الحمامة البيضاء🕊️
هبطو من طموبيل توجهو لقهوة كبيرة شدو بلاصة ونطقات ايمان وقالت: نتاا كتعرف لونا وكتعرف يوسف من شحال هدا
كريس: لونا صديقة الدراسة ويوسف راجلها ههه
ايمان: لونا اليوم دكرات ليا شي سمياات تاع بنات ومعرفتش شنو بغات تقصد …صوفي …ماريا …منويلا …هاد اللخرة قالت ليا انتا_حرات واش بصح ؟
كريس(كيتفكر )منويلاا كانظن البنت لي كانت كتغنيي فالريستو قبل منك
ايمان: وعلاش غتكون انتا_حرات
كريس:معرفتش بالضبط كانت فعلا مع يوسف
خرجو عينيها وقالت:هدشي علاش نتا_حرات !
كريس: مكانظنش القضية كبر من هدشي ومعارفهاش …لي عارف هوا يوسف ماشي انساان يقدر يطول معاه الواحد …قدما قدرتيي تبني لكاريير ديالك بعيدة علييه…حيت محدك حداه صعيب تكملي
ايمان :شنو يكون دار ليها حتى فكرات تنتا_حر فنظرك !
كريس: معرفتش…نتي خدمي ونفس الوقت حظي راسك منوو
ايمان:كون لقيت ما حسن غنمشيي ولكن هوا ليي هد الساعة عاطيني فرصة نباان
كريس: ولكن هاد الفرصة راه ماشي فابور هوا اكثر واحد كيستافد منك …داكشي علاش حاولي ما أمكن تبحتي على راسك
ايمان: عندي امل الاغنية لي غادي تخرج غنتشهر بييهاا وغيكون عندي حظ كثر باش يشوفوني منتجيين كباار شنو بان لييك
كريس(تبسم ليهاا ) صوتك جوهري ..اكيد اي منتج غيهتم بيه غير تيقي بياا
تبسماات كتشرب فقهوتها وكلها امل تخرج الاغنية وتفتح ليها بيبان الشهرة
فلعشية دوزات الحفلة ورجعات لدارهاا فوقت 3 تاع صباح مهدودة وحلقهاا ضرهاا قصدات الدار لقاتها مجموعة ونقية حيت دازت المساعدة جمعاتهاا دخلات لبيتها بتعب كتحط فالطالون قصدات لحمام مسحات وجهها وكتعمر فلجاكوزي ب برودويات وزيوت مسترخية شعلات شميعات وخلقات لراسها مكان راحة
حطات حوايجهاا جامعة شعرهاا كعكة دخلات فالرغوة المنعشة برائحة الطبيعة وريحة الورد هازة تيليفونها فايدها داخلة لتصاور …كتاخد جلسات ديال تصاور باش تحطهم فانسطا ولكن الاقرب لقلبها هما لي جاو صدفة وعفويين صور كيرجع عمرهم ل ربع سنين ونصف ..في تركياا وايطاليا فاشهرها اللولة مع رفييق الطريق والقلب “حذيفة “
كتشوف فتصاورو بحنين طاغي عليهاا عينيها طغات عليهم حمرة دموع لي غادية وكتكون فبياضهاا قبل مايتكونو دمووع طاحت على خدها ف صمت …معارفاش واش هدا كلو حب ولا ندم ولا هوس ولا شوق
ولكن هي عارفة ومتاكدة بلي اكثر انسان كتعشقو فهاد الدنياا هو نفسو حذيفة..ولكن هدشي نهار على نهار كيضرهاا وكيديق عليها خاطرها ملي كتفكر بلي مبقاتش عندو بلاصة فحياتها لغاهاا
مقادراش تمحي تصاورو ونهار على نهار كتزيد تعدب ومقدراش تحبس هدشيي مقادراش تعيش طبيعية وتفرح بلفلوس لي ولات كتجمع بالحياة لي ولات عايشة كيجيها كلشي نااقص وخاص لي يعمر عليها داك لفراغ تاع الحب والحنان لي تحرمات منو..بغات غير توصل لييه ملقات ليه حتى وجهة ولا طريق
حطات التيليفون وغصة فحلقهاا وشهقة تنهدات غاطسة فلماا ناضت تشللات نشفات خرجات لروتينها من ترطيب رشات ريحتها وتكات فبلاصتها شادة لكتاب كتقراا وكتبسم وهي كتشوف وصفهاا ف الصفحات غنائهاا ومنساش يذكر ان البطلة جات من بلاد مغربية ..
خداها الوقت ونعاس طاير حتى قرات الربع فالكتاب والابتساامة وعلى فمها والحماس خداها من ورقة لورقة كتخيل بلي هي فالصفحات وعازف الكمان هوا حذيفة داها نعاس على نسماات الصبااح والكتاب فوق صدرهاا
الوقت كيدوز بنفس الروتين لي تبنات عليه حياتها الجديدة ..كتفيق معطلة كدير الرياضة وكتباشر اعمالها من اشهارات وغناء فالريستوو …حتى وصل الوقت الموعود شهر 7 المقرر باش تخرج اول فيديو كليب لي خسرو فيه فلوس صحيحة كالسة فقلب الصالون ديالها قدامها لگلية وكانيط وطابليت فاتحة فيهاا فيديو مع وديان لي حتى هي كتفرج
وديان: ايما السبعة هادي اصاحبتي مزال متحطش
ايمان: بلاتي نشوف يوسف
صونات ليوسف فلبلاصة جاوب وقال: يكون فييك صبر شوية تسنيتي شهر ودقيقة مقدرتيش !
ايمان(بتاكيد ): وزعمة غيعجب الناس
يوسف: كنقوليك تيقي بياا ونتي مزال كتسوليي واش غيعجب النااس …حنا راه سجلنا قنبلة فهاد الصيف …المهيم شوية وغيتحط
قطعات معاه ونطقات وديان كتبرد فظفارها :اش قال داك وجه بطاطة
ايمان(طالعة هابطة فانستاا ) قاليك شوية وينزل …فف ناري مستريسية
وديان: فين وصلتي فلكتااب …طلاقات بيانكا مع الامير
ايمان (كضحك ومركزة مع التيليفون ) ناري قصة وااعرة اصاحبتيي مدوز عليها الصراط المستقييم داك الامير
وديان: ولكن هي مدلولة باغة المݣجف تاع لكوامانجيي اتبقا حتى يوقع ليها موقع ل اينجين التركية خهههه
ايمان: ولكن راه كيبغيهاا
وديان: سكتي يالمدلولة غضحكي فيناا المغاربة
ضحكاات وقالت: متشوقة لنهاية اصاحبتي
وديان: نتخاطرو عليها فاللخر اتزوج ب ألبير وغتولد ولد تسميه ادم على لكوامنجي حب قلبها
ضحكات ايمان بصوت مرتاافع وقالت: ناري غتكون مقطرة لدارتها ههههعع
وديان: تحط تحط
خرجو عينيها وقلبها كيضرب وحناكهاا سخنوو| بستريس
طلقات لفيديو كليب لي تصور بدايتو ف بحر اوترانتوو
باقدام حافية وصوت البحر
وديان: رجليك هادو
ايمان(مركزة): ششش
بانت ايمان بكسوة موردة قصيرة شعرهاا كان فطول لكسوة زايدة الشعر …بقات مدة كتشوف فلبحر
وديان: كاين شي تيتيز ولا غتبقاي مقابلة لبحر كي الحاجة الحمداوية
ايمان: وتي سكتيي وتفرجي
سكتات كضحك حتى بدات الموسيقى صيفية شبابية فيديو كليب مقسم بيين لبحر وملهى ليلي بدلات اللوك شحال من مرة مكانش عندها احتكاك من شي راجل من غير لبنات لي كيشطحو فقط لباسها كان قصير وكانت زايدة وشم مؤقت فايديهاا عبارة عن ورود
حتى تسالات ورجعات عاوداتهاا كتشوف كيجات كيف باانت …واش غيشووف هاد لكليب لشافو مية فلمية مغيعجبوش ، لحوايج لي لابسة قصار بزااف …نسات وديان وبقات كتفكر واش غيشوفو
وديان:عرفتيي صرعتوو لفيديو اصااحبتيي الأغنية واعرة متأكدة غضرب طوب …بس بس وااا ايماان
تقلباات جيهتها شادة حنكها كتلعب فسنيلة ديالهاا وقالت: والى معجبهمش ؟
وديان: نتخاطرو عليهاا !
بقاو سهرانين حاضيين المشاهدات كتزاد من مية ولات الف ومن الف غادية طالعة
مشات لانسطا كتلقاا ديڤ اول واحد مبارطاجي ليان يوتوب تاع القناة فين تحطات الاغنية حطاها وديان لي حتى هي لكونط كان عامر كانت كتشارك ڤلوكات ديالها ونصائح طبيية ومكياج وحوايج
بداو الصفحات الايطالية لي ديجا تخلصو باش يدوزو الاشهار ديال لكليب ومع الصباح غادي دوز فالراديو…هدشي كلو كتسناه بفارغ الصبر يعطي ثماره
بقاو ساهريين على المشاهدات حتى قرب الصباح يطلع عاد طفات طابلييت وتكاات ..كتخاف تنعس تفييق مخلووعة …داك الشاب لي تق_تل على ايدهاا عارفة فقرارة نفسها بليي كان دفاع على النفس كان ممكن تكون هي تدفنات ولا يكون حذيفة ولكن تز_هق روح على ايدك ميمكنش تنساا
نعاس ولا كيهرب ليهاا ولابد تلفازة تبقا شاعلة حيت كيطفا الضو كتبدا تخيل شي حوايج مكاينااش
الوحدة صعيبة والافكار كتق_تل …حلات تيليفونهاا على سورة البقرة حشمانة من راسهاا حشمانة من البعد لي بعدات على دينهاا الدنياا لهاتهاا وكتفكر القرآن غير ملي كتخااف وكتبغي شكون يحمييهاا نسات الصلااة نهائياا حتى كتقول صافي غدا نصليي كتمشيي مع الدنياا حتى كتلهيهاا كتخلق اعداار لنفسهاا وكتبرر لنفسهاا وعارفة بلي مكاين حتى شي مبرر مقنع لبعدهاا نهار على نهار على الله
غمضات عينيهاا وضو فلكولوار شاعل خاافت مهرس ليها الظلام فالدار صوت القران كيتسمع وهي كترمش وكتقلب فوق لفوطوي حتى عيات وناضت لبيت تكات ففراشها سورة البقرة تسالات وعينيها مزال لاصقيين فالحيط كترمش
حتى نعساات من حلمة لحلمة حتى بدات كتجري لكلاب موراهاا شوية صوتوو من بيين شجر كيعيط عليهاا شوية صوت نعييمة شوية ايدها عامرين د_م غوتات حتى ناصت مخلوعة قلبها غيخرج
ناضت كتنهج كلشي فيها كايترعد مخنووقة كتبكي ناضت لدوش طلقات عليها لماا وهي بحوايجهاا ….كلسات فالارض تحت لماا كتبكيي وتشوف فايديهاا وتشهق وضرب فجبهتهاا كتبكيي بحرقة و الوحدة كاتق_تلها من لداخل شوية بشوية
*
الوحدة تأتيك حينما تنسى أن الله معك.
*
وكيف ديما كتضعف فبيتهاا وكتخرج لشارع وحدة خرا مقادة ومصاايبة لي شافها غيقول عايشة لحياة طول وعرض
جاها اتصال من وديان …تصنعات الابتسامة وردات : بونجورنوو
وديان: اوى صباح زييين هداا …شفتيي شحال تاع المشاهدات فلكليب
ايمان: لاا والله مدخلت
وديان: اويلي حيي ف 12 لساعة اصاحبتيي ضرب نص مليون ونتي كتقولي والله مشفتوو
وقفات فنص الطريق دخلات ليوتوب كتهدر مع وديان ابيل فيديوو تبسماات بلطف وقالت: واللهيلاا
وديان: متجي فين توصل 24 ساعة غتكون ضاربة ملييون ههه راه ميمكنش ادماان
ايمان(ضحكات)شكون شكاار العرووسة
وديان:لاا فغيمون ناضية ا بب (سكتات شوية )فين غادية ! ياك ليوم راحة
ايمان(تبسمات ليهاا ) ناخد شي دوا كيضرني راسي
وديان:يمكن بسهير … خودي ** غينفعك
ايمان: نرجع لدار ونهدرو
قطعات معااها ولغات ضحكتهاا قاصدة فارماسي دايرة نضاراتها الشمسية كتنهد
تبسمات لصيدليي وقالت: عفاك نعاسي مخربق ومبقيتش كنعس مزيان …بغيت شي حاجة تعاوني نعس
بقا الشاب كيشووف فيهاا كيقلب على دوا ويرجع يتاكد غير حيدات نظاراتهاا وقال: بيانكا !
ايمان: سيي
تبسم ليها ابتسامة عريضة وقال : عاد شفت لكليب لي حطيتي …فين كان هد الصوت مخبي
تبسمات باطراء وقالت:شكراا هه
_ممكن صورة !
حركات راسها باه جاي جيهتهاا هاز تيليفونوو بفرحة جا قدامها وخدا سيلفيي معاهاا
عطاها دوا فرحاان وقال: عندي انستاا تاعك غنطاكيك …
هزات الصاشية وخرجاات كدير نظاظرها ضحكات بفقصة ..اول صورة مع معجب فالشارع تكون فيها علامات السهير والشعر مجموع باهمال وفالصيدلية
دخلات لداار صايبات فطورهاا وكلساات كتشوف فانستاا والناس لي برطجااو لكليب فسطورياتهم كتعاود تبارطاجيهم عندها منهم ديڤ لي حاط صورتو معاهاا ف لبروفيل كان كاتب ديفيد وحداه حمامة بيضاء حدا اسمه معارتش للامر اهميية ودخلات كتقرا فكمية لمساجات كلهم تعبير الاعجااب
كتبقا ناازلة نازلة جهد 100 مساج او اكتر غير باش تاكد بليي لي باغاه يسيفط ليهاا وتعرف اخبارو مكاينش
غمضات عينيهاا باسى كتشرب من قهوتهاا دخلات ل تعاليق يوتوب كتقراا حتى عياات كلشي عجباه …عجبها الحال كثر وتبدلات نفسيتهاا شوية المشاهدات ساعة بسااعة كيتزادوو حتى وصلات لمليون فظرف 20 ساعة كلشي كيهدر على الاغنية لمغنية جديدة صوت رائع وشكلها رائع
دازت يومااين على خروج الاغنية لي كانت التالتة ف ترند ومبقاتش عالقة غير ف ايطاليا وصلات ل 4 الملييون ومزال مستمرة
*
حل قرعة المشرووب فسماا حتى طار الشرااب وهز القرعة بفرحة قدامو لوناا ولي شارك فالأغنية من منتج ومخرج وكاتب الكلمات …معاهم ايمان وكريس هي لي عارضااه
بدا تصفااق وهي باجمل حلة ليهاا قطعات كيك نجاح الاغنية تحت تصفيقاتهم وبداا كيتوزع شرااب على لجميع حتى وصل يوسف بلكااس عندهاا
يوسف: شنو قلت لييك اول مرة …غادي نطلعو انا ويااك وغتنافسيي الفنانة لكباار (مد ليها كاسهاا)
ايمانبامتنااع) وشنو قلت ليك الف مرة مكنشربش
يوسف: ولكن ليوم حاجة سپيسيال ضروري تكون مرة اولى فكلشي (باصرار) بيانكاا
ايمان: يوسف
يوسف:شدي ناخدو صورة ومتشربيش
ببغا يمدو لايدهاا وشدوو كريس من ايدو بابتساامة وقال بصوت خفيف : كتعرف شنو هي الحرية الشخصية
يوسف (ضحك )اوه كريس …بدا كيرجع صوتك شوية !
كريس(تبسم ) غنسرق ليك نجمة اليوم شوية(جرها من كتفهاا وحط لكاس على الطبلة
مع عطاهم بالظهر تلغات ضحكتو وشاف فلونا لي كتشرب مشا ليها وقال: هد كريس و بيانكا بيناتهم شي حاجة
لونا(شربات لكاس التااني كضحك )اناا راسك ومعارفاش شنو فييه غنعرف واش دوك جوج بيناتهم شي حاجة !
يوسف(حيد ليها لكااس من ايدهاا ) باركا جمعي راسك …وعرفي شنو كتخرجي من فمك
لونا(ضحكات)خايف نفضحك هههه
يوسف(ضحك )خافي حتى على راسك ازوينة
كريس:ايماا …بيك شي حاجة ! مافرحاناش
ايمان(غرغو عينيهاا) معرفتش …خاصني نفرح ياك ؟ مفرحاناش…محاساش براسي مزياان
كريس: يمكن خاصك ترتااحي …تبدلي الجو هاد الدومين لي ختاريتي فيه ضغط كثير وونتي عاد بديتي (ضربها لجبهتهاا تهزات عينيها فييه وتكلم بالشارة ) باقة كتفكري فييه …مبغيتيش تنسايه
ايمان: علاش فروايتك بيانكا نسات ادم
كريس: ولكن ادم محاولش يمشي ويخليي بيانكا فأول نقااش (بحركات )يمكن مكانش كيبغييك
ايمان: الى مكانش داكشي لي بين ليا حب شنو غيكون
كريس: ولف …اعجاب …يمكن جا الوقت باش تنساايه وتكمليي حياتك
هبطات عينيهاا وهزاتهم فالحضور وهي بكسوتهاا لكحلة جامعة شعرهاا كلو لفووق كعكة وطايحين خصلات مموجة من شعرها فلقدام مبينين عنقهاا و وجهها بملامح بريئة وفاتنة فنفس الوقت
شافت يوسف كايشير ليهاا باش تبعو
طلعات لبيرو ديالوو ودخلات بابتساامة استقبلهاا كيمد ليها جوا بيض
شداتو وقالت: شنو هناا ..
يوسف: قلبيي
حلات جوا كان فيه فلوس كثيرة هزات حاجبها وقالت: هادو فلوس لفيديو ؟
ضحك عاطيها بجنب كيرميي لماكلة للحوت وقال: واش نتي حمقة لفيديو ياله يوماين تحط …غير كوني هانية غتااخدي نصيبك منو وبزياادة (رجع لحوتات كيهدر عاطيها بالظهر) هادوو باش دوزيي لييك عطلة وترجعي اكتر نشااط …بان ليا بديتي كطفااي وحنا عاد بديينا
بابتساامة: واش بصح !
يوسف: حتى لحفلة لي كانت غتكون ف فرنسا راه تلغات حتى يساليو اصلحات لاوطيل …خودي ليك بووز وسيريي سافري …متفوتيش 15 اليوم ، باش منخسروش لكليان لي كيسولو عليك
ايمان:جات فوقتها …شكرا (تبسمات لييه وخرجات فرحانة اخيرا غتساافر وترتاح شوية
خرجات من الريستو لقات كريس كيتسناهاا بطموبيل
ايمان: غنساافر
كريس: عند ودان
ايمان: ههه ودياان
كريس(تبسم ) يس .. فرنسا ياك ….وانا لي كنت باغيك تمشي معايا لاسبانياا نشوف العائلة
كدكر ليها اسبانيا بحال الا ضغطتي على جرحها قالت بهدوء :مرة اخرى
وصلها لباب تحرك خلاها كتحل فلباب حتى سمعات ديڤ كيعيط ليهاا
ضارت جيهتو شادة الساروت بقات كترمش فيه وهوا كيقرب لجيهتها من جديد ب بوكيه ديال ورد الياسمين …شداتو من عندو وقالت: شكراا
ديڤ: شكون هدا لي وصلك !
شافت فييه كتاكد شنو من شنو قال : كوزا ؟ (شنو)
ديڤ: شكون هدا لي وصلك ! ع عععلاش يوصلك
ايمان: خاصني نمشي تعطل الحاال …بويناسيرا
بغات تعطيه بالظهر وشد ايدهاا وقال: م متمشيش
بعدات ايدهاا وقالت: خاصني نمشيي
ديڤ:ب ببلاتيي …لكادوو …كادوو الاغنية
بنفاد صبر قالت: الورد كاافي شكرا ديڤ…ااا مبقيتيش (ردات زغبات ورا ودنها ) تعرض ليا بليل حيت كتخلعنيي ؤك
ديڤ(جرها من ايدها )اجي تشوفي لكادو
خرجو عينيها من جرة وقالت: واش حماقيتيي …طلق منيي اش كدير
طلق منها وسط طريق كيضحك وصفر حتى خلعهاا مع التصفيرة مع ديمارا موطور تاع طموبيل وراهاا خلعهاا تقلباات قلبها كيضرب كتبان ليهاا طموبيل بيضاء من نوع فيات كاط كاط فجنابها سينة حمرااء وملصق فيها لورد لقدام …حطات ايدها على فمهاا من الصدمة وديڤ جا قدامهاا حال ايديه وقال: هديتي المتواضعة
كتشوف فيه وتشوف فطموبيل هادي كلها سماها هدية متواضعة يمكن غتهز كاع لفلوس لي جامعة ياله تجيبها ..ضهشرهاا وبدا ناقوص لخطر كيدق من جيهتوو ميمكنش شخص عادي يجيب ليك طموبيل بدا قلبها كيضرب حتى فيقها بهدرتوو
ديڤ(مد ليهاا الساروت ومشا كيجري لباب حلو) كيف جاتك
مع فاقت من الصدمة بالخلعة زيرات على داك لورد حتى حسات بالشوك لي فييه وقالت: ز زوينة …ولكن منقدرش نقبلها
سكت فوضعيتو كيشوف فيها وقرب ليها :ع علااش شريتهاا لييك …شوفيي (وراها لبلاكاا لتحت مكتوبة بيناكاا ) خصيصا لك …الهدية مكترجعش
ايمان:اااه ديڤ(ضحكات )معنديش لبيرميي …و وكنخاف نسووݣ
ديڤ : شنوو كيدير ديڤ …شنوو ! نعلمك تسوݣي … حتى لبرمي (طرطق صباعو ) بميساج واحد يكون عندك
سرطات ريقهاا كترعد : شكرا ولكن حاليا مامحتاجاهش (بالعربية )ياربي نكون كنحلم
ديڤ(تلغات ضحكتو ) : ريݣالو مكيرجعش …بغيتي تسطييني
ايمان(برجاء) ديڤ سكوزاا
ديڤ(جر ايدهاا وحط ليهاا لكونطاك وزير على ايدها ): غتقبلييه بغيتي ولا كرهتيي …شريتها لييك بكل حب
ايمان: نديرو اتفااق !
ديف:سيي سيي قولي
ايمان (شدات ايدو حطات فيها الساروت بضحيكة وقالت) ملي توصل الاغنية ل 30 مليون عطيها لياا ؤك
ديڤ:30 !
ايمان(جاها الرقم قليل ) نديرو 60 حسن
ديڤ(خرج عينيه )30
ايمان:ؤك ديك الساع غنشدها من عندك …متاافقيين
ديڤ:صافي وخة
تفكات منو بلكشايف خلاتو متبع ليها العين حتى دخلاات سدات عليهاا وكلها كترعد تكات على الباب وقلبها غيخرج من بلاصتوو مشات لسانسور بركات على الرقم ايدها كيترعدو موصلات لدارها وسدات عليهاا تكانت صفارت حطات الطالون وبقات كتمشي وتجيي حاطة ايدها على فمهاا بصدمة كتكلس وتعاود تنوض وملقات غير وديان تصوني ليهاا فيقااتها من نعااس وقالت: فيقتك
وديان:مالك اصاحبتي …2 هادي
ايمان:طرا بلاان فشكل …نهدرو فيديو !
فلبلاصة صونات ليها بانت ليها الشاشة كحلة حتى بانت ليها وديان شعلات الضو من وسط فراشهاا وقالت:ياك لبااس
وراتها الورد فلبلاصة عرفاتو ديڤ تقادات وديان فبلاصتها وقالت: مع 2 تاع الليل
ايمان:المشكيل ماشي هناا
مشات لبالكون لكوزينة بلا متشعل ضو كطل بان ليها مشاا وقالت:مشاا
وديان(توكضات)اش واقع اصاحبتي
ايمان:جايب لياا طموبيل اصاحبتي فيات كاط كاط
وديان:واش …واش داوية بصح ! اويلي وشنو المناسبة
ايمان:قالييك الاغنية
وديان:شديتيها ؟
ايمان:واش حماقيتيي ! بزز تفكيت منو قلت لييه تضرب 30 مليون فيوتوب وعطيها ليا
وديان:واش لمك الاغنية فيومان ضربات 4 المليون فنضرك 30 مغضربهاش
ايمان: هدشي لي خرج من فميي …عرفتيي خلعنيي ا ودياان هد زمر ياا حمق يا شي مافيو_زي راه ميمكنش السلام السلام هاكي طموبيل
وديان: من اللول قلت لييك متعطيش لسلكوط وجه كااع
ايمان:انا حساب لياا واش نورمال كيجي يحضر لسهرات فالريستو بحال الناس ماظنيتش يولي هكا
وديان: متقوليهاش ليوسف يبدا يوصلك تالباب دار !
ايمان:ودابا راه وصلني كريس ومشا
وديان:ديك الساع يتسناك حتى دخلي
ايمان:منيتك الشيفور ديالي
وديان:اوى من الرجولة حط بنت مع 2 تاع الليل يتاكد واش طلعات …فالح غير فروايات الحب …تلقايه داكشي علاش طلق هههه
ايمان:داباا فين حنا وفين مشيتي نتي .. اش غندير مع هدا دابا
وديان:بقاي تميكي عليه قدما قدرتي تيفهم راسو
ايمان:نساني فلفرحة
وديان:اشمن فرحة
ايمان:شديت واحد 15 اليوم
وديان:غتجي عنديي اصحيبتيي ياك
ايمان(بابتساامة باهتة )وفين غنمشي الى مجيت عندك
وديان:احسن حاجة هههه…غدا التخرج مغنحتافل حتى تجي اصاحبتي حاولي تقطعيي اليوم ابب
ايمان(تنهدات)ان شاء الله …رجعي تنعسي
وديان: بونوي حبي
قطعات معاها هزات طابليت كتقلب على طيارة بغات تمشي فاقرب وقت وترتاح متبقاش بوحدها ..لقات وحدة غدا ببليل كلشي عامر العطلة الصيفية كلشي بغا يسافر
عارفة راسها غتبقاا تقلب حتى تعياا من غير لخدات الدوا فضلات تنوض تجمع لحوايج تجبد وتحط لي كتعجبها كتحطها ولي ماعجباتهاش كترجعهاا
صايبات لباليزة..طلع صباح وهي مناعسااش بلفرحة خرجات كتقدا كادو تاع التخرج حارت ومعرفات شنو تاخد
دخلات لماركة لي كتعجب وديان “Louis Vuitton”
كدور وتقلب كلشي عجبهاا بان ليها صاك اونييك صغير ونفس ستيل لي كيعجب وديان هوا لي حطات علييه العيين مشات خداتو صايبوه ليهاا فلكرطونة مع تيكي ديالو خلصات 800 اورو كاش وخرجات فرحانة بلفلوس لي ولات عندها واقدر تشري اي حاجة بغاتهاا
قصدات دار جمعات لي بقاا مشات خدات حمام مغربي حكاات وقدات راسها فنفس الوقت منساتش سطورياات ومرة مرة تلوح عينيها لجهة يوتوب تشوف فين وصل نقزات بفرحة ملي لقات خمسة المليون مشاهدة ولي بااج الايطالية كانت حديث الساعة هي “الحمامة البيضاء ” لانه فلكليب قبل متسالي لاغنية كانت مدورة بيها مجموعة من الحمام الابيض وفالاخير طلع اسمهاا ” colombq bianca”
فنفس الوقت العدد غادي وكيتزاد فانسطا ولا عندها الرواج كثر
حسات بلعياا ومشات تكاات غمضات عيينيها ترتااح حيت مناعسااش حققات تيليفون لا تغفل عينيهاا
مع وقت الغروب كانت لابسة ملابس مريحة للسفر سروال توب لارج فلبيض وديباردو فلبيج قصير بسميطات شعرهاا مموج وطالقااه ولابسة سبادري بيج جارة بكاجها هازة صاك فايدها وكتاب قبل متخرج حطات سطوري قدام لمرااية مع اغنيتهاا وخرجاات فرحانة اول تسافيرة خارج لبلاد من بعد 4سنين وزيادة فبلاصة وحدة
شدات طاكسي لمطار كتكلم مع وديان ابيل فيديو كتعلمها بليي غتركب مع 10 تاع الليل
فطاكسي طلقات اغنيتها فراديوو وضحكات وكتسناه يقوليها واش نتي السعاتي معررفهاش او هوا من النوع لي كيتسنط الاغنية معندو غراض بشكون غناهاا
هبطات فلمطار كدير الاجراءات اللازمة كتسناا فلكرسي وفنفس الوقت كتقرا الكتااب وفكل مرة كتبسم ملي بيانكا كتلاقا بتخبية ب ادم كتحس بلي هي نفسها كتشوف حذيفة ولات عايشة هاجس بوحدهاا
_سكوزاا !
هزات عينيهاا وتبسمات لجوج تاع البنات وقفو عليهاا وقالت:سيي
_ بيانكاا !
حركات ايمان راسهاا بابتساامة حتى عنقاتها مرااهقة وقالت: متخيليش شحال فرحانة ملي شفتك ممكن ناخدو معاك سيلفي انا وختيي
وقفات بضحيكة لبات طلبهم يقدر هدشي يكون كيفرحهم ولكن هي راه كثر بداية الشهرة ديما كتكون زوينة
خداو صور لييهم فوضعيات زوينة ومشااو تقريبا الشباب لي مواكبيين الجديد شنو تحط شنو الجديد فالاغنية الايطالية كلهم تعرفو عليهاا
قبل متوصل طيارتها خدات صور مع ربعات الاشخااص بنات ودراري
ركبات فطيارة وكلسات بلاصتهاا كتستاعد طيارة تقلع دارت لكاسك كتشوف من زاج طيارة كتقلع وضو المدينة كيسلب العين فالظلمة
غمضات عينيهاا من بعدما سدات لكتااب ..قدرات تنعس قل من نصف ساعة قبل متفيق بطيارة لي قربات تنزل
نصف ساعة وكانت جارة باليتزهاا فمطار “شارل ديغول _باريس”
كتشوف وترمش فبنادم تابعاهم باش تخرج لممر فين الناس كتلقا عائلتها كتسناها كتقلب على وديان بعينيهاا خفافو خطواتهاا من بعدماا ذكرى من الماضي ثلجات صدرهاا
“
شادة نعيمة مجسم برج إيفل صغير وقالت: اش كيقولو لهدا ا ايمان
ايمان: برج إيڤل (بحزن )مشات حتى لفرنسا وجايبا لينا حديدة
نعيمة: اوى لي جاب شي حاجة الله يجيه الخير ولي مجابش مخاصناش
ايمان (شادة حنكهاا )غير قولي الحقيقة شنو جابت ليك نورة …انا راه شفتهاا عطاتك شي حاجة
نعيمة(نكرات ) لا ابنتي بلعما هادوك غير حوايج صغارو على نور وقالت ليا نعطيهم …ياك جابت ليك ريحة
ايمان:شانيل مدرحة …كنلقاهم فسويقة غير ب تمنمية دريال …عرفتي اميي (بحماس ) ملي نشد لباك ونمشيي نكمل قرايتي عند امين …غنقوليه يديني لفرنساا نتصور ونطلع حتى لفووق
نعيمة:ان شاء الله الحبيبة ديالي كلشي قريب عند الله
ايمان:وغير نشد وراقي ونخدم اميي نقاد ليك لوراق …ندورو انا ويااك بلاد بلاد ونلبسو غير لماركاات هههه نصبغ ليك شعر ونقاد ليك الظفار
نعيمة(ضحكات كتسبح ) هههه ايييه ونلبسوو كسوة مݣرطة حد الركبة
ايمان(ضحكات )تجيك امزينها امي ههههههه
نعيمة:راك نتي لي زوينة الكبيدة (باستهاا )الفارة ديالي بغات تديني لفرااانساا ههه
**
دكرى حياة فيها جرح نعيمة وفقدانها قبل متحقق معاها تا نص من داكشي لي كانت باغة
عينيهاا تعمرو بالدموع وايدها حطاها على سنسلة فعنقهاا …طاحت دمعة كتجري على خدهاا نسات الناس ونسات فين هي حتىى باغثها صوت وديان من وسط النااس قدامها هازة لورد فايديها كتشير ليهاا
وديان:ايمااا
مسحات ديك الدمعة اليتيمة وتبسماات وهي كتشير ل ودياان
جرات الشانطة وزربات فلخطوات باش توصل عند ودييان لي دازت من لحديد تلقات ليهاا وحضنااتها بشوق وصدق وايمان كدالك ترمات فحضنهاا حساات برائحة الوطن رائحة مغريباش عليهاا …من عطلة راس العام متلقااوش
وديان(بفرحة )على سلامتك (بعدات كتشوف فيها و كضحك)مامتيقااش بليي جيتي عندي
ايمان:ههههه انا ومامتيقااش
رجعو تعانقوو من جديد كيضحكوو
عطاتها الورد و شدات من عندها الصاك غاديين فاتجااه باب الخروج
وديان بسورفيت وشعر اسود ضارب لمؤخرتها وصندالة فرجليهاا كدور وتعنق فايمان وقالت: توحشتي لماكلة المغربية
ايمان: لكان غير الطاجين ديالك بلااش ههههه
وديان(ضرباتهاا لدراعهاا ) لحسك كنصرع الطاجين
ايمان:بزاااف هههه
وديان: الآلة ماما اصرااات باش دير لينا دجاج محمر بمنااسبة التخرج
ايمان:واش بصح هههه عرفتي شحال مكليتوو
وديان:زيدي ها باباا
كان رجل ستيني كيتسنا قدام طموبيل صغيرة ..لابس جبادور صيفية مع سروال اسود نضارات شمسية عامر شوية شعرو من جنااب شااب او لوسط خاوي من شعر
وديان(شدات فباباها)هدا القرع دياليي باباا ههه هادي ايماان
_(مد لايمان ايدو شداتها باحترام :مشرفين ابنتي
ايمان:سلام عمي بخير
_ الحمد لله ابنتيي يكما عيتي بطريق
ايمان:لا ماشي بزااف
شد من عندها الشانطة دارها فلكووفر …وركبوو ركبات ايمان اللور والاب سايݣ وديان حداه
وديان:رتااحي ابب باقي شوية طريق شي سااعة هكاك
شدو طرييق وهي كطل من شرجم كيضربهاا الريح داافي مع الظلام كانت دنيا بدات تخوا شوية
حتى حسات بنعاس ملي سكتو من الهدرة وقفات طموبييل قدام موبل عاالي هبطوو و وديان كترحب وتعاود ب صاحبتهاا
طلعو لطابق ديالهاا حلو الباب كيشمو رييحة الدغميرة ريحة المغرب يا سلاام اول ما لاحظات ايمان هوا الصالون المغربي لي لا يعلى علييه فلبيج ومهرس باللون لخضر زربية فاسية وطبلة منقوشة بلعود والوسط زاج مع طابلوات ايات قرآنية
جاية ام وديان بابتساامة ب فراشة بيتية ديال الصيف سيدة خمسينية دايرة بوني على شعرهاا اكسسوارات ذهبية فايديها وعنقهاا ودنيهاا
_اهلاا اهلا بالغزاالة
مشات ايمان بابتساامة سلمات عليها بحرارة بعنااق لطيف لانه كتهدر معاها ابيل فيديو فكل مرة جاو عند وديان او هبطات عندهم
ايمان:خالتي خديجة اش خبارك
خديجة:لباس ابنتي ونتي اش خباارك الحبيبة اش كتعاودي
ايمان:لباس اخالتي ههه خليتكم سهرانين سمحي لياا
خديجة:لا ابنتيي مسهرانين وااالو …دخلي ترتااحي
وديان:ماما الى كان واجد العشاا نحطوه
وديان:كلشي واجد غسلو ايديكم وكلسو …سيد الحاج شرب دواك باش تعشاا عفااك
ايمان:باباك مريض !
وديان: غير المعدة
ايمان:دارك فنة اصاحبتيي …لفراش غزال
وديان:داري منين جاتني ههههه هادي دار باباا انا غير هارفة عليهاا
ايمان:هههه لمهيم غزالة وكبيرة
كلس حداهم الحااج وهوما كالسين متبتيين وحشمانين حداه
_ اوى وديان شنو ناوية ديري داباا ؟
وديان: وراه هدرنا ابابا انخدم مع واحد طبيب ناخد اكسبيريونس مزيان ونرجع
الحاج؛ ممم ان شاء الله اللهم يسر … ايمان من اينا بلاصة ف كازا !
ايمان(قلبها كيضرب) ف ***
الحاج: مزياانة …داركم تماا نييت
وديان: ماتو الله ارحمهم ابابا
الحاج : اا الله ارحمهم ابنتيي
ايمان(بهدوء) اميين يارب
هبطات عينيهاا تدخلات خديجة ب طبسيل طاوس فيه جوج دجاجات محمريين بدغميرة دايزها لكلام …وطباسل تاع لفريت والهريسة
ايمان:الله اعطيك الصحة اخالتي
خديجة:بصحتكم ابنتي
تعشااو فجو عائلي افتقداتو ايمان ساكتة و كتشوف العائلة مجمعة مع بعضياتهاا كيسولو فبنتهم شنوو ناوية دير كتحاول تشارك معاهم لحوار باش ميركزوش على سكاتها وتحرج
سلاو لعشا بكاس تاع اتااي
ايمان (بهمس )وديان
قربات حداهاا هازة كاسهاا :ممم
ايمان:نشوف شي اوطيل نكلس فييه …مبغيتش نبرزطك مع داركم
وديان:مامااا باباا واش ايماان مبرزطاكم
حشماتها حتى تزنكات وشداات حنكهاا كتسب فييهاا
خديجة: وعلاه ابنتي حتى مبرزطانة متقوليش هكاك ابنتيي بحالك بحال و ديان …مكتهدر عليك غير بلخير علاه ملي كتجي هي لطالياان تشوفك كتشد لاوطيل !
الحاج: راك فدار لكبيرة ابنتي ولمهزاتك هادي (اشار لعينوو )تهزك هادي
ايمان(حشمات)الله اكبر بييكم اعمي شكراا
سكتات كتحلف ف وديان لي كضحك فالاخير دخلوو البييت لي كانو فيه جوج بلاايص وبلكار ابيض كبير بحال دريسينغ محلول بلا بيباان كلو حوايج وصيكان وسبابط فيه دوش ووشرجم الوسط …مفرشااه زويين ومقاد
ايمان؛ماشي هدا لي كتصوري فيييه
وديان: كنصور فلبييت لكبير لي شاد بابا دابا هههه
حلات لباليزة وجبدات ليها لكرطونة وقالت: لكادو ديالك
وديان:واش حماقييتي اصااحبتي بيناتناا (كلسات كتحل فلكارطونة حتى تحلو عينيهاا ) ميمكنش …الصااك لي بغييت
حطاتو وناضضت عنقااتهااا كتنقز. وايمان كضحك وقالت: واااعر الخاانزة ولكن اصااحبتي راه غالي مكنتيش تعدبي راسك والله
ايمان(ضحكات كتجبد بيجامة بسروالها فيها خطوط بيضاء و وردية ) مكاين حتى عدااب الزين تستااهلي
وقفات قدام لمرااية دايراه فكتفها فرحانة بييه وقالت: وااعر نسيييت نشوفو فين وصلات الاغنية هههه
كلسات حدا ايماان دخلو ليوتوب كطلع لييهم 6 الملييون
وديان: كنتسنا امتا توصل 30 هههه
ايمان(ضرباتهاا بلبيجامة ) سكتيي متفكرينيش فداك لهبيل
وديان: داباا لقيناا الامير (تكات على لفراش كضحك) خاص غير عزيزي يبان وتكمل القصة
ايمان: كتحلمي نتيي ..نمشي نبدل
دخلات لدوش سادة عليها مع بيجامتها ولاتروس ديالهاا تقابلات مع لمرااية … كتنهد من ذكراه على بالها خاصها غير حاجة بسيطة وترجع تفكر فييه من جديد
بما انهاا دايرة اشهار لݣام ديال الوجه فخاص تصور روتيينهاا كانت الاضاءة خفيفة خرجات جابت رينغ لايت من الشانطة لقات وديان كتصور فالصااك
ايمان:تريكة سطوريات
وديان:بلية والله هههه اجي ديك لݣام مزيانة !
ايمان: مكديرش شي حااجة واو ولكن ماشي خايبة زوينة كترطب مكتحيد لا ليطااش لا والوو
وديان: شحال دىتي معاهم فلكونطرا !
ايمان(غادية )6 شهور قريب نساليها علياا
دخلاات دارت روتينهاا فنفس الوقت دايرة الاغنية فخلفية الفيدو من بعدما حطات سطورياات فانسطاا وحتى فتيكتوك لي ولات متفاعلة فييه
وديان:عرفتي ترند الاغاني هد الصيف غير باغنيتك فتيكتوك
ايمان:طلع ليا فيديو ديال واحد البنت مغربية حطاه
ودياان؛اااه عرفتها هي لي بداتو لييهم
تكات فبلاصتهاا حتى نطقات وديان من بعدما طفاو ضو وكل واحد شد بلاصتوو وقالت:ايماا
ايمان(تقلبات على ظهرها كتشوف فنجوم لمعلقين ف لحيط مضويين)ممم
وديان:شنو درتي فقرايتك !
ايمان: خاصني بعداا نجمع لفلوس باش نقراا ونسالي الالتزامات لي علياا
وديان:انا كون جات علياا كون فكيتي ديك لكونطرا لي دايرة مع يوسف والله…شنو فيها الى خدمتي معاه هكاك
ايمان:كونما لكونطرا مكنتش نقاد وراقيي اصاحبتي
وديان:ولكن جددتيهاا معاه غير فهد العام
ايمان:سيي ولكن الى لقيت ماحسن غنفسخها معااه ..الصراحة مبقاش عاجبني نغني فالريستوو عرفتي كنعياا غادي نرجع نشوف حل ..الحفلات وعاد زيد الشوتينݣ و لي كوڤر لي كنغني مرة مرة خاصني نتبع حاجة وحدة لنصدق تالفة
وديان:احسن حاجة (تاوبات)نعسي غتكوني عييتي الزيين
تفكرات دوا تاع نعاس ناضت قلبات صاكهاا ملقاتوش ورجعات لبلاصتها طفات ضوو وتكات كتقلب من بلاصة لبلاصة…ندات على وديان لقات الاخيرة غطساات فنعااس
ايمان:سعداتك (تنهدات كتقلب عينيها مرة تحلهم مرة تسدهم
حيدات لفوق ديال لبيجامة بقات ب بيل خفيف ..هزات تيليفونها شوية
حتى ضروها عينيها ورجعات حطاتوو وتقلبات تنعس
معرفاتش امتا داتها عينيهاا حتى فاقت قافزة على غوتة جاتها فودنهاا
ايمان(طافجة )ودياااان
كلسات كترعد من الخلعة تشعلات وديان لڤيوز حداها مخلوعة وقالت:بسم الله علييك مالك
ايمان(كلسها كترعد شادة فقلبها )شي واحد غوت …كنتي كتحلمي ؟
وديان:لاا كنت فايقة مغوت تواحد
ايمان:واش متاكدة راه غوتة خاايبة حسيت بقلبي سكت
وديان(جات حداها)غير كتحلمي يمكن ملي بدلتي لبلااصة .. نجيب ليك تشربي ! بلاتي
مشاات جابت كاس تاع لماا والاخيرة باقة شادة فيها الخلعة الغوتة جاتهاا ماشي حلمة حسات بحال شي حد غوت حدا ودنهاا
شربات ورجعات لبلاصتهاا كتلعن فالشيطان وكتقرا اية الكرسي حتى تهدناات
ايمان:وديان غير رجعي تنعسيي صافي
وديان؛متاكدة !
ايمان:مم صافي نعسي
رجعات لبلاصتها طفاو ضو هزات تيليفون كتقلب فالساعة لقات قريبة 6 تاع صباع …تنهدات وهي كتشوف راسها مبقاتش كتشبع نعااس …حطات صباعها على شفايفهاا محبسة ديك رعشة البكاء لي بغات تبداهاا
جبدات صورة نعيمة وحضناتها وتكورات كيف الجنين..نفضات نيوفهاا بخفوت
سمعاتهاا وديان وهزات راسهاا فيها كتشوف حتى بغات تعيط ليهاا وسكتات ..متكية فبلاصتهاا …غمضات عينيها باسف ماشي اول مرة تفيق على هكا وتسمعها …شحال من مرة باتت معاها فدارها كتفيق مخلوعة وعرقانة وشي مرات كتبكيي …مكتبغي تسكت ليهاا حتى كتخوي عليها لماا
رجعات لنعاسهاا وايمان بقات هكاك حتى غفاات بشفار فازݣين بدموع
كتحلم براسهاا فبلاصة عاالية حتى سمعات صوتو وراهاا قلبات وجهها لجيهتو بان ليها بديك الضحكة لي ولفات تشوفها منوو هز ايدو بلطف ودوز ايديه على حناكهاا وشعرهاا شمو… قربات بغات تعنقوو حتى لقات رااسها هابطة من لفووق بدات كتغوت وتركل حتى فااقت مخربقة لفرااش كتنهج شافت ضو داخل و وديان مكاينااش ردات النفس بزز ومدات ايدها لبيجامة لبساتها حلقها ناشف كان لحال سخون شافت الساعة لقات قرابة 11 تاع صباح …جمعات شعرهاا وفبالهاا داك الشعوور ملي شافتو مدة طويلة محلماتش بييه توحشاتو حتى فاحلامهاا لا هوا لا مهاا وخة راه نهارها كلو كتفكر فيهم …
كيقولو ان الحاجة لي نعستيي كتفكر فيها دماغك كيحولها لييك فالحلم ..مامرة ماجوج كان املها غير تحلم ب نعيمة ولكن من زمان محلمات بييهاا…اما حذيفة مع مرور الوقت حتى هوا تفقد من احلامها
ناضت جمعات بلاصتهاا تخرجات وديان من دوش كتنشف فشعرها ولابسة بيجامة قصيرة وقالت:صباح النووور(باستها ) يكما فيقتك طاح ليا السشوار وتهرس ههه
ايمان:صباح الخير الزيين …لاا مفيقتينيش فقت بوحدي
وديان:الى بغيتي دوشي باش تصحصحي
ايمان(كتحرك فعنقها )داكشي لي بان لي …كااين الصهد هناا
وديان: غير شي مرات وصافي
جبدات فوطتها وحوايج ودخلات دوشات وتريحات كيف العادة وخرجاات بحنيكات مورديين …خرجات من البيت …كتشم ريحة القهوة معطرة وريحة المسمن والهدرة جاية من لكوزينة
وديان:ممم شحال توحشا اماما هد لمسمن ديالك
خديجة:راه لفريݣو عامر بلمسمن سخني وهزيي تاتشبعي وكون سعفتيني كون مشيتي معايا ياك لقراية ساليتيهاا …وانا بنتي راه توحشتك وتوحشت جموعك وبيتك هجرتيه مسكيين
وديان: وصافي اماما انا سالييت بغييت نرتاح شوية ويكون خير
خديجة:كااانعرفك اسليعفامة …جمعي راسك فدوك سطورياات وديك لحالة راك فرعنتيي …واش نتي طبيبة وكتشطحي فتيكتوك
وديان(بهمس ) غا سكتي ها لعاار هههه مال طبيبة ما ضحك ما تشطح راني غير مفوجة اماما متعقدوهااش …ونتي اش دخلك لهاد تيكتوك
خديجة:انا ندخل ؟ الله ينجيني … وردة ختك لي ورات لياا
وديان(ميقات ) الشبكة عيبات الغربال وقاتليه ياا مو عيون كباار
دخلات ايماان كاسرة حوارهم بابتسامة:صباح الخير
خدية(بضحيكة)صباح النوور الغزالة زوينة كيصبحتي ابنتي …نعستي مزياان
ايمان:الحمد لله اخالتي
خديجة:غتكوني توحشتي فطور مغريبيي هههه وديان فيقي باباك نفطرو
وديان:والله اماما كون غير زدتو معاياا شي يوماين خرا
خديجة:لكنتي نتي مسالية باباك راه بخدمتوو ابنتي خاصو يوقف على شغلوو
وديان:وخة نمشي نفيقو بعدا
هي مشات تفيقوو وايمان عاونات خديجة كتحول لصالون …فطرو مجموعيين ايمان دارت لماعن فلماشين خدماتهاا ومشات تودعهم
وديان(معنقة باهاا بحب وكتهدر بغنج فحضنو ) غنتوحشك احبيبي
الحاج : ممم باااينة العفريتة
وديان:هههه ودابااا نجي ونطلع فراسك …كون خليتوني نوصلكم
خديجة:لاا مكاين لاش الشيفور لي جابنا غيوصلناا …ياله تهلاي فرااسك ابنتيي …ايمان بسلامة ابنتيي (باستهاا ) الله احفضكم ابنتي ديرو عقلكم
وديان:هههه سيري اماما سيري
خديجة:وخة علييك اسليعفانة
عنقاتها كذلك كتبوس فحناك مهاا بجهد تضرباتها …شدها باها قداموو دار ايديه فجناب رااسهاا كيقراا فنفسوو بعض الايات حتى سالا وباس جبهتهاا
ايمان مرااقبة وساكتة …حتى شافتو قرب ليها بغات تمد ايدهاا وسبق ايديه بجوج لجانب راسها كانه كيحصنهاا…تشوكات ولحمهاا شوك عليهاا كملها بلبوسة على راسهاا وقال: استودعمك الله الذي لا تضيع ودائعه
حسات برجفة فاطرافهاا وكلامو بصوتو الحنين دخل معاها بحال لبنج فدمهاا …حسات بكتافهاا طاحو وعينيها تحقنوو بدمووع ..مكرهاتش تقولييه عنقنيي وقولي الله ارضي عليك ..يمكن بهاكا ترتاح شوية وتقول مزال لي كيدعي معايا بلخير
هبطات معاهم وديان وايمان بقات واقفة فبلاصتها كتستوعب هيبتو قدامهاا ..صحيح انه هيبة الاب بوحدها طاغية
رجعات وديان مبتاسمة شافت ف ايمان وقالت: شنو بان لييك نخرجو
ايمان:واخة !
بعدات الطاقة السلبية باش تعيش الفرحة شوية لبسات شورط دجين مع شوميز نص كم فلغوز دارت اكسسواراتها ونظاراتها الشمسية مع ميكاب خفيف خرجات هازة صاكهاا وعطرهاا شانيل كيفوح منهاا
وديان مكانتش اقل انااقة بكسوة من توب ليكرا لاصقة سميطات فوق منها دارت شوميز فلازرق شفاف وطلقات شعرها الاسود واصل لمؤخرتهاا وهزات الصاك لي جابت ليها ايمان مع سبادري مريحة من لويس فيطون
خارجين جوج بنات كينعشوو بالشباب ورائحة الانوثة مهلين فراسهم وباينة عليهم فلوسهم
هزو الطموبيل الصغيرة ديال وديان وقالت:ليوم غندوزو احسن نهار
ايمان(دارت نظاظرها كضحك ) انديامو (ياله )
فشوارع باريس حلات الشرجم كتشوف فالاجواء وطريق كملو على رجليهم كل مرة فين واقفيين …خدات صورة حدا برج إيڤل وحطاتها فلبلاصة بوسط فانسطاا مع تدوينة فرنسية “la vie en rose 🌹”
بداو كيوصلوها الاشعارات فلبلاصة ولكن كملات جولتهاا فاكتشاف باريس وطرقانها جراديهاا اي بلاصة كانت معارفهاش عرفاتهاا
وديان؛اما حسن طاليان ولا فرنسا ههه
وديان:الصراحة وبلا نفاق …طالياان زوينة اصاحبتي وخة كاين لي كيقول مقنااطة ولكن راه ناسهاا زوينين الانااقة ورواايح ونقااا وكيبغيو النشاط ولماكلة ولحوايج ههه كيموتو على هدشي
وديان:مكدبتيش فالصاراحة …اه عقلتي على نصيرة صاحبتي كنتي هدرتي معاها
ايمان:اه عرفتها
وديان:غتجي لييوم عندي عرفتي راه مصدعاني امتا تجي ايماان ونجي عندها …وبليل نخرجو نشطو مجموعين شنو بان لييك
ايمان:مزيانة
كملو دورانها مشاو تغداو فريستو للاكل الصيني كلسوو كيجربو فالسوشي وكانت اول تجربة لايمان
ايمان:مزوينش هدشي
وديان:هههه كولي غيضحكو عليناا ههه …مولفة كيديروه زوين(كتشم وكضحك) فيه شي رييحة ماهيااش
ايمان(كتشم وكتشوف فالناس ) الرووز مهواش
وديان (كضحك تدمعو عينيهاا ) وراه هكاك داير راه غير ريحت الحوت
ايمان:حالتوو
كملاتها سطوريات من بعد مصورات ليبلا وحطاتهم كتشكي ليهم بلي معجبتهاش لماكلة وكضحك
وديان:شوفي شوفيي
حطات تيليفونها وشدات تيليفون وديان لقات بوسط فتصويرتها حدا البرج ف صفحات ايطالياا وكاتبين بالايطالية ” بعد نجاح اغنيتهاا الاولى ..بيانكا تحتفل امام باريس “
وديان:دغياا هزو تصويرة هههه
ايمان:واللهيلا
هزات وديان عينيهاا فجوج شباب جايين قبالتهاا وقالت: عشييريي ههه
ناضت حضنات شااب من دوك جوج والتاني كدالك وقالت:(بلعربية) شنو كدير هناا
_ جيت على ود واحد لبخوجي …نتي صافاا ؟ توڤا بيان
وديان :صافاا صافاا …ايمان خبطات لشاب لي جنبهاا )هه هدا ياسيين ..وهدا ياسر …خوت وجيرانيي وصحابي فرباط
ايمان(مدات ايدها ل ياسر لي كان جنبهاا تبسمات ليه بلطف) تشرفت
وديان:هادي ايماان
ياسر: غاڤي
كان شاب فالعشريناات شكلو بحال الى خارج من فلم كوري …ابيض البشرة وشعر رطب وكحل لحية خفيفة عينيه كحليين لصقو فايماان في حيين وديان واقفة مع ياسين مجمعيين وقالت :كلسوو !
ياسر: بخوشيين فواا ..عطينيي نيميغو ديالك نديرو شي صواغي اونصومبل !
وديان:ويي وي بوغكوا باا
عطاتو نمرتهاا تسالمو من جديد ونطق ياسر موجه كلامو ل ايمان : بونجوغني ايمان
تبسمات ليه وردات بلعربية:بسلامة
رجعات كلساات وديان كضحك ونطقات ايمان:شكون هادو ! كيبانو بحال شي موديل فشي مجلة هههههه
وديان؛ مكدبتيش ياسر موديل ولكن ياسين لاا عندو بروجيي وخدام فييه حتى ياسر…هوما راه توام ملاحظتيش الشبه
ايمان:اه بان لياا …سبحان الله ولاد رباط هضرتهم معروفة
وديان : ههههه مفروشيين ..
دوزو نهارهم فالدوران ولبوتيكات ولي مارك ديال روايح
رجعو لدار ضاحكيين ناشطين دوشو وبدلو حوايجهم كلسو يرتاحوو حتى صونا لباب ناضت وديان كتنقز ب شورط وديباردو ديالو مقزب حلات الباب وقالت: مال جدك ديما روطاار
سلمات عليهاا وفايدها كرطومة عالية شوية ومربعة …شابة فنفس العمر …غليوضة شوية وزوينة بملامح سمراء خفيفة
نصيرة: عاد وجد ليا لعيبات
دخلات ضااحكة كتلقا ليها ايمان بابتسامة والاخيرة فتحات حضنهاا ومشات كتجري لإيمان بفرحة بحالا كتعرفها سنين طويلة كتبوس وتعنق فرحانة
نصيرة: ايييي شحال فرحت ملي شفتك …غزالة ياختييي ماااشااء الله …وديان ! شوفي الزين
وديان(شادة لكرطونة كضحك ) هههههه قلبا وقالباا
ايمان:نصيرة بخير اش خباارك
نصيرة:لي سمعك كاتهضري بطاليانية وتغني بيهاا يقول طاليانية محطوطة
ايمان:غير الولف وكنهدر بيها بزااف بحالك نتي و وديان هدرتكم تخلطات بلفرونسي بزااف
نصيرة: فعلا المحيط كايأثر
وديان(دخلات كتمسح فايدها)عرفتي شكون تلاقيناا قبيلة …ياسر وياسين
نصيرة:حلفي بالله صدفة ياختيي …داك ياسر بعدا هاز نيفو لسما شنو جابو مع ياسين
وديان:جوسي باا …شي نهار نديرو شي عشية اونصومبل
بكترة مولفات سكات والحوارات قلالو مع الناس بلهجتها المغربية مبقاتش عارفة تشارك فحديث طويل كتحس براسها من كترة ما عتازلات الناس ولات كتفضل تبقا سااكتة …حسات بنشاطها قل ومبقاتش عندها قابليية تكون اجتمااعية بحال شكل وديان كضحك مع كلشي وتجمع ودخل فحوارات مع اي شخص
ايمان لا نهار على نهار ولات كدخل فواحد الدائرة خاصة بيها الناس لي تقدر تشاركهم الحديث معدودين على رؤوس الاصابع
نصيرة: دابا نقولو بيانكاا ولا ايمان هههه واش معارفينكش مغربية كانظن
وديان: كنفكر ا ايماا ديري شيي شوتينݣ مغربي مطرطق اش بان لييك
ايمان: غير مجابتهاش الفرصة والاكثرية عندي فلكونط غير طاليان
وديان:لا لا مكنظنش ..المهيم نفكرو فشي بلان واصلا لي فلكونط عندي شحال من مرة لحنا تصاور بجوج …غير محددناش وصافي …(وقفات)المهيم نحتافلو بنجااح الكليب ،ابخي نهدروو
مشات لكوزينة ونصيرة قربات لايمان كضحك وقالت:نسولك !
ايمان: سيي هههه
نصيرة:داك سميمر طوييل …كنتي تصورتي معاه بزاف تلمرات …راه كاتب
ايمان: كريس مالو
نصيرة: مزوج ولا مخطوب ولا كيتسنا فلمكتوب بحالي
ضحكات ايمان وقالت: ههههه توحدة فهادو هههه كان مزوج بايطالية وتفارقوو مدة هادي ههههه ضحكتيني اصاحبتي
نصيرة: زينو شكلاطي كيعجبوني السمريين
ايمان: هههه حييت اصولو من المكسيك خههه ضحكتيني الله اعطيك الخير
نصيرة: نتي زعمة مكااينش شيي ممم (غمزاتها)هاد زين كلو مكاين لي يحتاضنو
ايمان:لا لاا مكنفكرش اصلا انا هكا مرتاحة (تنهدات )
بانت وديان بكاطو متوسط الحجم دائري عالي شوية فلغوز مع وريدات ف بلايص عشوائية كان ورد حقيقي فالاحمر والابيض
مع هزات ايمان عينيهاا ضرب فيهاا الضوو لداك لكيك بدل الضحكة كانت صدمة بقات على كلستها متحركاتش غير عينيها تابعيين الكيك
“”
ايمان(كتبنن )نتا لي صايبتييها
حرك راسو باه كيتبسم ليها :بصحتك …عجباتك ؟
ايمان:وااعرة …علمني نصايبهاا
حذيفة:ان شاء الله (هز وردة من لكيك مسحها بكلينيكس ودارها ليهاا فوق ودنهاا )
“””
وديان(كتصفق قدام ايمان ) وااا ايمااان …هييي صافاا ؟
ايمان (حطات ايدها على قلبهاا وحاسة بلحالة رجعات ليهاا تانيي قلبها كيضرب وكلهاا كترجف والخنقة بداتهاا )و والوو
وديان (قربات ليها شدات فايدهاا ) تنفسيي مزياان …ايمان ..بب شوفي فيااا متفكري فوالو
ايمان(طاحو دموع من عينيهاا ) هوا لي صاايبهاا هءهء هواا انا حاسة بلي هوا
نصيرة: كيفاش …ايمان مالك
وديان: متبكييش … ا
قبل متكمل كلامهاا ناضت كي لحمقة كتشوف فلكيك وكتبكيي وقالت: حذيفة لي صااايبهاا والله حتى هوا هءهءهء (هزات لمو_س كترعد وقصدات الحلوة ) لداخل فيهاا لفرييز عارفو كيعجبنيي
قطعات لحلوة على نص لقات طبقة من الكريمة بنكهة الفراولة ..حطات لموس كالسة على ركابيهاا كتشوف فلكيك
وديان: تقدر كلشي ممكن …ولكن شكوون …واش لي فباليي … ل اكس !
حركات راسها باه وقفات حدا وديان وقالت: منين جبتوها …(شافت ف نصيرة لي غير كتشوف )منين اختي شريتيهاا عفااك قولي ليا منين
وديان (شداتها من دراعها )غير تهدني …نديك منين شريتهاا
حركات ايمان راسهاا باه
وديان: وخة ياله …نصيرة مغنتعطلووش ؤك
نصيرة(شادة حنكها )ؤك
مشات وديان لبسات فوق الشورط ݣندورة فلبيض مخططة الراعي الرسمي تاع المغربيات فالاعياد ..مقزبة لبسات معاها كلاكيط وخرجات تابعة ايمان ليي قليها غيوقف …ركبو فالطموبيل وقالت: عفاك دغياا
وديان (كديماري )غير صبري …فهمينيي واش هوا كاين ف فرنسا …ملي كتبغيه علاش مدة هادي ونتي ساكتة اصاحبتي
ايمان(حركات راسها بلا سدات عينيها وطاحو دموعها مجاوباتش على السؤال …بعد دقائق وقفات قدام محل للحلوياات كبييرة فالشارع
مسحات وجهها جمعات شعرها لفووق قدات لكول تاع لكسوة وخرجات بصندالة والكسوة مقزبة صيفية نص كم كحلة سامبل بصديفات لقدام
كانت قريب الشمس تغيب ..دخلات كتزرب وموراها وديان مفاهمة والو كتشوف غير ايمان قدامها بحال شي ام لقات ولدها لي كان تالف ليها دخلوو لبنت لي فلاكيس تقدمات وديان عندها بابتساامة وقالت: بونجووغ …كنت كمونديت على واحد لكيك فخومبواز و فريز
_ويي مدموزييل داتو صاحبتك هد العشية
ودياان:ويي وي عرفت حم
ايمان : بغيت نعرف شكون صاايبوو واش نقدر نشووف الشاف لي صايبوو عفااك
بقات البنت كتشوف فيهم وقالت بادب : انسة واش معجبكومش ؟
ايمان(بنفاد صبر) عفاااك ببغييت نشوفوو عفااك
_وخة (ناضت )نقولها لييه
وديان:شنو سميتوو …ايمان تبتي معايا شوية اصاحبتي كنا نسولوها على سميتوو بعدا
ايمان: انا متأكدة هوا اودياان هواا
رجعات لبنت بعد لحظات وقالت: يكمل واحد لكوموند ويخرج عندكم مغيتعطلش
كانت واقفة على اعصاابها كتمشي وتجي وقلبها كتحس بيه فشي لحظة يقدر يسكت ليها بهاد الخلعة …كترتب كلامهاا وشنو تقولييه ملي تشوفوو
وديان حاضياهاا وكترمش لأن حالتهاا ماشي نورماال
شي خمسة دقايق قبل متنتابه وديان لشاب خارج من لكونطوار من لبسوو عرفاتو وشافت فايمان لي عاطياه بالظهر مقابلة مع وديان حاطة ايدها على فمها
وديان: ايمان هاهوا خرج
شدات فايدها مزيرة عليهاا ودموع هوادين : طويل (حركات وديان راسها باه ) شعرو …شعرو كحل بزاف
وديان:اه
ايمان؛ عينيه ؟ …عينيه زوينين بحال الى مكحلاات
شافت فييه وشاافت فايماان وقالت: معرفتش ….عاطيني بجنب …هاهوا جااي (تبسمات لييه ) وراك (حركاتها )اييماا
مسحات دموعهاا بايدهاا وتقلبات عند الشااب هزات عينيها المشتاقيين ونطق قلبهاا قبل لسانها: حذيفة
_ باغدون !
كلمة خلات شهقة تخرج ودمعة تقطر من عينيهاا …خيبة امل واحساسها كذبهاا ،كذبة عطاتها امل بليي غتشوف حذيفة من جديد
خرجات كتزرب شادة على قلبهاا ..اعتدرات وديان لشاب الفرنسي وخرجات تابعة ايمان لي بغات تقطع الشارع بلا عقل تجراتها وديان مخلوعة
وديان: واش حماقيتيي
ايمان(بصرخة)اااه حمااقييت(شدات شعرها كتبكيي )هء هء (برجفة) غنحماااق هءهء غنحمااق كنت حاسة بليي هواا
وديان: واخة غير تهدني (مسحات ليها عينيها )نمشيو لدار ونهدروو
ايمان :بغييت نشم لهوا
وديان:ولكن لجو غيتقلب شوفي لغيوم وحنا ملابسيين والوو
ايمان(برجااء )عفاااك اودياان هءهء خليني بغييت غير نرتااح عفااك
وديان:رجلي على رجلك حتى ترتاحي منقدرش نخليك هكا …بغيتي ترتاحي ..اجي نديك لشي بلاصة كالم وزوينة اجي
بقات معاها بالسياسة حتى ركباتها فالطموبيل غير ركبوو بداو نقيطات شتاا كيطيحوو على الطموبيل
خدمات سويݣلاص ساكتيين بقات غادية فطريق لمساافة ولحال بدا كايظلام …هبطوو كيتمشااو فضواحي باريس فوق الجسر وقفات كتشوف فلبرج بداو كيشعلو الاضواء ..جراتها وديان لكراسة جنب …كلسو فيهم كضرب فيهم ريحة شتاا والجو برد
وديان:عفاك عاودي لياا …شكون حذيفة
ايمان (مهبطة راسها )عقلتي على اول مرة تلاقيت انا وياك
وديان:عقلت
ايمان(رتاجفو شفايفها)كانت هاديك اخر مرة شفتو فيهاا
وديان:ملي كتبغيه علاش تفارقتو
ايمان:جرحتو …مقصدتش …ك كنت مضغوطة جا قداميي قلت ليه شي حوايج ماشي هوا لي كان خاصو يسمعهم … عمري بغيت شي حد كتر من مي اوديان هء ولكن هواا (حطات ايدها على صدرهاا ) عشقتوو بزااف …حاسة براسي غنموت بلا بييه
قرباتها ليها حضنااتهاا باسف وقالت: ملي كتبغيه ا ايمان علاش بقيتي هاد ربع سنين كلهاا علاش مامشيتيش عندو وعتادرتي ليه ولا غير فتيليفون
ايمان: تحاجة مبقات خدامة (مسحات عينيها )لا تلفون لا فيس واالوو مبقيتش لقيت ليه الاثر نهائياا
وديان:يقدر يكون مبلوكيك فلفيس داكشي باش مكيطلعش
ايمان:درت كونط اخور واالو …مبغاش يبقا فحياتي فخطرة …وخة نقلب الدنيا كاملة منلقااش بحالو …معمري غادي نبغي شي حد كيف بغيتوو
وديان:غير كتقولي نهار يجي الشخص المناسب بلا متحسي غتلقاي راسك بغيتيه
ايمان:حذيفة كان هوا الشخص المناسب ولكن انا مكنتش …ضيعتوو ،فكرة بلي غيكون بداا حياة جديدة ولا تزوج ولا غير تصاحب مع شي بنت كاتقت_لني من لداخل اوديان
وديان: عندك عليه شي معلومة ! نقلبو علييه
ايمان: تقلبي على واحد مباغيكش تعرفييه فين كاين…المواقف (شهقات) المواقف لي دار معاياا عمري نسااهم هء كان كيعاملني فشكل …ظريف وحنين بزااف معاياا …مبغييتش ،مبغيتش نجرو معاياا منستاهلووش ..وحدة كارهة حياتها منهار تزادت غتعيش وتفرح شي حد
وديان: علاش كتقولي هكا ! شوفي راسك داباا …تشهرتيي وبزاف كلشي ولا كيعرفك
ايمان: ولكن بووحدي…ملي كنحط راسي على المخدة كنكون بوحديي … نعطيي لي قدامي ولي وراياا ونعيش تا اناا ديك لحلاوة ديال العائلة نحس براسيي وسط اب وام كيبغييوني (بدموع)انا حياتي دازت عبارة على بنت الحراام…بغاتني ميي وبغاني جدي …وربي بغاهم وخلاونيي وسط ناس محاملينيش …شنو ذنبي نعيش بوحدي ا اوديان …عييت والله هءهء كنحاول ندير اي حاجة غير باش نفرح مكنقدرش كنحس براسي الفرحة متخلقاتش لياا وخة ندير ليي درت
وديان(شدات ايدها ) نساايه ابب …الحياة مواقفاش على رااجل نتيي عاد بديتي فحياتك …غيجيك سيد سيدو
ايمان:ماعمري نحل قلبي لشي واحد مزال حيت معمري غنفرح شي حد …حيت راسي ومقدراش نفرحو وخة ندير لي درت
بقات وديان كتشوفييهاا وسكتات خلات ايمان تنفارد بداكرتهاا وسهات قدامهاا
**
راه نموت اناا ومنخليكش تموتي
* مسح عينيها من دموع وقال:هاد العينين ماشي ديال البكاا
*باقة كضرك ايدك !
ايمان :شوية
هز ايدهاا باسها فراحة وقال:دابا تبراا
* العين لي تهز فييك نعميهاا ا ايماان
“”
شحال جهدها تفكر مواقف رجوليية قدامهاا قلبهاا كيتقطع ،كيتحسر، كايتألم على فراق انسان يمكن مغيجيش فطريقها واحد بشهامتوو
وقفتو معاها فتركياا ، فالغابة، فايطالياا معمرها غتنساها
ايمان(نطقات برجفة وصوتها كيتقطع ) حياتي مغتكملش زوينة بلا بييه والله
قربات ليها حكات على ظهرها وقالت: شوفي الى مزال الرزق بناتكم غتعاودو تلاقااو ، سمعتيني ..ولكن الى مكنتوش مكتابيين معناتها ماشي هوا الراجل المناسب لك
شحال جهدها تشرح بلي هداك الراجل بغاتو على كل رجال مستحيل قلبها يتفتح من جديد
ختمات كلامها وقالت:اصلا فين عمر شي حد بغيتو بقا معايا ! كل واحد كيمشي واحد لوقت(هزات عينيها فيها )حتى نتي غتمشيي غتنسااينيي بحالا عمري كنت …وغنبقا بوحدي
وديان: سكتي راه غنضربك …نهار قلت لييك درتك ختيي راه درتك ختي سديناا وحنا بجوجات متبدلنا لا اياام ولا حتى مساافة (هزات ايدهاا وشابكاتها مع ايد ايمان زيرات عليهاا) عطينا لبعضياتنا عهد نسيتيي
ايمان:مكنسااش
وديان:حتى انا راه مكنسااش …انا لبغيت شي حد فحياتي كنشد فييه بسناني وخة يبقا بسيف على مو حداياا
ايمان(ضحكاتها ) لهاد الدرجة هههه
وديان: هههه انا راه انااانية في حبيي انا غير صحاباتي كنغير الى هدرو مع بنات اخرين حسب الله شي برهووش نطييح فيه والله غير الى مربطتوو حداياا
ايمان:ههههه واش نتي حمقة
وديان :نقوليك بلاان !
ايييمان:شنوو
وديان:طبيب لي قلت لييك غنخدم معاه هوا ݣاوري بيا سيغ …طلبني لزواج
ايمان: ولكن ماشي مسلم
وديان:تما فين بقاات …بابا مستحيييل واش يتقبل نتزوج بشي حد نصراني …والمشكيل انا راه ميليق ليا غير ݣاوري ههه حيت انا فالصراحة حياتي فشكل ..كنبغي نخرج كنبغي نسهر كنبغي نسااافر نساافر ونعييش الحياة
ايمان؛عادي هضري معاه يسلم
وديان: حنا عارفيين بليي نص لي مزوجة بيه كاوري راه كسلم غير فلورااق قليل فين تلقاي شي حد نيت سلم من قلبوو
ايمان:الصراحة فشكل وحياتهم فشكل
وديان:انا مشغليش فحياتوو ..المهيم غنعيش معااه داكشي لي بغييت الى مصدقش نكركبوو هههه محديي مربيتش الكبدة علييه منعقلش عليه اما لمشييت حتى بغيتو يا ايمان ندخل على مو لحبس
ايمان(ضحكات) واش منييتك هههههه
وديان: راه مزيان ليي مزال مبغيت شي حد حيت عارفني الله شنو غندوز علييه …اوى الله اخلييك فالحياة تاتشوفي وديان نهار تبغي شي حد هههه حتى داباا نقلبوو على هد حذيفة مال اسبانيا بغات تخلعناا
ايمان: اسبانياا فيها شارع وصيدلية ! واش منيتك بلاد على قدها باش غنعرف شمن مدينة كاين
وديان:ساهلة نديكلاريو بييه عند لبوليس يجبدوه يجبدوه
ايمان:لا تفكيرك زوييين الصراااحة (تنهدات )مخلياها عند الله كيف قلتي الى كان مكتاب غنرجعو نتلاقاوو …ولكن كنطلب الله ياربي الى كان بدا حياتو مع شي وحدة ماعمري نشوفو فحياتيي مزال
وديان: نمشييو ..تحرك البرد
فعلاا رجعو ادراجهم وشتا كتقطر عليهم فزكوو ولكن نفسيتهاا تهدنات شوية على كيف كانت
رجعو لداار بزربة وقالت:غدا غنفيقك بكري تمشي تحركي شوية عرفتي الجو كيف كيكون فصباح من ورا الشتا راه العشق صافي
ايمان:صافيي نيت شحال متحركت كنعگز
دخلو لدار لقاو نصيرة كالسة قدامها الشيپس والعصير تبسمات ليهم وقالت:كنتو تباتو على برا اش جابكم
وديان:قلت غتكوني درتي لينا العشاا
نصيرة:ندير ليك ايخان بيتيه طلبي لينا بيتزا
كلسات ايمان كضحك وقالت: تلقااو هنا غير الطيابات
وديان:نطلبو بيتزاا كاطخ سيزون !
ايمان:طلعات لياا فراسي لبيتزا
نصيرة:نتي فبلادهم هههه شوفي طلبي پلا غويال حلال
ايمان:وزعمة حلال ؟
نصيرة: ويي لولد لي كنكومونديو من عندوو مغربي
ايمان:صافي وخة
تاصلات وديان بيهم ومشاو بدلو حوايجهم وكلسوو نصيرة شادة التيليفون وقالت:القردة مقلتيش ليا غتولي خالة للمرة التانية
وديان: موا !
نصيرة: مقلتيش ليا وردة حاملة
وديان(بتعجب ) مفراسيش … ومقالت ليا ماما والو شكون قالها ليك
ايمان: واش وردة ياك عاد ولدات لا !
وديان:شي عماين داباا ولكن والله مفراسي حملهاا … اصلا حتى مبروك التخرج مقالتهاا لياا
نصيرة:قالتها لنادية ونادية قالتها ليا داباا
وديان: صاحبتها كتعاود ليها انا خافتني نحسدها مسكينة
نصيرة: انا بغيت غير نفهم علاش نتي و وردة بحال المش مع الفار
وديان:لي يفهمك يفهمناا الزيين كيقولو الخوتات فدار كيكونو مدابزين ولكن غير كيتباعدو كيعزازو (ضحكات) هادي مكتحملني لا انا قريبة لا انا بعييدة …معلييش مبروك عليهاا والله اكمل كلشي بخير (شافت فايمان )شفتي راه تواحد محياتو پيرفيكت ها انا عندي جوج خوتات …كتربطني معاهم غير الكنية
تعشااو خالقيين الضحك بيناتهم تاحد مجبد موضوع لكيك من جديد بحالا مكااينش
بقاو ساهرين فالصالون على فلم كيتفرجو فيه حتى لجوج تاع الليل طفااوه ونعسوو كل وحدة فقنت … كل وحدة غطسات فنوم غير من نفسهم المنتظم الا ايمان …عينيهاا محلولين فالظلام وكتسمع صوت الشتاا على براا تنهدات ونااضت دايرة الضو بلپيل …دخلات لكوزينة حلات التلاجة وبان ليها لكيك مغطي بغطاء ديال زاج شفاف …جبداتها وخدات موس قطعات طرف منها ورجعاتها لثلاجة ،جابت فورشيط وكلساات مقابلة مع الشرجم ديال لكوزينة كتشوف فشتاا والبرد كيدخل من السرجم منعش
مع اول متذوقاتهاا حسات بطعمهاا مغريبش عليهاا …فكل مرة تدوقات كتفكر حذيفة ونهار صايبها ليهاا ..حبسات لماكلة واحلة ليهاا دفعات الطبسيل وشفايفها كيترعدو وقفاات فالسرجم كيضرب فيها البرد ينشف عينيهاا ..بقات على حالها لمدة طويلة حتى رتااحت ناضت جمعات لبقايا رماتهم فسطل وغسلات الطبسيل رجعات كلشي لبلاصتو دخلات لدوش غسلات سنانها مشات لبلاصتها بهدوء كتقلب على النعااس
حطات ايدها على عنقهاا مغمضة عينيها دارت لكيت ديالها طلقات سورة البقرة حتى نعسات بعد عناء طويل…وصلات 6 ونص ناضت ودياان كتفيق فيها تناضت قافزة
وديان(بهمس ) خلعتك
ايمان(كتستوعب ) لا شحال داباا
وديان:نوضي نخرجوو
شافت فنصيرة ناعسة وقالت:ونصيرة
وديان: كضرها رجلها متقدرش تمشي لمدة طويلة …ياله دغياا لبسي
ناضت جمعات بلاصتها ..هزات سورفيت ديالها دخلات لبساتها فاللون الابيض مع سبرديلة نايك سبور هزات تيليفونها وخرجوو كيتمشاو فجو نقيي ودنيا مزال ساكتة وكاالم كانت 7 تاع الصباح الدنيا مضوية قبل مطلع الشمس ريحة الشتاا وشجر كيقطر لما لي حاصل فلوراق …منظر مريح للعين والخااطر
من بعدما سخنو بلامارش بداو كيجرييو فلممر الخاص بالرياضة فالشارع
وديان: يكما عيتي
ايمان(كتنهج ) ولفت ههه
وديان:لي سبق يخلص لفطور ههههه
وقفات ايمان كتنهج وجبهتها عرقات في حين وديان سبقاتهاا وسط زناقيي راجعين لدار ..تبعاتهاا كتجري بخاطرها وتوقف الى عياات
شافت وراها لقات الدنياا خاوية ورجعات كتجري ..جاها احساس شي حد وراهاا وقفات كتنهج وقال :وديااان
مبان ليها حد وكملات غير كتمشاا وبقا بالها وراهاا كتحس بخطوات وراهاا وقفات على غفلة ودارت مكيبان ليه حد …رجعات بشوية تشوف يكما كاين شي حد كتلقا زناقي خاوين غير لمشاش
كدور وراهاا تانيي وجنابهاا بدااو دقات قلبهاا كيتجهدو على العاادي وهي كدور بجناابها كل مرة مني كيجيهاا صوت الخطوات ومكتلقا حد
جبدات تيليفونها يديها كيترعدوو حلات ل كونيكسيوون وعينيهاا كيدوروو كتمشاا جوج خطوات وتوقف مخلووعة
مشات نيشان ل سطوريات ديڤ لقات اخر سطوري حاط فشي ديسكوو مع 4 تاع صباح فايطاليا ،رتاحت نسبياا ورجعات التيليفون لجيبهاا
كملات طريقهاا بخوف حتى ولات كتجري تخرج من داك الشاارع محدهاا كتسرع ماحد الصوت كيجيها قويي طلات وراهاا وهي كتجري ملقات والوو مع بغات دور رااسهاا تساطحات مع عمود الاناارة لي قداامهاا تغوتات ،طااحت سخفانة ودم جاي من حاجبهاا سخوون
شي مرات ملي كنسمحو لوسواس يدخل لعقلنا كيولي يهيئ لينا شي حواايج مكاينينش …بحال شي حد تابعك
بحال شي خيال فالظلام .. كيولي الخوف ديالك هوا اكبر جحيم فحياتك
كيولي عقلك يصور لييك شي اصوات شي حوايج مكاينينش نهائيا
**
وقفات والالم قوي فحاجبها والضربة دوخاتهاا قدر ما كتخيل حطات ايدها على عينيهاا كتلقاها فازكة شافت صباعها لقات د_م سخوون
نزلات سيدة من الديور لي كانو تما سمعات الغوتة وحتى الضربة هبطات بشوميز تاع نعاس وشعر مجموع ضعيفة وقالت : واش نتيي بخير …تحتاجيي تمشي لسبيطار
ايمان:دايخة ) نوو نوو اااي
_ اووه شنو وقع لييك…خليني نديك لوبيطال راه عندي طموبيل
امتانعات ايمان وحاولات تنوض والدوخة شداهاا قالت شكراا لسيدة وحاولات تمشا …حلات السنسلة حيدات لفوق بقات ب بيل لاصق عليها فالاسود حطات لڤيست على جرحة بركات عليهاا مع د_مها سخوون مبغاتش تحبس
مرة مرة تشوف وراهاا ..لقات تيليفونها كيصوني جاوبات وديان بالم وقالت:وديان
وديان:تعطلتي فيينك
ايمان:اناا …احح اناا فالشارع لي ورااك
وديان:ماالكي اش وقع نجي عندك
ايمان(كلساات فلحافة تاع طريق )سيي
قطعات معاهاا كتالم راسهاا داايخ …كيدوزو من حداها الطموبيلات وهي مهبطة راسهاا حتى شافت وديان جاية قاصداها فايدها صاشيات التقدية
وديان:وييييلي اش وقع ليك(تحنات على ركابيها كتشوف الضربة تخرجو عينيهاا )اش وقع
ايمان:ضربت فداك لعمود تاع الضو
وديان:واش بصح ويليي راك ماشي غير ضربك (غلب عليها الضحك ) واش كتجري ناعسة هادي راه كسيدة ماشي ضربة
ايمان:كنت كنشوف ورايا حسابليا واش نتيي وراياا اي اي بشوية ودياان
وديان:نوضي نوضي جاتك فوق لحاجب نيشان
ناضت شداها والاخيرة دايخة تطلعو لدار كلسات فلكوزينة ،حتى جاية وديان ب الاسعافات الاولية كلسات قدامها بليكات بيضاء كتعقم ليها
نصيرة(كتاوب تشهقات) اش وقع اش هد لحالة
وديان:ضربات فلعمود تاع الضو
نصيرة(شدات فمها )ضربة وشمن ضربة …كضرك !
ايمان:دوخاتني ماشي غير كضرني احح بشوية وديان :صبري نعقمها ليك
نظفاتها ليهاا من الد_م باش تشوف الضربة شنو تحتااج..عقماتها مزيان وداواتها ليهاا دارت ليها لصقة طبية كتجمع الجرحة بلا غراز وفوقها دارت سبرادرا صغيرة فحجم الضربة
وديان:صباح زيين هدا
ايمان:معرفاش شنو وقع والله ….. ففف غادي نبغي ندير شي سطوري غتبان اللصقة
وديان:ههه عينووك ليا اصاحبتي
تبسماات تنهدات وهي تنوض دوشات وحاولات متقربش لما لحاجبها قدر الامكان فاللخر بدلات ليها وديان لفاصمة وكلسو كيفطرو
نصيرة:شنو لبروغرام الزينات
وديان: اش بان ليكم نمشيو نتبحرو شوية ف ” le havre”
نصيرة:ناري ياختي بعييدة
وديان:ولكن زوينة نمشيو بطموبيل 3 سوايع ونص اش بان لييك ا ايمان
ايمان:انا راه معنديش بيرميي غتسوكي بوحدك
نصيرة :زيديني علييك
وديان:ولا عرفتو نمشيو فتران حسن دغيا نوصلوو اصلا المدينة صغيرة غنشدو شي اوطيل حدا لبحر وا نوضو لجو تاع باريس جاب ليا الاكتئاب الييوم …
فطرو وجمعو لحوايج ديالهم ايمان ديجا حوايجها فلباليزة هزاتها وبقاو يكتسناو نصيرة لي ساكنة قريبة لوديان
نصيرة و وديان نفس السن وقراو مجموعين غير كل وحدة دارت شنو بغات : وديان فامراض النساء والتوليد ونصيرة استقرات فالطب العاام وخدمات فكلينيك فباريس
قطعو فتران وشدو الرحلة ديالهم كل وحدة كتفلوݣي بطريقتها الا نصيرة لي شادة لهدرة مع شااب ابيل فيديو كتوريه الاجواء الممطرة من تران
حتى وصلوو لقاو شميسة ضاربة وخة لحال دافئ مباردش خداو طاكسيي وفطريق كانت وديان ديجا دارت الحجز على 3 ديال الغرف باش كل وحدة تاخد راحتهاا مع دخلات لشومبر ضرب فيه الريح ديال البحر شحال توحشاتو ودكرهاا بايامها مع جداهاا فالمحمدية كانت اكثر ايامها سعادة هي ملي كيمشيو لدار ديال المحمدية فايام نعيمة الاخيرة …كطيح المحمدية فبالهاا يعني حتى حذيفة كيجي فبالها اول مرة شافتوو …غمضات عينيهاا مخلية الريح تحرك شعرها وهي فلبالكون
بدلات حوايجها بدو بيااس ولبسات فوقو كاش مايو فلبيض دهنات لحمهاا هزات برودويات دارتهم فالصاك ديال البحر مع نظاظر لبسات صندالة خفيفة فرجلهاا هبطات طالقة الشعر وشوية من لافخونش مغطية ليهاا الضربة لي فحاجبها هبط دهناتو بسيروم موجو ليها بشكل طبيعي
كان الحجر عواض الرملة فلبلايص قددام لبحر كل واحد مفرش لفوطة ديالو وكالس طرونكيل مكانوش لي پراصور لانو لجو بارد فوق لبحر كانو صحاب الشراع الهوائي كيطايرو مع الرييح ويركبو على الامواج
لجو كان راائع نصيرة دخلات نيشان تبحر …ايمان كتصور الاجواء مع ايكرون تاع الشمش ديالهاا مغطية نصف وجهها ب شعر ..صورات برودوياتها مع الصااك فوق الحجر اغنيتها ديما المساند ف سطوريات
كانت وديان حداها بدو بياس فلاسود ملاصق وشعر طويل كدهن فزيت خاص بلبرونزاج
وديان :عمرك تبرونزيتي هههه
ايمان:ههههه مكنتبرونزاش اكنولي حمرة كي مطيشة مكرهتش نتبرونزا مخلييت ماجربت
وديان:هدا هوا المشكيل ديال زعرات صعيب يشد فيهم اللون كنشوف غير لكاوريات كيولييو حمريييين بجهد ومكيتبرونزاوش
نصيرة(خارجة من لماا بدو بيااس وشعر قصير فلاسود )لجو راااائع يالبناات
وديان:نوضي نعوموو
جمعات اشياءها فالصااك ومشات كيتجراو لبحر
دخلو وسط لبحر منساجميين بلهوااء والما البارد والشمس ضاربة فيهم
وديان:محيدتيش لكااش
ايمان:غير كنبغي نحيدو كيجي صوت مي الله يرحمها فودني متحيديييهش انلييع والديك من وسط الفخااض ههه
وديان:هههععع الله ارحمهاا …اللهم قوي ايمانك يا شييخة …مشفتيش الجديد (عطاتها بالظهر وهزات شعرهاا بايين وشاام على شكل فراشة فكتفهاا من اللور
ايمان:نااري مامشيتي حتى وشمتييه
وديان:غير سكتي كون شافو بابا يعلقنيي
ايمان:طيحتي الدل على الاطباء
وديان:ويلي لهلا يوريك الاطباء اش كيديرو …نهار يطلع ليا فراسي نحيدو …ندمتي علييه !
ايمان: لي فصدري …الصراحة لاا ولكن مستحييل نزيد شي واحد اخور
وديان:بغيت نزييد (♾️) فايدي هههه ولكن خفت
ايمان:ههههه باينة كتخاافي
تقلبو فلمااا كيعوموو بحال الحوتات لمدة طويلة حتى عيااو وخرجوو وحدة تنسيك فلخرى لقاو نصيرة واقفين عليها جوج شباان كضحك معاهم يعني كتعرفهم تشافت جيهتهم غير من ظهرهم عرفاتهم
وديان؛ اش كيديرو هنا
ايمان:شكون
وديان:لي تلاقينا بيهم لبارح ياسين وياسر
قربو ليهم :هيلووو ..سلمات عليهم بلاحضان وايمان تبسمات ليهم ومشات هزات لفوطة وياسر متبعهاا بعينيه لابس شورط قصير بيض وصدرو مطراسي داير سنسلة دهبية فعنقوو مرجع شعرو بنظارات شمسية فوق راسو
وديان:اش هد الصدف ههه
ياسين:نتي عارفة هد لبلاصة شحال كتعجبنيي وفينما جيت لفرنسا كنجي ندوز فيها طخوا جوغ
وديان: مزييان اسيدي …ياسر
ياسر(نتابه ليها وتبسم ) صافاا
وديان(ضحكات ) صافا ا طوا
ياسر:سوبيغ
ايمان: هاني جااية (تبسمات ليهم ومشات هازة تيليفونها والاخير متبع ليها العيين نغزات وديان ياسيين وقالت: شوف خووك مشاا
ياسين:نكدب عليك هوا لي جرنيي ملي شاف سطوري ديالكم ههه دابا شوفي كيديري
وديان:هاويلي ههههه
مشات قصدات لبحر كتصور ف الريل لي بغات تحط عجبها لجو حتى حسات بلخطوات وراها ضارت قافزة
ياسر(تبسم ) سي موا ههه خلعتك
ايمان:لاا ههه
ياسر (بلفرنسية ) بغيتي نصورك ؟
ايمان: شعري مزال فازݣ بلاتي شوية …قالت لياا وديان نتاا موديل
ياسر:ويي مع لمارك “prada”
ايمان: مزياان (تبسمات ليه كترجع شعرها اللور )
ياسر: تبغي نتمشااو شوية !
ايمام:ؤك
تمشاو جنب بعضياتهم هوا ايديه فجياب شورط وهي عينيهاا فلبحر ولما لي كل مرة كيضرب فرجلهاا
ياسر: لاشونصون اي تخي بوو
ايمان:ههه ميغسيي
ياسر : جوسوي فان ديالك
ايمان:بصح شنو سميت لكونط ديالك
جيد تيليفونوو وراها لكونط دخلات اجوتات لكونط ديالوو ضارب مليون ابوني حتى هوا لي بوز فتصاور مكاين غير الله اعطيك الصحة
ياسر :ناخدو شي فوطو اونصومبل نحطها
ايمان:وي علاش لا (ضحكات)ولكن داباا حاالتيي بلما هههه
ياسر:نديرو شي عشاا اونصومبل ليوم !
ايمان:معرفتش نشوف لبروغرام مع البناات
ياسر:وي بيان سيغ نخرجو مجموعيين
ايمان:ان شاء الله
رجعو ادراجهم كلسوو مجموعين وعرضوهم العشا فشي رسيتوو مشاو لبنات لوطيل يدوشوو
وديان:شنو بان ليكم نمشو معاهم !
نصيرة: فيين شي بلاصة محترمة ياك
ايمان: ايمانك قوي انصيرة (ضرباتها لجنبها )مداخلش فيه دو بيااس لي كتجري فيهم فلبحر هههه
نصيرة :الله يسمح ليناا
وديان:شوفي لبلاصة محترمة بجهد واااااعرة
وقفو بكامل اناااقتهم قداام ديسكوو الزدحة مسموعة من الشارع نقزات نصيرة وقالت: محترم المحترمة
اوديان: ههههه شدي طبلة وتكمشي اصااحبتي
ايمان(كتشوف)ناري صدااع
وديان:وخة هكاك زويين غير اجيي
ب ميني ڤونطخ فلاسود و صاية ملونة حد الركبة وفيها فتحة فجنب طالعة شوية فلكراميل صندالة وصاك فلاسود طالقة شعرها مموج ومكياج فاتن بشرة كتلمع مع الاضواء
دخلوو كيقلبو بعينيهم على الدراري بجوج لقاوهم لفوق ولتحت كاين لبار والمرقص الاصوات صااخبة
تلقا ليهم ياسر سلم عليهم بلا بيز وشد ايمان من خصرها قربها لكرسي جرو ليهاا وكلسات وديان غمزاتها كضحك كلسو فطبيلة كيطلوو على الناس كتشطح
ياسر:تشربو شي حاجة ؟
وديان(بصوت مرتافع باش يسمعها ) شي عصير
ياسر(لايح ايدو فوق لكرسي ورا ايماان قرب جيهتها )شنو تشرب لابرينسيس
ايمان: غير عصير
نصيرة: وانا متحاشيوهاش ليياا ! تشربو السم
ياسن:هههههه كنتي تجيبي معاك الزوج المصوون
نصيرة:كيجمع فلوس صداق
وديان(قربات ليها )ونتي كالسة مع لعزارة
ضرباتها لكتفها وقالت:نتي غير سكتيي المحترمة
ضحكات وديان وقربات جهة ياسين مشاركة معاه الهدرة
ياسر(قرب لودن ايمان تقفزها) جيتي زوينة
بعدات كضحك وقالت:شكرا
كل واحد فيهم كيصور سطوري بطرييقتوو خدات ليهم نصيرة صورة كالسين بربعة فطبلة …خدا ياسر سيلفي مع ايمان وهي فجنبوو لايح ايدو ورا لكرسي كيبان معنقهاا …لاحها فلبلاصة ف سطوري وطلع ليها الطاك هزاتها هي دارت ليها بارطاج فسطوري عندهاا فلوقت لي كتحط سطورياات ..وصلها مساج فلبلاصة دخلات لبلاصة كيبان ليها ديف راسل كثر ممن 50 ميساج غير فهاد نهار
دخلات تشوف كاين لي ايموجي 😍و♥️ على سطورياتهاا لي كانت كثر من 20 سطوري ليوم
اما الصورة اللخرة لي حطاات مع ياسر مشا يتسطا بلمساجات
_شكوون هداا
_مودل ؟
علاش يقرب لييك هكا
عفاك جاوبيني بغيت نهدر معاك
بيانكاااا …جاوبيي غادي تسطييني
بيااانكاا!
ايمان(كاتقرا وتحل عينيها ) اويلي هدا مالو
ياسر: هضرتي معايا
ايمان(هزات عينيها فسه )لاا ههه
رجعات لتيليفونها سكرينات داكشي وسيفطاتو لوديان لي بيناتهم ياسين شافت فيها كاشارة تشوف تيليفونها
وديان شافت سكرينات وكتبات بلوكيه اصاحبتي راه بدا كيهربو ليا هدا
فعلا مشات بلوكاتو ومسحات لمساجات ديالوو وبما انو دايرة لكونط بريڤي اي شخص كتقبلو هي كتعرفو وخة كيجيوها الطلبات كتار هدشي فقط باش تعرف واش شي نهار يقدر يجيها طلب باسم حذيفة !
حطات التيليفون ورجعات لسهرتها خداو عواصرهم ودراري مشروب كحولي مع تحلياات
فعلا ضحكوو ونشطوو والامور تمام بدلو الروتيين بليلة صااخبة..عامرة ضحك ونشاط
ياسر جر ايد ايماان وناضوو كيشطحوو ويضحكوو
وصلوهم لاويطل مع 4 تاع صبااح مسخسخيين
مشاو لغرفهم طاحو كاو بلعياا
طاحت بحوايجها فلفراش مبغاتش ضيع عليها هد الفرصة ملي حسات بلعياا ونعااس …نعسات مكمشة فلفراش وصندالة خيوطها تطرساو فرجلهاا
مفيقها غير شمش لي ضربات فيهاا ومقدراتش تنوض تسد شراجم بقات كتقلب فبلاصتها وتسوووط حيت مستحيل دابا ترجع تنعس من بعدما فااقت
شافت حتى عيات وناضت تبدل عليها خرجات لبالكون من بعدما بدلات وغسلات وجهها ،كضرب فيها شمس الصبااح والبحر كيبان ليها صاافيي والدنيا نقية ..كلسات فلكرسي شادة تيليفونها ..كتلقا الناس مطاݣينها ف تيكتوك كدخل لطاك كتلقاا صورها وهي كتشطح مع ياسر مكتوب “عارض الازياء المغربي مع الجميلة بيانكاا في مرقص ليلي “
شكون شافهم وشكون صورهم معرفاتش …انك تولي مشهور فراه حياتك الشخصية كتولي ملك للجميع
عضات على فمهاا كتقرا شنو مكتوب هالي رجعهم مصاحبيين ودوزو الليلة بجوج والتعاليق كثيرة
مشات لانسطا كتلقا نفس الصور تبارطاجااو سوا لي حطات ولي محطاتش ف باجات فانسطا دخلات لسطوريات كدوز فيهم ملقاتش صورتها مع ياسر كمشات ملامحها وقالت:علاش تمسحات ؟
مشات لجيهة لمساجات لقات الاعجاب بالصورة ولكن الصورة تمسحاات
دق لباب وناضت حلات ب بينوار ستاان قصير سداه فالابيض لقات وديان شادة راسهاا :مجبتي حتى كينة تاع الراس
ايمان :دخلي ….شقيقة هي لي غتمرضني اناا
كلسات وديان وايمان كتمشي وتجي معصبة
وديان:اش واقع
ايمان: تصويرة لي حطيت ليارح ديالي انا و ياسر تمسحات
وديان:شكون مسحها !
ايمان:شكون فنظرك ؟
وديان(ميقات ) مدير الاعمال سي يوسف ولكن شنو دخلو فسطوريات ديالك الحماق هدا
صونات ليه معصبة مجاوبها تكان غيتقطع كان باقي ناعس دخلات فلهدرة نيشان مخلاتوش يستوعب: باشمن حق تبقا تمسح ليا سطوريات ايووسف
يوسف:اشنوو كيفاش
ايمان:راك عارفني شنو قلت علاش كتمسح ليا سطورياات انسطا راه دياليي
يوسف:نتي مصورة مع وجه ماركات لابرادا فالوقت لي حناا باغيينك تاخديي عقد مع شركة المناافسة ليها نظتي تصورتيي مع لوݣو ديالها
ايمان(شداتها الضحكة بلفقصة ونطقات بلعربية)واش نتاااا مريييض
يوسف: شنوو
ايمان:ومتبقاااش تمسح لياا سطورياتي ايووسف هدا كونط ديالي
يوسف:ديالك ههههه فلعالم لي نتي فيييه ابيانكا تحاجة مبقات ديالك واي حاجة درتيها كتصور وكتسجل فجمعي رااسك وعرفي معامن كتخرجي …مزال مدازت حتى 4 ايام ف فرنسا مشيتي كتصوري مع داك العربيي بغيتي تجمعي علينا الدبان !
ايمان(كمشات حجبانها )كيفاش الدبان شرح لياا
يوسف: خليك بعييدة على العرب حيت مغاديش تربحي معاهم …خلي صورتك زويينة باش تسني عقد عمل مع شي مارك عااالميية
ايمان:داباا العرب دباان على اساس نتا شنوو ميريكانيي ولا يكما تيقتي راسك بلي نتا طاليانيي ديال بصح حتى نتا راه من دبان
يوسف(ببرود كيضحك )مغنقلقش رااسي معاك ابييانكاا زوينة …ردي بالك ولا غيولي معاك شي ݣارد يراقب تصرفاتك ازوينة نتيي حالياا وجه تقدر تشريه اي شركة ف باني زوينة وبعديي من تخربيق
قطع عليها قبل متكمل هدرتها وكلسات حدا وديان معصبة وقالت:عرفتي هد لويل والله ميخليك تعيشي كي الناس والله بدلي لمود باس وخلييه
ايمان:داكشي فاش كنفكر ماشي اول مرة يديرها
فعلا داكشي لي دارت بدلات لمود باص حتى صونا ليها كريس
كريس:ايماا
ايمان:كريس بخير
كريس:بخير ! صوتك معاجبنيش
ايمان:غير تناقشت مع يوسف على لكونط ديال انسطا بحال ديما
كريس:عندي لييك خباار زوينة
ايمان: محتاجاها هههه شنو هي
كريس: توقيع الكتااب المترجم غيكون نهار السبت
ايمان:واش بصح اليوم تلات يعني بقات 3 اياام
كريس: فهد تلتياام بغيتك توجدي رااسك حيت غتكوني ضيفة الشرف فلحفل …غيكون حفل خيري وفنفس الوقت توقيع الكتااب وشرف ليا تكوني ضيفتيي ورفيقتي ديك الليلة
ايمان:هههه مزيااان غنجي
كريس؛غيكونو بعض النقاد يعني غتكون الصحاافة وبغيت نقولييك حاجة اخري .. غايكونو مؤلفيين …منتجيين …يعني فرصة كبيرة لك مبغيتكش ضيعيها
ايمان(شدات فايد وديان بحمااس ) موافقة صافي هههه شنوو نلبس اي حاجة بغييت
كريس: نتي شنوو ؟
ايمان(ضحكات )بيانكاا
كريس:ادا راك عارفة شنو تلبسي …اه رحلة مدفوعة التكاليف لييك و لصديقتك ودان
ايمان:ههه وديان (خبطو فايد بعضهم بحمااس ) ولكن فييين ؟
كريس: دولة السامبااا …*اسبانيا*
تشوكات لثوانيي وقالت:اسبانياا !
كريس:خاصني نقطع من بعد غنسيفط ليك جميع المعلومات وفين بالضبط
قطعات معاه وكلسات حدا وديان بهدوء وقالت:قاليا ف اسبانياا
وديان:ومن بعد …فين المشكيل
ايمان(مسحات على وجهها ) معرفتش
وديان: غنمشييو وغتباني بومباا ههه شوفيي (شدات ايدها ) صافي راه دازت 4 سنين نساي وعيشي حياتك …راه ربي مخلقش غير راجل واحد فالدنيا خلق بزااف وكل وحدة كتدي الراااجل لي ربي كتبو ليهاا ومكاينش غير هوا لي جنتل مان كاينين بزااف
ايمان:فهميني اوديان
وديان: نتي لي غادي تفهميني …نتي الف واحد يتمناك متبقايش تخلقي ليه أعذار ،كون كان كيبغيك بصح مكانش غيمحي راسو من حياتك بهاد الطريقة ..كان كيتسنا غير امتا تغلطي باش يعاقبك هكا …سمحيلياا ولكن هدا ماشي حب وحتى نتي راك مكتبغيهش غير ولفتيه والطريقة باش مشاا خلاك تبقاي تفكريه ديماا…صافي نسااي ،ويلي نسااي وعيشيي حياتك
سكتات كتنهد وتحسسر وقالت: واش غير اجي ونسا حساب ليك ساهل ؟
وديان:شوووفي الالة ياسر كيفاش حااامق علييك وشاف سطوري وجاي كيجريي لهنا غير باش يتعرف علييك …عطيه فرصة
ايمان:لا نتيي راك مشابعاش نعااس نوضي فحااك
وديان(زيرات عليها)خليني نكمل اصاحبتي …هوا طلبني لبارح باش نهدر معااك بغا يتعرف علييك وتديو وتجيبو فلهدرة بجوج بيكم …جربي مخاسرة والو
ايمان(ضحكات وناضت ) سيري اوديان ندوش سيري
وقفات جنبها وقالت: والله منتفاك معاك …شوفي ديري ليا خاطري ياك عزيزة علييك
هيا كتهز فبرودوياتها داخلة لمراية تاع دوش وديان وراهاا كتزنزن حداهاا
ايمان (كدير ماسك لهالات تحت عينيهاا ) وديان راك غير كضيعي الحجرة انا انسانة لي حطات فيها ايدهاا مكتصدقش لي بغيتو فحياتي مكيطولش …بغيتي تاني نبغي واحد اخور يخليني حتى نبغيه ويمشيي ؟ نزيد نمرض ؟ نزيد نتازم
وديان؛ غيطير منك النص غتموتي ! خليه هوا يبغييك …الشعراااء ونصحونا باش نختارو لي كيبغيناا ونتي باغة بسيف تبغييه
ايمان:نكون مع واحد فغولاصيوون مكنبغيهش
وديان:الحب كيجي من المواقف الزين
ايمان(شافت فيها كتمشط شعرها )والله تندمك على هد الهدرة نهار طيحي على فمك
وديان:داباا خلينا فيك نتيي ،معندكش صحاب فايطالياا مكتشوفيش خاصك كليكة وخاصك ناس دخليهم لحياتك ! كريس بوحدو كتدوي معاه وتيقتلني غير بلملل ملي تكلسي معاه وهو كيتفلسف حياتو كلها ضايرة على ورقة وستيلوو
ايمان(ضحكاتها ) : صدق حسن من بزاف اوديان …كنحسبو بحال خويا الكبير الصراحة عمرو نقص مني ولا أداني ..وكتعجبني فلسفتو فلحياة
وديان:خلينا فياسر الله اجازيك بخير
ايمان:تقيل على القلب
وديان:مقلتش ليك هزيه
ايمان(ساطت )وخة وشنوو المطلوب
وديان:نخرجو اونصومبل فلعشية وكلسي معااه
ايمان:بجوج ؟
وديان:مالو كيعض تي مالك ازمر
ايمان:لا لا خاصني نختار شنو نلبس نهار السبت
ميقاات وقالت: سبانياا عامرة حوايج وماركات لاش اتمشي متقلة ، خلينا فهاد طخوا جووغ لي شاديين هناا ،وعفاااك ا ايمااا عمري طلبتك
سكتات معرفات باش تجاوب باستها وديان بجهد وقالت:نمشي نقاد بروغرام مع ياسين
خرجات مخلية وراها ايمان فدائرة من الحيرة ماحيلتها لمشية لاسبانيا ولا هاد العلاقة ليي خرجات ليها من الجنب. ..
بدلات حوايجها بصالوبيط شورط لبسات صندالة خفيفة وهبطو يفطرو لتحت
نصيرة: فين اليوم البنات
ايمان:نسولو مولات لبلانات
وديام:اليوم الالة غيخرج ياسر مع ايمان
حطات لفورشييط وقالت:ياك قلتي مجموعين
وديان: سيي مجموعيين ولكن نتوما غتكلسو اونصومبل
نصيرة:ونتي اختيي وليتي جارتنا لخطابة مالك عزيز علييك تلابقي شبوقاتت اصاحبتي نااري عليك
وديان:نتي مكتبغيش دخلي فالخير
نصيرة: الله اكتر خييرك …لعنداك ا ايمان داك ياسر راه غير شافك تشهرتي قال ارا نضبر على شي بلان يرجعني لاخبار ديال سوشيل ميديا
وديان:ان بعض الظن اثم اصاحبتي حرام علييك قالها ليا قبل ما ايمان تلوح لكليب
ايمان: كون غير عفيتينا اوديان مامرتاحاش لييه
وديان (هزات لفورشيط موجهاها لنصيرة ) غندير فيك شي خريطة يحيرو فيك الاطباء متخرجي متخلي لي يخرج
نصيرة(ميقات ) انا مرت الراجل …وايمان بغيت نعرفها على خو راجليي بيلووط
ايمان(ضحكات ) والله حتى انا هبيلة لي دايرة فيكم عقلي واش كنبان ليكم ضروري نبغي شي حد
وديان:ماشي ضروري .. نتي غير جربي اش خاسرة (تبسمات ) مبغيتيش شي حد يصبح عليك بكليمات زوينين شي كادوات ..شي تسافيرات
ايمان:وهدشي زعمة فابوور منيتك اوديان بحالا يمكن معارفاش الرجال لا
وديان؛ناري غنتفوو معاكم اصاحبتي … تيي عطي لراسك فرصة لي مالاق دفعييه
ايمان: كلشي عندك ساهل
وديان:حيت مكنربيش الكبدة ههههه
نصيرة: بااز
وديان:سكتي نتي
كملو فطورهم بجو مرح قصدو البحر من جديد كان الجو بارد مقدروش يعومو فقط خداو تصاور وفيديوات مشاو جابو دويرة وتصورو حدا معالم المدينة وشنو فيهاا تقداو لي بغاو من مكياج وحوايج ورجعو لاوطيل منبعدما تغداو برا معطليين كل وحدة دخلات لشومبر دوشات ايمان وكلسات بلپينوار تختار شنو تلبس بانت ليها كسوة من ليكرا زيتية كتجي لاصقة على الجسم حد الركبة وسميطات عراض فلكتف بوكلات شعرهاا كتافات بصندال كحلة سامبل وصاك كحل مكياج بارد ولطيف على بشرتهاا بدلات لحلقات فودنها بتشكيلة من الحلقات على شكل فرشات من صغيرة لكبيرة وخواتم فايدهاا وساعتها الرقمية وقفات قدام لمراية تاع الماريو كتشوف فراسها كيجاات دارت سطوري صغير حطات فيه اللوك
كان الحال بدا كايظلام تدخلات عندها وديان بكسيوة كحلة قصييرة وشعر جامعاه لفوق مطيحة سميطات لكسوة باش يبان الطاطو لي فكتفها من اللور وصندالة عالية بالاسود
ايمان(شدات جنابها)طلقتي زينك الدكتورة
وديان:هههه كون شفتي نتيي الزعرة …هد لكسوة سامبل اصااحبتي
ايمان:مرتااحة فيهاا
وديان؛ مشيناا ؟ ..نصيرة مغتمشيش شادة جماعة مع الخطيب
ايمان:ههههه صافي ياله نشوفو هدشي ديالك
وقفو كيتصور فكولوار لاوطيل وحدة تنسيك فلخرى هبطوو لتحت كيبان ليهاا ياسر گالس فالاستقبال مع خوه ياسن بكامل اناقتهم وروايح كتعطي من بعييد سلمو علييهم والاخير مد يدو ل ايمان لي بقات ثواني كتشوف فيهاا ..حولات الصاك من يدها اليمنى وعطاتو ايدها اول ماشدها باسهاا بلطف وقال: بويناسيرا ميا بيلا (مساء الخير ازوينة )
ايمان :مساء النور.
خرجو مع بعضهم ركبو لبنات اللور ودراري القدام قصدو نفس الريستو لي تحتو ملهى ومرقص كان هوا الاشهر فديك لبلاصة
طلعو لفوق فين كانو حاجزين طبلة ديالهم تنائية لكل شخص .. جر لكرسي لإيمان باحترام كلسات وكلس قبالتها في حين وديان وياسين خداو طبلة بعيدة علييهم
ياسر: انا فرحان لي قبلتيي دعوتي ليوم ..شنو طلبي !
ايمان:معرفتش شنو عندهم
طلب لموني كيقراا وكيعرفها على الاطباق ديالهم وهي كتحرك فلحلقات فودنها وسارحة
ياسر:كيعجبني عندو “la foie gras” (كبد الاوز ) مع صلااد اش بان لييك
ايمان:خود على دوقك
ياسر؛ؤك
تنهدات كتشوف وتسرح عينيهاا هنا وهناا حطات تيليفونها قدامهاا كتربت برجلها تحت الطبلة
ياسر:علاش مسحتي سطوري ديال لبارح !
ايمان:سطوري ! ااه ديالناا ماشي انا لي مسحتوو المنادجر ديالي لي مسحو
ياسر:علاش !
ايمان: حيت قال بلي كيدير مفاواضات مع شي ماركة لي مكتحاملش مع لبرادا لي موقع معاهم نتاا
ضحك وقال:مممم مصلاحة زعمة من حقوو ههه
بعد وقت وجيز مشاركين فييه الحوار الاشهارات والربح ولكونطرات لي تسنااو حتى تحط قدامه العشاا كلااو وختموها ب لفوند ديال الشكلاط مع طريفات لفخومبواز
ياسر: عطيني نمرتك
ايمان:اي وخة
عطاتو الرقم واتاصل بيهاا سجلات الاخيرة نمرتو بغات تحط تيليفون حتى بدا يوسف كيصونيي ويعاود ..طفات التيليفون وتهنات
ياسن: شحال ونتي ف ايطالي
ايمان:5 سنين
ياسر:واو هههه مدة طويلة مكتفكريش تهبطي لمغرب فهاد الصيف
ايمان:لاا الصراحة
ياسر:كنشوف لي انفليونسوز مغربيات كيكتاسبو واحد الشوية تاع الشهرة وكيهبطو للمغرب يستاقرو علاش فنظرك ؟
ايمان: مكيخلصوش الضرائب بزاف من الارباح كنظن !
ياسر:كيعيشو فابور اشهارات فابوور ههههه ..
ايمتن:كل واحد كيفاش كيجبد رزقوو
ياسر: نهبطو لتحت
ايمان:وخة
هزات صاكها بغات تنوض حتى جر ليها لكرسي وشد ايدها تبسمات وهبطو لتحت فين كان شطيح بانت ليها وديان الوسط كتشطح شيرات لييهاا اما ايمان كلسوو فطبلة عالية فين اشارت ليهم وديان يكلسو كانو فوقها جوج كيسان واحد عصير والتاني كحولي
ياس:تشربي شي حاجة ؟
ايمان:مكنشربش ههه
ياسر:والو زعمة لا خفيف لا تقييل !
ايمان:ضروري نشرب !
ياسر(اشار ليها ب ؤك بايدو كيضحك وكيتماايل مع لموسيقى ) نشطحو !
ايمان:نمشي لحمام ونجيي
هزات صاكها قاصدها بلاصة الحمام مبعدة من الصخب …دفعاتهاا ايد من وراهاا لواحد لباب وسد وراه حتى بان ليهاا ديڤ رجعات بخطوات اللور مخلووعة وقالت:ديڤ؟
ديف:اااه ديف …دد ديڤ لي بلوكيتييه (بصراخ)علاااش تبلوكينيي علاااش بغيتي تقت_ليني بغيتيني نحماااق
كيبغي يشدها وكتبعد وقالت: بعد ايدك …ديڤ بعد ايديك
ديڤ(هز ايدو )مغنقيسكش …جبديي تيليفونك وديبلوكيني (جمع ايدوو وطاح على ركابيه حداها برجااء)عفااك …بيانكاا پورفابوور
ايمان(زيرات على صاكها ) وخة غنرجعك
وقف كيتفتف وقال:دابااا دد داباا
جبدات تيليفونها محاصرة فزاوية حيدات ليه لبلووك فلبلاصة رجع عندها ورجعات قبلاتو كيف بغا
ايمان:دابا نقدر نمشي ! واخر مرة تعرض لياا
ديڤ(بفرحة)سمحيلياا الى خلعتك (شد درعاانها)انا فرحاان بزااف
جرات ايدها راجعة اللور وخرجات فيه عينياا :قلت ليك متقيسنيش
ضرب ايدوو مع لباب وقال: اخر مرة كنواعدك …ش شكراا
خرجات من تماا كتزرب نسات شي حمام حاضنة صاكها كتقلب على وديان تمشي فحالهاا ..حتى جرها ياسر لمرقص وهي كتمتاانع وعينيها كيقلبو على وديان
دورهاا على راسهاا وقربها لييه الخلعة مزال فيهاا وياسر كيشطح معاها وزحام وعباد الله كتشط
شافت ديڤ واقف ومعاه جوج تاع الاشخاص من وراه شدات ف ياسر باش الاخير يبعد منها السعاتي كان عند ديڤ رأي اخر شافتو جااي قاصدهاا ومعاه دوك جوج لي باينين رجالو من حجمهم …
ايمان:خاصنا نمشيييو
ياسر:شنوووو
مسمعهااش مجات فين تعاودهاا حتى تجر ياسر من عنقوو طيحوو ديڤ وكلس كيعطييه جات ايمان تبعدو تجرات من طرف رجالو حتى طااحت ولا شي كيطيح ويهرب من فوق شيي وايمان كتغوت على ودياان ..ياسين نقز من فوق لبنات وطاار على ديڤ
ناضت لمشاانقة وايماان كتجري كتقلب على وديان حتى جرااتهاا الاخيرة تحت لكونطوار وقالت بلغوات:شنووو واااقع
مزال مجاوباتهاا حتى سمعو صوت القرطاس خلا كلشي كيغوت
غوتات ايماان بخوف تجراتها وديان لحضنها مخشيين تحت الطبلة مزيرين على بعضياتهم السرباية كلشي هرب بنادم كلشي هرب
ناضت وديان بزعامتها كطل كيبان ليها ياسر و ياسين غادين كيجرييو جهة الباب لمحات ديڤ وشهقات راجعة لبلاصتهاا
وديان:شنو جاب داك لمخربق هنا …هاز سلا_ااح
ايمان: تابعني حتى لهنا شنو غندير
وديان:سكتيي تيمشيي سكتي
كيطلو علييه من واحد القنت بان ليها جروه رجالوو بزربة حتى سمعو روايض تحكو عاد خرج لي كان مخبي من النااس
خرجو كيجرييو ايمان رجليها فشلو غير وديان لي جاراها وراها
ضربوها برجل ديك الطريق كلهاا مكانش بعيد حتى هوا على جنب لبحر حيدو صنادلهم وياله خايفيين ومرعوديين وديان طريق كلها وهي كتدعي على ياسن وياسر لي هربو وخلاوهم
طلعو لشومبر ديال ايمان وقفات كترعد وكتبكيي وديان كتهدن فيها
ايمان: تنقولييك راه معنديش الحق نفرح اوديان علاش كطمعيني
وديان: شنو دخل هدشي بفرحتك …غنديكلاريو بدااك لحماار غير صبري …
ايمان(كتشهق ) مسطيي تسلط عليا اوديان اويلي سلا_ح اصااحبتيي هاز سلاا_ح
وديان: نص الطاليان هكاك زيديهم على المكسيك وتواركة السلا_ح عندهم بحالا هاز بريكي …دابا تهدنيي واش كاينة السيبة فلبلااد .. عرفتي كون هدشي حضرات ليه نصيرة كانت غادي تمووت وهي فيها القلب ففف
ايمان(كتنخصص )انا لي غيسكت ليااا اودياان هءهءهءه عيييت عيييت
كلسات جنبها حاضناهاا وفايدها التيليفون كتصوني ل ياسن مكيجاوب ياسر كذلك
وديان: الرجلة تاع الزمر تفوو
بقاو كالسين حتى بردو الوقت هزات ايمان تيليفونها دخلات لانسطاا لقات ديڤ راسل ليها عشرات المسجات تاني كلهم ايموجي كيبكيي
ديڤ:عفاك سمحيليااا خلعتك مبقيتش نعااود عفاااك سمحيلياا
ايمان: مريييض
وديان:متجاوبيهش حتى تمشي لايطالية ديكلاري بيه فلبلاصة
بغات دخل لكونط ياسر لقاتو دار ليها بلوك وقالت: معطلنيش
وديان : شكون(شدات تيليفون ) الخامج لاخر هارب كي المش …غير بلاتي والله متبقا فيهم
ايمان: واش نتي حمقة عواض يهربو يرجعو يعتقوك نتيي كتصنعي ليهم لوييز
وديان: مصيبة والله نااري على بلاان
ايمان: بقاي حداياا ليوم(برجاء ) عفاك
وديان: سپايدر مان بغا يطير عليك من لبالكون هههه ويلي ويلي على السمطة لكحلة
ايمان: كون ضربتو كون خوا فيا داك لقر_طااس كامل
وديان: لوحدة هادي نبدلو علينا ونعسوو غدا نرجعو فحالنا
ناضو غسلو حالتهم عطاتها بيجامة ولبسوها ونعسو حدا بعضياتهم فلفراش …نعسو حتى ضرباتها الفيقة قافزة ف عز الليل لقات مزال الظلام
زادت على لپيل پينوارها لحريري ومشات جهة لبالكون كطل كتلقا الدنيا سااقلة غير صوت لمواج كيتسمع …كلسات فلكرسي جامعة رجليهاا
حتى بدات كتحس بقلبها تقبط وشداتها بحال الخلعة ايديها كيرجفوو كتعياا تزيرهم
مشات لدوش كترمي لما على وجهها شادة قلبهاا والغصة واخلة فحلقهاا جاتها الردة ومشاات ردات لي فمعدتهاا،حسات بروحها غتخرج كلشي فيها كيترعد ..هبطات مع لفاابوو تكلسات فلارض سادة فمهاا …بدات كتهدن والرجفة مبغاتش تمشي من ايدهاا
رجعات لبالكون مكمشة فوق لكرسي مرة مرة تراقب ايديهاا
حتى حسات بالرجفة مشاات عاد رتااحت
رجعات لبلاصتها كتشوف فوديان ناعسة براحة بقات مكمشة كتشوف فيهاا وقالت فنفسهاا
“سعداتهاا عايشة وسط عائلة كتمو_ت عليهاا …فرحانة وقرات شنو بغات عايشة بشنو بغاات مرتاحة نفسياا ومعندهاش نقص من جيهة شي حاجة كلشي موفر ليهاا وكاع الاساسيات عندها *
ماحسداتهاش ولكن تمنات حتى هي تكون بنت عادية وسط واليديهاا تعيش الدفئ و الحنان ..فلحظة تمنات كون غير عاشت معاهم لحظات زوينة وما_توو يمكن هكا غترحم عليهم وتبرد عكس داباا ليي حاسة براسهاا خرجات من غرق ز_نى محرمة وحاسة براسهاا نكرة وتاحد مكيحملها من عائلتها
مكرهاتش حتى هي تكون محبوبة ومرغوب فيها مكرهاتش تكون عندها ذكريات خاصة مع باها مع مهاا كون كون
وحياتها مغتبدلش ولو تبقا تحسر سنين طويلة
**
فاقو الصبااح على صوت التيليفون كيصوني ناضو قافزيين لقات يوسف كيصوني ليهااا مرة ورا مرة جاوبات وعينيهاا مقلوبيين
ايمان: شنو
جاها صوتو قوي من التيليفون حتى نقصات ليه الصوت : علاش مكتجاوبييش علاااش
ايمان: فف مساليتش
يوسف: معلوم ونتي البارح كنتي عايشة فيلم ميريكاني مزيااان …مزال مدازت على لاغنية حتى سيمانة وليتيي نتي اللولة كنصبح علييك (بلغوات) فشوووهة
وديان: مال هد لخراا
ايمان: اشمن شووهة
يوسف: ياك قلت لييك بعديي من داك لمودييل ولا لا فاللخر معشية معاه وكتشطحي معاه حتى ناض صدااع
ايمان(وقفات) : واش هدشي تلاح ! باش عرفتيهاا
يوسف: ردي لبال لشنو كديريي راه خاسر زبالة تاع لفلوس باش نتيي تشهريي مضيعييش لياا خدمتي فزيرو سمعتيني ولالا
قطع عليهاا خلاها كتقلا فبلاصتهاا حلات لكونيكسيون ديك السااع كتلقا لفيديو تاع المضاربة ضااير فسوشيل ميدياا
ملي كانت كتشطح معااه وملي نااضت لمضاربة والغواات ولا لفيديو مخربق والمصور هارب وجري والحالة
تعصباات وقالت: شوفي على شوووهة اصااحبتي بوحدي لي وجهيي بااين
وديان: يخ على بلان مابقاو مخلين تواحد على راحتو غير كيتشهر شوية كيوليو شادين عليه الشادة ولفادة فحياتو تء
ايمان(كتمشي وتجي )كلشي من داك لمريض لي تسلط علياا
دقان فلباب حلات لباب ودخلات نصيرة مخلووعة شادة فقلبهاا
نصيرة: واش ماوقع ليكم والوو شنو ديك الموصيبة لبارح
وديان: شفتيه ؟
نصيرة: ويلي راه الهضرة غير علييه ودراري يكما وقعات ليهم شي حاجة
وديان: دراري هربوو وخلاوناا لداخل مخبيين بزاف عليهم يكونو رجال الكل_ب وميخليكش فهد المواقف
ايمان: شنو ندير دابا
نصيرة: معندك مديريي هادي ضريبة الشهرة مبقيتوش تمشيو لتما
وديان: ليوم غنجمعو شطايطنا نرجعو …ياله تحركو
من بعد ايام كانت الرحلة المنتظرة لاسبانيا …شدو بلايصهم فالطيارة و ايمان متوترة وهي كتشوف فطيارة كتقلع
وديان :شفت فانسطا واحد لبنت عندها بوتييك ديال البلدي وكسيوات ديال السهرات داكشي غزاال
شافت فتيليفون وقالت: غير نوصلوو ونمشيي
كانت شادة الكتاب كتقرا و وديان دايرة لكاسك وناعسة حتى علنات المضيفة على وقت الهبوط…خفق قلبها وهي كتشوف اضوواء اسبانيا من الفووق هبطات الطيارة ف مطار برشلونة الدولي
خرجو بعد الاجراءات جارين باليزاتهم فلمطار بلباس رياضي مريح لسفر خارجيين كانت 10 تاع الليل الاجواء الليلية لها طعم خاص ..كان فاستقبالهم كريس ونطق باسبانية ضعيفة: هولا اتوضوس (مرحبا بكم)
ايمان: هههه هولاا
وديان (بالانجليزية ) كنعرف فلاسبانية غير هولا ،بيلا وب
عرفاتها اش بغات تقول وضرباتها لجنبها وقالت: غير سكتي بلااش
ضحكوو جميع وقال: اليوم العشاا عنديي (تبسم لايمان ) عائلتي الصغيرة بغات تعرف علييك من بعد نوصلكم لاوطيل لي حجزت ليكم
ايمان: ؤك
وديان(ضحكات): الله شحال زوينة حاجة فابور ههههه
الشيفور شد علييهم الشانطات ..طلعو اللور وكريس القدام …تحركات الطموبيل حلات الزاج مخرجة يدها مستمتعة بداك لجو لبارد طول الطرييق عينيها براا …كتعقل على لقطات صغر ملي خالها امين كان كايقرا فاسبانياا كان كيحساب ليها بليي اوروبا هي اسبانيا بوحدهاا كان حلمها تمشي معااه وتركب فالطيارة وتعيش فبلد اجنبيي
بعد طول الطريق تركنات الطموبيل فحي كالم ورااقيي من ديور وجرادي كبار تقول الناس مساكنينش هناا
تبعو كريس لي دخل وحل ليهم لباب كتبان ليهم الدنيا خضرة ومع الظلام كانو اضواء فجردة كاملة ولابيسيين دائري كيبان لما ديالو زرق بضو ليي فجنااب
جاية طفلة سمراء صغيرة شبه كريس تعلقات فييه وقال:دااد (شافت فايمان )واااو بيانكاا
تبسم ليها كريس وايمان تبسمات لطفلة وقالت: هاااي ايميلياا
هبطها ومشاات عنقات ايمان و وديان وقالت بالانجليزية :جداتي فرحاانة حيت غتشوفك اليوم ههه
بانت سيدة ستينية بشعر قصير ملامح مكسيكية غليضة شوية شدات فمها وقالت بفرحة:بياانكاا
عنقاتهاا بفرحة وقالت:متخيليش شحال فرحة لي شفتك
توجهو لكليسة فجردة بفوطويات بيضين وطبيلة تاع زاج مغطية من لفوق كلس الجمييع فحوار تعارف وديان مجمعة مع ايميلياا و ايمان مع ام كريس …وكريس كان كيشوف باعجاب ف ودياان لي هزات عينيها وتبسمات لييه ..المساعدات كانو كيوجدو الطبلة وزينوهاا ب اشهى الاطباق …كلسو على الطبلة كريس فمقدمة الطبلة وحداه موو وجنب لاخر بنتوو وايمان مقابلة مع وديان
الام: نعرفكم على الاكل المكسيكي شوية …نتمنى تكونو كتاكلو الحار حيت ضروووري منوو ههه
ايمان: نحااولوو هههه
كريس: الماكلة حلال مخفتوش
كل مرة كتحط لييهم من شي طبق وكتزيد ليهم صوص الحار
كريس: باركة راه مومولفينووش
الام(مسمعاتوش ) شنوو
كريس(تكللم بلحركة معاهاا )
الام: متخااافش هههه
ولاو حمريين ومدوزين غير بلموناضة والعصير والصغيرة كضحك علييهم
فجو زويين تعشااو كيضحكوو مع بعضيااتهم ..شافت انسجام الام بكريس كيفاش كتعطييه وتهلا فييه كيف شي ولد صغير تبسمات بلطف وكملات ماكلتها
الام: بلااتي مزال مسالات الحفلة
شافو فبعضياتهم حتى دخلو جوج رجال بلݣيتاار بلباس موحد فلابيض مطروز من الكتااف و شابوو ابييض كبيير سباط طالع ميني طالون ومعاهم بنت بلبااس غجري كتشطح على نغمات لݣيتار غناو الرجال بجوج اغاني مكسيكيية
ايمان كتصور وفرحانة بالاستقبال الزويين…جراتها لبنت لي كتشطح ناضت بلا عكز وديان كتصور كتوريها لحركات الساية ديال الرقصة الفلكلورية الخاصة بيهم
ناضو كلهم فرحانين كيشطحوو حتى عيااو وخرجو على تصفيقاتهم ورجعو بلاصتهم ضاحكيين
ايمان: شكرا بزااف هههه اول مرة نحضر لهدشي
كريس: لمرة جاية نديكم لمنبع المكسيك
وديان: ههههه حتى هكا مزيان
ايمان(بامتنان)شكراا على لكلسة والعشااء والجو زويين
الام: ضروري ترجعو عندي نشربو قهوة
وقفوو من بعد سهرة طويلة حتى عيااو وصلوهم ل اوطيل سانك اطوال كانت شومبر ثنائية ولكن كبيرة ..مجهزة بصالون وتلفازة كبيرة وجاكوزي كاطل على المدينة كاملة
دوزو ديك الليلة كيهدرو على الاجواء كيدازت حتى نعسوو ..ناضو بكري باش يوجدو راسهم لسهرة فالعشية خاصهم يشوفو شنو غيلبسوو كريس خلا ليهم الطموبيل والشيفور باش يتحركو على خاطرهم مخالط برشلونة وعارف طرقانهاا …قصدو البوتيكات ديال الحوايج
بقات مدة نيت كدور بيين البوتيكات مبانش لييهاا شي حاجة تلبسها وتكون اونيك على كلشي
وديان:اجي نشوفو هنا
كان بوتييك كتشمي فييه ريحة التراث المغربي “القفطان “
مع الدخلة كيبانو قفاطن فلڤيترينة لي على براا وحدة تنسييك فلخرا عامريين هماويين ديال الحضور والعرايس …اللباس الرجالي ..جلابة و الجبادور ..كيحيي فييك الجدور المغربيية وكتحس براسك وسط بلادك
وديان(داخت ) كيشهييوك فشي عراااسية يا صااحبتي
جات سيدة من ملامحها تعرفها مغربيية .. دايرة فولار ومرجعاه اللور عنقها معري لابسة جبادور اسود وطالون
وديان: سلاام
تبسمات السيدة وقالت؛وعليكم السلام …مرحبااا شنو حب الخاطر
وديان:تبارك الله هدشي غزاال كتجيبوه من المغرب
_ على حسب امداام كاينة لي كنجيبوها من المغرب وكاين تاني مصممين تبارك الله كناخدو من عندهم ..شنوو بغيتي بالضبط
كانت ايمان بعدات عليهم غادية مع صف التكاشط ولقفاطن كدوز بايديهاا ..حتى وقفاات وقدامها كانت مانكان فيها ” تكشيطة ملكية باكسسوارات ذهبية من سمطة وعقيق ديال العنق وشمار لي تيكون فالظهر ” ابيض ملكي مطروزة بالوان ما بين الذهبي والجوهر الاحمر والاخضر وتوب من لداخل اخضر مطروز مطروزة كدالك من الظهر ودورة لكمام ..دقة التصميم … ومنتوج بالوان المغرب والابيض الملكي شي حاجة فخمة ماشي اي حاجة …تخيلات راسها لابسااه وتبسماات…ياله بغات تعيط على ودياسن لقاتهم جايين عندهاا
ايمان: وديان شوفيي
وديان :تبارك الله غزاال
_ هدا من التصاميم لي عاد دخلناها جديدة …هدا قفطان غوب كيتلبس فلمناسبات والحضور ولزدنا معاه التااج ولڤوال كدخل بيه العروسة ..ياله علقتو داباا
قربات وديان لايمان وقالت: غادي ضربك تا طيري ملي شافتك لصقتي علييه …اجي نضربو دويرة
والو ايمان مامفكااش دارت حتى عيات فلمحال وعينيهاا فيهم غير القفطان البيض
ايمان:نرجعو لبيض
وديان:زيدي ياله
هبطو لتحت فين كانت شابة اخرى جنب لقفطان خرجو عينين ايمان ومشاات كتزرب وقالت:صافي اختارييت عفاك عطيني هدا
_ ولكن اختي راه ختاريتوو
ايمان(ضحكات )شفتو احبيبة قبل منك …طلعي لفوق كاينين موديلات واعرين هدا محتاجاه
تكلمات ام البنت وقالت:حتى بنتي راه محتاجاه عندها ضريب صدااق
تكلمات السيدة لي كتبيع باش مينوص الصداع وقالت: نقدرو نصايبو واحد اخوور غير كياخد وقت شوية
ايمان: داكشي لي كاين انا محتاجاه الييوم
_ او بشحال !
500اورو
لمرة شهقاات وقالت: ويلي على 500 اختي غليتي بزااف
وديان(قرصاتها)ها لي قلت
ايمان: وخة عطيه لياا
الفرحة ديال البيااعة هوا يقوليك الثمن والشاري مكيتشرطش اما العرووسة ومهاا بقا فييهم الحال والاخيرة شداتها البكيية …خصوصا ملي اختارت قفطان اخور ولقات الثمن غيتفركع
_ مدام راه الثوب جاي من الهند …والخيااطة بالاييد شوفي شتي هد الطرز كلوو مخدوم بلييد والعقيق شي حاجة كاليتي زوينة
_ ولكن راه الثمن طالع بزااف
خلات وديان كتقيس فغوب كحلة ومشات لعندهم وقالت :عجبك ؟
شافت فيها لبنت وقالت: زوين ولكن غلات عليناا بزااف … كيحسبو لي عايش فاوروبا راه كيطيح وينوض بلاورو
ايمان(بابتسامة ) عتابريه كادو منيي (هدرات مع البنت لي شادة القفطاان ) جمعييه لييها
الام متيقاتش كتسول بنتهاا وايمان مشات لاكيس تخلص الام تبعاتها بامتناع ولكن بقات مصرة تخلص وقالت: الله اكبر بييك ابنتي ويحفضك لميمتك
ايمان: دعي ليا معاها بالرحمة
_الله ارحمها ابنتيي شوفيي تقليد الله جي حضري لعرس
ايمان(ضحكات): مكرهتش اخالتي ولكن معنديش الوقت عندي خدمة كثيرة
البنت كتشوفييهاا وكتقول شايفاها فشي بلاصة ولكن متاكداتش
خلصاات وخدات التكشيطة مع اكسسواراتها فصاشية ديالو مداتو لشيفور ومشات هي و وديان كيدورو
تقدات وديان شنو تلبس ومشاو قصدو سونتر دو كوافير كبير فقلب المدينة …قادات مكياج بارد حيا ملامحها الشهبيين … حلقات جوهرية فودنهاا شعرهاا بوكلي وصبغات ظفارها ورجعو لاوطيل كان مشا الحال دخلو كيلبسو
**
الوقت كيدووز وكريس واقف فقاعة كبيرة صحافة عربية و اجنبية كيوجدو فكاميراتهم الدنيا عامرة برجال كباار ونسائهم ومعجبيين كيتقداو الكتب باللغتين بجوج وكيتسناو الدور لتوقييع لي غيكون ورا الندوة الصحفية …فرقة موسيقية فالجنب كلهم بلباس اسود
تقدم شخص من ملامح وجهو اتعرفو عربي ولكن تكلم بالانجليزية : ضيفتك تعطلات
شاف فساعتو واشار لييه ب يتسنا شوية
الاضواء خافتة فالقاعة المزينة بلوروود ولكراسة كل واحد بعيد على لاخر بمسافة ..المشروبات كيتفرقو كل مرة على الحضور
بدات الندوة الصحفية حيت كلشي تجمع كتبان ليه وديان داخلة مبتاسمة قربات ليه وقال: تعطلتوو
وديان: جيناا
سمعو صوت طالون جاي وكيقرب لباب القاعة كلشي مترقب الضيفة لي الكل كيتسناها باش ييداو سهرتهم
صندالة عالية محجرة فالأبيض وثوب ابييض مجرور وراهاا لحجر لمفرق فتوب كيبري مع اضواء القااعة واحد من الصحاافة تبسسم وهوا كيشووف التكشيطة المغربية كتمشىى جيهتهم بلا ميشعر هز لكاميراا وخدا صورة ضرب جمالها بلفلااش حتى تقلبات جيهتوو ولحلقات كيلعبو فودنيها …. فاتنة والتكشيطة تخيطات على جسمهاا وتفاصيلهاا الرقيقة خلات لكل يحل فمو فيهاا وفزينتها ولفلاش كيضرب فيها مرة مرة وهي حاسة براسها ” حمامة واميرة السهرة “
“ارفعي راسك انت مغربية”
كلمة جاتهاا من احد الصحاافة ،تبسمات بلا شعور قبل متهبط دريجات هزات بصبيعاتها القفطان بكل رقي لقات ايد كريس كتسناها شداتها بلطافة والكل كيتسنا تقديم هد التحفة لي قدامو كلشي عندو فضول يعرف شكون هي …شد لميكرو قربو لفمو وقال بالانجليزية: كنقدم لكم ..الحمامة البيضااء الراعي الرسمي لكتابيي
جاها صوت شاب من بين الصحافة وقال: نتي مغربية ؟
ايمان:مغربية طبعاا
-تحكي عربي!
ايمان: اكيد
ولات المترجمة ديال كريس فاللقاء لي كان تقريبا نصهم لبنانين وعرب بصفة عامة اي واحد مهتم بالكتب كيكون حاضر وفمجالات متعددة
بدات فقرة لي كيتسناوها المعجبين وهي ياخدو الصور ويسنييو على الكتااب …
كانت غادية جهة وديان لطبلة توقفها شاب وقال:السلام
ايمان(تبسمات ليه)وعليكم السلاام
مد ليها ايدو :عبد الصمد …الصراحة صدمتيني تكوني مغربية عمرها طاحت فبالي
ايمان:متشرفين ..علاش زعمة
_معرفتش ههه متبعك فانسطاا معمرك قلتيها
ايمان:عاد جابتها الوقت
_ممكن صورة !
ايمان:وخة
فعلا خدا صورة ليهم وقال: عندي باج انستااغرام وباج يوتوب كندير ريفيو على الكتب باش ياخد لواحد فكرة قبل ميشري
ايمان:بصح عطيني لاشين ديالك
بفرحة جبد تيليفونو وراها لاشين يوتوب وانستاا ..رسلات لييه انفيت
ايمان:نتاا عنديي
_من زماان
ايمان:محسابش ليا عندي المغاربة ههه
_المغاربة فينما مشيتي ضروري يكونو
_صدفة سعييدة …واش سميتك بيانكا نيت ؟
ايمان:اسم الشهرة فقط …سمحلياا خاصني نمشيي
توجهات لجيهة وديان لاخيرة كتصفق وقالت:ميمكنش كيفاش كلشي تبهض فييك والصحاافة ياختي
ايمان (تبسمات كتشوف فالاجواء ) داكشي كلااص
وديان:صبري نمشي يوقع لياا ههه
مشات خلاتها فالطبلة كتلعب بلحلقة متكية عليها هزات قرعة تاع لما شربات حتى بان ليهاا رجل سيتيني او اكتر جاي جيهتهاا بشعر ابيض وملابس رسمية
_مرحباا
تبسمات ايمان وقالت:مرحباا
_ممكن نتكلم شوي
حركات راسها بااه وقال:اناا محمد *** اسمي ما دكرك بشيي !
ايمان: لاا ! كنعرفك !
ضحك ورد عليها:معقوول فنانة في مجال الفن مابتعرف منتجيين
ايمان:الصراحة لاا
محمد:انا منتج لبناني وكاتب الحان … في كثير فنانين كتبت وانتجت لهن
ايمان(تبسمات ) ماعندي فكرة صراحة شوو الفنانين لي كتبت ليهم
محمد:كثيير … كتبي اسمي ع ݣوݣل احسن ،هيدا مش موضوعي لا ليووم انا موضوعي اشي تانيي يا حمامتنا البيضاا …ممكن اسمع صوتك عربي
ايمان:ليش !
محمد(بابتسامة )بلييز (بلطافة)هيدا طلب معجب ماتردي لي ياه اكييد
ايمان(شدها الضحك ) شنو اغني
محمد؛هههه اتكلمي مغربي افهمو …تحبي شو فالاغاني العربية
ايمان:بزااف
محمد :لو قلت بدياكي تغني ل لفنانة ماجدة الرومي …تعرفي اغانيهاا
تبسماات كتحرك راسهاا :ماشي كلهم ولكن اقربهم لقلبي
محمد: لكان هيك …اتفضلي (اشار ليها للمنصة فين كاينة الفرقة الموسيقية )
ايمان(خرجو عينيهاا ) قدام الكل !
محمد: تفضلي (مد ليها ايدو) لا تخافي صوتك قد كلشي
عطاتو ايدهاا قلبهاا كيضرب شافت جيهة وديان وكريس لقاتو تبسم ليها وعطاها ؤكي بايدو
محسات حتى بداو التصفيقات ودورات راسها ليهم باحرااج كترتب ديك الاغنية لي لاصقة فبالهاا من زماان ملي كانت نعيمة كطلق اغاني ماجدة الرومي فلكوزينة وكتغني معاها
طلعات دريجات ومعاها محمد شد لميكرو وقال: مرحبا فيكن اليوم لتوقيع كتااب رفيقي ونفس الوقت هيداا حفل خيريي لاطفالنا صغار …نتشرف كثير بحضوركن ومساهمتكن معنا ..ف الييوم معاناا حمامة الموسيقى بيانكاا بس هالمرة راح تغني بلعربيي … ياله نسمع جوهر الصووت
ايمان(شدات لميكرو)تنكيو
هبط تحت تصفيقات وهي بقات حايرة مشات عند الفرقة عطاتهم اسم الاغنية و وافقو فلبلاصة
*ما حدا بيعبي مطرحك بقلبي
كيف لك قلبي تجافي الحبك هالمحبه
ما حدا بيعبي مطرحك بقلبي
خبرني يا حبي .. خبرني يا حبي ..
حبك انت وجاى .. حبك انت ورايح
بحبك يا هناى .. بكل المطارح
اتطلع بعينى .. اتطلع بعد شوى
عيونى ما بتخبي .. عيونى ما بتخبي ..
و ما حدا بيعبي .. مطرحك بقلبي
عيونى ما بتخبي .. عيونى ما بتخبي ..
القصة مش جديدة .. شغلت بالى وبالك
و بتسأل شو بتريدى ..ليش ما بتسأل حالك
فى علمي اللى بيحبوا .. ما يقدروا يخبوا
شو القصة يا قلبي .. شو القصة يا قلبي
ما حدا بيعبي .. مطرحك بقلبي
شو القصة يا قلبي .. شو القصة يا قلبي ..
#ماجدة_الرومي
*
غنات باحساس عالي كلماتها حساتهم موجهيين لحبيب القلب ليي معرفاتو فين حاطاه الدنياا …عينيهاا كيدورو على الناس لي كانو متعيين ب اغنيتهاا
حسات بالاغنية خرجات كلها مشااعر وفرحات لي تعطاتها الفرصة لي بغات و غنات بلعربية لي توحشااتهاا من اياام كتغني الرااي مع لكليكة ديالهاا …
تحت تصفيقاتهم هبطات لقات قدامهاا محمد واقف بابتسامة وقال:شو ها الصووت بجنن …لو حطولي لصوتك عربي وايطالي بختاري عربي …لانو صوتك جوهري حراام يضييع ومنستمتع فييه باغاني هيك عربية …تعرفي شوو
ايمان:نعم
محمد: في مرة غنيتي فايطالياا كان عازمني كريس لعندو وسمعت صوتك فعلا جميل بس بالعربي اكتر …حاولت اتواصل مع مدير اعمالك ع شي عمل عربي بس رفض
ايمان:يوسف !! معنديش فكرة
محمد:اسمعيني منييح بيانكاا …صوتك قوي مش لا لغة وحدة …انتي صوتك جوهريي بيغني اي شكل واي لغة (جبد بطاقتوو مدها ليها )هيدي بطاقتي …وانا مستعد كثير اتبنى صوتك قبل ما اعتزل الفن وارتاح …راح كون ف انتضار اتصالك وجيتك ل لبنان كثير …بلييز فكري منييح هيدا قرار مصيري لا الك
شدات البطاقة من عندو بقات كتشوفيها هزات عينيها فكريس و وديان لقاتهم جنب لباب كيهدرو وعينيهم على الباب … شافوها جاية وتبسمو ليهاا
ايمان:شنو كديرو هنا كتسناو شي حد ؟
وديان:شكون غنتسنااو هههه
ايمان:كريس واش كتعرفو
كريس”تبسم “: كنعرفو وجا اليوم خصيصا باش يسمع صوتك و يقتانع
وديان:بشنو يقتاانع ؟
كريس: هدا من اكبر المنتجيين فعالم الفنانين بزاف واستاد موسيقي عندو مدرسة الموسقى ف امريكا ولبنان
جبدات تيليفونها دارت اسمو فروشيرش وطلع ليها مصور مع بزاف لفنانة معرووفيين منهم مغاربة وبزاف الدول
ايمان(لوديان)قالياا نتبنى صوتك !
وديان:وشنو قلتي ليه
ايمان:مجاوبتش ..و يوسف
كريس: يوسف غتكوني ناجحة تحت شروطو هوا وبنجاحه هوا …بيانكاا …جا الوقت باش الحمامة طير
وديان:خودي وقتك (رجعات ليها تيليفونها )فرصة بحال هادي ومنتج كبير بحال هدا مستحييل تعوضيها اصاحبتي …يوسف شكون كيعرفو غير الزون لي عايش فيهاا والريستو ولاوطيلات كيعرف منتج واحد كيقسم معاه ربااح وغيعطيك نتيي شوية باش يسكتك …فكري مزياان من ديما بغيتي الفرصة تغني بلغتك ودابا جاتك الفرصة …
ايمان:نفكر ونرد علييه
كريس: مغتندمييش كناكد ليك ..بلاصتك مبقاتش مع يوسف وتغني فالريستوو صوتك اكبر من هدشي تيقي بياا
دخلات فدوامة التفكيير …وصلات 9 تاع الليل وكلشي تفرق وصلهم الشيفور حتى لاوطيل ومشاا مخليهم كيراجعو فلحفل كيفاش داز نشطوو وضحكو وفرحوو
دخلوو لشومبر بدلو حوايجهم وكلسوو وصل ايمان مساج من “sam”
دخلات لقات المساج بلعربية وتبسمات
_السلام علييكم انا عبد الصمد نتمنا تكوني عقلتي علياا …خديت لييك صور وفيدواات درت ليهم لمونتاح بتقنية عالية نتمنا تقبليي علييهم …ونتمنا تعملي ليا طاݣ وبارطاج عطيني غير جيمايل ديالك نسيفطهم ليك باش يطلعو بكاليتي مزيانة
جاوبات ب ؤك وعطاتو ليه فلبلاصة وصلوها تصاور
ايمان:ودياان اجي تشووفي
دخلات لاخيرة من لبالكون كلسات حداها كتوريها فلفيديو بمونطاج زويين لدخلة ديالهاا باغنية الدوزي “انا مغرابي”وحتى الاغنية وصوتهاا واضح وتصااور لوقفتهاا ولتكشيطة
وديان؛واااعر حطييه
ايمتن(عضات على فمها ) متحمسة
وديان:ديري لكونط بيبلييك وتشوفي طلعة لي غيطلع
دارت شنو قالت رجعاتو بيبلييك فيه جوج تاع لمليون ونص …حطات لڤيديو كيف رسلو ليهاا عبد الصمد وحطات حتى لكونط ديالو لتحت كتشكرو وختماتهاا ب ” ارفعي راسك انت مغربية 🇲🇦* القفطان مغربي …وانا مغربية 🇲🇦
كتباتها بالعربية و الانجليزية لتحت باش لي مافهم يفهم
حسات براسهاا فرحاانة انها حطات اصلها وجدورهاا وعلم بلادها من بعد ربع سنين عارفة غتكون صدمة لمتتبعيين ديالهاا
كمية التعالييق ميمكنش واكثرهم كان العلم المغربي فالتعاليق والاجانب كلشيي كيبين صدمتو فالتعالييق
ايمان:هههههه ناري هد المغاربة فيين كانو اصااحبتي
وديان: بلااتيي تشوفي طوندونص غدا ههه
بقاو كالسين جهد ساعة من تعليق لتعلييق دخلات وديان لفيس لقات البنات ف لكروبات فصدمو
“ملي بدات وانا كنسمع ليها كان كيحسابنيي طاليانية حتى كنتصدم بلي مغربية …لبنات وصلنا العالمية المغاربة فينما مشيتي *
لكراش العشران لي بغيتها دير ليا الوراق صدقات مغربية*
باينة غيكون باها ولا مهاا نصرانيي معمرها هضرات بلعربية من نهار بداات
” لبنات واش هاد بيانكا ماشي هي هاديي لي كانت كتغني مع ديك لفرقة فيوتوب …شوفو واش هياا اخر فيديو تحط فديك القناة شي 5 سنين هادي “
كان الرد فالتعاليق :يمكن غير كتشبه ليهاا
“والله حتى هي ولكن تبدلااات الفلووس كتزين
وديان:واش بصح هادي نتي ؟
وراتها لبووسط وشهقات ايمان: نااري كيدارو طاحو علييه
وديان:ماعمرك قلتي لياا كنتي كتغني فيوتوب
ايمان:تانتي فاياام البااك هههه كل كوڤر كنشد فيه 500 درهم هههه معرفت فيين تلاو دراري الصراحة دوزت معاهم ايام زوينة
وديان:لبلاد لي مشيتي ليهاا تحلي قناة ههههه دابا العقبة لبنان
ايمان: وزعمة تصدق
وديان:انا بغيتك تفكي غير من الغناا فالريستو اصاحبتي نتي ديال الكبيير
ايمان:ايكون خيير
كلسات وديان فبلاصتها كتشوف فايمان ساهية وقالت:فرحانة !
ايمان(شافت فيها وتبسمات ) ممم
حركات وديان راسها وسكتات حتى كتبان لييها ايمان كتزومي على صورة شاب فتيليفونهاا قربات ليها وقالت: مبغيتيش تمسحي تصاورو علييك
ايمان: منيتك …بقات فتصاور بقات فالقلب
رجعات لبلاصتهاا كترمش وتشووف حتى نطقات ايمان بضعف:توحشتو والله
وديان بقات مدة ساكتة وقالت:ايماان بغيت نقوليك شي حاجة
ايمان(حطات التيليفون وتقابلات معاها ) قولي (شافتها كدور فعينيها )وديان كتخلعيني هكا فراسك
وديان:حيت بغيت نقوليك شي حاجة وخفت يبقا فييك الحال
ايمان(تنهداات بحسرة)واش منيتك ههه انا عارفة اي فرحة كتهرس فالنص غير دويي
وديان: مكنتش بغيت نقولها ليك …ولكن (تنهدات) تعرفي حسن
ايمان:وديااان دويي اصااحبتي
وديان:كريس(جات كلسات حداها شدات ايدهاا ) كريس قالياا بليي (تنهدات)بلي شاف حذيفة …وطلبو باش يجي الحفلة ولكن مجاش
حسات بلسانها تقال فديك اللحظة مقدراتش طلع حتى النفس عينيهاا عمرو بدمووع وضببو عليها الشوفة وقالت بتوتر:ش شش …(طاحو دموعها)شافوو …متاكدة
حركات وديان راسها بااه وقالت: اه شافو يوماين هادي
وقفات قافزة بحال شي حد قرصها سدات فمها بايدها من الصدمة وعينيهاا كيدمعوو قلبهاا حساتو غيخرج من بلاصتو معرفاتش شنوو تقوول
ايمان:وعلاش مجااش (كتبكي ) علااش
وديان(باسف)معرفتش
ايمان(بضعف)بغييت نشووفوو اودياان هءهءهء بغيت غير نشوفوو توحشتو بزااف
وديان: ايمان راه كون بغا يشوفك كان غيجيي يشوفك عارفك كاينة هنا وعاارف فين غتكووني …شنو لي غيخليه ميجيش
ايمان:يقدر يكون جاا ودخل ومشفناهش
وديان(تنهدات كتمسح ليها دموعهاا )مجاااش ، ومقربش القاعة حتى ب 50 متر …كريس وصا الشيفور لي كان معااه غير الى شافو يعلموو …مشافوهش نهائياا والقاعة ميدخلش ليها بلا ميعطيهم البيي …يعني مجاش
ايمان(قلبها ضرهاا كتمسح دموعها بلكم ) معنديش مشكيل انا بغييت نشوفوو بغيت غير نعرف كيفاش كمل من ورااياا مطالبة منو والوو ا وديان ولكن كيستاهل منيي نطلب منو السماحة …بغيتو غير يرجع لحياتي وخة غير صديق معنيدش مشكييلة والله (بدموع)المهيم يكون فحياتي
ناضت هزات التيليفون لقات يوسف كيصوني قطعات عليه ودوزات النمرة لكريس لي جاوبها وقال بصوت خاافت: مكنتش باغيك تعررفيي ..كنت بغيت يكون مفاجأة لييك..ولكن هوا قرر يبقا بعيد علييك
ايمات(مسحات عينيهاا وشفايفها كيترعدو ) مكيهمش …عطيني العنوان ديالوو …غنمشي نشوفوو
ايمان(مسحات دموعهاا )بغييت العنوان ديالوو …خاصني نشوفوو
كريس:غدا نسيفط ليك الشيفور يوصلك لعندو
ايمان:لا دااباا بغيت نشوفو داباا منقدرش نصبر حتى الغدا عفااك كريس
كريس:ايمان …مشا الحال داباا … غنحجز ليك نتي و ودان فالريستوو فاش كااين وغتشوفييه قدامك
ايمان:عطيني غير سمية الريستوو
كريس:*** …غير صبري غدا تكوني مرتااحة وتمشي تشوفييه الى كان هدشي غينفعك
قطعات معاه وكلسات وديان دخلات لكوكل كاتبة اسم الريستو طلعات ليها فلماپس بعيد بنص ساعة عليهم وسط المدينة ..الكل عاطيها خمس نجوم …بخاصية اكل الشاف
الحجز كيكون فقط على طبالي لي ضايرين بلكوزينة لي كتشوفهم كيطيبو لييك ونتا كالس كتسنا الطبق ديالك …كيفصلهم كونطوار
من جهة التانية كاينين كراسة على لكونطوار لناس لي بغاو ياكلو من الموني اليومي ماشي هوما لي كيختارو ولكن الطباخ لي كيعطيهم شنو غيوجد كتكون زايدة فالثمن على باقي طبالي لي تماا كيكون “vip”
شافت تصاور ديال الاكل ديال الاطباق وكيفاش كيخدمو
دارت بوز لفيديو وقالت:ايديه هاادو
وديان::ايمان
ايمان(جبدات التيليفون ) والله حتى هوا (مسحات عينيها) شووفيي (برجاء)ياله نمشييو هاهواما كاتبيين هناا مزال خداميين
وديان:ايمان غتمشي عندو هكا عينييك حمريين وباكية ومعرت شنوو ….خلي حتى الغدا دخل معاك راك غتشوفيه متمشيش هكا…نخاف تشدك شي كرييز تانيي غير سمعي لياا عفااك
ايمان:شنو غيصبرني تالغدا
وديان:لي صبرك علييه هد ربع سنين كلها
*
هي مكتنعسش وزادت كملات داباا ..كتكا شوية وتنووض لبالكون ودخل لصور ديال الريستو يقدر يبان ليها فشي بلاصة والوو مكاينش فصور لي حاطيين …الوحدة ..وجوج ..والربعة وهي مزال منعسات كتحل وديان عينيهاا كتبان ليها كالسة فلبالكون شادة التيليفون …ندمات لي دكرات ليها هدشي بليل
كتحسب دقايق والثواني لي كيبانو ليها طوال …
فاقت وديان صباح شافت الساعة لقات 8 تاع صباح شافت بلاصت ايمان ..الغطا ماتحركش بمعنى مناعسااش فبلاصتها تقلبات جيهة لبالكون كتلقاها كتمشي وتجي مربعة ايد وكتاكل فظفارها سااهية …الجو مغيم والرييح كيحرك فشعرها على وجهها وهي مامسوقاش مع حلات وديان الباب كتلقا الريح كيطير والبرد نيت جراتها وسدات لبالكون
وديان:واش نتي حمقة خارجة هكا فهد لجو
ايمان : صباح الخير
وديان:منعستييش !
شافت فييهاا وتنهدات :نعااس ولا قل منو مكاين فحياتيي
وديان:ايماا راك غتمرضي اصااحبتي
ايمان:وانا اصلا مريضة واش عاااد تء غنصوني ل كريس
وديان: راه ريستوو ا ايماان وراه قرينا البارح ديك الخدمة ديال الشاف كتكون عند الغدا والعشاا فقط صبري دابا غير صباح
وخة هكاك صونات لكريس مجاوبهاش حطات التيليفون معصبة
وديان(كترطب فيها)اجي ابب نفطروو ونطلعو نختارو شنو تلبسي باش يشوفك ينسااا راسوو ههه جاوبي بعدا غير داك يوسف برزط ليا راسي من لبارح هوا سر سر
لبسو حوايجهم وهبطو لاوطيل خداو لفطور من لبوفي مشكل ومنوع خدات عصير وكرواصة كتشرب وتنهد
صونا تليفونها هزاتو قافزة حتى كتلقاا يوسف ساطت معصبة
وديان: جاوبيه
ايمان: غيبقا عليا تاني علاش لحتي الفيديو والعصااب
وديان: جاوبي الزمر
تنهدات وجاوبات: الوو
يوسف:من الادب يصوني ليك الواحد تجاوبي اولا ؟
ايمان:مكنتش مسالية وزيد راني فعطلة لا
يوسف: عطلة مكيغنيوش فيهاا النااس وزايداها خالقة لبلباالة براك مغرابية
ايمان: مالي كدبت ولا وزايدون غنيت اغنية وحدة عادي شنو فيها
يوسف (بهدوء)مقلت والو …مزيان امتا راجعة
ايمان: باقة سيمانة
يوسف: هد السيمانة غتخرج علييا بلملااين ا بيانكاا …كلشي باغي غير صوتك شنو ندير داباا
ايمان: خاصني الراحة ا يوسف …خاصني نقطع
قطعات عليه وقالت: شتو رطب
وديان: كيساايس …شوفي شنوو محطوط
شدات من عندها التيليفون شافت صورتها مع المنتج اللبنان منشورة كاتب عليها …كان لي الشرف اللقاء بإبنة المغرب الحبيب
ايمان: واش هادي لباج ديالوو فانسطاا
وديان: طحت عليها غير صدفة …جاوبييه
دخلات لانسطا حتى كيتحلو عينيها وقالت: وديان لكونط وصل 3 الملييون
وديان(صفقات كضحك )ههههه الله اعز المغاربة هههههه نشوفوو الاغنية فين وصلاات ؟
ايمان: غير خليها بلاتيي
سكتو كيفطرو تنهدات ايمان وقالت: شنو فنضرك غتكون ردة الفعل ديالو ملي يشوفني …غيفرح
وديان: عندو تيتيزة مشهوورة كتبغييه مالو ميفرح
ايمان: معمري توحشت شي حد قدو اوديان
وديان: كتبغييه لهد الدرجة ابب
ايمان: كنموت علييه
وديان(تبسمات )اوى شدي فييه بسنانك هههه الصراحة زويين ومسراار بزااف تواتيتو قهيوة وحليب تولدي ليا شي بوكووص دايزو لكلام
ضحكات ايماان حتى جاها اتصال من كريس ردات وقلبها كيضرب :وي كريس
كريس: حجزت ليكم فلعشية
ايمان: وعلاش مخديتيش الغدا
كريس: بغيتي طبلة عادية ؟ ولا تكلسي ونتي كتشوفي فيه ؟
ايمان: حداه اكريس
كريس: ادا صبريي حتى العشية هوا لي غيكون اما عند الغدا تيكون واحد اخور الشيفور شوية وغيجي عندكم يبقا معاك حتى يوصلكم بليل
حطات التيليفون وقالت: حتى العشية بزااف
وديان: منها نيت تهدنيي وتفكريي ف لهدرة لي قالييك داك اللبناني …نخرجو ؟
ايمان: خليها تالغدا (تنهدات)مقادرة نركز فوالو حالياا والله
طلعو لشومبر كانو بغاو يهبطو لبيسين على برا ولكن شتاا بدات كطيح والجو برد مشاو لقاعة لتحت فين كان بيسين اخور مغطي لقاوه خاوي تقريبا غير شي بنات ..حطات لكاش وبقات بلمايو كحل جاي مع بيااضهاا وشعرها المموج متناسق ..كتحاول متفكرش ولكن والو دماغها فيه غير امتا تشوف حذيفة
*
واقفة قدام لمراية بسروال توب لارج كرراميل مع بودي بالكمام فيه تدرجات من التيركوا والكراميل لاصق خشاتو فالسروال ..لبسات سبرديلة عاليية رشات ريحتها المعتادة اكسسوارات خفيفة يومية ديالهاا مكياج خفيف مباينش …عتامدات تكون طبيعيية كيف ولفها
تعمدات اليوم تكون “ايمان ” ماشي “بيانكا”
وديان خرجات من دوش كدير ساعتتهاا لقاتها ساهية قدام المراية وقالت: علاش ملبستييش لكسوة !
ايمان:هكا مزياان (طلقات شعرها مصاايب ) مشيناا !
عودات رشاات ريحة ودارتها فصاكهاا ..هزات وديان الاخيرة الصاك وتبعاتهاا…لقاو الجو فازݣ بشتاا …طلعو لطموبيل هازة سروال ليقيسو لما حتى طلعوو حلات الزاج مع تحركات الطموبيل كتشم ريحت شتاا والاجواء الليلية ديال برشلونة الساحرة …تبسمات لطيفو كترمش كتفكر كيفاش غيكون اللقااء داز وقت طويل …شنو تبدل فييه كيفاش ولا …شنو عااش شنو دوز …ربع سنين مدة طويييلة ماشي ساهلة ددوز
دارت سطوري بتيليفونها لاجواء حيت اليوم محطات والوو ظلات غابرة على سطوريات هد لمرة طفات التيلي ورجعاتو لصاك كتفرك فايديها بتوتر و وديان مراقباهاا
خايفة الحماس لي فيهاا يتقلب ليهاا ويضيع
بعد نصف ساعة وقف الشيفور ونطق بالانجليزية : وصلناا …المطعم لي قبالتكم …
هزات عينيهاا وقلبها كيضرب بغا يهبط يحل ليهم ولكن حلو بوحدهم هبطات ايماان كتسرط فريقها مزيرة على صاكهاا تجراتهاا وديان وقالت: متبينيش بلي ميتة علييه …توكضي وخة
جراتهاا غادين وكيقربو لداك المطعم كيبانو الضواو شاعليين فييه مكانش كبير بزاف ولكن عاامر وكاين لي واقف على برا
كانت فالاستقبال سيدة بلباس رسمي تبسمات ليهم وقالت:هولااا
تكلمات ايمان بتوتر :عندنا حجز
_اااه تفصلو معاياا شنو الاسم
ايمان: بيانكاا
قلبات لاليست فايدهاا وقالت :مرحباا تفضلوو
ماحدهم غاديين ودقات قلبهاا كيدير زدااف زدااف …هزات عينيهاا حاسة بكلشي كيسمع قلبهاا لي كيضرب ولات حاسة براسهاا غادية بالعرض البطييئ ولا يمكن راجعة باللور حيت مبقاتش قادرة تزييد كان فاخر الروااق كولواار وتما كاين كونطوار دااار كلوو جوج كراسة فطبلة كيبانو ليهاا فلكوزينة بلبااس ابيض وغطاء الرأس كتقول فين هواا لي شافتو طويل ومكضر كتقلب عينيها لجيهتوو
_تفضلوو مرحباا …عندكم زهر ليووم الاكل بحري من اشهى الاطباق ليي كيحماقو عليها النااس …وختاريتو الطبلة
لقريبة لشااف (بمزاح)غيتهلا فيكن …شهية طيبة مسبقا
تبسمو ليهاا وكلسوو
وديان(كتشوف فطبق الناس لي بعاد عليها شوية ) كيبان كيشهي داكشي …
ايمانكدور فعينيهاا )مكايينش
وديان:صبريي (تبسمات لبنت لي جات عندهم من ورا لكونطوار ب بلوزة بيضة مكتوبة على جانب اللبسة ” zina”
تبسمات ليهم ونطقات بالاسبانية …تبغيو تشربوو شي حاجة قبل ؟
ايمان: نتي هي الشااف
_بابتساكة قالت: انا المسااعدة ديالوو
ايمان: يقدر يجي هواا وديك السااع نشوفوو شنو غنااكلو
شافت فيها البنت باستغراب : نشوف …
مشات والاخيرة كتربت على الطبلة وكتلعب بقريعات صغار ديال الملح والابزار محطوطين حداها تيطحات الملحة
وديان : وااا الشووهة
هبطات كتجمع لقاتها تحلات هزات غير لي فيها وسداتها وكتجمع لملحة لي طاحت تماا بكلينيكس تحت الطبلة حتى جاتها ركلة من وديان ياله بغات تهز راسها سمعات صوتو المميز بالاسبانية ولكنتوو السلسة وبحة صوتو لي ميمكنش تخفا عليها وسط الاف الاصواات
_Buenas noches señora (مساء الخير مدام)
هزات راسهاا ببطئ محدهاا كدور وجهها عندوو محدوو كيوجه نظرو ليهاا …حتى تلاقاو عينييهم بجوج فلحظة صمت حتى التنفس حبسااتوو من صدمتهاا بيييه ..ربع سنين كانت شوفتها ليه غير فتصااور دابا كلوو قداامهاا …بلبااس ابييض مكتوب فجنب شاف امين ايديه دايرهم قداموو واقف عينيه فعينيهاا … لحية خفيفة زاد غلاض على كيف كان…تبدلو ملامح وجهوو شوية او بالاحرى فعينيها زاد زييان ..نظارات طبية بكادر اسود على عينيه …نايڤية سوداء على شعرو
مقدراتش حتى توقف وتنطق بشي كلمة …تبسم ليهاا بلطف وقال: ايمان …(تنهد) عاش من شاافك
*
ثمة أمر لا تستطيع أن تجتازه بسهولة ، ثمة شعور لا يجديه التغاضي ،ثمة عتاب طويل في صدرك ،كتمانه صعب وإفصاح إهانة ، ثمة أشياء لا تبدو بتلك البساطة.
للراحلين رسائل امتزجت أحرفها مابين فقد واشتياق مابين عتاب وحنين وآمنيه لقاء .
*
تنهيدتو وشوفتو ليهاا خلااو عينيهاا يبريو ببريق الدموع لي حاولات ما امكن ميطيحووش …داركات راسهاا بابتساامة وسرطات ريقها بحال شي حاجة واحلة ليها فلحلق خلات ريقها ينزل بصعوبة من صدمة الوضع
كترمش بزاف باش تمنع الدموع ولكن حمرة عينيها فضحاتها وصوتها لي خرج رااجف وقالت :حذيفة
تبسمات وديان وشافت فييه وقالت السلام بخير
بغات تهز ايدها تحسات بايمان شداتها تحت الطبلة وشافت فيهاا …هوا مامدش ايديه وهي كذلك معطاتوش ايدها غير مصافحة مصافحوش بعضياتهم بقات غير كتشووف
حذيفة: غتسمحو لياا داباا الخدمة كثيرة …مرحبا بكم مرة اخرى …تشربو شي حاجة !
ايمان: لا شكرا
ميل راسوو ليهاا وانساحبات معاه الابتساامة لي كانت فوجهو وقف عاطيهم بجنب بعيد عليهم بخطوات قلال
وديان: صافي !
قالتها بدهشة من برودة اللقاء ردت ايمان وعينيها مهبطاهم كتلعب بلخاتم فايدها: صافي
وديان: مسلمش علييك حتى السلاام ا ايمان …نوضي ياله فحاالك
ايمان(طاحت ديك الدمعة اليتيمة على خدها ومسحاتها دغيا بابتساامة لطيفة ): ملي مامدش ايدوو لياا عرفت راسي مبقيتش فحياتوو
وديان: مكيسلمش ؟
ايمان: كيسلم على العائلة ولكن الغريب لاا (كتلعب فالطبلة ومسحات ديك النقطة تاع الدموع لي طاحت ) وليت غريبة علييه
وديان؛نوضي ياله نمشييو …الف واحد يتمناتك بضحكة وحدة تجيبي سيدو وهوا دافع كبيير (بغات تهز الصاك)نووضي
شافت فيها برجاء: لا مغنمشيش خاصني نهدر معااه
سكتات ملقات متقول مزال بقاو بجوج ساكتيين كيشووفو فييه كيقطع ويشحر عاطيهم بجنب كايوجد فطباسل حداه المساعدة ديالو
حطات لي فورشيط ولماس وطابيي حداهم تبسمات ليهم ونقات بلعربية: مرحبا ب بنات البلااد
وديان: مغسيي حبيية
تبسمات ليها ايمان جهد باش تهدر مبقااش حطات طبسيل الاول عبارة عن مقدمة الاكل سوب غويال بكروفيت والفطر والشعرية
سرحو السربيتات على رجلهم هزات ايمان لمعلقة كتشرب فالسم
وديان(حمقاتهاا) واعرة ..عجباتك
ايمان: ممم
وديان: صافي بدلت الرأي نكلسو نتعشااو ههه (قرصاتها)ضحكي اصاحبتيي غيشوفك هكا غيضسر
تبسمات ليهاا وهزات عينيها فييه لقاتو كيشرح للمساعدة على شي حااجة داير ليݣات سوداء
شربات شوية اما وديان عجباتها ضربات نصها غير حشمات وبروتوكول الماكلة البرجوازية مضربش القااع
هزات زينة زلايف وحط ليهم حذيفة الطبق الرئيسي طبق من الحوت مشكل مع صوص فجنااب وقال: بصحة
ايمان(هزات عينيها فيه وهبطاتهم): شكرا
نقبات منوو فقط وبقات كتلعب بلفورشيط متبعة تحركاتو وكيفاش كيهدر مع زينة
وديان :دايرين هد الجرس ملي نسالييو نعيطو ليهم هههه داكشي تاع الملوك
هزات السربيتة مسحاات فمها وقالت:نخرجو !
وديان: لعار غير نكمل هدا ونووض
ايمان: ؤك …نمشي لحمام ونجي
وقفات مخنووقة حاطة ايدها على المعدة كتحس براسها عرقات وايدها رجعات لرجفة تااني سولات على الحمام كيدخلاات مشاات ردات كلشي ودنيها كيصفروو وحاسة بحال شي حد قاجهاا مقادراش تنفس …كتهبط لكول ما امكن ولكن مكاافييش رمات لما على عنقها شادة فلفابو بايدين كيرجفوو والعروق بانو فايديها البيضين وجهها ولا حمر…كطلع النفس وتخرجها مرعوودة
مسحات ايدها وجههاا تنفسات شوية وخرجات مزيرة على ايديها جات عينيهاا فعينو ملي دور راسو وهبطاتهم دغياا لقاتهم هزو طباسل وقالت: صافي
وديان(شافت فيها مطلعاها ومهبطاها ) باقة التحلية …كلسي
ايمان(كلسات مزيرة على ايدها تحت الطبلة كتربت برجلهاا بتوتر
وديان:شدك لپانييك ؟
ايمان(بابتسامة)انا بخير
حطات ليهم طباسل ديسير بطريفات لكيوي
حاولات تهز لمعلقة لقات ايدها كترجف وديان مراقباهاا وقالت: وكوولي
إيمان: مقدييتش
كلات وديان شوية وناضت هي الاخيرة لحمام …بان ليها وقف قبالتهاا وهزات عينيها فييه وقال: ايسطاس بيين
ايمان: بيين ݣراسياس
ياله بغا يهدر نطقات المساعدة من وراه
زينة: حذيفة دقيقة
تبسم لايمان وعطاها بالظهر من كثرة ما لبلاصة خنقاتها ولات باغة تخرج فاقرب وقت جبدات لكارط بونكير عند لاكيص بغات تخلص تلحقات عليهاا وديان …لقات البنت كتهدر فتيليفون قطعات وشافت فيهم :عشااكم مخلص …كنتسناوكم مرة اخرى
رمات عينيهاا وراها لحذيفة لقاتو عاد هبط راسوو …خرجات من تما تابعاها وديان ماوقفات حتى لحدا الطموبيل كتنهج حتى خرج الشيفوور معاه قرعة تاع لما مدها لودياان
_انسة واش نتي بخير
وديان:بخيير ..بخير (حضناتها )ياله نمشييو
ايمان(بامتنااع والهدرة كتخرج بزز )لااا لاا خاصني نهدر معااه
هزات معصمها كتشوف الساعة قرابة العشرة …شحال غيبقاو يتسنااو الله اعلم المهيم خاصها تخرج كلمة الاعتدار من فمهاا ديك الساع ترتاح
دازت ساعتين وهوما فطموبيل صوت السويگلاص فقط لي كيتسمع حيت كانت شتاا كتنقط مرة مرة ..كتسناه يخرج وعينيهاا مقابلة مع الريستو
ايمان: عنداك يكون شي باب اخور
_ضروري ا انسة كيكون باب خاص بالسلع ودخول الموضفيين
تهز قلبهاا وخرجات فديك شتاا كدور ب الريستو كتشوف واش خرجوو حتى تبعها الشيفور بلمظل وقال: رجعيي لطموبيل …انا غنراقب هد الباب
ايمان:الى خرج وقفوو
_كوني هانية
عطاتو المظلة ورجعات شعرها فازݣ …كلسات فلقداام وديان اللور كيتسنااو حتى بان ليهاا جااي قفزات كتر من قلبها وحلات الباب ..سمع الباب تحل وتقلب جيهة الصوت حتى كتباان لييه …لابس قبية خفيفة مع دجيبن ساعة فايدو وشعرو مهمل على طبيعتو اسود …معرفاتش فاش تركز شنو لي توحشات فيه كتر
هبط طروطوار بخطوة قاطع لعندها كان ناوي يكمي غير شافها رجع لباكية لجيبو وخلا ايديه فجياب وقرب لعندهاا
محدو كيقرب و رائحة عطرو الرجولية كدخل لأنفها
كتسناه يدير شي ردة فعل يبيين بلي فرح ملي شافها قابلها بشكل باارد بحال الى شافها غير الصبااح ..نظرتو تبدلات على كيف كاان مبقاش داك الشغف ليهاا
ايمان: لبااس ! اش خباارك
حذيفة(نظف صووتوو ميل راسو لجيهتهاا ونطق وعينيه كيدورو بدون تركيز عليهاا ) : الحمد لله ،نتي امورك مزياان !
ايمان:بخير (بابتسامة مصطنعة )متبدلتييش ههه
حذيفة(بجفااء ) ولكن نتي تبدلتيي ….معرفتكش كااع وافقاتك الطاليان ونااسهاا …سمعت بلي خرجتي اغنيتك …مبرووك
ايمان:الله ايبارك فييك …ونتاا شنو درتيي كملتيي داكشي لي بغيتي
حذيفة:انا غادي دقة دقة مزربانش (دوز لسانو على شفايفو) لي زربو ماتوو
ايمان(تنهدات)وقع سوء تفاهم بيناتنا اوو
حذيفة(قاطعهاا ) هد لهدرة دازت عليها سنين ا ايمان …انا نسييتهاا كاع
ايمان: ولكن بغيتك تسمح لياا مقصدتش ديك الهدرة بتاتا
حذيقة:غير رتاحيي يلالة المسامح كرييم
كتشوف فيه بخيبة امل كترمش فالارض وقلبهاا كيضرهاا كيفاش هد الانسان بين ليلة ونهار مبقااش ديالهاا …
نطق كاسر سكاتهم لي طول فعتمة الليل وقال: اوى …شنو كتعاودي …شنو الجديد
نطقات بدون تفكير عيات تسكت، عينيها فيهم عيااء وشغف للحب طفااتو فخطرة نطقات برجفة فصوتهاا كتشوفيه بانكسار : توحشتك …هدا هوا القديم …وهدا هوا جديد
بادلها بابتساامة لطيفة كأن ديك الكلمة محركات فييه والوو … عينيه كتحاول تفهم تغيرهم ملقات ولا تغيير مع كلمتها بحالاا قالتها لشخص غريب
رد عليها بجفااء بابتسامة خفيفة : يتوحشك الخير اختي
بعد صدمتها ضحكاات مربعة ايديها كتسرط فلقمعة والغصة وقالت: يمكن ديرونجيتك ملي جييت
حذيفة: مرحبا بيك فاي وقت معنديش مشكيل
هز عينو ل زينة لي جاية قاصداهم تقاد فلوقفة خرج ايدو حك نيفوو توقفات عليهم وقالت: مقلتيش لياا كتعرف المغنية ديالناا ههه (مدات ليها ايدهاا ) محسابنيش واش مغربية والله
سلمات عليها بابتساامة ولسانها تقيل على لكلاام
حذيفة: هادي ايمان لبنت لي قلت ليك جات معانا فالطرييق
زينة(بصدمة)ميمكنش ، ههه محسابش لياا والله ..المهيم فرصة سعييدة لي تلاقيتيت بييك (شافت ف حذيفة)مشيناا
حذيفة: غير سبقيني هاني جايي
زينة: وخة
تمشات خطوات قلال ورجعات ياله بغا يهدر قالت: عطيني السوارت نسبقك !
حذيفة:ممم!
زينة:سوااارت معندييش
حذيفة(كيقلب فجياابو حتى لقاهم خرجهم امام ايماان مكتوبة فلعلاقة ديالهم home) غير سبقيني انا جاي داباا
بحال شي حد طرشها ولا ضربها فظهرها بشي حاجة قااسحة ودقتها مسمومة…كتشوف فزينة شدات السوارت وضحكات وكتشوف فيه هوا …خافت تضعف فهاد اللحظة ورجعات بخطوة اللور
كانت هابطة فالطريق ومشافتش الطروطوار وراهاا تعكلات ملقات متشد جات طايحة وايدها تحردات بغا يشدها وبعدات ايدهاا
ايمان:اناا بخير تعكلت
خرجات وديان من طموبيل جااية لجيهتها:ايماان
وقفات وقالت:منعطلكش سمحلياا لديرونجيتك ..ب بسلامة
حذيفة: مكاين حتى ديرونج (تبسم ليهاا ) مرحبا فاي وقت
ايمان(بهدوء) ش شكرا
عطاتو بالظهر كتحاول تبقا قوية قبل مدخل لطموبيل ركبات اللور كتحس بصداع قوي فودنهاا مخلاها تسمع حتى صوت اخور ضاير بيهاا…سدات لباب وشافت فوديان كتسولها ولكن حاسة بصوتها مواصلهااش
تكاات على رجليها وعينيهاا محلولين بالصدمة معرفاتش امتا تحركات الطموبيل وشحال داز تاع الوقت
حلات وديان الزاج يدخل ليها شوية البرد …كتمسح على شعرهاا بلطف ومعارفاش شنو لي خلاها تقسح بهاد الطريقة
وصلو لاوطيل هزات صيكانهم بجوج وشداتها من كتافهاا بحال الصنم كتجرو وراهاا
طلعو لشومبر كلسات على السرير متحركاتش وديان فسرير المقابل كالسة قبالتهاا
وديان: دوي معاياا …قاليك شي كلمة جرحاتك ؟ مبغاش يسمح لييك …ايمان دويي معاياا
ايمان: تزوج …هاديك مرتوو
جات حداها عنقاتهاا كتواسيها وقالت: مامكتابش ا ايمان …صافي نسااي
حركات راسها بااه وتكات فبلاصتها بحوايجهاا ..حيدات ليها وديان سبرديلة وخلاتهاا طفات الضو وغطاتهاا ولكن عينيها مبغاوش يتسدوو …مقدراتش تقبل بليي الشخص الوحيد لي بغات من قلبهاا هي ولات عندو غير مااضي
مقادراش تيق بليي صافيي مبقات حتى حاجة غتجمعهم مزال
كتبكيي بصمت وكتقول كيفاش غنسااه ..كيفاش نمحبيه من قلبيي وهوا تحفر لدااخل بلاصة عمر شي حد وصلهاا
كيفاش غنكمل حيااتيي من ورا عاد الواقع ، كيفاش غنولف بليي كايعنق مرا خرا كينعس ويفيق مع مرا اخرا كيضحك مع مرا اخرى
تخنقو نيووفهاا بلبكا كاتهز كلها فلفرااش والشهقة ضاراها فقلبهاا
عانات وعانات ومزال كتعاااني ،كيبان ليها كلشي ظلام مبقا حتى نور خفيف يضويي حيياتهاا فقدات الامل بلي غيجي شي نهار وتكون فرحانة كيف النااس
شهقات شهقة مقدراتش تحبسهاا …تحساات بحضن وديان فالظلام من وراهاا كتقول: غير بكيي بكيي وخوي قلبك
بكااء قووي شهقاات بحال الطفلة وصووتهاا مبقاتش قادرة تحبسو كتبكيي لي عمرهاا بكاتوو كترعد وترجف بلببكا لمدة طويلة مقادرااش تحبس ديك النوبة وحاسة براسهاا فواحد الانهياار محساتش بيه من موت جداهاا
جاهاا الموضوع بحال شي مو_س عاود فتح جراحهاا ودكرياتها الكئيبة…
بقات جامدة فوضعيتها حتى حسات براسها فشلاات وسخنات بكترة البكا لي بكاات …بقاو غير الشهقات حتى نعساات جسمها كيتهز ويتحط مع شهقتهاا
مشات وديان لبلاصتهاا كتمسح دمووعها لي طاحو من حالة ايمان قدامها ..بقات رادة معاها لبال وكل مرة طل عليها حتى نعساات حتى هي
فاقت وديان كتااوب تقلبات جيهة ايمان لقاتها فايقة كتجبد لحوايج من لماريو وكترجعهم لشانطة…عينيها منفوخيين بدلات حوايجها بسورفيت ولبسات سبرديلتهاا …بقات فبلاصها مدة كتستوعب حتى بانت ليها كتسد فلباليزة وجمعات شعرها
قفزات وقالت: فين غادية الصباح هدا
بصوت بااح ردات عليها: غنرجع لطاليان قطعت مع 11
وديان: واش حماقيتي …فين غتمشي دوزي تكلسيي العطلة ديالك باقة ليها سيمانة
ايمان: خاصني نمشيي عفااك اوديان غير خليني
وديان: وصبري نمشي معااك
ايمان : وديان …كلسي اختي دوزي لفاكونص ديالك ورتاحيي …انا بغيت نبقا بوحدي
وديان: منقدرش نخليك تمشي فهاد لحالة
ايمان: دزت من ماكتر ماتخافيش علياا (بحرقة ) غادي نساا خاصني غير الوقت
وديان: ولكن فطري
ايمان: غنفطر فلمطار …رجعي تنعسي اوديان عفااك
وديان: صبري نلبس ونمشي معااك تالمطار
بدلات عليها وتبعاتهاا خرجو كان باقي لحال ياله تمنية ونص وصلو لمطار مع 9 شربات قهوة دايرة نظاراتها الشمسية هزات قرعة تاع الماا ساكتة مهدراتش كالسين فلكراسة كتسناا طيارتهاا وتنهد حتى سمعات النداء وناضت ودعات وديان
وديان: ياك بخيير (مسحات على كتافها )هدشي عادي دابا تنساايه
ايمان(حركات راسها بالايجاب)متشغليش بالك
وديان:ملي توصليي صوني لياا
حركات راسها بااه ومشات فلممر جسد بلا رووح …غير تابعة الناس وغادية…حتى لقات راسهاا فبلاصتهاا…معندها شغف لا تقرا ولا تشوف التلفون بغات غير تنعس وظلم عليهاا وحدتها لا غير
وصلات لايطالياا شدات طاكسي لدارهاا
دخلات جارة خيبتهاا الجديدة تزيدهاا على الخييباات وكانت هادي اقساهم عليهاا حطماتهاا وعصراات قلبها حتى نزف
سدات لبالكوين وكلسات فوق السرير ضامة رجليها عندها كتشوف فلكاسكيط لي معلقة حدا لمراية ودموعها هابطيين فصمت
التيليفون كيصوني حدا رجلها معندهاش ليه الجهد
عاملها بجفااء …عاملها بحالا شي قصة انتهت من حياتوو ..عاملها معاملة الغربااء ،كان عندها امل خفيف تحسن علاقتها معاه وترجعو لحياتها ولكن هوا نهار خرج من الطاليان حتى هي خرجها من قلبو …
**
دازت 4 ايام …ربع ايام دازت قااسحة عليها مقدراتش تقبل نهائيا شنو حساات وشنوو شافت وشنو ضرهاا
التليفون مسكتش من ليزابييل كتفات بمساج لوديان قبل يوماين فييه بلي وصلات لدارها وبغات ترتاح اماا يوسف كيصوني ويعاود
غبرات على السطوريات 5ايام هادي من اخر سطوري حطات ملي كانت غادية تشوفوو
دخلات فحالة معالم بيها غير الله ..كتشوف الاتصالات حتى مع صحاب لبرودويات لي كان مفرووض تحط ليهم اشهار لشي برودوي واخدااه …التزماتها فوق حالتها النفسيية
ناضت بملامح طاافية وعينين دابليين لي نعسااتهم غير بدواا كتكره راسها كلما فاقت وكترجع تشرب كينة وتنعسس
خدات دوش مرة مرة تكا على الحييط باقة فيها الدوخة تاع الكينة لي شرباات
مشات صايبات قهوة شرباتهاا شعلات الرينك لايت وجبدات المشطة برونشاتهاا فلبرييز دارت التيليفون فبلاصتو كيسجل كل مرة تسجل فيديو ترجع تمسحوو.. حتى عياات ودارت فيديو عادي رافقاتو باغنيتهاا …صورات سطوري تاني موجهة لكاميرا لمشطة كتشرح لشنو كتستعمل والمزاية ديالها بصوت هادئ كتبان غير ايدها كتحرك فوق لمشطة وكتوري ريوس لي كيجيو معاهاا
هكل دوزت نهار …باليزتها باقة هكاك عند الباب
صونا ليهاا يوسف من جديد تعصبات وجاوباتو:شنوو ايووسف شنو
يوسف: اجيي عندي داباا …راني عرفتك كاينة فدار اجي نهدرو
قطعات عليه وناضت لبسات دجين وقميجة وشعرها جمعاتو لفوق مدارت والو لوجهها هزات نظاراتها الشمسية عريضة وخرجات …ضربات فيها الشمس لي طول هد الايام مشافتهاا …لابسة فرجليها صندالة غادية كتجر فيهاا توصلات لريستو اول مدخلات تعرضو ليها جوج بنات خدات معاهم صور بابتسامة باهتة…ودخلات محاملاش راسهاا ولا دخل هناا تاني
ناصر:ايمااان صافاا جيتي
ايمان:لباس اش خبارك
ناصر:بخير اختي الحمد لله …الصراحة البلاصة هنا بلا بيك مظلمة
تبسمات لييه وزادت طالع لعند يوسف دقات مع الدخلة كتبان ليها وحدة كالسة فوق يوسف غير شافتها جمعات النوضة هوا متحركش ودعها وخرجات
يوسف:على سلاامة (تسرح فوق الكرسي ) كنتيي تعلميني نجي نتعرض ليك فالمطار باستقبال زوين
ايمان(بنفاد صبر )معنديش الخاطر ايوسف قول شنو بغيتي
يوسف:عندك الخاطر غير تغنيي ف اسبانيا وتنوضي لبلبالة هدشي وزايداهاا مبدلة كود حساب لانسطا باش ديري لي بغيتي فييه(بابتسامة وقف)هدشي غير اغنية وحدة ضربت 16 الملييون درتيي هد الحالة
ايمان(جبدات تيليفونها دخلات ليوتوب لقاتها ضربات 18 مليون فضرف 15 اليوم ) لا راك غالط 18
يوسف(قرب جيهتهاا) لي واقف قدامك راه مدير اعمالك
ايمان:مدير اعمال لي كيجيوني اعمال عربية ومكتقبلش بيهم
ضحك عطاها بالظهر كيمشي ويجي قدامهاا وقال: ملي باغة تشهري عند العرب علاش ازوينة جاية ضاربة الطريق باش انااا نورييك لايطاليين باش تنوضي نتيي تحيا فييك الوطنيية فدقيقة ؟
ايمان:اشنو دخل هدشي فالهدرة
يوسف(بحدة ) ازوييينة …راه عندك التزامات معاياا عندك خدمة وعندك مدير اعماال ،اما باش تصرفي بوووحدك مغنخلييكش سمعتيني … شكون غيخلص ليا انا الخسااائر تاع الناس لي جاااو على ودك وملقاوكش …مقالوش لييك بلي هادي سيمانة كانت الصالة خااوية كتصفر !
ايمان(كلسات على البيرو ) جيت نهدر معاك ….اناا مبقيتش بغييت نغني فالريستو عييت من خدمة الليل مبقيتش كنعس …مستاعدة نخدم معااك فلحفلات برا لبلاد ولكن الريستو صافيي لاا منقدرش
يوسف(بصدمة قرب ليها )عاودي شنو قلتيي
ايمان (تنهدات)راك سمعتيني …مبقيتش غادي نغني فالريستو عيييت كترات عليا الخدمة بزااف خاصني رااحة
يوسف :غندير راسي مسمعت والوو وغتمشي تهبطي لتحت توجدي راسك لسهرة ديال العشية
حركات راسها بلا ببرود وقالت: لااا
يوسف(بنفاد صبر) راك كتختابري شوية تاع الصبر لي باقي عندي معااك …شوفي الحمامة (قاد ليها لكول ) زويينة العيب مقادينش علييه ؤك غتمشيي تلبسي وغاتوجدي راسك …غتزيدي معايا كلمة وحدة غادي ندير واحد التصرف مغيعجبكش
ايمان:كتهددني ايووسف ولا
يوسف(ميل راسو ) لا لا مزال موصلنا لتهديد
ايمان:عرفتي شنوو …طلعتووو لياا فراااسيي مبقيتش بغيت نخدم معاااك ياله بوووم طرطق شنو غادي ديير
حرك لسانو على شفايفوو كيشوف فيهاا وضحك باستفزاز وقال: شوفيي خودي لييك وقت زيدي رتاحي فييه ؤك منخرجش انا وياك للعيب حيت مدوزنااش قليل ؤك (مسح ايدو مع بعضياتهم)ميغركش شي واحد …شفتي هدشي فاش عايشة نتي دابا والامتيازات لي عندك …حتى حد مغيعطيهم لك الا اناا
بقات ساكتة عياانة باغة غير تسد عليها وتنعس وترتاح خرجات من تماا…لقات ناصر واقف فلباب كيتسناها غير شافها وقفهاا
ناصر:ايمان …بغيت نهدر معاك
ايمان:من بعد انااصر اخوياا …من بعد
ناصر: غير اجي نهدروو الله احفضك
تنهدات وتمشااو حتى لسااحة وقالت: شنوو بغيتي تهدر معاياا
ناصر: هد ليامات ملي مكنتيش جا واحد لمخربق تيغوت على يوسف وجرا على عباد الله كامليين
ايمان:شكوون مفراسي والو
ناصر: واحد السلكووط كلو وشاام شنق على يوسف وكيقولييه دابا غتحضرها لياا
ايمان(ضرب قلبها بجهد ) واش وااشم ايديه بجوج وضعييف
ناصر: اييه زعر وعينيه خضريين …قاليه يوسف غادي تجي قريب تجي قالييه داك خينا الا مجااتش غادي نرجعك فين كنتي …
حسات بلخوف من يوسف ديڤ تلميحات لوناا هدشي كلو ولا موسوس عقلها كتر وكتر
ناصر:حم …تلاقيتي بحذيفة
دغيا شافت فييه وقالت:ياك مكتهدرش معاه ؟ كدبتي عليا اناصر
ناصر:لااا والله اختي مكادب عليك فشي حاجة … كنت كنهدر مع عتمان على وديت الوراق اختي هد خيناا مبغاش يدير معانا شي حل
ايمان:ناصر اخويا صبر راه انا 4 سنين ونص عاد درتهم نتا عاد عماين ونص معااه نتا عارف الطاليان مصعبيين الورااق شوية خدام بصالير مزيان غير شوية صبر
ناصر: تاصل بياا حذيفة شي يوماين هادي
ايمان:شنو بغاا !
ناصر:قالياا …الا مامسلكاش ليك تماا جي عندي هناا نديرو ليك كونطرا دغيا طلع وراقك …مول الريستو عندو كيتعاون بزاف مع المهاجريين
ضحكااات وضحكااات بهستيرية خلات ناصر غير كيشووف وقالت: حتى نتاا انااصر بغيتي تمشي (تغرغرو عينيهاا ) حتى نتاا
ناصر: الظرووف اختي والله الغربة صعيبة بلا ورااق توحشنا تاحنا الواليدين بغينا نفرحوهم ونعاونوهم ولكن بلا وراق راه مقدرتش اختي
ايمان: عطيني نمرتو عطيني
ناصر:ديال حذيفة !(جبد تيليفونو عطاها ليهاا ) ايمااان
مشات وخلاتو كتمسح فدمووعهاا وكدوز الخط لييه وشفايفها كيترعدو مع خرجات الشهقة مع جاوب بصوت هاادئ
_الوو
ايمان(بنبرة بكاء عاالية )شنوو كيحسااب لييك رااسك مشيتيي نتا ديتي طارق وداباا بان لييك فنااصر هءهء علاش شنو درت لييك لي باغي تخليني بوووحدي فهد لبلااد هدا كلوو حقد فييك علييا
ايمان: هدا كلوو حقد هءهء علاش كدير لياا هكا علاش شنو درت فحقك احذيفة هء شنوو
حذيفة: ايمان !
ايمان(بلغوات ودموع كيقطرو من وجهها)فيين ايمااان فييين كون غير تدفنات فديك الغابة حسسن لييها …فاش اديتك مشيتيي بلا حتى كلمة وديتي معاك طارق وداباا بغيتي تجر حتى نااصر شكون غيبقا معاياا هناا هءهء
حذيفة: ايمان نتي راه بورااقك واش ماشي من حق داك لولد حتى هوا يدير ورااقوو …هوا حتى لكونطرا مدارهاا لييه ! شحال غيبقاا بلا ورااق خمس سنين ! سبع سنين ؟
قطعات علييه كتبكيي ورجع كيصوونيي ولكن حلفت لاجاوباات ردات التيليفون لجيبهاا ومشاات لريستوو كتمسح عينيهاا
دخلات نيشان لبيرو بلا مدق جمع شي وراق كان كيقرا فيهم تدلخلات
يوسف: كنت عارف غير مقلقة ودغيا غترجعي
ايمان: بغيت ندير شكاية بواحد لحمق
يوسف(وقف جاي عندها) شكاية ! ديالاش
ايمان: واحد المريض ديما كيتعرض لياا حدا الدار وتبعني حتى لفرنساا عارفة غير سميتوو راه ديما كيجيي هناا بليل غتكون عاارفوو
يوسف: شكون !
ايمان: سميتو ديڤيد عطيني سميتو كاملة بغيت نمشي نديكلاري بييه
يوسف: واش كتهدري على لولد لي وااشم هههه واش نتيي حمقة بغيتي تخرجي عليناا
ايمان: علاش غنخرج علييك بغيتيه حتى يق_تلنيي
يوسف: هههههه ديڤ يق_تلك هههه هداك راه حمق وصافيي متديش علييه معندو ميدير لييك
ايمان: انا قلت ليك عطيني سميتو كاملة مقلتش لييك غيدير ليا مغنتسنااهش حتى يدير
يوسف(كيرطب معاها)شوفي ..غنهدر معاه غير كوني هاانية …بااه راه من اكبر المستتمرين فايطالياا وعندو غير هوا الى مشيتي حتى دعيتيه ادخلي معاه فشي طريق خايبة …غتخرجي خاسرة حتى لكاريير ديالك …غير رتاحي انا نهدر معااه راه وخة تشوفيه هكاك راه ميأديكش
طبطب على كتاافهاا وقال: رتااحيي يمكن فرنسا منفعاتكش (تبسم ليها )راحتك هناا ..من بعد نبداو خدمتناا ونزيدو نحتافلو بنجاح الاغنية
خرجاات دايقة بيهاا نيشان مشات لدار سدات عليهاا وكلساات فبلاصتهاا حيدات القميجة كتماصي صدرهاا كتنهد وتسووط باش تمشي ديك الخنقة لي ولات كتعاني منهاا بشكل غادي وكيتزااد
رجعات لبلاصتهاا موسدة مخدتهاا وسارحة محاضراش فواقعهاا
جاها اتصال من وديان مقداش تهدر ولا تحاور مع شي حد موراهاا نمرة كريس والرد من عندها مكااينش
مشات جبدات لكارط ڤيزيت لي عطاها المنتج كدور فيهاا حايرة شنو دير بغات تصوني لييه تلقات باتصال وديان وجاوبات بلا قصد تنهدات وجاوبات
وديان: حراام علييك والله ،مالك قلبتي هد القلبة كلهاا اصااحبتي خليتيني مخلوعة علييك
ايمان: راني قلت ليك بليي بغيت غير نرتااح مابياا والو اوديان مكاين لاش تخلعيي
وديان: فينك داباا فدار …نجي ندوز معاك شي يومااين ؟
ايمان: غنبدا الخدمة
وديان: وشنو قلناا ! ياك غتحبسي الخدمة بليل
ايمان:مبغااش ومبغيتش نتزايد معاه فلهدرة حتى نشد فلوسي من الاغنية بعدا
وديان:خاصك تعرفي شحال نسبة ربااح
ايمان:اش بان لييك …نزعم مع المنتج اللبناني !
وديان: كيبان معقوول وشارب الفن مزياان وتكون عندك شروطك باش ضمني حقوقك ..يوسف لقاك صغيرة ومزال معارفة والو فهدشي دار فيك لي بغاا …قولي ليا لكونطرا لي بيناتكم شحال فيها من عام ؟
ايمان:عماين والمشكيلة ماشي بزاف باش سنيتها تانيي ومضنييتش يبغيي بالساهل باش نلغيوها
وديان:قوليه بغيت نعتازل ههه المهيم خرجي راسك باي طريقة ؤك
قطعات معاها لقات نمرتوو مصونية ليها جوج مراات …مسحاتهاا حيت خافت تضعف كتر ما هي ضعيفة حالياا …ركبات نمرة لي فلبطاقة ..بعد مدة قصيرة جاوبهاا
محمد:الوو ..مرحباا مين معي
ايمان:مرحبا استااد محمد …معك بيانكاا
محمد:اهلاا وسهلااا باتصالك …كيفك ان شاء الله منيحة
ايمان:الحمد لله(كتلعب بلبطاقة )بغيت نقوليك انا مواقفة على طلبك …بغيت غير شوية الوقت نقاد اموري
محمد: هالخبر كثيرر راح يكون في صالحك اكييد وجودك وغناءك في المطعم مش منيح لا صورتك ولا صوتك …في انتظارك فاي وقت
ايمان(ابتسامة خفيفة )ان شاء الله
قطعات معاه ورمات التيليفون حدا رجلهاا لاحت المخدة على راسهاا وتكمشات مظلمة البيت من جديد
الوقت دااز رجعات لخدمتهاا المعتادة اشهارات سطوريات ..رجعات بيانكاا ل الريستو كتغني ويوسف نااشط وفرحان بانجاز الكليب لي غادي وكيطلع وب الريستو لي رجع فيها الرواج من جديد
من بعد يوم حافل مشات لبيرو عند يوسف ملقاتووش وبدات كدور بجنابوو…لي بان ليها حداهاا كتقراها ..بغات تحل المجر لتحتاني ديال البيرو لقاتو مسدود فضولها فراسها قال:شنو غيكون فييه … بان ليها طابلو عوج قدامها ميلاتوو وطلات وراه حتى كيبان ليها مربع بحال كوفر فور كيتحل بالارقام
رجعات الطابلو كيف كان وبعداات من تماا وبالها معاه حتى دخل يوسف فايدو جوا ضااحك
يوسف:كنت كنقلب عليك لتحت
ايمان:سبقتك لفوق …علاش عيطتي لياا
يوسف:قولي ليا بعدا داك ديف باقي كيبرزطك ؟
ايمان:مدة مشفتو
يوسف : شفتي راني عند كلمتي ههه
ايمان:قوليا شنو بغيتي خاصني نمشي نرتااح
يوسف(وراها جوا) جبت لييك لفلوووس(رمى جواا قدامها فالطبلة ) نصيبك اللول
جرات جوا حلاتو لقات فييه 18 المليون وقالت: ونتا شحال خديتي
يوسف: النص ! حساب لييك الكليب طلع فابور ! هد شهر ياله رجعنا داكشي لي خسرنا من بعد عااد غتبدا الاربااح
ايمان(ضحكات)كضحك علياا ايووسف هههه شهر باش تحط لكليب …ضرب طوندونس فسيمانة اللولة …وضرب 25 ملييون فشهر واش شوية لبااس
يوسف: راه الارباح مكدوزش لينا كااملة 45 فلمية كدوز لكوكل
ايمان: يووسف راني مجايااش من شي كهف ورا الشمش …وريني الاربااح داباا
يوسف: داكشي لي خاصك تشدييه راك شديتيه شي حاجة اخرى راه مكاينااش (بابتساامة ) خدمي على راسك كتر باش تااخدي كتر
ايمان (تزنكاات بلعصااب )يووسف عطيني رزقيي كااامل ….كيفاااش وحديين فيديواتهم مواصليينش تا عشريين ملييون وشاديين لملاااين نتا تجيي ضرب لياا رباح كلو وتعطيني 18 ؟ واش باغي تحمقنيي
يوسف:الفلووس لي كنعطيييك ؟ تداااور الحوايج الماركااات ومزال كدوي ؟
ايمان: كتعطيني رزقييي مكناااكلش لييك رزقك سمعتييني
يوسف: سيري سولي مزيان وشوفي واش ظلمتك
خرجات رادخة لباب وراها كانت كتوقع تشد كتر وخاصها فعلا تشد كتر دارت فلوسها فالصااك وخرجاات كدير فنظاراتها الشمسية مشات حطاتهم فلبنك مع لفلوس لي جامعة ومشات كلساات فقهوة بعيدة على الضجيج شادة راسهاا كتعاود لوديان فابيل فيديو
وديان(بصدمة )راه قلت لييك داك لحمااار واكل على ظهرك لملااين اصااحبتي وغير ڤلوكاات وبنادم كيربحو منو زبالة ديال الفلووس وهوا فيديو قرب يوصل ل 30 مليون عاطيك فيه 18 والله تالحمااق وملقااش ليي يخرج فمو لكل_ب لاخر
ايمان(كتبكي )شنو ندير داباا
وديان:معندك مديري سيري فكي مع لحمار هاد الشركة وعطيه بالتيسااع …راك درتي صوورتك شوفي غير انسطا شحال وصل غير من ورا الاغنية راك ضربتي فيه 5 الملييون …حيدييه اليوم قبل غدا من ادراة الاعماال حيدي حتى نمرتوو و جيمايل محيي ليه الاتر من انسطا ديالك وحطي نمرة ديالك حتى تلقااي شي واحد ولا وحدة فادارة الاعماال يتكلف ليك بالاعمال تحت شروطك نتي اماا هدا راه واكل النص وكتر فرزقك
مسحات وجهها وسااطت …تعشات براا عاد رجعات ادراجها لداار كتقلب على سارووت ديال الباب العمارة حتى كتسمع الحس وراها ضارت مخلووعة حتى كيبان ليها ديڤ لي مدة طويلة مشاافتو واقف قدامهاا وايديه ورااه بابتساامة لابس قميجة بيضاء وسروال بيض ومرجع شعرو اللور ومقاد الحساانة
ديڤ:تعطلتي مدة وانا كنتسنااك
ايمان(هبطات عندو )شنو بغيتي ؟ ياك هدرت معاك قلت ليك متبقااش تبان قدامي
ديڤ:عقلتي ملي قلتي ليا توصل 30 مليون غ غ غاادي نقبل الهدية ديالك
ايمان:مزال ماوصلاتش
ديڤ:شكوون قلقك ؟ غير قوليي لياا يباات ميصبح
بقات كتشوفييه وقالت:عفااك سير بحالك مبغييت والوو …غتمشيي ولا غنعيط لييك لبوولييس
ديڤ:لاا لاا ااا انا مبغيتش نأديك …انااا كنبغييك …ككنبغيك بزااف
مد ليها بوكيي بيض وقال:شششدي شديي
ايمان:وخة سير فحالك
كلس على ركبتوو وجبد بواطة من ورا ظهرو حمرة حلهاا وكان فيها خاتم كبير الحجرة فييه مربعة وكبيرة من دياموند
ديڤ: ق قققبلي تزوجي بياا عفااك
ضحكات بلفقصة وقالت: واشش شايطين علييك لفلووس ؟ نووض سير فحالك نووض
ديڤ(كيحرك راسوو )نووو مغنمشي حتى تقبلي تزوجي بيااا ….ككنحمااق علييك عفاااك (كيبكي)منقدرش نعيش بلا بييك…كلشي فييك كيحمقنيي بغييتك ليااا بوووحديي
ايمان:مقابلاش ..مقابلااش صافيي شوف ليك وحدة اخرى
ديف؛نتي لي بغييت(جر ايدهاا ) غتزوجي بييااا …هي غتزوجي بييا
خلعهاا ودفعااتو برجلهاا تطااح وقالت:غتقرب مزال غنضربك (بلغوات)تفرق منييي ….انااا مكنحملكش واش نتااا مرييض بعد منيي
ديڤ(كيبكي )ولكن انا كنبغييك و ووومغاديش نخلييك لغيريي سمعتي
خلاتو طايح ومشات كتجريي ملي شي ساكن حل لباب دخلات قبل ميتسد وسداتو كتنهج ومخلوعة خلاتو كيغوت فالزنقة باسمهاا
تكات على لباب كلهاا كترعد كتحس بعقلهاا غيخرج من بلاصتوو
طلعات لدار وسدات وراها بالسارووت مشات كطل من لبالكون لقات جوج تاع رجال جرووه لطموبيل وهوا كيغوت بسميتها
من وحدة لوحدة بحالا دايز على زهرها ايد ميت دخلات لبيت وكلسات كتفكر شنو دير مع يوسف كيبان ليهاا هد الساعة هوا لي خاص كيدير تفك منوو
شربات كينة حيت ميمكنش تنعس بلا بيها مفاقت حتى لطناش تاع نهار فاقت مدوخة بحال شي سكرانة غسلات عليهاا طرفات ،دارت روتينها فلعنااية ومشات بدلات حوايجها بشورط كلون لاصق كحل وبيل سماطي فوق السرة ..لبسات فوق منهم قبية هزات صاك دايرة فييه حوايجها ولفوطة لبسات سبرديلتها وخرجاات فاتجاه لاصال ظافرة شعرها ودايرة كاسكيط ونظارات شمسية فاتحة اللون …مرة مرة دور ورااهاا يكما تابعها حتى ركبات فطاكسي ..هبطات دخلات كتريني وفنفس الوقت كتلبي طلب المعجبيين فتصااور زادت كبرات شهرتها فينما مشاات خاصها تخرج مقادة ومصاوبة حيت حياتهاا مبقاتش ملكها بتاتا
كملات الحصة وعقلهاا خدام شنوو دير بدات كتفكر فتبدل لبلااد وتجرب حظها فلبنان او فرنسا بينما رصات امورها مزياان…
كلسات من بعد الدوش كتبحت فكوكل وتشوف شنو كاين فلبنان وطريق وبشحال بعييدة ،ميلات فمهاا معجبهاش وفظلات تنتااقل فقط متبدل البلاد وخة المسافة بعييدة
عارفة بلي الى مشات حتى فرقات كلشي مع يوسف حتى الدار غيخصهاا تكري فبلاصة اخرى ..تابعها بزااف خاصها تكون مستاعدة لكلشيي
مشات رتاحت فدار بدلات حوايجهاا وخرجاات قاصدة الريستو بان ليها ناصر وتبسمات ليه مشات عندوو
ايمان:باقي مبغيتي تمشي
ناصر:بغيت غير نتخلص وغنمشيي
ايمان(بابتساامة ) مزياان الله يسهل علييك يارب دير وريقاتك
ناصر:داكشي لي كاين اختي …الغربة بلا وراق صعييبة ،نهار كنكونو فبلادنا كيبان لينا كلشي ساهل غير كتجي هنا كتصدم
ايمان:ضروري تصدم باش تعيش ههه غيعجبك تماا
ناصر:شفتي لبلاصة نتيي شي ريستو زوينة
ايمان:هي مكبيراش بحال هادي ولكن كتبان عااامرة وزويينة …
ناصر:يكون خير ان شاء الله
تبسمات ليه ومشات قاصدة يووسف كتوجد فراسهاا شنو تقول وشنوو باش تخرج باقل الاضرار
دقات ودخلاات بهدوء
يوسف: عاد كنت بغييت نعيط لييك …ديك لحفلة لي تلغات ف فرنسا راه رجعو عيطوو …وجدي راسك نعار السبت نشدو الطيارة
گلسات فلكرسيي ساكتة حتى كمل هدرتوو وقالت:عندي ليك شي هدرة
يوسف: قلت لييك داكشي لي خاصك تشديه شديتيه …خدمي كتر تاخدي كتر
ايمان : مبقيتش بغيت نخدم فريستوو ايوسف كلمة مافيهاش رجوع
يوسف:وفين باغة تخدمي هههه نسييت بلي الريستو هي لي بيناااتك
ايمان: اه مختلفناش ولكن واش بغيتي نبقا نغني فيها حياتي كااملة
يوسف :هههه دابا صافيي وصلتي لمرادك مبقيتيش راضية بريستوو تخدمي فيهاا
ايمان:عيييت بغييت نركز مع حاجة وحدة ماشي عشرة ومن الفووق كتلوح لياا شوية من بزااف لي كتشد …ربحتي معايا ضعف لي ربحت معاك ايوووسف متكدبش
يوسف:شنو بغيتي داباا ؟
ايمان:مابغيت والوو …نلغيوو لكونطرا لي بيناتناا وكل واحد يشد طريقوو
يوسف:عاودي شنو قلتي ! نلغيييو ههههه غير اجيي ولغيهاا ياك هههههه ضحكتيني هههههه غير اجيي ونسالييو لكونطراا هههه
ايمان(بجدية )مكنضحكش
يوسف: حتى انا مكنضحكش … انا مباغييش تفسخ العقد لي بيناتناا يعنيي بغيتي ندخلو انا ويااك لمحاكم ياك ! من بعد هدشي كلو لي دوزناا نجرجرك فلحبس ازوينة
ايمان:شنو وصلنا لحبس والهدرة
يوسف:بغيتيه بالترااضي ونسالييوه !
ايمان:ااه
حل لمجر لي حداه كيضحك وجبد من بين لوراق كونطرا لي جامعاهم وقال:بان لياا نهار وقعتي مقريتيش الورقة مزياان
مدها ليها حلات جوا وقالت: فين لورقة لي وقعت
يوسف:قدامك
ايمان: يوووسف هادي ماشي لكونطرا لي وقعت
يوسف:هاديك لي قدامك هي لكونطرا الغزالة
خنزرات وتبدلو فيها لواان دورات راسهاا كتقراا حتى وصلات لصدمة لي لتحت كتقراا وقلبهاا كيضرب بغا يخرج من بلاصتوو
يوسف (مرتاح فبلاصتوو ) اشنو القضية لي بغيتو نسبقوو …ولاا عرفتي خلصي لياا غير الاتعااب دياليي و شيكات لي عاطيييك ولفلوس لي كنتساالك ودار لي ساكنة فيه 5سنين هادي وضمانات باش ملي تخرجي تخلصي كلشي مجمووع راه كلشي محسوب تماا متحتاحيش تحسبي
ايمان(نقزو عينيها بدموع كتشووف فييه ) خ خ 500 ميليوون ايوووسف
يوسف(ميل وجهو ) ولااا تخدمي عندي حتى بلاا خلاص حتى تسالي لفلوس ليي مسطر عليهم مممم ولااا 4 سنين ديال الحبس(تبسم )هكا تكوني رجعتي ليا 4 سنين واناا كنصرف علييك ..اوى شنو قلتي
يتبع
🕊️🕊️🕊️
بقلم الكاتبة ✍️👇
الاحدات الماجية غتكون فشكل على لي تعودتو تقراو لياا غتشوفو الوجه التااني المضلم لشهرة
شاركنا رأيك في هذا الفصل 🌹