مرجان: “ضربات طليلة على اساامة لقاتو طالق ودنيه متبع معاهم الحوار” يااختي خرج لييه نييشان بالمضا عاامر بالدم دياال واحد الحاولي يالله دبحو
زينب: إييوا
مرجان: إيييوا يالالة مشا قااصدو نيييشان لفيين كايخدم سبحان الله لي وصل الخباار وراه حتى العنوان فيين كاايخدم
زينب: وا مسخوووط هادا يا ختي إوا كملي شنو داار
مرجان: جرو ياختي من وسط البوتيك ضربو بكابال حتى جابو طاايح وهو يگوليه هادي هي اللخرة ليك يااوليدي شهد على روحك..حكمو مزياان وهو يشد داك الموس باااقي كايقطر بدم الحولي..گال بسم الله وهو يد…
أسامة: حببببببببس
ضارو لجيهت اسامة لقاوه العرق كايقطر ليه ومخرج فيهم عينييه
مرجان: وييلي يا بيبي بسم الله عليك بسم الله عليك نتا فيعار الله والنبي رسول الله
أسامة: “قرب ليها كايقفقف” شنو بغيتي اختي شنو بغييتي عندي اااش درت ليك تاادبحيني.
مرجان: ويلي دابة اناا اشنو درت ليك ويلي تبقي ستر
أسامة: “غدداتو” صااافي اختي انا لي درت انااا انا لي حمااار كانبو مانسوااش الله ينعل ديلمي انا اناااا..غير گولي ليا شنو بغيتي شنو حب الخااطر
مرجان: ممم وهي بصرااحة بغييت غير هو حشمت منك
أسامة: الله اودي علاه نتي كاتحشمي
مرجان: نعام ابب؟
أسامة: ماتحشمييييش مني غيير كولي على راااس والعين
مرجان: احم ايوا ملي هااكة ومافيه حتا شي دورينجمو..بغيير ناخد شي حاجة من البوتيك..شي صوارية هاكا حتال غدا ونردها
أسامة: نعاااام اختشيييي “عاود خفض صوتو” وااش تسطيتي كالو ليك المحال ديال با
مرجان: وهانتا رااه غيير بيناتنا..ياك الكساوي محطوطين محطوطين الا غابو ليلة وحدة ماغايوقع واالو
أسامة: ماغايوقع وااالو..وااش بااغة تخرجي ليا على الخدمة لي ماضبرت عليها حتى نشف ريقي..لا.لا.لا
مرجان: يااااك واااخة..زينب
زينب: وي بب
مرجان: زيدي قدامي….حطات الكسوة ومشات عندها خارجين وملي وصلو للباب گالت مرجان: اييه اصااحبتي واادبيحة واشمن دبيحة يمكن يديرو عليها حلقة فأخطر المجرمين ….خرجو من البوتيك وتمو غادين مع الطروطوار ومرجان راسمة ابتسامة نصر على فمها هزات تلاتة الصباع وگالت..واااحد جوووج تل…وقفي بلاتي
مرجان: “ضارت مخنزرة فيه” مالنا نتا ااش كاين
أسامة: “تحت سنانو” صاااافي زييدي دخلي زييدي الله يدخلني فحيط
مرجان: ومالك كاتغوت ياك لاباس
أسامة: حااشة حااااشة واش نغوت عليك غااازيدي دخلي
مرجان: وامعرت “دارت لجيهت زينب” شنو بانلك ندخلو
زينب: وي بب
مرجان: اووكي على وجهك وصافي اماا شي وحديين خصاارة فيهم
أسامة: “ضحك ليها مغغددد” لهلا يخطييك القلب على القلب احبيييييبة
مرجان: “زادت قدامو داخلة” بغييت لييك حبببة
أسامة: فزززززك
مرجان: ههههه …دخلات كاتنخوا موراها زينب حتا هي مبتاسما موراهم اسامة بغا يااكل جناابو مسكيين..داازت لجييهت الكساوي وبدات..شوف هادي سكريني هادي لاهادي قصيرة لا هادي طويلة لاراه لونها خايب ويلي توبها قديم..شيبااتو مسكين كلا مرة مسيفطاه يمشي يجيب كوليكسيون جدييدة ولكن حتى حااجة ماعاجباها وملات وضروها عينيها..ناضت كاتسارا فالبوتيك وفواحد الدخلة مدرگة بانت ليها واحد المانكان لي كايعرضو فيها الحوايج محطوطة بوحدها فديك الدخلة ومغطية بحرير كحل جاها الفضول تعرف شمن كسوة هادي وعلاش حاطينها هنا ومضركينها من الفوق..قربات وهزات يديها حيدات عليها الحرير طاح فالارض وتحلو عينيها وفمها وهي كاتفحصها بعينيها..غيير لحظات باانت اتسامة جانبية على طرف فمها وگلت وهي كاتساري عليها عينيها…”صافي لقيتك”
خرجو من التانوية فين غاتقرا وهي الخلعة شاداها..انتابهات ليها ايجا وهي ضحك
إيجا: اماالكي ههه عاد البارح كنتي فرحانة
تيتريت: ماعرفتش اخالتي كلشي جاني فشكل
إيجا: دااابة تولفي راه غير البدية كاتكون هاكا..غير بلا ماتخلعي دابة ديري حتى نتي صحابات وتبداو تمشيو وتجييو بلا ماتحتاجيني گااع
تيتريت: هه ان شاء الله
إيجا: يالله احبيبتي طلقيي راسك راه باقي خاصنا نوجدو للغدا “بدا كايصوني ليها عاود طيلي” يخخ بنادم مابغاش يفهم راسو
تيتريت: واش ولدك اخالتي؟
إيجا: هو هاادا باقي لدابة كايصوني..ولكن والله لا جاوبتو..لي بغاني راه عارف داري فين جات “بدا عاود التيليفون كايصوني وقطعات تاني ايجا كاتنفخ” غير نتا راسك قاصح وانا كتااار منك اوليدي….وصلو لباب الدار وحلات ايجا الباب ودخلو..لقات سعيد راجلها گالس فالصالون كايشرب اتاي مشات تيتريت باست ليه يدو وراسو..رضا عليها وگلسات قدامو حشمانة
إيجا: “حيدات زيفها” الحاج ايمتا جيتي؟
سعيد: (لحية بيضاء طويلة وعلامة الصلاة على جبهتو..باينة فيه الصرااامة والوقار) كبييلة ولقيت الدار خاوية واش هادا كامل وقت غير تقدي فيه
إيجا: ايوا راه مشينا على رجلينا داكشي علاش
وتبركي عام حتا كاس ديال اتاي مالقيت شكون يصيبو ليا
إيجا: واخة هانة نمشي ندير الغدا
سعيد: طلقي راسك راه من الصباح وحنا واقفين
إيجا: اجي معايا ابنتي
تيتريت: واخة اخالتي
سعيد: تيتريت
تيتريت: “ضارت عندو كاترمش” نعام اعمي
سعيد: “دار يديه فجيبو جبد 400درهم ومدها ليها” هاكي هادي الا بغيتي تشري شي حاجة للمدراسة ونتي اايجا ايلا خديتو ورقة الادوات سيفطيها ليا مع عماد نجيبهم معايا
تيتريت: لا اعمي را..
سعيد: ماحشمتيش كاتگولي لعمك لا..يالله سيرو ديرو لينا ماناكلو راه من الصباح ماطاح فكرشنا.
تيتريت: واخة اعمي “باست ليه يدو”
سعيد: الله يرضي عليك
إيجا: يالله ابنتي سيري بدلي حوايجك ونزلي عندي
تيتريت: “ابتاسمات ليها” واخة…..مشات طالعة لبيتها ومكمشة على دوك الفلوس..مجموعة عليها الفرحة ديال انها غاتقرا وخلعة انها متأقلمش وتلقا راسها مبدلة عليهم وتصعاب عليها المأمورية
أسامة: لا ..لا .. لا ..لا.
مرجان: “طلعات فيه حاجب” شوف أوكاان
أسامة: راه گلت ليك لا..واش تسطيتي فالبوتيك كامل بانت ليك غيير هادي..غيير هاادي
مرجان: شتي فهاد الخرا كاااامل هادي بوحدها لي عجباتني..ودابا طارت معزة..نزلت معزة..بغيت هااااادي
أسامة: وحتى انا هادي هيا لي ماغاتاخديش يالله لا لا.لا.لا.
★
★
خاارجين من البوتيك كلا وحدة هازة بلاستيكة فيها الكسوة لي خدات مبتاسمين ومرجان كتر..غير كاضحك وطل عليها حمقاااتها.. وأسامة موراهم شاداه القفقافة وكايوصي ويعاود
أسامة: هاانتي غدا غدا غدا هاادي راها ماشي بحال الكسااوي لخرين..هادي راها دومونض خاصة واخة تبيعي ليقدامك ووراك لاشريتيها..والله ومشاات حتى وقعات ليها شي حااجة حتى نمشي فيها كفتة مصهضة وحتى نتي معايا ياابنيتي
مرجان: “عوجات فيه فمها” واااودنية طاابو بهاد ديسك يخخ..صافي گلنا لك غدا هي غدا كلمة ديال العيالات
أسامة: وهااانتي غدا غدا
مرجان: وااصاافي يخخ على كولا….مشات وهو بااقي موراها كايطلب ماتوقع حتى حاجة للكسوة..وقفات فالشاريع شيرات لطاكسي وقف ليها وقبل مايطلعو ضارت لعنو
مرجان: آااه حگا كنت غاننسا..اليوم محتاجينك توصلنا للحفلة فين غادين انا وزينب “ابتاسمات” اوكي بب
أسامة: شنااهوا علاه أنا نقدر ننسنى القتلة لي واكل من عند الواليد بمسبت الطوموبيل.. والله لاكانت لك
مرجان: دابا شنو..مابغيتيش؟
أسامة: لا لا لا لا
مرجان: اوكي بب ههه بااي….طلعو لطاكسي ومشاو مخلينو شاداه القفقافة والسخفة على التسخسيخة لي دارو لييه..
فالواجهة ديال اوطيل هيلتون المتواجد بمدينة الرباط..المزينة بأضواء بيضاء ساطعة على المدخل وبساط أحمر طوييل جاي من داخل القاعة وكاينتاهي فالخارج ديالها فمكان وقوف سيارات المدعوين..جانب الباب واقفين جوج بوديكارز لابسين الأسود كايتفقدو الدعوات من عند المدعوين عاد يسمحو ليهم يدخلو..
داخل القاعة..وجنب البوفي لي عامر بكل مالد وطاب..أكل مالح وحلو وديسير مشكل ومنوع..واقفة حداه مع المساعدة ديالها بفستان أسود كلاسيكي قصير بالدونطيل..وشعرها جامعاه لور باش يبانو حلقات الزمرد الأخضر لي دايرة ومعاهم العقد ديالهم مزين العنق ديالها..كاتوزع نظراتها على المدعوين لي يالله بداو كايجيو وتبتاسم ليهم وكاين لي كايجي يسلم عليها وبدورها ترحب بيه..حتى شافت عمر داخل كايقلب عليها..لابس الرسمي وبجنبو ميلين بفستان رصاصي طايح شوية على الكتاف وطوييل مزين بورود رمادية.. مشات عندهم نيشان بابتسامة
سهام: ههه مرحبا..نورتوو
عمر: “باسها” بوجودك احبيبة أش هاد الجمال كاامل آاش
سهام: ههه حتى نتا احياتي
عمر: “شاف فالأرجاء” ايااياااي هادشي غزال
سهام: هه معلوم مايكون غزال راه من الصباح وانا واقفة على كلشي..حتى من الباس جبتو معايا باش نلبس هنا ومايفوتني والو
عمر: ولكن راه زوين..بصراحة صرعتيه
ميلين: أكييد غايطلع زوين..مدام سهام المنصوري على قدها واقفة عليه وتنقص شي حاجة ههه مايمكنش
سهام: “باستها لحنكها” لهلا يخطيك عليا احبيبتي هههه بعدا راكي جيتي غزاالة
ميلين: حلفيي
سهام: وعلاش الحلوف..جيتي فننة احبيبتي الله يحفظك ليا
ميلين: ميييرسي اماما حتى نتي جيتي طووپ
سهام: ههههه زيدو زيدو راني موجدة ليكم طبلة بالخصوص
عمر: واخا احبيبة..وريني بعدا فين ناكل راه من الخدمة لعندك باقي مهلوك
سهام: عارفاك عياان وواخا هاكاك جاي لهلا يخطييك عليا احبيبي..تعالى معايا..
ميلين: وأنا غانمشي عند صحاباتي بااي
…باستها ومشات فحين هي مشات ورات لعمر البوفي فين جا..باستو ومشات كاتفقد الحاضرين وتشوف شنو خاص وكلا مرة تشوف لجيهت الباب كاتسنا حضورو …
برا القاعة..وقفات سيارة حمراء من طراز كلاسيكي عند المدخل..حل الشيفور الباب ونزل مشا حل الباب ديال لور..تمد منو عكاز ديال الخشب لمااع وعندو رأس ديال صقر مرصع بالألماس..مد يدو للسائق لي تحنا مد ليه يدو هو كدلك باش يعاونو يخرج من السيارة..حط رجليه وخرج بلباسو الرسمي الأسود مع قميجة بيضاء نفس لون اللحية ديالو وشعرو القليل وحداء بني لامع..وقف مبتاسم وشاف لجيهت الباب
الشيفور: ياكما بغيتيني نعاونك تدخل امسيو العوماري
العوماري: “قهقه بمرح” ياكما شرفت لهاد الدرجة افؤاد
الشيفور: حاشا اسيدي..ضربة وغاتفوت وإن شاء الله ترجع أحسن من الأول
العوماري: “تنهد” إن شاء الله.. إن شاء الله…..مد رجلو وتعكز بعكازو غادي لجيهت الباب الكبير…
نفس اللبسة ديال الخمار ونفس الوقفة..غير هاد المرة مامخنزراش بالعكس مبتاسمة ومرتاحة..ومن نفس الشرجم طاحت نفس الشكارة وخرجات بنفس العباية مغطياها من راسها لساسها..نقزات تنفيزة وحدة للتحت وغمزات زينب تمشي موراها وبخطوات سرااع بداو كايبعدو على الدرب باش يوصلو لنفس الشاريع ولنفس السيارة الأونو لي مخرشة من القدام..طلعو ومرجان نيشان مدات يدها حيدات النقاب كاضحك
مرجان: هههه الهربة والله..غانتمسخو انا وياك لي كانلعبو بالنقاب كيف بغينا
زينب: هههه واييه دابا المغطي وشوية ملي غانخرجو غايبان المخبي ههههه
مرجان: هههههه..”ضارت لجيهت اسامة لي ضيمارا مخنزر” اساامة بيبي صاافا علييك
أسامة: قوودي عليا نتي حسن لك
مرجان: “خنزرات فيه” معشوقة فييك انايا گعلا تهضر “ضارت غمزات زينب.” حيدي ابب
زينب: هي لولة ابب هههه..مدات يديها للعاباية تحيدها…
★★★٭٭*
واقفة فالكوزينة كاتحرك الروز ديال العشا..لابسة پيجامة بيضة خفيفة شويا وفوق منها پينوار بيض سخون ولاوية زيف على شعرها عاد مدوشة وباقي فازگ..طلات عليها إيجا
إيجا: تيتريت..راه أبنتي باك فالتيليفون كايسول فيك..هاكي هضري معاه….غير سمعات باها وهي تقفز نيشان مشات خداتو من عند خالتها وگالت مبتاسة..بابا
إيجا: أنا نمشي..نخليكم تدويو فراحتكم
الحاج محمد: كيديرا اتيتريتينو لاباس عليك ههه
تيتريت: “دمعو عينيها” مالاباس والو ابابا
الحاج محمد: “تخلع” تيتريت..مالك ابنتي واش خاصاك شي حاجة؟قلقك شي حد
تيتريت: خاصني نتا ابابا..توحشتك بزاف اتسانو (كبيدتي)
الحاج محمد: ههههه خلعتيني ابنتي سحابني واقعة لك شي حاجة..ياك مرتاحة بعدا
تيتريت: آه ابابا مرتاحة وخالتي وعمي ماكايخليوني مخصوصة من والو
الحاج محمد: إيوا الحمد لله ابنتي..تهلاي فراسك وفقرايتك الله يرضي عليك
تيتريت: “دمعو عينيها” آميين ابابا أميين
الحاج محمد: واحشومة دابة انا صونيت عليك باش تفرحي ولا تبكي
تيتريت: لا راه فرحاكة
الحاج محمد: ماشي هادشي لي كانسمع
تيتريت: “مسحات دموعها وگالت مبتاسمة بحال إيلا كايشوفها” فرحانة بزاف أبابا
الحاج محمد: الله يرضي عليك ابنتي الله يرضي عليك ويخليك ديما فرحانة .يالله الله يعاونك ويوفقك..إن شاء الله نعاود نصوني عليك غدا
تيتريت: واخا ابابا حتى نتا تهلا فراسك..بسلامة….قطعات عليه مرحة نسبيا حيت هضرات معاه ويالله غاضور وهو يعاود يصوني طيلي..هزاتو بلاما تشوف الرقم وجاوبات مبتاسمة وبصوت حنين ورقيق بحال ديما
تيتريت: ألو كبيدتي
…-الصمت
تيتريت: ألو ..ألوو..ألو واش كاتسمعني
…-شكون معايا ….قفزات ملي سمعات صوت راجل ودغية قطعات كلها صفرة…جات خالتها عندها
إيجا: هه إوا ابنتي هضرتي معاه..فرحانة دابة
تيتريت: آااه اخالتي..شكرا
إيجا: مالك
تيتريت:لا مامالي والو..انا غانكمل العشا
إيجا: واخا ابنتي الله يرضي عليك ….هزات تيليفونها ومشات خلاتها هي تالفة غير بوحدها كاضور من هنا وهنا..
فالحفل
كانت واقفة مع عمر كايضحكو حتى كايبان ليها داخل بشويا عليه..
سهام: عمر سي العوماري جا
عمر: “ضار لفين نعتات واستغرب ملي شافو” ماكانش يسحابني حتى الأب ديالو غايجي
سهام: أنا غادة نسلم عليه
عمر: أنا جاي معاك صبري “هز جوج كيسان ديال الشامپانيا ومشاو لعندو”
سهام: مسيو العوماري
العوماري: “ضار لعندها بعدما كان كايتكلم مع واحد السيد”
سهام: هه أنا سهام المنصوري..المديرة ديال شركة ڤاييرا وهادا راجلي عمر
العوماري: “بابتسامة” ااه ههه كيف أحوالك اسي عمر ونتي امدام سهام
عمر: هههه الحمد لله أسيدي ونتا شنو أخبارك..كيف بقيتي من الضربة شوية بعدة
العوماري: “وراه العكاز” هههه هانتا تشوف..ولينا عاجزين حتى على المشي ولكن الحمد لله على كل حال
عمر: بصراحة ترويض الخيل هواية صعيبة وفيها مجازفات ولكن حفض الله وجات غير فرجلك
العوماري: هههه بصح الحمد لله..الخيل عشقي الأول والأخير ومن المستحيل نتخلا على ركوبو واخا يتهرسو رجليا بجوج هههه
سهام: هههه “جات عندها المساعدة ديالها كاتجري..همسات ليها شي حاجة فودنها وملي سالات مدات ليها يدها تمشي”..شافها العوماري وگال وهو كايشرب من كاسو: واش وصل؟
سهام: وي عاد قالتهالي السكرتيرة ديالي..راه قرب عند المدخل
عمر: مزيان نيت نتعرفو على سيد الليل هههه كانعرفك غير نتا لي كاتبان شوية للصحافة أما مسيو العوماري جونيور باقي ماحسن لينا الشرف
العوماري: ههههه الشرف ماحسن ليا حتى أنا لي الأب ديالو أسي عمر وولا خاصنا موعد باش نشوفوه غير تهنا هههه
عمر: هههههه
على بعد أميال فقط من الأوطيل وقفات لوطو ديال اسامة..تحل الباب وخرجات بكعب عالي وردي ورجل بيضاء صافية..حطات يدها على باب السيارة وخرجات .شعرها البني المسبسب سابقها..قاداتو بيديها وسرحات معاه الكسوة الرمادية المرصعة من جهة الصدر بأحجار صغيرة كاتبري وحزام فضي رقيق لاسق فيه الديل الطوييل ديال الكسوة..نزلات زينب حتى هي بفستان قصير من الأمام وطويل من الوراء..شعرها مبوكلياه ولابسة طالون أسود جلدي..وقفو حدا بعضياتهم وابتاسمو لبعضياتهم شادين پوشيطات فيديهم.
زينب: عشيرتي..مشينا
مرجان: “جمعات النفس وطلقاتو وهي كاتشوف فباب المدخل” مشينا ….فالدروج ليكايدخلو للقاعة ..نازلين بالزربة جوج بوكيگارز لابسين الأسود وسناطات على ودنيهم كايهضرو
…-“حاط صبعو على ودنو وكايهضر” واش صافي وصل..لا كلشي هو هاداك وغانكونو حدا الباب تانتسناوكم…مرجان وزينب جايين داخلين كايضحكو ومبهورين بالأجواء حتى كايدخل فيها واحد من ليبوديكارز ومشى كايجري
مرجان: واابنادم ماكاتشووفش..مسينا على الله
زينب: زيدي ندخلو صافي راه مشا
مرجان: يخخ على فاال كيدااير..يااربي مايوقع واالو يااربي يدوز كلشي كيفما مخططا ليه ياربي
زينب: ماعندو مايوقع وكلشي غايدوز كيفما باغا نتي..غير بلا ماتوتري وكوني مرجان لي كانعرف
مرجان: “زفرات مغوبشة” علا الله احبيبتي..على الله زيدي ندخلو زيدي لايزدق داخل فيا شي بوراس آخر….مشاو وفالباب عطاو الدعوة لهادوك لي واقفين حداه..ابتاسمو ليهم وحلو الباب باش يدخلو…★★★
عند باب المدخل وبجانب البساط الأحمر..توقفات سيارة رولز رويس السوداء القاتمة..تقدم أحد هادوك لي بوديگارز حل باب السائق..تمدات منو حداء أسود برااق ويد شدات الباب فيها ساعة فضية مرصعة فالجوانب بالألماس وخاتم رقيق فالصبع الصغير..خرج من السيارة وسد الڤيسط السوداء ديالو ووقف بعيون عسلية وأحيانا بندقية اللول مع شعر ولحية خفيفة زعرة.. طلع عينيه فداك البوديگار
…-“مخنزر وبصوت خشن” مغنتعطلش بزاف..شويا ورجع ….تحنا ليه البوديگار ومشا دخل للسيارة باش يمشي يبلاصيها..أما هو شاف فالباب كايلعب بالخاتم لي فيديه مخنزر وعينيه كايطلقو الشرااار..زفر وتقدم بخطواتو الموزونة لباب المدخل وهو مطلع راسو الفوق كايتعنكر فالمشية. …
★★★
دخلات لبيتها وحيدات الفوطة على راسها لقاتو مازال فازگ شوية..حيدات الپينوار ديالها ومشات تخشات ففراشها تنعس..تغطات كلها بقاو كايبانو غير عينيها وبسرعة بداو أنفاسها كاينتاضمو ونعسات..تحل باب البيت..دخل وسدو موراه ومشا حيد سبرديلتو والجاكيط الكحلة ديالو حطهم فوق الكوافوز وحط حداهم ماگانتو وخاتمو..حرك عضلات يديه وراسو وهز الكوڤر تخشا حدا بلا مايشوفها ولا تحس بيه..ونعس
فنفس الأوطيل ولكن فالمدخل اللوراني ديالو جنب فين كايلوحو الزبل..واقف جواد بقاميجة بيضة وبابيوين حمرة وسروال توب كحل..هاز صينية فيدو وكايهضر معصب فطيلي معصب: واش وصلتو..كيفاش مازال وإمتا بالسلامة حتى يتفرتك المجمع..وااازبي تامالك شاداك القفقافة غير بوحدك راها سااهلة غادي غير دخل للطاج لول حدا الدروج وتركن ليا تما..طفي الكاميرات وشي لاخر كلو عليا أنا..بففف قلاوي كيداير دوز ليا موسى دوز دوز..الو موسى..حضي معاك داك زبي لايمشي يخسر لينا كلشي راه والله ومايزدق هاد المرض ولا نغلطو فشي حاجا حتى نمشيو فيها بجوج..برب تايدبحنا وراك عارفو طيداير..واخا هانا ش(خرجات عندو المشرفة على ليسيرڤور)
المشرفة: آاسي..واش نتا ماناويش تخدم ولا كيفاش
جواد: “دار وجه الظرافة” سمحي ليا امدام راه غير الواليدة تشوشات عليا وعلمتها بلي غانتعطل شويا
المشرفة: ملي مك مشوشة عليك بقا عندها..ماشي دير ليا انا الخدمة ديال المرض..زيد دخل دير خدمتك راه الناس وصلو ولا سير فحالاتك
جواد: هه واخا الالة هي لولة…..حنا راسو ودخل مزير على تيليفونو وهي موراه مخنزرة فيه..
★★★
واقفة مع زينب فواحد الطبلة حاطين قدامهم جوج كيسان ديال العاصير ومرجان غير كادور فعيناها وتحرك صبعانها على الطبلة
مرجان: “جامعة حجبانها ومتوترة” اوووف فيناهي فيين..يخخ شهاد الزهر
زينب: “تاهيا كادور عينيها ولكن ماشي كاتقلب على سهام..بالعكس كاتقلب على التيتيز وكلا مرة تكول هادا حسن لا لا هادا حسن ويلي هادا راه التوت التوووت” صبري شويا اصاحبتي السيدة راها مشغولة زعما..
مرجان: شمن گالاك..راه 00:30 دابا واش بغيت نديرو بحال اخر مرة وحتى نمشي للقيسم عاد نكمل نعاسي تفووو
زينب: مرجان
مرجان: هااا
زينب: راها قدامك
طلعات عينيها وشافتها واقفة مع واحد المرا كايضحكو..شداتها الخلعة مع الفرحة مع الصدمة مع التفقيفة ومابقات عرفات اينا وحدة فيهم تزگي..من صغرها وهي كاتشوف سهام المنصوري جبل عريض عاالي يستحيل الوصول ليه..من ديما كاتشوف بلي حلم عارضة الازياء وتكون حتى هي كاتبان على اغلفة المجلات والجرائد هدف بعييد الاف الكيلومترات عليها..حبها وتشبتها وعشقها لهاد المجال خلاها دير المستحيل وتوصل ليه.. واليوم هاهي هنا..قدامها ومعاها فنفس المكان..كايتشاركو نفس الهواء..واقفين على نفس الارضية..فرصتها الدهبية واقفة قدامها على بعد مترات قليقلة منها….لمعو عينيها وراسها الفووووق كاتقويه وتحفز راسها براسها باش تمشي تهضر معاها..ولكن لا..ماشي دابا..خاصها حتى تكون واقفة بوحدها باش تعرف كيفاش تهضر وتعبر وتفسر وتوصل شحال وشحاال وشحاال من حاجة واقفة فحلقها وكانت كاتگولها بنظراتها لصورتها ليكانت معلقة عندها فالبيت..كلا ليلة كاتهض وتحلم وتبني مع ديك الصورة..فقط بكلمات ماكايسمعهم حد من غيرهم هوما بجوج..فقط بجوج….زيرات على پوشيطتها ورسمات ابتسامة على فمها فورما شافت ديك المرأة مشات وبقات سهام واقفة مع العوماري وراجلها وبنتها..عمر كايهضر مع العوماري وميلين كاتسيلفا بطيلي ديالها..أما سهام شادا كاسها ومزيرة عليه..عندها إحساس غريب مكتاسح كيانها وكلا مرة كاترشف من كاسها باش تجري عليه ولكن بدون جدوى…مرجان شافت هادي هي فرصتها مادام هي واقفة ماكاتهضر مع حد فمن الاحسن دير خطوتها دابا وبلا ماتزيد تعطل كتر..حسن مايتوضر ليها الكلام وتخربق كلشي..حطات پوشيطتها ودارت يديها شاداهم قدامها وخطات اولى خطواتها فاتجاهها باتسامة كاتشوف فيها بعينين لامعين بالفرحة..وعلى بعد خطوات فقط من انها توصل.. داز من حداها ودخل فيها بكتفو حتى كانت غاطيح ومع دالك مكمل طريقو..غادي يدو فجيبو متعنكر فالمشية خطوة خطوة..راسو الفوق وحجبانو مشروكين بشوفة صارمة وكل من داز من حداه كايسلم عليه وهو كيرد عليهم بابتسامة خفيفة وكايأني راسو شويا..البنات لي تما كلهم بغاو ياكلوه بعينيهم ويدوزو من حداه بأتيريو الإنتباه ديالو وهو ماراد البال لحتى حد وماشايف حد..غادي فالإتجاه فين واقفة سهام والعوماري وعمر وميلين….مخليها هي كاتشوفيه من لور..الشرار كايخرجو من عينيها وحجبانها دغيا خنزرات بيهم وماكرهاتش تشنتفو تشنتيف..مشات رجعات عند زينب معصبة
زينب: “ضورات عندها عينيها” اويلي شتك دغية رجعتي..آاش وقع؟
مرجان: “كاتشوف فيه عاطيها بالظهر..مغددة وگالت تحت سنانها وهي حاضياه” قيليني علك الله يرحم باك راني قريب نقتل شي وااحد
زينب: امالكي ياتا؟
مرجان: “سدات عينيها بعصبية” زييييينب
زينب: هاهي ساكتة يخخ
بقات حاضياه مخنزرة لي ضيع ليها فرصتها ولي ضربها فكتفها بلا حتى مايطلب منها السماحة..غير كاتشوف فيه مخنزرة وكاتحرج رجلها بعصبية وماابانشاي ليها بلي نااوي يتزعزع من ديك البلاصة بحال إلا ضد فيها واقف تما وتابت..واخة ماكايهضر مع حد غير هاز كاسو..مرة مرة كايشرب منو ولكن قليل فين كايجاوب وغير بكلمة ولا جوج ولاغير يحرك راسو
مرجان: لا صافي هادا باانليا غايبقا لاصق ليا تما
زينب: “ضارت عندها” نعام..شنو گلتي؟
مرجان: يمشي يخرا من كبيلة وأنا كانخطط ونفصل يجي هو يضرب ليا كلشي فزيرو
زينب: شكون هادا؟
مرجان: ولكن والله لاكانت..ليه هانا راجعة
زينب: واتي علامن..خلاتها مافاهما والو وتمشلت لجيهت طابلتهم كاتشوفيه عاطيها بالضهر واقف چ
بعيد عليهم بشوية..بدات طلع فيه وتهبط من الور وغير الطولة والكتاف يديرو منها ربعة…هو واقف غير كايتنهد شاد كاسو غير ويالله غايحطو ففمو وهو يحس فشي حد دخل فيه..يالله غايصعر ويدور وهو يلقاها قدامو واقفة مقابلة مع سهام كايبان غير شعرها قدام وجهو..
مرجان وقفات قدامها كاتشوفها كاتهضر مع راجلها..قادات الوقفة وحنحنات وگالت بصوت مأدب رقيق وابتسامة عدبة: مدام سهام
سمعات سميتها وضارت باش تلاقي عينيها الخوضر الزمرديتان مع مثلهما..خفقت القلوب وتسارعت الانفاس وهوما كايشوفو فبعضياتهم بنفس العيون والنظرات وقليل من الملامح..سهام بقات غير كاتشوف فيها وقلبها كايضرب بجهد وهي كاتفحصها كلها وگالت بصوت بالكاد قدرات تلملمو: وي
مرجان: “جمعات النفس ومدات يديها مبتاااسمة” انا مرجان
رمشات بعينيها ملي سمعات الاسم وسرطات ريقها بصعوبة..هزات يدها كاترجف حطاتها على يدها وكاتشوف فيها هي لي واقفة بتقة وتبات كاتشوف فيها..
مرجان: انا معجبة كبيبة بيك امدام المنصوري..حسن ليا الشرف انني نجي عندك اليوم ونشوفك..ماتصوريش شحال كنت متمنية لقاء بحال هادا وهانا ووأخيرا كايتحقق حلمي (بقات كاتهضر وتعبر وترمش وتحرك يديها) من لي كنت صغيرة وانا كانتابع عروض الازياء لي كنتي كاديري وكنت ديما كانحلم نكون بحالك شي نهار”سهام غير كاتشوف فيها بملامح جامدة”وهاانا دابة واقفة قدامك ههه ماتصوريش شحال فرحاانة ههه
سهام: “رمشات وابتاسمات” فخبارك واحد الحاجة
مرجان: شنو امدام
سهام: كاتفكريني فراسي..ماعرفتش علاش حسيت بحالما هاكا ولكن غير شفتك ومن شوفتك لي لاحظت..كاتفكريني فراسي هادي عشرين عام لور
مرجان: “غاطير بالفرحة” ههه شكرا بزااف امدام..ليا الشرف
سهام: “ابتاسمات ليها وحلات پوشيطها هزات منها كارط ديالها..مرجان غير كاتشوف مستغربة” هادي كارط ڤيزيط ديالي..إلى بغيتي وكان عندك طموح ديال بصح”طلعات راسها الفوق بصرامة” انا غانعطيك هاد الفرصة وغانتسنا اتصالك
مرجان”تصدمات فيها”
سهام: اشنوگلتي اانسة
مرجان: اا ؟ وي..وي بيان سور امدام ههه إن شاء الله أكيد غانجي
سهام: ههه إن شاء الله
مرجان: “حابسة الفرحة بزز” نخليكم دابة خاصني نمشي امسية سعيدة وليا الشرف انني نتلاقاك امدام وشكرا مرة خرا على وقتك ..
سهام: العفو احبيبة
مرجان حركات ليها راسها مبتاسمة ومشات لجيهة زينب نيشان لقاتها كاتشرب فليمون وتحضي الناس..باينة فيها قنطات..
مرجان: زينب سربي سربي تهزي نمشيو من هنا راه قريب نسخف
زينب: “شرعات عينيها” ويلي ماتگوليها..ناري قمعاتك..تفوو على بنات الكلاب راه هاكا كايكونو متكبرات بلا قيااس
مرجان: “خنزرات فيها” تزمي لا..هزي طيلي وعيطي على اسامة يتسنانا..رانا باغا نغوت هههه
زينب: اويلي علاش
مرجان: “بعينين كايبريو بالفرحة” نخرجو ونگوليك
★★★
جواد كايوزع المشروبات فالحفل وغير كايضور عينيه كي موكا كايشوف هنا وهنا وزينب راها واقفة غيير موراه..فواحد اللحظة حط داك البلاطو وبخطوات سراع قدر يطلع الفوق بلاما بحس بيه شي حد..كلشي مشغول بالحفل..وصل لواحد الباب فطاج لول وجبد من جيبو كارط حل بيه الباب ودخل لسويت حافظ شغلو وعارف فين يمشي..دخل للدريسين ومن جيبو جبد واحد الموس صغيير رقيق..مشا للپلاكار لقا واحد الكوفر كبيبر..مد يدو كايحلو بالموس وحيت محتارف فالسرقة قدر يحلو دغيا.وقف ورد الموس لجيبو وتم خارج بلى مايهز شي حاجة..فقط دار يدو فودنو وگال: كلشي هو هاداك راني حليتو..واخا اسيدي هانا نازل….حيد صبعو ونزل للتحت
واقف فطاولة من طاولات الحفل بجنب الاب ديالو.هاز كاس شامبانيا كايشرب منو ونظرات حادة مخنزرة كايوزها على الحفل كلو وأحيانا كايتوقفو عندها هي لي كاتدوي مع زينب وتحرك يديها ورجلها ليمنا…تحطات يد قوية على كتفو..حط الكاس بهدوء وبلا مايدور گال ببرود: حالتك هي حالتك مستحيل تجي فالوقت
رياض: هههه “ضار لعندو” عاد ساليت من شغلي اصاحبي..”حاضي البنات لي فالحفلة ويغمز” ولكن كون عرفت هادشي واعر هاكا..نجي من كبييلا
…- تبت اصاحبي..تبت ورصي لارض
رياض: علاه لييشوف هاد تيتيز كامل يرصي مازال لارض ههه باز لك اساط
…- “شرب من كاسو بلا مبالات ودور عينيه بصدفة جاو عليها وفواحد اللقطة ندبات حنكها وضارت مصدومة عند زينب..استغرب وماقدرش يسمعهم شنو كايگولو ولكن بقا كايتفرج ويرشف من كاسو”
مرجان: “مخرجة عينيها فزينب” هاويلي على ماغايجيش
زينب: مرجان بلا ماتعصبي غير بلاتي هانا نعاود نصوني عليه.. هزات طيلي عاوتاني ولقاتو هاد المرة طافيه … مرجان شافتها دارت ديك الشوفة وهي دير يديها فوق راسها بغات تندب: هاويلي اعباد الله دارها بيا ولد الحرام..هاويلي على بالحزاق لاخر جاي من ورا الجبل دارها بك امجان اويلي اويلي..منين نندب انا من هك ولا هك ولا هههههك هاااويلي
زينب: “كاتبسم بتوتر”مرجان رسي ازبلة واش باغا تشوهينا
مرجان: شوهتي انا مااابحالها شوهة واليووم نتشوه “حيدات يديها وتنفسات مزياااان ودارت عند زينب بصرامة” ..سمعي..دابة البكا ورا الميت خصارة..فكري معايا فشي طريقة نرجعو بيها لخربتنا دغيا وبلا شوهة
زينب: دابا الطوموبيل ماكايناش..يعني الحل لي عندنا هو طاكسي ولكن ماهزينا معانا حتى شي فلوس
مرجان:”ضربات جبهتها” كلاخيت هاد العشية هادي كلاخييت علاش مادرتش احتياطي علاااش
زينب: “لصمت كاتفكر”
مرجان دوراتها فراسها حتى دوراتها ولقات حل واحد هو ليعندها حسن ماتتشوه مع السيدة ويزدق كلشي مضروب ليها فالزيرو..دورات عينيها على الحفلة ووقفو عند واحد بوكريشة من الصباح وهو حاضيها وهي دور عند زينب
مرجان: لقيتها وهاد الحل هو لي كاين
زينب: “حلات فيها عينيها” اما هو
مرجان: “بحزم وهي كاطلع وتهبط فداك الشارف” نشفر ..
زينب: “خنزرات فيها” تخراي لا
مرجان: وشنو بان لك راه الى مشينا حتى خرجنا غانلقاو غير الخلا والقيفار وديك السلعة علم الله شنو غايوقع لينا
زينب: بففف فكري فشي حاجة خرا اصاحبتي..هانتي سيري عند ديك سهام طلبيها ولا ختارعي ليها شي حاجة تعطيك هي
مرجان: “خرجات عينيها” لا لا هادشي ليبقا الصرااحة برااڤو عليك..السيدة يالله جوج دقايق باش سلمت عليها وگالسا نعبر ليها ونوصف..على اللخر نمشي نسعاها..اش بغيتيها تگول عليا طماعة وتابعة غير الفلوس ويمكن حتى كمارني ماتبقا حاملة تشوفها..اللهيلا مزياان
زينب: دابا خيطي سيناريو من عندك وباقي گاعما سولتيها
مرجان: نموت ومانمشيش واخا نعرف نرجع لدارنا على رجليا
زينب: يااك ايوا سيري رجعي على رجليك وخلي عزة نفسك تنفعك ملي يشدك شي شمكار فشي قنت
مرجان: “عاود شافت لداك الشارف وهي ضور عندها” زينب راه الشارف مايدي مايجيب شوفي غير شحال من كاس ضارب
زينب: وتشفرييييه
مرجان: وا غير100درهم اناااري..عرفتي شنو..تسناي انا جايا
زينب: اويلي مرجان ماديريهاش. ..خلاتها كاتعيط وتمشات لجيهتو كاتسرط الريق وتشوف لجيهة فين كانت واقفة سهام..بانت ليها ماكايناي فالحفل ولقات فرصتها هي هادي حسن ماتشوه هاد النهار..مشات ناحيتو كاتفرك فيديها وتفكر كيف دير ليها وعيون صقرية كايترقبوها يشوفوها شغاتصنع..رياض كايهضر معاه وهو كايجاوب وعينيه عليها كايشوف ويحلل ووسعهم ملي شافها تعكلات حدا رجلين الشارف وغير بالريط خشات يدها لجيبو جبدات ليه البزطام وضرگاتو بيدها..ناضت كاتبسم ليه شاداها الخلعة وهو غير شاف عينيها والضحيكة لي دارت ليه داخ..اعتادرات ليه ومشات لجيهت الحمام موركة على البزطام ناوية تمشي تهز منو 100درهم وترجعو لمولاه زعما راه طاحليه وتخرج منها بحال الشعرة من العجينة..وقفات حدا الحمامات كانت البلاصة خااوية..حطات يدها على قلبها لي كايضرب وتنفسات مزيان ويالله غاتحلو وتشوف شحال فيه وهي تجر من لور لجيهت الطواليطات ديال الرجال..
غير تاتنفخ حاطة يديها على الطبلة وكاتشوف للجيهة منين دازت صاحبتها كادعي مايوقع والو وتسالي هاد الليلة المنحوسة بلا فرشة ولا مصيبة.. هزات طيلي طلات عليه لقاتها وصلات الوحدة وعاد غاتردو للصاك وهو يبانليها جواد مقاابل معاها كايفرق المشروبات لشي ناس..جمد ليها الما فالركابي وجاتها البولة مابقات عرفات شنو ديك وكيفاش تصرف وهي كاتشوفو واقف قدامها مباشرة وغير الى عطسات ولا تفنفنات غايحس بيها..هو ضار على ليمن ديالو لجيهة طابلتهم وبالزربة تحنات لتحت الطبلة مخبية واللون مخطوف من وجهها كاطلب الله مايكونش شافها..حركات راسها شوية وهو يبان ليها سباط ديال الرجال مقابل مع كمارتها وهي تيبس..سرطات الريق وطلعات راسها ببطئ بحال المشيشة من السروال للقميجة البيضة لفمو الغوز بحال ايلا معكر للحيتو الخفيفة الزعرة للعينيه الخضرين غاديين للصفورية..رمشات فيه ببلاهة عكسو هو لي مبتاسم ليها..من كبيلة وهو كايراقبها عاس على حركاتها حتى شافها شافت لجيهة جواد وتخبات تحت الطبلة..استغرب من تصرفها وجابت ليه الضحكة ومشا فاتجاهها هاز كاسو
رياض: “عوج معاها راسو بابتسامة” بون سوار
زينب: “غير كاتشوف فيه مبهوطة”
رياض: “ضحك وگال وهو كايتفحص ملامحها” صاڤا “ماجاوباتوش ودار لقا جواد مشا” هههه مالك محنية هاكا..كاتقلبي على شي حاجة
زينب عاد تفكرات جواد وهي طل من بين رجليه لفين كان واقف مالقاتوش.. هزات عينيها فرياض ليمطلع حاجب
زينب: “توترات” ااه طاحت ليا وكانقلب عليها داكشي علاش تحنيت
رياض: ههه شناهيا
زينب: حلقة..”دارت يدها فودنها بالزربة حيدات طانگتها” توضرات ليا الحلقة ديالي وعليها كانقلب..صافي غير سير نتا انا نشوف فين طاحت
رياض: “دار راسو متيقها وحط كاسو تحنا حداها وكل من كايشوف لجيهتهم مستغرب وهو مامسوق لحد” لا مايمكنش نخليك تقلبي بوحدك..انا غانعاونك اوكي ههه
زينب تحرجات وماعرفات اشدير وهي كاتشوفو كايقلب معاها من نيتو زعما..حطات الطانگة حدا رجلها ودارت راسها عاد لقاتها” اااه صافي اخويا هه صافي هاهي لقيتها …. شد ليها يدها خدا الطانگة وقرب لجيهتها حتى قرب نيفها يقيس نيفو
دخلها لطواليط خبطها مع الباب ديالو ووقف قدامها مربع يديه كايدير فيها شي تخنزيرات غير الله يستر..اما هي ماعرفات باش تبلات عاد كانت غاتاخد الفلوس وهو يجرها باقي ماستاوعبات والو..فيقها من سهوتها ملي خنزر فيها وگال بصوت حاد..’شكون نتي’
مرجان: ” خنزرات فيه وضهرها بدا يعطيها الحريق” الزعاامة خايبة هادي نتا شكون ليجاي مدرم وكاضرب من الفوق..مالنا شكااين
…- “طلع فيها حاجب “اييّاه وكاتسنطحي مزال
مرجان: ونتا مالك ولاش مدخلي لهنايا أصلا
…-“زاد دفعها وقرب تلاصق معاها نفسو كاضرب فيها” سمعي مزياان..بلا ماتخليني نمد يدي حسن ليك..”تحت سنانو” شكون نتي
مرجان: “شداتها القفقافة لايكون عايق بيها”..ونتا ماالك..شوف راكا ماكاتعرفش شكون انا حسن ليك حيد نخرج بحالاتي ولا راه ماغايعجبك حاال
..-“رجع عينيه لور مصغرهم فيها” اهااا
مرجان: معلوم “طلعات راسها” نتا مازال ماعارفنيش بنت من انا
…-بنت من…
مرجان: “بتقة” بنت سهام المنصوري
…- “خنزر فيها وفهادي زاااادت فيه..شدها من فكها مزير عليها فقساتو بهاد الكدبة وبينات راها مخبية شي حاجة” ايوا زيدي الالة الاميرة نگولو لماما بلي بنتها كادوز على الرجال فالحفلة وتشفر البزاطم همم …وسعات عينيها مصدومة. نشف ريقها وبدات ضور عينيها لي قربو يدمعو بالخلعة ‘آااش كاتقصد نتايا’
…-“طلع ليه الخز” طلعي البزطام حسن ليك وگولي شكون نتي وآاش كاديري فالحفلة ديالي
مرجان: “وسعات فيه عينيها مصدوومة” واش نتا هو شريك ڤاييرا جديد
…- قباض روحك انايا “لاصق نيفو مع نيفها وكايزفر” هضري خلااص ااش كاديري هنا..
مرجان: “رمشات كاتمسكن لقات احسن حل هو هادا وهو باينة فيه مامفاكش معاها ومعلوم حتى الا عطاتو البزطام ماغايتفرقش عليها وغاطيح فشي مصيبة كبر وتشوه” هانتا اخويا والله العظيم ايما كنت ناوية نسرقو راه غير ..غير ..
…- “بقلة صبر” دابا ماناويااش تهضري يااك
مرجان: لا صافي انا غانگوليك كلشي غير صبر “سرطات ريقها كاتفكر كيف دير تفك حريرتها وهو لاسق معاها كايخنزر فيها وماباغيش حتى يضربها باغي يعرفها علاش جايا للحفلة ديالو ولاش شافرة البزطام ساعا لقاها كاتعطي للكدوب والتسنطيح قتلة..وعلى غفلة منو وهو كايشوف فيها دفعاتو بجهد حتى تطرطقو ليه الصدايف لولين ديال القاميجة وقمشاتو فصدرو..حلات الباب بالزربة وخرجات سداتو عليه من برا ومشات كاتجري مخلياه هو كايخبط فداك الباب..كان معصب زاادت عصباتو كتتتر وكون شدها يفگسها بين يديه…
كايشوف فعينيها العسليين مقابلهم مع عينيه الخوضر وگال وهو ماساخيش من الشوفة فيها ‘انا غانديرها ليه’
زينب: “مخدرة فيه” شنو هي
رياض: هه الحلقة
زينب: احم لا لا بلاش انا نديرها لراسي…ماهتمش ليها وقرب لجيهت ودنها مدور عليها يدو وليد لخرا حاطها على ودنها كايسد الحلقة بشوية عليه..ركبها وحيد راسو شاف فيها
زينب: “غير كاترمش فيه ومتوترة من الشوفات ليكايدير فيها” شكرا وسمحليا
رياض: لا ماعليش …ابتاسمات ولقات حسن ليها تنوض لاتزدق ساخفة ليه هنا هزات راسها وجا نيشان فقنت الطبلة حتى تزعزعو الكيسان لي فوقها..ناضت كاتوجع تبوقلات والدمعة قريب تسيل..وقف حداها رياض وشافيها مخلوع ‘انشوف فين تضربتي..واش هنا؟’
زينب: ااه هءهءهء …بدا كايماصي ليها ديك البلاصة وهو قريب منها بزاف
زينب: “كاترمش فيه” الله ياربي كلشي تجمع دقة وحدة يخخ
رياض: هههه شنو لي تجمع
زينب: لا والو ..بقات كاتشوف فيها وهو كايشوف لجيهت الضربة كايماصيها ليها وعلى غفلة شافيها لقاها حاضياه وبالزربة نزلاتهم ‘احم صافي راها مابقاتش كاضرني’
زرياض: “شاف فعينيها سااهي” شنو سميتك …حلات فمها تنطق وهي تبان ليها مرجان جاية كاتجري دازت من حدا جواد نيشان كي الزواق بلا حتا واحد مايشوف لاخر ..وقفات عليها هي ورياض وبلا ماتشوفيه هزات بوشيطاتهم وجراتها وراها مافاهمة واالو لا هي لارياض …فنفس اللحضة خرج هو من الطواليط..جاي معصب كايتمشا بشوية محيد الڤيسط عنقو فازگ شويا وكايضور عينيه على القاعة..وقف حدا رياض
رياض: مالك حتى نتا؟
…-“معصب” ماماليش..فين الواليد
رياض: ماعرفتش عاد كان واقف فطابلتنا..مالك فازگ؟ ماجاوبوش مشا هز طيلي ديالو وخرج كايغزز فسنانو.. لقا باه فالباب ديال الاوطيل كايهضر فطيلي غير شافو وهو يقطع ودار لعندو.. ‘مالك واش غادي’
…-ااه صافي مليت وزيد عليها عيان..نمشي نرتاح شويا
العوماري: كاتبان ليا معصب شنو واقع
…-“تفكرها وزاد تعصب” لا ماواقع والو غير بغيت نمشي
العوماري: تسنا راه انا نيت كنت غادي..نمشيو بجوج …خرجو لبرا لقا لوطو ديالو كاتسناه..ركب وركب باه حداه وضيمارا غادي طااير..
★★
وقفو فالشاريع كاينهجو وسخفانين من الجري ليدارو
مرجان: “كاترد النفس” أنا راه والله حتى منحوسة بالله
زينب: واازهر مكوز هادا كنا غانمشيو فيها
مرجان: “شافت فيها” ونتي باش عرفتي
زينب: آاش عرفت؟
مرجان: هادشي ليوقع ليا
زينب: هااويلي كتر من هاكا ااش وقع مازاال؟
مرجان: زيينب ماتجعريينش كتتتر وگولي آاشنو وقع
زينب: شفت جوااد
مرجان: جوااد خوويا “حركات راسها” هاااويلي قفااارت
زينب: قوااادت
مرجان: تنااكت..نااري كوون حصلنا يفرج فيينا الربااط سلا ومااجاورهما
زينب: وااغاسكتي راكي دزتي من حداه ملي كنتي كااتجري. غاحفظ الله وناشافكش
مرجان: “بغات تبكي” هااميمتي وماعندي زهر اعباد الله ماعندي زهر..واش حتال النهار ليكنت كانتمنا اييمتا غير يوصل زدقو مجموعين ليا فيه مصاائب الدنيا والديين..
زينب: صاافي زييدي دابا ناخدو طاكسي ونقودو من هنا قبل مايوصل للدار قبل منك وتزدقي مقوداها نيييت …
قدام القصر الفخم ديال عائلة العوماري توقفات سيارتو فالمدخل الرئيسي تحل الباب ومادخل لوطو..دار لعندو باه
العوماري: غاتنزل ولا مازال
…-“كايشوف قدام” لا غانمشي لداري
العوماري: “تنهد” لي يريحك حل الباب ومد عكازو نزل كايتسند بيه وهو دار دوميتور ومشا فإتجاه دارو..معصصب وغير قارن حجبانو غادي مكسيري فالطريق طااير..وصل لواحط پتي ڤيلا ضاير بيها الشجر تحل الباب ديال الحديد..دخل لوطو بلاصاها قدام الباب ونزل مد السوارت للعساس..دخل للڤيلا وتوجه لطابق الفوقاني وهو كايحيد صدايف القاميجة..حل واحد الباب كحل ودخل لبيتو الكبير..ناموسية دايرة فوسط البيت مقابلة مع پلازمة كبيرة موراها كرسي ملكي ديال الخشب منقوش فالجناب بالدهب ومقاابل مع باالكو بابو كلو زااج كايبين السما كلها.. فجناب الناموسية جوج كوافوزات كحلين فوق منهم فيوز وفالجنب حداه الحمام وحدا الحمام واحد البيت مسدود..نصل القاميجة وحس بشي حاجة كاتوزوز ليه فصدرو..شعل الضو وقرب لجيهت مراية طويلة عندو فالبيت وهي تبان ليه قمشة طويلة فصدرو قدها قداش..حط صبعو الصغير على راسها وهو هابط بيه كايتفكر كلامها..(ونتا مالك لاش مدخلني هنا أصلا)عينيها(خنزرات فيه وظهرها كايعطيها الحريق)نظراتها(شافت فيه بتقة: أنا بنت سهام المنصوري)وآخر حاجة ملي دفعاتو قامشاه وزيد عليها سدات عليه الباب خلاتو معصصب لأقصى درجة وبقوة الحر لي فيه ضرب داك الباب حتى طوعو ومشا غسل وجهو يبرد شوية..حيت بجوج خطوات غايشدها وديك الساعة عارف راسو غايفلعصها مافيهاش..تنهد ومشا جيهة الحمام وبعد لحظات خرج لابس شورط كحل بسيور عريان من الفوق وهاز فوطة كايمسح بيها..مشا لواحد الپلاكار صغير جنب البالكو جبد منو قرعة ديال الزاج فيها الويسكي وجبد كاس..كب ليه وهزها..مشا للكرسي لي مقابل مع البالكو وگلس كايشرب مقابل الليل بنظرات جامع فيهم كلشي وضو القمر كايضرب فوجهو..ساعات وهو گالس وكايشب شوية بشوية..رشفة رشفة حتى بدا داك الضو لي مضروب فوجهو كايختافي ويبان فبلاصتو ضو الشمس..غير شافو سد عينيه وتنهد وهو حااقد..هز ديك القرعة لي خوات فيها النص ردها لبلاصتها ومشى يعاود يدوش باش يمشي لخدمتو..
أشعة شمس متسلسة دخلات متسللة للبيت..شاااابع نعاس..خاشيها فيه كلها معنقها لعندو ومدرعها بيدو ويد مسند بيها راسها ورجليها تحت رجليه..نيفو على شعرها كايعنكشو معااه معا جاه رطب ستحلاها وكاينزلو شوية بشوية لجيهة عنقها كايستنشق ريحتها ويحك نيفو معاه.. وعلى غفلة..حل عينيه على وسعهم مصدووم..بالزربة طلع راسو ليها هي لي كانت نااعسة ماجايبة للدنيا خبار..خرجو عينيه وتصدم فاش شافها ناعسة فبيتو ففراشو وبين إيديه ..بدا كايربط الأحدات ويتفكر البارح البنت لي جاوباتو إدن هي هادي،شنو زعما ضيفة عندهم فالدار وعطاتها مو بيتو..هزليها راسها بشويا وحطو على مخدتها وسلت من حداها تالف غير بوحدو وكيدار حتى ماشافهاش.هز جاكيطتو بالحس وهز طيلي ديالو وخرج سد الباب بالحس ونزل لتحت…
ايجا كاتحط الفطور فالطبلة لي فالكوزينة ماكاين حد فالدار من غيرها هي وتيتريت..عماد ومروان مشاو لمدراستهم والحاج عزيز فخدمتو بقاو غير بجوج بيهم..حطات الصينية وهي تسمع الباب تحل گالت وهي كاتخلف أتاي
إيجا: يالله لقيتيني غانطلع نفيقك باش تفطري..طلعات راسها لباب الكوزينة وهي تشوفو واقف مسند يدو على الباب مبتاسم ليها
كريم: وانا ماتعيطيش ليا نفطر معاك
إيجا: كريم!! “قربات لبه” ولدي الحبييب “عنقها ليه بجههد كايحيد وحشو منها” الله ياوليدي وحشومة عليك..حشومة عليك سامح فميمتك هاد اليامات كلها ومابغيتي حتى تزورها..الله ياوليدي الله لوكان تعرف شحال توحشتك
كريم: ميمتي “كايبوس فراسها” توحشتك الحنانة توحشتك كون تعرفي قداش..بقا معنقها كلا مرة يبوس راسها ويديها وحتى هي فرحاااانة وماقاداها فرحة
إيجا: زيد اوليدي تفطر زيد احبيبي راك واقلة عياان..أجي گلس حدايا رانا توحشتك توحشك
كريم: يااك أيجا حوگلي فينما نعيط ليك تقطعي عليا فعايل دابا هادو
إيجا: عبرت عليك أبوراص تستاااه،كونما هاكا گااعما تجي عندي..اجي ايمتا جيتي گاعما شفتك
كريم: “طلع راسو وحك راسو لور” جيت البارح بالليل..ماكنتش باغي نفيقكم داكشي علاش مشيت نعست حسن
إيجا: “طرطقات فيه عينيها: وفين نعستي
كريم: فالصالون الواليدة فالصالون..ماكان فيا مايدخل للبيت حيت جيت مسخسخ
يجا: ااه ايوا مزيان..البيت بعدا راه عامر مزيان لي مادخلتيش ليه راه عندنا الضياف
كريم: واايلي شكون عندا
إيجا: بنت خالتك يزا..تيتريت
كريم: شكون؟
إيجا: اويلي ماعقلتيش عليها؟
كريم: لا..كبي ليا نفطر راني موحش ماكلتك “باس ليها يدها”
إيجا: هههه هااهو ياسيدي..هاك شرب ورد عليا …هز كاسو ضااحك وبدا كايفطر وهي دخل لالة البنات بحال العادة بپيجامة مستورة وشعرها جامعاه.. كاتكسل ضاحكة..
تيتريت: صباح الخير خالتي “عاد شافت كريم منزل راسو كايفطر مامديهاش فيها”
إيجا: صباح النوور ابنتي هههه هادا كاريم ولدي لي كنت گلت لك عليه..وهادي هي تيتريت حبيبتي بنت خالتك يزا الله يرحمها
تيتريت: “تبسمات ليه” السلام اخويا
كريم: السلام
إيجا: زيدي احبيبتي تفطري زيدي هههه إوا أنا معروف علاش فرحانة هاد الصباح ونتي مالك فايقة منورة
تيتريت: والو أخالتي غير نعست مرتاحة البارح
كريم: “طلع فيها عينيه وبالزربة نزلهم وناض” الواليدة أنا خارج
إيجا: الله ياوليدي وبحرا وصلتي،فين باغي تمشي
كريم: غير هنا فالدرب ماتخلعيش مازال ناوي نبقا معاك هههه يالله هانا غادي.مروان معاش خارج
إيجا: مع الطناش
كريم: مزيان نيت نجيبو معايا..الله يعاون ..مشا وسد الباب وإيجا دارت تكمل فطورها..تحلات ليها الشهية وفرحااانة حيت توحشاتو بلا قياس …
★★★. ★★★. ★★★
10:30
ناعسة فبيتها على ضهرها وغارقة فنعاسها حتى بدا طيبي كايصوني خسرات سيفتها ماساخياش تنوض وهي تمد يدها هزاتو ودوزات الخط بلا ماتشوف النمرة
مرجان: الو
أسامة: ختي مرجان صباح الخير يا كما فيقتك
مرجان: “دايخة بالنعاس” شكون معايا اخويا
أسامة: اسامة هادا اختي
مرجان: شكون اسامة
أسامة: احم اسامة اسامة هه علاه شحال من اسامة كاتعرفي
مرجان: واحد الخونتة هو لي كانعرف بهاد السمية. ولكن البارح قودها معايا وواااقلة مابقاش عندو الوجه لي عليا
أسامة: والله امرجان مالخاطري را..
مرجان: اطط اطط مع دابة باقي مافقت حتى الى بغيت نتعصب ماغانعرفش حيت باقي ماتوگضت..سير واحد ساعة ورجع عيط ديك الساعة نكون موجودة لك مزياان اوك بب بااي
قطعات وحطاتو تحت مخدتها وتقلبات على كرشها مكملة نعاسها
★
فاقت مليكة ودخلات غسلات وجهها ودارت الما ديال الوضو..مشات لبيت مرجان تجمعو وغير حلاتو لقاتها هااكاك بااقا ناعسة وهي تغوبش
مليكة: أديكااه..مرجان.مرجاااان
مرجان:”خاشية راسها فالمخدة” همم
مليكة: ياتي ماقارياش اليوم
مرجان: لا
مليكة: شوف أووكان
مرجان: “طلعات فيها راسها مبوقة بالنعاس” واامليكة حشومة عليك خليني ننعس دابا
مليكة: كتي قارية ياك الحمارة..زدقتي مامشيتيش حتى اليوم
مرجان: اووف كيبغيتيني نمشي وانا ميتة بالنعااس رااسي ماقادراش نجمعو
مليكة: والليل ليكانو ينعسو فيه الناس نتي فين كنتي آا؟ فين كنتي؟
مرجان: “رجعات تكات” سهرانة
مليكة: فااش بالسلامة اخيتي
مرجان: فطيلي ببفففف واصافي دابة خليني ننعس
مليكة: “خرجات فيها عينيها” تهزي لمك گالاك ننعس..مزيان تبارك الله سهري بالليل ونعسي بالنهار ايوا صفات
مرجان: هء هء واامااامااا
مليكة: الغمة..نوضي جيبي لپاريزيان يالله..نرجع نلقاك باقا ناعسة ننتف بنتي
مرجان: واالحگرة هاادي بالله حتى الحگرة …ناضت مغبنة ماعدها خاطر وميتة بالنعاس..البارح ماوصلات للدار حتال ديك التلاتة..جات مدگدگة وبقاليها غير شويا وطيح..دخلات للحمام غسلات وجهها وحكات سنانها ودخلات
ودخلات لبيتها هزات بوليرو ديالها لبساتو فوق الپيجامة وجمعات شعرها الفوق بقراسة..سدات باب بيتها وحلات ديال جواد لقات فراشو باقي مصاوب من البارح هي مارجعش للدار..ضرها راسها خصوصا ملي گالت ليها زينب بلي شافتو هاز پلاطو فيديه كايفرق كيسان تاع العصير ر وهي عارفا خوها ماعندوس مع بحال هاد الخدامي وعمرو دارهم ومتأكدة عمرو يفكر يديرهم..ادن كاينة شي إن فالموضوع..دخلات عند ماماها للكوزينة لقاتها صلات ودارت الما ديال اتاي يطيب وكلسات توجد الفطور …وقفات حداها ‘هاري نجيبلك هاد الباريزيان علاش مصدعاني’
مليكة: عشرين درهم فوق التلاجة جيبي جوج
مرجان: وناخد الباقي
مليكة: لا
مرجان: مسخرا ليك وماناخد والو آاو..واخا غير الروشارج زعما
مليكة: غاتنزلي تسخري ولا نشير على بنتي بهاد الكااس
مرجان: اووف..هبطات بپانطوفتها للدرب لقات البراهش قدام دارهم كايلعبو البي وشي عيالات كاينشرو وشي شاد النميمة على الصباح..توجهات للمخبازة غادة وتفكر فليلة البارح وبلاناتها لعوجين ولمزيانين..من ناحية ضربات ضربة صحيحة ملي تلاقات ودوات مع سهام المنصوري وعطاتها نمرتها گااع..ومن ناحية كملات ليها الليلة فالصو ملي خوا بيها اسامة ومازدقش جاي يردها غير تفكراتو تغغددات نييت ولكن حاالفاها فيه وغاتردها ليه تانية متنية وبسبابو ضطرات تشفر..على غفلة طاح ليها فبالها هاداك لي كالاها فالحمام وكافاش سدات عليهخلاتو معلق تما..تخلعات كتر وكتر ونفضات راسها دخلات للمخبازة خدات جوج پاريزيانات وهي راجعة تلاقات مع خليل جاي من نفس طريقها..غير شافها وهو يبسم وتسناها قربات لناحيتو
خليل: صباح الخيير..صباح زوين هادا ليصبحت عليك
عهههه يااك بعدا؟
خليل: والله “قطع ليها من الباريزيان” ماقارياش اليوم
مرجان: تت ونتا
خليل: قاري ولكن مافيا مايمشي..حتى يجيب ليا صاحبي المحاضرات
مرجان: شحال زوينة لافاك والله..تقرا وقتما بغيتي وتخرج وقتما بغيتي وماكاين لييتسوق لك
خليل: هههه ايوا زيري راسك طلعي ليها هاد العام..عرفتي شنو زيدي فطري معانا راه الواليدة تقيل تسول عايك
مرجان: ههه الا كانت لالة غيتة هي لي عارضة عليا مرحبا
خليل: ايوا زيدي نمشيو “تمو راجعين فالطريق”
مرجان: أجي فين كنتي غادي نتا؟
خليل: راجع ماشي غادي،كان عندي مانقضي
مرجان: إيوا صبر نحط الباريزيان ونسول مليكة بعدا عاد نشوف
خليل: اوكي..كيداز االبارح
مرجان: طووپ دطوووپ
خليل: نعيا مانفكر كيدارت حتى خلاتك ماماك ولكن واالو
مرجان: من الصباح وانا نطلبها عام عاد بغات
خليل: ومعاش رجعتي
مرجان: معقلتش..هانا وصلت اطط نمشي نطلع ليها لپاريزيان ونسولها …طلعات عند ماماها حطات ليها الپاريزيان وسولاتها واش تقدر تمشي تفطر عند غيتة..گالت ليها سيري ونزلات گالتها لخليل ومشاو
★★★
راجعة من المدرسة غادة لدارهم معصبة ملي دازت الحصة بلا مرجان..طاح عليها الضيم وتعصبات حيت دارو يطلاقاو مع التمنية حدا باب المدرسة ساعا زدقات مرجان خامرة ومامشاتش..هزات طيلي ديالها ودوزات نمرتها ودغيا جاوباتها
مرجان: ألو حبي
زينب: الزعتر..مالكي ماجيتيش هادي هيا الكلمة ازوفرية
مرجان: “گالسة هي وغيتة فالصالون كايفطرو” وراه كنت ناوية أصاحبتي ولكن غدرني النعااس
زينب: مسكيينة
مرجان: واصافي ازينب سمحي ليا عافاااك
زينب: مخلياني داخلا ساعتاين عند الڤيزيك طرمتي دراتني واكون غير علميتي بعدا
مرجان: واراه ماشي لخاطري احبيبة والله..اجي كتبتو شي حاجة
زينب: ممم
مرجان: خلي حتى تجيبيه ليا اليوم صافي
زينب: والله لاجييت
مرجان: أناا نجي عند زين ديالي غير ماتبقايش مقلقة صافي..مع الستة نكون عندك واخا ازين دياالي.بااي
قطعات وحطاتو حداها
غيتة: “غزااالة فوجهها واخة كبيرة فالعمر والبراءة باينة فيها لابسة فراشة خفيفة شيبية مفتوحة من الجناب طالعة شوية مع رجليها البيضة الصاافية” تقلقات يااك
مرجان: ممم يخخ ماكانعرفش نصهر ونفيق بكري
غيتة: هههه حسن لك نييت..بعدا الهالات تهنيتي منهم وحتى بشرتك صافية
مرجان: بصح..حلفي حلفي
غيتة: والحلوف لااش هههه راكي غزاالة كاتحمقي بالخصوص عينيك
مرجان: منكونش بحالك الحب..مصاب غير يتقاد زهري شوية
غيتة: داابة يتقاد احبيبتي غير كوني هاانية
مرجان: يااربي..
غيتة: إوا شت غير زينب عيطات ونتي تحبسي..كملي راه ماغاتفلتيش مني
مرجان: تي سيري فحالاتك راه گلت كلشي
غيتة: اوا ماوصفتيهش ليا كيف داير واش زوين واش خايب
مرجان: مخييبو ياختي الخيوبية كاتقطر منو تقاطير ويديه گد البالة الخبطة لي خبطني مع الباب باقة لدابة كاتوزوز
غيتة: والاواه لاوااه
مرجان: ايوا الصراحة
غيتة: الله يمسخك راه كانعرفك نتي الواحد لا غلط معاك واخا يكون ملك جمال الكون ماتحملي فيه الشعرة
مرجان: هاانتي هضرتي داابة..شتي فعيني انا كايبان ليا خايب خايب خاااايب
غيتة: واغير وصفيه ليا كيف داير وانا غانعرف نجبدو واش زوين ولا لا
مرجان: غييتة..سخنتي لا
غيتة: “هزات كاس تأتاي وحليوة” يخخ على باشار الواحد مايدي منك لاحق لا باطل بففف..
مرجان: ههههه فراسك شنو
غيتة: شنو
مرجان: حمقني هاد اللون لي دايرة ماكرهتش نسبغو بحالك
غيتة: إوا ديري شي وقية وزيدي نسبغو لحبيبتي انا نييت
مرجان: بصح
غيتة: هههه بصح بصح
مرجان: “عنقاتها” هههه ياااي لهلا يخطيك عليا طاانبغييك انا طانبغييك
غيتة: هههه اوا صافي طلقي راكي خنقتيني..كملي كملي فطورك
مرجان: لا لا غانمشي كونراه مليكة بقاليها شوية وتخرج ليا..انا غادة حسن
غيتة: هههه سلمي عليها..وماتنساينيش مرة مرة دوزي صافي
مرجان: صافي كوني هاانية ابب..طهلاااي..خرجات مخلية غيتة كاضحك عليها..
★★★★★★★
فبيتو كايمشي ويجي بنفس حوايج البارح ووجه صفر وعينيه مدمعين أفكار موضرين تالف وماعارف شنو يدير..هاز طلي كايصوني ويعاود
أيمن: جاوبب اجواد جاوب جااااوب …عيا بالتعياط وهو والا بغا يجاوبو..گلس على حافة االسرير ضايع وخايف ضرب حساب يمشي يعطل الكاميرات ديال الفندق باش جواد يشفر..ساعا عرف بلي واحد الكاميرة متواجدة فالبيت مقابلة مع الخزنة ماكاتختارقش واكيد غاتكون شدات جواد ومشا فيها ومادام مشافيها جواد فاحتى هو مشافيها وغادي لاحبس مافيهاااش..بغا يحماق من التفكير فهاد المصيبة فاش طيح راسو وعااود هز طيلي كايصوني ليه ويعاود ويعااود …
فشركة ڤاييرا..
گالس فغرفة الاجتماعات ببدلتو الرسمية قاميجة بيضة وفيسط كحلة..جنبو ليمن گالس جود المساعد ديالو وقدامو سهام حتى هي كيف العادة متألقة فلباسها..لبقة فحركاتها..كاتهضر على المشروع لي جامعهم..
سهام: ومادام غايكون شي حاجة جديدة فالسوق..يعني شراكة جديدة وأفكار جداد..فاكنضن خاص حتى العارضة لي غاتقدم التصاميم ديالنا تكون وجه جديد..شنو بان لك أمسيو
…- همم..متافق معاك فهادي..من الأحسن يكون كلشي نيو كبداية جميلة..”ناض وقف” هادشي خليتو عليك نتي حليه
سهام: كون هادي امسيو العوماري
…-الإجتماع سالا..بون شونص … سد الفيسط ديالو ومشا خرج غادي فاتجاه الأسونسور مع جود..نزل للپاركينگ ومشا ركب فلوطو ديالو وكسيرا وجود حتى هو ركب فطوموبيلتو غادي موراه …
******
💎 Alrosa 💎
شركة روسية..كاتعد من أقوى الشركات الرائدة فالعالم كلو بحيت عندها منجم واحد في روسيا كايخليها تتصدر من بين أقوى الشركات..إذ كايحتاوي على ماس 4 مليار دولار والرئيس ديالها هو المالك الوااحد الوحيد لهاد المنجم الضخم عاد باش مناجم أخرى فجنوب إفريقيا …فالفرع ديالها بمدينة الرباط توقفات سيارتو ومن موراها سيارة جود..قرب أحد الحراس فتح ليه الباب ينزل وخدا الساروت يمشي يبلاصيها..بخطوات سراع واتقين داخل مع الشركة فإتجاه المكتب ديالو وكل من شافو توقف عاطيه التحية وهو غادي نيشان ماشايف حد لإتجاه الأسنسور ..دخل ليه وطلع للطابق فين كاين المكتب ديالو..نزل وتوجه ليه..طابق فيه جوج مكاتب بالحساب ومنهم المكتب ديالو لي كيف دخل ليه دخل جود موراه
…-“حيد الڤيسط وگلس تحنى على شي وراق” ياك لاباس شنو واقع
جود: داكشي لي توقعنا هو لي كان..التصاميم جداد وشي ألماسات تشفرو من الخزنة لي فالوطيل
…-همم “شاف فيه ببرود” وشكون هادا
جود: گاع الكاميرات كانو مخصرين الا الكاميرة لي فالبيت كيما عارف مستحيل تتختارق
…- ممم..إدن قادو التسجيل وسيفطوه ليا نشوفو انا لول..من بعد نگولك كيفاش تصرف
جود: واخا أمسيو..تحنى ليه ومشا خرج..وهو بقا كايشوف فالباب مدة رااد راسو لور..من بعد حل الپيسي ديالو خدام …
گالس فالصالون وتيتريت گالسة مقابلة معاه هو ومروان كاتشوف فيهم مبتاسمة..مروان گالس فوق رجرو بغا يطير بالفرحة وغير يدور يدور ويگوليه يالله نخرجو غير بجوج ولا يالله لعب معايا فپليي ولا زيد نمشيو نتقهواو فقهوة باحمد..المهم يقضي معاه وقت طويل وكريم غير كايضحك ويگوليه واخا واخا..دخل عماد هاز شكارتو ومع الصالون جا جنب الباب قشعو مع الدخلة..ناض لعندو مروان كايجري والفرحة قريب تنقز من عينيه
مروان:شفتي خوويا كليم جا جا …دخل عندو عماد ضااحك أصلا كان عارفو غايجي يدوز معاهم شي يامات مع كان گالها ليه ..سلم عليه وگلس حداه ومروان نقز على رجلو تاني غير كايفرنس ويضور عند تيتريت يقلي ليها السم وهي مامدياهاش فيه أصلا
كريم: “لعماد” ونتا كي غادي مع القراية بيخير بعدا
عماد: الحمد لله اخويا هاحنا غادين
كريم: وزير راسك زير ..”تحنا عند مروان” ونتا اسراق الزيت كاتقرا مزيان ولا غامتقل بديك الكارطابل
مروان: “شاف لجيهت تيتريت مراضيش” واماتگولش ليا سراق الزيت
كريم: “شافيها بنص عين” علاش مالنا اش كاين
مروان: خويا كليم فلاسك بيتك خداتو ليك هادي …تيتريت وسعات عينيها فيه تفكرات نهار گاليها غانگولها ليه وغايضربك …طلع فيها كريم عينو ويالله غايهضر وهي تدخل ايجا هازة طاجين تاللحم..ضارت عند تيتريت ‘سيري احبيبتي جيبي ليا الخبز الله يرضي عليك’ ..حركات ليها راسها وناضت قلبها كايدردگ خاايفة..هزات سلة الخبز وداتها للصالون حطاتها فوق الطبلة المضورة وگلسات بعيد حتا عيطات ليها ايجا تقرب عاد توخرات لطبلة وبداو ياكلو ..كاتهز دغمة قليلة وتخشيها ففمها وتسنا حتا تندغ عاد دوز الدغمة لخرا،حتى فماكلتها بريئة وتقيلة وكلا مرة خاصها ترمش برموشها الطوال..طلعات راسها وشافتو كايشووف فيها لكن نيشان هبط عينيه وحتى هي نزلاتهم كاتفادا الشوفة فيه..كملو وتهز الطاجين وحطات ايجا الديسير وغير تاتنقي لولدها فرحانة بيه..ناضت تيتريت استأدنات منهم ومشات لبيتها وحتى كريم وقف
كريم: الوليدة انا خارج دابة
إجا: أويلي مازال الحال..بقا گلس حدايا غيير شوية
كريم: غير هنا شوية وراجع …خرج من الدار طالع لطاج الفوقاني لبيتو حيت فالصباح بالتلفة لي تلف نسا مايهز ماگانتو وحتى خاتمو..دخل مع الدار الفوقانية ومشا لبيتو نااسي راه ساكنة واحد الضيفة وبلا احم بلا دستور دخل..كانت عاطية بالظهر للباب طالقة شعرها الطويل كاتمشطو وغير سمعات الباب قفزات هو نزل عينيه وگال بحدة..غاناخد شي حوايج عندي هنا”حركات راسها حشمانة منو” دار راسو كايقلب فالمجر وهز الخاتم والمگانة لبسهم ومشا خارج وقبل مايوصل للباب..
تيتريت: خويا كريم
كريم: “ضار عندها نص دورة” همم ..قربات لعندو وگالت كاتفرك صباعها وترمش ‘سمحليا حيت خديت لك بيتك “ضار لعنها مغوبش” انا ماقصدتش نستعمرك فيه وبسبابي نعستي فالصالون البارح سمحليا..واليوم انالي غانمشي ننع..
كريم: “قاطعها بحدة” هادا بيتك واخا وانا اصلا ماساكنش هنا غانبقا غير شي يامات داكشي علاش هادا ولا بيتك
تيتريت: “طلعات فيه عينيها كاطلبو بيهم” ولكن راه حشومة تبقا تبات فالصالو..
كريم: “زفر” صافي دويت..هادا بيتك بدليه كامل نتي الابغيتي ماسوقيش..ومانبقاش نسمع هاد الهضرة اوك
تيتريت: “هزات راسها بمعنى اوك” شكرا اخويا …خرج نزل من الدار مخليها هي ارتاحت شوية ورجعات كاتمشط فشعرها..
عند زينب
نازلة فالدروج ومشات لصالون عند ماماها..
زينب: نعام
عايدة: أجي احبيبتي بغيت نسولك
زينب: ماما ياك لاباس مالكي؟
عايدة: شوفي انا نسولك ونتي ماتخبيش عليا..اوك حبيبة
زينب: “صفارت” علاش غانخبي عليك مالي اشنو درت
عايدة: ماشي نتي..أيمن
زينب: أيمن؟؟
عايدة: آه أيمن..من الصباح وهو كايبانليا ماشي هو هاداك مافطر ماتغدا وحتى بيتو ماخرج منها
زينب: كونراه غير مريض
عايدة: طلييت عليه كبيلة مابانش ليا مريض بالعكس متأكدة شي پخوبليم هادا لي طيح فيه راسو عااود..گولي ليا احبيبتي اشنو واقع..مالو
زينب: والله اماما ما عرفت اصلا من البارح ماشفتو
عايدة: ايوا هانتي طلعي عندو سوليه ياكي ونزلي عاودي ليا اش كاين
زينب: صافي واخا بلا ماتشغلي بالك كون كانت شي مدابزة كون وصلاتك خبارو قبل مايوصل للدار ههه هانا طالعة
عايدة: ميغسي حبيبتي..وهانتي ماتنزلي حتى يعاود لك كلشي
زينب: “طالعة فالدروج” واصافي غانلصق فيه هههه …وصلات لبيتو ودقات ماجاوبهاش : أداك بوراس حل حل..أيمن محتاجاك واحل هاد الباب
أيمن: زينب سيري بعدي مني هاد الساعة راه ماناقصكش
زينب: أويلي على ماناقصنيش راه مامحركاش من هنا غير لاما حليتي يالله …ناض وقف فشلان مدمر وعينيه ماليهم الخوف..بالأخص ملي شاف داك الحفل ديالمن وشكون هاداك لي شفرو زاد خواو بيه ركابيه وحس بكبر المشكلة فاش طيح راسو..حل ليها الباب هي ليكانت واقفة حداه مبسمة ولكن تمحات ملي فورما شافت حالتو
زينب: أيمن؟!!ماالك أشنو واقع
أيمن: “غرغرو عينيه” طيحت راسي فمصيبة أختي..مصيبة ماغانعاودش نوض منها
زينب: أويلي آاش درتي..هضر خلاص أشمن مصيبة طيحتي فيها راسك؟
بقبية بيضة مكتوبة من الوسط ودجين زرق مع سبرديلة بيضة وساكادو قهوي..غادة فالطريق عند زينب وطيلي غير كايصوني ويعاود..هزاتو بالنترة جاوبات وگالت منفخة: راه دويت وگلت ليك ماعمرك تحلم نردها وااش اخويا كاتفهم من طرمتك
أسامة: وعلاش اختي..ماحشوماش عليك؟
مرجان: حشومة عليا انا؟ انا ياولد الحرام لي خليتك فالقنت التالي ونتا ماهاز لاريال لاجوج..انا لي خويت بيك وگلت ليك غانوصلك ونجيبك وماجيتش انا يااك..لمك نسيتي شحال من مرة وقفت معاك ملي كتي كاتكحلها مع باك..شحال من مرة فكيتك من شحال من موصيبة طحتي فيها ءء؟ شحال؟
أسامة: عاارف أختي مرجان والله حتى خيرك ساابق وحق الله غيير هو..
مرجان: شوف الله يرحم باك بلا سباغة بلا تجيار باراكا غير التصبينة لي عطيتك فالصباح وشتي غير الكسوة..راها ماكايناش ماكايناش ماكايناش اوك
أسامة: وااراه والله مالخاطري بالله حتى الواليد كان بغا يمشي يجيب بيها شي سلعة قبل مايودن الفجر ونتوما لي تعطلتو عليا
مرجان: “كتمسكن” إيييه واراه حتى انا مانصيبش مااكرتشاي لك ولكن الغارب الله مانقدش
أسامة: وياك گلتي ليا كلمة العيالات وغدا نردها..گلتيها ولا لا
مرجان: وعلاه حنا العيالات عندنا شي كلمة.حنا راه ناقصات عقل غاليگالها الطانطون ديال راسنا نديروها ودابا طانطوني كايگوليا نقطع عليك يالله بااي بب. “قطعات” ..هحح ويلا شفتيها ياوليدي رانا واشمة طرمتي ..كملات طريقها ووصلات للعمارة ديال زينب..صونات لطامو وحلات ليها..طلعات ودخلات بانت ليها عايدة گالسة بوحدها فالصالون ومشات عندها
مرجان: هه السلام خالتو “باستها”
عايدة: أهلا أبنتي..صاڤا عليك
مرجان: صاڤا الحمدلله بيخير..فين زينب
عايدة: زينب سيفطها تسخر ليا..گلسي شربي معاها شي حاجة
مرجان: أوكي “حطات شكارتها حداها”
عايدة: كيف دايرة مليكة
مرجان: هههه دگ ودردگ الحمد لله
عايدة: ههه توحشتها بزااف..أشنو تشربي بعدا احبيبتي
مرجان: أ”زينب هابطة لعندهم وعينيها على مرجان..ضارت عند ماماها بابتسامة صفرة” ماما غير تهناي راه كلشي بيخير
عايدة: متأكدة احبيبة
زينب: وي غير رتاحي..مرجان..اجي معايا عافاك محتاجاك
مرجان: اه واخا ابب..تبعاتها طالعين لبيتها..دخلو وسدو لباب وبانو كلامح زينب الخايفة ووجهها فرمشة عين صفار
زينب: مصيبة امرجان مصييييبة كحلة
مرجان: “نضهشرات ” أويلي مالك
زينب: ماشي أنا أيمن..أيمن طيح راسو فواحد المصيبة موحال واش يطلع منها سالم
مرجان: واتي هضري ازمرة اشنو كاين..بلاتي اجي بعدا گلسي أجي راكي بنتي ليا ماهياش
زينب: “گلسات والدموع فعينيها” فراسك جواد علاش كان خدام فالحفل ديك النهار؟
مرجان: لا ولكن ديك كلمة خدام سرباي مابغاتش دخل ليا لراسي..خويا ماشي ديال دوك الخدامي ديال عرق الكتاف
زينب: إيوا راه كان تما باش يشفر
مرجان: هاويلي على يشفر؟
زينب: يشفر شي مجوهرات فشي بيت فالاوطيل
مرجان: هاداك سخنو عليه جنابو تاني وماغايرتاح حتى يقرقبو عليه صحاب الحال..ونتي مال والديك كادمعي وتنخنصي طيحتي مني النص سحابني غير شي حاجة
زينب: واهانا جاياك للهضرة..هءهءهءعقلتي ديك المرة فاش كنا خارجي ودزنا على ديك القهوة ديال الشيشة..شفنا جواد گالس مع أيمن وكايتافقو على شي حاجة
مرجان: “گلسات حداها مصدومة” ناري واقلة فهمت
زينب: إيوا الالة ليعطل الكاميرات ديال الكولوار منين داز جواد هو خويا الحماار..ولكن واحد الكاميرة فالبيت مابغاتش تخسر ليه وبان فيها جواد كايشفر هء هء هء
مرجان: “ضربات جنابها” هااويلي گلتها لييك..گلت لييك نبهييه يبعد على جوااد رااه غايخرج علييه..خويا انا راه الحبس كايدوز فيه كتر ماكايدوز فدارهم وبييييخيير عندو ولكن أيمن كيغايديير ليها”دارت يدها على راسها وعينيها غرغرو بقا فيهاا”
زينب: خرج على رااسو امرجان صافي خرج على راسو وهاد المرة والله لادوزها ليه الواليد هءهءهءهء
مرجان: “ردات شعرها لور ووقفات” شوفي دابا راه البكا والله لافادك فشي حاجة..خاصنا نفكرو فشي حل لهاد الموصيبة .فينهو أيمن بعدا
زينب: خليتو مشا يدوش هءهءهءهء كون تشوفي حالتو كيكاانت أمرجان
مرجان: سخونية الراس كاترجع بالبرودة وهااأخيرة التفرفير هي هادي..دابة بلا بكا بلا نديب خاصنا نفكرو فشي حل وبالزربة قبل مايتفضح كلشي
زينب: آشمن حل الله يهديك كيغاندييرو ليها هءهءهءهء صاافي أيمن ضااع
مرجان: زمي الله يرحم باك ودخلي غسلي كمارتك..أنا غانفكر فشي حل كوني هانية صافي..يالله احبيبتي سيري…ناضت زينب تغسل وجهها أما مرجان خرجات من البيت ومشات فإتجاه بيت أيمن..دقات ودخلات عندو لقاتو لابس وكايمسح راسو وعينيه حمرين
أيمن: مرجان؟
مرجان: بوراس “گلسات حداه” صاڤا أش تعاود
أيمن: “شاف قدامو” عاودات لك كلشي يااك؟
مرجان: إييه گالت ليا كلشي وغير حالتك كافياك بلا مانزيدك شي ضربة انايا..دابا نوض زيد قدامي
أيمن: لفين..شوفي راه يوماين ماناعس والله حتى عيان
مرجان: وحتى انا إلا ماحليتش هاد المشكيل مغانعسش وازيد قدامي خلاص …ناض غادي موراها مهدود لبيت زينب..حلاتو ودخلو وخرجات زينب من الحمام غير شافت فأيمن جاتها البكية تاني
مرجان: واصاافي واش غاتبقاو تخننو عليا هنايا وااه راه جامعاكم نفكرو فشي حل زعمة
أيمن: أشمن حل الله يرحم باك حتى نتي راه صافي جواد مشى فيها وحتى انا جارني معاه
مرجان: واخا هانتا دابة..هادا لي شافرين كاتعرفو
أيمن: آاه كانعرف عليه شي حوايج
مرجان: يعني دابا المكتب والدار وتسجيلات الكاميرة ديالو تقدر ضبرليا عليهم
أيمن: شوية صعيبة..ولكن نقد
مرجان: إوا صاافي هاهو المشكل تحل..
أيمن: والله مافهمت شنوبغيتي تقصدي
مرجان: علاه اخويا كون كنتي تفهم دير ايدك فيد راس الدرگ ديال خويا؟..ماعلينا دابا نوضح ليك..شتي كيفمادرتي مع جواد..غادير معانا
أيمن: كيفاش زعما؟
مرجان: جواد عطلتي ليه الكاميرات باش يشفر داك زمر..وحنا غاتبحت لينا وتعطل لينا الكاميرات باش نشفرو التسجيل..وهاهي تحلات..ماكاين تسجيل..ماكاين دليل..ماكاين حبس..سااهلة ماهلة..
زينب: “جبدات فيها عينيها” نعاام أختي..واش ماكفاتناش هاد المصيبة نزيدو وحدة خرا
مرجان: “مقابلة معاهم” بان لك ماحسن أتينا بيه ألالة
أيمن: لا لا هاد الحل مامسلكش..حتى التسجيل ماعرفناه فين كاين وزيد عليها هاد صاحب الخزنة مابايناش فيه شي واحد لي ساهل
مرجان: هنا فين غاتجي مهتك نتا..وزايدون بااينة التسجيل غايدون عندو فالمكتب مالو غايديه للدار يبات معاه متلا..ضبر لينا على واش عندو شي شركة ولا شي مكتب والباقي علينا
زينب: أنا هادشي خاالعني والله..حاسة بحاليلا غانخرجو من وحدة ونطيحو فماكفس
أيمن: البنات غادي غيير نلوحكم فشي مشكيل ماهواش،اللهم خليوني أنا نتحمل نتيجة أغلاطي أصلا نستاهل
مرجان: زينب زيدي يالله تعشاي معانا باش بلا ماتحس ماماك ونتا سير دير داكشي ليگلت ليك وزم..
أيمن: ولكن..
مرجان: ويالله ازينب زيدي …أيمن نزل راسو وهزات زينب تليفونها وسبرديلتها ومشاو نزلو گالوها لعايدة وواقات شرط ماتفوتش التسعود باش توصل قبل من باها..گالت ليها واخا وخرجو
★★
واقفة فدريسين ديالها كاتبدل حوايج الخدمة بديال الدار..لبسات وجات قدام المراية كاتفك شعرها وشوية سهات فيها عقلها راجع لور وبالضبك لواحد اللقطة فالحفلة
🎬 Flach back🎬
مرجان وقفات قدامها كاتشوفها كاتهضر مع راجلها..قادات الوقفة وحنحنات وگالت بصوت مأدب رقيق وابتسامة عدبة: مدام سهام
سمعات سميتها وضارت باش تلاقي عينيها الخوضر الزمرديتان مع مثلهما..خفقت القلوب وتسارعت الانفاس وهوما كايشوفو فبعضياتهم بنفس العيون والنظرات وقليل من الملامح..سهام بقات غير كاتشوف فيها وقلبها كايضرب بجهد وهي كاتفحصها كلها وگالت بصوت بالكاد قدرات تلملمو: وي
مرجان: “جمعات النفس ومدات يديها مبتاااسمة” انا مرجان
🎬Back🎬
زفرات وناضت خرجات من البيت تالفة..نزلات لتحت لقاتهم كايتعشاو وگلسات حتى هي،عمر نتابه ليها ماشي على خاطرها وهو يشد يديها : سهام حبيبة مالك
سهام: “ابتاسمات ليه بغصة” والو أحياتي غير سطخيس ديال الخدمة وصافي
ميلين: ماما واش شريكك الجديد كايبقا فالشركة ديالنا
سهام: “معندها نفس” لا عندو مكتب خاص بيه ولكن قليل فين كايبقا فيه
ميلين: واخا وشنو هي سميتو..بغيت نقلب عليه فالأنسطا مالقيت عليه والو وفإيطاليا كايگولو ليه غير “padrone della notte” ومترجمينها العرب بسيد الليل..بففف بغيت غير نعرفو شنو دا…
سهام: “خنزرات فيها وغوتات” ميلييين زدتي فيه سكتي شويااا،من الصباااح ونتي تنقي فوق راااسي ضريتينيي
عمر: “بحدة” سهااااام
ميلين: سمحي ليا اماما أنا غير سولت ماسحابنيش غانقلقك..سمحيليا
سهام: “تنهدات وحطات سربيتها وناضت فحالاتها طالعة فالدروج”
عمر: “ضار عند ميلين” مايبقاش فيك الحال احبيبة راها غير منرڤية شوية مع الخدمة..وحتى نتي ملي تشوفيها مقلقة ماتبقايش تلحي
ميلين: أنا ماقصدتش أبابا والله
عمر: صافي دابا..أنا غانطلع نشوفها ونتي كملي عشاك …ناض موراها تابعها لبيتهم..حل الباب ودخل لقاها گالسا على كرسي ديال طابل ديالها حاطة راسها على يديها وعينيها مغمضاهم..قرب لجيهتها : سهام مالك احبيبة واقعة معاك شي حاجة
سهام: “هزات راسها وشافت فيه من المراية” ماواقع والو أعمر غير عياانة شوية
عمر: “بهدوء” ماواقع والو داكشي علاش غوتي على البنت مادارت لك والو..همم “باسها فراسها” آخر مرة نشوف منك هاد التصرف أسهام آخر مرة..ناض من حداها ومشا دوش وخرج تخشا فبلاصتو ونعس..هي بقات كاتشوف فطيفو من المراية عينيها مركزين فيه ماكاترمشس حتى سالت ليها دمعة..دمعة معبِّرة وحيدة يتيمة..مسحاتها بالجهالة وهزات راسها الفوق بدلات ملامحها من الضعف والحيرة للقوة والصرامة وناضت دخلات للحمام ..
ناضو من الطبلة بعدما بززات على زينب تاكل شوية وواخة ماكان عندها خاطر بغات ديرو لمرجان ونقبات شوية من الطاجين..سالاو وناضت مرجان جمعات الخبز والطاجين داتهم لاكوزيزة،حطات الطاجين فلاڤابو والخبز فالفران..مسحات الطبلة وجرات زينب : ماما هاحنا فبيتي
مليكة: “جرات تيليكمونض لحداها” سيرو ..دخلاتها لبيتها وسدات الباب، ضارت لعندها زينب بتأفف : شنو واقع، ملي جينا ونتي باغا تگولي شي حاجة آش كاين؟
مرجان: “گلسات على السرير” أجي حدايا راه بغيت نتشاور معاك
زينب: واايلي اصاحبتي علاه نتي كاتشاوري هههه فاش بعدا
مرجان: “حلات الكوافوز لي حدا ناموسيتها وجبدات منو لاكارط ڤيزيط ديال سهام” كنت باغا نصوني عليها ملي نجي عندك ساعا خرج لينا داك المشكيل وخليتها حتى لغدا..أشنو بان ليك
زينب: مرجان..زعما ماتكونش غير جاملاتك وعطاتها ليك حيت كبرتي بيها..يعني غير بغاتتعطيها ليك وتبان
مرجان: لا أصاحبتي نتي عارفاني من الشوفة نفهم بنادم وهي راها بصح عنات أنني نمشي نشوفها ولكن قبل خليني نتاصل بعدا
زينب: أوك لي بغيتي
مرجان: “صغرات فيها عينيها” أجي دابا عاد تفكرت..شكون داك الزعر لي كنتي واقفة حداه فالحفلة؟
زينب: “تبسمات ملي تفكراتو” اووف فااش فكرتيني،البارح مانعستش الليل كولو ملي بايتة نحلم بيه
مرجان: ممم هادشي وصل للأحلام گاااع
زينب: هحح كون تشوفيه أصاحبتي كايحمق كايحمق
مرجان: ضربت فيه شوفة ملي كنا خارجين ومانكدبش عليك جاني شي واحد زاايغ
زينب: ممم زعما
مرجان: غامن دوك العينين ليكان كايضورهم فالحفلة كانت بااااينة فيه شي واحد لي زهوااني الله يدااوي ههههه
زينب: ههههه أودي نتي خاطاار “وقفات” يالله احبيبتي خاصني نمشي خلاص
مرجان: “باستها” واخا ولكن ماديريش فبالك راه أيمن خويا وراكي عارفاه شحال عزيز عليا،غير تهناي هاد المشكيل غااايفوت وغدا غانحلو كلشي ..
زينب حركات ليها راسها ومشات مرجان وصلاتها للباب لتحت وتوادعات معاها،عاد باش طلعات نيشان للكوزينة تغسل لماعن ديال العشا قبل ماتنوض ليها مليكة …
فديپو وسط الغابة واقفين شي رجال وشمنك يااارجاال، تاقادة وحدة فالفورمة ولابسين كلهم الكحل وفودنهم سناطات بلوتوت،واقفي خارج الديپو فداك الضلام وغير ضو الطاموبيلات لمبلاصيين قدامو لي مضويين الدنيا وداك الخلا..وصلوهم شي أوامر من الصناطة لي فودنيهم وهوما يقادو الوقفة كايشوفو لجيهت الطريق باينة فيهم القفقافة والخلعة وشوية بشوية بدات كاتبان ليهم واحد الفيراري كحلة جاية منيرة ماوقفات حتال حدا رجليهم..كلشي جمد وشي كايشوف فشي حتى تحل الباب ونزل منها واحد التيتيز أقل مايقال عليه توت وفرييز عينين عسليين،شعر مارو،فم حميمر ولحية خفيفة مزيناه ومكملا جمالو،
********
جوزيف العوماري..27 سنة حتى هو رجل أعمال فتجارة الماس وكايتعتابر المنافس القوي والأول لسيد الليل ولشركة Alrosa واخا صغر منو بعام ولكن تاقادة وحدة فالطول والعرض والإرتفاع
********
هبط مخنزر ماعندو خاطر وقف على واحد من هادوك وهو ضارب تخنزيرة تاع الله يحفظ مع الله يستر وبصوت حاد خشن گال وهو مربع يديه فيهم : شنو واقع مالكم،مصدعيني من الصباح همم
…-التصاميم والألماسات لي كنتي سيفطينا نجيبوهم أسي جوزيف”حنا راسو ماقدش يكمل”
جوزيف: “شاف فيه بصرامة” نطق
…- كانو مغشوشين أسيدي وحتا الألماسات مالقيناش فيهم الجوهرة علاش وصيتينا، لقينا كلشي مز”جمعها معاه بكلاك جابو طايح مجبد..خشا يدو فشعرو معصصب وباغي غير يتفرگع حاس براسو تشمت ديال بصح وشي لي خطط ليه كلو مشا..بدا كايصوني ليه طيلي فلول مابغاش يجاوب غير غادي جاي غادي جاي كايحاول يبرد شوية حتى نيرڤاه وبغا يخبط بيه ولكن لقا سميت “Il padrone della notte” بمعنى سيد الليل وهو يجاوب مغزززف
…-جوزيف هه صاڤا كيكاتحس تصرطات ولا مازال
جوزيف: غاندمك غير صبر،غاندمك مزياااان وهاديك الجوهرة بغيتي ولا كرهتي ديالي وغادي ترجع ليا
…-“گالس فنفس الكرسي لي مقابل مع البالكو،قرعة الويسكي حداه وشاد جوهرة وردية مقابلها مع ضو القمر حتى ولات كاتبري بحال النجوم لي حايطين بيه وگال بصوت خافت” ماكانضنش، حيت الحاجة إلا عجبانتي، كاناخدها بأي طريقة وكاتولي ديالي وفملكي، وهادي بالظبط عجباتني بزاف
جوزيف: “ضحك مغدد” مازال غانتلاقاو ومازال غانفدي فيك هادشي كامل غير بلاتي..غيييير بلاتي
…- “رد راسو لور” مزيان، غير هو المرة جايا ماتبقاش دخل البراهش فالموضوع، فبالك بلي إلا دخلتيهم هوما فالواجهة ماغانعرفش بلي نتا ورا هادشي؟ تء تء تء راك غالط بزااف أولد العم
جوزيف: ومازاال غادي نغلط معاك أولد العم
…- “قطع عليه وابتسامة جانبية على شفايفو وعلآّ عينيه مقابل مع سواد الليل وكايشرب من كاسو..لابس شورط خفيف وصدرو عريان من الفوق وقمشة مرجان مازال مصورة فصدرو ضارب فيها ضو القمر …جوزيف بقا كايشوف فطيلي وغمض عينيه مزير عليهم وعضلاتو تنفخو فالتيشورت حتى قرب يتقطع عليه..حلهم حمرين وكايشوف قدامو بتوعد عاد ضار للفيراري ديالو ركب ومشا طاير مخلي وراه غير الريح والعجاج ..
ڤيلا المنصوري..
فبيتها الفخم..باركة فوق ناموسيتها كاتشوف لطيلي وتمعن فصورو، صحيح أنو ملي عرف بلي سهام كلفات المساعدة ديالها دير استقبال صحفي ضخم قدام باب القاعة..إلاّ أنو قبل لحظات من وصولو للمغرب كلف رجالو يخويو الدنيا وينقيوها ومنع أي صحافي يبقا يدور ليه تما،ولكن گاع لي فالحفل شاد طيلي كايصور ويتسيلفا وشادين حتى سيد الليل وحتى ميلين منهم،من لي دخلات ماقدراتش حتى تهضر معاه جوج كلمات مقادين فاشدات طيلي ديالها وبقات كاتصورو..هاهو ساهي هنا، هاهو شاد كاسو كايرتاشف منو،هاهو مبسم بجنب فمو،هاهو كايهضر مع شي حد ولا كايستامع لشي حد..حركاتو جلتمانية لبقة مدروسة مأدبة وكلشي عندو بالقياس لااامن الوقفة ولا الشوفة ولا الهضرة ولا الضحكة لي أصلا ماكايكملهاش يكفي فقط أنو يتبسم بجنب فمو..حاطة صبعها على ليكخو ديال طيلي كاتقلب وتزومي مبتاسمة بهيام..وفراسها راسمة..أحلام..وأحلام. ..نفسها نفس لوخرا..نفس الگلسة ونفس الشوفة لطيلي الفرق فقط هو المكان والشخص لي كاتشوف فيه ..ميلين فبيت أميرات وفراش ناعم حريري ،ومرجان فبيت صغير يمكن وصفه “بالبساطة” وفراش عادي وناموسية كافية لشخص واحد..ميلين حاطا طيلي قبالتها كاتمعن فسيد الليل وتهيم فيه أما مرجان شادا سيت ديال عارضات أزياء ڤاييرا وقدامها لاكارط ڤيزيط ديال سهام كاتشوف فيهم حتى هي..بهيام وفراسها راسما..أحلام..وأحلام ..أحلام عازمة وحازمة فتحقيقها وعارفة راسها تقدر تحققها..تولي وحدة من هادو لي كاتشوف فيهم دابا وفعينيها إصرار وإصرار والله كبيير …قاطع تفكيرها وسهوتها غوات خوها فالدرب..قفزات من بلاصتها للشرجم حلاتو وهو يبان ليها جاي كايتلاوط حيط يضربو لحيط ويسب غير من السمطة لتحت والهضرة الخامجة حتى وصل للباب ديال لتحت حلو غير بزز …سدات الشرجم معصبة وشوية سمعات الخبيط فباب الدار طلات على الساعة لقاتها 00:30.. خبطات طيلي فوق ناموسيتها وناضت كاتجري والخبيط كايجهاد،حلات باب بيتها ولقات مليكة قبالتها فايقة مضهشرة كاتحزم زيفها ديال حياتي،مشاو للباب وكيف حلوه لقاو جاواد ريحتو عاااطية بالشراب والحشيش لي كاتخنق وتجيب الترويعة،مشات ليه مليكة سنداتو عليها حيت ماجا حتا لوا والوقفة مابقا قاد يديرها غيير كايضحك ويغني لشاب حسني شافتو مرجان هاكاك حقدات وعافت ولكن مابغاتش تخلي مها مضاربة معاه بوحدها لايزدق مطيحها تما وهو قد الفيل فامشات على وعدها حتى هي سنداتو من ليد لخرا گاالبة وجهها على الريحة الخااانزة وتعاونو عليه بجوجات داوه لبيتو ولاحوه ففراشو..وهي تحيد مشات لبيتها مخليا مليكة تحيد ليه سبرديلتو وتغطيه،دخلات لبيتها وتخشات فوسط فراشها كاتسوط …طلعات عينيها لبلاصت التصويرة لي ماكايناش ساهية فيها وشوية بشوية بدا النعاس تايديها حتى مشات فخطرة مستسلمة ليه
🌝🌞أيّها الصباح.. ما أجمل فيك الأمل.. ما أجمل أن نراك نقطة صفر للأنطلاق من جديد.. نطوي صفحات الماضي..لنفتح بك صفحة جديدة..
🌤️
صباح جديد على أميرتنا البريئة النائمة..ناضت من فراشها فرحانة متوترة متحمسة وخايفة..أول يوم ليها فليسي وماعارفاش شنو كايتسناها ولا كفاش غاتصرف،خلاتها لله ولي بغاها هي لي تكون وناضت نيشان لپلاكارها جبدات منو كسوة بالأخضر ملكي كم مزيرة من الصدر ومطلوقة من لتحت،حيدات پيجامتها ولبساتها وشعرها مشطاتو قدام لمراية وضفراتو جنب وهي كاتبسم..خرجات من لبيت ودخلات للباب لي حداه فين كاين الحمام..ردات دفيرتها لور ماتفزگش ليها وغسلات وجهها مزياان ومسحاتو بفوطة وحتى سنانها حكاتهم عاد باش خرجات غادة هابطة للتحت وريحة القهوة كاضربها لنيفها.. زادت فتبسيمتها ومشات عند خالتها للكوزينة لقاتها موجدة الفطور على حقو وطريقو وحاطا ليها العاصير ديال الليمون والخيزو وكرواصة وكيكة بالشكلاط ووحدة بالحامض ووحدة ديال لاكريم فيها طبقات خااصة بيها..عاد باش صينية ديال آتاي بالنعناع ووحدة خرا ديال القهوة كحلة وطبيسلات فيهم الزيتون وزيت العود والزبدة والفرماج والكونفيتور ..بقات غير كاتشوف فيها كاتحط هادي وتحط هادي حتى عمراات الطبلة نيييت..دخلو عماد ومروان هازين شكايرهم حتى هوما داخلين مع التمنية..عماد غير شاف الطبلة وهو يگلس نيشان وتفتح ليه العقل
عماد: والفرزيات دابا هادو الواليدة،علاش حنا النهار لول مادرتيش لينا هاكا “تيتريت ضحكات على الطريقة باش گالها وگلسات فبلاصتها”
إيجا: “ميقات فيه” سكتنا أداك بوراص على قرايتك الزيينة “ضارت عند تيتريت” تيتريتينو..سيري عافا حبيبتي فيقي كريم يفطر معانا حتى هو
مروان: “نقز” نمشي أنا نمشي أناا
إيجا: گلس لااارض ولا نووض ليك..سيري احبيبتي عافاك فيقيه …تيتريت تحرجات منها ومالقات ماتقول غير أنها تبسم وتنوض ..إيجا ضارت تقاد الكيسان وهي تقشع عماد كايشوووف فيها
إيجا: “خنزرات فيه” ماالنا نتا
عماد: ماماليش غاكانشوف ههههه “نزل عينيه كايضحك”
طالعة فالدروج كاتفرك يديها تالفة..ماعمرها تعاملات مع شي ولد فحياتها داكشي علاش جاتها فشكل تدخل عند واحد وتفيقو واخا راه ولد خالتها ولكن مازال ماكاتعرفوش مزيان ومازال مامولفاهش..وصلات للصالون المقابل لبيتها،ماعندوش الباب داكشي علاش مالقات فين دق ودخلات نيشان،لقاتو مالابسش تيشورت صدرو عريان وناعس فالأرض فوق الزربية مغطي بيزار خفيف ومسند بمخدة من المخاد المستفين..هو من الناس لي كايبغي التيساع فاش يكون ناعس داكشي علاش مالقاش راحتو فالسداري ونزل للتحت فالأرض وحتى حوايجو ماكايبغيش ينعس بيهم داكشي علاش حيد غير تيشورت وحتى السروال غير حشم ينصلو أما راها كانت غاتلقاه مسفح ليها فالأرض صولو..
خدودها حمارو ملي شافت صدرو العريض لمزغب وحتى كانت غاترجع فحالاتها وتفكرات خالتها حشومة تگوليها مابغيتش..رجعات لعندو وتحنات لعندو بعات تمد يدها تنغزو مالقات فين تمدها وهو مسفح حداها جمعاتها وبدات تعيط ليه بصوت خافت وهادئ حنووون كيف العادة: خويا كريم..خويا كرييم. …كريم زاد خشش راسو فالمخدة وندغ بفمو وهي تعاود تعيط بسميتو عاد باش حل فيها عينيه مصغرهم فيها وكايشوف
تيتريت: خويا كريم گالت لك خالتي نوض تفطر معانا “هو غير كايشوف فيها” خويا كريم واش سمعتيني..راه گالت لك..
كريم: شكون كبيدتك
تيتريت: “جبدات فيه عينيها” هاا
كريم: “ناض توگض كايشوف فيها مباشرة وعاد بانو ليها عضلاتو لمستفين” النهار لي غانجي فيه صونيت للواليدة “كايهضر بحدة مخنزر فيها حتى خلعها” ديك الساعة جاوباتني بنت عندها نفس البحة ديال صوتك..هي نتي ياك
تيتريت: ء ء آه هي أناا
كريم: أنا هو كبيدتك؟ملي جاوبتي گلتيها
تيتريت: “بقات كاتفكر ديك النهار لقات راسها بصح گالتها ملي جاوبات بلا ماتشوف”
كريم: “شافها ساكتة وتعصب” يالله جااوبي شكون هادا لي كنتي كاتهضري معاه من تيليفون الواليدة لا وزايداها كاتگولي ليه كبيدتي وكاتبيني علينا البراءة هنا
تيتريت: “دمعو عينيها” ماشي هاكاك أنا كنت كاندوي مع بابا..وملي بغيت نقطع گالي تاسانو لي هي كبيدتي “كاتحرك يديها تشرح ليها وهو غوباشتو شوية بشوية كاتفك” وملي عيطتي نتا سحابني هو وگلتها بالعربية..سمحلي أنا ماقصدت والو وكنت كانهضر غير مع بابا..غانزل دابا وگالت لك خالتي نزل تفطر معانا …مشات فحالها قلبها كايضرب..أصلا بتخنزيرو كان كايخلعها ودابا زاد كتر ..هو بقا كايشوف ناحيت الباب من بعد مسح وجهو وتنهد ناض …
نزلات لتحت لقات إيجا فينما يبغي شي واحد يقرب للطبلة تجمعها معاه باش حتى يتجمعو كاملين عاد يفطرو..گلسات فكرسيها ونزلات راسها ماعاود طلعاتو وهي تعاود ضور عندها إيجا سولاتها : واش فاق أبنتي “تيتريت حركات ليها راسها بآه” إوا سيري عافا حبيبتي راه شي حوايج ديالو جمعتهم ليك فوق الطبيلة لي حدا الباب طلعيهم ليه الله يرضي عليك
تيتريت: “شافت فيها برجاء” غير خلي عماد يديهم ليه أخالتي عافاك
إيجا: لا لا صافي أنا نوض واخا رجليا كايضروني فدوك الدروج ولكن ماشي مشكيل …ناضت كاتعگز وتگول أي أي..عماد مصدوم فيها أما تيتريت حسات براسها ماتسواش وناضت عندها متأسفة : سمحي ليا أخالتي،صافي آري أنا نطلعهم
إيجا: لا أبنيتي صافي غير سيري تفطري أنا غانطلعهم
تيتريت: لا أخالتي سيري نتي رتاحي،أنا غانطلع نعطيهم ليه كوني هانية..تبسمات ليها وطلعات عاود أما إيجا رجعات كاتمشا عادي وگلسات بلاصتها..طلعات راسها فعماد لقاتو غير مجبد فيها عينيه بنظرة مايگد عليك غااليخلقكوحتى شيرات عليه بمعلقة عادباش نزلهم..
دخلات مع الباب وطلات فالصالون مالقاتوش ولكن سمعات رشاشة الحمام خدامة..مشات ليه عاصرة لحوايج لجيهتها ودقات جوج دقات خفاف ماجاوبهاش وعاود دقات عاد رد عليها
كريم: وي
تيتريت: خويا كريم..سيفطات لك خالتي حوايجك …حل شوية من الباب ومد يدو كاتقطر وهي مداتهم ليه باش يشدهم زدق شاد معاهم حتى يدها معمرها بالما..خطفاتها بالزربة ودغيا حمارت وقلبها بدا يضرب ونزلات مع الدروج كاتجري شادة يدها لعندها وغير وصلات گلسات بلاصتها حالفة ماتعاود تطلع لعندو..شافتها إيجا كيف ولات كلها حمرة وگالت: تيتريت مالكي
تيتريت: والو!!..مامالي والو
نازل لعندهم شعرو باقي فازگ رادو لور وريحت باندوش كاتفوح..جا قرب لجيهتهم وجر كرسي حطو حدا تيتريت وگال لمو تكب ليه أتاي وبدا كايفطر..أما واحد الأخت ملي گلس حداها وهي واحلة ليها فالقرجوتة ماعرفات واش تسرط ولا تردها حتى هزات كاس العاصير شربات منو وضارت لخالتها
تيتريت: خالتي..صافي فطرت واش نمشيو
إيجا: “حطات كاسها وشافت فيها” نوضي بعدا نشوف “ناضت مستغربة منها وإيجا بقات كاتشوف فديك الكسوة وديك الدفيرة مااعجباتهاشااي وهي تكشر ملامحها” ماعندكش أبنتي شي حوييجات من غير هاد الكساوي لي بحال الخنشة “تيتريت حركات راسها بلا” همم..كريم
كريم: “شاف فيها شاد كاسو”
إيجا: أرا الله يرضي عليك واحد ل1000 درهم “مد يدو لبرطامو جبدها ليها وتيتريت غير واقفة كاتشوف مافاهمة والو..عاود طلعات فيها إيجا عينيها لصبيبيط لي لابسة وضارت تاني عندو” زيد واحد الألف خرا هادشي مابانليش يكفي
كريم: “كايجبدهم من البزطام” وعلاش بغيتيهم بعدا
إيجا: شغلي هاداك نتا غير أرا “حطهم ليها فيدها وهي كورات عليهم وخشاتهم فصدرها” سربي تفطر توصل معاك البنت للمدرسة راه أنا مافيا ماينوض ..يالله غايجاوبها وهي تنقز تيتريت لي وسعات فيها عينيها : لا لا أخالتي بلاش راني حفظت الطريق
إيجا: “بصرامة” لا غير خليه يوصلك نيت باش مايضسر ومايتبسل عليك حد راه ولاد الدرب باااسلين غامن هاد بوراس (عماد) وجبد
كريم: “غوبش فيها” واس كايضسر عليها شي واحد
إيجا: إيوا الدرية داخلة سوق راسها وغزالة تبارك الله الله يحجبها بغيتيهم يقيلوها..من النهاار لول يموت لمش ويعرفوك معاها
تيتريت: “زادت جبدات عينيها كتر” لا اخالتي حتى واحد ماغايضسر عليا اصلا مكانهضر حد
كريم: “حط كاسو بالزعاف وناض شاف فيها” نزلي تسنايني لتحت هانا جاي …طلع الفوق وهي ضارت بترجي كاتشوف فعمتها لي هزات كاس تآتاي كاتكمل فطورها عاادي: خالتي بلاش عافاك
إيجا: ماكايدير والو غايبقا غير گالس..خليه يوصلك حسن
تيتريت: ولايني راه..
إيجا: سيري راه غاينزل مايلقاكش غايتعصب عاود …مالقات ماتگول ومشات هزات ساكها صغير ونزلات كاتسناه قدام الباب..حتى بان ليها نازل مع الدروج لابس عليه قاميجة فوق التيشورت الكحل..
بقات مقابلاه حتى وقف حداها كايقاد كمامو وگال وهو كايطلع فيها : عمرك ركبتي فموطور “حركات راسها بلا” أصلا هاد الكسوة غاتبرزطك فالركوب،صافي زيدي على رجلينا
تيتريت: “بصوت خافت”واخا …تحركات موراه وهو غادي سابقها كايتنخوا فالمشية وكلا خطوة كايخطيها يالله كادير فيها هي جوج،بقات غادة معاه وهو مضرگها موراه كاطلع فيه عينيها بحال المشيشة،الطولة وااااشمنك ياطولة أما العرض مانهضروش عليه، يالله واصلة ليه كتفو دايرة بحال بنيتو وهي حداه..وهوما غادين فالدرب،لي تلاقى معاه كايسلم عليه ويرحب بيه مع شحاال مابقا عتبو ولا جا ليه هو معروف تما وكلشي كايقدرو وعاطيه همة..لاكبار لاصغار لاعيالات لارجال،كلشي محتارمو وهو ماكايدصر عليه حد وداير بيناتهم حدود بلامايطلع ليه شي حد فوق الراس…
وصلو لقدام المؤسسة بالظبط ووقف قدامها كايدور عينيه على ليسي ويتفكر ملي كان كايقرا هنا حتى هو
كريم: شوفي..يدصر عليك شي حد ولا يتبسل عليك غاتجي عندي تگوليها ليا..متافقين “حنات عينيها وحركات راسها حشمانة منو” دابا سيري وفالعشية غانرجع لك..معاش غاتخرجي بعدا
تيتريت: معرفتش،خاصني ندخل نشوف فإينا قسم جيت وناخد ورقة الأدوات واستعمال الزمن عاد نرجع للدار بلا مانقرا هاد النهار
كريم: مهم فالعشية ملي تخرجي صوني للواليدة تگولها ليا باش نرجع ليك
تيتريت: “حنات راسها وبصوت خافـِت” ماعنديش تيليفون
كريم: واايلي بففف”دار كايحك فراسو وعاود شاف فيها” عندك نمرت الواليدة “حركات راسها” مزيان..ملي تكوني خارجة شوفي مع شي بنت تعطيك طيلي صوني عليها وقطعي..شوفي شيوحدة تكون كاتقرا معاك راه ماغايگولوش لك لا..صافي؟
تيتريت: واخا
كريم: يالله تهلاي “ضار ماشي وعيطات ليه” نعام
تيتريت: “مبسمة” شكرا …ضار ماجاوبهاش ومشا..أما هي كيف دارت كاتشوف فالمؤسسة تمحات بسمتها والتلاميد بداو كايوصلو حيت قربات تصوني وهي غير حاضية مع جنابها معارفة شنو ديير….
التمنية تالصباح
..فجلستو المعتادة الكاس فيديه والقرعة مكبوب منها غير شوية حيت كايشرب رشيفات صغاار بين كلا مرة ومرة وهو كايراقب السماء المختافي منها القمر..قاطع تمعنو المعتاد فالسماء لي بدات كاتصفا والشمس كاتشرق رنين الهاتف،مد يدو لطبيلة حداه هزو ودوز الخط..
جود: التسجيل موجود أسيدي،وحتى المعلومات لي طلبتي منا جبناهم
…-سيفطهم ليا
جود: أوكي مسيو العوماري
…-قطع عليه وكمل الجغمة لي فكاسو وناض كايتجبد عينيه فيهم شوية الحمورية كايبانو بحالا مدمعين وزاد اللون البني ديالهم صفااءً حتى ولا غادي للصفورية ولا للعسلي..حط كاسو ودخل للحمام..وخمسة الدقايق خرج منو مدور فوطة على نصو ووحدة صغيرة كاينشف بيها..وهو غادي للدريس روم داز على المراية الطويلة لي فوسط البيت ووقف مصغر فيها عينيه،قرب بخطوات تقااال لجيهتها وحط صبعو على قمشة مرجان الطويلة فصدرو..كاتبان فحالا جديدة وفاش كايحط عليها صبعو كاتبدا تنغزو شويا،بقا مراقبها على طولها وعقلو كايسترجعها ليه وتفكر فاش شافها واقفة حدى صاحبتها وندبات حنكها ولا ملي شاف صاحبتها هزات طيلي كاتعيط وهي بقات حاطة يدها حلى جنبها وكاتراري برجلها معصبة..تما وفديك اللقطة لي تفكر ضهرت ابتسامة خفييييفة على طرف شفتو ونطق هامس للقمشة قبل مايدخل يبدل “مسمومة”
★★
من دارهم خارجة مادوموازيل “مسمومة” كيفما سماها..بكسوة نصها الفوقاني صفر والتحتاني بيض مع ساك كبير كحل بصمطة غليظة وصبيبيط بيض..شعرها طالقاه مصاوب مسرح ودايرة عكر غوز بارد صاافي ..هزات تيليفونها وسيفطات لزينب ميساج فواطساپ وبقات غادة لعند مول المحلبة خدات من عندو جوج دراهم حرشة تشد بيهم الطريق بينما وصلات لعندها …
★★
واقف بسروال توب أسود وصباط جلد بني لامع كايسد صدايف شوميز ديالو وهو يسمع ميساج وصلو من طيلي..ضار لجيهتو هزو وحلو لقا جود مسيفط ليه داكشي لي طلب منبينهم الڤيديو لي فيه جواد كايفتح الخزنة وخلاها وخرج ومن وراه دخل واحد ملتم ماشي بحال داك المكلخ لي داخل يشفر بوجهو حمر بحالا كايگوليهم هااني..لا هادا ماكايبانو منو غير عينيه هز داكشي لي باغي دارو فساك وخرج..دوز الڤيديو وعلى ملاامحو البروود التاام ويالله غايحل الملف لي تسيفط ليه وهو يتدق الباب..جمع طيلي فجيبو وهز الڤيسط ديالو الكحلة وحل الباب..
الخدامة: سي العوماري لتحت أسيدي
..حنات ليه ومشات لخدمتها أما هو زفر حااقد..سد بيتو ونزل لتحت …
واقفة فالساحة ديال المدرسة العامرة ببنات وولاد موضرة بيناتهم مزيرة على يديها كاتفركهم متوترة ماعارفة فين تمشي ولا تجي والخلعة لاعبة عليها والتوتر مامخليها تسول حد..غير كاتبربق عينيها فكل بلاصة. ..من بعييد لابس پيل بيض ودجين مقطع من الركبة وسپادرية كحلة..شعرو واصل ليه لعنقو وعندو شووووية اللحية جنب فمو واقف فواحد القنت مع عشرانو وعينيه عليها من لي دخلات وهو تابعها فحركاتها حتى بانت ليه غادة دااخلة للإدارة وحول عينيه على الساحة تاني حتى نطق واحد صاحبو سميتو ياسر
ياسر: صافي دابا القصارة عندك أبا أشرف
أشرف: “قلب عينيه” مممم..هانا جاي …خلاهم ودار يديه فجيبو كايتكوسل ومشا داخل للإدارة..
تيتريت كان كايهضر معاها الحارس العام وواصاها تاخد الدروس تنقلهم هوما اللولين عاد باش تشوف الأدوات وشي لاخر..وهوما كايهضرو تدق الباب ودخل..الحارس العام غير شافو غوبش ودوا مكروز بزز باش كايضحك
الحارس العام: سي اليزيدي مرحبا
أشرف: “شاف فتيتريت لي كاتشوف فالحارس العام وتنزلهم،تبسم ودار شاف فيه ماحيها” بغيت ورقة
الحارس العام: هه ولكن راكا مغيب شهر..يعني خاص يكون عندك مبرر
أشرف: “خنزر فيه” لا مكاينش مبرر وباغي ورقة،شنو دابة ماغاتحطهاش “ضارت شافت فيه مصدومة منو كيفاش كايهضر مع الحارس بحاليلا خدام عندو وتصدمات كتر ملي شافت الحارس العام طبع ليه ورقتو وعطاها ليه مبسم بزز
الحارس العام: “شاف فتيتريت ومد ليها ورقة مكتوبة فيها رقم قسمها” هاكي ابنتي وقراي مزيان
أشرف: “خطفها قبل ماتشدها” أنا غانوريها قسمها بااينة فيها جديدة هنا “وسع عينيك فاش شافها فإينا قسم كاتقرا” واايلي يالله فسانكيام “طلعها وهبطها” مابايناش فك گاع،ياكما فايت لك ساقطا “حيدات ليه الورقة من يديك غوبشات فيه ومشات،أما هو ضحك وضار لجيهة الحارس العام حاط يديه على البيرو” شكون هادي
الحارس العام: سي اليازيدي، هاد البنت ماشي من داك النوع وداخلة سوق راسها وراها م…
أشرف: ماشي هادشي علاش سولت..أنا گلت غيير شكون هي، تعلم تجاوب على قد السؤال يالله نطق
الحارس العام: “حنا راسو مغلوب فأمرو” سميتها تيتريت و..
أشرف: تيتريت!!؟
الحارس العام: هي شلحة، وعاد تحولات لهنا
أشرف: همم، مزياان يالله تهلا
الحارس العام: بلاتي أسي اليزيدي، راه الجد ديالك عاود سول فيك هاد الصباح
أشرف: “غمزو” أهااا
الحارس العام: كيف العادة، گلت بلي راكا منضابط وكاتقرا مزيان
أشرف: مزياااان، هاكا نبغيك، حسابك غايوصلك مضوبل هاد العشية حيت رااشقة ليا “غمزو” هه تهلا ..خرج من الإدارة ودور عينييه مزياان ملي مابانتش ليها مشا لقيسمو مكررره
گالس فالصالون مقابل مع المدفأة كايشوف فيها وهو هاز كاس القهوة قااسحة فيديه كايشرب منها..سمع خطواتو نازلين فالدروج،حط داك الكاس وناض واقف كايشوفيه نازل كايلبس لڤيسط ديالو حتى وصل حداه ونطق: الوااليد؟ياك لاباس
العوماري: هه لهاد الدرجة..لهاد الدرجة ولا صعيب نجي حتى باش نهضر معاك
…: “تنهد” ماشي هاكاك
العوماري: وشنو..هاا؟ “قرب مقابل معاه عينيهم فبعضياتهم” مابقاتش عاجباني حالتك..هاد ربع سنين وليتي راجع لور ومبعد كلشي، واش ماكاتشوفش بلي معيش راسك فظلام كحل غاادي وكايستاولي علييك
…: هه أنا أصلا حياتي الحقيقية مقتاصرة على الظلام ولا نسيتي
العوماري: ماحدك ماباغيش تنسا وتبدا صفحة جديدة..غاتبقا حتى تبعد منك كلشي، سمعتيني كلللشي
…: ماعندي ماندير بالبااشار “دار غادي لجيهت الباب يخرج” خليتهم فالتيقار حتى هوما يقودو عليا
العوماري: أدهم..
أدهم: “وقف بلا مايضور عندو”
العوماري: ماحدك ماباغيش تساامح..غاتبقا وحيد أولدي وأنا لايمكن نخليك تضيع راسك ونبقا كانتفرج
أدهم: “ضار عندو وابتاسم” ok..إلى سااليتي الواليد تقدر تسد معاك الباب …خرج فإتجاه لوطو ديالو وركب..محا الإبتسامة وبقا گااالس مدة وهو كايطلع النفس ويهبطها بجهههد بحاليلا شي حجرة محطوطة على صدرو متقلة علييه التنفس،عينيه حمااارو حتى بداو كايبريو والعرووق تنفخو ليه فعنقو ودرعاانو وهو يضيماري منيير حتى تحكو الرواايد مع الأرض ومشا طااير..
★
أدهم: معناه الأسود. وتغلب الصفة على الخيل الدُّهم، ووُصف بها الليل الشديد السواد، أو القيد لسواده
خرجو مع العشرة من المدرسة وبقاو غادين فالطريق لدار زينب..لي دازو من حداه كايبدا يطلع فمرجان ويهبط كلها وكي كايشوف وهي مجمعة مع زينب ممسوقاش ليهم ولاحتى شايفاهم …وصلو للعمارة وطلعو ونيشاان دازو لبيتها دخلو ليه..لقاو أيمن گالس تما بالپيسي ديالو ..مرجان مشات ليه گلسات حداه وگالت بجدية: يالله آتينا وآرا ماعندك
أيمن: “كايهضر ويشوف فالپيسي” عندو واحد فالشركة لي فالرباط وواحد المكتب فواحد الشركة يالله تعاقد معاها ومكتب تالت عندو فالدار ديالو
مرجان: همم..الشركة الجديدة مانضنش يكونو فيه الحاجيات ديالو غير نستبعدوها..إدن غايبقا عندنا مكتب الشركة ديالو والدار
أيمن: ديال دارو ومعاه السلاك حيت أصلا ماكايحملش شي حاجة سميتها لي گارد كور ومعاه غير واحد العساس..ولكن ديال الشركة هه بلا ماتحلمي مصاب غير تقدري دخلي ليها بعدا
مرجان: هي نبداو بديال الدار أشنو بان ليكم
زينب: أنا وعلى مابان ليا هادشي مااامسلكش
أيمن: حتى أنا هادشي ليكانشوف وهو حتا كون مادارش لي گارد فالداار بااينة فيه حافظ صواريه وماشي شيواحد لي سااهل..هاادشي صعييب
مرجان: “ناضت” لا رابالله حتى زدتو فييه آو..وااش باغيينا نتسنااااو حتى يدخلوو عليييك البووليس وضيع رااسك عاااد ديك سااعة نبداو نندبوو بففف..رااك شاافر ابناادم شاافر واخا غيير عاونتي راك محسووب شفاار ومااشي أي شفرة القضية فييها الماااس يعني فلوس صحييحة وغاتمشي فيها مشية مقوودة القليييلة واحد لعشر سنيين، قااد عليهاا
أيمن: “ناض عينيه مدمعيين” صاافي زيدي..على الأقل نحااولو
زينب: ياااربي يكون خير، حتى أنا معااك
مرجان: مزياان نييت..هز نتا داك الپيسي ولحق علينا ….خرجات هي وزينب نزلو لتحت ولحق عليهم أيمن ومشاو …
★
واقف جنب الطريق كايشوف قداامو حاط يدو على فمو..عينيه حمريين وطنييين كايضرب ليه فودنو حتى كايسدهم بالجهد..جمع النفس وطلقها ووااالو ماقاادش يبرد عاااد ماكايزيييد صوت بااه وأصوااات خرين كاايهضروو فودنييه..زففر وضور لوطو دياالو رااجع فحالااتو وهز طيلي ديالو دوز خط
جود: نعام أسيدي
أدهم: سيفط ليا شي وحدة دابا للدار
جود: واخا أسي العوماري …قطع معااه وكمل طريقو للدارو وعروقو غير مازايدين كايتنفخو..
على سريرو الداائري الضخم نااعس وطالق يدييه،صدرو عرياان ووشمة ناازلة من يدو لأسفل ضهرو..بيتو كلو ضااير بالزااج الطريق براا كلها كااتبان والشمش حتى هي ساطعة فالسما وضاااربة فالبيت مضوياااه..بدا كايتسمع الدقان فبااب الپارطمة مخربق لييه نعااسو ونااض كااااره بشورط زرق نزل للتحت وشعرو نازل على جبهتو وكايحك عينيه ماقاد حتى يحلهم..حل الباب وگال مغوبش: ماالنا شكاين عللصباح
العوماري: “واقف بعكازو وبنيتو الصخمة.. واخة هو خمسيني لكن مابايناش فيه بالعكس عندو كاريزما خطيييرة وحتى لفورما دياالو مساعداه” ولد خوويا هه
جوزيف: “يد شاد بيها الباب ويد على خصرو بوقفة رجولية” شنووو
العوماري: لا وبااش كاتعجبوني فييكم الصوااب تبارك الله عليكم وخلااص
جوزيف: بفف دخل دخل …حيد ليه من الباب ومشا للكوزينة وهو كايتفوه ويتكسل طاالق باادرو يتجبدو..جبد جوج كيسان صيب قهوة كحلة بلا سكار وهو كب ليه عصير الليمون..داهم لصالون لقاه گالس،عطاه قهوتو وگلس مقابل معاه كايشرب عصيرو
العوماري: كنتي نااعس يااك
جوزيف: كنت ناااعس مرتااح حتى قطعتيه عليا العميم حشومة علك بالله
العوماري: ههههه آودي يااودي على رجل الأعماال طزز
جوزيف: “سرح يديه” ماالنا كي جينااك حسن من شي بعضيين عاطيينها غير للراحة..”جاتو الضحكة” هههه عكااز واعر عندك هههههه
العوماري: هه طنز طنز..كنت عاارفك كيغاتشوفو غاتبدا
جوزيف: تااصافي اصاحبي راك شرفتي ااشداااك لشي خييل ولا بغل هههههه
العوماري: هاهاهاها “حط كاسو” جوزيف..محتاجك تعاونني
جوزيف: “جمع الضحكة” ياك لاباس أبا حسام..محتاج شي حاجة
حسام: آه محتاج..وصلوني شي خبار والوحيد لييقد يعاونني هو نتا
جوزيف: مرحبا،راك عاارف فاشما بغيتيني تلقاني
حسام: يااك ..واخا واسمع..الموضوع كايتعلق بأدهم..
جوزيف: الكوزينة رااها فين جات ايلا عجباتك القهوة..والباب اونفاص معاك ايلا بغيتي دردب فحالاتك..أما أناا “ناض وقف” غانمشي نعس اوك …مشا طالع فالدروج وحسام موراه
حسام: وااوقف أبورااص غير نهضر معاك …دخل لبيتو مامسوقش ليه ويالله غايتلاح ففراشو وهو يلوح حسام عكازو ولوا ليه يدو حتى بغات تنصل
جوزيف: ااااع “قبح ملامحو وجاتو الضحكة واخا موعت” واالعمييم هاادشي راه غاتمشي عليه للحبس فرااسك
حسام: يااك لمك ومازال زاايد فيه “طلقو ولاخر شد يدو كايتوجع منها ومصدوم منو” ويالله دابازيد نزل قدامي تسمعني
جوزيف: لاوشاااد عكااز من الفووق تارابالرب حتى وااحد الكداب منك مااكان بالله
حسام: مزيان “هز عكازو” لبس شي حاجة أنا لتحت..وتعطل نجي نفصلك راكا عارفني “غادي لجيهت الباب”
جوزيف: حااگر عليا غيير أنا وااسيير دير هادشي مع ولدك
حسام: غانجمعكم بجوج..طلق رااسك راه كانتسنا
بلاصة لوطو قدام دارو وگال لعساس بلي غاتجي شي وحدة يحل ليها الباب ونزل هاز طيلي فيدو كايقرا فيه ملف وعاقد لحضاش مخنننزر..دخل وطلع لبيتو ونيشان للحمام كاينهج عصبيتو غير ماكاتزاد..مد يديه طرطق صدايف القاميجة وحيدها بالنتير لاحها وحط يديه على لاڤابو كايتنفس بالجهد..طلع عينيه كايشوف راسو فالمراية عينيه كايحماارو كتر وكتر..
كيف ددخل بجوج دقايق وقفات طاكسي قريب للباب ونزلو كلهم كايضورو عينيهم على الدار ويشوفو منين يبداو
زينب: هااويلي هاااويلي وماحشومااش عليك تگول عليها داار..بالسيف مايحيد الگارد وهو مضورها بهاد الصور واخا تكون فرخ مادخل
مرجان: “إيديها على جنابها اتشوف فالدار” متأكد كاين باب واحد
أيمن: وي باب واحد هو ليكااين وهو هادا
مرجان: بففف واخا..تسناوني هنا …مشطات شعرها بصبعانها ومصات شفايفها وتمات غادة كاتلوا لجيهت العساس الوااقف قدام الباب ويالله غاتهضر هو يسبقها : تفضلي امادموزيل..دخلي “حل ليها الباب وحيد ليها من الطريق حاني راسو وهي غير كاتشوف فيه أما زينب وأيمن مبلگين فيها عينيهم كيدااارت ليها … الفرصة جاتها ومابغات ضيعها فابتاسمات ليه ودخلات متوترة منين غادوز وكيف غادير تلقا المكتب قبل لايرجع لدار ..هو أصلا رااه فالداار … دخلات وكي خطات الخطوة تسد الباب وتطرق أوطوماتيكيا يعني هانتا گاااع دخلتي المشكل هو الخروج كي غادير ليه … تنفسات مزيان باش تركز وأليباا إلى الأعلى فين كاينيين البيوت ماشي بزاااف غير شي ربعة … بدات تدخل لهادي غيير بالحس وتقلب فالممجورة والپلاكارات وملي ماكاتلقا والو كاتعاود تخرج غيييير بالحس ودخل لبيت آخر..حتى بقا ليها واحد جاهو لخر وبابو مبدل على البيبان لخرين..
دخلات كتسلت على صباع رجليها بان ليها البيت خاوي وبااينة فيه بيتو غير من الريحة لي ضرباتها لنيفها..دارت يديها على خصرها كتسرح عينيها فالبيت وتشوف منين غتبدا.. بانو ليها مجورة حدا الناموسية مشات ليهم نيشان وبدات.حل, قلب, خربق, سد ودوز للاخر نفس الشيئ وكل مرة ترد شعرها مور دنيها ومركزة فشنو كدير..
داير يديه على جناب لاڤابو مهبط راسو والراية ليكان مقابل معاها وجهو كااايلة مشتتة حداه..يديه كتقططر ودمها كيطيح فالأرض قطرة قطرة.. مكررره وعينيه دابلين كيبان فيهم جرح عمييق كيحرقو كتر من الجرح لي فيدو..طلع النفس وخرجها وتم غادي يخرج للبيت..وصل للباب ديال الحمام ويالله غيحط يديه على لپوانو حبببس..بدا كيرمش عينيه بشوية وحجبانو عاقدهم شوية شاك فشي حاجة.. عاود حط ايدو على الپوانو بشوووووية وحل غير فتحة صغيرة طل منها بانت ليه عاطياه بالضهر قدام واحد البيرو عندو فالبيت كتقلب بين الوراق وصنيديقات الخشب المنقوشين والحاجة لي حيدات منها كاتخليها مرونا.. عرفها وعقد حجبانو مستغرب..زاد حل الباب وتم غادي عندها بالحس دقااا دقااا وحفيان.. وصل موراها وقرب كتر حتا لصق نيفو على شعرها دار يديه ورا ضهرو وسد عينيه..وااقف مكاالمي كيخرج النفس بشووويية وكيتسناها تحبس روينتها وضور.. لكن مرجان غيير مكتزيد ترون وتقرا فشي وراق لاعلاقة مع داكشي لي كتقلب عليه غير حب الإستكشاف وفضوول واخا معرفاتهم باشمن لغة ولا شمن كتابة هاديك..دارت ليد ليمنا على خصرها كتشوف وتنفخ..عيات متقلب ووااالو … قرب حدا ودنها وهو باقي ساد عينيه وقال بصوت هامس:كتقلبي على شي حاجة الغزاالة؟.يكما نعاونك؟
قفزات وضارت..ملي شافتو قدامها هاكاك مشا اللون من وجها ومشا لكلام..حلات فيه فمها مصدومة وهو وااقف كيشوف فيها فاص وكيبان مهدددن مكاااالمي
أدهم: صاڤا
مرجان: “سرطات ريقها وبدات كترمش وتفكر فشي كدبة هيا هادييك وميشكش فيها وقالت كتمتم” أأنا كنت.كنت ب ب باغة ن نهضر معاك
أدهم: “طلع فيها حاجب” معايا أنا
مرجان: ء ء آه معاك
يوسف:وفاش بالسلامة
مرجان: ف فف فالحفلة..بغيت نگول الموضوع كيتعلق بالحفلة يعني ملي شفتيني شفرت داك السيد وداك الشي “هو نزل داك الحاجب ووجهو جااامد مفييه حتا تعبير متبع ليها العين كيفاش متوترة وكيفاش كتلعب بعينيها وكتفرك يديها وشعرها لي كل مرة كترضو اللور وواضح وضوح الشمس راه كتكدب” أنا كان عندي مبرر احم يعني فهمتي
أدهم: “ربع فيها يديه” بشوية عليك..بنتي ليا غااتسخفي
مرجان: “عاد شداتها السخفة ملي شافت القمشة” ل لاا …شافها فين كاتشوف وقرب..
شافها لفين كاتشوف وزاد قرب حتى ولات نفسو كاضرب لوجهها، رجع يديه مورا ضهرو باش تبان ليها فعلتها كتر وهي وااالا بغات تبرا ليه كيما گال عليها مسموومة ودقتها مسمومة
أدهم: عاقلة على هادي”مبررد”..هممم
مرجان: “طلعات فيه عينيها كاترمش” ح ححيتى نتا دفعتيني للباب “سرطات الريق” انا ..ماكنتش باغا نقمشك اصلا.. ولكن خلعتيني وكان خاصني ندافع على راسي ..فهمتي
أدهم: “مصغر فيهاا عينيه وغير كايتفحص وجهها سكوتو وبرودو كايبردو ليها الما فالركابي وكلا مرة تگول دابة تجيني شي دقة من حيت لا أدري..هاهو غايجمعها معايا داابة ولا يمكن يقتلني گااع ومايسيق ليا حد الخبار ولايدير فيا شي حاجة.
أدهم: ماكانضربش العيالات “قفزها” خصوصا لي ماكايعنيونيش..كانبقا بعيد ونخلي رجالي هوما يتكلفو الغزالة..غانعاود نسولك غانعطيك فرصة اخرى ونتمنا تستاغليها..آشنو .. جايا .. ديري .. هنا
مرجان: راه گلت ليك جيت نعتادر “كاترعد من الشوفة لي عاطيهاا وماقادا حتى طلع عينيها فيه” ع ععرفت رراسي غالطة وجيت نطلب منك السماحة وحيت..
أدهم: خرجي
مرجان: هااا …معاودش معاها الهضرة مشا ليها نيشان جرها من يدها مخرجها من البيت ودغيا تسيف ورجع مخنزززر عااصر ليها دراعها..هبطها لتحت حدا باب الدار وركب الببصمة ديالو تحل الباب ودفعها حتى كانت غاطيح والخلعة باقا شاداها وكاتشوف فيه مصدومة …هز صبعو محمررر فييها كايدوي بصوت خافت وتحت سنانو: مانعاودش .. نشوف وجهك مرة خرا..كاتسمعي..وااخر مرة دووري بشي جيهة نكون فيها ولا غاتوقع شي حاجة ماغاتعجبش ..طلعها وهبطها عااااايف ومطيح منهاا النص بهاااد الشووف ..خبط عليها الباب وخلاها واقفة مصمرة قدامو عينيها موسهاااهم وهضرتو كاطلع وتنزل معاها مباغاااش تسرط ولي عصبها كتر حتى دمعو عينيها..هو أنه ماعطاهاش الفرصة حتى تجاوبو وترد عليه وهادي أكتر حاااجة غددداتها وهي شي واحد ينقص منها ولو بشعرة وهو الشوووفة ليداار فيها گالت بزااف وبزااااف..لاحت ساكها ومشات كاتخبط فالبااب وتسب سبااان وواشمن سباااااان حتى تجرحات يدها ولكن مبرداااتش..هزات سااكها ويالله غاتم خارجة تاكادخل بنت من بنات ليل .. من مشيتها، للباسها، لفورمتها، لماكياجها عرفاتها شكوون ..خنزرات فيها وداازت ضرباتها بكتفها مخلياها مافاهمة والو ومشات لعند أيمن وزينب .. مدوات ماهضرات غير عاقداهم وكاتنهج وعينيها مدمعين وهوما ملي شافوها فديك الحالة تقريبا فهمو بلي ماوقعش كيما خططو وركبو فطاكسي غادين محبطين شي ممهضر شي..طاايح عليهم الضيم وهي طاحت ليها جزء من كرامتها لي مابغاتش تسرط ليها..
رجع دخل لبيتو معصب نيييت وغادي جااي باغي يبررد.. هز تيليفونو مشا للبالكو كايشوف فيها غادة عند أيمن وزينب لي واقفين على جنب الطريق..دوز خط لجود وگأل تحت سنانو مراقبها: بغيتك تبقاا مراقبو ليا مزياان ونهار نعطيك لورضر غاتجيبو ليا
جود: غير بوحدو أسيدي ولا بجوج
أدهم: داك البرهوش دير ليه شدة ودن وحيييد، أما السمية لي عطيتك هو ليتجيب ..”بحدة” مفهوووم
جود: كون هاني أمسيو …قطع عليه ودخل وقف وسط البيت ساد عينيه كاينهج وكاارز على تيليفون فيدو .. سمع الباب تدق وفتحو من طيلي بلا مايحل عينيه.. دخلات كاتلوا وعينيها مخرجاهم فيه وخصوصا العصبية جاات معاه وبرزات عضلاتو ولون عينيه عطااع جمالية خطييرة .. فتح فيها عينيه كايشوف لوجهها ونازل بشوفاتو عليها وهز طيلي باقي حاضيها .. ورك على زر فيه وتسد الباب عليهم …
★★★
صونات الطناش والتلاميد بداو يخرجو وهي معاهم..بنادم غير حاضيها بنات وولاد وهي محرجة منهم ومنزلة عينيها ماكاتشوفش فيهم وغادة لباب المؤسسة تخرج .. واقف قدام الباب بأودي كحلة كاتبري…عينيه مقنصين على الباب حاضيها إمتا غاتخرج حتى بانت ليه خرجات كادور عينيها على الباب..ناض غادي لعندها حتى بانت ليه غادا ضاحكة لعند خالتها لي كانت كاتسناها غير شافها گلب الطريق طالع ليه الخز والبلان لي صاوب تخربق ليه …
تيتريت باست خالتها وتمو راجعين للدار كايهضرو
إيجا: يكما كتار بزاف؟
تيتريت: شوية وصافي حتى نشري الأدوات وننقلهم
إيجا: إوا مزيان .. راه كريم ولدي عطاني باش نشريهم لك أنا بلا ماتعطي الورقة لعماد وفالعشية ملي تخرجي غاتصوني عليا من تيليفون شي بنت حتى نشري لبنتي واحد
تيتريت: “تبسمات” آه أخالتي راه گالها ليا خويا كريم
إيجا: “طلعات حاجب وشافت فيها” خووك؟
تيتريت: آه خويا كريم گالها ليا ملي وصلني
إيجا: هممم ..مهم ماتنسايش العشية فاش تخرجي صوني عليا نجي لك
تيتريت: صافي أخالتي
إيجا: الله يرضي عليك …كملو طريقهم ومشاو للدار دخلو..تيتريت طلعات لبيتها تحط شي دفاتر طلبهم ليها الأستاد من عند شي تلاميد باش تنقل داكشي ليفاتها..أما كون طلباتهم هي والله لاعطاها شي حد خصوصاا فقيسمها أغلبيتهم مساميم الله يستر .. فكات ظفيرتها ودوزات عليها بمشطة عاد جمعاتها لور ومشات لپلاكارها تجبد ماتلبس
فالدار لتحت إيجا حيدات جلابتها لبسات پيجامتها وواقفة كاتسخن الطاجين حتى سمعاتو دخل ومشا للصالون گلس شاد الكورة كايتفرج..
نزلات تيتريت عند خالتها ودازت من حدا الصالون..رمقها بعينيها حتى دازت ورجع كايتفرج وهي مشات للكوزينة
إيجا: هاكي أبنتي دي هاد شلاضة حطيها فوق الطبلة وأنا نقطع الخبز نجيبو
تيتريت: واخا اخالتي ..هزات داك الپلاطو فيه خمسة الطباسل ديال شلاضة مغربية وخمسة المعالق حداهم .. دخلات عليه للصالون وحطات الپلاطو فوق الطبلة وبدات كاتستف طبيسلات ودورهم على الطبلة.. هو عين فالتلفازة وعين فيها محنية كاتحط بشوية عليها وبسمة خفيفة على شفتها ديما ملازماها وشعرها لي جامعة الفوق مبين عنقها البيض طوييل وجوج خالات وحدة فوق وحدة تحت ودنها..وتما لسقو عينيه وميل معاها راسو كايشوف فيهم كيفاش وااضحين ومع هوما كحلين زاادو بينو البيوضية ليفعنقها..حتى قاطعات تأملو مو لي دخلات هازة الخبز فيديها .. سرط ريقو وطرطق عنقو وناض وقف
إيجا: فين غادي أهيا
كريم: نغسل يدي وهانا جاي ..مشا للحمام دخل وخشا راسو تحت لاڤابو .. بقا شوية عاد طلعو كايشوف للمراية وكاينهج..مسح بفوطة وغسل يديه وحل الباب لقا عماد هو ومروان عاد جاو من الدرسة وواقفين كايتسناوه يدخلو يغسلو حتا هوما باش يتغداو، سلم عليهم ومشا للصالون گلس فبلاصتو حدا مو وعماد ومروان لحقو عليه وتيتريت جابت طاجين حطاتو ليهم .. گالو بسم الله وبداو كاياكلو ..
سالاو ماكلتهم وناضو الدراري يغسلوو. يديهم ويمشيو يبدلو حوايجهم وتيتريت ناضت كاتجمع الخبز فسلة ديالو ويالله غاتنوض إيجا تعاونها وهو يشدها كريم مرجعها لبلاصتها
كريم: الواليدة بغيت نهضر معاك
إيجا: الله يسمعنا خبار الخير “تيتريت هزات داكشي لكوزينة مخلياهم بجوج”
كريم: دابة بلا ماتقلقي بلا ماتكعاي صافي..أنا ناوي نرجع فحالاتي
إيجا: “حزنات” الله ياوليدي وباقي حتى ماشبعت منك والا گلست معااك
كريم: واالواليدة واراه حتى أنا عندي خدمتي وداري وخاصني نمشي نقابل شغلي
إيجا: “شدات يدو” وحتى هاادي داارك علاه مالها
كريم: “ضور وجهو مخنزر” الدار لي جرا عليا راجلك منها ماشي داري الواليدة
إيجا: الله يهديك أولدي راه باك هاداك..نعل الشيطان وسير تصالح معاه وطلب منو السماحة وصفيو الخواطر راه كايبقا بااك
كريم: الوااليدة الله يرحم باك باراكة..حلفت منبقا نعتب هنايا وبمسبتك جيت وماتندمينيش وهو كون كان باغي يهضر معايا راه يوماين وانا كانبات معاه فالدار مالو ماجاش عندي
إيجا: واراكا كاتعرفو ياااكريم كيف داير وباقي مانساش داكشي لي وقع..”شافت فيه برجاء” وحتى هو راه غير ربي لي عالم بيه كايفيق مع النبوري ومايرجع حتال نصايص الليل ومحتاج ولدو لي يهز عليه الحمل شوية ويعاونو على الزمان
كريم: نعطيه ياك هه باش يعاود يلوحهم ليا على كمارتي .. الواليدة”باس ليها يديها” أنا غانمشي..تهلاي ليا فصحتك وفاش تبغيني راكي عارفة داري فين جات وإن شاء الله بعد فترة غانرجع نشوفك .. صافي
إيجا: “تنهدات بضعف” إيوا آش غانگوليك ياولدي..راسك قااسح ولكن ماعندي ماندير..الله يسر ليك أمورك وينقي طريقك من الشوك ويبعد عليك ولاد الحرام
كريم: “تحنا كايبوس ليها يديها” أميين أمييمتي أميين..دعي معايا راني محتاجو أمييمتي
إيجا: داعية معاك أوليدي فكل صلاة دااعية معاك وداكراك وديما على طرف لساني وفدعائي الله يررضي علييك
وصلات للدار وكيف دخلات بدات عليها مليكة بالمخاسمة والمعيور على التعطيلة لي تعطلات..صبناتها مزياان عاد دخلات دير القيلولة.. متسوقاتش ليها ودخلات معصبة لبيتها .. گلسلت على السرير ديالها وهضرتو فودنيها كاتزيد تزندها كتر وكتر..نفضات راسها وناضت للكوزينة سخنات غداها وهزات الخبز وبدات كاتاكل بالغدايد وكلا ندغة كاتحس راسها كاتندغو هو..كملات وغسلات الطاجين ويديها وهزات ساكها وخرجات تاني .. دارت مع الدورة ديال دارهم فين كاين السيبير ومشات كادق فالدار لي حداه
مرجان: غييتة …غيييييتة … حل ليها خليل الباب مبتاسم ولكن غير شاف ملامحها خنزر
خليل: مرجان مالك..واش دوا معاك شي حد
مرجان: مامالي والو..كاينة غيتة فالدار
خليل: داوي معاك ابنادمة مالكي..بحالا فيك البكية
مرجان: “ساطت” دابزت مع مليكة صافي ..وادابا فين ماماك
خليل: “قرب ومسح ليها عينيها لي كانو شوية مدمعين” ماتبقايش تعصبي بزاف..عينيك بوحدهم كايدمعو
مرجان: هه نحااول
خليل: “ابتاسم” الواليدة كاينة فالصالون حتال شوية وترجع
مرجان: لا صافي غانمشي عندها..شكرا
..مشات وهو بقا متبع ليها العين حتى غبرات ودخل فحالو
فصالون الحلاقة للنساء ..واقفة غيتة بكولون كحل وتيشورت بيض وشعرها جامعاه بقراسة كاتصيب لواحد السيدة شعرها وتضحك مع هادي وهادي حتى دخلات عليهم كيف العجاجة كاتسوط
غيتة: ههه مرحبا بزيين “مرجان مشات گلسات فكرسي وتقابلات مع المرايا” سمية تعالي ابنتي كملي لسيدة نشوف هادي مالها .. “عطاتها سيشوار ومشات لمرجان باستها بحنكها وعنقاتها من لور كاتشوف فيها من المرايا” مال زين ديالي مكشر مالو مالو
مرجان: بفف لهلا يوريك اليوم شنو وقع ليا
غيتة: شنو درتي تاني يالجنية
مرجان: أودي صيبي ليا شعري بعدا راه غادا فين گلت ليك البارح
غيتة: وبهاد المورال هادا غادة..ماجاتش..طلقي البسمة شويا راك غادة لڤاييرا ويالاالة هههه سمية ضربيها بشي تزغريتة
سمية: روروروروروي هههه
غيتة: الرررضا ههههه ودابة ازين شنو باغا نصيب ليك،آااش حبات خاطرك
مرجان: هههه لي بغيتي
غيتة: ممم..واخة هانتي غانصيبو ليه ساامپل ونديرو بوكلي من لتحت مع ميكاپ خفييف غايجيك طوپ كتتر مانتي طووپ..بعدا لغوب جاتك فننة ومبينااك كيووت
مرجان: هههه “طلع ليها المورال ودغيا تبدل ليها المود” ياك بعدا هههههه
غيتة: معلوووم..إيوا هاكة نبغيك طلقي ليا الضحيكة هههه … بدات كاتصيب ليها وتهضر معاها ومرجان نسات ماوقع وتطلقات فالهضرة معاها..
خرجات من بيتو فرحاانة واخا جاتها المشية صعيبة ولكن الضحكة واصلة للودنين .. نزلات لتحت وبقات كاتسناه كيفما گاليها حتا بان ليها نازل عندها ببودي زرق وسروال كيطما ديال الدار وشعرو فازگ..دار البصمة ديالو وحل ليها الباب.. قربات لجيهتو وباستو فحنكو عاد خرجات..خنززر وخبط الباب ويالله تم طالع حتى عاود تدق الباب مشا لجيهتو عااقدهم وغير حلو وشاف شكون زااد عقدهم كتر وبقا واقف شادو بيد
جوزيف: “ضاااحك وحل ليه يديه” ولد عمي الحبيييب..أجي عندي أجي راه تووحشتك
أدهم: “دفع ليه يديه” زملتي نتا لا
جوزيف: شنوو حتى واحد مابقا يتوحش ولد عمو لحبيب
أدهم: “سد عينيه وحلهم معصب وزاد عصبو” جوزيف..سييير بحاالك..قوود
جوزيف: “ضرب ليه يدو باش شاد الباب ودخل ضااحك كايتنخوا بحالا دارو” لا وتگووول..توحشت حبيبي وجيت نشوفو ونتا ماتوحشتينيش
أدهم: ملي توحشتي حبيبك كنتي تعلمني نتسناك باش نجمعك مع هادي لي يالله خرجاات “غمزو” نحيد منك وحشي مزياان
جوزيف: هاهاهاها مقبوولة منك والله مانتعصب غير تهنا “مشا گلس مسرح يديه ومفرگ رجليه كايشوفيه هو لي داير يديه على خصرو ومخنزرر طالع ليه الفواار” شنو ماغاضايفنااش..زعما مافيك صوااب
أدهم: نتا راه باانليا لحمك كاياكلك .. وكاتقلب عليا
جوزيف: صاافي اسيدي گعلا تضايفنا اصلا حنا ماشي غرااب هههه سير بدل عليك ويالله نخرجو نسهرو هاد العشية نتفكرو يامات زمان “غمزو” ههههه
أدهم: دابة ماباغييش تخرج يااك
جوزيف: تء تء
أدهم: واخاا “بدا كايگفض كمامو وجاي قاصدو”
جوزيف: “ناض وقف” هه هانا نايض اصاحبي بلا ماتكعا ولكن غانتسناك برا..عنداك ماتخرجش راه ماجانمشيش بالرب حتى ندير لك الأراارة..يالله تهلا … مشا خرج مخليه غير كايتنهد على لخر طلع لفوق لبيتو ..
نزل لتحت وهو مدرع إيجا الحابسة دموعها بزز أما مروان فاطلقهم وبدا كايبكي..هزو كايسكت فيه ويگوليه شنو غايجيب ليه المرة جايا إيلا جا .. وماحطو حتى سكت ورضا..مشا عنق ميمتو وباس على رااسها وهي كاترضي عليه أما عماد ودعو الفوق وتيتريت كانت طلعات لبيتها ..
إيجا: تهلا أولدي فراسك وماتنساش راكا حلفتي ليا السيمانا جايا غاترجع يااك؟
كريم: واصافي الواليدة إلى قديت راه غانجي
إيجا: لا وتگووول گلتي سيمانة جاية..هي السيمااانة جاية
كريم: يكون خير..نسيت جاكيط ديالي لفوق..مروان سير..
إيجا: حيد منو گالااك..النهار اوماطال وهو شاد زكاير مع الدرية وبغيتيه يطلع يدابز معاها تاني..سير جيب جاكيطك إلى بغيتيها سيير سيرر
…شاف فيها وضحك طاالع للفوق..دخل للصالون لي كاينعس فيه وهز جاكيطو..جا خارج وهو يوقف..تبسم ودار غادي لبيتو..كان الباب محلول وهي فوق الناموسية مربعة رجليها وحاطا الدفاتر ليجابت كاتقرا فيهم..شافها هاكاك وزاد تبسم ودق.. حولات عينيها للباب وغير شافتو وقفات ومشات ناحيتو مبتاسمة
كريم: كنت غادي وگلت نجي نودعك..
تيتريت: وااش غاتمشي “حرك ليها راسو” الله يسر ليك ويسهل عليك
كريم: “تنهد” آميين..ديها فقرايتك وملي تحتاجي شي حاجة عيطي..ليا راه وصيت الواليدة تشري ليك طيلي
تيتريت: هه آاه گالتها ليا..شكرا بزاف أخويا ..ابتاسمات ليه وحتى هو ردها ليها وتم غادي خارج..وصل لباب ليطاج وهو يوقف وحبس على الحركة ..دار لعندها براصو لقاها باقا كاتشوفيه مبتاسمة ويديها قدامها.. رجع ليها بسرعة نيشان وجبدها معنقها لعندو ..حلات عينيها على وسعهم مصدووومة..عكسو هو لي سدهم منتاشي ونيفو فشعرها وبشوبة قرب لجيهت ودنها وهمس: باقا ريحتك نفسها..حتى ملي كنتي كاتجي تخشاااي حدايا بالليل كنت كانشمها فيك وبااقي لدابة عاقل عليها..حتى حاجة ماتبدلات فيك..حتى حاجة ابنت خالتي … حيد وجهو شوية وشافيها كانت حمممرة وغير كاتشوف.. ابتاسم وقرب باسها لحنكها وگال وشفايفو مازال لاسقين فيه: تهلاي فراسك..أنا قريب غانرجع..بلا ماتوحشيني حيت حتى أنا ماغانتوحشكش..واخا؟ “زاد باسها وخرج زربان كايطلع النفس ويهبطها بالزبة والضحكة مزينة وجهو..عينيه بؤبؤهم وسااع وولاو كايبريو..أما هي فابقات مسمرة بلاصتها مامستاوعبة والو وكاتشوف فمنحا واحد..
★★
شعرها سامپل ومبوكلي من لتحت ودايرة عكر گرونة وميكاپ خفييف مركزة غير على فمها لي مزيناه ابتساامة عريييضة وهي كاتشوف فباب مدخل شركة الأزياء ڤاييرا..عينيه بداو يبريو وخضوريتهم بانت كتر وهوما كايتفحصو سميت الشركة وبطالونها العاالي نفس لون عكارها..تقدمات بخطوات مدروسين كاتقرقب بيه وغادا باش للمدخل..
فوسط قاعة الإستقبال واقفة بشعرها البني المتموج راداه لور كايتحرك معاها وحداءها العالي وأحمر شفاهها مبين شفتاها وراسمهم بدقة .. عينينيها كادورهم على القاعة كاملة عيات ماتخلها كيف غاتكون من لداخل ولكن ملي شافتها زاادت تبهرات..قاعة كبيرة مقابل مع باب المدخل بيرو مستطيلي فيه واحد البنت هي السكرتيرة ولي كاتنظم المواعيد..جانبها فوطويات موڤيين وخدادي باللون الأبيض أوسطهم إسم الشركة “Vayera” وفي الرواق الطويل من مكتب الإستقبال للباب كاينين دي غوب رووعة منفوخيين من لتحت وملبسينهم للي مانكان وحاطينهم فالجنب ديال داك الرواق كنوع من التصاميم الفخمة لي فالشركة .. تقدمات مرجان لديك البنت..حطات ساكها فوق المكتب وحنحنات والسكرتيرة هزات فيها عينيها وابتاسمات: وي مدموزيل..كاين فاش نساعدك
مرجان: “بابتسامة” بغيت نقابل مدام سهام عفاك
السكرتيرة: عندك غونديڤو معاها امدموزيل
مرجان: بصراحة نن..ولكن كانت گالت ليا ندوز عندها..
السكرتيرة: سمحيلي امدموزيل ولكن راه مايمكنش ليا نخليك دخلي عندها بلا موعد
مرجان: واخا..إلى كان ممكن غير علميها وهي غاتعرفني وگولي ليها مرجان
السكرتيرة: داكوغ نحاول… هزات طيلي ديالها ودوزات الخط ديالها
كانت گالسة فالمكتب كاتشوف فشي تصاميم من المصممين لي عندها في الشركة وحداها المساعدة ديالها كاتقيد الملاحظات والإنتقادات لي كاتعطيها.. حتى قاطعهم رنين الهاتف لي فوق المكتب،هزاتو وهي عينيها باقين على الرسومات: وي
السكرتيرة: مدام سهام..واحد البنت كاتسول فيك
سهام: شكون هادي
السكرتيرة: سميتها مرجان امدام..وگالت ليا كاتعرفيها .. مدام واش كاتسمعيني ..واخة امدام كانعتادر على الديرونجمو ..قطعات الخط ومرجان غير كاتشوف فيها بحماس
مرجان: آش گالت ليك..ندخل عندها دابة
السكرتيرة: سمحيليا امدموزيل ولكن مدام سهام گالت بلي مكاتعرفكش
مرجان: شنوو “تصدمات” سمعي غاتكون ماعقلاتش على السمية يمكن..عاودي عيطي ليها وگولي ليها بلي تلاقينا فالحفل ديالها وبلي هي بنفسها لي عطاتني كارط ڤيزيط وگالت ليا نجي عندها
السكرتيرة: مدموزيل..الله يخليك بلا ماديري ليا شي مشكيل..تفضلي عافاك خرجي
مرجان: ولكن راه ماكانكدبش عليك هي بنفسها لي طلبات مني نجي لعندها..الله يخليك عاودي تاصلي بيها وخليني نهضر معاها أنا الله يخليك
السكرتيرة: انا كاندير غير خدمتي امادموزيل ومدام سهام گالت بلي ماكاتعرفكش ومانعاودش نتاصل بيها..عافاك تفضلي خرجي ولا غانضطر نعيط ليك لسوكيغيتي ..مرجان شافت حتى عيات وهي تهز ساكها مضيومة وتمات خارجة وملامحها تبدلو تسعين درجة على ليكانو عليه..دخلات مع داك الباب بتقة واستقامة وعيون متحمسين هازة آماال كتييرة بلي غاتلاقاها وتهضر معاها وتحقق حلمها..ودابا هاهيا خارجة من نفس الباب ولكن بكتاف طايحين رجليها غير جاراهم وعينيها حمارو حابسة البكية بزز..خيبة الأمل جاتها قااصحة حيت ماحطاتش فإحتمالها ولو واحد فالمئة بلي ماغاتشوفهاش..وهادا هو الخطء لي دارت..أنها ماحطاتش إحتمالات..وقفات برا وكتشوف للشاريع مقاومة لدموعها يطيحو ومشات شدات طاكسي ترجع فحالاتها لدارهم..
حطات الفيكس من يدها وهي كاتشوف لمنحى واحد..هادشي ماشي من شيمها أبدا..ماشي هي لي تواعد ومتحقق..ماشي هي لي تگول وتنكر.. هادي ماشي هي بتاتا ولكن هاكدا أحسن وشيء لي خل بتوازن حياتها فهاد اليوماين خاصها تبعدو عليها واخا يكون غير مجرد إسم..تنهدات وسدات عينيها وعاود حلاتهم بغات تنسا الفعلة لي دارت وضارت عند المساعدة ديالها: خلي حتال غدا ونكملو..سدي معاك الباب ومايدخل عندي حد
المساعدة: واخة امدام .. جمعات التصاميم وملاحظاتها وخرجات سادة عليها الباب مخلياها دايرة يديها على جبهتها ومسنداهم على المكتب وضميرها داير خدمتو وكايأنبها على فعلتها
★★
وصلات لدربهم وهي محطمة..غير كاتزطم فالطريق..غادة وحواسها مامعاهاش ماكاتسمع ماكادوي ماكاتحس بشنو ضاير بيها..غير غادة فطريق دارهم وساكها مجرجراه معاها .. خليل كان راجع فحالاتو للدار حتى شافها هاكاك وهو يمشي ليها كايزرب
خليل: مرجان..ماالكي هاكة “كايتفحصها بعينيه” شنو واقع
مرجان: “شافت فيه ونزلاتهم عياانة” باغا نمشي للدار..حيد من الطريق
خليل: “تعصب” نتي راه حالتك ماعاجبانيش هضريي مااالكي
مرجان: “بعياء” خليل الله يرحمباااك لاما حيد راه بقا ليا شوية ونطييح شووية
خليل: راااه من هناا مامحررك حتى تهضري شكوون داار لك شي حااجة ولا رااه غانقودوها انا ويااك اليوم..مالكي لاابسة هااكدا بعداا شهااد الحاااالة
مرجان: “صعرات” واابناادم واش ماكاتفهش وااقود عليااا ماباغااش نهضر فهم كررك وحييد
خليل: “زاد تعصب ووقف قدامها” مافااهمووش ومااامحيدش عرفتي آش ديري “شدها من يدها” زيدي نحيدو من هنا بعداا وغاتعاودي ليااا كولشي …مابقا فيها مايتجابد وزادت موراه حتال الشاريع وشدو طاكسي
ناازل من الدروج كايلبس جاكيط دجلد ديالو ..حل الباب وكيما گاليه نيت لقاه كايتسناه متكي على الفيراري الكحلة ديالو وكايشوف فالخضورة..قرب ناحيتو عاقدهم وغير وصل حداه ناض جوزيف وقف كايبتاسم
جوزيف: صافي مشينا
أدهم: دابة نتا ماناويش تفرق عليا ولا كيفاش
جوزيف: هههه واصافي اصاحبي بحالا غانخطفك..زيد زيد نمشيو نقصرو شوية تشوف ازين المغريبي كي داير
أدهم: جوزييف
جوزيف: صافي صافي..غانديك لبلاصة نقية وزوينة غاتعجبك.. يالله ..غادي يحل لوطو حتا لقاه باقي واقف كايشوف فيها..ضحك ومشا عندو مد ليه السوارت: ههه عادتك هي عادتك اصاحبي الواحد مستحييل تأمن لشي حد هههه .. خدا من عندو السوارت وطلع ضيمارا ومشا ..
★
صونات الربعة..خرجات من الباب كاتسول والبنت لي طلباتها كاطلع فيها وتهبط وتگول ماعنديش..مامشارجياش..ماعاطياكش .. هي أصلا حشمانة حيت غاطلب طيلي من شيوحدة وزادو حشموها برفضهم وبالشوفات لي دارو فيها ..جاتها البكية والتلفة مابقات عرفات آش دير ولا فين تصد حيت طريق للدار ضايرة على الدروبة وخافت لاتزدق تالفة..بقات واقفة قدام الباب لي بدا كايخوا شي داخل شي خارج فحالاتو وهي حاضنة واحد المقرر حاطاه على صدرها مزية عليها وعينيها قربو يبكيو.. حتى كاتشوف تيليفون تمد ليها من لور..ضارت وهي توسع عينيها ملي شافت أشرف واقف مبتاسم ليها وطيلي أيفون دهبي فيدو مادو ليها
أشرف: سمعتك ملي كنتي كاطلبيه..خودي عيطي
تيتريت: ءء ل لا ششكرا “توترات وبغات دوز وهو يوقف ليها فالطريق”
أشرف: مافيها والو..نتي عاد كنتي كاطلبيه باش تعطي لخالتك تديك..خودي هاهو ديالي عيطي منو
تيتريت: لا اخويا مابغيتش..شكرا “حيدات من حداه بالزربة وتمشات غادة فالطريق عاااصرة على داك الكتاب كتتر وغير كاترجف..دارت ولقاتو باقي واقف كايشوف فيها عاقدهم وهي تعاود دور مخلوعة منو واخة ماعارفة فين تمشي حدها حافضة منين تدخل ولكن غير توصل لجيهت الدروبة غاتلف عاارفة راسها..بقات غادة بخطوات بطيئة حتى سمعات شي وحدة كاتعيط من موراها
…: البنت..البنت تسنااي بلاتي
ضارت موراها لقاتها كاتعيط ليها نييت
…: ههه الله ياختي وسخفتيني من كبيلة وانا كانعيط
تيتريت: “بقات كاتشوفيها وفلبسها لي لاعلاقة معاها.. عينيها عسليين وحجبانها مقادين غلاض وشعرها كحل كريپي أما وجهها بيض منتور عليه شوية تالنمش من النيف والخدود..لابسة دجين طاي هوت كحل مقطع من الركابي وطاالع حتال البوط وقميجة بيضة عاگداها من كرشها فوق منها كونڤيرص كحلة وفرجليها سبرديلة سپورتيف كحلة ديال اير ماكس … بقات غير كاتشوفيها وترمش ماعرفات ماتقول
…: ههههه ياكما خلعتك..أنا هيام “مدات ليها يديها”
تيتريت: ممتشرفين أنا تيتريت
هيام: ويينو على سمية هههه بحال مولاتها كاتحمق
تيتريت: “حشماتها” شكرا
هيام: ههههههه هاانية ازين..شوفي راه سمعتك ملي كنتي كاطلبي طيلي من عند دوك المساميم..ولكن كنت مخلياه عند واحد خيتي عاد رداتو..هاك ابب هضري مع خالتك
تيتريت: “بصوت خافت” إلى ماكان عندك حتى مشكل
هيام: لا وييلي على يكون عندي مشكيل..شدي شدي عيطي إلى بااغة تعيطي
تيتريت: هه واخة شكرا ..شداتو من عندها متوترة وبدات تركب فنمرة خالتها لي حافظاها عن ظهر قلب وإيجا دغيا جاوباتها
إيجا: ألو.
تيتريت: خالتي..أنا تيتريت
إيجا: آاه خرجتي أبنتي؟
تيتريت: أه عاد دابة شوية
إيجا: وهانتي أنا راه غانلبس غير جلابيتي ونجي عندك ماغانتعطلش..ونتي بقاي تسنايني قدام باب المدرسة متحركيش..صافي
تيتريت: صافي واخا أخالتي..بسلامة “قطعات معاها وردات تيليفون لهيام” شكرا اختي الله يرحم بيها الوالدين
هيام: آميين ازين هاانياتون..أجي نتي فاش كاتقراي
تيتريت: فسانكيام اختي
هيام: تء فايتاك بعام ولكن ماعلييش هههه يالله تهلاي انا خاصني نمشي..باي “باستها ومشات …وتيتريت رجعات فالطريق باش توقف حدا الباب تسنا إيجا تجي..
يتبع
التعليقات 0