كــالــيــفــورنــيـا الــولايــات الــمــتــحــدة الأمــريــكـيــة🇺🇸
وبالضبط فمدينة{ســان ديــيــغــو}وحدة من افضل المدن السياحية بامريكا المتميزة بشواطئها الصافية ومناخها الدافئ على طول العام كانو بالضبط فشاطئ la Jolla Cove لكان عامر شي كعوم وشي جالس كتشمش الفئة الطاغية فالبحر ديك الساعة كانو لي كوبل والكليكات دالصحاب جو صيفي زوين داك النهار غير ديال التبحيرة كانت متكية على الرولاكس تتشمش دايرة نظاظر كحلين ولابسة مايو دوبياس تكعدات شوية جلسات هنا شافت صاحبتها خارجة من البحر جاية كدوز يديها على شعرها الطويل جمعاتو شفنجة شداتها بقراسة كانت ملصاقها فالسوتيان دالمايو بخطوات موزونة تتمشى طاي مقادة عامرة شوية مبيناها كبيرة على عمرها خصر مشدود صدر واقف واللور حتى هو حاضر وحتى الرياضة مخلية طايتها جذابة وانثى كاملة مايو دوبياس صفر على لحمها لبيض الصافي والفازك مخليها تبان سيكسي شي لخلا مجموعة من الشباب جالسين يتبعولها العين جلسات حدا صاحبتها هزات فوطة تتمسح ونطقات بالانجليزية:نوضي تعومي البحر غزال بينما يجيو
صاحبتها لكانت امريكية حيدات النظاظر وناضت خلاتها تكات تاهي على الرولاكس تشمش ويشد فيها اللون ماشي بزاف حتى وقفو الكليكة ديالهم لكانو تتسناو جلسو تعرمو حداها دغيا نصلو حوايجهم ولحقو على صاحبتها بقات غير هي وواحد من الدراري لكان مغربي حتى هو شافت فيه:شنو درتي معاها فالمشكل لي وقع؟
معتز ضور وجهو كشوف فلبحر طلق تنهيدة تتبين على انه حزين:مقتانعاتش بهضرتي المشكل زاد كبر خليتها على خاطرها
دينا شدات فيه:دانييلا كتبغيك غير معصبة انا لي كنعرفها وسولاتني عليك لبارح غير رتاح راك فبالها
تبسم من كلامها وضور يديه على عنقو جارها عندو وحتى هي عزاز على بعضهم قراو مجموعين وزيد جامعاهم تمغاربيت واخا مكعرفو والو فالداريجة لانهم تولدو وكبرو تما فميريكان رجعو صحابهم وبقاو مدة تما فالبحر ضاحكين حتى جا لوقت فين يمشيو كانت لابسة شورط جينز تيشرت خفيف قصير مبين كرشها كلاكيطة فرجليها جامعة شعرها شفنجة كانت مزنݣة وشد فيها شوية اللون ركبات فطموبيلتها ومعاها صاحبتها وبنت اخرى من الكليكة ديالهم ديمارات وزادو ومعاها طوموبيل اخرى فيها لبقى من صحابهم شادين وجهة وحدة لهي دار واحد منهم ناويين يتجمعو ويسهرو الليلة
داز الوقت كانت جالسة فوق الناموسية لاوية عليها الفوطة دوشات من ملحة البحر الطيليفون فيديها تتهضر كلامها كولو بالانجليزية:صافي اماما غدا غادي نرجع قوليها لبابا
الام:رد لبال لراسك ادينا عنداك تمشي تشربي وياك
دينا زفرات:صافي صافي شحال عاودتيها مهم نخليك خاصني نلبس راني يلاه خرجت من الدوش(نطقات بعربية معكلة)كنبغيييك بزاااف يلاه باي
توادعات مع ماماها لي تتوصي وتعاود واخا كبرات تما متتعرف للعربية من غير كلمات قلاال بزاف الا وأن عائلتها حارصين على تربيتها لان تربية برا صعيبة السيبة كاينة متنكرش انها دارت شي لعيبات ورا ضهرهم فايت كمات وفايت شربات ولكن غير جربات داكشي الصعيب مقدراتش عليه وزيد راه تما واخا متبغيش دير غادي يوسوس شيطانها غتشوف قرانها كديرو العجب لبسات حوايجها شي حاجة خفيفة شورط وتيشرت جات صاحبتها بدات تتصايب لها شعرها بلبلاك وشادة الطيلي طلات عليها ونطقات:كتهضر مع لمغربي
دينا تتكتب ميساج:هو لي كاين اصلا
كايلي:راه خاصك تمشي لمغرب تشوفيه مفهمتش عامين ونت معاه غير فلواتساب كيفاش داير عندكم هاد الحب ونت طلاقيتيه غير مرة وحدة
دينا:هادشي مكتعرفيش ليه ولكن بصح خاصني نمشي
كانت تتهضر معاه ومبسمة غطير تتحماق عليه واخا عامين مشافتو كدويو غير فلواتساب داكشي ديال حب المسافات طلاقاتو مرة وحدة تعرفات عليه فواحد العرس دلعائلة كانو حضرو ليه فاش نزلو لمغرب واحد لعام وبقى حتى خدا نمرتها ولد خت مرات عمها من تما وهي معاه مكتمشيش لمغرب بزاف كاع عكس واليديها ولكن هاد المرة تتفكر تنزل باش تشوفو قادو راسهم غير شوية ماشي شي حاجة لانهم غيسهرو غير فالدار كانو ضايرين بالطبلة حاطين بيتزا والموناضة وحتى شي قراعي دالشراب وكلعبوUNOصفقات على راسها بعدما ربحات وهي كضحك هزات ݣارو يلاه دارتو فمها وهو يخطفو لها معتز:لا
دينا عبسات:راه ماشي اول مرة
معتز رماه فوق الطبلة:عارف ولكن خاص تحيديه نت زوينة وماشي ديال هادشي ومتنسايش حنا راه ماشي منهم وماشي بحالهم ومسلمين من لفوق تانا غادي نقطعو
دينا بقات تتشوف فيه محركات راسها باه دغيا قتانعات لانها واخا تزادت تما راه ماشي منهم الاصل كغلب واخا تكون ضارب السنين تما وزيد بشوية بدات تتندم على نهار شربات واخا غير مرة وحدة ونهار كمات لانها سبحان الله غير كديرها كتوقع شي حاجة تفيقها مثلا شي فيديو ديني تطلع لها ولا تتسمع شي حد كدوي فدارهم على المحرمات مهم تتوقع شي حاجة كتزيد تبين لها بلي داكشي حرام وخايب
واخا ترعرعات تما الا وأن عندها ضمير أصلها العربي والمسلم كغلب وزيد عائلتها رغم الغربة متبدل فيهم والو تما عايشين عيشة مغربية فالدار واخا متتصليش تتشوفهم هما شنو كديرو وماماها تتوصيها وتشرح لها ديما تنهدات ورجعات اللور وهي تتفكر بغات تمشي لمغرب آخر مرة مشاتلو كانت عندها 17عام توحشات جدودها واليديها لكانو كنزلو بزاف وهي مرة قارية مرة متبغيش تنزل كانت جاتها واحد المراهقة خلاتها تلهى بلحياة تما والخروج والضوران ونسات بلادها وزيد كورونا ولكن دابا بدات تتفيق وهي تتشوف صحابها النصارى يحماقو ويمشيو لمغرب وهي لبلادها ممسوقاش ليه عاد الضوء لي سطع عليه فإنجاز كأس العالم خلا بزاف يحبوه كثر ومنهم هي وحتى داك لي هي معاه خلاها تولي باغية تمشي باش تشوفو مفيقها من سهوتها غير طيليفونها كان هو نيت ناضت تتنقز خرجات للجردة تهضر معاه فرحانة غطير شافت واحد من الدراري صحابها واقف ككمي غمزها سيفطات ليه بوسة فلهوا وهي تتهضر فرحانة غارقة فالزعطة مسكينة
هادي دينا 19عام مغربية من الجالية المقيمة بالديار الامريكية تولدات وترعرعات تما فالغربة حياتها دازت زوينة عادي لان عائلتها رغم الغربة ميسورين وهادشي كرجع لنسلها المغربي جدودها بزوج لا ديال ماماها ولا باباها بخيرهم بحالها بحال كاع قراناتها لا لمغربيات ولا لمريكانيات فيها ديك النغزة ديال الخفة والطيران تبغي تجرب تلبس وتخرج خصوصا تما مكاين لي يحاسبك من ناحية الزين زويييينة كيفما كقولو بياسة على لي جامعة زين الوجه والفورمة الحاجة لي فيها زوينة هي انها ماشي من واحد لواحد تهضر مع هدا وتمشي عند لاخر لا عكس بزاف تما وهادشي بسباب حبها للمغربي لي معاه واخا بعيد عليها وعندها الحرية الكاملة الا وانها فيدال مسكينة رجعات لكليكة فرحانة جلسات حدا معتز وكملو اللعب والضحك مدوزين ليلة ممتعة بين الصحاب
نهار جديد🐚
لاحت الصاك وجلسات فوق البوطاجي كتلعب برجليها وختها كطيب كهضرو بزوج شافت فيها ونطقات:مزال مقلتيش لمراد داكشي لي قلت ليك
دينا غير سمعات كلامها ضورات وجها:مزال
جوليا:وشنو تتسناي عادي مالك غير جربيه هنا غتعرفيه واش باغيك ولا لا
دينا:واش لمباغيكش غادي يصبر معاك عامين بلاما يشوفك اجوليا اويلي
جوليا فهاد اللحظة تبسمات باستهزاء قربات عندها ونطقات:على قبل وراق هنا يصبر حتى عمرو كامل الجنسية راه حلم العمر لاي واحد كطمح يخرج من المغرب مغتخسري والو الا جربتي مدام خايفة اذن راك شاكة
دينا وهي مخنزرة فهاد اللحظة شدات الطيلي ديالها وبدات تتكتب ليه
بغات تتبث لختها انه كنبغيها بصح لانها ديما تتقوليها تستغلك على ود الوراق وكدا لانه مخدام مردام ولكن كن كان بصح مغاديش يصبر عامين بلاما يشوفها:مراد حبيبي من شحال وانا باغية نقول لك واحد القرار تاخدتو هو انني صافي قررت نجي نستقر فالمغرب لي هو اصلي ونكون حداااك❤️
سيفطاتو ليه كان مداخلش جوليا ضارت تتكمل كانت كدير ليكخيب مالحين سالات ومشاو بزوج كتفرجو ودينا عينيها على الطيلي:هاهو شاف الميساج
قلبها بدا كضرب جوليا تتشوف معاها هنا وهو يصوني ليها دغيا جاوبات:الو
مراد مصدوم:واش كدوي بصح براكة من الضحك لباسل
دينا وهي كضحك:اه هادشي مفيهش ضحك مالك شفتك تصدمتي مفرحتييش
مراد عض على شفايفو:بلاتي بلاتي شوية ونعيط لك
قطع عليها خلاها تتشوف فختها لي تتاكل هزات كتافها:شفتي
دينا:غتكون عندو شي حاجة انا متاكدة شوية وغيسيفط
وكملات الفراجة عادي لانها ممدوزاش معاه القليل عارفاه غيسيفط ككون مشغول عادي وزيد متأكدة كبغيها غير بداكشي لداير عليها واخا غير الميساجات مهتم بيها يسول بليل والنهار غير تسيفط يدخل داك الساع واخا تكون غالطة هو لكصالحها
وزيد انه كقشع شوية فالانجليزية هادشي باش عاجبها كثر
داز الوقت وظلام الحال كانت فبيتها جالسة على اعصابها كتسناه يبان عمرو غاب وتعطل قد هكا من قبيلة وزيد كطلع لها اونلاين تعصبات مبغاتش تعيط لانه هو لكجي عندها ديما ولكن مقدراتش تصبر وهي غير كانت كضحك معاه فداك لبلان تمشي عطلة اه ولكن تستقر لا صونات ليه المرة الاولى والثانية حتى لتالثة عاد جاوب ببرود:الو نعام؟
دينا:فينك شنو عندك كنشوفك اونلاين معاودتيش عيطي
مراد ببرود:ممساليش عندي مايدار
دينا لاحظات انه مبدل:مالك شفتك مفرحتيش حيت غنجي
مراد زفر:شنو بغيتي نقولك راك غتجي غلبلادك حاجة عادية
جوليا دخلات فهاد اللحظة حداها ودينا دارت المكبر وكملات فالتمثيل:زعما غادي نتشاوفو من بعد عامين وغادي نستقر باش نكون حداك ديما مالك؟
مراد وهو معصب لانه مسرحية عامين تضربات ليه فالزيرو كلشي تبخر:ماشي على هادشي تافقنااا قلتي غتجي وغتمشي
دينا طلعات حاجب وشافت فختها لطلبات منها تكمل:علاش غير سمعتي غنستقر وتبدلتي ياك كتبغيني وكتحماق عليا كيفما كتقول خاصك تفرح حيت غنبقى معاك ديما ولا نيتك فشي حاجة اخرى ماشي انا
مراد وهو مفقوص بدا كغوت عليها:كنبغييك اه ولكن ماشي على هادشي تافقنا بنيت معاك احلام وشحال من حاجة غنديروها بزوج ولكن ماشي فالمغرب ادينا انا شفت معاك مستقبلي ومصلاحتي لهيه ماشي هنا انا لي نجي عندك اما الا كنت نت لغتجي وتستقري ملفوق غا ضربي عليا نفاريوها ونسدو هنا
دينا مع كمل كلامو خرجات عينيها وبقات مبلوكية لا راه قالها ليها فوجها بكل وقاحة كعتارف انه باغيها لمصلاحتو ختها خطفات لها الطيليفون وهي معصبة دارتو فوذنيها وبدات تتعطيه بالعربية:الو الشماتة عندك الوجه تقولها معول على بنت هي لي تقاد حياتك كترتو يا اشباه الرجال هاد العامين لي نت خدام كضحك عليها كن تخدم فيهم كن راك لباس خرجتي لها طاي طاي ودابا كنقسم لك بالله وتبقى تضور بختي حتى نخسر على يماك طيارة ونسيفطك فين تربى تفووو
مخلاتش ليه فين يجاوب قطعات ورمات الطيلي ضارت عند دينا لكانت مصدومة حتى بدات تدخل وتخرج فالهضرة:لا لا ميمكنش لا لا ميمكنش لا لا غير كضحك غير ككذب
الفقصة والشمتة والصدمة تجمعو عليها خلاوها تفركع بالبكى قدام ختها لي حركاتها تتعنق فيها وتتواسيها:صافي شووو سكتي تفكيتي منو واخا تعطلنا باش نعرفو وجهو الحقيقي صافي قلتها ليك ولد لحراااام
دينا تتبكي وتشهق بحرقة غطرطق مرضاتش من بعد كلشي مستحيل يكون هو هدا لي وراها نيابو دابا فرمشة عين مستحيل كان داير ليها كيف الما القليل واخا غير بلميساجات وليزابيل كانت تتحس بداكشي شي لخلاها طيح فيه ولكن كلشي كان غير تمثيل فسبيل انه يديرها طريق يقاد بيها حياتو الشمتة وقفات ليها فالحلق تتهضر وتتشهق:كان عندك الحق وانا كيف الحمااارة متيقاه ومضيعة الوقت على والو
جوليا تتعنق وتبوس فيها:صافي اي غلط كنتعلمو منو صافي راك باقية صغيرة فينما مشيتي كتخلي بنادم حال فيك فمو تجيبي حسن منو بألف درجة
تكات على ركبة ختها وهي تتبكي بالصوت غتفركع مرضاتش ديال بصح حسات براسها مكلخة وبزااف ولزاد على كلشي هو انها كان كجي عندها ماحسن منو وكتصدهم زينها مخليها محطة اهتمام الشباب وهي كيف الحمارة مكتقبل حد دايرة فيها فيدال وهاهي جلسات على الصبع تكعدات وهي تتبكي:جوليا خرجي بغيت نبقى بوحدي
جوليا بقات تتشوف فيها من واحد الناحية صعيبة:بكي على الشمتة حيت غتعلمي منها اما هو ميستاهلش
خرجات وسدات لباب خلاتها تتنخصص مجروحة ومقهورة هزات الطيلي دخلات لواتساب لقاتو جالس كسب فيها:انوضي يالموسخة انا ناخد وحدة كماية ضاربة وشمة كي سيكاطريس انا راجل ومدايرهاش مخلا شكون داز فيك لمصدقاتش ليا انا غتصدق لواحد آخر نتوما غير ديال كو* خود الوريقات وخوي
زاد فقصها كثر وكلامو دخل بحال الموس فقلبها خسرات عليه زوج كلمات قبل متبلوكيه:الراجل مكتسناش لي يدير ليه الطريق كشقها راسو لقيمة الا معطتيهاش لنفسك فبلادك متسناش تاخدها فبلادات دالناس فعايل ختك خلاوك تشوف كلشي بحالها انا لدرت شي حاجة راني محسوبة على هنا كيتك نت لي تتقول على راسك راجل وختك حداك مخلات فين حيدات حوايجهاSanaa the bit*ch😉
الغصة وقفات فحلقها والدموع زادو تحجرو فعينيها كلامو قصحها لانها مكانت كدير حتى حاجة وهي معاه كانت تتصدر اي واحد جا عندها فلوقت لي هو كان حاسبها بلي مخلات معامن مشات تتمسح دموعها بالجهد ومباغياش تبكي كعاير فيها بالع*هر وناسي ختو لي كلشي عارف سيرتها مدارت ليها والو ولكن فقصها بكلامو شي لخلاها تعايرو بيها مرضاتش وحسات براسها اكبر مكلخة لشاف التعامل ديالو ولميساجات ميقولش غير كمثل وهاد المدة كاملة منين جاب هاد الجهد ساعة كيفما خلاتها ختها راه ميريكان هادي على قبل وراقيها يتسنى عمرو كامل ويدير لمكيدارش ختها كان عندها الحق وهي كيف الحمارة كانت متيقاه وكدافع عليه شوف دابا غير جرباتو دغيا تبدل وبين وجهو الحقيقي ندمات كانت دير بكلام ختها شحال هدا وطبقها ماشي حتال دابا بدات تتعض فالمخدة تضرب فوجها بهيستيرية حتى تفشات وتكمشات تتبكي بحرقة
🦩بعد مرور أسبوع🦩
دوزاتها كلها فبيتها بكى مرة ساكتة وتتخمم مرة تتبكي وتسب فراسها مرة تقول حمدالله عرفت نيتو عايشة الصراع لي ككون من مور الفراق نفسية محطمة وقلب مهرس رغم انها فقط علاقة إلكترونية لكن عطات فيها الجهد بزاف كانت غادية على نيتها فلخر رجعات ممزياناش جالسة وجامعة رجليها عندها شفنجة مخربقة بيجامة قصيرة نازلة على كتفها لابساها باهمال وجالسة دغيا الحزن بان على وجهها عينيها منفوخين حالتها حالة والظلام فهاد اللحظة سمعات الدقان زفرات ناضت بكسل تتجر فرجليها مع حلات نيشان دفعوه عليها ودخلو كان معتز وصاحبتها زوي وختها جوليا لي تتهضر:شفتو على حالة دايرة فراسها
معتز مع تقابل معاها وشاف حالها جرها عندو عنقها تاهي على سبة بدات تتبكي زوي جات تاهي معنقاها من اللور كواسيو فيها:صافي احبيبتي ميستاهلكش عودات لي جوليا
جوليا:الموسخ لاخر كنت عارفاه غذار مخدام مقاري راه باينة نيتو كيف دايرة
معتز بعدها عليه وهو كمسح ليها دموعها:صافي شوو دموعك غاليين متبكيش اجي معايا
جرها وهو خاشيها فيه مضور يديه عليها خرجو لبالكو وسدو عليهم كهضر معاها وكواسيها جوليا وزوي جلسو فوق الناموسية تتعاود ليها بالتفصيل:ديما كنقولها غير جربيه نعرفو شنو تحت راسو مخدام مقاري راه باينة نيتو فاش وهي متتبغيش بقات حتى ضيعات عامين من حياتها
زوي:تانا كنت كنقولها ليها الحب ديال المسافات راه شبه مستحيل عطات كاع جهدها فهاد العلاقة مسكينة
جوليا تنهدات:الايام تنسيها خاصها غير ماتبقاش نية بزاف
زوي:دينا غطلاقا لي يستاهلها انا متأكدة وهي زوينة بزاف خصوصا مين كعرفوها مغربية متخايليش فينما مشينا العينين ككونو عليها شحال من واحد واعر جا عندها وهي متتبغيش ولكن دابا
جوليا قاطعاتها:دابا خاصها تنسى وتديها فحياتها وقرايتها
دينا الدموع محجرين فعينيها:انا لي جرحني كثر هو ظلمني وقاليا هضرة خايبة وانا لي كنت شادة معاه الطريق
معتز شد وجها بين يديه:لي عقلو مسخ متديهاش فيه لانه ككون كابر وسط الوسخ مخليه يشوف الناس بحالو هادي غلطة ودازت والاغلاط كنتعلمو منهم ضروري منطيحو واحد النهار ولكن واش غنوضو ولا لا هنا كنعرفو شخصيتنا كيف دايرة نت راه كنعرفك سنين قادرة تخطايها وانا معاك
تبسمات شوية فعز الحزن وهو جرها عندو ثاني معنقها فاش كتلقى شي حد فجنبك يواسيك على الاقل كتخفف شوية وهنا كجي دور العائلة والاصدقاء رجع بعد عليها نطق وهو باغي يضحكها:ميستاهلكش الكلوشار ونت بياسة(نطقها بعربية معكلة)شفتي كن مكانتش حاكماني دانييلا نت اول وحدة كنت غادي نضور بيها
ضحكات واخا الحزن بقى معاها حتى ضحكها جرها ودخلو عندهم جوليا شافتها سكتات شوية حلات ليها يديها:اجي عندي احبي
جلسات معنقاها متكية على صدرها وزوي شادة فيها لاقية السند فعز الازمة جوليا:صافي رجعي دينا لي كنعرف غلطة ودازت وزيد بابا راه بدا كحس واخا قلنا ليه غير ليغيكل مخاصش يعرف والله ميستاهل نكبرو عليه الموضوع
دينا تنهدات صعيبة تنسى فوقت قصير ولكن غادي دير ما فجهدها غير هو راه ضروري من البكى لانها تجرحات زوي:نوضي مجيناش نجلسو معاك غنخرجو
دينا بتعب:مفياش والله غير خليوني
كلهم فدقة وحدة:نوضيييي
بقاو عليها حتى ناضت جبدات متلبس معتز نزل يتسناهم برا مخلي البنات بيناتهم زوي بدات تتقاد ليها شعرها وجوليا كتقاد لها شوية لميكاب مفيها ليدير والو غير جالسة مليها نفس تخرج اصلا
دينا:يلاه معانا غتبقاي بوحدك فالدار
جوليا باستها فخدها:غير سيري عندي شي خدمة خاص نكملها ردو لبال زوي منوصيكش
زوي:متخافيش دينا راه ختي خاصني نوقف معاها
شدات فيها جراتها وخرجو كان معتز كتسنى فالطوموبيل ركبو وزادو طالقين الموسيقى حالفين تيخلقو لها جو ينسيها غير عيطات لهم جوليا جاو كجريو وهادي هي الصداقة الحقيقية
ماشي حسد وبغض وغذر هي مواقف دالسند والرجولة
طاح الظلام وهما مزال خارجين كانو فواحد المهرجان مديور غير فالزنقة الدنيا عامرة شي سكران شي ساحي عاطينها لشطيح والدنيا مبلبلة تما كانو تاهما معاهم زوي تتشطح ممسوقاش معتز مع صاحبتو دانييلا تصالح معاها دينا حتى هي معاهم تتمايل بشوية فبلاصتها مبدلة لجو واخا مكان فيها لي يخرج زوج دلمرات تتجي عينيها فواحد طول المدة لي هما تما هو كلمح ليها وهي صاداه لفيها كافيها هاد الساع فهاد اللحظة حسات بشي حد دخل فيها بكتفو عن قصد غير شافتها طلعات حاجب:مكتشوفيش
لبنت لي دخلات فيها كانت وحدة تتقرا معاها فلجامعة متتحاملوش ودابا طلاقاو نطقات باستفزاز:لا مشفتكش حيت مكنشوفو الحشرات حتى كنعفطو عليهم
ضحكات ناوية تستفزها كيف ديما كلوحو الهضرة لبعضياتهم زادت هي ودوك الزوجات لكانو معاها مخلينها وراهم تتغلي فهاد اللحظة تدخلات زوي:مالك شنو كانت تتقولك ديك ليلي
دينا بلاما تجاوب طلاحت على ليلي من اللور جراتها من شعرها نزلاتها كانت على النقشة خاصها غير معامن وجاب ليها الله فيمن تبرد فقايصها زوي تدخلات ولكن غير شافت وحدة من صحابات هاديك ضربات دينا لضهرها طلاحت عليها هبطاتها تاهي معتز معرف باش تبلا كان شابكها بوسان هو وصاحبتو حتى بانت ليه البونيا ناضت حداه تدخلو هو وياها كفكو كجر فدينا لي تتغوت وتنتف فهاديك وتقول منتفتش من طبعها عادية مكتجبدش الصداعات ولكن ربي عطاها واحد الجهد مين كتكون هاز فقلبك نييت اي حاجة تتفيض كاسك الموسيقى كانت مجهدة شي لخلا بنادم ميردش لبال لديك المدابزة من غير لقريب لهم فاكوهم بزز ليلي شعرها واقف كجرو فيها وتتعاير فدينا مرضاتش مكانتش متوقعاها تمد عليها يديها باغية تلاح فيها تاهي ولكن شادينهم معتز بغى يخرجها ويحيدو من تما هزها على كتفو شادها من رجليها وهي مزال تتغوت وتعاير فليلي:biii*tch fu*ck you
خرجها وبعدو شي تتفرج وشي ݣعما مسوق محطها حتى وصلو لطوموبيل وهي معصبة مع نزلات للارض غوتاات بحر جهدها مخرجة گاع لي فجوفها حتى عروق جبهتها برزو
معتز مقربش لها عارفها معصبة خلاها على راحتها تتفش زوي ودانييلا جايين كجريو حتى وقفو عندها تتنفس بالجهد وتكات على الطوموبيل مهضروش معاها داك لي لحفلة كاملة حاضيها لقا لفرصة فين يهضر معاها وتبعهم مع وقف سولها:واش نت بخير
دينا لي على النقشة:بعد مني نت لبقيتي
قمعاتو مسكين وهو مدار والو غير مزعوط خخخ حلات باب الطوموبيل وطلعات خلاتهم تعتاذرو منو بلي معصبة وكدا طلعو وزادو دينا:ديوني للدار
معارضوهاش الصمت لي كان سائد عليهم طول الطريق مع وقفو قدام باب دارها مجات فين تنزل حتى تفركعات بالضحك شي لخلاهم تاهما دغيا يبداو يضحكو كانو غير حابسينها زوي:شحال وانا باغية نعطيها علاش تتقلب ولكن سبقتيني نت
دانييلا:انا دايرة براسي كنفارقكم وكنعطيها
معتز:ديال العصى تاهي بنت اللدينا
بقاو شوية مجمعين فالطوموبيل من بعد دخلات حسات براسها شوية خففات بديك المدابزة وخرجات شي فقايص الباقي مع الوقت دخلات كانو واليديها كاينين فالدار جلسات حدا باها معنقاه كطمن عليها لانه عند بالو بلي مريضة وسادة عليها جات ماماها حداها كسولوها وكهضرو مجموعين
بوبكر:الا مزال حاسة براسك عيانة نمشيو لطبيب
حركات راسها بلا نطقات ماماها:صفاريتي انا نوجد لحبيبتي كسكسو لكعجبها عاامر خضرة وفيتامينات
حركات راسها باه ومن بعد سكوت طويل ليها نطقات وتيرات فيهم نيشان بعربية مخربقة:بابا ماما انا يمشي مغرييب وغدااا
بوبكر وشادية شافو فيها باستفهام فهاد اللحظة لتكون كضحك حيت عمرها طلبات منهم تمشي لمغرب بوحدها ديما جارينها معاهم وكاع بعد المرات متتبغيش تمشي مخلاتش ليهم فين يسولوها وضورات ليهم الطيليفون:اقرب طيارة غادية من بعد يومين
شادية:ياك قلتي غتسافري مع صحابك لlas vegas
دينا بنفس الدارجة العوجة:انا نمشيشlas vegasانا نمشي مغرييب عند ميما رحمة
شادية:العروبية ديال با سيدي ومي لالة قريبة لمراكش يعني سخونة بزااف هاد الوقت مغتصبريش وعمرك مشيتي لها
دينا باصرار كملات كلامها بالانجليزية:انا بغيت نمشي توحشت جدي وجداتي ديما تتقولولي خاص نمشي انا يبغي نمشي دابا
بوبكر غير سمع بغات تمشي عند مو وباه صافي وزيد بالفرحات عليه تمشي تجلس فالعروبية وتعرف لبلاد:صافي خليها انا غنقطع ليها ونسيفطها
شادية قاطعاتو:حيت كنت باغية نمشيو مجموعين راه اصلا كاين عرس تما ادينا تسناي واحد زوج سيمانات وغنمشيو
دينا:لا بغيت نمشي دابا ماشي اول مرة نطير بوحدي
شادية تتشوف فراجلها:صافي لبغيتي عيط نت لخالتي علمها
بوبكر حرك راسو باه:انا غادي لمحل يلاه خودي لغتدي معاك ونت جمعي لها لحوايج
شادية فهماتو شبغا يقصد توقف على باليزة بنتها بيديها لاتمشي تدي حوايج قصار والمغرب راه ماشي هو ميريكان وزيد البادية الحشمة والحياء مزال كاينين
جوليا جلسات:مالكم سمعت المغرب
بوبكد ضور يديه على دينا شاد فيها:غنسيفطو دينا عند الوليدة تعلم تعجن وطيب المرقة وتحلب البݣر
كلشي بدا كضحك وحتى هي نساحبات طلعات لبيتها سدات عليها طلاحت فوق الناموسية وهي تتفكر هاد القرار المفاجئ بغات تبدل العتبة باش تنسى شوية ولكن فنفس الوقت تقدر طلاقاه مرت عمها خالتو واحد الجانب منها كقولها راك غادية على ودو وجانب اخر كصارعو وتقول بلي غادية عند عائلتها وفعلا بلا بيه كانت باغية تنزل لمغرب تشوف جدودها بنات عمامها عزاز عندها ودابا جا الوقت بالنسبة لها غير صدفة فقط مع تفارقو بغات تمشي واخا مزال منساتوش راه يلاه سيمانة باش فرتكوها ولكن مدار ميصلاح تنساه بزز منها ناضت بشوية تقابلات مع المراية وجها ماعليه حتى تعبير وبدات تتهضر مع راسها وكلامها كولو بالانجليزية طبعا
دينا:الا شفتيه غديريه مكاينش وبحالا عمرك عرفتيه ميستاهلش الموسخ لاخر نت حسن منو زوينة كبغيك كلشي واخا طلعتي مكلخة معاه ولكن ماشي مشكل غلط ووقع وغتنسايه بزز منك غتبداي من جديد نت قادرة حيت لبكى معندو مايصلح
كانت كدعم راسها براسها حيت مقتانعة ان البكى والغبينة مينفعو بوالو واخا مزال مجروحة ولكن طال الزمان ولا قصار غادي تنسى هي عارفة نفسها كيف دايرة
تتحقق فملامحها وتتشوف فراسها كيف كقول لها كلشي زوينة وفعلا عندها حقها كبير من الزين ولميزها ان ملامحها طفو8لية وكيوت وجها دائري بيضة حجبان عراض عوينات عسليين شنيفاتها عامرين سنينات بيض مقادين مخليين ضحكتها غزالة وشعرها طويل قهوي وشي زغيبات متخللهم الغور صابغاه رغم الحزن لي كاسي عيونها وبان فوجها بلبكى لي بكات الا ان جمالها غالب الشوفة فراسها تتخلي تزيد الثقة وتتقول فنفسها انا زوينة منبكيش على هداك الفاشل لي كتسناني انا نقاد حياتو وفنفس الوقت متخليش الحزن عليه يخسر زينها غتبقى على لغبينة تتولي جايباها فراسها وفصحتها تتحاول بأي طريقة تخفف على راسها وتنسى وهادشي لي مخلي انه كاينة قوة فشخصيتها مدام عرفات انها غلطات وخاصها تنسى جلسات وتنهدات واخا كلامو قصحها غتجاوز وأول خطوة تسافيرتها للمغرب تنهدات بشوية وقربات حطات قبلة فلمراية وكأنها تتبوس راسها دموعها خانوها شحال من مرة ولكن مغتبكيش ونطقات:نت قوية غير صبري
ضارت جبدات باليزتها وبدات تتوجد شنو غتدي معاها حتى سمعات الدقان وتحل لباب تلفتات كانت ماماها تبسمات لها ودخلات:غادي تخوي علينا الدار
دينا تتجبد لحوايج:ياك غادي تلحقو عليا
شادية تنهدات وناضت جراتها جلساتها حداها ونطقات:واش هاد المشية عندها علاقة بهداك السيد
دينا لسانها تسرط نزلات راسها بلاما تهضر شي لخلا شادية تبتاسم شوية:انا راني عارفة كلشي وماماك متخفى عليا حتى شي حاجة تتخص بناتي
دينا قاطعاتها بحزن:مغادياش على قبلو حنا تفارقنا
بدات تتعاود ليها كلشي ودموعها كطيحو عيات تقوي راسها ولكن مع ماماها غتخوي قلبها شادية تتسمع لها بأذن صاغية عمرها قالت ليها بلي راه عارفة علاقتها معاه مخلياها تعيش عمرها عمرهم حبسو عليها لحاجة حيت الا زيروها غيبقى فبالها بلي ضدد فيها داك الزيار خصوصا انهم فبلاد غربي خاصها تجرب وتقتانع براسها واش ديك الحاجة مسلكاها او لا مع كملات كلامها عنقاتها ماماها خشاتها فيها:شووو حمدلله عرفتيه شنو كسوا ومزيان يوقع هادشي باش تعلمي ومن هنا لقدام تعرفي تختاري شريك حياتك
دينا بعدات عليها:معمرك مقلتي لي بلي راك عارفة
شادية شداتها من وجها بحنان وهي تتمسح دموعها:هادشي عادي كلنا دزنا من حب فاشل حتى كنطيحو فالشخص الصح انا فاش كنت قدك تعلقت بواحد حماقيت عليه واخا تزاديت وكبرت هنا لكن عمرو حسيت بيه طامع فيا ولا دايرني طريق بلعكس خدم هنا وتقاتل باش يبني لينا حياة بزوجنا وهاد الشخص هو باباك الحب ماشي عيب خاص غير نختارو الشخص الصحيح
دينا بحزن:نتوما ساليتو بالزواج وانا غير ضحك عليا
شادية:قلت ليك عادي اماما مزيان يوقع هادشي باش تعرفي بلي ماشي ݣاع الناس مزيانين لي كبغيك بصح غيبغيك كيفما نت هو لغادي يشق الطريق ليكم بزوج بلاما يحتاجك نت ولا يحتاج لي يبدا ليه هو ليخدم باش يهزك نت فوق راسو طال الزمان ولا قصار غادي يجي انشاءالله ديما قولي الله يجيب لي يستاهلني ويكون ليا سند
مع كملات كلامها رجعات تخشات فيها دينا تتجيها ماماها اكثر إنسان متفهم فهاد الدنيا داكشي باش عمرها لقات مشكل مع واليديها حاضيين وراخفين فنفس الوقت شادية مصاحبة مع بناتها لكان يعاودوه ليها واخا يكون غيزلق فيها جمل حتى هي تولدات فميريكان ولكن ماشي بحال دينا تتهضر بالعربية مزيان عارفة المغرب وتقاليدو كانت كتنزل بزاف شي لخلاها تعرف على بابات دينا غير هو لحق عليها بوحدو جا يقرا وخدم ودمر نيت باش خداها ودار علاش يرجع وحتى هي طاحت وناضت معاه باش دارو هاد الحياة الميسورة لي عايشين دابا
شادية:الا طلاقيتيه خاص يعرفك بلي قوية يشوفك ضاحكة باينة غيكون فالعرس تما فين خاص يعرف بلي مساوي والو عندك مين يشوفك ناااشطة وعلى خير
حركات راسها باه بقاو شحال كهضرو تتواسيها ومن ماماها كتقوى بدات تتجمع معاها الحوايج وتتشرح لها انه كاينين شي حوايج قصار متقدرش تلبسهم تما لان المجتمع المغربي اسلامي ماشي بحال عندهم تما كانت جابدة لقشابات ديال ستمية دريال وشي ݣنضورات مسرحاهم قدامها:هانت دي هادو لي شارية لك من مراكش هما لتلبسي خفاف وزوينين ديال الصهد كلا مرة بدلي بوحدة وحوايج لخروج دي غير تيشورتات والجينز
دينا:صافي واخا وغندي الميكاب ديالي كامل
بوبكر من لتحت:ديناااا انا غادي لمحل يلاه خودي شغتدي معاك
دينا:واخااااا كملي ليا اماما
مشات مع باها تاخد السقاطة لي غتدي ليها ولولاد عمامها بحكم انه عندو سوبر ماركت متوسط وزايد فيه مواد مغربية عليها الاقبال بحال زيت أزݣان الشعير العسل الحر شحال من حاجة لقى عليها بلي عليها اقبال تما لانه النصارى معروف عشقهم للمغرب وموادو الطبيعية وهدا هو مشروعو تما
نهار جديد❣️
زوي:بحزن يا قلنا غنمشيو لvegas غتخلي بلاصتك
دينا تنهدات:مرة اخرى توحشت لعائلة بزاااف
معتز مصغر عينيه فيها:ياكما لقضية فيها إن
دينا فهماتو شنو كقصد بلي زعما ياكما غادية على قبلو حركات راسها:لا لا ماشي على ودو غير من شحال وانا باغية نزل لمغرب وهدا هو الوقت منها نيت نسى شوية
معتز:ميمكنش تنساي ونت غادية لفين كاين هو
دينا:هو راه كاين فمراكش انا غنمشي لعروبية لي حداه وزيد واخا نطلاقاه انا قانعة راسي بلي باغية نساه
جوليا:هنا غتعرفي شخصيتك كيف دايرة واخا هكاك انا عارفاك غادي تجاوزي
دينا تنهدات صعيب ولكن ماشي مستحيل يمكن دغيا جمعات دموعها لكن قلبها راه مزال مجروح عنقاتهم بزوج توادعات معاهم وزيد راه غير غيسالي الصيف غترجع يعني عادي
داز الوقت كانت نيت فبيتها حاطة قدامها منتجات العناية بالبشرة وطابليط ديالها تتفرج وتتطلي لوجها تتوجد راسها لتسافيرة وفنفس الوقت متخليش الحزن يخسر لها زينها واخا مكاين خاطر ولكن تتقاوم دايرة ماسك لوجها وملصقة دوك لعيبات ديال الهالات تتزيت فشعرها فلحظة بدات تتعيط وهي تتماصي شعرها بسنان المشطة باش يستافد من الزيت مزيان تحل لباب ودخلات عندها تتفوه لابسة غا شورط وبيل سماطي سميطات:مالكي؟
دينا:اجي عفاك ماصي لي شعري من اللور باش يدخل الزيت
جوليا بلا حتى كلمة جات وراها ودارت شنو طلبات منها وهما ساكتين حتى نطقات:انا معمرني متدخلت ولا غنتدخل فاختياراتك حيت نت كبيرة وعارفة شنو لي صالح ليك ولكن نتمنى هاد المشية متكونش على قبل لي فات
دينا تنهدات كلشي قالها لها وهي ربي لعالم بيها مجاوباتهاش شي لخلا جوليا تنوض وتقابل معاها:انا راه ختك ومنبغيش لي يضحك عليك ولا نشوفك مقهورة بغيت غير تحطي رجليك فمطار المغرب تكوني ماشي دينا لي قدامي حزينة مضيومة لا قدام الناس ضحكي وضحكتك توصل لمنعرف فين حتى تكوني بوحدك عاد بكي ولا تفركعي واخا ميستاهلش دمعة منك خليه يشوفك بلي عمرو كان فحياتك وبلي مساوي والو واخا تكوني كتموتي من لداخل ونكون معاك صريحة راه ميمكنش تنساي شي حد فبلاصة قريبة ليه فيها وزيد لعروبية معمرك مشيتي لها خاصك تأقلمي بعدا عاد تنسايه
دينا كلام ختها كان كتسمعو بتأني فعلا عندها الحق واخا مكاينش فالعروبية وانما راه قريب لها عائلتو غتلقاهم راه صعيب عليها واخا هكاك باغية تمشي معرفاتش فاش فكرات فاش بغات تمشي ولكن مصرة وعازمة انها غتمحي هادشي جوليا عرفاتها تتفكر تنهدات لاحت المشطة وجراتها عندها عنقاتها ختها الصغيورة الحب ديالها الاخت سند تحس بيك وتخفف عليك لانها بنت بحالك بحالها والدم مشروك
جوليا:اي تصرف ولا خطوة غديري قدام شي حد كجيه فكري فيها مزيان حيت انا متأكدة شحال من واحد كان عارف علاقتكم وغيعرف حتى فراقكم فالمغرب راه اي حاجة تتوصل
دينا:تتهمني غير نفسيتي دابا اي حاجة تقلقني وتخليني كنبكي غنحيدها
جوليا تبسمات وشدات فيها:هكا نبغيك احبيبتي قوي راسك براسك الحزن غير كقهر الصحة وخصوصا الا كان على قبل لي ميستاهلش مهم يلاه نزلو نتجمعو نشبعو منك راك غدا غادية
لتحت كانت شادية وبوبكر جالسين مضور يدو عليها وتتفرجو حاطين القهوة كحلة فلحظة نطقات شادية:واش فراسك نسينا اهم حاجة فهاد المشية ديال دينا لي جات على غفلة
بوبكر:ياك شرينا كلشي
شادية:دينا كلامها بالعربية محدود حنا لي كنا كنغطيو على هادشي حيت كنا كنمشيو مجموعين دابا راه بوحدها والعروبية اول مرة تمشي لها
بوبكر:وايلي تانت ياك تتفهم بعدا الهضرة حالها ساهل هاهي اجي ابنتي اجي
جاية شعرها مجموع شفنجة وجها مطلي جلسات وسطهم شادية شاداها من جيهة وبوبكر من جيهة مفهمات والو شادية:انا وباباك غادي نعطيوك شي كلمات بالدارجة كنستعملوهم فالحياة اليومية صافي
دينا بدارجة معكلة:انا يفهم عربية
شادية:ولكن خاصك تعلم تهضر بيها اماما
بوبكر:سمع ابنتي الا جاك الجوع قولي انا بغيت ناكل
دينا بنفس الدارجة العوجة:اناا بغيت نااكوول
شادية وجوليا صفقو عليها:برافو زيد كمليها
بوبكر:الا بغيتي تخرجي غتقولي انا بغيت نخرج
دينا تتعاودها فدماغها عاد نطقات:انا بغيت نخروج
شادية:الا بغيتي تمشي لطواليط غتقولي انا بغيت نمشي لطواليط
دينا جاتها طويلة هادي منطقاتهاش مزيان وبقاو عليها عاوديها رجعات تتهضر بالانجليزية:طويلة انا نقول(بالدارجة)ميما انا كاكا ولا انا بيبي على حسب شنو عندي
فهاد اللحظة مع سكتات تفرشخو كاملين عليها بالضحك شي لخلاها تاهي تبدا ضحك معاهم جوليا:هي حتى بقى لها نهار وتمشي عاد غتقريوها اشوفي لبغيتي شي حاجة نعتي فيها وصافي ولا عيطي لي انا نقولها لهم
شادية وهي تدوز يديها على شعر دينا:اهم حاجه راك تتفهمي
بقاو جالسين مجموعين كوصيها شنو دير وشنو مديرش شي حوايج كديرهم هنا ملايقينش تما مثلا بحال الخروج بالليل الموسيقى مجهدة وبزاااف
✈️نهار جديد مطار سان دييغو الدولي✈️
جا الوقت وطيارتها وصلات غادية جارة الباليزات ديالها من بعد عناق ووداع حار مع عائلتها دابا غدوز من آخر باب المؤدي لبلاصة الطيارات ضارت عندهم كانو بعاد وبرا لكن تتشوفهم دارت ليهم باي باي بيديها لاخر مرة وهما كسيفطو لهم بوسات فالهوا وكودعوها حتى دخلات ومبقاتش تتبان لهم
شدات بلاصتها فالطيارة لكانت حدا السرجم تقادات دارت لكيت التلفازة قدامها وبقات تتفكر محساتش بالطيارة لي تهزات وولات لفوق حتى تلفتات وبقات تتشوف فالسما كيف صافية وهما وسط السحاب بقات هكاك وقت طويل
تتشوف فالسرجم وهي تتفكر بعدما نعسات وفاقت ظلام الحال وهما دابا فوق المغرب ماشي بزاف حتى نزلو فأرضو وصلات لبلادها لكن فين غادية مختالف بزاف عليها وعلى فين كانت واخا اصلها لكن راه ماشي مدينة الاوقات لي جات فيهم كانو تتجمعو فدارهم لي فمراكش اما العروبية عمرها مشات لها معرفاتش واش غيعجبها الحال مهم بغات تبدل العتبة بغات فين ترتب افكارها وهي عارفة انه لغادية تنساه قريب لفين غادية نكحات اللوجيك فهادي ورونات لكن عازمة واعدات نفسها انه غتنسى وقدام عينيه بغات تمتاحن راسها بغات تكون قريبة ليه وهي تتعفط على قلبها من جيهتو باش يعرف انه مساوي والو ومن جيهة اخرى جات عند عائلتها لكن المحيط والحياة فين كاينين مختالفين عليها بزاف مع وقفات فباب الطيارة قبل متنزل ضربها بريد خفيف خلاها تستنشقو بالجهد وكأنه بعث امل جديد لها فمكان غتعيش فيه لعمرو طاح فبالها
مــراكــش الــجــمــاعــة الــقــرويــة ســيـدي عــبـد الــلــه🇲🇦
الظلام طاح وكانت غادية لتسعود دالليل الطوموبيل غادية تتشق الݣودرون ديال الطريق الرئيسية متاجهة لواحد من الدواور دالجماعة لي هو{دوار العزابة}كانت جالسة فاللور ديال الطوموبيل تتفوه نعسات نيت فالطيارة لي حطات الرحال مع 8دالليل فمطار مراكش قدامها جدها وعمها لي صايݣ هما لي طلقاولها كسر الصمت الحاج احمد الجد ديالها نطق والابتسامة على وجهو:ونهار كبيير هذا بنت ولديي جات لعندي بالفرحات علينا
دينا ابتسامة عريضة على وجها غير شافها فالمطار كيعنق ويبوس فيها اول مرة تزورهم فالبادية فرحاتهم بهاد المجية نطقات بعربيتها المعكلة:شكرا با سيدي
كلامها بالدارجة قليل لكن مهم تتفهمهم هما شكقولو نطق عمها محجوب وهو كشوف فالطريق:اكداير الجو ديال دوك الناس كاين شي صهد
دينا حركات راسها باه:اه بزاف ديما الصهد مكينش شتا
الحاج حمد:الله يرحمنا غدا انشاءالله غندبح لبنتي واحد الخروف من داكشي
دينا بلهفة:باسيدي كاين بݣيرة🐄
الحاج حمد وهو كضحك:كلشي كاين الحمدلله الخرفان البݣر الخيل الدجاج لبغيتييي
دينا:غنلعب معااهم كاملين
محجوب:غدا نديك تركبي فالعود لي جا جديد انشاءالله
بتاسمات كثر وهي تتشوف الاهتمام ديالهم واخا مزال مسخنات بلاصتها عوج الطريق ودخل فوحدة كلها غير حجر وتراب تتشوف من الزاج غير الخلا والظلام واراضي كبيييرة مظلمة بشوية بشوية بدا كبان الضو ديال الدوار وهما داخلين ليه تتشوف الضواو شاعلين فالديور كاين لي بني بسيط وكاين لي محلقة من برا على حساب حالة ماليها الدنيا خاوية كدخلو بكري وصلو لدار لي كانت كبيرة وضاير بيها الصور قدو قداش نزلات كان الباب ديالو مردود شافت وليد صغير واقف فيه غير شافها دخل كجري يعلمهم بلي المنتظرة وصلات محجوب:غا دخلي انا غنجيب لك البالز
شدات فجدها لي ضور يدو على ضهرها ودخلو دازو على الجردة حتى وصلو لباب الدار لي كان محلول دخلو كتسمع الحركة كثيرة وريحة الطياب غزالة تغلغلات فنيفها الحاج حمد:مالين الدااااار افييييينكم
وفهاد اللحظة خرجات مرا كبيرة من الكوزينة غليظة شوية وقصيرة الخير باين على وجها مطلعة كمايمها ومحزمة لابسة قميص ودايرة تزارة زيف حياتي فوق راسها لي باين منو شوية دالشعر مخلط بين لبيض ولحمر دالحنا حلقات الفروج فودنيها مرا بلدية نيت من العيالات لي فتاقد جيلنا على وجها ابتسامة بشوشة وفرحانة فاتحة يديها لحفيدتها:على سلامة كبيدتي سعدي سعدي بزينة البنات نهار كبييير هدا
دينا تلاحت على جداها لتتعنق فيها بحرارة وتبوس وكأنها تتشم فيها ريحة ولدها لي توحشات وفنفس الوقت بحنية كدوي:العزيزة بنت لعزيز جات لعندي فرحتيني وربي شاهد كدايرة اميمتي
دينا مبتاسمة:لباس اميما ونت لباس
رحمة شادة فيها:الحمدلله اكبيدتي زيدي زيدي وفرحتي قداش
الحاج حمد:مخاص والو الحاجة؟
الحاجة رحمة:مخاص والو الحمدلله لكانت خاصة هاهي جات
دخلو للصالة ورحمة تعنق وتبوس فدينا فرحانة بيها خصوصا مين سمعو هي لبغات تجي فهاد اللحظة دخلو لبقية من أهل الدار جملة عيالات عمامها بزوج ولادهم وبناتهم تسلمو عليها بحرارة تطلق من هدا ويشدها لاخر جابو لها التمر والحليب فرحتهم قداش بيها لانها اول مرة تشرفهم ضارو بيها فالصالون والانظار كلها عليها وهي مبتاسمة لسانها فيه فقط لباس الحمدلله كسولوها على حالها ولقراية الحياة كدايرة لهيه المهم جو عائلي بامتياز ونقطة الاهتمام فيه كانت هي متنكرش عجبها هاد الاهتمام بزاف فالوقت لي نفسيتها مريضة محتاجه وبزاف
الحاجة رحمة:سعاد نوض ابنتي طلعي دينا للبيت بدل ابنتي حوايجك ونزل نتعشاو
دينا حركات راسها باه وناضت مع مرات عمها لي مبتاسمة فوجها جرات باليزتها وسعاد جرات وحدة تاهي:سليمة اسلييمة اجي هزي لباليزة لبقات
سليمة من الصالة:واخا اماما
طالعين فالدروج وهي تتسولها على حالها:كدايرة ماماك وختك ولوسي بوبكر
دينا بابتسامة صغيرة:لباس اطاتي
دخلاتها لبيت فين غتجلس كان مقاد مجموع شافت فيها سعاد:راني طرفتو غير الصباح نقاد معاك الحوايج؟
دينا بعربيتها المتواضعة تتحاول تواصل معاهم:لا صافي اطاتي انا قاد حوايجي بوحدي
سعاد بتاسمات:واخا يلاه مين تبدلي عليك نزلي ولبغيتي شي حاجة جي عندي
فهاد اللحظة سليمة طلعات الباليزة لي بقات دخلاتها ليها لبيت دينا:شكرا بزاف
سليمة:ماشي مشكل احبي حتى تسالي ونخرجو بزوج صافي
دينا حركات راسها باه سعاد:خلي عليك لبنت ترتاح دابا مبقى خروج غدا انشاءالله زيدي
خرجو وخلاوها بوحدها جلسات فوق الناموسية وهي تنهد هادي هي مرات عمها لي كتجيه غير شافتها تفكراتو باينة غير من التعامل ديالها مفراسهاش كانت تتقول مغتعاملش معاها مزيان الا عرفاتها تفارقات معاه افكار ماليها لا ساس ولا راس كتراودها منوية غبوحدها ناضت تتزفر حلات البلاكار وباليزتها ستفات حوايجها وكلشي بدلات لبسات بيجامة خفيفة زرقة من ديال ستمية دريال مزوقة لي جات عليها هي هاديك حيت عامرة والبلدي كبغي القالب خلات شعرها مطلوق جات كيوت بالبلدي ومشات نزلات دخلات عليهم للصالون وهي مبتاسمة كلهم شافو فيها الحاجة رحمة:سعدي سعدي بالزينة مشاءالله زيدي اميمتي حدايا زيدي
جلسات حداها وهي تبوس وتمدح فيها مقاداها فرحة تتشوفيها غير ولدها لي توحشات ومكرهاتش يدخل للبلاد
رحمة:ياك وليدي بخير لباس عليه
دينا حركات راسها باه:لباس اميما
رحمة تنهدات:كن غير يدخل لبلادو صافي الله يجعل لبركة
حمد:وهو لي بغى منبززوش عليه نهار يقنع ها دار باه وبلادو موجودين وسط خوتو
رحمة تنهدات:الله يسهل عليه هو ومراتو وبنياتو ياربي
سليمة جات حدا دينا وبداو على لحتيت تنهدات:توحشتكم بزاف والله شنو يوقع لتيليفونك فينهو
سليمة:طاح اختي فلكوري عفطات عليه العودة تشق يلاه با وصى ليا على واحد
دينا:ايوا شنو جديد فحياتك
سليمة ضحكات:ناري يختي الدارجة عندك بحال شي بنت صغيرة يلاه تتعلم تهضر ههه
دينا ضحكات:علمني نتيا
سليمة كتشوف لها فشعرها:هاد المرة غطولي معانا مغتمشي حتى تولي بنت لبلاد قحة صبغتي شعرك ثاني؟
دينا جرات خصلة من شعرها وحركات راسها باه بقاو كهضرو بزوج كلمة مقادة بالدارجة وخمسة عوجين سليمة اكثر وحدة من بنات عمامها عزيزة عندها حيت قد قد حتى هي تتقرا فالكلية بنت عادية بحال ݣاع بنات البادية
سليمة ضورات يديها عليها:ومتخايليش شحال فرحانة حيت جيتي والله غندوزو الصيف واعر منخليو فين نمشيو هالرحبة هالواد ها راس الجبل كلشي كلشي وعاد غنعرسو قريب
دينا:شكون يتزوج؟
سليمة:خيمة الحاج العيادي هادو لي حدانا دايرين الفرح لبنتهم
فهاد اللحظة تسربات الطبلة وتحط العشى لي كان عبارة على الدجاج محمر بالفريت والشلايض والموناضة وخبيز ديال الدار دينا عينيها تحلو ضارو بالطبلة والبراهش حطو لهم بوحدهم كياكلو وتاهي تتاكل وتبنن وتغمس تتعرف تاكل بيديها بعدا حيت واخا ميريكان فالدار راه تتاكل ماكلة مغربية العائلة مجموعة وكياكلو ويهضرو وكلا واحد كقرب لها ورحمة تقطع الدجاج وتحط قدامها كول اميمتي كول اكبيدتي عجبها الحال بزاف كلشي مهتم بيها وزيد لمة العائلة غزالة عاد حسات بيها كلاو وجمعو تحط الديسير كلات فيه شوية وبقاو جالسين مجمعين حتى شافت فجداها:ميما انا يمشي ينعس
رحمة:نوضي اميمتي ترتاحي راك عيانة عاد عݣبتي
ناضت وقبل متخرج من الصالة ودعاتهم:good night
وزادت بلاما تحس انها دوات بالانجليزية مزال مولفاتش خلات شي كشوف فشي خخخ نقز جدها:شݣالت بغات بيت لما واقلة؟
سليمة:قالت لكم تصبحو على خير
حمد شاف فواحد من حفايدو جالس حداه كانت تقريبا عندو ديك 12عام هو يلبقو خخ:وتا لاش متقولش لها ونت من اهل الخير بالفرنسيه اودي القرايه اودي نوض تهز تعرف غالخبز والخرا غبر لبوك الشقف
طفات الطيلي وحطاتو مبغاتش تشدو بزاف وتسهر هي هنا باش ترتاح تقادات فوق الناموسية وهي تتفكر غدا ايكون اول نهار بليلتو دوزو هنا لحد الآن شافت لمة العائلة زوينة واهتمامهم بزاف بقات تتفكر والصقيل برا من غير صوت الكلاب ولا النهيق دشي حمار وحتى صوت الصرصور بقات هكاك طالقة وذنيها حتى غفات😴
نهار جديد تسلسلات خيوط الشمس الذهبية للبيت عاطية فيه واحد النور تقلبات على جنبها وهي تتسمع صوت الديك إعلان على بداية الصباح🐓☀️
بدات تتحك فعينيها حتى حلاتهم تكعدات شوية هزات الطيلي وهي مقلوبة كانت8:05عمرها فاقت فهاد الوقت فالصيف ناضت بشوية شعرها مخربق لجيهة السرجم غحلاتو عينيها خرجو كان منظر زوين وهي تتشوف الاراضي كيف خضرا كل وحدة ودرجة خضوريتها الجبال كلشي كبان من الفوق السما الصافية وبريد خفيف كضرب فوجها طلعات النفس بالجهد تتحس بهوا نقي عمر ريتها ومنظر زوين طبيعي كريح النفس وعاد الهدوء أهم حاجة مولفة فميريكان تتصبح على صوت الزحام وكلاكصون الطوموبيلات بقات شحال كطل من بعد جمعات شعرها هزات غسول الوجه ديالها ومشات غسلات وطرفات حالتها من بعد نزلات كانت ريحة اتاي منعنع وخبيز ديال الفران عاطيين الصالة كانو غير لبراهش مزال ناعسين فالارض مشات لكوزينة فين كانت جداها وعيالات عمامها:صباح لخير
رحمة:صباح النور سعدي بالزينة فاقت معانا
بتاسمات وجلسات تلفتات عندها وحدة من عيالات عمامها:دينا باش كتبغي تفطري نقلي ليك البيض؟
دينا مولفة تفطر بيضة نيت حركات راسها باه:واخا اطاتي
فهاد اللحظة سمعو الدقان مشات سليمة تحل وهي تتمسح وجها من الما كانت ختها لي بايتة فدار الجيران مالين العرس بحكم العروسة عشيرتها مشات لكوزينة هازة طبݣ فيديها:صباح الخير زين على السلامة
سلمات على دينا بحرارة وهي تتسولها على لحال والاحوال وضارت عند جداها:مي سيفطاتو لك خالتي يزة وقالت على سلامة دينا غير تسالي تجي تشوفك
رحمة حلات الطبݣ لي كان عامر مخنفر:ياويلي علاش معذبة راسها وهما مرونين
تجمعو على طبلة الفطور لي كان منوع المسمن البطبوط البغرير وهادشي باش معروفين ناس البادية كلشي على حقو وطريقو الزبدة البلدية والزيت العود الخالص كياكلو وكل واحد كيخطط شغيدير فالنهار وكقسمو المهام دينا تتفطر ونسات الكورنفليكس ونوتيلا لي جايبة مكاين ما حسن من الطبيعي وزيد كلات بعينيها فالاول الطبلة مزوقة خلات نفسها تحل عليها ونسات السقاطة سالاو وتجمعات طابلة الفطور كانت فلكوزينة حدا سليمة لي فالارض تتغسل فالماعن
سعاد:اهزي ديك القزيبة من الارض نهار تجيك حق الشهر تجلسي تلواي وتولولي
دينا ضحكات:شنو هي قزيبة
سعاد وهي كضحك:عنداك تمشي تقوليها ابنيتي ݣدام شي حد راه عيب غا انا مع هادو مبقى عندي فرانات
كملات سليمة الماعن وخرجات هي وياها يتسخرو فنفس الوقت تساريها وقفو قدام واحد الدار لكبيرة تاهي وضاير بيها الصور دقات سليمة شحال حتى طلات عليهم واحد لبنت من السرجم:سليمة اكدايرة دخلي
سليمة:سميحة لباس لا زربانين اختي قالت ليكم مي الله يخلف والا عندكم شوية الشيبا عفاك حيت حنا يلاه حشيناها وتقادات
سميحة:يلاه مشى خليفة يحشها سيري عندو للفصة يعطيك
سليمة:واخا شكرا راه بدا يطيح السر تبارك الله هههه
سميحة:هههه قولي راني صفاريت بالخلعة
سميحة:هههه قولي راني صفاريت بالخلعة
ضحكو وزادت هي ودينا لي غير ساكتة وتتشوف وغا يدوزو من حدا شي حد يبقى يشوف فيها الفيلاج مكبيرش والهضرة دغيا كضور بلي بنت ولد الحاج احمد جات من بلاد النصارى وعاد انها غزالة داكشي باش لي دازت يتبعها
سليمة:شفتي هاد لبنت لي طلات علينا هي لعروس
دينا بابتسامة صغيرة وعينيها فالارض حاضية لتعفط فشي حجرة:زوينة حنا فين ماشين دابا انا يبغي يشوف بݣيرة
سليمة:هاحنا نمشيو غير عند خليفة يعطينا الشيبا نجيبوها لمي ونلحقو على عبد المغيث مشى يسرحهم
حركات راسها باه ودخلو لواحد الجيهة خاوية كانو الاراضي كلهم سبول مزال محصدوش بقاو غادين وسط منهم ودينا خايفة لطلع معاها شي حاجة وسط داك الزحام ديال🌾حتى خرجو لارض اخرى كلها ربيع خضر تتشوف الخضورية دالطبيعة شحال غزالة مدة قصيرة حتى كبانليهم شي حد بعيد شوية سليمة:راهو زيدي قبل ميسالي ونوليو مرجعينو
تبعاتها بالجرى وقربو حتى مبقاش بزاف بينهم وبين المقصود هنا سليمة ضربات فخادها وهي تتشوف لبعيد:اويلي على مسخوط الوالدين
دينا ضارت:مالكي؟
سليمة:عبد المغيث ولد لحرام مدخل لبݣر كسرحو فبلاد خيمة السالمي شوفي خاصني نمشي نخرجهم قبل ميشوفوهم مالين الارض هانت غتمشي عند هداك الولد راهو قولي ليه قالت ليك الحاجة رحمة عطيها شوية الشيبا عاوديها
دينا بتركيز:نقولو يعطينا شيبا
سليمة:اه الشيبا سيري انا جاية دابا
مشات تتجري تابعة خوها لي دخل البݣر يسرحو فأرض الناس وهي بقات تتمشى بشوية عند السيد تتقرب بخطوات صغار منزلة راسها حتى قربات شوية وقفات وشافت فيه هنا محساتش براسها حتى بقات حاضياه بلاما تهضر وحتى هو مردش ليها البال كان مزال شاب محني على الارض كحش بالفاس عرقان بفعل الشمس والعرق نازل مع رقبتو ومرة مرة كمسح جبهتو كارز على ذقنو المزين بلحية سوداء طالعة من الجناب حتى لاصقة مع شعر راسو الكثيف لي لا يقل عنها فالسواد ضورات عينيها لكتافو العراض والعريانين حيت لابس غسليب كحل لاصق عليه بالعرق شافت دراعو لي شادة الفاس العروق بارزين منها والاهم انه سمر والشمس زادت غلقات لونو شوية فثواني حضاتو كامل وفلات تفاصيلو مفيقها من سهوتها غير صوت الفاس تضرب مع حجرة بلعات ريقها شوية وقربات عندو حاسة بالحشمة كان هو تكعد عاطيها بالضهر مزال مشافهاش غارق فشغلو زاد شوية وتبعاتو غير وقفات وراه نغزاتو بصبعها فذراعو ونطقات نيشان بدارجتها:هاه سوف قاتلك ميما رحمة عطيها
تلفت ولمحها من شكلها عرفها شكون بنت اقرب جيران لهم لي جاية من برا تلفت عندها كامل ونطق بصوت هادئ:شخاصها
دينا معقلاتش على شبغاو بدات تتحك راسها ورجعات شافت فيه:انا ينسى يلاه معايا عند ميما تقولك شنو سميتها
ومع كملات كلامها بلا فرانات شدات فذراعو بيديها الصغيرة وجراتو بكل ثقة:غير يلاه دار ميما غير هنا متخافش
بلاما يتزعزع غير كشوف فيها وهي مزال مواصلة يلاه يلاه باغى تديه هو كامل ماشي غير الشيبة خخ شافتو مزال تابث وهي عيات تجر طلقات منو ونطقات:وغير يلاه دار ميما قريبة واش خفتي ماماك تغوت عليك؟
#يتبع السيد بشلاغمو وبطولوا وعرضوا قالت ليه تخافش ماماك تغوت عليك 😂 وااااهيا ناري كون غي بقات
بقى كشوفيها واش تتهضر بصح ولا كضحك منيتها هادي لكن مغيديش عليها حيت تتبان ليه صغيرة لا من ملامح وجها ولا شكلها قصيرة ولابسة ديك البيجامة وشعرها الطويل كطير على وجها وتترجع فيه اللور وتتقولو يلاه زيد وتتعبر بملامح وجها معرفها مين خرجات ليه بقى كشوف فيها وهي شاداه كحس بيديها رطبة على ذراعو ماحس على راسو حتى فلت يدو منها بشوية وبأدب نطق بعدما جمع عينيه دغيا احتراما ليها كا بنت:غا سيري عاودي سوليها منقدش نمشي معاك ممساليش
دينا دلات قنانفها دليل على قلة حيلتها ونطقات بصوتها الرقيق والدارجة الكارثية:انا عرفش يمشي(منعرفش نمشي)للدار بوحدي ويرجع عندك
وفهاد اللحظة سمعو شي حد كعيط ليه من بعيد تلفتو بزوج كانت سليمة بعيدة قدامها البݣر تتشير ليه بيديها:خليفة وااخليفة
نعت ليها بيدو فدينا ودارليها حركة شنو زعما مالها جاوباتو وهي تتغوت: قاتلك مي عطيها شوية الشيبا راه حشيناها(قطعناها)وكملات مزال ما ناضت ثاني
رجع شاف فدينا ونطق:قالو ليك الشيبا
هنا ضحكات وضربات على جبهتها:اه دغيا دغيا عطيني عفاك بݣيرات يمشيو(غيمشيو)
تحنا حشها بالفاس جمع ليها شوية وعطاه لها بلاما يطول فيها الشوفة خداتها من عندو وهي غادية تتجري:thank you
هازة طرف من بيجامتها تتجري وتنقز الحجر بحال شي بنيتة صغيرة خلاتو دغيا رجع شافيها تتنقز ورجع ضور وجهو وهو مكمل خدمتو ضحك فنفسو كحرك راسو بلا وهو تتفكر يلاه معايا ولا خفتي ماماك تغوت عليك
كانو فالكوري دالبݣر🐄دايرة يديها على نيفها الريحة مجهدة تتمشى بشوية وخايفة تزطم فزبلهم وخايفة حتى منهم بانولها كبار بزاف عكس سليمة لي مولفة مشات دخلات وسطهم عادي:زيدي اصاحبتي ميديرو لك والو
بدات تتزعم وتقرب لوحدة بلدية مخلطة بين القهوي والبيض يلاه غتحط يديه عليها وهي تطلق صوتها مجهد شي لخلاها طير وتهرب من الكوري فمرة مطلاقات غير بجدها:امالك ابنتي
دينا مخلوعة:ناري ابا بݣيرة كبيرة بزاف خفت انا
حمد وهو كضحك:اودي علامن معولين اودي سيري جيهة الخرفان ولا الدجاج
وهنا وقف معاه واحد السيد من الدوار كهضر معاه وهي مشات دخلات تتنش على وجها دغيا عيات وجاها الصهد لاحت الصندالة وبقات تتمشى حفيانة فالزليج البارد دخلات لكوزينة فين كانت رحمة وعريساتها:ميما
رحمة وهي تتعجن:بنيتي دخلي الشمس عليك
دينا عمرات كاس تتشرب:اه الصهد بزاف
جلسات معاهم فالطبلة دالكوزينة كانو كعجنو المسمن ديال الرفيسة لي راضينها طيب وريحتها عاطية دينا:ميما مكاينش كسكسو
رحمة ضحكات:نهار الجمعة نديرو لبنيتي انشاءالله
بقات معاهم شوية نجية خت سليمة تتقطع المسمن وتتفلي فيها بعينيها من راسها لرجليها دينا شوية وطلعات لبيتها هزات الطيلي ديالها دوات مع ماماها وباباها من بعد دازت للواتس كتهضر مع صحابها وكسولو فيها
داز الحال ووصل وقت الغدا تحطات الرفيسة شهوة منها فقصرية عاامرة بقوامها ضارو بيها مخلاو فيها والو كلات حتى شبعات من المعروف أن الرفيسة تترخي وورا الظهر فالعروبية ككون برا غا تيقيقت ديال الشمس ترمي بيضة تقلا شي لخلاهم كلا واحد يتجبد فجيهة وحتى هي معاهم تسرحات مع ولاد وبنات عمامها لكانو كثار ومن جميع الفئات العمرية فالصالون ونعسو غير عمها محجوب بات سليمة عندو ستة زوج بنات وربعة الولاد شي قدها شي كبر ولا صغر منها عاد خلي عمها لاخر لي مزال مشافت غايب خدام عندو ربعة الولاد صغار وخلي عمها الصغير تاهو عندو زوج بنيات صغارات ومراتو حاملة غايبة لدارهم فداك الوقت لكن دار جدها كبييرة والتيساع موجود ممخليش بنادم يبان كثير ومزاحم ومن جيهة اخرى كاينة حلاوة لمة العائلة ياكلو مجموعين وينعسو مجموعين وما احلى هاد الجماعة مفاقت حتال ورا العصر على ريحة القهوة كحلة كانت غير بوحدها ناعسة كلشي فاق وتشتت جلسات تتفوه وتكسل وقصدات الكوزينة كانت مرات عمها الوسطاني تتعجن البطبوط:الزينة فقتيي
دينا مبتاسمة:فين هي ميما؟
تيجانية:مشات لخيمة العيادي هادو لي حدانا تمشي عندها؟
دينا حركات راسها باه وهنا ناضت تيجانية خرجات معاها لباب فين كاينين ولادها كلعبو عيطات لواحد منهم وسيفطاتو مع دينا يوريها دار لعيادي لي كانت غير قريبة حيت متتعرفش ومزال مولفات ضروري يرافقها شي حد غاديين بزوج وتضور تشوف فيه كان صغيور وكيوت خخخ واصل لكرشها فالطول وهو لي غادي حاضيها وموصلها زعما مع وصلو نعت ليها:هاهي
دينا:مين نرجع نعطيك شكلاطة
ولد عمها فرح وتحلات ليه مشى كنقز خلاها هزات راسها فالدار كانت مقادة من برا وكبيرة بحال دار جدها نيت باب الصور كان محلول دقات وهي كطل مبان ليها حد تقدمات شوية هنا شافت واحد البنت دايزة عقلات عليها نفسها العروسة لي دوات مع سليمة الصباح تمات جاية عندها مبتاسمة تسالمو بلوجه:سلام لباس
دينا بتاسمات:لباس ونت عفاك كاينة ميما هنا
سميحة:اه زيدي دخلي مرحبا بيك
دينا تقدمات معاها منزلة راسها حشمانة وهي فدار الناس نيشان للصالة فين كانت جداها ومامات سميحة والعيالات والدنيا عامرة بحكم انها دار العرس ككون الداخل كثر من الخارج سميحة:مي جات عندك واحد الضيفة من ميريكان ههه
غير سمعو ميريكان عرفوها شكون وضحكو الحاجة يزة:مرحباااا بيها زيدي ابنيتي زيدي تبارك الله سعدي سعدي
دينا حيدات كلاكيطها ودخلات سلمات عليى كلشي والانظار عليها وجلسات حدا جداها:فقتي اميمتي
دينا حركات راسها باه وهي مبتاسمة كلهم كشوفو فيها بفضول من راسها لرجليها باينة فيها برا نيت غير من حالها وزينها كبات ليها الحاجة يزة اتاي وهي تترحب بيها وتقرب لها الطباسل حداها:هزي اميمتي كولي متحشميش تبارك الله زين الله يحفضها لكم اختي رحمة
رحمة:امين ياربي ويخلي ليك بنياتك ووليدك الله يرضي عليه
يزة:امين ياربي وسيدي عبد الغني تاج راسي
كلشي ضحك وحتى هي معاهم دينا عرفات انها على راجلها ضحكات تاهي هنا جات وحدة من بنات يزة هازة بلاطو فيديها:مي انا غاندي لخليفة اتاي
يزة:سيري اميمتي درتو ليه الزيت والزبدة
اسمهان:اه قادات ليه سميحة كلشي
يزة هزات من طبسيل لفاكيه:هاكي دي ليه شوية السلعة يݣعد ݣليبو وليدي من الصباح وهو من حاجة لحاجة
رحمة:مزال سارح مسيكين الله يرضي عليه عزيز عليا بحال قطرة العسل على قلبي ديما كنقول ختي يزه ربحات هاد الوليد ماشاءالله الله يحفضو
يزة هزات كفوفها كدعي مع ولدها حبيبها:الله يحفضو ياربي ويبعد عليه شر الخلق ممخلينا مخصوصين من حتى حاجة خليفة وخرج نييت خليييفة باه وجدودو
مرا:ايوا اختي يزه راه وصل وقتو تاهو يدير دارو ووليداتو
يزه:الله يجيب ليه بنت الناس لي تستاهلو نهار يبغي المخيرة فبنات الاصل نمشي برجلي نجيبها ليه
دينا وسط هادشي كامل سمعات السريح عرفات الزنقة وهي مزال باغية تكتاشف الدوار ضارت عند جداها:ميما يمشي معاها
يزة سمعاتها:نوضي معاها ابنيتي راه غادية تدي غلخوها اتاي سارح البهايم
رحمة:سيري وعدااك فالطريݣ
ناضت مشات معاها مخليينهم كهضرو فأمور العرس لي ما بقى ليه والو وكوجدو ليه خارجة تابعة اسمهان لي هازة لبلاطو طلاقاو مع سميحة جالسة تتخلط شي تخليطة لوجه تتوجد لعرسها تبسمات لدينا:فين غاديين؟
اسمهان:نديو غا لخليفة آتاي ونضورو شوية
دينا:يلاه معانا حتى نت نخرجو
سميحة بابتسامة:لا منقدرش نخرج محبوسة ههه
دينا بتاسمات بلاما تحكر ومشاو غاديين هي واسمهان مدة قصيرة وشافت فيها:شنو سميتك؟
دينا:انا دينا ونت؟
اسمهان:انا اسمهان متشرفين قوليلي كدايرة ميريكان زينة ياك
دينا شافت فيها وهزات كتافها:عادي شوية ههه كاين الصداع ماشي بحال هنا
اسمهان بفضول:والطيارة تاهي تتجيب الدوخة بحال الكار
دينا ضحكات:شوية هههه غير تولف انا غير نطلع نعس
بقاو غادين بزوجات كهضرو بزوج اسمهان تتسولها باغية تعرف كلشي على الخاريج كانت قدها فالعمر وجالسة من القراية كل مرة ضحك لدينا على دارجتها محسوش براسهم حتى وصلو دينا بقات تتشوف فالبهايم مخلطين خرفان وماعز وسط داك الحقل كبير وكولو خضر وزيد وقت الغروب واحد المنظر فالسما كان وااعر تبعات اسمهان بشوية فاش شافتها مشات عند خوها وعطاتو لبلاطو كان عاطيها بضهرو العريض ولكن غير ضار شوية عرفاتو نفسو لي هضرات معاه الصباح بقات تتشوف فيه تاني وتعبر فيه من راسو لرجليه وكيف كهضر مع ختو بصوت هادئ ومهدن كعقد حجبانو مرة مرة ولا كزير على ذقنو بقات حاضياه بلاما تحس حتى ضار شافيها غير طلاقاو عينيهم ضورات وجها دغيا وحسات على راسها
وبقات حاضية البهايم بغات تقرب منهم لكن خافت وزيد ديال الناس يقدر ميبغيش حتى تمشي لكوري ديالهم وتشوفهم هو رجع شاف فختو ونطق:يلاه سيري للخيمة راه غيطيح الظلام
اسمهان:اه واخا غير شوية نضور انا ودينا وندخلو عفاك مين تكون جاي جيب ليا كيكس دالشكلاط من لحانوت
حرك راسو باه ورجع جلس بلاصتو كشرب اتاي يرد مجاجو وراسو لي تقلب بالشمس منين كحل عينيه وهو كدمر وهاز كلشي اما هما بزوجات رجعو بحالهم غاديين وكهضرو:علاش ختك قاتلي متخرجش محبوسة
اسمهان:حيت عروس والعروس عندنا متخرجش لمدة شهر حتال عرسها
دينا هزات راسها هنا شافت شي نصارى كضورو فواحد الجنان وكتصورو:شنو كديرو هنا كاين شي واحد نصراني ساكن معاكم
اسمهان حركات راسها بلا:لا راهم جالسين فلوطيل ديالنا قبل ميمشيو لمراكش
دينا:ياه كاين اوطيل هنا وديالكم
اسمهان:غير صغير مقابلو با وخويا خليفة فاش كسالي اجي يلاه نمشيو ليه راه ورا دارنا
تبعاتها بالجرى وسط الدوار لي كانو خارجين الناس العيالات مجمعات قدام خيمة وحدة فيهم البراهش كلعبو والرجال حتى هما شادين ضامة حسات بالحركة فالدوار مع العشية وهي غادية مع اسمهان حتى سمعات شي حد كعيط لها تلفتات كان جدها:نعااام ابا انا يجي دابا
الحاج حمد:يلاه زيدي دخلي الله يجعل البركة حتال غدا
دينا شافت فاسمهان:انا يمشي دابا غدا يجي عندك صافي
اسمهان:صافي واخا جي نت وسليمة
تسالمو بزوج وهي مشات عند جدها باستو النهار كامل مشافتوش جبد من جيبو خنشة الفانيد وعطاها كمشة شدات فيه وتماو غاديين لخيمتهم وهي فرحانة دخلو وهنا تجمعو عليه البراهش كيف مولف لهم غير يدخل يجمعهم ويعطيهم الفانيد وبيمو لي كجيب لهم ناضت حتى هي بالجرى حفيانة وبيجامة ستمية تتلعب فوق لحمها دخلات لبيتها حلات وحدة من بالزها لي كانت عامرة غير سقاطة كاملة هزات منها تلاتة لباكيات دشكلاط وخنشة دالفانيد ورجعات نزلات تتجري وشعرها كلعب على ضهرها غير دخلات نطقات:يلاه اجييو
غير شافو الشكلاط تجوقو عليها ولمكاينش عيطو ليه عطاتهم كاملين وعطات لجدها ولي بقى خباتو لجداها وولاد عمامها لكبار حمد وهو تتبنن:هاي هاي تراه شكلاط ميريكان زين اشهادشي فيه زنجلان
دينا عضات شوية وهي تتشوف فلغلاف:لا noisette ابا
حمد:لي هو آش اولد محجوب
هضر الولد المقصود بكل ثقة:النوزيت ابا هو التمر
الحاج حمد فرح ديما فينما يحتي على شي حد من ولاد ولادو يزيرو لجاوبو كفرح:سعدي سعدي تعالا بوس با غنجيب لولدي الفول من السوق غدا
سليمة داخلة:ياويلي ابا داير راسك فيه هدا noisette كعما يضور عندنا هنا عمرنا ذقناه فالسلعة ولا شفناه قالاك التمر
هنا حمد كوش على الدري من وذنو:تكذب عليا لحمار بوك تا لي متعرف الفاكية بالفرنسية لاش تقرا ولاش صالح
رحمة داخلة لقات حفيدها كرغب وحاتي عليه جدو من وذنو:ياتاااطلق منو انااااري مسينا عالله اجا مسكتو روسنا ضارينا
دينا وسط المخارية كانت شادة الطيلي تتهضر مع معتز لي صونا ليها نساحبات من وسطهم بانلها باب الخروج محلول خرجات من الدار وهي تتهضر معاه واخا غير صديق و مغيفهموش لكن موصياها شادية الا تاصل بيها شي صديق وكان ولد متهضرش قدام العائلة عيب كان كسول فيها وتتسول فيه محساتش حتى بعدات غير شوية على الدار وهي تتهضر كلامها كولو انجليزية بطلاقة ضاير بيها الظلام واخا كاين العمود ديال الضو الا ان سواد الليل طاغي
معتز:باش تتحسي دابا شوية؟
دينا تنهدات:لحد الآن راه كنحاول نتناسى تاحد من أقاربو مجبد ليا الموضوع
معتز:حيت تاحد مدخلو نت متعطيش فرصة لشي حد يدوي فهادشي حيت خاصك نت تنساي
دينا:عندك الحق عرفتي واحد الهدوء هنا الراحة بزاف
معتز:راه صراحة بلاصة مناسبة فين تقدري تبدلي الجو وسط الطبيعة بلا ضغوطات واخا أصل المشكل كاين تما
دينا:انا هنا بغيت نختابر شخصيتي واش غنقدر ولا لا بغيت نبين ليه قدامو كيف غنخرجو من قلبي بحال شي وسخ
بقاو كهضرو شحال من بعد توادعو يلاه قطعات مجات فين ترجع وهو يخرج لها واحد الكلب ديال العسة مع برانية حسابلو هاجمة بدا كنبح عليها وجاي قاصدها غوتات وعطات الريح لرجليها وهو تابعها من اللور تتبكي وتغوت وقلبها غيخرج من بلاصتو مبان ليها غير واحد دايز وهو نيت وقف فاش سمع الغوات تتبانليه جاية تجري شعرها كطير تتغوت مع وصلات عندو دارها وراه لكلب عقلو خارج بالنبيح غير شاف داك الشخص سكت حيت عرفو ولد الدوار تحنى هز حجرة خلعو بيها:سير سير حيد
الكلب تراجع وهي رخفات فيها النفس دارت يديها على قلبها وهي كتنفس بالجهد تلفت شافيها عاقد حجبانو:شكديري نت هنا بوحدك فهاد الظلام
دينا عاد حققات فيه نفسو خو اسمهان لديجا جامعهم موقف قبل هازة فيه راسها لانه طويل عليها عاقد حجبانو ومخنزر زاد كمل على كلامو:سيري دخلي لداركم
دينا عاد سرات معاها انه كغوت عليها خنزرات تاهي ونطقات بصوتها الرقيق ودارجتها الفكاهية:هييه غوتش عليا نقولها لباسيدي
خليفة بنفس النبرة لانه محملهاش تكون خارجة دابا الظلام يتلقى لها شي حد وهي برانية شافيها كوحدة من خوتاتو:هاد الوقت خاص تكوني فخيمتكم ماشي هنا
دينا مكتحملش لي يتهز عليها ماشي حيت فكها من الكلب غيبدا ينهض فيها بعدات وهزات حجرة:غوتش عليا انا كبيرة ماشي سوقك نت لي سير انضربك
هازة عليه حجرة باغية ضعقو بيها وهو طول وعرض منها وكعبر فيها بعينيه تتبانليه صغيرة هدا هو المشكل وزيد بنت مخاصش تخرج والظلام اما هي واخا الحجرة فيديها بقى بلاصتو مخافش قالت فبالها خاص تعايرو باش يبقى فيه الحال فدوك الثواني نيت تتفكر فشي معيارة بالدارجة وكشوفو فبعضهم كتسناها تشير عليه وهي تتفكر شنو تقولو حتى تفكرات واحد الكلمة يلاه سامعاها وهي لي تتعرف فالسبان تيرات فيه بيها وهي معارفاش معناها اصلا
دينا غوتات:نت قزييييييبة
تيرات فيه بيها بلاما تحشم لانها اصلا معارفاش معناها عند بالها بحال نت حمار ولا نت خايب مهم هي لجات فبالها خلاتو هو غير كشوف فيه ووجهو ماعليه حتى تعبير مخلاهاش تعرف ردة فعلو غير من الشيبا لي نسات قبيلة متأكد انها مفاهماش الكلمة لي قالت دابا بقى كشوف فيها وهي تتسنى ردة فعلو جاوبات سكاتو بتخراج دالعينين والجبهة لي مزال دافعة:راه انضربك سيييير هرب
باغية ضربو وتتقولو هرب زوج دالمرات طلاقاها خلاتو يسمع اغرب الكلمات والتصرفات فحياتو خخخ تقدم خطوة جيهتها بلا حتى كلمة شي لخلاها فرمشة عين ترمي الحجرة وتعطيه بضهرها متخلي وراها غير الريح هربات وخلاتو متبعها وهي طايرة حتى دخلات وسدات باب دارهم وراها زاد وهو كحرك راسو بلا اللسان طويل بلا فايدة كاع لبنات هكا تخرج فيك عينيها وهي مفيديهاش ولكن الطامة الكبرى انه فآخر ايامو ولا يتعاير بقزيبة خخخ اما هي سدات وراها لباب وجلسات تلهت دخلات وهي تتنش على وجها قلبها مزال كضرب مشات لكوزينة شربات مرات عمها سعاد لاحظات وجها الصفر:مالك كنتي خارجة فالظلام؟
دينا جلسات:اه وتبعني الكلب
سعاد خرجات عينيها:اويلي ياكما عضك راه مزال معرفوك مخاصش تمشي جيهتهم وحدك
دينا تفكرات الموقف لكن جمعات وطوات:خاف مني اطاتي بحجرة حتى هرب وهو جاي عندي هزيتها ورميتها عليه خليتو مشى يجري
سعاد ضارت مقابلة الطنجرة:ايوا حمدالله المرة الجاية متخرجيش وحدك الله يرضي عليك
تحط العشى لكان عبارة على اللحم بالبرقوق تعشاو كلاو الديسير ومن بعد ماجمعو الطبلة جلسو شوية على براد داتاي من بعد تفرقو وكلا شد بلاصة ولا سد عليه فشي بيت فين غينعس بعدما دارت روتينها الليلي وبدلات عليها تخشات فبلاصتها هزات تيليفونها نيشان لواتساب صحابها ديال لهيه واولهم زوي ومعتز ختها ماماها باباها ضارت شوية فانستغرام وقبل متنعس كانت داخلة لتصاور تتقلب وهي هكاك مجات عينيها غير فواحد التصويرة دخلات ليها وبقات تتشوفيه كيفاش نسات وممسحاتها فلحظة نسات كلشي وبقات تتشوف فيه شكون قال من بعد داكشي كامل عامين ديال المواعدة الالكترونية لي مكانش خاص تحط فيها جهدها كامل وندمات ولكن القلب ميشاور عامين وفرمشة عين تبخر كلشي شي ليخليها تعرف انه مكاين والو من الاول غير هي غرقات بلاقياس حسات بعينيها غرغرو طفات التيليفون ضارت على جنبها وتكمشات على راسها مقدراتش تحبس دموعها الشمتة لي خايبة علاش يضحك عليها واش هي شارفة ولا فايت فيها الفوت لي يبغي يستغلها على ود الجنسية كيف كديرو بزاف علاش مشافش زينها مشافش انها ضريفة وانها بغاتو ومكانتش كتلعب ورا ضهرو واخا كان عندها كامل الحرية
معرفاتش واش هي لي ناقصها عقل متيقة واحد مصاحبة معاه غير فواتساب طلاقاتو مرة وحدة فاش خدا نمرتها ولا هو لي خبيث وعندو الجهد انه يبقى عامين كضحك عليها وكن ملاحتش ليه ديك الكذبة لي كشفات كلشي كان مزال يزيد معرفاتش المشكل فيمن وزادت جات دفنات راسها هنا باش تنساه واخا جات عند جدودها الا انه وسط بعيد كل البعد على فين كانت واخا أصلها اول يوم هنا قضاتو بنهارو وليلو وجاها الملل شحال من مرة متكدبش وهادي غير لبدية وباغية تنسى اصل المشكل فبلاصة لي قريبة ليه فلحظة حسات راسها غير تترون واخا عيات تقوي راسها واخا هكاك محسات بحتى حد تتغامز عليها من ولاد عمها لي فالاصل ولاد خالتو هو يعني معارفينش وغير هي مكبرة الموضوع تنهدات وهي تتمسح دموعها راسها غيتفرݣع بالتفكير كانت غير تتحاول تناسى النهار الكامل ولكن غير تخلوات بنفسها طلقات لعنان لدموعها بقات هكاك على حالها حتى غفاات
دازت هاد الليلة وجا نهار جديد🐓🌞
صوت الفروج كاسر المكان إعلان على بداية صباح جديد كانو خيوط الشمس بداو كبانو شوية وسط الظلام الحالك لي بدا كمشي الدوار شبه خاوي من غير خطوات قليلة ديال الناس راجعة من الفجر وكان واحد منهم جاي داير صلايتو تحت ذراعو منزل راسو وبخطوات شبه مزروبة كحاول يوصل دغيا كيف كلا صباح مكتفوتوش صلاة الفجر كرجع وكمشي يشدها بجرية على الدوار ويفوتو كنوع من الرياضة باش يصحصح ويكون مستعد باش يدوز نهارو لي ككون عامر من صباحو حتال ليلو وزيد عرس ختو لي قرب واقف فيه معاهم على كلشي بحكم انه البكر والولد الوحيد وسط ستة لبنات وعاد باه عيا شوية وميمكنش مو تخرج للارض اذن هو لي منو كلشي الفلاحة السريح الكوري الزيتون السوق يمشي يطل فداك النزل الصغير لداير باه وزيد هو كاين مكاين لاش خواتاتو يخرجو يخدمو هادشي باش غادي هو فحياتو وتفكيرو هو مكلف برا وخواتاتو ومو مكلفين بأمور الدار والبݣر لي كتحلب حيت كبيعوه للمركز ديالو شي لاخر كولو عليه وهو لي مكلف بيه دخل للدار عطاتو ريحة اتاي طل على مو فالكوزينة كانت هي ووحدة خواتاتو:مي صباح الخير
قرب وطبع قبلة على راسها حيت خرج لفجر بلاما يشوفها يزة طبطبات عليه:الله يرضي عليك اميمتي فين بوك
خليفة كان كلبس فالسبرديلة الكيطما كان ديجا لابسها:طلاقا مع حيمود وبقى مجمع معاه
يزة:وسير اوليدي ومتعطلش الفطور قريب يوجد
حرك راسو باه وخرج كانت سليمة جالسة تتفوه وختو وحدة اخرى جالسين قدام الفران البلدي لي بانينو برا كطيبو لخبز بزوجات شافيهم ونطق:صباح الخييير
اسمهان:صباح النوووور
بديعة:معاش غتدي لحليب لمركز اخيي(اخويا)
خليفة:نورد لبهايم وغانديه غير بداو
خرج وخلاهم كاملين كلا وفاش مدهي فالفطور دغيا باش يحلبو لبݣر ويسيفطوهم للمركز وعاد زيد الدار عندهم عامرة بحكم عرس ختو قريب والعائلة بداو كجيو غادي كجري ولي داز من حداه يلقي عليه التحية واخا كان مزال الصباح بكري هادي عادتو بدا مبعد على الدوار وهو كجري بشوية وكطلع النفس بداك الهوا النقي ديال الصباح لكفيق الذات مزيان هدا هو خليفة 28عام فلاح شاب بسيط حل عينيه وكبر فهاد الدوار هو الوحيد لي خرج ولد عند واليديه بين ستة لبنات وهو اكبرهم مكرس حياتو بين خدمة الارض والبهايم وخدمة عائلتو مين عيا باه ولا هو كلشي بالنسبة لهم من غير الامور المنزلية هو لي مكلف بكلشي الاراضي البهايم السوق وهادشي تربا عليه وولا خليفة جدودو فالفلاحة لي خلاو شلا اراضي كلا وشنو فيها الزيتون التفاح وحتى الزرع اكيد لكان شي حصاد ولا شي جني دالزيتون ولا التفاح كجيب لي يعاونو ولكن كبقى هو لي خلف أسلافو فهاد الحرفة لي معيشاهم وفايتاهم ومخلياهم ميسورين وعاد خلي ريوس الغنم والبݣر لي حليبهم ومشتقاتو دايرينو تجارة حتى هو عايشين وبايعين من الخير لي عطاهم الله وفهاد السنين الاخيرة باه فتح واحد الدار ديال الضيافة صغيرة فالدوار كستقبلو فيها الزوار السياح اي واحد دايز من تما كدخل ياخد وجبة تقليدية ولا يبات على حسب تاهو واخد من وقتو وكقابلو مع باه ضرب ضورة على الدوار كامل وتحنى ضرب شوية ديال الطراكسيو عاد رجع لدارهم دوش بالخف ونزل فطر مع الرجال حيت بنادم كثير بسبب المناسبة ولاو كتفرقو فالماكلة كملو وكلا ناض لشغلو مشى لكوري وكانت الشمس طلعات خرج لبهايم لكانو تقريبا شي مئة خروف وزاد بيهم نجية بنت عم دينا كانت جاية مشات قطفات شوية النعناع من الجنان ديالهم وراجعة غير لمحاتو وقفات:خليييفة
سمع سميتو وهو يتلفت غير شافها تبسمات ليه ودارت ليه بيديها باي باي لقى عليها تحية الصباح وزاد منزل راسو بلاما يزيد معاها الهضرة خلاها متبعة ليه لعين وتنهدات من القلب
داز الوقت ورجع البهايم مع دخلهم للكوري لقى مو وتلاتة من خواتاتو كلا وحدة شادة بݣرة شافيها ونطق:صافي ساليتو الوليدة؟
يزة:اه اوليدي هادشي لي خرج ليوم
حرك راسو باه ومشى هز لحليب لي كان فواحد البرامل ديال الحديد هز واحد بواحد حطو فلهوندا ومع سد لباب وقفات عليه الثانية فالترتيب دخواتاتو:جيب لي معاك لفول اخيي قلبي ملهوف عليه الليل كولو وانا نتقلب وريوݣي سايلين
خليفة حرك راسو باه وهو مبسم لانها تتوحم وزاد غادي لمركز يبيع لحليب بحال كلا نهار وبحال كاع مالين الدوار كلشي كان متاجه ليه فداك الصباح ومنهم نيت محجوب عم دينا لي طلاقاه تما وشد معاه لحتيت
فدارهم كانو خواتاتو بستة مع شي بنات العائلة جاو يحضرو للعرس جالسين فواحد الجليسة برا الدار ولكن داخلة فالصور طاليين وجههم بالماسك
سميحة لعروسة مسرحة رجليها كدهنهم بواحد التخليطة مناسياهمش نقزات اسمهان:خليليا شوية تانا رجليا تمشݣو ولاو كي تاع الميت
سميحة كوشت على الزلافة:انوضي لطليتي منها الله يطليني مين قلت ليك دݣي ليا الشبة جلستي تهزي عليا فمساسطك ولݣاي دابا دوك الرجلين حرشات كي المشطات ميقدي فيهم عكر فاسي ولا صابون لبلدي
بديعة الاخت الرابعة:سرحاتهم عليا لبارح حرشين كرجلين خويا خليفة حسابلي غاهو لي مجبد حدايا
اسمهان:ماشتي نت رجليك مݣودين كلا صبع سابق خوه نت غادية وهما راهم لݣدام دقو لباب معرفناهم صبعان ولا بطاطة قصبية يتقبو العزبة المكروزة
سميحة هزات صندالة وشيرات عليها خلاتها ناضت هربات:الدغمومة طايرة بݣر غبر لبوك الشقف
اسمهان تخبات فلحيط:يا والله لا بياضيتي يا الشقفة وجه الشريحة برقوقة لعراس
مع كملات كلامها طارت خلاتها مفقوصة وتعاير هادي هي دار لبنات المشادة بين الخواتات فجميع المناسبات خخ
اما برا كانت جالسة قدام العتبة ديال دارهم حاضية لي غادي يسݣي على حمارو ولا لي جايب خرفانو لي داز يبقى يشوفيها والبراهش كلعبو ليوم صبحات مراشقاش ليها معرفاتش واش عاد طلعات معاها انها خلات مدينتها لي فيها كلشي وجات هنا ولا غير ليغيݣل لاعبة عليها حيت اصلا هي لي أصرات تجي ميمكنش تقلب لان مزال مشافت تحاجة خايبة منهم لي تخليها تنفر من غير الوسط لي مختالف جات من لمدينة للقرية ضراتها الشمس ودخلات مكانت لا سليمة لا نجية لا ولاد عمها لي قدها كلا فين مدهي كاين غير لبراهش وقفات عليهم فالكوزينة جداها وعرايساتها بزوج كوجدو الغدا:ميما انا بغيت ندوش
التيجانية:نحمي ليك الحمام؟
دينا:لا لا ندوش غير لفوق دغيا
رحمة:واسيري اميمتي عنداك يضربك البرد عندك شامبان والصابون جايباهم؟
حركات راسها باه التيجانية:انا نطلع نسخن ليك الشوڤو
دينا:انا نعوم غير بما بارد كاين الصهد
خلاوها على خاطرها حيت فعلا الصهد ومع هما قراب لمراكش مشات طلعات جبدات ݣنضورة فالغوز ملابس داخلية داكشي خفيف وجبدات لوازمها ومشات دخلات كانت الطواليط وفيها الدوش حيدات حوايجها ودخلات تحت الما بارد حسات بيه منعش على لحمها وخففها
لتحت كانو فالكوزينة كهضرو على دار العرس بحكم انهم جيرانهم قدام وولاد دوار واحد جا الحاج حمد طلب يسخنو ليه الما دلوضو وهما فحالهم حتى قفزو فاش سمعو واحد الصوت فزعهم كاملين عمرهم سمعو بحالو كخلع كلهم ناضو يتجاراو وتجمعو وسط الدار كان بالضبط جاي من الفوق حمد جاي يكحز من الصالة:اشهادشي السلامة ياربي
التيجانية ضربات فخادها:اويلي ياكما خدمات الشوڤو وطرطق
رحمة كتعدد:واانااااري بنت ولدييي ونااااري دينااا واااااديناااا
كلشي كعيط وتاحد مكجاوب من غير داك الصوت لي رعبهم مزال مواصل عمرهم سمعو بحالو ولا قدرو يطلعو يشوفو شكاين والدرية لفوق بوحدها💔
كلشي تخلع عياو يعيطو والو والصوت لي زرع فيهم الرعب مزال مستامر الحركة مقطوعة الفوق شي لخلا خوفهم يتزاد على دينا لي حسها غابر باغين يطلعو عندها وفنفس الوقت داك الصوت مخوفهم بزاف وهما غير لعيالات والبراهش ومعاهم راجل كبير الحاجة رحمة حاطة يديها على صدرها تتعدد ودغيا طيحات الدموع:وناااري بنت ولييييدي فينهااا واااديناااا وافينك ابنيتيييي وناااري ولدييي مأمني على كبدتو وانا مصنتهااا وااااربييي
دغيا سبقات الخلعة لان فعلا داك الصوت كخلع الحاج احمد كلامها وبكاها زادت علاما بيه:يا غسكتينا يا هاد المرة الله يحفض انا طالع
التيجانية لي ضارو بيها ولادها صغار تخشاو فيها خايفين باغية طلع تاهي ولكن خايفة:غير بشوية عليك اعزيزي
احمد غادي قاصد الدروج مخلوع وطلع ليه الطونسيو وزيد ركابيه فشلو عليه وهما كتغاوتو سعاد مرات عمها شافتو مزال معطل زيد راجل كبير ومخلوع نساحبات وخرجات تجري تقلب على يد المساعدة و شي حد فولادها تجيبو حيت ولادها كبار هي عكس التيجانية خرجات بلا عقل كطل وتقلب غير بانليها حماتها للغوت:خليييييييفة واااااااخلييييفة خلييييفة
خليفة لي كان واقف حدا خيمتهم مخرج بهايمو كوردو وهو حاضيهم غير شافها كتعيط ليه وبالغوات عرف شي حاجة تما قصدها بالزربة:اشبيك اختي سعاد ياك شي باس مكاين
سعاد كلها تترجف:تعالا تعالا عتق اخويي راه منعرف اشداكشي عندنا لفوق واش ريبان ولا شوڤو مطرطݣ ولا آش وبنت لوسي وحدها تما وغي انا والحاجة والحاج مريض هالعااار اخويي زيد وقف معانا نعرفو غير شكاين
خليفة غير سمع الخطر وزيد سمع الغوات لداخل دغيا دخل جيرانهم قراب بحال عائلتو سعاد وراه تجري غير دخل عليهم بحال شافو درهم دالحلال رحمة قرمات عليه:وليديي الله يرضي عليك طلع شوف شداكشي الروح غطيح وبنت ولدي بوحدها لفوق وباقى صغيرة
متسناش يجاوبها دغيا طلع فالدروج لقى الحاج حمد يلاه وصل للنص فيهم وصفر:غير بشوية عليك ابا احمد مغيوقع باس
حمد مخلوع غير شافو جلس فالارض وشد فراسو طاح منو النص ولكن ناض تبعو خليفة لي كمل طريقو مع وصل للطبقة نيشان مشى لمصدر الصوت قصد لبيت بلا تردد ودفع لباب بالجهد قفزات وطفات السيشوار ضارت باستغراب حيت عاطية بالضهر غير شافتو حلات فمها وخرجات عينيها دغيا وقفات بشعرها الفازك كانت تتنشفو:هيييه شكدييير هنا شنو بغيتيي
هو غير وقفات دغيا ضور وجهو مكملش فيها الشوفة لانها لابسة غير شورط وبيل سماطي ديالو نطق قالب وجهو:واش نت بخير معندك باس؟
دينا مسمعات كاع اشنو قال شعلات السيشوار لكان هو مصدر الصوت لقربلها قاداتو فيديها بحال وضعية الفردي غتيري فيه بالسخونية وبدات تتقرب عندو:خرج سير هرب شنو بغيتي نقولها لباسيدي(بدات تتعيط)ميمااااااا باااا قزيييييبة كاين هنا فبيتييي اجييييو
فهاد اللحظة خليفة غيقلب الضورة ويرجع بحالو لانها بانت ليه على خير وزيد عريانة واخا ممسوقاش مشهقات مين شافتو محاولات تغطي راسها لان بالنسبة لها هي عادي داك لونصومبل كتلبسو قدام باها عادي ولكن هو حاجة اخرى ومجمتع آخر عطاها بالضهر وزاد عاد طلاقا بالحاج احمد يلاه وصل كلهت:اشكاين اولدي اشداك العجب
خليفة:مكاين باس ابا حمد مكاين باس غابشوية عليك
هادشي لقال وزاد منزل راسو بخطوات تابثة ومسرعة فنفس الوقت لانه هلا بهايمو مع نزل لقا لعيالات تحزمو والعين بشوية هالي شادة صندالة وهال أي شادة مدلك الحاجة بخوف رحمة:اشداكشي اولدي فاين بنت ولدي اشداكشي كنا كنسمعو
خليفة:مكاين باس امي رحمة غا شوشوار ولا شكسميوه هو مول الصوت
سعاد والتيجانية غير سمعو السوشوار ادا ماشي شي حاجة طلعت تتجاراو عندها مخلين رحمة عاقدة حجبانها:اشنو هو هاد الشوشور اولدي شي بخوش دخل على بنت ولدي ولا اش
خليفة تنهد:فردي دالبرد كيقادو بيه الشعر ولا منعرف المهم راه مكاين باس امي رحمة خليت لكم الراحة راني مخلي البهايم يوردو وحدهم
رحمة:سير اوليدي الله يسهل عليك وفينما حطيت رجليك تربح
خلاهم وزاد عندو شلا شغالات عرس ختو قالب ليه الراس ورحمة زادت بالزربة تتكحز فالدروج حتى وصلات تنهدات مين شافت البنت صحة سلام جلسات فوق الناموسية ويديها على قلبها تتلهت:اشهادشي ابنيتي اشهاد الصوت
الحاج احمد:الله يا ابنيتي طارت منا خلعة وهذا غير كابوس السخونية
دينا مفاهمة والو غا حتى هجمو عليها:مكاين والو ابا سيدي مكاينش الصوت
التيجانية مشات هزات السوشوار:غير هدا اعكوزتي طلق الصوت مجهد
دينا عاد فهمات شافت فيها وهي غضحك مخرجة عينيها:واش كخلعكم هدا ههههه
وهنا بداو كضحكو كاملين قلبوها ضحك بعدما خرجات منهم حيت فعلا كان الصوت مجهد وهما ممولفينش بحال هاد الالات عندهم فالدار يعني كون كانت حداهم شي كوافورة بحال المدينة كان غيجيهم مألوف اما هما لا كاينة فالسوق وكمشيو لها فقط فالمناسبات وغير لعروسة لانو الاكثرية البنات ككونو محجبات تفاصيل كثيرة مختالفة الحاج احمد عاد سرات معاه:لوحي عليك شي يزار الله يرضي على بنتي السيد دخل ولقاك بالݣرصون عيييب
مع كمل كلامو وهو قالب عينيه زاد وخلاها معجبو حال صراحة الولد طلع ولقاها هكاك واخا هي راه بالنسبة لها عادي مكانت فاهمة والو شنو الݣرصون متسوقاتش ومشات كملات تنشاف الشعر
لتحت كانو ككملو نصيب الغدا مع الحاجة رحمة خرجات وهي تنطق سعاد بهمس:خليفة طلع ولقاها مسفحة هكاك محشمات ملاحت عليها يزار
تيجانية:هي حشمات من شيخي بعدا بقى غا خليفة تانت هاديك عادتهم بلاد النصارى غير لبغا يعيش فيها تلقايها تتلبس هكاك قدام لوسي نيت
سعاد:نوصي بناتي يوقروها لتمشي تزيدهم للمسخ
تيجانية:صراحة هاد اليومين طلعتها ونزلتها مافيها قوة خروج ولا تعياب فالماكلة غاهو ديك كثرة الصباغة فالوجه والحشمة لي بانتلينا دابا مافيهاش ممعاناش
سعاد: صراحة عندك الحق ولكن منبغيو ولادنا يدخلوهم فعايل النصارى مقادين على شي مسخة تخلي الدوار يحل علينا في فمو
داز الوقت رجعات الدار عمرات نزلو يتغداو كانو فالكوزينة كغسلو الماعن وهي حداهم تسولوها على ميريكان وهي تتعاود ليهم نجية:قوليلي ابنت عمي عدكم عادي تمشيو لمدرسة بالمااكيااج والصاية
دينا بدارجتها العوجة:اه انا يمشي بيهم ديما
سليمة:قوليلي عدكم الناس يتصاحبو بزاف والبوسان فالزنقة عادي شفتها في لانستغرام باسها قدام الناس بلا حشمة بلا حيااا
دينا بدات تتضحك وهي تتعاود ليهم شي حوايج تتخليهم غير كستغربو وبالنسبة لها هي عادي لانه اختلاف كبير فالتربية والوسط لي كبرات فيه كل وحدة سليمة:انا يختي باغى غير نطلع فالطيارة غا نشوفها ونشم ريحتها وننزل
دينا:اجيو عندي نخرجو ديما ونمشيو لبلاصات واعرين
نجية وهي تتشلل الماعن تنهدات:حنا مشينا تالمراكش وحدنا بقى غير ميريكان ونقطعو البحر
سليمة:اجي سمعت مي كتهضر قبيلة خليفة طلع عندك لبيت؟
نجية فهاد اللحظة شعل معاها الضو دغيا ضارت:طلع عندك باش طلع اشباغي
دينا قبحات وجها:خلعني ميعرفوش امتى دخل
بدات تتعاود ليهم على الموقف الطريييف لي وقع وبداو كضحكو اما نجية غير كانت مزال باغية تعرف شوقع واش هضر معاها شحال بقى بزاف وزيد لي محملاتش انها عايراتو محساتش براسها:وهو طالع يعاونك ونت جلستي تعايري فيه
دينا بقات تتشوف فيها مفهمات والو كيف هضرات معاها سليمة نغزات ختها تجمع وضارت عندها بغات تعتق الموقف: اويلييي على سوشوار هول قبيلة هههههه
دينا مدات مجابت:والله هما خايفين وانا ميسمعهم فاش عيطو بقيت مخداماه وزادو خافو(وقفات)مهم انا يمشي يطلع ينعس شوية ملي يفيق ندير لك ماكياج صافي
سليمة:واخا وصايبي ليا شعري
حركات راسها باه ومشات طلعات غير سمعو الحس تقطع سليمة ضارت لختها:واش حماقيتي ولا طار لك العقل بقى لي شوية ولاحظت فالدرية
نجية:وهي لي جالسة تعاير فيه عجباتك
سليمة:داروك محامية علييه فيقي من الݣلبة وديري شوية النفس لا نت لا دوك الهبيلات ديال الدوار النفس جات تالعندكم وشهداات
نجية قلبات عينيها ممسوقاش وكملات التسياق هدا حالها ومعندها مادير بحال حال بزاف من بنات الدوار حاطين العين عليه ولكن هي زايدة نغزة عائلتها قريبة لعائلتو كمشيو عندهم ويجيو عندهم تاهما مكتحيدش من خيمتهم الشقى لي تتشقاه عندهم مكتشقاهش مع مها وهما ممحتاجينش لها الدار عامرة بنات ولكن كلشي فسبيل الحاجة يزة ترد لها البال شي نهار وترشمها ليه امنيتها كيفما امنية بزاف البنات فالدوار بحكم انه هو لي عاطي العين عندهم تما مع سالات الماعن شافت شحال الساعة مبقاش بزاف ويخرج البهايم حافظة وقتو مزيان بقات تتفكر وهي تقصدها بدون تردد طلعات ودقات بشوية:دينا
شوية الوقت وهو يتفتح لباب كانو عينيها نعسانين دارت ليها الطريق باش دخل:دخلي
نجية:فيقتك كنت باغة غير نقولك ديري لي الماكياج تايانا
دينا غير سمعات الماكياج عينيها تحلو تتحماق عليه وكتبغي ديرو لشي حد ميولها اصلا تكون ميكاب ارتست:اه اه يديرو لك دابا دخلييي جلسييي هنا
دخلات وجلسات وهي تتشوف فداكشي ديالها لي محطوط فوق واحد طويبلة البرودويات الميكاب كلشي وهي كتكساب غير عكر دربعة وعشرين ساعة وفازلين الماكياج عندهم نادر او شبه محرم الا فالمناسبات مزال تعقل نهار دارت واحد العكر مشعشع وكلات قتلة هاهي دينا طالية وجها ومدواها حد تنهدات وتمتمات فخاطرها:شي عطاتو وشي زواتو
دينا جبدات واحد الباليزة صغيرة وحلاتها تما كان لميكاب ديالها كااامل نجية عينيها تحلو:تي هادشي ديال الوجه كيف كديري تعقلي على كل شقفة لاش تصلاح
دينا ضحكات:ههههه انا يحماق على ماكياج داكشي باش يشري بزاااف حطي راسك هنا
نعتات ليها فوق المخدة تكات تجبدات وجابت هي كرسي وجلسات نجية:مديري ليش داكشي مشعشع باش ميشوفنيش با
حركات راسها باه وبدات تتماكي ليها بتركيز كلا حاجة عاطياها وقت وكيف طلبات منها نفدات مدارتش ليها شي حاجة لي باينة ماكياج هادئ جا مع ملامح وجها الوقت كاملة وهما مضاربين وحدة تقول بغيت نشوف لمراية لوخرا تحلف حتى تسالي وداكشي لي كان كملات ليها وخلاتها تنوض تشوف نجية غير شافت داكشي عينيها تحلوو عجبها راسها بزاااف وممتيقاش: اويليييي تي هادي ياناا تبارك الله علام زيناتي ومعارفين بحقيي
دينا بتاسمات لها وهي تتجمع الماكياج رجعاتو لديك لباليزة ونجية تعوج قدام المراية وفرحانة خفات ليها عيوب وجها وركزات ليها على عينيها خلاتها ملامحها يبرزو كثر
نجية:هادشي خاصوو يشوفوه مالين الدوار يعرفو راسهم معامن وشنو مخبيين عليهم
زادت بحالها خرجات بلاما تسوق انها راه مشكراتهاش دينا متسوقاتش كاع ورجعات نعساات اما نجية نازلة حادرة راسها باش ميشوفها حد قبل متدير داكشي لي فبالها مشات تخشات فواحد لبيت وسدات عليها وهي تتشوف فلمراية مقاداها فرحة بوجهها
داز الوقت تقلبات على جنبها وهي تتكسل تكعدات نعسات شي شوية هزات الطيلي ديالها دخلات ضارت شوية دوات مع جوليا معتز زوي صونات لماماها مجاوباتهاش وحتى باباها غيكونو مشغولين ناضت بشوية ونزلات مكان حد فالدار من غير سعاد مرات عمها فالكوزينة وشي ولاد عمها قلال مجبدين فالصالة:طاتي فين ميما ولبناات
سعاد تتعجن:مشاو يجلسو شويش مع خيمة العيادي هادو لي جنبنا كي شتي عندهم العرس
دينا:هما دار اسمهان ياااك
سعاد:اياااه وخليفة لي طلع عندك الصباح تاهو منهم
مجاوباتهاش ومشات خرجات وقفات قدام لباب كتكسل الشميسة ساطعة وقريب غروبها الدوار فيه الحركة بحكم العشية صوت البݣر والحمير وحتى الفروج عاطيين ضوضاء زوينة مخلية جو البادية مميز كانو شي ولاد عمها دوك الصغار كلعبو مع شي وليدات اخرين جلسات فوق العتبة كتشوف الجو تما بريد خفيف كضرب فوجها وهي تتفكر ليوم معاجبهاش الحال مخرجاتش كاع معرفاتش واش بدا كتنادم معاها الحال ولا شنو عكس كيف كانت فالاول متحمسة وباغية تجي وفرحانة اما دابا لا يلاه يومين وملااات مكاينش فين تلاها
عكس فين كانت ولكن هي لختارت معندها ما دير زفراات معرفاتش واش نفسها لي هكا ولا غير ليغيݣل حيت هي فاش تتختار شي حاجة تتختارها عن اقتناع واخا زربات فهاد المجية ولكن كانت باغية تجي حطات يديها على صدرها وقاستو وفعلا حسات بيه تنفخ وكعݣرها اذن غير الكافرة لي مخلياها هكا صابحة بلا خاطر بقات جالسة حتى سمعات شي حد كعيط لها كانت اسمهان قدام باب خيمتهم ناضت ومشات عندها:كدايرة لباس غبرتي مبقيتي بنتي
دينا:غير ليوم كنت عيانة غتجيني ليغيݣل
اسمهان:اه الكافرة بنت لحرام اجي تسناي نجمع الكوري دغيا خويا غيخرج البهايم يسرحو وندخلو جلسي معانا كاينة مي رحمة وبنات عمك
دينا حركات راسها باه وتبعاتها بقات واقفة غير قدام الباب وتتشوف اسمهان تتجمع الحوالا غير تتقرب لهم كرجعو باللور شي لخلا دينا تبسم من خوفهم وهي مراقباهم كانو بزااف والكوري كبيير وواسع حمقوها شي حوالا صغار يلاه زايدين وشي معيزات حتى هما وعاد البݣر والثور حتى هو كاين غير كضور عينيها وتتشوف فوقما وصلاتها الريحة تبدا تنش على وجها جاي قاصد الكوري شافها كانت عاطياه بالضهر وشعرها طويل نازل على طولو بلاما يطول فيها الشوفة تخطاها ودخل:اسمهاان تكلمي لمي وجيبي ليا معاك السمطة نسد هاد السروال مرخووف
اسمهان:ضعافيتي اخويي دينا يلاه ندخلو
دينا:غير سيري انا شوية يضربني البرد ويدخل
حركات راسها باه وزادت خلاتها تتشوف فالبهايم تاهو خرج داز من حداها مشافت فيه مشاف فيها كانت تتسمع غالهضرة وراها بقات تتشوف فلحظة خرجات عينيها فاش شافت واحد الثور طلع على واحد البݣرة من اللور وبداو كتسمعو شي اصوات حلات فمها ودخلات قصداتهم ناسية خوفها والريحة وقفات قريبة لهم وهي تتغوت:هيييه بعد منهااا غادي ضرها فضهرها بعد منهااااا
طلقو واحد الصوت خلعوها وزيد بانت ليها واحد البݣرة ضارت جيهتها عاد حسات بلي دخلات وسطهم دغيا طارت الكبر ديالهم ضعقها راجعة باللور وتتغوت على داك الثور لي مزال مواصل شنو كدير والبݣرة كطلق شي اصوات عند بال دينا بلي كتألم خرجات دغيا تتقلب لقاتو غاهو قصداتو شدات فيه:اجيي اجييي تشوف شكدييير اجييي
خليفة عقد حجبانو مفهم والو وهي شادة فيه تتجرو عقلها خارج:اجييي راه غادييي تموووووت البݣيرة
تبعها فاش سمع الموت والبݣرة مع دخلو نعتات ليه فالبݣرة والثور لكانو كديرو التزاوج:قولو يحيد عليها غادي يضرها فضهرها قولو ينوووض عليها
بقى غير كشوف فيها واش بصح ولا تتبوهل عليه هادي كيفاش عايشة فبلاد الحضارة والحرية لي فيها بنادم كدير داكشي على الجهد بلا زواج ولا موجب شرع ومعارفاش كيف كدار عند الحيوانات دينا شافتو كشوف فيها مناوي يدير والو تحنات هزات صندالتها وجات وراه محمية بيه حيت كان قريب لهم الخوف والجبهة بدات تتغوت على الثور:حيد حيد عليها غادي ضرهااا حيييد واش غتبقى تفرج نتيااا راه غادي يهرسها لك
خليفة نيشان:السيد شاد مرتو باغي يدير الطريكة نوض انا نحرمها عليه مكدخل بين الراجل ومرتو غا الحاسد…
دينا بقات غير تتشوف فيه مفهماتش هضرتو كاملة ضارت تتشوف فالبݣرة لي كطلق داك الصوت وهو مبغاش يتحرك بقات فيها فهاد اللحظة دخلات واحد البرهوشة دايرة نظاظر دالشوف وهازة كتاب:خليفة اريدك ان تراجع معي دروس السنة القادمة لكي اكون مستعدة
خليفة مشى معاها فالخط:انتظري حتى انتهي من رعي الماشية يا سهيلة
سهيلة شافت فدينا وضارت شافت داك الديكور:يا الاهي يا خليفة إن ابقارك يفعلون الشر
دينا بكثرة مابقات تتشوف فداك المنظر وشافت شي حاجه تحت من الثور عرفاتها شنو هي عاد سراات معاها مزيان عينيها طرطقو وطلعات معاها السخونية ضارت دغيا شافت فيه كانو تاهو عينيه عليها ونطقات باحراج:واش كديرو هادشي باش يولي عندهمbaby
خليفة كشوف فيها كيف تزنكات وحشمااات حرك راسو باه وهو مصغر عينيه فيها غير شافت جوابو شهقات ودارت يديها على فمها وحمااارت بحال مطيشة مقدراتش تبقى واقفة قدامو خرجاااات تتجري طااارت ودخلات لدارهم خلاتو متبعها كشوفيها كيف حشمات حسابلو فالاول غير تتبوهل عليه ولكن بديك التزنيگة لي طلعاتها مايمكنش زعما ولاد بلاد النصارى فيهم بحال هاد الحشمة غريييب
اسمهان:دينااا اجي هاااحنا
تلفتات بعدما كانت داخلة منزلة راسها كانو جالسين برا الدار ولكن ماشي فالزنقة واحد الجليسة غير بالزرابي تقدمات عندهم كانو خواتاتو بستة وسليمة وشي بنات من العائلة ديالهم لي جاية تحضر للعرس سلمات عليهم كاملين وهما كشوفو فيها دارو ليها بلاصة حداهم وجلسات وجها مزال حمر لكن محاولة متبين والو متقدرش تعاود هادشي لي وقع ابدا لبنات كانو كلهم كشوفو فيها وهادي فينا قاعدة نبقاو نطلعو ونهبطو فبعضنا ونفليو بعينيها خصوصا انها زماگرية وجاية من برا نقزات ثورية وحدة من خواتات خليفة دارت يديها على خصرها ونطقات باغية تشد فيها:اجي اختي نت قالو لينا صبنتي خويا ومخليتي فيه غير لينسى
سليمة:ايه عايراااتو وعطاتو مسكين
بداو شادين فيها وهي شي كلام كتفهمو وشي لا كتفهم فقط ديك الدارجة البسيطة نقزات سليمة:شنو قلتي ليه ادينا اسمعتيه بالدارجة
دينا نزلات راسها وهي جامعة ركابيها عندها:قلتلو نت قزيييييبة والله انا غير كنت خفت اما منقولوش كلام خايب
فهاد اللحظة غير سمعو كلامها كلشي تكرشخ بالضحك خلاوها غير تتشوف فيهم:مااالكم؟
سميحة كضحك: اويلي على خويا طول وعرض ولا يتعاير بالقزازب ههههههههه
سليمة:اربيي على خليفة وفين تلات بيه ليام
دينا حسات بلي راه كانت تتقول ليه شي حاجة مشكوك بيها: علاش شنو هي قزييبة
فهاد اللحظة ناضت سميحة العروسة وكوزات:هاااالقزيييبة مشااااات الهيبة والشان اخيي خليفة
كلهم كضحك الا هي لي ضو شعل معاها كيفاش قزيبة هي هاديك لي كتجلس عليها هي عند بالها بلي معيارة عادية بحال نت خايب ولا نت حمار ولا كدا غاسمعاتها وقالتها اصلا حشمات حشمات وتزنگات حتى دارت يديها بزوج على وجها
حسابليهم بلي كتبكي وبداو كجرو فيها وكحزروها سميحة:اويلي البنت غير كنقشبو
سليمة شدات فيها:دينا غير كنضحكو احبي اويلي
ضارو بيها كحزروها وهي مغطية وجها حشمانة ايه تتحشم واخا كابرة لهيه ولكن الاصل والجذر غالب عرات وجها:انا يحشم (حشمت)دابا شنو يمشي يقولو سمحلي حيت قلتلو نت هادي
خديجة اخت خليفة لي كانت كتراري بولدها:تانت خليفة كعما كيدي على الخلق تلقاه نسى
بشرى:تانا ديما كنقول الله يعطيني من برودية دم خويا غا شوية
اسمهان:ايه ولكن نهار كينوض مكعقل علينا
وحدة من بنات العائلة:اه اي واحد درويش مكتسوقش نهار كنوض عرفيه غيرونهاا
بديعة تنهدات:خونا هاز بهبالنا الله يخليك لينااا لكدير لينا مدايرو حد فالدوار
دينا كانت غير تتسمع مبغاتش كاع تجبد الموقف الكوري حسات براسها مشوهة وغارقة فحوايجها بقات جالسة مكمشة كتسمع الهضرة فالداخل الدار عامرة بداو كهضرو لبنات على الوصفات وسميحة العروسة ناضت جابت شي تخربيق حطاتو غتبدا طلس نقزات وحدة من بنات العائلة:دينا شنو كديري لوجهك تبارك الله غزال
اسمهان وهي تتشوف فيها:هي اصلا كلها غزالة تبارك الله
وفعلا كانو كلهم فلاوها بعينيهم زيادة على زينها النقى باغي يخرج منها كتبان مهلية فراسها بشرتها لحمها صافيين شعرها يديها رجليها كلشي حضاوها فيه دينا:انا يدير السكينكير ولماسكات صافي
سميحة:حتى تقولي لي الماسكات لي كديري نطلسهم فهاد ليام لي بقاو
خديجة:تي ياكما يحسابلك كظل طلس لحمص مطحون ولا النيلا ابغيتي الزين جبد الحبة
دينا:انا يدير كلشي حتى الماسكات دالطبيعة ديما بلاتي انا يمشي يجيب لكم البرودويات
بلاما تسناهم يجاوبوها ناضت خلاتهم شادين فيها الحتيت بديعة:هادي راهي العروسة ماشي نت خخخ
سميحة:ولاهيلا تبارك الله ما عيناها رجليها بيض من وجهي
وحدة من بنات العائلة:ايوا اختي سلعة ميريكان هاديك الزماگرية هما هادو تنجب ونسولها على شكدير لصيݣانها انا قتلاتني جلد الإوزة
سليمة:غتجي غتفرق عليكم النص عرفتو مسكينة غير فهاد اليومين شحال عطاتنا ديال الشكلاط حاجتها ماشي ديالها
اسمهان:توحلي غير مع سميحة الجيعانة
سميحة:يعطي لملتك الجوع يݣمطك مانتي مطفرااه البق ما يزهق الله يستر
ثورية وحدة من خواتات خليفة تاهي:الله يخلي ليا خويا خليفة عمرو عز فيا الحاجة بغيت لكم الدل نت وياها
فهاد اللحظة رجعات دينا هازة واحد المانيطة صغيرة تتلهت دارو ليها بلاصة وجلسات وسطهم وبدات تتحل جبدات واحد الغسول دالوجه بحال البوماضة:هانتوما غسلو بهادا وجهكم يكون نقي عاد نديرو الماسكات
غير سمعو غتعطيهم يديرو وبانلهم داكشي كثيير وماركااات وهما ينوضو يتناقزو كل وحدة عصرات لها فيديها وناضو يتجاراو يغسلو حيت الوجه خاصو يكون نقي الا بغاو يديرو الماسكات
فجيهة اخرى كان جالس فوق حجرة الكلب حداه مقابل هو وياه الخرفان لكسرحو فوقما يبانو ليه شي زوج بداو كتناطحو ينوض يفكهم كدوز يديه على ذقنو متحسس لحيتو ساهي كفكر فعرس ختو لي واقفين عليه شنو خاص وشنو لي باقي العائلة بدات تتكب عليهم وخاص بعدا القوام باش غيطعمو الناس لي جاو ومزال يجيو قبل العرس هاز الهم لكلشي كبلاني وكخطط حتى سمع الحس وراه تلفت غير شافها عرفها لاش جاية ثاني كانت تتمشى جيهتو بخطوات موزونة او كانت تتحاول تمشى هكاك مقادة الزيف ولابس بيجامة جديدة مزوقة داك الوجه كيف الطعريجة وجاية غير وصلات هزات فيه عينيها ونطقات بصوت ملحون تتحاول ترققو:خليفة كداير لباس
خليفة وقف وجهو معليه حتى تعبير ونطق:حمدالله ونت
نجية مبسمة وتتنزل عينيها كتداعي الخجل والحشمة:لباس الحمدلله ربي خليك
مع كملات كلامها مدات ليه الصينية لي كتجيب ليه ديما فوقما لقات الفرصة نزل عينيه لصينية وتنهد غلبو وجهو وزيد عيب يرد النعمة قرب بشوية وخداها من عندها خلا قلبها غيطير بالفرحة:خاصاك شي حاجة نجيبها ليك
خليفة حط الصينيه فالارض حداه ونطق بأدب فيه رسالة لها:لا لا الله يخلف عليكم بلاما تبقاي تشقي راسك اختي نجية راه كتسيفط ليا الوليدة
نجية حركات راسها باه وديك ختي كطلع وتنزل فيها:مكاين لا عذاب لا والو نت راه واحد مننا الله يعاونك
مع كملات كلامها ضارت وزادت تتغدد المكياج والحالة واخا هكاك مكطولش فيها الشوفة وزيد ديك كلمة ختي عمرها بغات تحيد غير بعدات عليه تمات غادية تتشتف ومعصبة منزلة راسها باش ميشوفها حد بداك الوجه المطعرج عيات تطير وتنزل وقت طويل بزاف وهي تتحاول ولكن تحاجة مكتبدل بحال كتكب الما فالرملة لانه ماشي غير هي بزاف من بنات الدوار حاطين العين عليه لانه اكثر واحد وسامة ضريف دياني وداخل سوق راسو عيبو بعيد وهو الذراع اي هازة كل ما يخص عائلتو ودارو يعني راجل ديال الزمان بكل ما تحمل الكلمة من معنى دخلات تتشتف مكان حد من غير ولاد عمها الصغار ولاد التيجانية منعساهم فالصالون وهي غايبة مع عكوزتها وسعاد لدار العرس دخلات لكوزينة جلسات وهي معصبة فهاد اللحظة حسات بشي حد دخل دغيا لوات عليها الشال غطات وجها غير شافتها زفرات:خلعتيني عطيك الويل
سليمة لكانت طالية وجها بماسك دخلات هزات واحد الكويس صغير غديرلها فيه دينا شي برودوي مع تمات خارجة نطقات:شفتك خارجة من الجنان هادشي لي كديري فيه مكبغيه لا ربي لا عبدو قيلو عليكم الراجل ونتوما بغيتو تزيغوه بزز كلا مرة خارجة ليه وحدة شوهتو ببنات سيدي عبد الله
نجية وهي معصبة:سيري فرقينييي عليك راني طالعة ليا خاصني غا فيمن نعض
سليمة:ماشي اول مرة ترجعي من عندو هكا نفس الحاجة كتمشي عندو وترجعي معصبة علاش حيت كعاملك بحال ختو واخا منعرف شنو ديري عزها تعزك انجية الرجل عمرو مكشوف فلي كتلوح راسها وتحوم عليه هو لي كبغي يطلع وينزل على ود المرأة
نجية بقات جامعاها حتى طلقاتها عينيها غرغرو ونطقات بصوت باكي:شنو نبقى حتال شي مرة نسمع يزة خطبات ولا رمشات ليه هاديك هي اللخرة ليا
سليمة تنهدات:غير كضيعي الجهد وكتشري سخط واليديك ولي خلقك نت داوي فيك واحد وكتحومي على واحد آخر متربيناش هكا اختي الرجوع الله راك سنين ونت قدام يزة الشقى لي كتشقايه لها وهي عندها ستة العيالات مكتشقايهش فداركم غير من هادي تعزلك ممكتابش انجية رضاي بمكتوبك وزيد سعيد مناقصو حتى خيير غير نهار جا يدوي فيك شحال جابلك معساك الخطبة وضريب الصداق شاريك بالغالي غير نت بايعة راسك بالرخيص لغيرك
نجية لي زايدها انها داوي فيها واحد آخر وخطبتها بقاو لها شهور لي داوي فيها الله يعمرها دار ولكن القلب كميل لواحد آخر دارت يديها على وجها وجلسات تتبكي وتنحط الحب من طرف واحد صعييب ولكن حتى الدل اصعب سليمة تنهدات وزادت خلاتها تتفش غايجي النهار لي تعرف فيه كلامها مزيان صغر منها وكترد ليها عقلها تتبقى فيها ختها بزاف ولكن الحب لي يجيب لها الدل بلاش منو
سميحة:الله يختي يديك رطيطبين تبارك الله
كانت متكية على فخد دينا لي كتماصي ليها الماسك بطريقة يستافد منها وجها مزيان بحال سواه نقزات ثورية تتشوف فداكشي لي عطاتها دينا:الله يخلف عليك اختي دينا نردها ليك فساعة الخير
دينا بتاسمات:ماشي مشكل الا جيت مرة اخرى يجيب ليكم حاجات آخرين
اسمهان كانت كدير فقنانفها واحد الݣلوص عطاتو ليها دينا:وشحال ريحتو زينة حسيت بشلاقمي رطابو من دابا الله يسهل عليك اختي
دينا مركزة مع سميحة:اه ديريه ديما وغيرطب ليك
سليمة جلسات:هاهو كاسي ديري ليا ادينا
دينا:يديا عامرين راه السكراب خودييه وعطي لبديعة حتى يبغي منو
داكشي لي كان فرقات عليهم النص من برودوياتها حتى ولاو كقولو لها غير كبي لينا فطويسات لقاتهم حتى هما مطماعاتش فوق القياس ومبغاوش يقجرو عليها يلاه سليمة هزات الحك فيه السكراب خدات منو شوية وخباتو فالكاس حتى ديرو من بعد بديعة هزاتو تاهي:قويلي ادينا غير نديرو على سيݣاني ونبدا نحك ونغسل صافي بغيت نديرو لفاقو ولادي والله لبقيت درت شي حاجة
دينا:اه انا يسالي ويوريك
بشرى لكانت عطاها دينا اللصاقات ديال ليسيغن وواحد لبوماضة صغيرة ديالهم فرحانة بيهم تاهي ناضت وباستها كانت ناوية تدخل:شكرا بزاااف ادينا الله يخلف عليك
دينا:ماشي مشكل احبيبة خلي حتى يبغي تنعسي يديريهم
بشرى:واخا اختي ثورية نوضي يلاه نبداو نصبو العشى
ثورية كانت متكية ودايرة لصاقات تحت ليسيغن:غا سبقيني واخا لاحگة عليك جيبي ليا حفصة بنتي نبدل ليها وانا تابعاك
بقاو جالسين هكاك ديك الجليسة رجعات صالون شهرزاد حبوها كاملين ودارت بلاصتهم وسطهم لانها مافيها عياقة متكبرات عليهم
بلعكس حاجتها ماشي ديالها فرقات عليهم النص معزات فيهم حتى حاجة وتتقولهم الا نزلت المغرب المرة الجاية نجيب لكم عكس واحد ككون جاي غير من شي قرينة قريبة لهم ويبدا يفوح عليهم صح من قال توحل غير مع ليزانبيخيش داز الوقت دخلو يشربو اتاي مجموعين الدار عامرة والضحك والتقشاب وهضرة على التجهيزات دالعرس حتى ضلام الله الحال وناضت هي وجداها وعيالات عمامها واخا شداتهم يزة يجلسو لكن عتاذرو منها بحجة انهم تاهما خاص يطيبو عشاهم
كانت جالسة فلبيت مع سليمة لي متكية طالية ثاني ماسك ودينا تتقاد لها الخيار فوق عينيها وولادهم عمهم الصغار حداهم كلعبو عاطياهمخدينا المصاصات والشكلاط
سليمة:الله ياختي كنحس بيه بارد على كمارتيي
دينا:غير تسناي مين يحيد اتحسي بوجهك رطب
خلاتها متكية وناضت تتقلب على ماطلس تاهي بقات تتقلب حتى لقات واحد لبوماضة ديال المسام كانت واعدات سميحة بانها غتعطيها لها حيت ملقاتهاش قبيلة فالمانيطة ناضت:سليمة انا يجي دابا متهضريش ايخسر الماسك
سليمة بلاما تهضر:ممممم
ولد عمها صغير:دينا عطيني شكلاطة خرا
دينا:انا يجي دابا احبيبي ويعطيك
خرجات بالزربة تتجري كلاكيطها دايرة الصوت شعرها كلعب ورا ضهرها دازت من قدام الصالون الحاجة رحمة:افين غادية اميمتي
دينا رجعات:انا يمشي عند سميحة يعطيها هادي ويجي دغيا
رحمة:بشوية عليك راه الظلام هاكي البيل
دينا: بلاش اميما انا يجي دغيا
خلاتهم وخرجات تاحد متسوق لها حلات باب الصور لكبير لدار الصوت وطلات كان الصقيل والظلام تلفتات فدار سميحة كانت الطريق لها مظلمة وخافت ليخرج لها شي كلب البولة مكانتش عاطية الضو جيهتهم بقات واقفة شوية ليبان لها شي ولد عمها طلبو يمشي معاها حتى سمعات شي طوموبيل جاية واصوات كثيرة وقفات ديك لبيكوب قدام دار سميحة واللور ديالو بداو كنزلو وليدات صغار وكضحكو وكل واحد هاز بيمو وكان منهم واحد من ولاد عمها الضو ديال الطوموبيل وضحك الرؤية وبقات نزل وضارو بيه فرحانين حيت ضورهم على الدوار بالطوموبيل وشرا ليهم نزل وضار عندهم بدا مها وكنزل لي منزلوش وهما ضايرين بيه فرحانين عزيز عندهم حيت ديما كفرحهم:خليفة غادي تاني ركبنا فالطوموبيل
خليفة: انشاءالله يلاه سيرو دخلو لي لقيتو خارج مغاديش نهزو غدا
داكشي لي كان طارو كاملين كلا زاد لدارهم ولد عمها جاي كجري كوريها لبيمو باستو ورجعات ضارت بالها مع لاخر تتفكر سميتو لانها عمرها سمعاتها سمية نادرة ومقدراتش تفكرها غير شافتو غيدخل وهي تغوت:هااااااه شوووف
خليفة تلفت غير شافها واقفة عقد حجبانو شوية دينا:نت نت اجي عفاك اجي
خليفة تما جاي قاصدها باستغراب شبغاتو تاني تمات تاهي جاية قاصدها حتى قربو لبعض هزات فيه عويناتها وهنا طلعات معاها الحشمة من الموقف لي وقع وزيد المعيارة باش كانت تتعايرو معرفات متقول نطق هو وكسر الصمت: ياك لباس اشخاصك؟؟
دينا نزلات عينيها ومدات ليه لبوماظة:انا كنت يمشي عندكم لدار ولكن خفت الظلام عطي هادي لسميحة
مداتها ليه هو نزل عينيه شاف شداكشي وبلاما يخليها مادة يديها خداه من عندها قبل ماينطق سبقاتو هي بصوت رقيق ومنزلة راسها شابكة صباع يديها ومتوترة حاسة بالذنب من شنو دارتلي:شوف انا يبغي يقولك سمحلي مكانش يعرف معنى قزيبة ميبقاش يقولها ليك سمحلي
كانت تتحاول تهضر بالدارجة مقادة لكن الغالب الله عضات على لسانها هاهي عاود قالتها تاني دارت يديها على فمها وشافت فيه وهي غارقة فحوايجها وهادشي كامل لاحظو هو كيف حشمانة وكترعد مبغاش يزيد عليها لانه عارفها وباينة مكتعرف العربية نطق بصوت هادئ ممزوج ببحة رجولية:مكاين باس الله يسامح يلاه سيري دخلي الليل هدا البنات مكخرجوش والحال ضالم
وختم كلامو بابتسامة صغيرة تتبين على انه تقبل اعتذارها حيدات يديها على فمها وتاهي بادلاتو الابتسامة وضارت غتمشي مع عطاتو عضات على شفايفها قالتها عاوتاني زلقات ليها بقى مراقبها تدخلات وزاد كشوف شداكشي عطاتو مع سدات الباب تكات عليه قلبها كضرب وحشمانة بلعات ريقها وتفكرات كيفاش بتاسم لها ودغيا نسى يعني كلام خواتاتو بصح فعلا ضريف باقي فدماغها ديك الإبتسامة دابا عاد حققات فيه مزيان فعلا وسيم وهي ساهية مفيقهاتها غير سليمة جاية نازلة وجها كولو مطلس:يا دينا وفين خليتيني صافي نحيد هادشي
دينا فاقت من سهوتها تالفة:اه اه اجي اجي نحيدوه
سميحة شادة البوماظة وفرحاانة:مسكيييينة منساتنيش
بشرى كتقطع الخضرة:عرفتي امي دينا بنت ولد الحاجة رحمة وشحال عطاتنا ديال البوماضات ديال وجهنا
بديعة:ومزال بغات تزيد غا حشمنا ولينا نقولو لها غا قسمي معانا وخلي ليك لي عجباتها شي حاجة تقولها هزيها
الحاجة يزة كانت كتكسكس فالكسكسو: ايوا راه من عيلة الجود والكرم خيرهم سابق دوك الناس
سميحة بغات تقرا شداكشي مكتوب ولكن كلشي بالانجليزية واخا شرحات لها دينا كيف غتستعملها مين تجيبها ولكن بغات تشوف ساعة مفهمات والو خليفة لكان حداهم كحيد فسبرديلتو رجليه طابو النهار كامل وهو من هادي لهادي:بديعة نوضي اختي سخني ميها نغسل رجليا الله يحفضك
بديعة ناضت هازة ولدها:واخا اخويي
خليفة شاف فسميحة لي كتقرا فالبواطة وهو يلمح شي حاجة فيها:اري نشوفلك اري
مداتها ليه وضور جيهة الثمن لكان مطبوع فيه 60دولار ورجع مدها لها:عاطياك بوماضة بتناشر الف هادي راه ماشي غاسخية
سميحة خرجات عينيها:حلف يا حليليييي
بشرى:عقلتي بنت حيمود فاش عزات فيا عكر ديال السوق قلت لها جيبيه لي غانشري عليه قاتلي توضر غدليه لقيتها سايرة تعكر بيه
بديعة:الا مشينا لسوق ناخدو لها شي حاجة تاحنا
يزة كانت مشات لكوزينة وجاية راجعة وسمعاتهم:شكون؟
اسمهان:دينا امي عطات لسميحة بوماضة بي تناشرالف
يزة خرجات عينيها:بصح ايوا الله يخلف عليها تانتوما عطيوها شي حاجة
كان جالس معاهم شاد التيليفون علاما يسخن الما وينوض يغسل وكسمع لكلامهم لي كان كولو عليها وتتفكر موقف الثور كشدو الضحك وحابسو وديك الحشمة والتزنيگة هي لي سالات معاه لا قبيلة ولا دابا
فاش عتاذرات وآخر حاجة يتوقعها هي يكون شي حد كحشم فهادشي وهو كابر وسط النصارى لكن كيفما كقولو الاصل كي غلب والعروق هي لي كتحكم فواحد
دازت هاد الليلة وجا نهار جديد
الصهد والشمس مطنطنة جالسة كيف ديما فالعتبة عيات فيها سليمة تمشي معاها يسݣيو والو فايقة كاعية ديال بصح كل نهار تتفيق بلا خاطر كثر من لي قبل منو محدها تتقرب لها ليغگل وهي عاد مكتزيد نفسيتها تدهور كان حداها واحد ولد عمها صغير تاهو جالس وكلعب وهي مرة مرة دوز يديها على راسو وكتنهد حتى شافت واحد لمشيشة خارجة من الكوري ديالهم بدات تتبسبس عليها حتى جات عندها وبدات تتحكك عليها بتاسمات وهزاتها وديك المشة نيت كانت خاصها غا علاش تخشات فيها وكضور وتحكك عليها عجبها الحال دينا بزاف هزاتها حطاتها بشوية فالارض:انا يمشي يجيب لك فرماجة ايوب بقى تلعب معاها انا جاية
مع بغات تدخل وهي تحط واحد الحجرة فوق المشة نيشان خلاتها هربات دينا شهقات وضارت شافت شكون كان ولد عمها صغر منها شوية هز حجرة وزادها للمشة ثاني خلا دينا شعلات:اييييه بعد من ميميييي بعد
ولد عمها:وراه بالت على المازيير با لݣاليا جري عليها
زاد هز حجرة ثالثة وعطاها للمشة لي طارت دينا تعصبات هزات حجرة تاهي ولاحتها عليه:بعااااد منها
ولد عمها بدا كضحك وهرب خلاها تابعاه تتغوت عصبها لانها كابرة فبلاد كقدرو الحيوان هو يجري ويقول والله لا شديتيني وهي تابعاه تتغوت كالحمقة مضربش ميمي بقاو يتجاراو حتى وصلو للجنان تحنات هزات حجرة وبدات كتلوح عليه وهو كنقز ويزيد يعصبها لحجرة لي لقاتها تنيش عليه بيها ومكوصلوهش هادشي لزاد عليها وقفات وهي تتلهتت وحتى هو وقف كنقز حيت مشداتوش جمعات السوفل وتحنات هزات حجرة نيشات عليه بيها وواخا هكاك خوا متحطات غير على واحد خرج على غفلة من جيهة الدرݣ شهقات وحطات يديها على فمها فاش شافتها جاتو فجبهتو مشات تتجري عندو خليفة لي كان حاط يدو على جنب جبهتو كحس بيها تتزدح معرف باش تبلا حيد يديه وهنا عينيها خرجو فاش شافت الدم طوش حيت سخون بدات تتندب وشدااأت فيه:كضرك كضرك ياك هئ هئ سمحلي سمحلي
بدات تتبكي بلا عقل وهي تتشوف الدم نزل ليه مع عنقو واخا كمسحو بيديه كزيد يخرج تلاحت عليه عنقاتو تتبكي:سمحلي سمحلي
ورجعات بعدات عليه تتشوف الدم وعاود رجعات عنقاتو وهي تتقولو سمحلي بعدات تاني طلات على جبهتو وعنقاتو وفمها غير سمحلي سمحلي وتتشهق شي لخلاه هو يبدا يسكت فيها
خليفة:صافي مكاين باس موقع والو صافي غاسكتي
دينا:انا دابا يجيب ليك الدوا بقى هنا انا يجي دابا
طارت تتجري للدار دموعها كطيحو وتمسحهم طلعات لبيتها تتحل لباليزة وهي تترعد هزات واحد لاطروس ديال الطوارئ ورجعات تتجري وهما كسولوها فالدار مالها مجاوبات حد تتجري فديك الشمس حتى سخفات موصلات لديك لبلاصة زادت شوية حتى خرجات فالارض كلها ربيع وكانت ديال دار عائلة خليفة لقاتو مجبد على طولتو فيها دمو كسيح وحداه واحد خينة دارت يديها على فمها قلبها بغا يخرج صافي مشات فيها رمات لاطروس وعطات رجليها للريح وهي تتبكي وتغوت:قتلتو قتلتو قتلتووو مااااات انااا يمشي لحبس ماااات
كانت متكي فالارض ناشر رجليه ومغمض عينيه شداتو الدوخة اصلا راسو مقلوب بالشمس وزادتو الضربة لي طوشات بالدم حيت كان عرقان ودمو سخون كان حداه ولد عمو لي نطق:واخليفة وتنوض اصاحبي شوف شدير لديك الموصيبة ايبقى الدم دايز
خليفة وهو مغمض عينيه:اصبر را راسي داخ عليا
فهاد اللحظة تگعد بالزربة فاش سمعو لغوات ناضو بزوج هو يمكن فرز مولات الصوت حيت سمعو بزاف هاد الايام طل حيت كان مغطي بالضرݣ وفعلا حرك راسو بلا وزفر كان كسمعها بوضوح تتقول قتلتو قتلتو وهو غير شداتو الدوخة وتكا شوية ولد عمو كشوف فدينا لي غادية تجري بحال عايشة طوش:اتهادي مالها ماشي هي لي جاية من ورا لبحر بنت ولد الحاج احمد
خليفة بلاما يشوفيه:هز داك السطل ديال الهندي وديه لخيمة
مع كمل كلامو زاد تحنى هز لاطروسها لي لاحت وغادي على سعدو وعدو يديه لها وراسو مقرقرب داير غايديه مغطي الجرحة لي حبس منها الدم شوية
تجري وتقول ماجريت جاب الله الظهر الدوار خاوي حيت غا تيقيقت دالشمس مكخرج حد ربي ستر مشاف شوهتها حد تجري وتقول ماجريت كتبكي وتقول قتلتو دخلات لخيمتهم معرفو باش تبلاو حتى تحطات عليهم وسط الدار تتبكي وتنحط الحاجة رحمة خارجة من الكوزينة مفزوعة شافتها فداك الحال تتبكي وتشهق وكلها كترعد:بسم الله عليك ابنيتي بسم الله علييك ماااالك اشبيك
دينا تتبكي وتندب:قفرتها اميما قفرتها قتلتو قتلتو مااات
الحاجة رحمة باغية غير تفهم شكاين:يا شكووون هدا شكووون يا غاسكتيي غتخنقي سكتييي
صوت بكاها كاسر الدنيا فكرة انها قتلات واحد وغتمشي الحبس غتخرج لها القلب سعاد خارجة من الطواليط تيجانية خارجة تجري هازة ولدها كانت كتنعس فيه البراهش تجمعو عليها سليمة كانت كطيب الخبز فالفران برا وصلها الغوات دخلات تجري تاهيا تقلبات الدنيا فالدار ومزال مفهموش مالها دفعاتهم وطلعات تتجري وتشهق سدات عليها دخل عمها محجوب يجري:اشكاين اشواقع قالو ليا بنت خوك جاية تجري وتغوت صوتها واصل لدوار ليتامى
سعاد:بحالنا بحالك معارفين اشبيها ولا اشصابها عقلها خارج بالبكى
تيجانية:ياكما مشات للرحبة المهجورة وتضرباات
سليمة:تي هي مشات معايا تالعوينة بقى غالرحبة لي مكضور بيها حد
مع كملات كلامها طلعات تتجري عندها كدق عليها تحل وهي والو جالسة فوق الناموسية وجامعة رجليها عندها تتبكي وتشهق وسليمة عيات بالدقان عليها لتحت كانو كتسائلو شكاين اشواقع معرفو باش تبلاو
خليفة:سلام عليكم
دق دقة خفيفة فلباب لكان محلول الحاجة:وليدي خليفة دخل دخل متبقاش فلباب الله اشداكشي فراسك
خليفة لي تقدم خطوات عندهم وهما كشوفو فيه وفجبهتو المفلقة شوية بشوية بداو كفهمو يمكن شواقع المحجوب حط يدو على كتفو:امنين جاك هادشي اخليفة ياك لباس
خليفة مد ليه لاطروس ديال دينا:هدا ديال بنتكم دينا طايحاتو حدا الدرݣ وراه مواقع والو مكاين مناش تخاف
#يتبع 😂
شاركنا رأيك في هذا الفصل 🌹