الفصل 6

🔥الموسم الثاني : كافيين🔥

– وصل نهار السبت ، نهار الخطوبة عند سامية … الدار كانت سفاها على علاها … زينب واقفة على كولشي ..كلفات التريتور من حلاوي مقبلات مأكولات مشروبات ،، من كولشي .

– سامية هي وسعاد وسعيدة وإيمان خرجو مع الصباح ، دازو نيشان لسونطر ديال سامية تما أيتكلفو بيهم البنات ، الخياطة سيفطات لسامية القفطان لي اتلبس هو والإكسيسوارات نيشان للڤيلا ، باش بلاما تعدب وتدوز حتى للمحال ..

– جواد (كيهضر فتيليفون فرحان) : هي غادي نشوفك اليوم ؟

– سهيلة (كضحك) : جواد من صباح وانت كل مرة مسوني ليا ، وكتسولني نفس السؤال ..

– جواد (كيضحك) : بغيت غير نتأكد واش الصديقة ديالي الغالية على قلبي ، أتحضر ولالا ..

– سهيلة (ضحكات) : اه اسيدي … صديقتك الغالية على قلبك … غادي تحضر تهنيتي دابا ؟..

– جواد (شاف فساعتو) : اه دابا تهنيت ، المهم نخليك انمشي نجيب لبنات .. ونخليك حتى انت توجدي راسك ..

– سهيلة : والحمد لله منين فهمتي راسك ؟

– جواد : ياك لمك ؟ قمعتيني دابا ..

– سهيلة (كضحك ) : جواد بسلامة عليك انا مشيت ..

– جواد : ههههه يلاه بسلامة . قطع معاها ضار كيبان ليه جنيد واقف على جنب الباب ، لابس شوميز فالخزي طاوي ليها يديها مع سروال فالبيج وصباط ..

– جنيد (غمزو) : وطحتي ابا جواد ، شكون ݣال ..

– جواد (كيضحك) : كتسنط ليا العود ؟

– جنيد : ولكن منخافش عليك اخويا ، قرطاسة خطيرة ..

– جواد (كيضحك) : شريه قبل ماتجيبها فعظامك ..

– جنيد : لالا اخويا يلاه مأنتكين على الحالة ، مافينا لي يبدل ..

– جواد : يلاه تلاح ندوز نجيب لبنات ..

– جنيد : غير خليك انت يلاه خاصك تبدل حوايجك ، انا غادي نمشي .

– جواد : متأكد ؟

– جنيد : هضرت معاك ، يلاه انا مشيت ..

______

– جلال (كيقاد فراسو) : نورة نورة ..

– نورة (من لبيت لاخور) : بلاتي انا جايا ..

– جلال : واش نلبس جلابة ولا ولا الفوقية ؟

– نورة (وقفات كتشوف فيه) : اويلي على الفوقية مالك غادي مع الطلبة زوينة هادي .. بلاتي بلاتي انا غادي نجبد ليك ماتلبس صبر ..

– مشات للماريو جبدات جلابة فالبيج مخيطة بالݣرونة وبلغة ديالها ..

– نورة : هاك هادي ، كتجيك غزالة وكتبان منخوي .

– جلال : اودي لهلا يخطيك عليا وخلاص ، انت لي كاتعرفي ليا ..

– نورة (كضحك) : اح عليك زفيفيط ، كتصبغ فيا ، ويلاه خليني نلبس حتى انا ..

– جلال : سكينة وجدات هي وادم ؟

– نورة : هوما لولين ، تݣول اهوما لي غاديين يخطبو ..

– جلال : صافي سيري وجدي راسك أنت ..

– مشات نورة توجد راسها ، لبسات جلابة ديال المناسبات جوهرة هي وقفطانها ، طلقات شعرها .. دارت سنسلة فعنقها مع طوينݣاتها وبراسلي ديالها وخاتمها ، وليد لوهرا دارت فيها ساعة مذهبة ، لبسات صندالة عالية فالكحل وساك ديالها .. رشات من البارفان ديالها وخرجات لعند جلال ..

– جلال (كيعيط) : سكينة آدم يلاه غادي نتعطلو ..

– جاو سكينة وادم..

– نورة : سبقوني نشوف البوطة واش مسدودة ، ونسد البيبان ..

– جلال : واخا حنا التحت ..

– سدات نورة البوطة وتأكدات بلي كولشي هو هذاك ، جات تخرج وهو يسوني ليها التيليفون .. خرجاتو من ساكها كطلع ليها نمرة غريبة ..

– نورة (بإستغراب) : ألو ..

– (صوت ديال مرأة) : ألو واش نورة هادي ؟

– نورة (بإستفهام) : اه هي هادي شكون معايا ؟

______

– نورة : اه هي هادي شكون معايا ؟

– مغاديش تعرفيني شكون ، ولكن بغيت نهضر معاك فواحد الموضوع ضروري ..

– نورة (بإستغراب) : أشمن موضوع ؟ وفين كتعرفيني؟

– كنعرفك مزيان ، إلى كان ممكن نتلاقاو غدا … وإلى كنتي خايفة حددي أنت لبلاصة لي نتلاقاو فيها ..

– نورة (جاها الفضول وبطبعها مكتخاف) : صافي واخا ، غدا إن شاء الله مع 3:30 حدا الجامع حسن الثاني ..

– صافي واخا 3:30 انكون تماك ..

– نورة : بسلامة .

– قطعات نورة التيليفون ، سدات الباب وهبطات مستغربة من هاد المكالمة لي جاتها ..

– جلال: تعطلتي بزاف ..

– نورة : تعطلت امع الباب تعكس وصافي ،داك الساع جاها ميساج ، هزات تيليفون لقات ميساج من نمرة لي سونات مكتوب فيه ” من الاحسن بلاما تقوليها لراجلك حتى للوقت المناسب) ..

– جلال (كيشوف فيها) : كاينة شيحاجة ؟

– نورة (شافت فيه) : لا غير ميساج من زينب ، كالت لينا بلي تعطلنا وصافي .

– جلال : وراه انت لي عطلتينا .

– نورة : وبراكة من الملاغة ويلاه خلاص .. جبدات السمطة وبالها مع هاد للمكالمة وهاد السيدة ، شكون وشنو بغاتها .. زعمة يكون داكشي لي فبالها .. موحال مابغاتش تامل على والو وتصدق مخمقة جلال على الخوا الخاوي ، حتى لغدا وغادي تعرف كولشي ، دك سامية ، جبد التيليفون دوز نمرة سعيدة ..

– جنيد : وي سعيدة ، إلى ساليتو أنا لتحت كنتسناكم ..

– قطع معاها واقف على طوموبيلتو داير يديه فجيابو وكيتسنى فيهم ، هبطات سعيدة هي الاولى ..

– جنيد : هاي هاي على زين ديال خوها منين جا هادشي منين ..

– سعيدة (كضحك ) : باااز … ومنين غادي تشوف الزين ديال بصح شنو غادي دير ؟(غمزاتو) ..

– جنيد مافهمهاش علاياش كتمعني ، هبطات إيمان جامعة شعرها كاملو على شكل ديل حصان ومسرح ، أشرات ليه براسها وطلعات حدا سعيدة ..

– سمع صوت سامية وشامة كيهضرو ..

– شامة : ماعرفتش كيفاش درت فيك راسي وحق الله ..

– سامية : سيري ياتا سيري ، كتباني كتهبلي مالنا انعيشو فيها ديما ، جربي شيحاجة جديدة ، هاهو جنيد ݣاع نسولوه ..

– شامة : سامية لا ص(مداتهاش فيها سامية خلاتها وراها وسبقات) ..

– جنيد (مبسم) : العروسة ديالنا ، لالا العريس ديالنا اليوم موحال ينزل عينيه عليك ، أش هاد الجمال ؟

– سامية (كضحك سلامات عليه بالوجه) : هضر مع شامة قاتليك داكشي لي فوجها معيق ..

– جنيد (دور وجهو جهة شامة ، من سباطها الغوز بيبي مع كسوة فنفس اللون … جات على لاطاي ديالها هي هاديك .. شعرها تبدل اللون ديالو ، خصلات من التحت فاتحين درجات على اللون الفوقاني ، كان مصايب على شكل تموجات اما بنسبة للمكياج ، عكر فالحمر مع أيلاينر وشفار .. جات كتحمق واخا شافها المرة لي فاتت بالمكياج .. ولكن دابا متغيرة بزاف ، عينيه منزلوش عليها حتى فيقو صوت سامية ..

– سامية : جنيد واش انباتو هنا ؟

– جنيد (عاد فاق من سهوتو) : هاني .. مݣال والو لشامة ، طلع لبلاصتو او شامة للور .. سعيدة حاضياهم بنص عين ومبسمة ..

– ديمارا جنيد الطوموبيل وكسيرا شاد الطريق ..

______

– الطرب الاندلسي خدام ، وريحة البخور والعود القماري فدار ، زينب لابسة قفطان خياطتو خفيفة فالبيج ، يديه مجموعين مع ساعة نقرية وفولارا فالبيج وذهبي ، حداها توفيق لابس جلابة فتيركواز مع شوميز بيضة من التحت وبلغة فالبيج ..

– أما علي فكان لابس سروال ديال التوب فالرماضي مع قميجة وصباط فالكحل ..

– سونا الباب ، مشات ليلى حلات ، دخل جلال ونورة ودراري ، ستقبلاتهم زينب وتوفيق بالقجم وضحك ..

– هبط بهاد من الفوق يدو مهزوزة ، لابس سروال دجين مع شوميز زرقة .. يلاه مدوش وريحتو عاطية ..

– جلال : اتبارك الله على العود ديالنا ، كيبقيتي شوية ؟

– بهاء : الحمد لله ، جيتي بكري عندنا الشاف ..

– جلال : اسمح ليا وصافي ، راك عارف مع الخدمة .. سونيت ليك وبان ليا صوتك بحال الجن ..

– نورة (بإستغراب) : اويلي مالك ؟

– زينب : علاش مافخباركش ؟ صافي صافي عارفة خويا مغايكون ݣاليك والو..

– جلال : والله حتى نسيت وخرجات ليا من بالي ..

– بهاء (كيضحك) : درت كسيدة ، ولكن ماشي شيحاجة خايبة الحمد لله .

– نورة (كتخنزر فجلال) : والله اخويا الى انت زعمة ، لا حول وحق الله .. اويلي من نيتك بحال هادشي كينساوه الناس؟

– زينب : ماوقع والو دابا مكاين باس ..

– هبط جواد من الفوق بسروال فالبيج وشوميز فزرق ..

– جواد : اوووه خالي هنا ، هاي هاي على سي ادم كبرتي وغبرتي .

– آدم (كيضحك) : غير مع القراية وصافي ..

– سكينة : بان ليك غير آدم

– جواد : الزين ديالنا ، انت راه صافي وليتي عروسة خاصنا نزوجوك ݣاع ..

– سكينة (بصدمة) : شكون انا ؟ الله ينجيني ..

– نورة (كضحك) : جنها وجنونها هاد الموضوع ..

– زينب : وعندها الحق ..

– جلال : سي علي لاباس عليك امورك مزيانة ؟

– علي : الحمد لله اسي جلال ، بيخير .

– توفيق : نورة هذا هو سي علي لي عاودت ليك عليه ..

– علي : مشرفين الالة ..

– نورة : الله يكبر بيك ..

– جلال : مزال العريسات ديالنا ماوصلوش ؟

– جواد : مشى جنيد يجيبهم شوية ويكون هنا ..

– جلال : معاش دارو معاكم غادي يجيو ؟

– توفيق : إيوا واحد الساعة غادي يكونو هنا ..

– جلال : ايوا راه مابقى والو ، اللهم يسر .

– توفيق : أمــيـــــن ..

_____

– وصلو البنات للدار ..

– نورة (وقفات كتسلم عليهم ) : تبارك الله تبارك الله على بناتي وشحال فنات ..

– وقفات عند شامة ..

– جلال : شامة بنت سي علي ..

– نورة : مرحبا بيك ابنتي .

– شامة (كتشوف فيها بإهتمام كبير ، عنقاتها حسات بواحد الراحة كبيرة ، ماقدراتش تبعد عليها ، لدرجة نورة ستغربات ) : لهلا يخطيك ..

– زينب : سامية طلعي ابنتي لبسي قفطانك ، مابقى والو ويجيو الناس ..

– سامية واخا ، طلعو لبنات الفوق مع سامية ، ݣلسات نورة كتخمم جاتها عجب تعنيقة لي دارت ليها شامة مافهمات فيها والو ..

______

– وصلو الناس ، دخلاتهم ليلى … تلقات ليهم نورة وزينب بصلاة وسلام .. سيف الدين كيبان شهوة منو فكوستار بلبلو مارين ، ماماه الحاجة فاطمة نخوة بجلابة فالبوردو منبتة .. معاه خوه الكبير وختو وباه او واحد خالو ، ماخلاو مجابو محملين ومجملين من اللحظة الاولى كيبانو ليك شحال هوما فرحانين وعاجبهم الحال ..

– رحبو بيهم أحسن ترحيب من بعدما ݣلسو وتعرفو على بعضياتهم .. سيف الدين حاضي غير الباب إيمتا تبان ليه سامية ..

– الحاجة(فاطمة كضحك) : فين هي العروسة ديالنا نشوفوها ؟

– نورة (وقفات) : انمشي نجيبها ونجي ، سمحوليا .

– طلعات نورة للفوق ، دقات فبيت سامية ودخلات ..

– نورة (كضحك) : اتباتو هنا ، العريس راه جا … مسكين تكول واش ݣالس على العافية ، كل شوية كيشوف جهة الباب .. يلاه هبطي راه طالبين يشوفوك..

– سامية (قلبها كيضرب ويديها بردو عليها ) : ناااري شداني الخلعة وحق الله ..

– شامة (كتشوف فيها بإستغراب) : تي نوضي قاتليك الخلعة ، انت عام وانت كتهضري معاه ، ولا ماعرفت شحال أݣالسة تقنبلي علينا .. ودابا كتݣولي جاتك الخلعة الله يعطينا وجهك ..

– نورة (كضحك بجهد) : كضحك علينا هادي ..

– سعيدة : انا بعدا نتزوج بداك لي كنبغي ، وااله متجيني الخلعة ..

– شامة : انت خلاص ، انت غير خليني ساكتة من بعد ونتفاهمو ..(كتغمزها) ..

– سعاد : انبقاو هنا هاد النهار ، دابا بهرب العريس ..

– وقفات سامية بقفيطين فالخضر ، دايرة تاج صغير خفيف ، مع مكياج ثقيل شعرها مبوكلي من التحت ، كتبان كتحمق ماشاء الله ، اما سعاد كتفات بكسوة بالحمر والبيج .. اما إيمان لبسات قفيطين خفيف فزرق ..

– هبطو سامية من بيتها بصلاة على النبي وزغاريت … موراهم إيمان حتى هي .. مع جاو يهبطوها من دروج حتى تجرات إيمان يديها ، ضارت كيبان ليها زياد واقف قدامها ..

– إيمان : أويلي ، أش كدير ؟

– زياد : كيفاش اويلي شنو كندير .. بغيت نسوف خطيبتي كيف طلعات ، ونݣوليها بصحة وراحة ، وشحال جات زوينة ..

– إيمان (رتابكات ماعرفات متݣول ، تزنݣات وحشمات ) : زياد خليني نهبط ، ايحسابليهم علم الله شنو كنديرو ..

– زياد (كيضحك) : دابا مغاندير والو ، ولكن مزال غادي ندير ، خشا يدو فجيبو وجبد بواطة فزرق ، حلها وجبد منها سلسلة ديال الذهب على شكل فراشة ، هز عينو فيها كيبانو ليه عينيها كيبريو ..

– زياد : نقد نلبسها ليك ؟

– إيمان حدرات راسها ، ضارت وعلات شعرها على عنقها ، حسات بلمسة يديها باردة على عنقها ،، خلاها تبورس وقلبها يضرب ف90 .

– زياد (قرب لودنها) : جاتك زوينة بصحة وراحة ..

– إيمان (بعدات عليه دغية وجها حمر وسخون) : شكرا بزاف ، انا مشيت .. هبطات كتجري حاسة بنظرات ديالو متبعينها من اللور ..

______

– الحب الحقيقي.. هو أن تزرع في طريق من تحبهم وردة حمراء.. وتزرع في خيالهم حكاية جميلة.. وتزرع في قلوبهم نبضات صادقة.. ثم لا تنتظر المقابل.. !

– الحب الحقيقي.. هو أن ترمي لهم بطوق النجاة في لحظة الغرق.. وتبني لهم جسر الأمان في لحظات الخوف.. وتمنحهم ثوبك في لحظات العري كي تسترهم.. تم لا تنتظر المقابل.. !

– الحب الحقيقي.. هو أن تبيع دموعك كي تشتري لهم الفرح.. وتتراقص بينهم ألماً كي تمنحهم السعادة.. وتبكي بعيداً عنهم كي لا تفسد فرحهم.. ثم لا تنتظر المقابل.. !

الحب الحقيقي.. هو أن تتحول إلى عكاز كي ترحم عجزهم.. وتتحول إلى مرآة كي تقوم عيوبهم.. وتتحول إلى مطر كي تبلل جفافهم.. ثم لا تنتظر المقابل.. !

– الحب الحقيقي.. هو أن تخترع لهم الهواء عند اختناقهم.. وتنزف لهم دموعك عند عطشهم.. وتقتطع لهم من جسدك عند جوعهم.. ثم لا تنتظر المقابل.. !

_____

– فجهة أخرى وبضبط فطنجة ، ݣالسة شمس فصالون دايرة رجل على رجل وكتخمم ، ساهية وملامح وجها جامدة ساهية فنقطة معينة ، تنهدات تنهيدة طويلة .. هزات عينيها بان ليها محمود راجلها كيشوف فيها ..

– شمس : محمود إيمتا دخلتي ݣاعما شفتك ، إيمتا دخلتي؟؟

– محمود ( ݣلس) : دخلت ݣبيلة وانت كاعما كاينة فهاد العالم ، مالك فاش كتفكري ؟

– شمس : والو ، ماشي شيحاجة مهمة ..

– محمود : راه تقدي تخبي على الناس كاملين حتى ليا انا لا ، نفس الموضوع ياك ؟

– شمس (تقادات فالݣلسة) : وعلاش كاين شيحاجة من غيرو ..

– محمود : ياك ݣلنا غادي نسدو على هاد الموضوع ؟

– شمس : كون كنتي فبلاصتي غادي تسد عليه ؟ ولا حيت أنت عند عائلة طول بعرض .. وأنا لا ..

– محمود : حتى انت عندك عائلة ، غير بغيتي تبرزطي راسك وصافي .

– شمس (تنيرڤات) : على أشمن عائلة كتهضر ، عائلة لي قراتك وكبراتك وعطاتك الفلوس والمكانة الإجتماعية، ولكن ماعطاتكش الحنان ديال الوالدين ، الله يهديك امحمود اغير كتخربق ..

– محمود : هضرنا فهادشي شحال من مرا واقيلة ، وسديناه ..

– شمس (بعناد) : عمرو مغادي يتسد ، واخا طير ولا تنزل مغاديش نسدو ، والديا انقلب عليهم غير نعرف وتبرد العافية لي شاعلة فيا ..

– محمود (ببرود) : تقلبي عليهم فهاد الوقت ؟

– شمس : متلي جيتك شرفت ولا؟ شفتي واخا تكون عندي 50 عام ولا 60 ولا 70 أنقلب عليهم ، يكونو ميتين نعرف ، يكونو عايشين نعرف ..

– محمود : كون بغاوك كاعما يعطيوك ..

– شمس (وقفات كتخنزر فيه) : ياك اسيدي وليتي تحشي الهضرة ، ياكما يحسابليك داركم غير حيت ناس الهاي كلاص سافي ، راه ضواسيهم كلهم عارفاها ، خليني ساكتة امحمود حسن ماتجبدنيش ، راك عارف بلاما نهضر ..

– محمود (عصباتو) : ماعندك ماتݣولي على عائلتي الحمد لله ..

– شمس : عطا الله مايتݣال ، الى عند بالك ناعسة على ودنيا راك غالط ، وهنينا .

– محمود : انت لي غادي تهنينا وغادي تسدي على هاد الموضوع ، بغيتي دارك وبغيتي ولادك ، نساي بلي عندك والدين خاص تقلبي عليهم ماعرفناهم كيدايرين ..

– شمس (بإصرار) : واخا نعرف أمحمود نطلق منك ، ومنساش والديا وغادي نقلب عليهم ، والمخير فحميرك ركب عليه ..

– محمود : بغيتي تخسري دارك وحياتك كلها لي بنيتيها ، او ولادك كاملين على ود والدين لاحوك ؟

– شمس (بتحدي) : أه ، ولادي راه كبرو وكل واحد فيهم دار مستقبل ديالو ، وانا حياتي كانت هانية حتى نهار عرفت بلي غير مربية ، سينين لي عشت فيها كدبة كبيرة ، وكنت فرحانة نص نص فرحة مكاملاش ، حتى كنتفاجئ بلي انا غير مربية ، عاد عرفت السر ديال تعامل البارد من عند دارنا ، عييت نقلب وانت شاهد على هادشي اشمن حياة كتهصر عليها ، كون كنتي بصح كتبغيني اتوقف جنبي ، وغادي نݣوليك جوج كلمات امحمود ، ديري لي بغيتي مابقاش كيهمني ، لي كيهمني دابا هو نعرف شكون هوما والديا ..

– جاهم صوت نزار من اللور :

– كيفاش والديك ؟

______

– محمود (ضار شاف فولدو بإرتباك) : ولدي .. الدهشة بانت على شمس فاش شافت نزار ، واقف معاه سعد ..

– سعد (كيشوف فيها بإستغراب) : كيفاش والديك ، اش هاد تخربيق ..

– نزار : الواليدة ، شنو واقع ؟

– محمود (كيحاول يغطي) : والو اولدي غير كنا كنهضرو وصافي ..

– نزار : ماكنتوش كتهضرو ، كنتو كتغوتو .. واش عرفتو صوتكم فين كان واصل ؟..

– سعد (كيشوف فشمس) : الواليدة شنو واقع ؟

– محمود : راه ݣلت ليك ماواقع والو ..

– سعد (خنزر فيه) : ماكنهضرش معاك انت ، كنعضر مع الواليدة .. واخر مرة نسمعك كتهضر معاها وتعلي فصوتك ..

– محمود : واقيلة نسيتي بلي هاديك مراتي ؟

– سعد : الى كانت مراتك راها مي ، ومنسمحش لشي مخلوق يرفع عليها صوتو كيفما بغا يكون نوعو ، واخا يكون راجلها ..

– نزار (شاف فسعد) : سعد تكالمة اخويا ..

– سعد (شاف فيه) : ماسمعتيس باك كيفاش كيهضر مع الواليدة ..

– نزار (شاف فباه ، الى مدخلش عارف بلي اتنوض خصوصا فاش كيتلقى باه مع سعد ربيبو) : الواليد هنينا ، راه سمعنا كولشي بلاما تحاول ضرق الشمس بالغربال ..

– شمس : مكاين اولدي مايضرق ، واخا باك يخبي انا كنت ناوية نݣول كولشي ، مغانبقاش غير ساكتة ..

– محمود (كيخنزر فيها) : شمس بلاما نبقاور نجبدو العقود راشية ..

– شمس(مداتهاش فيه وݣلسات) : نهار حليت عينيا ، حليتها فعائلة لاباس عليها فمكناس … بابا كانو عندو البزارات .. ومعروف فمكناس لي بغيتها كانت كتحضر كيفما بغا يكون نوعها كتحي حتى لعندي ، ولكن واخا هكاك ماكنتش كنحس بداك الحنان والحب ديال الوالدين … وزاد هادشي كبر فاش ماما تزاد عندها جوج ديال دراري ، هنا كملات مابقاوش كاع حاسبيني واش كاينة ولالا … لي كانت مكلفة بيا هيا خالتي حورية .. هي اصلا لي كانت مربياني (تنهدات تنهيدة طويلة ) .. حسات بيدين سعد على كتافها ..

– سعد : غير بشوية عليك ..

– نزار(كيشوف فباه لي ماعجبو حال غير كينفخ) : كملي الواليدة حنا معاك ..

– شمس : فاش درت 17 سنة تعرفت على واحد السيد (شافت فسعد ) باباك الله يرحمو ، كان خدام مع بابا فالبزار … تعرفت عليه وبغيتو ، ولكن دارنا مابغاوهش ليا حيت خافو على سمعة ديالهم ، ولكن انا تحديتهم .. غير درت 18 سنة هزيت الوراق ديالي ومشيت تزوجت بيه ..

– ماخلاو باش عايروني ، فالاخير ݣالو ليا كلمة عمري نساها .. بلي ماشي غريب عليهم هادشي .. أصلا طلعت لاصلي لي ماشي منهم وحاشة واش نكون منهم وجراو عليا ، خالتي حورية فهماتني بلي هوما ماشي والديا الحقيقيين وبلي شحال هذا شي مرة … أسمها أمينة جابتني ليهم .. وهوما رباوني ، تما عرفت السر ديال المعاملة ديالهم معايا ، باك الله يرحمو عاودت ليه كولشي ، ودار جهدو باش يعاوني نلقاهوم … ولكن والو مكانش بيدو خصوصا بابا جرا عليه .. مرة يخدم مرة لا ، حتى توفى مسكين داك الساع كانت عندك عامين انت .

– فاش فات 40 يوم ديال الموت ، جا با رضني لدار بشرط .. من داك اليوم نسمع ليه لهضرتو ولي بغاها تكون … وانا قبلت حيت مكان عندي فلوس وكنا غير كاريين ، وعندي ولد صغير مكان عندي حتى شي حل أخور … رجعت معاه لدار دازت شي 7 شهور ورا الموت ديال باباك الله يرحمو ، عطاني بابا ل محمود (شافت فيه) شافو هو الشخص المناسب ليا ،وأيقبل بأرملة وبولدها … وفعلا تزوجت بيه ، وفعلا كان معليا راجل .. تكلف بيك وبقرايتك وتكفل بيا وبغاني ، واخا هو مكانش حامل هاد الموضوع ديال والديا نجبدو ، على قبل عائلتو .

– نزار (بقا غير مصدوم ، بقات فيه مو بزاف مكانش على بالو اتكون عنات بحال هكا) : مابقيتيش حاولتي تقلبي ؟

– شمس (تنهدات تنهيدة طويلة) : عييت نقلب او والو ، حتى الناس لي رباوني لي هوما ماما او بابا … غير تزوجت بحال شي حمل تحيد عليهم ، كالو بلي ديك أمينة كانت ساكنة فمكناس ، وبلي كانت خدامة عند شي مرة او راجل لاباس عليهم ، ولكن دوك الناس مابقاوش فمكناس هاجرو ، لفين الله أعلم ..

– سعد (باس ليها راسها) : كولشي ايكون مزيان الواليدة غير تهناي ..

– نزار : هادشي خليه عليا أنا وسعد ، انقلبو دنيا سفاها على علاها ، مايكون الخير الواليدة غادي نلقاوهم ، غير متعصبيش راسك ومتبكيش ، معاش ولاكان لي ينزل دمعة وحدة من عينيك ، براكة داكشي لي داز عليك .

– شمس (دموعها هابطين) : الله يرضي عليكم ، انا مابغيت والو …بغيت غير نعرف واش عايشين ولا ميتين ، وعلاش عطاوني شنو سبب ؟ صافي مابغيت منهم حتى حاجة أخرى ..

– محمود (مغوبش ) خلاهم وخرج ..

– نزار : مديش عليه ،عارفة لواليد كيف داير ، غير يبرد ويرجع ..

– شمس : عارفة اولدي ، راه من حقي ..

– سعد : واه من حقك تعرفي شكون والديك ، ومامنحق حتى واحد يمنعك ..

– شمس (عاد سرات معاها عنقاتو) : توحشتك اولدي ، علاش مݣلتيش بلي راك جاي ، لبارح ماسونيتيش … مالف كتسوني عليا ديما ..

– سعد (كيضحك) : مكنتش مسالي .. كانو عندي شي شغال .. وخاصني نزل لكازا .

– نزار (بإستغراب) : علاش ؟

– سعد : جاتني واحد الخدمة من عند واحد الشركة ، شركة الهاشمي ..

_____

– نزار : وايلي بصح ، اه راه عندهم إفتتاح ديال لاتوليي ديالهم ، وغادي يطلقو اخر تصميم ليهم ..

– سعقد : وي هادشي ، انتكلف بتصوير ديال التصاميم ، هضرات معايا بنتهم سعيدة ..

– نزار : أه عرفتها ، راه معرفة ديالنا من زمان ..

– سعد (بإستغراب) : وايلي ، مكانش فخباري ..

– شمس : اولدي انت مكنشوفوك غير فين لفين ، كيعرفو خوك ولدهم صاحبو ..

– سعد (بإهتمام كيفكر ) : أممم مزيان ..

– نزار : نوض يلاه ..

– شمس (كتشوف فيهم) : فين غاديين ؟

– نزار : شمس ، ياك بغيتي تلقاي والديك ؟ ورته خاصنا نباليو ..عندي واحد صاحبي كنعرفو ، أنشوفو يعاوني ..

– شمس : الله يرضي عليكم ، ومنين توصلو سونيو ليا ..

‌ظحنبءخظ

– سعد (باس ليها يديها) : كوني هانية العمر ، يلاه هاحنا مشينا ..

– شمس (تبعاتهم حتى لباب كدعي معاهم ، حتى ركبو فطوموبيل ومشاو) ..

______

– فاطمة (كتشوف فسامية) : تبارك الله تبارك الله على عروستنا ..

– الحاج محمد : تبارك الله الله يكمل بالخير اسي توفيق ..

– توفيق : أمين ياربي .

– الحاج : سيف الدين عاود لينا عليكم ، ونعمة الناس وتبارك الله سمعة ديالكم سابقاكم ..

– توفيق : و الله يجيبنا فصواب ، وحتى حنا كنعرفو سيف الدين راه ولد الدار .

– جلال : سيف الدين مكاينش بحالو ، تربية ديال يدي كنعرفو مزيان اش كيسوا ..

– الحاج : داكشي باش ݣلنا مكاين لاش يلاه نتعرفو ، اللهم نديروها خطوبة ..

– توفيق : ماقلتو عيب ، وليداروها دراري مرحبا بيها

– الحاج : وهي نقراو الفاتحة؟

– توفيق : يا بسم الله … قراو الفاتحة وتطلقات الزغراتات … دارو تركاب الخاتم .. شربو لعضياتهم الحليب وتمر .. وهكا ولات سامية وسيف الدين مخطوبين رسميا ..

– تحط العشا ، كولشي فرحان واحد الجو زوين بزاف ..

– الحاج : سي توفيق .. أش بان ليك نديرو العرس من هنا لشهر ؟

– توفيق : مرحبا ، نشوفو العرسان ..

– سيف الدين (بلاما يعيق) : شهر بزاف ، علاش منديروه من هنا لسيمانة ماحدني شاد كونجي ..

– سامية (ولات حمرة وجاتها الضحكة) ..

– جواد ݣالس مقابل مع سهيلة لي مجات حتى لحظة الاخيرة ، لابسة سروال بيض واسع مع شوميز فالبيض ، وجامعة شعرها سفنجة ..

– سعاد كتفرنس ، نغزات سعيدة :

– السيد زربان ..

– سعيدة ( كضحك) : وايياه زربان على رزقو مسكين ..

– زينب : لا اولدي سيمانة بزاف ، وزيد عليها السيمانة جايا إن شاء الله كاينة واحد الحفلة فشركة ديال إفتتاح لاتوليي جديد، وغادي يكون فنفس النهار عرس ولدي زياد ، بالمناسبة راكم معروضين ..

– سيف الدين : الله يكمل بالخير ، الى كان هكاك مكاين باس ..

– الحاج : سيادنا ، خلينا ليكم الراحة والله يكمل كولشي مبارك ومسعود ، والله يجيبنا فصواب ياربي ويجعلها فاتحة خير علينا ..

– الكل : أمين ياربي ..

– خرجو وخرج معاهم توفيق وجلال ودراري ، بقاو البنات مع سامية كايبقشو فداكشي لي جاب ليها ، صباط عالي وساك وروايح ، كريمات وتفاصل ديال قفطان وتكشيطة ، وجلابة … ساعة بذهبي خاتم ديال الزواج لي كان مفاجأة ليها ، كان عاجبها نهار خرجو مع بعضياتهم .

– شامة : تبارك الله ياختي ، الله يكمل عليكم بالخير ياربي ..

– سامية (طايرة بالفرحة) : أمين ياربي العقبة ليك إن شاء الله ..

– شامة ( كضحك) : ماشي دابا ياختي ماشي دابا ..

– سعيدة : أتبقاي بلاش ؟

– شامة : اختي تزوجو غير انتوما اما انا مزال عليا الحال ..

– سعاد : تاعنداك ، ماعندك مديري بشي زواج .. شوفي مستقبلك وديري دارك وطوموبيلتك ، اما راجل ماعندو مايعطيك ، غير المرض والقهرة والغمة ..

– سعيدة ( كتنغزها) : اويلي أصاحبتي من نيتك ، انت عندك عقلية معقدة باغية تعقدي ݣاع الناس ..

– شامة : والله العظيم الى هي لي فاهمة الحياة بصح .. أش درنا وطفرناه من ورا الرجال وهاد القلب غير الغمة ..

– سامية ( ناضت) : أنا غادي نطلع لبيتي نبدل عليا ، بغيتو تقلبو ليا مودي راني عروسة زعمة ..

– إيمان : أنمشي معاك اختي ، هادو راه بغاو يخرجو علينا ..

– طلعات إيمان مع سامية ..

– سعيدة : وهادشي لي خليتي ؟

– سامية : جيبوه معاكم منين تساليو مداولة ..

_____

– فبلاصة اخرى ، ݣالسة فالبالكو ومقابلة الڤيلا بإهتمام ، كتشوف فناس لي جاو قبيلات خارجين .. منين شافتها نزلات من طوموبيل ، وقفات كتشوف فيها كتحاول تحقق مزيان ، واش هي نيت ولالا .. دخلات لبيت دغية وهزات التصويرة كتحقق فيها .. دارت يديها على فمها ودموعها هابطين ، بناتها قراب ليها ومقاداش تقرب ليهم ، ولكن مابقى قدما فات … كولشي ايتفضح والله لا سكتات ، غادي دير لي ݣالها ليها راسها وغادي تفضح كولشي وتعاود لبناتها كاع لي وقع ، ياربحة يا دبحة ..

______

– فالجردة ديال الڤيلا ، ݣالسة هي وياه ..

– سهيلة : حشومة خليناهم وخرجنا ..

– جواد : علاش حشومة ، الخطبة سلات .. مافيها باس نخرجو يضربنا البرد واحد الشوية ..

– سهيلة : واخا هكاك مجاتش ، وحشومة علم الله شنو غادي يݣولو ، وزيد عليها خاصني نمشي ،حتى شامة ماݣلستش معاها بزاف .

– جواد : أحسن حاجة دارتها شامة هي تعرفات عليك ..

– سهيلة (ضحكات) : حتى انا عزيزة عليا ، من أول لحظة دخلات ليا لخاطري ولقلبي ..

– جواد (كيضحك) : وانا مادخلتش ليك لقلبك ؟(غمزها) .

– سهيلة (وقفات كتضحك) : أنت باسل ، وانا خاصني نمشي ..

– جواد (وقف) : نوصلك ؟

– سهيلة : لا بلاش ، معايا طوموبيلتي واش غادي نبقى غير نفكرك ..

– جواد ( كيتمسكن) : أقل حاجة ناخود غير تعنيقة ماقبل النعاس ..

– سهيلة ( كضحك) : جواد صافي براكة من البسالة ، أندخل نسلم عليهم ونمشي ، تنهد جواد بإستسلام ، دخل معاها حتى سلمات عليهم ، ورجع خرج معاها حتى ركبات فطوموبيلتها ومشات ..

_____

– بدلات شامة حوايجها ، عنقات ماشة من بعدما عطاتها تاكل ، هزات تيليفون ديالها وطلعات لفوق لسطح ديال الڤيلا ، تتهدات تنهيدة طويلة وطلعات فوق الصور ، السما صافية والقمرة باينة ونجوم ، بقات غادية حتى لافان ديال الصور وݣلسات ، هزات تيليفون ديالها ودوزات نمرة أحلام ..

– شامة : حلومتي ..

– أحلام : الحب ، ساليتو الخطبة ؟

– شامة : أه سالات ، عندي ليك ذلا اخبار ..

– احلام : خوي المزيودة شنو كاين ؟

– شامة : با باغي يبيع الدار ديالنا ..

– أحلام : وايييه وصلاتني لخبار ، ݣالها لينا با ݣبيلة بلي ديك البلاصة كلها جات وسط الموقع لي باغيين يطلعو فيه عمارات ، وباغيين يديرو فيه شي مول .. حتى دار عماد جات فالبلان .

– شامة : وايلي حتى هوما غادي يبيعو ؟

– احلام : ماعندهم حتى شي حل اخور من غير البيع .. وعمي علي بعدا كيف بقى كي ولا ، دازو الحال بعدا ؟

______

– شامة : لا دابا بيخير وعلى خير ، عمي توفيق ضبر ليه فخدمة ، علي تبدل مابقاش كيف كان متعرفيهش ݣاع ..

– أحلام (كضحك) : وحاجة مزيانة هادي ، هي صافي غادي تبيعو؟

– شامة : وابا راه خاص يبالي ، باش مايجي فين يسالي عرس ديال إيمان ، يكون لقا شاري ولا يبيع ليهم نيت هوما .

– احلام : وراه هوما لي باغيين يشريو ، ماشي يلاه أيلقى شاري ، زوهرة راه صافي سنات معاهم على البيع ..

– شامة : هاديك زويهرة حتى هيا ، بلانها بوحدو … ماشي ݣاليك با كيهضر معاها ، حݣا ݣاليك عيطات ليه سولات فيه حيت غبر زيدك .

– أحلام (كضحك) : وخليه اختي مالك .

– شامة : الله يهني سعيد بسعيدة ههه ، المهم ݣولي ليا ، اش درتي ليا فداكشي ..؟

– أحلام : ويااه فكرتيني ، راه كنت غادي نسوني ليك .. غير ݣلت حتى تسالي الخطبة ونهضرو ..

– شامة : ويلاه بالي دوي ..

– أحلام : المهم الالة جبت ليك ݣاع الاخبار ، من الاول لأخر … المهم هذاك المحال ديال الحاج أسماعيل شمسي ، عندو 3ديال المحالات ، هداك ديال تواب ولاصق عليه ديال الخياطة ولاصق عليه ديال الحرير ، بحال الى كلتي محال كبير مقسوم على 3 وعندو واحد ففاس ، وعاد عندو محال اخور ديال البلاغي والمضمات ديال الصم ، ولادو كاملين كاينين على برا ، وهو عايش هنا مع مرتو او واحد بنتو مزال كتقرا ، خدامين عندو 3 ديال البنات ، وحدة خدامة فالمحل ديال الحرير ، وجوجات خدامات معاه فمحل ديال الثواب ،وجوج دراري خدامين فمحل الخياطة ،لاخور خياط او واحد كيعاونو ..

– شامة : تبارك الله زيدي كملي ..

– أحلام : هو مكايبغيش يخدم شي وحدة مكديرش الفولار ، ݣاع البنات لي عندو دايرات الفولارة … ولكن راه مقولبينو اللفعات ..

– شامة : كيفاش مقولبينو ؟؟!!

– أحلام : ݣايلين ليه بلي دايرات الفولارة ، هوما غير كيخرجو كيزولو الفولار ، هو صراحة تقال راجل حقاني ودياني والله يعمر ليه دار ، وسمعة ديالو سابقاه .. وݣاع الناس كتقدى عندو تبارك الله ، وݣاع الخياطات هو من عندمن كيتقداو الحرير ..

– شامة (بإصرار) : غادي نديرها فيد الله وغادي نمشي نطلبو يخدمني ، وندي معايا ديبلوم ديالي ..

– أحلام : ولكن هو راه كيقبل غير صحابات الفولارة ..

– شامة : ويكون ، مغاديش نكدب عليه انا ماشي كدابة ، راه هادوك لي عندو غير قدامو كيداعيو البراءة وهوما لفعات واخا مكنعرفهمش ..

– أحلام : وسيري جربي حظك وشوفي ، غير هو راه الايام مكاينش مخلي غير دراري فالمحال ، مشا لفرنسا ومزال مارجعش ..

– شامة : رشيد لي جاب ليك هاد الخبار ياك ؟

– أحلام (كضحك) : وياااه راكي عارفة ، اي حاجة بغيتيها وصي عليها رشيد يجيب ليك الخبار حتى لعندك ..

– شامة : صافي مزيانة ، غادي يكون عرس إيمان سالة ، وبلان الدار حتى هو طرق ، غير هو خاصني من غدا نهبط نسول على ديور ونوصي داك السمسار لي كاين فحومتنا ..

– أحلام : اه وسوني حتى لعماد وصيه ، حتى هوما غادي يبيعو ايكون عارف ..

– شامة : صافي إن شاء الله لهلا يحاشمنا ياربي ، وهانتي غير تسيقي لخبار لسيد سوني ليا ..

– أحلام : صافي واخا يلاه حتى لمن بعد ..

– شامة : يلاه بسلامة .. قطعات شامة تيليفون ، مع ضارت هبطات هزات راسها كيبان ليها قدام وجها ، الضو ديال القمرة وديال الجردة مضوي على وجهو ..

– جنيد (بإستهزاء) : زربانة تخوي ، غير بشوية عليك حتى واحد مكايجري عليك ، بدا كيدخلني الشك ياكما ..

– شامة : ياكما أش ؟

____

– جنيد : بحال الى جاب ليا الله ، هربانة من شيحاجة … ولا زربانة ترجعي لحبابك لقدام ؟؟

– شامة(وقفات مقابلة معاه) : حتى نكون نسيتهم بعدا ، حبابي القدام كيف كتݣول عمري مانسيتهم ، وعمر شي واحد يجي فبلاصتهم ولا يعمرها ، غير باش ديرها فبالك ..

– جنيد (كيحاول يستفزها) : عرفتي شنو هي أحسن حاجة فهادشي كامل ؟ انرتاح ونتهنى من المشاكيل ديالك وصداعك ، تهنينا دابا من المشاكل ونقدرو نكملو حياتنا بيخير ، مغانبقاش مقيد بيك وحاضيك ذكون تابعك وشكون لا ، هادي هي أحسن حاجة بحال الى عمرك ماكنتي ..

– شامة (مجاوباتش ، كتشوف فيه وصلات ليها لحلق .. حسات براسها كانت عالة عليهم ، تبسمات ليه) :

– فعلا عندك الصح ، يلاه تهنى وتشوف حياتك اتبقى غير تابعني ومقابلني ، وجنبك لاصق على جنبي مجاتش ، حتى لي شافك يفهمك غلط يحاسبليه ماعرفت شنو لي بيناتنا ..

– جنيد ( ضحك ضحكة إستهزاء) : لا غير تهناي ، مايمكنش يݣولوها ، شكون انا وشكون انت خايبة حتى لمعاودة ، مايقدوش يفكرو فيها حتى بينهم وبين راسهم ..

– شامة (ضحكات وزادت قربات ليه حتى تقابلات عينيها مع عينيه) :

– هاد الهضرة خاصك تݣولها لراسك ، عاد تشوف الناس …لي يسمعك غير الأيام لي فاتو كتعتارف لبنت سي علي بلي كتبغيها ، مايݣولش أنت لي كتهضر دابا سبحان مبدل الأحوال ..

– جات تخطاه جرها من يدها حتى تخبطات مع صدرو .. كيشوف ليها فعينيها .. النار شاعلة فيه من الداخل … العافية لي فيه تقدر تحرق مدينة على قدها … كيشوف الكبرياء على وجهو وعينيها لي مافيهم نقطة خوف ولا تردد .. أنفاسها كانو كيضربو فوجهو ، شافيفها كانو قراب من شفايفو ، فلحظة كان أيضعف ويبوسها ، ولكن من بعد شنو … وحدة مكاتحسش من جيهتو بحتى حاجة ، كيفضل يزطم على قبلو ولا يخطوي هاد الخطوة هادي ، رخف على دراعها ودفعها .

– جنيد : أصلا ماتستاهليش .. خلاها ومشا ..

– بقات واقفة فبلاصتها ، قلبها كيضرب بجهد ، ماتنكرش بلي كلامو ضرها فقلبها ومراضتش .. ولكن واعدات راسها عمر شي واحد يشوف ضعفها ، حيت فهاد الزمان لي عرف نقطة ضعفك ، كيستغلها ضدك ويستغلك ، كتخليك ضعيف قدامو .. وهادشي لي مابغاتوش هي ، يكفي لي داز عليها وكرامتها لي تهانت بسباب الحب ، الى كان الحب يجيب ليها غير دل ، اللهم تسد على قلبها وتهنى ..

______

– سيمانة كلها دازت غير فتوجاد لعرس زياد وإيمان ، زينب مسكينة واقفة على كولشي بيديها ماحبساتش ، ريزيرڤاو فالأوطيل لي غادي يكون فيه الإفتتاح ديال ، أخر تصميم من شركة الهاشمي ، وعرس لولد توفيق الهاشمي … الصحافة كيوجدو راسهم باش يتنقلو الاخبار ، عياو مايتقصاو شكون هادي لي غادي ياخود الولد الصغير ، لعائلة الهاشمي ولكن فالأخير كيلقاو غير الريح ..

– فالشركة ..

– فالبيرو ديال عماد ، واقف حال العقدة ديال القميجة الفوقانية ، جامع كمايمو وكيشوف فشي وراق كيقاد فيهم ، تحل الباب عليه .. ضار لقاها سعيدة ..

– عماد (بإستغراب) : سعيدة ، بلاه كنت انجيب(قاطعاتو بتعنيقتها ليه ) ..

– عماد (متفاجئ) : سعيدة دابا يشوفنا شي واحد ..

– سعيدة (مغمضة عينيها كتستنشق ريحتو) : توحشتك بزااف بزاااف .. بعدات عليه واحد الشوية كتشوف فيه ، هز يديه كيحيد ليها الشعر على وجها وعينيها ..

– عماد (عينيه كلهم حب وهيام وعشق) : حتى انا توحشتك أحبيبتي ..

– سعيدة : حتى انا توحشتك بزاف ، كتر ماتصور … مابقيناش كنتلاقاو ݣاع من اخر مرة شفتك فيها ..

– عماد : غير صبري ، كولشي بوقتو زوين ..

– سعيدة (ضحكات) : قريب وقتو أحبيبي ، عندي ليك مفاجاة زوينة بزااف ..

– عماد (ضحك) : أهاه وشنو هي ؟

_____

– سعيدة (غمزاتو) : مغاديش نݣوليك دابا(قربات لودنيه) : أ يوصلك ميساج من عندي بليل ، دير داكشي لي غادي نݣوليك (طبعات بوسة خفيفة على فمو وخرجات) ..

– عماد (كيدوز يديه على شعرو ، تالف) : اهاه واخا ..

_____

– تدق باب البيرو ديال جواد لي كان كيهضر فتيليفون ..

– جواد (هز راسو بان ليه شاب فتلاتينات من عمرو بشوس هاز واحد الكارتابل ، أشر ليه براسو باش يتفضل بينما كمل التيليفون) :

– يعني دابا صافي وليت حر (ضحك) الحمد لله ، أستاذ شقارة كنشكرك جزيل الشكر على خدمتك ، وإن شاء الله الإمانة غادي توصلك كون هاني .

– جواد (قطع التيليفون او وقف ماد يديه) : سعد شاكر؟

– سعد ( بإبتسامة) : هو هذا ..

– جواد : تفضل ݣلس علاش واقف ..

– سعد (من بعدما ݣلس) .. موسيو جواد ياك ، هضرات ليا عليك مدموزيل سعيدة ..

– جواد : حتى أنت هضرات ليا عليك ، أسيدي سمعتك سابقاك ماعندي مانسالك ..

– سعد (كيضحك) : الحمد لله ..

– جواد : تشرب شيحاجة ؟

– سعد : لا مايحتاجش ، بغينا ندخلو فالموضوع نيشان ..

– جواد (كيضحك) : أيااه أسيدي مرحبا ..

– سعد (جبد واحد الألبوم من الكارطابل ديالو) :

– هادو لي موديل لي قلت نخدمو عليهم ، وهوما لي غادي ينزلو عليهم التصاميم ، انت اتختار لي موديل لي عجبوك ، باش هكا نبدا مع العارضات شنو بام ليك ؟

– جواد (كيشوف فتصاميم ) : هادشي زوين صراحة ، تدق الباب ..

– جواد : دخل (كيشوف فالباب) ، تحل وكلات سعاد بكامل أناقتها المعهودة ..

– سعاد (بإبتسامة) : ممكن ندخل ..

– جواد (كيضحك) : دخلي جابك الله ..

– مع دخلات سعاد ، مع وقف سعد وضار ، على وجهو إبتسامة مثيرة وجدابة ، غير شافتو سعاد تمحات الضحكة على وجهو او وقفات كتشوف فيه ..

– جواد : مزيان منين جيتي ، تشوفي لي موديل لي ايتحط عليهم تصاميم ديالنا .. وتلاقاي مع سعد شاكر احسن فوتوغرافي فالمغرب كلو ..

– سعد (كيضحك ) : ماشي حتى لهاد الدرجة (شاف فسعاد) مدموزيل سعاد ، فرصة سعيدة نشوفك مرة اخرى ..

– جواد( بإستغراب) : فايتين تلاقيتو؟

– سعد : اه تلاقينا فواحد المعرض فإسبانيا ياك ؟

– سعاد (بإستفزاز) : الصراحة مابقيتش عاقلة ، تلاقيت مع بزاف ديال الناس ، شحال قد الواحد يعقل ..

– سعد : فعلا ، شحال قدك تعقلي … المهم انا مانسيتكش (غمزها) ..

– سعاد (بلعات ريقها كتشوف فخوها ومبسمة ) : سمحوليا ، جيت اخويا انطل عليك ونمشي … مزال تابعني مايدار ..

– جواد : مغاديش تشوفي لي موديل ؟

– سعاد : انا تايقة فدوقك أحبيبي (باستو فوجهو ومشات ) ..

– سعد (كيضحك ، تبعها بالعين حتى خرجات ) : موسيو جواد شنو درنا ؟

– جواد : سعد أنا بغيت نشوف تاتش ديالك ، انت لي شفتيه مناسب للعارضات ولتصميم ، ديرو.. انا بغيتك تبهرني … بغيت ماشي غير المغرب لي يهضر على هاد الإحتفالية ، بغيت حتى فرنسا وإيطاليا ..

– سعد (ضحك) : وعاليه ، كون هاني … منين تقتي فيا مغاديش نخيبك ..

– جواد : بون كوغاج ..

– سعد : ميغسي . خدا سعد لي موديل ديالو وخرج ..

_____

– فدار جلال ، على طبلة مجموعين كيتغداو … هز جلال عينيه فنورة ، كتبان ليها ساهية وشادة حنكها مكترمش ..

– جلال : نورة ..

– نورة (الصمت)

– جلال (بصوت مرتفع) : نورة ..

– نورة (عاد فاقت من السهوة ديالها وشافت فيه) : نعام ..

– جلال : شنو واقع مالك ؟ ماعجبانيش 6 يام هادي وانت ماشي حتى لتم ، كندخل كنلقى عينيك منفوخين وغير ساهية شنو واقع ..؟

– نورة (حطات لي فيديها ) : مافيا لي يهضر اجلال ، عفاك خليني عليك ..

– جلال (وقفها كيفاش خليني عليك) ..

– سكينة هي وأدم : حنا غادي نمشيو ..

– جلال : بلاتي نوصلكم .

– سكينة : بلاش ابابا ، اتجي ورانا خالتو نجاة .. ناضت نورة من فوق الطبلة دخلات لبيتها سدات عليها ..

– جلال (لولادو) : متديوش على ماماكم ، أتكون امقلقة ..

– سكينة : بحال والو ابابا تكون تفكرات عائلتها تاني ؟؟

– جلال : غير سيرو انتوما انا غادي نشوف مالها ..

– خرجو الدراري ، ناض جلال جمع الطبلة وطرفها … وجد كاس ديال القهوة ، هزو فيديه مع جوج بيسكويات ، حل الباب على نورة ودخل … كانت متكية على نموسية وباينة فيها باكية ، حطهم حداها وبلاما يهضر كلس قريب منها وجرها لصدرو معنقها … كيدوز على شعرها بحال الى بنتو ماشي مرتو ، حس بيها كتبكي وتنخصص … ماسولهاش نهائيا مالها وسنو سبب لي خلاها كتبكي ، حتى سلات على خاطرها وحس بيها تهدنات ..

– بعدها عليها بشوية ومد ليها القهوة والبيسكوي ، تبسمات من وسط دموعها لي كانو نازلين ..

– عارف ليا الكود ديالي ياك ؟

– جلال : مابيناتناش عام ولا عامين ، راه 24 عام ديال زواج امدام ، و24 عام ديال العشرة وديال المحبة والإحترام ، راني حافظك ما ..

– نورة (تنهدات تنهيدة طويلة , جغمات من القهوة وحطاتها ، كتشوف فالفراغ) : نهر الخطبة ديال سامية ، سونا ليا تيليفون .. داكشي باش تعطلت ، سونات ليا واحد المرأة ، وطلبات تشوفني . ..

– جلال (بهدوء) : كنسمعك ..

– نورة : فعلا لغد ليه مشيت شفتها حدا الجامع ، مشيت قبل الوقت ، واحد الخلعة كانت شداني فشكل وحق الله ، ماحسيت بواحد المراة حتى وقفات عليا بالعكاز ديالها ، تكون عندها ديك 80 سنة بحال هكاك ، ولكن مابيناش عليها لديك الدرجة ..

– جلال (كيشوف فيها وكيسمع ) ..

– نورة (شافت فيه) : عرفتي شنو ݣالت ليا أجلال ، ݣالت ليا بلي هي مي(ضحكات) تخايل معايا ..

– جلال (تفاجئ) : وباش جاوبتيها أنت ؟

– نورة : فالاول ماتيقتهاش ، يحساب ليا شي وحدة كتفلى عليا .. ولكن ماعرفتش علاش حسيت بواحد الإحساس فشكل من جيهتها ، كان بيناتنا واحد تشابه ..

– جلال : ماݣلتش ليك كيفاش خلاتك وعلاش ؟

– نورة : سولتها ، مابغات تݣول والو … ݣالت ليا بلي هي مستعدة دير معايا تحاليل ، باش نتأكد واش فعلا هي مي ولالا ، وݣالت ليا بلي عندها عدر علاش سمحات فيا ،ولكن ماتقدش تعاود حتى تكون ختي حاضرة ، تخايل معايا اجلال أنا عندي ختي ، وݣالت لي بلي كانت عندي أخت وحدة اخرى وماتت ، وبلي بقات غير بنتها …

– جلال : شنو غادي ديري ؟

______

– نورة : مشيت معاها ، ودرنا تحاليل … ولكن مزال ماخرجوش دارو معانا بعد غدا ..

– جلال : بعد غدا ايكون العرس ديال زياد نسيتي؟

– نورة : مانسيتش ، ولكن اجلال من حقي أخويا نعرف ،، راه سنين وانا كنقلب .. تخايل معايا تكون مي بصح ، وتكون عندي ختي او ولاد ختي ، وتكون بنت ختي لي ماتت حتى هي كاينة ، شكون عرف تكون حدايا ولا تكون قريبة مني وماشفتهاش وماعرفتهاش(بدات كتبكي) هادشي لي محمقني ..

– جلال (عنقها) : كولشي غادي يكون مزيان وغادي يتقاد ..

– نورة : ياربي ياربي ماتحاذمنيش ياربي ، حيت عيييت وحق الله ، بغيت انعرف والديا شكون هوما ونتهنى وحق الله العظيم ..

– جلال : يكون خير ، أنا معاك وأي حاجة كانت .. غادي نواجهوها بجوج ، واش انا حمق نخلي زين ديالي بوحدو ..

– نورة (ضحكات) : باااز الناس فناس والقرع فمشيط الراس ..

– جلال (غمزها) : شحال هادي ماشتك بالكسوة الحمرة ..

– نورة (حشمها) : اويلي ، جلال دير عقلك ..

– جلال : جلال جلال يا عيون جلال ، كيفاش دير عقلك ياكما يحسابليك كبرت عليها ولا ..

– نورة (جات توقف) : انمشي نغسل الماعن ..

– جلال (رجعها او وقف كيسد فسراجم) : غسلنا الماعن ، وطرفنا الكوزينة … انوضي بالي قبل لا يسالي ..

– نورة : جلال حماقيتي لا ؟

– جلال : اه حماقيت ، حمقاتني مراتي مامات وليداتي وحب حياتي فيها شيحاجة هادي ، اجي نݣوليك أجي …

_____

– دخلات إيمان على شامة هازة فيديها واحد الملف ، فيه شي وراق .

– شامة : عطاهم ليك ؟

– إيمان : شنو ݣلت ليك ، أحركي الفلوس كولشي يحضر ، ولكن الصراحة زياد مسكين هو لي قام بكولشي ..

– شامة : غدا غادي تعقدو ياكي ؟

– إيمان (متوترة ) : ناري أسكتي شداني واحد الخلعة منݣولش ليك ..

– شامة : تبتي لأرض ، وأنت وليتي بحال السفود ..

– إيمان : مابقيتش كندوق النعمة اسكتي ، كنتفكر راسي مابقا والو لبعد غدا ، كنبغي نبول فحوايجي ..

– شامة (غمزاتها كطنز عليها) : دابا انت خايفة من الزواج ، ولا ليلة الدخلة ؟

– إيمان : حرام عليك قسما بالله ، أش بغيتي عندي أختي ..

– شامة (كضحك) : لطاسيلتك ناري على شوميزات خداو ليك الصداع ..

– إيمان : مخلاونيش ياختي نشوفهم ، حرام عليهم ..

– شامة :مفاجأة ، أش بغيتي ؟

– إيمان ، حتى لخاتم خدا زياد قياس صبعي صافي ..

– شامة : شكون بحالك الويلة ، موجد ليك مفاجأة ..

– إيمان (تبسمات) : ناري الكسوة ،كيجاتك ؟

– شامة : واعرة واعرة ، أحسن مدرتي بلا دوك كترت التكاشط وتبديلات ..

– إيمان : داكشي علاش حتى أنا ختاريت الكسوة ..

– شامة (عنقاتها ) : هاااح فرحانة فرحانة بزااف ، شفتي اندردك فعرسك .. عندك ايديرو لينا داكشي ديال موزار ولا ، الموسيقى الكلاسيكية ..

– إيمان (كضحك) : لا قلت لزياد ، مكرهتش يجيب لينا عبد المغيت ..

– شامة (طلقات منها او وقفات) : أح ، هك أندردك فعرسك هك(هزات على سروال البيجامة كدردك وتجدب بشعرها ) ..

– إيمان (ميتة بضحك وقفات حتى هي) : البوط أحميدة البوط ..

– شامة : هاديك هاديك سييييير عالله .. قلبوها نشاط وضحك أبوحدهم فالبيت ، حتى سخفو وتلاحو على النموسية ..

_____

– فڤيلا صغيرة جنب البحر ، قدات الكبلة على حقها وطريقها ، نابط فالبيض عليه الورد … بلا ديال الحوت كان مغطي بالأليمينيوم ، شلايض محطوطين زمستفين على الطبلة ، موسيقى خفيفة خدامة … واحد الجو رومانسي زوين ..

– ضارت هزات تيليفون ديالها كتشوف فالكسوة الكحلة محطوطة فالبوشيط فوق الفوتوي ..

– سعيدة (فتحات التيليفون وطلعات نمرة عماد ) : حبيبي من هنا لساعة ، بغيتك تكون عندي .. هاهو العنوان ماتعطلش عليا 8 تكون هنا ، غادي نتسناك ..

______

– عماد داك الوقت كان عاد دخل لدار ، وصلو ميساج هز تيليفون وقراه ، ستغرب شنو كدير سعيدة تم ، ومع 8 بغات تلاقى بيه … هو عارف مزيان بلي يمكن سعيدة الاجواء لي عاشت فيها ، عادي بنسبة ليها يتلاقاو فداك الوقت … جاوبها ب :

– واخا حبيبة ..

______

– وصلات العشية ، لبسات سعيدة كسوة فالكحل حد الركبة ، مشبكة من اليدين وهابطة من جهة الخصر … هزات شعرها على شكل ديل حصان ، وبوكلاتو من الخصلات التحتانية ، فرجليها لبسات صندالة عالية نع سنسلة خفيفة مدهبة وحلبات خفاف ، رشات من ريحتها المفضلة ، أما المكياج كتفات بأيلاينر مع وعكر فالحمر ..

– شافت فساعتها الأنيقة المذهبة ، كانت 19:50 دقيقة بقات 10 ديال دقايق ويوصل عماد ، ماعرفاتش كيفاش اتكون ردة الفعل ديالو وكيفاش ايفكر ، ولكن هي مافكراتش بزاف باش ختارت دير ليه مفاجأة ، حسات براسها بحال الى بغات تعوضو على داكشي لي دوز ، بغات تكون غير هي وياه الراس فراس ..

– تنهدات تنهيدة طويلة ، وصلها ميساج من عند سامية سولاتها فين هي ..

– سعيدة(جاوباتها) : انتعشى مع البنات ..

– حطات تيليفون ديالها وݣلسات كتسنى ، وصلات 8:05 ، سونا الباب ، وقفات قلبها كيضرب بجهد .. مشات بخطوات تقيلة ، حلات الباب وبإبتسامة تلقات ليه .. دخل عماد كيطلعها ويهبطها بإعجاب ..

– سعيدة (حشمات) : مالك كتشوف فيا ؟

– عماد (بإعجاب) : جيتي زوينة بزاف .

– سعيدة (ضحكات ) : عويناتك زوينين وكيشوفو كولشي زوين .. دخل مالك بحال الى خايف ولا حشمان ..

– عماد : ماشي هكاك ، غير فاجئتيني وصافي ..

– جراتو من يدو غادية بيه لجهة الطبلة ، عماد هز حجبانو مبسم ..

– عماد : هاي هاي هادشي كثير هههه ..

– سعيدة : حتى حاجة ماكثيرة عليك ولا غالية عليك ..

– عماد (جر ليها الكرسي) : تفضلي ..

– ݣلسات سعيدة وجر الكرسي ݣلس حداها ..

– بداو كيتعشاو موسيقى خفيفة خدامة ، نظراتهم لبعضياتهم هي سيدة الموقف ..

– سلاو العشا ديالهم فجو هادئ رومانسي ..

– عماد : الأميرة ديالي تقدر تسمح ليا بهاد الرقصة ؟

– سعيدة (ضحكات ومدات ليه يدها) : بكل سرور ..

– خداها بين يديه وسط صدرو ، حاطة يد فيدو ولوخرا على صدرو ، راسها جيهة قلبو كتسمع دقاتو … كتحس براسها طايرة فسما ، الفرحة مقاداهاش .. قلبها كيضرب يجهد ..

– بعدات راسها بشوية كتشوف فعماد نظرات حب وشوق ولهفة ، غير عينيهم لي كيهضرو ..

– عماد باس ليها راسها ورجع خداها بين يديه حتى سلات الموسيقى ..

– سعيدة (شافت فيه بكل حب) : كنبغيك ..

– عماد (كيتفحص وجها ملامحها البريئة ، تايقة فيه وعيطات ليه هنا غير هي وهو ، إلا وكتبغيه وتايقة فيه)

_____

– عماد : حتى أنا كنبغيك ، وهادشي لي درتي كايعني ليا بزاف … هاد ليلة وهادشي لي درتي كيعني ليا بزاااف ..

– سعيدة : حيت كنبغيك .. هادشي علاش درت هادشي كامل ..

– عماد (عنقها) : الله يخليك ليا ومايحرمنيش منك ..

سعيدة : أمين ياربي وحتى أنت ..

– عماد بعدها عليه واحد شوية ، كيشوف فيها كيفاش كتشوف فيه بلهفة ، تبسم وباس ليها راسها ..

– عماد : حبيبة ديالي ، خاصك دخلي لدار مجاتش تبقاي على برا حتى لهاد الوقت ..

– سعيدة ( بإستغراب) : مزال الحال ؟

– عماد (شد ليها وجها) : حبيبة ديالي ، أنا كنبقى راجل وكتحكم فيها الغريزة وشهوة ديالي ، وإنت بنت ضعيفة وهشيشة … مابغينا احبيبة توقع بيناتنا شيحاجة قبل من الوقت ، أنا مكنشوفش فيك غير حبيبتي ولا صاحبتي ، كنشوف فيك مراتي ومامات وليداتي الى سهل الله … مخاصش نخليو المشاعر ديالنا وغريزتنا تحكم فينا ، وجوج الى كانو كيبغيو بعضياتهم وكانو بجوج بوحدهم ، شيطان كيكون ثالتهم فهمتيني ابب … بغيت نهار ناخود مراتي ناخودها بعزها … هادشي مكايعنيش انو مكنبغيك ، بالعكس هاد الحاجة لي وقعات ليا معاك … كنحمد عليها الله ونشكرو ، داكشي باش اكبيدة كل حاجة فوقتها كتكون زوينة فهمتيني ؟

– سعيدة (وجها ولا حمر ، حسات براسها قداش هي غالية عندو ومايتغلش الفرصة انهم بجوج وستغلها بالعكس ) ::

– اه فهمت ..

– عماد (باس ليها جبهتها) :

– نمشيو ؟

– سعيدة (ضحكات ) : أه نمشيو ..

_____

– اليوم تالي ، الأوطيل لي ايتقام فيه الإفتتاح والعرس .. الخدامة خدامين على تزيين ، معاهم سعد كيوريهم كل حاجة فين بغاها تكون ، وفين خاصها تكون … كانو معاه حتى العارضات لي أيلبسو تصاميم الهاشمي … سعد كيصور كل حاجة بوحدها وكل حاجة مع ختها .. القاعة لي ايدار فيها العرس والعرض كانت كبيرة بزااف ، تريات من الكريستال نازلين منها ..

_____

– فالڤيلا … طقوس الحناء كانت حاضرة .. واخا إيمان مابغاتش ماعندهاش مع الحنة نهائيا ، ولكن بزز باش بزو عليها دير واخا غير صبع صبع ، أما رجليها ماوفقاتش ديرهم واخا طلبوها .. بغات كولشي يكون خفيف ظريف ، ولكن هادشي مامشاش على شامة ، عارفاها بلي من داخل حاسة بنقص ، داكشي باش مابغاتش تقوم بطقوس كيما هوما ، حتى من الحمام وقوامو مابغاتش ديرو ، كتفات غير غسلات فدوش ديال دار صافي .

– شامة : خالتو زينب ،مديش عليها انت عارفة علاش رفضات دير الطقوس وتقوم بيهم ..

– زينب : عارفة أبنتي ، عارفة بلي ماشي هكا خاص يكون هادشي ويكون بقوامو ، ولكن مابغيتش نخسر ليها الخاطر … راه بزز باش وافقات على العرس اما راه مكانتش باغية ݣاع ..

– شامة : المشكل هي رافضة يسيقو دارهم الخبار ، وفنفس الوقت حاسة بنقص ، راه انا لي كنعرفها مزيان .. كون كانت فشي وقت اخور بالفرحات عليها دير ليلتها وتلبس لبيسات ، واخا هي ماعندهاش مع كترت الزواق ..

– زينب : حنا مباركين منين قبلات دير العرس وتلبس الكسوة البيضا ..

– شامة : صبر أخالتي صبر ، تعطلو بزاف كان خاصهم يكونو جاو من عند العدول ..

– زينب : وسيري بدلي عليك أنت بعدا ، شوية وغادي تجي مرات جلال وتجي سهيلة حتى هي ، ݣلت ليها تجيب ماماها معاها ، ݣالت ليا حتى لغدا يكون العرس ..

– شامة : أه مع ماماها عيانة داكشي باش ، المهم أخالتي انمشي نلبس حوايجي ونهبط ..

_____

– طلعات شامة لبيت الفوق ، خدات واحد القفطان ديال جوهارة خداتو ليها زينب ، لبساتو هو واحد البلغة ، شدات شعرها جمعاتو على شكل ذيل حصان ، أما المكياج دارت غير ظلال خفيف سموكي ، وعكر فسومو ،، رشات ريحتها وسنسلة ديالها فعنقها ، خرجات من بيتها مع ضارت تلاقات بجنيد الوجه فالوجه ، ماهضراتوش ضربات فيه وهبطات ..

____

– وصلات سهيلة لابسة سروال ديال دجين ، مع شوميز على شكل جبادور فالكرونة بسفيفة ، شعرها على شكل سفنجة … موراها جات سعاد حتى هي ، لابسة كسوة طويلة ، سامية حتى هي .. وصل جلال ومعاه الدراري ونورة ، عائلة سيف الدين حتى هوما كانو … الدار عمرات بالحباب وبصحاب … وصل نزار حتى هو ..

– زينب : ماجبتيش معاك شمس ومحمود ؟

– نزار : غدا أيكونو هنا إن شاء الله ..

– زينب : ايوا صافي مزيان ، خدمات سامية البيفان وجهدات الموسيقى .. الݣلسة ليكان لونها فالبيج ومطروزة بدهبي … قدامها طبيلات صغار محطوط عليهم الشمع وسكر وزهر …

– توفيق واقف هو وعلي وجلال بجلالبهم ، جواد وجنيد مع نزار وبهاء ..

– سونا تيليفون لزينب ، طلعات ليها نمرة ديال فرنسا .. مشات بعدات شوية على الصداع وفتحات الخط ..

– زينب (فرحانة ) : ختي نبيلة امضرا وصلتو ولا مزال ؟ وايلي وإيمتا ؟ إيوا صافي هي اتكونو هنا لغد فصباح بكري ؟ إيوا مزيان ياك جايا معاك لمياء ؟ إيوا يحسابلي واش مجاياش كنت انتخاصم معاها .. إيوا صافي إن شاء الله ، الله يجيبكم على خير ..

– سامية : أمضرا وصلو ولا مزال ؟

– زينب : حتى لغدا فصباح عاد يقدرو يكونو هنا ..

– سامية : كنا بغيناهم يكونو معانا اليوم زعمة ..

– زينب : ايوا أبنتي كل توخيرة فيها هيرة ماعندنا منديرو ..

– سونا الباب

– زينب (بلهفة ) : أيكونو هوما لي جاو ..

– سامية : انمشي نجيب الحليب وتمر ، مشات ليلى تحل الباب … وهو يدخل زياد لابس سروال فالكحل وشوميز فالبيض ، معاه إيمان شاد ليها فيديها لابسة جلابة مخيطة براندا فالتيركواز ، مع صندالة وساك وشادة ليه فيديه …

– كلشي تجمع عليهم ،كيصليو على النبي وكيزغرتو ، واخيرا زياد وإيمان مزوجين … شرباتهم زينب الحليب وكلاتهم التمر ، مقاداها فرحة اليوم عندها عيد ، واحد فولادها تزوج وختار بنت الناس ، تربية وزين وكولشي مجموع فيها …

– طلعات سامية إيمان لفوق ،هي لي اتكلف ليها بالمكياج وتلبسها قفطان الحنة ، قدات ليها شعرها بوكلي ، أما المكياج خلات ليها وجها طبيعي ، باش الغد يطيح عليها السر … لبساتها قفطان ديال الموبرا فالخضر مخيط بصم ، مع بلغة فاسية بصم ،، حلو عليها البنات الباب شامة كتزغرت وتݣول مازغرتات ، الفرحة لي كتحس بيها اليوم بحال الى بنتها ماشي بنت خالتها ، عنقاتها تعنيقة كبيرة خلات إيمان دموعها يسلو ، كانت كتمنى يكونو والديها معاها ، ولكن مامكتابش كتحاول تفرح راسها براسها …

– سامية : وصافي اتبكيوني حتى انا ازبلات ..

– سعاد : براكة وأنتوما غير على سبة ، يلاه راه نقاشة كتسنى ..

– هبطو إيمان بصلاة على النبي وزغاريت ماليا المكان ، الموسيقى خدامة على جهد ، ريحة العود والبخور .. الرجال فصالون بوحدهم والعيالات فصالون لي اتبرز فيه إيمان .. ݣلسوها فالبرزة وسعاد كتصور فيهم ،بدات النقاشة خدمتها ، سلات ليها ليد لولة وتبعاتها الثانية ، وخا كانت نقشة خفيفة ولكن جاتها زوينة مع يدياتها صغارات ..

_____

اما الرجيلات دارتلها غي خلخال خفيف لاحقاش مولاي السلطان قالك تيعجبوه رجليها بلا حنة … غير كملات تبعوها البنات حتى هما دارو صبيع ديال الفال ..

دازت الليلة فالضحك والنشاط كلها جالس مع حبيبو وحتى للي بعيد عليه تيتصور ويسيفطلو الاجواء بحال سعيدة وعماد اما شامة مهياش فهاد العالم فرحتها متعطيها لحد فرحانة ببنت خالتها للي اخيرا تهنات عليها وحطاتها فايدي امينة غافلة على عينين جنيد لي غادي ياكوها

قلبو معاها ولاكن كرامتو متسمحلوش يزيد يفرض راسو عليها..

تفرق المجمع كل واحد فيهم قصد بيتو والضياف مشاو بحالهم … سالات الحفلة لي شبعو فيها شطيح و حيحو واخا البعض قلوبهوم عالم بيها غير الله

جا الصباح وجا نهار جديد لي هاز معاه شلا حاجات .. النهار لي كانت كتساينو ايمان بفارغ صبر ..

فاقت لالة العروسة على العياط ديال زينب لي كتفيقها بحب حاولات انها ديرلها ݣاع التقاليد اللي تديرهم ام العروسة من تحياد الحنة حتى للتحجاب كملو جميع الطقوس ديال تحياد الحنة… هبطات زينب بجرا من بعد ماسمعات صوت الباب حيت عرفات شكون غيكون ..

زينب : بعدات كضحك معنقة واحد المرة كبيرة فالعمر وأنيقة ، معاها بنت طويلة فأواخر العشرينات ، شعرها طويل وكحل زوينة وكيبان الغرور على وجها) ناري خايفة تعطلو كثر ، تبارك الله تبارك الله على بنتي لمياء ، غزالة صلاة على نبي .. كنت خايفاك متجيش

لمياء (كضحك بغرور) : علاه شحال عندي من خالتو ، صراخة أقالت ليا ماما بلي جنيد هنا مترددتش

زينب : عزيزة و غاليا ازين ديالي دخلو متبقاوش واقفين فالباب

– نبيلة : لي باݣاج فطوموبيل ..

– زينب : ماعليش ايدخلهم شيفور

لمياء : فين هما البنات لاباس عليهم واحد جنيد لباس عليه ؟

عند شامة كانت هابطا حتى كتسمع هضرة لمياء لي جات فودنها كمشات حواجبها بانزعاج معرفاتش علاش محملاتهاش خصوصا ملي سولات فجنيد ، وفاش شافتها من بعيد خلاص ..

تجاهلات هضرتهوم و مشات نيشان للكوزينة كتفادا تلاقة بعائلتهم مافيها للي يسمع شي تعليق للي متصبرش عليه

داز الصباح كامل فجري عليا نجري عليك والتوجاد ، عرفاتهم زينب على علي وشامة والعروسة ، وكيف كانت حاسة شامة ، القلوب مابغاوش بعضياتهم ، تغداو البنات بوحدهم لاحقاش زينب حلفات على ايمان متبانش قدام زياد باش يطيح عليها السر نيت .. كملو وناضو مشاو للسونطر فيين استقبلو ايمان بالحليب والتمر ..دخلوها بوحدها لواحد البيت ضاروبيها 3 دالبنات والبنات لخرين كلها شداتهوم بنت…كلهم خدامين فراحتهم الا للي خدامة مع شامة ،، مخلاتهاش مسكينة تخدم فراحتها كل مرة نقسي مسحي هادشي بزاف مكملتليها حتى البنت مسكينا شحفات… كملو لبنات ولبسو تكيشطات راقيين على شكل كسيوات من غير شامة لي لبسات تكشيطة فالموف بارد ديال الموبرة مخيطة بصم ، شعرها جاها كيحمق ولا كيبان لحال الى قصير جاها خطير ، مع صندالة عالية مدهبة ، وإيكسيسوارات ، جات بحال شي أميرة ..

______

– سعاد حتى هي كانت فقمة الأناقة ، أما سعيدة وسامية كانو غزالات بقفيطنات على شكل سواريات بريش من التحت ، إيمان كانت كتحمق بزين ، مكياج برز الملامح ديالها ، وشعرها علاوه ليها للفوق … لبسوها جلابة خفيفة حتى تمشي للأوطيل باش يلبسوها الكسوة ديال العرس .

– عيطات سعاد على نزار ، باش يجي هو وجنيد يديوهم للأوطيل ..

خرجوها بالصلاة والسلام لقاو زياد وجنيد ونزار واقفين كلهم دايرين السبة بالبنات وفالحقيقة كل واحد فيهم جاي على قبل وحدة فقط جنيد كان فكامل الأناقة ديالو ، لابس جام يود فالخضر داكن صدرو محلول ، عينيها كانو مفيكسيين على شامة لأول مرة يشوفها بتقليدي وشعرها بهاد الشكل هذا كتبان خطيرة ، وهو ساهي فيها ..زياد محس براسو حتى وقف قدام إيمان شادليها فيديها بحال لي خايفها تهرب .. حل ليها الباب طلعات وطلع هو وزاد مكسيري خلاهم تيضحكو عليه ..

نزار : يالاه يلاه اخويا جنيد لاباس للي جينا اما كون بقاو البنات خلا سيد مزروب ..

جنيد: (عينيها على شامة) هانتا كتشوف

مشاو البنات كل وحدة معامن ركبات سعيدة للي تعمدات تخلي شامة تركب حدا جنيد …

تحركو الطنوبيلات موقفو حتى لقدام لوطيل فين لقاو عيساوة فالباب واقفين فاستقبال الضيوف بالحليب و تمر ،، طلعو إيمان لفوق لشومبر فين غادي تبدل حوايجها .. سعاد وهي داخلة تلاقات فاص فاص مع سعد ، تعمدات تجاهلو وكملات طريقها … بداو ضيوف كيوصلو شوية بشوية ، الكل تجمع فالجردة ديال لوطيل اللي مزينة بالضواو تقولو النهار ماشي الليل والناس مفرقين فالطبالي .. كلشي على حقو و طريقو ..

– هبطات شامة لجردة، بقات كتقلب بعينيها حتى لقات احلام وعماد مشات عندهم مقصدة ..

عماد : شكون نتي فين مشات شاما.. شكون بدلها اهيا ناري جيتي قرطاسة تيبالي خيري مايديه غيري فينو عمي علي نمشي نضرب الكحل فالبيض ..

شامة: اويلي غي بالشوية يعطيك الجهل يسمعك شي حد يصحابليه بصح

الحوار كامل داز على ودنن جنيد للي محاملش راسو علاش مع عماد كتكون على طبيعتها ومعاه لا ..

بقا ساهي مخنزر محس غي باليد للي تحطات على كتفو

– لمياء : نتا هنا وانا تنقلب عليك

جنيد :طلعها وهبطا لابسة صوارية مبينة لاطاي ديالها وكتهضر وتتحلون عليه وهدفها باين ميخفاش على واحد بحالو .

(مع راسو اجي جابك الله نشوفو ديك الثلجة واش غدوب ولالا )

جنيد (باستهزاء ) هي كنتي كتقلبي عليا؟

– لمياء : غي لقيت راسي بقيت بوحدي وقلت نتوانسو بجوج ؟ توحشتك اجنيد غبرتي علينا ..

– جنيد (ضحك) : صراحة حتى انا توحشتك زيانيتي ..

—–

شامة مبقاتش مركزة مع عماد عينيها غير مع جنيد واقف مع ديك المسيميمة ، وهي متبعا حركاتها المايعين وضحكتها المايعة ، والنار شاعلة فيها ومعارفاش علاش مافاهماش شنو واقع ليها مكرهاتش طير عليها و متشوفهاش معاه .

مفيقها غي صوت التصفاق اللي علا ملي بانت لالة العرايسات بكسوة طويلة فالبيض ، كلها مشبكة من يدين ومن التحت ، كتبان بحال الأميرة ديال ديزني ، .. داخلة فيد علي اه علي للي لعب دور الاب لايمان وجابها بيدو سلمها لعريسها مخلاهاش تحس بالنقص و كان اب ليها ، زياد لي كان فكامل أناقتو ، حداه جواد وتوفيق وبهاء ، وزينب لي دموعها هبكو فاش شافت هاد المنظر هذا ..

الدموع فعينين إيمان ، مقدراتش تحبسهوم واخا وجودهم الا بصح حسات براسها يتيمة فعلا احساس صعيب تتيتم وحبابك مزالين ولكن ربي كبير عوضها بعلي وشامة والاهم بزياد راجل للي يبغيها بكل ظروفها ..

وصل علي الامانة لمولاها ووصاه عليها.. جاو البنات يتصورو معاهم حتى من ديك سفود النصارى كيفما سماتها شامة جرات جنيد باش تتصور معاه وهو دايرلها الخاطر ، كيشوف بنص عين فشامة لي حاضياه من بعيد ..

كملو التصاور وقطعو لاطارط ، وهنا دخل عبد المغيث ، لي شعل الجو بنشاط ديالو ، جرات شامة عماد وأخلام لي نظرات بهاء مفيكسيين عليها ، منين دخلات وهو حاضيها ، شطيح شامة مع عماد خلات نار جنيد تشعل ، جرات شامة سهيلة وسعيدة وسعاد ، ودارو دائرة وشامة وسطهم ، معلية على تكشيطة حتى بانو ݣاع رجليها كتشطح وتقول ماشطحات ..

– زياد (همس لجنيد) : أنا غادي ناخود إيمان ونمشيو ..

– جنيد : وديفيلي ديال تصميمات ؟

– زياد : أخويا ليلتي قبل كولشي

– جنيد : تخاف الواليد يتقلق أصاحبي ..

– زياد : لا ماتخافش الواليد فخبارو..

– جنيد : أياه أسيدي والله يكمل بالخير ههههه سير أسيدي ، راك زربان ..

– زياد : ماتخافش كولشي غادي نشوفو من بعد ، وكولشي أيدوز مزيان ، خدمة سعد خطيرة ، كنت بغيت نبقى صراحة ، ولكن منكدبش عليك أنا زربان ..

– نزار (وقف عليهم) : الواليد والواليدة عاد وصلو شوية ويكونو هنا ..

– زياد : تهلاو ، خلاهم ومشا لعند إيمان ، جرها وتوسطو القاعة .. مور مشبعو شطيح و ختموها برقصة على موسيقى هادئة رومنسية ، غير شاف الكل مشغول زياد جر ايمان بالسكات خرجو من الاوطيل ركبها فالطونوبيل وزاد

ايمان ،:فين غاديين دابا يتخلعو علينا خرجنا بلا ميشوفونا

زياد : كيفاش غيتخلعو راكي مرتي وانا مبقيتش قادر نصبر

كلمة خلات ايمان تزاد معاها الزايد عاد طلعات معاها شنو تيتسناها مفاقت من الݣلبة حتى لقات راسها قدام اوطيل 5ايطوال

هبط زيال فتح لها لباب لقاوهم كيتسناوهوم .. رحبو بيهوم و استقبلوهوم احلى استقبال..

طلعو نيشنا للسويت للي كان مريزيرفي فيه من قبل مع الدخلة تيبانلها الورد مشتت واحد ديكور على السريرعلى شكل قلب بالفاط والشموع مشعولين… كان منضر رومانسي بلاقياس الشيى للي خلا قلبها يزدح والفراشات تلعب فكرشها زاد كمل عليها ملي حسات بنفس ديالو كاضرب فعنقها معنقها من لور

حبيبة ديالي ليوم ميفكك مني حتى واحد ليوم أتكوني لي قلبا وقالبا ..

_____

– فالأوطيل ..

– من بعدما عاقو بالعرسان هربو ، دخلو للاوطيل لداخل .. خداو بلايصهم وبدا العرض ديال ديفيلي ديال تصاميم ..

– تصاميم المجوهرات كانو خطيرين بزاف ، واغرين كاع الناس عجبوهم ، وشكرو الخدمة المتقونة وتصميم الواعر … شامة كانت حدا عماد وأحلام ولبنات ، وحهة لوخرى كان جنيد ݣالس داير رجل على رجل ، ومخشية فيه لمياء كتوشوش ليه فودنيه ..

– غير سالة العرض ، وقفو الناس كيصفقو .. وقف جواد معاه سعيدة وسعد ، تصاميم ديال جواد وسعيدة .. ووليموديل والحائط من يدين سعد … الصحافة كتصور الأحداث كلها لحظة باللحظة … سالة العرض على خير وبيخير وسالة معاه العرس ..

– جواد (بفرحة ) : سعد انا فرحان بزاف على هادشي كامل ، تبارك الله عليك ..

– سعد : بالعكس هذا واجب ..

– توفيق : تبارك الله عليك أولدي ، ماعندي منݣول ..

– (وقف عليهم نزار معنق سعد) : تبارك الله على خويا العزيز ، الخدمة عندك خطيرة كل مرة كتبهرني ..

– جنيد (هاز حاجب ومهبط الثاني بإستغراب) : كيفاش خوك ؟

– سعد (كيضحك) : أنا ونزار خوت ، خوت من نفس الأم ..

– توفيق : وايلي ، والله مافخباري ..

– نزار : حيت الاخ ديما غابر علينا ، داكشي باش ..

– سعيدة : مشرفين ، ومرحبا بيك دابا بحالك بحال نزار ، مغاديش تبقى جمعانا غير الخدمة ..

– سعد (تبسم وشاف فسعاد لي مكتهضرش) : كنتمنى ، علاش لا ..

– زينب : نمشيو نكملو الهضرة فدار ..

– سعد : انا غير عفيوني ..

– توفيق : لا مايمكنش ، أنمشيو كاملين حشومة ، وزايدون مزال السهرة طويلة ..

– نزار : ولي بغيتو ، انمشي نعلم الواليدة ونجي ..

– خرجو كاملين من الأوطيل ، معاهم جلال ونورة شمس ومحمود ، شامة علي حتى أحلام وعماد .. كلشي مشاو للڤيلا الهاشمي يكملو السهرة تماك ..

______

– كانت واقفة عند البالكو ، حتى بانو ليها طوموبيلات وقفو قدام الڤيلا … تحلات الباب ودخلو كاملين .. كيبانو ليها حتى خرجو كاملين ومعاهم بناتها بجوج وحفيدتها ، كتبان ليها ختها حتى هي … مافهماتش كيفاش وقتاش حتى جات لهنا ، تنهدات تنهيدة طويلة .. مابغاتش تردد لحظة وحدة فهادشي لي غادي دير ، براكة ضيعات الوقت بزاف ، جا الوقت لي كولشي يتفضح … جا الوقت لي الأمور تصلح ولي عندو شي حق ياخدو ..

_____

– ضارت وتنهدات تنهيدة طويلة ، ضارت لقاتو واقف قدامها ..

– عبد الرحمان: مصممة على قرارك ؟

– عالية : كتر ماتخايل ، نورة عرفات بلي أنا مها ، وتحاليل خرجو إيجابيين … واخا مزال ماتقبلاتنيش ، ولكن ايحي وقت تقبلني … كيتك انت كيفاش اتعطي لوجه لولادك ..

– عبد الرحمان : خلي بعدا يفوت اليوم ..

– عالية : مغاديش تقنعني ، غير .يرها فبالك … كانت زمان كنسمع ليك ، دابا مابقاش كيهمني هضرتك … واخا تهضر حتى لغدا انمشي لعندهم هي أنمشي ..

______

– عند العرسان ..

– خرجات إيمان من الحمام ، بالبينوار … خدات بيجامة ديال ستان فالبيج … لبساتها نشفات شعرها مزيان .. تنهدات تنهيدة طويلة .. هاد الليلة كانت من أحسن الليالي عندها … كيفاش تعامل معاها زياد بحال شي بنية صغيرة … خداها بالخاطر حتى توحدو الأجساد ديالهم ..

– خرج زياد من الحمام لاخور كيمسح فشعرو بالفوطة ، على وجهو إبتسامة .. ݣلس حداها كيشوف فيها ، حنيكاتها حمرين وطايح عليها السر ..

– زياد : رتاحيتي شوية ؟

– إيمان : اه الحمد لله .

– زياد : نتعشاو ؟

– إيمان : واخا . ناضت لطبلة ، يلاه ݣلسات حسات بيه وراها ، وشيحاجة على عنقها تحطات ، شافت التحت كتبان ليها سلسلة زوينة مصنوعة من الذهب الخالص ..

– إيمان ( بإستفهام) : ولكن ، عاد جبتي ليا وحدة ..

– زياد : هادي من الكوليكسيون الجديدة ، بغيتهت تبقى هنا حيت بلاصتها et هنا ، ختمها بقبلة على شعرها ، جر الكرسي وݣلس مقابل معاها ..

– قبل مايبداو العشا ، حط زياد يدو على يد إيمان ، كيشوف فيها بكل حب ..

– زياد : أنا عارف مزيان بلي مزال ماوليتي كتبغيني ، هادشي أنا عارفو ، وعارف بلي كترتاحي معايا .. وتزوجتي بيا حيت كترتاحي معايا وحيت حسيتي بالامان معايا ، وعارف مزيان بلي هاد الليلة كانت ناقصة حيت والديك مكانوش حاضرين ، وانا مابغيتش نبزز عليك شيحاجة أنت مباغياهاش … ولكن كنواعدك غادي نكون نعمة الزوج ليك ، وغادي يكون فيا الأب والام والاخ ليك ، واخا عارف مزيان مايمكنش نعوض هاد النقص ، ولكن كنواعدك غادي ندير كل مافجهدي باش انت تكوني مزيانة وفرحانة ومرتاحة ، كنطلب منك حاجة وحدة .. أي حاجة ضراتك ولا قلقاتك ولا ماعجباتك تݣوليها ليا ، ماتحشميش مني ولا تخافي … انا دابا راجلك ماشي براني ، تافقنا ؟..

– إيمان (رتاحت داخليا منين حسن بيها ، ومرتاحة كتر حيت ربي من عليها بزوج بحال زياد ) : متافقين ، وحتى انا مغاديش نخيب ظنك فيا ..

– زياد (ضحك) : عارف ، ويلاه تعشاي ..

– إيمان (كضحك ) : واخا ..

_____

– نبيلة (كتضحك) : عقلتي ازينب ، عقلتي كونا كنقولو بلي لمياء لجنيد وجنيد للمياء ..

– زينب : إيوا أختي كل وقت او وقتها ، حنا غير كنݣولو ولكن الولاد هوما لي كيختارو .

– نبيلة : لي شافهم دابا مايقولش شحال وهوما بعاد ..

– سعيدة (كتوشوش لسامية) : هاد لمياء مكرهتش نشدها ، نضربها ليها بأكبر نتفة ..

– سامية : اويلي وعلاش ؟ زعمة راه بنت خالتك ..

– سعيدة : بنت النبݣ ، ماشي بنت خالتي … فين كانو هذا شحال … حتى سمعو جنيد جا عاد تمو جايات تحريميات ، فعرس جواد كانو فالمغرب وماحضروش … انت راه مكلخة ولا كتعماي ..

– سامية : وانت دابا مالك فاش عينك ؟

____

– سعيدة : مابغيت والو ، بغيتها اتهز قلزعها وتعطينا بتيساع ، وتعطي لخويا بضبط بتيساع ..

– نباتها سعاد : عطيها يوماين ديالها وغادي تمشي ..

– سعيدة : بففف ..

– أحلام(كتوشوش لشامة) : شكون هاديك طيطڤيت؟

– شامة ( غير كتسمع ومامسوقاش) : بنت خالتو ..

– أحلام : ياختي ماحملتها ماقبلتها .

– عماد : وأنت مالك ناوية تخطبيها لخوك ..

– أحلام : وأنت دخل سوق راسك ، وخطيك من سغل العيالات ..

– نزار (قاطعهم بصوت مجهد) : الواليدة ، هادي هي شامة لي ݣلت ليك كتشبه ليك فشعر ..

– شمس(ضارت عندها) : تبارك الله عليك أبنتي ، غزالة ماشاء الله ..

– شامة (تبسمات ليها) : لهلا يخطيك أخالتي ..

– لمياء غير مخشية فجنيد وكتشوف فيها شوفة العما ..

– زينب (موجهة هضرتها لثورية مامات سهيلة) : مرحبا بيك الالة ، نهار كبير هذا لي زرتينا ..

– فوزية : شحال عاودات ليا سهيلة عليكم ، وعلى شامة بضبط ..

– لمياء (بإستغراب) : علاش أسهيلة كتعرفيها ؟

– سهيلة : وي صاحبتي ..

– لمياء : اووه لعجب ..

– شامة (هازة حاجبها) : وعلاش جاتك عجب مثلا ؟؟

– لمياء : نور مي كيقولو المغنيات كيكونو مغرورات وماكيهضروش مع عامة الشعب ..

– شامة (تبسمات) : هضري على راسك أحبيبة ، حيت كاينات شي وحدينات حاسبات راسهم هوما هوما ، وهوما دايرات بحال شي حبة ديال العدس واحلات فالحلقومة ، أما كايناش شي فنانات تبارك الله متواضعات ، كلنا كيف كيف لا فرق بينك وبيني وبين غيرنا ..

– سعيدة (عجبها الحال) : أصلا ليه شرف هذا لي يتعرف على شامة ، الزين والحداݣة وتقالة ورزانة وتباتة ، ماشي غريفرة وغير كتنقز ولي لقاتو تلصق فيه بحال ديك دودة ديال العلق ..

– سامية (قرصات) : اويلي ..

– سعيدة : بعدي مني طلعات ليا فمخي ..

– سهيلة : شامة كنت غادي نضربها بطوموبيلتي ، غير الحمد لله ماوقع ليها والو ، وفغيمو فرحانة حيت تعرفت عليها او ولات صاحبتي ، وحتى سامية وسعيدة ولبنات لاخرات ولاو صحاباتي ..

– جواد (نقز) : وفين مشينا حنا ؟

– بهاء (همس لجنيد) : كيبان ليا أنوجدو لشي عراسية أخرى ، خوك طاح فشبكة. .

– جنيد : عاد شفتيه ، ههههه صباح الخير ..

– قاطعهم السونيت ديال الباب ، مشات ليلى تحل ..

– جلال (لنورة) : نورة ، مالك ساهية ياكما نمشيو ؟

– نورة (هزات راسها فيه) : راسي ضرني ، راك عارف شنو كان اليوم ..

– قاطعتاهم ليلى :

– مدام زينب ، واحد السيدة باغية تشوفكم ..

– زينب : تشوفنا حنا شكون واش انا ولا شكون ؟

– ليلى : قاتلي بغات تشوف مالين دار وماقالتش شكون ..

– زينب : واخا دخليها ..

_____

– مشات ليلى ، ورجعات معاها عالية كتمشى بشوية ، بعكاز ديالها .. غير شافتها فوزية تصدمات ، أستغربات شنو جات ختها كدير هنا ، الصدمة الكبيرة كانت باينة على وجه نورة … ماعرفات متݣول ولا باش تنطق … يلاه خطوات عالية الخطوة اللولة حتى تبعها عبد الرحمان ..

– زينب (مافهمات والو شكون هادي وشكون هذا لي داخلين لدارها) ..

– شامة (بإستغراب) : خالتي عالية شنو كديري هنا ؟

– عالية (شداها الرعدة وكتحس براسها على شوية صافي أطيح ، على شوية كونماشي جواد لي كان واقف وعتقها فاخر لحظة شد بيديها) ..

– شامة (وقفات بجرا مشات عندها كتجري شدات فيها ݣلساتها) : خالتي شنو واقع ، طاح ليها السكر عاوتاني ؟

– عالية (قمعا نشف فيها السخفة) : لا لا أبنتي مكاين والو ، أنا بيخير ..

– عبد الرحمان (متوتر) : عالية ، ݣلت ليك بلاما تجي راكي مريضة ..

– توفيق : سيادنا شكون انتوما ، مافهمت والو !! شامة بنتي واش كتعرفي هاد الناس؟

– شامة : جيرانا اعمي ، قبالتنا ساكنين واحد المرة شفت خالتي عالية سخفات فالبالكو ، وتمت فين تعرفت عليها هي وراجلها ..

– زينب : مشرفين الالة ، كتباني ليا عيانة واقيلة ..

– عالية : مكاين باس الالة زينب مكاين باس ، ماشي مشكيل … سمحوليا على هاد الدخلة ولكن ..

– عبد الرحمان : عالية صافي يلاه نمشيو ، حشومة ..

– عالية (ضارت شافت فيه مخنزرة) : أنت أصلا شكون ݣاليك تبعني ولا شكون سولك ݣاع ، تقدر تمشي وجودك بحالو بحال غيابك ..

– جلال (كيشوف فنورة لي وجها ولا صفر ، خافها غير لا تكون مريضة) :

– نورة شنو واقع مالك ؟

– نورة (عينيها على عالية) : مممم ما ماليش ..

– جلال(بالهمس) : نورة شنو واقع ؟

– نورة : جلال ، هاد هاد المرأة هي هي مي ..

– جلال (تصدم كيشوف فعالية وفنورة) : كيفاش ..

_____

– توفيق : مرحبا الالة ماعليش ، واخا تݣولي لينا شنو كاين ، حتى لدابا مافهمنا والو سمحولينا ..

– ݣاع لي ݣالس كانو علامات الإستفهام على وجهو ، مافهمو والو من هادشي لي واقع ..

– عالية (بان ليها كاس ديال الما ، تماطات ليه شربات حتى كملاتو يديها كيترعدو ورضاتو لطبلة) :

– أنتوما لي سمحوليا على هاد الدخلة ، ولكن ضروري نهضر معاكم ، أنا عالية عالية الراضي .. وهذا راجلي عبد الرحمان رشدي ..

– توفيق (خرجو عينيه ، قلبو كيضرب ضار شاف فزينب وهي بدورها شافت فيه ، بلع ريقو بخوف وتوتر … كان حاس بلي هاد النهار ايجي وبلي والدين فوزية غادي يبانو شي نهار ) ..

______

– توفيق ماعرف واش يوقفهم ، ولا يخليها تكمل ولا شنو غادي يدير ، نظراتو توجهات نيشان لشامة لي كاتشوف فيهم ، وعلى وجها علامات إستغراب وإستفهام ..

– عالية (تنهدات تنهيدة طويلة، وشافت فثورية ) : أنا خت ثورية لكبيرة ..

– كولشي شاف فثورية ، سهيلة كتشوف فمها بإستغراب ..

– سهيلة : اويلي كيفاش ختك ، ماما كيفاش هاد المرة ختك ؟ عمرك ݣلتي ليا عندك ختك اويلي أش هاد التخربيق ..

– جواد : سهيلة صبري نفهمو ،حتى حنا بحالك مفاهمين والو ..

– ثورية : عمري عاودت ليك عليها ، حيتاش سينين ماشفتهاش عند بالي ماتت ، ومع موت باباك أبنتي مجابتهاش الوقت ..

– نبيلة (كتهمس لزينب) : ويلي شكون هاد الناس أزينب ؟ كتدخلي لدارك من والو اختي ..

– زينب (خنزرات فيها ، هي أصلا متوترة ومعصبة وزادت عليها) : عاد ݣلتيها داري وندخل ليها شكون مابغيت ، اختي نبيلة دخلي سوق راسك وشوفي بعينيك مابغيتيش طلعي لبيتك ورتاحي … عطاتها جوج كلمات حدرات راسها وسكتات ..

– سهيلة : ماما واش هادشي ينساوها ناس ؟

– عالية : بنتي مكاين باس ، انا سباب أبنتي ..

– شامة : خالتي عالية ، حتى لدابا راه مافهمنا والو وحق الله العظيم ..

– عالية (الهضرة كتوقف ليها فالحلق ، والبكية غلبات عليها) : انا ابنتي انعاود أبشوية عفاك عليا .. (هزات راسها) ماشي غير فوزية لي ختي ، حتى حتى نورة بنتي ..

– سكينة وادم شافو فمهم مصدومين ، توفيق ضار عند نورة كلشي العينين توجهو ليها ..

– جلال : اش هاد روينة هادي ..

– توفيق : نورة عاهدنا بيها ماعندها عائلة ، رباوها شي ناس وماتو ..

– عالية : انا وعبد الرحمان والديها الحقيقييين ..

– عماد كيشوف فأحلام ..

– أحلام : جاني راسي بحال الى ، كنتفرج فمسلسل الماضي لا يموت ..

– عماد : هني الوقت وسكتينا ..

– جنيد (مغوبش) :أش هاد تخربيق وهاد الروينة ، الالة هضري نيشان وأراي ماعندك وانت كتقطري فالهضرة ، واش مسيفطكم شي واحد ولا كيفاش ؟

– نورة (دموعها هابطين) : عندها الصح ، هاد السيدة هي مي … درنا التحاليل وخرجو اليوم ، خرجو إيجابيين …هاد السيدة هي مي ، وهاد السيد هدا لي واقف هو با ، سي عبد الرحمان رشدي ..

– جلال (هز حجبانو بصدمة ، حيت سامع بعائلة رشدي عائلة لاباس عليها )..

– عالية : عفاكم واخا تحلو شي سرجم ؟ ، عالية ولات عرقانة وجها ولا سخون … حل جواد السراجم ، تنهدات عالية تنهيدة طويلة :

– غير صبرو عليا عفاكم ، أنا غادي نعاود ليكم كولشي ..

– توفيق : حنا كنسمعوك الالة عالية ، غير دوي باش كل واحد يعرف شنو كاين … جنيد شاف فباه ، من ملامح وجهو باين بلي عارف شي حاجة ومباغيش يݣولها ..

– عالية : واخا ، المهم هادا شحال ، 40 عام هادي …

_____

– انا وعبد الرحمان ، تزوجنا عن حب … عبد الرحمان كان لاباس عليه فمكناس .. وانا كنت من عائلة متوسطة واخا هكاك ، ايوا كنا عايشين بيخير وعلى خير … هادشي لي كان كيبان ليا أنا داك الساع ، ولكن عبد الرحمان كان كيلعب ورايا ..

– عبد الرحمان : عالية ..

– عالية (شافت فيه) : قسما بالله ومتهنيني حتى نعطيك بهاد العكاز لراس ، فوتني عليك الله يرحم جدك ..

– محمود (همس لشمس) : كون يحسابلي كاعما نجي ..

– شمس : حتى واحد ماضربك على يدك ، وهنينا عفاك ..

– زينب : كملي الالة ..

– عالية : عبد الرحمان ، كان باغي يزيد يكبر الثورة ديالو ، ومالقا من غير التهريب .. خدم مع شي مصريين فتهريب الاثار .. انا ماكنتش كنخرح مقابلة غير وليداتي ، كانو عندي جوج بنيات ، ومع عبد الرحمان كان باغي الولد .. جاب ليا واحد الدري نربيه ، وفعلا ربيتو بحالو بحال بناتي … وخرجت كنتوحم ببنتي الثالثة الصغيرة .. ولكن فهاد الوقت عبد الرحمان غرق حتى لرجلين ، وماقدرش يفلت .. هددوه بولادو وبيا أنا ، ناض هز بناتي بجوج .. وعطاهم لشي ناس يربيوهم … (بلعات ريقها تنهدات ورجعات تكمل كلامها) ، عبد الرحمان طلقتي بغيت نݣول وهمني بلي طلقني ..

– توفيق (شاف فعبد الرحمان ماحملوش) : وعلاش هادشي ؟

– عبد الرحمان : كانو كيهددوني بيها ، وبولادي .. حل لي كان عندي هو نوهمها بلي طلقتها ، ونعطي البنات يترباو عندو عائلات لي ممكن يحميوهم ، ويربيوهم مزيان … اللهم هكاك ولا يقتلوهم ..

– جلال : هادشي كامل سبابو الطمع بي عما ليك عينيك ؟ كرشك كبيرة وخرجتي على بناتك ..

– عالية ( دموعها هابطين سخان) : ماشي غير هو لي غالط ، حتى أنا غالطة وبزاف وغلطت غلطة كبيرة ، فاش مشا هو … المنظمة عرفو يوصلو ليا … كنت داك الساع عاد ولدت بنتي الثالثة ، أما الولد داه عبد الرحمان معاه ليونان … خديت البنت وعطيتها لخالتي أمينة الله يرحمها ، عطاتها لشي ناس كتعرفهم ..

– نزار (غوبش ) : ݣلتي أمينة ؟ سمحيليا الالة ، شكنو سميت بنتك لي عطيتي ؟

– عالية : سميتها فوزية ..

– شامة : بنتك لي ماتت ياك ؟ لي ݣلتي ليا سميتها بحالي ..

– عالية : أه أبنتي ..

– نزار : وبنتك لوخرا بلا خالتي نورة ؟

– عالية (غمضات عينيها بجهد وشافت جيهت شمس لي كتشوف فيها بشك وبإستفهام وحيرة ) :

– سميتها شمس ..

– سعد (تصدم ) : شمس ؟!!!

– نزار (كيترعد) : الله يخليك كملي هضرتك ..

– شمس (كترعد كلها دموعها بداو هابطين ݣاع لي ݣالس كيشوف فيهم ) : السيدة لي عطاتني ، كانت سميتها امينة ، وݣالو ليا بلي كانت خدامة عند شي ناس لاباس عليهم ، متݣوليش ليا ..(دموعها هابطين سخان كتبكي ..) ..

– عالية (كتنخصص فبلاصتها) : أه أبنتي ، عبد الرحمان هو لي عطاك لأمينة ، هي لي عطاتك لشي ناس لاباس عليهم ففاس ..

______

– (شمس دارت يديها على وجها كتنخصص ، مامايقاش راسها ، نورة يديها على فمها … ختها حداها أعباد الله ومكانت عارفة … أش هاد الدنيا الغدارة لي كدير فينا بحال هكا ) ..

– عالية : عطيت بنتي فوزية ، ومشيت لعند المنظمة .. حتى لقيت راسي وليت خدامة معاهم .. وليت انا الكل فالكل ، مولاي الراي والشوار … كنت بغيت نصايب لبنتي فوزية واحد السلسلة نسيفطها ليها … صايبتها ليها من ذهب غالي … وسميت السلسلة بالملكة ، سيف الدين شاف فجلال ، وجلال بدورو شاف فسيف ..

– عالية (تنهدات ) : سقت لخبار لبنتي ماتت ، ماقديتش نصبر .. خبيت السلسلة فالعنق ديال واحد القطيطة كنت مربياها ..

– شامة شافت فجنيد تلقائيا ، وهو بدورو شاف فيها ..

– شامة (مسات السلسلة) : هادي هي سلسلة ياكي ؟ داكشي باش سوليتيني كيفاش وصلات ليا ..

– عالية : أه أبنتي ، هي هادي … كنت مسيفطاها لثورية ختي تحتافظ بيها .. كنت خايفة لا يوصلو ليها المنظمة ، ولا يوصلو ليا ويقتلوني … ولكن الحمد لله البوليس شدوهم من ورا ماعطيت بلاغ ضدهم ..

– جلال ( ضحك بإستهزاء) : بعدا درتي شيحاجة مزيانة فحياتك ..

– عالية : عارفة راسي مدرتش شي حاجة زوينة فحياتي ، وزدت عرفت بلي أنا مسخوطة فاش سقت لخبار لبنتي فوزية … داكشي لي دوزو عليها العائلة لي كانت عندهم ..

– توفيق : فوزية عرفات بلي هادوك ماشي والديها فاش كنا كنقراو ..

– جنيد ( شاف فباه ) : كيفاش فاش كنتو كتقراو ، الواليد اش هاد الروينة واش عارف شيحاجة وحنا معارفينهاش ولا كيفاش ؟

– شامة (قلبها بدا كيضرب بجهد ، شداتها تبوريشة من رجليها ويديها ولاو باردين ، البؤبؤ ديال عينيها هو لي كيتحرك ) : عمي توفيق ، واش كانت شي وحدة كتقرا معاكم من غير ماما سميتها فوزية ، انا عاهدي غير ماما لي كانت كتقرا معاكم ..

– شمس ونورة هزو راسهم كيسمعو هاد الخبار جديدة ..

– عالية (شدات ليها على يدها) : انا نعاود ليك أبنتي ..

– شامة (تنطرات منها او وقفات) : ماتشديش فيا الله يرحم باك ، عمي توفيق هضر الله يرحم جدك ، شنو كاين واش من غير ماما كاينة شي وحدة أسمها فوزية ..؟

– توفيق (حدر راسو) : لا أبنتي ، ماماك بوحدها لي كانت كتقرا معانا أسمها فوزية ، ماماك الله يرحمها قبل ماتموت ، عرفات بلي ناس لي عند بالها والديها ، ماشي هوما والديها وبلي ..

– شامة (لأول مرة فحياتها ، كتحس بدموع خانوها ، عينيها الكبار لي كانو ديما عسليين وضاحكين ، اليوم حمرين وعامرين بدموع ، دارت يديها على ودنيها) : لاااا لاااا لاااا سكت سكت (كتغوت) لا لا متݣولهاش لا ..

– جنيد (وقف كيغوت ) : واش كضحكو علينا ؟

– عالية : لا أولدي ، فوزية بنتي وانا مها … وشامة حفيدتي ..

– علي وقف مصدوم كيشوف فبنتو لي ولات كلها كترعد ، ماعرف ميدير تلفات بيه الجرية ..

– شامة : كضحكو عليا (دموعها خانوها وهبطو سخان ) : كتفلاو عليا ، مايمكنش ماتقوليش حفيدتي متقوليهاش ، أنا ماشي حفيدتك … واش انت ام انت .. المشة ومكتسمحش فولادها .. كتهزهم بسنانها ، الحيوان لي حيوان مكيسمحش فولادو .. واخا تعرفي يقتلزك ويقولو الله يرحمها ومتسمحيش فولادك .. أغبد الله أعباد الله ..

– جنيد (حرها من كتفها) : شامة بردي ..

– ضارت عندو بحال شي ملاك ، دموعها هابطين ، لاول مرة يشوفها هكا عمرو شافها كتبكي ..

– شامة : عرفتي أجنيد شحال كنت كنتمتى يكونو عندي خلاتي يحنو فيا من بعد ما ماتت ماما ، واش عرفتي شحال تمنيت حتى انا يكونو عندي عائلة نمشي عندهم ويجيو عندنا ، ماما ماتت وخلاتني لا حنين لا رحيم .. خواتاتها غير ماتت حتى واحد فيهم مابقاش باغي يشوفنا لا انا لا با ، خرجت ودمرت وخدمت فالمعمل وكنت نسمع الهضرة من عند لي يسوى ولي مايسواش ، اعباد الله (كضرب فصدرها) عندي عائلة كدها كداش ، عندي ولاد الخالات ومعارفاش ، كان فيا الولد والبنت ، عطاو ماما لناس تكرفصو عليها كونما با لي تزوج بيها ، وجايين دابا كيݣوليك حنا جدودك ..

– جنيد (قلبو ضرو ، ولا كلو كيترعد بالأعصاب ، مابغاهاش تبكي كيحس بالعافية شاعلة ليه فقلبو ، جرها وعنقها لصدرو كيدوز ليها على ظهرها وعلى شعرها ) :

– صافي شششش ..

– دفعاتو وضارت عندهم :

– واخا هكاك ، او واخا هادوك ناس تكرفصو على ماما ، ولكن على الاقل رباوها ، مارماوهاش لزنقة وسمحو فيها بحال والديها .. شافت فجدها لي حادر راسو كيبان ضعيف ..

– وانت ، صافي درتي الفلوس والجاه والمال ، ولكن شوف شنو خسرتي ، (ضارت كتأشر بصبعها ) جوج بنات ، و6 ديال الحفايد ، 6 ديال الحفايد … خرجتو علينا الله ياخود فيكم الحق خرجتو علينا خرجتو علينا ، حسبي الله ونعمة الوكيل حسبي الله ونعم الوكيل ، هزات على تكشيكة ديالها ومشات كتجري حلات باب زنقة ، تبعها عماد وجنيد ونزار كيجريو كيعيطو بسميتها .. باها خرج وراها كيجري ..

– شامة (كولشي جا قدام عينيها ، كتنخصص ودموع مغشيين عينيها مكتشوفش قدامها ، غير كتجري والأصوات كتحس بيهم وراها ، ماعرفاتش كيفاش حتى حسات براسها تهزات حتى لسما وتخبطات ، كيبان ليها غير ضباب وظلام وأصوات بعيدة غادية وكتبعد حتى تقطعات) ..

____

– فكولوار بيض ، ݣالسة عالية وعبد الرحمان .. علي ݣالس من جهة لوخرا شاد راسو .. اللحية ناضت ليه ، تم جاي زياد ومعاه إيمان ..

– إيمان (كتبان باكية ) : عمي علي أمضرا فاقت ولا مزال ؟

– علي (تنهد تنهيدة طويلة) : مزال أبنتي مزااااال ، 4 يام هادي وبنتي مزال مفاقتش( دموعو لي كام حابسهم شحال هادي) خفت غير بنتي ضيع مني ، مزال عاد ݣلت زعمة نعوضها على هادشي لي فات ، أنا عاد قطعت لقمر وبريت ، وغادي نخدم ونعوضها على داكشي لي عانات ، الدار تباعت .. اليوم شديت فلوسها ، وكنت ناوي نفرحها ونمشيو نشوفو دويرة جديدة ، نبداو فيها حياتنا من جديد ..

– إيمان (عنقاتو كتبكي) : متݣولش هكاك أعمي ، شامة غادي تولي بيخير وعلى خير ، ودابا تݣول إيمان قالت ،، شفتي أعمي واخا تكون شامة ماشي بنت خالتي بصح … ولكن راه بنسبة ليا انا هي ختي لي مولداتهاش ليا مي ، راه والله لا فارقني عليها شي واحد .. واخا يجيبو وراق دنيا كاملين .. شامة ختي ( معنقاه كتنخصص)..

– زياد (كيدوز ليها على ظهرها) : صافي شش إيمان براكة ، كتبكيو عليها بحال الى دابا واقعة شي كارثة ، شامة قوية تبارك الله … غادي تفيق ..

– علي (من وسط دموعو) : الطبيب ݣالينا بلي ، الحسم ديالها ستقبل دوا ، وبدا كيبرا ولكن العقل الباطني ديالها رافض أنو يفيق … ورافض الدوا ، داكشي باش مزال فغيبوبة ، وبلي هادشي عندها نفسي كثر ماهو عندها جسماني ، ضروري خاص عقلها يستقبل باش تفيق ، أما داتها مافيهاش إصابة خطيرة .. بحال الى ݣلتي هاد الكسيدة ، جاتها على نقطة الضعف ديالها ..

– زياد : ماشي ساهل اعمي ، راه صعيبة بزاف ، وتخلط مع ݣاع داكشي لي دازت منو صعيب ..

– علي : ياربي ، ياربي عوينة وحدة لي عندي وبقات ليا فدنيا ياربي ، تشوف من حالة وترجعنا ليا سالمة ياربي الحبيب ..

– إيمان : إن شاء الله أعمي ، إن شاء الله أترجع حسن من اللول ياربي ..

_____

– فالڤيلا ..

– توفيق : كيف بقات أولدي ؟

– جنيد (كيحس بقلبو محروق ، بحال الى شاعلة فيه العافية ، 4 يام دازو عليه عذاب ، كيشوف فيها من زاجة ناعسة بحال الملاك ، وجها مجروح وجبهتها ، مكتحركش نهائيا ، روحو كانت اتهزق … داكرتو رجعات بيه فديك الليلة وهو تابعها … ماقدش يعتقها ، تهزات قدام عينيه ،، القفطان ليكان موڤ ولا حمر بدم ، كولشي كيغوت الشارع ولا ݣنازة … كولشي خلاتها ولاد خلاتها واخا عاد عرفوها ، نزار لي كان غادي يحماق تقول مو لي تضربات ، كولشي كان فحالة هيستيرية عليها ، كيفاش هزاتها لومبيلونص قدام عينيه) ..

– توفيق (فيقو) : جنيد سولتك أولدي ..

– جنيد (ضور وجهو عندو) : سمحليا ماسمعتكش ، مزال مفاقتش … الجسم ديالها بدا كيبرا .. ولكن عقلها رافض الإستجابة ، عندها هادشي نفساني ..

– توفيق (تنهد) : بسيف أولدي ، ماشي ساهل .

– جنيد (شاف فيه) : مدرتو فيها مايصلح الواليد ، مغاديش تسمح ليكم حتى أنتوما ..

– توفيق : ولدي ، راه كنا خايفين عليها ..

– جنيد : ولاو تكونو خايفين عليها ، ماشي عدر هذا ..

– توفيق : أهم حاجة تفيق دابا ، هذا هو المهم ..

– جنيد (كيدوز على وجهو) : كنتمنى ، أنا خاصني نمشي لكلينيك ، نهضرو من بعد … خلى باه وخرج ..

____

– فأوطيل ، دخل محمود على شمس ..

– واش غادي نبقاو هنا بزاف ، راه عندنا دار وعندنا حياة ، مغاديش نبقى موقف خدمتي انا على ودك وعلى ود عائلتك لي عاد بانت ..

– شمس (كتشوف فيه بواحد البغض) : بغيتي تمشي راه طريق قدامك ، والباب راه وسع من كتافك … متسنانيش نوريها ليك ، وأنا مغاديش نتحرك من هنا حتى نشوف بنت ختي كيف بقات ..

– محمود (كيطنز) : بنت ختك ، أشمن بنت ختك … حمدي الله وشكريه والديك مبانوش هذا شحال ، باش فادتهم السمعة وهوما كانو مهربين ..

– شمس (كتكزز على سنانها) : بصحتهم مهربين ، واخا يكونو حشايشية راه والديا … دارو غلط وعرفو بحقو ، اه دمرونا وشتتونا مكايهمنيش ، المهم مزال عايشين المهم عندي حسب ونسب ، هوما بعدا عتارفو قدام ناس كامل ، وشنو نݣولو على داركم انت وعلى رجال خواتاتك ، لي كيضربو غير من تحت الدف ، حسي مسي واكلين لناس فلوسهم ، وشحال من واحد دوليه أرضو … ياكما يحسابليك ناعسة على ودنيا ..

– محمود (غوت) : حدك تما ، سير حتى تشوفي راسك أصلك وفصلك وأجي تهضري ، نسيتي راسك هزيتك انت او ولدك ..

– جاه صوت نزار من اللور ..

– نزار (بصرامة) : الواليد ، حدك تما وماتنساش راسك هاديك لي كتخضر معاها راه مي ، هي لي كبراتنا وسهرات علينا (وقف قدامو عينيه حمرين) فين عمرك أصلا أنت ديتيها فينا ..

– شمس(شدات ليه فيدو) : ولدي ، باك حشومة ..

– نزار (شافيها) : كيغوت عليك ويعايرك وكدافعي عليه ، مكاينش سكت مكاينش … طغا بزاف هو طغا (رجع شاف فيه ) طغيتي بزاف ، واش يحسابليك نسينا ولا شنو واش غير جيت انا وخويت دار وسكنت بوحدي ، فخبارك الواليد بلي فرح خوات المغرب حيتاش كتبغي واحد السيد مكايبغيهاش ، فخبارك بلي مرضات فصحتها مسكينة ، كونماشي أنا لي وقفت معاها ، لا أنت هادشي مفراسكش براكة عليك غير شركة والأوامر ، راه ربي وصا على الوالدين ولكن ، وصا حتى على الوالدين يربيو ولادهم مزيان ، ويردو ليهم البال … كونماشي الواليدة لي رفدات لينا هبالنا ورباتنا ويهرات علينا ، كان فيها الأم والأب وانت غايب مكاتجي حتى لفجر ، الله يهديك بلاما نحبدو العقود راشية ، وهاديك البنت لي مليوحة فسبيطار ، بنت خالتي بغيتي ولا كرهتي … ونزيدك مغانبقاوش فطنجة أنتحولو لكازا انا وسعد والواليدة ، براكة غير سينين ضيعناهم بعاد على عائلتنا محسوبين بلا عائلة ، بغيتي تجمع حتى أنت عائلتك وتعوضها على داك الوقت لي مكنتيش معاها ، مرحبا وألف مرحبا ، مابغيتيش الواليد .. راه كتبقى بابا ومندوزكش ، ولكن ديك طنجة مابقيناش راجعين ليها ، وأنت تعرف دابا .

– محمود بقا واقف كيشوف فنزار كيفاش كيهضر ، عمر ولدو هضر معاه بهاد الطريقة هادي ، بقا كيشوف شحال ، حدر راسو وخرج ..

– شمس : علاش هضرتي معاك بحال هكا ، حشومة راه باباك هداك ..

– نزار : كان خاصني نهضر هكا باش يفيق شوية ، راه هادشي لي غادي فيه ماهواش الواليدة ..

– شمس : أمضرا اولدي شي خبار على شامة ؟

– نزار (ݣلس باين عليه العيا بزاف ) : مزااال الواليدة مزال ..

– شمس : ياربي ياربي الحبيب تشوف من حالها ، ياربي تشافيها وتعافيها وتفيق ياربي ..

– نزار : كنتمناو ، كنتمناو ياربي تكون خير ..

______

– فالكلينيك ، تسمع صوت ديال خطوات بطالون .. وصوت أنثوي حنين هضر …

– سلام ، شكون فيكم الأب ديال شامة شرف الدين ؟

– وقف علي : أنا الالة ياكما واقعة شيحاجة ليها؟

– تبسمات : لا لاسيدي (مدات ليه يدها) نقدم ليك راسي ، أنا دكتورة نهاد … أنكون المشرفة على حالة شامة ، إلى كان ممكن تجي معايا بغيت نهضر معاك ، وبغيت نسولك شي أسئلة الى كان ممكن ..

– جنيد (وصل فالوقت ، موراه بضبط وصل نزار حتى هو) ..

– شنو واقع شنو كاين ؟

– نهاد (ضارت) : لا ماواقع والو ..

– نزار (مغوبش) : كيفاش مواقع والو ، (شاف فعلي) عني شنو كاين ؟

_____

– علي : ماعرفتش أولدي ، ݣالت بغاتني مافهمت والو ..

– نهاد (بالخاطر) : أنا دكتورة نهاد ، مكلفة بحال شامة الجسمية ونفسانية كذلك ، وخاصني شي معلومات عليها ،، باش نعرف نتعامل معاها على حسب كيفاش عاشت ، وكيفاش كانت حياتها … وقيلة دابا ممكن نكمل خدمتي الى ساليتو الإستنطاق ديالكم ، واخا ماعرفتش شكون انتوما فالحقيقة ..

– نزار (بزعاف) : أنا ولدت خالتها ، وݣاع لي ݣالس فهاد الكولوار عائلتها ، ومن حقهم كاملين يعرفو شنو كاين … ودابا ممكن أدكتورة تشوفي خدمتك كيف بغيتي ، طلعاتو نهاد وهبطاتو ، رجعات شافت فعلي فإبتسامة … خذات يدها فدراعو وداتو معاها للمكتب ..

– نزار (كيخنزر فيها متبعها بالعين ) : دكتورة قاليك ، صباط ديال طالون فالكلينيك ، إزعاج المرضى بحد داتو ..

– جنيد : برد أصاحبي برد ..

– نزار (غمض عينيه وفتحهم) : خاصني قهوة قاصحة والله ..

– جنيد : حتى أنا .

– نزار (أشر لجداه وجدو) : هادو مزال هنا ؟

– جنيد : كيطلع الصباح كتلقاهم هوما اللولين ..

– نزار (ضحك بإستهزاء) : عند بالهم بهاد المجيان ديالهم ، غادي يكفرو على الغلط ديالهم أودي ، يلاه اخويا من هنا حاس براسي ماهواش ..

– جنيد : يلاه ..

______

– على برا ، واقفة أحلام وعماد ..

– أحلام ، وحق الله حتى حاسة براسي كنحلم … مابقيتش كندوق النعمة ..

– عماد : وجهك أصاحبتي صفر ، فطرتي بعدا ؟

– أحلام : لا مافياش ..

– عماد : تي ريحي أشمن مافياش ، خليك هنا انمشي نجيب ليك شيحاجة ونجي ..

– أحلام : واخا ..

– مع مشا عماد ، وقف طاكسي … هبط بهاء خلص .. هز راسو بانت ليه أحلام واقفة بوحدها ، حدر راسو وجا عندها ..

– بهاء : أحلام .. هزات راسها شاف فيه ..

– أحلام : سلام ، كيف بقات يدك شوية ؟

– بهاء : الحمد لله ، شوية بعدا ..

– أحلام : سمح ليا ، بسبابي أنا درتي كسيدة ..

– بهاء : بالعكس ، أنت لي سمحيليا … مكنتش كنفكر مزيان حتى أنا ، كنت غالط بزاف وهادشي نيت نناسبة باش ، باش نعتادر ليك على داكشي لي ݣلت ليك … وكنت السباب حتى خرجتي من الخدمة ، هضرتك ليا بدلات بزاف ديال الحوايج .. كنتمنى تقبلي الاعتدار ديالي ..

– أحلام (تبسمات) : ماشي مشكيل ، المسامح كريم .. أهم حاجة الواحد يعرف الغلط ديالو ، والإعتراق بالخطأ فضيلة ..

– بهاء : داكشي لي كاين ،أمضرا شامة فاقت ؟

– أحلام (تنهدات تنهيدة طويلة) : مزاااال ، بيني وبينك وغير سمحليا على هاد الكلمة ، كون غير مامشات عندكم لدار ، والله كون مامشات مغاتعرفش على ديك عالية ولا تشوفها ولا تلقى ديك سنسلة ولا يوصلو ليها..

– بهاء : غير كيبان ليك والله ، شفتي جدودها كانو غادي يلقاوها غادي يلقاوها ، سوا كانت عندنا ولالا ، واخا تخوي كازا ݣاع … كانو غادي يلقاوها .. راه مصير الحيين يتلاقاو طوال زمان ولا قصار …

– أحلام (تنهدات) : بصح ، سمحليا راه كولشي تخلط عليا وحق الله ..

– بهاء : عارف لي كاين مكاين باس ، إن شاء الله يكون خير ..

– رجع عماد وقف عليهم ، أشر لبهاء براسو ..

– بهاء : نخليكم سمحوليا ..

– عماد (خلاه حتى مشا) : شنو كان باغي؟

– أحلام : كيسول على شامة ..

– عماد (مد ليها سوندويتش) : هاكي كولي ..

– أحلام (شداتو عندو) : لهلا يخطيك ..

______

– فبيت مصبوغ بالبيض ، فيه طابلويات جوج فالغوز .. بوكي ديال الورد أحمر حدا راسها .. ناعسة بحال الملاك .. شوية بشوية حلات عينيها كدورهم فالبيت ، كتستوعب فين هي .. عرفات راسها فسبيطار ، تنهدات تنهيدة طويلة … ملامح وجها مامقريينش ، شوية دار البوانيي ديال الباب ، مع تحل مع غمضات عينيها .. دخلات نهاد حطات واحد الملف من يديها ، او مشات لحدا راسها او وقفات …

_______

– هبطات نهاد عند مستوى راسها ، حلات ليه العين لولة قلباتها ، ومشات للعين تانية قلباتها حتى هي .. بعدات شوية مقابلة شامة .. رجعات بلور وجرات الكرسي لي كان قريب منها ، وصلاتو حدا النموسية وݣلسات … دارت رجل على رجل وبقات ساكتة ..

– نهاد (تنهدات ) : شامة ، أنا عارفاك فقتي من الغيبوبة … مكاينش لاش ديري راسك ناعسة ، الى ممكن تحلي عينيك .

– تنهدات شامة تنهيدة طويلة وحلات عينيها ..

– نهاد (بإبتسامة ) : على سلامتك ، كيف كتحسي راسك شوية ؟

– شامة (بصوت عيان) : الحمد لله ، بغيت غير نشرف فمي ناشف ..

– نهاد (بهدوء) : واخا .. هزات القرعة لي كانت حداها كبات ليها فالكاس ، وشرباتو ليها ..

– نهاد : صاڤا دابا مزيان ؟

– حركات ليها شامة راسها بالإيجاب ..

– نهاد (بهدوء تام) : شامة ، ممكن نعرف علاش درتي راسك ناعسة فاش دخلت ، عارفة بلي عاد فقتي من الغيبوبة ، ولكن شي واحد أخور كان أيبقى فايق … يسول شنو وقع ليه فين هي عائلتو ولالا؟

– شامة (دورات عينيها عندها) : فحالة عادية ، ماشي فحالتي أنا .. كون غير بقيت فغيبوبة حسن ليا والله ..

– نهاد : شامة ، كولشي فهاد دنيا عندو حل ، أنا عارفة لي داز عليك ماشي قليل … الواليد ديالك عاود ليا كولشي ..

– شامة (قاطعاتها) : شفتي أدكتورة ، بابا هو الحاجة الوحيدة الزوينة لي طرات ليا فحياتي ، هو وصحابي … بابا هو كنز كنز ، تحمل مسؤولية بنت صغيرة كبرها قراها كساها شربها ، ضرب عليها تمارة وكان فيه الاب والأم بجوج ، فالوقت لي جدودي ياحسرة مفطحين وعايشين الحياة ، هو كان كيدمر ماحيلتو لخدمتو ماحيلتو ليا … بابا واخا نفني شبابي كامل ، مانوفيهش حقو وداكشي لي قاصة على قبلي ، حيت كون شي واحد اخور ، كون تزوج وجاب عليا مرات الأب لي قليل فين كتصدق شي وحدة حنينة ، ولكن هو ختار يبقى بوحدو … الى كان شي واحد خاصو يعرفني فقت او وليت مزيان فراه هو ، أما شي واحد أخور مغانزيدو مغانقصو ..

– نهاد : ولكن الشامة ، كونما كنتيش مهمة بنسبة ليهم مكانوش غادي يتسناوك ، وفهاد الدنيا أصعب حاجة هو الإنسان مايعتارفش بالغلط ، ولكن هوما عتارفو بالغلط ديالهم ، وكنظن كون مداروش ديك الخطوة شحال من حاجة مكانتش غادي توقع ..

– شامة : بحالاش مثلا ؟

– نهاد : كونما تعطاتش ماماك ، مكانتش غادي تلاقا بباباك ولالا ،ومكانش غادي يكون عندك أب حنين وظريف بحالو، كيبغيك وحيد من لحمو وقراك وكبرك ، كان ممكن ماماك تاخود شي واحد لاباس عليه ، همو الوحيد هو الفلوس ، كان ممكن تقراي وتكوني لاباس عليك وبيخير ، وبطوموبيلتك بخدمتك ، ولكن حنان الأب مكاينش ، وكان ممكن يتزوج ويجيب مرات أب لي متعاملش معاك مزيان ، وتعيشي تشتت أسري ولالا ؟ أي حاجة خاصنا وقعات خايبة ، خاصنا نشوفو فيها الجانب الإيجابي ، أنا مكنݣولش ليك هادشي باش تسامحي ، ايجي وقت وغادي تسامحي .. ولكن خاص تشافاي من الداخل ..

– شامة (بتتاقل) : هاد الساعة بغيت نخرج من هنا ونبعد ..

– نهاد : وي ممكن تسافري ترتاحي ..

– شامة : مكاينش فين ، ماعنديش شي عائلة بعيدة على هنا ..

– نهاد (وقفات حطات يدها على كتف شامة) : تشوفك عائلتك ويكون خير ..

– شامة : دكتورة ، شكون كاين على برا ؟ الى كانو صحابي وبابا وإيمان ، هوما لي بغيتهم يدخلو عفاك ، شي واحد أخر مابغيتش نشوفو … عفاك مابغيتش نشوف شي واحد من غيرهم ..

– نهاد : داكوغ الالة متكون غير على خاطرك ..

______

#الكافيتيريا

– جنيد ( جغم من القهوة ديالو) : شنو غادي دير فريستو لي عندك فطنجة؟

– نزار : كاين واحد السيد كنعرفو ، كان عينيو عليها وعاجباه ، أي ثمن ݣلتو ليه أيحطو ..

– جنيد : هي ناوي تسكن هنا ؟

– نزار : كلشي على قبل الواليدة ، شحال وهي بعيدة على دارهم مكانتش عارفاهم حتى شكون هوما ..

– جنيد (تنهد) : وباك أش ݣال؟

– نزار : أش عندو مايݣول ، تفرݣعت عليه تفرݣيعة متورخة ، كيبقى با وخاص نحتارمو …ولكن خاص لي يفيقو بعيبو ، عمري فحياتي هضرت معاه بشي هضرة ماهياش ، ولا رفعت صوتي .. الوالدين كيبقاو خط أحمر واخا يتعداو علينا ، خاصنا نحتارموهم ومنهزوش صوتنا عليهم ، ولكن فاش شفتو كيفاش هضر مع الواليدة ماشعرتش ، قسما برب ماشعرت كيفاش حتى هضرت هكاك ، ولكن راه كتر أصاحبي بزاف وزاد فيه ، كان ضروري خاص شي حد يݣوليه شنو كاين ..

– جنيد (كمل لي بقا ليه فالقهوة) : ماعليش كتوقع ، المهم هانتا اتقرب مغاتبقاش محجج بالخدمة وطريق ..

– نزار (كيشوف فيه بنص عين) : وأنت السبع ، بحال الى مخبي عليا شيحاجة ..

– جنيد (ببرود) : شكون انا ، بحالاش مثلا ؟؟!!

– نزار : كتبغيها أصاحبي ، طحتي طيحة وحدة .

– جنيد : مازال مافهمتكش شنو بغيتي تقصد !!!

– نزار : جنيد ، ماتبقاش تبهلل عليا أصاحبي راني شاربك ما ، شفتك كيدرتي عليها عقلك كان ايخرج من بلاصتو ..

– جنيد (سكت كيشوف بعيد) : قصة وسديناها ..

– نزار : علاش هي بدات باش تسالي ؟

– جنيد : مغاديش تبدا انزال ، وسلات قبل ماتبدا … مابغيتش نطول فالموضوع ونهضر فيه ، قلب أصاحبي ..

– نزار : أنت تعرف ..

______

– علي شاد ليها فيديها ، حداها إيمان وطبيبة ..

– شامة : با وا با الله يرضي عليك وصافي ، أنا ݣدام عينيك بحال البݣرة ، وصافي ..

– إيمان (كضحك) : شفتي أعمي أمنين رجعات لهاد لقجم ديالها ، صافي عرفها ولات بيخير ..

– علي : خرجتيها منا خلعة أبنتي ، فخبارك بعنا دار صافي وبثمن واعر ،، نقدرو ناخدو دار زوينة ويشيط لينا باش نفرشو ..

– شامة : با بغيت نخرج من هنا ، أنمشي عند أحلام نݣلس عندها ، بيما لقينا دار فين نسكنو ، مابغيتش نرجع للڤيلا الله يعطيك الستر ..

– علي : وابنتي أحلام كاين خوها صغير ، وأنت مريضة شكون أيݣابلك مجاتش ..

– إيمان : علاش أختي أتمشي وأنت مريضة ..

– شامة : مغاديش نرجع لديك الڤيلا ، أنت دابا تزوجتي تهنيت من جيهتك ، وشوفي عندك يݣوليك راسك مابقيتش من دمها راه صافي ، واخا تبان شحال من عائلة ، اتبقاي انت هي عائلتي وبنت خالتي ..

– إيمان : غرغرو عينيها بدموع) عارفة حتى انت راه هي لي عندي ، ماعندي حد من غيركم ..

– شامة : وهكاك ..

– نهاد : إلى بغيتي أشامة تقدري تجي لعندنا لدار ، تݣلسي معانا ..

– شامة : أويلي ادكتورة مجاتش ..

– نهاد : بالعكس ، منها تبدلي الجو .. ونقدر نقابلك حتى تبراي نفسيا وجسديا ، بينما سي علي لقا الدار لي اتسكنو فيها ، وداك الساع الله يعرضك السلامة .. وزايدون أيعجبك الحال ، دارنا بعيدة على كازا شوية ، أتلقاي طبيعة وممنوع تسمعي الصداع ..

– شامة : بابا شنو بان ليك ؟

______

– علي : سيري أبنتي ، منها نيت ترتاحي وتبدلي الجو .. دكتورة عفاك إيمتا تقدر تخرج ؟

– نهاد : حنا كنا كنتسناوها غير تفيق من الغيبوبة ، الجسم ديالها تقبل العلاج ، واخا مزال ليها شي كدمات ولكن راها مزيانة ، تقدر تخرج من هاد العشية .. ولكن من الأحسن ترتاح حتى لغدا ..

– شامة : لا عفاك ، بغيت نخرج اليوم … ومابغيت حتى واحد يعرف عفاك ولا نشوف حد ، هاد الساعة مامستعداش نشوف شي واحد والله …

– نهاد : داكوغ ، أنت رتاحي وأنا غادي نتكلف .. خرجات نهاد وبقا علي مع شامة ، خلاتهم إيمان وخرجات ، كان زياد على برا وجدود شامة ..

– عالية : بنتي أمضرا ، شامة فاقت ؟

– إيمان : اه فاقت الحمد لله ، ولكن سمحيليا مابغاتش حتى تشوف حتى واحد ..

– عالية (حركات راسها) : مكاين باس أبنتي مكاين باس ، المهم عندي هي ولات بيخير وعلى خير ، هذا هو المهم ..

– زياد (جر إيمان) : كيف بقات دابا ؟

– إيمان : لا دابا بيخير الحمد لله ، غادي تخرج تمشي مع دكتورة لدار ..

– زياد : وعلاش ؟ مغاديش تمشي للڤيلا؟

– إيمان : بغات تبعد أزياد ، راه مايمكنش ترجع للڤيلا فهمتيني ، هي مابغاتش تشوف حتى واحد دابا ، حتى ترتاح وإن شاء الله يكون خير .. غادي نمشي لدار نجيب ليها حوايجها النقيين ونجي ..

– زياد : سيري سبقيني لطوموبيل ، نقضي واحد الغرض ونجي صافي ؟

– إيمان : واخا صافي .. سبقاتو إيمان للطوموبيل ، وهو مشا خرج …

_____

– نهاد قامت بݣاع الإجراءات ديال خروج شامة ، رجعات إيمان فيديها ساك ، فيه حوايج شامة ، دخلات عندها ، مع دخلات وصلات زينب توفيق ، تبعاتها نورة وجلال وشمس ..

_____

– زياد كان واقف مع جنيد ..

– نزار (كاعي) : وايلي على باغية تمشي مع دكتورة ، علاش وعائلتها راه خرجان العقل هذا ..

– زياد : نزار راه مايمكنش أصاحبي ، واش هي عاد عرفات عائلتها غادي تمشي معاهم مايمكنش ، ومزيان ليها ترتاح وتبدل الجو ، وطبيبة اتكون قريبة ليها باش تكلف بالحالة ديالها ..

– جنيد (ملامح وجهو جامدين ، مامقريينش) :

– ݣالت ليك بلي مابغاتش تشوف حتى واحد ياك ؟

– زياد : هادشي لي ݣالت إيمان ، نفسيتها مزال مأزمة داكشي باش راه طبيعي هادشي ..

– جنيد (حرك راسو) : مكاين باس ..

– نزار : أنا انطلع نشوفها ، مغانبقاش واقف هنا .. خلاهم نزار وطلع ..

– زياد : ماتبقاش هنا أخويا ، انا لفوق .. مشا زياد وبقا جنيد بوحدو ساهي فنقطة معينة ..

______

– نهاد (مدات لعلي ورقة) : سي علي ، هذا العنوان ديال دارنا ، مرحبا بيك فأي وقت ، الى بغيتي تحي حتى أنت ماعندي مشكيل ، الحمد لله كاينة الواليدة والواليد ، كاينين خوتي لوخرين .. شامة متخافش عليها ، أيكون فيا دكتورة ديالها وصديقتها ..

– علي : عارف لي كاينة أدكتورة ، إن شاء الله أندير جهدي فهاد الأيام نلقا دويرة ونجيب بنتي ..

– شامة : عندك ابابا تشوف شي دار ماهياش ، الله يعطيك الستر ختار شيحاجة تكون مزيانة ..

– علي : خليها عليا ، دابا تشوفي غادي نعجبك أتهناي ..

– نهاد : وأجي اسي علي ، نخليو شامة تبدل حوايجها ..

– خرج علي ونهاد على برا ، العائلة كلها مجموعة … أحلام هي وعماد حتى هوما كاينين ، سعيدة بهاء من غير سعاد لي مكايناش هي وسعد ..

_____

– إيمان : التيليفون أيبقى بيناتنا ، وغادي نبقى نحي عندك بينما لقيتو دار ..

– شامة : إن شاء الله ، وقفاتها إيمان غير بشوية ..

– شامة ( وقفات ورجعات ݣلسات) : ناري شداتني الدوخة ..

– إيمان : حاجة طبيعية تشدك الدوخة ، غير حاولي غير بشوية عليك ، دقة دقة … بقات معاها إيمان حتى نوضاتها ، طرفات ليها حالتها ولبساتها حوايجها ، دارت ليها واحد الشال على راسها وقداتو ليها .. رشات ليها ريحة شوية باش توݣض ومايبقاش فيها دوخة ..

– دخلات عليهم نهاد هي واحد الفرملية جرا كرسي متحرك

– صافي واجدة ؟

– شامة : أه ..

– نهاد : وأجي ݣلسي هنا ، ݣلسوها على الكرسي وخرجوها ، هزات راسها كيبانو ليها كولشي قدامها ..

– بقات كتشوف فيهم واحد بواحد ، تخطاهم نزار ووقف قدامها ، نزل قفازي كيشوف فيها ..

– نزار : ماشي ضروري تخوي ..

– شامة (تنهدات) : بغيت نرتاح ، ماشي قليل لي داز عليا ..

– نزار : حنا ماعندنا دنب فهادشي ، حتى حنا راه بحالك ..

– شامة : هادشي عارفاه انزار ، شفتي الخاحة لي زوينة ، هي لقيت خالاتي او ولاد خلاتي(غرغرو عينيها بدموع وسالو سخان على خدها) أصلا (شافت فنورة) نهار شفت خالتي نورة حسيت بإحساس فشكل والله … نورة قربات منها ، تحنات عندها وباستها فراسها معنقاها ، كتمسح ليها على راسها ..

– شامة (كتبكي) : شحال زوين يكون عندك شي حد حنين ، يطبطب عليك ويكون معاك ..

– شمس (جات عندها عنقاتها كتبكي) : حنا فينا عائلتك الحبيبة ديالي ، حنا خالاتك ومواتك أبنتي ، لي تقالت عليك خفافت علينا أبنتي ، وغادي نبداو من جديد ونكونو مع بعضياتنا ، ونعوضو كاع لي داز وفاتنا ..

– نزار : شفتي ، هاهي عائلتك كاين انا فيا خوك او ولد خالتك ، وكاين صحابك ها عماد ها أحلام ..

– زينب (قربات منها) : سمحيليا أبنتي ، سمحي لينا ماقصدناش نخبيو عليك ..

– شامة : خالتي زينب ، أنا مامقلقاش منكم .. خيركم سابق ، المسامحة هي لي كاينة .. ولكن أنا بغيت نبعد بغبت نرتاح ، فاش نولي مزيانة غادي نرجع ، خليو ليا عفاكم شوية ديال الوقت ..

– شمس : واخا أبنتي واخا خودي راحتك أبنتي ..

– شامة : تيليفون بيناتنا ، ومزال انݣلسو وغادي نتعاودو وغادي نتعرفو على بعضياتنا مزيان ، خليت ليكم الراحة وسمحوليا عدبتكم معايا ..

– نهاد : مشينا ؟؟

– شامة : واخا يلاه … دفعاتها نهاد فالكولوار ، دازت من حدا جدودها ، جات عالية تهضر مشافتش فيها ، تخطاتها ومشات ، مع وقفات نهاد قدام لاسانسور … دورات شامة راسها … لقاتو واقف كيشوف فيها بشوفات ممفهومينش ، كتشوف فيه وكيشوف فيها … شوفات فيهم بزاف ديال الحوايج ، فيهم عتاب ويمكن فيهم وداع ، ويمكن كلهم حب … شافت مفاهمينهم غير هوما بجوج … تحل لاسنسور حركات نهاد الكرسي … غمضات شامة عينيها ودورات وجها ، تسد باب لاسنسور وسدات شامة على الحياة القديمة وعلى المعاناة وعلى ݣاع هادشي لي عاشتو ، تسد الباب وتنهدات تنهيدة طويلة ، وفالداخل ديالها باغية تغلب على ݣاع هادشي وتبدا حياة جديدة ، تعكي لراسها فرصة أخرى ولناس لي ضايرين بيها ..

يتبع