الفصل 4

كنت موجدة كولشي وحاطة باليزتي غير وصلت صليت وشديتا الطريق ساق بينا بابا النص حتى طاح الضلام وسقت انا الباقي حتى لفاس حيت مكيشوفش مزيان بالليل ،. حجزنا فأوتيل حطينا فيه حوايجنا ودوزنا الليلة وكانت يسرى باغاني نحضر للحمام لاكن ماتساعنيش الوقت غير وصلت تلهيت مع بنتي كنجبد فالحوايج ونطلق ونعست وفالصباح نضت دوشت وجلست لاوية على راسي فوطة وبينوار وقدامي بنتي بدلت ليها كولشي من لداخل ومن برا وحطيت ليها كسوتها اللي تلبس وفطرتها وفطرت معاها هزيتها هي ولبستها ديتها للبيت دماما خليتها معاهم ورجعت لبست حوايجي وهزيت صاكي نزلنا كاملين سقت سيارة بابا وصلتهم حتى للفيلا حيت بغا يشوفو العائلة ويجلسو مجموعين يشبعو من جنة شوية . قلت لبابا غنرجع لاوتيل حتى لليل وندوز عندكم نمشيو للقاعة وفهمني مابغيتش ندخل للدار و رجعت بحالي مشيت للصالون صاوبت شعري درت ليه مشيطة بلدية بالفرقة الوسط ومجموعة اللور لتحت سامبل. ومكياج سموكي مع عكر خفيف لامع بانو عيني كبار وصاوبت دفاري مامولفاش نصبغ ولا نلسق مع الصلاة غير من المناسبة للمناسبة وكنرجع كنحيدهم وهاد المرة صاربت بخال ديال لعروسة ورجعت للاوتيل لابسة نضاضر والشال مغطيني لبست تكشيطتي من احسن التكاشط الدارجين على الموضة بالتنبات و الحجر عنقها متلت وتعطرت ولبست مجوهراتي البلدية نع حوالق نازلين بلديين وشوكة فالصدر وساعة ومجوهرات فاليد ومضمة ودرت الشال غير من لفوق ومشيت حشمانة نتلاقا بابا مزوقة . عيطت ليهم خرجو كانت ماما ملبسة بنتي ولابسة نزلت ورجعت اللور مدرقة وجهي عطيت لبابا يسوق ومشينا للقاعة حيدت الشال فالدخلة حيا كان كولشي مقزب وغير النسا ومانسيتش خاتم الزواج طبعا . سرحت عيني بانت ليا غير العاىلة مزال ماجات الضرة . هزيت بنتي فيدي ودخلت خليت ماما برا مع بابا ونسيت تيليفوني فطموبيل وتميت راجعة حتى للباب نقول ليها تجيبو ليا حتى كنخرج فعيسى قدامي حطو الاسانسور اللي طلعنا فيه وخرج منو هوا ورجاء .. تصدمت وحتى هوا تصدم فاش شافني وبنتي بدات تركل ليا فيدي بغات تمشي عندو . اما رجاء صفار وجهها ويلي من صابت كن قجاتني .. انا عيسى تحنا عند ولدو كيتلف معاه وبنتي صعرات جاتها الغيرة وحتى انا جاتني الغيرة عليها بغيت رجع وجهي احمر وضرت هازاها بغا يسكت ليها القلب بالبكا حتى كنت غندخل وسمعتو قالي سارة

ضرت عندو جات عيني على رجاء. كنشوف فيها بغات تاكلني بعينيها وساكتة ولابسة ومقادة وهوا لابس كوستيم تم جاي عندي بغا يهز جنة ورجعت اللور قلت ليه لاللا غير خليها . جرها من تحت يديها وهي كتلسق فيه وجراتني من ودني كانت غطيرها ليا دات ليا راسي حتى لعندو ولسقات على الحلقة مابغاتش طلق وهوا كيرجع اللور تقول غادي نسرطو وانا تابعاه براسي كنقول ليه الحلقة الحلقة .. ماشافهاش كيقول مالي هادي كتسند عليا اش بغات وانا ودني غطير تابعاه فاللخر جريتو من دراعه وشادة فودني كنقول ليه وقف وقف راه شادة ليا فودني . انا كنقول ليه وقف وهوا كيرجع اللور حتى كان غيتعصب عاد انتباه ليا علاش لسقت عليه وعطيتو راسي. وشد لجنة فيدها فكني ورجعت اللور شادة ودني ورجاء كتشوف . مارضيتش ومارضاتش ومارضاش وتحطينا فموقف خايب وحسيت بيها بغات تشرب من دمي وماقادراش تهضر قدامو قاطعاها فنفسها باغا طير عليا وشادة راسها حتى تحل الاسانسور خرجات لبنى هازة التكشيطة تصادفات مع العيالات كتسالم معاهم وعينيها فيا مخرجاهم . اما عيسى بغا يمشي وقلت ليه فين غادي ؟ فين غتديها!! تخلعت خفت يديها ليا وبقيت برا فداك الكولوار غادية موراه قلت ليه لا ماتديهاش والله لاديتيها

رجع اللور قالي شوية وغنجيبها

قلت ليه لا شوفها هنا واراها

شفت فلبنى كتجر رجاء باش يدخلو وهي كتنتر يدها باغا تجي ليا ولبنى كتخزر فيا وشاداها حداها حتى جات ماما هازة صاكها لقاتنا قدامها وجات مصدومة كتسول اش واقع. ، قال ليها هاهي جنة معايا بلاتي ونجيبها

قالت ليه واخا وكان ولدو كيجرو بغا يشوف جنة وتحنا عندو عيسى القرفصاء كيضحك معاه عطاه باسها وانا وماما مشادين هي كتجرني للقاعة وانا كنتر يدي وقفت عليه حتى وقف قلت ليه صافي اراها نديها

دار فيا واحد الشوفة كتخلع وبغا يمشي وانا نوقف قدامو شديت ليه فيدو وقفتو بغيت ناخد بنتي وضربني ليدي .. نفس الشحطة وبنفس اليد ونفس التقسيحة دالمكانة قالي حتارمي راسك الاللة

حسيت بالضوء ضربني فيدي والدموع مشاو فعيني مارضيتش وجريت بنتي بالقوة مابغيتش نجاوب قدامها وماعجبوش الحال قالي سيري ستري راسك هوا الاول شهاد قلة الحيا

مشيت خليتو كنت غنطيح وبنتي كتبكي ليا وتجبد بغات تمشي عندو . اللي شاف الشبه غير انا محطوطة .. غير عينيا وفمي وشعري وحناكي وبيوضيتي .. لاكن القلب على باها طيح وتموت عليه كتنكرني فاش كتشوفو .. كمدت د الدقة ودخلت للقاعة تبعاتني ماما قالت ليا واش خرج ليك العقل خرجتي بشعرك عريان

درت يدي غلى راسي نسيت الشال وعاد انتباهت واصلا دمي كيغلي ماعقلت حتى على راسي وعاد فهمت علاش قالي ديك الهضرة ومارضيتش بغيت نقتل راسي. ومابغيتش نتشوه ولا ندير شي فضيحة كمدتها فقلبي رديتها لداخل حتى تطعنت ومشيت كنرد فالطواليط بالفقصة

حسيت بقنبلة غادي طرطق فصدري عييت نتقيا ماقدرتش نرتاح والصهد جاني والغضب عماني مشيت للطبلة فين جالسة هزيت شالي لحتو عليا وماما كتسولني فين غادية قلت ليها هانا جايا

دزت حدا لبنى ورجاء. بداو كيضحكو عليا ويتشفاو حتى رعدوني كان كيبان ليا نقتل شي واحد والحمد لله مادرتهاش وخرجت لبرا كان الضلام كنقلب على شي برهوش يكلم ليا عيسى ينزل عندي مالقيتوش .. ضورت وجهي كنقلب بان ليا جالس فطموبيل بوحدو وكيهضر فتيليفون ومشيت ليه كنشوف واش بنتي معاه ماكايناش قلت الله واعلم يكون عطاها لبابا ونزل !! نزل معايا نيشان بالغضب والرعدة ديدي وكنت لاوية الفولار عليا كل شوية يميل وعيني مغرغرين جريتو من كتفو هزيت كاع طاقتي مابقيتش كنعقل وهزيت يدي عادية نزل عليه بشي طرشة يالاه نبرد لاكن صدها فالدقيقة تسعين شد ليا يدي. لاحها للارض وهز صبعو خرج فيا عينيه قالي وياااك ويااك تزعمي .. سمعتي

دفعتو بغضب مع البكا مع القهرة والحكرة وكاع الزمر تخلط عليا بقيت كندفع فيه ونتعكل ونعاود ندفع وهوا هاز يديه كيقول ليا جمعي يديك ..و جمعي يديك حسن ليك

قلت ليه نتا والله ماراجل … كايحساب ليك راسك راجل ولاكن والله ماراجل . بغيت نرد ليه الدقة وهزيت يدي عاود صدها وهزيت لخرا عاود صدها حتى هي وتعصب عليا قالي جمعي راسك واش نتي مريضة ؟؟ واش خرج ليك العقل

صد ليا كاع الهجمات فاللخر هزيت واحد الحجرة من الارض كبيرة مابقا كيبان ليا لا برستيج لا احترام ينعل ابو الاحترام وضربت كلشي عرض الحائط مابقاش كيهمني النضرة ديالو عليا ولا شنو يقول. اللي كيهمني نرجع ليه الغدايد ونخرجهم فيه وماحدو كيصدني وانا كنزيد نتفقص ونشعل وتابعاه وغادي كيرجع باللور شافني هزيت الحجرة وكنبكي زيرت على سناني بغيت نضربو بيها وحيدها ليا لاحها وطلق من يدي دار ليا حركة قالي نتي ولا هيلا مسطية

دفعتو قلت ليه ماعندكش الحق تهز يدك عليا .. ماعندكش الحق تقيس فيا ولا ضربني انا با عمرو ضربني .. ماتقيسنيش ماتوسخنيش بيدك

وبديت ندفع ونضرب قالي ماتقيسينيش حيدي يديك علاياش كتقلبي؟. شنو بغيتي

زاد صعرني بديت كنضرب بحال الى كنضرب فشي طبل وهوا هاز راسو فالسما كيبعد ليا يدي فاللخر شفت وجهه حمار وتعصب شدني لسقني مع واحد سطافيت كحلة فديك الضلمة تردخت معاها وزير ليا على يدي مع غنسمعو قال شنو بغيتي فشلت مشات مني الطاقة وانا نطيح ليه تما .. ماشي فقدت الوعي ولاكن فشلت مدام فشلت وردخني ديك الردخة وناقضار ليا يدي والو قلت ندمو بشي سخفة اصلا طيح ليا النص

جيت نطيح جا يشدني فلت من يدو مشيت جنب وجيت على راسي حسيت بالضو ضربني غبت بالصح واحد الغيبة تقول طفا ليا عقلي وشعل فلحضة وحدة حسيت بالدوخة بحال الى نعست وفقت فنفس اللحضة وحليت عيني شفت فيه مخلوعة ماعرفتش شنو وقع ليا مزال ما رتبتش احداثي لقيتو عند وجهي كيقولي سارة. سارة

هزيت يدي بغيت نجلس حسيت براسي بقا محطوط ورايا والشال هبط وشد ليا فيدي باش زعما نوض ساعة رجعت جلست مالقيتش الجهد وتكيت على الرويضة ديال السطافيط كنقول ليه راسي راسي

حسيت بيه تلف بقا كيتفتف وحط يدو على راسي وهزها فالضوء كيشوف واش كاين شي دم وانا كنهضر ونتنخصص البكية كطلع وتهبط فيا

قالي بلاتي نعيط لمك وهزيت صبعي حركتو ليه مابغيت لا مي لا جدي يباتو ينكرو عليا قلت ليه بالتنخصيصة خليني هنا .. صافي بعد مني خليني دابا نوض راسي عطيني شبر تيساع

رجع اللور بقيت بلاصتي حاطة راسي سادة عيني الدموع كيهبطو راسهم وهوا وقف عليا بحال الجن كيبان غير الكوستيم كحل ورجع جلس القرفصاء. كيشوف فيا مارضيتش نبكي قدامو وخانوني دموع الحكرة والضلم لا انا لابنتي ودرت يدي على نيفي كنبكي . قالي نعلي الشيطان حشومة هادشي اللي كديري ؟؟

قلت ليه انا ندمت على نهار اللي عرفتك فيه

قالي شنو درت ليك انا ؟؟ نتي بغيتي تزوجي بيا تزوجت بيك قلتي طلقني طلقتك ! بغيتي تزوجي قلت ليك الله يسخر !! قلتي خود عليا بنتك قلت ليك مرحبا اش بغيتي ؟؟

مسحت عيني قلت بعد مني .. عطيني غير تيساع

ناض وقف قالي غنمشي نعيط على مك تجي عندك

قلت ليه والله ديك البنت لا شفتيها ولا عطيتها ليك سمعتي

رجع جلس القرفصاء قدامي وقالي ماحيدتهاش ليك بزز .. كنت واضح معاك بغيتي تزوجي تزوجي ولاكن تبقا مع مك

عصبني جريتو من الفيستة قلت ليه هاديك بنتي فين ما كنت غتكون معايا واخا ندخل للقبور نديها يالاه

قالي واجمعي يديك شوفي الى ضربتك ليدك ماتلومينيش وتبقاي عليا با ما باا

ديتو وجبتو قلت ليه هااا.. زعما حاج وداكشي .. هاااا يالاه يالاااه

وجلست نمسح فيه يدي فين ما جاب الله وهوا كيشوف فيا ويزفر شدني من رقبتي قالي شنو بغيتي علاش كتقلبي دابا؟؟ هاا؟؟

حط نيفو قدام نيفي حسيت بالنفس كتزفر كتحرق فوجهي وريحة القهوى من فمو خارجة بقيت كنترعد وقلبي كيضرب كنشوف فيه حتى باسني من فمي وتكاليا راسي مع الرويضة فقبلات طويلة كيضغط عليا كنت دفعتو فاش باسني سكت بدا قلبي كيزدح حسيت بالشوق والبكية طالعة مع صدري لقيت راسي معنقاه ومصدومة فراسي كنبوسو .. بغا يبعد واحد اللحضة وشديت فيه عاود رجع كيدخل النفس كتر ما كيخرجها وعنقني كيشد ليا فوجهي ولاسق مع شفاهي حسيت براسي كنزير ليه على دراعه ونغرس دفاري وندعي فيه فخاطري يهزو ربي عليا ويهنيني منو

تقطع الخط اللي بيناتنا وبعد راسو كينهج وناض وقف وبعد شوية عطاني بالضهر وانا جالسة بلاصتي دايرة يدي على فمي وكنقول اوييلي واش هادشي بصح!! واش هادا الخاج شخصيا اللي مكيسلم ما كيهز العين !! وانا!!! ياخسرا بنت الامام وبنت القاع والباع اصل ومعدن وترابي وخلوق واداب وصواب !! الشيطان الله ينعلو ويخزيه .. الله ينعلو ويخزيه غرار وطيحني فالخطيئة وباشمن وجهه غنرجع نشوف فيه !! فين الاحترام والوقار وعزة النفس و و و و وووووو وييلي ويلي هادي هي ندير وندير وندير اش درت فاللخر ومعامن !!! مع بات بنتي وحاج ودايراه فمرتبة قداش وطيحت بقيمتي ويلي على فضيحة كن بقيت فالناضور ولا هاد العار اللي جبت راسي وشنو غايقول عليا دابا وفين هوا الكبرياء والويل لكحل كاع ماشفت داكشي فالبوسة .. نضت وقفت كنقاد حالتي وهوا واقف قدامي كيمسخ على راسو ولحيتو وانا موراه كنشوف فجنابي والدقة كضرني فراسي .. درت الشال لويتو عليا ومشيت دايخة كنشوف قدامي ماهضرتش معاه وماهضرش معايا دخلت للقاعة ومشيت لقيت العروسة لبسات اللبسة التالتة وانا غابرة وماما شادة بنتي فيدها .. مشيت للحمام نيشان وقفت قدام المرايات وحيدت الشال شفت فوجهي ومامصدقاش راسي . بديت نقاد شعري ونمسح العكار من الجناب حتى دخلات رجاء فجأة وغير شافتني بدات كتميع فيا ووقفات حدايا كتصاوب مكياجها وضحك غير بوحدها وقالت ليا شخبارك لباس عليك

قلت ليها الحمد لله اختي

قالت ليا كي بقات يدك

شفت فيدي وقلت ليها علاش مالها شنو ناقصها

ضارت عندي وقالت ليا من الدقة اللي عطاك راجلي.. شتي اللي كيمد يدو على الرجال

درت ليها ضحكة صفرا وقلت ليها والله اختي الى كتبقاي فيا .. عرفتي شنو .. مغاديش نجاوبك

هزات صبعانها وقالت ليا غنقول ليك جوج كلمات .. قلبي ليك على شي واحد يسترك وعطي تيساع لرجال المزوجين

قلت ليها اختي نتي راك كتقلبي على خلاك .. نسيتي !! راه كان راجلي … وعندي معاه بنت يطير ولا ينزل غادي يرجع .. وانا الى بغيت نرجع غير بكلمة مني غنردو واسيري سولي ضررتك تقوليك علاش بكلمة مني غيرجع باش تعلمك دخلي سوق راسك حتى نتي ولا غادي نطيرك ونجي بلاصتك .. ومزال غادي نطيرك بلا ماتفرحي بزاف الى بقيتي مزوجة بيه عكري ليا بالكحل

خرجت من الطواليط خليتها تما كنهددني حساب ليها غتخلعني ونبقا نتجاوب معاها ! مشيت حدا ماما جلست وبقات كتسول فيا وتبحث فين مشيت فين تعطلت قلا ليها مشيت اوتيل جبت تيليفوني وجيت وبقات كتنكر عليا حتى طابت وانا غير جالسة عيني على لبنى وعينيها عليا كتشوف فيا بنص عين وتقلب عينيها، حطو العشا تعشينا ونضت تصورت مع يسرى صورة للذكرى ورجعت جلست مكاين غير حضيني نحضيك حتى داز العرس وخرجت ملوية عليا الشال لطموبيلة بابا وراسي تقيل بالعيا الطبل والغيطة بقاو كيزننو ليا فراسي حتى وصلت للاوتيل ، قلت مع راسي يقدر يعيط يقول شي حاجة على الموضوع لاكن ماعيطتش وتفكرت انه مغاديش يعيط فوقت متأخر ونعست دايرة فراسي اننا غادي نرجعو بحالنا فالصباخ لاكن تفاجأت ببابا كيقول لينا باللي راحنا معروضين للغدا كلنا عند ايت الحاج ! تفاجأت قلت مع راسي غايكون شيخي اللي عرض على بابا ماخلاهش يمشي وصبحت كنوجد للغدا ومشينا وانا على اعصابي كنتمنى مانلقاش عيسى فالدار وتجي عيني فعينيو ماعندو مايشوف فيا ولا نشوف فيه وليت كنحس براسي بحال شي عاهرة سلاطيت عليه خرجتو على طوعو !

رحبات بينا حماتي وماخلات ماوجدات لينا وفرحات ببنتي وغير كتراري بيها .. لقيت الدار خاوية فيها غير هما وخو عيسى الكبير الاخواني و واحد عمو ومراتو وشيخي ، ..عزلونا على الرجال تغدينا بوحدنا ودرنا موعضة عاوتاني وتجمعنا كلنا فصالون كبير بحال المعتاد ولقيت عيسى تما جالس داير رجل على رجل مصغر عينيه كيشوف فجهة اخرى .. اشمنك يا نخوة ويا شخصية ويا هبة ويا وقار !!! اللي شافو يقول عمرو يغلط. وهوا لبارح خرج الطريق خرجة وحدة ! من السلام اللي مكيسلمش عليا وعينو اللي مكيهزش فيا دخل عليا ببوسة دخلة وحدة ! يعلم الله واش ندم عليها ولا ماندمش ! ولاكن شفتو كاع ماشاف جيهتي بمرة وحتى انا دورت وجهي افتتح بابا الموعضة بآية قرآنية على النساء والطلاق وانا نفهم راسي. . قلت صافي غادي يجبدوني ويهضرو عليا ومكاينش هنا فالمجمع اللي مطلقة من غيري ! بقاو كيهضرو ويهضرو والاحاديث والآيات ويهضرو على التعدد مرة اخرى والذرية وانا غير ساكتة وكنسمع عرفتهم كيقصدوني انا فالاخير خرجو ليها نيشان ومع بابا صريح كيهضر ديريكت قالي بنتي سارة … هاد السيد باغي يردك على سنة الله ورسوله .. واش قابلة ترجعي وتجمعي شملك ولاماقابلاش؟. وكلشي بالتراضي .. لا ضغط ولا إجبار عليك

تدهشت من السؤال الموجه ليا وشفت فعيسى لقيتو كيشطح برجلو وكيشتت النضر وطالق ودنيه ماشافش فيا وماعرفتش علاش ماقالي والو ؟ حطوني امام الامر الواقع وبقات مرت عمو كتقولي نعلي الشيطان وراه بيناتكم بنية وراه التعدد حللو الله المهم هوا العدل

نفس الكلام قالت حماتي وكيحاولو يدخلو بخيط ابيض ويتناقشو .. صونا تيليفون لبابا وقالينا سمحو ليا وناض هازو فيدو وداز قدامي قالي فكري مزيان قبل ماتقرري وحطي النقط على الحروف

تنهدت وانا ساكتة وقالي شيخي شنو السبب اللي ماخلاكش ترضاي بالتعدد

سكت شحال وقلت ليه ماقدرتش انا ماقدرتش على الشركة … ومكيعدلش ديما ضالمني

ضار شاف فيا واحد الشوفة تصدم وقالي انا كنضلمك؟

دورت وجهي سكت وشيخي كيشوف فيا قالي غير هضري مافيهاا عيب اللي كيضرك قوليه راحنا هنا باش نقادو الطريق

قلت ليه كيميز بيني وبين لخرين .. انا كيهمشني ديما وكيضحكهم عليا وكيطيح من قيمتي قدامهم

حل عينيه فيا بقا غير كيشوف وانا مترددة كنقول واش نزيد نهضر ولا نسكت شفت هضرتي ضهشراتو حتى تسر ليه اللسان وشيخي كيسولني قالي كيفاش كيهمشك ؟؟ مثلا؟؟

قلت ليه فاش كنكونو كاملين حتى السلام مكيسلم عليا وكيهضر معاهم ويضحك وانا لا ديما كيقلب عليا وجهه وديما عاطيني بالضهر ومسبقهم عليا وانا اخر وحدة وحقي مهضوم

قالي الحاج عيسى الله ااودي فين وامتى هادشي اللي كتقولي دابا انا اول مرة نسمعو

ربعت يدي ودورت وجهي وقالي فوقاش ميزتهم عليك؟ هضري يالاه عطيني شي حاجة كتبين باللي كنميزهم عليك

بقيت ساكتة كنشوف قدامي وكنهضر وحشمانة منهم قلت ليه فاش كنا مشينا عند لبنى نطلو عليها ماشفتيش حتى فيا وحتى كتبعد عاد كتعيط ليا فتيليفون علاش ديك الساعة ماقلتيهاش ليا قدامهم؟. وعلاش كضحك معاهم هما وانا لا وكدير ليهم خاطرهم فكولشي. وانا لا واللي طلبات شي حاجة كتقول ليها اه وانا بغيتي دير ليا النقاب وبغيتي نبقا غير فالدار جالسة و كتزعف عليا وضربتيني وبزاف ديال الحوايج .. ديما الفرزيات وديما انا مهمشة مكنعرف شنو واقع وماكتقول ليا والو والصدقة هي اللخرة اللي دارت لبنى ديك المرة ماسقت ليها الخبار حتى مشيت لتما .. مالي انا ماشي بنادم ؟. وبنتي حتى هي مهمشة وماكتديهاش فيها وكتفضل الولد عليها هي !! واش حيت بنتي ؟. وعلاش كدير معايا هادشي كامل وباغي تردني ؟ فين غنرجع ؟ انا منقدرش نرجع ومانقدرش على الضرات وداك الجو ديال الحساسيات والمشاكل

كولشي بقا غير كيشوف فيا ودخل بابا جلس بلاصتو وانا نسكت قالي ايوا شنو قلتي دابا يالاه اتينا ماعندك

بقيت ساكتة مهبطة راسي وعيسى مزال مصدوم قاليا هادشي كامل اللي قلتي مكاينش كاع ونتي كيتهيأ ليك وحتى حاجة من هادشي ماصحيحة

قاليه بابا اش قالت ؟!

قاليه شيخي قالت ليك كيدير الفرزيات بين ولادو وبينها وبين نسا الاخرين

قاليه عيسى بصرامة مكاين حتى حاجة من هادشي .. لا فرزيات لا والو هي كيجيب ليها الله كندير الفرزيات والله وأعلم .. اصلا كنعاملها بحال الى كاينة غير هي

بلا منشعر قلت لبابا لالا كاع مكاين هادشي بلعكس كيعاملني بحال الى كاينين غير هما

هبط شيخي راسو كيضحك بوحدو وقلت لبابا راه السلام ديال الله ماكيقولوشً ليا فوجهي الى كنت مع لخرين وعمرو فحياته هضر معايا قدامهم ولا عطاني قيمة ديما مبهدلني والى ماضربنيش مايشكرنيش

قالي بابا فين ضربك!! ياك مرة وحدة اللي ضربك صافي حديناها شحال هادي !!

قلبت وجهي سكت بديت كنرمش وبابا كيشوف فيا قالي الله يهديك .. الله يهديك راه ماشي اي واحد غادي يدير ليك الفشوش اللي داير ليك باك ومك .. راك كبرتي فكري فمستقبلك ومستقبل بنتك خلي عليك الزواق والرش هوا اللخر .. الزواج شروطه واضحة .. الدين المال المودة والاحترام والى كانو هاد الميزات فهاد السيد صافي تغاضاي على الباقي .. شي كيغطي على شي .. هوا يصبر ليك تخدمي و ماديريش النقاب ونتي غمضي عينيك على التعدد وخليو السفينة تبحر .. قلبي الهنا فحياتك ماشي على المشاكل

بقيت ساكتة وهوا كينصحني ويتسنا الرد وقلت ليه بشرط يخليني نبقا فخدمتي ومايجمعنيش مع الضراير و مايديرشً الفرزيات ومايجيبش عليا شي وحدة اخرى

قالي بابا هاهوا كيسمع ..

قاليه عيسى بغات تخدم تخدم مابغاتش تلاقا بيهم حقها هاداك اما الزواج راه فكرة مستبعدة مكنفكرش فيها نهائيا .. شروطها عادية ماشي شي حاجة

واش قالي بابا وشنو قلتي

بقيت ساكتة مطولا والكل كيتسنى الرد وقلت لبابا اللي درتيها

قاليهم بابا سيادنا .. الله يكمل بلخير الحق بان .. نضربو الحديد ماحدو سخون ..

شرطت عليه نبقا فالناضور مانرجعش لفاس وهوا يجي عندي .. وحتى يسرى اللي كنشوف وتشوفني وتفاجي عليا تزوجات مغتبقاش مسالية ليا دابا والقنط ففاس واصلا موحشة داري وباغا نعيش فيها وكتعجبني وكطل على موقع زوين ومريح ومبهجة كتفتح ليا الشهية ..

بصراحة ماكنتش متوقعة هاد الرجعة ابدا وكنت فالسفر حتى صدقت فالرجوع وجري عليا نجري عليك .. رجعت للناضور خويت الدار وجبنا ليها اصلاحات جداد وبدلناها من راسها لساسها بالفراش والديكورات وتلهيت مع التجهيزات ولحسن الحظ جاتني مع العطلة لقيت راحتي وفرشت على خاطري وصايبت البيت لبنتي على حقو وطريقو وبديت فشريان الحوايج وهاد المرة دهزت راسي شريت حوايجي راسي وعلى دوقي وتم الرجوع وقت قصير ودرنا صداقة فدارنا عند بابا وتجمعات العائلة كلها دوزنا ديك العشية وجهزت نفسي من جديد بحال اي عروسة .. جاتني الخلعة وخا سبق ليا مزوجة ووالدة لاكن جاتني الرهبة عمرني توقعت نرجع لراجلي حتى صدقت خارجة من دار باب لابسة الجلابة والشال على كتافي والفولار مدور على وجهي وجارة باليزتي لقيتو كيتسنا هوا وبابا وهاز جنة كيضحك معاها . توادعت مع ماما اللي عيات تنصحني وتبدل ليها الرأي رجعات كتفكر فمصلحة جنة كتر مني وكتوصيني نصبر على قبل بنتي ونكون حسن منهم ماشي هما حسن مني . عنقتها وطلعت اللور شادة جنة فيدي وهوا غادي سايق بينا فصمت طول الطريق .. نعسات ليا فيدي ووصلت للدار مشيت للبيت اللي صاوبت ليها نيشان حطيتها فالبياص وتحنيت كنقاد ليها الغطا حتى جا وقف ورايا عنقني وطل عليها بقا كيشوف فيها ويتأمل وقالي كتشبه ليك غير نتي

حركت ليه راسي قلت ليه امم داكشي علاش مهمشها حتى هي

دورني عندو شاف فيها وشد ليا دقني قالي انا مهمشك !!

هبطت ليه يدو قلت ليه انا رجعت ليك على قبل بنتي .. باش تعيش بين باها ومها وتربي عليها الكبدة

شدني من يدي وقالي على قبل بنتك خاويها ماتخليهاش بوحدها

وقفت هزيت فيه نيفي وقلت ليه هاديك هي اللي عمرها مغتكون .. مغنزيدش نضلم شي بيبي اخر وانا ماعارفاش واش هاد الزواج دايم ليا ولالا … وماتحاولش تقرب مني

مشيت وخليتو دخلت للبيت ديالي هزيت حوايجي ودخلت للدريسنغ بدلت ولبس سوميج بالدونتيل والبينوار يديه مزغبين شفافين كحلة وخرجت كنلوي شعري وريحتي كتعطعط لقيتو واقف معري عليا كيدور غير بالشروط وشاف فيا وبقا متبعني بعينو … لحت البانطوفة بغيت ننعس ورجعت نضت جلست قدام مرايتي حيدت حلقات كبار كنت دايراهم كيضروني ونضت غادية للفراش حتى وقفني قدامو قالي كيفاش؟

قلت ليه شنو؟

قالي شنو كنتي كتقولي

قلت ليه بكل ثقة ما تقربش ليا .. راه عندك جوج اخرين

هز راسو كيتبوزق عليا قالي اهاه !! ونتي؟

قلت ليه حسبني مكايناش انا غير زايدة

جرني من يدي بجوج بقوة حطهم على جنابو وشدني من خصري قالي انا باغيك نتي

بغيت ندفعو وزير عليا قلت ليه انا بزاف عليك ماغاديش نكون ليك

لاحني فوق الناموسية غلى غفلة جيت غلى ضهري وطلع عليا شد ليا يديا لفوق قالي هاحنا غنشوفو

هبط عليا بحال الباطل تقول عمرو شاف مرى فحياتو ولا عمرو تزوج وهوا عندو جوج وجا عندي بجهد واحد عمرو ماشاف ماتشوف حتى بديت كنطلب الشرع معاه ولا تغوت بنتي من البيت ونلقا السبة نمشي نخليه يتقلى .. حديت الشوق اللولاني وبردت حر البعد والحرمان ووليت باغا غير نعس معنقاه ونتسنط لعضامي لاكن ماخلانيش . بقينا فايقين الليل كله حتى بدا الضوء يدخل للبيت من الزاج ديال البالكو وبدا كيبان ليا ويبانو تفاصيله حيت ماخليتوش يضوي عليا البيت ويتفرج فيا وهوا عزيز عليه يتسارا فتفاصيلي . كنا فلحضة رمنسية وسط. العمل كيشوف فيا وكنشوف فيه ومصبرة راسي بحال الى اول مرة غنتعاشر .. قالي تجمعتي بزاف

عجبني الحال فاش قالها ليا ودفعت كبير قلت ليه ياكما ولفتي … ماكملتهاش وبقا كيضحك قالي غير كمليها … مالكي سكتي

دورت وجهي شديت الضحكة وهبط على عنقني باسني قالي توحشتك

بقيت ساكتة وهو كيداعب يديا ويبوسهم وقالي نتي زعما ماتوحشتينيش؟ فين كبيدة وحبيبة وديك الهضرة كلها اللي كانت عندك

قلت ليه شرفت عليها مابقيتش قدها

ضحك وقالي ماشرفتي وااالو غادية وكتصغاري وكتزياني

بديت كنضحك قالي توحشت هاد الضحكة

قلت ليها امم باينة

قالي راه باينة توحشتك وحتى نتي توحشتيني .. غير قوليها

قلت ليه الوحش راه عندو وقت ويسالي وغنرجعو للفرزيات

بقا ساكت ماهضرش حتى نال مبتغاه وتكا حدايا قالي علاش كتقولي كندير الفرزيات ؟؟ فين هاد الفرزيات انا معرفتش علاياش كتهضري

قلت ليه صافي دابا غير نسا … ديرهم ولا ماديرهمش مابقاش كيهمني

بقا غير كيشوف فيا قالي ياك !!

قلبت وجهي ودورو بقا كيشوف فيا والشمش داخلة عليها وباسني قالي وسط القبلة كنبغيك وبدا كيعبر ليا على الشوق والحب والاحاسيس وكيوصفني ويمدحني حسيت براسي. اسعد انسانة على وجه الارض .. كنت هايمة وكنلعب ليه فواحد السنسلة دالفضة دايرها فعنقو زوينة بزاف ورقيقة عمرني شفتها عندو من قبل وكنسمع ليه وساهية فديك السنسلة وكل مرة قبلة كل مرة همسة حتى دخلنا فالجماع وطاحت ديك السنسلة على عيني بديت كنشوف فيها بانت ليا شي خبشات مكتوبين فيها فواحد الطرف مسطح من ديك السنسلة فالجنب وقلبتو كنشوف فيه قريتو بزز لقيت عليه اسم لبنى منقوش نقش رقيق. مكتبانش.. حست بالضو كيطلع معايا مع كل حركة دارها وطاح ليا النص وهوا معايا وسط المعاشرة ماشعرتش براسي حتى قطعتها وزيرت عليها بيدي بغيت نقجها وعضيت على شنايفي بالفقصة حتى سالات الحصة وعنقني بقيت كنقول ليه خليني .. بغيت نعس .. عييت

تقلب ليا المزاج وخلاني وتكا حدايا دار يدو على عنقو وبقا كيقلب بيدو حداه قالي قطعتي السنسلة

مجاوبتوش ولحتها من يدي حسيت بيها تلوات ليا بين صبعاني وزيرت عليها حتى قطعات فيا الدم . هزها حطها حداه من الجهة الاخرى وانا كنحس بالموت كتاكل مني وقالبة وجهي ومغطية . عنقني وقالي فودني مالكي

سديت عيني كمدتها وسكت وخليتو معنقني كيلعب ليا فشعري. حتى نعست

فقت معطلة وهزيت راسي لقيت بلاصتو خاوية والسكات فالدار الدبانة مكتزنزن والبلاصة اللي ساكنة فيها انا مهدنة وغير الطبيعة .. تخلعت على بنتي وشفت فالساعة لقيتها الوحدة!! وييلي. ماكلات ماشربات ما بدلات .. وقفت كنجري لبست السوميج ديالي وبينواري ودزت على بانطوفتي وخرجت كنجمع شعري للبيت اللي حدايا مالقيتهاش ومشيت لوسط الدار كنقلب مكاين حتى صوت حتى فجأة !! كنشوفها خدا زاج البالكون جالسة ببيجامتها وعيسى حداها شاد ليها الملاعق وشي طاسات من لكوزينة مخلطين مع الالعاب وكتلعب وتتجمع هي وياه ! هز عينو فيا قالي صباح النور الشهدة

تفكرت السنسلة وانا نجمع معاه هزيت خنافري ومشيت عند بنتي هزيتها اول حاجة ديتها بدلت ليها لقيت ليكوش عامر وهوا واقف عند راسي قالي بغيت نبدل ليها وماعرفتش كي ندير

قلت ليه ساهلة هاهي ..

بديت كنوريه شنو يدير وقالي راه عطيتها لحليب الصباح

قلت ليه اشمن حليب !!ًكي درتي ليها

قالي داكشي اللي مكتوب فالبواطة هوا اللي درت

قلت ليه عنداك تكون عطيتيه ليها سخون

قالي لا راه تبعت داكشي اللي تما بالحرف ولعبات شحال وفطرات معايا

قرب ليها كيضحك معاها وناضت كتعلق فيه بغاتو يهزها وخرجها معزوزة عاى راسو عاجبها الحال وانا موراه كنشوف باش فطرات وشنو عطاها لقيت الفطور فلكوزينة !! هاي هاي هاي السي الحاج شخصيا وجد الفطور وهبط للمخبزة تسخر وحط كولشي على الطبلة؟. حادك سخنت لحليب لراسي وجلست لقيت طبسيل صغير فيه الشوفان عرفتو وكلها الشوفان ودقت نشوف ياكما نسمو ليها بشي حاجة لقيتو هوا هاداك اصلا راه عندو خبرة وسبق ليه ربا الولد الاول .. جا حدايا هازها بغا يجلس وبدات كتركل مابغاتوش يجلس وناض دار بناقص قالي فاش تفطري يالاه نخرجو نتسخرو للدار

قلت ليه مغتمشيش للخدمة قالي شنو دابا بغيتي تسيفطينا نخدمو مابغيتيش نبقاو معاك ولا شنو

بقيت ساكتة قلبت وجهي وقالي سبحان الله نتوما وكانتكم تنعسو على مود وتفيقو على مود ماعندكمش الوضوح فحياتكم

ماجاوبتوش وبقيت كنشوف فه بنص عين لقيت أثار دفاري فعنقو خطوط عشوائية .. عجبني الحال .. بغيت فاش يمشي لفاس يمشي مزوق نفقص ليهم المرارة لا رجاء لا ديك لبنى . نضت دوشت ولبست حوايجي خرجنا تقدينا بحال اي اسرة سعيدة فآخر الاسبوع ودينا معانا جنة شرا ليها العاب جداد وحوايج جداد وتعطلنا لحسن حضي هازة ليها ماكلتها معايا ، جلسنا نتغداو فواحد البلاصة نقية وجلستها معانا قلبات علينا الطبلة غطسات يدها فشلاضة وكمشات وهزات بغات تاكل وفاش حيدتها ليها بدات كتجبد فرجات فينا الناس حتى ناض عيسى هزها كيدور بيها قاليها وماخليتي فمك حتى حرف

شفت فيه بنص عين كيحشي ليا الهضرة ولاكن ماشي مشكل كيتقلى فسمو فاش كيبقاو الناس يقولو ليه كتشبه لمها. غير محطوطة ومكتشبه ليك فحتى حاجة .. كنفرح .. وزادت واحد المرى كانت حدانا شافتها وباستها فيدها وبقات كدعي معانا ربي يحفضها و شفت فجنة بغات تمشي عندها وانا نسخط حسيت بالشياط فصدري مابغيتها لا تبوسها ولا تقيسها وبقيت كنشوف ونضحك بزز مني وقالت ليا ماماها نتي ياك .. تبارك الله كتشبه ليك

قلت ليها شكرا وودعاتنا مشات ورجع عيسى جلس قلت ليه علاش خليتيها تبوسها؟؟

قالي وشنو فيها ؟

قلت ليه لا ماتبوسهاش عندها ماماها ماعندها مادير بالناس

قالي مالكي مالكي على هاد الغيرة هادي كووولها

دورت وجهي بقيت كنشوف قدامي نقول واش بصح غرت !! زعما جاتني الغيرة على جنة ؟ عمرني ضنيت نغير من الناس على بنتي ولا يبقا فيا الحال الى شفتها بغات تمشي عند شي واحد ولا تبوس شي واحد. بلحق ديك قضية البوسان خبيتها حتى وصلت للدار ودرت السلعة بلاصتها وجلست غير انا وياها بوحدنا فالبيت كنلعب معاها وبقيت كنوريها شنو ماخصهاش دير وكنبوس ونقول ليها هادي ديالي .. حتى واحد ماتعطيها ليه صافي ..هادي لا .. بيزو لااا .. غير ماما صافي دخل على غفلة لقاني كنقريها وتكا حدايا قاليها وبابا

تلاحت عليه بقاو كيلعبو وقالي شنو غديري فاش غنمشي لفاس غتبقاي فالدار بحدك

قلت ليه ماعندي مندير هنا غنمشي لدارنا

قالي داكشي اللي بغيت نقول ليك

قلت ليه جنة اصلا غتبقا مع ماما وانا كنجي عيانة كنبغي نرتاح

قالي اصلا ماعندك ماديري بحدك هنا حتى نجي

قلت ليه ونتا فوقاش غتبقا تجي

قالي غنجي فالويكاند

سكت بقيت كنفكر فهاد الويكاند اللي جاني فحقي ! شافني قاطعة الحس وقالي مالكي ماعجباتكش الويكاند؟

قلت ليه لا بلعكس حسن باش تشبع مزيان عيالاتك

سكت بقا كيشوف فيا وانا كنلعب مع جنة وضرت لقيتو مزال على نفس الشوفة وسولتو بعيني قالي شوفي نتي اش كتقولي !! واش هادي هضرة!

قلت ليه اشمن هضرة مالي كدبت!

قالي هاد الهضرة مكنبغيش نسمعها.. مرة اخرى ماتعاوديش تقولي شي هضرة بحال هادي

دورت وجهي سكت وبقيتا جالسين شوية وقالي واش عندك فيزا؟

قلت ليه لا علاش؟

قالي نمشيو نسافرو لشي بلاصة نبدلو الجو

قلت ليه نديو معانا جنة؟

قالي وفين غنخليوها؟؟ نديوها

قلت ليه صافي

قالي فين نمشيو

قلت ليه بغيت نمشي لدبي

حرك ليا راسو وبقينا جالسين قالك ديري لينا شي عشا زوين ومشا خرج خلاني مع جنة نعستها ومشيت نطيب شي عشا حتى رجع جايب معاه صاك قدو قداش حليتو لقيتو عامر بالسقاطة والمشروبات والفواكه الجافة .. قلت مع راسي هادا عوال على شي سهرة وغادي نديرها ليه نشوفو شنو تجيب ليا من موراها .

حطيت لعشا تعشينا بقينا مع جنة حتى نعسات ومشيت ضربتها بواحد الغسلة وتماكيجة وضربت ليه واحد السوميج كتولول غير بوحدها لحت عليها بينوار ديالها مقزب وتعطرت وطلقت الشعور ومشيت للكوزينة ماضرتش جيهتو خليتو فالصالون جالس و حطيت الطبلة فبيت النعاس عمرتها وزوقتها حتى دخل على غفلة لقاني كنحط ااخر بلاطو ديال الكيسان ومانسيتش ليه اتاي مشحر عرفتو كيعجبو اتاي بزاف .. وقف بقا كيشوف فيا دار ليا واحد الضحكة معتبرة وجا عنقني طير ليا بوسة وبدا يطلع يديه مع جنابي وانا كنهرب قلت ليه مالك زربان

قاليا بواحد التنهيدة راه باقي ماصليت لعشا

قلت ليه بديتي كتعكز على الصلاة

قالي واش اللي معاك غيبقا عندو شي عقل .. شحال من عام ما شفت فشي وحدة جيتي نتي ضربتي لينا كاع داك الحداد وخرجتينا على الطوع الله يسمح لينا وصافي

قلت ليه مالي انا شديتك بزز منك نتا اللي كنتي طااايب كتغلي وخ خخ خخننن

بقا واقف شادني مصغر عينو فيا وقالي كملي كملي .. شنو كنتي باغا تقولي قلت ليه والو

مشا جلس جنب الناموسية قدام الطبلة وكيشوف فيا بواحد الضحكة وكل مرة ينقب منها ويشير ليا بصبعو ويقول ليا نتي خطيييرة

شعلت تلفازة درت اليوتيوب وقلت ليه وجد راسك للخطر وطلقت ليه واحد الشعبي دالشيخات وكنقول مع راسي دابا وهوا تسيف عليا يقول ليا حيدي داك الحرام طلقي القرآن نعلة الله عليك . وبصراحة من ديما كنت كنتمى نعيش حياتي الزوجية بحال هاكا كنا كنت كنشوف فالافلام المصرية قديما خرجو عليا الله يخليها سلعة .. وطحت مع عيسى الدين والتدين الحقيقي كنت كنخاف نقلل الحيا ويدور فيا والمصيبة الى دار فيا غندخل ف قوقعتي ونندم اشد الندم وعمرني نتجرأ .. وكنت فالزواج الاول كنبغي نجبدو بطرق بحال هادي لاكن كنخاف وكنحتارمو وكنوقرو وهيبته كتخليني مانتفنفنش ولا ندير شي حركة ماهياش،. لاكن فاش باسني حدا الرويضة وهوا محرم عليا صافي طيح داك الستار اللي كان بيني وبينو وسرح ليا الطريق منين ندوز مابقيتش كنحشم لاكن مزال عندي تخوف ياخد عليا شي نضرة خايبة ويقول عليا خارجة الطريق. وفين تعلمت هادشي .. بديت بالشعبي نشوف واش يقول ليا طفي لاكن ماقال والو بقا كيتسنا يشوفني شنو ندير .. قلت مع راسي والله تا نعيش التسلكيط اصلا كيعجبني كانت امنيتي نكون سلكوطة لاكن الحرام حرام وكون تحلل الحرام كله اول حاجة نديرها هي التسلكيط نخرج ليها ديريكت .. كنحس براسي فيا واحد النفس سلكوطة من الطراز الرفيع وكابتاها من زمان مابغيتش نخليها تسيطر عليا وتخليني ندير لحرام حيت ماشي اي حاجة تشهاتها النفس نديروها ونتبعوها كأن الدنيا مغتساليش والمحرمات مكاينينش

جاني على كانتي وتجبد على ضهرو دار يديه اللور وتكا على المخدة وسط الناموسية بالعرض وتصدم ديك الصدمة ديال الاعجاب خصوصا فاش درت ليه واحد الدخلة شيخاوية مرتبة و متولة مع النغمة دالشعبي ومع الدورة اللي غندور عندو ضرت براسي وشعري دورة وحدة وتبعت ليها مباشرة جوج دورات بصدري وكملتها بواحد الهزة بكرشي من الجنب و طيرت داك البينوار جريت ليه الحزام لويتو عليا وبديت نمشي مع النغمة على صبعان رجلي والصدر كيتهز بوحدو شفتو تصدم ! الغابر الظاهر بقا غير كيشوف قال مع راسو هاد الشيخة بريستيج متكون غير خدمات رقاصة شعبية فشي اوتيل سانك ايقوال عندها الهزة بقواعدها ونيت ناقصني شي اكسسوارات ونخرج ديك العاهرة اللي فيا واللي شهوتي فيها من بكري ولاكن ماكان عندي ليها جهد .. بلحق حل وقتها تخرج و فيما يرضي الله .. يقول عليا عاهرة .. يقول خرجت ليها .. يقول معلمة . يقول اللي بغا اصلا كن كان العهر يجوز كاع مانتسوق هضرة الناس المهم نتعهر فباباه حتى القاع ماعندي ماندير بشي عفة ولا حياء واخا حتى هوا كيعجبني لاكن العهر كتر وكنشوف فيها الانوثة طاغية لا من ناحية الهضرة ولا من ناحية الحركات ومن جميع النواحي .

درت ليه واحد الطرح مقاد وطلعت على باباها ديك الطبلة قلت لديك العاهرة اخرجي انطلقي ماحد الباب محلول وهاتي ماعندك وماجمعتي وما خبيتي فجري ليا جسدي المحتشم وطلعي من بين ضلوعي طلقي العنان لموهبتك وشوقك اللي لاطالما كنتي ضاغطة عليا وكابحاه حسيت براسي ساعتها ماشي انا !! ماشي كاع ولا علاقة ليا بيا !! حسيت بقلبي كيضرب بالجهد وعايشة واحد السعادة وواحد المتعة وانا كنشوف فيه منبهر بيا وكنحس براسي سيدة الكون وعندي قوى عظيمة وتقة فنفس عمرني حسيت بيها من قبل! .. والاهم انني حسيت بسعادة لا مثيل لها وتصدمت ماكنتش متوقعة انني غنعيش السعادة فقلة الاداب وقلة الحياء .. سخن فيا الدم حتى وليت خف من رزقي وكنشطح فوق ديك الطبلة تقول مولفة وهزيت رجلي دوزتها ليه على حنكو وهوا غير كيشووف وعطيتو واحد الدفعة للصدر تكيتو وانا نسمع بنتي دارت واع ونقزت كنجري خليت ليه البيت ومشيت حليت الباب سخونة بالشطيح لقيتها واقفة فبلاصتها كتبكي وهزيتها سمعت صوت الشعبي تنقص وبقيت كندور بيها نردها فالنعاس لاكن مابغاتش تنعس بدات كتبكي ماعرفت مالها واش حلمات ولا شنو وقع ليها حتى دخل عندي عيسى كيستكشف مالها وهزها قلت ليه غنصاوب ليها تاكل يمكن بغات تاكل .

خليتو مقاتل معاها كيمشي ويجي بيها باش تنعس وكنسمعو كيقول ليها نعسي الله يرضي عليك. وكيرغبها لاكن توكضات وطار ليها النعاس ودخلت عطيتها تاكل وجلسات بقات كتسفق. بغات تلعب

ضيعات لينا السهرة وعيينا نراريو بيها مابغاتش فاللخر ديناها معانا للبيت قالي خليها تلعب حتى تهد وتنعس نيشان. وناض مشا توضا وصلى ورجع جلس قدام الطبلة كيشرب اتاي ويدوز بدوك التقاوت وانا متكية كنتسنى جنة تحك عينيها حتى بداو عيني يتلسقو وقلت ليه غنعس شوية عييت حتى تبغي تنعس وجيبها ليا

نخزني وقالي تنعس شوية؟!!! مكاين نعاس نوضي ضربي شي دكة داتاي ولا قهوى

قلت ليه بتعب لالا عيني كيتسدو صافي عييت

عمر ليا كاس دالماء ولاح ليا فيه سوبرادين وقالي هااانتي غتوكضي دابا مزيان

عطيتو بضهري وقلت ليه واخليها حتى تسالي تفشفيش

جرني من عنقي نوضني قالي غنمحححنك هاد الليلة غير وجدي راسك وبلاصة كاس شربي جوج

ضحكني بديت كنضحك وقلت ليه غتندمني على هادشي

قالي مكاينش اللي نادم قدي .. كن حساب ليا هاكا كن خليتي البنت لمك ومشينا ندوزو هاد السيمانة فشي جبل .. غير انا ونتي والملائكة

قلت ليه الملائكة؟؟!!

قالي ااه نسيت نتي مولفة بجنون .. غير انا ونتي وجنون مزيانة

دفعتو قلت ليه احياااني عليك نتا هوا الجن الكبير عاد بديتي كتبان مزيان ..قالك الايمان ايه

قالي الايمان وإيمان بجوج لا تفريط ولا تكريط

بقيت كنشوف فيه على هاد إيمان عاود اللي جبد وحسيت بيه بحال الى فلتات ليه من فمو وقلت ليه شكون إيمان؟

قالي شكون إيمان؟

قلت ليه نتا قلتي دابا الإيمان وإيمان شكون هاد إيمان !!

قالي إيمان كتعني المرى .. راه باااينة

حسيت الصهد طلع معايا وجلست قلت ليه وكتقولها ليا نيشان فوجهي؟؟!! اصلا راني عرفتك من ديك البوسة اللي عطيتني ونتا محرم عليا عرفتك ما شاد حتى طريق

هز حاجبو كيشوف فيا مطولا وقالي هانتي غتخرجي للعيب … الدين مكنلعبوش بيه ومكنشكوش فيه .. وخير الخطائون التوابون

قلت ليه اممم خير الخطائون .. اللي كيخطاو مرة ماشي عشرة

تمر فيا وقالي يهديك الله

سكت وقلبت وجهي جمعت غوباشتي حتى قالي هاهي بدات تحك راه بغات تنعس

جابها ليا كنعسها حتى نعسات وديتها للبيت حطيتها ورجعت مشيت نيشان لبلاصتي يالاه جيت نطيح وتعرض ليا بيدو مع طيحة مع تكا عليا وعينيه تقال بالنعاس بدا يوشوش ليا وقلت ليه خليني نعس

قالي. راه قلت ليك مكاين نعاس … حتى نكرمك مزيااان مزيان ونرد ليك حسن الضيافة والكرم عاد تنعسي .. الدين خاصو يرجع لصاحبو

دفعتو قلت ليه من الصباح ونتا جالس عليا إيمان ما إيمان سير عند إيمان ديالك

قالي كيضحك وها إيمان ديالي

قلت ليه انا سميتي سارة ماشي إيمان

قالي وصافي خلينا من هاد تخربيق

قلت ليه بعد مني نتا بنتي على حقيقتك

بعد راسو وقالي اشمن حقيقة؟

قلت ليه مافيكش التيقة كما درتي معايا غدير مع وحدين اخرين

قالي الى كانو بحالك علاش لا

خرجت فيه عيني قلت ليه كتعتارف

قالي بنرفزة. كنضحك راه غننن

قلت ليه لااالا مكضحكش باينة كتهضر بصح

حط صبعو على عقلي قالي غيخرج عليك الشك والوسواس .. كتشكي فيا انا ؟؟ ماحشمتيش!

قلت ليه علاش نتا مرفوع عليك القلم

قالي والله الاللة الى ندمت على داكشي اللي وقع بيني وبينك ومادانيش النعاس ديك الليلة .. بايت بلا نعاس وماعجبنيش داكشي اللي وقع وراكي حضرتي وشفتي وصححت اللي خاصو يتصحح وتبت .. بقيتي غير نتي مابغيتيش توبي

قلت ليه شنو دابا كتعايرني ؟؟ هي اللي غلطتي معاها غادي تصحح غلطك باش ترتاح !!! وكيفاش اصلا هاد مابغيتش نتوب مالي شنو درت

بقا ساكت كيشوف فيا قالي راه بصح المرى فتنة وشي فتنة قدك عمرني عرفتها فحياتي و انا كنفهمك بلاتي هيا احسن ونتي كتلواي عليا .. صعيب الواحد ينقاشكم

ناض حساب ليا غيغضب وهوا يجرني من رجلي غفلني حتى شهقت هزهم فالسما وقالي ها شنو يصلاح ليك

انهال عليا ضرب وجرح من ألذ ما دقت فحياتي .. كنت فكل مرة كنبين الصبر من خلال تعابير وجهي كيزيد يتحداني وانا غير قطعة هشيشة متقدرش تتحمل المعانات .. لاكن بحال معاناته تحملتها وعن طيب خاطر وبسعادة وحب كانت كتغلبني الضحكة فكل مرة كيبان داك التحدي وكيضحك معايا حتى هوا .. علاش كنضحكو ؟. شكون عرف .. كيفهمني وكنفهمو ولغة العيون والاحاسيس كيفسرو كل شيء .. كنت مشتاقة ومتعطشة نروي عطشي .. ورويته بجميع حواسي حتى تنهكت ورجعنا السرير بحال حلبة المصارعة والبيت بحال شي غرفة دالولادة .. صبح علينا الصباح مسخسخين بحال الى كنا كنتسابقو على جائزة الاوسكار . عنقني وباس جبيني وقالي غنرتاح شوية باش نشد الطريق لفاس. وغادي نتوحشك

خطيت راسي على صدرو قلت بقه حتى انا غادي نتوحشك بزاف فوقاش غترجع؟

قالي السبت غنجي ..

وعنقني مسخاش ينوض ونعسنا حتى صونا المنبه .. من عناء الليلة والتعب ماقدرتش نوض وبقيت بلاصتي حتى حسيت بيه حط ليا جنة حدايا وهي ناعسة وباسني وقالي هانا مشيت وفاش تفيقي نعيط ليك ..دوز يدو على شعر جنة وباسها قالي تهلاي ليا فعويناتي

قلت ليه وانا ماشي عويناتك

ضحك وباسني قالي نتي القلب

عجباتني وبديت نتمحكك كنضحك ومشا بقيت بلاصتي متكية طار ليا النعاس ونضت دوشت بسرعة ووجدت لفطور ليا ولبنتي حتى فاقت وفطرنا ولبسنا وتميت غادية هازاها جثت نهز سوارت الطموبيل لقيت حداهم ضرف فيه الفلوس باش نصرف ، هزيتو درتو فصاكي ووصلت بنتي عند ماما وهزيت القدر الكافي اللي يقدني فالاحتياجات ومشيت حطيت الباقي فالبنكة .. قلت مع راسي مادام هوا كيعطي بالكترة مكاينش لاش التبدير غادي نصرف ونخبي الباقي .. واصلا من طبعي ماشي مبدرة واخا حتى انا كيسعدني ويفرحني نشري الحوايج والمكياج والصيكان ونقابل الصالونات لاكن ماخليتش الفلوس ضسرني وكنشري بالقياس وللضارورة وكنقابل راسي بالقياس ومقسمة متطلباتي فالشهر كامل .. كافياني خمسية ولا ثلت مية درهم بين الصالونات واسبوعيا حمام مغربي انا وبنتي ومصاريفها ومصاريفي بين الاكل والشرب والملبس مكتفوتش الف وخمسية وشي مرات منوصلش حتى خمسية درهم حيت عايشة مع دارنا وبابا مكيقبلش نصرف شي ريال فالدار .. لاكن مع عيسى الوضع تبدل وغادي نقدر ندير شي مشروع جنب العمل ديالي ونزيد لقدام ونرفر الصالير ديالي كامل وبلا حتى مايديرو ليا هوا … بغيت نجمع شي مبلغ كبير ونفاجأهم شي نهار هوا بابا ونوقف عليهم نقول ليهم بغيت ندير بروجي كبير .. امنيتي شي مدرسة خاصة ديال الابتدائي .. ومن موراها ندير شي سلسلة ديال المدارس الخاصة .. وعلاش لا واخا صعيبة وغير حلم الى زيرت راسي نقدر نديرها من هنا تسع سنين ولا عشر سنين .. اصلا جامعة شوية وغنزيد نوفر اكثر .. والاهم مابغيت الدعم من عند حتى واحد حيت يقدر عيسى يدعمني ماديا نديرها ماصعيباش عليه وهادشي الى بغاني نزيد راه يطلعها ليا فعام .. لاكن انا مابغيتش .. بغيت شي حاجة نديرها بمجهودي والى كنت غنزيد نوفر نوفر من الفلوس اللي كيخلي ليا ولا اللي كيدوز ليا واخا عمرني طلبت ليه وعمرني نطلب ليه وماعمرو يسمعها مني .. وان شاء الله نوصل لشنو بغيت وعندي امل كبير .. الى وصلت ليه فلي ذلك .. وإن لم اصل فقدرعشت بذلك (الامل) هادا ما عشت عليه من ديما واللي غنبقا عايشة عليه دائما ومابغيتش نكون زوجة فقط

مشيت للكلية نخدم على راسي وغادية وكنفكر نزيد نطور من نفسي. اكثر من كوني استاذة جامعية .. بغيت نبدا نأطر اللي باغيين يديرو الدكتورة وخاصني الاهلية لهادشي .. وماحدي عندي فرصة والوقت الكافي وراجلي كيغيب نستاغلها وندفع للكونكور ونوجد ليه مزيان وندير فيه راسي باش ناخد الأهلية للتأطير .. غادي تنفعني بزاف وتزيد قيمتي وماكرهتش نكون عضوة فحزب يستافدو مني ونستافد منهم وهاد الاهلية غادي تفتح ليا بيبان كثيرة .. مابغيتش نكون بحال لبنى ولا رجاء كيتسناو الدعم وتفكيرهم محدود .. انا بغيت نصدمو هوا ونصدم عائلته كلها اللي واصلين ونصدم عائلتي حتى هي .. كيعجبني التمييز وكيعجبني النجاح وكنت كنطمح لمناصب عليا عليا وكنت اللي هضرت معاه فهادشي كيحك عليا .. عمرني طمحت ندير غير طموبيل زوينة ودار زوينة ونجلس .. هادشي كيجيني لاشيء. مقارنة بشي إسم ساطع ونجلس مع الاسماء المرموقة ونشرف كاع وبنتي يقولو عليها بنت فلانة واللي سمع بيا يعرفني .. افف شحال كيعجبني نحلم ونمشي بخيالي كنعيش واحد السعادة لامثيل لعا وكنقول مع راسي تصور لو كانت بصح !! هادا غير خيال وباش حسيت فيه اما كن كان وواقع كن طرت بحال الريشة. ووفرحتي منقدرش نوصفها .. وهادشي كامل وعندي لحجر فالطريق والناس معكسين ليا وقدرت بجهد الله نكون استاذة جامعية … اما كن ماكانش بابا وراجلي واقفين ليا يعلم الله فين كنت غنوصل والحمد لله عندي عقل القراية وكنركز فيها وحاطاها محور حياتي ن البداية حيت من غيرها مكاينش اللي يوصلني ولا يحطني فالمرتبة اللي باغا انا . كنت كنقول يا إما نوصل بيها لشنو بغيت او على الاقل ناكل منها حتى نموت المهم نستاقل ماديا .. وبكل صراحة .. احساسي وانا مستقلة ماديا لا علاقة بإحساسي الاولاني وانا مع عيسى ما دايرة حتى حاجة فحياتي .. كنت واكلة شاربة وكنتسنى الموت اما دابا كنحس بحياتي نشيطة وماكاينش الملل فحياتي وناقصني الحب هاهوا معايا .. اذا شنو باقي ؟ باقي ليا داك المنصب اللي حاطة بين عيني نوصل ليه . وماحدي متحمسة قلت غادي نبدا بديك الأهلية ناخدها ونبدا بيها التأطير هي اللولة ومنقولها لحد .. مابغيت لا تشجيع لا إحباط من شي واحد غنخليها بيني وبين راسي حتى ننحخ وناخدها وديك الساعة نقولها ليهم .

وصلت للكلية كان المورال طالع ليا ودوزت المحاضرة من احسن ما يكون وجيت خارجة بحالي صادفت صديقتي بقينا كنهضرو وشفت ياسين واقف تما كيشوف فيا وانا نضور ليها وضحكت قلت ليها هاد العطلة شديتها على قبل راجلي. حيت رجعت انا وياه

قالت ليا شنو؟؟ علاش ماشي كنتي مخطوبة نتي مسيو ياسين

قلت ليها شنو؟!! وضحكت. قلت ليها لا لا هاد الهضرة كلها كدوب وانا رجعت لراجلي وها تصاورنا

وبديت كنوريها وقالت ليا راجلك غزال وحسن ليك من شي حد اخر

قلت ليها انا زوينة عليه غير كيبان زوين فتصاور

قالت لي لالا حتى هوا باين زوين بايينين لحروف

قلت ليها راه خااايب انا حسن منو بالف درجة اشمن هوا زوين .. كولشي كيقول لي نتي خسن منو

يخ بنادم شحال مكيحشمش!! انا مانقدرش نقول لشي وحدة راجلك زوين واخا يكون كيقطر بالزين !! وهاهوا كاع زوين ومن بعد؟. علاش نقول ليها اع حقى زوين !! بنادم شحال اينو زايغة تفو ، بغيت نوريها رجوعي لراجلي باش ضرب ليا شوية ديال الطر فالكلية صدقنا فزوين وخايب. وشوف. بنادم شحال ماكيحمش ماقداتني لبنى ورجاء اللي يكون وصل عندهم زادني بنادم كحل الراس حتى هوا الله يخليها سلعة. . اصلا كنكون ناسيا ديك رجاء ولبنى انهم مزوجين بيه وكيجيو مساخط الواليدين يفكروني باللي هما فالحياة غير باش يشاركوني فيه حرام واش تطوع شي وحدة فيهم ودير النفس فراسها وتطلب الطلاق. .. زعما هاد الحلم صعيب يتحقق !!

شفتو كاع مسول ليا وانا نهز تيليفون صونيت ليه وجاوبني بدلت نبرة دصوتي مباشرة بلا تفكير للتحلوين !! مافهمتش راسي منكون منهضر عادي حتى ليه هوا كتخرج ديك السلموطك اللي مزوجة بيه تهضر بلاصتي !

بقيت عليه شخبارك واش مرتاخ واش ما مرتاخش. واش وصلتي واش ماوصلتي. قالي وصل راه معايا شي ناس نسالي معاهم ونعيط. ليك

قلت ليه امن وشكون هاد الناس

قالي رجال رجال يالاه غنقطع فاش نسالي نعيط ليك

مالقيت مانقول وقلت ليه اوك صدقت نادمة كاع على اتصالي وبغيت نعرف واش مشغول ولا بغا يصدرني حيت بوسان الروايض فقدت التقة فيه الشيطان هادا ماتعرف فوقاش يبان . تاصلت بيسرى دوزت معاها دقيقة ديال لاباس بيخير وقلت ليها عيسى مكيجاوبش على اتصالاتي خفت توقع ليه شي حاجة شوفي لبنى واش راه معاها ولا مع رجاء واش عندهم شي خبار وردي عليا بالزربة . قالت ليا اوك وقطعت تميت خارجة تلاقيت مع ياسين غير شفتو طلع ليا الدم وقلبت وجهي وحتى هوا مارقفنيش. حتى ركبت فطموبيل وصونا ليا فتيليفون جاوبتو بقا كيسول غلى الاحوال وانا كنجاوب بالرسميات وقلت ليه سمح ليا رجعت لراجلي خلينا كنحتارمو بعضياتنا. وراجلي صعيب ماكيتفاهمش فهاد الامور .. راك تكون كتسمع بالحجوجي .. الله يخليك خلي الاحترام بيناتنا بلا منخليو الامور تخرج على حدها والله يعاونك. وقطعت معاه جمعت وطويت

شديت الطريق لدارنا وكنتسنا مكالمة يسرى ترد عليا .. قبل نندهل صونات ليا قالت ليا راه مع رجاء

فاش قالتها لقا حسيت البرودة فعضامي والهشاشة فركابيا والعافية فقلبي

قلات ليها واش متأكدة

قالت ليا اه اصاحبتي راه سولتها قالت ليا معاه

قلت ليها صافي شكرا وكمدتها فقلبي. وبقا فيا الحال بزاف واكثر حاجة بقات فيا هي الكدوب .. علاش كدب عليا ؟ كن قالي الصراحة مايبقاش فيا الحال قد هاكا .. كن على الاقل يبقا فصراحته. ياك مكيكدبش والدين والايمان ولا داكشي غير فالوقت اللي كيبغي .. تقلقلت وماقدرتش. نسرطها وشديتها عندي طالعة هابطة حتى صونا ليا بالليل ومابغيتش نجاوبو خليتو كيصوني ونعست على مخدتي كنبكي حتى داني النعاس. الصباح صبح كيصوني عليا مع الثمنية ! شفت مكالمتو وخليتو ومشيت لخدمتي اللي غتنفعني .. زواجي الحقيقي اللي نعول عليه واللي يغطي ليا راسي ويدير ليا قيمة ،. اما الزواج فهاد الوقت غير جزء. من الحياة ماشي الحياة كلها وليوم ولا غدا نلقا راسي بلا راجل .. ماعرفتش شكرن فبنا السابق. ولاكن الموت كدور والزمان الى متقلبش. الموت واجدة تخطف . ساعتها مانلقى لا صدر حنين ولا ركبة نوسد عندها .. وشحال ما ضربت وتأملت غيجي واحد النهار نلقا راسي بوحدي … لا أخ ولا والو .. كنتمنى من ربي يطول لبابا وماما فعمرهم لاكن مع كل متمنياتي وتعلقي بيهم. خاطة بين عينيا انني شي نهار نصبح على خبر وداع واحد فيهم وكنحاول نستاعد ليها نفسيا ونبقا ديما مفكراها باش مانفقدش عقلي ساعتها ونتبت راسي .

هاد المرة مشيت حانية الراس ماهضرت مع حتى واحد ومشيت نيشان درت الواجب ديالي وطفيت التيليفون اثناء المحاضرة وخرجت تناقشت مع بعض. الدكاترة على الكونكور ديال التأهيلية وتفاجأو مللي شافر وحدة فالسن ديالي كتفكر تأطر الدكاترة الصاعدين وبقاو كيخلعو فيا وانها مسؤولية ما مسؤولية والقليل اللي كينجح والتأهلية مكتعطاش بالساهل والزيادة ديالها على الصالير ماشي شي حاجة اللي كتيرة .. لاكن هضرتهم دازت من ودن وزادت وانا عارفة شنو خاصني وماشي الفلوس. اللي غيزيدوني اللي باغا وانما غادي تزادني مكانة احتماعة وقيمة ونقدر ندخل كعضوة فشي حزب. ونتسلل لنائبة ولا رئيسة ولا مستشارة وغادي ندخل للسياسة حيت هي اللي غتعاوني نشق بيها طريقي. وداك الشغل عارفة ليه وعارفة كي ندخل ليه وشنو ندير فيه

رجعت للدار نرتاح لقيت بابا كيتسناني قالي راه عيط عيسى بغا يهضر معاك

تمرت وطلعت للبيت سديت عليا حتى بدا كيصوني وجاوبتو وانا جالسة كنمسد رجلي اللي تنفخات ليا بالطالون ومافيا اللي يهضر معاه ويدير مجهود . قالي علاش مكتجاوبيش. فتيليفون قلت ليه كنت مشغولة فالقاعة مايمكنشً ليا نهضر

ماعجبوش الرد ديالي وقالي بغضب واخا تكوني وسط العافية جاوبيني وماتخلينيش كنصوني

قلت اوكي وسكت مابغيتش نهضر وبدا كيسول على بنتو وعلى شنو. درت النهار كامل وختاصرت ليه كلشي فجملة وبقيت ساكتةحتى بدا راسو كيشرح ليا قالي كنت فاجتماع الصباح فاش عيطتي ليا وماساليتش بكري

بقيت كنسمع والضحك ديال الفقصة شداني كنقول ليه مع راسي كن غير ما بررتيش كن غير تسكت وتهنيني غير كتزيد تفقصني

بقيت كنسمع ليه حتى سالا هضرتو وما عاتبتو ما سولتو حيت شوطاتني هضرة يسرى حتى تفححمت مابقا ليا فين نزيد كاع شي هضرة . ساليت المكالمة وطحت حدا بنتي نعست كنبكي وعقلي كيدي ويجيب. وكتهيلو دابا راه مع وحدة فيهم داير السهرة وعايش. الحياة وانا كيجي يكدب عليا بجوج كلمات . كفاش اصلا قادرة نتقبل. هادشي اللي يوقع ليا ونتعايش معاه!! اخر حاجة كنت نتقبلها هي راجي تشاركو معايا وخدة اخرى. .. لاكن الحقيقة مررة وها انا فين كنتكرمل عالمهل ونتشوط ومتعايشة مع الوضع . نعست مقهورة وفقت مقهورة وخدمت مقهورة والضيم طايح عليا وكنهضر معاه بالعبار فتيليفون مابقيتش. كنسولو كاع فين نتا ولا شنو درتي ولا شنو غادير .. كيسول. كنجاوب والى مسولنيش كنسد فمي ونسكت . بقينا على دا الحال السيمانة كلها والمورال طايح ليا وماعاجبني حال حتى طار الاسبوع ونزلات عليا الدم وجيت مع الويكاند هي هاديك . تاصل بيا الجمعة بلعشية قالي انا جاي فطريق سبقيني للدار ومشيت سبقتو وديت معايا جنة وضربت دورة فالدار عطرتها ودوشت بالماء والصابون باش نرتاح وتزادني التقة فالنفس ولبست وتعطرت وتقاديت حسيت بالمورال طلع شوية وحالتي تحسنات . جلست كنتفرج فالتلفازة وجنة كتلعب حدايا حتى نعسات وديتها لبيتها يالاه حطيتها سمعت البال تحل وصوت السوارت ومشيت لقيت عيسى اللي دخل . درت ليه ابتسامة باردة وقلت ليه على سلامتك

قالي الله يسلمك وجرني باسني وعنقني قالي ماتوحشتينيش ولا شنو

مد ليا صاك فيدي ودرت ليه تفرنيسة باردة وسولني على جنة قلت ليه عاد نعسات ومشيت نجيب ليه الماء يشرب. في حين تكا على الفطوي كيرتاح وحليت انا داك العلبة لقيت فيها تيليفون جديد اخر سيري ساوي جوج مليون ونص. عمرني شفت جيهته ولا قلت نشريه فحياتي

مشيت لبيت النعاس دخلت ليه باليزتو وخرجت لقيتو مع كيبوس اليدين لبنتو وهي ناعسة .. مشيت نوجد العشا اللي سبق ليا حضرتو حتى دخل عندي للكوزينة عنقني من اللور وباسني فعنقي قالي اشر هاد الثلج

بقيت ساكتة كنسخن الماكلة ماهضرتش وهوا كيعنق فيا ويبوس من اللور. وقالي مالكي واش هادا هوا الاستقبال

قلت ليه هاني كنوجد ليك الماكلة

قالي واش انا جايباني الماكلة

قلت ليه وشنو جايبك ؟؟

بقا كيشوف فيا مطولا وطلق. مني مشا بقيت بوحدي وجدت ليه الطبلة و رجعت نجيب الماء سمعتو كيصلي فالبيت وخرج عندي كيجر البانطوفة فرجلو بالبيجامة دالدار عبارة عن تريكو رياضي وسروالو مجموع من لتحت فبلو مارين وجلس حدايا ساكت هز فرشيطة ياكل وقالي كي غادية مع لافاك

شفت فطبسيلي وقلت ليه مزيان

سكت كيشوف فتلفازة حتى كمل عشاه وناض ماهضرش معايا حك سنانو وتيليفونو حدايا كيصوني قالي من الحمام جيبي ليا تيليفون

جيت نهزو وقطع ماشفت شكون صونا كاع .. عطيتو ليه طل عليه ومشيت كنجمع الطبلة شفتو خرج من الحمام وتيلي فيدو ومشا خرج للبالكون سد عليه تما وجلس على واحد الكرسي كيهضر ويقطع ويعاود يعيط وتيليفونو الثاني كيصوني ومشغول مع تيليفونات شي ساعة عاد دخل

دخل عندي للبيت وعطيتو بضهري خليتو غير كيشوف وطلعت عليا الغطا .. قالي مالك نتي اش هاد التصرفات وليتي كديري

ماجاوبتوش وقالي بصرامة راه معاك كنهضر

ضرت عندو قلت ليه بقا فالبالكون علاش جاي ؟؟

قالي باستغراب بقا فالبالكون علاش جاي؟ .. ياك لاباس ا واقع

فركعتها فوجهه وقلت ليه عندك البديل معامن توانس راه عندك عيالاتك شبع معاهم هضرة اما انا ماعندكش الوقت ليا

رد عليا بجدية قالي بديتي كتحماقي واقيلا .. هاد الشك ديالك غادي يحمقك شي نهار

قلت ليه عطيوني غير التيساع نتوما .. ماشي تجي عندي عاد تحلا ليك الهضرة مع عيالتك

سكت بقا كيحنزز فيا وسكت دخل بلاصتو دار واحد اليد مور راسو وشد تيليفون كيقرا القرآن ماعرفتو فوقاش فوقاش نعس حتى صبح الحال وحليت عيني لقيت راس ناعسة على صدرو اللحم على اللحم فارق بيني وبينو توب السوميج الرقيق .

نضت انا اللولة سمعت صوت بنتي ومشيت عندها كنلبس بينواري لقيتها جالسة كتلعب بلاصتها وهزيتها ديتها معايا للطواليط طرفت ليها ومشطت ليها وجلستها فوق الرخامة كنسرح ليها شعرها .. حروفها احسن من حروفي .. يمكن حيت مزالة صغيرة كيبانو مختالفين عليا .. عينيها كبار محلولين كتبان فايقة وموكضة وشفارها طوال وشعرها بين الاشقر والبني عندها شي خصلات مشتتين لونهم فاتح وفمها صغيور مطبز .. عندها شي سنينات فاشً كضحك كيبانو وبيضاء وحنيكاتها حومر والاسوء انها كتموت على باها اكثر مني واخا ندير ليها اللي درت كيبقا هوا المفضل عندها ماعرفتش علاش؟ مع العلم انني كنعاملها مزيان وكندير ليها الخاطر ونلعب معاها ومكنخلي مندير ليها وكتقلب عليا ومكتبغيش تجي عندي فخضوره .. وهوا كيعجبو الحال وكيبدا يستافزني .. ديتها معايا للكوزينة جلستها على الكرسي ديالها سبقتها هي اللولة درت ليها الشوفان مع الحليب والفواكه الجافة طحنتهم مزيان ودفيتهم شوية وحطيت ليها تفطر وجلست كنوكلها حتى سمعتو ناض وجا كيقلب عليها نيشان باقي ماحل حتى عينيه مزيان تحنا عندها كيهضر معاها ويبوس وهي كتلسق فيه .. قاليها نخرجو نمشيو؟؟ .. نمشي لبرا يالاه فطريً

هز راسو ماشافش فيا وقالي غنخرجو نفطرو برا ماديري والو ومشا للحمام وحتى انا ماعطيتوش وجه وماجاوبتوش نضت لبست ولبست بنتي وخرجنا موراه ركبتا اللور ماسولتو لا فين غنمشيو ولا فين غنجيو حتى وقف بينا فواحد البلاصة زوينة ونقية ونزلنا دخلنا مانت مقهى بحال الحديقة فيها فطور وغدا واللي تشهات الخاطر

جلستا فصمت ماهضرش معايا ماهضرت معاه لاكن تيليفون عندو مكيستكش حتى تعصبت وخليتو حتى قطع وانا نقول ليه واش حتى فلويكاند غتبقا هاز تيليفون واش ماشبعتيش من فاس سيمانة كاملة

هز عينيه فيا وحط تيليفون قالي مزيان مللي جبدتي الموضوع حيت كنت غنعضر معاك فيه.. اول حاجة .. ردي البال لراسك فاش تكوني كتهضري معايا وماتهزيش عليا صوتك .. وتعلمي تهضري بشوية .. المرة الجاية ترفعي صوتك مغنهضرش معاك بحال هاكا . اما تيليفون وفاس وداكشي اللي كيدور بيك فراسك من لبارح وعصبتينا على الخوا الخاوي.. راك ماعنديش غير نتي ودوك الجوج لخرين فهمتي ..

قبل مايكمل كلامو حسيت بقلبي ضرب ووجهي صفار خلعني قلت صافي زاد الرابعة فشي قرينة اللي ضربو هوا وياها وبديت كنسخن حتى كمل هضرتو ببرودة وعجرفة وقالي راه عندي خدمتي عندي المشاغل ديالي اللي كياهدو من وقتي بزااف .. ماشي مسالي نبقا كنتجمع فالتخربيق ديالكم نتوما العيالات اللي مكايساليش ونبقا مقالبلكم ومقابل مشاكلكم ..كن غير شي حاجة تستاهل .. كدورو فبلاصتكم ومحدودين .. هاهوا عيط لفلانة هاهوا كيهضر مع فلانة .. لا صافي داكشي اللي بقا غير نقطع مع هادي نشد الهضرة مع الاخرى وهي غادية .. ماعندي مايدار من غير الخوا الخاوي ديالكم .. فبلاصة ما تديها فشغلك وشنو يصلاح ليك وتخلينا ندوزو معام هاد الويكاند مهنيين نجددو فيه الطاقة انا وياك ونعيشو بيخير حاضياني شنو كندير .. معامن هضرت ! شنو كتبت .. نعلي الشيطان وديري عقلك واش باقا مراهقة ؟ هاد التبرهيش ديال المراهقات وزعما كبرتي على هادشي وبعقلك واستاذة جامعية !! لعجب كي درتي لهاد التعليم العالي وكي كديري ليه انا بعدا كنستعجب لهاد الطلبة اللي كيحضرو المحضرات ديالك وحتى لهادوك اللي كتجتامعي معاهم فالكلية

قطعني طراف بقيت مصدومة فيه قلت ليه علاش كيفاش جيتك؟؟

قالي كتجيني باقا صغيييرة فعقلك مزال مانضجتيش.. لا الزواج ولا الولادة ولا حتى اللاج بدلو فيك شي حاجة .. باقا سارة هي سارة من نهار عرفتها

بقيت ساكتة ماقدرتش نهضر بقا فيا الحال وغرغرت قلبت وجهي درت يدي على نيفي حسيت بواحد الدمعة هبطات ليا ومسحتها بالتخبية ،. اما هوا قلب وجهه كيشوف فجنة ومجلسها على حجرو كيهضر معاها بشوية ويشير ليها بحجبانو جيهتي .. ماعرفت شنو كيقول ليها عليا .. حطو داك الفطور دوزتو بسيف بحال الى مدوزك الرملة مع حلقي ومن ديك الساعة ماهضرنا بقينا ساكتين وجالسين واحد مكيهضر مع لاخر من غير جنة اللي جامعانا .. دوزنا النهار كله على برا مع البنت وكل واحد كيشوف فجهة حتى عيينا ورجعنا للدار نيشان نعسنا وسبقت ليه القلبة بضهري ماضرتش عندو وما قربش ليا خلاني كما انا وبقا متكي كيتفرج فتلفازة حتى نعس خلاها شاعلة .. صبح الحال ديال الاحد وقالي راني عيطت لباباك وماماك يجيو يتغداو معانا وجدي الغدا ومشا جاب كاع داكشي اللي خاص وقالي طيبي فثر شي حاجة علاش قديتي الباقي غنكومونديه . صاوبت البسطيلة بوحدها ديال الحوت وطلب هوا شلاضة و اللحم مبخر بالخضرة وديسير والحلوى وكولشي وجاب ليا وحدة من عند تريتور اللي طلب من عندو كولشي عاوناتني فالعراضة واستقبلت بابا وماما وفرحو بينا وفرحو بالعراضة وكبرتا بيهم وجلس من مور الغدا بابا والسيهم الحاج على اتاي والحلوى كيتجمعو فالصالون حتى للمغرب ووخرجو فرحانين مشاو ، بقات معايا البنت فكات الكوزينة وجمعات الدنيا وعاوناتني. وهوا جلس هز تيليفون عاوتاني وقالي صاوبي ليا المسمنة ديالك توحشتها . كنت كنصاوب ليه واحد المسمنة ديما من ابتكاري وكانت كتعجبو .. واخا غضبا مشيت لبست ليكات على سعديو وعديوخلطت الطحين على طريقة المسمن وكنزيد غليها واحد خنيشة دالفاني ونص معلقة دالسكر وعجبنتها وبيدت كنطلق ونورق بابزيت والطحين كل مسمنة بوحدها فالاخير حطيتهم كلهم وحدة فوق وحدة فمسمنة وحدة دائرية وجمعتهم فتوريقة وحدة وكترت ليها الزيت من لفرق ودخلتها للفران طابت نص طيبة وخرجتها وجدت ليها للبيسطاش مطحون مع شوية دالسكر واللوز ايفيلي درت الطبقة اللولة داللوز فوقها مزيان حتى غطيتها ورديتها تكرملات مزيان وخرجتها درتدرت عليها مسحوق البيسطاش وديتها ليها غير شافني جايباها بحال العمارية عالية ومورقة كتفتت بوحدها فرح وتقاد فالجلسة قالي واستقبلينا بحال هاكا ماشي تقلبينا علينا وجهك .. حشومة ولالا ؟ وبدا كيضحك

حطيتها ليه وجيت نرجع بحالي وعيط ليا قالي اجي فين غادية

شفت فيه واحد الشوفة ناقصة وقلت ليه مشغولة

حط يدو على الغوطوي قالي واجي اشمن مشغولة .. اجي جلسي

ترددت بقيت كنشوف فجنابي شنو ندير ومشيت جلست حداه غير جلست جرني من جنبي باسني فحنكي وبدا كيضحك بوحدو وحتى قلت ليه علاش كضحك عليا واش انا كلون

طرطق عليا بالضحك وعنقني قالي عزييزة عليا واخا مسطية شي شوية

هزيت حاجبي قلت ليه مسطية ! ..

قالي مسطية فحاجة وحدة.. فعلاقتي انا وياك اما الشي. لاخر ماعندي منقول

قلت ليه اييياااه مابقيتش حمقا وفيا العجب وماشي ديال التعليم العاللللييي و الطلبة ديالي ضايعين معايا وداكشي لاخر

قالي انا قلت ليك هاد الهضرة؟

بقيت غير كنشوف فيه قلت ليه نتا فيك الزهايمر .. ااشرديك الهضرة قلتي ليا قبيلة ؟

دار صبعو حدا فمو وصغر عينو فيا قالي وقولي ليا الصراحة بصح كيفاش دايرة مع الطلبة فالكلية ومع كاع الناس اللي تما

ميعت سيفتي خلاني نميع من سوء الضن دياله فيا وقلت ليه اصلا باش توصل لتما خاصك تكون سيدي ومولاي ماجيتش ووليت استاذة جامعية .. نتا مزال غالط فيا ياكما كايحساب ليك كاع الناس عائلتي كاع الناس حبابي نبقا تابعاهم فحياتهم !! الواجب العملي ديالي كنأديه على اكمل وجه .. الناس اصلا كيشوفوني واعرة عليهم غير نتا اللي كتشوفني مراهقة مسالية اما انا عارفة راسي شكندبر عااارفة راسي شنو باغا فحياتي

ضحك وقالي امممم ماعندي مانتسالك واهاكا نبغيك ..

قاطعتو قلت ليه كاع لاتبغيني انا. باغيا راسي

جرني من عنقي قالي لسانك طويل

لوا ليا يدي مورايا حسابني بصح لاكن جرني وباسني فعنقي من اللور ورخاني بدا كيعنق فيا ودفعتو قلت ليه بعد مني

شدني بالسيف قالي كفاش بعد مني

قلت ليه كيف كتسمع

زيرني من يدي قالي والى مابغيتش

قلت ليه حتى تعرف راسك اشنو كتقول عاد اجي هضر معايا

ضحك وقالي بقا فيك الحال على الهضرة اللي قلت ليك قبيلة؟

شفت فيه باشمأزاز قلت قلت. بقا فيك الحال على الهضرة اللي قلت ليك قبيلة !!! اه اخويا بقا الحال ماشي انا ضاربة تمارة وحياتي كلها كنبخيباغي وندوز فليكرنكور ونبات سهرانة كنقرا ونوض مع الستة باش تجي تقولي بااااز للطلبة اللي كيقراو عندك .. هادوك الطلبة بعدا كيستافدو مني اكثر ما كيستافدو من الاساتذة لخرين

قالي باااينة.. حيت فيك الهضرة بزاف

نترت يدي دفعتو قلت ليه تفرق عليا وجيت نوض وجرني كنت غنطيح على ديك المسمنة فوق الطبلة وشدني لاحني حداه قالي كنتي غترزينا فيها

قلت ليه داكشي اللي كيهمك غير كرشك

بغيت نوض وشدني من المعصم دار يدو على قلبو وقالي وقلبي

قلت ليه سير سير داك القلب عندك بحال الكار فيه خمسين بلاصة

نترت يدي ومشيت بقا كيشوف فيا بقا عليا يااكي ما ياكي وعقلي فيها وخليتو مشيت بحالي اصلا ماعندو مايصور مني .. جاني فبالي نخرجها منو ومشيت عند دبك البنت اللي جاب ليا تعاوني قلت ليها تسخر ليا للفرماسيان اللي حدانا وقلت ليها غير سيري انا غنعيط ليها تعطيك الدوا وعيطت للبنت اللي تما فتيليفون قلت ليها بغيت منشط. جنسي شي حاجة فعالة وآمنة

اقدمت على اول جريمة فحياتي وحطيت ليه حبة فكاس د أتاي اللي كيعجبو وخليتو دوز بيه الساعة من بعد ما كلا ديك المورقة ومشيت للبيت مع بنتي قلت مع راسي ندوز معاها الليلة ونعس حداها .

حطيت راسي ننعس حتى خلعني جا عندي بلا حس وهضر فودني قالي غتنعسي هنا؟

درت يدي على صدري قلت ليه خلعتيني

شدني من يدي بصوت منخفض قالي شوو غتفيقيها وشار ليا براسو قالي يالاه ونضت مشيت معاه للبيت ومع السدة دالباب ضار عندي كمشني مع البلاكار كيطلع ليا حوايجي ويبوس قالي توحشتك وكنجي كنجري عندك وفاللخر كتعصبيني

بعدت وجهي من قبلاتو السريعة وقلت ليه فيا ليغيكل

بعد وجهه عقد حواجبو قالي شنو ؟

قلت ليه هادشي اللي عطا الله

هز حاجبو قالي لالالا كضحكي

بديت كنحلف ليه ماتاقش بيا وهبط ليا سروال البيجامة وانا كنجر وهوا كيجر بالواقفية جر سليب شاف الحفاضة وقالي دابراها بلعاني ولا بصح ؟؟

قلت ليه ماتقتيش بيا

تنهد بانزعاج وقالي مشكييلة

قلت ليه علاش؟؟ مالك واش ضاروري؟؟

قالي ضاروري واش انا جاي عندك من فاس وسيمانة ماشفتكش وكتقولي واش ضاروري

قلت ليه هي كيجيبك عندي غير هادشي

قالي خلي التأويلات ديالك حتى للصباح .. ومكتفاداوش حياتكم كلها فيراجات

نترت يدي قلت ليه واشد ليك لوتوروت خليتو واقف ومشيت نعست ، حا نعس حدايا وتكا عليا كيشمشم ويبوس قالي مالكي فيك هاد الفعايل

قلت ليه عفاك خليني نعس

قالي وانا اللي غنمشي الصباح وناغنشوفكش حتى للويكاند اللي موراه

قلت ليه ماعندي مندير ليك خليني نعس

دار واحد الضحكة بالجنب وقالي اجي نوريك شنو ديري

عطيتو بضهري قلت ليه لا اصلا فيا العادة ومن حقي نرتاح وماتقربش ليا

هز راسو قالي يااك

قلت ليه ااه

بعد شوية تكا حدايا وانا حداه كنلوح لغطا برجلي بلعاني وكنسمعو كيسوط وينعل الشيطان ويستغفر حى عيا ورجع عندي كيطلبني وانا حالفة حتى نخرجها منو باش عمرو يعاود يقلل مني ويضرب ليا الف حساب وحساب . طلعت عليا الغطا مابغيتش وتعصب قالي زدتي فيه كاع غتندمينا كاع علاش جينا

ضرت عندو قلت ليه الى كان هادشي اللي جابك راه ماكاينش

زفر واحد الزفرة حسيت بيها طالعة من قلبو وقالي واخا ونتر المانطة ناض من حدايا واحد النوضة بحال العجاج خلعني وجلست كنشوف قدامي تخلعت وقلت اش داني كاع لهادشي كندير المشاكل لراسي وكن غير درت ليه خاطرو تفوو .. ولاكن مابغيتش نتراجع مدام رفضت ووقع اللي وقع . شفت حسو تقطع ونضت نشوف فين مشا لقيتو كيصلي. حسيت بواحد النار حرقاتني فاش شفتو كيصلي وخفت من غضب الله عليا ومشيت جلست فالجنب حداه كنتسناه يسالي ونقول ليه سمح ليا وكنتمنى مايكونش كيدعي عليا . بقيت كنتسنا فكل مرة كنقول هاهوا غيسالي كيعاود وكنشوف وجهه احمر ومكيشوفش جيهتي بمرة حتى بغيت نبكي من تأنيب الضمير وعييت جالسة وبغيت نهضر واخا كيصلي لاكن لزمت الصمت وكرهت راسي ندمت على ديك الكينة اللي عطيتو . كان فالاول كيصلي بالزربة ومعصب وشوية بشوية بداك يتقال وبدا لونو كيرجع وسلم ونضت بالاه قلت ليه عيسى وبغيت نقول ليه سمح ليا سبقني هز القرآن وبدا ينعل الشيطان وجلس كيقرا.. حسيت بالندم الشديد ونضت خليتو قلت خليتو

قلت خليه حتى يبرد شوية باش يجاوبني تكيت ناعسة نص نعسة وكنسمعو كيقرقب فلكوزينة ونضت طليت بنص عين لقيتو كيعصر واحد الحامضة فالكاس وماعرفت اش داكشي زاد عليها وجلس على واحد الكرسي كيشوف فنطقة وحدة ويدور داك الكاس بيدو ونزل عليه نزلة وحدة شربو وبقا جالس شحال عاد وقف ومشيت بالجرا للبيت طحت بلاصتي لاكن ماجاش عندي بمرة حتى سمعت الفجر كيأدن ومشيت طليت عليه لقيتو كيتوضا يصلي ورجعت نعست نعاس المرض اللي ماشديناه لا انا لا هوا حتى صبح الحال ونضت نواجهه وجها لوجه من بعد الليلة الكحلة .. غير دخلت للكوزينة دخل للبيت نعس بلاصتي وماجاتش فرصة نصبح عليه ودوزت الصباح غير انا وبنتي مابغيتش نفيقو خليتو وكنقول هاهوا غينوض لاكن ماناضش نعس نعسة ديال الاموات حتى اذن العصر عاد سمعتو ناض ومشا كيدوش وخرج لقاني موجدة ليه الشهيوات اللي كيبغي لاكن ماشافش جيهتي وبقيت غير واقفة كنشوف فيه محني عند بنتو كيضحك معاها وهزها خرجها معاه ماقدرت حتى نسولو فين غاديين .. دازت شي ساعة ونص ورجع بيها هازة العاب جداد وحطها ومشا سد عليه الباب حتى تم خارج لابس دجين وتريكو صوف رقيق وبوت كحل دالرجال ومونطو فيدو جار باليزتو وداز من حدايا هاز حاجبو هز سوارتو وتم غادي جيهت الباب .. عيطت ليه قبل مايخرج. عيسى. لاكن خرج وخلاني واقفة وضميري كيأنب فيا وكنتخيل شي تخربيق مرضني بلا الضمير اللي كمل عليا

بقاو ليا دوك الشهيوات فراسي وهمي كامل فدعاويه خايفة يخرجو فيا . بقيت مشطونة وقلبي ماطاوعنيش وبديت كنصوني عليه فتيليفون ماجاوبنيش .. عييت نصوني وبغيت نعرف كي وصل لاكن ماردش عليا كاع وسيفطت ليه مسج قلت ليه واش وصلتي الى وصلتي رد ليا الخبار باش نرتاح

ود عليا قالي غير تهناي من جيهتي

حسيت بقلبي ضرب ماعرفتش شمو كيقصد بيها زعما !! كفاش غير تهناي من جيهتي شنو زعما !!

كتبت ليه مسج قلت ليه الحمد لله على سلامتك

شافو وماردش عليا وخلاني كنتعدب بيني وبين ضميري والندم كياكل فيا . هزيت بنتي ومشيت لدارنا نجلس معاهم وبديت الخدمة من جديد .. نفس الروتين ونفس الايام كيتكرر ورجعت انا اللي كنصوني عليه ونسول فيه ومرة يجاوب مرة مايجاوبش والى رد عليا كيسول غير على بنتو وكيقولي عطيها تيليفون نهضر معاها وكنخليها كتبجغط هي وياه . بقينا على داك الحال حتى دازت سيمانة ووصل نهار الجمعة وهزيت بنتي مشيت للدار سبقتو وقبل منمشي سبقتها بواحد تحميمة دايزها لكلام ووحدت راسي بحال شي عروسة وصاوبت شعري وبدلت الفراش دالبيت وقاديت كولشي. ودرت ليه الشهيوات اللي كيبغي وبقيت غادية جايا بحال العروسة والروايح كتفوح وليزاكسيسوار واللبسة جديدة والمكياج وحاضية الساعة حتى وصلات لعشا شفتو تعطل وعيطت ليه بديت كنصوني ونعاود حتى جاوبني ..سمعت الهضرة دالناس بحال الى جالس مع شي ، قلت ليه اش خبارك فين وصلتي واش مزال فالطريق

جاوبني وقالي ماغنجيش هاد الويكاند عندي شي شغل

حسيت بالضو ضربني من صبعان رجليا وانا جالسة شادة تيليفون فيدي وقلت ليه بحالاش هاد الشغل ؟

قالي الخدمة .. من بعد ونعيط ليك نهضر مع جنة يالاه بون وي

قطع عليا وخلاني جالسة كنشوف فالحيوط وقلبي مقبوط والدار ضلامت عليا وطاح عليا الضيم .. بقيت كنشوف قدامي حتى عيطات ليا يسرى لقاتني مهمومة جالسة بوحدي وجايبة ليا خبار سخونة .. قالت ليا واش عيسى جا عندك؟؟

قلت ليها لاماجاش قالك عندو شي شغل شغل

قالت ليا انا نقولك فين راه راه عندي خبارو

خلعاتني قلت ليها فين اشمن خبار

قالت ليا عرفتي شنو .. عيطات ليا لبارح رجاء كتسولني على واحد المطعم كنت تعشيت فيه مع راجلي وصورتو فسطوري واتساب قالت ليك حقا ما حقا عيد زواجهم وبغات تحتافل بيه وماعرفاتش فين وعجبها المطعم

بقيت ساكتة كنشوف قدامي والدموع تحجرو فعيني قلت ليها دابا هما بجوج؟

قالت ليا غالبا غيكون معاها ليوم عيد زواجهم وبلعاني كتسولني دوك الاسئلة باش كولشي يعرف باللي عيد زواجهم وكيحتافلو بيه وداك البروطوكول ديال الزوجة المثالية وقالت ليا راه دايرة ليه سوربرايز زعما عارضاه بلا خبارو وبغات تريزيرفي طبلة على حسابهم وديك الرمنسية دعادل امام

بقيت ساكتة هي كتهضر وانا كنقطر بالدموع حتى بدات كتقول ليا الو الو وقلت ليها انا معاك كنسمعك .. مزيان الله يكمل عليهم

قالت ليا ياكما كتبكي !!

مانت ناقصاني غير ديك الجملة ونتفركع بالبكا وبدات تواسيني قالت ليا كنوضل ليك الهضرة وكندم ااخر مرة نقول ليك شي حاجة وماتلومينيش الو خبيت

قلت ليه بعجبك الحال دابا خلاني موجدة ومحضرة ليه والويكاند ديالي حيدو ليا ومشا يحتافل وماقدرش حتى يعلمني يقولي ماغنجيش حتى عيطت ليه انا دابا

قالت ليا اوييلي ماقالك والو ماعلمكش

قلت ليها ماقالي والو

قالت ليا ياكما نسا !!

قلت ليها منعرف وبقيت كنبكي وهي كتسكتني حتى شبعت وقطعت معاها وجلست كنتنخصص بوحدي حتى طاب قلبي وعاودت عيطت ليها قلت ليها عطيني نمرة رجاء .. سولاتني واش مابقاتش عندي قلت ليها بدلت تيلي ومشا كولشي .. بقات كتسولني علاش بغيتها وخايفة نخلق شي مشكل وقلت ليها ماغندير والو غير عطيها ليا وخديتها قيدتها عندي وبديت نقلب عليها فسطوريات دالواتساب لقيتها حاطة شي حاجة .. باللهفة والفضول دخلت كنشوف وندوز لقيت شي تعابير دالحب بالعربية والفرنسية حاطاهم وفيديو دالحب وجلست كندوز فداكشي حتى دخلت فتصاورها مصورة راسها غير النص مكيبانش وجهها وجالسة فمطعم كبير راقي ولابسة ومقادة وكتصور الماكلة وتشدات معاها واحد البواطة زرقة ديال المجوهرات محطوطة فوق الطبلة ومصورة واحد الصورة هي وياه جالس حداها ومشابكين اليدين بجوج وطالقة عليها اغنية انت لوحدي.

تشوطت فقلبي حسيت بأعصابي تشنجو وبديت كنترعد فبلاصتي.. فقصاتني رجاء بكل معنى الكلمة وخدات ليا الويكاند ومن فوق هادشي مقيدة نمرتي وكتسناني ندخل نشوف ووصلات لشنو بغات . مرضت ومابغاتش النعاس يدوز عليا وحتى بنتي تغيرات بدات غير كتبكي وماخليت ما درت ليها حتى شبعات بكا وعطيتها اللويزة ونعسات حدايا وجلست انا مقابلة تيليفون كنتسنا شنو حطو وتابعاههم .. صورات الطريق وهما فالطموبيل ومن بعدها ماعاودات صورات حتى حاجة وبقيت انا ساعتها كنتحرق فبلاصتي ماقدرتش نبرد وكنقلب على مهدىء يهدنني ويطفي النار اللي كتاكلني لاكن والو . هزيت تيليفون كنتنخصص بالبكا وتهديت ماقدرتش نصبر وعيطت ليه بقيت كنصوني عليه مكيجاوبش و ماحدو منخلني. وانا مصرة نهضر معاه حتى جاوبني بنبرة حادة وصوتي كيترعد فتيليفون وكنبكي قالي الو شنو ؟

جاوبتو وصوتي كيتقطع كندفعو بزز ماقدرتش نهضر وانا نسكت بقيت غير كنبكي ..قطع الحس فاش سمعني كنبكي وكنسمع غير انفاسه فتيليفون فاللخر قطعت وشديت واحد نونوس دبنتي عضيتو وبديت كنبكي بحال الحمقة ونتعصر وتيليفوني كيصوني .. خليتو كيسرسر وتقلبت عنقت بنتي وبديت كنبكي حتى حسيت بقلبي غيسكت وكنطلب الله يديني النعاس ونعس على الاقل نرتاح بقيت هاكاك حتى داتني عيني ماعرفتش فوقاش نعست ولاكن نعست مريضة اي حركة دارتها بنتي كنحل عيني وكنمشي للتيليفون نطل عليه ونرجع نطيب النعاس بالبكا وصورتو مع رجاء بغات تخرج ليا عقلي . ضربات الشمس ديال الصباح فوجهي نيشان حيت نسيت ما رديت الريدو بالليل وحليت عيني جيت فالساعة كانت تمنية وطار ليا النعاس قلت نوض نوجد لفطور لبنتي ونشغل راسي. وقفت دزت على المرايا شفت وجهي كان مخمج بالمكياج وناعسة بحال شي عروسة غتروح . مشيت للحمام غسلت وجهي وقشرتو تفكيت من دوك الالوان ودهنتو براحد الكريم على الله يرتاح .. حسيت بوجهي سخون وحناكي حومر ونيفي حمر بالعافية اللي شعلات فيا ومشيت بالاه بغيت ندخل للكوزينة سمعت الساروت كيدور فالباب ورجعت خطوة اللور تخلعت قلت ياكما شفار جا يسرق على الصباح .. لاكن تصدمت فاش شفت عيسى حل الباب ودخل هاز راسو ردها موراه وانا مصمرة كنشوف فيه ماقدرتش نتيق. بقيت كنقول واش تسطيت!!! ياكما تسطيت بديت كنشوفو فكل بلاصة

شفتو بحال الى شفت الموت .. شعل فقلبي واحد الكره من جيهتو بحال شي واد من لهيب. وقلبت وجهي دخلت للكوزينة وردبت الباب ورايا كندير لفطور حتى دخل عندي بقا كيشوف فيا ويشوف شنو كندير وقالي صباح الخير

مارديتهاش عليه وتزيرو ضراسي عليا حشيت بالفك ديالي يبس وعنقي تشنج وفقلبي واحد الشعلة باغا تنوض وسادة عليها ومكمداها .. قرب حتى لعندي بقا كيدير فيا شي شوفات ومتردد غير بوحدو باغي يهضر وماباغيش يهضر . طفيت على الحليب ومشيت خليتو واقف ودخلت للبيت هزيت تيليفوني درتو يتشارجا وبديت كندور بالبيت . دخل مورايا حيد لافيست وسبرديلتو وتكا فبلاصتي حدا بنتو وبقا كيشوف فيها ويشد ليها فيدها وانا حاضياه من المرايا ساهي فيها وكيخمم . مشيت للكوزينة حطيت الفطور تما وجلست كنفطر بوحدي عاطية بضهري للباب والدموع فعيني كناكل بزز . سمعتو دخل ووقف ورايا تكا بيدو غلى الطبلة ونزل لمستوايا وقرب حدا ودني قالي كتفطري بوحدك

مسحت يدي ونضت خليت ليه الطبلة وماباغاش نهضر حيت الى هضرت غادي نتعايب ومابغيت حزارة ومابغيت خاطر وماقدرتش نبرد وخاطري مدمر .. تجاهلتو بما فيه الكفاية حتى وقفني حدا الباب وبدا كيهضر معايا بعينيه وهزيت فيه عيني ولساني كيترعد بالفقصة قلت ليه اجي. ومشيت قدامو قلت ليه جلس وجلس فالصالون وجلست قدامو بقا كيشوف فيا مافهم والو وكيتساىل بعينيه .. قلت ليه طلقني اعيسى

بقا ساكت غير كيشوف فيا وقالي كلمة جوج طلاق ؟؟ً اش وصلنا ليه ؟

قليت وجهي وقلت ليه انا اللي بغيت .. صافي حتى لهنا وحبس ماغنزيدش معاك

هقد حجبانو وتكا على ركابيه كيشوف فيا وقالي الطلاق اسارة!!

دورت وجهي سكت وهوا ساكت كل واحد كيشوف فجهة وبقيت ساكتة حتى عييت وضرت عندو والدموع محجرين فعيني قلت ليه طلقني وهاد المرة بالثلات باش نتهناو فمرة

ضار شاف فيا وقالي علاش شنو اللي خلاك طلبي الطلاق ؟

طلعات معايا واحد تنخصيصة وقلت ليه انا ماشي. ديال التعدد وماشي ديال هادشي .. ومانصلاحوش لبعضياتنا لا انا لا نتا

ناض وقف قبل منكمل كلامي طلع سروالو من اللور ونفض هضرتي وقالي من بعد ونهضرو فهادشي خلي من بعد

وقفت قدامو ماخليتوش يمشي حسيت بواحد الدمعة طاحت على خدي ومستحتها بالزربة قلت ليه غاتسمعني ومن بعد سير ورتاح فخطرة

دار يديه على جنابو بقا كيشوفيا وقالي واش جبت عليك شي مرى اخرى؟؟؟

قلت ليه هاديك اللي عمرها مغتكون حيت انا مغنكونش وماناقصانيش يد ولا رجل باش تجيب عليا وحدة اخرى

قالي وشنو بغيتي ياك نتي اللي بغيتي

قلت ليه بغييت ودابا مابقيتش باغا صافي؟؟

تنهد قالي خلي هاد النهار يدوز ومن بعد نهضرو فهادشي

قلت ليه حتى حاجة مغادوز .. انا بغيت الطلاق وليوم .. طلقني وبعد مني خليني نرتاح فحياتي .. مابغيتك لا نتا لا عيالاتك

بقا كيشوف فيا مطولا وربع يديه قالي واش انا كرهت ؟؟ عاجبك هاد الحال ديال كل سيمانة شاد الطريق ؟ واش انا تزوجت بيك وجبت عليك شي مرى اخرى ؟ كن عرفتك قبل منهم ماكنتش اصلا غنفكر فالزواج ولا فالتعدد.. هادا مكتاب الله شنو بغيتي

هزيت صبعي قلت ليه نتا واعدتيني باش تعدل وباش نبقا مرتاحة فحياتي .. فين هي هاد الراحة هادي؟ فين انا كاع مامرتاحة ومكنشوفش هاد العدل كااع .. كتعدل غير بين لبنى ورجاء وانا اخر وحدة كتفكر فيها .. هما كدير ليهم الخاطر وتهلا فيهم وانا لا غير شايطة عليك

قالي نتي كتشوفي غير الحوايج الخايبين .. شتي هاد الويكاند اللي كنجي فيه راه نايضة عليه القتيلة وخليتو ليك نتي .. وهاد الهضرة كووولها اللي كتقولي وكنصبر عليها راه ماكتقولها لا رجاء ولا لبنى .. النهار الاول قلتي ليا منجبدهمش ونكنجبدهمش .. ولاكن نتي مكتخليش بنادم يبقا ساكت ومهني فمخو

بقا داك الاحتفال كيطلع فيا ويهبط ماعرفت كيفاش نجبدو ليه وقلت لقت ليه اشمن ويكاند ؟؟ حتى الويكاند طمعتي فيه ودوزتيه مع لبنى وماقدرتي حتى تعيط ليا تقول ليا مغنجيش ماتسناينيش

هز حاجبو وربع يديه قالي ونسيتي شنو درتي الويكاند اللي فات ؟ ماشي حشومة عليك داكشي اللي درتي

قلت ليه شنو درت ؟؟ اشنو كاع درت واش حيدت ليك شي حاجة ولا منعت عليك شي حاجة اصلا كان عندي عذر

حرك راسو وقالي المهم ماعلنيا .. نساي داك النهار ونعلي الشيطان

قلت ليه ماغاديش نتراجع فكلامي صافي .. عييت ومابغيتش هاد العيشة .. ماشي قد كلمتك وكتعاملني بحال شي عدوة ومخليني لبارح كنتسناك ومشيتي تحتافل بعيد زواجك نتا ورجاء وماكنهمك لا انا لا بنتك ولا حتى واحد .. دوزتي وقتك على خاطرك عاد جاي عندي… صافي غير بقا تما

سكت فاش حطيت ليه كولشي وقلت ليه نتا كتكدب عليا .. مكتصارحنيش ديك المرة فاش مشيتي ماعيطتي ماسولتي وفاش عيطت ليك قلتي ليا نتا فالخدمة ونتا كنتي مع رجاء

استغرب قالي فوقاش؟؟ فكريني

فكرتو وعيا يتفكر وقالي ماشفتش كاع رجاء ديك اليوماين اصلا اش كتخربقي

قلت ليه كنتي معاها وانا متأكدة من هادشي

قالي واخا ومن بعد الى كنت معاها ولا ماكنتش فين كاين المشكل؟

قلت ليه فيك نتا حيت كتكدب مكتقولش ليا الحقيقة حتى كنكتاشفها انا

بقا غير كيشوف فيا قالي ونتي منين كتجيبي هاد الاخبار كلها انا وماعرفهاش على راسي .. واصلا مكنكبدش عليك ونتي عارفاني مكنكدبش.. الى قلت ليك مشغول ولا خدمة صافي فهمي راسك علاش كتقلبي على الصدع واش بغيتي نعطيك ليديطاي ديال كل حاجة ؟

قلت ليه اااه صارحني وماتخبيش عليا ..

قالي واخا لاللة بغيتي الصراحة غنصارحك وتقبليها ماتجيش تشكي عليا

قلت ليه مانشكي عليك ماتشكي عليا يا اما طلقني ولا طلقهم يا انا هما

ماجاوبنيش وجلس ،. سمعت صرت بنيتي فاقت ومشيت بدلت ليها وهزيتها سمعتو عيط ليا من الصالون قالي جيبيها ليا وديتها ليه منفخة قالبة وجهي حطيتها على رجلو ومشيت للمرايا كنشوف وجهي مابغيتش نبان مقهورة اقل من لبنى ورجاء وحتى الى قلت شي كلمة قاصحك تجي معايا وتزادني التقة فالنفس. بدلت حوايجي لبست واحد الكسوة فوق الركبة شوية كحلة مزيرة ومشطت شعري المتموج وطلقتو ورشيت الورايح حتى تشبعت مزيان بالعطور ودرت واحد الخلخال رقيق وصندالة مزغبة دالصبع ولبست ساعتي وخواتمي وحوالقي وسنسلتي وخرجت للكوزينة هزيت لفطور دبنتي وديتو ليها دزت قدامو حسيت بيه كيشوف فيا بنص عين وجلست كنوكلها وهي جالسة عندو كتلعب معاه حتى حسيت بيه دار يدو ورا ضهري وشوية بشوية بدا كيحركها ويمسح على جنبي .. درت راسي عديمة الاحساس ومشغولة كنوكل بنتي حتى شبعات ونزلات فوق الزربية كتلعب ،. حطيت المعلقة ونضت من حداه مشيت للكوزينة كنجمع ماعن الفطور وجا عندي وقف مورايا قالي نخرجو جنة تلعب شوية على برا

رديت عليه وانا كنمسح البوطاجي قلت ليه خرج نتا وياها انا مامسالياش

حط يدو على خصري قالي خلي عليك هادشي وعطينا وقت شوية

رديت بجدية قلت ليه هضرت معاك دابا نتا قرر يا انا هما

جيت نمشي وكلاني مع الرخامة قالي مكاينش الطلاق غير نسايه غنبقا انا ونتي حتى للموت

قلت ليه بغيتي تقصد انا وياكم ماشي انا ونتا

قرب لوجهي كيشوف فيا خلعوني نضراتو وحسيت براسي كنغرق وقالي نهار غنحس بيك مقتانعة وباغا الفراق بصح ديك الساعة نفكك اما دابا لا

بقيت كنشوفً فيه قلت ليه باش عرفتيني مامقتانعاش؟

قالي كنحس بيك ..

قلت ليه كن كنتي كتحس بيا مغتعدبنيش معاك .. غا

قاطعني وميل راسو زاد قرب ليا وحط يدو على حنكي كيمسح بصبعو حدا فمي ويتأمل وقالي نتي اللي محلية ليا حياتي .. نتي اللي كنلقا معاك راحتي .. واخا نعدل حتى نعيا الى غلطت فحقك راه من خوفي نكون كنبين حبي ليك واهتمامي بيك بلا منشعر

سكت بقيت كنشوفً فيه ماعرفت واش نتيق بيه ولا لا ولا كايراضيني باش نرضا وصافي

قلت ليه هاد الهضرة واش غير ليا ولا لرجاء ولبنى حتى هما

رخا يدو وتنهد قالي بوحدك … ليك. بوحدك ياربي تيقي بيا وماتبقايش تشكي فهادشي .. قلت ليك كنبغيك .. كنبغيك نتي وبوووحدك واخا غتحمقيني

قلت ليه ماعرفتش علاش ماقادراش نتيق .. زعما مكتقولش نفس الهضرة للخرين

بقا كيشوف فيا مطولا وقالي واش كتآمني بالله ؟؟.

حركت ليه راسي بالايجاب وقالي واصلي على النبي.. قلت ليك كنبغيك ومقلتها لحتى وحدة

بقيت ساكتة كنفكر وقلت ليه ومللي نتا مكتبغيهمش علاش مزوج بيهم؟

سد عينيه وهز راسو كيسوط وقالي علاش اسارة كتقلبي على الصدع ؟ً.

بقيت ساكتة كنفكر بغيت نشريها لرجاء وقلت ليه راه رجاء ناشرة تصاوركم شافكم العالم كتعشاو لبارح وجايب ليها الكادو

تبدل ليه اللون قالي كيفاش؟؟ فين شفتي هادشي

قلت ليه بلاتي نوريه ليك

مشيت كنجري للبيت هزيت تيليفوني ورجعت عندو حليت السطوريات دالواتساب قلت ليه انا نوريك . بقا كيشوف معايا وانا كنقلب عليها لقيتها مسحات كولشي وحطات الادعية والقرآن وانا نتعصب قلت ليه مسحاتهم .. ولاكن لبارح حطات المطعم وحطات تصويرتكم مشادين فاليدين وعايشين الحب وصورات العشا بالامارة كليتو ستيك داللحم ياك.. وجبتي ليها كادو فبواطة زرقة .. ويعلم الله لمن سيفطات التصاور كاع وانا جالسة هنا كنتسناك ودايرة ليك العشا وموجدة ليك باش نصلح غلطي معاك ديال السيمانة اللي فاتت ساعة نتا ماتستاهلش كاع عندك اللي يعوضك الحنان اما سارة غير شايطة حتى تلقا فراغ عاد اجي عندها .

خرجت خليتو واقف ومشيت ماهضرتش معاه وحتى هوا سكت ماجبدش الهضرة معايا وحسيت بيه ماعجبوش الحال وتبدل عليه الجو .. سولني واش نخرج معاهم ومابغيتش وخرج غير هوا و بنتو دوزو العشية على برا ورجعو للدار ومشا جلس ماهضر معايا ما نطق بقا كل واحد فينا كيخمم مع راسو فصمت حتى للعشا .. حطيت العشا وجلست كنتشعا بقينا مشطونين مع جنة وهي كتاكل معانا وهزها كيراري بيها نعسها وداها بلاصتها وقلت مع راسي نمشي نضربها بتفركيسة فاعلة تاركة ننعس فيها ونضربها بغضبة نزيد نشعلو على رجاء مزيان يمشي يخرج فيها الغدايد ديال هاد الويكاند ومادابيا يطلقها يقول ليها سيري عليا فحالك . غاندير الزردة موراها

دخلت فالفراش وشديت تيليفون سيفطت ليسرى مسج قلت ليها راني شفت سطوريات وقلتها ليه خفت مايتيقش بيا حيت مسحاتهم .. قولي للبنى تشكي عليه تقوليه راه حطاتهم ومسحاتهم باش مانبانش انا الكدابة فهادشي وباغا ندير الصدع

قالت ليا واش متأكدة شفتيهم حيت انا ماشفت والو !

قلت ليها شفتهم متأكدة ومع الفقصة والغدايد ماسكرينيتش ولاكن الى جات لبنى أيداتني فهادي غادي تكحال على رجاء باش نيت تتعلم تفقصني بالسطوريات بنت الحرام كضربني من تحت الدف

قالت ليا نعلي الشيطان راه هادشي فيه الصدع مادخليش راسك فيه من الاحسن

قلت ليها لالا غير علمي لبنى قولي ليها تشكي عليه باش نطير ديك رجاء راه كضربني بالبرد وانا مجايبة خبار

قالت ليا منقدرش ندخل فهادشي اسارة غير سمحي ليا حيت فيه الصدع والمشاكل

قلت ليها المهم نتي غير هضري مع لبنى ولا عطيني نمرتها انا اللي نهضر معاها

ماجاوباتنيش على المسج اللخر ديالي ومسحت كولشي بالزربة خفت يحصل عندي المساجات وحطيت تيلي فاش نعس حدايا وحيد حوايجو عرا عليا صدرو ودار يدو مورايا قالي حطي داك تيليفون شوية

جرني عندو يالاه قرب يبوسني بعدت قلت ليه ماتقربش ليا حتى ترد ليا حقي اللي هضمتي

قالي امن حق هضمت؟

قلت ليه انا طلقتيني على كلمة وحدة ورجاء يجوز ليها دير اللي بغات ماتتحاسبش

قالي واش ضاروري نحاسبها قدامك؟

قلت ليها كما حاسبتيني حاسبها حتى هي

قالي نتي الغلط اللي درتي ماحتارمتي حتى واحد .. لا واليديا ولا انا وقلتي هضرة قدامهم .. ااخر حاجة ندوزها هي قلة الاحترام سوا منك ولا من شي واحد اخر

قلت ليه وها رجاء ماحتارماتكش ونشرات تصاوركم كااع كتتحابو باش تفقصني انا ولبنى .. والنهار اللي خاصك تجي عندي فيه دوزتيه معاه فين هوا العدل

شد ليا يدي كيحسب ليا قالي اولا انا قلت ليك غنجي الويكاند وهانا جيت .. الجمعة اصلا ماداخلش فالويكاند ومني راسي كنبغي نجي عندك فيه .. فين هوا حقك اللي تهضم

بقيت كنشوف ونستوعب لقيت راسي مزالة فالسبت ومالقيت مانقول وهوا يهز حاجبو وقالي شفتي دابا العيب شحال خايب

قلت ليه وعلاش شديتي ليا فهادي بالضبط وماشديتيش فالاشهار اللي دارت رجاء

صغر عينيه وقالي مغندوزهاش ليها .. غير حتى نرجع بقيتي على خاطرك ؟

ربعت يدي قلت ليه شنو غدير غتسيفطها بحالها؟

قالي نسيفطها بحالها؟؟

جاتني على قلبي خرجتها بشدة قلت ليه سيفطها طلقها بالثلات كاع اصلا تستاهل

طل عليا بعينيه بقا كيدير فيا شي شوفات وانا مربعة يدي كنشطح برجلي ونشوف فيها .. حولت النضر عندو شفت فيه وفلحيتو وشعلامو اللي خباو شفايفه وخلاها زادت كترات على اللي قبل ومن الاحسن .. بكثرة ماكيعجبني فمو وشفايفو كنت بغاهم يتغطاو مايبانوش نشوفهم غير انا ونقيسهم غير انا .. بقيت كنتأمل فيه وشحال هادي ماتأملت ملامح وجهه وعينيه السوداء .. حسيت براسي عاد كنتعرف عليه لأول مرة ونتعرف على بريق عينيه اللي فيهم الف قصة وقصة .. تنهدت ماعرفتش كي ندير لحالتي وشحال كنبغيه وشحال كنكرهه فنفس الوقت .. كيطيح ليا النص فاش كنشوفو كيدير فيا دوك الشوفات اللي واخا نعيا نفسرهم ماكنجيش فتفسيرهم وكيخلي قلبي يضرب وكنسا كاع المحاين وشنو كيدوز عليا .. كنقول ندفع عليه كبير ونهز خنافري فالاخير كنلقا راسي انا اللي كننجادب ليه وكنحاول نجدبو ليا .. قرب ليا ماجاوبنيش على اخر جملة قلتها ودوز يدو على خصري بحال شي هوا دافي وتقربنا من بعض وباسني جنب فمي وبدا كيقرب بقبلات متتالية تقيلة خلاني كنتدور جوعا لقبلاتو حتى باسني على شفاهي ولمست شعريات شواربه الخشنة بشفاهي وبديت كنحس بلسانو كيتسلل بين شفتاي ولمسات يديه على جسدي بحال الماء دافي .. كنت باغا نعتارض لاكن ماقدرتش وبديت كنحس براسي كنخرج الحقيقة ديالي وكنعري على مشاعري وحسيت بيه عرا على مشاعره حتى هوا وكسر جميع حواجز الخجل اللي بيني وبينو وتعاشرنا لأطول مدة بجميع الوضعيات حتى تهدينا وتكينا كنهضرو. قلت ليه بغيت نسولك وحشمت

حشمتي؟ وهادا العجب !

جمعت حجباني قلت ليه علاش مالي كي كنبان ليك ؟؟ بلحق انا اللي غالطة عندك الحق تقول هاد الهضرة .

حسيت بقلبي تدبح مارضيتش ندمت على كاع ديك العفوية والحقيقة اللي بينت ليه وتمنيت يرجع الوقت اللور وندير فيها الشريفة العفيفة وشرطي المرور فالعلاقة ومنخليهش يتمادا . بلحق هادي نتيجة الحلان ديالي.

جيت ندور وشدني كيضحك قالي ماشي داكشي اللي نويتي مالكي كتفهمي الهضرة بالغلط

ابتسمت وقلت ليه ماشي مشكل صافث نسا

طلعت الغذا عليا وقالي شنو كنتي باغا تسوليني ؟

قلت ليه نسيت

قالي قلتي ليا بغيت نسولك وحشمت سولي حتى انا بغيت نعرف

قلت ليه ماعقلتش نسيت

قطعتها فصدري وسكت نعست وحلفت حلفة قطعية مانعاود نتعامل معاه بعفوية، مكاين غير التميثل حتى انا والله يقدرني عليه ويصبرني حتى نوريه الجهة لاخرى من شخصيتي اللي ماكرهتش نبينها لاكن مكنقدرش وغيرتي كتسيطر . صبحت الصباح معولة نوريه الوجه لاخر وعيطت لماما كنسولً فيها وكنطلبها دعي معايا .. بدات كتدعب وكتسولني مالي شنو واقع قلت ليها ماماليش وحبست البكية مابغيتش نبينها ليها .. قالت ليا راه باك داير لغدا عل حسابكم تجيو تغداو معانا راه كيصوني على عيسى ومكايجاوبش . قلت ليها مزال ناعس انا غنقولها ليه وقطعت معاها مشيت عندو لقيتو حل عينيه كيشوف فالسقف وابتسمت قلت ليه صباح الخير .. راه بابا كان كيصوني عليك

هز راسو قالي اري ليا تيليفون ومديتو ليه خرجت وخليتو كيهضر ووصيتو على جنة يرد معاها البال ودخلت دوشت وخرجت دايزة لابسة بينوار والفوقة على راسي بحال القبة دزت من حداها وهوا عريان لابس غير السروال ديال لكيطمة . ضربني لمؤخرتي وهزني بواحد القرصة من الوسط حسيت بالبينوار طلع معايا ونقزت ضرت عندو قلتو شنو كدير؟؟ شهادشي راش انا بنت ليك ديال الزنقة

عاود سمطني وقالي وانا قلت ليك بنت الزنقة ؟درت يدي ورايا وتمرت عليه قلت ليه ماديرش ليا هاكا مكنبغيش بحال هادشي وهزيت بيجامتي خليتو غير كيشوف. باش نوريه الحشمة والعفة حيت هوا ماشي ديال العفوية والتلقاىية فير ديال التمتيل والكدوب والنفاق والله يقدرني على هادشي كامل نجمعو ليه فطبسيل واحد ونقدمو ليع

مشينا لدارنا عرضو لينا للغدا ورحبو بيه وحتى هوا مشا بالكادويات وجلسنا تغدينا دارو لينا الدجاج مدغمر و الاللحم مبخر وجلسنا ندوزنا معاهم العشية ومشينا خرجنا دوزنا النهار على برا بحال اي عائلة ورجعنا للدار كنضحكو وجلست قدامو فالكرسي ديال الطموبيل وجبدت واحد البورطكلي قلت ليه هادا كادو علقو هنا تفكرني بيه . بدا كيضحك قالث مفكرك بلا أدات . قلت ليه ايوا منعرف المهم هاهوا علقتو هنا . حليتو من ميكتو علقتو ليه وطلق الريحة قالي هادي نفس الريحة ديالك

قلت ليه اه باش تحس بيا جالسة معاك ومنوساك . شاف فيا كيضحك قالي علاش لا . ضحكت ليه حتى انا ورجعت جلست مانتابهش لسميتي المكتوبة تما وبلعاني علقتو راسي ماعطيتوش ليه فيدو ودرت عقلي بدينا كنهضرو وكل مرة نرمي ليه شي حاجة من اغراضي فالطموبيل وخليت ليه صباط بنتي اللور و مقبط دشعري ونضاضري دالشمس وبزاف ديال التخربيق ونزلت طلعت للدار قلت ليه واش غتمشي ليوم نجمع ليك حوايجي

قالي حتى لغدا الصباح

قلت ليه انا غنوجدهم باش تلقاهم واجدين الصباح ومشيت كنضحك خليتو مع جنة وجبدت الحوايج من ديك الباليزة وكنضربهم مع الناموسية ماكرهتش نعضهم ونشركهم وخصوصا واحد القميجة كيلبسعا كتجيه فنة .. شديتها كنصلحها وحرقتها وديتها ليه قلت ليه راه جيت نصلح ليك القميجة وحرقتها .

قالي واردي البال اسارة عنداك تشعلي فينا العافية

ابتسمت قلت ليه لا ماتخافش . مشيت للبيت بديت كنبقش ليه الجياب ديال حوايجو ولقيت فالجيب ديال لافيست واحد البرية مربعة صغيرة فالاحمر . شفت يمين يسار وحليتها لقيت فيها ورقة مكتوب عليها. حبيبي الغالي يا من ازهر حياتي وعطر أيامي .. بكل عطر استنشقه ولكل هواء انتفسه وبكل نبضات قلبي ومشاعري وحبي الخالص اكتب لك هاذه الكلمات وأشكرا لأنك زوجي .. لأنك حبيبي .. لأهتمامك بي وبكل اهتماماتي .. شكرا على السعادة اللتي غمرتني بها وعلى عطفك وحنانك اللذي منحتني اياه وعلى كل هاذا العمر وهاذه السنوات اللتي قضيناها معا .. معك فكل قرارتك وفي كل خطواتك واتمنى لك السعادة الدائمة والعمر المديد وكل عيد ونحن معا وكل سنة وانت زوجي وكل يوم وانت سندي وحبيبي. وصديقي ورفيق دربي وكل ثانية وانت نبض قلبي. عيد ميلا سعيد

حبيبتك لبنى ❤️

كنقرا وكنقول ماتكون غير لبنى هي مولات الاشعار .. بدات يدي كترعد تقول سقطت فالباك وقلبي بغا يوقف . قصحاتني الرسالة وبالخصوص الكلمات اللي مكتوبين فيها كانو بحال الابر كيدربر قلبي حرف بحرف وبقيت كنقول كيفاش غيكون حس بهاد الكلمات وكفاش وصلو ليه وانا اللي مرى حسيت بيها كتهضر وتوصف حياتهم مع بعض وقاصرني حتى تقبو ليا صدري .. سمعتو خطواتو مورايا وبديت كتفتف باش نردعا فالغلاف ونخشيها فالجيب لاكن مالحقتش وكمشتها فيدي لحتها ورايا جهة الكوافوز وضرت عندو شاف فيها بعينين محلولين قلت ياكما حصلني .. بقيت كنشوف فيه ونتسنا يصدمني حتى قرب مني قالي مالكي ؟؟

قلت ليه ولساني كيرجف مالي؟

قالي مال وجهك صفر؟

قلت ليه والو وحطيت يدي على حنكي بغيت نرجع اللور وخواو بيا رجليا كنت غنطيح وتلفت وشد ليا فيدي قالي مالكي ؟ًياك لاباس؟؟

قلت ليه والو جاتني الدوخة وصافي

جلسني وعطاني الماء كان حدايا وبديت نخبي ديك الورقة برجلي بعدتها من الطريق وشربت داك الكاس وسناني كيتقرقبو وقلت ليه صافي فاتني الحال

نزل لمستوايا حط يدو على خدي قالي باش كتحسي واش عيانة ؟

حركت راسي قلت ليه والو غير عييت وصافي

كحز ديم الباليزة قالي خلي عليك هادشي انا غنجمعو راسي تكاي رتاحي

حركت راسي بالايجاب وقلت ليه لالا صافي فاتني الحال غنوض ..غير خليه دابا نرع نجمعو جلس مع جنة وصافي عنداك تجر شي حاجة عليها

خرجنا من البيت وسديت الباب ورايا وبقيت كنفكر واللهيب شاعل فصدري وكنقول شروف لبنى وشنو كتقول ليه ويعلم الله حياتو كي دايرة معاها وعندي فضول قاتلني باغا نعرف كيفاش دايرة علاقتو معاها .. كتقول ليه رفيق دربي وعطيتني ومنحتيني!! شنو عطاها وشنو منحها وشنو كيدير ليها .. يمكن كيبغيها اكثر وهي اللي كيبغي اما انا غير كيراضيني وتلهيت مع رجاء وخليت البطلة عايشة الحب .. ماقدرتش نبلعها ولا دوز ليا وكفاش انا ماعرفتش عيد ميلادو وهوا احتافل بيه وسالا وانا جالسة فالنكد .. ضارت بيا الدنيا ونضت بلا منشعر لقيت راسي كنصاوب حلوى وماجاني فبالي غير تشيز كيك حيت هوا اللي عندي مقاديره فالدار ودرتو عالي بجوج طبقات وزوقتو من برا وكتبت عليه سميتو وتميت غادية بيه وكنضحك بزز تلاقيتو فالباب قالي شهادشي ؟ قلت ليه عيد ميلاد سعييد . بدا كيضحك ويشوف فالحلوى ويشوف فيا تصدم قالي واش صاوبتيها غير دابا؟

قلت ليه لا راه كنت موجدة ليها غير مابغيتش نقولها ليك

باسني فجبهتي قالي شكرا انا جاي غنصلي لعشا ونجي

مشيت ديتها ليك فوق الطبلة وحطيتها ودورت عليها الكيسان .. كنسمعو كيصلي من البيت واحد اللحضة قطع الحس قلت كيصلي سرا لاكن تعطل ومشيت نشوف شنو كيدير لقيتو ساجد لاكن ماشي كيصلي ..هاز راسو وبين صبعانو الرسالة حدا الكوافوز دالمرايا اللي قدامو . رجعت اللور درت يدي على فمي قلت صافي عاق بيا وشداني كاع نكمشها . رجعت طليت نص طلة لقيتو مزال على نفس الوضعية وكيحك جبهتو فصمت وتنهد تز راسو ناض وطواها دارها فبزطامو وبغا يخرج من البيت .. رجعت باللور بشوية ومشيت كنجري للطبلة هبطت الغصة بجغمة دالماء وهزيت راسي كنسوط على وجهي باش مندمعش ولا تبان عليا وقطعت النفس حتى سمعتو كيقرب وانا نطلق الضحكة درت راسي ماشفت ما ريت وجلست كنتلف مع جنة ونقول ليها هابي بيرثاي جنة ونغني ليها

شفت فيه كنضحك وجلس حدايا كيضحك عنقني قالي شكرا وباسني حتى ناضت جنة كتغوت وهزها عندو جلسها على رجلو قاليها نتي اللولة اصلا كولشي ديالك

بدينا كنضحكو وهز الموس قاليها بلاتي نشوف هاد الحلوى اللي صاوبات لينا ماماك كي دايرة

قلت ليه زويينة ماعندك ماتول عليها

قطع واحد الطرف ليا انا اللولة وحط ليه واحد وقالي اجي واش نعطيها شوية يصلاح ليها

قلت ليه اه ولاكن متكتركش اصلا درتها بالجبن مالح شويةولكريمة حلوة غتعجبها

كلا واحد الملعلقة وشاف فيا قالي تبارك الله عليك ماعندي منقول .. باش عرفتي لانيفيغشيغ ديالي؟

قلت ليه وانا كنضحك عرفتها وصافي عطا الله الطرق

شاف فيا وجرني عنقني بقا كيشكر فيا ورجع للحلوى كياكل وشاف فيا بنص عين قالي فلانيف ديالك غنجيب ليك كادو واعر .. كنواعدك

ضحكت من عيني قلت بيه بصح!! بحالاش ؟

قالي حتى لتما وتعرفي

كحزت حداه وقلت ليه بحالاش عطيني غير فكرة

قالي ماعندي منعطيك دابا حتى لتما وتعرفي ..

بقيت ساكتة كنشوف قدامي ونتنهد وقلت ليه ايوا خسارة مابقاو عندي اعياد باش نحتافل .. اما حتى عيد الزواج خصو عام على قدو

شاف فيا بعفوية كيضحك قالي نتي عندك جوج اعياد اصلا ديال الزواج حتافلي وقتما بغيتي

شفت قدامي دارت ليا الطاق فالراس قلت مع راسي ولاهيلا عندو الحق .. مالو زواجي الاول ماشي زواج!!! الاول عليه تعول ومزياان بقا ليه شهر وصافي . قلت ليه زواجنا الاول بقا ليه شهر .. قلتي ليا غادي نسافرو علاش منسافروش فيه

قالي الى وجدات ليك الفيزة فوقتها نسافرو علاش منسافروش.. وهاد الفلوسة نديوها معانا ؟

قلت ليه نهليها مع ماما احسن نمشي غير انا ونتا ..شحال كااع نجلسو ؟

قالي سيمانة ولا عشر ايام

قلت ليه صافي ماشي بزاف نخليها مع ماما وبابا احسن ونمشيو

شاف فيها كيضحك وعنقني باسني فعنقي وكملنا ديك الحلوة وجبت مانطة من البيت بغا يتغطا بيها ويتفرج وجلست حداه فتح ليا يدو وخليت الطبلة حدانا فيها الحلوى وجنة كتلعب فوق الزربية وتكيت على صدور عنقني بيدو تكمشت فالمانطة كنتفرج معاها وكنحس بيدو كتقلب على يدي تحت الغطا ..

حليت عيني من بعد نعسة حلوة لقيت جنة وسطنا ناعسة على رجلينا ومعنقني انا وياها …حسيت بصبعانو كيلعبو فشعري وهزيت راسي بتعب قلت ليه يالاه نمشيو نعسو

ناض هز جنة وهزيت الطبلة للكوزينة ومشينا لبلاصينا .. تكيت على ضهري نعس وتكا عليا بالقبل والشمان والحنان حتى فضت .. دار ليا مساج لكتافي ويديا بحركات بسيطة حتى ترخيت وبدا كيدير مساج لعنقي وانا ناعسة على كرشي وفنفس الوقت كنا فمعشارة هادئة وهدوء وكالم حسيت براسي رتاحيت وخفافيت ونعست بعد ذلك وفقت معاه الصباح مع السبعة مابغيتش نسيفطو بلا فطور وبلا منشوفو .. وجدت ليه فطر وجلست معاه على الطبلة جامعة شعري كعكة وغاسلة وجهي وريحتي نقية وخدودي حمرا ولابسة بينوار كحل قصير وحلقات مربعين فودني. بغيت نفتح ليه الشهية ونبعث ليه النشاط والحماس ويصحح البصر ديالو ماشي نجلس معاه كي الجنية حتى الكانة نهرب ليه والشهية تسد ليه ..هزيت يدي كنعمر ليه ونصاوي ليه ونعطيه وهوا كيضحك قالي كتفششيني

ضحكت وقلت ليه نتا فششتيني لبارح وانا منفششكش ؟؟ شحال عندي منك

بقا غير كيشوف فيا عجبو الحال وقالي شنو دابا بغيتي نبقا معاك هنا ماغاديش تخليني نمشي ولا شنو

هزيت كتفي كنضحك قلت ليه بغيتي تبقا بقا دارك هادي مرحبا بيك .. حتى حنا ماكرهناش ندوزو معاك بزاف ديال الوقت

قالث ولاكن نتي خدامة ..شفتي كن كنتي جالسة فالدار كن راكي معايا كتشوفيني صباح وعشية

قلت ليه ايوا مشكييلة الى بقيتي كتشوفني صباح وعشية.. غنطلع ليك فراسك بالزربة وتبغي تجيب الجديد

حط الكاس كيضحك وقالي صاافي تسد داك الباب مكاين لا جديد لا والو

درت يديا حدا وجهي كنشوف فيه بابتسامة وقلت ليه زعما تقدر تزيد الى شي نهار شفتي راسك مليتي

هز حبانو فيا وقالي الله يهديك .. الله يهديك عليا ..علاش كتبغي تختابريني وتختابري صبري

قلت ليه الله هاديني عليك نتا اللي الله يهديك عليا

ناض وقف قالي ماسخيتش بالهضرة معاك ولاكن خاصني نمشي ..

قربت عندو عنقتو وسديتي عيني ماسخيتش بيه وجاتني سيمانة كثيرة بزاف ومابقاش عندي الصبر نتسنا حتى للويكاند قلت ليه الى قدرتي تجي وسط السيمانة غير نهار وصافي

مسح على ضهري معنقني وقالي غنشوف كي ندير .. راه خاصك تعرفي باللي الخدمة اللي شاغلاني وجايا واحد التسافيرة غنمشي شهر لبرا

حليت عيني شفت فيه وقلت ليه وعلاش ماقلتيهاش ليا؟

قالي ماكنتش غنقولها ليك اصلا حتى نقرب نمشي

قلت ليه معامن غتمشي

قالي حتى نهضرو فتيليفون صافي .. غير الخدمة وصافي ماديريش فبالك

رجع للبيت عند جنة كيبوس فيها حتى كانت غتفيق وخرج كيوصيني عليها ..وصلت للباب معاه ودعتو مشا ورجعت كنحمع النفس ونطلقها ماسخيتش ..جمعت الدار بقاو ليا فيها غير الذكريات وهزيت بنتي مشيت لدارنا حطيتها وشديت الطريق لجامعة وقبل منوصل عيط ليا عيسى فتيليفون وضحكت لا إراديا جاوبتو بالفرحة قلت ليه توحشتيني

قاطعتو كان باغي يقول شي حاجة ورجع قالي اه توحشتك. عرفتي شنو درتي!!

تخلعت قلت ليه شنو درت !!

قالي ولا نقول شنو درت انا .. راه صبحت فاطر الحادكة ولبارح نويت نصوم

شديت الفران وشفت قدامي جاتني الضحكة وتفكرت انه الاثنين وكيصوم على مدار العام ايام البيض وبديت كنضحك قلت ليه هيييه فخبارك نسييت

قالي وانسيييتيني وجلست كنفطر معاك بلا عقل .. بلحق اللومة عليك نتي ماخليتي ليا عقل

بديت كنضحك قلت ليه ماقصدتش انا اصلا نسيت حتى قلتيها ليا دابا

قالي ايييوا شفتي شدرتي

بديت كنضحك قلت ليه فين وصلتي واش باقي شاد الطريق

قالي مزاال شادها .. جيت دابا هزيت القرعة دالماء وانا نتفكر الصيام قلت وااايلي ماتقولهااااش

قلت ليه ايوا الله يهديك . بغيتي تسبيها فيا

قالي والصراحة تلفتيني وكتقولي ليا لبارح ندوزو رمضان انا ونتي .. كي غايدوز هاد رمضان الله يهديك

قلت ليه علاش وشنو فيها

قالي لالا مصالحش .. فينك مشيتي لافاك

قلت ليه عاد غادية

قالي وازيري واسك ..مانخافش عليك

بقيت كنضحك قلت ليه ماتخفاش عليا

قالي نخاف على راسي منك. وبدا كيضحك شدني بالهضرة عاد جاه يتجمع وينشط. وبقيت تقريبا شي ساعة مرة نهضرو مرة نخلي المكالمة دايزة حتى وصلت للقاعة وقلت ليه غندخل دابا. فاش توصل قولها ليا

قالي اوك ان شاء الله الله يعاونك

قلت ليه امين الله يوصلك على خير وقطعت ودخلت للمحاضرة نبدا اسبوع جديد مع الطلبة

بداية اسبوع موفقة من اولها بانت زوينة .. سديت على كولشي من نهار رجعت لراجلي فرضت الاحترام على الجميع انا ياسين مابقات كتلاقيني بيه حتى كلمة وحتى هوا خاف على صمعته ومكانته وقلب وجهه لدرجة رجع كيشوفني كيدور . تهنيتو منو وركزت على خدمتي وكنتسنا فرصة فين نزيد براسي لقدام .. حتى اتصالاتي مع عيسى المتكررة دازت زوينة وكنهضرو بالسوايع وكنعاود ليه على كل كبيرة وصغيرة . قالي باللي شيخي فالكلينيك غيفتح على المرارة وكان لازم عليا نمشي عندو نطل عليه وتافقنا باش انا اللي نمشي فالويكاند ماشي هوا اللي يجي وقلتها لبابا تاصل بيه هضر معاه ووتافقت مع ماما نخلي ليها بنتي باش منتقلش بيها ونمشي خفيفة ونرجع خفيفة ومشيت لداري جمعت الحوايج اللي نحتاج ولبست سروال التوب كحل وكاب كلاسيكي بني وبودي من لتحت باليدين بني ودرت الحجاب والبوت عالي كحل ومشيت شديت طريق مع الفجر حتى لفاس وتاصل بيا كيسولني فين وصلت كل شوية حتى وقفت قدام لكلينيك واللي نفسه زرت فيه لبنى وتعرفت على العاىلة اول مرة وكنت حشمانة وماقدراش ندخل بوحدي وكنشوف الناس كنغرق فحوايجي .. تفكرت راسي. كي كنت وبديت كنضحك وتفكرت ايامي الاولى مع عيسى كيفاش بدات وبدبت نقارن بين سارة لقديمة وسارة الجديدة .. كان كل همي نتحرر ولو بنسبة قليلة .. كانت كتجيني يسرى امرأة مقالية وقدوتي فلحياة وكنت باغا نكون بحالها ونسوق سيارة ونخرج بوحدي ونلبس العصري .. لاكن كل داك الهم تبخر ووصلت لشنو بغيت وحلم الوضيفة تحقق وحقق ليا بزاف ديال الامنيات وطمحت لما عوا اكثر واكبر من جميع طموحاتي.. نزلت قلت ندخل راسي نشوف العاىلة ونشوف شيخي وبلا منرتابك هاد المرة بل على العكس كنت مرتاحة كأنني جاية عند عاىلتي .

دخل مع الباب كنقرقب وتصادفت عيسى خارج عندي يتعرض ليا وابتسم ليها حاوطني بيدو وسلم عليا من الوجه قالث على السلامة ديالك .. كي جيتي فطريق. مزيانة ؟

فرحت باستقبالر وقلت ليه الحمد لله ..سولت على شيخي كيبقا وقالي. يالاه نديك عندو .. ليوم عندو العملية

بديت كندعي ربي يكون معاه ومشيت مع عيسى دخل لغرفة ديالو لقيت العاىلة كلها مجموعة وبديت نسلم على النساء وكنحرك راسي لرجال ولقيت يسرى واقفة كتبكي عنقتها وسلمت على حماتي والضرايرات حت هما ..ًشفت فوجه را حسيت بيها بغات تقتلني بعينيها وعاطياني حنكةها كتسلم وتنافق .. اما لبنى بانت ليا عادية وفيدها كلينيكس باينة كانت كتبكي. .. سلمات عليا عادي وكحزات خلات ليا فين نجلس وجلست بقيت كنشوف بحالي بحال كولشي وساكتة حتى لواحد اللحضة دخل عيسى بعفوية وجا حدايا عند لبنى تحنا لمستواها كيهضر معاها ويسولها ويتشاور على شي ألة ما آلة وكيهضر هوا وياها وهي متقوليه ياك قالك حتى للشهر الجاي قاليها هوا دابا صافي اللي عطا الله عطاه نوضي فكينا يالاه نشوفو. هادشي قبل مينزل الحاج للبلوك

قالت ليه غينزل دابا غير صبر شوية وديك اساعة نمشي معاك

مدات يدها لجيبو قالت ليه ارا دوك السوارت غيتلفو ليك ونتا مشطون حتى تبغيهم واجي نعطيهم ليك

شاف فيا وابتسم ليا وابتسمت ليه حتى انا وحط يدو على ركبتي وقف حيت كان جالس القرفصاء مع لبنى كيهضر وناض خرج .. عجبني الحال واخا ماحملتش لبنى وحسيت بالغيرة من جيهتها وهي كتشوف فيا بنص عين .. جا شيخي يهبط للبلوك وناضت لبنى بالزربة كتعاون حماتي يوقفوه باش يجلس على الكرسي وخلات الصاك حدايا .. بقيت كنشوف فيه ونشوف فيها ونضت خفت نبقا حداه وتمشي ليها شي حاجة منو ويمسحوها فيا وخرجت جيهة الباب وقفت بعيدة وخضرت ليه حتى نزل للبلوك وبقينا على برا واقفين كاملين .. قلت نمشي نجلس فطموبيل نشرب واحد الكاس دالقهوى بلا منبقا مصمرة ونرتاح من الطريق وخرجت جلست فسيارتي كنشرب قهوتي حتى بانت ليا لبنى خرجات من المستشفى وكانت لابسة جلابة مخزانية ومتوسطة القد بحالي ولبوت كحل بالطالون والصاك فيديها والنضاضر دالشمس ..كانو حروفها كوحل وعندها حقها من الزين حتى هي .. بدات كتقلب يمين يسار قلت مع راسي مال هادي شنو واقع ليها !! حتى تمات جايا عندي كتجري ودقات عليا كتقولي حلي وحليت ليها مدات ليا يدها وقالت ليا اري السوارت .. اري. طلقي. دغيا السوارت اللي هزيتي

بقيت كنطلع فيها ونهبط ونزلت قلت ليها اشمن سوارت

قالت ليا شوفي .. ماعنديش ليك الكانة دابا ويا إما غتعطيني السوارت ولا ميعجبك حال

شفت الباطل نزل عليا ووقفت قلت ليها ماشفت سوارت ماهزيت سوارت اصلا اشمن سوارت

قالت ليا السوارت اللي عطاني عيسى قدامك .. ونتي اللي كنتي حدا الصاك وهزيتيهم وخرجتي .. سمعي راه مكنتفلاش معاك .. عطيني السوارت ومريضنا ماعندو باس ولا غيكبر الموضوع ونوليو فحوايج اخرى

تزيرت وحماريت شيرت بديت القهوى حتى تزلعات وقلت ليها بعصبية كبريتا اختي اصلا داكشي علاش كتقلبو باغين ليا السبة .. عيطي ليه فين هوا يجي حساب ليك غنخاف منك

حبدت تيليفون كنترعد كنصوني ليه وحيداتو ليا قالت ليا هزيتيهم ولالا ؟؟؟ جيني للصراحة

حلفت ليها قلت ليها ماهزيتهمش سيري. للكلينيك شوفي يردو ليك الكامرة دلاشومبغ الى كنت هزيتهم ديك الساعة هضري. والى ماكنتش انا غادي تكون هضراا اخرى

هزات راسها بقات كتشوف فيا وعطاتني تيليفون قالت ليا واخا هانا غنشوف .. بلحق بلا ماطيري على عيسى توصلي ليه هادشي. .. راه غارق مشاكل تزيدي تكملي عليه

قلت ليها غنوصلها ليه حيت الباطل نزل عليا ماشي عليك

قالت ليا يبانو السوارت وديك الساعة وصليها ليه

مشات كتجري رجعات للكلينيك وجلست حبست البكية حسيت بالحكرة وبقيت سادة عليا شحال حتى تمات راجعة عندي كتزرب. وشيرات ليها باش نحل وحليت ليها نزلت وقالت ليا وهي سخفانة صافي لقيتهم اختي ..

خرجت فيها عيني قلت ليها لقيتيهم !! ياك بعدا ماشي انا اللي هزيتهم .. ودابا بلاتي عاد غتوصل ليه يجي ونشوفو هادشي

قالت ليا بلاش بلا ماتقولي ليه والو .. راه اختي مسؤولية كبيرة وحوايجي شكيت فيهم .. سمحي ليا عفاك راه عقلي بغا يخرج من بلاصتو

قلت ليها وانا علاش تشكي فيا ؟ علاش شكيتي فيا بالضبط ؟؟ شنو درت ليك وباش وصلتك واش كنتي كتقلبي ليا على السبة

قربات ليا وقالت ليا شوفي. راه رجاء داتهم بلعاني والو قلتيها لعيسى غادي تنوض. وهوا اصلا هجرها بسببك

بقيت مخرجة عيني فيها قلت ليها ومالي انا شنو درت ليها ؟

قالت ليا عقلتي على سطوريات اللي حطات ؟. حطاتهم ليك غير نتي تشوفيهم ومسحاتهم وعيسى ساق الخبار نشرات داكشي شخصي وقلب عليها عادي سيمانة وهوا هاجرها

قلت ليها ومالها ماطلقات وتهني راسها

صحكات وقالت ليا ماغاديش طلق غير تهناي واخا يوقع اللي يوقع عمرها طلب الطلاق

قلت ليها ونتي عادي عندك تسرق ليك السوارت وتغرقك وتغطي عليها !!

قالت ليا انا عارفة علاش.. عارفة شنو كندير

قلت ليها وانا اختي مابغيتش الباطل ينزل عليا غير هاكا وغادي نعيط ليه ونقولها ليه

عزيت تيليفون كنصوني وهي كتشوف فيا وقالت ليا خلي هادشي اللي وقع لصالحك مزال تحتاجيه .. انا دابا ناعندو باش ينفعك اصلا نايضة بيناتهم والطلاق نسايه واخا تقولي ليه شنو وقع

بقيت كنشوف فيها وسكت خليتها حتى مشات وكملت على الصونيت ديالي حتى جاوبني وبديت نبكي عليه قلت ليه اجي عندي دابااا وقطعت ماكاملاش عشرة دقايق خرج كيقلب عليا وجا عندي حدا الطموبيل. لقاني كنبكي بقا كيسول مالك شنو واقع يام لاباس وعنقتو قلت ليه لبنى طيحات عليا الباطل و جات عندي تاهماتني وبديت كنبكي وكنشكي وعاودت ليه كولشي وهوا غير كيشوف .. جبد تيليفون عيط على لبنى خرجها لعندنا وكحز شوية مابقاش معنقني وجات لبنى وقفات بيناتنا شافت فيها شوفة ناقصك ودورت وجهي كنمسح عيني قاليها فين السوارت ؟

جبداتهم قالت ليه هاهما

قاليها شنو وقع ؟

بقات ساكتة وتنهدات قالت ليه الشيطان غرار اعيسى .. كل واحد عندو دوافع كيخليوه يدير شي حوايج بلا ميشعر .. قاليها السرقة ؟؟ السرقة عندها دوافع ؟

قالت ليه وانعل الشيطان نتا مول العقل .. وماشي وقت هادشي هانتا كتشوف عمي مسكين فالبلوك وكلنا مخلوعين عليه … الغلط كيوقع وبنادم مامعصومش من الخطأ

قلت ليها بحدة وعلاش سبيتيها فيا هي انا سراقة

دارت يدها حبهتها كتسوط وقالت ليا ياك عتاذرت ليك اشنو بغيتي اخر ؟. ولا نتي ماكتعرفيش تسامحي

قلت ليها لا اختي هادا الباطل شتي مللي مادعيتكش لسيدي ربي حمدي الله عليها .. واش انا فين نا نجي لهنا ترميو عليا باطل !! ها سراقة ها كدابة ها ماعرفت شنو ؟؟ ماع الصفات الكحلة نسبتوها ليها

شاف فيا عيسى وقالي ساارة

كملت كلامي مابغيتش نسكت قلت ليها انا بعيدة عليكم ونتوما كتبغيو تورطوني فالمشاكل انا فغنى عنها وكن غير كنصلكم بالعيب ياك شادة تيقاري شنو بغيتو مني

عاود قالي بحدة ساد عينيه سااارة

وانا نسكت دورت وجهي وهي بقات ساكتة وصبعانها على جبهتها … قاليها سيري دخلي من بعد وغادي نشوفو هادشي

مشات ماعاوداتش الهضرة وبقيت انا واقفك. خلت للطموبيل قلت ليه غنمشي بحالي .. اخر مرة نحط رجلي هنا

حيد ليا السوارت قالي كيفاش غنمشي بحالي معامن تشاورتي؟ نسيت راسك مزوجة ولا شنو

هزيت كتفي قلت ليه ويرضيك عاد الباطل اللي طيحو عليا وهادشي اللي وقع ليا .. وليت سراقة ياك عجبك الحال

تنهد وطلع جلس حدايا شد ليا فيدي. وقالي ماشي سراقة وصافي نعلي الشيطان .. يالاه نديك للدار ترتاحي حت لعيا كيزيد يكمل الباقي

نزلت وركب بلاصتي وصلني لفيلا لقيتها خاوية فيها غير الخدامات وهبط ليا الشنط ديالي ودخلت قالي فاش يطلع الحاج من لبلوك غنعلمك ومشا

جلست فالفيلا بوحدي كنهضر انا والخدامة فلكوزينة على كاس داتاي وهي كتوجد لعشا وقالت ليا باللي كاع اللي مشاو للكلينيك غيرجعو للفيلا هاد العشية .. بقيت كنهضر انا وياها وكنبين ليها شحال انا ضريفة وزوينة باش نلقط منها خبيرات وسولتها شحال وهي خدامة عندهم قالت ليا خدمات مع الحاجة فاش كانت عندها سطاش لعام ..ًفاش يالاه تزوجها الحاج ودابا عندها خمسة وخمسين عام . قلت ليها واش عندك شي وليدات ولالا قالت ليا اه مزوجة وعندها وليدات وبناتها مزوجين وعندها ولد واحد خرج فيها الشيب وخدموه معاهم فالمصنع ديال المجوهرات عاد تهنات .. راجلها عسكري وشد التقاعد وجالس غير فالدار ولاكن هي ولفات العاىلة وولفات الحاجة متقدرش تتفرق عليهم وباللي واخا كتخدم مابقاش عليها داك الدرك بزاف ومقابلة غير الطبخ وصافي ماكتجمع مكتشقا ومابقاتش كدير مجهود بحال من قبل .

بدينا كنهضرو هضرة تجبد هضرة وبانت ليا معقولة ماشي شي وحدة فضولية وحسيت بيها عارفة بزاف على العائلة وجبدت ليها الهضرة على التعدد وطولنا الهضرة بزاف وقلت ليها عيسى كيعاود ليا كولشي ماكيخبي عليا حتى حاجة

قالت ليا لالا الحاج عيسى الله يعمرها دار وكلهم الله يعمرها دار .. والعدل .. زعما يميز هادي على هادي ولا هادي لا كيخلي كل وحدة على خاطرها

قلت ليها راه راه مخاصم مع رجاء ويمكن مكيمشيش عندها

ردت عليا برزانة وقالت ليا غاادي يمشي عندها وغادي يهضر معاها .. ماتعرفيش شنو بين الراجل ومرتو ابنتي راه يباتو مناقشين يصبحو مصالحين ..ًكيشيط العيب للي كيدخل بين المرى وراجلها

قلت ليها الحمد لله مكندخلش وشادة التيقار .. واخا كنشوفو كيميز بيناتنا ماكنبغيش نحكر

قالت ليا غير كيجيب ليك الله ابنتي راه ماكيميز ما والو .. هاكا كانت رجاء فاش يالاه جات ..نفس الهضرة كانت كتقول

قلت ليها حيت كيفضل لبنى اغلبية

ضارت عندي مشمرة على يديها وقالت ليا خاصكم تعذرو لبنى .. راه مجابش ليها الله الولاد مسكينة وكتحس بالنقص .. وعاوتاني لاتنسايش راه هي اللولة ..ًواللي دوز معاها الحاج راه مادوزوش معاكم .. راه بيناتهم عشرة وكبرو بجوج دايرين الراس عند الراس وخمسطاش لعام ولا اكثر ديال الزواج عاد تزوج رجاء .. انا نتي راه جابك على رجاء مزال ماكملات ختى ثلت سنين راه رجاء اللي دازت خصها تشكي

قلت ليها وعلاش انا بززت عليه يتزوج بيا!

قالت ليا لاااا حنا غير كنهضرو انا ما معاك ما مع لخرين .. غير باش تعرفي باللي الضراير راه مضرورين كلهم مكاينش هادي مرتاحة ولا لخرى واكلة الدق..

قلت ليها انا فاش كليت الدق راني طلقت هما اللي صابرين على الدق

قالت ليا واش غير اجي وطلق !! واش لبنى دابا عاد مزال غادي طلق ولا تبدا من جديد.. فين غادير هاد العشرة وهاد السنين كلها راه ماشي عاد لبارح عرفاتو راه ماشي ساهلة .. حتى الحاج عمرو مايطلقها ، راه عندو عزيزة .. يقدر رجاء دور ليها فالخوا شي نهار تقول ليه طلقني ولا تعيا اما لبنى لا عمرها تفارق هي وياه ..واش هوا غير كدور بيه الدنيا كيقصدها نيشان مكيشوف لا هاكا ولا هاكا

حسيت بالغيرة شعلات فيا وقلت ليها كفاش كيقصدها مافهمتش

قالت ليا زعما كيحط عليها الراس الى مرض كايرتاح عندها ومأمنها على الخوصيات دياله .. وعاد جالسة فالدار ماخداماش مقابلة دارها

قلت ليها زعما مابقاش فيها الحال فاش تزوج عليها

بدات كضحك قالت ليا لبنى بعقلهاااا ..كانت عارفاه غادي يتزوج وكانت كتقولها .. قالت ليهم هانا هانتوما الى مازاد الحاج جوج وثلاتة وربعة

وقفت قلت ليها شنو؟؟

قالت ليا وا زعماا غير كتقول وصافي

جلست فشل طلع معايا دا اتاي حسيت بالردان وخرجت من لكوزينة وتيليفون كيصوني . جاوبتو كان عيسى وقالي راه العملية دازت مزيانة والحاج خوج من البلوك

قلت ليه دوز عليا ديني نطل عليه وقالي انا قريب وجدي راسك .

وصل ودخل للدار غير شفتو بدات تبان ليا فيه صورة لبنى وبديت نتشوط .. ركبت معاه وساكتة ماهضرت مانطقت ومشينا للكلينيك لقيت كولشي مجموع تما ودخلت طليت على شيخي قلت ليه على سلامتك والله يشافيك لينا ياربي وترجع ليك صحيحتك ورجعت اللور وقفت بوحدي كنشوف فرجاء بنص عين اللي اصلا ماشافتش فيا وعينيها غير على لبنى اللي كانت واقفة وكتهضر مع واحد البنت كانت واقفة حداها لابسة كسوة طويلة وزعرة شعرها فمنصف الضهر وحاطة مكياج خفيف وهازة صاك تحت باطها وعندها حقها من الزين ولاكن ماتوصلنيش حتى فصبعي الصغير .. والاسوءً انها منفخة وكتشوف فيا من فوق نيفها وبنص عين . شفت عيسى خارج مع الباب وكانت واقفة تما قال ليها سمحي ليا وضحكات قالت ليه ااه سمح ليا وعطاتو داز وانا كنشوف وحاسة بشي حاجة ماشي طبيعية وجاتني ديك البنت بحال الى كتنشر الجمال ديالها علينا والله وأعلم . واحد اللحضة حطات عليا رجاء يديها خلعاتني وقالت ليا نوضي. نوضي. اجي نهضر معاك سربي وخرجات من البيت تبعتها لبرا حدا الطموبيلات وحيدات النضاضر الشمس على عينيها وقالت ليا هازة حاجبها. . شوفي. . دابا نتي تزوجتي واللي عطا الله عطااه ماعندي علاش نضربك ولا ضربيني قلت ليها شوفي راسك اختي اللي واقفة ليك انا فحلقك

قربات ليا وطبطبات على كتفي قالت ليا راه جابت ليك لبنى اللي توقف ليك فالحلق ديال بصح .. قلت ليها شنو كتخربقي

قالت ليا راه جابت صاحبتها هادي سيمانة تجلس معاها فالدار وقالت لعيسى اه حقا ما حقا راه كتقرا وغتسكن بوحدها وانا اصلا بوحدي نجيبها تونسني على بيدمن تلقا شي سكنة على تاسيع .. واش هادي ضربها الله ولا كتسطا علينا !!! كاينة شي وحدة تسكن معاها صاحبتها وتشوفها كتحلون ليها !!! باغا تزوج الحاج بصاحبتها حيت اصلا ماعندها ماتخسر وغير ضد فيا انا ونتي وخصوصا نتي.. شفتي كيفاش كضحك وتفرنس ليه !! واش هادي تسطات ولا حماقت واش جايبة العافية ومسكناها فدارها وهانتي عقلي فين قلتها ليك .. الى مازوجاتو هانا هانتي وقولي قالتها رجاء

ضحكاتني قلت ليها واش حماقيتي واش هي طاح ليها النص فاش تزوجنا وكتقولي ليا باغا تزوجو!! لبنى لوووبنى تزوجو لوحدة اخرى

قالت ليا اااايه الى ماتقتيش بيا سولي عيسى هوا يقول ليك شنو كاين .. سوليه شنو كدير هاديك مع لبنى يالاه ..ًوكاع الى ماكانتش ناوية تزوجو اااش كدير عندها هاديك فالدار والراجل باقي صغير بخيرو وخميرو كولشي طامع فيه !! مامسوقنيش ليه يتزوج حتى عشرة تقولك انا وبعدي الطوفان .. على قلة الديور زعما ماقدراتش تعاونها ماديا ولا تكري ليها ياك صاحبتها وعزيزة عليها

بقيت ساكتة كنخمم وقالت ليا اوويلي واش فين ما يمشي عندها يلقا معاها صاحبتها ؟!! تتغدا معاهم وتتعشا معاهم وتبات معاهم!! وتسارا بالشعر عليه ودور حداه والسيدة عامرة ها بزازل ها ترمة !!! لحماق هادا اويييلي

قلت ليها الحاج اصلا بعقلو عينو ماشي. زايغة قالت ليا شنوو!!! واختي مللي عينو ماشي زايغة كان يقبل على لبنى بوحدها ويسد عينيه ماشي يجيب عليها جوج وثلاتة وخصوصا نتي

قلت ليها اييوا لزمي حدك

قالت ليا وانتي اللي كتقولي شي هضرة ماكايناش !! قالك عينو ماشي زايغة !!! انا اللي مرى وعيني زايغة كنشوف الزين كنتلف بقا غير هوا اللي كتمشي وتجي حداه وحدة فدار وحدة بالشعورات والبيجامات والزوينة هي الى كانت الضبعة دلبنى كتخليهم بوحدهم راه ماشي غير غيزيغ راه يخون وينوض بلا ميشعر

دارت ليا طاق فراسي تفكرت البوسان حدا الروايض وقلت رجاش عندها الحق يديرها ويفوتها ماكاين لاحاج لا حجوج ! قلت ليها اوييلي واش حماقت هادي.

قالت ليا وشنو راه ديرها غير ضد فيا وفيك انا نتيق فيك ومنتيقش فلبنى بخصوص هادشي

خليتها واقفة ومشيت كنزرب دخلت للبيت لقيت ديك خيتي مزالة واقفة تما وعاجبها الحال بقيت كنشوف فيها ونحقق مزيان ووقفت حداها قلت ليها لباس بيخير ؟

قالت ليها الحمد لله احبيبة ابتسمت ليها وجات لبنى حدانا بعفوية قالت ليها الى عييتي سبقيني حتى نلحق عليك

قالت ليها واخا صافي اصلا خاصني نراجع شوية

لبنى: خليك خليك نشوف عيسى واش غادي يوصلك معاه راه قالي غيمشي للدار يجيب من تما شي حاجة

بقيت غير كنشوف ماكرهتش نطير على لبنى نريشها وجبدات تيليفون كتهضر معاه وقطعات قالت ليها سيري سيري دغيا راه غادي على شوية مايمشي

خرجات هي ولبنى كيجريو لبرى وتبعتهم شفت طموبيلة عيسى واقفة كيتسنا وشاعل الاضواء دالسيارة وانا نشقمهم شديت لبنى قلت ليها فين غادية بيها بالسلامة

قالت ليا نعام !!!

وقفات علينا رجاء كتجري قالت ليها بغضب واش نتي بعقلك ولا سايط فيك الريح شنو كديري لاياش باغا توصلي !!!!

بقات ديك البنت كتشوف فينا باستغراب والتسمت قالت لينا مالكم

ضرباتها رجاء ليدها وقالت ليها نتي اااه نتي واش مالقيتي فين تسكني ؟؟؟ مالقيتي فين تباتي

وقفات قدامها لبنى بغضب هازة صبعها قالت ليها جمعي يدك .. رجاااء لزمي حدودك معايا حسن ليك

قالت ليها رجاء اشنو غدييري كاع شنو يالاه ؟؟ لاياش كتحفري ؟؟؟ شووفي هااه دوك الفعايل راني حااافضاهم وعارفاك لشنو باغا توصلي وعلاياش كدوري

قلت ليها واش ماحشمتيش !!! مسيفطاها معاه فطموبيل للدار ؟!!! هادشي اللي بقا ولاهيلا

قالت ليا ديها فسوق راسك نتي اااصلا انا اللي جبتك وانا اللي دخلتك لهاد العاىلة وخلينا ساكتين قبل منفركعو هاد الرمانة

عصباتني قلت ليها اااشنو غتفركعي كاااع يالاه شنووو ؟؟؟

يتبع