وقفات اللوطو عند الباب و خرجات منها مسرعة .. خلاتو هو فيها كي الحنش المقطوع ليه راسو باغي غيير يهضر معاها و يسمع صوتها يطمن عليها و مكتجاوبوش .. دكشي علاش طلب من جنات تعيط لخالتها بعد محاولات منها باش تهضر معاها بائت بالفشل صونات على خالتها و خبراتها بماجيئها .. دقات فالباب و تسنات حتا حلات خالتها .. غير دخلات لاحت عينيها فالدار كتقلب عليها
– فينهي ديك بنتك الهبيلة .. بغات تخرج ليا عقلييي علاش مكتجاوبش
رابحة: معرفت مندير معاها من الصباح و هي تنحط و تبكي تقول قتلوها .. ما خليت باش سكتها و وااالو .. تغوت و تقول من حكيم نخلااق لى شفتيها تبصمي عليها حماقت
جنات غادية جهة البيت كتنكر: الهبااال كيف داير!! غير لاقال ليها جاو فيك الخطاب ديير هاد الحالة!! جايبة السيد وجهو صفر مخلوع عليها معرف باش تبلا .. كان يهضر معاها حتا قطعات و حتا تلفونها مكاتجاوب فييه؟ مااالها على هاد الحالة؟ يااك غير باغي يزوجها غنقولو ليه راه جاها واحد حسن من هداك و مريضنا معندو باس ..
بدات كدق عليها في الباب ولا من مجييب .. عيطات عليها و مكاتجاوبش .. بقاو كيتسناو فيها تحل و واالو .. صوتها مكيتسمعش نهائيا .. حس التقرقيب مكاينش .. بداو يتخلعو عليها و جنات كدق فالباب بالجهد ولكن لا من مجيب .. شافت فخالتها لي طار منها اللون و نطقات بتوتر
جنات: زعمة تكون ناعسة؟ .. واش مبقيتيش هضرتي معاها ملي عيطت ليك انا؟
رابحة: لا من ديك الساعة .. خليتها متكية فبلاصتها و شوية جات عندنا جلسات معانا كتبكي و رجعات دخلات للبيت من تما ما شفتها
جنات: ولكن هي نعاسها خفيييف كيفاش ماسمعاتش الدقان زعمة؟ .. معندكمش شي ساروت زايد ديال الباب
رابحة: كاين نمشي نجيبو
وقفات جنات كتسنا حتا جات خالتها هازة رزمة ديال السوارت و مداتهم ليها
– شوفي اينا واحد ديالو راه هنا جامعة كاع السوارت
نفخات جنات بتوتر و بدات تجرب فدوك السوارت و تقلب بينهم حتا لقات الساروت المناسب .. ضوراتو فالباب و فتحاتو على وسعو حتا دخلو بزوجات كيتسابقو يشوفوها .. حلو عينيهم من شوفتها و بقاو كيشوفو فبعض و يرجعو يشوفو قدامهم فيها .. وحدة كتشوف فالاخرى .. حطات رابحة يدها على قلبها كأنها كتطبطب عليه من شدة خفقانو و تكات على الباب راخية يدها على جنبها..
جالسة فوق سجادتها كتصلي و تدعي لربي يفك كربتها و يشوف من حالها .. هو العالم بحالها و احوالها .. هو القادر على كل شيء .. الله سبحانه و تعالى .. الله لي فين ما طحنا فشي مصيبة كنلتاجئو ليه و مكيرضناش خايبين و ديما واقف فجنبنا .. الله الغفور الرحيم .. الله لي رغم اغلاطنا ديما مسامحنا و غافر ذنوبنا .. مدة و هي ساجدة و كتلطب الله و تبكي حتا خوات قلبها و تنفسات عاد سلمات و وقفت كتشوف فيهم
– جناااات جيتي
جنات: تجييك فالراس طيرتيها منا خلعة
رابحة تنفسات براحة: الله يا بنيتي و مالك مسورتة عليك غنشقمووك
الغالية: غير حيت كنت كنبدل حوايجي .. با مزال ما جا
جنات: اش بيتيه دبا .. مالك مكاتجاوبي
الغالية: ساعة الله ..كنت غنحماق على شوي
جنات: زيدي نخرجو و عاودي ليا
معارضاتهاش هزات كاب لبساتها فوق بيجامتها و خرجات معاها كيتمشاو و تعاود ليها و تبكي حتا وصلو لجنان ديالهم ( الحقل) فيه اشجار الزيتون و وقفو تما تحت واحد الشجرة حتا سمعات سميتها من وراها
– الغالية
تلفتات شافت فيه و نقزو عينيها بالدموع و هب كتشوف فيه .. باين الخوف فعينيه و هو كيتفحصها كاملة
الغالية: حكيييم اهئ اهئ
قرب لعندها و تلاحت عليه عنقاتو كتبكي و تقول مابكيت .. مابقات لا حشومة لا عيب متشبتة فيه و هو مخليها فحضنو كيطبطب على كتافها حتا تهدنات
– بغاو يزوجوني احكيم اهئ اهئ
حكيم: نتي بخير ياك معندك والو
الغالية: ماشي بخير اهئ مبغييتش نتزوج شي واحد اخر احكيم
حكيم: و شكون قاليك غتزوجي واحد اخر .. يا انا يا مكاينش اصاحبي كلمة وحدة قلناها
الغالية: ولكن با..
حكيم: جييت باش نهضر معاه غير كوني هانية .. الخطبة لي غتوجدو ليها غتكون ديالنا غير رتاحي و متفكري فوالو .. واش انا نقدر نخلي شي واحد يدي ليا شنيولة ديالي هممم .. الغالية لحكيم و حكيم للغالية .. تافقنا
الغالية: و شنو غتقول لبا
حكيم: خوي راسك من دكشي ” ضربها بصبعو لنيفها و حط يدو على خدها” توحشتك الخايبة
الغالية زيرات ليه على يدو و هزات فيه عينيها بشوق: حتا انا .. بزااف
ابتسم حتا تغمضو عينيه و قرب منها حتا مبقا كيفصلهم والو .. نزل راسو لعندها و حط شفايفو على جبينها مطول فالقبلة حتا غمضات عينيها مستسلمة لقبلتو .. بعد كيشوف فيها مزال مغمصة عينيها و رجع باس نيفها ..
.. بقا مدة قريب لوجهها و نزل ببطئ لشفايفها طبع عليهم قبيلة خفيييفة ملامس فقط شفايفها بدون ما يحركهم .. ما بعداتش و بقات صامتة مغمضة عينيها و يديها زيرو على تريكو لي كان لابس .. انزاح على فمها و باس خدها بلطف و بعد
– تهلاي فراسك و ملي نصوني عليك جاوبيني ماديريش كي اليوم ولا بربي تندخل على مك حتال الدار
الغالية بخجل: غترجع ياك
حكيم: نجي لشنيولة ديالي منخليهاش هنا .. ياله سيري غتكون جنات كتسنا فيك
طلقات منو مساخياش بيه و خرجات من تما لقات جنات كتمشي و تجي و مربعة يديها عند صدرها حتا بانت ليها
جنات: كون تعطلتو شوية تخرجي بالتوام
الغالية: لواه الزعتر .. زيدي نرجعو دبا يجي با
جنات: نوصلك و نرجع عند حكيم بغاني فشي حاجة
دكشي لي كان وصلتها للدار و رجعات عند حكيم للطموبيل و زاد مع الطريق
– فين بايكون هاد نسيبي نهضرو معاه
جنات: راه كاينة واحد القهوة كيجلسو فيها عند الدخلة ديال الدوار غير زيد شوية
تبع تنعاتها حتا وصل و نعتات ليه رشيد لي كان جالس مع الرجال .. ترجل من السيارة و تقدم جهة الرجال حتا وقف عليهم .. لقا التحية و ردوها عليه عاد شاف ف رشيد
– سي رشيد؟
رشيد: اييه هو هذا .. كاين ما نقضيو
حكيم: الى سمحي ممكن ندوي معاك
رشيد: مرحبا اولدي
وقف تبع حكيم لي جلس فطبلة بعيدة من البشر و بدا يجمع فالكلمات ما عارف ما يقول .. كيتلف فبحال هاد المواضيع .. حك ودنو باحراج و شاف فرشيد
حكيم: المهم .. انا حكيم .. اا صاحب سيف الدين
رشيد: ولد سي حسن ياك .. مرحبا اولدي متشرفين
حكيم: ايه هو .. احم .. الصراحة اسي رشيد ما كاين ما نخبي عليك .. بغيتك فواحد الموضوع و دكشي علاش قصدتك
رشيد: الله يسمعنا خبار الخير اولدي
حكيم: الى كتاب بغيت نطلب يد بنتك للزواج
طلقها ليه خلاه غير كيشوف .. كرن حواجبو و شاف فيه: و نتا فين كتعرف بنتي اسي
حكيم: مكنعرفهاش .. شفتها غير مع خت سيف الدين واحد المرة و سولت عليها .. قلتها لسي حسن راه في خبارو كلشي اسي رشيد .. انا جيت ناوي المعقول و قصدتك نتا لي باها .. واخة سي حسن عطاني الكلمة و قال ليا راه هو غيدوي معاك ولكن من الصواب نطلبها من باها
رشيد: انا مقال ليا حسن والو .. و بنتي كتعرفك
حكيم: لا مكتعرفنيش و حتا انا قلت ليك شايفها غير مع خت سيف الدين .. بغيتها للحلال و قصدتك الى قبلتي عليا
رشيد كيحك فلاحيتو: واش نقول ليك اولدي .. نتا قصدتي الباب و جيتي عندي ناوي لحلال .. ولكن تعطلتي اولدي البنت عطيتها لواحد السيد قبلك
حكيم غزز سنانو مكره ينقز عليه يقجو: مايمكنش اسي رشيد .. انا هضرت مع سي حسن من شحال هادي و عطاني الكلمة .. باقي كنتسنا غير امتا نجي نقراو الفاتحة و صافي
رشيد: و انا اولدي مافخبريش حتا نهضر مع سي حسن و نشوف .. قول ليا بعدا باش عرفتيني هنا
حكيم: لي عندو فمو عمرو يتلف اسي رشيد .. المهم انا نخلي ليك النمرة ديالي و علمني امتا نجيو انا و مالين الدار .. خليت ليك الراحة اسيدي
حط ليه كارت فيزيت و وقف خارج كيتعنكر ركب فسيارتو و رشيد متبعو بالعين و يحرك فراسو متبع السيارة حتا غبرات .. رجع جلس و جبد تلفونو دوز نمرة ديال حسن .. هاد الاخير لي كان كيتفرج حتا جابت ليه خديجة تلفون يجاوب و جلسات مقابلة معاه كتصنط
– الو سي حسن لباس
حسن: اللهم لك الحمد .. اش خبارك كلشي بخير
رشيد: نحمدووه .. قول ليا واحد السيد عاد جا لعندي دبا شوي قال ليا بغا البنت عندي و فايت دوا معاك هاد الكلام بصح
حسن بقا غير كيشوف مفهم والو و هي تنغزو خديجة من الجنب كتقول ليه قول اه
– اييه راه هضر معايا
رشيد: و دكشي لي قال ليا .. جا بغا يخطب الدرية و قال بلي صاحب ولدك سيف .. الرجل كيبان معقول و جا قال ليا راك دوزتي معاه الكلمة و غتعاود ليا .. انا مفخباري والو اسي حسن
حسن بالتلفة كيشوف فخديجة لي كاتشرح ليه اش يقول: و انا هضر معايا شحال هادي قبل ماترجع الغالية للدار و قلت حتا نسالي شي شغل و يتقاد الوضع عاد نعلمك .. وراك عارف الغالية بحال بنتي جنات .. باغي ليها غير الخير و كنحسبها منا دكشي علاش تصرفت من راسي و قلت حتا نعاود ليك اسي رشيد .. الغالية راه عزيزة عندي و وحدة من بناتي .. و حتا السيد راه معقووول و ولد الناس راه كنعرفو الله يعمرها داار
رشيد: اييه اسي حسن درتي مزية .. و هاد السيد فاش خدام اش داير فين ساكن نعرفو عليه شوي
حسن كيشوف فخديجة و يسولها حتا نطقات بهمس
خديجة: و راه حكيم حكيم صاحب ولدك
حسن بصوت عالي: حكيييييييم !! .. اه اه بغيت نقول سميتو حكيم .. راه عندو مدرسة ديال تعلم السياقة و عندو حانوت ديال الحوايج و ساكن غير هنا قريب ليا .. راه بدارو و خيرو و خميرو ما خاصو حتا خير .. غير هو راه كان مزوج و طلق و راه عندو بنية
رشيد: اييوا مزيان اسي حسن .. ملي نتا عطيتي الكلمة ما عندي مانقول .. واخة كنت عاطي الكلمة لراجل خر و الكلمة هي الراجل ما عندي ما ندير .. نقول ليه راه معطية .. نخليك دبا حتا نعاود نعيط ليك .. الله يعاون اسي حسن
قطع معاه عاد تلفت سي حسن مخنزر فمرتو
– اش كتنوعرو من ورا ضهري
خديجة بالتحلوين: والله اسيدي حسن ما كاينة شي حاجة .. حكيم بغا الدرية و حنا عطيناها هادشي لي كاين و هي متصييب بحالو لي يتهلا فيها .. و راه طلبها من عند صاحبو بحال ختو اولا؟ .. ياك سيف كيحسب الغالية ختو .. شاف الراجل مناسب ليها و عطاها ليه .. غير بيتي تكبر الموضوع و صافي ” ضحكات ليه” الله يخلي ليا عماااارت دااااري يانا لي يسمع كلامي ههههه
* حطات القرآن من بعد ما قرات ما تيير منه .. و بدات تطلب و تعاود فربي يسمح ليها على المعصية لي كانت غدير .. لولا الادان لي ادن و دخلو كلماتو لمسامعها كانت غطرا كارتة .. تخرج على راسها لا دنيا لا دين .. كلمات الصلاة هوما لي رجعو ليها عقلها و خلاوها تتراجع ف اخر لحضة .. بكات على الحالة لي وصلات ليها و لاحت ديك الغازواغ تحت السرير غبراتها و ناضت لبسات حوايج الصلاة تصلي و تدعي ربي يوقف معاها …
دخلات عليها جنات كتمسح فوجهها بالفوطة و حيدات سبرديلتها لاحتها و تلاحت على السرير عيانة
– جبدي ليا شي حاجة نلبسها راه هدشي قلقنني نهار كامل و انا مجلداهم فوق كتافي
الغالية جبدات ليها بجامة مريحة و جلسات حداها كتبدل: فين مشيتو بزوج قبيلة
جنات: عند بوووك يهضر معااه .. علمنا حتا ماما باش وقع باش لا سول ولا شي لعبة نكونو على بال
الغالية: على الله يبغي اوووف اليوم كنت غنحماق و ندير شي كريتة
جنات بشك: اش كنتي غديري
الغالية كتبيض فعينيها: و وواااالووو
شنقات عليها جنات حتا عاودات ليها و هي تحتيها عليها بالقرييص و العصان نتيييف حتا بردااات فيها جنونها ما تفرقات عليها حتا شروطاتها بالمعقول خلاتها كتبكي و تمسح و هب كتنكر فوق راسها
– مزيااااان تبارك الله على الخانزة دكشي لي بغا غير تنتاحري على قلة ما يدااار كون غي هربتي و لا دييك الفضيحة لي كنتي غديري الله يغرق ليييك الشقف يالكلبة الحمارة الخرااا .. صدقتي فاااالصو زيييرو عقل عندك فبلاصت العقل عندك خرية الله يعطيك .. تأ براكة غير هدشي لي حنا فيه نبقا نزيد عليك فالدعاوي تفووو
ما خلات باش عيراتها عطاتها المنقي خيارو حتا بردات و سخفات عاد سكتت .. دخل رشيد من الباااب كيغوت عليها حتا خرجات عندو حادرة راسها
رشيد: فييين كتعرفي داك حكييم ولا اش سميت مو
الغالية كتمتم: ششششكوون هادو ابا
رشيد: داك حكيم لي جاي يخطب فيك فين كتعرفييه
الغالية: مكتعرفوووش ياك نتا لي بغيتي تزوجني ليه بزز واخة مبغيتووووش
بقا رشيد كيشوف فيها مدة و حرك راسو ب اه: اممم و وجدي راسك السيد راه غيجي يخطبك مكاين ما تبقاي ديري فالدار اللهم ديري دارك و تقابلي ولادك
الغالية: واخة ابا لي بغيتي
رجعات مخبية الضحكة بزز غير سدات الباب نقزات على جنات كتغوت بلا صوت و تبوس فيها
– وااااا قباااااال قبااااال ههههه .. بنتزوج حكييييم اجنااات هههه ولاهيلاااا قببببببل ههههه
جنات بعدات عليها كتنكر: اااا جهههل ابنت الهم الجههههل خنقتيني غا نتي لي بتزوجي يييخ .. و نوضي الالة من دبا و نتي توجدي على الزواج ساهل
الغالية: نتي غتعاونيني ههه ناري شداتني الفرحة و الخلعة و كلشي هههه
جنات: عادي عادي بيحاول عليك سي حكييم ههه
الغالية: الله يمسخك ههه ناري لاهيلا مخلوعة بحال الى عاد غنتزوج
جنات: راك عروسة الهبيلة مبروك عليك ازيين لاهيلا فرحت لييك بزاف
الغالية: الله يبارك فيك العقبة ليك حبيبتي
جنات: اودييي بلاش منو فيهم غير الصداع انا عارفة راسي حتا حد مايقبل عليا
الغالية: متقوليش هكا الف واحد يتمناك نسولك
جنات: اممم
الغالية: زعمة داك الشيفور مبقيتي كتحسي من جيهتو بوالو
بقات ساكتة لبضع دقايق عاد جاوبات: ماشي ساهل تنساي ف مدة قصيرة خاص واقت ازين معلينا نوضي تعشاي و زيدي تنعسي راه مزال تابعنا شحال من حاجة نوجدوها
* جلابة و سبرديلة فرجليها هي و جنات .. هازة ساكها جامعة فيه البسطام و التلفون و خارجين للسويقة يتقداو شرات كل ما تحتاج ها الفاكية ها الديسير ها اللحم و الدجاج و الفواكه الجافة و لي بانت ليها تقداها بفرحة و سرور باغية تحمر وجه عائلة حكيم و تحط لي قدات عليه .. السويقة كلها ضارو فيها حتا الرجلين طابو و جنات بدات عليها بالنكير..
جنات: و براكة راك رحلتي السوق كامل
الغالية: و صافي كملت هدشي .. ياله نمشيو لدوك البوتيكات نشريو شي حاجة نلبسوها
مشات معاها لتما كانو ملابس تقليدية شرات حويجات لمها تفرحها بيهم و منساتش باها و خوتها .. عاد دازو لسناك كان تم كان تما طلبو الماكلة و بقاو مجمعين
كيقلب وسط الماريو و وااالو .. قلبو كامل و ما من جدوى .. حط يديه على جنابو و عيط ليها بعصبية حتا تمات جاية كتمختر و ديك الجلابة كطلب معاها السلاك خطوة تفزر فوق منها
خالد: فيييين الفلووس لي كانو هنااا هممم .. ولاااات عندنا الشفرة فالدااار نحط الحاجة منبقا نلقاهاااا
سعاد: و مااالك كتغوت عليا يانا .. انا فيي شتهم ولا شمييت تا ريحتهم .. شوووف نتا فبن درتيهم و لمن عطيتيهم .. ياااك كتبااات دالع فالزناقي مع **** و تجي سكرااان ايوا سيير دبا قلب عليهم و فوتني عليييك .. و زييد خلاص مزال قدامنا الطريق خاص نتقدا و نشري حوايج ل صلاح مبقا عندو والو كاشي صغار
نفخ كيحك فوجهو و شمتة كتاكل فييه الفلوس عاد ديما كيلقاهم ناقصيين .. كيحطهم و يرجع يلقاهم نقصو .. معرف واش هي لي كتهزهم ليه ولا نييت كيخسرهم فالسكرة و تازهوانييت .. تلف و معرف مايدير .. مسح على وجهو و دارها فيد الله و خرج تابعها شدو المركوب للفيلاج فين كاينة السويقة و دخلو كيتقداو اش خاصهم .. داز من حدا السناك و هو يقشعها جالسة و الضحكة مشرقة على وجهها .. كتصحك و باينة السعادة على ملامحها مقاداها فرحة .. ضحيكتها صغيرة و مرة مرة كتحدر راسها بخجل ملي كتقول ليها جنات شي حاجة .. بقا كيحدق فيها لمدة و كيشوف فالمايكاب الخفيف لي مزين وجهها الدائرين .. كتاكل بالمهمل و كلامها خفيف مرة مرة كتلوح شي هضرة و تضحك .. خلا سعاد واقفة كتعزل من عند مول الديسير و مشا هو اتجاهم حتا وقف عليهم
خالد: الغالية! .. اش كديري هنا؟..
ملي شافتو بحال الى شافت حفار قبرها .. الدغمة وحلات ليها فحلقها نزلاتها بزز .. ولكن مابيناتش بل لبسات ملامح البرودة و الهدوء و نطقات بلا مبالاة..
– ماكيهمكش … معندك حتا حق تدخل فيا اسي
خالد بعصبية: كيييفاش معنديييش؟؟ اش كديري هنا وسط الرجااال .. مبقيتي تحششششمي وليتي تجلسي وسط الرجااال صافي طوالو رجلييك
الغالية: ماشي شغلك فيا نجلس فين بغيت و ندير لي بغيت معندك دخل .. عطيني التيساع و بعد مني حسن ليك
خالد: ممبااااعدش و عمري غنبعد كتفهي .. نوووضي تكعدي من هنا زااايداها حتا بهاااد الزواق فوجهك .. “شاف فجنات مخنزر” ولا علماتك هاد ال*** اش ديري
كانت طول الوقت ساكتة مبغاتش تدخل و خلات الغالية تكلم .. ولكن غير ضار لجهتها خنزرات فيه و وقفات مقابلة معاه
– خليني محتارماك و جمع ك** معايا .. عندك شي مشكل سير حلو بعييد عليا ولا راه غنوريك هاد *** اش كتسوا .. اقسم باللي خلقني حتا نفرج فيك امة محمد
ضار كيشوف فالغالية: الهضرة ماشي معاك نتي .. هدشي غيوصل لبوك و ديك الساعة يكون كلام اخر ..
الغالية: لي فجهدك ديرو ” شافت وراه ف سعاد لي وقفات وراها و تبسمت بسخرية” قابل غير مرتك و بعد من طريقي احسن لييك
سعاد: اش واقف كدير هنا .. خليتيني كنتقدا و جيتي لهنا
جنات: دييه اختي قبل مانق*** السوايع و ديك الساعة ماحنا فخير
صونا تلفون الغالية و جبداتو تشوف شكون حتا بدات تفتف .. هزاتو و قبلات المكالمة .. حطاتو على ودنها و دازت من حداهم طالقة ليهم كلمة لي فرحات شي و عبسات شي
– الو حبيبييي
حكيم: الله الله على شنيولة بات تصيفطني للقبر قبل الوقت
الغالية: الله يحفصك و ينجييك هههه
حكيم: لا نتي كترتي عليا الحلاوة بيتي تسكتي ليا القلب
الغالية: الله يطول ليا فعمرك
حكيم: زيين ديالي راشقة لييه همم.. فين كاينة حداك الصداع
الغالية: خارجة نتقدا و معايا جنات .. راه صيفط ليك مساج علمتك فالصباح
حكيم: اممم مزيان .. ماشفتووش احبي .. رجعي دغيا متعطلوش
الغالية: لقيتينا راجعين
حكيم: راه تكلم معايا باك .. نهار السبت غنجيو ان شاء الله
الغالية بفرحة مخفية: مرحبا بييكم .. طريق السلامة
كملات معاه الهضرة حتا خرجات جنات كانت خلصات لي عليهم و رجعو فحالهم محملين و مجملين بالتقدية ..
بداو التوجاد الغالية مقابلة غير الفران تقاد فالحلاوي و الكيكات و تحط .. كاع دكشي لي معلمة ليه دارتو و حطات كاع فلوسها لي كانت جامعة فالتقدية و التوجاد .. خملو الدار و حطو الفراش بطلامط جداد و الطبالي كبار شادين البيت كامل .. و جنات مقابلة الغالية كل ليلة بالماسكات و الوصفات حتا صفا ليها الوجه و رجع كيف الدريري الصغير .. رطيطب و بيض لامع .. وصل نهار الخطبة لي غتكون غير باش يتعرفو على بعضهم و يرسمو كلامهم عاد ديك الساعة يتافقو على كلشي .. فاقو مالين الدار بكري و جات خديجة و راجلها معاها واقف معاهم و العيالات طيبو الاكل اما لبنات مخشيين فالبيت مقابلين غير راسهم ..
تهلااات فيها جنات نييت كاع دكشي لي معلمة و جميع الماسكات دارتهم ليها عاد اكتفت دير ليها غير كحل لعينيها فقط .. نضرا انه غيكونو رجال و عيالات اخرين و من العيب دير الماكياج ..
* فالطريق كانت سيارة سيف الدين هي الاولى زعمة يوريييه الطريق واخة هو عااارفها نهار جا مع جنات ولكن مكملين فكذبتهم و متيقينها .. اما اللور كانت سيارة حكيم لي جاي مسكسف على الحالة .. قميجة بيضة و سروال اسود مع صباط لامع و شعرو ماشطو اللور عطاه جمالية و اناقة .. و حداه اللا حليمة بجليليبة اخر ماكاين و اللون لي فالموضة و مهلية فراسها .. و اللور عمو الكبير في متابة باه جاي يخطب ليه و مرتو معاه .. كانت سيارة اخرى وراهم راكبة فيها سارة لي اصرات تحضر حتا هي و معاها راجلها ادم .. وقفو قدام الباب و بداو كيهزو فالهداية لي جايبين .. ما خلاوش من جهدهم و جايين فرحانين بولدهم .. استقبلهم سي حسن و سي رشيد استقبال حاار بالترحيب و الابتسامة و الكلمة الطيبة و دخلوهم للصالون الكبير فرحانين بيهم و حكيم متبت و شاد ف يد بنتو لي غير كتضحك و تشوف في جنابها .. و فرحانة مع باها ..
سي حسن: مرحبااا بيكم اسيادي زارتنا البراكة
العم؛ الله يكبر بيك اسي حسن نتوما مالين الخير
رشيد: مرحبا بيكم .. نهار كبير هذا
العم: الله يبارك فيك اسي ..
رشيد: رشيد .. ولدي حكيم بخيير؟
حكيم: الحمدلله اللهم لك الحمد
داو و جابو فالهضرة الرجال بيناتهم و العيالات حتا هوما جالسين بعاد شوية كيهضرو مع بعد .. تعرفو على بعضهم و عرفو بعضياتهم مزيان ..
دخلات رابحة بلباس تقليدي من لي شرات ليها الغالية مستور و انيق و الفولار ضاير على وجهها .. ملامحها قراب للغالية و بيناتهم شبه كبير .. الشيء لي لاحظو حكيم ملي هز فيها راسو .. تقول غير الغالية و كبرات فالعمر .. حطات ليهم اتاي و غير كترحب و تبسم ليهم و تبعاتها جنات هازة طباسل لحلاوي حطاتهم و جلسات حدا سارة كتضحك معاها و مجمعين لانها كتعرفها .. شافت مرت العم ف رابحة بابتسامة و نطقات
– ايوا اللا رابحة فين العروسة ههه بغينا نشوفو عروستنا
رابحة: اييه مرحبا اللا ” شافت فجنات” عيطي ابنتي على الغالية
وقفات جنات مشات عندها لبيت لقاتها بغات تسخف لي شافها يقول اول تزويجة ليها و التوتر راكبها و كتعرق من يديها و تمسح فالفوطة حداها
جنات: نتي فعار الله و نبي رسول الله هههه .. تبتي و خرجي سلمي على ناسك راه كيتسناو فيك
الغالية: شكووون جا كاينين بزاف .. و كي ندير نسلم
جنات: بوسي ليهم رجليهم ههههه من نيتك سلمي عليهم و جلسي حدا مك اويلي شيطان .. اصلا مكاين حد براني .. غير حكيم و خالتي حليمة و سارة و راجلها و عمو و مرتو
الغالية: واخة واخة .. تسناي نقاد فولاري
ضوراتو على وجهها و خرجات بقفيطين خفيف و عادي ماباينش معيق فالازرق ملكي و دخلات عليهم حادرة راسها وجهها حمر بكترة الحشمة الشيء لي زادها جمال .. كتسلم و عينيها فالارض حتا وصلات ليه .. هاد الاخير لي كان مراقبها ملي دخلات بلا مايعيقو بيه لخرين .. مسحوور بيها و بجمالها الطبيعي و حشمتها لي غتنقز من حنوكها بكترة ما مزيرة .. مدات ليه يديها كتفتف و زير ليها عليها حتا هزات عينيها فيه و جرات يدها لا يفضحها .. كملات السلام ديالها و جلسات حدا مها .. فهاد الاثناء كانت هداية كتنتر من حجر حكيم و مشات كتجري فرحانة تلاحت على الغالية عنقاتها و كتبوس فيها خلات كلشي كيشوف فيها و يبيض فعينيه اما سي حكيم غير سمعها اش قالت وقف بلا شعور
هداية: طاتي الغالية توحشتك بزااف .. مبقبتيش كتجي عندي
اه يا بنيتي و شنو درتي فديك الطفلة .. اللون هرب ليها من وجهها عادت غتسخف فبلاصتها و هي كتسمع فيها .. متحركاتش ولا هزات راسها حتا سمعات صوت باها كيتسائل
– كتعرفيييها؟
حكيم باستغراب: حبيبة بابي كتعرفيها؟
هداية: اه هي
قطعاتها جنات لي هزاتها كضحك و تفتف فالهضرة: هههه اه اويلي على متعرفهاش هههه راه كتعرفها كلاك هههه شكون مايعرفهاااش .. ااا بغيت نقوول تعرفات عليها معايا ههه .. كانت هداية كتجي عندي للدار نراجع معاها لقرية ديالها و تما فين تعرفات على الغالية ههههه هدشي لي كاين .. اجي احبيبة نعطيك واحد الحاجة تعجبك
خرجاتها كتفتف و داتها معاها لبييت عطاتها الشكلاط كتلاهي فيها .. اما الغالية صافي القلب وصل عند رجليها و العينين بياضو و الفم نشف .. ولات كتقول هادي اللخرى ليا .. تبدل الموضوع و هي مبغات تنسا ليها حتا نغزاتها مها تجمع راسها عاد تقادت و ابتسمت للناس .. تسمع صوت العم مخاطب باها و هي تحل ودنيها
العم: ايوا اسي رشيد .. دبا تعارفنا بيناتنا و شركنا الطعام .. ندوزو للمعقول و الغرض لي حنا جينا عليه اسي رشيد .. حنا طالبين راغبين ف يد بنتكم لولدنا حكيم الى قبلتي علينا
رشيد؛ مرحبااا بيكم اسيدي
مرت العم: ها الولد قدامكم اسيدي راه يديرها فعينيه و مايخصها معاه حتا خير ان شاء الله .. منشكروش ليكم و راه كلشي باين و واضح .. راه مربي و ولد الناس و عارف بينو و بين لي خلقو .. بخدمتو و بدارو الحمدلله و قاري و بعقلو تبارك الله .. عندو هاد البنية مزالة صغيرة و يتيمة ديرها بحال بنتها و تربيها تدي فيها الاجر ..
العم: هدشي لي كاين اسي رشيد .. ايوا اش قلتي
رشيد: تبارك الله .. الله يصلح البنية اولدي .. ايوا انا منزيدكم غير الخير .. نسولو لبنت الى بغات نقراو الفاتحة
العم: ما قلتي عييب
رشيد: ايوا ابنتي الغالية اش قلتي
الغالية وجهها رجع حمر و الحشمة تقلات ليها اللسان كتشوف جميع الانضار عليها .. حمحمات بخجل و نطقات بصوت خافت
الغالية: احم .. لي ق قالها با موافقة عليها
رشيد: ايوا اسيدي منزيدكم غير الله يكمل بالخير
العم: نقراو الفاتحة
هزو يديهم قراو الفاتحة و من بعدها نطقات مرت العم
– ايوا اسي رشيد .. نخليو الدراري يهضرو بيناتهم .. الشوفة الشرعية
رشيد: مرحبا .. الغالية
غير عيط ليها فهمات راسها و وقفات كتمشى بخطوات بطيئة و المشية تالفة ليها و حاسة بيه جاي من وراها غير من ريحتو لي مالية المكان .. دخلا لبيت صغير مفرش حتا هو بفراش بسيط .. ياله ضارت تشوف فيه و هي تلقاه حدا وجهها ساد الباب من وراه و عينيه هايمين فيها
– الحب ديالي توحشتك
الغالية بخجل: بصح
قرب ليها اكتر و هي تبعد مخرجة فيه عينيها: ههه و غير اجي مناكلكش
الغالية: اويلي دبا يدخل شي واحد
حكيم: ياك بنتزوجك يدخل لي بايدخل حبيبتي و حلالي .. فرحانة؟
الغالية بصوت رقيوق: بزااف هههه
حكيم: اححح عليك و نشدك منطلقك حتا ن
قطعاتو حاطة يدها على فمو: سكت فضحتينا دبا يسمعك شي واحد
باس يدها كيضحك و جرها جلسها حداه: اجي ازين مهضرناش على الصداق
الغالية بحرج: مم دكشي شوفو مع با
حكيم: واخة الالة .. و العرس
الغالية: حتا هو ههه شوف با واش يبغي يديرو
حكيم: و مال باك لي بغا يبرز .. المهم دبا نهضرو فهادشي ولكن لاكط نبغيه فهاد الايام ماكاين لاش نأجلو تاني
الغالية: اويلي زربتي عليا على الاقل حتا يدوز غير شهر
حكيم ناض واقف: مكاين لا شهر لا شهرين لاكط غنديروه من هنا سيمانة تقولي ليا بلاتي ولا من بعد نخسر معاك الغالية
الغالية: و باقي ماوجدنا والو و خاص نتقدا و شحال من حاجة
حكيم: الالة لبسي هي جلابتك و زيدي متوجدي والو باغيك هكاك ” طلعها و نزلها حتا وقف عند رجليها” تهلاي ليا غير فالرجيلات ازين
خرج و خالاها موسعة عينيها فيه حتا غبر عاد جمعات فمها و خرجات تابعاه جلسات حدا لعيالات و خلات الرجال بيناتهم كيتناقشو و بتافقو على لاكط
رشيد: واخة اولدي نجمعو الوراق و يكون خير
حكيم: و بالنسبة العرس الى بغات ديرو معندي حتا مشكل
رشيد: مكاين لاش .. دير عقدها و تمشي لدارها
بقا حكيم مدة كيشوف فيه و التزم الصمت بينما عمو كمل الهصرة معاه و تحط الاكل تجمعو عليه العيالات بوحدهم و الرجال بوحدهم .. كلاو و شربو و الغالية و مها مخلاوش من جهدهم فالطياب تهلاو فضيافهم .. كمل المجمع و ناضو يمشيو فحالاتهم .. توادعو مع بعض و كل واحد ركب سيارتو مخليين رشيد فرحان و هاز راسو للفوق عاجبينو نسابو الجداد
اما لداخل كانو العيالات كيجمعو فالروينة و شادين النميمة ف نسابهم مو ضريفة ختو ضحوكية هو معقول عمو راجل مرزن .. مخلاو فيمن دواو في الاخير شدو فالغالية محشمينها حتا خلاتهم و دخلات لبيتها مقاداها فرحة .. بدلات حوايجها ب بيجامة مريحة و تلاحت تنعس مخلية ليهم تمارة يجمعوها
خديجة: سيري شطبي ديك الزربية راه طاح فوقها الفتات ديال الخبز .. و مسحي الطوابل و قادي البيت
مشات جنات كتنكر عليهم: شي يعرس و شي يترس هي ديالتي انا .. حولهم قالو العروسة للعريس و الشقا للمتاعيس .. فيين غابر زماني تانا يجي يديني خلاص
جمعو الروينة و بداو فالتخطيط و التوجاد للاكط لي زرب عليهم فيه حكيم مخلاهمش يعتارضو و دار سبة بالاشغال لي كتسناه باش مايلقاو ما يقولو .. تكلف سي رشيد جمع ليها وراقها و هي مقابلة غير راسها و رجعات مع خالتها لمراكش بحجة تقدا لي خاصها و تشري شنو بغات .. و فعلا كانت كل يوم تخرج مع جنات تقدا شوية بشوية و تجمع و تشوف شنو خاصها و مهلية فراسها و مبعدة من الشموسات و تمارة عادت عاطياها غير للوصفات للشعر و الجسم و ترطيب… و حتا جنات معاوناها فين ما شافت شي وصفة ولا ماسك تجربو فيهم و خديجة لقاتها تسلكها عادت خاشية راسها وسطهم لي داروه يخليو ليها حقها ..
فمنزل مولاي السلطان كانت سارة لي جلسات فالدار تعاون خوها و تقابل مها .. تعاونات هي و المراة لي كتقابل الدار و خملوها كاملة من بيوت لصالونات للكوزينة كلشي ردوه كيشعل .. بدلو الفراشات و دارو فراش جديد عاد مشري و حكيم غير يتقدا و يحط .. و لي طلباتها سارة يجيبها ليها و مخلي ليها زمام الامور ..
محطوط براد ديال اتاي و دوازو و جالسين كل من حليمة و سارة و المراة لي كتعاونهم كيتجمعو و يضحكو بيناتهم و هداية و ماجد كيلعبو حداهم .. تحل الباب و دخل محمل بالصيكان .. سلم عليهم و حط شي صيكان تما و شي لاخر فالكوزينة عاد مشا جلس كيحرك فراسو بتعب و يبوس ف هداية لي جلسات عندو
حكيم: كبيدة دبابا فرحانة
هداية؛ اه ههههه غتجي عندنا طاتي الغالية ياك ههه
حكيم: عزيزة عليك الغالية؟
هداية: اه ضريفة و زوينة و كدير ليا دكشي لي بغيت .. بيتها تسكن معانا ابابي
حكيم: يخليلي الزين ديالي انا لي كيفهمني هههه .. قريب الحب تجي تسكن هنا صافي .. ياله سيري هزي الشوكولا لي بغيتي راه فوق الطابل و عطي ل ماجد ديالو ازين انا نمشي ندوش عييت
باستو على حنكو بقوة و ناضت كتجري هزات صاك فيه الشوكولا و داتو كتقسم فيه مع ماجد
وقف حكيم طلع لبيتو دوش و حيد عليه العيا و لبس حوايج مريحين عاد عيط على سارة طلعات عندو
– غنتحول من هاد البيت مبقييتش حملتو .. البيت لي فالجهة الاخرى غنشدو انا و هذا يبقا للضياف .. غنصبغو و نشري ليه فراش اخر واخة؟ .. نتي شنو درتي فداكشي لاخر
سارة: كلشي تقديتو ازين ديالي راه الفراشات كاملين تبدلو الدار رجعات فحال الى جديدة و حتا الصباغة لي درتي ليها جات زوينة و واتات الالوان ديال الفراش
حكيم: يحفضك ازين .. المهم انا غنهضر مع الغالية الى بغات تقدا جهازها بوحدها ولا نشريوه ليها حنا
سارة: و الى بغينا نتبعو العادات راه العكوزة لي كتقدا الجهاز لعروستها
حكيم: واخة انا غنخلي ليك الكارت بونكيغ و ملي تكونو مساليين خرجي نتي و الوليدة شوفو شنو كيتشرا المهم راه كلشي عليك .. و جيبي شي حاجة مزيانة هانا كنوصييك و تهلااااي دكشي زيين الحب
سارة: لاتوصينيييش هههه الغالية راه مرات الغالي هههه
حكيم: اجي نحبك ازيين اجي
خرجات سارة كتضحك عليه: و سييير حبها هب اما انا عندييي راجلي هههه
خرجات كتفرنس و ناض هو نعس ليه شوية يرتاح ولكن قبل ما ينعس صيفط ليها مساج و طفا تلفون..
جالسة فالكوزينة كتوجد فالشلايض للغذا و زيف حياتي فوق راسها مطبع و بيجامة صيفية خفيفة .. حداها جنات كتطحن فالعصير و تغني ناشطة مع راسها و مها كقابلة غذااها كلشي داير يديه و خالقين جو عائلي بيناتهم .. حتا صونا تلفون اغالية بمساج و مسحات يديها هزاتو كتشوف و تقرا و هي تخبط حنكها مخرجة عينيها حتا خلعاتهم
– وييييلي على شووووهتي
خديجة: ياك لباس مالكي
الغالية مزال كتحشم من خالتها: غ غير ححكيم بغانا نمشيو نشوفو الخواتم
جنات: و شنو فيها بتبقاي بلا خاتم ولا
الغالية؛ و شوفي راسي كيف داير اويلي كلي مطلية كيف ندير نخرج
خديجة: هههه راه غير الحنة و عشوبها سيري غسلي و دوشي دغيا
الغالية: اويلي انا شعري بلا حناني و كنبقا فيه ساعتين حسبلاك دبا
جنات: خرجي عندو هكاك ههههه بليمييين متبقاي تشوفيه واخة تبغييه للدواااا ههههههه
خديجة: ههههه مالو لباباه راه هدشي كديرو غير لييه هههه لعنداك ابنتي سيري تغسلي انا نكمل عليك هدشي و نجي نعاونك الى بغيتي انا نغسلو ليك
الغالية: لا اخالتي انا ندخل نغسلو دبا واخة غنتعطل فيه .. المهم غير تغذاو متسناونيش راه نتعطل
حطات دكشي من يديها و مشات كتزرب وجدات حوايجها و دخلاتهم معاها للدوش .. نزلات شعرها القوي الطويل و بقات مشط يا تمشط حتا يديها طاحو عليها .. بزز حتا نقاتو و مشطاتو بمشطة رقييقة باش يحيد كااع داك الفرتيت لي بقا فراسها .. غسلات و كملات عاد خرجات ملوية فبينوار الحنيكات حمرين و مزينكين و فوطة على راسها .. دهنات لحمها بالكريمات لي شرات ليها خالتها هي و جنات و لبسات حوايجها كتنشف فشعرها بالفوطة حتا دخلات عليها جنات كتجبد
– اجي نشفو ليك دغيا
هزات الشيشوار نشفاتو ليها مزيان و جمعاتو الفوق لايحة عليها فولار عاد خرجات للكوزينة لقاتهم مخليين ليها غذاها حطاتو و بقات مجمعة مع جنات
جنات: و ختاري شي خاتم زوين و انيق يجي مع صبيعاتك
الغالية: كون غي مشيتي معانا
جنات: خرا مالكي مالكي انا لي بنتزوج ولا سيري مع خطيبك تعرفي عليه و يتعرف عليك كتر .. اش بغيتيني انا غير ملصقاني فشواطتك
سكتاتها و كملات غذاها و جمعات الحالة .. ياله دخلات لبيت صونا عليها و جاوبات
حكيم: ياله نزلي هانا لتحت
الغالية: واخة تسنا واحد دقيقة
دخلات للبيت تاني اش نلبس اش منلبس هادي تجي هادي متجي و جنات غير حاضاها بنص عين و كتستغفر الله ..
قلبات حتا عيات فاللخر لبسات جلابتها المخزانية لي فالبوردو مع صنيدلتها و فولارها و خرجات هازة صاكها فكتفها .. لقات طموبيلتو حتا الدار ركبات و القت السلام ب يدها لكن جرها حتا قبلها من حنيكاتها الموردين عاد طلقها كيحنزز فيها
– من تسنا دقيقة ولينا فساعة
الغالية: هههه و منستاهلش تسناني
حكيم بتنهيدة: نتسناك العمر كامل العمر .. هي طلقينا للفراجة
ديمارا اللوطو و زاد بسرعة خفيفة كيتسارا بيها فالازقة و شد ف يدها قبلها من الجهات بزوج و حطها على فخدو .. جرات يدها من فوقو و هو يهز فيها حاجبو و ردها بلاصتها
– و هي خليها مابناكلكش
بقا شاد ليها فيها و حاطها على فخدو و هي مدورة راسها للشرجم ساكتة و غير كتشوف بعويناتها حتا وقف امام الدهايبي و نزلو بزوج غادي شاد ليها فيديها حتا دخلو للمحل .. استقبلهم مول المحل و قالو ليه شنو بغاو عاد جبد ليهم سلسلة من الخواتم حطها قدامهم و هي مرة تهز هذا مرة لاخر كلهم قيساتهم و حكيم شاد معاها الخاطر لي معجبوش كتحيدو و كيعزل معاها و يعطيها رأيو حتا وحلات بين زوج .. دارتهم فصبيعاتها و هزاتها قدامو
الغالية: اينا واحد حسن ههه عجبوني بزوووج
حكيم: جاوك زوين بزوج ختاري لي بغيتي نتي
الغالية: معرفتش ههه حرت بيناتهم
حكيم: ايوا صافي خوديهم ديري واحد فهاد اليد و لاخر فاليد لخرا
الغالية كضحك: اويلي حماقيتي ههه
شاف هو فمول المحل قال ليه يجمع ليه واحد فالكريطينة ديالو و لاخر خلاه ليها فصبعها فرحانة بيه و الضحكة مشركة فمها .. ختار جتا هو خاتم رجالي فيه خط اسود من الوسط عاد زيدها ختارت سنسلة و براصليات ليديها و هي كلشي عاجبها تحط حاجة و تهز حاجة حمقاتو لا هو لا مول المحل .. ما خرجات حتا شحفاتهم عاد ختارت اش بغات و خلاتو كيخلص و يتحاسب مع مول الشي و هي وقفات كتسناه عند الباب مقابلة صبعها و تشوف فيه عاجبها الخاتم و عاجبها مول الخاتم .. كتفرنس و تضحك للحيوط و باغة تنقز بالفرحة .. خرج هو عطاها الصاك لي مجموع فيه داكشي لي تقدات و زادت قدامو كتفرنس و هو تابعها حتا ركبات فالسيارة و كان غيركب و هو يتفكر شي حاجة
– تسنايني هنا هانا جاي
سد عليها الباب و رجع ادراجو خلاها كتبقشش فتلفونها و تهضر مع جنات حتا رجع تاني و ركب بلاصتو و زاد
حكيم: نجلسو فشي كافي عاد نرجعك
الغالية: غير ياله قبل ما يدخل عمي حسن و سيف و مايلقاونيش
حكيم: قوليهم خرجت مع حبقلبي
غمزها و زاد منتاضرش جوابها حيت عااارفها غتبقا غير تمرض فيه لا نرجعو لا كذا لا يشوفونا لا … اللهم يدير لي قاليه راسو .. وقفو قدام كافي كتبان كلاص غير من الواجهة .. دخلو و جلسو فلاطيراس و ناض تاني مخليها بوحدها بعض الوقت عاد رجع لقاها هازة شوكتها
– فيين كتمشي و تخليني
حكيم: غي هنا هضرت فالتلفون و صافي
الغالية: و متهضرش قدامي
حكيم: هههه شميت شي ريحة ازين ديالي
الغالية من نيتها: اشمن ريحة ” كتشمشم” ما شميت والو
حكيم قرب حتال عند وجهها و نطق بخفوت: ريحة الغييييرة اكبيدة
الغالية بعدات عليه وجهها كتقلب فعينيها حتا تم جاي النادل هاز كاطو فيدو شاعلين فيه شميعات و ابتسامة على وجهو و حطو قدامها
– عيد ميلاد سعيد مدام
بقات كتشوف فيه ابستغراب و رجعات شافت ف حكيم لي كان مبسم ليها و عينيه متفحصينها حتا وسعات عينيها
– عيييد ميلادي
حكيم: كل عام و نتي غاليتي .. كل عام و نتي لحكيم .. كل عام و نتي حياتي .. كل عام و نتي عيوني “قبلة على يديها” عيد ميلاد سعيد .. ان شاء الله هاد العام يدخل عليك بالصحة و السلامة و السعادة و ربي يقدرني باش نفرحك و نسعدك و عمري نشوف دموعك الى فالفرح
نطق كلماتو و خلاها مزيرة و دموعها هوادين و قلبها كتحس بيه غيخرج من بلاصتو .. كلمات بساط ولكن هي عندها كيوزنو بالذهب .. كلمات نقدرو نعتابروهم حنا عاديين ولكن هي حركو مشاعرها و خلاوها كتشوف فحياتها غير حكيم و من غيرو مكاينش .. حركة وحدة لي قدرات دير هي تحط يدها على فمها حابسة الشهقة و هو كيشوف فيها بابتسامة و نض وقف وراها كيسكت فيها
– و صافي ههه جبناك تفرحي ماشي تنكديها عليك .. ياله طفي الشمعات ههه
بقات كتبكي و تضحك فنفس الوقت و الناس لي كانو جنبهم كيباركو ليها العيد ميلاد و هي كتحرك غير راسها بابتسامة .. مسحات دموعها و نفخات على الشميعات بفرحة و قسمات طرف وكلاتو هو الاول عاد وكلها هي و هو كيضحك عليها..
حكيم: دبا عاد تأكدت ديييت بكاااااية نييت
الغاليا: ههه لا مابكاياش والله .. فخبارك نسيت واش اليوم عيد ميلادي ههه باش عرفتيها نتا
حكيم: عرفتها و صافيي .. كولي حلوتك ياله نمشيو
الغالية: و كولها معايا ههه كتيرة
حكيم بهمس مقرب منها: بغيييت حلوى خرااا هادي مكتعجبنيش .. ديري مع حبيبك المزيان و طلقينا خلاص
الغالبة مبعدة منو و ضرباتو لكتفو: والله حتا تمسختي مبقيتيييش كتحشم كااع
حكيم حابس الضحكة: و خاص نحيدو الحشمة دبا قبل مانديرك تحتي و ديك الساعة مكاين غير
مخلاتوش يكمل هضرتو و وقفات وجهها غيطرطق بالحمورية هزات صاكها و سبقاتو مخلياه كيضحك عليها و ناض حاط الخلاص و زاد تابعها كيعيط عليها و هي حلفات لا وقفات حتا وصلات قدام اللوطو
الغالية: زييد وصلني فحالي مباقيش نخرج معاك صافي
حكيم: هههه لخاطرك ازين
فتح ليها اللوطو و خلاها حتا ركبات عاد نزل على رجليه قدامها..
– اري رجلك ازين
الغالية باستغراب: لاش اش بيتيها حتا هي
حكيم بالطنز: بنسلم عليها .. و مدي رجلك
مدات ليه رجلها باستغراب و مترقباه اش بغا يدير حتا بان ليها جبد شي حاجة من جيبو .. كان خلخال رقيق ذهبي و انيق ناعم .. ركبو ليها و هو كيتمعن فرجيلاتها البيضين .. مع ديك الصندالة لي لابسة زاد بانت بيوضيتهم و الصبيعات نقيين مافيهم حتا صباغة .. داعب رجلها بيدو حتا هرها و خطفاتها عاضة على شفاها من لتحت و هو يتبسم
– متبقايش ديري ليهم الصباغة خليهم هاكا فنيونين الفنون
وقف و سد عليها الباب خلاها متبعة ليه العين حتا ضار لبلاصتو .. هزات رجلها حطاتها فوق الرجل الاخرى كتلمس فالخلخال الرقيق كيلامس جلدها الرطب .. ابتسمات و الفرحة باينة فعينيها و هي كتشوف ف اهتمامو ليها .. عمرها توقعات تلاقا بواحد بحال حكيم .. وقت الضحك ضحك و وقت المعقول كتلقاه ديما فجنبها .. ركب حداها و نزل عينيه لرجلها كيفرنس عااجبو على رجيلتها و متبع ليه العين .. و ديمارا اللوطو محرك من تما و يدو شدات فيدها تاني كيداعب اصابعها الرقيقة .. وصلها حتال قدام الباب و هي غير ساكتة الطريق كاملة .. مكتافية تحدق فيه و تحفض ملامحو بدون ملل .. فيقها من سهوتها ملي وصلو و تقادت فالجلسة كتهز اغراضها .. حلات الباب تنزل و هي توقف و تلفتات عندو .. بغفلة منو قربات لخدو قبلاتو قبلة رهييفة و خفيفة خلات بدنو يقشعر ليها و بهمس و صوت خافت نطقات الكلمة لي شحال و هي مخبياها بينها و بين نفسها و ها قد اتى الوقت باش تشاركها معاه
– كنبغييييك
كيف نطقاتها خرجات كتجري من اللوطو بدون ما تشوف ردة فعلو ولا تسناه يتكلم اي يدير شي حاجة .. دخلات للدار لي كان بابها محلول و خلاتو متبع ليها العين بعيون لامعة و ولهانة فيها .. عض على شفاهه بابتسامة و كمل طريقو ما قداهش الدنيا و الفرحة لي كيحس معاها عمرو حسها مع احد اخر ..
اما لالة لبنات راه كيف دخلات للدار لقات غير جنات و خديجة و هي طلقها بغوتة بفرحة خلاتهم غير كيشوفو فيها و يتعجبو .. مبقات لا خالتي لا جداتي .. مشات عندهم كتجري و توريهم فصبعها و رجليها و تفرنس فمها مبقاش بغا يتجمع
– شوفي ههه جاني زوييين ياك .. شوفي رجلي هههه كيحمق والله ناري غيسطيني هههه
بقات غير كضحك و توريهم و جبدات ذبها لي شرات حطاتو قدام خديجة كتشوف فيه و تعبر فيه غير بنضرتها و يديها
خديجة: اتهلا فيييك ابنتي بصحتك و راحتك تستاهلي ما كتر
الغالية نقزات عليها باستها و عنقاتها: الله يعطيك الصحة اخالتي ربي يخاليك ليا
جنات: هاي هاي على بلارج ولا يعرف فالخلاخل “طولاااتها”
خديجة: هههه و واتاوها رجيلاتها نييت صغيورين و زوينين
الغالية: هههه شوفي لاهيلا زوين
ملي دخلات و هي غير مقلزة رجلها و تشوف فيها عاجباها و محمقاها .. اولا الفرحة و الجيست لي دار معاها لي سطاها و خلاها بلا عقل .. كانت عندها امنية وحدة .. راجل يحتارمها و يقدرها و يدير ليها اعتبار .. ها الحمدلله ربي استاجب لدعائها و رزقها بحكيم دايرها فعينيه و عمرو خسر ليها .. حنين معاها و كيتعامل معاها بحال طفلة صغيرة عاد كتكتاشف الدنيا .. سخي و كريم معاها ديما مهلي فيها و يدو متقوبة ليها .. احساس جديد كتحسو معاه عمرها جرباتو من قبل .. بحال الى عاد تولدات او عاد غتعيش هاد الشعور لي عمرو خالجها من قبل .. احاسيس و شعور مختلف غزا قلبها و خلاها كتشوف غير حكيم و غيرو مكاينش .. ناضت بعدما بدلات حوايجها دخلات لكوزينة بطاقة فرغاتها كاملة غير فالتوجاد كل من الحلويات و المملحات حتا مبقات لقات فاش تجمع عاد جلسات للارض حدا جنات لي مقابلة تلفونها طالعة نازلة و الملل قتلها ..
* محل كبيير مملوء بملابس المحجاب .. الفولارت صف كامل اشكار و الوان مكاينش شي لون متلقاهش .. الملابس منوعين و مشكلين تدوخي بيناتهم .. واقفة سارة و معاها اللا حليمة كيقلبو فالفولارات و تعزل و التلفون فودنها كتشاور و تختار ..
سارة: وي غير كون هاني اكيمو كنهز غير الالوان المبهجين .. و صافي فهمت .. واش نتا غتوريني فواحد لبنات .. وي عرفت عندها 20 سنة ماشي 50 .. و صافي اصاحبي بيتي هي تعصبني نسمح فكلشي و نزيد .. اممم هادشي مكفي و موفي غير تهنا .. راه يدي مرخوووفة مكاين غير هز و خلص غير سيير شوف ليك متقدي و فرقني عليك ..
سارة: راه يدي مرخوووفة مكاين غير هز و خلص غير سيير شوف ليك متقدي و فرقني عليك .. عرفتي شنو .. الى بقيت جاوبتك ها انا ها نتا
قطعات عليه و دارت مود سيلونس عاد رجعات ملات عزيلها و دازت لحاجة اخرى .. مابخلاتش عليها و الالوان مختاراهم مناسلين لسنها و لون وجهها .. ما خلات ما هزات ليها و لي تقداتها تديها للوطو تحطها فيها .. دازو لتفصيلات و التواب حتا هوما ختارو و تخيرو و عزلو ما خرجو حتا دوخو مول الشي خلاوه باغي يطج بكترة التسوال و التقلاب عاد ختارو لي بغاو و خرجو .. من بوتيك لبوتيك و سارة تقول كتجهز لختها ولا بنتها كلشي مشري على حقو و طريقو و دايرا بكلام خوها لي كل ساعة مصدعها بالتعياط .. طاح الليل و رجعو عيانين للدار تنشرو كل وحدة شدات فوطوي منشورة عليه كيبردو فرجليهم و يتفخو .. حطات ليهم سعدية المراة لي كتعاونهم فالدار الما و براد د اتاي يقاد ليهم المزاج و جلسات تاني سارة تجبد و تطوي و تحط حتا دخل حكيم و تربع حداها كيعاونها و يفلي فداكشي و هي حاضياه بنص عين حتا كمل و ناض باس ليها راسها و عنكشها فرحان بختو و وقفتها معاه
حكيم؛ الله يرضي على حبيبتي
سارة: لا تقول ما تهليتش فمرت خوويا .. المهم راه خاصها حتا هي تخرج معانا شي نهار تختار على ذوقها .. و دكشي لاخر راه غنمشي غير للمحل عندك نهزو وصي الخدامة دياولك عليا
حكيم: كوني هانية ازين هي سيري مكاين لي يهضر معاك و دوزي حتا عند دهايبي لي كاين ف **** راه موصيه عليك تقداي شي حاجة معاك
سارة: ان شاء الله .. اجي واش باديرو العرس ولا نو
حكيم: مكنضنش .. باها مبغاش قاليك دير العقد و تمشي لدارها
سارة: ايوا شوف نتا لي بان ليك و ماسولتيش الغالية .. اش قالت ليك هي
حكيم: مزال ما سولتها المهم حتال نهار لاكط و نهضرو على دكشي دبا بنديرو لاكط نتهماو منو قبل مايخرج لينا باها بشي بلان تاني
سارو: مزروووب هههه
ضحك حكيم و وقف كيجمع معاها دكشي: بزاااف ههه .. نوضي تنعسي داز الحال
سارة: نو غايجي ليا ادم نمشي لداري .. غير سير تنعس تصبح على خير
يوم جديد من ايام الله .. لبسات الغالية سروال اسود قصير شوية من لتحت و شوميز طويلة من اللور موديغن .. قدات فولارها و لبسات صندالتها مع الخلخال فرجلها رقيوق و انيق .. رشات ريحتها الناعمة الى مقربتيش ليها متشميهاش و خرجات باست خالتها و جنات و نزلات مع الدروج
بعدات شوي على الدار و هي تلقاه واقف كيتسناها .. ركبات سلمات عليه عاد زاد داير نضاضر دالشمس و طالق موسيقى هادئة كاسرة داك الصمت لي كان حتا نطقات
– علاش بغيتيني قلتي ليا خاصني نجي ضروري
حكيم بضحيكة خفيفة: هي توحشتك و بيت نشوفك هه و مع نتي كامووونية كون ما قلت ليك هكاك منشوفش خليقتك حتال لاكط
الغالية: هههه باز ياخويا
حكيم كيحرك فراسو بواخة: هي بلاتي حتا تسني على ديك الورقة و تشوفي خويا كيف دايرا الى مخرجت من مك الزييت العنكورية مانيش حكيم
الغالية: هههه ربي لما غي سكت بتندمني لاش خرجت تاني هههه
ضحك و حبس الطموبيل .. نزلو مشادين من ليدين دخلو لكافي جلسو فيها كيتعاودو و اكيد حكيم كلامو مايخلاش من تحشيم الغالية حتا كيخليها بغات تنوض تهرب ولا تخشي وجهها فدراعو مخبية من شوفاتو .. تحط لبهم طلبهم و هوما مجمعين حتا نطق هو
– الغالية مهضرناش على موضوع العرس
الغالية كتحك فعنقها من فوق الفولار: ياك هصر معاك با
حكيم: خلي باك فجنب و هضري معايا نتي.. بيناتنا و متخبييش عليا.. واش باغة العرس؟ واش مستعدة تعرسي و قادة عليه؟.. باغة تفرحي براسك؟.. الى كنتي باغاه هي قوليها و خلي شي لاخر عليا
الغالية بخفوت: للا بلاش .. اصلا با مقادش عليه و ماباغيهش هي عشرة .. قال نديرو غي لاكط و صافي
حكيم: نتي مبغيتيهش؟
بقات ساكتة بتردد و احراج و رجعات نطقات:لا مبغيتوش
حكيم: واخة على خاطرك .. هضرت مع باك و العقد من هنا يومين .. ديري فبالك غي نعقدو غتزيدي قدامي مكاين لا من بعد لا ماشي دبا .. داك انهار تمشي معايا
الغالية: و و مزال ما وجدت والو
حكيم: كلشي واجد الالة غير نعسي على جنب الراحة
كملو كلامهم على نفس المنوال .. هز حكيم كاسو بغا يشرب منو و مسرح عينيه حتا بقا مركزهم فالشخص لي مقابل معاه و عيونو مترقبينو مرة هو مرة الغالية.. كانت كريمة جالسة هي و ختها و شي بنات اخرين.. بقات كتشوف فيه و هو كيشوف فيها حتا غمزاتو بابتسامة.. ملامحو بقا مكتاسيهم البرود اكتفى يهز يد الغالية لي كان فيها الخاتم و يقبلها برقة مخلي كريمة بغات تمووت فبلاصتها حركة وحدة منو خلاتها غتنفاجر غير وحدها و مغددة عليه بقات مرقباهم و باغية شي طريقة كيفاش توصل ليهم ولكن معطاهاش اهمية بل استمر فمداعبة الغالية و تحشيمها كل دقيقة حتا هربها كيف كل مرة و ناضو كيضحكو مدرعها من كتافها كتبان كيف النملة معاه و خرجو مشاو فحالهم
راكبين فسيارتهم كيتعاودو و يتناقشو و يضحكو .. الغالية مرة تعجبها هضرتو مرة يعصبها مرة يحشمها يخليها غارقة فحوايجها .. جبدو موضوع ليكول و هو يشوف فيها كيبتاسم
– خاصك تعلمي تسوقي ضروري
الغاليا: ههه من نيتك! .. لا لا حتال السياقة لا
حكيم: و خاااايبة حتال المعاودة راجلك عندو مدرسة السياقة و نتي مكتعرفيش تسوقي!! دبا وزنتيها!! و اصلا شنو فيها انا غنعلمك و دوزي ليكزام
الغالية: و نخاااف منقدرش
حكيم؛ مناش غتخافي!! واش بعقلك ولا متكسابيهش راه عادي مال جنات كتسوق و سوقانها زوين واخة خرجاتها مني دغيا طلقات يدها
الغالية: و موحالش نجح ههه هدشي كيبان معقد
حكيم: غتنجحي واش انا لي غنعلمك و متنجحييش!!
الغالية بحماس: و ياله علمني نشوف .. هذا لاش لايق
حكيم صغر فيها عينيه و حرك راسو بلا: لااا لاا منعلمكش دبا حتا نسنيو الورقة
الغالية: و علاااش ياك نتا قلتي غتعلمني بحال دبا بحال ديك الساعة .. و علمني عفاااك
حكيم: قلت ليك لا حتا نتزوجو و ديك الساعة نعلم كبيدة
الغالية شدات العكس: و علمني دبا نييت مالك اش خاسر
حكيم بمكر: و ياله اجي جلسي هنا و نعلمك ” نعت ليها فوق ركابيه”
شافت فيه و زمات فمها على شكل خط و هي تهز يدها ضرباتو لصدرو حتا ضحك: والله مبقيتي كتحشم .. طيرتي البلااايك نييت .. ديني لدارنااا اخويا ماباقيييش نخرج معاك من اليوم
حكيم: ههه و نتي لي بيتي تعلمي ليوم ياك قلت ليك حتا نسنيو الورقة هههه
الغالية: ماسخ
ضحك عليها و كمل سوقانو حتا وصلها لقدام الباب و نزلات رادخة عليه الباب طلعات فحالها
* من بعد ما كملات خدمتها خرجات كيف العادة متاجهة لسيارتها كتجمع فشعرها لي مبرزطها .. هزات راسها بان ليها صاحب دعوتها واقف ليها عند السيارة .. قلبات عينيها بتدمر مكملة طريقها حتا خرج لاخر فطريقها معارضها .. ما عرفاتو منين نط عليها كي الزلط .. بعدات منو زوج خطوات اللور و نفخات كتافاف و تهضر مع راسها بهمس
– ياله و هااا كمال و بلال جاو عند منار
فؤاد: جنات بغيت نهضر معاك
جنات بلا مبالاة: ممسالياش اسيدي و كيف كتشوف ” نعتات ب يدها جهة فاتح لي بقا فبلاصتو متحركش” حبيبي كيتسنا فيا .. بااسلامة
زادت بخطوات اسرع حتا وصلات عند فاتح و ابتسمات ليه بمجاملة كتهضر بين سنانها: اش بيتي تا نتا
قرب منها فاتح مسلم عليها بلابيز و فاهم قصدها .. كيف هي استغلات وجودو حتا هو استغل الموقف لي هي فيه ..
فاتح: خاصنا نهضرو ياله معايا
جنات: واخة انا نتبعك بطموبيلتي
فاتح: هي زيدي حتال من بعد و نرجعك ليها
حط يدو على كتافها مزيدها قدامو و فتح ليها ركبات عاد مشا لبلاصتو .. ضورات نضراتها ل فؤاد لي شاف السيناريو كامل و رجعات قلبات عينيها ببرودة جهة فاتح
جنات: شنو بغيتي تاني لاش جاي عندي قدام خدمتي
فاتح ابتسم جنب و سكت مجاوبهاش و حرك الطموبيل زاد حتال قدام كافي عاد نزل و نزلات حتا هي .. دخلو جلسو فطابل بعيدة على الضجيج و طلبو كافي للواحد ..
بقا واحد يشوف فلاخر و هو غير كيحدق فيها لمدة بصمت حتا نطقات هي
– واش جايبني تبقا تشوف فيا؟
فاتح: باقة نتي هي نتي .. متبدلتيش
جنات: ايوا الله يخلينا فصباغتنا .. عيانة افاتح قول شنو عندك خاص نمشي
فاتح بابتسامة: بغيت نرجع علاقتي معاك كيف كانت
جنات بجدية: مغاترجعش كيف كانت .. نتا لي هدمتي علاقتنا نهار الاول
فاتح: علاش شنو درت انا؟
جنات: نتا لي فهمتي علاقتنا فشكل اخر و دخلتي شي فشي!! انا كنت كنتعامل معاك عادي افاتح بحال سيف الدين و حكيم و غيرهم .. حاسباك صديقي .. مي نتا فهمتيها كيف بغيتي و تجاوزتي حدودك معايا
فاتح: ولكن كنت ناوي معاك الحلال .. شنو دبا دايرا هادشي كامل على بوسة!!!
جنات بعصبية: كتقول فيها بحال الى عااااادي .. شوف ا فاتح انا مبغيييتش نقول هادشي لخويا لمصلاحتنا كاملين متخلينيش نديرها ليك قد فمك و نوصلها ليه
فاتح بهدوء: صراحة مكرهتش توصلو .. على الاقل غيلقا حل وسط و نوصل لشنو بغيت .. جاوبيني بصراحة شنو لي ممخليكش تفتحي قلبك ليا .. واش باقة شادة فخاطرك من جيهتي طول هاد العامين؟
جنات: انا خاطري صافي من جهة كلشي .. ولكن نتا اخر مرة شمتي فيا و تشفيتي فيا و عاجبك الحال ” بعيون مدمعة”
فاتح: علاش غنشمت فييك و انا كنت كنتاضر غير نهار لي تعرفي داك لل .. شماتة على حقيقتو
جنات: بلاما تخبي هئ نتا ضحكتي عليا و تشيفيتي فيا اهئ
فاتح: جنات الله يهديك .. واش عرفاني انا كنشمت فالناس!! .. ديري عقلك و خلينا نصلحو علاقتنا ” سكت لمدة و رجع كمل ” فكري فايام صداقتنا الزوينة لي دازت .. واخة؟
جنات: وصلني للدار عفاك
استاجب لطلبها و وقف خلص و مشا معاها وصلها حتال قدام الدار دخلات عاد كمل هو طريقو ..
في الكوزينة كانت خديجة و رابحة كيوجدو فالحلاوي و مشتقاتها و يوجدو لنهار الموعود .. من بعد ما جات تعاون بنتها و توقف معاها .. كانت الغالية و جنات فبيتهم كيطويو فالحوايج لي شارية .. حتا هي مخلاتش من حقها و تقدات كل ما يخصها .. فلوسها كاملين حطاتهم فالتقدية .. و زادتها مها حتا هي من عندها .. كلشي تجمع و تطوا و تقاد .. اشياء كتقداهم كل عروس .. جالسين كيجمعو فالروايح و الكريمات حتا صونا تلفون جنات و هزات جاوبت
– الو سارة .. لباس الحمدلله و نتي .. كلشي بخير يحفضك .. اه راه غذا ان شاء الله غنمشيو بزوجات .. هههه واخة معروساش نتهلا فراسي .. متبغييش تجي عندك هههه تحشم من لوستها ههه .. واخة ان شاء الله .. غذا فالصباح نكونو عندك ب ادن الله .. باي الزيين
قطعات و شافت في الغالية لي كانت كتسناها تقول اش كاين
جنات: سارة قالت ليك نمشيو للصالون عندها حسن من واحد اخر
الغالية؛ علاااه عندها شي صالون؟
سارة: واييه كبيير و زوين متسخاي تخرجي منو هههه كيتهلاو فيك ياختي
الغالية: واش هي لي قالت لبك نجيو
جنات: وايه اصحبتي راه خاوياه على قبلك ههه .. غذا تهلا فيك ههه توجدك لخوها هههه
الغالية: الله يمسخك ههه بحالك بحالو فمكم كيقطر مسخ ههه
جنات: هي صبري دبا تشوفي المسخ دبصح ابنت خالتي
الغالية سبلات عينيها و قربات ليها: ع عنداك غ غغيير منعجبوش
جنات: كيفاش متعجبيييهش!! من نيتك؟؟؟ كون ما كان باغييك و عاجباه بيتزوجك اش هاد الهصرة تاني
الغالية: معرفتش حيت زعمة مطلقة
جنات: خوي راسك ازبلة من هدشي هو عارفك مطلقة ماشي كاذبة عليه
* هاز بنتو طلعها لبيتها حطها ناعسة فوق فراشها و نزل كيحنقز فالدروج حتال الثالون لي كان عامر بالعائلة .. شاف ف خالتو الكبيرة و نطق كيورك على كلامو
– بغيييتو تمشييو مرحبااا مبغييييتوش مرحبتييين المهم الغااالية هي لي كاينة و سدات مدام
لكبيرة مطلعة حاجبها: و انا بيت هي مصلاحتك اولدي .. راك مزال تجيب لالات العزبات لاش تا تاخد مطلقة
حكيم: و العزبةةة خليييتها ليكم .. اللا انا بيييتها مطلقة واش سوق شي واحد فيا؟؟؟ و كتهضرييي بحال الى انا عاد بنتزوج و انا دوزت تلاتة و زايدة عندي بنت .. واش كتفكري بعقلك
لكبيرة؛ ايييوااا شفتك كتهز عليا صوووتك اولد ختي
حكيم: كنهضر معاك باللوجيك ابنت جدي .. انا باغي الغااالية و فينال بتمشي معايا مرحبا مابيتيش مرحبا
لكبيرة؛ و مالك متجيب شي بنت نكونو عارفينها و بنت الناس
سارة كتحاول تهدن السوق: و خالتي راه بنت الناس و مربية و شهوة منها راه كون تشوفيها تحمقك راه حلاااوى والله
لكبيرة: و جيب شي وحدة اولدي لي نعرفوها و تكون مزال عزبة راك مناقصك حتا خيير بخدمتك و دارك و اي بنت تتمناك
حكيم: سيري قلبي لولدك على عزبة انا مبقيت باغي ننن .. عرفتي شنو انا لي خاااص دينمي العصا جالس نتقاشح معاك قالت ليك عزبة لواه … “بهمس مع راسو” طفرتو من تلاتة اللولين بقات هي الرابعة بقات هي الرابعة تفوو
زاد خارج كينفخ معاجبو حال و هي تنطق حليمة لي متكلماتش قدامو
– البنت مصوابة و الله يعمرها دار و مزال صغيرة .. انا بغيتها ليه .. خليه منو لراسو راه عارف اش كيدير .. تبقاي تجبدي فيه حتا يخسر معك الضواسا
لكبيرة: هاني اللا حليمة منو لراسو
سارو: ايوا هكاك خلييه البنت عاجباه و نوضو جمعو معايا داكشي غلفوه و قادوه راه بايديه فالطيافر
جمعو الوقفة كيوجدو معاها و هي فرحانة بخوها و ناشطة تجمع و تقول ما جمعت ..
اما الغالية غير سالاو قشهم و كملو لعيالات قلبوها تاشياخت و كل وحدة هزات بندير ولا طعريجة كيضربو و يشطحو و يغنيو على الغالية زاهيين و ناشطين بيها
خديجة: غذا ان شاء الله تجي النقاشة تنقش ليك .. راه ضروري من الحنة
جنات: جيبي هديك لي نقشات ليك اخر مرة نقشها مصرووع
رابحة: خاص تمشي للحمام عاد تجي تنقش
جنات: اييه غنمشيو ليه فالصباح مع سارة خت لعريس
خديجة: و المهم متنسايش القفطان دالعروسة تمشي تجبيه هو اللول من عند الخياط راه دزت عندو قال ليا غدا يوجد
جنات: ان شاء الله.. نوضو تركدو
ناضو ينعسو و الغالية بقات مجمعة مع حكيم فالتلفون كيف كل ليلة قبل ما ينعس خاص ضروري يهضر معاها و يجمعو بزوج واخة فمواضيع تافهة و لا علاقة المهم يبقاو على تواصل حتا يطيب نعاسهم عاد يقطعو ..
لبسو جليلباتهم و نزلو معولين يمشيو عند سارة .. غير نزلات شافت طموبيلتها واقفة قريب من الدار .. استغربات من وجودها ياك خلاتها حدا مكان العمل شنو وصلها هنا؟ .. قربات جهتها و هو يخرج منها هو بلباس رسمي كيف ديما و ابتسامة خفيييفة مزينة وجهو .. شافت فيه جنات باستغراب و قربات منو
– منين جاوك السوارت ؟؟
فاتح: صباح الخير صفا
جنات: منين جاوك السوارت؟؟
حك فاتح على حاجبو و رد عليها تاني: هاكي ها سوارتك .. بغيت سيف الدين كاين؟
جنات بنفخة: صوني ليه فالطاج اللخر ينزل عندك
شدات من عندو السوارت لي كانو مختلفين على دياولها و ركبات و الغالية جنبها .. مشاو نيشان عند سارة لي استقبلاتهم هي و لبنات لي معاها بالزغاريت و الصلاة على النبي و الحليب و تمر بحال الى جاية لدارهم .. دخلات معاها حشمانة و لبنات كيباركو ليها و هي شاداها سارة من مرفقها مدخلاها معاها كتضحك و تصلي على النبي .. دخلو ريحو عضامهم هوما اللولين عاد تبعوها لاصير بزوجات و سارة واقفة على لبنات باش يتهلاو فيهم .. خرجات الغالية حمييمرة فببنوار ابيض كتشعل و الحنيكات حمريين طايح عليها السر .. عاد تبعاتها جنات حتا هي لا تقل عنها .. جلسو كيبردو فضفارهم و حتا سارة معاهم و الضحك و النشاط بيناتهم حتا كملو كلشي على خاطرهم عاد ناضو تسالمو و و خرجو دازو عند الخياط جابو حوايجهم و رجعو للدار ..
* فالعشية كانت الغالية متوسطة الصالون بقفيطين خفيف فالاخضر و شعرها الاسود الطويل مصايب و مليوح وراء ضهرها .. وجهها خالي من مواد التجميل من غير كحل فعينيها زاد بين جمالهم مع ابتسامتها الخجولة و حنيكاتها الموردين ماحتاجتش مايكاب .. مادة يدها للنقاشة و لعيالات كيصليو على النبي و يزغرتو كاسرين داك الطاج كامل .. دارت نقش خفييف غير صبيعات معامرينش و رجليها كدالك مكتراتش من الحنة .. دازت الحنة على كلشي نقش و فرح معاها عاد قشروها ليها و سقاوها بالما ديالها حتا رجعات حمراء فيديها .. العيالات كيباركو ليها و يسلمو عليها و هي عاطياهم صوابهم و ابتسامتها ما حيداتش على وجهها .. لعبو ليها مزيان و الشطيح و الغنااا على الجهد و كل واحد يغني حقو و هي عاجبها الحال و حاسة براسها عاااد غتزوج و عمر داك الزواج الاول ما داز من حياتها .. مسحات كلشي من ذاكرتها و احتافضات غير باللحضات الزوينة لي كتعيشها ..
عائلة صغيرة فرحانين معاها و الجيران لي سمعو الزغاريد و دخلو يباركو .. كلشي فرح ليها و كأنها وحدة منهم و كانو كيتسناو فرحتها …
حطو العشاء لي وجدوه خديجة و رابحة بكري و كلشي تحط على حقو و طريقو .. وكلو الناس حتا مبقا ليهم فين يزيدو عاد خلاوهم يخرجو و ناضو هوما جمعو الحالة معاونين و الغالية مخلينها مرتاحة و مقابلة غير راسها شنو ناقص .. شنو خاص .. شنو مشريتش .. شنو غنحتاج .. كتهدنها غير جنات مرة تشد ليها الخاطر نرة تنهد فيها حتا تكمش ..
جمعو الحالة و ناضو يرتاحو باش يفيقو بكري .. اكيد ما هو يوم فرحهم غذا خاص كلشي يكون على حقو و طريقو ..
* الرواج فالدار شي داخل شي خارج .. خديجو التلفون محيدش من ودنها مع سيف .. جيب هادي خاص هادي فين هادي وصيتي على كذا فين داكشي علاش وصيت جي خلااص مالك تعطلتي …. ندماااتو على نهار لي وافق يتقدا ليها .. و هي مشطونة و تلفانة كتر من ام لعروسة .. و اكيد خديجة مكتعتابرش الغالية غير بنت ختها بل حاسباها بحال بنتها و دايراها فمثابتها .. دكشي لي تبغي لبناتها كديرو حتال الغالية و فرحانة بيها .. وصاو على الاكل يجيهم من عند التريتور و معيطين على فرقة موسيقية تنشط ليهم النهار غير بيناتهم و العائلة المقربة لي حضرات داك النهار ..
اما في البيت كانت الغالية مرتااابكة اكتر من اللازم الخلعة و التوتر و الفرحة كلشي مخلط عليها ما عارفة شنو ديير غير جالسة و تشوف و ممخلية حتا واحد يدخل عندها من بنات العائلة من غير جنات و ختها سلوى لي حضرات معاهم .. جالسين جنبها حاطين يدهم على حنكهم و يشوفو فيها مبهوضين .. مالها؟ .. اش واقع ليها؟ .. ياك غير لبارح كانت غطير بالفرحة؟ .. و حتا واحد ما حاس بيها .. ما عارفينها باش كتحس و هي مخلط عليها كلشي .. خايفة .. مناش هي بنفسها معارفاش .. كانت غادير المستحيل باش تزوج بيه و دابا متخوفة من الخطوة لي غتقدم .. جلساتها سلوى قدامها و بقات عليها بالنصائح و الكلام حتا هدناتها شوية .. سمعات هضرة الرجال كترات و هي توقف قافزة موسعة عينيها فيهم
– ويلي جاااو .. دغياااا
جنات: و مالك كتسناي يطييح الضلام عاد يجيو لا .. شدي لبسي عليك هذا و غطي شعرك راه دبا كاينين غير الرجال العدول و الطلبة صافي .. حتال العشية عاد غتزها للعيالات هههه
الغالية: اوووففف ناري قلبي غيخرج من بلاصتو .. شداتني القفقافة
جنات: هههه المعقووول كيخلع ياختي.
جنات: هههه المعقووول كيخلع ياختي .. كنتي باديري كااارتة باش تزوجي بيه و دبا كترعدي الله يعطينا وجهك .. و نوضي خلاص لبسي قبل مايوليو يتسناو فيك هههه
سلوى: و تبتي اصحبتي مالك على هاد الخوف كامل .. ياك نتي باغياه و هو باغييك خاصك تكوني فرحااانة .. الله يجعل كلشي مبارك و مسعوود ازيين والله الى فرحت لييك
الغالية: لهلا يخطيكم عليا شكرا بزاف
جنات: هاهي بتبدا تاني .. شدي لبسي خلاص نمشي نشوف اش كاين و نجي
خلاتها كتلبس و معاوناها سلوى و هي خرجات برا كتسمع الرجال فالصالون لكبير .. دازت من تما جهة الكوزينة و لاحت عينيها عليهم .. كيبان ليها مولاي السلطان جالس و جنبو العم لي جا معاه للخطبة و رجل اخر من الجهة الاخرى باين خوه.. مشات للكوزينة تشوف واش خاصهم شي حاجة و رجعات عند الغالية حتا ناداو عليها .. هاد الاخيرة لي كانت كتعراق و التوتر لاعب عليها .. وجهها منور من عند الله بلا حتا نقطة ماكياج .. دخلاتها مها و هي حشمانة مهزاتش الراس مخلياه كيحدق فيها و يتمعن فجمالها و خجلها لي واضح على وجنتيها ..
قدم باها وراقها و بدا العدول فاسئلتو الاعتيادية
العدول: الغالية بنت رشيد .. واش قابلة بسي حكيم بن محمد زوج ليك على سنة الله و رسوله
بصوت رقيق بالكاد كيتسمع نطقات بعد سكوت دام لبضع ثواني: اه .. قابلة
مد ليها وقعات و كان حتا حكيم موقع و هاكدا اللا الغالية رجعات مرت حكيم و حكيم راجل الغالية على سنة الله و رسوله .. فرحتهم باينة من عينيهم و كل واحد مشتاق للاخر يفرغ سعادته ليه ..
العدول: الله يجعل كلشي مبارك و مسعود .. سي حكيم مبروك عليك
حكيم: الله يبارك فيك اسيدي
تطلقات تزغريتة من برا كانت مولاتها خديجة على اثرها خرجات الغالية حشمانة وجهها غينقز منو الدم .. و شدوها العيالات كيباركو ليها و فرحانين بيها .. اما الرجال ناضو كيتسالمو و يباركو لبعضهم فرحانين ليهم
تحط ليهم الاكل مشكل و منوع و متول على حقو و طريقو عاد ناضو العدول خرجو من بعد ما خلصهم اخ حكيم لي كلفو .. بداو الطبة كيقراو ما تيسر من القرآن و العيالات فالصالون لاخر حاطين ليهم يغداو حتا هو اما العروسة راها فبيتها سادة عليها..
تفرتك مجمع الرجال و خرجو من الدار مخليين التيساع للعيالات فين يدوزو نشاطهم .. جاو اللعبات لي دايرين معاهم و معيطين ليهم بداو كيقادو فماطيريالهم و خديجة هي و رابحة غير كيرحبو بناسهم .. كلشي مقاد الحالة و شي باغي يبان على شي واخة غير حفلة صغيرة ناسها كباار .. ها عماتها ها بنااتهم ها خلااتها و بناتهم كلشي عارضين عليه فرحانين بليلتها .. لبسو و تقادو و شدو بلاصتهم فالصالون شي مجمع مع شي و منين ما دازت رابحة ولا خديجة يرحبو .. لبنات بغاو يدخلو عند لعروسة ولكن مالقاو جهد فين ما سولو عليها يصدروهم حتا شدو لارض و تبتو .. اما هاد الاخيرة .. عروستها الغالية و غاالية نييت .. السر طايح عليها و الفرحة باينة فعينيها البراقين لابسة قفيطين خفيف فالبلونكاصي ديال العريسات و شعرها كان مطلوق من بعد ما سرحاتو ليها جنات .. جالسين كيتسناو فالبنت لي تجي تقاد للغالية .. تدق الباب و مشات جنات تشوف سكون حتا لقاتها خديجة و خلاتها تدخل..
– نزلي شوفي شكون كيسول عليك قالت ليا بغاتك
جنات: شكون هادي؟ .. واش هبة لي غتقاد لينا جات .. سيري قولي ليها طلعي عندهم
رجعات خديجة ادراجها طلعات لبنت حتال عندهم و دخلاتها عاد طرقو الباب عليهم
جنات: على سلامتك اصحبتي تعطلتي دبا شوي غيجيو اهل لعريس
هبة: والله ما لخاطري ياختي واحظ المدندن مول طاكسي حطني بعيد عاد جييت
الغالية: معليهش اختي مكاين باس
هبة: ايوا مبروووك عليك ازيين الله يكمل علبكم بالخير و يرزقكم الدرية الصالحة
الغابية: اميين اختي العقبة لييك
هبة بعيون موسعة: هاااححح على التيتيز غي منشر عندكم لتحت بنضبر على راسي من عرسك ههه
جنات: و طلقينا خلاص و نزوجك ياله
حطات هبة ماطريالها و بدات تفنن و تقاد للغالية .. قدات ليها وجهها الدائري بماكياج فاتن و خفيف فنفس الوقت .. ممكتراش ليها الماكياج تحت طلب الغالية و في نفس الوقت خرجات منها غالية اخرى .. مع تسريحة شعر خفيفة و ضريفة زادتها جمالا .. رولات ليها شعرها الطويل و جمعات منو على سكل ضفيرة مرخوفة كيبان منفوخ من الفوق و زغيبات نازلين من جناب وجهها ..
كملات ليها و بدات مع جنات تا هي لي مخلاتش من حقها غير هي دارت مكياج تقيل شوية بين ملامحها اكتر و قوة شخصيتها زادت بانت مع ماكياجها الجريئ .. خلات شعرها مطلوق من اللور و جمعاتو من القدام ب ضفيرة ضايرة على دائرة وجهها بحال البوندو
كملو و اخرين و بدات العروسة كتلبس لمساعدة هبة حتا سمعو صوت الدقايقية و الدقة المركشية عند الباب .. مشات جنات طلات بالجري بانو ليها عائلة العريس جايين و الطيافر مهزوزين الفوق من طرف رجال كيلعبو بيهم و الدقايقية دايرين خدمتهم مكاين غير الله يعطيك الصحة .. جات الغالية كطل و عينيها دمعو بغات طيحهم كون ما جنات لي بدات تنش عليها هي و هبة و مسكتينها
جنات: ويلي على لبكااا حماقيتي
الغالية: دموع الفرحة هه .. عمري ضنييت غنعيش هدشي والله
جنات بحنية عنقاتها: تستاهلي ما اكتر اكبيدة .. حكيم كيبغيك و هدشي دايرو باش تفرحي و تنشطي مع راسك ماشي تبداي تبكي
الغالية؛ مسطي ههه عنداك غير يقول با شي حاجة
جنات: نو متخافيش راه هضر معاه هو و هو لي داير هادشي كامل .. و اصلا بووك ما عندو دخل دبا وليتي محسوبة على حكيم .. ياله اجي لبسي تكشيطتك باش تخرجي عند الناااس راه النشاط غيبدا
الغالية: ولاهيلا صدمتوني ههه كنت كنضن غير حفيلة بيناتنا ماشي هدشي كامل
هبة: و لبسي من تبعكييك كون انا بلاثتك تلقايني طاعة فوق القعدة كندردك و نزغرت و نتي دايرا لينا فيها الحنينة الحساسة
جنات: هههه نتي لي كتفهميني اجي نبوسوك اجي
الغالية بدات تلبس عليها و عينيها كل مرة يقطرو بالدموع على شوي تخسر ليهم كلشي كون ما هبة لي كتقاد و تمسح و تقاد..
هبة: بتضربي ليا تمارة ديالي كاااملة فالزيييرو .. جمعي اختي دموعك و فرحي و نشطي و استمتعي بنهارك … اححح و شحااال نحبو هاد حكييم ديما منشط الوقت
الغالية خرجات فيها عينيها: شناااااااهوا
هبة: هيهيهي زعمة كنبغيه بحال خويا ماتمشيش بعيد راه خو المعلمة ههه
الغالية: ايوا هكاك فوتي عليك حكيم شوفي ليك شي حد اخر حسن ليك
جنات: هييبة ياله نخرجو .. انا بنمشي نستقبلهم ههه
هبة: و انا غادية فحالي اختي الله يعاونكم و يكمل عليكم بالخير
جنات: اويلي من نيييتك جلسي حضري معانا مالك اش زاربك
هبة: و مجبتش اش نلبس و ديك الشارفة عندمن كارية نلقها سادات عليا الباب
جنات: هاكي قفطاني و باتي معايا غير جلسي
شداتو من عندها و قادات راسها حتا هي عاد خرجو معانقات و خلاو الغالية بوحدها و هوما نزلو لتحت فبن كانو الدقايقية عند الباب كيلعبو و خالقينها و شي يشطح شي يصفق شي يزغرت فرحانين و ناشطين .. اكيد غينشطو و هو عرس الغالي حكيم و الغالية ..
دخلات جنات هازة جلايلها وسطهم كتشطح و تهز فكتافها و تضحك فرحانة .. غافلة على عينين متبعينها ملي خرجات .. خاشي يديه فجياب السروال الاسود و طاوي كمايم القاميجة البيضاء مع ساعة يدوية فضية و واقف بعيد على الهرج مع سيف الدين و اخ حكيم عاد مولاي السلطان .. هاد الاخير لي كان بكااامل اناقتو .. سروال اسود مع سباط اسود لامع و قاميجة بيضاء .. مرجع شعرو اللور و مقاد اللحية و ابتسامة مزينة وجهو .. جنبو سيف الدين حتا هو لا يقل عنهم اناقة و جمال .. بنفس شكلهم فاللبس و وقفتهم الرجوولية بعاد على الصداع و كيهضرو بيناتهم و يضحكو .. الى شفتيهم من بعيد متعرفي شكون العريس فيهم .. يتلفوك بربعة و يخليوك متبعة ليهم العين .. و هدشي لي كانت دايرا هيبة نييت .. حاضياهم و تعبر فيهم .. عرفات غير حكيم حيت فايت ليها شايفاه اما لخرين حتا واحد ما عرفاتو .. جراتها جنات كتشطح معاها حتا عياو و حبسو الدقايقية عاد دخلو كيصليو على النبي و يزغرتو..
دخلو العيالات للصالون الكبير لي خصصاتو ليهم خديجة و مفتووح على الصالون لاخر .. كانت اللا حليمة بقفيطين خفيف و مناسب عمرها و الفلار على راسها .. شادة فيها سارة لي كانت بتكشيطة منبتة و الشعر مقاد و الماكياج مبين ملامحها عااد جنبها الخالة لي هازة خنافرها الفووق و الارض مهازاهاش .. عينيها غير كيضورو و تعبر فالناس و تشوف ولد ختها بيمن مناسب .. عاد تبعوهم لعيالات لخرين و الجهاز مدخلينو فالطيافر معرين عليه و كلشي كيطل باغي يشوف جهازها و شنو جايبين ليها ناسها .. غير حطوه الرجال و خرجو و مشات خديجة و رابحة هزووه دخلوه لبيتها و ضربات ليه الساروت ..
الرجال طلعوهم للدار الفوقانية ديال سييف لي كانت حتا هي مفرشة على حقها و طريقها .. و علاش لا و باااه عندو مكازة قد الخلا ديال الاثات و الفراشات .. تجمعو الرجال تما و العيالات لتحت باش ياخدو راحتهم و ينشطو كيف بغاو بلا ما تعيقهم شي حاجة … بداو اللعابات فالغنا و النساط و يغنيو على العروسة و العرييس و هوما يخرجو الغالية بتكشيطتها .. فاتنة و جمالها واااضح و باين .. ما خلات للناس ما يقولو من غيير ما شاء الله .. شي عجباتو و فرح ليها و شي حسدها على لي هي فيه و شي ممهتمش اصلا جاي غير يبان على لاخر .. كل واحد و نيتو .. و هي جاية داخلة تحت الصلاة على النبي و الزغاريت للجلسة لي كانت فالصالون الكبيير و جالسة حداها عكوزتها …
غناو للعروسة و الغرامة غير كتلاوح عليهم و العرييس حتا هو و لي لاح لغرامة يغنيو عليه .. سارة ناضت تشطح و علقات ليهم و غناو عليها حتا ما قدهم .. و لالة جناات حلفات هي متجلس خلصتها بغات تحطها غير للعابات .. كل دقيقة تمشي تقول ليهم غنييو عليا و فاقصة بنادم و مطرطقة ليهم العينين .. اما الغالية غير جالسة فبلاصتها و تضحك و ترد على لي بارك ليها .. لي بغا يتصور كينوض لعندها و كاين لي كيجلس حداها نييت يدوي معاها شوي ة يرجع فحالو .. كانت بلاصة العريس خاوية كتجلس فيها جنات و ملي كتنوض كيجلس جنبها شي حد .. جات بنت عمها سلمات عليها و باركات ليها و جلسات جنبها شوي و هي تجي جنات نوضاتها حيت لعريس غيدخل .. جابو للغالية فولارها حيت مغايدخلش بوحدو و كاينين الرجال معاه و لي محجبة لاحت عليها فولارها عاد سمحو للرجال يدخلو .. بداو بالصلاة على النبي و حكيم حاط يدو على صدرو كشكر على كلماتهم و ابتسامة منورة وجهو و هو كيحركو لكل واحد .. و عينيه متزحزحاتش على محبوبتو و عروستو .. كتبان كيف شي ملاك بابتسامة براقة و خجولة كل مرة تحدر عينيها باش تبعد من نضراتو .. قرب ليها و خلاو ليهم البلاصة خاوية و هي واففة فبلاصتها شادة فيديها و راسها منزل .. هز ليها راسها بصبيعاتو من فكها و قرب خطوة لعندها حتا قبل جبينها ب قبلة رقييقة مليئة بالاحساس .. غمضات الغالية على اثرها عينيها مستقبلة قبلتو على الجبين .. القبلة لي كتكون مليئة بالاحاسيي و المشاعر الجياشة .. طبع القبلة و كأنه كيوصل ليها رسالة انها ولات ملكو و عرضو … الصلاة على النبي مسكتاتش و المصورة مزاكياش من التصوار .. قربات ليهم خديجة لي كانت مقادة الحالة بقفطان و الشعر مقاد لايحة عليه فولار و هضرات مع حكيم بابتسامة
– ياله اولدي ركب لمرتك الخاتم
تبسم ليها و قرب هز الخاتم لي كانت ختارت لبسو ليها و باس يديها قدامهم و هي كدلك لبساتو خاتمو و باست يدو كاحترام ليه خلاتو ابتسم من قلبو .. لبسها السنسلة لي جابو ليها هي و براصلياتها و خلاو الطوانك حيت كانت دايرا الفولار .. هز التمرة معمرة بالكركاع و اللوز عطاها ليها عصات منها و شربها الحليب و نفس الشيء ليه حتا هو .. عاد بعدو ليهم الطبلة و خلاوهم يجلسو و ناضو يغنيو تاني و الكاميرامان كتصور و تفيلمي كلشي .. لاح يدو وراء ضهرها و قرب لادنها كيهمس ليها بخفوت
لاح يدو وراء ضهرها و قرب لادنها كيهمس ليها بخفوت
– ما شاء الله .. معرفت واش نتي لي كتزيدي تزياني و لا انا لي عاد تحلو ليا العينين
الغالية بخجل مقدراتش تلفت ليه: ههه حكييم الناس كيشوفو
حكيم: مالي متكيك قدامهم .. هي كنتعزل بغزالي
عضات شفاها حابسة الضحكة و سكتات مخلياه كيتمعن فوجهها عن قرب
– متكملييش هدشي خلاص و نوضو نمشيو فحالنا؟ .. بيت نستفرد بالكبيدة
الغالية قرصاتو من يدو: حكيييم
حكيم: عيوون حكيم
الغالية: سكت حتا يمشي بنادم
حكيم: منقدش نشوف حلالي و نربط لساني
حابسة الضحكة بزز مخلبة وجهها حمر و هي كتسمع ليه مكرهاتس تنوض تهرب من حداه و لا تبقا جنبو .. سكتات حتا حسات بيديه شدو يديها كيداعب فصباعها و مرة مرة يبوس يدها ولا يهمس بشي كلمة لي كتخليها تغرق بالحشمة…
غير بعيد عنهم واقفة كتشوف فيهم بابتسامة و تهزز بكتافها حتا حسات بشي واحد وقف جنبها .. و همس حدا ودنها
– مكرهت نشوفك حتا نتي عروسة
جنات: ان شاء الله حتا حاجة ما بعيدة
فاتح؛ هي لا حن قلبك عليا و تنازلتي شوية
جنات: لي يشمت فيا و يضحك عليا معندي مندير بيه
فاتح: كتسوئي الضن فيا
جنات: و شنو معناتها داك الكلام
فاتح: كلام عادي غير نتي لي شديتي فيه مبقيتي بطلقي .. دبا نساي داكشي و عطينا فرصة
جنات: هانا نسا كلامك و افعالك؟
فاتح هز راسو نفخ الفوق و رجع شاف فيها: اشمن افعال تان؟ .. واش بوسة ندمتي اصل مي عليها كرهتيني راسي
جنات: مزييان تكره راسك و تعرف انك غلطتي فحق صاحبك
فاتح: مغلطتش فحق حتا واحد .. انا طلبتك للزواج و هديك كانت غير ردة فعل لا ارادية .. و من هدشي كلو كنت قايلها لخوك
تلفتات لبه مخرجة فيه عينيه: كييييفاااش!! واش حماقيتييي
فاتح: لا بعقلي .. كنت ناوي الزواج و قصدت صاحبي قلتها ليه كيفما درت حتا دبا .. ميمكنش نهضر مع ختو و هو ما فخباروش
ضورات عينيها كتقلب على خوها حتا قشعاتو كيهضر مع خو حكيم و هي تزيد مبعدة من فاتح مخلاه متبع ليها العين حتا وصلات حدا خوها عاد وقفات هازة قنانفها لفووق
تقدم العصير و الحلوى و المملحات هو الاول عاد حطو العشاء للناس و تهلاو فيهم .. البسطيلة مشكلة و الدجاج بالدغميرة ديالو و اللحم .. ما خلاو للناس باش يعيبو عليهم .. دوزو من وراها اتاي و طبيسلات تالحلوى للناس عاد بدا بدا بنادم كينقص و يخف الجوق حتا كمل العرس على خيير ..
توادعات الغالية مع عائلتها و خرجات بجليليبة فالغوز بيبي و فولارها .. لقات حكيم كيتسناها عند طموبيلتو جالس القرفصاء امام بنتو كيهضر معاها و يبوسها على حنيكاتها .. عنقاتو و باستو و تلفتات بانت ليها الغالية و مشات لعندها حتا هي باستها و عنقاتها و تبعات عمتها سارة ركبات معاها فسيارتها .. اما الغالية شدها حكيم من يدها و حل ليها الباب ركبات و ركب حتا هو .. ياله غيديماري و هي تدق عليه خالتو فالزاج حتا شاف فيها
– توخر اللور نسبقوك حنا اللولين للدار نستقبلوكم
حكيم: واخة اللا الكبيرة غي سيري
مشات كتهز و تحط ركبات حدا ختها و سبقات سارة بسيارتها و هو غادي وراها .. حتا خرجو للشارع و ضوبلها .. خرج يدو شير ليها و قلب الطريق مخليها كتضحك و تسمع فخالتها تعاير و تبركم غير وحدها
كسيرا مبدل ااطريق و الغالية كتشوف باستغراب و تلفتات ليه قائلة
– فين غاديين
حكيم بغمزة و ابتسامة: هااارب بحلالي
الغالية: لفيين ههه
حكيم: غنسافرو شي ايام للشمال .. كيعجبك الشمال؟
الغالية: عمري مشيت ليه ههه اصلا عمري فت مراكش ههه
حكيم: ايوا هادي هي الفرصة ضوري مع حبيبك
حطات راسها على كتفو و هو مدرعها بيدو: الله يخاليك ليا
باس على راسها و ناضت تقادت فبلاصتها كتقاد فالفولار حتا خاطبها: حيديييه خلي شعرك يتهوا راه مكاين حد دبا
حيداتو حطاتو على فخاضها و طلقات شعرها لي كانت مشطاتو و سرحاتو كيبان طويل و اسود كيف الليل .. جر خصلة منو كيلعب بيها و يلمس نعومتها و بقا مراقبو باعجاب
– هذا شعرك
الغالية: لا مسلفاه هههه هذا سؤال؟ اكيد شعري
حكيم: مصابغاهش
الغالية: لا هاكا لونو
حكيم: عمرك تصبغيييه ولا تقطعيه خليه هاكا
الغالية: ههه واخة .. كيعجبك الشعر الطويل
حكيم تنهد و عينيه مرة فالطريق مرة فيها: كتعجبنيي مولاتووو ” عاود لمس ليها شعرها” و ديالك حمقني .. كلك زبدة و منين نبدااا .. حالفة تسكتيلي قلبي
ضحكات حتا تغمضو عينيها عاجبها الحال و كمل هو سوقانو بينما هي تكات على الكوسان مرخية كترتاح من تعب النهار .. توقف امام اوطيل راقي و كيبان من الدخلة شكلو المريح للنفس .. ضورات عينيها و شافت فيه كيحيد فالسمطة
– ديري فولارك و نزلي .. نباتو هنا حتال الصباح و نشدو الطريق
حركات راسها و جمعات شعرها و لاحت عليها الفولار عاد نزلات تابعاه هاز زوج شانطات صغار و دخل لريسبشن
خدا شومبر و طلع هو و الغالية ليها .. بدات كضور فيها عينيها و مشات جهة البالكون كطل منو و تفرك في يديها بينما هو حط الشانطات و قرب منها حتا حاوطها بيديه من خصرها و حط فكو على كتفها .. هز يدو حيد ليها الفولار لاحو فالجنب و بان قدامو عنقها ابيض فيه سنيسلة ذهبية مزيناه .. حط شفايفو ببطئ على عنقها بقبلة خفيفة حتا ميلات عنقها عليه و حطات يديها على يديه لي على خصرها .. طلع لحنكها باسها فيه و هي جامدة كتحس بقلبها بغا يخرج من بلاصتو .. و همس بخفوت
– هانا راجع غير ندوش و نجي
حركات ليه راسها و مشا هز مستلزماتو و دخل للدوش عاد طلعات النفس و بدات تنش على وجهها .. تحركات فالبيت و مشات للفاليز لي جاب ليها حلاتها كتقلب فيها و تهز و تحط و مخرجة عينيها فداكشي .. بقات كتشوف فيه و عاضة على فمها حتا تحل لباب و خرج كينشف فشعرو لابس سروال سيرفيت رمادي و تيشرت ابيض و رائحة الباندوش عاطية منو ..
الغالية بابتسامة: بالصحة
حكيم: يعطيك الصحة .. تبغي دوشي من العياء
الغالية: اممم
هزات حويجاتها و الفوطة و دخلات .. غسلات غير جسدها بلاما تقيس شعرها و توضات عاد دهنات لحمها بكريماتها خلاتو كيبري .. وقفات قدام المرايا كتشاور تلبس داك لعجب ولا تخليه .. مدة و هي تخمم فالاخير لبسات شوميز دونوي قصيرة فالباج و فوقها البينوار طويل ديالها .. طلقات شعرها و خلات وجهها طبيعي مدارت ليه والو عاد قربات جهة الباب .. تشجعات و حلات الباب .. واخة مزال مزاعماش عليه ولكن كيبقا راجلها و خاص تحيد ديك الحشمة الزايدة .. لقاتو برا كيهضر فالتلفون غير كمل و دخل كيتفحص فيها من رجليها لي لابسة فيهم صنيديلة صبع و فيها الريش و هو طالع مع سيقانها لي مغطيهم داك التوب الحريري حتا وصل لراسها .. قرب ليها باسها من جبينها و حيد ليها خصلة من شعرها على عينيها
– بصحتك .. لبسي شي حاجة نصليو زوج ركعات
لبسات عليها و قادات فولار و وقفات وراه حتا بدا كيصلي بيها و هي تخشع فصلاتها و تبعات معاه حتا كمل .. قال الدعاء و هي من وراه حادرة راسها و كتصنط ليه حتا كمل و دار عندها بابتسامة
-غزالي .. اجي عندي نقوليك واحد الحاجة
حيدات الفولار و عباية الصلاة حابسة الضحكة و نطقات: شنوو هه
وقف و وقفها معاه و مشا جلس على السرير مجلسها على رجليه و مدور يديه على خصرها دافن وجهو ف فجوة عنقها
– فرحانة؟
الغالية بغنج: بزااف ههه
قبلات على عنقها كيخليوها تميلو كل مرة: بغيت نسمع ديك الكلمة لي قلتيلي فاللوطو
الغالية بخجل: اشمن كلمة
عضها بخفة حتا قفزات: راك عارفة ” بعد من وجها و شد فجبينها حاط جبهتو على ديالها ” بغيت نسمعها منك تاني
غمضات عينيها و انفاسو كتحس بيهم على وجهها و نطقاتها بصوت هامس مبحوح
– كنبغيييك
غير نطقاتها تحطو شفايفوو على ديالها مقبلها بشوق و لهفة .. غمضات عينيها مستسلمة لقبلته و متجاوبة معاها بكل احساس .. يديها هزاتهم حطاتهم على شعرو بدون شعور كتدوز اصابعها وسط شعره بحنية .. كانت قبلة مشتعلة بالاحاسيس و شعور كل واحد اتجاه الاخر .. كانت قبلة فرنسية بامتياز .. قبلة ملتهبة خلاتو يطلب المزيد .. و يعض شفاها حتا حلات فمها و غاص فبحر ثغرها .. كان كيمتص ريقها و يلعب بلسانها بكل اتقان .. و هي متجاوبها معاه و يديها كينزلو من شعره لعنقه .. نزل يديه من على خدودها لعنقها كيماصي فيه و يزيد يقربها ليه اكتر ملصق جسدها الصغير مع جسده .. نزل ب يدو التانية جهة عقدة البينوار حلها بلاما تحس و نزلو ليها من جهة كتافها كيتلمس فنعومتهم و شعرها الاسود مغطي ليها ضهرها ..
نزل بقبلاتو من فمها لفكها نزولا لعنقها مستوطنو و كيطبع فيه قبلات لاسعة مخلياها كتعض فشفايفها حابسة تأوهاتها .. رجع بجسدو للوراء متكي على السرير و جرها عليه محيد ليها البينوار حتا طاح للارض .. قبلاتو محبسوش من عنقها و فمها و هي مغمضة عينيها مستمتعة بقبلاتو ليها .. بعد عليها عينيه معسلين كيتمنضر فيها و هي مغمضة عينيها و هو يقرب تاني بايسها على شفايفها
– حلي عينيك
حلاتهم بتتاقل و فمها كيبري بريقو .. هزات يديها حاوطاتو من عنقو مقرباه ليها الشيء لي خلى ابتسامتو تزيد توساع و يغرق معاها فالقبلات و كلمات العسل ..
نزل مع عنقها بقبلاته و هاد المرة بشهوة كيخلي كل بلاصة داز منها حمراء الشيء لي خلاها بزز منها تطلق اهاتها بصوت رقييق دخل لمسامعو كيف شي رنة خلاتو يزيد يتعمق معاها فالقبلات ..
رجع لقبلاتو تاني طالع مع طول عنقها حتا وصل لودنها و عضها من شحمة ادنها هامس بكلمة خلاتها ترخى و تزيد تزير عليه بيديها
– كنبغييك
يتأوه بكلمة كنبغيك تعبيرا عن عاطفتو و هو غارق فعالم الشهوة و الحب الحقيقي تجاهها .. دقات قلبه كانو مسرعين مليئين بالطاقة القوية و الاثارة .. كانت مداعبتو ليها فكل طرف من جسمها المنفجر بالانوثة و الاثارة مخلياه يديز يغرق فيها و فبحر المتعة لي جامعاهم .. اما هي فكانت غايبة عن العالم الخارجي و مستمتعة فعالمهم الخاص .. عالم لي جامعهم غير بزوج فقط .. كانو اصواتهم بزوج مسموعة فالغرفة بكلمات عسل و حب و غزل .. شعورها بالأمان الدافئ و الغامض كانت علامة على انها علاقة موثوقة و مريحة من طرفه ليها .. بتصرفاته الرجولية خلاها تحس برغبة جنسية اتجاهه جامحة .. رغبة لي عمرها حساتها من قبل .. خلاتها تزيد تشوق لما هو اكتر و تطلب المزيد .. قدر يوصلها لعلاقة حميمية رومانسية حسية مستمتعة و متجاوبة معاه بكل جوارحها .. علاقة شاركات فيها حتا هي و بينات على شهوتها اتجاهه و صرفات مشاعرها بالافعال .. اول مرة تحس براسها وسط علاقة متكاملة و استمتاع بين الطرفين .. علاقة بدون غصب او تهديد ولا تحس انه فقط حق واجب عليها تأديه و بس .. بل كانت مستمتعة و طالبة المزيد معاه .. تعاملو و تصرفاتو معاها و كلماتو خلاوها تحس براسها امراة بكامل انوثتها .. و ملكة بين يديه .. اكتملت علاقتهم الروحية خالصة تسمو فيها كل من المشاعر و الاحاسيس و الوجدان …
* ناعسة على جنبها مغطية حتال كتافها ب غطاء ابيض خفيف و الشمس سانية فيها خلاتها تكمش حجبانها بانزعاج و ضور وجهها للجهة الاخرى .. حلات نص عين كتشوف فالمكان لي هي فيه و بلاصتو الفارغة .. تفكرات ليلتهم البارحة و عضات على شفاها كتفرنس حتا سمعات صوت باب الحمام تحل و هو جاي خارج كينشف فراسو و لاوي فوطة على خصرو و صدرو عريان نازل معاه قطرات ماء .. قرب ليها بابتسامة حتا وصل عندها و نزل قبلها
– غزالي .. صباحو
الغالية: صباح الخيير
حكيم: ملي صبحت عليك هذاك هو الخييير
غطات وجهها كتفرنس و هو ينوض هو كيضحك عليها و مشا كيلبس فحوايجو
– نوضي دوشي نهبطو نفطرو مزال تابعانا الطريق ازين
جرات البينوار لي كان جنبها لبساتو و مشات للحمام خلاتو هو خرج للبالكو كيهضر مع ختو و يوصي فيها على بنتو ترض ليها لبال و تحضيها معاها حتا خرجات لبسات حوايجها و لبسات جلابة مخزانية و لوات عليها الفولار عاد مشات لعندو لقاتو عاد سالا
– كنتي كتهضر مع هداية
درعها من كتافها و زاد خارج: وي .. وصيت عليها سارة ترد البال سيغتو دبا الدار عامرة
الغالية: كون غير ديناها معانا .. غتقنط بوحدها
حكيم: كاينة معاها سارة و الوليدة راه غيديرو بالهم معاها .. مغنبقاوش بزاف غير سومين و نرجعو .. حتال مرة اخرى و نمشيو مجموعين
الغالية: ان شاء الله
دخلو للريسطو طلبو فطورهم كيفطرو و يتحدثو فمواضيع مختلفة من بينها سفرهم
حكيم: نشدو الطيارة حسن دغيا نوصلو
الغالية: لااا نمشيو غير فالطموبيل .. اصلا حنا بغينا نضورو و نمتعو عينينا ماشي نوصلو دغيا
حكيم: هانا اكبيدة متعي فيا عويناتك حتا تشبعي
الغالية ضرباتو لكتفو كضحك: هههه و بغيت نسافرو فالطموبيل حسن .. طيارة بلاش عفاك
حكيم قرب ليها وجهه: ياله شي بوسة
الغالية: ويلي الناااس .. حتا نكونو بوحدنا ههه
حكيم كيهمس حدا ودنها: دييك الساعة بوووسات هوما لي بتعطيني
الغالية بخجل: و صااافي نووض نمشييو
حكيم زايد مزنكها: بديري داك صوت المشة دالبارح فالدار تهرب حليمة بلا جلابة هههه
خشاو وجهها فصدرو مخبياه علبه و كتضرب فيه بيدها و هو كيضحك: ماااسخ لاخر
حكيم: هي معاك ههه و نوضي نمشيو خلاص راه تابعانا الطريق
فطرو عاد شدو طريق لوتوروت و حكيم مرصاش من بسالتو حتا كيندمها لاش دوات معاه .. فكل مرة كيتوقفو فشي سطاسيون يرتاحو و يتقداو السقاطة عاد يرجعو يشدو الطريق .. اما الغالية مرة تنعس مرة تفيق مرة تشد معاه الهضرة مرة تميك عليه .. مرة تهضر فالتلفون مرة تصنط للموسيقى هاكا دازت طريقهم كاملة بدون ملل .. توقفو اخيرا فمدينة شفشاون ..
كرا حكيم دار لمدة اسبوع باش يبقا فيها احسن من الاوطيلات .. بعد تعب اليوم دخلو ديريكت للدوش حيدو عليهم لعيا و تلاحو ينعسو من بعد ما تعشاو و صلاو الصلاة لي فاتتهم..
يوم جديد بنشاط و حيوية .. فيقها بتعنكيش و بوسة هنا و بوسة لهيه حتا ادت بيهم لما هو اكتر و ناضو كملو على ما بداو فالدوش ..
خرج سابقها لاوي عليه فوطة كيضحك عليها و هي تابعاه ببنوار ابيض و فوطة على شعرها .. حناكها حمرين و قارنة حجبانها فيه .. جلسات على السرير بعياء و بدات كتجبد فحوايجها بينما هو كمل لبسو و داز نشف ليها شعرها عاد لبسات حوايجها عبارة عن كسوى للمحجبات طويلة هي و فولارها و سبرديلة بيضاء باش تمشا على راحتها .. خرجو مشادين كيتساراو فمدينة شفشاون العتيقة و احياءها و دازو لساحة وطاء الحمام وهي ساحة عمومية تقع داخل المدينة .. تحتوي على العديد من المقاهي، والمطاعم، كما أنها تحتوي على نافورة مياه رائعة الشكل، وفيها المسجد الأعظم .. جلسو كيفطرو و حكيم مرة مرة كيغفل الغالية بشي صورة و هي عاجبها الحال غير كتفرنس و تعنق فيه .. يوم كامل دوزوه مساريات و دوران .. منين ما دازت يشري ليها شي حاجة و اكيد ما ناسيش بنت و مو .. لي حطات عليها العين واخى متقولهاش ليه كيسبقها هو و يجيبها ليها .. عاد دخل معاها شعوور بالانتماء و الحب من جهتو ..
دوزو اربع ايام كلها عسل و حب مرة يخرجو يتساراو فالمدينة مرة يدوزوه غير فالدار مستمتعين بوقتهم ..
الليل طاح و هوما عاد داخلين كيضحكو و صوت الغالية الرقيق مسموع من بعيد .. لاحت صاكها فوق الفوطوي و طاحت حداه كتحيد فالسبرديلة و الفولار و هو حط الصيكان لي مقدين و جلس كيماصي فراسو بعياء..
– حكييم واش ضراك شي حاجة
حكيم: نوو غير العيا .. اجي ديري ليا مساج
الغالية: واخة
وقفات وراه من بعد ما حيدات حوايجها بقات غير فديباردور و كولون لاصق عليها و بدات كتماصي ليه فراسو و جبهتو و هو مغمص عينيه مرخي .. نزلات مع رقبتو و كتافو كتماصيهم ليه حتا جر يدها باسها ليها و جرها قدامو مجلسها عليه كيقبلها .. ياله بدا يتعمق فقبلاتو و هو يقاطعو التلفون .. فالاول خلاه كيصوني ولكن ملي رجع صونا بعد يشوف شكون و غير شاف سميتها جاوب .. مايمكنش تصوني عليه دبا الا الى كانت واقعة شي حاجة
– سارة! ياك لباس
سارة: موصييبة .. واحد الحماار النهار كامل و هو يمشي و يجي قدام الدااار و دبا زاد كملها مشا سكر ولا معرت لدينمو و جاي محيح كيعيط على الغالية .. راه نايضة قدام لباب و عيطنا للبوليس عاد جاو ليه
وقف عاقد غوباشتو و سنانو كيتغززو .. عرف شكوون و ميين غييرو كيعرفها و يجي لتما .. سنانو علييه قد خييزو كون كان قدامو دبا ينهشووو و مايحنش فيييه .. جمع غضبو و نطق بصوت عادي
– ياكما وقعات ليكم شي حاجة؟ .. نتوما بخير
سارة: بخير .. عاد عيطت ل ادم جا للهنا
حكيم: و علاااش عاد عالماني .. الصباااح قوليها ليا ياك هضرت معاك
سارة: راه مايسحابش ليا .. النهار كان غير كيمشي و يجي ماديت ما جبت حتا بدا كيغوت
حكيم: فالصباح نكون تما..
* نزل من بيتو مدوش و مبدل .. لاح السلام عليهم و جلس فجنب مو و الغالية .. هاد الاخيرة لي كانت مبدلة حوايجها بكسوا طويلة و الفولار على راسها .. شادة فحجرها هداية معنقاها و كتوكلها و الاخرى شادة فيها و مبتاسمة .. سارة كتهز و تحط قدامهم و حكيم اكتفى بقهوى كحلة قاسحة .. مو كتاكل بهدوء كيف معودة و ختها مقابلة معاها و عينيها غير على الغالية كطلع و تهبط فيها .. حطات كاس القهوى و نفخات ما عاجبها حال
– ايوا صافي!! على اخر يامنا يوليو يجيو الشماكرية يحيحو علينا قدام الباب و مشوهينا مع الجييران!!
حط كاسو كينفخ محاملش يهضر دبا و باغي غير يخرج يبدل ساعة باخرى .. الى جا يهضر يخسر الضواسا مع خالتو .. خوات ليها سارة القهوى و نطقات بين سنانها
سارة: كوولي اخالتي غيبرد كولي و سكتي
لكبيرة: و مالي كذبت!! علاه ماشي لبارح كان عيفرع علينا لباااب
حليمة: الله يهدي ما خلق اختي .. داكشي فات لبارح حنا دبا فاليوم .. خلي النهار يدوز بخير
بنت الخالة: ايوا اخالتي ماما ماقالت عييب .. راه لبارح كلشي شهد فييه ما خلا ما قاال و زايدها كيعيط على مراة الراجل حشوومة الغالية يجي حتال لهنا
حكييم خبط الطبلة و وقف: دبا مال ديلمك تا نتيي باغة تفرعي ليا *** ديييها فسوقك و فوتي علييك مرتيي ولا بربي تا نقودو السوايع
لكبيرة وقفات: يااك اولد ختيي وليتي تسبنااا فدااار ختيي هذا منستاااهل من عندك
حكيم بانفعاال: شديي ال
سارة مقاطعاه كتدفع فييه و تخرج فيه و الغالية هزات هداية لي تكمشات فيها مخلوعة و خرجاتها للصالون فين كانت سارة و حكيم
سارة: سييير سيير بدل ساعة باخرى سيير برد السوووق
حكيم كشاكشو خارجيين: غنمشييي نفرع ال*** تموو باش يتعلم يجيي حتال داااارو ولد **** بربي تن****
سارة: سكككت سكت و سيير برد السووق عااار لبزيزيلة لي مشاركيين .. برررد السوووق احكيييم سييير تا تبرد و ندوييو
حطات الغالية هداية و قربات ليه كتبكي: حكييم عفاااك مادييير والو الله يرحم ليك ما عز علييك هئ هئ بعد من الصداااع
حكيم: طلعي لبيتك و بقاي تما حتا نجي متنزليييش هنااا هانا علمتك!! .. جلسي نتي و هداية و متهضري مع حتا واحد هي شوي و نجي
الغالية: و ماديير والو الله يحفضك احكييم دكشي علاش كيقلب غير يخلق المشاكييل
حكيم كينفض حوايجو: مااانديير والو هيي طلعييي نخرج هي نكمي و نجي ياله سيري “خاطب سارة” متخلي حتا حد يهضرها ولا منعقلش على ****
سارة باغة غير السلاك: مايهضروووش غي خرج حتا حد مايتكلم
خرج خابط عليهم لباب عاد تنفسات سارة و طبطبات على ضهر الغالية: ماديريش فبالك اختي راه هكاك دايرا خالتي مسحيها فيا الله يحفضك و متشديش فخاطرك
الغالية: لا اختي ماديريش فبالك عادراها .. انا خايفة غير حكيم يدير شي حاجة و يخرج على راسو
سارة: متخافيش عليه راه عارف اش كيدير .. المهم طلعي للفوق انا نجيب ليكم فطوركم كملوه
الغالية: ما عندو منين يدوز جيبي غير لهداية مكملاتش مكلتها
حركات ليها سارة راسها و مشات الغالية هزات هداية كتهدئ فيها و تبوس فراسها و هدايو لاصقة فيها كي العلقة .. دخلو لبيتهم و جات سارة ب بلاطو للاكل وكلات هداية عاد دوراتها كتمشط ليها فشعرها و تضفر ليها و تلعب معاها و هداية كتضحك .. خلاتهم سارة بوحدهم و نزلات عند خالتها تطلب فيها و تزاوك و هي هازة خنافرها للسما و لابسة جلابتها هي و بنتها
– لا والو واش نزييد الضربة هنا .. ولييت نتعااير فوجهيي و نبقا لا لا منقبلها عليا
سارة: لعني الشيطان اخالتي و دوزي تجلسي راك عارفة حكيم فمو خاسر مقصدش شي حاجة راه غيير مقطووع دكشي علاش
سهيلة: هو مقطووع و حنا نتعايرو و نسكتو! لا اختي سمحي ليا ولكن منرضاهاش لينا نتعايرو بمسبة وحدة جات هي لبارح
حليمة: لكبيرة دوزي تجلسي من الهصرة راك عارفة حكيم مكيربطش فمو و غير كان معصب اما مايهضرش ليك .. و حتا نتي فوتييه عطييه التيساع راه خاااايب و فوتي مرتو ما وصلانا بوالو اش دنبها هي فهادشي.. ياك كعما كاانت حتا جا كيحيح ماعليها والو و السيدة داخلا سوق راسها و مربية مكتردش الهضرة .. جلسي للارض و سكتي
لكبيرة: ياك اختي حيت بغيت ليه مصلاحتو.. نستااهل!!
مشات جلسات من بعد ما حيدات جلابتها و حداها بنتها عاد دخلات سارة للكوزينة كتوجد فالغذا و عقلها مع خوها ياكما دار شي حاجة ولا فين يكون مشا .. نصبات و طرفات الكوزينة ياله غتخرج و هو يصوني تلفونها و جاوبات
– ختي سارة انا سيف بغيت نعلمك بلي حكيم شدوه لبوليس هاد الصباح .. راه لقاوه مضارب عند الكوميسارية
سارة: اوييلي و هو ما واقع ليه والو ياك
سيف الدين: لا متخافيش بخير
سارة: واخة اخويا شكرا .. انا شوي و نكون تما
قطعات معاه و دوزات لراجلها: ادم فينك .. و تبعني للكوميسارية لي حدانا راه شدوو حكيم مضارب .. و انا اش عرفنيي حتا نمشي و نعرف اش واقع .. صافي هانا سبقتك
طفات لبوطة و خرجات كتبركم و تنتر دازت عند الغالية لقاتها مزال شادة عندها هداية و طمناتها
سارة: الغالية هانا خارجة نشوف ادم اش خاصو و نجي .. الله يستر عليك ردي لبال ل هداية عنداك طييح ولا شي حاجة
الغالية: غي سيري اختي ها هي معايا ما يوقع والو
سارة: واخة و متنزليش لتحت خليك غير فبيتك
نزلات كتزرب لبسات جلابة و صندالة و خرجات مشطونة ركبات سيارتها و زادت مع الطريق حتال الكوميسارية عاد وقفات .. و عيطات على سيف الدين خرج عندها يفهمها اش وقع
–
– اش غنقول ليك اختي انا مفراسي والو و حتا داك لحمار ما عندي عليه خبار .. جييت هاد الصباح للخدمة عادي حتا كنسمع الصداااع برا خرجنا نشوفو شنو واقع لقييتو كيشتف على السيد غيقتلو مخمج ليه وجهو و كيضرب فيه .. فرقوهم هداك صيفطوه للصبيطار و هدا دخلوه يتبرد شوي
سارة: عفاك اخويا الى ما خليني نشوفو
سيف الدين: واخة اجي معايا
دخلها لبيرو ديالو و كلف شرطي يجيب حكيم .. هاد الاخير لي داخل مهدن و هادئ بحال الى جالس فدارو .. ابتسم لسارة و جلس قدامها و سيف الدين كيشوف فيه حاط يدو على حنكو
سارة: صاااافي هادشي لي بغيتي هانتا لقيتيييه
حكين بالطنز: و نتي قلتي ليا خرج تا تبرد هانا دبا جالس نتبرد على خاطر خاطري
سارة: الله يعطيني هي شوي من برودية دمك!! واش نتا فارع السيد و زايدها بالهضرة
حكيم بتخنزيرة: كوون بقا قدامي نقتل موو
سيف الدين: بروسلي عندي هنا .. دبا بغيت هي نعرف ما بان ليك تا قنت غي قدام الكوميسارية
حكيم حك على راسو: من هدشي كامل .. شنوو؟
سيف الدين: طلب الله مايرفعش عليك دعوة
سارة: اويييلي بايمشي فيها؟؟؟ .. حتا انا غنرفع عليييه تهمة التهجم علينا فالدار و حنا غي عيالات و نشوفو هادشي فين يكمل
سيف الدين: دبا نتسناوه يجيي و ندويو معاه باللتي هي احسن..
حكيم: قلتي شي حاجة للغالية؟
سارة: ما قلت ليها والو راه خليتها مقابلة هداية و ماما جالسة مع ختها
حكيم: نوضي سيري للدار قبل متقربل تاني و متقولي ليهم والو
سارة: راه خليتها فالبيت حتا حد ميقرب ليها
حكيم: و هي نوضي معندك ماديري ليا انا هنا
دارت ليه خاطرو و ناضت خرجات تلاقات مع راجلها عاد وصل و خلاتو تما مع خوها و تمات راجعة للدار
* من بعد ما لعباتها و مشطات ليها شعرها نعساتها على السرير و ناضت حطات الماليطات كتخوي فيهم و تطوي دير فالماريو .. تحل عليها الباب و تلفتات عند بالها حكيم .. ولكن كانت لكبيرة داخلة كتقلب فعينيها و تميق فالبيت و شنو فيه .. قربات كتستكشف البيت و شنو فيه و شافت الصيكان محطوطين من لي شراو و كان جايب حكيم .. حطات الغالية دكشي من يدها و بقات كتشوف فيها بتوتر و لخرا حاضية الميكات و الصيكان
– منيين جاك هدشي! جبتوه من السفر
الغالية: غي شي حاجة ماشي كلشي
لكبيرة: و مالكم على هاد الضياع؟؟ غير لي بانت ليكم تهزوها حاولو شوي
الغالية: حكيم لي كيشريهم ماشي انا لي بغيتهم
لكبيرة: اممم ايوا مزيان .. فين مشيتو هاد السيمانة و عندمن جلستو
الغالية: مسافرين
لكبيرة: اجي ماقلتيش ليا .. علاش طلقتي المرة اللولة؟ واش الراجل كان خايب
الغالية بنفاد صبر: داكشي داز مكندويش فيه .. دبا عندي راجلي و حشومة ندوي على شي حد اخر من غيرو .. المعني بالامر راه معاودة ليه كلشي و مكنخبييش عليه
لكبيرة: اممم ايوا حتا انا راه خالتو و من حقي نعرف .. و طليقك جاي لبارح مهجم علينا بقا ليه غير يدخل للدار
الغالية: كيف قلتي طليييقي يعني مكتربطني بييه حتا صلة و معرفتش لاااش جا اصلا واش انا قلت لييه جي؟
لكبيرة: شفتك كتنهضي عليا!!! ماعاجبك حاال بقا لييك شوي و ضربيني
الغالية: لا حاشة راك قد مي و محتارماك اخالتي
ياله بغات تهضر لكبيرة و هو يتدق لباب .. دخلات سارة وجهها تشوف واش كاينة و غير بانت ليها الكبيرة دخلات كاملة هازة حاجبها فيها
– خالتي؟ اش كديري هنا؟ .. كتقلبي على شي حاجة
لكبيرة: لا .. جيت هي نشوف عروستنا .. و تنزل تكمل داك الغذا شفتو منصوب و محطوط ..
سارة: هاني جييت ليه اخالتي هي نزلي ترتاحي و جلسي دبا يضرووك الركابي راه الدروج خايبين عليك .. الى جعتي نحط لييك ما تاكلي حتا نطيبو
لكبيرة: ايوا مافيها باس قلت تكملو عروستنا و نشوفو حنة يديها
سارة: مزالة عروووسة و الحنة في يديها مزال حتا ماطارت و تدخل للكوزينة؟؟ ماشي من عوايدنا و انا كاااينة خايبة فحقي نجلس و نوض مرت خويا .. و لا عرفتي اش ديري فيقي سهيلة تكملو راه بنت الدار ماشي ضيفة..
نفخات لكبيرة و خرجات كتسوط عاد سدات سارة من وراها الباب و نفخات
– اوووف كيدخلو راسهم فالشبوقات يخ .. شنو كانت متقول ليك
الغالية: والو غير هضرة عادية
سارة: نوضي اختي نعسي لييك شوية بتكوني عييتي بالطريق و مناعساش .. انا نهبط نكمل لغذا و نعيط ليك
الغالية: حكيم مزال ماجاش؟ .. كنصوني عليه تلفونو طافي
سارة: ا الا لا راه خارج مع ادم شوية و يجيو .. غيكون غير طفا ليه و مردش ليه البال .. نتي غير رتاحي دبا يجي
حركات ليها راسها و خرجات سارة كتبركم بين سنانها و تجمع فشعرها لفوق
– انا هاد التريكة بتقتلني بغات تيتم ولدي و تصيفطي للقبر .. ما حيلتي لداك الصكع ولا هاد خالتي تا هي .. راسي شيبووه بقا ليهم هي حشوني تفووو
* جالس قدامو وجهو كلو مضروب .. داير فاصمة على نيفو و مسدود ليه بالقطن .. يدو هازها ببانضة و عينو مقوسة بالضربة لي جات فيها .. نطق سيف الدين لي كيحاول يفك الحريرة بلا صداع
سيف الدين: اسي خالد راه عقوبتك نتا اكبر من ديالو .. واش نتا مهجم ليه على دارو و عائلتو و مزال زايد فيه!! .. تابع مرتو و محيح قدام الدار عليها بغيتيه يسكت ليك .. راه غيرفع عليك دعوة و ديك الساعة تعفن فالحباسات اما هو راه الحومة كلها غتشهد فيك و بلي ضربك دفاعا على عرضو و شرف مراتو
خالد: ماشي مراتو و عمرها تكون ليه
حكيم نقز عليه مغدد: و مزال زايد فيه اولد **** بغيتي لي **** و ديك الساعة ندخل على اصل مك للحبس
سيف فرقو عليه: ريح اصاحبي بلا صداع .. شوف اسي خالد من الاحسن تتنازل على الدعوة ولا راه نتا لي غتغرق فالحباسات اما هو راه يخلص غير غرامة مالية و ها هو خرج
خالد هاز راسو: ندخل للحبس .. ياك الحبس للرجال
حكيم بسخرية: باين على اصل مك الرجلة يال**** ضربة وحدة شخشخاتك و قال ليك الحبس .. نتا راااجل لي جاي لدار فيها العيالات يال**** جييي عندي انا لاما *****
سيف الدين: هنيينا ا** مالك تا نتا شاعل .. خلينا نفكو الق**** تخرج تق** فحالك .. و نتا تنازل على *** و خرج بعضامك صحاح قبل ميقلب دينمو هاد المكتب على راسك واش نتا مخور ف*** مهجم على عيالات الرجال و زايدها بالسنطيحة!!! تنازل و نوض فحالك
شاف خالد حتا عيا و سحب الشكاية و ناض فحالو قبل مايصدق معوق من شي قنت .. خرج حكيم رفقة ادم لي كان كيتسناه و عيط فرقم سارة ولكن مجاوباتوش .. سلم على ادم و شكرو على وقفتو و ركب سيارتو و عفطة وحدة حتال الدار .. جبد الساروت فتح الباب و لقا الهضرة و الصداع فالصالون .. دخل عليهم كيشوف فالغالية كتبكي و مو تدعي و تسبح و لالة خالتو لغلغلغ مسكتاتش من الهضرة
– ها حاااي على الراااجل مزاااال عريييس و دخل للحبس … النحس دخل لييينا للدار و حنااا مجايبييين خبااار .. لبارح الشمااااكرية بغاو يفرعووو علينا الدااار و اليوووم الراجل تشد فالحبس .. صاااافي تزويييجة بااااين عربونها من دبااا و بااااين اش يتسناااه معاااهااا .. ما لقاااه لا مع اللولات لا مع اللخراااات .. كلشييي تابعو النحس لاصق ليييه فقدااامو .. قدااامهم قدااام النحس ما تهنااااو حتا صيييفطوووه للحبس
حكيم دخل عليهم مخنزر و هي تسكت ملي شافتو .. سارة طار من وجهها الدم كتشوف فييه بغا يشعل تاني و سدات فمها قبل مايدور فيها .. بااس راس موو لي كاانت قريبة ليه و قرب من الغالية لي غير شافتو وقفات كتمسح فدموعها
– مالك كتبكي ياك لباس
الغالية: اهئ اهئ اش درتيي خلعتيني علييك يسحابلي صافي تشديتي
حكيم طبطب على ضهرها بهدوء: ششش متشديت ما والو .. طلعي للفوق هاني جاي
طلعات متخصص و تمسح فالدموع و هو ضار عند خالته مخنزر .. قرب ليها بغا يدوي و رجع بلع لسانو و ضار طالع فحالو .. خلاهم غير كيشوفو .. و نطقات حليمة من بعد ما سمعات خطواتو بعدو
– صاااافي هادشي لي بغيييتي .. و ياله تركني و شدي لارض هانتي كبتيها معااه .. استغفر الله العضيم .. استغفر الله العضيم
*كيف حل لباب لقاها قدامو .. تلاحت عليه معنقاه كتبكي و تنخصص و هو كيسكت فيها .. غير كيبغي يبعدخا كتزيد تشبت بييه و تخشي وجهها فصدرو و دموعها فزكو تريكوه ..
حكيم: ششش الغالية!! .. لغالية لاش هاد الدموع كاملين .. ششش الغالية؟
كتنخصص و تشهق: اهئ اهئ تخلعت عليك بزاف يسحابلي مغتبقاش تخرج اهئ اهئ
حكيم: ششش راه غير بقيت جالس مع سيف الدين و تعطلت .. علاش غيشدوني مالي قاتل!! .. مسحي دموعك راك نفختي دوك العينين و حسابي مع السرسورة لي وصلاتها ليك
الغالية كتمسح فعينيها و التنخصيصة مزال فيها: هي مقالت ليا والو .. سمعتها كتهضر مع راجلها و سولاتو عليك
حكيم: و صافي دبا من لبكا هاني معاك ماوقع والو ” باس عويناتها” طيبتي ليا عويناتي بالبكا
الغالية تمخشات فيه مغمضة عينيها: عمرك تعاودها كان قلبي غيسكت بالخلعة
حكيم تبسم و باس على راسها: خفتي عليا؟
الغالية: بزاااف .. خفت يدخلوك للحبس و تخلينا بوحدنا اهئ عمرك تعاودها احكيم
حكيم: يخاليلي كبييدة لي تخاف عليا
هز ليها راسها و باشر فقبلاتو و هي منساجمة معاه حتا عضها و بعد
– شنو قالت ليك الكبيرة
الغالية: والو .. غير خافت عليك و صافي
حكيم و هو خاشي وجهو فعنقها كيقبلها فيه و مغمض عينيه؛ جمعي شي حويجات ديالك و ديال هداية نخرجو نفوجو حتا تخوا الدار
الغالية: غير خلينا .. حشومة نخرجو من الدار و نخليو خالتي بوحدها
حكيم: معاها سارة .. غير يمشيو و نرجعو
الغالية: مكاين لاش .. هاحنا جالسين فدارنا و سادين بابنا مكاين لي يبرزطنا
حكيم: بنخسر هي مع لكبيرة و نولييو فالعييب اللهم نخليها حتا تشبع من ختها و تزيد فحالها
الغالية: حشومة تقول هاكا راه كتبقا خالتك .. متقلقتش من كلامها اي وحدة كانت تقول هكاك
حكيم: منسمح لحتا حد ينقص من مرتي .. الى نتي متقلقتييش انا راه مزال كتحفر فيا .. مرتييي معند حتا **** يهضر فيها
الغالية: يهدييك الله صافي ديير الما من يدوز راه خالتك و مراة كبيرة حشومة
حكيم: واخة الالة .. ندخل ندوش و نجي.. متخرجيش من البيت هاني جااي
باسها و قرب لبنتو لي كانت غارقة فالنعاس نزل عليها بالبوسان حتا فيقها و خلاها مع الغالية و دخل هو للدوش
بقات الغالية مع هداية كتلعب معاها و يتعاودو و جمعات ليها شعرها لي تشعكك مع النعاس .. وقفات حطات ليه حوايجو و دخلاتهم ليه للدوش يلبس تم عاد خرج شعرو مزال مرطب و كيمسح فيه فالفوطة .. لابس سروال سرفيت و تيسرت ابيض و سندالة ديال الدار .. هز هداية من جهة و درع الغالية و خرجو من البيت .. لقاوهم جالسين فالصالون و زادو للكوزينة حط هداية فوق الطبلة و الغالية وقفات جنبو و هو بدا يجبد و يحط
– اليوم تاكلو من يدي
الغالية: كتعرف طيب ههه
حكيم: هي شوي .. ماشي فحالك العمر
الغالية: عطيني نعاونك
مد ليها تعاونو و بدا كيطيب و يحط .. وجد ليهم الطبلة بشلايضها و عواصرها و جلس جنبهم كيوكلهم و ياكل هو و ضروري من بسالتو .. مسح يديه و فمو و ناض وقف خلاهم مزالين كينقبو و داز للصالون فين كانو مجمعين …
جلس مقابل مع خالتو كيشوف فيها و هي هازة خنافرها للسما .. سكت لبعض الوقت و هضر مخاطبها
– اللا لكبيرة .. عارفاني كنحتارمك و بلاصتك من بلاصت الوليدة .. و عارفاني عندي هي نيشااان منتراوغش علييك .. و دبا غنهضر معاااك و نتمنى كلامي ينفع … الغاااالية خط حمممر .. مرتييي و ام ولااادي معند حتا شي واحد الحق يهضر ليها ولا يعاتبها .. باااش تلوحي ليييها كلام كيييف السم .. لاااا منسمحش ليييك اللا لكبيرة .. بنت النااااس مجبتهاااش باااش تجي نتي تسميها و تقتليها بكللااامك و النحس ااااانا لي منحوووس و اناااا لي خااايب و انا لي ولد الحرااام مقطر اما هي معندها حتا دخل .. بنت محتاااارماك و عاطياك التيساااع فوتييها ماشي تشوفيها ساكتة ليييك تركبي فوووق راسها .. هادشي غيير لي شفت يعلم الله ملي مكنتش “بغات تهضر و منعها” ايييه كتعتااابريني بحاال ولدك و بغيييتي ليا الخيير و ديك الهضرة .. دبا نقوول ليك الى بغيتي ليا الخيير حتارمي مرتي حييت احترامي من احترام مرتي لي يقلل منها راه قلل مني حتا انااا لي هااانها راه كيهييني حتا انااا و لي عااايرها غيلقاني انا فوجهو .. نتي لكبيرة و مولات لعقل .. لبنت مزااال صغيرة و تكرفصاااات فحياتها بما فيييه الكفاااية براكة عليييها .. و زااايدة صابرة عليا انا مطلق زوج و ارمل و عندي بنت من الفوووق !! شكووون لي خايب دبا انا ولا هي؟؟ الى كانت هي مطلقة مرة انا دوزت 3 اللا لكبيرة .. مالقيييت الخيير فحتا وحدة و لقيتو فيها هي .. اييه حتا سيمانة ما كملناها ولكن داك الاحترام و التقدير لي مقدراني عندي بالدنيا و ما فيها .. منزييدش نكتر علييك .. جيتي عندنا مرحبا بييك الى ما هزك هاد الكتف يهزك لاخر و نحطوط فكفوف الراحة .. ولكن حتا نتي حتارمي مولات الدااار راك مراة بحالك بحالها و غتفهميها ماشي تسميها بكلامك .. دبا من هدشي راك فهمتي اش بغيت نقصد و داااك الكلام منبغيش نسمعو مزال ولا هاد المرة مغنديير لا بحساب دم لا بحساب قرابة .. الله يهنييك اللا لكبيرة
بانت ابتسامة على ثغرها ملي سمعات كلامو و رجعات للكوزينة جلسات حتا دخل عندها .. عنكش شعرها و باس هداية
– تبغي تخرجي ابابي
هداية بسعادة: اه اه نخرجو و تشري ليا كلاص
حكيم: نشريه لكبيدة .. الغالية لبسي حوايجك نخرجو انا نطلع مع هداية نلبسها
الغالية شداتهاا من يديه: غير خليك انا نلبسها و نلبس .. ياك اطاتي نلبسو بزووج
هداية عنقاتها و باستها: شكرا .. نتي ضريفة و كنبغيك
الغالية: ههههه حتا انا كنحماق عليك ازوينة .. ياله نلبسو خلاص منتعطلوش عليه لايهرب و يخلينا ههه
طلعاتها لبساتها و مشطات ليها عاد هزات هي كسوى تركية للمحجبات لبساتها مع سبرديلة و فولارها و هزات صاكها .. دارت كلوز لشفايفها وردي و خرجات شادة فيدين هداية و تلاقات مع سارة
– زيين خارجين؟
الغالية: هداية قنطات و بغا يخرجها حكيم
سارة: اه هكاك صافي سيرو بدلو الجو نييت ياله يبرد راه بقا ليه شوي ينوض يشعل فينا العافية
الغالية: هههه بسلامة اختي
سارة: اينجوووي حبيبتي
خرجات عندو ركبات هداية اللور و ركبات جنبو .. شاف فيها بابتسامة كيحقق فيها و قرب منها
– اجي نقول ليك
قربات على نيتها و شدها من عنقها مص ليها شفايفها حتا كان غيطيرهم عاد بعد خلاها كتنهج و تلفت كيضحك لهداية لي دارت يديها على عينيها
حكيم: بنت باباها هكاك غمضيهم ازين ههه
الغالية حمرة: واش حماقيتي؟؟؟ اوييلي البنت كتشوف
حكيم: هي مسحت لييك داك العجب .. بقاي ديريه ملي نكونو بزوج اما برا معندك ماديري بيه
الغالية ربعات يديها: الله حتا حماقيتي!!
ضحك و زاد مخليها حتا تفشات على راحتها .. وقف قدام غيسطو عائلي و فيه جردة كيلعبو فيها الدراري الصغار .. شدو طبلة جلسو فيها و طلب ليه كافي نواغ و ليهم كلاص .. بقاو مجمعين و كيضحكو بيناتهم حتا صونا تلفون الغالية و جوبات بابتسامة
– زيين ديالي صفا عليك
جنات: من نهار دفنوه ما زارووه ولا نساتك الحلوة فينا
الغالية: ههههه حتا انا بخيير الحمدلله يسول فيك الخيير جنات: اممم و انا نفهم حداك بلارج ..فين كاينين حداكم الصداع
الغالية: خرجنا نضورو ههه و نتي فينك
جنات: غير فالدار ازيين .. نخلييك حتا ترجعو و صوني ليا
حكيم خاطب الغالية: قول ليها تجي للهنا
الغالية: جنات جي عندنا الى كنتي مسالية
جنات: غير بصحتكم استمتعو
الغالية: و غيير جي هاحنا نتسناوك راحنا كايني ف ****
قطعات عليها و ناضت جنات بلا عجز لبسات عليها و خرجات شدات الطريق حتا وقفات عليهم .. سلمات و جلسات معاهم كيتعاودو
جنات: فييين حقي من الشمال
حكيم: كلاتو المشة
جنات: ها هيا فييك نتزوج و نمشي لتركيا انا كاااع
الغالية: هي شي عراسية جاية فالطريق هههه
جنات: حتا نلقا لي يعرس معايا .. اجي مالكم جيتو بكري ما كملتو حتا السيمانة
حكيم: معاودش ليك سيف .. مموالفاش ليه يخبي عليك
جنات: ماشفتوش انا كااع ههه راه مزال غابر اما ميخبيش عليا .. ياك مكاين باس
حكيم: نخليكم تعاودو بيناتكم .. انا ندي هداية نساريها شوي غتكون قنطات
هز بنتو و ناض خرج بيها يضورها و يشري ليها اش بغات بينما جنات حلات ودنيها و شافت فالغالية
-ياختييي ولييت اااخر من يعلم!! مبقيتي تعاودي اللفعى
الغالية: فيين العقل باش نعيط لييك حتا نتي راه دكشي دغيا داز
جنات: خوي خوي المزييودة
بدات الغالية كتعاود ليها بالتفصيل من نهار عيطات سارة حتال اليون و جنات غير كتفقص و بغات تاكل جناابها
– اناااا مبقاااا فيا داااك نص رويييجل خدااا خلااا عشتووو .. لييي مزااال عافيتو مابات تطفا ديييك الشارفة مو ترامي .. كرش اللووور و كرش القداااام حتا هي بغااات تهضر .. اوييييلي غذاااايديي و مالكي ما نضتي ليها الق*** ساكتة تصحابي غتوقرك والله يا ديلمك و ما جمعتي *** معاها حتا يديرو ليييك كتر ما دااز علييك .. تي مااالك متجمعي و توكدييي معانا واااش متعلمتي حتا خرية من لي داز عليييك .. و ليييي عطاااك عطييييه ينعل بووو ليحتراااام لاكان غير هاكاااااك تييي المغاااربة والله و ما حكيييتي ليهم خنافرهم فلارض لا عطااات ريحتهم تجييي نتي تسكتي ليها ” ليعاتها حتا غوتات” لديييلمك مزااال خاصك تربية ” ضربات على فخدها كتغدد” ما تبردي جوووف ما تبردي قلب يعطيييك ليييعة تريكة الناااقصة ولكن هي بلاااتي والله متبقااا فالشارفة الهااارفة بتخيم عندك ولا ياااك العرس و داااز ايوا تهز جلابتها و راه الكااار لي جابها يرضها
الغالية: هههه تي مالك شعلتيي راه ناض ليهم حكيم ما خلا ليها ما تقول و اصلا هو مزيان معايا و المراة كبيرة جات ناقصة نتناقش معاها و نتراد معاها الهضرة .. نصبر ليها حتا تمشي و صافي .. انا محملتش غير ديك الصفريطة ديال بنتها
جنات ميقات فيها: و من زيييناتك بيه كلام .. شتي داااك النوع واخة يرجع فحالو يبقا مكرهك فعيشتك اللهم نهار اللول يموت المش المهم ماتعاوديش نفس الغلط لي درتي قبل هانا كنصحك و راني كبر منك و عارفة و فاهمة متقوليش هادي ممزوجاش متعرفش راه انا نحنتك نتي لي ضاربة زوج تزويجات
الغاليى: هههه و ختي فمك ماضي مووس لي دزتي عليه ذبحيه .. اخاصك تعلميني تعطيني درووس هههه
جنات: هههه هانا غذا نصبح عند قزييبتك نقريك اش تقولي.. و اجي بعدا كيف جاك الزواج هههه
من بعد خرجتهم لي استمتعو بيها و كلاو برا عاد دخلو .. نعسات الغالية هداية فبيتها عاد مشات للبيت لقاتو بدل حوايجو بوحدين موريحين و نزل خلاها بدلات و جمعات الوسخ فالشبكة .. اما هو نزل عند مو جلس معاها شوي كيسول فيها على صحتها و يدي و يجيب معاها فالهضرة كيف مولفها و خالتو جالسة كتشوف بعويناتها و مبقات هضرات .. سارة كانت مشات لدارها من بعد ما جا داها راجلها و بقاو غير خالتهم و بنتها مع حليمة
طلع لبيتو من بعد ما مسا عليهم و لقا الغالبة بدلات بشوميز دونوي و مشطات شعرها مخلياه مطلوق وراء ضهرها و كتدهن فيديها .. تمشا وراها و ضمها بين درعانو خاشي وجهو فعنقها كيقبلها فيه و جرها موقفها و مدورها عندو ….
من بعد علاقة حميمية تجمعات فيها اجسادهم و ارواحهم .. كانت متكية على جنبها مغطية ب يزار خفيف و عاطياه بضهرها و هو معنقها من اللور و يديها كتمشي و تجي على كرشها .. باسها فكتفها و تكلم عند ودنها
– امتا تعمر ليك الكريشة بشي فنيكيش يصدعنا اممم
بضحكة: مزال الحال على الاولاد ههه عاد تزوجنا
حكيم: و شنو فيها واخة عاد تزوجنا .. نتي مبغيتيش شي وليد يسهرنا معاه
الغالية تلفتات لعندو كتمرر اصابعها على صدرو: تأ ماشي هكاك غير مزال الوقت .. و هاحنا عندنا هداية حتا هي كنحسبها بحال بنتي .. و نخليوها حتا تولف عليا بعدا منزربوش
حكيم: واخة الالة لي حب الخاطر .. واخة انا بغيت منك شي بنية ولا وليد يكون يشبه ليك
الغالية: ان شاء الله .. ملشي بوقتو زوين
حكيم: اممم .. شنو قلتي لجنات قبيلة
الغالية: ماقلت ليها والو غير المشكل لي وقع حتا رجعنا صافي واش مكانش عليا نقولو؟
حكيم: لا معليهش .. ختك هديك من حقك تقولي ليها لي بغيتي .. لي نوصيك عليه هو لي يوقع بيني و بينك هنا يبقاا ميخرجش واخة
الغالية: كون هاني راني فاهمة
حكيم ضامها ليه: يخليلي الكبيدة ديالي لي كتفهمنيي .. ياله نعسو راه غذا خدام
الغالية: حتا انا بغيت نكمل خدمتي عفاك
حكيم: مزالك عروسة حتال من بعد و نهضرو على الخدمة
الغالية: مغتمنعنييش ياك؟ .. نبقا خدامة عفاك .. راه كنقنط فالدار و اصلا غنخدم غير عندك عفاك
حكيم: ان شاء الله .. ياله نعسي ازيين
واقفة فالكوزينة كتوجد في الفطور و تحول فوق الطبلة .. كانت اللا حليمة جالسة بلباسها التقليدي و التسبيح فيديها و حداها ختها لي غير حاطة يد فوق يد و كتشوف .. تحط الفطور و نزل حكيم هاز هداية ملبسها و كيضحك معاها .. صبح عليهم و جلسو عاد تمات جاية سهيلة كتمختر لابسة بيجامة بيتية و جامعة شعرها للفوق .. جلسات جنب الغالية و صبحات عليهم عاد بداو الفطور..
الكبيرة: الله يعطيك الصحة ابنتي .. طيابك زوين تبارك الله عليك
الغالية باستغراب و ابتسامة: بصحتك اخالتي
الكبيرة: ولدي حكيم اليوم ان شاء الله غنمشي .. الله يرضي عليك الى ساليتي بكري جي وصلني راه ولدي مكاينش غايب خدام
حكيم: ان شاء الله .. جلسو تغداو معانا عاد سيرو
لكبيرة: غنمشي غير انا .. بنتي سهيلة عندها شي فورماسيو ولا معرفت غتبقا هنا الى مكان حتا مشكل
هزات الغالية راسها دوراتو ف سهيلة لي كتاكل بلا مبالاة و رجعات شافت ف حكيم
حكيم: شنو عندك اختي سهيلة؟
سهيلة؛ دفعت لواحد الشركة و عيطو ليا .. غنمشي ندووز المقابلة على الله نتقبل
حكيم بعفوية: و غتبقاي ساكنة هنا؟؟؟
هزات فيه سهيلة راسها باحراج و نطقات: الى تقبلت .. غير حتا نلقا فين نكري و نخرج .. الى بغيتو
لكبيرة: راك عارف هي مكتعرف حتا واحد هنا .. الى بغيتي تخليها هنا معاكم غير حتا تعرف المدينة مزيان و تخرج تكري
حليمة: الله اودي مرحبا بيها راه بنت ختي هادي ماشي برانية
سهيلة: الله يكبر بييك اخالتي
كانت راشقة ليها على الصباح .. غير سمعات الخبر تسدات ليها الشهية و تزيرات ولكن مبيناتش .. شاف فيها حكيم تغيرات و سكت .. كمل الفطور و ناضت الغالية كتجمع فالطبلة حتا خاطبات لكبيرة بنتها
– نوضي عاوني عروستنا حشومة تبقاي جالسة و هي دير كلشي .. راك وليتي وحدة منهم
تبعات سهيلة الغالية حتال الكوزينة و وقفات حداها متكية على البوطاجي
سهيلة: فاش نعاونك اختي
الغالية مسحات يديها فالفوطة و تمات خارجة من الكوزينة: غسلي عفاك دوك الماعن و جبدي اللحم من التلاجة .. نمشي نشوف راجلي و هانا معاك
دورات عينيها بان ليها نازل من الدروج كيسد فالساعة اليدوية و تبعاتو حتال الباب مودعاه .. جرها خرجها معاه للجريدة لي قدام الباب و باسها مصغر عينيه فيها
– تقلقتي؟
الغالية: علاش غنتقلق
حكيم: الى معجبكش وجودها نقلب ليها على شي دار فين تسكن اش قلتي
الغالية: معليهش راه كتبقا بنت خالتك .. تبقا معانا حتا تلقا فين تسكن و ديك الساعة تخرج الى بغات ..
حكيم: متأكدة؟ .. راه نقدر نلقا ليها فين تسكن و صافي .. ماشي ملزوم عليك تبقاي ساكتة و نتي مراضياش على شي حاجة كتبقا دارك حتا نتي
الغالية: مكاين حتا مشكل احكيم .. كل واحد يعرف حدودو و صافي .. دبا سير لخدمتك رتك غتعطل .. اه راه فيجيو عندي مي و خالتي و جنات غيتغذاو معانا
حكيم: مرحبا بيهم و سلمي ليا على نسيبتي
ودعاتو و دخلات للدار .. طلات على الكوزينة لقات الماعن مغسولين و محطوطين بلا تطراف .. الما كيقطر و كل حاجة فين محطوطة .. نفخات قالبة عينيها و دخلات لشغلها راسها جمعاتو و طرفاتو .. دخلات عندها الكبيرة وقفات جنبها و الغالية كتنصب فالغذا..
لكبيرة؛ بنتي الغالية بغيت نهضر معاك
الغالية: نعام اخالتي خصاك شي حاجة
لكبيرة: فالصراحة لبارح هضر معايا حكيم .. و كلامو كلو صحيح .. سمحي ليا ابنتي الى قلت فيك كلمة العيييب راك عارفة غير حيت عزيز عليا و صافي .. راه بحال ولدي دكشي علاش هضرت ..
الغالية: ماشي مشكل اخالتي .. عارفة لي كاين الله اودي راك بحال مي معندك علاش طلبي السماح
الكبيرة: الله يرضي عليك ابنتي و يكمل بعقلك
الغالية: امين .. اليوم غيجيو دارنا يتغداو معانا
لكبيرة: مرحبا بيهم عطيني نعاونك فشي حاجة
الغالية: غير خليك منعذبك معايا
خرجات لكبيرة دخلات على بنتها لقاتها شادة تلفون مكونيكطية و حيداتو ليها
– نوضي عاوني البنت واش تصحابي راسك غتبقاي هنا غير هكاك .. راه يدك بيدها عاونيها و سكني معاها ماشي غتبقا تخدم عليك ..
سهيلة: و ياك غسلت ليها الشقااف اش بغات !! مالي ساكنة عندها راه دار خالتي هادي .. هي جات غير لبارح بغات تركب فوقنا
لكبيرة: نووضي تكعدي كلاك .. ماشفتيش البارح كي دار ليا على قبلها .. و البنت راه ساكتة و محتارمة راسها ديري يدك الى بغيتي تبقاي ولا زيدي قدامي ماخاصني صداع مع خيتي
ناضت سهيلة كتسوط و تنفخ: اوووف المرض كي داير
دخلات عند الغالية لقاتها نصبات و مجلسة هداية حداها فوق الطبلة كتوجد الشلايض و مؤة مؤة تنقل شي حاجة من اليوتوب .. دارت سهيلة الضحكة الصفرا و قربات ليهم
– نعاونكم فشي حاجة
الغالية: مبقاش بزاف .. جمعي غير الصالونات راه غيجيو دارنا يتغذاو معانا
سهيلة: واخة
وجد الغذا و ناضت الغالسة لبيتها بدلات حوايجها لي شمو ريحة الطياب بكندورة صيفية و لبسات حتا لهداية بحالها .. نزلات من بعد ما سمعات لكلاكصون ديال اللوطو و خرجات حلات الباب لايحة الفولار على راسها .. لقات مها هي و خالتها و جنات و سلوى لي كانت مزال فمراكش و بدات تسلم و تبوس و ترحب و تضحك فرحانة بقدومهم عندها .. جات حتا اللا حليمة و الكبيرة مستقبلينهم و دخلوهم للصالون مرجبين بيهم .. اللا حليمة فمها كينطق غي العسل ترحب و تقول ما رحبت و ختها مبسمة ليهم و ساكتة ..
جلسات الغالية جنب مها و حداها جنات .. بداو لعيالات كيهضرو فواضيعهم الاعتيادية و ناضت الغالية للكوزينة و تابعاها جنات .. حطات الكيسان فالصينية و البراد كيطيب و جبدات الطباسل كتحط فالحلاوي و الفاكية و جنات كتعاونها
جنات: هديك هي خالتهم
الغالية: اه هي هديك و ديك الغليضة السمرا بنتها .. من الصباح و هي مقابلة داك الشقف
جنات: و المرا كتبان داخلة سوق راسها
الغالية: اختي تقولي هزيتي وحدة و حطيتي اخرى لبارح عاد كانت كتهلل و اليوم صابحة تشكر و تطلب فالسماحة
جنات: ايوا راه جبد ليها ودنيها الواحد هو لي يدخل سوق جواه .. دبا تهناي منهم حتا نتي .. اري نحول معاك
هزات ليها البلاطو و تبعاتها ضيفات عائلتها و اللا حليمة عاطياهم صوابهم و مرحبة بيهم ..
جنات بهمس قريبة من الغالية: عرفتي شكون هضر معايا ههه
الغالية: ياكما الشيفور تاني
جنات معوجة فمها: تأ لااا .. فاتح معرفت منين جاتو نمرتي
الغالية: ماصعيباااش ياخدها تا نتي .. و شنو تقاولتو العفيريتة شفتك وليتي تخبي
جنات: و هاني كنعاود ليك ازمر ههه بغانا نتلاقاو قاليك بغا يتعرف عليا كتر
الغاليى: ايوا فين غطلقاو
جنات كتلعب فخصلة من شعرها: قلت ليه لا ممسالياش .. عزها تعزك مالي حمقة نخرج عندو فينما قالها ليا .. كيقول المتل جوع كلبك يتبعك
الغالية حطات يدها على حنكها: تخافي غير يقلب على البديل
جنات: فمك لاحسو كلب و معاودو جرو .. مالك على هاد الفال اناري
الغالية: شوفليييك الدرية ههه ميتة على خراه و دافعة كبيير ههههه
جنات كتفرنس: كنعزز فراسي اختي باش فاللخر لا تخاصمنا شي نهار مايقولش ليا كنتي لاقصة فيا هههه نقول ليه نتا لي تبعتيني حتا رضيت بيك ههه
الغالية: احياني علييك ياختي كطيييري مع الطيور
جنات: و فاللخر كنطييح على قفايا هههه
لكبيرة مخاطبة خديجة: هادي بنتك اللا خديجة
خديجة: اييه بنتي .. هادي هي الصغيرة عندي
لكبيرة: تبارك الله غزالة .. فاش كتقراي ابنتي
جنات: كملت القرايا دبا خدامة
لكبيرة؛ ما شاء الله .. و فاش خدامة
جنات: مع حكيم
لكبيرة: مزوجة؟ ولا مخطوبة
خديجة: مادة يدها للحنة ههه
لكبيرة: ايوا عندي واحد الولد اش تقوليك الله يرضي عليه .. خدام تبارك الله و مربي .. و هاني كنقلب ليه على عروسة لي تكون فجنبو و توقف معاه
خديجة: الله يسهل عليه و يلاقيه مع بنت الناس
لكبيرة: امين اختي .. بنتك ماتعطيهاش ليا لولدي
تبسمات خديجة باحراج و دورات وجهها لجنات: هه الله اودي مرحبا منلقاو حسن منك .. ولكن البنت مزال صغيرة باقي ماقنع منها باها
لكبيرة: ماصغيرة والو اللا خديجة .. الواحد هو لي يدير دارو و يولد ولادو و هو صغير يكبرو معاه
جنات دورات وجهها جهة الغالية كتهمس: تكون هادي عكوزتي نمشي عليها للحبس و راسي مرفوع
الغالية: ههههه مجرد التخيل مقدرتش هههه
جنات: هادي بغات دير خدامة فالدار تولد و تشقا و تاكل و تشرب .. الله يعطينا هي شوي من قسوحية وجهها
الغالية: براكة غير القسوحية لي عندك هههه .. نوضي نحطو الغذا هههه ” وقفات و شافت فيهم” نحط الغذاء غتكون هداية جاعت
اللا حليمة: غير حطيه ابنتي هذا وقتو .. مرحبا بيكم دار داركم .. مرحبا باللا رابحة فدار بنتها
رابحة: الله يكبر بيك اللا حليمة بارك الله فيك
تقدمو جلسو فبلايصهم و جنات تبعات الغالية للكوزينة تحط معاها
الغالية: ديك خيتي بتبقل مقابلة غير السريط و المريط تفو غتبقا مخيمة عندي هنا و انا مقابلاها
جنات: زيديها تشقا مالها بتجلس ف اوطيل .. عيطي ليها تعاونك
الغالية: اختي شقاها مريض كيمرضني و انا منبغي نشقا فالروينة تفو نصبر عليها حتا تمشي فحالها
جنات: فحال دوك الماركات تما ينبتو لييك واكلين شاربين ناعسين اش خاصهم و نتي قابليها شقاي عليها تا يبدلك الراجل و جلسي تندبي .. نوضي الزبل يشقا حتا هو
حطات الغالية الطياب متول و مقاد على حقو مكبرة بعائلتها .. الشلايض و العواصر محطوطين متولين و مزوقين غير النضرة فيهم تشهيك .. كلشي شكر ليها مكلتها و كلاو حتا شبعات لكريشة .. بغات تنوض تجمع و هي تقرصها جنات من الجنب
– ا اختي سهيلة .. جمعي معاك هاد الطبلة غنطلع للبيت حتا نصلي
سهيلة من فوق خاطرها: امم واخة ازين غي سيري
وقفات الغالية و طلعات معاها حتا جنات لاصقة فيها كي القملة حتا دخلو لبيتهم و سداتو عليهم
– اوف شحال تقيلة على القلب .. متسرطاتش ليا كاااع
الغالية: خليها متصدعيش راسك بيها ” بدات تجبد و تحط قدام جنات” شوفي هادو جبتهم مع شفشاون واعرين حمقوني .. هادي ليك و هادي لخالتي و هادي لسلوى و هادو لمي و خوتي
جنات كتقلب فيهم و تجمع فالصيكان: الله يعطييك الخير .. هادشي زوين .. جبتي بعكوزتك شي حاجة
الغالية: اه راه جبت حتا ليها و سارة ولكن ملقيت الوقت لي نعطيهم ليهم و هادو كاينين و مجايبة ليهم والو
جنات: و عطي لعكوزتك هي لي مهمة و ساكنة معاك و لوستك باش تبقاي عزيزة ههه اما هدوك معندك بيهم شغل
شافت الغالية حتا عيات و ناضت هزات الكادويات لي جابت لحليمة و سارة و هزات فولارات شراتهم ليها .. نزلو تاني و مدات لكل واحد كادوه .. شافت ف لكبيرة و عطاتها شاصية فيها ريحة و فولار بخجل
– غير سمحي ليا اخالتي مع الزربة ماشريت والو
لكبيرة: الله يقوي الخير ابنتي .. الله يرضي عليك
اللا حليمة: الله يخلف عليك ابنتي ” مخاطبة رابحة” تبارك الله عليك اللا رابحة راك ربيتي و عرفتي اش تربي
رابحة بافتخار: لهلا يحشمنا اختي
فدوك الاثناء دخل حكيم محمل بعض الميكات حطهم فالجنب و دخل سلم عليهم دار الصواب و طلع الفوق .. وقفات الغالية تبعاتو و بقاو لخرين مجمعين على كاس ديال اتاي
دخلات عليه لقاتو كينصل فحوايجو و يقلب فتلفون
– على سلامتك .. نوجد ليك الدوش
جرها عندو معنقها و كيلعب فشعرها و يهر فيها: اجيي عندي اسكيكيرة ديالي .. الحليييوة ديالي مكرهت نسرطك و نخشييك بين ضلوعي
الغالية: ههههه و حكييم براكة هههه راه غيسمعونا
حكيم: يسسمعوو ياك مرتيي و حلااالي اش كيتسالوني
الغالية: هههه والله حتا حمق .. دخل دوش انا نطلع ليك تاكل
حكيم: هي رتاحي و جلسي مع نسييبتي ندوش و نزل ناكل لتحت
الغالية: واخة الى احتاجيتي شي حاجة عيط ليا هانا لتحت
حكيم: هداية فينهي؟ كلات؟
الغالية: اه راه وكلتها و كانت كتلعب مع اروى بنت سلوى و نعسو راهم فالبيت
حكيم: صافي هي نزلي ازيين
نزلات هي و بقا هو كيجيد حوايجو و مبسم .. كيشوف كيفاش رادة البال للصغيرة و الكبيرة.. حوايجو مطويين و بنتو واكلة و حالتها نقية و مهلية فيها .. مو عمرها قالت عليها شي كلمة.. كيشوف كيفاش دخل و تبعاتو كتسول فيه اش خاصو و واش كلا ولا مزال
مو عمرها قالت عليها شي كلمة.. كيشوف كيفاش دخل و تبعاتو كتسول فيه اش خاصو و واش كلا ولا مزال .. واش عيان .. واش توجد ليه الدوش .. واش تحط ليه حوايجو .. الاهتمام لي شايفو من جهتها مكانش عارفو مع كريمة ولا مرة .. ديما حوايجو هو لي يجمعهم و بنتو هو لي يلبسها و يعومها و يمشط ليها .. مو هو لي يطيب ليها و مهلي فيها .. اما كريمة كانت كيف الامانة محطوطة غير كتشرط و تطلب لا غير اما باش دير واجباتها كزوجة لا..
نزلات الغالية جلسات حدا مها بينما حكيم دوش و نزل حط ليه ياكل .. غير كمل جمع الماعن غسلهم و طرفهم عاد خرج ملي سمع الهضرة عند الباب .. كانو عائلتها غاديين .. سلم عليهم و ودع نسيبتو عاد دخل جلس حدا مو ناشر رجليه كيستراح حتا وقفات عليه خالتو هازة صاكها و لابس جلابتها
– ولدي مسالي توصلني
حكيم: صافي سخيتي بينا
لكبيرة: ايوا هادا هو الجهد .. نمشي لداري خليتها خاوية
حكيم: واخة الالة .. نلبس حوايجي و هانا معاك
طلع هو يلبس و سلمات الكبيرة على ختها و الغالية و بنتها بالعناق عاد خرجات تابعاه ملي نزل .. ركبات معاه و زادو .. تسرحات الغالية فوق الفوطوي و كتهضر مع حليمة حتا وقفات سهيلة كتفرنس مع تلفون
– زيين هانا خارجة نتلاقا مع شي اصدقاء .. ياكما خاصة شي حاجة نجيبها معايا
الغالية: لا اختي هي سيري مخاص والو
مشات سهيلة لبسات و تزوقات عاد خرجات بينما الغالية عاد تنفسات و ناضت طلعات لبيتها من بعد ما دخلات حليمة ترتاح .. هزات حوايجها طواتهم و رتباتهم حدا حوايجو و كل حاجة قاداتها فبلاصتها .. جمعات البيت و ريحاتو و هواتو عاد نزلات وجدات عشاء خفيف خلاتو بطيب و طلعات عند هداية لي كانت كتلعب
– حبيبة ديالي اجي نلعبو بزوج
هداية: نتي كتشبهي لهاد الاميرة لي عندي ” وراتها مونيكتها”
الغالية: هههه و نتي هي الامييرة عندي انا ازين .. اجي عاودي ليا .. شنو كيعجبك تلبسي همم .. و اش كتبغي تاكلي ولا كتشهاي
بدات كتعاود ليها هداية بحماس و الغالية كتسجل في دماغها و تقيد كيفاش تعامل معاها و كيفاش تقرب منها و تخلي علاقتها مزيانة معاها .. كانت هداية حتا هي هادئة و مسالمة .. كتعاود و مرة مرة تهز عويناتها فالغالية باش تشوف ردة فعلها .. بقات معاها الغالية مدة و هي كتعاود ليها و تجر ليها فلسانها حتا خوات ليها هداية المزيودة كاملة ..
بعد الروتين اليومي نزلات الغالية للكوزينة كتوجد في الفطور و تحط حتا حسات بيديه تلفو على خصرها و لاحيتو كتدقها فكتفها .. تبسمات و كملات توجادها مخلياه على راحتو كيستنشق عطرها الهادئ حتا نطق عند ودنها
– متبقايش تعيي راسك فالشغل .. اليوم غتجي اللا سعدية تعاون فالدار .. كنت عطيتها سومين راحة
– ماكنديرش شي حاجة .. غير كندوز الوقت و صافي ” تلفتات عندو مدورة يديها على عنقو” امتا نرجع للخدمة
حكيم حك جبينو و بعد شوي: احبيبة مكاين لاش الخدمة .. هانا لي خصاتك نجيبها ليك .. مناقصك والو علاش تخدمي
الغالية: و ماشي قضية ناقصني او نو .. كنمل فالدار و الشقا بغيت نعمر وقتي شوي
حكيم بسياسة: ها وقتك عامر بغيتي كتر من هاكا؟ غادي غير ترهقي راسك بالخدمة و العيا كل نهار ” عنقها من خصرها” و هانتي معمرة وقتك ب هداية .. راه هي غتشد ليك وقتك كامل
الغالية: تأ هداية كتقرا و انا مكاينة لا قراية لا والو .. عفاااك ياك غير فالمحل عندك مكاين مشكل عفاك
حكيم: الغالية .. الله يهديك!! .. واش غتقدري تجمعي بين الخدمة و الدار؟ .. راه كتيير عليك اكبيدة و انا منبغييش مراتي تعذب
الغالية: لا لا احبيبي غنقدر نوفق بيناتهم والله
حكيم بقبلة على شفايفها: هاد حبيبي كتقوليها غير وقتما بغيتي .. واخة الالة دبا نشوفو هاد قسوحية راسك فين غتوصلنا
الغالية بابتسامة: يخليك لييلي ههه
و هوما فعناقهم دخلات سهيلة مدرمة ببيجامة بيتية كتحك فشعرها .. وقفات حالة عينيها فيهم و رجعات خطوة اللور حتا حسو بيها و تلفت حكيم هاز حاجبو
سهيلة: ااا سمحو ليا .. كنت بغيت غير نشرب .. كنعتاذر سمحولي
رجعات ادراجها و الغالية بقات خاشية وجهها فصدرو كتولول
– وييلي ويلي بتشوهنا مع بنت خالتك
حكيم بعدم اهتمام: و هي لي جاية تسلت مادايرا حتا الحس نعرفوها جاية .. داخلة كي الشفار
الغالية: هههه نتا لي باسل .. عمرك تقرب ليا اخويا فالدار ختا نكونو بوحدنا .. هاد المرة تحصلنا خالتي ههه
حكيم بمزاح: هديك هي عورة واخة نشدك قدامها ههههه
تمات داخلة حليمة و كلامو ميطيح غير فمسامعها .. تبسمات و نطقات من وراه
– عورة ياوليدي ماشي صمكة .. الله يقل حياك مبقيتي تحتارم
حكيم: هههه نتي هنااا .. دبا انا لي خاص نمشي ندوز على ودنية وليتو دخلو و تخرجو و انا ودنية مصمكين
طارت الغالية من حداهم وجهها غيطرطق و هو كيضحك و يتمازح مع مو حتا نرجعات الغالية هازة هداية مبدلة و ماشطة و الضحكة مشرقة على وجهها .. تفكرات كلامها معاها لبارح و ضماتها لصدرها كأنها كتزودها بالحنان لي افتقداتو شحال من عام من طرف امها .. تفكرات كيفاش كانت كتدوي بحرقة على كريمة و تعاملها السيئ معاها و جفافها من جهتها .. كيفاش كانت هاملاها و شحال من مرة تعرضات لحوادث منزلية بسببها .. شحال من مرة عيراتها و ضرباتها و هددتها باش متقولش لباها ولا تجري عليها .. عقل نت صغيرة معارفاش قدرات تلعب بيها كيف بغات ..
جمعات الغالية تنخصيصتها و نفخات كتبرد فالحرقة لي فيها و الدموع على طرف عينها .. جلساتها جنبها و قابلاتها توكلها و تحط ليها و موجدة ليها كااع الشهيوات لي بغات .. خلات هداية فرحانة و كل مرة تبوسها كشكر .. لاحظ حكيم هاد التغيير و تبسم فرحان لعلاقتهم لي غادية فطريق مزيانة ..
حكيم؛ حبيبة بابا كملتي نمشيو
الغالية: اليوم مغتمشيش للنادي .. تبقا معايا حتال غذا و تمشي
هداية: اه اه نبقا مع طاتي عزيزة عليا
حكيم: واخة اكبيدة و ماديريش ليبيتيز
ناضت عندو هداية باستو عاد مشا من بعد ما باس مو من راسها و تبعاتو الغالية حتال الباب و نطقات مشاوراه
– نقدرو نخرجو انا و هداية .. نمشيو غير حتال عند سارة و نرجعو
حكيم: سيرو و متعطلوش و خلي تلفونك معاك الى وقعات شي حاجة عيطي
الغالية: غير كون هاني غنضورو غير شوية و نشريو شي حويجات ناقصين هداية و نرجعو
حكيم: الفلوس راه فالمجر لي فالماريو .. تقداي لي خصاتك ياله نخليك ازيين
ودعاتو عاد رجعات .. شافت ف سهيلة كتاكل و عينيها فتلفون و خاطباتها
– ملي تسالي جمعي معاك الطبلة عفاك انا غنخرج مع هداية و غنتعطلو شوي .. راه غتجي خالتي السعدية بقاي فالدار حتا تجي عاد خرجي الى بغيتي واخة؟
سهيلة: امم واخة سيري
طلعات الغالية لبيتها بدلات و خرجات شدات طاكسي للبلاصة فين دارت مع سارة لقاتها في انتضارها و تسالمو عاد دخلو بين البوتيكات كيتساراو و يتقداو اش خاصهم تهلات الغالية فهداية بالمزيان واخة كلشي عندها ولكن حنا لبنات كنبغيو كل مرة نتقداو شيء جديد و نتخيرو فيه على ذوقنا ماشي يشريه لينا شي واحد .. خلاتها الغالية كتختار و هي معاوناها و عاطياها الخاطر و سارة مراقباهم و فرحانة للعلاقة لي جمعات هاد زوج..
خلاتها الغالية كتختار و هي معاوناها و عاطياها الخاطر و سارة مراقباهم و فرحانة للعلاقة لي جمعات هاد زوج .. مكتبانش ربيبتها بل كتبان كأي ام و بنتها .. واحد التفاهم بيناتهم خلاو سارة غير معجبة لبنت خوها لي كانت فينما جابوها معاهم تغذب و مايعجبها حال .. دبا هي لي كتجرهم لكل محل و تخير على راحتها ..
ما سالاو الشوبينغ ديالهم حتا الرجلين طابو .. جلسو فكافي يستاراحو و من بعد وصلاتهم سارة حتال الباب و دخلات معاهم تشوف مها .. لقات حليمة جالسة هي و السعدية على براد داتاي مدوزين بيه الساعة و جلسو حداهم مونسينهم .. و هوما فجماعهم دازت سهيلة من قدام الصالون و دخلات سلمات على سارة
– هاء يسحابلي مشيتي مع خالتي
سهيلة: لا عيطات ليا الشركة لي كنت دافعة ليها .. غذا عندي مقابلة معاهم
سارة: هاكاك ايوا الله يسر
سهيلة: اميين .. ختي الغالية معندكش الضوبل دالسوارت عفاك نقدر نتعطل و مبغيتش نبرزطكم
الغالية: لا اختي معنديش .. ياله هادو عطاهم ليا حكيم قبيلة
سهيلة: عطيهم ليا حتا نرجع و نردهم ليك عفاك
سارة بحدة: سهيلة لاش السوارت؟ .. الى بيتي تخرجي خرجي ولكن رجعي بكرييي .. راه يسيق ليك حكيم لخبار تعطلتي ولا شي لعبة مانتي فخير
خرجات سهيلة كتنفخ و تلفتات سارة للغالية
– متعطيهاش اختي السوارت راه والله متبقاي تشوفيهم .. سهيلة ضاسرة انا لي كنعرفها غتلقا السيبة متبقا تدخل للدار حتا يقولها ليها مخها و ديك الساعة بينوض حكيم ليها
الغالية: اختي مخاصني صداع معاه .. حتا يجي و تشد السوارت من عندو انا منقدر نعطيهم ليها
بدلو موضوعها و بقاو لى الجموع حتا داز الحال و ناضت سارة بدارها..
من بعد ما طلعات بدلات حوايجها و حوايج هداية جلساتها فالصالون حدا حلينة و دخلات للكوزينة كتعاون السعدية واخة الاخيرة عارضات فالاول ولكن من بعد خلاتها.. وجد العشاء مع دخولو لدار.. سلم عليهم و طلع حتا طرف حالتو عاد نزل جلس معاهم دور عينيه فالطبلة و نطق كيشوف فالغالية
– سهيلة مبغاتش تعشا؟
الغالية: اا.. للا راه مكايناش
طلع حاجبو باستفسار: و فين مشات؟
الغالية: الله اعلم انا مقالتش ليا .. قبيلة ملي جينا هي خرجات و مزال ما جات
زير على فكو و حرك راسو بايجاب .. بداو اكلهم و هو كيحط للمو تاكل و الغالية لهداية بحال الى مقاسمين المهام .. جمعو الطبلة بزوج و ناضت غسلات للماعن و هو معاونها كيطرف ليها فيهم و هي كتضحك
يتبع
التعليقات 0