نزل عندنا وتم جاي جيهتنا .. سقلو بجوج فاش شافوه جاي لاكن انا مابغيتش نبين خوفي لا منهم لا منو خصوصا فاش هدداتني لبنى وقلت ليها قولي ليه .. يالاه قولي ليه شنو مغنخافش منك
وقف شافينا قالينا شنو غتقول ليا شنو كاين مالنا على هاد الشوهة
تلفتات لبنى عند ديك البنت قالت ليها سبقيني للطموبيل هانا جايا وعطاتها سوارتها وهنا قالت ليها رجاء ايوا مالكي ماوصلتيها من الاول ؟
شاف فيها عيسى قاليها مالنا شنو واقع غواتكم كيتسمع منين ومنين
شفت فلبنى وقلت ليها وا هضري مالكي سكتي
تنهدات وقالت ليه والو مكاين والو..ًغير انا قلت ليك نوصل سلمى للدار وناضو قالو لي علاش وكيفاش
حركات ليها رجاء صبعها وقالت ليها لاا قلتي. يوصلها هوا ماشي نتي
حلات فينا لبنى عينيها وقالت ليها انا قلت ليك هاد الهضرة؟؟
قلت ليها ااه وسمعتك بودني .. اصلا شنو كدير معاك فالدار
ضحكات وقالت لعيسى مافهمتش هادو مالهم علاش كيهضرو
قالينا فرتكو علينا هاد المجمع وااخر مرة ديرو بحال هاد الشوهة اللي درتو ليوم
قلت ليه مادرنا لا شوهة لا والو هي جايبة وحدة برانية مسكناها فالدار كيفاش هادشي ؟؟
قالي نتي واقيلا تخالطو ليك !!!
قالت ليه رجاء شوف انا نشرح ليك شنو كاين
قاطعها قاليها ماتشرحي ليا منشرح ليك فضيو علينا هاد التخربيق .. داكشي اللي بقا ليا غير نولي شيفور نوصل هادي ونوصل هاديك !! مالنا على هاد الفضايح كاع الناس تفرجو فيكم وواقفين فالزنقة مشوهين !!! تناتفو حسن !! يالاه نوضو تناتفو
قالت ليه لبنى. لاحولة ولا قوة الا بالله .. سوء تفاهم وقع وصافي
ضار فيها قاليها سوء. تفاهم ولا سوق التفاهم ماشي فالزنقة .. شهاد الحالة وزعما نتي مولات العقل كاع !! اشهاد للل … الزمر هادا !! يالاه حيدو عليا من هنا .. واقسم بالله ونسمع حس شي وحدة طالع وكتسمعو لكاع الناس حتى ندمها سمعتو
رجع طالع ليه الدم طلع فالطموبيل وزدح الباب مشا وخوات حتى لبنى مشات تبعات صاحبتها وتميت راجعة انا ورجاء مافهمنا والو .. قالت ليا مافهمت والو
قلت ليها حتى انا ياك كانت غادية عندو
قالت ليا واش سمعتيها؟؟
قلت ليها سمعتها بودني كتهضر معاه
قالت ليا ضحكات عليك وتيقتيها
قلت ليها حتى نتي ضحكات عليك وتيقتيها شكون قالك ساكنة معاهم فالدار انا قلت موحال
قالت ليا واش انا مكلخة حتى مانعيقش بيها!! متأكدة ساكنة معاهم اما قضية يوصلها موحال غير ضحكات عليك وموحال كاع واش عيطات ليه .. شي تقوليبة هادي مافيهاش
دخلنا جلسنا لداخل فالكافيتيريا كل وحدة شدات كاس دالقهوى وبقينا ساكتين كنشوفو .. تنهدات وقالت ليا وشووفي لبنى وفعايلها وياالاه
قلت ليها انا مافهمت والو واش سوء تفاهم ولا تنوعيرة مافهمت والو
قالت ليا سوء. تفاهم!! مزال مكتعرفي لبنى ..توريك سوء التفاهم وتنوعرني انا ويااك
قلت ليها راه اصلا من الصباح وهي كدور بيا وطيحات عليا باطل .. بلحق والله مانخليها فيها مزال نقولها للحاج ،. مشاو ليها سوارتو وجات قالت ليا نتي اللي هزيتيهم
قالت ليا ببرودة واستهزاء. مشاو ليها السوارت .. راه تسرطهم وماضيعهمش..واش نتي حمقى .. راه الحاج هادا والله وتلفات ليه شي حاجة ديالو حتى يعلقها ..راه كيخلي عندها كاع الحوايج المهمة وكتقولي ليا تلفهم .. كتكون ناعسة فالدار مابيها ماعليها وكتنوض بالليل تمشي طل على المساىل اللي مخبي عندها وترجع تنعس .. ونتي كتقولي ليا تلفهم
قلت ليها بااز ليها مالها عليها
قالت ليا ايوا هي باغا دير فيها مولات العقل والمسؤولية والأمان .. خليها ..
بقيت ساكتة كنشرب القهوى وكنشوف فيها وقلت ليها كتجيني خطييرة
قالت ليا ماشي خطييرة هي مزيانة ولاكن الى عولات عليك وحطاتك فراسها مشيتي فيها والله ماتهنا تا تسيفطك .. ماشي وصلاتني انا والحاج للطلاق واحد المرة ..
قلت ليها زعما راه شادة ليك الولد ومأمناه عندها
قالت ليا حنا مكنهضروش على الولد كنهضرو علينا حنا اما الولد ماتقدرش تآديه حيت هزاتو فاش كان لحمة والصراحة فيها شي حوايج زوينين ولاكن فيها فعايل خايبين اكثر والحاج كيتيق فيها وواخا تقولي عليها االي قلتي مايتيقكش يقول غير غرتي منها
هزيت حاجبي قلت ليها غرت منها !! علاااش غنغير اصلا
قالت ليا اييييوااا هاكا هوا كيفهم .. ماشي بحالي انا غير نية وهبيلة
بقينا كنهضرو وشفتها كتهضر من قلبها حسيت بيها مضرورة فاللهر قلت ليها يالاه نرجعو للبيت نشوفو الحاج
مشينا طلينا عليه لقينا معاه غير الحاجة وعيط ليا عيسى قالي باباك راه جاي فالطريق. يزور الحاج
قلت ليه واخا ولاكن بغيت نرجع للفيلا
قالي غنتعطل تسناي شوية
شارت ليا رجاء بيدها قالت ليا انا نديك حتى انا غادية وقلت ليه صافي انا غنمشي مع رجاء
رد عليا قالي باستغراب. رجاء !! واخا سيري
قطع معايا وخرجت معاها غادين وعيط ليها حدايا سمعتها كتقول ليه ماشي مشكل مابيناتناش حنا اصلا راجعين راجعين .. امين يالاه بسلامة
قطعات وطلعت معاها دارت السمطة وقالت ليا عرفتي غتشوفنا لبنى بجوج غيطرطق فيها شي عرق
صحكت عجبني الحال بغيت نفقص لبنى ونطرطق ليها المرارة ومشينا كنهضرو على العاىلة .. سولاتني معامن كتخلي بنتك قلت ليها مع ماما وسولتها على واليديها قالت ليا مساكنينش ففاس ساكنين فصفرو وقالت ليا غيجيو فلعشية على قبل الحاج وكملنا الطريق كنهضرو قالت ليا واش تغديتي قلت ليها منين جاني اصلا باقا بلا فطور . دزنا انا وياها جلسنا فواحد البلاصة تغدينا وتما عيط ليها الحاج عيسى سمعتها كتقول ليه دزتا ناكلو شي حاجة هاحنا جالسين واحد شوية ونمشيو راه من الصباح ما كلينا ماشربنا وبدات تقوليه فين حنا وماطولاتش وقطعات قالت ليا كيسول خاف نطجو ليه واقيلا
قلت ليها عنداك يغوت يقولك ماقلتوش ليا
قالت ليا لالااا هوا فهادشي ديال دزت شريت دزت كليت ماكيحكرش .. شحال قدك تبقا كل مرة الو انا دخلت للحانوت. الو انا كناكل الو انا مانعرف!!وبزاف هوا براسو مايبغيش..وهاد الفعايل فلبنى هي اللي كتبقا عليه هانا مشيت هانا جيت هانا كليت عانا شربت حتى رجع مكيبغيش يجاوبها شي مرات الى كان مشغول عارفها غتبقا عليه درت فعلت تتركت
بقيت ساكتك غير كنشوف ونضنا مشينا للدار دخلنا لقينا العاىلة الاولاد والاحفاد وعيالاتهم تما وبدينا نسلمو حتى طاب ليا الحنك وجلست وهي تنهد هزات يديها فالسما كتفوه سمعتها قالت بصوت منخفض مع ديك التفويهة اللهم غفرلي دنبي وشافت فيا قالت ليا نااري تجمعات عليا الصلاة عاوتاني ومشات فشلانة طلعات لفوق وبقيت انا جالسة مع العيالات
دازت العشية طويلة ومملة بزاف حتى ضلام الحال ورجعو اللي كانو فالكلينيك كاملين وبقيت جالسة كنتسنا عيسى يبان لاكن مابانش كاع ..رجعات لبنى وجابت معاها ديك خيتي عاوتاني ولايحة شال على راسها زعما مغطياها!! باز ليها والله .. الدار عامرة باللحايا جبهتهم كاملين كحلة بالصلاة وكيشوفو فالارض وهي بلاحشمة بلا حيا جاية لابسة جلابة مزيرة والوجه مزوق والدفار فالاحمر !!
دورت وجهي ماشفتش فلبنى وكانت حدايا رجاء ، شافتها داخلة وضارت عندي كضحك ودارت رجل على رجل وقالت ليا هضري وضحكي خليها تقلا فسمها راه غطرطق
يالاه يجت نضحك وهي دوز حدانا وقالت ليا بالتسامة الله يتاويكم للخير ويدومها محبة
قالت ليها رجاء اميين احبيبة ويبعد علينا عين العديان
بقيت انا غير كنشوف وكنتسنى عيسى يبان . شفتو داخل مع الباب وانا نوض سبقت عندو نهضر معاه باش نبان الاقرب ليه ساعة لقيت لبنى سبقاتني وقفات عليه يالاه قلت ليه عيسى وكنضحك شافو فيا بجوج وسمعت رجاء مورايا جات تا هي كتسابق قالت ليه جيتي على سلامتك
هبط راسو وبقا كيشوف فينا بعينيه ويدور السوارت فيدو وقالينا قل اعوذ برب الناس .. ياك لباس ؟؟
قلت ليه بغيت نهضر معاك
نقزات للنى قالت ليه كنت كنتسناك على شي حاجة .. دارت رجاء يد على يد ونفخات سمعتها قالا بهمس … متأ يالاه السباق
طول فينا الشوفة وقالينا سيرو تجلسو سيرو .. براكة منننن…
شدات فيه رجاء قالت ليه اجي نقول ليك
وقربات لودنو وبلا منشعر جريتو عندي بعنف قلت ليه فين بابا ماجاش؟
نتر يديه بجوج وهزهم قالينا شهاااد البسالة ؟؟؟ واش حنا فالمرض والدار عامرة ونتوما فين هادا اجي نقولك اجي منقوليكش !!! بسالة كيدايرة كل وحدة تشد بلاصة تجلس فيها وعطيوني التيساع نفض يديه وزاد خلانا واقفين .. حسيت بغصة فقلبي عيني غرغرو وتزيرت ومارضيتش وماحملتوش وكرهت راسي. .. انا لبنى ورجاء دار يد على يد وبقا كيشوفو ويسوطو ماتحركات فيهم حتى حاجة تقول كاع ماقمعهم ..مشيت لواحد الطواليط سديت عليا وخرجت ديك القمعة فالبكا حتى شبعت وخرجت لقيت كل وحدة فيهم جالسة فجهة ومجمعة بقيت غير كنشوف فيهم وعلى النفس والخاطر اللي عندهم ومزال عندهم الكانة يهضرو مع شي واحد .. اما انا حتى الجوع مشا ليا ومابقيتش حاسة بيه ومابغيت نعضر مع حتى واحد حتى دازت حدايا حماتي وجيت نسولها وطلعات معايا تنخصيصة. قلت ليها واش بابا جا
قالت ليا جا راه مع الرجال .. واش كيليتي شي حاجة ؟. سيري. ابنتي للكوزينة هانا جايا نحط ليك واقيلا من الفطور ماكليتي
قلت ليها تفديت برا انا ورجاء وقالت ليا ايوا مزيان جلسي. هاحنا دابا شوية نخطو لعشا غير حتى يصليو صلاة العشا وتعشاب وسيري ترتاحي من العيا ديال الطريق
تعشيت ونفسي فالسما ماعضرت ما نطق .. جلسنا كنسمعو القرآن وبابا كان داير خطاب للرجال كان كيهضر على السياسة وكروش الحرام والمال الحرام ..ًكان موضوع مشوق. وبابا كيلفت انتباه الناس بطريقتو فالهضرة المخلطة بين اللغة العربية والدارجة حتى سالا وتلاقيتو دايز سلمت عليه وبست ليه يدو وكان واقف مع بابات رجاء اللي عرفتو عن طريقها فاش عيطات ليه .. خرج باباها ودعو عيسى ومشات معاه للدار داتو وبابا عطاوه بيت النعاس وانا وطلعت للبيت سديت عليا ولبست بيجامتي وجلست حتى سمعت الدقان ونضت حليت لقيت يسرى . عنقاتني وعنقتها ودخلات قلت ليها فين غابرة مابنتيش النهار كامل قالت ليا عاد وصلا راني دزت عند بابا هوا الاول بقيت معاه شحال مسكين الله يشافيه قلت ليها امين .. وبقيت كنسولها على الحياة الزوجية وعلى راسها وجلسنا كنهضرو قالت ليا ولفتي شوية ؟. قلت ليها هانا كنولف بزز مني
ماكملناش الهضرة دخل علينا عيسى وناضت سلمات عليه بقاو كيهضرو على الاحوال وقالت ليا تصبحي على خير الصباح نتشاوفو ومشات رجعت بلاصتي عيطت لماما كنهضر معاها على بنتي فالفيديو وعيسى فالبيت كيدور بدل وتوضا وصلى وحيد وجا حدايا بتيشورط تكا شار ليا بيدو نقطع وقطعت حطيتو . ضار عندي عنقنقي وقالي الزين ديالي…حيدت ليه يدو قلت ليه خليني نعس بقا مصمر كيشوف فيا وقالي مالكي ياك لاباس؟ماجاوبتوش وطلعت عليا الغطا تكمشت وهوا يطل عليا قالي شنو كاين مالنا على هاد القلبة؟نضت جلست وقلت ليه مالنا ؟؟ شوف نتا ؟؟ بلحق انا اللي خاصني لعصا جايا عندك اما انا نشد الركنة ونتكمش مانشوفش حتى فيك .. مزياان ليا
هز راسو قالي اااه .. واصلا علاش جايا عندي واش ماقدرتيش. تخلي حتى نكونو غير انا وياك قلت ليه بصاااح ولاهيلا سعدااتك !! ياكما حساب ليك جيت باش نزورك وناخد البركة ديالك!!!ً جيت غير نسول على بابا ماجيتش على شي حاجة اخرى
قالي ومانتي كتجري ولخرى كتجر وماشي بسالة هادي !! صافي فاش يكونو الناس والدار عامرة مادوروش بيا حيت غتجي عندي شي وحدة تفلسف غليا ديك الساعة غندور فيها شكون ما بغات تكون … الا نتي الشهدة ديالي
هزيت حاجبي قلت ليه سير سير انا عمرني نسا ليك هاد القمعة فحياتي كلها
قالي وبلعاني قلت هاكاك باش هما يفهمو اما الهضرة ماشي عليك اصلا
قلت ليه امممم ماشي عليا وباااز .. اجي وهاديك اللي جابت ليك لبنى ومجلساها فالدار !! عاجبك الحال ؟
شاف قدامو قالي شكون؟قلت ليه هاديك اللي كنتي غتوصل ليوم وتديها للدار عند لبنى غير نتا وثاها طيط اطيط .. صااحبتها
بعد وجهه وشاف فيا قالي دابا غادي نتخاصم معاك !!
قلت ليه علاش!!
قالي واش بعقلك ؟؟ واش غادي نهز معايا وحدة ونديها للدار !! واش تسطيتي !! واخا تكون بنت عمي مانهزهاش بوحدها !! اصلا ماتعرف الباطل منين ينزل نهز التهمة يقولك مشات معاه شوف واش داها للدار ولا شي بلاصة اخرى
قلت ليه وعلاش خليتيها تسكن مع لبنى
قالي نتي راه خاصني نفسل ليك دا الراس من لدااخل!! اشمن تسكن ولا ماتسكن فين كاينة هادي!! جات لبارح باتت معاها وليوم غاديا فحالها وهضرت معاها قلت ليها نجي نلقا الدار خاوية واصلا البنت معاها امها وجاو كيقلبو السكن وغتكري وترجع مها بحالها
ربعت يدي قلت ليه وماكايناش المشية عند لبنى اسيدي حتى تمشي هاد ختنا هادي
تما وجمع يديه قالي اصلا لبنى كنشوفها الاربعاء و الجميس والخميس كنصوم مكنجي حتى ياذن المغرب ونمشي نفطر والجمعة كنتغداو هنا وكنشد الطريق لعندك .. مالكي على هاد الشك وعاد الوسواس
قلت ليه شتي لبنى كدير هادشي بلعاني ماعرفتش علاش
جرني قالي خليني من لبنى ولا غيرها شوفي دابا كاين غير انا ونتي .. واخلينا ندوزو هاد الليلة على خير
ربعت يدي قلت ليه انا بغيت غير نعرف .. واش. هاد الهضرة غير ليا انا ولا ليهم حتى هما !! كن كنتي مع شي وحدة فيهم كنتي غتقول ليها نفس الهضرة
رجع اللور وقالي ونتي مالكي .. مالك مكتعرفيش تعيشي مالكي ؟؟ مالكي كدوزي من هنا ودوزي من هنا !! علاش هادي. ؟ وعلاش هادي!! حساب ليك كاع الرجال فيهم الهضرة والغزل !! موشكيييلة معاك والله .. شكرنااااك مشكيييلة واش كدير بحال هاكا معاهم !! ناشكرناااكش موصيييبة اكبر. ادا مكتبغينيش وكتبغيهم اكثر مني !! شنو باغا بالضبط. انا مغنبقاش نهضر هانا غنهز يدي. حتى نشوفو فين غتوصل
قلت ليه ايوا تصبح على خير
ضرت عطيتو بضهري. وبقا جالس كيشوف فيا حتى عيا وناض لبس حوايجو وخرج فرمشت عين صدمني ونضت جلست بقيت غير كنشوف !! اوييلي واش من نيتو ؟؟ ماحسابنيش غيدير هاكا قلت غادي يرغبني شوية وصافي واصلا مابغيت. شي صدع معاه ولا غضيب بحال المرك اللي فايتة !! مانويتهاش كااع بناقص من شي فشوش ولا زمر يخخ عكرت الجو على راسي. تفو
نضت لبست حوايجي ودرت الشال وخرجت كنطل عليه ونقلب قلت مافيها باس نحزر شوية كما هوا كيحزرني ونزلت بالزربة لقيتو واقف كيهضر مع مو وشافو فيا بجوج ابتسمت ليهم وقلت ليه الى كنتي مسالي اجي بغيتك
حرك ليا راسو وتم جاي طلعت مع الدروج وتبعني للبيت خليتو حتى دخل وقلت ليه مالك ؟
قالي شوفي نتي مالك !!
قلت ليه نتا اللي على نقشة !!
قالي انا على نقشة !!
تنهدت ومشيت حيدت حوايجي دخلت فالفراش وتبعني كيعنق ويبوس .. قلت ليه حشمت نصبح الصباح كندوش قدامهم
قالي حشومة تبيتيني واقف وانا مزوج و ماشايفكش سيمانة ..
بديت كنضحك وطفيتا الضوء. نعسنا وصبحت الصباح فالدوش على النبوري ولبست ونزلت درت يدي حتى انا فالتوجاد ديال الفطور وكان بابا حاضر غير فطر ودعنا ومشا كيوصيني ندير عقلي ونتبت .. موراه جات العاىلة وقررنا نخرجو الحاج من الكلينيك ومشار عندو ولادو خرجوه واستقبلناه فالدار درنا صدقة ديك العشية وقلت لعسى وهوا برا واقف. . خسارة بابا مشا اما كن حضر للصداقة
قالي راه معروض للصدقة تما فالناضور ديال شي زواج وخاصو يمشي
قلت ليه ااه مزيان
قالي سولتي فجنة ؟
قلت ليه بطبيعة الحال سولت فيها
دخلات رجاء هازة ولدها لقاتني واقفة انا وياه كنهضرو وجات عندنا كضحك وحتى هوا هز ولدو باسو ومشا من حدانا مابقاش معانا وبقيت واقفة غير انا وياها قالت ليا واش الدار عامرة
قلت ليها مطرطقة ماعندك فين تجلسي
قالت ليا مافيا اللي يجلس اصلا جايا غير بزز .. تصادف ليوم مع عرس صاحبتي وبغيت نمشي وماعندي كي ندير
قلت ليها جلسي شوية وسيري حضري
قالت ليا اوييلي مايصلاحش حشومة حتى للتعاويدة
وصلات لبنى وموراها صاحبتها غير دخلات دازت لاحت لينا السلام وهي دور عندها رجاء قالت ليها وجه الله اختي ايلا ما حشمي شوية!! غير غادية جايا بديك المونيكة ديالك
جاوباتها البنت قالت ليها واش عليا كتهضري؟
قلت ليها انا ماشي عليك واش نتي سميتك مونيكة؟
ردت لبنى قالت ليها راك كتقلبي عليها ارجاء ..
قالت ليها رجاء نتي اللي كتقلبي عليها
جريت رجاء قلت ليها راه مكاين والو من داكشي اللي وصل ليك الهضرة وصلها ليك غالطة
جات تهضر وعيط ليها عيسى من لداخل تمشي تتكلم ومشات وجات عندي ببنى قربات هزات حاجبها وشارت ليا بنص عين قالت ليا دارتك قنطرة وتصالحات مع الحاج على ضهرك مبروك مسعود عليك
دخت وتلفت مابقيت عارفة شنو كايدوز قدامي .. مرة يبانو ليا مزيانين مرة لفعات مابقيتش فاهمة شنو كيوقع !! لاكن اللي فاهمة هوا ان الضرايرات عمرهم يبغيو ليا الخير مهما يكن.. رجاء اللي خاصمتها مع عيسى صدقت انا نيت اللي مصالحاها معاه!! ايوا خصني العصا وهادي دير ليا لعقل نعطيهم التيساع مانعاودش ندور بيهم حيت مساكناش حداهم وماعارفاش شنو كيطرا كاع .
دوزت الصدقة والتقوليبة ديال رجاء كطلع وتهبط فيا وعييت نكمدها مابغاتش تتكمد ليا حتى شديت الطريق راجعة بحالي وبعدت على المدينة البي جامعاهم عاد بردت .. وحتى مع الخدمة والحركة نسيتهم عليا وجيت مباشرة مع الكونكور اللي كنت كنتسنا وبديت نوجد ليه ووقتي كامل كندوزر فالتحضير لهاد لكونكور . شيخي الحمد لله على سلامتو رجع لاباس وعيسى بحال العادة كيجي فالويكاند والصراعات اليومية والروتين نفسه ونهار على نهار كنقرب الكونكور وخاصني نصارح عيسى حيت مابقيت قادرة عل مشاكل ولا صدع معاه وداك الغضيب كنكرهه ومكنحملش داك الجو المكهرب، وصل الويكاند والزوج المصون غادي يجي عندنا .. بحال اي مر كايكون راجلها مسافر ولا خدام فبلاصة بعيدة مكتشوفو ماكيشوفها فاش كيقرب يجي كتنوض تديها فحالتها .. نضت دوشت قاديت الحالة لبست حوايج جداد ومجوهراتي الخفيفة اليومية وعطرت البيت ورجدت جو هغدئ ومريح ورمنسي وحتى التقدية تقدات ليا زينب اللي كتعاوني فالدار ودرنا العشا انا وياها وغطيناه ، ضربات التسعود ديال الليل نعسات ليا جنة ومشيت حطيتها فبلاصتها وجيت خارجة مع الكولوار وصادفتو داخل مع الباب والسوارت فيدو .. تبسمت ليه لاكن ماضحكش وقالي ببرودة والعيا باين على وجهه . السلام عليكم
مشيت نعنقو ورد ليا التعنيقة بيد وحدة وطبطب على ضهري زعما راضي على عليا لاكن ماكيتجاوبش معايا بحال العادة .. جاني هاد التعامل الجديد غريب عليا ومامولفش يديرها ومولف يعنقني ويبوسني فالباب قبل مايفوت العتبة وكيتم داخل ومعنقني !! لاكن هاد المرة جاتني المجية ديالو على غير عادتها . سولتو مالو ياكما مريض. قالي عيان شوية ودخل حط السوارت وتكا على واحد الكنبة كيسوط ويدو على جبهتو. . سولني على جنة قلت ليه نعسات غير دابا وقالي عطيني نشرب .. عطيتو شرب وناض نيشان مشا توضا ودخل للبيت صلى ورجع جلس بقا كيسولني على دارنا واحوالنا واحوالي مع الخدمة .. بقيت كنعاود ليه ودخلت فالموضوع قلت ليه دفعت لواحد الكونكور وبغيت نشرح ليه لاكن الى قاطعني وقالي خلي لمن بعد راسي كيضرني باغي غير ننعس .. سكت وخليتو ونضت حطيت لعشا ورجعت مالقيتوش حتى بان ليا خارج من بيت جنة ومشا جلس تعشا ودخل للبيت طلق سورة البقرة وتكا على ضهرو ويدو على جبهته .. مشيت نعست حداه ومابغاش يديني النعاس بقيت كنتقلب من جهة لجهة .. ناض هز تيليفون وخرج من البيت ووتبعتو جاني الفضول نعرف معامن غيهضر فهاد الوقت وهوا اصلا عيان ومافيه اللي يهضر .. طليت بالتخبية من الريدو على البالكون ديال وسط الدار وانا نسمعو كيقول .. البنى الله يهديك نعلي الشيطان ..
طلعات ليا السخانة فاش سمعت لبنى ودخلت عليه وهوا شاد تيليفون .. ضار عندي قلت ليه معامن كتهضر ؟؟
شار ليا بيدو نتسنى وتلفت كيقول ليها واخا .. واخا انا غنعيط ليك من بعد يالاه بسلامة
ربعت يدي خليتو حتى قطع وقلت ليه انا مافيك اللي هضر معايا ولايسمع ليا ولبنى عندك ليها الوقت .. تهضر معاها مع الصباح مع الليل لا وماكفاكش هاد السيمانة كلها اللي نتا حداها زايدها حتى بهاد الويكاند المنحوس اللي كنبغي انا نرتاح فيه كتجي غير باش تنكدعا عليا .. ديك الساعة بقا معاها تما وطلقر عليا شي كدبة احسن من هاد الحالة .. شكون بزز عليك تجي
بقا ساكت غير كيشوف فيا وهز يديه قالي لا حولة ولا قوة الا بالله العلي العضيم .. وزاد خلاني واقفة وما ينعس ! بغيت ناكل جنابي ومشيت حدا بنتي نعست وتغطيت وبقيت شحال شفت الحس مقطوع ونضت رجعت للبيت حليت الباب قلت ليه بنااقص كااع من هاد الويكاند ها البيت ربح بيه وعنداك تجي تحزرني ولا تبعني
زدحت الباب خليتو فبلاصتو بقا كيشوف فيا ومشيت رجعت للبيت جاتني واحد البكية مع الفقصة خرجتها فصمت وتسنيتو يجي يحزرني لاكن ماداهاش فيا وزدت تعصبت وكمدتها ونعست .
الصباح مافقتش للفطور وماوجدتوش .. درت غير لبنتي فطورها وجلست كنوكلها فالبيت ديالهها حت دخل علينا كيضحك قصدها نيشان هزها فالسما وبدا يبوس فيها .. اما انا خليتو وخرجت مشيت جمعت ليها حوايجها ولبست حوايجي وخرجت قلت ليه غنمشي نتغدا فدارنا وندوز معاهم النهار
رد عليا وهوا مع جنة قالي غنمشيو كاملين وناض عيط لبابا علمو ولبس حوايجو وصدقنا غاديين بلا عراضة هاجمين على ماما .. فرحو بينا واستقبلوه بخال العادة وكبرو بيه وجلس العشية كلها مع بابا ومشاو صلاو بجوج فالجامع. ومن تما دازو للقهوى بقاو جالسين شحال عاد رجعو لقاونا موجدين كاسكروط. كلينا مجموعين وسبقني عيسى للطموبيل. هاز جنة وانا موراه .. وقفني بابا وشدني نن يدي وجمع صبعانو الخمسة وقالي
غير بشوية وبالهداوة راه الصدع مكيحلش المشاكل..
قلت ليه مادرت والو اصلا والله مادرت شي حاجة
سولاتنا ماما قالت لينا مالكم
قال ليا بابا انا غير كنقول ليك ..ًراك تربية يدي. وكيتبدل ليك المزاج فدقيقة ونص .. سايس سايس باللتي هي احسن وماتحكيش بزاف .. وخلي الحياة تستمر الله يرضي عليك
بقيت ساكتة مالقيت منقول ومشيت ركبت حداه بقا كيدور بيا فالطموبيل فصمت وقف بينا قدام واحد المطعم نزلنا تعشينا فيه وشربنا قهوة وبقينا ساكتين . شفتو كيتامل فيا وانا قالبة وجهي وكنتسنا يهضر .. حل فمو قلت غادي يقول شي كلمة لاكن ماهضرش وتنهد هز تيليفون كيشوف فيه ويدو على فكو حتى طلع ليا الدم وقلت ليه عييت بغيت نرجع بحالي وحتى البنت نعسات ليا فيدي
حرك راسو وعثنو فتيليفون قالي هاحنا غنمشيو غير تسناي شوية
سكت وحط تيليفون وتنهد قالي مغنجيش السيمانة الجاية.. غنسافر شي يامات على برا
حركت ليه راسي ببرودة وماسولتوش واخا جاني فضول نعرف معامن واش مع شي وحدة ولا معامن
قالي غتمشي معايا لبنى .. عيانة شوية هادشي علاش غنسافرو
حركت ليه راسي قلت ليه مزيان مافيها باس تديها تفج شوية .. انا مسامحة ليك فديك التسافيرة اللي كنتي غدير ليا غير عطيها للبنى ولا رجاء هما مساكن ستاحقوها اكثر مني
سكت بقا كيحنزز فيا وقالي مالكي ديما مزروبة ؟؟ علاش كتسبقي العيب واش قلت ليك مغاديش نديك؟. مانسافروش ؟. كنا غنسافرو ولاكن دابا حكمات علينا الاقدار وجات ضروف بدلات كولشي ..
قلت ليه شنو هي هاد الضروف هادي واش ماشي مراتك؟ واش انا برانية ؟ علاش مخليني فالجنب مكتعاودش ليا ومكنعرف عليك حتى حاجة ؟
حط صبعو على صدرو قالي شي حاجة كتخصني انا بوحدي راكي كتعرفيها .. بغيتي نهز اي حاجة طرات بيني وبينك ونشرها ففاس كولشي يعرف اش كيوقع بيناتنا ؟؟ مزيانة تبقاي على خاطرك؟ .. صافي قلت ليك ضروف لزمات عليا نسافر واصلا ماكنتش عوال على هاد السفر .. ومع لبنى عيانة شوية خاصها تخرج منها تمشي ..وافهميني شوية اسارة علاش كتبغي تخلقي مشكل
قلت ليه حتى انا عيااانة .. وكنموت فيا الموت وباغا نسافر وباغا نرتاح
تنهد وقالي واحمدي الله عندك صحتك وعندك بنتك وواليديك وحياتك هانية .. شوفي. اللي تحت منك وشوفي اللي ماعندو صحة .. واللي عايش الفقر و اللي عايش الكحط وتمارة .. واللي ماعندو حتى عشا ليلة .. شوفي هاد الناس كيفاش عايشين .. نتي اللي كتهضري على الراحة والسياحة. وواحد باغي غير ينعس مرتاح من الوجع والحريق واخا ينعس منو للارض
قلت ليه الحمد لله بصحتي كنحمد عليها الله وكنجاهد باش نعيش عيشة زوينة وكندير السبب لراسي وربي كيسهل ليا .. نتا اللي فين هوا العدل ديالك؟ فين هي هاد الحياة الزوجية والراحة
قالي نتي اللي ماباغلش تخلقيها راسك .. ياكما يسحاب ليك كاااع الناس عايشين بحالك.. كياكلو بحالك .. وكيلبسو بحالك !! .. طلي على هاديك اللي مزوجة عسكري مسكينة كتشوفو من الصيف للصيف مكيعرفش كااع ولادو .. واللي عايشين فالكرا الى ماخلصوهش يخرجو يباتو فالزنقة .. وشحال من وحدة باغا غير هاد الجلسة اللي جالسة نتي هنا وفهاد البلاصة ومع راجلها ومالقاتهاش كتشوفها غير فالافلام .. الناس راه كيكملو الشهر بالكريدي وعايشين فالحسابات والميزيرية .. واللي موضفة كتحط النص بالنص مع راجلها وتصرف معاها والنهار الاول كيشرطها عليها .. ونتي كيبان ليك غير التعدد !! ماكنقول ليك عطيني . سلفيني .. عاونيني .. مكنشوفش كااع الصالير ديالك ومكنشولكش فاش خسرتي فاش وفرتي .. داير ليك كونط كدوز ليك المانضة واخا خدامة .. كنجي كنخرجك كل ويكاند .. كنهضر معاك كنضحك معاك عاطيك وقت كنسول فيك صباح وعشية .. جاتك شي حاجة زوينة كنقولها ليك كنهضر معاك بالكلمة الطيبة !!! شنو بغيتي ؟؟ السفر غادي نسافرو الكادويات كل سيمانة جايبهم معايا والخدمة خليتك تخدمي باش متقنطيش .. شنو بغيتي؟؟ كيفاش دايرة هاد الحياة اللي نتي باغا !! حساب ليك كاع الرجال هاكا !!
كمل كلامو وشد تيليفون رجع اللور وسكت عاقد حجبانو .. قلت ليه انا ماباغاش هادشي اللي حسبتي .. راجل حر طليق احسن ليا من التعدد
قالي ايوا الله يسمع منك ويرزقك على قد نيتك
صدمني حسيت بدعوتو طالعة من قلبو .. بان ليا بحال الى باغي يرتاح ويتفك مني وانا جالسة ليه على قلبو بزز منو .. حسيت بقيمتي طاحت ولا يمكن مكانتش عندي قيمة من الاول حيت انا اللي عرضت عليه راسي ومادرتش قيمة راسي ونستاهل حيت انا اللي قبلت على هاد الدل .. هما هاز ليهم هبالهم وداير ليهم الهاطر وانا كيعطيني القاصح .. بلحق الى ماخققت ليه الامنية ودرت لعز راسي راني ماشي سارة باش يعرف انا شنو كنسوا حيت مزال ماعارفنيش مزيان . سكت مابغيتش نهضر بغيت نخليها فصدري حيت الى فرغت غادي نبرد وننسا كولشي بحال ديما .. لاكن هاد المرة كتمتها باش تبقا شاعلة فصدري ومانساهاش ومانتراجعش. رجعنا للدار ساكتين حطيت جنة ناعسة ومشيت حداه بغيت ننعس .. قرب ليا وكبان ليا فمو كيهضر ويردد ديك الجملة .. خليتها مكمدة وعطيتو حقو واها مابقا ليه حق عندي وفرشت ليه الحرير بحال الى مكاين والو .. رطاب وقالي سمحي ليا على ديك الهضرة وكنت معصب وراه معالم بيا غير الله وبقا كيشكي .. سكت خليتو حتى شكا وسايست معاه ونعست ودوزت الويكاند ديالي عادي غير فالدوران حتى مشا بحالو وعيط ليا قالي مسافر ودعيت ليه بالسلامة ونضت تقاديت ليه . وحلفت حتى نوريه قيمتو ونوريه قيمتي حيت انا ماشي شايطة ونهار داني داني بالشان والمرشان وساكنة فثلاتة طاج وبيتي يجري فيه الخيل وكناكل الماكلة المخيرة وكنلبس احسن من البنات اللي قرار معايا وعائلتي عندها اصل ومفصل ومعروفة كنيتي فالناضور وبابا امام قدو قداش ديال الجامع .. ويجي هوا يبقا يمن عليا ويحسب ليا . مشيت عند المحامية اللي طلقاتني المرة الاولى قابلتها واستقبلاتني بقينا كنهضرو وسولاتني على حياتي قلت ليها راني رجعت ليه وجيت نطلق عاوتاني
تصدمات وخرجات ليها الصدمة بالضحك بقات كتشوف فثا وقالت ليا علاش . قلت ليها السبب الاول راكي عارفاه. التعدد وداك الزمر . والسبب الثاني باغا نجاوبو على واحد الهضرة قالها ليا تقول قبل منو كنت كنموت بالجوع وبلا بيه غنموت .. وبديت كنعاود ليها على الكلام اللي قال ليا . بقات غير كتشوف فيا وقالت ليا نعلي الشيطان وماشي سبب. وكن تعرفق الاسباب ديال الطلاق اللي كتجي تصدمي اما نتي راكي منورة عليهم . حاولات معايا نتراجع لاكن رفضت وقلت ليها باغا ندير الخلع ومغاديش نتراجع
حلات عينيها قالت ليا ماقلتي طلاق الشقاق ماقلتي الطلاق اتفاقي طلاق غيابي. نيشان نقزتي للخلع؟!! عارفة شنو هوا الخلع !!
قلت ليها عارفاه كن ماكنتش عارفاه مغاديش نطلبو
قالت ليا غايكلفك بزاف الخلع .. حيت فاش المرى كدير الخلع. راه كتسمى شارية طلاقها .. يقدر الزوج يطلب المبلغ اللي بغا وتعطيه ليه باش يطلقها .. بالنسبة للرجل راه ثمن رجولة وقيمة .. كتهبطيه بداك الخلع لاسفل سافلين .. يعني نعطي عليك فلوس ونتفك منك
قلت ليها هادشي تماما اللي بغيت .. بغيت الخلع ونكركبو باش يعرف راسو معامن . بغيتو يعرف باللي انا اللي مابغيتوش .. يعرف باللي ساليت منو نعطي عليه الفلوس باش نتهنا منو
وضحت ليها وجهة نضري ومكان عليها غير تخدم على هاد الخلع وتسربيه ماحدي متحمسة وباغا نشوف ردة فعله فأقرب وقت ..
رجعت بحالي وسكت ماقلتها احتى واحد واخا عارفة راسي غادي ناكلها من عند بابا لاكن فسبيل ديك الصدمة دالحاج كولشي يهون . ونشوفو واش انا عايشك بفضله ولا بفضل الله سبحانه وتعالى . كان كيسول فيا فتيليفون يوميا وكنجاوبو عادي بحال الى مكاين والو وعايشة عادي حتى قرب يجي وقطعت التيليفون عليه وبدلت الساقطة دالباب باش الى جا على غفلة مايدخلش. للدار .
كنت جالسة فالدار وعيط لبابا سمعتو كيهضر معاه وتلفت بابا عندي قالي علاش مكتجاوبيش عيسى ؟؟. شدي بغا يهضر معاك .
قلت ليه غير هضر معاه نتا حتى تسالي ونضت للكوزينة عند ماما قلت ليها هضري مع بابا مايبقاش يتدخل بيني وبين عيسى .. هوا معايش معانا معارفش مشاكلنا يخلينا بيناتنا .. الى مابغيتش نجاوب راني عندي اسباب .. واي حاجة وقعات بيناتنا يخلي راسو بعيد
بقات مصدومة كتشوف فيا وقالت ليا ابنتي اش عرفنا حنا !! هوا عيط سول باك قالك هاكي هضري مافيها والو
قلت ليها واشرحي ليه هادشي بطريقتك .. باش مايتدخلش
هزات يديها وقالت ليا هانا غنشرح ليه .. الله يهدينا وخلاص
مشات بقات كتهضر معاه وانا فالكوزينة كنغزز ظفري .. لبحمد لله ماسولني ماطرح عليا اسئلة ودوزنا لعشا سكوتي وحاولت نمهد ليهم انه بيناتنا مشاكل وضعوطات باش يستاعدو لأي قرار مفاجأ.
مشيت نعست وضربتها بنعسة .. فقت على رقم عيسى كيصوني وماجاوبتوش .. رسل بيا مسج قالي داابا خرجي اجي للدار
بقيت غير كنشوف فداك المسج ونضت قلت لماما غنخرج نقضي شي غرض ونرجع وكان الويكاند .. سولت على بابا قالت ليا ما للصدقة من جيهتو ومن الاسىلة ديال فين غادية فين جاية ..هزيت طموبيل ومشيت نبشان للدار وقلبي كيضرب لقيت طموبيلتو واقفة فالباب وهوا جالس لداخل كيشوف فتيليفون .. نزلت درت راسي ماشفتوش وطلعت للدار دخلت ودخل ورايا زدح الباب ولاح ليا البرا فوق الطبلة وقالي بعصبية شنو هاادشي ؟
وقفت قدامو وقلت ليه شنو ؟
قالي هااادشي شنوو هوا ؟؟ هاد الطلاق والخلع اللي دايرة وكنهضر معاك وكتجاوبي عاادي وورا ضهري جالسة كتبني .. شنوو هادشي. هضريييي
خرج فيا عينيه ولو مضاعفين وانا كنشوف فيه قلت ليه بكل جرأة منقدرش على التعدد .. ومنقدرش على هاد العيشة .. الفلوسً وهادشي كاامل كنت عايشة فيه من قبل ماشي عاد غنعيش فيه .. ونتا بفمك قلتي ليا الله يسمع منك ويجيب ليك اللي تمنيتي ولالا؟
ربع يديه وسكت بقا كيشوف فديك البرية مطولا وقالي اهاه .. غير قلت ايك ديك الهضرة نضتي خلعتيني !! بان ليك غير الخلع ؟؟ لاياش باغا توصلي بهادشي ؟
جلست وربعت يدي قلت ليه انا قادرة نعيش بلا بيك وسعادتي مامرتابطاش بيك نتا .. الى طلقت .. غناكل وغنشرب وغنلبس وغنعيش حيت الرزاق الله ماشي نتا . ودابا اولد الناس شنو خاصك نعطيه ليك ونطلق
قالي بسخرية : شنو خاصك نعطيه ليك !! مافكرتيش فديك البنت ؟ فكرتي غير فراسك ؟. مكتفكريش فالناس اللي دايرين بيك !! كتفكري غير فالتخربيق .. الناس كيطلقو الى حرارت العيشة وولات حارة ووصلات للجدر ومابقاتش الضحكة كطلع ليهم .. هاد الميثاق ديال الزواج اللي نتي كتستهزأي بيه راه ميثاق مقدس ماشي غير ورقة سنييناها.. تزوجنا قدام الله ماشي فالسر .. والزواج مكنلعبوش بيه ونتي مزال معارفاش اشنو هوا الزواج واشنو هوا البيت وشنو هوا العش والمسؤولية والاولاد .. كتخربي بيتك على اتف الاسباب .. الخوا الخاوي اللي ماليه حتى معنا .. ماضربتك ماعايرتك ما حرمتك من شي حاجة وما كنعاملكش معاملة خايبة .. واصلا كنبقا انسان. بشر ماشي ملاك مافيه عيب … باغا واخد مافيه حتى عيب كامل مكمول الله يلاقيك بيه .. وسمعي دابا وحلي ودنك . نتي مطللللقة وبالثلات والريال ديالك خليه عندك غادي ينفعك نهار ماتلقايش هاد الراجل الكامل على الله تشريه بالفلوس
نضت بغيت نجاوب لاكن هز يديه قالي ملقانا فدار القاضي. باشما حكم انا قابل
وخرج سمعتو غادي وكايقول يخخ تفوو حتى غبر .. ماعرفتش واش نتبعو نجاوبو عاى ديك يخ تفو ولا نجلس نستوعب ديك التطليقة ولا شنو ندير .. مهما كان الوضع حسيت بيها قاصحة بزاف وضراتني وحسيت بالدار كتريب عليا والندم والتسرع نتيجة قرراتي .. اتا من النوع اللي الى تعصب كيرد فالبلاصة ومنقدرش نصبر وفاش كيفوت الفوت كنندم .. واحد اللحضة قلت ياكما كنحلم !! واش وصلت لهادشي بصح !! واش فعلا طلقت ورجعت مرى مطلقة ومابقا لا راجل يدخل عليا ولا ويكاند ولا والو !! مشيت غسلت وجهي لعل وعسى نفيق من الحلم لاكن لقيت راسي عايشة الواقع والحقيقة المرة وحسيت بالدنيا دارت بيا والضلام فعيني وبقيت كنبكي فصمت ومنصبر راسي ونقول عادي عادي عادي اصلا فالاول كتجي قاصحة ومع الوقت نولف وهاكا وقع ليا من قبل .. تفكرت دارنا اللي خليت ماعرفوني فثن زدت ومشيت رجعت كنجري مرفوعة لقيت غير ماما فالدار وبابا باقي مارجع .. جلست حداها كانت شادة بنتي وسولاتني قللت ليا مال وجهك صفر وقلت ليها اللي كاين ورجعنا لنقطة الصفر والاحداث اللي عشت من قبل من ورا الطلاق وديك الازمة النفسية والمرض والهم والغم والاكتآب وخصوصا فاش ساق بابا الخبار وواجهني ببرودة وقالي انا هزيت يدي من هادشي .. غير هوا وجدي راسك تتحملي مسؤوليتك .. الخدمة الدار الدار الخدمة ماعندي بنات يدورو فالزناقي ويخرجو بلا سبب . سكت حيت اصلا ماعندي منقول وهادشي راني عارفاه وحاولت ندرز الازمة بسير واجي للخدمة وحطيت الغضب ديالي فداك الكونكور وباغا ننجح فيه ومزالة شي حاجة فيا كتنوض وتبغي تبين للناس انني ناجحة براجل ولا بلا راجل .
داع خبار الطلاق فالعاىلة والمكالمات اللي كنكره والاتصالات والويل لكحل اللي اصلا مكنردش عليهم وغير ماما اللي كتوصل ليا الهضرة .. واللي زاد ازمني اكثر وانا فأزمة هوا بنت عمي دارت العرس وكنت انا وياها بحال الخواتات وماعرضاتش عليا وحشاتها مرات عمي لماما غير بالفن قالت ليها بلا متعدبي سارة راه تكون عيانة خليها ترتاح اصلا مادايرينش شي حاجة كبيرة !
حسيت براسي بحال شي نعلة ولا عالة ورجعت كنشوف فنضرة الناس الاحتقار والكره واخا مادرت ليهم حتى حاجة .. اما عاىلتي ولاو خايفين مني وكل وحدة خايفة نطير ليها راجلها وكنبان ليهم بحال شي وحدة متاحة للجميع وهادشي شفتو فولد عمي اللي داز عندنا سلم علينا فاش رجع من السفر وفاش ساقت ليه مرتو الخبار دارت ليه فضيحة ومعيطة ليا بلا حشمة بلا حياء. تقول السيدة خرج ليها العقل !! ماخلات فيا غير اللي نسات حتى مشات ليهم ماما كتبرر شرفي وعرضي كأنني مرتكبة جريمة .. وحتى ولاد العائلة اللي مزوجين مابقاوش كيطوفو بدارنا بوحدهم .. والى مشيت حتى نزلت من الطموبيل كنلقا الجيران كيطلو عليا من التقابي وخاضيين رجالاتهم !! شي حوايج بديت كنلاحضهم وكنشوفهم كيمرضو ويقطعو فالقلب وأزموني بزااف وكملات عليا يسرى ماعرفتش اش بغات عندي معيطة ليا كتشول عليا واها عييت نترهب من اتصالاتها رصداتني بنمرة اخرى وقالت ليا واش فخبارك شنو واقع للبنى ؟
قلت ليها اختي انا هادي شهوور ما تلفت لديك الجهة واصلا اللي فيا كافيني وبنتي ولات بحال داك اليتيم اللي باه فالحياة .. عندها غير انا تقول ولدتها بوحدي
قالت ليا راكي معارفاش اشنو واقع راه لبنى عندها سرطان وراه غادية جايا لبرا كتعالج وحتى كيقولو لينا صافي راه داكشي كيمشي حتى كنلقاوه فبلاصة اخرى .. فيين هي لبنى اللي كتعرفي .. مشاا ليها الشعر ومشات ليها الصحك ولاو فيها العضام وحالتها حالة وكولنا مخلوعين عليها ومتشبتين بالامل وكنطلبو الله تشافا ..عيسى اللي كتقولي سامح فبنتو راه برا اصلا مكاينش .. نتي اسارة كتسبقي العيب وعيطت ليك نسول فيك لوجه الله ونسول فديك البنية اللي من لحمنا ودمنا اختي
بقيت ساكتة مالقيت منقول وقالت ليا المهم نتي لاباس وبنتك لاباس .. هادشي اللي بغيت نعرف الله يعاونك وقطعات خلاتني مصمرة كنشوف قدامي .. نزلت كنجري عند ماما للكوزينة خلعتها عاودت ليها شنو كاين وتصدمات وهزات تيليفون عيطات لعكوزتي كتهضر معاها وسولاتها على لبنى قالت ليها واش مكاين باس عند لبنى راه عاشنو سمعنا ها شنو سمعنا .. خطفت بيها تيليفون كبرت الصوت وجلست كنسمع قالت ليها عكوزتي غير خليها على الله راه غادية وكترجع اللور مابقات عندها صحة وباقي عندها الامل مسكينة كتقول غادي نبرا ونرجع نوقف حتى كيخرج داك العجب عاوتاني فبلاصة اخرى ..
درت لماما اشارة تسولها من امتى وداكشي فيها وقالت ليها عكوزتي من شحال هادي .. هادي شحال وهي كداوي بالدوايات شي خمس سنين .. ولاكن هاد المرة هدها طيحها ولات ناعسة فالدار شهر وفسبيطار شهر والطبيب قالينا داكشي نتاشر ليها بزااف ومافيه مايفهم الواحد
تأسفت على حال لبنى وسكت وخفت توقع ليها شي حاجة .. مابغيتش ليها المضرة ومانبغيش نكون بلاصتها والله يكون فعاونها والروح عزيزة عند الله مابغيتهاش تموت وهي مزالة صغيرة .. تأزمت وجلست قاطعة الحس بقيت كنتفكر صورتها وهضرتها ماقدرتش نتقبل انها تكون طريحة الفراش والمرض متمكن منها .
وصل بابا وتعرضات ليه ماما قالتها ليه وحرك راسو بالايجاب وهوا داخل للصالة كيحسد البلغة وقاليها لا الاه الا الله ..
قالت ليه واش كانت فخبارك ؟
خرجت وقفت قدامو كنشوف فيه قالينا باللي عيسى قالها ليه فاش كان جا شحال هادي وبغا يبقا المرض فالسر حيت لبنى مابغات حتى واحد يسيق الخبار وكانت كتعالج بلا خبار شي واحد ..ًولاكن المرض تمكن منها ومزال كيعيط على الحاج عيسى وكيسول عليها وهوا كيرد ليه الخبار
قلت ليه علاش ماقلتيهاش لينا ؟؟
قالي كن كنتي كتسنطي للهضرة دباك .. وااهلي فين كنتي غتوصلي .. وانا ماشي بحالك يجي السيد يأمني على سره ونعاودو ليك .. واخا تكوني بنتي وكبدتي منقولوش ليك . دابا الى عندك شي حساب مع ديك السيدة هزي صندالتك سيري تسامحي معاها .. ليوم الدنيا وغدا لاخرة .. تسامحو ماحدكم هنا اما الى مشيتو لهيه مابقات سماحة
قلت ليه مالي انا غادي نقولها للناس .. يقولها ليا
قالي بصرامة واش السيد امناتو على السر يجي يقولها ليك نتي !! نتي
قلت ليه وعلاش جا قالها ليك !
هز حاجبو فيا وقالي واجي صلي بالناس بلاصتي يالفاهمة ..كاع هاد الناس اللي كيجيو يعاودو ليا قوليهم علاش كتعاودو ليه !! السيدة مريضة كان عندها امل تبرى وماتوصلش لهاد الحالة وتنوض مايسيق ليها حتى واحد الخبار ساعا تزاد عليها الحال كولشي عرف شنو عندها ..
بقيت ساكتة ورجعت اللور وكنفكر واش نمشي نتسامح معاها ؟. واش مانتسامحش معاها؟ شنو نكون درت ليها ؟. نكون هضرت فيها ؟؟ قلت عليها شي كلمة ؟؟ وكيفاش غنقابلها وكيفاش كنواجهها !
بقيت على داك الحال كنقول ليوم غدا ليوم غدا والكونكور فالطريق قلت غير ندوزو ونمشي عندها . مشيت دوزت الكونكور ومابقات حتى حاجة كاتمنعني باش نمشي لاكن كندير مبررات لراسي ونتعطل حتى لواحد النهار كنت فالكلية وعيط ليا بابا قالي يالاه تمشي تسامحي مع المرى راه الحال تزاد عليها. . بقيت كنتمتم وقالي يا عاد البنت كن ماكنتي بنتي كاع مانديها فيك لهلا يتوالاك بشي سماحة .. زيدي تسامحي ليوم الدنيا وغدا لاخرة راني خايف عليك تكوني أديتيها بشي حاجة وتمشي تبقا نحسوبة عليك ليوم الدين
قلت ليه عمرني وصلتها وبقيت كنحلف ليه قالي علاه حنا كنعرفو دنوبنا ولا اغلاطنا يا هاد البنت !! حنا ديما مضلومين وعندنا الحق حتى لغدا قدام الله ويخرجو ليك يقولو بيك هاحنا .. شنو غتخسري الى تسامحتي راه كانت ضرتك وكنتي ضرتها تسمحي ليها وتسمح ليك ونابينا عليه السلام .. والبراني ومكنوحلش معاه ونتي مانعرف منين جيتي بهاد العكس
بقيت ساكتة كنتفتف قلت ليه واخا وفوقاش نمشيو
قالي ليووم .. راه المرى كتموت نمشيو نسامحو معاها شوف تلحقيها ولالا .. الى كنتي مرضية راك غتلحقيها
درت يدي غلى فمي وعمرني تخيلت يوقع ليا هادشي ونشوف لبنى مريضة ومجرد تخيلات كيمرضوني.. شديت الطريق مع بابا وغاديين وكنسمعو كيطلب الله نوصلو قبل مايدي مول الامانة امانته والطريق كلها وهوا كيهضر ليا فالدين وفالمعقول وانا ساكتة حتى وصلنا وسمعتو كيهضر مع عيسى وتبعنا لوكاليزاسيون ديال دارها واخا كنت عارفاها لاكن ماعارفاش الطريق صونا ليه تيليفون قبل وعوج الطريق قالي راه راه تزاد عليها الحال
قلت ليه فين غادي علاش قلبتي الطريق
قالي غنتعرضو ليهم فالدخلة دفاس راهم جايبينها من المطار .. حسيت براسي تشوك ليا لحمي وجاتني البكية وتبوريشة وخايفة مشينا وقفنا بالطموبيل فالطريق كنتسناو حتى بانت لينا سيارة الاسعاف جايا من بعيد وداك الصوت كيخلع وكتجري والطموبيلات كيخويو ليها الطريق وموراه صف ديال الطموبيلات دايرين سينيال دربعة كيسينيو وجات حتى قربات ووقفات فجأة فالجنب مافهمنا والو ونزلو الناس من ديك الطموبيلات اللي موراها ونزل بابا ونزلت موراه .. شفت كولشي كيجري جهة الاسعاف ومشيت كنجري مور ورجلي كيخويو بيا دخلت بين دوك الناس وكنسمع البكا ديالهم والتنخصيص .. طلع بابا فسطافيط ولقيت نضرة لقيت عيسى لداخل محني على البياص وهي مغطية بمانطة رمادية وقدامي غير الرجلين .. شفت عيسى شاد ليها فيدها وبابا قرب جنبها لداخل وشار ليا بيدو طلعني حداه فالسطافيط ماشفت لاهاكا لا هاكا .. شفت فيها ماعرفتهاش.. تقول ماشي هي .. صفرا كلها وحازمة راسها وناعسى كترمش بعينيها وفمها ناشف وكتشوف فينا .. قرا عليها بابا شوية دالقرآن على راسها وقاليها واش عرفتيني .. عرفتيني ؟
رمشات ليه بمعنى عرفتك وجرني قاليها سارة بغات تسامح معاك
شافت فيا ودارت واحد الابتسامة ورمشات وفمها محلول مكتهضرش وعيسى كيدير ليها الماء بالقطرات فحلقها .. جاتني واحد البكية وواحد الاحساس وتحنيت عليها قلت ليها سمحي ليا الى درت ليك شي حاجة وبلا منشعر بست ليها يدها وبقيت كنبكي .. رمشات ليا وبابا كياكد واش سمحات ليا وكيعاود يسولها حتى حركات ليه راسها بالايجاب وقالي واش مسامحة ليها قلت ليها مسامحة ليك دنيا واخرة ونزلت فشلانة رجليا ماقادرينش يهزوني وعمرني خضرت لداك المنضر وكنسمع بابا كينطقها الشهادة وقوة التيليفونات كيصيوني .. لاح بيا السوارت ويدو كترعد قالي تبعينا بطموبيل غادي نكملو الطريق وسدو البيبان وكل واحد مشا كيجري لطموبيلتو وسمعت وحدة كتقول الطريق كلها كنقول صافي مشات عند الله وكنزلو مخلوعين .. تبعتهم بالطموبيل دبابا وماعارفاش شنو كيوقع تما وكنصوني عليه مكيجاوبش حتى وصلنا للفيلا فين عايشة لقينا الطموبيلات والناس والعاىلة معرضين ليها بالبكا وشي مرى خرجات كتجري وطاحت غيبات حدا باب السطافيط والناس كيبكيو وشي كينعق شي. وريحة الموت كدور .. نزلت كنجري وشفت باب السطافيط تحل وطلعو لتما غير شي وحدين بالنوبة وبقيت كنطل نشوف شنو واقع لقيتهم كيبوسو راسها ويدو الغطا غلى وجهها وبقيت كنسول حتى واحد ماجاوبني ومشيت عند بابا قلت ليه شنو كاين قالي الله يرحمها دعي ليها بالرحمة والمغفرة .. شفتي الموت شحال صعيبة .. سعداتك يافاعل الخير . هاااشكنقول ليك انا راه الدنيا مادايماش والموت حدا ودنينا كدور
ودعاتها العاىلة وكولشي تنفتن ورجع كولشي كيبان ليا كحل ومرضت عمرني توقعت هادشي يوقع .. من سيارة الاسعاف مباشرة للدفن مانزلوهاش ومشاو يأدير معاها الواجب وبقا الطايح اكثر من النايض وبكيت حتى شبعت بقيت كنقول مع راسي واش لبنى لبنى !!! لبنى نيت اللي كنعرف اللي ماتت !! واش هي شخصيا اللي كانت كتوقف قدامي وكتهضر وكانت عندها واحد الشخصية عجيبة !! واخا نعيا نحللها مانقدرش .. كانت قوية ومتأكدة من نو كدير وشنو باغا وكانت مرى ونص لدرجة كنت كنكرهها على ديك الشخصية والطريقة ديالها فالتعامل .. كانت كتحرك كولشي كيف بغات بلا ماتخسس حتى واحد .. وفنفس الوقت كانت زوينة ومتولة ومكتبينش ضعفها قدام لخرين .. بديت كنحلل شخصيتها بيني وبين راسي حتى تأثرت بيها ولقيت راسي كنقلدها وكندير نفس حركاتها بلا منشعر ..وماكرهتش نكون بحالها حيت وحدة اخرى فبلاصتها ماعندها ولاد ومكتولدش ومريضة غتكون ماتت غير بالاكتآب .. انا هي لا خلات العاىلة كلها تبغيها حتى من الخدامات ضاربين ليها حساب و كيهضرو عليها كانها الوحيدة اللي مرى .. والاهم من هادشي كانت محافضة على عيسى وكانت الملجأ ديالو وبأر اسراره وشاداها بقوة شخصيتها والكاريزما ديالها والعقل ديالها. وواخا تزوج عليها بقا ليها بوحدها ومابدلهاش وبقات هي الامان والراحة النفسية ديالو .. ماعرفتش اشنو اللي بيناتهم وشنو اللي خلاه يميزها ؟؟ ماعرفتش شنو اللي فيها مكاينش فرجاء وفيا ! وواش غيتأثر بموتها وفراقها ؟؟ مافهمتش واصلا خرجت الى الابد من هاد العاىلة وماكرهتش نكون بحال لبنى ونسير حياتي وننجح فيها وننجح حتى فمستقبلي ونخلي الناس يبغيوني ويقدروني ويحتارموني .. ماكرهتش كن تعرفت اكثر على لبنى على الاقل نتعلم منها بزاف ديال الحوايج ناقصيني فحياتي .. واخا مقراتش بحال القرايا اللي قريت والنيفو اللي وصلت ليه لاكن سابقاني بزااف وكنتمنى حتى انا نكون بحالها ولا هاد الشخصية المزاجية والمتسرعة ديالي والاكفس انني حساسة دغيا كيبقا فيا الحال واخا نعيا نستقوى كنضعاف وماعنديش الصبر وماعنديش القوة والصمود وحتى الحوار اللبق ماعنديش ودغيا كنتنرفز .. واش حيت ماعنديش خبرة فالحياة ومزال مانضجت بما يكفي ولا مزال نكبر ونتبدل وننضج راسي !
جلست بين العيالات بالليل والامداح والطلبة كيقراو ودار ليها العشا على حقو وطريقو وكالعادة سمعت بابا كيهضر فالميكرو ويعطي الموعضة على التسامح وغلى الدنيا وغلى الاخرة … شي مرات كنلقاه عندو الحق فكل كلمة وحكيم .. وشي مرات كتجيني هضرتو لا علاقة وكنفرط فالنصائح دياله .. لاكن اللي متأكدة منه انني فكل مرة فرطت فشي نصيحة كنجيبعا فراسي. .. وواخا نعرف حتى نعيا عمرني نعرف بحاله .. هادا علاش قررت من اليوم نسمع لكلامو ونطبقو بالحرف .. وكما كاع الناس كيستاشروه ويعاودو ليه حتى انا نحسب راسي من الناس ونستاشر عاد نتصرف .
عم الصمت بين النساء وماصادفت لا رجاء لا عيسى . من غيريسرى اللي بانت ليا كتتحرك وغاديك جاية وعينيها ناشفين من الدموع .. تقطع صوت القرآن وحطو للرجال لعشا وسمعت العيالات كيهضرو على لبنى ويشكروها ويدعيو ليها بالرحمة والمغفرة .. حطو لينا حتى حنا تعشينا وكلينا الخلوى وشربنا ونضت باش نمشي لطواليط وقصدتها حيت عارفة فين جات وغاديك حتى سمعت صوت مبحوح تقول جوايقي كيغني فالعراسات. عيط وقال لبنى
ضرت لقيت رجاء طالعة مع الدروج حبسات وعيسى جايب ولدو وعيط ليها وغلط ليها فالسمية .. قبلت وجهي ومشيت دخلت طوليط وخرجت صادفت رجاء فطريقي وشافت فيا شي شوفات بغات تاكلني .. ماديتهاش فيها وخليتها مابغيت اثم ولا دنب معاها ومشيت سلمت على عكوزتي والعاىلة اللي صادفت وخرجت عند بابا سبقتو للطموبيل خليتو كيرتب على عيسى وشيخي واقف معاهم لابس جلابة بيضاء. .. ماحققتش كاع فوجهم وبقيت كنشوف قدامي حتى رجع بابا ركب وقلت ليه نسوق انا غير رتاح وشدينا الطريق رجعنا بحالنا ورجعت هازة فقلبي مشاعر جديدة .. حسيت بالدنب من جيهة التسرع ديالي ولمت راسي حيت ماكانش خاصني نتسرع ونتهور حتى نعرف شنو كاين .. وقررت عمرني نسبق رجلي حتى نعرف فين كنحطها سواء فحياتي الشخصية او العملية وخديت درس جديد فالحياة خلا عيني يتحلو ويشوفو الدنيا بمنضور اخر
رجعت بحالي وموت لبنى مأثر عليا .. جلست مع ماما وعاودت ليها على شنو وقع ودعينا معاها بالرحمة والمغفرة وبديت كنحاول نخرج من الاكتآب اللي دخلت فيه والحزن والهم ولتاجآت لبنتي ولحنانها وبديت كنخرجها كل يوم فاش كنرجع من الخدمة وكنحاول ندوز اطول وقت معاها وكنستمتع بوقتي انا وياها .. دوزت السيمانة انا وبنتي حتى حسيت براسي كنرتاح وكنلقا راحتي معاها ودرتها صاحبتي وختي وفآخر الاسبوع مشينا للحمام وسبا فركتها مزيان وخرجت جلستها عل رجلي على بيدمن نصاوب شعري وكنعلمها تنساجم مع الناس الكبار باش تكبر فعقلها وتولف بحياة الكبار وماديرش البسالة .. بقات جالسة كتشوف فيا كنجبد فشعري وقالت بصوتها الطفولي ماما واش حتا انا تصاوبي لي شعري
بديت كنضحك قلت ليها انا شعري خايب داكشي علاش كنصاوبو ونتي شعرك خايب ؟ قالت لي لا .. قلت ليها وغتصاوبيه ؟ قالت لي لا ونسات الموضوع وكملت شغلي كنتجمع انا وياها ونهضرو وكنشوف فيها فالمراية تقول غير سارة بنسخة مصغرة .. واخا كنلاحض فيها شوية ديال الشبه مع عيسى لاكن اللي شافها من النضرة الاولى وشافني كيقول ليا كتشبه ليا غير انا .. جاني اتصال من عند بابا كيهضر ويضحك كانه كان فحوار وجاوبتو على غفلة قالي واش ساليتو
قلت ليه اه هاحنا جايين
قالي يالاه طلقي راسك الله يرضي عليك
نضت شديت لبنتي فيدها ومشيت رجعت بحالي ودخلت لقيت عيسى عندنا فالدار .. كان جالس متكي على السداري وهاز رجلو كيهضر مع بابا اللي متكي حداه وكيتجمعو على اتاي والحلوى . هبذت راسي لحت السلام وومشيت . اما جنة مشات كتجري عندو طلعات عليه وجلست كنسمع صوتها كضحك من الصالون وكتعاود ليه شنو درنا وفين مشينا وشنو كلينا وانا كنحلف فيها على هاد التعاويد اللي كتعاود بلا سوالات .. خليتها حتى جات عندي للكوزينة وشديتها قلت ليها عجبك الحمام اللي مشينا ليه ؟
قالت لي اه. قلت ليها كيعجبك تخرجي معايا ؟
قالت ليا اه
قلت ليها ايوا مغاديش تبقاي تخرجي معايا ومتبقايش صاحبتي وغنبقا نخرج بوحدي
تصدمات قالت لي علااش
قلت ليها حيت كتعاودي كولشي ومكتحافضيش على الاسرار .. علاش مشيتي كتعاودي لباباك ؟؟ علاش بقيتي كتقولي ليا كلينا هادي وشربنا هادي ومشينا لهادي وجينا من هادي؟؟ علاش مكتسكتيش؟ هانتي دابا غادي تبقاي تجلسي بوحدك فالدار
دارت يديها على عينيها بدات كتبكي وخليتها قلت والله مانحزرها باش تعلم تبقا تسكت من التبرويل. اوييلي. شي نهار تشريها ليا مع بابا تقول ليه شي حاجة يندم طاسيلتي على الخروج والدخول .
جراتها ماما كتسكت فيها وهي كتجرني باغاني انا نتصالح معاها بلحق خليتها مابغيتش نتصالح معاها غير هاكاك حتى دير علاش نتصالحو .. باش ماتعلمش تنال الحاجة بالساهل .. جلسات كتبكي حتى وصل صوتها لعند بابا وعيسى للصالون وسمعت بابا كيقول ليا مالها شنو درتو ليها ؟؟ قلت ليه فخاطري قطعنا ليها الراس ! عيط ليها عيسى من الصالون قاليها اجي عندي ومشات كتجري وتبعتها كنتسنط نشوف اش غتقول ليه .. ناض جلس وهزها عندو كيسولها علاش كتبكي وكيسمح ليها خنونتها وبقا عليها واش غوتات عليك ؟. واش ضرباتك؟ حيدات ليك شي حاجة ؟. شنو درتي ؟
بقات عليه هي لا لا لا وهوا كيسول وهي كتجاوبو بلا حتى مل وعنقها كيسكتها عاد رجعت للكوزينة وعيطت ليها جات عندي كطل عليا من الباب وتسملل فعينيها باغا تصالح .. كتقتقلني بالضحك وكتفوج عليا فالصراحة .. هزيتها وبستها قلت ليها صافي هاحنا تصالحنا ..وماتبقايش تعاودي ياكي
حركات ليا راسها بالايجاب وقلت ليها وعد؟. عطاتني يدها زعما وعد وتصالحنا وطلقتها مشات كتنقز فرحانة بشي قشاوش جابهم ليها وواحد الطموبيل. كبيرة كاط كاط بيضاء معرية كتمشي بالضو بغات تركب فيها وتمشي بيها لاكن الدار صغيرة .. حطينا ليهم الغدا تغداو وخرجها دور شوية بديك الطموبيل فواحد الجردة حدانا اللور كبيرة وطلعت للسطح كنطل عليها نشوف لقيتها راكبة زعما راها سايقة الطموبيل وهوا تابعها بتيليكونومد حتى جا واحد الولد صغير بغا يلعب معاها ودفعاتو جابتو على وجهه ناض كيبكي وجا باه كيجري عندو هزو وبدا كيهضر مع عيسى وكيحزر فجنة وجلس حداها داك الولد .. قلت صافي غادي ترضا لاكن هزات وجهها للسما طلقات واحد الغوتة وناضت كتنقز غضبات وعيسى كيشد فيها ويتبتها وهي بدوك الكرينات كتمشي وتجي مابغاتوش يركب حداها وكدفعو باش ينوض .. اشمن خاطر واشمن صبر انا اللي كنعرف بنتي مزيان والله لا خلاتو يركب ولا يزيد بيها وداكشي اللي وقع نيت بقات تجدب تما وعيا يحزر فيها ويرغب مابغاتش وهزها كتغوت خلا دا الولد ضرب واحد الضورة خفيفة بالزربة ونزلو باه داه قبل ميصعر حتى هوا .. انا بنتي فاش رجع بغا يحطها تما بدات كتركل مابغاتش تركب فيها وصعرات ليه فرجات فيه عباد الله كاملين وبقات كتبكي حتى شبعات .. ماخلا ماشرا ليها وبشوية وبالهداوة جلسها فديك الطموبيل شادة النفاخات فيديها وكدور
ردها فالعشية ناعسة على كتفو ودخل ديك الطموبيل للكراج ديال دارنا وطلع عندنا تعرضات ليه ماما وانا وراها قالت ليه لعبات شوية؟
عطاها ليها وقاليها هي غير لعبات !! ماخلات مادارت
سول على بابا قالت ليه فالجامع ومشا تبعو ماشفتوش حتى دازت العشا وحتى هوا مكيشوفش جيهتي كاع كأنني مكايناش وسطومنهم .. مابقاش فيا الحال حيت انا اللي ختاريت وبديت كنولف من جديد وكنتعود على الحياة الجديدة .. الحمد لله ربي عطاني الزهر فالخدمة واخا ماعطاه ليا فالزواج الحمد لله حت و واحد مالقاها كي بغاها . نجحت فلكونكور وخديت الاهلية وطلعت للمستوى العالي وفرحت بزااف وفرح لبا حتى بابا حيت انا الوحيدة اللي فالعاىلة عندها مكانة مهمة فالمجتمع ورجع كايفتاخر بيا من بعد ما كان رافض فكرة الخدمة ، كنت انطلاقة للبنات اللي فالعاىلة ديالي ودرت فيهم النفس هما وواليديهم ورجعو يضربو بيا المثل من جهة الخدمة والمناصب لاكن كيخاغو على رجالهم مني حيت فكل مرة كنزيد نعلى كيزيد احترام الرجال ليا وتوددهم ليا باش نعاونهم على شي ترقية ولا نتوسط ليهم .. خصوصا انني درت معارف كبار وركايز صحاح مت المستوى ديالي وهادشي خلا العيالات الناقصات عقل ودين اكثر مني يفكرو غير فالخوا الخاوي !! نكيفكرو فحتى حاجة من غير الراجل ! عنداك يطير ليها وتجلس بلا ماشي تفكر تكون راسها ودير من راسها همة وشان تخليه هوا يخاف يخسرها !! لا هي حيت عارفة راسها لا تسوى بصلة وانا احسن منها دايرة من اطونسيون وخايفة نطير ليها الراجل تقول شايطة على راسي. وغنمشي غير لرجالهم هما ونطيرهم !! مافهمتش كيفاش كتشوف راجلها باش نجي انا نطمع فيه بااز !
جاني الانتقال للرباط وغادي نودع واليديا وبنتي حتى هي ونبدا مسيرة جديدة ونشق طريقي من جديد وتحملت مسؤوليتي ومابقيتش تحت كنف واليديا خصوصا فاش سبقت بابا فالقرايا وطلعت وتحلو ليا ابواب كثيرة رجع هوا كيسولني على شي حوايج قانوينية وخلاني نعوم بحري. وديما كيوصيني على السيراط المستقيم ومنتعمقش فالسياسة اكثر من القياس ونتحمس فيها ونخرج على راسي وهادشي مناش خايف . هزيت رحيلي وانتقلت للرباط وتعرفت على ناس جداد .. طباع جداد عليا وخرجت من القوقعة اللي كنت فيها وحسيت براسي انفتحت على المجتمع وتلاقيت اشكال واجناس ودرت اصدقاء وكان ليهم دور كبير فالمسار ديالي ومنهم كنتعلم كيفاش نتعايش مع طباع هاد الناس دهاد المدينة اللي غراب عليا ومتفتحين بزاف عكس طباعنا حنا المحافضين . وكنت كناخد منهم المعلومات اللي غتتفعني فحياتي وعاونوني حتى عرفت الحي اللي نقي سكنت فيه وبديت كنأطر الطلبة ونقري فالكلية وعايشة حياة جديدة وعجبني الحال حيت كولشي تبدل عليا وحتى الطلبة مبدلين ومنهم بزاف غريبي الاطوار وعايشين العالم ديالهم بوحدهم وصعيب يتقبلو اي حاجة منك ، واللي زدت اكتشفتها ان الناس اغلبهم كيسايرو بعض واخا ميكونش مقتانع بالفكرة كيسايرك حتى تسالي ويزيد بحاله كانه عمرو سمع ليك !! جلست كنناقش هاد المواضيع فواحد القهوى مع بعض الزملاء فالعمل وكنضحكو وهضرة تجبد هضرة حتى قالينا واحد الدكتور انه كاين واحد الكونكور في غاية السرية حتى واحد ماعارفو خاص بالاستاذة الجامعيين ومستوى التعليم العالي الى بغيت ندفع ليه ! بقيت كنسول ونستفسر وعرفت من كلامو انه كونكور ديال الداخلية ونصحني ندوز معاهم ونخرج من الكلية وصداع الراس ونبدا خدمة اخرى اللي فيها غادي نعيش واحد التحول جدري جدا
تبعت الخطوات اللي عطاني السيد ودفعت لهاد الكونكور .. قلت مع راسي ندفع ونشوف الى بغيت نخدم نخدم مابغيتش ندير بناقص .. المهم جمعت المعلومات الكافية عليا ودفعتها والفضل كيرجع لله سبحانه اللي سخر ليا الناس باش نعرف نو ندير ونعرف شنو كاين .. رجعت للدار وتاصلت بيا الصديق ديالي السي الطيب .. كان راجل مزوج وعندو جوج بنات وكولشي كيشكرو وحتى هوا من الناضور داكشي علاش كيعاوني كانني وحدة من عاىلتو .. قالي وجدي للكونكور وضربي طلة على الاخبار وعلى شنو كيروج فالاحداث دالبلاد حاليا والمواضيع السياسية حيت هي اللي غيسولو عليها وحتى الاقتصاد اللي دايرة راجعيه حيت شي واحد كيعرفو تما هوا اللي عطاه المعلومات حول الاسىلة اللي ممكن يطرحوها . شديت انا الموضوع بجدية كنراجع ليل ونهار ونوجد وخايفة حيت عمرني تخيلت راسي غندخل لشي شبكة بحال هادي وكنسول راسي واش انا قد المسؤلية ؟. واش نتي اسارة قد هاد المناصب. العليا اللي مكيشدها غير شكون وشكون .. مانتي داخلة بالباك ولا بالاجازة ولا بشي سلم على قد الحال .. راك داخلة مع ناس صحاح وبالدكتورة والاهلية وهادشي مافيهش الاستهتار واللعب حيت ماغانجلسش مع ناس قدي. .. وانما غنجلس مع شخصيات مهمة اللي قراو غير مع شكون وشكون ومع فلان وفرتلان ..واش نتي عندك الكمارة باش تجلسي مع هاد الناس وتعاشريهم ؟. راك مابقيتيش ديال الدوران والصحابات والعقل الفارغ .. واش عندك الكاريزما اللي تخليك تبتي الحضور ديالك بعدا وتسمعي كلمتك ؟. واش نتي قادرة علاش هادشي اللي ماشي اي واحد كيوصل ليه واي وحدة غادي دخل ليه .. واش اصلا قادرة تكتمي اسرار الدولة بعدا ولا من النهار الاول يجلسوك على القرعة بالاستهتار ديالك وتكرهي قرايتك اللي جلساتك على الزاج
ارا نشوفو شنو مخبي لينا هاد الكونكور .. صبحت الصباح واقفة مع السبعة .. شربت واحد فيتامين سي باش نتوكض وبقيت كنشوف شنو نلبس .. تاصلت بالسي الطيب كنسولو واش كيعلقو على الهندام وقالي دابا لا ولاكن فالشفوي كيلاحضو على كولشي .. بحال التقاشر ديال العيالات ولا داك التزمت الى شافون فشي واحد كيقصيوه . قطعت معاه وقلت فخاطري ومالي عليها نصعبها على راسي ونبدا تفلسف .. ارا نرخيها من دابا .
لبست واحد الصندالة بلا وكان الصيف وسروال الترب وفيست ودرت الشال ديالي وصاكي ومكياج اخف من الريح ومشيت تبعت النعت حتى وصلت لواحد الادارة فالرباط تقول غندخل لقصر .. لقيت الباريير فالباب والبوليس ووقفوني خداو مني لاكارط ودارو ليا سكانير عاد دخلت لقيت شي عشرين واحد جاي يدوز وكلهم كبار وبعقلهم فواحد القاعة كبيرة فالباب ديالها شي رجال طوال بالكوستيمات وحتى واحد مكيشوف فلاخر .. كيديرو خدمهتهم بلا حتى ابتسامة .. الواجب فقط . جلست بلاصتي وتفرقو الاوراق وبداو كيدورو علينا .. سولني واحد منهم قالي باش تجاوبي. ؟
قلت ليه فرونسي
قالي ديري كروة هنا
درت علامة على اللغة باش غنجاوب حيت الفرونسي االي كنعرف نعبر بيها ومولفة نهضر بيها مع الطلبة. طليت على الورقة دلقيت جل اسئلتها سياسية ومتعلقة بالاقتصاد .. بقيت كنشوف فيها وكنشوف فالبنات اللي غيدوزو داخلين وبقيت مصدومة كنقول واش هادو تعليم عالي!! مابايناش عليهم !! الطالون كيقرقب منين ومنين بحال الى جايا لعرس. والمكياج وي ميني جيب كلاص وصوت الطالون فالقاعة كيتقب الودنين ودوك الرجال اللي واقفين وتقول واش شي واحد فيهم تلفت لشي وحدة تقول مكيشوفوش . دوزت الامتحان وساليت وبديت ندور عيني كنشوف فجنابي كنلقا كولشي كيشوف فالورقة ويفكر كيفاش يجاوب.. راجعتها مزيان وخرجنا تلاقيت بالسي الطيب بقينا كنهضرو وخرجنا عطاونا ليكارط ديالنا وتيليفونات ومشينا بحالنا
مكاينش اللي خالعني قد الشفوي .. هوا اللي مخلوعة منو وضاربة ليه حساب اكثر هنا غيتعرفو عل اللي طلعو مباشرة ويشوفو السلوك والحوار والكلام واش موزون .. وجدت ليه واحساسي كيقول ليا بلاصتك تما معاهم وحاسة براسي غنرجع ونعاود لديك البلاصة ونصادف نفس الكمامر مرة اخرى . صبحت واقفة فنعار الشفوي ومشيت مرة اخرى وركزت على الهندام ديالي ..مابغيتش نكون رسمية ومابغيتش نكون مبرشهة ..بين وبين وحتى الفولار طلعو بينت القصة شوية باش منبانش متزمتة ولا شي حاجة بحال هاكا .. لقيت السي الطيب تما وسلمت عليه وباركت ليه حيت طلع للشفوي وجلسنا كنهضرو قالي ماتبينيش باللي مخلوعة ولا كتفهمي اكثر من القياس.. بقاي فالوسطية راه شحال من واحد حا يكحلها عماها . قلت ليه فخاطري لهلا يوريك شحال وانا سهرانة على الفيديوهات ديال التعلم والاستقبال فلكونكورات ووالحركات وفوقاش خاصني نهضر فوقاش خاصني نسكت وفوقاش نبتاصم فوقاش منبتاسمش .. تعلمت بزااف دالقواعد ولقيتهم لصالحي حيت لاحضت باللي حاو غير شي عشرة دالناس وكاع صحابات الشعور والطالونات تقصاو .. عرفت ان الامر جدي للغاية واللي عندو شي حاجة فراسه يحطها وبحال هاد الخدمة اللي واقف عليها ساس دولة بشعبها ماشي غير اجي ودخل ليها من والا والا كن راه نهارت من زمان وتشردنا حنا واولادنا .. لا طالون لا عكار وابسط حاجة كينتابهه بيها ونسبة الخطأ منعدمة واول حاجة تعلمتها من نهار الاول جيت وقابلت دوك الوجوه هي المعقول والجدية فالحياة والاستهتار بلاصتو ماشي هنا . دخلت للقاعة لقيت ثلاتة دالرجال جالسين اللور وثلاتة لقدام قدامي وجلست بالادب . بقا واحد فيهم هوا اللي كيتجمع معايا جموع عادي وكيسولني اسىلة وكيدخلني ويخرجني وانا مركزة معاه وخايفة نقول شي حاجة ماشي هي هاديك .. بقاو كراوغ بيا وكنحاول مركز معاه مزيان ومرة يبتاسم ويدخل ليا فالاقتصاد مرة يخرج منو ويدخل فالسياسة وشي مرات كيسولني على شي حوايج كانه نسا على شي تاريخ كيقوليً فكريني وكيقولو غالط بلعاني باش يعرف واش كنفقه شي حاجة وعندي الفطنة ولالا واخا انا عارفاه عارف العجب وكيدوخني ..اما اللي حداه ماكيشوفوش فيا بمرة كل واحد ساكت وكيشوف فجهة وذالقين ودنيهم وكيهبطو على ديك الورقة يكتبو وكنقول يعلم الله اش كتب ليا تما الله يحضر السلامة . ساليت وخرجت بحالي حمرا ووجهي سخون تفكيت من داك المجهر اللي كنت تحت منو ومشيت بحالي كنراجع شنو قلت عاوتاني وعيطت لبابا قلت ليه راني دوزت واحد الامتحان وعييت نفهمو ديالاش غير بالمعاني حيت عطاونا واحد الورقة وقعنا عليها قبل مندخلو باش مندكرو لا اسم الادارة ولا نوع الكونكور ولا حتى حاجة من داكشي . عيا بابا يسول فيا فاللهر قلت ليه ديال الوزارة وصافي بدينا كنهضرو قلت ليه حتى تجي وتزيد نشرح ليك
على بركة الله .. صبحت على نجاحي فالكونكور.. وكان عندي الزهر تهزيت مع العشرة اللي نجحو من بين ستين واحد دوز داك الكونكور .. لاكن السي الطيب مانحجش وبارك ليا وهنا غنبدا نصنع من نفسي سارة جديدة .. او بالاحرى المحيط اللي ضاير بيا هوا اللي صنع مني انسانة اخرى .. اول نهار ليا فالسطاح مشيت لديك الادارة انا اللولة وخفت نتعطل .. كان تابعني سطاج ديال ست شهور لاكن الخلصة ديالي ماتبدلاتش واخا غير سطاج كنتخلص نفس الخلصة اللي كياخدو تما اللي بحالي . كانت ديك الادارة عبارة على عمارات كل وحدة فين مدورين بالامن والحراسة المشددة .. كانت كل عمارة عندها مطعم لتحت والماكلة فابور وكنخدم نهار ونجلس يوماين وكان الدور ديالي فداك السطاج نرتب الوقات ديال العمل دالموضفين تما ونبقا شادة النوبة وعاقلة عليها باش منتلفش شي نوبة وحتى العطل كانو من العمل ديالي . ماكانتش شي خدمة صعيبة وكنت كنخدم نهار ونجلس يوماين وكان عندي بادج كندخل بيه بين دوك البوليس اللي فالدخلة والى نسيتو نبقا برا .. نهار على نهار كنكتاشف شي ملفات كيدوزو بين يدي وشي اسرار و قرارات كنعرفوهم حنى فداك القسم قبل مايخرجو للاخبار .. رجعت سابقة الاخبار بيوماين ورجعت كنعرف شي حوايج ماشي كاع الناس كيعرفوهم ومابقيتش محدودة بين التفاهات ، وليت كنحس براسي مهمة .. كاع اللي نجحو معايا فرقوهم وكل واحد فقصم وجيت انا فقسم الادارة العليا .. ياه على زهر عندي !! كنت كنسمع بواحد السمية غير فالتلفازة حتى رجعت خدامة فنفس الكولوار ديالو .. فلان بن فرتلان. ومن لا يعرفه .. اصلا ماشي كولشي غيعرفو غير اللي مهتم بهاد الوسط والمواضيع السياسية . بصراحة ماكنتش كنعرفو فوجه حتى تفاجات بواحد الاجتماع على غفلة وكانو اللي حاضرين للاجتماع غير المديرين ديال دوك العمارات و والمسؤولين على الاقسام والكاتبات . طليت على باب الاحتماع فاش سالاو وشفتو خارج. كان عندي فضول نعرفه فكمارتو . كان كبير فالسن وفيه الشيب وكيبان صارم لاكن موفر الحقوق للموضفين فهاد الشبكة وعرفت من بعد باللي كاع اللي كيرصلو الستينات ولا الخمسينات كيسيفطوهم للحج على حسب الخدمة و الاعياد كيعطيو بيرمات لجميع الموضفين و فالعيد وفرمضان كيعطيو فلوس الحريرة والى مرض شي واحد تما كيتكلفو بيه من ساسو لراسو وكيسيفطوه لواحد المستشفى العسكري كيتعالج على حسب الخدمة حتى من الفوطات كيسيفطوهم ليهم واكتشفت ان اللي خدامين تما كتكون عندهم مهام خارج البلاد وكيدوزو فيها ربع سنين ولا قلت سنين وكيجيو جايبين ثروة حيت كيتخلصو للنهار .. كاع اللي خدامين تما لاباس عليهم مكاينش اللي مكحط والمخير عندو فيلا ولا جوج ديور وكاين اللي مدخل ولادو .. اما انا الصالير ديالي طلع طلعة وحدة وليت كنشدهم ضمسة على ختها ونهار على نهار وليت كنحس براسي كنتبدل بلا منشعر .. لا فهضرتي ولا فتصرفاتي .. المشية ديالي هي اللهخرة تبدلات وليت غادية ومخنفرة هازة راسي . اما البوليس الي وقفوني وقلت ليهم فاش خدامة كيضربو ليا السلام ويخليوني نزيد
الحاصول .. الثقة فالنفس كتزاد والهبة والهمة والشان .. ماشي غير الفلوس اللي كيديرو هادشي وانما حتى المنصب ديالك والمحيط ديالك كيساهم فشخصيتك وفاحترام الناس ليك وحتى المعارف تبدلو مرة اخرى وتعرفت على ناس كيتعاشرو غير مع الناس اللي ليهم قيمة
رصيت الامور العملية اللي كانو شاغلين ليا وقتي وغبرت هاد المدة كلها على مالين الدار وعلى بنتي وقررت نمشي الويكاند نشوفهم .. تقديت ليهم الكادويات وتقديت لبنتي ومابقيتش كاع كنضرب حسبة للفلوس .. مشيت للناضور ووقفت لقيت الطموبيل دعيسى قدامي ..نزلت هزيت البكاج ديالي وطلعت للدار كنجري تعرضات ليا بنتي عنقاتني وهزيتها كنبوس فيها ونعنق ونعنق ماما .. ناض بابا تفاجا حيت ماقلتش ليهم غنجي ودرتها ليهم مفاجأة .. عنقتو وسلمت عليه ودخلت لقيت عيسى جالس .. لحت ليه السلام ومشيت بحالي متحمسة نهضر مع ماما ونعنق بنتي .. جلست فالكوزينة هازاها وهي كتقولي نمشي معاك ديني معاك .. بقيت كنحاول نشرخ ليها باللي خدامة وغل قلبها كندير شحال من حاجة باش نشوفها احسن من كاع الوليدات وكاع الناس مستقبلا ويجي النهار اللي تحضى فيه بالاحترام والوقار حتى هي .. مشيت لبيتي ديتها معايا وجلست باش ناخد راحتي معاها وبقيت كنسولها شنو كديري واش كيجي باباك عندك واش كتهلا فيك وهي غير اه اه اه وعينيها على باكية دالشكلاط .. ماخديت راحتي مع دارنا حتى مشا عيسى بحالو عاد جلست معاهم وبقا بابا كيسولني على شنو كنت منعاود ليه وقلت ليه راني خدمت فالوزارة ديال الداخلية وصافي مابغيتش نقول ليه فاش خدامة ونجبد على راسي النحل والاسئلة ، قلت ندوز معاهم ديك الويكاند فالهنى ونمشي حتى يحن الله . جلسنا فالعشا وسمعتو كيهضر عاى عيسى قالينا غيسافر على برا باش نكونو عارفين انه مغيجيش يشوف جنة .. ماديتهاش فيه حيت اصلا مابقاش كيهمني كاع شنو كيدير وخرجتو من بالي فمرة وتهنيت ودوزت ديك اليوماين ومشيت نقابل خدمتي وكل ويكاند كنشد الطريق لدارنا ندوزو معاهم ونرجع بحالي وحتى هما كل مرة جايين عندي وبعد المرات كتجلس معايا ماما اسبوع وترجع .. بقينا على داك الحال حتى ساليت السطاج وتحولت من داك القسم لقسم اخر وهاد المرة المهمة ديالي كانت كبيرة .. من زهري جيت مع التقاعد ديال واحد الكاتبة دالرئيس ديالنا وجيت انا بلاصتها وجاتني خدمتها صعيبة ومسؤولية كبيرة وخاصني الدماغ لهادشي وانا كانت عاجباني خدمة العطل وداكشي ماحسابنيش غنشد مكتب بوحدي ونكون مسؤولة على اللي تحت مني . هزيت ليها الهم وضربت فيها اربع اشهر ديال الخدمة مع الرئيس المنحوس مرضني كل مرة عاطيني مهمة ومكتعجبو حتى حاجة والمشكلة هوا مريض وكبر رجع كينسا وعندو زهيمر وكيتسناو الفرصة فين يهزوه من تما ويحيدوه حيت مابقاش قد المسؤولية وميجي فين يمشي حتى يخرج ليا عقلي معاه .. واللي هضرتي معاه يقصح معا الهضرة مكاينش الاستهتار فالخدمة واللعب .
اخيرا جا السبب وطاح مريض واستبعد من المكتب ديالو وبقا وفارغ وتحملت المسؤولية كلها على ضهري ودايرة خدمة دالرئيس والنائبة وضاغطة على اللي تحت مني وتضغطنا كلنا وعشنا واحد الستريس وجات مع شي مشاكل سياسة وعشنا واحد الضغط. رهيب حتى مرضنا عاد جات اللائحة البيضاء عندنا فيها الرئيس الجديد .. من نهار جات وانا هازة الهم كنطلب الله يكون شي واحد مزيان وماناقصو لا عقل لا والو باش ميحمقنيش ويحمقنا كلنا حيت غنخدم معاه ولاسقة عليه ومني ليه وانا اللي غنسمع الهضرة الى ما كانتش كل حاجة فمحلها .
صبح نهار الاثنين وقالك ليوم غيبدا ومشيت وجدت كاع الملفات والوثائق اللي خدامين عليها حطيتهم وكنتسنا الرئيس يدخل للمكتب ديالو حتى قالت ليا واحد الشاف راه جا هوا الاول وراه فالبيرو ديالو
قلت ليها حسابني مزال ماجا حيت على ما اضن عندنا اجتماع
قالت ليا داكشي اللي كاين
سمعت تيليفون الفيكس كيصوني وهزيت جاوبت من مكتب الرئيس ديالنا قالي جيبي الوثاىق فلان فلانية وهزيتهم مشيت دقيت عليه ودخل .. مع غنهز راسي كنجي فالسمية اللي فواحد الزاجة قدامي فوق المكتب مكتوب عليها عيسى الحجوجي !!
هزيت راسي واللون تخطف ليا شفت فيه كان هوا بشحمه ولحمه معلق لافيست وراه وجالس بالقميجة والسروال والبيرو قدو قداش وكيشوف فيا باستغراب تصدم .. وقالي سارة؟!
كنت غطيح من هول الصدمة !!! بقيت واقفة مصمرة وبعد واحد الملف قدامو وقالي ااشكديري هنا
ماعرفت نجاوبو كرئيس ولا كطليق ولا كيفاش ندير ليه!! كان فالذهب اش جابو عندي !! هاد السيد مابغاش يتفهم ليا وماقدرتش نفهمو .. عمرني طاح ليا على بالي يكون خدام هنا ولا عندو علاقة بهادشي كاع ولاكن تصدمت .. نقدر نقول انني اول مرة نتصدم شي صدمة نيييت فحياتي .. تلفت بقيت كنحنحن قلت ليه عيسى .. السي الحاج السي الرئيس !! وبقيت كنتمتم ماعرفت مانقدم ولا منوخر
قالي زيدي زيدي جلسي
مشيت المشية دالشينوا وهبطت خنافري وجلست عطيتو دوك الوثاىق وبقا كيطلع فيا ويهبط ويدو على فمو وانا كنشوف فيه بنص عين .. قالي وليتي خدامة هنا
حركت ليه راسي قلت ليه اه
قالي شي واحد ترسط ليك ولا ؟؟
قلت ليه لا راسي ..دوزت مع الدكاترة وهزوني
هبط راسو شاد فستيلو وقالي مزيان .
قلت ليه واش حتى نتا خدام هنا !!
تكا الور كيشوف فيا وقالي امم
قلت ليه عمرني عرفتك خدام هنا واش عاد بديتي ؟
بقا ساكت وحل دوك الوثائق كيشوف فيهم وسولني عليهم وعلى الخدمة تقول عمرو عرفني !! السيد تهز واحد وتحط واحد كن كان بلاصتو واحد اخر مكيعرفنيش كن عاملني نفس المعاملة .. اصلا ماكنتش كنتسنا منو شي معاملة فشكل واللي بغيت هوا يخليني مرتاحة فخدمتي ميضغطش عليا ويخرج ليا عقلي .. على الله يوقرني ويخليني ندير خدمتي فخاطري بلا ميدخل المشاكل الخاصة فالخدمة .. بقا كيشوف ويدور دوك الاوراق وانا كنربط الاحداث القديمة مع الجديدة .. بصراحة عمرني عرفتو فاش خدام وكان ديما كيصدرني ويقولي مسافر خدمة. ولا معطل خدمة ولا شي حاجة متعلقة بالخدمة وكيدخل ليا الذهب فالطريق. حتى دوخني .. وحتى فاش سيفطوني لمدينة اخرى وتوسط ليا دخلني الشك قلت مع راسي خاص يكون عندو شي منصب كبير باش يقدر يتوسط ليا ويكونو عندو معارف كبار ..كاع هادشي فكرت فيه ولاكن متوقعتش بمرة نطيح انا وياه فنفس الصف .
رجع اللور تكا على ضهرو مكيشوفش فيا كاع تقول جالس بوحدو عيط على الكاتبة الثانية اللي كتسجل الموعيد وخدمتها بحال المنبه. حيت ماعندهاش سكريتيرة حنا لاكن عندنا واحد التقسيم مخربق وشي فوق شي وشي حدا شي وبينا مجموعات مقسمين كل واحد وخدمتو .. قاليها فتيليفون باللي غيبداو الاجتماع من دابا عشرة دقايق وقطع وهبط راسو قالي صافي شكرا غير سيري للبيرو ديالك ونضت خرجت مشيت بحالي وجلست كنتسنا يبان ليا شي واحد يشبع فيا تسرفيق باش نفيق ونخرج من هاد المنامة
تقلبات عليا الدنيا بالضحك بديت كنضحك غير بوحدي بحال شي حمقة وكنشوف فهاد الزمان اللي كدورني كيف بغا .. دوزت دوك الدقايق كنستوعب ونضت مشيت للاجتماع جلست باش نتعرفو غلى رئيس القسم ديالنا .. كلشي داير عقلو الا انا اللي كل مرة كتخرج ليا الضحكة من ودنيا وجاتني واحد الهستيرية ديال الضحك ماقدرتش نشوف فوجهه وقالبة وجهي جيهة واحد المرى جالسة حدايا وكنبكيص بالضحك وهي كتسولني مالي وعلاش كنضحك .. ماحدها كتسول وانا كنزيد نضحك حتى قالي ضحكينا معاك نضحكو حتى حنا
سديت فمي وسكت زيرت غلى سناني باش منضحكش والموضفين اللي معانا كيشوفو فيا ومنهم اللي ضحك لا اراديا وانتقلت ليه العدوى .ً شفت فالحاج عيسى لقيتو كيدور ستيلياو فيدو وكيشوف فيا بجدية وهبطت راسي قامعة الضحكة فيا حتى بردت .. ماهضرت ما نطقت بقيت ساكتة كنسمع حتى دازت ديك نص ساعة دالاجتماع وخرجنا كل واحد مشا لخدمتو .. يالاه جلست نسوط على راسي عيط ليا فالتيليفون قالي اجي ونضت كنسوط مشيت عندو ودخلت نشوف اش بغا لقيتو جالس واحل بين دوك الوثاىق وبقا كيسولني وانا كنجاوبو ومتبعة معاه ورقة بورقة جميع الملفات والعناوين وكنخليه حتى يراجعو ونحط داكشي بالترتيب حتى سخفت وجاني الجوع وماعطانيش البوز ديالي دالغدا وبقيت عاصرة كنحسب انا وياه حتى ساليناهم وهز تيليفون عيط على الكاتبة الثانية قاليها طلعهم للحصانة وهزاتهم داتهم وقالي صافي غير سيري ونضت جمعت الاوراق اللي بقاو في حين جر السجادة طلقها تما وخرجت بحالي خليتو كيحل سيور سباطو باغي يصلي . هبطت نيشان للمطعم تغديت وجلست كنتجمع مع واحد المرى كبيرة فالسن كيقولو ليها الحاجة لكبيرة وحجات شي خمسة دالمرات على حسب الخدمة وقربات تخرج تقاعد وكتقاتل باش تدخل بنتها فبلاصتها .. بقينا كنضهرو على هادشي وقالت ليا باللي عندها الاجازة و دوزات الكونكور ديال السلم عشرة وحداش وبنتها نجحات فالكتابي وبقا ليها الشفوي وقالت ليا غنهضر مع مسيو الحجوجي على بنتي
قلت ليها راه متديين موحال يبغي يدير معاك هادشي
قالت ليا لا خفت غير تنجح ويحيدوها ويديرو بلاصتها شي واحد اخر من برى .. هادشي فيه التحراك والى جات شي ليستة من برا فيها اسماء بزاف غينقصو حتى من اللي نجحو .
قلت ليها هضري معاه ماتعرفي
قالت ليا كيعاودو عليه راجل مزيان ومعقول
قلت ليها كن كان معقول مايسمحش لشي واحد جاي من الطرف ويدخل واللي ضارب عليها الجهد يضيع
بقات ساكتة وقالت ليا بلاتي ونمشي ..
تغدينا ورجعت للخدمة حتى بانت ليا دايزة ونضت شيرت ليها دخلات عندي قلت ليها امضرا شنو درتي ؟
دخلات عاضة شنايفها قالت ليا دخلت لقيتو واقف يالاه بغا يصلي العصر ويخرج ووقف مابداش قالي غير زيدي دخلي .. قلت ليه زعما السي لحجوجي راه عندي واحد البنيتة وهاشنو هاشنو وراه نجحات وبغيت نوصي عليها وغير هي اللي عندي وانا قربت نتقاعد وخفت عليها ضيع .. ايوا وبدا كيقلب تما على ديك الورقة بدا كيشوف دوك الاسماء وقالي مكايناش هاد الهضرة كاع اللي نجحو حتى واحد مغيضيع فحقو وقلت ليه الله يرحم الواليدين والله يقبل وخرجت
قلت ليها راني قلت ليك متديين مغينقص ومغايزيد
قالت ليا بصح .. لالل باينة عليه ديكودي
قلت ليها شنو هي زعما؟
قالت ليا دغري
بقيت كنشوف فيها مافهمتش وقالت ليا زعما نيشان
قلت ليها اااه اه اه لا نيشان ماتدي منو لا حق لا باطل
قالت ليا واش فايت خدمتي معاه فشي بلاصة
بقيت كنضحك قلت ليها لا غير كنسمع عليه وصافي. ومشات فرحانة مطمنة على بنتها
ناري على نهار كي داز .. داز اطول نهار فحياتي العملية .. رجعت للدار مسخسخة طحت كاو رتاحيت .. عيطت لدارنا نسول على بنتي وسكت ما جبدتش حس عيسى ولا غيرو .. ضربت الطم وقطعت الحس وبقيت كنتجمع مع بنتي وكنواعدها غير تكمل ربع سنين ونجيبها عندي تعيش معايا وندخلها لاكخيش ومابقا ليها والو .. اربع اشهر ونجيبها عندي .. مسكينة بقات كتحسب ليا شحال بصبعها وانا مساسيساها حتى تسدو عيني ونعست وصبحت على الخدمة .. هاد الصباح ماجاش مسيو حجوجي وخدمنا راسنا داكشي اللي موالفين نديروه والاخداث الجديدة اللي كدخل علينا .. مشاو منا شي وحدين لغزة غيجلسو فيها عماين وجات الخرجة على برا وناضت المفاوضات مع المدير وكلشي ماكرهش يمشي وكولشي دخل فاللاىحة وباغي يخرج والنص منا منتشار على برا فدول عمرني سمعت سمياتهم وبزاف ديال العجب بديت كنشوفو .. وصلاتني اللاىحة ديال الناس المرشحين واراك للتبحليس وكلشي جا فصفي. وكولشي باغي يدير معايا المزيان واخا ماعندي منصور منهم انا اصلا .. شديتها حيدت كاع هادوك اللي رجعو هاد العام وخليت اللي شحال هادي مامشاو وماعطيت لا حس لا خبر لشي واحد وقاديت اللاىحة وحطيتها و رجعت منين مادزت كيعيطو ليا لاللة سارة وكيديرو ليا كي الماء القليل وحتى اللي رجعو هاد العام ولقاوني جديدة جابو ليا عرام دالكادوات باش زعما نخليهم فالاىحة .. اما لعيالات وجعت حبيبتهم ووحدة عرضاتني لعرس بنتها ووحدة بغات تصاحب معايا .. اوودي والله كن ما داك البيرو اللي كنجلس فيه لا عطاوني جغمة دالماء. خليت اللاىحة باتت تما حتى الغد ليه شديتها راجعتها لانكون ضلمت شي واحد ووقعت عليها ودخلتها لمسيو لحجوجي عطيتها ليه طالع عليها وقالي واش هادو كانو على برا.
قلت ليه لا هادو عاد رجعو . بقا كيشوف فيهم وضرب على واحد جوج فيهم بستيلو .. قلت ليه ماخرجوش هادو كاع
قالي هادو بوجاديين وماشي ديال الخدمة برا
بقيت كنشوف قلت خليه يضبر محاينو شغلو هاداك المهم درت اللي عليا .. حط جوج اسماء اخرين ديال واحد الجوج قافزيين وقلت ليه راه عاد دخلو
قالي يدخلو ولا يخرجو .. حنا ماشي كنفرقو الصدقة هنا ولا العطل .. اللي قد المسؤولية وكابابل هوا اللي كنسبقوه .. هادا بالضبط ماتعاوديش تحطيه فعاد لاليست ديال الناس اللي خارجين فميسيو .
حركت راسي كنشوف فديك الورقة اللي شد طواها وقالي عاودو لاىحة اخرى
خرجت من تما كنفخ مشيت عاودت خرجت وحدة اخرى غلى سعدي ووعدي وكولشي باغي يعرف شكون فديك اللائحة .. خرجت وحدة جديدة والقديمة حرقتها حيت لاطاحت فيد شي واحد مشيت فيها فخطرة مايعقلوش عليا . دخلت عندو لقيتو كيصلي .. سعداتو والله .. بعدا الصلاة مكيدوزهاش واخا يكون كيغرق. .. رجعت بحالي مادخلتش حتى عيط ليا قالي اجي ومشيت ديتها ليه حطيتها ليه قراها ووقع عليها ودخلها فالملف قالي صافي ديها وخرجت بحالي .
تعلنو من بعد ثلت ايام الناس اللي غيسافرو وبدينا روينة اخرى ديال واحد الملف اخر مشحر .. خصيني نحضيك والتبركيك والبق مايزهق ..
هاد الويكاند جاو عندي مالين الدار .. وتجمعنا على قصرية دالرفيسة . قلت لبابا انا صافي دابا استقريت هنا فالرباط والسياج ديالي هنا ماعندي فين نرجع.. حتى جنة غتزيد شوية وتتحول لهنا .. وبغيت نشري شي دار احسن ما نبقا فالكرا
قالي الى كنتي غتشريها بالربى غير بقاي فالكرا
قلت ليه لالا بغيت نبيع هاديك اللي فالناضور ونشري هنا حيت مابقا لي ماندير فالناضور
قالي نتي تعرفي .. بقيت كنسايس معاه حتى اقتنع وهم الاسقرار والسكن انزاح .. قالي راه عيسى حتى هوا تحول للرباط وراه باغي يخرج جنة تلعب شوية مع ولدو باش يولفو بعضياتهم وتتربا بيناتهم ديك الاخوة ماشي يبقا شي غريب على شي
قلت ليه هي تحول هوا وعاىلته
قالي ايوا ضاروري واش كاين شي راجل يقبل يعيش فمدينة والمرى فمدينة
سكت ماعرفتش شنو وقع بين رجاء وعيسى وكيفاش حتى تحولات معاه واش باقا خدامة ولالا ولاشنو دارت . قلت مع راسي يضبرو راسهم وانا مالي ..نديها فحياتي اللي مهمة والباقي لهلا يقلب . خرج بابا فالعشية خرجها معاه واخا كنت باغا نبقا معاها ونشبع منها ساعا جا طيرها ليا داها وبقيت كنشوف فالحيوط..قنطت ومالقيت ماندير وخرجت حتى انا خرجت ماما قلت ليها يالاه نمشيو لحديقة الحيوانات ندوزو العشية تما ونجيو ونيت تشوفي الحديقة عمرك مشيتي ليها . لبسنا ومشينا كندورو فخديقة الحيوانات انا وياها حتى كنخرج فعيسى لابس سورفيت كحلة وداير نضاضر الشمس حتى قلت مع راسي شكون هاد الزين قبل مانعرفو ..عرفتو غيرر ببنتي اللي غادي تابعها وهي كتجري مور ولدو .. تباارك الله ولدو كبر شحال ما شفتو .. ضحكت لااراديا قلت لماما ها جنة
ضارت يمين وشمال قالت ليا فين فين؟ قلت ليها هااهيا كتنقز
ضربتها بالعين حتى جات على زنافرها ومشيت كنجري عندها لاكن سبقني عيسى وهزها من الارض وتصدم فاش شافني . ماعقلتش عليه تحنيت عندها كنقلب ليها وجهها وهي كتبكي وتعجبات فاش شافتني . وقف ولدو حدايا تكا على ركابيه كيسوط من العيا وعيسى كيهضر مع ماما كتعاود ليه قصة حياتنا كفاش حتى تلاقيناهم .واحد الشويك وقفات علينا رجاء هازة قرعة دالماء ولابسة سورفيت طويلة وسبرديلة كضحك قالت ليا السلام وتحنات قالت لبنتي ياكما تقصحتي اماما .. لاباس عليك احبيبة ديالي لاباس غليك .
حسيت ساعتها بواحد النار طالعة معايا وشفت فيها من تحت حجباني واحد الشوفة كنخزر فيها وماما واقفة سلمو غلى بعضياتهم وبقات كتهضر وانا كنمسح لبنتي وجهها وساكتة ماهزيتش راسي ومابغيتش نبين كاع احساسي .. وقفت قلت لبنتي صافي عيييتي ؟ يالاه نمشيو بحالنا
قالت ليا رجاء خليها مسكينية تفوج شوية راه عاجبها الحال
هبطت راسي كنمص ديك الهضرة ديال السم البارد ومابغيتش كاع نجاوبها ولا نشوف جيهتها وهي كتهضر وعاجبها الحال تقول ربحات رحلة للمالديف قالت لينا مرحبا بيكم اجيو تجلسو معانا
قالت ليها ماما لالا حنا بغيتا نتمشاو شوية على رجلينا عيينا بالجلاس ابنتي
هبط عيسى لمستوى جنة كيشوف فيها وكيضحك ومخبيها تحت الكاسكيطة اللي داير كنسمعو كيقول ليها فين تقصحتي .. انشوف. .. جرها من تريكو باسها وهزها على كتافو داها وبقينا حنا واقفين وماما كدير الصواب مع رجاء وتسولها على العاىلة وهي كتهضر والفرحة غتخرج من عينيها .. بسيف ماتفرح وهي كانت الرسط ودابا خوات ليها الساحة وغتكون مرتاحة من جيهتي حيت تطلقت بالثلات مابقا ليا فين نرجع ومحرمة عليه
قالت لينا الله يعاون ومشات كضحك وانا كنشوف هاد الله يعاون ديالها زعما خليت ليكم الراحة .. انا بيا بنتي ولا شيء من غير بنتي وهي عقلها غير فالازبال وزادتها بالغلض ولات بحال البقرةووجها تنفخ بغا يطرطق مابقات كااع جايا معاه اصلا .. لا علاقة ليه بيها .. هوا بعيد كل البعد ومهلي فراسو بالرياضة وفصحتو و حتى فحوايحو وهي موراه شادة واحد الكاغيط غادية وكتقشر فالزريعة .. قلت لماما عجبك هادشي ؟؟ تشوفيني انا غادية مع مرت با ونتي كتشوفي بعينيك ؟ عجبك هادشي؟
قالت ليا سيري ردي بنتك وعطيه واحد جوج كلمات ..هاديك راه باغا دير البنت تحت باطها وهادشي كامل باش تبين ليه هوا شحال هي حنينة ومابحالها حد..سيري جيبي بنتك راه انا وشعلات فيا العافية
مشيت عندو نيشان ابتسمت وقلت ليها وهي فوق راسو ماما يالاه نمشيو لدوك البلايص الزوينين ديالنا انا ونتي
شاف فيا قالي خليها حتى للعشية ونردها للدار
قلت ليه لا براكة عليها حتى لمرةاخرى ان شاء الله
نزلها وتحنا باسها وجات ام الصدر الحنون البقرة الضاحكة تحنات عندها باستها وعطاتها وريدة قالت ليها ديالمن هادي؟
قالت ليها جنة ديال طاطا رجاء
دورت وجهي كنزفر وكنحاول نتحكم فأعصابي حتى سليت بنتي ومشيت بحالي كنبحث فيها ونسولها شنو قالو ليك شنو قالت ليك فين مشيتو فين جيتو .. جلسنا فواحد المطعم ناكلو شي حاجة وبقيت كنشوف حتى بانو ليا من بعيد غاديين وهي كتمد ليه يدها باغا تشد فيه وكتهز وتحط فديك السورفيت اللي لابسة .. عيفاتني ولات حالتها بالغلض مابقا باين ليها راس من رجلين وكتلسق فيه بحال الى غيهرب ليها .. هوا براسو كرهتو وخيخت منو لا هوا لا دوقو المزفت ومضيع راسو مع وحدة منافقة ومسمومة وماشي ديالو كاع … تحسرت عليه فهاد اللحضة وبقا فيا مابغيتهاش ليه ولاكن سرو خليه انا بغيت يموت معاها ..كان بثلاتة دالعيالات رجع بوحدة واكفس وحدة فدوك آلثلاتة . بكثرة ما شبعات نعاس على جنب الراحة فاضت حتى تزلعات ..يخخ
عيينا بالجلاس فالحديقة وجينا خارجين وتلاقيت فالباب مع واحد الولد قرا معايا فلافاك وكنت كنهضر معاه على الواجبات ديال القرايا .. وقفني على غفلة بواحد الحماس خلعني وفرح مللي شافني وحتى انا نتصدمت فاش شفتو .. سلمت عليه وكنت بوحدي اللي واقفة وماما سبقاتني للطموبيل . بقينا كنهضرو لاباس بيخير قالي عاد جيت من هولاندا وصدفة زوينة ونهار كبير هادا
كانت سميتو عمار وكان زويين وشعرو كحل بحال الضلام وكثيف وعندو لحية كحلة وواحد الموسطاج مجبد وكيضحك من عينيه .. كان طويل وماضعيف ماغليض.. عادي وزويين فوجهه ومقبول واهم شيء مصواب وجنتلمان بزااف . فرحني بشوفتو وطلب ليا نمرتي وعطيتها ليه ومشا حيت كان على عجلة وحتى انا مزروبة .. مشيت بحالي ركبت وكنضحك غير بوحدي حيت اصلا داك السيد غير الشوفة فوجهه كتبعت السرور .
رجعت بحالي للدار مع والديا وحتى جيت ننعس وصونا ليا بالليل ..جاوبتو وضحكت قلت ليه عرفتي شنو .. ماتقولش شكون حيت انا عارفاك شكون
بدا كيضحك قالي حزر فزر
قلت ليه عمار
قالي وباش عرفتيني
قلت ليه ماعرفتش باش عرفتك ولاكن عرفتك ..احساسي خلاني نعرفك
بدا كيضحك قالي وحتى انا احساسي قالي راه غتعرفيني
بقينا كنهضرو وكنتعاودو و إيوا مات ايوا والخديث طويل وقالي راه خاصو جلسة .. قلت ليه ان شاء الله نديرو شي كافي
قالي لااالالا اشمن كافي .. انا غنعرض عليك للعشا
قلت ليه بلاتي حيت راه عندي الضياف حتى يمشيو وهانا معاك .
قطعت معاه وماكرهتش نجلس معاه الصراحة يفوج عليا شوية ونضحك ونبدل الوجوه والروتين ونخلق لراسي جو زوين .. دوزت اللي قسم الله مع مالين دار ومشاو رجعو للناضور وبقيت بوحدي فالدار وعلى اتصال بعمار .. وكل مرة يسولني واش الضياف مشاو حتى قلت ليه مشاو وقالي نتعشاو غدا فشي بلاصة ..قلت ليه مزال مكنعرف البلايص هنا ..قالي نميو لمايا .. غتعجبك دخلي شوفيها باش ماتقوليش خاطفك
بقيت كنضحك قلت ليه مزال نتا هوا نتا. وبقينا كنضحكو ونهضرو حتى عييت وطحت نعست وصبح على الخدمة والروتين وهاد المرة ما شفت الرئيس ماشافني . خرجت فالعشية مشيت بحالي ووجدت راسي ولبست واحد الكسوة انيقة محتشمة والشال ديالي ودرت واحد المونطو خفيف على كتافي طويل ديال الليل وخرجت مشيت لهاد مايا اللي قالي .. هزيت راسي. فيها ودورتو. !! ايوا ماااايا نيييت ضخمة .. نزل من الطموبيل لابس كلاص تقول جاي يخطب وفيدو الورد احمر صدمني بيه بقيت كنشوف فيه حتى عطاه عليا وقلت ليه واش ليا !!
قالي ولمن ؟
شديتو بقيت غير مصدومة وكنضحك وحسيت براسي بحال شي اميرة فديك اللحضة اللي شديت فيها داك الورد .. دخلت بيه للغيسطو وبغيت نجلس وجر ليا الكرسي مورايا جلسني وجلس حدايا كيشوف فيا قالي نهار كبير كبير هادا .
بقيت كنضحك حشمت من لوجيست اللي دار لي ديال الورد والتكبيرة وفرحني وحسسني انني انثى وعندي قيمة وزاد دار ليا قيمة .. بقيت غير ساكتة مشات ليا الهضرة ماعرفت كي ندير نرد ليه الجميل ديالو .. قالي سنواااات اسارة ياك
ضحكت وقلت ليه سنين تبارك الله ..
قالي شنو درتي فيهم ؟
قلت ليه درت فيهم كولشي ..اي خاجة تخطر ليك على بالك ..كاع المراحل اللي كيدوز منهم الانسان دوزتهم فهاد السنين ونتا قالي انا مشيت كملت لقرايا فكندا ..من بعد تحولت لهولاندا عن لافامي .. ودابا دخلت فواحد الصفقة هي اللي جابتني لهاد البلاد السعيدة
قلت ليه مزيان ..اشمن صفقة ؟
قالي واحد الصفقة مع واحد الشركة مغربية ديال البني الاقتصادي
قلت ليه مزيان الله يكمل عليك بلخير
قالي ونتي فين وصلتي فالقرايا
قلت ليه ويدي على دوك الوريدات قرييت حتى تحدات القرايا ..خديت الدكتورة ودابا خدامة فالوزارة الداخلية
تعجب فيا وقالي ماعندي مانتسالك .. وتزوجتي ؟
بقيت كنضحك وقلت ليه تزوجت وطلقت وعندي بنيتة
تصدم قالي بصح !!! تبارك الله الله يخليها ليك
قلت ليه ونتا تزوجتي ؟
قالي لا .. اش غندير بشي زواج طفرتو تا وانا بوحدي بقالي غير الزواج
قلت ليه فالصراحة حسن ليك ماعندك مادير بيه
قالي بالنسبة للراجل اه .. لاكن بالنسبة للمرى حسن ليها تزوج ودير وليدات وتستاقر واخا تكون خدامة
قلت ليه الى لقات الراجل علامن تعول ماشي الشمايت
قالي هادي متافق معاك فيها
بقينا كنهضرو وحطو لينا لعشا تعشيتا وجبدنا ذكرايات الصغر وسولني واش خويت الناضور فمرة قلت ليه استقريت فالرباط دابا وماعندي عليه لاين واخا البعد على الواليدين صعيب وبعد بنتي عليا كيقهرني لاكن ماعندي مندير الصبر وصافي حتى يحن الله
مسح على يدي قالي الله يتاويكم .. داابا يفرج الله
قلت ليه ياربي امين
شربنا قهوة تركية من مور العشا وبقينا كنتجمعو انا وياه حتى نسيت راسي وسفت الساعة لقيتها الثلاتة دالصباح وقلت ليه مشا الحال ..عمرني بقيت حتى لهاد الساعة فالزنقة فحياتي
قالي الوقت كيطير
نضت درت عليا المونطو وخرجت من تما شكرتو على الورد وسلمت عليه بيدي ورجعت بحالي كنشوف فداك الورد كل مرة و وعجبني .. عمر شي واحد عطاني شي باقة ورد . الصراحة الورد زوين كيخلق المشاعر والاحاسيس من جديد واها تكون ميتة .
طلعت بحالي للدار بدلت حوايجي وغسلت وجهي وتكيت كنشم فدوك الوريدات حتى عيط ليا سولني كي وصلت وطمنتو وبقيت كنهضر معاه شوية ونعست احلى نعسة حدا داك الورد .. حسيت بقلبي حيا من جديد وغير جيست بسيط حرك فيا المشاعر حتى قلت صافي نشفت مابقيتش كنحس وليت بحال شي انسان آلي
رجعت للروتين ديالي دالخدمة وهاد المرة بطاقة جديدة ومتفاىلة بلخير .. عمر عطاني واحد الطاقة اجابية نفعاتني بزاف وخلاتني ندوز شحال من حاجة بلا منكبر موضوعها ونكون نشيطة فالعمل ديالي .. رجع كيصبح عليا كل صباح بالتيليفون كيسول فيا وكيعرض عليا للغدا ولا للبيكنيك ولا للبحر .. وكل مرة يقابلني فيها كيجيب ليا هدية زوينة حتى بديت كنحس بالاعجاب اتجاهه وحسيت بيه معجب بيا حيت لايعقل واحد مهتم بوحدة لهاد الدرجة هادي غير هاكاك ..الاتصالاتو ديالو بالليل .. كيبغي يعرفني شنو كندير وواش على خاطري ولا مقلقة ..كيخرجني وكيعطيني وقت واخا مشغول .. كيسرق من شغلو الوقت باش يسول فيا .. خلاني نشك واش كان عندو شي اعجاب من جيهتي فاش كنا كنقراو وكان خايف يصراحني … حيت من الساعة اللي تلاقاني بيها وهوا ملهوف عليا وكنشوف فعينيه البراىة وكنحس بالراحة معاه .
كنت جالسة فالبيرو خدامة وداخلة سوق راسي كندير الواجب ديالي على اكمل وجه وعمر شي واحد تشكا مني وحتى مسيو عيسى موقرني لحد الساعة وماكيجبدش عيبي وكيتصرف معايا بحال الى عمرو عرفني .. عيط ليا فتيليفون مشيت عندو لقيتو مهبط راسو مشغول وقالي نعاونو فترتيب بعض العناوين وجلست فصمت كنرتب فيهم وهوا كيملي عليا من الحاسوب اللي حداه وقالي نتاصل بواحد الصحفي من ديالولنا اللي على برا وتاصلت بيه قدامو وصلت ليه الاوامر وقطعت ورجعت كنكتب وهوا كيدور يطل عليا يشوف فين وصلت .. واحد اللحضة صونا عليا عمار وطليت على تيليفون سكتو وشفت فيه قلت دابا وهوا ضار فيا لاكن ماضارش عندي كاع .. دار واحد النضاضر دالشرف رقاق وكان واقف كيشوف فالحاسوب ومتكي بونيك على البيرو حتى عاود صونا تيليفون مرة وقالي حيدي الصوت لداك التيليفون وشديتو انا طفيتو كاع درت بناقص باش نركز فالمفيد ورجعت لشغلي ماهزيتش الراس وبقيت مركزة وكنقول ساليت حتى كيخرج ليا بشي حاجة جديدة واللي دازت قدامو كيبقا عاقل عليها تقول حاسوب .. مكينساش وكيغفلش والى قال الهضرة كيدير بيها والى واعد كيبقا عاقل والى عطا الكلمة كيشد فيها .. بديت كحاول نمتص منو ديك الطاقة باش نكون اكثر جدية ونقلدو حتى فالخدمة وفداك السكات وبديت كنحاول ولقيت فالصمت والسكات كلام كثيير .. حوارات هما وكيخلي الانسان يحلل ويركز ويناقش فير بينو وبين راسو على مدار الساعة .. لاكن انا خديتها كتجربة فقط ومارقدرتش عليها ..ماشي طبعي وماشي انا وماشي شخصيتي ..انا حركية شوية وكنبغي نهضر ماشي نبقا غير كنسمع .. مايمكنش ليا نكون من غير نفسي واللي مابغاتي تعما عينو .
خرجت من تما جمعت كاع الخدمة اللي درنا وفرقتها على الاعضاء وتشغلت ونسيت تيليفون اللي طافي حتى خرجت فلعشية وركبت فطموبيلتي عاد تفكرتو وشعلتو ومشيت نيشان لنمرة دعمار عيطت ليه وكنقول عنداك مايجاوبنيش لاكن جاوبني وقالي بواحد الصوت حسيت بيه تقلق وكيهضر بشوية .. قالي علاش طفيتي عليا تيليفون زعما لهاد الدرجة كنصدعك؟
قلت ليه لالالا راني كنت فاجتماع وصونا ليا وسط القاعة وطفيتو بالزربة ماقصدتش نقطع عليك كاع
بقا ساكت مطولا وقالي بغيت نشوفك هاد العشية واش عندك شي وقت
قلت ليه واخا ان شاء الله نوصل للدار و نبدل حوايجي ونتلاقاو
تافقنا ومشيت للدار بدلت وكليت وجرجت تلاقيتو فقهوى ومن ساعتو وهوا ساكت مهبط راسو مكيهضرش .. بقيت عليه مالك علاش مكتهضرش .. شاف فيا وقالي ماطفيش عليا تيليفون اسارة .. انا مكنطفيهش عليك ماشي جيست هادا الصراحة نقولها ليك
بقيت غير كنشوف فيه قلت ليه راني قلت ليك ماصلاحش ليا بالخلعة طفيتو والشاف واقف على راسي خفت يقول ليا شي كلمة !
دور وجهه وسكت حتى عيا وقالي مرة اخرى فاش تكوني داخلة للخدمة سيفطي مسج .. قولي ليا داخلة للخدمة ولا داخلة للاجتماع
قربت وقلت ليه ايوا سيدي بصفتك شكون
هز حاجبو شاف فيا وقالي بصفتي راجل فحياتك
سكتني بقيت غير كنشوف فيه قلت ليه شكون عطاك الحق ؟
قالي تعطا راسو .. واش هادشي عاد فيه شكون عطا لحق لشكون؟. صافي نتي عارفة وانا عارف
قلت ليه ايوا نتا ماعينك فمعقول اعمار وانا مينكمش ليا نبقا معاك فعلاقة غير شرعية
استغرب وقالي اش وصلنا لشي علاقة شرعية ولا شعرية اسارة.. حتا فمرحلة ديال التعارف .. لابد منها .. خاصنا نعرفو بعضياتنا على اساس علاقة شرعية ماشي هادشي اللي كتقولي دابا
قلت ليه شنو بغيتي تقصد
قالي انا ناوي المعقول .. ماشي جالس معاك كنتفلا عليك ولا كندوز بيك الفاكونص
قلت ليه نتا عارفني يالاه خرجت من علاقة فااشلة جوج مرات مع نفس الشخص وكنحاول نبني حياتي ونكون شخصيتي ونوقف على رجلي من جديد .. مانقدرش نبدا علاقة اخرى بهاد السرعة
قالي خودي وقتك الكاافي.. حتى نتي تبغي .. انا غنتسناك والوقت مزال قدامنا فين نزيدو نعرفو بعضياتنا .. ونتي باقا صغيرة وزوينة ماضيعيش الوقت وبداي صفحة جديدة ماحدك باقا صغيرة
قلت ليه مزال مامستاعداش والامور ديالي كلها مرونة وبنتي بعيدة عليا كنحاول نقربها مني .. نتا حياتك على برا وانا خدمتي ومستقبلي هنا كيفاش غنديرو
شد ليا فيدي وقالي انا مستاعد نعيش هنا ديما .. نبقا هنا معاك وندير مستقبلي هنا معاك .. باش تعرفي واحد الحاجة .. انا راه من لافاك وانا كنبغيك ماشي حتى لدابا .. وباش نصارحك بهادشي كنت كنتسنا الوقت المناسب
سكت بقيت كنشوف فيه قلت ليه صدمتيني
قالي سمعي اسارة .. ها يدي .. الى بغيتي ديري يدك فيدي راه ماعمرك مغتندمي .. ماكيهمني لا ماضيك ولا حتى حاجة اخرى .. انا باغي نبدا معاك نتي الى قبلتي عليا
حاولت نشرح ليه لعل وعسى يفهم وجهة نضري ويعرف حتى سارة كيفاش كتفكر وكيفاش دايرة وشنو كتبغي وشنو مكتبغيش وخليت ليه حرية الاختيار .. اللي يبغيني يبغيني كما انا ويصبر عليا وعلى حماقي ولا الله يعاون .. من عيسى والزيار والقميع ديالو غسلت يدي على الزمر . اشنو يصبرني وانا الحمد لله مناقصني خير وبعيني وبحواسي كلهم ! يا راجل بمعنى الكلمة يا الراحة والسياحة . جلست يوماين قلت نمشي عند ختي لكازا من نهار جيت وانا كنقول نمشي عندها ماكيكتابش . الصباح نضت بكري قلت ندوز معاها هاد ليوماين وهزيت واحد البيجامة والاغراض ديالي ولبست سروال دجينز تحت منو ليبك موس وصباط عالي وفيست فالباج وتقاديت كي عادتي ودزت خديت للوليدات شوية ديال لألعاب وحلويات ومشيت شديت الطريق عندها عاد علمتها قلت ليها انا جايا باش مانكلفهاش وندير ليها تمارة ديال التوجاد حيت عارفاها كي دايرة وكتعطي الدق لراسها من جيهة الضياف وكتكبر بالواحد داكشي علاش خليت حتى قربت عاد قلتها ليها باش اللي كان ناكلوه ماتكلف راسها من جيهتي ما حتى حاجة . ايوا دقيت ودخلت عندها وكانت هي لكبيرة فخواتاتي اللي كنت كنعاود ليها فعايلي واسراري . عنقاتني وطارو عليا وليداتها بجوج طاطا باطاطا كانو غيطحوني وجرو ليا الشال بقيت كنقلب على لحيوط فاش نشد ودخلت جارا واحد وهازة وحدة لقيت عندها لوستها فالدار سلمت عليها وجلسنا كاملين على داك الحوار اللول ديال الحال والاحوال .. مللي جلست ولوستها دايرة رجل على رجل وكطلع وتهبط فيا بابتسامة ويديها فجياب البيجامة .. قلت لختي عنداك تكلفي راسك فلغدا انا جايا نشوفك ماشي جايا ناكل الماكلة راه طلعات ليا فالراس
قالت ليا لالا تكوني توحشتي الماكلة ديال الدار. وناضت للكوزينة وبقيت جالسة مع البز ولوستها حدايا كنهضرو على دراري الصغار ، سولاتني على بنتي واحوالها قلت ليها هاد الساعة مع ماما ولفاتهم وولفوها
قالت دابا تنساك
شفت فيها حشمت فبلاصتها وبقيت كنتلف هضرتها مع الوليدات وقلت لبنت ختي اجي نشوفو ماماك اشنو كدير. .. اجي
جريتها ودخلت للكوزينة لقيت ختي مصاوبة قصرية ديال الرفيسة بالدجاج محمر واللوز والبيض وتعجبت قلت ليها هادشي غير قلت ليك راني وصلت
قالت ليا نيتك ياختي والله ماحسابني جايا .. قلت ل فاطمة ماكرهناش شي كصعة درفيسة ولاكن شكون غياكلها معانا قالت ليا ناكلوها غير حنا ونضت درتها حتى عيطتي قلتي راني جايا
قربت ليها وفت مورايا وقلت ليها بالشلحة عرفتي شنو قالت ليا لوستك
تعجبات وقالت لي شنو؟
قلت ليها سولاتني على بنتي قلت ليها مع مي وبا وقالت لي دابا تنساك !!
عصرات الحامض ففمها وقالت ليا ماديهاش فيها مكتعرفش تهضر مبلورزة لسانها سابق عقلها
قلت ليها مالها مزال كترضع صبعها راه كبيرة شاربة عقلها
قالت ليا هي هاكاك كتهضر غير كتخرى وصافي
الله يستر على بشار مابقاش كيعرف شنو كيخرج على فمو .. مشينا جلسنا حطيت معاها الفراشط وجلسنا كناكلو وختي كترحب بيا وقالت ليا ماتقوليش ليا غتمشي. غتباتي معانا ..
قلت ليها ان شاء الله وهي تهضر لوستها قالت ليا واش ساكنة غير بوحدك فالرباط. دابا
قلت ليها. وشنو كنقول ليك من الصباح معامن غنسكن فالرباط. اصلا!!
قالت ليا زعما واش مع العاىلة
قلت ليها لالا اختي بوحدي ومالقيتش راحتي بقا ت ليا غير لعاىلة
قالت ليا واخا هاكاك غيجي واحد الوقت تمللي من السكنة بوحدك .. حتى انا شحال وانا ساكنة بوحدي حتى طلعات ليا السكنة بوحدي فراسي بغيت غير اللي يونسني
قلت ليها ايوا الله يجيب ليك اللي يونسك
كملنا ديك القصرية دالرفيسة كنتجمعو واللي هضرنا عليها ياربي السلامة ككنلقاها كتفهم فيها ..هضرنا فالمرض كتفهم فيه وكتعرف الاطباء والناس كانو مراض .. هضرنا فالسفر قالت ليك سافرت فالمغرب ماخليت حتى بلاصة والخاريج عندي فيه صحاباتي وكاع الدول كتعرفهم .. هضرنا فشي شخصية كنلقاها كتعرفو ولا عندها معاه رابط مشترك! هضرنا فالجمال تقول طبيبة ديال التجميل .. هضرنا فاللبس قالت ليك انا كااع مكيهمني كون لبس شكون ما لبسش وكتهضر على راسها بزااف كاع واخا مامقصوداش هي اصلا .. اول مرة نتلاقا هاد اللوسة دختي واجتماعية اكثر من القياس وكتبغي تهضر على راسها بزااف .. بقيتا كنهضرو حتى هضرنا على الزواج وجبدنا الرجال وكنا تغدينا وسالينا ولبست بيجامتي وجلست وبقينا كلمة من هنا كلمة من لهيه قالت لينا ختي الزواج ماشي هوا الحيااة .. هضرات لوستها قالت لينا اصلا زواج هاد الوقت رجع بحال المصاحبة .. هاهما تزوجو ليوم غدا يصبحو مطلقين والولاد كيبقاو الوسط مشردين
قلت ليها الى كان اختي غير زواج ديال المرض اللهم الطلاق ..
قالت ليا كتجي غير فالدراري وواخد صاحبتي حتى هي تزوجات وطلقات وخدات خليجي مشات معاه ولدات تما وطليقها تزوج ومشا مدينة اخرى والبنت بقات مع جداها وجدها
قلت ليها الجدود بعدا را احن من الواليدين خصوصا الى كانو غير بوحدهم عايشين راه الاحفاد كيعمرو عليهم الدار وكيردو فيهم الروح والتربية اللي غيربيو حفادهم احسن بألف درجة من واليديهم
قالت ليها ختي بصح شحال من واحد عايش مع واليديه وديما النكد والمشاكل .. كيكبر معقد وواليديه كيحساب ليهم الولد راه مابحالو حد حيت غير عايش معاهم صافي راه اسعد واحد فالدنيا ..اما الجدود راه الراحة والهنا معاهم يكبرو مع جدودهم احسن كاع من واليديهم
قالت ليها ايوا علاش اختي غادي يولدوهم ويلوحوهم من الاول يشربو الكينة راه غير فابور فالسبيطارات .. انا بعدا مابغيتش نتزوج حتى نلقا راجل علامن نعول ونديرو فكتافي ونعرف راسي فين خاطة رجلي
ضحكت وقلت ليها هاد الهضرة مواكلاش حيت عمرك تعرفي الراجل كيف داير واخا تعيشي معاه حياتك كلها .. شحال من واحد حتى كبرو ولادو وشرفات مرتو وناض جاب ما صغر منها !! حتى مرتو مسكينة كانت كتقول نفس الهضرة
قالت ليا انا وياك مغنتفاهموش .. حيت ماشي نفس العقلية
دورت وجهي قلت ليها العقلية والرغبات كيتبدلو حسب المحيط اللي كيعيش فيه كل واحد والضروف ديالو
قالت ليا انا بعدا ماعنديش ديك الفكرة ديال زوج طلق زوج طلق
قلت ليها علاش اصلا غتزوجي ديري بناقص
قالت ليا لالا ماشي بناقص فمرة ولاكن ماشي اي واحد نقبل عليه
قلت ليها نفس الهضرة اللي كتقولي نتي كيقولها حتى الراجل.. ماشي اي وحدة يقبل بيها ..قد ما المرى دارت قيمة راسها وعلا شانها كيتزادو فرص الزواج والرجال اللي مقادين فحياتها
قالت ليا وعلاش نتي مكتفكريش تعاودي تزوجي ؟؟
ضحكت وقلت ليها لا
قالت ليا علاش
قلت ليها الرجال قلال والعيالات كتار ..نخلي فرصة لوحدة اخرى
بقات كتشوف فيا وقالت ليا امم وعلاش قبلتي تكوني ضرة ؟
تصدمت بقيت غير كنشوف فيها وبلا حشمة بلا حيا قالتها ليا وختي بقات غير كتشوف فيا وانا مصدومة متوقعتش كاع هاد الهضرة
قلت ليها سوليه هوا شنو بغا فيا وعلاش جا بغا يتزوج بيا .. ياك كتعرفي الناس والشخصيات المهمة
قالت ليا حنا دابا غير كنهضرو وبقات كضحك قالت لي انا منقدرش نتزوج براجل مزوج
تنهدت عييت من هضرتها قلت ليها اصلا هادا بالدات واللي بحالو مايجيوش عندك احسن ليك متقبليش بالتعدد مع شي حد
ميقات وقالت ليا ومالي انا شايطة على راسي اصلا واخا يجي ماحسن منو منقبلش بيه
شفت فختي بديت كنضحك قلت ليها الى كنت اناااا انااا شخصيا طلقت ورجعت نتي شنو غتقولي ؟؟ واش عارفة بعدا بيمن كنت مزوجة؟! حساب ليك واحد مفضي ومسالي وماعندو حتى فلوس الحمام
قالت ليها ختي على نيتها مسكينة هادا راه فشكااااال
قالت ليها لوستها كيفاش فشكاااال شكون غيكون كاع
قالت ليها ختي شتي من غييير لاباااااس عليه .. متديين ومعقوول والرجال بحالو قلااال
قالت ليها عطاااهم الله اللي ماحسن
قلت ليها ومالكي مازال ماشديتي شي واحد فيهم مللي هما هااااكا اااكوكو !! عاد دابا قلتي خاصك اللي يكون ويكون ويكون والى مكانش ميكون والو !! دابا رجعو كثاار وعطاهم الله !
قالت ليا انا مالقيتش داكشي اللي بغيت بالضبط
سكت خليتها كتهضر حيت مستحيل نتفاهمو انا وياها وكتتوهم بزااف اكثر من لقياس قلت ليها فخاطري شتي واخا تبقاي غا نتي فالكوكب مايجيش عندك عيسى بلا ماتشرطي اصلا
بقات كتهضر فاش مجاوبتهاش قالت ليا انا خطبني واحد فالخاريج مزوج كاورية ولاباس عليه وقالي باغي مغربية ومابغيتش وشحال وهوا تابعني مابغيتش .. قلت ليه منقبلش نمشي على ضرة وقالي ندير ليك اللي بغيتي
قلت ليها اصلا مستحيل ومن سابع المستحيلات يديك حيت اوروبا مافيهاش شي حاجة سميتها جوج عيالات فواحد .. يعني غتبقاي فالمغرب وهاد القضية راه خاصك تكوني عارفااها
قالت ليا اه اه عارفة ولاكن بغا يطلق. وقلت ليه لا .. واللهم ديال راسي ولا واحد مشروك
قلت ليها نتي اه كتفكري هاكا يعني ماشي كلشي بحالك وكيفكر بحالك وماشي حرام ااصلا التعدد غير حنا فاش كنسمعو التعدد كنبقاو حسبي الله ونعم الوكيل. .. الله ياخد الحق ونبقاو ندعيو فالراجل ونديرو فيها مضلومين .. اما هي مسألة واضحة مافيها لل ذنب لا إثم وبغيتي تصبري صبري مابغيتيش طلقي عااادي كلشي حلال ومايضيعك ما ضيعيه .. حنا العيالات ماكنتقبلوهاش وعمرنا نتقبلوها ابدا .. اما الى جينا نهضرو بلا شكليات و لا عواطف. فراه التعدد عادي وحللو الله
قالت ليا نتي تقبلي تجي عليك ضرة
قلت ليها منقبلش .. وهضرت معاه قلت ليك مكنتقبلوهاش ولاكن الى محينا العواطف وجينا نهضرو فالمعقول فراه حق مشروع
قالت ليا يكون مشروع ولا ماشي مشروع انا منقبلش بشي واحد مزوج ابدا واخا يكون السلطان سليمان
قلت ليها شتي كن جا شي واحد اللي نيييييت همة وشان ميزك على مرتو ودار ليك كي الماء لقليل عاد اجي نشوفو احساسك ديك الساعة .. خصوصا فاش يسميوك مرت فلان ..
قالت ليا لالا كاع ماكيهمني. كااع نكون مرت فلان
قلت ليها ايوا نتي تعرفي نو يسلكك انا كنهضر وعارفة علاش كنهضر وسكت خليتها كتهضر حتى عيات وسلولاتني منين خديت بيجامتي قلت ليها من واحد الموقع وعطيتو ليها وبدينا كنهضرو قالت ليا انا مكنشريش. كيسيفطو ليا خواتاتي من برا حوايج برا اما حوايج ليسيت و حوايج المغرب حالتهم منلبسهمش واخا يعطيوهم ليا فابور
ابيتسمت قلت ليها مزيان وبقيت ساكتة كنشوف بيجامتها عاادية جدا ماعرفتش شنو كتبغي تقصد بهضرتها .. كتركز على شي حوايج انا نسيتهم ومابقيتش كنعطيهم اهمية كااع من نهار خدمت .. لحوايج والذهب والروايح وتخربيق. كامل مابقاش كيبان ليا شي حاجة واو ! لاكن هادشي مكيعنيش انني كنلبس اللي كان وهاملة راسي .. وشنو عندي من غير راسي. وعلامن غنخسر فلوسي!! كانت عندي فكرة غالطة فالاول كنت كنبغي نبقا غير نقتاصد ونجمع لاكن من بعد تبدلات الفكرة وليت باغا غير شي دويرة متيسعة وكبيرة ونفرغ فيها الفن ديالي ونتولها وصافي .. ماعندي علاش ندكس فالبنك ونحرم راسي من الللباس والكماليات. ونهار نموت نخليهم مورايا .. ماعرفت راسي واش غنلحق نجمعهم كلهم ولا نزيد ونخلي كولشي. .. اللهم نتبرع والخدمة هانا خدامة احسن خدمة ماطامعاش فشي خدمة اخرا ولا حريق الراس وكافيني البيرو ديالي ومع الوقت غنبقا نترقا حتى نتقاعد ويبقا ليا تقاعدي. .. نخسر على راسي ونركب فالطموبيلات المخيرين وناكل اللي تشهيت ونسيفط لواليديا ونتهلا فبنتي ونقريها فأحسن المدارس ونوجدها حتى هي بديبلوماتها باش تخدم خدمة راقية ونصدق على الناس داكشي علاش قديت واخا بغيت نعيل شي عاىلة وندير الخير لاكن ماعرفتش وعمرني صادفت شي حد اللي نيت محتاج وكنشوف غير الاستغلال وكنزكي غلى المدخول ديالي بالنيةو البركة اللي كنعطي فاش كنكون سايقة وصافي
صونا ليا عمار ونضت بعدت جلست كنهضر انا وياه قالي نشوفك قلت ليه انا فكازا جيت عند ختي
قالي علاش ماقلتي ليا والو
قلت ليه علاش غنقولها ليك راني هضرت معاك فهادشي قلت ليك هاد النوع دالعلاقات اللي كيجيبو هاد الاسىلة مامشتاعداش ليهم
قالي وها انا بغيت غا نشوفك ليوم حساب ليا نتي فالرباط
قلت ليه توحشت ختي وجيت نشوفها حتى نرجع ونتشاوفو ..
سكت ماخليت ليه مايقول وبقينا كنهضرو عادي بان ليا السيد. معقول كيسول فيا وعاطيني وقت وانا ماعرفت مالي عزيز عليا القميع والبخ والتجرجير .. كنبغي نفهم راسي كنحصل! فالتجرير والقميع كنشعى وراء الاهتمام. وفالاهتمام و كنسعا ورا التجرجير
دورت ديك الليلة مع ختي وكان راجلها خدام وصبح الحال خرجنا كلنا قلت ليهم يالاه نخرجو لبرا نتغدار فشي بلاصة وطلعو معايا فالطموبيل مشينا جلسنا تغدينا وكانت حتى لوستها معانا .. فالاول مابغاتش تخرج قالت لينا نبقا فالدار مافيا اللي يخرج .. جاتني حشومة وبقينا عليها يالاه عاد خرجات معانا . من مور لغدا جلسنا فقهوى كنتجمعو وسولتها فاش خدامة. قالت ليا كانت شاف فشي وزين رلا ماعرفت شركة دالخياطة ودارت فاييط وجلسات وتابعين دابا الشركة فالمحاكم على التعويض شي سبع سنين دابا ومزال ماخرج ليهم حتى ريال .. وقالت ليا انا اصلا ماواقفاش على فلوسهم عندي خواتاتي كيسيفطو ليا من برا وخوتي اما ديك جوج دريال ديالهم ما عندي مندير بيها
قلت ليها الله يدير ليكم اللي فيها الخير ولاكن تابعي حقك الى عطاوه ليكم علاش لا
دارت ليا حركة بيدها بمعنى يزيدوه فراسهم
سكت بقيت كنشوف فجهة اخرى وقالت ليا انا بغيت دابا غير شي خدمة ندوز فيها الوقت وصافي حسن من الجلاس فالدار
قلت ليها ايوا هنااا دابا فين كينفع داك فلان وفرتلان اللي هضرنا عليهم لبارح .. الدنيا راه غادية بواحد القوانين فشكل الى بغيتي تنجحي فيها سيري مع قوانينها ماشي مع قوانينك نتي وشنو باغا نتي
قالت ليا لااالا الى ماجاتش بلاش اصلا باغا غير نتلف شوية
بقيت ساكتة كنشوف قلت ليها فخاطري واش الخدمة كيتلفو بيها الناس الوقت ! الخدمة راه ساس وسترة للمرأة خصوصا الى كانت وضيفة .. فاش تشرف تلقا ماتاكل وفين تنعس اما العاىلة شحال قدهم يصرفو عليك ؟. ونهار يشرفو ينساوك بالزهيمر اما الدولة عمر الزهايمر يدور بيها ! قالك مامحتاجاش للخدمة وباغا ندوز الوقت ! الوقت دايز بغيتي ولا كرهتي
قلت ليها واش عندك شي ديبلومات قالت ليا انا عندي الباك اداب
قلت ليها شنو درتي مور الباك
قالت ليا نيشان خدمت فالشركة
قلت ليها وعلاش مادفعتيش فشي خدمة ولا درتي التمريض حتى هوا مزيان
حركات ليا راسها مابغاتش وهزات كتفها . بانت ليا ماعندها خاطر واخا بغيت ندير معاها مزيان ننصحها فشي توجه لاكن مابقا عندها خاطر وجاتني مابغات لا تخدم لا تردم وكتسنى الزواج حيت وحدة من زوج .. اللي جالس مربع يديه راه كيتسنى يتزوج واللي مكيتسنا بو زواج راه كيقلب غلى مشغلة لراسو
دوزت معاهم ديك العشية ورديتهم للدار وتوادعت معاهم مشيت بحالي نوجد راسي. . وصلت للدار بديت نجهز للخدمة .. عيطت على واحد السيدة جابوها ليا غير المعارف كتجمع ليا وتعاوني فالدار قلت ليها دوري بالدار تصبح الصباح نقية مابغيتش نصبح عليها مرونة وفيها ريحة خايبة وخليتها كتجمع ومشيت خرجت ليفيست ديالي اللي كنلبس حطيتهم وحدة على وحدة فالالوان وسراولي وديتهم للمصبنة كنوصي عليهم ونعاود لا يتحبب ليا توبهم ورجعت بحالي ضربتها بتدويشة مع راسي وخليت حتى لديك الثمينة عاد خرجت دزت عليهم هزيتهم ودزت للصالون قاديت حالتي وصاوبت دفاري وصبغتهم مع كانت فيا العادة تشهيت نصبغهم حيت مكنصبغش مع الصلاة . خرجت بحالي دزت على كينتاكي هزيت سطل ديال الدجاج وسلاد وموناضة وجيت بحالي تعشيت انا والسيدة وكانت غتبات معايا ومشيت لبيتي علقت حوايج الخدمة باش نصبح عليهم واجدين بلا منتلف مع السبعة دالنعاس ،. حطيت اي حاجة غنلبسها قدامي كما مولفة حيت عارفة راسي كنوض تالفة مكنعلقش على سميتي حتى كنشوف البوليس. ديال باب الادارة . حطيت البادج ديالي وصباطي وسروالي وفيتست رمادية والشال والريحة وليزاكسيسوار والصاك حتى هوا ومشيت لفراشي حطيت واحد البانضة على عيني وطلقت الراديو حيت بلا بيه وبلا صوتو هوا ولا تلفازة منعسش .
فقت الصباح لقيت فوزية وجدات ليا الفطور .. لاكن مابغيتش .. مامولفاش نفطر مع الثمينة وولفت نفطر فالخدمة ورجع عندي واحد الروتين كيتكرر يوميا منقدرش نبدلو ولا نمشي عكسه ، لبست حوايجي ونزلت طلعت فطموبيلتي مشيت للخدمة . طق طق طق طق. اصوات الصبابط مع واحد الرخام رمادي دايرينو فالارض كيسمع حتى صبابط الرجال . كولشي داخل زربان وانا وحدة منهم صادفت الشاوش فالدروج لقيتو هاز قهوة فيدو قلت ليه ارا ليا ديك القهوة قالي راه ديال السي لحجوجي هوا اللي طلبها
قلت ليه اراها ودير ليه وحدة اخرى دابا سبقت انا
ديتها معايا للبيرو وحطيت صاكي وجلست حليت بيها عيني على دوك المستندات اللي عندنا .. كان خاصني ندوز واحد المكالمة مهمة وعيطت لسطوندار دوزوها ليا حيت مننوع دوز مني للشخص وكاع المكالمات المهمة كدوز على سطوندار هوا كيدوز شي لشي وتلقيت اوامر اخرى نزلات عليا بحال الرعد ومشيت كنتأكد لقيت راسي غنخرج فميسيو لموريطانيا !! اويلي على موريطانيا مالقاو فين يسيفطوني غير لبلاد لهيناهاوا ! دوزت داك الكاس دقطران بزز ومشات ليا الشهية دالفطور كاع و بقيت غير كنخمم لهاد التسافيرة حتى جاني اتصال من عند مسيو عيسى نلتاحق بالبيرو عندو
ايوا نوضي التاحقي هيا اسرعي .. مشيت على وجه السرعة دقيت ودخلت لقيتو جالس لابس قميجة رمادية وكرافاطة بلو مارين حيت ممنوع على الموضفين الدخول بلاكرافاطة .. كان داير يدو على فمو جالس وكيشوف فالاوراق قدامو . ماشافش فيا وسولني مباشرة على الخدمة وعلى دوك الاوراق اللي متعلقين بيها وقربت وقفت قدامو كنشوف معاه بحال العادة .. بقينا كنهضرو فنطاق العمل حتى قالي غتمشي فميسو لموريطانيا
تقاديت فالوقفة وقلت ليه واش غنمشي بوحدي؟
قالي لا غيمشيو معاك شي وحدين وراه عندنا ما عندنا ودوم العلاقات ديالنا المشبكة وبقا كيهضر وانا كنتسنا بشحال غيضربوني فهاد موريطانيا
قلت ليه شحال غنجلس قالي شهر
تنفست ورتاحيت حيت ماشي عام ولا ربع سنين .. كنت غنسخف وقالي مزال قدامك واحد الشهراين عاد غتمشي
حركت راسي وقلت ليه ان شاء الله .. قلت مع راسي. دابا وهوا سولني على بنتي لاكن ماسولش ومكانش كيشوف فيا اصلا حتى بديت كنشك واش انا كنت مرت هادا نييت شي نهار !!! اوييلي راه لعجب هادا السيد تقول مكنعرفوش كااع ولا عمرو عرفني ! اما واحد الريحة دايراها كتعطعط قلت دابا وهوا قالي اش قوة الروايح ولا يقول شي كلمة يعلق عليها ساعا موحال كاع واش عندو حتى حاسة الشم
مكانتش عاد السفرة كاع على بالي ولا على كانتي وبزز مني وجدت ليها وعلمت بابا قلتها ليه وحتى عمار قلت ليها راه غنمشي لموريطانيا ..وقالي اش هاد الزهر حتى جيت انا عاد جات موريطانيا ! قلت فخاطري ماعرفتش واش نتا اللي منحوس. ولا انا اللي طليتك بنحسي .. بقا كيبحث فيا باغي يعرف شنو خدامة بالضبط لاكن خبيت عليه ماقلت ليه الحقيقة وقلت ليه حتى هوا كما قلت لبابا خدامة فوزارة الداخلية .. ماعارفش الداخلية دبصح اللي خدامة فيها حيت ماعندوش علاش يعرف اصلا وحتى حياتي حاليا مراقبة وجميع خطواتي وحتى معارفي رجعت كنضرب ليهم حساب .. معامن نمشي ومعامن نترافق ،. كاع اللي مطولين اللحية اكثر من لقياس مكندورش بيهم ولا اللي دايرين النقاب مع احترامي ليهم لاكن حياتي ومستقبلي اهم من شي واحد اخر وماعندي مندير بالمشاكل فحياتي . شديت واحد الاسبوع كامل قبل مانسافر ومشيت للناضور باش ندوزو نع بنتي وجلست معاها نشبع منها حيت نغنشوفهاش شهر وواعدتها فاش نجي نديها معايا تعيش معايا الى الابد . قبل الويكاند اللي غيجي فيه عيسى عندها مشيت انا بحالي نستاعد للطيارة اللي غنمشي فيها .
لبست حوايجي ووجدت المساىل والحوايج ديالي .. حات عندي كاط كاط قدها قداش وصلاتني للمطار ودخل لقيت شي جوج رجال غادين معايا كانو سيفيل وكانو فالمطار شرطة من عندنا حتى هما سيفيل مامعروفينيش دوزونا بوحدنا وخداو باسبوراتنا طبعوها راسهم ومشينا حتى لتاحقو بينا فاش بغينا ندوزو على الممر ديال الطائرة عطاونا الجوازات ديالنا والاوراق. بلا منكلفو ريوسنا ولا نتسناو شي دقيقة . وقبل كاع هادشي كامل خضعت لواحد الفحص طبي ودرت تحاليل وحقنة ضد الفايروسات اللي ممكن نصادف على برا و عاد مشيت .
وصلنا على سلامتنا ودزنا تما كيأيها الناس مامعروفينش شكون حنا وشنو جينا نديرو وخرجنا كل واحد فين مشا . مشيت انا فسيارة خاصة لقيتها كتسناني لواحد البرطمة كبيرة فالعاصمة وحطيت رحيلي نكتاشف هاد البلاد ونرتاح ..وماقدرتش نرتاح فيها حسيت بيها مزموتة وجوها بحال جو مصر ومملة ولاكن رخيصة بزااف بلاصة كيلو دبطاطة بعشرة دراهم خديت ربعة كيلو ! لقيت عندهم الرخا وبديت كنحاول نتعايش ونتأقلم حتى يدوز هاد الشهر الكئيب اللي ماحملت فيه لا خدمة لا هاد لبلاد وبدا كيبان المغرب بحال الجنة .. من النهار الاول بديت كنبكي وحسيت بالقنط وبغيت نتفركع ورجعت كنجاوب عمار فكل مرة تاصل بيا وكنشكي عليه ونبكي عليه وديما مور الخدمة كنعيط ليه انا نهضر معاه وكان كيفوج عليا شوية ..
فاجأني واحد النهار حتى قالي انا فموريطانيا !! تصدمت بقيت كنسول شنو جا يدير قالي جيت نونسك ! صدمني وجا كرا شقة فنفس الشارع ورجعت كل نهار كنتلاقاه من مور ما كنسالي المهمة اللي جيت عليها وكنخرجو نتساراو وندورو ونبدلو الجو .. كانت حتى هوا اول مرة يزور هاد البلاد و يتعرف عليها وجات الفرصة نتعرفو عليها بجوج نيت وبقينا عاطينها للدوران عاد حسيت براسي ترخفت شوية وخرجت من ديك الخالة النفسية الخبيتة اللي كنت عايشة فيها واللي زاد ريحني هوا انه كان محتارمني وماقلقلش راحتي بمرة وهاد الشهر كان كافي باش يخليني نتقرب منو ونزيد نرتاح ليه اكثر وقلت علاش لا ؟ الى كان ولد الناس وباغيني علاش منعطيش لراسي فرصة ؟ زوين ! خدام مزيان .. قاري وباقي صغير ومحترم فوق هادشي كامل وعاد رمنسي وشبعني هدايا وورد .
وعلى ذكر الهدايا شريت بعض الهدايا للزملاء فالعمل باش نتبت راسي وسط منهم حتى انا كما كولشي كيدير وخديت لواليديا والعاىلة ديالي الصغيرة وشديت الطيارة بلا منقولها لعمار باش ميمشيش معايا فنفس الخط تفاديا لاي مشكل ممكن يوقع ليا مع الخدمة وتحججت ليه بحجة انني غنرجع على غفلة وما كنتش عوالك ومسحت كولشي فالخدمة وخليتو حتى رجع مورايا .
وصلت بالجمعة وكي وصلت ومشيت لدارنا نيشان شفت عاىلتي وبنتي وجلست معاهم وقلت لبابا راني غناخد جنة معايا تعيش معايا
شافت فيه ماما واحد الشوفة وشاف فيها حتى هوا وشافو فيا بجوج !! خلعوني شفت وجههم صفار وبقيت كنشوف قلت ليهم مالكم ؟
قالت لي ماما كيفاش تاخديها !
قلت ليها بعفوية ناخدها تعيش معايا !
بقا بابا ساكت وشفت الدموع فعينين ماما ومافهمت والو قلت ليها ماما مالكي؟!!
قالت ليا والنخصة فحلقها وعلاش غتديها شنو ناقصها معانا؟. .
بقيت ساكتة كنشوف فيهم وجات بنتي كتجري عند بابا عنقاتو ومسح على راسها وعنقها وقالي دابا غادي تديها وتخلينا حنا ؟؟ علاش غتديها هاهي معانا مخييرة كاع ماخاصها حتى خير
قلت ليه راني عارفة ماخاصها حتى خير واش انا عندي الشك فهادشي.. واش عمرني سولت عليها كلات ولا ماكلاتش ! راني عارفة هادشي بطبيعة الحال .. ولاكن نديها معايا باش حتى نتوما ترتاحو شوية ونتحمل مسوؤليتها شوية وتولفني
قالت ليا ماما مولفاك غير خليها ماعندك فين تديها .. انا الى راه غنطيح ليك هنا الى ديتيها ..هادي بنتي وماكنعسش بلا بيها .. غيير خليها
قالي بابا خليها معانا مونسانا .. مزال عليها الحال وماكاينة قراية دابا .. لاكخيش هاهيا مخييرة ندخلها ليها وندخلها لدار لقرآن تحفض القرآن مع مك وكنخرجها كنساريوها كنعلمها الدين ..كنكون كنصلي كتجي تصلي معايا .. الله يحفضها وينجيها معمرة علينا الدار وتجي نتي تديها ونبقاو حنا هنا كنشوفو .. هانتي مرة اجي نتي مرة نجيو حنا .. بغيتي نسافرو كاملين نسافرو ولا تسافري نتي وياها ومك سافرو ورديها خليها مرتاحة .. راه البيت ديالها كتلعب فيه ..حتى تجي القراية ديال الصح ويحن الله
بقيت كنشوف فيهم مالقيت منقول وكنشوف فبنتي حتى هي ..ماكرهتش نديها معايا وحتى انا محتاجة ليها فجنبي ونشوفها كتكبر ونكون قريبة ليها وتتعلق بيا .. ولاكن بقاو فيا واليديا ماعرفت شنو ندير وحرت بين نارين .. بنتي كنشوفها مرتاحة وعاجبها الحال ولاكن كتوحشني وحتى انا بغيتها حدايا.
جريت الوقت شوية قلت حتى نشوف شنو يكون من هنا لقدام ويدير الله اللي فيها الخير .
رجعت بحالي وكنوجد لصباح الخدمة بحال العادة ونفس الروتين .. وجدت حوايجي فواحد العلاقة حدايا علقت فيها فيست حمراء الاحمر ديالها نقي فاتح بصدايف مستفين فلكمام وسروال بلو مارين توب وبوحدي كول في خفيف بلو مارين والشال وصباطي وتقار رقاق كوحل حيت فاش كنحلس كيطلع ليا السروال كيبقاو في فراقشي كيبانو وانا داخلة خارجة عند اللحية وكاع الموضفين لكبار محترمين وحجاج .
صبحت غادية للخدمة وخديت شي كادوات معايا للناس اللي فوق مني واللي كنعرف باش ندير بلاصتي ومامسيتش الرئيس الحجوجي حتى هوا شريت ليه واحد التذكار كحل كي السفرة اللي سارفت باش يتفكر بيها موريطانيا ونواحيها .
جلست فالبيرو ديالي كنراجع روتين العمل ديالي حتى صونا ليا ومشيت خديت داك الكادو ديتو معايا ودخلت لقيت السلام كان جالس داير النضاضر وضارب واحد التخنزيرة .. حطيت ليه داك التذكار قلت ليه هادا واحد الكادو من موريطانيا .
قالي شكرا وشار ليا بيدو جلست وسد الملف وشبك صبعانو وتلفت عندي كيشوف فيها بحال شي صبورة وقالي بواحد الحدة نورتي موريطانيا
بقيت غير كنشوف فيه مافهمت والو بقيت كنبركم بوحدي كنقول مال هادا واش تسطا ولا مالو حتى ضرب بصبعو فالبيرو وقالي بغضب الاااللة راكي غادية فميسيون ماشي فشهر العسل .. واش حساب ليك راسك خدامة مع شركة دالسياحة؟؟؟
قلت ليه ماعرفتش علاش كتهضر اشمن غلط درت
هز صبعانو بجوج وقالي والله كن ماحشمت حتى نضرب ليك الرابور ديالك ونوريك الغلط فين كااين .. ولاكن فوجه شي كيدوز وراك دزتي دابا وعارفة علاش كنهضر .. بلحق تعاودي تمشي فميسون لشي قرينة وتدي معاك صحابك عاد غنوريك الغلط فين كاين وتعرفيه مزيااان .. واقيلا مزاااال معارفة فين حطيتي رجلك وحساب ليك هادي كلية دالاقاصاد .. ودابا هزي عليا هاد الملف ديالك وسيري عليا للبيرو ديالك ولا ميعجبم حال هاد الصباح …
وقفت ووجلي كيمشيو ويجيو هزيت الملف بالزربة وتلفت مشيت مهبطة راسي خرجت بالزربة وقبل مانغبر قالي حرقي داك الملف ولا كوليه مانشوفوش كيدور هنا
ضرت عندو حركت ليه راسي وخرجت مشيت كنبكي رجعت للبيرو وسديت عليا وجلست بكي بكي بكي حتى مابقيت كنقشع والو وحليت الملف نشوف ديالاش لقيت واحد الملخص عليا بالسمية والكنية وفين كنت ومنين جيت وشنو درت ومعامن وكااع تلخيص المهمة اللي كنت فيها كلها فورقة وحدة وفيها حتى شكون تبعني معامن كنت كنعمر وقتي وتحت هادشي كله واحد الكاشي بالازرق مطبوع . عرفت راسي شنو درت والغلط فين كاين وراجعت راسي لقيت راسي خاطئة حيت اي واحد مشا فمهمة كيمشيو معاه الحضاية وشي حاضي شي وشي كيكتب بشي والمكلف بالمهمة كيتعطا عليه ملخص كيفاش اداها .. ارتكبت خطأ لا يغتفر ولحسن حضي خرجات هنا واخا غادي نمرض فالخدمة دابا والحو غيتكهرب كيفاش غنتصرف وشنو غندير وكيفاش غنبرر هادشي .. واش. نكتب ليه شي تفسير ولا تصريح ولا شي حاجة ولا شنو ندير ؟ ميمكنش نبقا هاكا بلا مندافع على راسي .
شديت واحد الورقة كتبت ليه فيها تفسير وشرح مبسط فأسطر قليلة ودرتها وسط الملف وشديت لاخر قطعتو طروفة ولحتو ونضت للخدمة ديالي ننسي بيها الوقت حتى تجي فرصة ونعطي ليه التفسير ديال داكشي اللي تكتب عليا .
ماجاتش فرصة داك النهار ولغد ليه ماكانش حتى دازت شي ثلت ايام وكنت خدامة وكان داك النهار الجمعة وهوا مولف كيصلي فالجامع ديال الادارة مع المصلين وكيمشي بحالو مباشرة . نزلت انا للغدا وقلت غادي نصادفو حدا الجامع ونعطيه ليه لاكن نزلت ومالقيتوش لقيتو رجع للبيرو وقلت مزيان نمشي للبيرو وطلعت بالزربة كتعكل دقيت فالباب ودخلت لقيتو مزال جالس مشغول ومشيت حطيت ليه الملف. . قالي ديالاش هادا؟. قلت ليه خدمة فلان فلانية باش ينتابه ليه وخرجت خليتو باغي يعرف شنو فيه وهزو فيدو
سلمت ليه الشرح وجلست كنفكر شنو ندير دابا؟؟؟. مارضييتش يوقع ليا هادشي وحتى اللي خدامين معايا منبغيهمش يعرفو شنو وقع وانا اصلا مامزوجاش وغتمشي الصمعة ديالي واحترام الزملاء ليا وهادشي منرضاهش ليا واخا نموت .. بقات كطلع فثا وتهبط تمنيت تشق الارض وتبلعني ولا يعرفني مسيو عيسى كنت كنتلاقا واحد مابيني وبينو والو وخارجين داخلين بلا شرع بلا قانون وغيمشي بالو بعيد بزاف ومع انا مرى مطلقة وهازة التهمة بلا والو ما بالك هادشي اللي تحطيت فيه غادي يديرو فيا يديهم ورجليهم .. ماكرهتش نقتل النفس لي فيا ولا نفقد الذاكرة باش. منبقاش نفكر فهادشي .. المشكل رجعت كنشوف فالموضفين بحرج كنقول كوراه عارفين وساكتين عاطييني وجه . فسبيل دم وجهي ونفسي الحارة قلت والله مايدرر الشهر حتى ندير العز لراسي باش مايقولوش عليا فاسدة وكدير وتفعل واولهم عيسى .. يقول مابقا ليها ماتخسر ومشات لموريتانيا مع واحد غريب. اشنو اللي يمنعها ماطيحش معاه وتفوق معاه التوقعات .
خرجت ديك العشية تلاقيت بعمر قلت ليه الى كنتي مزال ناوي المعقول كما كتقول هاك عنوان بابا وسير خطبني من عندو .. انا موافقة خاصو هوا يقتانع بيك
تفاجأ وفنفس الوقت عجبو الحال وشد العنوان مشا وتكلفت انا بالباقي القانوني بخصوص الزواج . دفعت طلب الزواج فالخدمة نت بعد اسبوع من الكارثة وسبقتو باش يالاه يخرج ليا ونقدر نتزوج ومزال ست اشهر عاد يخرج القبول وقدامي ست اشهر كلها ديال البحث على عمر وعاىلتو من طرف الخدمة ويشوفو واش ماعندو حتى سوابق ولا مشاكل قانونية ولا شي علاقات غير قانونية عاد يوقعو ليا عليه . تنشر خبر الطلب ديالي فالخدمة خصوصا وانا متابعاه كنتسنا الرد ومتابعة اخباره .
ضار الشهر وجاو واليديا للدار وبنتي يدوزو معايا واحد الاسبوع ومنها نتناقشو على الموضوع ديالي ونشبع من بنتي شوية .
كنا جالسين كنهضرو على الزواج وقالي بابا واش متأكدة من عاد السيد ؟
قلت ليه شنو بان ليك فيه ؟. مانعرفش انا احسن منك
قالي انا ماغنهضر دابا مانطق .. واش اللي بحالك عاد محتاجة النصائح ؟ راك نتي تنصحينا دابا
قلت ليه واش كايبان ولد الناس
قالي كاع الرجال نهار كيبانو ولاد الناس .. المعقول كيبان موور الزواج ماشي من النهار الاول .. بغيتي تزوجي الله يسخر هادشي اللي غنقول ليك
وكلت امري لله وزدت فهاد الخطوة حتى نشوف فين غادي توصل ، اما عمار ماقداتو فرحة و فكل مرة كنقول نتراجع كيبقا فيا وكنقول علاش نتفلا على ولد الناس حتى عطيتو امل ونرجع نقوليه لا !!
المهم علمتو بعدا قلت ليه راه الزواج غيتطلب وقت حيت على حسب خدمتي فالداخيلية كيديرو واحد البحث .. صغر فيا عينيه وقالي امم .. وبقا كيضحك حسيت بيه عاق بيا فاش خدامة وقالي كاع البحث الى طول مايفوتش عام
قلت ليه لالا غير شي ست هور
قالي مزيانة المهم انا هضرت مع الواليد ديالك ومزيان بعدا تعرفو الواليدين على بعضياتهم خاصنا نديرو خطبة . قلت ليه ان شاء الله ولاكن احسن نخليوه حتى تخرج ليا الموافقة هاكا نكون مرتاحة .. مابغيت حتى واحد يعرف حسن العينين عليا وراك عارف الاسىلة ديال العاىلة .. تخرج الموافقة ونديرو عقد وكولشي فمرة. المهم بابا راك طلبتيني منو
قالي ماقلتي عيب ولاكن الواليدة بغات تشوفك وتتعرف عليك ، قلت ليه ماشي مشكل دير شي وقيتة ونتلاقاها
قالي غتبغي تعرض عليك للدار قلت ليه منقدرش نمشي عندها دابا للدار حتى تكون شي حاجة رسمية .. هاكا احسن نبقا مرتاحة .. بغات تهضر معايا فايليفون ولا نتلاقاو برا ماشي مشكل
قالي واخا اللي بان ليك المهم نتوما راه كتفهمو بعضياتكم .
تافقنا وقررنا نعيشو فالمغرب وقالي راني بديت كنقلب على شي سكنة هنا تكون زوينة ولا بانو ليك شي ديور مناسبين قوليها ليا
قلت ليه ان شاء الله وحتى انا راه كانت عندي داري فالناضور وبعتها ودابا كنقلب على دار هنا وماعرفتش ..
قالي علاش غتشري دار انا غنشريها نتي خلي فلوسك فالبنك استثمري بيهم فشي حاجة
قلت ليه لا منقدرش انا عندي الدار شي حاجة مهمة بزاف
قالي وانتي تعرفي المهم حتى الى بانت ليك شي وحدة وعجباتك قوليها لي ولا نديرو شي وقيتة ونقلبو انا وياك
المهم تافقنا وبديت كنسول على الديور فالخدمة والامور غادية مزيان والحمد لله كولشي تيسر .. لقيت عمارات جداد كبار موديغن وفيهم البالكون وانا كيعجبني البالكون يكون كبير ولاكاف لتحت والاسلنصور والحي نقي وزوين وعلمتو قلتها ليه قلت ليه راني لقيت وتلاقينا انا وياه وكانت معاه مو .. امرة متوسطة الطول وكدير الحجاب وغليضة وحجبانها رقاق وباينة كتبغي تهلا فراسها .. سلمت عليها وعرفها عليا وبقات كتشكر فيا وتردد تبارك الله تبارك الله فرصة سعيدة هادي واللع يكمل عليكم بلخير نفرحو بيكم. وسلاتني على بنتي واخبارها قلت ليها الحمد لله راها مع ماما وقالت ليا الله يخليها ليك ابنتي وتشوفيها كما تمنيتي .
ابتسمت ومشينا نشوفو الدار .. طلعنا كنشوفو الدار النمودجية مفرشك ومقادة ودخلت كنقلب ونشوف عجباتني بزاف قلت ليه عادي زوينة ومريحة انا حسيت بالراحة
شفتو متردد ماعجباتوش وقالي نتفادار العمارات احسن .. كاينين دي بتي فيلا زوينين بانو ليا وعجبوني
قالت ليه ماماه الصراحة العمارة كتبقا عمارة واخا تكون الدار مانعرف كي دايرة. بتي فيلا بالحريدة اخسن ليكم
قلت ليه ماشي مشكل ولاكن انا بعدا عجباتني هادي. وحتى البلاصة عجباتني بزاف وبحال هادي كانت عندي فالناضور .. الى لقيت شي وحدة مزال كطل على الجردة والشارع نشري انا هنا
قالي نتي تعرفي المهم انا غنديك تشوفي الفيلات
قلت ليه ماشي مشكل انا بعدا صافي اقتانعت
قالت ليه ماماه خليها على خاطرها الى لقات راحتها هنا خليها
قاليها انا خليتها ماعنديش مشكل .. الى بغات حتى انا نشري هنا ونسكنو هنا ماعندي حتى مشكل
بقيت كنضحك قلت ليه نشوفو الفيلات ويكون خير .
خرجنا من تما وهز عينو فالعمارة قالي فالحقيقة تصلاح ليك اسارة الى كنتي باغا تشري الدار تصلاح ليك هنا وتكريها مفرشة
قلت ليه داكشي اللي قلت حتى انا
قالت لي ماماه انا بعدا عجباتني الى كنتي باغاها ماضيعيهاش
بقيت كنضحك ومشيت لمكتب البيع خليتو هوا يهضر وسول على الطبقة اللي بغيت لقيت بقات وحدة وزربت عليها بالخف مع النوتير وحطيت شيك تسبيق وجمعت وطويت وفطريقنا للفيلات قلتها لبابا قلت ليه دفعت فدار وقالي مزيان احسن باش مايمشيش فالخوا الخاوي وتافق معايا وطول الطريق كنجمع معاه وانا حدا عمار ومو اللور حلفات ماتجلس حداه وجلساتني انا . وصلنا للفيلات لقينا تجزئة ديالهم خاصة بيهم وكلهم كيتشابهو وزوينين وعصريين .. دخلنا كنشوفو لقيت علام ااخر والفيلا عاوتاني حاجة اخرى فين تبان برطمة .. عيني برقو وهوا عجباتو قالي وادابا ااه .. دابا كنحس براسي باغي نشري
قالت ليه ماماه تبااارك الله فننة .. هادي هي الفيلا والا فلا
قالي واش عجباتك
قلت ليه معلوم واش هادي يقولو عليها لا
بقينا كنضحكو وخرجنا لمكتب البيع دوزتا فيه ساعة كلها هضرة ونقاش حول البني الجديد والفيلا وقرر عمار يرجع لغد ليه يوتق الامور ديالو مع النوتير ويتكاتب ومشينا درنا قهيوة مجموعين وبقيت كنتجمع مع مو حسيت بيها اجتماعية ومتافقة على اي حاجة وفيها الضحك ولاكن واخا هاكاك ماقدرتش نرتاح ليها وشي حاجة كتخليني ننفر منها
قلت اعوذ بالله من الشيطان الرجيم وخزيت الشيطان ودوزت معاها العشية وبقينا على اتصال كتسول فيا وكنسول فيها والايام غادية .. سولت عمار من بعد على الفيلا قالي راه فيهم شي مشكل فالبيع ومابغاش يزعم وقالي غنصبر شوية حتى نشوف شنو كاين .. فاش بديت كنستفسر اكثر قالي باللي مابقاوش ليهم اصلا وديك الفيلا اللي شفنا مبيوعة وقالو ليه تسنا الشطر الثاني من هنا لعام الجاي عاد يسلموهم وقالي باللي غيشري فالشطر الثاني ويختار الاتجاه اللي بغا قبل نايبدا البيع وتلاقينا مرة اخرى مشينا كنشوفو الشطر الثاني في طور البناء. واختارينا وحدة مشمشة مزيان ورجعنا بحالنا خليتو غيدفع فيها قبل ماضيع . تشغلنا فأمور الدار. الفيلا وهاد الاشغال ووكل اسبوع كنمشي نشوف بنتي وسط السيمانة حيت الويكاند كيشمي ليها باها ومكيبقاش ليا انا الوقت كاع نشوفها ورجعت كنمشي فاليوماين اللي كنجلس فيها وسط الاسبوع أحيانا كنشد الويكاند كنخدم فيه حيت خدمتنا حنا مكتساليشً ربعة وعشرين ساعة غلى ربعة وعشرين ساعة .. بقيت هاكاك ومشغولة بين الخدمة والسفر والدار الجديدة اللي شريت وهزيت ليها رحيلي خرجت من ديور الكرا وتنفست ورتاحيت وقلت مانبدلش الفراش حيت اصلا مغنطولش فيها وفراشي باقي جديد وزوين بلا منبدر الفلوس ونرحل ونخليها للكرا .
دازت ديك الست اشهر كطير وعمار كل شوية يسولني فين وصلتي فالبحث واش باقي ماردوش حتى لواحد الصباح صبحت فالخدمة جالسة كنأدي العمل ديالي والواجب ديالي وصونا ليا مسيو عيسى ومشيت دقيت ودخلت لقيتو كيشوف فالحاسوب .. رميت السلام وردو عليا وقالي جلسي وجلست كنتسنا شي ملف ولا شي خدمة ولا شي حاجة . تلفت عندي وهوا كيقلب بعينيه لتحت ولفوق على شي حاجة وقالي بنتك غتجيبيها عندك ؟
قلت ليه لا مانقدرش صافي غتبقا مع ماما وبابا
لقا الورقة علاش كان كيقلب ومدها ليا قالي مزيان .. الله يكمل بلخير
شديت الورقة فيدي شفتها لقيت الموافقة ديال الخدمة على زواجي وحتى توقيع مسيو عيسى كاين لتحت وهزيت عيني شفت فيه وحسيت بواحد الاحساس غريب ..ماعرفتش علاش حسيت بيه .. ماقدرتش نفرح بديك الموافقة واخا مابقيتش كنكن ليه شي مشاعر لاكن توقيعه وطريقته فالهضرة جرحاتني .. مابغيتش نحس براسي نكرة ولا نزوة ولا منامة .. واخا مانكونش كنحملو لاكن ماشي ندوز بحال ايها الناس .. حيت انا ماشي بحال الموضفين اللي خدامين هنا .. وبعيدا على العمل هاد القرار وهاد الموافقة راه متعلقة بالعمل وحتى بحياتي الشخصية .. كيفاش قدر يعطيها ليها بهاد البرودة دم كانه كيعطيها لأي وحدة ولا أي واحد .. حسيت بنزيف فصدري وخذلان وألم ختارق اعماق قلبي واخا ماكنتش طامعة فشي حاجة وكنت باغا المرافقك تخرج لاكن ماحسابش ليا تأثيرها غادي يكون قوي لهاد الدرجة عليا ، ومع ذلك ابتسمت وقلت ليه شكرا وخرجت من البيرو هازة ديك الورقة فيدي وضاحكة حتى للمكتب ديالي وهبطو عليا الدموع بحال الرشاشة .. كنبكي وماعارفاش علاش .. شي حاجة ضاراني وماعرفتش شنو هي وماقدرتش نشخصها . تزير عليا راسي بالبكا وبقيت حتى بردت ورتاحيت عاد نتابها للموافقة ديالي على عمار وقريتها ولقيت الاسم والنسب ديالو واسم والديه حتى هما وارتاحيت حيت ماعندو حتى مشاكل قانونية وكن كان عندهم شوية دالشك مايوقعش ليا عليها فلان وفلان وفرتلان ودوز على شحال من مدير وشحال من شاف و رئيس عاد تخرج ليا
عيطت لعمار من الخدمة علمتو قلت ليه راه خرجات الموافقة وطار من بلاصتو بالفرحة قالي دابا صافي ماعندنا مانتسناو و خاصك تشدي كونجي نديرو فيه العقد ونتزوجو .. راني مزال عاقل على هضرتك
قلت ليه اه كون هاني وقطعت معاه وبداك الحر اللي حسيت بيه من جيهة الموافقة قلت والله مانبكي .. غانعيش حياتي ونعاود من الاول ونشد فاللي شاد فيا .. عمار راجل زوين الف وحدة تتمناه .. كيقطر بالزين وقديرقدو وضحوكي ومعاه غادي نعيش ونبدا من الاول وكنتفاهمو وهاز ليا هبالي ماشي معقد . عيطت لبابا قلتها ليه وقالي ايوا الحمد لله مللي خرجات الموافقة بعدا راه بان شنو كاين والسيد ماعندو مشاكل ماهارب ما عندو سوابق
قلت ليه داكشي علاش كيتعطلو مايعطيونا الموافقة فالخدمة حتى يتأكدو واش ماعندو يد فحتى حاجة والضوسي ديالو نقي .
بقيت كنهضر مع بابا ودوز ليا بنتي هضرت معاها وقطعت رجعت للكم الهاىل. من الاشغال اللي عندي والتوجاد وتابعني شحال من حاجة خاصني نقضيها واولها اوراق الزواج .. بديت بيهم هما الاولين دفعتهم مع الموافقة ديالي اللي عطاوني و بدا حتى هوا كيوجد اوراقه وقلتها لبابا قلت ليه مابغيت لا صدع لا هراج لا خطبة لا عراضات .. صافي براكة نديرو العقد ومن موراه نديرو شي صدقة وصافي الله يجعل البركة وحتى هوا قالي احسن وبقا كيدعي معايا يسخر ليا ربي. وندير عقلي واخا راني دايرة عقلي وغادية مع الحيط الحيط .
وسط داك التوجاد والروينة ديالو اللي كنعيش جا بابا وماما عندي للدار باش ندير العقد وعرض على عمار وعاىلته قبل العقد باش نزيدو نتقاربو اكثر ونتافقو وجاو عندي لداري الجديدة .. كومونديت ليهم كولشي من تريتور ودرت ليهم عراضة وهزاتها فوزية السيدة اللي كتعاوني فالدار وجلست بحال الضيفة مع امو اللي جات فرحانة وجابت ليا تفصيلة وشربيل وشال واخا كنت عوالة على شي حاجة ديال الذهب زعما .. فاللخر قلت ماشي ضاروري المهم يكونو مزيانين ومعقوليين .. جلس بابا كيهضر مع باه ويتجمعو فالدين وباه من النوع اللي فيه الهضرة بزاف والتقشاب وانا بابا عندو غير نيشان وماعندوش مع المزاح ماقدرتش كاع يتفاهم مع باه .. اما. مو قالت ليا وريني الدار ونوضتها كنوريها الدار والفراش وهوا كيدور معانا قالي فاش تفرشات عاد بانت
قلت ليه على حسب الدوق وصافي وبقيت كنضحك .. ضحك وقالي نتي دواقة داكشي علاش
رجعنا جلسنا وكملنا العشا ديالنا ومشاو بحالهم وبقينا غير حنا انا بنتي مسيكنة طاحت فسابع نومة شافتهم غير فاش دخلو وسلمات عليهم وجلسات شوية ونعسات .
بدينا المشاورات والتخقيقات العائلية بحال كل عاىلة وقلت لبابا اشنو بان ليك
قالي وابنتي انا منقدر نقول ليك اه ولا لا دابا.. نتي الى كنتي باغا هاد السيد الله يسخر ليك .. مابغيتيش غاديري الخير فراسك
قلت ليه كيفاش ندير لخير فراسي؟
قالي ماشي غدا ولا بعد غدا تقولي بناقص ويبداو يبانو ليك العيوب .. الزواج راه هوا هادا .. شي زوين شي خايب .. الى فيك ما يصبر ضبري راسك ماتجيش تقولي ليا نتا ولا ماشي نتي
بقيت ساكتة كنخمم وتفكرت ياماتي فاش كنت مزال كنقرا واول مرة يبغي بابا يزوجني وشحال كنت كنحشم حتى نهز فيه الراس .. ودابا رجعنا كنديرو اجتماع كااع !! يااه الوقت شحال كتبدل بنادم وتبدل الاوضاع .
يتبع
التعليقات 0