وإن سألوه عن الجمال أجابهم بــزيـــنــــة ... كان عاشقا لها وفجأة اصبح هو الــنّــمــرود❤️🔥
فنفس الوقت فجيهة اخرى بالضبط فالليسي
خارجة بشوية مع فاتت لباب شوية بان ليها بقات واقفة بلاصتها شوية بدات تتحرك راسها بلا قصداتو بشوية حتى وقفات عليه كان شاد الطيلي غير هز راسو شافها وهو يتوݣد ربعات يديها ونطقات
سكينة:ماعيتيش فينما نضور نلقاك؟
وليد خشى الطيلي فجيبو:كلشي على ودك يهون فينما مشيتي وراك حتى تحني فيا على خاطرك
سكينة:ايوا راك غير تتجري على الخاوي وكتحصد الما وكتحلم بالالوان
مع نطقات كلامها بغات تزيد وهو يشد فيها حالف ليوم ميخليها تفلت منو ليوم باغي عذابو يسالي
وليد:على ودك نت نقطع لبحور تذراع ماشي غير نحصد ما النعاس والله مكنشوفو اسكينة غا سمعيني زوج كلمات شاعلين فيا العافية نقولهم باش نرتاح
سكينة طلعات فيه حاجب وهي تتشوف فيه متنكرش عاجبها الحال حيت تابعها وتتشوفو كيف كزاوݣ وهادشي باغية هي باش يتعلم ويعرف قيمتها مزياااان
سكينة:الرسائل ودابا القافية نزار القباني هدا شنو هما هاد زوج كلمات طلقني دغيا زربانة
فديك اللحظة وهو ينزل على ركبتو فعلا كان مقطع الوراق ديال بصح خخخ حط يديه على قلبو وبدا كعبر بلاما يتسوق للبشار
وليد:بالرب لي شاهد مكانت ديك الهضرة من قلبي اسكينة العافية شعلات فيا فاش شفتك مع غيري والفرانات تقطعو كنقسم ليك بالله عمر كانو عندي التناوي من جيهتك ديما شوفتي فيك صافية غير الشيطان وصافي سمحيليا سمحيليااا بزااااف
كان كعبر من قلبو واخا كزرع شي كلمات كجيبو لها الضحكة لكن كلشي كان باين غير من عينيه لي بقات مركزة فيهم فاقت من سهوتها وهي تتسمع كلامو وبدات تتشوف فجنابها كاين لي دايز وبدا جاري معاهم خرجات فيه عينيها ونطقات:نوض براكة من الشوهة
وليد:ديبلوكيني وقولي ليا مسامحاك عاد نوقف
سكينة:نوووووض الناس تتفرجو فيناااا اوليد كاين لي كعرف خويا
وليد جلس ليها فالارض:لي نسميه راجل يقصدو منايضش تا يرتاح هذا
حط يديه على قلبو وهي تتشوف فيه باغية تنذب جلس ليها فالأرض بحال شي طلابة والناس تتفرجو بغات تزيد ولكن تاهي قليبها مطاوعهاش تاهي غارقة جبدات تيليفونها وهي تتنتر ديبلوكاتو ووراتو التيليفون
سكينة:هانت يلاه نوض العادي والبادي تتفرج فينا
وليد:نسمع المسامحة نوض
فديك اللحظة وهي تتشوف بلعات ريقها او بالضبط الغصة لي حسات بيها فحلقها صح ديبلوكاتو ولكن واش سامحاتو مزال معرفاتش عينيها غرغرو وهي تتشوف فيه ونطقات بصوت باكي:واخا تتقول مقاصدش اوليد ولكن هضرتك ضراتني قاصتني انا وقاصت واليديا
دموعها بداو كنزلو ݣاع ديك القصوحية لي كانت دايرة تتبين على انها حساسة هاهي دابا فاس تواجهات معاه مصبراتش وخوات لي فقلبها دغيا وقف نيشان جرها عندو عنقها ممسوش لبنادم تتبكي وتتشهق وراسها على صدرو نسات تاهي البشار ولكن داكشي لي كان فقلبها كبير وبزاف قصحات وجرجراتو حيت هازة فقلبها ودابا فاش جاتها لفرصة تفرݣعات عليه وبينات له بلي قصحها بزاف كان كارز عليها وكطبطب لها على ضهرها وكسكت فيها عمرو كان ناوي يوصلها هكا ولكن قلبو لي دارها ليه بعدها عليه وهو شاد وجها بين يديه دموعها كنزلو وصدرها تتهز نطق نيشان بلا فرانات وعينيه فعينيها
وليد:قلت هضرة خايبة وكنعتارف بيها الله يسمح لي ولكن مقلتهاش حيت واخد عليه نظرة خايبة وانما قلبي لي ݣيدني شعلات فيه العافية وانا كنشوف حاجتي مع غيري مقديتش نصبر سمحيليا راه القلب من جيهتك معالم بيه غير الله عمرك تسمعي مني لي يضرك اسكينة غير سمحيليا دابا
كان كعتارف نيشان وهو عينيه فعينيها مكانش باغيها تعرف هكذا ولكن الحل باش يصالحها هو يعتارف باش تعرف بلي قلبو لي دارها ليه ماشي نيتو الخايبة قلبها كضرب وهي تتسمع كلامو اعترافو لي حسات بيه دخل لقلبها بحال شي صاروخ معرفات متقول من غير انها تبقى تشوف فيه وقلبها كضرب وسط نظراتهم كان كتسنى جوابها صونا ليها تيليفونها فيقهم من سهوتهم ومن ديك اللحظة لي كانو عايشين مسحات عينيها بشوية بعد عليها وهو كشوف فيها وكتنهد وكطلب فخاطرو صافي تكون هادي هي اللخرى ويرجعو كيف كانو قطعات الطيلي كانت مسعودة خشاتو فجيب الطابلية وشافت فيه
سكينة:خاصني نمشي دابا نطلاقاو فالكلينيك
عرفها مغاديش تركب معاه دابا ولكن غير مين ديك نطلاقاو فالكلينيك باين قلبها رطاب شوية مبغاش يحكر عليها ضار معاها شاد ليها طاكسي خلصو وزادت خلاتو هو ركب فطوموبيلتو وتبعهم شوية تنفس مين شافها بعدا رطابت شوية يبقى عليها تترجع ليه كيف كانت
داز الوقت دوزو النهار عادي حتى طاح الظلام وتفرقو كل زاد لدارو مخليين زينة جالسة وتتفكر فرحانة وواحد الراحة كاسية قلبها فاش تحلات قضيتها حمدات الله فنفسها وفنفس الوقت سهات وهي تتخايل النهار لي غادي يوصل وتمشي فيه لداك المقام غيكون احسن مداز فحياتها واحسن تعويض من عند الخالق يهون داكشي لي دوزات على قبل هاد العوض تبسمات كثر فاش تحل لباب وشافتو كان فيديه بوكي ديال الورد حيت لي كان ذبل دارت يديها على خدها وهي تتشوف فيه هايمة حتى من الورد رد ليه البال وجابليها واحد جديد طبع قبلة على راسها بعدما مدو ليها وهي مبسمة غطير
يزيد جلس حداها يديه على شعرها:فراشة وسط الورود
ضحكات وهي مزينݣة وتتشم فداك الورد ريحتو فنة وكان أحمر ومن المعروف ان الورد الاحمر هو رمز الحب والعشق والهيام زاد عزز لحظات الأنس بيناتهم
فنفس الوقت فجيهة اخرى فدار زينة خارجة من الكوزينة بعدما غسلات الماعن جلسات حدا راجل ختها وهي شادة الطيلي مع شعلاتو طلع ليها ميساجو
وليد:I miss you🥺
تبسمات ديك توحشتك كانت تتعني بزاف الوقت لي دوزوه بعاد خلاتو ملهوف عليها كثر وكثر تفكرات قبيلة وهي تنهد قلبها كضرب بالجهد وعضات على شفايفها عتارف واخا كان اعتراف غير مباشر المهم عتارف
كان على القرص مع طلع ليه بلي شافت الميساج صونا ليها ناضت بشوية تسللات لبيت سدات عليها وجاوباتو خلاتو حاط يديه على قلبو اخيرااا بعد مشقة انفس وبهاديك القصوحية غتكون عزيزة وغالية فرضات وجودها دابا لي صعيب يتزعزع
دازو يومين بالضبط فالكلينيك
مبسمة ابتسامة عريضة وهما كحايدو ليها الدعامة على عنقها لي رسميا تشافى بقى فقط العلاج ديالها هي فالدار بالمساج والدوى لي غيخرج ليها الطبيب حاسة براحة الفرحة لا مثيل لها وهي لي كانت سبب رئيسي باش تعاون راسها جسمها ونفسيتها ولي هي فرحة الديار المقدسة مبقاش بزاف ولي زاد بعث البهجة فقلبها هو ان الطبيب كنقولها بقات ليه زوج دالسيمانات وتقدري تخرجي ورحلة العمرة بقات ليها 3ديال الاسابيع ما بقى والو وهاد الوقت لي كقرب كزيد يعطيها واحد الطاقة تنهدات وهي تتفكر كيف دخلات ودابا بقات ليها زوج ديال السيمانات وتخرج من مور شهرين ونص قريبة تلاتة دالشهور لي تبدلو فيها بزاااف دالحوايج غيرو حياتها وغيرو حتى من شخصيتها
الطبيب:غادي تبقى فقط يديك كيفما قلت لك راه غادي تمشي بيها واخا صراحة راه باقي الجسم ديالك خاصو شوية الراحة من مور ما تخرجي
زينة:بغيت نمشي ادكتور هادشي كجي مرة فالعمر وراك عارف كيف دخلت ودابا الحمدلله راك تتشوف ولي جات من عند الله مرحبا بيها
الطبيب حرك راسو بآه وهو تتنهد فعلا لي شافها كيف دخلات النهار الاول يقول هادي مغاديش تعيش ولكن القدرة الإلاهية متتعرفش المستحيل: ان شاءالله نهار تبغي تخرجي غادي نكتب ليك بزاف ديال الڤيتامينات يعاونوك فالسفر والله يتقبل
زينة بابتسامة عريضة:شكرا ليك بزااف ادكتور حتى نتوما كان عندكم دور كبير الله يجازيكم بلخير
الطبيب:كنديرو غير خدمتنا ابنتي وتاحنا شحال كنفرحو فاش كنشوفو خدمتنا ممشاتش غير هكاك
الفرملية:غتبقى بلاصتك صراحة
فديك اللحظة تعانقات هي والفرملية لي تصاحبات معاها طول هاد المدة كانت كتعاونها وتسخر ليها قابلاتها مزيان وهي الوحيدة لي عارفة بين لياليها هي ويزيد كملات الكونطرول ديالها ورجعوها الجناح ديالها لي كساتو الفرحة وهما كسمعو بلي بقات ليها غير زوج سيمانات وتخرج اخيرا كلشي كحمد الله حياتهم تقادات وغادية فتحسن وكلشي بفضل الخالق جاو عينيها فعينيه كان ديجا عارف غمزها وهو مبسم كانو كهضرو غير بلعينين شي لخلاها تبسم وهي مزنݣة وتتنهد عينيها عليه عندو دور كبير فشفائها لا هو لي عائلتها كان سند وسند لي نيت يعول عليه وتحط عليه الراس من ݣاع النواحي
فريدة:متسالوني غير شي زردة ديال القلب نفرحو فيها ونفرحو فيها الناس معانا
مسعودة:الله يكثر خيركم يكفي غير لي درتو واننا تجمعنا ثاني هادشي كافي ووافي الحمدلله
فجيهة اخرى بالضبط فالليسي مع خرجات بانليها تبسمات شوية وتمات غادية قاصداه مزال معفرة ومزال مكتركبش معاه واخا تصالحو مع وقفات عليه طلعات ونزلات فيه مكانش جايب الطوموبيل هاد المرة وانما موطور كبير
سكينة:تمجهدتي فهاد اللحظة امعلم
وليد مبسم:زينة بقات ليها زوج سيمانات وتخرج
سكينة هنا خرجات عينيها بعدم تصديق:بصح شكون قالها ليك؟؟؟
وليد:راني جاي عندك من الكلينيك قالها لينا الطبيب
سكينة وهي فرحانة غادي طير اخيرا ختها غادي ترجع لحياتها العادية اخيرا:الحمدلله الحمدلله ياربي
وليد:طلعي طلعي مبقاش عندك مع الطوموبيل هانا جبت ليك الجديد
ميقات فيه وضارت زعما باغية تشد طاكسي هنا وهو يجرها:تي الله يهديك وزوج سيمانات اسكينة
سكينة طلعات حاجب:مالني منستاهلش
وليد:تستاهلي نتبعك على الحفى العمر كامل غا طلعي
مقدراتش تحبس الضحكة عندو واحد التعناب عجيب مجايش معاه متعرف فين حافظوا بقات واقفة تتفكر وهو كبرݣم عليها ويتبت فيها لاحت عليه الصاك يشدو وطلعات من مور ما شحفاتو وزادو مكسيري مقاداه فرحة وهي شعرها طاير مرة مرة تفرد يديها فرحانة غطير بخروج ختها وهو فرحان بيها اخيرا رجعات فيه النفس لي شافهم فالزنقة يقول الله يستر عايشين الحياة ناسيين شكان واقع هي تشالي بشعرها وهو غادي مورك طاح الحك وصاب غطاه
زوج سيمانات كيفما كان متوقع دازت كيف رمشة عين نهار على نهار كتسنى بلهفة امتى تخرج ومع كل نهار كدوز تتحس بفرحتها تتزاد وهي تتقرب لزيارة داك المقام لي بسبابو جاها الشفاء لروحها ايام دازو كلها إجراءات ديال السفر نيت تكلف بيهم الحاج ويزيد لي فينما كانت خاصة شي ورقة فالملف ديالهم يقصد راضية تمشي تجيبها ليهم من الدار كانو تحضيرات خروجها وفنفس الوقت تحضيرات السفر حتى فريدة دايرة يديها معاهم وكل واحد معاون والايام تتجري وصح من قال الايام طايرة ودايزة سعداتك يا فاعل الخير
جا النهار الموعود النهار لي غادي تخرج فيه كلشي كجري من هنا ولهيه ام الغيث وفريدة عاونوها تلبس سكينة ويوسف فالمدرسة تنهدات وهي تتشوف فالجناح لي دوزات فيه بزاف دخلات ليه طافية ودابا الحمدلله خارجة واقفة على رجليها واخا باقية ضعيفة شوية ويديها مزال مݣبصة ولكن الحمدلله حسن بزاف من الاول دوزات ايام هنا بدلو حياتها بزاف غتخرج هاد المرة بصفحة جديدة مرتاحة مهازة حتى ذنب على كتافها وقفو معاها عائلتها لقات الحب والسند واهم حاجة سيدي ربي لي وقف جنبها قواها وخلاها توقف من جديد وعوضها على مداز
ودعات طبيبها تعنقات مع الفرملية وشكراتهم شكر حار توادعات حتى مع الناس لي كانو حداها وديما كانت كطلاقاهم وهي خارجة دعات معاهم بالشفاء وتمنات كل واحد كدوز من شي محنة ربي يفرجها عليه خرجو بشوية شاد فيها سعيد راجل راضية ومن جيهة لوخرا فريدة كان الشيفور ويزيد حتى هو ركبو معاه والطوموبيل دالشيفور تشارجاو فيهم فريدة وولادها كلهم غادين للدار ديال زينة عارضة عليهم مسعودة قبل ما تحرك الطوموبيل شافت آخر مرة فالكلينيك واخا الناس مين كخرجو كقولو لهلا يرجعنا ليه حتى هي قالت هكا ولكن لي وقع فيه غيبقى ديما راسخ من برائتها وتسامحها معاهم حتال لياليها مع يزيد فالجردة ديالو تحركو الطوموبيلات والطريق كاملة وعينيها عليه من المراية كهضرو غير بلعينين مبسمة مخلية ام الغيث تتنغز فيها زعما راني عايقة بيك خلاتها تاهي تتفرنس فخاطرها مدة ديال الطريق حتى وصلو للحومة ديالها بلعات ريقها شوية وهي تتمسح من دماغها الليلة الحادثة مع نزلات لي شافها يجي يسلم عليها داخلة مع الدرب شادة فراجل ختها ولي شافها يجي يسلم عليها على سلامتك اختي زينة من ݣاع الجوزيه ومسعودة لي شافتها من الجارات تعنقها حليمة كي طير الموت كطل من السرجم وعينيها عليها وعلى يزيد وتتحرك راسها بلا على ولدها المدلول وصلو للدار وطلعو وهي كضور عينيها وكتنهد توحشات دارهم توحشات حومتها حياتها كلشي ودابا هاهي الحمدالله رجعات كيف كانت واحسن وغادي تبدا من جديد الباب محلول ودغيا الدار عمرات الداخل كثر من الخارج لي سمع زينة خرجات يقصد مول الحانوت يهز قالب دالسكر ولا ايطرو دلحليب ويقصدهم هدا حال الاحياء الشعبية زيارة المريض الفرح القرح ديما دار الحدث عامرة خصوصا هي كانت الله يعمرها دار ورجعات من المو/ت بهاد المعنى كلشي كان كقول الله يوقف من جيهتها والحمدلله ربي كبير الكسيدة واخا كانت محنة ولكن من جيهة اخرى بدلات بزاف دالحوايج زوينين
عبد الكريم لي كان كهضر مع الدقايقية فالدروج كلبسو دايرين ليها مفاجئة يفرحوها شوية برجوعها للدار رجعات راضية هي وام الغيث للكوزينة كعمرو البرارد ديال آتاي باش يضايفو الناس ويحطو داكشي لي جابت فريدة واخا العراضة عندهم قامت بالواجب نضامات ليهم تاهي بغات تعاونهم مخليين مسعودة وزينة روعة وانيسة جالسين مع الجيران واخا زينة خاصها ترتاح لكن توحشات هاد اللمة ديال الحباب وجيرانها لي جاو شافوها مساكن فديك اللحظة هزات عينيها جيهة لباب فاش حسات بشي حد دخل وتقابل معاهم عند بالها شي حد من الجيران ولكن الوجه لي شافت كان مخالف تمام لشي حد كسكن حداها وجه مكانتش متوقعة تشوفو أبدا وآخر واحد يجي فبالها طلاقاه الزمن وقف بينهم وبين نظراتهم وهما فديك الثواني لي تقابلو فيها عينيهم بزوج
كشوفو فبعضهم وعينيهم تتقول بزاااف من مور صدمة اللقاء بدا كبان الشوق من خلال النظرات الشوق لي تزرع بسبب القيود لي تزرعو وسدو على كل واحد فجيهة مسعودة ردات لبال تاهي وصدمتها م ججهةن صدمة بنتها ممتيقاش السيدة بدات تتقرب عندهم بشوية بشوية وعينيهم على بعض وكأنهم تتفكرو السنين لي دازت لمة العائلة لي فتاقدوها حلاوة الجماعة بزاف ديال الحوايج زينة وقفات بشوية وعينيها على السيدة لي تقابلات معاها وفنفس الوقت الحسرة على عينيها مين شافتها مريضة واصلا فاش جاية وتتسول قالى لها يلاه خرجات من الكلينيك مكاملاش دقيقة حتى كانو تعانقو عناق حار
زينة بصوت باكي:توحشتك بزاااااف اسليمة
سليمة بنفس الدموع:عمرك حيدتي من بالي ابنت عمي الحمدلله يارب الحمدلله
تتحمد الله على انها طلاقاو وتجمعو ثاني مسعودة عينيها غرغرو والناس عرفو بلي شي وحدة من العائلة هادي زمان مطلاقاو راضية جاية بالزربة بعدما فريدة قالت لها شي بنت جات وكتبكي هي وزينة وكدا راضية غير شافتها شهقات
راضية:سليمة بنت عمي
مشات تتجري تاني طلاحو على بعضياتهم معنقين بثلاثة من ديما كانت عندهم علاقة زوينة والمشكل لي وقع فرتك الشمل حتى كتاب ثاني تجمع بعدات على زينة وهما كبكيو ورجعو تعانقو ثاني شوق الاحباب صعيب فديك اللحظة سكينة دخلات مفهمات والو لكن غير قربات ثاني ردة فعلها بحالهم ديك الفرحة كانت زايدة عليها انهم حياتهم بدات كتقاد بشوية بشوية وݣاع الهم لي كان مثقل عليهم من شحال تزاح والحمدلله تعانقات هي ومسعودة وسكينة حتى بردو قلبهم فداك الوحش لي كانو موحشين بعضهم وجلسو مجموعين
سليمة وهي تتمسح عينيها:غير سمعنا الخبار لي وقعات فالڤيلاج من مور م/وت حيسون(عبد اللطيف) من داك الوقت وحنا كنقلبو عليكم والحمدلله ربي يسر
مسعودة:درتي أجر كبير ابنيتي يوقف معاك فالدنيا قبل الآخرة
زينة:كيف داير عمي كيف بقى حتى هو من السكر
سليمة فديك اللحظة بلعات ريقها شوية نزلات راسها ونطقات بغصة:رحمه الله السيمانة لي فاتت كملات شهرين على مو/تو
زينة فديك اللحظة ضربات الحساب ما/ت بشهر من مور باها الله يرحمو ويرحمهم بزوج تفكرات فاش تاصلات بيه كيف عاملها هاهو واحد آخر كمشي بلا متواجه معاه هدا مكانتش باغية تلومو وإنما تسامح معاه حيت هدا تاهو دمها ولحمها عذرات بزاف وداكشي باش عاذراه حتى دموعها نزلو وهي تتشوف فبنت عمها العيالات فديك اللحظة بداو الله يرحمو الله يصبركم رجعات تعانقات زينة هي وبنت عمها وهما كبكيو ثاني
سليمة وهي كطبطب عليها:ما/ت وهو كان باغي يشوفكم ربي لي شاهد وهو لي وصاني نقلب عليكم صعيب علينا محضرتش لعمي تانا ولكن هذا مكتاب الله الحمدلله وصية با وفيت بيها ورجعت شفتكم هاديك هي الدنيا وما فيها
ام الغيث:الحمدلله أهم حاجة تكون غير القلوب صافية وهاهو ربي حنين ورحيم لقى القلوب
مسعودة تنهدات:ونعم بالله
فديك اللحظة راضية ناضت تتمسح فعينيها خرجات لقات عبد الكريم كرصي مع الدقايقية علماتو بلي يلاه عرفو بم/وت عمهم مكاين لاش الدقايقية مجاتش وحشومة ضبرو عليهم وسيفطوهم بحالهم نزلات ام الغيث حلات دارها للرجال طلع يزيد وباه ووليد عمهم وشي رجال من الحومة ضايفوهم وكلشي مشارك فهاد الفرحة الزوينة واحد من الجيران تشافى ورجع سالم
سليمة:البركة فراسك اخالتي الله يبدل محبتو بالصبر
فريدة تنهدات:مامشى معاك باس ابنيتي وراها براكة فراسك من جيهة الوليد ديالك كلنا غاديين الله يرزقنا غا حسن الخاتمة
كلشي:اللهم آمين
بقاو جالسين مجموعين لي دايز يدخل يبارك لزينة سلامتها من بعد ناضت ترتاح خلاتهم غير هما مجموعين والناس مزال كدخلو ويخرجو
فنفس الوقت فبلاصة اخرى جالسة بلاصة الجمهور لي خاوية ناس قلال لي جاي مع شي ولدو كتريني ولا شي واحد خدام من الاكاديميه وجالس تتشوف فيه عينيها عليه هو بالذات كيفاش كلعب وكيفاش كشد الكورة ويجري بيها مكتفهمش فهادشي مزيان لكن باين انه كعرف يلعب وكوايري تتنهد وهي تتخمم بغات اي حاجة تريحها لدرجة انه قتارح عليها تمشي تفرج فيه وهو كتريني فالاكاديمية وهي معندها مع كورة ومرفضاتش اي حاجة تفاجي عليها وتنسيها لي تتعيش منهار وقع لها داكشي وجاتهم خبار سعيدة وهو معاها مكفرقهاش نصحها بالرياضه وداكشي لي بدات كدير وحسات راسها بدات تتخف شوية فينما كان غادي يتريني يديها معاه وهاهو ليوم قتارح عليها حاجة مغايرة ومرفضاتش ولا عزيز عندها بزاف حيت لي كوقف معاك فالشدة عمرك تنساه كنصحها ويهضر معاها واخا صغر منها بعام لكم تتحس بيه هو لي كبر منها كلامو خاتر وعقلو كبير صفقات فاش سالاو وتبسمات فاش تما جاي قاصدها مدات ليه قرعة الما وهو مبسم ليها قبل ما يشرب خاطبها
يوسف:جاك الملل واقلة
رؤية:لا لا بلعكس عجبني الحال الخضورية ديال التيران كتنفس القلب
يوسف:اي وقت تكوني مقارياش نجيو بزوج
حركات راسها بآه ونطقات بطنز ناوية تلطف الجو:عنداك تولي فالمنتخب ان شاءالله وتنسانا
يوسف:معمرني نسى لي شاركني فبدايتي
ومع كمل كلامو غمزها وهو كهز صاكو خلاها وقفات تاهي مبتاسمة فهمات كلامو انه واخا يوصل فينما وصل عمرو ينسى لي كان معاه فنقطة النهاية ودابا هما ولاو اصدقاء والصداقة راه مقادة مع العمر زادو خرجو بزوج غاديين غير على رجليهم وكهضرو ويتناقشو محاسينش بالوقت لي جامعهم بزوج
داز الوقت وبدات تتخوا الدنيا وبقاو غير الاقرباء فقط كانو حاطين اتاي وضايرين بالصينية كاملين
وهي وسط منهم يلاه فايقة من النعاس شعرها مشنتف شوية وهما مقابل معاها كشوف فيها
الحاج اب يزيد:صلة الرحيم تتشفع لبزاف ديال الحوايج فالآخرة والواحد كيفما كان الحال مينساش دمو والحمدلله ربي فرجها من عندو
زينة كانت تتسمع لكلامهم لي كضور غير على هادشي والحاجة الزوينة لي دارت بنت عمهم انها قلبات عليهم وعاود حيات رابطة الدم بينهم
الحاج اب يزيد فديك اللحظة لمح لفريدة لي ضارت نيشان عند مسعودة ونطقات
فريدة:ختي مسعودة كيفما عارفين بقات زوج سيمانات ان شاءالله ونزورو المقام الشريف داكشي باش ان شاءالله مكرهناكمش هاد المدة كاملة دوزوها معانا فالدار وان شاءالله مين نمشيو الدراري يبقاو مع بعضياتهم
الحاج:تاحنا بغينا نتجمعو بيكم ونرجعو ايام زمان ونمشيو لداك المقام وحنا مجموعين راه حنا دابا قريب ونوليو عائلة ان شاءالله
زينة غير سمعات قريب نوليو عائلة نيشان عينيها مشاو ليزيد لي كان كشوف فيها وكأنه تاهو من مور كلمة باه كان كتسناها تهز فيه الراس مسعودة وولادها بداو كشوفو فبعضياتهم هادشي كثير عليهم فصراحة مخلاو ليهم ميقولو فريدة زادت أكدات انهم باغين يتجمعو ويزيدو يعززو الصلح لي بينهم وينساو لي فات أكثر وفنفس الوقت هاهي تتأكد على انهم غيوليو عائلة فالقريب وكلشي فهم المضمون من ديك الجملة
مسعودة بابتسامة:وشغادي نقوليكم مخليتو لي منقول صراحة
الحاج:ما عندك متقولي الآلة مسعودة مبقى فرق بيناتنا نتوما ديالنا دابا والله يجعل لي جاي احسن من لي فات
كلشي:اللهم آمين ياربييي
روعة فديك اللحظة نغزات زينة بفرحة زعما غادي يكونو مجموعين وكدا وفنفس البلاصة سكينة كذلك تتخمم وتفكر فديك غيكونو مجموعين وغتسكن فالڤيلا تاهي واهم غتكون قريبة لواحد الخليقة لي مع هزات فيه راسها وهو يغمزها زعما غنقربو لمحها لها غير بعينيه خلاها شداتها الضحكة فديك اللحظة خرجات فيه عينيها شوية زعما حشم ورجعات نزلات راسها وهي مبسمة وتتفكر اتكون قريبة ليه وفدار وحدة شنو مخبية ليهم ليام وشنو مزال جاااي
مسعودة وهي موجهة كلامها لوليد وأنيسة وروعة:غير هو الله يرضي عليكم الا مشينا ردو ليهم لبال يحفضو مزياااان مابقى والو لامتحان
وليد فمو:كوني هانيا امي مسعودة كاين غالدار والكتوبة
فريدة:ملقيتي شكون توصي امسعودة هداك براسو خاص لي يݣيدو
هنا بداو كضحكو كاملين كان جو زوين بزااف جامع لمة الاحباب من مور شوق طويل القلوب لي صفات ورتاح والهم لي تزاح وكان ثقيل
داز الوقت وظلام الحال وجا الوقت فين فريدة وولادها يمشيو بحالهم واخا عيات فيهم مسعودة وام الغيث يباتو لكن كان ضروري يمشيو عندهم ما يوجدو للزيارة لي غيمشيو وزيد تحضيرات رمضان لي ما بقى ليه والو مشار وخلاوهم هما حتى يلحقو عليهم مبغاوش يخليو سليمة لي غتجلس معاهم يومين وترجع لمدينتها واخا عيات فيها فريدة تاهي تجي معاهم لكن كان عندها عذر انها مخلية ختها بوحدها حيت اصلا الام ديالهم مي/تة من شحال هذا ودابا تبعها الاب بقاو ليهم غير زينة وعائلتها وشي خالات قلال
يزيد:الطيليفون ديالك خدام؟
زينة حركات راسها شوية بآه:اه راه غادي نشعلو
يزيد مأنسيسطي عليها:الا كان خاصك واحد نجيبو لك
زينة حركات راسها بلا:لا لا والله حتى خدام انا دابا غنديرو يتشارجى ونشعلو
يزيد:غير غنحس بيك دخلتي غنصوني ليك صافي
حركات راسها بآه وهنا تبسم ليها وسيفط ليها بوسة فالهوى وهو كودعها ونازل فالدروج عينيهم على بعض دارت ليه باي باي بيديها وبقاو عينيهم على بعض حتى خرج كان اخر واحد يخرج باش يهضر معاها شريك فالدروج بقات واقفة بلاصتها مبتاسمة وهي كتنهد وتتفكر
ام الغيث:قريب نوليو عائلة ان شاءالله
زينة فديك اللحظة ضارت لقات ام الغيث مبسمة وزادت غمزاتها شي لخلاها تدخل وهي كضحك ومزنݣة حشمانة دخلات لبيت ونيشان قلبات على الطيلي لي كان شحال وهو كتجلوق من مور ما طفاتو آخر مرة كان هو نيت لي جايبو لها من ايام الخوالي والڤيلاج دارتو يتشارجى ومشات تكات فوق الناموسية بدات تتشم فالمخدة وكأنها كتشم ريحة باها تنهدات وتمتمات فخاطرها
زينة:الله يرحمك الغالي
كانت بغاتو يكون ويعيش معاهم هاد حلاوة الايام الزوينة لي كعيشو والفرج لي جا والحمدلله
حزنات على عمها تاهو ولكن كيف قالت سليمة انه آخر ايامو كان بالو معاهم ووصاها تقلب عليهم وطلب منهم السماحة فبلاصتو تنهدات وهي متكية على جنبها من طبعها اصلا مكتهزش بقلبها عذرات ناس آذاوها حيت هي براسها ماشي انسانة مثالية تاهي عندها ذنوب وأخطاء يعني متقدر تحاسب حد مدازش بزاف ديال الوقت حتى ناضت بشوية مزال جسمها تتحس بيه ضعيف ومزال خاصها الراحة هزات الطيلي مع شعلاتو نيشان بقات بزاف دليبزابيل من عندو ايام المشكل مع الحمار دمنصور دخلات للمحادثة بيناتهم وهي تبلع ريقها من داك الميساج لي طويل كاتباه له كدعي فيه مسحات كلشي ودخلات بغات تسيفط له ميساج جاتها فشكل حتى ضحكات فنفسها كان فينما يصوني ليها ايام الشركة تخلع اما دابا غير ولا سند وسند زوين إلا خافت كطلقاه هو يمحي خوفها بكلمة انا معاك تنهدات وسيفطات ليه ميساج
تقول كان على القرص وغير كتسناها داك الساعة صونا ليها بلعات ريقها شوية هو صح تصالحو من شحال ولكن عمرها دوات معاه مكالمة بعلاقتهم دابا شحال هدا كانت غير كتجاوب كلوح لها زوج كلمات ويقطع ركبات ليها فوبيا فوقما يصوني الطيلي بسميتو ولكن كلشي تحيد بالوقفة لي وقف معاها جاوباتو ونيشان دارت الطيلي فوذنيها صوتو حسات بيه ختارق قلبها بديك البحة لي عندو تكات بشوية فوق الناموسية وهي تتهضر معاه تتسمع كلامو لي كقول ليها وتتحس بقلبها كضرب بالجهد غتفرفر الحب شحال زويييييين
اما فلبيت لاخر كانت جالسة تتجمع كتوبتها وجدات حوايجها لي غادي تلبس غدا شدات الطيلي ونضامات ليهم فالصالة كانت ام الغيث ومسعودة راضية وسليمة مجمعين مع شعلات الطيلي وهو يطلع ليها لميساج ديالو لي خلاها حبسات الضحكة بزز وتتقرا شكاتب ليها
وليد:وجدي راسك مكاين غا الحكام ثم الحكام😈
عضات على شفايفها وهي مبسمة وتتفكر كيفاش الايام لي جايين غادي يكونو وكيفاش اتكون معاه فدار وحدة واخا ماشي بوحدهم لكن فشكل داك القرب معرفاتش كيف اتصرف فيه غير بمجرذ التفكير تتحس بقلبها كضرب بالجهد رجعات دخلات للمحادثة بيناتهم مشات جيهة التصاور فين كان مسيفط لها تصاور الديفيلي ضور ضور وتمشي تشوفهم كان هو لي مصورها وصورها زوييين كان الحلم ديالها مجسد على شكل صورة تنهدات عمرها تقدر تنسى اول خطوة نحو الحلم شي حاجة لي بزاف وهي غارقة وسط افكارها صونا ليها تسللات بشوية ومشات دخلات لكوزينة وجاوباتو
دازت هاد الليلة وجا نهار جديد كانو خارجين من البنك بزوج بعدما حلات كونط باش يدوزو لها فلوس التصاميم ديالها لي تحطو فالسطور وغادي يبداو يتباعو ركبات ومع ديمارا يزيد وهي تنطق
سكينة:مزال لحد الآن ممتيقاش خاص لي يقرصني
يزيد بابتسامة عينيه على الطريق:غير تيقي حيت جاي بزاف ان شاءالله
سكينة:الحمدلله ياربي الحمدلله
يزيد:غنمشيو نطلاقاو بواحد الشخص من بعد نوصلك للدار
سكينة حركات راسها بآه من بعد مدة ديال الطريق وقفو قدام الڤيلا معرفاتش ديالمن ولا اصلا عندمن غاديين ولكن مسولاتش تحل لباب ودخلو تتشوف فالجردة قداش لابسين من ديما الڤيلات كتشوفهم فالافلام عجباتها بزاف خصوصا الجردة لي كانت كلها ورد ولابسين صافيي نزلو من الطوموبيل وزاد هي وياه بلاما تسولو مع وقفو قدام الباب قرات السمية عرفات بلي دارهم تحل لباب كانت لخدامة تبسمات ليها سكينة ودخلو بزوج بيهم وهي كضور فعينيها وديك واو قالتها فداخلها فديك اللحظة نازلة روعة تتجري طلاحت عليها عنقاتها
روعة:يختي شكون جااااا عندنا مرحباااا بييييك
سكينة مبادلاها العناق:ربي خليييك احبيبتي
روعة بعدات عليها:علاش مجبتوش زينة؟
يزيد:هزيتها من المدرسة ماشي من الدار فين هو الوليد؟
روعة:مع عمي فالمحكمة اجي معايا لبيتي
جرات سكينة معاها طالعين وهي بالتخبية كضور فعينيها هادو ساكنين هنا ولبارح ضلو معاهم فدارهم لي فيها ميترو ودربهم لي مكخواش من المطايفات التواضع صفة لي زوينة بزاف دخلات مع روعة لبيتها فرحانة وهي غير تتشوف الشومبغ قداش الناس عايشين الله يزيدهم وقريب غتجي تاهي تجلس معاهم
روعة:ناري شحال فرحانة حيت غادي تجيو عندنا والله غنقصرووو مزيان وغنتوانسو ومنخليو حتى حاجة منديروهاش
سكينة:ان شاءالله تانا فرحانة والله احم مكاينش وليد؟
روعة غمزاتها:ممممم وانا كنقول غادي تونسني انا ساعة السيدة عقلها مع ناس اخرين
سكينة:لا لا والله ما هكا غير سولت وصافي ههه
بقاو كضحكو بزوجات وهما جالسين مجمعين حتى دخلات فريدة رحبات بيها بحرارة وبقاو جالسين مجمعين من بعد جراتها معاها فريدة لبيتها عجبها الحال حسات براسها ماشي برانية وهما كعاملوها هكا
داخلة وتتهضر مع فريدة لبيتها وهما وسط لبيت قصدات واحد لباب حلاتو وجرات معاها سكينة لي مستغربة لكن مع دخلات حلات عينيها بدهشة كان مكتب كولو مجهز بما يخص الموضة والازياء مجسمات على شكل عارضة ديال القياس محطوطين تصاور ديال التصاميم مرسومين باليد معمرين الحيوط كاملين بقات غير تتشوف بلاكار كبير فالحيط كولو الوان بالتدرييج بݣاع لي يطيحو ليها على البال عاد خلي البيرو لي كان كبير كولو ادوات ديال التصميم الالوان كلشي كانو بجودة عالية كان فعلا مكان ملهم للحلم ديالها مجهز بكلشي كخص داك المجال معرفات متقول ولا كيفاش لكن فلحظة ضربات ليها فدماغها وهي تلفت عندها بصدمة فريدة كانت مبسمة تتشوف فيها مخلياها حتى سقات عويناتها وستوعبات هنا سكينة نطقات بصدمة:المصممة السرية ياك
فريدة فديك اللحظة قربات عندها شدات فيها من كتافها ونطقات:انا الماضي والحاضر ديال شركة الوزاني ونت المستقبل
كلام دخل فقلب سكينة بحال شعلة الأمل وهي تتشوف الطريق نحو حلمها تسرحات وتتشوف راسها تعطى ليها الشرف انه تعرف السر ديال شركة كبيرة لي عارفينو غير مالين شي فقط عاد انها فاص افاص قدام مصممة كبيرة ووازنة والخفاء ديالها هو التميز دارت يديها على فمها مقادراش تيق مع غرغرو عينيها جراتها تتعنق فيها بالجهد بهادشي لي كدير تتحس قلبها كبرد وكرتاح كثر وكثر على لي فات سكينة وهي معنقاها وممتيقاش وصورة وحدة بين عينيها هي صورة ختها زينة لي كن مكانتش هي عمرها كانت غتوصل هنا بعدات عليها فريدة وهي تتمسح ليها شعرها
فريدة:سمعيني خاصك تيقي لانك نت موهبة وموهبة كبيرة وخاصها تصقل من دابا مكاينش وقت نضيعوه زيدي
مع نطقات كلامها جراتها معاها البيرو وجلسو بزوجات وهي تتوريها كلشي وسكينة حالة عينيها ووذنيها وتتسمع باهتمام وزادت فرحاتها كثر بأنها نهار تمشي للعمرة تبقى تدخل وقتما بغات ترسم تما خلاتها تتحس وكأنها فحلم قدام مصممة كبيرة وسط مكتب كولو مجهز شحال وهي تتحلم بيه بالإضافة انها قدام الطبلة لي كتصمم عليها اشهر التصاميم فالمغرب ولي كتهافتو عليها غير طبقة لاكريم دلاكلاص داكشي لي شافت فالديفيلي علام آخر
فنفس الوقت فبلاصة اخرى بالضبط فدار زينة من مور ما رجعو من المقبرة بتلاتة مشاو زارو المرحوم التيباري كانت جالسة هي ومسعودة وسليمة راضية مشات مع راجلها لطنجة لكن غادي ترجع السيمانة الجاية سليمة فديك اللحظة حلات صاكها وجبدات منو شيك وتلفتات عند زينة وحطاتو قدامها
سليمة:باش فاش كان كموت طلب مني نبيع الدار لي خدا فأصيلة ونعطيكم حقكم داكشي لي درت قبلو عليه
زينة:انا مبغيت والو اسليمة يكفي اننا عاود تجمعنا الجامعة مع الدم والاحباب ماليها لا ثمن ولا قيمة
سليمة:عارفة عارفة لي كاين اختي ولكن عفاك غير باش باش يرتاح فقبرو عفاااااك
كانت كترجاها تاخد حقها وكل مرة كانت تتبين شحال قانعة مكان بيها لا فلوس ولا حق قدما كان بيها انها تجمع مع دمها لي تفرق هذا شحال تنهدات بعدما شافت فمسعودة لي لمحات ليها بعينيها زعما خودي وداكشي لي كان تنهدات وخدات الشيك شي لخلا سليمة طلاح عليها ورجعو تعااانقو عناق حااار عمها مات ميسور عكس باها واخا داك الوقت مسول عليهم حد ولكن كلشي كان مكتاب دابا الحمدلله معرفوش الرزق مين طاح عليهم
داز الوقت وظلام الحال كانت هي واختها فلبيت وتتعاود ليها كلشي وزينة تتسمع ومبسمة صح مدارت داكشي لي بغات وموصلاتش ليه لكن غير مين تتشوف خوتها فرحانين هاديك هي الدنيا وما فيها
زينة:الحمدلله دابا خاصك نت تجتاهدي ݣاع داكشي لي كنت باغيين ليك هاهو بدا كترسم بشوية بشوية
سكينة بفرحة:الحمدلله ياربي احم حقا قاليك الالة يزيد عيطي ليييه
زينة:عاد قايلاها عطيك الويل عيط لي قبيلة سيري جيبي ليا دوايا
سكينة:مزال عاقلة على ايام الڤيلاج تخليني ملاهية بالبݣر وتجلسو نتوما تحابو غير عيطي ليه دابا قدامي ݣعما تحتاجي راني كبرت مكاين لاش تحشمي
فديك اللحظة مع كملات كلامها ناضت طايرة حيت عارفة راسها غتعطيها شي قرصة خلاتها تتضحك وراها وفكراتها فاش كان كجي عندها شحال هذا وكتكون هي كانت صغيرة كتصدرها تدي البݣر وتبقى هي وياه فديك اللحظة نيت صونا ليها التيليفون عرفاتو كان هو دغيا جاوباتو وهي عاضة على شفايفها:آلو
يزيد نيشان معندوش مع التلاوي:توحشتك
ضحكات وهي دايرة يديها على فمها مزنݣة بحالا راه حداها قلبها غيفرفر بلعات ريقها شوية ونطقات بصوتها الرقيق مخلياه مفرفر حتى هو كثر منها زينة:حتى أنا
برا فالكوزينة كانت سليمة وسكينة واقفين على العشى وكهضرو جالسين كقطعو الخضرة ومجمعين حتى سمعات شي ميساج وصل فتيليفونها مع طلات عليه وهي تتقشر لبطاطا ضحكات فنفسها وهي ممتيقاش شكقول هاد الحمق
وليد:كيفاش بلانك نت متسناينيش نجي نشوفك نتخايلك ضارب بيك الكحل والبيض ونت فدارنا
حركات راسها بلا وهي كضحك فنفسها علام الله مين غتجلس معاها اشغيبدا يطلق عليها موحال واش غتحفض للباك الا طلاقات هي وهدا خلاتها فريدة ملقيتي شكون توصي هو براسو خاصو عقل
دازت هاد الليلة وجا نهار جدييد واقفين قدام الدار بعناق حاو كودعو فيه سليمة لي كضرب لهم موعد انهم غير يرجعو من العمرة غادي تجي تشوفهم هي وختها دابا جات بوحدها عبر تتقلب حيت مكانتش متيقنة من العنوان
زينة:تهلاي فراسك وان شاءالله تاحنا غادي نجيو عندكم
سليمة:الحمدلله الصلة رجعات ثاني متخايليش راني غادية وقلبي مرتااااح وفيت وصية با
رجعو تعانقو وهما كودعوها فديك اللحظة جاي عبد الكريم ويوسف بعدما طلبوه انه يوصلها للمحطة توادعات معاهم واحد واحد عبد الكريم هز ليها الصاك وهي غادية وتتوادع معاهم وكضربو موعد انهم غادي يطلاقاو عما قريب بإذن الله كيفما طلاقاو دابا ورجعات المياه لمجاريها
سليمة خدات من عندو الكاصك:شكرا اخويا الله يرحم ليك الوالدين
عبد الكريم عينيه عليها وهو تتسناها تلبس الكاصك بانت ليه وحلات فيه هنا بشوية بدا كقادو ليها حتى هزات فيه عينيها وطلاقاو نظراتهم لكن سرعان ما نزلات عينيها كانو عندها نفس عينين زينة غير زينة عينيها ناصعين أكثر ركبو بزوج وزادو غاديين للمحطة ديال الكيران الطريق كاملة مرة مرة تجي عينيه فعينيها من المراية حتى وصلو نزل معاها وقطع ليها وتسنى معاها الكار ديالها لي غادي لمكناس حتى جا مع بغات تركب ضارت عندو
سليمة:شكرا بزااااف الله يرحم ليك الوالدين
عبد الكريم مسح على شعرو بلع ريقو ونطق هو متردد:مكاين باس احم تقدري تخلي ليا نمرتك زعما لكنتي جاية المرة الجاية مع توصلي صوني ليا نجيبك
كانت داخلة مفروشة ولكن واخا هكاك بطريقة لبقة ومحتارمة خلاتها فهماتو مزيان غير فهاد الساعة لي طلاقاتو دار مواقف رجولية هو لي قطع ليها وسط الزحام وتسنى معاها حتى جا الكار واخا ممفروضش عليه وزيد كيف كقولو سماهم على وجوههم نقي مؤدب ضريف رجولة مد ليها الطيلي ديالو قيداتها ليه من بعد طلعات قبل متدخل تلفتات وهي مبسمة زعما راني عقت بيك خلاتو تاهو ضحك وكمسح على شعرو وكضحك غير بوحدو
نهار جديد كانو بالضبط قدام الڤيلا كلهم زينة تتحاول تنسى بزز النهار لي دخلات فيه لأول مرة كيف كان داز دابا وقت جديد الامور تصلحات مسعودة سمات الله ودخلو كاملين الشيفور لي تكلف ومشى جابهم مع هما داخلين وكشوفو غير الجردة تعطيهم الخبار عرفو بلي ربي لاقاهم بناس ديال الجود و الكرم والمعنى الحقيقي ديال الله يلاقينا مع ماحسن منا وصافي تحل لباب وخرجات فريدة بابتسامة عريضة تترحب بيهم ترحيب حار واستقبال بالتمر والحليب وترحيبها كان زايد نغزة اكثر مع زينة حيت بزوجهم عارفين الزيارة الاولى مكانتش مزيان دخلو بالترحيب والكبرانية انيسة وروعة نيشان حدا زينة جالسين ممبعدينش منها كحاولو تاهما يمسحو لي فات ونفس الحاجة طبعا هي زيارتها الاولى زينة جالسة مبسمة وتتشوف المعنى الحقيقي ديال سبحان مبدل الاحوال لبارح دخلات حانية الراس خدامة ومقهورة واليوم العكس تنهدات وتلفتات بابتسامة تتهضر مع روعة وفريدة ترحب وتعاود مسعودة كضور فعينيها وتشوف فالدار تبارك الله اشمنك يا زليج واشمنك يا آثاث الخير باين على مالييه بعدا الا مشات تبقى مهنية على ولادهم غيجلسو فالخير والحمير داز الوقت جا وليد ويزيد الحاج وخوه لي طلبات منو فريدة والحاج انه يخلي رؤية تجلس عندهم تبقى مع الدراري ومنها نيت ترتاح وتفوج شوية جالسين من مور ما تعشاو كهضرو ومجمعين هضرتهم على العمرة وشنو خاص يديرو فهاد ليامات لي بقاو زينة تتسمع وتتحس بقلبها مفاجي ما بقى والو وبقى عليها غير امتى تسد عينيها تحلهم تفيق تلقى راسها غادية لكن مابقى والو اقل من زوج سيمانات فاقت من سهوتها بعدما جابت ليها الخدامة لما تشرب الدوا ديالها حلات الصاشي لي دايراه فيها وبدات تتجبد فديك اللحظة هو كان شاد الطيلي مع حطو هز فيها راسو شافها مستفة الدوا وهو ينوض حداها هز واحد ومدو ليها
يزيد:دابا عندك هذا
زينة شافت فالدوا وهي ضرب ليها فراسها: اويلي كنت غنشرب لاخر
يزيد:وغير زݣي لتولي فشي فضيحة
ضحكات وهزات الدوا شرباتو وهو كشوف فيها وكتنهد ليوم فدار واليديه وغدا فدارو بإذن الله ضور عينيه وهو كشوف كلشي كهضر شي ملاهي مع شي وتنهد براحة حمدالله كلشي تقاد بفضل الخالق وهم كبير تزاح عليهم كاملين جاو عينيه فعينين مو لي بدورها تبسمات ليه وكأنها تاني تتفكر فنفس الحاجة
روعة بخمس:شحال تحطي يزيد مغاديش يبقى يمشي لدارو حتى لنهار السفر
انيسة:راه اصلا جاب باليزتو وستف حوايجو حبقلبو هنا ويمشي لدارو بوحدو بين الحيوط
ضحكو بزوجات ورجعو كهضرو مجمعين مع وليد وسكينة ورؤية ويوسف فجيهة لوخرا كانت مسعودة مجمعة مع الحاج وفريدة ولوسها وحتى راجل أنيسة ووسطهم كانو جالسين بزوج بيهم جمعات الدوا ومع شافت فيه لقاتو معسل فيها عينيه ونطق نيشان بهمس
يزيد:كنتسنى على العافية النهار لي نشوفك فيه فداري
تبسمات بخجل ومنزلة راسها مكخلي لها متقوليه وزيد قدام دارهم حشى ليها الهضرة بلي ليوم دار واليديه وغدا دارو شي لخلا قلبها يبدا يضرب بالجهد وهو كشوف فيها مبسم وسط جو عائلي سطابل وزوين
دازو شي أيام طايرين كلها تحضيرات فالدار على ود العمرة والسفر ديالهم كانو ايام روتينية وجا النهار المقصود بالضبط فمطار محمد الخامس
زينة:تهلاو فراسكم وخليو طيليفوناتكم مشعولين فوقما نعيط جاوبوني
سكينة معنقة ختها بحرارة:كوني هانيا بخوفيطي فهاد الايام ورتاحي
يوسف:الله يديكم ويجيبكم على خير الخوادرية
بعدات عليهم وهي تتوصي فيهم وضارت تتوصي حتى فوليد بعدما مسعودة طيبات انيسة بالوصاية تعانقات هي واختها راضية عناق حار وكذلك مسعودة مع ام الغيث وعبد الكريم لي تاهو حضر باش يودعهم وكان شي كعنق شي كتوادعو وهما غاديين لوحدة من أجمل الرحلات لي ممكن يتمناها اي مسلم لي مسافرين كوصيو لي باقيين يردو البال ولي باقيين كطمنوهم بلي كلشي غيكون هو هداك فغيابهم وكتمناو ليه السلامة فالمشيان والمجيان
عبد الكريم فديك اللحظة مع تلفت كان كسلم على مسعودة تساطح فيزيد طلاقاو عينيهم ومن بعد مدة قصيرة عبد الكريم مد يديه ليزيد بغا يصافحو
عبد الكريم:تهلاو فراسكم الله يديكم على خير
يزيد نزل عينيه ليد عبد الكريم لي ممدودة ليه هنا بلاما يتردد قرب ليه وعنقو خلاه مصدوم او مندهش زينة نغزات مسعودة وهما كتبسمو وشي كشوف فشي عائلة يزيد مفاهمين والو لكن طريكة زينة لي عارفين عبد الكريم تبسم شوية وبادلو العناق ويزيد كطبطب عليه كان غير بداك العناق قالو بزاف عبد الكريم شافت كيف كبغي زينة داكشي باش تساخر اللور واصلا كان سابقو ويزيد ديك الجملة ديال ماشي رجولة تشوف فحاجة واحد آخر بينات ليه المعدن ديال عبد الكريم مزيان لاحو دوك الخلافات لي وقعو وراهم وكلشي دايز
عاوتاني رجعو سمعو بلي الطيارة المتجهة لسعودية غادي تقلع عما قريب وكان هداك هو الوقت فين خاصهم يمشيو تسالمو ثاني بالزربة وزادو وهما كودعهم فجو عائلي زوين وطاغية عليه اللمة والدفئ مع خرجو وكيفاش كبانو ليهم صافي رجعو تلفتو وهما كشوفو غير قدامهم وغاديين من غير زينة وامها كانو ديجا كمشيو وماشي اول مرة لكن زينة بالنسبة ليها هادشي استثنائي وغير الحلم لي حلمات بيه هاهي تتعيشو تتحس بواحد الصفاء وواحد الراحة فقلبها لا مثيل لها تلفتات شوية كان غادي حداها ضار شافها حتى هو وتبسم لها ابتسامة تتقول بزاف كان ديجا قاليها بلي من مور هاد السفر غادي يوقعو بزاف دالحوايج وفهماتو هي لاش كلمح مزيان بغاو هاد الرحلة تكون نقطة يصفيو فيها قلوبهم كثر يرتاحو وتكون هي البداية لي جاية باش ربي يسر فيه بزاف ديال الحوايج زوينين واولهم وأجملهم هي لي كتعيش دابا وسط عائلتها الثانية لي طول هاد المدة محساتش معاهم بلي راه برانية هزوهم فوق راسهم ولي دارو معاهم كبراني بزاف وحيت لقاوها حتى هي وعائلتها ناس ديال الاصل وربي لاقاهم وكيف كتقال الله يلاقينا غير مع ماحسن منها وصافي
كلشي شد بلاصتو فالطيارة لي بقاو ليها ثواني قليلة وغادي تقلع شدات فيها مسعودة وهنا تلفتات عندها شافو فبعضياتهم وغير بنظراتهم كانت رسالة هي اننا هاحنا الحمدلله كنعيشو العوض من بعد صبر هزات زينة يد مسعودة وطبعات قبلة عليها اكثر وحدين عاناو وهاهما كعيشو الفرج وربي كبير مكنسى حد اكثر عوض تمناوه يكون هو هذا رحلة لتطهير الروح والنفس لمقام شريف ومقدس تتخشع فيه الروح والقلب وتتكون فيه التوبة والهداية على أكمل وجه قلبها تهز وحسات بالطيارة فاش قلعات وتهزات على الارض احاسيس زوينة تتحس بيها وحاسة بدموعها فين محطوطين غينزلو فأي لحظة بهاد الفرحة والطمأنينة لي تتحس بيهم محساتش بلوقت محساتش بإمتى محساتش بيزيد لي مرة مرة تتلفت عندها يتبسم ليها حتى داتها عينيها
بشوية حسات على راسها وفتحات عويناتها ستوعبات مزيان ودماغها دغيا رجع لها شنو تتعيش تهزات بشوية تلفتات لمسعودة كانت ناعسة تاهي جات عندها لوطيس طلبات منها عصير كان حلقها ناشف مع مشات السيدة وهي تلفت نيشان طلات كان واحد المنظر خيالي وهي تتشوف السحاب وهما وسط السما غير شوية نزاح على الطيارة ووضاحت ليها الصورة لتحت وحققات مزيان قلبها تهز بواحد بالفرحة عظيمة بورشاتها اللحظة لي تمنات وتسنات وتحرقات بالشوق ليها وهي تتشوف داك المنظر رسميا دخلو للأراضي السعودية وهي على بعد خطوة من انها تحط رجليها فأطهر بقاع الأرض🕋🇸🇦
فديك اللحظة علنات الطائرة بأنهم قربو من الميقات وبالضبط الجحفة وهو احد المواقيت الخمسة المحددة فالاسلام لي وجب على المعتمرين القادمين من الشام و مصر والمغرب يحرمو منها ولأنهم على متن الطائرة غادي يكون الاحرام منها نيت وهادشي كعني على انهم كاملين خاصهم يكونو على استعداد لان الميقات نقطة الانطلاق الروحانية للحاج او المعتمر خاص المؤمن يدخل فنية انه غادي يؤدي مناسك الحج والعمرة وفهاد النقطة خاص يكون التجهيز يعني الاغتسال لباس الاحرام الرجال الازرار والرداء والنساء اللباس الشرعي دون قفازات ولا تبرج ومن بعدها نية اداء العمرة وداكشي لي كان غمضات عينيها وعقدات نية اداء هاد العمرة فقلبها بحالها بحال ݣاع الناس ومن مور النية بدات التلبية بصوت عالي كان منظر يقشعر له الابدان وهي تتشوف راسها وهاد الناس كاملين وهما فضيافة الرحمان النية فقلوبهم بزيارة أطهر بقاع الارض وكطلبو من الخالق يتقبل منهم وتكون مغفرة لأي ذنب وهما فضعف تام ساعيين لرحمتو كانت كتردد”لبيك اللهم لبيك لبيك لا شريك لك لبيك الحمد والنعمة لك والملك، لا شريك لك”
تتحس بالخشوع منغامس فقلبها وشي احاسيس عمرها حساتهم احساس الفرحة الضعف للخالق الطمأنينة والإمتتال لطاعتو وهي كتردد التلبية بنية قبول الخالق لعمرتها وحدة من السنن المؤكدة لي عززات شعور التواضع والعبودية تجاه الله عندها بواحد الطريقة لي ميمكنش توصفها كاين لي كمل فالتلبية بصوت عال وكاين لي كملها فنفسو وفقلبو ومنهم هي وطول الطريق من مور الاحرام من الميقات وهي كتردد فيها حتى وصلو لمكة وهنا جات نوبة طواف القدوم تتحس بقلبها كضرب بالجهد وواحد الرجفة سرات مع ذاتها مدة وحطات الطائرة رحالها فمطار الملك عبد العزيز بجدة نزلو وهي مزال تتؤدي التلبية فخاطرها وهادشي مستحب يبقى الواحد يلبي حتى يوصل باش يتعزز القرب من الله نيشان كلشي ركب قاصدين مكة المكرمة لي كتبعد على جدة ب80 كيلومتر عيانة ومهدودة ومع ذلك مبغاتش تسد عينيها وهي كتردد فنفسها دعاء دخول مكة بغات تشوف كلشي واي تفصيل مبغاتش تفلتو باش يتحفر فذاكرتها وعمرها تنسى زيارتها لبيت الله الحرام مكان الخشوع والطمأنينة وغفران الذنوب كان هو سباب شفائها وفصفاء قلبها ودابا غادية تشوفو مباشرة باش طلب المغفرة من الخالق وتشكرو على الفرج وعلى الصبر لي عطاها وكانت هادي هدية صبرها كلشي يهون فسبيل هاد اللحظات لي غادي تعيش من بعد تقريبا ساعة ونص وصلو تتحس بواحد الهيبة طاغية على المكان والاحاسيس غير مكتزادو على القلب اللسان كعجز على وصفها مخلية الوجدان فخضوع تام للخالق بنية التقرب منو فسبيل الغفران نيشان قصدو لوطيل لي كان فندق الصفوة البرج الاول باش يرتاحو شوية عاد يبداو المناسك اولها طواف القدوم دخلو للجناح هي ومسعودة وعينيها الريدو لي مغطي لبالكو قلبها كضرب حيت عارفة لوطيل كطل على الكعبة نيشان وغيكون احسن منظر ومع ذلك مبغاتش تحيدو بغات تشوفها اول مرة مباشرة فاش تنزل واخا الصبر قليل لكن ضروري من شوية الراحة من مور تعب السفر لكن فسبيل المغفرة والتقرب من الله كلشي يهون كيفما قالت تكات هي ومسعودة فوق الناموسية وهما كشوفو فبعضهم
مسعودة:الحمدلله على نعمة ديننا مقادراش نقول قلبي ومافيها الحمدلله لي صبر كنال
زينة هزات يد ميمتها وعينيهم على بعض ونطقات:ربي كبير ومضيعناش اميمتي
كانو عارفين مزيان شنو كقولو لبعضهم حيت هما لي هزو الدق لكن هاد اللحظة خلات بالنسبة لهم سقطات كلشي لحظة الانتصار فمعركة الكفاح لحظة الفرج لحظة الجزاء وكان هذا احسن جزاء رتاحو شوية من بعد رجعو خرجو طلاقاو بفريدة وهنا غاديين فنية يبداو المناسك
مع كل خطوة مقادراش توصف لي بقلبها حاسة برجليها مبقاوش هازينها شادة فمسعودة وفريدة لي كانت عارفة مين يخرجو ومين يدوزو حيت هي ماشي اول مرة تجي زينة لي رجليها مبقاوش هازينها ماشي بالخوف ولا الرعب وانما بفرحة هيبة داك المكان غاديين كقربو وعينيها مفيكسين فاتجاه مخارج من مخرج المسجد الحرام لي غادي يخرجهم ليها نيشان شادة فمسعودة لي تاهية نفس حالها وغادية ومع اول خطوة دخلوها كانت برجليها اليمنى على صحن المسجد الحرام ولي هي المنطقة الرخامية المحيطة بالكعبة رمشات عينيها ومع رجعات حلاتهم نيشان كانت مقابلة معاها واحد العظمة لا مثيل لها مكايناش فالتصاور وهي تتشوفها مباشرة قلبها طاح عليه واحد السكون خيالي وعينيها تفيكساو عليها نيشان وهي تتشوف راسها مباشرة قدام اعظم مسجد فالإسلام وقبلة المسلمين قلبها تهز ودارت يديها على فمها مقادراش تكتم دموعها وفدماغها كتعاود كلام بصوتها(آه هي آه راك قدامها)كانت متحمسة وفرحانة باش تجي ونهار جات بديك الهيبة ديال المكان مقادراش تيق دموعها كسيلو شلال سخان على خدودها وهي تتشوف فيها ومجموعة من الاحاسيس فقلبها غير مكتزادو والشهقة طلعات مع قلبها الإستسلام التبتل التَواضُع الخُضُوع السُكُون الإجْلال كلهم كانو مراضفات الخضوع لي طغى على جوارحها محساتش حتى حيدات يديها على فمها ونطقات بفرحة وفنفس الوقت بصوت باكي بعدما غمضات عينيها ودموعها كسيلو
زينة:الحمدلله على نعمة الإسلام
ونيشان هزات كفوفها بزوج وهي مقابلة معاها ونطقات دعاء كان معروف كجي على لسان أشرف الخلق
زينة:اللهم زد هذا البيت تشريفاً وتعظيماً وتكريماً وزد من شرفه وكرمه وعظمه ممن حجه أو اعتمره تشريفاً وتكريماً وتعظيماً وبراً
جميع تعابير التشريف والتكبير لهاد المقام نطقاتهم ومن تما نيشان دارو طواف القدوم حول الكعبة ولي هو تحية للمسجد الحرام ومن موراه نيشان صلاو زوج ركعات لي هما نيت ركعتا طواف القدوم كتصلاو من موراه ونيشان خلف مقام ابراهيم وهو المكان لي وقف فيه النبي ابراهيم عليه السلام اثناء بناء الكعبة الركعة الاولى يستحب تكون بسورة الفاتحة وسورة الكافرون والثانية بسورة الاخلاص
والمراد من تأدية الحاج او المعارك لهاد زوج ركعات هو شكر الخالق والطلب ليه فإكمال مناسك العمرة والحج والهدف منهم هو التعبد والتقرب
كانت كتصلي واحساس ديك الصلاة لا مثيل له كان تجربة روحانية عظيمة ولدات شعور اعمق بالخشوع وهي فحضرة بيت الله وعاد خلي فاش سجدات ميمكنش احساس جامع كل من السكينة
بالرهبة والعظمة والأجر العظيم وعاد خلي الترابط الاسلامي التاريخي وفكرة انها قدام قبلة المسلمين اي حاجة فايتة سامعاها على داك المقام جات فبالها وهي تتصلي قدامو بعدما كتاب ليها وكانت فرصة وأجمل فرصة فحياتها وعمرها تقدر تنساها هزات يديها للخالق كطلب منو يسمح ليها ويغفر ليها ويقبل منها وكتشكرو على هاد الهدية باش جازاها على صبرها وكتب ليها تشوف هاد المقام الشريف دموعها مكانتش قادرة تحبسهم لانها واخا توصف مغتوفيش واخا تهضر وتعبر وتشكر الخالق مغتقدرش توفي هو لي عارف ما فقلبها وعالم تلفتات عند مسعودة وتبسمو لبعضياتهم هادي بحد ذاتها حاجة اخرى انها تجمع هي وميمتها فهاد المكان الطاهر وعاد فريدة لي ضورات يديها على كتفها ربي لي كان اصلا مكتب لها تزور هاد المقام وهما كانو سبب طبعات قبلة على راسها ميمتها وضارت دارت نفس الشي مع فريدة وهي تترضى عليها الدنيا شحال زوينة واخا هكاك لبارح كانو فخصام واليوم مجموعين القلوب صافية وقدام المقام الطاهر ككفرو على لي فات وكطلبو من الخالق الشفاعة لحظات لا توصف ولا تعبر بلسان بل القلب بوحدو لي معلوم شنو فيه والله يرزق ديك اللحظة على كل مسلم من مور ركعتا طواف القدوم جات نوبة السعي بين الصفا والمروه ولي هو احد مناسك الحج والعمرة ومن العبادات المهمة فالأداء ديالهم بزوج
السعي لي كعني المشي او الجري بين جبلي الصفا والمروة لي كاينين فمكة المكرمة وهو عبادة هادفة للتقرب من الله سبحانه وتعالى وهو مستوحى من قصة السيدة هاجر فاش بحثات على الما لإبنها اسماعيل بين الجبلين والسعي رمز قوي بين للإيمان الصبر والاعتماد على الله والتوكل عليه
زينة لي بدات فيه هي ومسعودة وفريدة وهما فوسط منو كانت تتفكر ايام الابتدائي ولا القراية فاش كانو كعاودو ليهم على قصص الانبياء عليهم السلام ومنهم نيت قصة النبي ابراهيم عليه السلام لي خارجة منها قصة السيدة هاجر وتتشوف راسها هاهي كدير نفس داكشي لي كان كتعاود لها تتعيشو فالحقيقة شي لمخلي احساسها متقدرش توصفو بداو السعي من جبل الصفا بحيث وقفو نحو الكعبة وهما كقولو”أبدأ بما بدأ الله به” وبعد الوصل في لجبل المروة وقفو ثاني وعاودت رجعو للصفا وبقاو كعاودو هاد العملية حتى كملو سبعة الاشواط وكل شوط من الصفا للمروة كتعتابر شوط واحد وكذلك من المروة للصفا شوط آخر مع الاستغفار فنفسهم وكذلك الدعاء دعات مع كلشي خوتها بالنجاح باباها بالرحمة مع راسها ان ربي من مور هادشي يسر ليها حياتها وتعرف فين غتحط الرجل حيت غتبدا من جديد دابا وفنفس الوقت جا فبالها واحد الشخص ودعات معاه من قلبها واكيد تاهو غيكون كدعي معاها وهو كؤدي المناسك كيفما كان كدعي معاها فصلاتو وهي فعز المرض مغاديش ينساها دابا وهما فالمقام الشريف لأي دعاء فيه مستجاب ومقبول وهي فرحلة السعي زادت تخشعات أكثر لانها حسات بيها عليها السيدة هاجر كانت فرحلة البحث عن الماء والأمل وهي تاهي فحياتها كانت فرحلة البحث عن النور لي يخرجها من ظلمة الظلم والقمع من اجل أمل حريتها لي الحمدلله تفكات من أغلال الحقد لي كان موجه لها والفرج دار طريق لها وهاهي تتعيشو دابا وهي فالطوب دالايمان والعبودية نحو الخالق حالها من حال مسعودة لي تاهي كانت تتحمد الله لي منساهاش وخلاها تعيش اجمل ما يتمنى المرء على ارض الواقع ولي هو الغفران فبيت الله المقدس
فنفس الوقت وفنفس البلاصة كان بعيد عليهم وهو كؤدي وحدة من المناسك الاخيرة للعمرة ولي هي الحلق والتقصير والاحلال من الاحرام بالنسبة له هو راجل كان واجب عليه الحلق وداكشي لي كان فمكان مخصص لهادشي كان بالضبط قريب للصفا والمروة حلق شعر راسو كامل هو والحاج وهكذا ككون تحلل من الاحرام ونهى العمرة ديالو على أكمل وجه تاهو كحس بقلبو صفى ورتاح وكتسنى لي جاي بفارغ الصبر دعى للخالق يسر ليه حياتو يطول ليه فهمت واليديه يسهل على خوتو ومن ضمن هاد الادعية دعى الخالق من قلبو يسر ليه فأنها تكون من نصيبو ويكمل دينو ويؤسس عائلة ووليدات ينورو حياتو ويكونو خليفة ليه مذكرش سميتها فدعائو حيت ربي عالم بما فالقلوب وهو راه عالم على قلبو وعارف شكون فيه وشكون هي متأكد سيدي ربي مغاديش يخيبو وشاف معركتو فحبها وأنه دعاه فهاد المقام حاس مغاديش يخيبو والمستقبل غادي يكون زوين بالإذن ديالو حس بشي يد تحطات على ضهرو تلفت كان الاب ديالو بعدما سالا حتى هو الحلق وكملو العمرة ديالهم تبسم ليه شوية وتحنى طبع قبلة على يديه وهو كرضي عليه
فجيهة اخرى كانت هي والام ديالها وفريدة بعدما كملو مرحلة القص حتى هما قطعو شعرهم وتحللو من الاحرام لي كعني التحرر من قيود الاحرام لي بداو بيها مناسك العمرة ديالهم ومن بعد الاحرام التلبية دخول مكة طواف القدوم السعي بين الصفا والمروه الحلق والقص التحلل من الاحرام كانو رسميا نهاو العمرة ديالهم على أكمل وجه بقلب مرتاح ووجه مضيء يتقابلو بيه مع الله هزات كفوفها بحال جميع الناس لي كملو حتى هما ودعات دعاء من القلب وهي هازة راسها للسما
زينة:اللهم تقبل مني يا ارحم الراحمين
دوزات يديها على وجها وهي كتذكر مجموعة من الادعية فخاطرها ومسعودة وفريدة كذلك وهما مقابلين مع الكعبة مساخياش تحيد عينيها عليها لان الشوفة فيها كتروي القلب وكتملأ الوجدان بالايمان كثر وكثر
قبل ما يمشيو وقفات هي مسعودة مضورين يديهم على بعض من الكتاف وعينيهم مزال عليها كشوفو جزاء الحرب لي خاضوها
زينة:لو كانت عارفة اميمتي هذا غيكون جزاء دموعي كن بكيت بحور وميكفينيش
مسعودة بنفس الراحة وعينيها على قبلة المسلمين:كلشي يهون ابنيتي على ود أطهر ما فالكون
ومن بعد مدة قصيرة توجهو راجعين للفندق ديالهم مكملين عمرتهم وكتسناو الاعلان على اول ايام شهر رمضان الكريم لي غادي يدوزوه تما فجو روحاني وعظيم شهر مقدس وسط مكان مقدس هذا بحد ذاتو طمأنينة وتعبد من نوع آخر مع وصلو لوطيل طلاقاو مع يزيد والحاج لي لقى عليها التحية وهو منزل عينيه وهي كذلك رغم الحب رغم العشق الا ان وسط هاد المكان الطاهر كسقط كلشي وهما مزال حرام على بعضهم مجامعهم والو كان وقت العشاء مشاو قاصدين البلاصة المخصصة للماكلة جلسو ملاقيين مع ناس كثيرة من بلدان مختلفة عربية وغيرها كان جو مكحسسكش بأنك غريب لأن كاينين ناس من بلادك وحتى واخا يكونو ماشي من نفس الجنسية الا ان الاسلام لي جامع كلشي مخلي روح التآزر والالتحام بينهم
داز الوقت ورجعو للجناح هي وماماها ونيشان بداو كتاصلو بسكينة ويوسف كطمنى عليهم وبلي راه وصلو مزيان وكدا
فنفس الوقت فالمغرب كانو كلهم مجموعين فالصالة مونجي كتعشاو من مور مع قطعو معاهم وطمنو عليهم كملو الماكلة فجو من الضحك دوزوها فهاد اليومين ومع تجمعو كلهم نفس العمر مرحلة الشباب كلشي هارب ليه ومكاين لي يقولهم هنيونا من مور الماكلة شي قصد الصالة شي خرج للجردة وكانت روعة ميت لي خارجة تهضر مع عادل رؤية ويوسف شادين بلاي ومعاهم أنيسة وراجلها لي تصالحو وجا جلس معاهم تاهو هارب ليه وولدهم كنقز فالصالة لاخر كانت جالسة جابدة شي تمارين حاسدة خوها حيت معندهمش نفس لبروف وزيد ماشي نفس الشعبة هي صيونص ماط وهو svt يعني هي خاصها خدمة مضاعفة معزولة عليهم غير بينما تسالي وتنوض تنضم ليهم وهي غارقة حسات بشي حد دخل هزات راسها غير شافتو تبسمات
وليد:الباك فالجيب محدي معاك انا غا رتاحي
ميقات فيه ورجعات تتخرج وهو جلس حداها شاد الطيلي يونسها زعما وداكشي بدات تتزفر وحلات فواحد الدالة حتى زندات ليها راسها جمع الطيلي وضار شافيها:وحلتي فشي حاجة؟
سكينة بتركيز خايفاه يمشي ليها:سكت سكت اوليد بلاتي
فديك اللحظة طل بشوية على دفتارها يشوفها شكتختارع وشكتقرا وفاش واحلة نيشان لمح الخطأ لي رونها وداير لها الروينة حط عليه صبعو بلاما يهضر شافت فين لمح ليها عقدات حجبانها شوية ومع طلعات معاها هداك هو الخطأ ضربات فجبهتها ودغيا صحاتو وشافت فيه
سكينة:راك كاين
وليد: عارفك حاݣراني قلت ليك معايا انا الباك فالجيب
واخا صحح ليها كان مزال داخلها الشك فيه ماشي حيت حاݣراه ولكن حيت هبيل ومقطع الوراق وهادشي مكطلاقاش مع الماط نعتات ليه فواحد الدالة عندها فالكتاب ونطقات
سكينة:شحال تحط مغتخرجش هادي
يوسف ضور عينيه من الطيلي لكتاب هنا غطات الحل بيديه هز الستيلو بلاما يجاوبها من مور عشرة الدقايق حط الستيلو خلاها هزات راسها كانت ملاهية مع تخراجها غير شافت التخراج وقارناتو مع لي فكتابها وهي تعض على شفايفها وتبسمات لا لا فعلا كاين محاݣراهش ولكن الطريق لي متبع الرياضة والفيتنس بعيدة على الماط خلاتها تستبعدو انه يكون عندو معاه
وليد:كاين ولا مكاينش(شاف فروعة لي دخلات عليهم)ختنا حاݣراني فالماط
روعة جلسات موجهة كلامها لسكينة:هذا هو النوع لي كخرج على بنادم تتشوفو عاطيها غير للضحك تتقول ندير بحالو فاللخر هو كنجح ونت لا النقطة لي جاب فالوطني انيسة لي طبيبة ومجابتهاشخ
هنا بداو كضحكو وضارت تتشوف فيه زادت حباتو واخا التسطية مغيز غمزها شي لخلاها تبسمات ونزلات راسها لكتوبتها وهما قاطعين الحس حيت معاهم روعة لي اصلا عايقة بيهم سهات وهي تتكتب وتفكرات ختها اكيد غتكون مرتاحة وفرحانة دارت يديها على خدها تتكتب ومبسمة غير بوحدها ناضت فديك اللحظة روعة خرجات وخلاتهم جالسين بزوج بيهم ثاني الراس فالراس
وليد نيشان:تي عطيني الضو الخضر دابا نحضر الخاتم والعدول راني بحالا ضارب بربوقة ممتيقش كنشوفك قدامي فوق سدادر الوليدة
طلقات الضحكة بالجهد وهي دايرة يديها فمها نزلات عليه للكتف كسكت حتى يسكت ويطلقها ليها نيشان قهرها بلي راه ممتيقش جالسة معاه فالدار
ويبقى يتعنب عليها وكلامو كخليها متحبسش الضحكة خايفة غير خوها شي نهار يعيق بيهم ناضت هزات كتوبتها مخلياه شاد فقلبو وكقولها رجعي بحال شي هبيلة وهي غادية خارجة وتضحك وتقول باش بلاني سيدي ربي
دازو شي ايام قلال طايرين وهاد المرة بالضبط فمكة المكرمة بعد الشهادتين هزات يديها للخالق تتدعيه ودعائها لنفسها للناس لي تتبغي واهم حاجة قبولو لعمرتها وعباداتها دوزات يديها على وجها وجلسات تتأمل فداك المنظر كانت تتصلي قدامو البالكو لي كطل على الكعبة الشريفة من الفوق كان منظر كفتح القلب منهار جات وهي تتصلي هكاك ولا تتنزل يصليو فصحن الكعبة اي بلاصة صلات فيها تما حسناتها توزن بشي حاجة اكثر من الذهب تتشوف بعينيها واحسن منظر ممكن تفتح عليه عينيها الصباح ولا تكون آخر حاجة تشوفها قبل تنعس هو هذا كتجلس بالسوايع تأمل ومساخياش بكل ساعة دازت الطريق الله زوينة وبزاف ديننا كذلك دين التسامح دين الرأفة والحنية وربي حنين وكريم فعبادو صونات ليها فريدة ودغيا ناضت كانت دايرة معاها باش ينزلو بزوجات لسوق الحرم يتقداو شي حاجات منهم التمر استعدادا لرمضان لي تعلن فيه يوم غد هو أول أيامو بالمملكة العربية السعودية مقادراش تخيل انه غتقضي اجمل شهر فالعقيدة الإسلامية فديك البلاصة أجمل ما قضات فحياتها هما دوك الايام طبعات قبلة على راس مسعودة لي كانت ناعسة الصحة عيات داكشي باش فقط كتكافي انها تصلي تما ولا على برا بدون اضافة انها تخرج للسوق ولا ضور كتؤدي الفرائض اولهم الصلاة وصافي كتجلس ترتاح وربي راه عاذرها يكفي انها موجودة فداك المكان والنية راه فالقلب
طلاقاو وخرجو نيشان لسوق الحرم لي فيه محلات فيها كل من الهدايا التذكارية لي كتعبر على الكعبة ومكة ككل لباس شرعي صلايات مصاحف كلشي عاد خلي التمور بأنواعها وما أعرق تمر مكة كضورو من هنا ولهيه وكتقداو والناس كذلك من مختلف الجنسيات الإسلامية رونق رمضان والاجواء ديالو حاضرة وزايدة جمال بتواجدهم فداك المكان كانو واقفين فواحد المحل ديال العبايات والمخاور خداو لي بغاو ولي غادي يديو معاهم نهار يكونو غاديين كل مرة كخطفو حاجة من الباروك ماشي حتال لنهار يبغيو يمشيو عاد يوليو يتجاراو وجاو خارجين مع فاتو المحل شوية نطق شي حد من وراهم:السلام عليكم حضرتك ممكن دقيقة من وقتكم
فديك اللحظة تلفتو بزوجات بعدما وقفو كشوفو شكون كان شاب فتلاتينات من عمرو مع شافو فيه نزل عينيه للأرض بوقار وحياء وحتى ديك الوقفة لي وقفهم كانت بعد تفكير من اول ما لمح المقصودة
فريدة باستفهام:نعام اسيدي؟
الشاب عينيه فالارض:آسف على الازعاج بس كان مؤكد وضروري احكي معاكم دقيقتين بس وبعتذر والله ممكن اعرف من اي جنسية
فريدة وزينة شافو فبعضياتهم مفهمو والو هذا اشبغا جنسيتهم السيد من كلامو كبان مصري طريقة كلامو محترمة وما غيوقفك فهاد البلاصة غير لي نيت ناوي على شي حاجة
فريدة:الله يسمعنا خير اسيدي حنا من المغرب
الشاب وعينيه مزال فالأرض:على راسنا أجدع ناس حضرتك اذا كان معاكم راجل ممكن تخليني اقابلو عندي كلام عاوز اسمعهو لو
فريدة يمكن فهمات هذا شنو باغي وزينة كذلك لكن بغات تقلقلو كثر وتزيد تأكد فريدة:خير ليش؟
الشاب عينيه مزال فالارض مهزهمش نهائيا فيهم منين وقف وكان كبان نقي وسماهم على وجوهم شي لخلاها طول معاه فالهضرة فسبيل انها تعرف مالو بطريقة مباشرة:نيتي صافية وربنا شاهد يا ستي انا شفت البنت دي لي معاكي ومن غير لف و دوران اذا كان مكتب ومقدر حبيت اني اطلب ايدها على سنة الله ورسوله ومن لما عرفت انها مغربية زاد اصراري وخاصة اني شفتها فالمكان والمقام ده
السيد دخلهم دخلة بلاما يسول واش مزوجة ولا لا لكن الطريقة باش كان كهضر وكيفاش بين ليهم شنو باغي كانت لبقة وناوي الحلال مينكروش لكن السيدة ديال ماليها كان كسمعو ليه وهو كعبر وكقول بلي باغيها على سنة الله ورسوله فديك اللحظة غا حتى وقف عليهم عاقد حجبانو شوية معرفوه مين خرج جا نيشان مع اطلب ايدها على سنة الله ورسوله هنا زاد كنزز زينة غير شافتو بلعات ريقها ورجعات ورا فريدة تاهي لي تسرط ليها اللسان السيد كعبر ولاخر وراه بدا كطرطق فصباعو بشوية وببرود غير نظراتو لي كانت عكس الهدوء ديالو كتسناه يسالي على خاطرو فريدة تتلمح له بعينيها زعما مواقع والو غنتصرف حيت اصلا السيد هضر بالادب غتقول له ديال ماليها وغيمشي بحالو لكن زينة لي عارفة مزيان صباعو لي كان كطرطق ماهي الا تسخينات لي غير مقبولة فهاد المكان الشريف دارت يديها على فمها وهي كتزاوݣ فيه بلا حس بعينيها لي كقولو كلشي هالعار لما خلي عمرتك وعمرتنا تابثة كلشي بالعقل بلاما يتفرجو فينا الناس فديك اللحظة خونا المصري تلفت لقا نيشان يزيد وراه خاطبو بنفس النبرة:انت معاهم يا سيدي؟
يزيد حرك راسو بآه ببرود وهو غادي معاه فهادشي لي بالنسبة ليه هو هبال هنا المصري مد ليه يديه صافحو بيها وهو مبسم لقى معامن يفاتح موضوعو الشاب:كنت لسه سائل الست عن رجال من العيلة شرفني بيك شكلك اخوها للبنت صح؟
زينة فديك اللحظة دارت يديها على جبهتها وهي تتسنى الشوهة تحت أنظار الناس من جميع الجنسيات والاعمار والاجناس
يزيد كان كشوف فخونا لي مبسم كدوي ليه على رزقو وماعلابالوش مكهموش يدوي بالأدب ولا بلباقة ولا يكون مكهزش العين كثر ما كهمو انه كدوي ليه على ديالو وعلى حاجتو وهادشي هو دم سنانو عض على شفايفو وهو مزال كشوف فخونا وكحاول يلبدها واخا دازو بزاف بحال هاد المواقف وكانو يديه لي كخدمو ولكن هاد المرة بزز باش خاصو يسرطها حيت اولا فبلاصة لي ماشي ديال المدابزة ثانية قدام مو تالتة الاخت مريضة وكيفما قال الطبيب مخاصهاش تشوف شي حاجة لي تعصبها ولا تسطريسيها اذن خاصو بزز منو يسطرطها وهو كشوف فيه مكانش هدوء ديال انه مكالمي كان هدوء ديال العافية لي شاعلة فيه فداخلو وكحاول يطفي فيها بزز دايز بوجه داك المقام وبوجه مو فديك اللحظة زينة دغيا رجعات هزات راسها ونغزات فريدة قبل ما توقع شي حاجة الا تدخلات مو عارفاه ميهضرش نطقات بهمس
زينة:هضري هضري اخالتي راه والله حتى يرونها
فديك اللحظة فريدة داكشي اصلا لي كانت غدير شدات فولدها من ذراعو مع بغات تنطق مخاطبة السيد كان سبقها هو ووجه ليه كلامو ببرود وبدون مقدمات
يزيد:مزوجة وانا هو راجلها
زينة هزات فيه راسها نيشان من مور ما سمعات كلامو مفيكسية عينيها عليه وجملتو تتعاود فوذنيها ديك مراتي طاحت فشكل على مسامعها وديك انا راجلها كذلك حسات بشي حاجة فشكل وهي تتسمع كلامو معرفاتش باش حسات فقلبها وهو كوصفها بأنها مراتو بلاما يدير الشوهة كيف موالف وخرج من باب واسع مقادراش تحيد عينيها عليه وهي كضورها فدماغها
فريدة:للآسف اسيدي هاذي مرات ابني وهدا نفسو ابني الله يسهل عليك فبنت الناس وخيرها فغيرها
المصري فديك اللحظة وهو كشوف فيزيد بلع ريقو شوية وما فهم ما يقول كان من الاول خاص يسول واش السيدة مزوجة مخطوبة ولكن الزربة لي زرب حيت مجاتوش يبقى موقف زوج عيالات بوحدهم نيشان طلب رجل يهضر معاه فالموضوع مباشرة لكن تنهد بعدما مسح على وجهو ونطق مخاطب يزيد
المصري:انا آسف والله سامحني يا فندم كان من الاول لازم اسأل بس تسرعت لاني كنت بشوف عيب اوقف ستات لمدة طويل شي لخلاني انني ادخل فصلب الموضوع مباشرة بدون مقدمات سامحني
فريدة كتنغز فولدها لي شافيها بنفس البرود:مقال عيب اولدي صافي موقع والو
يزيد فديك اللحظة زفر هز عينيه فزينة لي فور ماطلاقاو عينيهم نزلاتهم وهي تتبلع ريقها رجع شاف فخونا وحرك راسو بآه:مكاين مشكل
المصري فهم بلي صافي تفهمو الموقف ديالو نزل راسو وزاد وهو حشمان جاي يخطب فوحدة مزوجة ديك الساعة يزيد ضار عند مو:الوليدة خارجين بوحدكم علموني
فريدة:صافي موقع والو مالك السيد مقال عيب وهضرنا معاه راه مشى بحالو
عض على شفايفو وهو مقادرش يبقى يتراد مع مو تتقوليه عادي وهو العوافي شاعلة فيه عينيه عليها هي لي منزلة راسها مقدراتش تشوف هز عليهم داكشي لي شاريين وزادو بثلاتة وهو كزفر سارطها بزز المعنى الحقيقي ديال بغيت نتوب والعرب مخلاوني جاي يغسل الذنوب ويتكوانا مع مخو بنادم كهبش عليه وعلى حاجتو باغين يخرجوه على طوعو يصدق داير شي ذنوب كثر من دوك لي جاي بيهم وصلو لوطيل هو مشى قصد باه معاجبو حال على لي وقع جلس معاه لتحت هو و شي ناس من معارفهم طلاقاو بيهم تما وهو كخمم وكفكر فشي حاجة فبالو وهما دخلو بزوجات عند مسعودة كوريوها شنو شراو بقاو مدة جالسين حتى ناضت مسعودة لطواليط وهي ضور فريدة نيشان عند زينة:متقوليش ليا فايت داير شي روينة
زينة نيشان فهماتها شنو تتقصد تنهدات وهي كضور فراسها:لهلا يوريك اخالتي دابا راه عندنا الزهر
فريدة ضحكات مقدراتش تحبسها شي لخلا زينة تبدا ضحك تاهي وهي تتفكر المواقف لي جمعوها معاه فريدة حطات يديها على يد زينة ونطقات
فريدة:متخايليش شحال كنكون فرحانة فاش كنشوفو فرحان والفرحة لي كنبغي نشوفو فيها هي فاش كتكوني معاه
زينة بقات تتشوف فيها وهي تتسمع كلامها فعلا راه الوجه لي كعطيها هي فاش ككونو الراس فالراس ماشي هو الوجه لي كعطيه لغيرها وللناس وهادشي كعجبها بزااف تنهدات وهي مبتاسمة وهي تتسمع لكلام فريدة:الله يجعلك من نصيبو ويتاويكم بلخير كنتسنى فداك النهار بالساعة وبالدقيقة وياربي تعجلو
قلبها تهز وهي تتسمع داك الكلام وكتخايل داك النهار لي غيكون ديالهم تتحس بقلبها غادي يفرفر الفكرة ديال داك النهار واخا كتحشم فاش تتفكر فيها ولكن كراودها احساس زوين قربات عندها فريدة وهنا تعانقو عناق زوين تمهيد للعلاقة لي غادي تزيد توطد عما قريب وهما عارفين باش غتزيد تقوى معناقاها زينة وهي مبسمة وتتفكر ديك انا راجلها كيف خارجة منو وبصوتو مزال تتعاود فوذنيها خلاتها تعض على شفايفها وهي كارزة على فريدة
فنفس الوقت فجيهة اخرى بالضبط فالمغرب
دوزات يديها على وجها بشوية من مور الدعاء هي وخوها لي ضرب يدو فجيبو وجبد شي بركة مدخل للسيد لي قرا ليهم القرآن تحنات بشوية وطبعات قبلة على قبر باها وتݣعدات شوية وهي ساهية فيه تنهدات من قلبها عاودات ليه كلشي وݣاع داكشي الزوين لي طرات فحياتهم لا معاها لا مع خوتها ومتأكدة غادي يكون فرحان حتى هو
بعدات بشوية وهنا يوسف حتى هو تحنى على قبر باه وباسو فديك اللحظة نظم ليهم وليد ورؤية لي جاو يزورو قبر سامية كانو عينيه نيشان عليها الحزن طاغي على وجها وهادشي عادي راه جاية تزور اغلى شخص ممكن تفقدو هو الاب والسند مواعد نفسو انه يخليها ديما فرحانة ويكون معاها العمر كامل ولكن فهادي حتى واخا ما يقدر يعوض مكانة الاب تنهد من قلبو وهو عينيه عليها هز يديه دعى ليه بالرحمة ومن بعد شي بدا كشوف فشي وزادو فصمت وهما غاديين نساحبات من عندهم ودخلات فواحد الصف ديال القبور يوسف ورؤية كانو لقدام مرضوش ليها البال لكن هو وقف كشوف فيها وعرفها فين غادية وقفات قدام قبر سامية كان شوية ديال الزهر مزال عندها فالقرعة خواتو على قبرها وهي تتشوف فسميتها وكتنهد كانت سبب فمعاناة ختها لكن فالأخير كلا خدا الجزاء ديالو والدنيا فانية ترحمات عليها فنفسها وزادت مع ضارت لقاتو واقف كشوف فيها تنهدات وتقدمات جيهتو منزلة راسها كان كشوف فيها نسخة طبقة الاصل من ختها وبإختصار بنات الناس مع وقفات قدامو حط يديه بشوية على خدها هزات فيه عينيها وهما كشوفو فبعضهم فهماتو وفهمها غير بلعينين دواو ثواني قليلة حتى حسات على راسها وبعدات عليه نزلات راسها وزادت خلاتو تابعها من اللور بلا حتى كلمة ركبو مجموعين فالطوموبيل وزادو حطو وليد فالاكاديمية ونزلات معاه حتى رؤية خلات وليد باستغراب كشوف فيها من ايمتى هادي تتعجبها الكورة وهي حياتها كاملة غا الماكياج والشراوط بحال خواتاتو وتتقوليه شافت فيه سكينة لقاتو متبع بنت عمو وهي تنطق:غا الا مبغيتيش تفهم تاهما بحالنا احنيني
وليد شافيها وتبسم:خليهم مساكن حلال علينا وعليهم تاهما الله يسهل عليهم
هو بالفرحات عليه تخوا ليه الساحة ويبقاو غير هما بزوج الراس فالراس تبسمات بلا حتى كلمة مع ديمارا ساقيها:فين بغيتي نمشيو
سكينة رجعات اللور شوية وهي تتخمم هاد الايام كلها مبقات خرجات غير لبريباراسيو هي وخوها والمدرسة مبقاش بزاف للوطني:يلاه نمشيو للبحر
هي الاولى خلاها هو ديمارا وزادو طلق ليها المزيكا الطريق كلها وهما يشاليو طلاقاو خصوصا كان باغي يخرجها حيت شافها كيف دوزات هاد الايام من القراية للدار للسوايع مزال يوسف كمشي يتنفس شوية فلونطرينمو اما هي لا وفنفس الوقت بغا يخرجو بزوج الراس فالراس باش يسقي عينيه حيت رمضان خاصو يدير غض البصر واخا عينيه عمرو يرواو منها
فنفس الوقت فلبحر كانو جالسين بزوج بيهم فوق الرملة مع سالات القراية قصدها هزها من تما وقصدو لبحر تاهما ضاربين ضويرة رمضان جاي ككتر فيه الشغل وجري جري يعني نسبة انه يطلاقاو غادي تكون قليلة بزاااف عادل تلفت كشوف فيها وهي مغمضة عينيها مستحلية داك البرد لي كضرب فوجها من بعد مدة قصيرة نطق:ان شاءالله غير غادي يجيو الدار من العمرة غنهضر مع سي يزيد
روعة فديك اللحظة حلات عينيها وشافت فيه تتأكد واش كضحك ولا لا تبسمات وقلبها كضرب حطات راسها على كتفو وهي تتنهد ونطقات:من مور العمرة خويا غادي يطلب يد زينة وانا مستعدة نتسنى وانا كنشوفهم فرحانين تعذبو بزاااف
عادل:عارف لي كاين على الاقل نهضر معاه ونضمنك ليا
رجعات شافت فيه ورسمات ابتسامة عريضة كثر على وجها تتخايل داك النهار لي غادي يتجمعو فيه بزوج فيهم هز يديها بشوية وطبع قبلة عليها خلاها منزلة راسها ومزنݣة شحال زوين يطلع معاك راجل داك لي عطيتيه قلبك ويعتارف لك انه ناوي معاك الحلال رجعات هزات راسها وهي مبتاسمة هنا نيشان خرجات عينيها جامعة ضحكتها
روعة:اويلييي وليد خويااااا
فديك اللحظة عادل تلفت كبانليه من بعيد راه واقف عند البحر والدرية ديالو مقدرش يفرزها من بعيد ويعرفها حتى زينة واقفة كصور فيها فديك اللحظة روعة دارت نظاظر كحلين
روعة:نوض نوض اعادل الا شافني مصيبة
عادل تنهد متفهمها محدو مزال مدوا مع دارهم واخا ناوي كبقى داك الخوف مسيطر دغيا حيد التجاكيطة ديالو ومدها ليها لبساتها ودارت القب وقف جيهة وليد مغطيها زعما واخا هم راه بعيد عاطيهم بالضهر لكن خافت زادو خواو من تما مخلينهم هما بزوج عايشين الغرام مكاين لي يدوي معاهم هزات الما بشوية وهو كصور فيها بݣاع البوزات شاد ليها الخاطر بردات يديها فديك اللحظة ضارت بالجهد ورشات عليه خلاتو جامع التيليفون وتابعها كجريو كيف شي زوج هبل وسط داك البحر لي كان خاوي فداك الوقت من العام دوزو وقيت تما من بعد طلبات انهم يمشيو بحالهم وداكشي لي كان مع غادي تحل الباب ديال الطوموبيل وهو يشد فيها تلفتات عندو نيشان بلا مقدمات شد وجها بين يديه عينيه فعينيها مفهمات والو ونطق
وليد:غير غادي يرجع الوليد والواليدة غنخوي ليهم ما فقلبي من جيهتك ناوي الحلال اسكينة
قلبها تهز وهي تتسمع كلامو لي كان بدون تمهيد معرفات متقول ولا شنو تجاوبو غير كشوفو فبعض وقلبها بدا كضرب ونزلات عليها واحد الحشمة وعلاش لا هو ذاكر ليها الزواج ولي زاد كثر الكلام لي قال من بعد وفكرها بشحال هذا نهار سولاتو على شنو ممكن يدير على ود بنت قلبو
وليد:عينيا نعطيهم ليك اسكينة
كان بصوت هامس كعبر ليها على مكنون قلبو وبلي هي المقصودة داك النهار وعلاقتهم ماشي عابرة وانما غالية عندو حيت باغي يتوجها بالحلال مقدراتش تصبر تجمع عليها دهشة وفرحة طلاحت عليه وتعانقو عناق حار كارزين على بعضهم شامل ما فقلوبهم وشنو كحسو تجاه بعض
دازت هاد الليلة وجا نهار جديد بالضبط فالسعودية
كان اول ايام رمضان الفاضل جو زوين عامر بالإيمان والعبادة وعاد انه الصيام فمكة المكرمة عندو طعم آخر كانو بالضبط فصلاة العصر جات بوحدها صلات امام الكعبة الشريفة وبقات جالسة التسبيح فيديها وكذكر الله جو زوين فاجى على قلبها الناس غاديين جايين كاين لي جالس كصلي كاين لي صلى وغادي بحالو وكاين لي بقى جالس بحالها كذكر رمضان تما عندو طعم خاص والصيام كذلك واحد الروح كاسياها كل من التعبد والإمتتال للخالق على اكمل وجه مكاينش بحالهم حمدات الله لي عاشت هادشي ورد ليها قلبها وخلاها تعاود تحيا من جديد صباعها كلتاهما حبيبات التسبيح وهي كذكر الله وعينيها على الكعبة الشريفة مكتقدرش تحيد عينيها عليها ابدا الشوفة فيها زيارة الصلاة قدامها عمرتها عطاوها واحد الامل انها تبغي تبدا من جديد بعدما كانت تتقول الجهد مشى وشرفت قبل الوقت جهدها عاود تجدد باش انها تعيش لي جاي وتعاود توقف على رجليها فسبيل انها تقلب على طريقها هي الطريق لي غادي تديها للحلم ديالها لي مزال قادرة انها تحققو هزات يديها للسما وكأنها كتحكي لله سبحانه وتعالى كتدعيه فنفسها ينور ليها طريقها ويبين ليها المسار الصحيح بعدما ناوية دير صلاة الإستخارة باش تشوف بشنو غادي تبدا نهار ترجع لبلادها غترجع بروح جديدة بقلب صافي ونقي لايح كل الهموم لي دازو عليه والحمدلله الدين علاج للروح وهي نهار تبعات طريق الله تفاجات وحيات من جديد
فنفس الوقت الفوق فلوطيل كانو جالسين بزوج وهو غادي جاي عليهم من لبارح مزال ممسروطاش ليه ودابا قصد واليديه نيشان انه خاصهم يعجلو داكشي لي هضرو فيه قبل ما يجيو وقف وتقابل مع باه ونطق نيشان
يزيد: مبقيتش قادر نصبر الوليد تسنيت بزاف
الحاج تنهد وفريدة كذلك عارفينو شحال باغيها وعارفين فعلا شحال تسنى قصد دابا طريق الحلال وحالف تا يطبق
الحاج:صبرتي وغادي تنال اولدي ان شاءالله كيفما قلتي دوينا قبل ما نجيو غير غنمشيو ان شاءالله غادي نفاتحوهم بالموضوع
يزيد: انا غنهضر مع مسعودة هنا ونتوما حتى تمشيو وعاودو دويو معاها
فريدة ولدها زربان ومستعجل كثر من القياس تاهما كتسناو داك النهار بالريق الناشف لكن باغين يوجدو ليه وقفات وقصداتو شادة فيه: سمعني اولدي عارفاك صبرتي ولي داز مساهلش الحمدلله دابا كلشي تقاد والطريق مسرحة الناس دابا راك شفتي حالهم تفاجاو من مور مجاو هنا متخشعين فالعمرة ديالهم وباغين يرتاحو اه غادي يفرحو فاش نهضرو معاهم ولكن بغينا كلشي بقوامو داك النهار تسنيناه بزاف بغينا نوجدو ليه ونقادو كلشي بقوامو شوف ان شاءالله غير نمشيو المدينة انا غادي نهضر معاهم باش نرصيو ونيشان مع نرجعو نديرو الخطبة مزيان هكا؟
يزيد كن بيه هو وكون مكانتش عيانة يكتب بيها العقد تما ويمشيو ناضيين ولكن عيانة والزواج خارج البلاد كطلب طلع ونزل على شحال من ورقة واولهم تصريح بالزواج من السلطات السعودية مسح على ذقنو وهو كحرك راسو بآه سارطها بزز غا حيت ما بقى والو ويمشيو للمدينة واخا تاهي خاصو يصبر واخا ما بقى ليه صبر لا عليها ولا يبقى كل مرة يقصدها واحد وهي معاقدش عليها ومضمونة ليه غايبقى تا يفوت شي دقة فشي حد تديه لشي زوبية وهو دمو حار على حاجتو
الحاج:مدام نويتي الحلال ربي غادي يسر ليك وبهاد الصبر غادي يعطيك كثر من داكشي لي باغي وغادي يفتح عليك بيبان لخير نت واياها حيت ولكن بزوج صبرتو
يزيد تنهد وحرك راسو بآه:ونعم بالله
معندو ما يدير كيف قاليه باه واخا ما بقى عندو جهد صبر بزاف يزيد يصبر حتى دابا ما بقى قدما فات لكن فبالو واحد البلان لكن مغاديش يطبقو دابا جلس وهو كمسح على ذقنو وفبالو غير هي فديك اللحظة شاف وجها كيف رجع تنور من جديد كانت مريضة ولي دوزات مساهلش لكن الحمدلله فرحان دابا حسن من الاول شهد عليها وهي فأكفس حالتها ودابا بشوية بشوية كترجع كيف كانت ومزال معاه تزيد تحسن كثر حيت باغي يدير بزاف وكطلب ربي يستاجب ليه ويعجل النهار لي غادي يتجمع فيه هو وياها
داز الوقت فجيهة اخرى بالضبط فالمغرب
كانت جالسة هي وخوها فالصالة كحفضو بزوج بيهم معزولين ممصدعهم حد يوسف مع سالا الكتبة تكسل وهو كهضر
يوسف:معرت كيف غنديرو مع ديك المدرسة فرمضان باي باي التنمر واخا بنادم تما غا ديال التݣراد
سكينة:انا شاداني السخفة من دابا غدا غندخلو مع التسعود ياك
جبد تيليفونو تشوف لومبلوا لي سيفطو ليهم على ود رمضان لي تعلن أول أيامو فالمغرب هو غدا مفاوت هو والسعودية بنهار فديك اللحظة صونات ليهم زينة ابيل ڤيديو دغيا جاوبوها وهما فرحانين كشوفو ولات على خير ووجها تفاجا وعلاش لا لبلاصة لي فيها هي راه طمأنينة القلب وكلما فالقلب كنعاكس على الوجه والمظهر الخارجي
زينة:كي غاديين مع القراية كندعي معاكم ليل ونهار والله تفرحوني بالكارطونة
يوسف:متخمميش فالجيب بإذن الله
سكينة:توحشتك بزااااااف بقات بلاصتك اكبيدتي
فديك اللحظة دخلات انيسة وروعة وبداو كهضرو معاها فجو من الفرحة وهما كعبرو ليها على اشتياقهم وطلبوها متنساهمش من الدعاء وهي اصلا مناسية حد كدعي مع كلشي فكل صلاة من بعد مدة قطعات معاهم كانت جالسة قدام البالكو وهي كطل على الكعبة من الزاج تنهدات وهي تتفكر فلي جاي فحياتها ومستقبلها ناوية دير صلاة الإستخارة باش تشوف الطريق لي غادي تشد هاد الزيارة عطاتها طاقة وجهد جديد لي غيخليوها تبدا من جديد تكمل هاد المرة باغي توصل للحلم لي لطالما حلماتو وكان مأجلاه على ود لي قراب ليها لكن اول حاجة حتى تشوف ربي شنو باغيها تبدا شنو الإشارة لي غادي يعطيها واي حاجة جات من عندو مرحبا ليها
دازو شي ايام قلال طايرين بالضبط فمكة نيت نازلة للتحت ديال الفندق فين كجلسو الناس تتقلب عليه بعينيها بعدما سولات عليه فريدة لي يلاه كانت معاه شي دقايق قليلة قبل ما تنزل هي لمحاتو بلعات ريقها شوية ونيشان قصداتو فين جالس حتى وقفات عليه:يزيد
هز فيها راسو بشوية غير شافيها وهو يوقف دغيا: مالكي شنو خاصك؟
زينة وهي كتنهد:كداير لباس عليك؟
يزيد مسح على شعرو شوية مع مبقاش كشوفها بزاف دابا مين جات عندو برجليها توقع تكون خاصاها شي حاجة لدرجة انه نسى يسولها على حالها: الحمدلله ونت كي صبحتي ليوم؟
زينة: الحمدلله احم مسالي دابا بغيت نهضر معاك
يزيد باهتمام مسالي لكان غا على ودها:اه مالك ياك لباس؟
زينة:قبيلة شفتك مشيتي تصلي نت والشيخ عمر لقزابري بغيت نشوفو ضروري ايزيد
كان عادي انها تبغي طلاقى بشي شيخ لي معروف وتسلم عليه وكدا لكن ديك ضروري دخلات ليه الشك اي حاجة كتخصها خاصو يعرفها رد عليها نيشان:علاش احم واش بغيتي تقولي ليه شي حاجة
زينة حركات راسها بآه وعينيها فالارض:درت سخارة الإستخارة ودابا عاد حلمت وبغيتو يفسرها ليا
يزيد حرك راسو بآه:ان شاءالله خير جلسي جلسي
فديك اللحظة جلسات وهو جبد التيليفون صونا ليه وهي جالسة تتسنى عرفاتو ايكون كعرفو مزيان عقلها شرد وهي تتفكر فديك الحلمة يومين وهي تتعاود معاها من مور صلاة الإستخارة لي دارت باش ربي يوريها الطريق لي غادي تكون بدايتها من مور هاد رحلة طهارة وتصفية الروح والقلب قطع مع دار ليها اشارة تنوض داكشي لي كان غادية وراه منزلة راسها خرجو من لوطيل لي هما فيه ومن بعد مسافة دخلو لوطيل واحد آخر تما نيشان لقاوه جالس فين قاليه يجي عندو كانت صالة كبيرة تما فداك لوطيل جالسين الناس النزلاء تما على الطريقة الإسلامية كلشي جالس فالارض على زرابي عريقة وديكور اسلامي طاغي على ديك الصالة ولوطيل كامل بحال لي نازلين فيه هما حيت فداك المقام الشريف سلمو عليه وجلسو وهي مبسمة فرحانة وهي قبالة واحد من شيوخ المغرب المعروفين ولي لطالما رمضان فمدينتها كازا تميز بصوتو فمسجد الحسن الثاني
يزيد:سي عمر السيدة من العائلة ديالي لي بغات انها تشوفك وتهضر معاك
الشيخ شاف فزينة مبسم وهي منزلة عينيها للارض:مرحبا ابنتي
يزيد فديك اللحظة جاه اتصال عتاذر منهم وناض يجاوب مخليهم غير هما بزوج نطقات بصوت الرقيق:شكرا بزاف اسيدي بغيت نطلبك منك طلب هو انك تفسر ليا الحلم لي حلمت من مور صلاة الإستخارة شنو دلالتو باش نعرف كيفاش ندير بيه انا دزت من واحد الوعكة صحية لي خايبة والحمدلله دابا قدرت نوقف ونرجع كيف كنت وبغيت نعرف شنو الطريق لي نشد وشنو نقطة لي بداية لي غتكون من مور هاد العمرة وانا كنعاود نبدا حياتي من جديد
الشيخ:الحمدلله على كل حال المومن مصاب خير وسلام حكي ليا شنو شفتي انا كنسمعك وان شاءالله التفسير يكون خير
زينة:كنشوف راسي جالسة فالطبيعة والدنيا كلها خضرا وواحد السيد كجي حتال عندي كتحنى على ركابيه كلبس ليا سباط جديد وزوين وانا ممنعتوش كتافيت غير انني نبقى نشوف فيه من مور ما لبست داك السباط كنحس بيه على مقاسي ومرتاحة فيه
الشيخ وهو كسمع ليها:هاد الحلم شفتيه مباشرة من مور صلاة الإستخارة
زينة حركات راسها بآه:آه اسيدي تعاودات معايا زوج ديال المرات بنفس التفاصيل وكنشوف داكشي واضح بحالا راني فايقة
الشيخ:ونت هاد السيد لي شفتيه كقوم بهاد الفعل تتعرفيه وواش من المحارم ديالك
زينة تنهدات وحركات راسها بآه:لا اسيدي مكقربني بحتى حاجة لكن كنعرفو مزيان
الشيخ:وكيفاش علاقتك بييه؟
كتسنى التفسير بفارغ الصبر ولكن واخا هكاك تتجاوب على أسئلة الشيخ لي حكر فالكلام على هذا لي حلمات بيه كانت خايفة غير يكون تفسير خايب لكن كطمن راسها بلي ديما صلاة الإستخارة ككون فيها كل ما هو خير ليك
زينة تنهدات وهي تتحاول تنسى لي فات:كانو وقعو شي مشاكل تدهورات علاقتي بيه بزاف شي مشاكيل لي خايبين لكن الحمدلله كلشي تقاد دابا
فديك اللحظة يزيد رجع عاود لقى التحية وجلس وهو باغي يسمع شنو الموضوع لي بغات فيه الشيخ حتال من بعد ويسولها على لي فاتو الشيخ فديك اللحظة تبسم ونطق:رسالة زوينة من الخالق لي ابنتي بهاد الحلم كبين انه ختار ليك الشخص المناسب ولي غيكون غير خير انك تكملي معاه حياتك
زينة نيشان هزات فالشيخ عينيها من مور هاد الكلام لي هو تمهيد للتفسير لي غادي يعطيها قلبها بدا كضرب بالجهد والشيخ كمل على كلامو
الشيخ:الطبيعة تتعني الخير والاستقرار والحذاء فالحلم وبالضبط الحذاء الجديد المريح كيفما وصفتي كعني هو النجاح التقدم و كذلك الزواج وفالحالة ديالك نت كتشوفي شخص كتعرفيه هو لي كلبسو ليك فراه كعني ان الخالق ختار ليك هاد الشخص هو لي يكون زوجك وشريكك فالحياة ومكاينش من غيرو خير لك مدام تعطاتك هاد الرسالة من مور صلاة الإستخارة اذن الا تقدم ليك ان شاءالله توكلي على الله
يزيد فديك اللحظة داكشي لي كان سرطو وكبتو مع المصري هاهو عاود رجع ليه دابا وهو كسمع الشيخ شكقول شوية وبزز كحبس راسو باش مايبداش يهلل عليهم يشكون هذا وعليها هي بالضبط بلع ريقو وهو كارز على على فكو لي بدا كمسح عليه بيدو وهضرة الشيخ كطنطن ليه فراسو العافية شعلات له مع جنابو وهو كتحرق فأنه يعرف شكون هاد خينة
الشيخ مزال مكمل فكلامو:تفسير حلمك ابنتي هو الزواج والاستقرار مع هاد الشخص واخا ݣاع لي وقع كيفما قلتي لي من مشاكل ربي بغا زواجك منو يكون نقطة بدايتك لي تعطاك دابا اشترتها وكلشي من عندو فيه خير
كلام الشيخ كتعاود فدماغها قلبها تهز فور ما سمعاتو كلشي وضاح ليها ودابا عرفات مين اتشد الطريق عرفات لي تابعها ولي مكتب لها جملة الزواج والاستقرار مع هاد السيد كتعاود فبالها وهي شاردة وتتسمع كلام الشيخ لي كشجعها وكنصح فيها زيادة على التفسير لي فسر ليها
الشيخ:هاد الشخص ابنتي واش عندك بيه شي علاقة ماشي عائلية وانما فايت جابد ليك موضوع الزواج
زينة بلاما تحس وسط سهوتها جاوباتو جواب مخالف لسؤالو وهي منعتة فيزيد بلاما تشوفيه:هاهو اسيدي راه هو هاد السيد
اللقوة ضرباتو والصدمة زادتو بواحد الكروشي وهو كشوفها كتنعت فيه وكتقول للشيخ بلي هو المقصود وهو لي كانت عليه الهضرة من الاول ترخف وطلق حجبانو لي كانو معقودين الثلج تكب عليه وطفى ديك العافية لي كانت شاعلة فيه ظنا منه انه كتهضر على غيرو كلام الشيخ لي شعلو عاد رجع معاه ولكن هاد المرة رجع عليه بالحلاوة وهو كسترجع شنو سمع كقولها توكلي عالله وربي ختار لك هداك الشخص كرمش عينيه بشوية شداتو الضحكة وهادشي كولو كضور فدماغو وهو وسط هاد الدهشة لي كتاسحاتو خلاتو قلبو فديك اللحظة غادي ينقز
الشيخ فديك اللحظة تلفت عند يزيد وتبسم ابتسامة عريضة:الله ونعم الاختيار والرفقة(رجع شاف فزينة وهو كطبطب ليزيد على ضهرو)بعينيك مغمضة وبلا حلم نقولك توكلي على الله
زينة الحشمة وتزنيݣتها زاروها بعدما دركات شنو قالت وعتارفات قدامو وقدام الشيخ شنو راودها
نزلات عينيها مبسمة وكتفرك يديها مع بعض نطقات بصوت خافت شبه مسموع الهضرة تسرطات ليها
زينة:الله يدير لي فيها الخير
الشيخ:الحمدلله نقلة طيبة ان هاد الإشارة ابنتي جاتك فهاد المقام الشريف الله يكمل عليكم بلخير وبارك الله لكما في حياة سعيدة وان شاءالله بالرفاه والبنين
يزيد وهو كسمع داك الكلام لي لطالما كان كتحرق باش يسمعو وبالنسبة له دابا بحال الضو الخضر الفرحة كساتو من راسو تالرجليه لدرجة انه عنق الشيخ:اللهم امين اشيخنا العزيز الله يكبر بيك ويطول فعمرك وان شاءالله تحضر معانا
الشيخ:ان شاءالله اولدي الله يكمل عليكم مكاين ما حسن من طريق الحلال والطيبون للطيبات
فديك اللحظة الشيخ صونا ليه التيليفون ديالو ودعهم بحرارة وهو كبارك ليهم ويعاود خلاهم بزوج عايشين واحد الاحساس لا مثيل له متشاركينو بزوج احساس تعطات ليهم فيه الإشارة من عند خالق السماوات والارض بأنه يكملو بزوج ونقطة بدايتهم هي انهم يكملو دينهم عينيه عليها كبريو مقادرش يوصف شنو كحس ناض وتحول حداها كانت مزال منزلة راسها لأن هاد المرة غير على المرات لي فاتو كانت تتهرب وهي حشمانة وكتبقى تضحك فنفسها لكن دابا تحطات امام الامر الواقع خاصها تواجهو ومن علامات جمال المرأة هو الحياء وما اجمل الحياء لي ككون فموضوع الزواج وهادشي لي سالا معاه فديك اللحظة نطق وعينيه كبريو فرحة حب وهيام طال صبرو والحمدلله نال حتى هو
يزيد:هزي عينيك شوفي فيا
كطلب منها تقابلو بعينيها لي لطالما كانو نقطة ضعفو وسبب عشقو ليها كطلب منها تهزهم فيه بلاما تخاف لان كلشي تبدل داكشي لي كان هزات فيه راسها بشوية وطلاقاو عينيهم وواحد الكيمياء داز فديك اللحظة زوين وغزال حيت غيتواجهو فموضوع زوين موضوع الزواج الحلال لي غيجمعهم بزوج فدار وحدة ويوحد قلوبهم نطق بهيام وبأي حاجة مرادفة للحب لي كقطر من عينيه وكاسي قلبو وجوارحو
يزيد:طفيتي عافية الصبر وختاصرتي طريق طويلة عيات رجليا وعياتني حتى انا ولكن كلشي يهون على جالك وعلى جال دابا
كلشي يهون وداك الصبر كامل هانيا على قبل هاد اللحظة عويناتها تاهي كبريو تاهي فرحانة وهي تتسمع بدايتها هي انها تكون معاه مع بغات ترجع
تنزل راسها هنا بدون مقدمات خرج لها لي فقلبو
يزيد:مدابيا نعقد بيك هنا لكن جهدك مكافيش لطلع ونزل على الوراق لكن مدام عطيتيني الطوع على الاقل نقراو الفاتحة هنا ازينة نضمنك ليا ونريح قلبي راك غتولي ملكي فالقريب
الترجي فعينيه كان طاغي اكثر من اي حاجة مخليها غير تتشوف فيه ضارب لها الحساب انها عيانة لكن فنفس الوقت باغي يريح قلبو كانت على الاقل الفاتحة هي لي تبرد قلبو وتزيد تعطيه الصبر بأن لي جاي ليهم وديالهم معرفاتش كيفاش تعبر على لي فداخلها شي لخلاها تهز كتافها بشوية بطريقة طفولية ونطقات بصوتها الرقيق العذب على مسامعو
زينة:واخا الله يجيبنا فالصواب
ربي عطاها إشارة فعلاش غادي تسنى ولا تعكس وخير البر عاجله وهي براسها مدابيها تكون معاه كانت خايفة مين شافتو فحلمها انه يكون تفسيرو تبعد عليه ومدام جاتها من عند الله فمتقدرش تجادل خافت على فراقو وهي ديك الخمس سنين كانت كيف الظلام بلا بيه هازة ذنب ظلم الاحساس لي كان كجيها وهي تتشوفيه كارهها ولا قبل ما يطلاقاو عمرو خطى بالها وهي تتفكر فيه وتقول علام الله بيه ولا اشطرى بيه وكيف داير حالو سنوات كانو كيف الظلام تعوضو لها دابا بنور ساطع ضوا عليها صافي تكسرو ݣاع القيود وما بقى عندهم ما يحبسهم على بعض حمل الصبر نزاح عليه وحلاوة الحلال خدات بلاصتو بغا يطبع قبلة على راسها ولا يعنقها لكن مقدرش حرام عليه وهما فوسط ذلك المقام والشهر الفاضل تنهد ودار يديه على وجهو كستوعب هاد الفرحة سجدة شكر للخالق كافية تبين على ما فداخلو وغير غيخرج غيديرها قدام الكعبة هزات فيه عويناتها كانت قادرة تشوف فرحتو قداش وهي كذلك داكشي لي تتحس بيه فقلبها معالم بيه غير الله من غير انه اجمل ماداز على قلبها كانت كتجلى فحلاوة الحلال لي زوين وزوين بزاف خاصة مع من ختارو القلب
الحاج فريدة ومسعودة شافو فبعضياتهم من مور ما سمعو كلامو هو اما هي كانت غير منزلة راسها ومرة مرة تتشوف فيهم مبسمة مزنݣة وهذا دليل على انهم متافقين بزوج رجعو كشوفو فيهم السيدة والسيد متافقين ناضيين كلشي شاهد على قصتهم وعلى عذابهم ولي دازو منو وهذا بحد ذاتو خلا مسعودة وفريدة تبسمو والحاج كان أول من ينطق من مور كلامهم:اشغادي نقوليكم اشارة من عند الخالق فهاد المقام وفهاد الشهر الفاضل معلينا الا بالدعاء ربي يكمل بلخير ويسر ولي جات من عندو مرحبا بيها
فريدة مبسمة لولدها ابتسامة عريضة وعينيها كبريو وهي تتشوف فيه فرحان كلشي تعوض ليه وفرحتو كانت عبارة على انسانة هاهي مع رجعات لحياتهم كلشي تنور والحمدلله كانت كتسنى هاد النهار بفارغ الصبر النهار لي تشوفيه ولدها ختار شريكتو رفيقة دربو لي غتكمل معاه وتولد ليه خليفتو وسبحان الله لي ختار النهار الاول هي نفسها المكتابة ليه رغم ݣاع لي وقع
مسعودة تاهي نفس الشي فور ما جمعوهم قالت خبار لخير لكن غير سمعات ديك مي مسعودة جيت طالب راغب فيد زينة فهاد المكان واحد الاحساس عمرها حساتو وهي تتشوف كبيدتها لي مدازش فيها قليل تتعوض قدام عينيها نفسو لي جا فيها النهار الاول وحباتو وكانت عارفة ما فقلب بنتها من جيهتو هو لي غتكون من نصيبو عينيها غرغرو وهنا هزات كفوفها شكر وامتنان للخالق كانت تتسنى هاد النهار بفارغ الصبر وكطلب يطول فالعمر باش تعيشو وهاهو كتااب
مسعودة:حمدتك ياربي وشكرتك خليتيني فالدنيا نشهد على فرحة بنيتي
فريدة:الله يطول العمر نشوفو وليداتهم ونجريو فعرسهم بإذن الله
كلشي:اللهم آمين
فديك اللحظة ناضو بزوج قاصدين واليديهم عنقات ميمتها عناق حار شهدو على المعاناة وهاهما كشهدو حتى على العوض يزيد طبع قبلة على راس فريدة وهي تتعنق فيه صبر بزاف وطلباتو يزيد يصبر وهاهو كنال وربي مخيبوش فرحانة مقاداها فرحة البكر ديالها واول مولود لي دخل الفرحة عليها هي وراجلها ولا راجل دابا وغيكمل دينو طبع قبلة على يد باه وهو كرضى عليه تقلبو هي مشات عند واليديه تتعنق فيها فريدة ومقاداها فرحة وكذلك الحاج لي طبعات قبلة على يديه رد عليها هو بعناق ضمها لصدرو كان مطمن وعارف ولدو اشنو غادي يدي بنت الناس والمعدن الصافي اما هو كانت طلاحت عليه مسعودة بتعنيقة من مور ما طبع قبلة على راسها الرجل لي تمناه اي أم يكون من نصيب بنتها وقف معاهم فالشدة وفعز المشاكيل لقاوه والحمدلله كيفما تفرقو هاهما رجعو كتابو لبعضهم والحمدلله صدق من قال الله يلاقينا بما حسن منا اجواء الفرحة طغاو عليهم بعدما تعلن بينهم نية الزواج لي تتجلى فالفاتحة والخطبة اي تبادل الخواتم لي تافقو عليهم واكيد لي كانو جائزين فالشهر الفاضل وحتى فالمكان الشريف بل هو حاجة مزيانة ومخيرة انهم يبغيو يبداو حياتهم ويعلنو نيتهم فالحلال فمكان طاهر بحال هداك وشهر كريم وجب فقط المراعاة لحرمة كل من المقام والشهر رجعو لكلامهم ودخلو نيشان فصلب التحضيرات غيكون داكشي خفيف غير بيناتهم فقط لانه غير اعلان على نية الزواج واهم حاجة فكلشي هي ديك النية نيت
زينة عينيها فالأرض من مور سمعات كلامو لي بين فيه على صبرو القليل وانه نيشان باغي غير يرجعو يديرو العقد حتى هي باغية ومعندهاش مشكل لكن عندها شرط وحيد
زينة:معنديش مشكل نديرو العقد مين نرجعو غير هو العرس حتى يدوزو خوتي الامتحان باش ميتلاهاوش على قرايتهم
كانت تتخمم لكلشي حتى فرحتها ومع ذلك كان شرطها منطقي تقبلوه كاملين الا هو ضربات ليه فراسو واحد الحاجة لكن حتى لمن بعد ويهضر فيها هو وياها
فريدة:اياه باش نوجدو على خاطرنا ويدوز كلشي على أكمل وجه ان شاءالله
مسعودة:وحنا منديرو والو كلشي عليكم بزااف
الحاج:اودي الالة مسعودة قلتها وكنقولها جماعتنا معاكم وهاد النهار السعيد ساوي الدنيا وما فيها
فعلا يزيد من مور كلام مسعودة يدفع الغالي والنفيس ويحط عليها لي وراه ولي قدام غير فسبيل أنها تكون ليه ويوصل داك النهار
فريدة:الحمدلله تافقنا على كلشي دابا نعيطو نعلموهم
مسعودة جبدات تيليفون:اياه نفرح ختها كيفما فرحت انا زينة انا غنعيط لراضية عيطي نت لسكينة وأم الغيث
حركات راسها بآه وجبدو التيليفونات يعلمو الحباب ويلوحو لهم هاد البشارة السارة دارت الطيلي فوذنيها وهي تتسنى ختها تجاوب وجاياها فشكل تقولها غادي نتخطب هزات فيه عينيها كان كشوف فيها غير بعينيهم سيفطو رسالة لبعضهم بلي اخيرا صافي خلاتو هو يعرض ابتسامتو كثر وهو كتنهد براحة منزلة عينيها بخجل وابتسامة غزالة على وجها وسرور الحب مالي قلبها
فالمغرب كانو جالسين تتعشاو حتى عيطو ليهم دقة وحدة مع سمعو الخبار تفاجئو وولا الطايح كثر من النايض والنايض راسو زاند عليه مفهمو والو علاش زربو راه حتى هما خاص يحضرو لكن فور ما عاودو ليهم السبب تفهمو حيت تاهما شايفين شحال تعذبو وخاصهم يرتاحو فأنهم يتجمعو وتقلب الاندهاش لفرحة لي تزادت فور ما عرفو بلي العقد غيكون نيشان ان شاءالله من مور ما يرجعو انيسة جلسات على الزغاريت هي وروعة سكينة غطير بالفرحة وهي تتهضر مع ختها وفنفس الوقت طلعو معاهم فلابيل راضية وبلاما يحسو تقلبات لابيل لدموع الفرحة هما بثلاتة ختهم تعذبات ودابا الحمدلله هاهي تتعوض وجروحها كتجمعو بشوية فرحة كانت اكثر من المرة لي فاتت هاد المرة غير ومختالفة بزاف حيت مكاين سوسة وسطهم مكاين لي غيفرقهم فديك اللحظة روعة خدمات الشعبي فالتلفازة ناقصاه رمضان ولكن بغاو يديرو شوية لومبينوص خوهم الكبير اخيرا غيكمل دينو ويتجمع مع لي ملكات قلبو من شحال يوسف كان كهضر مع زينة مقاداه فرحة غيشهد على زواج ثاني أخت ليه ولكن هادي زواجها غير واستثنائي هادي غيكون زواجها هو العوض لي غتعوض بيه على صبرها وكلما دارت على ودهم طلعو معاهم ابيل فيديو وحطو التيليفون خلاوهم تتفرجو فيهم وهما كشطحو شي كان كعرف يشطح وشي كان غير كي المسطي وطالقينو واولهم وليد لي تحمس وغير كشالي بيديه كيفما جات ديك الشطحة
رؤية لي كانت غير واقفة مبتاسمة وتتصفق شافيها يوسف وهو كشطح وهو يجرها كانت حشمانة مزنݣة لكن سرعان ما ندامجات وهما مشادين كتشطح بلاصتها وعينيهم على بعض جاو الخدامات بزوجات نضامو ليهم وحدة منهم ناسية راسها وجلسات تهز فالبوط خلات يزيد هو الاول رجع اللور بلاما يعيق ويضور وجهو والحاج كذلك مخلينهم هما عيالات تتفرجو ويموتو عليهم بالضحك سكينة لي كانت تشطح وكضور بلاصتها ومدابزين على شكون يبان كثر فالكاميرة تقابلات معاه وهي تتمايل بكتافها خلاتو قرب عندها وهو كتلوا بلاصتو وهمس ليها
وليد:عقبة يشطحو لينا انا وياك ازين
سكينة وهي كتشطح ومبسمة:نشطح لراسي ونفرح برااااسي ولي حسدني يتعمى
وليد هادشي باش تتقتلو تاهي علام وعندها نفس الكراكطير ديالو فديك اللحظة شد فيها وضورها وتشادو ثاني وجلسو كشطحو بزوج ݣعما مسوقين بالنسبة لوخرين عادي كلا كلوز من جيهة ولكن هما لي عارفين شبينهم
وليد:متنسايش تشطحي ليا تانا راني غكنشوف الشعبي والكسدة غادية معاه فالريتم كنتلف
خلاها تفرݣعات بالضحك وهي شادة فيه وكشطحو الا جاها غير على الشطيح غيزيد يغرق غرقة لكلاب عندها معاه وهادشي لي بانليه باغي يدير غض البصر لكن عيبو كيف عيب ݣاع الرجال كانت الفرحة مخلياها زايدة ريتم فالشطيح وفنفس الوقت جاتها فرصة فين تبرد داك السطريس ديال القراية لي جاب ليها الله فين تلفو دابا وباش تنسيه
شطحو حتى بردو قلوبهم وجلسو سخفانين عرقانين فرحانين بأحسن خبار ممكن تجيهم فديك الساعة نيت أنيسة وروعة وراجل انيسة لي يلاه دخل فايتاه الفيجطة دارو النية انهم يلحقو عليهم فانتظار يجي غدا يبداو فالاجراءات لي مغاديش تاخد بزاف حيت غيمشيو فعمرة مستقلة يعني بدون قرعة فقط غيدفعو طلب تأشيرة العمرة لي كتخرج من مور يومين حتال تلتيام بغاو يحضرو معاهم ويكونو جنبهم فهاد المناسبة السعيدة تاصلات بيهم انيسة وعلماتهم على الفور خلات فرحتهم تزاد بإنظمامهم وعدد العائلة لي غادي يتزاد
داز هاد النهار الغزال وجا نهار جديد فإنتظار انه يكون أجمل وفعلا لي جاي ليهم كولو بشارة فرح
كانو غاديين بزوج وسط سوق مكة كانت المشية معاه من مور اعلان الزواج فشكل تقدر تقول غادية وهازة راسها واحساس زوين مراودها مخلي قلبها غيفرفر وهما غاديين يختارو الخواتم آه وصل هاد النهار وهاهما كعيشو فيه فالواقع فبلاصة لي مقدسة كان زربان كثر منها غير جا من التراوح وهو يقتارح عليها يسبقو الخواتم داك النهار ومرفضاتش غادين والمشية معاه غير ومختالفة من غير انهم غادين يختارو الرابط لي غيخليهم مجموعين طول العمر لي هو داك الخاتم لي عندو مكانة فالزواج كان الاهتمام ديالو حتى وهما غير غادي كتمشاو يقولها عندها يخليها دوز هي الاولى لكان شي زحام من جيهتها كجي هو عليه ويخليها هي تمشي لجيهة لوخرا كان داكشي عندو فطبيعتو ماشي غير كتصنعو ومزال نفس الاهتمام لي كان ليها وهي مراهقة منو هاهي تتعيشو وهي دابا شابة واخا ݣاع لي فات فهاد الفترة ودار على ودها كانت حاضية هاد التفاصيل كاملة واهم حاجة لي زادت خلاتها تحمد الله بالليل والنهار عليه هو انه متسوقش انها مزال دايرة الݣبص يعني الخطوبة غدوزها بيه ومع ذلك ترجاها باش انها تقبل يديروها وهنا ككمن فأنه لي يبغيك متحبسو عليك حتى حاجة واخا تكوني فأكفس حالاتك
مرة مرة كضور يهضر معاها وهي كتجاوبو منزلة راسها طايحة عليها الحشمة بهاد اللحظة وكومة من الاحاسيس مكتاسحة قلبها فرحة بالزواج حماس لديك المرحلة الخجل منو العشق لهذا لي قدامها لي قريب غيكون رفيق دربها بإذن الله اشارة سيدي ربي لهاد الزواج واهم حاجة ان هادشي غيتم فهاد الشهر الفاضل وفهاد المكان الشريف وهدا تاهو اشارة على ان هاد الزواج ميسر ومرغوب فيه وصلو لواحد المحل ديال الذهب راقي ودخلو بزوج كانت غير تتشوف وتضور فعينيها من ديما كانت تتسمع ذهب السعودية فاخر وفعلا داكشي لي تتشوف عالم آخر كانت غير تتسمع ودابا هاهي كتاب وغتختار خاتم زواجها منو من بعد ما سلم يزيد على السيد مول المحل طلب منهم انهم يتفضلو يجلسو وداكشي لي كان جات السيدة لي غتخدمهم
يزيد باللغة العربية:بغيت آخر مكاين فخواتم الزواج
البنت حركات راسها بآه ومشات قاصدة لڤيترينا تجيب ليهم تلفت عندها هو بقى كشوف تنهد وهو هايم عينيه فيها بكثرة مكان ملهوف ومتشوق لنهار لي يطلب يديها وتقبل بيه نهار جا متيقش معارفش شنو داكشي كحس بيه فقلبو من غير فرحانة وفرحتو كبيرة ماليها حدود المشكل الوحيد لي عندو فحياتو انها مزال معقدش عليه وهادشي مخليه جالس على العافية تنهد وهو ساهي كشوف فيها منزلة راسها مرة مرة تتهز عينيها تشوف فالسلعة حتى كسر الصمت ونطق
يزيد:ختاري لي يرضي ذوقك كيفما كان
هزات فيه عينيها مبسمة كانت فاهماه شنو كقصد لانه عارفها تتحشم وحافظ طبعها مدازش بزاف دالوقت حتى جا السيدة جايبة معاهم داكشي لي بغاو حطاتهم قدامهم
لبنت:حاليا آخر إصدار هما هادو ديال الذهب الابيض الا كنت كتفضلي الذهب الاصفر نجيبو لك
زينة بابتسامة:شكرا
نزلات راسها تتشوف وكتفلي كل واحد بعويناتها صراحة كان الذهب الابيض راقي وهماوي كلهم زوينين وعصريين كل واحد نساها فلي قبل منو حتى هو كان كشوف معاها ناوي غير يعطي رأيو حيت الأولوية ديالها كانت تتسالي من كادر كدوز لكادر آخر حارت بزاف لأن كلشي زوين فلحظة تفيكساو عينيها على واحد بقات تتشوف فيه شحال وتتفلي فيه بعويناتها حتى هزات راسها للسيدة:عفاك نشوف هذا
داكشي لي كان جبداتو ليها السيدة ومع دارتو فصبعها جاها نيشان ملبوس عليها مواتي صبيعاتها وحتى لون بشرتها كضور فيديها وتشوف فيه من ݣاع الجوانب كان هماوي كيف كنقولو وراقي داكشي لي ولا دابا فانستاغرام وتتشوفو هي نيت فيها مرصع كامل بحجيرات خفاف كبريو وتتوسطو دياموندا مربعة تاني مرصعة بحجيرات صغار مخرجين خاتم زوين فالشوفة وحتى فاللبسة
هزات فيه عويناتها ونطقات بشوية:عجبني هذا
يزيد:سبحان الله هو لي حطيت عليه عيني من الاول
تبسمو لبعضياتهم وهنا السيدة مشات باش تجمع ليهم بعدما خدا ليه حتى هو فاللحظة لي كتسناو فيها كان كضور فعينيه مزال فبالو ياخد حاجة اخرى لكن بلا خبارها فيكسى عينيه فواحد الطقم وبقى شحال كشوف فيه كان سامبل ولكن فنفس الوقت راقي غيناسب ذوقها لانها منهار عرفها كان كلاحظ انها تتميل لأي حاجة بسيطة حتى فاش كانت خدامة عندو كان كبقى حاضي تفاصيلها ديما لي زاكسيسواو لي كدير بساطين جمعات ليهم السيدة وهنا ناضو لاكيس فغفلة منها تلفت للسيدة لمح ليها فيه تجمعو ليه هاهو راجع دابا وداكشي لي كان خلصو مع الخواتم بلاما ترد ليه البال ومن زادو بحالهم غاديين وكهضرو وكل واحد فيهم كتخايل داك النهار لي غيوصل وكل واحد فيهم غيركب للآخر داك الخاتم لي غيكون ميثاق الترابط بينهم لي غادين يجمعهم للأبد بزوج نهار كتسناوه بزوج بيهم بفارغ الصبر غير كل واحد كابح فرحتو واحاسيسو فقلبو
فنفس الوقت فجيهة أخرى بالضبط فالمغرب كانو جالسين فالصالة فالارض شادين الكارطة وضايرين بيها كانو دايرين جماعة زوينة من نهار تجمعو هما عاطينها غير للضحك ولومبينوص فديك اللحظة انيسة هزات راسها وهو يغمزها وليد فهماتو وهنا نيشان نغزات روعة باش تبعها ناضت منساحبة فهدوء ومن مور دقايق قليلة تبعاتها روعة بقاو هما جالسين مكملين الطرح ديال الكارطة حتى طفى الضو
سكينة هزات راسها وهي تتشوف فجنابها:اويلي شهادشي
يوسف:شي سيركيو هذا نوض اوليد نطلبو على المݣانة
فديك اللحظة هما يدخلو بزوجات هازين حلوى بالشموع وروعة هازة الطيلي فيه ابيل ڤيديو مع زينة نيشان مع دخلو كلشي بدا كغني joyeux anniversaire حتى من زينة لي نظامات ليها مسعودة يوسف وسكينة معرفو باش تبلاو كانو ناسيين متسوقوش مع الامتحان قرب وشحال من حاجة لكن هما منساوهمش تحطات الحلوى قدامهم وضارو بيهم سكينة شدات الطيلي فرحانة تتسيفط بوسات كبارين لماماها وزينة وهي غطير ويوسف كذلك حاجة زوينة مين كتكون ناسي شي حاجة وشي حد تتفكرك
وليد كصور ورؤية كذلك وسط جو من الفرح والمرح مع كملو تعانقو وليد وسكينة وتحناو نفخو على الشمع بزوج بيهم تحت تصفيقات كلشي
مسعودة:ان شاءالله بالنجاح وطول العمر ياربي
زينة:اللهم آمين يفرحو ويفرحونا معاهم
يوسف عنق سكينة:كل عام ونت الفريدة ديالي
سكينة كارزة عليه بالجهد وهو خوها وسندها والتويمي ديالها:كنبغييييييك
كانو بحال الفولة وتقسمات مشاركين كلشي وتتشابهو فكلشي مختلفين غير فالجنس فديك اللحظة بداو تتعانقو معاهم وهما كباركو ليهم كان جاي قاصدها وعينيهم على بعض مع وقف مقابل معاها تعانقو وهو كبارك ليها كرزات عليه وكانت اشارة شكر لانه هو الوحيد وسط منهم لي كان عارف النهار لي تولدات فيه هو وخوها وهو لي قالها ليهم بعد عليها شوية وهو مبسم لغة اجسادهم هي لي كانت تتعبر على شنو فقلوبهم من جيهة بعض بلاما يحس لي ضاير بيهم فديك اللحظة نيت كان يوسف ورؤية لي تعانقو كرزات عليه بالجهد وهي تتبارك ليه مع بعدات عليه وهو ينطق
يوسف:نلقاك العام الجاي تاهو ان شاءالله
تبسمات وحسات بقلبها فرفر فديك اللحظة وهي فاهمة قصدو بغاها تالعام لي جاي تكون معاه لأن الصداقة لي كانت بيناتهم حسو بيها بزوج بدات كتطور والعام جاي شكون عارف كيف غادي تكون هاد الصداقة واش اتبقى كيفما هي ولا غادي تزيد وهادشي لي كان كعني هو وعينيه عليها من مور ما عطاها ديك الرسالة المشفرة غير بالكلام قطعو الحلوى ودوزو وقيت زوين مكانش هامهم الكادوات لي جابو ليهم قدما فرحهم انهم تفكروهم كانو مزال جالسين مجمعين ناقصهم غير وليد سكينة شادة الطيلي وتتهضر ميساجات بعدما وراتها الخاتم لي حمقها
سكينة:شفتك قبيلة طاح عليك السر العفريتة
زينة:ايوا اختي هذا ما عطى الله هههه
سكينة:باش كتحسي🥺
زينة:معارفاش كيفاش نوصف تجمع عليا كلشي الفرحة الحب الصدمة كلشي اسكينة معارفة ما نسبق ولا نوخر
فديك اللحظة دخلات حتى راضية كانو دايرين ݣروب واتساب بيناتهم كانو موضوعهم غير على فرح ختها لي كلشي طاير وفرحان لداك النهار فديك اللحظة خرجات من الكروب بعدما شافت خواتاتها مبقات دخلات حتى وحدة مجات فين طفي الطيلي حتى وصلها ميساج من عندو
وليد:آجي لعندي انا حدا لابسين
عقدات حجبانها شوية علاش مسيفط ليها ميساج كان يقدر يعيط ليها ناضت بشوية لابسة فرجليها وغادية قاصداه خرجات من الڤيلا وتوجهات جيهة لابسين فين لقاتو واقف كان داير يديه فجيابو وعاطي بالضهر ضمات يديها عندو وقصدات حتى وقفات وراه:هاي
وليد فديك اللحظة تلفت عندها شافيها وهو يتبسم:كبرتي ليوم
سكينة:الله يكبرنا على طاعة الله هادشي لي نقولو
تبسم ابتسامة عريضة فديك اللحظة وعينيه كبريو الصقيل ضاير بيهم وكان جو لي زوين داكشي باش ختار انه يجيبها تما
وليد:غمضي عينيك
سكينة عقدات حجبانها:شنو لاااش ياكما باغي دفعني هنايا ياااك
وليد:واتي غير غمضي يا قليلة النية
ضحكات واخا هكاك تايقة فيه غير بغات تشد فيها غمضات عينيها خلاتو واقف ساهي كشوف فيها خشى يديه فجيبو وجبد منو واحد السنيسلة جا وراها ومع دارها ليها وحسات بيها على عنقها حلات عينيها كان كسدها ليها غير شافتها تصدمات رجع تقابل معاها وهي تتشوف فيه مصدومة مدهوشة وفرحانة فنفس الوقت نفسها السنسلة لي كانت محمقاها سيفطات ليه تصويرتها غير بالغلط ومسحاتها كانت ناوية تسيفطها لصاحبتها وهي براسها كانت غادي تشريها لكن سبقها اي حاجة كديرها كتزيد معزتو عندها معرفات متقول من غير انه طلاحت عليه عنقاتو بالجهد وهو كذلك مبادلها العناق ناسين لي ضاير بيهم وانهم فوسط دارهم الحب اكبر من كلشي
سكينة وهي مزال معنقاه:ياك جبتي ليا الكادو لاش كلفتي راسك بزااف
وليد:حتى حاجة ما تغلا عليك هداك غير تبات اما هادي هي لي عليها العمدة
زادت كرزات عليه كثر وهما معانقين حالهم كبين على ان النوبة الجاية من مور خوتهم شكون عرف تكون ديالهم زيادة على الاهتمام ديالو فالقراية وكعاونها وراد ليها البال زاد دابا صح كانت عاجباها ولكن الفرحة كانت بسبب انه عرفها كانت عاجبها وجابها ليها واخا هي راه كانت غادي تشريها الاهتمام جميل وككون اجمل من الشخص المناسب
خرجات من الحمام بعدما دارت روتينها الليلي قبل ما تنعس جلسات بشوية بعدما زادت الصوت فالقرآن لي فالتلفازة مسعودة نعسات مشطات شعرها دغيا وقبل ما تخشى بلاصتها مشات وقفات شوية قدام البالكو وهي كطل على الكعبة من الزاج تبسمات فنفسها وهي تتفكر الخاتم وفنفس الوقت النهار لي قريب غيركبو لها وغيكون رسميا اعلان لنية زواجهم عضات على شفايفها معارفاش كيف تصرف فداك النهار لي بقات ليه تلتيام اجلوه علاما يجيو روعة وانيسة يكونو معاهم عينيها على الكعبة بشوية حطات يديها على قلبها وفنفس الوقت تتفكر فيه قريب يعلنها ديالو وهو كركب ليها الخاتم فهاد المقام الشريف تتشوف الشوق واللهفة ليها لكخليوها تعرف بلي هداك هو الشخص المناسب من بعد سنين اخيرا النهار ديالهم قرب كلشي زوين عاشتو هنا هزات عينيها للخالق مع ابتسامة تتشكر فيه فنفسها
فنفس الوقت كان هو فالجناح ديالو سد المصحف بشوية وطبع عليه قبلة تݣعد وهو كطرطق عنقو بشوية يمين وشمال غيصلي واحد زوج ركعات عاد يتكى ينعس فإنتظار الفجر ديال نهار جديد من ايام هاد الشهر المبارك وقف قدام الزاج وهو كشوف الاجواء لتحت صحن الكعبة عامر بالناس وكاين لي مكنعسش حتى كصلي الفجر كدوزو برا تنهد من اعماق قلبو وحاجة وحدة فبالو هو ما بقى قدما فات تلتيام غيحسبها بالنهار والدقيقة والساعة عاد العقد بوحدو لكن على الاقل اخيرا وصلو لأيام لي كان تتسنى من شحال مخلية قلبو غيطير بالفرحة وهو اخيرا غيعلن على نية الزواج لمالكة قلبو والسالبة قلبو عن طريق ديك الخطبة والفاتحة بعد سنين وانتظار طويل تمتم فخاطرو شكر للخالق على جائزة صبرو:الحمدلله
مشات ايام وجات أخرى فالمقام الشريف كلهم تحضيرات لداك النهار لي كان الشوق حار والانتظار فيه على أحر من جمر عند كل واحد منهم وحتى لي فالمغرب كذلك كان بالهم معاهم و السعادة سائدة على كلشي والانتظار كذلك
فلوطيل لي جالسين فيه بالضبط من مور صلاة التراويح كانو حاجزين صالة vipخصيصا ليهم ولهاد المناسبة ريحة البخور دمكة فايح ومخلط معاها باجواء الفرحة والبهجة بطابع ديني كان كلشي حاضر مسعودة فريدة أنيسة وروعة وراجل روعة الحاج وكذلك الشيخ عمر القزابري لي قبل الدعوة بكل حب وجا يشاركهم فرحتهم وشي معارف ديال عائلة الوزاني ناس من مقامهم كعرفوهم وتصادف انهم طلاقاو فالمقام وكتاب لهم تاهما يحضرو يشهدو على الخطوبة ويباركو للزوجين كانت واحد الهبة دينية طاغية جالسة منزلة راسها قلبها كضرب كل من الخجل التوثر الفرحة مجموعين عليها مكتحلمش لا راه بصح ليوم خطوبتها من محبوب قلبها من بعد رحلة المعاناة والانتظار كانت جالسة بيناتهم فريدة اما هو كان حالو من حالها لكن كثر يمكن داخلو تتعاود كلمة اخيرا هو عكسها كان عارف راسو مكحلمش كان عايش كل لحظة بدقيقتها بثانيتها وهو كشوف كل حاجة ضايرة بيهم دابا تتوحي لبداية رحلتو هو وياها بكونها غتكون رفيقة دربو عن ما قريب صبرو بزوج وهاهما كعيشو نتيجة صبر حبهم
كان كلشي كسمع للشيخ وهو كهضر فموضوع الزواج فإنتظار انه يسالي ويركبو الخواتم ويقراو الفاتحة كان كلامو زوين وهو مرافقو بكلام الله حول هاد الموضوع المقدس لي هو ميثاق ترابط وتراحم بين المرأة والرجل سواء كان الزواج تقليدي او عن حب وفالحالة ديالهم هما كسمعو كلامو وهما مختارين بعضهم عن حب عن اقتناع وبعد انتظار فراه أجمل ما ممكن يعيشو
الشيخ:ان شاءالله نتمناو هاد الزواج يكون مفعم بالرحمة والمحبة بينكم وبالتيسير والبركة وبما ان نيتو غادي تم فهاد المكان المبارك هذا لا يوحي الا للخير توكلو على الله
كلشي نطق اللهم آمين كلام الشيخ لي كان كقصد بين الرحمة بينكم كانو هما عايشينو قبل الزواج دار بزاف على ودها وهو مكتربطو بيها حتى حاجة معساك وهي ديالو حلالو اما هي لقاتو السند فالشدة فوقت مغاير على دابا فكيفاش غادي يكون معاها وهما مجموعين بشرع الله تحت سقف واحد فديك اللحظة فريدة ناضت من وسطهم قاصدة الخواتم والشيخ والحاج وشي رجال من دوك المعارف لي حاضرين مزال مواصل الحديث فالدين فالطبلة لي فيها الخواتم نيت كانو زوج تيليفونات محطوطين واحد طالعة فيه ام الغيث لي كانت ففرنسا ممدوزاش رمضان فالمغرب متأثرة وتتشوف فهاد اللحظة لي اخيرا تاهي عاشتها معاهم بعدما شهدات معاهم على معاناة كثيرة ربي اخيرا شاف من حالهم التيليفون لاخر كانت طالعة فيه سكينة ووليد ورؤية ويوسف والخدامات لي كانو كلهم جالسين فالصالة وتتفرجو عايشين معاهم فرحة ديك اللحظة لي هزات فيها فريدة الخاتم ومداتو لولدها وقلبها تاهي معالم بيه غير الله فرحة كانت على كلشي ماشي غير على العرسان حيت كلشي صبر معاهم وكلشي عاش خدا من عندها الخاتم وتلفت عند زينة لي بشوية مدات يديها وهي تترجف مقادراش تحكم فيها وهادي هي الحلاوة خلاتو يتبسم بلاما يحس وهو كركب ليها الخاتم وكتنهد من قلبو فديك اللحظة مسعودة مدات ليها هي الخاتم ديالو خداتو من عندها وهي تترعد وهادشي عادي واخا فرحانة ضارت بشوية وركباتو ليه تحت تصفيق لي ضايرين بيهم وخوتها لي تتفرجو فيهم زينة تبسمات وهي تتشوف فختها دايرة براسها تتزغرت روعة لي كانت كتصور موثقة كلشي هاد اللحظة لي اتبقى ذكرى عمرهم ينساوها
الشيخ:الحمدلله الخاتم نية مباشرة على الزواج وإكمال الدين على أكمل وجه الله يتمم كلشي على خير ودابا نديرو شي فاتحة
كلشي هز يديه فديك اللحظة كقراو الفاتحة تيمنا بالتيسير وإكمال كلشي على خير مع كملوها الشيخ بدا فالدعاء ليهم وكلشي كقول من وراه آمين وهما مع كل دعاء كسمعوه عليهم كحسو بحال الثلج على قلوبهم مكانوش كشوفو فبعضهم عينيها هي فالأرض لكن قلوبهم لي كانت تتراسل مابيناتها
الشيخ:اللهم ارزقهما الحياة الطيبة واجعل فيها خيرا وبركة لهم اللهم أنر دربهما وازرع بينها الرحمة والمودة اللهم ارزقهما البنين والبنات وذرية صالحة تشفع لهما في الدنيا قبل الآخرة آمييين
كلشي نطق آمين فديك اللحظة وهما كتمناو هادشي الراحة والسعادة والخير واكثر حاجة زوينة هو الذرية الصالحة عنقاتها فريدة فديك اللحظة وشي بدا كسلم على شي كان داكشي خفيف لي دارو ولكن بالنسبة لهم هما راه بزاف هو لي غيخلي صبرهم على بعضهم يزيد حتى يرجعو لبلادهم وداك الساع غيدار اللازم اكثر
يزيد عينيه عليها كبريو وابتسامة على مضيئة على وجهو:فرحانة؟؟
زينة عينيها فالأرض تبسمات اكثر وحنيكاتها توردو من مور ما سمعات كلامو حركات راسها بآه:الحمدلله على يدومها علينا فرحة
كان باغي يطبع قبلة على راسها يعنقها اي حاجة تزيد تعبر على فرحتو لكن ميمكنش مزال حرام عليه وزيد رمضان وفمقام بحال هذاك لا يجوز واخا شحال هذا كانو كتعانقو شحال من مرة باسها وهي كذلك كانو فغفلة الله يسمح ليهم لكن تما جاو يتجردوا من كل الذنوب وكطلبو ربي يغفر ليهم عينيه عليها ممحيدهمش ومقادرش يشوف فجيهة اخرى من غيرها حيت دابا قادر يقول ليوم خطيبتو وغدا مراتو حلالو عندهم كامل الحرية على بعضهم بإذن الله🤍
قرب لعندها بشوية وهي جالسة حداه كشوفو فالتصاور لي سيفطات روعة ديال خطوبة خوتهم همس لها بشوية فوذنيها بلاما يدري حد
وليد:العقبة لينا
ضارت عندو مخرجة عينيها زعما خويا حدايا غيسمعنا وفنفس الوقت حابسة الضحك ودغيا ناضت مضاسرة عليه ولكن فبحال هاد الموضوع تتبقى الحشمة فطرة فلبنت خلاتو مبسم بوحدو كي المسطي متبعها فنفس الوقت فالفوطوي لاخر كان جالس يوسف ورؤية لي كشوفو فتصاور تاهما
رؤية مبسمة:جات زوينة زينة تبارك الله يزيد مسكين الفرحة باينة فعينيه
يوسف عينيه عليها:الله يجيب من تفرحنا تاحنا
فديك اللحظة مهزاتش راسها فيه بقات غير تتشوف فالتصاور وقلبها بدا كضرب دايرة براسها مسمعات والو واخا حبساتها الضحكة مخلياه كشوف فيها وعايق بيها تاهو بالتزنيݣة لي طلعات وكان متعمد هادشي باش يقيص ليها النبض من جيهتو
واقفة وعينيها مفيكسين عليها احاسيسها نفاجرو فديك اللحظة مخليين دموع كبريو سايلين مع خدودها وهي تتشوف فالكعبة الشريفة قدامها آخر صلاة فيها صلاتها دابا حان الوقت فأنهم يمشيو من مور زوج سيمانات ديال رمضان لي دوزو تما وكانو احسن ما عاشت فحياتها عاشت المعنى الحقيقي ديال طهارة الروح صفاء القلب وحلاوة الفرج سيفطات ليها قبلة وشكلات يديها على شكل قلب كانت غير بالحركات تتعبر على حبها لهاد المقام حبها لدينها لي كان هو دواها وخلاها ترجع للحياة فاش كانت كتحتاضر وهي هازة يديها لمحات الخاتم خاتم خطوبتها وزواجها عما قريب هدا بوحدو حاجة اخرى وفرحة من نوع آخر باش انك تخطبي لمالك قلبك فبلاصة بحال هاديك وفشهر بحال هدا فراه هنا ختمات سلم الامنيات حسات براسها فظرف قصير حققات كلشي وملكات الدنيا ومافيها رجعات صحتها ونفسيتها وبعد طول انتظار ومعاناة رجعات علاقتها بلي بغاتو من اول نظرة ومبقاش بزاف مباشرة من مور رجوعهم غادي تهز سميتو وتولي ديالو شنو بغات مزال نطقات من قلبها بعدما مسحات دموعها وهي تتشوف فجنابها وكضور فعينيها على أشرف واطهر مكان
زينة:شكرااا مكة🤍🕋
فجيهة اخرى كان هو عينيه على المكان ونفس حالها ماشي اول مرة يدير العمرة ولكن هادي ماشي بحال لي قبلها هادي استثنائية هادي عتابرها بدايتو ونقطة انطلاقتو ومغيكونش غير بوحدو غتكون معاه رفيقة الدرب معشوقة القلب والروح ملاقيش باش يوصف من غير انه فرحان هز يديه بشوية لي فيها الخاتم وطبع قبلة عليه حركة كانت تتبين انه عاشق ولهان وصل لأعلى درجات الهيام
كان آخر نهار فمكة المكرمة لي الجلسة فيها كانت زوينة واستثنائية عليهم كاملين كلا خدا شنو بغا دوزو فيها النص فرمضان ومن بعد توجهو للمدينة المنورة وحتى تما كانت زيارة روحانية من نوع آخر زيارة المسجد النبوي الشريف والمقبرة الشريف لي هي من أقدس ما بالمسجدحين يرقد سيد الخلق النبي محمد عليه أفضل الصلاة والسلام زيارة زادت عززات الطمأنينة والخشوع فقلبها كان احساسها ليها تاني بوحدو بالهداوة الطاغية على المكان ولي هي روضة من رياض الجنة
ومن مور اسبوع وهما فيها هزو الرحال للرياض تما فين كان عندهم لقاء مع الطبيب لي ديجا دوز ليه طبيب المغرب ملف حالتها على ود باش يحيد ليها الݣبص وبمرور سيمانة فمدينة الرياض هكا كانو ختمو رحلتهم الروحية لازمهم يرجعو لأرض الوطن بروح جديدة كاسيها الصفاء لي ساد على قلوب كلشي وهما راجعين لبلاد عارفين بدايتهم وعارفين الطريق لي غادي يشدو لي بلاصة الشوك والحجر لي كان فيها كلشي تبخر تسرحات وتعبدات بالحب والقلوب لي رتاحت وولات سهلة منورة مضوية غيسلكوها كاملين بعدما تعترو فيها بزاف
الفرحة سايدة على دار الوزاني لي طوموبيلات مستفين قدامها والناس كدخلو تحت ترحيب الحاج ووليد ليهم فالباب لي حضر فالصدقة دالعمرة هاهو رجع ثاني يشاركهم فرحة عقد القران دالبكر ديال العائلة التحضيرات لي كانت على مدى زوج سيمانات على الدار كانت باينة مغيدوزش ضريب دالصداق عادي غيكون من داكشي هماوي حيت العرس مزال بعيد شوية حتال للصيف بغاو يكون ضريب الصداق كبير لي دخل كجلس كانو مقادين الدار بحال القاعة بالطوابل وكلشي متول كل طبلة كان شي كعرف شي وأكثر الحاضرين من الجيران والصحاب وحتى شركاء العمل سواء رجال أعمال ولا موظفين من شركة الوزاني لي كان حاضر منهم كل من حسنية لبنى وعادل وشي وحدين كانو قراب لزينة ولعائلة الوزاني فريدة كترحب بالناس وكتجري من هنا ولهيه معاوناها ام الغيث ومليكة ومسعودة كذلك واخا الصحة مشات لكن تتجري ففرح بنتها لي فرحتو عطاها الجهد كان هاد المرة غير على لي فاتت مكاين سوسة مكاين حقد كلشي لا من روح ولا قلوب كانت سليمة جالسة فالطبلة المخصصة للعائلة حدا سكينة وختها لي جات هاد المرة يشاركو بنت عمهم فرحتها كلهم بقفاطنهم كلشي مقاد ومفركس جبدات تيليفونها وسيفطات ليه ميساج
سليمة:عبد الكريم بقات بلاصتك وكانو كهضرو عليك مساكن
تنهدات مكانش داخل قبل متجي مع عرضات عليها زينة سولاتو وقاليها مغاديش يمشي معطاهاش راس الخيط ولا سبب مباشر وهو عرفات بلي كان قريب ليهم وعزيز عندهم فعلاش غادي يتغيب هاد النهار شهر ونص وهي معاه مشافت منو غير الخير وكان ديما كلامو عليهم زوين وهما كذلك
لفوق حلات عينيها بشوية ومع الحلة تبسمات بدهشة عجبها راسها بالميكاب والمشيطة لي جاو مواتيين مع القفطان تنهدات براحة لي مقاداها هي فرحتها هزات تيليفونها من قبيلة مطلات عليه مع حلاتو تبسمات وهي تتشوف لميساج ديالو
يزيد:تكايسي عليا ليوم زينك غيطير ليا النقشة لي بقات
ضحكات فنفسها مشافتوش ليوم ݣاع وحتى لميساج كان من قبيلة فاقت بكري مشات لحمام بالخف ومين جات وهي مع السيدة لي كقاد ليها تكلفات ليها بالماكياج وعاوناتها تلبس القفطان
البنت:جيتي فنة تبارك الله انا غادي نزل مع يعلموني بلي غتنزلي نجي نركب ليك الڤوال مبغيتش نديرو ليك دابا غيتقل عليك
زينة:واخا احبيبة ربي خليييك
لتحت كانت الحركة كثيرة والداخل كثر من الخارج الطرب الاندلسي عاطي رنة لمكان وريحة بخور العمرة فايحة فديك اللحظة دخل الحاج ومعاه العدول لي وصلو كرحب بيهم بحرارة وجلسو مضايفينهم ومضايفين الناس كاملين بآتاي والحلوى علاما ينزلو العروسين
داز غير شوية الوقت وهي مزال تتشوف فالمراية مبتاسمة فرحة العروسة طاغية على قلبها وفؤاذها تتخايلو كيف غتكون ردة فعله مين غادي يشوفها غيكون فرحان ومقاداه فرحة بحالها وهاد ليام كلها ديال التوجاد كان كل مرة تتشوفو هكاك غير تقيسو يطير غير من عينيه تعرف قلبو شنو فيه تتمعن فالمراية وهي تتحقق فالماكياج كيف جاها عجبها راسها حاسة بقلبها غيخرج من بلاصته ليوم رسميا غتولي على ذمتو وغتهز سميتو طول العمر غير التفكير فهادشي كخلي قلبها غينقز بعد طول انتظار هاهي تتعيش الحقيقة هي وياه لي كانت واحد النهار حلم تلفتات شوية النݣافة خلات الباب مردود شافت روعة واقفة يمكن غادي دخل عندها كانت مبسمة حيت غتشوف ردة فعلها تاهي كيف جات مزال مشافها حد
أنيسة جاية هازة جلايل قفطانها:مالكي شكاين؟
روعة وهي صفرة لكن ممخلياش الخوف يسيطر عليها مباغياش تسرع:يزيد ساعة ونص وهو غابر العدول وصلو صونيت ليه خمسة دالمرات مكجاوبش
انيسة فديك اللحظة بلعات ريقها هاهي لاحظات هادشي وسكتات لكن كبانليها شي حاجة ماشي تلهيه:سكتي كيفما سكت تانا تنشوفو شغنديرو زينة متعرف والو وماما حتى هي دخلي عندها باش متحس بحتى حاجة انا غادي نبقى نصوني
فديك اللحظة وقفات عليهم فريدة باستفهام عينيها على بناتها:فين خوكم الناس جاو والعدول كتسناو العروسة خاص تنزل
فديك اللحظة بلعو ريقهم بزوجات لانهم معارفينش الجواب وهاد اللحظة لا تصح لجواب معرفتش زينة لي كانت لداخل سمعات كلشي دغيا شافت فالمراية بصدمة بعدما ختافات ابتسامتها جملة يزيد مكاينش خلاتها تسترجع ذكرى واحد من اسوء النهارات لي دوزات فحياتها لي منين بداو التحضيرات وجا هاد النهار ومع بدات تتقاد لهاد النݣافة كانت تتحاول تناسى لڤيرسيو لقديمة بكونها عروسة لكن القدر فكرها بيها وحسات بلي الزمن كعاود نفسو غير المرة لي فاتت كانت هي لي كقلبو عليها اما دابا بلعات ريقها وهي تتحس بالدم نشف فعروقها مقادراش تقبل فكرة يكون هو دابا لي….
قلبها بدا كضرب بالجهد بغا يخرج من بلاصتو مباغياش تفكر فديك الفكرة لي كضور فبالها لأنها مستحيل دار لي ميدار على ود هاد النهار مستحيل يدير مدارت هي قبل خمس سنين واخا تفرضات عليها زائد خايفة لتكون واقعة ليه شي حاجة وهي مدواتش معاه ليوم ݣاع باش غير تعرفو فين كاين ولا فين مشى شدات الطيلي ويديها كترعدو غتسخف ليهم تما مقادراش على الدموع مقادراش على شي صدمة بعدما صفات روحها اي حاجة جات اتكون هي اللخرة ليها خصوصا فهاد النهار مقادراش تستحمل شي حاجة تخسر ليها فرحتها تتصوني والطيلي فوذنيها كترعد وتاهي نفس كلام ختو مكجاوبش دخلات تتصوني ليه فواتساب ابيل عادية دازت على كلشي الطيلي شاعل لكن ما من مجيب بدات تتراودها فكرة انه تكون واقعة ليه شي حاجة الله يحفض خبطات الطيلي وهي مفقوصة معصبة وخايفة الناس لتحت وكلشي جاي يشاركهم فرحتهم باش فاللخر يتعاود الزمان مقادراش تعيش نفس المعاناة ونفس المأساة مقادراش تتشوف فيديها كيف كترعدو والرجفة سرات مع ذاتها كاملة وهي جالسة بلاصتها
فديك اللحظة دخلات روعة عند بالها مزال مفراسها ميتعاود تبسمات بالسيف عليها مخبية خوفها ونطقات:جيتي فنة تبارك الله
زينة شافت فيها بعينين حمرين وصفارت:نوضي يلاه نمشيو نقلبو عليه
لتحت كانت فريدة غادية جاية مبسمة فوجه الناس الدار عمرات والداخل كثر من الخارج لمحات للحاج لي كان جالس مقشب مع خوه والعدول وشي رجال مجايب خبار فديك اللحظة ستأذن منهم وناض عندها خوفها من لي فات لي راودها تاهي خلاها مقادراش تسكت وتدمص القضية
فريدة قربات عندو وهمسات ليه مبسمة فوجه الناس:يزيد غابر سارطاه الارض ومكجاوبش فتيليفونو متبينش الحاج عفاك
الحاج فديك اللحظة جمع الضحكة بحال نزلات عليه بتصرفيقة بعد عليها ونطق:تاصلتو بيه
حركات راسها بآه وباغية تبكي لو كان هادشي وقع بلا داكشي لي فات كانت اتجيهم عادي يمكن جاتو شي خدمة على غفلة ولا شي حاجة لكن فوبيا الماضي كانت مزروعة فيهم كاملين مقادرينش يعاودو يعيشو لي فات الحاج فديك اللحظة زفر وضار خارج قاصد وليد لي كان واقف قدام الباب هو لي كلفوه يرحب بالناس لي يلاه كجيو
الحاج:مشفتيش خوك امتى آخر مرة دويتي معاه
وليد:شي ساعتين دابا قاليا غنمشي للشركة بالخف ومن بعد ندوز للدار نلبس
فريدة:طيييير للشركة شوف واش كاين ملقيتيهش طير للدار
وليد عقد حجبانو:اشكاين الوليدة اشواقع
الحاج دفعو بشوية:طييييير ماشي وقت الهضرة
داكشي لي دار معاودش الهضرة واخا معرفش شنو وقع تاصل بيه وهو كديماري ونفس الحاجة مكجاوبش الحاج شد فمراتو من كتابها
الحاج:تهدني كلشي غادي يتحل دابا يبان وكلشي ايدوز مزيان بإذن الله
فريدة حطات يديها على قلبها:قلبي غيسكت الحاج
الحاج كرز عليها:رخفي على راسك الناس مخاص يحسو بوالو كلشي غيدوز بخير ولدك كان يحماق ويجي هاد النهار يبان يبان غا رتاحي
حركات راسها بآه فنفس الوقت خايفين حتى لتكون واقعة ليه شي حاجة ترونو وتخربقو والوقت كدوز فديك اللحظة وقف عليهم
عبد الكريم:سلام عليكم
فريدة تلفتات غير شافتو تبسمات:اهلا ولديي مرحباااا بييييك
عبد الكريم طبع قبلة على راسها:الله يكبر بيك الالة مبروك مدرتو الله يكمل كلشي بخير
الحاج وهو كطبطب عليه بعدما تحنى وطبع قبلة على يديه:الله يرضي عليك اولدي دخل مرحبا بييك
تبسم ودخل وبقاو هما فلباب كهدنو فراسهم باش يلقاو وجه وجهد يقابلو بيه الناس فهاد اللحظات الوشيكة يوسف لي كان معنق عبد الكريم وفرحان حيت جا بعد عليه وهو كرحب بيه وعبد الكريم مبسم له جات مسعودة عنقها وهو كبارك ليها من بعد دخل مع الناس نيشان للطبلة لي فيها هما سليمة غير شافتو تفاجئات لكن مبيناتش زينة بوحدها لي عارفة قالتها ليها سكينة عنقاتو فرحو مين جا لأنه محسوب واحد من العائلة جلس وعينيه فعينين سليمة تبسم ليها وهي كذلك لكن كانت حاسة بيه ماشي تلهيه اما هو نزل راسو تتنهد مكانش جاي لكن فآخر لحظة تقلب كلشي بقى فيه الحال مو لي عرضو عليها ومجاتش مخلياه جاي حشمان واخا هما مبينوش ليه لكن مدارتش بحساب الجورة وبلي كلشي مكاتيب
ســـجـــن عـــكـــاشـــة الـــمـــركـــزي
فزنزانة ديال الإنفرادي مظلمة وضو خفيف لي جاي من ديك البولة لي تتطفى وتشعل طايح فالأرض كاو والدم سايل ليه من نيفو وعظامو مدݣدݣين بعدما كلاها فيهم مزيان قتلة ربانية ديال بصح محال يفيق منها مݣود وحتى لعندو شي زهر أنه يسلك خاصو مدة طويلة يلاه يرجع كيف كان مع مضاعفات واقفين قدامو وعينيهم عليه بعدما طفاو داك الغليل لي كان شاعل فيهم من جيهتو كل واحد على جال لي بغاها قلبو وكان ضحية ديال هاد الحيوان القانون خدا ليهم حقهم لكن ضروري ميديرو شرع يديهم كان هو كثر من لاخر حيت هو حبو قديم عكس أنور لي يلاه تعرف على صافية كان كل مرة كقول ليوم نقصدو غدا نقصدو حتى جابليه انور لاسبيكتور لبارح فليل بلي غادي يحولوه لحبس ديال الجديدة من هنا لسيمانة ولأيام لي جاية هو مغاديش يكون مسالي غيتزوج وخاصو يتفرغ لمراتو متشغلو عليها حتى حاجة فقرر انه يغيز الشغل بالحبة من تحت الطبلة لي كلشي تتحل بيها والواسطة ومعارف انور قدرو يدخلو عندو تالحبس تحاسبو معاه قبل ما يغيرها فديك اللحظة يزيد هز رجليه تالسما ونزل عليه نيشان لزنطيطو لي دار فيه هاد الكبت خلاه فاق من غيبوبتو وهو كتلواا هرس ليه شي بيضة مفيهاش الشك يخليه نيت يخليه عاجز حياتو كاملة عاد الفضيحة لي دار فديك اللحظة دق عليهم الݣارديان:الشاف اللجنة قريبة تجي
انور فديك اللحظة تلفت عند يزيد:يلاه نغيروها
يزيد حرك راسو بآه وعينيه مزال عليه ديك العافية ديال الڤيديو ديالها وهي تتقاومو بردها فيه دابا مين دخل وهو كعطي فينما جات كروشيات جمعو بشمال التصرفيق واخا تاهو بغا يبدا يقاوم لكن ضعقو حيت طول منو وعاد انور لي اصلا بوليسي الرياضة عندو فالدم مخلاش من جهدو تاهو على ديك البنت لي ضيع لو مكانش طلاقاها وحبها وختارها تكون شريكة حياته كانت اتبقى ضايعة لان خدمتو خلاتو شاف الحالات ديال ضحايا الاغتصاب داكشي باش تفهم وموزنهاش بقطرة ديال الدم لو مطلاقاهاش كانت اتبقى ضايعة والمجتمع مغاديش يرحمها مجا فين يخرج حتى جمع الدفلة ولاحها عليه عينيه قرطاس وهو كشوف فيه غير معندوش الوقت اما يزيدو خرجو بزوج انور صافح لاݣرديان لي كان عندو يد خلاه يدخلو لإنفرادي عقوبة غير بنقاش بسيط هو واحد خونا معاه فشومبغ باش يعزلو ليهم وحد ما يدري وحتى ايلا عرفو مكاين لي يتسوق اتلصق فشي مدابزة مع شي حد من المدابزات لي كنوضو فليشومبغ ولا الساحة وتتشخض كروشيات
يزيد صافحو:حلاوتك وصلاتك وتهلاو فيه
الݣارديان:الله يخلف ااستاذ عزيز علينا نشاركو فهاد الاعمال الخيريه وغنتهلاو فيه لي تعدا على بنات الناس نتعداو عليه هنا وخبارو غتوصل تلهيه وتاهما غادي يتهلاو فيه
انور:داكشي لي بغينا ابا عروب سلم على التهامي وتهلا فالوليدات
ودعوه وخرجو من الباب اللوراني كيفما دخلو وحد مجاب خبارهم او حد مغادي يوصل خبارهم بلي جا وحتى لوصلات اللعاقة تضمص القضية
يزيد:متعطلوش لحق عليا دابا
انور فديك اللحظة قرب ليه وعنقو كبارك ليه وفنفس الوقت كضحك:مبروك ما درتي الله يكمل بلخير الواحد هو لي يغيز دقة واخا يكون عريس
يزيد وهو كطبطب على ضهرو:الله يبارك فيه ابا انور عقباليك تانت ان شاءالله وديك بنت الناس عمرني نسى خيرك
انور بعد عليه:نت لي منساوش خيرك كن ماكنت نت لي جريتي فالأول صوت دوك البنات عمرو كان غيوصل لينا ومكنتش غادي نتزعط
ضحكو بزوج وهما مصافحين فعلا شي نفع شي توادعو وهو كضرب ليه موعد غيطلاقاو فالڤيلا تاهو معروض مع ركب فالطوموبيل شاف شحال ساعة عينيه تبلزو تعطل بزااااف وشحال وهو غابر اكيد تخلعو غير من ليزابيل فديك اللحظة اول كونڤرساسيو كانت ديال ختو كتب ليها هانا جاي وهو يطفى ليه الطيلي زفر وديمارا طاير باغي غير فوقاش يوصل ويشوفها واجدة كتسناه باش تهز سميتو ويولي على دمتو اكيد بالها مشغول عليه لكن أهمية هاد لبلان لي خدا من عرسو ومشاليه كانت كبيرة دابا عاد غادي يبرد عاد غيحس بحلاوة هادشي لي غادي يعيش بعدما خدا ليها حقها على أكمل وجه ݣاع داك لوطرينمو دحياتو كاملة البوكس لي كان مبلي بيه فالمراهقة الكراطي لي كانت دخلاتو مو ليه وهو باقي فالإبتدائي خرجو فيه ليوم كروشاه مزيان وخلاها ليه متورخة عاد خلي الحباسة مين غتوصلهم لخبار بلي مغت/صب غيتهلاو فيه ويجلسوه على القرعة خاصة مع الحبس ديال الجديدة صعيب والشائع فالحبس ان كلشي داخل على الكوارث لكن تجيهم لإغتصاب كوليو فدائيو الوطن مكتقبلوهاش وكوسعوها لمول الفعلة وصل وهو طاير عرف بلي الناس جاو وهو لي عريس آخر واحد غادي يوصل هز الكوستيم ديالو ودخل طاير بلاما يدري تاحد دخل من جيهة لاكاب وبقى كتسلت حتى طلع غادي لبيت فين جاتو لخبار غادي تلبس وتقاد فيه
جالسة شادة فراسها ݣاع سيناريوات ديال افلام الرعب دازو فبالها واش خلاها واش واقعة ليه شي موصيبة بكات حتى ساح الريسيل مبقاتش مسوقة لماكياج بغاتو غير هو يبان ولا تعرف شي حاجة سمعات لباب تحل مهزاتش راسها عند بالها روعة لي مشات تجيب ليها الحلوى حيت طونسيو بالخلعة طاح ليها وحسات بالسخفة تتجاهد لتولي طايحة ليهم تما ويوليو فمقدو فيه زادوه فيلة كان واقف مبلوكي بلاصتو وهو كشوف فيها بالقفطان مقادة مصايبة والمشيطة مع التاج لي لطالما كان كشوف العروسات دايرينو وهاهي دابا دايراه ومقادة خصيصا ليه باش تولي رسميا ديالو مزال مهزاتش فيه راسها باش يشوف الزين ويزيد يتلف كان راسم ابتسامة على وجهو وعينيه عليها ومع تقدم أول خطوة هزات راسها ودموعها سايلين غير هزات فيه راسها ولمحاتو محساتش حتى شهقات وناضت طلاحت عليه وبدات تتبكي وهي كارزة عليه وهو كذلك ضور يديه على خسرها ضامها لصدرو معتارف بالغلط ديالو بلي كان خاصو يعلم
زينة:خلعتيني عليك حسابلي واقعة ليك شي حاجة ولا مغاديش تجي هئ هئ
مع سمع كلامها بعدها عليه وهو شاد وجها بين يديه كمسح ليها دموعها وهي تتفلي فيه بعينيها وكلمة مافيك والو ياك كتردد على فمها فيكسى عينيه فعينيها ونطق:متفرقني عليك غير الم/وت
زينة لي كانت كتروي قلبها بالشوفة فيه وتتحاول تجرد من داك الخوف لي تملكها وݣاع دوك الافكار الخايبين وهو دابا حداها شدات فيديه لي على وجها وكرزات عليه تتزيد تأكد وتيقن بلي راه جا هاهو معاها والفرح مغاديش يتخرب نطقات وهي تتجمع البكية وفنفس الوقت كمسح ليها دموعها
زينة:فين مشيتي خوفتينا عليك كاملين
يزيد بصوتو الهادئ كحاول يهدئها حتى هي:مشيت نريح قلبي وقلبك ودابا هانا جيت متفكري فحتى حاجة من غير ليوم ديالنا
واخا مفهماتش قصدو لكن محاولاتش تحكر كيفما قال المهم جا رجع معنقها بالجهد خاشيها مخليها تنفسات الصعداء وتتقول الحمدلله الدفئ ديالو جنبها عاود رجع ثاني بعدما عقلها مشى بعيد
فديك اللحظة تحل الباب هنا دخلات فريدة وروعة هازة طبسيل فيه كعب الغزال وكاس الحليب غير شافوه تدهشو حتى هما بعدات عليه شوية مين شافت فريدة لي طلاحت عليه مهولة
فريدة:الله ياولدي مشيتي تسكت لينا القلب فين مشيتي وكيفاش دخلتي مشفتكش
يزيد طبع قبلة على راسها:مديري فبالك والو هانا جيت
روعة:طيرتيها منا يا خويا اويلي ومزال ݣاع ما لبستي العدول كتسنى
فريدة جراتو لبيرو:زيد زيد تلبس معمرني شفت شي عريس غابر نهار فرحو وداخل علينا بالسبرديلة الله يمسخك
ضحكات زينة وهو كذلك قبل ما يخرج غمزها وزاد يلبس تاهو مخلي فريدة نزلات تعلم الحاج وانيسة وݣاع لي جراو مع البلان بلي السيد غابر ويعيطو لوليد يرجع زينة وروعة تعانقو وهما فرحانين طارت منهم خلعة
روعة:ساح ليك الريسيل انا نعيط ليها تعاود ليك
زينة وهي تتنش على وجها وكترجع فيها النفس رجعات السيدة قادات ليها ثاني دخلو عليها خواتاتها مقاداهم فرحة كنعقو فيها بهاد النهار السعيد لي اخيرا غيتحقق فيه المنتظر وختهم غتنال جزء آخر من جزاء صبرها لي هو غتوج علاقتها بمحبوب قلبها بعد انتظار دخل عندها يوسف لي عنقها عناق حار وبغا يتحنى يبوس ليها يديها لكن مخلاتوش جراتو عندها وهي تتعنق فيه بالجهد كانت مكانتها خاصة عند خوتها كاملين داكشي باش فالفرح ديالها اليوم كانت فرحتهم ليها زايدة نغزة احساس زوين انك تشوف واحد الشخص داز من فترة صعيبة وتشهد حتى على الفترة لي غينور فيها وهادشي كان كنطابق عليهم
جات فريدة علماتهم بلي جا وقت أنهم خاص ينزلو خرجو لبنات برا حيت غادي ينزلو معاها وخلاوه هو يدخل عندها فريدة بدات تتقاد ليه فالكول وتتوجدو زعما دابا غيدخل بصيفتو عريس فرحتها مقاداها وهي تتشوف البكر ديالها ولا راجل ديما هاز راسها ودابا غيزيد كثر دا لالة البنات ولي بغاها له قلبو وعلاش لا راه مرضي وربي مخيبوش عنقاتو بالجهد الفرحة وهي تتشوفو ضارب لكوستيم عريس من الطيارة ماليها مثيل وخواتاتو كذلك طبع قبلة على يد ميمتو وهي كترضى عليه عينيها غرغرو لكن تمالكات نفسها عنق خواتاتو بزوجات سكينة وسلم على راضية ودابا جا الوقت فين يدخل عند عروستو بصفتو عريس دفعاتو فريدة بشوية باش يدخل عندها وسدو لباب وراه
هزات فيه عويناتها بشوية من المراية وناضت ملفتة عندو وهي تتشوف فيه كيفما عينيه عليها تاهو حباتو وهو دابا كبان عريس ديال بصح وسامة وطولة وتجريدة ليوم يكتبو على بعضهم من ليوم متفرقهم غير الموت تقابلو مع بعض وهي هازة فيه راسها غير عيونهم لي تتهضر فرحتها طاغية حيت الحمدلله لي كان فبالها مشى هاهو قدامها دابا وغينزلو يعلنها قدام الناس ديالو وملكو قرب لعندها بشوية بلا حتى كلمة وطبع قبلة كبيرة على راسها بعدما حيد ليها الڤوال تتعني بزاف ومعانيها كبيرة وهي قدامو دابا بصفتها عروستو مع بعد عليها سمعو الدقان جا وقت النزول بلا حتى كلمة مد ليها ذراعو خشات يديها وهي شادة فيه هادي هي نقطة البداية لي جات من بعد صبر طويل
الصلاة على النبي ملات المكان والزغاريت كذلك وهذا دليل على ان العروسين نازلين كل الحضور تلفت وهطى اهتمامو لجيهة الدروج مين غادي يبانو وهما داخلين شي كصور وشي وقف كاين لي ݣعما كعرف العروسة وناوي ليوم يعبرها يشوف كنة عائلة الوزاني المنتظرة كيف دايرة واش نيت خداو الزيت حيت دائما عروسة الابن البكر هي لي كتكون عليها الانظار قلبها كضرب وهما نازلين شادة فيه وعينيه على الدروج لتمشي تعكل حيت لابسة الطالون نازلين بالشوية وخواتاتو وخواتاتها وراهم كصليو على النبي الانظار كلها عليهم وهما غاديين مبسمين واخا كانت دايرة الڤوال كانت تتبان او بالضبط كان كبان الزين لي زاد بكونها عروسة والسر طااح لي عمرو شافها هاهو شافها وبصم بلي دار وعرفو اشداو زين زينة بحال سميتها يزيد لي كان غادي ومبسم فوقما تجي عينيه فعين شي حد كعرفو كحييه وكردها عليه تاهو بكل لباقة وفرحة شي كصور وشي تتفرج والصلاة على النبي مواصلة العائلة الحباب الصحاب كلشي كان حاضر يشاركهم هاد الفرحة زينة لي مع كل خطوة تتجي عينيها فشي حد تتعرفو تتشير ليه بيديها بشوية ولا تسيفط ليه بوسة فالهوى وهي فقمة الفرحة وهما كقربو للطبلة فين مجهز كلشي خصيصا ليهم باش يكتبو كتابهم على سنة الله ورسوله وداكشي لي جلسو بشوية حدا العدول لي صافحهم يزيد واحد واحد لحظة زوينة فرحتها مشاركينها بزوج بيهم دقة وحدة كل واحد فيهم فدماغو كقنع راسو بلي آه راه وصلات ديك اللحظة أخيرا كلشي ضاير بيهم وكلشي فرحان راضية كانت تتهضر لزينة فوذنيها على فين دايرة لاكارط ديالها طارو جابوها ليها وهما جالسين يزيد كهضر مع العدول حتى وصلات اللحظة المنظرة بالريق الناشف
العدول:إذن اسيادنا نبداو على بركة الله
العدول الثاني جبد البيسي خدام فيه:بسم الله
المصور لي كان وسط منهم كوثق هاد الحدث الزوين واهم ما فطقوس الزواج عقد القران شاد على كلشي وكصور فكلشي
العدول:البطاقة الوطنية ديالك اولدي
يزيد حل الكوستيم وجبدها مدها ليه يديه عرقو وقلبو كضرب وهو كنطق فدماغو ما بقى والو ما بقى والو ملفت عندها مبسم وهي منزلة راسها فديك اللحظة انيسة جاية هازة واحد الصندوق حطاتو فوق الطبلة وجلسات تاهي تتفرجو زينة كانو عينيها على داك الصندوق مسولاتوش ولكن بقات غير تتشوف فيه من تحت الفؤال زوين وكان فالأغجونطي كبير شوية وتصميمو راقي ملكي
العدول:خديتي صداقك ابنتي؟
زينة فاقت من سهوتها وشافت فيه يلاه غادي تنطق وهو يسبقها يزيد منعت بالصندوق:آه هاهو
العدول عينيه على البيسي:فتحو اولدي وقوليا المضمون ديالو
داكشي لي كان هي نزلات راسها مقدرات ݣاع تشوف شنو فيه حتى تعزل بوحدها ولكن راه غالب باين فيه الفلوس لي هما حق عطاه ليها الله فهاد الليلة ديال عمرها
يزيد:300000ألف درهم 50فالمية منها كاش و 50شيك طقم مجوهرات وأوراق دالملكية
كان كملي عليه غير بشوية وهو فاتح الصندوق غير جيهتو فور ما كمل رجع سدو وحطو حداها من الحاضرين حتى شي حد ما تسوق لان هكاك عندهم كتعطى الصداق منخوي وهماوي عكس عائلة زينة لي شائع فالطبقة الشعبية كتعطى غير الفلوس ومكجيبو خبار حيت العروسة والعريس كمشيو يتكاتبو عندهم
سكينة بهمس:غادي نكوش لزينة على داك الصندوق ونمشي نحرݣ بيه ومنعقلش عليك
وليد تلفت عندها:نعطيك شحال مكان فيك ونديك فين باغية تحرݣي بالوراق غير نوضي نجلسو بحالهم تا حنا
كان عند بالها غادي يتقلق ويبدا عليها ياك ياك ساعة السيدة غير مكزيد يبين ليها شحال غارق بالكلام لاحتها ليه غير بالضحك لكن المعنى دجوابو هو غارق وبزاف خلاهم كشوفو فبعضياتهم ناسيين لي ضايرين بيهم
العدول موجه كلامو لزينة:عندك شي شروط تبغي ديريهم فالعقد ابنتي؟
زينة عينيها فالأرض:لا لا اسيدي
اشمن شروط هي غير مين وصلات هاد الساعة عندها الدنيا وما فيها فديك اللحظة قليبها فرفر فاش وصل وقت انهم يسينيو وهي تتشوف فيزيد خدا الكتاب وتحنى كسيني هو الاول وهو غيفرفر كامل ماشي غير قلبو تلفت عندها بالزربة ماد ليها الكتاب موريها فين تسيني قبل العدول وهو كقول فخاطرو يلاه سيني دغيا سربي خدات الستيلو وهي تترجف هز ليها الڤوال شوية باش تشوف فأدق التفاصيل كرد ليهم البال ديك اللحظة وهي تتسيني ستيلو بين يديها وصباعها كرجفو معرفاتش ليها وصف وهي تتشوف بعدما سالات وحيدات يديها امضائها حدا امضائو وسمياتهم بزوج حطات ستيلو وهنا كلشي بدا كصفق صافي لي تسناوه شحال هاهو تحقق رسميا مراتو على سنة الله ورسوله
العدول هزو لديهم:سيادنا واحد الدعيوة الخفيفة للزوجين لمباركة هاد الزواج
كلشي هز يديه وحتى هما بزوج واحد اللحظة تتعاش مكتوصفش
العدول:اللهم بارك هذا الزواج واجعل فيه خيرا وبركة وارزقهما الحياة السعيدة مليئة بالبركة والخير وأنر دربهما بالتيسير وارزقها الذرية الصالحة عاجلا غير آجلا آمين
من مور كل دعوة كلشي كان كقول آمين ومن كل دعوة كسمعوها هما عليهم بصفتهم كزوجين اخيرا كانت تتخلي الثلج كطيح على قلوبهم حيت صافي تحقق شنو بغاو تجمعو بالحلال وبقى لهم غير يكونو تحت سقف واحد اخيرا بعد سنين من الظلمات انتصر حبهم
العدول الثاني:سيادنا الله يجعل كلشي مبارك ومسعودة
تصافح هو ويزيد بحرارة وهو كبارك ليه كلشي باين من عينيه جا عندو باه ناض تعانق وياه فرحة الولدين تاهي بوحدها سكينة طلاحت على ختها معانقين تتبارك ليها تصافو عليها خوتها واحد واحد مكانش الضغط عليهم غير هما بل على العائلات بزوج لكن الحمدلله انتصر الحب والخير
معنق مسعودة وهو كبوس ليها راسها كترضى عليه من قلبها وكدعي معاهم كلشي تدفق يسلم على العروسين ويبارك ليهم لبنى معنقة زينة بحرارة وعادل كتسنى نوبتو لي غير وصلاتو طلاح على يزيد بحرارة كبارك ليه روعة تتشوف فيهم وكتنهد تتسنى النهار لي تاهي تكون بلاصة زينة بفارغ الصبر ݣاع لي مزعوط ابتداء من خوها وسكينة ويوسف تخايل راسو بلاصة العروسة والعريس متمنيين الفرح الجاي يكون من نصيبهم
زينة طبعات قبلة كبيرة على راس مسعودة لي كاتمة دموعها لكن عينيها حمرين:الله يخليك ليا اميمتي ويطول ليا فعمرك
مسعودة:الله يكمل بلخير وينور طريقك دابا قلبي عاد غادي يتهنى عليك اكبيدتي صبرتي ونلتي الحمدلله
فعلا رضاة الوالدين والصبر هاهما رجعو عليها لقاها ربي بواحد شاريها بالغالي والنفيس ودار على ودها لي ميدارش فريدة كذلك تتعانق معاها وتترحب بيها فالعائلة لاهي لا الحاج منهم دابا ومعزتها غالية وغلات كثر بلي دارت وفنفس الوقت وهما كشوفو فولدهم الضحكة ممفارقاهش كلما تجمع بيها والحمدلله من الاول كانت من مكتابو رجع كلشي جلس بعدما باركو لهم ودابا جات نوبتهم يباركو لبعضياتهم ضار عندها كامل مرزن ومتبث وكلشي عارفها عليه اما دابا من مور ما كتب عليها وهي قدامو مكرهش ينوض يغوت ويشدها جرية من الراس فين ساكنين تالراس لاخر هز ليها الڤوال وهي منزلة عينيها وهو كتفكرها لبارح مراهقة واليوم شابة زينة كيف سميتها كتب عليها وولات حلالو هازة سميتو وعلى ذمتو غير شاف دموعها سايلين تتبكي فصمت متسناش حتى جرها لعندو معنقها ممسوقش لبنادم ولا انه يبين حبو دار هادشي وهي باقية حرام عليه معساك دابا لي ولات حلالو تعانقو عناق حار بيناتهم كان كبين شعلة الحب لي طفات اخيرا بهاد النهار كلشي بدا كصفق والقراب بزاف عينيهم غرغرو حيت كانو عارفين شنو من مور داك العناق اخيرا وصلو لشنو بغاو وتحققو الأماني ودعوات الليل لي كان كل ليلة يسجد للخالق وستاجب ليه الحمدلله كان معنقها كارز عليها وكهمس لها فوذنيها
يزيد:صافي ربحنا الحمدلله مكاين لاش لبكى نت ديالي ومبقى بعاد بيناتنا
زينة بصوت باكي:كنبغيييك
ديك كنبغيك تحطات فوذنيه بحال الضو خلاتو بعد عليها وهو كمسح ليها دموعها قراب لبعضهم وعينيهم لي تتهضر محسش حتى حط جبهتو مغمض عينيه على جبهتها كتنشوى بحلاوة هاد اللحظة لي دار على ودها بزاف ومزال يدير فسبيل حبها وعشقها وهي صدرها تتهز مقدراتش تمالك نفسها خصوصا انها تفكرات باها لي تمنات يعيش هاد اللحظة السعيدة ويشوفها عروسة لكن مكتابش اكيد فرحتهم غادي توصل خواتاتها خواتاتو مسعودة فريدة مليكة ام الغيث كلشي مقدرش يتمالك دموعو وهادشي لي خلا الناس يعرفو بلي يمكن كانت واقعة شي حاجة وبهاد الزواج حسو بالحلاوة فعلا حلاوة الفرج لي طغات على كلشي لا هي لا هي كانو كقولو هاد اللحظة عمرها توصل بعدما تلغات الاولى وهاد هي بداكشي لي وقع ليوم بداو كدخلوها المساوس لكن مكتاب ربي بوحدو ومن مور هادشي كامل عاد عرفو حكمة ربي علاش لغى المرة الاولى حيت بغاهم يعيشو المرة الثانية هكا بهدوء وسكينة واي واحد فيه الغذر مشى وتحيد من الطريق
يزيد بعد عليها شوية ونطق بصوتو الهادئ لي كنغم ودنيها:كل توخيرة فيها خيرة
حركات راسها بآه وهي مبتاسمة وسط دموعها فعلا لي جا من عند الله زوين وفيه خير واخا تدرك داك الخير من بعد مدة طويلة كيفما وقع ليهم هما هز يديها بشوية وطبع عليها قبلة مخليها تتمسح دموعها بزز منها وتتعيش فرحة ديك اللحظة جا وقت التمر والحليب والطبلة لي كانت قدامهم مزوقة كاملة بالورد لي كان مقاد فبوكي بسمياتهم بزوج وتاريخ عقد قرانهم باش يترسخ مصحف من الذهب مرافق الصينية ديال التمر بيرستيج والحليب الصندوق ديال صداقها لي تاهو زايد الطبلة همة وشان همس لمو شوية تحل الصندوق وتجبد منو الطقم لي شرا ليها فمكة المكرمة وداكشي لي كان حلاتو ولمحات لأم الغيث لي كانت حدا زينة تحيد ليها لي دايرة وداكشي لي كان بدات كتحيد ليها الكوليي لي دايرة والطوانݣ باش يدير ليها هو ديالو لي عجبو من اول ما لمحو وتخايلو عليها
ومكاين ما حسن من هاد اللحظة هي براسها حمقها واخا مقالش ليها راه شريتو ليك حتى سولاتو دابا كان المصور مقابل معاهم كصور فيهم وهما كشربو بعضهم الحليب لي كدل على الصفاء نظرا لبياضو والتمر لي هو الخير والمباركة كان الخجل طايح عليها مقادراش طول فيه الشوفة بزاف وابتسامة صغيرة على وجها وحنيكاتها مزينݣين كانت عروسة كيوت فديك اللحظة هز الكوليي عطاتو شوية بالضهر وضورو ليها على عنقها وهو كسد ليها حسات بأنفاسو شوية على رقبتها احساس خلا تبوريشة خفيفة سرات مع سائر جسدها سدها ليها ورجعات ضارت مدات ليه يديها بشوية باش يركب ليها البراصلي تحت انظار الكل وهما كشوفو الحب مجسد قدامهم زايدة عليه حاجة اخرى ولي هي التضحية
جا وقت التصاور وبدا كلا شوية من العائلة كجي يتصور معاهم فجو من البهجة والفرحة كلشي ناشط وكلشي راشقة ليه
رؤية جلسات حدا زينة مبتاسمة ويوسف من جيهة يزيد لي ضورو يديهم على بعضياتهم زينة دارت نفس الشي ضورات يديها على روعة شي لخلاها فرحات فنفسها وحطات راسها على كتف زينة وتلتقطات الصورة ببزاف ديال الحب ضارت عندها رؤية وطبعات قبلة على خدها بينات ليها كيفما قالت لها انها صافية من جيهتها حيت ماليها والو تما حيدو الطبلة وتجمعو كاملين عائلتهم شي جلس فالأرض شي جلس فالجنب وواليديهم خلاهم وتلتاقطات صورة جماعية ليهم تبقى ذكرى لهاد النهار المقدس فديك
ام الغيث:بنتي لي عطاتني الدنيا
زينة ضورات يديها عليها وطبعات قبلة على خدها مخلية المصور يشد ديك اللقطة فعلا كانت وحدة منهم عاشت معاهم بزاف وتشاركات معاهم الحلوى والمرة كلمة الله يخليك ليا اماماتي كانت عسل على قلبها سمعاتها من بنت قلبها لي عطاتها الدنيا بعدما تحرمات من الولاد
الحاج عم يزيد همس اخوه:شكون هي ديك السيدة
الحاج ضور عينيه فين نعت ليه خوه وفيكساهم على ام الغيث لي كانت حدا زينة:هاديك السيدة جارتهم وحاسبينها وحدة من العائلة من اطيب خلق الله
فديك اللحظة جات مسعودة تصور معاهم داروها الوسط وهي معنقاها وهو شاد ليها فيديها كانت الفرحة والحب باينين فالتصاور كيفما باينين فالواقع سكينة ووليد جاو تاهما تصورو يبقاو يتفكرو بيها ايام العزوبية نهار يكوغطها كيفما قاليها هو خلاها ثاني تتفرنس فديك اللحظة جا عبد الكريم يتصور تاهو مد يديه وصافح زينة بابتسامة عريضة:الله يكمل بلخير اختي ونشوفكم ديما فرحانين
زينة بنفس الابتسامة:ربي خليك اخويا عبد الكريم العقبة ليك
ومع نطقاتها نيشان شافت فبنت عمها لي تبسمات منزلة راسها حشمانة فديك اللحظة تلفت عند يزيد زينة حاضية الستون هنا تبسمو لبعضهم يزيد وقف وتعانقو ناسين كلشي ولايحين كلشي وراهم وهما معانقين همس ليه
يزيد:شكرا حيت جيتيي كانو باغينك تحضر
عبد الكريم:شكرا ليك نت
مع بعد عليه جرو جلس حداه وزينة جرات سليمة واخا تصورات معاها وعاودو تصورو مجموعين هما بزوج لي عارفين وصلاتو الخبار واخا مقالها له حد لكن سمعهم كهضرو بلي يمكن مبغاش يجي على قبل يزيد حيت دارو خاف لميبغيهش وفنفس الوقت عرف من زينة انه مع بنت عمها هادشي لخلاه يعيط ليه ووضح ليه انه قلبو لي خلاه يدير هكاك ويشري معاه عداوة وزيد عز عليه بديك ماشي رجولة تشوف فحاجة واحد آخر تما عرفو رجووولة نيت اكد عليه انه يجي فطريقو لعكاشة كيفما شارك معاهم المعاناة والحزن خاص يحضر حتى فالفرح وتاهو وقف معاهم سنين طويلة توضحو النقط وبين ليه انه معندوش مشكل معاه وتحطىو النقط على الحروف وصفات الخواطر
من مور التصاور هنا جات النقاشة لي تعطلات عليهم وكان خاصها تجي قبل ما يكتبو الكتاب لكن ماشي مشكل ناض من حداها باش تاخد راحتها ومشى جلس حدا باه وعمو والرجال فديك اللحظة يلاه جا انور وصافية ناض رحب بيهم واخا عاتب عليه حيت تعطلو لكن الاهم انهم جاو صافية لي تعنقات مع زينة واخا متتعرفهاش لكن شافتها فالمحاكمة وهي معنقاها تتهمس ليها بكل عبارات الشكر والامتنان باش متبينش حيت تاحد معارف من غيرهم بعدات عليها وهما مبسمين فوجوه بعض مشكل لقاهم وطيح القلب على القلب
صافية:الله يكمل عليك بلخير ويعطيك ما تمناي
زينة:حتى نت احبيبتي والعقبة ليك(شافت فراضية)هادي صاحبتي
رحبو بيها بحرارة ودارو ليها بلاصة وسطهم هنا خدم الشعبي ولي فيه شي هوايش راه ناض واخا هكاك كان شطيحهم راقي لي منوض النعرة هي سكينة ووليد تقول تاهو جاي معاهم من الدرب راضية لي كرشها بانت لكن مقاداها فرحة تتشتف ففرح ختها ام الغيث مليكة فريدة كلشي يوسف
وليد وهو كشطح:اتي تكايسي راني تالف وغنتلف
سكينة:راك تاااااالف خلوق كيفما قلتييي
ضحكو بزوج وهما كشطحو كلا يشتف من جيهة الحاج عم يزيد عينيه على ام الغيث لي تتشطح تاهي مقاداها فرحة نقشات زينة ولي بغا ينقش كجلس نوضوها تشطح بزز وقفات وهي تتمايل هازة يديها وتتضحك من طبعها تتحشم متقدرش تشطح قدام الناس واخا فرحها نوضوه تاهو بزز وهنا شافو فبعضياتهم وبداو تضحكو عض على شفايفو وهو كشوف فالحنا شي لخلاها تبدا تضحك تاهي الا كانو الرجال ككرهو الحنا هو كثر منهم اضعاف
وعارفة هي هادشي مزيان من ايام الڤيلاج ولكن دابا حاجة أخرى يستحمل ويصبر فسبيلها هي شد فيها من معصمها وضارو بيها كلشي بدا لاهيلا بصح العريس كشطح حيت فعلا تجرد من الرزانة وخرج ديك الفرحة خلاها هي مخرجة عينيها وكضحك حيت كان كعرف يشطح وهو شاد فيها يزيد واحد آخر فرحان بيها وفرحان بهادشي لي دارو ووصلو ليه بزوج تعانقو وسط منهم عناق حار كأكدو على فرحتهم وسط داك المجمع والناس لي ضايرين بعدما علنها حلالو هازة سميتو وتوجوا علاقتهم بالحلال لي طال انتظارو
جا وقت التصاور وبدا كلا شوية من العائلة كجي يتصور معاهم فجو من البهجة والفرحة كلشي ناشط وكلشي راشقة ليه
من مور النشاط حتى شاط والشطيح والرديح تحط العشى البساطل والشوى والخير مشاركين الفرحة فهاد الليلة الزوينة لي خلاها الحلوة حلوة غتبقى راسخة فالبال حيت دار على ودخل بزاف كانت حرب وحرب لي تربحات بفضل الحب القوي التضحية النية والثقة فمكتاب سيدي ربي والحمدلله🤍
نزلات بشوية من الطوموبيل بعدما وصلها الشيفور طلات عليه من الزاجة علماتو غير يمشي صافي غتبقى مع راجلها تلفتات قدام الشركة وهي تتشوف فيها بسبابها رجعات طلاقاتو وفيها وقعو بزاف حتى وصلو لي هما عليه دابا واخا مكانش زوين ولي هو لي كان سبيل وطريق لي كان نهايتها حالهم دابا دازت سيمانة على زواجهم واليوم غادين يشوفو شي حوايج للدار وفنفس الوقت يقصدو النݣافة لي أصر انه يمشي معاها عندها بقات شهر ونص بالضبط للعرس تقدمات بخطوتها اليمنى ودخلات هازة راسها وابتسامة على وجها ونيشان طلاقات بلبنى ووقفو بزوجات كتسالمو بحرارة كان لي داز كبارك ليها ويسلم عليها وهي واقفة مع لبنى الحنة فيديها مخلياها مفرزة عروسة من الطيارة كاين لي تمنى لهم الخير وكاين لي قال شوف يا دنيا لبارح سكرتيرة ديالو واليوم مراتو مرات مول الشي بعدما كان غير لبارح وهما معارفينش قصتهم ولي داز من مور الكواليس من مور دقايق واقفة مع لبنى زادت عندو غادية مبسمة بدون توثر ولا خوف مشى داك الزمان دابا راه جاية عند راجلها ديك كلمة راجلي جديدة عليها فوقما جات فبالها تزنݣ واخا تكون جالسة غير بوحدها لي داز من حداها يبارك ليها اصلا كانت ظريفة ومحبوبة شي لخلا الأكثرية يفرحو ليهم حيت تاهو الله يعمرها دار
لفوق دقات بشوية بعدما سمعات الإذن داخلة وتتعيوج كسوة لاصقة عليها وماكياج مشارجي مكانتش تتجي بهادشي فاش يلاه توظفات بصفتها السكرتيره الجديدة ولكن نهار على نهار كانت تتزيد فالسطاج مين تقربات له وشافت شخصيته لي كلشي كهضر عليها كاريزما زوين مهيب واهم حاجة عاطي قيمة لراسو مكانش مزلع وهادشي لي خلاها حطات عليه العين وغتبقى حاطاها واخا تزوج سيمانة هادي والخاتم راهو فيديه غير مدة طويلة مع العمرة وكان ناعس فالسبيطار فاش رجع وجع مزوج ولكن ماشي مشكل كانت من النوع لي مكهمهاش الرجل عندو فحياتو مرأة غيرها لا تتهمها علاقتها كيف تتكون معاه ومعندهاش مشكل تكون دخيلة واخا معاه هو هادشي بالاحلام بينات ليه شحال من مرة لكن متشدش
يزيد بلاما يشوفيها:صافي ديه لكونطابل وقولي ليه يعطي أڤونص لفورنيسور ديال الحرير
السكرتيرة عينيها عليه بصوت رقيق:واخا اموسيو
كانت شبه محنية كيف كدير ديما فاش تتبغي تجمع الوراق باش فرقة صدرها تبان شوية مجات فين ضور ومع قربات لباب غتخرج طاحو ليها الوراق تحنات تهزهم ولكن بالطريقة باش تحنات بان بلي كانت متعمدة طيحهم كانت مكوزة بهاد العبارة وهي تتجمع الوراق زينة مع الوقفة قدام لبيرو مع شافت داك الستون خرجات عينيها الاخت مدات مجابت اول حاجة هزات عينيها لموسيو لقاتو اصلا عينيه على لبيسي ݣعما جاري معاها ومغاديش يجري معاها عارفاه لكن بغات تشوف غير واش شاف لي شافت ختنا ناضت وقفات عاد رضات ليها لبال هنا طلعات حاجب بعدما دارت يديها على خصرها ونطقات بنبرة واسلوب مخالف لباش معروفة زينة ناوية على خزيت
زينة:غير الحمار لي كمشي مكوز ماد مسلالتو هداك نقولو خليقة الله اما نت لشايطة عليك ثقبتك راه عطى الله فين تعطيها
يتبع
التعليقات 0