– (حليت عيني على صدمة .. ماشعرتش براسي تابديت كنغوت لربي لي خلقني ) حنـــــــــــــــــــــــــــــــــــــــة (جات عندي جدة كاتجري) أشهادشي أحنة 😮 ؟؟؟؟؟؟؟
– بسم الله عليك أبنتي انت في عار الله .. (شافتلي فيدي لي كنت مداهم ليها) آآآآآآه هاديك غير الحناء درتها ليك فاش كنتي ناعسة .. باش يحن عليك الحنان المنان
– الحنا أحنة ؟؟.. كنتي بعدا ديري غير دويويرة خويط … طليسة أحنة ؟؟؟ وهابطة على ظفار ؟؟؟ أش غايقولو عليا فالخدمة ؟؟؟ زيادة على رابحة الحولة وقاع الكاس يزيدوني الحنا العمشة ؟؟
– (خدات يدي وبدات كتقشر فيها ببرود وفرح عارم) اللـــــــه شوفي كي خرجات .. حمرااااااااااا تبارك الله .. كايقولو لبنت لي كاتخرج ليها الحنا حمرا مايدور عليها لعام تاتكون فدار راجلها
– حنة واش كاطنزي عليا ؟؟ راه لي يشوفني بهاد الحالة يهرب بلا فران .. خليني نوض الله يحن عليك لا يوليوا مجرين عليا من الخدمة ونولي لا خدمة لاردمة …
ماجيت فين نوض .. تا بحالا صعقني ضو ملي شفت رجليا
– حنــــــــــــة حرام عليك تا رجليا ؟؟؟؟؟؟؟؟؟؟؟؟؟؟؟؟
– بلاتي نشوف كي خرجات … كحلااااااا تبارك الله .. كايقولو أبنيتي أهناء لبنت لي كاتخرج ليها الحنا كحلا مايدور عليها شهر تاتكون فدار راجلها
نضت وانا شاداني دوخة 100% طلع لي طانسيو ولا ماعرفت نزل ولا يكون كايشطح كاع رفقة زهري العوج ماشي بعيد.. مشيت الحمام وبديت كنشوف فالمرايا وكنشوف فحالتي لي ماتبغيها لعدوك .. وجهي صفر تقول داخلاني الموت .. أما عويناتي شادين القنت تقول متكيين على بعضياتهم .. وباش مايبانش عيبهم غطيتهم بما كفس .. نظاظر قاع الكاس لي ماعقلتش من إيمتى وانا دايراهم ماشي بعيد نكون تزاديت بيهم … مهم وجهي ماشي جديد .. جديد هو هاد الكارتة ديال لحنا بديت فيها نحيد نحيد نحيد نحيد جلدة تحيدات وهي مزالا كارمة ..ماساليت تاوصلات بلاتي نشوف شحال ساعة
– لاااااااا حنــــــــــــــــــــــــــــــــــــــــــــــــــــــــــــــــــــــــة .. تسعود ليوم يجريوا على جدي
– جدك جراو عليه صحاب لحال شحاااااال هادي
عارفة حنة مكاتقاداش لداكشي ماجاوبتهاش … كملت لباس ديال حوايجي فطريق .. أما واحد طوبيس شاي الله أمولاي دريس ربع ساعة وحنا كاتنسناوه بحال عروسة شتا .. بزز باش جا … وإلى ماتقاتلتيش و ماحاربتيش والله فيه لا عفطتي (هدا هو صعب المنال ديال بصح) … شبعت أحضان هاد صباح جاب الله جيت وسط العيالات ..مهم إيوا يالاه ديمارا طوبيس وفات المحطة لولة بشويـــة وهو يخسر .. يااااالاااااه زيــــــدوني عشقا زيــــدوني .. لا بلاتي نعاودو لجملة الأخيرة .. زيدوني نحسا زيدووووني .. والنحس الكبير هو ملي قلت لراسي : هناء ماطلعيش فدروج طلعي فسانسور كفاية معاناة .. وداكشي لي درت .. وانا كانتسنى حدا سانسور .. وانا نسمع شي صوت من ورايا
– دخلي أبنيتي أقاع لكاس دخلـــــــــــــــــــــي
تفووووو على حالة ، تفوووو على زهر ، تفوووووو على حياة … ماحتاجيتش ندور صوت كان مولاه هو المدير ومن ريحة المجهدة التي ترافقه كانت معاه زوجته الحنون .. تحلات الباب دخلت وكأنني داخلة إلى حبل المشنقة … ماقديتش نقلب وجهي لباب بقيت رداه للحيط على الله يتشق ونعلق
– هو : عشناااا وشفنا تا ولينا ندخلو مع الموظفين … دوي أقاع الكاس دوي ألكافرة بالله
– أنا : أستغفر الله ليا وليك و المدام أشاف .. والله كن تعرف أش داز عليا لبارح والله تا يضرك خاطرك أساط أأأ شاف .. حنة لبارح توفتها المنية ولتحقت بالرفيق الأعلى
– هو : أهاه على بسلامة .. تي شحال عندك من حناك .. إلى كان عقلي ينفعني وحسابي هو هداك هادي سبعطاااش ولا كدبت ؟؟؟
– أنا : لا هادي تمنية وعشرين فترتيب ديال عرايسات جدي .. ولكن كيما قلتي هي صطاش فالتوديع (هزيت كفوفي لسما ) الله يرحمك أحنة .. الله يرزقك الجنة أحنة .. كنتي انت فيهم الحنينة عليا .. لمن مشيتي وخليتيني أحنــــــــــــــة ( وبديت نتمخصص عليهم تما)
– هو : وزايداها بالحنة من الفوق ؟؟ وطليجة ؟؟؟ واش فخبارك بلي ممنوع الحنة فدومين ديالنا
– أنا : وراه أشاف قالك ليكانت عزيزة عليها المرحومة .. تحني يديها باش يحن عليها الله تاهي
– مراتو : باركة .. شوف البنت مسكينة كي كاتمخصص .. صافي أقاع الكاس طيبتي لينا قلبنا
– هو : (شير لمراتو) انت لي ضرستيها عليا .. انت ؟؟
– مراتو : شحال من مرة قلت ليك هاد البنت عندها مستقبل زاهر … غاتمشي بعيد ..وعمر إحساسي ماخيبني ..(بزقات فصبعها ودارت كروة فسانسور) .. هاهيا أقاع لكاس فين علمتها ليك .. مانرتاح ونتهنى تا نرجع انت سيكريطيرتو(طبعا نظرا لجمالي الأخاد ونظراتي الفتاكة)
– هو : هي بغيتينا أمادام نديرو فاييت
بداو كايتغاننو فالهضرة .. وأنا وصل طاجي نزلت وخليت صوتهم واصل لسما .. دخلت لبيرويا لي كنت مشاركة فيه أنا و ضحى لقيت سيدة خداااااامة على شاط وضحك وتكركير … على فكرة انا خدامة فشركة ديال الإليكتريسيتي أي حاجة فيها ضو وفيها سلوكة حنا كنبشو فيها
– ضحى : قاع لكاس صباح الخير تي فين صابحة فكوميسارية؟؟ .. هاي هاي هاي على الحناني والقلب هاني .. ياكما ضبرتي ألعفيريتة على شي قاع البراد هاهاهاهاها ؟؟؟
– لواه صابحة فعزو … تفوووعلى صباح كي داير .. باينة نهار كي غايطلع منين صبحت على ضبع (لقب سيادة المدير)
– ماتقوليهاش لمدير ؟؟؟ قفرتيها أساطة
– عارفة … جاب الله كان فاطر عند نسيبتو … ومفطراه بالبيض والخليع هه
– ههه كي درتي عرفتيها ؟؟؟
– سنانو يعطيوك الخبار وريحتو تعطعط .. أجي شحال ساعة دابا ؟
– 10
– هي دابا 2 فدبي ؟؟ لااااااا ناري بقات دقيقة للمقابلة
– كورة؟؟؟
– لواه تبوريدة … entretien
هاد دقيقة ماتحل ليك تا جوجل مع هاد لكونيكس ديال زفت .. بقيت كنضارب ونتقاتل راه حلم حياتي فهاد المقابلة باش نخرج من هاد القهرة لي أنا فيها … تعشككت .. تشنفت .. تعبصت .. عرقت ونشفت .. وأخيرا شد .. حيدت نظاظر ديال قاع الكاس باش مايبانش عيبي من لول.. وقررت مانشوفش فشكون لي غايدوزليا هاد المقابلة en face.. بديت كنشوف فسقف يالاه باش يبانو عيني مقادين ونبان كانشوف فيه (ختكم حولة مع كامل الأسف) .. وركزت فقط على السمع .. كان الحوار بالإنجليزية .. ختكم مزططة فيها راسها .. إيوا بدات المقابلة .. هما كايسولو وأنا كنفسر ونعبر و نتفلسف ونشرح بيدي و …
– ضحى : معامن كاتهضري أشيخة ؟؟؟
– أناااا : شششش
– تي راه عندهم شيخة مرأة محترمة .. ولكن واش كادوزي entretien مع شبح ؟؟
حيدت عينيا من السقف وشفت فلبيسي ..لقيتهم قطعووووو عليا ولاد الحرام ماعرفت من إيمتى .. حسيت بالحكرة وشداتني البكية
– ضحى : لاااااااااااااااا مغاديش تبكي ياك ؟؟ (جات حطات يدها على كتفي) وصافي أقاع أأأ هناء ماعندكي ماديري ببرة بقاي فبلادك مع ناس لي كايبغيوك
– (بالبكا والعزا) ناس لي كايبغيوني ؟؟؟ أنا تاحد مكايبغيني فهاد دنيا.. وحتى من والديا مشاو لبرا وخلاوني مع حنة عمرهم سولو فيا
– وحناك ؟؟ مالها مكاتبغيكش ؟؟؟
– شوفي يدي .. حنات ليا وانا ناعسة باش نتزوج ونعطيها تيساع شوية
– لواه .. باغا مصلاحتك و باغا تشوفك فرحانة .. والله إلى عندها صح خصكي تزوجي وتبغي شي راجل باش ينسيك همومك شوية ويجيب ليك هموم جداد ههه
– شكون هدا لي غايبغي يتزوج بوحدة حولة ودايرة نظاظر قاع الكاس وأهم حاجة ميغناطيس النحس والبلا فين ماكان نجرو
– أعدا حاجة عندي هي عدم تقة في النفس .. مالكي يا لهبيلة مقطوعة يد ولا رجل .. وحتى لي مقطوعين لي هم اليدين والرجلين كايتزوجو … واش كاتعرفي شنو هو الحب أقاع الكاس؟؟
– لا
– احم الحب هو : العمى
– أ؟؟؟ لا براكة أختي عليا غا الحوولية اللهم عمش ولا عمى
– خليني نكمل العمى على جميع عيوب الشخص
– الله ينجيني منو .. أنا بعدا زهري قبل مايجيب ليا شي حد فحياتي كايسبق ليا عيبو هو لول .. كايقوليا ها ماتسواي
وحنا مزال كنهضرو تا سمعنا تيليفون كايصوني كانت سيكريطيرت المدير جميلة
– قاااااع الكااااس تكلمي لموسيو لو ديغيكطوغ .. الضبع يناديكم هاااه
– ضحى : الله يستر هدا أش بغا مامولفاش ليه
– أنا : صافي أنا مشيت فيها طرد هادا مافيهاش
مشيت للمكتب لمدير على نغامات قلبي لي كايزدح ويشطح ويردح بالخلعة .. وصلت ودقيت سمعتو قال دخل وانا ندخل جبهة لي ليا ليها كاينة موت وحدة.. كان جالس مع واحد راجل كبير فالعمر باينة فيه شخصية
– المدير : زيدي أبنيتي أقاع الكاس زيدي .. زيدي ألمصيبة لي بلاني بيها الله … جلسي (شاف فراجل لي كان معاه ووجه ليه الكلام) شفتي أسي عبد الصمد هاد البنت هي لي قالو عليها قد البرا وفيها البلا .. فين مامشات تفرتكها .. ماشي كانت غاتفرتك ليا شمل على صباح .. لداكشي كايقولو الباب لي يجي منو الريح سدو ..(شاف فيا) سمعي أبنيتي أقاع الكاس مااعندي مانخبي عليك … شركتنا على حافة الإفلاس عندنا العرض كتر من طلب .. وكي كاتعرفي راه ملي كايوصل راس شهر كنقطع من لحمي ونعطيكم .. لداكشي درنا اجتماع على صباح أنا وأعضاء الإدارة .. فكان قرارنا كالتالي نقصو من الموظفين .. لداكشي تم اختيارنا على لي ديما كايجي معطل .. وهندامو غير لائق وشكلو غير جداب وغير زايد
– أنا : (فهمت المقصود .. ولكن الأبطال هما لي كيموتو وراسهم مرفوع) ماشي معقول غايجريوا عليك انت ؟
– المدير : أشنو ؟؟
– أنا : انت لي ديما كاتجي معطل .. وانت لي لابس سروال ليموني تحت سروال لكومبلي .. سبيدورمان ومدارهاش أشاف .. وانت لي قرع وعندك جوج زغيبات كايدابزو فوق داك راس .. ولي بغا يهضر معاك خصو مظلة باش مايفزكش بشتا لي كتصب من درقوشك..انت لي داخل خارج وغيـــر زايد .. ومكايحملو حد وكيضيح ضيم وكيسد نفس (بردت غدايدي)
– المدير : وشووووف أسي عبد الصمد .. لقلة الحيا كي دايرة .. ياك ألكافرة بالله مابقيتيش تحتارميني .. إيوا لالة تم اختيارك … انت لي غاتغادرينا دون عودة
– السيد : ههههههه ولكن بلاتي كي درتي عرفتيه لابس سروال أغونج
– أنا : خخخخخخ
– المدير : هادي راه نمسة مكاينش منها جوج … تقولك باش تعشات مك نهار ولادتك .. الله يخليها سلعة … هي لي سمات عليا ضبع .. وديما مخرجة عليا الإشاعات .. خدمتها المتقونة هي لي كانت كتشفع ليها عندي ولكن ليوم مكاينش لي يشفع ليها على وجه الباسطة
– السيد : أنا لي غانشفع ليها .. عجباتني وفيها كاع المواصفات لي باغيها .. هي لبنت لي كنت كانقلب عليها
– أنا : شناااااهو … عاود الأخ أشقلتي .. ولايني راك واحد شيبة عاصية كتر منهاد نعناع لاوي (شيرت لضبع)
– السيد : لا ابنتي ماتفهمينيش غلط كنقدم ليك راسي .. أنا عبد الصمد عميد شرطة ممتاز
– أنا :ممتاز ومن بعد ؟؟
– السيد : جيت ليوم لهنا باش ناقش مع مديركم واحد القضية خدامين عليها هاد الفترة .. هي ديال واحد الخائن مغربي بغا يستولي على ممتلكات مهمة للبلاد .. لداكشي باش نمسكوه بالجرم المشهود .. بغينا نزرعو ليه كاميرات فدارو وهادشي من اختصاصكم … لداكشي خصنا شي شخص مختص فهادشي و مايتشكش فيه فنفس الوقت حيت هاد الخائن لي للأسف دكي لواحد درجة لا تصور.. وكنظن انت هي الشخص لي يناسب هاد المهمة
– أنا : سمح ليا أسي عبد الصمد نقوليك بلي غير كضيعو وقتكم .. حيت هاد الخائن إلى ماشفرش غايشفر واحد أخور … حيت مع كامل الأسف هاد البلاد بحال لعنة إبليس شفارة والخوانة فيها عمرهم يتقاداو .. وبيني وبينك أنا مامستاعداش نضيع وقتي على تغيير إسم ديال السارق
– السيد : فخبارك بلادنا عمرها غاتزيد القدام بهاد التفكير المنحط لي عندك
– أنا : لا هدا تفكير عملي ومنطقي .. واش البلاد لي وصلات 2017 ومزال ناس كيعيشو فيها بلا ضو وبلا ما … و مزال معولين على قنطرة المستعمر .. شنو تفسير هادشي .. ضعف المزانية متلا ؟؟؟ عندنا جوج بحورا واحتياطي مهم فالفوسفاط وزيد وزيد .. ومافيا لي يصدع راسي نزيد نفسر راه كل واحد فينا عارف
– السيد : وشنو بنظرك نخليو لبلاد تشفر وضيع .. ولي جا يشفر نقولو ليه خووووود راه إلى ماخديتيش انت غاياخد واحد أخور … خود راه ناس صابرين وحامدين واخا ماعندهم لا ما لا ضو .. عندنا قنطرة المستعمر شادة نهار طيح نعيطو للمستعمر تاني نقولو ليه عافاك أجي استعمرنا وبنينا قنطرة واخرى الله يخليك لينا ..وحنا نربعو يدينا ونتفرجو .. أشنو بنظرك هادا هو الحل أأنسة ؟؟؟
– أنا : لا ماشي حل كنعترف
– السيد : وشنو هو الحل بنظرك ؟؟
– أنا : مممم
– السيد : قولي ؟؟
– أنا : كنعترف خصنا نشدوالشفار … ولكن راه ماتشد هدا تايطلع ليك واحد أخور .. راه مكايتقضاوش دايرين كي الزومبي
– السيد : مكاينش شي حاجة مكاتقاضاش .. كل من عليها فان .. وإلى بدينا راه غانقصو منهم ونقدرو نخلعو لوخرين لي جايين تا نحدوهم .. والله غايعاونا حيت الله ديما مع الحق.. والمحاولة حسن ما تربعي يديك وتفرجي .. شفتي سنغافورة كي كانت وكي ولات .. علاش مايكونش تا لمغرب بحالها
– أنا : لهضرة ساهلة
– السيد : وحنا مباغينش غير نهضرو بغينا نخدمو .. دابا واش انت معانا ولا مع الخوانة ؟؟
– أنا : مع غانا … صافي معاكم
السيد : أوكي هاكا كيكونو المواطنين … غاتفضلي معايا باش نفسر ليك كتر القضية لي حنا بصددها و الخطة لي غانطبقوها
– أنا : واخا
– المدير : احم قاع الكاس إلى نجحتي فهاد المهمة تقدري ترجعي لخدمتك وراسك مرفوع
حياتي تقلبات رأسا على عقب .. بسباب طردي من لخدمة وبسباب هاد المهمة الإنسانية الوطنية المزعومة .. لي ترتب عليها تنقلي من مدينتي الأم سلا إلى عاصمة ثلوج إفران .. من ديما كنت كانتمنى نمشي ليها وكنت كانتمنى نولي بوليسية ولكن ماشي بهاد طريقة الخطرة .. ماعرفت نرجع حية ولا ميتة ولا معوقة كاع .. مهم تصافطت مع حنة لي هي سباب هي وحنتها فهادشي كلو .. ودرت صاكي فكتافي .. توكلت على الله وقبل مانشد طريق عاودت تلاقيت بسي عبد الصمد لي عاود شرح ليا القضية .. ومدى خطورتها ومدى أهمية نجاحها .. وشرح ليا الصفة لي غاندخل بيها لدار المشتبه به … وبقية الخطة بحالي بحالكم .. قاليا كلشي غانعرفو فوقتو .. خافيين نتحصل ونعاود كلشي ولاد الحرام كايعرفو غا مصلاحتهم مخافوش عليا وعلى دق لي غايجي فيا .. مهم حتى الأدوات لي غانركب بيها الكاميرات هما غايصيفطهم ليا من بعد .. وبطبيعة الحال غايرافقني أحد عناصر شرطة تاهو غايكون متنكر ليمسك زمام الخطة وماعليا غير نفد أوامرو وهو لي غايتكلف بحمايتي حسب ما قاله سي عبد الصمد تقالّوا إن شاء الله .. مهم طلعت فالكار لي كان خاوي أصلا هادي وقت البرد قليل لي كايسافر .. كان المقعد لي حدايا خاوي طلقت فيه رجليا وتكساااالت تاداني نعاس .. كنظن وصلنا لتيفلت ملي حسيت بشي حد كايحركني
– فيقي فيقي
– (حليت عيني بشوية) راني مقطعة غا سير بحالك
– لا باينة … واش انت هي هناء ؟؟؟
– اه (هنا توكدت .. كان مخاطبي راجل مفقتبل لعمر )
– جمعي رجليك (جمعتهم) تقول غادة لدار جدودك … معاك أحمد البوليسي لي غايرافقك فهاد المهمة
– آآآآه .. سمحليا ماعرفتكش .. حالتك ماشي ديال بوليسي .. كاتبان بحال شي حرات ولا خراز
– (بصدمة وتكبر وعجرفة) أشنو ؟؟ هادشي راه غير تنكر من أجل القضية
– آآآآآ هي كاين شوية الزين مخبي ؟؟؟ سي أحمد قوليا شنو هي الخطة .. قاليا سي عبد الصمد غاتقوليا كلشي ؟؟
– كلشي بوقتو .. حاليا غاديري راسك خدامة تصرفي طبيعية وماتفكري فتاحاجة .. وأهم حاجة خصك ديري راسك مكاتعرفينيـــــش
كايهضر وحاس بجنابو .. ماعرفت أش سحابو راسو غير هاز زنافرو .. مجاوبتوش وحيدت عيني عليه .. الله يصبرني وخلاص
– مالكي كاتشوفي فيا ؟؟
– مكانشوفش فيك
– (أدرك الأمر دخلات معاه بالدارجة) آآآ الأخت حولة
– والأخ نابتة ليه التونية فالموساش ؟؟؟؟؟ (أووووووه مارضاش أصبت الهدف)
– ماشي هكاك غير حيت يالاه كبرتو .. مهم ماشي شغلك يخ على حنزازة
– يخ من لي بدا
بدا كيبركهم وانا دورت وجهي لطرف .. تفو شحال تقيل عل القلب .. مهم قبل ما نوصلو للمحطة قاليا تبعيني .. نزلنا من الكار فالدخلة ديال إفران … كان سم ديال لبرد وديور قلال شي جوج ولا تلاتة لي بانو ليا قدامي ومفرقين بشحااال … مساااافة مابين دار ودار .. بقينا غادين مكنززين بالبرد تا وصلنا قدام واحد الفيلا … واااااو شحال كبيييرة ناري شداتني تبوريشة .. أما لخلعة لهلا يوريكم شدايرة فيا .. كان فبابها واحد العساس .. قلنا ليه حنا شكون وشنو مقصودنا .. ودخل طلب الإذن عاد دخلنا .. وما إن دخلنا حتى وساع فمي فدهشة كانت جردة على قدها وعاد الفيلا الأسطورية .. دابا هادشي كلو حرااام خساااارة … اللهم رزقنا كما رزقتهم حلالا طيبا .. وانا مزالا كنسكاني بعويناتي تاغطاهم ليا واحد الخيير أش غانقوليكم سلمان خان ؟؟ عامر خان ؟؟ عرفان خان ؟؟ شاروخان ؟؟ جمعوهم كلهم يعطيوكم فورمة وعضلات هاد سيد .. عفطة منو تزهق روحي إلى بارئها
– سيد : انتوما هما لي صيفطاتكم لاصفية
– أنا : واه
– هو : اه
– سيد : انتِ محتاجينك … هو لا .. (شداتني الضحكة) كنا باغين جارديني ولكن تلج قريب يطيح يعني ماغاتنفعنا بوالو
أوه ما يگووود .. عجبني عليه الحال .. شفتي النفخة فين كاتوصل .. بلاتي ناري إلى مشا راه غانمشي فيها بالمزيان .. لداكشي بلا تفكير
– أنا : يحش ليكم تلج أسيدي .. ها لعار إلى ماخدموه .. راه ضريف ومعقول .. الله يخلي ليك ماعز عليك أسيدي
– سيد : بيناتكم شي حاجة ؟؟؟
– أنا : ( وريت ليه يدي لمطلسة بالحنة ) مزوجين أو يالاه قايلين بسم الله .. جرات علينا المسخوطة ديال مو وحنا مزال ماكملنا سبع يام د الباكور .. رحمونا الله يرحم ليكم الواليدين
كلشي تصدم بيما فيهم أنا .. ولكن هدا هو الحل الوحيد يانبقاو بجوج يانمشيو بجوج … أما باش يمشي هو ونبقى أنا كي موكة أمبوسييبل .. مهم بدا كيطلع فينا ويهبط
– سيد : بلاتي .. تسناوني هنا
مشا وخلانا بان ليا غايمشي تا هو يتشاور .. طزز بقينا هنا .. بحالا لاعبين سيبر ماريو من سطاج لسطاج .. علم الله أخرتها فين غاتوصل
– أنا : (بالحس) بس بس عنداك ماتنساش تكتب هاد المساعدة البطولية فرابور
– (من بين سنانو) تفو عليك عقدتي الأمور .. دمرت ليا الخطة لي كنت موجد ليها وكلت عليك الله
بعد عدة لحظات رجع وقالينا تبعوني وخليو صيكانكم برا … باينة غايتصكاناو .. مهم تبعناه ودخلنا للفيلا .. يااا إلاهي عمرني دخلت لشي فيلا فحياتي .. رجليا غادين ويتعترو مامولفينش مساكن … دخلنا لواحد البيرو قدو قد الخلا كان فيه واحد راجل يكون خمسيني العمر وعندو شوية ديال لحية فيها شيب هاز تسبيح فيدو وعندو طابو ديال صلاة فالجبهة والبراءة أوووو مكسلة فوجهو .. دابا هادا هو الخائن ؟؟؟ انا الخائنة إلى على هاد الحساب أنا المجرمة أنا الكافرة أستغفر الله .. كانت جالسة حداه واحد البنت تكون عندها شي 23 فالعمر زوينة عندها وااحد سالف ديال العودة صافي
– هو : شنو سمياتكم ؟؟؟؟
– أحمد : احمد وكايعيطو ليا حميدة
شداتني ضحكة كلشي بدا يشوف فيا باستغراب لداكشي تداركت الوضع بسرعة
– أنا : كانعيطو ليه حميدة راس الميدة ههه أنا سميتي هنية وكايعيطوليا هناء
– هو : مزوجين ؟؟
– بجوج : اه
– هو : وفينهوا العقد ديال زواج ؟
– أحمد : الكاغيط ؟؟ مزوجين غا بالفاتحة
– أنا : قاليا تانولدو لولاد وندخل كلشي فالكناش تضيُع لاش
– هو : تضيع ؟؟ ( بدا كيشوف فاحمد شي شوفات ديال براكة من تقوليب) منين انتوما ؟؟
– أنا : من إخرواعن
– هو : اخروا… احم فين جات هاد البلاصة ؟؟
– أنا : بين بني علاهم وبني بوحسان
– هو : المدينة ؟؟
– أنا : هرمومو
– هو : هادي سميت مدينة ؟؟ شنو سميت المدينة لي حداها ؟؟
– أنا : المنزل (بن يازغة)
– هو : (عصبتوو مزيااان) العمالة ديال إينا مدينة ألكلاخ ؟
– أنا : (صافي براكة عليه لا يولي مجري علينا أما أنا فيا لي يزيد) آآآه كنا محسوبين على تازة ولكن ولينا على صفرو
– هو : قولي من لول صفرو لاش هاد تجباد كامل .. مهم إلى بغيتو تخدمو بجوج .. غاتاخدو خلصة وحدة
– أحمد : اه أسيدي الله يرحم الوالدين
غايشفر الملاير وغايعطينا خلصة وحدة كن مكانتش فيه حاجتي كن دفلت ليه على وجهو الإستغلالي لاخور .. أنا ماكرهتش يعاودو يحلو تازمامارت على ودو وعلى ود لي بحالو .. يشفرو دولة والشعب .. بغيت ليهم موتة فرعون ويكون شي بركان وسط الما يتصلقو بالعرض لبطيء يااااربي الحبيب إلى ماستاجب ليا
– هو : كي كاتجيكم البلاد ؟؟؟
– أحمد : إيفران ولا إيموزار
– هو : المغرب ؟؟؟
– أنا : العاااام زيين عاااش الملك
– هو : (بدااا كيشوف فينا ويضحك) ديهم ياكلو ووريهم فين ياباتو .. تال غدا ويبداو الخدمة .. وشوفو نحصلكم ها ولا ها ماتلومو غي راسكم
– بجوج : لهلا يحشمنا أسيدي
دانا حسن اليد اليمنى ديال رجل الشرير (وهو راجل لي دانا عندو فلول) نتعشاو فالكوزينة ومنها تعرفنا على كاع لي خدامين .. من تما داتنا واحد الخدامة وراتنا فين نباتو .. كان فواحد البيت خارج الفيلا .. كان بحال بريتشة (منزل) ديال الكلاب وعاد هاد الأخيرة وسع من داك البيت .. وحنا يالاه بغينا ندخلو وهو يخرج منو حسن .. غمزني احمد كن كانت شي ظروف اخرى كن دخت اما فهاد ظروف فهمت قصدو .. دخلنا للبيت كان قد البونيتة ديال الوقيد فيه حصيرة وشي كويشات (مانطات) كنا شاكين فأنه دارو لينا كاميرا .. ولكاميرا خصها تكون معلقة لفوق باش تشد كلشي .. ولكن بما أنا الحيط وسقف خاوي .. كتاشفناهم أنهم دارو ليا مسجل فالقنت تحت الحصير .. طلعو مأدبين زعمة .. ولكن هذا كيدل على أننا ماخصنا نهضرو فتا موضوع مهم .. درنا راسنا هبل تربح
– أنا : الله على بوييت شحال زوين .. مفجج حسن من داك غار لفار لي كانت فاضحانا بيه مك … حميدة دير عقلك وخدم من نيتك راه هاد الخديمة ما لقاوش بحالها
– ومالي كنضرب بالحجر … هانا غانوريك حميدة راس الميدة علاش قاد … غانخدم وغاندمر على ودك وعلى ود ولادنا لي جايين .. وغانبني ليك فيلا بحال هادي .. لا واسعة على هادي بشوية
– بصح أحموشتي ؟؟
– على رقبتي أ هنوشتي .. وغاندير ليك جردة كبييييرة عامرة نوار .. ولكن غاتبقاي انت هي نوارتي نور عويناتي … أجي أهنوشتي أجي
– كحز كحز لهيه .. قاليا لفقيه بلي إلى بغيتي تولدي راجلك ماخصوش يقيسك
– وكي غاديري تولدي ؟؟؟
– احم هو لي غايعطيني شي ما نتوضى بيه
– إيوا على هاد الحساب .. غير ديرو خيمتكم وربيوا ولادكم مجموعين .. والله أداك المشعككة ونعاود نشوفك عفطتي عنداك الفقيه ياتانعفط لك على مسارنك .. واهاودني منك .. اودي أنا لي خليت بنت خالي لي كانت غاتسطا عليا مسيكينة و ديت سخط ميمتي .. وتبعتك يا السخط لكحل ..
– حموشتي
– فوتيني عليك
دار ليا علامة أوكي .. دليل على انتهاء المسرحية .. كل واحد شد قنت .. ولكن لكاشات ليل كلو وحنا كنتجابدو عليها ..ليل طويل و ماطلع نهار غي بستة وستين كشيفة .. أما الجو أوووه صميقلي .. حنا فسلا مولفين دفا شهر واحد مافيهش لبرد ديال شهر 11 هنا .. والعذاب يالاه فبدايتو .. وحيت أول نهار ديال الخدمة ولعبة مزال فبدايتها متاقوش فينا يخدمونا فدار .. لداكشي عطاونا نصبنو زرابي مور دار باش نتمضاو …
– أنا : يا إلاهي واش هادا هو عذاب الدنيا لي كايعاودو عليه ؟
– مزال ماشفتي والو .. اجي باش غانغسلو هاد العجب .. واش بجافيل ؟؟
– لواه بسانيكروا .. فين عمرك شفتي شي زربية غالية كاتغسل بجافيل .. من غير إلى بغيتيهم يغسلوك بالما القاطع .. تريكة الحصير
– (مارضاااش )دابا شنو كتحشي لهضرة ؟؟
– مكانحشي والو .. شوف أنا نكب الما وانت دوز صابون طرف أنا نشييت وانت تكب الما و أنا ندوز صياقة عليها وانت غاتهزها فلخر .. تافقنا ؟؟؟
– أوكي
– ماعرفت لاش كيغسلو زرابي فعز البرد .. يامكلخين يا باغين فينا الخدمة
الهضرة دازت ساهلة … أما التطبيق داز عسيــر و عسيـــــــر جداااا .. وعلى أنغام لما البارد رقصنا رقصات متنوعة من الشعبي الخليجي من لبوليود لهوليود ومن لهيبهوب لكيبوب …. نهار ضيعناه غير فيهم وفشي تفرتيت ديال صابون .. ماستافدنا فيه تاحاجة من غير درسنا الجهة الخلفية للفيلا .. وصل ليل قلبنا البيت مالقينا فيه تا أداة تجسس .. وستاغليت خروج أحمد … باش نفد خطتي ضد البرد هاد ليلة .. ومن بعد تنفيدها استلقيت في فراشي
– هو : اش هاد الحالة دايرة فراسك؟؟
– كي جيتك ماشي مثيرة خخخخ ههه
– أشنو .. واش لبستي كاع لحوايج لي جبتي معاك ؟؟؟ لاا مايمكنش ؟
– يس بايبي .. لدواعي بردية ولدواعي أمنية
– كيفاش أمنية ؟؟
– ما خلا رجل وامرأة إلى وكان تالتهما شيطان .. ونا نخاف تهجم عليا وأنا لازلت صبية جميلة في ريعان شبابي
– فهاد القضية كني متيقنة 100 % عمري نديها فيك .. واخا نبقاو غير أنا وياك فهاد دنيا
– نتمناو .. أجي أجي أحميدة غطيني راه ماقديتش نهز يدي
– (لاح عليا الكاشة بالنفخة ) فين غانعس وانت ناعسة فالوسط
– اه بلاتي ( بديت كنحاول باش نكحاز ولكن تقل ماخلانيش) ماقديتش دفعني
– غا قولي واش باغا تركبي فيا سكر
– وراه والله ماقديت واش أنا كرهت
بدا تاني كيدفع فيا بالنفخة .. وانا كنغوت
– وا ضريتيني ألمسخوطة .. من لتحت ماشي من تما .. بلاتي غابشوية
مهم ما دفعني تا شبعت فيه سبان … أما فاش صبح صباح .. وليت كنطلب فيه ونزواگ يوقفني ..
– هانا خارج على ماتحيدي هاد تبهديلة
– أجي فين غادي .. راه يدي مكانقدرش نحركهم .. تقطع فيا لحم من الحكان ديال زرابي لبارح
– وشنو لمطلوب ؟؟؟
– احم .. حشمت نقولها … حيد ليا حوايجي
– أشنو ؟؟؟؟؟ واش شوية لباس ؟؟ لا أنا مامتيقش بلي كاينة شي بنت عندها شوية ديال الحشمة تقدر تقول هاد الهضرة
– دابا واش مكاتشوفش بلي غاندوب فبلاصتي بكترة الحشمة … زيد كمل عليا … وانا قلت ليك حيد ليا حوايجي كاملين .. غير لفوقانين على مانقدر نتحكم فيدي .. مال عقلك موسخ .. ولا عرفتي شنو عيط لحفيظة ( خدامة) تجي تعاوني ..براكة عليا من دل
– لا داك حفيظة هي شوهة بيديها ورجليها .. هزي يديك .. عمري تخيلت ندير شي حاجة بحال هادي فحياتي .. يالاه هزي … هانا غانحيدو (طريكو) جري يديك .. مال هاادشي واحل
– أيييييي قصحتيني
– تستاهلي … شوفي غانحسب واحد جوج تلاتة وجري وعاونيني صافي
– واخا ولكن غير بشوية
صافي ماحيدنا داك الحوايج تا تحيدو مني لكيلوات .. يخ اللهم البرد ولا الحشمة ودل .. ولكن هاد الحشمة لا تقارن مع الحشمة لي جايا .. فاش مشا أحمد مع حسن حيت بغاه وأنا جلست مع الخدامات لي غير شافوني بداو يضحكو ويتغامزو
– حفيظة : هناء سعداتك بداك راجل .. شقاوة بليل وشقاوة بنهار ؟
– أنا : إينا شقاوة ؟؟
– قلت الحيا يالعفيرتة .. ملي داز من حداكم حسن بليل .. وهو يسمع غواتك “قصحتيني غا بشوية .. ماشي من تما ” وكذالك على صباح .. سعداتك .. بيني وبينك هاد البرد داكشي لي يصلاح ليه
ماقديتش نرمش عيني من صدمة وماقديتش تا نبرئ راسي .. وااااع جاب الله فخبارهم مزوجين أما محالش نهز راسي من الأرض وتادابا ومحالش بكترة الحشمة
مهم بعد الحشمة والدل .. داز نهار ممل تصبان تسياق تخمال تقشار الخضرة غسيل المواعن وما جاوره .. واخا مازال مكايتيقوش فيا ولكن أنا راه حلوة وسهلة المعشر وكيما كيقولو عليا زملائي فالعمل عين المجهر … تا حاجة مانزكلها عويناتي عياو من دوران فليت دار قنت بقنت ولي مكايبشرش بالخير و كيبشر بالبخوش هو الممر لي كايدي المكتب ديال الخائن فيه كاميرا خفيه .. قشعتها غابزز بنظاراتي ديال قاع الكاس.. وخا مكنحملهومش كيفيدوني .. هنا غاتصعاب القضية ولكن على هناء لا شيء مستحيل.. وبما أن حسن تجرأ يقول لحفيظة شنو طرا بيني وبين أحمد إذن القضية فيها إن .. خصني نتحقق منها .. نرجعو لخائن عندو واحد مراتو عزيز عليها الحجايات والمعاودات باينة عليها ضريفة كنشك واش عارفة فعايل راجلها قاتلها غا القنط .. أما البنت لي كانت معاه فالبيرو نهار جينا فهاديك كانت بنتو ونهار كلو مابانتش .. احمد تاهو مابانش أعلم الله صگع فين مجلي .. توحشت حنة كتفكرني فيها الحنة لي فيدي علم الله فإينا دار تكون دابا طالقة لسانها و رجليها …ما وصل ليل غير بمشقة الأنفس وسالينا الخدمة .. واحمد جا مع حسن غير شفتو وشفت الفرصة فين نهضر معاه وشنقت عليه بأسئلتي
– ( غير بالحس ) فين كنتي نهار كلو وانت غابر ؟؟ .. فين مشيتو فين جيتو ؟؟ لقيتي شي حاجة ؟؟؟
– هناااااااااااااااااء تكايسي على راجل خليه غا يرتاااااح ليل باااقي طويل
هذا كان صوت حفيظة الحضاية جاني من لبعيد الله يخليها قاعدة فيها .. مع هاد حفيظة غير الله يحفظ مع الله يستر
– واماشي هكاااااااك
تفو التنفس هو لخر يحسبو ليك شحال فيه من شهيق وشحال من زفير .. بدلت ساعة باخرى لا نصدقو فشي طاب وشي تحرق .. وبما أن ساعات عملي سلاو .. مشيت كنوجد خططي ضد البرد لهاد ليلة .. درت لي درتو ومشيت لي بيتي .. لقيت أحمد مكساااااال ومكنزز بالبرد
– أش داكشي جايبة تاني ؟؟
– تيراراااا مع هناء دائما لجديييييد
– قرعة ديال جافيل ؟؟؟
– هي حقا قرعة ديال جافيل ولكن عامرة بليصانص .. قلت نرش شوية فالقنات ونشعلو شوية ديال العافية باش نباتو دافيين
– (قفززز) أشنو ؟؟؟؟؟
– أويلي راه غير كنضحك معاك .. مالك لونك تخطف ؟
– لا على لبارح نتوقع منك أي حاجة
– إيوا صافي بلا ماتفكرني .. ديب كادوز عليه غا مرة وحدة (هزيت القرعة وبديت كنحركها بحال عارضات الإشهار)هدا حل إيفيكاس .. قرعة ديال جافيل عامرة بالما طايب ..ممم على نوم الهانئ والدافئ
– ولاش كاتصلاح ؟؟
– تدفئة البنية الفوقية والتحتية والعظمية والعضلية .. ماعليك غير تحطها فبلاصة لي فيها البرد وهي غاتكلف … تيراررراااا … كحاز كحاز كن غير درت شي بيدو ديال 5 ليطرو دزيت لوسيور هاد القرعة محالش تكفي
مهم كل واحد شد قنتو وتكمش فبلاصتو .. وطفينا الضو … وهنا ظنيت أنه سالا نهار ولكن نسيت بلي ليل طويييييل
الساعة 11:40 ” احـــمد جمع رجلييييـــــك “
الساعة 1:10 ” تكمش بلااااصتك احمـد “
الساعة 2:00 ” وااااا احمد وااا زمر راك كاتجبدني والله القرعة لا وصلتيليها غير الركد “
الساعة 2:30 ” وااااا با واااامي واااجدودي (نضت أنا كاع) بناقص من هاد العيشة .. (عطيتو القرعة) شد بخر بيها (حيدت عليا الكاشة ونضت)”
– هو : خخخخ باردة (شير عليا بيها) فين غادة ؟؟
– غادة لجايحة .. إلى مكانتش هي لي فيها أنا دابا نيت … غادة لطواليط
– دي معاك البيل
– بلاش عويناتي راه مضويين بوحدهم .. بلا القمر المتمثل فوجهي
غير خرجت من البيت .. وهو يصعقني البرد … والله ماعرفت نوصف ليكم راسي واش بديت نرجف ولا بديت نفيفري ولا وليت نشطح على أنغام أسناني التي تصطك .. مهم وأنا غادة وانا نسمع شي وشوشة جايا من البعيد بديت كنقرب ليها بالحس تا وليت كنسمع بوضوح
– وفاء يالاه نهربو ؟؟ واش مكاتبغينيش؟؟
– كنبغيك ولكن الهروب ماشي حل
– وشنوهو الحل نبقاو كنتفرجو وهما كيفرقونا
– حاول تفهمني الله يخليك واش بان ليك أنا عاجباني هاد الحالة .. علي سير دابا لا يجي شي حد و يحصلنا .. عافاااك لي فينا يكفينا
– واخا غانمشي غير على ودك .. ماباغيش نتسبب ليك فالمشاكل .. و حيت كنخاف عليك كتر من راسي
خخخ شحال مكانحملش رومانسية .. أنا عزيز عليا الأكشن وتفرشيخ الغموض والتشويق .. لداكشي قبل مايعلق … كمشتهم بالجرم المشهود باش ماينكرونيش من بعد .. ويقولو ليا غير تخايل ليك ولكن ولد الحرام دغيا طار
– لالة وفاء بنت سي عزيز(الخائن) شكاديري هنا فنصاصات ليل ؟؟؟
– ( مخلووووعة .. هو لسة شفتي حاجة يا ضناية ) الخدامة جديدة ؟؟؟ شفتي شي حاجة ؟؟؟
– لاااا ماشفت والو (يالاه بغات تنفس الصعداء) علي ؟؟؟؟ لا ماشفتوش .. كاتبغيو بعضياتكم عائلتكم رافضة ؟؟ باغين تهربو ؟؟؟ لا لا ماشفت تا حاجة … أجي هو عسكري ؟ جوندارم ؟ بوليسي لا ؟؟
– بوليسي
– آآآآه عرفتها غا من تعليقة لي دار .. داخل غا بلكليان .. أعلم الله باه صاحب من ؟؟؟
– باش عرفتيها ؟؟
– ناقصو 5,5cm على الطول المطلوب.. وباينة فيه ماشي جدارة واستحقاق .. حيت كن كان راجل كاع مايهرب ويخليك ملي شافني
– خايف عليا
– لواه النبك .. خايف على راسو
– دابا شحال بغيتي باش تسدي فمك
– ناهي ناهي (كن جات فيامي كن طلبت منيون ونص ولكن ملي كاتلقى راس الخيط خصك تخشيه فالبرة ماشي تلفو) أنا مابغيت والو .. سرك فبير (لي جا يشرب منو)
– واش بصح ؟؟
– وي بيان سيغ .. مهم خليني نمشي .. لاش خرجت أنا بعدا ؟؟ اه نقضي حاجتي
أنا مشيت لطواليط وهي مشات كتسلت لبيتها .. هي ماعرفت أش كايدور فراسها .. أما أنا لهلا يوريكم أش فراسي من أفكار .. لدرجة انني تعدبت فالنعاس ولكن أحمد لي تعدب مزياااان رديت ليه صرفو بتاني ولمتني
الساعة 3:15 ” هناااااء “
الساعة 4:05 ” هناء هناء هنااااااااء “
الساعة 5:45 ” واااااهنية .. يعطيك الحبس والهرس بناقص .. هدا عداب ماشي نعاس”
ضراباتني الفيقة مع 7 ونص لقيت احمد مكاينش بلاصتو … وعلى ما بديت كنجبد ونتمدد وهو يبان ليا قدامي متكي فقنت البيت على الحيط
– مالك مخلي بلاصتك وناعس تم كي سعاي باب فتوح
– داك البلاصة ربحي بيها خليتها ليك على مادوزتي عليا
– لااااا ماتقولهاش … ماتقولش ليا عنقتك وانا ناعسة .. را فاش أفكاري كتخربق كانولي نعنق كانقلب على الأمان
– كاتقلبي على خلا دار بوك لا ؟؟؟
– ماديرش فيها براد بيت … راه انا لي خصني نتقلق حيت عنقتك اما انت شرف ليك
– أشنو .. دابا هداك كاتسميه تعناق !!!!!!!! هداك راه ركل و ضرب وجرح لمؤدي إلى لموت .. ربي جا من جيهتي وخلاص
– أنا درت هادشي كامل ؟؟؟
– اه
– وصافي ماديرش ليا فيها العروسة المقلقة لي غلب يعف .. أجي أجي جر ليا يدي نوض راني تكوانسيت
ناض وعطاني بواحد المخدة كان موسدها للكمارة .. كمارتي تبلوكات .. واتقول المخدة معمرة بطوب والياجور … خرج وزدح الباب وانا بحالا دارو ليا بوص .. غير الله يخرج هاد نهار بيخير باينة من صباحو الزين
وبدا نهار جديد … نهار باينة مشارجي .. احمد مشا مع حسن وواحد الخدام أخور على الصباح .. سي عزيز (الخائن) ماخرجش من دار أو بالأحرى من البيرو ديالو .. أعلم الله علاش ناوي .. أما انا فنهار كلو وأنا كندورو أنا وحفيظة لي طبخات ليا مخي بالهضرة كنقادو فالدار نمحيو الغبرة ونشطبو وندورو على الحالة حيت ليوم غايجيو شي ناس يخطبو وفاء
– حفيظة شكون هاد الناس لي غايجيو يخطبو بنت سي عزيز ؟؟
– مانعرف
– أحياني عليك ألعفيريتة .. زعمة مقال ليك حسن والو .. وهو زعمة اليد اليمنى لسي عزيز غا يكون عارف
– وعلى أش بيني وبين حسن تا يقول ليا ؟؟
– أه بصح .. كان يسحابني كيبغيك وكيموووت عليك ولكن بان ليا غير تهيأ ليا
– هه كيفاش كيبغيني أش هاد الهضرة كاتقولي ؟؟؟
– صافي صافي راه ختك عندها عين قيس كلشي كاتشوفو حب وعشق وهيام
– ههه خرجو عليك الأفلام
سكتاااات وتا أنا درت راسي مامسوقاش .. ولكن عرفتها مغاطولش فسكاتها .. حيت هاكا حنا العيالات كنبغيو لي يبين لينا الحب قدام العالم وكنفرحو ملي كايعتارف لينا شي شخص غريب بلي فلان كايبغينا واخا نكونو كنكرهوه .. الأهم عندنا هو نحسو بشي حد كايبغينا .. حيت بالنسبة لينا الحب هو الأمان
– هناء وباش عرفتي حسن كايبغيني ؟؟
– (بديت نتبلحس ونتملغس عليها) كيفاش باش عرفتو؟؟ … شوفاتو ليك ماشي هما تخزيراتو لينا … نبرة صوتو لحنينة ليك ماشي هو غواتو المصحوب ببزاقو لينا .. السبع قدامنا مشيش قدامك .. مينوط علينا وليك خاتم فصبيعاتك (سيدة غادة وكدوب مع هضرتي) قلب ناس كيقول دق دردلق .. وقلبو كيقول حفيظة حفيفيظتي حفظوشتي والعذااااب أحفيظة
– (بخجل) هههه براكة ماتزيدي فيه
– والله يا حفيظة الى طايح فيك طول وعرض وارتفاع .. قوليليا أش موكلاه وسميت لفقيه لي متبعاه … عتقيتني أختي راه أحمد عينو خضرة و مرة مرة كاتحوال
– لا حبيبة لقلب ومايريد مكاين لا شوافة لا فقيه
– كاتعتارفي ؟؟؟
– لا مكانعتارفش .. خخخ جريتي ليا لساني ألويلة .. غير الحمار لي يدي ويجيب معاك فالهضرة .. هناء عنداك تقولي هادشي لشي حد
– لا أحبيبة سرك فبير (لي جا يهز منو) واش حماقيت أنا
– إلى سمعتها من شي حد نعرفها خرجات منك
– (صافي عرفت قضيتها مع حسن دابا خصني قضية الخطوبة ديال ليوم) لعقبة ليكم أحفيظة ان شاء الله مانساليوا من خطوبة لالة وفاء تا ندوزو لتوجاد عرسكم أنت وحبيب القلب .. وإن شاء الله يكون عندك فال لالة وفاء وحسن
– خخخخخ فمك لحسو كلب
– ( بدهشة مصطنعة) علاش ماباغاش تزوجي بحسن ؟
– لا مابغيتش فالها .. زواج ديال بزز (عاد عاقت مع راسها) هناء بعدي مني أختي من صباح وانت تجري ليا لساني .. لي ماعرفوهش ناس فعوام انت عرفتيه فنهار .. سلامة ياربي .. صافي سالينا بقات لينا بلاصة وحدة مقاديناهاش هو البيت ديال وفاء ومع هي غاتكون معصبة وانت لسانك رطب .. انت لي غاتقاديه
– لاااا
– اه
نفدت أوامرها ومشيت مرغمة عليا .. حيت أصلا لي بغيت نعرف راه عارفاه .. وانا مكايعجبنيش نضيع وقتي فالخاويات .. مشيت وانا حالي معاجبني دقيت ودخلت حيت مجاوبني تاحد يسحابني البيت خاوي ولكن ملي دخلت تصدمت كانت جنازة نايضة عند لالاهم وفاء
– الله الله مالكي ألالة على هاد الحالة؟؟
– خرجي شكون قالك دخلي
– دقيت مجاوبني حد يسحابني البيت خاوي سمحيليا … واش هاد البكا والعزا كلو على ود علي .. سعدااااااتو بيك ؟؟
– (بعصبية) اه على ودو .. خرجي قوليها لناس كاملين … بلي مابغاش نتزوج بهذاك فؤاد .. ومن غير علي منتزوج بتاحد
– تاهدا حل .. باك مكايبغيش علي وعلاش تا انت ماتقوليش ليهم ماكنبغيش فؤاد ..بلا ماتجبدي كاع سميت علي
– هه (باستهزاء) واش بنظرك غاياخدو شواري من بعد ماوقعو الصفقة ؟ ولي ضمانتها هي أنا
– آآآه لقضية فيها شراكة .. بحال داكشي ديال الأفلام والمسلسلات .. والله تا كنحس بيكم انت وعلي هما الأبطال ديال شي سلسلة مغربية لا لبنانية هما لي عندهم هادشي ديال الأعمال والصفقات
– واش كطنزي عليا ؟؟؟
– (جلست حداها) لا بالعمى .. شوفي الحياة هي عبارة عن قصة حنا أبطالها .. والأبطال ديما كايكونو خاسرين فلول باش يربحو فلخر .. وانت هذا هو امتحان ديالك وامتحان حتال علوشك باش تشوفيه واش كايستاحقك .. انت إلى مابغيتيش هاد الزواج راه عمرو يكون .. واش نسيتي قول الله تعالى إن كيدهن عظيم تمعني فالأية .. وهادي غير خطوبة ماشي زواج يعني عندك الوقت فين تخدمي داك العقل فعوض ماتحفي دوك العينين بدموع … نوضي تحركي وجمعي الوقفة حشمتي بينا حنا العيالات
نضت أنا نيت جمعتها بوقفة لا تجمعها معايا بشي بونية .. بصح حسيت بلي حفزتها ولكن خفت تبدا بيا أنا لولى .. داز نهار وحنا مالقيناش فين نحكو راسنا بتوجاد وصلات 8 وبداو شي طنوبيلات كبار بحال ديال عتمان كوزان كيدخلو للفيلا .. ماكرهتش غير نضرب حداهم شي تصويرات نحطهم فسطاتيات ديال الواتس راه عندي ناشفين .. مهم نرجعو لمهم خرجو منهم شي رجالا مكلظمين بحال سطاجير ديال كويزينيغ ديال ليسطيا (شابعين قص) .. ولكن صدمة هي ملي خرج منها واحد سياسي معروف فالبلاد .. صراحة ماعرفتش سميتو حيت مكانهتامش بسميات .. ولكن وجهو مألوف وهنا كايطرح السؤال واش هما شركاء ؟؟ ولا واحد ناصب عل لاخور ؟؟ .. مهم دازت الخطوبة بيخير وعلى خير على عكس المتوقع .. كنظن بلي هضرو على عقد العمل كتر من عقد الزواج ومن بعد ساعة ونص حل الهدوء وكل واحد درك زلافتو
وحل وقت النوم راحة والهناء .. للأسف ليوم ماوجدت حتى حاجة حيت بصح عييت وتهديت .. ولكن سيهم أحمد موجد لقيتو قاسم لبيت على جوج بالوسايد
– حميدة راس الميدة شهاد الفعايل ؟؟ خفتيني نتحرش بيك زعمة ؟؟
– أشنو ؟؟ التحرش درتيه البارح خفتك ديري شي حاجة كتر .. حيت انت تبارك الله عليك مجتهدة كتمجهدي نهار على نهار .. لمصيبة لي درتي ليوم غدا ديري أكبر و أعظم منها
– وصافي ماتزيدش فيه .. راني غانطيح دودة حيت عييت والله
– ونتمناو ماترجعيش لفعى
– احمد قوليا هاد وجه المغرفة لي جا ليوم .. واش تاهو ؟؟؟
– ماعندكي لاش تعرفي .. خليك هاكا بريئة حيت إلى عرفتي غايضرك راسك .. وغاتولي تصرفاتك ماشي من مصلحتنا ..أصلا انت لي عقدتي الأمور كان عليك ماتقوليش بلي حنا مزوجين زدتي غرقتي راسك بيدك أما كنتي غير تسالي مهمتك تقدري تنساحبي أما دابا فغاتبقاي تال نهاية ماعندكيش خيار أخور
– تفو ماتفكرنيش أصلا لساني طويل هو لي وصلني لهنا
مرت لحظات وحنا ساكتين وكانشوفو فالسقف أما عقلنا فات السقف وفات الحدود وفات المدن .. وفواحد لحظة من لحظات ضورت وجهي عندو لقيتو فات الكرة الأرضية هادا
– انا :احم كاتفكر فيها ؟؟؟
– شكون هي ؟؟؟
– صونيا بنت سيكليس لي كاتبيع شامبوان كلير ونهار جمعة كاتقلبها حمص منفخ … تا مالك مبوق قصدت القضية ؟؟
– ههه آآآه كنفكر فيهم بجوج
– بجوج ؟؟؟ لا يشييييخ ليوم غا ديال العشق والهيام زيدوني .. أهاه مزوجها؟؟ خاطبها ؟؟هاضر فيها ؟؟؟
– ههه لخرة
– وجهك نيت غاديال النميمة … شوفو سيد كيفرنس .. لا لا سيد طايح على زنافرو نيت .. إيوا امتى غاتمشي تخطب .. أجي بعدا هي قابلة عليك .. زعمة عارفاك هاكا وقابلة ماعندهاش مشكل ؟؟؟
– (سيد بدا يبان ليه عرق حمر فعينيه) أش كاتقصدي زعمة ؟؟ بقابلة عليا وماعندهاش مشكل فين كاين فيا المشكل ؟
– بلا ماتعصب .. زعمة عارفة بلي خدمتك تتطلب الغياب أكتر من الحضور .. زعمة ديما مشغول ديما خدام حياتك فخطر .. تقدر تكون جالس ماعليك مابيك يعيطو ليك تحضر فالحين .. هادشي لي قصدت مال عيبك سابق
– آآآ .. لا ماعندهاش مشكل هي أصلا فالدومين .. وقريب غاتلتاحق بينا هنا
– أشنو ؟؟؟ هيييي أصكع والى عرفاتنا متتلين بلي مزوجين وكانعسو فبيت واحد أشغاتقول؟؟؟؟؟
– أصلا هي عارفة وأي تحرك كنديروه راه فخبار عناصرالشرطة كاملين لي خدامين على هاد القضية .. عنداك يسحابك راني مهدن إذن راني كنستمتع بحالك ومكاندير حتى شي تحرك
– بلاتي بلاتي .. أش كاتقول بلي فخبارهم كاع تحركاتنا … ياكما فخبارهم فضائحي الليلية ؟؟
– ههه يقدر ماشي بعيد
– أشنوووووووووووووو ؟؟؟ لاااااا دابا ملي غاتعاودو تمتلو إعادة الجريمة فأخطر المجرمين غاتمتلو هادشي لي درت
– للأسف تا ممتلة ماتقبل تمتل الدور الجريء ديالك
دار لجهة الحيط وخلاني أنا كنولول بوحدي .. ناري ميمتي شوهتي شوهة .. خايبة حتال لمعاودة يا عساك إعادة التمثيل .. أبيضار ومحالش واش توافق عليه .. بصراحة ماعرفتش واش نعست ولا سخفت ولا دخلت فكومة
من جهة أحمد
5:30 هدا هو الوقت المناسب لتواصل مع فريق تفكيك الجريمة ومعرفة المستجدات وتبادل المعلومات … كانت فهاد الوقت المصيبة الحولة ناعسة ومكسلة وشخيرها واصل لسمااا … تقول ناعسة فدار باها .. مرتاااحة وبالها هاااني .. مانعرف منين ضبر عليها سي عبد الصمد لي تايق فيها تقة عمياء .. هاد الثقة لي عمرها ماتحلم بيها مني .. كنعرف هاد النوع مزيان ديال مليون ولا جوج ويرجعو فصف العدو .. شكلها كاينرفزني سبحان الله .. ماعرفت علاش ؟ واخا أنا ماشي من النوع لي كيكره الناس بلا مبرر مقنع .. قطع حبل أفكاري اتصال سي عبد الصمد لي جاوبتو فمكان آمن
– ألو شاف
– ألو أحمد .. كيدايرة الأمور مزيان ؟؟
– مزيان .. كاين تقدم فالأحدات .. كنظن قربنا نوصلو لراس الخيط
– كان شكك فمحلو .. المجرم عبد العزيز مكانش يقدر ينفد الخطة بوحدو .. لداكشي استعن بالنائب البرلماني موسى .. ولكن شك بوحدو مكافيش خصنا الدليل .. وعلاقة المصاهرة مكادل على تاحاجة .. أما بالنسبة لحسن فحنا ليوم غانفدو طلبك بسحب منو رخصة القيادة فأحد النقط التفتيش ..الضابطة سهام ليوم غاتلتاحق بيكم ..الخطة غاتنفد ف 10 من هاد الشهر مابقى والو أأحمد .. ومافيدنا غير الهضرة خصنا الدليل
– وي شاف .. لخطة فطور التنفيد
– هاكا نبغيك .. كلشي مفهوم ؟
– كلشي ماعدا حاجة وحدا .. هي هناء ما محلها من الإعراب .. الكاميرة كانت تقدر ديرها سهام .. أما هاد الحولة أستغفر الله غير مشكلة خطر علينا
– ههه عمرني شفتك كتنعت شي حد بهاد الألقاب هه .. باينة مفعولها بدا يأتر عليك .. راك غير مزال معارفهاش مزيان ومقلل من قيمتها .. كايقول ليا احساسي هي الحل
– أما أنا إحساسي كايقول ليا تقدر تخوننا فأي لحظة
– لي كايبغي البلاد عمرو يخون
رجعت لبيت وانا راسي عامر أفكار وتساؤلات واحتمالات .. مجرم محترف بحال عبد العزيز مكايخلي تا شي دليل من وراه حاضي راسو مزيان وكاع الأبواب لي تديك للحل سادهم بقفل … ولكن علاقتو بالنائب البرلماني موسى بابو باقي ماتسدات ومن هنا خصني نبدا … هاد المرة صوت أو صراخ موصيبتي الحولة هو لي قطع حبل أفكاري
– (بالغوات)حميـــــــــــدة .. فين هما مظاظري ؟؟
– (بعصبية) فوق جبهتك .. نسولك وماديريهاش مني قلت صواب واش انت حولة ولا عورة ؟
– مالنا على حشيان لهضرة على الريق .. وتا أنا بغيت نسولك وزدح صوابك مع الحيط .. هداك وجهك ولاقفاك ؟؟ حيت بكل صراحة جاني عقلك بحال صباطك نفس الوسخ والعفن
– عاودي أش قلتي ؟؟؟؟
– لي سمعتيه .. ولكن إلى بغيتي نعاود ماعنديش مشكيل
– هناء راكي كاتقلبي عليا ؟؟
– كنقلب على لويز متلا ؟ شوف أسي أحمد عندك هرمون الأنانية مرتفع شوية لا ماشي شوية بزاااف حاول تمشي عند شي مختص يعالجك .. حيت مرضك صعيب ودواك غير متوفر فالأسواق
ابتسمات ابتسامة خبيثة وخرجات .. عندها الزهر خرجات فالوقت المناسب .. أما ماكنتش نقدر نضمن ليها سلامتها من بعد مغانفقد أعصابي .. أنا ماشي هاكا من ديما بارد كي التلج ولكن معاها كنحس ببركان كيغلي فيا .. كضرب بنت الهم على الوتر الحساس .. هدا هو لي قالو عليه ماقدو فيل زيدوه حولة
من جهة هناء
– حفيظة : صباح العينين المنفوخين .. واش كنتي كاتبكي ؟؟؟
– أنا : لا
– إذن بايتة كاتشمي فتقاشر؟؟
– خليني ساكتة…دابزت مع احمد على الصباح ,,,هو لي جبدني نايض كاعي … وقاليا الحولة … الله يحوليه ضلوعة مع ركابي
– ههه صافي سلات 7 ايام ديال لباكور .. أنا عرفت مالكم
– عوينتك وصابتنا .. أش غايصيبنا من غيرها
– لا …
بغات تكمل الهضرة وهو يدخل داك موسطاش تونية وحسن وخدام أخور للكوزينة يفطرو .. مشيت نكب ليهم أتاي وانا واحد الراس كايقوليا عطي لي فاقسك بالبراد لراس عجني ليه المخيخ و عوجي ليه لجمجمة .. ولكن لي مانعني هو خفت نبان فأخطر المجرمين فحلقة بعنوان ” بوبراد ” بلاصة “بوصمة” كن غير كانو كا يتفننو فالعناوين كن مانتردد تا لحظة .. أما الآن لا يسعني سوى نتمنى ليه يشرب السم و جغدييييد وبوگليب الكحل بلاصة داك أتاي ..
– حفيظة : مبرووووك وألف ألف مبروك أسي أحمد
– حسن : علاش أش طاري ؟؟
– حفيظة : مراتو هناء حاملة وبتوام إن شاء الله
أش غانقوليكم تمنيتكم تشوفو هاد لحظة بعينيكم وبالخصوص أحمد ملي سمع هاد الخبر السعيد .. أتاي لي كان ففمو نصو تشتش بيه ونصو زهقلو أما وجهو رجع حمر من داك أتاي .. وحيت أنا مراتو وعن قريب غانولي مت ولادو فكان من الواجب عليا نضرب ليه فضهرو باش يتبلع ليه أتاي أأأ أقصد الخبر .. مهم بردت غدايدي فيه بالعصا .. وكل ماكايبغي يتنفس كنزيد نفكرو بتوام وكازيد توحل ليه مسيكين يدخل فيه سكين ان شاء الله
– أحمد : أيييي صافي براكة .. كتنفضي حصير ولا كاتنتاقمي مني ؟؟ ..حفيظة ممكن نعرف باش عرفتيها حاملة ؟؟؟
– حفيظة : (بحنان زائد) لمرأة مكاتعرفها غير لمرأة .. وهناء هاد ليام معاجبنيش حالها مكاتشوفهاش كي صفرة .. ملاحظتيش بلي ولات إنفعالية وحساسة لواحد درجة مكاتصورش ..ضعافت وشعرها بدا يطيح .. وولات كتسهى بزاف لدرجة لبارح بدات كاتاكل فتفاحة تا عظات فالعظم .. ماشي هدا هو الوحم ؟؟… هناء أجي عندي ألحبيبة ديالي (شداتني عنقاتني ) يتربااااو فعزكم إن شاء الله .. وتفرحو بحفايدكم وولاد ولاد حفايدكم
– أنا : آآآآآمين ياربي .. العقبة ليك تا انت مع الراجل لي كايبغيك وكاتبغيه
– حسن : آمين … إيوا مبروك أبا حميدة
– أحمد : خلي مبروكك تال من بعد الفحص
هز زنافرو وخرج يالطيف على معفر .. أنا شاكة بلي هدا راجل من طين .. كنظن تركيبتو من الشر والغرور .. خخخ شحال حاس براسو وبجنابو .. يالطيف لطف بينا ومن شرو حمينا … حفيظة ليوم دارت معايا مزيان .. كتعطيني ندير غير الحاجة لخفيفة والماكلة زوينة كاتعطيها ليا وكل مرة كاتسولني إلى عييت نرتاح .. صراحة بديت كنشعر بالذنب .. حيت كادبة عليها وكنحس بحالا كنخونها … فوجهي ضحكة ومور ظهري موجداليها جنوية .. ولي بقا فيا كتر كنعاون واحد حقير مكايسواش .. كايهمو غير المظاهر .. وليت حايرة فينهوا الحق
وصلات 4 ديال العشية … وفاء بغات تخرج للمدينة وكان من المفروض عليها دي معاها حفيظة .. حيت هي أقدم خدامة فالدار ولي كايتيقو فيها وتقدر تقوليهم تحركاتها .. ولكن حفيظة كانت معصبة حيت حسن طرا ليه شي مشكل .. فاضطريت أنا لي نرافق وفاء .. هاد الأخيرة لي مكان عندها تا مانع نرافقها حيت عارفة لي خايفة يتعرف … من بعد ما وصلنا المدينة .. مشينا لواحد جردة .. غير شافت علي حبيب القلب .. صدراتني حيت باغا تهضر معاه على انفراد .. وأنا كنتمشى قريب بان ليا واحد المحل ديال الإليكترونيات استغليت الفرصة ومشيت خديت منو داكشي لي محتاجة ..باش نساليو هاد المهزلة فأقرب وقت حيت صراحة وليت كنولف ناس لي أنا معاهم .. وكل مسالينا بكري غايكون الضرر العاطفي قل … رجعت عند وفاء لي لقيتها باقا مع علي بقيت كنساين تا سلاو الهضرة هو مشا بحالو وهي جات عندي .. من بعد مشينا لواحد القيصارية ناخدو شي حوايج باش نبانو بلي خرجنا لهدف معين .. طريق كلو وحنا ساكتين
– وفاء : مالكي طريق كلها وانت ساكتة .. وحتى من علي ماسولتينيش عليه ؟
– أ؟؟؟ سمحي ليا كنت ساهية ؟؟؟
– (بعصية) وفاش بسلامة ياكما كنتي كاتفكري تقولي لشي حد على علاقتي بعلي ؟؟؟
– ماديتها غير فيكم .. لي فيا يكفيني … دابزت مع راجلي :’(
– داخلنا عليك بالله هداك يتقلقو عليه الناس ههههه مفضعص و غير هاز زنافرو لسما
– والله إلى عندك صح ههههه ولكن هو بعدا نواور على هذاك علي ديالك
– نبگ ماشي نواور .. عرفتي ؟؟ رجال كلهم بحال بحال … وحنا خاصنا لعصا لي كنشغو تفكيرنا بيهم .. يالاه نقادو المجاج
– باش ؟؟
– شنو هي أعز حاجة عند المرأة ولي تنسيها فرجال الكون أجمع ؟؟؟؟
شوبينگ .. مراكزالتدليك .. صالون التجميل … مشينا للأخير ضرنا بالحالة وقادينا السوالف وخلينا العقل تالف .. نسينا الهم ورمينا علينا الغم .. قادينا المظهر الخارجي وتا المظهر الباطني وصلاتو العدوى … صراحة والله تا حسيت بالنفستي تحسنات … ولكن للأسف كاينين بعض طفيليلات على هيأت بشر تخلقو باش ينكدوعليك حياتك وينكسو عليك ايامك ..وحنا راجعين وفاء دخلات لدار وأنا فطريقي لبيتي لقيت سيهم أحمد مع واحد المونيكة ديال عيشورة
– أحمد : هناء كنقدم ليك زميلتنا فالقضية سهام وخطيبتي عن قريب .. سهام كنقدم ليك
– سهام : (قاطعاتو فالهضرة) هههههههه هادي هي مصيبتك الحولة هههههههه
– أنا : أشنو ؟؟؟؟
– أحمد : سهام شششش
– سهام : والله تا عرفتها غير من شكلها ههههه … علاش كاتعصبك أنا بلاصتك نشوفها نشبع غير ضحك
– أنا : بصاااااح ؟؟؟ وانت لي يشوفك يموت غا فقصة … ولكن أنا مغانعطيكش هاد الفرصة .. أجي لهنا عليك كنقلب
واخا كانت طويلة عليا ولكن نقزت عليها .. وشديت ليها داك شطبة لي نابتة ليها فوق راسها … وبديت ننتف ونريش ومرة مرة نخبط … ومانسيتش العظان والبزيق والقميش .. أما الركل والعفيط كانو من نصيب حميدة لي كان كايفك … مهم كاع أعضائي ستخدمتهم فهاد المشاجرة العنيفة … والله إيما فكوني عليهم غير حسن ورجالا لي معاه .. أما قسما عظما مانتفرق عليهم تا تشرق شمش نهار السبت على فكرة حنا فالأحد
من بعد شد ليا نقطع ليك .. المونيكة ديال عيشورة (سهام) مشات كدمع وتسب .. وانا دخلت لبيتي فرحانة ومرتاحة من بعد مابردت غدايدي لي كانو فيا من نهار حليت عيني ولقيت طليسة فيدي وغدايد المدير وغدايد مقابلة عمل لي قطعو عليا فيها و غدايد طردي من الخدمة وغدايد هاد القضية .. حسيت براسي نفست الضيق لي كان فياا .. ولكن شكون خلاك ترتاح وتستنشق الهواء النقي
– أحمد : أش هادشي لي درتي للبنت ؟؟ واش حماقيتي ولا خرج ليك العقل؟؟
– خرج ليا العقل ؟؟؟؟ كن راجل مرة وحدة فحياتك وخدم داك العقل لي دايرة عليه الخملة والقمل ( الكلمة الأخيرة غير للقافية هه) .. شكون فينا لي جبد لاخور لول ؟؟
– كنعتارف بلي هي .. ولكن ماشي من حقك تصرفي بداك طريقة الهمجية
– أهاه الحل بنظرك هو أنني نسكت ونكمدها فقلبي ونعس ودموعي فعيني …صوري بيبي أنا ماشي من داك النوع
– ماعرفتش شنو هو الذنب لي درتو فحياتي تا عاقبني الله بيك
– وانا شنو ذنبي .. خلقني الله بهاد الشكل ..حولة و كاندير نظاظر قاع لكاس واش بنظرك بغيت نكون هاكا.. هاد امتحان وعطاه ليا الله الحمدلله عليه … راضية بقضاء الله .. ولكن مغانرضاش بأحكام واستهزاءات بنادم المليء بالعيوب .. لي كل ماسكت ليه يزيد يتجرء ينطق كتر .. وأش بغيتيني ندير كل مقاليا شي حد الحولة نوض نبكي ونقتل راسي .. عمر شي حد فهمني ولا غير حاول .. ولكن براكة عليا غير انا نفهم راسي ونبغي راسي ونتهلا فراسي .. وربي معايا .. وظز فيك وفالبشار
خليتو ومشيت درت راسي فوق المخدة وقلبت وجهي لجهة الحيط .. أنا صافي يا ربي عييت ما نقاوم فهضرت الناس .. كل ماكانسكت واحد كيطلع ليا واحد أخور .. أنا مكانطلب من تاحد بيبغيني ولا حتى يفهموني أنا بغيتهم غير يعطيوني التيساع ويخليوني نعيش حياتي هانية .. داني شوية ديال النعاس وانا تيليفوني العظمة بدا كايصوني … لا لا هاد نهار مايسالي تا يسالني فقبر
– ألو حنة لاباس عليك ؟؟
– لاباس أبنتي ناقصاني غير انت … بغيتك تكوني غدا عندي فالدار عندي ليك واحد المفاجئة
– مفاجئة ؟؟؟؟ بحال هاد طليسة لي درتي ليا وانا ناعسة !!!!!!!! .. الحمدلله هاد المرة فكني ربي من مفاجئاتك .. عندي الخدمة مزيرة أحنة وماعنديش كي ندير نجي
– وراه واليديك بقات ليهم غير يومين ويسالي ليهم الكونجي
– واليديا ؟؟؟ بقات ليهم يومين عاد هما تفكرو عندهم شي بنت بغاو يشوفوها .. قوليليهم يشوفكم الخير وبنتكم ماباغاش تشوفكم
– هناء الله يرضي عليك أبنتي ديري عقلك فراسك .. إلى ماجيتيش غايتقلقو منك .. وشكون لي غايسيفط لينا الفلوس .. باش غانعيشو بداك جوج دريال لي كاتشدي فالشهر ؟؟
– حنة شكون لي عزيز عليك أنا ولا لفلوس ؟؟
– انت ألحمقة ولكن أنا بغيتك تعيشي مزيان وماينقصك تا خير
– واخا هانا غانجي غدا
قطعت الخط وانا قلبي كايتقطع .. صافي لي كان ناقصني كمل .. مكانظنش بلي دوزت شي نهار فحياتي بحال هاد نهار وكنتمنى مايجيش شي نهار بحالو من بعد
– أحمد : (بصوت مليء بالحنان خخ) واش غاتمشي غدا ؟
– واش كنتي كاتصنط عليا ؟؟؟
– حنا فنفس الغرفة فبطبيعة الحال غانسمع .. جاوبي على سؤالي ؟
– اه غانمشي .. ياك هادشي لي كنتي باغي
– والمهمة لي مكلفة بيها .. مايمكنش ليك تخوي بينا ومايمكنش ليك تنساحبي فهاد الوقت بالضبط
– وااااو واش كاتعتارف بلي راك محتاجني … هاذا اعتراف خطير خصو يتسجل ويتصورويتعلق ويدار ليه إطار دهبي .. ولكن ماتخافش أنا ماشي من النوع لي كايهرب فوقت الجد .. غادي نرجع بعد يومين
– وبإينا حجة غاتاخدي الإذن ؟؟
– واش مقالش ليك سي عبد الصمد أول مرة تلاقيتو فإينا مناسبة ؟؟
– لا
– طردي من العمل .. بسباب إتمامي للكدبة الألف .. لي كايخليوا مرات المدير تنهج بالبكا وهادشي لي كايخليها ديما مع راجلها فصراع دائم عليا .. تمتع ليا فهاد الفترة انت ولالاهم سهام ماحدي غايبة .. حيت ملي نرجع غاندوقكم تمر شجر الزقوم أسغفر الله .. وأرا ماعندك
وجاء يوم جديد يوم جميل يوم ليس له مثيل .. (تفكرت أغنية القناع قلت نطلقها عليكم هه ) وأنا جالسة كنعاود الحفيظة أش جرا لبارح وهو يجي حسن قاليا تكلمي لسي عزيز يريد أن يوبخني لما فعلته أمس.. ياك قلت ليكم يوم جميل … قبل مانمشي للمشنقة دهنات ليا حفيظة شوية ديال الباربة لوجهي باش يبانو لكدمات وضربات وشلظات ليا جوج بصلات قدام عويناتي اللتان أجهشتا بالبكاء وشبعاتني قريص باش ماتشدنيش الضحة ويبان عليا الألم .. من بعد مشيت وتبعاتني بصينية ديال القهوة .. دخلت لقيت كلشي حاضر للمحكمة ، سي عزيز سيادة القاضي ، الضحية سهام ،شرطي أحمد ، المحامية وفاء ، شاهد حسن ، وشاهدة التي لم ترى شيئا حفيظة .. كانو كايهضرو فشي موضوع قبل ماندخل
– سي عزيز : مع من خدمتي قبل أ أنسة سهام ؟
– سهام : خدمت مع سي سفيان الريواني (اسم خيالي وأي تشابه فالأسماء فهو من قبيل الصدفة ) وزير سابق وفايت ليه خدم مع سي موسى .. لي عارفة مزيان تغرات ديالو
– مزيان غاتفيديني فهاد القضية .. (شافني وصلت وجالسة مع الناس كنتصنط) زيدي ألالة غزالي .. مزيان وتبارك الله ولا قد القب قد السطل (مكاينش شي سطل قدك دايرين بيك غير البوليس وانت حال فمك كي شطونة.. ناري شداتني الضحكة جاب الله مزال عيني كيدمعو من البصلة) وليتي دابزي مع سيادك .. مابقا ليك والو ضوري فيا أنا نيت (والله ماكرهت نضور فيك ونضور بيه شي سلوكة ديال ضو ونخوي عليك شي سطل ديال لما طايب.. تصلق وتشوى في آن واحد) .. هضري مالكي ساكتة داك دموع تماسيح ماينفعوش معايا
– حفيظة : سيدي هي لي جبداتها وعايراتها بالحولة .. وبغات دور ليها براجل .. وعايرات ليها واليديها وماخلات مقالت فيها .. أنا سمعتها بهاد الودينين لي ياكلهم دود .. وتا حسن سمع ياك أحسن ؟؟؟
– حسن : (ماعرف يكدب مايعرف يقول لحق .. وحفيظة بين هاد جوج) احم اه أسيدي .. هناء بنت الناس ومايمكنش تأدي نملة إلى ماجبدهاش شي حد
– وفاء : هناء ماديرش شي حاجة بحال هاكا إلى مدارتش ليها داك لفعى شي حاجة … ولكن ماحدي حية مكاينش لي يقيس الشعرة من حبيبتي هناء (أحمد طلع حاجب ونزل حاجب)
ناري واش كايهضرو هادو عليا واااو .. لا بلاتي هادو أش كايديرو وفاء تلاحت على شعر سهام وناضت حفيظة كاتعاونها ..سي عزيز كايغوت .. وحسن كايجي يفك كايفك يدين سهام لي كادافع على راسها .. أحمد تصدم بحالا درتي ليه بوص.. أما سيادتي بعد مانفدت خطتي .. بديت كنكحز لجهة حفيظة وكنهضر معاها من تحت سناني بحالا كندوز ليها أجوبة الإمتحان
– حفيظة جنب عطيها لراس .. عظي عظي راه فمك كاع مامستعملاه .. ماتنسايش لقميش والقريص
– عزيز : (بالغوات .. زعزع الدار ) براااااااااااااااااااااااااااااااااكة (بحالا كلشي درتي ليه بوص) خرجو عليا كلكم مابغيت نشوف تا واااااحد
حدرنا راسنا وخرجنا بالصف .. وكل واحد مشا بحالو .. طبيعة الحال بعد ماهددو وفاء وحفيظة سهام .. باش ماتلقاش دور بساحتي
– أحمد : وليت كانخاف منك أ لالة هناء
– أنا : خاف من لي خلقك .. أما أنا غير دريويشة
– دريوشة ؟؟؟ صدمتيني
مشا وخلاني وتا أنا كاع ماتسوقت ليه .. مشيت عند مرات سي عزيز حيت هي لي مكلفة بشؤون الخدم باش تخليني نمشي هاد ليومين .. بديت كنطنز عليها ونتبوحط ونتبحلس ساعة ديال لمكانة تا طيبت ليها قلبها وسيدة عاد مزايدة فيه مع جاها الملل قالت ليا عاودي ليا قصة حياتك كااااملة والله مانكدب عليكم حسيت براسي رمانة مع سحت الليل .. بديت نعاود ليها لكاين ولي مكاين استعنت بكاع المسلسلات لي تفرجت فيهم وكاع قصص البنات فالجروبات ديال العيالات وااااع … وأخيرا بعدما جف ريقي وبعدما قربت نلفظ أنفاسي الأخيرة قتانعات .. بعدما سمعت منها كلمة “واخا “هربت بلا صباط لا تقوليا نعاود ليها على شي حاجة واخرى … تصافطت مع حفيظة ووفاء ووصلني أحمد للمحطة
– هناء واش غاتكوني بيخير ؟؟
– (طليت ليه على وجهو) واش هذا أحمد ولا شي حد أخور .. بطبيعة لحال غانكون بيخير إلى بغا الله
– عندي واحد الإحساس كايقول ليا العكس
– ههه على انت كاتحس صدمتيني هه … واش بغيتي مانمشيش ؟
– لا سيري ولكن ماترجعيش
– اه باغي تهنا من وجهي .. ومحاملش تعاود تشوفني
– لا حيت خايف عليك
– لاااااا أنا دابا غاندوب فبلاصتي .. مالكم ليوم على هاد الحنان الزائد .. ياكما غانموت ؟؟؟!!!!
– معامن أنا كانهضر ياربي كلشي قالباه ضحك وتفلية … سيري لكار جا
– واخا هانا غادة ههه
– تهلاي فراسك
– (طليت ليه تاني على وجهو) واخا على شكون عندي أنا من غيرو نتهلا فيه هههه
– (شداتو الضحكة) هههه تلاحي
ركبت فالكار .. وانا كلي أحاسيس مختلطة .. الفرحة مع الحزن .. باغا نبكي وفنفس الوقت باغا نضحك .. أش هادشي ياربي .. فرحانة حيت حسيت بلي وفاء وحفيظة كايبغيوني وكايهتامو لأمري .. وفرحانة بهاد الإهتمام المفاجئ ديال أحمد .. مائة مرة واخا كانتفكر هضرتو (خايف عليك & تهلاي فراسك) خخخخ كل مرة كانقيص حناكي حيت كنحس بيهم غايتفركعو بالخجل .. ونفس الوقت كنيأس حيت كنفكر بلي هادشي كلو كدوب وأوهاام بحال النجوم ..غير كطلع الشمش كايختفي كلشي .. تمنيت كون كان هادشي بصح هناء وحفيظة وحسن عائتي واحمد راجلي ديال بصح
– خخخخخخخ تفو قالك جوج كليمات خلاك كي الهبيلة .. هناء توكضي معانا أصاحبتي
ماحسيتش براسي بلي قلت لجملة لخرة بجهد تا شفت كاع الناس ضارو عندي .. ويلي زيادة على الهتير زدت الشوهة .. تفو عليك أحمد انت سباب .. كاع مداني النعاس كي فالعادة فالكار مهم داوني الافكار … وأخيرا وصلت لسلا ووصلت الحقيقة وودعت الحلم .. لي بقى عايش غير فعقلي .. لهلا يوريكم كي دازت هاد اليومين بحالا دازت عامين بالعرض البطيء .. مملة ومعدبة … ماما كتهضر غير على العيشة برا .. على صحاباتها تما وحياتها كلها تما ..أما خوتي لي مكانعرف عليهم والو نهار ومطال وهما كايقارنو بين العيشة هنا والعيشة فالخارج .. أما أبي المحترم كيظل يعطيني فالنصائح على شكل أوامر .. بلي خصني نتزوج وندير داري باش مايبقاوش مشوشين عليا .. أو بالأحرى مايبقاوش يصيفطو ليا الفلوس .. أما بالنسبة لحنة الحنون .. قالك ناويين يديوها معاهم باش يصيفطوها للحج من تما .. يالا سعادتي داكشي لي عندي فدنيا غايديوه .. زيدوني عشقا زيدوني .. أما أنا عقلي كلو فإفران وشنو يكونو كايديرو سكانو … وأخيرا سلات هاد اليومين وسالا العذاب وبدا الجحيم … وصلت عائلتي المطار وتسافطت مع حنة لي كانت غادة معهم .. ومشيت للمحطة فالبلاصة .. شديت أول كار غادي لإفران وأنا فإعتقادي لي خليتو غادي نلقاه وغانكمل فين خليتها .. ولكن الغايب عمرو كايلقى داكشي لي خلا .. وحتى إلى بغا يعيش فالجو جديد خص يكون عندو الصبر والعزيمة الفولادية هادي لي كنظن أنا ماعنديش
وصلت ودخلت للفيلا كانت خاوية بحالا كانت قصر وولات دابا خربة مهجورة .. بقيت كندور فيها ولا فيها حس إنس ,, بديت كنغوت لحفيظة ووفاء ولا من مجيب من غير الصدى ديال الصوت.. شوية سمعت شي بكا جاي من الحديقة لورانية .. مشيت كنجري لجهة البكا كانت مرات سي عزيز ووفاء كايبكيوا وحفيظة كاتصبرهم .. غير شافوني نظرات الحزن لي كانت فعينيهم رجعات حقد
– حفيظة : تا انت كنتي من لبوليس ؟
– أنا : أش واقع ؟؟
– وفاء : بابا وحسن شديتهم أشنو ياكما نسيتونا تا حنا جيتو تديونا ؟؟
– أنا : حرام عليكم قولو ليا أش جاري ؟ أنا ما فراسي والو ؟
– أم وفاء : أحمد راجلك ؟؟؟ قولي لينا انت أش كنتو كاتخططو من لول .. رجلي بريء وعمرو يقدر يخون بلادو .. ولكن انتوما تلويتو عليه كي لحنوشة .. وغرقتوه باغين تغطيو بيه على الشفارة لكبار الله ياخد فيكم الحق ( بدات كاتغوت تا فقدات أعصابها ) خرجي عليا من داااري ألكدابة
شفت وجودي مغايزيد الأمر غير السوء .. لداكشي خرجت بلا مانتفوه حتى بكلمة .. أصلا ماعندي حتا باش ندافع على راسي .. قبل ماخرجت دخلت لبيرو ديال سي عزيز خديت منو لكاميرة لي درت داك نهار ديال لمدابزة.. ودايم فالقبر غي مولاه رجعت منين جيت يالاه بغيت نركب فالكار وهو يبدا يطيح التلج شحال تسنيتو وتمنيت نشوفو وحتى بغيت نمشي عاد جا بحالا كايقول ليا ماتمشيش .. ولكن أنا مابقى عندي ماندير هنا .. حتى التلج غايدوب واحد النهار وحتى حاجة مكادوم … وصلت للدار لي كانت هادئة هدوء الموتى أما أنا راسي كان مشوش كتلفاز جدتي القديم (الجملة الأخيرة مسروقة هه) ليل كلو وانا كنفكر أش جرا وأش هاد السرعة لي تحلات بيها القضية .. ماكرهتش شي حد يجي عندي يقوليا حلي أهناء ودنيك وسمعيني مزيان ويبقى يعاود ليا بالتفصيل الممل .. ولكن أنا لاش غانحل ودني ؟؟ خصني غير نحل عيني والحل عندي .. جبدت لكاميرة وحيدت منها كارط ميموار ركبتها فلبيسي وبديت كنتفرج فالصدمات … صدمة تلوى الأخرى .. كان سي عزيز كايهضر مع شي حد .. ومن خلال هضرتو .. بان ليا بريء .. ولكن إلى كان هو بريء إذن شكون المجرم ؟؟؟؟ وبإينا دليل تم القبض عليه ؟؟ سهام كانت كتهضر معاه وعطاتو شي وتائق يوقعهم وهو الحمار قرا غير الوتائق لولين وبدا يسني بحالا عمرو شد ستيلو هي كانت متوترة فالبداية ولكن من بعد توقيع بتاسمات ابتسامة عجيبة بحال ديال النصر .. نوغمالمون دليل لي خصو يتشد بيه خصو يكون موقع من شحال هادي ماشي عاد هدا راه كيتسمى نصب على حد علمي .. من بعد ساعتين تسمع غير صوت سيارات شرطة .. كانظن داك ساعة تشدو .. حيت عندي غير لكاميرة لي درت فالبيرو … دابا شنو غاندير أنا ؟؟؟ واش نمشي عند لبوليس ؟؟ مايمكنش حيت ماعنديش شي دليل ملموس وحتى هاديك سهام مشكوك فأمرها … أش غاندير ياربـــــــــي … مجات عيني غير على صاكي لي كان قدامي .. هزيتو من بعد ماكوبيت تسجيلات فالبيسي .. وشديت طريق لإيفران .. تفو أنا تسيزيت بهاد المشي والمجي حتى شيفور ولا يحبس ليا بلا مانقولها ليه واااع
وصلت لإيفران .. خديت نفس عميق وتوكلت على الله .. عارفة ماشي ساهلة يعاودو يشوفو وجهي ولكن خصني نصبر .. وكيف المتوقع غير شافتني حفيظة جات جراتني من شعري
– أنا : أييييي حفيظة طلقي أيييييي .. حفيظة راه أنا هي أملك الوحيد باش يخرج حسن من الحبس .. وقتليني وبقاي بايرة
سمعات كلمة بايرة وهي طلق .. وانا مزال كنقاد فحالتي وهي تجي وفاء كاعية كان معاها علي … لااااا تخبيت مور حفيظة
– حفيظة : لالة وفاء خليها راه قالك عندها الحل
– وفاء : حل ؟؟ فين هو ؟؟
– أنا : الحل هو أنا .. ولكن خصكم تسمعوني قبل
– وفاء : واخا زيدي ولكن كنقسم ليك وتكوني كتلعبي شي لعبة جديدة مور ظهرنا .. والله تا نقتلك وقبرك مايعرفو حد
مشينا لبيرو سي عزيز وجلسنا فطاولة الإجتماعات المستديرة
– علي : واش تا انت بوليسية ؟
– أنا : لا بان ليك شكلي ديال البوليس !!!!
– علي : داكشي لي بان ليا تا أنا
– أنا : أنا غانعاود ليكم القصة من لول تا لهاد لحظة لي حنا فيها دابا
التحقت بنا مرات سي عزيز وحتى هي سمعات القصة من لول تا لخر ووريتهم تا تسجيلات الكاميرة
– وفاء : إذن هاهو دليل .. يالاه نوريوه للبوليس
– علي : وفاء هذا ماشي دليل .. شكون قال بلي باك كان شاف الكاميرة ودار هاد تمتيلية باش يبرئ راسو
– وفاء : كيفاش تمتيلية واش مكاتشوفش ؟؟؟
– أنا : اه عند علي صح .. حنا عارفين بلي هادي ماشي تمتيلية ولكن هما ماغاديش يتيقو وبالخصوص إلى كان عندهم دليل ملوموس مغاديش يتيقو بالشك وهما عندهم اليقين
– وفاء : إيوا وهاد وهادوك الوراق لي كان كايمضي ؟؟
– أنا : للأسف الكاميرة مشاداهمش وحنا معارفينش شنو فيهم
– أم وفاء : شنو هو الحل ؟؟ و هاد تسجيلات منافعين فوالو
– أنا : نافعين .. عرفنا راس الخيط إذن خصنا نجروه ونخشيوه فالبرة
– حفيظة : وكيغانديرو نجروه
– أنا : طاحت عليا واحد الفكرة ولكن ماعرفتش واش غاتصدق؟؟
– كلهم : شنو هي ؟؟
– أنا : غانمشي عند أحمد وغادي نقوليه قدام سهام بلي سي عزيز بريء وغير منصوب عليه باش يتغطى على المجرم الحقيقي.. وغادي نقوليه بلي عندي الدليل .. هنا غايكونو جوج احتمالات .. الإحتمال لول إلى كانت سهام متورطة غادي تقرص وغادي تقول للمجرم الحقيقي باش يتخلص مني .. وهنا غايكون علي حاضيني وأي حاجة شافها غريبة غادي يعلم الشرطة .. وهكا غانكونو خشينا الخيط فالبرة
– والإحتمال تاني ؟؟
– أنا : سهام غاتكون بريئة ..وسي عزيز يا غايكون هو المجرم يا منصوب عليه من شي طرف أخور .. وهكا غانقلبو على شي خطة جديدة ولا نشوفو أش نديرو …
– وفاء : بابا بريء هو بصح كاراكطيرو صعيب ولكن عندو نيشان نيشان عمرو كلا عرق كتاف شي حد بقاليه غير يسرق فلوس دولة .. وحتى انت ملي جيتي انت واحمد وقاليكم غايخلصكم بصالير واحد كان باغي غير يختابركم واش بصح محتاجين الخدمة
– أنا : مم أنا غانبقى معكم ومغانتخلاش عليكم حتى تبان الحقيقة ويخرج سي عزيز وحسن براءة دابا خصنا نبداو فالخطة فأسرع وقت ممكن
– حفيظة : ولكن أهناء هاد الخطة راه خطر عليك .. وإلى طلعو هما دكيين علينا ؟؟ ودارو ليك شي حاجة الله يستر
– وفاء : اه حفيظة عندها الحق ..حياتك غاتكون فخطر.. لا مخصناش نغامرو بهاد طريقة .. خصنا نشوفو شي حل أخور
– أنا : مايمكنش ليك تصيدي لحوتة بلا ماترمي طعم .. ماتخافوش كلشي غايدوز كيف خططنا ليه .. الله ديما مع الحق وغايكون معايا ان شاء الله .. وحتى علي غايكون مراقبني ياك أعلي ؟؟
– علي : اه بطبيعة الحال .. غاندير مافجهدي وكتر من جهدي باش نحميك
– أنا :اه ضروري باش تربح حب وفاء .. وتكسب قلب نسيبك وينقص عليك شوية فصداق ههه
قلبنها ضحك خفيف خلاوها ناس زمان كترة الهم كضحك.. ونضنا نبداو فتطبيق الخطة .. خليت التسجيلات عند وفاء دنيا والزمان هادي .. ودرت مسجل صغير فجيبي فيه GPS … مشيت لمديرية الأمن فالرباط وبديت فالتنفيد .. للأسف أحمد مكانش ولكن لقيت سي عبدالصمد ولحسن حظي كانت معاه سهام .. قلت ليه بلي سي عزيز بريء و بلي عندي دليل وبلي كنت دايرة ليه كاميرة فبيرو ديالو بلا خبار تا حد .. والدليل والكاميرة كاينين فإيفران ودابا غانمشي نجيبهم ونرجع .. خرجت من لكوميسارية وكيف توقعت من بعد نص ساعة بدا الإحتمال لول كايتنفد
من جهة أحمد
بعد ما كنت غارق فأفكاري .. وشكوك لي مابغاتش تفارق ليا بالي كيفاش قضية بهاد صعوبة يتشد مجرمها بسهولة .. عيط لي سي عبد الصمد وقاليا بلي هناء جات عندو وقالت ليه بلي عزيز بريء و المجرم الحقيقي غير بغا يلهينا بيه ويوهمنا بلي هو المجرم لي كنقلبو عليه .. باش هو يخدم مرتاح وبعيد على الشبوهات .. وبلي عندها الدليل وهاد دليل كاين فإيفران .. غادي تمشي تجيبو وترجع .. مايمكنش إلى كان هادشي بصح وبصح عندها دليل .. إذن الوثائق لي كا تبت تورط وإدانة عزيز مزورة … بلا مانفكر خديت طنوبيلتي وتوجهت لإيفران .. بمجرد ماوصلت لقيت وفاء كاتغوت فتليفون
– علي جاااااوب .. أوف هدا مالو مكايجاوبش
– هناء فين هي ؟؟
– أحمد .. جاب الله جيتي .. هناء كنظن خطفوها
– أشنو ؟؟؟؟
بدات كاتعاود ليا على كلشي وعلى خطتهم السخيفة ووراتني التسجيل ديال الكاميرة .. جاب الله كانت دايرة جيبي إس لي بديت كنتتبعو ..وفنفس الوقت عيطت لسي عبد الصمد وقلت ليه يتكلف بسهام ويجبرها تعتارف ليه بعلاقتها بالوزير السابق سفيان الريواني ويوهمها بلي لقينا عليها الدليل القاطع .. ويصيفط أقرب دورية ديال الشرطة لدار ديال عزيز حيت تاهما فخطر .. إشارة gps توقفات كنتمنى مايكون طرا ليها والو ..ياربي حميها .. كنسوك على أعصابي مافهمتش كيفاش كاتفكر هاديك سيدة مرة كاتبان دكية مرة غير كتخربق .. واش يسحابها يحنو فيها راه روحها عندهم رخص من روح دبانة .. شفت راسي غانتعطل والوقت مغايكفينيش لداكشي صيفط لموقع لي هي فيه لسي عبد الصمد باش يصيفط أقرب دورية لتما فأسرع وقت ممكن .. من بعد نص ساعة ديال الأعصاب والتوتر فالطريق.. عاود عيط ليا سي عبد الصمد وقاليا بلي الشرطة لي مشات العين لمكان مالقات والو غير جهاز تسجيل مرمي .. وان سهام عتارفات وبلي جبرها باش تعاود تعيط للمجرمين وتقوليهم بلي دليل عند هناء وإلى مشات تا طرات ليها شي حاجة كلشي غايتفضح .. ياربي أش هاد الزهر .. عيطت لوفاء سولتها على علي واش عندها شي خبار عليه .. قالت ليا بلي راه مزال تابعهم صيفطات ليا الموقع فين كاينين دابا ورقم ديال السيارة لي مختاطفينها فيها ولي صيفطها لجميع نقط التفتيش .. الحمدلله وأخيرا لقينا نقطة ضوء … ووصلت الموقع لي كان صيفطات ليا وفاء ولي عاودات اتاصلات مرعوبة وقالت ليا بلي علي تليفونو طفا .. تاكانقولو تحلات وكاتعاود تعقد .. كانت لبلاصة لي أنا فيها كتأدي لطريق وحدة كملت فيها تابان ليا شي سيارات واقفين فمكان واحد من بينهم السيارة المتعقبة .. وأخيرا .. صيفطت لموقع لسي عبدالصمد .. وأنا مزال كنتحقق من المكان وكندرس خطة الدخول تلاقيت مع علي لي كان تاهو بحالي .. فقررنا ندخلو قبل وصول عناصر الشرطة لي ماهي إلا لحظات ووصلات .. ولقاتنا فمواجهة مع الخاطفين وجها لوجه ومن بعد عملية المداهمة تمت العملية بنجاح مع جروح خفيفة ليا أنا وعلي .. ولكن ملي شفت هناء عرفت بلي واخا نجحنا فالقبض على المجرمين فشلنا فحمايتها
كانت حالة هناء يرثى لها .. ملي شفتها فداك المنظر غارقة وسط دماياتها .. حسيت بالوقت وقف .. حسيت بقلبي وقف .. شفت بزاف ديال الحالات بحال هاكا وبطبيعة لحال تأترت ولكن حيت خدمتي تماسكت .. أما هناء قدامها نسيت خدمتي حسيت بيها شي حاجة كاتخصني شي حاجة جزء من روحي جزء من حياتي بلابيه مانقدرش نعيش .. ماحسيت براسي تاهزيتها فيدي كان نبضها ضعيــف وهي فاقدة الوعي تماما .. نصها حي نصها ميت ..وما هي إلا وتواني و جات الإسعاف خداوها بسرعة للمستعجلات .. مشيت معاها وأنا كلي أمل تحل عينيها فكل لحظة وتنوض تعايرني والله مانجاوبها ولا نتعصب عليها .. تمنيت كن كان هادشي غير حلم مزعج نفيقو منو ونلقاو راسنا بجوج .. نقوليها شحال كنبغيها و بلي من نهار شفتها عمرها فارقات خيالي .. بصح نهار لول كرهتها ودخلات لعقلي ولكن بشوية بشوية ولات كتسلل لقلبي ..عمري حسيت براسي مربوط ومافيدي ماندير من غير ندعي الله ونتسنى .. وعمري ظنيت بلي هادي لي كنت كانقول عليها المصيبة الحولة غاتحول ليا حياتي رأسا على عقب .. ولي كن تجرأ شي حد وقاليا بلي هاد البنت غاتولي عندك غلا من حياتك نقتلو بلا مانتردد .. وجا هاد ليوم وطال الإنتظار دازت يومين وهناء مزالا فغيبوبة وفنهار تالت عاد تكرمات تحل عينيها وترجع ليا الروح .. من بعد الفحوصات قدرت نشوفها
– أنا : هناء
– هي : شكون انت ؟؟
– أنا : دكتور واش فقدات الذاكرة ؟؟
– أنا : آآه حميدة عقلت عليك غا بصوت .. هاي هاي هاي هاي زيانيتي ألعفريت .. ولكن فين هو الموسطاش ألمسخوط .. كنتي كاتبان حرش أخخخخ بحال بقلاوة
– أنا : شكون بقلاوة ؟؟ واش شوية لباس كاتفكري غا فالموسطاش ؟؟؟؟
– هي :اه بصح ماخصنيش نفكر فالموسطاش ولكن والله تاكان يجي معاك .. أجي شنو دارو ليا داك الكفارة ياكما قتلوني ؟؟
– أنا : اه للأسف .. ماكنتش بغيت نقولها ليك باش مانصدمكش ..ولكن دايم الله دفناك لبارح مع العصر .. قبرك جا شوكة ماتخافيش .. إلى بغيتي نجيب ليك حقك ديال كسكسو من العزو
– هي : لااااااااامايمكنش وانا مازال ما شفت ما تشوفت .. ما تخطبت ما تزوجت .. ماولدت ما تحزرت
– الدكتور : بان ليا خصنا نديرو ليها سكانير .. لا يكون عندها شي ارتجاج فالدماغ
– أنا : لا أدكتور هادي حالتها من نهار عرفتها .. فالت ليها شي ڨيس كانظن من نهار تزادت
– هي : واش أنا مامتش ؟؟؟؟
– أنا : واش مضروبة بفردي خاوي لا ؟؟؟
– هي : ومالك كاتكدب عليا طيرتيها مني
– أنا : أنا غير طيرتها منك أما انت … أودي خليني ساكت
– هي : أودي غير هضر … اجي بعدا أش جرا فالقضية ؟؟
– أنا : الحمدلله لي تفكرتي ..القضية تحلات و المجرم الحقيقي وسهام دخلو للحبس هما وكاع المتورطين لي معهم
– هي : سهام … مابقاش فيك الحال عليها ؟؟
– أنا : لا بالعكس تستاهل كل مايجرى ليها
– هي : ولكن انت كاتبغيها ؟؟
– أنا :لا اكتشفت بلي مكانبغيهاش ولي حسيتو تجاهها عمرو ماكان حب
– هي : وباش عرفتيها ؟؟
– أنا : حيت دابا عرفت الحب الحقيقي شنو هو
– هي : احم قوليا حسن وسي عزيز خرجو من الحبس؟؟
– أنا : اه
– هي : خصني نمشي عندو نشنق على جدو يخلصني فليامات لي خدمت فيهم .. راني دمرت فيهم والله .. ماشي بحالكم انتما كان فيكم الدغل
– أنا : (بغير تصديق) لا بلاتي واش فهاد الوقت كاتفكري فلفلوس ؟؟
– هي : ومالو .. انت كاتخلصك دولة شهريا .. وانا نكب الما على كرشي لاديدي لا حب الملوك
– أنا : ههههه غاقولي ليا أش ندير معاك
– هي : أنا نقوليك يالاه نشنقو عليه بجوج .. حيت أنا مزالا عيانة شوية .. ويقدر يقولبني ولد الحرام
– أنا : هههههه نعسي نعسي تنعسي ما تنوضي .. نخليك ترتاحي .. هانا غير برا إلى حتاجيتي شي حاجة
خرجت من عندها وانا كنضحك ما عرفتش واش على هضرتها وهبالها ولا على الفرحة لي مخلية قلبي غايطير … هه هبيلة ومحمقة قبيلة .. واخا داكشي كامل لي عاشتو فحياتها وففترة القضية … مزال الضحكة فوجها مزالا كاتقاتل باش تعيش سعيدة وفرحانة واخا غير بوحدها .. ولكن من ليوم عمري نخليها بوحدها .. غانحميها بكل ما أوتيت من قوة .. واخا تكون مكاتبغينيش أنا غانبغيها حياتي كاملة … وياويل لي مشا تا قلقها شي نهار نمحيه من الكرة الأرضية .. وصلات العشية وجاو عندها زملاءها ومديرها فالعمل يطمنو عليها .. وقبل مايدخلو عطيتهم شي تحديرات
– شكرا على زيارتكم .. قبل مادخلو بغيت نقول ليكم … ياويل تم ياويل نسمع شي حد قال لهناء شي كلمة ماهياش وواخا غير بالضحك .. وبالخصوص لقب قاع الكاس .. لي سمعتها منو غانفصلو راسو على كسدتو .. واش فهمتو ؟؟
من جهة هناء
من بعد زيارة أحمد ليا زيارة لي فرحاتني بزااف ..صراحة كنت خايفة لا مانعاودش نشوفو .. يا إلهي لقد وقعت فالحب … احم أستغفر الله واقلة دكتور عندو صح جاني شي ارتجاج فالمخ .. فين كنا اه جاو عندي ضبع أستغفر الله يالاه رجعت من الموت زعمة مديري المحترم وزملائي الكرماء لي جابو لي نص يطرو ديال الحليب لواحد وشي دانونات ديال جيرفي ومفيد الله يعطيهم سيزي أأزعمة الله يعطيهم الخير أما المدير كمش ليا شي وريقة فيدي بقيت لاوية عليها كي الحنش حشمت نطل عليها تا مشا عاد تصدمت فيها ولقيتها خضرة 50درهم دايزة عليها لاندوشين خصني نلصقها بسكوتش وياربي غير يقبلوها مني جاب الله ماشفتهاش وهو كاين أما كن وريتو لعين لحمرة …مهم جاتني شي حاجة ماهياش فهاد زيارة .. شفت كلشي مؤدب وكلامو مزون طرا لي العجب
– المدير : على سلامتك أ قـ قـ قـ قـ قـ قـ (وحلات ليه) قـ قـ قـمرنا المنير .. من نهار مشيتي وحنا لور لور .. رجعي لخدمتك زملائك مفتقدينك وبلاصتك غاترجعي ليها معززة مكرمة
– ناهـــي انا ما بقيتش باغا نخدم
– وعلاش أ قـ قـ قـ قـمرنا المنير ؟؟؟؟
– (بتبوحيط) مانكدبش عليك ماعندي نفس .. نفسي مسدودة
– (جا لحدا ودني وهضر بالحس) نضوبلك فصالير غا رجعي
– آآه عندك صح دار كتسد نفس كتر … صافي نرجع لخدمتي هي لي دايمة لي
من بعد جا دور زملائي فالعمل كايهضرو معايا وكايشوفو فأحمد ومكاين غير ” الله يشافيك أحبيبة ” ” على سلامتك أكبيدة” سبحان مبدل الأحوال سبحانك يا جليل … من بعد مامشاو جات حفيظة ووفاء ومها واااو جاو عندي تالرباط .. خخخ حسيت براسي بحالا عاد تولدت من جديد .. أحمد خرج وخلانا بوحدنا عرف هضرة العيالات .. ومن بعد دودودودو على القضية بدينا الهضرة على المسائل العاطفية
– حفيظة : وراكي مساهلاش أحمد مسيكين منين دخلتي لسبيطار مفارقك تا دقيقة هو شد كونجي على ودك كاع .. أجي واش بصح مكاتعرفيش أحمد قبل من هاد القضية ؟؟ ياختي كاتبانو بحالا كاتعرفو بعضياتكم ملي تزاديتو
– أنا : لا والله ما كنت كانعرفو
– أم وفاء: إيوا ودابا ماطرات بينكم تا حاجة زعمة ؟؟
– حفيظة : طرات ؟؟ أويلي أش هاد سؤال وانتوما كنتو جامعينهم فبيت واحد كي القنيات … يطرا لي مايطرا
– أنا : لااااا حفيظة أش كاتقولي والله ماطرات بيناتنا شي حاجة
– حفيظة : اممم تيقتك … شوفو سيدة كي حمااااارت
– وفاء: لا لا مسيكينة طايحة على زنافرها فيه … وتاهو طايح كلو مسكين .. غير هو مزال ماعرفش معامن طاح
– أنا : ههه وباش عرفتيه طايح ؟؟؟
– وفاء: قاليا علي نهار خطفوك .. دخل أحمد عند العصابة كي المسعور … اما فاش شافك غارقة فدمياتك .. أوووه قالك سيد كان غايتصطى مسكين
– أنا : عادي شاف بنت مخطوفة .. يديرها مع أي وحدة
– وفاء: لا ماشي مع أي وحدة .. راجل يقدر يدير هكاك على مو ولا ختو ولا بنتو ولا لي خاطفة ليه قلبو
– أنا : زعمة نكون أنا من صنف الأخير ؟؟؟
– أم وفاء: يالاه بحالنا نخليوها ترتاح .. سيدة باقا مبنجة من الحب
خلاوني ومشاو وانا كي الهبيلة كنفرنس بوحدي .. ناااااري ومايكونش هادشي بصح غاتكون نهايتي كي البرتقالة المرة الله يستر … لالا خصني نبدا نفكر شنو ندير … نخطبو ؟؟؟؟ نخطفو ؟؟؟ نقرصو ؟؟؟ لالا أنا خرج ليا العقل صافي
– أحمد : فاش ساهية وكاتفكري ؟؟
– (سهيت وزلقات ليا من فمي) فيك
– أشنو؟؟؟؟
– أأأ قصدت فيا وفيك وفينا وفيهم وفالمجتمع وفالمغرب وفالعالم وفدنيا الغدارة لي كاتلعب علينا بالعشرة
– هاااازة فقلبك ههه
– احمد بغيتي تقول ليا شي حاجة ؟؟
– لا
– زعمة ماباغي تقولها ليا والو
– والو .. أش عندي نقوليك
– آآآه صافي ماديرش فبالك .. ماعرفت شحال فساعة هادا مالو تعطل ؟؟
– شكون هو ؟؟؟
– ولد خالتي خطشيبي كايمووووت عليا ناوين هاد صيف نضربوها بتزويجة .. مغاتباركش ليا ؟؟؟
– أه مبروك برفاه والبنين
– (من بين سناني)عديم الإحساس
– قلتي شي حاجة ؟؟
– لااااا
– ومالكي كاتباني مقلقة ؟؟ ماصدقاتش ليك الخطة لي صدقات ليك مع المدير
– إينا خطة ؟؟
– شوفي انت ؟؟ نسيتي بلي أنا بوليسي ؟؟
– اه حقا نسيت
– إلى بغيتي تعرفي شي حاجة مني .. ماتبقايش تلفي ودوري .. سولي نيشان وأنا غانجاوبك بكل صراحة
– واااخا هانا غانسول … اممممم ماقديتش صافي غير نسا
– زعمة حشمتي .. واخا هانا غانجاوب … واخا معارفتش صيغة سؤال كي غاتسوليه .. ولكن ملي كنتي فغيبوبة تمنيت كن كنت فبلاصتك تمنيت أنا لي يوقع ليا لي وقع ليك وانت ما تقاصيش بخبشة وحدة ..كنت خايف عليك لواحد درجة مكاتصورش وماعرفتش حياتي كي غاتقدر تكون كن طرات ليك شي حاجة .. مكاتفارقيش خيالي دقيقة وحدة ..إلى كان هادا هو الحب فأنا كنبغيك .. وإلى كان هدا حماق فأنا كنحماق عليك … عارف بلي مور هاد ضحكة لي كاضحكيها كاين حزن ووحدة كاتحسي بيها ولكن ماحدي أنا حي كنواعدك بلي غاندير كتر من جهدي باش تولي ضحكتك صافية .. مكاتعبر غير على الفرحة والسعادة .. واخا انت ماتبغينيش أنا غانبقى فجنبك ديييما وديما غانبقى نبغيك .. حيت انت كاتسواي عندي دنيا ومافيها
– واااو بركة الفقيه بدات تبان هههه
– أشنو ؟؟؟؟؟
– غير كنضحك … عقلتي على نهار لول فاش كان تسجيل وقلت ليك شي حاجة على الفقيه ههه
– باااااقي عاقل …والله مك ونشوفك جهة شي فقيه ههههه
– غير كنضحك مكاين لا شوافة لا فقيه .. داكشي من عند ربي هه .. إيوا مغاطلبش مني زواج ولا بغيتيني نبقى مجرجرة معاك
– نتزوجو وانت مكاتبغينيش !!!!!؟؟
– شكون قالها ليك ؟؟؟
– انت لي ماقلتيهاش إذن مكاتبغينيش
– وصافي أصاحبي غير نتزوجو داك تخربيق يجي مور زواج
– باغا تگمطيني … لا ألالة حنا مازربانينش تا تبغيني على خاطرك ونتزوجو
– أسيدي كانبغيك وكنتجوانطا عليك .. نوض نقولها لسبيطار كامل ؟؟ مكاتراعيوش خجل المرأة
– أه أنا عارف داك لخجل ديالك … باش ملي نتزوجو وندابزو .. تقوليليا انت لي كنتي كاتسطى عليا وانا ماكنتش معبراك
– يالطيف الله يستر داير كي العيالات كاتشد لحسيفة
– هههه أجي ياك كنتي ماباغاش تزوجي ببوليسي ؟؟ أش جرا ولا دوختك ؟؟
– لواه بوقتيني .. راه درت سطاتي فواحد لكروب ديال لعيالات فالفايس وسولت عيالات البوليس ديال المغرب زعمة واش نزعم ناكل لحم ولا نزعم ونكدد لعظم ؟ قالوليا غير زعمي راه ضريفين ووكايكون عارفين شنو هي المسؤولية وبقاي تشرطي تا تبقاي فدار باك .. قلت ندير برأيهم.. أجي إمتى غاتجي تخطبني ؟؟
– باغا تزربي عليا ألعفريتة .. تال لصيف ملي يجيو واليديك من برااا
– شهر أش هادا ؟؟؟ شهر 12 وإمتى صيف شهر 6 هيااااش باقا 6 شهور .. صافي قول لواليديك يجيو سيمانة جايا تخطبوني ان شاء الله فسكايب
– ونديرو العرس فسناب شاط هه
جاب أحمد واليديه لإيفران .. فين تلاقينا فين تخطبنا .. وخطبوني من عند سي عزيز لي عطاه بابا لوكالة واخا تا عائلتي كانت حاضرة فالبيسي ههه تجمعنا كلنا أول مرة نحس بلي عندي عائلة كبيرة كايبغيوني وكايبغيو مصلاحتي .. علي جا خطب وفاء لاغديه وسي عزيز وافق بطبيعة لحال حيت علي بين لكاع ناس بلي كايستحق وفاء عن جدارة واستحقاق … أما حسن نهار خرج من لحبس مشا خطب حفيظة زربان ههه عاد عرف قيمتها … بصح تا كانحسو براسنا كنفقدو لحاجة عاد كانحسو بحقها .. بحالي ملي كنت غانفقد حياتي وبحال أحمد ملي كان غايفقدني .. مهم خليونا من الأسى والماضي الأليم … درنا العرس بتلاتة فنهار واحد فبلاصة وحدة … إمتى ؟؟ فليلة راس العام فين ؟؟؟؟ فقاعة علي بالفلاح فمراكش فين كايديرو لالة العروسة العرس .. بطبيعة الحال قسمنا الضريبة المالية ههه … ممم عائلتي جاو وحتى حنة جات وفكراتني فنهار دارت ليا الحنة وخرجات حمرا وقالت ليا بلي هاد العام غانتزوج … بل وكاترجع ليها لفضل بلي بسبابها ربي حن عليا وزوجني .. تاقي الله أحنة راه غاتحجي زعمة .. زواج بالمكتاب وكلشي بالمكتاب .. نهار يكتب ليك الله وخا يطيح عليك العريس من سما ماتعرفي الدقة منين جاتك هه .. خليوني مع حميدتي فاش سالا العرس وجاءت ليلة الموعودة وكيف ديما ضروري ماخصني ندير شي فضيحة .. دخل عندي لقاني لابسة كاع الحوايج لي رزقني بيهم الله
– أش هادشي أهناء؟؟؟؟
– البرد أخويا شغادير ؟؟
– خوك ؟؟؟ أشغاديري ؟؟؟ أنا لي غاندير … فيناهيا القفة نديها لسيهام
– أجي لهنا ؟؟؟ فين غادي يا ؟؟؟؟ حميميشتي ماتمشيش
– وشغانديرو دابا … نبدا نقشرو فيك كي البصلة … ناس عطاهم الله مصيبة حلوة وانا عطاني مصيبة حولة
– ومالك أش بغيتي كتر .. مصيبة حولة تبغي تجيك وتجي غيرك
– لاااا أي حاجة منك سمن وعسل
دوبني بالهضرة ولد الحرام تا ضربتها بسخفة … دابا دازت 4 سنين على هاد القصة مزال أحمد معايا كيف نهار لول وعاد مكايزيد يحلى .. عندنا دابا جوج ولاد خنساء وعمران كاتعاونني عليهم حنة ..حيت أنا وليت دابا سيكريطيرة المدير .. وماشي بتدخل مراتو بل عن جدارة واستحقاق .. عينيا تقادو ونظاظر قاع لكاس حيدتهم مممم .. احم احم أصبحت جميلة صرت قنبلة فتاكة هههه .. وفاء وعلي ولدو 4 ديال توام هههههه ضحكوني حمقو سي عزيز ورجعو ليه راسو بلاصة رجليه فينما نمشيو عندهم نلقاوه راكبين ليه على ظهرو وكايديرو عنعن شاشا رارا … كبريائو معهم ولاو فالحضيض.. أما مراتو كاع لقصص لي سمعات عباد الله عاوداتهم ليهم .. أما حفيظة وحسن ماتزاد عندهم والو ولكن مأخرا راه سمعت بلي حاملة .. يسحابكم مسوقين عايشين لحياة جاب الله شي ولاد هي هاديك مجابش هي هاديك سعادتهم ماشي فالولاد .. مهم قصتي كي العادة فالمعاودة سالات .. كنتمنى تكون عجباتكم وخدات منكم ولو ابتسامة .. شكرا على المتابعة وخليتكم على خير
#النهاية
بقلم الكاتبة ✍️👇
دعيو مع هناء وأحمد الحقيقين يكمل عليهم الله بالخير ولكن بالمتل
شاركنا رأيك في هذا الفصل 🌹