وإن سألوه عن الجمال أجابهم بــزيـــنــــة ... كان عاشقا لها وفجأة اصبح هو الــنّــمــرود❤️🔥
زينة لي كانت حاطة جبهتها على يديها لي فوق الطبلة تتبان بحال ناعسة سامية عضات على شفايفها بفرحة المخدر عطى مفعول ودابا غينعسها وسط الاجتماع وهدا هو الاستهتار وهادشي لي مكحملش يزيد ضورات وجها تشوف ردة فعلو لي زادت حمساتها وفرفرات قلبها كان كارز على فكو وغير من عينيه وحجبانو لي تعقدو تعرفو حاقد وغيتفرݣع ليك فوجهك كان كشوف فيها وكيفاش قمة اللا مبالاة لي هي دم سنانو كن مجاتو ولية كن مشى وراها شغلها نطق بنفس النبرة لي موالف كهضر معاها بيها قداام الناس
يزيد:راه بدينا واااقلة اشريفة
كانو الموظفين كلشي تتفرج ومراقبين الفيلم مفاهمين والو علاش دارت هكا نطق عادل بسميتها والسيد لكان حداها لي هو فالأصل المصور نغزها بصبعو بشوية فكتفها وخاطبها بكل ادب:ختي راه غنبداو الاجتماع
سامية بزز باش حابسة الضحكة وتتشوف فيزيد لي بزز مصبر راسو وهو كحك فلحيتو وفكو لي كارز مكرهاتش يقصدها يشدها من داك الشعر ولا اي حاجه المهم قدام الناس صافي شوهاتها وبينات بلي هضرتها على حق وماشي أي وحدة تستاهل هاد لبوسط
زينة فهاد اللحظة هزات راسها لكان ثقيل عليها بشوية دارت يديها على نيفها لكان كنزف بزاف لدرجة شفايفها تلطخو حتى عنقها كان نازل معاه الدم شي شهق وشي خرج عينيه وكانت منهم سامية كلشي ناض عندها وكان أول واحد يقصدها بلاما يحس هو داك لكان غير دابا شوية غياكلها على تصرفها شد فيها من يديها وراسها كلعب عينيها حمرين غيطرطق يزيد بشوية قاس عنقها كااان سخوون حتى من يديها فاش شد فيها كانت سخونة كلشي ضار بيها
لبنى وهي شادة فيها:متخافيش حناا معاك متخافيش احبيبة
عادل:باش كتحسي شي حد يعيط لومبيلونص ادراري
سامية كانت راجعة اللور وتتفرج وهي كلها تترجف وعينيها خارجين مكانتش متوقعة أبدا غيطرا هادشي هي بغات تنعسها اشوصلهم لشي دم
زينة كانت تتحس براسها وعينيها غيطرطقو داتها كلها سخونة ولكن تتحس بحال شلل خفيف طالع معاها من رجليها راسها ثقيل عليها وعينيها كتسدو نيفها كزدح عليها نطقات بصوت خافت وكلمات متقطعة وعينيها على يزيد لي كانت كارزة ليه على يديه:ما ما ماما متعر ف وا لو غتخا ف
وهنا فور ما نطقات كلماتها غمضات عينيها وغيبات ليه على صدرو ورخات من يديه لبنى بدات كطبطب لها على وجها وهي مخلوعة:زينة زينة فيقي اختييي فيقييي زينة
عادل فهاد اللحظة جاي كجري جايب كلينيكس باش يمسحو لها نيفها وعنقها حتى لقاها غيبات:لومبيلونص غادي تعطل خاصنا توصل لسبيطار دغيا
قبل ما يكمل كلامو كان يزيد زاد تكاها على صدرو كثر خشى يديه تحت رجليها وضهرها وهزها بين يديه كلشي فسح ليه المجال منصور دغيا حل ليه لباب وقبل ما يخرج شافيهم:الإجتماع تأجل
لاح عليهم كلامو وزاد حيت كان عارف راسو مغاديش يرجع خرج وهي بين يديه وهما تبعوه الا سامية لي ركابيها تحشو وجلسات فوق واحد الكرسي وهي تترجف تجمعو عليها زوج الخوف من هادشي لي دارت ومخرجش كيف بغات والتانية الفقصة كيفاش مشى عندها شد فيها وزيد هزها شدات راسها بين يديها وهي مقادراش توصف بشنو كتحس كان غادي وسط الشركة وهي بين يديه كيف الريشة كلشي وقف ولي كان فشي بيرو خرج كلشي كسول مالها مسكينة لكانو معاهم فالإجتماع تاهما نتاشرو وسط الشركة تطوعات لبنى هي لي تمشي معاهم دخلو من واحد لباب باش يخرجو نيشان للݣاراج وهو غادي كحس بذاتو سخونة يديها ورجليها مرخيين كلعبو فالهوى هنا عرف السيدة بلي غايبة ولي بيها غيكون صعيب غير من الدم لي نزفات
كان كزرب فخطاويه باش يوصل دغيا حلات لبنى لباب هنا مع دخلها بشوية لطوموبيل كان وجهو قريب لوجها حس بنفسها ضربات فيه وهي داخلة فداك السبات بقى كشوف فيها لولا لبنى لي طلعات من الجيهة لوخرا كان غيبقى مدة اطول وهو كتفحص ملامح وجها فداك القرب لي وقع بينهم فثواني سد لباب ودغيا ركب هو وديمارا كانت لبنى ضاماها عندها وتتمسح لها نيفها وعنقها من الدم غادي مكسيري وكل مرة عينيه عليها من المراية حتى وصلو
لبنى جلسات فالكرسي دلكولوار تتحك على يديها بعدما دخلو زينة شافت فيزيد لي كان واقف متكي على الحيط ويديه فجيابو
لبنى:يلاه كانت مزيانة مسكينة
يزيد دماغو لي كان خدام كخمم خلاه ݣعما يسمع لبنى ولا يجاوبها صورتها بين عينيه كيفاش هزات راسها فيه وهي كلها دم الشوفة دعينيها وهي تتقولو ماماها متسيقش لخبار هي فأوج المعاناة وهازة الهم لدارهم فاش كانت بين يديه حس بواحد الاحساس فشكل رعشة خفيفة سرات معاه كامل من راسو حتال رجليه ومينساش نبضات قلبو لي تسارعت فور ما هزها وراسها تحط على صدرو والأهم من هادشي كولو كيفاش كان حاقد وفرمشة عين برد وتبدل فاش شاف حالها وجرى عندها بلاما يحس شد فيها تنهد ودار يديه على ذقنو صورتها وهي تترجاه ميوصلش لخبار لدارهم مبغاتش تحيد من عينيه وهي فقمة الضعف ترسخات فبالو وصعيب باش أنه ينساها بقاو شحال كتسناو لبنى كلا مرة تيليفونها يصوني كان عادل لي كسول وكل مرة تقولو راه مزال مخرجوش
فديك اللحظة خرج الطبيب يزيد غير شافو قصدو ولبنى كذلك
يزيد:شنو عندها ادكتور شي حاجة صعيبة؟
الدكتور:لا لا المريضة عندها حساسية من مادة لي كاينة فالمهدئ لي واخدة
لبنى:واش يقدر مهدئ يخليك ترعف؟
الدكتور:آه إلا تخدا بعشوائية وبكمية لي تقدر تهيج الحساسية هادشي لکؤدي لنزيف على مستوى الأنف والسخانة وهدا لي وقع مع المريضة لأنها محتارماتش الكمية المسموح بيها لأصحاب الحساسية المهم أنا خديت عينة من الدم ديالها وسيفطتها لتحاليل باش نعرف نوع المهدئ بالضبط لي خدات باش متعاودش تستعملو حيت إلا تعاود هادشي ممكن المضاعفات يكونو كثار وتقدر توصل حتى للكومة او الموت لا قدر الله
يزيد:لاياش كصلاح هاد المهدئ
الدكتور:التحاليل غتبين لينا ولكن غالبا ايكون من النوع لي كتخاد على قبل باش ينقص التوثر والضغط لي كؤدي لنوبة عصبية أو على قبل قلة النوم وهدا هو لي شائع
لبنى:فوقاش تقدر تفييق
الدكتور:من هنا لواحد تلاتة السوايع ان شاءالله تفيق عادي مع شوية ديال الدوخة
يزيد:والتحاليل فوقاش غيخرجو
الدكتور:هاد النوع ديال التحاليل كتعطل شوية غدا الصباح ان شاءالله يكونو عندنا المهم الله يجيب الشفى
يزيد:دكتور بغيتك مزال واحد الدقيقة(شاف فلبنى)سيري دخلي عندها البنى
لبنى حركات راسها بآه ودغيا ضارت دخلات هنا يزيد زاد هو والطبيب كهضر معاه كثر على التحاليل
داز شوية الوقت ورجع قصد فين كاينة بشوية دفع لباب ودخل عينيه كانو عليها كيف ناعسة وحدها لبنى فيديها السيروم وكتنفس بهدوء شوية حوايجها كانو فيهم شي نقيطات ديال الدم بقى كشوف فيها وفنفس الوقت كتفكر صورتها قبيلة مبغاتش تحيد من بالو أبدا وموحال تحيد تفكر كيف كان شوية وغيشعل معاها فاش شافها ناعسة وهو مكانش عارفة حالها وآشبيها وزيد دابا مين عرف كتاخد المهدئ واخا معرفش واش باش تقدر تنعس ولا حيت كتعصب زعما يكون هادشي بسبب الخدمة حيت هو معتارف بلي شحال من حاجة كديرها لها بلعاني وكقلب لها غا على السبة ولكن واش دغيا وصلها لدرجة المهدئات ليوم مغوتش عليها بزاف شنو لخلاها تاخدو فوسط الخدمة وهي عارفاه يقدر ينعسها بزاف دالأسئلة كضورو فراسو باغي يعرف جوابهم ولكن مستحيل يسولها ولا يبين لها بلي هاز الهم من جيهتها عمرها تحلم بيها من جيهتو كان كفكر وعينيه عليها لدرجة انه مسمعش لبنى لي كتهضر معاه حتى وقفات
لبنى:موسيو يزييد
يزيد هنا ضار شافيها بمعنى نعام لبنى هنا ستأنفات كلامها:واش نقدرو نرجعو نهز غير صاكي وصاك زينة عاد نرجع نبقى معاها
يزيد رجع حول عينيه لها وحرك راسو بآه ضور وجهو بعيد عليها وزاد خارج مخليها وراه لا هي لا لبنى
فنفس الوقت فالشركة تترعد وهي تتشوف فداك الكاس هزاتو دغيا وخرجات من لبيرو ديال زينة ودغيا قصدات لبيرو ديالها كانت ديال البلاستيك دغيا كمشاتو ولواتو كولو بكلينيكس دارتو فميكة ودكاتو فصاكها مزيان وجلسات وهي تتحرك رجليها بتوتر الخوف والفقصة مجموعين عليها بغات غير فوقاش يجيو وتعرف شنو بيها وأصلا مشرارة ولكن فيها غير الفم مقادراش تخيل تمشي تموت ولا شي حاجة حيت عارفة البوليس الا مشى حتى هبش مزيان يطلعوها يطلعوها هي كانت باغية غير تنعسها قدامهم وقدامو هو باش يشوفها بلي ممسوقاش ويكونو عليها الشهود ويكركبوها ولكن هادشي مضرباتش ليه حساب تكمشات وجالسة ترعد كي الكلبة تخاف ما تحشم ولي زايد عليها الفقصة وهي تتفكر كيفاش مشى عندها وشد فيها وعاد هزها قدام الشركة كاملة وهو لي داها لطبيب وزادو انهم تعطلو اذن مزال معاها
فديك اللحظة دخلات عليها مريم: مادموزيل علام الله ديك خيتي مالها
سامية محساتش براسها حتى غوتات بالفقصة: خرجي عليااااااا مسوووووقييييش
مريم قفزات وهي تتشوف فيها خرجات بلا حتى كلمة خلاتها كلها تترعد بالفقصة وحالها يشفي العدو
فديك اللحظة وصلو للشركة لبنى قبل ما تنزل ضارت عند يزيد:موسيو صافي انا غادي نرجع فالطوموبيل ديالي
يزيد حرك راسو بآه يلاه بغات تنزل لبنى وهو يوقفها:شوفي الا فاقت قولي ليها بلاما تجي غدا الا حسات براسها مريضة
لبنى حركات راسها بآه ونزلات مع دخلات للشركة كلشي تجوق عليها واولهم عادل شرحات ليهم كلشي وطمناااتهم وبقى لي جا يسولها والاخبار داعت فالشركة وكلشي كهضر
فنفس الوقت كان ضور الطوموبيل وديمارا قاصد الكلينيك الطريق كلها وهو كخمم حالها مبغاتش تحيد لو من دماغو أبدا شدها عفطة وحدة بعدما وقف وخدا لها الدوا لي عطاه الطبيب تشربو هاد اليومين باش يصحصحها حيت قالو غتفيق دايخة ومصرفقة داكشي باش قال لبنى تقولها بلاما تجي للشركة وصل ودخل نيشان للغرفة فين كاينة كانت مزال على حالها وكيفما خلاوها حط ليها داك الدوا فوق الكوافوزة وهو كشوف فيها وفوجها كانت واحد الزغيبة طايحة على خدها بلاما يحس حيدها لها بصبعو بشوية ودارها لها ورا وذنيها وعينيه على حالها بعد المرات كشوفها فشي لحظات ديال الضعف كقول هادي متحرك الدجاجة على بيضها ممتيقش بلي هي لي طعناتو هي لي غذراتو بعدما دار عليها لي ميدار فالمقابل عفطات على قلبو وكرهاتو فالنسى وخلات ثقتو من جيهتهم نعادمااات كن جاتو قبل ما دير فعلتها كان يدير لي ميدار غير باش تحل عينيها ولكن دابا مستحيل تفيق وطلقاه حداها وداكشي لي كان من مور دقايق قليلة وهو واقف حاضيها ضار وزاد بحالو بكل برود مخليها وراه هكاك حتى تجي لبنى
داز الوقت وقرب يطيح الظلام بدات تتحل عينيها بشوية وهي تتشوف غير الضباب بقات شحال عاد وضاحت ليها الصورة تلفتات بشوية وهي تتسمع الهضرة كان لبنى وعادل جالسين فالفوطوي حداها وكهضر عادل غير شافها وحتى لبنى جاو عندها
عادل شد فيها:زينة ختي شوية باش كتحسي
لبنى:حبيبة خلعتينا عليك حمدالله على سلامتك
زينة بشوية بغات تݣعد ولكن راسها زاند عليها وثقيل بزز باش قدرات تنوض تجلس بعدما عاونها وهي معاقلة على والو تتحس غير بالدوخة نطقات بصوت خافت:شنو وقع معقلت على والو
لبنى مبغاتش تخلعها بلي رعفات وكدا:اه كنا فالإجتماع وسخفتي الحمدلله معندك والو
زينة غير سمعات طاحت فالإجتماع شداتها السخفة كثر فاش طاح فبالها هو اكيد غتكون حبساتو لهم دغيا بغات تنوض:يلاه زيدي خاصنا نرجعو
عادل:لا لا غا رتاحي صافي راه فات وقت الخدمة السبعة هادي
لبنى:غير رتاحي احبيبة اصلا الإجتماع تؤجل على قبلك
عادل:انا غنمشي نعيط لطبيب
زينة بلعات ريقها شوية:سي يزيد مقال والو
لبنى:شنو غيقول الصحة هادي مافيها لعب وزيد راه جبناك انا وياه وقاليا غدا ان شاءالله الا حسيتي براسك ماشي مزيان بلاما تجي
زينة دارت يديها على راسها كانت حاسة براسها دايخة:واش متأكدة
لبنى:اويلي ازينة تي راك واقلة سكرااانة هههه
فهاد اللحظة دخل الطبيب لي شاف زينة تبسم:على السلامة
زينة بابتسامة صغيرة:ربي خليك ادكتور شنو عندي
الطبيب هنا بشوية وسع لها عينيها بصباعو
وبدا كقيس لها السخانة والطونسيو من بعد شافيها ونطق:شنو هادشي درتي نت عارفة عندك الحساسية ومشيتي خديتي كمية كثر من الجهد المهدئات راه مفيهمش اللعب ابنتي
زينة عقدات حجبانها واستغربات:ولكن انا معمرني خديت شي مهدئ وحتى الحساسية معنديش خديت غير اسبرين صباح
الدكتور:متأكدة مكتاخدي والو عجب الاسبرين بوحدو ميدير لك والو من الا كانت شي حساسية ضددو حتى هو المهم هانت متشغليش بالك الحمدلله راك بيخير دابا غدا ان شاءالله غادي يخرجو التحاليل غنسيفطهم للسيد لي جا معاك وغنشرح ليه كلشي وراه خرجت لك واحد الدوا ضروري تاخديه هاد ليومين غيفيقك ويحيد لك الدوخة
لبنى هنا نتبهات لصاشي لي فوق الكوافوزة هزاتو ومداتو ليه:هو هدا ادكتور؟
الطبيب جبد الدوا وشافو:اياه هو هدا لوغدونونص عطيتها للسيد نيت غيكون هو لي جابو المهم ضروري تاخديه ابنتي ومتخافيش الحمدلله خرجات طريفة غير هو ردي البال
زينة:شكرا بزااف ادكتور
خرج الطبيب وخلاهم هنا تلفتات عند لبنى: واش سي يزيد هو لي قالو يسيفط ليه التحاليل
لبنى:اه راه قبيلة دخلت عندك وخليتو معاه غيكون بغاهم باش يدفعهم فلاميتيال حيت سخفتي فالخدمة تتعتابر بحال accident travail
زينة حركات راسها باه هو ويدخل عادل:مشيت سولت فريسيبسيو لقيت كلشي خالص بسمية الشركة
لبنى:حاجة باينة هادي غيكون موسيو يزيد نيت هو لي خلص حيت كنيتو راه هي سمية الشركة
هنا ضحكو بزوج الا زينة لي كانت ساهية وتتقول فبالها هادشي كولو وقع وهي مغيبة مجايبة خبار
عادل:ختي زينة ميكون عندك باااس وردي لبال لراسك
زينة لي كانت مزال دايخة خاشية دراعها فيد لبنى تبسمات وعينيها راكدين:شكرا بزاااف اخويا سمحوليا عدبتكم معايا
لبنى:اويلي مكاين لا عذاب لا والو اشدرنا اصلا
عادل:مكاين تا عذاب حنا راه خوت دابا
بقاو واقفين شوية قدام لكلينيك تفرقو عادل ركب فموطورو ودعهم وزاد وهما ركبو فالطوموبيل ديال لبنى وزادو وسط هادشي كامل كانت واحد الطوموبيل بعيدة شوية بأمتار فور مبانو ليه صافي راه مشاو وهي واقفة على رجليها بعدا واخا بانت ليه تتمشى بشوية ولكن مهم حلات عينيها ضور الطوموبيل وزاد بحالو تاهو كانت كتسنى غير هاد اللحظة يشوفهم خارجين وهي فايقة
زينة الطريق كلها وراسها زاند عليها دايخة وتتحس براسها مرخية بزاف تتفكر شنو هادشي طرا لها منهار جات لهاد الخدمة وهي غير حاجة من مور حاجة تنهدات وشافت فلبنى:ياك متقلقوش عليا
لبنى عينيها على الطريق:اويلي ازينة واش منيتك راه اي واحد بلاصتك كنا غنديرو نفس الشي الصحة اصاحبتي ممعاهاش اللعب
زينة:عرفتي راه معقلت على والو آخر حاجة شفتك نت شادة فيا وسي يزيد تاهو قلت ليه شي حاجة معقلت لا على اومبيلونص لا والو
لبنى:مقدرناش نتسناو لومبيلونص داك الساع هزك موسيو يزيد وطرنا بيك لكلينيك الحمدلله خرجات طريفة التحاليل ان شاءالله يبينو لك شنو خديتي
زينة غير سمعات سي يزيد هزك تاهي كملات على لي خصها من بعد بلان الدوا وبلي هو لي تكلف لها بالخلاص وزيد التحاليل لي أكد على الطبيب يسيفطوهم ليه هو فالشركة واخا معرفاتش علاش لانهم ماشي واقعة فالخدمة لي تقول خاص يدفعوهم لها لاكيص اصلا معارفاش شنو واكلة حتى طرا لها هكا واش عندهم ولا فالدار ولا آش تنهدات دارت يديها على خدها وهي تتخمم وعينيها على الطريق مزال عاقلة قبل ما تسد عينيها كيفاش كانت قريبة ليه وعينيها فعينيه الرماديين مزال عاقلة كيفاش تما جاي قاصدها فور ما شاف حالها وكيفاش شد فيها ودابا تتسمع لبنى تتقول هو لي هزك وجابك لطبيب فديك اللحظة قبل ما تسخف كانت تتشوف فعينيه يزيد لي كتعرف يزيد لي كان كخاف عليها مكانش كشوف فنظرتو ديال دابا وسط هادشي كامل قدرات تفرز مزيان بلي هداك كان يزيد لي بغات لكان كخاف عليها بحال الما لقليل واش كلام ام الغيث عندها فيه الحق يقدر يكون مزال باقي يزيد القديم من جيهتها غير كصطانع بلي كلشي تبدل تنهدات مفاقت من سهوتها غير فاش شافت لبنى بدات تتقرب لفين ساكنة:صافي اختي لبنى غير هنا بلاما دخلي راه الزحام لداخل صعيب باش تخرجي شكرااا بزااف
لبنى كتسلم عليها بلابيز:ماشي مشكل اصاحبتي حنا خووت الحمدلله على سلامتك
زينة حلات لباب:الله يسلمك اختي سمحيليا وبيناتنا واتساب
لبنى:أنا غير نوصل نعيط ليك ميكون عندك باس
نزلات زينة وودعاتها مع مشات لبنى قصدات تاهي الدار غادية وتتحس براسها مرخية باغية غير تحط راسها وتنعس مزال حتى الدوخة حاكماها دخلات مع الحومة منزلة راسها مابغات تهضر مع حد حتى وصلات للدار
سكينة حلات لها لباب:حوبي تعطلتيي
زينة باستها ودخلات:كدايرة لباس
مسعودة:الله يا بنيتي مالك تعطلتي
زينة باست راس مها:غير الطوبيس امي وقف فنص الطريق خسر ونزلنا نتسناو واحد آخر
مسعودة لاحظات بلي حال بنتها ماشي تلهيه غير من عينيها الراݣدين وكلامها لي ثقيل:مالكي ابنيتي
زينة وهي تتحيد المونطو:واحد الدوخة شداتني هلكاااتني
مسعودة:الله على ابنيتي بالسيف ونت كضربي فتمارة وحتى الماكلة مكتاكليش جلسي نحط ليك مريقة
زينة تتحيد سباطها بشوية وباين فيها مهلوكة:انا نعس غير واحد نص ساعة يفوتني راسي وداك الساع نوض ناكل با مزال مادخل
سكينة:مشيت نجيبو لقيتو جالس هو والحاج احمد قالي عبد الكريم غا خليه انا نجيبو
حركات راسها بآه وهنا مشات بدلات عليها وهي تتحس بكتافها طايحين عليها وذاتها كلها ثقيلة بحالا مخدرة مشات تكاات فالصالة وهي تتخمم واكيد فيه هو وهي تتنهد تشوشات على حالها بزاف بقات هكاك حتى داتها عينيها
سعيدة عينيها خرجو وهي تتسمع كلام بنتها نطقات بصوت خافت وباينة منفاعلة:ونت شحال درتي ليهاا ياك وصيتك وعاودت
سامية:خويت نص القرعة
سعيدة شرعات عينيها:اويلييي ياك قلت ليك غير تلاتة القطرات هادي راه متعاودش تحل عينيها ليوم اصلا داك الدوا ميخرجش لها الدم من غير لكانت مريضة بشي عجب
سامية وهي مرعودة:صافي اماما متزيديش عليا كن تشوفي حالتها كيف كانت
سعيدة هنا شدات فبنتها من كتافها بزوج ونطقات بحدة:سمعينيييي شفتك بحالا تردعتي هاهي وقعات لها شي حاجة توصل حتى لشلل مالها غتعز عليك اصلا حد مغيعرف مكاين لا كاميرات لا والو إذن عين مشافت قلب ما وجع هادشي فمصلاحتك متعرفي تكون هادي اللخرة ليها جمعي راسك وقصحي قلبك ديما لبغيتي توصلي لشنو بغيتي
فأي حاجة ماشي غير على ود اليزيد
سامية بقات تتشوف فمها وهي عاضة على شفايفها وتتبان بحال تتفكر حركات راسها وهي مقتانعة بكلام ماماها دير ما كثر ولكن غير مين شافتها رعفات تخلعااات وتضعقات
سعيدة:أنا متأكدة موحال تجي غدا مين القضية وصلات لسبيطار داكشي باش بغيتك تلبسي أحسن ما عندك ومتحيديش من قدامو ونت لي ديري خدمتها باش متبانش بلاصتها
سامية فور مطاح فبالها تمشي تسخر ليه وتجيبلو القهوة وتبقى داخلة خارجة طلعات معاها الفرحة من طرمتها وتبسمات عكس كيف كانت مخلوعة دابا تحت تشجيع سعيدة لي جالسة تزند لها فالفيخرات مزيان
نهار جديد فالشركة
جاية وتتعيوج صوت الطالون كاسر الدنيا بلاطو صغير فيديها فيه طاص ديال القهوة كحلة وقفات قدام لبيرو وهي تتنفخ صدرها ضارت جيهة بيرو زينة لي كان مسدود تبسمات طارت بالفرحة مين عرفاتها مجاتش دازت نص ساعة على الدخول دابا باينة مجاياش دقات بشوية مع سمعات الإذن بالدخول دخلات وهي مبسمة وزادت تبسمات كثر فاش شافتو هز راسو من لبيسي وطلاقاو عينيها تقدماتو بخطوات موجودة وحطاتليه القهوى قدامو ونطقات:صباح الخير
يزيد لي كان رجع عينيه لبيسي وهي واقفة قدامو بعد مدة دقايق شافيها طلعها ونزلها ولكن مطولش فيها كانت لابسة واحد الكسوة سخونة لاصقة عليها بزاف مبينة مفاتينها فواحد الطريقة ممعتابراش من لباس الخدمة وشي حاجة دالرسمية وعاد معرية من الكتاف وقصيرة فوق الركابي رجع شاف فلبيسي وهي هنا جمعات الإبتسامة شوية ولفات هاد الطبع فيه ولكن ماشي لدرجة أنه ميطولش فيها الشوفة هاد المرة وهي مين خرجات من الدار لي دازت من حداه يتبعها وهي ضاربة ديك الحطة فالأخير كبقى راجل كانت السباقة أنها تهضر
سامية:كيف بقات الكاتبة مسكينة كلشي كهضر عليها
يزيد هنا رجع شوية باللور وعينيه على وجها نيشان بلاما يحولهم لشي جيهة اخرى فيها:مزيان لواحد يكون قلبو صافي ويسول فخوه المسلم آخر مرة كنتو مقربلينها بزوجات
سامية فهماتو شقصد النهار لي جات تشكات ليه منها وعيطو لها ساعة عطاتها قدامو تبسمات ونطقات: انا هكا مكنحقدش كيفما كان تتبقى بنت بحالي بحالها
يزيد قلب الموضوع ديك اللحظة بشكل غريب مخاطبها بنبرة رسمية:من اليوم غيولي لبيرو ديال لتحت حدا ليبوسط ديال الماركتينغ داك البيرو غيتسد
سامية هنا جمعات الضحكة شوية وهي تتسمع كلامو وتتشوف فيه كيف راجع باللور وكضور بالكرسي شوية وستيلو بين يديه وعينيه عليها بلعات ريقها ونطقات باستفسار:علاش شنو واقع
يزيد هز كتافو:مكاين حتى سبب وزيد ماشي شي حاجة غتبدلي غير البلاصة ونزيدك تقدري ترجعي دابا للدار حتال يدخل لعام الجديد وداك الساع جي ان شاءالله
سامية مفاهمة والو وهي تتسمع هادشي:علاش ايزيد الخدمة راه مزال كاينة حتال من مور الديفيلي شنو السبب
يزيد:مكاين حتى سبب بنت عمي وبغيت نعطيها عطلة من عندي كاين شي مشكل حيت ضربات تمارة هاد العام مزيان خصوصا فهاد الشهر اللخر
سيري رتاحي
مع ختم كلامو تبسم لها ابتسامة شبه غبية معندها حتى محل من الإعراب ورجع خدام فالبيسي بحالا مكاين والو وبين لها بلي لا نقاش ورا كلامو وهي الغصة وقفات فحلقها لكن مبيناتش نطقات بصوت حاولات تكبح فيه الفقصة والبكية لي شدوها:واخاا
مجات فين ضور تمشي حتى عاود لاح عليها كلام آخر ولكن هاد المرة كان أكثر حزم:آخر مرة تجي بحال هاد اللباس كاينين رجال وعيالات هنا قد واليدينا
زاد على مابيها ولكن بزز منها سرطاتها وتبسمات:واخا سمحليا المهم انا غنمشي حتى نطلاقاو فالديفيلي
يزيد:حتى هو الا سعفتيني بلاما تجي ليه رتاحي مع راسك مزيااان
كان كهضر وكشوف فلبيسي وهادشي لي مرضها ووقف لها فالحلق انه كهضر معاها ببرود رغم ان البوسط ديالها مهم مقدرات تقول حتى كلمة لسانها تسرط بالفقصة خرجات تتعتر فجلايلها وكرامتها لي تشتتات
يزيد غير خرجات شاف فداك الكاس دلقهوة لي جابت حطو فالجنب هز الطيلي ديال البيرو كصوني لbuvette
يزيد:كحلة بلا سكر
سدات لباب ديال الطوموبيل وراها وهي مرفوعة عاضة فشفايفها مع شدات فالديريكسون دموعها بداو كنزلو الفقصة والغصة تجمعو عليها بزوج دقة وحدة كيفاش غتنزل لبوسط عادي وهي من عائلة مالين الشي كيفاش متجيش لديفيلي كيفاش تمشي تجلس حتى يدخل العام الجديد لي اصلا مبقى ليه والو وجاي الكونجي لكلشي ولكن هي سبقو لها ولكن لي قتلها وعصبها هو غيبقى الراس فالراس هو السكرتيرة فداك الطاج كيفاش اتبقى تشوفو كيفاش اتبقى تشوفها حتى هي واش دخلات عندو واخا داك الطاج فيه موظفين آخرين ولكن هي بالذات قريبة ليه محساتش براسها وهي تغوت بالفقصة وهي تتبكي خلات لي دايز فداك الصباح تلفت يشوفيها تترعد وتتبكي مرضاااتش من ݣاع الجوايه كدير لي دارت واخا هكاك تتحس براسها تتكب الما فالرملة
داز الوقت فبلاصة اخرى بالضبط فدار زينة خارجة من الكوزينة بعدما فطرات وجمعات ليوم ما فاقت حال 10:30 طاحت دودة من لبارح مكلات موالو ومزال حاسة براسها دايخة كانت تتجمع الصالة بعدما نصبات الغدا بانو ليها شي دفاتر ديال ختها محطوطين فوق السداري مشات طرفهم لها مع هزات اول واحد لكان كلاسور فيه لوراق حلاتو بنية عادية أنها تشوف ديال إينا مادة هنا وهي تصدم بقات تتشوف فداكشي قدامها ممتيقاش جلسات وهي تتشوف فداكشي كيفاش مرسوم بواحد الاتقان وملون بالوان جات مع كل تصميم مكانتش عارفة ختها بلي فنانة عمرها قالتها ليها سكينة فديك اللحظة كانت داخلة جايبة السخرة زينة هزات فيها راسها وعويناتها كبريو بالفرحة:عمرك قلتي ليا بلي كعجبك هادشي
سكينة جلسات حداها بشوية وهي منزلة راسها:مجابتهاش الفرصة وصافي
زينة تتشوف فدوك الرسومات:هادشي مخاصوش يبقى محبوس هنا خاصو يبان نت فنانة
سكينة عينيها فالأرض:داكشي باش قلت ليك اختي خليني نخدم فالصيف بغيت نجمع فلوس واحد المدرسة ديال الستيليست بغيت نتبع هادشي من مورا الباك
زينة شدات فيها من وجها:شدي غير لباك وبابا داك الساع يكون دار العملية وانا غادي نتكلف ليك بيها عمرك تفكري تخدمي وانا كاينة نت غتديها فقرايتك
سكينة هنا طلاحت على ختها وتعانقو المعنى الحقيقي ديال الأخت سند زينة فرحات بزاف وهي تتشوف ختها عندها حلم وطموح واهم شي موهبة غتعاونها حتى تشق طريقها
فجيهة اخرى بالضبط فالشركة تسمع الدقان عطى الإذن بالدخول كانت لبنت ديال الريسيبسيو عطاتو واحد الظرف وخرجات مع حلو عرفو التحاليل جاي من الكلينيك ديك اللحظة دوز نمرة الطبيب لي كانت فالتحليلة
يزيد:هاهما قدامي توصلت بيهم ادكتور
الطبيب:لبارح كان كحسابلي السيدة واخدة شي مهدئ ولكن من خلال التحاليل تبين بلي منوم لي دار هكاك السبب فالنزيف هو انها كانت واحد الاسبرين بسبب التفاعلات بينو وبين المهدئ ولد ليها اعراض شبيهة بأعراض الحساسية لي هي اصلا معندهاش
يزيد عاقد حجبانو شوية كقرا فالتحليلة وكشوف سمية المنوم:ما عندو حتى شي اضرار ياك؟
الطبيب:لا لا الحمدلله لأنها اول مرة تاخدو اما الا بقات كداوم عليه ممكن يتسبب فشلل مؤقت على مستوى اليدين ولا الرجلين وحتى النسيان
بقى شحال كهضر هو وياه وكشرح هو كسمع عليه مزيان من بعد قطع معاه داك الساع عيط لصحاب لاكيص عطاهم دوك التحاليل باش يدفعو لها دوك التحاليل ويرجعو لها فلوسهم واخا مخلصات والو تتبقى سخفات عندو فالشركة
كان كفكر فكلام الطبيب وفيها حتى هي عرفها مغاديش تجي حيت الطبيب شرح ليه بلي تاثير المنوم مكزولش دغيا بانت ليه لبنى قبيلة وكان باغي يسولها عليها لتكون هضرات معاها فالتيليفون ولكن سكت فآخر لحظة زفر ورجع لبيسي ديالو ككمل خدمتو
نهار جديد كانت جالسة شادة الطيلي لعامر ميساجات لبنى فرقات نمرتها لي جا سولها عليها تتعطينا لأنها اصلا دغيا دارت بلاصتها بينهم كانت تتجاوب واحد بواحد منهم حتى منصور وفنفس الوقت كدوي حتى مع لبنى
لبنى:ضروري تجي اصاحبتي منها نيت تلفي شوية وتنساي هاد المرضة لي مرضتي
زينة:والله ما عرفت صافي واخا
لبنى:ليوم فرقو علينا لي بادج باش ندخلو انا غنمشي ناخد ديالك ونخليه عندي وغدا ان شاءالله انا لي غندوز عندك ونمشيو بزوج
زينة حمساتها شوية مين عرفات بلي غتمشي معاها هي:صافي واخا ان شاءالله
بقات شحال تتهضر معاها وتتجاوب الناس لي كسولو فيها هادشي بلاما تقول لدارهم بلي راه مغيبة يومين على الخدمة قالت لهم عطاونا العطلة قبل عرض الازياء المهم كذبة دوزاتها عليهم بيها حطات الطيلي وجلسات تتخمم فغدا شنو غتلبس واكيد لي غيعاونها هي ام الغيث
داز هاد النهار عادي عند كلشي وجا نهار جديد لي هو نهار المنتظر ديال الديفيلي
كانت مسعودة وأم الغيث فالصالة كهضرو ومعاهم سكينة ووليد غير سمعو الحس تلفتو كاملين يوسف فديك اللحظة صفر وهو كحرك يديه بحركة ناري ناري
يوسف:ويلي ويلي ويلي بووومبااااا الخوادرية
سكينة ناضت عندها:جيتي فنة تبارك الله
ام الغيث:مشاء الله تبارك الرحمان قلت ليك لاڤيسط أحسن فهاد المناسبة
مسعودة تتشوف فبنتها مبسمة: تبارك الله انا لي والدة قراي شوية القرآن
زينة كانت مبسمة ليهم حتى هي عاجبها راسها كانت لابسة لبيسة رسمية بيضة ديال الثوب وسباط ديال الطالون طالقة شعرها وماكياج خفيف
ناضت ام الغيث تترش ليها ريحة ومسعودة تقرا عليها القرآن وهما كدعيو معاها ودعاتهم وخرجات كانت معاها ام الغيث توصلها حتى لعند لبنى لي كانت واقفة قريبة للحومة غادية وتتحس بالأعين عليها هي اصلا زوينة عاد خلي الرسمي جا معاها ولات تتبان مديرة نيت تبسمات فاش شافت لبنى واقفة بالطوموبيل سلمات عليها هي وأم الغيث لي بقات كدعي معاهم بالتوفيق والتسيير حتى مشاو
لبنى:جيتي فنة تبارك الله نت هي المدير ماشي سي يزيد
زينة ضحكات:عويناتك الحب تانت حبيت الكسوة
لبنى:اليوم نضبرو على راسنا كاين غير بوكو حبة خخخخ ليوم ݣاع بنات الشركة ليوم كيف ديما مسابقة شكون طيح موسيو يزيد لي عندها شي حطة غضربها واخا هو خاطيه هادشي عمرنا شفناه تبع شي وحدة
زينة فهاد اللحظة تقرصات منطقات بحتى كلمة لبنى كملات كلامها:سامية طلقايها ليوم كي الطعرييجة عرفتي خليتي بلاصتك اصاحبتي والله
زينة:رتاحيت بعدا هاد اليومين اختي
بقاو غاديين الطريق كاملة وهما كهضرو حتى وصلو سطاسيونات لبنى وزينة تتشوف غا الحديد الواعر محطوط وزادو دخلو بزوجات فالدخلة وقفهم الكارد وراوه البادج بلي راهم موظفات فالشركة المنظمة ودخلو كان اوطيل هاي كلاص غا ديال صحاب موروكو عمرها دازت حتى من حداه هادشي لي كانت تتقول فبالها زينة خرجو على لاطيراس لي كان كبير ومقاد خصيصا للديفيلي كانت الدنيا عامرة والناس ديجا حاضرين الموظفين لي معاهم شي مجمع شي واقف كصور عاد خلي صحاب الكواليس كجريو ويقادو قبل ما يبداو واولهم منصور ومونيا
لبنى:زينة تسنايني هنا نمشي غير نشوف مونيا دغيا ونجي
زينة:آه بيان سيغ سيري
تتشوف فلوطيل كيف داير شي حاجة لي فوق الكلاص والرقي والناس كيف دايرين شي حاجة لي واو داكشي ديال موروكو بالنسبة لها هي عمرها توصل لبحال هاد البلايص وطلاقى مع هاد الناس بكل صراحة كل واحد وعايش فالمستوى ديالو واخا كلنا فقراء قدام الخالق ولكن هاد الناس لي تتشوف قدامها راهم المعنى الحقيقي ديال البرجوازية والرفاهية تتشوف فعويناتها فكل بلاصة مرة مرة كجي عندها شي حد من الموظفين يسول فيها وهي على حالها هكاك غير واقفة وتتشوف لمحات عائلة الوزاني كلهم بأناقتهم كاينين
غتحاول ما أمكن انها تبقى بعيدة عليهم مريضة ومعالم بيها غير الله ومقادة على سم الكلام واخا واليديه الا شافوها وعرفو بلي خدامة عندو علام الله شنو غيوقع ولكن عيات من أنها تبقى تضخم الامور وتقتل راسها غير بلخلعة لان نفسيتها تقهرات جلسات فواحد الكرسي وهي تتشوف فالناس غير الفرنسية والانجليزية ضايرين ووسطهم شي كليمات بالعربية تتشوف حتى حوايجهم وكيفاش لابسين شي حاجة اللخر ديال لاكلاص بانو لها بزاف ديال المشاهير اولهم ليلى حديوي لي كانت واقفة مع أنيسة ولالة فريدة
شافت حتى نورة الصقلي تتهضر مع روعة وسامية
المهم بزااف بقات هكاك تتشوف بعينيها حتى بانليها فيكسات عينيها عليه وبقات تتشوف فيه وخدات راحتها لأنه مكانش راد ليها البال ولا عرف حتى أنها جات كان واقف وهاز راسو كيف ديما الكاريزما ديالو طاغية كيف العادة مرة مرة كدوز يديه على ذقنو وهو كهضر كان واقع مع شي نصارى هو وخوه وليد وأهم حاجة فيه هي أناقتو لباس بكل ما تحمل الكلمة من معنى وهادشي زايد وسامتو تنهدات وهي تتشوف فكل واحد من أفراد حتى من الاب ديالو بانليها مع شي ناس غير من هاد لevent لي دايرين وعلامن عارضين وفين دايرينو وهما قمة التواضع كيفاش كانو كعاملوها فالفيلاج مكانتش كتحس بالنقص وهي وسطهم عرفات بلي كانت غتكون من عائلة هماوية وشان وهمة غير مكتابش بقات هكاك تتشوف فيه مرة مرة شي حد من الموظفين لي خدامين على بداية الديفيلي كجي يقوليه شي حاجة فوذنيه حولات هنا بانت ليها سامية ثاني هازة كاس تترشف منو وتاهي بحالها كانو عينيها عليه فديك اللحظة مفيقها من سهوتها غير عادل لي جا سلم عليها وجلس حداها
عادل:مالكي جالسة بوحدك يلاه جيتو كبقيتي بعدا
زينة:الحمدلله شوية يسول فيك الخير آه يلاه وصلت انا ولبنى
عادل:نجيلك شي حاجة من ل buffet ?
زينة:لا لا شكرا ربي خليك الله يكبر بيك
هنا جات لبنى سلمات عليه وجلسو مجموعين
عادل:و دابا نتوما تتقلبو نرجع زهواني الزين غير تتشاير طلقتوه علينا دقة وحدة
لبنى:ايوا تعرف راسك معامن حنا شوية فلبلاد ولا
زينة بقات كضحك الكوميديا مع عادل ولي على قلبو على لسانو نظمو ليهم شي موظفين آخرين وبقاو مجمعين حتى وصل وقت الديفيلي كلشي ناض يشد بلاصة قدام المنصة عائلة الوزاني كلهم شدو الصف الأول وكذلك صحاب لvip كلشي تستف وشد بلاصة بقى غير يبداو زينة تحججات انها غتمشي لطواليط سبقوها هي وعادل وهي بقات برا تتشوف من الزاج بقات برا مبغاتش تدخل لان فاي لحظة غتلمحها فريدة والحاج تفاديا لأي مشكل ومقادة على هضرة وحشيان المعاني
أنيسة همسات لختها:مبانتش ليا زينة
روعة:سولت غير شي موظفات قالو مريضة مجاتش من شحال
أنيسة: حمدالله ماما وبابا مخاص يعرفو والو حنا مخلوعين وشوفي يزيد كيف مبرد
فديك اللحظة جات سامية وجلسات فبلاصتها انيسة تلفتات عندها ونطقات:فين كنت من قبيلة كنقلبو عليك
سامية:مشيت غير قاديت الماكياج
أنيسة حركات راسها بآه وضارت هنا سامية تبسمات شوية وهي تتفكر شنو غيوقع من هنا ثواني شافت فيزيد لي بينها وبينو انيسة وروعة ولالة فريدة غير غيجيو عندو يزفو ليه الخبر غطبق البلان لي غيرد لها الاعتبار معاه وغيبنها وااو قدام عائلتو والمعروضين والمعارف
سعيدة همسات لها:وافقات؟
سامية حركات راسها بآه بلاما تشوف فمها هنا سعيدة تبسمات: ايوا وجد راسك
فجيهة اخرى وبالضبط الكواليس كانو العارضات واجدات وكل وحدة بلبسة الميكاب ارتست كزيدو بهم اللمسات الاخيرة فالميكاب والشعر مونيا لي مكلفة بكل ما يخص الديفيلي من العارضات حتى الأوطيل خارجة من البلاصة فين كبدلو العارضات وعينيها خارجين قصدات نيشان المصور
مونيا:كيڤن وحدة من العارضات ناقصة
كيڤن لكان كوجد الكاميرة:كيفاش شكون هادي؟
مونيا راسها زند عليها شحال وهما خدامين ويتحشمو فآخر لحظة: هاديك خيتي لي جابو جديدة كلشي خرج مين دخلت لقيت اللبسة وهي مكايناش ناري موسيو يزيد غيحيح علينا
فديك اللحظة شافت منصور مشات قصداتو:منصور لقى ليا شي حل انا غنطرطق وحدة من العارضات ناقصة الديفيلي بقات ليه خمسة دقايق ويبدا غنتحشمو فآخر لحظة
منصور عينيه خرجو:شكون هاد خيتي لي مشات شوفي لي غتخرج اللولة مين تعاود تدخل لبسيها ليها
مونيا: راه هي اللولة غادي دوز وكل لبسة عندها الميكاب ديالها على حسب الالوان ناري قفرناااااهااااا
خرجات وهي كلها معصبة ومتوترة كانت تتشوف فيزيد طالع للمنصة كفتاتح وكعطي الكلمة بغات تندب حناكها اخيب حاجة تحشيمة الدقيقة 90 فديك اللحظة وهي على حالها لمحات زينة ومن الجيهة بانت ليها واحد الموظفة حتى هي زوينة بقات تتشوف فيهم بزوج كل مرة تتحول عينيها لوحدة وتتعبر فيهم بعينيها
كان واقف فوق المنصة قدام الكاميرات والاضواء وعيون الحاضرين وفخر واليديه الميكرو فيديه وكهضر بكل ثقة بصفتو مدير الشركة والوريث الأساسي ديالها
يزيد:كيف كل مرة تعودنا نتجمعو ونتشاركو الجديد هاد المرة ان شاءالله غتكون شي حاجة مختالفة كيفما عودوكم الوزاني من الاولويات ديالنا نرضيو الاذواق ديالكم وهادشي هو لي مخلي الاستمرارية ديال الشركة بالوفاء ديالكم والعطاء ديالنا الوزاني مزال مكملة حتال ليوم ومزال غتكمل بإذن الله مرحبا بيكم كاملين وكنعلن رسميا انطلاقة دفعة 2025
كان كهضر وعينيه على الوليدة ديالو لي فاهمة شوفتو مزيان تتصفق كيف صفق كلشي من مور ما سالا ومبتاسمة ومفتاخرة باه كذلك عرف لمن خلا الشركة عند الشخص المناسب خوتو فرحانين كذلك وسامية حتى هي لي كتناغز هي ومها تنهدات وهي مزال تتعطي لراسها الأمل من جيهتو واخا قالها متجيش لديفيلي عفطات على كرامتها فنفس الوقت بانوليها تعطلو مزال جاو قالو ليه راه وحدة من العارضات ناقصة باش تنفد خطتها
فديك اللحظة طفى الضو وبقاو غير اضواء خافتة فالقاعة مع أغنية شبه صاخبة وضوء واحد لي ناصع هو لي فيكساو من لبلاصة لي غادي يدخلو منها العارضات عم السكوت والانتظار والدخول تعطل لدقايق حتى ولا عشرين دقيقة يزيد عقد حجبانو شوية شهاد التعطيلة شواقع فالكواليس فريدة ضارت عندو زعما شنو كاين وحتى الحاضرين حسو بشي حاجة سامية تبسمات شوية هنا عرفات بلي خطتها نجحات جات تنوض تمشي عندهم برجليه للكواليس هنا فديك اللحظة دخلات أول عارضة الناس المدعوين بداو كصفقو وهما كشوفو جمالية اللبسة والتصميم لي مواتي العارضة لي كانت تتمشى بخطوات تابثة اما لي كعرفوها كانت عندهم ردة فعل مغايرة كلشي كشوف مصدووم وعلاش وكيفاش هو السؤال لي طرحوه كاملين فنفسهم دقة وحدة
الأضواء والانظار فݣاع الجوايه كلشي كشوف فيها لي كعرفها ولا لي مكعرفهاش لي كعرفوها مصدومين ومفاهمين والو ولي مكعرفوهاش كشوفو فاللبسة لي مقيسة عليها ولكن كلشي كان متافق على زينها الطاغي الضو ديال الكاميرات وكذلك ديال المنصة كان منعاكس على اللون ديال عينيها لي بان وبرز وزادها جمالية تتمشى بخطوات تابثة وكتحس بالأنظار كلها عليها رجليها كترعدو وواحد الخوف طالع معاها لا يصور لا من ناحية ان كاينين ناس كثار ولا من ناحية انها بانت قدام ناس لي غيتصدمو فاش يشوفوها مع كل خطوة كدير تتفكر هضرة مونيا بقاي تشوفي غير نيشان وتخايلي راك بوحدك ومضايرينش بيك الناس وداكشي لي دارت مع وصلات للخر ديال المنصة وقفات وهنا حيدات المونطو باش يبان لتحت شنو لابسة ودارتو على كتفها كانت صاية قصيرة فوق الركابي ديال الكوير فالقهوي مع طوب بيض بلا كمام وطالع على العنق والمونطو بنفس لون دالصاية مع ليبوط طالع شعرها اصلا كانت جاية بيه مصايب وميكاب خفيف ترابي دارت لمونطو على كتفها ويديها على خسرها وهي واقفة كضور نص ضورة يمين وشمال
الصف الأمامي كانو كلهم فحالة صدمة وعينيهم عليها وكتأكدو واش فعلا هي بقوة ما تشوكاو كذبو عينيهم أنيسة وروعة ووليد كشوفو فبعضياتهم واخا تاهما مصدومين وكانو متوقعين يشوفوها ولكن ماشي درجة طلع أمام الملأ ضارو شافو ففريدة وباهم كانو كثااار منهم فريدة راسها زند عليها وهي تتشوف فيها هي بشحمها ولحمها كيفاش لبارح طيابة وليوم عارضة وفين فشركة ولدها الأب ديالو الحاج ابراهيم واخا تاهو مصدوم تلفت عند ولدو بكل هدوء ونطق:شهادشي؟
يزيد لي كان بحالهم تاهو ولكن صدمتو مكانتش أكبر من انه بقى كشوف فيها ويعبر فيها كيف جات بانت فشكل جديد زاد برز جمالها الطاغي ستيل بعيد على الستيل لي كتلبس بينها بشخصية اخرى كشوف فيها وفوجها ويطلع وينزل فيها ناسي حقدو وناسي كلشي لانه فآخر المطاف كبقى رجل الا شاف الزين يتلف حاضيها مع كل حركة كدير وهي واقفة قدام الكاميرات والناس تتفرجو فيها وكشوف فيها هي واللبسة لي موالف كجي عرف بلي عارضة جديدة هادي وزوينة من لفوق تاهو بحال كشوف مراقب الزين لدرجة انه مسمعش باه شنو قال وبلي راه هضر معاه
فديك اللحظة صافي ضارت ورجعات بخطوات تابثة تحت انظار الكل جات بومبا نييت تتمشى بخطوات تابثة وتتفكر فهضرة مونيا دير بحال كاينة بوحدها وتبقى تشوف غير نيشان بالنسبة لها إنجاز لانها حشومية وطلعات قدام أمة دالناس والكاميرات وهادي من جيهة وزيد خرجات قدام ناس لي مغيعرفو باش تبلاو فاش يشوفوها مع قربات تغبر نقز عادل من وسط الحاضرين كصفق ويصفق:aller zina
لبنى تاهي تحمسات بدات تتصفق والموظفين تاهما كصفقو ويهضرو بيناتهم بلي جات زوينة وخرجات باحترافية الناس المعروضين بداو تصفقو عاد وصلاتهم بلي هاديك موظفة فالشركة وكدا المهم هضرة وصافي زينة مع خرجات وغبرات من قدام عينيهم دارت يديها على قلبها خرجات العارضة الثانية وهي واقفة فالكواليس قدام العارضات لي دايرين الصف باش يخرجو تاهما دايرة يديها على قلبها وتتنفس بالجهد عاد رجعات عليها الخلعة وهما جالسين عليها بلي عادي اول مرة وتاهما كانو هكا قبل وغتولف فديك اللحظة جات مونيا جراتها من وسطهم تتبوس فيها
مونيا:شكرااا شكرااااااا بزااااف نت الفنووون نت
زينة الخلعة لي شاداها مخلياها تتحرك راسها غير بآه وهي تتبسم بلاما تسولها كجاتها غاتتفكر دابا لي جاي والعاصفة لي غتجي من مور هاد الظهور
مونيا جربتها:آجي معايا للجلسة ديال التصوير
جراتها وهي ركابيها محشوشين عليها غير مݣيداها ومكتقول لا آه لا لا برا واحد الصف ديال الناس بقوة الصدمة لي راكباه ما بقى كسوق
كرز على فكو وكمش يديه على شكل قبضة عاد طلعات معاه من بعد ما سقى عينيه تاهو بلي خرجات قدام أمة دبنادم نصهم رجال بقات غادية جاية عليهم بالميني ناض قدام بنادم ووسط العرض وزاد قاصد جيهة الكواليس مخلي عائلتو متبعين ليه العين
فريدة:انا مبقيت فاهمة والو شواقع هنا
مع بغات تنوض وهي تشد فيها روعة ونطقات:ماما بلا شوهة خدامة عندو
انيسة:من بعد ونعاودو لكم كلشي غير خليو هادشي يدوز بخييير
فريدة يلاه غادي تنطق وهو يشد فيها راجلها زعما صافي من بعد وغنعرفو كلشي واخا حتى هو مفهم والو ولكن الناس دابا كاينين خاص يدوز هادشي بخير كلشي ليه حل فريدة جلسات وسكتات ولكن العافية شاعلة تحت منها وراسها كضور عليها كيفاش خدامة مين خرجات وكيفاش حتى دخلها اشباغي ولدها يصنع ياكما رجعات معاه هادشي لكان كضور فبالها
فنفس الوقت فالكرسي لي حداهم كانت جالسة مكوفرية بحال ضاربها الضو مزال عينيها خارجين بالصدمة لي دخلاتها دقايق هادي تتنفس بالجهد بالفقصة وهي ممتيقاش هي لي جرات عند العارضة الجديدة وكتبات لها شيك باش تغبر وتطوع تاخد هي بلاصتها بعدما يعلنو ليزيد ان العارضات مكاملينش باش فاللخر ميعلموهش اصلا وتطلع وحدة أخرى وحدة لي عيات تحفر لها ولكن عاد مكتزيد تبان وتضمن بلاصتها
كانت باغية تخرج قدام عائلتو والناس لابسة ومقادة تاهي بوحدة من لبيسات الكوليكسيو وزعما تنقذ السمعة قدام واليديه ولكن تحاجة من هادشي ما طرات تلفتات عند مها عينيها خارجين ومدمعين بالفقصة نطقات بصوت عالي كن ما الموسيقى الصاخبة كان كلشي غيضور عندها
سامية:علاااااش فينما نضووور كنلقاها علاااش
سعيدة لي كان تاهي فمها بيض بالفقصة مكانتش متوقعاها:طلع هادشي مساهلش
سامية:والله حتى نوض نمشي لها
سعيدة شدات فيها وهي تتحاول تبان عادية بلا شوهة لان الناس مقابلين معاهم من ݣاع الجوايه:جلسييي للأرض واش تتقلب على الشوهة تصدقي نت لي مقربلاها ليهم مزال كاين ميدااار خاص غير صبرك ليكون طويل شوفي واليديه كيف مصدومين إلا لعبنا جيهتهم غنضربو الضربة خليها على حسابي نت غا جلسي وسكتي
سامية كيفاش اتجلس وتسكت وهي العافية شاعلة فيها وهي تتفكر كيف طلعات وكيف جات كلشي بقى كشوف فيها فالوقت لي كان خاصها طلع فيه هي وزيد شافتو كيف غير خرجات ناض اكيد مشى لعندها دارت يديها على فمها تتفكر وتترعد فنفس الوقت بالفقصة مكرهاتش تشدها تغززها بغات تنوض بلا حشمة وتمشيهتقصد الباك سطيج لكن غير بانليها باها يلاه جا عاد وصل جلس حدا خوه فبلاصة يزيد كهضر هو وياه وهي تلبدها والفقصة والعافية شاعلة معاها من طرمتها
فجيهة أخرى كان غادي عاقد حجبانو بخطوات تابثين قاصد الكواليس الموظفين لي خدامين فيهم لشافو كخوي ليه الطريق من بعيد شافها فالجلسة ديال التصوير لي كانو دايرينها فواحد الجيهة مقادة مصايبة بالخلفيات وكلشي كانت هي وواحد العارضة يلاه خرجات كتصورو بزوج ومساعدة المصور كتوريهم كيفاش يديرو وواحد حداهم شاد ديك اللعيبة ديال الإنارة موجهها جيهتهم باش تعطي الضو مصفف الشعر كان واقف عليها كقاد لها شعرها بالزربة ومولات لميكاب داخلة خارجة عليهم المهم جقلة دعباد الله ضايرين بيها زاد عقد حجبانو وكرز على فكو قاصد باغي غير يوصل ليها عندها فديك اللحظة كانت العارضة لوخرا نساحبات وبقات غير هي تتصور وهما كوريوها كيف دير مع وقف كي العجاجة معرفوه مين خرج تيرا فالمصور بغلظة وبنبرة آمرة وتعابير وجهو ما كتبشرش بلخير
يزيد:حبس نت وحيد دوك التصاور
المصور ما عرف باش تبلا لا هو لا المساعدين لي معاه معمرو دوا معاهم هكا رجعو اللور مراقبين الوضع هو مع ت/يرا فيهم تلفت عندها هي لي غير تتشوف ولكن تتبلع ريقها ها الريح لي كسبق العاصفة جا
نطق بنفس النبرة وهو كارز على سنانو بصوت خافت كتحلف عليها نيشان:غتحيدي هاد الشرواط وغتمشي تعبري شبر وتجلسي فيه ولا مغيعجبك حال
لي شافو يقول غير كهضر معاها عادي ولكن هي بوحدها لي قاست النبض بشنو كعني كلامو غير من صوتو فديك اللحظة تلفت جيهتهم هو مزال على حالو:فين هي مونيااااااااا
داك الساع وصلوها لها بلي المدير باغيك جات تتجري وهي مبتاسمة:سي يزيد كلشي غادي مزيااان ياك
يزيد مزال عاقد حجبانو ولكن نبرة صوتو شوية خففات:شواقع علاش مخرجين هادي؟
زينة عضات على شفايفها سرطاتها كيف ديما وتتشوف فيه كيف كدوي عليها بحال شي حجرة علاه مالها معندها سميتها وزيد كان غيوقع مشكل كن ما تدخلاتش هي
مونيا:لقينا فآخر لحظة وحدة من العارضات ناقصين وطلبت السيدة تعوضها حيت بانت ليا مناسبة هاد العارضة لي خوات بينا أول مرة نتعاملو معاها معرفتش علاش مشات وحنا تفاهمنا معاها على الثمن لي بغات
يزيد كان كحاول يهدن راسو ماشي من طبيعتو وتربيتو يبقى يتهز على الموظفين فك تعابير وجهو ورجع عادي وحتى نبرة صوتو تبدلات:سيري قلبي على شي وحدة اخرى وكلمي ليا مايك
مونيا:صراحة اموسيو يزيد بانتلي هاد البنت مناسبة كن غير خليناها هي غيجيو معاها اللبيسات لاخرين
يزيد:مونيا ديري لي قلت عفاك
مونيا حركات راسها بآه وهي مبتاسمة شوية معندها مدير تسمع كلامو لأنه هو لكرجع ليه كلشي تلفت عند المصور لي كان مزال واقف وكشوف فيه طبطب ليه على كتفو وخاطبو بالفرنسية لانه فرنسي وبنبرة هادئة عكس الاول لا هو لا لي كانو معاه:كملو خدمتكم ديرو بحالا موقع والو
المصور حرك راسو بآه وهو مبسم لا هو لاخرين مكدويش عليه لانهم عارفين طبعو مزيان ساعة غضب وصافي وسط السطريس ديال أنه كلشي خاص يدوز مزيان رجع تلفت لزينة لي كانت مزال واقفة تتشوف فيه يلاه غيقر/طسها تغبر من قدامو وهي تقرب عندو هازة فيه راسها عينيها فعينيه ونطقات بكل هدوء ردا على كلامو لي قاليها فالاول
زينة:عارفة بلي مخاصنيش نلبس هاد الحوايج وبلي مخاصنيش نبان قدام هاد الناس حيت ماشي من النيڤو ديالكم ولكن على الأقل الديفيلي مشى مزيان وهادشي فمصلاحتنا كاملين سوا نتوما مالين الشي سوا حنا لي تحت منكم
لاحت عليه كلامها وزادت بهدوء خلاتو واقف على حالو فبلاصتو وكلامها كتردد فوذنيه ماشي على ود هاد الشي هو حقد وجا ليها بحال العجاجة هو عمرو شاف النيڤو ديال الناس وعمرو قلل من شي حد بمستواه تربى على أن الناس كلهم بحال بحال مكانش كقصد هادشي فاش قالها سيري حيديهم ولكن كلامو مع مونيا وديك علاش مدخلين هادي هي لخلاتها تفهم هكاك اما هو بيه حاجة مابيهش هادشي لي قالت ولكن آخر حاجة تحلم بيها هي يبرر لها مسح على ذقنو وتلفت عند المصور لكان كوريه تصاور العارضة لي دخلات من موراها
غادية قاصدة الكرسي ديالها حدا لبنى بعدما بدلات حوايجها قررات صافي تدخل ولي ليها ليها حيت صافي شافها كلشي الموظفين لي دازت من حداه يمدحها وهي مبسمة جلسات حدا لبنى لي باقي فيها الحماس من قبيلة شدات فيها وعينيها خارجين:جيتييي وااااعرة اصاااحبتي معمرك قلتيلي عندك مع المانكينا
عادل فديك اللحظة جا دخل كان كهضر فالطيلي جلس حداهم وضار لزينة غيشد فيها مزيان:كيفاش قضيتك نت فين كنت مخبية علينا هادشي
واحد الموظفة تاهي كانت حداهم:لا ازينة أنا معرفتكش هههه
بدات كضحك وعاودات ليهم لبلان بلي شي عارضة مشات وشافتها مونيا وجات كطلب فيها تدخل بلاصتها وهدا مكان
زينة: رجليا كانو كتردعو كنقول غنسخف دابا
عادل:لا لا داكشي زاز خليتي الحاضي حاضي ولي محاضيش حضى حتى هو
ضحكو كاملين هنا لبنى قراتها شوية:ايوا تسناي شي ترقية مغيخليوكش بلاش
زينة تبسمات بلا حتى كلمة وضارت تتفرج فالعارضات وتتشوف فالحوايج قالت فنفسها اشمن ترقية خدات جزاء بقمعة أن دوك الحوايج ماشي من مستواها تنهدات متنكرش من نهار جات واخا دوزها عليها ولكن هاد المرة حسات بيها زايدة نغزة وضراتها بزاف علاش مالها تاهي زوينة بحال دوك العارضات شنو الفرق بينها وبينهم حتى متستاهلش تلبس دوك الحوايج وزيد انها جات منو هو مبقاش فيها الحال فاش قالتها لها سامية ولكن حيت هو عمرو حسسها هكا فاش كانت معاه واخا هي لي كانت حاݣرة راسها مكانتش تتحس بلي راه أقل منو حيت متواضع لا هو لا عائلتو لأنها عاشراتهم وعارفة طينتو وطينتهم ولكن دابا كلشي تبدل كيفما تبدل حتى هو عتقات الخدمة ديال شهور لي كانت غتخسر فرمشة عين وغيتحشمو خاطرات براسها بعدما بانت قدام عائلتو وفالأخير خدات اهانة سمعاتها على ودنيها وسرطاتها بحال العافية على قلبها
داز الوقت والكوليكسيو كلها بحوايج النسى والرجال خرجات تعلن بلي الشراء تحل فالسيت وبلي القطع محدودة كلشي من المعروضين تكب لسيت كلا باغي يشري لراسو حيت بالنسبة لهم واو أنك تشري أغتيكل وهو مزال متحطش فالسوق المهم داكشي ديال البخ والفوحان دالناس الكلاص
زينة ولبنى كانو غير كشوفو فالأثمنة من السيت زينة عينيها خرجو اللبسة لي لبسات كاملة ساوية 15000درهم بالسيف ما يقمعها ويقولها حطيها كتشوف هي ولبنى الأثمنة وعينيها خارجين بالنسبة لها هي باهظين بزاف ولكن الحاضرين ومالين شي عادي الحاجة الرفيعة هداك ثمنها نهار على نهار كتزيد تأكد بلي خدمات عند الهمة والشان كيفما تتقول لها لبنى
عادل حتى هو شرا واحد المونطو مين شافتو ثمنو ضربات الطم وتكمشات جاو عينيها على سامية لي جالسة عاقداهم فبلاصتها اكيد ايطلاقا معاها ثانية اتلوح لها شي كلمة تعلن بلي الشوبينغ تسد وبلي ݣاع القطع لي جابو لديفيلي سالاو وكلشي تباع ولكن مشراش خاصو يتسنى حتى يشري من store فاش تنزل السلعة للسوق
داز الوقت وكان كلشي خارج لاطيراس هازة كاس ديال العصير كتهضر مع شي موظفات لي كانو كمدحوها ولي داز يوقف معاهم ويلوح لها شي كليمة زوينة وهي الابتسامة مفارقاتش وجها فواحد اللحظة مشات حطات الكاس ديالها لي خوا مجات فين تلفت حتى كانت فريدة واقفة عليها عينيها مفيكسين فيها وعاقدة حجبانها زينة هنا تنهدات ونزلات عينيها شوية فريدة متسناتش بزاف حتى كانت هازة فيها صبعها بتهديد
فريدة:غنقوليك زوج كلمة بعدي من ولدي يكفي لي درتي ولكنتي عاود بنتي تاني حيت ناوية على غذر بغيت ربي ميكملش عليك ومزال الدنيا ضور عليك وتعطيك خلاصك على فعلتك
فديك اللحظة وقفات سعيدة لي كانت كطلع وتنزل فزينة بشر شدات ففريدة ونطقات: زيد افريدة ختي للناس لي هما همة وشان معندك ما دير هنا رضينا بالهم والهم ما رضى بينا
لاحو عليها كلامهم وزادو فريدة عينيها عليها بالحال العافية لي غتحرقها مع فاتوها نزلات راسها وهي مافيها ما تبكي وهي تتسرط ثاني على قلبها كثر ما دايرة فيها الدنيا شنو غتزيد مزال دارت فيها ليام شرع يديها وولدهم تاهو ممخليش من حقو غير يرتاحو
مشات شدات كرسي بوحدها وجلسات تتخمم مكرهاتش تنوض غير مبغاتش اخوي بلبنى جاو بزوج يمشيو بزوج بانليها واقف كهضر فالتيليفون تفكرات شي حاجة هنا ناضت قصداتو غادية بشوية وقلبها كضرب تتقل المشية حتى يسالي الهضرة واخا قمعها قبيلة حاجتها بيه دابا وقفات وراه تتبلع ريقها شوية مع سالا الهضرة قطع وتلفت بانت ليه رمقها ببرود بلاما يهضر كتسناها هي تبدا حيت هي لي جاية عندو
زينة نزلات عينيها للارض:موسيو يزيد بغيت نسولك واش التحاليل ديالو سيفطهم الطبيب للشركة كيفما قاليا؟
يلاه غيجاوبها هنا وهي توقف عليهم ليلى حديوي عينيها على زينة ولكن قبل تلفتات ليزيد لي تبسم ليها وحتى كذلك تصافحو بليد ونطقات وابتسامة عريضة على وجها
ليلى:موسيو يزيد كيف ديما الوزاني ممخلين لينا منقولو داكشي كان vraiment magnifique
يزيد بابتسامة صغيرة وبكل كاريزما ورسمية:هادشي لي بغينا لهلا يحشمنا
ليلى هنا تلفتات عند زينة لي غير واقفة وتتشوف مدات ليها يدها:سلام صاڤا؟
زينة بابتسامة عريضة مدات لها يديها وصافحاتها: حمدالله ونت ça me fait plaisir نطلاقاك
ليلى:ههه ربي خليك شفتك قبيلة فالديفيلي ڤغيمو كنت مزيانة عمرني شفتك
زينة هنا ملقات متقول ليها شافت فيزيد لي عينيه عليها وحاضي الحوار وعاود شافت فيها:يلاه بادية
ليلى:مزيان لي طلاقيتك كاين مرجان القفطان فحفلة ديال fin d’année بغيتك تكوني معانا
ليلى فديك اللحظة وهي تتهضر وقفو عليها واحد زوج بنات من طريكة بابي مامي بغاو يتصورو معاها فديك اللحظة لي هي مشغولة معاهم يزيد بشوية قرب وضار براسو ملفت كشوف وراه قرب حتال عند ودنيها وهمس لها بكلمات عبرات بيهم مزيان الصيغة باش كان كهضر وكان صوتو أشبه بالفحيح نيشان عند ودنيها
يزيد:تقولي ليها آه تشوفي لي عمرك شفتيه
زينة ضارت شافت فيه وطلاقاو عينيهم كان كشوف فيها بنبرة باردة ولكن عينيه كقولو كلشي كقولو بلي كعني شنو كقول بعد عليها ورجع شوية اللور وهو مزال كشوف فيها وكتسنى ردة فعلها بلعات ريقها وهي عاضة على شفايفها مما كسر داك الصمت وداك الجو المكهرب غير ليلى لي رجعات عند زينة
ليلى:شنو قلتي ولا راك متحتاجيش تفكري بلاصتك كاينة وكنبصم لك عند مستقبل زوين فلfashion هاهي لكارط ڤيزيت ديالي غنتسناك تعيطي ليا
جبداتها من البوشيط ديالها ومداتها لها خداتها زينة وهي مبتاسمة من بعدما شكراتها
ليلى:يلاه نخليكم سي يزيد نطلاقاو فشي ساعة زوينة ان شاءالله
يزيد بابتسامة جانبية:ان شاءالله
مع زادت ليلى وخلاتهم بوحدهم تلفتات عندو وبلاما تحس ونطقات وهي مفقوصة:سي يزيد علاش هادشي قبيلة سرطتها ودابا علاش هكا واش غير حيت ماشي بحالكم
يزيد قاطعها نيشان:قلت ليك ديك النهار راك بديتي كتعري على نيابك عاجبك تبقاي غادة جاية والبشار حاضيك من القدام ومن اللور
خرجات عينيها من كلامو بي نطقو ببرود نزلات راسها وهي كلها موردة مقدراتش تعاود تهز فيه الراس كمل كلامو وهو ماد ليها يديه:آري ديك لاكارط
زينة رجعات شافت فيه وحناكها حمرين مرݣات مداتها ليه علاه تقدر تقول لا مع شدها من عندها وهو يتي/ري فيها ثاني بمعنى سالات الهضرة:يلاه سيري تكمشي
نزلات راسها وزادت تتشتف مفقوصة محليات متبعها من اللور وحاضيها فين غتوقف ومعامن حتى بانتليه مشات عند لبنى وشي بنات وسط هادشي كامل سامية كانت بعيدة عليهم وحاضية كلشي عينيها عليه كن كانو عافية كانو يحرقو زينة لي تتشوف كيف كانت قريبة ليه ومعرفاتش شنو عطاتو فيديه ولا هو شنو همس ليها خاصها دير شي حاجة خاصها تصرف لأن العافية شاعلة فيها لداخل ولكن تتحس براسها مربوطة نزلات على كاسها دقة وحدة وهي غطرطق
داز الوقت والناس بداو كمشيو كلشي كشهد ويمدح بلي كلشي كان زوين وكيف العادة الكوليكسيو غتكتاسح السوق بداو حتى الموظفين كمشيو بحالهم كانت خارجة هي ولبنى كهضرو مع هزات راسها جاو عينيها فعينين روعة بقاو كشوفو فبعضهم شحال وكأنهم تفكرو شي حاجة من الماضي من بعد روعة ضورات وجها خلات زينة تنهدات وضارت تاهي تتكمل كلامها مع لبنى وخارجين غادين بحالهم
داز الوقت وطاح الظلام بالضبط فدار الوزاني لي كانت مرونة وكلشي جالس على أعصابو ولي منوض الريݣاطة هي فريدة لي مبغاتش تسرط ليها وخصوصا مين عرفات ولادها عارفين ومخبين عليهم كانو مستفين قدامها جالسين وهي غادية جاية عليهم
فريدة:ساكتين وضاربين الطم علام الله علاياش ساكتين ثاني هضرو شواقع شنو جابها عندو للشركة
وليد:انا يلاه عرفت ولكن حنا عارفين ولدك مكديرش الحاجة غير هكاك
انيسة:ماما يزيد ماشي ولد صغير حنا عارفين لي داز صعيب علينا كاملين ولكن
فريدة منفاعلة:ولكن آش نبقاو نتفرجو حتى تمشي دير ليه شي موصيبة ثاني شفتكم كتهضرو ببرود واش نسيتو لي فات وشنو داز على خوكم
أنيسة:ماما يزيد راه كبير وبعقلو فنظركم هو مكلخ لهاد الدرجة حتى يعاود الخطأ زوج دالمرات
روعة:تاحنا بحالك اماما واخا كنا عارفين ولكن معارفينش السبب لي خلاه يخدمها
سعيدة لي كانت جالسة حاضية هاد النقاش باش دخل بخيط بيض جلسات تكوي وتبخ:لا وليداتي نتوما مالين العقل ومالين الشان والهمة هي ماشي من مقامكم ولا مقامو حتى تكون خدامة فالشركة
انيسة:خالتي سعيدة حنا كبرنا وبنينا حياتنا وكلا دار شنو بغا يزيد خوينا ليه الساحة حيت عارفين حكيم وقد المسؤولية وماشي شي حد لي متهور ولي جا فبالو يطبقو
سعيدة سرطاتها بزز وسكتات بعدما فكراتها بلي عمها منهار باع حقو ليزيد ومشى شد شركتهم دالعقار وخلا شوية الأسهم نسبة قليلة فسمية سامية مبقى عندهم دخل يخدم لي بغا ويدير لي بغى هما براسهم خوتو كلى بنى طريقو بعيد على عالم الموضة والشركة مخليين ليه كلشي حيت عارفينو قدها وحقهم من الارباح راه كوصلهم هادشي لي مخلي سعيدة باغية تلصق بنتها فيه صحة راجلها باع ولكن بنتها لولات مدام الوزاني المنتظرة فراه كلشي غيولي فيديها وهي مرات مول الشي
وليد:كيفما قاليك الوليد الوليدة متقولي ليه والو بلاما نكبروها هو غيهضر معاه وغنعرفو كلشي
فريدة جلسات وكأنها جالسة على الزمر مابيهاش زينة تمشي مشية بلا رجعة بيها ولدها لأن الكية لي تكوى فقلبو عمرها تنساها متقدرش تشوفو هكاك مرة أخرى واخا عارفة ولدها بعقلو ولكن قلب الأم هو هدا جلسات وهي تتنهد ضارو بيها ولادها وهو كصبروها بلي مغيوقع والو وكلشي غيعرفوه بالوقت واخا تاهما شاعلة فيهم العافية باش يعرفو وسعيدة عينيها عليهم كيف اللفعة مزال واحلة لها بلي بنتها مطلعاتش ليوم قدامهم وطلعات لوخرا عرفاتها مساهلاش والحرب معاها غطول داكشي باش لعبات على جانب فريدة بقات تتعمر فيها باش تقصد ولدها
فبلاصة أخرى فدار زينة كانت واقفة تتقطع الخضرة باش تنصب لعشى وفبالها لقطات من قبيلة تتفكر كيفاش جات عندها مونيا تطلب فيها أنها تجي تعوض العارضة بعدما شرحات لها البلان رفضات ورفضات ولكن والو مونيا لصقاتها لاحت كلشي وراها خوفها منهم حشمتها من طبعها مكتخالطش الناس بزاف وفكيفاش قدرات انه طلع قدام قوم ديال الناس والكاميرات وماشي أي ناس غير شكون وشكون تفكرات كيفاش قالها تحيد الحوايج ومن بعدها نيشان جملتو(عاجبك الحال تبقاي غادة جاية والبشار حاضيك من اللور ومن القدام)مكانش كعني داكشي لي فهمات فالأول انه استهزأ بيها ولكن واش كان كعني داكشي لي فهمات كلام ام الغيث صحيح؟
ولكن كيفاش غيكون غار وهو كوريها غير الحقد واش من بعد خمس سنين ديال الفراق يكون مزال هادشي بينهم مقادراش تقنع راسها حدها زفرات وخلاتها فيد الله هلكات راسها بالتخمام مبغاتش حتى تفكر فكلام فريدة لانها اصلا مقهورة وعيااات
نهار جديد بالضبط فالشركة
دقات بشوية ودخلات كانت جايبة ليه القهوى ديالو تعطل ليوم مجاش بكري حطاتها ليه ورجعات اللور
زينة: موسيو ليوم عندك موعد مع الوفد الصيني فريسطو made in china
يزيد هز قهوتو ورشف منها بشوية حرك راسو بآه وضار للبيسي بلا حتى كلمة شي لخلاها ضور وتمشي تخرج بهدوء ليوم كلشي كجي عندها يقولها كنت واعرة لبارح وكدا المهم المدح على الجهد خلى نفسيتها شوية ترتاح وتفرح مشات لبيروها تكمل خدمتها وهي تتسنى على أحر من الجمل الفيديو دلبارح يطلاح فلاباج دالشركة وتشوف التصاور كيف جااات
داز الوقت كانت تقريبا ديك 13:00 دالنهار
خدامة فلبيسي على واحد الملف ما بقى والو لبوز ديال الغدا وهي هكاك غا حتى وقف عليها هزات راسها فيه وهو ينطق بنبرتو المعتادة
يزيد:شكتسناي؟
زينة مفهمات والو وقفات ونطقات بصوتها الرقيق:مفهمتش اموسيو؟
يزيد بنفاذ صبر مسح على وجهو ورجع شافيها:شنو خدمتك نت هنا؟
زينة على نيتها:سكرتيرة
يزيد مشى خشى يديه فجيابو وتكى على الباب شاد معاها الستون:ديالمن؟
زينة نعتات فيه:ديالك احم زعما ديال المدير
يزيد:إذن خاصك تكوني فأي بلاصة كان فيها المدير
زينة نزلات عينيها للارض وهي تتفكر مع سرات معاها وهي تهز راسها فيه مين عرفها فهمات نطق قبل ما يمشي:طلقي راسك
زاد وخلاها واقفة فبلاصتها واش غتمشي معاه الراس فالراس بدات تلاقي فالسلوكة وهي مفاهمة والو مكانتش عارفة هاد لبلان وهي وسط أفكارها تفكرات إلا مشات تعطلات عليه شنو ممكن يدير دغيا قفزات هزات صاكها وتيليفونها ونزلات تتجري
تبعاتو شافتو يلاه خرج الطوموبيل لي كانت من صنف porche عطاتها ليا تاهي غتركب فالحديد الغالي هادشي لي قالت فبالها زادت بشوية وحلات الباب وركبات اللور يلاه سدات لباب شافيها من المراية وسيفط لها الهضرة بنبرتو الدائمة معاها
يزيد:الشيفور ديالك أنا؟
زينة بقات غير تتشوف فيها حتى رجع عينيه للطريق تنهدات ونزلات بشوية ومشات ركبات حداه زعما ميقدرش ولو غير مرة يهضر معاها بشوية ومزياان دارت السمطة وهنا ديمارا وهما ساكتين هاد المرة كانو قراب بزاف ديما ككون بيناتهم البيرو أولا شي مسافة أمتار أما دابا غيير
كانت الصمت هو السيد الموقف والطوموبيل غادية تتشق طريقها وسط شوارع الدار البيضاء الدنيا عامرة فداك الوقت ديال الظهيرة والناس تتجري تقضي شغالها
حاسة براسها فشكل وهي معاه الراس فالراس عينيها غير على الطريق وساكتة حاسة بالتوتر تزاد وهي معاه الراس فالراس ضربات عليه بنص عين بانليها صايݣ معلابالوش بيها داكشي لي خلاها ترخي فيها النفس هي ريحة عطرو لي منتاشرة فالطوموبيل تغلغلات مع نيفها خلاتها ترخى وهي تتفكر أيام زمان فاش كانت كطلع معاه فالطوموبيل تخبية كانت كدير الف سبة وتبات تخطط باش تخرج معاه واخا كانو كمشيو غير للسوق حيت قريب باش ميعيقوش دارهم بغيابها المهم كانت الحلاوة فديك البساطة ودير الزيف والنظاظر كحلين باش ميعرفها حد ويشوفها وزيد نهار مشى قيدها فالمدرسة شحال فرحات وعوتاني مزال تعقل كان عيد ميلادها وجابليها الحلوى تما فالطوموبيل كانو أوقات زوينين ولكن مشاو بقاو غير الذكريات هاهما تجمعو ثاني وبزوج بيهم ثاني فالطوموبيل ولكن ممشاركين حتى كلمة بعدما كانو عايشين الحب والحياة بطولها وعرضها
وقفو فواحد الفيروج فالسونطر كانت تتشوف من الزاج ومع تلفتات واحد لوقيتة وهي تفيكسي عينيها فواحد البلاصة خرجاتهم وهي تتكذب شنو شافت وماهي إلا ثواني حتى كانت حلات الباب بالجهد وخرجات تتجري مخلياه وراها مفاهم والو ومعرف باش تبلا
تتجري وتكذب عينيها حتى وقفات مقابلة معاه والاحساس أنه عينيها مكانوش ككذبو دخل فقلبها بحال الخنجر التيباري مع هزا راسو وشافها الضو شعل معاه ماعرف ما يقول ولا شنو يدير صافي كلشي تفرش وكان غيتفرش طال الزمان ولا قصار نزل راسو بحزن بعدما شاف دموعها وعينيها لغرغرو وحاس تاهو بلي الدموع غيخونوه فديك اللحظة يزيد جاي بالزربة وراها ولكن غير شاف تاهو داك المنظر وقف جامد فبلاصتو تيباري هز راسو فيه بعينين حمرين وغير شافو كانت صدمتو اكبر من الصدمة لي دخلاتو فاش بنتو شافت كلشي كحقق فيه وكتأكد واش هو كانو عينيهم على بعض يزيد كشوف الدنيا بلي مافيها والو وكيفاش الصحة كتخون الواحد ودقتها صعيبة والتيباري كشوف الدنيا كيفاش كضور عليك وكتردك ضعيف قدام هداك لي آديتيه باش يتشفى فيك ثواني دايزة بينهم بتلاتة وكأن ليوم تتقول هانا عاودت جمعت الدنيا صغيرة يزيد حول عينيه لزينة لي دموعها طايحين على خدودها سخان وتتمنى كن عمات ومتشوفش باها فالشمس حاطة شبيكة فيها المسكة وكلينيكس وهي كطيح وتنوض وتجرتل على قبل راحتهم هي وماماها تيباري شافيها وعينيه مغرغرين تجمع عليه كلشي شي لخلاها تنطق بقهرة عينيها حمرين ودموعها كسيلو وهي منعتة بصبعها فيزيد
زينة:صابرة على الدل وقابلة نكون جفاف بين الرجلين غير باش منوصلوش لهاد الحالة ابا لي كون غير عميت ومنشوفكش فيها
نطقات كلامها بكل قهرة من قلب مجروح كبين شحال تقصحات يزيد كان كشوف فيها وكشوف فحالها شحال منهارة جلسات حدا باها وهي فاشلة التيباري كان فشبه صدمة وهو كسمع وكشوف عندمن خدامة تجمع عليه كلشي دقة وحدة شدات فيه ويدها لوخرا حطاتها على خدو وبدات كتنطق بنفس النبرة لي جامعة القهرة والحسرة
زينة:علاش ابا علاش قوليا راني مقصرة غوت عليا وقولي ليا راني مدايراااش واجبي من جيهتكم ومديرش هادشي هئ هئ قوليا شنو خاص قوليا راني مقصرة باش نعيق براسي
كتهضر وتتبكي تيباري فديك اللحظة مقدرش يحبس دموعو بداو كنزلو سخان من عينيه بحرقة على بنتو لي كشوفها كضيع فشبابها وكطيح وتنوض ومزال تتقولو راني مقصرة
تيباري:الحمل ثقيل علييك ابنتي انا لي قصرت وانا السباب انا لي درت لي ميدارش انا لي منسواااش اما نت راك مرضية
زينة غير شافتو غيبدا يهضر قدام يزيد جراتو عندها عنقاااتو وهما كبكيو بزوج كان منظر كقطع فالقلب بين أب وبنتو حالهم كلخص مرارة الحياة وقساوة الدنيا يزيد كانو عينيهم عليهم ولسانو تربط معرف ميقول او بالضبط ما لقى ما يقول كانو عينيه عليها كيف تتبكي ومن كلامها وردة فعلها من الأول بانت قهرتها وشحال تتعاني وكيفاش نعتات فيه وداك الكلام لي خرجات لخص كلشي وكشوف فباها كيف ولا حالو على آخر مرة دوا معاه الدنيا مافيها والو ولي ماخرج منها ما خرج من عقايبها تنهد تنهيدة من القلب وهو كمسح على وجهو وتلفت شوية مقدرش يكمل الشوف مزال
زينة بعدات على باها وهي تتمسح دموعو وتتمسح دموعها شدات وجها باها بين يديها ونطقات:متهز الهم لوالو انا قادة براسي ابا خلي بالي هاني عليك باش نعطي جهدي كامل فالخدمة عفاك
ومع كملات كلامها طبعات قبلة على راسو وهي تتمسح ليه عينيه وكملات كلامها وعويناتها كبريو:نت غير دعي معايا هادشي لي بغيت منك غير نحس بيك معايا نت ومي هاديك هي الدنيا وما فيها
وهنا رجعات عنقاتو وحتى هو والعافية زادت شعلات فقلبو بمرارة الندم شنو دار حتى ربي عطاه هاد البنيتة لي طول عمرو كان قاصح معاهم ولادو كاملين ولكن نهار طاح مخطاوهش يزيد كان رجع ضار كشوف فيها حس بشي حاجة فداخلو وهو كسمعها شنو كتقول وكيفاش كتعامل معاه يمكن تأثر فاش تفكر تعامل باها معاهم شحال هدا وهي تعاملها معاه ليوم حتى هو كان عارف بلي قبيح فيهم وشحال كانو كخافو منو غير لبغات يخرج يشوفها خاصو يفكر لها فخطة وتاهي تبقى تشوف فجنابها وتقولو خاصني نمشي واخا تكون يلاه
جات وشوف دابا زعما الدنيا حناتة فاق من سهوتو فاش ضارت شافت فيهم وطلاقاو عينيهم
زينة:موسيو عفاك غير نوصل با للدار ونرجع مغاديش نتعطل غنشد طاكسي من هنا ودغيا غنلحق عليك لريسطو
كانت تترجاه بعينيها باش ميرفض ومتوقعة منو أي ردة فعل لأنه لقاء غير متوقع بينو وبين باها قرب جيهة تيباري بشوية وشد فيه بشوية من ذراعو ونطق
يزيد:انا غنوصلكم
وبشوية عاون تيباري لي مكانش عندو الوجه يشوف فيه بيه يوقف زينة تاهي شدات فباها من الذراع لوخرا وزادو بشوية فصمت جيهة الطوموبيل وعينيها على يزيد لي كان شاد فباها وعينيه فالأرض معارفة متقول من غير أن الدنيا حناتة وكتعاود طلاقيك مع لي قلتي عمر عاود ليام تجمعني بيه زادو من تما مخليين ديك الشبكة وراهم ركبو فالطوموبيل والطريق كاملة وهما ساكتين كانت شادة فباها عينيها على الطريق وكاتمة دموعها بزز وقلبها كضرها يزيد كان مرة مرة كشوف فيها من المراية وساكت ما نطق بحتى كلمة الصمت ساد على كلشي لانه موقف ماشي ساهل شي تكسر من لي شاف وشي تصدم بيمن طلاقى وشي تحسر على الدنيا والصحة الغدارين
وصلو قدام الحومة يزيد ضور عينيه بالخف كشوف فين ساكنين زينة فديك اللحظة نزلات ومع بانليها يزيد باغي ينزل نطقات:غير خليك اموسيو انا غادي نعيط لخويا(شافت قبلها)با خليك انا نعيط ليوسف بالزربة
كانت تتهضر وغير بعينيها كدير ليه إشارات باش يسكت لتزلق ليه شي كلمة من لي فبالهم زادت وخلاتهم يزيد متسوقش لها مع بغا ينزل باش يعاونو يخرج وهو يشد فيه تيباري من كتفو خلاه تلفت عندو مع طلاقاو عينيهم خاطبو بحرقة
تيباري:عارف مداير فيها ميصلاح من جيهتك ومعنديش الوجه لي نشوفيك بيه ولكن انا مزاوݣ فيك لما عطيني نمرتك ولا اي حاجة تخليني نعاود نشوفك عندي ليك كلام هاز بيه تقليد وجبل على كتافي وفأي لحظة يقدر مول الامانة يدي أمانتو مقادش نوقف قدام سيدي ربي وأنا مثقل
يزيد بقى كشوف فيه وعينيهم على بعض حاقد آه ولكن مين شاف حالو دابا برد واحد الجزء واخا ممربيش على الشفاية خصوصا فاش تتفكر آخر هضر معاه وكيفاش عاملو ودابا جالس كزاوݣ فيه تلفت وحل المجر ديال الطوموبيل جبد كارط ڤيزيت ديالو ومدها ليه بلا حتى كلمة ونزل من الطوموبيل تكى عليها ودار يديه فجيابو وهو هاز راسو للسمى وتتنهد
راجعة من الدار بعدما ما لقات حد فيها عقلها مرفوع ومنظر باها بين عينيها مرضاتش خصوصا قدام يزيد حاسة بالغصة واقفة لها فالحلق عينيها حمرين فديك اللحظة غا حتى وقف عليها عبد الكريم مبسم
عبد الكريم:زينة كدايرة لباس عليك
زينة بغات تخطاه بلاما تهضر معاه هنا وهو يشدها من دراعها مفاهم والو:زينة مالك راني كنهضر معاك واش مقلقاك شي حاجة
زينة نترات منو بالجهد ونطقات وهي منفاعلة ومعصبة:نت معمرك ما تبقى تهضر معاياا هادي هي الثقة لي دايرة فيك مأمناك على با وفاللخر كتمشي نت بيديك تديه يتكرفس ونت أكثر واحد عارفو شحال عيان وشايفني شحال كنجري غير على راحتو هو ومي
لاحت عليه كلامها وزادت خلاتو تابعها وباغي غير يشرح ليها بلي شحال من مرة حاول يهضر معاه وهو لي كان مصر وقفات قدام الطوموبيل تيباري شافيه ونزل راسو كتنهد بقات عليه الطريق كاملة حتى قالها شكون كديه لسونطر ڤيل ويجيبو
عبد الكريم:زينة غير سمعيني هاهو قدامو با تيباري شحال من مرة قلت ليك هادشي ما مسلكش
يزيد كان مراقب البلان بلا حتى كلمة حلات لباب وهي ممسوقاش لعبد الكريم لباغي يحماق غير تسمع ليه شدات فالتيباري باغية تخرج هنا جا حتى هو باغي يشد فيه ويعاونها يخرجوه هنا وهي تنتر ليه يديه من يد باها
زينة منفاعلة:متقيسوووش سير بحااااالك حنا ممحتاجينش ليك
تيباري:ابنتي راه كلشي من تحت راسي انا هو ماعليه والو مقدرش يرضها فوجهي
زينة:كان خاص يجي يقولها ليا ماشي ابا نت كتهلك صحتك وهو مطاوعك
عبد الكريم مزال مصر انها تسمع ليه مقادرش يتخيل أنها مقلقة منو ومتبقاش تهضر معاه:زينة خليني غير نشرح راك مزال مسمعتيش ليا
يزيد فهاد اللحظة تدخل وجا بينو وبينها ونطق وعينيه كازين عليه وهو كشوفها تتجري عليه وهو لاصقها واصلا كانو سنانو عليه لوبيا مزال عاقل عليه هو لي جا لها للشركة وركبات واخا طلع غا ولد الحومة لكن محملوش
يزيد:مبغاتش تهضر معاك صافي سير غيرها
عبد الكريم:غنقولها زوج كلمات وزيد بيني وبينها
يزيد:مبغاتش دوي معاك ترضاها لراسك كتجري عليك ونت مزال لاصق
عبد الكريم:وقلت ليك بيني وبينها شكون نت بعدا
يزيد هنا وهو يدفعو بالجهد:وسيير بحالك البشار
هنا زينة وهي تدخل دغيا شدات فيزيد من ذراعو وجات بينهم:سي يزيد عفاك مكاين لاش الصداع(ضارت عند عبد الكريم)عبد الكريم صافي سير بحالك الكلام لي كان راه تقال بلا شوهة الناس ايتجمعو علينا
تيباري معندو جهد:لا لا ادراري الله يرضي عليكن بلا صداع موقع والو
يزيد وعبد الكريم كانو كشوفو فبعضياتهم بنظرات مكهربة واحد محملوش يقرب لها ويلصقها والثاني كقول شكون هدا واشنو ليه فهادشي عبد الكريم سرطها بحال العافية كواها فقلبو وزاد حاقد خلا يزيد تلفت قاصد تيباري شد فيه من ذراعو بشوية كعاونو يخرج عكس كيف كان شاعل ثواني هادي زينة بقات تتشوف فيه فآخر المطاف تنهدات ومشات شدات فيه تاهي وخرجوه من الطوموبيل وزادو دخلو مع الحومة
فديك اللحظة لي زينة ملاهية مع لباب ديال الدار تتحل فيه يزيد غتانم لفرصة وخشى شي بركة فجيب تيباري لي كان غادي ينطق ولكن يزيد غير بعينيه قالو يسكت خلاه تزاد على مابيه ودارليه إشارة بيديه زعما غنعيط ليك يزيد حرك راسو بآه وضور وجهو وتنهد دخلات زينة باها وطارت عند ام الغيث قالت لها تجي تجلس معاه علاما تجي مسعودة ميبقاش بوحدو حتى لعشية وتجي تعاود ليها ورجعات لطوموبيل كان جالس كتسناها وعقلو خدام
سدات لباب بشوية وضارت شافت فيه ونطقات:سمحليا بزاف اموسيو وشكرا
يزيد حرك راسو بآه بلاما يشوفيها وديمارا بلا حتى كلمة كانت تتشوف من الزاج ودايرة يديها على فمها عينيها مغرغرين وحمرين ولكن تتحاول تكتم دموعها بقى فيها الحال وحسات بالقهرة والفشل طلعو معاها حسات بلي كلشي تضرب ليها فالزيرو ولي عند بالها تتجري وتجاري طلعات مقصرة وباها خارج كهلك فصحتو عاد عرفات بلي هو لي كان كحط لها الفلوس لي كتلقى فجيبها حسات بلي كلشي تضرب لها فالزيرو وجهدها مشى قلبها حاسة بيه غيتفرݣع مقادراش تصبر كاسها فاض وبزااف وزيد لي زاد كمل عليها هو مبغاتش يزيد يشوفو هكاك مبغاتش يعرف بلي الجهد مشى واخا هدا قدر الله ولكن شاف وعرف بلي الدنيا نتاقمات ليه منهم غير يبرد دابا كان كشوف فيها بنص عين مرة مرة كضور يشوف فيها بشوية حيت كانت ملفتة للزاج ويرجع يشوف فالطريق مع وقفو قدام الريسطو غيبلاصي هنا هو يضور دغيا شاف فيها كانت تفرݣعات بلبكى نيشان ويديها على وجها كرجفو كانت تتبكي وتشهق من قلبها بكاها كبين كمية القهرة لي حسات بيها وهو كشوف جسمها كيف تتهز ويديها على وجها كيف كرجفو وكطيح فدوك الدموع عينيه عليها وعلى حالها متسناش بزاف حتى بدون مقدمات نيشان حيد سانتيغ وضار جرها لعندو وعنقها ضامها لصدرو وهي تتبكي وتشهق دارت بحالو وحتى هي عنقاتو تتبين بلي شحال محتاجة لشي صدر تحط عليه الراس وتخوي لي فقلبها وحبذا لو كان القلب من جيهتو كيميل ريحتو تغلغلات فنيفها وهي كارزة عليه بحال غيهرب تعلقها بيه فديك اللحظة كان اشبه بكلمات تتقولو متخلينيش راك مزال الدفئ والامان كيفما شحال هدا تتبكي بحرقة وتتخوي قلبها اما هو من غير هاد المبادرة لي دار بقى على حالو مخليها على راحتها لاحو كلشي وراهم وعاشو ديك اللحظة بدون ما يتفكرو شنو بينهم يمكن دار هاد الخطوى بلاما يفكر لأنه هو براسو تزعزع من هاد الموقف عارف بينو وبين الله داكشي باش متشفاش فنفسو ولكن عرف المعنى الحقيقي ديال إن الله يمهل ولا يهمل
بقاو هكاك على حالهم تتبكي على صدرو وهو ممنعهاش لأنه كان السباق فهاد الخطوة فديك اللحظة صونى تيليفونو هنا زينة قفزات وحسات على راسها شوية بشوية رجعات اللور وحتى هو طلق منها كانت تتشهق وتتمسح دموعها وهي تتلوم راسها وحشمانة لكن الجهد مشى والقلب عمر
حيد التيليفون من وذنيه بعدما سالا الابيل وشاف فيها وفحالها تتمسح دموعها ونيفها بعد سكوت شبه قصير نطق:البكى ماعندو باش ينفع هادي هي الدنيا كلها امتحانات وعادي طيح الخايب هي الا طحتي ومعاودش وقفتي
هزات راسها فيه وعينيها حمرين بالدموع تأكدات واش فعلا هو لي هضر وهو لي نصحها فعلا كلو عندو فيه الحق ولكن الجهد فين هو تتحس براسها تقهرات قبل ما تبدا بقاو كشوفو فبعضهم وكانهم كقراو عينين بعض حتى فلحظة دغيا ضور وجهو بلاما يزيد يطول الشوفة فيها كثر وبالأخص عينيها
يزيد:سيري سبقيني انا جاي
حركات راسها بآه وهي تتمسح عينيها بكمها هنا هو يحط ليها باكية كلينيكس قدامها هزات منها ونزلات بلا حتى كلمة خلاتو متبعها بنص عين رجع راسو اللور وتنهد وهو كتمتم فنفسو لا حول ولا قوه الا بالله زعما شكون يثيق فالدنيا ولي دعى بالقوة يموت بالضعف شكون قال حال تيباري يتبدل مزال عاقل على آخر موقف جمعو بيه كيف عاملو ودلو وقاليه كلام حفر قلبو حفرة وزاد على حقدو وليوم عاونو باش يوقف وهو كزاوݣ فيه انه يطلاقاه ثاني معرفش شنو بغا يقول ولكن الدنيا ضارت وورجعات وراتو حالهم كيف ولا من مور ما غبرو لا هو لا بنتو
دخلات سبقاتو لريسطو حشمانة وهي تتمسح عينيها من الدموع وحتى نيفها قلبها طايب وخاطرها أكثر مع هزات راسها وقفات فبلاصتها روعة تاهي فيكسات عينيها فيها فديك اللحظة عادل لي كان عاطي بالضهر لزينة شاف روعة سكتات وتبلوكات وهي تتشوف فواحد لبلاصة وهو يتلف غير شافها خرج عينيه شوية تصدمو بتلاتة خصوصا عادل وروعة بالنسبة لهم زينة خطر أنها تشوفهم وتعرف علاقتهم لأنها قريبة من يزيد وماشي غير هي أي واحد يكون كعرفو عادل فديك اللحظة وقف باغي يهضر مع زينة وهي تقصدهم وقفات قبالة روعة ونطقات بتوتر لي ركبها حتى واخا اصلا ماليها والو
زينة:روعة خوك كاين برا وفأي لحظة يقدر يدخل عندنا اجتماع مع واحد الوفد هنا(شافت فعادل)عادل غبر تخبى فشي قنت حتى يجلس وداك الساعة خرج سير دابا راه كاين حدا لباب
عادل شاف فروعة:انا مشيت بيناتنا التيليفون
روعة لي كانت صفارت وهي تتسمع خوها برا غيلقاها مع الصاحب وماشي اي واحد واحد من الشركة حركات راسها بآه وهي تترعد عادل ما بغا يمشي وقفاتو زينة:هز طبسيلك اعادل
بالتلفة كان غيمشي ويخلي زوج طباسل فوق الطبلة وتفرش القضية بلي كان معاها شي حد هز قشو وزاد دغيا يقلب فين يتخشى روعة جلسات وهي تترعد وصفرة
زينة:شدي فراسك ومتبينيش بلي شي حاجة كاينة تصرفي عاديي
فهاد اللحظة يزيد دخل غير لمح ختو وزينة عقد حجبانو شوية وقصدهم روعة وقفات وهي تتشوف فخوها وتتبلع ريقها هو كان غيسولها عادي بالنسبة ليه صدفة طلاقا بختو ولكن هي الخلعة كانت لاعبة عليها يلاه غينطق زينة وهي تسبقو وهضرات هي
زينة:موسيو يزيد مادموزيل روعة تاصلات قبيلة كانت باغية تشوفك وقلت لها بلي غتخرج حيت عندك اجتماع هنا عطيتها العنوان ديال الريسطو وهاهي لقيتها سبقاتنا وكتسناك
يزيد عينيه على ختو رجع شاف فزينة ونطق: علاش مقلتي ليا والو
روعة لي كانت تتشوف فزينة كيف تدخلات وبسرعة قلبات الموقف لإتجاه آخر حسات بقلبها رتاح وهنا ضارت عند خوها:انا لي طلبت منها اخويا متقولك والو باش متشنطنش راسك كنت بغيت غير نهضر معاك فشي حاجة ولكن حتى تسالي الخدمة
يزيد جلس مع ختو وشاف فزينة:سيري جلسي مع الناس انا جاي
حركات راسها بآه وزادت خلاتها بزوج روعة فيساع لقات شنو غتقوليه وباش غادي تبتو شد فيها ونطق:مالكي ياك لباس
روعة تنهدات:خويا من داكشي لي وقع لبارح والروينة فالدار ماما مشطووونة من جيهتك منين عرفات زينة رجعات لحياتنا وعاود بانت حنا عارفين مكدير الحاجة حتى كضرب لها الحساب ولكن لا ماما لا بابا لا حنا قلبنا عليك اخويا
يزيد شد فيها من يديها بزوج كطمنها:نت بغيت ديها فقرايتك وتاشي حاجة متلاهيك قلتها ليك ديك النهار مكاين ومغيكون والو غير خوي راسك الوليدة والوليد خليهم على حسابي فالعشية مين غنتجمعو انا غنهضر معاهم
روعة:وعنداك تعطل الا مجيتيش مغاديش نطفي الشمع
يزيد تبسم وطبع قبلة على يد ختو محانين فبعضهم بلا قياس يلاه لبارح كانت صغيورة كتبكي حيت طاحت لها أول سنة ودابا هازة ليه الهم وخايفة عليه
روعة:منعطلكش على الخدمة وحتى انا خاصني نمشي
يزيد هنا ضرب يدو فجيبو ولكن قاطعاتو روعة:لا لا اخويا صافي راني خلصت
كان من حسن الحظ ان داك الريسطو حتى كتخلص عاد كتاخد ماكلتك اما كان بهاد لبلان يعرف بلي مكانتش بوحدها خرج معاها حتى لبرا توادعو ركبات فطوموبيلتها وزادت رجع هو دخل لقى زينة جالسة مع الوفد كتسناو عتاذر منهم على التعطال وبداو الاجتماع ديالهم
هازة لmenu وتتشوف مفهمات والو ولكن تتقرا كل أكلة والمكونات ديالها بانلها داكشي زوين واخا عمرها كلات السوشي 🍣 حطات عينيها على وحدة وحطاتو وجلسات تتشوف فيهم كهضرو وكتناقشو كانو عينيها عليه كيفاش كهضر بالانجليزية بطلاقة كلامو الموزون وكلا تفاصيلو لا النظرة دعينيه نبرة صوتو تقاسيم وجهو كيفاش كحركهم مبيناه انسان تايق فراسو وعارف شكيدير سهات فيه وهي تتفكر قبيلة كيفاش بكات قدامو كيفاش نسى كلشي وضمها لصدرو حتى فشات قلبها كيف ايام زمان كان محتاجة تخرج دوك الدموع ومحتاجة اكثر صدر لي تبكي عليه ويواسيها والاجمل انه كان هو
تنهدات ورجعات لواقعها المر تتخمم وصورة باها مبغاتش تحيد من بالها بقات هكاك غير تتنهد حتى جا السيرڤور خدا الطلب ديالهم كاملين ومشى خلاهم مكملين خدمتهم كتناقشو وهي حداه كتقيد فالطابليط لي عطاها كلما قالها لها
جابو لهم الغدا ديالهم الشناوا بداو كياكلو عادي ويزيد حتى هو كان كلشي كياكل بالعواد ديال السوشي مولفين إلا هي معرفاتش لهم ومعارفاتش حتى كيفاش تحكمهم بين صباعها مع كتبغي تهز كطيح لها وكتقرقب فالطبسيل بدات كضور فعينيها وتتشوف واش كشوفو فيها وتزنݣات حيت ماشي ناس عاديين كانو رجال اعمال الحشمة مضوبلة بلعات ريقها وهي حالها يزيد كان ضرب على لبلان وشافها بلي معرفاتش ديك اللحظة وهو كهضر مع الشينوي بلاما يبين حط العواد وهز وحدة بيديه وشاف فيهم
يزيد:بما أن غتكون بيناتنا شراكة فالحوايج علاش لي متكونش حتى فالماكلة نتوما عرضتو عليها لثقافتكم وتاحنا بغيناكم طبقو ثقافتنا شحال من اكلة كناكلوها باليد داكشي علاش بغينا نكلو الماكلة ديالكم ولكن بطريقتنا هاكدا غنكونو تشاركنا كلشي
الشناوا فديك اللحظة شافو فبعضياتهم وتبسمو حطو العواد وجلسو كياكلو بيديهم زينة فديك اللحظة معرفاتش كيفاش توصف احساسها عرفتي شنو هي ينقذك شي شخص من موقف محرج فالسر بلاما يبين ولا يحسس الناس بالسبب الحقيقي وخصوصا إلا كان شي شخص لي عندك معاه قصة الجوهر ديال الانسان مكتبدلش واخا يبغي هو يبين بلي تبدل التربية والقلب عمرهم كتغيرو وهادشي لي كنطابق عليه هو خلاها شاردة عينيها هايمين كقولو بزااف وهي تتشوف فيه وهو كهضر واخا مشافش فيها ݣاع فاش دار داك البلان ولكن يكفي أنه طبق وهما بوحدهم لي عارفين علاش دار هكاك
كملو غداهم وحتى الإجتماع مع سالاو تصافحو كاملين وهما كتواعدو ان الشركة غتكون نيشان من مور دخول العام الجديد حيت دابا كلشي غيخرج كونجي خرجو بزوج ركبو فالطوموبيل بلا حتى كلمة الطريق كاملة وهما ساكتين كلا وفاش كفكر
عقدات حجبانها شوية وهي تتشوف فلاباج لي سيفطات لها لبنى ديال الشركة الڤيديوات والتصاور طلاحو ولكن علاش المقطع ديالها هي مكاينش علاش تصاورها مطلاحوش علاش اللبسة لي لبسات هي طلاحت بلا عارضة ومملبوساش غير على اللبسات لاخرين علاش مداروهاش هي رغم أن كلشي مدحها وشكرها طفات الطيلي ديالها وهي تتفكر كانو قربو للشركة بغات ضور تسولو ولكن سكتات السؤال هو علاش وصلو ونزلو بزوج كان غادي سابقها وهنا مع دخلو مع لباب ديال الشركة وهي توقفو بصوتها وقف وتلفت لها نص ضورة بلاما يهضر وقفات مقابلة معاه ونطقات ومرة عينيها فالأرض مرة عليه
زينة:موسيو علاش التصاور ديالي متنشروش والمقطع ديالي مكاينش مكوبي
يزيد كشوف فيها وهي تتهضر الحشومية تتسول علاش تصاورها مطلاحوش وهي غادية جاية تتعوج جاوبها برد سريع:تيباري عيا وترخات لك السمطة الحشمة طارت وولا عندك التقزاب كي والو ومن الفوق تتسولي علاش مغيشوفوش لي يسوا ولي ميسواش
زينة كانت عارفة ومتأكدة بعد موقف باها غتسمع منو شي حاجة كتعلق بيه وزيد هادي المرة الثانية تقولو وكجاوبها شي جواب لي معندو علاقة ولا إقناع
زينة:علاش أنا من دون ݣاع دوك البنات وزيد سوقي هدا وتصاوري هادوك
رجعات خطوة اللور فاش شافتو جاي كقرب لجيهتها بدات تتشوف فجنابها وتبلع ريقها بلا شوهة راهم فوسط الشركة والناس داخلة خارجة فيكسى عينيه فعينيها وسيفط ليها جوابها بكل برود
يزيد:ماشي تيباري تسالا جهدو صافي قطعتي الواد ونشفو رجليك بقاي غادية مع جنب الحيط حسن ليك كل طريق كتبان حلوة فالبدية ولكن مع كتزيد تغرق فيها كيضربك الصهد الخفة كترجع بالشوك والندامة
كانو كبانو واقفين عادي وكهضرو هازة فيه راسها وجامدة بلاصتها وهي تتسمع كلامو لي كان كنطقو بنبرة هادية ولكن عبارة على التهديد البارد لي ولفاتو وهي معاه لاح عليها كلامو وزاد خلاها واقفة فبلاصتها كرزات على يديها وهي غطرطق كلامو كان عندو فيه الحق لان ما خفي أعظم هو لي عارف داك العالم شنو مخبي فيه وسط الشهرة والاضواء كاينين كواليس خبيثة ولكن النبرة والطريقة باش كهضر كتمرضها زادت وهي مفقوصة قاصدة المصور وصحاب الماركتينغ لي مكلفين بالصفحات ديال الشركة على مواقع التواصل تعرف شهادشي وعلاش تإيليمينات
جلسات فلبيرو ديالها بالجهد وهي معصبة ليوم معالم بيها غير الله مشات سولاتهم وقالو لها نيشان سي يزيد لي مبغاش نحطوهم وداكشي كان تحت أوامرو هو راسها زند عليها غطرطق كقتلها غير بداك الاستفزاز وكقولها ناقصة ترابي حيت باك مرض لانه بطبيعة عارف باها شحال كان قبيح وكدا ولكن هي مبيهاش الديفيلي ولا عرض ليلى داكشي خاطيها جاتها فرصة ودارتها عادي ما فنيتها والو بغات غير تشوف راسها كيفاش جات ولي زادو عليها حتى الموظفين مالك ملاحوكش كنت واعرة علاش وكيفاش زفرات ومسحات على وجها وضارت لبيسي تكمل خدمتها
فنفس الوقت فبلاصة اخرى كان متكي فلبيت وعقلو شارد قلبو معالم بيه غير الله وهو كشوف الدنيا كيف دوارة لي زاد قتلو كثر بعد ان بنتو كشفاتو هو فاش عرف بلي خدامة عندو وتحت يدو علام الله شنو داير فيها متأكد مكعاملهاش مزيان لأنه معارف والو تفكر كيفاش تعامل معاه هو وكيفاش لقاه دارليه فجيبو 600درهم وكيفاش مشافش ولو شوية ديال الشفاية فعينيه بعدما آخر مرة كان كطلب فيه وبقالو شوية يبوسو ليه رجليه وهو بلحيتو وبطولو وبعرضو دار يديه على وجهو بندم كتحسر وكتفكر آخر مرة طلاقاه شنو دار وشنو قاليه وردة فعلو لي بقات تتحرق فيه من أول ما طلعات معاه الندامة وعرف شنو دار
🤍فــلاش بـاك تــازة 2019🤍
غادي فوسط الخلا ديال الزرع كشوف هنا ولهيه تتفكر فين حط الفاس غادي بخطوات تقال وهو كيتفكر تحت الشمس الحارقة حتى فلحظة سمع سميتو تلفت شافو جاي كجري جيهتو غير لمحوه عينيه وهو يكفر على الدعوة خنزر ومع وقف قدامو تي/را فيه بنبرة غليظة
تيباري:اشكاين ثاني واش نت معندك شغل فينما نضور نلقاك ياك داكشي لي كان بيناتنا تفرتك اشباغي عندي مزال
يزيد لي كان كلهت والتعب باين على وجهو غير من تحت عينيه لي بدل ككحال مع التقط انفاسو خاطبو:با تيباري راني يلاه جاي من فاس مخليت فين قلبت فيها ومزال غنقلب عليها حتى نجيبها مغنخليهاش ضيع مني الله يرحم ليك الوالدين الا كنت عارف شي حاجة قولها ليا
تيباري:اسيدي شكون ضربك على يديك حتى تمشي تقلب عليها مالك عاقد عليها ولا آش سير عطيني التيساع انا معاك بالله وبالشرع
يزيد زاد قرب عندو وهو كترجاه:انا عارف زينة كدايرة غنكون غير قلقتها بلاما نقصد هانت غير قوليا فين هي نمشي برجلي حتى لعندها نتصالح معاها وما يكون غير خاطرها غيكون غير معجبوهاش الحوايج لي جبت ليها فالخطبة ولا واقلة الصداق مكافيش نزيدها عليه تستاهل كثر غير نعرف فين كاينة
كان كهضر والصدمة مزال لاعبة عليه أنها مشات وخلاتو نهار العرس تيباري دفعو وهو كغوت فيه:اسيدي عطيني بالتيساع نت وحوايجك وصداقك انا مبقى عندي بنات للزواج
يزيد:منين هربات كيف تتقولو علاش مخايفينش عليها واولهم نت علاش مكتقلبش عليها
تيباري زاد نفاعل وهو كشوفو كيف مصر وكحقق ويهبش وراهم:علامن غنقلب على لي مرمدات وجهي وسط التراب قدام العادي والبادي غنخاف على برهوشة ضحكات على قوم وزادت خلفة معرفناها عندمن صدات انا لي خرج طاعتي نكرو واخا يكون من لحمي ودمي تطلب الله تبقى غابرة أما نهار نطيح فيها ندفنها حية كون منك انا نضرب على جيهة النسى ونهار نشوفها نذبحها من الودن تلودن سير عطيني بالتيساع لي خلقها خلق غيرها
كعايرو وكدفع فيه وهو مزال متشبت حبو مخليه عافط على كرامتو وباغي يبوس ليه يديه غير يقولو شي خيط يتبعو ويلقاها حيت مداخلاش ليه لراسو ابدا
تيباري خشى يدو فجيابو:آه حگا فكرتيني صبر صبر
بقى كقلب تاجبد واحد الحاجة ولاحها عليه:شد هالي غيفرق بينا وبينك
يزيد تحنى بالزربة لتاقطها لأنها متعلقة بيها وتيباري كشوف عارف هادي اللخرى لي غتجيب ليه التمام وتنفرو منها وفعلا ماهي إلا دقايق قليلة حتى كان جالس فالأرض منهار بدق الشمتة لي كوا قلبو شد فراسو وهو غارس صباعو فشعرو ومنزل راسو للأرض حالو كبين قداش طع/نة الغذر والصدمة صعاب عليه وزادو سم كلام تيباري
تيباري:شفتي كلشي على عينيك لافيك شوية دالنفس عطينا شبر ديال التيساع راك طيحتي الدل على الرجال ومرمدتي بيهم
ديك اللحظة فاش نهار قدامو مبغاتش تنسى ليه وكيف كان كطلب فيه وهو دلو ومرمدو وفداك الوقت راه كان شاب فآواخر العشرينات يعني ماشي شي حد لي كان صغير يقول عادي غلطة ديال الصغر نكبر ونسى ونتعلم منها لا كان كشوف الحب فعينيه لبنتو وكيفاش كانت غتعيش معاه أميرة كن بقات ولكن خرب كلشي بالطمع حتى صدق لا هو خدا داكشي علاش رونها لا بنتو عاشت مزيان بديك التزويجة كان شاريها بالغالي غير نهار جا يخطبها طلب ليه 10المليون فالصداق ومقالش لا ونهار هربات كقولو نزيدك غير تبان لا هو لا بنتو كانو ضحايا فهادشي كامل من داك النهار غبر لا هو لا عائلتو معاودش رجعو لفيرما ديالهم جاتو خبارو هو بلي زاد لهولندا وهو ربح الشوهة كلشي كدوي عليه فالدوار بنتو هربات بنتو ماشي عزبة عاد طلع معاه شنو دار ملي مصدقش ليه علاش دار هادشي كامل ورونها زعما معندوش فين يحط راسو ولكن كقولو السمطة كضور والبزيم كقصح واكثر واحد تقصح بيه هو بنتو لي معندها لا يد لا رجل فداكشي خدمات عندو وعلام الله شنو داير فيها ومن حقو لأنه معارف والو والدقة تاهو جاتو صعيبة وربي بغا يلاقيها بيه باش تكون سبب انه يعاود يشوفو ولكن ماشي بنفس الحال يشوف شاد للأرض مقاد حتى يوقف ويجي عاونو هو يتحرك
ولي قتلو كثر هو كيفاش عاملو غارق وسط دوامة من الندم خاصو يهضر باش يخف علييه مبقاش قادر على هاد العذاب وهاد الحمل لي هاز حتى كتافو دار يدو على قلبو وهو كحس بيه كنغزو
داز الوقت بالضبط فالشركة كان ما بقى والو ويخرجو غادية قاصدة الفوطوكوبيوز وهي فطريقها طلاقات لعادل غير شافتو تبسمات جا قصدها ووقف قدامها بعدما صافحها
عادل:شكرا بزااااف على قبيييلة
زينة:مدرت والو غير بقاو تردو البال
عادل:يبقى بيناتنا ازينة داكشي الله يحفضك ماشي على قبلي ولكن على قبلها هي اما انا يبكي على مو بنادم
زينة:لا لا كون هاني(تبسمات)جيتو مع بعضياتكم تبارك الله روعة ضريفة
عادل:الله يكبر بيك الخوادرية ديالي راني ناوي المعقول
زينة:الله يكمل عليكم بلخير
عادل:امين اجي واش كتعرفيها؟
زينة جمعات الضحكة شوية:روعة معرفة قديمة حتى لمن بعد ونعاودها لك
عادل:ان شاءالله المهم شكرا مرة اخرى
توادعات معاه وزادت تتكمل خدمتها وهي تتفكر تقدر روعة تعاود ليه وميبقاش يتعامل معاها مزيان حتى هو وهي راجعة لبيرو ديالها حتى طلاقات مع منصور لي غا حتى وقف عليها تصافحو باليد وهما كسولو على الحال والأحوال
منصور:كانت عندي الخدمة بزاف الديفيلي وداكشي راك عارفة داكشي باش مقدرتش نطلاقاك ونقوليك كنتي tellement magnifique ازينة والله
زينة تبسمات بخجل:ربي خليك هههه
منصور:عمرك قلتي ليا بلي عندك مع هادشي ڤغيمو تقدري تمشي فيه بعيد انا نشجعك خصوصا انك نت زوينة بزااف
زينة هزات فيه راسها ونطقات وهي مزال محافظة على ابتسامتها:ربي خليك هاديك كانت غير صدفة وصافي اما انا بعيدة على داكشي خليه لماليه براكة عليا غير هاد الخديمة ضامنة بيها طرف دالخبر وصافي اما داكشي ممعطيش ليا انا
منصور:ههه المهم فكلتا الحالات زوينة سوا زينة المودل ولا السكرتيرة
زينة:ربي خليك المهم نخليك مزال عندي الخدمة
زادت وخلاتو متبعة كطلعها وينزلها من اللور متميزة وفيها كلشي زوين وغامضة مكطولش معاه فالهضرة كلامها الحد فالقد وهدا هو النوع المطلوب تستاهل يجري وراهااا
طالعة لبيرو ديالها فديك اللحظة مع وصلات لطاج طلاقات معاه شافو فبعضهم ثواني قليلة هنا وهي تنزل راسها وتمات غادية قاصدة لبيرو ديالها هنا وهو يوقفها بصوتو
يزيد:فينما تكون خارجة من لبيرو ديالك سدي لباب وراك
زينة فديك اللحظة تلفتات عندو غادي تجاوبو هنا وهي طلع لبنت ديال لاغيسيبسيو هازة بوكي دالورد فيديها ومداتو لزينة:مادموزيل وصلك هاد البوكي بسميتك
زينة ستغربات شداتو من عندها ونطقات:شكون جابو؟؟
لبنت:مقالوش لينا السمية المهم ليك وصافي يقدر يكون شي حد من الديفيلي راك عارفة كنت بومبا
لبنت قالتها على نيتها وهي كضحك زادت وخلاتها واقفة مستغربة ولكن فالاخير تبسمات وبدات تتشم فيه وهزات ديك الوريقة غتقراها وهادشي كلو تحت عينين يزيد لي كشوف فيها تضحك وعاجبها الحال فديك اللحظة هزات فيه عينيها وهي تفيق على راسها بلعات ريقها شوية ونطقات:احم سمحلي اموسيو صافي انبقى نسد لباب
يزيد وهو كطلع وينزل فيها زاد من قدامو لايح ليها زوج كلمات:سيري سيري حيدي داكشي وديها فخدمتك
عقدات حجبانها شوية وزادت داخلة فرحانة بداك البوكي كان واحد الفاز فيه شي وريدات زادت عليه هادوك وجلسات هازة لكارط لي جات معاه وتتقرا فيها كانت مكتوبة بالفرنسية
كنت أجمل ما شافت عيني❤️
غالبا غيكون من الديفيلي حيت شافت داك النهار شحال ديال الانظار فينما كان كبانليها شي حد جاي قاصدها تتمشي تدخل تهرب لطواليط ولا توقف مع عادل متسوقاتش اصلا الزعطة ديال الألبة هي هاديك يسيفط بوكي دالورد وعمرك تعرفيه كعتارفو عادي هما وكلشي عابر
داز الوقت وظلام الحال بالضبط فالڤيلا ديال الوزاني لي كانت عامرة حيت عيد ميلاد روعة كانو شي صحاباتها وشي ولاد خالاتها خوتها سعيدة مرات عمها وسامية وفريدة وكمال كنقز عليهم المهم المقربين جالسين ضاحكين وليد شاد الستون مع واحد صاحبة روعة وولاد خالاتو المهم امسية تجمعو فيها وصافي
برا فالجردة كان الحاج ابراهيم وسامية جالسين قدام لابسين وكهضرو هي تتسرسب وهو كسمع ليها
سامية: صراحة اعمي انا مكنتش عارفاها هي كيف تتعرف راني مكنتش فالمغرب فاش يزيد كان غادي يتزوجها هي صراحة ضريفة ولكن تتجيني شوية مرخية يعني ماشي مؤهلة لشركة ديالنا ولبوسط قريب لمدير هكاك
ابراهيم حرك راسو بآه:وكيفاش تتعامل معاها يزيد
سامية:صراحة يزيد شوية قاصح معاها فهمتي اول اكسبيغيونص ليها ولكن هي على سبة اي حاجة كدير منها وانا هضرت معاها بلي هادشي كلشي كدوز منو ولكن صراحة اعمي ماشي قد المسؤولية
ونت عارف الشركة ديالنا فالسوق والخدمة كدايرة يعني لمكنتيش حربي معندكش بلاصة معانا
الحاج ابراهيم كسمع لها وهو كفكر فديك اللحظة العساس حل لباب دخل يزيد فيديه واحد الكرطونة سلم على العساس ومدها ليه خلاها عندو ودخل لمح باه وسامية فالجردة مشى قصدهم
يزيد:سلام عليكم
سامية غير شافتو وقفات دغيا:يزيد
يزيد كانو عينيه على باه تحنى على يدو باسها وهو كرضى عليه عاد شاف فسامية لي سلم عليها باليد عادي وعينيه غير على باه كهضر معاه وكسولو على حالو سامية عينيها عليه وتتنهد مشافش فيها حتى الشوفة مطولة غابر هاد الايام وقلبها من جيهتو معالم بيه غير الله خاصة ان مريم وصلات ليها بلي راه خرجو هو وزينة فوقت الغدا خلاتها غطرطق وغتاكل جنابها
الحاج ابراهيم:جلس جلس اولدي باغي نهضر معاك(شاف فسامية)سير ابنتي دخل على البرد وكلملي معاك لالة فريدة
سامية كانت باغية تبقى باش تعرف شنو غيقولو على زينة خصوصا انها زندات لها فيخرات مع الحاج ابراهيم عندها امل انهم الا تدخلو واليديه يكركبوها زادت دخلات وخلاتهم بزووج الحاج ابراهيم عينيه على ولدو بعد ثواني نطق
الحاج ابراهيم:مغنطولش عليك فالهضرة بزاف حيت راك عارف شنو كدير وقبل اي خطوة كضرب لها الف حساب ولكن انا نهار قررت تسالي نوبتي فالشركة كان بالي مرتاح حيت عارف شكون مخلي ورايا معرفتش كيفاش كتفكر ولا شنو فبالك ولكن عمرك ختاريتي شي طريق وغلطتي معندي منقولك صراحة من غير رد لبال لراسك وصافي كنهضر مع يزيد ولدي ماشي المدير مبغيناش لي فات يتعاود حيت كان صعيب عليك وانا مقادرش نشوف عينيا تآذات
يزيد ناض وطبع قبلة على راس باه كطمنو يرتاح بالو حيت تاشي حاجة مغادي توقع:ريح بالك ونعس على جانب الراحة مبغيتش نت والواليدة تبرزطو راسكم حيت ربيتينا عمرنا نشوفو ورانا ثاني كنكملو فالطريق لقدام واخا نطيحو ونوضو نكملو حيت عمر الرباح كجي من لي فات
الحاج ابراهيم طبطب لولدو على كتفو عارف مزيان شنو ولد وشنو كبر من صغرو مكهزوش ليه الهم حيت عارفينو كخدم عقلو واخا دوز فترة صعيبة كان قلبو لي تحكم فيه ولكن رجع ناض وتخطاها
الحاج ابراهيم:ولكن وصية وحدة نوصيك خليها معاك حياتك كاملة متظلمش كيفما كان الواحد دمعة المظلوم صعيبة اولدي واخا يكون هو لي غالط فحقك الا كانو هما خايبين متكونش نت بحالهم ورد لبال راه سرسبات كلشي بلا حيلة
يزيد غير من كلام باه عرف بلي سامية اتكون قالت بلي مكعاملهاش مزيان تنهد وحرك راسو بآه فديك اللحظة جات مو لي نيشان وقف وباس يديها وهي تدوزها على وجهو
فريدة:شطنتيني عليك بزاااف مجيتيش لبارح
يزيد:متهزيش فبالك مكاين ومغيوقع والو راك كتعرفيني زعما
فريدة واخا منعرف شنو يقول قلب الام مهول من ابسط الامور شافت فراجلها لي دار ليها بعينيه زعما صافي تنهدات وهي تتحاول طمن واخا راه صعيب لان هي لي شافت وحاسة شنو عاش ولدها
روعة طلاحت عليه عنقاتو وهي فرحانة بالكادو لي جاب ليها لي كان عبارة على كليب صغير كانيش كانت باغياه:كنحمااااااق علييييك
يزيد طبع قبلة على راسها:عيد ميلاد سعيد نتمنى ليك اي حاجة زوينة
عنقاتو وكلشي كشوف مبسم عايشين لحظة زوينة ووسطهم سامية وسعيدة جالسين يتغامزو
فبلاصة اخرى فدار زينة كانت كتنصب العشى وتتهضر مع ختها ابيل فيديو قريب تجي عندهم دوز معاهم راس العام قطعات معاها ومشات عند باها لي سمعاتو كعيط من لبيت
زينة:مالك ابا قنطتي تخرج للصالون
تيباري:جلسي جلسي ابنتي
جلسات حداه هنا وهو يجبد 600درهم لي عطاه يزيد ومدها ليها زينة مفهمات والو منين جاوه
زينة:شهادشي ابا منين جاوك
تيباري:شدي عطاهم ليا المدير ديالك
زينة خرجات عينيها وهي مصدومة دارهم ليها فيديها وكمل كلامو:الحمل ثقيل عليك ابنتي وانا مدرتش داكشي باش نضرك العافية تتشعل وانا كنشوفك كتكرفسي والندامة منفعاتنيش
كان كهضر بحزن لي طاغي على وجهو فواحد الوقيتة شد فيديها وبغا يبوسها:سامحيني ابنتي سامحيني من جيهتك نت راه معندي فين نعس
زينة جرات يديها عندها بالزربة وطلاحت عليه عنقاتو كتواسيه وعينيها دمعو حتى هي كطبطب على ضهرو وتتبين ليه بلي محاقداش عليه غير باش تخفف عليه داك تأنيب الضمير وهو مريض
زينة:الله يسمح لينا كاملين ابا متشطنش راسك انا قادة براسي وزيد هدا مكتاب وتصرف مكاين لاش تقهر رااسك
تيباري:بغيت نهضر معاه ونعاود ليه كلشي
زينة غير سمعات داكشي عينيها طرطقو وهي تتحرك راسها بلا:لا لا لا ابا مغادي تقول والو لي فاااات مااااات صافي داكشي تدفن وداك الزواج مكتابش معندك علاش تعاود تجبدو
تيباري بحسرة:راني كنموت كل نهار وانا كنشوف كلشي تمسح فيك نت لي معندك لا يد ولا رجل انا لي حرامي وانا لي عماني الطمع حتى خرجت عليك نت وداك ولد الناس لي كنت اتعيشي معاه قايدة ماشي بحال دابا كتفني فشبابك ونت مزال صغيرة
زينة دموعها بداو كطيحو اه حتى هي مضرورة وحتى عيات ولكن حرقة باها مقاداش عليها رجعات عنقاتو بالجهد وهي تتبكي على كلشي على لي داز وعلى حالها دابا وهي مواصلة مواساتها ليه: مكتاب ابا وحامدين الله عليه معندنا منديرو حتى هاد الحياة زوينة مالنا معندناش ومخاصناش وعلى قبلكم نتوما نعطي عمري كولو ماشي غير شبابي
بعدات عليه وهي شادة وجهو بين يديه وتتمسح ليه عينيه:انا غنتقهر فاش نشوف نت ممرتاحش مبغيتك تفكر فوالو نسا لي فات ابا داكشي داز والتخمام غير كقهر وانا منقدرش نشوفك مقهور راحتك وصحتك هي راحتي هادشي لبغيت متقول لمي والو مبغيتهاش تشطن راسها على والو ديك الخدمة غتهز علينا بزاف ابا وخاصنا نصبرو كيف صبرنا على بزاااف دالحوايج صعب والحمدلله ربي كختابرنا وكختابر صبرنا داكشي باش الحمدلله على كل حال
ورجعات عنقاتو وهي كاتمة دموعها ربي لي عالم بيها وهو كذلك تتقولو بغيت راحتك وهو راه لي كقهرو وكمرضو غير أنها بعد كلشي محاقداش هازة ليه الهم اما كن نكراااتو على لي دار ويعذرها
بعدات عليه وهي تتمسح ليه على وجهو
زينة:العشى ما بقى لي والو ويوجد تكى رتاح ليك شوية غير نحط نفيقك
تكاتو فبلاصتو وغطاتو وخرجات مع رجعات للكوزينة دارت يديها على فمها وهي تتشوف دوك لفلوس فيديها كانت غير تتحاول تناسى اما ربي لي عالم بحالها بموقف دالصباح كقولو السمطة كضور والبزيم كقصح وهاهو يزيد صباح شاف لبزيم شحال قصحهم كاملين وتفتحو الجروح لي كانو غير هامدين غير تتبين بلي راه صابرة وراضية اما لي ربي عالم بيها على فراقو تفكرات تعامل ديالو الصباح زاد قهرها حتى هو مضرور غير كبين تأكدات غير من هاد المواقف كيف كبين حنيتو بلاما يحس عناقو ليها نقدها من الاحراج كلامو على ان الدنيا اختبار كلشي مسحات دموعها دغيا فاش سمعات سكينة ومسعودة دخلو كانو عند واحد الجارة وضارت كتكمل العشى فالنصيب وعاضة على شفايفها مخاصش دموعها ينزلو قدام مها تفكرات روعة وموقفها معاها ليوم عيد ميلادها رجع بيها الزمان اللور ثاني وهي تتفكر مخسراتش غير حب حياتها وإنما خسرات حتى الصداقة تمتمات فخاطرها وهي تتنهد
زينة:عيد ميلاد سعيد روعة كنتمنى ليك أي حاجة زوينة
داز الوقت كانت تقريبا 1:15 الليل الهدوء والصقيل فالدار وحتى فالشارع كان واقف قدام البالكو يلاه دخل تعطل معاهم على ود عيد ميلاد ختو طرطق عنقو يمين وشمال ويديه فجيابو عينيه الݣمرة وكفكر واكيد باين شنو شاغل بالو الملاقية دالصباح لي روناتو كثر ما بردات قلبو حيت شاف لي آذاه تقادى جهدو
حاقد والنار لي شاعلة فقلبو مطفاتش وهو كشوف فتيباري كيف هدو الزمان مبغاش يقول هادوك غير الذنوب حيت مترباش انه يتشفى ولكن أداوه بزاف واش سيدي ربي كلاقيه بيهم واحد بواحد باش يشوف حالهم فالأول بنتو ودابا هو كزاوݣ فيه يعاود يطلاقاه بعدما جرى عليه آخر مرة والكلام لي قال على بنتو فالأخير لقاها عاود بانت ومزال عايشة معاهم وتتجري عليها زعما اللحم الا خناز كهزوه غا ماليه هاهي هربات وعاود بانت ورجعات لدارهم وهو باش خرج فهادشي كامل غير تط/عن وتكوى فقلبو الغذر صعيب خصوصا إلا جا من واحد الشخص لي عمرك توقعها منو تنهد تنهيدة من القلب وتلفت بشوية قاصد الدريسينغ دخل وهو كقلب فواحد البلاصة غابرة حتى جبد واحد الصندوق خشبية دفنها هدا شحال خلاها عندو واخا ݣاع لي دارت جلس فوق الناموسية وفتحها كان فيها ذكرياتو معاها كان شحال وهو كحاول يحيدو ولا يحرق ولكن ميقدرش حيت معتارف لراسو أنه متخطااش داكشي الغذر اول ما فتح الصندوق كانت فيه ورقة هزها بشوية وهو كشوف فالتصاور لي كلهم فيهم هما بزوج ضاحكين وفرحانين حول عينيه لديك الورقة لي جابت ليه التمام بلع ريقو شوية وهو كفتح فيها وكحس بحال كيف حلها أول مرة فاش عطاها ليه باها بدا كقرا فدوك السطور لي أول ما قراهم أول مرة دمروه وجاوه صعاب على قلبو بزااف حيت فالوقت لي كان خاص يكون عقد عليها وتزوجو وعايشين أولى ايام حياتهم الزوجية بصفتها رفيقة دربو
“يزيد أنا عارفة بلي الوقت لي غتكون تتقرا هاد السطور مغاديش نكون معاك ولا حتى مع عائلتي غنكون مشيت لواحد البلاصة بعيدة على كلشي على فين كبرت وعليك حتى نت أنا فآخر لحظة فقت بعدما فكرت مزيان وحتى بدينا التواجد عاد حسيت بالخطوة لي انا غادية فيها بلي ممسلكانيش ومنقدرش نعارض حيت فات الفوت نت جاي فالليل ومعاك العدول باش نتحسب عليك حياتي كاملة با ومي فرحانين كوجدو حيت غتنقص عليهم بلاصة وغيهزو راسهم بين الناس مفتاخرين بمعامن تناسبو والناس حتى هما كتسناو غير عندمن يفوجو وعلامن يهضرو ولكن انا مباغاش تاحد مسولني واش متأكدة من هاد الخطوة كانت غلطة انني قبلت نهار جيتي عند با والغلط الاكبر هو انني بغيتك او وهمت راسي بلي كنبغيك وقفتك معايا فكلشي وحتى الحنان لي مخديتوش من عند با خلاوني نتوهم بلي راك نت هو فارس احلامي وهاذي فقط كانت نزوة المراهقة لي غنفيق منها من مور تلت سنين ولا ربعة دالزواج وغنعرف بلي زربت غنخرج من الحبس ديال با وغندخل لحبس ديال الزواج وديال ناس آخرين وغيكون أكفس حيت كولو غيكون مسؤوليات بالنسبة ليا الزواج منك ايزيد غيدفن احلامي لي حلمت وكان كل مرة با وعقلية الدوار كحاولو يخطفوها مني سمحليا مقدرتش نصارحك لانني عارفة العواقب خايبة واولهم با لي ممكن يق/تلني حيت هو قبل بهاد الزواج غا حيت نتوما ميسورين نهار غادي نختار شريك حياتي غنختارو وانا عاقلة راشدة وعارفة شنو باغية وماشي غير واحد غراتني بيه ملدات المراهقة سمحليا ومتحاولش تقلب عليا مغادي يتبدل والو تهلا فراسك زينة”
الريق بصعوبة قدر يبلعو وهو كقرا آخر سطر من ديك الرسالة لي خلات ليه بخط يديها لي ميخفاش عليه الثقل ديال داك الكلام لي عطاتو هو لخلاه ميعاودش ينبش وراها خوا لبلاد وبقى ومارجع من ورا عامين هي فين شد شركة دبااه وهادشي لخلاه انه ميسولهاش علاش مشات نهار جابتها ليه ليام للشركة
من بعد كاع لي دوزو عتابراتو غير نزوة ديال طيش المراهقة كان كخاف عليها بحالها بحال خواتاتو عمرو نوى فيها الغذر وفاللخر تعتابر بلي ماشي هو الشخص المناسب لها كون تجيه للصراحة بلي ممستاعداش كان يتسناها عمرو كامل عمرو كان ناوي يدفنها من مور الزواج كان غيعاونها فقرايتها فكلشي تا توصل لانه هو ماشي من داك النوع لي كخاف من المرأة المثقفة لا بالفرحات عليه يشوف شريكة حياتو واصلة ويشاركها نجاحها من الصفر بقات عليه احلامي احلامي حتى فاللخر هاهي جات خدمات عندو خدمة لي ماشي عيب اه ولكن متستاهلش تخليه على ودها شحال بقى فيه راسو ونفسو وهو كتفكر كيف كان كطلب فباها وهو عافط على كرامتو وهو كمرمد فيه فاللخر طلع غير نزوة عمرات بيها الحنان لي كان ناقصها عمرو كان ذلك الشخص لي ممكن يآدي بالكلام حتى يبكي الواحد كيفما داير ليها دابا هي بالذات كان كفشل قدام دموعها وعينيها كاع لي دار ليها فالشركة هي لي بغاتو لراسها حيت هي لي رضاتو هكاك بعدما كانو دموعها نقطة ضعفو
عمرو قدر يتخطى غير كان كبين وكعتارف بيها بينو وبين راسو كان كسرح فالماضي لان حقدو مخلاهش ينساها بغا من نيتو داكشي باش الدقة جاتو صعيبة عقداتو من جيهة النسى لدرجة انهم كشوفهم كحومو عليه باشكال وانواع ولكن صافي برد من جيهة النسى واولهم سامية كشوف الحب فعينيها كشوفها كدل راسها غير باش يشوف فيها ولكن مقادراش مبقاش كقدر يتخيل راسو مع شي وحدة ويعطيها قلبو حيت نهار عطاه متهلاتش فيه لي خداتو
واليديه بداو كدقو عليه بمسألة الزواج ومو تتعيا تقولو فلانة بنت فلان همة وشان وهو والو حتى وكان الا تزوج عمرو غيقدر يبغيها فقط حيت خاصها تولد ليه لي يجي من وراه ويهز سميتو أما الحب مغيعاودش يدق قلبو ابدا
هز واحد التصويرة كشوف فيها تاهي كانت تتعبر على شلا حوايج فداك الوقت كان كشوف فيها عامرة احاسيس نابعة من قلبو اما دابا ذكريات باردة كانت هي وياه كشوفو فالݣمرة تحت نجوم الليل مزال عاقل صورهم خوه وليد كانت داك الساع بالنسبة ليه لݣمرة وهي النجوم لي مضويين طريق حياتو وقلبو ضورها وكان فضهرها كلام كعبر على حالو كتبو وهو مخلوي مع راسو كعبر بالقلم على شنو كحس فلعوض ما يبوح بداك الكلام
أبليتني بالعشقِ ثم تركتني
وأذقتني حلو الهوى فقتلتني
ووهبتني قلبًا يفيضُ تعطّفًا
بضعًا من الأيام ثم قهرتَني
تقسو عليّ ولستُ أعلمُ غلطتي💔
كلامو كان كعبر على حالو بلي معاها عاش حلم زويين وستحلاااه ولكن من بعد شرباتو المرار وقهرات قلبو واحاسيسو وهو معارفش الغلطة ديالو ولا حتى شنو دار ليها حيت عمرو كان يستاهل منها هادشي لي دارت بقى هكاك على حالو حتى هو بحالها لا هي لا باها حتى هو مزال كعاني من مرارة الغذر وكأس الشمتة لي شرباتو منو
دازو شي ايام قليلة طايرة روتينية فالخدمة حتى وصل لكونجي ديال راس العام فيه سيمانة
كانت غادية تقضى ختها غتجي غدا بغات توجد لها شي حاجة تتعجبها لمحات عبد الكريم كان قدام قهوتو واقف غير شافتو ضورات وجها وزادت خلاتو تتنهد وراها بلوكات من الواتساب بعدما حاول بلميساجات وانه يصوني ليها وعاد طلقى لها زوج دالمرات وصداتو غادية حتى وصلات للسوق خدات لي بغات ووقفات واحد الجيهة تتسنى خوها يوسف يجي يهز معاها بعدما طلباتو يلحق عليها جاتها الشمس وشافتو تعطل هزات داكشي واخا ثقيل وزادت تتمشى بشوية خطوى خطوى حتى ضارت مع واحد الحومة هنا وهي تعقد حجبانها شوية ولكن فور ما حققات مزيان وتأكدات شنو شافت خرجو عينيها بفعل الصدمة وهي تتشوف شكون داخل لدار الشوافة هكاك عاين باين
تتحقق وتشوف وتتقول لا ميمكنش ولكن هي عمرها كان عندها مشكل فالنظر هي بشحمها ولحمها فديك اللحظة وهي وسط صدمتها شعلات الطيلي بالخف وصوراتها لايحة عليها فولار ولابسة جلابة ولكن تتبان فيها كلاص يعني مفروشة من دوك صحاب الحبة لي معندهم عقل تابعين طريق الشوافات بحال منعرف شخاصهم الصدمة مزال شادة فيها طلعات معاها واحد الخلعة وهي تتفكر فشنو ممكن يجيبها لها عارفة مزيان واش سالات حلول الارض حتى تبغي تسحر لواحد من دمها يا حسرة واش على قلة الرجال فكرات فيه هو غتآديه راسها زند عليها وتكات على الحيط فديك اللحظة وقف عليها يوسف هو وصاحبو
يوسف:امالك واقفة فالشمس
زينة:شوف هز هز هادشي ديه انا جاية
يوسف:علاش مالك؟
زينة:واحد صاحبتي خدامة معايا غادي تجي هنا تقدا وطلباتني نكون معاها
يوسف:واخا صافي ردي البال لراسك هز هز اسمير
هز هو وصاحبو ديك التقدية وزادو وهي بقات واقفة فواحد القنت تخمم وتفكر شنو دير وهمها غير هو خافتو يتآذى معرفاتش كيفاش تصرف ولا شنو دير شوية بانت ليها خارجة دغيا رجعات صوراتها ثاني وهي غادية مع الحومة تبعاتها حتى بانت ليها ركبات فالطوموبيل لي حاطاها فالشارع وزادت خلاتها واقفة تتفكر فلحظة رجعات تتجري لدار الشوافة لقات واحد البرهوش كلعب الكورة قدام دارها لاحت ليه درهم وطلع كجري يكلمها ليها
بالحيلة غتسيل الشوكة بلا دم تتعرف هاد الشوافة او بالضبط غا نصابة دالسيكتور وبنت الدرب بينها وبين السحور على الخير والاحسان تلاحت ليه مطلعاها باش تمص الفلوس من عند لي متبعات هاد الطريق دالحرام كي الحمارات ناسيين أن سيدي ربي هو لي فيديه كلشي لا من إنس ولا جن وهو لي قادر على اي حاجه
نزلات الشوافة ضاربة واحد البيجامة ديال النمر جامعة شعرها لي كحل بقراسة حجبانها مصبوغين:ايوا هادي غا زينة لي مهبطانا داك الساعة طلعي الدار الجواد دارك
زينة طلبات التسليم فخاطرها:عارفة لي كاين اختي نبيلة ولكن لقيتيني زربانة واخا هكاك قلت ضروري نجي نلوح ليك هاد زوج كلمات حيت قلبي كلاني عليك حيت راهم ضايرين بيك وناويين ليك على الدقة ردي البال
نبيلة:ياك اختي والله يكثر من مثالك متساليني غير شي مجمر ديال كميميسة الحسد من داكشي دقة بطلة العكوس والعقس آتيني
زينة:هاد خيتي لي يلاه مازالت لابسة الكحل لاش جات عندك وآش طالبة
نبيلة:هي قولي نت باغية غا تقلقلي السوووق وصافي لابغيتي الخدمة جيت برجليك ويري النية وخلي عليك غيييرك
زينة: سمعيني ومتزربيش راك مقلوبة عليك القفة
نبيلة زفرات:جاية قاتلك باغية القبول والمحبة بينها وبين شي حد
زينة فديك اللحظة لفقصة طلعات معاها:ومعطاتك عربون معطاتك تصويرتو ولا حوايجو
نبيلة:زينة اشبيك اختي تتقلبي واقلة على شي كحل الراس الجواد معندهمش الفضول سيري خليك مع الحلاوي والطياب اما المجمر عندو ماليه
زينة:يا نوووضي يا لهبيييلة راه جات قلقلاتك حسي مسي راه مع صحاب الحال وماشي بعيد تكون سجلاتك
نبيلة عقدات حجبانها:كيفاش اشكتكوري باش عرفتيها
زينة:علاه ماشي نهار مشيت مع خويا يقاد لاكارط هي لي دارت ليه البصمات ونهار ولد عيشة قربلها هو وولد طامو بعيني لي غياكلهم الدود شفتها كانت فسطافيط واش طلعو الحزاق كامل
نبيلة:عليها بنت الحرام مع دخلات سبقات ليا العربون ومعطاتنيش باش نخدم قالت ليا جاية غا نسول حتى لمن ونجيب لك حوايجو
زينة:اييييه شتي قلتها ليييك يا المسخوطة علاه ماشي كاينة الحملة هاد ليامات ياك سيدي عبد رحمان شطبووه وفينما كان شي مجمر ومولاتو هزوه الا جات عندك جرييي عليها تي بغيتي آخر ايامك طلاحي فلحباسات على التخربيق ونت مزال عويتقة ممادة يديك للحنا
نبيلة تزاد معاها الزايد:الله ياربي الله وانا غير دريويشة ما ديال حبس ما ديال محاكم غير البلية وصافي لي دارتها نت عارفة اختي غا كنبغيو نقشبو وصافي نقتلو الملال وقلة ما يدار اما راه غا قعقلة فالمجمر لي دايرة الشياط اصلا هادشي كعما لواحد يكون متاقي الله متقيسووو حاجة الله ياربي الله
زينة:عارفة عارفة لي كاين مالك نت برانية المهم ردي البال الحملة كاين وحضي جنابك نت اصلا ممعروفاش غيكون غاشي حد من الحومة لي حطها لهم سخونة ولا عرفتي آش سيري غبري ليك واحد الشهر علاما تبرد القضية دوزي بخير
نبيلة:سيري الله يكثر من امثالك الله يزوجك
زادت وخلاتها وهي تتزفر ناري الكذوب شحال صعيب ماشي من عوايدها ولكن للضرورة احكام حمدالله لي مجابت لها والو من حوايجو ولا تصويرتو دابا الخطوة الثانية الخطوة الاولى متاكدة منها حيت نبيلة فالجيب تيقات لانها غا شوافة دبلعاني ديال النواحي وزيد باقية غا برهوشة كن كانت نيت متمكنة ومدرسة ݣعما تبغي حتى تنزل عندها بقى غير تيقها مع حنا جنس كاموني جبد المخنز كلبد الغاشي
فنفس الوقت فجيهة أخرى كانت روعة هي وصاحبتها جالسين فالطوموبيل وكهضرو صاحبتها شافت الساعة فالطيليفون وضارت ليها ونطقات بالفرنسية:ختي راه تعطل لاخور كتسناني
روعة:وصافي غير صبري اصاحبتي هاهو غادي يجي راه قالي الموطور عندو فيه شي حاجة
صاحبتها:نت خسرات لك الطوموبيل هو خاسر ليه الموطور اشهاد لكوبل
روعة:الحب هدا الحب يختي شوفي السنسلة لي جابلي على قبل لانيڤ ديالي
صاحبتها:زوينة قلتها لك لبارح ناري يختي فكرتيني خوك لكبير امبوسي حبيييتو كااالم وجنتلمان وكيفاش داخل سوق راسو لبارح حبييييتو
روعة:الحب ديالي هداك هو وليد مكتشابهوش وليد كطييير وهو كاااالم
صاحبتها:مصاحب الا كان سيليباطير شوف ليا معاك زعما راني لبيست فراند ديالك وعارفاني نديرو فعينيا
روعة جمعات الضحكة شوية فور ما طاحت فبالها زينة فجأة تنهدات ونطقات:خودي الانستغرام ديالو راني مطاݣياه فشحال من فوطو وشوفي الا تشد كركبي النصراني ومنزيدك غير الله يكمل بلخير
صاحبتها بدلع:شحال نحماق عليه يكون صعيب وكاريزما
فديك اللحظة صونى ليها عادل لي كان قريب توادعات مع صاحبتها ونزلات مدة قصيرة حتى وقف عليها تسالمات هي وياه بلابيز وطلعات معاه بعدما دارت الكاصك وزادو زوج شعرها طاير وعاجبها الحال وهي معاه ومع الموطور كان من دوك الماطر لكبار عايشة اللحظة مع حبقلبها لايحة كلشي وراها تاحد معارف علاقتهم لي جات غير بالصدفة طلاقاو العام لي قبل من لي فات فلحفلة ديال الديفيلي من تما تعارفو وتفاهمو وقفو قدام البحر كيفما طلبات بقاو شحال تما كتمشاو وكهضرو وكتخشي رجليها فالما
حيد ليها خصلة من شعرها لي كان كطير على وجها شد فيديها بزوج ونطق:غير تشدي الماستر ديالك ان شاءالله غادي نهضر مع سي يزيد
روعة تبسمات ونزلات راسها حشمانة:غتكون احسن غتوقع فحياتي
عادل:كنواعدك معايا عمرك تكوني مغبونة قبل ما تكوني ديالي راه فيك كلشي
روعة حطات يديها على خدو وعينيهم على بعض عارفة بلي دايرها كلشي بالنسبة حيت معندوش خواتاتو وحتى الام ديالو متوفية وباباه مزوج نطقات بكل حب:وانا ديما معاااك عمرني نخليك حتى نت وعائلتي بوحدكم كلشي بالنسبة ليا نت لي كنت كنتسنى هدا شحال
عادل شد لها فيديها لي على وجهو وباسها فوسط الرحى ديالها لي خلاه يعشقها هو تواضعها واخا تاهو بخدمتو وقاد براسو ولكن تتبقى هي بنت مالين الشي بقاو هكاك على حالهم تتمشاو وعايشين الحب حتى جبد واحد البلان
عادل:آه حݣا فين تتعرفي زينة مشيت شكرتها على لي دارت معانا وسولتها عليك قالت لي معرفة قديمة صراحة درويشة ديك البنت
روعة غير سمعات سميتها جمعات الضحكة ضارت تتشوف فلبحر لي كضرب فوجها تنهدات وهي شاردة خلاتو غير كشوف فيها حتى حط يديه على كتفها رجعات شافت فيه وكأنها فاقت من سهوتها نزلات راسها للأرض ونطقات
روعة:زينة كانت عشيرتي تعرفت عليها فاش كنا كنمشيو كل صيف للفيرمى لي عندنا فتازا وكان باغي يتزوج بيها خويا يزيد ولكن خلاتو
عادل داكشي لي كان كسمع ثقيل على وذنيه كيفاش زينة مع يزيد وهاهي دابا خدامة عندو عادي وعلاش خلاتو كاين شي وحدة تكره واحد ميسور وظريف بحالو
عادل:وعلاش دارت هادشي
روعة هزات كتافها وعينيها على البحر:حتى حد ما عارف باتت ما صبحات حتى عاود بانت عاوتاني عندو فالشركة المهم قصة طوييلة مبغيتش نهضر فيها دابا وحنا فرحانين المهم هادشي يبقى بيناتنا اقسم بالله معارفو حتى حد من غير القراب فقط
عادل حرك راسو بآه اكيد راه مغيخرج حتى كلمة حيت اصلا بعيد على هادشي هو ولكن زينة ضريفة علاش ادير هادشي ويزيد حتى هو الله يعمرها سلعة علاش تنهد وهو كفكر ضور يديه على كتافها وهو هكاك على حالهم
فبلاصة أخرى بالضبط دار ام الغيث
ام الغيث عينيها خرجو وهي تتسمع بلان سامية والشوافة:اويلي هادي راه خطيييرة جاب الله جات غير عند نبيلة غا زافطة ولكن تخاف تمشي عند شي وحدة متمكنة داك الساع مغنكونوش عارفين
زينة وهي تتفكر: عندي واحد لبلان فدماغي سمعيني اماماتي وزيدينا شي حاجة اخرى
اماماتي وزيدينا شي حاجة اخرى
بدات تتعاود ليها لبلان وعاودات ليها حتى شنو قالت لنبيلة وخلعاتها وام الغيث غير تتسمع فالأخير تبسمااات:هاي هاي اري داك الراس نبوسوو ونزيدك حاجة أخرى من جيهتو هو
بدات تتقولي شنو دير وكيفاش توصلها ليه هو وزينة حالة ودنيها وعينيها وݣاع الثقابي وهي تتنسق فدماغها وتتبلاني مع سالات ام الغيث وهو يتسالمو باليد زعما المهمة غتبدا وكلشي هو هداك
ام الغيث:الدراري خلي فلوسهم على حسابي
زينة فهاد اللحظة طلاحت عليها تتبوس فيها وتعنق:كنحماااااق علييييك
ام الغيث تتبوس فيها:نمووووت معاك نت بينا ولا بيها على قلة الرجال وزايدون يكون غير كصلي ومتاقي الله عمر تآذيه شي حاجة
زينة تنهدات فاش طاح فبالها فعلا شاد طريق الله كصلي غير دعاوي ميمتو يحميوه هنا طلات من السرجم فاش سمعت صوت واحد من دوك لي غادي يحتاجوهم فالخطة قالت ليه يتكلم لأم الغيث وطلع كجري كان شاب من اصحاب البطالة وشد الحيط فراس الدرب ليطيح وهاد النوع هو لي كنفع ويصلاح فالبلانات
ام الغيث:غيكونو معاك زوج آخرين بغيتك تجيبهم لي ميكونوش ولاد السيكتور وتاحد مكعرفهم
الولد:كوني هانيا الله ياودي انا دابا نصوني ونقطع يحضرو
ام الغيث:هاه وماشفتي ما سمعتي وراه غنتهلا فيك
الولد:لهلا يحشمنا دابا غنوجد الحطة والصوت وكلشي غيدوز هو هداك
ام الغيث:يلاه جرييي
الولد زاد وزينة كانت جالسة تتقلب على سامية فالفايسبوك لي خدات من المعلومات ودخلات لانستغرام ديالها تتقلب حتى بانو ليها شي تصاور حدا الڤيلا فين ساكنة لي بانت ليها نفس الشارع فين كاينة دار عائلة يزيد
زينة:معرفتش واش تقدر تشوفهم ولا لا حيت متاكدة الناس لي كنعرف فالشركة مكحملوهاش مغتكونش عندهم نمرتها
ام الغيث:تاحنا معندنا ميدار نبقاو نسيفطو فيهم حتى يوصلوها مالنا شنو تابعنا بلاتي عندي واحد النمرة قديمة شحال مبقيت خدمتها انا نقلب عليها غتنفعنا فلبلان ديالو هو
زينة كانت مركزة دخلات لكونط فايس ديالها مسحات السمية وبدلاتها وحيدات كلشي مكانتش اصلا دايرة فيه تصاورها دخلات عند سامية جيهة وبدات تطبق داكشي لي فكرات فيه وام الغيث رجعات هازة لاكارط دالنمرة وتاهي كتزيدها فيخرات ونفس الشي دارتو فانستاغرام
وجلسو كدرسو داكشي لي بقى من الخطة
داز الوقت وطاح الظلام كانو جايين يزيد ووليد فالطوموبيل كهضرو بخصوص لاصال لي ناوي يفتاتحو قريب وغيكون اول مشروع غادي يدير بحكم انه كحماق على لفيتنس وكل ما كتعلق بالرياضه ختار يدير مشاريعو بوحدو بعيد على الموضى وحرفة عائلتو
يزيد:راه جا فموقع استراتيجي وباين وواضح غتخدم حتى على مواقع التواصل راه كلشي ولا غير بيهم
وليد:ويااااه والله حتى باغي غير فوقاش نبدا واخا بانتلي ديك الليسي لي جات حداه فشكل
يزيد:مزيان الحماس ولكن وفر منو شوية على قبل لي جاااي ان شاءالله بالنسبة الليسي غا دراري صغار هادوك ماعندك ما دير ليهم العطلة يغبر كلشي
وليد:ان شاءالله الخاوة
كان كسمع لكلام خوه بتأني حيت عارف مغيز فكلشي وعندو عقل مدبر وكشوف على تيساع الامور ومن ݣاع الجوايه
وليد بدا كقلب فتيليفونو وهو كهضر:اخي العزيز نت عارفني مكنقدرش نعيش بلا موسيقى غا صبر عليا هاد خمسة الدقايق لي بقات
يزيد عينيه على الطريق وهو صايݣ:خود راحتك
كان عكس خوه كبغي الكالم وحتى فالطوموبيل ولكن معندو ميقدرش يقوله لا على شي حاجة بحال هادي طلع وليد المزيكا وتحمس وحدة من ورا وحدة تطلقات وحدة خلات وليد يتحمس كثر ويبدا يغني معاها
شكون لي ݣال نطلاقاو من بعد فراقنا
ياكنت نݣول موحال نلقاك وتلقايني
ساعة ضار الحال وربي راه جمعنا
طلاقات عمري عينيك مع عينيا
شفتك سهييت والارض ضارت بيا
تفكرت نهار لي ليه خدعتيني💔
وليد كان محمس وطالق حلوقو بلاما يدي ما يجيب بشنو خدم اما يزيد غير كان صايݣ عينيه على الطريق ولكن علقو كانو مع الكلمات حس بالاغنية مكتوبة عليه نيشان لانه حتى هو نهار شاف السيڤي ديالها تصدم حتى هو قال عمرو يعاود يشفوها ولا يطلاقاها حتى هو خدعاتو امراة
تنهد ورجع لواقعو كشوف فخوه كيف كيف معاق بوالو بلي طلق اغنية كدوي على قصتو خوه مع لي بغاها ومصدقاتش غير كغني وشدو الحماس بحال البغل وصلو قدام دار واليديهم وليد نزل سبقو وبقى هو مع شعل الطيلي بانليه ميساج من نمرة غريبة مع دخل ليه قراه وشاف دوك التصاور بعدما حقق فيهم وهو يتبسم باستهزاء وهو كقرا فداك الميساج لي من مجهول ومسيفط ليه الدليل من الفوق تصاور مع دوك الكلمات لي كتمعن فيهم مزيااان
(ماشي مهم شكون ولكن المهم هو رد بالك راهم ناويين لك على الغذر هادي دار دالشوافة ولكن فالأصل غير نصابة ليوم بنت عمك جات عند وحدة مغتئدر تنفعها بوالو ولكن غدا تئدر تمشي عند وحدة متمكنة وراك عارف مزيان علاياش غتكون جاية عندها)
كانو مسيفطين ليه داكشي بالدليل بقى كشوف فدوك الديور وكحقق فديك المنطقة مزيان وهو كفكر فيها عمر لي سالاو لها الحلول دالأرض بحال ربي خالقو غير هو تعيا ماطير ماعندها ما تصور منو ماحدو متبع طريق الله فراه هو الحامي والمنقذ والشافي اعلى ما فخيلها تركبو
فنفس الوقت فدار زينة كانت كتنصب العشى ختها كانت دايرة تجي داك النهار ولكن أجلات حتى لغدا التيباري كتفرج فالصالة ومسعودة حداه تتصلي العشى سكينة تتحفض ويوسف خارج مسخر كلا فين مدهي راسها زاند عليها فالكوزينة وهي تتفكر فالضربة الجاية كتبات ليه ميساج بعدما طلبات لبنى ضبر لها فيها من عند الكونطابل بحجة انها بغات طلبو على يومين ورا الكونجي غتسافر كتحذرو فيه باسم مجهول مبغاتش تبان وكذلك سامية سيفطات لها باش تردعها وترجع اللور حيت عارفاها مغتبغيش الشوهة مزالين ليها شلا حوايج والخطة مكملاتش وغادية دقة دقة المهم هو يكون على بال ويحضي راسو وحوايجو واخا عارف ربي معاه لانه مومن ومتاقيه مكتفوتوش الصلاة ولكن قلبها مهناهاش عليه شحال من واحد خرجو عليه بالمجامر وشحال من وحدة تسلب منها زينها بالتوكال تنهدات وهي تتقطع فالبطاطا وتطلب سيدي ربي فنفسها لكانت ناوية ليه على خزيت ميصدقش ليهاا ويبعدها عليه
نهار جديد تقلبات على جنبها وهي ناعسة ومادة يديها تتقلب على التيليفون لي كصوني هدا نهارها الثاني فالكونجي كتصبح شوية مكرشخة فالنعاس وخصوصا داك النهار خوتها قاريين تالعشية هزات الطيلي ودارتو فودنيها وجاوبات بصوت نعسان وهي سادة عينيها:آلو
يزيد:آلو سلام عليكم
زينة فهاد اللحظة طرطقات عينيها وناضت قافزة جلسات:سي يزيد صباح الخير
يزيد نيشان:صباح الخير احم جي مع العشرة حيدي واحد الخدمة دغيا
زينة: آه صافي واخا انا غنجي
قطع عليها داك الساع شافت التيليفون كانت نمرتو الشخصية بلعات ريقها شوية ياكما حس بشي حاجة وحتى الا حس هي نيتها زوينة لكن خافت انه يخرج فيها ويقلبها لها حيت هاديك بنت عمو وهي عندها معاه سوابق داكشي باش مغيتيقهاش الا كان عاق ناضت دغيا لبسات عليها ووجدات لفطور علمات مسعودة بلي عيطو لها على غفلة ومشات بعد مدة نزلات من الطوبيس دغيا وخفات رجليها مبقى والو للعشرة باينة شي حاجة مهم مدام معيط لها بنمرتو وصلات للشركة لقات التحية على السيكيريتي ودخلات بانت ليها البنت لي فلاغيسيبسيو مكايناش فهمات علاش هو لي تاصل بنمرتو وصلات لمكتبها تأنسطالات دغيا وقصداتو دقات بشوية ودخلات بعد الإذن ديالو
زينة:سلام موسيو انا يلاه وصلت شنو خاصني ندير
يزيد كانو عينيه على لبيسي هز فيها راسو طلعها ونزلها دغيا ونطق:غطلاقاي عادل مسيفط لك ليزانڤيطاسيو ديال حفلة راس العام سيفطيهم لݣاع الناس المعروضين ومين تسالي سيري عند الكونطابل غيعطيك واحد الضوصي جيبيه هو والضوصي ديال الشركة الصينية
حركات راسها بآه وخرجات قصدات بيروها وبدات الخدمة كانت الحفلة لي دوات ليها عليها لبنى بمناسبة ارباح الشركة وبلي عام داز غيدخل فالأرشيف وغيجي عام جديد كانو ليزانڤيطاسيو كلهم غير الموظفين والناس البرانيين قلال شافت لانڤيطاسيو ديالها بسميتها تبسمات باغية نيت غا تفوج بقات هكاك غارقة فالخدمة وكانو شي موظفين قلااال كانو تاهما
سالات خدمتها ومشات عند الكونطابل عطاها الضوصي وقصدات لبيرو ديزيد دقات ودخلات كان جالس كهضر فالتيليفون حطات ليه الملف قدامو ورجعات اللور بانو لها شي وراق طايحين حطات تيليفونها فوق الكرسي وتحنات جمعاتهم مع حطاتهم ليه حيد الطيلي شوية ونطق باستنكار:فين هو الضوصي ديال الشركة؟
زينة عاد تفكرات راه وصاه عليها وهي نساتو بلعات ريقها شوية ونطقات:نسيتو انا غنمشي نجيبو
يزيد:وشكتسنااااي؟
لاح عليها كلامو وتلفت ككمل الهضرة عادي زفرات وزادت معصبة بعدما شتت لها كرامتها ثاني قدام هداك لي كهضر معاه ومتسوقش دخلات لبيرو ديالها معالم بيها غير الله مفقوصة بدات تتهضر بوحدها وهي محاساش براااسها:سبحان لي ما يسهى اويلي راه حنا غا بنادم ميقدرش يهضر بشوية كي الناس تقول ماشي مدير وولد عائلة مبقالو والو ويجيب التيو ويقولي عندك عشرة الدقات فكلا يد ولا المرة الجاي تعاودي تنساي غدوزي فالفلاقة
زفرات ودارت يديها على خصرها حركات راسها بلا هزات الوراق لي نسات مجات فين ضور حتى كان وراها عينيها خرجو متأكدة ايكون سمع شقالت لأن ديك الساعة جاها الرد
يزيد بصوت هادي وبطنز:الا درتي علاش تستاهلي التيو مرحبا علاش لا ما طلبتي غير الموجود
ومع كمل كلامو لاح لها تيليفونها لي كان كصوني نساتو عندو فلبيرو ومجا فين يمشي حتى تلفت لها وهي مزال مكوفرية فبلاصتها مخرجة عينيها وعاود نطق بنفس النبرة بعدما خدا الملف
يزيد:الفلاقة مزيانة كتصلاح مزيان لصحاب الخفة واللسان الطويل
زاد وخلاها واقفة كارمة بلاصتها بدات تتصرفق فحناكها وهي تتندب حشمانة ومارݣة شدها بالجرم المشهود بدات تضرب على فمها وتتقول هاك افمي هاااااك جلسات وهي حشمانة دارت يديها على خدها وزفراااااات
فبلاصة اخرى كانت واقفة قدام باب الليسي تتسنى واحد صاحبتها بلعات ريقها فاش ودغيا ضارت عطات بالظهر فاش شافت وليد دايز من الجيهة لاخر ودخل لواحد لبلاصة رجعات تلفتات وهي تتشوف واش مشى وزفرات هادي المرة الثانية تتشوف كعمر هنا بزاف على هاد الحساب تنهدات على حالهم وعلى ليام لي خلاتها تشوفو وتخبى بعدما مكان صديق عزيييز عندها حتى بدات تتحس من جيهتو بشي حاجة كثر من الصداقة
تكات على واحد الطوموبيل وسهات وهي تتفكر شي حاجة من ايام زمااان ايام الحب بيت ختها وخوه والصداقة بينها وبينو
🤍2019 فــلاش بـاك تــازة🤍
جاية جارة الحمار لي حتى هو جار كروسة فيها السطولة كانت تتحاول تخليه يمشي فطريق مستقيمة حيت داكشي ثقيل عليها والسطولة كتقرقبو بالحجر وقفات قدام العوينة لي كانت خاوية هزات اول سطل وبدات تتعمر وهي واقفة ضارت تبسمات فاش شافتو جاي كدير الرياضة كجري بالشوية وقلب الطريق جيهتها سلم عليها وهي هازة فيه راسها ودايرة يديها على وجها مطاكية الشمس
وليد:نت صاڤا بيخير
سكينة:الحمدلله ونت كدايرين البنات
وليد: الحمدلله الله يحفضك
تلفت شاف السطولة وبرميل فالكروسة ضار شافيها ونطق:هادشي ديالكم غتعمريهم كاااملين؟
سكينة:اه عمي عبد اللطيف بغا يورد البهايم
وليد بقى كشوف فيها كيفاش خالو مسيفط بنت صغيرة قد بناتو لمهمة صعيبة بحال هدا وولادو شنو كديرو فديك اللحظة تما دايز واحد ولد خالو نيت شافو فبعضهم بنظرات حادة وضار عند سكينة هضر معاها بنبرة سلطوية:طلقي راسك نت وبراكة من الهضرة
لاح كلامو زاد وفديك اللحظة وليد تبعو وشد من قبو ضورو عندو شن/ق عليك:اول حاجة تعلم كيفاش تهضر وخصوصا مع الناس لي كقضيو لكم حاجتكم ثاني حاجة ترجل راه نت لي خاصك دير هادشي الرعواني
سكينة فديك اللحظة تدخلات وشدات فيه من ذراعو:طلق طلق من اوليد عفاك راه غيمشي يقولها لبابا وغيتجبد ليا الصداع
وليد عينيه قرطا/س على ولد خالو اصلا مكحملووش:تجيني خبارك خرجتي كلمة وحدة نحيييك وراك عارفني شكنسوا
وهنا دفعو بالجهد خلاه غادي وكرجع باللور وعينيه عليهم بحال الكليب ما لقى ما يقول وزاد سارطها بزز منو بلا حتى كلمة وليد تلفت عند سكينة لي كانت تتشوف فيه كيفاش تبدل لي شاف الضحك والتقشاب لي فيه ݣعما يقول قبيح بلا حتى كلمة مشى هز لها السطل لي عمر حطو لها فالكروسة وضار هز واحد آخر وعاونها عمراتهم كاملين لا هما لا للبرميل وجر معاها الكروسة حتى قربها للدار
رجعات لواقعها بعدما جات صاحبتها تنهدات وهي تتفكر لي فات حتى تضررات وبقى فيها الحال على لي طرا تاهي بكات على حال ختها وعلى فراق دوك الناس لي نعم الناس غير الله ياخد الحق فلي كان سبااب
داز الوقت وطاح الظلام وبالضبط فدار ام الغيث
ام الغيث كانت كتسمع لها وهي مخرجة عينيها هادشي كولو وقع كانت تتعاود لها على بلان الديفيلي كلامو لها فاش تحلف عليها التصاور لي تمسحو كلشي من غير لملاقية ديال تيباري ويزيد
ام الغيث:تي هادشي كولو ساكتة علييييه فيييلم هدا ولا مسلسل ب 60حلقة
زينة:ايوا هادشي لي كاين اماماتي راهو خاصو غير منين يشدني
ام الغيث:السيد مزال مزعوووط وغاير حتى قال براكة راه كلشي بااااين ابنتيييي كلشي باااين هضريييي معاااه وصلحي راه مزال كاين ميتصلح
شوفي نت كيف خايفة عليه من بنت عمو وهو كيفاش غاااير كيفاش خاف عليك فاش سخفتي هزك وشرا الدوا والتحاليل كيفما قالت لك السيدة
زينة تنهدات وسكتات وهي تتخمم كلشي باين كيفما تتقول لها حيت تاعي حسات ولكن مباغياش تيق مباغياش تبني أمل انهم غادي يرجعو وفاللخر تصدم لانه لي وقع مساهلاش
ام الغيث قرات افكارها:دابا نت شنو لي مخليك ساكتة وممتيقاش ومباغياش تخلي عينيك راه مزال كبغييييك ازينة ومزال كضربو النفس عليك
زينة تنهدات: اودييي غا خلي داك الجمل راݣد اماماتي
ام الغيث:عاوديلي شنو وقع راني مزال لحد الان معارفة والو علاش مشيتي نهار العرس
زينة الغصة وقفات فحلقها دارت يديها على وجها ورجعات حيداتهم:ماشي لخاطري والله ما لخاطري اماماتي هما لي بززو عليا
ام الغيث شدات فيها متشبتة بيها تعاود لها لان باين لي مخبي ماشي ساهل:شكون هما هادو ابنتي شكون بزز عليك تخلي لي كتبغيه نهار عرسكم
هزات فيها عينيها مغرغرين ودامعين ولفيلم لي وقع كولو داز قدام عينيها وهي تتحاول تلقى الكلام باش تعاود لها ديك الليلة المشؤومة لي بدلات كلشي نطقات بأول كلمة من الحقيقة الكاملة وكانت كتعني الشخص لي دار كلشي ورونهم ورجع اللور تتفرج فيهم تتع/ذبو كلهم
ام الغيث كانت كتسنى بفارغ الصبر أنها تسمع وتعرف شنو وقع شنو لي فرقهم وهي تتشوف الحب فعينيها ليه وهوغيرتو عليها واخا حاقد وقلبو مكسور زينة كانو عينيها غرغرو وهي تتحاول تلقى الكلمات باش تبدا وكأنها كدير مجهود كبير حيت فعلا تتفكر واحد الفترة السوداء لي غيرات حياتهم وهي سبابها فعد/ابها وعذ/ابو وعد/اب عائلاتهم
نطقات بصوت مقهور ممزوج ببحة ديال البكى وغصة طرطقات فحلقها:خالو هو لي داني هربني بزز عليا من العرس هئ هئ
دموعها طاحو سخان وهي تتهضر ام الغيث عقدات حجبانها شوية ونطقات بعدم فهم:وعلاش خالو دار هكا شنو دخلو فيكم وشمن رباح عندو
زينة بنفس نبرة الصوت المنهارة:حيت مدابز ومقاطع مع ختو لي هي مامات يزيد على الورث كان باغي يدير أي حاجة باش يآديها ودارني انا طرييق طمع با بلي غادي يكتب ليه فيرما الا وقف العرس وغياخدنا لولادو انا وسكينة وحيت خالو لباس عليه عندو الاراضي والفيرمات والغنم داكشي لي كان باغي با لي طمع و رجع اللور وخلاه دار ما بغا ونهار قضى الغرض ما عقلش عليه ومعطاه والو الحقد ديالو خلاه دمر ختو وولدها تشوهت انا فالدوار بلي راني ماشي عزبة داكشي باش هربت با فينما داز يلقى الناس كدويو ما بقى عندنا وجه فالدوار لا حنا لا عائلة يزيد من تما خوينا الدوار وجينا هنا وهما مبقاوش ݣاع عاودو مشاو للفيرما ديالهم تما
كانت تتعاود وتتحس بالخناجر كدخلو فقلبها لان ديك الليلة تبدل كلشي تسلبات منها سعادتها وحبها وايامها كمراهقة حيت منهار جات لكازا وهي فتمارة بدات تتعاود لها الفيلم كامل من الاول وابتداء من ديك الليلة
🤍فــلاش بـاك تــازة 2019🤍
الزغاريت والفيجطا والجوق خدام الداخل كثر من الخارج وجو دالفرحة مالي لمكان الناس شي جالس وشي واقف كشطح البراهش مزلعين فكل بلاصة السرباية داخلين خارجين بآتاي ودوازو ويوسف كذلك معاون اما سكينة واقفة قدام لبيت فين كتلبس ختها ممخلية حد يدخل كان جالس وسط الناس مقاداه فرحة بجبادور بيض تقليدي جايم ع فصالتو وطولو عاطياه جمالية على وسامتو وشهامتو كرجل مغربي مفرز هو العريس وسط الجماعة من الطيارة والفرحة باينة فعينيه وغير من حركات وتصرفاتو يديه على صدرو كحطها كل ما بارك ليه شي حد من بعيد وابتسامتو لي واسعة على شفايفو كتبينو شحال فرحان وعلاش لا وهو من شحال كتسنى فهاد اللحظة يتجمع مع لبغاها ليه قلبو وتولي ديالو وعلى دمتو وسميتو كشوف العدول حداه كتسناو كيفما تتسنى هو كثر منهم تنزل دغيا يشوفها كيف جات وهي عروسة ليه ويكتبو كتابهم وتكون ديالو ورفيقة دربو اليوم الفرحة فرحتين بزواجو وفنفس الوقت بالنفس لي حس بيها هدات شوية وهو كشوف خالو قال لبات زينة يديرو لحفلة عندو حيت هما مفحالهمش ودارهم على قد الحال اذن هدا فال زوين على ان الصلح قرب كشوف فماماه كيف فرحانة وضحكتها وسط الناس ساطعة تاهي مقاداها فرحة بزواج ولدها والخطوة لي دار خوها باه فرحان بيه حيت غيدير دارو ووليداتو تنهد براحة وهو كشوف هنا ولهيه وتتسنى الحب ديالو تنزل عندو خلاص مبقاش بزاف وتولي محسوبة عليه مكاين ليقولو علاش تتهضر معاها مغيبقاوش يتخباو فجنان الدرݣ باش يشوفو بعضهم مغيبقاوش يكتبو الرسائل لبعض باش يعرفو أحوالهم ضحك فنفسو على هاد اللحظات لي دازت بيناتهم وهي لي عززات حبهم
لفوق كانت جالسة قدام المراية فرحانة ومقاداها فرحة غطير مقادراش توصف فرحتها منهار جا خطبها وباها قبل مبقاتش هازاها الارض بالفرحة لابسة قفطان فالأبيض غادي للباج ماكياج خفيف مشيطة حتى هي خفيفة قد عمرها مع تاج صغيور فوق راسها وحنينة فيديداتها زينها طاغي وجمال عينيها اكثر كانت تتبان باقية صغيرة شي لي مخليها عروسة كيوت فرحتها باينة فعينيها وهي غتزوج بفارس احلامها ومغاديش تبقى تخاف من شي حد يشوف ولا تكذب على التيباري عاد تخرج تشوفو لا غتولي على سميتو ميحيدها ليه حد شدات فلخاتم دالخطبة لي مزين صبعها وتفكرات كيفاش ركبو ليها نهار الخطبة وشحال كانت فرحانة طبعات قبلة عليه وهي تتسنى تنزل بفارغ الصبر
كانو جايين بزوج قاصدين لبيت عبد اللطيف عينيه كيف الشرار ومراتو حداه هازة واحد الميكة وتتبلع ريقها والحزن كاسي وجها عارفة شنو غيوقع ولكن مغلوب على أمرها متقدرش تهضر
عبد اللطيف خاطب سكينة لي واقفة حدا لباب:سيري ابنتي قلبي على باك وكلميه ليا
سكينة لي كانت تاهي لابسة قفيطين وماشطة حركات راسها بآه وهي مبتاسمة ومشات هاد الايام ولا تتعامل معاهم مزيان مكغوت عليهم مكنهرهم
النݣافة بعدما سالات خرجات بحالها لانها كانت غتلبس غير لبيسة حيت غير ضريب الصداق زينة هزات راسها فيهم من تحت الڤوال وتبسمات لمرات عبد اللطيف لأنها كانت ظريفة ماشي بحالو جلسات حداها وحيداتو ليها على وجها بشوية وهي تتشوف فيها غزالة تبارك الله ومتستاهلش لي مخبي ليها كان تتشوف فيها بحزن زينة حسات بشي حاجة يلاه غتنطق وهو يسبقها عبد اللطيف مخاطب مرتو بنبرة غامضة
عبد اللطيف:طلقي راسك
فديك اللحظة مراتو حطات يديها على خد زينة ونطقات بكل حسرة:معرفتيش ربي شنو مخبي ليك الله يصبرك ويجعل أيامك لي جاية حسن من لي غدوز دابا
زينة مفهمات والو من كلامها وحتى حزنها هي من ديما ظريفة معاهم وكانت باغية راجلها يتصالح مع ختو خاصها تكون فرحانة دابا هنا بدات تتحيد ليها ليزاكسيسوار شي لخلا زينة توقف وتبعد عليها شوية:خالتي مليكة شنو كديري راه خاصني نزل دابا كتسناوني يزيد و العدول
فديك اللحظة جاتها تصرفيقة طيحاتها للأرض خلات مراتو شهقات وبداو دموعها كطيحو وهي تتحسر على حال هاد البنية لي طاحت فقلوب قاطعة لا من جيهة فعلة راجلها ولا باها لي باعها ورجع اللور زينة دموعها بداو كنزلو دارت يديها على خدها وهي طايحة للأرض مفاهمة والو هنا عبد اللطيف نطق بكل سلطة وغلظة وتهديد:غتنصلي عليا هاد الشراوط بلا حس وتزيدي قدامي ولا عليا بليمين حتى ندفنك فبلاصتك حية وميجيب حد خبارك يلاه طلقي راسك
شهقو بزوجات فاش شافوه جبد موس من جيبو موجهو جيهة زينة وكمل على كلامو بنفس النبرة:حسك منسمعوش لا نت لا هي ولا نقسم بالله حتى ندوز عليك من الوذن للوذن يلاه سربيي نت نصلي ليها
مراتو مليكة تحنات وهي تتبكي شدات فزينة ونوضاتها بدات تتحيد لها القفطان والتاج وكلشي وهي تتبكي لا حول لها ولا قوة مفاهمة والو وخايفة فنفس الوقت وهو كشوف فيها بشر وعارفاه يديرها يمشي يق/تلها ومكاين لي يحاسبو ولا ياخد حقها انسان سلطوي ومعندوش القلب تتبكي فصمت وبحرقة ومليكة تتواسيها بلمساتها على وجها حتى حيدات ليها كلشي وبدات تتلبس لها حوايج ديال الدراري وتجاكيطة كبيرة عليها دارت لها كاسكيطة وقب وماهي إلا دقايق حتى كانت واجدة من عروسة فرحانة بليلة فرحها لوحدة متنكرة بصفة ولد معارفاش علاش ولا آش واقع
عبد اللطيف مخاطب مراتو:شوية خرجي قولي ليهم مكايناش هربات(جر زينة من قرفادتها)زيدي نت قدامي
سمعات كلمة هربات قلبها نزل بين رجليها وقفات وهي تترجاه قبل ما يخرجو من لبيت شدات فيه ونطقات بترجي:عفاك اعمي عبد اللطيف منقدرش نمشي عفاك شنو درت الا مشيت ايتقلق عليا با ومي ويزيد عفااك
عبد اللطيف تبسم باستهزاء معارفاش باها لي باعها بالرخيص رجع نزل عليها بتصرفيقة ومليكة غير تتولول فنفسها حداه مقاداش تفكها شدها من عنقها وهي تتبكي والمو/س فيديه موجهو لها جيهة عينيها نطق وهو كارز على سنانو:ديري شي حس ولا شي حركة نحطهم ليك قدامك ونقط/عك طراف طراف ونرميك للكلاب يلاه زيدي قدامي وقطعي الحس والنفس قبل ما نقطعهم فيك انا
لمح الخاتم فيديها دغيا شدها بإحكام وحيدو لها من صبعها ورماه فالارض أمر مرتو متقيسوش باش لي غيدخل يشوفو وتبت التهمة حكمها من قرفادتها وزادو وهي مقادرة لا دوي لا تكلم تتبكي فصمت وخايفة وأصلا صغيرة ومغلوب على أمرها تربات تحني الراس وتسكت نازلين فالدروج بعدما قاليها تخشي يديها فجيبها حيت ناقشة غيفرشو بلي راها بنت الدنيا عامرة والداخل كثر من الخارج داكشي باش كان ساهل ينسلو من وسطهم وتاحد ما يجيب خبار عبد اللطيف وهو خارج لمح ختو غادية جاية مبسمة وسط الناس ضحك فنفسو باستهزاء وهو كتخايل وجها من هنا لشوية فاش ديع لخبار واش اتبقى ضاحكة ولا لا زينة خارجة من دار عرسها وقلبها تتقطع تدوز من حدا الناس لي كتسناو العروسة تنزل ومعارفينهاش هاهي خارجة دابا قدامهم ولكن ماشي بصفة عروسة خرجها من لباب دالكوزينة ونيشان دخلو مع الكوري وخرجو من بابو بلاما يدري حد وهي تتبكي فصمت وتتقطع فبالها يزيد لي دابا غيكون كتسنى واليديها شنو غيوقع فيهم الناس الحاضرين على بعد خطوات وقفو عبد اللطيف غير سمع الصوت كرز لزينة على قرفادتها اشارة من انه الا دارت شي حاجة متلوم الا راسها تلفت بشوية كانت راضية ختها واقفة بعيدة على الكوري
راضية:فين غادي اعمي عبد اللطيف دابا ختي زينة غتنزل وبغيناك تكون مع الشهود
عبد اللطيف:انا جاي ابنتي نمشي غا عند واحد السيد صاحبي جاي من فاس نجيبو عرضت عليه هاهو ولدو معايا نيت ونجي
حركات راسها بآه راضية ومشات دخلات خلات زينة عاضة على شفايفها وتتحرق ختها كانت قريبة ومعرفاتش بلي راه العروسة هي هاديك لي واقفة عاطياها بالضهر وكحاول عبد اللطيف يديرها فجنبو باش متحققش فيها الشوفة
جرها بالجهد وزادو وهي تتبكي فصمت وتتقطع بعد مسافة حتى وصلو للجنانات هنا وهي تسمع الحس ووقفو قدام شي حد مع هزات راسها شافت تيباري وهي تشهق ومشات عندو تتجري شدات فيه ورجعات وراه محمية بيه وهي تتبكي والريسيل سايح وحالتها حالة
زينة:با انا مبغيتش نمشي ابا هئ هئ عمي عبد اللطيف قال لخالتي مليكة تحيد ليا حوايج العروسة وخرجني من العرس هئ هئ
تيباري وعبد اللطيف كانو كشوفو فبعضياتهم وزينة تتبكي ومحمية بباها على عبد اللطيف شدات فيه من يدو ونطقات:يلاه ابا نمشيو يلاه الناس كتسناو والعدول حتى هما يزيد غادي يطلع لبيت باش نزل انا وياه ومغاديش يلقاني يلاه
فديك اللحظة التيباري ضرب يديه فجيبو وجبدت سوارت الطوموبيل ديال عبد اللطيف لي كان سبقو بيها وجابها ليه بعيدة على الدار وعلى انظار الناس ديال الڤيلاج حيت كلشي مدهي فالعرس
عبد اللطيف خداهم من عندو:سير سبقني وراك عارف شنو غادي دير ومنين غيسالي هادشي حلاوتك غتكون بالضوبل وعلاش تافقنا غادي يجيك وبسميتك
تيباري تبسم وهو تتخايل الفيرما والغنم والعز والزرع داخل خارج ويولي هو الآمر والناهي وميبقاش هو لي كآمرو فيه شد زينة من كتفها ونطق:سيري مع عمك
زينة فديك اللحظة خرجات عينيها وهي تتشوف فيه كانت كحسابلها غيشدها عندو ويغوت فعبد اللطيف حيت باغي يخسر لها عرسها ساعة شنو واقع مفهمات والو وواخا هكاك لصقات فيه بالجهد من حوايجو وهي تتبكي بهيستيرية
زينة:عفاااك اباااا عفااااااك خلينييي معاك مبغيتش نمشي هئ هئ بغيت نبقى معااااكم مي غادي تخلع عليا ياك عمرك خليتينا نباتو برا الدار فين بغيتيني نمشي دابا عفااااك
دفعها بالجهد عليه حتى طاحت ونطق:هادشي على مصلاحتك حتى تكبري وتفهمي
زاد وخلاها طايحة فالارض تتبكي وتشهق وتتعيط عليه مع بغات تنوض تبعو وهي تتبكي وتقول با متخلينيش شدها عبد اللطيف من شعرها داها وجابها وهو مغدد كبرد فيها الفقصة ديال ختو لي بالنسبة ليه أخيرا لقى باش يضربها ويهرس لها الجناح والكتاف زينة تتبكي وتعيط با على أمل يرجع وينقدها جمع معاها بتصرفيقة ثاني حتى جا فيها الخاتم لي داير فجنب فمها خلا قنوفتها كتنزف من الجنب دفعها ثاني بالجهد وهي مشاداش توازنها بالشدان لي شدها من شعرها والتصرفيق لي خدات طاحت نيشان جبهتها على الأرض ربي لي عالم بيها ناضت دايخة وبدات تترجع باللور خايفة منو وراسها كزدح دموعها كسيلو والريسيل ساح معارفاش شنو دارت ولا شنو واقع علاش كضربها علاش باها عطاها بضهرو علاش خرجوها من دار العرس واش دارت العار فين كاين المشكل فأنها غتزوج
عبد اللطيف كان كشوف فيها باحتقار وجهو وعينيه كعبرو على شحال هو انسان خبيث وشراااني نطق بنبرة استهزاء وهو كشوف فيها وفحالها:تنطابق السما مع الارض وميدخلش بيننا وسخ التراس ويتخلط مع دمنا
زيادة على انه باغي يآدي ختو مكانش حامل حتى ان فآخر يامهم دوك لي كانو كترسو عليهم يتناسبو معاهم تحنى جرها من دراعها دغيا وزاد بيها غادي بالزربة وهي تطيح وتجرجر فالأرض وتعاود تنوض ويديها غينصلها لها خشاها فالطوموبيل وركب هو وديمارا كانت تتشوف من الزاج تتبان لها الدار بعيييدة والضواو شاعلين دابا شوية غيعرفو غيابها وغتقربل قلبها كضرها على هادشي لي وقع ومعارفاش علاش تتقطع على مها غتخاف عليها على باها لي عطاها بضهرو وعلى اكثر حاجة لي هي داك لي جالس فرحان كتسنى فيها تنزل عندو باش يكتبو كتاب حياتهم لي غيجمعهم للأبد
شافت فيديها بزوج لي منقوشين بالحنة ومبينين على انها عروس ولكن مكملاتش فرحتها حالتها مرونة بالتراب وشعرها مشعكك فمها كسيل وجبهتها حمارت تجرتلات بعدما كانت فأبهى الحلة كلما بعدات الطوموبيل على الڤيلاج تتحس بقلبها تتقسم وهي مخلياه وراها
فالدار لي كانت ترونات بعدما وصل وقت العقد وعرفو العروسة مكايناش فبيتها كلشي كقلب والدنيا مقلوبة الهضرة كترات والقيل والقال يزيد نازل فالدروج عقلو خارج بعدما مشى طل فلبيت يتأكد وملقاهاش كدخل لكاع لبيوت كقلب والخاتم ديالها فيديه عقلو غيخرج في هي عنداك تكون واقعة لها شي حاجة بعدما كان فرحان دقايق هادي تقلب حالو للصدمة وغير مرفوع كجري من هنا ولهيه كقلب خرج وراه خوه وليد وروعة وشي دراري من العائلة كقلبو فالڤيلاج راضية وسكينة كسكتو فمسعودة لي معارفة والو ونهارت
سكينة:سكتيييي ختي مهربااااتش ختي غادي ترجع علاش تتقولي للناس هربات
كانت موجهة كلامها لبنت عبد اللطيف لي كانت قد زينة براسها مكانت عارفة والو على فعلة باها ولكن غا الحسد لي مخليها كتنشر الدعاية بلي العروسة غبرااات الفرح تقلب القرح كلشي ترون
فريدة جالسة مصدومة وبنتها انيسة حداها لي خرج كقلب مكعاودش يرجع يعني البنت غابرة تاحد مفهم علاش وشنو واقع لان كلشي كان عارف هاد الزواج على غير لعادة لانه مكانوش مبززين على العروسة وزيد العريس مزيان وميسور علاش اتهرب هنا بدا كشعل ديجانكتور على احتمالية تكون ماشي عزبة ولا دايرة شي فضيحة
كلشي تقلب وترون وتيباري وسط الرجال كسكتو فيه واولهم الحاج ابراهيم وهو كشاكشو خارجين صارع الدور
تيباري:شوهاتني بنت الحرام ليهودية شوهاتني قدام لي يسوا ولي ميسواش عليا بليمييين ونطيح فيها تندوز عليها من الودن تالودن اويلي ياويلييي آخر يامي تمرمدني برهوشة
الحاج ابراهيم براسو مصدوم ولكن داخل بخيط بيض وعقلانية:اسي تيباري لعن الشيطان وجلس الغوات مكجي من وراه غا الفضيحة معرفناش اشطاري لان البنت كانت بخاطرها وقابلة غا جلس وغنلقاو حل ولا زيد يلاه نخرج انا وياك نقلبو عليها
تيباري جلس ليهم فالارض وهو كندب ويتمرغ:علاياش غنقلب علايااش مشات الله يعرضها السلامة عمرها تعاود تدخل لداري عليا بليمين وباش كحلفو الشلاغمية تازاوا الحرار
غواتو كان واصل للعلام شي لخلا فريدة ومسعودة ينهارو ويتزاد على حالهم لانه عرفو المشكل اكبر والناس خرجو يقلبو وتاحد ما رجع يعطيهم غا شي خبار تبرد نفوسهم مليكة بوحدها لي كانت عارفة وجالسة وسطهم مقهوورة ومعالم بيها غير الله وهي تتشوف المنكر وقع وساكتة عليه ولكن ملقات جهد تحط لها الموس على عنقها تاهي
داز الوقت ولامن خبار يزيد مين خرج يقلب معاودش يرجع خرج بحالتو دالعرس مسكين بعدما كان خاص يكون بارز وفرحان مع مراتو بدات تتفرتك الجقلة الا المقربين لي بقاو مشاركين الحزن والصدمة والعرس تقلب لجنازة ودازت هاد الليلة كارتية بكل المقاييس
حاطة راسها على الحيط ومكمشة جبهتها زراقت وحالها معالم بيه غير الله يومين وهي فهاد الدار محبوسة بوحدها منهار هربها من الدار ديك الليلة وهي هنا معاودش طل عليها تتجي واحد المرة تتحل عليها تعطيها الماكلة ولبغات تمشي لطواليط وهي حاضياها وتترجعها لبيت شنو غيكون واقع فيهم وفيه هو كيفاش خلات الدوار وراها قلبها تتحرق وعاطياها غير للبكى حتى عينيها تنفخو فديك اللحظة سمعات لباب تفتح تلفتات كان عند بالها ديك السيدة ولكن غير شافتو قلبها تقبض عليها ووقفات نطقات بقهرة وترجي وحالها يبكي الدم:عفاك اعمي عبد اللطيف خليني نمشي للدار راهم غادي يكونو تخلعو عليا
عبد اللطيف كان هاز دفتار وستيلو وفيدو لاخرة سمطة جرها من دراعها ودفعها للارض رجعها جلسها وهي تتبكي لاح عليها داك الدفتار وستيلو ونزل عليها بالسمطة لدراعها حتى غوتات وهي تتشهق كملي عليها تكتب وهي قلبها تتقطع عاد فهمات لبلان وعاد فهمات بلي داروها طريق باش يضربو عائلتو مع كل مرة تتهز راسو طلبو حيت داك الكلام لي كقولها كتبي قاصح كيفاش ايكون حال يزيد الا قراه كنزل عليها بالسمطة حتى زرق لها لحمها بلا رحمة بلا شفقة حتى كملات وخدا لها ديك الورقة وهو كشوف فيها هادي هي باش غيخليوه يطج هو وطريكتو حيت متاقش يومين هو كقلب وجا حتى لفاس عرفوه غادي يلصقهم ويرونهم وكيفما تشكى ليه التيباري قالو بلي راه كتبعو ولاصقو داكشي باش فكر فحيلة ثانية طيرو لهم من الطريق زاد وخلاها سد عليها ثاني وهي تتبكي بحرقة وتتشهق كانت بحالا فحلم زوين وفاقت منو على كابوس كلشي سالا بانليها صافي مستحيل يعاود يشوف فيها بعد الرسالة وانها هربات منو بدات تتضرب فوجها وتنتف فراسها بهيستيرية وهي حاسة بلي تتقطع
هادشي كولو داز قدام عينيها بحال غير لبارح تتعاود ودموعها كطيحو بحرقة وام الغيث تتسمع وتاهي دموعها كطيحو مصدومة ومقهورة عليها مكانتش عارفة هادشي كولو واقع لها وهي مزال فهاد السن شافت لي ما يتشاف
زينة:مهربتش اماماتي هو لي بززو عليا خالو كان ضارب لحساب لكلشي كان خاصو غير يطبق ونجح فداكشي لي كان ناوي يدير من موراها بقيت تما شحال وهو من مور مشاف داكشي صدق نكر با بلي حد ما شافو فاش قاليه غنعطيك وغنكتب ليه وعاد با حس تاهو بحر الشمتة والشوهة لي كان الطمع عامي ليه عينيه عليها وخلاه ما يضربش لها حساب فينما مشى كدويو فينا الناس حتى صافي قررنا نخويو الڤيلاج
ام الغيث:ونت معاودش رجعتي بقيتي فديك الدار
زينة:جرى عليا خالو منها وبقيت تلتيام فالزنقة حتى حنات فيا واحد السيدة ودخلاتني لدارها وهي لي عطاتني عيطت لبا وجا عندي من تما جينا هنا لكازا وهما جاتنا خبارهم بلي عمرهم مشاو لڤيلاج و يزيد خوا لبلاد مدة طويلة تصوري حتى عمامي وخوالاتي حتى شي حد ما بقى بغا يهضر معانا ولا يسول فينا كحسابليهم انا مين دايرة شي فضيحة وداكشي باش هربت شفتي اماماتي علاش كنقولك مستحيل يكون مزال كحس بشي حاجة من جيهتي راه لي داز مكانش ساهل
ام الغيث فعلا مكانتش متوقعة هادشي لهاد الدرجة يكون وان كاينين ناس قاطعين كبغيو يآديو واحد من دمهم طلع المشكل اكبر مما كتصور مسحات دموعها وشدات فيها بحنان كانت عزيزة عليها ودابا غتزيدها لانها تعذبات فحياتها وقاصات وهي مزال صغيرة وجهدها ماشي ديال هاد التكرفيس
ام الغيث:انا مكنتش عارفة هادشي واصل لهاد الدرجة ولكن بغاك من نيتو ابنتي داكشي علاش متخليهش معذب حتى هو هضري معاه ريحيه وتحرري حتى نت من هاد الحمل لي هازة
زينة تتحرك راسها بلا:لا لا منقدرش اماماتي منقدرش هي لي عمرني ندير
ام الغيث:هما مفكروش فيك فاش دارو لي بغاو ونت هازة لهم الهم والدقة
زينة فهمات بلي كدق على تيباري لي عطاها بضهرو ومافكرش فيها وهي جالسة تتستر عليه:يدك منك واخا تكون مجدامة
ام الغيث:غنعاود نقولها واخا عاودتيلي القصة كاملة مزال كبغيك ومزال فقلبو لان حر الشمتة صعييب والفقصة هي لمخلياه هكاك متقمص شخصية ماشي ديالو ابنتيي نت تعرفي مغاديش نبزز عليك ولكن عقلي عليها نهار غادي يعرف غيرطاب داك الساع لانه واخا مسولكش علاش مشيتي نهار غتبغي تعاودي ليه غيسمع ليك
زعما يتيقها من مور ݣاع هاد السنين شدات فراسها لي غادي يطرطق عليها فاش تفكرات لي داز حسات بلي شوية تنفسات فاش عاودات لأم الغيث لي هي سندها وبئر اسرارها جراتها عندها عنقاتها بالجهد بقات فيها بزااف وهي كطبطب لها على ضهرها
ام الغيث:انا معااااك وديما معاااك وان شاءالله ربي راه كشوف والحق يبان يبان طال الزمان ولا قصار
زينة تنهدات وحطات راسها على ام الغيث معنقاها تاهي محتاجة سند لي يقويها ويعاونها تبني جناوح جداد وروح جديدة لي هدهم لها الزمان قبل الوقت
دازت هاد الليلة وجا نهار جديييد
كانت فلبيرو ديالو فالشركة كقاد شي حاجات فلبيسي ديالو وكشوف فالمݣانة عندو الطيارة من مور ساعتين غيمشي لهولندا يرتاح شوية فهاد الكونجي منها نيت يشوف عمتو حيت عايشة تما وهي لي مكلفة بليبوتيك ديال الشركة تما كمل وناض سد لبيرو ديالو ومجا فين يزيد حتى شاف لبيرو ديالها محلول غتكون غير الفام دميناج نساتو تقدم ليه ومع بغا يسد لباب بانليه الورد لي كان جاها حاطاه فواحد الڤاز حداها يلاه تفكرو داك النهار كان زربان قصدو ونيشان هزو وخرج سد وراه لباب وهو غادي كنتش فيه ويقطعو حتى وصل لبوبيل لي كاينة فالدروج لاحو فيها ببرود وزاد كمسح فيديه عادي بحالا مدار والو
فبلاصة اخرى
كانو عينيها خارجين والطيلي فيديها كترعدو وهي تتقرا داك الميساج لي وصلها من مجهول وزايدها بتصاورها يعني شدها بالجرم المشهود سعيدة حداها تتولول تاهي شداتها الرعدة
سعيدة:واش نت حمقة تتقلبي على الشووووهة واش نت اي واحد حتى تمشي لشوافة برجلييك ها اشغيوقع الا باك عرف والا وصلاتو هو نيييت شكون يبغي حرااكة المجامر حنا بغيناه يجي بالشعق حيت راني عارفة شكاين ومدوزتش القليل شفت بعيني داكشي مدايمش وخصوصا هو متاقي لي خلقو متشد فيه حاجة نبصم ليك عليها بالطابع لي مجا بخاطر ما يجي بمجامر وحتى الا جا مدايمش
سامية كانت كلها تترجف خايفة شكون ممكن يكون شي حد تبعها ولا شي حد كعرفها شافها تما اشداها وهي كانت غادية غير تسول مقدرات تقول والو فكرة انها تمشي وتوصل وتشوه مقدراتش ابدا تستحملها ورجعات تتقرا داك الميساج هدا باين كعرفها حيت جابد ليها اللاصق دحياتها
(غايجي فبالك شكون انا وكن ماشي كثر من أنك تخايلي هادشي يتعرف ويخرج للناس لي كشوفوك بشوفة اخرى ونت من ارقى العائلات فالمغرب سامية الوزاني لي قارية فرنسا وساكنة فأرقى حي فكازا وخدامة فالشركة دعمها مدير الموارد البشرية يا حسرة تكون من هاد النوع غيضحكو عليك مزيان 😉)
دارت يديها على فمها وجلسات تتخمم والخلعة طالعة معاها من طرمتها تخااااف ما تحشم ولات كي الكلبة حيت فعلا الموضوع متقدرش تخايلو الا عرف باها وعائلتو ودوك لي خدامين فالشركة لي لاعبة عليهم ست الكل وصحابها والمعارف غير الفكرة تخليها تلبد اما الواقع حاجة اخرى
داز الوقت حتى تعاشات العشية بالضبط فدار زينة كانت معانقة هي وختها راضية بحرارة توحشو بعضهم راجلها كسلم على مسعودة والتيباري جو زوين فالدار كفرح الوالدين فاش كشوفو بنتهم المزوجة جات تشوفهم وطمنهم بلي عايشة مزيان ومرتاحة فزواجها جلسو مجموعين وزينة وراضية فالكوزينة كتحتو ويحيدو الوحش من بعضهم
راضية تتستف المسمن والحلوى لي جابت:ايوا كدايرة الخدمة جلستو دابا
زينة تتنقي النعناع:حمدالله مزيانة هاحنا معديين عطاونا هاد السيمانة ديال راس العام
راضية:ايوا مزيان توحشتكم والله طلبتو يخليني نكمل سيمانة سبحان الله هانت تانت جالسة
زينة:تانا والله بقات بلاصتك وسطنا صح من قال دار لبنات خاوية
راضية:هاد التيو ازينة خاص يتبدل الا خرجنا نجيبو واحد جديد يركبو سعيد
زينة:صافي واخا راه فبالي غا مول لهري صابح ساد هاد اليومين
جلسات زينة فالسداري ديال الكوزينة تتنقي النعناع غادكرات لها التيو وهي تفكر نهار حصلها وقالها خاصك العصى محساتش حتى تبسمات واخا حشمات هاد الموقف نفسو دكرها بواحد البلان فكاهي كان وقع لها معاه قبل عمرها تنسااااه كان داك الساع يلاه فأيامهم الاولى مزال معتارفو لبعض كان داكشي غير بالافعال والتلميحات
🤍فــلاش بـاك تــازة 2019🤍
جالسة هي واختها سكينة سارحين واحد زوج بݣرات سكينة جالسة قدام زينة كظفر لها شعرها سمعو الحس بزوج وهما يتلفتو كان جاي وكهضر فالتيليفون زينة بقات تتشوف فيه بلاما تحس ونسات ختها لي كتمشط لها
سكينة:وصايبي ليا الخرية
زينة نغزاتها:سكتييي عطيك الويل
سكينة جمعات سوالفها وجلسات حداها وهما كشوفو فيه زينة يديها على خدها وساهية فيه مكتقدرش تحيد عينيها عليه فاش مككونش كشوف فيها
سكينة:شحال زويين
زينة وهي ساهلة:بزااااف عمرني شفت شي حد زويين بحااالو كن غير يبقى ديما هنا فالفيلاج
كانو كهضرو بالامازيغية وواخدين راحتهم بزوجات وهما كشوفو فيه وكتغزلو بوسامتو بنية عادية راهم غاصغارات فديك اللحظة سكينة ناضت مشات للدار وخلاتها غير هي تتشوف فيه مع كمل الابيل ديالو تلفت شوية نزلات راسها وعاود شافت فيه هنا تبسم ليها ولقى عليها التحية:كدايرة لبااس
زينة بخجل:الحمدلله ربي خليك
وضورات وجها فاش شافتو مبقاش عاطيها بالضهر بحال قبيلة كان كقلب فالتيليفون ومنزل راسو مرة مرة تترمي ليه شي شوفة حتى هز راسو دارو فجيبو وتما غادي بحالو ولكن قبل وقف ورجع شافيها:فكريني شنو سميتك؟
زينة وعينيها على الارض نطقات بصوت رقيق خجول:سميتي زينة
يزيد عينيه عليها:حتى نت زوينة ازينة
هنا هزات فيه راسها مخرجة عينيها ضحك لها وزاد مخليها وراه حشمانة ومصدومة مكانش كحسابليها كفهم الشلحة وهي واخدة راسها هي وختها لي اصلا صغيرة عادي الشوهة ديالها هي
رجعات لواقعها فاش دخلات عليهم مسعودة: سعدي سعدي ببناتي
راضية ضارت وعنقات ماماها توحشاتها بزاااف زينة تبسمات وهي مواصلة خدمتها تتنقي النعناع وتتبسم كان جو زوين سائد على الدار طلات على تيباري لقاتو كهضر مع سعيد راجل راضية ومعاهم يوسف تزادت واحد الروح خصوصا انها هي جالسة كونجي وحتى بالمجية ديال ختها
داز الوقت خرجو مجموعين تعشاو على برا على حساب راجل راضية ضحكو وفوجو ومن بعد رجعو وروح ديال جماعة العائلة طاغية عليهم تكاو فالصالة الخوت ومعاهم حتى راجل راضية لي كان اجتماعي وضحوكي جلسو على الضحك والتقشاب فداك الليل حتى بداو كنعسو بواحد بلواحد كانت مزال فايقة شادة الطيلي وتتشوف فالكونط ديال سامية زعما تكون شافت الميساج وتردعات شوية واخا كان فيه تهديد ولكن متقدرش تمشي ديكلاري السحور راه براسو جنحة داك الكونط حيداتو فور ما سيفطات ليها بيه هو والنمرة تتشوف فتصاورها زعما زوينة غير مطيحة الدل على راسها كل مرة فبلاد زعما عندها كلشي علاش دايرة هادشي كامل على راجل ماشي حتى مفحالهاش لي نقولو طامعة راه عطى الله الرجال بقات تتشوف حتى بانت ليها تصويرة مع روعة مطاݣياها دخلات لقات سادة الكونط دايراه بريف بقات تتشوف فتصويرة البروفيل ديالها وتتنهد وهي تتفكر فصداقتهم لي كانت زوينة رجعات تتقلب فكونط سامية فالناس لي متابعة بالصدفة كتبات فالبحث Yazid elwazani وهو يطلع ليها حسابو متسناتش بزاف حتى دخلات ليه لاحظات بلي حتى الحسابات على مواقع التواصل كبينو ليك اذا كان واحد ملعق ولا لا وهادشي نطابق عليه هو غير من تصاورو كلا مرة فجيهة بدات تتفلي فيهم وحدة بوحدة وغير من الستوري عرفاتو مشى لهولندا تتشوف فتصاورو وكل مرة تتسهى فوحدة وفيه هو بالضبط كل تصويرة فبلاصة ها فرنسا ها ايطاليا ها اسبانيا ها مريكان ها هولندا وهادشي عارفاه هي انه من عشاق السفر وزيد ربي عاطيه يسافر ويفوج مع راسو واصلا هما فالعطل كسافرو برا المغرب من غير الصيف كانو كدوزو شهر فالڤيلاج قبل ما تحرم عليهم مساكن يصدو لتما تنهدات وهي مزال تتشوف فتصاورو وتتبرݣݣ طلع لها وليد ودخلات لسطوري ديالو تاهو لقاتو فاسبانيا هو وروعة وأنيسة عايشين الحياة فرحانين خرجات من حياتهم بحالا عمرها كانت عضات على شفايفها شوية ورجعات لكونط يزيد بغات نشوف لمن داير ابوني واخا متابعينو قوة ولكن داير فولو غير لصفحات الرياضة صفحات ديال الدين ديال الثقافة وشي ناس أليبة تاهما قلال وشي بنات ديال العائلة عقلات عليهم وشي وحدات معدودات على رؤوس الاصابع كبانو سيدات اعمال يعني الواحد تعرفو خاتر غير من شنو كشوف وشنو تتفرج بقات هكاك مدوزة الوقت حتى داتها عينيها
داز الكونجي ايامو طايرين وعاديين كلها روتين وتزادتهم اضافة براضية بعدما جا راجلها جلس معاهم يومين ورجع لخدمتو وهي بقات معاهم ايام دوزوها بحالهم بحال ݣاع الناس كي ودعو العام لي غيخرج وكستعدو للعام لي داخل وكطلبو انه يكون حامل فطياتو السعادة وحاجات زوينة لي فبالو شي حاجة تحقق فيه ولي مريض يتشفى عما قريب ولي مسجون كطلب الفرج
كان النهار لي فيه الحفلة دالخدمة واقفة قدام المراية ووراها راضية تتقاد ليها الحزام ديال التكشيطة لي لابسة فالدعوة طالبين منهم يلبسو لباس تقليدي وحتى لبنى قالتها لها بلي الحفلة كدوز بحال شي عراسية كان دايرة مشيطة خفيفة فشعرها ومخليه مطلوق ميكاب خفيف ومركزة على عينيها لي تزادتهم جمالية بلميكاب ولونهم صندالة ديال الطالون وبوشيط دخلات أم الغيث جايبة لها الريحة رشاتها ليها وهي على فمها تبارك الله ماشاءالله
مسعودة تتشوف فبنتها بفرحة:تباركالله ماشاءالله على ابنيتي ويحفظها من العين
زينة طبعات قبلة على راسها ماماها ومشات عند باها فالصالة وقفات عليه:با كجييييتك
تيباري كشوف فيها شحال غزالة بنتو وطيبة قلبها زايداها زين على زين نطق وهو مبسم:زينة تبارك الله بحال سميتك
تقدمات عندو وطبعات قبلة على راسو وام الغيث تتشوف فيها هاد البنت آخرتها غتكون زوينة لانها بلي عاودات لها على شنو دار باها وشوف دابا كيف تتعامل معاه زعما
سكينة:حبيتك حبيتك أنا
زينة شداتها من خدودها:غير نشد بلاصتي معاهم مزيان وان شاءالله فينما كانت شي حفلة نديك معايا
سكينة:ان شاءالله ابب
دارت اللمسات الاخيرة لاحت عليها واحد العباية وخرجات هي وراضية وام الغيث غادين موصلينها عند لبنى لي غدوز عليها طلاقاو بيوسف كلعب الكورة مع الدراري زاد معاهم حتى هو
كان جالس فالقهوى ديالو كشوف فيها عينيه عليه هي فقط من دون الناس قطعات كلامو فمرة حاول ولكن والو ومزال غيحاول لان ميقدرش يبقى على هاد الحال إلا هي يصبر على اي واحد ساهي فيها وهي مقادة ومصايبة باينة غادية معروضة وجات غزاالة بقات متبعهم وكتنهد حتى غبرات
طلعات زينة بعدما لبنى سلمات عليهم وكاملين وعرفاتها على ختها راضية ودعوهم وهما كدعيو معاهم بالحماية وربي يحفضهم من العين
لبنى:غنشطح نشطح تنسخف باغى نشطح على كيتو نخرج السطريس ديال العام كامل
زينة:تانا كشدوني الهوايش صراحة
لبنى:جيتي فنة تبارك الله اصحيبتي الليلة نطرطقو العديان اولهم سامية
زينة:عويناتك الحب تانت بومبا هاديك غا خليها جايين نشطوها غنديرها بحالا مكايناش
الطريق كاملة وهما كهضرو وكوجدو الشطيح والرديح كان ظلام الحال والحفلة اتبدا مع تسعود كانت تتوجد راسها لانها حاسة شوية بالسطريس عارفة الموظفين كاملين ولكن الحفل اول مرة وزيد جايين بصفة اخرى ماشي الخدمة وصلو معطلين بنص ساعة بانو لها شي وحدين خارجين كتصورو قدام باب القاعة لي كانت راقية وكلشي البنات بالتقليدي والرجال بالكوستيمات الإجواء ديال عرس سطاسيونات لبنى الطوموبيل وخرجو بزوج فكامل اناقتهم لبنى كانت لابسة تكشيطة حمرا بمضمة صفرا وزينة بتكشيطة فالموطارد وتاهي مضمة صفرا واكسيسوارات خفاف كانو هما ولبنات كلهم حلوات بالفخامة المغربية❤️🇲🇦
وقفو معاهم وسلمو عليها وتصورو مجموعين ودخلو بزوجات هي ولبنى داخلين وكسلمو الموظفين كلشي مفركس حتى وصلو لقاعة كانو باديين شي كشطح وشي جالس وشي كتصور
لبنى:موسيو يزيد سنة سعيدة وان شاءالله نبقاو ديما مجموعين
زينة غير سمعات سميتو تلفتات كان واقف كصافح لبنى وابتسامة جانبية على وجهو وبكل ادب كهضر معاها بقات غير واقفة وتتشوف فديك اللحظة هز راسو فيها طلعها ونزلها هي بلاما تحس مدات ليه يديها بلا حتى كلمة ولكن مجات فين تحس براسها انه ممكن يخليها بلاكة كان صافحها حتى هو بلا حتى كلمة وعينيه عليها وقف عليه واحد وتشغل معاه هنا جراتها لبنى ومشاو ختارو طبلة وجلسو كان فيها منصور لي جاتو من الجنة والناس لانها جلسات حداه اخيرا غتكون قريبة ليه جلسو مجمعين مع الموظفين لي جالسين فالطبلة
منصور:جيتي غزالة تبارك الله
زينة ضارت عندو وتبسمات:ربي خليك
عادل وقف عليهم:سلام عليكم
نضم ليهم العنصر الفكاهي وجلس معاهم كان شد فكلشي يسالي من واحد يدوز لاخر حتى داز لزينة لي عرفات بلي روعة مقالت ليه والو مدام متبدلش فالتعامل ديالو معاها
الاوركسترا خدامة وجو زوين فآخر نهار من السنة تقول عرس وراقي لاكن القاعة ولا داكشي باش مجهز حتى من السرباية انيقين زينة لمحات عائلة الوزاني جالسين فطبلة بوحدهم الملكية زعما كانت طويلة ومترأسها الحاج ابراهيم فيها كلهم روعة انيسة وليد فريدة خوه سامية سعيدة عمتو لي ساكنة فهولندا نزلات لمغرب وولادها تنهدات تاهي تتعرفها لاشافتها مصيبة خوات راسها ميمكنش هي جاية تفوج وتجلس تخمم عام جديد دوزاتو جري وسطريس خصوصا فهاد الشهر اللخر لي قلب كلشي وداز بالكشايف تلفتات لمنصور لي مد ليها شكيليطة من داكشي لي محطوط فوق الطبلة كنقبو منو تبسمات ليه وخداتها ميمكنش تردها فوجهو وهي تتحس باهتمامو حلاتها وكلاتها وهي كضحك على واحد الكلمة قالها واحد الموظف جالس معاهم
عينيه عليها نيشان بحال شي سهم قبيلة ما طولش فيها الشوفة ولكن دابا مين مكتشوفش فيه فلاها مزيان وهي بالبلدي جايبة التمام لا فزين ولا قالب من بعيد منيش عليها ولكن ملامحو دغيا تبدلو وكرز على فكو وهو كشوف فيها كيف كضحك مع منصور لي كان كهضر معاها وكقرب لودنيها باش تسمعو كانت حركة عادية حيت الاوركسترا مجهدة ولكن بالنسبة ليه هو لا ولي زاد كثر هو فاش مد ليها شكلاطة وخداتها وهي تتضحك كان حاضيها لدرجة انه مسمعش السيد لي كهضر معاه
فديك اللحظة ناضو يشطحو فور ما دخل الداودي ونضم للأوركسترا لبنى تتجر فزينة بزز باش نوضاتها وكلشي تكب وسط القاعة وجلسو على الشطيح كانت واخا تتحشم تتشطح مزيان وغادية مع الايقاع ديال الشعبي لبنى كذلك وكاع البنات عادل خلاص شدو الحماس مخليهم كضحكو عليه وروعة من بعيد حاضياه وتتضحك وهي تتصفق شهاد الحمق بلاها سيدي ربي بيه فديك اللحظة كانت مونيا وصلات وكانت نشايطية نيشان دخلات وسطهم وبدات تتشطح مع عادل لي بالنسبة ليه عادي قدام روعة لانها اصلا السيدة كبيرة واربعينية فديك اللحظة مونيا لمحات زينة تسالمو على بعضهم وشدات فيها مونيا وبداو كشطحو بزوجات كلشي كشطح الا القليل لي غير واقف وكتفرج ومنهم يزيد عمو وباه
زينة فديك اللحظة كانت تتحرك بكتافها وتتصفق لمحات يزيد لي بدورو كان حاضيها ومراقب الفيلم والشطيح من الاول بدون سابق انذار خنزر فيها ودار ليها إشارة براسو مفهماتش بقات غير تتشوف فيه هنا وهو يلمح لها جيهة بلاصتها زعما سيري تجلسي طلعات حجبانها وهي مفاهمة والو وتتستوعب هنا جات واحد الموظفة عندها معاها شدات فيها وبداو كشطحو بزوجات بلاما تسوق ليه خلاتو كمسح على ذقنو وكحرك راسو بآه بحالا غير بلاتي داز الوقت فالشطيح والداودي منشط الجو كانت راجعة من الطواليط حتى طلاقات مع روعة لي جاية هازة جلايلها طلاقاو عينيهم وبقاو كشوفو فبعضهم هنا هنا روعة نزلات راسها ودازت من حداها بلا حتى كلمة زينة نزلات عينيها للارض دغيا لتاقطات الحلقة لي طاحت ليها تلفتات عندها ونطقات دغيا:روعة
روعة وقفات بلاصتها وتلفتات نص ضورة هنا زينة قربات لها ومدات ليها الحلقة ديالها تلفتات كاملة وخداتها من عندها تنهدات ونطقات وهي تتحاول متشوفش فيها ومتهزش فيها عينيها:شكرا
زينة:ماشي مشكل
زادت وخلاتها مع عطاتها بالضهر روعة هزات فيها عينيها وتنهدات محساتش كاع بلي طاحت ليها ووسط هاد العداوة كانت ممكن تاخدها ليها وتديها ولكن لا مزال كيفما هي عمرها مدات يديها على لي ماشي ديالها كيفما شحال هدا كانت مفحالهاش وكدخلها معاها لبيتها وعمر مشات ليها شي حاجة
غادية منزلة راسها وصوت الطالون عاطي رنة شادة فطرف من قفطانها وهنا مع هزات راسها بانليها جاي مكانش كشوف فيها حدها قربات دوز من حداه هبطات عينيها فديك اللحظة لي تساطحو شوية فالكتاف نطق:شدي الأرض حسن ليك
لاح عليها كلامو المحدود ولكن كان كعني بزاف وزاد خلاها واقفة فبلاصتها وتلفتات ممتيقاش هدا مالو واش الحبس فالشركة والحبس حتى هنا لي سمعو يقول بحالا نايضة بوحدها كي الشيخة وهي الناس النايض كثر من الجالس حركات راسها بلا وهي تتزفر وزادت
زينة قربات بشوية لعند الولد لي كان باغي يهضر معاها كان موظف معاهم:عفاك زينة واش واخا تدي لياسمين تيليفونها راه كاينة برا الله يحفضك
زينة خداتو من عندو:اه بيان سيغ ياك برا القاعة
حرك راسو بآه وزادت خرجات عطات للبنت تيليفونها كانت برا تتصور هي وصاحبتها ورجعات وهي غادية طلاقات بسامية جاية مطولاتش فيها الشوفة تفاديا لأي احتكاك ولكن مع دازت من حداها دخلاتها فيها بالجهد حتى خلاتها تفقد توازنها من مشداتش فلحيط وزادت ببرود
زينة ضارت مخنزرة ونطقات بانفعال: بشوية
سامية فهاد اللحظة ضارت عندها ونطقات:معايا؟
زينة:آه معاك نت مكتشوفيش راك ضربتيني
سامية فديك اللحظة شافت يزيد داخل قصداتو وقفات عليه زينة تاهي مشات وقفات عليهم شنو زعما غتخلعها بيه
سامية:قلت ليها مدرتهاش ليك بلعاني ولكن هي
جلسات تتهز وتحط والناس داخلة جاية
زينة:كن هضرتي بالاداب كانت غدوز مرور الكرام
سامية:راني هضرت بأدب داكشي باش مبغيتيش تحشمي وزيد مالني شنو درت فملك الله
زينة:راك كنت غطيحيني ومن المفروض عليك تعتاذري لانني ماشي كنسعى انا راني موظفة بحالي بحالك الاداب راه خاص يكون فينا ماشي غير كنهضرو وكنمتلو بلي كنتعاملو بيه
يزيد بنبرتو المعتادة معاها ممزوجة بنبرة آمرة:هضري بشوية
سامية مكرهاتش طلاح عليها ولكن قدام يزيد خاصها تبان هي لي كلاص سكتات وجلسات تتفرج خلاتها منها ليه يفرجها فيها
زينة شافت فيه:كنهضر بشوية كن كان العكس كانو ݣاع هاد الناس غيكونو كشوف فينا او لا
سامية:دابا شنو بغيتي مني عتاذرت منك علاش تتقلبي الا كان عندك شي مشكل معايا قوليه حيت بانليا ماشي مسألة انني دخلت فيك وصافي
زينة بهدوء:ماعندي معاك حتى مشكل وعمرو غيكون لانني جامعاني بيك غير الخدمة لكنمشي نصور فيها طرف ديال الخبز ماشي نجبد الصداعات ونهز فقلبي من جيهة الناس كن عتاذرتي بصح ݣعما نوصلو لهادشي دابا
سامية كانت تتشوف فيها كيف تتسرسبهم لها حيت شعلاتها وتتشوف فيه تاهو تتسناه يتدخل كان خاشي يديه فجيابو وكشوف فيها ببرود كيف مسرح لها اللسان عاود خاطبها بنفس النبرة:قلتها لك ديك المرة وغنعاودها عرفي كيفاش تهضري مع لي هاز السمية الشركة عرفي مقااامك اول حاجة عاد سمي راسك موظفة شقصتك نت بانتلي تزادت فيك واحد النغزة وخاص لي يحدها اشكتسواي حتى تستاهلي هاد الاعتذار ݣاع شكون نت
زينة حسات بكلامو بحال الموس فقلبها لانه ماشي من عوايدو يحتاقر المستوى وزيد لوخرا لي شعلاتها ورجعات اللور سرطاتها وبقات تابثة لانها قدام سامية لي كانت مبتاسمة شوية باستهزاء زينة نزلات راسها وعينيها للارض هنا سامية زادت تحلات لها هادشي لي تتعرف دير غير تنزل راسها فيها غير الفم يزيد براسو كان عاجبو الحال فاش كعطيها على ودنيها وتسكت وتنزل راسها
سكوتها مطولش بزاف فيساع هزات راسها وفيكسات عينيها فعينيه نيشان وتيرات فيه بواحد الهدوء مستفز
زينة:انا هي لي خليتها كطلع وتنزل فيك بحال العافية خمس سنين هادي
سامية عينيها خرجو حتى تحطو فوق حنوكها من بعد ما سمعاتها شقالت وفوجهو وكتعتارف ومفتاخرة بفعلتها هي شداتها الخلعة من ردة فعلو بلاصتها شافت فيه كان تابث والبرود بالنسبة ليه هو سيد الموقف اما هي عينيها كانو مزال فعينيه ومنزلاتهمش وكأنها تتقولو اجي حيدها ليا من فمي ولا كذبني الا قدرتي ياك هادشي لي وقع ديك كلمة اشساوية هي لي خلات العافية تشعل فيها وخصوصا منو هو وقدام سامية كانو كشوفو فبعضهم بنظرات الا كنت معارفش شنو تقال بيناتهم كنت اتقول زوج متشاوفوش شحال وكتمعنو فبعضهم ولكن بالنسبة لهم هما نظرات تحدي وهادشي ما حبسش هنا لأنها ستأنفات الحديث وكملات على القنبولة لي طلقات
زينة:أنا هنا موظفة كنستحق الاحترام بحالي بحال ݣاع هاد الناس لي هنا لأنني داخلة بديبلومي وبقرايتي ماشي غير هكاك وفالمشاكيل تانا عندي حق نهضر وندافع على راسي وفمشاكل لي تكون مهنية ماشي التخربيق والحمد لله ساوية وساوية بزااااف حيت مبايعاش كرامتي بالرخييص ومكنجيش بالساهل
حشاتها لهم بزوج فكلامها اللخر لكانت تتعني ليه فيه هو بلي مخداهاش وتتحشي لسامية لمدلولة لي حسات بالفقصة طلعات معاها من طرمتها والصدمة مخلياها مقادرة دير والو حيت مزال تتستوعب بلي راه تتعاير فيهم عاين باين وعطاتو هو القاصح وعينيها فعينيه ومسرح لها اللسان تتشوف فيه هو كيف غير ساكت وكشوف اشنو طرا ياك موالف كتي/ري فيها وهي مدايرة والو ودابا لي خرجات على فمها كلام محرم تتعتارف وتستهزأ بلي هي لي خلاتو ساكت
زينة لي مبغاتش تسكت ولا ترد لسانها لحلقها وكأن كاسها كان خاصو غير شوية ويفيض وكانت خاصاه غير الفرصة فين تخوي سمها وكلام مسموم لي نيت زادت كملات على لي بدات
زينة:يزيد الوزاني ولد وحدة من أرقى العائلات فالمغرب قراية وماستر على برا ومدير ديال شركة مرموقة فعالم الموضة والازياء خاصو يعرف يفرق بين المشاكل الشخصية والمهنية ويكون سوق لعيالات خاطيه
سامية بانفعال:زدتييي فيييه نتييي
يزيد قاطعها بهدوء بعدما ضار شافي فيها:سيري نت دخلي
سامية مفهمات والو وهي تتشوف فيه كانو عينيه عليها وببرود كشوف فيها ممعروفاش ردة فعلو ولكن علاش غيسيفطها بغات تشوف كيف ايكون ردو بغات تمرمد زينة هو يبدا وهي تكمل ويتحماو فيها بزووج بلعات ريقها وهي تتشوف عينيه عليها تتسناها تنفد شنو بغات لمحات زينة طلعات ونزلات فيها وزادت بلا حتى كلمة على هي تقدر تقوليه لا خلاتهم بزوج بيهم الراس فالراس وغيكون بينهم حساب على هضرة تقالت فايتة الحدود تلفت شافيها كانو عينيها مزال عليه وجه لها كلامو بنفس النبرة باش دوا مع سامية الهدوء كاسيها ولكن شنو جاي من وراه
يزيد:ساليتي؟
زينة يمكن عاد حسات بشنو قالت وطلعات معاها ولكن بالضبط ديك انا لي خليتها كطلع وتنزل فيك عاد حسات بحجمها وبزلة اللسان لي خرجات ولكن فوق طاقتها لا تلام بزاف عليها ديك اشكتسواي حرقاتها وبغات باش تحرقو مكلفش راسو حتى يسمع لها تاهي وهادي المرة الثانية لكديرها
بلعات ريقها ورجعات خطوة اللور فاش شافتو تقدم جيهتها بقات تترجع باللور حتى تكات على الحيط وتحاصرات وهي هازة راسها فيه مراقبة ردة فعلو لي للحد الآن مزال مبانت قلبها بدا كضرب بالجهد متأكدة شعلاتو متأكدة سكوتو ما هو إلا هدوء ما قبل العاصفة لي غتعصف فوجها دابا عينيه لي كانو عاديين معاقدش حجبانو ولكن كرمقوها بنظرة لي مصافيااش تتقول دابا غتجيني شي طرشة واخا عارفاه ميهزش يدو على امرأة ولكن لي خرجات مع فمها خطير وسلييط وكون غير كانت بصح خلاتو بخاطرها ميبقاش فيها لحال على لي غيدير فيها دابا مقدراتش على داك السكوت غطات وجها بيديها لثواني وهي كطلع النفس من بعد حيداتهم وشافت فيه تتحاول تشرح موقفها
زينة:سي يزيد انا ماقصدتش راه هادشي بزاف عليا شي حاجة مداخلاش فالخدمة مكاين لاش تحاسبني عليها وبحال هاد المشاكل حتى هما علاش انا من دون الناس
كانت تتحاول تبرد السوق وتستفسر علاش حيت فعلا بزاف هادشي زيادة على انه ككبر مشاكل لي بساط بحال هدا اي مع سامية علاش كتدخل فيما لا يعنيه بلعات ريقها وتزيرات على الحيط مكرهاتش دخل وسطو غير تهرب من هاد اللحظة وهي تتشوفو كطرطق عنقو يمين وشمال وهادي حركة لا تبشر بالخير زيادة على يديه لي بانولها عروقها برزو
بغات تهرب بغات تغوت على لي يعتقها ولا اي واحد يدوز من الصباح داخلين خارجين فين هما دابا يعتقوها فيكسى عينيه فيها بعد حركة العنق لي كانت وسيلة انه يهدن راسو باش ميدير حتى حركة ولا ردة فعل متهورة لانها شعلات فيه واحد العافية الا بغا يطفيها خاصو يخدم يديه لي مع هزها قفزات وبان فيها الخوف حطها على لحيط وزاد قرب لها حتى مبقات تتفصلو بينها وبينو والو نطق بنبرة اشبه فالفحيح ولكن الكلام لي خرج كبين مدى وزن داكشي لي نطق بيه ولي جاي من موراه رد فعل لي كابحو هو غير بزز حيت واخا فيقات داك البركان لي داخلو تربيتو وشخصيتو أكبر من انه يهز يدو على امرأة
يزيد:هبشتي على المدفون وحليتي على المنسي لݣاي دابا شنو غيجيك وقدي بيه راك يلاه شفت قد هكا ومزال ليك بزاااف(دار ليها بصباعو حركة شوية)
من بعد هز فيها صبعو بإنذار وهاد المرة كرز على فكو كثر شداتها السخفة فاش شافت حتى عنقو تزير يعني واصلة بيه كن مكان فطبعو كالم مكانش غيضبط راسو دابا كن قجها ميطلق منها حتى تخرج روحها كمل على كلامو وهو كارز على سنانو هاد المرة وصبعو فوجها لأن الكلام لي غيقول كعنييه وبزاااف
يزيد:غتخلصي على ديك الخمس سنين نهار بنهار و فعلتك الا منبكيك عليها الدم ونخليك تندمي على النهار لي عرفتي فيه هاد الوجه راني ماشي راجل جابتك ليا ليام نمشيك على العافية والزاج
هبط صبعو وهو مزال قريب لها وحرك راسو بلا وهاد المرة زاد فالدوص ديال التهديد فكلامو
يزيد:والله مغدوز ليك بالساهل ازينة
وورك على ديك زينة وهو كعني كلامو كامل وكتوعد لها بأقصى العقوبات وليزيد يؤكد لها أنه مداويش فالخوى انه قاص رجولتو وهو تتوعد لها وتتحلف عليها غتندم حيت عرفاتو والرجل الا رجولتو خط أحمر ولا قال راه كطبق بعد عليها وعينيه كنفتو الشرار اما هي كان اللون مشى منها بزز باش بقات واقفة وصامدة وهي تتسمع داك الكلام لي دب الرعب فيها وفقلبها وغير كيفاش كشوف فيها تعطيها الخبار هبشات ليه على المنسي خلاها هو وحكات ليه على الضبرة عيراتو بيها ساعة جاها الرد صاعق عطاها بالضهر وخاطبها ثاني بنفس النبرة وهو كبلع ريقو وكمسح على ذقنو ملبدها غير بزز
يزيد:حيدي من قدامي محدك مزال واقفة بصحتك
مع كمل كلامو معاوداتهاش معاه هزات جلايلها وطاااارت من بلاصتها خلاتو مع حس انها خوات السيكتور ضار وداك الجهد باش ضاير خشى يدو فالحيط لي برزو عروقها رعداتو وحكات ليه على الضبرة وعينيه فعينيها كتفتاخر بفعلتها صوتها وهي تتقول فيها مزال تتعاود فوذنو مهموش كلامها لاخر لي تاهو مطنطن قدما تغرزات فيه هاديك بالضبط مين شافها مع منصور وشافها كيف تجاهلات كلامو فاش قالها سيري تجلسي بغا يعطيها علاش ويسمعهم لها وجاتو هي هاديك مع بلان سامية ولكن الرد جاه ثقيل من بعد الرسالة لي خلاتو هو ميسولهاش علاش أول مطلاقاها هاهو خدا الجواب علاش هي محاولاتش تجبد الموضوع شي مرة ولا غير تلمح كان يسمع لها رغم حقدو وتبين ليه بلي غير شوية راها نادمة كان يقدر يسرطها رغم انها مارة باغي غير شي حاجه تخليه يطفي حقدو ويرتاح ولكن دابا غير مزادتو بتفاخرها وتعاليها بأنها كسرات قلبو وطعن/اتو ولكن حتى هو كلامو كان كعنيه دابا عاد غتبدا الحرب بالنسبة ليه
كانت جالسة وبزز كتسرط الماكلة كانو حطو العشى بالبساطل ديال الحوت والمقبلات داكشي بالطريطور ومتول على حقو وطريقو تتشوف فالفورشيط كيف تترعد فيديها وهي تتفكر كلامو وتهديدو عينيه كلشي كقولها بلي مزال مشافت والو وبلي لي جاي صعيب على لي شافت كان ساهل باقي شي حاجة صعب منو ندمات وعضات على لسانها بدا كبانليها انها فاش كانت كتنزل راسها احسن حل واخا تبقى تحرق فيها ولا هاد الحال
تدير الدغمة فمها وتتطول فيها فالمديغ وهي تتفكر وعقلها شارد وقلبها تسلل ليه الخوف مكرهاتش تنوض تمشي دابا وتهرب واخا تهرب الخدمة بعد غدا وغترجع ثاني لوكرو لي غيفرسها فين بنيابو
تحط اللحم مشوي لݣلاص والديسير زندوها وناضو ثاني للشطيح الا هي بقات غير جالسة وتتشوف مبسمة ولي طلبها تصورو تتصورو عياو فيها تنوض وهي والو بحجة انها عيات بغات غير فوقاش يسالي هادشي كانت تضور عينيها وتشوف رجع دخل قبيلة وكان تتصرف عادي ولكن عمرو عاود رجع شافيها ولا جات عينيها فعينيه تتشوفو كيفاش كهضر مع عائلتو وعاطيهم لخاطر كضحك مرة مرة وحتى مع الحاضرين تقول ماشي هو لي تتبدل معاها لكن كيف ديما تعذرو جات عينيها شحال من مرة فسامية لي بانت لها السم كخرج من عينيها وتتخنزر فيها وتحلف عليها بعينيها
تتصفق بشوية ومبسمة تتحاول متبينش بلي مبقات راشقة لعا ديما تتحاول تنسي ولكن ميمكنش لانها مع الناس لي عندها معاهم البلان عمرك تنسى ونت تتشوف المشكل ديالك تلفتات شافت منصور جا حداها هاز السيلفي وبغى يتصور هنا عتاذرات منو ووقفات
زينة:خليها مرة أخرى ان شاءالله حاسة براسي ماشي مزيان
منصور بابتسامة صغيرة:معرفتش علاش ديما كنحس براسي كنقجر عليك المهم انا بغيت غير نكون قريب ليك صديق ولا اي حاجة حيت وليتي عزيزة عندي وبنت ظريفة بزاف المهم الا كنت كنبرزطك سمحيليا
وزاد وخلاها واقفة دارت يديها على جبهتها وزادت لطواليط غتفرݣع كلا كلغط عليها من جيهة مجات فين تدخل حتى طلاقات بسامية ثاني خارجة فينما ضور طلقاها دارتها بحال شي حشرة دايزة متسوقاتش ليها مع فاتها شوية وهي تنطق سامية
سامية:غتندمي على لي خرجتي مع فمك كلمة بكلمة غير بلاتي راك مزال مكتعرفينيش
زينة وقفات بلاصتها عاطياها بالضهر ضحكات باستهزاء وتلفتات:اعلى ما فخيلك ركبييه وعيطي على لي يركب معاك كن كنا كنخافو من الدجاج منريشوهش
سامية بفقصة وهي تتفكر كيفاش استهزآت بيه ونعتاتها بالمدلولة نيشان:ولد عمي خسارة فيك وبزاااف عليك حتى تكوني مننا
زينة:حمدلله الفقر والسعادة وكرامتي هي راس مالي كيتك نت
سامية زادت فقصاتها كان كحسابلها ساهلة وساهل تمضغها هي تتشوف تتخاف منو ولكن معاها هي تتولي وحدة اخرى:وهانت غتشوفي والله ما تبقى فيك عقلي مزيان
زينة:الكلب لي كنبح مكعضش هاحنا غنشوفو
زادت وهي تتعتر فجلايلها وصوت الطالون كاسر الدنيا زينة وقفات قدام المراية حاطة يديها على الرخام حاسة براسها غطرطق حتى لبلاصة لي جات تفوج فيها صدقات هي لي منكدة فيها تتحس بواحد الضغط رهيب نازل عليها شدات فراسها وبدات تتطلع النفس وتنزلها خاصها تصبر الحرب مساهلاش فأي بلاصتها خاصها تقاتل ولكن وسط هادو خاصها جهد كبييير رجعات ثاني لقاعة جلسات كانت الاوركسترا حبسو وعائلة الوزاني كلهم طلعو بلاصة البرزة كانو محيدينها حيت ماشي عرس وكانت مقادة بحال المنصة وحداها واحد الطبلة كبييرة كلها عامرة كادوات مغلفين ومقادين يزيد وهو مضور يديه على عنق باه وحداه مو شاد فيها خواتاتو خوه عمو سعيدة تاهي طالعة مزاحمة سامية مهازاهاش الارض فديك اللحظة وعمتو المهم كلشي عائلة الوزاني كاملة والمصور كصور موتق اللحظات فريدة وهي واقفة مبسمة تنهدات وهي تتشوف راجلها ضايرين بيه خوتو وهي أخ واحد لي تكساب مبقات جامعاها بيه لا صلة ولا خبار حسات بعينيها غادي يدمعو ولكن تمالكات نفسها هاهي ضايرين بيها ولادها الحمدلله هادشي لي قالت فبالها وزيد ولدها الكبير مخليها دابا هازة راسها بين الناس خاصها تفرح يزيد شد لميكرو ويديه مزال على باه الحاج الوزاني لي تاهو دوز وقتو فالشركة وكلشي كشهد بيه وبطيبتو من بعد ما حبسو التصفاق بدا يزيد كهضر موجه كلامو لكلشي بنبرة هادئة جامعة كل من أدب الكلام والثقة فالنفس لي طاغية على شخصيتو والكاريزما لي عندو مخلية كلشي يعطيه انتباهو ويسمع ليه
يزيد:كيف كل عام كنتجمعو فهاد الأمسية السعيدة من بعد عام على قدو ديال الخدمة والجري باش نزيدو بالشركة القدام والحمدلله فينما كجي هاد الوقت كلقانا زدنا خطوة الفوق هاد لعام كان غير على لي قبلو لأول مرة فتاريخ الشركة غتكون الارباح زايدة بخمسة وسبعين فلمية على لعام لي قبل منو رقم خيالي وعمرو تسجل فالسوق وهادشي كولو بفضل الله وفضلكم
مع بنادم سمع سبعين فلمية شي شهق وشي خرجو عينيه وكلشي بدا كصفق بحرارة فرحانين بإنجازهم وبلي خدمتهم ممشاتش هكاك وفرحانين بالزيادة لي غتكون كل عام كزيدوهم فالصاليغ هادشي لمخليهم عاطيين الجهد بتفاني ودابا ملي دخلو بزاف غتكون شي زايدة معتبرة
يزيد وهو راسم ابتسامة على وجهو كتسناهم حتى يحبسو التصفيق والتصفار ويكمل كلامو
يزيد: كيفما سبق وقلت بفضل الله وبيكم وبأي واحد داز معانا الوزاني ليوم كاينة الكلام قليل فحق كل واحد كعطي جهدو فسبيل اننا نزيدو لقدام داكشي باش كنقولكم شكرا لأي كاين هنا ولا مقدرش يحضر معانا شكرا لكم القلب
ختم كلامو وهو حاط يديه على قلبو كحركة امتنان وشكر ليهم بكلامو كعلي لهم قيمتهم باش يعرفو راسهم مهمين ويعطيو كثر كلشي كصفق وكهتف وكانت حتى هي منهم تتصفق وتشوف فيه كيف كهضر وداك التواضع لي فيه هو أصلو واخا حسات الشكر مموجهش ليها لأنها هي يلاه جديدة ولكن المهم حتى هي راه معاهم
الحاج ابراهيم خدا الكلمة:داكشي لي كاين قالو لكم ولدي الشركة بتيسير الله وبيكم غادية الله يخلينا ديما مجموعين ويبعد عليها اي واحد نيتو خايبة الله يدخل علينا هاد العام الجديد بالخير والتيسير يارب وشكرا لكم
كلشي نطق آمين كصفق بحرارة وهما فرحانين زينة كانت تتشوف فيهم واحد بواحد فلحظة سهات وهي تتراجع ذاكرتها كان ممكن تكون منهم دابا ومعاه وماشي بعيد تكون ولدات اول مولود ليهم ويكونو فرحانين كانت غتكون حياتها أفضل من دابا بكثير عينيها غرغرو وناضت من تما مخلية كاع الموظفين
ناضو دارو الصف باش ياخدو الهدايا من هاد عائلة الوزاني ويتصورو معاهم خرجات مخلياهم اصلا معندها بلاصة وسطهم وميمكنش تصور معاهم وزيد يلاه جديدة حتى الكادو ديالها مغيكونش وهي مزال بادية مزال معاطياش اضافة للشركة
وقفات قدام الباب ديال القاعة تتمسح عينيها وهي تتنفس بالجهد الهدوء والصقيل والليل طاغي ظلامو تتنفس بالجهد وهي هازة راسها للسمى دخل العام الجديد وفات منتصف الليل بساعات تتمنى يكون هاد العام أحن واخف على الاعوام لي سبقوه وتطلب ربي يقويها ويعطيها الصبر اكثر حتى تقدي حاجتها سمعات الحس وراها فديك اللحظة شي حد نغزها فكتفها شوية تلفتات دغيا هنا هما يفيكسيو عينيهم فبعض وحتى وحدة منطقات بشي كلمة تشاوفو بزاف هاد الايام الاخيرة ولكن لقاءاتهم كانت باردة روعة ديك اللحظة مدات ليها شنو كانت هازة ونطقات بالزربة:الكادو ديالك حتى نت موظفة
زينة نزلات عينيها ليه وهي تاخدو بلاما تردد وترسمات ابتسامة على وجهو ورجعات شافت فيها كانو عينيهم كقولو بزاف ولكن توحدة مقادرة تهضر روعة فديك اللحظة نزلات راسها وزادت زينة لسانها تربط قبل ما تقول لها شكرا بهاد الجيست لي دارت فرحها بزاف نزلات عينيها للكادو كانت مكتوبة فيه سميتها حتى هي دايرين بحسابها رغم كلشي مقدراتش تمالك دموعها لي نزلو تخلطات عليها الفرحة على ود روعة احساس انها حسات براسها شوية مهمة فالشركة ودايرين بحسابها واخا مخداتوش من عندهم شخصيا ومتصوراتش معاهم المهم تاهي خدات
لداخل كانو دخلو الحلوى كبيرة بياس مونطي فيها شاعلين شموعها وكاتبين فيها الوزاني 2025 وليد لي تحمس وشعل الفلااام ودخلو معاه فالخط الموظفين وتبلبلات يزيد راجع اللور وتتفرج وحداه فريدة تاني تتشوف بعويناتها ومبسمة جو زوين مالياه الفرحة كتنبؤو بلي العام الداخل غيكون زوين بقاو شحال على الشطيح والغنى حتى بداو بشوية كمشيو الناس بعدها تتوادعو مع عائلة الوزاني شخصيا دوزو ليلة زوينة نشطو وفرحو فيها مع بعض وكوجدو طاقة جديدة لعام جديد داخل عليهم
متكية على الزاجة ديال الطوموبيل لبنى صايگة وكتكمع كلشي مهدود بالشطيح زينة تتشوف من الزاج السمى كانت شي ربعة دالصباح تتنهد وتطلب فنفسها هاد العام لي داخل يكون زوين وتيسر فيه داكشي لي بغات ولي هو عملية باها ويتشافى وفنفس الوقت تكون فيه شوية الفرحة لي تتحاول تدعي الخالق بلاما تفكر داكشي لي وقع فالحفلة لي كبين عكس داكشي لي باغية وبلي لي مخبي لها مساهلش ابدا ولكن ربي راه فوق من كلشي تمنات فقط انه هو أحن واحسن من الاعوام لي دازو وفنفس الوقت تتفكر فهاد الشهر الاخير لي داز كان مختالف وقلب حياتها بلي مكانتش متوقعاه غيعاود يتجبد بعدما تدفن ولكن الدنيا كلها مفاجآت
دازت هاد الليلة وجا نهار جديد من العام الجديد
نازلة من الدروج فكتفها شاكوش ناوية تخوي علاما تحس بالقضية بردات واخا هي ممسوق لها حد مع خطوات خطوة برا وقفو عليها كانو طوال لابسين تجاكيطات ودايرين نظاظر ديال الشمس نبيلة بلعات ريقها وصفارت دغيا نطق واحد منهم بنبرة صارمة:نت هي نبيلة
نبيلة تتفتف:اياه هي انا اسيدي شكون نتوما
الثاني:حنا لبوليس جاتنا خبار بلي كتمارسي طقوس السحر والشعوذة
نبيلة برد ليها الما فالركابي:هادي وثوبة احم بغيت نقول اشاف لا لا لا لهلا يطيح علينا باااطل والله مكاين هادشي انا عيد درويشة اشداني للمنكر
يتبع
التعليقات 0