وإن سألوه عن الجمال أجابهم بــزيـــنــــة ... كان عاشقا لها وفجأة اصبح هو الــنّــمــرود❤️🔥
السيدة ضارت وتبسمات لها:أهلا الغزالة كدايرة لباس عليك
زينة:حمدالله اخالتي نت بخير
السيدة:الحمدلله تديها معاك ولا تاكليها هنا؟
زينة مدات ليها الفلوس:لا غير جمعيها لي عفاك عندي لخدمة
فهاد اللحظة وقف عليها بابتسامة على وجهو:سلام
هنا زينة تلفتات غير شافتو تبسمات بخجل:سلام لباس
كان منصور لmanager:حمدالله ونت مبقيتش شفتك من داك النهار نت بيخير
زينة:الحمدلله غير مع الخدمة وصافي
السيدة مدات ليها الحلوة ديالها وهي عاقدة حجبانها عكس كيف كانت قبل مايجي:هاك ابنتي بلاتي نعطيك الصرف ديالك
منصور:رجعي ليها فلوسها خاصك شي حاجة أخرى
قالها وهو كشوف فزينة لي غير سمعات كلامو تزنݣات:لا لا مكاين لاش راه خلصت
منصور:صافي خودي فلوسك وسيري
زينة تحرجات شوية ومعجبهاش الحال:والله متخلصها صاف
منصور هنا عقد حجبانو شوية:شنو زعما معفرة علينا
زينة حسات بالصهدة بغات غير تزيد بحالها نزلات عينيها:لالا ماشي هكاك مكاين لاش مرة اخرى ان شاءالله
منصور:واخا اللالة مكاين مشكل قوليلي شنو بانلك نتغداو بزوج ليوم إلا بغيتي طبعا
زينة رتابكات وبدات كضور فعينيها:احم صراحة عندي الخدمة بزاف مغاديش ننزل خليها حتى هي مرة أخرى عفاك
منصور هنا بقى كشوف فيها قراها بان فيها التوتر وهاد النوع كعجبو الحشومي والصعيب فنفس الوقت رجع بتاسم ونطق:واخا الالة على راحتك غاهو عنداك تنساي
ومع كمل كلامو جاه اتصال دار الطيلي فوذنيه وقبل ميزيد شافيها:يلاه نخليك بسلامة
حركات راسها بآه بابتسامة صغيرة وغير بعد زفرات براحة مكتبغيش لي يحكر عليها وهي ما بينها وبينو والو ومترضاش يخلص لها شي حد وهو براني كتحرج بزاف وهي حشومية مكتحملش طيح فهاد المواقف ضارت تهز حلوتها وصرفها كانت السيدة لي كتخدم تما مراقبة الموقف نطقات:قوليلي منين نت
زينة بابتسامة صغيرة:أنا من تازة ههه
السيدة بإعجاب وهي تتشوف فيها:وأنا كنقول هاد الزين وهاد النفس ديالمن طلع ديال التازيات الحرات
زينة بتاسمات بخجل:ربي خليك اخالتي عينيك لغزالين
السيدة:خليك هكا صعيبة وبنفسك باش تبقاي ديما غالية
زينة بتاسمات لها وكتمعن فكلامها شكراتها وزادت من طبعها هكا تتفادى الجنس الخشن وكتحشم بزاف وفنفس الوقت تتحس هاد منصور فعلا عاونها ولكن تتبقى أنها متتعرفوش وحنا البنات مكنبغيوش من الدقة لي يحرجنا ولا يحكر علينا البنت كتبغي تجي بهواها وݣانتها وتكون مرتاحة وزيد مبغات كثرة بنادم التيقار حسن واخا تعرفات على عادل ولكن حيت شافت أنه محبوب فالشركة كلشي كقولها فيه زوينة وزيد شافت فيه واحد شوية من خوها يوسف تاهو ضحوكي بحالو ونشايطي تنهدات ودخلات لمكتب ديالها تحت أنظار مريم لبرݣاݣة ديال سامية كطلع وتنزل فيها جلسات وبدات الخدمة فشي وراق خاصها توجدهم ليه قبل من البوز ديال لغدا زفرات وقت قصير وخدمة كثيرة لكن معندها مادير
داز الوقت وسالا الاجتماع الميريكاني قبل ميمشي جا عند زينة وودعها بلطف خلاها غير كضحك وتحرك راسها بلا فاش مشى تنهدات وهي خاشية راسها وسط لوراق حتى وقفات عليها كطلع وتنزل فيها عينيها كيف القرطاس ونطقات بحقد:الخديديمة
زينة هزات راسها غير شافت قبل مدير حتى ردة فعل تيرات فيها سامية:كبرو لك الشان اليوم
بقات غير تتشوف فيها بلا حتى كلمة شي لخلا سامية تزيد:غير بلاما تفرحي النصارى راه عقلهم فيه غير الك**وا
زينة تنهدات نزلات راسها تتكمل خدمتها ونطقات:لاحول ولاقوة الا بالله
سامية ستفزها لبرود ديالها:ممم الشريفة العفيفة زعما وأنا متأكدة كن جاتك الفرصة تعطي لحمك بلاصة الجفاف مكنتيش غادي ترددي وشفتي الميريكاني كن شافك بالطابلية وموسخة ݣعما كان غادي يدوي معاك غير بلاما تفرحي
ومع نطقات كلامها ضارت تتعيوج خلات زينة غير تتشوف فيها مزال عقلها حاصل فالليسي والمعاطية ديالو مجات فين تخرج سامية حتى كانت سمعات جواب يليق بيها
زينة:مكعرف الزنى والوسخ غير لكابر وسط منهم
سامية فهاد اللحظة خرجات عينيها وضارت كانت زينة مزال جالسة فبلاصتها وتتشوف فيها ببرود عكسها لي لعافية شعلات فيها:نت الموسخة كتعايريني أنا
زينة:معايرتكش وإنما دويت تانا كيفما حليتي فمك نت طعنتيني فشرفي ومع ذلك بقيت كيفما أنا متعصبت ماغوت حيت عارفة راسي شنو كنسوا عكسك نت شوف كيف كترعدي ومعصبة وحالتك حالة إذن قصتك بشي حاجة لفيك
سامية العافية شعلات فيها مكانتش كتحسابها هكا عند بالها غديرها تحت السباط وتسكت ليها كيفما تتشوف يزيد كبهدلها ومكدويش نسات أنه راه المدير هداك عكسها هي طير تاطير راه غير خدامة بحالها واخا من عائلتو نطقات وهي كارزة على سنانها ومفقوصة:إلا زدتي نهار واحد هنا راني منتسماش
زادت وهي معصبة تتشتف وصوت الطالون كاسر الدنيا نزلات راسها وهي تتحركو بلا وكتردد لا حول ولا قوه الا بالله آخر وحدة يأثر فيها كلامها هي هاديك مع كملات الوراق وجمعاتهم صونا الطيلي ديال لبيرو جاوبات:آلو
يزيد:دابا نلقاك فلبيرو عندي
مع كمل كلامو قطع عليها مدات مجابت لأنه ديما هكا ناضت هازة وراقيها فيديها وزادت دقات بشوية ودخلات هنا شافت سامية جالسة وهو واقف ويديه فجيابو حسات بشي حاجة لأنه ديما مخنزر فيها ولكن دابا كثر بانليها مع وقفات قدام لبيرو نطقات بصوت شبه خافت:هاهما الوراق قاديتهم
يزيد شاف فسامية:شكاين؟؟
سامية ناوية على خزيت نيت:اسيدي كملنا لإجتماع خرجت قصدتها بنية صافية بانليا داك كيڤن خارج من عندها قلت ليها متمشيش معاه فالخط النصارى معروف عليهم نيتهم كيف دايرة مكاين لا معقول لا والو غير التفلية غير كملت كلامي السيدة جهلاات دخلي سوق راسك شغلي هداك ونت شنو حرق جيهتك سمعيني اختي هادي شركة عمي منبغيش نشوف فيها الوسخ ونسكت وسمحيليا
يزيد فور ما كملات كلامها ضار عند زينة لكانت فشبه صدمة وتيرا فيها:مالك نت تزادت فيك شي ضلعة ولا شنو
هزات عينيها وشافت لأول مرة بلا دموع بلا والو متعطلاتش ونطقات:راه فقانون الشغل ومن العدل إلا كان مشكل بين شي زوج كنسمعو لهم بزوج ماشي غير واحد ونبداو نحكمو تانا من حقي نهضر وندافع على راسي اموسيو أو لا؟
سامية هنا طرطقات فيها عينيها على هاد الجرأة بلعات ريقها بشوية وشافت فيزيد لي البرود كضرب على وجهو وممعروفش ردة فعلو كانو عينيها فعينيه ومنزلاتهمش وهادشي لاحظو هو موالفة غير تترعد كلمة زوج تنزل عينيها وتزنݣ عكس دابا هي من واحد الناحية عندها لحق خاص يسمع لهم بزوج ولكن داك الكره لي كحس بيه من جيهتها مخليه ميفلتش الفرصة فأنه يتيري فيها بكلامو لقاصح هادشي لكان كضور فبالو زينة ليغيݣل لاعبة عليها وعلى سبة خاصها غير معامن وجابهم ليها الله بزوج محارت فحتى حد لأن للصبر حدود يزيد من بعد سكوت:هادي راه شركة ماشي بلاصة ديال التزنديق باغية داكشي تتخرجي وسيري لبلاصتو وآخر مرة تجي عندي شي وحدة تتشكى من لوخرا راكم موظفات ماشي براهش وسوق لعيالات خاطيني
سامية فهاد اللحظة طلعات معاها الصهدة لأنه جمعها معاها وهي لي جبدات هاد الصداع وجاية تجري عندو ومرضاتش كلاشاها قدامها زاد كمل على كلامو لي موجه لزينة:ونت تعلمي كيفاش تهضري مع لي هاز كنية الشركة عرفي مقامك اشريفة
سامية تحلاات ليها هنا شافت فيه مبسمة ورجعات شافت فزينة باستهزاء ونطقات:مكعرفوش راسهم معامن
زينة فهاد اللحظة خدات القاصح ولكن ولفات نزلات راسها شوية وعاود شافت فيه ودمعة وحدة مطيحاتهاش كموالفة:سي يزيد راك زعما قاري وواعي ومدير ديال شركة قدها قد الخلا سميتها وازنة فالسوق خاصك تكون عارف حنا كلنا بحال بحال وآخرتها شبر فالتراب
يزيد كشوف فيها كيف كلمة كلمة هي وياه مجا فين يهضر حتى كانت سبقاتو سامية وهي مخرجة عينيها متتيقاش:عارفة راسك معامن كتهضري واش مريضة نت ولا مالك؟
زينة شافت فيها:تاشي حد معارف الهضرة لي دازت بيناتنا من غير لي فوق منا جيتي هنا زدتي ونقصتي لي بغيتي طعنتيني فعراضي وبشي حاجة معلاباليش بيها لغنقولك هو حسبي الله ونعم الوكيل
يزيد كشوف فيها كيف تتهضر بلاما تزعزع لأنها تقاست فشرفها وتظلمات سهى وهو عينيه فيها عويناتها الخضر لعندهم واحد الطابع خاص كيف تتطلع حجبانها كيف تتخرج لسانها تمسح فيه شفايفها وكتكمل كلامها
كتمعن فملامح وجها الزوينة عكس فلوقت لي كتكون تتشوف فيه مكطولش فيها الشوفة نسى أنها هزات فيه الراس وخاصو يأدبها كيف ديما واخا هو لحكم بلاما يسمع وعطاتو الهضرة لكانت صحيحة ولكن هو داك الكره لها بالنسبة ليه غالطة واخا مسمعش لها مفيقو من سهوتو غير طيليفونو لكان كصوني شاف المتصل ورجع عقد حجبانو وتيرا فيهم بزوج:حبس عليا هاد التخربيق نت خدمتك ومن بعد غادي نتفاهمو على هاد كلمة مني وزوج منك(دار الطيلي فوذنو)يلاه طيري
ومع جاوب المتصل تحرك وهو كهضر دار لسامية إشارة بيدو زعما يلاه مع وقفات شد فيها شي لخلاها تبسم وهي تتشوف فيه فرحانة وغادية هازة راسها متكرهش يبقى ديما هكا مخليين زينة وراهم تتشوف فيديهم لمشابكين عضات على شفايفها وضورات وجها مبغاتش تشوف كثر خرجات من وراهم وسدات باب لمكتب ديالو نزلات راسها كانو غاديين قدامها مبغاتش تشوف جيهتهم ݣاع سامية غادية ومبتاسمة هازة راسها وهي شادة فيه مضورة يديها على دراعو راجل كامل مكمول حداها وهادشي لتتمنى يبقى ديما حداها ويعاملها هكا مسولاتش راسها شنو سبب هاد التغيير المفاجئ فرمشة عين وهو ديما كصدها مفكراتش لأنه عاجباها هاد اللحظة ومسخاتش تخرج منها ركبو فالطوموبيل يلاه غيديماري قطع التيليفون شافيها مبسمة وطالعة معاه عاد سرات معاه شنو دابا كان باغيها معاه غير فالشركة وتصرع معاه الدور ولكن حصلات فيه دابا زفر وهنا نطقات:نمشيو نتغداو ايزيد كاين واحد ريسطو آزياتيك غير قريب واعر
يزيد زيادة على كلشي بنت عمو كيفما كان الحال راه تتجيه حرك راسو بآه وديمارا بلا حتى كلمة وزادو فالشركة كانت زينة جابدة غداها فبيروها سادة عليها مخرجاتش ومبغات تشوف حد حتى لبنى لتتعرف راه مزال مريضة تتاكل وهي مفقوصة واخا عطاتهم جوابهم ولكن حاسة براسها مزال معصبة داك الموقف تشادو قدامها هو لي محملاتش رغم أنها عارفة من الشركة كاملة كقولو راه هي لي لاصقة فيه وتتسمع الموظفات كقولوها ولكن شنو تبدل دابا حتى ولا هو مبغاتش تفكر بزاف ومسولاتش راسها علاش دارت يديها على جبهتها وكملات ماكلتها وهي معصبة
دازت هاد العشية بلاما تعاود تشوفو مرجعش وجا نهار جديد كانت غير فالدار بحكم كان داك النهار عيد الاستقلال مكاين لا خدمة لا والو تلاحت بعدما تغداو وجمعات الماعن خوتها كانو مشاو عند السيد لكدير معاهم السوايع بقات غير هي وتيباري ومسعودة فهاد اللحظة يلاه غتديها عينيها وهو يصوني تيليفونها كانت لالة أم الغيث:آلو ماماتي
أم الغيث:آلو حبيبة فيقتك واقلة كنت كترتاحي
زينة:لا لا غير متكية نجي عندك
أم الغيث:آه نجمعو شوية وجبدت لك شي حوايج ثاني
زينة:واخا أنا جاية دابا
قطعات ومشات لاحت عليها بينوار دالبيجامة طلات على مسعودة وتيباري ناعسين ومشات عندها دخلات تسالمو وجلسو كانو كتحتو ويديو ويجيبو فالهضرة حتى زينة بدات تعاود ليها على الشركة ثاني وفعايل مول الشي
زينة:ايوا تانا مسكتش ليهم منين جاو خارجين شد فيها وزادو كي الحلاقم بزوج بلا حشمة بلا حيا وحنا كلنا عارفين هي لي لاصقة فيه وتاحد مكقولها فيها زوينة الله يستر
أم الغيث تتشوف فيها كيف غير هضرات عليه هي وهاديك وهي تعصب وبانت فيها الفقصة شي هضرة فبالها لكن مبغاتش تسولها دابا تنهدات:الدل الله يستر شي بنات معاطينش القيمة لراسهم معارفينش أن الرجل ديما عينو فالحاجة الصعيبة
زينة:الله يعطيها العز أما الدل غارقة فيه تالقاع
أم الغيث:لا عطاتك كلمة عطيها عشرة تاهي غير خدامة بحالك بحالها أما المدير فراني ابنتي شوية متسكتيش على حقك ولكن بالكلام الموزون جاوبيه لبقيتي كلمة منك كلمة منو غيزيد يتبت بلي فعلا راك داخلة فالمشكل والصداع
زينة بلاما تحس:اودي هو راه عارفني كدايرة غير كبغي يتعامى
بقات تتشوف فيها أم الغيث وهي تنطق:واش شحال هدا فاش كنتو مع بعضكم كان هكا زعما متسلط ومكتفاهمش
زينة قاست ليها الوثر الحساس لي هو ذكرياتها معاه بلعكس كان مختالف وبعيد كل البعد على حالو دابا لخلاها تبغيه حنيتو عليها وطيبتو ومعاملتو لها كان داير لها كيف الما القليل عمرها تنسى داكشي كدوز قدام عينيها بحال غير لبارح عينيها غرغرو وتمالكات نفسها وتنهدات:بلعكس كان أحن منو مكاينش وهادشي لخلاني نبغيه ونتعلق بيه كنت صغيرة ومراهقة قاسني اهتمامو طيبتو منقدرش نوصفهم كنت كنلقاه فالشدة معايا راجل إلا بكيت هو لكان كمسح دموعي منقدرش نوصف لك شنو كنت كنحس فاش كان كعنقني كنحس بيه حيط محمية بيه هو الوحيد لكنت كنكون معاه وأنا مخايفاش لأنني كنت صغيرة كان يقدر يضحك عليا لكن لا والڤيلاج كان الراجل لي مكقربناش محرم علينا ولكن تحديت كلشي ومندمتش عمرني شفت فعينيه الغذر من جيهتي كان خوفو عليا من خوف خواتاتو واخا شاءت الأقدار يتبدل كلشي أنا عاذراه على معاملتو ليا دابا لأنني غلطت وغذرتو داكشي لكان داير عليا أنا كنعتارف أنني معمرني مغنلقاه فشي راجل آخر واخا كنتفكر شحال هادي ودابا قلبي كضرني على حالتنا كيف ولات ولكن مكاتيب الله يسهل عليه فلي تستاهلو
كانت تتحاول متبكيش لكن متقدرش داكشي مقادراش تخطاه نزلو دموعها شي لخلا أم الغيث تجرها عندها وتعنقها وهي تتشهق قلبها مجروح وتتسمع مواساة أم الغيث:صافي احبيبتي هذا مكتاب معرفتيش شكان غيوقع كن بقيتو بزوج صافي فيها خير
زينة دموعها سخان على خدودها:عرفتي كنحس براسي كنتقطع وأنا كنشوف دابا الكره فعينيه الشوفة مكطولهاش فيا بعدما كان داير ليا الشان
بعدات عليها وهي تتمسح دموعها وتتحاول تسكت ولكن مقادراش ربي لعالم بيها قلبها كضرها بزاف فهاد اللحظة نطقات أم الغيث بحزن:مزال كتبغيه ياك ازينة
زينة معندها حتى مهرب وجوابها راه باين وهي معتارفة بيها لراسها ونطقات ودموعها مزال كطيحو:5سنين دازت معمرني قدرت نساه مزال فقلبي كيفما شفتو النهار الأول ولكن هو
أم الغيث قاطعاتها:بعد داكشي كامل لي عاودتيلي انا نأكد ونبصم لك أنه مزال كبغيك ازينة ومزال فبالو
زينة قاطعاتها:كنقولك الشوفة مكشوفش فيا غير كغوت عليا بعدما كان شاد لي بخاطري وعمرو خسرو لي ولكن أنا لي هرست كلشي ونستاهل هو نسى كلشي مدام أنه
أم الغيث قاطعاتها:فنظرك علاش كدير هادشي قلتيلي مع الدخلة بين لك الضدد قلتي كضور فيك على أتفه الأسباب ومكعاملكش مزيان عكس الناس لي معاك كحرث عليك وواخا تتكوني دايرة خدمتك مزيان كنتاقدك ويغوت فيك كلشي باين ابنتي هادي ماشي شخصيتو لأنه ممطبقهاش على كلشي غير معاك مزال هاز من جيهتك ومنساكش هو مجروح وباغي العافية لي شاعلة فيه عليك يطفيها عن طريق هادشي زعما كنتاقم منك وكن بصح ناسيك ومتجاوز ݣعما يقبلك فشركتو ويرجعك لحياتو ثاني باش يرد ليك الصرف بتصرفاتو وزيد جرا عليك من مور ماشاف النصراني كتغزل بيك زعما مفهمتي والو
زينة غير ساكتة وتتخمم زعما يكون غار كيفما غارت هي من سامية المشكل أن ديك الشوفة لكدير فيها تتخلعها مستحيل تكون ديال شي حد منساهاش تلفات وترونات من نهار حطات رجليها فديك الشركة وهي غير الضغط والستريس حطات عليها أم الغيث يديها:أنا مزال معارفاش شنو وقع وعلاش خليتيه ولكن راه كلشي باين إلا كنت قادرة تجلسي معاه وتشرحي لو إلا كانو عندك أسبابك أنا كنشجعك ديري هاد الخطوة مدام مزال مناسياهش يقدر حتى هو يكون باغي يسمع ليك ويعرف السبب غير مجروح ومراضيش الرجل إلا كان كبغييك ديال بصح فراه واخا شنو يوقع عمرك تحيدي من بالو الرجال آه جنس قصيف ولكن نهار كبغيو كبغيو بصدق ومن قبلهم ولكن غير مرة وحدة فعمرهم إلا كان نت لي فتح لك قلبو فراه عمرك تخرجي منو يوقع لي يوقع
زينة تتفكر زعما إلا حكات ليه يتيقها واخا غتقيس عائلتو يقدر حبهم يرجع متكرهش لإن هادشي لقالت أم الغيث كنطابق عليها هي مرة وحدة فحياتها حبات وحبها كان هو مكتابوش لبعض وحبهم تدفن ولكن حتى إلا طلاقات بواحد آخر وخداتو عمرها غتبغيه كيفما بغاتو هو شي حاجة كثر من الحب بالنسبة لها هو عمرها نسات ولا تجاوزات واخا تدفن داكشي او ولا ماضي
أم الغيث عرفاتها تتفكر:يمكن ربي عطى فرصة أخرى لعلاقتكم مدام عاود طلاقيتو فهاد الظروف معرفناش شنو مخبي ونتمناو يكون غير لخير ان شاءالله
زينة تتخمم معرفاتش واش أم الغيث كلامها على حق ولا غير ذنوبو كخرجو فيها الدنيا ضارت وجابتها ليه خدامة عندو يديرها تحت السباط ينتاقم ويبرد قلبو فيها
داز الوقت فبلاصة اخرى
كانت جالسة فالجردة هي وماماها وختها دايرة رجل على رجل شادة الطيلي ديالها كضور راشقة لها وغير كضحك بداكشي لوقع ليوم خرجات تغدات معاه وهادشي عمرو وقع ومقالش لها لا غير ناضت ختها هنا مها نطقات:خاصك ديما تبقاي هكا لاصقة فيه باش يولفك وقيلي عليك بحال هاد الصداعات مع الموظفين باش متبانيش ليه مبرهشة خدمي عقلك
سامية:كوني هانيا وليت عارفة كيفاش نكسبو
سعيدة:سمعيني هو مساهلش كيف كحسابلك ومغيجيش بالساهل هداك أنا لي كنعرفو راه مو بفمها ديما كتقول بلي مكتعرفش شنو تحت راسو وبداكشي لي وقع ليه أكيد مبقاش كثيق فالنسى خاصك أول حاجة تكسبي الثقة ديالو متفكري فوالو دابا من غير أنه خاص يثيق فيك
سامية تنهدات:درت كلشي على ودو كنحلم بيه بالليل والنهار ولحمارة لوخرا مخلياه الحاجة كتمشي غير عند لي ميستاهل
سعيدة:هانت قلتيها متستاهلوش كانت غير بنت الدوار ومزيان لي مخداهاش وتحيدات بحالها نهار العرس غبرات هادشي كي دل على أنه مكتاب لك خاصك غير تعرف ليه لأنك نت لي من مقامو
فهاد اللحظة كانت تتشوف تصاور الصدقة بالضبط فاش كان كتكي فالحوالا وباه كذبح واقف على كلشي بيدو وهادشي لي مخليها تتحماق عليه راجل بكل ما تحمل الكلمة من معنى ركزات فواحد التصويرة وهي تتشوف شي حد واقف فباب الكوزينة لي على الجردة تشد فالتصويرة كتفرج فالذبيحة زومات وكانت هي دغيا وراتها لمها:هاهي ديك خيتي السكرتيرة دوالو جات ضربات الجفاف نهار الصدقة ديال بابا وعمي الخدامات تاهما ولاو مشاركين معانا ديك الشركة وكبر لهم الشان
سعيدة شدات الطيليفون:نساي كلشي دابا وركزي فيك نت وياه
مع كملات كلامها نزلات راسها تتشوف وهي تعقد حجبانها تتحقق فيها وتشوف لدرجة هبطات نظاظرها لعينيها وهي تتزومي دغيا هزات راسها:واش سميتها زينة واش خدامة معاكم؟
سامية شافت فمها باستغراب:باش عرفتي سميتها ياكما جات شي نهار دارت لينا الميناج راه هداك هو سهمها
سعيدة مخرجة عينيها وهي تتشوف فيها متخفاش عليها وعاقلة عليها مزيان كانو كميزوها عينيها لخضر مشات معاهم فاش بغى يخطبها وكانت نهار ضريب الصداق فاش وقع داكشي خرجات عينيها وشافت فبنتها مصدومة:ياكما رجعات معاه كيفاش حتى بانت ثاني وفين كانت مشات وعلااش
سامية بلاما تفهم:شكتقولي اماما شتتخربقي
سعيدة نفاعلات:وراه هادي زينة هي لكان خاطب ودارت ديك الفضيحة نهار العرس هادي هي صاحبة دعوتو
سامية عينيها خرجو بصدمة عمرها عرفات هاديك لكان غياخد لأن فاش كان غادي يتزوج كانت تتقرا ففرنسا ومحضراتش آخر وحدة توقع هي زينة لروناتو وروناتها فالعائلة ومشات خلات سيرتها وسيرتو على كل لسان سنين هادي آخر وحدة توقع كان كبغيها وطلب يدها هي هاديك:واش متأكدة
سعيدة:متخفاش عليا كنعرف طريكتها كاملة كانو خدامين عند خالو مقابلين ليه لڤيلا لي فالڤيلاج ولكن فين مشات من مور ما غبرات تبعوها حتى عائلتها كلهم رحلو من الڤيلاج مخليين كلشي سنين هادي غتكون شي فضيحة كبيرة دارتها هي باش كلهم غبرو دقة وحدة شواقع دابا علاش جابها للشركة
سامية مبقاش عندها العقل وشعلات فيها العافية بدات تتحرك راسها بلا بحال الحمقة:لا لا خاص نهضر معاه خاص نسولو علاش رجعها ميمكنش ترجع خاص يبغينيي أنا واش ݣاع لي درت ميصدقش هو ممسوقش وزادتني تاهي ياكما رجع معاها
سعيدة شدات بنتها من وجها ونطقات بحدة:وياك تمشي تسوليه وتفكريه فيها داكشي فات خاصك تفكري فدابا لي هو نت وياه بعد ديك الفضيحة غتكون كحالت فعينو داكشي باش خاصك نت لي ترطبي ليه قلبو وتنسيييه فيها وفنفس الوقت تقلبي على شي طريقة تكركبيها هي من الشركة غتزاد عليك الخدمة
سامية العافية شاعلة فيها:ندير أي حاجة غير يولي ليا أنا وهاديك تغبر ثاني نعفط على أي وحدة تجي بيني وبينو
كانت تتعني كلا كلمة قالتها وعينيها كنفتو الشرار والفقصة بلعات ريقها وهي تتوعد لها بلي مغتقيلهاش ومن غدا غدير ما فجهدها تحيدها من الطريق جاها الشك ياكما رجعو ولكن تتشوف تصرفاتو معاها تتقول العكس تبسمات بخبث فاش طاح فبالها واحد لبلان غطبقو غدا مع الدخلة وغيكون أول حلقة من سلسلة الشطابة لزينة باش طير من الشركة وعلاش لا يكون هو لي غيخرجها محدها مزال مضارباش الشهر ومسخناتش بلاصتها بلان غيكحل لها الضوسي مع يزيد مزيان
فبلاصة أخرى بالضبط فدار زينة
التيباري كان فلبيت ساد عليه كحسب شي فلوس جمعهم من داكشي لي ولا كدير ليوم مخرجش لشارع لأن زينة كاينة غتبقى تسولو فين غادي كانت 40درهم وراق كمشهم مع بعض وناض بشوية كانت معلقة المونطو لي غتلبس غدا فلباب خشى لها دوك لفلوس فجيبها ورجع لبلاصتو تخشى وهو كفكر داكشي لكجمعو من الشارع كديرو لها فجيبها بلاما تعرف واخا غير فلوس الطرونسبور الحمل عليها ثقيل وخاص يعاون دخلات مسعودة وتبعاتهم زينة غطاتهم بعدما تعشاو غينعسو مسات عليهم ومشات هي لبلاصتها فين خوتها منشورين شادين التيليفون تكات وهي تتخمم كلام أم الغيث كضور فبالها تنهدات وهي تتفكر مواقفها معاه وهي تتقولها مناسيكش قاسي معاها بزاف وتتحس بيه مكرحمش أي غلط كسمم لها وذنيها عليه عكس كيف كان توحشات بزاف دوك الأيام وهي معاه واخا كان كبير عليها كانت علاقة بريئة وحلوة كانت غتختم بالزواج غير الأقدار والمكاتيب وهي غارقة وسط أفكارها سمعات واحد الأغنية من عند ختها لي شادة الطيلي لحن زوين وكلمات خلاتها تمعن كل كلمة تقالت وهي ساهية لامسات قلبها وحسات بيها عليها وعليه وهي كتسمع لها
وافتكرت لما جت عيني فعينو
سنيني معاه وإفتكرت وعد كان
بيني وبينو زمان خدناه
وإفتكرت مسكتو فإيدي
وإيدي خلاص سايباااه💔
فور مطاح كلام الأغنيه فودنيها تقلبات على جنبها حسات بعينيها غرغرو ديك الجملة الأخيرة قاستها لأنها هي لي طلقات من يدو وخلاتو فنص الطريق كلام الأغنية خلاها فثواني قليلة وفوسط حزنها تغوص فالماضي وتفكر لي داز وعمرها غتنساه ولي هو نهار أول مرة غتشوفو وتعرفو
🤍فـــلاش بـــاك تـــازة 2019🤍
الجو صافي وشميسة دافية ساطعة فوق الڤيلاج يوم من أيام فصل الربيع الدنيا خضرا والأراضي كاسيها الربيع مخلي طبيعة غزالة بين زرقة السما وخضورية الطبيعة كانو بزوجات جالسات فوق الحجر والبݣر قدامهم كسرح زوج بنيات بلباسهم البسيط وبرائة البادية وجمال الأطلس طاغيين عليهم نطقات وحدة منهم بأمازيغية الأطلس:واش فراسك صاحبتي أنيسة غتجي من المدينة ليوم توحشتهاا
زينة كانت كضفر واحد من الݣرينات لدايرة فشعرها وجاوباتها بنفس اللهجة:إلا مشيتي عندها مخاص عمي عبد اللطيف يعرفك باش ميتقلقش على با ويخاصم علينا
راضية حركات راسها بآه فعلا مخاصش يعرف السيد لي خدام عندو باها ومها ومول هاد البݣر نيت لأنه مقاطع مع ختو لي هي مامات صاحبتها موصيهم ميوصلوهمش وهما جالسين حتى سمعات راضية سميتها غير ضارت ناضت بفرحة مشات تتجري عند صاحبتها لي بدورها جاية عندها تتجري و تعاااانقو بالجهد:توحشتك بزاااف والله
راضية:حتى أنا فوقاش جيتو ناري ليك وحشة قدااش
أنيسة بعدات:غير دابا سولت عليك مديحة هي لقالت لي راك هنا سلام زينة
زينة مكانتش عندها بيهم شي علاقة عمرها مشات عندهم عكس ختها سلمات عليها عادي ورجعات حدا البݣر راضية:عاودي عاودي لي على هولندا وكيف دايرة يختي
أنيسة:يلاه معايا لدار ونعاود لك بزاف وجبت لك الحوايج والفانيد لكعجبك يلاه راني موحشاك
راضية ضارت عند زينة:زينة أنا غادي نمشي دغيا مع أنيسة إلا سولات عليا مي قولي لها هاني جاية شوية ودي لبݣر صافي
زينة حركات راسها بآه وبقات تما كضفر ݣرونها شوية وناضت رجعات البݣيرات دخلاتهم لكوري ومشات دخلات لڤيلا لي مقابلين واليديها نيشان لكوزينة كانت مسعودة كطيب وحداها سكينة:جبتو لبݣر فين راضية؟
زينة نزلات راسها باش متعيقش مها بكذوبها:غير مع لبنات فالساقية قالت لي شوية وتجي
مسعودة بعصبية:سير عيط لها بنت لحرام راه خاص تعاوني فالزرع وهي غير كتسلت سير
زينة تنهدات ومشات غادية فالطريق لي كلها حجر بصنيديلتها منزلة راسها تبان لك غير من حركاتها دريويشة وحشومية وهي تتقرب لفيرما ديال دوك الناس قلبها بدا كضرب خايفة شي حد يشوفها ويوصلها لباها واخا معندهمش عداوة معاهم ولكن لي مخدمهم وكخلصهم متحكم فيهم مقاطع مع ختو باغي ݣاع الناس بحالو وقفات قدام الصور لي ضاير بالڤيلا بانليها لباب مفتوح ولعساس راهو بعيد قاصد الكوري دخلات بشوية منزلة راسها ومتوثرة فنفس الوقت وقفات قدام باب الڤيلا دغيا دقات بغات غاتجر ختها ويمشيو من هنا متسناتش بزاف حتى تفتح لباب مع هزات راسها بلعات ريقها شوية نزلات عليها الحشمة والتوثر لدغيا بانو فيها وهي تتشوف شاب وسيم قدامها هو لي فتح ليها لباب معرفات متسبق ولا متوخر لسانها تسرط مموالفاش تكون قريبة من الشباب أو الجنس الآخر بزاف داكشي باش معرفاتش تصرف وبانت فيها الحشمة لي نزلات على خدودها ورداتهم نطقات بصوت شبه خافت بالكاد يقدر يتسمع:سلام عفاك أنا بغيت ختي كاينة هنا مع أنيسة
حسات بعيونو كتفحصوها شي لخلا حشمتها تزااد وعينيها فالأرض أما هو كان كسمع لها وكشوف فيها غير من شكلها فرزها غتكون غير من بنات لڤيلاج وتأكد مين سمع كلامها عرفهم أنهم الناس لي خدامين عند خالو ثواني قليلة صكاناها فيهم ومع كملات كلامها فسح لها المجال تدخل ونطق ببحة رجولية ممزوجة بنبرة فيها نوع من الهدوء و الأدب فالكلام
يزيد:راهي كاينة لفوق دخلي عندهم سدي لباب معاك الله يحفظك
مجا فين نطق كلامو حتى كان خرج وخلاها حدا لباب لي فتح لها بقات غير واقفة مبلوكية كيفاش أول مرة تجي لهنا ويخليوها دخل نيشان وهما مكعرفوهاش سمعات صوت شي مرا جاية وتتهضر
فريدة:يزيييد شكوون اولدي مشيتييي
غير شافت زينة طلعاتها ونزلاتها ونطقات بابتسامة بشوشة:سلام ابنتي اشحب لخاطر
زينة بأدب ورقة:سلام خالتي عفاك أنا بغيت ختي كاينة هنا مع أنيسة
فريدة فهاد اللحظة جمعات ضحكتها شوية فاش عرفات بلي من الناس لي خدامين عند خوها تنهدات ونطقات:كيف داير سي عبد اللطيف ابنتي
زينة:لباس عليه اخالتي الحمدلله
فريدة معالم الحزن كسات وجها هاهما جاو الڤيلاج من بعد سفر طويل ولكن متقدرش تسلم على خوها ويقولها على سلامتك وهي تقولو شخبارك مقاطع معاهم وهادشي كامل غا على قبل الورث حسات على راسها وفسحات المجال لزينة بترحيب:دخل دخل ابنتي مرحبا راه كاينين لفوق فلبيت واش يزيد ولدي لي حل ليك لباب؟
زينة حركات راسها بآه:اه اخالتي راه مشى خرج
حركات راسها فريدة بآه ورحبات بيها خلاتها مشات طلعات عند أنيسة وراضية لي كانو مجمعين وقدامهم عرام دالحوايج لي عطاتهم لهم كيف ديما فوقما جات لڤيلاج كتجيب لختها راضية الحوايج وكلبسوهم بزوج
راضية:أنيسة غير خليهم عندك اختي راك عارفة بنت خالك الرادار خلي تا تكون الدعوة خاوية ونجي نديهم
أنيسة تنهدات:واخا متغبريش غدا مين تخرجي لبݣيرات نجي نجلس معاك شوية
تسالمو معاها وخرجو بزوجات من الفيرما راجعين وكشوفو فجنابهم ليكون لمحهم شي حد يوصلها لعبد اللطيف لي بدورو غادي يقولها لباهم وغيسمعو الهضرة ثاني واخا سوقهم بعيد على هادشي ديالهم طلاقاو بسكينة كتلعب لاستيك مع لبنات وزادو بتلاتة
راضية:إلا لقاو عندنا لحوايج نقولو لهم دازت واحد الطوموبيل من هنا جاية من المدينة وعطاتهم لينا
سكينة:خاص حتى ميكونش با ونجيبوهم
وسط هادشي زينة كانت غير غادية وساكتة هزات عينيها لواحد الجماعة حدا الحانوت وهنا نيشان مشاو لواحد الشخص كان واقف مع شي ولاد ديال الدوار وهما تتمشاو عينيها كانو عليه كتحشم وخجولة ومكتهزش الراس ولكن وسامتو خلاتها تنسى هادشي وهي شاردة متبعة لو العين فآخر المطاف تتبقى مراهقة مقدراتش تهز فيه العين فاش حل لها لباب حيت كان كشوف فيها ولكن دابا العكس تترمش عويناتها بشوية مع كل خطوة وهي غادية مع خواتاتها لكانو كهضرو مداوهاش فيها كان مختالف على ولاد الڤيلاج وهو وسطهم مفرز براني وولد المدينة بالإضافة لوسامتو لخلاتها تبع ليه العين الطريقة باش هضر معاها وداك الأدب وخلاها دخل واخا مكعرفوهاش لا هو لا مو غير لمحات واحد من الدراري لكان مع ديك الجماعة شاف جيهتها وهي ضور وجها دغيا وسرعات فخطاويها راجعة لوضعيتها ولي هي عينيها فالأرض
خرجات تنهيدة طويلة من أعماق قلبها فاش رجعات للحاضر من بعد ما عقلها شرد عينيها فالسقف تتحس براسها مخنوقة وهي تتفكر داك الماضي لي ولا ذكريات من فاش حل لها لباب تما بدات الحكاية كانت هي لي حباتو الأولى من أول نظرة دخل لعقلها وقلبها لأنها كانت مراهقة فعمرها 17عام عاد من بعد هو رد لها البال دار عليها لي ميدارش ولكن طعناتو وهي مقاصداش لا هو لا عائلتو
تكمشات على راسها وتغطات كاملة تتحاول تكتم دموعها ولكن مقدراتش لأن جروحها تحلو حلة خايبة وباش تخفف خاصها تبكي واخا البكى من مور الميت خسارة ودموعها مغيرجعوش لي فات معاه
دازت هاد الليلة وجا نهار جديد من أيام شهر ديسمبر الباردة🌧️
الجو مغمم والسماء ملبدة بالغيوم الأرض فازكة من بعد ليلة ماطرة طاحت فيها الشتا خيط من السما واقف قدام البالكو لي كان حالو شوية وكشم ريحة الهوا الصافي لي مخلطة بريحة التراب دالجردة لي طاحت عليه الشتا كرد مجاجو فداك الصباح و عينيه على الأجواء برا فيديه قهوتو كرشف منا ويديه لاخرة فجيبو كان الهدوء والصقيل فدار بحكم ساكن غا بوحدو من غير معزوفة لصاحبة الصوت الملائكي كاسرة داك الصمت وزايدة رونق على داك الجو لي برا والشتا مخلياه هو براسو يحس نفسو وكأنه بين أزقة بيروت وريحة لبنان ورونق الشام كيف كلا نهار كبدا صباحو بكلاسيكيات الزمن الجميل لرواد الأغنية العربية ذوقو كلاسيكي وخاتر بعيد كل البعد على ما تحمله الساعة والجيل هو يمكن من الناس لقلال لي باقي أو بالظبط الناس الدواقة وماشي أي حاجة تسمعها وذنيه لكمزكو هو عبد الحليم أم كلثوم وديع الصافي والأقرب لقلبو وذوقو مكاينش من غيرها جارة القمر و سيدة الصباح ألا وهي فيروز🖤✨
كان مزال على حالو كرشف من قهوتو وعينيه على برا وفنفس الوقت كطرب وذنيه بصوتها الملائكي لي عاطي صدى فأرجاء الدار بكلمات من حنجرتها الذهبية الملقبة بعصفورة الشرق
تذكر آخر سهرة سهرتا عنـــا🖤
تذكر كان في وحدة مضايق منـــا✨
هايدي إمي بتعتل همي منك إنت ملا إنـــت🖤
كيفك قالو عم بيقولو صارو عندك ولاد✨
وأنا والله كنت مفكرتك برات البـــلاد🖤
شو بدي بالبلاد الله يخلي الـــولاد✨
كيفك إنت ملا إنـــت🖤
بيطلع عبالي إرجع أنا ويـــاك✨
إنت حلالي إرجع أنا ويـــاك🖤
أنا وإنت ملأ إنـــت✨
كلمات الأغنية كانو طاربين وذنيه مخليينو كتمعن فداك الكلام الوازن لي تفتاقد فهاد الزمان مخلين الماضي لي داز يتقال عليه الزمن الجميل حيت فعلا كان كلشي زوين مع رشف آخر رشفة من كاسو كانت فنفس الوقت العصفورة ختمات أغنيتها تلفت بشوية الخطوات قاصد لجرامافون لي بدورها من كلاسيكيات العزف بداك السيدي الكبير الكحل كانو شي أغراض فديك الجليسة لي داير بحال شي متحف حيت كلشي فيه قديم وكلاسيكي عاطي واحد الهدوء خيالي كان كسد الساعة فيديه وكشوف فعقاربها كضرب فدماغو كل ساعة شنو غيدير فيها فهاد النهار منظم وقتو مزيان وكلا حاجة عاطيها وقتها
حل باب الطوموبيل ودخل طرطق عنقو يمين وشمال ومسح على ذقنو بشوية هز تيليفونو صونا للوليدة ديالو يسول فيها كيف كلا صباح وزاد قلع للشركة
جاية بشوية يديها فجياب المونطو لاوية على عنقها كاشكول بحال ݣاع الناس لي خارجين فداك الصباح المغيم تتمشى بشوية شي لمخليها يبان عليها معالم الكسل فاقت راسها ضارها بالبكى لي بكات قبل ماتنعس وكتافها طايحين عليها دخلات بعدما دوزات البادج دالشركة فلاباراي لي لاصقة على الدخلة بحالها بحال ݣاع الموظفين ركبات فلاسانسور وعقلها مرفوع حتى وصلات خرجات بشوية قاصدة البيرو ديالها مع ضارت شافت المدير ديالها واقف هو واحد الموظف كهضرو عادي نزلات راسها وقصدات المكتب ديالها كانو بعاد عليها شوية واخا هكاك جلسات وهي تتنفس عنقها من الكاشكول بغاتو غير يدخل وتمشي تجيب ليه قهوتو مبغاتش تعاود تخرج وهو كاين كتحاول ما أمكن تقلل الإحتكاك معاه وهي وسط أفكارها تتشعل لبيسي ديالها حتى صونا الطيلي دالبيرو بلعات ريقها بشوية تسعين فلمية هو مع دارت السماعة فوذنيها نطقات بصوت رقيق:آلو
جواب صاحب الرد كان مختالف تماما عليها بالضبط فنبرة الصوت لي كانت خشنة ومخاطبها بغلظة بكلام محدود:نلقاك فلبيرو دابا
مع كمل كلامو قطع عليها كيف ديما كقطر عليها الهضرة حسات بنبضات قلبها تسارعات كيف العادة فوقما سمعات صوتو واخا تكون مدايرة والو غير غيعطيها الخدمة ولا عندها من جيهتو بحال الرهاب طلعات النفس وقفات وهي تتقوي نفسها وزادت قصداتو بخطوات تابثة أو تتحاول تبين أنها تابثة
وقفات قدام لبيرو ديالو متسناتش بزاف حيت لبقات هكاك غير مغيزيد الخوف يتمكن منها دقات بشوية وغير سمعات الإذن دخلات وهي منزلة راسها سدات وراها وتقدمات جيهتو بخطوات صغيرة وهي تتبلع ريقها بشوية تتحاول متركزش الشوفة فيه بزاف كان جالس فلمكتب ديالو كلعب بستيلو بيديه وعينيه عليها مكانش صعيب عليه أنه يقراها بلي متوثرة وجهو مكان عليه حتى شي تعبير باش تعرف اشبيه حيت واخا مدايرة والو لكان عقلها ينفعها غيلقى لها شي سبة مع تقابلات معاه نطقات بشوية:وي موسيو
يزيد نيشان بنبرة متسلطة كاسياها بحة رجولية:شهاد التعطيلة؟
زينة هزات فيه عويناتها بشوية بعدم فهم:غير تاصلتي بيا جيت
يزيد عينيه مفيكسيين عليها عاقد حجبانو وبنفس النبرة جاوبها:كندوي على الدخول كيفاش قضية نجي منلقاكش فين عمرك شفتي شي مدير كسبق
زينة بقات غير تتشوف ولكن مقدراتش طول فيه الشوفة وهو غيتيري فيها بعينيه معرفات متقول من غير أنه فعلا لقى لها سبة كغدير تحيدها ليه من فمو وتقولو بلي هو لي جا بكري بزاف وحتى هي جات قبل من الدخول بعشرة الدقايق حركات راسها شوية بآه ونطقات بصوت رقيق عالنة فيه استسلامها بدون مبررات:سمح ليا امسيو مغاديش تعاود غير حيت الطوبيس كبقى يوقف داكشي
وهي وسط كلامها قاطعها بأسلوب آمر مكاينش من غيرو فكل محادثة كضور بيناتهم:هزي عينيك فاش نكون كنهضر معاك ديما كنقولك معندناش السينما هنا
عضات على شفايفها بشوية وهي كطلب ربي يصبرها كان حالها بحال شي تلميذة مذنبة قدام مدير دالمدرسة وماشي مدير وسكرتيرتو اشهاد الصباح وشهاد الحالة وشهاد الجهد عندو دارت لي قاليها وهزات فيه عويناتها لي لونهم جامع بين زوج دالألوان ولكن لي طاغي أكثر هو داك الرمادي وممزوج بشيء من الحزن أصلا جاية مهمومة وزاد على مابيها مع طلاقاو عينيهم كمل على كلامو بتسلط
يزيد:معندي مندير بهاد التخرميز على لبدية نجي نبقى منشور تاتوصلي على خاطرك شكون مخدم لاخر؟
رجعات نزلات عينيها للأرض وهي تتسمع على وذنيها السبة لي خلق لها ثاني ولكن لا حول لها ولا قوة متقدرش تجاوب وشكون تجاوب مول الشي دغيا سرسب لها وكأنه كقولها حيديها لي من فمي لقدرتي ستأنف ثاني كلامو وهاد المرة هاز فيها صبعو بنبرة شبه باردة على كيف كان مخاطبها ثواني هادي ولكن داك الهدوء ماهو الا تهديد غير مباشر
يزيد:هاد المرة دازت المرة جاية تجي مورايا بخمسة الدقايق تمشي ليك ساعة
قلبها تقبط عليها وهي تتحلل هضرتو لي فهماتها مزيان أنه لتعطلات فقط خمسة الدقايق غينقص لها ساعة وإلا نقص ساعة فراه غتخصم لها شي حاجة من الصالير لي كل درهم فيه زايدة فيها بلعات ريقها بالغصة لي وقفات فحلقها وهي تتحاول متبكيش حركات راسها بآه ورجعات هزات فيه عينيها ونطقات بصوتها الرقيق:كون هاني اموسيو مغاديش تعاود
يزيد تݣعد شوية وضار لبيسي كهضر بلاما يشوفيها:مين تجي سامية خودي من عندها الضوصي ديال الديفيلي دخليه فكلي وجيبيهم بزوج
حركات راسها بآه ونطقات:واخا اموسيو نقدر نمشي
دارليها إشارة بيديه زعما صافي طيري بلاما يشوفيها خلاها ضارت منزلة راسها وغادية خارجة غير من حركات جسمها ولغة جسدها تبان ليك ردود أفعالها تجاه الحݣرة والتسلط لي كتعرض ليه مع غتخرج خاطبها بنفس أسلوبو المعتاد:كحلة بلا سكر
زينة بلاما ضور:واخا
سدات لباب وراها وقصدات بيروها مع دخلات تكات على لحيط وهي كارزة على صباعها حتى غرسات ضفارها فوسط الرحى ديال يديها حلات عينيها لي كانو حمرين ومغرغرين دموع غير بالفقصة مكخليش لها فين تجاوبو وكعرف كيفاش يسرسبهم لها كخلق شي سبات قد الحبة ولي أصلا مكاينينش وكدير منهم قبة
جلسات فلبيرو ديالها وهي شادة فراسها تتطلع النفس وتتصبر راسها ديما تتقول نصبر ولكن تتحس بالموضوع أكبر لأنها بدات تتأكد إلا ما لقى مين يشدها غيبدا يخلق لها شي حوايج لي أصلا هي مدايراهمش وهي وسط هادشي بدات تتهدن فراسها ماشي بيديها هاد الخدمة غتهز بزاف وباها غادي يتشافى ويرجع بصحتو وبلي ديما فبداية الكاريير والمشوار المهني ضروري مغتكون تحت السباط باش نهار توصل متقولش وصلت بالساهل تتوهم راسها بهادشي واخا خاصو يلومها بشي حاجة لي قتارفاتها ماشي يخلق لها لي مكاينش ويدير منو حلقة حطات يديها بشوية على قلبها ونطقات:ياربي تعطيني الصبر راني محتاجاه كثر من أي وقت داز ياربي
مع كملات دعائها لي عرفات غادي يوقف معاها مهما كان الوضع ناضت قاصدة لbuvette تجيب ليه قبل ثاني ميدير لها ماهي وما لونها
فبلاصة أخرى بعيدة على الشركة
كان داز الوقت وبالضبط فواحد الليسي دالمخزن كان وقت الإستراحة الدنيا عامرة قدام الليسي شي يلاه داخل وشي خارج بحالو ولا يشري شي معرم قدام لباب المهم الدعوة مخلطة خرجات من وسط ديك الجقلة شكارتها فضهرها هازة كلاسور وغادية قاصدة المكتبة لي كانت على بعد أميال من الليسي وصلات ووقفات تسنى نوبتها لي متسناتش بزاف حتى وصلات لها
سكينة حالة الكلاسور:عفاك اخويا دير لي فوطوكوبي على هادي
دقايق قليلة حتى كانت قدات الغرض مجات فين ضور حتى كانو شي وراق طاحو ليها من الكلاسور زفرات ونزلات تتجمعهم وحدة منهم مشات بعيد وشافت شي حد هزها لها كان طاحت قدامو وهو نازل من الطوموبيل مع هزات راسها وحطات عينيها عليه مبتاسمة غتشكرو حتى فرشمة وقفات مبلوكية وهي تتشوف فيه حسات بالصهدة طلعات معاها الصدمة بحالا صرفقاتها وهي تتحقق فيه هو وعاقلة عليه مزيان وليد لي كان ماد ليها ورقتها وحالتو بحال حالها مناقص عليها والو كشوفو فبعضهم والصدمة صفعات كل واحد فيهم السنين لي دازت مكانتش عائق تخليهم ميعرفوش بعضياتهم وعلاش لا وهما فواحد الوقت كانو عائلاتهم غيتناسبو وخوتهم غيضربو الكحل فالبيض ثواني دازت ساعات هي بقات مسمرة فبلاصتها وهو بقى مبلوكي ويديه لي فيها ورقتها مزال ممدودة وكأن الزمن وقف عندهم بزوج ورجع بيهم اللور نهار الواقعة ودوك الأيام لي دازت عليهم عصيبة لا عند خوه هو ولا ختها هي حسات على راسها بلعات ريقها وهي تترجف معرفاتش كيف تصرف ولا شنو دير من غير أنها ترجع خطوة اللور وبلاما تفكر عطاتو بضهرها شداتها جرية وحدة تتحاول ما أمكن تبعد أما هو كان بحالها غير حس على راسو جمع مسح على شعرو وهو منرفز ممتيقش بلي بانت قدامو وحدة منهم ورا هاد السنين كاملة تكى على طوموبيلتو وهو كزفر وكمسح على ذقنو لحظة صغيرة خلاتو يتفكر لي فات شنو داز عليهم وبالضبط شنو داز على خوه فترة سوداء شهداتها عائلتو بسبب الخبث والشر
فبلاصة أخرى بالضبط فالشركة
واقفة قدام لمكتب ديالها طلعات النفس موجدة لشي كلاش من عندها تاهي حيت فينما شافتها تلوح لها شي هضرة ضروري بحالها بحال ولد عمها غير لفرق بينهم هادي كتقدر تجاوبها حيت تتبقى غير خدامة بحالها عكسو هو مول الشي تتحبسها عندها وتخليها طلع وتنزل فيها دقات بشوية مع سمعات الإذن بالدخول دخلات بشوية بقات غير حدا لباب ونطقات بصوت رقيق ونبرة حدودية:مادموزيل سامية عفاك الضوصيي ديال l’organisation ديالdéfilé بغاه موسيو يزيد
سامية هزاتو ومداتو ليها:آه هاهو يلاه كنت غنجيبو لك سمحيلي عطلتو عليك حيت أصلا ليوم مجيتش بكري
زينة بقات غير تتشوف فيها وهي تتهضر معاها بالآداب وبنبرة زوينة عمرها سمعاتها منها بقات تتحقق فيها ياكما مريضة ولا ضارباها شي سخانة فالأخير حركات راسها بشوية بآه وقربات عندها خداتو:ماشي مشكل الله يحسن العوان
خداتو من عندها وسامية مراقباها مع عطاتها بالضهر خارجة وهي تحط راسها:أيييي
زينة تلفتات عندها دغيا تتشوف فيها ونطقات:مالكي؟
سامية شادة فراسها بزوج يدين:راسي راسي غادي يطرطق نسيت مشربتش دوايا
زينة قربات عندها بشوية:غير بشوية عليك شربيه دابا يلاه يفوتك الحال مين عيانة مكانش عليك تجي
سامية هزات راسها بتعب أو بالضبط تتحاول تصنع التعب شافت فلبيرو ديالها تتقلب بعينيها ونطقات:معنديش الما ناخد قرعة دغيا ونشربو فوقما كنساه كوقع لي هكا خصوصا مع السهير
مجات فين توقف حتى رجعات جلسات وهي شادة فجبهتها متصنعة الدوخة شي لخلا زينة تنطق على نيتها:غير رتاحي أنا نمشي نجيبها لك
سامية هزات فيها راسها:ميغسي بوكو ما شيغي والله حاسة غير غنوقف غنطيح على طولتي سيري حتى تحطي الضوصيي وجيبيها لي
زينة:مكاين حتى مشكل غارتاحي دابا تكون عندك
داكشي لي كان خرجات بالخف وغير غبرات سامية رجعات لحالها صحيحة فصيحة كي العودة كان كلشي مدروس حتى ديك غير دي الضوصي لبيرو ديالك هو الأول ضمن الخطة عارفاها مغتديهش ليه نيشان تتدخلو فكلي وهي الساس ديال بلانها غير حسات بيها بعدات هزات قرعة الما من صاكها ديجا كانت عندها دغيا كان الوقت عامل أساسي فبلانها خرجات تتسلت الكولوار كان خاوي كلا مديها فخدمتو ولحسن الحظ بيرو زينة كان مقنت وبعيد على الأنظار مقابل معاه بيرو يزيد هو لي مغطي عليه جاي فالواجهة خرجات بالخف تتشوف فجنابها حتى وصلات لبيرو ديالها حلات دغيا وهي كطلب تكون مزال مداتش ليه الضوصي فطريقها مع وقفات قدام المكتب تبسمات بخبث كانت زينة حاطة كاس دلحليب حداها كترشف منو شي لخلا سامية مغاديش تحتاج القرعة دالما لي جابت بكل برود بلاما تفكر هزات داك الكاس وقلباتو على الضوصي ورجعات حلاتو وخوات لي بقى على الوراق سداتو وحطات الكاس فوضيعة أنه طاح ومقلوب وزادت خارجة بلاما تفكر طيارة ورجعات لبيرو ديالها تتبسم بخبث هادي التالية ليها أي واحد وقف فطريقها تنحيه نفذات لبلان لي باتت الليل كولو كتخطط ليه بلاما تفكر لأن لكان الحقد عامي الواحد كتمشي ليه البصيرة مفكراتش أنه ديك السيدة غتوقف لها فرزقها وهي تتجري على عائلة ولا ولد عمها نيت لي دايرة على قبلو هادشي غيتضر تاهو حيت غتقاس ليه الخدمة وفنفس الوقت ضرات حتى راسها بلاما تعيق حيت تاهي خدمات فداك الضوصي وناس آخرين أي واحد مكلف بشي حاجة فالديفيلي دار يديه فداك الضوسي وفاللخر خسرات جهد أمة فرمشة عين سمعات الحس ورجعات شدات فراسها كيفما خلاتها دخلات زينة بعدما دقات
سامية هزات راسها:شكرا بزااااف وسمحيلي
زينة مدات لها القرعة:مكاين حتى مشكل شربيه دابا يلاه يخف عليك الحال مزال النهار طويل
سامية:داكشي لي غادي ندير
زينة رجعات اللور خارجة:ميكون باس
سامية:شكرا احبيبة
مع غبرات من قدامها ناضت ورمات ديك القرعة لي جابت لها فالزبل خسرات سيفتها ونطقات:مكلخة
حسباتها مكلخة حيت غير بزوج كلمات ضحكات عليها وخلاتها تنسى بلاما تشوف من جانب آخر أنها عوناتها واخا ݣاع لي وقع بيناتهم من احتكاك غير حيت دوات معاها فالأول زوين هادشي دال على بيوضة قلبها رجعات باللور متكية على الكرسي وبدات تضور بيه وهي تتحسب بالعد التنازلي الوقت لي بقى لها معاهم حيت عارفة أعدى حاجة عند يزيد هي الاستهثار وهو لي غادي يكلاصي فيه هادشي لي وقع
زينة دخلات لبيرو ديالها وهي تتفكر قبيلة معجبهاش الحال فاش شافتها جاية تالعشرة وحد مقالها شحال فالساعة حيت تتبقى من عائلة مالين الشي ولكن مين شافتها دابا طلبات السلامة زعما الناس مافيها والو مقدراتش حتى توقف لي شاف داك الجهد وتخراج دالعينين وحالها دابا ݣعما يقول راه هي لي فوقما شافتها تيري فيها بنادم حتى تتجيه فصحتو عاد كرطاب الله يخلص كل واحد على أفعالو ويهدي ما خلق عاملاتها زوين رغم كلشي لأن هادي طبيعتها وعلاش تربات تمنات لها الهداية والشفاء فنفس الوقت ودغيا رجعات لواقعها مع وقفات قدام مكتبها يلاه غتجلس باش تخدم تاهي على الضوصي وهي يتزاد معاها الزايد هزاتو باش تأكد حتى صدق الحليب ساح فالأرض عينيها خرجو الصدمة ركباتها من قاع رجليها كيفاش شنو وقع واش حطاتو بالجهد حتى تخوا عليه لحليب واش قلباتو ومحساتش كيف وقع بزاف دالاسئلة تكبو عليها فثانية وحدة مقادرة تخرج بحتى جواب يبرد عليها حر الخلعة وهي تتشوف هادي التالية ليها ولكن قبل غياكلها غيقجها غيخرج منها الويل هداك لي جالس كتسنى الضوصي يوصلو ماهي إلا دقايق قليلة وهي غارقة وسط صدمتها حتى كان كمل على مابيها قلبها لي نزل بين رجليها بعدما سمعات صوت وراها كخاطبها كيف ديما بصوت غليظ جا عندها مولاه برجليه باش يشوف هاد الشوهة
يزيد:نص ساعة باش كان خاص الضوصي يكون عندي فين هو؟
عينيها خرجو وهي على حالها بعدما سمعات صوتو كان موراها مباشرة تمنات الأرض تشق وتبلعها تمنات أي حاجة متخليهاش تواجه معاه فهاد اللحظة لأنها هاد المرة دايرة علاش واخا مدايرة والو ولكن الدليل بين يديها فمكتبها وتقاص بشي حاجة لي ديالها تشدات بالجرم المشهود لخلاها غتبان ليه مكبتاها وبالطابع حتى الزهر هاد النوبة غذرها كن مجاش كان ممكن تعاود طابيه ولا تشوف شنو دير ولكن مع مع تقول كان عالم عليها مقدراتش ضور بقات مكوفرية فبلاصتها عاطياه بالضهر شي لخلاه ينفذ صبرو عينيه عليها بحال الرص**اص غي**تيريو فظهرها كشوف فيها بحال كتستفزو عاطياه بظهرها ولا رد جاه منها شي لخلاه يتقدم جيهتها كارز على فكو مع تقابل معاها نطق بصوت متحجر:كنهضر مع الحيط؟
عينيه مشاو للضوصي بين يديها كيف مكرفص وفازك شي لخلاه يسكت وميزيد تا كلمة غير كشوف فيه كيف تتحرك بين يديها لي كرجفو قلبها غيسكت هز عينيه فيها كانت حالتها حالة صفرة مشى منها اللون ومزال مخرجة عينيها وشفايفها كرجفو تتشوف فيه جامدة بحال مخوي عليها الثلج متوقعة أي ردة فعل وحالتها مبينة الرعب لي راكب فيها من جيهتو وشنو يقدر يجيها منو تتحاول تقراه وتشوف ردة فعلو ولكن ملامح وجهو باردة ماشي بزاف حتى كانت قفزات فاش خطف من عندها الضوصي لي كقطر وزاد بلا حتى كلمة ولا رد فعل غير خرج شدات فقلبها ومشات جيهة الكرسي بزز باش تتحرك رجليها لي تحشو طارت منها خلعة تتنفس بالجهد وحاسة براسها غتغيب غطيح أي حاجة حطات يديها على خدودها سخان كيفاش مقال والو متأكدة مغاديش دوز ليها بالساهل تبغي غير تشرح له بلي معرفات كي وقع مغيسمعهاش وهو خاصو غير السبة بدات تندب فوجها وتقول مندبتش متكرهش تنوض تهرب تخبى تبخر غير متسمعش تيليفون لمكتب كصوني ويقولها اجي لبيرو هزات قرعتها دلما بدات تتشرب حلقها نشف من بعد مسحات داك الحليب لي باقي مكبوب فوق بيروها وحيدات الكاس وهي مزال على حالها كلها تتغزل وتتسنى غير يصوني باش تمشي عندو يتي*ري فيها
فنفس الوقت سامية خارجة من المكتب ديالها تقيس النبض وتقرقب الناب قربات لمكتب ديال مريم لي غير شافتها حطات لي فيديها وعطاتها اهتمامها سامية غمزاتها وحركات راسها زعما شي جديد كانو كفهمو بعضياتهم غير بالإشارة
مريم:والو امادموزيل القضية ناشفة ليوم مكاين جديد من غير بانلي موسيو يزيد خارج من عند la secrétaire شي نص ساعة دابا
سامية:وكيف بانلك معصب مهدن وصفيه لي
مريم:بانلي عادي دخل شوية وخرج هاز واحد الضوصي يمكن عطلاتو عليه وجا وراه
سامية عوجات وجها:حيانا الله حتى ولا المدير برجليه كمشي يجيب الضواصى المهم راك عارفة نت خدمتك
مريم نعتات فعينيها ووذنيها زعما كوني هانيا حاضية كلشي هنا سامية زادت لبيرو دالمدير تما غتعرف وتشوف نيت ردة فعلو متأكدة ايكون معصب من زينة ومنها نيت تزيد فيخرات باش تكون لخرة لها ويقولو لها لباب الحباب صوت الطالون كان كاسر المكان غادية وتعيوج وصراحة صارعة الدعوة لا من ناحية الفورمة ولا اللباس تتعرف تلبس وكلاص بلا زعما ديك صاليرها باين عليها تتبان بنت عائلة نيت وحتى زينها زوينة غير قلبها لي كحل وحاسة بجنابها ومتسلطة دقات بشوية ودخلات كان عاطي بالضهر كهضر فالتيليفون جلسات بشوية تتسناه وتتشوف فالضوصي محطوط فوق البيرو حالتو كولو مسرسط تبسمات بشر وهي متحمسة تزيد فيخرات وتكبرها وتكحلها على لي لصقات فيها الفعلة مزيان حيت ماشي ضوصي عادي مجموع فيه كل ما يخص الديفيلي وزيد أنه ديال آخر ديفيلي هاد العام والكوليكسيو ديال العام الجديد يعني غرقاتها مزيان ولصقات لها مونتيف ثقيل ومستعدة دير هادشي لأي واحد غادي يجي فطريقها بينها وبين هدا لي واقف قدامها
تتفكر فهادشي وتتشوف فيه كيف كهضر فالطيلي وكيف كحرك ذقنو لي كشدو مرة مرة على حسب رد فعلو كلامو الموزون بصوت لي طاغية عليه بحة ولكنة رجولية وزيد أهم زوج حوايج لقتلوها فيه وجابو لها التمام هما وسامتو غزال وكيف كقول المثل تختاريه من وسط الرجال الطولة والتجريدة والثانية شخصيتو عندو واحد الكاريزما خطيرة أول مثال غير فالشركة واخا كتعامل زوين مع كلشي لكن فنفس الوقت مخلي بنادم كحتارمو طالق ومزير اللعب فدقة وحدة وفينما داز كخلي بنادم كهضر عليه كمل مكالمتو وتلفت وهو كخشي الطيلي فجيبو فهاد اللحظة وهو جاي جيهة لبيرو نتاحلات الصدمة وهي نعتات فالملف
سامية:اويلي شهادشي داااارت هاد سكرتيرة ديال زوج دريال خسرات خدمة شهر فدقيقة
يزيد جلس بلاما يجاوبها وهو كحل فالملف وكشوف شحال من ورقة تقاصت وهي تتشوف فيه وتتسنى ردة فعلو تتقول ياربي يعيط لها دابا باش تشوفو شغيدير معاها قدامها
فهاد اللحظة حط الملف جنب هز فيها راسو ورجع اللور تكى على الكرسي وواحد ستيلو بين يديه كلعب بيه بصباعو وجه لها كلامو بنبرة هادئة مع غمزة صغيرة بعينيه ولكن ماشي بهدف يدي ويجيب معاها فلكلام بل كان فيه نوع من الاستجواب الغير مباشر:باش عرفتي السكرتيرة هي لي خسراتو؟
سامية هنا لسانها تربط وهي تتشوف فيه بعدما طرح عليها سؤالو لي خلا قلبها فثواني يبدا يضرب بالجهد ومتعرف باش تجاوب محساتش حتى زلق لها لسانها ونسات راسها قبيلة البلان ماشي غير تنفدو وصافي بل خاصك درسو من ݣاع الجوانب حتى من الكلام والتصرفات لي غدير وراه ولا قبلو وهادشي لي عماتها فيه هي تمالكات نفسها ونطقات بصوت تتحاول تدمص فيه داك التوثر لي ركبها
سامية:شكون من غيرها غالبا اتكون هي حيت أنا يلاه عطيتو لها مقاد مافيه والو
عينيه عليها وهي تتهضر شي لخلاها تزيد توثر كثر عنداك يكون حس بشي حاجة ندمات لاش جات ݣاع كانت كتسنى زينة لي يدار لها الاستنطاق وتبهدل قدامها ساعة صدق مديور لها هي بسؤال بسيط خلاها تخربق فوسط هاد الموقف لي بالنسبة لها وشييك صونا الطيلي ديال البيرو تقدم بشوية وهز السماعة دارها فوذنيه:آلو
زينة:موسيو عادل بغى يشوفك
يزيد كان قادر يفرز الخوف لي مزال متملكها غير من صوتها بكلمات محدودة عطاها جوابها:خليه يدخل
سامية فلوقت لي تلاهى فيه بالهضرة كانت تتجمع قوتها وتتحاول تطرد داك التوثر لي ركبها غير حط السماعة شافيها بنفس النبرة:الضوصي ديال Amo فين هو ماشي كان خاصك تجيبيه من مور ما وصلتي الصباح
سامية بلعات ريقها من طريقة كلامو كيف محارش فيها فأمر كتعلق بالخدمة وقفات بشوية ونطقات:أنا دابا غادي نسيفطو لك راه كملتو
يزيد رجع تكى على الكرسي وستيلوه كداعبو بين يديه:فكريني لاش جيتي مين مجاياش على قبل الخدمة؟
سامية زاد على حالها ولكن كتحاول متهضرش وهي متوترة باش الهضرة متلعبش لها فمها ويبان شعورها الحقيقي ورا داكشي لي كتصنع جمعات قوتها شوية ونطقات:غير شي حاجة بعيدة على الخدمة خلي حتى لمن بعد سمحليا
يزيد:إلا مكانتش هاد المرة شي حاجة كتعلق بالخدمة وحنا فالشركة تقدري تعيطي غا فالتيليفون بلاما تعذبي وضيعي الوقت لي خاصك تكوني فيه خدامة
تتسرط قمعة من مور قمعة بلاما تقدر تجاوب معاه ولا تجادلو تبسمات بالسيف عليها وحركات راسها بآه وزادت بلا حتى كلمة معاه كتطفي ديك الشخصية المتسلطة وكتحني الراس مجات فين تحل لباب حتى تسمع الدقان عطى إذن بالدخول وهنا تفتح لباب كان عادل لgraphique designer لقى التحية بشوية ودخل سلم باليد على يزيد لي طلب منو يجلس عارفو علاش جاي سامية كانت تتسد لباب وراها وتتشوف فيه كيف مبسم ابتسامة رجولية وهو كهضر مع عادل وكهضرو عكس كيف كان قبل دقايق ولكن هي لي حطات راسها فهاد الموقف البايخ
يزيد عينيه على لبيسي وهو كشوف التصميم ديال ليزانڤيطاسيو كلهم واعرين وحدة تنسيك فلوخرا دار يدو على ذقنو وهو كشوف حار بزاف شاف فعادل ونطق:كيف ديما مخليتي ليا منقول
عادل بابتسامة:الحمدلله لهلا يحشمنا اسي يزيد
يزيد فيكسى عينيه على واحد الزوج ونعت ليه فيها:كمل فهادي سمية المعروضين تكون هنا(نعت ليه بالضبط فين يكتب)وهادي ديال لvipلاخرين خليهم عندك متمسح تا وحدة غنحتاجوهم كاملين جاية لحفلة ديال fin d’année ان شاءالله
عادل:صافي اسي يزيد كون هاني أنا غندفعها دابا لسيت يطبع فيها سميات les invités
يزيد:من تما سيفطهم لسكرتيرة تسيفطهم للناس وريني لكطالوݣ
عادل تحنى على لبيسي وهو كقلب باش يوريه ثاني تصميم الكطالوݣ تاهو مخلا ليه فيه ميقول
يزيد:مين تسيفطهم لسكرتيرة دوز للبنك غتلقى شي حاجة
عادل بابتسامة صافحو بحرارة وهو كشكرو:شكرا بزاااف اسي يزيد الله يكثر خيرك
يزيد وقف وهو كصافحو:تستاهل على خدمتك من الناس لي عمرنا غندمو عليهم
عادل وهو فرحان:الله يكبر بيك اسي يزيد
هز لبيسي ديالو وخرج وهو فرحان المدير كمدح فيه وزيد الزيادة لي غيعطيه على الصالير كتشجيع ليه على خدمتو المتقونة هادشي مع كلشي داكشي باش الشركة غادية مزيان كشجع الموظفين ديالو حيت بكل بساطة الشركات من بعد المؤسس راه هي العمال
مشى جيهة الزاج بعدما هز كاس دالقهوة ديالو وقف شوية كرشف ما تبقى من كاسو ويدو لوخرا فجيبو كفكر فهاد العام لي غيختمو وحققو فيه نيت باه غادي يكون فرحان وهادشي لي باغي باه ميندمش حيت جا خليفة ديالو وديال جدودو لي أسسوها وسهرو عليها حتى ولات كتبيع فالمغرب كامل وكتعامل حتى مع شركات اجنبية ويكون قدها كيفما جدو الأول هو لي بدا من الصفر ودخل سمية العائلة فعالم الموضة وجدو الثاني كمل وباه حتى هو وسع السمية جا هو الرابع فالسلالة وشد الشركة مكمل شنو بداو وغيكرس حياتو كاملة فالحقبة لي غيدوز فيها باش تزيد تبقى خالدة وكتوارث عبر أجيال أهم حاجة تعلمها ماشي هما الفلوس لي دخلو من هاد الشركة وإنما الحب لي خلاهم يكملو كن مكانوش كبغيو هادشي لي كديرو عمرهم كانو غيكملو وماشي غير فالمجال ديالهم فأي حاجة الشغف كساوي الإستمرارية تنهد بشوية وهو كفكر فهادشي وفنفسو كحمد الله على لي واصلين ليه ومزال مكملين زيادة على حبهم لخدمتهم فظل الله معاونهم تلفت قاصد لبيرو ديالو يلاه جلس وحط الكاس لمح الملف المشوه متسناش بزاف حتى قطب حجبانو وهز التيليفون ديال لبيرو دابا عاد قاد لها المجاج فين يتفاهم معاها
تتشوف فيديها لي غادية تهز السماعة ديال التيليفون لي كصوني كيف تترجف ومقاداش تحكم فيها الخوف غيسكت قلبها حيت عارفة شكون كصوني هزات السماعة ونيشان حطاتها على وذنيها الهضرة هربانة عليها بالكاد كتسمع صوتها
زينة:آلو
يزيد بنبرتو الجافة وأسلوبو فالكلام العقيم لي موظفهم ديما معاها خصوصا دابا فاش مكحلاها:دابا نلقاك عندي
قطع عليها وخلاها غطيح فبلاصتها طلعات النفس بالجهد وهي تتصبر راسها بلاما تكون دايرة والو كان كلصق لها المونتيفات معساك دابا لي لاصقة فيها عاين باين والمشكل لبغات غير تشرح لو وتقولو راه معرفاتش كيف وقع غيسميها ممسوقاش ومداياهاش فخدمتها وقفات دغيا وزادت رجليها كترعدو عليها وتتحاول تعطل ولا الطريق طوال أي حاجة تخليها متواجهش معاه دقات بشوية وفتحات لباب بلاما تختافي رجفتها من يديها والسارية فجسدها كولو ماشي غير هاد المشكل لي وقع لي مخلي حالها هكا كترعد وتغزل حتى ضعفها وحاجتها للخدمة زايدين عليها تتمشى جيهة المكتب وهي تتشوف فيه خدام فالبيسي مقطب حجبانو كيف العادة كلما قربات قلبها كزيد يضرب وكل خطوة بحالا تتمشي على الشوك وقفات وبقات بعيدة شوية نطقات بصوت رقيق خافت مؤثرة عليه حتى هو رجفتها
زينة:وي موسيو
يزيد هز فيها راسو بنظرتو المعتادة تجاهها غير شافيها نزلات راسها وهي تتبلع ريقها طلعها ونزلها ومكانش خافي عليه خوفها واخا ميكونش كعرفها أي واحد غيلاحظ حالها صفرة ومسكوف منها اللون وقف وتما جاي قاصدها خاشي يديه فجيابو وجاي جيهتها مع كل خطوة تتحس بقلبها تتهز وتتبلع ريقها وعينيها فالأرض مع وقف مقابل معاها وكان قريب ليها ريحة عطرو الرجولي تغلغل مع نيوفها وسط هاد الروينة كاملة مزال حتى كلام مدار بيناتهم ومعارفاش شنو غيقول ولا بشنو غيبدا ليها من غير أن قربو ليها زعزعها وريحتو لي طلعات مع نيوفها كملات عليها وسط حالها غير واقفة جامدة منزلة راسها تتسنى أي عقاب وكلام مسموم يجي فحقها دابا أما هو كانو عينيه عليه قبل ما ينطق بحتى كلمة كان حاضي حالها لي متبدلش مزال خوافة ومزال مكتهضرش وتبرر موقفها تجاه شي مشكل باقية كيفما هي أخيرا فتح الكلام ونطق بنبرة جامدة حديدية تتبين قداش المشكل لي دارت كبير وزيد مع هي لي دارتو تزادو لها فيخرات
يزيد:شنو نسميو هادشي لي درتي؟
زينة الغصة وقفات فحلقها وهي تتغوت فنفسها مدرت والو خلاتو صحة سلام رجعات لقات الروينة بلعات ريقها وسرطات البكية باش تقدر تهضر وهزات فيه عويناتها لي حمرين ومغرغرين بالدموع بؤبؤ عينيها لخضر كان كبري خلا عينيها كبانو بواحد الشكل زوين واخا كاسيهم الحزن عطاهم واحد الرونق أو بشكل آخر جاو معاهم الدموع وهادشي كولو داز على عينيه هو أول ما هزات فيه الشوفة نطقات بصوت شبه باكي تتحاول تجمع فيه قوتها وتبرر وتشرح ليه بلي معرفات كي وقع وهي تتشوف فيه وعينيها كبريو
زينة:اقسم بالله مدرتها بلعاني معرفتش كيف وقع خليتو فوق لبيرو مافيه والو ورجعت
يزيد قاطعها وسط كلامها بنفس نبرتو وزايد عليها نغزة حيت نطق بأسلوب فين لغة الأمر:نزلي عينيك
زينة حبسات كلامها وهي مزال على حالها وكثر تجمع عليها كلشي الخوف الدهشة وزيد عليها الحݣرة وهو كقوليها تشوف فالأرض تنهدات من أعماق قلبها وحدرات عينيها للأرض ودموعها سخان كطيحو على خدودها كملات كلامها وهاد المرة مقدراتش تحبس ديك الشهقة لي طالعة مع صوتها:إيلا بغيتي أنا مستاعدة نعاودو كامل واخا كنحلف لك بالله حتى معرفتش كيف وقع إلا كذبت بغيت ربي يرزيني فصحتي
تتهضر والشهقة طالعة مع صوتها وعينيها للارض عامرين دموع كانت مثال حي للمغلوب على أمرو وهي فداك الحال حاجتها للخدمة ولفلوس مخلياها صابرة لكلشي وحتى لأقصى أنواع الدل كان كشوف فيها وفحالها وفالدموع لكطيح والدعاوي لي كدعي على راسها بلي مدارت والو وراه فعلا ماليها لا يد ولا رجل فهاد المونتيف لي لصق فيها
يزيد طلع فيها حاجب:تعاوديه كامل وغدا يكون واجد؟
زينة هزات فيه راسها وهي تتحركو بآه:آه آه نعاودو وغدا طلقاه على الصباح عندك
يزيد مشى معاها فخو كلامها عطاها بالضهر وزاد قاصد لبيرو:هاحنا غنشوفو
كانت تتمسح عينيها من الدموع وهي تتشوف الملف فيديه وهو جاي قاصدها مع مدو لها نطق:حتى تكملي ݣاع الخدمة لي عندك عاد بداي فيه
زينة سكتات لثواني وهي تتفكر فكلامو عاد نطقات:إيلا تسنيت حتى نكمل راه غيجي وقت الخروج وانا مزال مبادياش فيه وزيد معنديش بيسي فالدار
يزيد بلاما يتسوق لكلامها حيت داكشي لي بغا راه فهماتو تما غادي قاصد لباب وهو كهضر:إذن مغاديش تمشي للدار حتى تكملي خدمتك وتكمليه حتى هو
حل لباب وشافيها زعما صافي سالات الهضرة خرجي وداكشي لي كان من بعد ثواني وهي تتشوف فيه جات خارجة بحالها وهي مجات فين تفوت لباب حتى وقفها ثاني بصوتو لكان كزيد يحكر عليها بيه
يزيد:غدا مع 8:00 نلقاه فوق لبيرو سابقني
كشوفو فبعضهم من مور داك الكلام لي ختم بيه الموضوع وهما قدام لباب عينيهم على بعض وكلا واحد شكقولو عينيه فلغة العيون هي مغلوبة على أمرها وقلة حيلتها كانت هي سيدة الموقف متقدر تقول لا بزاف عليا ولا تجادل وهو عينيه كنفتو التسلط والجبروت وفنفس الوقت التحدي نزلات راسها بلا حتى كلمة وزادت خارجة خلاتو سد لباب وراها
مع سد لباب وتعزل بوحدو كرز على يدو ويدو لاخرى دوزها على فكو وهو حاقد مكانش مبين حتى خرجات دار واحد لحاجة لي محسش بيها وهي معاه ومكانش خاصو يديرها ولا ينطق بيها خلاتو يكفر على الوضعية جلس فلبيرو كزفر وهو كخبط ويهز الوراق ويحل البيسي بالجهد دليل على أنه كاعي ديال بصح
فجيهة أخرى كانت تتمسح دموعها لكطيحو فصمت تتحس بيهم سخان على خدودها من قلبها المقروح وكيانها لي بدا كعيا بهاد كثرة الحݣرة وتعامل الجفاف ولكن على الأقل مسمعات حتى كلمة خايبة لي تسممها اللهم الخدمة زايدة ولا سم الكلام لي مكتمحاش كبقى يحفر فالقلب بحال الموس هزات قرعة الما وبدات تتشرب وهي تتهدن راسها وكطلع النفس بالجهد هزات الطيلي وهي تتحاول تجمع بكاها وتمحيه من صوتو باش متشطنش مسعودة دارت الطيلي فوذنيها وهي تتسنى تجاوب
مسعودة:آلو بنيتي
زينة:آلو مي كدايرة لباس عليك كداير با كصبح
مسعودة:الحمدلله اكبيدتي بخير راه خارج لقهوى نت كدايرة مع الخدمة
زينة تنهدات بشوية:أنا الحمدلله بخير شوفي مي راني عيطت ليك بغيت نقولك راني غنتعطل ليوم كاينة الخدمة بزااف
مسعودة:الله ياربي ومعاش غتسالي وغتبقاي بوحدك ولا غيكونو الناس لاخرين
زينة:والله ما عرفت معاش انخرج لا لا ويلي كلشي الشركة كاملة حيت آخر العام والحوايج خاص يخرجو داكشي باش زادو السوايع
مسعودة:والطرانسبور طوبيس راه يفوت تسعود كيسالي كيف غديري ابنيتي
زينة فهاد اللحظة دارت يديها على راسها نسات الطرونسبور ولكن حاولات متبينش قدام مها:متهزي هم امي راه كاينين الخطافة هنا وزيد وليت كنعرف الناس أكثرية عندهم الطوموبيل غنسول شكون كشد نفس الطريق ونطلبو يقربني كوني هانيا كاينين الناس والوناسة اميمتي
مسعودة:ولكان هكا صافي سيري الله يسهل عليك ما صعاب
نطقات آمين من كل قلبها دعيوة كانت محتاجاها تقاوم وتحارب بيها وسط هادشي قطعات مع ماماها وجلسات تتخمم كلشي كذوب فكذوب غتبقى بوحدها والشارع كولو شركات وعمارات يعني غيظلام الحال الموظفين غيخرجو والناس غيسدو عليهم فديورهم مغيبقى لا طوبيس ولا طرام دارت يديها على خدها والهم مكتاسح قلبها هو عارف شركتو فين كاينة وعارف الأجواء ومع ذلك مراعاش
داز الوقت كانت غارقة فالخدمة ديال بصح معندهاش الوقت ݣاع لي تقول أجي نبدا فيه تخبية سدات واحد الضوصي وبعدات على لبيسي وهي تتخمم بقات تتشوف فالطيلي ديال المكتب وهي تتفكر فواحد لحاجة من قبيلة طلعات النفس وهزات السماعة دارتها فوذنيها وقلبها كضرب بلعات ريقها فاش سمعات صوتو
يزيد:آلو
زينة وهي مترددة:موسيو يزيد
يزيد برد جاف:شكاين؟
زينة بعد سكوت قصير نطقات بصوتها الرقيق:عفاك بغيت نقولك بلي واش نقدر نخرج فالوقت العادي وندي معايا الضوصي غنقادو كامل فشي سيبير ونجيبو لك غدا على الدخلة حيت إلا تعطلت مغيبقاش الطرونسبور ونت عارف الدنيا كتخوا وزيد بابا مريض خاص
يزيد قاطعها بكل برود:لا
وزاد قطع لها فوجها بلاما يدير الإعتبار لݣاع دوك الأعذار لي عطاتو لي كلها مقنعة وزيد بنت وغتبقى بوحدها فالشركة ومكاين لي يوصلها وهو مدير أكثر واحد عارف أن الحي لي هما فيه صناعي يعني الماكس 8 كتفرتك الجقلة عند ݣاع الشركات وزيد ماشي حي شعبي كلا ساد عليه بابو فالناس لي ساكنين قراب للشركة ومن الجانب الإنساني راه عندو خواتاتو يخمم بلي شي نهار شي وحدة فيهم تقدر طيح فنفس موقفها ويتقطع بيها الحبل
تنهدات من القلب وحطات السماعة وهي شادة فراسها زند عليها وتتخمم شغدير فهاد الحريرة مغالباهاش لخدمة قدما تتخمم لعائلتها باها خاصو دواه مها عيانة بالسيف باش غتنصب العشى خوتها كبغيو مرة مرة تعاونهم فشي حاجة دالقراية وأكثرية الإنجليزيه عندها معاها روينة صافي
عضات على شفايفها وهي تتقول فبالها واش منيتها هو ما ككمل فيها حتى الشوفة بقى غير يحن فيها ولا يهز لها الهم من بعد لي وقع فوسط أفكارها صونات صافي سالا هاد النهار فالشركة تنهدات وضارت هزات الضوصي يلاه تبداه على وعدها وسعدها وهي تتسمع الحركة برا والموظفين خارجين
برا الشركة كانت تتقرب بشوية وهي تتشوف فيه كهضر فالتيليفون وهو فالطوموبيل خاص ضروري تهضر معاه وتشوف ردة فعلو باش تعرف واش حس بشي حاجة ولا لا من بعد لي وقع الصباح
مع كمل وقفات عليه جيهة السرجم تحنات شوية ونطقات:يزيد غادي للدار؟
يزيد شافيها بعدما قطع ونطق:علاش؟
سامية وهي تترجع خصلة من شعرها ورا ودنيها:بغيت غير نمشي نشوف عمي والبنات ماما معروضة وبابا راك عارفو مشى لفيرمة مبغيتش نبقى بوحدي حتى من رؤية ختي بايتة عند صاحبتها
يزيد وهو كديماري بلاما يشوفيها:طلعي نوصلك
سامية فهاد اللحظة غطير بالفرحة مشات مفرفرة ركبات وهي مبسمة من ناحية أنه غيوصلها وغدوز معاه وقيتة ومن جيهة أخرى باين ماحس بوالو مدام تعامل دابا هكا عكس قبيلة من هادي فكرات مزيان أنه إلا مشات ثاني حتى دارت شي بلان خاصها تبعد وتفرج من بعيد معرفاتش شنو دار معاها باقي ولكن مخصهاش تسول حتى توصلها لخبار بوحدها أي حاجة كديع فالشركة عضات على شفايفها وهي تتفكر وفنفس الوقت ريحة عطرو لي تتسالي معاها تغلغلات مع نيوفها شافت فيه بنص عين وتنهدات باش كزيد عليها أناقتو لي مخلية وسامتو طاغية كثر زادو بلا حتى كلمة معندهاش مشكل ميهضرش المهم تكون معاه وقريبة ليه
فنفس الوقت فبلاصة أخرى تحنات بشوية هزات الوراق لي خرجو من الفوطوكوبيوز خداتهم وجات راجعة لمكتب ديالها مع غضور من الكولوار تسطحات فيه كانو مزال شي موظفين باقين فالشركة يلاه ربع ساعة باش سالاو تبسم لها وهو كطلع وينزل فيها
منصور:اهلا كدايرة لباس عليك
زينة بابتسامة صغيرة باينة وراها العيى والتعب ولكن واخا هكاك عاطياه خاطر:حمدالله ونت بخير؟
منصور:الحمدلله وخصوصا مين شفتك أحم ماشي ديما كنشوفك فالشركة
زينة عينيها مرة فالأرض ومرة عليه:غير الخدمة راك عارف وزيد لخر دالعام
منصور:وياه كلشي غارق هدا هو وقت الخروج تبغي نوصلك ومنها نيت نهضرو كثر راه مزال مجاتنيش الفرصة نتعرف عليك مزيان راك مزال جديدة هههه
زينة بضحيكة صغيرة:مرة أخرى ان شاء الله أنا مزال مغنخرجش دابا عندي شي خدمة ضروري نكملها باغيها موسيو يزيد غدا الصباح
منصور عقد حجبانو شوية:بصح زعما سي يزيد عمرو دار هكا وخلا شي موظف يزيد السوايع ماشي من عوايدو
زينة تنهدات ونطقات فخاطرها ماشفتي والو هي ݣعما معتابرها موظفة غا خليها عالله وصافي عرضات ابتسامتها وردات على كلامو بكل أدب:الخدمة كثرات داكشي علاش مهم نخليك دابا خاصني نمشي bon fin journée
نزلات راسها وزادت خلاتو متبع لها العين كطلع وينزل فيها من اللور ويديه على ذقنو المرة الثانية وهي كتصدو وهادشي لي غيخليه يزيد يدير معاها بالو حيت الحاجة الصعيبة كتكون بحلاوتها
زينة:سير عند عبد الكريم القهوى وعطيه التيليفون بغيت نهضر معاه
يوسف:ياك مواقع والو اختي؟
زينة:مكاين والو غير رتاح بغيتو غير نسولو إلا بغى يجي يجيبني ومتقول لمي والو احم حيت حتى شي حد هنا من الناس لي عندهم الطوموبيل ملقيتو غادي من نفس طريقي
يوسف تنهد:واخا اختي وحتى أنا غنطلبو
داز الوقت وهي غارقة هزات راسها تتطرطق عنقها شافتو خارج باين غادي بحالو تنهدات ودارت يديها على خدها كان عندها أمل أنه يتراجع حيت عطاتو أعذار لي مقنعة ولكن والو زاد ولاح كلشي وراه
بقات تتسنى خوها يخرج يمشي لقهوى عند عبد الكريم دخل كانت عامرة حيت كان ماتش ديال الكورة بقى كقلب عليه بعينيه حتى بانليه جيهة العصارة مشى قصدو وقف عليه
يوسف:عبد الكريم خويا محتاجينك فواحد لبلان
عبد الكريم تلفت ليه وهو كمسح يديه فالطابلية: ياك لباس ايوسف
يوسف مد ليه التيليفون:زينة بغات تهضر معاك
عبد الكريم غير سمع زينة تزادت فيه نغزة دغيا خطف التيليفون ودارو فوذنيه:آلو زينة مالك شكاين ياك لباس
زينة:سلام عبد الكريم كداير لباس عليك احم لا والو باس بغيت غير نسولك واش مسالي مزال حاصلة فالخدمة وملقيتش لي يجيبني وطحتي فبالي غير نت
عبد الكريم:الله ياودي متحتاجيش تسوليني قوليلي غير فين كاينة
زينة:ماشي دابا مزال ليا واحد الساعتين ها نت عطيني نمرتك وفاش يوصل لوقت نصوني ليك ياك مسالي بعدا
عبد الكريم فنفسو واخا منكونش مسالي نسالي على ودك:أنا غير جالس وقتما عيطتي ليا أنا معاك
زينة:شكرا بزاااااف الله يسهل عليييك اخويا عبد الكريم
الفرحة ديال أنه غيطلاقاها وغيجيبها وغتكون معاه خلاتو يسرط ديك خويا عطاها نمرتو من بعد قطع معاها شكرو يوسف ومشى وخلاه ككمل الخدمة وكعصر فالقهاوي بالعشق مبسم غير بوحدو كتسنى غير فوقاش تصوني
طرطقات عنقها يمين وشمال وهي راجعة اللور شافت فالساعة كانت 21:00 من الستة وهي غارقة ضرها راسها وشداتها الدوخة بالكتبة بقوة مكتنقل من الضوسي وتعاود ضور لبيسي تكتب وتقول ما كتبت كملات كلشي حيدات الورقة كانت كملاتها وضارت جبداتها من لامبريمونت بقات ليها ورقة وحدة وتكمل مكملات لوخرين تخرجات روحها صباعها ضروها عنقها ضهرها حتى تحتها طاب بالجلوس أما عينيها خلاص كلشي تجمع عليها ولكن معندها ما دير مين جات غير هكا لباس لخايبة هي كن سمعهم لها وكلامو كيف السم كن راه باقية تشهق لدابا دارت يديها على راسها وهي تتشوف فالبيسي والصقيل موالفة تكون خدامة وبنادم غادي جاي والحركة ماشي بحال دابا هزات آخر ورقة لي غير شافتها عينيها خرجو كانت عامرة بعرضها وطولها بالكتبة صغرات عينيها وبدات تتقرا هنا وهي تنهد من قلبها حسات بواحد القالب تحشى لها الورقة ما عندها حتى شي علاقة بمضمون الضوصي متأكدة أنه هو لي زرعها وسطهم حيت مشارجية كتبة وغتزيد عليها الخدمة متنكرش أنها تعصبات ومعرفاتوش لاش باغي يوصل هو مشى يرتاح مع مخو وخلاها هي مرهونة هنا معرفات حتى معاش اتوصل لدارهم ولا علام الله بيهم فغيابها وزيد كن غير كانت خسراتو نيت تمتمات مع تنهيدة طويلة:لا حول ولا قوه الا بالله ياربي الصبر من عندك
وبدات كطابي الحروف على وعدها وسعدها معندها ما دير مكتوبها لقاها مهرسين لها الجناح وداير فيها ما بغى عطاتو ليام غا خليه حتى يتهد على خاطرو هادشي لكانت كتقول فبالها
فنفس الوقت واللحظة كان التيليفون كصوني هزو بشوية وجاوب:آلو سلام عليكم
السيكيريتي:آلو سي يزيد كداير لباس عليك بغيت نقولك راني يلاه حليت الجوا لي خليتي ليا الله يخلف عليك واخا مكانش عليك خيرك سابق
يزيد:مكاين حتى مشكل فلوس خدمتك هادوك ياك درتي لي قلت لك
السيكيريتي:لا كون هاني قدام الشركة ممحركش عبد الحق مشى غير يجيب كاس دالقهوى تاحد فينا مغيتحرك حتى تسالي السيدة
يزيد:خليتي الضو شاعل فݣاع الطوابق
السيكيريتي:آه كيما وصيتيني بالحرف سولتها قبيلة واش خاصها شي حاجة قالت ليا لا خليتها على راحتها
يزيد:مزيان مهم نخليك دابا تصبح على خير
السيكيريتي:لينا وليك اسي يزيد الله يخلف عليك ويقوي الخيير
قطع مع السيكيريتي لي كشكر ويعاود على المبلغ لي عطاه استثناء على الخدمة لي دار ليوم واخا هو ديما حاضي الشركة بالليل عيط ليه بغى يقلقلو ولقاه فعلا مككدبش لأنه كشوف فيه دابا وفاللحظة فاش هضر معاه فالتيليفون كان بعيد على الشركة فقط بأمتار قليلة جالس فطوموبيل مغايرة على ديالو باش ميعرفوهش ليسيكيريتي كشوف فالشركة وبالضبط فالطابق لي فيه البيرو ديالها وديالو حتى هو كان شاعل فيه الضو كيفما بقات تاهي وتعطلات حتى هو كاين رجع باش يبقى حاضي من بعيد شاد الطيلي فيديه مرة كهز راسو يشوف فوقاش اتخرج وعينيه على الساعة ومرة كشد الطيلي غير وصل سامية قبيلة مشى بالخف لدارو بدل عليه ورجع بلاما يحس بيه السيكيريتي بلي حتى هو كاين معاهم هما حاضيين زينة والشركة وهو تما جا يحضيهم كاملين
حط الطيلي ويديه على ذقنو كتحسس شعيرات لحيتو وكفكر الضوصيي كامل مغتوحلش معاه لأنه وراقيه معامرينش ولكن الورقة لي زرع لها وسطو هي لي غادي تعطلها حيت عامرة بغى يشوفها واش قادرة وقد كلمتها اتكملو ويلقاه على الصباح ولا لا وزيد بغى يشوف حتى واش بصح اتبقى فالشركة ولا غتجلس شوية وتخرج تديه معاها للدار وغدا تجيبو قبل ما يجي هو بزاف دالحوايج خلاوه يجي باش يقلقل السوق ويشوفو شنو كان غادي يطرى من مور ظهرو رجع شاف فالساعة كانت 21:45 لحد الآن راه مزال مخرجاتش إذن راه دايرة لي عليها ومعندوش مين يشدها ولكن ساعة أخرى الله وأعلم هادشي لكان كفكر فيه تفكر قبيلة فاش عطاتو بزاف دالأعذار أنها خاصها تمشي ومخلاهاش وبكل بساطة رفض مكهموش داكشي ومكتهموش حتى هي المهم خدمتو واخا بكات وحلفات بلي مدارت والو ولكن كبقى الضوصي جا عندها وهو يخسر إذن تحمل مسؤوليتو وفنفس الوقت باغي يختابر صبرها وقوتها وبالها فالخدمة واش غتكمل ولا لا وزيد واخا تكون مصالحاش بزز منها غيخليها تبقى حيت عندو معاها حسابات بعاد على الخدمة مزال مصفاوش نهار يتحدو داك الساع غيشوف باش غادي يحدها معاها كان كفكر فهادشي وعينيه على الأجواء بانليه السيكيريتي بعد شوية على الشركة وهو كهضر مع واحد السيد الڤيلا ديالو قريبة من الشركة والسيكيريتي لاخر مزال ماجا مع تلفت جيهة الشركة كبانليه فلحظة الضو كامل تقطع فيها من أول طابق حتى لآخرو وظلام حالك ساد فيها عقد حجبانو وهو كشوف الشارع مزال فيه الضو علاش هما لي تقطع عندهم إذن كاينة شي حاجة وزيد الشركة مخاوياش فيها بنت وكاينة بوحدها وسط داك الظلام لي غا حتى طاح متسناش بزاف حتى نزل من الطوموبيل بخطوات سريعة قاصدها بلاما يفكر ولايح كلشي وراه
السيكيريتي كان كبلبل مع الرجل وحتى حد فيهم مارد لبال يزيد براسو مكانش عندو وقت لي يهضر فيه مع السيكيريتي قصد الشركة دخل مع الباب وكلا خطوة كدير منها زوج
كانت كلها كترجف ومكمشة ضامة يديها عندها وسط داك الظلام من طبعها تتموت من الظلام متقدرش تنعس فيه ضروري يكون ضو خافت حداها معساك دابا لي بوحدها ووسط شركة قدها قد الخلا معارفاش شنو ضاير بيها ولا علاش تقطع كتقول دابا غيص/رفقها معاها شي جن ولا غيحتي عليها شي حد بقجة ومجاب حد خبارها إحساسها مقادراش توصفو أبدا بوحدها مكاين معاها حد وسط الظلام و معارفاش امتى غيمشي ومن طبعها هي كتخاف بزاف زعما هاد النهار داز عليها مكفس بكل ما تحمل الكلمة من معنى وزاد الظلام بين لها المعنى الحقيقي ديال ختامها مسك هزات التيليفون تشعل لبيل ولكن زاد عليها تاهو فديك اللحظة لأنه كان طفى دارت يديها على قلبها لكان كضرب بالجهد ووقفات وهي تترجف بغات تخرج غير تنزل عند السيكيريتي وتخرج برا تتقاد الأوضاع خوفها خلاها متفكرش أنها تمشي تحل السرجم ديال بيروها لكان عليه الريدو لي كون كان محلول كان الضو ديال الزنقة غيدخل ويضوي عليها شوية خارجة وتتملس فالحيوط حتى خرجات وزادت خطوات برا البيرو ديالها فداك الظلام وهي تترعد وتغزل وكطلب ربي يكمل ما بقى على خير فهاد الليلة
كان جاي طالع فالدروج وسط داك الظلام وتابث كان كحاول يسمع حسها ولا واش خرجات من لبيرو ديالها كمل الدروج وهو قاصد الطابق لي فيه هي بلاما يدير الحس هو براسو
تكات على الحيط فواحد القنت قريب لبيروها وهي ضامة يديها عندها معدتها كانت تتلوا عليها بالدهشة والجوع فنفس الوقت من الغدا مكلات والو حالها يشفي العدو عينيها غرغرو بالدموع بقى فيها راسها وحالها لي مضامش مع داك لي خلاها فهاد الحال بلاما يفكر ولا يخمم وهي كتنطق فداخلها حرام عليك طلباتو وعطاها بضهرو وخلاها تتمرمد وغدا نيت غتهمو غير الخدمة تكون واجدة مغيتسوقش ݣاع لشنو دازت منو باش كملاتها هادشي إلا رجع الضو وكملاتها وهدا بوحدو بلان آخر تكمشات وهي دايرة يديها على وجها تفرݣ/عات بالبكى والشهيق تجمع عليها كلشي الخوف الحݣرة الدل ݣاع لي جمعاتو هاد النهار حطاتو وكركباتو دموع فداك الظلام لي فيض الكأس
وصل للطابق الثاني الكولوار الأول كان عاطي فيه ضو دالزنقة شوية عكس الكولوار لاخر لي فيه لبيرو ديالها وديالو كانو السراجم مسدودين وعليهم الريدويات ضار حلهم حتى دخل غير شوية الضو وكمل طريقو كقلب عليها حتى تيليفونو باش يدير البيل نساه ما عاق بيه حتى دخل كان كلما زاد خطوة فالكولوار كسمع الحس وكلما قرب كوضاح ليه بلي صوت البكى مكان كشوف والو ولكن غير متبع الصوت حتى قرب ووقف قريب وحس بلي مقابل معاها واخا مكانش كشوف كان كحس بيها وبلي جسد إنسان واقف مقنت مع الحيط حالها وبكاها وقلبها الطايب لي نفا/جر خلاها متحسش بالحس وبلي معاها الزايد كان كسمع فيها تتبكي وغير واقف مكشوفهاش ولكن كان قادر يفرز أن داك البكى والشهيق مكانش من الخوف بل زايد عليه القهرة والضيم متسناش بزاف حتى نطق بنبرة مغايرة على لي موالف يخاطبها بيها هادي أخف وأرحم
يزيد:زينة
زينة هزات راسها دغيا وهي تتشهق مكانت تتشوف والو ولكن حتى هي حاسة بلي شي حد واقف قريب لها من غير نبرة صوتو طلعات مع نيفها ريحتو لي كدير ديما وباش ولا عندها معروف لأنها عندها واحد الرونق خاص غير شماتها ديك المرة زعزعاتها ولكن دابا خلاتها تعرفو بلي راه هو آه هو كاين معاها دابا وبوحدهم
من غير سميتها لي نطق معاود زاد حتى كلمة غير واقف وكسمع فيها مزال تتشهق أما هي محساتش حتى قربات شوية وتسطحات فيه حالها وخوفها خلاوها تنسى شكون هو كانت محتاجة أي واحد يجي يكون معاها فهاد اللحظة كيفما كان واخا يكون حتى هو لي سبابها وهادشي بلا وعي خلاها تقرب بشوية وتحط راسها على صدرو وكأنها كتحتامي بيه وكتعطي لراسها شوية الآمان بلي مبقاتش بوحدها نطقات بصوت باكي يق/طع فالقلب ومزال صدرها تتهز بشهقاتها
زينة:خفت بزااف كنت جالسة بوحدي حتى مشى الضو
كتهضر وتشهق مخشية فيه وراسها على صدرو وشادة ليه من حوايجو بحالا غيهرب وهادشي كولو هو حس بيه حس بخوفها وبرجفتها وحتى كلامها كبين حالها كانت بحال شي بنيتة صغيرة شادة فباباها محمية بيه وكتعبر ليه على خوفها نسات شكون هو ونسات كلشي حالها ولي واقع خلاوه حتى هو ميحسش براسو وهو كحس بدفئ جسدها لقريب ليه يسري معاه ومطولش فأنه يبقى غير واقف هز يديه بزوج بشوية وحاوطها كانو يديها هي على صدرو ويديه هو محاوطهم عليها معززين وضعيتهم نساو كلشي هو نسى لي داز وهي نسات مكانتو كان كحس بدقات قلبها المتسارعة وجسمها لي تتهز بشهقاتها راسها لي على صدرو نيشان بحالا مسندة بيه ويديها لي شادة فيه بيهم وكارزة بحال غيهرب لغة جسدها وكأنها تتقول ليه متخلينيش أما من غير الحركة الغير متوقعة بالنسبة ليه لي دار معاودش جا منو شي ردة فعل واقف مبلوكي ذقنو على شعرها إلتحام أجسادهم فديك اللحظة خلاو واحد الرعشة خفيفة طلع معاه من رجليه شي لخلاه بشوية يبدا يطبطب على ذراعها وهي فعز الخوف وينطق بصوت شبه خافت ببحتو الرجولية
يزيد:شووو صافي تهدني راك ماشي بوحدك
زينة فهاد الدقايق لي دازو كانت تتحاول تجمع قوتها والجهد لي مشى لها بالضغط والخلعة لي خرجو منها ليوم كلامو خلاها تبدا ترمش عينيها بشوية وكأنها كتستوعب وزيد ريحتو لي تغلغلات فنيوفها وبقربها ليه خلاتها تزيد تهز كيانها عاد ستوعبات لي ضاير وسط داك الظلام بقاو على حالهم حتى فلحظة رجع الضو هنا هي بلعات ريقها بشوية وهو مزال ضامها عندو وهي شادة فيه هزات فيه عويناتها الحمر الدامعين ووجها مخطوف بحال تتأكد راه هو وفعلا طلاقاو عينيهم وتفيكساو على بعض حالهم دابا كان مغاير على ديما دابا كانت خايفة وجا عندها حبس خوفها وهو محسش براسو حتى كان طاير عندها شنو زعما صدفة غتخليهم يتفكرو لي فات دقايق صمت ممعروفش شنو المراد منها كانو مزال على حالهم كشوف فعينيها الدامعين تزادهم واحد الرونق على لونهم لي هو بحد ذاتو فشكل مكانش لون عينيها عند أي واحد وهادشي خلاه ميبقاش مركز فيهم بزاف طلق منها ودفعها عليه بشوية شي لخلاها هي تحس على راسها لي نزلاتو وهي تتفرك فيديها وتتمسح دموعها بكمها تزادها الإحراج فهاد اللحظة معرفات مدير ووجها تزنݣ دغيا عطاتو بالضهر وقصدات مكتبها دغيا ولسانها مربوط أما هو كان مسح على ذقنو مراضيش على الحالة مجا فين يقصد الدروج ويزيد بحالو حتى كان موقفها بصوتو ومخاطبها بلاما يشوف جيهتها
يزيد:سيري للدار حتى لغدا وكملي
زاد وخلاها واقفة فبلاصتها تتسمع خطواتو تنهدات ومجات فين تجلس حتى تفكرات عبد الكريم لي غيكون وصل وكاين لتحت
كان نازل عاقد حجبانو باغي غيغبر فديك اللحظة جايين العساسة بزوج كتجاراو طالعين عند زينة غير شافوه تصدمو معرفوه مين خرج حتى نطق واحد منهم
السيكيريتي:سي يزيد نت هنا طاحت المݣانة بحال داك المرة داكشي باش مشى الضو وعاود طلعناها
يزيد حرك راسو باه:صافي سدو وسيرو
السيكيريتي:واخا اسي يزيد
نزلو كاملين وهو وراهم كفكر مجا فين يخرج مع باب الشركة حتى وقف وتلفت جيهة الدروج بالو قالو يتسنى حتى تنزل ويسولها إلا بغات يوصلها
بقى واقف قدام لباب لمح واحد السيد واقف بالموطور وقصدو السيكيريتي كان عبد الكريم
السيكيريتي:اشحب الخاطر اسيدي
عبد الكريم:أنا كنتسنى واحد السيدة خدامة هنا جيت نديها
السيكيريتي:آه هاهي غادي تخرج دابا لقيتينا غادي نسدو
عبد الكريم:شكرا الله يكبر بيك
فديك اللحظة كرز على يدو وزاد خارج عاقد حجبانو بلا حتى كلمة وبلاما يودع العساسة شي لخلاهم يبقاو يشوفو فيه لأنها مموالفاش ليه معروف عليه مؤدب ومتواضع ركب وزاد عافط مخلي وراه غير الدخاخن زينة فهاد اللحظة نزلات صافحات عبد الكريم لي كان مبسم حتى بانو ضراسو عطاها الكاصك دارتو وركبات وراه ديمارا الموطور وزادو هو غيطير بالفرحة صايݣ بيها أما هي مرفوعة ومعالم بيها غير الله دماغها غير مع هادشي لي وقع دابا كان البرد كضرب فوجها مخلي شعرها طاير ستحلاتو وغمضات عينيها بشوية وهي تتنهد فديك اللحظة جات فبالها فاش كان معنقها وراسها على صدرو واحد الإحساس حساتو سرى مع كيانها ميمكنش معارفاش باش توصفو ولا حتى شنو تفسيرو من غير أنه نفسها هدات والخوف نقص منها فاش جا أما متنكرش وسط داك الظلام طارت منها خلعة غارقة وسط سباتها حتى فيقها عبد الكريم بصوتو لكان ضاير عندها نص ضورة:زينة شنو بانلك نمشيو دابا نتعشاو أنا وياك عارض عليك الالة
ختم كلامو بتبسيمة وضار عندها كامل كانو واقفين فلفيروج زينة بلعات ريقها شوية ونطقات بنبرة هادية طاغي عليها الرقة والأدب:خلي حتى لمرة اخرى ان شاءالله دابا والله حتى عيانة راسي هازاه غير بزز
عبد الكريم صغر ابتسامتو وحرك راسو بآه وهو متفهمها لأنها فعلا تعطلات فالخدمة غتكون عيانة وبزاف:واخا ماشي مشكل وعنداك
زينة:ان شاءالله
مزاد حتى كلمة وخلاها على راحتها يكفي أنها معاه دابا ميكرهش يبقى غير يخيط الزناقي بالموطور وتكون هي معاه دابا بالنسبة ليه تقدم ملحوظ معاها يمكن هي بالنسبة لها عادي ولد دربهم وصلها ولكن هو لا شي حاجه لي زوينة وبزاف واخا صدات عراضتو بأدب ولكن على الأقل خدا نمرتها كلشي يجي بشوية مع الوقت وصلها بعيد على الدرب شوية تحت طلبها كانت 22:30 ديال الليل الدنيا بدات كتخوا حيت لبرد أكثرية غي شي دراري لي خارجين مجمعين فراس الدرب شكراتو وزادت حط لموطور عند الݣارديان وتبعها غادي وراها بعيد عليها بأمتار حاضيها حتى تدخل وداكشي لي كان غير غبرات مسح على شعرو وزاد لقهوتو يسدها وهو مبسم وراشقة ليه
طلاحت فوق فراشها بعدما كلا واحد شد قنت عيانة ومهدودة مجات فين تغمض عينيها حتى جا فبالها داكشي ديال قبيلة لي كان فشكل تنهدات حيت مكانش المدير فديك اللحظة بل كان يزيد لي كتعرف ديال شحال هدا لي كان سندها وفينما خافت كطلقاه وهاهي الصدفة ضارت وخلاتها تحس بيه وسط ديك الغلظة والقساوة لي كخرج من جيهتها زيادة على أنه واخا مكملاتش الخدمة مين شافت حالها هكاك قاليها سيري حتى لغدا معرفاتش بعدا مين خرج ولا واش كان من الأول وممشاش لدارو المهم لقاتو فعز خوفها تلقبات على جنبها جيهة الحيط وهي عاضة على شفايفها تتخمم تفكرات أيام زمان واحد الموقف وقع بينهم بحال كي طرا ليوم تماما وكأن ليام تعاودات والضيم طاح عليها وهي تتفكر لي فات ومبقاش ايرجع بقات هكاك على حالها مظيومة حتى غفات
دازت هاد الليلة وجا نهار جديد
جاية بالزربة تتكبر خطاويها خاصها توصل قبل منو كيفما قاليها دخلات تتجري للشركة وهي تتقاد الكاشكول مع طلعات للطاج فين كاين بيروها تنهدات براحة مزال مجاش جلسات بالزربة شعلات لبيسي وجلسات تتكمل الضوصي علاما يجي خاص يلقاه واجد كانت كتزرب وتقول مازربتش حتى بانليه دايز عاقدهم بلعات ريقها بشوية غير كدخل كتركب فيها الخلعة مكانش بقى ليها بزاف دغيا زربات على داكشي وناضت تتجري جابت ليه القهوى ديالو
هزات الضوصي وزادت عندو معرفاتش كيف تصرف بعد داكشي ديال لبارح وقفات قدام لمكتب طلعات النفس دقات بشوية ودخلات بعدما سمعات الإذن كانو عينيه على لبيسي حطات ليه قهوتو وحتى الضوصي ورجعات اللور
زينة:هاهو اموسيو كملتو كامل
يزيد مشافش فيها بعدما نطقات بل حول عينيه جيهة الملف هزو وتفحصو كامل كيفما كان خدماتو مدار حتى ردة فعل سدو ورجع حطو وضار لبيسي ككمل خدمتو بلاما يهضر معاها نزلات راسها بشوية وضارت غادية خارجة مجات فين تخطوي زوج خطوات حتى وقفها بصوت بنبرة استنكار
يزيد:قلت ليك سيري؟
جمدات فبلاصتها ورجعات تلفتات بشوية مع لقات عينيه عليها نزلات راسها للأرض بشوية وتنهدات بلا حتى كلمة لأنها حارت معاه ومبقات عارفة مادير
خاطبها بنبرتو المعتادة المتحجرة ومبين نيشان أنه كتنفخ عليها وهادشي ولفاتو
يزيد:لgraphique designer غادي يسيفط ليك les invitations dyl défilé سيفطهم par e-mail لمعروضين
زينة حركات راسها بآه:واخا اموسيو
يزيد:وإلا سول عليا شي حد ممساليش
زينة:واخا
مع كمل كلامو دارليها إشارة بيديه زعما صافي سيري ولا طيري ولا غبري المهم صافي سالات ساعتها زادت ومع سدات لباب وغبرات هز راسو وهو كزفر رجع باللور براسو وهو كمسد فجبهتو بصبعانو حاس براسو هاد الصباح ماشي هو هداك ودماغو عامر
زينة لي قصدات بيروها مع قربات ليه شافت لبنى طلات فيه مين ملقاتهاش رجعات لكن غير تلفتات شافتها جاية تبسمات وحتى زينة طارت عندها وتعانقو كتسالمو بحرارة
زينة:بقات بلاصتك قداااش كبقيتي شوية
لبنى:الحمدلله الحب نت بخير لباس عليك
زينة:أنا الحمدلله ياك شوية بعدا
يلاه غادي تنطق لبنى وهو يعيط لها واحد من الموظفين هاز فيديه ملف يعني الخدمة شي لخلا لبنى تلفت لزينة:زين ديالي نطلاقاو فالغدا ونهضرو مزيان جيت غا نطل عليك دابا
زينة:سيري الله يسر أنا ندوز عندك فاش تصوني
تفرقو ودخلات لبيرو ديالها كان عادل سيفط ليها واحد لفيشيي عامر بليزانڤيطاسيو جبدات لاليست ديال الناس المدعوين لي كانو مخلصين بالطبع وبدات تتسيفط لهم فلإيمايل
فنفس الوقت فبلاصة أخرى كانت العشرة دالصباح يعني الإستراحة الدنيا عامرة وشي داخل وشي خارج جالسة فواحد من الكراسة ديال الساحة وكتشوف بعينيها وساهية تلفتات بشوية فاش حسات بشي حد جلس حداها كان خوها يوسف لي مد ليها بيمو
سكينة خداتو:شكراا
يوسف:مالك اشبيك؟
سكينة:والو شغيكون بيا
يوسف:سيري شوفي علامن ضحكي أنا راه خوك وزيد التويمي ديالك يعني حاس بيك غير قولي اشنو تما
سكينة شافت فيه وهو يغمزها وضور يدو عليها تبسمات حيت فعلا خوها كحس بيها وعلاش لا راه التويمي ديالها تشاركو كرش وحدة
سكينة:ولكن حلف بالله متقولها لزينة
يوسف عقد حجبانو شوية:هي شي مصيبة
سكينة:لا مدرت والو غاحلف
يوسف:أقسم بالله اتبقى هنا كلمة الرجال
سكينة مسحات على وجها ونطقات بعدما تنهدات:طلاقيت بوليد خو يزيد
يوسف بقى كشوف فيها من بعد مدة وهو ينطق:فين وامتى قاليك شي حاجة؟
عاودات ليه لبلان نهار طلاقاتو وبقى شاغل بالها لأنهم كلهم تقاصو من داكشي لي وقع ودوزو أيام كحلة متنساش
يوسف:حلفي مقاليك حتى حاجة
سكينة:والله ما هضر معايا أصلا أنا هربت فاش شفتو
يوسف تنهد وما نطق بحتى كلمة شي لخلا سكينة تنطق بحزن:أنا من هادشي كامل بقات فيا غير ختي زينة مدارت لا بيديها لا برجليها
يوسف وهو ساهي كتفكر:داكشي كان غير سبب باش يوقف داك الزواج لأنه أصلا من الأول ممكتابش
سكينة:عرفتي وتمشي تقول شي حاجة لزينة منبقاش نهضر معاك غادي تفكر لي داز مسكينة ولي فيها كافيها
يوسف شد فيها:كوني هانية المهم نت مديريش فبالك واخا لي داز صعيب الحمدلله على كل حال
سكينة حطات راسها على كتفو وهي تتفكر فختها وكتنهد:الحمدلله
فجيهة أخرى بالضبط فالشركة كانت خدامة مزال كتسيفط للناس عرفات أنه حدث كبير حيت لي معروضين كثار ولي صدمها هو الثمن الغالي ديال التذكرة واخا هكاك كاينين بزاف دالناس وغير من كنياتهم تعرف شكون جاي ومحايرش فداك الثمن تتقرا فسمياتهم المطبوعين فالدعوة غير بناني وبرادة تتشاير فديك اللحظة كانت كتسمع صوت الطالون جاي وكقرب بخطوات سريعة مع وقفات عليها دقات بشوية الباب زينة هزات راسها وغير طلاقاو عينيهم أنيسة متسناتش بزاف حتى نطقات بنبرة جافة:كاين يزيد؟
زينة رتابكات وبلعات ريقها نسات بلي قاليها تقول لأي واحد جاي عندو ممساليش:آه كاين أنا غنعلمو
هزات السماعة وقلبها كضرب كصوني تيليفون المكتب ديالو ولكن مكجاوبش
أنيسة مخاطبة ولدها بالفرنسية:هاحنا غادي ندخلو نشوفو خالو غنديرو ليه مفاجأة
زينة لكتسناه يجاوب نشرها مرة مرة تتهز عينيها فأنيسة لي كضحك مع ولدها ولكن غير تتهز راسها فزينة تتجمعها من بعد دقايق وهو يجاوب:آلو
زينة:موسيو يزيد بغات تشوفك
يزيد قاطعها دغيا:ياك قلت ليك ممساليش
زينة بصوت رقيق وبصبر طويل لأنها مستبعدة أنه ميبغيش يشوف ختو حيت عرفاتها جات على غفلة ومعالماهش:موسيو يزيد ختك أنيسة لي بغات تشوفك
قطع عليها خلاها مفاهمة والو بعدات السماعة على وذنيها معارفة متقول للسيدة لكن فديك اللحظة سمعات لباب ديال لبيرو ديالو تحل أنيسة تلفتات غير شافتو مشات عندو زينة طلات بشوية تشوف ردة فعلو لقاتو هز ولدها كبوسو وسلم عليها حتى هي بلابيز كان مبسم فوجها تقول ماشي هو لي تي/را فيها بلي تاحد مايجي عندو ولكن طبيعة الحال لي جات ماشي أي واحد هاديك راه ختو دخلو وسدو وراهم لباب جلسات وهي تتنهد مخفاوش عليها شوفات أنيسة لي تاهي بحال خوها كون كانو عينيها قرط/اس كن تي/راو فيها
يزيد:شنو تشربي؟
أنيسة:لا لا مبغيت والو بغيت نهضر معاك دغيا ونمشي
يزيد لي كان جالس مقابل معاها ومجلس ولد ختو عندو كلعب معاه وعاطيه الخاطر وحتى الوليد مولفو رجع شافيها ونطق:هانا كنسمعك ياك لباس حالك معجبنيش
أنيسة من بعد صمت قصير نطقات:كمال سير اماما لعب شوية برا عفاك ايزيد عيط لشي واحد ثقة من الموظفين يهزو غير شوية علاما نهضرو واخا مغيفهمش مبغيتش نهضر حداه
يزيد عرف بلي شي حاجة كاينة وخاصو يعرفها دغيا هز الطيلي دلمكتب ونيشان عيط لسامية لي مدازتش حتى نصف دقيقة حتى كانت جات طايرة مع دخلات وشافت أنيسة تبسمات وسلمات عليها
أنيسة:بلييز سامية واخا ناخد شوية من وقتك بغيت نهضر مع يزيد بوحدنا وبغيتك تخلي معاك كمال ولدي واحد نص ساعة
سامية:آه اويلي ماشي مشكل حبيبتي avec un grand plaisir
أنيسة:شكرا بزاااف(شافت فولدها)كمال اجي اماما سير مع طاتي سامية تخرجك بينما نهضر مع خالو
سامية فهاد اللحظة مدات ليه يديها وهي مبتاسمة:يلاه الغزال
كمال فهاد اللحظة تراجع ولصق فيزيد مبغاش يمشي معاها حرك راسو بلا
أنيسة:كمال حشومة نخليو الناس كتسناو أو لا؟
يزيد وقف بيه وهو هازو زاد بيه جيهة لباب وهو كهضر معاه فوذنيه:البطل مخاصش يكون كخاف من الناس منين غادي ترجع غتكون عندي ليك واحد المفاجأة غادي تعجبك تفاهمنا؟
كمال بشوية حرك راسو بآه دغيا قلبو وهدا هو حال الدراري الصغار كبغيو غير لي يسايسهم بشوية مدو لسامية لي كانو عينيها عليه ومبسمة شي لخلاه حتى هو يبتاسم لها ابتسامة صغيرة جانبية خرجات هازة كمال وخلاتهم بزوج سد لباب وراه بشوية ورجع عند ختو لشي شد لها فيديها بزوج ونطق:قولي ليا شنو كاين
أنيسة فهاد اللحظة نزلات راسها جمعات النفس وعاودت شافت فيه:أنا بغيت نطلق
يزيد بقى كشوف فيها من مور كلامها بلا حتى ردة فعل لكانت كتسنى هي بلاما يبين والو جاها رد جوابها فيساع وبهدوء:علاش؟
أنيسة سحبات يديها ودارتهم على جبهتها وهي تتنهد تقول جامعة فقلبها هموم الدنيا بدات تتعاود ليه وتتخوي قلبها:مبقيتش قادرة نستحمل العيشة معاه صوتو هو اللخر مكنحملوش يهضر ولا حتى يقرب منيي تخايل وزيد بالحالة ديال كمال مقادراش نصبر زايدة عليا
يزيد قاطعها:الحالة ديال كمال مكتابة من عند الخالق ولي جات عندو مرحبا بيها
أنيسة:عارفة وراضية بقضاء الله المهم كفهم وكسمع بحالو بحال ݣاع لوليدات ولكن باه أيزيد مبقيتش قادرة على العيشة معاه
يزيد نيشان:كهز عليك يدو؟
أنيسة هزات راسها فخوها وحركاتو بلا:عمرو دارها كقولي دابا اجي نهضرو نعرفو هادشي علاش وأنا حتى داك القرب مباغاااهش ومبقيتش مستحملاه نت أول واحد نقولو هادشي حيت عارفاك غادي تفهمني وكتفكر بعقلك قبل قلبك داكشي علاش متخايلش شحال محتاجاك نت لي تعاوني كثر من اي واحد
يزيد من بعد كلام ختو شد ليها فيديها بزوج كيف ديما كان سندها فكلشي قرايتها خدمتها كانت كطلقاه وراها ومشجعها فاختياراتها مكانش فقط أخ وإنما الأب الثاني ديالهم لا هي لا خوتها كلشي كياخد رأييو لأنه عارفينو مكخدمش العاطفة بل عقلاني ورزين كضرب ألف حساب قبل ما يطبق
يزيد:سمعيني مزيان كيفما الزواج ككون بالرضى ديال الطرفين الطلاق كذلك مزال مسمعناش لراجلك أنا فاهمك وحاس بيك حتى الضغط ممكن يدير كثر من هكا خليني نجلس مع وسيم ونشوف اشكقول حتى هو فهادشي ويكون خير نت دابا محتاجة ترتاحي وتبعدي من البلاصة لفين كتحسي براسك مريضة فيها أنا غندوي معاه بعدا تمشي تجلسي عند الوليدة ولا عندي شوفي نت فين بغيتي حيت صعيب الحال أأنيسة لأن مبقيتوش بوحدكم خاصنا نجلسو ونهضرو حيت بيناتكم ولد الحالة ديالو محتاجة واليديه بزوج يكونو معاه ويربيو فيه شخصية تخليه يعرف أنه بحالو بحال ݣاع لوليدات ومكاين حتى شي اختلاف بينهم وهادشي باش يقتانع بيه ويكون عندو خاصو يلقاه وسط عائلة لي مجموعة خوي راسك أنا معاك وغنتكلف تفاهمنا؟
أنيسة حركات راسها بآه وهي كارزة عليه كتحسس راسها بلي ماشي بوحدها تبسمات شبه مرتاحة حيت عارفة خوها راجل ووقفتو مع الواحد وقفة الصح ومتفهم وعقلاني جرها لعندو بشوية ضامين بعضهم مبينين المعنى الحقيقي ديال الخاوة فالحزة
فنفس الوقت برا كانت جاية جارة كمال لي هاز ݣلاص وتتهضر معاه وفينما يدوز من حدا شي موظف يضحك معاه كان من أصحاب متلازمة داون أو متلازمة البرائة مخلياه كدخل لخاطر ولي داز يوقف يبوسو ويضحك معاه مع ضارو من الكولوار لي كان خاوي وهي تجلس القرفصاء مقابلة معاه ونطقات
سامية:واش عارف بلي أنا غنولي مرات خالك
كمال كان كياكل الݣلاص وكشوف فيها شي لخلاها تكمل كلامها وهي تتحلم:غنكون أنا هي مدام الوزاني لي كلشي كتسنى يعرف شكون هي غيبدا يتضرب لي حساب وكلشي يحني الراس كيفما حانيينو لخالك لي غادي نسيه فلي مشات ومتستاهلوش ومتقارنش حتى بالتراب لي كنمشي عليه
وقفات وهي مزال تتهضر وتعبر حطات يديها على كرشها وكملات كلامها:أول ولادة ديالي غتكون ولد غيهز سمية باباه وغيولي هو الوريث الأول بحالو وغيشد بلاصتو وغيكون كشبه ليه فكلشي أنا حسن منها يااك
قالتها وهي تتنعت ليه فبيرو زينة كان تتتهضر بحال الحمقة قدام ولد صغير لي أصلا ݣعما فاهم اشكتقول فهاد اللحظة صونى ليها الطيلي دغيا جاوبات وبدات تتهضر مع صاحبتها وكضحك نساجمات فالهضرة وترفعات لدرجة بعدات من تما مخلية الدري بوحدو تما واقف كشوف فجنابو
تحل لباب كانت أنيسة لي سابقة وراها يزيد شاد الطيلي بحال كقرا شي ميساج وكهضر معاها
أنيسة:ماما متعرف والو دابا أيزيد عفاك انا عارفاك بير غارق ولكن راك عارف مبغيتش تشوش على والو
يلاه ايهز راسو يجاوبها بعدما خشى الطيلي فجيبو حتى كانت غوتااات لربي لي خلقهااا فلحظة ذعر
أنيسة:يزيييييييد ولديييييييييييييييي
ما عرف باش تبلا ضار لفين كتشوف كان كمال ولدها طالع فكرسي ومدلي من واحد السرجم ديال الكولوار لي قريب لبيرو ديال زينة وكطل على الشارع غير رجليه لي بقاو شادين للداخل ونصو كلو مدلي برا بين ثانية وختها غادي يط*يح للزنقة يتش*تت وغيولي كان الله يعمرها سلعة
أنيسة بديك الصدمة وداك المنظر جلسات فاشلة للأرض رجليها تحشو عليها وهي تتشوف ولدها بقالو غير شوية ويودع حتى الجهد باش تمشي ليه تعتقو مكاينش فشلات بالخلعة يزيد براسو تصدم وكرم بلاصتو حيت داكشي فرمشة عين وقع ولكن دغيا تدارك نفسو وهو كشوف الولد لي عزيز عندو وأول حفيد للعائلة غيط*لاح يتش*تت وفين فالشركة مجا فين يقصدو حتى كان كمال تجر من ظهرو وتسحب للداخل من طرف شخص جا فلوقت المناسب وحبس مصيبة كانت اتوقع وبراسو واخا هو المنقذ إلا أنه جلس للأرض فاشل ومعنق كمال بالجهد ضامو للصدرو وكترعد وكأنه دار مجهود كبير باش ينقذو فوسط لحظة وشيكة بحال هكاك كانت اتجي من وراها كارثة خايبة الموظفين من مور صرخة أنيسة جاو تتجاراو كبان لهم الطايح كثر من النايض ضارو بزينة لي كانت ضامة كمال لصدرها وتترعد بداو كتسائلو مفاهمين والو بعداتو عليها وطبعات قبلة على راسو ورجعات عنقاتو خايفة عليه لأنها أصلا ديجا شايفاه فدار جداه يزيد مع وقف عليها خط/فو لها من يديها وهو كعنق فيه بحرارة
زينة هزات راسها فالموظفين لي كانو كسولوها شواقع نطقات وهي فيها السخفة:كان غادي يطيح من السرجم وشديتو
فهاد اللحظة شي وحدين آخرين ضارو بأنيسة لي جالسة فالارض جابو ليهم الما ودغيا ترونات الدعوة يزيد فديك اللحظة حط راس ولد ختو على صدرو وهو كتنفس الصعداء مصيبة كانت غتوقع جاو عينيه على زينة لي فالأرض عاطينها قرعة الما تتشرب مع حيداتها من فمها شافت فيه وطلاقاو عينيهم بدون مقدمات مد ليها يديه خلاها بقات تتشوف فيه شحال وكأنها تتأكد بلي راه باغي يهزها مفكراتش بزاف ومدات ليه يديها حتى هي لي كانت تترجف شدات فيه وهنا جرها بشوية حتى وقفات بلا حتى كلمة وديك الساع طلق منها يلاه هزات فيه عينيها هنا وهي دفعها أنيسة وجرات ولدها تتعنق وتبوس فيه وتتبكي حتى بدا كلشي كصبرها بلي الحمدلله خرجات طريفة
أنيسة فديك اللحظة معنقة ولدها وتتبكي تلفتات لقات زينة واقفة قريبة لها محساتش حتى طلاحت عليها عنقاتها ونطقات بصوت باكي:شكرااااا
زينة تصدمات لأن علاقتهم متوثرة ولكن قلب الأمومة خلاها تنسى كلشي بسرعة بادلاتها العناق حتى هي شي لخلا الموظفين كاملين يبداو يصفقو دخل وسطهم عادل يلاه وصلاتو لخبار بدا كصفر ولبنى حتى هي تتصفق بعدات عليها شوية وهي تتمسح عينيها زينة كانو عينيها على يزيد محساتش براسها بلي تتشوف فيه طول هاد المدة وحتى هو كذلك عينيهم على بعض ولكن فلحظة قلب وجهو رسم ابتسامة صغيرة للموظفين وهنا جر ختو وزادو مع الخطوة الأولى وقفات عليهم لالة سامية صفرة عاد طفات عليها الشمعة بعدما سمعات الخبار مشات لطواليط تعصرات واحد زوج دميعات وجات تتجري وقفات على أنيسة تتنخصص أو بمعنى آخر كتعصر
سامية:ختي أنيسة والله ما درتها بلعاني هئ هئ شريتلو لݣلاص مبغاش يدخل معايا لبيرو بغا يبقى يلعب فالكولوار قلت نمشي بالزربة نجيبلو كلينكس ونرجع وهو يجرحني لبوانيي ديال لباب محسيتش بلي تعطلت عليه هئ هئ
وراتهم صبعها لي كان فعلا مجروح وهي مزال مواصلة تمثيلها:سمحيليييي سمحيليييي بزااااف معنديش الوجه لي نهضر معاك بيه هئ سمحليا ايزييد
تتبكي وتنخصص والناس كتفرجو شي لخلا أكثرية يبدا صافي موقع والو هنا أنيسة جراتها عنقاتها بكل طيبة لأنها حمدالله خرجات طريفة وتتبقى بنت عمها:صافي شو موقع والو الحمدلله صافي
يزيد فهاد اللحظة ضار عند الموظفين ونطق بكل أدب:تقدرو ترجعو les postes ديالكم شكرا
وداكشي لي كان تفرتكات الجقلة زينة دازت من حداه منزلة راسها وهو متبعها بنص عين
بعدات عليها شوية وهي تتمسح دموعها وعينيها فقط على يزيد:سمحليا بزاف أيزيد معارفاش شنو نقول والله
يزيد عينيه على ولد ختو ورجع شافيها:موقع والو صافي سيري لبيرو ديالك
وداكشي لي كان زادت وخلاتهم بزوج أنيسة عنقات ولدها كثر طارت منها خلعة ومقادراش تخايل المنظر ضور يديه عليها وزادو خارجين من الشركة مقرر يوصلها وميخليهاش بوحدها ورا هادشي لكان ايوقع
غادية جاية فالبيرو غطرطق ومعالم بحالها غير الله كتأنب راسها وكيفاش سهات على الولد كانت غتوقع كارثة ولكن لي حارقها كثر هو شكون عتقو وبان فصورة البطولة كتكرها بزاف لصقات لها مونتيف قاصح ومع ذلك هاهي مزال كضور فجنابها كان عندها أمل أنهم يسيفطوها ولكن بهادشي لي وقع دابا موحال وبانت هي ماشي قد المسؤولية قدامو جلسات فبيروها بالجهد وهي معصبة و مرتابكة تتهز رجليها بتوثر وهادشي مبين شحال عقلها مشوش باغية أي حاجة تخليه يسيفطها وباغية ثقتو وصورتها قدام عائلتو ولكن كلشي غير بشوية وديك بشوية هي لي محاملاش هي بعدا خاصها طيرها بدات تتمتم فخاطرها وتتبرد على راسها وهي تتفرك يديها مع بعض:كاين شي حل ركزي وفكري مزيااان ضروري مغادي طلقاي شي حاجة لي تغبرها من هنا فكرييي تحاجة ما صعيبة عليك
تتهضر بحقد فنفسها لأنها فعلا زادت حقدات عليها وكرهاتها كثر من مور ما عرفات بلي هي لكانت اتكون مدام الوزاني وهادشي لي وقع ليوم زاد على داك الحقد والكره البغض والضغينة كثر
داز الوقت وجا البوز ديال لغدا كانت جالسة هي ولبنى تتغداو وتتعاود ليها على الموقف دقبيلة
زينة:غير سمعت الغوتة ديال ماماه مع خرجت كبانلي الدري مدلي من السرجم
لبنى خفضات صوتها:مو تاهي مالها متشدوش مخلياه لديك لهبيلة ديال سامية حضات حتى راسها طلقاها دابا كلها تتغزل خايفة من سي يزيد غيجي ينݣدو ليها والله حتى ياكلها
زينة تنهدات تتبقى بنت عمو يطير تايطير مغيتعاملش معاها كيف كعاملها هي على أبسط الأغلاط وشافت قبيلة كيف هضرو معاها:الحمدلله خرجات طريفة وصافي هدا هو المهم
لبنى:وياه الله يحفظ وصافي الديفيلي مبقى ليه والو كلشي غارق
زينة:وياه الله يدوز كلشي بخير نت فايتة حاضرة ليه؟
لبنى:ديما اويلي راه حتى حنى معروضين اشغادي نقولك علاام آخر والله
زينة وهي كضحك:ريحة الفلوس والناس ديال morocco ماشي دالمغرب هههه
لبنى:وياه يختي عطاتهم ليام الله يزيدهم ويعطينا حتى حنا ياربي عالله يكونو مخرجين غير شي مونطو خاصني واحد نيت
زينة:علاش مشفتيش les articles?
لبنى:لا شفت غير الثواب وڤاليديت لهم بلي راهم مزيانين فالكاليطي مكخرج حتى article ومعرفناش شنو كاين حتى لنهار الديفيلي
زينة:وعلاش هادشي وكيفاش درتي حتى عرفتي بلي داك الثوب مناسب لكل حاجة
لبنى:كثرات المنافسة وكلشي تابعهم وباش الماركة متفقدش القيمة ديالها حيت راك عارفة الميطاسيو غا مشتت وفنفس الوقت ميتسربش حتى تصميم ويمشي يتسرق كديرو هكا جابو بزاف ديال الثواب ديال البرد وختاريت لهم شكون لي الكاليطي ديالو زوينة حيت الكوليكسيو ديال الخريف والشتى وهما بيناتهم غيتفاقو كلا تصميم شنو الثوب لي غيديرو فيه
زينة بقات تتفكر مكانتش متوقعة لهاد الدرجة زعما متبوعين وعليهم العين وداكشي ديال حسي مسي ولكن هدا هو سوق الشغل شي حاضي شي وديما الحاجة الناجحة كتكون متبوعة
لبنى:فراسك بلي معارفينش شكون هو المصمم الرئيسي
زينة عقدات حجبانها شوية:كيفاش مفهمتش
لبنى:المصمم ديال الشركة معارفينوش شكون هو الفرقة ديال التصميم هنا دورها هو مين يجي الرسم والنوع ديال الثوب لي غادي يجي مع التصميم من عند المصمم المجهول يفصلوه كيفما ترسم وكزيدو عليه الإضافات الصيكان والسبابط كاين فرقة ديالهم بوحدهم أما المصمم الرئيسي ديال الحوايج ممعروفش شكون هو
زينة وهي كضورها فدماغها:باش هكا يحافظو على التميز ديالهم نت قبل مني هنا بزاف مشاكة فحتى شي حد
لبنى وهي كتاكل:ماشي بعيد يكون سي يزيد نيت ولا شي حد من عائلتو يقدر يكون باه مثلا حيت هو لي كان شاد الشركة قبل منو ولا يكون شي حد مكجيهمش شادينو يخدم غير ليهم
زينة بلاما تحس وهي ساهية بحالا تتنبش على شي حاجة فدماغها:المصمم مرا ماشي راجل
لبنى شافت فيها:باش عرفتيها هههه سمعتي شي هضرة
زينة حسات على راسها:لا لا غير حيت زعما اختصاصهم حوايج ديال العيالات داكشي باش قلت زعما راه مرا حيت غادي تعرف مزيان لشنو كميلو النسى وغادي تصممو فهمتي يعني هاد النجاح كامل مجايش من فراغ ههه
لبنى:وياه أي حاجة خرجات تبارك الله مكتبقاش فالسطوك كلشي كنجح الله يخليهم ديما واكلين وموكلينا معاهم راه حنا خدامين عند الشان والمرشان غا الله يحفضنا من لعين وصافي
زينة تنهدات:آمييين ياربي
عادل حط يدو على كتفو زينة:super women ديالنا
زينة ولبنى ضحكو وحتى هو كذلك نظم ليهم عادي وبقاو جالسين مجموعين كتغداو لي داز يشوف فزينة على حساب داكشي لي وقع قبيلة والهضرة ضارت بلي دارت مهمة بطولية وكدا حتى جا وقت الخدمة
داز الوقت كانت فبيروها خدامة مبقاش بزاف ويخرجو هزات شي وراق وقصداتو تديهم ليه دقات بشوية ودخلات كان واقف وكتفرج من الزاج خاشي يد فجيبو وليد لوخرا كتحسس بيها ذقنو نطقات بصوتها الرقيق فور ما حطات الوراق على المكتب:سي يزيد الوراق ديال لوطيل خلاهم لmanager قبل ما يرجع ليه هو و مونيا ثاني
تلفت بشوية جيهتها وتما جاي قاصد الوراق هزهم وهو كشوف فيهم وهي عينيها عليه كشدها الستريس وهي معاه الهضرة كتلف ليها بلعات ريقها شوية وكملات كلامها
زينة:راه تاصل بيا من طيليفون آخر قاليك بلي خلاو لينا لاطيراس كامل لي على لابسين وقالي راه طليفونو طفى ليه داكشي باش مقدرش يعيط ليك
يزيد بصوت هادئ على عكس العادة وعينيه على الوراق:صافي راه تاصل بيا
زينة:هادشي لي كاين نقدر نمشي اموسيو
حط لوراق وحرك راسو بآه بلاما يشوفيها مع عطاتو بالضهر هز فيها عينيه دغيا ونطق بلاما يحس بصوت مختالف على كيف موالف كهضر معاها هدا كان أحسن
يزيد:تسناي
تلفتات بشوية بلاما تهضر كتسنى شي أمر من عندو بقى كشوف فيها بلاما حتى كلمة أو بمعنى آخر معرفش شنو يقول لأن الكلام لي باغي يقول ماشي أمر على الخدمة أو توبيخ لا كانت شي حاجة مختالفة كان باغي يشكرها على لي دارت مع ولد ختو ولكن معرفش كيفاش لسانو تربط لأنه منهار شافها وهو كعطيها غير فالقاصح مين جا للزوين معرفش زينة مفهماتش سكوتو تعابير وجهو مكان عليها والو وهادشي لي كخلعها مكتعرفوش فاش كفكر غا حتى كت*يري فيها عينيه لي عليها خلاوها تنزل راسها بشوية وإحساس التوثر زاد فالڤوليم عندها نطقات بصوت شبه خافت كاسرة داك الصمت:نعام اموسيو
ورجعات هزات فيه عينيها بشوية وهي تتحاول متنزلهمش تتحاول تولف حيت السطريس لي كجيها من جيهتو وهو كشوف فيها بغات تحاربو حيت قهر صحتها فديك اللحظة حس على راسو بلي طول الشوف بلع ريقو بشوية وفرمشة عين عقد حجبانو ورجع لحالو معاها قلب وجهو دغيا ودار ليها إشارة بيديه مع بضع كلمات بالحساب:صافي والو سيري لخدمتك
زينة ديك الساعة ضارت وخرجات دغيا بلا حتى كلمة خلاتو وراها جلس بالجهد وهو كلعب بستيلو بين صباعو وكفكر ديك شكرا مبغاتش تخرج ليه وهي قدامو ولف ديما يعطيها غير القاصح صح لي دارت صعيب نقذات روح ولكن لي يستاهل الشكر هو الخالق لأنه من الأول كانت مكتب بلي ولد ختو مغادي يوقع ليه والو هي كانت غير سبب لأن هادشي لي دارت ليوم ميشفعش على لي دارت شحال هذا هادشي لي كان كقول فبالو وهو كارز على فكو لي كنرفزو فيها هو داك الوجه لي كبينها شحال مكتهزش الراس وهي خبث منها مكاين وزيد أكثر حاجة زايداها نغزة فدور البرائة هما عينيها لونهم مغاير وماشي لون عادي بحال الناس فيهم واحد المزيج مغاير بين الأخضر والرمادي مينكرش أنه مخليها متميزة وفاش كتبدا دمع قدامو كوليو فشكل علام آخر دار يديه على ذقنو قاعيدة فيه فاش ككون كفكر كتحسس شعيرات لحيتو بشوية وهو فوضعية الشرود كفكر فيها فاش غا وصل لعينيها وتضربات صورتهم فدماغو محسش حتى رجعات بيه الذاكرة فنفس الوقت فاش تفكر نهار تقطع الضو وفرش راسو بلي كان حاضيها وهادشي كان كحاول يتانساه
🤍فــلاش بـاك تــازة 2019🤍
بالضبط فالڤيلاج نازل فالدروج هاز الصلاية كطرطق عنقو يمين وشمال الڤيلا خاوية غا بوحدو مو وباه معروضين للعشى عند شي ناس من الڤيلاج وخوتو حتى هما معاهم هو فضل يبقى بوحدو لأنه معندوش مع كثرة التجمعات الهدوء والصقيل طاغيين فالدار وهادو أكثر زوج دالحوايج كنغموه دخل للصالون وجلس شاد الطيلي كتسنى أذان العشى باش يمشي يصلي فالجامع وهو هكاك جالس سمع الدقان بشوية فلباب ناض وتاجه جيهتو يفتحو وهو متأكد ماشي شي حد من عائلتو ولا العساس او السراح لي دق هاد الدقة الهادئة وبشوية
فتح لباب بشوية وكيفما كان متوقع ماشي شي حد منهم هي غير شافتو نزلات راسها شوية وهي تتفتف عينيه لي عليها خلاوه ميخفاش عليه الخجل لي نازل عليها وأول حاجة خدودها لي توردو
متسناتش بزااف حتى كانت نطقات وصوتها كذلك كاسيه شيء من الحياء وهادشي عادي بالنسبة لبنت قروية قليلة الاحتكاك مع الجنس الخنش لأنه عيب كيفما ترباو
زينة:عفاك أنا راه سيفطاتني روعة باش ندي ليها تيليفونها بغاتو
كان لهجتها وطريقة نطقها للعربية طاغي عليها رنة أمازيغية الأطلس هادشي كان من بين الحوايج لي صكاناهم فيها فهاد الدقايق لقليلة لي وقفات قدامو نطق بصوت هادئ حتى هو وهو كشوف فيها وفحالها:مقالتش ليك فين حاطاه
بنفس وضعيتها عينيها فالأرض ونبرة رقيقة:قالت لي فلبيت كتشارجى
فديك اللحظة فسح ليها المجال باش تدخل تاخدو بلاما يزيد حتى كلمة خلاها تطلع لبيت ختو عادي لأن لي باين راه باين او بمعنى آخر سماهم على وجوههم واخا ختو تاقت فيها وسيفطاتها حتى هو قراها وبنادم راه باين دخلات منزلة راسها وهو خرج بقى حدا لباب يديه فجيابو احتراما لها أنها مكاين حد وهي دخلات مبغاش هاد الدقايق لي جمعاتهم يكونو بوحدهم فالدار هو معلابالوش ولكن غا على ودها هي حيت شافها كيف تزنݣاات كان واقف خاشي يديه فجيابو كسمع صوت الصرصور زيادة على اصوات الحيوانات لي عندهم فالكوري وسط هدوء البادية وظلام ليلها تلفت لها بشوية فاش حس بخطواتها كانت جاية هازة الطيلي ومنزلة راسها مع خرجات نطقات وعينيها مزال فالأرض بصوت رقيق:شكرا
يزيد عينيه عليها:واش الوليدة كاينة معاكم؟
زينة مزال على حالها:آه حنا مجموعين فدار الغربي
يزيد:الا مشيتي قولي لها الله يحفظك راه يزيد
فوسط كلامو تقطع الضو فجأة لا فالدار ولا على برا والبولة لي كانت فوق لباب فين واقفين كذلك شي لخلا واحد ظلام حالك يسوود بقى تابث بلاصتو ولكن هي لا مع تخطف الضو والظلام غطى على كلشي شهقات وبلاما تحس طلاحت عليه شدات فذراعو كارزة بالجهد ونطقات بصوت كولو خوف:متمشيش عفااااك بقى حداياااا
قالتها بصوت طاغي عليه الترجي وصوت أنفاسها لي كتسمعو دليل على خوفها وعاد الشدة لي شاداه بلاما تحس وهي عاد كانت حشمانة منو عرف أنها من اصحاب فوبيا الظلام بلاما يتردد شد فيها بشوية ونطق بصوت هادئ كحاول يهدنها:متخافيش أنا معاك هاهو غيعاود يرجع دابا متخافيش
كرزات عليه من يدو وماهي إلا ثواني قليلة حتى بدا كسمع صوت شهقاتها بشوية كتبكي بغا يجر يدو باش يشد فيها هنا وهي تكرز عليه متمسكة بيه ونطقات بصوت باكي:لا متخلينيش عفااك
يزيد هنا ملقى ميدير وسط خوفها من غير انه يضور يديه على كتفها بشوية ونطق بصوت هادئ ممزوج بنبرة غتهدنها وتبعث فيها شيء من الأمان:متخااافيش مكاين لاش تبكي معندو ميوقع ونت معايا غير تهدني بشوية عليك انا معاك
حس بلي فاش حاوطها بيديه وكلامو خلاوها ترخى وتهدن شوية وسط داك الظلام مكانو كشوفو والو من غير داك القرب لي كانو كحسو بيه بعضياتهم
يزيد بنفس النبرة:قراي شوية القرآن فنفسك باش تزيدي تهدني وترتاحي
زينة كانت تتمسح عينيها وهي مزال شادة فيه جاوباتو بصوتها الرقيق:واخا
وفديك اللحظة رجع الضو شعل وتنورات الدنيا هزات فيه عويناتها بشوية لي بالدموع كانو بواحد اللون لي غزال ومغيشوفهمش عند أي واحد كانت مزال شادة وكارزة عليه من ذراعو على كتفها كانو قراب بزاف لدرجة كحس بجسدها لي كرجف بالخوف عرفها تتخاف من الظلام لدرجة الفوبيا غير من حالها بعدات عليه شوية وهي تتبلع ريقها وشافها كيف تزنݣات طلق منها حتى هو وهنا بعدات عليه كثر وهي منزلة راسها وحمرا غطرطق متسناتش بزاف حتى عطات برجليها للريح وهربات من حداه خلاتو غير كشوف فيها غبرات محسش براسو حتى تبسم على حالها وهو كمسح على شعرو الحشمة شي حاجه زويينة فالبنت بالنسبة ليه
حس على راسو بشوية وهو مزال على حالو كتفكر دماغو شرد ومزال عاقل على لي فات بلحظة بختها مزال عاقل بلي من تما دارها فبالو وبلي أول ما جدبو فيها بعد حشمتها هما عينيها فشكل من مور ما ولات معاه وتقربو لبعض كانت أكثر حاجة كتسالي معاه فيها وخصوصا إلا بكات قدامو مكانش كقدر يشوفها هكاك كفشلوه عينيها بالدموع وهاهما دازت السنين وتعاود نفس الموقف ولكن قلبو من جيهتها مكانش كيف الأول تبدل كلشي شحال هدا كان كشوف فيها الحشمة والبراءة الخالصة اما دابا كلها كذوب وتمثيل وغدر كلشي تبدل من جيهتها ولكن كبقى السؤال لي بقى مرون بالو علاش نهار خسرات الضوصي وبكات قدامو قال لها نزلي عينيك واش زعما يكون مزال عينيها مقدرش يكمل التفكير فهادشي حتى ناض بالجهد كارز على فكو بجواب كقنع فيه راسو بلي مستحيل لأن كلشي تبدل من جيهتها
وصل وقت الخروج وݣاع الموظفين خرجو كانت زينة ولبنى خارجين بزوجات ركبات معاها فالطوموبيل حيت لبنى غادية فطريقها تقضي شي غرض وقتارحات توصلها معاها وقفو مع عادل شوية قدام الشركة من بعد توادعو معاه هما مشاو ركبو فالطوموبيل هو بقى واقف كهضر فالتيليفون حتى خرج يزيد نفس شي وقف معاه كهضرو مجات فين ديماري لبنى حتى كانت زينة لمحاتو وبقات تتشوف فيه تفكرات قبيلة فاش نوضها وفلبيرو فاش قالها تسناي كانت حاسة بلي كان باغي يقول شي حاجة غير من الشوفة ديالو مكانش مخنزر فيها شنو زعما بغا يشكرها
تنهدات وضحكات فنفسها باستهزاء كيفاش بغاتو يقولها ديك شكرا بداكشي لي داز وهما من نهار طلاقاو وهو كعطيها فالقاصح مفيقها من سهوتها غير لبنى لي كانت كتهضر معاها خوات راسها وشدات الحتيت هي وياها
فنفس الوقت سامية كانت خارجة لمحاتو ركب وديمارا هنا وهي تنهد من قلبها كرزات على يديها بالجهد وهي تتفكر بلان ليوم كانت غتوقع كارثة بسبابها محملاتش راسها بانت قدامو ماشي قد المسؤولية وزيد لي حارقها كثر شكون دارت دور البطولة قدامو بلعات ريقها وهي معصبة غطرطق كتكرها كرهها لها كتزاد نهار على نهار فاش دخلات النهار الاول بسهولة فاش عرفاتها هي لي كانت معاه خسراتلها الضوصيي ولصق فيها واخا هكاك هاهي مزال معاهم وموقف ليوم لي زاد الطين بلة فوقما تتبغي تقرب ليزيد تتحس براسها رجعات باللور بزاف زادت لطوموبيلتها وهي حاقدة تتوعد لها بلي مغدوزش ساهل و حسابها معاها مغيكونش عسير غتبقى تطيرها وطير اي وحدة غتجي قدامها معاه
داز هاد النهار وجا نهار جديد ثاني بالضبط فالشركة
كانت واقفة قدام الفوطوكوبيوز تدير فوطوكوبي وكتهضر فنفس الوقت مع واحد الموظف تاهو شاد الفوطوكوبيوز لوخرا سالات وقصدات لبيرو خدامة على واحد الضوصي خاصها دابا تديه ليه فديك اللحظة بانت ليها سامية دايزة قاصدة لبيرو بلاما تجي عندها تسولها واش قالها ماشي مشكل لبغاه يدخل عندو كيف كديرو ݣاع الموظفين حيت بعد المرات كقول لها ما يدخل عندي حد هي لا مدخلة الامور الشخصية وبلي من العائلة فالخدمة وهادشي معندو تا علاقة بلبروفيسونيل هادشي لكانت تتقول فبالها وهي خدااامة
فنفس الوقت كانت سامية واقفة قدام لبيرو تتشجع راسها وكطلع النفس وتهبطها دقات بشوية ودخلات بعدما سمعات الإذن كان واقف يديه فجيابو كشوف من الزاج تلفت شاف شكون دخل ورجع ضار للزاج بلا حتى كلمة وقفات وراه هنا حطات يديها على كتفو ونطقات بصوت خافت:يزيد
يزيد تلفت عندها وغير من ملامح وجها لي كتبان حزينة سولها نيشان:مالك؟
سامية فهاد اللحظة نطقات بصوت شبه باكي كان خاصو غير يسولها وتبدا:داكشي لي وقع لبارح مقدرتش نساه الليل كامل منعستش وانا كنتفكر كن وقعات شي حاجة لكمال الله يحفظ مكنتش غادي نسامح راسي أنيسة تاقت فيا وأنا مكنتش قد المسؤولية معرفتش هاد الأيام مالي غير مرفوعة وعقلي ما معايااش هئ هئ ماشي لخاطري والله
تتهضر وعينيها مغرغرين غير كملات كلامها تفرݣعات بلبكى قدامو وهي شادة فيه وتتنطق بترجي:سمحليا بزاااف ايزييد
يزيد فهاد اللحظة تنهد كيفما كان الحال تتبقى بنت عمو شد فيها من وجها وهو كمسح دموعها بشوية وكهدنها بنبرة صوتو الرجولية بدون لغة الخدمة
يزيد:صافي شوو تهدني موقع والو خرجات طرييفة مكاين لاش الدموع دابا
سامية دموعها كطيحو وهي شادة فيديه لي على وجها:مقدرتش نسى ولا نصبر والله حاسة بالذنب من جيهة كمال ومن جيهتك حتى نت ايزيد كنعاود نقولها لك سمحليا بزاااف كنواعدك عمرها تعاود مبغيتش تكون مقلق مني مغنستحملش
مع ختمات كلامها حطات راسها على صدرو وهي تتنخصص خلاتو تنهد معرف ميدير من غير انه يحاوط يديه عليها وعنقها كواسيها
وحتى هي كرزات عليه وزادت تخشات فيه وفرحتها ماليها مثيل بحالا تتحلم مقادراش تفلت الفرصة فأنها تكون قريبة يزيد معنقها شي حاجة واو بالنسبة لها مكانش هاماها أنيسة لي هي مامات الولد قدما هاهمها هو ميتقلقش عليها وصورتها معاه هو بالذات فديك اللحظة تسمع الدقان بشوية ونيشان تفتح زينة غير شافتهم هكاك وقفات فبلاصتها جامدة اما هما تلفتو بزوج كانو مزال على حالهم معانقين يزيد فهاد اللحظة تي*را فيها بنفس نبرتو المعتادة وهو عاقد حجبانو
يزيد:قلت لك دخلي؟
زينة داك المنظر ديالهم بزوج معانقين وقراب البعض خلاها تصرفق فبلاصتها بسرعة البرق حسات بالغصة فحلقها وشي حاجة فقلبها من جيهة سامية بحال العافية مقدراتش تفسرها سامية فديك اللحظة عمدا رجعات عنقاتو غاطسة راسها فصدرو وكارزة عليه شي لخلا زينة تنزل راسها ومتقدرش تبقى تشوف بزااف نطقات بصوتها الرقيق:سمحولي
نساحبات بهدوء سادة لباب وراها مع غبرات ديك الساعة يزيد بشوية بعد عليه سامية لي تتمسح دموعها نطق بنبرة مغايرة على لي هضر بيها مع زينة:مديريش فبالك كي قلت لك موقع والو رخفي على راسك
سامية حركات راسها وهي مبتاسمة ليه فوجهو وعينيها كبريو بالدموع والفرحة فنفس الوقت حاسة براسها غطيير أنها حطات الراس عليه وواساها وفنفس الوقت شافتهم زينة بزوج بالنسبة لها انجاز ضربات عصفورين بحجر واحد
زادت وهي راشقة لها غطير بالفرحة خلاتو وراها رجع ضار كشوف من الزاج ويديه على ذقنو الشوفة لي دارت فيهم وهما بزوج فشكل بقى كحلل فيها وكخمم فنفس الوقت
فنفس الوقت فجيهة أخرى كانت قاصدة بوسط عادل تهز منو الكاصك ديالو بعدما صونا لبنى تنزلو ليه ومكانتش مسالية تاصلات بزينة تديه ليه هي داكشي لكان هزاتو وقصدات برا الشركة وهي تتسرع فخطاويها وعاقدة حجبانها تتحس بواحد الإحساس داخلها خايب المنظر ديالهم بزوج مبغاش يحيد من قدام عينيها معرفاتش كيفاش تفرس داك الاحساس من غير أنها محملاتش منظرهم معانقين وصافي خرجات كان عادل واقف كتسنى بالموطور غير شاف زينة لي مخرجاه ليه تبسم كثر:عذبتك معايا اختي سمحيليا
زينة رغم كلشي الابتسامة البشوشة مكتخطاش وجها:مكاين لا عذاب لا والو الله ياودي مدرت والو لبنى مكانتش مسالية وصونات ليا واش صافي خارج؟
عادل كان كركب الصاك:لا لا غنمشي غير للدار بالزربة نجيب لبيسي ديالي لاخر غنخدم بواحد لوجيسييل جديد معنديش فهاد لبيسي لي هنا على قبل الإشهار ديال الديفيلي
زينة:آه ايوا سير اخويا الله يسر لك رد بالك فالطريق
توادعات مع عادل يلاه ضارت غتزيد لمحها منصور لي كان نازل من الطوموبيل غير شافها سد دغيا وقصدها بالزربة حتى وقف وراها:سلام
زينة تلفتات غير شافتو رجعات رسمات ابتسامة بالسيف عليها:اهلا لباس
منصور عينيه عليها:الحمدلله وانت
زينة نزلات عينيها للارض مزال محافظة على ابتسامتها:الحمدلله ربي خليك
منصور:عرفتي شحال من مرة شفتك وعمرني سولتك على سميتك هههه
زينة:هههه سميتي زينة
منصور مدليها يديه:تشرفت بيك وانا منصور ههه نديرو بلي أول مرة نتعارفو سميتك زوينة بحالك
زينة نزلات راسها بخجل:الشرف ليا شكرا الله يكبر بيك ههه
سحبات يديها بشوية وكملات كلامها:نخليك دابا مزال تابعاني الخدمة راك عارف
مع كملات كلامها ضارت وبغات تزيد هنا وهو يرجع يوقفها:زينة تسناي
رجعات شافت فيه هنا كمل كلامو وهو كحك على ذقنو وكبين بلي متردد:احم معرفت منقوليك صراحة
زينة عقدات حجبانها شوية باستفسار متوقعة تاني يعرض عليها ولا شي حاجة من هاد القبيل بحال المرات لي قبل وهاد المرة بصح مراشقاش لها:ياك لباس غير قول
منصور بابتسامة:الصراحة شميت الريحة ديالك دابا زوينة بزااف وأنا هاد الايام كنت كنقلب على شي كادو نعطيه لواحد الشخص عزيز عندي ومغنلقاش حسن من هاد الريحة الا ممكن تعطيني سميتها
زينة بتاسمات كثر:اه bien sûr ههه سميتها virsace crystal noir ولكن ماشي الاصلية ديالها لي دايرة أنا
منصور فهاد اللحظة جبد تيليفونو:ماشي مشكل راه زوينة هانت الا ممكن تعطيني النمرة ديالك نسيفط لك ميساج وانت لا مشيتي للدار صوريها ليا
زينة عاد طلعات معاها ولكن مبغاتش تنوى وتسرع بلعات ريقها شوية وحركات راسها بآه مكتبغيش تفرق نمرتها ولكن إلا كانت فنيتو شي حاجة غتعرف كيفاش تصرف حركات راسها بآه وخدات من عندو الطيلي بلا حتى كلمة كانت تتقيد ليه النمرة وهو عينيه عليه كيفاش ثقيلة وهادية وعاد ريحتها لي طلعات معاه زادت على مابيه مدات ليه الطيلي ديالو خداه ونطق بشكر:شكرا بزاااف أنا متأكد الوليدة غتعجبها بزاف
زينة بٱبتسامة بشوشة:الله يخليها ليييك غيكون كادو زوين لها غتعجبها
منصور:مكاينش الشك فهادي
هنا دار ليها بيدو حركة الاحترام انها هي الاولى دوز داكشي لي كان سبقاتو وهو وراها كشوف فيها ويشبع عينيه ودخلو للشركة بزوج وهادشي كولو تحت عينين من الفوق كانو مراقبين الفيلم
غادية طالعة وتتفكر فهاد منصور إلا كان هادشي كامل دايرو غير على قبل النمرة غتوريه شغلو ولكن إلا كان نيتو صافية راه غتبان فاش غتسيفطلو الريحة لكان اصلا ممكن يدخل لغوغل ويقلب عليها ولكن كلشي باين واخا حشومية راه ماشي مكلخة زفرات هو فعلا مؤدب وعادي يبغي شي حد يتعرف عليها فالخدمة ولكن مكتبغيش لي يحكر عليها خصوصا دابا جاها وهي مقلقاها واحد الحاجة وصلات لكولوار ديالها كانت سامية دايزة من حداها طلاقاو عينيهم مع دازت من حدا زينة ضرباتها شوية بكتفها شي لخلا زينة توقف وتلفت وهي كطلع وتنزل فيها من اللور وتتحرك راسها بلا فعلا برهوشة بكل ما تحمل الكلمة من معنى وأصلا مفقوصة وهي تتحاول تلعب لها على الاعصاب بالبلان ديال قبيلة
زفرات وزادت وهي فعلا تتحس براسها معصبة مع دخلات صونى الطيلي ديال لبيرو جاوبات وأكيد عارفة شكون:آلو
يزيد بصوت جاف:نلقاك فلبيرو دابا
وقطع عليها خلاها تتزفر تاهو أي حاجة تتزيد عليها كثر ماهي مفقوصة خبطات السماعة وناضت هازة الملف قاصداه وعاقدة حجبانها شوية باينة ماشي على مودها وصلات قدام لبيرو دقات بشوية مع سمعات الإذن دخلات بخطوات تابثة قصدات لمكتب وحطات فوقو الملف:هاهو اموسيو الضوصي
يزيد كان عاطيها بالضهر وكشوف من الزاج مزال على حالو غير كملات كلامها ضار كامل طلع ونزل فيها بشوية يديه بزوج فجيابو تقدم بخطواتو جيهتها نزلات عينيها بشوية كتسنى شي أمر ولا يقولها سيري كان كشوف فيها كيف دايرة فيها الحشمانة وهي يلاه كانت تتعطي النمرة فالشارع بلعلالي كانو واقفين مقابلين مع بعض فارق بينهم غير البيرو نيشان وبدون مقدمات قرطسها بكلامو لي معندو حتى علاقة بالخدمة
يزيد:بديتي كتعري على نيابك بشوية بشوية تفراق النوامر فالشارع والركوب فالماطر عاين باين
زينة هزات فيه عينيها مفاهمة والو كان كهضر ونبرتو كلها استهزاء وزيد عاقد حجبانو مفهماتش أصلا شنو كقصد منطقاتش لأنه أصلا هو كمل على كلامو وهاد المرة هاز فيها صبعو بتحذير
يزيد:قلتها ليك ديك المرة وغنعاودها بغيتي التزنديق سيري قلبي على بلاصتو الرخى فينما مشى كتهز أما هنا شركة محترمة مكاينش بلاصة للوسخ علمتك هاد المرة المرة الجاية مغيعجبك حال جيتي غير لبارح وغطيري ياك لباس
بقات تتشوف فيه كتهز ويتحط عاد فهمات شكقصد وتصدمات فنفس الوقت حاجة لي أصلا معلبالهاش بيها السيد نسات اصلا بلي خدا النمرة وبنية صافية عطاتها ليه وعبد الكريم لي غير جارهم جا داها فالوقت لي هو نشرها هنا علاش كقلب اشنو مشى ليه اصلا هادشي معندو علاقة بالخدمة باش يحاسبها وديك الرخى لي قال واش كنعتها بالرخيصة مجا فين يهز الملف حتى دار ليها بحركة معندها علاقة لا بالأدب ولا ببروتوكول الخدمة كجري عليها عاين باين بنبرة غليظة:يلاه خدمتك
زينة ديك الرخى دغيا تتهز متسرطاتش ليها و اصلا مفقوصة نطقات نيشان تاهي ردا على جوابو:فنظرك لي كقلب على الوسخ ولي من سلعة الرخى كيفما تتقول غيصبر على هاد الدل وهاد التعامل لي معندو حتى علاقة بالخدمة؟
يزيد فهاد اللحظة هز فيها راسو بالزربة وكأنه كستوعب بلي راه جاوباتو منزلاتش عينيها وإنما بقات مركزة فيه ماشي تبدلات ورجعات المرأة الحديدية لأن ميمكنش تحيد لخوف بين نهار وليلة وإنما الفقصة لي جامعة من كلشي هي لي دواتها كيفاش هي تتجري وصابرة على الدل فالأخير ترجع رخيصة كانو كشوفو فبعضهم وعيونهم متزحزحاتش ستأنفات كلامها وهي مزال هازة فيه الراس
زينة:بفمك قلتيها عاين باين كن كانت شي حاجة فيها إن وعندها علاقة بالوسخ كن راني مخبية سادة عليا الباب ولي دخل نجري عليه
يزيد عرفها كدق عليه هو وسامية قبيلة كلامها لعب عليه قدما لعب عليه أنها تجاوبات معاه وعينيها فعينيه وزيد قلباتها عليه بلي هو براسو مول الشي لي خاص ضربو النفس على سمعة الشركة كان ساد عليه هو ووحدة نطق وهو كارز على سنانو ونبرتو تزادت غلظة:بزز منك تسمعي الهضرة وتحني الراس دوا العناد عندي وإلا جربتيه غتندمي وبزاااف غيفكرك أول حاجة راك معامن حيت بانليا نسيتي
زينة بلعات ريقها شوية النبرة باش دوا خوفاتها ولكن عرفات بلي لعبات عليه مدام بدات خاصها تكمل جمعات قوتها وفيساع عطاتو خو جوابو بهدوء
زينة:مديري فالشركة على الراس والعين وكل ما كخص الخدمة سمعا وطاعة وفوق هادشي كامل إن بعد الظن إثم الحمدلله عارفة راسي شكنسوا صبرت للدل ومزال نصبر حيت الحمدلله كنجيبها حلال سوا عندك ولا عند لي قبلك وعمر الرخيص مكرضى بالعبودية كبغي ديما الساهل وهادشي مكنطابقش عليا أنا اموسيو مكنتاهمو الناس بالحاجة غير لا كنا مولفين بيها وختاما حياتي الشخصية معند الحق تاشي حد يتدخل فيها كيفما كان ندير لي بغيت ونهضر مع من مابغيت
طلقات عليه كلامها ومجات فين ضور تمشي حتى تفيكسات فبلاصتها تتبلع ريقها وهي تتشوفو جاي جيهتها وعلى وجهو أعلى درجة من درجات الغل والحقد وأول مكبين هادشي هما عينيه لي عليها بحال كخرج منهم الشرار عرفات كلامها اللخر لعب عليه وبزااف خصوصا فاش شافتو جاي قاصدها نيشان بلاما تشعر رجعات خطوة للور تتبلع ريقها وقلبها كضرب خايفة منو ومن شنو يقدر يدير فيها فديك اللحظة
كان كقرب وعينيه عليها متزحزحوش تتشوف فيه وغير من ملامحو عرفات ردة فعلو غتكون ثقيلة كيف كلامها لي قالت مكتقدرش تهز فيه الراس ودابا كتعايرو عاين باين وعينيه فعينيها معرفاتش كيفاش قدرات دابا عاد طلع معاها شدارت ولكن هو لي هبش عليها هو لي طعنها فشرفها وتدخل فشي حاجة لي بعيدة عليه تسطحات فالحيط وتحاصرات هنا قلبها غينزل بين رجليها بانت فيها وصفارت ولكن تتجاهد باش تبقى تابثة وقف مقابل معاها عينيه عافية لها ونطق بنبرة هادية ولكن هدوء ما قبل العاصفة
يزيد:شنو قلتي ندير لي بغيت ونهضر مع من ما بغيت
زينة نزلات راسها مقدراتش تبقى تشوف فيه وهو قريب لها هكاك وزيد غير تقيسو غيطرطق تتبلع فريقها ومتوقعة اي ردة فعل حتى جاها الرد بنفس الهدوء ولكن داك الهدوء بحد ذاتو كان كعني بيه أقصى درجات التهديد
يزيد:جربي إلا ساخية عليك روحك
من مور كلامو هزات فيه عينيها بعدما عرفات شنو كعني كانت خايفة من ردة فعلو على المعيار لي عايراتو ولكن شد فحاجة اخرى النبرة باش هضرة وهددها من الفوق والشوفة لي دايرة دابا خوفووها خلاوها تعلن استسلامها رجعات نزلات راسها وهي عاضة على شفايفها مفقوصة وخايفة باغية تبكي وباغية تغوت فوجهو وتقولو صافي حبس
يزيد مزال على حالو:قيدي عندك هادي رخفت ليك شوية هاد ليام درتي الجناوح عبري لسانك ولا راك عارفة الحساب ومكاينش لي يفكك شفتي غا شوية من بزااف وباقي ليك مزااال
كلامو طيح لها الما فالركابي كان تهديد مباشر وزيد اشنو باقي مزال واش لي دوز عليها مكفاهش جاها نيشان بلي راه مزال طريقها معاه شوك وعافية فديك اللحظة وهما على حالها منزلة راسها بخضوع تتسمع على ودنيها وهو عينيه عليها كيف القرط/اس حاول يطفي العافية لي شعلات فيه بكلامها تسمع الدقان هنا قفزات أي واحد فهاد اللحظة غتبوسو وتعنقو لأنه بالنسبة لها المنقذ تحل لباب نيشان كانت سامية لي غير شافتهم وشافت قربهم تاهي كرمات بلاصتها بلعات ريقها بالفقصة وكرزات على يديه يزيد تلفت لها وغير شافت الشوفة لي دار فيها ونفسها لكان داير فزينة تزعزعات ونطقات بصوت رقيق عكس حالها المتسلط
سامية:سمحليا غير جيت ودخلت باغية نقولك شي حاجة ضروري
زينة فهاد اللحظة غتانمات الفرصة أنه ملفت عند سامية تسللات بشوية وتخطاتو وزادت خارجة منزلة راسها وتتطلب ميقولش لها تسناي ولا بقاي دازت من حدا سامية لي رمقاتها بنظرة حاقدة ولكن مبيناتش قدام يزيد دغيا رجعات حولات عينيها ليه مع غتخطوي أول خطوة وتدخل وهو يعطيها بالضهر مسح على ذقنو بشوية وهادي حركة كتبين أنه غير كابت العافية ومهدن راسو بزز قبل متخطوي لخطوة الثانية نطق بلاما يشوفيها بنبرة هادية ولكن بصيغة أمر مبينة أنه طالعة ليه القردة وغا طافي راسو بزز
يزيد:خرجي وسدي لباب ورااك
سامية تبلوكات بلاصتها من مور كلامو ومين شافت حالو عاطيها بالضهر عرفات بيه شي حاجة وهي عارفة حالو هو صح كالم ولكن إلا كان ماشي على مجاجو غا بعد منو سرطات القمعة وخرجات سادة وراها لباب وهي غطرطق علاش كانو قراب لبعضهم شنو وقع حتى تعصب يلاه كان مزيان شنو كان كقولو علاااش كانو قراب هكاك راسها غيطرطق والعافية شعلات فيها مشات كطير قاصدة زينة وصوت الطالون كاسر الدنيا بخطواتها السريعة حتى وقفات عليها زينة لكانت جالسة فلبيرو شادة فراسها سمعات الحس والطالون هزات راسها غير شافتها نطقات صباح الله فخاطرها كانو كشوفو فبعضهم سامية نظرات حقد وزينة بنظرات هادية محاقدة مهازة فقلبها سامية كسرات داك الصمت بعد ثواني على وقوفها
سامية:ساعتك سالات شحال هادي نت داكشي علاش غنقولك بعدي من حاجتي وسيري لعبي بعيد راك مغتقديش عليا
كانت تتهضر او بالضبط كتهدد بلا حشمة بلا حيا زينة كطلع وتنزل فيها على جهد عندها مسكينة وغطرطق وحالتها حالة وكحساب لها الناس حاسدينها وتابعينها وحد مداها فيها أصلا وهي أولهم
همها غير تخدم وتجيب باش تعيش هي وعائلتها اشمن بعدي من حاجتي ولا لعبي فالتيساع داكشي آخر همها وكيفاش تقنعها بلي ولد عمها هو لي كهبش فيما لا يعنيه سامية شافتها ساكتة ومجاوباتهاش زادت ضسرات وشنعات نطقات باستهزاء مصاحبة كلامها بابتسامة استفزاز
سامية:لبسي قدك يواتيك وكيف كتقولو بداك language ديالكم متعلقش فين تفلق جري على دوك زوج ريالات باش تاكلي وتلبسي وبعدي من لي فوق منك
لاحت عليها كلامها وزادت غتمشي يلاه غتلفت وهو يجيها الرد فيساع بنفس الهدوء ولكن بكلمات أعمق
زينة:انا بعدا كنجري على زوج ريالات وعارفة بلي مضمونين وغنشدهم فاللخر ديال الشهر كيت لي كجري على حاجة هي براسها مباغاهش مجات لا بفلوس ولا بفقر جات غير بالنفس والكرامة
سامية خرجات عينيها وضارت عندها تتشوف فيها كيف سرسباتهم لها زينة كانت مزال على حالها محافظة على هدوئها عكسها هي لي فهمات المعنى ونعتاتها بالمدلولة نيشان هانت عندك الفلوس ولكن معندكش كرامة عطاتها لها نيشان للقلب لي شعلات فيه العافية بالصدمة أن الكلام جا من زينة لي يلاه شافتها صفرة قدام لمدير مقدراتش تجاوبها متوقعاتش الرد يكون هكا بقات غير واقفة والعافية تتنهش فيها السكوتية طلع عندها مع ضريب المعاني فديك اللحظة صونى التيليفون ديال لمكتب زينة هزات السماعة ودارتها فوذنيها:آلو
يزيد بنبرتو المعتادة:قولي لmanager يجي عندي دابا
زينة:واخا(قبل ما تقطع شافت فسامية لي مزال كارمة فبلاصتها)مادموزيل سامية مزال هنا حسابلي مشيتي واش خاصك شي حاجة
مع كملات كلامها قطعات خلاتها زادت شرعات عينيها كثر بلا الهضرة لي حشات لها زادتها تخويرة مع يزيد بينات ليه بلي راه مكايناش فبوسطها تقابل خدمتها غير كضور زينة هنا وقفات راسمة ابتسامة صغيرة وهي جاية قاصداها مع قربات لها وقبل ما تفوتها بشوية نطقات وزادت على مابيها
زينة:باش نكون لباس عليا وبنت عائلة هماوية خاصني نكون عارفة بلي الحياة مافيهاش غير نجري ورا رجل كرامتي وقيمتي كأنثى أولى ليا من كلشي رتاحي تاحد متابعك ولا حاضيك بفمك قلتيها نجري على زوج ريالات وهادشي لكندير فيه دابا مزايدة عليه مناقصة
وزادت وخلاتها مشوكية آخر حاجة توقعها هي هادي لي كانت جاية تنݣدو لها وتعطيها القاصح صدقات عاطياها دروس فالحياة شعلات فيها العافية وزادت خلات شفايفها كرجفو وهي مفقوصة وبينات ليها بلي راه مساهلاش ومهمة انها طيرها من الشركة بدات تتوضاح بلي راه أصعب
يزيد:آلو
زينة:موسيو هاهو سي منصور معايا
يزيد: قولي ليه يدخل
مع كمل كلامو قطع عليها خلاها حطات السماعة وضارت عند منصور لي كان كشوف فيها مبسم:تفضل اسي منصور دخل عندو
منصور بابتسامة:واخا شكرا
زاد وخلاها جمعات الضحكة ومشات جلسات راسها زاند عليها لاش معيط ليه ياكما غيقولو عليها والسيد يتحساب ليه بلي غير تشكات منو وغيحطها معاه فشي موقف محرج ومن جيهة اخرى ديك البعرة دبنت عمو لي جالسة تقولها بعدي من حاجتي من شافتو كيف تتعامل معاها تحشم على عرضها هي لي كانت على شوية غتوقع كارثة للوليد صغير وخرجات منها كيف الشعرة من لعجين متأكدة مقالها والو غير مين شافتهم معانقين قبيلة وهي لي على أقل ما هي حاجه كتاخد السم ولي عصبها كثر حلال عليه وحرام عليها علاش يدخل فيها تركب فالموطور ولا تاخد النمرة شنو مشى ليه ياك الخدمة لي جامعاهم وزايدها كهددها بلي مزال مشافت والو حاسة براسها غطرطق من ݣاع الجوايه الضغط والتابعة على والو زفرات ورجعات لبيسي ديالها تتخدم وطالعة لها القردة للراس
فنفس الوقت فلبيرو عند يزيد كان جالس وقدامو منصور كهضر معاه على الديفيلي لي مابقى ليه والو
منصور:المهم لوطيل كلشي هو هدااك لاطيراس ديالنا مونيا حتى هي عجبها مع طويل وعريض غتجي فيه المنصة هي هاديك
يزيد شاد ستيلو كلعب بين يديه وهو كشوف فيه مابيهش الخدمة وانما بيه حاجة اخرى حتى يسالي ويت/يري فيه بيها بقاو كهضرو شحال على الديفيلي والتفاصيل وشكون المغنيين لي غيجيو شحال دلبوليس ولي كارد المهم كلشي
يزيد:صافي مزيان اي جديد علمني
منصور وقف:ان شاءالله اسي يزيد كن هاني
يلاه جا يضور ويمشي حتى كان يزيد وقفو بصوتو بنبرة رسمية هادئة ولكن كلامها عندو معنى آخر
يزيد:سي منصور حاليا كاين حاجة مهمة عندنا كاملين ولي هي الديفيلي أهم بزااف من لبنات وداكشي ديال التعارف خاطينا
منصور عقد حجبانو شوية مفاهم والو ورجع ضار عندو نطق باستفسار:ما فهمتش شنو قصدتي اسي يزيد
يزيد بشوية كتحرك بالكرسي والستيلو مزال فيديه كلعب بين صباعو كان نبرتو هادية ولكن كانت تحذير غير مباشر بطريقة رسمية و شيك:الرجال عيبنا واحد عادي سوا كانت نزوة ولا المعقول لعب فالتيساع باش ميوصلكش الصهد والدقة تكون خايبة من لقيل ولقال
منصور مفهمش كلامو ابدا ولكن طاحت فبالو شي حاجة وبغا يتأكد واش عليها هي نيت ولا:واش تشكات مني شي وحدة سي يزيد نت عارف انا سنين وانا هنا
يزيد قاطعو:متشكى حد ولكن شفت بعيني عتابرها نصيحة راجل لراجل ماشي من مدير وموظف عندو داكشي ديال نفس التيران ما مسلكش كي كتر الدواوي بزاف ومعندنا منديرو بيه هنا حيت الكونسيبطت ديالنا هو الخدمة ماشي فلان طايح مع فلانة ولبنات هنا قبل ما يكونو موظفات معانا راهم خواتاتنا فنفس الوقت فهمتي
منصور كان كسمع لكلامو ومعرفوش واش على زينة بالضبط لأنها آخر وحدة هضر معاها بنية التعارف وشد نمرتها قبل ما يحس بكلامو نصيحة حس بيها تحذير غير من الشوفة لي داير فيه وزيد من حقو السمعة ديال الشركة مهمة هو فهمها هكا واخا راه مكان ناوي حتى حاجة الا كان كهضر على زينة بالضبط سرط ريقو وتقبلها بكل بساطة لأنه اصلا فين يقدر يهضر قدام مول الشي حرك راسو بآه ونطق بابتسامة صغيرة
منصور:كون هاني اسي يزيد وكنعتاذر الا تسببت فشل مشكل وانا ما قاصد ولا فنيتي شي حاجة
يزيد حرك راسو بآه بابتسامة صفرة صغيرة مجا فين يعطيه بالضهر حتى كان رجع شوفتو المعتادة وزايدة من الحدة نغزة تحاسب معاهم بزوج وأكثرية هي مزال حسابو معاها منصور لي مع خرج من البيرو كخمم طلاقى بزينة تاهي خارجة من البيرو ديالها غير شافتو تبسمات ليه ونزلات عينيها وزادت بلاما تحكر فشنو ضار بينو وبين يزيد منصور هنا بتصرفها وابتسامتها خلاه يستبعدها بلي تكون تشكات منو هي منين ماشي هي شكون زفر وزاد و راسو مطنطن راجعة بعدما دارت فوطوكوبي تبسمات لوحدة من الموظفات لي تساطحات معاها فالطريق ولأي واحد تتجي عينيها فعينيه مع خرجات من لسانسور وقفات عليها مريم بحال الرعدة
مريم:زييينة نسولك
زينة قفزات وشافت فيها ونطقات فخاطرها وعليكم السلام:ياك لباس؟
مريم وهي كطلع وتنزل فيها:بصح داكشي لي سمعت خسرتي الضوصيي ديال الديفيلي وبلي تعاود واحد جديد
زينة أصلا طالعة لها وكان خاصها غير فيمن تخوي سمها طلعات حاجب ونطقات:او هانا خسرتو نت شنو مشى ليك وباش عرفتيني أنا وعلاش من دون الناس نت لجيتيني سولتيني مول الفز كقفز إذن نت لي دخلتي لبيرو ديالي وخويتي عليه الحليب نت ياك
كانت تتخرج فيها عينيها وهي تتهضر شي لخلا مريم ترجع اللور وهي مضعوقة تطاكي بيديها زينة غير كملات كلامها طلعات ونزلات فيها زفرات وزادت مخلياها مع فاتتها تزادو واحد الزوجات على مريم كل وحدة وقفات من جيهة متبعين زينة كانو مراقبين الوضع من قبيلة اصلا بتلاتة كانو باغين يعرفو معروفات برݣاݣات ومسمينهم فالشركة تلاتي هسبريس
مريم مزال ممتوعبة:بسم الله الرحمن الرحيم هادي مالها
وحدة منهم:يختي كان كحسابلنا غا سكوتية
مريم:شوية ومكانت غتاكلني
الثانية:علاش فاش كدخل عند سي يزيد كتسد لباب وراها شي إن تما
عادل جاهم من اللور:تلاتي المرح شي جدييد
هنا هما يتفرتكو دغيا كلا هربات لجيهة خلاوه وراهم كضحك ويحرك راسو بلا زعما لا حول ولا قوة إلا بالله التبركيك بلية وموصيبة
نهار جديد كان الويكاند وكانت فالدار كتسيق وسكينة حداها تتغسل الماعن حتى تلفتات عندها تتمسح يديها فالطابلية:زينة أنا كملت غنمشي نلبس حوايجي باش نمشي لسوايع
زينة محنية على الجفاف:سيري احبي هزي عشرة دراهم من بزطامي قسميها نت ويوسف
كملات شغلها ومشات طلات على باها ومها لي كنعسو يرتاحو من مور الغدا خرجات من عندهم وقصدات الصالة فين كانت سكينة تتجمع كتوبها ويوسف كلبس حوايجو جلسات فالسداري وهي تتشوف فيهم ونطقات:ردو لبال وركزو مزيان مبقى والو للفرض اللخر
يوسف دار شكارتو فكتفو:كوني هانية الخوادرية
قصدها باسها فخدها وهي كذلك عنقاتو باست سكينة وخرجو بزوج خلاوها تجبدات تاهي ترتاح ديما الويكاند كتكلف بكلشي وكتريح مها عكس الأيام العادية كتجي من الخدمة كتكلف غير بالعشى والتسياق شدات الطيلي شوية هضرات مع لبنى فواتساب وختها راضية لكانت عندها الخدمة شادة كوموند دالحلوى وكتوريها التصاور هنا وهي ترد البال عبد الكريم كان مسيفطت لها ميساج بعد نهار من مور مكانت عطاتو النمرة فاش جابها من الخدمة مكتهزش الطيلي بزاف داكشي باش مرضاتش ليه لبال لميساجو دخلات قرات شكاتب
عبد الكريم:أهلا زينة كدايرة لباس عليك المهم فوقما حتاجيتي نوصلك ولا اي حاجة راك عارفة متحشميش
زينة جاوباتو داك الساع:سلام عبد الكريم كداير لباس شكراا بزاااف الله يكبر بييك سمحليا داك النهار إلا كنت عذبتك
مع سيفطات ليه الميساج طفات الكونيكسيو ناضت لاحت عليها بينوار البيجامة وخرجات قاصدة أم الغيث لي دايرة معاها تمشي تجلس معاها شوية
ام الغيث:واش معندهمش الكاميرات مدام نت متأكدة بلي حطيتي الكاس مزيان يعني ميمكنش يطيح تقدر تكون شي إن تما
زينة عاد ضربات لها فبالها نسات بلان الكاميرات وعمرها فكرااات فيه أبدا حركات راسها بلا:لا يمكن مكاينينش
ام الغيث:عجب شركة بحال هاديك مكاينينش فيها الكاميرات المهم كملي
زينة:ايوا قالي حقا ما حقا جلسي تا تعاوديه عاد سيريي
ام الغيث:حمق هدا راه معندوش الحق الشركات كاين وقت رسمي كخرج فيه كلشي مكاينش زيد السوايع
زينة تنهدات وكملات لها التعاويد بالتفاصيل على الضو لي تقطع هو لي معرفاتو مين خرج بعدما كان كحساب ليها بلي راه مشى لدارو على الحالة لي دار على ود عبد الكريم والنمرة لي عطات لمنصور بنية صافية وهو اصلا كان ساد عليه هو وبنت عمو
كانت تتهضر وهي معصبة
زينة:تخايلي فاش قلت ليه ندير لي بغيت قالي غير جربي إلا ساخية عليك رووحك تهدييد نيشان وبلعلالي بقالو غير شوية ويحتي عليا بقجة مبقيت فاهمة والو واش الدور ديالو ينتاقد الخدمة ولا حياتي ولا آش زادتني ديك بنت عمو تاهي ولكن عطيتها زعما راه واحد الحالة منعاودش ليك كنحس براسي انا بوحدي لي مضغوطة تما اما كلشي فرحان كلشي عاطيها للضحك غير انا لي دار ليا التيليسكوب على اي حاجة درت والمشكل يمكن عيط حتى للسيد وقالو شي حاجة انا متأكدة وغتحساب ليه بلي انا تشكيت منو
ام الغيث لي كانت تتسمع كلامها بتأني فور ما سالات زينة كلامها تبسمات:كلشي باين وكلشي واضح ابنتي غير ريحي عقلك ومتجهديش على راسك
زينة دارت يديها على جبهتها:عيت اماماتي والله تا عيييت
ام الغيث:أنا ممعاوداش ليا المشكل كامل وشنو وقع
ولكن فهمت ردود افعالو راه كلشي واضح
زينة شافت فيها:مفهمتش كيفاش؟
ام الغيث هزات كتافها:غاااار بكل بساطة
زينة بالنسبة لها من سابع المستحيلات هادشي لي كتقول ام الغيث ضحكات باستهزاء ونطقات:آخر حاجة نتوقعها كن شفتيه شداير لي راه
ام الغيث قاطعاتها:نت بفمك قلتيها شد غير فديك ندير لي بغيت ومتسوقش لداك الكلام لاخر لي نت عايرتيه فيه تدخل فهادشي وهو معندوش علاقة بالخدمة لا النمرة ولا عبد الكريم ومن الفوق كي هدد فيك بطريقة مباشرة راه كلشي باين ازينة وزيد قلتي بلي نهار حبسك تا تكملي الملف ومين مشى الضو غا حتى لقيتيه معاك اذن ما مشاش راه كلشي باين ابنتي قلبو من جهيتك مزال كيفما هو السنين مبدلات والو لكن حر الشمتة هي لمخلياه هكا لأنه كيف تتقولي شخصيتو الحقيقية بعيدة كل البعد على هدا لي تتشوفيه غير نت من دون الناس
زينة تنهدات فعلا ماشي هو يزيد الحقيقي تتعرفو مزيان غير متصنع القساوة لي ماشي من شيمو رجعات شافت فيها ونطقات:وبنت عمو
ام الغيث:حلي معايا عقلك نت بوحدك لي شفتيهم قراب وداك النهار قلتي تشادو قدامك عكس الناس بفمك قلتي كلشي فالشركة عارفها بلي هي لي تابعاه وهو ممهتمش بيها اذن شنو
زينة بقات تتخمم وضربات لها فراسها شنو باغي يفقصها زعما تنهدات وهي تتفكر راسها زند عليها مستحيل هادشي بالنسبة لها لي تتقول أم الغيث واش من بعد خمس سنين ومن بعد لي دارت فيه غيكون باقي مزال عندو الجهد فأنه يغير عليها ويفقصها بوحدة أخرى
فبلاصة أخرى خارجة تتكسل وتتحك شعرها قنطانة مبانليها غير خوها تقصد تشد معاه الستون بالبلاي دقات ونطقات فيساع:لابس حوايجك ندخل؟
وليد كان لابس ليݣات ديال البوسك وكتريني فالخنشة لي معلقة نازلة من السقف:دخليي
روعة حلات لباب ودخلات:فييين
طلاحت فوق الناموسية وهي تتكسل شادة الطيلي هو من بعد ما كروشى الخنشة مزيان حيد الليݣات وتلفت عندها:اري داك تيشرت
روعة عينيها على التيليفون بلاما تشوف فيه رمات ليه تيشرت ديالو لبسو وجلس حداها شاد الطيلي تاهو شافت فيه ونطقات:خدم لينا لبلاي
يوسف:راهو حداك شعلييه
روعة تݣعدات:مديرش الكورة مكنفهمهاش دير San Andreas
وليد ناض ريݣل داكشي ورجع جلس حداها فالناموسية مد ليها المانيطة وبداو كلعبو
روعة:قت/ل قت/ل هداك غيغذرني معندك ميتكال هنا؟
وليد عينيه على التلفازة مركز فتشلاخ عباد الله:حلي المجر كاينة واحد شكلاطة وبرينجلز
داكشي لي كانت مع تلفتات لكوافوزة حلاتها شافت واحد الورقة تما هزات وهي تنطق مطلعاها عليه:منين جاتك هادي مشيتي للشركة ولا قلبتيها من البوكس لديزاين خخخ
كانت ورقة مرسومة فيها واحد الكسوة ملونة ومقادة بحال ديال شي مصمم وليد تلفت غير شافها وقف اللعب كانت نفسها الورقة لي طاحت لسكينة نهار طلاقاها هربات قبل ميرجعها لها ويفيق من الصدمة روعة يلاه اتهز فيه راسها وهي تركز عينيها فالسمية والتوقيع لي كان مكتوب فالقنت ديال الورقة(Soukaina ait elhaj)
عينيها خرجو وهزات راسها فيه هنا هو يتنهد مكخبي عليها والو وحتى هي كذلك حط المانيطة مسح على شعرو ونطق:طلاقيتها ديك النهار غير شافتني هربات وطاحت ليها من تما بقات عندي
روعة فهاد اللحظة لاحت الورقة ودارت يديها على شعرها رجعاتو اللور وبانت بحال تتفكر فشي حاجة نيشان شافت فخوها لكانو عينيه على الورقة ونطقات:انقوليك واحد الحاجة وحلف بالله ماما وبابا ميعرفوهاش اولييد
وليد شافيها:عمرك سمعتي شي حاجه برا تقالت بيني وبينك
روعة تنهدات ونيشان نزلات عليه بالخبار:زينة خدامة عند يزيد فالشركة وهي الكاتبة ديالو عاودات بانت بعدما روناتو وقربلات حياتنا
وليد الصدمة خلاتو يبقى غير ساكت تصدم فاش شاف ختها ودابا تجيه خبارها خدامة عند خوه من داكشي لي وقع كلهم ترونو لأنهم كاملين عندهم علاقة بيهم وهو كان عندو مع سكينة بزااف داكشي باش نهار طلاقاها تشوكى دغيا فاق من سهوتو ونطق:ميكونوش رجعو
روعة:منضنش وزيد موحال يزيد طفى قلبو من داك الوقت مسكين
وليد:كلنا تآذينا ولكن هو بزاااف الغذر صعيب ومعارفينش حتى السبب
روعة وهي سامية تتفكر لي فات:كيفما كان السبب تتبقى خبيثة آذاتو بزاااف
وليد حتى هو نفس الشي كتفكر خوه قبل:كان واكل عليها الشراوط شي حاجة فوق الحب داكشي باش جاتو الضربة صعييبة
روعة:بغيت غير نعرف شنو واقع وكيفاش حتى قدر يدخلها وكيفاش تتعامل معاها دابا
وليد:نهار تجي سامية نقلقلوها ونعرفو آش تما
روعة:لا مبغيناش نقولو لها بلي هاديك هي مولات المشكل
وليد:مكانتش هي فالعرس ياك كن غا قلتوها ليها تاهي باش تفيق شوية متسنى منو والو
روعة:اودي لي باغينو مبغانا ولي مباغينوش باغينا تاحد ملقاها كي بغاها
وليد شافيها:ياكما تانت واكلة الجوانط على شي حد ومصمكها عليك
روعة ميقات فيها ووقفات فاش سمعات فريدة تتعيط:لهلا يحييك ألف واحد يتمناني(شافت فلباب)انا جاااااية اماماااا(رجعات شافت فيه)ونت جمع وطوي عنداك تمشي تقولو شي حاجة
وليد:لا لا كوني هانيا خاطيني داكشي
زادت وخلاتو كشوف فالورقة مرمية وكتفكر لي فات حتى هو كانت عشيرتو سكينة الضحك والتقشاب والتنمر كانو كطيرو فيه داكشي باش تفاهمو كان كلشي غاذي زوين ساعة وقع لي وقع وخوتهم مكتابوش لبعضهم وتقطعات الأخبار
داز الوقت فبلاصة أخرى كان الظلام طاح وبالضبط حدا البحر جالسين فالطوموبيل بزووج
سعيدة:كنقولك خاصك تكسبيه وتكسبي عائلتو تباني لهم قد المسؤولية ومرا ديال الزمان لي يقدر يسخن بيها كتافو راه ماشي اي واحد مدير ديال شركة يعني لي غتكون معاه خاصها تكون مرا وقاادة يعول عليها فغيابو
سامية صباعها على الديريكسون غارسة فيه ظفارها وهادشي مبينها شحال معصبة:انا نهار غتمشي ديك الكاتبة دوالو غنعرف شغلي مزيااان نبالي بيها هي عاد ندوز ليه هو
سعيدة:حلي عقلك مزياااان كيفما هو مساهلش الحرب على ودو تاهي مساهلاش وصيتك وعاودت مدخليش معاها فشي مدابزة ولا شي حاجة باش متبانيش ليه برهوشة ومزال حاصلة فالليسي كوني نت مولات العقل خاص مين توقفو بزوج قدامو يحمد الله أنها هربات ويحل عينيه عليك نت
سامية تتفكر كلام زينة لي كطلع وينزل فيها وعاد المنظر وهما قراب زاد جعرها نطقات بحقد وهي كارزة على سنانها:غندمها غير بلاااااتي ميمكنش وحدة مكتسوا والو داخلة غير هكاك وماشي حتى من سهمنا تعاندني أنااا
سعيدة:نت غلطتي مين غفلتي على الولد كانت عندك فرصة مزيانة تبيني انك قدها قدام ختو حتى عائلتو الا كسبتيهم واحد بواحد هادشي غيعاونك وبزااف
سامية بعد تفكير شافت فمها ونطقات:طاتي وعمي متأكدة مغيكونوش عارفين بلي راه رجعات وخدامة عندو شنو باااانلك نمشي نعاود لهم كلشييييي
سعيدة خرجات فيها عينيها:لا ويااااااك لااااا عمرك تفكري ديريها يقدر يتجبد شي صداع وتكوني نت سبابو وهادشي غينفرو فيك ثانيا عمرك تمشي تعاودي شي حاجة تتخصو ولا تتخص الشركة على برا غتوصلو غتوصلو الرجل مكبغيش المرا البروالة من ضمن أنك تكسبيه خاصك الثقة ديالو خاص يديرك بئر أسرارو عمرها تكون ليك هادي المهم نت مو ضربيها على حسابي الأهم هو أنك تكسبيه وتكركبي لوخرا دقة وحدة إلا تسنيتي كل حاجة ديريها بوحدها ماشي بعيد يتفكر أيام زمان معاها واخا لي دارت يخليه ما يشوف فيه حتى الشوفة
سامية فكرة أنهم يرجعو بزوج خلات العافية تشعل فيها نطقات بغلظة:عمرها تكون ليهااا
سعيدة:دابا خاصك تفكري فشي حاجة لي تخليها تشفع لك قدام ديك الواقعة ديال ولد ختو وتخليه يعرف بلي غير غلطة وصافي راك قدها وقدود فنفس الوقت شي مونتيف لديك خيتي يحطها قدامو بلا وجه راك عجينة يدي منخافش عليك قادة عليها أنا باك مجيتش وخديتو بالساهل ولكن بقيت حتى ديتو حاربي على حاجتك
سامية شافت فمها لي كانت نسخة طبق الأصل منها تبسمات بتشجيعها وهي تتعطي آمال لراسها أنها قادة تكركبها وداكشي لي كان عقلها بدا خدام كفتش على حيلة أخرى
سعيدة:الطريق مسرحة ليك فين ديري ليها لي ما يدار خاصك غير تعرفي مدام الكاميرات كاينين غير فالدروج وبراا
سامية طرطقات صباعها وهي تتفكر:بدات معايا الحرب غندمها على النهار لي فكرات تحط داك السيڤي عندنا ولا ضور بساحتنا
سعيدة طاح فبالها بلان:الرجل حالو ساااهل تعرفي غير كيف تكسبيه يولي بحال الخاتم فصباعك ومسكة بين سنانك حلي وذنيييك وسمعيني مزيان لقيت ليك لي غتجيب لها الدقة
شافت فمها لي بدات تتعطيها واحد لبلان لي غير سمعاتو تبسمات بشر وتحمسااات جلسو كخططو كيفاش يطبقو كي القرعة وبنتها طلاقاو باش الأم ترد للبنت عقلها لا زايدة لها فيه ومزيداها للزوبية
نهار جديد الصقيل والهدوء سائد فالدار لي شافها يقولها راه خاوية بقوة الكالم كان متكي فوق الطابي ديال الرياضة عريان من لفوق وفكل يد هاز كتلة ديال الحديد الرياضي كتريني على الكتاف عروق يديه المفتولين بارزين بالثقل لي هاز وحتى بالرياضة لي باينة فجسمو كامل كمل وناض بشوية عرقان هز التيليفون تبسم شوية فاش شاف ماماه مسيفطة ليه تصويرة مدازش بزاف دالوقت حتى وقف هاز فوطة فيديه كمسح العرق وكطرطق عنقو يمين وشمال خرج من تما كانت ديك لبلاصة عندو فالدار خاصة غير بالرياضة كتريني غير فالدار ومكالمي مع راسو متفادي أي حاجة فيها قوة البشار قصد الدوش نيشان مع طلق الما لي بدا كنزل على لحمو وضهرو وهو يترخى بدا كماصي جبهتو بصباعو هاد اليومين حاس براسو ماشي تلهيه دماغو عامر وحتى فالمود ديالو مرون وهادشي كامل حيت ولا كتعصب بزاف وهادشي ماشي من عوايدو غير جبد حس العصاب فنفسو وهي طيح فبالو نيشان هي و ديك ندير لي بغيت ونهضر مع من بغيت متسرطوش ليه خصوصا قالتها وهي عينيها فعينيه قمة الحقدة بالنسبة ليه مهماتوش الهضرة لوخرا قالت وبلي عايراتو قدما حقداتو ديك الجملة كيفما حقد فاش شافها تتفرق فنمرتها وواحد جاي تتسناها قدام شركتو بالموطور
معندوش هو ديك لا حياتي الشخصية مدام هي السكرتيرة ديالو وداكشي وقع فالشركة ديالو وأي حاجة غيشوفها ولا غتوصلو غيبالي بيها ومزال يعطيها علاش تتقلب واخا لي زاد حقدو انه بين ليها انفعالو خلاها بدات تتنقز عليه بديك انا حرة ولكن غيبرد حر العافية فأنه يعطيها علاش تتقلب ويهبطها مزيان حيت بانت ليه بدات تتطلع وتشنع طرطق عنقو وهو كارز على فكو فنفس الوقت كفكر فهادشي مزال أيام الله طويلة بينو وبينها يبقى غير يعطيها على وذنيها سوا دارت ولا مدارتش سوا فالخدمة ولا بلا خدمة
داز الوقت وطاح الظلام كانت جاية هي ومسعودة مقديين شوية الخضرة وصلو الحومة لي كانت عامرة بالناس والبراهش خصوصا انها شعبية وقفو مع شي عيالات جاراتهم وجلسو على الهضرة
مسعودة:إيوا مبااارك ومسعووود الله يكمل بلخير اختي حليمة
حليمة:الله يبارك فيك عقبال لبنياتك ان شاءالله نفرحو بيهم
مسعودة:ربي خلييك اختي الله يتبث لها العرس ويكمل عليها بالخير والخمير ياربي
حليمة:اللهم امين وان شاء الله زينة غنجي عندك على قبل الحلوة راني معولة عليك ههه
زينة بٱبتسامة عريضة:الله ياودي امي حليمة سميرة بحال ختي متساليني غير تحميرة الوجه مرحباا بييك
حليمة:الله يكبر بيك ابنيتي والله يسهل عليك ديما كنقولها الزينااات معندهم زهر جالسين يضربو فتمااارة
مسعودة تنهدات:ايوا يختي هادي هي الدنيا
زينة جمعات الضحكة شوية:مكاتيب امي حليمة الله يطعمنا حلال وصافي
هنا نظامات ليهم أم الغيث لي كانت خارجة سلمات عليهم كاملين ووقفو مجموعين كباركو للجارة لي بنتها غتزوج وكل وحدة كتقولها نتكلف ليك بحاجة نهار العرس هدا حال الاحياء الشعبية وشي معاون شي فالأفراح والأقراح وسط هادشي زينة شافت باها فراس الدرب جايبو عبد الكريم مخرجو من القهوى عطات لمها الميكة ديال التقدية ومشات تتجري عندو شدات فيه
زينة:صافي اعبد الكريم غير سير لخدمتك اخويا شكرااا بزاااف الله يرحم الوالدين
عبد الكريم بابتسامة عريضة:مكاين حتى مشكل با التيباري بحال الولييد
هنا قرب وطبع قبلة على راس التيباري لي جلس كرضي عليه ويعاود زينة ختمات الكلام بلاما تجاوب بابتسامة وشدات فباها يلاه غيزيدو وهو يوقفها عبد الكريم بصوتو رجعات شافت فيه هنا وهو يمسح على ذقنو ونطق
عبد الكريم:الا بغيتي نبقى ديما نوصلك فالصباح راني كنحل بكري وحتى فالعشية نجيبك بلاما تبقاي تعذبي فالطوبيس
التيباري شاف فبنتو:اياه علاش لا منها نيت يكون بالنا هاني علييك(شاف فيه)الله يكثر خيرك اولدي
زينة متسوقاتش لكلام باها جاوبات عبد الكريم بكل ادب:لا اخويا عبد الكريم مكاين لاش تعذب وتخلي خدمتك الطرونسبور موجود وانا شي مرة إلا حتاجيتك غنعلمك بلاما تشطن راسك
عبد الكريم بقى محافظ على ابتسامتو:وفينما تحتاجيني انا كاين
زينة: ربي خلييك
جرات باها وزادو خلاوه وراهم كشوف فيها سرطها وهو كمسح على راسو كان باغي غير فرصة يكون قريب لها وفكر مزيان قبل مايجي يقولها لها كان باغي يهضر معاها فالواتساب ولكن نشراتو فيه حتى هو تنهد وهو كصبر راسو بالصبر وبلي الحاجة الصعيبة تتكون بحلاوتها حيت متتجيش بالساهل شحال وهو كجري وراها وهي تتشوف بحال خوها ولكن مواعد نفسو غيبقى حتى يبدلها ديك الشوفة من جيهتو
جلساتو فوق السداري وتحنات تتحيد ليه الصابو لي لابس وتتهضر:مكاين لاش الشنعة أبا الطرونسبور كاين وانا قادة براسي عبد الكريم بحال خويا وعارفين نيتو صافية ولكن مكاين لاش الشوهة على والو يشوفوني طالعة نازلة معاه فالموطور وهما خاصهم فين يعضو ويشربو كيسان آتاي
تيباري جر رجليه بشوية وهي تتحيد ليه الصابو:حشاك ابا حشاك وشغادي نقوليك نت تعرفي راك بعقلك وعارفة لي مسلكك
مسعودة جات جلسات تتنقي الربيع:اشغديري فالحلوى دعرس بنت حليمة ابنيتي انا كنت باغاك تقولي ليها خدمت
زينة:علاش امي خديمة جابها الله زايدة فيا وزيد عادي نخدم بنهار ونجي نقادها بالليل
مسعودة:ماشي بزااف عليك تسهري وتصبحي خدامة
زينة:اويلي امي تانت بحالا اول مرة دوزنا ما كثر
خرجات وخلات مسعودة تتنهد وتيباري اكثر يكوي ويعطي لقلبو على حال بنتو لي تسعين فلمية هو سبابها فعذابها
دازت هاد الليلة وجا نهار جديد بالضبط فالشركة
كانت جالسة فلبيرو ديالها خدامة ليوم الاجتماع اللخر قبل الديفيلي لي بقات ليه يومين كلشي كجري والخدمة تزادت كثر سمعات الدقان وهزات راسها غير شافتو تبسمات:أهلااا
ناضت عندو كان عادل لي جا عندها هاز فيديه واحد البواطة تصافحو وهو كسولها على حالها:كدااايرة شوية
زينة حركات راسها بآه وهي مربعة يديها وتكات على الحيط: شوية الحمدلله ونت
عادل بدا كحل فالبواطة:الحمدلله قولي لي كجاتك؟
حل لبواطة لي كانت فيها واحد السنسلة ديال الذهب بحجيرة صغيرة على شكل قلب شكلها انيق وراقي نطقات بابتسامة مبينة على إعجابها:زويييينة كتحمق
عادل:فنظرك غتعجبها
زينة:على حسابي نبصم ليك غادي بصحتها
عادل حط يدو على قلبو ونطق بطنز:راني واكل الجوانط والتبن عليها اختي
زينة ضحكات وضربات ليه فيدو وهما كضحكو دغيا ضاسرات معاه لأنه اصلا كدخل الخاطر وضحوكي
زينة:شي وحدة معانا فالشركة
عادل:وصراحة معانا ونهار المعقول غتعرفوها دابا مخبيها باش ميضربوهاش ليا بلعين
زينة:وصراحة هنا كاينين غير الحضايين
عادل:غير الحضية وسكتييي داكشي ديال لFBI
زينة:الله يستر وصافي التابعة على والو المهم السنسلة راه غزالة غتحمقها بمناسبة آش؟
عادل:عيد ميلاد ديالها غدا ان شاء الله آه حݣا معاش الإجتماع سي يزيد مقاليا والو
زينة:حتال مور لغدا ان شاءالله ما بقى والو
عادل:وياه لهلا يحشمنا وصافيي
فهاد اللحظة وهما واقفين نظامات ليهم لبنى لي كانت دايزة هازة شي وراق حتى وقفات عليهم:الخونة مجمعين بلا بيا
عادل رجع حل البواطة:كجاتك ديال المدام
لبنى:هاي هاي الزهواني تبت لغرس فنة سعداتها بيييك خخخ
فديك اللحظة دايزة سامية تتشتف كاسرة دنيا بالطالون طلاقاو عينيها مع زينة طلعات ونزلات فيها وزادت
لبنى:هادي مالها تتخنزر غطير
عادل كسد البواطة:معروفة المديليلة خلاوها البنات هداك هو حالها
زينة ضحكات على كلامو:عطيتها لبارح واحد زوج كلمات بردت قلبي
لبنى:عبرتي عليها عطيها العز من عندي أنا
عادل:هكاك نبغيك أي واحد دوا عطييه ولبغيتي لي يطاكي معاك البشري صوني وقطعي نحضر فيساع نفرجك فييه
زينة ضحكات كيفما ضحكو كاملين بقاو مجمعين شوية من بعد تفرقو كلا قصد خدمتو كانو ملهيين بالاجتماع لي غيكون ختامي قبل الديفيلي غيحضر فيه كل واحد كان عندو مهمة فيه
كانت جالسة فلبيرو ديالها بعدما سيفطات فلإمايل دعوة للناس المعنيين بالاجتماع هزات بزطامها بغات تنزل لbuvette تشري غير شي حاجة تشربها حسات بالشحفة مع خرجات طلاقات بالسيدة لي خدامة فيه وديجا تتعرفها جاية تتجري
زينة:خالتي مالكييي ياك لباس
السيدة كلها تتغزل:عفاك ابنتي قولي لسي يزيد حسنية بغات تشوفك ضروري
زينة شدات فيها:واخا غير تهدني شنو واقع ياك لباس
حسنية وهي كلها خايفة:ولدي ولدي ضرباتو طوموبيل قدام الاعدادية هئ هئ عيطو ليا غير الناس بغيت غا سي يزيد نقولها ليه باش نقدر نخرج
زينة تتواسيها:غير تهدني ان شاءالله ميكون واقع ليه والو سي يزيد دابا راه مكاينش غير سيري الا جا نقولها ليه
حسنية:آه نمشي منقدرش نتسناه مغيقولي والو انا عارفاااااه قولي ليه شكاين متنسايش
زينة هنا حلات بزطامها وجبدات منو 20درهم:هاكي أخالتي واخا باش تمشي غير فالطاكسي
حسنية مبغاتش تشدها:لا لا لا ابنيتي وتقولي لالا
زينة دارتها لها بزز فيديها هنا هزات عينيها وهو يبان ليها جاي دغيا نطقات: هاهو سي يزيد
هنا حسنية نطقات غير شافتو قصداتو وحتى هو كذلك وقف زينة نساحبات بهدوء ودخلات لبيرو ديالها ولكن كانت تتسمع شكقولو وكانو كبانو ليهاا بزوج واقفين
حسنية: عيطو لي غير الناس هزوه السبيطار وخاصني نمشي ضروري اسي يزيد عفاك
يزيد:سيري مكاين حتى مشكل الصحة هادي ممعاهاش اللعب ومتخافيش ان شاءالله متكونش عندو شي حاجة صعيبة
حسنية:الله يرحم ليك الوالدين
هنا يزيد ضرب يديه فجيبو جبد بزطامو خرج منو 500درهم ومدها ليها:هادي إلا كان خاصو شي دوا دابا والا حتاجيتي اي حاجة مرحبا راك عارفة
حسنية بخجل:لا لا اسي يزيد براكة غير خيرك لي مغرقنا فيييه
يزيد بزز عليها تشدهم صحة:مكاين حتى مشكل الله يجيب الشفى
حسنية خداتهم من عندو بخجل لأنه أصلا كدير معاهم فوق المزيان وفينما حتاجوه كلقاوه نطقات من قلبها:سير انا بغيت ليك النهار الخايب تكون غايب الله يسهل عليك ويرحم من ربااك
بغات تنزل تبوس لو على يديه هنا وهو يمنعها وجر يدو بالجهد وتحنى هو باسليها على راسها خلاها غادية وكدعي معاه فنفس الوقت عينين آخرين كانو حاضيين الموقف بقات متبعاه بعينيها حتى دخل لمكتب ديالو بلعات ريقها وكانت تتحس بالغصة واقفة فحلقها هذا هو يزيد لي كتعرف لي بغات النهار الأول يزيد لي المحنة عندو بحال شريب وفالشدة طلقاه راجل
هاد الموقف لي طرا دابا خلاها فرمشة عين دماغها يشرد ويرجع باللور سنين دازت سنين مكانش فيها هاد شد ليا نقطع ليك بل كان الحب بينهم
🤍فــلاش بـاك تــازة 2019🤍
غادية وتتمسح عينيها منزلة راسها باش حد ميرد لبال راه تتبكي تتشوف فجنابها باش عاوتاني تاحد ميشوفها غادية للفيرما لي محرمة عليهم ولمشى حتى عرف باها تتمشي عند دوك الناس لي اصلا مبينهم حتى مشكل غيدير لهم حالة مع وصلات دخلات كان العساس جالس لقات عليه التحية ودخلات هزات عويناتها بانليها واقف قدام لباب كهضر فالتيليفون نزلات راسها مع قربات قطع وشافيها مبتاسم بعدما هزات فيه راسها:لباس؟
زينة:حمدلله ونت؟
يزيد فهاد اللحظة لاحظ عينيها لي حمرين عقد حجبانو ونطق:مالك شكاين؟
زينة وهي شادة فواحد من ݣرونها نطقات بحزن وهي منزلة راسها:والو
يزيد زاد قرب لها كثر:دويت معاك مالك علاش تتبكي هضر معاك شي حد؟
زينة كان خاصها غير ليقول لها شحال فالساعة وتفرݣع دغيا بدات تتبكي وطيح فدوك الدموع نطقات بصوت باكي:با مبغاش يعطيني الفلوس داللوازم باش نتقيد ومبغى حتى يمشي معايا للمدرسة قالي ضبري راسك هئ هئ هئ أصلا هو ݣعما باغيني نقراا هئ هئ واخا كنجحو مكفرحش
كانت تتهضر بحال شي بنيتة صغيرة وتتبكي شي لخلاه دغيا يفك حواجبو المعقودين و يتبسم وشد فيها من وجها بيديه بزوج:صافي غير على هادشي كتبكي أنا كاين إلا مبغاش يمشي معاك هو نديك أنا
زينة خرجات عينيها بشوية:بصح؟
يزيد مسح ليها دموعها بصباعو بشوية ونطق وهو شاد فوجها بكل حنية:لي بغيتيه نديرو غير منشوفش دموعك ديما كنقولك متبكيش لي خصاتك اجي عندي أنا
زينة فهاد اللحظة شافت يمين وشمال وتأكدات بلي مكاين حد العساس مكشوفش فيهم وهي طلاح عليه عنقاتو كارزة عليه:شكرا بزااااف
هو كذلك عنقها ممسوقش لدارهم ولا يقدر يخرج اي واحد يشوفهم تتهمو غا هي فوقما جات باكية يمسح دموعها وفثواني يضحكها ديما كقولها منشوفش دموعك وفعلا تتجي عندو باكية وهو كيف البلسم كحبس دموعها
روعة من لداخل تتهضر مع ختها:انييييييسة طلييي جاني بحال صوت زييينة براا
زينة فهاد اللحظة غير سمعات روعة دغيا بعدات عليه مخرجة عينيها دارت يديها فمها وهي كضحك بلا حس ودخلات وخلاتو واقف متبعها وتاهو كضحك ويحرك راسو بلا
بشوية دوزات صبعها على عينها لي حسات بيها دمعات بعدما رجعات لواقعها توحشات أيام شحال هادي وجاها الحنين لداك الوقت التمييز فالتعامل دابا كقتلها زيادة على قساوتو واخا هكاك تتحس براسها محاقداش عليه لأنها عاذراه حيت ماشي هو هداك يزيد غير كبغي يبين بلي راه قبيح أما هو داخلو كاينة الرجولة والطيبة لي شافتهم معاها وهما لي خلاوها تبغيه حيت وقف معاها فالشدة
لقاتو وخدا قلبها غير بديك الظرافة وداك التعامل
زعما أم الغيث يقدر يكون عندها الحق يقدر يكون غاار وباقية شي حاجه منها فقلبو مقدراتش تبقى تفكر بزاف حسات بالبكية
الزوين تنهدات وناضت قاصدة لbuvette شرات منو عصير دالليمون وجات راجعة تترشف منو وهي تتزرب حيت ما بقى للإجتماع والحركة فالشركة كثيرة والحماس لديفيلي ولشنو كاين فالدفعة غادي وككبر مع اقتراب الموعد وصلات للطابق فين كاين المكتب ديالها مع ضارت مع الكولوار وزادت بانت سامية بشوية كطل عليها من واحد الحيط مخبية وراه
زينة مع دخلات لمكتب ديالها حطات الكاس وهزات السماعة ديال التيليفون لي كان كصوني:آلو
يزيد:علمي كلشي يسبقني لقاعة دالاجتماع
زينة:واخا اموسيو
قطع عليها هنا رجعات خرجات قاصدة كل واحد من الناس المعنيين تخبرو يمشي لقاعة دالاجتماع حيت دقائق قليلة ويبداو كانت جاية وتتشوف وراها وفجنابها تتبلع ريقها وقلبها كضرب تتحاول تزرب باش تنفد دغيا لي فبالها وترجع اللور وتفرج بعدما تخرج بحالها وصلات لبيرو ديال زينة شافت وراها مكاين حد هنا جبدات واحد لقريعة صغير من الكم ديالها حلاتها وخوات قطرات منها فالكأس من بعد سداتها دغيا وخرجات تتضور فعينيها وتتأكد واش مكاين حد تبسمات بشر وهي غادية وتتسنى بفارغ الصبر تشوف اللحظة لي غيعطي فيها مفعول خطتها
زينة وصلات قدام واحد البوسط دقات فالزاج ديالو هنا منصور هز راسو غير شافها تبسم شوية وخرج عندها:سلام
زينة بٱبتسامة:سلام سي منصور جيت نقولك بلي هدا وقت الاجتماع تفضل لتاحق بقاعة الاجتماع
منصور مزال محافظ على ابتسامتو غاهو تقل شوية مبقاش كيف الاول معاها غير معقد:واخا شكرا بزاااف
زينة مجات فين ضور تمشي حتى رجعات تلفتات ليه: فكرتيني لقيتي الرييحة
منصور حك حاجبو بشوية وهو كفكر بالزربة فشي كذبة:اه صراحة مزال الوليدة مسافرة بغيتها حتى تجي
زينة بٱبتسامة:اه مزيان ايوا الله يجيبها على خير
خلاتو وزادت بقى متبعها وهو كخمم مغتكونش عليها علاش دوا يزيد كن كانت تشكات منو مغتسولوش دابا وتهضر عادي هز كتافو وزاد
زينة رجعات لبيرو ديالها دغيا هزات واحد الملف مجات فين تخرج حتى لمحات الكاس دلعصير هزاتو وجغماتو جغمة وحدة وزادت مع خرجات طلاقات معاه تاهو خارج من لبيرو ديالو لمحها دغيا وضور خلاها وقفات حتى بعد عليها عاد تبعاتو بعدا ليوم شوية متحاكاتش معاه كانت تتخمم كيفاش اتعامل من مور داك التهديد المباشر لي دب فيها الرعب وخلاها مرعودة لبارح الليل كولو وهي تخمم دخلات لقاعة الاجتماعات لي كانت عامرة الطبلة فيها على طولها لبنى عادل منصور سامية مونيا وحدة من المصممين صحاب الماركتينغ المصورين الميكاب آرتست المهم كلشي قصداتو حطات ليه الملف قدامو كان مترأس الطبلة بدات كتاخد واحد شنو يشرب هنا وهو يوقفها
يزيد:غا جلسي مكاين غيطلع شي حد من لbuvette
حركات راسها بآه ومشات شدات واحد الكريسي وجلسات بعدا هضر معاها شوية زوين قدام الناس
لبنى ضارت عند عادل ونطقات بهمس:واش زينة لي كتسخر لbuvette?
عادل بنفس الهمس:ماشي اول مرة
لبنى مجاوباتوش وحولات عينيها لزينة بقات تتشوف فيها سمعات شي هضرة بلي مكتعاملش معاها مزيان وشي تنقنيقة بحال هكا شنو السبب زعما وهي ضريفة وحتى ضريف
زينة هنا هزات فيها راسها طلاقاو عينيهم وهما يبتاسمو لبعضهم شوية ضورات عينيها وجاو فعينين سامية لي كانت كطلع وتنزل فيها كانت جالسة على أحر من الجمر وهي تتشوف فيها وحاضية وجها واش شاحب ولا غير شي حاجة تعرف بيها واش شربات الكاس ولا لا وكطلب المفعول يعطي دابا وقدام الناس وقداموو
زينة فديك اللحظة حولات عينيها ليزيد لي كان خدام على الطابليط لكبيرة لي لاصقة فالحيط فنفس الوقت كهضر مع عادل فلحظة حسات بوذنيها سخان عليها بزاف وذاتها كذلك نزلات راسها تتنفس بالجهد وحطات يديها على صدرها
يزيد لكان كشوف فالتلفازة وكقاد داكشي قبل ميبداو ثواني قليلة وتلفت عندهم:إذن نبداو
مع جات عينو على زينة بغا يضور وجهو ولكن لي شاف خلاه فيكسى فيها عينيه وهو بحال ممتيقش عينيه الموظفين لي كانو كشوفو فيه مين شافو حالو هكاك كلهم ضارو تلفتو لفين كشوف هنا أول ردة فعل جات هي ديال سامية لي تبسمات بشر
يتبع
التعليقات 0