زفة إلى المجهول
العجاااج بجهد فمراكش الدنيا تغمقاات والجو تزمط فانتظار قطرات المطر الي تنزل باش تنفس الجو…عباد الله تجري وتجارا..صحاب المحلات كايغطيو السلعة الي خارجة على برا…شي كايغطي بالباش وشي كايسد هو گاع…كاتسمع غير سوات الناس…
واجريييي جريييي الغبرة بادخل لمحااال…جرييي غطي غطي…ااااا سماااح سيري ظغيا لدار شوفي شراجم بادخل ليهم الغبرة…جرييييي ديري جفاف فازگ عند العتبة…اااا منييييير دوز غطي وسد المحاااال…ياربي سلامة يا ربي سلامة…
كاتسمع فعباد الله تلاغط وغالا غالا…واحد العجاج تقولي اعصار ناض فديك المدينة…صوت القزدير كايطيح صوت كلاكصونات…كلشي هادشي كانت كاتشوفو وهي جالسة فواحد الكافي بالقرب من لافاك حيث كانت عندها بين حصة وحصة ساعة ونص استغلتها في انها تجلس فديك الكافي…حلات تيليفون وشافت فالساعة لقات باقي الحال بزاف..الجو مريييض وهي جالسة على برا شوي ناضت ودخلات لداخل منها نيت تبعد من الغبرة الي بدات كاتهيييج ليها الحساسية ديالها من الي بدا الريح يتحرك والغبرة تنوض بداها العطيس وحدة تابعة لاخرى…جلسات لداخل وحطات دفتر ديالها مستغلة الوقت تراجع فيه درسها…حاطة حداها كالكيلاتريس وستيلويات وپوليكوب ودفتر المراجعة…وحداها تيليفونها…بدات كاتراجع فالدرس وتحسب وتبحث…بين رقم ورقم وبين نتيجة ونتيجة وبين غلط وصحيح…بين تفكير وتفكير فلحظة وفثانية سهااات و لقات راسها كاتفكر والذاكرة كاترجع ليها لداك اليوم الي كانت فيه المكالمة بينها وبين “بشااار”…كيفاش تلقى هضرتها وكيفاش كان رد الفعل ديالو على قرارها ف أنها تسكن معاه وتعيش معاه لمدة الي غاتخلي حياتو تبان عادية تقريبا وتبان للقاضي أنه شخص مؤهل وانه تماثل للشفاء وانه تقريبا كايمارس حياتو بشكل عادي وأنه يكون مزوج كايبين ويأكد انه شخص عادي حالو حال اي واحد عايش حياتو…باش من بعد ماتحكم القضية الي بينو وبين مو ولو ربح الشكاية غايخول ليه انه يطلب من القاضي بانه يكون وصي على خوه ويتكفل بيه وبهاكا يتهنى ويرتااااح بزاف ان يوسف معاه بين ايدي اميييينة وماشي معرض للاهمال ومكرفص بهاد المعنى…وهادشي كامل حتى هي فكرات فيه فاللول خصوصا ملي شافت بشار كيفاش كايتعامل معاه وكيفاش كايولي بمجرد مكايشوف يوسف كايولي شخص اااخر غير داك “الوحش” الي كانت وشافتو معاها هي وشخص خايب حتى مع مو…
~~~
حبيبة”مسحات عينيها ونطقات” : فين غادي نعيش معاك..
بشار”بقى ساكت وحتى هي بقات ساكتة..هضرتها كلها كادور ليه فراسو..شي دقيقة ولا اكثر وهو ساكت وحتى هي ماقالت ليه حتى واش معايا…حتى نطق” : شروطك ؟!
حبيبة”حركات راسها” : هممم..اه..
بشار : مجابة…
نيشان جاوبها بكلمة وحدة بلا مايعرفهم او يمكن عارف المهم حاوبها بكلمة اختاصرات كلشي مكاين لاش تقوليهم وماكاين لاش يعرفهم…يمكن عارف ان الشرط الاكبر هو مايكونش قرب كبيييير بيناتهم..يعني تعيش معاه فدار وحدة لكن يكون قرب طبعا هذا هو اكبر شرط عندها وحتى هو عااارف وتاهو را ماغايفكرش اصلا ييقيسها…هذا معروف اهم شرط…
حبيبة. : واخا ماعارفهمش.؟..
بشار : ماعنديش غراض نعرفهم..l’essentiel كافي…
حبيبة : فين غانعيش معاك…
بشار : فداري هنا…”بغات تعاود تهضر وهو يقاطعها” دابا ماعنديش الوقت باش نكونفيرمي معاك بقاي كيما نتي فداركم حتى نرجع من لهيه..ومزال نعرف منين عرفتي الهضرة الي ضارت بيني وبين باك…
حبيبة : ماشي بابا الي گالها ليا…
بشار : عارف..
حبيبة : وعلاش بغيتي تعرف شكون گالها المهم عرفت…
بشار”شاف مكالمة فتيليفونو قطع على ديك المكالمة واستمر فالكلام معاها” : حتى نرجع ونهضرو فهادشي…~~~
رجعات من الماضي للحاضر وهزات عينيها فور ما سمعات صوت قطرات المطر الي لامست التراب وفاحت ريحتو الي كاتعطر الانفاس..الريحة الي من بين اجمل العطور الطبيعية فالارض…قطرة وقطرة تبعوها قطرااات حتى بدات الشتاء كاتصب بغزااااارة وطرطق صوت الرعد قفزها من مكانها واخا متطونش كاتخاف منو لكن الصوت كان مجهد الشي الي خلاها تكون بلاصتها ودير الايربودز فوذنيها وتطلق القرآن الكريم على سورة “الرعد” بصوت ياسر الدوسري…طريقة او ولف علمو ليها باباها فاش كانت صغيرة شوي…وبقات كاتسمع ليها وتشوف فالناس غاديا جايا قدام الكافي…هبطات عينيها لقات الوقت قرب بزاف وهي خاصها تخرج ولكن شتاء ماحبساتش…
اما هو فور ما كمل ديك السيجارة ديمارا سيارة وكسيرا متوجه ل دارو…دخل لدار وتوجه ديريكت لبيت حيد الفوقي بقا عريان من فوق هز تيليفونو من سمع صوت الرنة…قرا الرسالة الي جاتو من البنك كايأكد ليه التحويل الي دار…كايحك فشعيرات صدرو وكيقرا..نيشان دوز الاتصال ل نمرة جدو الي بقا مدة عاد جاوبو…
بشار : الامانة وصلاتك ا با…
ع.القادر : امتى…
بشار : الوقت الي عطيتك هو هذا…
ع.القادر : واهييلي…
بشار : ماعنديش تخرشيش فكلمتي..الفلوس عندك مابقا بيني وبينك ريال..تقتي بيا وعطيتيني شيكات..الله يرحم بيها الواليدين..
ع.القادر : راني عاارفك حار ف كلمتك…وليني گاااع دوك الفلوس ؟ دقة وحدة..
بشار”هز حاجبو” : رزقي وگاد بيه الرحماني…
اما حبيبة مابقاتش قدرات تخرج من ديك الكافي لان الشتاء مابقاتش بغات تحبس وصوت الرعد خدااام كانت الخمسة ديال العشية..اتاصلات ب باها فالبلاصة…
حبيبة : بابا حبيبي…
م.حفيظ : القشة…ابنتي اكبدي…
حبيبة : تگد تجي ليا لافاك ؟
م.حفيظ : اخفتي ههههه حسيت بيك الله تاحسيت…فينك بالضبط…
حبيبة : انا ف واحد كافي فلافاك كنت كانراجع حيث عندي ساعة ونص خاوية بين حصة وحصة ولكن مابقيتش دخلت حيث كانت شتا بزاف والعجاج (عطسات ثلاثة العطسات وحدة تابعة لاخرى) الحمد لله…
م.حفيظ : ارحمك الله رحمك الله…ياكما باتبدى الحساسية ؟ قويتي العطيس…
حبيبة : ممم تحرك العجاج گبيلة وليني منضنش هي عادي..
م.حفيظ”شاف قالمتعلم عندو كايهضر مع اجانب سياح طاليانييين ورجع نطق” : بتسنايني تم هاني شوي ونجي عندك..
حبيبة : وخا حابيبي…
كيف قاليها كيف وقع بقات كاتسناه حتى جا لعندها وخرجات بزربة من بعد ماخلصات الكونصوماسيون الي خذات…ركبات دغيا فسيارة كان جايب معاه نيت فوطة مسح ليها وجهها وكتافها وحالتها وكيضحك عليها كاتمسح وتعطس…دارت سانتيغ وتوجه بيها نيشان ل #رميلة…قرب سيارة شوية لدرب وكانت شتا سحات تقريبا بقاو غير زخات خفيفة…تسناها تا دخلات ورجع هو لرزقو….دخلات لدار مع ريحة المسمن عاطية…
حبيبة : الله واش مسمن معمر…
ناديا”جمعات حجبانها” : مال منخرك حمر…
حبيبة”عطسات” : والو هييي الغبرة تاع گبيلة…
ناديا : سيري بدلي ودوشي بتحيد منك الغبرة…
حركات راسها وطلعات لفوق بيتها…حيدات حوايجها ودخلات ديريكت دوشات حيدات عليها الغبرة من شعرها ووجهها بسباب داك العجاج خرجات حناكها ومنخرها بغاو يطرطقو بالحمورية…ذهنات لحمها بالخف…لبسات بيجامة خريفية مناسبة للفصل ودافية شي شوي على حساب ان الجو تبدل وبرد…نشفات شعرها ب سيشوار وجمعاتو ذهنات وجهها بكريم مرطب ديالها ذهنات ايديها رشات سبراي وديدورنت..كلها ولات تضج بريحة الفانيليا…هزات تيليفونها وخشات رجليها ف كروكس بيض فيه نونوسات صغار…هبطات لتحت وريحة المسمن معمر بالشحمة وفلفلة خضرة والبصلة تعطييي كاتحماااق عليه. وجايا جيعانة نيت..لقات رقية يلاه حطات صينية اتاي تحنات عليها وباستها من حناكها…
حبيبة : يخلي ليا دادا ديالي…
رقية : ههههه هي بروفيتي بروفيتي يا بنتي مابقا بزاف وبايجي راجلك وبتمشي تاني وتخلينا…
فحال الى هزاتها تالسما وزدحاتها رجعات للواقع الي عارفة راسها غاديا ليه…للمجهول الي غاتواجه فالعيشة مع بشار…قلبها تجيف فديك اللحظة تا بانت على وجهها الشي الي خلا رقية تجمع البسمة وناديا تهز راسها من بعد ماكانت منغامسة فالهاتف كاتسمع اوديو مولاي الحفيظ فالواتساب…
ناديا : مالك ؟!..
حبيبة”هزات فيهم عينيها تا تحرك البؤبؤ ديالهم..حاولات تصرط ريقها بدون ماتبين..هزات ايدها كاتحك جبينها وصوتها كانت فيه نبرة فشكل” : ها ماماليش..هييي جعت…
ناديا : واقع شي مشكيل مع راجلك ؟!
حبيبة”حركات راسها ب لا”
باش ماتحسش ناديا اكثر تنهدات وهي تجلس حداها تابطات دراعها وباست ليها كتفها…
حبيبة : هي ولفت هنا…ولفت دارنا من الي رجعت من الفيرما مابقيتش قدرت نرجع تاني…
ناديا : هادشي عادي ابنتي..عااادي جدا…الي ماشي عادي هو وجهك والي ماشي عادي هو هضرتك فاش كنسولك تاتلوني عليا تم…كاين شي حاجة بينك وبين راجلك..
حبيبة”وسعات عينيها” : اش بيكون اماما..الى متيقتيش سوليه هضري معاه…
ناديا : ماعندي نمرتو..وهو واحد الي مكيشركش الهضرة باش يتشارك معايا ويعطيني نمرتو…نمرتو را عند باباك وبيجي باباك وبيسولو…
حبيبة”الصمت”
ناديا : تگدي تجاوبيني على هاد سؤال ؟!
حبيبة : ش شنو هو…
ناديا : علاش عگوزتك لحد ساعة ما سولات فيك ؟…
حبيبة : ماعرفتش…كانهضر هي مع خالتي سعيدة وكاتدوز ليا خالتي عيدة…
ناديا : ونتي عمرك گلتي ليها نهضر مع خالتي توريا ؟ عمرك سولتي فيها…
حبيبة”كاتلولب فعينيها بتوثر”
ناديا : دويييييت معاك جاوبي…
حبيبة : ل لا ع عمري هضرت معاها…
ناديا”هزات حاجبها تا حدرت حبيبة عينيها” : وعلاااش ؟!
حبيبة : د دابا نهضر معاها…
ناديا : هادي هي ترابينا ؟ هادي هي نعيط نسول فالي كبر مني نسول فالعائلة ونصيل الرحم الي علمناك ؟…توريا عگوزتك فمقام مك وعيب انك متسوليش فيها…علاش گلتي ليا را تتدوي معايا…
حبيبة : م.ا..
ناديا : علاش كذبتي بديتي تعلمي فالكذوب احبيبة ؟…بغيتي نتقلق منك مانبقاش نهضر معاك…
حبيبة : لا لا لا…را ماما هانتي را فاش هي تخاصمت مع ولدها…”حدرت عينيها…سميتو كاتجيها ثقيلة بزاف” بشار…
ناديا : من الي مشيتي لكلينيك تشوفي يوسف لقيتيها تم..
حبيبة. : لا…
ناديا : يومين هكاك وعلمي راجلك باش تمشي معانا لدار ناسك..
حبيبة”خرجات عينيها” : عع علاااااش…
ناديا”خنزرات فيها” : ويل شيطان ؟ كيفاش لا ؟ ولوسك الي خرج من الكلينيك مابيتيش تمشي تشوفيه ؟ مابيديريش الواجب ؟ راجلك مشكل مع مو ونتي مالك ؟ خرجي من باب واسع وسيري سولي وسلمي عليه وسلمي فمو عليه…را واجبك هذاك غذا ولا بعدو يتصالحو وبتدي نتي العيب…ديري وهضري معاه علميه را بيتي تمشي…يلاه سيري جلسي تاكلي…
الشهية تسدااات ليها…العقل ترفع تاني وبدا فمرحلة التفكير…تمشي ل رحامنة تاني تحط رجليها عندهم ؟…مشكيل كبيييير وطبعا مكاينش الي غايفكها من غير شخص واحد والي حاطة فيه ثقة كبييييييرة وهي “سعيدة”…
خرجات من الحمام الي على برا الفيرما من بعد تحميمة دارتها حسات ب عضامها خفافو عليها…كان العشاء كايوذن ديك الساعة…مع خرجات دخلات سيارة هاشم ديال الخدمة جا معاها قدقد يلاه بغات تدخل متحاهلاه وهو يكلاكصوني عليها وشعل ضو وطفاه ساني عليها…ضارت ووقفات حدا الباب مكمشة فحوايجها حناكها بغاو يطرطقو…تسناتو تا خرج وهي مغوبشة فيه تا وصل لعندها ب لبستو ديال القايد….
هاشم”بابتسامة وشوق ليها حيث من نهار دور وجهو على بشار تقلقات منو ومابقاتش معاه كيف كانت واخا كايضهرو…” : بالصحة وراحة مدام…
سعيدة”بجفاء” : يعطيك صحة…بغيتيني ف شي حاجة…
هاشم : ملي شفتك خارجة ملكمة هاكا بغيت نشوفك ساعاك كنتي تعومي…
سعيدة : ممم…
هاشم : طالعة لبيت ؟!
سعيدة : اه..
هاشم : واخا طلعي لا يضربك البرد..هاني لاحگك …
ماجاوباتوش ماتسوقاتش طلعات لبيت نيشان حيدات الفوطة ومشطات شعرها من بعد ما نشفاتو وضفراتو وجمعاتو بقراصة دارت عليه زيف حياتي عقداتو ودارت شالها…حتى تحل الباب وطلع هاشم كابحك فراسو…شاف فيها وتبسم…
هاشم : الله ماكرهت شي تحميمة دايزها الكلام…
نعيمة : سير عوم شكون شدك…
هاشم”وقف كايشوف فيها كانت ولاااازالت وستبقى اجمل النساء ف عينيه…حبو ليها كبيييير وهي مخليا راسها عزيزة عند كلشي…حنييييينة وعقلها وقلبها كبيييير..نهار خطبوها ليه يمكن كان احسن اختيار وقع عند دار الرحماني…احسن الكنات واعقلهم…توحشها توحشها بزاااااف وماكرهش يشرك معاها الفراش بحب كيف لول لكن الفترات الاخيرة كانت كاتعطيه حقو وصافي كا زوج خاصو حقو باش ماتلعنهاش الملائكة كيف كتقول…قرب شوي لعندها من ضهرها لور وحط ايديه على كتافها وهبط لعنقها استنشق ريحتها حتى تغمضو عينيه وهي تحبس الدهين الي كانت كتدهن وجهها…
سعيدة : هاااشم…
هاشم”باسها بين كتفها وعنقها” : ريحتك اسعيدة عمرها تبدل..
سعيدة : ايوى الله يخلينا فصباغتنا…”قالتها بواحد نفخة هو فهمها كاتحشي ليه الهضرة نيشااان”
هاشم : فوووگ خاطري اسعيدة فوووگ الخاطر…
سعيدة”حيدات ليه ايديه من فوق كتافها وبعدات منو وهي دور عندو” : اش وقع داك النهار اهاشم..علاش مكملتيش ليا الهضرة…”شافتو ساكت” هضر ؟ علاش حشمتي من توريا فاش عاوناتك بسلامة ؟…
هاشم : ماشي هي…
سعيدة”جهدات صوتها تا هز حاجبو مستغرب ومصدوم من صوتها الي علا عليه !!” : عااااااود ليا اهاشم عاود ليا بغيت نعرف كلشي..ماشي تگول غا الي بغيتي..بغيت نسمع..كانتسنى..
حدر راسو وعينيه فلارض..مدة وهو هكاك حتى تنهد وهز راسو الفوق مغوبش تفكر داك المشكيل…
هاشم : تعقلي دوك شهورة الي كنت بركتي فيهم فداركم…فاش كنتي توحمي ب منار…ديك الوقت “سكت كايعض شواربو” ديك الوقت وقع ليا مشكيل لقاو بالي حطيت فالوراق ثمن المتر مربع ديال واحد الفدان شراه با…باش مايخلصش الضريبة بزايد…ملي عرفو توقفت سيمانة بينما يعطيو القرار…
سعيدة. : تبعتي باك ف خلاك اهاشم ؟!
هاشم : حط ليا سخط والرضى سعيدة…غلطت وبنادم را بنادم خطاااء اسعيدة..ندمت فيها وهاني باقي نادم…را هو سبابي حتى باقي قايدة ممتاز اما كون راني باشا ويتحسب ليا حسااااب كثر …
سعيدة : و توريا اش خلاها تكون سباب سعادتك فالخدمة…
هاشم : خوها مرافگ مع الباشا الكبير الي عندنا فمراكش…سولها وهي جات سولاتني حيث سكت ماگلت وااالي (والو) لدار كمدتها ديك سبمانة تنشوف اش غايديرو ليا…گلت ليها اش كاين حيث بغا يتأكد…وهي هضرات معاه تدخل ليا مع ناس كبار تما حيث كايعرفهم مزيااان تاجر وكايتعاملو معاه وقاضي ليهم شلا غراضات…ناس ديال المعارف وضرصة صحيحة هما خوت توريا…بغيتي ولا كرهتي قضات ليا الغراض…
سعيدة : تا ولات تهدد فيك بيه…ولات دايراه ليك سواكة الحنك دابا…ودابا اش قضيتي ؟…
هاشم : ما هدداتش وليني وجهي حشم…عرفتي اشناهي ترجعك ل خدمتك الي دمرتي فيها…را كنت عمري مزال نخدم فالمخزن…فين كنتي بغيتي تعيشي ؟ فين نلقى خدمة مزال…
سعيدة : نعيش معاك بطرف الخبز نتلاوح معاك ومانحني راسي ل ناس يحنيوه ليا بزز…تحنى راسك تحنى..حشمتي منها ؟ وبقى حشمان اهاشم…
هاشم : دابا سعيدة غاتبقاي معايا هوك ؟ ماشي عيب عليك ؟ خليني مني لراسي خليني الالة خايب ممزيانش نتي باس وصلتك ؟ غاتبقاي منشفة عليا وجهك وصوتك اسعيدة…
سعيدة : خليها ليام…مقلقة منك ونتا عارف تقليقتي خااايبة..خليني تانتنفس…صحاب المعقول وكلام الحق ماكيجيوش ويسامحو دغيا..خاصك وقت على مانصرط اش سمعت منك واش درتي….”سكتات تا سكتااااات وهي تنهد وشافت فيه” سير تعوم دابا لحگ عليك حوايجك…
هاشم”تبسم ببلاهة” : هههههه تحكي ليا ضهري…
سعيدة : الكيس طويل ديال ضهر را بقى معلق..حك راسك ولا دابا نصيفط ليك حسام يحك ليك..راك والدهم يقومو بيك…
الي وقع لحبيبة هو انها اضطرات تكذب للمرة ثانية باش تقدر تعاون بشار ف يوسف…..
من الي مشا ماتاصل بيها…متكية ففراشها..دخلات لواتساب شافت الكروب ديالهم الي وزعو فيه البحوث شافت البحث الي خاصها تقدم على طريقة exposé…خذات المعلومات الي بغات باش تبدا حيث غادي تقدمو هي بنفسها…دخلات لانسطا كادور فيه وتجاوب الميساجات…حتى طلع ليها ميساج هزات عينيها بان ليها الاسم ديالو jad1985…
جاد : حبيبة…
ماجاوباتوش شافت الميساج لكن بدون جواب…عاود رسل ليها وكانت رسالتو…
جاد : حبيبة كاين شي مشكيل ؟ علاش مكتجاوبينيش…
طبعا الحوار بالانجليزية حيث العربية عندو صعيبة شوي ومعكلة…شافت ميساج ديالو عاوتاني وهي تزفر ورجعات جاوباتو…
حبيبة : عندي مشاكيل مايصلاحش ليا نهضر معاك..حاليا…
جاد : خاصة ؟!
حبيبة : yes…
جاد. : سااادلي…كنت بغيت ندير معاك وقت ونتلاقاو حيث جيت المغرب..بغيت نهضر معاك فواتساب…ماشي مشكيل كانتمنى تحلي مشاكلك ونهضرو نكون جيت ثاني لهنا…حيث دابا انا ف لندن…
ماجاوباتوش فاللول شوي دارت ليها طن…كيفاش نهضر معاك فالواتساب ؟…منين جاتو نمرتها اصلا ؟؟..رسلات ليه…
حبيبة : منين جاتك نمرتي ؟؟!…
تسناتو يجاوبها لكن مع الاسف كان خرج ومابقاش دخل…مافهماتش منين جاتو نمرتها وهي ماعاطياهاش ليه ومابغاتش تعطيها ليه…يلاه غاترجع تاني تصفح الانسطا من جديد حتى صونا تيليفون فايدها…كانت سعيدة…
سعيدة : ابنتي…صونيتي ليا كنت كنعوم ماشهيتك هههه…
حبيبة”تبسمات” : بالصحة خالتي…
سعيدة : الله يعطيك صحة…بغيتيني…
حبيبة تنهدات ورجعات للواقع…فاش تفكرات هضرة ناديا قبيلة…بدات كاتعاود ليها الحوار الي ضار بينها وبين ماماها حتى كملات وهي تنطق سعيدة بدون شعور…
سعيدة. : من احسن حتى تكوليها ل بشار…
حبيبة. : داكشي الي گالت ليا ماما بنعلمو عاد بنمشيو…انا مابيتش نمشي مابييييتش…خفت هي تبدا تلوح فالهضرة وماما اه مايعجبهاش الحال…
سعيدة : ماماك معقولة ابنتي وبغات دير غا الواجيب ديال زيارة حيث را مازالين نسابنا…وماعارفاش اش واقع هي باش غادي تحكم ابنتي…ديري اش گالت ليك وهضري معاه…
حبيبة : كانصوني ليه نمرتو طافية…
سعيدة : يا دلي را مايخدمش نمرة المغريب تما…
حبيبة”ضربات جبينها لشعورها بالغباء” : وييييليييي تنعيط ليه فنمرة المغريب وتنصيفط ليه فالواتساب ماكيطلعش ليا كاع…
سعيدة. : عنظو نمرة وحدة مخدم بيها واتساب وخدام بيها…من الي وقع المشكيل حيدها كاملة ودار وحدة جديدة كايعيط بيها مخبية لا معايا لا مع هاشم من ديك الوقت ولكن فاش جا مابقاش عيط…دار نمرة ديال المغريب هي باش كان بعيط لينا..النمرة الاصلية تاواحد ماعارفها…ماعيطش ليك كاع من الي مشا ولبارح ؟
حبيبة : لا…
سعيدة : وتانا ماعيط ما والو خوه الي يسول عليه ماعيطش ليه سولتو فاش جا اليوم فالصباح وتدهيت مع الناس الي جاو يسلمو فيوسف راكي عارفة دنيا كاتعمر عندنا…
حبيبة : ودابا اشنو ندير…بتسولني ماما واش هضرت معاه اش غاندير…
سعيدة : يمكن مشا غير يومين ويرجع ملي يرجع را يعيط ليك بديال المغريب وديك ساعة هضري معاه على نمرتو الاصلية…
حبيبة : كون بايعطيها ليا را يعطيها راسو منگولهاش ليه…
مالقات سعيدة ماتقوليها…شدات من عندها نمرة يوسف حتى تتاصل بيه فالصباح تسول عليه…مالقات مادير من غير انها تستسلم حتى تشوف اش غايدير معاها بشار وامتى غايرجع باش تمشي تعيش معاه تحت سقف واحد حيث علمها انه فاش غايرجع ياخذ دار كبر من هاديك…بقات كاتفكر اش غادير فاش تمشي لرحامنة مع دارهم او اش غايقول بشااار ليها…ماحساتش بالعيا الي تمكن منها حتى غفااااات…مافاقت غير على صوت تيليفونها الي كايصوني ليها تعنكشات فالفياق حيث اليوم ماقاريا حتى لعشية…كايصوني وهي كتقلب عليه حيث ترمى ليها بين المخاد مع نعسات وتيليفون فايدها..كايصوني ويقطع وهي كتقلب حتى لقاتو لقات الاتصال تقطع…شافت النمرة بانت ليها ديال برا ماعرفاتش اشمن رقم هذاك ديال اشمن دولة…ماطاحش فبالها تاحد من غير “جاد” هو الي يمكن يكون عيط ليها…
عينيها كانو لاصقين بالنعاس وفمها منفوخ ومبلوز على شكل بوسة بالنعاس…حالة عين بزز على شكل غمزة… وسادة لاخرى ماعرفاتش اشمن نمرة…وصلاتها رسالة اشعار من الواتساب هزات عينيها ودخلات لواتساب لقات رسالة من ديك النمرة…مافيهاش صورة دخلات لرقم فيه salut ! j’utilise WhatsApp…والرسالة محتواها كان “habiba ?”…
حبيبة”رسلات” : ؟؟؟
بان ليها الميساج تقرا تسنات يجاوب والو كان اونلاين لكن بدون مايجاوبها…بدات كاتسترجع الهضرة ديال جاد معاها وهي توسع عينيها ورسلات ليه باش تعرفو واش هو…باش تبلوكيه حيث ماعرفاتش منين جاب نمرتها اصلا…
حبيبة : جاد ؟!
من بعد مارسلاتها مابقاش بان ليها را دخل…تسنات حتى بان ليها الميساج تقرا..لكن بدون اجابة..بقى اونلايين خمسة دقايق وهي كاتسناه…شوي خرج من واتساب كاع….شافت الساعة كانت العشرة ديال صباح..ناضت كتفوه وحطات تيليفونها يتشارجا…دخلات لدوش تغسل…هي لداخل وتيليفون فوق طابل دونوي برا..كااان طااافي طاااافي…حتى تشعل وبان الميساج…الي كان فيه كلمة وحدة كاتبين شكون الي فالنمرة..
بشار : ” Bachar “….
خرجات من دوش غاسلة وجهها ودايرة روتين ديالو ومنشفو ومطرفة حالتها…مشات نيشان لماريو كحزات الباب واختارت شنو تلبس فالعشية فاش تمشي لافاك…اختارت شنو تلبس وعزلتهم فوق الناموسية…مشات لكوافوز مشطات شعرها وجمعاتو عاد رجعات لطابل دونوي شافت تيليفونها واش رسل ليها صاحب الرقم الجواب الي باغاه…جلسات على طرف ناموسية وشعلات الهاتف دخلات الواتساب وهي تلقى الرسالة…غااا هي قرات “bachar” وهي توسع عينيها على جهدهم تا ولات تبان ليها الكتبة مدوبلة فحال حوالت فديك اللحظة هههه….كاتقرا وتعاود تأكد وتقرا واش “بشار” وتعاود تقرا اش رسلات هي سولاتو واش جاد وهو كان بشار…اش غاتقول باش غاتجاوب…بقات مصدومة شي شوية وهي كاتقرا وتعاود…
حبيبة : اوييييييلي بيت نطيييير يا وعدي…
هزات عينيها ل تاريخ vu لقاتو خرج ديك الساعة فاش رسل ليها الرسالة…شافت حتى عيات وهي تجاوبو نيشان…
حبيبة. : ا اه حبيبة…ماعرفتش نمرة داكشي باش…
رسلات هاد الرسالة وماعرفااااتش علاش حسات بالاحراج والخلعة فاش قرات سميتو وفاش غلطات هي فسميتو…يمكن حيث هي على ذمتو وانها تعرف شخص اخر من غيرو…ماعرفاتش علاش كاتحس مزال قلبها كايخفق بشدة من هاد الموقف الي طرا دابا…حسات بحناكها سخنوووو حتى نملو عليها…حطات ايد على خدها وايد باقي شادة الفون…
زفرات وهي تخرج من الواتساب وطفات تيليفون حطاتو يتشارجا وناضت وقفات بقات واقفة وكتغزز فشنايفها…ورجعات جلسات وعاود تاني وقفات بقات كاتمشي وتجي…شوي وهي توقف…
حبيبة”صعرت غا وحدها” : وهو ماااالو في نعرف جاد ولا زمر..اش بيني وبينو كاااع…
شوي وقفت وبقات كاتفكر غا وحدها حطات صباعها على جبينها وهي تزفر…
حبيبة : هففففففف….اش بيني وبينكم بجوج لا نتا لا هو…يخ…
سمعات صوت تيليفونها وهي طييير هزاتو حساب ليها هو…ساعة كانت ناديا كاتصوني عليها فالواتساب باش تنزل الى فاقت…قطعات معاها وهي ترجع تيليفون يتشارجا باش تنزل..بدات طلع فكمايم بيجامتها من الايدين وخشات رجليها فكروكس ديالها تمات غاديا حتى صونا ليها التيليفون كانت علاين تخرج من باب بيتها…رجعات بخطواتها ناحية تيليفونها هزاتو وهي تبان ليها نفس النمرة ترددت للحظة انها تجاوب…علاش ترددات واش خافت ولا تحرجت ولا اش ؟!…علاش هاد تصرفات الي كيوقعو معاها…واخا تعيا تقول را هو ماسوقوش او ممسوقش ولكن را كايبقى “زوجها”…واخا مايكونش بينها وبين جاد تاحاجة الي اصلا ماكاين بيناتهم حتى حاجة وهي براسها ماكتعطيهش اهتمام سوى انه صديق ف موقع تواصل اجتماعي…
حبيبة”عضات فمها وهي تطلق الخط ونطقات بصوت مشحرج شبه مسموع” : ا الو…
بشار”رد عليها بصوت خشن حساات بيه فشي شكل…مكمل بتزعزيعة والبحة..” : ناعسة ؟!…
حبيبة”حركات راسها بالنفي ونطقات” : اهء لا…
بشار”كايشوف قدامو مخنزر وحجبانو ملاقيين” : مزيان مزياااان…
حبيبة : احم..فاللول غلطت حساب ليا نمرة واحد الولد كا”قاطعها بواحد طريقة خلاتها تصقل”…
بشار”كسيرا خارج من قدام دارو تم” : ماساليتش باش نهضر معاك بهاد النمرة…
حبيبة : هادي هي نمرتك ؟!..م حيث بغيت نهضر معاك صونيت فهاديك الي كنتي كاتهضر معايا بيها لقيتها طافية…
بشار : مزيان الواحد يحضر عقلو…زعما بعقلك…
حبيبة : مافهمتش…
بشار : شنو بغيتي تهضري معايا ؟ شنو عندك…
حبيبة : ففف..ماما بغات تمشي لهيه لفيرما باش نشوفو خالتي توريا ونسلموها ف يوسف…
بشار : اش بان ليك نتي ؟!..
حبيبة : خايفة..خايفة خالتي توريا تگول شي حاجة وماما تقلق ولا تفهم وتعرف…ما مرتاحاااش..مابغيتش نمشي حيث مامرتاحاش…ماعرفتش ماعرفتش…هذاكشي علاش صونيت ليك باش نعلمك اش ندير…حيث نتا گلتي ليا دارنا ماتمشيش ليها حتى نفكو مشكيل شيكات…
بشار”كايسوق وسااااكت داير صباع ايدو على فمو ولحيتو كيحك فيها مرة مرة وكيسمع ليها…عارف اشا مشات تما توريا مغاديش دير شي مشكيل حيث مغاتبغيش شوهة…لكن هي ممكن تآذيها ممكن تمعها شي حاجة او ممكن تهددها بالشيكات الي ماعارفاش توريا براسها واش تفكو…سكت هو وسكتات هي الي تحل عليها الباب وكانت امها ناديا شافت فيها ووقفاتها بايدها حتى سمعها كاتقوليها “كانهضر مع بشار”…شوي سمع كاتقوليها واخا…حتى نطقات حبيبة وقالت…
حبيبة : س سلمات عليك ماما…
بشار : شكرا…(ماشي يسلم عليها الخير هههه)…
حبيبة : اشنو ندير…
بشار : سيري…
حبيبة”وسعات عينيها” : كيفاش ؟ ع علاش ؟..
بشار : سمعي هضرتي…
حبيبة”عضات حناكها من لداخل وزيراات على صباعها” : والى دارت شي حاجة…و “قاطعها”
بشار”عض لساانو ماباغيش وماحاملش يعاود الهضرة…يمكن هي ماعارفاهش بالي اذا قال شي حاجة را متأكد…غمض عينيه وحلهم ورجع نطق” : سيري…قضي الغراض مع داركم و بقاي كي نتي…ديري الواجب معاهم ورجعي فحالك…شوفي يوسف الي بغيتي تشوفيه راك غاديا فالامان…حلي دماغك شوية داركم مابغيتيش يعرفو شنو وقع ؟…سيري معاهم ورجعي…
حبيبة : ممم..
بشار : مزال عندي مانقضي هنا..نسالي ونرجع نديك…ديك ساعة…نرجع نهضرو نيت…”نطق بصوت كاتحسي بيه مزير عالكلمة”…نهضرو نيت…
قطع معاها..وبقات شادة تيليفون فايدها كاتفكر كيفاش تمشي وكيفاش هو قالها بهاد سهولة…واخا عارف ان توريا ممكن تحشي ليها الهضرة او دور فيها…رجعات خدمات دماغها كيف قاليها وفهمات انه اذا مامشاتش دارهم غايعرفو ان بيها شي حاجة تما و فكلتا الحالتين يعيقو يعيقو….اما هو كيف قطعات معاه وقف جنب طريق وبقا شحاااااال كايفكر وكل مكيفكر كايبان الفك ديالو كايتحرم وحجبانو غير مكيزيدو يتورمو من فوق تا ولاو عينيه من كثرة ماخنزر وغوبش بيهم كحليييييين….اش وقع ليه؟!!…
نخليو مدينة مراكش ونتوجهو ل وحدة من اراضي الرحامنة الشاسعة…في الفيرما الي ماخطاهاش بنادم الي جا من معارف توريا كايسلم فيها ف يوسف الي خرج من الكلينيك والي فاش بغات تخلص تصعقات وراسها جمد من الي عرفات ان كلشي تخلص خصوصا من الي عرفات ان بشار هو الي خلص وهنا بلغات المحامي الي اكد ليها ان هادي حتى هي دليل او شهادة تعاون بشار ف الشكاية الشي الي خلاها تصعر واخا حاول ما امكن انه يهدنها باش تبان طبيعية وتفادا اي مشكيل ديرو باش مايرجعش عليها بالسلب…
دخلات لكوزينة كاتگفض كمايمها..لقات سعيدة كاتعمر فاتاي للناس الي جاو و كريمة حداها كاتستسف فالحلوة هزات كريمة راسها وشافت فيها مبسمة…
كريمة : خاصك شي حاحة خالتي…
توريا : بغيت نرد شوية صوبا ل يوسف…كاين شي گرعة هنا…
كريمة : واه كاينة غا سيري انا نصبها ليه…
توريا”كاتشوف ف سعيدة ماهازاش فيها راسها” : لا سيري دي صينية لناس انا نردها…
حركات كريمة راسها ورجعات تكمل حدا سعيدة…بدات توريا كاترد فصوبا حتى شوي سمعو صوت ربيعة داخلة وكتسلم على شي عيالات عرفوها غا من صوتها…تا دخلات عليهم لابسة جلابة جدييييدة فالمسكي و شال فنفس اللون مكحلة عينيها تا بغا يسكت ليهم الحس ومبسمة تا بانو سنانها صفرييين و شنايفها من لداخل ليمونييين بالسواك اما لايدين باقين حمرين وفيهم تفرتيت الخضر ديال الحنة ورجليها دايرة ليهم قطن ولابسة عليهم لباموس باقيين محنييين…ريحة دايراها تعطعط تا دخلات عليهم هازة صويك فايدها وضحك…
ربيعة : ياااا مسا الخير هههه…
توريا : عالسلامة..تي بركتي تم مابغيتي تجي هن…
ربيعة”سلمات عليها هي اللولة عاد دازت لخرينات تسلم وتنطح بسلامها” : غا سكتي ولفت خوتي على رقبتي لا بزز باش خلاوني نجي كون ما سيحمد حلف عليا…
سعيدة : وسبحمد مالو تاهو عزيز عليه يقوي..يخليك تايمشيو خوتك ويولي باك شوية…
ربيعة : وراه توحشني هههههه”بخجل خلا سعيدة تحرك راسها ودور لهيه تضحك مستهزأة وفنفس الوقت كايضرها خاطرها بجهد على ربيعة”…
كريمة : تي بصحة نقيش هههه…
ربيعة : الله يعطيك صحة..البارح عمت واليوم صبحت نقا.شة عدنا هاو كي ساليت جابني خويا عدنان..را خليتو عيط ليه سيحمد يبرك تم حيك (حيث) صابو جاي نيت هنا لدوار داخل من فيلاج…”شافت ف توريا” تي كي بقا يوسف على سلامتو…
توريا : الله يسلمك..راه الفوگ تا تسالي ولحگي عندو شوفيه…سيري بدلي عليك وشوفيه من تم…
ربيعة : داكشي نيت…
خلاتهم ومشات لبيت عند عگوزتها وشي عيالات جلسات معاهم شوي دارت الواجب ديال ضيافة تا ناضت مستاذنة وطلعات لفوق توجهت عند يوسف لقاتو ناعس باستو فراسو وخرجات لبيتها…حيدات جلابتها بقات غير ب بودي بيض وبيرميدا نفس اللون علقات جلابتها وحلات الماريو باش تجبد البيجامة الي غاتلبس…حتى تحل الباب وتسد بشوية وهو يوقف عليها جا وراها ضهرها مع صدرو ماجات فين تهضر تا لصقها مع الماريو…
سيحمد” خبط ليها جنابها” : قويتي الغبور انوارة ؤحامنة…
ربيعة”صحكت تا تزنگت” : غلبك الوحش…
سيحمد : ورا الوحش ديما غالبني جيهتك الكبيدة…”كايضغط عليها مع الماريو..” هممم…
ربيعة : ومالك ما جيتي ديتيني لاش مصيفطني عما خويا…كنتي تكبر بيا وتجي تجيبني…
سيحمد”دور ايدو وعبز ليها وحدة من بزا..ز.لها وزيررر عليها تا غوتت بشوي” : باش تعلمي لمك تبركي تم وتخليني بلايام…
ربيعة : وتا زگا دروك يسمعنا شي حد…
سيحمد : بغيت نتكي مك هن..توحشت نحرك فيك السواكن ونهز ليك العلام مانتي مغنية مانتي مغوتة مانتي مزغرتة…ماكرهتشااااي تخرجي بشي كرش مع سلام عليكم نحتاجوش حنا طبة ولا فقهة…خلي غا الفقيه الي فقهم نهار لول “شد ليها ايدها وحطها فوق حجرو تا ضحكت…عرفاتو قصد المعلم”…
ربيعة : وا سيحمد تا نعل شيطان…
سيحمد : وتي نعلتيه الي جيتيني مكحلة وناقشة وعايمة…نخليو هادشي يتيم مانزروش ليه القنات…
ربيعة : تاليل ينعس الغاشي وهاني ليك…
سيحمد”سكت تا سكت وهو ينطق مبعد منها كايحك فلحيتو” : ديري بحسابك بغد (بعد) غذا نمشيو عد طبيبة الي بغيتي تمشي عندها تشوفي هاد تعطال الولاد مناش…
ربيعة”وسعات عينيها تا دمعو ليها” : حلف يا سيحمد حلف لا نتا داوي بصح…
سيحمد : كانتفلى…
ربيعة : وديما تگوليا واخا ومتديني…تشوگني (تشوقني) وتخلي فرحتي گداش وتگطعها فيا…اش كرا وجرا تا تبدل رايك ونويتيها..
سيحمد : الوقت كايدوز ونتي باركة وتكبري هاو نديرو الحيلة گبل لا يفوت الفوت….وجدي راسك نديك لمراكش وديك ساعة يكون خير.. الي بغيتيها يا لالة گلبي نديروها تبقا لينا ربيعة بخاطرها….
ناس الي جاو يسلمو ف توريا خرجو…والليل وصل وكل واحد بدا كايدخل لعشو…طمنات على يوسف من بعد ماعطاتو اشراق يتعشا بنفسها…اما توريا كانت جالسة ف قاع دار وكاتهضر مع خوها الكبير…حتى كملات معاه وهي تقطع يلاه…دخلات لبيت كاتقاد فزيف على راسها لقات عيدة كاتسبح وحداها الكنينات كل وحدة شادة تيليفون تبقشش فيه…
توريا : غذا يمكن بغا يجي خويا عبد الرحيم و صافية…
كريمة”هزات راسها” : واه بغات تجي كاتسنا غا خالي عبد الرحيم يلحگ عليها حيث بغا يجي مع مرتو زبيدة…
عيدة : مرحبا بالي جاي والي طل يطل عليه الخير…ديرو بحسابكم بعد غذا را جاييين نسابك ا توريا…
توريا”غوبشت” : اشمن نساب ؟!..
سعيدة”هظات راسها فيها ورجعات هبطاتو فتيليفون وفنفس الوقت كاتسمع”…
عيدة : هاويلي يا بنيتي تي فين مشا عقلك…نسابك..دار مرت ولدك…
توريا”زمات فمها وخنزرات بجنب ماعاجبها حال” : شلا شكون بغا يجي…فين هي ياك مشات مابقات صدت لهادجيه مابقات سولت…شكون سبق العيب دروك…
عيدة : سولااات وعاودت وسولات فيوسف وديك الوقت نتي تدهيتي مع مشكيلك مع ولدك…هاهي جايا وبغات دير الوجيب…لجمي فمك ابنيتي وخلي الما منين يدوز…ناس ماخرجو معانا لعيب ومابغينا نتعايبو مع حد…
سعيدة : كاااتسول اتوريا كاتسول…شحاال من مرة جات تشوف يوسف وماصابتكش…نتي تدهيتي مع المشكيل…
توريا”خرجات فيها عينيها” : وعلاه تيليفون مناش يشكي…
عيدة : تورياااا هدني الوقت ابنيتي ..ناس جاييين يسلموك فولدك…ديري الصواب وهني الوقت الله يرضي عليك…
توريا”زمت فمها تا زماتو وتعوج فيه وتزفر جناوح منخرها يفرفرو..شوي هزت عينيها ف سعيدة” : وياك هو باغي يطلگها ماتلاشاي ولا فاش عينو…
سعيدة : والله وعلم بيناتهم…
ربيعة : تاتجي وسوليها…
توريا : ممم…
لا هي بقات دوات لا هما بقاو جبدو الموضوع…طاب العشا وناضو الكنينات حطوه كان عبد القادر يلاه كي دخل مع الشيفور كان غايب مسافر…تعشاو وكل طلع صد لبيتو…
داز الليل وصبح الصباح داز نهار بنهارو وباحداثو لا فاليفيرما ولا فمراكش نيت الي كانت واقفة ناديا كاتقاد فلباسها وترش فبارفانها كاتسنى الحاج مولاي حفيظ يكمل لباسو باش يخرجو…ضارت عندو…
ناديا : هاني برا على ماتسالي…
م.حفيظ : وا عليه…
هزات صاكها فايدها كبير وكحل…خرجات لقاع دار كاتقاد ف جلابتها المخزانية فلون الخزي المخدومة بالدبانة خدمة ليد بنفس اللون وتقاد فشالها فنفس اللون تاهو عقداتو ببروش ذهبي باش تبتاتو وتسوس فوق صدرها وتقاد فجلابتها تا وقفات..كانت رقية جالسة حدا دراري…
ناديا : بتوكليهم قبل مايمشيو..وعطيهم لانش بوكس ديالهم…ونتي ا وردة كولي ماكلتك اه كاترجعيها هي هي…سمعتيني…
وردة : واخا ماما…
حركات راسها ووقفات كاتقاد فساعتها…تا خرج مولاي الحفيظ من البيت كايقاد فطاقيتو لابس فوقية بيضة بالكمايم وطاقية بيضة تاهي…كايدوز على لحيتو البيضاء الكثيفة بايدو ويتمتم بذكر الله…
م.حفيظ : اه فين هي حبيبة…
ناديا”هزات عينيها لفوق ونادات باسمها” : حبيباااااا…”تسمع صوتها من ورا مابسمت الباب كاتقول “هاني جايا”…
م.حفيظ : هاني فطوموبيل الله يرضي عليك لا تعطلوش…
حركات ليه راسها ومشا هو بقات هي كاتسنا تا سمعات صوت خطاويها هزات عينيها بانت ليها نازلة وحادرة راسها كاتحسي بيها وكاتبان انها ماحاملاش تمشي او ماشي لخاطرها…لابسة جلابة شيبية بالقب مخزانية بفصالة مراكشي واصلة حد الكعبة…ومعاها صباط موكاسان فنفس اللون ديالها كيف خيطتها خذاتو ليها…وصاك صغير ديال لوي فيتون..مادايرة لا ميكاب جامعة شعرها لور وريحة بارفانها واصلة…نزلات عندها ووقفات وقالت بغير خاطر….
حبيبة : هاني…
ناديا : يلاه…
حركات راسها وهي تمشي باست رقية وخوتها وتبعاتها لقاو مولاي حفيظ مديماري طوموبيل…ركبو معاه وتوجه بيهم نيشان ل “سيدي بوعثمان”…غا خرجات من مراكشي وهي تحس بقلبها مقبوووووط بزااااف ماحاملاش ترجع لديك البلاصة..ماحاملاش تدخل عندهم وتشوف توريا تاني…خايفة فنفس الوقت تلوح ليهم شي هضرة او ماتعاملش معاهم ب صواب…غاديا فطريق وتنش وتصرط فريقها…غمضات عينيها باش تنعازل على الواقع وتلقى راسها غييير كتحلم….حطات راسها على زاج وفلداخل ديالها كاتغوت رجعوووني…كاتشوف فطريق وكاتمناااها تطوااااال لكن فاش حنا كنبغيو الحاجة كايوقع لعكس…ماعارفينش انها حكمة من الله…الي بغات وقع عكسو دغيا وصلو ودخلو للفيلاج وشدو البيست الي كاتدي لدوار…مسافة الطريق حتى كانو دخلو وشدو طريق الفيرما الي جات منعزلة على ديور تما…قلبها نقز وطاح فكرشها من سمعات باها كايقول “الحاج علمهم يحلو الباب ههه”…حلات عينيها ورجعات لواقعها المر فاش شافت بالي دخلو لفيرما ورجعات تاني لهاد الدار الي عاشت فيها ايام عمرها تنساها….
وقف السيارة وحل الباب نزل هو وتبعاتو ناديا الي ضارت عندها وقالت ليها “نزلي”…
ع.القادر : مرحبااا مرحبا الحاج…وتا زارتنا البركة يااا….”تسالم معاه وشاف جيهة ناديا حرك ليها راسو”…
م.حفيظ : على سلامة سي يوسف…
ع.ااقادر : الله يسلمك وكااان..دخلو دخلو “شاف ف حبيبة” زيدي بنتي تي كي طرا وجرا غااا عگبتي لداركم ماتليتي رگبتي لهاد جيه ههههه ادوي يا…
ناديا”نغزتها ونطقات بين سنانها” : تحركي سلمي عليه…
حبيبة”حدرت راسها…قربات باست ليه ايدو تا طبطب ليها على راسها وتمتم بجملة “الله يرضي عليك”..وضار عند مولاي حفيظ كايفرنس ليه…شوي وهي تخرج سعيدة لاستقبالهم بابتسامتها المعهودة وبشاشة وجهها كان تابعها حتى هاشم الي خذا نص نهار باش يكون فاستقبالهم…سلمات على ناديا وهي تبان لحبيبة الي وسعات ضحكتها وعنقاتها طبطبات عليها ونطقات فوذنها…
سعيدة : كلشي اايدوز مزيان ابنتي…
حبيبة”حركات راسها وتنهدات ليها فوذنيها تا زيرات عليها سعيدة
تقدم مولاي الحفيظ من بعد ما ضار لكوفر جبد شي ساشيات فيهم حليب ودانونات و شي كراطن فيهم الحلوة التقليدية موصى عليها…ومشا مع عبد القادر الي سلم عليه هاشم وسلم على حبيبة وناديا…الي دخلوهم لصالون…لقاو عيدة جالسة حاطة ايد على ايد وكاتسنى فيهم..كانو حداها شي عيالات جاو تاهما يسلمو…تقدمات ناديا سلمات عليها وباست ليها راسها…
عيدة : الله يجيك الخير ابنيتي يجيك الخير…”حطات ايدها على ايد ناديا” فين هي زينة الكنينات…
ربيعة”عوجات فمها ومطمطات بدون مايشوفها شي حد”…
ناديا : هههه “ضارت لقاتها وراها حادرة راسها” اويلي زيدي سلمي..
عيدة”كمشت فيها عينيها” : تي زيدي حبيني هاويلي شتك مبعدة…ياك ابنيتي…
حبيبة”شبه ابتسامة وقربات ليها حاكرة راسها باستها من ايدها وهي تقربها عيدة وباست ليها راسها وطبطبات عليها” : لباس عليك…
عيدة : الحمدي الله ابنيتي…
ناديا”جلسو وداو وجاوب فالهضرة” : فين للا توريا…على سلامة يوسف نقزها بعدا…
عيدة : سيري ربيعة نابي على توريا تجي….
يلاه بغات تمشي تا بانت ليها جايا داخلة وهازا حاجبها ومخنزرة شوية…قالت “سلام” وهي تهز حبيبة عينيها فيها ورجعات حدراتهم قلبها كايضررررب بجهد…وقفات ناديا سلمات عليها وقربات عندها…
توريا : ماكتسلميش ابنيتي…
ناديا : ههههههه حشمانة منك غا سمحي لينا اللا توريا مادارت فيها مايصلاح…
توريا : يااك بعدا”طلعتها وهبطتها وهي تبسم وبدات تضحك تا استغربت حبيبة وربيعة وسعيدة الي جمعت غوباشتهت”…ههههه وماعليش باقا صغيرة..زيدي بنتي سلمي زيدي…خليتي بلاصتك هنا…
حبيبة”هزات حاجبها وقربات سلمات عليها وتوريا كاتطبطب ليها على ضهرها” : على سلامة احم..”نضفات حلقها” يوسف…
توريا : الله يسلمك…بغيتي تشوفيه ؟!
حبيبة : اه بغيت…
توريا : ديها سعيدة تشوفوو راه الفوگ متكي…
حركات راسها وتبسمات ل سعيدة الي جراتها معاها…غاديا طالعة فدوك دروج وقلبها مقبوووط…ضارت عندها سعيدة وهي توقف تالحقات عليها وعنقهاتها بجنب غاديا وكطبطب عليها باش تهدنها حيث عارفاها بالي ماشافتش اي ذكرى ليها زوينة هنا شافت غير تهديد وحشيان الهضرة…وقفات عند بيت يوسف دقات الباب وهي تدخل طلات عليه لقاتو ناااعس…
سعيدة : نااعس مسكين…
حبيبة”بصوت منخفض” : خليه صافي…
سعيدة”ضارت بقات كاتشوف فيها وهي تنطق” : جايا على عينيك ياك هههه…
حبيبة : راكي عارفة “ضارت كاتشوف وهي تهز عينيها جيهة باب بيتها الي بقا مسدود تاحد ما وصلو ورجعات ضارت لهيه وزفرات”…
سعيدة : مزيان الي جيتي..خلي كلشي طبيعي تاتقاد الامور وديك الساعة تفاهمو بيناتكم وكل يشد طريقو…راه گاليك جي حيث قرا الحساب لداركم وليك…الى ماجيتيش تما داركم يعرفو كلشي وتصعاب الوقت عليكم…خلي كلشي يمشي عادي…
حبيبة : كانعيش شي حوايج فوق جهدي…كل نهار كل مرة كنكذب على دارنا…هاني غادي نمشي نعيش معاه ماعارفاش راسي فين بيت نمشي وكيفاش بنعيش معاه…غاديا عند واحد مكرفص عليا ومرحمنيش فاش كنت تنطلب فيه يرحمني…كون ما يوسف وبابا كون ماشفتش حتى وجهو…
سعيدة”تنهدات” : هضر معاك ؟
حبيبة”حركات راسها” : عطاني نمرتو ديال لهيه…گاليا يسالي شي حاجة ويجي هاد الايام…
سعيدة : ايه تانا هضر معايا…هضر معايا البااارح ووصاني عليك..
حبيبة : كيفاش ؛!!
سعيدة : گاليا بلي غاتجيو ووصاني عليك ووصاني نهضر مع لالة تدوي مع توريا تلجم فمها…وهضر حتى مع سيدي باش تحشم منو…يعني را قاااري الحساب حتى هو كوني هانية غير رتاحي ابنتي…
يلاه غايمشيو حتى بانت ليهم توريا طالعة وكاتشوف فحبيبة وهي تبتاسم ابتسامة خفيفة تا لحقات عليهم ووقفات شافت فحبيبة وهي تعوج راسها فيها…
توريا : علاش گطعتي اللغا مابقيتي تسولي…
حبيبة”مكتشوفش فيها” : كنسول هي نتي متتكونيش..جيت عند يوسف مالقيتكش…
توريا : ايييه مكنتش مسالية..”طلعت فيها وهبطت” مابقاش بغا يطلگك هذاك ؟!
حبيبة”الصمت”
توريا : وراني سولتك…
حبيبة : حتى يفك شي مشاكيل…”سكتت”…
توريا : مممم…لقيتي يوسف فايق ؟..
حبيبة : ناعس…انا نهبط عند ماما تايفيق ونشوفو…
تمات غاديا وهي تبعها سعيدة تا نزلو فدروج وتوريا متبعة ليهم العين…
توريا : اسيري الله يگطعك عليا نتي وياه…
بقات حبيبة جالسة على شوك لاصقة فناديا ومابغاتش تحرك من حداها وكريمة وربيعة كايحنززو فيها تا ناضو لكوزينة يقضيو شغالهم ويصايبو الضيافة….هزات ربيعة تيليفون ودوزات الخط لمليكة الي لقاتها مصونيا عليها…
مليكة : تي فاين غطستي ياناري…
ربيعة : جاو شي ناس هاو مسمعتوش كنت مخلياه يتشارجا…
مليكة : جاو هادوك نساب رباح وجات العروسة المتعوسة…
ربيعة : جااات..جايا وتخنزر شوفي ليك البرهوشة…
مليكة : ياكما خنزرت فمي على رقبتي تا نگطع عليها طيارة ليلة باشما تقامت عليا…هاكيلي…
كريمة : هههه لا ماخنزرت شاااي…
ربيعة : باغيا امتا تمشي…
مليكة : وتوريا شتگول…
ربيعة : را دايرة الخاطر على عينيها…هازة منها ما سولت عليها ما طلت…
بقاو كيهضرو معاها ويعاودو ليها اش واقع وكل جديد فالدار خصوصا من عرفات ان دار حبيبة جاو وهي معاهم…اما هي بقات جالسة وكتشوف وتسمع هضرة ناديا مع عيدة وسعيدة الي شادين معاها الهضرة …ناديا حسات بتوريا ماحاملاهمش يجيو لكن تصرفتت بطريقة عادية مابغاتش تبين انها حسات بيها…خصوصا منوشافت عيدة فرحانة بيهم…كانت كاتهضر وتضحك حتى نطقات عيدة موجهة كلامها لحبيبة.
عيدة : بنيتي ديري وجي نهار لحد نشاعلاه تمشي معانا لواحد دوار…
حبيبة”صرطات ريقها” : ها علاش…ق قارية منقدرش…
ربيعة : هاويلي كاين شي قراية نهار لحد…
حبيبة”الصمت”..
عيدة : بغيتك اكبيدتي تكوني عمانا…تايخرجو ناس هاو نعلمك اش كاين…
مابغاتش تقوليها را غادييين يخطبو ل عبد القادر حيث كانو شي عيالات جالسين لهيه…تبسمات ليها ناديا ونطقات “ان شاء الله تمشي علاش لا”…حبيبة تزاد معاها زايد وقلبها بدا يضرب بغات تنغزها تقوليها لا بغات تقوليها مابغيتش لكن اجلات حتى تمشي وتلقى شي سبة…حتى جاتها رسالة فيها السبة الي غاتخليها تقولها نيشان بلا ماتحس براسها انها قوات فالكذوب…من بعد يومين ماهضر معاها من داك نهار…حلات تيليفون من شافت اسمو فنمرتو كاتب ليها….
” بشار : وجدي راسك نهار سبت نجي نديك…”
كانت هادي رسالتو الي زادت فخفقان قلبها منها غاتلقى سبة انها ماتمشيش ومنها انها غاتمشي للمجهول الي هي خايفة منو…ماعارفاش كيفاش غاتعيش معاه كيفاش غايكون معاها…واش غايحتارم شروطها واش غاتعيش معاه الحوار الي مفتاقداه منو…كيفاش غاتواجه المصير #المجهول للمرة ثانية…وذلك بعد يوميييين…
اما هو كان جالس فالفوطوي…مقابل مع الطبيب الي كان كيسمع ليه او كايتسناه يجاوبو او يهضر…كان هو رسل ليها ديك الرسالة وهو وسط الحصة الاخيرة قبل مايرجع تاني لمغرب…حك شنايفو بسنانو كايفكر وكيشوف فنقطة فااارغة…حتى هز عينيه وشاف فالطبيب الي نطق وخلاه يوجه شوفة فيه…
محمد : شكون هي “اشراق”…
بشار : ختي الصغيرة…معزتها من معزة يوسف..گول يوسف كثر…شوي…
محمد : علاش حيث حالتو ضعيفة صحيا ومعنويا ونفسيا ؟!..
بشار : يوسف مالقاش المعاملة الي تگد بيه وعليه…
محمد : واشراق ؟…علاش معزتها قل من يوسف…
بشار : تعديت على اشراق…تعديت عليها بزاااف…
محمد”هز حاجبو” : بحالاش…
بشار : رزيتها فعز الناس عندها…طفيت عليها الضو فالنهار الي ضوات فيه…”عينيه ولاو حمرييييين”…
محمد”سكت وهو كيشوف فيه ويرجع يلملم الهضرة الي قاليه” : اشراق معزتها عندك كثر من يوسف…اشراق الذنب الي حاسو من جيهتها مخليك تخاف منها وعليها…مخليك تشوفها ديك التربية الي تزادت فداك نهار…كاتحاول تعوضها بالماديات اما المعنويات نتا مفتاقر ليهم من جيهتها حيث نتا براسك دوك الكعنويات الي غاتعطيها خاصك تكسبهم ف طبعك نتا عاد تعطيهم ليها…
بشار”الصمت”…
محمد : امتى راجع ؟
بشار : zwei Tage (يومين)…
محمد : تعيش معاك الزوجة ديالك فنفس الدار ولا تبدل ؟!
بشار : وصيت باش نبدل السكنى..بلاصة قريبة لدارهم…
محمد”تبسم” : باش ترتاح هي تكون قريبة لدارهم ؟!..
بشار هز فيه حاجبو…وحرك ليه راسو ب لا..وتا طبيب ماقال والو واخا را عرفو وفر ليها وسائل راحة وبدا باول حاجة هي يسكنها قريب لدارهم…بدا كايكتب فلاجوندا عندو…وبشار رجع تاني سهااا وعينيه حمريييين كايدور فداك تيليفون ويعاود…حتى وصلو ميساج منها بزربة دخل يقراه لقاها كاتبة ” ok”…بقا كايشوووف فيه ويعاود حتى طفا تيليفونو ورجع حطو بمجرد ما سمع سؤال الطبيب…
طبيب. : تقدر تجاوبني بالاسماء شكون اقرب ناس ليك ؟!..
بشار”حرك راسو مثاااااقل” : يوسف،، اشراق،،سعيدة،، هاشم،حسام…جدي..
محمد : ابعد ناس ليك…
بشار : الي ولداتني…
محمد : وحدها ؟”حرك ليه راسو”..و مراتك ؟!..
بشار : ماعندك لاش تعرف…
كمل معاه وخرج من العيادة…مشا لدار دوش ولبس عليه..وجد ليه كاس القهوة وجلس مقابل مع لابتوب..كايحاول يخدم لكن خاطرو معصب…علاااش معصب ؟….هز واحد الورقة صغيرة كايقيد فيها اسماء الحوابج الي برزطوه او عصبوه الي او محملهمش بدوون شعوور …سواء حوايج او اشخاص…فينما يسمع شي حاجة عصباتو كايكتبها فورقة واخا غير بسمية…ماحسش براسو اش كايدير فور ماتفكر قبل يومين…وبدا كيحك فشعرو وراسو ولحيتو بطريثة غرييبة…وحجبانو بداو يتجمعو وعروق نواضرو يتنفخو لييييه ولا وجهو كايخلع ويرعب الى شافو شي حد..هز ماركور حمر وكتب اسمو فديك الورقة البيضا…والاسم الي كتب كان يحمل اسم….
… “جاد”….
داز الوقت ودازو احداثو الي كانت خفيفة عند البعض وثقيلة عند البعض الاخر…والاخيرة المقصود بيها “حبيبة” الي عارفة راسها فالاخير غايوصل الوقت وتزف من جديد للمجهول…وتبدا حياة جديدة فبلاصة جديدة ثاني وهاد المرة واخا فمراكش الا انها غادي تعيش الغربة من جديد…
“غريبة في وطني”
حطات اخر ماتبقى من ملابس ف فاليز ديالها…كانو ثلاثة ديال الفاليز بالترتيب من الاكبر للاصغر…سداتها وهزاتها حيث كانت اخر وحدة هي صغيرة دغيا غلبات عليها…بقات واقفة وكتشوف وعقلها رجع غاب من جديد…حاسة ب حجرة كاتمة صدرها..الراحة بدات تنقص عندها والتخمام رجع يزور عقلها…بقات هكاك حتى ضارت وهي كاتشوف ف الكارطابل ديالها الي فيها لابتوب ديالها وفيها الايباد وكل ماتحتاج…تأكدات منها ومن كلشي حتى تدق الباب…
حبيبة. : ايووب ؟ (حيث ايوب هو الي كايدق ولا مولاي حفيظ).
رقية : انا بنتي…
حبيبة : ويلي وعلاش كدقي..دخلي دادا…
رقية دخلات مخلية البسمة مزينة شفايفها والجنية تقطر منها…لقات حبيبة باقي واقفة ببيجامتها ساتان الفوقي نص كم وتحتي شورط قصير زايد بارز ليها ليهونش اكثر ورجيلاتها الي يقطرو بالحليب واخا قصيورين كلها فاتنة وكلها كياتة…قربات حداها رقية الي عنقاتها بجنب ودارتها تحت باطها حيث رقية طويلة…عنقاتها تاهي بدورها وتنخششات فيها كأنها كاتاخذ معاها مايكفي باش يسد شوقها لدارهم…كأنها بغات تعاود ليها كلشي وتقوليها دادا ها اش واقع ليا واش طاري…بغيت نتفك بكن ما باليد حيلة انا مازال مقيدة….
رقية : هي صافي جمعتي القش هههه…
حبيبة”تبسمات فوق الخاطر وحركات راسها” : اه صافي ..
رقية : معاش بايجي ليك…
حبيبة”عضات شنايفها لثواني وهي تحرك راسها عاود ونطقات” : ماعرفتش معاش جا اصلا…گاليا سبت بالعشية بينجي وديك ساعة الى قرب را بايعيط ليا نلبس…
رقية : ايوى عالله يجي بكري شوي هي يتعشا معانا…
ماجاوبتهاش حبيبة واخا متمنية يجي معطل باش تبروفيتي مع دارهم اكبر قدر ممكن…عاونتها فحميع كملات داكشي وحطاتو عند باب البيت ودخلات لدوش هي خلات رقية نزلات…اما هي كي دخلات لدوش طلقات رشاشة نازل منها الما سخووون تا طلق الفوار وبدا دوش يتغمم وهي تنصل حوايجها رماتهم فالسلة ودخلات تحت رشاشة غسلات شعرها مزيان وغسلات جسمها حيث نهار كامل وهي فلافاك وكان العجاج عاوتاني…خرجات من دوش تقطر بالما..نشفات حالتها وكيف العادة هذا روتين عندها انها تذهن جسمها وترطب مزيان والا ماكتحسش براسها عامت…يلاه كاتذهن حتى صونا تيليفونها وهي دور جيهة طابل دونوي هزاتو لقاتو هو نيت “bachar”..الشخص الي حتى كاتنسى ويرجعها للواقع المر الي هي فيه…طلقات الخط ومع كلمة “الو” تسنات الرد منو…كان الرد عندو معطل نيييييت…شكاات واش كايسمع ولا تقطع الخط من جديد يلاه غاتشوف واش باقي الخط…حتى سمعات صوته كايهضر واخا البحة واخا تخين واخا خشين الا انه كانت نبرة باينة عيانة…
بشار : لباس !!…”كايشوف فساعتو ويهز عينيه لناس الي غاديا جايا حيث كان فدام باب المطار”…
حبيبة : اه…
بشار : واجدة ولا مزال ؟!…
حبيبة : معاش غادي تجي…
بشار : مزال..نسالي ونجي لعندك…
حبيبة : ب بابا بغا يشدك تعشا…
بشار : لا بلاش مايحتاجش..نجي نديك فالبلاصة…”عاود شاف فساعتو” حسبي ساعتين ونكون عندك…
حبيبة”سكتات تاهي لثوان..كأنها باغيا تقولبه زيد اجل مزال ماتجيش تديني زيد فليام…صرطات ريقها وخرجات الكلمة بحروف متباعدة ” : و و اخة…
ماسولهاش مالك واخا التامس من صوتها انه بيها شي حاجة لكن ماسولش…ما اهتمش ولا مابغاش يعرف مالها او عاااارف وماباغيش يتسوق او…كمية الغموض الي فالمشاعر ديالو كاتخليك صعيب بل مستحيل توقعي فاش كايفكر ولا شنو يدير…خشا تيليفون فجيبو وجبد الكونطاكت وتوجه ل باركينغ ديال المطار مشا جيهة السيارات الي باتو فيه اسبوع…وداز جيهة لاكيس خلص المستحقات وكسيرا خارج من المطار توجه نيشان ل بارطما الي دار مع السمسار الي عرفو عليه هاشم باش يلقاها ليه والي جات ف گيليز فعمارة فيها غير ثلاث طوابق وكل طابق فيه زوج برطمات..وكلهم ماليهم مكاينينش الا برطما الي خذا هو غايسكن فيها هو وحبيبة بخاطرهم دون تواجد سكان بزاف وصداعهم…دخل لبرطما كبييرة كايسمع ل سمسار الي كايوريه وكانت نيت مفرشة…
سمسار. : اه بتسكن فالسكااات اولدي..هانتا ها البيت لول فيه دوش لداخل..وها تاني مافيهش دوش كان فداك الكولوار تم قريب لكوزينة…وها كوزينة..وكاين صالون والبالكون را فكل بيت فيه بالكون…مزيان اولدي..
بشار”كايشوف فدار كلشي فيها مجهز كيف بغا مفرشة نااضية…ماجاوبوش ولاخور مابغا يسكت كايوريه وهو عقلو مكاينش غير كيشوف وصافي راسو بغا يطرطق عليه بالطيارة والسفر وشلا انتظار فالمطار واخا كان مقطع ف درجة رجال الاعمال…
سمسار : الصالون اه بلديييي وهانتا تشوف را بالطلامط ديال الموبرا الحرة اللولاااا هههههه…
بشار”غا ساكت اصلا ماعارف لا موبرة لا طلامط غا كيشوف حس براسو بغا يبدا يفرع ليه راسو الى ماسكتش”
سمسار : اجيب المدام نوريها طليمطات الي باتبدل…
بشار”كان كايشوف لهيه تا ضار عندو بالعرض البطيء شاف فيه بواحد شوفة سمسار جمع ضحكة”…
سمسار : هو هذا..المضمون را وصل والسكنة نشاعلاه فالقصر..سلام عليكم…
لبسات غير سورفيت بالقب كحلة…هبطات لتحت لقات باها داخل بكرييي…جايب فايدو ساشيات كبار باين عليه مقدي…شافتو وهي تقرب ليه مبتاسمة فرحااانة انها شافت الضحكة رجعات لباها الي غابت لاشهر…تبعاتو لكوزينة حتى حط دوك ساشيات وهو يدور عندها وجمعها تحت باطو كاينزل عليها بايدو تا بداو خوتها من قاع دار كايضحكو…
م.حفيظ : القشة بنت القش…هانيا…
حبيبة : اييي هههه هانيا…
م.حفيظ : راجلك مزال ماوصلش…
حبيبة”جمعات ضحكة مكتحملش ديك راجلك” : احم وصل هي بايمشي تايدوش ويبدل يمكن ويجي..گاليا ساعتين وبنكون عندك…
م.حفيظ : حاولي تخليه يتعشا عاد سيرو بنتي…
حبيبة”ماكرهاتش تبقى كثر” : واخا انشوف…
باسها فراسها وخرج يدوش حتى هو من تعب المحلات والعجاج الي كان تاني…تبعاتو ناديا تعطيه الحوايج مايلبس اما هي بقاات واقفة حدا رقية كاتشوف فيها كاتصايب وتقاد فطاسات…
حبيبة : اه كثرتو ليا…
رقية : اش بيتي نتي ؟ هادشي ماشي ديالك…
حبيبة : لمن…
رقية : لراجلك ههههه….
حبيبة”غوبشات” : وانا ؟!…
رقية : گوليه الى بايدوقك هههه…راه يادلي لدارك هادشي…
رجعات هي لبيت جلسات حدا خوتها عيطات لايوب لقاتو وسط واحد العرس خدام فالعروسة كايصايب ليها قالت ليا بالي بغات تمشي…بقات كاتخرج فتمارين مع خوتها وتشرح ليهم الفرنسية حيث كاتفهم ليها مزيان وكانت عندها النقطة الاولى من نهار دخلات تقرا…خرجات معاهم حتى تمات جايا رقية هازة تيليفونها وشافت فيها سولاتها بعينيها وهي تعلمها ب الي المتصل “بشار”…صافي هنا الريق نشف ووصلات اللحظة الي غاتحد فيها اولى خطواتها نحو المجهول الي غاديا ليه…شدات من عندها التيليفون وهي ترد عليه…
بشار : خرجي…
فالفيرما تمات جايا ربيعة هازا فايدها ميكة كبيييرة عامرة بالفاكية مشكلة حلات باب بيت عيدة وعبد القادر ودخلات كانت جالسة نيت سعيدة حداها هي وتوريا وكريمة كايقادو فالمقدية ديال الخطبة…واخا عندهم عادي فحال عيدة تخطب لراجلها خصوصا فضروفها انها امرأة متقبلة شرع الله الي تعطا لراجل لكن صعيبة عليهم هما كلهم كنيناتها واخا هكاك…
توريا : ونتي دويتي مع مها اش گالت نهار لول…
عيدة : گالت مرحبا…
ربيعة : عندها ولد هي الي بغيتو تخطبو ؟ گالها ليا سيحمد حگ كايعرف خوها العرابي دا ليه شي مرة البال (الفصة او تبن مجموع)…
عيدة : والدة ولد وليني عگرت وراه…
توريا : ايييه مسكينة حيدو ليها الوالدة..والراجل معامن ولدات الولد كي شتي را طلگها وزاد لصبليون تجوج شي نصرا.نية تما من تم الولد را عندو علاين خمسطاش سطاش عام…
سعيدة : وهي شحال فعمرها ؟!…
عيدة : باقي ليها ثلث سنين وتكمل بلاطو…(بلاطو ديال البيض فيه ثلاثين هههههع)…
سعيدة : ونتي يا لالة لخطتي وخطبتيها ؟ سولتيها هي واش تبغي ؟ راه واخا مطلگة واخا مايجيبش ليها ولاد…راه باقيا صغيرة وتجوج ب سيدي راه گد جدها ويفوت يضهر ليا…
توريا : وهي تلگا حسن من سيدي ؟!
كريمة : لا لگات الي يسترها علاش لا…هاهي بنت خالي هاجر كي شتي را فعمرها 25 عام مات ليها راجلها لول راهي مجوجة ب ولد الخبراوي ديك ساعة عدو سبعين عام ولدات معاه ثلاثة وراه…وراهم كل واحد تشرا ليه لبسة فسيمانة…ومشات هي وياه لعمرة ما مرة ماجوج ولعام جاي راهم ناويين يمشيو لحج…
سعيدة : اكريمة ااابنيتي لا تهضريشااااي غالي سمعتيها تگوليها بنيتي ولهلا يطيحك بلاصتهم طلبي ستر ابنيتي راكي يلاه باديا فدنيا ويلاه عندك 17 عام اش عرفك فهادشي…
كريمة”وسعات عينيها” : راه حضرت ليهم اختي سعيدة ماسمعتشاي…
سعيدة : واخا ماسمعتيش لا تهضريش…حنا لا دوينا راه جربنا والى مجربناش نگولو الله يستر…
توريا”هزات حاجبها فيها” : لا تقويش اسعيدة ماگالت عيب…راها بنت ختي ونعرفها قانعة ودرويشة وهضرتها معقولة وهادشي علاش تربات..ماسمعت ما رات راها عاشت وشافت…
سعيدة”الصمت”
توريا”قلبات عينيها بعدم رضى وهي تشوف ف عيدة” : الى مابغاتش اش ديري الالة ..
عيدة : نشوفو بنات ناس غيرها مالها هي وحدها الي بقات فدنيا…الحاج را عيا وهو يتسنى..ونامس را جاه سهال كال شي ماكلة فسوق جرات ليه كرشو بايت الليل على گدو الي داه الي ردو لكابينة (طواليط)..مالگيت ليه جهد بغيت غانوض نعطيه شوية الكمون بلدي يهمد عليه الوجع ما صبت كي ندير وكلشي ناعس دك الوقت…هاهي هادي اوى لا عيا نيت كي نديرو ؟ تگدو عليه ؟ را عيب ابنيتي راني واكلاها وليني را هذا الي عطا المعطى والى عطاك العاطي ماتحرث ماتواطي…
ربيعة : وتانتي را الشرع عطاه ربعة ماعليش الالة يكون خير..
سعيدة”بدات صحك بلعاني” : ههههه هي ربيعة لا جاك سيحمد بغا يتجوج ولا تجوج اش تكولي ليه…
ربيعة : اههههه لا مايديرهاش سيحمد قانع بيا انا عاطياااه الي يقنعو…
توريا : داك شلاهبي ماتعرفي اش تحت راسو (على نيتها)…
سعيدة : يديرها ويفوتها واخا تقنعيه تي…
ربيعة(لاحت ليها الهضرة) : لا مقنعاااه انا عارفاه قانع بيا وبزكريا شوفي نتي وطالعي ليا على هويشم ديالك اما انا بزاااف عليك ههه…
سعيدة”جمعات الصحكة وهي توقف” : ايوى لا بزاف عليا الله يطليكم ببعضياتكم…لالة تصبحي على خير…تصبحو على خير…
خلاتهم شي يشوف فشي وربيعة ماعجبهاش الحال تاهي…خرجات من البيت وطلعات كاتحرك ف راسها ب لا حول ولا قوة الا بالله…ومشات لكوزينة ترد العشا يطيب…
فنفس البلاصة ..واحد الدويرة صغييرة مبينة غير بالبريك والمرطوب فيها بيييت كبيير وفيها كوزينة وطواليط بلدية…تلفازة بلازما قديمة معلقة فالحايط وشاعلة متكي حداها كايتفرج وهي شادة تيليفونو وكتفرج فيه وتضحك حتى سمعو صوت الباب دورات راسها وضحكات وهي تنغز ولدها…
حسنية. : ابببب بااباببببببن…
ياسين”ضحك” : ههههه ااايه اشرف العزيز عندك ياك..انا غا لگيتين حداه نونس فيه…
دخل محمل فايدو ميكات وجا مع هضرتو وهو يضحك صوته يلاه غلاص ليه وباينين فيه علامات البلوغ ..عينيه كحلييين وحرشييين…بدا يضحك…
اشرف : راك مشري بالرخا وانا قايم بالغلا..راني عزيز كيتك المجدوب عههههه…
ياسين : ياك الكيدار…
حسنية”عطات ل ياسين تيليفونو الي داير فيه العرض نجمة ستة باش كاتفرج فالفيديوات الي كاتبغي ديال رسوم خصوصا طوم وجيري..وناضت اعند اشرف عنقاتو بجهد تا لاح الميكات وباسها فراسها” : بببب اباببببب…
اشرف”كايقيص ليها فحناكها وجبهتها وعنقها” : نزلات ليك سخانة شي …
ياسين : يلاه توگضت…من بارح وهي تهتهت من الي عيطت ليك…
اشرف : مالك ماديتيها لمستوصف علم غا عمي هاشم دك ساعات ولا حسام يقضيو معاك غراض…
ياسين : ماتليت بغيت نگوليهمش..مي وگاد بيها…واخا جات خالتي سعيدة جايبة معاها دوا وش مقدية حشمت نردهم ليها..
اشرف : خالتي سعيدة ودار رحماني مهلين فمي ماشفنا منهم غالخير…
حسنية : ابببب “كاتعبر ليها بايدها وتضحك وتنقز وتصفق بايديها” ابببببيااااا بببب…هههههههه
اشرف : واخا دوزي بركي نوريك اش جبت ليك بعدا…
حسنية”حركات ليه راسها”…
دخلها وهز ميكات وياسين شاد تيليكوموند ويشوف فيهم ومبسم تاهو…تا جلسها وجلس حداها وهز ميكة جبد منها دانون الي كايعجبها بيرلي جاب ليها ربعة…وجاب ليها قرعة ديال شكلاط ديال دهن و كاشير كبيرة لانشون كايعجبها…وجاب ليها قرعة كوفيتير…
اشرف : هادو را من سوق ديال الخميس العطاوية…
ياسين”مد ايدو داها وجابها بضحك” : واش بغيتي شكون بحالك عههههه ..
حسنية”باست ل اشرف كتفو وباستو فحنكو وهو كيضحك..عزيز عليها بزاااف هو وياسين لكن اشرف بزاف حيث ياسين كان كايمشي لمراكش يقرا واشرف الي كايبقى مقابلها فكلشي لباسها حتى دوش…الى مرضات يجلس عند راسها علاقتو بيها ف شكل…” : هههههه…
عاود تاني جبد ليها مايونيز وكيتشاب عزاز عليها…وباكية فرماج نوع عادي رخيص داكشي علاش قد مسكين جابو كاع ديك الخلصة ديال الكانزة الي شد فخدمتو فالفلاحة خسرها عليها (كانزة هي خمسطاش اليوم كايتخلصو فيها كل خمسطاش ليوم مثلا)…جاب ليها زبدة…
اشرف”شاف فيها وطلع حاجبو وهبطو” : عرفتي اش هنا ؟!
حسنية”كتشوف فيه ماعرفاتش”…
اشرف”جبد خنيشة صغيرة فيها حلوة معسلة بحال شباكية ديال سوق كاتحمااااق عليها غا شافتها وهي طيرها ليه وبدات تنقز فبلاصتها وتضحك” : ععهههههههههههه…
ياسين : هههه تا شو كي نقزت…واااا الميمة تي شوري را بان ليا مقدي ليك غا تي…
اشرف : لا جبت ليك تانتا…
ياسين : واااااااااهيييييييلي…تا كيفاش…
اشرف : اوكيييييه شد شد “لاح ليه ساشية شدها”
ياسين : ابسم الله هههههه…
حل ساشية تا جبد منها سروال سورفيت وباكية فيها ثلاثة تقاشر..وسع ضحكتو وهو يشير عليه بتيليكوموند تا غوبشات فيه الحسنية…
ياسين : تا را بالفرحة نفلق ليه راس…زيد لهن حب خوك…
مد ليه ايدو ضربو ببونية بالضحك بيناتهم…الي شافهم يقول تبااارك الله توام متكامل بمعنى الكلمة والي زاد نغزة هو اهتمامهم ب امهم واخا مساكن دازت عليهم حيث ولاد “الحرام” بعلاقة اغت..صاب كارثية دازت عليها…عاود مد ايدو لواحد ساشية كان جايب فيها ديسير تفاح وليمون وبنان…وساشية فيها ملابس داخلية ل حسنية باقين جداد شراهم من سوق…فرحان بمجيبتو لمو ولخوه كايحس براسو رجل يعول عليه…
اشرف”عاود مد ايدو لراس الحسنية” : رايك دافي امي ياكما بغات ترجع ليك سخانة…
حسنية”حركات راسها ب لا”
اشرف : نوضي عاونيني نستفو هادشي فثلاجة وندير العشا نوضي…
ناضت هي وياه عنقها بجنب وهز دوك ساشيات داهم لكوزينة الي كانت غير طاجيرات بالبريك وفيها خوامي مغطيين بيهم لتحت…وفيهم ماعن على قد الحال…جلسها فوق الكرسي وقرب ليها طويبلة ديال الميكة حط ليها شوية من ديك الحلوة تاكلها ..
اشرف. : هادي نخبيها ليك ماتكتريش منها دير ليك الوجع كي ديك المرة فكرشك..تعشاي وسيري را حطيت ليك الويز جبتها ليك راها فالبليصة فين كنخليها ليك…
تبسمات ليه وحركات راسها بطفولية…بدات تاكل وهو كايستف فداكشي..هز مطيشة وبصلة وفلفلة قطعهم مزيان وردهم يتشحرو دار ليهم تطرية وتومة وخلاهم يطيبو على عافية مهيلة فوق بوطة الصغيرة…هز بطاطا نقاها وقطعها باش يقليها…بقات حداه كاتاكل وتعاون فيه الى قاليها مدي ليا…جا ياسين غسل شي ماعن كانو باقيين نقا دنيا تما…طابت التكتوكة زاد عليها البيض خلاه تا طاب وطفا عليه كمل بطاطا فالقلي حيث عزيزة على مو….حط داكشي مقاد وداه لبيت حط فيه طابلة ديال ميكة…كان البيت نصو فيه سدادر بطلقان ونص لاخور مفرش فلارض فين كاينعسو نيت…سماو الله وبداو ياكلو..كانت باقية عيانة مرة يوكلها بايدو مرة تاكل هي…ويضحك معاها هو وياسين وهي كتكرشخ بضحك حتى كاتبغي تكور…اشرف كايبقى يشووووف فيها ويصحك تا نسا راو وبقا شاد ندغة فايدو وكيشوف فيها فرحان فرحان بزااااف بزاااف تا قلبو فرفر ليه….
كيف قاليها “خرجي”..حسات بالي صافي وصل الوقت باش تبدا ديك الحياة معاه……حنحنات منضفة حلقها وهي تجاوبو…
حبيبة : ك گالت ليك ماما دخل تعشا…
ناديا”غمضات عينيها بغات تاكلها حيث بغاتها هي تقوليه دخل تعشا”…
بشار”دوز على وجهو ولحيتو بتعب..سكت شحاال عاد جاوب” : لا…لا حبيبة عيان ماعنديش جهد لشي عشا…ماشي مشكيل…
حبيبة : اوك…
بشار : عندك الثقل ؟!..
حبيبة : اه…هاهما هنا لتحت…
بشار : حلي الباب…
.شافت جيهة باها وهي تبسم ومشات اعندو كاتزرب تلاحت عليه عنقاتو تا تنهدات ليه فحضنو ماكرهاتش تبقا معنقاه حياتها كلها….بقا شحاال وهو محاوطها بايديه ويطنز عايها حتى سمعات صوت لانتيرفون…
ناديا : سيري حلي ليه ابنتي…
حبيبة”غمضات عينها وجمعات البسمة وهي تنفخ” : ففف واخا…
مشات بخطى ثقيييلة حتى لباب وهي تاخذ نفس عميييييق وتنهدات وهي تحل الباب لقاتو واقف عاطي بالضهر خاشي ايد فجيب وايد فيها الگارو ودخان كايبان خارج من جنب فمو…لابس تيشرت گري مطرطق على درعانو وايديه المكتاسيين بالزغب حرش وكثيف…وسروال عامر جيوب فالكحل وبروتكان كحل..غير سمع صوت الباب وهو يلوح الكارو عسف عليه وساط اخر نفخة…وهو يدور شاف فيها وحرك راسو مثقل…
بشار : فين الڤاليز ؟!؟..
حبيبة”حلات الباب مزيان” : هاهما هنا…
م.حفيظ”خرج كايضحك” : اهلا اهلا بولدي نهار غليض هذا ههه
بشار”قرب لعندو وتحنى نصو تا باس ليه راسو” : يتوب عليك..
م.حفيظ : مابيتيش تعشا..
بشار : لا لا عيان… ماعليش…
م.حفيظ : واخا ولدي را باينة فيك نيت..الله يبيتك فراحة الله…هانا ولدي بلا منوصيك الله يرضي عليك بنتي ديرها فعينيك را هي البكرة وهي عينيا اللولة..معزتها وحدها ولدي الله ينورك…ماتخليهاش تبكي انا راضي عليك…
بشار”الصمت”…
م.حفيظ”ضار عند حبيبة باس راسها ومشات تسلم على امها وخوتها…قرب ليه الفاليز الي هزهم وداهم لطوموبيل كاينقل فيهم حيث موقفها فشارع…ودار زوجات فالكوفر ووحدة لور…حتى تمات جايا هازا شكارة فالبيج ومارون فيها نونوس فسنسلة فيها بوليكوب وداكشي ديال القرايا وجنب كتفها فيه شكارة لابتوب والايباد…قرب وشدهم من عندها حطهم لور تاهما…ضارت تبسمات لباها ودمعة فطرف عينيها…حتى حدرات راسها وباها عينيه ولاو حمرييين كايتوحشها بزاف….حطات راسها على زاج…لا هي داتها فيه ولا هو داها فيها….الضواو كايسنيو فعينيها وهي كاتشوف فالطرق وساااهية ودمعة على طرف غا هي غمضات وهي تهبط دمعة كاتجريييييييييييي…وديك دمعة فحال الى قالت ليه دور شوفني تا دور راسو وشاف ليها جنكها الي نازلة فيه ديك الدمعة ورجع شاف قدامو..!!…
ماحسات حتى وقفات بيها سيارة قدام عمارة سكنية كاتبان من برا راقية…الباب ديالها قدامو سيكيريتي…بقات كاتشوف حتى سمعات صوته…
بشار : نزلي…
ديك “نزلي” بصوته خلات قلبها يضررررررب…مدات ايدها لبواني حلات الباب وهي تنقز نزلات…بقات واقفة كاتفرك فايديها وتشوف قدامها ف نقطة مبهمة…حتى حسات بيه جا حداها…وقاليها تزيد… طلعو لفوق بالمصعد تحل على البارطما الي جبد ساروتها وحلها قدامها ووقف شير ليها براسو باش تدخل…بقات واقفة كاتشوف وخطواتها تقاااال بزااااف…
بشار : تبقاي ليا هنا ؟!
حبيبة”شافت فيه وهي تغوبش” : لا…
بشار : تحركي…
دخلات قدامو حتى لداخل وهي توقف كاتفرك فايديها وقلبها كيضررررب…مسألة يبقاو فدار تحت سقف صعيبة عليها لكن الضروف حكمات وخلاتها تقبل وتبقى معاه…دورات عينيها ناحية المكان ماتنكرش ان دار زوينة ستيلها راقي وديال الفريع..لكن اش يجي هادشي قدام الخوف والغمة الي فقلبها…
بشار : هاني جاي…
مجاوباتوش سد الباب ونزل لتحت تا طلع ليها حوايجها دخلهم ليها.كاملين وهو يوقف خاشي ايديه فجيابو…
بشار”شير بعينيه الي مخنزرين بلا وقت ناحية البيت” : دخلي تما فيه شنو تحتاجي..en tout cas دارك هادي مايحتاجش نوريك شي حاجة…”شاف فساعتو” هاني جاي شوفي شنو ديري واش بغيتي تگادي قضيه…
خلاها وخرج من الدار…بقات واقفة شحاال وهي دور لبيت الي وراها…دات ليه الفاليز وهي تدخل ليه كان زوين مفرش باتات باقي جديد كلو بيض وماريو فالحيط كلو زاج وفيه باب الي كاين فيه دوش…حطات شكارتها وصاكادو…وجلسات فطرف ناموسية باقي خاطرها مقبوض ابدا واش رتاحت….بقات شحاال كاتهضر مع ناديا حتى كملات وجلسات كاتشوف فالبيت..شوي هزات تيليفون كاتبقشش فيه باغيا تنسي الغمة الي فصدرها…حتى قفزات من صوت دقان فالباب تا شدات على صدرها…
حبيبة : ن نعااام..
بشار : خرجي…
بقات شحال وهي جالسة…حتى عاود عيط ليها وهي تخرج بخطى ثقيلة تا لحقات عليه كان واقف عند طابلة حاط فيها ساشيات…ضار شاف فيها ورجع شاف قدامو خاشي ايديه فجيابو كايحك فشنايفو الي غالبة عليهم لحية والمسطاج الكثييف..
حبيبة”هبطات عينيها لساشيات قرات اسم محل السوشي الي كايعجبها..ورجعات كاتشوف فيه عاطي بضهرو..”
بشار : جبتك بلا عشا…”كايحك فلحيتو وجبد تيليفون كايشوف فيه ويهضر ويعبر بايدو ناحية الساشيات” المحل الي كاتاخذي من عندو ديما…
حبيبة”هزات حاجبها ونطقات بصوت شبه مسموع” : باش عرفتيه ؟؟..
بشار”هز راسو ضار شاف فيها ورجع شاف فتيليفونو عاقد نفس الغوباشة حتى نطق تاني بنفس نبرة الصوت الخشين” : الي تعجبك ماشي مشكيل نسولو عليها.. بقاي ليا على خاطرك…
هزات حاجبها بإندهاش وصدمة اذا ماقلنا المعنى الصحيح…حيث عارفها مامرتاحاش معاه كايحاول قدر الامكان انه يحسسها واخا شوية بالامان باش تولف انها تبقى معاه وخا فترة مؤقتة…
حبيبة : شكون سولتي…
بشار”ببرود” : باك…
حبيبة”تبسمات بخفة دغيا جمعتها كلشي كايريحها كايكون وراها باها…حنحنات وهي تنطق وعينيها ب ساشيات” : مافياش جوع…
بشار”تم غادي ناحية البيت فين غاينعس” : كولي علاش گديتي ماشي بالشرط تاكلي كلشي…فضل ليك تاكلي وماتبقايش بلاش…
ضار جيهة الباب دالبيت وحلو ودخل مخليها واقفة كاتشوف..مافكراتش تسولو واش مغاتعشاش حتى نتا… ماتسوقاتش وتاهو ماتسوقش واش مسوقة ليه…ضارت جيهة الساشيات وهي تجلس وجراتهم كاتشوف فيهم..قلبات وحدة منهم كان جايب ليها من المحل الي مولفة كتاخذ منو هي ولا ايوب ولا يجيب ليهم باها هي وخوتها من عندو…تفكرات الايام الي الي فاتت ايام الي مكانتش مزوجة وكانت حياتها جد طبييعية…لمة عائلتها الصغيرة ومعاهم ايوب…اللمة الي كاتكون عايشة ومكتخممش وعمر تخمام زار عقلها…جبدات البواطات الي تما كان جايب غير سوشي الطايب ماشي الخضر..حتى هاد تفصيلة عرفها..حيث هي كاتاكل غير السوشي الي طايب…وجاب بواطة فيها لاسوب ديال فواكه البحر..ليصوص المرافقة لسوشي..جبدات اعواد “هاشي” باش تاكل بيهم… حتى من المناديل جايبهم باش تمسح فمها…وحتى لينيم معمرين بالكروفيت.وفروماج….شافت داكشي مشري وباقي سخوون..حشمات تخليه وهو واخذو وحشمات تخلي داكشي واخا يكون الي كان…عشا كاان كاامل حلات بواطة هزات منها حبة كلاتها ماتنكرش انها توحشات سوشي الي ماكلاتوش هادي مدة…شافت ساشية لاخرى وهي كاتندغ جراتها وهي تحلها لقات فيها ديسير “كنافة بالنوتيلا”…سدات البواطة ورجعات كلات غير غير ديك الحبة من سوشي فقط لاسوب و لينيم مادازتش فيهم..ماقدراتش تاكل وهي الغمة كاتمة صدرها…ماحاساش بالراحة ومافخاطرهاش تاكل…جمعات داكشي وهي توقف..مع وقفات حل هو الباب وخرج كايقاد فتيشرت ديالو الي مزير على درعانو..لابس سروال كيطما وخارج حفيان خشا ايديه فجيابو وقرب لعندها بان ليه داكشي مجموع…هز فيها عينيه ورجع شاف فداكشي..ونطق…
بشار : ماكلتيش ؟!..
حبيبة”حركات راسها” : ماقدرتش..مافياش..كون هي سولتيني مكنتش بنخليك تجيبو…المهم شكرا…
بشار : ماشي مشكيل…
ماكثرش معاها خلاها بخاطرها..اما هي حنحنات وهي تم غاديا جيهة البيت…
حبيبة : بندخل نراجع وبنعس…
بشار”مزال خاشي ايديه فجيابو وضار غير شوي بدون ميشوف فيها” : الي عجبك…
يلاه غاتدخل للبيت حتى سمعات صوته وهو يدور كايشوف فيها..
بشار. : توقيتك نهار تنين ؟!..
حبيبة : ماكنقراش الاثنين….ولكن غذا بايكون عندي واحد ليفينمون فالصباح بتكون فلافاك نيت فيها شي دكاترة ديال قاضي عياض…خاصني نحضر ليها ضروري…اتكون مع تسعود صباح….
بشار : ديري بحساب انا نوصلك…
حبيبة. : ماكاين لاش..بنمشي هي فطاكسي ولا بايوصلني بابا…
بشار”جمع حجبانو وهز فيها عينيه بشوفة خلاتها ترجع خطوة لور وتزنگ” : لا جا باك يوصلك ولا تمشي راسك لاش ملاگيين هنا نيت..رجعي لداركم حسن..دابا بلا تبرزيط سيري نعسي وصباح نوصلك..تسالي اش عندك ونهضرو فالعيشة ديالنا بجوج هنا مزيان…جيتي تعيشي معايا ماشي مخيمة عندي…هادي داري ودارك حتى نتي…تصرفي بطبيعتك وتصرفي براحتك…ديري شنو عجبك وبلا ماتهزي وتحطي عليا تما الحدود الي مطراسياهم نتي نعل جد مو هذا الي يفوتهم…
حبيبة : ماشي دغيا غادي نولف وماشي ديك ساعة بنعيش طبيعية معاك…خاصني وقت اه وافقت وبغيت نوقف معاك وعطيتك السبب والاسباب لكن ماتسناش مني دغيا نكون طبيعية…من غير دارنا مانگدش نولف شي بلاصة…
بشار : سيري تنعسي…
عضات فمها وهي دور ودخلات البيت فين غاتولي تنعس…اما هو ضار شاف فدوك ساشيات وبقى شحااال كايشوف فيهم..عض على شنايفو شوي حتى دفع دوك ساشيات تا تزلعو لهيه ب كلشي ليهم…
بدا يسوس فايديه ووجهو حاااقد..جاي عيان اصلا باغي غير يتلاح ينعس ماحاسش براسو انه يقدر يكونطرولي هضرتو ولا حتى تصرفاتو اضطر يشرب مهدئ باش يبقى مكالمي شرب غير نص حبة…توجه لبيت ديالو…مشا نيشان لباكية الكارو هز منها سيجارة وتوجه ناحية البالكون شعل الكارو ووقف كايكمي وعينيه فنقطة بعييييدة علم الله فاش كايخمم…بقى حتى كمل الكارو ورجع دخل هز لابتوب ديالو وتيليفونو وهز واحد ال رقاقة بحال usb وخرج من البيت برونشا البيسي مع ضو حيث كان قرب يديشارجا حيد ليه الباتري وخدمو…بان ليه داكشي الي شتت عض لسانو من لداخل وهو يجمعو فساشية عشوائيا وداه لكوزينة لاحو فوق البوطاجي…قلب على الماشين ديال القهوة لحسن الحظ لقاها ولقا حداها قرعة دزاج فيها لكابسيل ديالها…طبعا الخاطر عندو رحبتو خاوية مشا لديال الكابسيل وجد ليه فنجان ديالو…حطو فبلاطو وجبد قرعة ما من ثلاجة معدنية وخرج…وخا عيان ضروري يشوف الخدمة لانه عنظو اجتماع عن بعد فهاد الساعة لان خدمتو كاتحتم عليه يخدم حتى فالليل اذا اقتضى الامر..يلاه شعل الگارو وبدا يكمي ويركز مع الخدمة حتى سمع صوت الباب تسد بساروت ماتحرك مادر حتى رد الفعل بقى هكاك مشتح فوق الكرسي وعينيه على لابتوب…حدو نطق بنبرة خاااترة…
بشار : نعل زبور الوقت الي وصلت ملتي لهاد الحبس…
كيف سدات الباب مشات لفاليز وحلات وحدة الي عارفة فيها بيجاماتها…جبدات وحدة ديال قطن حيث شوي دار كانت باردة ومع الجو بدا كايبرد…لبساتها كانت فالقرمزي…طوات هادوك الي كانت لابسة وحطاتهم فالفاليز…وهي تخشا ففراشها وهزات تيلي ديالها برونشاتو مع الباور بانگ…دخلات كاتصفح سوشل ميديا لعلى.وعسا يجيها نعاس…هضرات مع ايوب الي لقاتو راسل ليها ميساج…
ايوب : مدام الهاشيمي وصلتي لدويرتك !؟..
حبيبة : سميتي حبيبة الصافي…
ايوب : شلا…كيداير هولاكو يحمد الله…
حبيبة : سولني هي على راسي..
ايوب : را تبكي قبيلة وتخلي الشاف تالف حالف تايشعكك سالف..ابنت الشارف…
حبيبة”شهقات” : هييييي انگولها لبابا بالله تانگولها ليه…
ايوب : بنرجع ليك ليسوان والمينيكير وكلشي بالفلوس وبالكارط بونكيغ…
حبيبة : سير هي فحالك نتا وصالونك…
خلاتو كايطير وينزل ويرسل ليها فميساجات..قدر يزرع شوية البسمة على شفايفها…اما هي كادور تاتعيا تنسي حتى تعيا وترجع ليها الغمة ابدا واش هي مرتاحة…تنهدات وبقات كادور وتعاود تا تفكرات ميساج الي خلات ل “جاد” والي فيه كاتسول منين جاب نمرتها…لقاتو مطلع ليها vu…هزات حاجبها وهي تخرج من المحادثة ومخليه يضبر لراسو ماتسوقاتش ليه… بداو عينيها كايتغمضو يمكن فاقت هاد نهار بكري وعيات وهي فلافاك…ماحساتش براسها حتى غفاااااات…
مافاقتش كاااع حتى سمعات صوت دقان فالباب وهي تحل عينيها بان ليها سقف ماشي الي مولفة وهي تنوض جالسة…
حبيبة : شش شكون…
بشار”كايشوف فساعتو قرب عليها الحال وهي ماخرجاتش” : ماناوياش تحركي تمشي ؟!…
حبيبة : علاش..”هزات تيليفونها وهي توسع عينيها تا شهقات…نشات انها تحقق الغيفييي وعندها حصة مهمة فيها غايناقشو البحوث الي غايبغيو يقدم كل واحد…ناضت على وقفتها بالخلعة على شوي طيح حسات بالضلمة طاحت على عينيها حيث ناضت بجهد…نطقات بزربة” هاني هاني خارجة…
بزربة مشات لدوش غسلات وجهها وحكات سنانها وخرجات لبيت جبدات ماتلبس ماعرفاتش بالتلفة نسات حتى انها تحدد كيف مولفة فكل ليلة توجد اش تلبس صدقات لابسة غير ديك السورفيت الي على شكل قبية وسروالها…تلاحت فوق ناموسية هزيات رجلها كاتلبس فتقاشر بيضين…هزات صاك من فاليز دارت فيه دفاتر وبوليكوب ولوازم الادوات وماجاورها وكالكيلاتريس..كاتقضي بجرا…كاتهز شي وتصليها مع شي وقلبها كايضرب بجهد…جمعات شعرها غير كعكة مهملة بزربة ماتسوقات شلا مكياج لا ل واقي شمسي…حلات الباب بزربة كاتنهج تا ضار حيث كان واقف كايهضر فتيليفون بالالمانية وهو كيهضر دور غير راسو جامع حجبانو وكيشوف فيها كاتنهج…
بشار : ياك لباس ؟!.
حبيبة : تعطلت تعطلت عااافاك وصلني دغيا…
بشار”طلعها وهبطها كلها تنهج…كايشوف فيها ببرودة وختووووية تا بغات تغوت حيث فثصها تقيل…حرك ليها راسو” : خرجي…
حركات راسها وهي تمشي سبقاتو مشا هز كونطاكت ديالو وخرج تبعها نزلة فالمصعد ركبات فالسيارة وهي كاتقاد فاللوازم ديالها تأكدات انها هازة كلشي معاها…شافت فالساعة لقات باقي خمسة دقايق…
ديمارا سيارة وكسيرا خارج من گلييز فاتجاه الداوديات فين كاينة الكلية..طريق كلها وهي كتاكل فضفارها مابقاتش تسوقت ليه من كثرة مامسوقة انها توصل دغيا…ركابيها كاتفيبري فيهم بتوثر…هادشي كامل لاحظو حيث شاف مدى تشبتها بالقرايا بهاد طريقة…الشي الي خلاه زاد فالسرعة باش يطمنها انها غاتوصل فالوقت…حتى قربو لكلية وهي كاتشوف ناسية فين هي ومعامن هي حتى سمعات صوته الي وگضها…
بشار : ماتفطريش ؟!…
حبيبة : ماشي مشكيل فاش نخرج نفطر…
بشار : معاش تسالي ؟!
حبيبة : حتى ل 12 عاد نسالي…
ماجاوبهاش…حتى وصلو لقدام الكلية فالوقت كيف بغات…يلاه بغات تخرج حتى نطق تاني مخليها دور عندو…
بشار”تهز شوية تا جبد من جيبو بزطام جبد منو 300 درهم دارها بين صباعو ومدها ليها” : فطري منها والباقي لا تزيرتي قضي بيه..على ماندوز ليك شي بركة ف الكونط ديالك…
حبيبة : ماكاين لاش عندي..
بشار”خرج لسانو وطواه عاض عليه بسنانو بغفلة جر ليها ايدها تا شهقت بالخلعة ودار ليها ديك تلتمية درهم فايدها وسدها ليها ونطق بنبرة صوت مبينة بالي خاصها تشدها وتخرج حسن مايخرا عليها تم” : تحركي سيري لشغلك…
صرطات ريقها وهي تغوبش فيه وضارت نزلات بانو ليها الطلبة واقفين حيث كاينة واحد الايفينمو داروها هاد النهار والي بالصدفة حتى هو لقاتو سبة باش انها ماتمشيش لرحامنة فين طلباتها عيدة تمشي معاها…يلاه قطعات ووقفات قدام لافاك حتى بان ليها كسيرا بجهد تا ضارو ناس كيشوفو…
حبيبة : مريض هي مع راسك الله يستر…
هزات كتافها وهي تدخل..كانت ناوية تجي مقادة فاللباس يكون كلاسيك لكن مناضتش بكري…
اما فغير البلاصة فين هي…هاد المرة فالدوار فين كانو فايقييين وناضو بكرييي وجدو وقادو مسائل الخطبة…كان جاالس هاشم مربع ايديه وكايشووف فباه الي واقف لابس جلابة بيضة بزيوية وواقفة حداه توريا كاتقاد ليه فسلهامو على كتفو..داير العصابة فوق راسو كيف العادة بالقتيب صفر ملوي عليها…
حسام”كايتفوه..قرب ل هاشم” : اول مرة نحضر لجدي غادي يخطب ومرتو حداه…هادشي فشكوول اهاشم…
هاشم”صحك مستهزأ” : الشرع عاطيه ربعة غاليه هو…رحامنة لا مدارو تانية مايبرد ليهم الجوف…
سعيدة”سمعاتو” : هي ناوي تانتا فواحد الوقت…
هاشم : لا انا اصلي اسباني ازين…
سعيدة : غا ديرها ديرها نيت..
حسام”تكا لور مشتح ليك فوق سداري وبدا يفرنس” : وانا رحماني قلبي زهواني يعشق الزين اينما حل وارتحل..هي مسالة ندير جوج عيالات ولا كثر حق ربي..حاااااااق ربي تا زاهية الوقت كل ليلة عند وحدة…مبدل الفرصادة…
هاشم”هز فيه حاجبو وشاف فيه من قنت عينيه” : اينا فرصادة.. اولد لحرام…
حسام : خنشوش ابويا خنشوش…وجه زعما…شتك تزگلتي لشي قنت…
هاشم : نتا را ناقص كلك..فين داك جدر ديال زكريا…
يلاه كايسول فيه حضر قدامو كي زلط…وقف عندو وتحنى مقرب ليه…
زكريا. : گالو ليا العميم مسول فيا…بلغك الوحش من جيهتي العميم…
هاشم”هز ايدو وجمع ليه وجهو” : تقيا داك برطال الي صارط وهضر كي ناس…تا شحال فعمرك ياناري راني وليت نشك فجدر والديك…
زكريا : فدار رحماني بغلت ستين وفالليسي مازال ماحق عليا نصوم…راني مساير مع دار هن لا نكبر بلا وقت..خليني نعكس..
هاشم”ضرب ايدو احماس اسداس وهزها كايشير بيها” : حق ربي لا قنعتيني حاااااق سيدي ربي لا قنعتيني…
زكريا : اوكييييه…
سعيدة”ناضت وقفات كاتقاد فجلابتها” : نوض هز اجسام داكشي ديرو ف الكوف…رد بالك لخواتاتك لا تدير هوك ولا هك تگول طالع لمراكش…
حسام : دابا انا نهار الاحد مانصيبش ندور فيه تبركيني هنا فدار ؟..
سعيدة : هضرتي لا عاودتها تاني يااااا بكري ويااا كبدتي حسام يالي زحمت عليك يومين ماخرجتي تا شاب راس بوك من الگفا “هاشم خبط حسام من لور وحرك ليه راسو بمعنى شتي سمع”.. يا تنعرف شغلي معاك…”خنزرات فيه غا بشوي” دير اش گلت ليك..
حسام”حدر راسو” : صافي واخا…
سعيدة : يلاه تگعد قضي اش گلت ليك قبل…
كان واقف سيحمد تاهو لابس داير ايديه فجيابو وحاضي بوه وكيضحك تاهو مستهزأ بالوضع…وحداه ربيعة تاهي لابسة وباقي حنتها فايدها جديدة..مكحلة عينيها ودايرة فغاجو فحناكها وعكر ربعة وعشرين ساعة ففمها هادشي بسيييط ولكن را بانت فيه بالرغم من ذلك زوينة حيث تاهي را زوينة ملامحها زوينين…هبطات كريمة تاهي لابسة جلابة وشال على راسها ولابسة صنيديلة ديال طالون..لابسة ذهبها ودايرة خاتم زواج فايدها.ذاهنة ليك الوجه بشوية فوندوتان ومكحلة عويناتها وتاهي دايرة عكر خفيف..
ربيعة”جرات زكريا” : رد البال لا تقويش الخروج فدواور لهيه را عندي غا عوينة وحدة نصيب مك ماشي لشي قنت نحش ليك ركابي…
زكريا : مدي ليا واحد عشرين درهم لحگ ل پلاي مع دراري غا هنا…
ربيعة : سير عند بوك انا خليت الفلوس الفوگ…
سيحمد”قرب لعندو وجبد من جيبو عشرين درهم وعطاها ليه” : يوذن ضهر تعگب لخيمتكم راني موصي عليك رباعة الي هنا…توصل الوحدة سير عند خديجة (الي كطيب ليهم لخداما الي فالفيرما) تعطيك واحد الامانة عطيها لباندي الى جا…عقل على اش گلت ليك…
باس ليه زكريا ايدو وهو يبدا يصحك سيحمد نقشب معاه صرفق ليه حناكو بمزاح تا سمع الحاج كايگول يلاه جاب ليه صحك وهو يخرج مع ربيعة لحقو على البقية…خرجو من الفيرما السيارة لولة راكب فيها الحاج القدام ولور كاينة عيدة الي لابسة جلابة مسكية وشال نفس اللون…وحداها توريا تاهي لابسة جلابة وشال فالبيج وكريمة…واللور كاين سيارة هاشم فيها سعيدة وسيحمد وربيعة…
توريا”كاتهصر فتيليفون مع بنتها” : ردي البال لخوك عيينييك عليه ماتفاوتيش من حداه على رقبتي وتفاوتي تا نزبر ليك سيگان…
اشراق : والغذا ؟!
توريا : را خديجة غادي توجدو ليكم كي توصل الوقت سيري عندها وجيبيه را غاتصايب ليه تا غذاه…
قطعات معاها ورجعات كاتشوف فالطريق…كانو غاديين غير فالبيست مكاينش الشانطي حيث الناس كاينين فواحد دوار بعيد عليهم شوي بزوج دواوير…طريق كلها وهي غير كتشوف وتنهد للحظة دازو من حدا واحد الموسم ديال تبوريدة…سمعات الحاج كايقول را كاين موسم ولاد فلان…تنهدات راجعة بذكرياتها مع “نور الدين” حب حياتها الشخص الي كبرات قدامو..الي خذاها وهي صغيرة بزاف عمرها 16 لعام تقريبا…ماعمرها تنسى الفشوش الي كان مفششها والي قالتها يقولو ليها عيب الا هو يقوليهم…
~~نور الدين : ههههه اخليو عليكم مرتي را باقي صغيرة ماعارفاشاااي…~~~
تبسمات تا دمعو عينيها وهي كاتفكر فاش كان يجي بعد غياب شهر ولا مدة الموسم الي كايكون فيه غايب فشي بلاد بحكم هو المقدم ديال صربة…وكايجيب ليها المخير فتواب من ديك البلاد…
~~~نورالدين : هانا يا وردة الخير…المخير فتواب لمرت المقدم…
شدات من عندو التوب وهي فرحاانا ديك الوقت باقيا صغيييرة حاملة وعندها سادي فكرشها من بعد ما صدق ليها بزز..كانت متكية فناموسية حيث الوجع بدا يزاورها فسادس…كاتشوف فيه وتضحك…
توريا : ههههههه زويييين هذا..يجي معايا تكشيطة ؟!
نزرالدين : الي عجبك ديريه نتي غا خلي البسمة مزينة الوجه عندك خليك فتانة…
توريا : نعيط ل خالتي فاطنة تديه عند الي.هودية تخيجو ليا (حيث كان داك الوقت اغلبية الخياطة ي.هود..)…
نورالدين : انا نديهم ليها ولا هي تجي عدك تگيس عليك..هاو ديك ساعة ماحتال تولدي نشاعلاه تلبسيهم فالسبوع…”حط ايدو على كرشها كيطبطب عليها” لا كان ولد نشاعلاه سميتو بشار..بشار الخير لا كتاب…
توريا : عذبني عذبني يا نورالدين يگطع الولاد وميجي منهم..
نورالدين : هههه لواه لواه حر الولاد ولابد منو..طلبي سلامة يجي بخير وعلى خير لا تقويش الفشوش غا صبري صبري دابا يفكك الله على خير…..~~~~~
ماحسات امتى نزلات ليها دمعة على خدها خلاتها توسع عينيها وتمد ايدها لحنكها مسحاتها قبل ماتبان ليهم..لكن عيدة واخا ماشافتهاش ديك دمعة فحال الى حسات بيها وهي تحط ايدها فوق ايد توريا وزيرات عليها وطبطبات عليها…
عيدة : الله يرحم الله يرحم…
توريا”حركات راسها وتنهدات” : اميييين..والله ياخذ الحق فالي كان سباب…
عيدة : اعوذ بالله…وزني كلامك ابنيتي وحكم الله مامنو هروب…را كبدتي گبل لا يكون زمانك..نعلي الشيطان وخلي الما منين يدوز…
توريا”الصمت”…
وقفو قدام واحد دار فيها ثلاثة طاجات زوج مصلوحين ولاخرى باقية بالبريك الفوقانية.محاوطة بسور ودخلة عندها گراج…كانو راشين قدامها ومشطبين وعند بابها واقفين شي زوج رجال وحداهم زوج عياالات…منهم عائشة ام زكية الي كانت واقفة تا شافتها ربيعة وهي تكمش حجبانها…
ربيعة : تي عيشة هاديك ولا…
عيدة : اوكيه را تجي ل بنت…كي شتي دار مسور الي هو بو البنت الي باغين نخطبو را ولد لوسها…
ربيعة : هااكاك عليها…
خرجو من سيارات كاملين وكريمة دايرة ابيل فيديو بالحس ل مليكة ورضوان جامعاهم فمكالمة وحدة…كايشوفو فالناس..بداو العيالات كايرشو بالمريشات واخا غير هضرة ماشي خطبة رسمية.المهم يستقبلوهم بالزهر فالمريشات…سلمو رجال مع بعضياتهم ودخلوهم رحبو بيهم والعيالات بيناتهم تاهما…
عيشة”سلمات على عيدة” : مرحباااا مرحبااا بالحاجة عيدة والله الى زارتنا البركة…
عيدة : ترحب بيك جنة ونعايمها بنتي..كيدايرة وكيدايرة زكية بنتك…
عيشة : ولواه الحمدي الله را هي لداخل مع بنات لوسي فالكوزينة..ولات شوية تهضر مع ناس غا شوية اللهم هاكا ولا والي نتي مولات الخير راك عارفة…
عيدة : الله يشافيها على سلامتها…
سلمات على سعيدة وعلى توريا وعلى باقي الكنينات لقات كريمة شادة مليكة واستغلات الفرصة هضرات معاها تاهي…
عيشة : وتي كيدايرة ياااا الباندية الغابرة گلتي ديك المرة تجي تشوفيني ماطليتي ما سولتي…
مليكة”نطقات بحلگها الغليض البح” : على رقبتي وماتساليني حلوف لا ديك الخطرة جيت لگيت مي عيانة راك حضرتي تمحنت تا گلنا مشات..هاو بعد برات جا عرس ولد خويا البكر موراها طراو شي مشاكيل هاو صديت لدار ناسي فالدوار ديال المعطي راجلي عندهم…جري من هك وسير من هك وماجبناش ليام غا شهر مالحگنا فيه والي…راني جايا هاد شهر الي داخل ونبرك تم نيت هاو ندير ليك طليلة على قليل مادوزنا انا واك هههههه…
عيشة. : ااايه الله يرحم ايام كنا نبقاو فالفدان عندكم تايلحگونت بالحجر ههههه…
بقات تهضر معاها ولات قطعات وعطات التيليفون لكريمة تاتعاود تعيط ليها فاش تدخل البنت الي بغاو يخطبو…دخلو رجال لصالون والعيالات لصالون المقابل…شوية وهي تدخل زكية حادرة راسها سلمات عليهم وسولو على احوالها كاتجاوب غير ب “الحمد لله”…شي دعا معاها بالشفاء وشي تنهد متأسف على حالتها خصوصا “سعيدة” الي عارفة انها دقتها صعيييبة وحسات بالي الي وقع ليها ماشي حادث كيف قايلين وانما تعلقها ب “بشار” واخا قالو ليها شوفي حياتك واخا وخا بغاتو وتأملات انه فيوم من الايام يرجع ويقولو ليه عليها لكن….
نجاة”ام البنت الي باغين يخطبو…دخلات دايرة طابلية مطروزة بيضة على خصرها وخاشية ايدها فجيبها القدامي..دايرة زيف حياتي كحل فيه صقلي ذهبي…ودايرة سنسلة فعنقها بالعقيق كحل وفيها دوارات لويز..دايرة وشام فذقنها وسنانها فيهم زوج سنات دايرة ليهم جوا ديال ذهب غا ضحكت بانو وبانو جناب فمها ليموني بالسواك..”
نجاة : مرحباااااا بيكم والله الى مرحبا نهار كبير هذا…
عيدة : ترحب بيك الوقت الزينة ونعايم جنة انجاة…
توريا : فين هي العروسة نشاعلاه لاكانت فالنصيب…
نجاة : هاهي دروك تدخل…”
وصلات 12 ف لافاك…خرجات من بعد مدة وهي غاطسة راسها كاتقيد فالمعلومات الي دازو فديك الندوة الي حضرات ليها…خرجات راسها كايدور حتى الفطور ما فطراتو…خرجات على برا ووقفات كاتشوف فالطريق..ماعرفاتش واش غايجي ليها ولا تمشي فطاكسي..ماهضرش معاها ماخلا ليها ميساج وحتى هي مافكراتش تسولو كاع…بقات واقفة وشافت تاعيات وهي تمد ايدها بغات تشير لطاكسي حتى صونا ليها تيليفونها لقاتو هو نيت…هزات عينيها وهي تبان ليها سيارتو واقفة بعيد شوي على جلبة الناس…جاوبات..
حبيبة : شفتك…
تاهو ماعطلهاش قطع عليها..تا وصلات عنظو وهي تركب شافتو ب نص عين بان ليها داير نضاضر شمس رايبان ومبدل حوايجو على ديال صباح…حرك ليها رايو وكسيرا بطوموبيل…تا خرجو من داوديات وهو ينطق…
بشار : غادي نديك لداركم…بقاي تما حتى نسالي ونرجع نديك بالليل…
حبيبة”حركات راسها”
بشار”طلق سينيال وضار دورة ف گيليز وقبل مايزيد يشد طريق رميلة نطق” : عندك شي حاجة تديها معاك من دار هنا ؟!
حبيبة : لا ماكاين والو…مزال عندي حوايجي فدارنا…
بشار”حرك راسو وسكت شوية شاد طريق رميلة..حتى نطق” : داكشي تخربيق ديال دار الماكلة الى رجعت بكري نقضي غراضو.. sinon الليلة علميني اش محتاجة من غير المقدية ديال دار…وغذا نتكلف ماعرفتش داك تخربيق اش فيه…ولا خرجي معايا نتي…
حبيبة : لا غير خليني وتقدا نتا…
بشار : غذا…ماعندك والو گلتي…
حبيبة : اه…
بشار : غذا خرجي تقداي معايا اش خاص…”وقف سيارة قدام درب” نزلي عليا من تم…
دار صباعو فلحيتو خاشيهم فيها كايحك فيها وتسناها تا نزلات دور وجهو ناحيتها بانت ليه ماشية تال دارهم…كان باغي يجلس معاها باش يهضرو يحطو نقط عالحروف على عيشتهم بزوج فنفس البرطما لكن ماقدوش الوقت عاطي لكلمة لشخص ومضطر يمشي…جبد تيليفون دار اتصالو…
اما فدار البنت الي مشاو يخطبو فيها….بعد ترحيب حااار…وصل وقت اتاي الي جابو ليهم صوانيه والمجامع الي فيهم سكار واتاي والنعناع…حطوهم فلارض عند رجال قدام تفريشة جالس فيها بات البنت…جابو ليه مقراج كبيييير صفر وخواو ليه بدا يعمر…
ع.القادر”جبد تيليفونو دارو فوذنيه” : اولدي..تعطلتي…ايه واخا حسام يجيبك لهن را عارف…
اما عند العيالات فالصالون كانو جالسين كايهضرو ويضحكو مع بعضياتهم…جات عيشة جايبة طبسيل الفاكية حطاتو ليهم وهي كضحك…تبعاتها زكية هازة صينية كبييرة فيها كيسان وزوج برارد…
نجاة ؛ وزكية سيري بنيتي عيطي لبنت عمك سيري…
زكية”حركات راسها وهي تمشي فين قالت ليها…دخلات البيت على العروسة لقاتها جالسة جنب السداري وحادرة راسها مغوبشة…زينها اشقر وعويناتها عسلييين فوسط البؤبؤ ديالهم واحد نقيطة مخلياهم مميزين…فمها صغيور ومنخرها منگاد فيها بياض يسحر…جالس حداها ولدها مخشي تحت باطها وكيشوف تاهو…تنهدات على حالها وهي تنطق” : خرجي عندهم اختي…
هي : نخرج لخلا عشتي..شفتي فين باغين يلصقوني..باش نحيد من طريگ ازكية ؟!…
زكية : واااختي فدوى هادشي الي كاين راكي عارفة تريكتنا مايبغيوش العيب…هاني گدامك شوفي حالتي كي ولات كون صابو يلصقوني ل عبد العالي الهبيل مايفرطو…
فدوى”ضارت شافت ف ولدها وباست ليه راسو” : هاني جايا وليدي بقى هنا..
حرك ليها راسو وهي تنوض كاتنهد ومسلمة امرها لله…وخرجات مع زكية الي تاهي حالها حاااال…دخلاتها لصالون..حادرة راسها وسلمات على الكنينات عاد دازت ل عيدة باست ليها ايدها وراسها وهي تجلسها امها حداها نيت ونطقات بجملة خلاتها تزيد هم على هم…
نجاة : جلسي حدا الحاجة لا كتاب نشاعلاه تولي ضرتك ضرة الخير…
عيدة : مانحسبهاشاااي ضرتي راهي فمقام بنتي..كسوتها من كسوة كنيناتي وكسوتي…
توريا : فدوى كيداير ولدك…
فدوى”بصوت شبه مسموع”.: لباس عليه…
توريا : شحاال فعمرو تبارك الله…
فدوى : عشر سنين…
ربيعة : وتي شحاال فعمرك….
فدوى : ث احم ثلاثين عام…
توريا : هاااويلي انا يحساب ليا عندك سبعة وعشرين وولدك عندو سطاش…
سعيدة : وا توريا تي صلي عالنبي…تي كيفاش سطاش وعندها سبعة وعشرين…تي مالها ولداتو على حداش وتجوجت على عشر سنين…
توريا”هزات فيها حاجبها” : ايوى ماحسبناش…
سعيدة : ها باش زينة القرايا ياااا خويتي توريا ههههه “حشاتها ليها فالعرق خلات توريا ضرب ليها واااحد مولاتي تخنزيرة عمرها دارتها ليها…”
سعيدة”درات راسها ماشافتهاش” : اسميتو تبارك الله…
فدوى : ريان…
بقاو كيضهرو وخا حسو بيها ماشي تالهيه…شي قال حشمانة شي قال نيشان را ماباغياش…صوراتها كريمة بالحس ورسلات صورتها لمليكة الي بانت ليها ماهياش وهي ترسلها ل رضوان…
مليكة : تا شوف يا مرت بوك ديال بعد غذا ههههه…
رضوان”شافها وتمعن فيها عرفها وعقل عليها وعلاش الي مايعقل على حب الطفولة” : ايهااي على فديوة كي ولات…
مليكة : تا عقلتي عليها…
رضوان : وراه نعرفها من زمان يا رحمان من كانت تجي عدنا فاش كايكون الموسم وليني من حرگت لطاليان مابقيت سقت عليها خبار…والله الى بويا طاح عليها نيت ههههه..خليه هي الي تعرف ليه را درويشة…
قرب الغذا يتحط الي كان عبارة على حولي مشوي فالحفرة فيها جمر ومخشي فيها مغطي بالحديد ومردوم عليه تراب…ودجاج محمر والقطبان ديال زنان…مازالين كايهضرو حتى سمعو صوت بات العروسة نايض يجري ويرحب ماقاداه فرحة وناض تا عبد القادر تلهو تبعو….
توريا : اش كاين…
عيدة : ولاكون لا جا…
توريا : شكون…
كانت جايا زكية جايبة صينية الكيسان النقييين كيف وصاتها عيشة تجيبهم….هزات عينيها حتى بان ليها عمها جاي وكيتفتف ووراه عبد القادر الي فرحان حيث ماخصرش ليه خاطرو…شافت من بعيد شكون الي جاي حتى بان ليها داخل مگضر حنى راسو باش قدر يدخل من الباب داخل مغوبببببببششش ماحاملش يجي ولكن الكلمة الي عطا لجدو خلاتو يجي وخا يدير غا الصواب ويرجع…
سالم”بات العروسة” : زيد ا سي بشار زيد يا البكر ديال سي نورالدين الله يرحمو…تباااارك الله غا نورالدين محطوط…
مع قالها هز فيه بشار عينيه وهو يوقف…مع شافتو زكية وجهها لوجهو قلبها ضررببب بجهههههد تا طاحت عليها ضبابة على عينيها وهي تطيح ديك صينية الكيسان تا تسمعو تشااااخ بصنيتهم خلات امها ومرت عمها وكلشي خرج يطل اش وقع…
خرجات نجاة ام العروسة كاتجري من الكوزينة وتطلب سلامة واللطيف..خرج واحد من الخوت تاهو وعيشة تاهي كاتشوف اش طاري لقات زكية حادرة راسها وعينيها جمدو مامثيقااااش واش هو الي شافت بعينيها..واش “الحب” الي بنات عليه احلام اليقظة وحتى النوم….من صدمتها قلبها علاين يسكت والاطراف ديال بردووو…حتى طاحت ليها صينية من ايدها بكيسانها وبراردها حتى ضبابة الي غلبت على عينيها من صدمتها كيف طاحت عينها عليه…عينيها الي مزالين عاشقين اسم “بشار” شخص بشار واخا ماعارفاهش تا كيف داير فهضرتو ولا صوتو…تعلقات بواحد شخص اشبه بالوهم…شخص شافتو وهو فعمر صغير. وهي فعمر اصغر بكثيير….شخص ربطوها بيه وهو ماعارفش واش رابطينو بشي وحدة…حتى وصل الوقت وقالو ليها “شوفي ماحسن منو او الله يجيب ليك ماحسن منو”….
نجاةوقفات كاتشوف فصينية ماحيلتها لكيسان ماحيلها ل ناس الي سمعو وهادي تعتبر عيييب يتسمع حس شي حاجة طاحت او يوقع شي مشكيل ولو صغييير..خاص مايتسمعش الحس ودوز الضيافة او العراضة كما يجب..شافت فيها لقاتها باقيا مبلوكية وحاطة ايدها على صدرها كأنها كاتقول لداك القلب سكت وهنيني…خليني نمو.ت وماتبقاش تضرب راك كاتعذبني وفايت ليك عذبتيني يا سباب عذا.بي…”
نجاة : يا تي كي طرا ليك يا ويلي…
عيشة”هي الي عارفاها مشات ليها كاتزرب شداتها من ايدها” : زيدي لهن زيدي…
سعيدة”شافتها وعرفاتها اش شافت” : ياك ماكاين باس اخويتي نجاة…
نجاة”باحراج” : اههه والي باس سمحو لينا والله الى سمحو لينا…
اما بشار كان دخل ماتسوق كاااع لشكون هرس او اش تهرس..حدو كي سمع ديك طيحة ديال الكيسان كمش حجبانو وخسر سيفتو من داك صداع الي طرا بسباب طيحة الصينية…مشا غير عبد القادر كايقول لبات العروسة ماوقع باس داو الباس هادو هما الجمل او الكلمات الي كايتقالو فور مكيطيح شي كاس طبسيل او او الخ….
عيشة جرات زكية كأنها جثة وغادية غير هاكاك..باقين عينيها يابسين ووجهها ولا حمررررر…صورتو ترسخات ليها فالبال دابا وزادت من اعجباها خصوصا فاش شافتو فالواقع نيشان…
عيشة”مخرجة عينيها بدات تندب فحناكها بالغدايد” : هاويييييييلي على بالمشوهة باغيا تشوهيني يگطعك عليا..
زكية”الصمت”.
عيشة : تي اش درتي يا بالمسخوطة يعطيك جهل..اش درتي..
زكية”بدا صدرها كايطع وينزل كأنها باغية تبدا تنخصص وكاتحبس فيها..كأن العافية الي شعلات فيها باغيا تخرج على برا الا انها ماتقدرش تبينها قدام امها ولا دارهم…حدرت راسها وعينيها فالارض ونطقات بصوت نبرتو طيح ضيم فحال الى خارج بزز باش يبرر..” : طاحت ليا ضبابة على عيني امي ماشفت والي (والو)…
عيشة”بقات تشوف فيها وتسوط ماكرهاتش ته.لكها ع.صا” : يا وانا بغيت طيح عليك ضبابة الدوام يا بنتلحرااام…مفافيا عمرك تسگمي كي لالياتك (تسگمي هي تقادي)…
زكية”الصمت”…
عيشة : بركي هنا ولا تخرجيش يعطيك مصيبة تصيبك في عمرك..
تا هي لقاتها من الجنة والناس..باغية نيت تبقى فالبيت وتكون وسط احزانها وهمها الي ماغايحس بيه تاحد من غيرها او الي مكوي بالنار الي مكوية بيها هي…بقات عيشة تعاير فيها وتعاود وهي تخرج من البيت كاتقاد فزيفها على راسها وتنهج تلاقات بنجاة قالت ليها را جاتها سخفة دغيا لبقت ليها عذر الي اصلا اختارعاتو زكية…رجعو لعند الضياف او “الخطاب” ورقعو من هنا وهنا وطلبو السماحة منهم ورجعو لضحكهم غير مبالين ب “قلب اعيد جرحه للنزيف”…
ع.القادر”ضار عند بشار وربت ليه على كتفو بشكر وافتخار” : الله يرضي عليك ماخصرتيهاش في وجهي…
بشار حرك ليه راسو..حيث بصح عطاه الكلمة فالنهار الي عطاه فيه الشيكات قبل ميمدهم ليه كان طلبو فوق انه ثاق فيه وسلمهم ليه انه يمشي معاه فاش يخطب..بشار ماستغربش انه غايخطب او بمعنى اصح ماعندوش سوق مغايتدخلش خصوصا انه عارف جدو غايبغي يتزوج ف يوم من الايام…جالس وجالس عالشوك خصوصا ان الناس كايرحبو بطريقة كبييرة..كايرحبو ويعاودو حتى كيبرزطو الواحد…هو ممولفش كثرة الناس وممولفش ترحيبات بهاد طريقة المزعجة…هاشم شافو وعارفو مغايصبرش…
بشار “قرب لجدو” : عندي ساعة نبقاها معاك هنا..مانضمنش ليك نصبر كثر ابا…
ع.القادر”طبطب عليه” : لا مكاين باس الي بغيتي ديرو…
فالبيت فين جالسين العيالات من الي خبروهم بالي بشار جا وتوريا لجمت فمها وسكتات ماهضرات ماتكلمات…كاتهضر بالعبار ولا تضحك بالعبار…واحد اللحظة وهي تضحك بطريقة حاشية بيها لهضرة لدار العروسة ولعروسة وبشار براسو…
توريا”قربات لعگوزتها” : ههه حضرو المساخيط وتهرسو الصواني والكيسان باين العربون…
عيدة : داو الباس اتوريا..والى جا را فشرد جدو كوني ابنتي كوني وخلي ساعة دوز بخير…
سكتات توريا مابقات هضرات…بداو كايوجدو لغذا باش يتحط وبشار جالس على عينيه…سيحمد قرب لهاشم ونطق بينو وبينو…
سيحمد : توما ماتهضروش مع بعضياتكم ولا كفاش..؟!..
هاشم : كانهضرو علاش ؟!..
سيحمد : شتو مكون ماگال تا سلام واخا غا ليك…
هاشم : خليه بخاطرو سيحمد وسكتنا…
سيحمد يلاه بغا يهضر وهو يشوف فيه لقاه مخنزرررر واخا ماكيشوفش كاع جيهتو..ولا تاهو سكت لا يشوفو كايهضر عليه ويصدق حاجو بوجهو قدام العباد..
نزلات لعندهم لقاتها غير هي وخوتها حيث رقية عندها روپو مكتجي حتى لغذ ليه…ايوب فالصالون عندو المحاسب…لقاتها حاجة طاجين القوق وجلبانة و شلاضة فطبيسلات وروز بالجون ومايييس وعصير ديال الليمون والخيار مستفة طابلة بطريقة تشهي…
حبيبة : ريحة طاجين تتشهي هههه..
ناديا : هه زيدي تغذاي…
مشات لافابو الي حدا طواليط لتحت غسلات ايديها ورجعات جلسات فطابلة الي تما فالقاع ديال رياض…كسرات ليهم الخبز وسمات الله كاتاكل…
ناديا : كيف نعستو البارح مزيان…
حبيبة”دغمة ولات فحلقها واحلة..هزات كاس الما باش هبطاتها” : احم..الحمد لله هي دار باردة…
ناديا : من گلتي ليا مفرشة على بالي ماتحتاجيش الغطا..تا ديري ودي واحد من الغطيان الي خذينا ليك فدهازك…
حبيبة : ندي هي كاشتي الي مولفة…
ناديا : وهادي را كبيرة كاشتك يلاه باتگدك وهو يبقى بلاش ؟ (حساب ليها كاينعسو حدا بعضياتهم هههه)…
حبيبة : لا اه كانعس هي “وقفاتها فدقيقة تسعين على شوي تقوليها كانعس بوحدي” احم را مكنبغيش نتشارك الغطا راكي عارفاني كانتكور فغطايا ههههه…
ناديا : ممم..وا دي هاديك ودي هاديك ليه هو…
حركات راسها ورجعات خاشياه فطاجين الي كان بنين…كملو غذاهم ومشات لدوش غسلات وحكات سنانها لتحت نيت وخرجات لقات ناديا حاطة ديسير كيف العادة بدات تقشر ل وردة الي كاتبغي تفاح مقشر…جلسات حداهم تاهي تاتهضر وتجمع مع ناديا حتى سمعات صوت الهاتف كايرن ب رنة رسالة عادية…طلات عليه حتى بان ليها اشعار من البنك ديالها..دخلات كاتشوف وهي توسع عينيها بان ليها تحويل مبلغ مالي من “بشار” ل حسابها هي…بقاات مبلوكية كاتشوف فداك المبلغ الي وصلها حتى لاحظاتها ناديا…
ناديا : مالك ؟!..
حبيبة : ها “هزات فيها عينيها” ااحم هي وصلني نوتيف من البنك..فيرسا ليا فلوس فحسابي..
ناديا : ايوى يا دلي را راجلك اش بيتيه مايدوزش ليك…
حبيبة : ولكن الفلوس الي دوز ليا بزااف..
ناديا : الي دوزها خير وبركة بنتي..را راجلك وراكم مشاركين هم وعيشة وحدة…
من ناحية هم وعيشة وحدة كان عندها الحق لكن بطريقة اخرى…ناديا يمكن عجبها الحال اهتمام بشار. ببنتها اول حاجة بانت هي هادي..شكون الام الي تكره ان بنتها يتهلا فيها راجلها سواء بالماديات او المعنويات واكثر حاجة هي المعنويات ان بنتها تكون مرتاحة فزواجها هادي اكثر حاجة كايبغيوها لواليدين لولادهم…يلاه خشات طرف تفاح في فمها حتى وصلها ميساج منو ف واتساب…
بشار : كونفيرمي ليا اش وصلك..
حبيبة”ساست ايديها وهي تدخل ورسلات ليه” : اه وصلني..شكرا…
مجاوبهاش طلع ليها vu…شافت فيها وهي تنطق…
حبيبة”عاودات ليها بالي داير معاها يمشيو يتقداو” : ماعرفتش اماما…
ناديا : ويلي شوفي اش بيخص..بداي من لول خضرة وللحم ودجاج..
حبيبة : هو ماعارفش وحتى انا “باحراج”..
ناديا : ايوى يا دلي راني ولدت الفشوش باك خرج عليك يا بنتي وهذا الله…تاتبغي تقداي ولا هي يمشيو خوتك يراجعو ونكتب ليك لا ليست اش بيخصك تقداي…
حبيبة : ولكن انا…
ناديا”تنهدات قالبة عينيها” : اه گلت ليك مفششة يا بنتي..مكتعرفيش طيبي…اليوتيب ابنتي مايشكي من والو…
كان هو فهاد اللحظة جالس على اعصابو…غا هما هزو داك الغذا الي ماكلا منو والو سوى انه نقب..
سالم”قرب ليه اللحم بايدو” : زيد اولدي كول..
بشار”كمش ملامحو ماحملش ديك طريقة يقرب ليه لحم حيث كان كاياكل ويلحس فصبعو..ماحسش حتى ناض على وقفتو” : الحاج..”كايقاد فتريكوه..حرك ليه راسو ووجهو كلو مخنزر خلا كلشي يشوف اما هاشم عرفووو اش بيه وعرف انه عااف وكاتم”
سالم : ولواه لواه تنوض عالغذا جلس اولدي غا تايحطو الغذا تاني…
بشار : لا عندي ماندير ماشي مشكيل…
ع.االقادر : اللهم يسر…
سالم : تا گعد يا گعد بالله ماتمشي و..”قاطعو بنبرة صوت مجهدة شوية خلات كلشي هز راسو يشوف”
بشار : الحاااااج ماتقجرش يرحم باك..عندي مانقضي الساعة الله…
عبد القادر شاف دعوة ماتعجبش ولاخور عزيز عليه يقجر على الواحد واخا كايرحب لكن كريقة ترحيبو مزعجة بزاف تقوليه سلاه يحلف عليك تا تسحر واخا بلا رمضان…وبشار خاطرو مكاينش ماشي غير ضيق غا دار الواجب مع جدو…وقف وبدا يحنحن ويضحك…
ع.القادر : لا يا را عنظو شي خدمة…سير الله يسر..
بشار”باس ليه راسو” : مبروك…
حرك ليه راسو كايضحك وطبطب عليه…كحاز سالم وخلا ليه طريق بدا كايضحك باحراج خافو لا يدور فيه حيث من الطريقة صوته وحتى ملامح وجهو كايجيبو الخلعة…ناض هاشم وتبعو حيث عبد القادر حرك ليه راسو بمعنى تبعو…حدو قال “شكرا” وزاد بمعنى الله يخلف…شافو فعبد القادر الي بقا يلبق اش يقول قاليهم را عندو شي اغراض ضرورية حيث ماعايشش فالمغرب المهم دغيا سكتهم بطريقتو…حيث فرح بالي دار معاه الواجب وحضر لهاد المجية حيث ماشي خطوبة رسمية غير غايهضرو فيها حتى يعطيوهم الرد عاد تتم الخطبة والعقد رسميا…وصل معاه هاشم تا لسيارتو حيث جا مع حسام تا وراه فين ورجع ادراجو لفيرما…بقا هاشم واقف كايشوف فيه يلاه بغا يحل طوموبيل…
هاشم : تمشي تشوف يوسف…
بشار”ماضارش جيهتو حدو حرك ليه راسو وهو يحل الباب بغا يدخل تا وقفو تاني”
هاشم : تبقى هاكا گاطع معايا اللغا ؟!..
بشار”عض لسانو شحااال قبل ماينطق” : شريت التيقار اهاشم..مانهز منك ماتهز مني..وگفتي معاها ماعندي لاش نگطع معاك اللغا راك واگف مع الي ولدتني ماشي عدوتي باش نگلب عليك…تنغم هضرتي وشري تانتا وقرك…
تحط الطبق الثاني والي كان دجاج محمر..وقراعي ice (مونادا) يتهزو من الباكيات ديالهم ويتحطو نيشان فوق طوابل الي خوات يحيدوها…تا تغذاو وحطو ليهم ديسير وتقولي يا العروسة واش شافو ضحكتك ولا سمعو صوتك…توريا حسات بيها ماباغياش سعيدة خلاص…اما كريمة هي وربيعة تقارير خدامين يوصلو واحد تابع لاخور ل “رضوان” و ل “مليكة” صورو ليها حتى اش حطو ليهم وحتى العروسة كيفاش مكونة…تحط اتاي مابعد الغذاء وشركو الكلام وجات اللحظة الي غايدويو فيها رجال والعيالات…
ع.القادر : ايوى سي سالم راك عارف المقصود…راه شريف والكلام راه وصلك…
سالم”حط كاسو ديال اتاي الي بؤزتو وسكار ديالو طاغي..تبسم وحرك راسو” : ايييه مرحبا بالحاج رحماني…شكون هذا الي يكره نسوبيتكم…
ع.القادر : نتا مول الخير…راك عارف وراني جاي ومعايا المرأة اللولة براسها تخطب ليا..راني شاري بنتكم مايخصها خير وماتحس براسها ناقصها وااالي…بحالها ابحال الحاجة عيدة ا هو الحاجة عيدة را شوي زايدة نغزة حيك (حيث) هي اللولة وهي الي ربات ليا سيحمد ورضوان ربايبها وهي مولات شي…وليني را ندير فووگ جهدي تعيش تحت جناحي وسهمها من سهمي..لا هي تخصها حاجة ولا هي تحس خاصها شي…
سالم”حرك راسو وعينيه فلارض” : عااارف الي كاين الدار الكبيرة الحاج…
#عند_العيالات…
حطات عيدها ايدها الي موشومة وشام العيالات الكبار…وطبطبات فوق ايد فدوى العروسة…
عيدة : الي تجي ليا تجيك بالدوبل ابنيتي…حسبي راسك نتي من مالين دار…والي شرطتيها تجاب ليك وتحضر ونقبلوها بالگلب الكبير وبالفرحة…
فدوى”الصمت”…
توريا”كمشت فيها حجبانها” : شتك ساكتة بنيتي…ياكما مقلقة وكان ههههه…
نجاة : اهههه مامقلقشاااي ا ختي توريا را حشمانة…وهازة لهم لولدها…
توريا : لا تهزي هم ليه شاي راه ولد وغذا ولا بعدو يكبر ويولي راجل ويشوف راسو…لا تعولي شاااي على تريكة غا يديرو الكتاف ويتفرعنو…
فدوى : انا منقدرش نفرط فولدي ومنخليهش فدارنا…هذا هو شرطي…
عيدة : لا تخليهش ابنيتي شكون يبعدو عليك..جيبيه يعيش معاك…
فدوى : مايولفش ليا بلاصة من غير هنا…هازة ليه الهم…
سعيدة. : من حقك ابنتي…
توريا : هي اش دروك…
سعيدة”شافت توريا كاطلع فيها وتهبط ومخنزرة وهي تدخل” : ايوى را كنعطيو وقت يفكرو فيه ناس اتوريا..كي درتي مع مرت ولدك را تا مع ناس…
توريا”تلجم ليها الفم”…
عيدة : اييه تا هادي هضرة…العلم را علمناكم والجواب را عندكم…فكري بنيتي والي جدتي بيه موجاب ليك من كرف تالطرف…”خبطات ليها فوق ايدها بخفة”…الله يرضي عليك..
من بعد ما ضرب مسافة راجع منين حا عقل على طريق حيث ماينساهاش وهي كانت فواحد الوقت طريق لموسم الي كان كيمشي ليه مع باه فالعطلة…داير صباعو بين سنانو كايحك عليهم وعقلو غااااايب خاطرو عالم بيه غير الله نفسيتو مهرسة بالمعقول والصبر راه عاض فيه وراه قرب يفلت ليه وطير النقشة…حس براسو بدا كيدور عليه ومفعول المهدئ الي شرب بدا كيحيد ليه…كايحك فلحيتو وعنقو بدا كايحس بصدرو كايديق عليه وحلقو كاينشف ليه…خصوصا منين داز من حدا الموسم الي نفسو دازت من حداه توريا وشافتو…لدرجة سد الشراجم الي حال ديال سيارة وطلق راديو الي عمرو ماطلقو ولا سمع ليه…فضل يسمع صداع راديو ولا اغنية على انه يسمع صوت طلقات تبوريدة ويرجعو لواحد زمان هو بايدو قضا عليه…
اصعب حاجة هي انك تكون سباب ضياع حياة شي حد…اصعب الم هو انك تكون قا.تل شي حد عزيز عليك وماشي اي حد “الاب” ديالك…واكثر شخص كان حنين فيك وفاهمك وكايضحك ليك دير الي درتي…ماعمرك شفتي منو تغوبيشة ولا سمعتي منو كلام العيب…ولا صرخة ولا تنهصيرة ولا مد عليك حتى ايدو ولا شاف فيك شوفة ناقصة…الحنان كون كان بنادم كان غايكون هو “نورالدين” الشخصية الي مشات فاول القصة وبقات عايشة بسباب مو.تها وطريقة باش ما.تت…
بدا كايحك فصدرو الي حس بيه شعلات فيه العافية وجمرها كايعذ.ب فيه ويحر.ق…حتى بدا يكحب وحجبانو المورمين زادو غوبشو وعينيه ولاو حمريييين…ماكرهش يمشي لاقرب بار يشرب ويسنى هاد الالم الي تاواحد ماكيعرفو را كايجيه..تاواحد ماعارف الحالة الحقيقية الي كاتصيبو وهي انه عقلو كايمشي وكايبقى شخص يدون عقل يتصرف بيه…حتى بدا كايهضر غير مع راسو تاني ويحرك راسو ويهبطو يدوز على جبهتو ويبدا يتمتم بين شفايفو بكلمات غير مفهومة…حط راسو عالكوسان وهزو كايشوف فالسقف حتى بدات الطوموبيل كاتنقص فالسرعة تا وقفات فجنب واحد البيست…كانت صاروفة ديال الكلا.ب كاتجري وهي تم جايا كادور بالطوموبيل وشكون حس بيها…مكانش فهاد العالم مكاينش الي حاس بيه من غير الله وراسو…
بقا كايشوف فالسقف ويتمتم اش كيقول الله اعلم..عينيه ولاو جغمة د.م…شوية حتى مابقاش كايحس اش ضاير بيه وشكون كاينبح واخا را مكيسمع والو…حتى بدا جسمو كايتنفض ويتخضخض وعينيه تقلبو لفووووق…كانت النوبة كاتهز فيه وتحط…النوبة الي كاتعذبو من ورا ماكتمشي واخا مكيبينش…شي مدة وهي شاداه حتى بدا كايتهدن الجسم كيف العادة ومع تخضخيصة بجهد الطوموبيل بدات كاتغوت غير وحدها…كايتسمع غواتها فداك الخلا…حتى زگااااااا وكشاكشو خرجو جنب فمو….
””عن أي الم تتحدثون”…
عروس_الجحيم_241💀🌩️الفصل الاول #زفة_الى_المجهول sana bouabid..
ماكاينش الي غايحس بيك من غير الله…ولله هو الحامي والشافي المعافي…كيف ديما وكيف ما ولف هو شخصيا…انه كيف كايفيق من النوبة كايبقى شي مدة وهو متكي ماكيتحرك…كايبقى فسكاااات حتى كايحس براسو غايقدر ينوض او يتحرك…ازيد من نص ساعة وهو مغمض عينيه كايحاول يتوگض من نوبة….ملي توگض هز راسو بشوي وطل على جناب سيارة من شرجم راسو باقي كايدور وحاس براسو عيااان ماقادرش تا يهضر…جبد من حداه قرعة الما شرب منها ورجع تكا راسو لوووور مسند تا خذا مايكفي من راحة واستيعاب عاد تگد وديمارا طوموبيل وكسيرا واخا حاس براسو واكل العصا فذاتو…مشا مسااافة وهو عاص فالصبر وصبرو مابحالو حد ووصل لفيرما حيث كان قرب ليها نيت كون ما جاتو النوبة…
سايق ومرة مرة كايمسد فعينيه…حتى لقا راسو داخل لفيرما ووقف فاش حل ليه العساس ورجع دخل تا وقف سيارة لداخل…تكا تاني مسند عالكوسان حتى بان ليه حسام خارج لعندو…
حسام : تلفتي فطريگ ههههه…
بشار”ساااكت”…
حسام”بان ليه ماشي هو هذاك..كمش حجبانو” : بيك شي حاجة خويا…
بشار”بقا ساكت شحال كايتصنط لداك تزنزين الي فراسو..حتى حل عينيه وشاف فيه” : لا…
“تگعد خارج من طوموبيل مشيتو عيانة السخانة بغات تبدا طلع ليه من ورا النوبة…ضار جيهة حسام وربت ليه على كتفو مزير عليه تا بغا يفصلو لحسام وهو ماحاسش..لكن حسام حس بيه وعرفو بحال باغي يتسند عليه ومابغاش يبين..صبر ليه حسام تاهو واخا را كتفو بغا يتفرق مسكين….هز بشار عينيه لفوق..
بشار : يوسف فايق ؟!..
حسام : واه را معاه اشراق يلاه غذاتو وعطاتو دواه…
بشار”حرك راسو” : مزيان….
زفر تا زفر وهو يطلق من حسام وتم داخل بخطى ثقييييلة…ضار عند حسام وشير ليه فين سبقو حسام وقاليه تبعني تا وصلو عند باب البيت دق عليهم وهو يحل الباب…غير شافو يوسف وهي توساع ضحكتو و اشراق جمعات الوقفة وتزاد معاها زايد….مشا سلم على يوسف وسلم على اشراق الي عنقها جنبو وكيشوف فيوسف…
بشار. : با يوسف…مخير اليوم ولا ؟!…
يوسف : اباس ابااس…وحشتك خويا…
بشار : گداش “غمزو بجنب”…
يوسف : بزااااااااااااااف “طولهااا”…
عنكش ليه شعرو ومد صباعو مسد بيهم عينيه صابر بزز لديك سخانة الي غاتبدا تشدو…وضار جيهة اشراق كايهضر بصوت ثقيل…
بشار”باس ليها راسها” : لباس نتي ؟
اشراق”تبسمات” : الحمد لله..
بشار : كاين شي قراية ولا نهضرو تاني…
اشراق. : لا كاين..احم سيمانة جايا كاينة عطلة سيمانة…
بشار. : مزيان…اش درتي فداكشي علاش هضرنا ؟!..
اشراق : كاين الفيزيك والماط والانجليزية…هما الي غاندير فيهم سوايع…
بشار : حسام غايتكلف معاك فيهم..”شاف فيه” ماشي مشكيل ؟
حسام : الله اودي مرحبا…هاديك طريقي تمشي من كوليج ونرجع نديها انا ولا هاشم با…
بشار : وعليه…
بقا معاهم غير شوية ماقدرش يزيد مزال…حتى باس يوسف وطبطب عليه وتأكد انه شرب دواه…عاد نزل من عنظو وتبعو حسام تال برا…وقف كايهضر معاه ودوز ليه فلوس سوايع اشراق فالكونط ديالو باش يخرجهم وهو يخلصهم ليها…شوي حتى تم جاي “اشرف” ولد الحسنية داخل هاز ورا كتافو واحد الخنشة فيها فاس وشاقور ومنجل لوازم الفلاحة اليدوية…تا وقف حدا حسام…
اشرف. : حسام لباس…
حسام : اهلا اشرف عاش من شافك…غبرة حارة هادي…
اشرف : الخدمة وكان…
حسام ؛ الخدمة فعمرك اصحبي ياك گلت ليك راجع لباك حر..
اشرف : منصيبش…گوليا فين مي ماعندكمش…
حسام : الحسنية ؟!…
بشار سمع الحسنية وهو يدور كان واقف كايشرب ف فنيدة ديال راس…وضار جيهة اشرف كايشوووف فيه….
اشرف : وامعرفت فين هي سولت ياسين گاليا را تكون عدكم…بغيت نشوفها گبل منمشي..
حسام : وتا ترجع اصحبي ماعندها فين غاديا لا ضارت تجي عندنا را وصاتني مي نعطيها تغذا لا جات…
اشرف : والو باغي نشوفها دابا…توحشاها بزاف ا حسام…
حسام : تا ديما موحشها لا تقويش عليها الغيبة ورا ماتوحشهاش…
اشرف : واخا نحاول نرجع بكري…
حرك ليه راسو وهو يدور غادي ماشي يخدم فالفدان مع شي فلاحة…وصل تالعند الراس وهو يدور وبقا كيشوف فحسام وفبشار وفدار…ورجع كايقلب بعينيه فانحاء الفيرما عالله وعسى تبان ليه مو…والو مابانتش عينيه ولاو حمرين باغي يشوفها…شاف تاعيا وهو يخرج اما بشار بقا حاضييييه تا خرج وهو يدور عند حسام…
بشار”كايهضر وينهج بسخانة” : ولدها ؟؟؟…
حسام : اه ولدها هو وخوه توام…
بشار”هز حاجبو” : شحال فعمرهم ؟؛
حسام : را علاين يلحگو سبعطاش يمكن شهر جاي حيث نفس شهر عيد ميلادي واخا انا كبر منهم مزيودين فنفس شهر…
بشار”وسع عينيه وضار شاف فحسام” : ولااادها ؟!…
حسام مافهم والو من شافو سول بديك الطريقة.. بشار بقا حاضي منين خرج اشرف…مد القرعة لحسام ودخل لسيارة حرك ليه راسو وكسيرا …واخا يعيا ينسا ويميك لكن غير انه شاف اشرف فحال الى حيا ليه شي حاجة فالخاطر ديالو…
فواحد زمااان الليلة الي وقع ل حسنية داك المشكيل..كان هو يلاه خارج من المصحة النفسية من بعد ماداز عاام على الكارثة…كانو سمحو ليه يخرج يشوف دارهم من بعد ماخرج براءة من القضية ديال باه….ماينساش ديك الليلة الي كانت الحسنية بين ايديه…بمجرد ماشاف واحد من ولادها قدامو رجعات ليه تاهو ذكرى ديك الليلة الي كانت مؤلمة ليه وبداية الصراع مع الالم النفسي الثاني…
“الحسنية” هي احد اكثر الاشخاص الي بقاو مرسخين ليه فعقلو…الليلة الي كان راجع من روضة من بعد ماداز عام واكثر تقريبا… داك النهار مكانش بخاطرو…غادي فديك الخلا..باغي غير يبقى خارج وميرجعش….حس بالخلا امان بالنسبة ليه على انه يكون فدار ولا ف مصح عقلي….
فوسط الضرگ وحدا شجيرات كبار فعز الليل…سمع صوت تخرشيش وهضرة وضحك قوي.. قرب شاف بين داك الشجر بان ليه واحد كايضحك ويسد فسنسلة سروال مابغاتش تسد ليه…وهو يدور على سروالو قنب…وضار هنا وهنا وهو يهز واحد الخنشة دارها على كتافو وزاد…قرب بشار اكثر…وهو يهبط عينيه حتى بانت ليه كلها عريانة من تحت ومفروشين ليها رجليها وتحتها مجلخ بدم.ايات…وهو يقرب ليها ووقف عند راسها….شافها باقية طفلة تقريبا واخا ماعرفش عمرها…تحنى عليها كايقلب فيها..حيد جاكيط الي كان لابس ورماها عليها من تحت باش سترها…مزال كايقلب فيها تا حلات عينيها الواضح انها كانت مضروبة لراسها باش غابت مع حلاتهم شافت فيه هو نيشان….حل ليها صدافي الكسوة باش يشوف واش بيها شي حاجة اخرى..بدات تغوت وتحرك غا هي تحركات ضربها ضو لتحت حيث طااايب غوتات بحر جهدها….بشار سمع الحس تاني وتخرشيش..
بشار”خنزر فيها” : شششش….سدي فمك…
حسات بدقة نزلات عليها لراس…حلات عينيها وعاودت سدتهم وعاودت حلتهم كاتشهق..وهي تغييب…هز عينيه وهو يحول شوفة فيه عاد بان ليه مزياااان شكوون هو…من ديما كايغوت عليه ويخاااف منو فايام ماكان كايجي من الكوليج…
هو”ضحك بهيستييريا” : ههههههههههه ولد نورالدين اش كدير هنا ههههههههههههههه…..
ناض ليه وهو يشنق عليه وضربو براس تا طيحو بغا ينوض ضار بشار كايقلب على شي حاجة مابانت ليه غا حجرة نزل عليه بيها لراس ماتسوقش ليه واش يقت.لو ولا لا…كان اصلا صاعر غا كابتها جا هو فطريقو…مع غيب بقا يركل فيه برجليه تا خرج ليه د.م من نيفو وفمو…لاح ديك الحجرة حس براسو تنفس شوية حيث برد فيه غدايدو.تما عرف راسو انه خااايب الى تعصب ممكن يق.تل شي حد لولا لطف الله…خلاه حتى يفيق راسو ويعلم بيه…تا سمع صوت شي واحد نطق وهو يدور…
هو : سير ابشار لحگها لدارهم انا نتوالا لهاد ولد لحرام…نديه لجدارمية يديرو معاه لازم…
حرك ليه راسو..تحنى هزها بين ايديه وزاد بيها…مابان ليه غا دارهم حطها ليهم عند الباب خلا كلشي كايشوف مافاهمين والو كايشوفو فيه كاينهج….~~~~
ماينساش الشخص الي شهد انه عاونها…لو مكانش كان هو ياخذ التهمة وشكون يتيق بواحد يلاه خارج من المصحة….لقا راسو شاد طريق ماعرفهاش تا فين كاتدي…وقف السيارة..مدة كايلتاقط انفاسو باش يقدر يسوق تاني….
رجع ديمارا طوموبيل وتم غادي راجع ادراجو لطريق الرئيسية الي بغا يشد…بقا شحال واقف حتى هز تيليفونو. وهو يقرا رسالتها…هز تيليفونو وبدا يضرب بيه ضربات خفاف على نواضرو…ماباايش يهضر ماعندوش الخاطر…ولا شعل تيليفون وصوناا ليها حتى جاوبات…
بشار : شي ساعة ونكون عندك…
حبيبة : واخا…احم ب باقي غادي نتقداو…
بشار : ماعنديش جهد هاد ساعة…گولي ليا شنو بغيتي تعشاي ناخذو ليك…
حبيبة : نجيبو معايا من دار ؟!..
بشار : ب “غمض عينيه وعض فسنانو كايحاول يكمل” بلاش…
#الفيرما….
دخلات “اشراق”….لبيت الي داروه لحبيبة وبشار فالفيرما….وقفات تيليفون قدام الكوافوز وحيدات حوايجها مادام ماكاين حد فدار ومادام ماكيدخلوش لبيت حبيبة خذات ساروت وحلاتو…يلاه بدات كاتصور وتشطح حتى تحل عليها الباب وهي تشهق تا غوتات….
~~~~~~~«««««««
اشرف من بعد ما خرج من الفيرما تلقى لواحد طراكس كايمشي مع مولاها حيث خدامين فنفس الارض….وصلو لفدان او الارض فين بغاو يخدمو ومشا لواحد البيت لبس حوايج الخدمة وهو يصوني ليه تيليفونو جاوب فالبلاصة من عرفو حسام…
حسام : ها مك را جات…
اشرف : مدها ليا….”دوزها ليه سمع صوتها” امي لباس..تي فين صديتي خليتيني نقلب عليك بريق ناشف…
حسنية”بدات تهضر” : ابببب بابببييببب….ببب…”كاتهضر معاه تا طاحو ليها دموعها خلات حسام يشوف مافهم والو…كاتهضر وتعبر ليه وتحرك فراسها ب لا…” بببببي.
اشرف : تانشوفك ونفهم…يلاه سيري غذا نجي ونجيب ليك اش بغيتي…
قطع معاها ودار تيليفونو فجيبو.وهو يدخل لفدان كانت واقفة الطراكس باش يبداو يحرثو….جا وراها باش يتبعها ويرمي سماد…وهو يحركها مولاها كايسوق فيها…وقف اشرف وراه باش تمشي تزيد…ماعرفش السيد الي سايقها بالي غايرجع مارش اغيييغ…كان اشرف وراها والحايط ورا اشرف…بغاو يقولو ليه حبااااس كان مول طراكس رجع بيها ورجع فاشرف تا تخشات سنة من سنان طراكس الكبار فجنب اشرف ورجعات بيه اللور لصقاتو مع الحايط حتى بقا كايتخضخض تا خرج ليه د.م من فمو وهز عينيه تالسما كايشوووووووووف تا مشاااااااااا….
الحسنية فهاد اللحظة كانت جالسة حدا البنات حتى حطات ايدها على صدرها وبدات كاتغوت وتركل ليهم تم ماعرفوش مالها….
حسام : امالها يا…حسنية مالك….”كايسوف فيها كاتعصر وشادة فبلاصة فصدرها وتبكي”….
اما اشرف كان اخر صوت سمعو دخل ليه لوذنيه…”الله اكبر”
“دنيا قسات عليا وعليك وعلى خويا…دعي معايا وصبري من ورايا…يمكن هذا حدي فالدنيا وراني عااارف بلي مااااشي ولد دنيا”…
“بشار”…الحياة الي حل عليها عينيه ابدا ماكانت ولا عمرها تكون راحة ليه …من نهار حل عينيه وهو المشاكل ساسو والهم وسادو..والغم غطاه و الكحل لون الدنيا عندو…والغموض حياتو وعيشتو والحدة شخصيتو…البشاشة منعدمة فيه والابتسامة ماداخلاش فقاموس محياه…كاتحسي بيه كأنه شخص غير عايش وكيحاول يتعايش…..
حطات التيليفون من بعد ماقطع عليها بمجرد ماقاليها غايجي ويجيب معاه العشا…واخا بعيييدة عليه كل البعد الا انه قدرات تميز من صوته الي كان واضح انه وااالكها فصحتو وباين التعب والعيا من صوته…هزات عينيها فاش شافت ناديا خارجة من الكوزينة هازا صينية فيها قرعة الما والكيسان وجلسات….
ناديا : علمتيه يبقى لعشا !؟..
حبيبة”بنفي” : اهء مابغاش…قال غادي ياخذو من برا…”سكتت شوي ورجعت نطقت” يمكن عيان..بان ليا غير من صوته حيث كيهضر ويقطع فالهضرة…
ناديا”حطات ايدها فوق البلاستيكة الي فيها كراطن الحلوى وصاتهم عليهم هاد العشية وجابتهم ليها مولات الحلوة الي كاتعامل معاها” : ها الحلوى حيدتها عليك هي ومسيمنات وصلي وديريهم فالفريگو كل مرة جبدي وسخني راه تتعرفي…
حبيبة : اموحال ياكلو…
ناديا : ياكلو ياكلو هي ديري حنة ايديك..را بتسكني دابا بوحدك وتولي مسؤولة على دارك وهذاك راه راجلك ماشي ساكن حداك..توگضي معايا حبيبة الله يرضي عليك….والورقة الي كتبت ليك شنو بيخصك فالمقدية راها عندك !!
حبيبة”جبداتها من جيبها” : هاهي..گاليا مغانتقداوش اليوم..يمكن تالغذا وانا غذا منسالي حتى ل ستة العشية…
ناديا : هاهي عندك تنفعك الضروريات راه تم..والي تفكرتها نعيط ليك تاخذيها بداي بالعطرية…وسوليه شنو تاياكل وشنو مكياكلش..نتي يادلي را فيك تبعكيك فالماكلة…
حبيبة”تبسمات ليها” : انا كتعجبني هي ماكلة ناديا الغازي…
ناديا : ممم ماكلة مك هي الي تبعصصي فيها..وليني راه فشوش باك الي وصلك لهنا…
حبيبة : توحشتو مازال مابيجيش ؟!…
مزال كيهضرو تا سمعو صوت الساروت ديال الباب تحل وتم داخل مسمعهم صوت تحنحينتو…تا وقف عليهم كايضحك بقشابتو الواسعة كيف ديما وبشاشة وجهو….
م.حفيظ : ا ش هذا القشة ونهار كبير هذا…زيدي بوسي بابا…
ناضت عندو باست ليه ايدو وتنخششات فيه تحت باطو فحال الكميشة مع تاهو طويل…مشا بيها تا جلس حدا ناديا الي باس ليها راسها وبدا يدوز على وجهو بتعب مستغفر مولاه…
ناديا : تبان ليا عيان…جيتي بكري اليوم…
م.حفيظ : اموسخ اناديا موساااخ لحمي بغا ليه شي حكيكة من داكش…
ناديا : نسخن ليك دوش…
م.حفيظ : نمشي لحمام الي هنا حدانا…وجدي ليا حويجات…
حبيبة : ممولفش الحمام من غير ديالنا..
م.حفيظ : وتاهذا نولفوه تايخلف الله…”طبطب على فخد ناديا” نوضي وجدي ليا رزمة امولات العش…
ناضت كاضحك عارفاه مايمكنش ميمشيش لحمام واخا هكاك..بقا هو مقشب مع حبيبة…
شوي حتى جابت ليه ناديا الصاك ديالو فيه حوايج الحمام شدو من عندها وناض كيستغفر مولاه موصي حبيبة تبلغ سلامو لبشار….
#الفيرما…
رجعو من دار الناس الي خطبو من عندهم..كل طلعات لبيتها تبدل…يلاه بدات سعيدة كاتلبس بيجامتها تا دق الباب وهي تسمع بنتها منار بغات تدخل…
سعيدة : دخلي بنتي…
منار”دخلات عندها ووقفات جامعة ايديها قدامها وباغيا تقول شي حاجة وخافت لا تعايرها وفنفس الوقت خايفة من اشراق وتاني خايفة من امها..”
سعيدة”طلقات شعرها فركاتو بصباعها ورجعات جمعاتو وسدات الباب وهي تشوفها واقفة وجهها مخطوف” : منار !! مالك ؟؟..
منار”صرطات ريقها” : ماما كتگولي لينا الى شفنا شي حاجة عيب نكولوها ليك…
سعيدة : اش شفتي ابنتي..اجي جلسي حدايا وعاودي ليا اش كاين ؟…
منار”حركات راسها وجلسات حداها” : گبيلة طلعت لبيت نجيب شارجور لخويا حسام…
سعيدة : ايه…
منار”باش تقوليها شنو شافت حشمات حيث كيحشمو بزاف غير الى لقات شي وحدة كتبدل فمابالك” : طلعت نجيبو ليه وهي تبان ليا ختي اشراق داخلة لبيت عمي بشار…
سعيدة”كتسناها تكمل شافتها حبست الهضرة” : كملي مالك سكتي…
منار”بعفوية” : ياك امي كتگولي لينا بيت ماليه منقربوش ليه..
سعيدة : بيت خوها هذاك وتكون مسخرة لخالتك توريا واخا ساروتو راه عندي ودوبل عند ختي توريا…
منار”خسرات سيفتها باينة انها حشمت وحدرت عينيها”…
سعيدة كمشت حجبانها عارفة بنتها الى دارت هاد الحركة كاتكون شي حاجة كبر من انها تقولها وهي فهاد العمر داخلة ف تسع سنوات..وممولفينش يشوفو شي حاجة عيب..شدتها من كتفها ونطقات بنبرة الي تخليها تعاود وماتخافش…
سعيدة : غير دوي ابنتي ماتخافيش دخلتي عندها ؟!..
منار : حليت الباب باش نگوليها مادخلش لبيت عمي بشار حيث حشومة…وو..
سعيدة : لقيتيها كاتهز شي حاجة ؟! هزات شي حاجة من كوافوز ؟!..
منار”حركات راسها ب لا” : ل لقيتها كاتشطح..
سعيدة : وااتانتيييي خلعتيييني…تكون بغات تشطب وتمسح البيت من الغبرة راك عارفاها فاش كتشقى كطلق الموسيقى فوذنيها وتشقى ههههه هذا وكان..ماعليش تكون غا دخلات تنقي البيت…
منار : ولكن امي هي كاطلق موسيقى لابسة حوايجها وفالبيت كاتشطح عرياانة “حدرت راسها وتزنگات”..
سعيدة : هاااا !؟..كيفاش عريانا هاويلي…كاتبدل فالبيت..
منار”حركات راسها ب لا” : كاتشطح فحال كيف كنشطحو فعرس..
سعيدة : اويلي حي…
“سكتت كترمش كاتحاول تفهم الموضوع دارت صباعها على ذقنها حتى نفضات راسها وهي تشوف ف منار”..
سعيدة : اش دارت فاش دخلتي ولقيتيها كاتشطح عريانا..
منار : غوتات وهي تعايرني وجرات عليا…
سعيدة : جرات عليك وبقات تما.”حركات راسها” صافي ماعليش ماوقع والي دابا نشوفها ونعرف اش كانت كدير…
منار : غادي تعايرني الى عرفات گلت ليك…
سعيدة : ماتعايركش ماتخافيش..وتانتي لا گالت ليك شي حاجة گولي ليها مكنقدروش نخبيو على مي..”شافتها باقي حشمانة” صافي سيري هبطي ماوقع والو غا كانت كتبدل وعارفاها نتي هبيلة..هبطي هاني شوي ونهبط فين حسام ؟!..
منار : مشا هو وزكريا مع ختي حسنية گبيلة طاحت كتغوت وتبكي ماعرفناش مالها وهزها داها لمستوصف…
سعيدة : اويلي اش وقع ليها…
هزات منار كتافها وهي تنوض دغيا هزات تيليفونها وهو يصوني ليها نيييت راسو…
سعيدة. : الو حسام !! “وقفات بزربة مخرجة عينيها وحاطة ايدها على قلبها”..ياك لباس مالو ؟؟…اشنوووووو…اوييييلي اويلي…الله ياربي الله….
الاخبار الي قاليها نساوها اش قالت ليها بنتها بالزربة مشات لبسات جلابيتها تا بدات تبكي…ونزلات بزربة كتنقز دروج لقاتهم ساقو الخبار وهاشم كان بغا يعيط ليها مشات عندو كاتجري عنقها بجنب ومشاو ركبو فطوموبيل كسيرا بجهد خارج تا تسمع الكسيراتو خلا كلشي الي تم ضارو كان قريب اذان المغرب…
ع.القادر : لا حول ولا قوة الا بالله..”ضار عند سيحمد” نوض يلاه نلحگو عليهم نوض..
الطريق الي غادين فيها من الي خرجو من الفيرما وهما مرة يتنهدو ويتسحرو على حالو ومرة يدعيو معاه ومع مو الي ماغاتعرفش اش بيه وهي متعلقة بيه بزاااف واخا معزتهم كبيرة لكن هو معزتو زايدة على ياسين حيث هو الي كان مقابلها من ادق تفاصيلها…
هاشم”ضار عند سعيدة لقاها كتمسح دموعها ودوك دموع كيتجددو..حدو حط ايدو على ايدها وزييييرررر عليها”
سعيدة”شافت فيه” : بقا فيا يا هاشم بقا فيا اهئ..باقي غا صغييير وحنيييين بزاف ف حسنية..الله ياربي الله على هاد دراري كبرو گبل وقتهم الله ياربي الله غايشوييييني الى مشا اهئ..
هاشم”مكمش سيفتو مالاقي مايقول ملي قاليه حسام الخبر حس بخاطرو تقسم على زوج”.
سعيدة : حگلها طاحت كي گالت ليا منار حگلها گول هي حسات بكبدتها…
هاشم : گالتها لينا اشراق…
سعيدة”عاد تفكرت هضرة منار على اشراق ورجعات ضارت عندو” : فين هي حسنية مع حسام ؟!..
هاشم : معاه ماصابوش يخليوها عند شي حد وخاف حسام لا ي “صرط ريقو وحزنو ملامحو بزاف تاغوبش” لا ميكملش اشرف..
سعيدة”عصرات عينيها بجهد وكتحرك راسها مابغياش تسمع انه على مشارف المو.ت” : لا هاشم لااا الله يخليك دعي معاه انا وحسك ليا گلبي عساك خوه..
اش كاين مايتقاال…الفم تسد والخاطر مرض..اشرف واخا ماعندو صلة قرابة بيهم الا انه حل عينيه عندهم..هما اقرب جيران ليهم يمكن الوحييدين حيث الي وقع لحسنية فاش ولدات كانو كايعاونوها فيهم…وكانو كابرين عندهم فواحد البيت فوسط الفيرما حدا الدار…حتى كبرو ووعاو دراري وعزلو خارج الفيرما قريب ليهم…فالوقت الي عائلة الحسنية تبرات منها وغبروو رحلو من المكان وتاحد ماعارف ليهم طريق ولا عنوان…هادشي كااامل داز كذكرايات فعقل سعيدة وحتى هاشم…
ساد الصمت حتى قربو يدخلو لمراكش وهي تنطق بلا ماتحس براسها تا ضار هاشم كيشوف فيها….
حسنية : كان يغسل ليها يبدل ليها..نهار تمرض يبقى عند راسها ومايخلينيش. نجيبها عندنا نرد ليها البال..كان يگوليا مي انا عاارف كيفاش كايقابلو فالمرض…وخا صغير عارف اخالتي سعيدة غا خليها باش ماينهض فيها حد عندكم..حتى من تبدال يبدل ليها..خرج من قرايتو باش يخدم ويجيب ليها ماتاكل..اشرف فعمر سبعطاش لعام وبعقل ستين عام…غاااا گول ليا الى مشا عند الله شكون يقوم بيها ؟ ياسين ؟ ياسين براسو مولفش يقابلها ميعرفش ليها غا تبدا تغوت تلف بيه الوقت..مكيعرفش يشد الخاطر بحال اشرف…
هاشم عينيه غرغرو تاهو عزيز عليه اشرف بزااف وهو الي كان حاضر كيفاش كافحو من الي مابقاوش بغاو الخلصة الشهرية الي كانت كتوصلهم من عند شخص معين….
بقات تبكي وطلب الله مايسمعوش الي قاليهم حسام انه احتمال كبييير مايعيش…حتى وصلو لمراكش وومشاو نيشان لمستشفى محمد السادس فين نقلوه على وجه السرعة…
هاشم”جاي بزربة وتابعاه سعيدة تا بان ليهم زكرياء متكي وحداه واحد سيد من الي جابوه من الفدان” : زكريا !! امضرا…
زكرياء : ماعرفتش اعمي عيطو لحسام ودخل عندهم…
حسنية : اش گاليكم طبيب…
ماعرف باش يجاوب حيث هو براسو ماسايق خبار حسام الي لداخل…شي نص ساعة وهما يتسناو ..ضارت حسنية تقلب هنا وهنا…
حسنية : فين حسنية ؟!..عرفات ؟..
زكرياء : عرفات وبدات تبكي حتى خرج معاها ياسين برا مابغاتش تجلس هنا بقات تغوت على اشرف…
حتى خرج حسام وجهو مكيبشرش بالخير ولات سعيدة تسرط فريقها وهاشم كيتسنا يقوليه انا لله وانا اليه راجعون..ماوصل ونطق تا فشلو كان نيت ياسين جاي وعينيه منفوخين بالبكا وحسنية مخشية فيه….
هاشم. : اش كاين ؟!..
حسام : تهرسو ليه زوج ضلعات من القفص صدري..حيث واحد الحديدة فوق سنان ديال طراكس قاسوه…ووحدة من سنان قاست ليه كلوة وخاص يحيدوها ليه..
هاشم : كاين شي مشكيل خور ؟!..
حسام : فاش بغاو يديرو ليه عملية طلع ليه سكار ماقدرو يديرو ليه والو حتى يتگاد…”كلشي شهق حيث ماكانوش عارفين انه يطلع ليه السكري حيث ماكانش كيعاني منو نهائيا”…
جا مولاي حفيظ.من الحمام…
حبيبة”باست ليه ايدو” : بالصحة وراحة بابا…
م.حفيظ : يعتيك صحة بنتي..”جاو معتز ووردة باسو ليه ايديه” ارا الولاد بوس بابا هههه..الله وتحميمة هي..”ضار عندها” افين اتا بعلك…
حبيبة : ماعرفتش ماكيجاوبش وبدا يتعطل الحال شوف شحال ساعة.”بدات تعصب”…فففف
م.حفيظ : هي نوضي ابنتي رتاحي تاوكان يجي راه يعيط ليك..
حبيبة : الى نعست مانبغيش نفيق…وخاصني نمشي حيث شي وراق وبوليكوب لي بغيت لهيه حيث عندي غذا موديل ديالهم..وعندي مع العشرة اكسبوزي الوراق ديالو ف ضوصي لهيه وفالبيسي…وخاصني نراجعهم قبل مانقدمو…دابا مانقدرش نركز فيا نعاس يعني بايخصني غذا مندخلش لحصة لولة ونبقى فشي كافيي كنراجعو مع الكروب الي معايا انا وصاحبتي وواحد الولد…
م.حفيظ. : الى بيتي نديك انا تاوكان يجي…
حبيبة : ماعنديش ساروت…
م.حفيظ”هز حاجبو” : وايلي الي ماعندك الساروت !!..
حبيبة”بقات ترمش فيه مالقات ماتقول”
م.حفيظ”تنهد حتى هو تشطن عليه” : ماعرفت مانگول ابنتي..نتي هي طلعي رتاحي الى جا را يصوني ليك الى كان شي مشكيل ولابد نعرفو من بعد..الله يدير الي فيه الخير…
حبيبة”بقات شحااال ساكتة حتى هزات فيه عينيها كان كايضوف فتيليفونو وهي تنطق” : بابااا….”هز فيها عينيه” ياكما تكون جاتو لكريز épilepsie فطريق !!..
م.حفيظ : كون شي حاجة بتسيقي الخبار..”حاول يلطف الجو” هي الناس بداو يهزو الهم لرجالهم هههه…
حبيبة”تحرجت ولات غا كاتلولب فعينيها هي همها فحاجة اخرى..ماهضرتش حدرت راسها مزنگة..عند بالهم را عليه….”.
ردات ناديا العشا يطيب اختاصراتو غير فحسوة خفيفة ديال الحليب تا خرجو الولاد من البيت من بعد ماكملو ليدوفواغ ديالهم ريتما يجي بشار الي تعطل ومااكيجاوبش…صدق جا مولاي حفيظ من الحمام الي كان غايلقاها مشاات لدارها ولقاها باقيا وبشار ماجاش…
ناديا : صوني ليه…
حبيبة”دوزات ليه الخط ثاني كيصوني لكن مكيجاوبش..عوجات فمها وهزات كتافها ونفات براسها” : وااا راه ماكيجاوبش !!
م.حفيظ”خرج من صالون مصلي العشا وكايتمتم بالباقيات حيث ماصلاهش” : امضرا جاوبك ابنتي ؟!…
حبيبة : لا… تايصوني مي ماكايجاوبش…
م.حفيظ : يكون خير الغايب حجتو معاه وقت ماوصل را يصوني ليك…
حركات راسها وصافي…ورجعات كاتبقشش فتيليفونها كيف عادتها دخلات الانسطا كاتصفح سطوريات حتى وصلتها رسالة من “جاد”..هزات عينيها كاتشوف انه رسل رسالة صوتية…دارت الايربودز ديالها وهي تدخل تفكرات انه خلاها كاتسول منين جاب نمرتها…الفضول كلاها وسمعات الاوديو الي كان بصوته طبعا ب الانجليزية البريتيش اكسنت (لهجة بريطانيا)..الي غالبا عليه بزاف..
جاد : sorry for being late !!…
كان هذا محتوى الاوديو حتى قطع يمكن فوسط هضرتو كأنه كان باغي يشرح علاش تعطل وباغي يقوليها اش كاين وحبس فيه شي حد الهضرة وقطع حتى كمل غير كتابة وقاليها…”باغي نهضر معاك ولكن عندي مشاكل مخلياني منقدرش حتى نتواصل معاك كيف كنت…حتى نشوفك او نهضر معاك مزيان ونشرح ليك عندي ليك بزاف بغيت نگولو ليك…وخاصك تعرفي شحاال من حاجة واقعة ليا وكيفاش لقيت نمرتك…بالنسبة لرقم تيليفونك مكانش صعيب عليا نلقاه وخا ماشي من حقي ناخذو بدون اذنك”…
بقات كاتقرا فشنو كتب ليها..حسات ان هضرتو ماعندها حتى معنى وهي مكتعرفوش بحال بدا يزعم عليها اكثر ويبدا يقحمها فحياتو الشخصية خطوة بخطوة…
حبيبة : اشنو علاقتي بحياتك شخصية ؟!..
جاد : خاصك تعرفي…
عضات على شفايفها بتفكير وهي تجاوبو يمكن اخر رسالة بالنسبة ليه فاش يقراها ويمكن يستمر من هنا لقدام !!…
حبيبة : جاد…يمكن نتا الي خاصك تعرف انني مانقدرش نتواصل معاك..حيث انا وحدة مزوجة وعندي مشاكل ومابغيتش تجبد ليا مشاكل حتى نتا…وماكانش خاصني نكمل معاك فالهضرة غلط هادشي الي كندير وخا عندي مشاكل…يمكن من احسن ماتبقاش عندي فهاد الكونط…
“فالبلاصة رسلات الرسالة وماتسناتش حتى انها تشوف واش قراه..مشات لباغاميتخ وبلوكاتو بكل بساطة ؟!..
جابت ناديا بلاطو فيه زلايف ومعالق وتابعاها وردة هازة بلاطو فيه طبسيل تمر وبيض مصلوق مقسوم على زوج بالكمون ومليحة…حطوهم فوق طبلة ورجعات ناديا جايبة سوبيرة الطوس فيها حسوة البلبولة بالحليب..خوات لكل واحد فزلافتو حتى بانت ليها حبيبة كتحرك فمغرفتها ومغوبشة تعصبات حيث مجاش…تا بدات تافف وتزفر…
ناديا. : حبيبة “هزات فيها عينيها” كانگولو الغايب حجتو معاه ابنتي…كان عليك تشدي دوبل ديال ساروت لا وقع بحال هادشي تمشي نتي يوصلك باباك وخلي ليه ميساج تاتعرفي اش كاين…
تنهدات وبغات تهضر حتى وصلها ميساج وهي تهبط عينيها بان ليها هو الي راسل ليها ميساج وهي توقف…
حبيبة : هاهو جا..كايتسناني فالشارع…
م.حفيظ : ايوا هاهو مزيان…سيري بنتي الله ييدكم فامان الله…
سلمات عليه وعلى خوتها وناضت بزربة تبعاتها ناديا هازة ليها ساشيات فيهم اش تدي معاها وكراطن الحلوة ومسمن وملوي…وقفات معاها تا مشات ورجعت دخلت…وصلات بانت ليها سيارة ركبات وهي دور عندو…
حبيبة : تعطلتي بزاف كون كان عندي ساروت يديني هي بابا ومانبقاش نتسنى هادشي كامل وعندي شحاال من حاجة خاص نديرها ونراجعها…
على هو جاوبها خلاها قالت اش بغات وكسيرا طوموبيل فاتجاه الدار…ملي شافتو ماجاوبش دورات عينيها بشوي كتشوف فيه وهي تكمش حجبانها من شافتو كايبان من طيارة انه ماشي تالهيه…
طريق كلها وهي كاتسمع فيه كايسعل واحد سعلة صوتها قوي..حتى انه كايتنفس والنفس ديالو كاتسمع مبحوحة…بغات تقوليه مالك شافتو انه ماجاوبهاش وهي تزعم وسولاتو…
حبيبة : و احم واش مريض ؟!…
مكانش شي جواب منو لكن كانت حركة براسو بالنفس انه ماكاين والو واخا باين عليه انه واكلها نييييت..واش حيث ولف انه مايسول فيه حد ويكمد المرض ولا مابغاش وماكيحملش يشكي لشي حد ضعفو فالمرض…مابقاتش نطقات وضارت كاتشوف فطريق من شرجم الي كان محلول تا دعقها البرد وكمشات ايديها…حتى بان ليها الزاج طاالع حس بيها انه تبرزطت بالبرد وطلع ليها زاج…بقاو هاكاك تا وصلو لبرطما حل الباب وهي تدخل…وقفات دايرة صباعها على جبهتها….
حبيبة : غذا غايكون عندي عامر نهار كامل..ماغانجي حتى لعشية مع ستة..يعني غانتعطل على باش نتقداو..
وقف عاطيها بالضهر مكمش حجبانو وعينيه حمرييين..العرق كايقطر منو…شي حاجة فيه غامضة مضرووور من كاع جوايه لكن باش يقول مكيقولش…يمكن حتى انه مكيعرفش يقول…حتى سمعات صوته مبحووح زادتو بحة السعلة….
بشار : ماشي مشكيل…”كمش حجبانو حيث صدرو عطاه صداع”..
حدو قال هاد الجملة ودخل لبيتو..اما هي بقات واقفة كاتشوف فيه خصوصا من الي هضر يمكن حساات بتانيب ضمير انها تعصبات منو وهو كايبان مريض وواصح انه وقع ليه شي مشكيل الي خلاه يتعطل بزااف…شافت معصم ايدها بانت ليعا الساعة غاتضرب لحداش ديال الليل وعيااات بغات تنعس…تنهدات ومشات نيشان لبيتها جبدات داكشي الي غاتوجد ومشات لماريو جبدات بيجامتها دخلات بدلات حوايجها وغسلات وجهها وخرجات جلسات فوق ناموسية شعلات لابتوب..وبدات كاتقرا فالعرض وتراجع فيه وتسجل فالاجوندا حتى وصلها ميساج من الولد الي مشارك معاها فالعرض…
غيث : حبيبة واش كلشي هو هذاك عندك ؟!
حبيبة”هزات تيليفون وهي تعيط ليه جاوبها” : تعطلت باش دخلت لدار هاني خدامة فيه هي نسالي ونرسلو ليك فالجيمايل…هي هو علم ليلى تقلب جيمايل ديالها..وتجيب غذا بوليكوب ديال ماركوتينغ الي جبنا من عند صحاب جيستيون فليستيا باش نراجعوه غذا وماندخلوش لحضة صباح…
غيث : صافي..وعليه…
قطعات معاه ورجعات انغامست فداكشي حتى نسات راسها هبطات عينيها وهي تلقاها وحدة ونص ديال الليل….وسعات عينيها وكملات داكشي ليهم فجيمايل..حيدات الفوقي ديال بيجامة بقات غير بديباردور وتخشات ففراشها من بعد ما حققات تيليفونها وهي دور بغات تشرب الما لقات القرعة خاوية تاففات وناضت بزربة لبسات فوقي وخرجات من البيت تمشات تالكوزينة عمرات قرعتها وتمات راجعة حتى بان ليها بيتو شاعل فيه ضو..وقفات لحظة كتفكر واش تدق عليه تسولو واش عيان ولا. لا…شوي وهي تمشي وخلاتو على خاطرو ودخلات بزربة لبيت سدات عليها بساروت كيف العادة وتخشات ففراشها.مستسلمة لنوم….
الوحدة دياال الليل…رجعاات سعيدة مع هاشم الي خلا حسام مع دراري ووصاه عليهم وجابو معاهم زكرياء..اما الحاج وسيحمد رجعو بكري…دخلات سعيدة عينيها دابلين بالبكا على حسنية الي ماقدروش يجيبوها معاهم خايفين لا توقع ليه شي حاجة وماتكونش حداه…كاتبدل فحوايجها وتسحت بنيفها تا مد هاشم ايدو طبطب ليها على كتفها…حركات راسها وتنهدات مالاقية ماتقول من غير الدعاء…
فنفس البلاصة الوحدة دياال الليل وهي حالا عينيها وكاتشوف ف منار ناعسة وخايفة لا تكون قالت لشي حد عليها ولا قالت ل سعيدة عليها…ريقها صرطاتو وعاودت بغات تفيقها تسولها بغات ترجع تهددها ماقدراتش…حتى وصلها ميساج فالواتساب من عند صاحب دعوتها الي وصلها للهل.اك….
حميد : غذا معاش قارية ؟!…
اشراق : مع تمنية كيف ديما علاش ؟!…
حميد : مادخليش من لعشرة ل 12…خرجي وتلقايني گدام ليسي..
اشراق : مانقدرش راك عارف غايقيدوني فالغياب ويوصلوها لعمي…
حميد : سي الكيلالي الحارس العام ضربيه على حسابي…بغيتك نشوفك ونهضرو…
اشراق : حميد عافاك عفيني منقدرش نتلاقا معاك عافاك…
حميد : اشراق ولا فيك فريع الكر من نهار جا هاد خوك فارعة ليا بيه كري…اشوفي بغيت نشوفك ونهضرو ديري اش نقوليك وسيري تقاودي مع جوج لقرايتك…ساعتين مادات ما جابت ازين…
خلات ليه vu…وحطات راسها على المخدة عينيها ماشافوش النعاس الي حتى قرب يصبح الحال عاد نعسات بدون ماتحس…
السبعة ديال الصباح المنبه بدا كيصوني عند راسها وهي تنوض قافزة حاطة ايدها على صدرها شافت ساعة لقاتها سبعة صباح باقي الحال…تكات تا توگضت وهي تنوض نيشان لدوش غسلات وجهها وحكات سنانها ورجعات كملات روتين وجهها..عاد خرجات كاتقلب شنو اتلبس..اختارت ستيل كلاس قميجة كحلة وسرول توب كحل سليم. خشات فيه القاميجة لبسات عليهم كيمونو فالبيج…مشطات شعرها وجمعاتو ديل حصان…ذهنات وجهها بواقي شمس..لبسات اكسسواراتها ورشات بارفانها وهي تهز تيليفونها بغات تصوني ليه باش تقوليه تخرج راسها تشد طاكسي…دارت تيليفون فوذنها كيصوني ويعاود بدون جواب عاودت تاني ووالو تا وصلات شي ستة المرات وهي تصوني وبدات تصعب تاني…بقات واقفة كانقر فوق الكوافوز بصباعها وتاففف وهي تفكر انه ربما يكون مريض من بارح !!…
حبيبة : نخرج ندق عليه ؟!…
تنهدات بتافف اش غادير ؟…حلات الباب بساروت وهي تخرج مشات جيهة بيتو دقات وعاودت..والو ماجاوبهاش…ضارت غاديا تاني تصوني ليه حتى وقفات وخرجات عينيها….
ارض كبيييييرة وواسعة خضراء بطبيعتها كاتحس كأنك فالجنة…حداها عين خرير المياه ديالها كايتسمع يخلي النغمة فوذنك تطرب….وتبعث الراحة فنفسك…الفردوس هو هذا بدون ريح تبرزطك ولا شمس تحر.قك…فيها ثلاثة الاحصنة كل حصان قداااش ها لدهم ها البيض ها الذهبي…واقف كايشوووف فيهم خاشي ايديه فجيابو حتى سمع صوت تقرقيب رجلين الحصان جاي من وراه وهو يدور تا بان ليه بغا يوقف وكيسمع فيه كايقول لعود “تششششش وقف”… كان بلباس التبوريدة ديال العلام او مقدم الصربة بيض فبيض نفس التغوبيشة نفس الشبه كانهم توام بنفس الصورة واحد سميتو بشار وثاني سميتو نور الدين….
نورالدين. : بشارة الخير جيتي…
بشار”رد عليه بصوت تخيين” : جيييت…
نورالدين”جمع حجبانو” : مال وجهك مايبشر اولدي…
بشار”سكت مجاوبوش رجع ضار كيشوف فديك الدنيا الي تبهر العين وتلجم الفم تبغي غير تبقى تشوف وتشم نقا ديك دنيا الي ميمكنش تلقاها فشي بلاصة فالدنيا…لا نور الدين هضر ولا بضار تكلم..خلاه على خاطرو الي مستحيل يعطيه شي حد لحد…نزل نورالدين من العود وطبطب عليه تا مشا لحق على خوتو ياكل…وجا وقف حداه داير ايديه وراه بوقفة القياد الي هي نفس وقفة بشار…
بشار”ضار عندو شاف فيه مبسم الابتسامة الي مكتخطاااش نورالدين البشوش ورجع شاف قدامو” : على بالك ملاگيش بحالك !!
نورالدين : مالگيتي لمن تشكي ومكاين الي يفهم شكاك ؟!..
بشار : ماعلاباليش بالي بغا يفهمني ولا الي مايفهمني..مالاگيش بحالك ابا وسطر عليها بالحمر…”ضار شاف فيه” مشيتي بلا ماتعلمني وگفتي گدامي وخليتيني نصفيها ليك !! خليتيني نقسم ضهري طراااف كثر مانا مقسوم..وكنتي تجَبرني…
نورالدين : مكتابي اولدي…
بشار : يكون على ايد براني مايكون على ايد ولدك…
نورالدين : نعاندو الله ؟!..
بشار : شكون يهضر بحالك ؟!..
نورالدين : راك ولدي الي جاني على شوگ الولاد..الي نورني وزاد ليا فرزقي…
بشار : نورك طفا ابا…طفاوه وحرگوه…
“سكت تاني كيشوف ويلملم هضرتو…كايحس براسو كايزدح والعرق كايهبط منو…كايحس بتبوريييشة باغي يتغطا ولكن ديك البلاصة مكاينش فين…ضار عند باه…
بشار : كاين برد بزاف هنا !!..
نورالدين”ضحك” : هنا ماتحس لا ببرد لا بصهد..دنيا زينة هنا ولدي…نطلب من الله يوصل ليك رضايا تاتكون هي مقامك لاخر…
بشار”غمض عينيه شحااال ورجع حلهم” : دنيا واعرة…
نورالدين : اختبار الله لعبادو…
بشار : نگد عليها ؟!..صعييييب…
نورالدين : اش مرادك…
بشار : مالگيتش كيفاش نغمض عيني ونلحگ عندك…نجرب نق.تل راسي ؟!…
نورالدين : تغضب ربك وتعذب حتى فاخرتك !!
بشار : ولفت العذاب…
نورالدين : ماتگدش عليه ملي يغضب عليك الله…لا تعصاهش وزيد صبر تايفرج الله…
بشار : نرجع نشوفك !؟..
نورالدين : معاك فكل مكان…”حط ايدو على كتفو وزير عليه وديك تزيييرة حس بيها بشار سرحات ليه نمل فذاتو” الله يرضي عليك دنيا وااخرة….زيد صبر….
بشار : صبرت وزايد فصبري وعاص فالصبر…
كايهضر معاه وهو يسمع صوت شب حد كايعيط ليه فوذنيه صوت انثوي كيحرك فيه كايدور مايلقى حد ويرجع يشوف فباه يلاه بغا يقوليه شي حاجة تا غمض عينيه ورجع حلهم نيشان على عينيها لدرجة تخلعات من ديك شوفة وهي تشهق ورجعات باللور…
بشار”صرط ريقو وغمض عينيه ورجع حلهم تاني كايحس بزيف فوق راسو حيدو كيشوف فيه”…
حبيبة لقاتو ناعس فلارض حدا الفوطوي حاط مخدة ومتكي عليها راسو…كلو كيترعد ويهيتر بالهضرة وطاااااايب بغات تفيقو غير صهد ديال سخانة وصلها…عينيه حمرييييين بغا ينقز منهم د.م…
حبيبة : واش مريض بزاف !!؟…
بشار”ضار هنا وهنا ورجع شاف فيها وهو يكمش حجبانو” : ما “كحب بكحبة خلاتها كمشات حجبانها” مالك ؟!…
حبيبة : فقت باش نمشي نقرا لقيتك هنا بهاد النعسة عرفتك مريض…واش عيان بزاف نهبط نجيب ليك دوا ؟!..ماعرفتش اش كتشرب حيث فيك l’épilepsie..ونتا ديك المرة گلتي لماما مكتشربش اي دوا…
بشار”سكت كايحاول يفهم اش كتقول ممستوعبش ابدا هضرتها..على شحال عاد فهمها وهو يحرك راسو ب لا” : لا ماكاين لاش…
حبيبة : فين دوا ديالك كاين هنا ؟!..
رجع حط راسو ماقادرش على الجواب كلاها نيييت ماشي حيث سخانة من. را الصراع وانما الشمس ضل فيها وزادتو النوبة وضربو البرد كالها بالمعقول وحتى نفسية زفت عندو وتفكر الحادث من جديد…
بشار : دخلي لبيت عندي هزي فلوس تلقايهم محطوطني تم هزي شنو تحتاجي شدي طاكسي لحگي لقرايتك ماتعطليش…
حبيبة”سكتات مالقات ماتقول وهو يهز راسو وهي تشوف فيه” : فات عليا الحال..”هز حاجبو” ملي شفتك هاكا ماقدرتش نخليك ونمشي…”سكتت تاني ورجعات تكلمات” فيقتك باش تمشي لبيت مافقتيش..درت ليك هيي داكشي الي كدير ليا ماما زيف فازگ بالما بارد..
بشار”رجع راسو ورجع نطق وياربي صوته مبحوح بجهد بزز باش تفرز اش كيقول” : ماشي مشكيل غير سيري…
شوية مابقاش هضر رجع غمض عينيه وهي تمشي لبيتها جاوبت على تيليفونها الي كان كيصوني بقات كاتهضر وقطعات وهي ترجع عندو لقاتو تاني غااااب تاني قربات ليه بغات تفيقو غا قاستو وهو يمد ايدو وشد ليها ايدها زيررر عليها وسط ايدو فحال الى باغي لمن يقول واخا غير كلمة كااافية وحل عينيه كيشوف فعينيها….
بشار. : يااا حبيبة راني عبد حكمو عليه بالعذا.ب وعينيه عياو من ضلام…گولي ليه راني مولفتش…
حبيبة : ش شكوون “صرطات ريقها”…
بشار : لهذاك الي واگف وراك…
السخانة لعبات عليه بالمزيان حتى ولا كينطق بشنو شاف فالحلم ،، ملي دخلات البيت وخلاتو رجع غفى بلا مايحس ورجع دخل فمود الحلم..هي ماشافتش هادشي حيث مشات لبيت تجاوب فالفون…واش هي غاتقدر تفهم ان هادشي نابع من تاثير الحمى عليه ولا تخاف خصوصا انه قاليها “راه وراك”…
الشي الي خلاها دور بسرعة وراها وتشوف ضكون الي كاين…قلبها تهز بمجرد مازير ليها على ايدها عاد زادها الخوف من اش قال…
حبيبة : ش شكوون ؟!..
بشار”بقا كيشوف فيها،، قال اش قال ورجع تاني سكت لكن ايدو باقيا شادة فايدها لا بل مزيرة عليها لدرجة كاتحاول تفلتها من ايدو لكن كانت متمكنة فاحكامها…كأنه باغيها تبقى شادة فيه باغيها تفهم قصدو بدون مايشكي…محتاج للطبطبة الي عمرو عاشها غير من بعيييد فمكالمة هاتفية من سعيدة او هاشم…ناش الي كانو كيسولو فيه فقط وخا تسوالهم مايجيش قدام تسوال الواليدين الي هو معدوم منو…
حبيبة”الخوف قت.لها” : ع عافاك طلق ايدي ضريتيني…
ماطلقهاش بقا مزيييير عليها تا حستها بغات تقسم دموعها بغاو ينقزو..ربما هي كاتحس بالالم لكن هو باغي يوصل ليها اش بيه باش عامر اش ضارو لكن هاد الجريقة جد مؤدية كيف مكايضر راسو وجسمو بالالم هي انسب طريقة ولف وتعايش معاها علاش كايضغط على راسو حتى كيمرض..يضغط على الحاجة فايدو فاش كيتعصب…يضرب ايديه باش يتنفس…بزاف طرق مؤذية مؤلمة كايبثاو هما انسب طرق عندو….
“ربما حان وقت التغييير ؟ “
حبيبة”حطات ايدها على ايدو بغات تفلت ايدها” : ضريتينييي،، ايديييي عافاك طلقهاااا…ايييييييي…
فيييييين هو دابا…عقلو را مزاااال مع باه “نور الدين”…الي وقف حدا الخيل ديالو وقبل مايركب عليه وقف وشاف فيه مطووول…
نورالدين : الصبر ديما يضبر وعلى گد صبرك تنول الي يجبرك..ديرها خبيرة بين عينيك تفيد بيها وتفاد بيها..هاو راني هنا غاا مصورت فالدنيا..صبرت تاوصلت لهاد المقام الي حطني ربي فيه..
بشار”كايسمع انين وشي حد كيترجاه نفس الصوت الانثوي رجع ليه ثاني ضار هنا وهنا ورجع نطق بدون ميشوف فيه” : شي حد كايغوت ؟!..
نورالدين : هاديك جبيرتك اولدي…
بشار : كيفاش…
مابقاش جاوبو بزربة ركب فالعود وضرب ليه جنابو برجليه وهو يطير بيه مشا كي ريح تا غبر..وداك صوت كايزيد يعلى تا رجعو للواقع الي فيه وحل عينيه تا وسعهم كايشوف فيها كاتضرب ليه فايدو يطلقها حيث فلعصها ليها….
بشار”عينيه باقين خارجين كايشوف فيها مكمشة عينيها كتألم ورجع هبط عينيه لقا راسو على تكة ويقسمها ليها وهو يطلقها بزربة تا طاحت فلارض شادة ايدها وسخفة فيها..”
بشار : ض ضرييتك ؟!…
حبيبة”مزيرة فمها وكتألم ماقدرات حتى انها تجاوبو”
ناض والعرق كايتصبب منو…بغا يشد ليها ايدها وهي تبعدها وعاود شدها ليها بزز كايقلب فيها اما هي الخلعة والصداع شادين فيها…قلبها ليها كف وضهر لقاها حمرة زصباعها كذلك…
بشار : جمعيهم..جمعي صباعك…
حبيبة”تكاونساو ليها حيث فاش قبط ايدها زير عليهم تاهما نيت..ماقدراتش باقين مكوانسييين”
بشار : نوضي اجي معايا..
حبيبة”نترات ايدها بجهد” : هي خليني فففف..ايييي..”شداتها بالايد لاخرى”
بشار”ماتسوقش ليها وناض وخا غالبة عليه دوخة تا مشا وجا كون ماشد فالفوطوي ومشا نيشان لبيتو كايقلب فواحد سامسونيط فيها كاع الاسعافات ودواه حاطهم فيها كايقلب ويحل فعينيه الي كيرجعو يتسدو ليه بالمرض والعرق كايقطر منو..تالقى باندة ومشا لثلاجة جبد مكعبات ثلج ضار هنا وهنا كايقلب على شي زيف من دوخة ماشافوش را حداه وهو كيقلب بعينيه تا تابغا يصعر عاد لقاه وطيرو من تم لقاها جالسة فالفوطوي وتماصي فايدها…
بشار”تحنى على ركابيه بغا يشد ليها ايدها وهي تبعدها عرفها خافت منو” : عطيني ايدك…
حبيبة : ب بلاش هي خليني عافاك “كتهضر وتصرط فريقها”
بشار”هز عينيه فعينيها بان ليه بؤبؤ ديالها كيوساع ويدياق عرفها ترعبات منو..وهو عينيه فعينيها نطق بصوت الي باقي بح لكن مخفف نبرتو يمكن باغيها ماتخافش !!” : خفتي ؟…
حبيبة : ماخفتش ماخفتش عافاك هي خليني..اييي “كمشت سيفتها”
تاني ماسمعش ليها كل همو انه يداوييها نسا راسو ومرضو…شد ايدها بزربة غفلها وحط ليها زيف الي دار فيه ثلج…
حبيبة : ممممم…
بشار : ماشي مشكيل صبري…
بقا كيحطو على كفها وفوق صبعانها ومعصمها…تا حسات بايدها تجمدات مابقات تحس بيها…وشد الباندة خشاها ليها فايدها وسدها بستريتش…
بشار”بقا شاد ايدها وكيشوف…ماعرفش اش يقوليها واش سمحي ليا ولا عذريني..لكن هي فهاد الحالة ماعارفة عليه والو علاش يقوليها عذريني فهاد الحالة “سمحي ليا” هي الانسب…
بشار : اشنو وقع حتى درت ليك هاد الحالة ؟”بغات تهضر وعاود نطق باش يفهمها” كنتي بغيتي تمشي ل la faculté ديالك !! من بعد اش وقع ؟ گلت ليك شي حاجة ؟!..
حبيبة”شافت ايدها الي باقي شاد وسيفتها باقي خاسرة..هو غير شاف فين كتشوف طلق ليها من ايدها باش تطمن وشدات فيها”
بشار : حبيبة ماشي لخاطري واخا ؟!..
حبيبة : بيت نمشي لبيت…
بشار”بقا شحال ساكت كيشوف فيها كان كيتسنى تقوليه لكن شاف انها باقي خايفة وهو يحرك راسو وهو على نفس الملامح الحجبان معقودين…غير حرك راسو وهي تنوض شادة ايدها وطارت لبيتها سداتو وهو يصوني تيليفونها كانت ناديا الي متاصلة بيها تسولها…
ناديا : امضرا بنتي اش درتي كي بقا ؟…
فاش لقاتو طايح عيطات ليها تسولها اشنو دير…عاودات ليها اش دار…هاد المرة ماخباتش عليها الادية الي تعرضات ليها دابا…وكيفاش عالجها…
ناديا : كضرك ايدك بزاف !؟
حبيبة : شوية..ماما اه تخلعت..واش عادي ؟!…
ناديا”جابت ليها ضحك حاسة بيها دابا خايفة حيث عارفاها خواافة” : هههه..هي سخانة هاديك طالعة ليه بزاف…كون كان عندكم ميزان كون عرفتي شحاال واصلة ليه…اعقلتي على باباك فاش ضرباتو شمس وتقيقت مراكش خمسطاش ليوم وهي فيه..عقلتي فاش گالينا راه مي جالسة حدايا…
حبيبة : فاش حساب لينا بايموت…
ناديا : خرجها منا خلعة تا گالينا طبيب را هي تهتهيت سخانة…شوفي الى توگض شوي عصري شوي تالحامض ولا ديري فطور وعطيه دوا الي كيشرب باباك…عقلتي عليه…
حبيبة : مابغاش را عندو دواه ديال لهيه…”شافت ساعة فايدها لقاتها العشرة فااتت وفات عليها حال العرض”…
ناديا : وسيري طلي عليه وديري فطور يفطر و ديري عصير يبرد بيه…انا دابا غاديا مع باباك لمدرسة ديال دراري كاين اجتماع اولياء الامور هي نخرجو نعيطو ليك…
قطعات معاها وبقات واقفة مسندة على كوافوز ودورات وجهها جيهة الباب…ماتنكرش انه عز عليها فديك اللحظة..ومانساتش الجملة الي خرج من فمو
“بشار. : يااا حبيبة راني عبد حكمو عليه بالعذا.ب وعينيه عياو من ضلام…گولي ليه راني مولفتش… “…
علاش قال هاكا ؟!..علاش هو داير هاكا كاتحس بيه شخص قاسي ومزال كايبان ليها شخص غامض وحش…شكون هو “بشار”…وعلاش تختارت تكون عروس ليه وهو دارهم ماشام فيهم شمة لاخرة…علاش قاسيين عليه وقاسي عليهم..اش ورا هاد كتلة الاسرار الغامضة والضلمة الحالكة…
#22:30…قدام الكوليج وقفات دايرة ايدها حاجبة بيها الشمس..بانت ليها سيارة من نوع Siat فالگري باقي جديدة…وقفات على بعد شانطي الي فارق بيناتهم..حتى هبط زاج داير نضاضر شمس وهز صباعو زوج شير ليها لفين تمشي باش يلحق عليها وتركب…داكشي الي دارت مشات بزربة قاطعة شانطي وضارت على دورة وهو تابعها بشوي تا دخلات لبلاصة خاوية بزربة طارت لعندو وركبات حداه وكسيرا شاد طريق واحد دوار بعيد ب خمسة دقايق…
حيد نضاضر شمس وضار شاف فيها..تبسم بجنب مستهزأ وهو كيشوف فيها مغوبشة وخايفة عكس اشراق الي كانت قبل اشهر غير كتشوفو كتضحك تايبانو ضروسها…كان كيقضي عليها بجاذبيتو وهضرتو..كان معاها ديما صريييح ماعمرو بين ليها انه شخص ناوي المعقول الا هي الي لصقات عليه من نهار تعين عندهم فالاعدادي سيكيريتي…قبل مايمشي العام الي فات لمراكش..فرق سن بينها وبينو كبيييير بزاف فرق سن بين اب وبنتو لكن بحكم مهلي فراسو بزاف وزويين فوجهو وطولتو وحتى الفورمة ديالو حيث من اصحاب الفيتنس…كلشي فيه غراها حتى تعجباات بيه وهي الي رمات راسها عليه…
حميد : مال ديلمك الحبس…
اشراق : ماماليش احميد ماعرفتش فين غادي بيا…
حميد : توحشتك مانتوحشكش ؟..عرفتي لمك شحاال ماتكوانيت انا وياك !!…
اشراق : حميد عافاك زرب هنا كاين عمي هاشم…وانا گلت ليك مابقيتش بغيت نشوفك احميد راه خويا هنا..واش عرفتي خويا الكبير را خاااايب خايب بزاف احميد..القت.يلة عندو عاادي بحال كيف كنشوفك…”كاتهضر وبغات تبكي” مابغيتش نتفرق معاك ولكن نقص من تعياط والفيديوات غير تيمشي فحالو…
حميد : كاااع گد هاد الگد خايب ؟…
شاف قدامو وضار جيهة واحد دويرة جات وحدها فيرما صغييرة ضاير بيها شجيرات ومحاوطينها بحويط قصير ووقف قدامها خرج تا حل الباب ورجع دخل ليها ووقف طوموبيل وعاد ضار عندها قربها مزيااان لعندو تا باسها من فمها وعاود تادخل هو وياها فقبلة طويييييلة كان بغا يمد ايدو لصدرها يجبدو وهي تحبسو….
اشراق : حميد لا…مامتافقينش على هادشي…
حميد : لمك درتيه معايا شحاال هادي…
اشراق : ومابقيتش بغيت ندير…ياك متافقين هاكا تاتجي تخطبني…من مابقيتيش بغيتي تخطبني عطيني تيساع..والله حتى نطيحو فمصيبة احميد “عينيها غرغرو”
حميد : ههههه…”ضار جيهة شرجم كيضحك ويحك فلحيتو ورجع ضار بزربة غفلها وشدها من شعرها مزيييرررر عليها تا بغا يطير ليها جلدة ماعرفاتش امتى نزلو دموعها”…تي اش نخطب فمك اش ياااا قحوبانت رحامنة..يااا شريفة الشرفة…تي را مزال باغي نقصر بيك تانوصل فين بغيت وديك ساعة سيري قودي..دابا مابغيتش نضيع الوقت باش طناش تكوني فالكوليج..غادخلي ديري اش كنتي ديري نتنفس ونوصلك…تبداي تغاني ليا هنا بالرب المعبود تانطحن مك عصا…ونشوه مك وماسوقيش…
حركات راسها بزربة وهو يدفعها بجهد…خرجو من طوموبيل تسناها تا جات ودفعها قدامو حل الباب ودخلو لدار…دخلها لبيت..
حميد : بركي تم هاني جاي…
مشا طل هنا وهنا عاد سد شراجم الي لقا محلولين ورجع لعندها..وقف قدامها كانت حادرة راسها وهو يهزو ليها بجهد تا كانت غاطيح لور..بغا يقربها وهي تبعد عاود قربها…حيدات صاكادو رماتو جنبها وهي تشوف فيه..وهي تحل ليه سلسلة سروال وسمطة وهبطاتو ليه بايدها هو واالبوكسر…هز عينيه دورهم جنب وهو يغمضهم منتشي بمجرد ماقاست ليه العضو ديالو….
حميد : زييييييييييين ديال حميييييد…
ماحسش براسو تادفعو ليها في فمها بجهد تا خرجات عينيها وهي تعضو ليه..هز ايدو تالسما وهو يجمعها معاها بطرشة وعاودها تاني وثالثة تا تصورو صباعو فحنكها والخاتم الي فصبعو جرح ليها حنكها تا تصور خط مفلح بالد.م
حلات باب البيت وهي تخرج دورات عينيها فالارجاء ماكاينش ليه الحس وشافت جيهة فين كان ناعس لقاتو حيد المخدة رجعها لبلاصتها فالفوطوي…تا شوي حل باب البيت وخرج غاسل وجهو وشعرو مخربق بالما الي خوا عليه…
بشار”شاف فيها وهبط عينيه لايدها” : شوية ؟!..
حبيبة”حركات راسها بدون رد”…
بشار”حرك راسو ومشا لفوطوي جلس..دار اسدو على ناضرو بدا يماصي فيه كايحاول ما امكن يتوگض…هز راسو وضار جيهة الباكية دياال كارو هزها هي والبريكة..وهز عينيه فيها…
بشار : علاش مامشيتيش ؟!…
حبيبة : فات الحال..
بشار”كمش حجبانو كايتفكر اش قالت ليه البارح” : البارح گلتي عندك عامر لا ؟!..
حبيبة”سكتات شوية وعاودت نطقات” : مامشيتش وصافي..حتى لعشية ونمشي….
بشار”بقا كيشووووف فيها..نسا راسو وهو كيشووووف فيها حتى وثرها وهي تحدر عينيها ورجعات هزاتهم وضارت لهيه كاتدوز على سالفها باحراج وخوف…شاف انها خايفة منو !!..طبييعي تخاف منو وبالرغم من هادشي بقات معاه واخا خايفة…نسا راسو وهو ساهي فيها وحاضي تعابير وجهها وخا غالبة عليه ضبابة كيغمض عينيه ويحلهم باش يحاربها…تا رجع لوعيو وهو يدور لجنب للخور دوز على لحيتو وصرط ريقو ورجع شاف فيها…
بشار : فطرتي ؟!..
حبيبة : مزال…
بشار : وعلاش ؟!…
حبيبة”الصمت”..
بشار”بقا كيشوف فيها ورجع تافف عاد نطق بصوت ثقييييييل” : مريض فطري..مكاينش فطري..ناعس فطري…نسايني انا وفطري..عندك قراية وتمارة الكحلة فطري..واخا مسالي سبقي راسك “شير لراسو” انا احبيبة مولف مرضي مولف العيا شاد فراسي عادي..مولف الويل الكحل دوز وقيتة ديالو ونتگلع فحالي…
حبيبة : مامولفاش نقابل شي حد من غير بابا وماما وخوتي…ماعرفتش هادي اول مرة…
بشار”هز حاجبو” : وقابلتيني ؟!..
حركات راسها وهو يدور مغمض عينيه..تالف ماعارفش شنو يقول فهاد الحالة..اشنو يعبر من غير انه هادشي جاه فشكاااال وغريب…ماعصبوش بقد ما حس باهتمام جديد…بقا كيشوف وهو يدور عندها ووقف كيماصي فعنقو ونواضرو ونطق بح..
بشار : معاش بغيتي ترجعي ؟!
حبيبة : مع جوج ماشي مشكيل…
حرك راسو وهو يهز بزطامو وسوارت…حدو قاليها “هاني جاي” ومشا خرج قبل ماتجاوبو…جلسات ف صالامونجي الي وسط المراح تم…وجبدات تيليفون رسلات اعتذار ل بنت ولغيث الي معاها…ماجاوبوهاش وبقات كتبقشش حتى بان ليها ميساج من كونط ماعارفاهش ومشا لرسائل الغير مقروءة..تفاداتو كيف تفادات اي رسالة كاتجيها من عند شي حد مكتعرفوش…بقات تهضر مع ايوب ومع صاحبتها وفنفس الوقت حزينة حيث مادوزاتش العرض الي عندها…بانت ليها ابليكاسيون تطبيق “tinder” كانت داخلة ليها فوقيتة دارتها غي ضحك..مسحاتها من عندها ومسحات اي تطبيق زايد خلات غير الي مهمين ديال قراية واتساب وانسطا اما تالفيس ماعندهاش معاه….
شي نص ساعة وزيادة وهي جالسة تا ناضت لطوزينة حلات ثلاجة لقات فيها غير دفيش قليل..بانت ليها ماشين القهوة خدماتها ودارت فيها القهوة ف ماگ صغير…يلاه كتخوي فالقهوة الي فاحت ريحتها صونا تيليفونها بان ليها اسم “غيث” جاوبات دغيا…
حبيبة : خويا غيييث هي سمح ليا والله سمحو ليا بزاااف…
غيث : اهي زيديها فيك..هانيا هانيا ياك مكاين باس ؟!
حبيبة : وقع ليا مشكيل…اش درتو دوزتو لاكسبوزي ؟!..
غيث : لا البروف دوز الكروب لول وثاني وحبس عندنا حتى لجمعة يبدا بينا…
حبيبة : حلف !! الله صافي هاهو نيت واجد…
غيث : انعاودوها لحفار قب.رنا هههه راه شافو رسلناه ليه البارح ياك عارفة…ايوى را گاليك عاودوه ماشي هكاك كيتقدم البرودوي…ايخص نشوفو تركيبة ديالو مادايريناهاش..وزيد التقديم وداكشي ماملايقش يكون فالماغكوتينغ..دونك بنخدمووو عليه….
حبيبة”طالقة سبيكر حيث كانت هزات غراف من ماشي وبدات تحط فيه فبلاطو” : اويلي..وكيف ندير نعاودو العرض من لول ؟!..راه داكشي وبزز باش خدم ليا…عندنا اكسبوزي اخور كيف بنديرو نخدمو تا هذا وامتحان عند صوفت سكيز…ومزال ماخرجتش البحث الي عطانا لاخور…”جاتها البكية”..منين غانجيب ليزانگغيديون (وصفات) البرودوي…
غيث : انا لله اودا حماد..تاتجي نتي وليلى فالعشية نهضرو ف لونفي را بتزيد معانا تا رجاء…
حبيبة : رجاء تنفعناا كان علينا ندخلوها من لول…واخا قطع صافي تنشوف….
قطعات معاه وهي تخرج هازة بلاطو فيه غراف القهوة بدون سكر وكاس الما…تا قفزات فاش لقاتو جالس عاطيها بالضهر وكيستف فداكشي الي جاب…حط كاس اموبواتي ديال الحليب فيه شكلاط و ساشية الكاغط فيها نيويورك رولز الي كيعجبوها..وهي توقف حداه كتشوف فداكشي وحطات بلاطو قهوة…
بشار”شاف فالقهوة وهز عينيه فيها” : كتشربيها !!!؟؟؟..
حبيبة”بدون تعبير وبدون متشوف فيه” : ليك نتا…
بشار : كيفاش ؟؟؟…”جاتو فشكل”…
حبيبة : الى بقيت عاقلة كاتشربها بلا سكار !؟..ماعرفتش هادشي الي عقلت الى مابيتيهاش نخويها…
بشار”شاف فيها ورجع شاف قدامو تا بدا يكحب وشاد على صدرو ومكمش سيفتو..سالا كحبة وهو ينطق ” : جلسي فطري..
مشات لهيه وجلسات بعيد عليه فالكرسي لاخور…كحز ليها الفطور..شاف فايدها ورجع خسر سيفتو ماحملش يضر شي حد وهو مولف يضر غير راسو…ضار لهيه بدا يسب ويتمتم مكره حاااقد..والتعب مزال فيه ديال سخانة مزال كيحس بتبوريشة الي كتشدو ديالتها…زفر ورجع جر داك البلاطو هز فنجان ديال قهوة..شرب منو تا غمض عينيه متنغم بيه قبل مايحلها وينطق بسؤالو ليها…
بشار : كان عندك شي حاجة هاد صباح ف لافاك ؟!..
حبيبة”حركات راسها مكتشوفش فيه”. : كان عندي اكسبوزي..ماداروهش والبروف ماعجبوش اش درت..كنت غاندير ماحسن ماقدنيش الوقت حيث جيتي معطل البارح وكنت بينراجعو فالصباح قبل العشرة هي فاش لقيتك مريض…
بشار : ينعل بو حياة مي لاكان غير انا…
#الرحامنة…
خرجات كريمة هازة صينية اتاي وتابعاها ربيعة الي عاد جات هي و سيحمد من عند طبيبة وفرحااانة ماقادها فرحة انها تقدر تولد خاص غير تبع اش قالت ليها بالحرف…هازة طبسيل بطبوط مريح ديال الفطور تاني الي كيكون عند العروبية هو الفطور الي كيكون مورا مكيساليو شقا لول…حطوه وتجمعو عليه كل من هما وتوريا و عيدة وسعيدة….
ربيعة”شافت سعيدة عارفاها مكونة عليها من اخر تراشيق الهضرة الي داز بيناتهم” : وا سعيدة…
سعيدة”ماشافتش فيها” : نعام…
ربيعة : تي باقي مكونة مني (فرحانة حيث تقدر تولد داكشي باش هضرت معاها هي)…
سعيدة : ممكوناش اربيعة ساعات الله راني هازة هم جيهة اخرى…
ربيعة : ولد الحسنية ؟!..يكون خير ماتخافي والي سولت سبحمد گاليا گاليهم طبيب غايتگاد ليه سكر ويحيدو ليه الكلوة…تي لباس جاتو فيها وفضلوع مادات ليه العمر…
توريا : وعلاش تكون منك مالكم ؟!
ربيعة : وماگالت عيب غا صابتني معصبة وكان…
توريا : وتعذر…
سعيدة”هزات عينيها ف توريا” : كاتعذري نتي توريا ؟!..
توريا : قويتي عليا سويعيدة لاكون !!..
سعيدة : نتي الي قويتي اتوريا…
توريا : تبدلتي عليا مابقيتي تحتارميني…بدلوك عليا ولا عمروك ؟!..
سعيدة : ولدي الكبير دخل ف ستة وعشرين عام غذا ولا بعدو يدخل عليا بنت ناس ويدخل معايا زمان وندير الحفاد…شعري زارو الشيب وهم دنيا ثقل عليا وراني الزين من الخايب..كون نعمر عليك كون من الي كان ولدك الكبير سنان الحليب..نهار يلوحوه الحيوط ونهار دار لباس يعمرني هو نيت من سنين هادي..اجي ياكما رميتي المعنى عليه هو ؟!..
توريا”الصمت..لداخل ديال سنانها كيتغزز تا هبطات فيها عينيها بنضرة فشكااال وهي دور من سمعات صوت عيدة”..
عيدة : لاكون لجمو فامكم…الشيطان لا تخليوه يدخل بين عضامكم..نعلوه وخزيوه…”شافت ف ربيعة” اش گالت ليك طبيبة…
ربيعة : گادة نخرج نولد وصاتني اش ندير فاش يكون سيحمد ههههه”ضربت على كتف كريمة وتخبات وراها حشمانة”…
توريا : علاش مكانش يلحگك ؟!..
ربيعة : الا يا..كي نساليو نبقى هازة رجليا على الحايط تادوز شوية ومنغسلش ديك ساعات..تايبرك فيا ماه على ما گالت…
توريا : ههههه هاكاااك…
عيدة : والله يبلغ مقصودك ابنيتي…”ضارت عند كريمة” وديرو بحساب مليكة ورضوان را شهر جاي يجيو…
كريمة”ترمتها كتصفث حيث غايجي رضوان وهاد المرة غايجلس بزاف حيث خدام فالفلاحة وصحاب فلاحة كيجلسو بزاف فالبرد” : واايه..يقرب شوية الوقت هاو ونخملو دار سفاها على علاها…
توريا : ماعطاوك خبار دوك ناس الي مشينا عندهم يامس…
عيدة : مزال..مابان ليا شاي فيهم البنت مزكمة ماباغياش وخا هكاك حيد عليا…
سعيدة : البنت شادة فولدها ماعينها فجواج باين مبززينها ا لالة…
عيدة : مابغينا حاجة بزز…
توريا : لا مابغاتش شوفي خت زكية بنت عيشة نيت…
عيدة : ايناهي ؟..ياك البنات كلهم تجوجو بقات غا زكية. وصابرين..وصابرين صغيرة عليه مايبغي بوها يعطيها نيت…ناخذو زكية نيت ؟ اويلي العيب هذا…
توريا : ونوضي لالة نووووضي..لاعطاك العاطي ماتحرتي ماتواطي..را بنتها مباركة ياك طلگت عام هذا را جات ونامس من عند ختها لميا عاد گالت ليا عيشة يامس را طلگت غا كانت غابرة مابغاو هضرة عليهم…
عيدة : عام كاع…
توريا : اوكيه…
عيدة : واش سباب ؟!
توريا : ماتولدش..عشر سنين وهي عند راجل تا طلع ليه الخز وصيفطها كان يحساب ليه هو من طاحو وناضو هاو صابو هي عندها المشكيل من الي طاح ليها بنادم لول مابقات تولد..طاح ليها فالسابع…
سعيدة : السابع كيتولد اتوريا ماكيطيحش…
توريا”دارت براسها مكتسمعش” : الى مابغاتش هادي لوخرا ضربيها على حسابي..نيت را باغين يستروها مايبغيو تبقا ليهم تم…ونيت راها زيييينة ودراعها ماضي تهز ليك دار راسها عساك الحاج..ونيت متولدش مايجي الي يزاحم ليك تريكة…
عيدة : وتنشوفو هادي اش گالت…
فطرو وجمعو طابلة وناضت الطنة الي فيها نوبة ديال الغذا والي هي ربيعة اما توريا مشات عند طيابة الي برا الي كاطيب ل خدامة ديال فدان الي تم تعاونها حيث فيها نوبة هاد سبمانة مع دخول موسم جني وطحن زيتون الخدمة تضغطت خصوصا كايجنيو فيه وكيباتو تم الخدامة وكاين المعصرة ديالهم ف سيدي بوعثمان….
عيدة كانت جالسة فالمراح كاتسبح وتخمم من بعد ما دوات مع بنتها مليكة وجابو خبار اشرف الي دخلوه يدير العملية…عيطات لسعيدة الي كانت كتلبس جلابتها حيث غايجي حسام يديها لعند اشرف وحسنية وياسين…جلسات حداها…
عيدة”حطات ايدها على ايد سعيدة” : بنيتي كيداير بشار !؟
سعيدة”تنهدات” : يگول لباس مادويتش معاه هاد نهار…
عيدة : اش دار مع مرتو ؟!
سعيدة : مادار والو ماگالياش…
عيدة : سولت وكان..”تنهدات شحاال وهي دور عندها” مازال ماهداه الله يشوف جيهتي ؟!
سعيدة : وا يعلم الله…”شافت فيها بنت ليها حزيييينة عليه” بغيتي تدوي عماه ؟!..
عيدة : ماكرهتشاااي..
سعيدة”باست ليها ايدها” : دابا يهضر معاك عطيه وقتو را هاز هم خوه ومو وهذا الله…
حركات ليها راسها وتا بغات تنوض سعيدة وهي تزير عليها تا شافت فيها…
عيدة : علمي هاشم يجي ورا الغذا بغيتو يديني فين نگوليه…
سعيدة : واخا..فين غاديا ؟!..
عيدة”تبسمات ليها” : لمراكش..نشوف داك الولد فين وصل بيه الحال…ولا تسيقي خبار لحد عايش بنيتي…راكي فهمتي نيتي وفين غادي لغايا (فهمتي قصد هضرتي)…
فطرات غير شوية حاسة بحرج كبيييير وتوثر غالب عليها…شافت فالساعة كانت 12…شاف فتيليفونو ساعة هز تيليفونو وهو ينوض بعد عليها ودخل لبيت مشا لبالكون شعل كارو بدا يكمي والخط دايز حتى جاوباتو بصوت مرعود…
بشار : مالك ؟!..
اشراق : ها..مم ماليش “دايرة ايدها على حنكها وكدور هنا وهنا بغات تبووول فحوايجها عند بالها را غايوقف عليها فاي لحظة”..
بشار : وايلي ؟ كيفاش ماماليش ؟…مال صوتك كايترعد عليا تم !
اشراق : غير خرجت كنزرب باش نجاوبك ميكونش صداع..”صرطات ريقها”…
بشار : ضارباك مك ؟..
اشراق”خرجات عينيها” : ل لا لا ممضربتنيش والله…
بشار : صوتك مامنغمنيش “كيهضر وصوته عيان ومبحوح بزز باش كتفرز اش قال”..بيك شي حاجة ماترهطيش عليا…
اشراق : والله مابيا حتى حاجة “بدات تبكي بالخوف قلبها بغا يسكت بالخلعة قالت صافي هادي اخرتي”
“جهد صوته غير شوية طارت ونزلت وحبيبة سمعاتو من برا تا قفزت..وضرب الحديد بقبضة ايدو..حيث الى حس بختو بكات ولا بيها شي حاجة كيتعصب كيحماق على خوتو ومكيبغيش تقيسهم شي حاجة…”
بشار”خنزر بجهد” : اشرااااااق..ضربك شي حد ؟!..
اشراق”وسعات عينيها” : والله اخويا م مكاين حاجة…غير خلعتيني اهى…
بشار”حاول يتهدن حيث اصلا اعصابو فرطو مريض وراسو كيضرو ونفسية زفت وماكاميش وماشاربش دوا” : واخا… ماشي مشكيل..دابا غاتجمعي عليا دموعك وتركني فقرايتك…تانجي تما ونعرفو اش كاين..لگيتي جد مي العيا صلاها معايا…مانجمش معاك…نرتاح شوية ونشوف معاك…
قطع عليها وكمل كارو ديالو حس براسو صعر مايقدش يكونطرولي اعصابو…مشا ديريكت لداك المهدئ شرب حبة وتبعها الما تا حس براسو بدا يتهدن..هز تيليفون شاف ساعة لقاها قريبة لوحدة ونص…مشا ديريكت لدوش دوش بالخف يتوگض ويحيد عليه ريحة العرق…خرج لبس حوايجو حاس بالبرد مزال كيشدو بتبوريشة…لبس قبية بيضة بالقب وسروال دجين كحل ولبس تقاشر والبروتكان…مشط شعرو لور ورش عليه بارفان ديالو..هز كونطاكت وسوارت دار.وتيليفونو وخشا بزطامو فجيب..تم خارج وكيكحب باااقي مريض غير مضارب معاه باش يحاربو يمشي حيث كلاها نيييت…لقاها واقفة كاتقلب فصاكها فيه بوليكوب وتبقشش اش هازة…تا حنحن وهي تقفز وضارت عندو مكتقدرش تشوف فيه وحتى انها دير شي تعبير…
حبيبة : نقدر نمشي ؟!…
بشار : فين ؟!..
حبيبة : لافاك..ناخذ طاكسي…
بشار”هز حاجبو بطريقة كاتخلع” : تمشي فطاكسي ؟!..”حركات راسها”…وانا اش كندير هنا ؟!…
حبيبة”نطقات بصوت منخفض” : نتا عيان هي خليني…
بشار”كمش حجبانو” : اش گلتي جهدي صوته نسمعك…اش كندير هنا الي منوصلك ؟!…
حبيبة”حنحنات منضفة حلقها باش يسمعها جهدات صوتها” : حيث عيان…وزايدون راه نتا الي گلتي ليا گبيلة هي شدي طاكسي لحقي قرايتك…
بشار”هز حاجبو مصدوم ماعقلش امتى قالها بصح حيث كان كيهتهت بسخانة” : انا ؟!..
حبيبة”حركات راسها” : فاش كنتي لهيه ناعس وفيقتك…
بشار”جمع حجبانو كيحاول يتذكر ماعقلش” : نعل بو ملة المرض وميجي منو…”سكت شحال ورجع نطق”..ماعليش ماعليش..دابا زيدي نوصلك الوقت الي ساليتي علميني…
“صونا ليه تيليفونو جبدو من جيبو شاف الرقم وخشاه فجيبو..ومد ليها كونطاكت سيارة” …
بشار : نزلي سبقيني هاني جاي…
حركات راسها وهزات صاكها ولابتوب ديالها فشكارتو على كتافها شدو من عندها…
بشار : ثقيل عليك هادشي نزلي دابا نلحگو عليك…
شدات من عندو غير ساروت وخرجات هبطات لتحت…اما هو رجع بزربة عازد الاتصال بالرقم الي صونا ليه وبدا يهضر بالالمانية…
بشار : واحد Produkt(بخودوكت..برودوي،، produit)..شوي وتكون عندك سميتو وصورتو..فهاد اليومين Vor(قبل) الجمعة..رسلو ليا فالسريع…
قطع عليه وخشا تيليفون فجيبو…هز ليها صاكها وشكارة البيسي.وخرج سد الباب ونزل فالمصعد لقاه محلول نيت…خرج على برا بانت ليه عاطية بالضهر وكتهصر مع امها….
حبيبة : لا كايبان ليا ولا شوية…ماعرفتش حتى لعشية ونعيط ليك وريني كيفاش نصايب صوبا…ههه وماما راه مكنعرفش نطيب “كتحك فشعرها باحراج”…غاتجي نتي وبابا تشوفوه ؟!..واجيبي معاك صوبا ومن بعد نديرها…گولي لدادا تصايبها بالعشوب كيف كانت كدير ليا فاش كنمرض ويضربني البرد..يمكن هو ضاربو البرد..سولتو گاليا ماشي من كريز…صافي واخا..
يلاه ضارت وهي طير وتنزل من الي لقاتو واقف وراها…
حبيبة : ج مالك جيتي…
بشار”هز حاجبو” : نبقا لفوگ ولا كيفاش !!..تحركي نوصلك تحركي…
بقات ترمش وهي تحل الباب وركبات وضار هو حط ليها لوازمها لور ومشا لبلاصتو والكحبة سخسخااتو بالبيان….ديمارا طوموبيل وكسيرا فاتجاه لافاك…حتى وصلها قبل الوقت بشوي…ضارت بغات تخرج وهو يوقفها بصوته…
بشار : حبيبة…
حبيبة”ضارت شافت فيه ورجعات شافت قدامها” : ن نعام..
يمكن فكر اش يقول فطريق..فكر كيفاش يشكرها ولا كيفاش يهضر…..تفكر هضرة طبيب اش يدير ولكن نساا كيفاش يتصرف..ماعرفش وخلا غير غريزتو الفطرية الي تكلم وتگيدو…وهي الي خلاتو مد ايديه لكتفها وجرها لعندو بدهشة منها تا وسعت عينيها وماحست غير بشفايفو على راسها بقبلة وصلات كلشي…ولكن كلشي هو الي قالو على فمو…
“بشار : سمحي ليا يا بنت الناس”
في حالة بشار واخا ماعرفش اش ولا كيفاش يوصل ليها اختار هاد الكلمة على الله تفهم شنو بغا يقصد بيها واش اعتذار شامل لاش دار سوى الالم الي تسبب ليها فيه فايدها او ما داز قبل…ولكن واش كلمة سمحي ليا كافية !!..ولا مزال تعاود وتعاود لمرات عديدة…واخا بشار من الناس الي صعيب يقوليك سمحي ليا اذا ما قلنا مستحيل…
غير باس راسها دغيا بعدها باش ماتخافش حيث عارف انها كاتخاف منو ومزال..وحس بيها ترعدت فاش قربها…وردة الفعل الي دار المفاجئة صدمتها ولات غير تاتفتف وتصرط فريقها ماعرفت باش تبلات خصوصا انه تا شوفة ماكتزگيهاش فيه بزاف وطبيعي لانه شخص عاشت معاه تجربة سابقة مافيهاش ذكرى زوينة الي تخليها تحس معاه بالامان بنسبة مئة بالمئة…من غير انه عاون باها فاكبر كريدي واجهو وواجه حياتو العائلية والمهنية والصحية…
بشار. : هبطي…
ماجاوباتوش نزلات بزربة وجهها تزنگ كامل…شافها من مراية جنب وحل ليها الباب من حداه باش قدرات تهز صاكها وشكارتها ومشات بزربة قاطعة شانطي تا دخلت وسط الطلبة مابقاتش بانت ليه…عاد كسيرا لدار ماكاين من غيرها حيث حس براسو باقي خاصو ينعس ويرتاح من بعد الدوا ومن توصيات طبيب انه يعطي راحة لراسو…غير وصل لبرطما جاه ميساج بانه تم ارسال الطلبية الي بغا وكونفيرما عليه…حيد القبية والسروال بقا غير بالبوكسر وتلاح فوق ناموسية ورجع نعس….
#مستشفى_محمد_السادس…
حدا الجناح فين كاين البلوك ديال غرفة العمليات…جالس حسام و هاشم و ياسين وسعيدة وحسنية الي كاتلعب بتيليفون ياسين باش ماتبقاش تسول على اشرف بزاف…وواحد سيدة هي الي كايديها ياسين او اشرف تبقى معاها حسنية شي ايام السيدة الوحيييدة الي بقات من عائلة حسنية وتهلات فيها لكن ماكتجلسش معاها بزاف حيث سيدة كبيرة وكيجيو ولادها وماكاينش الي يرد البال لحسنية…
ياسين : تعطلو هادو بزاااف….
هاشم : عطيهم وقتهم اياسين..الحمد لله الي نجا منها بزز عطيهم وقتهم اولدي الله يرضي عليك…
سعيدة”كدوز ليه على كتفو” : صبر اولدي ودعي معاه الله يرضي عليك…
هاشم”شاف فيها” : گلتي لمي توجد راسها نصيفط ليها حسام ؟…
سعيدة : هاني دابا ندوي معاها كنتسنى غايخرج طبيب…
بقاو شحال كيتسناو حيث دخلوه مع 12 قالها حسام لهاشم…ودابا فاتت الثلاثة وهما كيتسناو…حتى تحل البلوك وخرج طبيب عاد بان لهاشم ومشا يجرييي عندو ناض ياسين وحسام…
هاشم : امضرا دكتور ؟!..
الجراح : نتوما عائلة اشرف ياك ؟!..
ياسين : واه خوه انا…
الجراح : غا باس نعلمكم را بزز بزز باش تقاد ليه الديابيت..حتى جا الاختصاصي دخل معانا مابغاش يتسطابيليزا…عاد قدرنا نحيدو ليه الكلية…بالنسبة للكسر الي عندو فالقفص الصدري من بعد مايخرج من الانعاش حاولو ماتخليوهش يتحرك ومايتعرضش ل لنزلة برد الي تقدر تجيب ليه السعال كيف كنقول الكحبة مغاديش تعاونو باش يبرا من الكسر…غادي يجي orthopédiste يشوف الراديو ديالو غادي يعطيكم باش تعاودو ديرو ليه راديو…
هاشم. : وبالنسبة لديابيت…
جراح : غادي تمشيو عند الدكتور رفيق هو غادي يعلمكم شنو كاين وشنو الالتزامات الي غايتبع…حاليا غايبقى فالانعاش حيث مزال مابعدش عليه الخطر…دعيو معاه وان شاء الله يكون خير…
حرك راسو ومشا خلاهم عالاقل حمدو الله الي خرج من العملية واخا الخطر باقي عليه لانه مكرفص بالمزيان كسر فالقفص الصدري و الكلية الي حيد وهو فعمر صغير…وزيد السكري الي جاه…سعيدة هزات كفوفها وبقات تدعي حتى نزلو دموعها تا صونا تيليفونها هبطات عينيها بانت ليها سميتو وهي تنوض ومشات لهيه تجاوب شافها هاشم وعرفها معامن كاتهضر…بقات شحال.واقفة وعاود قطعات ورجعات تاني كاتهضر فتيليفون شوية وهي تم جايا تا وقفات حداه…
هاشم : دويتي مع مي ؟!..
سعيدة : سيفط حسام يلاه يجيبها…
هاشم : فين بغات تمشي…
سعيدة : جايا لهنا تشوف اشرف والحسنية وياسين بعدا…
هاشم”ضار عند حسام” : سير جيب مي احسام دابا…
حسام : شوف غانجيبها ونرجع عيييت الوليد وغذا عندي امتحان ماوجدت ليه والو…
هاشم : صافي غا سير جيبها ورجع “ربت ليه على كتفو” الله ينورك اولدي..كرفصناك…
حسام : عاودها لراسك ا هاشم..
هاشم”خلاه كيرمش” : ياك لجد بوك..سير اولد الهم سير…
مشا حسام يجيب جداه…وبقات سعيدة جالسة تا شوي خرجو حيث وصل وقت الزيارة وناس بدات تدخل ودنيا عمرات خرجو على برا يرتاحو والحسنية داتها ديك سيدة معاها تبدل ليها ودوش ليها حيث عمرات حالتها بزز باش مشات تا طلبها ياسين وواعدها تشوف اشرف…وهما جالسين فواحد الجريدة..هاشم مشا يكمي الكارو بعيد..وسعيدة كانت جالسة وياسين جالس بعيد تاهو تم صونا ليه تيليفون وناض وقف شير بايدو تا تم جاي واحد سيد هو نفسو الي جاو مع اشرف ومعاه واحد لابس كوستيم خضر وسروالو توب…داير ترازة ونضاضر شمس…
العرابي : ولدي ياسين كي بقى اشرف ؟!
ياسين”حرك راسو وعينيه فلارض” : شوية اسي العربي..
العرابي : ولدي هذا المختار مول الفيرما فين خدام اشرف خوك..”ياسين شاف فيه ورجع حدر راسو همو هم على خوه”..المهم را بغا يشوف خوك كي بقا وبغا يطلب سماحة لا صبتو كي ديرو نجمعو هاد المشكيل غير بناتكم…وماتدعيهش على قبل الوراق الي مدايرش لخوك (التأمين)…
المختار : راك كتشوف الحالة والله ماكاين ريال وزيتون هاد العام ناشفة القضية..هالعار اولدي لما سمحو ليا ولي ساگ طراكس…
جالسة فالمراح كاتقاد فزيف على راسها عقداتو عاد هزات شال كبير فالبيض دارتو فوق زيف لاوياه تا غطات بيه فمها…وقادت جلابتها المسكية المخيطة على يد المعلم فمراكش وقبها كبييير حيث هاكا ولفات من زمانها حيث كانت كدير نگاب وكانو كيكبرو القب ديال جلابة…شدات تسبيحها كتسبح تا جات كريمة جايبة ليها صابوها كحل لبساتو ليها…
عيدة : الله يرضي عليك ابنيتي…شوفي واش حسام هذا الي جا ؟
مشات كريمة طل من باب الدار واش حسام جاي وتمات توريا نازلة من فوق مهبطة معاها يوسف الي نازل وطايح عليه ضيم وهي طالع ليها د.م حيث رجع تاني لحالتو يسول عليه…تا جلساتو حدا عيدة فبلاصة نيت باردة مرحة…
عيدة”طبطبات عليه” : مال كبيدتي…
يوسف : بغي شوف خويا…
عيدة : توحشتيه وكان هههه…
توريا : يوسف جلس رتاح وسكت..خوك مامسالي ليك هاد ساعة.
عيدة : وسعي الخاطر اتوريا…
توريا : ماخلاو ليا خاطر يوساع الالة…جهدي تقادا مع هاد تريكة الي حطت كرشي…”تنهدت” سيمانة جايا كاين تلني المحكمة ونعاود تاني نخبي على ناس داعيني ماخرات كرشي شتي فين لحگنا فالعيب…
عيدة ماجاوبوهاش خلاتها تدوي تنفس على راسها كي ديما…شوية تا دخل حسام ورا كريمة سلم على توريا وباس راس عيدة وباس يوسف تاهو…
حسام : ميمة تحركنا ؟!..
عاونتها كريمة تا ناضت شد فيها حسام وتمو غادين تا وقفات وهي دور جيهة يوسف بان ليها مهبط راسو من الي جا مسكين ماعرفش معنى الخروج ديما مسدود عليه غير فدار وحتى قبل مايمرض كيخرجوه غير مرة مرة فشحال ولا الى جا خوه ولا هاشم وحسام لكن اغلبيتو ف الدار…
عيدة : سيري جيبي ليه ترازتو (الترازة هي الطربوش تقليدي ديال عروبية ديروها فغوغل طلع ليكم) ويلاه عمانا…
توريا : فين مراكش ؟!..
عيدة : فينما كان اتوريا را عمايا انا وهاشم وسعيدة..
توريا : سخون عليه الحال…
حسام”شافو مهبط راسو يطيح عليك ضيم…بقا فيه وهو يهز عينو ف توريا” : طوموبيل فيها الكليما مي توريا ماتخافيش ونغطي ليه شرجم بداك لغطا الي كيلصق فسه متلحگوش…
توريا”بقات تشوف فيهم وترجع تشوف ف يوسف” : كريمة سيري لبيت لي تم جيبي ترازة را بانت ليا محطوطة…
كريمة : واخا خالتي…
مشات بزربة جابتها ليه دارتها ليه فراسو وهو بدا يبتاسم…ناض تبع حسام الي شدو من دراعو تا وصلو لطوموبيل كانت تابعاهم تا توريا غا ركب عيدة حداه وهو يدور ركب يوسف لور وسد عليه يلاه بغا يمشي وهي تشدو من دراعو…
توريا : عندااااك تديوه يشوفو هذاك…
حسام : شكون هذاك…
توريا : المسخوط…
حسام : بشار ؟!..ماعرفتش امي توريا غادي ب مي غا لسبيطار عندي مي وهاشم تشوف اشرف انا غانحطها وراجع هنا…
توريا : انا گلت ليك ونتا علمهم مايخرجو معايا لعيب…
ماجاوبهاش ركب فبلاصتو وديمارا مكسيري فاتجاه مراكش…
وصلات الستة ديال العشية والطلبة بداو كيخرجو من لافاك ودنيا عامرة اصلا وزادت عمرت…وقف السيارة قدام لافاك وتكا راسو على شرجم باقي مدوخ بالنعاس عيان بالمزيان اما ديك الكحبة عذباتو لدرجة ولا داير كلينيكس مع يكحب تا يكحب د.م حيث تجرح ليه الحلق وجهو ولا حمرررر اما عينيه خلاص هما كحلييين وزادتهم الحمورية…بقا كايتسنى وهو متكي ومغمض عينيه حتى سمع دقان وهو يحلهم دور راسو جيهة شرجم بان ليه غير راسها حل ليها الباب وهي طلع تاهي باين عليها العيا غير من الحصة الي دخلات ليها كانت مستمرة ماخرجوش تالدابا…
لا هو هضر ولا هي هضرات هي عيانة وهو مريض كثر…طريق كلها وهو كيكحب وفواحد لحظة دورات وجهها بلا ماتحس بان ليها كحب د.م وهي تشهق فاش شافتو…تا دور وجهو جامع حجبانو…
بشار : اش كاين !!
حبيبة : د.م ؟..
بشار”هز حاجبو” : كيفاش ؟!
“عاد فهم را شافت كلينيكس..رجع شاف قدامو ونطق تاني بصوت منخفض”…
بشار : عادي..
حبيبة : عادي ؟..احم “حركات راسها وهي دور مابقاتش سولت مازاعماش عليه وماباغياش تزعم…حتى سمعاتو نطق غير راسو بدون مقدمات جاوبها ب ما قل ودل”
بشار : تجرح ليا حلقي شوية…
حبيبة”ضارت عندو حركات راسها ورجعات شافت قدامها” : الله يشافي…
زاد كسيرا مع طريق وعينيه على طريق لكن عقلو معاها ومع الهم الي على راسو والمشاكيل والمرض وداك الحلم الي شاف كانه عاش مع باه نهار مينساهش…كأنه رجع تاني لدوك الرؤيات…هي قالت ليه الله يشافي وهو سكت هي حساب ليها ماغايجاوبش لكن هو كيف ديما معطل فالاجابات ديما السهو هي طريقتو ديما حتى كاياخذ وقت عاد يجاوبك…تا نساااات وهي تسمعو قال…
بشار : امين…
وصلو ل گيليز وهو يبلاصي قدام العمارة نزلات هازة لوازم ديالها تا حسات بيه حيدهم ليها وهزهم…
حبيبة : غير عطيني نهز ماثقالش…
بشار”شاف قدامو تا كحب وهو ينطق” : طلعي بلا تفلسيف ..
هزات فيه حاجبها من طريقة الرد ديالو واش هذا مكيعرفش يهضر ولا كيتقاد مرة ويخسر مرات…ماعطلاتوش تاهي دازت قدامو وطلعات مشاو لسانسور وطلعو لدار غير دخل عطاها صاكها وشكارتها وتمات غاديا لبيتها تبدل…وهو يوقفها بصوته…
بشار : حبيبة…
حبيبة : نعام !!؟..
بشار”حك شنايفو بسنانو كيفكر شنو يقول وعينيه فلارض..حتى هزهم مشتت شوفة وهو ينطق” : پوسيبل نشوف l’exposé الي درتي نتي ؟!..
حبيبة : علاش ؟!..
بشار”مافيه مايشرح” : فيك مايرسلو ليا نشوفو ؟!..”بقات تشوف مافهمات والو وهي تحرك راسها”..مزيان..شوي ونرسليك الايمايل ديالي رسليه تم..والى بدلتي خرجي عندي بغيت نهضر معاك فشي حوايج…
دخلات لبيت بدلات حوايجها وعلى وجهها علامة استفهام لاش يكون بغا العرض…جمعات شعرها اسنفجة وخرجات لقاتو تاهو يلاه خرج مبدل باغي يخرج..شير ليها بعينيه تجلس..كان هاز فايدو باكسة الكارو وسوارت…جر الكرسي وجلس كيكحب تاني…اما هي تقابلت معاه وربعات ايديها كتسنى فيه يهضر…
بشار”بقا ينقر بصبعو فوق طابلة كايتنفس من الكحبة ونهجة ديال المرض..هز عينيه فيها وشاف فايدها الي حيدت ليها الباندة” : علاش حيدتي ليها الباندة ؟!..
حبيبة”شافت فايدها وحركات صباعها” : مابقاتش كضرني..
بشار”كيشوفها باقي كاتكمش ف عينيها شوي” : لا حبيبة مزال مابرات..رجعي ليها الباندة..
حبيبة : صافي ماشي مشكيل كتبرزطني…”حنحنت” ف اش بغيتي نهضرو…
بشار”ضرب فوق طابلة بشوي بادي الهضرة” : بون…على بالك الجلسة جايا كاينة سيمانة جايا…
حبيبة : عرفت…
بشار : هي فين المحامي ديالي غادي يعلم القاضي بالي انا انسان حاليا عادي ماخاصني والو ومابيا والو ومزوج عادي وبداري راكي عارفة اش گلت ليك ديك المرة “حركات ليه راسها” مزياان..من تم القاضي غادي يبغي شي حاجة يذوقها وتثبت ليه هادشي ماشي غير هضرة ولغا…
حبيبة : اش غايبغي…
بشار : انا وياك بجوج عايشين فبرطما دارنا…هادي ماكافياش..خاص يعرف عايشين راجل ومرتو “شافها خرجت عينيها” بلا ماطردگي فعينيك تم ماتخافيش…
حبيبة : مافهمتش…
بشار : من ورا الجلسة كاينين جوج حفلات وحدة غير عشا مع واحد une société جايين من لهيه حسبيه عشا خدمة كل واحد جايب معاه مرتو…وثانية “غمز بحنكو حيث هو براسو مكيحضرش لهادشي ولكن خاص يحضر” كبيرة شوي كاينة ف واحد لوطيل كنت كنهبط ليه…من بعد ونشرح ليك كيفاش تكون…”شير لراسو” انا براسي ماعنديش مع هاد زعت وماعمري حضرت ليه وهانتي تشوفي ضروري نحضر…باش تكوني معايا بصفتك مرتي…”شاف فيها واكد بعينيه” فهمتي ؟!..
حبيبة فهمات قصدو وماشي وحدة الي مكلخة فهمات انه خاص يبانو ك اي زوجين عاديين حاضرة معاه فالمناسبات الرسمية والغير رسمية…كايخرجو لعشاء بيناتهم…حركات ليه راسها…
بشار : لحد هنا مزيان…كاين حاجة كبر من هادشي…بديت ليك بالساهل دابا ندخل معاك فالصعيب…هاد ليام ضروري نمشي نشوف يوسف لهيه وضروري تكوني معايا “شافها بغات تهضر” عارف قاصحة عليك…
حبيبة : ماشي قاصحة وانما مابغيتش المشاكيل…
بشار : تاحاجة متوصلك وانا معاك…
حبيبة : وعلاش تمشي لتما..حتى فاش كتمشي نتا كينوض صداع بيناتكم “سكتت وحطت ايدها على فمها نسات راسها”..
بشار”حرك راسو بحركة ثقييييلة” : ميمكنش نرفع شكاية على مي الى مكانش يوسف معذب تم مكرفص…والى جاب الله. وربحت الشكاية خاص يعرفو بالي انا نستاهل نتكفل بيه وناخذ الوصاية عليه…تنغمتي هضرتي فين بغات توصل ؟!..
حبيبة”بامتناع” : فهمت…
بشار”سكت شحال كيشوف فيها ممرتاحاش عارفة انه فينما تمشي تم كتنوض الروينة وينوض صداع بينو وبين مو الي عندها الباطل تنزلو بحال شريب الما…”..
حبيبة : الى عرفات انا ساكنة معاك هنا وممكن نشهد ضدها…
بشار : شحال ماگلست تعرف…الخوف الي خفتيه على باك منها مابقاش…هاهي عرفت ماعندها مادير وماكان عندها مادير قبل نتي الي سبقتي الخلعة بليلة…كون حضرتي عقلك نهار لول وقع الي وقع هزي راسك وسيري…”تگعد فالجلسة وربع ايديه تا بانو دراعو مزيان حيث كان لابس نص كم” ماشي مشكيل كلنا كنغلطو الى ماغلطنا يغلطو ملة منا صحة ديك تريكة…
حبيبة : تقدر تمشي لبابا تگولها ليه…
بشار : الواليدة كدير فعايل ابليس غا معايا انا…معاك نتي ولا غيرك ماتوصلكش ممسالياش لشي حد من غيري…”رجع قرب براسو ليها” نتي معايا دابا ومن جيهتي…نساي باك الي خفتي منو فكيناه نعسي على جنب راحة من جيهة بوك…هانيا ؟!..
حبيبة”حركات راسها وخا لداخل ديالها ممرتاحش…لكن ملي جربات كلمتو وشافت انه دفع مبلغ مهول على باها وتساعد معاها عارفاه علاش گاد ومن ناحية اخرى يوسف الي كان بين عينيها…
بشار”ناض وقف” : نرجع نعطيك دوبل ديال ساروت يبقى معاك…في حالة وقع كي البارح علمي باك يلحگك هنا..
حبيبة : و واحم واش غاتعطل برا ؟!..
بشار : بغيتي شي حاجة ؟..
حبيبة : ب بابا وماما بايجيو يشوفوك كيف بقيتي “حدرت عينيها”…الى ممكن…
بشار”هز حاجبو معصب” : كيفاش هاد ممكن ؟..
حبيبة : واش يقدرو يجيو ؟!..
بشار : يقدرو يجيو ؟…”جهد صوته وهي تهز راسها” كاري ليك بيت هنا ؟!…
حبيبة : كيفاش…
بشار : سولتك ؟!..”بدا يزير على ايدو حيث تعصب عدوه فحال هاد الهضرة الي كتكون ماعندهاش معنى حيث هادي دارها تاهي كيفاش واش يجيو دارنا”…
حبيبة : عارفة داري حتى انا و…
بشار : ومالنا فهاد الهضرة ديال والو ؟!…حبيبة نكون معاك مگاد نحاول جهدي نتصاوب معاك فالهضرة حيث انا بكري “عض لسانو كيحاول ميخصرش الهضرة قدامها..اما هي وسعت عينيها” براسي نتفاهم مع راسي وماگاد ،،وراني داير جهدي..ملي عارفاها دارك علاش تشاوري…
حبيبة : حيث غايجيبو معاهم العشا…
بشار : ويباتو گاع فين المشكيل ؟!…يجيو وقت مابغاو الله يجعلهم يجيو تا مع الفجر…حبيبة يرحم باك عاوني ملتي نكون مزيان مابغينا ترخوين فالهضرة والغوات بلا موجب شرع الله يرضي عليك…”عينيه مخنزريين”..
مشا الباب وخلاها كترمش وحادرة راسها…وقبل ميخرج نطق بشار : ماغاديش نتعطل شوي ونجي..
حل الباب وخرج هبط فدروج..غادي ويتمتم…
بشار : سلاوي ديال الحبس…
مشات لكوزينة كانو باقي ماعن ديال الفطور غسلاتهم غير راسها ضيعات نص صابون خاصهم يرغوييو مزيان عاد تهنى ديما مغوتة عليها ناديا على هاد القاعدة…مشات لدوش الي تم تاهو نقي وناشف وبدلات ليه العواد ديال لمعطر…وخرجات لصالون تاهو عطراتو…ودخلات لبيت عندها جلسات شوية كتراجع اش عندها تقريبا ساعة…تا سمعات الباب تحل…شوي سمعات صوته كيعيط عليها ترددات شوية وهي تنوض خرجات ولقاتو حاط ساشيات مقدي معاه…
بشار : شوفي شنو هنا وشوفي شنو ديري فثلاجة تم..ماعرفتش اش نجيب..
حبيبة : هما جايبين العشا…
بشار حرك راسو وبدا يكحب تاني عاود حس بالعيا وخا هاكاك كيكافح عضامو كلهم مدگدگين وسخانة تاني طالعة شوي عبرها وهو فطوموبيل..مشا لبيتو يبدل وهي دات دتكشي الكوزينة لقاتو مقدي عصيرات ومونادا و ديسير وحليوات ديال الضيافة…
سمعات صونيت الباب وهي تهز راسها…خرج من البيت وشير ليها تجلس ومشا هو حل الباب..كان كيسد فسيور ديال سروال ويكحب هل.كاتو ديك الكحبة…حتى هز حاجبو من شافها قدامو…
عيدة”تبسمات ابتسامة خاافتة عيانة” : ماجيتي عندي نلغاو انا وياك ونتفاهمو جيت عندك انا…
بشار”جمع غوباشتو”
عيدة : تالين تبقى هاز من جيهتي ؟!..
بشار”عص شنايفو شحاال وشاف قدامو” : ماهاز من حد اعيدة..درتيها بيا درتها بيك كل لحگ لتيساع…
عيدة”حركات راسها مثقل” : مادرتها غا لغرض الخير…
بشار : خرجتيني لعيب مع بنادم اعيدة…عارفة جد مي مزمر فراسي..ماعندش ملتي العقل تران يجمع حب وتبن يا غالط يا ماغالط…قويييتي بزاف اعيدة وعمرتي ضوصي وتقبتي معايا الورقة..”تنهد” ماهزيتش منك عطيتك الوقر…
عيدة”عينيها دمعو” : وتخليني فالباب…
بشار”حل الباب مزياان وبقا شحال واقف فالاخر جرها وباس ليها راسها بلا ميشوف فيها باقي هاز منها..حيث وصلوه لهادشي الي فيه ماراضيش عليه ودار فعلة بخاطرو كيف قال حيث فاش كيتشمت مكيبرد الا لما رد الحر وخا يتگدم فيها البريئ” : دارك..
عيدة”تبسمات عارفاه شوي بشوي وينسا مهم تجاوب معاها” : ماجيت بايديا خاويين…”كمش فيها حجبانو وهي دور راسها وعيطات” زيد اولدي زيد…
هز عينيه والغوباشة بدات تفك شوي بشوييي بشوي تا تبسم شبه ابتسامو ة وهو يسرح ايديه تا تلاح عليه معنقو تقولي شاف الما فشي صحرى..كايحماااق على بشار بجهد…باس ليه راسو وبقا معنقو تا بانت ليه حبيبة وهو يهز عينيه وبدا يضحك..
يوسف : حبيبة ههههههه “مشا لعندها يزرب عنقها وتاهي عمقاتو وبدات تضحك وبشار حاضيهم”…
بشار”شاف فجداه وجمع غوباشتو” : شكون جابكم…
تمات جايا سعيدة طالعة تاهي سلمات عليه وبدات تضحك..دخلو كاملين لصالون اما هو جر يوسف عنقو بجنبو كيهضر معاه ويسول فيه ويقيس ليه فراسو…وحبيبة الي جلسات بعيد….
بشار”قاس ليه راسو” : باقي كيعيطك صداع ؟!..
يوسف”حرك راسو” : شوية شوية ههههه…
بشار : فين خليتي اشراق علاش ماجبتوهاش…
عيدة : جينا تخبية ههههه…
بشار”حرك راسو بلا ميشوف فيها” : باينة لعما…
سعيدة : وتا خاص تشوف فاش گلنا ليه جايين عندك..كايطير لسما وينزل ماكرهش يجي على رجليه يسبقنا هههه تلف..
بشار”باس ليه راسو وحبيبة شافتو تفكرات البوسة الي باسها هي نفس البوسة ونفس البلاصة” : شدييد مع راسك ؟!..
يوسف بقا كيضحك وهي دور عيدة شافت فحبيبة الي جالسة بعيد..كمشات عينيها…
عيدة : تي سكنتي هنا بنيتي ؟!…
حبيبة”بدات تلولب فعينيها”. : م ا..
بشار : فين بغيتيها تسكن ؟..
عيدة : عند بالي مع دارهم…
بشار : واجب عليها تسكن هنا متقويش الجلسة فدارهم الهضرة تكثر ودارهم يعرفو فعايل ابليس الي درتو ونزيدو عيب فوگ عيب اعيدة…خدمي عقلك…
حركات عيدة راسها وحبيبة تنفسات حيث مابغاوش يعرفو را سكنات معاه بغرض قضية يوسف…
حبيبة مكتشوفش فيها تاهي باقي هازة منها وناضت لكوزينة تبعاتها سعيدة الي غمزها بشار تبعها..يلاه جبدات من ثلاجة الما وهي دور من شافت سعيدة دخلات”..
سعيدة : امضرا مرتاحة شوي…
حبيبة”تنهدات وحدرات راسها وحركاتو ب لا”.: كانحاول نولف حتى يدوز هادشي حيث عارفة غادي كل واحد يعطي تيساع ونرجع كيف كنت مهم درت بكلمتي وفنفس الوقت تفك بابا…
سعيدة : اشنو الي مخليك ممرتاحاش..
حبيبة : كنخاف منو وممولفاهش وصعيب دغيا كيتعصب..كيخلعني بزاف وماعمري نسا ديك الليلة…
سعيدة : من حقك ابنتي وتانتي متنسايش نتي الي قررتي تعاونيه من راسك…
يلاه بغات تجاوبها وهي تسمع صوت سرسار وخرجات من كوزينة شافت فبشار وقالت ليه انا غانحل كان نايض وهو يحرك راسو واخا مكيبغيهاش هي تحل.. قال را دارهم…يلاه حلت الباب كاتضحك وهي تجمعها فالبلاصة من شافتها قلبها بدا يضرررب يضرب بجهد…
توريا”كطلع وتهبط فيها” : اش كديري هنا ؟!..
حبيبة”الصمت”…
توريا”حركات راسها تاهي” : ممم..خفتي من هضرة ناس لحتي راسك لزوبية ابليس…”هزات منخرها وشيرات ليها بعينيها لداخل” سيري خرجي ليا يوسف ولا نبيتكم عند جدارمية ونطيح عليكم باطل يحرگ…انا نهاااار لول غا سيبوني معاهم فالخطبة كان يحساب ليا نرجعو راجل…ماكنت عارفة يخرج فيا هاد العجب كون من نهار حملت بيه طيحتو…نگولها ليك نيشان را مافيه خير لو كان فيه خير كون رحم بوه الي صيفطو ليا گبل الوقت…
طيحتو طيحتووو…كلمة بقات كتردد على مسامع شخص كان واقف ورا حبيبة الي هي براسها مافهماتش المعنى لكن الي فاهمو راه وراها….
كملات كلامها السام وهي تحول شوفة عينيها ليه ،، طبعات للشخص الي ديما كلامها القاصح كايجي معاه نيشان…اما حبيبة عارفاها مامفاهماش معاه وبزاف المرات كتسمعها كتقول عليه كلام قاسي ومكتفهمش اشنو حجم المشكيل الي بيناتهم الي مخلي ام تكره ولدها فلذة كبدها لهاد درجة…لكن هاد المرة غوبشات ماعجبهاش الحال من هضرتها مهما بلغ الاشكال الي بيناتهم مايمكنش لأم توصل لهاد الهضرة…
اما هو طبعا وفكل مرة كايسمع كلامها الي عمرو ماسمع منو كلمة زوينة واخا غير بالضحك…ف كيكون ديما عدم الرد او الرد بكلمة الي تبينو وترجعو مسخوط نيييت…لكن هاد المرة رغم انها زادت اقسى الجمل الي ممكن يسمعهم ابن من مو والي كانت ف “كون طيحتو”…الا انه مابينش واكتفى انه يبقى واقف حتى تكمل هضرتها…
“السكوت علامة أنّ الكلام خسارة فيك.”
تقدم شوية ونطق ورا حبيبة الي قفزت فاش سمعات صوته بنبرة مزعزعة شوي…
بشار : دخلي…
دورات راسها بان ليها واقف وخاشي ايديه فجياب سروال حتى شوفة مكيشوفها لا فيها لا فمو ودوك الحجبان غير مغوبشين طبيعيا وزادو منين شاف توريا…حركات راسها تقول طالباها نيييت دخلات وخلاتو واقف توريا مخنزرة فيه اما هو تقول واش حرك شوفة جيهتها…بقاو هكاك واقفين…
توريا”جهدات صوتها تا قفزو لي لداخل” : يووووساااااااف…
يوسف قفز وكحاز حدا عيدة هرب منو اللون حيث عارف فاش كاتلاقا مع بشار كينوض صداع…اما سعيدة وقفاات…
سعيدة : هاويلي توريا هادي ولا كذبت…
عيدة : اش جابها هنا !؟…
سعيدة : ماعرفت “شافت فحبيبة كانت جايا عندهم وتاهي شافت فيها بشوفة مبينة انها مخلوعة…يلاه غاتهضر تا سمعات صوته معيط ليها خلا حبيبة تقفز وتزيد تدخل ويوسف يزيد يتخشا ف عيدة”…
بشار : سعيييييدااااا…
شافت سعيدة ف عيدة الي شيرت ليها سيري عتقي قبل مايجيو عائلة حبيبة الي تفكراتهم ودارت ايدها على حنكها لانهم فاي لحظة يجيو…مشات بزربة لعندو بانت ليها توريا دايرة ايدها عالباب…شال مخربق على راسها ولابسة جلابة لا علاقة ليها بلون شال كانت باينة هازة كل حاجة من جيه لعار غاتوصل تجيب ولدها…
سعيدة : توريا نعلي شيطان يوسف را معايا انا وجداه…
توريا”ماجاوبتهاش وغوتات تا تغمضو عينيها” : يوساااااااااااااف..يووووووووسااااااف…
يوسف”كيحرك فراسو” : بغيت خويا بغيت بقا مع خويا بشار..
طبطبات عليه عيدة وهي تعكز على سداري وناضت….
بشار”كيسماااع فيها تغوت تم والله ماتحركت فيه زغبة…ضار عطاها بضهر وقرب لسعيدة” : فكي عليا هادشي..داابا..لا جيت نفك ملتو انا مايكونش خير “عاودها وكتحس بيه ضاغط على سنان” مايكووونش خير…
توريا باقا كاتعيط وتغوت باسم يوسف يخرج عندها…قربات ليها سعيدة بغات تهضر معاها والو ماجاوبتهتش كادور وتعيط…مشا لصالون بان ليه يوسف كيقفقف وحداه حبيبة غا وقف شاف فيه وهو يغمزو وناض عندو يجري عنقو بجنب وبشار كيبوس ليه على راسو…
توريا”شافت عيدة جايا” : ياك الالة تكذبي عليا وديريها بيا ؟!..
عيدة : مالو جا مع البرانية لعند البراني ؟!…
توريا : فين هو ؟!..
عيدة : راه لداخل فالصالون كان بارك عمايا تا تسلطتي عليه…توريا سيري بدلي ساعة باخرى دروك نجيبو عمايا…
توريا”خرجت عينيها وفمها ولا زرق بالسم بحال الى مارضاااتش كلمتها طيح والمشكيل ان عيدة كتهضر معاها” : لااااالة ولدي لازم يرجع عمايا..مريض ومنصيبش نخليه عند شي حد…
سعيدة : نهاك الله الحد را خوه من مو وبوه…
توريا : يگطعو خو ويگطعها عليا ولدة…
بشار”باس راس خوه وشاف ف حبيبة الي كانت جالسة ومربعة ايديها وحادرة راسها…باين عليها تخلعات غير من وجهها..بقا كيشووف فيها حتى نطق” : حبيبة…
حبيبة”هزات فيه راسها”
بشار : ماتخافيش…
“ماتخافيش” كلمة خرجات من فمو خصوصا فاش شافها خافت وحس بيها انها كتفكر حتى فدارهم الي ممكن يجيو دابا…شاف خوفها كأنه شاف يوسف تاهو…اما هي غير سمعاتها حركات راسها كيفاش ماتخافش وهما ديما هاكا فالصداع ديما يتلاقا بمو ينوض مشكيل…لمن تأمن وممن تخاف…
عيدة. : توريا سيري نسالي ونلحگ لسيدي بوعثمان…
توريا : لالة…
عيدة”خرجات فيها عينيها على جهدهم وغوتات عليها تا شدات فيها سعيدة” : توريااااااا…عليا بليمييييين وتديه عماك يا لغايا مايجي فلغاك (عمري نهضر معاك)…يوسف جا معايا يرجع معايا وسدي عليا الهضرة هنا…سيري دابا هاني شوي ونجي…
توريا”كاتنهج نفسها تخربقت تا حسات بالدوخة ومشات بيها لارض وجات كون ماشدت فالباب”
سعيدة : توريا مالك…
بشار”سمع سعيدة وهو يدور وجهو باقي بتخنزيرتو حيث سمعها قالت ليها مالك”…
توريا”غمضات عينيها شحااال كاتنهج وهي تحلهم وشافت ف عيدة وهي تحرك راسها ب واخا وااخا ومشات هبطات”…
ضارت عيدة هي وسعيدة الي سدات الباب ومشاو لصالون شافت فيوسف وهي طبطب عليه..
عيدة : غا برك اكبيدتي..شوية هاو نمشيو…
يوسف زاد تنخشش فبشار الي زير عليه باش ميخافش وهو يحرك راسو وتبسم وهي دخلات جلسات حدا حبيبة وسعيدة…ماكاملاش خمسة دقايق تا رن جرس الباب وهي تنقز حبيبة خرجت حيث عرفتهم دارهم الي جاو….
حلات الباب وگاع ديك الخلعة تلاشات وتبدلات لابتسامة وفرحة ودفئ…علاش وهي غير شافت باها فحال شافت الجنة ونعايمها…وكان هو اول واحد ترمى عليه وتعنقو تا تهزو رجليها مزيرررة عليه خلاتو يضحك وناديا تحرك راسها يمين شمال…
م.حفيظ : القشة مابغيتي تكبرييي هههه…
حبيبة : لا مابغيتش خليني هي گد هاكا باش متكبرش نتا. ههه…
م.حفيظ : نتي تشرف وانا شباب ديما..باباك ميكبرش ههه…
باست ليه راسو وايدو عاد شافت فماماها الي كانت تشوف فيها بمعنى عاااد شفتيني…عنقتها تاهي وباست ليها راسها وايدها…
حبيبة : دخلوو…
م.حفيظ : افين بشار…
بشار”وقف نيت مع سميتو” : الحاج…
م.حفيظ : اولدي…
“تقدم بشار باس ليه راسو..وبحركة عفوية من مولاي حفيظ حط ايدو على جبهة بشار ب طبطبة اب لابنو كيقيس فيه تا بشار قفز وهز حاجبو وبعد جبهتو شوي حيث جاتو حركة فجائية”..
م.حفيظ”بصوت حنين” : شوية ولدي ؟!..
بشار”بدا يكحب تا كمشو حجبانهم وسعيدة نيت سمعات الكحبة” : لا مزيان،، شكرا…
ناديا”تقدمات عندو تاهي باس ليها راسها” : الله يا ربي على ولدييي واكلهااا نيت…
م.حفيظ : اخسر معاك البرد الهضرة ماشي هي ضربك…”تا ضحكات حبيبة بلا متحس خلات بشار يدور وجهو عندها اول مرة ضحك حداه”
حبيبة : ههههههههههه ماتفاهمناش…
م.حفيظ”فهمها حيث ديما فاش كيضربها البرد كيقوليها ماتفاهمتوش” : ههههه ياك بعدا هههه…
بشار مافهم تا لعبة وماشغلش راسو…شافت ناديا جيهة حبيبة وهي تغمزها تجي وراها..تبعاتها تال عند الباب كانو جايبيين قفة فيها برمة كبيرة ديال حسوة و جايبة شي حاجات معاها…حتى من البيض صالقاه وجايباه…دخلوهم لكوزينة وبدات تعري وتستف…
ناديا : شكوون عندكم ؟!
حبيبة : خالتي عيدة وخالتي سعيدة ويوسف خوه…
ناديا : بصاااح..شدي شدي نمشي نسلم عليهم ونجي نوريك اش جبت…
مسحات ايديها وقادت شالها وهي تخرج من كوزينة مابرگكاتش فدار حتى توريها ليها بنتها ونيت هما مافيهمش الفضول فهادشي…رسمات ابتاسمة عريييضة وبشاسة ترحاب على محياها وهي تدخل رامية سلام الله والمسلمين…سلمات على عيدة وسعيدة ودازت ليوسف الي لاصق حدا بشار…
ناديا : كيداير اكبيدتي كي بقيتي شوية ؟!..”كطبطب ليه على حنكو”…
يوسف”غير كيضحك فرحتو ماتعطيها لحد”…
غير وصل حسام لفيرما من بعد ما وصل جداه ويوسف…كي وصل طلع نيشان لدوش دوش عليه مزياان حيث عظامو تسخسخو بالسهير مع اشرف يومين ماتزعزع من سبيطار…خرج لابس تيشرت و شورط وشعرو مشعكك بالما عينيه حمرين فاش كيخرج من دوش كيولي لونهم الخزي باين بحال لون عينين سعيدة…شاف فساعتو سمارت لقاها قريب تمنية ونص باقي الحال باش يمشي يجيب اشراق…تا شوي بان ليه زكرياء طالع لايح على كتافو طابلية وشكارتو وجاي زعما را عيااان…
حسام. : تا كيفاش يلاه جاي..
زكرياء”هز صبعو” : يلاه ساليت مع شي رجال الهضرة…
حسام : سخروك تجيب شي حاجة !!..
زكريا”طلعو وهبطو وكمش سيفتو” : كنا نهضرو على بحالك…
حسام”حسام” : نعاام ؟!…
زكرياء : دابا الي بحالك علاش يمشيو يقراو ماستر فمراكش..علاش منكحزوش الماستر هنا لرحامنة !! على رقبتي ورقبة عمتي مليكة الي فيها گنطرة واد العبيد الى داكشي الي يقراوه فرحامنة عندنا فهاد دار مايقراه حد…
حسام : قنعتيني…دابا اجي جابك الله…
زكريا : عياااااان احويسيم عياااان…
حسام : عااايشك بغيتك فواحد بريكول قديه ليا كي ديما…
زكريا : خوذ وعطي…
حسام : انري مالك طميميع…
زكريا : الوقت خيابت نديرهم تحتي ماعرفتي الوقت اش تجيب…
حسام : نديك معايا لكوان الي كنسهر فيه فمراكش…
زكريا : مايخليونيش ندخل حيث قاصر…
حسام : رجع صرط الطالب الي فيك تحنت ليا عشرين…راني هادشي لاش باغيك حيث قاضي معايا غراض فكلشي…مانديكش لكوان نديك ريسطو نسهرو فيها..بغيتي غا تركز كون هاني…
زكريا : اش بغيتي وكان…
حسام”فرنس” : دابا مزيان…واحد ختنا لااااصقة فيا لصقة العما فالضلمة…
زكرياء : ايه ومالك مباركة لقيتي وحدة تلصق فيك طويل العجلات…
حسام”كمش فيه حجبانو” : راك ساير تعاير ولا غيست…
زكريا”تنهد تنهيدة عياااانة تقولي شايب هاز هموم دنيا ودين” : ااااحسام طلگني (طلقني) گول اش بغيتي سربيني خالني نمشي تانا ندوش…
حسام : لا حول ولا قوة الا بالله…ماعلينا بغيتك تهضر معاها كي درتي ديك المرة مع فاطمة زهرا تا عطاتني تيساع…
زكريا : خطيبتك ولا مرتك !؟
حسام : گول راشمينك…
زكريا : سميتها وسمية مها…
حسام : ياغي تهضر معاها ولا تحرك ليها مجمر…
زكريا : سميتها…
حسام : سكينة…مها ماعرفتش…
زكريا : وسمية سكينة يصحكو عليها ناس !!!…عطيني نمرة…
حسام : هاااح هاك قيد…زيرو ستة خمسة وخمسين…زيرو اننن..سير عالله…
زكريا : ندوش ونهضر معاها…
حسام : غادي نجيب اشراق الحبس نتسناك ولا ؟!…
زكريا : غادي تمشي تجيب ديك اطفاء تانا اشراق وغاتلقاني دوشت وحطيت راسي عالمخدة بييييما مخمخت ليك..وبيييما داز وقت زعما راه انا خطيبتك الي راشمينها سميتي نوال وساكنة فدوار حد خرز…ودوارنا تانساليو شقا عاد نعيط…وعاطيني فصداقي جوج المليون…
حسام : جوج المليون ؟!..واخا يكون عندها ديال ذهب…
زكريا : عندهم غا جلافط وعطاو فيهم عشرة…وزايدون انا ماشي اي حد…
حسام : نتا شكون بسلامة…
زكريا”رقق صوته” : انا مريم خطيبتك…”هز كتافو ومشا لبيت خلاه مكوانسي”…
وقفات حبيبة وشيرات لماماها تبعها لكوزينة…ناضت ناديا بلباقة وتبعاتها وسعيدة قربات شوي لبشار…
سعيدة : ضربك البرد ولا ؟!..
بشار : ماشي شي حاجة…
سعيدة : حاجة اولدي حاجة سمع كحبتك كي مجهدة وصوت صدرك مهرس…شربتي شي دوا…
بشار : ضروري..”دور وجهو شوي عندها وساف فيها بطرف عينيه هاز حاجبو” داك دري شوية ؟!..
سعيدة : لا شوية گاليك يبقى فالانعاش على قبل سكار..
بشار”حرك راسو وحط ايدو على رجلها طبطب عليها وهي فهماتو”…
حطات ناديا البرمة ديال الحسوة دارتها تسخن كانت ديال زاج..وجبدات حبيبة طبسيل حطات فيه البيض مصلوق قصماتو على زوج رشات فيه كمون ومليحة وهما يبانو ليها ربعة البيضات معزولين…
حبيبة : هادو ؟!..
ناديا : هادوك بلديات حطيهم فطبيسيل لراجلك..كثري فيهم كمون مزياان…
حركات راسها ودارت داكشي الي قالت ليها…غير سخنات البرمة حطاتها ف بلاصتها تحت منها شميعة شعلاتها باش تبقى مسخناها…وخرجات هازاها كاتبان معافرة معاها حيث خايفة طيح ليها..شافها بشار وناض وقف بزربة تا هزو عينيهم مشا شدها عليها وحطها فوق طابلة تم…زمات فمها وهي ترجع لكوزينة جابت طباسل البيض وتمر وناديا جايبة زلايف من تم كاينين فدار حيث مجهزة من كلشي…حطاتهم…
ناديا : الحاجة حسوة البلبولة بزعتر من داكشي…
عيدة : الدار الكبيرة بنتي الله يرضي عليك (لداخل طاح عليها ضيم كتفكر اش دارت فبنتها وكيفاش كيتعاملو)…
قربات ناديا سمات الله وكبات زلافة لعيدة الي تعتبر الكبيرة..عاد عطات لسعيدة وتبعاتها بشار الي حطاتها ليه قدامو وهي توقفو…
ناديا : حبيبة جيبي بنتي داك الحك الي جبت معايا…
حبيبة”داخلة” : هاهو ماما جبتو معايا…
شداتو من عندها هو ومعيلقة هزات منو معيلقة ديال العسل الحر فيه اعشاب مخلط ومداتها ليه…
بشار : اشنو هادشي ؟!..
ناديا : عسل اولدي گالت ليا حبيبة حلقك مجروح وكيدوز بد.م..كولها ولدي وزيدك وحدة قبل ماتنعس بيتصبح كاتكذب…وبتبرا ان شاء الله…
م.حفيظ : ايييييه اتاكلها تشنشيط اولدي بينوض لسك فحلقك..حبيبة ماتحملها ماتقبلها والله ماتبغي تاكلها…
بشار”شاف المعيلقة وشاف ف حبيبة الي وقفة ورا ناديا” : لا الحاحة ماعنديش مع هادشي…شكرا…
سعيدة”وركات عليه عرفاتو خضر..ونطقات بالحس دايرة ايدها على فمها” : كووول ابشار كول…
بشار”شاف فناديا الي بغات ترجع المعيلقة وهو يشدها من عندها باس ليها ايدها تا تبسمت” : شكرا…
كال داك العسل الي فمعيلقة وهو يصرطو…العااااافية شعلات والشتنشيييييط ناض ليه فحلقو لكن مابينش والو على ملامحو تا شكو را حلقو مامجروحش…
حبيبة”مستغربة تا شهقت وهو يهز راسو فيها” : هييييي ماحرقكش ؟!…(حيث عارفا داك دوا كينوض الحراقية فيهم كلهم ماتقدش عليه وشافتو تا سيفتو ماحركها)…
بشار حدو حرك ليها راسو ب لا بدون مايهضر..ماعارفاش بالي را اصعب واقسى انواع الالم عاشهم هو وغير وحدو حتى ترودا وولا عندو عادي ومجرد من الاحساس…هزات كتافها وعوجات فمها بدون مبالاة…جلسو كاملين كيشربو فالحسوة الي جات زوينة وكلشي عجباتو…الا بشار الي غير كيشرب كيحاول يدير صواب…ونص وقتو مقابل غير يوسف الي كيشرب ويكمل وتزيدو ناديا بالفرحاات…حطات حبيبة لبشار طبسيل ديالو ديال بيض بلدي شاف فيه وهز فيها عينيه…
حبيبة : بيض بلدي مكثرين فيه كمون على قبل البرد مزيان “ماكتشوفش فيه”…
بشار : شكرا…
سعيدة كايجيب ليها ضحك بديك شكرا عارفاه زرق ماشي غير خضر…ضارت حبيبة شافت يوسف فين كيشوف فطبسيل…
حبيبة : بغيتي من هاد البيض ؟!..
يوسف”حرك راسو”..
حبيبة”ماتسوقاتش لبشار هزات داك طبسيل ومداتو ليه” : خوذ اش بيتي…كيعجبك بيض بلدي ؟!…
سعيدة : هههه ولفتو ليه ديما لهيه…هو باش كيفطر…
م.حفيظ : هز اولدي هز شحال بغيتي اسيدي خوذ طبسيل وخلي بشار عالضص ههههه…
بشار ماجاوبش عينيه كانو على يوسف وحبيبة كيفاش كتعامل معاه وضحك معاه وهو ناشط بجهد باغي ينقز قلبو كيفرفر فاش كيشوفو فرحان….
حبيبة”ناضت” : تفكرت واحد الحاجة جيتي ايوسف نيت…
ناضت بزربة مشات لبيت ديالها الي طبعا ماردوش البال بالي راهم عازلين البيووووت…دخلات بزربة ل كوافوز حلات المجر وجبدات واحد مذكرة كانت عندها هي باقي جديدة بميكتها ولكن عمرها استعملتها فيها اوراق بيضين هي و ملونات شراتهم حيث واحد نهار فاش كانت عايشة فالفيرما ديك الايام كان قاليها عزيز عليه يرسم ويخطط باللوان…وخرجات فرحانة تا دخلات عليهم وهي توقف عليه كان كيمسح ليه بشار فمو جخلطو بالحريرة تا هزو فيها عينيهم بجوج كانت كتفرنس كاع مامدياها ف بشار….
حبيبة : شوف اش جبت ليك هههه..عقلني فاش گلت ليك بنجيب ليك واحد مذكرة عندي باش ترسم فيها ؟!..هاهي وخذيت ليك ملونات ومعاهم گومة باش تمسح وفيهم حتى قلم…
يوسف”شدهم من عندها كيقلب فيهم ويضحك” : نرسم ههههه ملونااااات…”شاف فبشار وكيضحك يااااربي ضحكتو خلاتهم كلهم يضحكو كيوريه وينقز فرحان” ملونااات ونرسم ههههههه شوف شوف ويييينييين (زوينين)…
حاجة بسيييطة بزاف لكن عند البعض كتعني بزاااااف…خصوصا يوسف الي بفرحتو ناض وقف وعنقها تا مشاات وجات خلاهم كاملين كيضحكو الا بشار الي ربع ايديه وبقا حاضيهم…نساتو الخوف من توريا ونساتو المرض وفرحاتو ب جيست بسيييط الي عند البعض جيست مايتنسااااش….
وقف حسام قدام كوليج داير ايدو على شرجم وايد شد بيها تيليفونو كيبقشش فيه من بعد ما هضر مع هاشم…تا شوي صونا ليه طلع ليه اسم “بشار”…طلق الخط ونطق…
حسام : الو خويا بشار…
بشار : مشيتي تجيب اشراق ؟!..
حسام : وايه هاني گدام ليسي..هاهما بداو يخرجو…
بشار”واقف فالبالكون كيكمي” : يتوب عليك…غذا گلتي ماقارياش هي ؟!..
حسام : مكيقراوش فالعشية بغيتي نجيبها ليك…
بشار : لا نجي ليها راسي…بلا متعلمها…
حسام : واخا كون هاني…
قطع معاه وهو يدور تا بانت ليه جايا ودايرة نص شعرها على حنكها ودوز عليه بايدها باش ميبان والو…ضارت وركبات حدا حسام الي دور وجهو وشاف فيها…
حسام : مال وجهك…
اشراق”هزات عينيها بزربة” : ها ممالوش…
حسام : سول فيك خوك…
اشراق : علاش اش درت…
حسام”هز حاجبو” : علاش كيسول فيك غا لا درتي شي حاجة ؟!..اش درتي…ومالك كترعدي هوك اش واقع ؟!..
اشراق”بقات ترمس فيه شوي وهي تخنزر” : ونتا سوقك ؟!..وصلني فحالي لا بغيتي…
حسام”هز ايدو كان بغا يصمكها تا بعدت راسها” : والله يا مك ايدي ماتحير فيك…خدام عند مك انا…سدي فمك لا نوصل ليه بالي راك غايبة يومين وراني غا غطيت عليك وديك ساعة تفرجي ف سوقي كيداير…
صقرات مابقاتش عاودت ولات تفيييبري…زاد نيشان لفيرما مع وصلات جاب الله لقات توريا فبيتها شادة تيليفون وتحسب فسوايع امتى يجيو…طلعات تجرييي لبيتها لقات منار وريهان كيحفظو…لاحت شكارتها وسط البيت ومشات لماريو جبدات فوندوتان من المكياج الي واخذة من فلوس الي كان كيصيفط ليها خوها…ودخلات لدوش تجري تغطي ضربة على الله تغطى…
اما حسام بزربة طلع ومشا لبيت دخل لقا زكرياء شاد واحد دفتر وكيمشي ويجي كيحفظ…دخل عليه…
حسام : زيد طلق راني جاي فطريگ وتصوني عليا برزطت ليا كري…
زكريا : تعرفش تبلوكيها ؟!..دابا شوف نتا گداش وانا گداش…ولد خمسة وعشرين عام تايفك فيه ولد سطاش العام…
حسام”كيلولب فراسو” : هيييي هيييييي…نتا راك تحنت جوج فعمرهم ستين…حق ربي من الي فكيتيني من ديك خيتي وانا عمري نساها ليك…دابا هاك نمرة وقضي غراض الليلة نبات حاط راسي وناعس…
تنهد زكريا وشد من عندو نمرة زعما را خاااتر فهادشي وطلع ليه فراس وغا طريقة باش قاليه عطيني نمرة وملامح وجهو كيخليو حسام يرمش…سما الله ودوز نمرة…
زكريا(زعما مريم ههه) : الووو…”رقق صوته تا هز حسام حاجبو وحل فمو”…ختي معايا سكينة ياك ؟!..
سكينة : وي شكون معايا…
زكريا : احم..مهم انا درت واحد الغلط وخذيت نمرتك من عند خطيبي..سميتو حسام الهاشيمي كتعرفيه ؟!..
سكينة”صرطت ريقها” : ا اه كيفاش خطيبك ؟!..
زكريا”جناوح منخرو فرفرو زعما شربن والغيرة” : ويلي كيفاش كتسولي ؟!..مكتعرفيش اختي خطيب ؟ …خطيب احبيبتي جات من الخطبة وهي الوعد بجواج…انا راشمني وعاطي لبا الكلمة حبيبة..غير يخدم ونديرو العرس فالصيف…العرس الي غانولي فيه مرتو على سنة الله ونديرو الدخلة يااا حبيبتي الي تمنيتيها منو بلا حلال ومابغاش يعطيها ليك يا المدلولة يا الميتة يااا معدومة الكرامة…
سكينة : هيييي حدك تما…ابشوية اختي بشوويييااا عليك…حسام هو الي تبعني فالسبيطار ديال محمد سادس سيري سوليه هو الي بقا تابعني تا عطيتو نمرة وداير معايا…سيري سوليه كون ما لصق فيا والله مايشدها…
زكريا”شاف فحسام شوفة القت.يلة” : حسام ؟!..وعلاش ضلي تصوني ليه…
سكينة : صونيت ليه حيث داير معايا يجي نسهرو وبقيت كنتسناه…
زكريا : ومالو ندم ؟!…”حسام هز راسو كيشوف فسقف الي عمرو شافو وهز صباعو بدا يحسب فبولات ترية تم”..
حسام : بولة فهاد تريا ناقصة…
زكريا”نطق بصوته الغليض العادي بلا ميحس” : انا بغيتها تنقص ليك فالعمر اولد لحرااام…
حسام”شهق”…
سكينة : ويلي شكون نتا ؟؛..
زكريا”حنحن” : والو اختي هي خويا هذا…
سكينة. : دابا اش بيتي مني…
زكريا : تعطيه تيساع الى ماعطيتيهش ليه ندير شرع ايدي على رقبتي تنحرك ليك مجمر نخلي عباد الله تحير فيك مايعرفوك غاديا ولا جايا…مايعرفو ضحكك من بكاك…نهار ضحكي تبكي ونهار تبكي تنوضي تزغرتي…يا سكينة يا سخفانة يا ترمة دبانة…يا بنت فاطيمة…(غا قمر فسمية مها ههه)…
سكينة”شهقت وحطت ايدها على صدرها” : صافي صافي انعطيه تيساع غا بعدي مني ماديري ليا والو…والله تانبلوكيه وحق الله العار اختي راني يلاه تعالجت من سحر. جاب ليا الله خدمة فهاد سبيطار…صافي كوني هانية سمحي ليا…
زكريا : ودابا دوري مية وستين.تال سوق تنين وحطيه يتشمش لصحاب رموك عالله يديروه فبوك ويبردو ليك دودة الي فيك…ماتعطيوش تيساع لرجالة عيالاتهم ويييييييييكويك لما عطيتيه تيساع راني نطيح عليك باطل حار يحرگ يا وجه الشهادة بزور…
بالخلعة قطعات عليه ومشات بلوكات حسام الي قلب لقاها بلوكاتو وبدا يفرنس ويضرب فكتف زكريا الي كان كينهج مسكين دخل فالمود…هادي المرة تانية الي كيفكو من شب وحدة…
حسام ؛ حااااق ربي حاااااااق ربي تاتستاهل نديك لاحسن ريسطو وندورك نهار كامل…
زكريا”مشا جلس ودور عليه وجهو ” : مممم…
حسام”جمع ضحكة” : مالك…
زكريا : كون كنتي مهتم كون عرفتي مالي “نسا راسو وعاش فالدور هههه”…الخيانة تجري فد.م يگطعكم عليا رجالة..
حسام”هز حاجبو وبعد منو” : اهياااااااا زوك الرية (زكريا فاش كيفقصو كيقوليه زوك رية)…واااايااااك امسخوط واااياك را گالوها كاتبدا غا بالضحك…
وصل الوقت ومشاو….سدات حبيبة الباب وهي تدخل بدات كتهز فالماعن وتدي فيهم…اما هو مشا نيشان لبيت دخل لبالكون وشعل الكارو بدا يكمي…جبد لابتوب ديالو دارو يتشارجا حيث عارف عندو سهرة طويييييلة….جبد تيليفونو ودوز الخط دار بعض المكالمات…غسلات داكشي ونشفات وخرجت دخلت لبيتها نيشان…هز البيسي وخرج برا حطو فوق طابلة تم وبرونشا ليه بريز غير تما…وصلو داك برودوي الي هو عبارة عن مكمل غذائي…دور عنقو يمين شمال تا بدا يطرطق فيه وطرطق صباعو…وبدا يخدم فيه وفخدمتو…حاط حتى طابليط سامسونغ هي باش كيخدم…
اما هي دخلات ورجعات تكمل البريباراسيون…حتى وصلات الحداش وشي حاجة حساات بالعيا وهي تجمع داكشي ودخلات لفراشها…جاوبات ايوب الي كان مخلي ليها ميساج…
ايوب : القشة ولفتي هولاكو ولا ولفك…
حبيبة : ولفت مك…
ايوب : نعل بو حياة مك انا الي يه** دي الي مسولك..هاكي واحد بلوك معتبااار…
بلوكاها فالبلاصة تا خرجت عينيها…عارفاه صباح يديبلوكيها…نعسات وفاقت على صوت المنبه كانت السبعة ديال صباح سكتاتو ورجعات تكات تا خءات وقتها باش تستوعب وتوگض…نفضات فراشها وهي تمشي لماريو جبدات شنو تلبس ودخلات لدوش كيف ديما روتينها صباحي من غسيل وجه وحكان سنان…وخرجات مشطات شعرها وخلاتو مطلوق…لبسات حوايجها…اكتفات غير ب گلوص فالغوز خفيييف وبارفانها كيف ديما وواقي شمس…هزات غير صاكها .وخرجات باش تحطهم فوق طابلة وتشوف اش دير لفطور…يلاه حلت الباب حتى قفزت وشهقت من لقاتو جالس ومقابل لابتوب كيف بقا البارح صابح وحداه شي ستة الكيسان ديال قهوة كحلة تا ولا تحت عينيه كايبان غامق واخا عينيه اصلا حرشني وكحلييين وديما مغوبش…
حبيبة : ب بغيت ندير فطور…
بشار”حرك راسو” : ديري…
گفضات كمايم القميجة ومشات لكوزينة…دارت البويواغ يسخن الما الي عمراتو…وجبدات براد اتاي كبير دارت غير قياسها…دارت فيه اتاي كيف كتعرف يمكن هو الي كتعرف ليه…حلات ثلاجة بان ليها بيض و دوك مسيمنات الي فالثلج جبدات زوج…دارتهم يسخنو كيف وراتها ناديا دير…تا سمعاتو دخل البيت…بانو ليها كيسان بزاف القهوة ماعرفاتش واش تزيدو واحد ولا يديرو راسو…
دارت مسمن ف الطبسيل ودارت البيض اومليط بزبدة جابتها ليها ناديا….وجدات داكشي وخرجات كاتحط فيهم وتشوف فساعتها…كبات ليها اتاي وبدات تفطر بينما يخرج كملات فطورها ووالو ماخرجش….يلاه غاتنوض وهو يخرج لابس تريكو كحل وسروال كحل ديال ميليتيغ عامر جيوب وبروتكان بيج ريحة بارفانو كتضرب…الجو بدا يبرد مزيان حيث دخلو فالنص ديال شهر حداش…
حبيبة : ماعرفتش واش بغيتي قهوة ولا لا حيث شفت شربتي بزاف…”كتهضر ومكتشوفش فيه كيف العادة”…
بشار : ماشي مشكيل…
حبيبة : خاصني نمشي لافاك…
بشار : نوضي نوصلك…
حبيبة”بعفوية” : مغاتفطرش ؟!…
بشار”غمز بحنكو” : لا…(ماعندوش شهية ضل سهران خدمة وكيخدم فحاجة اخرى…)…
حركات راسها وناضت كتهز فداكشي…وهو يوقفها تا ترجع…
حبيبة : ميمكنش نخليهم ونمشي..حشومة يبقى الوسخ ورايا…
هز فيها عينيه بانت ليه كاتهز وغاديا…دخلات كوزينة حتى لقاتو تبعها هاز تاهو معاها…حطو داكشي فالكوزينة خشاتهم فالماشين تاتزيد عليهم وداكشي لاخور رتباتو بالخف…هزات صاكها وتبعاتو…قبل ميخرجو حتى مد ليها ساروت فيه بورتكلي على شكل شخصية فروزن الي كاتحماق عليها مصاوب بطريقة زوينة…كيفاش عرف الله اعلم…شافت فيه..
حبيبة : اشنو هذا…
بشار”غوبش بالسهرة الي سهر وضغط الخدمة معصب والحقيقة هاربة ليه غا ضاغط باش يوصلها” : ساروت دار…”جهد صوته” شدي عليا يرحم باك…
هزات حاجبها وخنزرات جاب الله مكيشوفوش حيث مخاري غا مع راسو…نزلو من العمارة وركبات حداه…ديمارا وتم غادي باتجاه لافاك غير وصلو قبل ماتنزل…
بشار : غادي تجي معايا ختي اشراق…عشية گلتي ماقارياش دونك نجي عليك هنا ملي نجيبها ونتحركو نتقداو…هانيا ؟!
حبيبة : اوك…
حلات الباب ونزلات غير دخلات كسيرا بجهد تا ضارو عباد الله يشوفو…وصلات 12 ديال نهار…كانو خارجين تلاميذ من الكوليج…خرجات وسطهم كاتضحك مع صاحبتها وتقهقه مع جات دور وهي تلقاه واقف بطومبيلتو جمعااات ضحكة وعينيه خرجو تا ريقها نشف…هبط زاج ديال شرجم داير نضاضر رايبان والگارو ففمو شاعل وحجبانو كايبانو من بعيييد مورمين بديك تخنزيرة مخلطة بتغوبيشة…ماعاوداتش الهضرة صقرااات ومشات لعندو قلبها بغا يسكت كاتخبي فالضربة الي مغطية فالفوندوتان الي فدار ماقشعوهاش حيث مخبية او حيث مكيديها فيها حد…ركبات حداه ويلمات عليه محاولة تبتاسم…
بشار : لباس عليك !!
اشراق : بيييخير…جيتي تديني ؟!…
بشار : ماتوحشتيش خوك…
اشراق : ههه توحشتك….
يلاه كاتضحك…اتا ضار بجهد وشدها من الفك ديالها قرب وجهها عندو تا غوتات وهو يبعد ليها شعرها على وجهها كايقلب فيها من الي هضرات معاه ما طرباتووش مارتاحش انها مزيانة..قلب عينيها حنكها لاخور وصل لحنكها ليمن بان ليه ماهواش صغر عينيه مزيان وهو يمد صبعو ومسح ليها مسحة بجهد تا تاوهت تحتها دااايز…غا هو شاف ضربة بحال نزلتي عليه شحطة لقلب…
بشار”غزز على سنانو ونطق بواحد البروووود خااااايب..” : ماتهضريش لزبور مي فحوايجك..هضري مگاد ونيشان شكون هاد ولد القح** الي مد عليك ايدو ولا نطحن عدو ربكم جملة…
يتبع
شاركنا رأيك في هذا الفصل 🌹