جنب الواد

تقديم بقلم ✍️ Qisatok
كاين حكايات المكان فيها غير خلفية… وكاين حكايات المكان كيولي جزء من نبضها.

جنب الواد كتدخلك لعالم ريحتو شتا وتراب وعود قماري، كيتسمع فيه صوت الحوافر وسط الخضورة، وكيقدر الهدوء فيه يتقلب فثانية لصوت بارود.

عالم ما هو قديم تماماً وما هو عصري، ما هو واقع كامل وما هو خيال… ولكن من أول ما تدخلو غادي تحس بحالو كان موجود ديما فشي بلاصة بعيدة على عينيك.

وهنا، ملي كيتلاقاو جوج طباع ما كيعرفوش التراجع… واحد ما كيقبلش يحني راسو، ووحدة الكبرياء عندها أكبر من أنها تخلي شي حد يفرض عليها كلمتو، حتى أبسط مواجهة تقدر تولي تحدي… والتحدي يقدر يخبّي وراه إحساس آخر أخطر بزاف.

بين العناد والغيرة، بين القوة والضعف اللي ما خاص حتى واحد يشوفو، وبين عيون كتفضح حوايج اللسان رافض يعترف بيها… كتبدا حكاية بطعم مختلف.

جنب الواد… قصة رومانسية بالدارجة المغربية، فيها الشوق، الندية، الخيل، أسرار العيون، وغرام كيجيك من حيث ما كنتيش كتسناه. 💙

القصة بقلم ✍️ ماريبوسا
قراءة ممتعة مع Qisatok♥️📖

تقديم القصة بقلم الكاتبة ✍️👇

قصة_قصيرة 🫐🌌
جمعات الليل بالنهار ..
جمعات الكحل بالبيض ..
جمعات الشتا بالربيع ..
جمعات البرد بالدفا ..
جمعات الأرض بالسما ..
جمعات التمرد بالخضوع ..
و جمعات قلبو هو بعينيها ..
قصة ماشي واقعية و ماشي خيالية .. هي فشي بلاصة بيناتهم بجوج .. ماشي قديمة و ماشي عصرية .. لا الزمن و لا المكان معروفين .. تجربة جديدة عليا فالكتابة .. ماعرفتش واش فشلت ولا نجحت و لكن لي عارفة هو أنني رتاحيت و أنا كنكتبها .. قصة بغيتكم تشوفوها و تشموها و تحسو بيها كتقيسكم ماديا ماشي غير معنويا .. بغيتها تسرقكم بتفاصيلها من واقعكم كيفما سرقاتني و تعيشكم حياة أخرى و حب ماتنساوهش .. حب بين بنت متمردة صعيب تتروض .. و راجل كيفضل يمو.ت و مايحنيش الراس .. و بيناتهم الشيخ و ولدو و مكحلة عمرها خمسين عام ...
🫐 جـــنـــب الـــواد 🫐
✨رويـت عطـشي و عطـش عودي فدقـيقة .. و عشـت وراهـا سبـع سنيـن عطـشان .. لعينيــك ..✨
🫐🫐🫐
• تصنيف: رومانسية 💙✨
• Playlist:
- طه نوري - الروح الطيح.
- طه نوري - بالهدى.
- موك صايب - كحلة العيون.
- مهدي مزين - و يا الغرام.
- سلمى رشيد - قلبي بغاه.
🫐🫐🫐
قبلما تبداو تقراوها كحلو عينيكم .. رشو على حوايجكم ريحة العود القماري .. قادو ليكم كاس ديال القهوة معطرة ولا براد دأتاي بالشيبة .. شدو شي بلاصة بعيد على الصداع .. و إيلا كانت الشتا كتصب حلو الشرجم و جلسو حداه .. 💙

القصة بعنوان : جنب الواد
بقلم : Mari Posa