الفصل 4

– لا .. مطلقة هه

هي قصدات بيها حقيقتها و معاناتها لي دوزات بطريقة لي تقدر تخفف بيها .. بطريقة مستهزئة من العيشة لي كانت عايشة فيها .. بطريقة لي تقدر تهضر بلاما تدرف حتا دمعة .. بطريقة لي متخليش الطرف الاخر يشفق عليها ولا يشوف فيها شوفة ناقصة..

و هو فهمها بطريقة استهزاء من كلامو .. بطريقة طنزت عليه من غبائو و كيفاش فكر غتكون مزوجة .. بطريقة كتقول ليه لواه مطلقة ماشي مزوجة .. كيفاش غنكون مزوجة و جالسة حداك هنا ؟؟ .. كيفاش نكون مزوجة و مايجيش ليا راجلي و نمشي معاك نتا ؟؟..

هاكدا قصداتها هي و هاكدا فهمها هو.. و هكذا طاح في #سوء_الفهم

**

و يحدث ان نقصد شيئا و يفهم شيئا اخر .. ليست غلطتنا ولا غلطة الطرف الاخر .. بل غلطة طريقة توصيل الكلام و سوء فهمه..

#سوما

**

حطها عند باب الدار و ابتسمات ليه بلا خاطر شكراتو و كانت غتنزل حتا وقفها بكلامو

– الى مكانش شي مشكل ممكن نوم ديالك

تحرجات و مقدراتش ترفض ليه الطلب و هو لي عاد وصلها حتال الدار .. شدات من عندو التيلي لي كان مادو ليها .. كتبات ليه نمرتها و نزلات

– تصبح على خير و سلم على هداية

سدات الباب و دخلات للدار مدارتش وراها حتا سمعات صوت الروايض تحركو .. دخلات لبيت الضياف لي كان موجد ليها ولكن كتبات مع جنات لقرب علاقتهم الاخوية .. هاد المرة فضلات تنعازل على راسها و تسد عليها فبيت بوحدها و تطلق العنان لدموعها ينزلو .. دموع لي كانت كتضن انهم يقدرو يخففو الجرح لي مزال ما برا من جهة بنتها .. الدموع لي كينزلو بحال الملح على جرحها واخة تحاول مرارا و تكرارا تخفف ملحهم .. دموع لي كتكبتهم قدام الناس و تبين ليهم الضحكة خرجاتهم دبا .. ماشي ساهلة عليها تنسا كبدتها .. ماشي ساهل تمسح عام من ذاكرتها و دير بحال الى عمرو كان .. ماشي ساهل تنسا وجه بنتها الباهت اللون نهار لفضات اخر انفاسها .. ماشي ساااهل واخة تحاول و تحاول و تحاول .. شحال من وحدة كتحرق غير من صبعها و دير جنازة عليه .. فما بالك بلي تحرق فكبدتو .. فحياتو .. في النوور لي كان مضوي ظلماتها .. فعلا ليس سهلا .. ولكن بالارادة و العزيمة تقدر تتعايش مع الوضع..

* يوم متل باقي الايام .. كتفيق و تاكل و تخدم و تنعس هاكا دازت سيمانة عليها .. فاقت بحيوية و فرحة لكونها اليوم غتشد اول خلصتها ..

.. طرفات حالتها و فطرات معاهم و جمعو و طيبو الغذاء تغداو عاد لبسات جلابة جديدة شراتها هي و جنات كل وحدة بلون مختلف .. جلابة مخزانية فالبوردو و مخيطة بالاسود .. جاتها كتحمق مع حجاب مدلين اطرافو من اللور و صندالة سوداء خفيفة فرجليها البيضين النقيين و المزينين بطلاء اضافر في البوردو .. و وجه خالي من مستحضرات التجميل .. هزات صاكها و خرجات من بعد ما باست خالتها عاد مشات لخدمتها ناشطة ماشطة ..

دخلات لقاتهم عاد غيخرجو اصحاب الصباح و غيدخلو لي خدامين في العشية .. سلمات و قابلات خدمتها حتا وقفات عليها سيدة غير من شكلها باينة كاورية .. ابتسمات ليها و حركات ليها يديها باشارة و مشات عيطات على ندى تهضر معاها .. خلاتهم و مشات عند البنت لي كانت مكلفة بالاحدية .. قربات للحداء لي كانت شافتو هي و جنات و عجبها و هزاتو كتقلب فيه هو و بوشيطتو و تلفتات كتشوف في البنت

الغالية: قولي ليا هذا شحال .. عجبني بزااف نقدر نشريه ههه

البنت بسخرية: تشرييه هههه من نيتك .. راه 1000 درهم هداك غير بوحدو قيمة خلصتك كاملة ههه لاهيلا قالت ليك تشريه .. راه لي مارك هدشي ازيين ماشي شي حاجة عادية و اصلا هادو بالبوشيطة ديالو مكايتشراش بوحدو و سيري قلبي على لي قدك

الغالية حطاتو بالنفاخة: و مالكي اختي خرجتي فيا عينين يكون حتا 2000 درهم سولت شحال جاوبي و هنينا و الى محطيت خلصتي عليا بنحطها عليك نتي .. و هانا و ها نتي الى مشريتو و ديك الساعة نشوفو شكون غتضحك .. بنادم يخ

دازت فيها كتنفخ و تسوط و صدمة الصباط فاقصاها واخة تكون غتمشا بيه فوق الزرابي الحمراء .. هي موالفة 200 درهم حتال 400 درهم هذا جهدها جا هذا قال ليها جمعي و طوي هدشي ماديالك .. ولكن هي حالفة حتا تشريه واخة تخدم عليه شهرين .. عاجبها و مشهياه تلبسو و زيد عليها كلام صديقتها فالعمل محملاتوش زاد اصرارها باش تشريه .. رجعات لخدمتها من بعد مامشات الكاورية و كملات عادي حتا جا حكيم .. كيف العادة كيبان انيقة واخة لبسو سامبل و عادي .. قاميجة و سروال كحلين … اسود في اسود .. عطا لكل واحد غلافو و قابلهم شوية و خرج .. ماشي بزاف على خروجو من تم وقفات كريمة هي و ختها قدام المحل .. طلعوه و نزلوه بنضراتهم و قرات اسمو بسم و غل

– ولد الكلبة سماه على بنتو

لبنى: ايوا نتي لي معرفتيش ليه كان عليك تزيديه يكتبو ليك قبل

كريمة: حتا دبا والله مايبقا ليه .. شحال و هو مطمعني بيه و دبا قلب عليا .. غير بيا ولا بييه .. زيدي ندخلو نشوفوه بعدا بان ليا ماشية فيه الخدمة

دخلو كيتمخترو كل وحدة هازة خير ربي وراها كتلوز بيه .. معصورين فسراول جينز و تيشورتات قصار مخشين فالسروال .. اكتاشفو المحل على مهلهم و تساراو فيه كامل في الاخير ختموها قدام سلمى لي كانت حدا لاكيس

سلمى: وي مدام شنو حب الخاطر

كريمة: كاين حكيم

سلمى: لا مكاينش مي نقدر نساعدك انا .. شكون حضرتك

كريمة: مولات المحل مرااااتو

سلمى: اا.. اه مرحبا الالة ولكن سي حكيم مكاينش دبا عاد لقيتوه خرج

كريمة: معرفتيش امتا غيجي

سلمى: نو معرفتش مي تقدري تسولي صديقتو تقدر تكون عارفة

لبنى مخرجة عينيها: صديييقتووو!!

تخلعات سلمى من نضرتها و نعتات للغالية لي كانت غادية طالعة تنزل شي سلعة نقصاتها: ووي راه هي

تلفتو بزوجات شافو في الغالية كيتفحصوها كاملة من رجليها لراسها .. عرفاتها كريمة و عقلات عليها و هي تضرب يد مع يد

-ولد لحرااااام طلقني باش يتصاحب مع هاااد العروبية!!! جااات غير لبارح و بغات تاخد بلاصتيييي اليووووم بيا ولا بييها والله متبقا فيها

لبنى: واااش حماقيتي اش بديري ليها هي راااه كلشي من داك الحمااار

كريمة: هيييييا بنت لحراااام لي دوراتو عليا الكلبة الشايطة .. حتا جاااات عاد طلقني *** ولكن والله متبقا فيها..

تبعاتها من اللور حتا وقفاتها وسط الدروج و جراتها عندها بالجهد من دراعها

كريمة: اجيي الكلبةةة .. تقادااااو الرجااال ماباااان لييك غير الراااااجل مزوج و والد تلصقييي فييه ادوي المكروووبة .. جيتي غير لبارح من دوااار رجعتي باغة تاخدي الراجل من مراتووو

الغالية تفعفعات معرفات باش تبلات حتا شدات فيها شدة العمى فالظلمة خلاتها غير كتفتف مفاهمة والو

– شنووو كتقولي نتي!! اشمن رااااجل و اشمن زواج واش حماقيييتي .. و فين كنعرفك انا اصلا بعدي منييي

نترات منها يدها و طلعات درجة مبعدا منها كتشوف فيها مطلعة حاجبها و لخرا العافية شاعلة فيها .. جراتها من اطراف الفولار حتال عندها مراضياش و جمعاتها معاها بصفعة خلاتها مخرجة عينيها و حنكها حمر .. دفعاتها الغالية مجننة و ردات ليها الصفعة حتا هي

– جمعييي يدييك متحطيهمش فيا الموسخة .. سيري شوفي راجلك فين دايع و بعدي منييي انااا فين كنعرفك

كريمة: بنت الكلبة كتضرب .. اجي ال*** نوريييك موسخة كيف دايرة

نزلاتها تحت يديها بغفلة من الغالية و جراتها مع الدروج حتا تعترات الغالية و تلوات ليها رجلها و عطاتها للغوات .. بدات تسب فيها كريمة و تعاير و تنتف فيها فوق الفولار و الغالية ماحيلتها ليها ولا لرجلها لي عطاتها الصداع .. كتغوت برجلها و طايحة الارض و رغم ذلك كطاكي على راسها من كريمة كتبغي تجر ليها وجهها و هي مبعداه و مغطياه بيديها باش ميتقمش ليها .. اما الموضفات لي معاها بغاو يتدخلو و منعاهم لبنى ممخلية حتا وحدة تقرب ..لي زعمات تفرق كتدفعها لبنى و مطاكية على ختها .. كريمة ما خلات باش سباتها و جنونها و اعصابها ديال البوتيك خرجاتهم في الغالية .. هاد الاخيرة لي رجلها عطاتتها الصداع بالجهد و من حر صداعها غوتات بصوت رقييق صمكات ليهم ودنيهم

– وااا رجلاااااااي

مبان ليها غير كتف كريمة معري قدامها حتات عليييه بعضة غرسات فيييه سنااانها و مدات يدها جراتها من راسها حتا غوتات كريمة من حر العضة ..

فهاد الاثناء خرجات ندى كتجري لبرا اتصلات بيه بالزربة خايفة على الغالية و دغيا جاوبها بصوت تقيل

– الوووو ندوشة ياك لباس

ندى: سي حكيييم عتقنااا مراتك و ختها تهجمو علينا هنا و راه محامين على الغالية مسكينة ملقيناش كيفاش نفرقو

تسمع صوت الروايض تحكووو مع الارض و صوتو مجهد كيغوت

– شنووووو .. بربيييي تن**** بنت ***** هاااانيييي جااااااي

ضور السيارة و رجع مكسيييري و لحسن حضو كان غير قريب دغيا وصل .. نزل كيجري من اللوطو و دخل عليهم لقا القربااالة نايضة .. الغالية لتحت و كريمة فوقها .. كتبان تحتها كيف الفرخ مخنوقة و صوتها كيخرج رقيييق .. جرا جيهتهم نتر لبنى دافعها حتا طاحت و جر كريمة فاكها من فوق الغالية .. غير وقفات نزل عليها للحنك حتا زلقات و طاحت .. رجع جرها من شعرها لي طاح على وجهها وقفها مغدد عليها .. كيعطيها صفعة تااابعة الاخرى و فمو تقول قادوس و فتحتيه

– يا بنت **** مبغيتيش ت*** عليااا مزااال كتقلبي على شي **** جاية يال**** حتااال حانوت كت**** على بنات الناااس بربييي تن***** و نفرج فيييك امة محمد يال**** مزاااال مبردش لييك **** لي درت ليييك جاية باغة تفشي ***** هناااا ..

… درت معااااك باااات المزياااان و كنت معاااك راجل يال**** و فرقتك بلا تا شي **** و جاية كتقلبي عليا اليووووم ***** يا بنت **** .. بربيييي تنغرق ال*** مك فالحباساااات و ديك الساعة بداااي تزاااوكي .. ياله دبا جمعي عليا *** و نوضي ت****

ايييه ايييه و منييين خرج هادشي كااامل .. فين الضحك و البسالة ديالو!! .. فين تساااع في الخاااطر!! .. فين التقشااااب و الملاغة ديالو!! .. فيين حكيم الفروجي!! .. فيين برودية دموو!! .. تسيف خطرة وحدة عليهم .. ماشي هذا هو لي كيعرفووو .. تقووول هزيتي حكيم الضحوكي و حطيتي هذا فبلاصتو .. خلاا كلشي مصدوووم فيه كيشوفو فيه مخرجين عينيهم و شي داخل فشي .. غوت عروق راسو منفوووخين و ضرب كرسي حتا تشقلب

– سدوووو عليا الق**** و خرجوووو تق*** كلكوووم يااااااله

جرات لبنى ختها سخفانة و وجهها عامر دم نزل من نيفها و منفوخ ليها بالصفعات لي عطاها .. خرجاتها شدو طاكسي و مشاو فحالاتهم .. ناضو لبنات خارجين و الغالية شدات في ندى تعكزات عليها كترعد و خايفة و رجلها عاطياها الصداع .. ياله غتخطي الخطوة اللولة و هي تسمع صوتو طيح ليها الما فالركابي ملي غوت

– فيييين غادية نتي فييين .. جلسي اللارض قبل منلصق مك معاها

شدات الغالية مزيرة هلى ندى من يدها بغات تبكي و نطقات بصوت مرتجف

خليني نمشي عفاااك اهئ ووالله مادرت شي حاجة

حكيم: ريييييحيييييي نشوف ليك رجليييك جلسييي اللارض

نهض فيها حتا تكمشات و رخفات على ندى لي طارت من حداها خايفة لا يخلطها حتا هي .. غير خرج كلشي مشا سد الباب من الداخل و تم راجع عندها .. هاد الاخيرة لي شافت الباب تسد و هي تطلق البكية .. تخلط عليها صداع رجلها مع الخوف منو و خرجات ليها التنخصيصة و شفايفها كيترعدو

– و و الله ممادرت شي اهئ حاجة اهئ اهئ خليني نمشي فحالي اهئ اهئ راه هي لي تهجمات عليا والله العضيم اهئ

حكيم قرب ليها كيشوف فيها بغات تسخف بالبكا علاااش الله اعلم .. حط يدو على كتفها و هي تقفز بخوف حتا بعد و نزل على ركابيه قدامها و هي جالسة فوق الفوطوي

– علاش البكاا مالك!! .. راه مغاندير ليك والو بيت هي نشوف ليك رجلييك لي كتغوتي بيها سيتو

سكتات خايفة من عصابيتو لا يضور فيها ولا يسلخها كيف كريمة و هي تمسح عينيها كتوجع برجلها ..

حط يدو على رجلها حيد ليها الصندلة و قاسها ليها منين منفوخة حتا قفزات .. هز فيها عينيه عاقد حواجبو و نطق..

-هنا فين كيضرك؟

اكتافات تحرك راسها بايجاب و التنخصيصة حابساها بزز .. حط ليها رجلها فوق فخدو كيماصي فيها بالشوية و نطق حادر راسو ينسيها

– شنو وقع بيناتكم؟ .. كيفاش حتا طيحاتك

مسحات دميعاتها و حركات شفايفها كتعاود ليه و تغبن و تشرح بيديها و هو مسايرها و عيينيها على رجلها حتا تسمعات طق و غوتة منها تقبات ليه ودنيه بيها

– صاااافي ماوقع والو غير كانت ملوية لييك .. ماكاين باس ..

بدا كيماصي ليها فيها و ساهي فرجلها .. بيضة و قدم معصور فيه الدم مع صبيعات صغيورين مصبوغين بالبوردو .. مرة يماصيها ليها مرة يلعب ليها بصبيعاتها و في القدم حتا كتقفز و تهرب رجلها .. وعى على راسو اش كيدير و هو يهز فيها عينيه حتا تفاجئ بيها كتبكي و حاطة يدها على فمها .. طلق ليها من رجلها و شاف فيها باستغراب

-ماااالك

شهقات و نطقات بصوت خافت: ك كنتي كتهرني اهئ

هز حواجبو فيها جابت ليه التمام بتصرفها لي شافها يقول قتلها .. الوجه حمر بالبكا و العينين فازكين .. وقف على رجليه محاول يغطي البسمة لي تكونات على شفايفو من كلمتها و طلع للفوق كيتمتم بين شفايفو و يقلب على كارو فجيبو يبرد بييه ..

– ناس يطيحو فالصدر و الطروفة و انا طايح فالرجليين وجه الكرفييي تفووو

بقات لتحت مرة تنخصص مرة تسكت مرة تسب فكريمة حتا بان ليها جاي نازل .. داز نن حداها فتح الباب و هي لبسات صندالتها و وقفات كتعكز على الحايط حتا دخل عندها .. بغا يقرب ليها يعاونها و هي تبعد

– قادة نمشي غير خليني

مداهاش فيها و حط يدو على خصرها من اللور شاد فيها و هي غادية كتعكز عليها و الصهدة طالعة معاها .. ما وصلات للطموبيل حتا كانت غطييح ليه تما سخفانة .. ركبها و مشا لبلاصتو مديماري و زاد موصلها لدارهم .. داز على فارماسي شرا ليها بوماض تماصي بيها و مشا ماوقف حتال قدام الباب .. كانت غتنزل و هو يحبسها شاد في يدها

– كنعتاذر على شنو وقع اليوم .. و كنأكد ليك عمرو يرجع يوقع .. نتمنى متشدييش فخاطرك و سمحي ليا على الطيحة لي طحتي .. معرفتش شنو مشات كدير عندك تما .. مع العلم راه مبقا كيجمعني بيها حتا حاجة .. كانت مراتي و طلقنا كل واحد شد طريقو .. و حتا سبب تهجمها عليك نتي بالاخص ممعروفش .. نتمنى تقبلي اعتذاري الغالية

الغالية: ماكاين مشكل .. ماشي شي حاجة .. الله يعاونك

خرجات من اللوطو و دخلات للدار بينما هو كسييرا ديريكت لمكتب المحامي لي كيتعامل معاه

– و مهجمة عليا فالمحل اصاحبييي و قاتلة البنت بالعصااااا بنبقا ساااكت ليها؟

المحامي: الى رفعتي عليها دعوة راه غيتفتحو ملفات اخرين اصاحبي اللهم نهددوها و صافي باش تبعد منك اما ديك الساعة راه غتجبد قضية الخيانة الزوجية و نتا اللول لي غتقاس اصاحبي واخة ماااشي شي خيانة نييت و نتا اصلا ما كانتش عينك فيها .. مي كلام الناس مغنمنعوهش

حكيم: دبا شنو المعموول؟

المحامي: انا نتكلف غير كون هاني اخا حكيم

حكيم: اش بتكلف ديك الق*** راه خااص لي *** من ودنييها عاد تبرد و تشد الارض .. واش كنقول ليك البنت مسكينة مخلات فيها هي اللي نسااات و نتا كتقول ليا بتكلف!! .. هاديك الق**دة باتني نجلسها على القرعة نيييت و تشوووف حكيم دبصح .. مبغاتش تاقى شريييي

محامي: راه الى دعيناها بتبقا تجرجر فديك البنت معانا و طلع و نزل و صافي .. راه تقدر تخلص غرامة مالية و ها هي خرجات

حكيم: واخة مادير والو حتا نعلمك

خرج تاني و رجع للبوتيك .. مشا ديريكت الفوق فين كان مكتب صغير حاط فيه اغراضو .. جبد بيسي و خدم الكاميرا لي دايرها مكاتبانش مغطية .. شغل فيديو ديال النهار كامل كيتفرج فيه بدون ملل حتا وصل للقطة لي دخلات كرينة و بقا متبعها مصغر عينيه حتا كمل .. دوز لسانو على شفايفهو و نطق بخفوت

– هاااكاك العافية شاعلة من عندنااا..

* كتمشي و تجي عليها .. الفقصة و الشمتة خلاتها كترعد .. بزز باش شرباتها دواها باش متشدها شي نوبة اخرى و جلساتها كتهدن فيها و الخرى شاااعلة باغية غير معااامن

جنات: مزياااان تبارك الله .. الق*** بقا لييها شوييي و تصيفطك لقبر و انا مجبدة هناااا مسايقة خباااار

الغالية: و تهدني اجنات متندمينيش حيت عاودت لييك و اصلا راه سي حكيم ماخلا ليها فين تزيييد .. ناري ياختي تسيييف تقولي هزيتي واحد و حطيتي لاخر

جنات خرجات فيها عينيها: هداااك ملي مح*** قدامكم راه بقاااا متبت و مااال كان عليييه يدبح دنمها تم يشرب من دمها يوريها السيييبة فالبلاد ” خبطات جنابها” اويييلي على غدااايدي محاااميين عليييك الباطرونات بزوجات باو يصفيوها لييك و انا مجاايبة للدنيا خبااار ” وقفات كتلبس فسبرديلتها مع السرفيت” ولكن الى بقات فيك يابنتي يا كوريمة راه ماولد فيا با حسن غا الخلا

خرجات من الدار ناوية على خزييت .. و تبعاها الغالية من الشرجم بالتعيااط لكن معااامن هي .. شدات طاكسي و عطاتو عنوان دار كريمة لي كانت عارفة فين ساكين .. حطها قريبة خلصاتو و نزلات كتمشي و تجي و حاضية الباب واش يخرج شي واحد .. و هي في افكارها و سبانها تحطات يد على كتفها .. دارت كافرة على مولاها حتا لقاتو واقف قدامها كيشوف فيها .. هزات حاجبها فيه و بعدات خطوة اللور مربعة يديها

جنات: اش تما اشريف

فؤاد: جنات! فين غبرتي توحشتك .. شحال و انا كنعيط لييك و تلفونك طافي!!

جنات: تؤ لحت نووم و معاها حتا بنادم لي فيها .. درت الجديييد

فؤاد: فهمتش اش كتقصدي؟ .. علاش مبقيتيش عيطتي ليا خليتيني مخلوع عليك

طلعاتو و نزلاتو و شافت فيه باستهزاء: لا بااااينة كنتي مخلوع و بزاف .. و دبا سييير بدل ساعة بخرا قبل منق** معاك السوايع

فؤاد بنرفزة: اش هاااد الكلااام .. علاش كتهضري معايا هكا .. ديك المرة نضتي مشيتي بلاما تقولي علاش و من وراها جاي خوك مهرس ليا نيفي و دبا نتي مطلعة غير بوحدك اش كاين

جنات: واااا لي كاااااين هواااا فرقنييييي ضرب عليااااا عطييييني شبر دتيساااع و فوتني علييييك و دبا بعاااااد مني ولا نجمع عليييك امة محمد

ضربات فيه و زادت ملي بانت ليها كريمة خارجة من الدار لابسة غير بيجامة بيتية و هازة بسطام في يديها .. ما حسات بيها حتا تجرات من شعرها حتا غوتات و لقات جنات في وجهها

جنات: اجيييي ابنت الكلبةةةة باغييين تحاماااو .. بربيييي ليوما يا بيا يا بييكم يا تريكة طلع و هبط .. يا تريييكة ال**** .. جااايين باغييين تستاقواااو على البنت مسيكنة معندهااا صحة لييييكم .. والله اليووووم حتا نبيتك فالصبيطاااار يالخانزة..

طاحت عليها بالضرييب و القميييش و مع جنات تبارك الله وازنة و هازة الخيير دغيا غلبات عليها و دارتها تحتها كتشتف عليها .. غير كتبغي تهز راسها تغطسو ليها بنتفة و الخبييط للراس .. خرجو الجييران يفرقو و مهااا تفرق و هي لاصقة عليها .. لي جا يفرق كتخرج فيه عينيها و و تنهض فيهم يبعدو ..

جنات: قسما بالله و يقرب ليييا شي واحد حتا نطييح عليه الرووح .. وراني بورااااقي نصيفط طاسيلت باباكم فين ترباااو

بردات فيها غدايدها و دات حتا هي شي قميشات في يديها و جهة صدرها لي كانت السورفيت محلولة و ناضت كتحلف عليها بصبعها

جنات؛ و نلقاك مرة اخرى واقفة ليها الى مرديت ضهرك رطب من كرشك

ناضت من فوق السرير شادة تلفون في يدها

– لااا والله منخرج بوحدي .. ياله معايا عفااااك و نتي لي كتعرفييه انا عاد تعرفت عليه

جنات: و اناا مااااالي اختي .. نتي بااك تخرجي معاه انا اش دخل كرموستي بيناتكم غير فهميني

الغالية: و و وراه منقدرش نخرج من الدار بوحدي .. و جات حشومة نقول ليه لا و هو شحال كيعرض نخرجو ندورو فمراكش .. و حتا انا بيت نبدل الجو شوية راه قنطت سيمانة و انا محبوسة تقول تهرست

جنات: شوفي الغالية .. بيتي تخرجي خرجي راه حكييم اصحبتي معرووف مالو علاش باتخافي منووو .. و اصلا انا عيانة بيت هي نغمض شوية..

تكات مغمضة عينيها و الغالية عند راسها تطلب و تزاوك و ترغب .. بزز باش نوضاتها بتكاسل .. لبسات سروال سيرفيت و تيشرت و سبرديلة .. اما لالة الغالية تحط حاجة و تهز لخرى حتا لبسة ماعاجباها .. نلبس هادي؟ .. لا مزويناش نلبس هادي حسن .. لا لا هاد اللون كيجيني مشعشع .. نلبس لكحل حسن .. تؤ كيجيب الشمس و الصهدة .. نلب

جنات قطعاتها مخيخة: وااا زعتورة لبسي جلابتك و زيدي مالنا غادين لعرس .. راه بنتلاقاو هي مع وجه النحس مايجي يطل علينا اش لابسين حتا يعواج ليه العنق

الغالية: هههه ياختي طوييل خاص حتا نهز فيه راسي عاد نهضر هههه

هزات كيف قالت ليها جنات جلابة فالاصفر و كيف ديما مخزانية .. بخياطة خفيفة و شالها .. رشات ريحتها الخفييفة الى مقربتيش ليها متشمهاش و خرجات هازة صاكها فيه التيلي و البسطام .. شدات في جنات لي باين من وجهها خارجة بزز و ماعندها خاطر لوالو .. تمشاو بين الازقة حتا وصلو عندو لقاوه واقف قدام اللوطو ديالو .. سروال جينز ازرق و تيشرت ابيض مع نضارات شمسية و ساعة فضية في يدو .. ابتاسم ليهم ملي وقفو قدامو و مد لجنات يدو

– عزري الدوار .. مخرجينك بالسييف

جنات: بحال الى علمك الله

شاف في الغالية لي وجهها مزيناه ابتسامة خجولة و يديها رابطة بيهم جنات فجنبها: شنييولة بخير

الغالية: الحمدلله ههه نتا اش خبارك

حكيم: صافا .. ياله نتحركو من هنا..

مشا لبلاصتو ركب و سبقات جنات ركبات اللور .. بغات تركب حداها الغالية و هي تخرج فيها عينيها

جنات: ركبي القدام اويلي .. نالو شيفور تاعنا نركبو اللور بزوج .. سيري سيري حسن ليك

خلاتها غير كتشوف و سدات عليها الباب .. حكات الغالية جبينها و حلات الباب ركبات جنبو بابتسامة مجاملة..

* في ريسطو هادئ بالوان مبهجة و موسيقى هادئة .. ف احد طبالي كانو كل من حكيم .. الغالية و جنات .. كيتبادلو اطراف الحديث و يضحكو مع بعض..

– فراسك كانت بتدعييك

جنات: اكبر ما فخيلها تركبو .. اش باتدي مني .. نخلص على اصل مها غرامة و هانا حرة

حكيم: دخلتي الفلوس الشيطانة وليتي باغة تفرعني

جنات: انا مكنجبد حد مكنهضر حد .. مي لي قلب عليا يلقاني ..

الغالية: هضرت معاها تجلس و مابغاتش خلاتني كنعيط ليها و زادت

وقف سيرفور عليهم و كل واحد طلب شنو ياكل من غير الغالية لي مقشبلات والو فداك المينو .. بقات غير كتشقلب فعينيها .. شافت فيها جنات و طلبات ليها بحالها

الغالية: غنقلب على شي سونطر للغات .. بغيت نتعلم شوي

جنات: كاين واحد كنت كنمشي ليه زويين و دغيا تهزي اللغة .. نهضر مع بابا يقيدك

الغالية: لا بيت نتقيد بوحدي .. عمي دار معايا فوق مزيان الله يجازيه بخير

جنات: عادي هو حاسبك بحالي غير نتي لي كترات فيك الهضرة

الغالية: واخة هكاك بيت ندير شي حاجة راسي على الاقل

حكيم: معليش .. انا نقلب ليك على شي واحد يكون زوين .. ماقلتيش ليا .. واش عائلتك مساكنينش فمراكش .. كاينين فمدينة اخرى؟

تجمدو ملامح الغالية و الضحكة لي كانت على وجهها اختفت مجرد دكر عائلتها .. ميلات وجهها للجنب و عينيها فيهم لمعة انكسار و خدلان و شوق .. شاف هو باستغراب في جنات لي حتا هي حولات عينيها للغالية و سرطات ريقها كتحك على عنقها بتوتر

جنات: وليت كنعيا فدام السونطر دالزعتر .. بضرب ليا في الخوى و نجي نخدم عندك ف اوطو اييكول

فهم راسو و جمع و طوا في محاولة يبدلو الموضوع: قلتها ليك شحال من مرة .. محتاح لي يقري و راه خلصة مزيانة و التوقيت مناسب

جنات: صافي نكمل هاد الشهر و نجي عند الزين المسرار

تحط ليهم الاكل لي داز في جو متوتر و صمت من طرف الغالية .. تقلب ليها الجو في ثامية وحدة .. كانت جاية فرحانة بالخرجة و باغة دور و تكتاشف .. ولكن دبا بغات غير امتا ترجع فحالها باش تسد عليها فبيت و تخوي قلبها في البكا..

خرجو من تما و وقفو عند اللوطو .. هزات جنات تلفونها قلباتو و شاف فيهم كتفرنس

جنات: هي سيرو نتوما كملو خرجتكم .. انا بنمشي نشوف واحد الصحيبة دايرة معاها دبا

الغالية: صافي نمشي معاك

حكيم؛ فيين بتمشي معاها .. انا خويت النهار باش نخرج و نتي بضربيه ليا فالزيرو!! .. سيري اجنات الله يعرضك السلامة ..

زادت و خلاتهم شي كيشوف فشي .. هي حادرة راسها كتلعب فسنسلة ديال الصاك و هو ابو عيوووون سكاناها كاااملة من ساسها لراسها .. عض على شفايفو حابس الضحكة كيشوف فيها متبعة جنات بنضراتها و معوجة فمها بحركة طفولية .. جر ليها الصاك حتا شافت فيه و غمزها كيفرنس

– و دبا عاد بتحلا الخرجة ههه ركبي ركبي

الغالية: ععلاش فين غاديين؟ .. صافي عييت غير ياله نرجعو

حكيم: ياله ركبي نرجعك بغيتي ترجعي على رجلك؟

ساطت من مناخرها و حل ليها الباب ركبات .. مشا هو لبلاصتو و ديمارا غادي بين ازقة مراكش الحمراء حتا وقف فجأة الشيء لي خلاها تلفت فيه .. دور راسو للكوسان اللور و هز صاك مدو ليها

– هذا ليك .. نتمنى يعجبك و تكوني نسيتي شنو وقع اخر مرة

فتحاتو بفضول تشوف شنو فيه حتا كتفاجئ بالصباط و البوشيط ديالو لي كانت شافت قبل و عجبها

الغالية: ولكن .. ولكن باش عرفتي بلي كان عاجبني

حكيم مصطنع الدهشة: بصح!! .. كان عاجبك!! .. هي القلب على القلب هههه

الغالية: ههه شكرا .. ولكن مايمكنش ليا ناخدو

حكيم؛ و علاش .. شنو السبب

الغاليا: حيت مكاين حتا سبب .. اصلا انا نسييت شنو وقع داك النهار مابحتاجش تزيد تعتاذر

حكيم: مكنرجعوش الهدية الغالية .. شديه و ديك الساعة ديري بيه لي عجبك .. بغيتي تلبسيه مزيان مبغيتيهش لوحيه و صافي المهم ميرجعش .. و الى معجبكش عطيه لشي واحد

الغالية: لا زويين اصلا كان عاجبني و كنت غنشريه ولكن ..

حكيم؛ مكاين ما ولكن .. ياك كتعتبريني صديقك ايوا عادي بين الاصدقاء .. ياك بعدا صاحبك صاحبك؟؟

حمارت تاني و خضارت مخرجة فيه عينيها و عاضة على شفاهها تحتانية

حكيم: زعمة بغيت نقول صديقك .. اصدقاء .. امي .. فرييند .. ياله لبسي يشوفو صديقك كيف جاك لبسي .. نعرف واش عيني ميزاني ولا كنزكل الحساب

ما خلا ليها متقول .. خرجات ليها الضحكة بلا هواها و هي كتشوف فيه مراقبها و حاضي ليها الصباط حتا حيدات صندالتها و لبساتو قدام انضارو

الغالية: ههه جا قد رجليي .. كيف جاني

حكيم: غزااال بحال مولاتو ..

الغالية: شكرا ههه

حكيم: هانية ازين ديالي ” شاف عينيها بغاو ينقزو عليه و هو يضحك ” زعمة زيين ديال صديييقها .. اصاحبي مالك بتاكليني هي بعينيك راه عادي عادي بين الاصدقاااااء الفنووون

بغا يجيب ليها التمام بهضرتها .. ماكيجي يصلح كلمة غير بكفس منها .. مسحات على وجهها مانعة الضحكة تخرج ليها و هو كيشوف فيها كيفرنس

بغا يجيب ليها التمام بهضرتها .. ماكيجي يصلح كلمة غير بكفس منها .. مسحات على وجهها مانعة الضحكة تخرج ليها و هو كيشوف فيها كيفرنس

حكيم: هي خرجيييها نشوفو غير سنانك و نسلمو عليهم ههههه ولا محجباهم حتا هوما

الغالية: هههههه واش نتا ديما هكا هههه لي شافك يقول بعقلك ههههه

حكيم: الى بقيتي معقل والله تا يهرب لييك دييما تولي باغيه و متصيبو .. اللهم طلقيها تسرح و ربي عوييين .. فين تبغي تمشي؟

الغالية: معرفتش ههه عمري تساريت مراكش

حكيم؛ تي جاااالسة عند السبعة رجااال و متسرايها كاملة؟ تا لهادي لااا .. نزلي نضربو دويرة هنا و نكملو اليووم بترجعي سخفانة

نزلات كتفرنس و عاجباها الرفاقة معاه واخة هضرتو كتسالي معاها .. زادت قدامو كتشوف فالصباط و تضحك عاجبها و فرحانة بيه و هو وراها كيفصل فيها انش ب انش حتا تلفتات شافت فيه

– زيد قدامي راك نتا لي عارف الطريق ماشي انا

قرب لجنبها كيتمشا معاها بنفس الريتم و هي تهز فيه راسها كتضحك

– بالطالون و مزال خاص نهز فيك راسي ههه

حكيم: ملي كانو الناس كيطوالو نتي فين كنتي

الغالية عوجات فمها تاني و نطقات بهمس: كنت هازة مسؤولية دار على كتافي

حكيم: كيفاش؟؟

الغالية: والو .. شحال فيك فالطول

حكيم: زووج ميترو

الغالية: ويلي لااا .. مايمكنش

حكيم: هههه و علاش مايمكن هههه .. فيا 1.98 قولي زوج و صافي هههه

الغالية: طوول بلا عقوول هههه

حكيم: هانتي كتحكريني الفنووون راه بعقلي و شااارف مبقيت صغير

سكتات هي كتضحك عليه و هو متبع ليها العين و حاضي ضحيكتها كتبان زويينة و هي ضاحكة .. السنان مستفين و الفم حميمر من عند الله .. غمض عينيه و رجع حلهم و دور راسو كيتمتم غير بوحدو

الغالية: شنو قلتي؟

حكيم: واالو اصحبتي هي زيدي

ضورها نييت فالمدينة و مخلا فين داها .. قسحها الصباط و حطاتو لبسات صندالتها .. و عطاوها للدوران .. ماحساتش بالوقت ولا العياء معاه .. مكايسكتش من الهضرة مرة يحشمها .. مرة يضحكها .. مرة يعصبها .. مرة يقلقها .. حتا طابو ليها الرجليين و عينيها ولاو يتلصقو .. صونا تلفونها و هي تهزو جاوبات

جنات: يا السااايبة هادشي غي مبغيتيش تخرجي معاه و شحال بقيتي اما كون خرجتي بخاطرك تباتي نييت

الغالية: فييينك ياكما مشيتي للدار

جنات: انا كنتسناكم فكافي *** جيو عندي نرجعو راه غذا خدامة فالصباح بيت نرتاح

الغالية: واخة هاحنا جايين

عطاتو العنوان و مشا ليه نيشان .. لقاوها جالسة شادة كافي نواغ و كتسناهم .. غير شافتهم خلصات و ناضت ركبات اللور كتنفخ

حكيم: مالك كنفخي كي الرابوز

جنات: خاصاني حتا انا طموبيل .. غذا نطلب سيف الدين يديني نشوفهم..

حكيم: غير خليييه مرتاح انا نديك عند واحد السيد صاحبي دكشي عندو زييين

جنات: عارفة الزيين ديالك بتديني عند شي واحد يصرفقني بشي تمن نييييت

حكيم: ههههه مالك كتسبقي العيييب اوردة القردة هههه راه هو نيت لي خدا من عندو سيف الدين اللوطو هههه

جنات: انا بغيت كليو في دم لغزال .. زوينة و انيقة و ديال لبنات

حكيم: ان شاء الله .. جامعة شي فليسات زعمة؟

جنات: ماشي بزاف هههه .. الخدمة لي كنت نخدم فالصيف و ديال العام لي فاات و هاد العام و التدويييرة ديال عمامي صافي هدشي لي جامعة ههه .. مي غيزيدني بابا و خويا ضروري ههههه

حكيم: هاي هاي على جنية بتدير حتا هي طموبيل و تحيح علينا

الغالية: هادشي الى خلاتها خالتي هههه راه فينما كتهز طموبيلت عمي كتبدا تدعي و تطلب مايوقع والو هههه عرفاها الكوارت تابعينها فينما مشات

جنات: غي كضلموني لاهيلا انا ضليييفة .. احححم .. تلاقيت ب فؤاد ليوم

وقف اللوطو على غفلة و تلفتو بزوج كيشوفو فيها و هي جالسة مربعة يديها و كتسبل فعينيها

– مالكم؟ راه ماوقع والو والله .. غي تخاصمنا و صافي

حكيم: مشيتو عندووو يالمدلووولة

الغالية: رجعتي معاااه يا قليلة النفس

جنات: لوااااه البعااابع .. راه هو لي تبعني با يهضر معايا و مبيتش .. مالكم ضرتو فيا بحال الى مكتعرفونيييش … صااافي هداك السيد خرجتووو من بالي شحااال هذا .. و اصلا هو كان باغي حاجتو و صافي .. انا مغانليييقش ليه و هو مغايلييقش ليا .. و سدات مدام..

جنات من طبعها الى نفرات شي حاجة مكتبقاااش دور بيها واخة تغمسيها ليها فالعسل متبقا تحملها .. الحاجة واخة تكون متعلقة بيها بجنون .. اينفوا كتخرجها من عقلها كتعييفها و متبقاش تشوف جيهتها .. و هدشي لي وقع حتا مع فؤاد .. يمكن كلام خوها قدر يفيقها ولو شوية و تشوف وجه فؤاد الحقيقي .. علاش مبغاش يخطبها؟ .. علاش كل مرة جايب ليها عدر في شكل ؟ .. ياك الدار و ساكن .. ياك الخدمة و خدام .. يام الصبر و صابرة معااه .. دكشي لي كيطلبوه لبنات مطلباتوش .. طلبات غير عيشة على قد الحال و يكون هو معاها .. شنو كيخلييه كل مرة يتهرب و يتحجج ..

طلبات غير عيشة على قد الحال و يكون هو معاها .. شنو كيخلييه كل مرة يتهرب و يتحجج .. حلااات عينيها و شافت الحقيقة لي كانت هي بنفسها كتغادى عليها و مباغياش تشوفها .. حسات براسها رخسااات راسها و نقصات منو بلا قياااس .. الف واحد يتمنى غير كلمة منها و هي تابعة واحد زايد غير في عذابها .. ضربات عليه من حياتها و رسمات مسار لمستقبلها واخة جاتها صعيبة انها تخلى عليه ولكن ميمكنش تبقا هاكا معاه طول حياتها …

حطهم حدا الدار نزلو مشادات كيف ديما .. طلعو و كيسمعو صوت الشعبي على الجهد .. دخلو للصالوم لقاو اللا خديجة محزمة و عطياها للشطيح و الرديح .. ضحكات جنات من الدخلة و صفرات عليها

جنات: هديييك هديييك اخديديج ههههه

دخلات حتا هي كتلوز و تشطح لايحة شي هم ولا غم و تحزمات مع مها .. اما الغالية اكتافات تصفق ليهم و تضحك .. متعرف لشطيح منين تجيه .. بررردو غدايدهم نييت و جلسو سخفانين حدا الغالية كيضحكو و يقجمو ..

جنات: ههههه تفكرت الكامانجة و الدربوكة هههههه

خديجة: ههههه قولي قولي كيف كيديرو ههههه

جنات: الكامانجة كتقول ليهم ” كتعيب بالحركات” فين نديرو فين نديرو هههه و الدربوكة كتجاوبها ” غلضات صوتها ” فداك ** فداك ** هههههههه

الغالية: هههه والله مكتحشميي هههه حشووومة

خديجة: تي هادي راه متحشم مترمش ههههه نوضو تعشاو هذا وقت سي حسن يدخل اما سيف الدين موحااالش باينة مقصر فشي قنت

الغالية: انا شبعانة غير بالصحة

جنات بهمس: اممم عشاااك داك بلارج عاد جيتو احياني عليكم كتغفلووو

الغالية: هههه نتي لي مشيتي و خليتينا .. دازت خرجة واعرة

جنات: و بصحتك ازين

ناضت الغالية دخلات لبيتها بدلات حوايجها و طاحت تنعس عيااانة مسخسخة اما جنات بقات تما تعشات مع باها و مها و قابلات التلفون كتميساجا مع صحابها من بينهم حكيم

جنات: سييف معاك ياك

حكيم: وي لاش بيتيه

جنات: غي سولت .. فين مشيتو بعدا شي بواط تاني

حكيم: وي كون جيتي تفوجي تا نتي

جنات: انا اش بندير تما و نتوما مشيتو تزهاو ياك؟

حطيم: مشينا ن**** ههههه سيري تنعسي ابنتي هادشي خايب عليك

جنات: ايوا الله يمسخكم صبا صبا بيتو ماينوووضش ليكم و يبقا راكد يالخوانز طفو عليكم ياله

سدات تلفون و ناضت كتبركم بدلات حوايجها و تخشات حدا الغالية معنقاها و كتفكر حتا غفات

كيف العادة بلباسها المحتشم و المحترم حطها الطاكسي قدام البوتيك .. نزلات كتقاد فالفولار ديالها حتا وقفات قدامها سلمى بعينين مغرغرين و كتفرك في يديها

– ختي الغالية كيف بقات ليك رجلك شوية؟

الغالية: الحمدلله و نتي لباس عليك

سلمى: ما لباس والو اهئ .. موسيو حكيم جرا عليا من الخدمة اهئ اهئ .. والله ماقصدت انا شي حاجة داك النهار اهئ اهئ كان كيحساب ليا بصح نيت مرتو اهئ

الغالية: غير بالشوية عليك اختي والله مافهمت شي حاجة

تفكرات سلمى اخر لقاء ليها مع حكيم و بدات تعاود ليها

🔙🔙

حكيم: شنو وقع ملي جات كريمة

سلمى بدات كتعاود ليه بالتفصيل و بلا كذوب

حكيم: واش نتي مكلخة ولا كتكلخي عليا!! كون كاااانت مراتي بتسولك علياااا .. و علااااش تا تقولي ليها الغالية صحبتي ولا زممممر .. جريي على المرض و هنينا!!!

سلمى بخوف: ولكن انا يسحابلي مرتك اسي حكيم و قلت ليها غير اخر مرة قبل متخرج هضرتي مع الغالية

حكيم بلا مبالاة تم طالع الفوق: ايوا حتا نتي تبعيها دبا .. خلاصك غتشديه و الله يعاونك

طلع و خلاها مصدومة كيفاش جرا عليها .. و هي لي كانت خدامة من نيتها و ديما مواضبة على الوقت و الخدمة مزيانة .. طاحو دموعها كتنخصص و بقات فيها الخدمة لي خسرات بسبب بسيط .. خرجات كتبكي و تحسر على خدمتها و حاولات شحال من مرة تهضر معاه ولكن مكيخليش ليها الفرصة..

🔚🔚

الغالية بملامح حزينة: تأ مابغيتهاش ليك والله .. و انا ماكانت في خباري حتا حاجة اختي

سلمى: عارفة اهئ .. عافاك بغيت منك غير طلب واحد الله يخليك .. حاولي تهضري معاه عفاك انا عاجباني الخدمة عندو و راه كنصرف على عائلة مبغيتش نخسر خدمتي معاه

الغالية: ولكن .. ولكن حتا انا راه غير خدامة بحالك راه هو مول الشيء معندي مندير ليك والله

سلمى شدات ليها في يدها بترجي: عفاك الغالية .. نتي كيسمع ليك و كيدير بهضرتك اختي .. عفاك راه مكنلقاش كيفاش نهضر معاه

الغالية بقات فيها و حكات على عنقها بتوتر: فففف واخة انا نهضر معاه ولكن الى مبغاش معندي مندير اختي

سلمى: واخة شكرا انا نتسناك هنا

دخلات الغالية كتفكر شنو تقول ليه و نفسها مضيقة عليها خايفاه يقمعها ولا يقول ليها شي كلمة .. هزات عينيها و هو يبان ليها جاي نازل من الفوق بلباسو البسيط و الضحكة ممفارقاش وجهو .. غمزها حال يديه و جاي جهتها كيفرنس..

– صحبتييي الغاااالية جااات ههه على سلامت الفنووون

الغالية حمااارت و بدات كضور فعينيها و تعض في شفايفها: راه دبا في بلاصة الخدمة اسي حكيم خلي بيناتنا احترام عفاك

جمع الضحكة و لبس قناع الجدية و حرك راسو: اييه واخة اللا الغالية .. سيري قابلي خدمتك

الغالية: ممكن نهضر معاك عفاك فواحد الموضوع كيتعلق ب سلمى

حكيم: هدشي مداخلش في الخدمة .. سيري قابلي خدمتك و فوتي عليك دكشي

زاد و خلاها واقفة كترمش .. معطاهاش وقت حتا تهضر خلاها مصدومة .. معجبهاش الحال و مبغاتش تسرط ليها القمعة لي قمعها .. دخلات لبلاصتها مقابلاها و حرقة النخال لي نخلها مبغاتش تبرد .. ما كملات سوايعها حتا غفر ليها الله الذنوب .. خرجات حادرة راسها كيف ديما و كتمشى في جنب الطريق و تسنا شي طاكسي يدوز حتا سمعات الكلاكصون و هي تلفت .. شافت فيه و رجعات كملات طريقها ببرود بحال الى مكتعرفوش و هو كيكلاكصوني عليها تركب حتا عصباتو و نزل عندها واقف قدامو

– الغالية! .. ركبي نوصلك الليل هذا

الغالية: لا اسيدي عندي رجلية و الطاكسيات عطاهم الله

حكيم: و غير ركبي عرفناك مزحافاش .. زيدي نوصلك و نهصرو علاش كنتي باغة تهضري

مهضراتوش و خلاتو تابعها كيهضر غير بوحدو حتا تعصب و هو يجرها من دراعها حتا تلفتات .. مع ضارت هزات يدها و دفعاتو من صدرو ناترة يدها و مخرجة عينيها فيه

– متحطططططش فيا يديييك كتفهم!! ماشي تكلمت معاك غتبغي تضسر عليا و دييير ليا دوك الفعايل .. انا ماااااشي لي نضسر عليا شي واحد كيفما بغاااا يكون .. هضرت معاااك بصفتك صديييق ولاد خالتي لااا غييير .. ولكن ندمتيني نيييت علاش تا هضرت .. و حتا ديييك الخدمة لي مخلياك كتعالا عليا و داير فيها السي سيد رببببح بيها معندي مندييير بيها .. ايييه انا بنت العروبية و عقليتي قديمة و خايبة و ممزياناش ولكن محتااارمة راسي اسي .. و دبا الله يخليك عمرك تعرض ليا فطريقي ولا راه غنوليو فشي حاجة ما كتر

زادت و خلاتو مصدوم فيها .. متبع ليها العين و كيسترجع في كلامها في دماغو ..صدماتو و خلاتو كيراجع في نفسو .. ركب سيارتو و زاد .. بينما هي تمشات بعض الوقت و شدات طاكسي وصلها حتال قدام الدار .. دخلات لقاتهم مجمعين بيناتهم .. عائلة مع بعضها .. طاح عليها سؤال واحد هي شنو كدير بيناتهم .. علاش مزال جالسة معاهم .. تبقا حتا يهزو ليها حوايجها و يقولو ليها تقادا صبرنا معاك؟ .. تبقا حتا يجريو عليها بخاطرهم؟ .. تبقا وسط ناس ماشي ناسها ..

تبقا حتا يجريو عليها بخاطرهم؟ .. تبقا وسط ناس ماشي ناسها .. واسط ناس رغم قرابة العائلة الا انهم مختلفين على بعضهم .. كل واحد و كيفاش عايش و كل واحد و كيفاش كبر .. و كل واحد و بيئته ..

سلمات عليهم و دخلات لبيتها كتفكر و تفكر و شي حل ما وصلات ليه .. راسها و ماقال ليها .. ناضت حيدات دوك الحوايج لي كانت لابسة بدلاتهم بلبسة بيتية و جبدات فاليز صغيرة كتجمع فيها بعض من ملابسها و اغراضها .. كملاتهم و هزات تلفونها كتصوني و تعاود حتا سمعات الرد..

* شرقات الشمس معلنة على بزوغ يوم جديد .. فاقت جنات ناشطة و فرحانة لبسات حوايجها و مشطات شعرها و مشات عند الغالية كتفيق فيها بزز

– فيقي النعاسة راه مشا عليك الحال للخدمة .. و خاصك تمشي معايا نشوف الطموبيلات لي بغيت .. و ياله نووضي براكة من الكسل

الغالية: غير سيري اختي مافياش و مبغيتش نخرج

جنات: لا ياله معايا عفاك على قبلي بغيتك تشوفي معايا دكشي و نوصلك حتال خدمتك غير ياله

بقات كتقنع فيها و ناضت دارت ليها الخاطر و لبسات حوايجها بغير نفس خارجة بزز .. ركبو طاكسي لي كان عند الباب و توجهو للمكان فين كاينة لاجونس .. صونات على حكيم يخرج عندها و دكشي لي كان .. بان ليها جاي جهتهم سلم على جنات و دار بحال الى هي مكايناش معاها او نكرة ، مجهولة .. دخلو كيساريها وسط السيارات و كل وحدة و تمانها و هي جنونها بغات غير كليو في دم الغزال .. قلبات عليها و تسارات مزيام فديك لاجونس حتا شافتها و هي تمشي كتجري جهة ااطموبيل كتقيس فيها و تشوف و تدور بيها حتا قفزها صوت من وراها .. صوت ماشي ديال حكيم حيت هداك حافظة ليه صوتو

– عجباتك هادي

تلفتات تعرف شكون لي كيهضر معاها و هي تشوكا فيه .. واقف قدامها بلباس رسمي كيف كيعجبو يلبسو و شعرو مرجعو اللور مع عينين عسليتان بشفار طوال و حواجب كتيفين.. اللحية مطراسية سوداء كسواد الليل و فم صغيور كيحركو و هي مسامعاه شنو كيقول حتا نغزاتها الغالية من الجنب

– تكلمي للسيد راه كيهضر معاك

جنات: هاء .. وي موسيو مسمعتكش؟

– كنت كنشرح ليك على الطموبيل سيتو مدام .. عجباتك هادي؟

جنات: وي زوينة هي علاش كنت نقلب

– مرحبت الالة .. تقدري تقلبي الى عيميك فشي حاجة اخرى

حكيم: عاش من شافك اخويا فاتح .. امورك هاانية

فاتح: اهلا سي حكيم لباس؟ اش خبارك اصاحبي غبورات هادي

حكيم؛ غير مع الخدمة و صافي ” شاف فجنات” عجباتك هادي اجنات

جنات كتهضر و عينيها على السيد : وي هي لي كنت باغة

فاتح: مرحبا امدام جنات نتمناو نكونو عند حسن الظن و النية و متلقاي معانا حتا اشكالية

جنات: الله اودي .. راك من معارفنا و تقة

حكيم: كتعرفو بعضكم؟

فاتح خاشي يديه فجيوب السروال و عينيه متفحصينها من راسها لرجليها: و شكون مايعرفهاش! .. من غير انها منخارطة في مجموعة من الجمعيات و كنشوفها تما .. راه اخت صاحبي اولا؟ ” بنوع من الاستفزاز” شوف هي واش باقة كتعرف شي واحد ولا نسات

جنات بملامح جامدة: لا مناسياش .. صحاب خويا كاملين كنعرفهم و الله يعمرها دار

حكيم: ما علينا .. الى عجباتك صافي نتافقو على شي لاخر

جنات: اييه مزيانة .. خاص يجي معايا سيف الدين ولا بابا و نكملو الاجراءات

حكيم: اوكي شوفيها هاني جاي .. نجاوب على تيلي و راجع

خرج حكيم لبرا و الغالية مشات كضور و تستكشف فالسيارات مكاين غير لفرييع .. اما للا جنات و سي فاتح بقاو شوف فيا نشوف فيك اطاجين الحوت ..

فاتح بنضرة متفحصة متبعها: مزال تحت جناح باك و خوك واخة تزوجتي؟

جنات:و شنو فيها؟ .. ياك غير بابا و خويا ممشيتش عند البراني؟

فاتح باستهزاء: هي راجلك مافيدوش .. المراة ملي كتخرج من دار باها مزوجة كتخرج حتا من تحت مسؤوليتو باش ترجع تحت مسؤولية راجلها اولا؟

جنات رجعات حمرا و شي حاجة حرقاها في صدرها: و شكون قالك خرجت من تحت يديهم؟ شكون قاليك تزوجت؟

فاتح هز فيها حواجبو بتعجب و عوج فمو بسخرية: على حسب كلامك اخر مرة كنت نقدر نشوف ولدك بين يديك دبا و راجلك لي جاي معاك ماشي بوحدك.. ولكن وقع العكس .. علاش زعمة؟ .. باقي عاقل على كل حرف قلتيه داك النهار.. يعني دبا غتكوني ولدتي على حسب هضرتك ولكن مبان ليا والو

بهاد الكلام لي قال و كأنه صمقلها .. حيدات الشعر على عينيها و حطات يدها على عنقها كتحركها كأنها تخنقات و نطقات كتشوف فيه بتمعن

– كتشفا فيا؟

قبل ما يجاوب كان وقف عليهم حكيم .. هضر معاه و اتافق يجي عندو سيف الدين لي عاد تكلم معاه باش يكملو الاجراءات و خرجو من تم .. لعب ليها حكيم في شعرها بحال شي طفلة صغيرة و درعها من كتافها

– مال الزين ديالي .. عاد كنتي فرحانة

جنات: لا والو .. علاش مقلتيش ليا غنجيو عند فاتح

حكيم: مايصحابليش كتعرفيه .. ركبي نوصلك

و تااني مرة غيهضر و كأنها مكايناش معاهم .. كأنها حايط او غير مرئية .. عضات شفايفها لتحتانية و يديها بكترة ما فركاتهم رجعو حمرين .. مكرهاتش تشق الارض و تدخل فيها ولا هاد التعامل الجديد لي عاملها بيه .. متجاااهلها نييت و عاطيها النخال .. وقفات حدا جنات لي نطقات بصوت مخنوق

– لا انا غنمشي بوحدي .. عفاك وصل غير الغالية في طريقك

حرك راسو و فتح ليها الباب تركب .. شافت في جنات و نطقات بيناتهم

– فين غادية نتي؟ .. ياله نرجعو بزوج

جنات: بيت نقدي شي غرض و نجي غير سيري

ركبان بقلة حيلة و تكمشات في بلاصتها .. عرفات راسها غالطة فحقو و مكانش عليها تهضر معاه بديك الطريقة .. كان ممكن تهضر معاه غير بالسياسة و تشرح ليه شنو كاين .. بلا داك الغوات و ديك الهضرة الزايدة .. مسحات على وجهها كتشوف فالزاج بينما هو ركب و كسيرا مكايشوفش جهتها حتا وقف امام كافي و حيد السمطة

– نزلي

شافت في جنابها بان ليها وسط المدينة و هي تنزل معولة تشد طاكسي يوصلها حتا وقف قدامها حاني راسو عندها

حكيم: اجي بغيتك فشي حاجة

الغالية: شنو؟ .. ياك لباس

حكيم: غي زيدي و غتفهمي .. بلاما تخلعي اخر مرة بنقرب ليك هي هادي غير توكلي على الله

زيرات على صمطة دالصاك و تبعاتو كتشوف فيه غادي مجبد كيف الليل .. هاز تلفون كيهضر فيه و اليد الاخرى سوارت الطموبيل .. دخلات معاه و تاجه لطبلة كان جالس فيها رجل يكون قدو في العمر .. شاد كافي كيرشف منها و بعض الاوراق قدامو .. سلم عليه سلام رجولي و جر ليها الكرسي حتا جلسات عاد جلس هو جنب السيد

حكيم: المهم هادي هي البنت لي تكلمت معاك عليها .. بغات تعلم اللغات و تبدا من الزيرو .. يعني غتبدا من الالفابي و هي طالعة ..

السيد: مرحبا امدام .. المهم هادو بعض الامتحانات باش نعرفو المستوى ديالك فاللغة و نشوفو فاش من كروب غنديروك

حكيم بنضرة من نيتك: قلت ليييك بنبدااا من زيييرو .. و تبت معانا اصاحبي اشمن امتحان ولا نم ..

سيد: واخة واخة كنعتاذر .. المهم امدام غنبداو معاك من الاول و نتي اختاري الايام لي مناسبينك باش تجي .. و اللغات لي نتي باغة تعلمي

الغالية بحرج: شكرا .. ولكن انا مبقيتش

قاطعها حكيم بجدية: كاين تخفيض بالنسبة للناس لي غيدخلو فهاد الشهر .. و حتا السونطر مزيان و دغيا غتعلمي اللغة و بسهولة

الغالية: واخة هكاك .. كنعتاذر منقدرش نتقيد دبا بالاخص

نغز حكيم السيد و لاح ليه شي كلمات بالفرونسي لي ما فهمات فيهم الغالية تا وزة

– و نزيدك الالة .. الشهر الاول مجاني .. الى عجبك الحال غتكملي معاهم سينو تقدري تنساحبي فالشهر جاي

حكيم: حتا هذا نضر .. تسجلي دبا و الى معجبكش خرجي

قنعاتها هضرتو و بقات كتخمم الى تسجلات دبا من هنا لشهر تقدر تلقا خدمة اخرى و تخلص الاشهر جاية .. و حتا الفلوس لي عندها مزال مقاستهمش و عمرها خسرات منهم شي حاجة غيعاونوها .. ابتسمات ليهم و نطقات

– واخة موافقة .. و فين جا هاد السونطر

السيد: مبعيدش الالة .. سي حكيم غيوصلك ليه

تافقات معاهم و ناضت منساحبة من بعد ما شكراتهم و خرجات فرحانة مشات للدار .. تلفت حكيم شاف فالسيد و جبد بسطامو هز منو شي فلوس

– هادو ديال الشهر الاول .. و يا وييلك و تعرف شي حاجة .. نعلق مك من حلاقمك .. الاشهر جاية غتشد من عندها دكشي باش تافقنا و انا غنكمل لييك الخلصة .. و نعرف راه وصلااااتها الخبار نقبرك في بلاصتك

سيد: و صافي كون هاني اصاحبي كلمة وحدة قلناها .. ولكن بغيت هي نعرف علاش داير هادشي كامل و زايد كاذب على البنت ..

حكيم: كملتي خدمتك؟ .. خديتي فلوسك؟ .. نوض جمع الوقفة قابل شغلك

وقف الرجل كيضحك و حط يدو على كتف حكيم: الله يعاون ابا حكيم و خلص معاك هاد القهيوى

* كيف خرجات من الكافي شدات طاكسي حطها عند الباب .. دخلات و هاا الفرحة بانت في وجهها .. طارت على مها تعنق و تبوس و تبكي و تضحك .. مخلطة عندها القضية .. ما خلات راسها ولا يديها ولا حنوكها كالتها بالبوسان و التعناق .. و خديجة كتشوف فيهم و تضحك .. جلسات حدا مها معنقاها و تبكي و في فمها غير ” توحشتك امي” .. بقاو شحال و هوما معانقين الغالية تبكي و رتبحة تمسح ليها .. لقاتها على سبة نييت دغيا طاحو دموعها و قلبها عامر بغات غير علامن تخوييه .. مالقات ما حسن من مها هزات تلفون فالليل صونات عليها تجي تشوفها و تجلس معاها .. و ماكان من رتبحة غير تلبي طلب بنتها و تصبح فدار ختها ..

خديجة: و براكة من لبكا ابنتي راك طيبتي دوك العوينات .. ها ميمتك حداك دبا مسحي دموعك الله يرضي عليك

رابحة كتمسح بقايا دموعها: من صغرها و هي بكاية ههه راه قلبها هشييش دغيا كطيحهم

خديجة: بحالها بحال جنات ههه غير هديك عندي شويطينة وقت لبكا بكا و وقت تخراج العينين تحدهم ليك هههه

رابحة: الله يرضي عليها هديك هي لي نافعة فهاد الوقت .. فين هي مشفتهاش

جنات: كنا بزوج راه شافت الطموبيل لي بغات و من بعد مشات تقدي شي غرض غير شوي و هي هنا

ناضت خديجة لكوزينتها توجد لغذا لختها و خلات البنت و مها يهضرو على راحتهم و يحيدو وحشهم .. تكات الغالية على حجر مها و باست ليها يدها

– با لباس و الدراري لباس عليهم

رابحة: كلشي بخير ابنتي .. نتي كيف دايرة مزيانة .. مناقصك والو

الغالية: مناقصني والو الحمدلله .. خالتي و عمي حسن دايريني بحال بنتهم والله كيف كيعاملو جنات كيعاملوني .. الله يجازيهم بالخير عمري سمعت منهم الكلمة الناقصة .. ولكن ناقصيني عائلتي اهئ .. بغيت نمشي لدارنا حداك و حدا با و خوتي اهئ عمري ننسا الخييير لي دارو فيا اهئ .. الوقت لي كان خاص با يهزني و يضمني يداوي جروحي لاحني و تبرا مني اهئ اهئ مالقيت غير خالتي و راجلها الله يطول في عمرهم .. وليت حاسباهم بحال واليدية ماشي غير خوالي اهئ اهئ .. ولكن الى حتا هوما مبقاوش قادرين يستحملوني اهئ اهئ و الى حتا هوما شي نهار لاحوني مكاين عندمن نمشي من غيرهم امي .. واخة عمرهم قالو ليا كلمة العيييب كنحس براسي متقلة عليهم اهئ اهئ

رابحة: شششت استغفري مولاك و مسحي دموعك .. سي حسن و خديجة راه ملي كنتب غير لحيمة و هوما مهليين فيك و حاسبينك بنتهم ماشي عاد .. راك من صغرك و نتي عزيزة و غالية .. راه الى سمعو منك هاد الكلام عاد غيتقلقو منك ابنتي .. انا ما بيدي عليكش الغالية راه باك ماخليت كيف درت ليه .. و راه حالف الى رجعتي يعطيك للمعطي لي خطبك من عندو .. دبا نتي ترضاي تمشي المرا الرابعة على رباعة ديال الاولاد .. الصغير فيهم كبر منك .. الله يرضي ليك ابنتي صبري و جلسي هنا حتا يحن قلبو عليك .. معندك فين تمشي معايا و ها خالتك عمرها خسرات ليك ولا قالت ليك كلمة العييب .. راجلها مكاين غير بنتي الغالية .. علاش لي تقلقتي و بيتي ترجعي

الغالية: الساعة لله .. هلكني التفكير و الخوف انهم يسمحو فيا حتا هوما اهئ اهئ قلت اللهم نمشي دبا ولا نخرج نكري بيت مع جيران حسن و نبقا نجي عندهم مرة مرة ولا يجريو عليا عمري نبقا نشوفهم

رابحة ضماتها لصدرها: استغفري الله و دكريه .. هذاك راه غير وسواس راكبك ابنتي .. متخافيش خديجة راه بحالي اعتابريها مك التانية و لي ضراتك قوليها ليها متحشمييش و خوي راسك من هادشي الله يرضي على بنتي ..

رابحة: خديجة راه بحالي اعتابريها مك التانية و لي ضراتك قوليها ليها متحشمييش و خوي راسك من هادشي الله يرضي على بنتي .. راه غير غيمرضك و نتي مناقصاش .. اش درتي بعدا مع الطبيب لي متبعة معاه .. بريتي من فقر الدم

الغالية: مزال كنشرب الدواء ولكن مبقاش كيف كان

رابحة: و رخفيي على راسك شوية .. و هانتي هنا جالسة مع خالتك حسن ليك من شي كرا و ها جنات الله يرضي عليها ضبرات ليك على خدمة زيينة و مهليين فيك ايوا خوي راسك من هاد الكلام..

* سايك و الكارو في يدو كيكمي فيه و يفكر في جملة السيد لي كان معاه .. علاش داير هدشي؟ .. ماقريبة ليه ما كتربطو بيها حتا علاقة ما من العائلة .. و زايد هي كتصدو و جرات عليه بالمعنى الاصح .. بفمها قالت لبه فرقني عليك و عمرك تقرب لجيهتي .. علاش مبعدش عليها و مزال معششة ليه في دماغو؟ .. واش كاع هذا فضول يتعرف عليها؟ .. علاش احتلات مكانة في دماغو .. علاش فاش كيشوفها كيتمنى يبقا غير مراقبها و صافي .. افكار خربقو دماغو و خلاوه ميحسش بالطريق حتا كان واقف مقابل معاها بالسيارة .. جالسة في الارض و مغطية وجهها بيديها كتبكي .. نزل من السيارة و قرب ليها جلس جنبها و ضمها لصدرو مخليها كتبكي .. طبطب على دراعها بحنية و سكت حتا نطقات..

– تشفا فيا اهئ اهئ كيشمت فيا و يضحك اهئ اهئ .. كلامو و شوفاتو كلهم استهزاء و سخرية و شماتة اهئ اهئ .. كنكرهوووو كنكرهووو الله ياخد فيه الحق اهئ اهئ

حكيم: شششت صافي براكة من البكا .. علاش دايرا فراسك هاد الحالة .. خوي راسك منو و ريحي دماغك .. راه صحتك على قد الحال بتبقاي تعصري و تعصبي تا تجيبيها فك**

جنات: عصبنييي الله يعطيه شي غبارة ترجعوو فين كااان تفو عليه

حكيم: معاودتيييش ليا هااا .. ماشي من عوااايدك تخبي عليا

هزات راسها من على كتفو و مسحات دموعها مخنزرة فيه عاد جمعات الوقفة و خرجات عينيها فيه

جنات: نتا عاودتي ليا بالحيماري لاخر تصحابني ناعسة على ودنية بتدوز من تحتي الما والله لاكانت ليك..

زادت ركبات فالسيارة و خلاتو تابعها كيضحك و ركب موصلها لدارهم..

* مشات رابحة ام الغالية من بعد ما رجعات ليها عقلها لراسها و خلاتها معززة مكرمة فدار خالتها .. دازو ايام و جاو ايام و الغالية مقابلة قرايتها .. كتمشي تقرا في العشية و في الصباح تقلب على خدمة ..

جاتها صعيييبة تلقا خدمة اخرى نضرا لمستواها الدراسي و المعارف لي معندهاش .. خبرات جنات بخروجها من الخدمة لي محكراتش عليها و خلاتها على راحتها .. هاد الاخيرة لي شرات السيارة و عادت تحرك غير بيها .. ولات حسباها بحال بنتها غير تمسح فيها و محاولة عليها لا تمشي تشخشخ ليها بشي حادث .. كتخرج مرة مرة مع الغالية ملي كتسالي القراية يضورو في المدينة و يرجعو ..

اليوم صبحات الغالية كتضور و تقلب على خدمة لي دازت عندو يقول ليها دبا نعيطو ليك و مكاين والو .. دازت من شارع كبير و دخلات لبوتيك حطات ليهم السيفي و تمات خارجة حادرة راسها و كتفكر فين ممكن تمشي تاني .. ماحسات غير براسها مسطوحة مع شي واحد حتا كانت غطيح لولا يديه لي شدوها من درعانها حتا شدات توازنها .. هزات راسها كتعتاذر حتا لقاتو واقف قدامها و كيشوف فيها

الغالية: سمح ليا مشفتكش مقصدتش

حكيم: الغالية صفا

الغالية: الحمدلله و نتا .. هداية لباس عليها

حكيم: بخير .. شنو جيتي ديري هنا

الغالية: ماشي شي حاجة غير دايزة

حكيم: اممم نخليك دبا الله يعاون

تم غادي و تلفتات كتشوف فيه بعد تردد نطقات سميتو بخجل

الغالية: حكيييم ” تلفت شاف فيها ” ممكن نهضر معاك

حكيم: وي كاين شي مشكل اختي

عضات شفايفها و حركات راسها هازاه فيه: كنت كنت ب بغيت نعتذر منك على شنو وقع ديك الليلة .. مكنتش قاصدة داك الكلام .. نتمنى تقبل اعتذاري و متبقاش هاز فخاطرك من جيهتي

حكيم بابتسامة: ما كنت هاز من جهتك حتا حاجة .. واخة تقولي لي قلتي كتبقاي عزيزة و غالية .. خليتك على راحتك و صافي مبغيتش نضغط عليك .. و كيف بغيتيني نبعد راه بعدت

الغالية كتحس بالدمعة واقفة ليها عند شفارها: سمح ليا عفاك اهئ والله مكنتش قاصدة دكشي .. اعصابي كانو متوترين و معارفاش شنو كنقول ولا اش كندير اهئ اهئ .. عارفة راسي غلطت فحقك و نتا ما صرفتي فيا غير الخير .. كنعتاذر مرة اخرى و نتمنى تسامحني اهئ اهئ

حكيم بقات فيه بغا يحط يدو على كتفها و ترجع كيهضر معاها بهدنها: ششش لاش الدموع؟ .. انا متقلقتش منك الغالية .. بالعكس عاد زدتي عزيتي عليا و بلاصتك كبرات مسحي دموعك الغالية ياله

مسحات دموعها كتنخصص و هو تسناها حتا جمعات البكية عاد نطق بمزح: اجي نشربو شي كافي انا و صحبتي

خرجات للغالية الصحكة و بدات كتمسح على وجهها مخبياها: ههه ها لي قلنا

حكيم: هههه غير حيت عزيزة و غالية .. اما منهضرش معاك هكا الفنون

رجع ليها الابتسامة من ورا البكية لي بكات و مشا لكافي كانت تما جلسو فيها واخدين هو كافي نواغ و هي جودوغونج كيهضرو بيناتهم و يسولو في الاحوال لي شافهم مايقولش عاد كانو مخاصمين .. هز فيها راسو من بعد ما تكا على الطبلة و نطق..

حكيم: مزال مهداكش الله تعتابريني صديقك ههه

الغالية: نو صافي وليتي امي ديالي هههه

حكيم: هانا تاني على الفرووونسي .. مي الاصدقاء مكيخبيوش على بعضهم .. مبغيتيش تعاودي ليا؟

بقات ساكتة كتشوف فيه و تقلب ليها الجو تاني .. مكتحملش تهصر فداك الموصوع كتعتابرو نقطة سوداء في حياتها .. شافها سكتات و استأنف الكلام

– معليهش حتا ترتاحي ليا عاد عاودي .. مبغيتي تعرفي عليا انا والو؟

الغالية: مكنعرف عليك والو صراحة هه .. عاود ليا على حياتك شوية .. كيفاش حتا تعرفتي على كريمة متلا؟

حكيم: دبا من حياتي كاملة مبانت ليك غير ديك الخليقة .. المهم حياتي مملة شوية ههه .. كنت عايش في فرنسا من صغري .. تعرفت على واحد البنت تما مغربية و قررنا نتزوجو .. درنا لاكط و كانت ساكنة معايا .. في الاول تافقنا انها تسكن معايا فالدار و معايا الوليدة .. كانت موافقة .. مي غير تزوجنا ولات كتقلب على الصداع و المشاكل و بغات تسكن بوحدها .. انا رفضت نخلي الوليدة بوحدها و راك عارفة الحالة كيف دايرا و هي قررات الطلاق .. صافي من بعد اللا حليمة مبقاتش بغات تبقا فالغربة و بغات ترجع لبلادها تعيش فيها و هنا فين تعرفت لى ام هداية .. تزوجتها زواج تقليدي و كانت صحبت ختي هي لي عرفاتنا .. كانت نعمة الزوجة و محتارمة راسها و بنت الناس .. نهار ولادة هداية توفات مسكينة .. و خلات كبدتها معايا .. كانت هداية بحال البلسم على جرحي من جهتها .. كانت عزيزة عليا بزاف .. من بعد كبرت هداية شوية بالشوية و الدراري الصغار راك عارفة تربيتهم صعيبة .. بقاو عليا خاصك تزوج خاصك تعمر دارك و تزوجت ب كريمة .. هدشي لي كاين

الغالية بحزن و خيبة: مسكينة .. مشات و ماشافت حتا عيون بنتها صعيبة بزاف “بدموع” حتا واحد ما لقاها كيف بغاها .. الله يرحمها

حكيم: امين ” بنضرات متفحصة” علاش كتباني مهمومة و هازة جبال من الاحزان على كتافك و نتي مزال صغيرة؟

الغالية: ماشي العمر معيار لشنو كيعيش الانسان .. كاين لي غير صغير و دايز عليه العجب

حكيم: عندك الحق .. ياله نمشيو

وقفو خرجو و هي فاقو عليها المواجيع .. حل ليها الباب حتا ركبات و مشا لبلاصتو ركب .. كان غيديماري قبل ما يسمع كلامها

– كانت عندي 17 سنة ملي جا خطبني .. واليدية وافقو عليه و بغاوه .. مكنتش نقدر نرفض ولا نختار بوحدي .. حيت عندنا عييب البنت تختار العريس .. دارنا لاكط و داوني معاهم بلا عرس .. و عرفتي شنو؟ كوون غير مت داك النهار كان غيكون اهون ليا من العيشة لي عشت عندهم اهئ اهئ .. كون غير قتلت راسي و منمشيييش لديك الدار لي خرجات ليا على حياتي اهئ اهئ .. كرهت حياتي و كرهت وليدية لي زوجوني و كرهت الرجااال و كلشييي اهئ اهئ .. كلشييي كرهتووو فعااامين من حياتي .. عامين داز عليا العذاب لي ميقدر حتا واحد يصبر ليه اهئ اهئ .. الجووع و الشقااا و المرررض و الضرب من العكوزة و الراجل اهئ اهئ و و اهئ اهئ كيبزز عليا ندير شي حاجة لي مباغياهاش .. واخة يعرف يضربني المهم ينال شنو بغا اهئ اهئ .. كنت غنهرب و نبعد ولكن ملي عرفت راسي حاملة صبرت على قبل بنتي اهئ اهئ بنتي لي خداوها مني و هي رضييع اهئ اهئ بنتي لي مزال عاد حلات عينيها فالدنيا قتلوها ليا بالسحوور و الشعوذة اهئ اهئ اهئ كانت هي نور عيني .. هي حياتي .. هي القمر لي كضوي ليلي و الشمس لي شارقة في نهاري اهئ اهئ شنو ذنب داك الملاك لي قتلو اهئ علاش حرموني من شوفتها اهئ اهئ .. و و حتا با لي كنت باغياه يوقف معايا و يساندني عطاني بالضهر ملي احتاجيتو اهئ اهئ .. تبرا مني و لاحني مجرد سمعني غنطلق منو و نبعد اهئ اهئ .. علاش واش انا منستاهلش نعييش بخير و بلا عذاب اهئ اهئ .. مانستاهلش نفرح حتا انا و نعيش حياتي مرتاحة اهئ اهئ .. علاش كيوقع معايا هادشي شنو ذنبي .. شنو درت باش نتجازا هاكا اهئ اهئ

لسانو تربط عليه .. مالقا مايقول ولا ينطق .

الصدمة سكتاتو و خلاتو غير كيشوف فيها .. حركة وحدة لي قدر يديرها ديك الساعة .. هي يضمها لصدرو كيطبطب عليها و ساكت و كلامها كيتعاود في دماغو .. ممتانعاتش من ضمتو بل زادت تشبتات فيه و خوات قلبها عليه .. كتبكي و تشكي عليه و هو غير كيسمع و حتا كلمة ماخرجات من فمو .. خلاها حتا تنفسات و رتاحت عاد نطق بصوت هامس كيمسح ليها فعينيها من الدموع

– ششش دموعك غاليين الغالية متبقايش تبكي .. عيونك ميستاهلوش تهلكيهم بالدموع .. نساي شنو وقع و لوحي كلشي من وراك .. فكري فالحاضر و المستقبل ..

حكيم: فكري فالحاضر و المستقبل .. عيشي حياتك راك مزاال صغيرة و عاد قلتي بسم الله .. مزال الحياة قدامك .. و ان شاء الله عمر دموعك ينزلو الى فرحة .. ربي غيعوضك على كاع دكشي لي داز عليك.. امني بالله الغالية .. الله سبحانه مكايحيد الحاجة حتا كيعطيك حاجة اخرى .. و نعم بالله

نفسات على راسها شوي ملي عودات ليه و ارتاحت نسبيا ملي خوات عليه قلبها .. مسحات دموعها و سكتات كتراجع نفسها بينما هو تحرك من تما و بقا مدة غير كيتسارا في الازقة و دماغو كيراجع كلامها حتا سمع صوتها مبحوح من البكاء لي بكات

– تقدر توصلني للدار عييت

حرك راسو و وصلها حتال الباب .. نزلات و طلعات للدار لقات غير خديجة في الكوزينة باستها و دخلات لبيتها بدلات حوايجها و نعسات

* مدات يدها من تحت الغطاء هزات تيلي لي كيصوني و جوبات بلاما تشوف شكون

– الووو

– مناوياااش تجي لخدمتك الالة!! شهاد التعطيلة

الغالية مدهشرة: شنووو؟

حكيم: نص ساااعة نلقاك هنا و يا وييلك تعطلي بتكون هضرة اخرى..

قطع و خلاها كتشوف فتيلفون بصدمة .. حيدات عليها الغطا و ناضت للدوش تطرف حالتها و تغسل عاد صحصحات .. تبسمات على هبالو تاني و مشات هزات حوايج سخان بفعل الجو لي برد .. و خرجات شدات طاكسي حطها قدام البوتيك .. لقاتو عند لاكيس كيهضر مع سلمى لي رجعها للخدمة .. غير شافها وسع ابتسامتو من الودن لودن و تمشا لعندها..

– مرحبا بالزين نورتي البوتيك

الغالية: منور بوجودك ههه

حكيم حط يدو على قلبو مغمض عينيه: احح اقلبي تكايسي عليا راه قلبي رهييف

الغالية: بديتي ببسالتك تاني

حكيم: هي معاك ازين ديالي .. ياله بلاصتك انا نمشي ليكول بيزو

خرج و خلاها موسعة عينيها من وراه .. هااااك على بيييزو .. السيد من صحبتي لبييزو .. عضات شفاها مانعة الضحكة تخرج و استقبلات سلام لبنات لي معاها .. عنقاتها سلمى بابتسامة و نطقات

– على سلامتك ملي رجعتي والله حتا خليتي بلاصتك .. و شكرا بزاف حيت هضرتي مع سي حكيم عليا عمري نسا خيرك

خرجات عينيها كتفكر هي فين هضرات معاه ياك غير جبدات ليه سميتها و هو يضور فيها .. مسحات وجهها كتحرك غير راسها و مشات لخدمتها مقابلاها كتحلف فيه .. كيدير غير لي فراسو .. اما هو مشا ليكول ديالو فين ولات خدامة معاه جنات من بعد ما خرجات من السونطر .. عيط ليها و دخلات عندو للبيرو ديالو كتشوف فيه كيفرنس لحيوط

– اسبحان الله .. مالك على هاد الفرحة كاملة

حكيم: بيتك فواحد البلان

جنات: لي هو؟

حكيم: الغااااالية

وقفات جنات عاطياه بالضهر و نطقات: فووت عليك البنت احكيم متصلاحش ليك .. لي فيها كافيها بلاما تزيد عليها

حكيم: و غير جلسي اصاحبي مالك على هاد الهضرة .. جيتك نيشان اجنات و بيتك تعاونيني .. كتعجبني و لقيت فيها دكشي لي بغيت .. واخة عاد عرفتها مي دخلات ليا لقلبي من اول مرة .. دبا شنو مبتعاونينيش

رجعات جلسات و كتحاول تشرح ليه: احكيييم انا عارفاك اش كتسوا و عارفاك ولد الناس و مغتأديهاش .. ولكن راه المشكل فيييها .. نتا معارفش شنو داز عليها و فاش عاشت و هي ممستعداش دخل فشي علاقة اخرى فهمتيني

حكيم: عاااارف شكون قاليك معارفش .. هي بنفسخا عودات ليا .. و انا كنت باغيها قبل اصلا ما نعرف .. شحال من مرة كنحاول نتقرب ليها هي باش تعرفني و تعرف مرادي مي هي غير كنقرب خطوة كتبعد عشرة .. مكاينش لي غيعاوني قدك .. و نتي بنت خالتها و متبغيهاش تبقا عايشة مع احزان الماضي و ذكرياته .. راه مزال صغيرة و قدامها الحياة .. دبا شنو قلتي

جنات في حيرة .. كتشوف كلامو على حق و من حق الغالية تبني حياة جديدة و تعيش مرتاحة و فرحانة .. مغتبقاش رابطة راسها بالماضي و شنو داز فيه .. مزال قدامها الحياة و شلا ميطرا .. حكات عنقها بحيرة و شافت فيه مقوسة عينيها

– وااااخة اسيدي و فاش بيتيني نعاونك انا .. نمشي نقول ليها حقا ما حقا سي حكييم بغاك

حكيم؛ ههه منخافش علييك عارفك قدها و قدود .. نعول عليك

جنات: تفو عليك نتا ضبر على راسك و انا نبقا بايرة نضفر الشيب

حكيم بمزح: نزوجوووك لفاتح هههه بتجي معاه هي هديك

جنات: واخة يبقا غي هو مناخدو .. معقد لاخر تفو عليه

حكيم: و دبا خلينا فموضوعنا حاولي تهضري معاها نتي واخة؟

جنات: ان شاء الله .. ياله هانا مشيت

خرجات من عندو كملات خدمتها حتال لعشية عاد خرجات .. ركبات سيارتها طالقة مزيكة كتغني معاها و خالقة جو غير بوحدها فالطريق حتا دوبلاتها طموبيل و وقفات قدامها .. خلاتها تشد الفران بالزربة مخرجة عينيها .. سباتو فخاطرها و حيدات الصمطة معولة على اخزيت .. و خرجات راسها من الشرجم

– تاحماريت كيييف دايرا .. اش هاااد الخرااا تاني .. هذا لي عطاك البييرمي خاص دينمو العصا

خرج من السيارة ديالو متوجه لعندها بخطوات بطيئة و هي غير شافتها قلبات عينيها و ساطت .. هزات الزاج سادة عليه حتا وقف عليها كيدق فالزاج و يشوف فيها .. نفخات مكرهة منو و نزلاتو مطلعة فيه حاجبها

– شنووو

فاتح؛ بيت نهصر معاك

جنات: معندنا فاش نهضرو اسي ..

فاتح بهدوء: الله يهديك زوج دقايق و سيري

جنات: شنو؟ بتكمل على شنو بديتيه داك النهار

فاتح؛ مقصدت والو داك النهار .. هضرت معاك عادي .. و

جنات: و عطيني بشبر دتيقار .. شوف اسميتك .. هي تبعد من طريقي ولا كنقسم بالله حتا نقول لسيف الدين شنو درتي .. راه نديرها .. معنديش علاش نحشم

تبسم فاتح كيحك فلاحيتو و كيتفحص فوجهها ..و ركز على شفايفها: كنت ناويك للحلال نتي لي مابغيتيش .. تبعتي داك الشماتة و ها اخرتها

جنات: و ديييها فراسك ابنادم نتبع شماتة ولا الزمممر بعد منيي

سدات عليه بغات تنفاجر و حركات اللوطو زايدة فحالها .. حطات يديها على شفايفها بغير وعي و حيداتها مفقوصة محلفة فيه

* دخلات كتسوط و تنفخ و تدعي فيييه مغددة .. هزات فنيدة شرباتها و دخلات للدوش كتبرد غدايدها فيه .. نزلات شعرها كتمشط فيه بالجعرة و تسب حتا كملات و خرجات لبسات حوايجها .. دخلات عليها الغالية كتشوف فيها باستغراب و جلسات حداها

– مالكي ياك لباس

جنات: والو غير عيانة شوي .. عاد وصلتي؟ شديتي طاكسي؟

الغالية: الا .. وصلني حكيم فطريقو

جنات ربعات رجليها و شافت فيها مقوصة حواجبها: مزال مهداك الله تعاودي ليا

الغالية: شنو نعاود ليك

جنات: شبينك و بين حكيم .. وليتي كتخبي على ختك .. مبقيتيش كتعاودي ليا

بارتباك: لا مكنخبي والو .. راك عارفة كلشي

جنات: دبا بيناتنا الغالية .. مكتحسي بوالو اتجاهو؟ .. زعمة مكتفرحيش فاش كتشوفيه؟ .. راك فهمتيني اش بيت نقصد ياك؟

الغالية شداتها السخفة من هاد الاسئلة .. عضات فمها من الجنب كتفرك في يديها و نطقات

– ع ععادي .. رراك عارفة حكيم طيف داير ضحوكي و كيدخل للخاطر

جنات: اممم كيدخل للخاااطر هااا المعقول بدا .. احم شوفي العالية نهضرو بصراحة .. حكيم ولد الناس و شفت علاقتو معاك كيف دايرا .. غير ملي كيعاود ليك و يضحك معاك و ضاسر عليك بزاف راه نييت كيحس بشي حاجة من جيهتك اما ميقربش منك نهائيا .. هو اه ضاسر و عينو زايغة ولكن في نفس الوقت راه معقووول و عندو غير نيشان بيض بيض كحل كحل … يعني معندك مناش تخافي منو ..

يعني معندك مناش تخافي منو .. و راه معرووف كون مكنتش عارفاه و معاشراه مكنتش نهضر معااك عليه و كنت انا نصحك تبعدي منو .. عطي لراسك فرصة و عطيها ليه حتا هو .. راك تستاهلي حتا نتي تعيشي و تزيدي بحياتك القدام .. والله ما تلقاي بحال حكيم .. رااااجل و ميسور الحااال و يدو ميهزهااش عليك واخة معرفت شنو ديري و عائلتو الله يعمر ليهم الدار و مربييي و ضرييف والله متلقايش لي يتهلا فيك بحالو و يحطك فوق رموشو .. و نتر محتاجة لراجل في حياتك .. واحد لي يبغيك و يحس بييك و يحن علييك و يسمع لييك و يهز عليك الحمل .. راك مزال صغيرة الغالية و القادم ان شاء الله اجمل .. و عندو بنية كي الوريدة ما شاء الله .. هي فاقدة حنان الام و نتي فاقدة البنت لي تشبعيها من حنانك .. كل واحد محتاج لاخر نتي محتاجة لبنتك تعوضيها و هي محتاجة لامها و مغتبقاو ما حسن من بعضكم .. و حتا دبا عطييه فرصة .. عجبك دكشي لي بغينا معجبكش نبينا عليه السلام و كل واحد يشد طريقو اش قلتي؟

الغالية بتردد: هو لي قال ليك شي حاجة

جنات: مايحتاجش يقول ليا راه كلشي باين اصحبتي .. و دبا اش قلتي

الغالية: و الى كان طامع فيا من بعد ما عرفني مطلقة؟

جنات بغات تنتف راسها بالفقصة .. هي مفقوصة من فاتح و زادت عليها هاد السيدة

– و الزززمر تي مالك لاش غيطمع فيييك على قلتهم .. راااه كون مكانش باغييك ميدوييش معاك اصحبتي راه عطا الله لبنااات ديال دكشي .. خوي راسك من هاد الهضرة و توكلي على الله..

بقات الغالية ساكتة عاضة على شفايفها و وجهها رجع حمر و هي تنفخ جنات براحة: اووف استنزفت طاااقتي معاك تقول كنقنعك تعطي كلوتك

الغالية: هههه وراه ماشي غير كلوتي راه حياتي كاملة

جنات: و غيير متحليييش ليه و جمعي طوي واخة تكوني ميتة علييه هزي خنافرك و دفعي كبيير خليييه غير تابعك و متلهف ليييك .. عنداك لي قالها ليك تقولي مرحبا .. خااااصك حتا تشحفي باباه عاد توافقي واخة تكوني باغية قولي لا و تمرضني عليه شوية .. ولكن ماشي بزااااف تا تمرضي دينمو بالمعقول غير شوي باش تبقا هازة راسك و صافي

الغالية: ههههه لي سمعك يقول هنا نبااات ههه

جنات: كضحكي دبا الله يعطينا وجهك .. راه غيير قلبي هشييش مسكين هههه دغيا كيرطاب هههه

كملو جموعهم بالتعاويد و الضحك حتا دخلات عليهم خديجة مشاركاهم الضحك لي شافها و حضر لجموعها ميقولش راه واالدة ديك التريكة كاملة ..

كملو جموعهم بالتعاويد و الضحك حتا دخلات عليهم خديجة مشاركاهم الضحك لي شافها و حضر لجموعها ميقولش راه واالدة ديك التريكة كاملة .. عايشة حياتها و مزال مهلية فراسها و مريحة دماغها من المشاكل لي بغا يربح العام طويييل ..

* ايام كتمر و علاقة الغالية بحكيم غادية في تحسن .. المكالمات بيناتهم كل نهار .. ولفات هضرتو و حماقو ولا عاجبها جموعو .. نهار يهضر معاها بجدية وبلا ضحكو الباسل كتحس بيه شي حاجة .. رجعات لخدمتها و ولات هي الغسبونسابل عليهم .. واخة عمرها هضرات لبنات ولا تشكات من شي وحدة بالعكس علاقتها معاهم مزيانة و كلشي محتارمها .. خوات راسها من داك الوسواس لي كان شاغل تفكيرها و عاشت النهار بنهارو .. مرة مرة كتخرج هي حكيم و بعد المرات ضروري متكون معاهم جنات .. واخة كتحاول تعطيهم التيساع باش يولفو على بعضهم .. ولفات الغالية على هداية لي رجعات كتشوفها مرارا و تكرارا في البوتيك الى مكانتش قارية .. تقربات منها و عاملاتها كأنها بنتها و ديما شادة معاها الخاطر الشيء لي خلا هداية تتعلق بيها و تولي تهضر غير عليها .. هدشي لي خلا حكيم يزيد يتشبت بقرارو و تكبر الغالية فعينيه او ربما قلبو لي مزال ممعتارفش ليه ..

وقفات سيارتها قدام البوتيك و هزات ساكها نازلة من السيارة .. قادات نضارتها الشمسية و عينيها كيشوفو في المحل و ابتسامة على وجهها .. سدات الباب و تمشات بخطوات انثوية و محسوبة و نطقات بهمس

– هاحنا غنشوفو هاد الغالية لي سيرتها مكتحيدش من الدار ..

دخلات كتستكشف في المحل و تقلب في الملابس بيديها و عينيها على لبنات لي مقابلين الكليان .. حيدات نضاراتها دارتهم فوق شعرها و تقدمات عند سلمى لي كانت حدا لاكيص

– بونجوغ

سلمى: بونجوغ مدام .. فاش نقدر نساعدك

– اممم كاين حكيم

سلمى: لا امدام مكاينش الى كانت شي حاجة سيري عند الغيسبونسابل هنا هي تعاونك

– و شكون هادي

سلمى: الغالية راها فين واقفة

تبسمات بانتصار و تمشات عندها كتفحصها من رجليها لراسها حتا وقفات عليها: السلام عليكم .. نتي هي الغالية؟

الغالية بابتسامة: وي مدام فاش نقدر نعاونك

– كنت بغيت حكيم .. مي مكاينش ” شافت فيها عينيها مغمضين بالضحيكة و عضات على شفايفها” الى جا قولي ليه سولات فيك سارة واخة احبيبة

الغالية بقات مدة كتشوف فيها و جمعات الضحكة وجهها حمر: ان شاء الله

سارة: الله يسر

خرجات حابسة الضحكة حتال برا و نطقات بخفوت

– ايوا نحركو الغيرة شوية ههه ولد لحلال عرف اش يختار ههه

ركبات سيارتها و مشات فحالها فرحانة و عاجبها الحال ..

صونا تلفونها و لقاتو هو .. هزات ساكها منفخة معاجبها حال .. تقيسيها تفركع عليك .. خرجات لقاتو قدام الباب فسيارتو و ركبات .. لا سلام ولا كلام .. ربعات يديها و سكتات زامة فمها .. شاف فيها باستغراب و نطق ممازح

– مال شنيولة منفخة علينا

الغالية: وصلني للدار عيانة

حكيم: ياك درنا نتغذاو اونسمبل

الغالية: واخة .. هداية مجبتيهاش معاك

حكيم؛ قارية .. مالك معاجبانيش

الغالية: لا والو .. قبيلة جات سولات فيك شي بنت سميتها سارة كانت باغاك

ضحك و فهم البلان .. جر يدها شابك صباعهم و باسها ليها بخفة: و شنو بغات

الغالية: بغاتك نتا

هز تلفونو صونا عليها و دار مكبر الصوت: سرسووورة لباس

سارة: بخيير احبيبي و نتا

هو كيهضر و الغالية ركزات غير فكلمة حبيبي

حكيم: جيتي عندي الصباح

سارة: اه هههه مشيت للمحل

حكيم: و لاااش الالة بتجبدي ليا الصداع و كان ههه

سارة: مشيت نتعرف على مرات خويا هههه و راك عرفتي تختار العفيريييت

حكيم شاف في الغالية لي تزنكات و حشمات من راسها على الموقف: هههه و شنووو راه طيحني الزيين

سارة: الى كنتي مسالي دوزو تغذاو معايا راني غير بوحدي و منها نتعارفو اكتر

دور راسو جهة الغالية لي خرجات فيه عينيها و حركات راسها بالنفي قطعاااا

– مرة اخرى ان شاء الله و نجيب ليك عروستي غير تهلاي ليا فيها

سارة: الله اودي نديرها فعيوني علاه شحال عندي من حكييم

كمل معاها الهضرة و الغالية قاطعة الحس مكتنفنفش حتا سالا و تلفت ليها

– المش كلا ليك لسانك هههه .. مالك مابغيتي تمشي .. سارة ضريفة غتفاهمي معاها

الغالية: اويلي نتم غادية هاكا شوف حالتي و وجهي صفر بتشوفني و تخلع

حكيم: زييينة البنااات نتي .. منووورة و بتبقاي ديما كي الوردة .. هي بغات تعرف عليك نتي و تجلس معاك .. شي نهار نمشيو عندها تعرفي على لوستك هههه

الغالية: والله مكتحشم! اوييلي جالس كتقول ليها ديك الهضرة ممركتيش؟

حكيم: و مالي اش قلت! علاه مغتكونييش مراتي!! كون جات عليا انا من دبا نجرك عند العدوول غي نتي معكسة سبحان الله

الغالية: و صافي ههه ناري معرفت اش غتكون قالت عليا ههه

حكيم: زوييينة و حكيم عااااد غيتزوج نيييت و مدي لالة لبنااااات الزين و الحشمة و التباتة و الرزانة و الحداكة سعدااااتييي .. نزلي تغذاي راه قهرني الجوووع

نزلو كيضحكو بزوج و هو شاد ليها فيدها غادية جنبو كي النملة .. سمعات سميتها و تلفتات للصوت .. مجرد شافتها خطفات يدها من يديه و جمعات الضحكة

فتيحة: ختي الغاااالية لباس علييك

الغالية: الحمدلله اختي .. نتي بخير

فتيحة: اللهم لك الحمد .. غبرتي مبقيت شفتك من شحال .. اش ديري هنا

الغالية: ساكنة هنا .. المهم اختي نخليك الله يعاونك

ما وقفاتش معاها نهائيا و عطاتها غير صوابها .. هي مدارت ليها والو بالعكس كانت كتساعدها و ديما واقفة معاها قبل ما تعزل و دير دارها بوحدها .. واخة مزوجة بولدهم ولكن هي كانت مزيانة معاها .. زادت تابعة حكيم لي سبقها مبعد عليهم .. شدات ليه في يديه و دخلو للريسطو .. بينما فتيحة تبعاتهم بااعين حتا غبرو و زادت مكملة طريقها

– مامشيتي حتا جبتيه قد الليل .. نملة قايدة جمل هي ديالتك نتي ههه تستاهلي نييت حسن من داك الشماتة دار حتا عيا و تحدو ليييه دبا

لداخل طلبو الاكل ديالهم و بقاو كيتعاودو بيناتهم .. مسولهاش معامن هضرات ولا شكون هديك.. بل التزم الصمت و خلا ليها الحرية تهضر معامن بغات.. جالسة جنبو و يديها في يديه كيلعب في صبيعاتها و يماصي فيهم و يطرطق فيهم حتا كتقفز

– فين ما حطيت عليك يدي تبداي تقفزي تقول مركبين ليك البريز

الغالية: و راه كتقصحني هههه غتكرد ليا صباعي هههه

حكيم مسبل فيها عينيه: ياودي ياودي علامن معولين .. باااينة بتمحنيني نتي كتر ما محن

الغالية: هههه والله حتا كتقصحني راه صبيعاتي غير رطيبين

حكيم كيهضر غير بينو و بينها: دبا تشوفي تقصاح كيف داير دبا مزال ما درنا والو و بديتي تشكاي علم الله ملي يوحل الفاس فالراس

الغالية: الله يمسخك هههه والله مبقيتي كتحشم

حكيم: و راني حشمان زعمة اما ننن ننن.. و خليني حشمان حسن لييك

حطات يدها على فمها كتضحك عليه و عينيها مغمضين فيه .. و هو يجرها عندو باسها من جبينها كيفرنس معاها

– كووون تعرفي هاد الضحكة و هاد الصوت اش كيدير فيا .. يضرك خاطرك

الغالية: والله حتا بااااسل .. معرفت كيف غندير معاك ههه

حكيم: ما ديري وااالو الالة انا نديير كلشي .. نتي غير عطي راسك الراحة و خلي شي لاخر عليا العمر منمحنكش .. غير طلقينا للفراجة و خلينا نضربو الكحل في البيض..

كاسكيط على راسو من الشمس .. و حوايج مغبرين بالتراب لي ضال فيه .. حل باب الدار غادي طالع مسخسخ باغي غير يحط الراس .. سمع صوتهم كيف ديما من باب الدار منوضين الهيلالة بيناتهم .. ولف على صداعهم حتا ولا كيجيه عجب الى شي نهار مسمعهمش .. دخل عليهم عاقد حواجبو على نقشة كيشوف في ختو و مرتو مشادات كيف العادة و الام دايرة يدها على راسها و تولول بيه … لاح السوارت فوق الطبلة بعصبية و نهض فيهم بزوج

– مااااالناااا ااااش كاين تااااني .. واااش مكااينيش النهار لي ندخل فيييه نلقاااكم شادين الارض بجوجات

نقزات مرتو عينيها فالتات بغاو ينقزو من بلاصتهم: اسيييدي شد عليا ختك و قووول ليها تعطيني شبر د التيسااااع .. ياااك موقراها و توقرني و تبعد من طريييقي .. وااش ما حيلتي ليها ولا لمك

خالد: مااال مي ماااالها ياك موقرااك و مبعدة منك شدي تيقارك و دخلي لبيتك متخرجيييش منو

طيحات دميعاتها و بدات تمسكن عليه: ياك اخالييد ياك كتعاير فيا اهئ اهئ و هوما لي دخلو هاجمين عليا حتال البيت بغاو يهزو ليا غطايا يتغطاو بيه ماحشوماش عليهم اهئ اهئ

نبيلة: لعنة الله عليك ابنت لحراااام الله يعطييك شي موصيبة يالكلبة كتلوحي في الباطل عليا بلا حشماااا .. لعنداك اخويا هي لي ضربات ليا ولدي كانت غتقتلو

خالد بعصبية هز طراف جاكيطتو: يعطييييكم المووووت بجووجات الكلبااات والله متبقا ف اصل مكم .. دوزي نتي حطي ليا ماناكل و وجدي العشا اليوم غيجي حميد و مرتوووو

دازت مرتو كتلوز باطرافها كل طرف يا طرف عاصراهم فبيجامة قصيرة و الشعر جامعاه بقراصة الفوق .. حطات ليه ماكلتو دخل فيها طول و عرض و ناض لبيت تلاح بحوايجو فوق السرير .. بينما هي جمعات دكشي حطاتو فوق البوطاجي بلا غسيل و خرجات هزات تلكومند متبعة مسلسلها

طامو: سعاد .. اسعاااد .. نوضي وجدي لعشا قبل مايدخل ولدي حميد راه يكونو قربو

سعاد هازة حاجبها فيها و عطياها النخال: ولدك نتي هداك .. نوضي طيبي ليه ولا جلسي مالي انا

طامو: و نتي لاااش لقتي ابنت لحرااام تاكلي و تشربي!! .. نوووضي جمعي الوقفة قبل مانوضو ليك يشتف على طاسيلتك

معبراتهاش ولا سمعات ليها .. قابلات افلامها من واحد لواحد حتا قالها ليها مخها عاد ناضت طلات على الكوزينة لقاتها مجموعة و نبيلة كتوجد لعشا و شلايضو .. خلاتها تما و مشات لبيت هزات ولدها كترضع فيه و بدلات ليه حوايجو عاد حطاتو يلعب حدا باه..

.. ناضت هزات حوايجها من الماريو لي كلو مبعتر شي مدلي و شي معلي .. السراول مخلطين مع التريكوات و ديال الخرجة مع ديال الدار .. حوايج ولدها تالفين بين حوايجها .. نص فالماريو و النص فالشبكة دالغسيل .. بدلات حوايجها و رشات ريحتها حتا هي تبان شوية قدام مرت لوسها لي كل مرة جاياهم فجلابة جديدة فاقصاها بيها .. ما هي الا دقائق حتا تدق الباب و نزلات هي فتحات .. دخل حميد هو و ولدو و من وراهم فتيحة بجلابة سخونة من البرد و سلمات على سعاد بمجاملة عاد دخلات للصالون فين كانت طامو و نبيلة .. سلمات و جلسات حدا عكوزتها كتسول على الاحوال.. تحط اتاي و دوازو و ولاد نبيلة كاسرين الدنيا بالغوات و اللعب و هي عاطياها للغوات عليهم يريحو .. بداو الجموع و الضحك و تقشاب حتا نطقات فتيحة كتضحك و تشوف فجلابتها لي كانت لابسة

فتيحة: شريتها من واحد الحانوت فمراكش ملي مشيت للطبيب .. اشمن يا جلالب و قفاطن عند داك السيد شهوة منهم

نبيلة: بصحتك اختي زوينة و جات معاك

فتيحة: راه جبت ليك وحدة ههه ” تلفتات عند طامو” عرفتي شكوون شفت تما اخالتي هههه ” هزات عينيها ف خالد” الغااالية كانت تما .. و يا خالتي و كيف ولااات تحمق و زادت غير زيانت و بياضت و تهلااات فراسها ولات كي الوردة .. وجهها منور من عند الله يا خالتي .. اللبس كي داير و الطموبيل لي نزلات منها مايديرها غير سيدي و مولاي .. اما الراااجل لي كان معاها غير الطووولة و التجريدة تعطيك الخبار .. هضرت معاها و تشوفي الصواب و التاويل و الهضرة الحلوى متسخايش من كلامها الله يكمل على عقيلها ماشي غير جيب يا فم و قووول

كان خالد حادر راسو كيشرب فكاسو ديال اتاي حتا سمع سميتها .. هز راسو ف فتيحة و كلامها كيتعاود فعقلو و يتحفر فيه .. دور وجهو جخة مرتو كيطلع و ينزل فيها و يقارن بيناتهم .. عمرو سمع صوتها علا فوق صوتو ولا تجابهات مع مو .. ديما النقا كيفوح منها و الدار مرتبة و منقية و ريحتها فايحة .. الهصرة بالخاطر و تسكت الى دوا هو .. واخة كانت تشكا ليه من مو و ختو ولكن كانت صابرة معاهم و دايرا الما من يدوز .. اما هادي كلمة زوج كطير عليه كي الكلية .. فمها مبري منها و كيطلق غير القرطاس .. مو ما فاتتها و ختو معطاتها تيساع .. الدار حالتها حالة و الشقا متحط فيه يدها .. الماكلة و النعاس لي كتعرف .. حتا راسها ما مهلية فيه .. لي يشوفها ميقول راها مزوجة و عندها ولد ..

نزل راسو كيتحسر على الجوهرة لي كانت فدارو و معمرة فراشو و مهلية فيه و ضيعها من يديه بيديه .. هو لي دارها لراسو و هو لي جابها فجنابو .. و ها هو كيخلص .. راحة البال مبقاش كيشوفها .. توحشها و توحش شوفتها .. كانت نعمة الزوجة .. رغم الخلافات لي كانت بيناتهم الا انها كانت مراة و نص و ديما مهلية فراسها و منقية حالتها و حوايجها ميبانو مسخين .. و دار مترتاح الا الى متنقات و ترتبات .. اما دبا ولا عايش فيها بحال الفاار فين ما داز يلقا الروينة و الزبل .. شادين الضد هي و ختو .. شي راخي على شي .. و طامو غوتات حتا عيات و شدات الركنة .. زم فمو باغي يطرطق و كيفكر شكون هذا لي كانت معاه .. تفكر بلي عندها ولد خالتها حتا هو بالطموبيل و طويل .. غيكون غير هو لي كان معاها .. و غير خالتها لي كاينة فمراكش .. يعني غتكون ساكنة معاهم ..

فايت مشيت لدار خالتها .. مزال عاقل على الطريق لي دزت منها نهار مشيت عندها .. زعمة تكون نسات لي فات و تبغي ترجع معايا؟ .. و علاش لا! الى مشيت عندها راه غنرجعها معايا .. و باها نيت راه مكان راضي على طلاقنا .. هو غيهضر معاها و يرجعها ليا .. نعزل ليها بوحدها و نسكنها فدارها مرتاحة .. متشوف مي متشوف ختي .. و حتا هاد المنحيسة نطلقها و نتهنى من صداعها .. ولدي قاد نربيه و نصرف عليه .. هي اصلا غتكون مزال باغياني غير كانت مريضة بموت البنت … و شكون عرف كتسنا فيا غير امتا نمشي نطلبها باش ترطاب و ترجع .. كلشي ممكن…!!

ناضت سعاد تقابل العشاء و بقاو العيالات مجمعين بيناتهم و الرجال خرجو .. حطات طامو يدها على حنكها طايح عليها الضيم و شافت ففتيحة

– غير سكتي يا فتيحة و كيتها مزال فقلبي

فتيحة: و نتوما لي ضيعتوها من يديكم .. كانت مسكينة صبارة و هازاك على كفوف الراحة و سمحي ليا نقول ليك نتوما لي خرجتو عليها

طامو: ندمت ندمت قد الزغب لي فراسي .. كانت مراة ديال الزمان و هازة دارها و مهلية فراجلها .. مشا جاب ليها هاد المعكوفة ما تحني ما تدني .. لصقات فيه بنت الحرام لصقة وحدة و دقت الوتاد بالولد .. حتا هو يضل دايع حتا جابها فراسو .. الشرورية خرجات عليه .. و وحلات فيه

نبيلة: و حتا الغالية مجرينا عليها .. هي لي بغات الطلاق اش نديرو ليها نشدوها بزز! .. هي لي رفعات الدعوة و طلقاتو .. ما فيدينا منديرو ليها

طامو: ياودي كون غير رجعناها ليه باقي باغيها و انا مسخيت بيها .. نمشيو عند واليديها و هوما يرجعوها ليه راهم ولاد الناس و مزيانين

فتيحة: ايييه منضنش تبغيي .. كون تشوفيها كيف ولات .. راه تبدلات كلها .. ولات تلبس غير دجين و التريكوات و السبرديلات .. فييين يامات الجلابة و الفولار .. دبا عادت عاااطية العيين .. وراه واقيلا تزوجات حيت كان معاها واحد الزيين يا خالتي كيف داير طول فعرض شاد فيها ممفارقها كيف لبنية .. و نتوما اخالتي لي كنتو خايبين معاها و سمحي ليا نقولها فوجهك حسن من ضهرك كنتو معديين عليها مسكينة و هي غير دريويشة معندها صحة ليكم .. دبا عاد بان فيها الضو و كتبان فرحانة

طامو تنهدات: نمشيو عند باها و يكون خير ان شاء الله

* لبسات تريكو خايط سخون و طويل مستور فالبوردو مع سروال ابيض قصير من لتحت و سبرديلة بيضاء .. قدات حجابها و نزلات لطموبيل جنات لي كانت كتسناها .. ركبات معاها و زادت توصلها لخدمتها و اكيد جنات منوضاها زدحة و غنا فاللوطو حتا وقفات قدام البوتيك .. هزات ساكها و شافت فالمرايا وجهها مزنك

الغالية؛ ياك مكايبانش معيق .. كنحس بيه كتيير

جنات: نزلي لبتنزلي اش كترووو اصحبتي نتي دايرا داك اللون مكايبانش اصلا .. شوفي انا لي دايرا البوردو مشعشع و مادايرا هاد الحالة

الغالية: و نتي مولفة تعكري بيه هههه انا ممولفاش نخرج بيه هاكا و الكحل حتا هو ههههه

جنات: ايوا داااارها لييك الحب هههه نزلي خلاص هاد المرة يجري عليا حكيم بمسبتك هخخ ديما معطلة

نزلات كتفرنس و دخلات للمحل سلمات على لبنات و بقات مجمعة معاهم .. كانت كتضحك و تضور تشوف جهة الباب لا يجي شي كليان .. شافت جهة الباب و رجعات تلفتات .. ولكن سرعان ما دورات راسها تاني و الضحكة بدات كتجمع .. حققات فيه مزيان حتا تأكدات انها مكتوهمش و هو كيقرب ليها حتا وقف قدامها .. شاف فيها بشوق و حنان و نطق اسمها بصوت خافت

– الغالية

بحال الى صرفقتيها و كبيتي عليها سطل دالما بارد .. جمعات راسها و لبسات ملامح البرودة عاد شافت فيه هازة حاجبها

– شنو كدير هنا؟ .. جاي عندي حتال بلاصة خدمتي؟ .. شكون وراها ليك؟

خالد: الغالية بغيت نهضر معاك .. جيت عندك لدار خالتك و شفتك ملي جيتي لهنا و تبعتك

الغالية؛ معندنا فاش ندويو .. سير فحالك غتجبد ليا الصداع مع الباطرون ديالي

خالد: ضروري نهضرو الغالية .. خاصك تسمعيني

الغالية: ااااش بيني و بينك باش نسمعك .. خرج عطيني التيقار ولا ميعجبك حااال

خالد بصوت عالي و عصبية: كيييفاش اش بيني و بيينك!! راك مرتيييي و غتسمعيييني بزز عليك و مغنخرج من هنااااا حتا نهضرووو ولي فجهدك ديريه

ولات كترعد عليه بالاعصاب .. خافت غير يجي حكيم و يلقاه هنا و توحل معاه .. ضورات عينيها كتشوف ف سلمى حاضياهم هي و ندى و هي تجعر عليه .. دفعاتو من صدرو بكل قوتها حتا كان غيطيح و تراجع اللور و هي مخرجة عينيها فيه كتهضر بعصبية..

– منييين جاااتك حتا مراتك منييين .. فييين كنعرفك انا فييين .. عطيني بالتيييساع .. و فرقنيييي عليييك و بعد من طريييقي .. خررررج بعد منييي خررررج

بقات كتدفع فيه حتال لباب مخرجاه و هو يشدها من يديها جارها معاه

خالد: غنهضرووو و نمشييي .. غييير سمعيني

جرها مبعدها من البوتيك و هي كترعد بالعصاب .. وقفها بعيد شوية عاد رخى من يديها

خالد: الغالية سمعيني .. راه والله حتا بلاصتك بقااات خاوية و عمرها تعمر .. راه نتي لي بغيييت ملي كنتي صغيرة و انا تااابعك .. ملي دخلتي تقراي و انا كنتسناك حتا كبرتي والله حتا كنبغيييك الغالية و عمري نسيييتك .. خلينا نرجعو كي كنا مجموعين و ربي غيعوضنا على نور الهدى لي ماتت

الغالية: نووور الهدى قتلتووووها ماشي ماتت غير هكاك .. نووور الهدى ماسلمااااتش من حقدكم و سمممكم و تشيطييينكم .. نووور الهدى رزيييتوني فيييها و هي مزال لحييييمة .. فييييين غنرجعو هاااا فييييين .. و شكوووون غيرجع معااااك شكووون؟ .. الغالية لي كنتي كتبعها من المدرسة حتال داااارهم ماااااتت نتوما لي قتلتوووها ااغااااالية لي كاااانت كتسمح فحقها و تسكت مااااااتت .. الغااااالية لي كنتو زاااااطمين عليييها و دايرين تحت الصبااااط مااااااتت .. عمممرها غتكوووون شي حاجة اخرى بيناتنا كتفهم سيييير عند مرتك و ولدك لي محتاجييين ليييك اما اناااا بزااااف عليييك و عممممرك باقي توصلنيييي

كانت راجعة فحالها و هو يشدها من دراعها جرها حتا تساطحات معاه

– كيييفاش عمرك توصلنييي .. رااااك نتي مرتييي كتفهمي مرتييي و عمري نتفرق عليييك والله منتفرق عليييك واخة نمووت

الغالية: و بعاااااد منيي و حجر العاااافية فرقنييي عليييك .. يعطيييك موصيييبة يعطيييك الموووت نتهنااااا منك و من تريييكتك ..

الغالية: .. بغيييت لييكم الغرااااق اولاد لحراااام بغيييت ليكم تشتيييتة تهنيني منكم .. ربي ياخد فيييكم الحق ربييي ياخدكم .. دمرتووو ليا حياااتتي و مزاااال مبغيتو تبعدووو .. مرضتوووووني و قتلتوووني و انا مزاااال معارفة وااالو .. هلكتووووني و لحتوووني الله يحرقكم كلكم .. بعدووو مني و خليييوني نعيييش حياتي عطيني التيساع.. و اخر مرة تبان قدامي .. سييير عند مرتتتتك

خالد: و نتي هي مرتيييي هي غنطلقها و نتزوجك نتي .. راه معرفت كيفاااش حتا حملت دكشي علاااش تزوجتها اما مندخلهاش لداري

* داخل كيلعب بالسوارت و عينيه كيقلبو عليها .. وقف حدا لاكيص قدام سلمى و تبسم ليها

– سلووومة فين الغالية

سلمى بارتباك: ففف في ممشات تت

حكيم: مالك كتفتفي .. فين هي جاوبي

سلمى بغات تقولها و خايفة يضور فيها .. دارتها فيد الله و نطقاتها: ممشات مع رر راجلها

حكيم من بعد ما كان منزل راسو على التلفون هزو فيها: كيفاش؟ .. راجلها؟

سلمى: كككنا كككننن

حكيم: دوي اسلمى من الخرااا .. عاودي ليا اش وقع و شكون هاد الز***

بدات كتعاود ليه بالتفصيل شنو وقع و هو غير كملات ضرب الدورة و خرج .. غادي كيغزز فشاربو و عينيه كيقلبو عليهم تما .. ياله غادي يركب و هي تبان ليه كتغوت و يديها كيتهزو بعصبية و يتحطو و شي واحد عاطيه بالضهر قدامها .. ما فكرش زوج مرات و تمشا لجيهتها حتا وقف وراها .. خاشي يديه فجيبو و عينيه على خالد .. نطق بصوت قوي و جدي حتا قفزها

– الغالية؟ .. اش كديري هنا

غير سمعات صوتو جفلات في بلاصتها و اللون طار من وجهها .. تلفتات ببطئ حتا هزات راسها فيه و فمها كيترعد

– حح حح حككييم

حكيم: امم حكيم .. شكون هاد خينا

الغالية هزات يدها شدات فدراعو كتفتف: ه هذا هذا خخاليد .. و و

خالد: شكون هذا؟

الغالية زيرات على دراع حكيم: خخخاااطييبييي

حكيم: ياله فحالك .. جيت نديك و ملقيتكش

ياله غيتحركو و هو يجرها خالد من يديها بالجهد حتا طلقات من حكيم

– شكووون هاد الق*** لي غادية معاااه طوالو لييك الرجلين وليتي تخرجي و الدخلي كيف بغيتي

حكيم: مزال شاد راسي عليك .. سير فحالك حسن ليك

خالد باستفزاز: كتحاااولي تغييريني منوو ياك .. بغيتي تفقصيني بييه بلعاني يااك

الغالية بعصبية: و بعععد منييي .. حكيييم خطيييبي و قريييب غيكووون راجلييي عطيني التيساع

خالد باستفزاز و عينيه خارجين فحكيم: غيير كتستغلك باش نغيير عليييها .. هي كتبغيييني انا و غنن

قبل ما يكمل جملتو عطاه حكيم براسو للنيف حتا تلاح راعف .. غوتات الغالية بخوف كتشوف فيه طايح و الدم داز من نيفو .. جرها بالجهد و نطق محمر فيها

– سيييري للطموبيل يااااله

دفعها جهة الطموبيل و رجع هو لخاليد لي وقف كيمسح فنيفو .. شدو من كول القميجة مقربو لوجهو كيهضر بين سنانو

– بربي و نلقااااك مرة اخرى كضووور بساحتها تن**** .. الغاااالية فوووت ساحتها ولا نتقب ل ***** عينيك اولد ***** .. هانا حدرتك مرة اخرى منهضرش بفمي غنخدم يدييي و ديييك الساعة غيير شهد

نترو من يديه حتا رجع باللور كيتخلخل و تم غادي كيمسح فيدو من الدم حتا حس بيه دورو من اللور بغا ينزل عليه بيدو .. دفعو و هز رجلو خبطو بيها حتا تشقلب .. رجع ليه مغدد عليه مكايقشعش و نزل عليه بالبونيات غير للوجه

– يا ولد **** مبغيييتش ت**** كتقلب على اصل ميييي ن***** … ” كينزل عليه و يخبط ليه راسو مع الارض و الناس كتشوف و تحاول تفرق” الغاااالية فوووووتها ولا ميعجبك حاااال .. بربي منعقل على **** مك نقتل **** و نمشي عليييك للحبس

جروه الرجال لي كانو تما كيفرقو بعدوه عليه بزز .. وقف خالد وجهو خامج بالدم و الجروح و شاد فكرشو متكي على ركابيه كيدفل فالدم و يكحب

– ههه الغالية ديااالي و غتبقا ديالي .. غنرجعها .. و دبا تشوف

كان غيرجع يكمل عليه كون ما رجال شدوه مبعدينو عليه و نص لاخر جر خالد غبرو من قدامو لا يقبرو فبلاصتو

حكيم: كنقسم فمي بالله و نبقا نشوف **** تمك كضوووور بساحتها تنقتل ***** بووووك

رجل كان شادو: لعن الشيطان اولدي و سيير فحالك مادير راسك فيه

حكيم: و كييضووور ليا بمرتييي ولد ***** .. بربييي تنقتل دينمو

الرجل: الله يهدي ما خلق .. سيير اولدي بدل ساعة باخرى حسن لييك .. سير الله يرضي عليك اولدي

نتر كويرتو لي كان لابس و تم غادي جهة السيارة فين لقاها راكبة كترعد و تبكي .. غير شافتو جمعات التنخصيصة بزز و عينيها ساحو بالكحل لي كانت دايرا .. كيبان مطراسي فحناكها .. ركب بلاصتو و مهضرش ..

ركب بلاصتو و مهضرش .. ديمارا و زاد مع الطريق سااااكت و ملامحو هادية متعرفي اش تحت راسو و فاش كيفكر .. خرج من المدينة و مشا للتيساع بين الاشجار و الاراضي عاد وقف .. تلفت شاف فيها حابسة البكية بزز و عاضة على شفاها .. بقا مدة كيشوف فيها شوية و هو يتبسم نصف ابتسامة مبايناش و نطق حاط يديه على الفولون

– امتا خطبتيني اختي

غير تكلم و هي تطلق شهقة و بدات تبكي و تشرح ليه بيديها و تفتف

الغالية: والله ماهضرت معاه اهئ راه هو لي تبعني للمحل والله معرفت امتا جا اهئ سول لبنات لي معايا اهئ اهئ كنت خدامة حتا وقف عل

جرها من يدها كيسكت فيها و حازها لصدرو كيطبطب على كتافها بحنية و صوت خافت كيهضر معاها بيه

– ششش انا مسولتكش و عااارف داك الشماتة لي جا لعندك .. علااش كتبكي دبا .. هانتي ضيعتي ليا الكحل و الزيين جاي مقاد ليا الحااالة هممم .. دموعك غاليين اكبيدة منبغيش نبقا نشوفهم على اتفه حاجة .. انا عااارف اش كاين و عااارفك اش كتسواي و تيقتي عمرها تنقص من جهتك ازيين الصافي

الغالية: ياك ممقلقش منيييي

حكيم: علاش غنتقلق!! .. نتي معليك والو .. ولكن مابقاش عاجبني هاد الدخول و الخروج بلا ورقة بلا رابط .. خليني على الاقل غير نهضر مع باك و نخطبك نرسمو علاقتنا دييك الساعة حتا واحد مايبقا يتجرأ عليك

الغالية: و خاص حتا نتصالح مع با و نهضر مع مي هي لي غتقولها ليه

حكيم: و هي دبا ازيني حتال امتا غنبقاو هاكا .. ياك انا باغييك و نتي باغياني شنو كنتسناو .. غيير الى مكنتييش باغية نتي معرت

الغالية: والله ما هكاك حتا انا باغية ولكن

حكيم شد يدها باسها و كيسايس معاها: شوف احبيبة .. هضري مع سي حسن راه هو غيهضر مع باك و ضروري يحن قلبو شوية .. خلييه هو يتكلف و ديك الساعة نمشيو ان شاء الله نخطبوك من عند باك .. علاش مصعبة الموضوع

الغالية: فففف واخة حتا نقولها لخالتي تقولها لعمي حسن

حكيم بابتسامة متفحصها: دبا عجبتيني .. ياله اري شي بوسة

خرجات فيه عينيها و بعدات وجهها جهة الشرجم: شنوووو!!

حكيم؛ ههههه و بنبقاااو حنا غير على الشفوي ههه بندوزو للتطبيقي و ياك خطبتيني و قرييب نولي راجلك هي وحيدة

ضرباتو لصدرو و خنزرات فيه: والله مابقيتي كتحشم كاااع .. البلاكة طيرتيييها

حكيم: من زماااان هههه زيدي نوصلك للسونطر قبل مانصدق مطيرها بالمعقووول

خرجات من بعد ما كملات خدمتها .. فتحات اللوطو تركب حتا وقفها صوتو من ورائها .. تلفتات رافعة حاجبها فيه و كطلع و تنزل فيه .. ربعات يديها كتسناه يتكلم و عينيها تقاال عليها بالعياء

– شنوو؟

فؤاد: مزال مهداكش الله توقفي هادشي خلاص

جنات: راه وقفتو زعما واخة معطلة .. كل واحد شد طريقو و الحمدلله عاااد رتاحيت

فؤاد: حرام عليك ديري فيا هادشي اجنات نتي عارفاني كنبغييك و منقدرش نتفرق علييك

جنات: لا باااينة .. تأترت صراحة .. شوف اسي ممسالياش لهاد المسرحية الجديدة .. سيير شوف ليك شي فيكتيم جديدة اما انا مبقيتي غتصور مني حتا زبلة

فؤاد: مايمكنش من بعد كااع لي دوزنا تخلاي عليا و تسمحي فيا اجنات

جنات بسخرية: ياكما تقبتك و هربت هه قالك مايمكنش!! .. سييير سيير اوليدي تزيد شوية نتييق بيك

ركبات سيارتها و زادت مخلياه كيغلي بغا يبخ الدم .. تبعها بنضراتو حتا غبرات و تمتم بين سنانو بعصبية عاد زاد مع الطريق..

دخلات للدار مسخسخة ديريكت للبيت تلاحت جنبها .. لقاتها مبدلة حوايجها و جالسة كتغزز فضفارها بتوتر

جنات: زييين ديالي سبقتيني اليوم خرجتو بكري

الغالية: علاه انا خدمت بعدا .. عرفتي اش وقع ليا اليوم متبغيه لعدوك

جنات: مالك تاني

الغالية: خالييد رجع قاليك بغانا نوليو بزوج

جنات ضحكتت: هههه توما هادو لي مالقا ميدير يبغي يرجع كيف كان .. بحال الى حنا ف بوز حتا يرجعو لينا هههه لاهيلا لحمااق هههه .. اييه عاودي عاودي نشوف

بدات تعاود ليها و خوات ليها المزيودة كاملة عاد شافت فيهة بنصرات ترجي

– نتي لي غتهضري مع عمي حسن ياك؟ .. قولي ليه يمشي معايا يصالحني مع با و ديك الساعة انا نهصر مع مي تقولها ليه

جنات: هههه و بتسبقيني تاني .. بقييييت بلا زواج بايرة نضفر الشيب حدا خدوجة .. غير تهناي انا نقولها ليه .. غذا ولا بعدو نمشيو نزاوكو فباك يحدر الراس هههه

الغالية عنقاتها كتفرنس: والله حتا كنحمااق عليييك ازيين ديالي … كون ما كنتي نتلف ربي يخاليك ليا

جنات: نتي و داك بلارج ديالك خاصكم تدعيو معايا صباح و عشية على تمارة لي كنضرب معاكم .. ياله هزي كفوفك و قولي يااااربي يزوجك اجنات بشي تيتيز بولحية .. ياااربي يعطيك شي نقرا فين يغبر صداااك .. ياااربي

الغالية: اميين اميين غير نوضي دبا شوفي عمي غيكون جا

وقفات جنات خارجة: و صبري على خبييزتك طييب .. ياودي لي كانت متحملو متقبلو عادت ميتة على خراه طزز

اليوم الاحد ماكاين حد .. لبسات الغالية جلابتها مع سبرديلة و الفولار و هزات صاكها ديال الحوايج مخرجاه معاها .. وقفات حدا جنات لي كانت بنفسها لابسة جلابة و جامعة شعرها لفوق و كيتسناو فخديجة تخرج خلاص

– و ماما زيدي خلاص راه بابا من الصباح و هو يتسنا فينا

خديجة: هاني جاية غير نزلو اناري متخليو حد يلبس على خاطرو

نزلو لبنات سبقوها لقاو سي حسن جمع التقدية لي غاديين بيها و راكب مكان السياقة .. ركبو بزوجات اللور و ما هي غير تواني حتا كانت خديجة نزلات و زادو مع الطريق في اتجاه منزل الغالية ..

استقبلاتهم رابحة بالاحضان و الفرحة و غير تعنق و ترحب بيهم .. دخلاتهم للثالون و عيطات لراجلها يجي لي كان خدام .. كانت الغالية جالسة بين خديجة و جنات .. غير دخل باها نطق السلام بصوته القوي و سلم عليهم .. وصل لعندها و مد ليها يدو باستها ليه عاد جلس كيرحب بيهم و يعاود .. تحط اتاي و دوازو و حسن كيجبد المواضيع مع باها حتا دخل فصلب الموضوع

حسن: و جينا عندك اسي رشييد طالبين الصلح بينك و بين بنتك .. شوف من حالها و راعي ليها و حن عليها .. راك نتا باها و نتا لي خاصك تكون السند ليها و توقف معاها .. تحي بيها و توعيها و تنصحها .. و الى غلطات تصحح ليها .. راها مسكينة تضل تدعي و تبات تدعي غير باش تنال رضاك .. دير الما منين يدووز و ضم بنتك لصدرك

رشيد: اودي اسي حسن اش غنقول ليك .. راها بنتي من لحمي و دمي و منفرط فيها .. دارهم هادي و معندها عليها فييين .. ها هي تجلس معانا و تبقا مع مها حتا يحن الله .. الله يرصي عليها و يكمل ليها بعقلها

ناضت عندو باست ليه راسو و يديه و هو كيرضي عليها و يطبطب على كتافها .. جلسات جنبو فرحانة بيه من بعد ما تصفاو النفوس و حن عليها .. من بعد ناضت تعاون مها و خلات الرجال مجمعين مع بعضهم و لعيالات تجمعو فالكوزينة على النميمة

خديجة: والله يا خيتي و ماتساليني حلوف الى السيد الله يعمر ليه الدااار … ولد الناس و مربي و يديرها فعينيه .. و حتا مو فمها كيقطر غير عسل ما شاء الرحمن .. متصييبش بحالهظ يا رابحة و انا كون ما كان يحسب جنات ختو كون عطيتهالو

رابحة: يكون خير ان شاء الله .. دبا نهصر معاه و نقولها ليه نشوفو اش يقول و اش تحت راسو .. و نتي الغالية بغيتيه

جنات: ربي اخالتي شكون مايبغييهش ههه تي والله كون ما كان خويا تنزوجو يانا هههه راه سيد رااااجل و قاد براسو و هاز دارو .. مايخصها معاه حتا خيير و لي بغاتها ديالها و حتا مو و خواتاتو مزيانين و ساكن غير هو مو و بنتو

رابحة: و واااالد

جنات: اه مسكينة ميتة ليها مها .. راها يتيمة تعوضها على مها و هي تعوضها على بنتها

رابحة: يكون خير ان شاء الله .. الله يتاويهم بالخير و انا منبغي ليهم غير التيسير و نشوف بنتي فرحانة

الغالية: الله يطول ليا فعمرك امي .. والله حتا ضريف و ولد الناس

رابحة فرحانة ببنتها: شوفي ليك سليعفانة كتشكر فيه هههه

خديجة: هههه وراه كانت خدامة عندو عارفة طباعو كيف دايرين

الغالية تزنكات و مشات لبيتها حشمانة مخلياهم كيضحكو عليها و يقجمو بيناتهم …

هزات تلفونها لقاتو غيطرطق بليزابيل و هي تصوني عليه فالحال

– على سلامتك ملي جاوبتي

الغالية: ههه كنت مع مي و ماشفتش تلفون

حكيم: امضرا تصالحتو

الغالية: اممم .. و عاودنا لماما عليك خاص غي تقولها لبا

حكيم: الحمدلله مزيان .. توحشتك اشنيولة ديالي

الغالية بخجل: متبقاش تقول ليا شنييولة ههه حشومة عليك

حكيم: شنييولة و عضاضة و قماشة و بخووشة و كلشي مجمووع فالحب تاعي هههه

الغالية: ههه مابخوشاش انا

حكيم: لااا هي كتوصلي ليا عند كرشييي

الغالية: نتا لي زاااايد فالطول اما انا طولي زوين و مواتيني

حكيم: و حتا انا مواااتيني غير طلقينا للمعقوول ازين ديالي .. بيت نشوفك فداااري خلاص .. و حتا هداية ديما كتسول فيك

الغالية: قريب نجي عندها ههه بوسها ليا معاك

حكيم: بوسي باباها هو اللول عاد شوفيها هي

الغالية: ولله حتا تمسختي

قطعات عليه كتفرنس و هي تدخل جنات كتلعب فتلفونها جلسات حداها..

– خاص حكيم لي يجي يهضر مع باك .. باش مايعيق بوالو و مايقولش كنتي تلعبي من وراه

الغالية: عندك الحق .. ولكن اش غيقول ليه

جنات: شفت بنتك و عجباتني و بيتها للحلال اش غيقووول تاني نتي .. المهم راه خاصك تبداي توجدي من دبا السيد راه مزروب على رزقو ههه

الغالية: اش غنوجد هههه راني واجدة غير لاكط و نزيد فحالي

جنات: اويلي حماقيتي و فيين الخطوبة و العرس و الجووق و الزعتر لاخر

الغالية: راه مابقيتش بنت ازبلة دكشي دوزتو قبل صافي

قلزات ليها جنات: هااااكي ها سواك .. نتي متزوجي تتمرضيني فمخي .. مااالكي على حالك .. عررررسي نشطس و شطحييي و ديري داك عرس الويل بحال عمرك دوزتيييه .. ياك غير حكيييم باغي يعرس نتي اش مشااا ليك!!

الغالية: و معرفت .. حتا يجي و يهضر مع با

جنات: اجي نقوليك .. غير بيناتنا .. ماجاكش باك فشي شكل؟ .. دغيا تصالح و دغيا رضى و دغيا هضر فحال الى عمر شي حاجة كانت

الغالية؛ معرفت! .. غيكون غير ندم و صافي .. نوضي راه كيعيطو لينا

* في الكوزينة هي و مها كيوجدو في الغذا .. من نهار جات مع خالتها و راجلها و هي فدارهم مرجعاتش معاهم .. حكيم ديما على تواصل معاها فالتلفون .. كل مرة يقول ليها نهضر مع باك و هي توخر فيه حتا طلع ليه الدم معاها .. معرفها علاش مزال كتأجل فيه ياك غير باها و تصالحت معاه .. مها و في خبارها كلشي .. هي و باغياه و عارفة عليه كلشي .. شنو مخليها كتأجل فيه كل مرة .. شيء لي مرضو و خلاه موسوس و مريض فراسو ..

وجدات شلايض فطبيسلات و مها طيبات الخبز .. دخل باها كيحمحم عليهم و عيط على رابحة بصوت غليض و عالي حتا مشات عندو لقاتو داخل لبيتهم …

رابحة: اش كاين علاش كتغوت

رشيد جلس فوق السرير بجلابيتو و حك راسو من الجنب: اليوم كنت خدام حتا جا عندي خالييد

رابحة: اش بغا تاني بغيت ليه غبارة تغبرو ولد لحرام

رشيد: قاليك بغا يرجع الغالية و

رابحة بالغوات: اويييلي .. و نتا اش قلتييي ليييه .. الله يطيييرو بالحرامي لاخر

رشيد: قلت ليه لا .. و انا عطيت الكلمة لراجل خوور خطبها من عندي وجدو راسكم سبت فالعشية جايين يشوفو لغالية و يخطبوها منا

رابحة: و شكوون هادو؟

رشيد: واحد الرجل خدام فالمدينة .. راجل معقول و كبير بعقلو هو لي يتهلا فيها

رابحة كتجر ليه لسانو: و مزوج عندو شي ولاد مطلق اش داير

رشيد: مطلق و والد شي ولد يمكن

رابحة: ايوا مرحبا بيهم .. نوض نحط لغذا

خرجات كتزرب فمشيتها حتال عند الغالية و جراتها كتعاود ليها

رابحة: السيد مزرووب .. ناض هو هضر مع باك و قاليه بغيت بنتك .. راه نهار السبت غايجيو

الغالية: اويلي انا مقال ليا حكيم والو

رابحة: يمكن عاد هضر معاه .. راه سولتو قال ليا مطلق و عندو ولد

الغالية: و حكيييم عندو بنت امي بننننت .. حطي ليكم تغذاو انا مافياش غير بالصحة

طارت من حداها دخلات للبيت و سدات عليها .. صونات عليه ما هي غير ثواني حتا جاوبها

– زيين الصافي

الغالية: مزال فالخدمة؟

حكيم: لا اليوم مخدمتش .. ديت الوليدة للطبيب و بقيت معاهم اليوما

الغالية: الله يشافيها .. ماقلتييش ليا راك جيتي

حكيم: فيين جيت

الغالية بابتسامة خجل: عند با .. عاد دبا قالها لينا ههه

تكعد حكيم لي كان متكي فوق الفوطوي و تقاد فالجلسة

– كيفاش باك؟ شكون مشا .. مفهمت والو

الغالية جمعات الضحكة من هضرتو: اويلي احكيم بلا هاد الضحك الباسل .. غير دبا جا با قال لينا بلي غتجي نهار السبت فالعشية تخطبني و بلي هضرتي معاه

حكيم؛ الغاااالية انا ممشيييت فيين .. ياك نتي قلتي ليا صبر حتا يدوز شوية الوقت و تقاد لاقتك بيه .. كيفاش دبا كتقولي لبا خطبة ما خطبة

الغالية بدات ترعد: م ما مهضرتيش مع با؟

قبل ما تسمع جوابو كانت قطعات عليه كترعد و خرجات من البيت بخطوات مسرعة جهة البيت فين كانو .. لقاتهم كيهضرو و يتناقشو بينهم و هي توقف كتصنت

رابحة: ما قلتيش ليا شحال فعمرو و فاش خدام و فين ساكن

رشيد؛ عندو ربعين عام ولكن راه مزال بصحتو كيبان صحيح و خدام فشركة ديال البني .. هو ساكن فالمدينة على قبل الخدمة و دارهم كاينة فالدوار لي جنبنا

تراجعات كتقفقف و ترعد و تضرب فحناكها .. دخلات لكوزينة كتمشي و تجي و الدمعة وقفات ليها فطرف عينها .. بغات تغوت و ماقاداش .. بغات تدخل تقلب كلشي عليهم و تقووول ليه مبغيتوش و مقدراش .. بغات تهرب من تما و رجليها ما مساعدينهاش .. بقات كتمشي و تجي تما كي الدبانة بغات تسخف حتا دخلات مها عليها لقاتها حالتها .. قبل ماتهضر دفعاتها مخرجاها

– سيري سيري رجعي عندو .. قوليييه مخطوبة .. قوليه مزوجة ولا ميييتة كاااع ماسوقيييش .. المهم منتزوجش بهذااااك .. رجعييي عندو قولييه مبغاااتش .. انا بااااغة حكيييم كتفهمب حكيييم ماشي هاد الشااارف .. و بغييييت حكيم اعباد الله .. واش بغاااا يحمقنييي ولا شنوووو

رابحة: نتي فعار الله اويلي مالك .. ياك لباس

الغالية بجنون بغات تنتف راسها: و مااااشي حكيييم هذا لي جااااي ماشي حكييييم اعباد الله و شووووف منين ضبر على هااااد الشارف بيلبقني ليييه .. والله منتزوج بيييه والله حتا نهرب ولا نلوووح راسي فالبييير .. غا حكييييم ولا مكااااينش غيييرو .. و دبا سيييري قولييه مبغااااتش ولا قولييه جايين فيها خطاب خريين ..

و دبا سيييري قولييه مبغااااتش ولا قولييه جايين فيها خطاب خريين .. المهم الشاااارف منشوف خنشوشو قدامي

خرجات رابحة مضهشرة مافهمات تا وزة و دخلات على رشيد .. بقات الغالية واقفة كتسنا فيها تجي حتا سمعات غوات باها و هو جاي خارج

– مزياااان تبارك الله .. كيفاش مبغااتش لخاااطرهااا ولا .. انا عطييييت كلمتي للراجل و ماني متراجع عليييها .. حنا ما دراري صغاار نبداو نلعبووو مع السيد .. غتجووووج بييه هي غتدجوج

خرجات عندو لوسط الدااار مخرجة فيييه عينيها مبقات كتعرف لا باها لا مها لا جدها .. كيبااان ليها غييير حكيم لي غضيييع من يديها .. كيييفاش غتزوج واحد اخر و هي قلبها عطاتو لواحد اخر؟ … كييفاااش غتعيييش مع رجل اخر مبغاااهش ليها قلبهاااا؟ … كيييفاش غيرجع باااها يدير نفس الغلط و يعطيييها بلا موافقتها؟ .. كيييفاش غتقدر تنسا ايامها مع حكيييم .. كيفاس غتنسا وقفتو معاها و كلااامو ليها و اعجابو لي بينو ليها شحااال مرة .. كيفاااش غتزوج براجل عمرها شااافتو و كبيير عليها بعشرين عام و وااالد من الفوووق .. عينيها تعماو ليها ولا كيبان قدامها غير حكيم لي غيمشي من يديها و يدوز على عينيها الضبابة

الغالية: مبغييييتوووش مغنتزوججججش بيييه والله منتزوجو واخة نموووت مناااخدو والله لا خديييتو

رشيد: وليتي كتحلفييي عليا ابنت لحرااام مشيتي للمديينة و تفرعنتييي .. ايوا سمعي نقووول ليك .. هداااك هو لي غدجوجي بييه بغيتي ولا كرهتي .. السيد شحاال و هو يتسنا و حنا نوخرو فييه حتال دبا و تجي تقولي لا .. لخااااطرك

الغالية بجنون معقلاتش عليه: انا والله منااااااخدووو اهئ والله لا تزوجتو اهئ اهئ وااااش باغييين تقتلووووونييي اهئ والله لا تزوجتو و دييير لي بغيييتيه ماسوقيييش اهئ

هز يدو حتال الفوق و نزل عليها للوجه حتا رعفات و شعرها تفك ليها من المقبط باش شداه .. شدها من شعرها و جرها صرفقها تاني و هي كتنين معاه

رشيد: باقي تهزي عليا صوتك نذبحك و نشرب مم دمك .. اش غتبقاااي ديري الى متزوجتي هممم .. مطلقة كتسناي يجييك سييد الرجال ولا .. هذا و حمدي الله قبل عليك

لاحها من يديه حتا طاحت و خرج من الدار خلاها كتغوت و تركل وسط الدار بغات تموووت .. عينيها تبووقلو بالبكا و وجهها حمااار و هي كتركل و تضرب فراسها بفقصة و مها شداها و ترغب فيها تسكت

بكاات و نحطات و غوتات و تركلات حتا سخفات .. نوضاتها رابحة من الارض دخلاتها للبيت و خلاتها مزال تبكي و تقول مابكات .. الدم نشف ليها على وجهها و هي ماهامهاش .. راسها كيفكر غير فيه …. دخلات مها هازة فوطة مرطباها كتمسح ليها فوجهها و نوضاتها من الارض عطاتها تبدل حوايجها لي مسخين .. خلاتهم محطوطين تما و مشات تكات فبلاصتها و تلفون جنبها مسكتش من الصونيت .. كل دقيقة يصوني و هي عينيها كيشوفو غير فنقطة وحدة .. عقلها مبلوكي و مقادراش تفكر فشي حاجة اخرى .. علاش رجعات لهنا .. علاش مبقاتش غير تما .. ياك باها لي سمح فيها .. علاش رجعات لعندو باش يعدبها تاني .. علاش كيدير فيها هاكا .. واش لهاد الدرجة تقلات عليه .. لهاد الدرجة بغا غير يتفك منها و يلوحها لمن والا .. قلبو قاسح من جهتها لدرجة ميتسوقش ليها و يدير لي قالها ليه راسو .. باها و ماحنش فيها اش خلا للبراني مايدير ..

عينيها ما نشفوش من الدموع و نيفها عاد سايل ليها .. وجهها تنفخ بالبكا و هي مزال غير كتشهق .. دخلات عليها رابحة حاطة تلفون على ودنها و كتشوف فيها بحسرة

– هاهي قدامي ابنتي ماكتهضر ما تكلم غير كتبكي و تشهق معرفت اش ندير معاها .. الليل عليك ابنتي بلاش حتال غذا و جي .. لي بغيتي .. حتا انا ماكان في خباري والو حتا جا رشيد كيعاود ليا .. انا يحسابلي هداك لي كتعرفو ملي قلتها ليها بغات تحماق و كتغوت كتقول ليا ماهواش .. المهم حتا تجي و هضري معاها راه مبغاتش حتا تسمع ليا .. الله يعاونك و يسهل عليك

قطعات و مشان عندها كتدوز على شعرها و لخرا كتشهق

– براكة ابنتي الى مكتاب ليك راه يجيك فين ما كنتي .. الله يرضي عليك غتمرضي غير راسك

الغالية: بغا يقتلني امي اهئ اهئ بغا يدفني و انا عايشة اهئ اهئ .. مابغيتوش امي مبغيتوش اهئ اهئ .. بغيت حكيييم اععععع اهئ اهئ

غوتات عاضة فالمخدة مخرجة فيها سمها و مها غير كتحسر .. ناضت خرجات و خلاتها كتفرغ فطاقتها فالبكا .. رجع صونا تيلي و هزاتو كتشوف فيه غيطرطق بالمكالمات لا ديال حكييم ولا ديال جنات .. مسكتش كيقطع واحد و يصوني لاخر و هي الصوت باش تهضر معندهاش .. خلاتو هكاك و بقات كترمش و تفكر لحضاتها مع حكيم .. كيفاش كان كيتعامل معاها و ديما هازها فوق راسو .. كيفاش كيخليها تضحك بزز عليها و يخرجها من كأبتها ..

كيفاش كيعاملها بحال بنتو هداية و يضحك معاها و شاد ليها الخاطر .. واخة يكون معصب يضحك في وجهها و ينشطها .. الى معجباتوش الحاجة ميقولهاش ليها نيشان غير باش مايجرحهاش و تقلق .. كلماتو ديما مدخلين الفرح و البهجة لقلبها .. ابتسامتو و حنيتو معاها و تعاملو اللين و احترامو ليها كأنثى خلاتها تفتح قلبها من جديد و تعطييه ليه بلاما تفكر زوج مرات .. واش غتقدر تعيش بلا قلبها .. واش تقدر تتزف لراجل و هي قلبها مع رجل اخر .. اش هاد الضلم اش هاد الحالة وصلات ليها ..وقفات بتتاقل و مشات للطواليط سدات عليها و بدات كتقلب فالمجورة لي تما .. لقات زيزوارا محطوطة فالمجر لفوق و هزاتها كتفتف و يديها كيرعدو عليها .. مدة و هي كتشوف فيها و تبكي .. كتفضل تموت ولا تعاود تعيش نفس لي عاشتو مع خالد .. نفس التاريخ كيتعاود ديك المرة خدعات لكلام باها و طاعتو .. ولكن هاد المرة واش تقدر تصبر؟ .. تقدر تقاوم و تكمل حياتها عادي؟ .. اكييد لا .. هزات الغازواغ دارتها فجيبها و مشات لعند مها فين كانت جالسة حاطة يدها على راسها و خوتها الصغارفجنبها كيتفرجو .. تلاحت عليها معنقاها و كتبكي و في فمها غير الله يسمح ليا .. الله يسمح ليا .. كتنطق احرفها بهمس و قهرة .. رابحة ما فهمات من كلامها والو .. حدها ضماتها لصدرها و طبطبات على ضهرها بحنية و دموع فعينيها

– كلشي يدووز ابنتي و يرجع غير تعاويد .. الله يدير لي فيها الخير و يشوف من حالك

بقات مدة و هي غير معنقاها و كتبكي .. دازت لخوتها كتبوس فيهم و كأنها كتسامح معاهم و تودعهم .. مدة و هي غير كتشوف فيهم و تطلب الله يسمح ليها و يغفر ليها على المعصية لي غادير .. عاد ناضت لبيتها سدات عليها و جلسات كتشوف فتلفون .. مرة تبغي تصوني مرة تتراجع .. في الاخير اكتفت بالصور كتشوف فيهم و تزومي فصورها هي و حكيم .. كتشوف البريق لي كان فعينيها و هي معاه و ضحكتو لي مزينة وجهها و نضراتو الولهانة فيها .. كل تفاصيلو لاحضاتها و كأنها كتحفض فملامحه .. مدة و هي غير كتشوف فيه و فصور جنات .. البنت لي وقفات معاها و ديما كانت كتدعمها .. البنت لي واجهات كلشي و بقاات معاها .. البنت لي كانت هي الاخت و الام و الاب بالنسبة ليها .. كتنصحها و تنبهها و تقويها بكلامها .. باست صورتها و اعتذرات ليها بين نفسها ..

. لاحت تلفون بعيد عليها و افكارها كيلعبو فعقلها .. واش باها و ماحنش فيها كيفاش غيحن البراني .. باااها لي من لحمو و دمو سمح فيها و بغا غيير يلوحها كيفاش واحد خر غيهزها و يعيشها فرحانة .. باها لي خاصو يحطها فوق رموشو و يعلي بيها كيحتقرها و مرجعها متسوى بصلة كيفاش ولد الناس غيعلي بيها .. علااش غتبقا عايشة الى كانت غتعييش غير فالعذاب و كل مرة تخضع لاوامر باها .. اللهم تنهي حياتها و تهني كلشي من صداعها و مشاكلها .. شنو غيقول حكيم الى عرف شنو دارت .. غيحزن عليها نهار و لا يومين و ينسا .. ولكن الى تزوجات بواحد اخر غتقدر تشوفو حتا هو مع مراة اخرى عايش حايتو .. اكيد متقدر و تفضل الموت ولا يوصل داك النهار … جبدات الغازواغ كتشوف فيها بين يديها لي كيترعدو .. قلبها غيخرج من بلاصتو و راسها تقييل عليها كيزدح .. كتشوف فراسها غاظية لجهنم برجليها .. غتخلي واحد هنا و تمشي للاخرة بعينيها مغمصين .. كاااع دكشي لي بنات من صغرها غتهدمو دبا فرمشة عيين .. نطقات بصوت ضعييف و مقهور و هي تستنجد الله سبحانه و تطلب منو المغفرة

– ياااربي راك شايف و عالم بحالتي اهئ اهئ .. ياربي تسمح ليا تغفر ليا هاد المعصية لي غنرتاكب فراسي اهئ اهئ .. يارب تسمح ليا يارب

حطاتها على عروق يديها و غمضات عينيها مستعدة تدو&زها على عروقها.

يتبع