🌿 سأبقى أنتظر قدوم الربيع مهما كان الشتاء قاسيا🌿
تدخل رشيد
رشيد : هاااد الشهر يمكن غادير تمنطاااش عام .. قووول تمنطااااش عاام ….
شاف العريس فباااه مخنززر بمعنى علاش كذبتي عليييا وباه تدخل كايتمتم
حسن : انا حسابتني قلتي ليا عشريين ههه اوا بحال بحال الله يجييب غا الصحححة والسلااامة
الحاجة : لا لا الله يجيب غاا الصصصحة والسلامة زواج الصصصغررر زييين … تكبر معااااه وتولد وليداتها صغييرة تطلع كي صاااحبتهم .. ( كتشوف عند ولدها باش تقنعو عارفاه ضد فكرة لاج ديالها فاش سمع عشرين فما عساك 17 )
رشيد : هانا ديييت حفصة تاهي صغيرة … هاحنا تبارك الله البنيتة طالعة معاهاا بحال ختها باااقي عندها الجهد والخااطر تلعععب معاااهاا وتكبررها … الواحد يختار غا الاصصصل العمر راه مكيهمش ….
العريس : ( تدخل كيشوف فيه حيت بدا يحس بالدم سخن ليه فراسو كيهضر بينو وبين رشيد رغم انه صوتو مسموع حيت كولشي ساكت ) قلتو ليها شحال فعمري ؟
رشيد : لا لاا قلناهااا ليييها .. حنا العمر مكيهمناش كييييهمنا لي تهلا لينا فختنا .. حنا البراهش ماعندنا مانديرو بيهم كووون هاني .. قلنا ليها فعمرك 34 عام
الحاجة : لاااااا فعمرو غااا 32 الله يرضي علييييه … بااااقي صغييير غا عزيز عليه يشرررف فراااسو مع كيشتو هوو ولدي الكبييير ديما كيشوف راسو راه هو الكبييير .. انا راااه باااقي فعيني وليييدي الصغييور هههه
خديجة : تبارك الله شحال عندك دالولاد
ام العريس : عندي محمد رضى هاهو قدااامكم … وعندو خوه صغر منو حااتم هاادااك تغررب علينا مشااا صغيير عا شد الباك ديالو قرا فالسويد وتما بقا وتما تزووج بواحد نصرانية دار مستقبلو تما وفعمرو 28 عام دابا تبارك الله كانتسناو يهديه الاه يرجع شي نهار نشوفوه … اوا والصغيورة ديالنا هي وجدان هاهي خدات الباك ديالها وقرات داكشي ديال المعاونة دطبا ماعرت اش كيمسيوه
وجدان : هههه l’aide soignante اماما
ام العريس : هادااك وخدامة مع واحد طبببيب فعمرها .. اوا وعندها 22 عااام ..
خديجة : والله يييخليهم لييييك والله يكبرهم فعزك …
العريس بدا غير يتنفس ويحك فيديييه وباه حس بيه تععصب بدا يدعي غير يخرج طرح على خييير … وتدخل كيحاول يستملح
حسن : واللي مزوجين راه مزووجييين فالسماا قبل الااارض … الى كانو ان شاء الله فالمكتاااب مكاين لي يحيييدهم … حنا نتمناو الخييير يجينا الخيير .. حنا قصدنا شريييف وقصدنا دار الكبيييرة الله يجيبنا فالصواااب
بوشتى : اللهم امين … ممرررحبا بيييكم … حنا كيفما كتشوفو غا ناس داخلين سوق راسنا الهم ديالنا نكبرو هاد الولاد على طاااعة الله ونبي … جاااهدنا معاهم تاوصلناهم كلها بخيييدمتو الله يسسسر ليييهم … اوا ومروى تاهي الله يسسسهل عليييها .. كانو مكتابين لبعضياتهم مانزيدوكم غيرر دعاودي دالخييير .. راه كنعطيوكم الجوووهررر ديال الدار ديالنا … كانو ماشي فالمكتاب الله يييسهل عليكم ويسهل عليها …
حسن : هدااا هو كلااام الصوااب اسي بوشتى … انا راه والله ملي قال رشيد عندو ختو .. ررربي شاااهد الااررض تههزات بيا مكرررهتش كون دااااك الساع جيت .. لان عارف رشيييد ولد الله يعمرررها داااررر ومعقووول ورزييين … وعارفو ولد الناس ولد الاصل ودرويش بحالنا … قلت وااالو هذا هو الاصل لي عليه كنقلب واخا مكنعرفش البنيتة .. غا وجه خوها عطاني الخبااااررر …عالامات الدار على باب الدار
بوشتى : والله يجيبنا فالصواااب الحاااج …
حسن : محمد ماخصو خييير … بببخدمتو تبارك الله عليه و دوييرتو … كيف قالت الحاجة راه ماعندوش مع الزيكزاك … طراااان كااايمشي نييييشان وعزيز عليه المعقوول … مايخصصها معاااه خييير ….
خالد : والله يدير لي فيييها خييرر
رشيد : اسيدي لي فالمكتاب الله يآتيييينا بيها …. انا رضى يخفى عليا راه معرفة دسنييين .. كون تانا معرفتو ولد ناس رااه منقبلش .. راه نوارة وحدة لي عندنا حاضنيييين عليييها تانعرفو فين نحطوها …
محمد رضى تنهد وشاف عند باه بمعنى يلاه .. وحسن قاد الجلسة
حسن : اوا هو هذااااا …. ( هز ساعتو شافها ورجع شاف فيهم ) نخليييييوكم والله يييدير لينا لي فيها خيييير
بوشتى : خليييكم مزااال تعشاااو معانا
خديجة : عااايشك الحاااجة غا قهييييوة .. هاهوما ينوضووو دابا يححطووها البناااات
الحاجة : لا لا منصييببوووشاي خويت الدار تاني لايمشي يخلف ليا شي حد لتما .. الصواب ودرناه الشوفة راه تشااوفنا والله يججبببلنا التيييييسير …
رشييد : جلللسو اصااحبي غا كاااس دالقهههووة
محمد رضى : ( وقف ) وراك عارف لي كاين منحتاجش نعاود ليك ( مروى وقفات تاهي كتسنط لصوتو ملي سمعاتو كيهضر ) راك عارف حالة التجارة …
رشيد : اوااا اش غنقولو ليكم … الله يدير لينا لي فيها خيييير ….
محمد رضى : اللهم امين ….
زاد بشوية مور باه والحاجة تاهيا وقفات كتسلم عليهم ووجدان تاهي عنقات مروى ضااحكة وهو مد يدو حاني راسو سلم على لبنى وغزلان وحفصة وسلم على خديجة وحط يدو لوخرا فوق يدها نوعا من الاحترام للاج ديالها … وشاف مع مروى ومد ليها يدو وتاهي مداتها بابتسامة وخطفاتها بزززربة وزاد خرج مور رشيد نزل هو لول فالدروج وبوشتى وحسن موراه كيهضرو وعاد الحاجة ووجدان مع العيالات اما مروى رجعات جلسات فبلاصتها فالصااالة .. كتشوف فالطااابلة وكيسانهم محطووطين والحلوة فوق طبلة وكتشوف لبلااصتو فييين كااان جااالس … وكترد صورتو بين عينيها واخا مشافتوش بزاف وماوزناتوش ولكن دات فكرة … صصصوتو حسات بييه غلييض وكبيير وحرش ولحوح نوعا ما وديجا فاش كان كالس كل مرة كانت كتسمع منو بحة صغيرة كايسرح بها حلقو .. ماعرفاتش علاش حساات قدامو بالحححشمة ومدور بيه هالة دالاحتراااام .. بحال شي عمها كبييير …. مامولفاش تكون ولا تبغي شي واحد قد هاكا فلاج …..ثلاتيني …
رتاحت نسبيا ملي شافتهم مبشارة وشافت ماماه وختو وباه لي بانو ليها ناس مزيانين واخا فيهم الهضرة بزاااف والمعاودة ومو كتبااان قااااافزة وجريئة .. وختو تاهي كتبان عندها شخصيتها .. نفس داك الشخصية لي كتمناها تكون عندها .. تمنات لو تاهيا تزادت فهاد العائلة وكانت بلاصة ما واليديها يهضرو على شهيواتها وحلاويها يكونو تاهي كيهضرو على قرايتها وفاش خدمات …
خدات نفس عمييييق ودازت للشرجم ودوزات ريدو كتشوف لتحت … وهو يبان ليها كيهضر مع رشيييد .. وكتقول علاش ملي جا وهو ساااكت .. واش حشوومي ؟؟؟؟ ….
مو وختو تسالمو مع خديجة لي تاهيا برا هبطات معاهم تالتحت وركبو لور … وهو سلم على رشيد بيدو وركب فطموبيل وبقى يكلاكصوني على باااه لي باقي كيتهاود مع بوشتى … وزادو ركبو فطموبيل ومشااااو …
وهي رجعات ريدو ورجعات جلسات فوق سداري كتشوف فداك الطبلة ساااااهية …..
اول مرة تشوف خوتها كيهضرو عليها بحال هاكا ويشكرو فيها ومفتخرين بيها ؟ وفرحااانين لشي حاجة كاتخصها ….. واش هوما فالاصل بحال هاكا غير مكيبغيوش يبينو حداها ولا غير كيصبغو للعريس ؟ …. ولكن كانت بصح كتشوف محبة صادقة فعينيهم وفخر كبيير بيها … وهاازين راسهم بيها …
تنفسااات معمقة وغمضات عينيها وضورات راسها لشرجم لان اطلالة الصالة نفس اطلالة بيتها كتشوف فداك شجرة توت لي معمرة وراق خضرين … وغمضات عينيها مزيرة عليهم وتمتماات غير فنفسها ….
مروى : ياااربي .. الى كان فيه خير كتبو ليا .. والا مكان فيه خير بعدو عليا …. ياااربي ….
فالسيارة
محمد رضى : ( ضرب فالفولون بجهد تاقفزهم ممعصب وعينيه شاعلين) واااالكدوووووب علاااااش …. علاااش … ماااااتكدبش عليااااا
حسن : طريييق اولدي الطررييييق … والله ماااكدبت عليييك .. انا رااه قاليا العمر ديالها و ماديت ماججبت والله تاداير فباالي عندها عشرين … والله اولدي مافالنية ديالي نكدب عليييك … ورد لبال راااحنا فطريق اولدي نوووصلو لدار ونهضرو …. الله يررررضي عليييك
الحاجة : وااا رضى وااا ولدي راه بحال عشرين بحال تمنطااش بحال سبعطاااش .. الله يجييب غا لخييييير …. واااااالله يرضي عليك اولدي راحنا فطططريق صوووگ بشششوية قلللبي هاهو حدااا فمي
محمد رضى : ( كايشوف فيها لور من المرايا مغزف كولو حمر بالعصبية) واااش عاارفين اش كديرو ولا معارفييينش ؟؟؟؟؟ .. نتي باغا تزوجي ولدك وتغصبي بنت الناس فطفولتها !!!!! …. البنت راا قااااصر …. راه باقا صغيييييرة … من لووول قولو ليااا العمرر نيشااان كنت نفااريها مع السيد فالتيليفون ماشي تااانمشيييو عنهم للدااار وتحطووني بوووجهي ….. دابا بغيتو تحااشمونا مع السيييد وصااافي ياااك؟؟؟؟ نوليو دراااري صغااار !!!!
حاجة : آآولدي …. غا لابغيتي نتا تحاشم راسك .. حنا البنت عجباااتنا وعائلتها عجبوووونا …. نتا لي معععكس حنااا بااااغيييين
محمد رضى : غاتديها نتِ؟؟؟؟؟ … غاندي انا عائلتها ؟؟؟؟؟ هوما لي غايكونو معايا فالدار ؟؟؟ … واش عاارفييين قداش فرق العممر ؟؟؟؟ … مانهضروش تاعلى فرق العمررر .. كنهضر على وحدة قاااصر عندها 17 عام … انا كون كانت عندي بنت فللاج ديالهااا والله مااانزوجها بالله …..
حاجة : ودابا هي عائلتها مااقالو والو .. هي مقالت والو .. نتا مااااااااالك …
محمد رضى : فييين شفتيها نت مقالت والو !!!! … البنت طططلعات مزززنكة كانت كتتتبكي عينيها منفووخييين …. باش عرفتيهم مابززنيش عليها ؟؟؟؟؟ واش عرفتو على موقف تحطيت فيه !!!!
حسن : صاحبك رشيد كتعرفو حسن مني . .يبزز على ختو ؟؟؟؟
الحاجة : والله الى .. وهومااا كايشوفو فيها بحالا كايشوفو فالمراايااا … بانية مقطرة ليهم من عينيهم … واش حسابتك رخيصة عليهم يلوحوها .. راه تااا عرفوك نتا ولد الناااس … ايييه ماااكدبتيش البنية باقا صغيييرة ولكن اولدي الواحد يخاف كون كان حطها فيد شي سكايري ولا قمااارر ولا شي شمكار يتكرفص عليييها …
محمد رضى : وعلاش انا لي تحطوني وسط هاد المسؤوولية كاملة ، نكره حياااتي غاصب بنت فطفووولتها .. ( معلي حاجبو ) علاش ؟؟؟؟
وجدان : ( عيات بالسكات وتدخلات ) واالااااواه اخويا لاوااااه اشمن طفووولة والبنت راها كبيييرة راك شتيها كتبان كترر مني تباركالله … كون ماقالت عمرها 17 عام نعطيها ربعة وعشرين …. والله الى غير بغيتي تتعكس وتععصب على واااالو . .. ( بدات مها كتقرصها تسكت باش مايرد عليها حرو )
حسن : البنية زييينة مافيها ماايتعااااب … بلااا متعكس ليييينا …..
محمد رضى : واش انا هاضر على الزييين آلواليد ؟؟؟ الزييين رااه ضاااربة بيه الشتااا على براااا …. حنا داوين على الدوااام .. على المسؤووولية
الحاجة : وااصافي اولدي الله برضي عليك لا ماصوگ بشووية غاتسكت ليا قلبي … نوصلو ونهضرو ، الطريق مامعاهاش اللعب ……
رضى : (كتنهد ويضور راسو بالنفي ) والله تا غاااكتتخربقووو وترووونو بالله … قلنا ليكم ضبرو ….. واضبرو شي وحدة بعقلها قريية ليا فلاااج نعرفو نتوااصلو معاها .. هادي راااها طططفلة .. بنننية صصصغيرة … قاااصر …. راه مغاانعرفش تا كيييندير نتعاااامل معاها … نشري ليها طابلية بيضة نديها لليسي تقرا ؟؟؟؟ ندير ليها الگرينات ؟؟؟؟ وسسسكتوووو مااتجهلوونااااش
ضربو الطم غير ساااكتين …. وهو پاركا على ليمن .. خلا السينيال شاعل ونزل لتخ الباااب …. والحاجة قفزات وبقات متبعاه بعينيها غادي قاطع الطريق …
الحاجة : الشووووك ياولدي …. والله ماااتقوول ولدت غا الشووك ماشي الولد … عجااااجة …. ، دابا فين مشا هذا و خلانا ؟؟؟؟؟
حسن : ( شافو داخل لقهوة ) غايكون بغا غا قهوة …
وجدان : والله الى غي بغا يتععصب … كون ماجاش معانا هو حسن … تانشوفو حنا بعدا ونعطيوه تصويرتها ولا شي حاجة .. ماعرفتش علاش ماعجبااتوش
الحاجة : راه ماشي ماعجباتوش نتِ عاود … راه خاف غا حيت صغييرة مكتعرفيهش هو كيداير … علاش ماتعجبوش والبنت بحال البلااارة. … مااااعندو مايعييب فيييها …. غزالة
حسن : انا دخلو ليا دوك ناس فخاطري …. الله يعمرها سلعة
الحاجة : البنت تاهي كتبان راسها صغييير ونيت تكبر معاه وعلى يديه .. و هو كايشعل بحال ليصانص خصو شي وحدة دريوشة وبنت للاصل بحالها نيت … انا والله الى عجباتني هاد التزويجة ورتاحيت ليها .. تا مها كتبان درويشة والله واعلم …. داك مرت خوها لكبير صدقات عمتها جااارتنا ، ساكنة تاهي فالفيلين حدا القشلة … شووف لك الصدفة …
وجدان : وادابا مصاب غا رضى يبغي … خخخلعني كاع ….
ضربو طم هازين الهم تاتم جاي هاز فيديه القهوة وطلع فالطموبيل حطها حداه كايجغم منها وزاد ساكت كايهدن بيها راسو … تاقربو يصولو للدار وهي تنطق مو
الحاجة : اوا اوليدي ….. وادابا لاتخليناشاي كي الراس المقطوع …
رضى : ( شمر بنيفو وجغم من قهوتو ونطق ) واادابا راااه لي درتوووه راكم درتوه ماعمدي فين نرجع بلووور .. ملول ماتحاشموناش مع السيد ماشفناش العيب ديالو و كليان قديم …( حط القهوة ودوا بتحذير) انا نقولها ليكم من دابا البنت راها صغييييرة … تحملو مسؤوليتكم …
وجدان : والله اخوياا غير هاز الهم على والو كتبااان كبيرة فعقلها ومرزنة ومتبتة ووغزاااالة فالزين انا بعدا حمقاااتني
رضى : واش بقات فالزين نتي تااااني !!!! .. واش انا كون بغيت الزواق غانحير !!!
حسن : ان شااااء الله مااايكون غاالخييير والتييسير … نتا تبع رضاة الوالدين وربي ماايخيبكش ….
رضى : هاحنا زاااطمين معاكم فهاد الروينة دابا ماعندي ماندير … ولكن تحححملو مسؤووليتكم ليوم ولا غدا سيدة مايبقاش عاااجبها الحال ولا عاد تكتشف شنو هو زواج والمسؤولية وتخلع … ولا تنوض تقوليا فنصايص الليل ديني عند مااااما …. ( وجدان حبسات الضحكة ) داك سااع ماتلومونيش انا ….ديجا اصلاااا بانت ليا مخلووعة وطلعوها بزز … ( بتحذير اكبر ) تححملو مسسؤوليتكم ( هز قهوتو كايغخم منها راد لبال مع الطريق )
حسن : اسييييدي خرررج هاد السووووق .. كاااع لاخلعاتك هاد البنت قد هاكا … اسيدي العااام لووول جيبها لعندي تكلس معانا هنا فبببنسليييمان تاااوكااان تكبر واجي ديها ….
رضى : ( شاف فيه بداك الشوفة دمنيتك ومد ليه الطاس دالقهوة ) شد شرب القهوة الواليد شششرب القهوة … ( شدها عليه ) شد راك بنتي ليا كاتهضر نااعس واقلة … التهتريس هدا سميييتو ….. داااك ساع ديييها لييك نتا نيت .. لاش معدبني انا مخلي الخدمة وجاي تالبنسليمان ….
الحاجة : لاا اييييه الله ييخلف عليك اوللللدي الله يررررضي عليييييك … هادا هو الرضااا … تزوج باك ، ومك فالحياة
رضى : راك نتي فارعة ليا راسي نفرح بيك نفرح بيك …. فرحي بيه هو الول …..
حسن : والله يقلل حيااااك … البنت بعقلها نتا لي مااعندكش اولدي …
رضى : ( تنهد ومد ليه يدو ) خليتو ليا شي عقل ….عطيني داك القهوة الله يخرج عاقبتكم على خييير عطييني …
وجدان : وصافي اخووويا دير لينا الخاطر راه توحشنا نسمعو الشعبي مطلوق فالداررر ونجيبو عييساوة ….
رضى : لاتبعتكوم نتوما غاطلقي طيور الجنة ….
الحاجة : والله تااااعيقتي ….. غااا بقى تنفخ على اللبن .. تاايجي لي يييسكفوووو ليك …. والله تاااايطيرو بيها …
سعيدة غير شافتو تهدن شوية عاد رتاحت نسبيا هي ووجدان وتطلقات فالهضرة كانت زامتاها ملي كان معععصب واخا مولفينو كيشعل دغيا …فنفس الوقت دغيا كيتهدن الى متزايدوش معاه فالهضرة بزاف وخلاوه على خاطرو …
الحاجة سعيدة : مها قالك عبدية من جهة اسفي … كلهم عجبوني .. غا وكان داك مراة الوسطاني .. لبنى واقلة جاتني شوية حاسبة فراسها …
وجدان : اااه تانا لاحظتها هي وداك لي صغيرة لي عندها بنيتة … شوية حاسبين فراسهم لوخرا لا شششعبية و كتبااان درويشة …
الحاجة : كون ما كانت درويشة غاتسكن مع العكوزة ….
رضى : ( بدا يضور راسو ) بديتو من دابا ….
الحسن : مكتعرفش العيالات … ( كايشير بيدو), زيييد اولدي تالتما حدااا الدار وباركي …..
رضى : لا لا مكاين لاش ندخل نلقى داك خينا تاني مزير طريق مافيا مانتصادع… غير نزلو.. ( وقف طموبيل فراس الدرب )
سعيدة : هاء ؟ على فييين غاااادي … طططلع اوليدي غاترتاح جايب طريق ورادها ؟؟؟؟
رضى : آ لااا ….. منبعد الواليدة
سعيدة : كووون تسمع ياهاد المعكس
رضى : واش حنا كرهنا …. واحد الكاميو راه كاتسناني خاص نقطع ليه الشيك يمشي فحالو ( شاف لساعتو ) راني تعطلت عاد …. نزلو عليا دغيا …
حسن : واسيير اولدي الله يعاااونك شغالك هوما لولين ( نزل من طموبيل )
سعيدة : عااااايشك اوووولدي ….. غااا ندااااكرو شويش
رضى : واهضرنا معاك الواليدة حنا براسنا محتاجين نطلعو نرتاحو …. ماكرهتش ….
سعيدة : اوا رررجع غدددا نديييرلك الحححريرة ياك كتعججبك رجع تعشى معانا
رضى : ( تكى عل لكرسي كاتجبد ويلوي فعنقو) موووحاااال …
سعيدة : ( تنهدات ووجدان كتنزل ) اوا اولدي شغنقووولك … الله يقدرك على شغااالك … والله يييآتيييك لي فيييها خيير وفين ماحطتي رجلك تررربح والله يجعل فهاد البنت الخير والتيسييير ( كايشوف فيها من المراية ضحكاتو بدعاويها لي مستفين) تدخل تانتا لدويرتك وتلقى المويكلة طااايبة ودنيا مجموعة
رضى : هه !! اودي اوالدة ملي كاتبغي ترطابي راك كاتولي زبدة ….. ههه سيري سيري دخلي لدارك خليني نمشي لشغالي
سعيدة : هاااانا …طريق سلاامة صوك غااابشوووية
رضى : مارانيش غادي لداكار ( أشار بيدو ) ها المحمدية غافضووورة
سعيدة : ( نزلات من طموبيل ) واااخا هاكاااك رررد البااال راك كتشوف هاد الكسااايد لي ولاااو …
سدات الباب وجات عندو لزاج وتبسمات وتاهو تببسم ليها عارفها فاش كتبسسم هاااكدا وتبحلس
سعيدة : اوا ….واا رررد علينا احبيبي …. فوقاش نمشيو نخطبو البنية .. ها ؟ والله تاااا البنية بلااااارة وجها ببض كي الحليييب و ضحيييكة و وافية و عااامرة و فتية … غزالة
رضى: ( كايتهد كايدوز يدو على وجهو ) فتية !!! . …. الواااالدة …. انا كون كنت نقلب على لحليب ولي وافية وفتية كنت نطلع لبلاد عند عمي نشري بگرة حسن ليا …. انا ماباغيش بگرة .. باغي لي نشركو معاها هاد الحياة ونتسفدو منها وتستفد منا .. اما هادشي لي كاتهضري عليه نتي كاايبقى غا ثناويات كانردو ليهم لبال تاااااالمنعد ……
سعيدة: ايييه كلامك سمن وعسل … ماقلنا والو .. ولكن راه ختارينا ليك بنت الاصل اوولدي … تعيا ماتكون البنت قبيحة الاصل كاااايجرها ….والى كان الاصل خايب واخا تكون البنت مانعرف كيدايرها اصلها تاني كايجرها لخيوبية …مكااااين ماحسن من بنت الاصل تحط عليها الراس …. سمع لكلام ميمتك
رضى : وااايكون خير يكون خير خليني دابا نمشي راني مزروب والله الى راه كايتسنى فيا حشومة
سعيدة : واقوول ليا عااا فوقاش نمشيو وسييير …..
الحسن : ( قرب تاهو ) نمشيو لحد جاااي … ؟؟؟
رضى : ( تنهد كيحك فلحيييتو كيشوف لتحت كيفكر ورجع شاف فيهم ) هاد الاحد مششغول … عندي شي سلعة ضروووري نجيبها من كازا ….
الحسن : اوا نمشيييو فوسط السييمانة ؟؟؟؟؟
رضى : الا والو فوتو هاد خمسطاش ليوم هاااادي عامرة شيكات راني مبررررزط
سعيدة : اوا وفووووقاش ؟؟؟؟
رضى : خليو تالفان ديال الشهر نكون مسالي …
سعيدة : اوا سيييييير من هنا عشرين يوووم … يدخل علينا رمضان … لااااا بزاف
رضى : رمضان باقي ليه شهر ونص الواليدة …
حسن : وصااافي هو هاداك … نرصيو معاهم سيمانة لخرا ديال هاد الشهر .. ندير معاهم نهار الاحد
رضى : وضرووري هاداك هو نهار لي عندي …
حسن : وهانتا اووولدي .. دير الخاطر لباااك .. عيييط نتا لرشيييد وقولها ليه .. عطيه الكلمة .. وماجاااتش نعيييط انا بحالا مبززين عليييك .. والااا تاني .. لازم نتا تعطي الكلمة دالخطبة … وسيد راه معرفتك ماجاتش …
رضى : ( بدا يديماري باش يمشي ) واااخا الواليييد واااخاااا …
يلاه غتنطق تاني مو هوما يسمعو تيليفون كيصوني فطموبيل وهزو كان نوكيا بيل ديال الخدمة
رضى : واسي براهيم ….
– واش باااقي معطل اسي ررضى والله تااا تابعنا طريق تالمراكش
رضى : انا جاي انا فرطرييق …. انا جاااي .. بداااو تنزززلو راه تما دراااري تانجي يلاااه انا غييير حدااااك ….( قطع عليه وشاف عند باه ) يلااه الله يعااااون .. يكون خير
سعيدة : ششوووف اوووولدي
حسن : (جرها) خخخلي سيد يمشي لخخدمتو ياالاااه
سعيدة : اااصببررر عااايشك .. وشوف اولدي .. كيغانديرو فالخواتم ؟؟؟
رضى : ( رد شعرو لور كايسوط) واااااايلي باقااا عشرين يوم و كتهضري ليا على الخواتم ونا راسي عااامر ليا غا بالمساااامر.. سييري طييبي عشششاااك سيري …
سعيدة : ونتا تعرف انا قلت غا نقضيو الشغل على بكري نتا راه كتتعرم عليك كولشي فنهااااررر وكتوحل
رضى : راه قتليك سيري تصاوبي عشاااك .. سيفطيلي وجدان دغيا راني مزروب …
مشات مو وباه تاتمات جايا عندو وجدان كتجري تكات ليه على زاج
وجدان : هانا اخويا شنو
رضى : ماخديتيش نمرتها ؟
وجدان : ديال البنت ؟؟؟ لاااااا ( عضات على شفتها بأسف) والله تااانسينا …
رضى : وباش غانتفاهم انا مع هاد البنت؟ غايدوزوها ليا فالاخبار !!!!
وجدان : نرررجع داااابا ناخدها ليك
رضى : اجلللسي بعقلك .. صاافي مكاين لاش … ( تكعد جبد بزطامو من جيبو لور ومد ليها فلوس ) ششدي
وجدان : (باحراج) لا لااا والله مكااين لاش يلاه داز ليا صاالييير
رضى : شششدي دغغغياااا راني مزروووب
وجدان : ( شداتهم كتشوفهم شلاا زرقااات وطارت من زاج عنقااتتووو ) شششكرااااا ….واش تبغي نجيب ليك نمرة غدا تكون عندك
رضى : راااه قتليييك لااااا دابا .. . صافي هضرنا ..
زاد كسيرا مشا ووجدان مشات فرحانة بداك 3000 درهم … وهو شد طريق لوطوروت ..
فدار مروى ..
نزلات حيدات عليها داك القميص ولبسات بيجامتها خفيفة وهزات شعرها كعكة لفوق وخرجات جلسات معاهم فصالون دايرة مخدة على رجليها وغير ساااهية وهوما كيديرو الكوطي ومسكتوش من الهضرة …
خديجة : ماابيييهاش كتبان قويفزة ومطورة وكتبان معقوولة والله واعلم
غزلان : راه قتليك دار عائلتها وخواتاتها راهم جيران عمتي … انطلع دابا نسووول عليها نجيب ليك مصارنها
خديجة : تي لا عمتك غاتسول علاش كتسوولي وانا باغا نخلي الرمانة مستورة .. ختي عيييطات دابا عاااد والله ماقلت ليها شي حاجة تاوكان يردو الناس ونشوفو ساسنا من راسنا وتكون الخطبة عاد بنادم يهضر ….
غزلان : وقلت غا نسلت الهضرة بشي طريقة … نقول ليها تلاقيتها فالحمام و كدا …
خديجة : ومتخلييييهاش تحس … ماعرفنا واش هادشي غيكمل ولالا ويبداو يطلعو على الدرية فالهضرة
حفصة : اوا امروى .. اش بانليييك
مروى : ( شافت فحفصة ورجعت شافت فماماها ) ماعرفتش … ناس مزيانين .. باباه ضريف باين زوين على وجهو … مو وختو منقدرش نحكم … ولكن كيبانو ضريفين … واخا كولشي هاكا كيبان فلول …
لبنى : مانتي سويييهلة يالعويفية ههههه
حفصة : خلينا منهم ….هووو .. هو ….واش عجبك ؟؟ كيييجاك
مروى : والله ماشفتو بزاف .. ولكن ماابييهش عااادي رااااجل …
غزلان : اويييلي على عااااادي ؟؟؟؟ اختي غزاااال …
خديجة : خليييها خليييها هادي باغا ليك داك زييين ديال داك مسلسلات لي كتشوف ويكون داير طانكة فنييييفو ومعععكر .. ولا بحال داك شناوا لي تقيل تفرج فيهم … هذا ابنتي راااه راااجل حححرش بكتااافووو .. لبسة لبسة والوقفة وقفة والهضرة هضرة ماعندك ماتعيييبي .. مزيناتو نسيب …
حفصة : والله الا فاش كانت كتسلم عليه فاش كان غااادي الى كااايبااانو موااااتييييين … هي زوينة هو زوين جاو فنين …
لبنى : وشششتي كيفاش حشوومي ماهزززش فينا عينو كيمد يدو راسو فلرض
غزلان : وبنادم وااعي ومححترم وولد عائلة … كيبان مررربي مزيان … ولكن رربي واش شفتو مرة مرة كيكان كيشوف فيها
لبنى : واااايييه كان كيوزززنها ياختي واخا داير راسو فلرض كيبانو عيييينيه كيدورو بحال الرادار …
خديجة : انا شوووية لي ديرونجاني .. هو فاش قالت العمر ديالها بحالا تتخخخلع بحال تبدل فيه اللون … من تما وهو ماشي على بعععضو را كنت حاااااضياه
غزلان : اوا عادي راه شاف راسو هو كبييير … قال يمكن يكون عندها شي مشكل .. شتيه سول رشيد قاليه واش قلتو ليها عمري
حفصة : ورشيييد زايد ليه عماين وهو بااقي صغير
يلاه كيهضرو هو يدخل خالد وطارق جلسو وتبعهم بوشتى ورشيد لي كانو فالقهوة تاهوما نفس الموضوع لي جامعهم
خالد : لا لاااا الناس باااينة عجبهم الحال .. على فييين يلقاااو حسن منا …
رشيد : اودي كااع ارتاحينا لهاد تزويجة ولهاد الناس ( ضرب فرجل مروى برجلو ) وهاااانتي … تقولي خوتك مكيعرفوش فين يحطوووك ….
طارق : او اشبانلك امروى ؟
مروى بقات شحال غييير ساهية ماقداتش كاع تجاوبو
بوشتى : خليوها على خاااااطرها …. تتتفككر بشوية عليها مزربانينش
رشيد : وتخاف الناس يعيطو منعرف باش نرد
خديجة : خليها تفكر هاد نهار على خاطرها وانا نرد عليك فتيليفون … خليوها تبني وترررييب دابا..
طارق : انا ناس عجبوووني … تالولد مأدب ومخخحلق ومحترررم … وبرررزقو … ولايني الشوار شوارها .. هي لي غاتعيش معاه ماشي حنا …
لبنى : اوا الله يجيب لي فيها خير .. طاااريق واانووض راه غدا دراري قاريين يالاه ندوش ليييهم يلاه ندير العشااا من قيبلة هوما يتمرغو فالتراب لتحت غالقاونا ملهيين دارو ماعليهم
غزلان : كون تشوفي دياالي محمد غنخشيه كامل فالمصبنة … يسرى بعدا كتككلف بيها مروى هي لي كادوش ليها
خديجة : جللسو تاتعشاااو
لبنى : لا لا اخالتي والله الا شلااا تابببعني غا دوش دهادو كيسسسخفني ….
رشيد : تانا غاانووض باقين شي فاكتورات كيتسناوني … يلاه خليناكم على خيييير .. الله يجيب لينا لي فيها التيييسيير …
خرجو مشاو رشيد طارق وخالد طلع لبيتو وخديجة وغزلان دخلو كيغسلو مواعن الكوطي وباها شعل تلفازة كيتفرج وهي بقات شحال غير ساهية حداه فلخر حطات المخدة ودخلات لبيتها سدات عليها ومشاات تكمشات على واحد الفوطوي صغير عندها تحت الشرجم وربعات يديها كيف العادة على الكادر دالشرجم وحطات راسها كتفرج فالغروووب .. ودماغها مرة يسول مرة يجاوب مرة يحيير …..
🍃 اليوم التالي
جالسة مروى على طابلة الفطور .. شادة فنجالها دالقهوة كيف العادة وساهية …. مابقات كادير تاحاجة اخرى من غير التفكير .. وغزلان حداها كتفطر فولدها وبنتها و ماماها كترد على خوالاتها فالواتساب باوديوهات … كتهضر معاهم وبالها مع مروى لي ساااهية تامن كاسها برد فيديها … سالات الاوديو وحطات تيليفون وشافت فيها
خديجة : وامروى … وابنتي مقلوبين ليك البابر ؟ ( علات غزلان عينيها فيهم )
مروى : ( تنهدات وحطات الكاس ) مقلوب ليا راسي هاد الساعة …
خديجة : تا دابا مادرنا فطاجين مايتحرق .. مبغيتيش ابنتي ماخصنااش هانتي فدار باك معززة مكرمة حنا مكنديروش عليك السيف .. بغيتي تزوجي راه هدا هو الراجل … بغيتي ابنتي مزال تفششي على واليديك .. لامهزك هاد الكتف يهزك لاخور ……
مروى : ( خدات تنهيدة عميقة وشافت فغزلان باغا تبدل الموضوع ) شنو نديرو لغدا
غزلان : خوك قالك ديرولنا العدس غيجيب معاه الحوت …
يلاه غترد عليهم خديجة ينوضو يعجنو وهوما يسمعو السرسار ديال الباب وخديجة علات حاجبها كتشوف فغزلان
خديجة : شكون جا ؟
غزلان : ( علات عينيها لساعة كانت تسعود ونص ) عمي راه ناعس …. خالد راه خدام مغيخرجش هو من البيرو دابا …..
يسرى : ( ناضت كتجري ) انمشي نشوف من الشرجم …
مشات يسرى للشرجم دالكولوار طلات على التحت شكون كيصوني وهي تجي عندهم ..
يسرى : جات .. دااااك … داك .. ل … لمرا لي كانت البارح مع عمو العريس ..
مروى : ( علات حاجبها ) شكووون ؟؟؟
غزلان : المراة الكبيرة ولا المراة الصغيرة ؟
يسرى : لا الصغيرة
خديجة : ويلي ويلي .. نوضو نوضو خملو هاد الحالة والفطور باقي على طبلة نوضوووو .. سيري ابنتي حلي ليها جري … حيدي نتي داك جورنال دبااك من تماااا نووضو دغيا جمعو( مشات يسرى )
مروى : علاش غنجمعو وقيتة الفطور هادي وحنا كنفطرو اصلا ..
غزلان : ( ضارت موراها كطل على الصالون ) دنيا مجموعة وهادي غا طبلة الفطورر راه تسعود هادي ….
خديجة : نوضي طفي على داك المقراج درتو تعجنو بيه يبقى يصفر علينا تما … ( بدات تقاد فولارها ومشات باتجاه الباب تستقبلها كتحيد فصبابط و صنادل و دخلات جفاف لي كان فلباب لدوش ومروى مشات للكوزينة وهي كاتسنى فدروج تطلع وكاتشوف مع جنابها واش كولشي هو هاداك )
غير شافتها طالعة فالدروج تبسمات ليها ومشات عندها كتسلم عليهاااا و مشات تا غزلان لاستقبالها وخرجات مروى من الكوزينة سلمو عليها وزادو داخلين
خديجة : ازييييدي والله ماتحيدي مزااال ماااسيقنا .. زييييدي
وجدان : ( حيدات صباطها ) لااا ماعليييش … ( مدات ليها مروى صندالة ولبساتها ) ياكما فيييقتكم جيت بكككري
غزلان : لا لاااا مرحبا ليك …. ( كتشير ليها للصالة ) زييييدي مرحبا
وجدان : خلييينا نجلسو غييير هنا ….
جلسات فالصالون فين كانو يفطرو وغزلان غير كتشوف فيهم كايتسائلو علاش غتكون جات ؟ … وهوما جلسو وهي مبتاسمة
خديجة : قهوة ولا اتاي ابنتي ؟
وجدان : والله مااارديتها عليك اخاالتي … دزت بززربة هادي طريقي نمشي للعيادة باش منتعطلش تاني على الطبيب … البنت لي معايا غتكون حلات دابا …..
غزلان : اوا لا ماهي مجية فطري معانا بعدا .. حنا مزال كنفطرو تعطلنا شوية هاد الصباح فنعاس
وجدان : اوا هذا هو الوقت .. ماما خليتها باقا ناعسة .. ( شافت فمروى ) اوا العروسة ديالنااااا … كيف صببحتي ؟
مروى : ( كتشوف فماماها وشافت فيها ) لااباااس الحمد الله …. كيف صبحتو نتوما ؟
وجدان : لاااباااس …. ( شافت فخديجة ورجعات شافت فيها ) الا ماكان زعما تاشي مشششكل .. ماما بغات نمرتك باش زعما نسولو فيييك …. الى ماعندكش شي مشكل .. جيت غا ناخدها ونمشي لخدمتي باش منتعطلش …. وسمحولي على هاد المجية
مروى : ( كتشوف فخديجة لي بحالا حسات لمن غاتعطي نمرة وشافت فيها ) لا ماعنديش مشكل …. بالعكس .. ا انا غنجيب تيليفوني حيت ماحافضاهاش
وجدان : داااكوووغ … ششكرا
ناضت مروى باتجاه بيتها ووجدان بقات مجمعة معاهم .. مشات لتحت مخدتها وجبدات تيليفونها ودخلات لبلاصة الواتساب تجبد نمرتها وهي تحس براسها رجعات عامين لوووور … لاول نهار وقف عليها فباب العمارة دخالتها وطلب ليها النمرة …. لهاداك النهار لي دخلاتها فتيليفون وكان اول راجل غيصوني عليها …. كيفاش غتقدر تشوف راجل اخر كيصوني فهاد تيليفون من غيرو .. وتهضر مع واحد اخر من غير انور !!! … للحظة حسات بغصة فففحححلقها كاااتحرقها وقلبها بدا يضرب بجججهد ودموع سالو على جفوووونها وهي كتفكرو وكتفكر ذكرياتها معاه والفرحة لي كانت كتحسها معاه وشحال كتبغيه … كيفاش غتقدر تعطي نمرتها لواحد اخر وعائلة وحدة اخرى … من غيرو هو ….
تلاحت على سريرها كتبكي وتننخخخص بلاااا شعور منها وقلبها كيتزير فضلوووعها .. مكرهاتش كون كان معاها وكون عمر طرا هادشي مكرهاتش كون كانت غير كتحلم وهوما باقين بجوج ويصوني عليها دابا يقول ليها شحال هو توحشها وبلي قريب يجي يهضر مع دارهم وغيتزوجو ويحققو كاع دوك الاحلام لي كتباات تحلم بيهم معاه ودعائها لي تبات تدعيييه فخاطرها وفسجودها وعلى صلايتها …. علاش ماشي انور علاش !!! هذا هو السؤال لي كتقولو وقلبها كيتقطع وكتشههق بالبكا .. اما وجدان غير كتشوف للبيت لي دخلات منو وشافت لعندهم
وجدان : واش مروى باقا معطلة حيت راني مزروبة شوية
غزلان : ( بقات كتمتم )غاتكون .. غير .. غير توضر ليها تيليفون راه ديما عندها مجلي .. انا غانعطيها ليك ….
ناضت غزلان لكوزينة تجيب تيليفونها و خديجة كتشوف لباب البيت كتسناها وترجع تشوف لوجدان تاجات غزلان وقيدات ليها نمرتهاا
غزلان : هي هااادي راه مخدمة بيها الواتساب …
وجدان : ( قيداتها عندها ووقفات ) شششكرا ربي يخليك …. راك عارفة الى بغات تعيط ليها ماما وصافي
غزلان : عارفة لي كاين احبيبة عااارفة ….
وجدان : انا غنخليكم دابا غنتعطل على الخدمة .. سلمو على مررروى نشوفوها فساعة الخير
غزلان : مرحبا بيك الحبيبة فكل وقت وعاودي عندنا المجية
خديجة : سسسلمي على الحاااجة بزاااف وعلى الحاااج …
غزلان : ضرووري .. شكرا … نهاركم مبروك
مشات معاها غزلان تالباب ونزلات معاها تالتحت وصلاتها اما خديجة مشات حلات الباب على مروى لقاتو مسووورت وبقات كتدق
خديجة : مروى … واا مروى … مروى
مروى : ( خدات نفس ومسحات دموعها وحاولات تنظف صوتها ) ا انا .. انا خارجة اماما .. انا جايا
خديجة : اويييلي دخلتي وسكنتي البنت بقات غاكتشوف
مروى : ا انا جايا
ناضت كتمسح دموعها وتنش على وجهها وتحكم فراسها وغزلان طلعات وهي تشوف فخديجة
غزلان : ( كضحك ) قاليك باغاها لماماها هههههه
خديجة : اوا خليهم على الله الى عيط ليها ترتاح ليه شوية …. ليهودية دخلات وسدات عليها البنت غتقول غاهربات منها
غزلان : جات على النمرة هاهيا دااااتها .. ومروى شوية بشوية دابا تولف مغتلقاش ماحسن منو …..
خديجة : وازيدي زيدي نجمعو هاد الطبلة العشرة هادي البنت دخلات على الروينة …..مرررررروى .. واخرجي عليا من تما دددغيااااا .. يااااا على بنت …..
انهمكو خديجة وغزلان فشغالاتهم … ملي هدنات راسها مزيان مروى خرجات عندهم وماماها غير شافت عينيها منفوخين بدات تنهد وكملات عجينتها .. وغزلان كترد الغدا اما هي مشات للتخمال وتسياق … وصلات وقيتة الغذا وتجمعو على طبلة كيتغذاااو مع الهاراج ديال التلفازة مشعولة على الاخبار كيف ديما … اما هي غير ساهية كتلوي الخبز ففمها بلا شهية وهوما كلهم ملاحظينها ومباغيينش يحكرو ….
عند رضى …
جالس فالبيرو ديالو … كان بيرو صغير عامر بضواسا والوراق والصنادق وكراطن فجنب وسكوتشات و الة حاسبة على البيرو وكرافوزات و الطابع و لي كارط فيزيت ديالو و محطوط على للبيرو يومية ديال تلت سنين قبل من شركة ديال كولورادو عامرة غا بتخربيش دستيلو كايجربو فيها .. كولشي كان مشتت …. كان بيرو فطابق التاني و قدامو حيط بالزاج كايطل على للتحت …. كان كايشوف الفاتورات ديال الناس وتايحسب بكالكيلاتريس تاسمع عليه تعياط وناض للزاج ودوز الزاجة بسبيكة دالمنيوم كايشوف عنهم لتحت
رضا : اش كاين …
– السيما وصلات نزلوها دابا ؟؟؟؟؟ ولا تاتنزل تفاهم معاه
رضا : انا نازل انا نااازل ..
مشا جهة وراقيه هبطهم للمجر سد عليهم وخرج نازل فدروج حديدين … خطاويه فيهم كاتسمعو فالمكان كامل … كان بلباس العمل سروال دجين كاع مغبببررر و تيشورت كحلة لاصقة على كتافو العراض وشعرو مربل فوق منو كاسكيطة …ونزل لتحت خرج لبرا كان كاميو ديال السيمة حدا باب الشركة ونزل عندو الشيفور سلم عليه وهو كيشوف مع السلعة
رضا : ياك البروميااار .. وانلقى ثاني الدوزيام بحال داك المرة غاانقودو السوايع … طالب اصاحبي سيمة مسيفطين ليا الفورص. غانصاوب السفنج
الشيفور : ( كيضرب فالسلعة ) والله تالبرووميار اصاحححبي .. كون هاني .. داك المرة راه الولد معرفش شنو شارجا ليك …. راه جاياك سلعة اخرى غتوصلك غدا داكشي ديال الضو .. انجيليك سلعة جدييييدة ديال الفريع …
رضا : ( كيجبد دفتر شيكات ) انا راه تفاهمت معاه على جوج دالمليون …
الشيفور : انا قاليا جوج وخمسالاف
رضا : قوليه يمشي يقاد الخدمة ديالو مزيان .. ويعاود الحساب
الشيفور : واااخطينا اسي رضى
رضا : والله لازدت ريال … لاقاليك شي حاجة قوليه يعيط ليا …بايع ليا هنا البيترول .. راه غا سيمة هادي …. داك مرة مسيفط ليا سلعة ددوزيام بثمن دالبروميار وعاد يهضر … ( كاكتب فالشيك ) واخدمو معانا شوية دالمعقول … ( قطعو عطاه ليه وجبد من جيبو لور الف درهم ) ها المازوط …
الشيفور : والله يخلف .. واشنو نزلو دابا ولا ؟
رضا : ( شاف عند الخدامة ديالو ) عرفتو شغاديرو … خويوه فديبو لوراني …. هاد السيمة البيضة مواقفش عليها دابا .. تاتسالي هادي لي هنا ورجعوها بلاصتها …. ضور اسي احمد هاد الكاميو لجيهة لورانية غينزلو الدراري تما .. هنا مبلوكية الدنيا مزال ماخرجت السلعة ….. ( سمع الفيبرور فجيبو بلي وصل ميساج وجبد التيليفون سكتو حيت كيهضر ) وااا سماعيييل عيييط لدوك درااري لاخرين يعاونوكم ..
اسماعيل : امااتيبغيييوش معكاازين هادوك .. اسمعتي لاخور لبارح قالك عطيوني خدمة مافيهاش الثقل
رضى : خااارج ليا من التاالت وباغي خدمة مافيهاش الثقل منين غانجيبها ليه انايا … رغبهم اصاحبي قوليه غيخخلصوكم.. ( كايشير بصبعو لكاميو) الظهررر منلقاش شي خنشة مزال هنا … تعاونو ساليو دغيا …..( شاف عند الشيفور ) قالك البطالة مالقينا فاش نخدمو ….كنقلب عليهم انا بالريق الناشف مكالقاهمش يجيو يهزو السلعة …. عاااطينها لفشوس كايتسناو البيرو وستيلو وهوما الكاطريام ماعندهمش …
الشيفور : وساااعف اسي رضى راه ولا ينادم دابا كايطلب غاساهلة الخدمة مووووجدة غا لي بغا يرخي راسو …. صافي هاهوما خمسة ديالك .. جوح هاهوما معايا نزربو على هادشي
رضى : ( كيحل التيلفون ولقاها نمرة ديال ختو وحل المسج كيقراه ) انا غانخرج دابا لمحل مانا كون عاونتكم .. ضور ضور احمد الكاميو سربيو دغيا
ركز مع الميساج كايقراه ” ها النمرة …. تاتحط حداها قلب حمر ههه …. ومتنساش راه سميتها مروى ههه “
شااف للميساج وهي تبانليه سيفطات نمرة تبسم بجنب شفتو على شقاوتها واخا قاليها ماتمشيش دارت لي فراسها … ورد تيليفون لجيبو كيشوف فالكاميو كيديماري وباقي كيهضر مع شيفور
رضا : حط ليه الراس تحت الشجر باش ميسخنش ليك .. ها دراري غيتعاونو والظهر تشد الطريق ان شاء الله
الشفيور : على تيييسير مولانا ….واااضبر علينا فالغدا
رضا : تاااا سسييير اصاحبي واش انا موالف نخليك بجوووع … جايني بالهييف ديالك الاطييييف
بقى يضحك الشيفور …. تامشا هو رجع دخل وبقى من هادي لهاديك وطلع ثاني كيكمل الفااتورات ديالو يالاه غيخرج لمحل لاخر …تفكر تيليفون …. وتكا لور فالكرسي وجبدو وبدا يقيد نمرة وهو يسمع الباب تحلات ودخل واحد من الخدامة ديالو
– عيطتي ليا ؟
رضا : ( حط تيليفون و مد ليه جوا ) غانمشي لمحل وغاندوز لدار مايتبعنيش شي واحد فيكم بشي تيليفون … الفاتورات لاسولوكم عليهم قوليهم غدا يوجدو و سدو مع السبعة … ها الفلوس فالجوا عطي لدراري لوخرين ميتين درهم لواحد وعطي لهادو ديالنا مية …. وجيب ليهم الغذا على الطيب انا غنمشي ….
اشار ليه براسو وهز الفيست ديالو نفضها من الغبرة ونزل فالدروج كالبسها … مشا لطموبيلتو لي كانت فورد بجوج بلايص لقدام ولور خاوية كايهز فيها السلعة …. هي لي كيخدم فخدمتو كانت عامرة بالسيطيرنات دالما … بدا يلوح عليهم السمطة وزيرهم مزيااان مع جناب الفورد ومشا بيها تالواحد من المحلات ديالو ديال الدروكري وحطها تما وخرجو الخدامة ديالو ينزلو داك السلعة وهو دخل لكونطوار جلس حدا البيسي كانت تما واحد البنت محجبة عشرينية كونطابل ديالو غير شافتو جات سلمات عليه وخرجات عاد هوو جلس تما حدا البيسي كيشوف اخر ماقيدات تما وشنو تباع ….. تا دخل واحد الولد جابيليه قهوة …. كايجغم منها ويفيرفي …. تاتفكر تاااني التيليفون ….وبلي داك نمرة لي كان كايفيد فيها خلاها فالنص …. ورجع بلور على الكرسي يد كايجبد بها التيل ويد حيد بيها الكاسكيط لاحها وكايمشط شعرو بيديه للقدام لي رقد ليه تحت الكاسكيط … كمل التقياد د النمرة ديالها عندو كاتب عليها سميتها وسها تيتفكرها البارح …. حس بلي احسن حاجة دارتها ختو هي جابت هاد النمرة … على الاقل بعدا غير يعرف عقليتها و يتأكد واش مبززين عليها ولا لا ويسمع جوابها منها هي ماشي من خوتها …. هي معامن غيعيش ماشي مع صاحبو رشيد … قيدها ورد تيليفون لجيب ودار اخر نظرة على البيسي شاف بلي كولشي هو هاداك .. عاد خرج لقاهم نزلو السلعة وجلس كيوصيهم وخلا الفورد تما ومشا بجيهة الاودي ديالو لي كتكون مباركية حدا هاد المحل طلع ومشا ديريكت لدارو … باركا ….يالاه نازل من طوموبيل بدا يصوني ليه التيليفون دارو فوذنو غادي لجهة السانسور دالاقامة فين ساكن
رضا : واااصاحبي غنبقاو نعاودو الهضرة .. حميير اصااااحبي …. واااخويييو ليها بلاصة دوك سطولا دالڤيرني خرجهم هادوك غايجي مولاهم ليوم …. خرجوهم من ديبو وخرجو لي اتباع غدا وستفوها تما …. راه غاااادخل كاملة اصاااحبي ماتمرضووونيش …. ستفو تما لداخل حيد سطولة دصباغة تاهوما خرجوووهم وحطو تما داك السييمة …. ومغنبقاش تابعكم كي البغال اصاححبي … راه خليت الفلوس عند اسماعيل غيجيب ليكم الغدا وقلت ليه يخلص الخدامة كاملين … رد معاه لبال كاتعرفو مفافي يخلي شي واحد بلا خلاص نديو دعاويه ماعندها فين تجيني …..وراااه ااعااااصر هادا طلقو السيد يمشي دغياااا ….وصافي متبقاش تفرع ليا كري خليني ندخل نرتاح
قطع عليه وطلع فالسانسور تاتحل بيه فالطابق السادس فين ساكن هو … خارج مدوووخ بالشمس ومسخسخ بالخدمة والعيا … كان العاصر كايودن … داخل كيحك فشعرو واليد لاخرى هاز بيها الفيست ديالو وكاسكيت وسوراتو .. وجيران كيدوزو حداه وتيسلمو عليه وهو كيجاوب غير براسو وهوما تيعضو فشفايفهم بشوية كيضحكو وكايتسناو نهار لي تدق بابهم مو وتقوليهم جاية نخطب لولدي لي زوفري ساكن بوحدو حداكم …..
وصل لبرطمة ديالو وحل دخل لاح الفيست وسوارتو و حيد سبرديلتو وتلاح على الفوطوووي بحالا جاي من الحححرب … عضامو كاع مسخسخين …. وكيعوج فعنقو بالعياااا .. تاسمع سمارت فون لي تكونيكطا مع الويفي كيصوني وبقى غير كيتنهد حيت مكيرتاح لا فالدار لابرا ساعة لقاها غير المرا لي كتجي تخمل ليه دار كاتصوني فالواتساب …
رضى : ( بصوت عيان ) اخالتي نعيمة …. لا راني دخلت ( ضور راسو كايشوف لكوزينة ) فين خليتيه ؟ واش بريز دالپريصة ؟ ماعليش ماعليش …. لا ماعنديش تصبين دابا تالغذا ودوزي …. امييين ..
قطع عليها ولاح تيلى على الطبلة … الشقة ديالو كانت هاااادئة طاغي عليها اللون الرمادي فالصباغة ديال الحيوط …. الحيط لي من جهة الباب كان طويل فيه بلازما عملاقة ضايرة بليباااف وطاجيرات كوحل ومجورة …. والحيط لي مقابل مع الباب كان زجاجي كيطل على البااالكون ليه فيه جليسة قصبية وكازون اصطناعي وطابلة زجاجية وكيطل على الساحة ديال العمارة ولاپيسين …. مباشرة اونفاس مع تلفازة جلسة بليفوطوووي فالرمادي والاسود ومخاد بالثوب ديال الجورنال مبعثرين ولوخرين بالاسود والابيض …. موراهم كوزينة مفتوحة بالابيض والرمادي مجهزة بجميع الاجهزة المنزلية وكراسا طواااال معدنيين كوحل …. من الجهة الاخرى كاينة صال امونجي سوداء طاولة زجاجية طويييلة بستة ديال الكراسي من الموبرة وموراهم بيفيه ابيض عليه بعض الديكورات وطابلوهات فالحيط .. تصميم كيوحي انه مهندس ديكور لي تكلف بيه … عاد كولوار طويل مفرش بزربية سوداء كيدي لبيتو ديال النعاس والحمامات و بيت اخر داير فيه بيرو ديالو و بعض الالات دالرياضة ….
ناض بعكز من على داك الفوطوي كينصل فحوايجو حاجة حاجة ويلوح ويدعي الصبر لسيدة لي كتجي تجمع موراه ….حيد البيل ديالو لاحها وتعرا ظهرو المفتوول السمر … كان ظهر كييزيد يوحي برجولتو وحروشيتووو وهييييبتو ….. صدرو كان رياااضي فنفس الوقت ظاهرة عليه علامات الوزن الزائد حيت رغم انه مشترك فلاصال الى انه بعد المرات كيتزير بالخدمة ومكيمشيش ديما شي لي كيخليه مرة مرة يهمل الخدمة ديال صدرو ومكيبقاش ديما مطراسي ……
دخل لبيتو دالنعاس ومشا لدوش لي فيه وتخشى تحت الرشاشة كيدوش … هو يتفكرها .. الى مادارش ليها وقت فهاد البوز دالغدا مغايلقاهش بالمرة …. كما دوشو وخرج غير بفوطة ومشا بجهة الصالون شعرو باقي فااازك كيقطر وكيردو لوورر ولحيتو تاهي فااازكة وريحة الشامبو عاطية منو .. جبد تيليفون وبدا كيصوني عليها …. فنفس الوقت شاد فوطة صغيرة عندو كينشف شعرو ولحيتو وغادي بجهة الكوزينة …. التيليفون بقا كيصوني حتى قطع ورجع حطو قدامو وبدا تيقلب ماياكل وكيشوف شنو خلات ليه داك السيدة للغذا … تاتسمعات ليه الباب كدق ..
مشا لبيتو لبس شورط وخرج حلها وهو يلقى بنية صغيرة هازة طبسيل مغطي
– عموو رضااا .. قااتليك ماما هاك حقك ديال بسطيلة صاوباتها لينا ختي …. وبغات ماما ذوقك …
تبسم ليها رضا وشد عليها داك طبسيل ولعب ليها فشعرها وسد لباب ….داه حطو فالكوزينة عرا عليه كان نصف بسطيلة ديال دجاج خسر ملامحو حيت ماعندوش مع القرفة ورجع غطااها خلاها تما ومشا جبد سوبيرة ديال الروز بالخضرة ودجاج لي خلاتو ليه …. وفنفس الوقت رجع كيصوني عليها تاينقب من واحد تفاحة .. وثاااااني مكتجاوبش ……
عند مروى ….
حيدات تزارة ديال الشقا بعد ماغسلات المواعن دالغدا و غزلان باقا كتمسح فالكوزيني ….. وهي كتنگر
مروى : ونااااااري يديا طااابو … شحال مكنحملش هاد الغدا لي كايكون فيه القلي والحوت .. العاصر ودن وحنا باقين مخشيين هنايا
غزلان : انا محمد مسكين نعس غااا فوق زريبية كون ماشافتو ماماك هزاتو لفراشو .. وفللخر يقولك شنووو كالسة كاديري
مروى : نسيييكين داك ولد مكرفصة عليه غا لقيتيه سااهل ولايحاه … واتبعي الشقااااا مانعرف شنو ربحنا منو …. ( تنهدات ) مهم انا غنمشي ندوووش ونضربها بنعسة راسي كنحس بيه غيطرطق .. عيييت …. العيا دالشقا والعيا دالتفكير غانتسطى
غزلان : وكاع مارديتي اصاحبتي علينا دابا يصوني خوك ماتعرف ماماك ماتقوليه
مروى. : ودابا لي دارو راه داروه .. شغلهم هاداك خليوني انا غانمشي نعس …. ديرو لي عجبكم
خرجات من كوزينة ومشات لبيتها سدات عليها وحيدات حوايجها حيت بدا يسخن الحال وتلاحت على سريرها وهي تشوف لطابل دونوي هزات تيليفونها شعلاتو هوما يبانو ليها ثلاتة دليزابيل ..
حلاتهم مستغربة واخر ابيل يالاه جوج دقايق باش قطعات ولولة كانت هادي نص ساعة .. بقات تشوف لداك نمرة ماعرفاتهاش !!!! عاد تفكرات وجدان قبيلة وعلات حجبانها قالت يمكن غاتكون هي ولا ماماها وهي مسمعاتش التيليفون حيث مكديرش ليه الصوت … وبدات كتعاود تصوني …
رضا كان سخن ماكلتو وحطها على الكونطوار وجلس على واحد من دوك الكراسي كياكل تاشاف التيليفون حداه بدا يصوني ولقاها هي وجاوب
رضى : الو
مروى : ( علات حجبانها ملي سمعات صوت راجل ) اء! س سمحلي سمحلي اخوياا بالغلط حسابتني واحد سيدة اخرى ( قطعات عليه تيليفون ) يااا على خراااا تانا كنصوني بلا منتأكد ….
حطات تيليفون فوق السرير وناضت لبلاكار كتجمع حوايجها دخل تدوش وهي تسمع الفيبرور وطلات عليه بانت ليها نفس النمرة كتصوني وتنهدات وجاوباتها
مروى : الو .. راه غي غالطة اخوياااا قالناليك سمحلياا
قطعات عليه ولاحت تيليفون ورجعات تاني كتجمع حوايجها تاسمعات وصلها مسج وحلاتو كان فالواتساب من نفس النمرة
” راه مكانعضش ” ……
علات حجبانها مفهماتش وعلات عينيها لصورة البروفايل هو يبان ليها لوغو ديال شركة دمواد البناء و هي توسع عينيها وحطات يديها على فمها
مروى : وييييييييلي على تحشيييييماااااا
يلاه كتستوعب تابدا يصوني ليها وجاوبات وهي عاضة على شفتها مححشمة
مروى : الو
رضى : امالكي مخلوعة مع جنابك … خلينا غا ندويو وقطعي
مروى : سمح ليا .. راه ماعرفتش نمرة … مع اصلا انا نمرتي الجديدة معاطياها لحد غير بابا وماما وخوتي .. انا حسابتني غتكون ماماك ولا ختك ولكن ملي سمعت صوت راجل قلت غير شي حد كيتفلى ….. سمح ليا
رضى : ماشي مشكل …. نمرة جديدة ! على مال القديمة
مروى : لا بدلتها سيمانة لي فاتت
رضى : علاش ؟ كان مصدعك فيها شي حد !
مروى عضات على لسانها وضربات على راسها كيفاش تا قالت تفصيل بحال هذا بلا ماتحس
مروى : لاااا …. ( كتشوف مع جنابها حسات براسها سخن عليها ) غ غير بدلتها وصافي كانت تبلوكات ليا
رضا : ااه … صافا بعدا نتي لاباس ؟ الدار كولشي بيخير ؟
مروى، : الحمد الله كولشي لاباس
رضا : ياك مكاينش سي مشكل خديت نمرتك ؟
مرزى : لا … ماشي مشكل ( عاضة على شفتها كتحس براسها حشماانة وصعيب تتضاسر معاه دغيا )
رضا : مزيان … ( حط المعلقة لي كان كياكل بيها وتكا على الكرسي كيحك ورا عنقو وتايدوي ) حيت كيفما كتعرفي … زواج تقلييدي اييه مقلناش .. ولكن راه صعيب تجي تخطب وحدة ونتا باقي مكتعرف عليها والو وممفاهمينش …. فنفس الوقت مباغيش نعيط لخوك … حتى نسمع منك نتي واش باغا هاد الزواج ولا لا …. حيت انا غنديك نتي ماشي خوك …
مروى : ( خدات نفس كأن هاد الاتصال جا فوقتو وهي محتاجاه كثر منو ) اه عندك الحق .. ضروري …
رضا : قولي ليا امروى … ( مروى غير ساكتة عاضة على شفتها ملي سمعات سميتها كيفاش نطقها وكان ثاني راجل بعد انور ينطق سميتها منغير خوتها ) علاش خرجتي من القرايا !
مروى : ( غير سمعات السؤال حسات بقلبها تزير وهدا اكره سؤال عندها لي مكتعرفش تجاوب عليه وتنهدات وجابواتو مختصرة ) عقل ديال الصغر .. مكنتش عارفة باهميتها
رضا : يعني نتي لي خرجتي ؟ ماشي داركم لي خرجوك ؟
مروى : اه انا … بالعكس دارنا باغيني نرجع نقرا ..
رضا : وعلاش فضلتي الزواج وماشي الرجوع للقرايا ؟
مروى : ماشي انا لي كنختار .. المكتاب لي كيحدد … زايدون الى بغيت نرجع لقرايا كتخصني مدينة كبيرة حيت مكنخططش نقرا غير الباك ونجلس …. دارنا مغيخليونيش نمشي للمحمدية بوحدي .. داكشي علاش قلت حتى الى تزوجت فشي مدينة كبيرة نقدر نكمل فيها لقرايا ….
رضا : اااه …. يعني دابا باغا تزوجي باش تكملي القرايا ؟
مروى : لا … ( جلسات حيت بانليها الموضووع باقي طويل وكيسول بزاف وعقلاني خاصها تاهي تجاوب معاه بنفس الطريقة وبنفس العقلانية حيت هي دابا فموقف جدي ) الى غتقول مع راسك دايراك قنطرة بلا متخاف بالعكس …. مكنفكرش فالزواج غير على القرايا .. كاين بزاف دالحوايج اخرين … ومنهم القرايا ….
رضا : ( كيحرك لسانو ففمو كيحس باجوبتها كبر من عمرها وبدات توضحلو عقليتها وبدا يرتاح ) دابا نفهمو منك امروى …. باغا تقراي ورا الزواج ؟
مروى : اه …. ( حسات من هضرتو انه كيشجع على القرايا ولقاتها اكبر فرصة ليها وكملات مصصمة على قرارها ) الى مكانش عندك مشكل … الشرط الوحيد لي عندي … هو باغا نكمل قرايتي ….
رضا : ( كيحك فوق حاجبو ) اممم … انا ماعنديش مشكل …. ولكن غنبغيك تعرفي تكيليبري … يعني الى كنتي قادرة توفقي بين دارك … وبين القراية ..انا ماعنديش مشكل …
مروى : متخافش .. ملي قررت نهز مسؤولية .. انا قادة بيها …
رضا : اممم …( عض على شفتو بحيرة وكمل) ماشي كبيرة عليك شوية هاد الهضرة !!!!.. مكتحسيش براسك باقا شوية صغيرة على تهزي مسؤولية كبيرة بحال هادي ؟
مروى : ( قلبات عينيها لجنب وقلبها تزير عليها وحسات براسها بحالا كيقمعها ) رضا .. سميتك رضا يااك ؟؟؟؟
رضا : ( بابتسامة ) هي هااديك …
مروى : انا واحد البنت لي كبرت فالفشوش و واليديا ماامقصرينش معااياا .. فنفس الوقت .. كبروني على المسؤولية .. انا دخلت لكوزينة وانا فعمري 14 عام … وربيت مع خوتي ولادهم …. انا ارضا ماشي واحد البنت لي كبرات بين الصحابات والقهاوي والخروج والسفر .. انا كبرت فدارنا بهاديك العقلية ديال نهار تبغي تخرجي غتخرجي مع راجلك …. انا ماكنقراش .. والا بغيت نقرا خاصني نتزوج فمدينة كبيرة …. يعني حاليا حياتي وااااقفة ….الى بغيت نكلمها غيخصني نتزوج والا غنبقى حابسة هنا .. وانا ماشي من ناس لي كنبغي نضيع عمري حابس …. والوقت كيدوز .. غير البارح كان عندي 12 عام ودابا قربت ندير 18.. وغذا غنلقى عندي عشرين …. تاحد ماقاد يسخى بدارو لي كبر فيها .. ولكن انا باغا نشوف حياتي … راه معاك نتاا ولا مع غيييرك .. انا قادة على داك المسؤولية …. والا نتا كتشوف راسك وحدة قدي مغتقدش ليك على المسؤولية قلب على شي وحدة كبيرة وقريبة ليك ….. والله يسهل عليك …..
رضا : ( كيحك فوق حاجبو داير ابتسامة صغيرة ملي حس بيها بحالا تنرفزات ) هه ! .. ماقللتش منك امروى … بالعكس .. انا غير باغي نعرف .. حيت عندي ختي تانا وكبيرة عليك ومع ذلك مزال منقدرش نزوجها دابا حيت كتبان ليا باقا متقدش على داك المسؤولية وباقي خاصها تنعس حدا الواليدة …. داكشي باش كنسولك نتي ونعاود نأكد لايكون شي حد مبزز عليك …. وحيت كنشوف راسي كبير عليك قلت تكوني غير حشمانة من خوتك وماباغاش .. كنهضر معاك انا مباشرة باش الى كان عندك شي مشكل قوليه ليا نصلحوه بيناتنا ومانديرليكش نتي العيب معاهم .. ننسحب انا راسي ….
مروى : انا الهضرة لي عندي راني قلتها ليك …. وخووتي قادة نقول ليهم لاااا الى بغيت انا …. و تانا باقا كنعس حدا مااما ووخا ندير خمسين عام غنحتااج نعس حدا ماما …. فنفس الوقت لاتحطيت فوضع خاصني نكبر فيه .. غنكبر … حيت العمر غير رقم اما العقلية حنا لي كنقدرو نگيديوها ( مكمش ملامحو كيحاول يستوعب واش هادي عندها غير 17 عام ) كنعرفو وقتاش خاصها تصغار ومعامن .. وقتاش خصها تكبر وفين ….. انا واليديا حمد الله من صغري كبروني على المسؤولية وكنعرف ندير كولشي ….بززو عليا بزاف دالحوايج … الا الزواااج …
رضا : ولكن خاصك تعرفي بلي الزواج مافيهش غير طياب وكوزينة ! انا اخر حاجة كنقلب عليها هي هادي ….
مروى : عرفتي شنو ؟
رضا : ( شرب الما وحط الكاس ) امم؟
مروى : الله يسهل عليك …
رضا : ههه …. علاش ؟ قلت شي حاجة ماعجباتكش ؟
مروى : ( بنرفزة وقلبها بدا يضرب بجهد ) هضرتك كلها ماعجباتنيش …. جيتو عندنا رحبنا بيكم …. انا كون كنت مباغاش نتزوج مغاااتجيوش تالدار …. وليكن فعلمك قبل منك انا راه قلت لا لكثر من عشرة ديال الناس لي هضرو مع الدار …. يعني كان فامكاني نقول لا حتى ليك .. وخوتي باقي لدابا تيقولو ليا اش باليك ….. باش تجي تهضر معاياا بهاد طريقة لي تحسسني بحالا راك شفقان عليا وانا خوتي مبززين عليا وبحالا منعرفت فين عايشة انا … ومنعرفت شنو ….راك غاااالط .. انا عشت فدارنا بعزي وغانمشي بعزي …. الزواج راه قلت ليك هو الخطوة لي باغا نزيد بيها القدام ….. وملي غنشوف الاختيار الصح غنقبل بيه ….. كنهضر معاك دابا حيت خويا شكرك بزااف وعائلتي رتاحت ليييك … وانا تابعة رضاة واليديا … ولكن نتا كل مرة كتهضر على العمر .. هادشي كيعني ان نتا لي عندك مشكل مع العمر ديالي .. داكشي علاش الله يسهل عليك تاخد وحدة فالعمر لي بغيتي نتا .. وانا راه كيفما جيتيي نتا .. غيجيو عشرة من غيرك ..
رضا : ( نزل راسو كيحك فوق حاجبو ويضحك بصوت هامس لي قدرات تفهم راه كيضحك ) اوا شنو دابا … نشدو الصف معاهم ولا ؟
مروى : تاحد مادارك فشي صف … نتا لي باغي دخل فيه …
رضا : اول حاجة امروى …. الى حداكم شي فارماسي قريب خودي شي ماغنيسيوم باش تهدني .. حيت بانليا حتى نتي دغيا كتشعلي وانا وياك شي نهار نطيحو شي روح …
مروى : وعلاش لي متشربوش نتا نيييت ؟
رضا : هههههه … ( جاتو الضحكة بالاستغراب ) وانا بانليا لا ديتك نتي راه تالحشيش غانولي نشربو ….
مروى : علاش كتحسسني بحالا مبززة عليك تزوج بيا ؟؟؟؟؟ واش نتااا شوية لاباس ؟
رضا : ههه ( كيضور فراسو ) عرفتي شنو غنديرو امروى .. غنقطعو ياك باش منزيدوش نتعصبو …. وانا غنمشي لخدمتي .. ونتي غتمشي تنعسي .. منبعد ونهضرو ..
مروى : بسلامة الله يعاون …
قطعات تيليفون قبل ماتسمعو ولاحتو على السرير شادة على نصها وهو معلي حاجبو كيشوف لتيليفون كيفاش فلول كانت حشومية ودغيا فلخر بدا تتزعف عليه وشبعاتو قميع ! وقطعاااات !!! حربية ومكتفاهمش وكتعرف تهضر زويييييين حسن من لي عندها تلاتين عام .. وعوج شفتو باستغراب حتى قال بابتسامة
رضا : بيررفكت …. !
اما مروى بقات غير كتمشي وتجي محملاااتش هاد الهضرة معاه …. وكتكره لي ينقص منها ولا لي يحسسها انه شفقان عليها …. “ماباغيش يتزوج بوحدة صغيرة علاش جاي عندي !” هذا هو السؤال لي قالت وهي معصبة كتر .. كانت حشمانة منو ومحتارماه ولكن طبعها العصبي دغيا بااان ودغيا خرجت منها داك العصبية لي ساكناها واخا حاولات ما امكن تهضر بهدوء ولكن فلخر خرجها على طوعها ومحسااتش كيفاش زعفااات عليه ……
مروى : دابا هادا شكايحسب فراسو مفهمتش !!! لاكان هو لي شارف انا مالي ؟ يمشي يبعد مني بحالا واقفة عليه ميييتة علييييه انا ؟؟؟ لا وزايدها بشربي الماغنزيوووم ؟؟؟؟؟ ياااا على عقلية …..
تأففات بغضب ومشات هزات حوايجها وبينوارها ومشات جيهة دوش تبرد شوية الفقصة .. اما هو زعماتو مزياااان بهاديك الشخصية لي كان كيظن ان فالعمر ديالها متكونش عندها .. ولكن بانتليه هضرتها كبر من عمرها وكتعرف تفرض رأيها وهادي هي الحاجة لي كتعجبو ماعندوش مع بنادم ضعيف فنفس الوقت جاتو قاااسحة شوية وصعيب يكبح اعصابو معاها وهو انسان عصبي ….ولكن حين بلزاف من انها تكون ضعيفة ولا منافقة كتمثل الصواب والطاعة غير باش تتزوج !!!!
خدا تنهيدة ورجع راسو لور كيشوف للسقف وكيسول راسوو واش باركا يخليها فخاطرها ويساليو هادشي ….ولا يزيد يعطي فرصة اخرى ويدويو مزال ! … بنت زوينة بحالها كيوت وبريئة فنفس الوقت شخصيتها قوية .. عائلتها مزيانين وبنت الاصل …. واش يضيعها من يديه على قبل انها صغيرة فالعمر ؟ ويضيع فرحو الواليدين و حماسهم !
كان كيظن هاد الاتصال غيوضح ليه الطريق ساعة حس بيه غا مازاد وضرها …. وناض لبيتو لبس سرورال دجين وشوميز رمادية علا ليها الكام ركب ساعتو وقاد شعرو لور ورش بارفانو وخرج بجهة الباب لبس سربديلتو وهز سوارتو وخرج …
مروى دخلات دوشات كيف العادة دوشها فيه نهار ونص .. غسلات شعرها بشوية عليها ولكن فنفس الوقت عقلها كولو مع داك الاتصال لي وضح ليها نيتو والصرامة لي تايدوي بيها والحدة لي فصوتو … ولمسات تاشوية من الغرور ! …
كملات دوشها ولبسات بيجامة ربيعية خفيفة وخرجات لبيتها ضرباتها بنعسة تافيقاتها ماماها لكوطي وناضت بالعككز جالسة حداهم شادة كاس داتاي وعينيها فالتلفازة لي مشعولة وعقلها هاااايم …. وخديجة كتشوف فغزلان وشافت فيها
خديجة : مروى .. وااامروى
مروى : ( شافت فيها ) اممم
خديجة : ( بابتسامة ) اوا ….عيييط عليك ؟؟؟؟؟
مروى : ههههه ( ضحكاتها فعز همومها و حطات كاس داتاي وشافت فيهم ) زعما … على حد المعرفة ديالي وانا باقا فهاد العمر الصغير .. هادشي كيتسمى الخصوصية ولا لا ؟ هههه
خديجة: ياااك اليهييييودية ؟؟؟؟
مروى : هههه غاكنضحك ( هزات كتخوي البراد كتزيد فكاسها ) عيط ليا قبيلة ….
غزلان : ( طلات عليها وهزات طليكيموند دغيا نقصات لتلفازة ) اوا شقاالك ؟ شنو هضرتو عليه ؟
مروى : معرفتش …..
خديجة : ( طوات يديها على كرشها ) هااااويلي على ماعرفتش
مروى : مااعرفتش اماما ….متفاهمناش شوية .. سيد عندو مشكل فالعمر ديالي وانا قلتو سييير الله يسهل عليك
خديجة : ( بصدمة ضربات ففخاضها) اوييييييلي ؟؟؟؟؟؟
مروى : ( شافت فيها ) شغنقوليه اماما ؟ اجي ديني بزز .. لاكان هو مباغيش شغندير ليه انا ياه !!!!!!
غزلان : واش هووو لي قااالها ؟؟؟؟ ولا جات منك نتي راني عارفاك كيدايرة
مروى : واسيد ملي دوا وهو كايقولي واش قادة على المسؤولية وانا ختي كبر منك وباقي منقدرش نزوجها وجالس بحالا كااايشفق عليا .. قتليه سير الله يسهل عليك فمااااكبر … بحالا مشواقة فيه انا ..
خديجة : ( شدات على راسها كتنهد ) ياااااربي تستر ياربي ماقالو عويفية يابنتي عماتك تاااعويفية … ماااكدبووووش عماتك ماااكدبوش
مروى : الالة انا عويييفية … انا باغا نكون عاافية على نكون مدلولة ….. يسحابلو بحالا ميتة عليه يبقى حياتو كاملة كيتكبر عليا .. ياك اودي لاباس …..
غزلان : واشنو دابا فرتكتوها ؟؟؟
مروى : قاليا منبعد ونهضرو …
غزلان : اوا صافي مدام قلتي ليه الله يسهل وقالك منبعد ونهضرو اذن راه مزال باغيك .. حيت كون مكانش باغي حتى هو غيقوليك الله يسهل ..
مروى : شغلو هاداك ( كتعض من كيكة ) انا لي عندي قلتو ليه ….
خديجة : وا الله يكون ليه فالعولن ….. ( ناضت ) نوضو نوضو المغرب وذنات .. العشا ديرو لينا غا فلان راه جبتو ليكم وقطعو عليه ديسير …. خليو الكوطي فوق طبلة ياكل بوشتى وخالد باش ميطلبوش لينا العشا عييييينا ….
ناضت خديجة لدوش ومروى حطات كاس داتاي
مروى : تانا نوض نصلي
غزلان : ( شداتها من يديها ) سيري صلي الاستخارة .. بنتي ليا تالفة صلي ركعات دالاستخارة وميكون غير الخير ….
مروى تنهدات وحركات ليها راسها بالايجاب وناضت لدوش لي قريب لبيتها توضات ودخلات تصلي … دوزات عشيتها روتينية تعشاو فجو هادي لي متعاودش تجبد مزال الموضوع حداها وكلها قصد بيتو ….
لبسات عباية الصلاة ودارت اش قالت ليها غزلان …. صلات صلاة الاستخارة ويالاه هازة يديها كدعي هي تشم ريحة زوييينة جاية من الشرحم الريحة لي كتموت عليها وهي ريحة التراب …. ناضت من على السجادة وحيدات لفورلار ومشات لشرجم وهي تلقى الشتا كطيييح خفييييييفة كتبان غير فالضو ديال البوطو دالحومة … تبسمات حيت كيحمقها هاد الجو .. ومنظر خيوط الشتا الخفاف فالضو الاصفر ديال البوطو … وااهدوووء كايتسنع غير صوتها وشوية دالبرق فااسما كايضرب فوجهها …..
ربعات يديها على الكادر دالشرجم وحطات راسها عليه وهي كتشوف فالشتا كطيييح والاوراق دشجرة توت كيتححركووو … كانت عاااامرة ومبهجة وبحالا فرحانة بالشتا ….. علات عينيها للسما بانتليها السما صافية رغم الشتا الخفيفة لي كطيح ولي زادت زيناااات الجوووو … وتبسمات غير فخاطرها وهي كتسول راسها “زعما تكون هاد الشتا جواب ؟” …..
تبسمات وناضت حيدات عبايتها ودخلات ففراشها ملهية فتيليفونها طالعة نازلة فالاتستاغرام …. علات عينيها لسطوريات ودارت ضحكة مستهزأة !!! كانت اول حاجة كاتشوف ليها هي هاديك … انستغرامو ديما كان فيه لي سطوري وكنت كدخلهم بلهفة تشوف تفاصيلو باش تحفظهم .. حيت كانت كظن هادوك التفاصيل فيهم ومعاهم غاتكمل حياتها !!! ولكن القدر لعب لعبة اخرى .. وجمعها بشخص غرييييب عليها …. لي ماعرفاتش حتى كيفاس تتعامل معاه ….
باقا فأفكارها …. حتى بانت ليها ابيل داخلة من نمرة معرفاتهاش … علات حاجبها باستغراب شكون غايصوني فهاد وقت وهي نمرتخا معاطياها لحد و نمرة ماعرفاتهاش !!!!! ….. وجاوبات باستغراب ….
مروى : الو ؟
رضا كان حاط قدامو كارطونة ديال بيتزا كياكل منها وكانيط دبيبسي وشاعل تلفازة قدامو جالس غير بشورط كان يلاه مدوش وصاكو دلاصال باقي مليوح
رضا : ياكما فيقتك ؟
مروى : اء ؟ رضا هذا نتا ؟
رضا : على شكون موالف يصوني عليك فهاد الوقت ؟
مروى : تاااحد … غير معرفتش نمرة !!!!!
رضا : نمرتي دالخدمة هادي … تيليفون لاخور نسيتو فلاصال ….
مروى : اااه .. دونك نقيدها ب رضا 2
رضا : على شكون رضا واحد ؟ كاين شي رضا اخر ؟
مروى : لا … ماشي انا لي عندي جوج من رضا .. رضا لي عندو جوج نوامر …
رضا : ( علا حجبانو العيا دلاصال ثقل ليه الاستيعاب) ههههه .. هاكداك ….
مروى : ( تنهدات وقطعات ليه ااشك حيت حسات بيه ) رضااا …. انا راه ماعندي تاحد فحياتي باش نطمنك حيت باليا بحالا باغي زعما تشد عليا الكذوب ….. علاش بدلتي شكون كايصوني فهاد الووقت. .. راه ماااعندي حد غااا تهنى ….
رضا : ( تبسم تابانو سنانو للفطنة ديالها لي كاتصدمو بيها ومسح يديه وكمل ) منكذبش عليك امروى … الجيل ديال دابا ولا كيخلع صراحة …. انا راه ماعندي مندير بوحدة الكسدة معااياا وعقلها مع واحد اخر …. داكشي باش غنعطيك سؤاااال نيشااااان …. ياك معندك تاحد اخر فراسك ؟ ولا مع شي واحد ولا شي حاجة بحال هاكا ؟ داكشي باش طلعتي عندنا فداركم عينيك منفوخين .. حيت الى مكانش العمر هو لي بكاك و انك مامبزز عليك تاحد كيف قلتي ليا ….. اذن غاتكون شي حاكة اخرى لي بكاتك قبل ماطلعي .. داك المنظر هو لي دخل ليا الشك وخلاني كنسول بزاف … انا عارف ماشي من حقي …. ولكن تاني ماباغيش ندي وحدة عقلها عند شي واحد اخر …..
مروى بقات مدة ساكتة كتشوف للارض كتغزز فشفايفها كتسول راسها واش تقول اه ولا لا …. فلخر هازت راسها كتلوم فقلبها الفااااشل لي باقي كيفكر فانور وهي مع واحد اخر وتنهدات جاوبات
مروى : لا … ماعندي تااااحد .. وكون كان شي حد متلقانيش كنهضر معاك ….
رضا : ( تنهد برااااحة ) مزييياااان .. دابا مفاهمين … حيت باش نكونو واضحين … انا راه باغي نكون انا اللول فحياة مراتي …. منبغيش يكون قلبها تعطى لشي واحد اخر من غيري .. باغي نكون انا اللول فنفس الوقت بغيتها هي اللخرة عندي
مروى : علاش نتا فايت عطيتيه لشي وحدة من قبل ؟
رضا : شنو هو ؟
مروى : قلبك ارضا .. قلبك …
رضا : اااه .. .لا لا ههه … قصدت زعما تكون اخر وحدة دخلات لحياتي .. ما القلب هاد الساعة كيعرف غايتحك ليا مع الشيكات والخدمة …..
مروى : امممم .. فهمت …. نقدر نفهم خدمتك كثر لامكانش مشكل ؟
رضا : مرحبا … انا لابغيتي تقولي دروكري …. خديت الباك … مشيت لكازا قريت التجارة والتسيير …. تخرجت ومادرت والو ، كنت باغي شي مشروع ديالي عمرني فكرت نخدم عند الناس … كان ضبر ليا واحد عمي فواحد الكونطرا مشيت خدمت شوية ففرانسا مع واحد السيد فواحد الماكازا فهادشي ديال البني وخديت منو شوية الحرفة …. جمعت شوية دالفلوس وكنت درت تما واحد لاكسيدون بالموطور تخلصت عليها وجيت للمغرب درت مشروع ديالي …. شوية بشوية كنكبر فيه .. ويلاه هادي ست شهور ملي حليت واحد الشركة صغيرة ….
مروى : اه .. ومناويش ترجع لفرانسا ؟
رضا : لا لا .. انا منعرفش نعيش تما .. نمشي نتسارا واخا … ولكن العيشة كنعرف ليها غير فالمغرب .. ماضحكيش عليا ولكن انا شوية بلدددي ….
مروى : اااه فهمت .. حتى المغرب الى كان الواحد عندو فلوسو فيه راه حسن من برا … مفايتش تزوجتي ولا خطبتي ؟
رضا : لا …. كانت كتكون هضرة دايزة مكتابش تكمل …. اول وحدة غندخل لدارهم راه هي نتي …
مروى : ااه فهمت … اه وحاجة اخرى .. سمحليا قبيلة لا كنت تعصبت شوية ونفاعلت فالهضرة ….
رضا : نو بالعكس مزيان …. مابغيتش نعرف انا غير داك الوجه ديال الصواب باغيك نعرفك نتي كيدايرة حيت الزواج هو الدوام …. وماعنديش مشكل تقولي رأيك وتفرضيه …ومبغيتكش تنافقي منين نكونو كنهضرو باش نوضحو الامور لاكنا غنافقو بعضايتنا مكاينش لاش …
مروى : واااحيت نتا لي قلتي ليا خودي الماغنزيوم قلت يكون عندك مشكل
رضا : عندي مشكل فالدوام … متكونيش ديما هاكا عصبية حيت انا عصبي والا كنا بجوج كنتعصبو راه غنريبو الدار .. خاص ملي يطلع واحد ينزل لاخر ولا لا ؟
مروى : اه ….بصح هادشي مكينطابقش غير عليا .. تانتا خاصك ديرو …
رضا : على قبيلة انا شعلت معاك ؟ ياك شفتك معصبة انا لي هبطت وبدلت ساعة باخرى … حيت انا ماموالفش نجاوب لي زعف عليا هكاك .. اخر وحد طلع عليا صوتو راه صيفطتو لسبيطار …. ولكن نتي لا .. نتي واحد البنت لي باغي نتزوجها ونعيشو اونسوبل .. يعني مجاتش كل مرة نسيفطك لسبيطار .. خاصني نتعلم نهبط معاك نتي ….
مروى : تصيفطني لسبيطار ؟؟؟ ههههه … علاش انا عطاوني ليك واليدياا تصيفطني لسبيطار ؟؟؟؟
رضا : ههه حااشاا امروى حاشااا .. ونتي يديك صغييييورين نقيسك تموتي ليا ههه .. و انا مكنضربش العيلات … نتي لاصيفطتك لسبيطار غانكون سيفطتك غا باش تولدي ….
مروى : اوا منعرف … حيت لافكرتي غير تهززز يديك .. غاتلقى البوللليس فالبااااب ..
رضا : اووووو .. هه !! شنو دابا مطلوب مني نخاف ؟
مروى : اوا نتاا تعرف ..
رضا : هههه ( رجع لور كيحك فشعرو نغماتو ) قولي ليا امروى … قلتي ليا قبيلة بلي قبل مني قلتي لا لعشرة ولا منعرف .. ماتما تاشي واحد يعني دزتو نتي وياه من الخطوبة ولا ركب ليك خاتمو ولا دويتو فتيليفون بحال هاكا ؟ فايت هضر معاك شي واحد ولا خرجتي مع شي واحد ؟ انا راه ماعنديش مشكل فشي حااجة فااتت .. ولكن كيف قتليك مانبغيش نتحط فشي مقارنة عاااد تختاري هدا حسن من هدا … لا ….ماداخلش انا فكومپيتيسيون …..فللخر تقولي كون غير ديييت فلان !!!!!
مروى سكتات كتفكر فانور لي مكيخرجش من بالها وخدات تنهيدة كتحاول طردو وجاوبات بثقة
مروى : لا ماعندي تاحد ….
رضا : داكووغ … ماباغا تزيدي تسولي على والو ؟؟
مروى: صراحة نعيا نسول .. الاجوبة الصريحة راه كاتجيبها ليام .. ولكن بغيت نعرف حاجة وحدة لي كاتهمني …. ياك مكتسكرش ! حيت مستحيل نتزوج بواحد كايشرب الشراب ….
رضا : ههه لا .. درنا داكشي فااصغر مانكدبوش … ولكن شي خمس سنين هادي قطعنا كولشي .. الصحة هي لولا ….
مروى : والگارو ؟
رضا : تاااهو قطعتو …ماكنكمييش ….
مروى : ( عضات على شفتها بابتسامة ) صاااافي … هادشي لي كايهمني عرفتو …
رضا : (باعجاب ) وماعندي مايتسالك … اسئلة فمحلهم …( تنهد) دونك امروى غيخصني نهضر مع خوك … غادي نجيو فلخر ديال الشهر بينما نكون ساليت عليا شي شيكات ..قبل منقولها ليه هو بغيتك نتي تعرفي ونتي لي تقبلي … لا على الزواج لا على فوقاش نجيو …. نتي لي كيخصك هادشي ….
مروى : انا زواج ماعنديش مشكل لاكنتي غتخلي لينا فترة فين نتعارفو انا وياك …. والا كنت قابل تخليني نقرا ….
رضا : راه عشرين يوم ولا كتر عاد غانجيو ارا ماااتعرفي عليا …. والقراية راه قلت ليك قبيلة بلي معنديش مشكل الا كنت غادي تسيباري يينها وبين دارك .. حيت منكذبش عليك انا راني ماشي شي واحد صغير لي غايتسنى … يعني انا باغي وليدات …..
مروى : غانحاول نقرا عن بعد ونحضر غير للامتحانات …. ولكن مور القراية انا ما كانخططش نقرا ونبقى فالدار راه غنبغي نخدم ….
رضا : صافي .. خودي الباك ديالك وديري شي فورماسيون صغيرة فالحسابات وجي نخشيك معايا فالبيرو ….
مروى : نخدم عنك ؟
رضا : ماشي عندي .. معايا ….
مروى : نوووو .. انا راه باغا نتخلص نتاا غاتقول ليا كولشي ديالك …..
رضا : هههههه وادابا ماحشوماش انا نخلي واحد اخر يجي يعطي ليا الفلوس لمرتي ….. نعطيك انا …. علاش انا مغنخلصكش ؟
مروى : كيتسماو ديااااالك
رضا : ودابا نوصلو لتما ويحن الله …. خودي الباك بعدا …..
مروى : ان شاء الله ….
رضا : والخطبة ؟ تبغيني نزيد نبعدها شوية مزال ؟ ولا نجيو فلخر دالشهر ؟ ولا نزيد نقربها هههه …
مروى : هادشي صراحة شوفو مع بابا وخوتي انا ماعنديش شي شوار قدامهم ..
رضا : لا عندك … وكاع هاد الشخصية لي بينتي ليا ليوم جيتي تالهنا وبغيتي ضعفيها ! هادشي كيخصك نتي …. غنشوف معاك نتي لولا وهوما راه غنهضر معاهم منبعد ….
مروى : صافي لخر دالشهر مزيااااان ….
رضا : مزياااان …. يلاه مغنطولش عليك حيت تعطل الحال سيري ترتاحي وتنعسي …. تانا غندخل ننعس … تالغذا ان شاء الله ..
مروى : صافي … تصبح على خييير
رضا : العجب ماقطعتيش عليا هه
مروى : هههه قبيلة عصبتيني اش غندير ليك ….
رضا : هههه سيري تنعسي سيري ..
قطع تيليفون وناض كيضور راسو ويضحك رتاح نسبيا ملي هضر معاها فهاد الاتصال التاني ومبقاش كيبان ليه انه كاين فرق دالعمر من خلال هضرتها وشخصيتها عكس فاش شافها مباشرة وبانتليه صغيرة بزاف .. طفا الضواو ومشا لسريرو تلاح على كرشو على عادتو معنق عندو مخدة تحت يدو غير تيغمض عينو كينعس بقوة العيا ديال الخدمة …..
كانت ساعة تسعود …. باقا ففراشها متكية على الكادر دسرير وكتلعب بالتعليقة ديال سنسلة لي فعنقها ومبتسمة ابتسامة خفيفة وهي كتفكر هضرتو وعقليتو … حاجة كتعجبها وحاجة مكتعجبهاش ولكن كتحس بلي الكاريزما ديالو غالبة على كولشي …. عجبها شحال واضح وشفاف فنفس الوقت لمحات فيه شوية دالسيطرة و مستنطق بزاف! كايسول على اي حاجة وباينة انه مشكاك ! تمنات انه يكون شك غير حيت شافها بكات ومايكونش هاد الشك فطبعو ديما ….
تاسمعات الباب تحلات ودخلات غزلان هازة الهرم ديال الشوكولا لي جابو فالخطبة
غزلان : فايقة ؟ هاكي ها شكلاطك اختي راه سالاوه ليك يسرى ومحمد …
مروى : اويلي علاش جبتيه خليه ليهم
غزلان : لا اختي يفرعو سنانهم انا نقيل نضارب مع خالد على السقاطة جا هاااد العريس ديالك دار ليهم زردة …
حطاتو ليها على طابل دونوي وجات خارجة وهي تسمعها
مروى : غزلاااان ( ضارت عندها ومروى تبسمات ) ددمو خفيييف !!!
غزلان : شكون ؟؟؟؟
مروى : ( لعبات فشعرها وقالتلها ) رضا …
غزلان : ( وسعات عينيها وسدات الباب وجات جلسات حداها بحماس ) عاااودتو هضرتو ؟؟؟؟ تصالحتو ؟؟؟؟؟
مروى : امممم … ( مبتسمة ) عيط ليا البارح بليل …. وهضرنا …. وقال بلي غيجيو فلخر دالشهر للخطبة ….
غزلان : ( بضحكة ) اوا مبروووووووك … هنية علييييييك … وهاانتي ليك على مروى غتخوووي علينا الدار
مروى : وراه خلاني نقرا ..
غزبان : او شتي .. وهانتي شكون بحاااالك … راجل غزاااال وطول والزيييين و لاباس عليه ودار ليك الخاطر …. وشدي فيه تااني ماتبقايش تعفري عليه بزاف راني كنعرفك عاجبك زينك …
مروى : ههه نوضي نوضي خليني نوض نصلي
غزلان : درتي صلاة الاستخارة ؟؟؟ باش حسيتي
مروى : ماشي شي حاجة ولكن كان نعاسي زوين وماحلمتش بشي حاجة خايبة …. وفاش ساليت الصلاة لقيت الشتا كطيح خفيقة عجبني الجو حسيتها اشارة ….
غزلان : ياربي تكمل بالخييير والتييسير الله يسسر ليك ….. انا غنوض عندي محمد خصني نديه يدير التلقيح ماماك راه خرجات عند داك الخياطة .. نوضي ديري شي غدا خفيف الخبز راه باقا كاينة من البارح …..
مروى : ( نازلة من فراشها ) كاين دجاج ؟ .. نديرو فالفران
غزلان : جبديه من فريكو ….
مشات غزلان ومروى ناضت توضات وصلات الصبح وخرجات فطرات هاد المرة كتشقى بوحدها فالدار حيت خااوية كاينة غير هي … حاسة براسها مورالها طلع ليها ومبقاتش كتفكر بزاف وقلبها مابقاش كيضرها بحالا رتاحت شوية ليه واخا مزال متخوووفة حيت كولشي كيهضر فللول زوين …
اما رضا فاق منرفز مع لالارم وصوت ديال تيليفون دالخدمة مامخليهش ينعس .. خرج صاوب قهوتو كيوجد الفطور تاسمع الباب كدق ومشا حل وهو يلقى جارتهم مبتسمة ليه
– رضاا صباح الخيير … عجنت شي مسييمناااات وقلت ذوق منهم …. ( مدات ليه طبسيل ) نتمنى يعجبوووك …
رضا : ( شد عليها طبسيل ) ششكرا …
ابتسم ليها تافهمات راسها ومشات وهو سد الباب ودخل حل على الطبسيل كانو فيه مسيمنات صغار شهاوه ..حط طبسيل وبدا يجبد فالعسل تاصونا ليه تيليفون شاف نمرة طلعات ليه ديال ماماه وابتسم وجابوها داير سبيكر كيفطر فكوزينة
رضا : صباح الخييير …
سعيدة : الله اوليدي الله طيرتييها مني خلعة عييت نصوني فالتيليفوون مكتجابوش تاصونيت فهاد نمرة
رضا : خليت تيليفون فلاصال الواليدة البارح نسيتو …. دابا ندوز نجيبو …
سعيدة : والله الا بقيت مهولة ممولفاش تسد الواتساب … البارح صيفطتليك الاوديو ماشفيتيهش وماديتيش عليا بقيت مهولة
رضا : كيصحبتتو مزيان ؟ الواليد شوية من داك الراس ؟
سعيدة : واش داك الشقيقة دباك كتبرا اولدي …راه مع الدوا … راك فالخدمة ولا باقي فالدار ؟
رضا : مزال فالدار الواليدة … كنوجد الفطور …
سعيدة : عندكم شي شتا ..صبات عندنا شتيييوة غزالة لبارح
رضا : اه ملي نضت للفجر كانت كاتصب … دابا لا الشمش …
سعيدة : او الله يرحمنا .. الشموش دابا هادا وقتها غا هي … الله يبردها علينا فهاد رمضان .. دارت ليك نعيمة شي فطور ولا كتصايبو نتا ؟؟؟؟
رضا : خالتي نعيمة عيطات ليا قبيلة هي لي فيقاتني .. مغاتجيش رجليها ضاراها نضت نصاوب انا .. راه وحدة من جيران جابت ليا المسمن … انفطر بيه ونخرج …
سعيدة : ( بالغوات ) كككمش ولووووح …. اويلي على الهبييييل غياااكل من عند الجيييران متعرف اشنو موكلينك تما … ككمش وولوووح لطااارو
رضا : ههههه اييهديك الله الوليدة شغيديرو ليا ….
سعيدة : نتا مغااتفهمممش فهادشي .. قتليييك لووووح … غا لي عطاتك شي حاجة كتاكلها شي نهار يعطيوك شي توكال ولا شي سحور تبقا تابعها حال فمك …. ياك صيفطاتليييك لمسن ختك عجنااات ليك متاكل شهر
رضا : راه فالفريكو الواليدة جامد
سعيدة : ججبدو سسسخنو … والله اولييدي وتمشي حتى تاكل شي حاجة من عند داك الزين دالجيييران لي عندك تاتبقى غا حال فمك …
رضا : ههههه وااخا الالة واخا ….
سعيدة : راه مابقى ماايععجب اولدي ماابقى مايعجب …. كيشوفوك بطموبيلتك وخديمتك غيبغيو يحومو عليك …. ( تنهدات ) وقول ليا اولدي … ومارديتيش عليا … هضرتي مع خو البنت … رديتي عليه ؟؟؟
رضا : وراه يلاه تسعود دصباح هادي نعيط ليه دابا واش عندي استدعاء دالمحكمة ….
سعيدة : راه جابتلك ختك نمرة البنت هضرتي معاها ؟
رضا : هضرت معاها …
سعيدة : اوا كيجااااتك ؟؟؟؟
رضا : كيغاتجيني مزيااانة …. عقلها كبير شوية … وماعندي فين نزيد عاد نختار الكلمة راه عطيناااها ….
سعيدة : دابا خليني من هاد الهضرة دالگرام بحالا دايرين عليك السيف البنت راها كي البلارة لامديتيهاش نتا يديها واحد اخر راه مواقفاش كتسناك غا نتا .. قوليا نتا واش عجبباااتك
رضا : وايكون خير يكوون خير خليني دابا نفطر نمشي لخدمتي …
سعيدة : دوووز ليييل تعشى معانا
رضا : لا وااالو .. تالسبت ونجي …
سعيدة : ان شاء الله .. يلاه اولدي مانشدكشااي .. وداك المسمن لووحوو ..
بدا يضحك كيضور فراسو كيشوف فيه ودر ليها الخاطر وعيط على الكونسياج طلع عندو وعطاه ليه هو والبسطيلة لي جابت ليه الجارة لوخرا …. وسد الباب فطر بلي كان وخرج لطموبيل مشا باتجاه خدمتو تاوقف جنب طريق عند واحد طموبيل ديال الپريصة خدا ليه قهوة معصرة شاد طريق كيجغم منها فنفس الوقت الشاشة ديال الطموبيل كتعطيه بلي كيصوني تاجاوبوو :
رشيد : واااسي رضااا .. صباح الخييير …
رضا : صباح نور اسي رشيد…. الاومور مزيان موالين الدار لاباس ؟؟؟
رشيد : كوولشي بخير يسول فيك الخير … امدرا الوليد الواليدة كولشي مزيان كاين شي شتا !!!!
رضا : الحمد الله …. وي ضربات شوية مي دابا صابحة سااحية ….
رشيد : تاهنا تقريبا نفس الجو .. اوا شنو فالعمل ولا باقي فالدار؟؟
رضا : راني فطريق غاادي .. كون جينا نتبعو الخدمة راه مغانعسوش …. كنگيديو شوية بتيليفون وصافي قاضي لينا الجرة …
رشيد : وماعندك مادير طريف دالخبز صعيب …
رضا : وايه .. تاحاجة ماساهلة .. وصافي اسي رشييد .. دويت مع موالين الدار …. والا كتاب اللخر فهاد الشهر نجيو عندكم ان شاء الله …
رشيد : ان شاااء الله … الله يكتب الخير ويجعل كولشي مبارك مسعووود …
رضا : اللهم امين بارك الله وفيك .. دوك الفاتورات راهم عندي واجدييين دابا ندوزهم ليك مع الدري حيت انا تالسبت عاد غنجي لبنسليمان مشغول شوية هاد ليام …
رشيد : صافي تانا مامزروبش عليهم تاتجي وجيبهم بيديك ونديرو شي قهوة
رضا : وصافي هو هاداك .. غا هو بداو فهاد الايام الله يحفظك توجدو ليها لاكارط ناسيونال ووريقاتها
رشيد : غيتكلف ليها خالد خدمتو هاديك ..انا نهضر معاه …
رضا : مزياان .. يلاه اسي رشيد خليتك على خير تالاحد ان شاء الله …السبت غنجي شوية معطل بليل .. حتى نسد راك عارف …
رشيد : صافي عشية دالحد نتلاقاو .. يلاه نهارك مبروك …
قطع عليه وبدا يقلب فالنماري تاطلع مروى وبدا يصوني عليها .. طريق كلها مجاوباتش قال غتكون باقا ناعسة وقطع نزل لخدمتو …
مروى سالات شقاها وعلات عينيها لساعة كانت الطناش بدات تعوج فعنقها تادخلات ماماها هازة تقضية وجات غزلان كيتعاونو كايردوها ومروى حيدات تزارة ومشات لبيتها تجمعو .. يلاه كتبدل الغشا لمخدتها وهي تشوف تيلي تحتها هزاتو غير حلاتو بانو ليها ربعة دليزابيل منو .. كمشات ملامحها !!!! ماتوقعاتش بالمرة غاتصل بيها فالصباح بلا متخلي ليه مسج ؟ ياك انور كان كايصوني ليها الصباح غير الى خلات ليه ميساج ولا كانت معاتباه !!!! ….
عضات على شفتها وبدات كتعاود ليه ماشية بجهة الشرجم كتفرج فداك الشجرة دالتوت والارض صاابحة فاازكة وشميشة شارقة ….تابان ليها قطع عليها وشافت فتيليقون علاش قطع ؟؟؟ .. غتيكون تقلق ميت مجاوباتش ؟ عضات على لسانها كاتفكر انور فاش مكانتش كاتجاوبو كايتقلق ومكايهضرو على يوماين ….
فلخر حطات تيليفون ومشات كدير كوفرلي جديد لسريرها ساااهية مع لابيل لي قطع عليها …بدات تتفب معاه ضوسي من نهار لول ….تاسمعاتو كيصوني ومشات جاوباتو بزربة
مروى : صباح الخير … سمحيلي قبيلة كنت مشغولة داكشي علاش .. مادرتهاش بالعاني وما(قاطعها)
رضا : قطعت حيت كان معاياا السيد ماشي حيت مجاوبتيش مراحناش براهش لهاد درجة ههه ….
مروى : ههه ماقصدتش هادشي غير يحسابتلي تقلقتي
رضا : نتقلق كون كنت وااااقف عليك محتاج شي غرض وعطلتيه … مهم عيطت باش نقوليك انا راه هضرت مع خوك ورصينا على لخر ديال الشهر .. ثمنية وعشرين .. نهار الاحد … نوطي عندك
مروى : اااه صافي ان شاء الله … ( شافت التاريخ فتيلي كانت سبعة فشهر ) باقي عشرين يوم هاكاك !!!
رضا : ايه … وراه هضرت معاه تجمعي وراقك على ود لاكارط ناسيونال … باش لاغدا ليه الثنين نديرو لاكط ديالنا …
مروى : ( حلات فمها ) شنوو ؟؟ هاااء ؟؟؟ ماشي بزاااااف !!!!
رضا : اشنو نجي سيمانة جاية ؟ هههه
مروى : اويلي لا .. قصدت زعما زربتي ….
رضا : ماعنديش الوقت بزاف امروى اللول دشهر خمسة هو لي كيترخف ليا فيه الشيكات والضراائب كنكون مهني شوية … ها عشرين يوم قدمنا ارا متعرفييني …. ولكن راه لابقيت تادرت ليك داك الخاتم غادوزي تسني …
مروى : معرفتش .. ( عضات مدة على شفتها و نطقات بخوف ) مهم شوف مع خوتي لي درتوها مرحبا بيها …
رضا : يخلي ليا الرضااا دالخوت هههه الواحد هو لي يكون مرضي …
مروى : انا اصلا راه تابعة غا رضااااهم … ما انا فين كنعرفك
رضا : كاع تابعين رضا دالوالدين ( تحل الباب دالبيرو ) دقيقة خليك معايا .. نعام ؟
– راه جا داك السيد مول صباغة واش نشارجيو ليه كولشي ؟
رضا : لا ماشي كولشي غير نص … قوليه مابقاش .. ياك ديما كانقوليكم ماتنشفوش السطوك ديما تبقى المواتيي …الفياج دالصباغة مزال فين يدخل باش غانقضيو لاعطيناه كولشي تجريو ليا على لكليان !….. عطيه غير النص …. انا نزل دابا لعندو ( مشا الخدام ورد تيليفون لوذنو ) هانا امروى …
مروى : ياكما معطلاك على الخدمة ؟
رضا : انا غنزل دابا .. الخدمة راه مكتساليش … كنديرو وقت لراسنا بزز وصافي …
مروى : وراه مزيان بعدا ملي معندك تاشي باطرون فوق راسك ونتا الباطرون دراسك ….
رضا : وهي مزيانة ولكن من ناحية اخرى الدرك كامل عليك … واحد بعدا موظف كايسالي مع الربعة وكيمشي يرتاح وكيشد شهرو دالكونجي مكيفكر لا فشيك داخل لا فضريبة لا فخلاص الخدامة .. حنا صحاب التجارة ديما متبوعين … ديما تيليفون يبقى شاعل … يلاه كنرتاح شوية داك النهار دالحد كنسد فيه ….
مروى : هاء ؟ مكتاخدش كونجي ؟
رضا : لا والو .. كنسافر سارق الوقت وصافي وتابعاني الخدمة فتيليفون …. كنشدو شوية دوك الايام ديال العيد هوما لي كنرتاح فيهم ….
مروى : يااك مغااتخلينيش فالدارررر نبقى نرغب فيك !!!! … ياك غايتلقى ليا وقت انا منبقاش بووحدي
رضا : هههه ( بدا يضحك عاض على شفتو ) نلقااه ليك علاش مانللقاهش انا كنطلب منك تيسباري بين القرايا ودارك وانا منسيبااارييش بين الخدمة وبين داري ؟ وميمكنش ….
مروى : اوا منعرف .. تكون غير هضرة دالبرلمانيين …. الوعود الكاذبة .
رضا : ههههه الا لا ان شاء الله يكون غير الخير ….( سد البيسي ووقف ) يلاه مروى غادي نزل نشوف واحد الكليان وندوز لبانكة تالليل ان شاء الله ….
مروى : واخا سير .. الله يعاونك …
🍃🍃🍃🍃🍃🍃🍃🍃🍃🍃🍃🍃🍃🍃🍃
هادوك التفاصيل الصغار …. شوية بشوية كيجروني ليه …. واخا هو قليل فين كيطول معايا شي أبيل كتر من عشرة دقايق ولكن غير بمجرد كيتصل بيا قبل مينعس وفاش كيفيق وملي كيكون كيتغدا وملي كيكون حاصل فزحمة ديال طريق …. كيتفكر نمرتي يصوني ليا واخا غير دقيقة … ملي كايكون مسافر غير داك الجملة ديال نشد بيك الطريق ونسيني كاتكبر عندي بزاف!! كنحس براسي بوحدي لي فحياااتو ….. كيعجبني كيفاش كيستغل كل وقت فراغ عندو يهضر معايا فيه واخا فمواضيع تافهة !!!! … وهو كيبروصي سنانو وهو كيصايب قهوتو وهو كيخدم وهو صايك وهو فيه النعاس … هادوك التفاصيل لي واخا كيبانو عاديين بنسبة ليا كانو كبار … انسان مشغول بحالو …. وكيلقى ليا الوقت وسط مشاغلو …. شي حاجة لي خلاتني نزيد نبغي نكون معاه ….. واخا هضرتي معاه جوج كلمات معايا وعشرة مع الخداما ديالو …. واخا هاكاك كايعجبني لحال …..ولي كااايعجبني كتر .. هو وليت نخلي الصوت لتيليفوني !!! وليت صونا تيليفوني كندخل لبيت ونهضر ونا ماخيفااانااش !!!! كاانهضر بكل حرية وفاش كنخرج كالقى ماما مبتسمة ليا …. ومكيقولوش علاش كاتهضري معاه … بالعكس كايخويو البيت الى صونا تيليفوني ….. مرتاحين حيت عارفيني بين يدين راجل يمكن مغايضيعنيش !!!
ولي كايعجبني كتر .. هو كل ويكاند حتى هو كايجي لبنسليمان ، بلاصة ماايصوني ليا نخرج نتلاقاه ويبزز عليا يشوفني ….كايصوني لخويا هو لي كايخرج يتقهوا معاه ! عمرو طلب مني نخرج عندو … وكبرات فياااا بزاف ملي قال ليا باغي ندير العقد باش نقدر نبقى نخرجك … مقالش ليا خاص يكونو خوتك مساعفين و كوووون كانو خوتك مطلوقين …. لا …. لدرجة واخا كايعرفوه دارنا … هو بغا هاداك العقد …
انسان نااااضج بزاف وكايبغي ليا لي كايبغي لختو ……
واخا الخوف قاتلني تجاه المستقبل وحياتي الجديدة معاه كيفاش غاتكون … عصبيتو لي كاتبان مرة مرة لاتزايدت معاه فالهضرة بزاف .. عقليتو التقليدية …. صرامتو … كيخلعوني بعد مرات …. وكنخاف ااني نكون كنهرب من سجن خوتي لسجن كبر! حيت عندو نفس عقليتهم ……
مزال كنحس بالبرود تجاهو .. ماعرفتش واش هو لي مكيعرفش يهضر مع العيالات …. ولا مزال ماكيحسش بتاحاجة من جيهتي !!!! … كيطلب مني يوميا ندير سيلفي ونرسلو ليه ولكن عمرو قاليا جيتي زوينة ! .. كيجاوب غير بزيدي وحدة اخرى …. مكنعرفش نقراه .. مبهم … مكيعبرش على مشاعرو .. غامض …مكنعرفش واش كنعجبو ولا لا …. مكيسمعنيش كلام رومنسي بزاف اغلب هضرتو تحقيق واسئلة باش نتعرفو على بعضياتنا كتر … شنو درتي ليوم شنو غاديري غدا … ولكن …. كيعحبني فاش كايقحمني فحياتو لخاصة .. فاش كيسيفط ليا لي سيرفيت لي باغي يشري نختار معاه …. فاش كيقوليا نقترح عليه شنو ياكل … فاش كيهضر معااياا الصباح ويسولني اشمن تيشورت يلبس … فاش مكتجيش عندو المراة لي كتخمل ليه وكايسولوني باش نمسح ثلاجة كيفاش نطيب شس حاجة …رغم انه عندو ختو ومو .. ولكن هو كايختار يعيط ليا لس نوريه ….
هادشي جديد عليا ! وماعمرني جربتو … اه انا عرفت انور عماين ونص …. عمرني حتى عرفت اذواقو .. عكس رضا لي عشرين يوم كانت كااافية نتعرف عليه من كل الزوايا .. كنحس بيه شفااااف بزااااف وواضح لابعد حد …. مكيخبيش ومكيراوغش وخا انا مشكاكة وموسوسة وكنخاف يطلع تاهو كذاب …. ولكن ديما كنلقاه قانعني باجوبتو … راجل بحالو مثالي من جميع النواحي معرفتش علاش مزال مخلوعة منو ومن مستقبلي معاه ….. عشرين يوم وحنا كنهضرو غير فالتيليفون وحسيت براسي مطلوقة بزاف معاه … كنتقلق عليه وكنزعف وكياخد بهبالي …. كيعجبني فاش كيقوليا صباح الخير ” ابنتي “… كلمة ليي كيعيط ليا بيها بزاف .. فلول كانت كديرونجيني .. فلخر ولات كتعجبني ..بطريقة او باخرى كينجح يجدبني ليه شوية بشوية .. كنحشم نقوليه يصيفط ليا تصاورو نفس الوقت كنبغي نبقى نشوف فيه .. فداك التصويرة الوحيدة لي عندي ولي هزيتها غير من لواتساب ديال ختو …. كتعجبني ضحكتو … وسنانو البيضين … زينو الحرش وحجبانو الغلاض … كتعجبني حتى شقاوتو وهو مسايرني … صوتو البحوح وهو فايق من نعاس فالصياح .. صوتو المرخي وهو فيييه النعاس بليل … كولشي فيه كيجرني شوية بشوية نطيح ليه …. ولكن الخوف هو لي باقي مخليني مزال مانعلن حبي ليه …. اولا بالاحرى …. قلبي كنحسو باقي عامر بانور …. مكيدوزش نهار مكنفكرش فيه …. هو بصح ملي كنكون كنضهر مع رضا مكيجيش فبالي وكننساه بالمرة .. ولكن غير نقطع تيليفون ودوز قدامي شي حاجة تفكرني فيه .. كنلقى راسي انجرفت لذكرياتي لقدام ومكنبغيش نعترف لراسي بلي توحشتووو … بلي توحشت رومانسيتو .. ضحكو معايا …. كلمة حبيبة وحياتي لي كان كيقوليا …. هضرتو معايا بالسواااايع لي مكتساليش … اما رضا كنحس براسي يلاه كنبغي نتخشغ فالهضرة كيكون قطع ومشا لشغالو .. مكيخلينيش نشبع منو … عشت هاد العشرين يوم كلها فالاخد والرد والتلفة …. كنفكر فرضا .. كنلقاه الرجل اللمثااااالي .. كنفكر فانور … كنلقاه الراجل لي كنبغي ….. ليوم … كاينة خطابتي … وانا مزال تالفة … بين الرجل المثالي .. والراجل لي كنبغي …..
كانت كالسة على سريرها وحاطة يديها فوق واحد المخدة كاتصاوب ليها واحد البنت جات مع الكوافورة الظفار … وهي غي ساهية كااتفكر …
الدار كانت عاااامرة بالناس لي من بعيد جا لبارح بايت ولي قريب عاد كايجي …. كانو خالاتها وعماتها اما حتى جدودها كاع ميتين … الهاراااج فالدار ..شي فرحان ليها واش مافهمش كيفاش دارت ليها ؟ وشكون هو هاد العريس وعلاش ماساقوش ليه الخبار تالنهار الخطبة .. وشي غيراان وكايقول الله يعطينا زهر البرهوشات الخفيفات ….
الطريطور كايقادو الصالة الفوقانية لي غاتم فيها الخطبة وخوتها واقفين على كوولشي وباغين كولشي يكون مثااالي بحكم الاخت الوحيدة لي عندهم .. والدار لتحت عامرة بالعيلات والتوجاد ها لي كايعمرو التمر ها لي كطل على الكيكات فالفران ها لي كتنفض وتخمل فالصالة …. خديجة محزمة جوج تحزيمات …. ومن ستة دالصباح مكلساتش الارض واقفة على كولشي بنفسها .. بوشتى وولادو عاطينها غي للسخرة على برا هادي حلوة وهادا لوز وهدا بيسطاش وهدا ديسير و هادي موناضة .. عيالات خوتها فالكوزينة كايغسلو الديسير وخالتها مع طيابة كاتشوف الطياب وتوقف عليه ….
اما دار رضى … خرجو ماماه وختو كايتقضاو ليه الحلوة و الهدية لي غادي يدي … عكسو هو لي باقي فالبيرو غارق فخدمتو كايحاول يسالي خدمة تلتيام باش يرتاح وكايختار مع ختو غير فالتصاور لي كاتسيفط ليه فالواتساب لي كادو لي غايديو ليها …..الساعة كانت كتشير للعشرة ونص وهدا هو الوقت لي خصو ينوض يمشي لدارو يلبس باش يشد الطريق لبنسليمان حيت غايتغداو عندهم …..
سد لبيسي وداه يكمل بلليل فالدار …. ومشا شد الطريق لدارو بعد ماوصى الخداما ديالو غدا يحلو بكري وداز على مواحلو واحد واحد كايوصي…. دخل خدا دوش بالخف وخرج لبس غير الكاجوال ….وهز سوارتو وصاك صغير فيه حوايجو و هز الغشا لي فيه الكوستار ديالو لي كان يلاه وصلو منعند celio… وخرج بزربة وتيليفون كايصوني ليه وهو داخل لسانسور
رضا : انا فالطريق الوايدة انا حداك …. انا قرييب
سعيدة : واش رررجعتي تالمحمدية ولا ؟ جيت لدار مالقيتكش
رضا : كانت عندي شي خدمة ضروري نقضيها …. انا جاي دابا انا معاك هاني فالبياج دلوطوروت …. ( خارج من سانسور بزربة لطموبيل لاقاليها فدار غاتبدا تغوت تالغدا)
سعيدة : اويييلي غانتعطلو على الناس امحمد راه دايرين معانا الغدا ماشي السحوور ….
رضا : وصافي انا حدااااك ….. قربت نوصل ..
سعيدة : وااسربي الله يرضي عليك … باك راه جاب دبيحة وكولشي واجد ….
رضا : صافي انا جاي …
وصل لطموبيلتو لاح فيها كولشي لور وداز عند الذهابي لي خدا عندو الخواتم ولي بيجو لي خدا ليها .. وشد طريق غادي طاير كايشوف للساعة غير خرج من الپياج لبنسليمان بدا يصوني ليها ….
كانت يلاه سالات ظفارها وشدات على ماماها القفيطين لي يلاه يلاه جابتو الخياطة ماوجد تانهار الخطبة حيت جا كولشي بزربة وهي مادافعة والو …. غاتلبسو باش تستقبلهم … وهي تسمع تيليفونها كايصوني وماماها خرجات هي والكوافورة باش يخليوها تهضر على خاطرها …
مروى : رضا .. صونيت عليك قبيلة علاش ماجاوبتنيش ؟
رضى : كنت فالخدمة وخليتو فالطوموبيل والله …
مروى : اويلي على الخدمة ؟؟؟؟؟ ليوووم !!!!!
رضى : غير شي حاجة خفيفة قضيتها …أنا داخل لبنسليمان شوية نكونو عندكم …
مروى : وماتعطلوش راه ( علات عينيها فالساعة ) طناش ونص هادي
رضى : ههههه اش هاد الحمااااس !!!..
مروى : وكيفما درت معاك وحلة ….لبارح كان طايح عليا الضيم كالس عليا مالكي مافرحاناش … ليوما تانقوليك سربي شوف اش كاتقول ….
رضى : هههه الله يخليك ديما فرحانة …. انا قربت نوصل للدار نلبس حوايجي ونخرجو …. العشية باقا طويلة تسناو شوية …
مروى : نتسناااااو .. غي هاد الخدمة ديالك لي ماعرفتهاش واش ماشي هي لي خصها تسنى …. راه خطابتنا ليوم واقلة لا ! …
رضى : اوا هادشي لي عطى الله …. خدامين غا عليك و على الوليدات لي غادي تجيبي لينا ماخدامين على تاحد براني …
مروى : هههه زوينة عندك هادي … يلاه سربي خليني نمشي نلبس تانا باقا معطلة والكوافورة كاتسناني ….
رضى : شكون كايتسناك ؟؟؟؟
مروى : كوافورة !!
رضى : علاش ! ياكما غاديري شي تخربيق فوجهك !!!!
مروى : راه واقلة خطابتي …..
رضى : ( بجدية ) ومنبعد ! … مروى انا راه ماعنديش مع داك تخربيق بزاف … ديري داكشي خفييييف ماقلناش …ولكن راه جايا معايا العائلة دراري ولاد عمامي … خليك طبيعية بلا داك المكياج الزايد ..
مروى : ( جاتها البكية ) رضى حرام عليك كااايعجبني الميكااااج
رضا : تاتجي لدارك وديريه …. دابا الدنيا مخلطة ….
مروى : شغانديرو انا فالدار نشقا بيه ؟؟؟ انااا رااه عرووووسة .. عااادي ندير مكياج
رضى : ونا دااابا هضرت … وديري لي عجبك …. يلاه انا وصلت .. تانجيو …
قطع تيلفيون وهي بقات كاتغزز فشفايفها هاد ديري لي عجبك فشلات ليها الركابي ….. يلاه غاتبدا دمع تحلات لباب دخلات ماماها
خديجة : ساليتي ..كوون غير درتي شي زيف حياتي لشععرررك على مايجيو الناس راه كاع تشنتف ليك ….
مروى : ( مهبطة شفايفها ) ماما رضى كااع مخلانيش ندير مكياااج …… انا بغيييت ندييييير …..
خديجة : اوا لا تاني … مابغاش صااافي على خاطرو …. ماشي ضروري .. نتي ابنتي لا دردتي غااا كحيلة فعينيك كااتجي فنة ومسرااارة
مروى : ( بفقصة ) ومامااا واااامااما … راه خطاابتي ….
خديجة : وااديري ليه خاطرو باش تانتي يبقى يدير ليك خاطرك صافي مابغاش خليييه …..
مروى : شتي شتي …. شتيي شنو كنت كانقوليك …رااه زهري عاارفااه … غانطيح فواحد قبح من خوتي
خديجة : واداباا هنييييينا …..شنو قاليك فين وصلو ؟ قربو يجيو ؟ تعططلو الظهر هاهو تايأذن ….
مروى : هو كان فالمحمدية .. راه يلاه وصل لدارهم قاليا غايلبس وغايجيو …
خديجة : او اصافي نمشي نعلم الطيابة ….. ( جراتها من يديها لعندها) شوفي عندي هاه … بنات عماااتك كولهم ملهوفين يدخلو عندك ونا ماخليتهمش … كانقول ليهم مشغولة يمشيو الله يستر يلوحو عليك شي عجب …. مااتخرجيش من بيتك وماتحلي للحد خليهم يدقو تايعياو ….. خليك هنا … عينيهم كايضورو الله يسستر السم فوجههم كااايقطر ….
مروى : هاء !!!! مانتغداش ؟؟؟ راه فيا الجوووع .. مانتسناش انا تايجيو جعت ….
خديجة : ها غزلان تجيب ليك تاكلي وكلسي هنا ….. تااتلبسي وتوجدي وتخبي حوايجك وتسدي عليهم فالماريو ….ويلا بغاو داك ساع يدخلو يسلمو يدخلو …. ماتخلي تاحاجة ديالك باينة وردي بااالك … انا نسيفك ليك مع يسرى قرعة دار ليك فيها خوك الرقية الشرعية شرربيها ….. يلاه ها نكافة غادخل عندك ….. خليني نمشي نشوف شغالي
مروى : والبسي تانتي ماتبقايش هاكا دابا وهوما جاو ….
خديجة : هااانا غاداا
مروى : نشوفك دايرة داك الزيف لزرق تاني بحالا غا هو لي عندك مغاااتفاكيش مني …. لبس داك شال لبيض لي جابليك طارق ….. وعطي لحفصة تصايبو ليك نتي كاتلويه كي العكوزة .. عطيها هي دير ليك شدة زوينة
خديجة : يااااودي زيااااني غااانتي حنااا داز وقتنا …..
مشات خديجة وهي متبعاها تدخلات عندها نكافة جايبة جوج تكاشط كاتوريهم ليها تختار فين لي تلبس فالعشية .. ختارت وحدة غوز بيبي محجرة بالذهبي … وختارت التاج لي يناسبها ….
دخلات غزلان مدخلة ليها بلاطو فيه نص دجاجة محمرة بدغميرة وكاس دالموناضة والديسير … بدات كتاكل حيت فاقت بكري ومافطراتش مزيان ومشات لحمام لي عياها وجوعها …. كلات بشهية فنفس الوقت كاتميساجا مع رضى …. غير قاليها راحنا خارجين من الداار …دخلات ديريكت بروصات سنانها وقررات دير مكايج غا راسها والكوافورة مشاات فحالها ..
دارت غير الماسكرا وكحل وكلوز غوز خفيف وفاغاجو … شي لي خلاها تزيد تبان مسرارة كتر … بدات كاتعاونها النكافة تلبسها القفطان لي كان فالخضيضر الخفيف و خياطة ذهبية وبدات تقاظ ليها شعرها فوق منو …..
النكافة : دابا لي راك فبيتك خليه هاكا لجنب باش مايعرقكش. …
مروى : فين هي داك الفرفاارة ياك جابتها ماما .!!…. شعليها ليا عفاك غايعراق ليا وجهي ….
النكافة : ( مشات شعلاتها ليها ) مادرتي والو لوجهك ؟ دايرة شي فوندوتان ؟
مروى : لااا مادرتش مااابغاش مافيا مانتقابح معاه فهاد النهار .. حاولت ندير خفيف ….
النكافة : يااابنتي بشششرتك غزااااالة والله تاتقولي دايرة ليها شي حاجة .. نتي ماتحتاجيش كاع … غا بلوش هاكا فحنيكاتك باراكا .. ونتي اصلا كاتزنگي غا بوحدك ههه
مروى : هههه ربي خليييك …
النكافة : ( كاتقاد ليها البروش فعنقها تجمع ليها قفطان ) راجلك غير منهنا ؟
مروى : اه غي منهنا … وساكن فالمحمدية …
النكافة : محمدية غزااالة …. والبحر ديالها فن دوزت فيها الصيف لي فات جاتني نقا من الوليدية…. الله يكمل عليكم … باينة تاهو باقي صغير بحالك ….
مروى : شوية …. عندو 32
النكافة : اوا حسن ليك من شي برهوووش ..تانا بنتي تزوجات صغيرة بحالك ولكن هي مشات لخارج .. راها فهولاندا كملات قرايتها تما دابا خدامة وبوليداتها والشوار شوارها مكيحيد ليها والو .. مابقاتش فزواج الصغر ولا الكبر … بقات فهااداك لي غاطيحي فيه كيداير !! … ياك ماغاتسكنيش مع ناسك ؟
مروى : لا لا غير انا وياه … هو ساكن بوحدو
النكافة : علي شعععرك ابنيتي شوية نركب ليه هاد الحلاقات … اوا حسسسن ليك …. باقا صغيرة وزوييينة يقتلوك غابلحسد والغييييرة
مرزى : لا لا دارهم ضريفين …
النكافة : اوا الله يتااااويكم …. دابا ماديري والو فشعرك ؟ ندير ليك خيط الريح ؟؟؟
مروى : لا .. لا نبقى غير هاكا ( كاتشوف فالمرايا ) خلي تالعشية مع تكشيطة وندير تاج خفيف …
النكافة : تلبسي البلغة ولا الطالون؟
مروى : لا عطني غير البلغة بغيت نبقى خفيفة الصهد ….ورا الغدا نبدل ….
النكافة : ( مدات ليها بلغة ديال الصم ذهبية لبساتها وعلات يديها كاتقاد ليها الحزام ديال القفطان وتقاد ليها ) صافي هاكا مزيااان .. جيتي غزااااالة الله ييييحجبك …. على الله يتكايس لينا سي العريس عليك هههههه
مروى : ( كضحك وتشوف فالمرايا ) ششكرا … ياك العكر مباينش بزاف ؟
النكافة : لا لا هو هادااك غوز جا معاك ونت وجهك باقي صغير كون درتي شي حاجة مغلووقة مغايجيش معاك .. جيتي بحال شي باربي الله يحجبك …. فنة … ( مشات كتجمع ماطيريالها ) انا غانخلي ليك هادشي هنا ونهز غي التكشيطة لوخرا نردها للمحل ملي تقربي تلبسي كتبي ليا مسج نرجع باش نبدل ليك …. وررردي بالك مع هاد حوايج عافا ابنيتي خبيهم ليا فشي ماريو لا يبقششو فيهم دراري صغار لاخرجتي منلبيت ….
مروى : لا لا متخافيش غير سيري مانعدبكش كتر … تانقربو نطلعو ونعيط ليك نبدل … تالماكياج راه مغانديرش
نكافة : تافتركاب الخواتم لا ؟؟؟؟ كون غااا زدتي شوية
مروى : انا غانشوف معاه الى بغا ….
خرجات النكافة وهي دارت اش قالت ليها ماماها وبدات تخمل وتجمع كاع حوايحها فالبلاكار و تخبي ماكياجها فالمجورا … وبدات تقاد المخاد لي فوق سريرها وتنفض …. خايفة يدخلو عائلتو لبيتها يلقاوه مروون … وهي تدخل عندها غزلان لي كانت لاابسة قفيطين خفيف ومقادة زيفها ودايرة ماكياج خفيف ….
غزلان : تباااارك الله جيتي غزاااالة .. صافي تغديتي نهز داك البلاطو ؟ كلات معاك شوية داك نكافة بعدا ؟؟؟؟ تشطنا كاع ماعطيناها الغدا
مروى : لا تغدينا انا وياها …. غا هزيييه اختي صافي ( هزات تيليفونها ) واش غير نخرج صافي ؟ قنطت هنا ….
غزلان : قالت ليك ماماك لااااا … راها كتوصي وتعاود .. قاتليك تافاش يجيو ماتخرجيش … تاايخرجك هو تركبو الخواتم ..
مروى : و مااانسلمش عليهم ؟؟؟؟؟
غزلان : مابغاتش اختي …. قاتليك جاين مخلطين ، وراه اصلا مامات رضى صونات عليها الصباح وقاتليها ماتخرجوهاش تاتخرج فيدو يركبو الخواتم .. راه كولشي كايخاف من العين …. هي ووجدان دابا يجيو يسملو عليك هنا فالبيت …..غير خليك
مروى : واش جايين معاهم الناس بزاف ؟
غزلان : واقالت لماماك جايبة معاها تلاتة دالطبالي وحدة دالعيالات وجوج دالرجال … قالك الالة جاين عمامو بتلاتة و ولادهم كبار بعيلاتهم وجاين معاها شي جوج خواتاتها ورجالهم و جوج عماتو ورجالهم وولادهم … مهم راك عارفة الخطبة …. ومو قالك كتخاف من عماتو وبنات خوااتاتها وقاتليك بقاي فبيتك تايخرجك هو ….
مروى : ناري على حبس ….. ففففف هنا غايقتلني الصهد
غزلان : وححلي السرجم مزيااااان راه الغربي على برا كايسوط …. ( هزات البلاطو ) مهم انا مشيت لابغيتي شي حاجة صوني عليا انا لي مكلفة هنا لبنى وحفصة راهم فالكوزينة ديال لفوق ….
مروى : صااافي واااخا ….
يلاه حلات لباب تخرج وهي دخل بزربة واحد البنت طوييلة ولابسة قفطان ودايرة فولار وماكياج وطالون عالي هازة صاكها
– صصبري اغزلااان نسلم على مروى ….
غزلان : ( ضارت موراها كاتشوف فمروى بمعنى ردي بالك ورجعات خرجات و هي دخلات عندها ) زيدي اسكينة دخلي عندها ….
دخلات سكينة لي كانت بنت عمتها لي كبيرة عليها بعام وبقات كاتشوف معاها
سكينة : تباااااااركالله جيتي غزااااالة …. وهانتي ليييك على مروى غاااتزوج ياااا ختي ( قربات كاتسلم عليها وبدات تضحك ) عررررفتي راني باقا مامتيقااااش واش بضح غاتزوجي
مروى : عقوبة ليك تانت …. كيف دايرة مع القراية مزيان؟
سكينة : اوا الباك هدا راني كنتاقل معاه …
مروى : عاودتيه ؟ كان عندك العام لي فات
سكينة : زكلووني فالتصحيح اختي …. واخا درت لاعادة ولاد الجرام غشوووني نا خدمت حطو عليااااا ولاد الحرام .. اوا وعاودت لعام على قلبي …
مروى : ماعليش فيها خير …لله يوفقك ( مشات كلسات ) زيدي كلسي …
سكينة : ( كلسات حداها كاتشوف ليها مع يديها ) حاوك ضفار غزالين .. جيييل ولا بيرمااانو ؟؟؟؟
مروى : بيغمانو ….
سكينة : ركباتهم ليك طوال بزاف ونتي يديك صغااااار … وقولي ليا دابااا العفريتة فين قلبتي عليه ؟؟؟؟ … خليني من داك الهضرة ديال صاحب خوك ههه قولي ليا فييين طيحتيه؟؟؟؟
مروى : ( علات حاجبها ) فين غاالقاه حماقيتي فين كانخرج انا باش نشوفو ؟ …. راه بصح صاحب رشيد مالنا نكدبو عليكم ؟؟؟؟؟
سكينة : ياااجنية من ديما ماكتبغيش تشاركييينا الوصفة ههههه باش غلاضيتي كاتقولي غير النعاااس .. باش بياااض ليك وجهك … كاتقولي غااا حيت مكنخرجش للشمش …بااش تزوجتي صاحب خويا ههههه مكتقااااسميش ياختي ههههه
مروى : اوا اره قلنا ليك صاحب خويا منغير لابغيتوني نكدب
سكينة : الالة تيقنااك …..قالولي كبييير عليك ؟؟؟ بصاااح ؟؟؟ اويلي كلستي كلسي وغااتدي شااارف ههههه
مروى : ( تنهدات ماباغاش تقمعها ) ماشي بزاف ..
سكينة : اويييييلي 32 ولا يمكن 33 و ماشي بزاااف ؟ .. راه كبييير نييييت …
مروى : ( كتحس براسها بدات تنرفزها ) وياك انا غااانديه ؟ الالة ضبر راسي معاه ….نتي ملي تجي تزوجي ديه عندو تا 12 عام
سكينة : هههههه اويلي غير ضااحكة مالكي … الله يتااااويكم احبيية انا غير كنقشب معاك ….وخا قلبتي عليا ومابقيتيش كاتجاوبني فانسطا هانا جيت نفررررح معاك ونشطح ليك
مروى : مرحبا بيك ( هبطات عينيها لتيليفون كتكتب ليه مسج فين وصلو حيت تعطلو ملي قاليها راهم خارجين )
سكينة : عندو شي خوووه ولا والو ؟ جايب معاه شي تييتيززز!!!!!
مروى : عندو وراه مزوج مكاينش هنا … شكون جايب معاه انا ماعرفاش زايدون الرجال مغايكلسوش مع العيالات ….
سكينة : اوا نطيحو شي واحد واخا غا فالدروج ههههه ومانمشيوش بلاش
مروى : باغا تزوجي ؟
سكينة : اوا اختي لاماجابشاي الله فهاد الباك علاش غانبقى كالسة فالدار نتناگر انا وختي
مروى : اوا الله يسهل عليك ( وصلها مسج وحلاتو كان فيه راحنا قرابين لحومتكم )
سكينة : ( كاتشوف لتيليفون وتشوف عندها ) كااتهضري معااه هو ؟؟؟ قربو يجيو ؟؟؟؟؟
مروى : ( ناضت لسرجم ووقفات ) اه .. قربو …..( جبدات تليفيون كاتصوني على غزلان تاجاوباتها ) غزلان علمي ماما راه قربو يدخلو لحومة … اااااه راه قربو قالها ليا دابا. .. سيري
قطعات تليفون وبقات كاتشوف من السرجم وبنت عمتها هرسات ليها راسها بالأسئلة على هادا وهاداك …. وهي غير كاتجاوب بالعبار وتسايس معاها….
اخر مرة شافتو هي فاش جا لدارهم …. ملامحو باقا مثورة فراسها … وباقي كنحس براسها لاشافتو تاني فالواقع غاتحشم منو عكس فاش كاتهضر معاه فالتيليفون .. وحاسة براسها متوترة لي غاتشوفو تاني ومعارفاش كيف غادير تتصرف ..
انور حيد من بالها ببمرة وعقلها عمر غير برضى والخطبة و واش جاات زوينة والماكلة واش غاتعجب الناس … كاتسنى فالسرجم تابانو ليها الطموبيلات داخلين …. اول وحدة كانت ميرسيديس كلاص … عاد تبعاتها سيتروين بيرلانغو … وعاد داسيا دوستر وعاد بانت ليها الاودي ديالو لي كاتبان مهيبة وسطهم وصوتها كايقلب الحومة …. وضحكات بلا شعور ملي شافتو داخل للحومة وموراه كليو وعاد بيجيو كاطكاط وموراهم الفورد ديالو دالخدمة فيها بگرة لور والهدية لي جايبين فالطيافر ….. تحطو الطموبيلات حدا بابهم وتعالاو الزغااااريت وبانو ليها دارهم كاع خرجو لبرا يستقبلوهم والجيران تجاراو لسراجم .. وهي قلبها بدا يضرب بالجهد وكاتشوف غير لطموبيلتو كاتسناه ينزل …..
سكينة : ( كااطل براسها بحماس) فييين طموووبيلتووو فييهم ؟؟؟؟ لكليو ؟؟؟
مروى : داك الاودي لهيه
سكينة : ( حلات فمها) بشااااااااااخ ياختي … سعدااااااتك …. ويلي ويلي على حديييييدة …
مروى غي ساكتة كاتفرج وبداو العيلات كايخرجو من الطموبيلات بتكاشطهم وقفاطنهم كايتسالمو وهي تبان ليها حفصة فالباب هازة صينية فيها التمر و الحليب للعريس …. والعيلات كاع كايتسالمو ويزغرتو والبعالك دالحومة تجمعو كايتفرجو وهي تبان ليها مو ووجدان نزلو من طموبيلتو بتكاشطهم تاهوما فرحانات كايضحكو وخديجة كترش عليهم الزهر بالمريشة وتسلم ….
سكينة : واش هو لي صاايگها ؟ مال الرجال مانزلوش ؟
مروى : ماعرفتش….. يمكن كايتسناو يتسالمو العيالات … ( كاتفرك يديها بالتوتر)
شوية بانو ليهم كاع العيلات نزلو وتحركو الطموبيلات لي كانو باقين مديماريين و كل واحد فين كايپاركيها مزيان ورضا تاهو قربها حدا لباب وباركا ولوخرين مشاوو كايتعاونو كاينزلو الضروبة و الهدية والكراطن ديال السكر والحليب والموناضا والما من هاديك الفورد لي صاكها ولد عمتو …. بداو كاينزلو الرجال لي كانو فمختلف الاعمار …كولشي كان مفركس ها اي بالبلدي ها لي بالكوستيم و ها لي لابس عادي … وسكينة فارعة ليها راسها وهي كاتسناه غير هو ينزل …
تاسمعات تيليلون كياصوني وقلبات راسها ليه وسكينة كاتشوف معاها وقلبها من داخل كايتعصر بالغيرة …
مروى : رضا …. ( كاتشوف فيه من السرجم) مناويش تنزل ههه ولا حشمان هههه
رضا : ههه غانزل…. خليك فبييتك ماتنزليش للتحت دنيا مخلطة
مروى : راني فيه اصلا
قطع عليها وبانت ليها الباب تحلات … دغيا تشققات على فمها ابتسامة وهي مستعدة تكتشف عريسها …
تابان ليها نزل … فكااامل انااقتو بكوستار بلو نوي ملبوووس على هيئتو … شومييز فلبو سيال كتبان تحت الجيلي وصباط اسود لامع … وشعرو مرتب مرجعو لور … ولحيتو مخففها وممشوطة للتحت مزيان .. وساعة فضية مدلية على معصمو … وهي تقرب عندو ختو كاتضحك كانت شدات فيديه وهو مبتسم حشمااان … وسكينة حلات عينيها تابغاو يخرجووو وقالت بغوتة تاقفزات مروى
سكينة : واش هاداك هو العريييييييس ؟؟؟؟؟؟
مروى : بشوية عليييك !!! .. هو …
سكينة : ( بدون شعور) ياختي ششششحال ففففففففن ….. وااااااعرررر لمك واااااعررررر…. كااااايسطي
قلبات مروى راسها يزربة كاتوشف فيها كيفاش سااااااحت وحلات عينيها ….وبدات غير كاتنهد … ورجعات للسرجم كاتشوف تابان ليها واحد من الرجال مقرب ليه كاصور فيه وهو واقف وشادة فيه وجدان من جهة ومراة اخرى كاتشبه لماماه من حهة اخرى لي واضح لي كايصور ولدها بقوة الشبه ….وكاتشوفو شحال كايبان متوتر وغير كايحك فوق حاجبو بابهامو … كايبان تالف وغير كايبتاسم … تاقرب ليه باباها سلم عليه بالوجه وبدا يسلم على خوووتها والعائلة وزادت مو شادة فيه مفتخرة بيه كأنها جارة شبلها لي ولا سبع كبير فيديها ومروى كاتشوف فسكينة كيفاش متبعاه حالة فمها مكرهاتش تزف بيها من تما وصابرة …. تاوصل لعند حفصة لي هازة بلاطو ديال التمر وضحك ليها ومروى علات حااجبها مع ضحكتو لي اول مرة كاااتشوفها وانه كاتشكل ليه حفرة فحناكو !!! … شرب من داك الكاس وكلا تمرة وهز عينيه لفوق وهي تبان ليه فااسرجم وسعات عينيها ملي قشعها …. وغمز ليها كامسح يدو من التمر …. وهي عضات على شفتها ضاحكة ليه عاد زادو دخلوووو … واابقية موراهم هازين طيااافررر ديال الهدية لي حااابو … وسكنية غير كاتنقز حداها
سكينة: وييييلي شاااافنااااا شااافنا هههه .. ياختي فن فن ….. كااااايحححمق …. سعادتك بيييه
بدات مروى كايضياق صدرها ومابغاتش تبين حداها بلي غارت ومامعتارفاش حتى لراسها …. بدا كايتسمع الهاراج فدار والتعشاق وصلاه عنبي وصوت الطالونات ديال العيالات وصوت البراهش .. رجال طلعو لفوق وعيلات دخلو لدار فين بيييتها … تاسمعتها بيتها كايدق وبدا قلبها كااايضرب بببجهد ….
سكينة : ( وسعات عينيها) واش هووو؟؟؟ هو لي جاا ؟؟؟؟
مروى : ( كاتشوف للباب ) ماعرفتش ….
سكينة بزربة ضارت لمراية كاتقاد راسها ومروى كاتشوف معاها … محملااااتش هاد اللقطة …. تاسمعات صوت ماماها
خديجة : مممروى ….
مروى : دددخلي اماما …..
دخلات وسكينة كاتسنى بعينيها فوقاش يدخل …. وكاتقول واش الى شافها غايبدل رأيو …. تادخلات خديحة وطلات عليها براسها ضاااحكة
خديجة : ببنتي ….اواا هااا رضااا …. من قبيلة وهي تسنى هههههه ….
مروى خنزات فيها هبطات ليها غرورها …وهي دفع لباب تحلات كاملة .. هو يبان موراها مبتسم وخوات ليه خديجة الطريق يدخل … وهو زاد للبيت علا عينيه غير بانت ليه معاها البنت هي لولا جات قدامو … هو يحدرهم دغيا ودار يدو فجيبو وحياها براسو .. وهي مدات يديها تسلم عليه وهو جاوبها غير بالهضرة مع ابتساامة لبقة …
رضى : بيخير لاباااس ؟؟؟
سكينة : ( فهمات انه مغاديش يسلم وجمعات يديها دغيا مقموعة ووجها حمممر كتجاوبو هو هز عينيه فمروى ) لاباس حمد الله … و نتا بيييخير؟؟؟ مبروووك عليكم .. انا بنت عمة مروى ….
رضى : ( كايشوف فمروى مبتسم ورجع شاف فيها ) مشرفين ..
قالها بالخف وزاد باتجاه مروى حيد يدو من جيبو يلاه دارت يديها فيديه تسلم عليه جبدها من يدها لعندو سلمات عليه بلابييز تاااتزكااات وهي كتحس بلحييتوو فوجهها و ريييحتو لسقات فيها كاتشوف فماماها ضاحكة وتزززنكاات كاملة و سكينة غير كاتشوف.
خديجة : يلاه اسكييينة ….. هانتوما هنا اولدي واحد شوية وطلع تغدا ….
رضى : ( ضار عندها بابتسامة ويدو باقا فيد مروى ) واخا ….
غمزات لسكينة لي باقا واقفة وخرجو و سدات عليهم لباب ومروى هزات عينيها فيه هو واقف قدامها حسابتها كاع هاديك ضسارة لي تضاسرات معاه فتليفون راه ولفاتو …. وبكن غير وقفات حداه الهضرة توضرات ليها .. يلاه حسات بيدو زيرات على بديها بحالا غايجبدها عندو تاني وهي تسلتها بزززربة منو وبعدات وهو تبسم غير بطرف شفتو ورد يدو غجيبو دسروال كايضور راسو على حشمتها و ضار شاف فيها فين هربات مبدلة ليه الموضوع ….
مروى : ( كاتهضر بصوت متوتر وخفيف ) ويلي ارضى علاش خليتي يد البنت ممدودة حشومة !
رضى : ( هز صبعو حك فوق حاجبو ) مكنعرفهاش شكون …. طبيعي مغانسلمش ….. نمدو حنا يدينا لاي واحد !
مروى : ولاكن هي مدااات ليك
رضى : وهادي تعلمها ماتمدش لبراني ….
مروى : غتكون تحرجات …
رضى : اعتذري منها فبلاصتي …. ( باقي كيطلع معاهاا ويهبط ) هدا هو لي خيطتي ؟؟؟
مروى : اااه ….( بابتسامة) كيجاني ؟؟؟
رضى : زويييين … ( بدا كايعوج فعنقو معنكش بداك الكرافاط ورخفها وحيد الفيست ديالو بقى غير بشوميز وجيلي ) واشفتي هاكااااا كيجا وجهك مزيان حسن من داك قوة الصبااايغ ……
مروى : فين شفتيهم باش تحكم … ولكن ضروري ندير شوية بلاتي
رضى : شكون قال هاد ضروري شكون خرج هاد القانون ؟
مروى : هههه زيد تجلس زيد … مرحبا بيك اسيدي فبيتي …..
مشات لسريرها جلسات وتاهو جلس حداها كيشوف مع البيت وشاف فيها
رضى : زوين كيشبه ليك …. ( شاف فعينيها ) مال عينيك عيانين ؟ منعستيش مزيان
مروى : فيقاتني ماما مع ستة دبصح مامولفاش نفيق مع هاد الوقت
رضى : ( رد ليها شعرها لور كيشوف فوجهها ويقراه مزيان ويتأملوو وهي كتشحم و كتشوف فكاع جوانب بعيد على عينيه ) دابا نتي كتبكري غا من الكسدة ( هبط عينو كيشوف معاها ورجع شاف فيها ) هاد الوجه متيكبرش عندك ! …
مروى : ماعندي منديير بيه كبير … بغيت نبقى ديما صغيييرة
رضى : ههه ( كيشوف معاها هايم فتفاصيلها لي
واضحين قدامو كتر من تصاااور لي كيبات يتفرج فيهم وقربها من يديها لعندو وهي قلبها بدا يضرب بجهد ومبغاتش تبين حداه ) بغيتي تخليني غير انا لي شاارف !! …
مروى : ههه علاش شارف ! راك باقي صغير ….
يلاه غيهضر هو يسمع تيليفونو كيصوني وتنهدات وشافت فيه بملل
مروى : هاحنا تاني … هاد الخدمة تابعاني فنهار خطبتي
رضى بقى غير كيضحك على تذمرها ومشا بجهة الفيست وتاهيا وقفات معاه وجبد تيليفون لقاه الخدام ديالو جاوبو وهو كيشوف فيها كيفاش معصبة
رضى : وي اسماعيل …. فوقاش ؟ غيجيو بليل …. ( ساهي فيها وكايهضر ) لا غذا بليل غنكون تما …. صافي دير معاه ورا المغرب غنكون تما ….
قطع عليه وهو كيشوف فيها وطفاه كاع ولاحو فوق الفيست ومشى عندها وهي كتشوف لجنب لمراية حتى كتحس بيديه حاوطوها من تحت يديها وضورها عندو كيشوف معاها
رضى : ( بابتسامة كيطلعها وعينيه مفتونين بجمالها ) شنو هاد تقليقة دابا ؟
مروى : بسيف مانتقلق ( كتهضر بكيوتنس ودلع ) وجالس كتقوليه غنكون تما بليل .. ياك غذا عندنا لاكط … وتا هاداك نهار مغترتاحش فيه !!! مغاتبقاش فيه هنا
رضى : ( قربها عندو من يديها تامبقى كيفرقهم والو وهي كتحاول تبان طبيعية واخا معدتها كتلوى ملي كيقرب ليها ويحني راسو عندها ويقيس فيها ) آمروى … آبنتي الغزااالة …. لاكط عندنا مع العشرة دصباح غنتغداو انسومبل وغناخدو كافي انسومبل عااااد غنمشي .. حيت راني صباح خدام ….
مروى : زعما شنو فيها كون خديتي هاد سيمانة خويتيها وجلستي هنا فبنسليمان ونتشاوفو
رضى : وشكون يخدم عليييك ؟ هه نعول انا على الخداما راه مكيتحركوش الى ماگيديتهمش من لور … والى كان هادشي غيقلقك علينا الالة فهاد النهار .. انا غنولي نسالي الخدمة ونجي لهنا نشوفك بليل ملي نسد ونمشي نرجع …..
مروى : (وسعات فيه عينيها ) هاااااء …. بزااااف
رضى : ( شااف فعينيها هايم فيهم وفشفايفها لي مجموعين ) تاحاجة ما بزاااف عليك …. ( مروى نزلات راسها لتحت كتغزز شفايفها وهو عوج معاها راسو كيطل عليها ) كتحشمي ؟ هههه
مروى : ( علات فيه عينيها بشوية ) لا .. ع .. ع .. علاش … غا .. غانحشم …
رضى : ههههه .. فتيليفون ، كايكون لسانك خدام بالتسعين … دابا بديتي تفتفي عليا .. علاش كطلي عليا ملتحت ؟
مروى : مكنطلش …راك نتا لي طويل
رضي : الا كنت قدك مغطليش عليا ؟ ( حركات ليها راسها بلا )
مشا جلس على سرير وجبدها من يديها جلسها على رجليه وهي وسعات عينيها ماعرفات كيفاش تتصرف … واش تعاند .. ولا تخضع بحكم غايولي راجلها …
مروى : ررررضى .. شكادير
رضى : قادي رجليك …. ( مجلسها فوق رجليه وهي ولات حححمرة وقلبها كيضرب ومعدتها كتقلص ) هاحنا دابا مقادين .. واشوفي فيا نيشان دابا ..
مروى : رضى خليني نوض ( كتبغي تنوض وشاد ليها يديها كيشوف معاها ويشوف جهة صدرها واردافها ) غايحل شي واحد البااااب حماقيتي …
رضى : ( علا عينو كيشوف فيها ) منين نديرو لاكط غدا تمشي معاياا لمحمدية ميقولو واليديك والو ؟
مروى : لا راه واقلة تسطيتي ( هز ليها يديها حطها على كتفو وهي محرجة حشمات حتى تحيدها فنفس الوقت ماقدراتش تشوف فيه وبدات تهضر متلفها على الحروف ) م م حتال …. تانديرو العرس …
رضى : انا كنعرف الحلال هو لاكط ماغياج .. غاباغيين تعقدو علينا الامور .. ولكن ماشي مشكل ….
مروى : ياك قلتي ليا غنخليو فترة للعرس حتى نستعد …. غاترجع فكلامك !
رضى : ماقلتش ليك تستعدي .. قلت ليك علاما تنجحي فالبيرمي … ونسالي انا شغالي … الاستعداد غندخلو انا وياك لاولمبيات !!!!! راه غا زواج هذا .. كون مكانش بيرمي ديالك كتحفظي فخاطرك ونا مشغول كنت غاندير عرس سيمانة جاية. . روطار الخاوي مكاين لاش. ..
مروى : ولكن هادشي غااااا زواج كيف قلتي .. راه عندك نتا لي فدااارك وخدمتك .. اما انا لا .. غنخوي دارنا وغنبدا حياة اخرى ….
رضى : لي تاديريه فداركم غاديريه تما …. هاد الهضرة كتنطابق على شي وحدة غتسكن مع شي عائلة .. نتي غتسكني بوحدك مناش خايفة
مروى : مغنسكنش بوحدي … غنسكن معاك
رضى : هههه ( ضرب ليها فنيفها ) وانا كااانعض ؟؟؟؟ راني ضريف نعجبك هههه
مروى : ههههه … وهي من ناحية ضريف راك ضريف ( حيدات ليه يديه من خصرها ) غا هو راك باسل شوية
رضى : وااايلي .. ( عوج معاها راسو ) بحالاش هاد البساالة ؟؟؟
مروى تنهدات وجات تنوض هو يجرها كاااملة عندو تاتلتخات على صدرو وشد وجهها بين يديه وشرك شفااايفهم مع بعضياتهم وهي وسعات عينيهااااا على الغفلة لي دارليها بلا ما حتى تستووووعب …. كتحاول تبعد وهو مزير عليها …وقلبها على السرير تاجا فوق منها تيبوسها وكيرخف الكراافاط من عنقو وهي صدرها كيتعلااااا ومخلوعة وفنفس الوقت كتحاول تكتشقغ هاد الشعور الجديد عليها شنو هو ! ولي ماتوقعاتوش غيكون بهاد السرعة وفهاد الغفلة .. كان فوق منها شاد يديها لفوق … كيقبل فيها بشراهة ورغبة فشفايفها لي عشرين يوم هو كيتشهاهم من الصور وداز لوذنيها كايهضر بهمس وهي زيرات على عينيها مخلطة بالحشمة والتوتر والخوف
رضى : بحالاش هاد البسالة هم ؟؟؟ قولي ليا ( هبط على عنقها كيمص فيه وهي شقهات وهزات يديها شدات على فمها صدرات شهقتها بلا متتتحس وضار لوذن لوخرا ) بحاااال هاكا هم ؟؟؟
مروى : رررضى ….. لا …..رررضضضضضى
رضى : ( علا عينو فيها معسلين وهي كتشوف فيه ) وا حددي لينا باش نعرفو اشمن نوع .. باش منبقاوش نديروهاا ليك ….
مروى : ( كدفعو من صدرو ) نووووض …. نووض غادخل ماما
رضى : مكاينش لي غيدخل بلا مايدق وعارفيني هنا …. ( هبط عينو تابان ليه صدرها تحت من عنق الققطان وتبسم حيت بان ليه منفوخ وزوين ورجع شاف فيها وهبط على شفتها ببوسة خفيفة وعلا راسو ) تاتقيلي تسيفطي ليا فالايموجي ديال البوسة .. دابا مابغيتيش ؟
مروى : وهاديك غير ديال تيليييييفون
رضى : وشغاندير بيها انا فالتيليفون ….
بعد عليها تكا على كادر السرير منزل عنيه لصدايف شومييز ديالو لي حلهم وبدا يقادهم … يلاه بانتليه غتنوض ورجع جرها تاني تاجات فوق منو عنقها عندو كيدوز شعرها لجنب وكيشوف لعنقها ورجع شاف فيها
رضى : عجباتني فيك واحد الحاجة
مروى : ( علات حاجبها ) شنو هي ؟
رضى : مكتعرفيش تبوسي …هه !
مروى : راه اول مرة ارضى راها باااينة مغنعرفش … غفللللتني
رضى : داكشي لي عجبني ….
مروى : ( كتحاول تقلب ليه الموضوع وهو عينيه غير كايتفحصوها ) قوليا ارضا مغنسافروش ورا العرس ؟
رضى : ( نعسها عليه كيمشط فشعرها ) عندي واحد تلتيام …. ختاري فين بغيتي دوزيها …
مروى : غاا تلتيااااام ؟؟؟؟؟
رضى : وشحال بغيتي ههههه راني قتليك مخدامش عند شي حد كيعطيني لكونجي .. راه هادشي لي عطى الله
مروى : ممممم ..( بدات كتشوف لكرافاط لي فصدرو علات عينيها فيه وهو نبتسم و مرفوع بسبب حركاتها وهي بقات كاتفكر مدة وقالت) بغيت نمشي لافرااان ….
رضى : كيعجبك ؟؟؟ اهاه نمشيو
مروى : ( ضحكت ) حححلف ؟؟؟
رضى : ومحتاج نحلف … صافي نمشيو لافران الى عاجباك … واخا ماشي وقتها .. كنت كنتسناك تختاري شي بلاصة دالبحر فهاد الصهد
مروى : مكنعرفش نعوم …
رضى : ههههه … دابا تعلمي …. نمشيو الالة الافران …. ومنبعد نشوفو بلاصة اخرى
مروى : فخبارك ارضا .. بغيييت نشوف المغرب كامل كانحماااق على السفر ولكن عمرني سافرت حدي غير كازا .. ومرة وحدة مشينا لشمال كنت باقا صغيرة مشيت مع خويا ومراتو
رضى : ( كيدوز يدو على خدها كاتسنط ليها ) فينما لقى وقيتة غانديك تشوفي بلاصة .. تااتعيااااي .. وتكملي هاد المغرب الالة ….
مروى : ههههه كضحك عليا ونتا نهار الخطبة وتابعاك فيه الخدمة
رضى : واخا هاكاك نديرو ليك الوقت بزز … (علا ليها وجهها بيدو) قربي زيديني بوسة اخرى باش نوض نطلع ….
مروى : ( شافت فيه ) وخليك مزال قنطت بوحدي ..
رضى : نتي راه تنقوليك يلاه معايا غذا للمحمدية مكتبغيييييش …..انا راه الى بقييت هنا راه مغيعجبكش الحال …
مروى : ( ضرباتو لصدرو ) انا قلت بقا معايا مونسني اما البسالة ديالك بلااااش ..
رضى : نوض نوريك البسالة تااااني ؟؟؟؟؟
مروى : ( بتحذير ) رررررضى
رضى : ههههه ( قرب لحنكها عضوو تاغوتاااات )
مروى : اااااي .. تسطييييتي
رضى : ( كيدوز يدو على شفايفها ) فيهم شي مذاق فشكل ….. مكيخليكش تبعد منهم ( رجع باسها وهي بغات تهرب )
مروى : ( بانت ابتسامة خفيفة على شفايفها اول مرة يتغزل بيها بحال هاكا وشافت فيه ) كنت كنتسناك باش نهضرو ساعة بانليا غانديرو كولشي الا نهضرو …..
رضى : عشرين يوم وانا كنهصصضصر .. بااراااكا خليني نديرر
مروى : مغادير حنى نتزوجو بااااارااكا …
رضى : تاهاد ماماك لي سادة علينا الباب خاصها العقل .. ينوضو يديو بنتهم قبل ماندير فيها شي كارثة …
مروى : هههه كان كايحسابتني بعقلك هههه …. ( رجعات تكات على صدرو كتشوف فسقف بيتها وهو كيمشط على شعرها ) رررضى
رضى : ابنتي ….
مروى : خليني ندير مكياج للخطبة عاافاااااك .. ومبغيتش يشوفوني باهتة بحال هاكا وكنبان بحالا عندي 12 عام
رضى : وهوما شغلهم ؟ هادشي كيخصني انا وياك هوما جايين غيري يشهدو على رضى خاطب مروى ….
مروى : ( علات راسها فيه ) واابغيييت نبان زويييييينة
رضى : وشكون قاليك نتي خايبة ؟
مروى : هانا والله مااااانكتررررر …
رضى : انا راه هضرت معاك قبيلة وراه مكنعاودش الهضرة ديري لي عجبك ….
مروى : ( ضرباتو لصدرو ) ففف شحال معكس ….
رضى : انا والله ماعندي مع داكشي امروى .. نقولهاليك من دابا .. انا عزيزة عليا النقاوة واخا .. ولكن قوة الصبايغ كاانعيفهم كون لقيتك مصبوغة دابا منقربش ليك ….. غير باش تعرفي عقليتي وصاااافي … انا خليك غا هاكا طبيييعية بارااكا عليا ….
مروى : فهمنا .. فهمنا النقاش معاك عقيم …( تكعدات)صبر نوريك تكشيطتي ..
ناضت عليه ومشات بجهة البلاكار وحلات وحيداتها من علاقة ووقفاتها قدامو كاتوريه
مروى : زوينة ؟؟؟؟؟
رضى : زوينة .. ولكن ثقييييلة مغيجيكش الصصصهد ؟؟ بقاي غير بهادا جاك زوين
مروى : لا … ضروري تكشيطة … وهي ثقيلة الصراحة ولكن مغنجلسش بيها بزاف
رضى : وانتي تعرفي …. انا كاع مكنفهم فهادشي
مروى : ( هبطات شفايفها كتشوف فتكشيطة وتشوف فيه ) صاااافي هادشي لي غاااتقول ؟؟؟؟
رضى : وشنو نگول ؟
مروى : مغتقولش غتجيك زوينة .. غاااتجيييك واااعرة .. وااااااو شحال زوينة
رضى : ( بدا يضور راسو ) ههههه … ابنتي هادشي ديالكم انا راه مكنفهمش فيه نتوما لي كيعجبكم هادشي .. من الشوفة راه بانت زوينة قلت ليك زوينة صافي هذا الجهد ديالي … سيري عندي شي صاحبتك ولا مرات خوك هي لي غتقولك واااااااو هههه ماشي انا …
مروى : ونتا على شنو كتقول واااو ؟
رضى : شي حديدة … شي سلعة مزياااانة …. شي شينيور زوين …. شي طاجين … مسمن .. حريييرة …
مروى : وباااااز .. انا كانهضر ليك عليا خلي خدمتك وكرشك فالتقار … شنو غنلبس متلا لي غتقول عليه وااااو … بغيت نعرف ذوقك
رضى : ( دار يدو تحت راسو كيشوف فيها كايعاود سؤالها بتفكير) شنو لي غتكوني لابسو نقول عليه واو ؟؟؟؟؟؟ غانقول واو فحالة وحدة
مروى : ( كترد التكشيطة للبلاكار ) شنو هي ؟
رضى : تكوني مالابسة والو
مروى : ( وسعات عينيها وبانليها صاكها قدامها هزاتو ضرباتو بيه ) والله مككككتحشم
رضى : هههههه ( شد عليها الصاك وبدا يحل فيه ) كاين فيه شي فلوس بعدا ولا والو …
بدات كتسد بلاكارها وهي ترد ليه لبال جبد من جيو دالكوستار كارطة دارها ليها تما
مروى : اش داكشي ؟؟؟ ( سدات بلاكارها ومشات عندو شدات صاك وجبداتها لقاتها كارطة دالبانكة وهو رجع دار يدو ورا راسو متكي على الكادر دالسرير )
رضى : خليها تما غاندوز ليك فيها غذا من البانكة الفلوس ديال صداقك … معنديش مع داك الجوايات بحالا شاري بقرة …
مروى : اشمن صداق ؟ انا بابا وخوتي قادين بيا تاا نجي عندك وعطيني فلوس ماشي دابا ….
رضى : داكشي من حقي انا .. غاندوزو تما وضبري راسك معاه …. ( مد يدو لكوستار جبد بواطة كحلة ) اجي حقا جربي هاد الخاتم لاماجاش قدك يردو ولد عمتي دغيا لشي ذهايبي هنا يقادو ليك
بقات شحال واقفة كاترمش وكاتشوف فيه كايجبد البواطة ، واش هاكا غايقدم ليها الخاتم ؟؟؟؟؟ بهاد طريقة الباهتة !!!! شوفي واش يجي قدك !!!!!! ….
خدات تنهيدة عميييييقة لخيبة ظنها تاني و بلي احسن الاوقات لي حلمات بيهم ماتحققوش وهي تزفرها متقبلة الواقع لي ماااعجبهاش ومشات كبسات حداه حل ليها البواط كان نفس الخاتم لي ختارت .. عين وحاحب بحجرة مربعة كولو من الذهب الاصفر ومرصع بحجيرات بيضيييين وخداتو عليه كتقيس بدووون شغف ، كأنه خاتم عادي ماشي دخطابتها …حسات الشغف طفاه ليها بخضوريتو ….
مروى : ياك عطيتك قياس صبعي
رضى : شوفي يقدر يكون شي غلط ….
مروى : ( خشاتو فصبعها هو يتخشى الخاتم نيشان ) شششوية واااااسع
رضى : ( هز ليها يديها كيشوف معاها وباسها ليها ) انا قلتها ليه…. في حالة ما لا زدتي شيوية فالميزان يجيك هو هاداك
مروى : اه احسن … انا غاندير ليه سكوتش ولا سولوفاان باش مايطيحش ليا
رضى : ( شد عليها البواطة بعد مرادتو ليها وحطها فوق طابل دونوي ديالها ) تاتعطيه للماماك مع داكشي لاخر راه عندهم ماهزيتوش انا
مروى : علاش عذبتي راسك بزاف ؟
رضى : ( ضار كيشوف فيها ) مالك رخيييصة علينا ولا ….
مروى : ششكرا …
رضى : وقربي اراي بشي بوسة اخرى خاصني نوووض اشمن شي شكرا
مروى : لاااااا
جرها من يديها لصدرو تاني وغاص فشفايفها متحكم فوجهها بدييه باش متحركش وهاد المراة لسااانو كيداعب لسااانها شي لي خلاها تحس بمعدتها كتزيد تققلص مافاهمش هاد شعور الجديد لي كاتعيش كيفاش تصنفو واش زوين ولا مثير ولا محرج .. شعور ملنس شفايفو فوق شفايفها .. قبلاتو عنيفة فنفس الوقت عامرين بالاثااااارة … ماعرفاتش كيفاش تتعامل معاهم وكولشي كايطرا قدامها بسرعة مامخليش ليها وقت تحلل … عاد طلقها تنفس كيشوف فيها ويبتسم وهي مزززنكة مكطلعش عينيها فيه. …
رضى : نتي راه ماخصش الواحد يشاورك …
ناض من على السرير ومشا باتجاه الفيست ديالو وهي باقا جالسة وكتشوف معاه ….
مروى : دابا صافي مغتجي عندي تانبغيو نركبو الخواتم ؟
رضى : ( بقى تايضحك وضار عندها ) واش نتي متأكدة مبغيتيش تمشي معايا غدا للمحمدية ههه ؟؟؟؟
مروى : شوف شوف ( كتميق فيه ) بحاالا ميييتة عليه .. راني غير حيت قنطااانة ماشي ميتة عليك …..
رضى : ههههه واشوفي نتي … انا بعدا راه مت ….
بدات كتبسم وناضت عندو كتقاد ليه الفيست على كتافو وكتنفض عليهم وشافت فيه وهو ساهي فيها وفهاد الحركة لي دارت شحال دغدغاتو من داااخل ….
مروى : صيفط ليا ماماك ووجدان نشوفهم كاعما شفتهم
رضى : ( حك فوق حاجبو كايتحكم فداك البعثرة لي بعثراتو بداك الحركة وكمل ماشي معاها فنفس لموضوع ) مغندخلش انا وسط العيالات .. غنخرج ديريكت نطلع لفوق .. هوما دابا يجيو عندك راسهم بلا متخرجي .. اه حقا .. عنداك تطلعي لفوق بهاد جوج زغيبات هاكا منتوفين راه نحسنهم ليك
مروى : ( حلات عينيها ) كييييفاش؟؟؟ ررررضى ماشي عيقتي عليا
رضى : كون كانو غير العيالااااات ماعنديش مشكل ولكن دنيا دابا مخخخلطة ومعاياا دراري ديال عمتي شوية عينيهم زااايغييين مافيا مانوض نعطب شي واحد فهاد النهار …..
مروى : حرااام علييييك ( جاتها البكية ) صاااوووبتووو بالعشق جااا زوين
رضى : وحيت جا زوين غطيه …. الاالة انا مباغي حد يعرف ليا شعر مراتي كيييداير .. لا زوين لا خايب .. ( بجدية مع قليل من عدم الرضى) غطيه وغطي عنقك راه صدرك كيبان ….
مروى : ( بتذمر ) رررررضى
رضى : ( مشا بجهة الباب ) هضرة وحدة راه قلناها …. ديري زيفك مزيان ومتبقاش تلعبي بيه … الحجاب عندو قواعدو …
مروى : ( مفقوصة ) عرفتي شنو .. كككبر اللحية حسن ليك
رضى ( ضار عندها كيمشط بيديه لحيتو ) هاكا معجببااتتتكش !
مروى قلبات عينيها مفقوصة وهو لاحليها سمارت فون ديالو على سرير
رضى : ديريه يتشارجا طفى ليا ….
لاحو وخرج مشا وهي بقات كتنهد فلخر مشات ليه بانليها ايفون وهي ماعندهاش شارجور ديالو بقات غير شاداه فيديها وفعلا كان طافي … يلاه غاضور تحطو فوق طابل دونوي هي تحل الباب ودخلات غزلان كضحك هي وحفصة
غزلان : كاااع هذاا وحش ….تعطللتو من قبيلة وهوما تيسولو عليك بغاو يشوفوك وكنقولو ليهم باااقي معاها
مروى : اختي شغاندير بوحدي هنا … كان مونسني
غزلان : ايهايهاي على الحب … شوفي كييييف زززنكها
حفصة : بااااينة مص منها الدم هههههههه
مروى : ياختي مكتمرگوووش .. حفصة شوفي ليا شي واحد عندو شارجور دايفون عطالي نشارجيه ليه بلا شارجور مانعرف منين غنجييو ليه انا ..
حفصة : صبري راه البعلوك دولد خالة ماماك عندو … انا نمشي نحيدو ليه ..
غزلان: وهانتي … فين تلقاي راجل يلوح ليك تيليفون ههه خوك قرن وزمارة ملي تزوجنا والله ماكنعرف تالكود دتيليفونو هههه
مروى بقات غا كاتشوف وتضورو فيديها وضور هضرة غزلان فراسها …. تاشافت غزلان جراتها من يديها قرباتها عندها
غزلان : اجي نقوليك واش هو اخواني ولا كيفاش قالك سكينة مسلمش عليها ؟؟؟
مروى : منييين جاتو …. غير قاليك مكيسلمش على لي مكيعرفش
غزلان : والله الا عببر عليها …..
مروى : غزلااااان … غاااانموت بالفقصة قاليا ديري الزيييييف
غزلان : تاخوك وصاني عليه مابغاوش طلعي بشعرك عرياااان …. غاديريه كيجيك زوين
مروى : ( بالفقصة) اوييييييلي منييين … شعري جاني حححسن
غزلان : دابا ماعندك ماديري لا هو بغا لا خوتك بغاو صافي كملي على هادشي بالرضا والخاطر …. ماتجيش تالسبب تافه وضيعي كولشي
مروى : ماديريش مكياااااج مديريش الزيييييف .. الحككرة والله
غزلان : آلهبيلة …راه الراجل المغيار راه ررررزق .. اش غاديري بشي ديووووث .. ماغار عليك الى وراك غااالية عندو … حمدي الله على زهرك راهم برااااا كااايموتوو منك بالغيييرة وكيبخو السم ملي شااااافوووه تا اتااي مابغاوش يشربوه غير جالسين وعاگدينهم .. طلعي شدي فيديييه وفففرعي ليهم المرااااارة .. كانو يقيلو يهضرو ويعيبو فييييك .. سيري ررردي ححقك غابالهداوة وضضضحكي وباني فرحانة راكم جييييتو فنين بجوج ….
مروى بقات غير ساكتة تادخلات حفصة هازة شارجور
حفصة : شدي شوفي واش يخدم ليك …
شداتو عليها ودارتو فالبريز غير برنشاتو وطلع ليها كيتشارجا
مروى : صافي … هو هاداك
حفصة : وتسالي رديه ليا راه حيدتو ليه غا يززز حاضن عليه بحالا ديال الذهب …. ( ضارت موراها ورجعات شافت فيهم ) غزلان زيدي غيبداو يغديو كانو كيتسناوه غير يخرج … مروى خليك هنا تالورا الغدا وبداي تلبسي …..
مشاو سدو لباب وهي تنهدات يلاه غتمشي تشوف الشيلان فين لي يجي مع تكشيطتها وهي تسمع الباب تحلات وشافت فيها بانت ليها ماماها داخلة ومعاها سعيدة ووجداااان دخلاتهم عندها وخرجات تقابل الغدا
سعيدة : تبارك الله وصلاة عنبي ( كتشوف معاها وتشوف مع البيت )
وجدان : عروستنا الغزاااالة على سلاامة طططلقك لينا ههه ..( عنقاتها كتسلم عليها وقربات هي سلمات على سعيدة )
سعيدة: الله يهنيييييكم ويسعدكم .. ( هزات ريال ديال النقرة وبدات تركبو ليها فصبعها الصغير ) خلي هذا فيديك يلقف عليكم العين .. العينين برا كيلهطو الله يستر خرج من البيت وطلع وهوما تابعينو غياكلوه … توما فحرم الله ونبي رسوووول الله ( باست ليها يديها ومروى خطفاتها حشمانة )
مروى : ( شافت ليديها ) ششكرا زويييين
سعيدة : تانتي فنة وغزالة …( شدات يديها ) انا ابنتي ديريني كي مييييمتك .. الا زعف عليك ولا دار ليك شي حاجة اجي عندي .. خلي واليديك فتيييقار .. انا نوصيييك لي يطرا بينك وبييييينو يبقى بينك وبينو .. هادشي راه كنقولو تالبنتي نهار تزوج …. عمرررر دخلي مشاكلك نت وراجلك وسط العائلة ديالك … حيت نتي وياه غتصالحو وهوما غيبقاو كارهينو ….. دار ليك شي حاجة صوني عليا نجي نتفاهم معاه .. هو وليدي عصبي شوية ولكن مااايخسرش ليك الخاااطررر وحنييييين ودرويش …
مروى : كوني هانية … ميكون غير الخير
سعيدة : واخا هاكاك ابنتي راك بعقلك شوية بشوية غاتزيدي تعععلمي ….
وجدان : ( تكات على السرير ) خويا شبعيه غا مااااكلة ميقولش ليك لا .. يموووت على كرشو
سعيدة : هههههه موحش مسكين فماكلة الدار …. عندو واحد المراة مسكينة كبيرة كتجي تخمل ليه وطيب ليه ولكن ماكلتها حالتها انا ذقتها لا مذاق لا نسمة كانت كتخدم مع شي ناس علموها داك طياب دريجيم ….. لا عطرية لا زيت ….
مروى غير كضحك فرحانة لي طلعو ضريفات ورتاحت ليهم وسعيدة جلسات كتنش على وجهها
سعيدة : الصهووودات يالاطيف الله يبرد علينا …..ملي تخرجو نتي وياه .. لي شافت فيك وضحكات ليك ضحكي ليها بالقياس وجمعي راسك لاتشوفك حلوة تشربك … ولي عيطات عليك متجاوبيهاش وماضوريش عندها … انا مكنتيق لا فديالي ولا فدياولكم .. انا خواتاتي لي هنا من مي وبا عرضت على بناتهم المزوجات ولي باقات بلا زواج والله معرضت عليهم … كلهم كانو عينيهم محلولين عليه وانا وليدي مابغيت ليه زواج العائلة بغيت ليه البراني يعيش مهني … تيقولك بعد من دمك لا يطليك .. وانا بغيت نبقى مزيانة مع خواتاتي …..
مروى : اوا تاني المكاتيب اخالتي
سعيدة : انا نوصيك ضحكي بالقيااااس لااتلهطيها بالعيييين ونتي غزيولة وفنيونة هاكا دغيا تشد فيك ونتوما باقي تابعكم ضريب الصداق ….اه حقااا …. ماماك قاتلي عندها شي ما فيه الرقية شربيه عافا ابنتي ….
مروى : واخا كوني هانية
سعيدة : عجبك الخاتم ؟؟؟
مروى : لا عجببني انا لي ختاريتو راه وراهم ليا فتصاور
سعيدة : اوا مزيااااان … محمد مغتلقايش معاه مشكل غا هو ملي تشوفيه تعصب عطيه تيساع خليه يييهضر تاااايعيا ويتم راااجع عندك رااااسو ….. والدويرة ديالك راها صغيورة وحلوة ودغيا كتجمع خدمي شغالك بكري وهاا نهارر كامل ديااااالك رتااااحي وشبعي نعااااس وملي يدخل عطيه الوقت ديالو … وهاد المسائل راكم عارفينهم دابا نتوما بنات الوقت تعرفو حسن منا ( مروى تحرجات ونزلات راسها ووجدان تدخلات )
وجدان : اويلي اماما غاسمعتيها صغيرة حسابلك مكتعرفش ههههه راه انا قدها كنت نعرف القرامد وباقا نعرفهم ههههه لاعساك ماديش على ماما .. راه تانا كتقول ليا هاكا ههههه
سعيدة : انا كنهضر معاها بحال بنتي .. حضيني نتي … اه ونزيدك وااياااااك ضسري عليك دوك الجارات لي عندو .. غا المبعككة على ختها وسلعة الفشر والتبعكيك وبان عليا نبان علييييك وحافضين جوج كلمات بالفرونسي … نتي دخلي وسدي عليك بابك … نشري فالبالكون كاع لاطلعي لسطح …. ماتما گنس على الله يبدل داك السكنة وتهناو …
🍃🍃🍃🍃🍃🍃🍃🍃🍃🍃🍃🍃🍃🍃
كانت كتهضر معايا وهي متحمسة ….. كتوصي و كاتعاود …. ولكن صوتها واحد اللحظة ، بدا كااايغراق ….كايغراااق بزاف حتى مابقيت كنسمع والو ..
كنحرك راسي ونبتسم وانا كنشوف فشفايفها كيتحركو …. كنسمع الصواااات غاااارقين بحالا سادة وذني فشي حمام شعبي …..معرفتش كيفاش ولا فوقاش …..حتى لقيت راسي واقفة قداااام العائلة كاااااملة .. تيليفونات قدامي كيصورو وانا مادة ليه يدي كيرررركب الخااااتم …….كولشي داز بالزربة بلا شعور مني …. عليت عيني فيه وشفتو .. كان مضارب مع الخاتم كيركبو فصبعي ومركز مع يدي …. ميمكنش ابتسامتو شحال كاااانت زوينة ؟ ابتسامة جد خجوووولة !!! علاش معايا مكيديرش بحالها ؟ … الشعور ديال التقبيل باقي كنتفكرو وكضرني كرشي … عمرني عشت حسن من داك الاحساااس ، شعور ديال مابغيتيش داك لحاجة فنفس الوقت كاتمناه يعاودها !!!!!! …. هو كيفاش قدر يدير فيا هادشي كامل وانا يلاه عشرين يوم باش عرفتو ….. عشرين يوم حسيت بحالا كنعرفو شحاااال هدا …. بقوة ما هو شفاف معايا وواضح دغيا قدرت نولف نهضر معاه …… ونهضر معاه حسن ما كنهضر مع الناس لي كنعرف من سنيييين .. كيفاش دار ليها ؟؟؟؟؟
تمدات قدامي بواط فيها خاتم مضور فضي .. تبسمت ملي شفتو ….. ومد ليا يدو لبستو ليه .. تقاااااتلت باش نخشيه فصبعو .. يديه كانو كبااار وسمرين .. خلاوني نزيد نخاف .. مناش ؟ ماعرفاش …
. حاسة براسي حابسة البكية .. حاسة براسي باغا نضحك فنفس الوقت باغا نغووووت …. ماعرفتش علاش الخاتم تعكس فيدي …. تنرفزززت ومبينتش على وجهي .. حاسة بقلبي بدا يضرب بججهد … اصوات الزغاريت والصلاة عنبي والضحك كنسمعهم غراق بحالا راني فشي بييييير غاااارق وهوما فوق مني ونا كانحاول مع داااك الخاااتم .. كنغمض عيني ملي كيجيوني ذكرياتو لراسي … هو … أنور .. انا مراسماش معاه ذكريات واقعية .. ولكن راسماهم فخيالي … هاد اللحظة لي انا كنركب فيها الخاتم لرضا .. انا حلمت بيها .. انا تخيلتها … ولكن كان انور .. مكانش رضا .. كان الولد لي كنبغي ……
فففف ….اخيرا ركب داك الخااااتم …. حتى ولا وجهي حمر بحالا درت مجهووووود كبير ….
تقلبنا بجوجنا عند الناس وحسيت بيدو حاوطات ليا ظهري وشدات فخصري …. لمساتو كيبورشوني .. معرفتوش علاش زاعم لهاد درجة ….. كنزيد نخاف من زعماتو وانه مكيخاف من حتى شي حاجة وجريئ لابعد حد .. شوية بشوية كنزيد نتعرف على خصال فيه كيزيدو يخلعوني كتر … راجل شاد بزمام الاومور كلها …. وكايتحكم فكولشي …. حتى مني انا … شاد بزمامي بواحد طريقة غريبة ! متملكة نوعا ما ….
خوتي كانو واقفين شادين ولادهم فيديهم وضاحكين ليا …. فرحانين بزاف !!!! ماما فداك القنيتة كتشوف فيا وعينيها دامعين … بابا واقف حدا باباه وكيحرك ليا راسو بفخر …. بنات عمتي وضحتكهم الصفرة خلعاتني … العائلة .. العائلة لي كنكرهها .. لي هي لي وصلاتني نتزوج على 17 عام …. بسبب هضرتهم ونعتهم ليا .. انا واقفة حداه …. هنا.
عليت راسي كنشوف فيه .. هانا شادة فيديه .. هانا تخطبت .. هانا وسط دارنا … اش باقي غيقولو عليا مزال ؟؟؟؟
عائلتو ؟ كانت نقية فنفس الوقت الغدر فعينيهم … كيشوفو فيا بطريقة معجباتنيش بحالا ديت شي حاجة ديالهم ؟ تاينشو على وجههم بالنشاشات وكيشوفو فوق النيف … من غير ماماه وختو وواحد مراة كنظن خالتو …. بوحدهم لي كنشوف محبة صادقة فعينيهم .. وشكون كيهمني من غيرهم !!!!
رضا عراقت يديه فيديا .. حسيت بيه متوتر معاجبوش الجو … فهاد العشرين يوم فهمت بلي ماعندوش مع كثرة الناس بحال هاكا … رخيت شوية من يديه باش مايزيدش يحس براسو مقيد ولكن زاد شد فيها …. بصح مجلسش معاياا بزاف … شوية واعتذر فوذني بلي تخنق .. وخرج مشا .. وتبعوه كاع الرجال …
بقيت وسط العيالات بوحدي كنشوف فيهم .. وكيشوفو فيا .. كنحس بيهم كيهضرو عليا كاملين .. على تكشيطتي .. على زيف مجاش مع التكشيطة علاش مدايراش مكايج علاش الخاتم جا كبير على يدي .. على السنسلة لي ركب ليا .. على الساعة لي جاب ليا … عليه هو ….. على الماكلة .. على اصلنا ودارنا …. قدرت نميز كاع هادشي واخا مكنسمعش …. بلا منحس شفت جنبي …. علاش ميكونش انور لي جالس هنا .. كنت متأكدة كون كان هو .. مغيمشيش .. مغيتخنقش .. غيشد ليا فيديا وغنتصورو ونشطحو انا وياه … غيكون ضااحك وكيقول ليا النكت وغايكون فرحاااااان …. انا علاش هاكا موحشاه … علاش علقني بيه لهاد درجة ..
انا مع الراااجل المثااااالي …. وفاش كنقول الرجل المثالي انا كنقصدها … قبل مانطلع .. بفضول مني .. شعلت تيليفون وانا متأكدة غنلقى الكود … ومالقيتوش .. راجل شفاف لهاد درجة .. لدرجة قلبت تيليفونو واخا ماشي من حقي .. كان تيليفون ممل .. مافيه تاحاجة نوووض عليها صداع ويخلييني.. واتساب عامر بالخدمة …. وحتى من فايسبوك مافيه حتى شي أمي معرفتش علاش دايرو !!! عامر بالاخبار .. يوتيب عامر بالقرآن و ناشيونال جيوغرافي وفيديواات ديال مواد البناء العصرية … غووغل عامر غير بروشيرش على كورة والاخبار … ونتفلكس كولو مسلسلات دالاكشن والحروب والتاريخ …… والاهم .. انه مقيد على نمرتي ” BENTI ” ماعرفتش واش نفرح حيت راجلي وفي وخاطيه التبرهيش والبنات والكذوب … ولا نتقلق حيت ممل ومغنلقاش علاش نتنااكر انا وياه …. واخا هو فالصراحة كااااااين بزاف دالحوايج لي مكرهتش نكر عليهم ولكن عزة نفسي مكتخلينيش … مكرهتش نقوليه .. تغزل بيا .. قوليا حبيبة .. قوليا حياتي .. قوليا كنبغيك …. قوليا شحال انا زوينة .. قوليا كنعجبك …. هضر معاياا بزااف .. بقا معاياا بزاف ….. حاااول ديير اش كان كادير ليا انور باش مانبقاش هاكا كانتفكرو ونعيش معدبة …. نسيني فييييه ….
تاحاجة من هادشي مكنلقاها ديما اتصالاتو دغيا كيقطعو بسبب الخدمة .. كينعس بكري .. وكيفيق بكري …. مواضيعو جديين بزاااف …. موسوس من ناحية الامراض وتقليدي بزاف فعقليتو … صارم … وانا عندي غير 18 عام مابغيتش نعيش فهاد الملل ومانلقاش هاداك الصخب لي ماعشتوش حتى فدارنا وكنتسناه فهاد الزواج ….
ماولفتش مع انور بحال هاكا … انور كان كيعبر على مشاعرو .. كان كيقول ليا باش كيحس … كان كيتغزل بيا ملي نصيفط ليه تصويرتي ….. كان كيصفيط ليا تصاورو ديما … عكس رضا ..
صعيبة ….
صعيبة بزاف تكوني احلام مع شي شخص .. وشوية بلا متحسي تلقايهم كيتحققو ولكن مع شخص اخر .. وبطريقة مختلفة تماما !!!!! …
انا فرحانة لي احلامي تححقووو وسديت الفام ولكن كنت غنكون فرحانة كتررررر كون كان معايا لي حلمت براسي كنحققهم معاه .. عارفة كتلوموني بزاف .. ولكن راه هدا هو الحب … بغيتو من كل قققلبي .. عرفتو كذاب ودوزت ليه .. عرفتو كيجرجر فيا ودوزت ليه .. بغيييت غير نكووون معاه … غير يكون هو لي فحياتي الكراش ديال طفولتي ولي منين حليت عيني فالمراهقة وهو كيعجبني .. السعادة لي كنحسها معاه ماكنحسها مع تاحد …..
اه حتى الاحاسيس لي مع رضى مختلفين …. حتى العلاقة لي مع رضى زوينة ولكن عقلاااانية كتر … انا توحشت الحماق .. توحشت انور … توحشتو بزاف …… ..
بلا منحس تاني … معرفتش فوقاش نزلت وفوقاش بدلت ولا وفوقاش مشاو … فوقاش جا نهار اخر ….و لبست هاد الجلابة …. زوينة !!!!! انا امتى درت هاد الشال فوق راسي .. وفوقاش هزيت هاد الصاك ولا فوقاش ركبت فطموبيل ووقتاش دخلنا لمكتب العدول ..
لقيت راسي جالسة على كرسي كنتسى معايا ماما وبابا وعكوزتي .. كنشوف فيه هو واقف مع خوتي ومع باباه …. كان كيضحك …. كيبان ليا فرحان …. هو علاش زوين بحال هاكا ؟ علاش انيييق تالهاد درجة .. نقي ومااافيه تاشي عيب !!!!! علاش غير كنسهى فيه كنسى كولشي .. نسيت حتى واش غندخل نسني على زواجي ….نسني على واحد العقد كيقول رررضى ولااا احد غير رضى لي غيكون فحياتي .. جسدي غيتعطى ليه …. وقتي .. احلامي .. حياتي …. كولشي ….. غيمشيو لرضى … للرجل المثااااالي … لي ختاريت … على الراجل لي كنبغي …….
مبقيتش قادرة على هاد العذاب لي عايشة فيه وانا كنشوف حياتي كتعطى لواحد اخر .. مبقيتش قادرة نصبر وليت نتمنى فوقاش يدوزو ليام ولقى راسي صافي وليت كنبغي رضى ونسيت انور غير باش نعيش مرتاحة … تنميت كون كانت شي قوة تمحيه ليا من راسي …. عماين ونص مكانتش ساهلة .. كان هو الضو لي كينور هاداك البيت المظلم ……
عطاوني ستيلو فيديا كنشوف فالعدول وكنشوف فيه هو لي وقع فورقتو وكيتسنى نوقع .. جالس وحاط يديه على رجليه شابكهم … ضرت بعيني وانا نلقى ماما وعكوزتي جالسين عنيهم دمعانين وخوتي وبابا وباباه واقفين كيشوفو فيييينا …. قدرت نلمح شوية الدموع فعينين ماما لي شفت كتمسحهم وشفت تاني فطارق لي حمار ليه نيفو … وعينين رشيد لي لمعو ….. وابتسامة خالد لي كاتقول بزاااف …. قدرت نشوف تاااا الحزن لي فعينين بابا ولي مخلطين بالفرحة ….. هادوك النظرات خلاوني نحرك هاداك الستيلو على هاديك الورقة بلااااااا حتى منححححس …. شفت فرضى لي تنهد بحالا كان هاز تقل وتبسم ليا .. لا عفااااااك لا .. متبسمش ليا بحال هاكاك .. متخيلينييييش نطيح فيك دغيا ؟ … لا عفاك داك ضحكة لا …… مضاربة مع راسي كيف شي حمقة تاسمعت زغاريت من ماما وعكوزتي … والمباركات من العدول شفتو كيسلم عليهم وجات تلاحت عليا ماما كتعنقني .. منين جاو هاد دموع انا علاش كنبكي ؟ واش حيت ماما كتبكي ؟ ولا حيت انا فرحانة ديت رضى .. ديت الرجل المثالي … ولا حيت ندمانة لي ماديتش انور .. الرجل لي كنبغي …….
ففففف …. تزوجت !!! اه بهاد الطريقة الباااااااردة ….. ماشي هاكا حلمت بها …. وتاحاجة اصلا ملي حلمت ما تحققات منغير اني تزوجت ….
تمنيت كون علقت احلامي غير بالحدث بلا منتعلق بالتفاصيل … هادوك التفاصيل لي مرررضوني وعدبوني … حيت هادي هي خدمتهم اما يرفعوك وفرحوووك الى حضرو .. ولا يعدبوك الى غااابو ……
مكانوش حاضرين … بيرو دالعدول كان ممل …. رضا مقال ليا والو بحالا هاد الحدث شي حاجة عااادية !!!!! ….
تزوجت ….. صافي …. تزوجت ….
مدام الرحموني ….هاكا غتولي سميتي وهادي هي كنية ولاااادي ….. انا هاد صباح تعلنت مراة متزوجة بمهر قدره خمسين الف درهم على سنة الله ورسوله ….. انا مروى العلامي بمحمد رضى الرحموني ……. راجلي ……
كلمة جديدة عليا بزااااف ….صعيب نتأقلم ولكن خاصني نتأقلم .. صعيب ننساه ولكن خاصني ننساه .. صعيب نبغيه ولكن خاصني نبغيه …. رضى ساهل .. ساهل بزاف الواحد يبغيه ولكن انا …. كاين عائق بيني و بينو .. غشا ممخليهش يدوز .. غشا سميتو ذكريات انور …. وغاندير جهدي كامل يتقطع هاد الغشا ويتحل قلللبي لمحمد رضى الرحومي … ويتسدو كاع البيبان …..
اختاريت الرجل المثالي ومغندمش على هاد القرااااار …….
بغيت نقول ….. كنتمنى مانندمش….
بعد شهراين ونصف …..
غادة جاية فبيتها شادة التيليفون كاتصوني وهادي خامس ابيل ومكايجاوبش ….
لابسة كسيوة كحلة طويلة وشعرها ضافراه فجنبها …. ومكياج خفيف …. الهاراج كان على برا ديال هضرة العيلاااات والدراري الصغار …. وهي كلها متوترة و مفقوصة مع تيليفون علاش مكيجاوبهاش ..
تاشافت لباب تحلات .. وطلات عليها لبنى
لبنى : مروى .. وااخرجي اصاحبتي عكوزتك قربات تمشي ونتي ماكلستيش معاها …. خرجي بعدا قطعي غا الحلوة ديالك …
مروى : ( بمورال نازل ) صافي غي قطعوها ماااعنديش الخاطر آلبنى ..
لبنى : امالكي تاني ؟؟؟؟؟ من قبيلة ونتي مزيانة !!!!
مروى : ( لتخات تيل على السرير ) رضا مكيجاوينيش …
لبنى : وغايكون فشغلو ..ياك قبيلة هضر معاك قاليك راه مشغول
مروى : اه وقلت ليه مايمكنش ماتجيش …. وقاليا دابا يشوف .. فللخر هانتي كاتشوفي كانصوني ومكايجاوبش …. هدا دابا مايعصبكش … شنو هاد الشغال لي مايخليوهش يقول جوج كلمات نعرف منهم واش جاي ولا لا …
لبنى : والله امروى الى خصك العقل .. خلي السيد فخدمتو ….راه عندك غا حفلة د الپيرمي .. علاش مسكين غاتجيبيه من المحمدية تالهنا وترجعيه بليل …. ماشي حشومة ؟
مروى : ( كاتهضر حابسة البكية) واخا غي حفلة حيت شديت الپيرمي ….ولكن راك شفتي كاع دوك الخرياااات برا كايمعنيو عليا واش راجلك مايجيش .. واش مغايحضرش معاك … واش مايباركش ليك …. وزعما درت بالعاني ليلة السبت غير حيت كايجي فيها هو لبنسليمان و غايصبح ماخدامش …. مالقى هو هاد الكاميو امتى يجيه ؟؟؟؟ … قاليا غايساليو مع العشرة … اوا هاهي العشرة ونص دالليل ومكايجاوبش …
لبنى : وايقدر يكون فالطريق ماعرفتي
مروى : فطريق البنى كااايجاوبني … راه ديما داير البلوتوت كايصوني ليه تيل كايقلب ليه الطموبيل ….
لبنى : وصافي دابا خرجي عند الناس قطعي الحلوة عكوزتك راه تعطلات ….
مروى خدات نفس عميق وهزات تيليفونها وخرجات لبرا باش ماتبينش ليهم …ابتسمات فوق خاطرها ومشات كلسات فالصالة لي كانت عامرة بعائلتها والجيران بنات الحومة لي دخلو يباركو ليها الپيرمي لي شداتو … وماماها كانت دايرة ليها حفلة صغيرة شراو ليها خوتها حلوة وجمعات العيالات …..هوما كايتهاودو وهي كضور تيل فيديعا وتغزز فشفايفها بالفقصة …
خديجة : واااهي كانت كاتعرف شوية كانو كايعلموها خوتها مرة مرة …. وراسها خفيف دغيا حفضات … ولكن تااني كون ماشي راجلها لي عطى الفلوس باش دغيا دوزات لامتحان كون راها باقا كاتسنى ….
الجارة : وفين هو مغايجيش ؟ سمعت واقلة قلتو غايجي ؟ غانسلمو عليه بعدا
مروى : ( تنهدات ) لا اخالتي موحال …. مشغول شوية
سعيدة: اويلي على مشغول .. وشكون كالسة انا هنا كانتسنى .. ياااك قلتي غايجي ؟؟؟؟ عاد نوض انا الحاج من النعاس يجي يديني !!!
لبنى : هاوا طارق كاين اخالتي راه لفوق .. الله اودي نوصلوك تالبااااب … ضروري يكون رضى … حنا نوصلوك
سعيدة : اويلي على انا نعدب السيد لااا .. انا قالت ليا مروى غايجي داكشي علاش كلست نتسناه …
مروى : راه كانصوني عليه مكايجاوبنيش مانعرفت فين راه لايحو …. ماعارفاش واش سالا شغالو ولا مزال
سكينة : اويلي يقولك بعدا غير واش جاي واش لا … مايخليكش تاني بحال هاااااكا ….
بنت اخرى : ياختي رجال كايعصبو بحال هااااكا … كايهمهم غا راسهم …. وهوما زعما يلاه باديين حيااتهم خصو يدير ليها خاطرها …. بدا يقلقها لينا هههه
وجدان : خويا ماشي شي واحد لي داير رجل على رجل اختي …. الراجل مشغول وهي مراتو وعرفاه مزيااااان …. كون لقى الوقت يجي كايجري .. راه تا مروى مارخيصاش عليه …. وبينو بينها اش دخلنا حنايا ؟؟؟؟؟
سعيدة : ( شافت فمروى كيفاش تبرزطات من هضرتهم وعينيها معمرين بدموع و قربات كاتهضر غير بيناتهم ) اشوفي عندي ياه … ماتخليش هاد الطعاارج يعمرو ليك راسك …. كو راه مشغول راه مامساليش هو يبقى شاد الطرقان … ملي ماجاش هاد ليلة السبت راه مشغول …
مروى : عارفة اخالتي …. ولكن كانتساه غي يجاوبني .. يعطيني شي خبار واش جاي ولا لا ، مايخلينيش هاكا معلقة
سعيدة : واهو ايه حقا تحقيقا راه خاصو يجاوبك .. هانا راه ميمتو وعارفني هنا كانتسنى ….. ولكن لاتبينيشاي حدا هادو …. الله ييستر باغين غا فين يتشفاااو …
خديجة : مروى نوضي ابنتي قطعي الحلوة ديالك …. وخلي السيد يخدم خدمتو خلاتها الحاجة راه مامساليش الله يحسن العوان مسكين مكيحكش فراسو ….لهلا يخطي علينا الرجال حنا فديورنا وهوما برا كايدمرو علينا … لهلا يخطيييه علييييك …
مروى : ( نتهدات ) وااخا ….
ناضت بلا خاطر ….كانت باغاه يكون معاها ويدوق منها هو اللول .. ولكن خصها تقطعها للناس باش يمشيو …. كانو كالسين كل وحدة منين كتنش على وجهها بسبب الصهد وعراقو بالشطيح …. قطعات الحلوة وهوما كايتصورو وسعيدة كتصفق هي وخديجة ووجدان وعيلات خوتها يخلقو ليها الجو …. كانت حلوة على شكل طرقااان وعلامات المرور ومكتوب فيها مبروك رخصة السياقة … بداو عيلات خوتها كايدوزو العصائر وهي كاتشوف مع وجدان للتصاور لي خدات ليها …
وجدان : سيفطي هادي لمحمد جاتك زوينة …
مروى : مغانسيفط ليه تااااوحدة …. يمشي يزرمر … كون بغا يشوفني كون جا
وجدان : هههه وهاكاك نكديها عليه غا بينك وبينو وبلا متبيني لهادو .. ياختي سمحيلي واخا عائلتك ومع احتراااماتي ولكن كانحس بااغييين ياااكلوك بالسم والغيرة … ياختي واحلة ليهم قد هاكا ؟؟؟؟؟
مروى : اودي لي فيها شي سم تموت بيه …. انا كنفكر غا فراسي وهمي هاد ساعة مامسوقة لحد
وجدان : وراه داكشي باش قاتلاهم .. ماما منهار خطابتكم نتي ورضى وهي ماحملاتهمش ديما كاتقوليا باش نوصيك تردي بالك … غايزيدو هضرة وحدة غاتنوض ليهم ببلغتها ههههه لهلا يوريهاليك ملي كاتنوووض ههههه
مروى : هي لي تصلاح ليهم …. ماما كتحشم
كايهضرو بيناتهم حتى نطقات وحدة من العيالات
– اوا اخديجة فوقاش العرس ؟؟؟ رصيتو ولا مزال ؟
خديجة : نعيدو نهار الاربع ان شاء اله .. اوا ونهار السبت عندها الحنة مرحبا بيكم ….
– ان شاء الله .. وفوقاش اللية؟
خديجة : نهار واحد غانجمعو فيه كولشي .. راجلها ماعندوش مع الهاراج بزاف وتا خوتها قبح منو .. نديرو ليهم حنينة ورا الغدا اوا وباللليل نقصرو شوية وتمشي مع راجلها ….
– او نتوما تعرفووو …. بنت وحدة وباقا صغيورة كون كبرررتو ييها…..
سكينة : اويلي انا راه لا ماكانت العمارية مانجيش ههههه
سعيدة : اوا كاع لاتجييش .. ياك العريس واعروسة جااايين … او الله يجعل البركة ( وجدان كتزطم عليها ) زايدون شحااااال من هرس تندار فالقاعات قدااااش وحضرو ليهم غا المطربين الكبار .. وطلقو لاغداااا ليه … مابقاتش فالعرررس .. بقات فالدوااام ……
خديجة : واييه … عندك الحق فهادي … والتكبااار الالة تورية راه ديما خوتها مكبرين بيها ماشس تالدابا …. خوتها ماكرهوش يهزوها للقمر يديرو ليها العرس…..
سعيدة : اودي راه العرس نهارو داااايز … يتجمعو الحباب ونفرحو معاهم والله يجعل البركة … نحيدو علينا تااالعييين …
– والله الى حسابتنا غاديرو فالقااااعة …. اوا ماعلييش نتوما تعرفو حنا ماعلينا غانجيو نحضرو … والله يكمل عليهم بالخير ..
سعيدة : امييييين … الله يتاويهم …
ناضت سعيدة ماشية بجهة بيت مروى وبدات تعيط ليها
سعيدة : مممروى .. اجي ابنتي وريني القبلة نصلي جوج ركيعات اجي
ناضت مروى وتبعاتها تا وجدان لي عارفة ماماها مكتصليييش فهاد الوقت اصلا .. ودخلو لبيت مروى وكلسات سعيدة على سريرها وكلسات حداها …..
سعيدة : اجي قوليلي…. واااالو مزال مابغا يهديه الله يرطاب راااسو شوووية يحضر معاك
مروى : نهار دالعرس ؟ لا والو …راك شفتيه مابغاش قالتها ليه حتى ماما داك نهار فاش جا تفاهمو على العرس هو وعمي حسن ومابغاش … تانا مابغيتش نحكر عليه …..
سعيدة : ( شافت فوجدان ) سيري عيطي ليا على خديجة بلا مايردو ليك البال …غمزي ليها بينك وبينها نهضرو شوية …الله يخليها سلعة مابغاو لاااينوضو يخليونا تحتتو … الحداش دليل هادي وهوما باقين شادين الركنة …يخلييييها قاعدة
مروى : هاهوما غايمشيو دابا كانو كايتسناو غا الحلوة وداك الساع نهضرو فخاطرنا …
سعيدة : لا لا منصيبشاااي … تعطلت انا غا هو لي عطلني حسابتني غايجي … مانا كون مشييييت …حسن نلقاه داه نعاس غا فالصالون …
يلا غاتجاوبها وهي دخل وجدان وخديجة لي جرات كرسي وكلسات حداهم
خديجة : ياك لاباس الحاجة
يتبع
شاركنا رأيك في هذا الفصل 🌹