الفصل 3

اما كنيزة كون صابت لرض تحل وتخشى فيها حشمااانة غتموت بالحشمة فاش حسات بالحكيمة كتهز ليها القفطان يسحابليها غتعريها ساعة طلعاتو عند كرشها وحبسات وحدرات ليها السروال القندريسي تحت سرتها عاد حطات ايديها تما كدوز بشوية مستعملة غير صباعها بربعة كتحسس بيهم تحت كرشها بالضحة جيهت الحوض، كلشي سكت وغير الصقيييل كيتسمع غير صوت الطيور يغرد في الشرفة وكنيزة سادة عينيها تسناها تكمل حتى وقفات الحكيمة وشافت في السلطانة محركة راسها بسلب وقالت :

_مباين والو امولاتي نجرب طريقة تانية..!

_علاش مباين والو ما مولفا ليك..!

_نعام الالة حتى ايلا كانت شي حاجة من الموحال تبان من دابا، نشوفو حشاكم طيار الما ديالها يكون خير..

ردات السلطانة وقالت : يالاه غير بالي فرجيني..

الحكيمة اشارت للوصيفاتها براسها داو كنزة للحمام وعطاوها الكاس فين غتحط البول ديالها وكنزة غير تابعاهم كدير اشنو قالو ليها بالت في الكاس وعطاتو ليهم وهوما داو للحيكمة شدات الكاس وزادت عليه خليط اخر وحطاتو وناضت وقفات محنية للسلطانة كتسنى الفحص يبان والسلطانة واقفة حداها تسنى على جمر فحين كنيزة كتشوف فمفتاحة قلبها كيضرب معارفاهم علاش يتغامزو ومفتاحة مبسمة ليها هادشي ماش اول مرة يدوز على عينيها،حتى هزات الحكيمة داك الكاس كتقلب فيه بعينيها وتشوف فيه وتأكد والتبسيمة بشوية بشوية على وجهها كتفرز، حتى لاحظتها لالاهم توت القلوب وقالت :

_اشنو كاين اشريفة طلقينا..

تبسمات الحكيمة وحطات الكاس عاد مالا عندها وقالت :

_مبروك على مولاي الالة..

حدرات راسها السلطانة مبسمة وعيونها بالفرحة تفتحات اما كنيزة واخا هبيلة دكية طيراتها في السماء ناضت مكعدة كتشوف قدامها وتشوف فيهم وحدة وحدة حتى قربات ليها السلطانة وقالت :

_سيري مع الوصيفات غيري لباسك وغينزلوك تفطري معايا، (ضارت عند الوصيفات) جهزوها وتبعوها ليا نبغيها تحرك وتوصل عندي سالمة..

الوصيفة:نعام الالة..

عطات بالضهر وخرجات عاد تبعوها وصيفاتها لاخرين والحكيمة جمعات لوازمها وزادت مع الباب ومفتاحة غير تسد الباب وهي تعنقها فوق سرير غادا جاية بيها وتضحك فرحانة وكنزة غير ساهية مصدومة تلجم ليها اللسان ربي اللي عالم باشنو بيه واش فرحة ولا قرحة..!

ناضت مع مفتاحة والوصيفات خرجات معاهم للحمام شدوها فركوها فريك محاولات عليها دايرين ليها كي الما القليل ومفتاحة مخرجة فيهم عينيها ورادة معاهم البال لا يقيصو فيها ولا يغرسو فيها سمهم، حتى كملو ليها ولبسوها وعطروها وزينوها وسيفطوها لجناح السلطان حتى يجي زروال ينزلها، هاد الاخير اللي مكاملاش اللحضة تا تفتح الباب ودخل عندها يقلب ويشقلب في عينيها لابس الجلابة جديدة ومطرزة داخل يقيص فيها ويقاد في القب قدامها زعما فاقصها بيها ، وهي تبسمات كتشوف فيه حتى نطق وقال :

_لالة ام سيدي طالباك تفطري معاها..!

_بصحة الجليلييبة وااتاك الحمر ازريوييلة..

غوبش وجرها قدامو : تحركي قدامي..

_زروال يا تحتارمني ولا نشكيك لمولاي وتشوف ديك ساعة شنو غيدير فيك..

قادات شعرها بصبيعاتها ولبسات البلغة المطروز وخرجات معاه وهو شاد في دراعها كيف العادة وهي غادا وتنتر منو وهو مغوبش وخطوتها فيها ربعة الخطوات منو..!

_كديرو لقيمة غير اللي كيجرتل فيكم ديك شمس ضحى تاحد ماكيقدر يهز فيها العين بلحق صبرو تانولي سلطانة ايلا مادرت ليك النقاب اودي ازروال والموزون وخشيتك وسط العبيد تلوز ليهم راني ماشي كنزة (فزكات صبعها بالدفال ولقصاتها في صدرو)

ضحك لفوق وقال كيلعب بايديه: يااا ضحكي اااموكة بلارج دار العرس قطعتي الواد ونشفو فرجليك اطلبي السلامة الله يستر غاطيري..سلطانة قالت ليك..

_تااعت الله غير قوليا ناس فين كانو يطوالو فين كنتي، ههههه كتوقف على السلطان كيشوفك بعدا؟ … عنداك شي نهار يعفط عليك امسخوط،

داها وجابها من دراعها تا سكتات شاداها التقية ونترات منو دراعها وهوما كيقربو من باب القصر مضاربين حتى وقفو قدامها وحلو ليهم الحراس الباب عاد دخلو، كانت السلطانة الام في انتضارها واقفة عند الجليسة اللي مزينة بالقصب والنخل فوقهم والحراس دايرين بيهم، تقول هزيتي كنيزة وحطيتي وحدة اخرى تمشات تا وقفات عليها وتحنات ليها بالتحية عاد جلسات مربعة قدامها والوصيفات كيكبو ليهم اتاي وهي تضور في عينيها وتشوف فيهم فحين السلطانة غير حاضياها وتنهد، تزاد عليهم الامير عطية الله جلس معاهم كيتكلم مع السلطانة وعينيه على كنزة وهي حادرة عينيها منو مارجعاتش هزاتها..!

عطية الله جالس مبسم مقلد السلطان في جلستو كيف كيحط ايديه على المخدة ورجليه مطلوقين، مدات ليه الخديدم كاس داتاي شدو منها وكنزة حتى هي خدات كاسها فحين السلطانة شادة كاسها وراسها كيف العادة يميل ويشطح على انغام الطير اللي قدامها يغرد وبالعود بين صباعها يطرب، ماردات لبال ولا شافت جيهة لمير عطية الله اللي عينو ماخلاو نبشة في كنزة…وهو يضور عند مو مبسم وقال :

_مبروك عواشرك اسلطانة العيد الكبير كيطل علينا..!

_الله يدخلو علينا بالصحة والسلامة..واحد صفية مابانت ليا فين خليتيها..

قلب وجهو ساخط وقال : في جناحها كتفطر…

السلطانة حطات الكويس من ايديها وقالت كتشوف بعيد وتنهد :

_صبر اوليدي الصبر…!

_اودي الصبر كيضبر امولاتي..

ردات عليه : تا دابا مكاين باس، الشرع عطى ربعة المخيرة فلالياتها جيبها، مكايناش غير هي،

_يكون خير..(علا عينيه في كنزة وقال ) على هاد الموضوع لاش جيتيك..

_اييه قول اولدي اش عندك..

تنهد وحك الكاس من ايديه وجا نايض :

_من بعد، ندوز لجناحك ونداكرو..هذا هو بصحة فطورك اسلطانة دوزي بخير..

تحنى باس على ايديها ومشى وكنزة عاد طلقات في الجلسة وارتاحت فحين السلطانة كتشرب في كاسها وتشوف فيها حتى قالت :

_كنزة، من هنا لقدام مابقيتي بوحدك، ولي عهد السلطان عندك و وسط فادك عايش، تهلاي في راسك وردي لبال ليه تا يتزاد على خير، هادشي يبقى سر بيناتنا مخبي تا يجي مولاي…

_ع علاش الالة..

_ديري اشنو كنقوليك هادشي سر وتاحد مايسيق ليك الخبار،

حركات راسها وحدراتو ساكتة والسلطانة كملات كلامها :

_نطلع لجناحي وزروال غيجيبك عندي تجمعي حوايجك وترجعي للحريم ليوم قبل غدا..

رفعات عينيها مدهوشة وقالت :

_ع علاش الالة اشنو درت اشمن غلاط درت والله ما درت شي حاجة ولا خالفت قوانينك..

_علااه ازينة البنات فين كنتي غابرة هاد ليام..

_م مع بن ياز (بلعات ريقها وكملات) مع مولاي السلطان الالة..

_الوصيفات ما كيباتو ما كيضلو عند مولاي، مدامك دخلتي لخلوتو وخلاص راك حاملة وهازة حفيدي عندك، غترجعي لجناح الحريم ولباس

ردات برجاء : و ولكن نتي اللي سيفطتيني عندو الالة..ايلا مشيت عندهم ومشاو حتى ساقو ليا الخبار حاملة من مولاي ماغيقيلونيش عليهم من دابا ومكيحملوش عساك فاش يصيقو الخبار

_نقصي من الهضرة واللي قلت ليك هواللي غيكون راه ايلا مشى ساق لخبار شي حد لحلمك نقطع ليك داك اللسان…في جناح الحريم عندك جناحك خاص بيك ما غتشاركي مع حد ما غتجمعي مع حد…شديه وجلسي فيه تعزلي في الوصيفات اللي بغى خاطرك اللي احاجيتيه يجي تا لعندك..يجي مولاي وهو يعرف اش يدير معاك..

حركات راسها كنزة وحدراتو شداتها البكية مزال وهي وصيفة عند السلطانة مخايفة من حوايجها يتقلبو ماخايفة يحرمو عليها الجلسة، مفوجة وخارجة داخلة ماشي كي الحريم غير مسجونة..!

كملات كاسها والتكبيعة شاداها حتى وقفات حنات للسلطانو ومشات حلاتها جالسة تخمم وتفكر كيف كنزة خايفة، على راسها السلطانة خايفة على حفيدها من حريم السلطان ولكن هادو قوانين القصر ومايخالفهم غير اللي خالف كلام السلطان..!

كنيزة رجعات للقصر وقصدات جناح السلطان دازت على الحراس وحلات الباب دخلات ، بقات عند السرير تقلب بعينيها والدموع علاين ينزلو ليها،طايح عليها الضيم والسلطان اللي يخفف عليها مكاين، خرجات للشرفة و وقفات كطل من لفوق على عباد الله حتى نزلو دموعها وتكات على الحيط وايديها على كرشها، الندامة سرات معاها وهي ما معتارفة بيها، اييه عشقات السلطان وجيلها ؟ وباها ؟ وحياتها، مدام حملات غير تاكد انو عودتها لجيلها عاد من المحال..!

اللي طلباتو السلطانة طبقاتو بالحرف بزز عليها، على سعدها و وعدها مشات جمعات الحوايج من جناحها وعطاتهم للحراس ينقلوهم لجناح الحريم عاد مشات موراهم، الجناح كان جاهز يتسنى فيها غير هي حلو ليها الحراس الباب وتمات داخلة عليهم وتضور عينيها بيناتهم وهو يتناغزو عليها ويتهامسو من نهار ساقو خبارها في جناح السلطان وهوما هازين منها الشوكة، كنزة ماتسوقاتش ليهم طلعات في الدروج ومشات للجناح على قد الحال مفرش ومأتت على حقو وطريقو حوايجها مستفين في الصنادق والمراية قداش معلقة في الحيط، وقفات عليها عرفية تشوف اش بغات ساعة كنيزة ماطلبات ولاو من غير وحدية تجي عندها..

حركات ليها عرفية راسها ونزلات سيفطات ليها وحدية وهي تطلع عندها هازة لباسها وفرحانة اللي من بين هاد اللفعات غتخرج طلعات عند كنزة لقاتها شادة سرير متكية وعينيها في السقف ساهية..!

وحدية: قالو ليا خيارك تقولي واش تصدمت من لول عرفتك شويطينة وما تجلسي تا ديريها..

كنزة ناضت عينيها خارجين تربعات وقالت :

_كلام محمد عاد دخل معايا اوحدية هاد القصر بلا مولاي مايجلس فيه البشر والو..

_ اويلي مالك ياك لباس..وشكون هذا محمد، شلا محمدات في القصر

كمشات ملامحها مغبنة وقالت: ماعندي لمن نشكي مولاي اللي يخفف عليا طيرو السفر، نقوليك ويبقى بيناتنا غنطرطق اوحدية..

_ياولي ماتقوليش هكاك ديريني بير قولي سرك ونسايه..

طلقات لسانها ليها تعاود ليها وتشكي من صباح خروج السلطان لدابا،هاد النهار اللي داز فيه النص عليها بعام، من الحكيمة اللي قلباتها والسلطانة اللي رجعاتها الحريم ونفاتها ومن عطية الله وعينيه اللي ماقالتها وحتى كلامو اللي كان واضح وباين علاش مطوي، وحدية دارت يد على الحنك وشافت فيها ماعرفات ماتقول ولا تنطق وكنزة مكلمة كلامها ودمعة على خدها نازلة..

_قالت ليا مفتاحة بلي شمس الضحى هي اللي سممات ديك البنت اللي كانت من مميزات السلطان عنداك غير تجي ليا شي نهار هي و وصيفاتها وتقتلي ومايصيق ليا حد الاخبار..

_اييه تقتلك سيبة في البلاد انا حداك وجنبك واللي قدرات تقرب غير تقيصك…

شدات فايديها: بصح بصح عنداك تغفلي عليها..

_لوااه ياه راك مزال ماتعرفيني راني كنت انا راجل ف دار با..

_لهلا يخطيك عليا غير علاما يجي مولاي فاش يكون هنا مكنخاف من تاحد ودابا فاش مشى كاع بنادم الله يستر نيابهم تعراو انا صدماتني غير السلطانة قالت ليا حملك يبقى سر بيناتنا تا يجي مولا ويعرف اش يدير معاك،اشنو غيدير معايا اشنو بغات تقصد..

ردات وحدية:

_في طبيعة السلاطين نهار تحمل ليهم العبدة كيحطوها سطل بلا تقرقيب ويتهلاو فيها ويوكلوها ويشربوها تا نهار تولد، غير تولد الوليد صحة سلام و يتجوح بيها..

_دابا انا مولاي ما يتزوج بيا تا نولد..

_هادشي اللي كاين والله اعلم ي داكشي عليك ياك عاد قلتي مولاي طلبك لجواج

_ااه والله

_ايوا صافي لا خوف منهم..

سكتات كنزة وتكات على سرها الجديد حاطة ايديها تحت حناكها وغير ساهية و وحدية حداها، العشية كاملة مخرجوش من جناح ولا زهقو منو حتى ضلامت الضلمة وغابت الشمس حل محلها ضو القنيدل، عاد ناضت كنزة لبسات لباسها وحلقات على نفسها وخرجات من جناح و وحدية معاها مافايتاها رادة معاها البال حتى في الخطوة اللي تخطيها..!

من الفوق كيتسمع عندهم صوت الغنى والضحك والتقشاب، والبنات مجمعات كي النحيلات كل وحدة فين مليوحة هالي تمشط وهالي تدهن وهالي تضحك وتحدث والطبلة قدامهم تشهي وليني باين فيهم كلاو وشبعو وتكعدو بقات غير واحد الخديديم عند الكّاملة دالحريرة كتوزع عليهم وحدة وحدة في جبابن،كنزة تبسمات وشافت في وحدية ناوية تنزل تشرب وهوما يمشيو عند ديك الخديدم وقفات عليها وقالت :

_عطيني جبانية حتى انا..

ديك الخديدم شافت فيها وحنات لتحت دارت راسها ماسمعاتهاش وكنزة جمعات الضحكة وشافت في وحدية..

وحدية:قالت ليك عطيها جبانية دالحريرة ماسمعتيهاش !

نطقات الخديدم: مابقاتش الحريرة..

وحدية:وراه الكّميلة باقة عامرة..

شمس الضحى:ايوا كدبوها كدبو السيدة قد مكم، قلالات الترابي ماتحشمو ما تحتارمو اللي كبر منك سن، قالت مبقاتش يعني مابقاتش عمركم دقتو نعمة يلاطيف..!

كنزة مضارت ما شافت فيها حظها كتسمع لصوتها موراها وعينيها على الخديديم اللي شافت فشمس الضحى وحدرات راسها كتحركو بسلب، عاقت وفهمات بلي هي اللي موصياها ماتعطيها من الحريرة ما تدير ليها اعتبار،كنيزة حتى هي علات حجبانها وضارت وقالت لوحدية :

_يلاه نمسيو على السلطانة الصباح طلباتني نتعشى معاها نيت نشربو الحريرة عندها..!

قلبات عويناتها وتمشات خارجة من الجناح و وحدية حداها مخبية التبسيمة وتابعاها مخلية شمس الضحى تقلا وتشعل وتطفى غير بوحدها،والبنات يشوفو فيها ويتتغامزو ويتهامسو..!

خرجات من عندهم ماحبسها حد ما شد عليها الطريق مقامها دابا من مقام شمس الضحى وكيف ماكيمنعو عليها والو تا كنزة بحالها،

وحدية:وليني راك جنية هكاك غير بلمهل كيتكال بوندجال..

_الله يعطيها شي مصيبة حرمات عليا الحريرة ريحتها طالعة مع نيوفي

وحدية:وا عودي للكشينة شربيها عطى الله الخير غا مدفك ينادم غير يقول بسم الله..

_تكون زعما..!

وحدية:وضروري كيطيبو داكشي بالشياطة للخدم ولناس القصر..

_اييه يلاه يلاه نمشيو عند مفتاحة..ب بلاتي هاداك ماشي محمد ههه هو اجي اجي..

ضحكات ومشات عندو و وحدية وراها قارنة حجبناها وتشوف معارفة اشنو علاقتها بهاد محمد، فحين كنزة وقفت عند نهاية الكولوار كتشوف فيه مع الحارس غير حسات بيه غيضور وهي تشير ليه بايديها ضاحكة،محمد تقول كان يتسنى فيها غير هي تبان شاف حولو ما بان ليه حد وهو يلوي عليه سلهامو وتم جاي لعندها حاضي وراد البال لا يشوفو شي حد، وقف عليها وعينيه كيضورو بينها وبين وحدية وهي كتشوف فيه وتفرنس:

_محمد لباس عليك..

خرج فيها عينيه كيشوف في وحدية وهي فهماتو جمعات ضحكة و وحدية فهمات الشوفات اللي عليها وهي تبعد عليهم وقالت :

وحدية:انا نسبقك للكشينة تا تبعيني..

كنزة:واخا غنلحق عليك دابا..

مشات وحدية حتى غبرات عليهم وضلات جيهت الكولوار وهي تقلب وطلان براسها حاضياهم وراخية راسها تصنت عليهم..محمد عقدهم وقال :

_اشنو كنخبر عليك من نهار جيتي ماتهضري معايا ما تعيطي عليا نهار يكون معاك شي حد، كون يسحابلي حداك مانجيش عندك..

ردات وقالت: غير صاحبتي متخافش منها على حسابي..

_صاحبك هو عقلك في هاد القصر واش مزال مافهمتي مازال ماتعلمي ولا باقة ماجربتي باش تحسي وتوعاي باشنو كنلغي عليك..

حدران راسها وقالت: و وفعلا كلامك على حق شفت شي حوايج انا تصدمت فيهم والله، ولكن نتا هانتا عايش مخاصك خير علاش حيت السلطان في كتافك وحتى انا قالي مدامو معايا عمر شي حاجة تآديني..

_ كلام اللي تقال بعد نص ليل ماشي كلام الفعل والمعقول، ديريها حلقة في ودنيك حب الليل عاهر بليل معاك وصباح يصبح قالب عليك، واش عارفة راسك اشنو كديري علاش فنضرك السلطان لحد الان ما تزوج ما دار الولاد صعيبة علييه زعما..

بلعات ريقها وقالت : ع علاش

رد مستهزأ : علاش هه حييت اللي حط عليها العين لغد ليه كتصبح (دوز صبعو على عنقو وقال) جيفة، ومازال تشوفي على عينيك واش عرفتي شحال من وحدة كنخرجوها ميتة مكانعرفو لا كيفاش ولا امتى تا كتعطي ريحتها في جناحها،مولاي ماعندو غرض لا بيك ولا بغيرك نهار غيسالي منك غيلوحك للحريم تحاربي معاهم تما حيت هو ماباغي زواج اللي بغاها ويرتاح معاها مزال مالقاها..

حدرات راسها وعلات كتافها تصنت لدقات قلبها داخل صدرها يلغي بلغاه مجروح من كلام محمد وهو يضور راسو ورجع شاف فيها وقال بمسم :

_الصندوق وجدتو ليلة اللي غيجي فيها مولاي غيخرجو الحراس يستقبلوه وديك الساعة نتي غتمشي للصندوق تفاهمنا مابقى قد مافات وغتهناي، داير ما فجهدي تمشي فاقرب وقت ولكن الجهد فوق جهد..!

بعد صمت سكتات تخمم وفي كلامها تلجم باش تعرف نجابو وتكلم :

_م مابغيتش نمشي امحمد صافي انا خديت قراري واخا كاع نبغي نمشي با غيكون نساني ومرتو نساتو فيا عندمن غنمشي وانا زا..زايدون…م مانقدرش نخلي مولاي ونمشي..

ضرب ايده حتى قفزات حاشية راسها بين كتافها وقال :

_اشنو كتكّوووووولي واااش كضحكي علياااا وااش بااااقة مافهمتي راااسك نتي فيييين

_ف فهمت و عارفة القصر وبديت كنشوف على عيني وكنتصدم ولكن باش نفكر نبعد على السلطان ونمشي لا، خصوصا داباا اللي..هزيت طرف منو واخا صعيب عليا نتقبلها ولكن وليت كنتمى غير نبقى معاه ونكبر معاه ولادي صافي..

وحل ليه الكلام وتسرطو ليه الححروف، ماعرف ما يقول ولا باش يرد، وهو يحك على شعرو وقال كيدخل ويخرج في الهضر :

_م ميكننش..م ميننننننكش ش شكون قاليك هاد الكلاام ميمممكنش تكوني..ن نتي و والسلطان م ميمممكنش..

_اه قالتها ليا الحكيمة صدماتنيي حتى انابحالك تصدمت ولكن هادشي اللي كاين..

_ميممممكنش ديريهااميمكننش خااصك ترجعي فحااالك خاصك ترحعيي لجيلك هاد الزمان ماشي ديااالك

جرها من ايديهااا بحههد كيدي ويجيب فيها وهي تخطفات قافزة كتبعد دراعها منو وهو مزير عليها وجارها كيغوت مصدوم تقول مشى ليه العقل، و وحدية خرجات مورا الكولاوار تندب ماعرفات تمشي تفكها وهي واحلة فروحها ولا تبقى بعيدة وتفرج

_طلق منييي…قصحتيني طلق منيي اااهى ماسوقكش مابغييتش نممشي ماشي سوووقك فياااا طلق مني ااهى

_على اشنووو كتقلبييي واش كتقلبي على موووتك واش بغيتيهم تا يقتلوك ويسفطو جنازتك تدفن في الخلا واش عارفة ايلا ساقو ليك الخبار ومولاي عرف نسااااي داركم نساااااي جييييلك فهاد القصر غتدفنييي

جرها من دراعها غادي بيها وهي كتنتر منو وتوقف وتنوض تفلت منو وهو حاكم فيها حتى جات وحدية كتجري شدات في دراعو تفكها منو وهو يدفعها لور ورجعات تاني تفك وكنزة كتبكي خلعها وهي كتسمع فكلامو تحت سنانو كيخرج مغدد..

وحدية بالجران خايفة على كنيزة فدوشاتو جرة اللي جرت تهزات ليه الجبادارو على دراعو اللي شاد بيه كنزة وهي تشدو منو غتجرو حتى كتقشع الوشام اللي مرسوم ف راحة دراعو من لتحث ..

رخات من دراعو وحيدات ايديها منو وعينيها على الوشام قلبها كيضرب يضرب وعقلها غيخرج بالتشاشات اللي طاحو بين عينيها ، نفس الايد باش تهز السيف تا لفوق ونفسو الوشام اللي كان في الايد وهو نازل على رااس ختها حتى تفصل على كسدتها قدام عينيها، غمضات على عينييها ودنيا ضارت بيها مابقات تسمع لا غوات كنزة ولا كلامو هو من غير صوت ختها وهي تبكي وترغب فيهم يسامحوها، ماحسات براسها حتى ترخاو بيها رجليها وقلبات عينيها وطاحت على وقفتها قدامهم..وكنزة خرجات عينيها وغوتات باسمها ومحمد طلقها وضار براسو كيزفر وينهج ورجع شاف فيها نزلات عندها كتكحب وتفيق مخلوعة عليها وهو يمسح على وجهو ومشى خلاهم تما..!

كنزة:وحدية وووحدية ككح كح كتسمعينييي اهى حلي يعينييك وحديااا كككح

تفدفد فيها وتعاود وهي تحنى حطات ودنيها عند قلبها وناضت خبطات في وجهها جوج تصرفيقات وباسمها كتنده وتكح..ما هدات ورجعات فيها روح حتى بدات وحدية كترمش يعيونها ثقال عليها، شدات فايديها بشويا وكعداتها جالسين بجوج فلرض وكنزة تسوس وتمشط ليها في شعرها وتهضر..!

_صافا شوية بااش كتحسي واش فيك دوخة !!

غمضات عينيها وردات: الضبابة الضبابة عمات ليا عيني…ف فيين فين مشى؟

_مشى الله يعطيه القطيع لدوك ليديين الحكّار

_فيين مشى هاا ؟ في القصر معانا هنا ماعندو فين يمشي هنا غيبقى يااك

متعجبة قالت : بشوية عليك ماعندو فين يمشي، يلاه نرجعو للحريم دابا يرجع نوضي..

وقفات بشوية وشدات في ايديها نوضاتها معاها ورجعو للحريم ووحدية غير ساهية وتخمم وايديها فايد كنزة كيرجفو رجييف كيخلع و كنزة غير كتشوف فيها وتقول يمكن تخلعات عليها، حلو ليهم الحراس الباب وطلعو مباشرة لجناح كنزة، اللي مشات تخشات في بلاصتها و وحدية في لرض مفرشة ليها نفس النعسة ونفس السهوة، عيونهم في الصقف وخيالهم كل وحدة وفين سارح بيها….!

ضهرات الشمس الغايبة ونزلات ضلمة الليل

في جناح السلطانة الام مجهزة طبلة طولها ما هو قد عرضها،عامرة بكل ما تتشهى النفس،الخوامي البيضين وشفافين نازلين على الشرجم ضاربة فيه شميسة ساطعة ومصحصحة وريحة البخور معطرة الجناح فايحة وطالعة والخدم مضاربين مع جلايلهم يقادو وينقيو، كانت لالهم توت القلوب واقفة على الشرفة مورا الخوامي تطل بعينيها وتشوف حتى تفتح الباب ومالت ضايرة كاملة مبسمة وعطية الله داخل عندها مع ولدو مولاي يوسف ،تحنى بالتحية ومشى باس على ايديها وهي كترضي عليه عاد تبسمات لحفيدها وعطاتو باس على ايديها ومشاو للطبلة وهي مزال شادة في حضنها يوسف..

_كي بقى حبيب جداه قوليا..

تبسم الحفيد يوسف حشمان ولمير عطية الله ضحك وقال :

_بخير بخير اش بغى يضرو راني والد راجل ههه

_تبارك الله الله يبارك فيه ويكبرو على طاعة الله،يكبر لينا ويعود يرافق عمو في الحروب ويدافع على بلادو و ولادو..

_انشاء الله انشاء الله اللهم اميين..

_فطر امولاي بسم الله..

_واحد مسك الليل والباثول في شادينها تاوحدة ماتلينا نشوفوها هه

_وراك عارفهم اوليدي حدوديات كي القمرة مايبانو من شحال لشحال، مسك الليل راه مبلية ليا بدداك اشنو.. ديال الصباغة والباثول تموت على القراية نهار كلو وهي شادة القلم وتدون، وخوتك راهم مع عيالاتهم..

تبسم عطية الله وشد كويس داتاي من الخديدم وشاف لبعيد مبسم ويفطر والسلطانة قدامو تفكر وتوكل قدامها الحفيد مبسمة مرة مرة تهز عينيها فعطية الله عارفة علاش جاي وعلاش طاوي مامولفة ليه يصبح عليها ولا يفطر معاها الوحيد في وليداتها اللي يتفكرها ومايدوز نهارو حتى يطل عليها هو السلطان، وفعلا تخمامها مكانش مشكوك فيه ولمير عطية الله حط الكويس قدامو وقال:

_سلطانة لبارح كنت كّلت بغيت نتكلم معاك..

_ايييه ومزال متدكرة اش كاين امولاي لمير الله يسمعنا خبار الخير..

الامير عطية الله: غير الخير، وكل خير، واحد الوصيفة عندك يمكن كانت من الحريم وتحولات لوصيفاتك..

ردات ناكرة : وعطاهم الله امولاي اللي كانو حريم وجبتهم ليا اش سماها الله هادي..

الامير عطية الله: وصيفتك كنزة، بليمارة كانت جالسة جنبك لبارح عند الفطور ضاهر ليا من الوصيفات المميزات عندك..

ردت وقالت : كنز من الحريم امولاي ماهي من وصيفاتي..

بدهشة حط الكاس وقال: كيفاش ومن امتى وانا من نهار شفتها وهي كي خيالك ما تفرقك..!

_اييه حَقَتاً جبتها عندي، ورمتها لجناحي وليني ما شفت فيها اللي تفيدني، حطيتها سطل بلا تقرقيب وليني امولاي مكاينش غير كنزة عطى الله بنات الزينة على ختها تخير اللي تحب خاطرك وبايدي نجيبها ليك…

_نجيب تاني بحال صفية تحرر ليا العيشة وتمرر عليا الجلسة، كنزة اللي ارتاح ليها البال والخاطر والشوفة فيها تبرد القلب،

_السلطان ماغيعجبو كلامك نتا عارفو ماكيبغي اللي يحط العين على حريمو..

_وليني انا خوه وهو خويا قبل ما يكون سلطان عليا، غنتكلم معاه في هاد الموضوع ومايردنيش خاسر الخاطر عارف مولاي مايخسر خاطر حد واخا ينقصها من عندو..

_مولاي يقطع من لحمو ويعطيك وليني اللي يحط عينيه على حاجتو ينساه وينسى حطتو، ونتا ادرى باالي فبالك، نتمى ماتشدش الخاطر من خوك ايلا رفض وخسر خاطرم قانون القصر هو هذا وكيف كيسرى عليا وعلى اهلو غيسرى عليك..!

_مولاي مغيرجعنيش وانا عارف كي نتكلم معاه، الله يجيبو على خير ونتكلم معاه وتكمل الفرحة، حيت اسلطانة قدما بقيت انا ولالة صفية غنكملوها بما لا يحمد عقباه وقد ما بقيت غنطلقها ونهز راسي من هنا ونرحل..بصحة فطورك..!

تبسم هارب ليه الخاطر وناض تم خارج مخلي ولدو في حضنها وهي علات حجبانها وباست على رويس ولدها ساهية طريق ديها وطريق تجيبها، حتى رفعات عيونها في الوصيفة وقالت:

_سيري لجناح لالة صفية وندهي عليها ليا..!

تحنات الوصيفة بطاعة وخرجات من جناح هازة جلايل القفطان عندها وتجري وتنهج حتى وصلات لجناح لالاهم صفية علموها الحراس عاد دخلات عندها و لالة صفية شافتها و وقفات شيرات بحجبانها للوصيفاتها خرجو عاد قربات عندها بالقفطان نازل تا للتحث والمضمة مدهبة تبري وكبيرة مزيرة ليها الخصر ، التكحيلة مجرورة من قنت للعين للقنت والحجبان كتاف ومطراسين تشعل وتضوي وماعزل من البنات غير هي، وصيغة ااساطالنة محنية بالتحية عينيها لتحث فلرض وقالت :

_لالة ام سيدي طالباك عندها الالة صفية..

_وعلاش بغاتني اعبلة اشنو فكرها فيا..

الوصيفة بلعات ريقها وشافت حولها ضور عينيها وقالت بهمس :

_كاع اللي قلتي ليا على صح الالة، بودني هادو سمعت كلام سيدي عطية الله حتى تكلم مع مولاتي وخدا شوارها..

_واشنو قاليها ؟

_داكشي اللي تخمي فيه الالة وشاغل بالك…!

علات حجبانها وقلبات شوفة للباب :

_هي بصح مولاي عطية الله ناوي يجيب عليا ضرة..

_تقولي سمعتيه بودنيك الالة..

_وشكون هادي تعرفيها اش سماها الله ومنين هي الكشينة ولا من العبيد..!

_لا ابلالة ولا وحدة… من الحريم نعام امولاتي..

_ ويليي على من الحريم…تعرفيها فايت شافتها عينيك..!

_اييه الالة واحد الشويطينة تكوي وتبخ العيون سم يقطر منهم ولسان تقولي غير نحلة بعسلها تقطر..!

_ايييه..هكااك.. !

_نعام الالة..

حركات راسها ورجعات لجناب سرير حلات واحد الصندوق وجبدات منو سرة ديال القرش تخرشش كلها مداتها للوصيفة وقالت :

_على كل خبار جديدة تزادك وحدة كيف هادي، يلاه سيري وعلمي السلطانة نوجد راسي ونبعت معاها..!

سيمانة بسبعيامها دازت كي شهر على كنزة، نهار على نهار ةهي في جناحها ما تخرج ما تشوفو مابين وحدية ومفتاحة مرة مرة تجي لعندها وتشوف اش تشهر واشنو حب خاطرها، لكن كنزة مكانت بخاطرها على غير العادة غير غير جابدة عليه وناعسة، وحتى بجمال القصر كيف موالفة ما حاسة، مرة مرة اكلم مع وحدية اللي غير ساهية وتخمم وليل كامل وهي تبكي بلحس وكنزة خاسة بيها عيات تسول وتفكر قالت يمكن توحشات دارهم ميكات عليها وخلاتها في حالها حتى هي بحالها، حنين جيلها رجع ليها ولات كيف جات نهار اللول، القصر في عيونها بلا الوان في غياب السلطان، ما كينش اللي تعجبها وتعمر عيونها وتخليها تنوض وتكعد من بلاصتها وتخرج من جناحها، هربانة من الحريم ومن محمد اللي شغل بالها بكلامو وخوفها منو زاد كبر، شكون قال وشكون ضمن ليها ما يفضها مع السلطان، وديك الساعة راسها مقطوع لا محال…!

السلطانة ملي شافت كنزة غبرات على عيونها وهي مولفة غير تبرصبص بين رجليها، خافت ومن ااحريم تردعات، لبسات عليها لباسها ورمات عليها سلهام وفي نص الليل قصدات الحريم بالغفلة وبلا عليم، ناوية تصدمهم و تشوف حقيقة الحريم اللي مخفية عليها، وفعلا الحريم مجمعات مع بعضياتهم ومقشبات الماكلة اللي تشهى كل نفس محطوط في الطوابل وضايرين بيه البنات، و وحدة من لاخرين واقفة لوسط بالكسوة مفتوحة من لقدام تا لفخضها ولفوق كلو عريان نص صدرها منو كيبان، طالقة شعر ورابطة عليها الحزام تشطح وتلوز للبنات وهوما يطبلو ليها ويغنيو ما دارين ما عالمين بقدوم السلطانة كل وحدة جالسة على حقيقتها، وشمس الضحى في القنت جالسة مادة رجليها و وصيفات يمسدو ليها وتانية تفك ليها في شعرها وبصباعها تمشط،

حتى تفتح عليهم الباب وتمات داخلة السلطانة والوصيفات موراها يتجاراو،الحريم غير شافوها قفزو يقادو في شعرهم ويلجمو في لباسهم وقفو مصافات محنيات، عرفية وصلاتها الخبار نزلات تجري من جناحها تمسح في فمها المسكينة عاد قالت في عشاها بسم الله…!

تحنات للسلطانة وقالت :

_ليلتكم مباركة الالة..!

ردات السلطانة كتشوف فيهم وفي الجو اللي ضاير بيهم وهي تقلب شفايفها معجبة ماضناتهم يكونو مقصرين زعما، قالت بينها وبين عرفية ما مسعاش للحريم :

_فيناهيا كنزة..!

_في جناحها الالة ماتنزلش وماتجمع مع البنات كيف العادة غتكون ناعسة نده عليها امولاتي..؟

_لا خليها انا غنطلع عندها..

تمات غادة وهي توقف كتشوف في دوك البنات شادين عندهم الطعارج والبندير محنيات ليها وهي تضورها فراسها وشقات التبسيمة على فمها وضارت عند عرفية قالت :

_عيطي على لميرات وعلى عيالات ولادي جيبيهم لجناح الحريم، نشوف حريم مولاي علاش يكّدو واش نيت يطربو ويغردو ولا غير جيب آفم وقول..!

تحنات بطاعة وقالت :

_نعام الالة..

طلعات السلطانة وعرفية خرجات تنفد الحكام، فحين الحريم شعلات فيهم الحيرة كل وحدة تجري وتجاري تلبس وتقاد وتنكف فراسها والغنايات ينحنحو ويدربو منهم شمس الضحى اللي طلعات لبيتها تجري مع وصيفاتها قادو ليها ويلبسوها ناوية تعجب عيون السلطانة، اما السلطانة طلعات لجناح كنزة دقو وصيفاتها ودخلو هوما لولين وكنزة غير شافتهم عرفاتهم وهي توقف وتحنات و وحدية موراها بحالها، حتى تمات داخلة عليهم كتضور عينيها فجناح ورجعات شافت فيها تطلع من رجليها لراسها وتشوف اش لابسة وباش ضالة، لكن كنيزة ماشي من العاكزين عارفة يقدر يدخل عليها شي حد في اي زمان لابسة لباسها ومزينة حالها بلا وصيفات بلا وصية، قربات للسلطانة وقالت :

_غير جالسة في الجماح ماتخرجيش يضربك البرد..

_ما ماعندي خاطر الالة لقيت راحتي في الجناح وجلست فيه..

_وعلاش يهرب ليك هاد الخاطر اشنو ناقصك..!

_في غياب السلطان الالة ناقصني كلشي..

تبسمات وحدية كتسمع وحدرات راسها والسلطانة معلية الحجبان وقالت :

_ممم، يلاه وا تبعيني جلسي معايا و ونسيني، ليوم امسية الحريم نزلي يضربك البرد شوية..!

حركات راسها بايجاب وقالت :

_واخا..

تحنات بالتحية والسلطانة خرجات ونزلات للحريم لقات بلاصتها وجدات في رمشة العين معلين ليها الجلسة الطبلة قدامها والشمع طويلة شاعل وعافيتو تلهب،شمس الضحى مزينة ومقادة شادة بلاصتها جنب السلطانة حادرة راس ومبسمة ،السلطانة غير شافتها كحلات بسم الحية ما حملتها ما قبلتها تنهدات ومشات لمكانها جلسات، والوصيفات طارو جابو ليها علاش تكالي رجليها،عاد تفتح الباب مزيان وتمو داخلين بنياتها مبسمين جلسو جنبها وانضافو ليها عيالات ولادها مزينين، والحريم مشتيين كل مجموعة فين جالسة، اشارت عرفية للحريم اللي كيطبلو يبداو وهو يهزو لوازمهم وطلعو الميزان، على صواتهم وعلى غناهم وتغريدتهم تمات نازلة كنزة و وحدية موراها عاقدة الغوباشة ماحاملة تنزل، الوصيفة البريكّيكّة غير شافت كنيزة وهي تشوف في لالة صفية اللي كانت عينيها على جمر تسنى هاد كنزة تبان وتضهر، حتى غمزاتها الوصيفة تشوف موراها وهي تضور لالة صفية وطلعات معاها عينيهاا.!

كنزة نازلة وتضور عينيها بين الحريم تشوف شكون كاين وشكون لا، في الحقيقة عينيها كيقلبو على وحدة فيهم راه معروفة وباينة حتى بانت ليها جالسة جنب السلطانة وهي تقرنهم وضارت شافت في وحدية طمنات بلي وراها وكملات طريقها حتى وقفات عليهم بتبسيمة تحنات ليهن بالتحية والسلطانة حركات راسها واشارت ليها لمكانها بين الميرات تجي تجلس،وهي تقرب وجلسات جنب اخت السلطانة لالة مسك ليل مادات ما جابت في شوفات لالة الصفية اللي كحلات بالعمى ملي شافت السلطانة اش داير عليها وهي لا عمرها عبرات الحريم ولا حتى دارت ليهم القيمة وتشطنات عليهم،اما لباسها وزينها شعل فيها العافية عاد عرفات عطية الله علاش بغاها حط عليها العين، جمعات فمها كي نقطة وحطات التغوبيشة بين حجبانها، كيفها كيف شمس الضحى اللي كون لقات العافية تشعلها فيها من حر اشنو دارت ليها مع السلطان والسلطانة تشوف فيها ورادة معاها البال عارفاها ما حاملة كنزة كا قابلاها غير مالقات منين دوز ليها..!

فحين كنزة غير جلسات حدا لالة مسك ليل نسات راسها ولات مرة مرة تطلع فيها عويناتها مبسمة حمقاتها وطيرات ليها العقل بعويناتها الكبار المرمشين جاتها كيف شي ملكة الحجمال جالسة جنبها، ولالة مسك ليل مرة مرة تبسم وتشوف فيها ملاحظة نضراتها البريئين وعلى راس كنزة واقفة الوصيفة البريكيكة تصنت ودي الكلام حتى نطقات كنزة وقالت :

_عويناتك غزالين مشااء الله ..!

ضحكات مسك ليل وردات :

_حتى نتي غزالة وفنة..

_لا ماشي بحالك.. (ميلات عندها راسها وقالت ) اشنو سميتك..!

ضحكات مسك ليل وقالت :

_ماعرفتينيش ههه !

ردات كترمش فيها : نتي خت مولاي عرفتك ولكن ماعرفتش سميتك..!

_انا اسميتي مسك ليل..

بدهشة ردات : مسك ليل !!! حتى سميتك غزالة، كلشي فيك زويين..

_هه شكرا..ونتي اش سماك الله..

_انا كنزة..

_بلا شك نتي هي البنت اللي كان وقع ليها مشكل مع لميرة الباثول..!

حكات شعرها وقالت: ااه..و..و لكن كنت عاد جيت ماكنت عارفاها وقللت عليها الاحترام كنبغي نمشي نطلب منها سماحة وكنخاف تردني..

_لميرة عصبية وعافيتها راكبة(قبيحة) وليني قلبها بيض وسميحة غير تكلمي معاها..

حركات كنزة راسها وحدراتو ومسك ليل تبسمات وضارت كتفرج في الحريم اللي كتشطح قدام السلطانة ولاخرين كيطبلو ليها ويغنيو، والخديدم عند رجليهم مربعة وصينية قدامها تجاري في اتاي ورزتو طالعة وريحتو عاطية تشهي،كبات الكيسان وعطات للخديمة تفرق عليهم وحدة وحدة، حتى وصلات لكينزة جات تمد ليها الكاس وهي تلوى ليها الرجل وضارت فبلاصة ما تحط الكاس بين ايديها قلباتو وحا مكفح فوق فخاض كنزة وهي تخطف و وقفات وااقف كتغوت وتنش مصلوقة من فخاضها والحريم حبسو كيشوفو فيها..!

_فففف تحرقت تحرقققت ااهى اااح فقفقف

وقفات مسك ليل شدات فيها وقالت:

مسك ليل :ماتخافيش بشويا عليك القفطان هاز عليك الحرقة..

_اااح لاا ااهى راا سخون حرقنيي اااهى فففف

وحدية:هز علييك القفطان مايشدش في لحمك..!

السلطان غوبشات وشافت في وصيفاتها وقالت :

_اشنو كتسناو ديوها للحكيمة تشوفها..!

تسربسو الوصيفات غادين مخرجينها وهي تبكي وتغوت بالحرقة اللي كلاتها وكلات لحمها من صاقها طلعات لفخاضها وهي غادا، السلطان خسر ليها الخاطر وعقداتهم كتشوف في شمس الضحى الضاحكة وتشوف في لالة صفية وتبسيمتها باينة مشفية،ماعرفات شكون بيناتهم مولات الفعلة حطات الكاس من ايديها وجمعات تغوبيشة عاد عرفية شيرات للحريم يكملو طربهم..!

اما كنيزة داوها للحكيمة حفضها الله القفطان هز عليها الحرقة لكن القلب طايل وخاصو غير سبة علامن يشكي، الدموع على خدها نازلين تبكي وتنحط هوما ضنوها على الحريق وهي بكاها كان مجموع فيه كل ما هو ضرها، نضفات ليها الحكيمة الحرقة وغطاتها ليها عاد رجعات للحريم وطلعات مباشرة لجناحها بدلات لباسها وتخشات في فراشها نعسات ورموشها بلما يلمعو،

صباح الغد السلطان اول من رسلات هو زروال يشوف حال كنزة ويطمنها على صحتها، ايلا جا السلطان ولقى مميزتو اش جاري فيها يقلب عليها الحريم وما فيه، زروال مشى عندها للجناح لقاها عند الشرجم الصغير حاطة ايديها تحت حنكها وجالسة ساهية تخمم والفطور جنبها محطوط ضاهر عليها عاد فطرات شاف في وحدية وقال :

_كي بقات..!

_الحرقة دابا تبرد ليها، اغير كنزة بوحاطية ما القفطان وازن هز عليها الحراق دابا تولي شوية لحمها زين دغيا يبرا..!

كنزة سمعات الحس موراها وهي تشوف زروال و وقفات مقربة عندو وهو نطق وقال :

_لالة ام سيدي كتسول على حالك كي بقات حرقتك وكي صبحات..!

ماسمعاتوش وتا كالمو ما تسوثلتو، قربات عندو وقالت :

_امتى غيجي مولاي ازروال، شحال باقي ليه..؟

_قولي ليا كدبي نكدب، مولف يسافر ولالة ام سيدي تبعت ليه المرسول وتشوف اخبارو واش قربات مجيتو ولا مزالها معطلة..ساعة بانت ليا هاد نوبة ما عليها حالة شي مرسول معناه مولاي ما غيتعطل..!

ردات مدهشة: كيفاش مرسول كيفاش كيتكتب….و و ايلا بغيت نكتبو مايقولو ليا والوو

_هلو (اهلو) وعايلتو هوما اللي يبعتو ليه، ما الحريم ما عندهم الحق وليني نتي مانعرف تاني حيت ماشي بحال الحريم لاخرين..!

دبلات عيونها محزنة وقالت :

_مغيخليونيش نكتب ليه..!

جلسات على السرير راخية كتافها وزروال كيشوف فيها، عزات في قلبو وبقات فيه ولا مضارب مع راسو واش يعاونها ولا يرجع لور ويخليها حتى نطق وقال متردد :

_اا..انا انعاونك واخا مافيك فايدة، كتبي مرسول ونسيفطو ليك لمولاي وهو ايلا قراه لحضتها يبعت ليك الجواب، وليني بشرط اامرسول سر مكتوم بيناتنا يسيق شي حد الخبار نكرك..

قفزات وقفات عليه وقالت :

_ك كيفاش غندير ليه…!!!

_كتبي رسالتك والحمام يوصلها ليه..

_وايلا هاد الحمام ما وصلهاش ليه..

_بادن الله والمولى توصل..

ضحكات والفرحة بسرعة ضوات ليها ملامحها ماحسات على راسها تا نقزات على زروال عنقاتو وهو كينقز بين ايديها ويترطى مخنوق و وحدية كتضحك وراهم وتسمع في كنزة كتقول :

_شكرااا شكراااا بزاااف عمر خيرك نساااااه راك عزيز عليا غير كنشد فييك والله حتى عزييز

_ممم واحيدي (دفعاها ورجع لور وقال ) قالت ليك نهار تولي سلطانة تركب ليا الموزون وتسيفطني بين العبيد نشط راني باقي ماناسيش كلامك..

ميلات راسها فيه وقالت : غير كنضحك معاك..نتا غتولي وصيفتي..ءء ز زعما وصيفي ياك كاين الوصيف ؟

_ياا شديتيني بالهضرة ، خليني نجيب اللي تكتب ليك المرسول..

_انا ك كنعرف نكتب..

_تعرفي تدوني..؟ عايني نشوف..

طار من بلاصتو جاب ليها الريش بو العين الزرقة والورقة قهوية، وعطاهم ليها وهي تشد ديك الريشة مبسمة وجلسات في لرض فوق الطبلة وبدات تكتب غير كتبات الكلمة لولى طار عليها زروال خداها كيقرا فيها وقال :

_اشناهيا هادي اش هادشي كتبيي… اشنو هاد الحرف شهاد بو زرواط ..!

خطف ليها الريش ضنها تخرق لانة متابة زمان ماشي هي كتابة دابا، زمان كانت كتابتهم كيف كتابة القران بالخط المنشوق ماشي بحال ديال دار:

_طلقي طلقي لواه تعرف تكتب طلقي لهنا..

ماعرفات مالو هزات كتافها وبقات جالسة في بلاصتها كل مرة تبسم غا بوحدها وتشوف فوحدية مبسمة ليها حتى جا زروال وجاب معاه الكتايبية جلسات على طبلة تصنت لكنزة وتكتب اشنو قالت ليها..فحين كنزة جلسات جنبها وحطات ايديها تحث حنكها وسردات ليها حروف المرسول و وحدية مبسمة تسمعفي كلامها ورزوال حال فمو وفيها نصدوم ، وهي مغمضة عينيها تسمع لدقات قلبة اللي باسم السلطان غيسكت كل ما قال ليها حطاتو وفي المرسول كتباتو عبرات لشوقها ولحاجتها ليه،للقصر اللي ولاَّ مسوس بغيابو بعدما كان مضوي وحلو بوجودو ، مدونة في المرسول امنيتها الملحة انو يوصل ليه ويقراه دعات يستاجب ليها الله يقرا مرسولها ويجي في الحين حيت مابقات قادرة على هاد الحَنِينْ اللي دبل قلبها الحزين….!

في اللحضة الموازية كان السلطان شاد المرسول بين ايديه عيونو بين الحروف يقراو وتبسيمتو على شفايفو واضحة وباينة، وهو كيقرا في كليمات محبوبتو اللي كتسنى انتضارو بفارغ الصبر،ضحك على اخر كلمة مكتوبة في المرسول وقال للراجل اللي واقف جنبو :

_السي عيسى، علم الحراس يوجدو القافلة والرحيل، قبل ادان الفجر نشدو طريق الله يجعل البراكة..!

قدام ساحة المبارزة واقف السلطان على عادتو بالجبادور مزينة حالتو شاد فايديه المرسول مبسم وقال للراجل اللي جنبو :

_السي عيسى، علم الحراس يوجدو القافلة والرحيل، قبل ادان الفجر نشدو طريق الله يجعل البراكة..!

السي عيسى: ك كون غير تزيد شي يامات ماسخينا بيكم امولاي..!

طبطب على كتاف عيسى وقال : شغل السلطان ما يتسنى اعيسى، لا هروب منو ولا راحة ليا وانا بعد من شعبي..

_كلامكم على حق امولاي، نتوما ادرى مني و ونتمناو ما تطول غيبتك علينا..

_انا اللي كنتسنى زيارتكم هاد نوبة..

شاف قدامو كيطوي داك المرسول خلاه عندو ورجع علا عينيه في الحراس اللي قدامو مبارزين بالسيف واحد حاضي من لاخر وواحد هاجم على تاني، والسلطان مركز معاهم حتى تضرب واحدة فيهم طاح ولاخر بقى واقف، نفسو اللي كان راهن عليه السلطان ،غير شافو خرج من المبارزة بلا ضربة وهو يتبسم وشاف في عيسى..!

_تخلص ولا تودي ؟

تبسم بحالو راضي بالخسارة وقال : تحث امرك امولاي..

_تجمع رحيلك واقيلا يلاه يدركك الوقت..

حرك عيسى راسو ورد:

_هاداك هو النهار الكبير امولاي، …ايلا قبلتو اسيدي هاد الحراس مني هدية ليكم، نتمناو تقبلوها..

_هديتك هدية مني للاميرة حسناء(اخت السلطان) نبغي حراسك عليها ليل ونهار ماتأديها تا شعرة في غيابها علينا..

حرك راسو عيسى بطاعة وسكت حادر راسو مبسم والفرحة لمشيتو لقصر السلطان على وجهو بارزة..!

فحين القصر على حالو مزال، كلا يلغي بلغاه محمد في غياب السلطان شد السلطة و ولا هو يحكم حكامو ويعطي لامر حتى ولاو العبيد كلهم يتشكاو منو ومن قصاوتو، اما شمس الضحى ولالة صفية يتسناو الفرصة اللي يعزلو فيها كنزة ساعة هي ماعطياهاش ليهم، ما ضور في قصر ما تخرج من جناحها كلشي كيطلع تا لعندها حتى خرجاتها وحدية بزز عليها ونزلاتها للتحث يضربها البرد خلاتها جالسة وقفات هي تضور فعينيها على محمد وتصدد عليه..!

كانت كنزة جالسة على جناب الخصة والحمام مجموع عليها ينقب من الزرع اللي تلوح ليه، حتى شافها زروال من بعيد وتم جاي لعندها شاف حولو مكاين حد وهو يجلس قدامها وقال :

_الخياط اللي قلت ليك جاي نده عليك فاش يدخل..!

حركات راسها وردات : واخا، جي عندي بكري قبل ما نعس..

حرك راسو وخدا منها زرع حتى هو كيلوح للحمام قدامو وهي تشوف فيه وقالت :

_مولاي موحال وصلاتو الرسالة ازروال شفتة ما رد عليها ولا حتى الحمام مارجعش ربعيام هادي باش مشى..

_خلي ايمانك بالله قوي المرسول عمرو خيب ضننا صبري على خبزتك..

شافت قدامها ويغفلة منها وهي تحتي على واحد الحمامة قجاتها وهزاتها في وجهو وقالت :

_دابا انا معولة على هادي تجيب ليا مولاي هذا هو الحماق..

غوت وفكها من ايديها : طلقي دورك تفلعصيها اش عرف الحمبير فسكنجبييير اودي اودي هاخلاك هاجلاك اناقصة عقيل وقالت ليك باغة تولي سلطانة وهي داير كي جرانة يسمعك مولاي يخرا عليك غا بضحك …مالكي تي عمركو في خربتكم ما رسلتو المروسل..

_لا مكنرسلوهش، ا اصلا ماعرفتش كيفاش كتيقو فيه يوصلو كيفاش هاد الحمام بغى يوصل ليكم المرسول..

_حيت ربيناه على توصيل المكتوب كي رباك نتي مولاي وسماك حمامة القصور….

_ممم مربينو…..مربينو وكتقتلوه !

_الا ياه، شتي داك الحمام اللي كيصيد مولاي،كيكون بزقو حشاك قاصح وفاش يطيح على البني كيرشيه وايلا بغينا نعاودو نقادوه كيسرط شلا ماصاريف..

_اوااه غيير البزق ديالو كيدير هاد الحالة..

_وييييه و الحمام اللي كيرسل المرسول مولاي اللي مربيه داخل القصر وفاش كيسافر كنرسلو لرسالة وسبحان ربي كيوصلها ويرجع..

_وكيفاش كيوصل لمولاي ،زعما ديك الحمامة كيفاش غتوصل لعندو وتديها ليه..

شاف لفوق ورد : بهادييك..

شافت لفوق بحالو ورجعات شافت فيه ببلاهة : شكون هاديك..

قلب شفايفو وهز راسها لفوق :

_شمش شتي شعى ديالها الحمام منو تايعرف منين غيمشي ويعرف الشرق من الغرب ويشد الطريق..

_واخا ولكن كيفاش غتعرف فين كاين مولاي ولا زعما كيفاش غتديها ليه هو نيشان، شكون قال دابا مرسولي مايمشي لعند شي حد ولا يتلف ويديها لواحد اخر..

رد ساخط: ايوا رااه قلنا ليك ياه حلي قلقولتك معايا المطنكّة

_ماقلتيش ليا اويلييي

_كّلت لييك..

_وصافي ماعلينا عاود قول مالك اش خاااسر

_قلت ليك مولاي مربي الحمام الزاجل،

بعدا هاد الحمام اللي يوصل المرسول اسميتو الحمام الزاجل ماشي ايها حمامة غتسيفطي معاها مرسولك،

ساست الزرع من ايديها وهزات رجليها عندها جلسات عليها مركزة معاه من ديما كانت من عشاق اي حاجة كتخص التاريخ وزروال حاها على الكّانة..!

ماعلينا هاد الحمام رباه مولاي واي مكان كان يسافر ليه كان يديه معاه، كي شتي دورك قصر اصيلا مولاي كل عام يمشي ليه ايوا وكيديه معاه راه حتى دابا دا معاه نص ونص كيخليه هنا،ايوا الحمام كيكون حافض الطريق اللي مشى فيه مع السلطان وملي كيعاود يسيفط المرسول معاه كيمشي ليه الحمام نيشان ما يتلفت لا هك لا هك..

_سبحاااان الله، و وعلاش مولاي دا غير نص وخلا لاخر..

_داك النص اللي داه كيخليه تما في قصر اصلا وكيجيب معاه نص الحمام الزاجل اللي مربينو ناس قصر اصيلا…(شافها حالها فمها كتخايل وهو يضور راسو وقال )ياا دركتي معايا شوية ولا والوو هااه ؟ ، (حركات راسها وكمل)ايو صافي وملي دابا غيجيب معاه حمام اصيلا غنوليو هو نرسلو بيه الرسايل لتما..

_بلاتي بلاتي قويتي عليا، دابا بحالا نتوما كتاخدو شي حمامة مربية هنا ياك وكتديوها للقصر لاخر وناس القصر ملي كيبغيو يسيفطو ليكم شي مرسول كياخدو ديك الحمام اللي ديتو من هنا حيت هي حافضة طريق دارها كتجي لهنا نيشاان وكتعاود ترجع ليهم حيت كتكون ديك ساعة ولفات تما..

_اييييه والحمام قالو تا يتبع الشمش والله اعلم تا يتبعها وبيها تايعرف الطريق فين يمشي…

_يعني مولاي غتكون وصلاتو الرسالة وعلاش ماردش عليا وربعيام هادي باش طارت الحمامة..

_وا هدااي عليا تا لهادي الله واعلم حتى ايلا وصلاتو ربعيام هادي مولاي ايلا بغى يجي غيكون شد طريق مابقى قد ما فات..

سكتات وشافت قدامها وهو زريعة الحمام ولا ينقب فيها ويلوح في فمو وخلا الحمام يبقلل فيه مرة مرة يشوف في كنزة ويدندن ويغني ويمعني عليها وهي كتسمع ليه وجامعة الغوباشة صبرات تاعيات لغناه حتى قال :

_الغرام حرام والربطة زغبية، نهار تعلقت بيك يا مولااااي،وليت كي الهبيل مشفي العديان وعقلي سرحان

جمعات فمها كي نقطة مغوبشة فيه وقالت :

_كتمعني عليا ولا اشنو دقان في الخامية ما كيتسمعش افلان ابلاتي دابا نرد ليك هادشي بضوبل..

طول سكات عاد رد عليها: مممم كون كانت صفيحة ترد العار، لو كانت رداتو على الحمار هههه احمارة القصور ههههه

خنزرات فييه و وقفات كتفور من كلامو و وحدية كتسمع ليه مخبية الضحكة اللي فالتهة ليها، زادت كنزة قدامها وهي تبعها وزروال ساس حوايجو وناض تاهو مشى لشغالو..!

واخا زروال هبيل ومقلقز في كلامو، وليني كيكون على حق وفعلا الخبار وصلات للقصر وبقدوم السلطان اللي قرب يدخل، ولا كلشي يجري العبيد ينقيو في الطريق و يوجدو ليه منين يدوز، والكشنية مقلوبة بالخدم وروايح د طعام طالعة منين ولين، اهل القصر مكانوش من العاكزين تلبسو وتزينو لاستقبالو وفي جناح السلطانة تجمعو يتسناو فيه،

حتى بدا كيتجهد صوت النفار العااالي في باب القصر، عالم على دخول السلطان وتسمع لداخل وتنشر، تجمعو العبيد عند الباب مشكلين جوج صفوفة محنيين بالتحية وشابكين ايديهم قدامهم، وهي تم داخلة قافلة السلطانة من وسطهم وهوما كيضحكو وبقدومو فرحانين، جا السلكان اللي غيابو داز غليهم كي غياب الشهور،السلطان اللي يجبر خاطر المسكور، والمهمون بعدلو فرحان ومبشور..

كنزة عند شرفة جناحو حاطة ايديها على السور وعينيها لتحث كتطل عليه بالفرحة عينيها دمعو وقلبها حساتو من صدرها طاير، تفتح داخالها وارتاح قلبها عاد حسات بروحها عايشة بشوفتو وهو نازل من القافلة وبايديه يشير لشعبو مبسم، شافت في وحدية جنبها اللي كانت عاقداهم وشوفتها حارة ما رادة لبال لا لسلطان ولا لشي حد عيونها كيف جمرة وشاعلة في محمد غير حسات بكنزة شافت فيها وهي تبسم وضارت عندها وقالت :

_ها مولاي جا،ماباقيش نشوفو هاد العيون دابلة نوبة اخرى

_من حدو حدايا عمرهم يدبلو..

جمعات نفس قوية من اعماق صدرها وطلقاتها براااحة كبيرة عمرها ولا حسات بيها من نهار فتحات عيونها في دنيا، عيونها مابعدو على سلطان ولا لحضة تبعاتو حتى سلم على الورزاء اللي وقفو جنبو والمشاويرو ديالو والناس المسؤولين معاه في القصر، سلم على محمد وخوتو وو ليداتهم الرجال عاد تم قاصد باب القصر والعبيد موراه يتهاتفو ويكبرو عليه ويدعيوه معاه بالنصر، فحين السلطان بعفوية منو وبدون قصد ترفعات عيونو الفوق حتى جات في عيونها مباشرة مبسمة ليه وبالفرحة كتبان غتنقز من تم، وقف ل لحضة كيشوف فيها وهو يتبسم كثر وزاد دخل وكنزة ضارت عند وحدية شادة في قلبها وقالت :

_داااخل داخل اوحدية غنطييير بالفرحة..

_على سلامتك ههه خليني نمشي قبل لا يجي مولاي ويلقاني هنا…

حركات راسها ووحدية خرجات خلاتها واقفة جامعة ايديها عندها ومبسمة النور ساطع في وجهها وعيونها يلمعو وبالدموع يبرييو…هاد التسنية اللي تسنى فيه غجناحو جاتها كثر من سفرو تعطل عليها وخافت مايجيش وهي مكاملة الدقيقة باش فات عتبة القصر..!

اما السلطان كتن في جناح السلطانة الام كيف ودعهم وهو غادي جا يسلم عليهم..تحنى باس للالهم توت القلوب على ايديها وهي كترضي عليه وتدعي معاه وداز سلم على خواتاتو مدوز ايديه على شعرهم عاد شير براسو لعيالات خوتو وقال :

_بادن الله تكون جميع بخيير..

السلطانة :بشوفتك امولاي بخيير تاحنا بخير الحمد الله رجعتي ليا سالم غانم الحمد الله..

_الحمد الله..

السلطانة: الاميرة حسناء لباس عليها واخا هي ماتسول فينا ماتشطن علينا واحجنا نسولو عليها..

_لباس عليها وحتى هي بلغاتكم سلامها…وقصر اصيلا كلو كيبلغكم سلامو..

_الله يبارك فيهم..و…ويسمح ليهم..

جمع تبسيمة اللي كان طالقها وشاف في السلطانة الام، مايحمل اللي يجبد حسناء بالعيب ولا يتكلمو عليها ويكرهو عليها القلوب قرن حجبانو وقال :

_ نخليكم..

ردات وهو خارج وقالت : ءء م مولاي ، م مكرخناش تعشى معانا ليوم..!

رد بايجاب : انشاء الله..

لجم عليه سلهانة وخرج من جناحها، تبعاتو حتى مشى وهي تغمض عينيها بعدما تدكرات خبر الحمل اللي ماقالت ليه وشافت في مسك ليل وقالت :

_الله يتبتا علشهادة شفت السلطان وتلفت، بلحق تا لعشى ونعلمو..!

السلطان كيف خرج من جناحها قصد جناحو مباشرة، الحراس غير شافوه وهوما يفتحو البيبان محنيين ليه بالتحية وهو يدخل وتسد الباب وراه، ضور عينيه دغيا في الجناح حتى شافها عند الشرفة واقفة غير لمحاتو عيونو تبسم وفتح دراعو ليها، وهي ضحكاااات وجات عندو كتجري خشاتها راسها في صدرو وعنقاااتو مزيرة عليه حتى نزلو دموعها و ولات تبكي بالصوت وهو كيسمع ليها ويضحك خلاها حتى تفشات على خاطرها عاد جابها قدامو وباس على راسها وقال :

_توحشتك..

_قلتي ليا مغتطلش علاش تعطلتي عليا تسنييتك بزااف

مسح دمعتها النازلة وقال : مرة اخرى نديك معايا..

_ماغتبقاش نخلييك تسافر بحال هكا كتخليني بوحدي ماكنعرف حتى حد وكتعطل عليا

تبسم وباس على راسها مرة اخرى وهو ينزل ايديه شد فايديها وداها معاه للسرير جلس وجلسها حداه كيدوز ايديه على شعرها وراسها وعينيه في عيونها بحرارة شوق كيحقق في ملامحها وهي اكثر بلهفة رفعات ايديها صغيورة كتدوزها على وجهو الكبير حتى غرقو صباعها وسط لحيتو الكثيفة وهي كتقول غارقة في بحر عيونو الكحال تمظب ايلا قالت لسانها اللي داوي بل كان قلبها اللي بحرارة الشوق خرج كاع اش فيه :

_فاش مشيتي قلت ماشي مشكل غير شي ايام وغيرجع ولكن نهار على نهار لقيت راسي بحال شي وردة تقطعات من غسنها وتلاحت وكل لحضة كتدبال…بحال شي فرخ تحل عليه سجن الشبيك وتعطاتو الحرية ولكن كيلقى راسو بعيد على موطنو وكيقلب عليه بريق ناشف يرجع ليه،

بنفس تبسيمة هز عندو ايديها باس راحتها وهي مكملة كلامها ومتبعاه بعيونها :

_من نهار دخلت للقصر وانا كنتمنى نخرج ولا نهرب منو حتى شفتك وليت كنتمى عمري نفوت عتبتو، في لول تعجبت بشخصيتك هيبتك حراكتك وضحكتك خاصة هههه قلت عادي حيت نتا سلطان وكيف اي وحدة عجبتيها حتى انا غتعجبني و ولكن نهار على نهار لقيت راسي بدون شعور تابعاك فيتما مشيتي وباغة اي حاجة تجمعني بيك واخا كنتي كتخلعني وشفت الموت بعينيا معاك وحتى فاش سيفطيتبني للسجن ماقدرتش نكرهك واخا ضلميتيني..

حرك راسو ورد : عارف راسي ضلمتك، نتمنى من الله عز وجل يسر ليا فيك ويطعمني حلال معاك، و يخليك هكا ويبعدك من غضبي باش مانقصاش عليك بزز مني…واخا راك جردتيني من سلطتيني وخليتي معاك كايها الناس، شحال تسنيت اللي تجي تنسيني في نفسي وتحررني من قوناني وتبين ليا حقيقتي، معاك عاد شفت بن يازيد اللي كان مخبي ورا لبسة السلطان، عطيت كلمة عمرني في بحر الهوى ما نعوم، ولكن من نهار شفتك وحبيتيك رجعت في كلامي…هاد الكلام كاع اللي كّلتي ماسمعتو اول مرة ياما جاو قبل منك و وهمو عقولهم بالغرام وقالوه ولكن كلامك قاص روحي وحسيت بروحك النقية لمسات روحي الحقيقة، وانو الغرام شي حقيقي ومن الله كيجي هدية كيف جيتيني نتي، وكيف عطيتيني روحك من ليوم نتي غرامي وروحي…

جر ايديها وعنقها عندو وهي تبسمات وحطات راسها على صدرو كتحس بايديه كيمشيو على شعرها ،براحة غمضات عيونها وهزاتها نفس من صدرها المفتوح، بحال السلطان اللي كيبوس على راسها مبسم وبيها مرتاح احساس العودة للوطن اللي عمرو حس بحالو،وهي بحضنو حاس بدنيا كملات وتملكات بين ايديه بكل مافيها، الملك الحقيقي والسعادة الحقيقة بعيدا على السلطة والحكم والمال..!

لحضات حتى طلعات فيه راسها وقالت :

_سيفطت ليك واحد الرساالة وصلاتك واش شفتيها..

_شفتها و (علا حاحبو ليمن وتبسم بجنب وقال) قريت حتى الكلام اللي فيها..

تبسمات وخبات وجهها وقالت :

_م ماعرفت حتى كيفاش كتبتو ..

قاص في شفايفها وقال : فين اللسان اللي قالو، منعاودش نسمعو ولا اشنو..

_لاا..

_ ادن نقراه..

حركات راسها ووقفات شادة فايديه جاراه وهو علا فيها راسو كيسمع ليها كتقول مبدلة الموضوع :

_لاا بلااش غتكون جيتي عيان خاصك تعشى باش تنعس ارتاح…

_واخا …يلاه تعشاي معايا..

ردات : و والسلطانة قالت ليا عرفية كيوجدو العشى ليكم مجموعين..

_بغيت نتعشى معاك جلسي جنبي حتى لمن بعد ونمشي عندهم..

تهز وقف وزول عليه سلهامو وهي جلسات على السرير متبعاه حتى دخل ااحمام وخرج مبدل عليه لباسو بلباس مريحة و واضح عليها ديال نوم فهمات انو السلطان مابقى ليه خروج من جناحو، عطى الامر الحراس يجيبو العشى ورجع جلس جنبها حتى طعوو العشى وزينو الطبلة وخرجو الخدم ومشى جلس وجلسها جنبو وقال بسم الله..!

السلطان عطى الامر الحراس يجيبو العشى ورجع جلس جنبها حتى طعوو العشى وزينو الطبلة وخرجو الخدم ومشى جلس وجلسها جنبو وقال بسم الله..وهي قالتها من وراه وباشرو في العشاء وبكلامهم محلين جليتهم!

_اشنو درتي في غيابي..!

بلعات اللقمة وقالت: و والو السلطانة عطاتني جناح في الحريم صافي وجلست فيه..

_قلت ليك بقاي في جناحي !

_بغيت نبقى ولكن ملي عطاتني السلطانة جناح خاص بيا ما مابغيتش نبقى فيه ونرونو ليك مشيت لهيه

حرك راسو وقال: تعشااي..

بدون رد حدرات راسها متعشى عارفة راسها خالفت امرو حتى سمعاتو غيتكلم وهي تعلي عينيه فيه :

_وفي جناح الحريم مادوى معاك حد..

هزات كتافها وردات :

_مسموميين و واحد نهار طيبو الحريرة وفاش طلبت ديك اللي كتفرق تعطيني قالت ليا مابقاش وانا كنشوف في الكّميلة عامرة،كيشدو معايا الضد بزاف و وعوتاني ف فاش كانت واحد السهرة بليل و وكانت السلطانة والاميرات كلهم مجموعين نزلت عندهم و وانا نتحرق

حبس الطعام وعقد فيها ححبانو كيسمع وهي كملات :

_خوات عليا واحد الخدامة كاس ديال اتاي فوق فخاضي حفض الله القفطان غليض هز عليا وحتى لحمي كيبرا دغيا…

_سمعي، من ليوم اخر مرة تفوتي باب جناحي هنا غتجلسي وهنا غتنعسي واللي نوا يخرجك منو قوليها ليا، متبقايش تمشي لعندهم فوتي طريقهم..

_راه الحريم اللي خاصو يتحيد حيت تجمعو فيه غير المسمومات..

_الحريم بعيد عليك نتي بعدي من طريقو وخليك منو..

_و ولكن ياك تعزلتي منو وقلتي ليا غنبقى معاك علاش غتخلي الحريم..

علا فبها حجبانو بمعنى انها فاتت حدودها معاه وهي تحدر راسها وكملات :

_حيت مغتبقى حتى وحدة تدخل عندك هادشي اللي سمعت..

_ايلا بغيتي يبقى مكانك في كّلبي كامل ماتدخليش في قوانيني وحكامي كيف قلت ليك الحريم بعيد عليك وهو فايد السلطانة بايديها تشطب عليه ولا تخليه…

حركات راسها وقالت : ايلا تشكيت من شي حاجة في حكامك غتغير بلاصتي في قلبك..

_بلاصتك في قلبي كبيرة وغااالية بايديك تزيدي تكبريها وبايديها تحيديها..بغيتك وليني انا السلطان وحكامي كيسرى فوق الجميع ماشي غير نتي..

مارجعاتش جاوباتو شربات الماء سرطات غصتها وسكتات وهو رد ليها البال وقال :

_تعشاي ماكليتي والوو..

_م مافياش جوع

جمع نيفها بين صباعو وقال : روحي تقلقات من كلامي، ماتخمميش ماكينش اللي تعمر بلاصتك في كّلبي غير يرتاح بالك، يلاه را ايلا ماكليتي قدام عيني ماغنعطيكش هديتك..

ردات بدهشة: جبتي ليا هدية..

حرك راسو وهي بالحماس وقفات حلفات ماتحط اللقمة في فمها حتى تشوفها والسلطان شد معاها العكس جلسها بزز حداه حتى كلات وشبعات مابقات قادرة تزيد عاد طلقها وسيفطها تجيبها ليه وهي تمشي هزتها من الصندوق وجابتها وجلسات قدامو مبسمة ومتبعاه بعينيها وهو كيفتح فيها حتى حلها وجبد قدام عيونها عقد كلو بالحجر كيلمع ويبري كبير وثقييل ضاير بحجر شفاف لامع و وسطو حجرة حمرة مضوية عليهم، حطو فايديها وهي مبسمة كتشوف فيه وقالت :

_هذا ديالي..!

_دياالك، وتصاوب خصيصا ليك..

_وااش بصح..!

حرك راسو باه وخداه ليها وهي ضارت بضهر ليه حتى هز ليها شعرها وركبو ليها عاد ضارت كتقيص فيه فرحاانة والتبسيمة من شفافيفها فالت ودغيا قربات باستو في حنكو وقالت :

_شكرااا احسن كاد..ءء هدية في حياتي عمرني غنيحدو

_بالصحة..

_فرحتيني ليوم ماكرهتش حتى انا نفرحك..!

تبسم كيدوز ابديه على خدها وهي حدرات راسها كتلعب بين صباعها وقالت :

_غنقوليك واحد الحاجة، واخا قالت ليا السلطانة مانقولها لتاحد حيت مكتيقش في الحريم وانا وسطهم ولكن نتا دابا جيتي وماتخلي حتى حد يقيصني..

عقد حجبانو وقال : ااش كاين..!

_ن نهار مشيتي..جات عندي السلطانة والحكيمة انا كان كيحسابلي غير مريضة ولا بيا شي حاجة خفت بزاف حيت مكنت كنحس بوالو،

_ااهاه زيدي..

_و وهي تقلبني بحال ديما وقالت ليا بلي انا..حاملة..!

قدام جناح السلطان كان واقف محمد غادي جاي يتسنى زعما خروج السلطان اللي عطى الكلمة باش يتعشى مع السلطانة، لكن ما خرج ما طل عليهم ومحمد ساق الخبار بلي كنزة عندو لداخل من الخدم اللي جابو العشى ورجعو للكشينة ولا كيف راس المقطوع غير يضور وينفر ما عاجبو حال..!

مسح على وجهو بفقصة منها وبقى غادي جاي قدام الجناح لا يخرج هو ولا تخرج هي نيت ساعة عيى بالانتضار وضاهر تاحد منهم ماغيخرج وهو يتنهد وحرك راسو وجا ماشي يعلم السلطانة الام حتى سمع شي صوت وراه ينده عليه وقف وضار بجنب راسو معلي حجبانو حتى وقفات قدامو وهو يشبك ايديه وراه وعلا فيها حجبانو ..!

فحين وحدية شوفة الكره والحقد اللي شاعلة في عيونها ماقدرات تخبيها ولا تخزنها منو عيات تبسم وتخبيهم وهوما كل ما شافو فيه كان كيف الغاز وكيتلاح فوق عافية عيونها وغير ماتزيد تلهب فيها..حدرات راسها ليه بالتحية وقالت:

_سيدي محمد، شحال قلبت عليك بغيت نطلب منك سماحة على اللي وقع اخر نوبة بيناتنا ماكنت ناوية نقيص فيك غير ماقدرت نخلي كنزة بين يديك وهي حاملة خفت يشوفها شي حد وينويها عوجة ونتا عارغهم كلهم عينيهم عليها..

رد وقال :مكاين باس رجعي لجناحك

جا ماشي من قدامها وهي ترد عليه:

_ءء س سيدي محمد..سيدي محمد..سمح ليا عندي ليك مزال ما يتقال..

تنهد وضار عندها مرة اخرى وقال :

_كنسمع

_اناا انا ما عرفت اش بينك وبين كنزة وليني ضاهر ليا كلامك على حق وبلي هي مكانها ماشي بين حيوط القصر..

_اشنو كتقصدي..!

_اللي قصدت اسيدي كنزة منفورة من الجميع وماكينش اللي باغي ليها الخير واخا هي غير نية والبي في قلبه على لسانها انا اللي كنشوف اش يديرو ليها وكيفاش يعاملوها نخاف غير شي نهار وسط لفعات الحريم تصبح فيها شي مصيبة…

_انا هادشي عارفو اشنو كاين تاني..

_ب بغيت غي نقول..ا ايلا بغيتي وورضيتي بيا قادرة نعاونك اسيدي تهرب كنزة من هنا..

بصدمة رد : عارفة ااش كتخرجي من فمك ولا لاا..

_عارفة وانا كون مابغيت ليها الخير ما نقدر حتى معاك ندوي في ضهرها وليني بان ليا هاد هو الصواب ..

شاف فيها مطول وحرك راسو وقال :

_رجعي لجناحك وفاش نحتاجك غنعيط ليك..خلي هاد الكلام بيناتنا و وياااك يعرفو شي حد من غيرنا..

حدرات راسها بطاعة ليه وهو زاد مشى قدام عيونها وهي بقات واقفة متبعاه كتنهج مصبرة نفسها قدامو مزز ماتكمش فيه وتخرج بايديها عينيه، جمعات الماء في فمها ودفلات في البلاصة اللي كان واقف فيها ومشات..عاد مورا الكولوار اللي كانو واقفين فيه خرج عيسى بالحس مبسم كيحك ايديه مع بضعهم وقال :

_الله ياودي…كلامك يبقى بيناتنا اسي محمد، لا نتا من جيلنا ولا حنا من جيلك جيتي من ورانا وتربعيتي فوق اعلى مقام ولحتي كلشي لتوش(للجنب) ياحسرة على زماني عطاك نتا اللي غريب عليه وخدا مني انا اللي ولدو، وليني ايلا ما تواليتك وطيرتك ليوم قبل غدا مانا عيسى وماولدات فيا مي غا لخلا..!

_و وهي تقلبني بحال ديما وقالت ليا بلي انا..حاملة..!

علا حجباانو وسكت مما نطق ما تكلم عينو عليها ودماغو ماهو معاه، وهي بلعات ريقها من سكاتو ماعرفات اشنو كيضور تحث راسو…حتى قال :

_كلامك معقول ولا راك كتفلاي..!

حركات راسها وردات : ااه والله ماكنكدب علييك الحكيمة اللي قالتها ليا

_وليني..

شاف قدامو عاقد حجبانو وحك على دقنو مافهم ما وعى من امتى و واش من اول مرة، ولا مع كثرة الممارسة، بكثرة انتضارو نهار تحقق مبتغاه ماتيق ما بغى عقلو يستوعبو…!

_وااش متأكدة مانجيبش الحكيمة ترجع تقلبك من مدة وجديد (من لول)

_هي قالت مبروك على مولاي ملي قلباتني علاش غنكدب حتى انا ماتيقتش ولكن هادشي اللي قالت حتى السلطانة

_ماشي مسألة كدوب وليني..

جمع الوقفة وناض متاجه لباب وهي متبعاه بعينيها حتى فتحو وتكلم مع الحراس وسدو ورجع عندها..

_عيطيتي عليها ت تعاود تقلبني..

_لازم نسمعها من فم الحكيمة

سكتات وحدرات راسها وهو كيشوف فيها عارفها بوحاطية وغير ايلا قاصتها البرا تقول هنا تموت، ضنها تكون سمعات شوقو ورغبتو الكبيرة في الولاد ربما تكون دارت بالها معاهم والحكيمة باش تهنى منها تقوليها راك حاملة.. !!

هاد الاخيرة غير سمعات السلطان طلبها فالحين حضرات دخلات محنية ليه بالنحية، والوصيفات وراها حادرين ومنو حشمانين، وكنزة وقفات لهيه عاطياها اتساع حتى قال :

_كنزة كتقول حاملة..واش هاد الكلام معقول..!

حركات راسها وقالت : نعام امولاي..!

رد وقال : قلبيها كّدامي..

حركات راسها بايجاب وكنزة خلفو مبعدة منها حتى ضار شاف فيها معلي حجبانو عاد تحركات ودازت للسرير تكات مزيرة القفطان لا يطلع ليها شداتها البكية من الحشمة ولات كترجف وتغطي فراسها مرضاتش تعرا قدامو وقدام الحكيمة هاد الاخيرة اللي جلسات جنبها ودوزات عليها ايزار وغطاتها عاد خشات ايديها من لتحث باش تهز ليها القفطان كيفها كيف كنزة ماتقدرش وتحشم تعريها قدامو، فحين السلطان مكانش اقل حياءا حس بيهم مزيرين منو وهو يخرج وخلاهم معاها وكنزة شافت في الحكيمة وقالت :

_و واش بصح حاملة السلطان متاقش في كلامي…

ردات الحكيمة : مولاي من زمان وهو يتسنى اللي تجيه بحالك ياما جاو وبغاهم وليني محملوش ونتي من عطيتيه اش بغى وجبتي ليه ولي العهد من لفوق..الانسان فاش تعطاه النعمة نوبة وحدة يدخل يدخل معاه شك وعقلو ما يتيق بيه..!

_ولكن شحال من وحدة في الحريم كلهم يقدرو يحملو و واش عمرهم م ما جربو م معاه..

_من زمان ونتي معاهم مزالتي ماعرفتي اشنو كاين، مولاي ماكينعس مع ايتها وحدة والحريم غير ايلا بغى يزهى شي ليلة تا وحدة فيهم ما ناويها للمعقول..

حركات راسها وحدراتو والحكيمة بعدما قلباتها ناضت ومسحات ايديها حتى تفتح بابا الجناح، وتم داخل السلطان بسلهامو يشالي،لمحاتو الحكيمة و وقفات مطرقة كي المسمار حانية راس وعاكفة الايدين قدامها، والوصيفات خلفها كيف القطوط الحاصلة مخزونين، يطلعو فعيونهم ويطلو في السلطان حشمانين..!

قرب ليهم مولاي السلطان شابك ايديه وراه وراسو مرفوع، عيونو مبشرين وحجبانو مقرونين، ماتعرفو فرحان ولا غضبان..شاف فيها وقال :

_صحيح هاد الكلام ؟

حركات راسها الحكيمة باه وقالت مبسمة : نعام آمولاي..!

ضار عطاهم بضهرو جيهت السريير مبسم وتنهيدة الفرحة من صدرو خرجات، وعينيه من شوفتها توسعات، وهوما شافو في بعضهم يتغامزو مصدومين من ضحكة السلطان اللي عمرها لمحاتها عيونهم..!

الحكيمة تحدرات ليه بالتحية وخرجات للباب ليه محنية ، فحين هو زاد خطواتو مبشر وتبسيمة مزينة ملامحو حتى جلس جنبها وهي حادرة عيونها منو، تكعدات شوية وزيرات ايديها قدامها مشافتش لعندو، وقالت:

_مكدبتش علك اللي قالتو لينا الحكيمة قلتو لييك..

دوز ايديه هلى خدها مبسم والفرحة في عينيه تلمع وقال :

_ما كّلتش كدبتي..

مارجعاتش تكلمات وهو مراقبها ومراقب ملامحها المقلقين منو ورموش عيونها كيتحركو دغيا هز ايديه وقاص فيهم بصباعو وهي تبعد وشافت فيه مغوبشة :

_شحال تسنيت اللي تجيب ليا الصبي اللي يهز عليا الحمل ونسند عليه ضهري، ماكرهتكش تولديه ليا ليوم قبل غدا ويتكلم ليوم قبل غدا ويكبر ويولي شاب بعقلو ليوم قبل غدا نحط بايديه سوارت القصر ونعطيه عرشي ونريح بالي..

ردات : و ايلا كانت بنية..

_لا انشاء الله يكون صبي.. لازم يكون صبي ، اللي ولد الولاد يتعجب في البانضية ما البنية ما كيف الهدية من الله ما تخلقات تجلس في عرش ولا تهز الحكام داكشي علاش لازمو يكون صبي هو لول

_شحال كتحكرو البناات اشنو فيها ايلا جات بنية وشدات الحكام يلاه ماغتعرفش تحكم بلعكس راه حنى اصلا خلقنا الله دكيات وقادين على كلشي..

رد مبسم وتحنى باش شفايها وكمل : مجاوش وقالو ليكم ناقصات عقيل ماقصدو فيها لا راكم غشيمات ولا قلالات الفهامة غير نتوما نسى كتغلبكم المحنة وقبل ماتفكرو بعقلكم تصبقو محنتكم قدامكم عكس الرجال اللي حكامهم حكام يسرى على اي خلق كيف ما كان..هادشي علاش الحكام والسلطة ما تليق بيكم..!

_انشاء الله يكون وليد..و وكيشبه ليك

دوز ايديه على كرشها وقال :

_غير يتزاد على خيير..(قبل ما يكمل كلامو علا عينيه وشاف فيها كتلوا وتضحك )ههه مالك..

_و والو كتهرني

_هه كتهريي..!

_اااه هههههه ط طلق..

تبسم وزاد كيحرك ايديه على كرشها كثر حتى ناضت وبغات تبعد عليها وهو رجع شدها وهي غتسخف بين ايديه

_ولااا هههههه لاااا لااا طلق منيي ههه كتتهرنيي ههه سخفت فف هههه

ضحك لضحكتها وحط البلغة من رجليه وطلع جنبها فوق سرير، جرها على صدرو وباس على راسها وقال في ودنيها بكلام خافت بورش لجنها :

_توحشتك..و توحشت..

طلع فيها عينيه وغمزها وهي حدراتهم دغيا وخشات راسها في في صدرو مبسمة حتى علا وجهها من فكها شافت فيه وتحنى لعندها غارق في حرب غراامها بجنود الشهوة اللي كانت متحكمة بشدة في الحرب مخلياه قتيل قدامها وهي بحركاتها مسيطرة وشادة لجامو…فحين السلطانة الام عند طبلة العشاء مزالها منتاضرة قدوم السلطان،حتى جا محمد وعلمها عاد ناضت وخلات العشا في بلاصتو معلية الحجبان والفقصة في قلبها كتنبش من كلمة السلطان اللي نزلات وقدام مو ماشي الغريب..!

ضلمة الليل نزلات وحلات محلها شميسة مشرقة ومصحصحة ضربات في عيون كنزة حتى فيقاتها من نعاس وناضت بتعب كتحرك عيونها في الجناح ملقاتوش و رجعات تكات حتى دخلات عليها عرفية مبسمة وهازة فايديها كل ل اللي تشهى نفس دايرين جهد وفوق جهد باش يجهزو ليها و يوحموه حتى قبل ما يبدى وحمها، حطاتو فوق الطبلة ودخلات مع كنزة لاحمام فركاتها وريحاتها عاد خرجاتها لبسات سروال طويل مرطز من الجناب والجابادور من لفوق طويلة ونازلة بالطرز البلدي كلها محجرة تلمع وتبري، وجلسات قدام المراية وعرفية وراها تضفر ليها في شعرها نزلاتو تا لتحث لقاتو تابعخا كيتنسل مطمطات شفايفها وقالت :

_شعرك تايتنسل تقولي مقرع لازمو شي دوا يخفف عليه..

_عيت مانداوي فيه وتقولي واش بغى يحبس خلاص ملي جيت لهنا عاد مازاد في الطياح يمكن تبدل عليه الما لا؟

_لا ياه الما مايديرش ليه هك..دابا نجيب ليك واحد العشوب دقة بطلة مايميشو ما يجيو معاه..

_اشنو فيهم كيفاش كتخلطيهم..

_ايوا فيه حبيبات القرنفل و فيه وريقات الحنة والورد وشوية دالازير و زييد وزيد ونخلطو ليك مع زويتة بلدية ويكون خير..

_عنداك يخنزو ليا راسي القرنفل فيه ريحة مجهدة..

_ديريه ديك الساعة وحيديه..

جابتو قدامها مضفور وهزات ريحة العود دوزاتها على عنقها وصدرها اللي بالقفطان وقف وبان فيه النص ، لاحت عليها سلهام يليق بالقفطان ووقفاتها تضور وتشوف في لبيسة..

_زوين سلهام حسيت براسي شي حاااجة هههه

_دابا تولي بصح سلطانة وبين الساطانات تضوي..

_ديك الساعة غنديرك نتي و وحدية وصيفاتي خاصين بيا وتجلسو معايا في جناحي..

_هاداك هو نهااار الكبيير يا سعدي بيه

_مابقى واالو ههه فين مولاي..!

_في ساحة الصيد شفت حراسو قاصدين ديك الجيه..وكون تشوفي شحال فرحو ليه ناس القبيلة كلشي يزغرت وكلشي فرحان،مولاي غا صبح صباح سيفك الضحية لكل باب البرا يبرح والوزاع وراه يدث الباب ويحك الضحية وعبرة دزرع ياربي تقبل ليه وتؤزقو وتدومو علينا..

_فرق صدااقة على نااس..

_اييه على حساب حبالتك والعيد ايامو داخلة جاد على الناس الله يحسن العوان العيد من رمضان وهوما يخمو ليه..

تبسمات وقالت : غنمشي عندو..

_هههه يلاه زيدي نمشي معاك

خشات البلغة في رجليها وخرجات مع عرفية فرحاانة وايديها على شعرها تلعب فيها..!

ساحة الصيد بالسلطان تنورت تاني وبرجوعو ليها زهات والحمام منو هربان تاوحدة مابقات فوق القصر تبان ولا تحوم وهو خدام يصيد فيهم ايلا ضرب ضربة ما يعاود

ختها، والحمامة اللي طاحت ما ترجع تكعد حتى سمع شي صوت موراه قال :

_مولاي..!

تلفت مبسم شاف فيه ورجع شاف قدامو ورد :

_عطية الله زيد قرب..!

_تبارك الله عليكم امولاي، سمعت شي خبار امولاي وجيت نبارك ليك..شي عبدة غتجيب لينا ولي العهد ولد مولاي مبرووك عليكم الله يجعلو فال خير علينا وعلى والقصر ..

حرك راسو ورد: الله يبارك فييك…العقبة عندك..

_ههه واهلي كون لقينا معامن ما كرهناهم..وليني يكون خير نشاعلاه نجيبو اللي تجيبهم لينا..

شير السلطان بالسهم في الحمامة تا طاحت عند رجلين لمير عطية الله، بلع ريقو منها وشاف في السلطان مبسم ليه والسهم فايديه :

_نفهم من كلامك ناوي تكرر التزويجة..

حرك راسو كيضحك : ههه داك الموضوع علاش جيت نتكلم معاكم امولاي ههه..

السلطان حك السهم من ايديه والحارس عطاه الدرة يمسح وقال وهو كيقرب عندو :

_مرحبا قول اش عندك..!

كنزة عند الباب القصر رمات الخطوة وعرفية حداها حتى قشعهم زروال وجا يجري عندهم، عرفية خلاتو معاها و رجعات للكشينة عند شغلها وهو تحرك معاها لساحة صيد غادي ويتكلم حتى وقف عليهم عيسى وحرك راسو في زروال وقال :

_فين غادين..!

قال زروال مرعد منو مشير ليها: ب باغا مولاي..(شا فكنزة معرفاتوش وقال) هذا السي عيسى يد مولاي ليمنة قبل السي محمد..

_مولاي مشغول رجعي عندو من بعد..

خنزرات في طريقة كلامو وقالت : قوليه كنزة جات وايلا قالها بفمو غنرجع..

_كون بغاك مولاي يوصي عليك يلاه رجعو مولاي مشغول مع لمير..

ضار عطاهم بالضهر وزروال نغزها يرجعو وهي تخنزر فيه ووقفات مجبدة ورا عيسى كتشوف في السلطان واقف مع عطية الله كيتكلمو وعيسى حس عليها ورجع ضار عندها…

_تكلمت معاكم اشنو كتسناو..

نطق زروال وقال : يلااه يلاه نمشيو

_ماغنمشيش محمد ومكيمنعنيش على مولاي بقى غير هذا..

_لسانك مجبد ماتخافيش على روحك ولا اشنو..محمد من مقامك تدكري اسمو حرفي

قلبات وجهها مجوباتوش وهو يغوبش فيها وضار شاف قدامو شابك ايديه وهي موراه مخنزة كثر منو، كان كيبان ليها غير عطية الله من ضهر والسلطان قدامو ماواضح لا كلامهم ولا علامن يتكلمو، مكانتش عارفة بلي الموضوع عليها وعطية الله قدام السلطان يتكلم على رغبتو بيها وطلبها ايديها من السلطان…!

هاد الاخير اللي علا الحاحب في عطية الله وقال :

_عارف اللي يحط عينيه على حريمي ويشوف فيهم بنضرة ناقصة اشنو يوقع فيه..!

_عارف امولاي وليني ما فجهدي حيلة عيت نصبر ونحدر عيني منها ووليني ما قدرت خلاص ملي شفتها تحولات لوصيفة السلطانة قلت نطلبها منكم والكمال على الله..

السلطان شاف فيه مطول ورد متفهم رغبتو وحاس بنقصو ومرارة عيشتو مع زوجتو لولى، قال فنفسو مدامو تخير كنزة ومن غيرها ما غتجي علاش يمنع الحريم ما يتزوجو غيرو.. حرك راسو وقال :

_واخا كّوليا شكون هادي اللي سحراتك وخلاتك تلغي بهاد الكلام كّدامي..

_واحد العبدة سماها الله كنزة…نطلبها منكم امولاي ايلا وافقتو بغيتها المراة الثانية اللي ماتجي وراها ثالتة بادن الله وسمح ليا امولاي على هاد الكلام..

_قلتي ليا تكلمتي مع السلطانة فهاد الموضوع..

_اييه نعام امولاي..

_واشنو كّالت ليك ..

_تكلمت معاها وماردات عليا لا بايه لا بلا خلاتني معلق نخمم قالت ليا يجي السلطان حيت كنتي امولاي مسافر وتكلم معاه، وانا جيت نتكلم معاك ونطلبها للحلال ما نضور بيها ما نشوه سمعتها..السلطانة قالت ليا رجعاتها من الحريم وفي امكانها ترجعها حتى من الوصيفات وماتبقاش محسوبة عليكم امولاي وناخدها على سنة الله ورسوله..

_اهااه يعني مكّالتش ليك العبدة اللي راك ساير تطلب فيها ..مني حاملة وقريب تولي تحث دمتي..

حل فيه عطية الله فمو وعيونو توسعو بحر الدهشة لكنو وعى على نفسو ورد مقجوج :

_لا امولاي..

_هاد الكلام اللي كاين، مانبغيش نوبة اخرى تحط العين على حريمي ولا قصر فاس مزالو خاوي طالب الناس اللي يعمروه..

حرك راسو عطية الله وضار ساخط كيبخ فاهم من السلطان انو ايلا رجع شاف في الحريم ديالو ينفيه ولاخر مرة يعتب داخل القصر،والسلطان متبعو بعينيه حتى مشى دوز ايديه على وجهو كيغلي والغضب عمى عينييه ولا كيف شي واد حامل خاصو غير علامن يفيض، فحين كنزة غير شافت عطية الله تحرك من قدامو من جيهة اخرى وهي تفوت عيسى بسهوة منو ومشات تزرب لعند السلطان وهو جا يتبعها لقاها ضربات في طريق نص وقف في مكانو كيضرو ويحك تحث دقنو..لكن كنزة ما جات فين توصل للسلطان حتى شافتو غادي ورا عطية الله وهي توقف وقالت :

_مولاي..!

تلفت عندها السلطان وتم جاي لجيهتها وقال :

_اش خرجك من الجناح..!

_نزلت عندك..(تبسمات وقربات شدات فايديه وقالت) بغيت نتعلم نصيد الحمام معاك واخا نزلتي وماقلتيش ليهم يجيبو ليك حمامة القصور!

تبسم فوق الخاطر وباس على راسها وقال :

_خليك هنا ماتمشي فين..

حركات راسها واقفة في مكانها وهو مشى تابع عطية الله وهي وتمشي للصور وقفات عليه تطل لتحث وتسنى فيها فحين عيسى من بعيد مراقبها ومراقب حركات السلطان معاها، حك على ايديه يمكن عاد عرف انو هادي هي العبدة اللي كلشي كيتكلم عليها وهو يتحرك وقرب مبسم عندها..!

تفتح باب جناح السلطانة الام وعند الباب تعلم بقدوم السلطان، وقفات من طيلة الفطور و وقفات مسمرة شابكة ايديها قدامها و و صيفاتها وبناتها جنبها محنين بالتحية مطرقين كي المسمار، حتى تم داخل السلطان، وهي تبسم في وجهو لكن هو مكانتش على وجهو البشارة وغير من شوفة في عينيه تعرف وتفهم وادو الهايج اللي علاين يفيض عليها،جمعات تبسيمة وقالت :

_ياك لاباس امولاي شي باس ما كاين!

وقف السلطان قدامها ورد ببرودة كيغلي قال :

_تبرييت فيك وكّلت عمرك كلمتك ماتنطق فوق كلامي..حطيت فايديك سوارت الحرييم وعطيتك نتي راي وشوار..

قاطعتو وردات : س سمعني اولدي ماتحكمش عليا

رد : سافرت يومين لقيت لميير حاط العين على حريمي

ردات و قالت :غير سمعني امولاي وتفهم…

السلطان كمل كلامو بحالا ماسمع كلامها :

_تكلم معاك عطية الله وعطيته الامل بالزواج من كنزة، علاش ماتلعميهش وماتوعيهش باللي شاف في حريمي اشنو يوقع فيه، جاريتي حاملة وهو كيطلبها منك وكّلتي ليه حتى نجي !!!

ردات : سمعني اوادي ماتحكمش عليا ماكنتش نقدر نقول لشي حد كنزة حاملة و الحريم مافيه تيقة، هوما غير عبدتك المميزة ما حاملة ما هازة في كرشها وسمموها بين ليلة ونهار عاساك كنزة اللي حاملة امولاي على مصلاحتها سكتت وخل(قاطعها صاااعر في وجهها)

_ايلاااا كنتي تخافي من الحريم علاش تشدي سواارتو خليني منيي ليهم واللي تجرئ وتقرب ليها نقطع راااسو بايدي…واش الحرييم جبتو نتخيرو اللي تجيب الورييييث ولا جبتهم للحرب شي يحفر لشي الغدر هذا زماااان حدرت عليييه نعاودو اللغى من لول

_ومالنا حتى على هاد الحالة امولاي نتا عادل وماتبغي ضلم علاش يتقطعو الريوس على قبلها وهي غير جارية ايلا كتاب وعاش اللي في كرشها غتولدو وترجع كيف الحريم بحالها بحالهم اشنو فارق عليها، نتمناو يعيش اللي في كرشها هو اللي هازينو همو ..

علا حجبانو سامع لكلامها حتى كملات مالقى باش يرد عليها بعد اللي قالتو واللي خرج من فمها دوز ابديه تحت دقنو ونطقات قبل ما ينطق :

_انا مكانش في علمي مولاي عطية الله حاط العين عليها حتى جا وعلمني بيها كون عرفت من نهار لول نحدرو يقرب ليها اللي خاف نجى امولاي خفت على عبدتك لا يقيصوها في غيابك سكت ومابغيت نعلم بحملها حتى تجي وتكون تحث حمايتك،

حرك راسو وشاف فيهم واحد بواحد ورد بحدة :

_تالت يوم العيد يتجهز عرس السلطان، عرس السلطان بالعبدة المتحررة كنزة مانبغيش ولا غلط ولا مشكل يجرا فييه واللي زغباتو نفسو يحفر فليلة عرسييي نحلف باللي خلقنا جميييع يطيير رااسو ويتشوا قدام العبااد..

_هادشي عمرو وقع ولا كان اي عبدة حملات ناخدوها للزواج ديك العبدة مانعرفو لا اصلها لا مفصلها نخليو بنات الدار لكبيرة وناخدو اللي جات بين ليلة ونهار ااذ عرفنا بيهاا وماحنا واتقين تا من حملها واش يكمل على خير ولا يوقع شي مشكل، من قوانين القصر هذا زمان نهار تحمل الجارية لازمها تولد بسلام عاد بامكان السلطان يتزوجها على سنة الله ورسوله

_انا السطان وانا اللي نمنع الحكام ونخلقهم،وهذا قانون جدييد مني اي السلطان غيحكم ويشد العرش بعدي يتزوج بالي تشهات خاطرو بحملها ولا بلاش بواليديه ولا مقطوعة من شجرة عبدة ولا خديمة حر وفزوااجو يتعزل ويتخير..

سكتات بدون رد وحدرات راسها وهو مطول فيها شوفة حتى رجع حطوة لور وقال غادي :

_كملو فطوركم…

عطاهم بالضهر وخرج من جناحها وهوما محنيين ليه حتى من السلطانة تحنات رغما عليها بالفقصة ولات تناخد وتنهج وبناتها يشوفو فيها ما عرفو يفرحو لعرس مولاهم ولا يتفقصو مع السلطانة،

فحين السلطان مكانش قل منها غضبا خرج من جناحها يغلي ويفووور ماجا فين يضور مع الكولوار حتى تخطططف مرفووووع وهز ايديه لفوق شاد سيف عطية الله اللي حس بيه غينزل عليييه مع الضورة…عطية الله اللي سمع كل كلام السلطان بحر الغضب عيونو تعماو مع شافو خارج وهو يجبد سيفو ونزل عليييه غافلو لكن سلطان خيب ضنو وشد السيف بين ايديه ولمير كيشوف فيه وفدم نازل مع برييييق سيفو كيقطر، كلو ينهج ويترعد خرج عينيه في سلطان بنضرة حااارة كثر من شوفتو وقال :

_اللي حطيت عليها العين عاد تعجبك وتحلا ليك فيها الشوفة وتبغييها..من صغرك اناني ومتسلط وباغي كلشيي لييييك…

طلق السلطان من السيف وشاف فايديه محفووورة كلها نازلة بالدم وبسرعة ضار نتر السيف من قدام الحاارس اللي جنبو وهوما ما جاو فين يتحركو بشدو عطية الله حتى هز ايديه ومنعهم يقربو وهو يهز السيف وبالضورة اللي غيضور نزل بيه على عطية الله لكن لقاه في الاستعداد هاز سيفو بالعرض مانع سيف السلطان ما يقيس فيه وجهو في وجهو وعيونهم حارة في بعضياااتهم..!

الحارس دخل يجري علم السلطانة وهي تخرج طلات عليهم من لباب شداتها سخفة والساكتة ضرباتها ما قدرات تكلم ولا تلجم الحروف، وبناتها رجعو لور مصدومات يرجفو بالخلعة، عيينيهم خارجين وهوما كيشوف في السلطان اللي هز سيفو من سيف عطية الله،

هاد الاخير اللي رجع هز السيف وشير بيه نيشان للسلطان حتى ترشكّ في الحيط والسلطان فلت منو وبعد لور مصدوم من خوه اللي عرا على نيابو وهز السيف فوجهو..

تكلمات السلطانة موراهم سخفانة وقالت :

_الله يهدييك ما تفرجو فيكم عباد الله..

رد عطية الله بغل : خليهم يتفرجو خلي كلشي يشهد ويشوف لمير كيقتل السلطان قدام عيونهم

تبسم ورد عليه :ماتحكمش بالفوز ونتا وسط المعركة…(التف بسرعة ونزل بالسيف على دراع عطية الله حتى تقطع عليه لباس وطوووش دموو الدم وقال ) ارا ما عندك اولد ميمتي…

هز عطية الله سيفو نوبة اخرى جاهل وباستهزاء السلطان المبسم صاااعر، جرا لجيهتو هاز سيفو والسلطان منو كيفلت كيف الشعرة مايجي فين يحط عليه السيف كيلقى قدامو غير ريح، الوصيفة البريكيكة تزبقات وسطهم ومشات تجري لحناح لالة صفية علماتها وحابتها معاها وهي خرجات عند راجلها تسابق بين كولوارات القصر وتغوت قدام الخدم حتى كلشي هزو الفضول وتبعوها يشوفو ااش اقع،

في لمحة بصر قدام جناح السلطانة تزرزر بالعائلة فقط، تاحد ماقدر يقرب ويفك حتى من خوت السلطان لاخرين فوقما بغاو يقربو كيهز في وجهم السلطان سيفو ويحدرهم يقربو…!

عند كنزة اللي ما جات فين تهز نفس مرتاحة حتى حسات بشي حد واقف جنبها، تلفتات شافتو وقالت:

_راك شفتي بعينيك السلطان بنفسو ما سيفطنيش ندخل وقال ليا نتسناه هنا..

رفع ايديه قدامو ورد :

_سمحي ليا على كلامي غير ماعرفتكش وعمري لمحتك في قصر مولاي..

شافت قدامها وحركات راسها ما دوات ما تكلمات معاه سكتات وضربات طم ما مرتاحة في الوقفة ولا الهضر معاه حتى تدكرات كلام زروال عاد تلفتات فيه وقالت :

_نتا كنتي خدام عند مولاي قبل من محمد ؟

_المشاوري محمد مايعجبوش الحال تدكري اسمو حرفي ..

_غ غير كنسى ..

_فعلا كنت انا ليد ليمنى لمولاي السلطان قبل مانجيبو محمد للقصر..

_نتوما اللي جبتوه بيسحابليا هو اللي جا عندكم فين لقيتوه؟؟؟ واش حتى هو جبتوه من داك السوق..

_اشمن سوق راك تتكلمي..؟

_واحد السوق كيبيعو فيه ناس..س سوق العبيد..

رد معجب : جيتي منو؟ منين نتي !

_انا من مراكش..

_مراكش ! كيفاش و آش جابك لسوق لعبيد ولا لقصر مولاي ومراكش مابعيدا علينا قلييل ! كيفاش وصلتي عندهم…!

بلعات ريقها وردات : جيت كيف جاو باقي العبيد هدية لمولاي

حرك راسو بشك غيتكلم حتى هز عينو وراها كيبان ليه العبيد داخلين خارجين للقصر والهضرة كثيرة خلفهم، مادا ما جاب قال يمكن شي حد من اهل القصر خارج عندهم،حتى بان ليه محمد داخل للقصر يجري وهو يعقد حجبانو ورخف ايديه المشبكين وراه وقال :

_شكاااين!!

تلفتات بحالو : ا اشنو كااين مالهم كيجريو !!

خلاها ومشى وهي وقفات تالفة ماعرفات تمشي ولا تسنى السلطان اللي وصاها تسنى، داخت بيها والحركية اللي نايضة في القصر خوفاتها، بلعات ريقها وشافت مع جنابها وهي تهز طرف قفطانها وتبعاتو تخطوا بين العبيد وهوما ما بان ليها لا عرفية ولا زروال اللي تسول وتعرف منهم ااش جاري، حتى لمحات وحدة من الخديدمات اللي كتطلع ليها الفطور وهي توقف حبساتها وقالت :

_اشنو وااقع لداخل شنوو كاين علاش كيجرييو..

_ناايضة المكّارعة بين مولاي وسيد لمييير هادي عمرهاا كانت ولا وقعات علامات ساعة ليوم طيييح روح

طرطقات فيها عينيها وحيداتها من قدامها بايديها كيرجفو عليها، قلبها كيخبط ورجليها فشلو عليها مشات تزرب وتجري تابعة الحراس فين غادين ماداها غير لطريق جناح السلطانة مع ضارت كتبان ليها السلطانة الام عاطية بالضهر وبناتها وعيالات ولادها ضايرين بيها، فحين السلطان لمير عطية الله قدامهم وغير السيوفة اللي كيبانو مهزوزين الفوق يتشايرو، ما جات في تقرب عندهم حتى جرها محمد للجنب وقال :

_اشنو كاديري هنا طلعي لجناحك..

_طلق مني..م ماالهم علاش مضاربييين

_طلعي لجناحك براكة من لهضرة..

_طلق مني ماتقيصنيش فبلاصة ماتطول عليا ايديك انا سير فكهم علاش كتفرج فييهم كلشي كيتفرج حراام عليييكم..

على صوتها تلفتات السلطانة وبعدها لالاهم صفية هاد الاخيرة اللي غير شافتها قصداتها وقفات عليها وهي تهز ايديها حتى لفوق ونزلات بيها على خد كنزة وقالت :

_هادشي اللي بغيتي جبدتي الفتنة بين الخوت الكافرة بالله نوضيتي عداااوة ما ترتاحي تاطييح الروح بينااتهم..

السلطانة يلاه غتقدم عندها وهي تشوف كنزة حتى هي بدون عكز هزات ايديها ورجعات ليها التصرفيقة حتى شهقات صفية والسلطانة موراهم مصدومة كثر من بناتها وهي توقف في بلاصتها تشوف فيهم مارجعاتش تحركات مدام كتزة قايمة بالواجب، هاد الاخيرة اللي قالت:

_تعاودي تهزي عليا ايدييك نورييييك غير اللي حفات ليها الجرة تهز عليا ايديها احتارمي راااسك وعرفي ااش كتخرجي من فمك اشنو بيني وبين الامير !!!

صفية شدات على حنكها وضارت شافت في السلطانة قلبات وجهها منعم مشطونة مع ولادها وهي ترجع تشوف فمحمد وقالت مجننة عليها :

_اشنوو كتسنا ديها تجلد ويتقطع راااسها تعلم تهز ايديها على لاليااتها..

نطق محمد: تحركي…

نتراات منو بجهد وهو يرجع يشدها حتى قالت السلطانة بعدما سعات كلام صفية :

_خودها لجناحها ومترجعش تجي نوبة اخرى لهنا..

ضارت حاطة ايديها فايد مسك الليل معكزة عليها كترعد وترجف كلها وهي كتشوف في ولاده اقدام عيونها مبارزين لا هوما مدربين بل مضاربييين والفايز فيه يتسمى قالت خوه، فحين كنزة لور مضاربة مع محمد وهي كيجرف فيها وهي كتشوف في السلطان عاطيها بالضهر وهاز السيف بالعرض حاكم بالايد ليسرية فقط حيت ليد لاخرا كلها تخرطااات والدم سخون كيقطر منها و عطية الله هاز عليه السيف بجوج ايدين بارك عليها بطول سيف على وجه السلطان اللي شادو بالعرض حتى فلت منو بسرعة وخلا سيف عطية الله تلاح في فلرض هو وياه وهو يضور ونزل عليه بسيف للضهر حتى سال دمو و وقف ضنو غيتهدم فحين عطية الله ضور سيف وضرب رجل السلطان حتى غوتت السلطااانة بحر دم ولادها اللي كيررررش..

كنزة سمعات صراخ السلطانة وهي تلفت بان ليها السلطان نازل على رجلييه وهي تغوت كتبكي ونترات من ايد محمد ولكن كان حاكمها ماخلاش ليه الفرصة وهو يجرها بجههد وراه غادي بيها وهي كتغوت وتبكي وتطيح وتوقف وهو جارها وعيسى وراه تالف ما عرف يتبعو ولا يوقف، حتى بان ليه السلطان وقف على رجليه تاني تبسم عارفو مايتهدنش وهو يضور وتبع محمد كيجري وراه وقتما بان ليه غيتلفت كيتخزن ويتخبى ورا الحيط ومحمد قدامو جار كنزة وهي شاعلة فيها العااافية تجرجرات تا عيات ما حن فيها ما طلق و هي تحنى عليييه وكرشات على دراعو بعضة حتى كمش وجهووو بالم صبر ليه تا عيى وهو يرخي منهاا وشد دراعو ماجات فين توقف تهرب حتى رجع شدها تاني وهي تنتر منو كتبكي ترجى فييه..!

_طلق منييي بعد منيي مابغييتش نهرب امحمد ااهى حراام عليك خليني عليييك لقيت راحتي بغييت نبقى هنا فاش ضريييتك انا

_ضرنيي اللي غتعيشييه في غياب السلطانن اشنو غيوقع فييك (قاطعتو)

_وريني اشنو عشتي واش هاد القصر اللي كتهضر عليه هو اللي عايشة فيه انا ماشفت واالو، الحريم اللي شفت معاهم الكفر ديال بصح ايلا جيت نشوف كنلقى عندهم سبب وهو السلطان كلشي باغيه شكون هاد الناس اللي كتهضر عليهم واش السلطانة ولا السلطان ولا خوتو بعد مني امحمد خليني هااانية بغييت السلطان ومعاه غنبقى واخا نعرف نموت معاه

_كووون سولتي السلطان وشوفي وااش غتسمعي منو نفس الكلام واش تاهو غيرضي بيك مختالفة على زمانو سوليه واش يتقبل الفكرة ومايديركش مجنونة وهبيلة كتدخلي في الهضرة وتخرجي قدامو…

بصرامة ردات : غنقولها ليه وعلى ودنيك غتسمع جوابوو

_مزال متأملة تعاودي تشووفيييه شكون قاليك ماشي روح مولاي اللي تطيح ليوم واش عارفة معامن كيضارب

جرها من دراعها عندو وقال مزير على سنانو مغدد :

_السلطان على يد الامير عطية الله تعلم يهز السيف ويشير بيه هو اللي عارف نقطة ضعف وقوة السلطان عارفو فين غيصوب وفين غيضرب وفين غيشير وعند بالك غيخليه موراه وهو من زمان هاز شوكتو معاه كيتسنى غير الفرصة فين يعري على النياب..

حركات راسها بسلب بسرعة ودموع على خدها يجريو وقالت :

_م مايمكنش يقتل خوه بعد منييي

_اللي قتل باه عاد يحن فخوه، الامير عطية الله قتل باه على العرش ومايقتلش خوه دابا يحن فييه زعما، ياما حفر لباه ما مرة ما جوج ملي شافو ما ميت بالحيلة وخرج ليها نيشان وقتلو بايديه

نترات منو ودمووعها على الخد نازلة: كتخرف ماعرفت منين كتجيب هاد الهضرة والخيال دياااالك…. ويقتل ولا يموت كاع انا ماسوقيش فييه انا باغة السطان ماشي خوه

رد باستهزاء : هه حتى السلطان ما فلتش من شر السلطة، بنفسو قتل عائلة على قد بلا ما يرف ليه الجفن، ما خلا حتتى دم فنسل عمامو حي ايلا من رحم ربه جمعهم كاملين في مجزرة وحدة لا عيالات لا رجال تاحد فيهم ما رجع هز راااس..وهازين العداوة دابا مع ولاد عمامو وفاي لحضة تشبك بيناتهم، اللي مايحنش في دمو ويخاف عليها من لهلاك يحنو فيك نتي بنت الناس وبرانية ما عرفوك منين طحتي عليهم..!

_م ميكنننش ..م ااهى طلق منييي انا حاملة يولد السلطان ميمكنننش يقتلني

زفر النفس من نيفو وطلقها بجههد وهو يجرها من دراعها غادي بيها حتى سمع صوت الحس حداه وشي فانوسة طاحت وهو يتلفت دغيا حتى بان لييه عيسى كيشوف فيهم مبسم وعينيه نا عليها بشارة خير،تحرك عندو محمد وهو يمشي هربان حتى غوت :

محمد:عيساااااا

تلفت وشاف فيه وهو يضور دغيا كيجري ومحمد طلق من كنزة وتبعو كيجري موراه، مخليها ضايرة بيها دنيا شدات على الحيط عينيها كيتسدو بالسخفة والصدمة اللي شداتها من شوفة عيسى اللي ضاهر و واضح سمع كلامهم وعرف ماهيتها، هزات نفسها موعية راسها وتبعاتو كتجري حتى هي…

ف حين محمد تبع عيسى كيجرب وهو غير مكيزيد يبعد علييه في كولوار طويل عيسى القدام ومحمد لور واقف كينهج وهو يجبد الخنجر من جنب لباسو، صغر عينيه وهز ايديه حتى لفوق وشيير بيها ضربات نيشان في ضهر عيسى جابتو طايح كاو ضارب الطم ماكيتحركش وهو يضربها بجرية وحدة وقف عليه وتحنى بان ليه مكيتحركش قال مات وهو يجبد الخنجر وضار راجع عندها حتى بانت ليه واقفة عند راس الكولوار شادة على فمها كترعد وتشوف فيهم وهو يمشي ليها بدون كلام جرها من ايديها وتم مخرجها برا القصر من الباب الخلفي مخلين عيسى اللي حس بيهم بعدو عليه عاد تحرك من بلاصتو شوية كيتوجع ويحاول يقيص في ضهرو حتى بانو ليه الحرس دايزين جنبو يجريو غير شافوه ووهوما يجيو لعندو..!

السلطان ما حس برجليه اللي تحلات من عند الكعب، دمو سخون عافية ودم من رجليه وايديه كيشرشر بعد لور وسيف فايديه وعطية الله ضهرو دراعو مفتوح ودم كيقطر منو شاد السيف مثلو وقال :

_الخير اللي عايش وناعس علييه كلو من حقي تسول الكبير والصغير ويقوليك اشنو كاين، وليني حيت نتا رزين وحكيم وبعقلك هههه كيف قال السلطان الكبير خديتي كلشيي ولحتيني للجنب نتفرج فيك

_الغدر ما من سمات السلطان كون ماعرفكش السلطان الكبير غدار مايعطينيش السلطة..اشنو كتعرف دير من غير الغدر وضربان في الضهر واجهتني وعطيتك خو كلامك و وقفتي تصنت عليا وملي نخرج تغدرني…!

هز سيفو غادي كيجري لعندو والسلطان بسرعة خوا عليه وغير عطاه عطية الله بالضهر قلب سيف بسرعة ونزل عليه بخلفيتو لراس حتى داخ وطاح شاد عليه وهو يوقف عليه السلطان حط رجلييه على صدرو مبسم ومعلي حجبانو وقمقوم السيف فوق عنق عطية الله بارك عليه تما والسلطانة عرفات عطية الله ماغينوض من تما ايلا وروحو طالعة وهي تسمح في بناتها ومشات عند السبطان تطلب وتنحط وتبكي عليه يطلقو وعطية الله مغدد كيشوف فيه قال :

_خليبيه..قتلنيي ااش كتسنى الفرصة بين ايديك قتلني قبل ما نسبق ونديرها..!..

رف راسو السلطان وقال : طلب العفو ولا تموت..

_ايلا طلبت السماحة انا اللي غنقتلك..

_ادن تموت..

زاد ورك على السيف حتى تغرس في عنق عطية الله ودم نزل مع عنقو بحال الخيط كلشي غوت وغطى عينيه ولالهم صيفة قلبات عينيها وسخفات بين ايدين الوصيفات..!

وسط الغااابة لا بشر يسير ولا طير يطير، جارها من ايديها كيجريييي يجرييي وهي تبكي وتنحط ولجيهت القصر غادا وتلفت،

اما هو كثر منها العرق كيف شتا يقطر منو، يلهت وينهج ويتلفت ورااه تقول خطاف روحو تابعو، بايديها تنتر وبرجليها تشتف وتحفر، متقلة عليه المشية وهو غادي يجري بيها وغبابر لرض طاير في السما ماوقف بيها تا وصل لعند الحصان ،قربها ليه وهز رجليها دغيا حطها فوق السرج وهي ضورات رجليها وطلعات جالسة فوقو…!

زير ليها اللجام فايديها وضرب العود تا سهل وتهز الفوق على رجليه ومشى كيجري بجهههد وهي فوق منو كتطلع وتنزل ودموع حارين على خدهااا ضورات راسها لور وهي تلقى محمد ضارو بييه وهو محني على ركابيه و هاز ايديه غير شافتهم هزو راسهم فيها وهي تلفت وعنقات العود متكية عليه وهو غادي هربان بيها كيسهل..!

كيقولو اللي سقط من الحصان يولي يقول للحمار حبس هنا نزل ايلا عرفتي ليه تطلع سلطان فوقو وايلا خفتي وتدعرتي منو تشوف شرو..!

وكنزة ما فلتات من شرو، الخيل بخوفها حس وبتوترها توتر معاها، هو كيجري ويسهل وهي كارزة فيه وتطلع وتبهط فوق منو جاها عالي وكبير فوقنا نزلات عينيها لارض كتبان ليها بعييدة وايلا طاحت عليها هاديك موتتها،خوفها من الارتفاعات هذا ما جاب ليها، كرزات عليه رجليه وعنقاتو بايديه وهو كيجري والريح كيضرب فيها، كان غصن شجرة راه ضربها، كان ورق راه تشابك مع شعرها ،كان تراب راه عمى عينيها، ولكن هي مااتستلمتش ليه خلاص فاش حسات بالوجع في كرشها تفكرات ولدها وبحر الامومة لصقات فيه لصقة العمى في الضلمة كيف الجرادة فوق ضهرو حلفات منو ما تطيح والعود بيها حاس مبقاش غير كيجري ولا كيتهز على ايديه حتى كيوقف على رجل وحدة وتقول هنا تقلب منو وتطيح وكيرجع يتقاد ويمشي يجري تاني…

ايديها عرقو ومن زغبو بداو كيفلتو ورجليها عياو وبقوة النهيج سخفات، حتى من عينيها تغطاو بالتراب ولات تشوف غير الضبابة، قالت هنا تطلق من الخيل، هنا تستسلم، حتى حسات بيه بدا كيتقل الجرية بشوية بشوية حتى وقف وهي تحل عينيها وبايد وحدة بدات كتحك فيهاغيا دغيا خايفه يغفلها ويبدا يجري تاني…!

وضاحت ليها الرؤية وبان ليها العود اللي وقف قدام الواد وغير الشجر ضاير بيها، بلعات ريقها كتنهج وشدات فيه بايديها بجوج عاد ضورات رجليها بحدر وجات منزلاها منو حتى كيبان ليها داكشي طويييل ورجليها مزال ما قاصو لرض، رجعات ركبات عليه وطلات تاني حتى خدات عبارها عاد مدات رجليها وقاصت لرض وطلقات منو ونزلات..!

وهو تهنى منها غير فلتات منو وهو يمشي للواد خشى فيه راسو يشرب وهي مشات جنبو قاصت الما بايديها عاد هزات وبدات تغسل في عينيها المضبين…!

لحضات مشاو وجاو وكنزة جلسات جنب الحجرة تستاراح حتى تدكرات السلطان واش جاري في القصر وهي هربات ومحمد تشد ،دبلات ملامحها وجمعات عندها رجليها تبكي وتنحط والعود جنبها عركّها ماء حتى شبع على خاطرو وضار ينفر ويسوس في نيفو ويبعد عليها وهي حسات بيه غيمشي وهي توقف دغيا كتمسح في عينيها وقالت :

_ايييه فين غادي وقف، وقااااف هناا ششش شااا شاا وقف شاااا

تلفت فيها للعاد براسو تقول فهمها وهو يوقف عاد ارتاحت وضارت تشوف راسها فين لا طير يطير لا بشر يسير غير هي والحمام فوق راسها يبجلقو صدعوها، الشجر طويل وعالي والريح يضرب فيهم وهوما يتغاوتو وبصوت اغصانو ملحنين سنفونية مرعبة، بلعات ريقها ومشات غتجلس تحث الشجرة حتى كتبان ليها واحد الاشارة حمرة، لاصقة في الخصن بحال شي شرويطة معلقة، قاصت فيها وهزات راسها في الشحرة اللي قدامها كتلقى نفس الشرويطة..!

زادت مشات ليها وتاني كتهز عينيها كتلقى الشجرة اللي قدامها مربوطة فيها نفس الشرويطة، فهمات وقلعاتها في السما واضحة وضوح الشمس هادو ماهوما غير اشارت دشي الطريق بحالا شي حد باغيها تشوف شي حاجة..!

ماكنتش حتى هي من العاكزين بلا خوف تبعات اغصان الشجر وشرويطة تلوحها لختها حتى عيات وقالت صافي هنا تجلس تستاراح وكتلقى نفسها تاني غادا تابعاهم بدون توقف ، تلفتات شافت الخيل باقي فبلاصتو وهي تبع تاني الاشارت تنتف منهم الشرويطات..!

حتى وقفات سخفانة معكزة على واحد الشجرة وكتشوف بعيد كيبان ليها واحد الصندوق و صغير كلما قربات كتزيد توضاح ليها الرؤية كثر ، وسعات عينيها واخا يجيبو ليها الف صندوق تقلعو وتعرفو بيناتهم، كيف عرفاتو دابا وكان هو الصندوق اللي جات فيه..!

ضحكات وعيونها بالفرحة توسعو وهي تهز القفطان ومشات ليه كتجري تجري والريح مضارباها تدفع فيها وهي تجري وتشتف ، و وقتما شتفات فوق الاغصااان يطيرو حمام الشجرة ويعليو هربانين منها…حتى وصلات لصندوق،

تقول غير هبيلة ولقات لجام عقلها، ولا فقير وطاح وسط بحر الدهب والحرير، ولا مريض موجع نعتو ليه دواه الاخير، ضحكات بصوت عالي وبالفرحة بكات كتضور عليه وتقلب في جنابو وهي توقف وتبسمات عرفات محمد اللي نصب هاد الطريق كاملة باش تمشي في خاطرها وما تبقى خايفة من حد يحصلها،

جمعات شعرها ودوزات ايديها على الصندوق ساستو وهي تهز غطاه وحلاتو..!

مدهب كيف اول مرة شافتو خاوي وعريض وكبير، بالشوفة تقول يهز قوم وقومان وعند الجلسة هي وموحال يكفيها، هزات رجليها وحطاتها داخلو ويلاه غترجع تحط تانية وهي توقف وتبسيمتها كتجمع وتلف،

رجعات رجليها المخشية عندها ووقفات وايديها على الصندوق، هاهي دابا على المحك قدامها جوج طرقان يا تخشى في الصندوق ترجع لزمانها وتنسى اللي فات واللي شافتو عينيها، تنسى ايام الحريم وايام الخلوات ومضاربتها معاهم، تنسى محمد و وحدية وعرفية وزروال وكاع اللي شافتها عينيها، تنسى القفاطن على النوع وتنسى الحرير والدهب اللي بيه تزرزرات ، السلطانة اللي قاصية معاها وغير تغفل تلاقا تفكر فيها تقول بنتها ما تعرفها نيت قاصية ولا غيرك تمتل القصاوة، تنسى عبيد القصر اللي ماشافت منهم غير الخير وعمر اداو الشعرة فيها، والاهم تنسى السلطان وغرامها بيه واش عاشت معاه واشنو سمعات منو…!

ويا تسد الصندوق وتضل في زمان السلطان وتنسى جيلها وتنسى باها ومراتو وخوتها، التبسيمة خفات من شفايفها وعييونها بلاحزن دبالو، تنهدات كيف حامل الجبال فوق ضهرو هزات النفس مخنوقة وسدات الصندوق ورجعات لور عليه متخلية..!

تلفتات وبعدات عليه وعطاتو بالضهر ورجعات لجيهت الخيل حتى كيبان ليها راه غادي يجري وسعات عينيها ومشات تجري موراه ولكن الخيل تجري تا تعيى وما توازا مع جريتو، جرات وراه تا سخفات وهي توقف على ركابيه متبعاه تغبن عرفاتو راجع لطريق القصر وهي بقات وسط الغابة معارفة منين تسلك ولا تمشي غير الشجر ضاير بيها والواد جنبها، وقفات تضور في عينيها شادة على جنبها كتنهج حتى ارتاحت وتبعات الطريق منين شافت الخيل مشى ، مسافة الطريق اللي ضربات وما حسات بيها وتقول هاد القصر ما بغى يبان ليها، غادا وتستاراح وتجلس وتنوض حتى قربات ضلمة الليل طيح، ولات تبكي وتجري خايفة يضلام عليها الحال وتبقى وسط الغابة واحلة..!

لكن اللي خافت منو طاحت فيه الضلمة نزلات وهي عاد مزالا تجري حتى مابقى يبان ليها رجل من الايد، غير ضلمة وفينما ضورات شوفة تقول عمية حتى حاجة ما كتبان ، ولات خايفة من الجن اكثر من النس لا تضور لشي جيهة ويصرفقها شي حد، وهي تبرك في مكانها تلمسات بايديها حتى قاصت الشجرة ورامتها جامعة عندها رجليها وخاشية راسها الوسط مغمضة عينيها المهم هي ماتشوف والو واللي بغى يوقع يوقع..!

🌥…اليوم الاول..🌥

قبيلة ولاد الغلام…!

عند دخلة القبيلة وقفات كنزة فوق الحجر العالي تطل عليهم من الفوق وتضور في عينيها وتشوف، وهي تلفت وراها في الطريق اللي سلكات هاد الصباح كتبان ليها غير الغابة وطريق طويييلة ومحادها شيى…تنفسات براحة غير اللي خرجات من غابة الرعب والحمد الله وهي تضور وتمات نازلة مع داك الحجر بشويا بشويا حتى تعكلات معاهم وجات مسرحة في لرض، تمغرات في لرض اوجع وتنييين بدراعها تا فاتها الحال عاد وقفات تنهج وتسوس في حوايجها وزادت رامية الخطوات بشويا عليها داخلة للقبيبة وخايفة معارفة راسها فين جاية…!

وهي تبان ليها واحد الصاقية بحال الشلال والما نازل عليها، عينيها ترسمو فيهم القلوبة وهي تمشي له تجري حتى جلسات قفازية وطاحت في الما تشرب بلاما تنفس غير كتخشي في فمها وتورد حتى تخنقات ووقفات كتكحب وتشهق عقلها غيخرج ما حسات غير بشي حد كيضرب خلف ضهرها وهي تلفت دغيا قافزة وبعدات لوووور وداك الشخص هز ايديه مطمنها وقال :

_بسم الله علييك بسم الله الرحمان الرحييم بسم الله الرحمان الرحييم ايلا كنتي من الجن انا متايب ليك ايلا كنتي من الجن انا طالب التسليييم…

رفعات ايديها بحالو وقالت كتحرك راسها بلا :

_انس…انس

_انس..! و وااش كديري هنا شكون نتي…؟

_ش شكون نتا..!

_انا من هل القبلة شكون نتي وعدمن جيتي هل (آهل) القبيلة كاع نعرفو بعضنا ونتي حسيتك بعيدة علينا شكون نتي..!

يالاع غتكلم وتجاوبو حتى سمعات شي كلام من خلفو كيتكلم ضار هو وهي طلات موراه كتشوف شكون وهو يقرب واحد الشخص اخر بحالو وبنفس لباسو الجلابة والعمانة والقفة في الايد جار الحمار جنبو وجاي قاصدهم كيتكلم حتى شاف في كنزة وسكت كيهز معاها عينيه وهو يشوف في صاحبو وقال :

_ش شكون هاد الولية اموحى..

سكت موحى ماردش عليه وكنزة كتشوف في صاحبو كيحرك في عينيه فهمات انو حتى موحى اللي عاطيها بالضهر كيتكلم عليها غير بالعين،بلعات ريقها وجمعات ايديها عندها وهي تشوف في صاحب موحى عينيه مشات مباشرة للعقد اللي في عنقها تبسم وشاف في صاحبو وشير ليه يتبعو بعدو عليها شوية وتقارنو بالراس يتهامسو..!

عرفاتهم حطو عينهم على عقد السلطان اللي جاها هدية، غير بعيونهم اتافقو عليها ومشاو يكملو حديتهم كيف يديرو ليها، بلعات ريقها وضارت بشويا مدايراش الحس وتمات طالعة من نزلات شادة في لرض بضفارها ورجليها حتى كانت غتطيح وهي تلصق تاتي وطلعات وهوما شافو في الحجر وراهم كيتسرسرب وضارو بجوج بريوسهم حتى بانت ليهم راه طالعة كسف الجرادة تحبو بعيدة عليهم وهوما يطلقو الحمير وتبعوها ساعة كانت وصلات للقمة وفاتتهم وهي تعطي رجليها للريح تجري تجري وتلفت حتى بان ليها واحد فيهم مد ايديه غيطلع ورجعات ضارت قدامها ضرباتها بجرية وحدة ماوقفات حتى سخفات وهي تروم واحد الحيط ماعرفاتو ديالاش واش دار ولا بني خالي وجلسات جنبو ترتاح وايديها على العقد ودموع على خدها كي الشلال يصبو وقالت :

_ن نموت ومنضيعوش كيف عطيتيه ليا غتشوفو عندي غتلقاني وغتجي ليا، ياربي تسهل طريقو ياربي حاسة بيه حدايا ياربي…

وفعلا احساس كنزة مكانش من الخطأ وحراس السلطان في الغابة منتاشرين كيف الرمل لكن هوما في شرق وهي في الغرب بعاد عليها ما بعد الشمس عن القمر…!

🌥….اليوم الثاني….🌥

كثرة اللغى والكلام فوق ودنيها فيقوها من نعاسها وبصداعهم خسروه فيها، وهي تكمش ملامحها وحلات عيونها بشويا فيهم حتى كيبانو ليها جقلة د دراري الصغار مجموعين عليها غير حلات فيهم عينيها وهوما يهربو منها كيجري ويتعافطو في بعضياتهم خايفين منها ويتغاوتو…!

وهي سدات ودنيها حتى مشاو كلهم عاد حلات عينيها مزيان و وقفات تشوف فين هي تلفتات في الحيط وهزات معاه عينيها وهو يبان ليها حيط مبني وعالي من شكلو عرفاتو مسيد وهاد الدراري كانو فيه كيقراو..!

صوت اللغى والكلام مكانش غير من دراري الصغار شي بلاصة قريبة ليها وفيها الهضرة بزاف بحال شي مجمع ولا بحال شي عرس، وهي تبعد على المسبد وتبعات صوت اللغى حتى وصلات لواحد الحافة وطلات من تما كانو بحال الدروج نازلين مدردبين تبعاتهم غير بعيونها حتى بانت ليها واحد الوسيعة قدها دقااااش عامرة بالناس وشي غادي وشي جاي الغوات في سما وفي لرض ومن الكلام اللي كتسمع واضح عليهم بياعة وشرية والوسيعة عبارة على سوق القبيلة ماشي مجمع ولا عرس كي ف ضنات…!

طلقات شعرها وعودت جمعاتو ومسحات على وجها وشدات نفس الشرويطة اللي تبعات بيها الصندوق ربطاتها على عنقها مخبية بيها العقد وساست لباسها لايمشيو يخافو منها ويتلفو بينها وبين الجن كي دارو دوك الرجال اللي قبل عاد تدردبات مع دوك الدروج ونزلات كضور وسط السوق، عنينيها حارو وتلفو ما عرفو يشوفو في مول التواب الحرير وعالنواع ها الحمر ها الحضر هازو لفوق ويعيط على العزبات والوليات يجيو يتقداو، ولا مول الحلوة اللي كيحلف انه بنسفو وبايديه باش صاوبها والعيالات مجموعات عليه يفليو في الحلوة ويقلبو فيها،

قلبات عينيها جيهت المراة اللي ملتمة مفرشة قدامها الزرع تبيع فيه للعبرة والبيض في سلل جنبها، غادة برجليها لقدامو وراسها لور ملفت حتى حسات براسها خرجات فشي حد وهي ضور دغيا طلعات معاه عينيها وبعدات عليه وهو شاف فيها مطول وزاد كيتلكم مع صاحبو، تبعاتو بعويناتها وكملات طريقها وسط الغيالات ملتمات ومغطيات ورجال بالجلابة والعمام هازين القفف يتقداو وهي غادا وسط منهم هكاك ملطة ضنوها هبيلة ولا مقطعة الوراق كاين شي بنت الناس تخرج بديك الحالة المبهدلة…!

حتى كيبان ليها واحد مول الحلوة جالس ومضور بيه طبكان د الحلوة في الالوان يقطرو بالعسل والدبان عليها مكجكج طرطقات عينيها وريوكها سالو عليه وهي تمشي وقفات قدامو كتشوف في رجال يتقادو منو وهو يعبر ويعطيهم وهي موراهم شداتها البكية ماعندها باش تشري ولا تقدا، وهي تضورها براسها بلخف هزات عينيها وتبسمات ومشات ما ناوية على خير، طلعات حداه جنب واحد الحجرة و جلسات تضور في عينيها وتشوف فيهم يتقداو منو ودنيا قدامو عمرات تقول جات بقدام الربح عليه غير جلسات جنبو تجوقو عليه الناس..!

لقات الغفلة وهو مارد ليها البال تا واش كاينة وهي تمد ايديها بشوية وراه وجرات حلوة من طبك ولاحتها في فنها دارت ليها هنا كانت سرطاتها، وضورات عييينها تاني مليرماشافها حد مدات ايديها جرات وحدة اخرى خشاتها حتى هي ، الحلوة صغيورة ومعسلة وهشييشة ماكين غير بلع بلا نضيغ وحدة تابعة وحدة وحدة تابعة وحدة حتى تكرعات مكهومة ولات كتشوف في الحلوة كتغيلف ليها خاطرها وهي تمسح فمها و ايديها في قفطانها من العسل وناضت من حداه ومشات مكملة طريقها تقول ماهي اللي كانت عاد دابا تسرق، ومول داك الحلوة خوات عليه الدنيا وهو يضور يجيب الحلوة قدامو حتى لقى الطبك تضرب فيه النص، قفز كيقلب في جنابو خايف وقال :

_ياعود بالله بسم الله الرحماان الرحييم التسلييم امالين المكان التسلييم..

نقز البياع حداه : امالك امبارك..

_يا بسم الله الرحمان الرحيم الطبك كان هنا جنبي مدكوك بالحلوة جيت نضور لقيت غا يدي ورحمة ياعود بالله من الشيطان الرجيم..

ساعة كنيزة كيف الفارة كلات تا شبعات وماخلات وراها الامارة، زادت مارجعات تلفتات في راجل تقول عمرها سرقات، وهي غادا وتضور في عيونها حتى سمعات صوت الغوات وهاد الغوات ما خافي عليها كي شكل التطبال اللي كانت تسمع في القصر..

الناس تفرقو على النص وهي قربات تطل بعينيها وتقلب حتى كيبان ليها واحد جاي فوق العود والحراس جنبو والطبال قدامو كيطبل ويقول بصوت مرتافع وكلشي سكت كيتصنت لييه :

_لا الاه ايلا الله محمد رسول الله ماتسمعو ايلا الخيير، ياا قبيلة ولاد الغلام قاااليكم سيييد القايد اللي لقى ولية بهاد الصيفات ما طويلة ما قصيرة ما بسضة ما سمرة واسميتها كنزة يرسلها لدار القايد وعندو هدية…

تعلاو الاصوات وكل واحد يسول لاخر شكون هاد؟ لازم نلقاوها مولاي يغطينا الهدية، شكون هادي؟ لاش بغاها سيدي؟واقيلا سيد اللقايد ناوي يجيب المراة التانية؟ على تساؤلتهم البراح كيكرر كلامو بدون توقف :

_لا الاه ايلا الله محمد رسول الله ماتسمعو ايلا الخيير، ياا قبيلة ولاد الغلام قاااليكم سيييد القايد اللي لقى ولية بهاد الصيفات ما طويلة ما قصيرة ما بيضة ما سمرة واسميتها كنزة يرسلها لدار القايد وعندو هدية…

كنزة من شدة الصدمة تلجم ليها اللسان وسكتات قلبها كيضرب ورجليها تقالو عليها حدرات راسها وتبسمات في السلطان اللي ما نساهاش وكلام البراح مزالو يتكرر في مسامعها ما جات فين تهز عينيها لقاتو فاتها وزاد بحمارو وهي تهز ايديها الفوق وغوتات حتى كلشي شاف فيها والبراح وقف وضار عندها..!

كنزة من شدة الصدمة تلجم ليها اللسان وسكتات قلبها كيضرب ورجليها تقالو عليها حدرات راسها وتبسمات في السلطان اللي ما نساهاش وكلام البراح مزالو يتكرر في مسامعها ما جات فين تهز عينيها لقاتو فاتها وزاد بحمارو وهي تهز ايديها الفوق وغوتات حتى كلشي شاف فيها والبراح وقف وضار عندها..!

_بلااااتيي وقاااف انااا اما هيااا كنزة هياا انااا وقاااف بلاااتي تسنااني..

البراح شاف في صاحبو وضار شاف فيها وهي جاية عندهم كتجري وبالفرحة كتبكي…!

_اناا اناا هياا اللي كيقلب عليا السلطان انا هياا كنززززة اااهى هياا انااا وقف

نطق طبال في ودن البراح وقال: غنديو هاد الهبيلة لسيد القايد.!

_اييه باش يضحك فينا ناس القبيلة ويقول ليهم جابو ليا هبيلة، زيد نمشيو زييد ارا (ضرب الحمار) زيييييد

_بلاتي فين غادي راه انا هي كنزة عفاك ديني معاه والله حتى هي انا شوف لبسيي شوف واش كاين شي حد هنا لابس بحالي راه انا كنت مع السلطان وحاملة منو والله حتى انا..

ضرب الحمار برجليه وعطاها بالضهر ماتسوقش ليها وهي جاية موراه كتجري خلاص فاش شافتو عطاها بالضهر عاد زادت في السرعة ماجات فين توصل عليه حتى حبسوها الحراس ودفعوها بعدوها علييه وهي تنوض مرة اخرى عندهم وهوما يجبدو السيف في وجهها…!

تخلعات ومنهم تردعات رجعات لور كتبكي وتقول انا هي كنزة والناس وراها يحولقو ضنوها حمقة وهبيلة حتى ولات تهتهت وبالقايد تحلم، البراح وحراسو خلاوها تما ومشاو داخلين للقبيلة يبرحو وهي رامت الحيط وجلسات كتبكي وتنحط وتشوف في العيالات والرجال يتغامزو عليها تاحد ماقدر يقرب ليها ولا يقيص فيها…!

حتى تم جاي جنبها واحد الراجل وجهو من المبشرين لحيتو كولها قداش بيضة ومشيابة لابس جلابية والعمامة على راسو هاز القفة ورابط الحزام على مصو،قرب عندها ومد ايديه يشد دراعها وهي تهرب منو حتى قال :

_ماتخافيشاي تعالي قربي نسولك..

هزات كتافها وبعدات منو داير منو الحدر وقاصت في عنقها قالت يمكن حتى هو شاف العقد وحط عينيه عليه ساعة عنقها مزال بالشرويطة مخبي..!

تبسم ورد: ماتخافيش انا انعاونك قلتي اسميتك كنزة ايلا كان بصح انا نعاونك تا توصلي فين بغيتي..

_ت تعاوني نمشي للقصر عند مولاي..

_اييه نعاونك تمشي عند مولاي تعالي معايا اجي ماتبقايش هنا زيدي تبعيني..

_فين غنمشيي..!!

_تمشي تغسلي حالتك وتبدلي لباسك بغيتي تمشي عند سيد السلطان فهاد الحالة..

_لا لا مابغيتش نمشي معاك بعد مني

شاف في جنابو ورد : صافي صافي ماتبدليش يلاه غير كولي وشربي ونمشي انا وياك رجلي برجلك تا لعندو صافي..!!

حركات راسها وقالت :صافي..

تبسم في وجهها وشد في دراعها وتم غادي بيها وهي حاضية معاه ورادة الباب غادا ومبعدة عليه حتى دخلو للقبيلة وتمو غادين وسط حقول ماطيشة والدنجال والفلفلة والخيرات والخضورية حتى وصلو لواحد الدار مبينة من التراب الحمري وبابها باب خشب جبد سوارت من حزتو ضور بيها القفل ودفعو ودخل..!

وهي تلقاه واحد المراة عند الباب واقفة تسناه وتمسح ايديها في طابليها طرطقات عينيها في كنزة وعلات حجبانها و قالت :

_شكون هادي المْعَيْطِي ومنين جتيها..!

خرج عينيه في مراتو ورجع تبسم ببلاهة وشاف في كنزة كيفرنس وقال :

_ههه د دخلي دخلي ابنتي جلسي دروك نجيو عندك دخلي..

حدرات راسها ودخلات مع واحد االقبة وجلسات عند الباب مجموعة وهو حط القفة وقرب عند مراتو وقال بلحس :

_لقيت هاد الولية في السوق تالفة ودايخة تخرج وتهضر في الهضرة معارفة فين تمشي ولا فين تجي ضاهر عليها المسكينة هبيلة…!

علات الحجبان وردات عليه ضاهر عليها مراة مدية وجايبة في الزمان قبيحة وكلمتها مسيطرة في الدار..!

_وملي هي الهبيلة لاش جبتيها ليا المعيطي شبغيت ندير بيها نرد ليها عقلها ولا نلعب معاها ونتبع هبالها…!

_الا يا هاد المراة هي مسيكنية ودينة غير قلت ليها عاودي معايا تبعاتني…واشديها نتي وعلميها شغل دار وضوري بيها تهز عليك الحمل وتعاونك في تمارة الدار…!

_زيد زيد نشوفو هاد الحريرة فين توصلنا..

نغزها وسكت كيضحك داخل للقبة حيد البلغة ودخل جلس قدام كنزة ومراتو واقفة عند الباب حطات ايديها على خصرها وقالت :

_نوضي تعالي ابنتي نوريك واحد الحاجة تعالي..

حرك ايديه كيضحك: سيري سيري معاها ماتخافيشااي..

بلعات ريقها وناضت تبعاتها ومولات الدار داتها لقبة اخرى حلات الصندوق وجبدات منو ماهي كسوة ماهو قفطان، طويلة تا لتحث ومفتوحة من جناب ولاحت ليها لبسة اخرى كتجي فوقها منها كم كامل عاد الدرة فوق راسها باش تغطي شعرها، لبساتهم كنزة وخشات رجليها في الشربيل الجديد وتبعاتها للكشينة وديك المراة رجعات تجري فين حطات حوايجها هزاتهم كلكماتهم ورماتهم ورا الباب خزناتهم، وخرجات تبعات كنزة للكشينة لقاتها واقفة كي الامانة تبحلق بعينيها وتشوف فيها دخلات وقالت:

_مرحباا مرحباا زييد ابنتي زيدي جلسي جنبي…

قربات كنزة جلسات جنبها وديك السيدة شدات الرحى بين ايديها خوات فيه الدرة ووركات عليه كتضور فيه وتطحن :

_قولي ليا اش سماك الله..

ردات: ك كنزة ونتي !

_انا فضيلة ههه منين نتي اكنزة اش سميت قبيلتكم..

_من مراكش..

_من مراكش هههه هايلي وعلى مراكش على مراكش ابنيتي غا هنا جيهت ساقيااو هههه

حركات راسها بسلب كتضحك وتشوف فيها بصمات عليها مقطعة الوراق غير من البلاد اللي نطقات من فمها،حتى قربات ليها الرحى حطاتو قدامها وقالت..!

_زيدي تعالي ديري معايا ايديك..

_شنو هذاا ؟؟

_ماعرفتيهش، سميتو الرحى…

_لا فايت لي شايفاه ولكن اشنو غندير بيه

_هذا كيطحنو بيه، الزرع يطحنو بيه الدرة

_علاش ماعندكمش الطحانة..

_ايه كاينة وليني مانمشيو ليها من سوق لسوق وزادان غالية علينا علاش منطحنوهش بايدينا..

_حنى عندنا طحانة كنخلصوهم بمياوستين ريال وكيطحنو ليا عبرة دزرع كاملة..

حركات راسها مسايراها : اييه اايه زيدي نعلمك..

_كنعرف ليه..شفت و فواحد الفيلم..

_هااا اشنو هذا..!!

_ههه ماعرفتيهش واحد الفيلم سميتو رمانة وبرطال شفت فيه وريقة الحنة كتطحن بيها..

_هاااه بغيتي تقولي حكاية اييه على رمانة وبرطالة ولالة منانة كانت تعاود ليا ميمتي الله يرحمها ويوسع عليها فهاد نهار كان ساكنة في قبيلتهم وكانت رميمينة لفعة وصكعة مصنكعة لسانها طول منها غرقات هاينة و ولد عمها مسخوطة بنت الهم هههه

ضحكات كنزة وحكات ايديها على الرحى جات تضورو وهي تطرطق عينيها قاصح ماحركاتو تا تعصرات بزز باش ضوراتو وقالت :

_كيضوروه هكا ياك..

_هكاك ضوريه زيدي، طوي كمامك..

طلعات كمامها للفوق وحطات ايديها كيف وراتها فضيلة تضور في الرحى وتخوي وترمي درة وتعاود تضَوَر حتى شافتها فضيلة شداتو مزيان وهي تنوض وخلاتها معاه جرات الخيشة د درة قرباتها ليها وضحكات ومشات تحط الغدا للراجل، عيطات على كنيزة تغدات معاهم ورجعات للرحى تسمع فيهم في القبة بجوجهم يشخرو ويردو على بعضياتهم سخفات وجهدها تقادا كاع الماكلة اللي كلاتها برياضة الرحى طيحاتها..!

العشية تعاشات ومغرب ودنات،وكنيزة مزال فديك الرحى واحلة ماشي من تقولية ايديها لا من النعاس اللي غلبها وداخا، سخنات في الكشينة ودفات وهي تلوح رحى من قدامها ونعسات موسدة الحيط ماكتفيق غير على صوت المودن وفضيلة واقفة تفيق فيها،

_يانوضي يالي عولنا عليها تطحن الدرة وتنصب العشى..

ردات مغبنة : فيا نعااس..

_حاااي على فيا نعاس ومن صبح الله ونتي ناعسة تكعدي ضوري شوية وتحركي باش كاعما يبقى فيك

هزات كتافها وردات : عيييت صافي فيناهو راجلك قاليا غيديني للقصر عند مولاي قاليا غنعاونك..!

مسارياها: اييه يديك شكون قال لا وليني ماشي دروك المغرب ودنات وضلمة ليل علاين تنزل يصبح صباح ويكون خير…يلاه وتعالي زهري ليا داك الكوان تدخل الغنم ونرد انا وياك العشى..!

_شنو غنزهر!!؟

_داك الكوان تاهو ماعرفتيهش، راه الفاخر وراه الوقيد نوضي عفا بنتي زهريه نجي نرد العشى قبل لا يدخل الراجل

_غتخرجي!

_ااه نجيب دوك الغنام ودنات عليهم المغرب ونسيتهم مطفي الخلا كوناه داعو ليا ..احاي على كرشي اللي ماولدات ليا الولاد يعغونوني ويهزوه عليا الحمل ..اااميمتيي

خرجات فضيلة وكنزة متبعاها بعويناتها تا سمعاتها حلات الباب وخرجات وصوت السوارت برا كيطرقو…تفوهات وعلات ايديها لفوق تجبدات وناضت مضاربة مع تبسيمة تخرج من فمها مزال الامل داق بابها ومزال تيقتها في الشايب يديها لقصر السلطان..!

عاد غتبدا تقلب على الفاخر حتى غوتات كرشها ومسارنها بالجوع بداو يشطحو، حطات اللي فايديها ومشات تقلب في الكشينة وتهز وتحط ساعة ما لقات غا ريح ورجعات خرجات للقبة مغبنة وشعرها خارج من زيف كيطل حتى قشعات الطبل اللي مغطي فوق الطبلة ، لاحت البلغة ومشات هزات عليه الغطى وهي تلقى اتاي رزتو طالعة وريحتو يا سلام عاطية وطبسيل الزيت البلدية والزبدة ولخبز سخون نعام اسيدي، حلات عينيها وجلسات مربعة قدام الصينية تدهن وتسرط وتدوز باتاي حتى شبعات ولكن مزال باغة زيادة ساعة الفاخر كيتسنها حطات الطاس عاد ناضت من حداه ومشات للكشينة فرحانة تقلب على الفاخر لقاتو وجبدات لخنشة خوات شوية ماقنعهاش زادت شوية تاني ماقنعهاش وهي تخويها كاملة عاد ارتاحت، من قلة عقلها هزات الوقيدة شعلاتها ولاحتها وسط الفاخر وهي تطفى ديك ساعة،الوقيدة تانية وتالتة وحلفات ليها هاد العافية ما تشعل…تجننات والفقصة ركباتها وهي تضرب على خنشة الدرة حداها محطوطة، بلا عكز مشات تجري ليها كفاتها وخوات الدرة منها ولاحت الخنشة وسط الفاخر شعلات الوقيدة ولاحتو فيها غير بانت ليها العافية بدات كتشعل وهي تبسم ومشات للقبة تشرب اتاي بيدما شعلات مزيان…

كاس تابع كاس والعافية في الكوزينة تنسات، حتى ضربات فراسها طن وهي تنوض ليها لقات العافية زهرااات وطلعات مع الخنشة الكبيرة وغادا سااارحة طرطقات عينيها وغوتات ومشات كتجري تطفي فيها جات تعفط عفطاات فوق طبك الدرة المطحونة حتى نقز الدقيقة وطار لفووق والعافية خدات لون الحمر تقول قاصت الملحة، ولات كتنقز من قنت القنت خايفة ومرعودة ماعرفات باش تطفيها وتامن الما عاد مشات تسقيه السيدة، ما بان ليها غير الكّراس باش مغطي الخبز وهي تمشي ليه حيدات الخبز وبدات تطفي في العافية بيه حتى شدات ليها فالكّراس حتى هو، وهي تلوحو فوق خايفة على ايديها يتحرقو…!

ضورات عينيها في الكشينة العافية فين ما ضارت لاهبة ها الخيشة ها الشراوط ها الخامية ديال الباب تاهي شدات فيها وهي تلوح كلشي وخرجات كتجري هربانة ما جات فين تحل الباب لقاتو مسدود ولات تبكي وتلفت في الكشينة تشوف في العافية اللي كتلهب، دغيا شبكات وطلعات في رمشة عين..!

الدموع على خدها نازلين وايديها في الباب شادين تخبط فيه وضرب عالله وعسى يسمعها شي حد ويجي يعتقها ولا يحل عليها الباب،ولكن لا من يجاوبها ولا يسمع لغاها وهوما وسط الخلا وديور بعادين على بعضياتهم بلكيلوميترات، عرفات راسها تما بقات وديك العافية هي باش غتزند وتحرق على فعايلها،

وهي تضور عينيها في ارض الدار تقلب وتبقشش جتى بانت ليها واحد الحديدة كبيرة و وازنة حدا الكشينة نيت، طلقات من الباب ومشات ليها كتجري هزاتها كتكحب عقلها غيخرج مخنوقة من دخاخن اللي خارجة من الكشينة، الله يستر العافية شعلات في الكشينة بقوة القش والتبخشيش دغيا لهبات وشدات فيه فحين كنزة هزات الحديدة ومشات للباب تخبط في ساقطة وضرب في الخشب حتى تطرطقات الخشبة فين شادة الساقة وتلاحت طايحة برا وهي تدفع الباب وخرجات كتجري هربانة برا وكل مرة تضور تلفت في الدار والدخاخن منها خارجيين، بقوة البكية سخفات تطيح وتنوض والضلمة قربات تطيح والنجوم ليل بداو يبانو، قلبها ما طاوعها تخلي دار الناس تحرق وتهرب وليني نفسها اولى وهي غير وسط الخلا والقيفار لا من غادي لا من جاي ماعارفة فين تسلك ولا تمشي تمنات غير الغابة تدخل وسطها على الاقل كان عندها امل تلقى القصر وكانت قريبة ليه لكن دابا وهي وسط القبيلة ماعرفات فين تمشي ودار كتلوحها للدار..!

لحسن حضها كانت دار الشيباني قريبة للسوق دغيا وصلات ليه ومن الكياطن المغطين عرفاتو، دخلات وسطو كتجري وتقلب على المسيد اللي نزلات منو حتى بان ليها وهي تطلع مع الدروج ودخلات وسط الغابة عاد تنفسات وارتاحت مشات ورا حيط المسيد اللي كانت على ضهرو نعسات، توسدات الحيط تاني وتكات،

صبح عليها صباح وضنها عكس اللي ضنات بان ليها السوق خاوي يصفر ضناتهم سالاو يمكن مافكراتش فانه يقدر يكون كيعمر من اسبوع لاسبوع، ناضت من بلاصتها ساست حوايحها ماعرفات تمشي عند دوك ناس تشوف كي صبحو ولا تزيد تقلب على القصر..!

وهي تغبن ملامحها ومشات دخلات للغابة موعدة نهار ترجع عند السلطان تجي عندهم تشوفهم، زادت تلوح رجل وتعاود لاخرا بشوية عليها غادا وتجبد وتفوه باقي فيها النعاس، ماحساتش بالطريق اللي ضربات حتى بان ليها الواد اللي نفسو نزلات فيه هي والعود تشرب ضحكاات فرحانة ومشات مقربة ليه كتجري ولسوء حضها مرداتش البال للهبطة اللي كتدي للواد غير حطات رجليها وهي تنزل ليها مع الغيس مشااات طايحة تا لتحث حتى جا راسها على الحجرة وتسرحات تكات هاديك طيحتها مغيبة..!!!

على بعد مسافة مكانتش قليلة حراس السلطان في اي مكان منتاشرين فين ما ضارو يلقاوهم، بخيولهم والفوانيس مطفين فايديهم، السيف قدامهم شادين عليه وعينيهم كيضورو كي القناصة حاضين مع جنابهم

والسلطان متقدم عليهم كلهم شاد الخيل فايديه وبرجليه كيضور في الغابة ويقلب، بالو ما مهنيش ومن نهار لقا الجام الحصان طايح جنب الواد ما تحرك من تما…والحراس من بعدو كيشوفو فيه ويتغامزو حتى قرب واحد وقال :

_انا ضنيت يا ديك الولية هبلات ولا في الواد غرقات..

_تا اش ساير تقول..

_واشنو ايلابقات عايشة ونعسات جنب الواد بحال والو تشير ويركبوها صحاب الحال وليني ايلا طاحت في الواد فين لقينا لجام العود موحال تخرج منو حية..

_سكت وولا تطلع هاد الكلام يسمعك مولاي يقطع ليك اللسان خلينا نقلبو ونبريو على الله يا مولانا..واخا راحنا تلتيام وسط الغابة ليل ونهار ومكاين ليها لاثر..

سكتو قاطعين الحس تابعين السلطان حتى كيقرب جتب الواد من بعيد كيطل فيه ويقلب بعينيه هادي يمكن العشرين في المرات اللي كيوقف حداه ويقلب ولكن بدون جدوى، تنهد مطول مزير من صدرو وضار عطى للواد بالضهر و شاف فيهم وقال :

_مكاين والو تاني ليوم، خلينا نشوفو الجنب التاني من الواد..!

تحناو الحراس بطاعة وتقسمو حتى داز قدامهم ومشى عاد تبعوه كيتغامزو مع بعضياتهم عليه مغبونين وحازنين على هاد الولية اللي مشات من ايديه..فحين السلطان غادي قدامهم وعقلو بالهضرة ما هاديش عنداك تكون غير في طرف رجليه ومايشوفهاش؟ ولا تكون طايحة في الواد وماردش ليها البال؟ ولا يكون دابا نيت فات الواد وهي فجنابو جالسة ولا مخبية ومشافهاش..!

غير ديك النزلة اللي مانزلش فيها لجناب الواد ولتحث كاع ماقدرش يزيد الخطزة بلاما يرجع يتأكد بنفسو تقول خاطرو علماتو وقلبو فديك البلاصة جلس ومابقى بغا يزيد لقنت اخر،

دوز ايديه على وجهو وتنهد مطول مضارب مع عقلو اللي كيقوليه كمل الطريق لبلاصة اخرى وقلبو كيعلمو يرجع لور حتى ضرب الخلفة لور ودخل وسط حراسو ورجع وهوما تبعوه تاني راجعين ، طلق من الخيل ونزل مدردب مع هبطة والغيس كيزلق حتى وقف لتحث وضور عينيه معااه مزيان لكن كيف العادة ولا اثر ليها،

يلاه غيضور يطلع حتى كتبان ليها شي حاجة جنب الحجرة الكبيرة تحركات قاص في سيف وضار كيقلب بعينيه مستاعد لحيوان ولا انسان وضار كيقلب بعينيه وحراسو كثر منو، رمى الخطوة القدام وزاد شوية وداك الجسد كيزيد يتحرك بحالا غينوض حتى قرب كثر وطل من بعيد غير لمح شعرها الاسود مرمي جنبها عرفو مايخفاش عليه وهو مولف كيتوسدو ، لاح السيف ومشى كيجري عندها نزل حداها وبعد الشعر من وحها وهي تبان ليه حمامة القصور مكمشة ملامحها وجنب جنبها بالدم دايز…!

لاح السلطان السيف ومشى كيجري عندها نزل حداها وبعد الشعر من وجهها وهي تبان ليه حمامة القصور مكمشة ملامحها وجنب جبهتها بالدم دايز…!

بشر ملامحو مدهوش وتحرك دغيا ضرب فوق خدودها وهي غا ماكتزيد تنين وتكمش في ملامحهاا ماقادرة تحل عينيها ولا تفتح فمها، ضربة دراس جابت ليها الساكتة وهو كيضرب في خدها وهي تهز ايديها وشدات فايديه حبساتو من لخبيط متألمة وهو يزكَا كيشوف فيها مسرحة وراسها فوق ركبتو هازو عندو..!

حتى بدات كتفتح في عينيها بشوية مع الشمس اللي ضاربة فيها كتعاود تسدها تاني وتعاود تحلها حتى ضور سلهامو على وجهها خباه من شمس عاد طلقات كماش وجهها و فتحات عويناتها بشوية كترمش فييه ما ان لمحات ملامحو وتأكدات منو وهي تقفز مبعدة عليه مصدومة حالة فمها وعيونها تقول شافت قباط روحها قدامها غير رصات عقلها فيه وتدكراتو وهي تطلق دموعها وتلاحت وسط صدرو معنقااه كتبكي بالصوت مزيرة على سلهامو وهو كيدوز ايديه على شعرها وضار شاف في حراسو مبسمين يمكن فرحانين كثر منو اللي غيرجعو لولالدهم وعيالاتهم، ما سكتها ما حبس بكاها خلاها حتى ارتاحت على خاطرها وتهدات متكية على صدرو مقادة تهز فيه الراس وهو بدون كلام كيسرح شعرها بصباعو غير اللي بقات حية وماحماقتش ولا ماتت في هاد الخلا…دوز ايديه تحتها وهزها عندو وزاد غادي بيها والحراس هزو سيفو وتبعوه حتى طلع فوق خيلو وطلعها معاه قدامو مغطيها بسلهامو وحرك الخيل مشى سابقهم وهوما وراه حارسين ضهرو..!

القصر في لمحة بصر وصلاتو الخبار،العبيد تستفو عند البيبان يطلو من الشقاق واهل القصر من شرفة دجناحهم يطلو منهم السلطانة الام اللي موجدة الحكيم الكبير المسؤوول على هاد الحالات هو اللي يقلبها ويتأكد من صحة ولي العهد، وشمس الضحى اللي فرحانة باختفائها حتى وصلاتها خبارها طاحت في البلاصة مصدومة من رجوعها،

السلطان دخل مع باب القصر الكبير وهزها في حضنو ومشى مدخلها فخطوة يدير تلاتة بين لحضة وتانية تا وصلها وحطها في جناحو فوق سريرو والحكيم دخل تبعو ومعداتو فايديه، قلبها سطحيا لا تكون ضربات فشي بلاصة ولا قرصاتها شي حاجة ساعة لقاها صحيحة فصيحة من غير جرحة جبهتها اللي دايزة بالدم ضمها ليها وعطاها مشروب من نوع خاص بلعاتو على ريقها عاد خرج ودخلات الحكيمة تأكدات من صحة التيلاد في كرشها بشراتهم بصحتو وخرجات هي والسلطانة فرحانة ومبشرة رجعات لجناحها خلاتها مع السلطان الراس في راس..!

هاد الاخير اللي خرج برا الشرفة ووقف حاط ايديه على اللسور ساهي في حراسو خارجين مستفين باش يتفرقو على القبايل ويعلموهم يوقفو التقلاب

ويرجعو باقي الحراس اللي مزالين يقلبو، غمض على عينيه وتنهد هاز نفس مخنوقة من صدرو حاس براسو نااقص وكتفو مهرس، مصدوم ومعجب في هاد الناس اللي تسعى ورا السلطة والمال ماحاسش بلي بيه كيزيد يتقل كفة الذنوب، ماحاسش بلي كل ما نورات ليه الشمس لابد من الغروب، ولا بد من نهار يجي فيه ويتقلب عليه شرو وليني من ديما كتجي غير في المضلوم، لو كان يدخل لعقولهم جميع ويعلمهم ساعة الموت لا ندامة تنفع والمال والجاه في الدنيا يبقاو والكفن ما ليه جيوب، ياما وصاه جدو قبل ما تزورو الموت ما يكون السلطان اامغرور وبالدنيا مفتون، وما يكون الضالم ويكون عادل بين العبد والوزير وما يختار بيناتهم، ومايدير التيقة في القريب والبعيد لكن السلطان كان يقلب على العدو بعيد عليه وهو كان في جنابو يتخطوا عليه..!

فحين كنزة لحضات وهي فوق السرير معارفة باش تبداه ولا باش تدخل الكلام بللات شفايفها وناضت من سرير خرجات عندو وهو حس بيها وتلفت عندها ما جات فين تهضر معاه حتى تفتح باب الجناح وحل الحارس دخل علم وخدا الموافقة من السلطان عاد خرج ودخلات موراه واحد الخديدم تحنات قدامو وتكلمات راسها محدور و قالت :

_مولاي جينا ناخدو لالة كنزة للحمام..!

ردات كنزة برفض وشافت في السلطان:

_ ب..بلاتي ماشي دابا..

قبل ما تكمل كلامها حتى قاطعها السلطان وتكلم كيشوف فيها:

_سيري معاهم…ورجعي عندي..

_و ولكن بغيت نهضر معاك..

شاف عندها مطول بدون اجابة وهي كترمش فيه حتى حرك راسو بهدوء ليها معلي حاجبو جيهت لباب بمعنى تخرج وهي تلفت ووخرجات مع الخديديم للحمام وهو رجع تقلب كيشوف قدامو ويتنهد كي حامل الجبال..!

خداو كنزة للحمام وهي غادا معاهم تقلب وتشقلب في عينيها تقلب على زروال ولا عرفية يعطيوه خبار لقصر واشنو واقع في غيابها ساعة ما بان ليها حد تقول غبر ليهم الاثر ضارت عند الخديدم سولاتها وهي تحدر راسها مجوباتهاش وكنزة بلعات ريقها وسكتات دخلات معاهم الحمام فركوها ولبسوها وقامو بيها حتى رجعات كتشقشق وكتافها ارتاحو عليها وعضامها خفافو ليها، عيات تسول وتبحث على اللي تعرفهم وماكين اللي عطاها الخبار ولا تكلم معاها تقول موصينهم عليها، حتى تجننات عليهم والفقصة ركبوها فيها وهي تغوت في وجههم وجرات عليهم خرجو برا عليها كاملين بقات غير بوحدها تشللات وضورات عليها الفوطة وخرجات لقاتهم يتسناوها بالقفطان والتزينات الخاصة بيها، لبسوها وحلقو عليها وهي ماراشقة ليها وماعندها كانة لشي تزيين مابطى عليها غير وقتاش تخرج منهم وتمشي عندو،

ما كملو ليها حتى غفر ليها الله دنوب عاد خرجات وقصدات مباشرة جناح السلطان دخلات عليه لقاتو فين خلاتو كفدات عليها قفطانها ومشات وقفات عليه وقالت :

_مولاي..!

تلفت عندها واقف بجنب ماطولش فيها الشوفة وشاف قدامو شابك ايديه وراه ورد:

_قربي عندي..

زادت قربات حداه لاصقة في السور وهو ضار غير بعينيه عندها حتى لاحظ جرحة اللي في جبهتها معرية قرن حجبانو وقال :

_علاش فزكتي جرحك بالما..!!

ردات مغبنة : الجرح هو اللي في قلبي امولاي حماقيت بالتقلاب على القصر وحتى حد ما بغى يعاوني عارفة اشنو كيضور في بالك وكتقول عليا هربت منك والله ما هربت من القصر والله ماكنت في نيتي من نهار شفتك نوي الهروب ونخرج من القصر

حرك راسو بايجاب وضار داخل الجناح وهي بدون شعور شدات في دراعو وردات :

_ماتسكتش هكا عفاك قول شي حاجة كنقسم بلي خلقني عمري نويت نهرب نهار جيت ااه قلت غنهرب ومابغيتش نجلس و ولكن دابا والله ما هربت انا كون كنت ناوية على الهروب بصح ماتلقانيش عند الواد راجعة ليه واش عرفتي اشنو وقع فياا ولااا لااا

عقد حجبانو وشاف فايديها الشابكة في دراعو ضناتو خارج وهو ماكان ناوي خروج، علا فيها عينيه وهي غير حدرات رموشها قطرو دموعها على خدودها وكملات :

_ماعمري في حياتي قصت الخيل بايديا حتى وليت طالعة فوقو وهو كيجري وانا شادة فيه بزز خايفة نطيح ولا يموت ليا ولدي ما ارتاحيت حتى حبس في الواد كيشرب وانا جلست حداه نتساراح وهو يهرب وخلانيي تمااا وسط الغابة والضلام ااهى ماكنشوف واالو غي كنتلمس وخايفة شي حاجة تقصني ولا شي حد يهجم عليااا

هزات الشهقة وطلقات من دراعو مكملة وهو كيتصنت عليها :

_سخفت غير بالعطش والجوع وليت كنقلب على الما بريق الناشف وحتى الواد اللي بغيت نرجع ليه نسيت طريقو وتلفت وسط الغابة ماعارفة حتى قنت فيها حتى قلت غنلقى شي حد يعاونو وانا نخرج في واحد رجال حطو عينيهم على عقدي وبغاو يديوه ليا ولكن هربت منهم واخل تبعوني ماشدونيييش..

تبعات ايديه بعينيها حتى شد العقد بين صباعو كيتلمس فيه وقالت:

_نتا عطيتيه ليا هدية حلفت ما نضيعو واخا نموت…كون بغيت نهرب بصح مانبقاش ناعسة جنب جنب الشجر والمسيد غير بوحدي والضلام وانا عارفاكم غتقلبو اما نعسا على لحيط بوحدي وفاش حليت عينيا حمدت الله اللي ماقرصاتني شي حاجة ومن تما حتى لقيت راسي وسط شي سوق فشي قبيلة ماعرفتها فيين كاينة و وداك البراح كيقلب عليا ملي قلت ليه انا متااقش بياااا ااهى وليت بحال شي هبيلة كنضور من دار للدار وانا والله ماهربت ااهى واش ماكتيقش بياا بنها قلت كنبغييك كيغاندير نبعد عليك ونهرب فيين غنمشيي وانا ربطت روحي بييك علاش غنهرب منك ااهى وانا دوزت الحرب على قبلك

طاحت مهدودة عند رجليه كتبكي وهو تنهد وطلق حجبانو المعقودين وتحنى عندها هز وجهها عندو من دقنها وقفها عندو كيمسح دموعها بطراف ايديه وهي كل ما جات عينيها في عينيه كتسيل دموعها على خدها حتى قال محرك راسو :

_عارف، ما طاح في بالي لا نشك فيك ولا نوي فيك الهروب عارف هادشي ماتبكيش..!

رمشات عيونها بسرعة مدهوشة وهو مسح اخر دمعة طاحت منها وكمل :

_وصلني كلام المشاوري محمد اللي فهمت منو اشنو ساير ورا ضهري طول هاد السنين..!

_شنو قالييك ؟؟ قاليك انا ماهربتش منك يااك هو اللي بغى يهربني بزز مني والله مابغيت نهرب ..

حرك راسو وبعد عليها دخل للجناح وهي تبعو حتى مشى للمكتب اللي عليه شغلو وحل واحد الصندوق صغير جبد منو ورقة ملوية ومحزومة برباط احمر يلمع مدو ليها وهي شداتة بين ايديها كترمش فيه معجبة حتى حرك حجبانو ليها تفتحو وهي تحدر عينيها وفتحات رباطو وحلات الورقة ما طويلة ما قصيرة مربعة ومكتوبة بحروف مزوقة ماتفها ايلا ادا كنتي داري بداك الوقت وبداك الخط، علات فيه عينيها وقالت :

_ش شنو هذاا؟ بحال الرسالة اللي رسلت لييك..

حرك راسو ورد: قرايه..

_ماكنعرفش لهاد الخط..

_قرايه واللي مافهمتيش قوليه ليا…

حدرات عينيها كتقرا في المكتوب وهو شبك ايديه وراه كيشوف فيها فملامح وجهها اللي كيتغيرو مع كل حرف تقال..!

” مولاي السلطان ياما ضحكتي في وجهي وقلتي ليا يا سارح في سماء الاحزان،نتوما ضحكتو وانا ضحكت وقلبي داخل صدري يبكي الدم، يا السلطان اللي بعدك عليا كيف بعد الشمس والقمر راسك في العالي ورجليك شادة في جدور لرض وانا غير كايها ناس خديتيني صديق ليك وعطيتيني مقام اللي كل العباد يتمناوه حتى وليت مكروه بين عباد اللي جيت خلفهم وخديتو ومحبوب بين عباد اخرين شرفوني وعطاوني قيمة بيناتهم، ولكن نحلف باللي خلقني امولاي نحلف بديني وما نزل الله علينا لا عمري نويت خيانتك ولا حفرة حفرة ورا ضهرك، خبيت سر ماهيتي وبفضلك امولاي نسيتو ونسيت نصرح بيه واخا كنت ناوي عمري نقولو، قتلت ناس وحبست ناس وعتقت ناس وليني عمري ضلمت الخلق ولا سبقت مول المقام الكبير على الصغير كيف تعلمت منك امولاي وكيف كنتي توصيني على طول، وهكا كنت ناوي على الدوام حتى لهاد النهار اللي مابغيتوش يتعاود كيف زمان، تخلعت وتردعت مابغيتش خاطرك يتغبن وتحزن على اللي ارتاحت ليها خاطرك مابغيتش ميمزتك تقتل كيف وقع اللي قبل منها شفت في عيونهم الدغينة وعرفت من وراك غيفرسوها ومايخليو ليها فين تهز راس، مبارزتك مع لمير عطية الله خلعاتني وخلاتنا نفكر فلي قدامي واللي ورايا ونتسرع بلاما نفكر ومميزتك اول من طاحت في بالي حيت عارفهم نهار يفكرو يأديوكم يبداو بالعزيز عليك، فكرت نهربها ما نويت غير حمايتها وحمايت ولي عهد سيدنا، اعدائك في جنابك امولاي بين رجليك يتخطاو القريب منك عدوك وعبادك خير منهم ليك ، كيف حلفت نبعدهم عليكم بقيت على وعدي وبعدت قدر الامكان هددتهم بالعزيز عندهم وربطتهم من الدراع الهشيش فيهم وليني بعد ما اتقرا رسالتي غتعرف اني مابقيت قادر على مواجهتهم وسامحني امولاي خنتك وخليتك بيناتهم، ماندكرش اسمهم حيت واتق في غبينتك نهار تعرف بيهم وليني اللي نقوليك شكك في محلو واللي كنتي ما مرتاح ليهم هوما اعدائك واللي ناوين غدرك..كل حاجة امولاي فالدنيا باوانها اللي زمان يكسر ليه الحناح يرضى بالمقسوم عليه والمكتاب، نتمتى سماحتكم امولاي فاللي غلطت فيه وانا ماحس ما ضان في كل كلمة نطفتها وكانت كدوب عليك واخا مانويتها وايلا كدبت على نية امولاي ما كانت غير حماية وخوف عليكم..

عاهدتك بالنية وكنودعكم بيها امولاي…

المشاوري محمد.

الختام..”

قرات الرسالة بدون ماتحتاج والا كلمة يشرحها ليها لقات راسها غادا بين حروف الرسالة تقرا فيهم وكل حرف تمعن فيه وتشوف اشنو كاين فخبياه ما ردات لتبرييراتو ولا لتبريئها من كل الافعال عيونها ركزو في السماحة اللي طلبها من سلطان قالت واش هرب كيف هربها؟ واش رجع لومانو كيف دار ليها؟ علات راسها فيه جامعة ملامحها وقالت :

_علاش كيطلب السماحة واش تسجن ؟ هو مادار والو امولاي انا شاهدة ايلا كان غالط حتى انا غالطة معاه.. فيين مشى واش مابقاش معانا في القصر ولا تسجن.؟؟؟

تنهد خدا الرسالة من ايديها كيطويها ورد:

_محمد مات آكنزة ..!

تنهد خدا الرسالة من ايدييها طواها وقال : محمد مات اكنزة..!

حدر راسو وكمل كلامو

_ندمت ندمت على اللحضة اللي نطقت فيها ورسلتو للسجن بايدي، في التالي لقيت رسالتو جنبو وهو مسمم حداها…

شهقاات وشدات على فمهاا حاابساها ودموع نازلين مع خدها كيقطرو كلها كتنخض وبالبكى غتسخف وهو شاف عندها ضنها حزنات عليه كيف حزن عليه هو واخا كان وجعها لشيى اخر،طوى المكتوب وعنقها عندو كتبكي وهو شاف لفوق وعينيه حمرين مدمعيين على صديق بن يازي ماشي صديق السلطان، اللي باح باسرارو ليه في مقام خوه ، الصديق اللي لقاه وقت الديق والخنقة وماشي غير وقت الفرحة،صحبتو بمحمد ما يوزنها ميزان واخا خالفهم الزمان، حاضيه وكاتم اسرارو وحافض ضهرو من الاعداء، الكبيرة والصغيرة دوز على ايديه واللي كان فيها شك يدخل ليها هو لول عاد يتبعو السلطان، تجرح في موتو وجرح قلبو كبير وغارق، موت باه حفر قلبو وموت محمد غرقو وكون ماتت كنزة تكمل على ما بيه..!

بلل شفايفو وبعد عليها كيتنهد ويرجع في دموعو ما يسيلو ويجرحو كبريائو وهي علات فيه عبنيها وقالت شنايفها كيترعدو وبالشهقة كل مرة كتسكت وتدمع:

_علاش سمموه اشنو دار ليهم شكون هذا اللي سممو..!؟

_ماشي واحد، عبدة من العبيد ما عرفت اشنو بغات منو ولا اشنو نوات على شهادة باقي السجناء قالت سمماتو وقبل ما يموت اعتارفت باللي عطاها السم ووصاها تقتلو،

_وعلاش سمماتو اشنو دار ليهاا ااهى حرام عليهم شنو بغاو عندو وهو كيدير غير خدمتو عمرو ضلم شي حد فيهم شكون هذا اللي غيبغي يقتلو !!

حرك راسو ورد : على اقوال السجناء محمد قبل ما يموت العبدة نطقات باسم اللي وصاها حيت عرفات راسها غتموت وماخافت من تاحد وما خافت على تاحد، دكرات اسم عيسى اللي وصى بقتلو وهي عوناتو وسممات محمد

بتدكر ردات : عيسى..و واش هادااك اللي ضربو محمد

_حضرتي ليهم..!

_ااه ااهى حضرت لمحمد كان باغي يهربني خزنة من كلشي وشافو عيسى ووهو يضربو باش مايقولها لحتى حد يحساب ليا مات مانسحبوش مزالو حي..

_كان حي…عيسى تعدم والعبدة تلقات ميتة جنب محمد..

تصدمات وحدرات راسها مغطية وجهها كتبكي وقالت : ماكنتش باغا يوقع هادشي ااهى

_نتي مادرتي والو

_كنحس براسي بسبابي مات محمد..

حرك راسو بسلب وحيد ايديها على وجهها وقال :

_لاا ششش ماشي بسبابك محمد تغدر من قريبي كلنا مكناش ناوين على هادشي وليني قدر الله فوق منا جميع، تغدرت في اعز الناس ليا تاني مرة

شد وجههها بين ايديه وحط جبهتو على جبهتها وقال مغمض عينيه مغدد :

_ عدمت عيسى بايدي ومابردتش ونعاود نقطع راسو وماندممش علييه، ماضنيتهاش منو عمري فكرت في المال والجاه يغيرو الانسان ويتعماو عيونهم بالطمع شكيت فييه وحدروني منو وليني بايدي رجعتو وقربتو منو حتى قتلو..

حطات ايديها على ايديه وردات : ماتقولش هكاك واش نتا كنتي عارف هادشي غيوقع ماتلومش راسك عفااك محمد كان عزيز عندي وعارفة معزتو عندك قداش مكتاب الله كيتصرف وكلنا ليها ولكن مابغيناهش يتغدر هكا…

_لازمني نعرف كيفاش مات (بعد عليها ووقف عاطيها بالضهر) اشنو بغات منو ديك العبدة وعلاش هو من دوم الناس يتقتل، ولا يطمعوها بالمال وتحاول تسممو! نقولو محمد نية وليني ما يتيق في حد ومتيفض نيتو مع البراني نقولو غراتو ، محمد مساهلش كيطيرها في سما ويعرف الواحد مم عينو..كيفاش دارت ليه وهي غير عبدة ضعيفة ماتداهيه في قوتو علاش محمد خلاها دير فيه مابغات..ايالا ايدا كان مضروب ولا بايدو شرب السم ونوا الموت..!

دوز على وجهو بقلة حيلة وهي عنقاتو من ضهرو مضورة ايديها على خصرو حاطة عليه راسها كتبكي بحرقة غير عااادية ابدا مامسمعاش ليه الصوت وماحسساتوش ابدا ببكاهاا..اللي ما خرجاتوش في وجهو بكاتو في ضهرو..!

بين كولوارات القصر العراض ماشية كنزة هازة عندها جلايل القفطان العريض مزال ماولفات على جلايلو وعلى ديك التجرجيرة والوصيفات الخاصين من السلطانة اللي سيفطاتهم موراها تابعينها وهي قاصدة جناح الحريم، الحراس غير شافوها حلو الباب في وجهها وبعدو خلاوها دخل وهي تقدمات رمات الخطوة ودخلات كتضور عينيها على حيوط الجناح كيبان خاوي تاوحدة في البنات ما كاينة ، كمشات ملامحها ودارت عند الوصيفات شافت فيهم وقالت :

_فيين البنات؟

نطقات وحدة فيهم حادرة الراس: ليوم الخميس الالة كيخرجو لكشينة يتعلمو طياب ويديزو الحمام..!

_وقوليها ليا قبيلة علاش ساكتين خليتوني ضربت هاد الكعطة كااملة تئ…وحدية غتكون خرجات معاهم واش مافراسهاش رجعت ولا اشنو تئ، يلاه سيرو وحدة فيكم تمشي تشوف ليا زروال فين كاين..

ردات الوصيفة: لالة ام سيدي قالت لينا منتحركو من جنابك ما نتزعزعو نبقاو حداك حتى ترجعي لمولاي في الامان..

قلبات عينيها بنفخة وردات : ايو وقفو هنا غنطلع لجناحي لفوق تاوحدة ما تبعني، تانعيط ليكم..!

عطاتهم بالضهر ومشات منفخة عليهم ماحاملاهم ما قابلاهم على ما دارو فيها نهار كانت وصيفة عند السلطانة وسم اللي غرسوه فيها، طلعات لجناحها حلات الباب تقلب ما لقات لا وحدية لا غيرها الجناح خاوي كيصفر وهي تسدو وجات غادية حتى سمعات صوت التنخصيص والكلام الهامس قرنات حجبانعا وتبعات الصوت بشويا راخية ودنيها وغادا على مشط رجليها حتى قربات لجناح شمس الضحى لحسن حضها كان الباب مبسم شوية وشمس الضحى كتبان ليها واقفة على المراية و وصيفتها جنبها ماعرفاتش شكون فيهم كتبكي حيت بزوج بيهم عاطين بالضهر وهي تقرب كثر حطات ايديها على الحيط ورخات ودنيها تصنت عليهم وتسمع فضولها واكلها تعرف اش بيها شمس الضحى اللفيعة حتى سمعات الوصيفة قالت :

الوصيفة:ماديريش فراسك هاد الحالة الالة خلي ايمانك في الله قوي ماتخليشاي الشيطان يوسوس لييك..!

ردات كتنخصص: الشيطان هو اللي كان ضاير بيا وانا معالماشاي علييه ااهى ديك العبدة الدميمة في جنابي ضور وانا مرتاحة ومسفحة شكون قال ماتقتلنيش تانا معااه اهى

كنزة غير سمعات حس القتيلة وهي طرطق عينيها وزادت خشات راسها متدكرة محمد اللي تقتل ومزال ما معروف مول المكيدة..!

الوصيفة:يهدييك الله الالة راه هوكا باش تزيدي تكتري عليك الشك خليك كي جيتي نهار لول وكي لاقيتي السلطان قبل ما ينفيك هازة راس ودافعة الصدر لوكان شك في نبشة فيك والله مايسيبك من ايديه ايلا وروحك خارجة..

ردات: لا لاا لا لازمني نمشي، ايلا كعدت تا بقيت هنا السلطان ديما يبقى حاط عليا العين وديما يبقى شكو فيا قايم، جمعي ليا لباسي هاد ليام نشد رحيل نرجع فحالي..!

الوصيفة:ومولاي اللي جيتي على قبلو..!

ردات هازة حجبانها فيها : وروحي انا سخات عليك ياك!! لاا اخيتي لا انا مزالا صغيرة ومزال من غير السلطان يجي ما لا مشات روحي ما نبقى نرجع انا، اولي اميمتي اويلي وحدية تخطوا حدا رجلي وانا حالة فمي ونضور لوكان ضارت وقتلاتني انا نييت شكون يتسوق ليا ولا يجيب ليا الخبار..!

_واهلي تانتي وحدية ماتت كون بقات مزالت حية نقولك ردي البال و

قبل ما تكمل كلمتها تدفع الباب ودخلات عليهم كنزة عينيها خارجيين ترعد وترجف كلها وشمس الضحى شافتها بردو عليها الركابي جلسات بخطرة سخفاانة كتنهج..!

كنزة:شكون وحديا، شكون وحديا شكون ماااات ادوي ماتحنزييش فياا شكون مااات

دفعات الوصيفة بجهد وهي كترعد وقالت :

_ دويي شكون مات هضريي شكون هادي وحدية ؟؟!

قفزات الوصيفة خاشية راسها بين عنقها وردات :العبدة اللي م م مم من حريم مولاي..!

دفعاتها بايدين سحفانين عليها: وحدية ااهى صاحبتي و واش اللي عندها الخالة تحث عينيهاا هضريي ااه شعرها كحل ورطب واش هي ولا حدة اخرى !!

حركات راسها وردات : هياا هيا اللي سممات سيد محمد وسممات راسها حداه

كنزة بحرقة شدات في شعر الوصيفة داتها وجابتها منو مقغدة كتبكيي بجهههد حتى غوتاااات وجلساات كتضرب في وجهها وشعرها بهستيييرية غتحماااق والوصيفة شافت في شمس الضحى مخرجة عينيها كيف الوصيفات لتحث سمعو غواتها طلعو كيجريو عندها وهي طايحة في لرض مربعة كتغووت وتضرب في شعرها ووجها واللي قربات عندها كتقمشها وتدفعها معاقلاش على رااسها ، علات عينيها في شمس ضحى صااعرة ولو كانو عافية تحرقها بلي فيها، يلاه وقفااات غادة ليها وهي تطييح على وقفتها سخفاانة قدامهم ووصيفاتها غوتو مخلوعيين نزلو عندها كيطيرو يقلبو فيها ويسولو وشمس الضحى وقفات كترعد بعدات منها جيهت الباب كتشوف فيها مخرجة عينيها بالخلعة غتموت..!

الوصيفات تعاونو يفيقو فيها و وحدة فيهم مشات كتجري تعلم السلطانة كيف وصاتها تعلمها باللي كان ومكانش..هاد الاخيرة بالخلعة ولات تفور خرجات من جناحها تجري وتجاري خايفة ومخلوعة دخلات عليهم للجناح وامراتهم في الحين يتعاونو يهزوها على السرير وفعلا لحضتها رفعوها متكية على السرير والحكيمة دخلات عليها تقلب وتشوف فيها يلاه غتقيص فيها وهي تبدا تحل عينيها والسلطانة قالت للحكيمة تبعد وتخليها…!

كنزة حلات عويناتها كتشوف فيهم واحد بواحد حتى رصات الشوفة في شمس الضحى والسلطانة فهماتها طايرة ضارت حتى هي شافت فيها ورجعات عند كنزة معلية حجبانها وقالت :

_ياك لاباس اشنو وقع ليك..!

شافت فيها كنزة وردات : واش بصح صاحبتي ماتت صاحبتي وحدية

_بحال هاد الصحابات لانس مايعتارف بيهم الله يسامح ليها ، ردي لبال راسك عارفينك محروقة عليها وليني ولد مولاي اسبق منها..

_وحدية ماديرهااش اشنو بينها وبينو حتى تقتلو ااهى مااشي ديالهااا

_سم راه سمماتو وليني شكون دفعها ليه الله اللي عالم واخا هاد القضية ماخافية علينا ومولاها يبان يبان، ومولاي السلطانة ما يفرقها حتى ياخد روحها..!

قلبات وجها لديك جيهة راخية شفايفها ودموعها على الخد دايزين والسلطانة غمضات عينيها وحلاتهم بصرامة وردات :

_عونوها حتى توقف وخودوها لجناح السلطان

تململات كنزة وناضت من بالاصتها بشوية عليها شدات فايد الوصيفة وخشات رجليها في البلغة وخرجات كتبكي والسلطانة شافت في شمس الضحى وهي كتضور في عينيها ماباغة تبين ليها دموعها فحين السلطانة معلية فيها حجبانها ورجعات تنهدات و وخرجات خلاتها..

اما كنزة ماحسات بطريق ولا ردات ليها البال غادة قاصدة جناح السلطان وتبكي وتمسح في دموعها محروقة من جيهت صحابها بجوج بيهم دقة وحدة خرجو باب القصر مكفنين مابقى ليها لا والي لا تالي لا محمد اللي يفهمها وعارف اصلها ومفصلها ولا وحدية اللي تدافع عليها وتحن من جيهتها..

فاتت الحراس ودفعات الباب ودخلات مكانش السلطان فجناحو كيف خرج قبل منها مزال ما رجع وهي لاحت البلغة من رجليها وتخشات في سرير حلطة الراس على المخدة ودمعتها عليهم نازلة..!

لحضات يمشيو ويجيو وكنزة فوق السرير ماتعرف الوقت ما تفرق بينو غير بالمؤدن اللي عاد ادن بصلاة العصر، عنيها دبالو ونعسو وحتى غيديها النعاس وهو يتفتح الباب ودخل منو السلطان وهي حسات بيه وناضت من السرير خرجات عندو واقفة خشات رجليها في البلغة وقربات عندو كتمسح في دموعها وهو قرب معلي حجبانو وقال :

_كنزة مالك !

ردات بصوت غالب عليه البكا: قالو ليا صاحبتي ماااتت ااهى وحدية اللي كانت صاحبتي في الحريم تسممات حتى هي مشيت نقلب عليها فكعانة عليها حيت مجاتش عندي وانا عاد رجعت في لخر قالو لياا ماااتت وماشفتهااش

شد فايديها وجرها معاه حتى جلسات على السرير وقال :

_شش بشويا علييك مسحي دموعك وقولي ليا شكاين..!

مسحات دموعها وهو كيدوز ابديه على شعرها جلس جنبها مفرق رجليه محني كيشوف فيها حتى بلعات ريقها وردات :

_وحدية صاحبتي..ماتت

_امتى هادشب !!

_ه هي اللي ماتت مع محمد

_العبدة اللي سمماتو؟

_لااا صاحبتي ماتسموش علاش غتبغي تقتلو اشنو بيناتهم ااهى

_كان مصاحباك في الحريم ! يعني كنتي تكلمي معاها بالكثير..!

_ااه

دوز ايديه على ضهرها وجرها متكية على صدرو كتبكي وتنخصص مزيرة على سلهامو وهو كيدوز ايديه على شعرها وكيسمع لكلامها..

_غير هوما بجوج اللي كانو جنبي في القصر محمد كان كيعاوني ويعلمني اشنو ندير وهي كتحامي عليا وماكتخلي حتى وحدة تقيصني ااهى ترزيت في صحابي بزوج تاحد ما بقى ليا، دقة وحدة خرجو من القصر وهوما في الكفن،علااش غتقتلو وتموت وهي كانت كتسناني نولد باش تربي معايا ولدي حيت انا مكنعرفش ااهى قلبي كيتحرق علاش مشاو ليا بجووج

جابها قدامو مسح على دموعها وقال :

_ايلا كانت صاحبتك ما سمماتو ما تسبات في قتلو غيبان..ماغنخلي حق تاحد فيهم يضيع..قلتي ليا كانت تتكلمي معاها وابادلو اطراف الحديث، انشو كتعرفي عليها شكون هي ومنين جات وشكون عندها..!

_م ما كانت كتقول ليا والو مكنهضروش على دارهم بزااف..و و لكن قالت ليا عندها ختها وكانت كتقول ليا كتشبه لييك بزاااف في كلشي كانت كتشبه ليا..!

_اش سميتها..!

_ماعرفتش مكانتش كتهضر ليا عليها بزاف غير مرة وحدة اللي جبدناها فيها..

_ استعقلي ضوريها في دماغك وشوفي واش تفكري شي كلمة..

حركات راسها بسلب وردات : لاا ماعقلت ااه و واحد نهار سولتها وقلت ليها علاش كتعامل معايا هكاك حيت كانت كتحامي مني بزاف وتضارب على قبلي وهي تقوليا اللي وقع لختي مابغيتوش يوقع ليك..ماعرفتش اشنو وقع لختهاا..!

حرك راسو وتنهد كيدوز ايديه على ضهرها ويطبط عليها مصبرها وهي حادرة راسها كتبكي وتلعب بين صباعها بالها مشغول وما شغلو غير لحضاتها مع وحدية ماسخاتش بيها ومزال ماشبعات منها ومابغاتها تموت بديك الطريقة،ماحسات براسها حتى تكات فوق السرير والسلطان جنبها حاط دراعو تحث راسها ولايد تانية كيفسخ بيها شعرها حتى تفتح وراها وهي تشد فايديه وقالت هازة فيه راسها:

_عفاك رد لبال لرااسك مابقى عندي حد، نتا اللي عندي ايلا وقعات ليك شي حاجة نتبعك ولله تى نتبعك مابغيت والو غير بقى معايا ايلا مشى شي حد اخر عزيز عليا نموووت مورااه

_ششش ماشي كلام هذا..!

هزات كتافها وردات: مانرجعش مزال ندير الصحاب قلبي تحرق على صحابي علاش يموتو هوما من دون نااس مزال بغيتهم ماكانش خاصهم يمشيو داباا ااهى مزال محتاجة ليهم في جنبي كنحس براسي ضعيفة وهوما بعاد عليااا ااهى

_بغيتي نغضب عليك اشنو هاد الكلام،مكتاب الله كيتصرف رضاي بقضاء الله…

حركات راسها وحدراتو وهو نحنح ونطق مبدل الموضوع..!

_حكي ليا فين مشيتي بعدما خرجتي من القصر..

_كان هاداك الخيل غيطيحني..

_الخبل ديال محمد ما مولف حد العجب اللي خلات تركبي علي..!

_حولو غادي وكينقز بيا مابغاش يرصى حتى واقيلة جاه العطش وهو يوقف جنب الواد عاد نزلت منو..!

_مم كملي..

_بقيت كنضور تما كي شي هبيلة بغيت نرجع للقصر وهو هرب عليا و وصافي بقيت كنضور حتى طحت فواحد الصاقية ونزلت نشرب منها…

رد: فين جات هاد الصاقية..!

ردات: م ماعرفت و واحد البلاصة فيها ديور بزاف ولكن بعاد على بعضياتهم بحال الخلا..

حرك راسو ورد: اهاه..

_بغيت نشرب منها وهوما يوقفو عليا واحد الرجال ماعرفتهم منين جاو يحسابلي باغين يشربو وهو يحطو عينيهم على عقدي وحسيت بيهم رجعو لور بحالا كيتافقو عليا..

عقد حجبانو ورد: تعقلي عليهم وصفيهم ليا..

رمشات عينيها ودرات ناكرة عليه :

_ءء! ل لاا م ماعقلتش عليهم، ولكن هربت منهم ونعست غير في الغابة ديك الليلة النهار تاني وانا نطيح فواحد السوق كان فيا جوع بزاف وغير واحد الراجل كان كيبيع الحلوة وانا ناكلها ليه مسكين كاملة..

رد مدهوش: سرقتيها..!!

ردات مغبنة: ااه الله يسمح ليا ولكن راه كان فيا جوع بزااف…

دوو ايديه على وجهو ورد : ههه لا حولة ولا قوة ايلا بالله زيدي..

_وصافي هي فاش جا داك البراح ملي قلت ليه انا هي كنزة بقى كيشوف فيا ومشى بحالا انا كنكدب علبيك..ومشى وخلاني كنبكي حيت بان ليا الامل الوحيد اللي غيرجعني للقصر مشى وخلاني عمري مزال غنرجع عندكم واللي قلت ليه ديك الساعة انا من القصر كيبقاو يشوفو فيا بحالا كيشوفو فشي حمق ولا شي هبيل..!

_اهل القصر ماكيضوروش بين القبيل وايلا جاو كيتعلمو ناس القبيلة قبل بشلا ايام داكشي باش مايتيقوش بيك..وفاش رسلت البعثة يوصيو عليك القبايل الخطأ اللي درت ماوصفت ليهم لباسك ولا قلت ليهم حالتك ضنو كنبحث على شي ولية من ناس القبيلة..

حركات عيونها وعلات فيه عينيها قالت : تخلعتي عليا..

مرر ايديه على خدودها تنهد ورد :

_اشنو ضهر ليك..

_كون ماخرجتش من جناحي داك نهار مكانش غيشوفنا محمد ومكانش غيهربني ومايوقع هادشي كامل..

_بالعكس محمد يخرجك من الجناح وياخدك يهربك حيت هادي اول حاجة كيديرو نهار توقع الحرب بين الاصول وهي ناس السلطان كيتهربو هوما لولين عاد عبيدو، ومحمد عارف مقامك عندي بدا بيك نتي اولا..

يلاه غتكلم وهو يقاطعها وايديه وسط شعرها وقال :

_كملي ليا كيفاش رجعتي للواد..!

_لقاني واحد راجل في السوق كنبكي ورا البراح وهو يقوليا يلاه معايا للدار ونعاونك ترجعي لقصر السلطلن..

رد وقال : مشيتي معاه..!!

_ااه كانت مراتو في دار بدلات ليا وتعشيت معاهم ودخلت للكوزينة عاونتهم وبقيت كنتسناه هو يجي باش يجيبني هنا..

_بفمو قال يجيبك للقصر..!

_ااه..

_النية صيفة زينة وليني ماشي لهاد الحد اللي توتقي فراجل غريب عليك وتمشي لدارو..صفي نيتك ومتوليش غشيمة ودمدومة قبالتهم ردي بالك وماتقي في جنابك..!

_علاش شنو يبغي يدير ليا مثلا..

_الله اعلم اشو نضار في بالو..!

_انا تقت بيه ولكن مساكت واقيلا حرقت ليهم الدار…!

عقد حجبانو وشاف فيها وهي ردات مكمشة ملامحها :

_دابا هي قالت ليا نشعل ليها داك المجمر د ديال الطياب وانابغيت نشعلو والعافية عكسات مابغتش تشعل ليا ودرت ليها خيشة ديال الدرا وشدات فيها العافية وتقلب ليا طبك ديال درة المطحونة ودخت وتخلعت والعافية كل مرة كتشد ليا في ح حاجة خليت كلشي وهربت..

رد: وناس الدار كانو معاك..؟

_لا لاا كانو ك كلهم خارجين..حفظ الله كنت غير بوحدي

قال : شحال من دار جنبهم!

_كانو بوحدهم كل دار بعيدة على لاخراا بزااااف

_اشنو قلتي ليا اسم الراجل ومرتو؟

_راجلها المعطي وهي فضيلة..ع علاش كتسول عليهم..؟!

_لازم يتعوضو على اشنو ضاع منهم.. !

تكعظات شوية وردات: شنو غدير معاهم..

رد بتأكيد: اللازم..!

_ن نقدر نمشي عندهم بغيت نشوف ديك المراة ونقوليها شكرا غير على قبل الحوايج اللي لبساتني والماكلة اللي عطاتني وبغيت نشوف داك الراجل اللي سرقت ليه الحلوة غير نطلب منو السماحة..

مرر ايديه على خدها ورد: واخا..ارتاحي والوقت اللي بغيتي تمشي علميني وسيري..

_غنمشي وغنرجع..

حرك راسو بايجاب وهي تبسمات وتكات ساهية تكلمات:

_كون كانت معايا وحدية كون مشات معايا كنحس بيها فاش كتجلس مع ناس هكا ضريفين وعلى قد الحال كتفرح وكتحس براسها وسط ناسها..!

مرة اخرى رظ السلطان مبدل الموضوع وقال :

_فايت قلت ليك كلامك غرييب على كلامنا..عندك واحد النطق غريب ماعمري شفت مثالو..!

ردات مبسمة: زويين ولا العكس..

_كلشي فيك زوين..!

شحكات حادرة راسها وهو كبدوز ابديه على شعرها ويتنهد:

_نعسي شوية ماعيتيش..!

_غتخرج ولا غتبقى معايا

_حداك انا حداك حتى تنعسي،يلاه غمضي غينيك نشوف نعسي شوية..

توسدات دراعو وغمضات عينيها مزيرة لايزار الحرير على صدرها وهو كيدوز ايديه على شعرها حتى شافها غمضات عينيها شوية بغى يحيدها وهي ترجع تشد فايديه وحطاتها على شعرها وقالت نغضنة عيونها:

_خليها..

رجع لموضعو ميف كان وهي متيكة جنبو كتحس بلمساتو حنان كينشيو على شعرها حتى جاب ليها النعاس وداتها عينيها وهو حس عليها ناض غطاها وخرج لشرفة الجناح وقف عليها..!

يتبع