هلكني الوسواس والشيطان قتلني ماعرفتش مناش خايفة واش حيت غنبدل راجل بلا راجل ولا شنو .. نعلت الشيطان وقلت غير الوسواس .. السيد ماشفت منو غير الخير ومادار ليا والو ومو حتى هي مزيانة شنو اللي كيوقع ليا ؟؟ واش خاصني شي ناس اخرين خارقين للعادة؟. صافي كل عاىلة وفاش طباعها ماشي ضاروري شي يشبه شي .. طردت دوك الافكار من بالي ولعنت الشيطان لاكن فكل مرة كيقرب يوم العقد للي حددنا كنحس بقلبي غيسكت وكنقول نزيد نصبر ونعطي راسي فرصة ونطول هادشي .. لاكن ماعندي كي ندير وصافي حددنا النهار وخاصني نتزوج ونعلنها فخدمتي ونمحي ديك النقطة السوداء اللي تحطات عليا فالخدمة ونداويها .. تكلت على الله وبنهار الجمعة بالضبط كان عندي العقد وتلاقيت بعمار وباه انا وبابا وقالي فمسج بيني وبينو راني دوزت ليك فلوس الصداق فالكونط ديالك .. ابتسمت وكنت فالطموبيل وبالي مع بابا كنوريه الطريق للعدول وقلت حتى نجلس وندخل من تيليفون نشوف .. وصلنا عند العدول وبحال اي عروسة لابسة جلابة والشال ودرت شوية ديال النقش فيدي نفرح براسي ونبدل الروتين ونمحي الافكار الخبيثة من راسي .. دخلنا وجلسنا وقعنا ومباشرة من بعد التوقيع حسيت بالدنيا تبدلات ليا فوجهي .. توقيع بسيط غير احساسي بلحياة وتبخرات الحرية والاستقلالية اللي كنت كنحس بيها قبل بخمسة دقايق. وخلاوتها تبخرات عاد حسيت براسي كنت عايشة فراحد النعيم ودخلت لواحد القفص اللي غبر ليا ديك الحلاوة ديال الحرية اللي ماحسيت بيها بصح حتى تزوجت ورجعت للدار مزوجة وكانت ماما تما وخواتاتي كلهم استقبلونا بالزغاريت والحليب والتمر ومو وختو اللي اول مرة نتعرف عليها وواحد خالتو .. بقاو كيسلمو عليا وفرحو بيا ودخلنا للصالون عاد ركبنا لخواتم وعطيتو يدي قدام بابا ودنا عشية صغيرة بيناتنا وجبنا واحد جوج طلبة قراو شوية دالقرآن فالدار وجلس بابا كيعطي الموعضة بحال عادتو ،. لاحضت غياب عمار على الموعضة وانا مع النسا فبيت اخر وبنتي حدايا نقشت ليها حتى هي وجالسة جنبي كل شوية تسها فيا واقولي واش نتي علوسة ؟ كل مرة تسولني وسؤالها كيضحكني وكنقول ليها اه انا وياك وكنبقاو نضحكو انا وخواتاتي .. شفت عمار عاد داخل من برا ورجع للصالون جلس دقيقة وعاود خرج ونضت مشيت للباب كنقلب عليه لقيتو واقف حدا الباب شاد تيليفون وكيتفرج فلكورة .. قلت ليه مالك واقف هنا
قالي كاين الماتش ديال الريال باغي نتفرج ومالقيت كي ندير
قلت ليه سير للقهوى !!! وزعما ليوم راه نهار مميز ماشي ديال لكورة
قالي قنطت لداخل واش مزال معطلين
قلت ليه غيتحط لعشا دابا غير دخل
دخلتو باش ماينتابهش بابا لخيطي زيطي ديالو ويتنرفز حيت فاش كيعطي الموعضة كيبغي كلشي ينتابه ويعطي وقتو وعمار جاني ماعندوش مع المواعيض وهاد الاجواء وقنط. باغي يتفك تقول مشدود بالسناسل .
سربينا العشا وسالينا وتافقنا على اننا نديرو صدقة كبيرة فالناضور وتحضر عاىلتي باش نشهر زواجي حيت فراسو وشي مافراسوش ومن موراها يدي مول الامانة امانتو . لاكن من بعد داك العشا بقا عليا عمار بالهضرة .. باغي نجلس معاك .. باغي نشوفك .. باغي نجلس معاك .. قهرني وانا كنقول ليه ماشي دابا حتى يمشي بابا وخليتو كيتقلا بغا يموت ومشيت وجدت حوايجي للخدمة باش نصبح خدامة ودارنا صبحو راجعين للناضور وتفرقنا .
صبحت عليهم فالخدمة بواحد البلاطو ديل الحلوى داللوز حيت دخلت دايرة الحنة فيدي والخاتم دالزواج وغنتلاقا المباركات وماجاتش ندير عين ميكة مع الزملاء فالعمل وقلت نطل عليهم بشي بلاطو داللوز ودخلت بخال العادة لابسة سروال ترب رمادي رطب وفيست الحمرا كتجي معاه زوينة وصباط عالي كحل ديال الدان ومادرتش الليبة بقا واخد الخط ديال الحنة طالع باين مع رجلي بيضاء .. الروايح و دخلت ضاحكة هازاه فيدي حتى للبيرو ديالي وعطيتو للشاوش يديه يفرقو عليهم تما فدا القسم فين جيت انا ودخلت جلست نشوف خدمتي ..خدمت فالكالم دام الصباح وتغديت مع الزملاء اللي باركو ليا على زواجي وضحكنا شوية وبغار ندير ليهم لعرس. وديك الهضرة ديال الاصدقاء. ورجعت للبيرو جلست يالاه غنبدا وعيط ليا مسيو عيسى طلب مني ندي ليه اللائحة ديال الحجاج اللي جاتني ومشيت ديتها ليه
دقيت ودخلت شادا الملف فيدي ونيشان وعيني فالارض حطيتها ليه وماشافش فيا حلها كيشوف وقالي واش صافي هنا هادو ؟
قلت ليه اه صافي هما هادوك
شد واحد ستيلو وقع عليها وهزيتها قالي صافي دفعيها وجيبي ليا واحد الخدمة سماها ليا بواحد الرمز حيت كل خدامينا برموز فرنسية وارقام ومشيت دفعت ديك الورقة ورجعت بحالي جبت ليه ديك الخدمة وكانت متعلقة باخبار المراسلين اللي عندنا على برا فيها جميع الاخبار السرية اللي كتوصلنا .. كانت فغاية السرية انا براسي ماعارفاش شنو فيهم وفاش دخلتها ليه حل الملف وبان ليا اللون فوجهه تبدل وهز تيليفون عيط لسطوندار دوزو ليه مكالمة مهمة وبقيت انا واقفة قالي تسناي ماتمشيش
سمعتو كيهضر بالفرونسي وعرفت بأن جاسوس من عندنا على برا قتلوه . درت يدي على فمي شهقت وهوا يدير فيا واحد التخنزيرة قطعات فيا الزي. وبقا حتى سالا هضرتو وقطع وقالي نعيط لفلان فرتلان وووووو. الى اخره .. الخبر نوض الريكاطا عندنا فالخدمة ومهمتي اللي كلفني بيها من اصعب المهمات فالتاريخ .. قالي غتمشي نتي وفلان حسي مسي عند العاىلة ديال السيد وتقولو ليهم مات فأكسيدون
درت يدي على فمي جاتني البكية وهوا يقصح معايا قالي واش كنهضر مع بنت صغيرة هنا ولا شنو ؟
قلت ليه منقدرش امسير حجوجي انا منقدرش وغادي نكدب عليهم
قالي اش هاد الهضرة واش حنا فييين ونتي فييين .. حنا فكدبو مانكدبو .. قلت ليك سيري قولي ليهم هادشي وماشي بوحدك غتمشي. راه معاك الناس
قلت ليه منقدرش. الله يرحم ليك الواليدين عفيني منقدرش نوصل هاد الخبر .. راه غيدوز فالاخبار هادشي غايدوز خليه حتى يدوز
ضرب بيدو فالطبلة وقالي مغتبقاش نعاود معاك الهضرة .. واش مسالي نبقا نقنع فيك ؟ غتمشي وغتهضري معاهم بشوية وبلا ماتخلعوهم .. هادا غير تسبيق ليهم باش يديع الخبر فعاىلتهم ودوز الاخبار على خير من بعد وتفوت الازمة دالموت عاد نصارحو العاىلة ماشي من اللول السلام عليكم وعليكم السلام ولدكم مات مقتول !!
بديت كنبكي ونمسح قلت ليه وسميتو مغدوزش فتلفازة؟
قالي شكون قالك غدوز ؟؟ شكوون هادا اللي جا قالك راه غايدوز شي اسم ما اسم ..
بديت كنتمتم ونترجاه بعيني يعفيني من هاد المهمة ويكلف بيها شي واحد اخر حتى سمعت الدقان ودخل واحد الراجل كبير مسكين من المناصب العادية كيهضر وراسو فالارض مد يدو سلم على مسيو عيسى وقاليه جلس شنو تما ؟. قاله داك السيد راني دفعت للحج وماجانيش وغادي نتقاعد هاد العام امسيو حجوجي وبقا كيبكي مسكين وانا كنتفتف كنتسناه يمضي ليا على الورقة اللي ناهد معايا ديال تكاليف العزو وحتى الخبر اللي غنوصل . كان كيكتب ليا فالورقة وكيسمع لداك السيد اللي قطع ليا قلبي وماجيت فهاد النهار السعيد غير مع تقطاع القلب . قالي مسيو عيسى فكرني فالسمية وعطاه داك السيد سميتو وبقا كيدعي معاه يدخلو فلاليست وانا كنشوف كي غادي يدير ليها وهوا عطاها ليا خرجتها ومشات واللي عطا الله عطاه وفنفس الرقت بقا فيا الراجل مسكين وكيترعد وحشمان . جبد عيسى كارني دشيك وانتاقل من الورقة اللي كيكتب ليا لداك الشيك زرب عليه بالزربة ماعرفت واش ربعة ولا ستة ولا شنو داكشي كتب تما يمكن شي ربعة دالمليون وقطعها بالزربة قاليه ها باش تمشي للحج ورجع ليا وقع ليا على خلا دار بويا وقالي غدا تمشيو عند الناس وبللاتي هي احسن ماشي بريكاطا
جمعت القوة ديالي والنفس باش نهضر مع عاىلة المرحرم ومشيت انا وجوج رجال من عندنا فسيارة مع الشيفور حتى لدار المرحوم .. حسيت برجلي فشلو عليا وانا غادي نقدم الخبر لعاىلته ودقيت حلات ليا مرتو وهزات عينيها شافت فينا باستغراب .. قلت ليها دار فلان .. قالت ليا اه شكون نتوما؟
قلت ليها واش نتي مراتو ؟
قالا ليه اه
قلت ليها حنا من لادجيت بغينا نهضرو معاك شوية
ابتسمت ليها باش نخفف من توترها ودخلاتنا للدار جلسنا وبقيت كنسولها على وليداتها ونهضر معاها وهي كتسنا مني نهضر ومخلوعة .. بقيت ساكتة مطولا والسيد معايا كيقول ليها الله يخلي ليك لوليدات وتشوفيهم كيف بغيتي وكيمهد ليها حتى سولاتنا قالت لينا واش راجلي وقعات ليه شي حاجة ؟. واش تشد. واش مريض
سكت مطولا وعيني غرغرو بديت كنترعد قلت ليها البركة فراسك من جيهة راجلك وسميتوو ليها ، ماخلاتنيش نكمل وتجبدات لينا فالارض كتعواج خلعاتني ولحسن الحظ معايا لعوين شدوها وسمعوها الجيران جاو كيجريو وتجمعات الدنيا وكولشي ساق الخبار .. وقفنا معاها ماخليناهاش بوحدها وكان خاصني نعطيها الضرف اللي فيه فلوس العزو لاكن ماقدرتش والسيدة طار ليها عقلها مسكينة طاحت وناضت وندبات وجدبات وسخفات .. جات واحد ختها كتجري وتولول من بعيد حتى دخلات وكانت متبتة شوية سولاتنا باش مات كيفاش وقع ليه قلتا ليها مات فحادث سير وغادي يجي من برا حتى لعندكم باش دفنوه هنا وعطيتها الضرف وخرجت خليت الدنيا مقولبة ومشيت بحالي وصلوني لطموبيلتي وطول الطريق كنا كنهضرو على الموت ورجعت للدار فكعانة ماعندي خاطر .. بقات فيا ديك المرى وقطعات ليا قلبي وبالليل عيطت لسيد فالخدمة اللي تما بيرمانونص عطاني نمرتها تاصلت بيها لقيتها شوية بردات ولاكن كتهضر بزز وحاولت نصبرها وسولاتني فوقاش يوصل المرحوم قلت ليها غدا وعطيتها التوقيت معاش يكون تما بالضبط وطفيت تيليفون نعست حتى سمعت الصونيط فالدار ونضت كنلبس بينواري .. كنت شاربة واحد المهدىء بزز باش سمعت صوت الباب وطليت من العين لقيت الزوج المصون واقف وحليت ليه دخل سلم عليا من وجهي وقالي كنصوني عليك واش طافياه؟.
قلت ليه مريضة وصافي وكنت ناعسة
عنقني وقالي علاش ماعيطتيش ليا ؟ شنو كيضرك ؟
بقيت كنشكي من تعب الخدمة ودخلنا جلسنا بقا كيشكي عليا حتى هوا من العيا وتمارة طير ليا النعاس .. بقينا جالسين قالي كتسلم عليك الواليدة وقالت علاش مكتسوليش فيها
بقيت كنشوف وساكتة عاوتاني جديدة هاد مكتسوليش فيها !! مساليا انا نبقا كل مرة الو خالتي الو عمتي واش بنادم مسالي للتسوال!! اللي نقولوه ليوم نقولوه غدا وحنا غاديين ونبقا ايوا ما ايوا
قلت ليه راه الخدمة وصافي وسكت ..شفتو بغا يقرب ليا وانا ماعندي كانة ولا خاطر ومامستاعداش وقلت ليه عرفتي راني عياانة هاد النهار داز كحل
قالي واميمكنش نتي مراتي وشوفي شخال صابر ودابا كتقولي ليا عيانة
قلت ليه ماعلمتينيش ماقلتيش ليا غنجي
قالي راه حنا دابا مزوجين ماشي مصاحبين .. واش خاصني نعلمك راني جاي؟
سديت عيني تنهدت قلت مع راسي عندو الحق صافي تزوجنا شنو دابا غانبقا نتبعكك سكت وبدا كيقرب مني مرة لمسة مرة همسة والحب الحب الحب والكلام المعسول حتى ضحكت بزز مني وحسيت براسي محتاجة حتى انا وعندي رغبة خصوصا فاش حرك فيا المشاعر بالقبل والهمسات مابقيتش قادرة نصبر قلت ليوم غادي نخليها .. سخن الطرح ومشينا لبيت النعاس كملنا تما الباقي والسيد سخن حيد حوايجو وطفيت الضو القوي خليت غير الخفيف وتقاديت معاه كنت غنغتاصبو فواحد اللحضة بالاعصاب .. مافهمتش مالو شي حاجة ماشي هي هاديك وكل شوية كيفلت ليه كيخرج وكنحبسو حتى يرجع .. بديت كنحس براسي انا وياه مكنتلاقاوش يانهبطو بجوج يا نطلعو بجوج مكاينش داك الاصدام اللي كيعطي القوة وكيطيح عليا بصدرو كيخنقني كنقول ليه هز كرشك ماضربنيش بكرشك راك كتهز كامل
قالي كيفاش كنتهز كامل
ضحكني بقيت كنضحك قلت ليه ماعرفتش المهم صافي
سكت قلت وانا نقول مع راسي اوييلي شكتقولي حشمي شوية !! لاكن سكت حتى عييت وتعصبت عاوتاني.. جاني ليكيليبر ماشي هوا هاداك وحسيت براسي فموسم المشاوشة ماشي فعلاقة حتى ديك النغمة اللي كنحس بيها كنكون شاداها شوية كتهرب ليا بشي حركة ماهياش ولا كيعيا وكيبدا غير يتسوطا ولا ينقص الحركة حتى كنبغي نسكت بحال الطموبيل
قلت ليه مالك
قالي عرقتيني
قلت ليه انا اللي عرقت
قالي وانتي مافهمتكش شنو باغا
قلت ليه ماشي شنو باغا راه واقيلا الناموسية مامساعداش اجي نعسو فالارض حسن
نزلنا للارض وقلت غادي نوصل لديك النشوة بنت الحرام اللي هاربة وانا تابعاها بحال الكورة .. نعسنا وبدينا عاوتاني وقلت غنسكت خليه نشوف شنو يدير دابا مانبقاوش نوثرو .. بدا غادي وكنتسنا يزيد فالجهد وكنوصيه لا يقدف تما حتى ناض شد بيدو وبان ليا تنشوا مع راسو وبقيت انا !!!
اويييلي كيفاش؟؟ شنو؟ تبدل اللون فوجهي قلت ليه دغياا؟؟ قالي حيت طولت بزاف ماقدرتش نزيد نصبر
تعصبت وجاوني الهوايش وبغيت نضرب بالحجر وانا كنت كنتسنا الجهد الاخير فين ندوق النعمة ساعا طفا عليا الضو وخلاني كنشوف فجنابي ونضت مشيت للطواليط ترضيت ورجعت معصبة ولاكن مابغيتش نبين الغضب ديالي ولبست حوايجي ومشيت لبلاصتي بردت حسيت بكرشي كضرني بقوة الخدمة على الخاوي .. رجع عندي كيضحك فرحان نعس حدايا وباسني قالي صدمتيني
شفت فيه بالجنب قلت ليه علاش غنصدمك !!
قالي ماحسابش ليا زعما غتكوني واعرة بحال هاكا .. عرفتي طلعتي خطيرة !
دورت وجهي ساكتة وقلت مع راسي خطيرة ؟؟ اوديي خليني ساكتة حسن . بقينا كنتجمعو ونتلف بالهضرة قلت يمكن السيد شافني داخ ماقدرش يصبر ولا تلف ومع الجماع الاول دغيا جاب الربحة ارا نتسنا الثاني غادي يكون طول من الاول ويكون ليه الجهد والصبر .. بقيت كنتسنا حتى قالي لعبي ليا فشعري شوية حتى يديني النعاس
جريت كتفي طيحت ليه الراس وبقيت نتمتم ونشوف فيه ماعرفتش كيفاش غنقولها ليه ؟ نقوليه كيفاش ننعس واش صافي نهاية النشرة زعما! ماكاين والو غنعسو!! شاف فيا قالي مالكي. وحركت راسي قلت ليه والو غير تفكرت شي حاجة . عنقني عاحبو الحال قالي وافشلتييييني .. كنت كنقول عمرني نلقا شي وحدة اللي تصبر و تكون بحالي
قلت ليه كيفاش بحالك
قالي زعما تصبر عليا عندي شوية الجهد زايد نغزة وكنتي كتباني ليا كيوت كنقول ماتهزي تا دقة
بقيت كنشوف فيه خفت نهضر نندمو وزايدها تايق فراسو ماعرفتش اشمن جهد كيهضر عليه واش الجهد ديال النشوة اللي فيه ولا الرغبة اللي فيه ولا التكريعة ديالو ولا اشمن جهد !! ماشفت جهد فالتطبيقي غير التفعفيع وزداف رداف حتى الضربة مزاكلة ماتابتاش وانا اللي كنت كنتسنا نسمع سط سط سط سط بحال السرسار اللي توصلني للقمة !! ترر اودي .
نعست مفقوصة قلت نصبر حتى نشوف الجهد علاش كيهضر وندوز هاد الليلة على خير اما الى بقا هاكا كيتفتف عليا غنقولها ليه نيشان ولا نعصر باباه شي عصرة نوريه الجهد على خقو وطريقو وعااد غيعرف خطيرة كي دايرة .. بلحق ماشي دابا خلي حتى نقدام واحد السيمانة بعدا فهادشي ونشوف شنو كاين .
نضت الصباح دوشت على الخوا الخاوي كن غير دايرة علاش والمشكلة محرك فيا كاع المحركات تقول جرب شي ماكينة واش خدامة وصافي ! ناض دوش وماقدرتش نسا ليه الفعلة دالبارح وخليتو راشقة ليه فرحان عاجبو راسو وكيتبومبة عليا وانا غير بيني وبين راسي كنقول واش البنات كانو مكبرين ليه الشان ولا فعلا هوا هاداك غير انا فيا شي ديفو !! ولاكن لا مايمكنش حيت فعلا تمرمدت على والو بحال شي سردينة شرملوها ومالقاوش فاش يقليوها وخلاوها مسهطة تا خنازت .
خرجنا هوا مشا لخدمتو وانا مشيت لخدمتي والمورال طايح ليا والنهار كلها واعصابي تالفة ومنرفزة غير بوحدي وماعندي خاطر .
كنت جالسة داياها فشغلي حتى عيط ليا مسيو عيسى مشيت لقيتو جالس كيوقع ولحت ليه السلام ردو عليا وقالي هادي الدية ديال العاىلة دالمرحوم دفعيها للخزينة دابا
حركت ليه راسي وبلا منحس بديت كنفخ ونسوط وهز فيا عينيه طلعني وهبطني وبقا متبت فيا الشوفة بواحد التخنزيرة وقالي ياكما نفخك شي واحد وجايا تفشي عليا هنايا
ارابكت ونتابهت ليه قلت ليه لالا امسيو عيسى ماقدتش
كمل ديك التخنزيرة وقلب عينيه بقيت غير كندور فعيني وعطاني ورقة اخرى قالي هادا ترخيص بالدفن و ممنوع منعا كليا يتحل الصندوق على الميت .. بغات مرتو تشوفو طلعيها بينك وبينها تشوف وجهه ويتدفن نيشان .. ديه ليهم يقراوه يعرفو اش يديرو
قلت ليه واش غنمشي للدفن!!
قالي نمشي فبلاصتك؟؟
نفخت مرة اخرى باسى مابغيتش نمشي لدوك الاجواء وهز راسو فيا خلعني لاح ليا الورقة فالارض قالي سيري نفخي فجهة اخرى .. نتي راك كتقلبي عليا نديشارجيك من هاد البيرو نردك فين كنتي اما هاد الخدمة بزاف عليك
سكت ماقدرتش نهضر حيت الى هضرت غنجيبها فراسي واصلا اللي كاع اللي هنا مامتساهلينش مكاين غير غسل ونشف لاكن مع ذلك بقا فيا الحال خرجت من تما كنبكي مشيت كنمسح وجهي ومكانش عندي الوقت يالاه لحقنا الصندوق فالمطار ومشيت اديت اللازم وحضرت لداك الجو اللي زاد كمل عليا ودوزت الخدمة كلها على برا وتكلفنا بكل كبيرة وصغيرة واخا كنت انا الشاف غلى داكشي ومعايا اللي كيطبق وكنت غير مراقبة للوضع وكنسجل فدماغي الرابور كامل باش نكتبو وندفعو ليهم
عييت ونفسيتي عياانة وحاسة براسي مريضة بسبب الضغط اللي كنعيش .. مشيت بحالي للدار درت واحد الدوش سخون وكمدت فيه عضامي وخرجت لابسة بينوار وفوطة كنشرب فواحد الكاس دلعصير ونتفرج فالاخبار وكنحاول نوقف عقلي من التفكير هزيت تيليفون تفكرت الصداق اللي خرج من بالي كاع وطليت لقيت عمار دوز ليا ربعالاف درهم !!! بقيت كنشوف فيها ونعاود ونتأكد ونقول واش بصح الفاين درهم ولاشنو هادشي !! عيطت لفوزية جات من لكوزينة قلت ليها شوفي اختي شحال هادي ؟؟
قالت لياربعالاف درهم
قلت ليها متأكدة ؟!!
قالت ليا ااه راها تما ربعة وربعة دالاصفار
شفت فيها مزيان والف سؤال وسؤال كيتطرح ليا فدماغي كنقول اوييلي واش هادا تسطا!!
سمعت الدقان فالباب ومشات فوزية حلات كان عمار اللي جا ودخل كيضحك جا عندي نيشان باسني فحنكي وقالي بالصحة والراحة
ابتسمت وقلت ليه الله يعطيك الصحة وجلس حدايا .. قلت بالفن عاد شفت الصداق كنت نسيتو
قالي غير سمحي ليا ماشي شي حاجة مع تزيرت شوية وعندي شي مشاكل فالخدمة عارف باللي ربعين الف درهم ماشي شي حاجة وتستاهلي اكثر
قلت ليه ربعين الف درهم ؟؟ واقيلا غلطتي راه لقيت غير ربعالاف درهم
عقد حجبانو وقالي كيفاش؟ اري نشوف !
وريتها ليه وبقيت كنشوف بنص عين وبلا منبين ليه وقالي وااايلي وااع غلطت جيت نسيفط ليك ربعين الف درهم درت غير ربعالاف درهم نسيت صفر
ابتسمت وحشمت قلت ليه ماشي مشكل كتوقع
قالي صافي صافي دابا ندوزها ليه غير نسيت
وبقا كيحرك راسو وتكا داير يدو على جبهتو قالي عيييت عرفتي ربي اللي عالم بيا
قلت ليه فين وصلتي فالفيلا ؟
قالي واغير خلييي داك الجمل راكد
قلت ليه اينا جمل ؟
قالي راه فيهم المشاكلييييل بان ليا داكشي فيه التخلويض ودرت بناقص كاع سمحت ليهم فداك التسبيق حتى هوا ..
قلت ليه شنوو وعلاش؟
قالي مخلوضين.. الفيلا اللي ختاريت وتافقنا عليها ماشي هي اللي دارو ليا فالاوراق دارو ليا وحدة من اختيارهم هما وتعصبت وانا نوضها معاهم ودرت بناقص
قلت ليه والتسبيق علاش تسمح فيه
قالي راه قلت ليهم اراو ليا التسبيق ديالي قالك كاع اللي عطاو التسبيق راه ساهمو بيه فالبناء ودابا تسنا .. قلت ليهم واسيرووو نتوما وداك التسبيق بنااقص منو .. التخلويييض ماعرفتش مالي انا من نهار جيت لهاد البلاد وانا اللور اللور اللي درت فيها يدي مكتصدقش !! والمخلويضين على الجهد والنصابا والدولة مامساعداش .. بزااف والله
بقا كيتنهد وبقيت انا غير كنشوف قلت ليه اشنوف هاد الاوراق ديال الفيلا شنو دايرين فيهم
هز يدير قالي فييين هما هاد الاوراق راه شركتهم عليهم تما وجيت .. يبخرو بيهم بنااقص كاع .. ندمت اللي رجعت لهاد المغرب
مابقيت فاهمة والو ووليت كنقول انا اللي منحوسة واقيلا وطليتو معايا .. قلت ليه صافي من لخير ولاكن ماخاصكش تسمح فداك التسبيق
قالي وامابقاتش فالتسبيق .. دابا راه مشكل اخر عندي
قلت ليه اشمن مشكل ؟
قالي السيد اللي جيت على قبل الصفقة معاه اختلس فلوس الدولة واستغل المنصب ديالو وتشد ومابغاش كاع يبين الفلوس اللي اختالس وحجزو على الفلوس ديالنا اللي حطينا وغرقونا وهرج علينا ولد لحرام جرنا معاه للعافية .. دخلنا معاه بالنية وقلنا نضربو المارشيات فهاد البلاد فاللخر ها شووف شنو وقع .. المشكلة كاع اللي عندي حطيتو .. الواليدة ساقت الخبار طاحت غيبات ولات خايفة عليا نمشي للحبس
صدمني قلت ليه اوييلي شهادشي ؟؟؟
قالي مكنبغيش نصدع ليك راسك بهاد المشاكل ولاكن ماكاين مايتخبا خاصك تعرفي
شديت حناكي وشفت قدامي مصدومة كنولول ونضرب حناكي ونستوعب قلت ليه الله اربي شهادشي !!! شنو دابا شنو غادير ؟ هادشي كيصدم
سد عينيه وحط راسو اللور قالي سلمت امري لله مابقا عندي مندير .. اللي دارها الله هي اللي غتكون
قلت ليه وفين مشيتي ليوم ؟
قالي مشيت للمحكمة .. ماعندي منخبي عليك هادشي اللي كاين .. دابا ماعرفتش شنو ندير وحتى الخروج على برا ممنوع عليا .. واش نبدا ا زيرو ولا شنو
تصمكت بقيت كنشوف قدامي ساكتة شحال والصمت فالدار حتى بانت ليه فوزية دايزة وقاليها فوزية اري لينا الى كاين مايتكال
تكا اللور كيتوجع بالعيا وقالي من الصباح وانا واقف فالمحكمة مع داك ولد الحرام .. واتيق فالشمايت
قلت ليه دابا صافي مابقات صفقة مابقات خدمة ولا شنو؟
قالي وشنو كنعاود ليك من الصباح اسارة .. راه ولاد الحرام خرجو علينا .. ماعرفتش دابا شنو ندير غنتسنا حتى نشوف باش غتحكم المحكمة
حطات فوزية الماكلة ليه ونضت انا مشيت للبيت مصدومة بقيت كنشوف فجنابي .. اش هاد الزهر عندي !! اش هاد الزمر !! عيطت لمو نسول فيها لقيتها مسهوتة قالت ليا واش سمعتي ااش وقع ليه .. كبيدة وحدة بغاو يزيوني فيها وبداك كتهضر بواحد الحرقة وكتبكي قهراتني نوضات ليا قلبي بقيت كنسايس معاها ونتهند مالقيت مانقول من غير الله يدير اللي فيها الخير .. اش غندير ! شخال من واحد تنصب عليه مسكين ودخلوه الحبس وضاعت صحتو وضيعوه فحياتو الوحيدة اللي عندو .. نطلبو الله السلامة وصافي المهم ماتجيش غير فالصحة .. لبست بيجامتي ومشيت عندو جلست حداه قلت ليه واش صافي ماديرش فراسك .. راك بديبلوماتك وقاري وكاين فاش تخدم هنا وتعاود بشوية عليك .. ماشي نهاية العالم .. صافي هادي هي الدنيا الانسان كيطيح وكينوض والحياة مستمرة مغنبقاوش واقفين
ناض عندي عنقني وبقا كيشوف مطولا وقالي سمحي ليا .. باس ليا يدي وراسي وقالي سمحي ليا بزااف
قلت ليه مكانيش علاش نسمح ليك هادا قدر الله
عاود عنقني بقوة وقالي واخا هاكاك سمحي ليا .. تعديت عليك معايا
قلت ليه ماتعديتيش عليا عاادي باقا انا هي انا الحمد لله ..
قالي غنسالي هاد الروينة وندفع لخدمة هنايا ..كما قلتي راه ديبلوماتك مايضيعونيش .. ولاكن بغيت نقول ليك شي حاجة وماعرفت كيفاش نقولها ليك
قلت ليه شنو هي هاد الحاجة؟
قالي والله ماعرفت كيفاش نقولها
قلت ليه غير قول
قالي سلفيني شي حاجة نعطيها للمحامي ونحرك بيها القضية حتى نرضها ليك
حشمت قلت ليه اوييلي على ترد ليا واش حنا فرد ليا نرد ليك شحال محتاج
قالي عشرين الف درهم بلحق سلف .. انا ماباغيش ندخلك معايا فهادشي
قلت ليه لالا ماشي مشكل صافي كون هاني
مشيت لبيت النعاس كتبت ليه شيك فيه حوج دالمليون اللي محتاج عطيتو ليه وقلبنا الموضوع على الله نخرجو من جو الاكتآب وقلبناها بوسان مرة اخرى وبقينا منين منك حتى طحنا للارض وبديت كنحاول نشد معاه التوازن .. حسيت براسي مامرتاحاش وجاني مكيعرفش ولا ماشي قادر باش يتحكم فالعلاقة وقلت ليه بلاتي نبدلو بوزيسيون حسن ونضت وقفت على ركابيا وطليت بعدا على المعقول نشوف ياكما عوج ولا ناقص فيه شي حاجة لقيتو عادي مافيه والو .. بدينا عاوتاني وشدني بحال لي كيشد لحمار لحمارة وكيخبط وصافي وحتى حركاتو عيانين ولا انا اللي فيا مشكل ولا ضرباتني شي عوينة ولا ماعرفتش بالضبط علاش انا ما قانعاش كنتسنا شي حاجة اخرى !! قلت غينزل غليا بشي تسرفيقة اللور تزعزعني ولا يدير ليا شي شدة محكمة !! لاكن هوا لا تكا عليا بيدو بحال الى متكي على مكتب وفين ما يدفعني نجي على جبهتي وكيتكا عليا مني مكتب مني مرى حتى ضبروني ركابيا والدفعة عندو فشكل كيتدفع ويدفعني معاه وبقيت كل شوية نقاد الوضعية ونرجل اللور ونقول ليه ماتكاش عليا اويييلي شد من هنا شد من هنا وقف مقاد مالك مقوس عليا !! الصراحة الشكل ديالو فالجماع وطريقتو ماعطاتنيش رغبة وليت بحال الى كنعجن ونتقاتل غير بوحدي وكنحاول غي راسي .. قالي ماعرفتكش كيفاش باغا هاد النعاس اجي نتي الاللة نشوفو كيفاش
نعس تشبح ونضت على سعدي ووعدي كنمشي ونجي بخال الو فيا البولة وهوا عاحبو الحال وانا منقلب كي ندير .. قلت ليه واتحرك شوية حتى نتا واماعندك حتى حركة راه عيييت
قالي وانتي اللي مافهمتش شنو باغا
قلت ليه انا ماعرفتش كيفاش اصلا شي حاجة ناقصة.. ميمكنش نبقاو هاكا
قالي شنو بغيتي ندير وندير انا راه مكنقدرش نصبر راه قلت ليك لبارح زايد شوية صبري
عصبني ونضت قلت ليه اجي اسيدي وريني الزيادة يالاه انا باغا هاد الزيادة دابا باغا قنبولة تفركع فيا
ناض. جعر وطاح عليا كيجاهد تقول راكب على بغلة شفتو كيتفخ ودافع الجهد نعصب كيفرغ الطاقة وانا ندفعر قلت ليه لالالا هادا ماشي هوا الجهد !!
قالي وانتي اللي صعيبة كنت كنقول انا صعيب طلعتي كتااار مني
قلت ليه وانا الى صعيبة ايوا يالاه كنتحداك وصلها ليا
قالي هانا غنوريك
شدني ضبرني على والو نفس الريتم والطريقة غير الصهد والنفس والجهد على والو وخفت يسالي ومايعقلش عليا وعرفتو هوا هاكا داير ماعندو تسميطة ما يايعرف تقليبة .. ماشي فنان بهاد المعنى حتى تخويرة جرحني بدفرو طلع ليا السكر قلت ليه حيد حيد .. انا ماعجبنيش هادشي ماغنبقاوش كل ليلة هاكا كنتعابصو كي الشينوا واحد باغي يهز لاخر
تعصب حتى هوا ماعجبوش الحال قالي مافهمتكش اسارة واش نتي شوية لاباس شنو باغا فهاد النعاس !
قلت ليه نتا خاصك تبدل طريقتك . طريقتك جاتني بلدية ماكاينش فيها فن وغير كطبق وصافي ماعجبنيش هاد النعاس غير عصبني ونشفت اصلا وليت كنتجرح
قالي نتي عندك مشكل دنشوفية !
قلت ليه انا عمرني كان عندي مشكل دنشوفيه فحياتي
مرضني موضوع النعاس .. رجع كيرد ليا اللومة ورجعت كنرد ليه اللومة ومابقيتوش كنخليه يوصل لشنو بغا .. يا إما نوصلو بحوج ولا حتى واحد فينا مايوصل .. بقيت على ديك الحال كيجي للدار كنبغيو ندبرو شي حاجة كنبدا نعاني ونتعصب وهوا كيقول ليا شنو بغيتي ندير ليك اش باغا واش شي حاجة ماكايناش. ؟. هادا هوا النعاس تبدال الوضعيات والحرث .. ماعرفتش كيفاش نشرح ليه باللي هاد الحرث اللي كيهضر عليه ماعجبنيش. مكنحسش بداكشي اللي بغيت وكنبقا طالعة طالعة حتى كنقول قربت وكنهبط هبطة وحدة وانا عرقانة وسخفانة و وكنتلاشا بسبب شي حاجة ولا بسبب الوثيرة وحتى الرغبة كنصنعها لراسي حيت هوا كامل مامفهموش ليا .. المشكل هوا كيدير داكشي اللي عليه ولاكن الطريقة ماهياش كتمرض وفاش مكندير والو كنزيد نمرض. واعصابي مكيترخاوش كندوزها كلها تشنجات ومعصبة والى جيت نقول هادشي لشي واحد يتصدم فيا ويستهزا بيه . وهوا هاد المشكل راه مرضني فحياتي وبسببه وليت كنستحلم فاش كنعس فكعانة و بسببه بداو الاعصاب كيركبو فيا والمشاكل مع عمار بداو .
عيطت لختي لي فكازا قلت ليها اجي شي ويكاند نشوفك وجات عندي للدار هي ووليداتها وتجمعنا غلى العشا وكان حتى عمار معانا .. مشا ينعس بالليل ونعسنا الدراري وبقينا انا وياها جالسين فالبيت كنتحمعو وسولاتني واش مغنمشيش معاه لدارو قلت ليها على المشاكل اللي عندنا كلها بلا منخبي وضربات حنكها قالت ليا اوييلي شهادشي !! دابا نتي تزوجتي باش يسترك ولا باش تستريه ؟
قلت ليها ماهندي مندير هادا هوا زهري
وبقينا كنتجمعو ونناقشو ونحللو وقالت ليا انا جاني هادا واقيلا كادب عليك .. ميمكنش فهادشي كامل حتى حاجة ما ستافدتيها منو ! الى مشا با حتى ساق لهبار للصداق دربعالاف درهم يشنق راسو .. واصلا هادشي الى ساق ليه الخبار غادي يتعصب وينوضها معاك
قلت ليها وشنو دابا ؟؟. هانا اختي طحت فهاد المصيبة شنو ندير ؟
قالت ليا لا ماتقبليش على راسك هادشي مالكي على حالتك
قلت ليها وشنو بغيتي دابا نطلق ؟؟ نبقا زوج طلق. نشفي فثا عباد الله ؟؟ صافي دابا ماغاديش نطلق واخا يكون كما بغا يكون خليه يضبر راسو .. انا حاجة وحدة اللي خاص تقاد ليا هي النعاس . النعاس اختي مرضني .. مكنتفاهمش انا وياه فيه وكيعرف غير ييي *****. وصافي بحال كي كيدير لعجل للبقرة .. تنشواي نتي ولا لهلا ينشويك بقا هاكاك.. مكاينش متعة كااع اصاحبتي انا مرضت ..
قالت ليا كيفاش واش ماشي راجل
قلت ليها وا رااجل ولاكن ماعندوش الحرفة .. مكيبردش القلب
ربعات يديها وقالت ليا وكيفاش بغيتي يدير ليك ؟؟ النعاس راه باين كيفاش بغيتي نتي هاد النعاس
قلت ليها نتي وراجلك مرتاحين عاجبك الحال ؟. كيفاش كديرو ؟
قالت ليا اوييلي على سؤال !!! كي كيديرو الناس واش انا غنبقا نتشرط عليه ؟؟ نتي اللي مافهمتكش علاش كتقلبي
ربعت يدي قلت ليها ماشي قاااد . ماشي فحل اصاحبتي انا مكنقدرش نوصل معاه انا بغيتو يكون فحل واش نبقا انا غير كنعرق على والو حتى ينشفو ليا عضامي ويجيني العصاب هزات حاجبها فيا قالت ليا وعلاه شحال هادي كي كنتي كديري ؟؟ فاش كنتي مع الحاج عيسى كي كنتي يا ختي؟
جابت ليا الضحكة هزيت راسي قلت ليه ههن !! كي كنت .. اختي راه هاداك راه بووووحدو انا ماقلتش ليه كااع دير بحالو انا يشد معايا الميزان وصافي يبقا شادو تا نوصل .. اما هاداك بلا منهضر عليه .. ثلاتة بينا كنا وكان كيجي كيحنتني .. هوا اللي ولف ليا واحد وجوج وثلاتة وليت كندور ونقلب عليهم الى مادرتهمش بثلاتة ماكنحسش بالعلاقة كاملة !!! هادا حتى واحد مادقتو معاه اصاحبتي حراك ثلاتة !! الحاج راه كان كل ما عاود كيطواال حتى كنقول صافي عييت وكيدير ليا شي هزات وشي لعبات راه كنبدا نلعب فالسما اما هادا الارض ومانفعاتناش
بقات كتموت بالضحك قالت ليا وماتقارنيش شي بشي راه كل راجل وكيفاش داير .. انا بعدا عندير علاقة وحدة وهوا كينعس وانا كنعس ماكاين لا شقلاب لا زمر .. عادي ومزيااانة واصلل ماقاداش على اكثر باااركة عليا حامدة الله وشاكراه .. نتي مجهدة خاصك قباض الارواح .. مشكيييلة عندك وفين تلقاي اللي يقنعك المسخوطة .. هاباش التصاحيب خايب والفساد خايب .. الراجل كيجرب العيالات كيعرف كي دايرين نهار كيتزوج وحدة على قد الحال كيلاحض الفرق ويخرج يخون ويخليها فالدار .. والمرى كذلك .. فاش كتجرب هادا وهادا وكتعرف الانواع دالرجال راه مصيييبتها نهار تزوج وطيح فيه على قد الحال خصوصا الى ولفات شي واحد نيييت اللى كيحنتهم ليها .. اللهم اللي هدا شي يشدو ويغمض عينيه يعرفو غير هوا
قلت ليها كن ماتزوجت هاد التزويجة ماكنتش غنعرف هادشي .. كان كيحساب ليا كاع الرجال كيف كيف
ضحكات وقالت ليا لالا احبيبة. نتي مشكلتك هوا تزوجتي من الاول بواحد هوا براسو ماقاداهش نتي اللي كطيري ومزوح ثلاتة …واش عارفة شناهما ثلاتة؟؟ راه هرقل هادا ..كاع اللي تعرفيه مزوج اكثر من وحدة عرفيه ناضي وفيه داكشي من عند الله ماتكفيهش وحدة .. ونتي المشكلة بديتي بيه هوا نيت وا فكيها
عييت نشكي وبغيت نبكي وتقاضا ليا الصبر .. من مور ماشكيت لختي لقيت راسي بين نارين .. والنار الكبيرة هي ديال النعاس اللي ماعندو لا مدارس لا سونطرات لا والو شد نا عطاك الله وداك الفن كيجي نتيجة الشهوة والرغبة ديال كل واحد .. وكل واحد كيفاش كيبغي يدرق وياكل وكل واحد وطريقتو وعمار طريقتو عشواىية ماطربنيش وماقضا والو وزيد على هادشي مشاكله ديال الهم مكيتقاضاوش .. ركبني الهم والغم وندمت على هاد التزويجة وعييت نحاول والو اللي فيه فيه واللي فيا فيا وانا مانقدرتش على داك الحماع الناقص .. ماشي لخاطري ولاكن ماكيقنعنيش رمكيرصلنيش واصلا كن وصلني كن طمعت فالاعادة والاعادة حتى نكمل النوبات اللي كبرت عليهم وتربيت عليهم وحليت عليهم عيني عاد نقول اه دابا صافي قنعت ونطيح نعس منهضرش. لاكن ختي زادت كملات عليا فاش قالت ليا باللي ماشي كاع الرجال كيعاودو اصلا والى وصلك للاول صافي غير قنعي حيت كيعياو وكيطيخو ينعسو خصوصا الى كان داكشي يوميا !! هادشي عمرني فكرت فيه ولا عرفتو وفهمت العلاقة الجنسية مفهوم واحد هوا انني معمرني نلقا هاد المشكل ولا نطيح فيه والراجل كيبقا كاي راجل من غير اللي ماشي راجل فمرة ..لاكن قضية الانواع وهادشي اللي شفت وسمعت صدمني رجع كيبان ليا غير عيسى وكنقول ياه على زهر عندي !! من الاول طحت فيه عارف راسو اش كيسوا .. وتذكرت كلامو واحد المرة شحال هادي كنا جامعنا وتكينا كنتجمعو وقالي حرايثية .. قلت ليه شنو كتعني زعما وقالي النعاس معاك ماشي ساهل وكطولي خصك الوقت والجو وشي كيكمل شي. .. دابا عاد فهمت شنو قصد بيها وعرفت شنو عنا ليا بديك شي كيكمل شي .. يعني كليمة كتكمل هميسة وهميسة كتكمل بوسة وبوسة كتكمل لمسة وهي غادية والجو خاصو مناسب كيعطيني الرغبة ويعطيني الحماس والريحة كيخصني نشمها وتعجبني وتجدبني باش نرتاح ونستنمتع وماتكون حتى حاجة مبرزطاني .. حتى حوايجي يكون مناسبين ونكون واجدة ومقادة وعاجبني راسي ومفركسة وتايقة فنفسي .. كان داكشي بالقواعد والقوام وكان عيسى كيفهمني كيعرف ليا نقط ضعفي ويتعامل معايا وحتى هوا كان كانت كتعجبو المعاشرة معايا وقالها ليا شحال من مرة .. حتى فاش مكنبغيش. كان كيقول ليا واغير زعمي حدك تبداي صافي ، وفعلا كنت كنكون فنيانة باغا غير نعس وفاش كنبدا انا وياه ويسخن فيا الدم كنبقا تابع الثاني والثالت حتى كندوزهم ونطيح كاو مكنطلبش الزيادة واخا فالاول فاش يالاه تزوجت بيه كنت كنعاني ومكنقدرش نكمل وبالخاطر مان كيسايس معايا حتى كنكمل ومن نهار الاول ولف ليا التعاويدة ثلاتة دالمرات .. عاد عرفت علاش ولفها ليا وعلاش بالضبط ثلاتة .. باش مايلقاش معايا مشكل فالنعاس وراسي فاش نبدا كنكمل بلا دفيع وزاد ليا الرابعة فالصباح فاش كنفيق من مور ما رجعت ليه المرة الثانية حتى وليت كنحس بالرغبى كتفيقني فالصباح فاش كنكون ناعسة حداه .. كولشي ولف. والولف موصيبة ووحلني دابا ماعرفتش شنو ندير وخفت يكون دارها ليا باش عمرني نقول فلان راجل عليه ولا فلان واعر عليه ويمكن كان باغي يخلي بلاصتو باش نبقا ديما مفكراه وعمرني ننساه واخا نتزوج عشرين منقولش هادا احسن منو . ودابا خفت نطلق ويسيق لخبار ويتشفا فيا ولا يفهمها على النعاس واخا راه هي على النعاس وانا منقدرش نتحمل اكثر من هادشي وبزاف دالمحاولات والو بلا فائدة .
حرت فحريرتي وزاد كمل عليا بمو جات عندي وبقات كتفهم عليا قالت ليا كن غير تعاونتي نتي وعمار ودرتو شي مشروع بجوج
بقيت غير كنشوف فيها مافهمتش شنر بغات تقصد .. واش بغاتني ندير ليه مشروع!! انا اصلا مامقتانعاش بهاد الزواج من الاساس وطلع ليا موضوع النعاس من الجنب وزادتني بغات توطد علاقتي معاه اكثر بالبروجي .. درت ليها خاطرها وسلمت معاها ودوزت داك الشهر الاول انا وعمار فالسراط المستقيم على النعاس حتى صافي مابقيتش كندير فيه يدي .. يقرب ليا كنفر وبدينا فالمشاكل من الاول وكولشي سببه النعاس .. تلات بيا الايام وعقلي طار رجعت غير كنفكر وساهية والمعانات كل ليلة ..
واحد النهار مشيت لواحد الصالون نصاوب حالتي باش نصبح خدامة و سمعتهم كيهضرو على المرى فالنعاس وسمعت وخدة قالت لوحدة اصلا المرى مكتجيبوش المرى غير كتستمتع بالعلاقة وصافي ماعندهاش داك الرعشة الجنسية !! صدماتني وضرت كنسمع وقلت ليها سمحي ليا نقاطعك ..علاش ماعندهاش ديك الرعشة ؟
قالت ليا حيت حنا ماشي بحالهم فالنعاس هما كتجيهم حنا غير كنستمتعو وصافي
قلت ليها واش عمرها جاتك
قالت ليا لا واخا عييت نحاول
سولات المرى لاخرى وقالت ليها لا وبقيت انا غير كنشوف فيهم تصدمت قلت هادو زواجهم بحال زواجي معارفين والو فالرعشة والنعاس وكينعسو نعاس مكاملش وكيحساب ليهم هادا ك هوا النعاس. سكت ماقلت ليهم والو حيت المشكل فالرجل ماشي فيهم ومابغيتش نخلق ليهم مشكل واخا ماكرهتش نقول ليهم كاينة الرعشة وعشتها وعاودت ولاكن خاص ليها مجهود حيت الرعشة دالمرأة مكتجيش بالساهل وانما خاص ليها مجهود كبير وجو نلائم وشخص مناسب يكون قاد وعارف كيفاش يدير يوصلها ليها وهادشي عشتو مع عيسى وعارفاه وماكنتش كنحلم .. بل عشتو وشفتو كيفاش داير فالنعاس وكيفاش كيلعب فيه ويتفنن وغير بالعقل وبلا ميشتت التركيز . للحضة ندمت على طلاقي المتسرع وبقيت كنلوم فراسي .. شنو فيها الى بقيت ضرة شنو فيها اصلا ياك مزوج غيري وقاد بيا اشنو ناقصني؟ً الحب؟. الحب اصلا كيتبخر كتبقا المودة والرحمة !! وهاد المودة والرحمة كانت بيني وبينو وكولشي كان زوين وكنا عاىلة وكن قبلت نعيش معاه فمدينة وحدة كنا غنكون مجموعين ونحسبو كاع فدوك الايام اللي كيدوز مع لخرين خدمة وكيجي فالويكاند عندنا .. لقيت الراجل اللي مناسب ليا واللي بغيتو من قلبي وبغاني ودرت معاه ذكرايات لل تنسى وكان بيناتنا واحد الانسجام زوين وكان رجل بكل معنى الكلمة .. منخاف يغدرني ولا يخوني ولا يضربني ..كان كايخاف الله ويتاقي فيا الله ويتاقي شري ومبرد معايا واخا كنت مجنونة .. كانو فيدي بزاف دالنعم وضيعتهم وخرجت نتحاك مع الواقع باش نعرف الناس والحياة كيفاش دايرة .. عرفت انني غنعيش مع عمار كما عايشين هاد العيالات مع رجالهم فير الفرق اللي بيني وبينهم هوا انهم معارفينش شنو هوا الجنس اصلا وكبرو وسنين وهما مزوجين وعايشين على ااساس المتعة فقط اللي هي مرحلة اولى فالعلاقة وعمرها وصلو للمرحلة الثالتة .. وانا عارفة هادشي لاكن منقدرش نعيشو وكنفضل نعيش بوحدي على انني نعيش نص عيشة وزيد المشاكل دالخدمة .
كانت هادي النقطة اللي فيضات الكاس ومكانتش باغا نوصل لهادشي كن كانت علاقتي كاملة وسعيدة بيها .. لاكن تزاد الخل على لخمير وشفت راسي ضالمة نفسي وعاطيا للناس الحق على انني نعطيه لراسي. وقررت الانفصال . يكفي هاد الشهر اللي عشت مافيا اللي يزيد شهر ديال المحاين اخر .
رجعت من الصالون للدار لقيتو تما جالس وكنت مناقشة انا وياه ومكيهضر معايا مكنهضر معاه .. مشيت عندو نيشان قلت عمار .. بغيت نهضر معاك فواحد الموضوع
كان شاد تيليفون وقالي شنو هوا؟
قلت ليه غنطلقو ..
هز عينيه شاف فيا وتصدم قالي شنو ؟
قلت ليه كيف كتسمع .. انا ونتا منليقوش لبعضياتنا
قالي واش نتي غتبقاي زوج طلق ولا شنو
قلت ليه اه حيت مامرتاحاش وراك شفتي على عينيك .
قالي لقيتيها سبة ولا شنو؟
قلت ليه لا ولاكن من الاحسن كل غازي يقصد بلده
مارضاش علاش نقول ايه ديك الكلمة وناض مارضاش مشا جمع حوايجو وماهضرش معايا ومشا خرج زدح الباب وراه حتى كان غيطير .. حسيت بواحد الراحة فاش خرج لا مثيل. لها وتهنيت وتنفست وجاني واحد الحماس لداري وبيتي ومشيت كنطوي الحوايج ونرتب اغراضي الانثوية وعطوريً ومجوهراتي حيت عارفة دابا كاينة غير انا وبيتي كيتسد بالسروت فاش كنمشي للخدمة .. تفرغت وصاوبت واحد الكيكة بالتمر والكركاع وعيطت لواحد بدل ليا القفل دالباب وتكيت مرتاحة درت فيلم كنتفرج فيه وماسك على وجهي حتى صرنا ليا تيلي طلعات ليا مو .. شفت نمرنها ورديتها للطبلة خليتها كتصوني مافيا اللي يسمع لصوابها وعقلها وخيرها وبقات تما كتصوني حتى صبح الحال .
نضت راشقة ليا وفرحانة ومتحمسة تقول جيت ضيفة !! لبست لباسي الراقي. للعمل وحسيت براسي كأنني كنت مسافرة وعاد غنمشي للخدمة واخا انا كنت ديما خدامة لاكن كنت فقوقعة واكتآب بوحدي
مشيت كنقرقب ونضحك طالعة للبيرو ديالي وراشقة ليا بمعنى الكلمة فرحانة بالحرية اللي رجعات ليا من جديد .. جلست فالبيرو ديالي دايرة رجل على رجل وعيطت للمحامية قلت ليها زربي ليا على الطلاق فأقرب وقت وماضربي حسبة لفلوس وتافقنا باش تكلف ليا بالدعوة وتساليها . يالاه قطعت رن الارضي ديال البيرو وكان مسيو عيسى عيط. ونضت نتكلم وانا جد جب جد سعيدة كأنني ترلدت من حديد او خرجت من شي حبس واخا كاع لحباصات درتهم راسي .
مشيت معطرة ومنورة كنت لابسة فيست فالبناني فلاشي كتحمق والسروال ابيض وقميجةمن لتحت ومكياج بارد . وقفت قدامو درت يدي قدامي وقلت ليها باباسامة كيبانو فيها سناني . صباح النور السي عيسى
وقفت بابتسامة العيد قلت ليه صباح النور السي عيسى .
هز راسو فيا وحط واحد الورقة بقا كيطلع ويهبط ورجع شاف فالورقة وسولني على الخدمة اللي فيها وقربت حداه كنوريه وشديت ستيلو كنسطر على شي حوايج فدوك الاورق وهوا متكي على البيرو بواحد اليد وحاطها تحت فمو كيشوف فشنو كندي واليد الاخرى موقفة بونية على فخدو جهة جيبو ومركز معايا وكيشير ليا بصبعو فين كنكتب .. واحد اللحضة حط صبعو وبقيت كنشوف ليه فيدو ونقارنها مع يد عمار .. فرق كبيرة حتى فأبسط التفاصيل. يد عمار خفيفة ومقزب دفاره وصبعانه رقاق كتبان فيها مسمومة وكيحركها بحال الو مافيهاش العضام .. اما يد عيسى كتحس بيها مرجلة ونقية بزاف لدرجة الكف دياله والدفار دياله حمرين وفيها الزغب كحل ناعس مع صبعانه ويدو وداير ساعة كتبان عادية متوسطة الحجم رمافيهاش كثرت الزواق والديكوات وخاتم دالزواج النايح دياله مع رجاء .. غير شفته رجعت لحقيقتي وطاح عليا واحد الضيم وتزيرت واحد التزييرة بغيت نطرطق .. حسيت بالندم الشديد وبقيت واقفة كنشوف فديك الورقة ويدي كترعد فوق منها .. بقيت كنقول شنو درت اعباد الله.. اش درت ؟؟؟ خربت بيتي وشتت شملي وفرقت بنتي عليا وعلى باها وخليت راجلي للي ماتستاحقوش اصلا .. ولا يمكن انا نيت اللي منستاحقوش ..انا اللي ماصبرتش ونعلت الشيطان وغرني راسيوالزين ديالي وكنت كنقول مابحالي حتى وحدة .. وزيني يشفع ليا فكل شيء ومايقدرش يتخلى عليا ولا يسمح فيا وحتى الى طلقنا يقدر يردني !! شوووف فين خرجت .. صدقت مطلقة بثلاتة ومزوجة راجل اخر وسالكة طريق اخرى غير اللي كنت فيها ومخبزة خبزة غير بوحدي. .. قتلت كاع الامال وكاع الاحتمالات اللي تخليه يردني ولا نرجعو انا وياه شي نهار .. اشنو دار ليا كااع ؟ ضربني ؟. جوعني؟ حتى زواجو بثلاتة ماشي عيب. باش نقول عيبو مزوج غيري .. وشنو كنت غنخسر كن بقيت مزوجة ومحافضة على حياتي ياك كنت عايشة بيخير وتحت جناح دافي وراجل نعول عليه وفوق هادشي كيعرف بينو وبين الله .. غير هادي كافية باش تغطي على داك التعدد اللي كان قاهرني.. ضربت شحال من خاجة زوينة وشحال من ميزة عرض الحائط وشديت غير فداك التعدد وها الساحة خوات وفازت رجاء السامة اللي لاسقة فيه كي تولالة حيت عارفة مغاديش تلقا حسن وماتبدل صاحبة غير ناكفس منو . حسيت براسي ضلمتو وتعديت عليه وهنتو اقبح اهانة وعاقبتو عقاب مايستاحقوش وما دارش علاش ، وكنت نقدر نرد عليه بطرق اخرى وماشي لدرجة الخلع حيت ماخانيش ولا حبسني وتعدا عليا بسي طرقة بشعة باش نخلعو ديك الخلعة كلها .. هاجمتو بسلاح كبر باضعاف من السلاح اللي ضربني بيه وكان علي نرد عليه بسلام على قد السلاح اللي ضربني بيه .
راجعت الاسطوانة فرمشة عين وماحسيتش براسي ختى طاحت دمعة من عيني فوق ديك الورقة حدا صبعو
نزلات ديك الدمعة قدامي قدامي وحليت عيني بقيت كنقول فصمت ويلي ويلي ويلي ماحملتش راسي ومترضيتش وبالزربة بعدت وجهي على ديك الورقة وبقيت كنش على وجهي بحال لا زعما شي حاجة دخلات ليا فيه ومسحت بالزربة .. اما هوا ماعرفتش واش نتابه ولالا مادار حتى ردة فعل وحتى فاش قطعت الشرح وبديت نحك عيني ونخرج الخشة زعما ماشافش فيا وعاد زاد تركيزه مع داكشي اللي كنت كنسطر عليه وهز ليه الورقك فيدو كيقرا حتى رديت النفس وتسرح ليا التنفس وسولني وهوا كيشوف فيها بجدية وقربت غير شوية باش منحسش بداك الصهد اللي كيجي بينيو وبينو وديك الطاقة اللي كتمشي وتجي مني ليه ومنو ليا بحال الماص . شرحت ليه وبصوت منخفض وغير بشوية با نعرف شنو كنقول ويفهمني بلا منقوي فالهضرة وانا مافيا مايهضر وطاقتي خرجات مع داك الكم ديال المشاعر اللي خرج من عيني .. بقا منتابه ليا وانا كنقلب الاوراق قدامو وحدة بوحدة وبالتقالة والاحترام وحتى كيجاوبني بنفس الطريقة وبدينا كنقاشو واحد الموضوع في اطار العمل وقالي بحال والو تمشي فميسيون الشهر الجاي
تفاجات قلت ليه ميسون ؟ فين مسيو حجوجي؟
قالي كاينين ثلاتة .. لندن وفرنسا و افريقيا
قلت ليه شحال فيها هاد الميسون امسيو حجوجي؟
قالي بالنسبة ليك نتي عماين اللي معاك خمس سنين
تصدمت واول حاجة جات قدام عيني هي بنتي وماكرهتش نقول ليه لا وراه بنتي وراه هادي وهادي و لاكن سكت حيت كن كان باغي يعاوني غايعاوني فيها منو راسو . حركت ليه راسي. قلت ليه واخا امسيو حجوجي
قالي المهم ديري بالك .. احتمال كبير تمشي
قلت ليه كنتمنى مانمشيش افريقيا على قبل الامراض وانا عندي بنت صغيرة
بقا ساكت ماردش عليا وطلب مني واحد الخدمة واستاذنت خرجت وتفركعت بالدموع فالبيرو ديالي حتى شبعت . وتبدل عليا الجو ودوزت داك النهار بالسيف وخرجت بحالي راجعة للدار ،. فالطريق تاصل بيا رقم غريب ورديت فايليفون لقيتها ام عمار !ً وكانت على طول اليوم كتتاصل برقمها ومكنجاوبهاش فالاخير شداتني وانا اصلا قلبي طايب وهي جالسة عليا لاباس مالاباس وقبل ماتهضر حديتهم ليها قلت ليها راني فالطريق اخالتي والبوليسي قدامي مايصلاحش ليا نهضر
قالت ليا دغيا دغيا بغيت غثر نهضر معاك ابنتي على عمار .. نعلي الشيطان ورجعي لراجلك وحلو مشاكلكم بلا مايسمعو الناس .. الطلاق راه ماشي هوا الحل
قلت ليها واخا واخا غير نوقف الطموبيل. ونهضرو حيت ماعندي كي ندير غيرقفني برليسي على تيليفون
قالت ليا ااه ايوا واخا صاافي حتى توصلي للدار الله يرصلك على خير
قطعت ولحت تيليفون قدامي طلعات ليا الدم جالسة توريني شنو ندير .. نتي اللي غتوريني شنو هوا الحل. قالك الطلاق ماشي هوا الحل نتسناك نتي تجي توريني شنو ندير فحياتي وكيفاش نعيش واللي عارفاه انا موحال كاع سمعتي بيه نتي
سديت عليها ورجعت بحالي وكل همي الطلاق والسفر اللي خرج على غفلة .. وصلت للدار والروتينات ديالي وتكيت نرتاح مع كاع داللويزة فبيجامتي وتاصلت ببنتي نهضر معاها ونسمع صوتها وتداوي ليا جروحي شوية .. بغيت غير نشوفها ونشم ريحتها ..توحشتها بزاف بزاف وبغيت نعنقها ونضمها..نعست على صوتها وصبحت دافعة شهادة طبية باش نرتاح شوية نت الستريس اللي كنعيش فالاواني الاخيرة واستغليت الخمس الايام اللي عطاني الطبيب ومشيت فيها للناضور عند بنتي .. مع الدخلة دالباب جات عندي كتجري طارت عليا وهزيتها عنقتها وبديت كنبكي فالباب حتى تخلعات ماما وفكاتها مني وسلمات عليا وعنقاتني مخلوعة كتسول ملي .. بغيت نقول ليها مالي وماعرفتش باش نبدا وشنو نقول .. اش غادي نقول ليها نقول ليها تجمع عليا كولشي وكولشي درتو بيدي ماضربني حد ،. جلسنا وبدات كتسول شنو واقع وجيت من اللخر قلت ليها غنطلق عاوتاني
ضربات فخادها كتولول وتسول وانا يدي على راسي عييت من الهم ومابقا كيهمني والو من غير الفكاك واللي بغا يهضر يهضر واللي بغا يغوت يغوت . قلت ليها على قلك الشيء اللي عندو والمصاىب اللي هوا فيها كمبرر للطلاق وخليتها كضرب فخادها وانفردت انا وبنتي خرجت من بالي كاع الافكار السلبية وجلست انا جنة فالبيت كنتحمعو ونضحو وكنسمع بابا كيغوت على برا ماعاجبوش الحال وداكشي اللي كندير .. حسبت داك الغوات والصدع كانه جاي من الشارع باش منزيدش نمرض وضحكت مع بنتي وعي حدايا وقلت ليها تمشي معايا؟
قالت ليا اه
قلت ليها نمشيو انا ونتي لواحد البلاصة بعيييدة
قالت ليا بصوتها الطفولي اه نمشي
قلت ليها ماتوحشيش ماما وبابا
قالت ليا نمشيو معانا
قلت ليها لا غنمشي غير انا ونتي .. نركبو فالطيارة ونمشيو
قلت ليها الطيارة وعجبها الحال دارت واحد الضحكة قتلاتني بالضحك ومشات كتلعب وهزيت تيليفون انا صونيت على عمار جاوبني وغضبان كيهضر بالكرام ..قلت ليه خاصنا نطلقو فأقرب وقت ونديرو طلاق الشقاق .. انا مسامحة ليك فكولشي ومغاديش نكلفك مصاريفي وعارفك الضروف ديالك .. وكل واحد فينا يدًطريقو
قالي انا جاوبتك حسابني معيطة باش تقولي شي هضرة زوينة حسن من هادي ونتي مزال شادة فالطلاق.. هانتي شوفي. انا غنعطيك وقت .. رتاحي شحال ما بغيتي .. وعاودي فكري
قلت ليه انا قررت قرار لا رجعة فيه .. نتا ماشي خايب انا فيا مشكل اما نتا مادرتي ليا والو ..
بقيت كنهضر ونعبر مابغيتش نخرج للعيب. وكنحاول نقنعو بهاد الطلاق حيت بغا ولا كره غادي نطلق واخا تنطابق السما مع الارض منبقاش معاه .لاكن مابغيتش الصدع ولا كسر الخواطر وبغيت نخليه على خاطرو ونبقا. على خاطري حيت مابقا عندي فين نزيد شي نقطة وهوا مزال كيتسناني نرجع وانا قطعت الورقة دالرجعة وساليت وكنشوف غير الطلاق وحياتي بعد الطلاق .
سديت معاه خليتو غضبان وقلبت وجهي جهة بنتي نضحك معاها شوية لقيتها فالبلاكار كتجر الحوايج والشكارة .. قلت ليها شنو كديري علاش كتخرجي الحوايج غتجي ماما تخاصم عليك .
قالت ليا باش نمشي فطيالا !!!
عالم الاطفال شحال زوين .. كنحمد الله على النعمة اللي عطاني وكن كانت معايا عمر الهم يدور بيا فالخقيقة . وهادشي اللي بغيت .. بغيت بنتي تبقاحدايا وتلسق معايا ونتلاسقو انا وياها منتفارقوش .. قررت نعلم مالين الدار وجلست ماما بيني وبينها اما بابا غضب عليا ماهضرش معايا وحتى انا ماعرفت اش ندير معاه وكيفاش نفسر ليه .. قلت لماما راني غنمشي للخاريج فميسو على حسب الخدمة بحال المرة اللي فاتت ولاكن غنتعطل شوية
قالت ليا وادابا نتي واش باغا طلقي ولا تسافري ولا شنو؟
قلت ليها الخدمة هي الاولى ..والطلاق راني مكلفة بيه محامية .. هاهياك عارفة شنو دير وشغلها هاداك المهم بعدا انا غنغبر على هاد البلاد باش حتى لاخر يقطع الياس من شي رجوع فخطرة .. اما الى بقيت هنا موحال يبغي يطلق .. خليه يقتانع ونساليو هاد المهزلة
قالت ليا ايوا نتي تعرفي ابنتي
قلت ليها كاينة واحد الحاجة مهمة
سولاتني شنو هي قلت ليها غندي جنة معايا
حدي قلتها ليها تبدل وجهها وتسيفات ومابغاتش وتقلبات عليا وانا كنبكي ونشكي عليها باش تخليني نديها وهي كتبكي ومخرجة فيا عينيها مابغاتش وخلاتني ومشات للبيت ونعست كنبكي ونتنخصص خدا بنتي ونلعب ليها فشعرها حتى صبح الحال . متر عليا الهم والغم ومرضت وصبح بابا مكيشوفش فيا وكيعنق غير بنتي ويلعب معاها ويخرجها اما انا بحال الى ماكايناش .. زادت حتى ماما قلبات عليا وجهها وخلاوني ديك الخمس ايام كنتقلا وكن ما بنتي اللي توحشت كن رجعت فحالي. دوزت العطلة كلها مريضة ورجعت بحالي لنهار جديد فالخدمة واستعديت بخال ديما وستفت حوايجي وروايحي وصبحت الصباح داخلة لابسة فيست بنية بستة صدايف لقدام جوج حدا جوج ومحلولة وسروال باج فاتح مخطط بالبني وصباط بني وشالي وصاكي واناقتي المعتادة المتحرمة وليفيست ديالي كلهم فايتين السمطة دالسروال وراقيين ماشي مقزبين وكبار كيجيوني زوينين وكلشي كيسولني منين كنشريهم وبشحال .. وفاش كنقول ليهم راه كطيح عليا غير وحدة بالف وخمسمية مكيصدقوش كيحساب ليهم كناخدهم من السوق ولا الحوانت !
الحاصول. طيح بشحال مابغات كتبقا ماساوياش بالنسبة ليا حيت ماطيحاتش ليا شي راجل مقاد وديال بصح ولا ترجع ليا علاقتي مع عيسى او على الاقل ترجعو غير كي كان فطلاقي انا وياه الاول .. على الاقل كان كيبتاسم ليا ويحتارمني ويسول على احوالي وكيعاملني مزيان .. اما دابا تقلب كولشي .. حتى الشوفة هي اللخرة الى ماخزرش فيا ما يشوفش كي الناس ..
بديت نهاري فالخدمة وهاد المرة مادخلت عند مسيو حجوجي وماعيطش ليا وكان عندي اجتماع مع الناس اللي معايا حول هاد الميسو اللي خرج فيها قرار السفر وطاحت فيا لندن .. كنت كنسمع عليها وصافي عمرني تخيلت راسي غنمشي ليها .. من واحد الناحية فرحت غير غنمشي نغبر واحد العماين على هاد البلاد والشعب المعاق ذهنيا ونبدل العقليات والجو وحتى الكمامر اللي معايا فالخدمة ونقابل كمامر اخرين ونبعد على ريحة عيسى اللي كنشم تقريبا كل نهار والطيف ديالو اللي كيطوف قدامي .. على الله ينسا شنو درت فهاد العماين وننسا حتى انا ونعيش قصص اخرين ينسويني فشنو عشت كامل .. جات فوقتها وبغيتها .. بغيت نغبر مايشوفني حد مانشوف حد .. وعماين راه قليلة كانو يعطويني سبع سنين نمشي تغرب فيها . تكون غير بنتي معايا والله يجعلهم يعطيوني حتى عشرين عام ونبقا نجي طل على واليديا مرة فالعام ونمشي نتغرب ننسا الناس اللي كنعرف وينساو عليا وعلى ريحتي ونمشي نبدل حياتي ونجددها وننضف راسي وتفكيري ونعاشر قوم وحدين اخرين وانمتص منهم الطاقة الاجابية عاد نجي ونجي بسارة وحدة اخرى .. اما ماحدي هنا وبعقليتي اللي كبرت عليها و بعقلية المجتمع ديالي عمرني نتبدل. ولا نتفاتح. ولا نتعلم حوايج جداد وندخل على تقافة جديدة ونكون مختالفة على الناس هنا .. هادو هما فوائد السفر خارج الوطن .. الانسان كيتعلم ويتفتح ويتعاشر ويتعرف على ثقافات جديدة ويزيد من الرصيد المعرفي والفكري دياله ماشي يبقا محدود وحتى الخيال دياله محدود منحاصر بين داكشي اللي كايشوف وكيسمع فقط . ولندن عاصمة ديال دولة ترفع لها القبعة .. شعب من ارقى الشعوب وليها تاريخ وغادي نستمتع فيها ونستافد منها وحتى بنتي مزيان ليها تعيش تما وتقرا وتتعلم وتسافد منهم اللي يتفعها .. حتى الى رجعات هنا ترجع مشحنة بافكار ايجابية وعقل سليم
جهزت نفسي للسفر وقررت قرار لا رجعة فيه بخصوص بنتي.. حتى انا عندي الحق فيها وبغيتها تعيش معايا ونتحمل المسؤلية شوية و علاش اللي منخرجهاش تعيش فبلاد زوين وتتعلم وتكون احسن من دابا مالها ماعليهاش الله .. الى بقات فالناضور مغتعلم حتى حاجة وطلع بحالي مقلوبة عليها القفة .. غتعلم الدين مع بابا والاداب ولاكن تفكيرها غايبقا محدود ومتعرفش تتصرف مع الناس كي كنت انا .. انا بغيتها تكون شخصيتها وتقويها وتتعلم تقول اه وتقول لا وماتحشمش بحال اللي كنت كنحشم حتى جبتها فراسي فسبيل رضى الناس .
كتبت ورقة نقدمها للادارة بحال اللي كيدير الكل قبل السفر . كيكتب فيها الضروف دياله اللي كيعيش والمتطلبات دياله و اي حاجة متعلقة بيه وبالسفر باش مايتسببش فشي مشكل ولا يسبب هوا مشاكل لراسو . وانا كتبت ضروف طلاقي اللي كنعيش وكتبت توضيح كبير بخصوص هاد الموضوع وانني فطريقي للطلاق بدرن رجعة وموقعة تحت ديك بدون رجعك كتأكيد عليه حييت كيسولو على ضروف الزوج وواش غيمشي ولالا وانا درت النقطة ديالي الخيرة بخصوص هاد الامر .. والاضافة اللي درت هي بنتي . طلبت تسافر معايا وتبقا تحت الحضانة ديالي وقلت انها تحت حضانتي ولايمكني نتخلا عليها وأكدت ليهم انني غناخدها معايا ووقعت ودفعتو مباشرة للادارة واخا عارفاه غادي يدور ويدور ويوصل لعيسى ويقدر يتكشف الامر ديالنا فهاد المرحلة اللي وصلنا ليها .. ومع ذلك مكيهمنيش الامر واخا عارفين انني مطلقة وماشي بعيد يكونو عارفين بيمن حيت اكثر ناس كيعرفو عليكن الكبيرة والصغيرة عما الناس اللي خدامين معاهم وكيطالعو على اسرار الدولة فكيف يعقل ان مكان بحال هادا اللي خدامة فيه يعطيوني السر بلا ميعرفو لمن عطاون وشكون معاهم ! لاكن بالرغم من معرفة اسرار الموضفين فكيبقا كلشي سر فسر شي مكيفضح اسرار الاخر لاننا هنا باش نسترو ماشي باش نفضحو وعقاب اللي كيخرج شي معلومة حساسة او اي معلومة كما كانت عقابه عسير جدا .
المهم ومافيه هوا ان الطلب من بعد ما دفعتو ومشا من مكتب لمكتب وتوقع من مدير لمدير ووصل عند مسير حجوجي باش يوقع ليا عليه . تفاجأت بالرد من بعد داك الاسبوع الطويل اللي كنت كنتسنا فيه ونوضني اتصاله من البيرو ديالي ومشيت كنطقطق بطالوني حتى لعندو وكنت لابسة كسوة كحلة انيقة بالدونتيل من لفرق وجيلي ديالها اسود قصير ودخلت للمكتب دياله ليقيتو مشغول وقلت بابتسامة واحترام
صباح الخير مسيو حجوجي
حرك ليا راسو بالايجاب قالي صباح لخير وقربت نشوف شنو كاين .. قالي باغا تدي بنتك معاك ؟
طلعات معايا الصهدة والزمت وقلت ليه بابتسامة خفيفة اه بغيت نديها امسيو حجوجي
مد ليا الورقة اللي موقعة من طرف ثلاتة دالمسؤولين الا هوا وقالي خاصك تجيبي الموافقة ديال الاب ديالها
برد ليا الدم فوجهي وشديت الورقة فيدي كنشوف فيها وقلت ليه واش ضارورية ؟
هز عينيه فيا وشبك اصابعه مع بعض حدا فمو وقالي وكيفاش بغيتي نوقع ليك على هاد الطلب والاب ديالها تلقاه مافراسوش؟. سولتيه ؟ عطاك الاوكي باش نقبل ليك انا ؟ كاين شي دري كيخرج بلا موافقة الواليدين بجوج !!
طأطأت راسي قلت ليه راكم عارفين امسيو الحجوجي باللي انا وباها منفاصلين
حط واحد الستيلو من يدو وتلفت يشوف شغلو قالي منفاصلين ولاماشي منفاصلين سيري جيبي الموافقة واجي
بقيت واقفة كنشوف فيه بغيت نبكي وتلفت لقاني مزال واقفة وشار ليا براسي قالي يالاه سيري. يعطي الموافقة واجي نوقع ليك على الطلب ديالك
بلعت ريقي وكمشتها فصدري رخرجت من تما شادة ديك الورقة ورجعت للبيرو كنسرط فديك البكية حتى سديت عليا وانفجرت
بكيت حتى عيييت وطبت وبقيت كنفكر شنو. ندير ؟؟ كيفاش كيهضر وكيفاش كيتعامل !! بزاااف على هاد البرود وهاد السم .. لهاد الدرجة زعما نسا على خيالي .. واخا يكون كاع فقد الذاكرة من جيهتي مايديرش ليا بحال هاكا وعارف راسو وعارف اش كاين وكيسفطيني للمجهول زعما سيري جيبي الموافقة !! يقول ليا لا مالو على هاد سير واجي !!
دوزت داك النهار فالستريس وخرجت لعشية ركبت فطموبيلتي وقبل منقلع عيطت ليه فتيليفون وبقيت كنصوني ونعاود حتى طبت عاد جاوبني قالو السلام عليكم
قلت ليه عليكم السلام مسيو حجوجي معاك سارة الى عندك شي وقت هاد العشية بغيت نهضر معاك فشي حاجة
قالي كنسمعك غير هضري
قلت ليه ماشي فتيليفون
قالي وفين ؟
قلت ليه فشي. بلاصة عمومية وصافي
بقا ساكت وقالي واخا ..واحد الساعة وسيفطي ليا لوكاليزاسيون
قلت ليه واخا مسيو حجوجي شكرا. وقطعت ..وحطيت تيليفون وانا نستغرب !! قلت مالي كنهضر هاكا وكنقول ليه مسيو حجوجي ولا زمروري ياك مابقيناش فالخدمة علاش غادي نطأطأ ليه راسي .. صافي نتصرف عادي ..الخدمة خدمة والحياة الشخصية بووحدها .
مشيت للدار رجعت بدلت عليا وغسلت وجهي عاودت قاديتو ولبست هاد المرة كسوة فريش ملونة عكس ستيل العمل اللي كيمنع علينا نلبسو اللي بغينا وكيبغي ملابس تكون ديال الخدمة فقط .
لبست ديك الكسيوة حمراء لونها احمر فاتح وواضح كانها مائلة للبرتقالي وكمامها واسعين شوية ومجموعين بخيرط فالمعصم ولبست حداء بكعب عالي ومحوهراتي فيدي ودرت حزام رقيق بني وشال على راسي بطريقة عصرية وخليت شعري من القصة شوية باين اشقر ناعم .. تعطرت باشهى العطور وهزيت صاكي مشيت لواحد المقهى عبارة عن حديقة بستيل الطبيعة والخضورية وجلست طلبت عصير ورسلت ليه الموقع .. قلت على بيدمن يجي ناكل شي حاجة وطلبت ليا بيتزا دوزتها مع داك العصير وعيطت ليه يجمع بقايا الاكل وينضف البلاصة باش مايجيش يلقاني كنسرط. .. تسنيت واحد خمسة دقايق اخرى وهزيت عيني على غفلة شفتو قدامي كان لابس دجين وتيشورط كحلة ولايح عليه فيست خفيفة قهوية بما انه الربيع وحاط نضرات شمسية .. قالي السلام عليكم ووقفت بابتسمة قلت ليه السلام ومديت يدي نسلم .. حط يدو على صدرو وحرك ليا راسو رد ليا السلام بديك الطريق وخلا يدي فالهوا عاد تفكرت قضية السلام وجمعت يدي جلست قدامو بالادب وابتسمت قلت غهضر هاد المرة بصفتو بابات بنتي .. سولتو على احواله وعلى ولدو قالي الحمد لله وقلت ليه كي دايرة رجاء لباس عليها
قالي كولشي مزيان الحمد لله .
قلت ليه الحمد لله .
تنهدت وبقيت ساكتة والابتسامة كنوع من اللطافة واللباقة مافارقاتنيش وقلت ليه عيطت ليك بخصوص جنة
حيد النضاضر من عينيه وقالي الله يسمعنا خبار الخير .. ياكما عيانة
سكت كنرمش وكنشوف فيه باستغراب !! زعما شي أسىلة كيطرح لعجب وهوا عارفني علاش عيطت ليه اصلا
حركت راسي بالايجاب وبنفس الابتاسمة قلت ليه ليوم كتبت تقرير عليا وفيه بنتي بغيت ناخدها .. داك التقرير انا كنت عارفة غادي يوصل ليك .. وبما اننا مكناقشوش موضوع بنتنا وكتهضر منك لبابا بحال ديما .. ماجيتش طلبت منك الموافقة مباشرة بحال هاكا ..وداك التقرير كان فيه طلب الموافقة بطريقة غير مباشرة .. يعني الى وقعتي ليا عليه هاكا غتكون عطيتني الموافقة
ربع يديه وقالي اولا .. ديك البنت عندها باها .. قبل مانقررو فحياتها حتى كنتناقشو ونستاشرو على قبل مصلاحتها .. نتي باغا نوافق ليك على الطلب وانا ماعنديش حتى فكرة على شنو كيدور ليك فراسك وشنو ناوية ديري
ردت بهدوء. وقلت ليه لااالا انا حتى حاجة ماكدور ليا فراسي ابدا .. حنا مامولفينش نهضرو مباشرة مني منك وحيت الخدمة ديالنا حساسة ماصلاحش ليا نقولها لبابا يتواصل معاك بحال ديما .. هادشي علاش انا قلت نهضر على بنتي وداك التقرير كان فيه مسج ليك نتا
بقا صامت كيسمع ليا وقالي لا نتي قررتي وكتبتي طلب ولونصيتيه وانا اخر واحد يسيق ليه الخبار .. حتى يطيح فيدي بحال الى ديك البنت ماشي بنتي
ابتسمت بادب وقلت ليه بهدوء. لا بنتك انا ماقلتش ليك هاكا .. غير انا ماكنهرضش معاك باش نقول ليك شنو كاين .. بحال الى قلتها ليك مباشرة بحال الى كتبت ليك الطلب ومعاه الشرح المفصل وكولشي باش بلا متحتاج طرح شي سؤال.. هي هياا بحال بحال وانا عارفة اصلا باللي خاصني موافقتك .. عارفة هادشي بطبيعة الحال
بقا ساكت كيشوف فجهة فاخرى ويدو على فمو وانا كنشوف فيه ومحافضة على الهدوء ديالي والابتسامة والسياسة معاه باش ميرفضش .. ماهضرش وقلت ليه انا غنمشي وغادي نتغرب عماين .. كيفاش غادي نتغرب هاد العماين كلها وبنتي ماتشوفنيش؟؟ هي محتاجة ليا محتاجة تشوفني
قالي عاد بان ليك هادشي. شحال وهي مع واليديك حتى لدابا عاد تفكرتي عندك بنت ؟
قلت ليه انا مكنحاسبكش ماعندكش الحق كااع تحاسبني .. ومغاديش نهضر عليك ولا نهضر عليا انا كنهضر على البنت بوحدها .. اما الى جينا نهضرو علينا راه غنجبدو موضوع كبير مايساليش وغيجبد معاه غير المشاكل وصافي .. زايدون عماين كونتينيي ماشي هي سيمانة .. هنا راه كنمشي عندها كتجي عندي على الاقل كندوزو ايامات فالشهر وكنتشاوفو بزاف والى مرضات كنكون حداها وجنبها مكتعرفهاش نتا فوقاش مرضات فوقاش برات وكنبغيوش نصدعوك بهاد المشاكل.. كنقولو راه عندو ولد مشغول معاه مامساليش بلا منزيدو نصدعوه بالتخربيق
قلتها ودورت وجهي للجنب كنميق ونشوف بعيد خليتو غير كيشوف فيا كاع مجاوبني على ديك الهضرة وقالي بلا منزيدو نطولو فالهضرة .. البنت احسن ليها تبقا مع واليديك
شفت فيه كنسايس وقلت ليه الى سولتيها شنو اللي حسن ليها غتقوليك ماما .. حيت نتا كتحس بحاجة وهي كتحس بحاجة اخرى .. عماين مايجمعها غير الفم .. حتى هادو اللي حطوني فلاليست وهما عارفين عندي بنت صغيرة مسكينة وماداروش بوجهها وبغاو يبعدوها على امها الله يسمح ليهم ..دنوب ديك البنت على رقبتهم ..عارفين شنو كاين ومافكروش فبنت صغيرة يتموها ومها فالحياة .. بلحق ربي كبير انا حطيت امري بين يديه
كنهضر وهوا متكي على فمو هاز حجبانو فيا بقا مصدوم .. ربعت يدي وشفت فجهة اخرى ساكتة مطولا ورجعت قلت ليه انا اصلا ماغنمشي لا مع واليدين لا مع راجل لا حتى حاجة .. كتهمني بنتي نديها معايا
قالي راجلك مغيمشيش معاك؟
ضحكت وقلت ليه راجلي ؟. اشمن راجل؟؟ انا كتبت ليكم فالتقرير باللي دافعة للطلاق .. ومكايناش شي حاجة سميتها راجلي .. كنتسنا الطلاق يخرج ليا
قالي واصافي حتى يخرج وديها معاك
حليت عيني فيه وقلت ليه بيأس وانا معارفاش شحال غنبقا معلقة فالمحكمة !!
قالي وانا اش عرفني تدي بنتي لندن وتغربيها تما ويتنادم معاك الحال وتطلعي راجلك معاك لتما وانا هنا معارفش بنتي شنو كدير تما معاكم
قلت ليه نرقع ليك التزام؟.
بغيتي نوقع ليك التزام انا كااع الى ديتو معايا ولا تزوجت كاع تما ردها .. غنوقع ليك التزام فيه عماين نكرس فيها حياتي لبنتي وخدمتي باش هاكا تكون نتا مرتاح من جيهتها هاد العماين هادي
تنهد وقالي واخا جيبي الالتزام ويحن الله
حركت ليه راسي ووقفت هزيت صاكي بالتقالة وقلت ليه صافي واخا غدا فالصباح نكاليزيه ونجيبو ليك للبيرو
بقا كيشوف فيا ويحرك ليا راسو وقلت ليه الله يعاون السي عيسى حتى لغدا ان شاء الله
قالي بعفوية الله يعاون ومشيت بحالي والغصة فحلقي حسيت براسي باغا نبكي لاكن قمعت نفسي باش منطيح حتى دمعة ومشيت بحالي للدار جلست على واحد الطبلة كنكتب ونكمش فالاوراق ونقاد فداك الالتزام حتى صاوبتو وصبحت لغد ليه فالمقاطعة كاليزيتو وحددت فيه تاريخ الالتزام ونهايته مع تاريخ السفر ومشيت للخدمة معطلة بزاف .. سبقت منو هوا الاول دقيت عليه ودخلت ابتسمت وبوجه بشوش قرب ليه مديت ليه الالتزام بتقالة قدامو قلت ليه هادا الالتزام اللي طلبتي مني امسيو حجوجي نجيب .. وهادا الطلب اللي ترفض ليا
مديت ليه الاوراق بجوج .. قرا داك الالتزام وبقا ساهي فيه كيشوف وقالي واخا سيري للبيرو دابا
مشيت بحالي للبيرو وراسي خدام ماعرفتش شنو غايدير واش يعطيني الموافقة ولا لا .. بقيت كنطلب الله يقبل ومايتعكسش ولا يدخل المشاكل الشخصية مع العملية دوزت النهار الاول فالخدمة والثاني كذلك صبحت خدامة وتاصل بيا مشيت عندو قلت صافي غيعيط ليا على الطلب . دخلت ابتسمت وقلت ليه صباح الخير مسيو حجوجي
شاف فيا وقالي صباح لخير وبعفوية جبد موضوع المهمة اللي غنمشي عليها وكانت عندنا خدمة كثيرة بقيت كنهضر معاه ودايرة خدمتي كما يجب ومكنبغيش نخلي ليه فرصة فين يهضر ويعيب عليا .. كملت اللقاء معاه وطلب نني نغادر المكتب وماهضرش معايا غلى الطلب ختى بدا الخوف يجيني . خفت يضمس القضية وينساني ورجعت على اعصابي معلقة معارفاش شنو ندير .. دوزت اسبوع كله ستريس وخوف وكايعيط ليا ومكيجبدش ليا الموضوع حتى كنقول نجيدو ليه انا ونسولو ..واحد الراس كيقول ليا هضري معاه على برا وعيطي ليه فتيليفون خارج نطاق العمل .. بقيت على داك الحال حتى لواحد الصباح صبحت مهمومة والوقت مابقاش ليا .. بنتي دفعت ليها الباسبور وكنوجد ليها للسفر وحتى من الحوايج كنخرج نشريهم ليها ونتقدا ليها الحاجيات ديالي وديالها .. رحيلي كنجمع فيه دقة ودقة وكل شوية نتفكر حاجة وكنحط داكشي فالبيت ونوجد ونتمنى مايرفضش .. كنت فالبيرو جالسة كنشرب قهوة كحلة حتى عيط ليا ونضت فالبلاصة مشيت دقيت ودخلت قلت ليه صباح الخير مسيو حجوجي
هز راسر فيا بالتقالة بقا كيطلع ويهبط. ..كنت لابسة كوستيم نساىي كحل انيق وفيست ديالو فيها صدايف كبار لقدام جوج حدا جوج ووبودي دونتيل من لداخل وشال كحل على راسي وطالون .. بالتقالة قالي صباح الخير وقربت قدامو كنشوف غلاش عيط بانت ليا الورقة فيدو ديال الطلب وتحت منها توقيع جديد ..حسيت بوجهي سخن وحناكي تزنكو والفرحة كطلع معايا وكنقول ياربي. يكون قبل. ياربي .. مدو ليا وعينيه قدامو قالي ها الطلب ديالك .. شاف فيا وقالي كنتمناو مايطراو حتى مشاكل ودوز هاد الميسيو على خير
شديتها وعيني كيبرقو بالفرحة وضحكت قلت ليه شكراااا شكراا بزااف امسيو حجوجي الله يخلي ليك ولدك ويخفضو ليك
بقا غير كيشوف فيا وقالي امين.. قلت واش صافي نمشي؟؟
حرك ليا راسو بتااقل ومشيت كنجري خليتو وخرجت رجعت للبيرو عنقت ديك الورقة وبستها وطويتها وحطيتها فعيني حيت هي اللي غندوز ليا بنتي فالمطار وتخرجها ليا .. اه اه شحال طلعت وهبطت عليها .. وشحال رغبت باش نشدها . اوووف سخفت حسيت براسي ضربت طريق فالعقبة ووصلت .
بالفرحة عيطت لماما قلتها ليها لاكن ماعجبهاش الحال وقالت ليا واش باها خلاك بعدا تديها . قلت ليها اه عطاني الموافقة .. بقات عليه بالهضرة واش هادا اب واش كاين شي واحد يخلي بنتو ويسمح فيها ..وحرام فيكم هاد البنت .. الله ينعلها والدين .. بقات كتعطينا حتى شبعات وقطعات عليا وعرفتها غتعيط ليه هي وبابا ويحرشوه عليا باش مانديهاش لاكن واخا يطيرو دابا غنديها وماحدهم يالاه بداو يربيو عليها الكبدة نحديها ليهم قبل ماتزيد شوية ونصدق طالعة نازلة معاهم فالمحاكم اله يحفظ . وجعت بحالي وخدا ليا جميع الرحيل جهد كثيير وسهرت الليالي كنقلب فين نسكن وشي بلاصة قريبة للمقر فين ساكنة ونقية .. لقيت الغلا والشواط فالبلاصة اللي بغيت وقررت نشوف بلاصة اخرى متواضعة واخا بعيدة عليا وشديت واحد الدار من السيت ديال الكرا ديالهم وخلصت ليهم شهر تسبيق باش نلقاها واجدة وحجزتها ليا ، مشيت للناضور اخر مشية نتوادع مع مالين الدار وندي بنتي معايا .. طول الطريق وانا كنجهز نفسي للمواجهة وكنبني على ودني سد باش منسمعش كلامهم الجارح .
وصلت وقابلتهم وغير شافوني كحلو بالعما وبدينا فالصراع من الخطوة الاولى .. شد ليا نقطع وعيطو لعيسى جا لغد ليه باش يشوف بنتو قبل مانديها وفنفس الوقت يسمع لشنو بغاو مباشرة . تقابلنا كلنا فالصالون وناض النقاش وهوا غير ساكت وكيسمع ويحك فلحيتو ويشوف فجنة بتأمل ومرة مرة كيضحك معاها . اما انا مربعة يدي وعاطاهم بضهري كنسمع وبابا كيهضر ومقلق وكيقول ليه واش قابل على هادشي ؟. البنت تمشي للخاريج ومها بعدا ااصلا متقدرش على المسؤولية ديالها بوحدها. هي براسها خصها اللي يرد ليها البال بقا غير تهز المسؤولية دالبنت
ماعجباتنيش هضرة دبابا وبديت فير كنسوط. ماقدرتش نجاوب خفت يقمعني وخليتو حتى ناض للجامع ومشا معاه عيسى ورجعو .. ساعتها وجع مبدل ومهدن قلت بحال والو يكون عيسى هضر معاه وشرح ليه وقاليه عل طبيعة العمل ديالنا وحساسيته حيت كيعاود ليه كولشي بصفته إمام الجامع قبل مايكون نسيبو . اخيرا تقبل الوضع واخا بقا فيه الحال وطفا الغضب وقدرنا نتنفسو ونعسنا بيخير .
صبحنا كولنا شادين الطريق للرباط لداري باش نوجدو راسنا للسفر . كملنا الويكاند فداري وبداو كيجمهو معايا ويوصيوني وخافيين عليا وعلى بنتي وحاضيين الصغيرة والكبيرة .. اما بنتي فرحتها كانت فرحة العيد .. جابت ليا واحد القط من العمارة اللي ساكنة فيها انا فاش كانت ماما مطلعاها معاها وقالت ليا نديوه حتى هوا معانا . بقيت كنضحك قلت ليها لا وبديت نشرح ليها وهي مسكينة كتسمع ماما كتقول ليا دي كولشي. عنداك تنساي شي حاجة ولات حتى هي كدور وتجيب ليا اي حاجة.. اللي بانت ليها ديالنا فالدار كتقولي نديوها زعما راه كتفكرني وتعاونني وكل شوية طل على حوايجها اللي علقت ليها تسافر بيهم وتقولي ماما ماما لقيت فوقها دبانة وجريت عليها . ماما ماما صاكك لقيتو فالارض وحطيتو ليك فوق الطبلة باش ماتنسايهش . الحاصول حسيت بفرحتها وبصراحة حتى انا فرحانة وحاسة بقلبي كيفرفر باغا نشوف لندن ومتشوقة للحياة الجديدة والروتينات الجديدة . احسن حاجة طرات ليا فحياتي هي هاد الرحلة ديالي انا وبنتي الراس فالراس.
نصت الصباح مع الستة دايخة بالنعاس .. فيقت بنتي قلت ليها يالاه غادي نمشيو وناضت توكضات اكثر مني كن. انا اللي جا شي واحد فيقتي مع النبوري تقوليه مابقيتش باغا نمشي غير سير بناقص .. النعاس كيشد فيا بحال الضوء .
لبست ولبستها حوايجها واستقبلت اتصال عيسى على الريق .
الو .
صباح الخير
صباح الخير
مشيتو ؟
لا عاد خارجين ؟
نتلاقاكم فالمطار قبل ماتمشيو
واخا حنا دابا خارجين
اوك اللهم يسر .
خرجت برحيلي والضلام مع الفجر باقي النهار ماطلعش .. معايا بابا وماما والضيم طايح عليهم .. سبحان الله اول مرة يتختالف الشعور .. انا فقة السعادة انا وبنتي وماما وبابا فقمة الحزن .كان البرد ولبستها جاكيط ويبرديلة ودجين وطاقية وانا مونطو بني وسبرديلة ودجين بوي فراند وشال على كتافي . دخلنا للمطار لقيناهفكافيتيريا جالس ع كيتسنا وجا عندنا هزها فالسما باسها وكيضحك معاها قالها فرحانة
قالت ليه اه
قاليها تبقاي معايا ولا تمشي
قالت ليه نمسي
قلت ليه فخاطري. يالاه شد. الرضاا
شدوها واليديا كيبرسو ويبكيو عليها حتى بكاوني وطلبت منهم السماحة وشديت ليها فيدي وحدرت راسي لعيسى بابتسامة قلت ليه بسلامة . شار ليا بيدو قالي غندخل معاكم ودخل هاز جنة فيدو دوزونا هوا وشي بوليس سيفيل تما من ديالنا و التحق بينا جاب لينا الجوازات وهزيت عيني فيه لاخر مرة قلت ليه شكرا
حرك ليا راسو بابتسامة وتحنا عنق جنة وباسها وقالي تيليفون بيناتنا
دار لينا باي باي ومشيتا طلعنا فالطائرة خدينا المقاعد ديالنا وانطلقنا فالجو لحياة جديدة فبلد جديد
حياة جديدة .. دولة جديدة .. مجتمع مختلف ودولة الحضارة والامبراطورية ..
مرحبا بينا فلندن او انكلترا عاصمة القصص والوروايات على مر العصور .. عاصمة ابريطانيا العضمى .
ودعنا سارة القديمة .. بشخصيتها بماضيها وذكرياتها المقرفة .. وتسد الباب وتحل باب جديد وحياة جديدة .
من اللحضة اللي وصلو فيها وركبو فيها سيارة الاجرة المتميزة صاحبة الطراز القديم وهما منباهرين بجمال المدينة واختلافها .. بحكم حياة سارة دوزاتها كلها فمدينة صغيرة بالمغرب وعمرها سافرات خارج البلاد ونهار جا السفر انتقلت من دولة من درل العالم الثالت لأعضم دولة من الدول العضيمة ومباشرة للعاصمة ! كان كلشي مذهل فعينيها وفعينين بنتها اللي كانو كيراقبر كل شيء من داخل السيارة .. الاطفال والمارة فرق الرصيف والخيوانات الأليفة والشوارع الجميلة والمحلات الراقية .. القطار الاحمر اللي دايز قدامهم و هواتف الشارع الحمراء و حافلات النقل الحمراء .. جاو مع راس العام مباشرة لقاو الدنيا كلها اضواء والاحتفالات والزينة على المحلات والاشجار والمنضر اكثر مدهش .. تحمسو لهاد المدينة وحبوها من اول نضرة وتعلقو بيها وتضاعفات سعادتهم من بعد ما شافوها وعنقو بعض من شدة الفرحة والسرور .
وصلو للبيت اللي غيبدار فيه حياتهم وطلعو دايرين يد فيد دخلو للدار ..كانت شقة صغيرة جدا كافياهم بجوج .. من باب الدار كيبان مراح صغير بكنبكة دائرية على التلفاز اللي قدامها وجنبها مطبخ اصغر بكثير فاصل بينو وبين غرفة المعيشة صور قصير قدامو كراسي للحلوس وعليه خشبة لتقديم الطعام . وفممر اصغر كيأدي مباشرة لعرفة النوم وجنبها باب للحمام والمرحاض . واخا كانت الدار صغيرة لاكن كان اتاثها خفيف وقليل وانيق ونضيفة ومريحة فيها ويفي واهم شيء دافية ومجهزة .حطات حوايجها ولقات نضرة فالدار ومن شدة حماسها باش تعيش فيها وتحس بيها اكثر .. بدلات نلابسها ولبسات بيجامة وبدات فترتيب الاغراض والملابس اللي دوزات فيهم اسبوع وهي كتجمع ستفاتهم فساعة بلا متشعر وبدلات لبنتها وشعلات التلفاز وبدات تمشي وتجي فالدار بالبانطوفة هي وبنتها وتعلق تصاورها وترتب كتبها والاكل اللي جابت حطاتو فالمطبخ وبدات حياتها .
جاها اتصال فالواتساب فور ما دخلات كود الويفي فهاتفها وفتحات الخط. ردت وكان المتصل عيسى وجاوبات وهي فالنافدة الكبيرة كطل
الو السلام عليكم
عليكم السلام.. وصلتو ؟
وصلنا عاد
مزيان كي وصلتو
الحمد لله مزيان
جنة مزيانة ؟. دوزيها ليا
اه مزيان هاهيا . جنااا هاكي باباك
عطاتها التيليفون كتهضر وبدات كتقلب فالتلفاز حتى ردات ليها جنة الهاتف وكملات المحادثة
الو
واش كولشي. هوا هاداك الدار مزيانة مالقيتو حتى مشكل ؟
لالا الحمد لله حتى مشكل مكاين
المهم اي حاجة وقفتو عليها علموني وردو البال لراسكم
غير تهنا امسيو عيسى كولشي. مزيان كولشي هوا هاداك وغادي نقلب على لاكريش لجنة فهاد اليوماين حدا الخدمة باش نبقا ندوز عليها ونجيبها معايا
واش السكنة بعيدة على الخدمة ؟
اه شوية حيت لقيت تما الغلا
ااه لالا هاصك تبقاي قريبة انا غنشوف ليكم دار قريبة ليكم لكولشي.
واخا مسيو عيسى شكرا
لاشكرا على واجب .. اللهم يسر
تقطع الاتصال ورجعات لنشاطها وبحثها على مدرسة تقريها فيها بنتها .. بحث طويل عميق ماعارفاش فهاد المدينة حتى حاجة وشنو الزوين شنو الخايب وحتى شكون تسول مالقاتش وضاروري من مساعدة وشي حد قريب ليها يعاونها حتى تتأقلم وتتعايش .. سمحات فداك البحث وناضت خرجات هي وبنتها قبل مايطيح الليل كتقلب على محل المواد الغدائية ونزلات سولات الحارس ديال السيارات اللي فالحومة فن ساكنة عطاها نعت بكل احترام ولباقة ومشات على رجليها ..كان قريب ليها ودخلات اشترت المستلزمات اللي يدوزو ليها واحد اليوماين ولا ثلت ايام من قهوة وفرماج وخبز وزيت وبيض الى اخره ورجعات للدار بدات تجرب ادرات المطبخ فالطبخ .. طبخات سباكيتي بالطماطم والطون ومازعماتش على شراء اللحم خوفا من الحرام ورفرات على راسها هم التفكير والتخمام وخدات اسماك طازجة حطاتها فالثلاجة وحطات العشا ليها ولبنتها كلاو وحكو سنانهم ومشاو يدوزو اول ليلة ليهم بوحدهم فغرفة جديدة عليهم وسرير جديد ومدينة وبلاد جديدة ..حتى من الرائحة مختالفة تماما على الروائح المألوفة فالمغرب .
فوق سرير واحد نعسو وبغطا واحد تغطاو وعلى ضو خفيف بقاو كيهضرو معانقين .. سولاتها واش فرحانة معايا وكان رد جنة هوا عناق حار والنوم فحضن امها اللي اول مرة تحس بالامومة وتحس بالحنان من جهة بنتها . كانت كضن انها خصها تعطيها الحنان واكتشفت ان حتى البنت كتعطي لامها الحنان ونامو فخضن بعضهم. فسعادة وهناء .
الصباح جميل وصباح مختالف كليا .. لا من ناحية المناخ ولا حتى الاصوات .. بدات تتكلم مع بنتها الانجليزية فالدار من اليوم الاول باش تقدر تتأقلن حتى هي ومايصعابش عليها التواصل وبدات تعلمها الاشياء بالانجليزية ومحات الدارجة باش يولف مسمع بنتها اللغة بسرعة ويتعود عليها .. كثرات من الحوار ومابقاتش كتسمت وعلى مدار الساعة كتتكلم وتكلمها وتخاطبها وتسمي ليها الاشياء بالانجليزية ولاحضات ان بنتها كتستوعب وكتفهم غير من العينين وكتعقل .
فوسط. النهار وصلها مسج من عند عيسى كالتالي ..
السلام عليكم .
لقيت دار حدا مقر العمل وحداها لاكريش ديال الدراري الصغار فحي زوين .. وجدو راسكم تتحولو ليها هانا غنسيفط ليك التصاور تشوفيها والموقع ديالها
رسلات ليه رسالة كتسول على ثمنها ورد عليها قاليها ماشي مشكل الكرا ديالها انا غنتكلف شوفو واش عجباتكم وردو عليا باش نشدها
وصلوها الصور متابعين ودخلات شافتها لقاتها فمرقع جميل كطل على بني اثري. قديم زوين ومن البعد على واحد الشرفة كيبان ليها الجسر المشهور تصبح عليه وتمسي عليه واخا منضره بعيد لاكن اامشهد زوين والدار فراشها جديد وحديث وفيها لمسة فنية كانها ديال شي فنان او عازف روك او رسام . وافقات عليها على الفور ورسل ليها كلمة تم ✅ وقاليها تتحول فاليوم الموالي .
رجعات من جديد جمعات حوايجها كلهم بلا مضيع الوقت وصبحات فاليوم الثالت شادة طاكسي للسكنة الجديدة واخا ضاعت فخلاص السكنة الاولى لاكن فضلات راحتها وراحة بنتها على الفلوس . اول خطوة فالدار بانو ليها الجدران فاللون الرمادي الغامق وكله لوحات وتحفات فنية كانه معرض. فشتو اللوان وكنبة فالموطارد كبيرة مع اثات عصري جميل وشرفة اللي شافت فالصورة بكراسي مريحة و مضلة خشبية كبيرة وطاولة خشبية وارضية خشبية .. كان ليها تلفاز كبير جنبه خزانة ومطبخ واسع جاهز رمادي فاتح وغرفة ليها وحمام معزول على المرحاض وغرفة لبنتها وخزانات خشبية .. كانت سعادتها بالدار لا توصف وبقات كدور فيها فرحانة ماقادراش تصدق انها غتعيش فهاد الدار وتجلس فديك الشرفة الزجاجية تحتسي القهوة الصباحية ديالها وتطبخ فداك المطبخ الجميل .. بالرغم من ان لبنتها غرفة نوم لاكن خلاتها ليها كغرفة للالعاب واللعب فقط. ودخلاتها معاها لغرفة نومها فين تبقا تنعس حداها وفرق سريرها معانقين . . الترتيبات من جديد والنضام والنشاط اللي ماكينتاهيش ابدا ولا وجود للملل .
زارت المدرسة اللي تحط فيها بنتها وتكلمات مع مسؤليها وشافتها وشافت فيها اطفال من مختلف الجنسيات وارتاحت ليها وخدات ورقة فيهاالمستلزمات اللي خاص تشري لبنتها وبدات بالدوران حجة وزيارة . كتسارا هي وبنتها ودافعاها فالشاريو وكتهز وتشري ليها ولاحضات غلاء الاسعار فكل شيء. .. الدرويش صعيب عليه يعيش تما ولابد من مدخول كبير باش يقدر الانسان يعيش ومايحسش براسو محروم .. بدات كتحمد الله على الخدمة اللي خدامة والمدخول ديالها اللي كيضاعفوه ليها على اربع مرات ويزيدوها فوق الاضعاف نصف ثمن الكراء كمساهمة منهم وزيادات اخرى على التمريض والاكل والشرب .. وحيت هي ضمنات مستقبلها ودارت دارها فبلادها ومتبقاتش كتسنا تزيد اكثر ولا دير مشارع اخرى مابقاتش كتوفر فلوسها كلهم بحال باقي الرجال اللي خدامين معاها. فاش كيسافرو خارج البلاد ويستافدو من دوك الزيادات كيكريو دار على قد الحال وياكلو على قدهم وجمعو الاموال ومايجيو فين يرجعو حتى كيكون جمعو ستمية مليون ولا ربعية مليون ويدخلو بيها للمغرب. انا هي فاكتفت بدار ومدخول يغنيها وقررات تتفطح اكثر ودخر الثلت من مدخولها والباقي تعيش بيه وتتبرع ..
لهاذا خدات كل ما نفسها فيه من تقديك وبغات تجرب الاطعمة المختلفة ديالهم وشرات لبنتها شاريو من الالعاب عامر على للفم ودفاتر واقلام ملونة بشتى انواعها وصبورة وانواع الالعاب التعليمية وعجاىيب وغرائب الالعاب . وهي كدور جارة الشاريو لقات مكان خاص بالاشياء الالكترونية وبدات تكتاشف وبغات تجرب. .. خدات ليها بانضات للركابي غلاض مبطنين بصناطات من لداخل وعندهم جهاز تحكم كيدفيو العضام وفيهم هزاز كيدير المساج وخدات واحد اخر كيتلبس بحال الجيلي متين وحتى هوا عندو جهاز تحكم كيسخن الضهر والكتاف والعنق والجناب وكيدير مساج .
خدات من لون طرب وخرجات بحالها ومانساتش لبنتها شكيكيرة ومشات للدار حطات ليها كاع الالعاب فالبيت ورتبات اغراضها وحلات بعض المعطرات دالجو وانتهت من شغلها وصاوبات ليها اكلة دافية وجلسات فبيجامتها قدام التلفاز كتجرب اشياءها اللي شرات .. لبسات الجيلي فوق بيجامتها وتكات على ضهرها ولبسات البانضات دركابيها فوق سروالها وشعلاتهم بدات كتفيبري كلها والحرارة كطلع من كل جهة وسدات عينيها كتكمد وقالت.
الله على راحة .. ماعند السمقيلي منين يدوز .
خدمات اجهزة التدفئة فالدار وجلسات كتسنط لعضامها وتتفرج فالتلفازة وبنتها قدامها وسط الالعاب كتقز من وحدة لوحدة .
بعد فترة الاستراحة بدا وقت الجد .
صبحات الصباح ناشطة تبدا العمل.. فطرات هي وبنتها ولبساتها حوايجها وهزات ليها حقيبتها فيها الماكلة والماء ومشروب طبيعي وداتها لاكريش .. تخلعات ليها فالاول وبدات كتبكي واخا بداو المعلمات كيحاولو يليهوها ويفرقوها على امها الاي اصلا خرجات كتبكي خلاتها وقلبها معلق معاها .. كانو بيناتهم خطوات قليلة على الرجل بين الدار ولاكريشً والخدمة مكانتش مختاجة وساىل النقل. . بدات نهارها فالعمل مع ناس جداد وتعرفات على حنسيات مختلفة وكان عملها هوا مراقبةالوحدة اللي مشات معاها وتوجيههم و الاشراف على المهمة اللي تكلفو بيهاإيصال المعلومات والتقارير عبر المواقع السرية ديالهم .. وحيت سبق ليها ودارت نفس العمل فموريتانيا فمكانش صعيب عليها تخدم وتترأس الوحدة ديالهم وحتى الخبرة والتجربة اللي خدات فالسفر السابق خلاها تزيد تحسن من مستواها فالعمل ومابقاتش بوجادية بحال النهار الاول وكان كل همها تنتهي من العمل وترجع لبنتها .
خرجات فلعشية على وجه السرعة مشات عند بنتها تعرضات ليها بالاحضان وسولات عليها وعلى نهارها كي داز وطمنوها وخدات بنتهل خرجاتها لمقهى كبير وجلسو بجوج فرق طاولات وقالت لبيها
مافينا اللي يمشيو للدار ياك يطيب .. ناكلو هنا حسن ونمشيو نتساراو .. منبقاوش غير جالسين فالدار .. الدار نبقاو نمسيو ليها غير باش نعسو وصافي ..مكاين غير المساريا والدوران انا وياك
السكينة والهدوء. وراحة البال ..
سارة من النوع اللي كيدير خدمتو فقط مايزيد فوقو حتى ساعة وميقدم تضحية ولا مساعدة .. بحالها بحال الرجل الآلي كتشد الخدمة كديرها وكتمحيها من دماغها ومكتفكرش بزاف وكتهز هم من غير همومها الشخصية .. الواجب الوطني كتأديه بلا زيادة ولا نقصان وحتى واحد مكايخد منها لا حق لا باطل .. ربات الدنيا بركلة وهمها غير حياتها وبنتها لا غير .. شداتها من الجهة الخفيفة والساهلة واللي بغا يربح العام طويل .
حياتها فلندن افضل بكثير من دي قبل .. جميع الانشطة فلندن جرباتهم هي وبنتها و جميع الاماكن مشات ليهم والملابس المخيرة كيلبوسهم والاكل الجيد كياكلوه والمطاعم الزوينة كيجلسو فيهم .. حياتهم تبدلات وتأقلمو مع الجو ومع الناس وحتى طباعهم تبدلو وتعاشرو ناس بعقليات مختلفة وشهر بعد شهر زادو ولفو اكثر ونساو طباعهم القديمة وحتى الدرجة مالقاوش معامن يتكلموها وانعدمت فحياتهم اليومية الا بعض الكلمات اللي كينطقو بيها فقط.
من باب الواجب الابوي والبنت المشاركين كان عيسى كيرسل ليها مصروف بنتها شهرياا اللي يوكلها ويلبسها وحتى من إيجار الدار كان مكلف بيه وكان الاتصال بيناتهم تقريبا يوميا من اجل الاطمئنان على حياتهم وحالتهم .
مرت ست اشهر كلها فالهناء وقرر عيسى يزورهم ووطمأن عليهم ويشوف بعينيه باش يهنا بالو وبدا كيجمع حوايجو فغرفة نومه فأحد العطل الاسبوعية ورجاء واقفة حداه كتمشي وتجي بوزنها الزائد وانفجر فضربة وحدة لدرجة وجهها تبدل وحناكها بغاو يطرطقو ومزال كتبغي تلبس الملابس المثيرة فالدار كما كانت واخا جسمها مابقاش مساعدها . كانت لابسة بيجامة بكلونها مزيرة وشعرها الاسود مجموع وقالت وهوا متكي بواحد اليد على البلاكار كيسوط ويوف شنو ياخد معاه وشنو مياخدش
قالت ليه ماكرهناش نمشيو فهاد العطلة لمراكش نبدلو الجو .. ساجد مسكين قنط بغا يسافر قالي ماما قولي لبابا يديني مراكش نعوم فلابيسين توحشت الصيف
رد عليها وهوا على نفس الوضعية وقاليها حتى نرجع باقي الحال على لابيسين والجو مزال ماسخن مزيان
قالت ليه شحال غتجلس فهاد لندن ؟
هز تيشورط لاحها وقاليها على حسب الجو
ابتسمت وقالت ايوا كن غير مشينا كلنا حتى حنا بغينا نسافرو
تلفت شاف فيها وقال ليها بتعجب سعداتك مسااليا كتفكري فشنو تاكلي وفين تمشي.. ولاهيلا سعداتك
ربعات يديها كتسوط قالت ليه وشنو بغيتي ياك قلتي ليا جلسي من الخدمة هانا جلست شنو بغيتي اخر ؟ الجلاس فالدار كيمرض
قاليها وشنو بغيتي نشري ليك طيارة خاصة تعيشي فيها ؟؟ كااع العيالات جالسين فديورهم مقابلين القراية دولادهم .. وااصلا عاد جيتي من طنجة سيمانة ونتي تما هاداك ماشي سفر ..
تنهد وكمل كلامه بللتي هي احسن قاليها نقصي شوية من الماكلة وديري شوية الرياضة .. راه غتخرجي غير على صحتك اما انا ماشي شغلي كولي اللي عجبك .
قالت ليه دابا وليت مكنعجبكش ولا شنو؟
تلفت قاليها واش نتي كضعافي باش تعجبيني ولا باش تربحي صحتك ؟؟ لعجب ليك الاللة ..
مارضاتش تسمع بخال ديك الهضرة اللي عيا يكررها ليها باش تشوف حياتها وتنتابه ليها وتخليه يتنفس احسن من انها تبقا كدور بيه وحاضياه شنو كيدير
قلبات الموضوع وقالت ليه كن غير ديتيني معاك نشوف لندن
قاليها مرة اخرى ان شاء الله
سكتات شحال وقالت ليه بنتك تكون توحشاتك مسكينة .. حتى حنا توحشناها الصراحة ولفناها
حط حوايجو فصمت كيحسب الملابس الداخلية اللي ياخد وهي كتشوف معاه وتحسب قالت ليه بزااف عليك متاخدش الحوايج بزاف غتوحل فيهم .. نقص عليك البكاج
هز راسو وسد عينيه قاليها سيري شوفي. ساجد شنو كيدير .. دوختيني ماعرفتش شنو هزيت شنو خليت خليني نشوف شغلي وميكي شوية
مشات تشوف شغلها وجلس هوا بوحدو كيجمع حوايجو ودخلات عند ساجد لبيتو باستو فحنكو وجلسات حداه قالت ليه باباك راه كيجمع حوايجو يمشي للندن عند جنة .. داابا يمشي وتشدو تما ماتخليهش يجي اللهم شد فيه يديك معاه باش ترجعو بزز منو يرجع باش نتا تقرا
شاف فيها وقاليها لا قالث غيمشي ويجي مايتعطلش
قالت ليه لا راه كيقول هاكا باش متبكيش نتا .. ماتخليهش يمشي
رجع للموطور ديالو اللي كيلعب عليه وقاليها لا منقولوش
دارت يدوعلى يد كتشوف فيه وقالت ليه وعلاش ماتقولوش باك باباك. بغيتي جنة تاخد ليك بلاصتك وتخليك ؟. هي نتا هبيل
قاليها انا عاااايق بيك نتي اللي بغيتي تمشي
تصدمات فيه وقالت ليه شنو؟؟ انا اللي بغيت نمشي؟. وليتي كترد عليا الهضرة !
بقا ساكت كيزنزن فالموطور ديالو ماجاوبهاش وهي كتشوف فقه وتنخزو فاللخر قالت ليه مابغيتيش ياك ؟. واخا وا من هادي ماتهضرش معايا .. ماتقوليش. كاع ماما واجلس دابا لعب تما حتى تشبع
ناضت وخلاتو متبع ليها عينو بنص عين حتى خرجات وبدا كيحاول مع الموطور ديالو يخدم وناض خلاها مشا لبيت النعاس طل على باها ودخل عندو بيأس جلس حداه كيشوف فيه . انتبه ليه عيسى وتوقف على الحركة قاليه ساجد؟ مالك كضرك شي حاجة ؟
شاف فيه ساجد بانزعاج وقاليه علاش مابغيتيش تديني معاك ؟
صغر فيه عيسى الشوفة مطولا وجلس القرفصاء قاليه هضرنا وعاودنا فهادشي وتافقنا قلت ليك غنمشي نشوف ختك مريضة وضربها البرد ونتا مابقيتيش صغير وليتي راجل غتبقا تحضي الدار .. شكون غايرد البال هنا واش حساب ليك مزال صغير ؟. مزال تغضب وتبكي ؟ هادي هيا انا راجل انا منعرف شنو ؟؟
بقا ساجد ساكت مطولا مالقا مايقول وعيسى كيمسح على شعرو وقاليه. عشر ايام ابابا وغنرجع وغنبقا معام كامل .. اما ختك مسكينة راه مكتشوفني ماكنشوفها وغنجلس معاها عشر ايام وصافي وغنخليها تما ونجي ! واش منشوفهاش؟.
قاليه ساجد لا شوفها وحتى انا توحشتها
قاليه عيسى غتجي فالصيف وغنسافرو انا ونتا وهي فين مابغيتو تافقنا
حرك ليه ساجد راسو ورد عليه عيسى قليه صافي مغنبقاوش نعاودو ونعاودو كل مرة الهضرة
حرك ليه ساجد راسو وناض خرج خلاه وتحنا عيسى القرفصاء على الباليزة وعيط على رجاء دخلات طلات عليه وبلا ميهز راسو قاليها بعدي من الولد خليه يديها فقرايتو وماتبقايش تعمري ليه راسو بالخوا الخاوي
دارت يدها على فمها مصدومة وقالت ليه فين عمرت ليه راسو
ضرباتها بنكرة .. بقات كتحلف باش تحيد ليه الشك فاللخر قاليها صافي تيقتك براكة من الحلوف غير مرة اخرى ماتعاوديش بحال هادشي
تنهدات ومشات خلاتو كمل شغلو ووجدات ليه الحمام بالفوطة والمساحيق وسخناتو ليه وخلاتو حتى دخل ومشات طيبات العشا وقادات الطبلة وجلسات كتسنا هي وساجد وغضبانة عليه مكتهضرش معاه وهوا جالس وكيشوف قدامو حتى خرج عيسى من الدوش حاط الفوطة على كتافو وشافو فديك الحالك الضيم طايح عليه وقاليه علاش مكتعشاش ؟
قالت ليه رجاء كنتسناوك مابغيناش نتعشاو بلا بيك
قاليها وعلاش حطيتي دابا مللي كتسناوني واش النعمة كيتسناو عليها الناس؟ صافي تحطات كولو
جر ساجد قاليه اجي ولدي اتعشا اجي
قاليه ساجد مابغيتش مافيا اللي يتعشا
شدو عيسى شاف فيه مزيان وقاليه علاش مابغيتيش تتعشا مالك؟
غرغرو عينين ساجد بدا كيبكي وشدو عيسى عنقو بقوة وشد ليه فوجهه وقاليه قولي مالك علاش كتبكي
قاليه ساجد بصوت مبحوح والو
حط ليه عيسى راسو على صدره وبقا ساكت كيشوف قدامو في حيرة وسايس معاه حتى تعشا ورجاء ساكتة كتشوف فجنابها حيت عارفة هي سبب الضيم اللي طايح على ولدها ومع ذلك بقات مصرة على قرارها باش تربيه وتوعده يسمعها .
انتهى العشا ودخل ساجد لبيتو ينعس ودخلات رجاءًوعيسى لبيتهم وسدو عليهم بابهم .. مشات لفراشها تكات ومراقباه شكايدير .وكان كيقلب فالبلاكار ديالو حتى لقا جواز السفر الخاص بساجد وتلفت عند رجاء قاليها جمعي ليه حوايجو غنديه معايا ..وديري بحساب الجو فلندن .. بارد شوية ومغيم
من الصدمة ناضت جلسات قالت ليه بتلعثم. كيفاش غتديه ؟؟. غتديه غير هوا ؟؟
تنهد وقاليها بعفوية وهانتي كتشوفي الولد سمع غنمشي ختو تبدل .. وشنو غندير نخليه هنا مريض ونمشي
بتردد وتلعثم قالت ليه ايوا نمشيو كاملين شانو فيها
حط الجواز حدا راسو ومشا تكا بلاصتو قاليها الليل هادا مافينا الل يهضر ..وجمعي الى غيتجمعي وخلينا نعسو الصباح غنوضو بكري
ربعات يديها وقالت ليه لااالا ثا نمشي مع ولدي يا يجلس ماعندو فين يمشي بلا مو . هااي هاي على يمشي
هز راسو من بلاصتو بتااقل وعينيه كيخرجو فيها تدريجيا وقبل ماينوض معاها على هضرتها قالت ليه صافي صافي هانا غنوض صافي
لاحت لغطا ناضت بالزربة وكما كان نايض رجع لبلاصتو ودخلو عينيه بلاصتهم وقاليها ايوا قلبي على الصدع فهاد الليل
سكتات ماجاوباتوش وسهرات كتجمع الحوايج وهوا ناعس حتى صبح الحال وناض لبس حوايجو وهي ناعسة فبلاصتها نعاس الموتى .. ماحساتش بيه فوقاش ناض وفوقاش لبس وفوقاش هبط الشنط. مشا لبيت ولدو وهوا ناعس حيد عليه الغطا وفيقو بزز جلسو وجرو للحمام حتى غسل وجهه وتوكض الدري وهوا مستغرب علاش مفيقو وكيقول ليه غسل بعدا وفيق عاد نقول ليك علاش . وفاش توكض جاب ليه حوايحو اللي حطات ليه مو فالحنب على الكرسي حتى لبيتو وقاليه كيضحك. . يالاه لبس باش نمشيو مشا الحال
استغرب ساجد قاليه فين غنمشيو ؟
قاليه عيسى مابغيتيش تمشي معايا لندن ؟
تحلو عينين ساجد وقاليه هااا!!! نقز عليه بالفرحة عنقو وعيسى كيضحك قاليه يالاه اصاحبي لبس سربي راسك غنتسناك ماتعطلش
شد ساجد حوايجو كيلبس وكان نعم الاخلاق والتربية و معتامد على نفسه وذكي ومربي احسن تربية وهاد الفضل كيرجع للبنى اللي شداتو وهوا قلب كينبض ورباتو اكثر من ولدها وتكفلات بيه حتى نسات رجاء انها ام وحملات المسؤولية للبنى وتهنات ولقات راحتها . لاكن من بعد وفات لبنى ورجع الطفل يعيش مع مو لقا فجوة كبيرة وكاع الحب اللي كيحس بيه كان اتجاه لبنى والعطف والحنان كلهم للبنى اللي كانت ليه ام ونعم الأم واخا كانو مشاكل بينها وبين رجاء لاكن عمرها حطات ساجد قدام المشاكل او حسباتو ولد ضرتها .بل تعلقات ليه لأنه ابن عيسى لحمو ودمو وربات عليه الكبدة حتى نسات انه ولد رجاء وصدقات انه ولدها هي وعيسى لا غير .
تحهز ساجد وخرج لابس كاط موطارد ودجينز وجاكيط بلو مارين من لفوق وطاقية . حيد ليه عيسى الجاكيط قاليه ماتلبسهاش دابا غتعرق حتى نوصلو لتما ولبسها على البرد اما دابا بلاش الجو دافيً هنا .
سمع ساجد كلام عيسى وصبح نشيط وفرحان وشدها فيدو دخل وراه لبيت النعاس فيقو رجاء اللي ناضت مضهشرة بسهير الليل ومنفخة وغضبانة قالت ليه بلاتي ندير ليكم لفطور
قاليها عيسى بلاش غنفطرو فالطيارة .
لقاتها من الجنة والناس مافيها نيت اللي يطيب والنعاس قاتلها بزز باش كتهضر ومامستاعداش حتى تزيد تنطق باغا غير فوقاش ترجع تنعس . حتى هما لباو ليها الرغبة وخلاوها رجعات فالنعاس وخرجو مشاو بجوج فالصباح الباكر شدو الطيارة
وصلات الرحلة للندن وحجزو شقة صغيرة مفرشة جنب الشقة ديال سارة وحطو اغراضهم وجلسو ارتاحو .. هز عيسى الفيكس ديال الدار تاصل بسارة وكان الحوار كالتالي .
الو
الو سلام عليكم
عليكم السلام معاك عيسى
ااه السي عيسى. اش خبارك لاباس كولشي مزيان. وصلتي ؟
وصلنا الحمد لله جا معايا ساجد
شكون اللي جا معاك!؟
ساجد اللي جا معايا
اااه ساجد حيت ماسمعتكش مزيان المهم الحمد لله على سلامتكم
الله يسلمك مشغولة واقيلا
لقيتيني فالخدمة .. ايوا وراك عارف
فهمتك ..وصافي بغيت نعلمك وصافي باش غدا الصباح نشوفو جنة
صافي واخا غنخرج من الخدمة دابا ندوز لاكريش نشد ليا واحد ديس جوغ باش تبقا معاكم فهاد العطلة .. كنت غنقول ليك سير لاكريش. الى كنتي بالي تشوفها ليوم ولاكن مغاديش يعطيوها ليك
لالا مايعطيوهاش ليا اصلا الضلام بدا كيطيح خليها حتى للصباح غتخرج بالليل تمرض ولا شي حاجة
اه بدا كيطيح .. الضلام كيطيح مع العصر هنايا
راييه داكشي اللي بان ليا
وا صافي خليكم رتاحو غدا ان شاء. الله قبل منمشي للخدمة ندوزها ليكم سيفط ليا لوكاليزاسيون فين نتوما
حنا حداك فنفس الكارتيي
فين حدايا ؟؟
حداك غير فالعمارة اللي حداك
ايوا مابعادينش علاش منتعشاوش اونسومبل ليوم مدام نتوما غير حدايا
اللي عجبك شوفي نتي
صافي نخرج من الخدمة ونتلاقاو حدا لاكريش مزيانة ؟
اوك مزيانة يا الاه الله يعاونك
بسلامة سلم على ساجد باي باي
قطع وحط السماعة تلفت عند ساجد قاليه كي جاتك لندن
قاليه ساجد مافيهاش الضوء
قاليه عيسى الضو عندهم هنا بالقياس اولدي ماعندك مادير نصبرو وصافي
ساجد : غنبقاو جالسين غير فالدار ؟
عيسى : هاحنا دابا شوية غنخرجو .. كليتي مزيان فالطيارة ولا باقي فيك الجوع؟
ساجد انا بغيت غير نشوف جنة
عيسى : يالاه دير الجاكيط ديالك على البرد نمشيو نشوفوها
خرجو على رجليهم كيهضرو قاليه عيسى واقيلا ماعجباتكش لندن
ميل ساجد راسو وقاليه. شوية
كنلو الطريق كيضحكو حتى لاكريش. وتلفت ساجد على غفلة بانت ليه متوسطة القد والطول لابسة سروال توب مجموع فيه فتحات فالجناب كحل وصباط عالي مقمقم كحل ومونطو بني معقود بحزام وصاك فيدها وشدة تركية بشال بني وجايا زربانة.. بقا كيحقق فيها حتى شيرات ليه بيدها كضحك قاطعة الشارع وتلفت بسرعة قاليه بابا بابا عا طاطا سارة ها هيا
تلفت شاف فيها ودار ابتسامة خفيفة حتى وصلات عندهم وشافت فيهم كضحك قالت ليه السلام السي عيسى. الحمد لله على سلامتكم كي وصلتو . وتحنات على ساجد باستو كتهضر معاه بداو يتبادلو اطراف الحديث بثلاتة على الاحوال وقالت ليه اجي ندخلو
دخلو معاها لاكريش عرفاتهم على المديرة ومدات الاخيرة يدها تسلم لاكن تراجع عيسى ابتسم ليها ودار يدو على صدره خلاها كتشوف مافهمات والو .
كان متشوق يشوف جنة هوا ساجد وبقات واقفين كيهضرو مع المديرة حتى خرجات عندهم شادك فيد صاحبتها ودايرة كرينات لشعرها الاشقر وجارة شكارتها معاها لابسة ليبة غليضة بيضاء وليبوط فالسومو ومونطو سومو فيرور حتى للركابي وكتهضر وتخاصم مع صحاباتها بالانجليزية. نتي درتي ليا نتي نخاصمة نتي صالحك وسارة تابعاها وسط ضجيج الاطفال كتعيط ليها وتجرها من يدها وهي كتشير بصبعها وتهضر على تصفية الحسابات مع البنات . شداتها سارة كضحك قالت ليها بالانجليزية ااجي شوفي شوفي شكون جا عندك
تلفتات جنة تشوف بعبوس من الصراعات مع البنات شافت باها قدامها كيضحك وساجد جاي عندها وحلات عينيها تصدمات شافت فسارة ورجعات شافت فباها وضارت عند صاحبتها اللي مخاصمها قالت ليها قالانجليزية باباا جا عندي ناااناانااا غنمشي للمغليب ونخليكم يالاه
جراتها سارة قالت ليها سيري بعدا سيري عند باباك
مشات كتجري تعرض ليها ساجد هوا الاول عنقها تلاحت عليه قالت ليه هزنيي
جرها عيسى كيضحك عنقها وبالفرحة بدات كطلع عليه وتتعلق هزها ومشا خارج بيها وسارة جارة الشكارة وكتهضر مع ام صاحبتها على داك الخصام وكيضحكو حتى خرجو وتوادعو برا وضارت تشوف بنتها سمعاتها كتقول لباها جبتي معاك سميسة
شاف فيها كيضحك قاليها ااودي يا ودييي على العربية ! فين هي العربية؟؟
شافت فساجد قالت ليه جبتي معاك سميسة
قاليها ساجد نحيدو الشمش من السما ونجيبوها !؟؟؟ اشمن شمش؟؟
جرها عيسى قاليها شوفي فيا .. هضري معايا العربية
شاف فساجد قاليه هضر معاها الدارجة اولدي باش تهضر معاك
قالت ليه سارة كتعرف غير دابا خرجات من لاكريش نهار كامل وهي بلبلبلبلبل بلونكلي صبر شوية غادي تبدا تهضر راسها
قاليها كتهضري معاها الدرجة فالدار
قالت ليه كنهضرو مرة مرة
قاليها خاصك تهضري معاها يوميا ماتخليهاش تنسى العربية
قالت ليه لا كنهضر معاها كنخفضها الاذكار والقرآن .. ضاروري
قاليها مزيااان وتلفت عند جنة كيهضر معاها وهي غطير تزادت فيا ضلعة فاش شافتو وروناتهم وبدات تفشش وسارة تابعاها .. سيري نيشان .. حشمي .. جلسي. وقفي. حتى وصلو للدار طلعو بالريكاطا رحبات بيهم سارة وقاليها عيسى شوفي واش غتبدلي ليها ولا شنو غديري نخرجو برا نتعشاو
قالت ليه منبدل ليها ما والو غندخلها غير طواليط
جراتها بزز داتها للطواليط قضات حاجتها وبقات كتوصي فيها تنقص من الطيران و خرجاتها طلقات ليها شعرها ودارت ليها بيرية بيضاء وطلقاتها مشات عندهم قالت ليهم يالاه صافي لبست وشافت فسارة قالت ليها بسلامة ماما
تمات سارة جايا كتسد الباب قالت ليها هاي هاي على بسلامة هانا جايا قالك بسلامة
خرجو مجموعين لمطعم كبير وجلسو على طاولة يطلبو الاكل .. عطاو لجنة تختار وبقات عليهم هادا .. لا هادا .. لالا هادا .. بحالكم .. بحال ديال دوك الناس
خدات ليها سارة لائحة الطعام قالت ليها اري نوريك شكون اللي حسن
شافت بنص عين فعيسى لقاتو كيشوف فيها وخافت تكون غلطات مع بنتو بلا ماتقصد ويقول ليها شي كلمة وقالت ليه بابتسامة الى بقيتي داير ليها الخاطر اكثر من لقياس تخرج ليك عقلك
قاليها ماشي مشكل باقا صغيرة مزال خصها الخاطر ويعيط ليها هزها على رجلو باسها وعطاها اللائحة كيوريها بالخاطر حتى حمقاتو وسدها قاليها شوفي. ماماك شنو بغات طلب ليك شوفي
كحز عندها ساجد قاليها بحالي انا اجنة خودي بحالي
قالت ليه لالا بحال ديال دوك الناس
دور ليها عيسى وجها قاليها هضري بالعربية
دورات وجهها ماداتهاش فيه وناضت مشطونة رجعات بلاصتها كتجلس وتوقف. وطلع على الكرسي. وسارة شاداها لاطيح وكتنفخ وقالت ليه مكديرش هاكا كتجلس مكتحركش غير حيت شافتك دابا داكشي علاش كدير هاكا
بقا ساكت كيشوف فجنة وكيجرها بغاها تجلس عندو وهي كل شوية طلع عليه وتجر فساجد وتلعب ..حطو ليهم الماكلة ومدات يدها تاكل وشدها عيسى وقفها وقاليها شنو كنقولو قبل مانبداو
بقات كتشوفيه قالت ليه شنو ؟
قاليها قلت ليه هضري معايا العربية يالاه شنو كنقولو
بقات كتوف فسارة اللي كانت كتخرك ليها لسانها بتخبية وشنايفها وجنة كتحقق فيها وشافت فعيسى قالت ليه بسم الله
قاليها مزيااان يالاه دابا عاد كولي
حطات سارة يدها على وجهها دوراتو وغطاتو دارت راسها ماراهاش معاهم وخبات الضحكة على ساجد اللي كان كيشوف فيها ويضحك عاق بيها وبقا ساكت وهز الفرشيطة قال بسم الله وبداو كيتعشاو مع فرط الحركة اللي فجنة .
عم الصمت من بعد العشا والصراع ديالو مع الاواني لا تتهرس وعيات جنة بالحركة وقطعات الحس تكات على الكرسي ديالها وبقات كتشوف بعينيها وعيسى كيضحك قاليها صافي عيتيي
ابتسمت سارة وقالت ليه هادي الساعة فاش كتنعس
شافت فساجد اللي كان شاد تيليفون كيلعب فيه وقالت ليه ساجد كي غادي مع القرايا
مسح عيسى على راسو وقاليها مجتهد هوا الاول ديما
قالت ليه تبارك الله الله ينجحك يا ربي
ساجد بقا ساكت حشمان وعيسى عنقو بدراعه وقاليها امين .. وديك البخوشة كتتعلم شوية ولا غير البسالة
حركات راسها كضحك وقالت ليه لالا ذكية تبارك واخا باسلة
سكت كيتأمل فجنة اللي بدات كترمش حتى نعسات وتنهد قال لسارة كي غادية مع الخدمة ولفتو الحياة هنا بعدا
دارت رجل على رجل تنهدات وشافت فجهة اخرى بتأمل وقالت ليه كما كان الحال احسن من قبل .. واخا الجو خايب وماكيشجعش على العيشة هنا ولاكن كاينين ميزات اخرين كيغطيو عليه . المشكل هوا فاش غتسالي المدة ونعاودو نرجعو للمغرب .. خاص الوقت عاوتاني باش نتأقلمو مع الحياة تما
هز كاسو ديال القهوى شرب منو وقاليها والواليد والواليدة مزيانين ؟. كيعيطو ؟
ابتسمت وقالت ليه الحمد لله . تقريبا يوميا كنهضرو معاهم .. توحشو جنة بزاف
حرك راسو بالتقالة وقاليها هضرت مع الواليد ديالك قلت ليه على الحج الى كان باغي زعما يمشي نمشيو ..
قاطعاتو قائلة ؟. وشنو قاليك ؟؟
قاليها قالي الى كان غيمشي خاصو يدي معاه ماماك حتى هي .. قلت ليه ماشي مشكل زعما نتكلف بالمصاريف وداكشي الى كان مامستاعدش من جهة المصاريف ولاكن مابغاش.. عييت فيه والو
بقات ساكتة كتخمم مطولا وقالت ليه يمكن عيان ولا شي حاجة
قاليها ماعرفتش .. المهم قلتها ليه قالي حتى نشوف
بقات ساكتة بابتسامة ويدها عل جنة وسولها على رمضان والعيد كي دوزوه وبقات كتجمع وتعاود هي وياه حتى وصلو لموضوع الطلاق ديالها وسولها قاليها مزال ماخرج ليك الطلاق
قالت ليه بلا مبالات. مزاال .. باقي معلق فالمحكمة وانا مامسالياش
قاليها علاش باقي معلق فين كاين المشكل؟
تنهدات وشافت وشافت فدفار يديها كتقشرهم وقالت ليه هاداك قليل الاصل مابغاش يطلق .. داير ليا بيت الطاعة وداك التخربيق . .
استغرب وقاليها كيفاش بيت الطاعة ونتي هنا فلندن
حركات راسها بالنفي بتتاقل وقالت ليه ماعارفنيش هنا اصلا .. الى عرفني غيزيد يلسق وانا بغيت نتفك قلت مع راسي انا اصلا غنجلس عماين هنا وخلي ديك الدعوة تما مجرجرة راه المحامية مكلفة حتى نشوفو شكون يعيا .. بغا بيت الطاعة راه خرج ليه .. اما انا هضرت مع المحامية قلت ليها دفع ليا اوراق ديال السبيطار باللي ناعسة مريضة باش منحضرش لدوك الجلسات الى سول القاضي . خليه يربح بداك بيت الطاعة ماعندو مايصور مني لا هوا لا داك القانون ديالو
تنهد وبقا ساكت مطولا وقاليها شنو كيدير هادا ؟
مارضاتش تقول ليه شومور وقالت شريك فشي شركة..
قاليها شنو سميتو ؟
بقات ساكتة كدور عينيها قالت ليه علاش ؟.
قاليها سولتك مابغيتيش تعطيني سميتو صافي ماكاين حتى مشكل
قالت ليه راني كنت دفعت الطلب ديال الزواج وكانت فيه سميتو وكنيتو
قاليها مابقيتش عاقل على سميتو فكريني فيها
بقات ساكتة مطولا كتفكر واش تعطيه ولالا والى ماعطاتهاش غنبين انها محسوسة وهوا بإمكانه يجبدها غير بتيليفون واحد وعطاتو سميتو وكنيتو وقاليها الانسان قبل مايحط وجلو خصو يعرف فين كيحطها .. زوج طلق داكشي مصالحش والباب الى تحل كيرجع ساهل ماهل فالحلان والسدان
قالت ليه اصلا مابقا كيهمني حتى واحد دابا .. الى مالقيتش راحتي مانجلسش .. كما قلتي نتا صعيبة غير البدية
دار يدو حدا راسو قاليها بقاي تفكري مزيااان قبل ماديري شي حاجة .. هانتي وحلتي مع هاداك وافكيها دابا
هزات كتفها وتغزز دفرها وقالت ليه لهلا يفكو خليه هاهواك معلق تما بحال الزبيبة .. اما انا راني عايشة كيتو هوا اللي طالع هابط.. نهار نرجع للمغرب غنجلس شهر ونعمر عاوتاني لبلاصة اخرى .. هادشي الى بغا يتساعد معايا الرئيس وقدر الضروف
هز حاجبو قاليها الرئيس يبقا مقابلك غير نتي ؟. راه حتى هوا عندو اولويات ومصلحة الوطن فوق مصلحة الموضف واش الموضف جاي يخدم البلاد ولا البلاد اللي خصها تخدم الموضف
قالت ليه بجوج ..كما هوا كيخدها تخدمو حتى هي
قاليها هاد الخدمة اللي خادماه ماقنعاتكش؟. الحماية اللي موفرة ليه مابانتش ليك ؟. سولي اللي مشاو للعراق ومشاو لسوريا وغزة .. هادوك هما اللي عارفين بحق بلادهم وكيتمناو يرجعو ليها. . اما نتي راكي فلندن وما ادراك ما لندن كيجي ليها غير شكون وشكون
بقات ساكتة فاللخر هزات كتفها بلا مبالات وقالت ليه المهم خال احسن من حال الحمد لله .. حتى واحد مالقاها كي بغاها . اصلا كن حياتي مقادة وفيها كولشي مقاد ومافيها حتى عيب. غنشك فينا واش الجنة .. نشك واش مت ودفنوني ومشيت للجنة .. حنا اصلا فالدنيا وباغيين نعيشو فالجنة مايمكنش . كل واحد والمشاكل اللي عندو
بقا ساكت ماهضرش وماقال ليها لا نوضي لا جلسي حتى جات منعندها وناضو كل واحد لدارو ..بغا ياخد معاه جنة تبات معاه وعطات ليه ووصاتو عليها ومشاتبحالها وكتقول عنداك غير ينعسها حداه وتبول عليه ولا مايفيقهاش بالليل للطواليط .. بقاعقلها مشطون واخا نعست ففاقت فنصاص الليل عيطات ليه جاوبها وصوتو مبحوح قالت ليه نوض جنة للطواليط غدير بيبي فالفراش .قاليها نوضتها
قالت ليه مابكاتش
قاليها شوية فاش مالقاتكش .. هزيتها ضرت بيها شوية حتى نعسات وحطيتها
قالت ليه اوكي تصبح على خير حتى لغدا
قطعاتورجعات نعسات ومع الصباح فاش كانت غادية للخدمةعيطات ليه لقاتو فايق.وسولاتو عليهاقاليها ناضت بغات تفطر شنو ندير ليها
قالت ليه هادا هوا الوقت اللي كتفيق فيه هاشنو دير هاشنو كتبغي وقطعات خلاتو معاها يعرف نيت شنو كتاكل بنتو وشنو مكتاكلش وشنو اللي كتبغي شنو مكتبغيش. ضربات الطناش عاودات عيطات كتسول لقاتهم خارجين وقطعات رجعات لخدمتها حتى للعيشية وتاصلات بيه قاليها رجعنا للدار
قالت ليه بغيت نشوف جنة وقاليها دوزي للدار عندها
ترددات فالاول تمشي عندهم فالاخير قالت بنتي تما اصلا ومشات دقات عليهم فتح ليها ساجد ودخلات سمعات صوتو كيصلي من البيت ولقات جنة فيدها زلافة ديال سلطة فواكه ومكسرات كتاكل ومشات عنقاتها قالت ليها حبيبة ديالي. نعستي لبارح بلا بيا مابكيتيش
حركات جنة راسها وقالت ليها لا ونتي مابكيتيش؟
بدات سارة كضحك وجلسات حداها كتلعب ليها فشعرها وتسولها فين مشيتو وفين جيتو وسولات ساجد عليها وعلى البسالة بقا كيعاود ويضحك حتى خرج عندهم عيسى ابتسم وقاليها السلام وجلس على كرسي فالطرف سولها على الخدمة وبقاو كيتابدلو اطراف الحديث .. شوية شوية بدات كتبع ليه العين وبنص عين وهوا نايض يجاوب فتيليفون حتى رجع ودورات وجهها كتهضر مع جنة وساجد وقالت ليها تبقاي. مع بابا؟
لسقات فيها جنة قالت ليها ديني معاك
قالت ليها سارة فين غنديك حشومة !!وشوور باباك غيبقا فيه الحال
سكتات جنة وقطعات الحس معنقة يد سارة وحاطة عليها راسها . رجع عيسى وجر عندو جنة قاليها علاش مابغيتيش تبقاي معايا؟.
هزات كتفها وقالت ليه لا نمشي مع ماما
دور ليها وجهها عندو وقاليها وباباك ؟
هزات كتفها وبقات ساكتة الشيء اللي حرك مشاعر عيسى اتجاه بنتو وشاف فسارة قاليها ولفاتك
قالت ليه شكون عندها من غيري هنا وشكون عندي من غيرها جالسين هنا فهاد الغربة
تنهد وقاليها ماتمشي غير فين مشات الله
ابتسمت فوجه جنة وقالت ليها نمشيو؟
حركات جنة راسها وشدات فيدها قالت ليه حتى لغدا ان شاء الله السي عيسى وندوزها ليكم الصباح قبل ماتمشي
حرك راسو بتتاقل كيشوف فيها ورمشات كتشتت النضر وخرجات دات بنتها ومشات بحالها
كان لقاء باارد .. خالي من المشاعر حسب ماكيهضر عليهم بجوج ..ًكانو الحوارات كلهم على بنتها وعلى الخدمة .. نهار على خوه ووكل نهار كايعاود نفسه حتى انتهت العطلة عند عيسى وساجد وبقا ليهم نهار واحد فلندن ويرجعو بحالهم .. دوزو ديك العشية ديال داك النهار مجموعين فمطعم وكان عيسى كيحاول يتقرب من جنة طيلة هاد الفترة لاكن كان تعلقها بأمها اكثر من تعلقها بباها وهادشي كان واضح بالنسبة لعيسى .. كان كيشوف كلشي على عينيه ومكانش عاجبو الوضع وماعندو كيفاش يخلي بنتو تبغيه بزز منو من غير الى سكنها معاها وعاش معاها دقيقة بدقيقة وثانية بثانية .. لاكن الامر صعيب او شبه مستحيل وماعليه غير يولف على هادالوضع الي كيألم .
نعسات جنة فأحضان سارة وشد ساجد تيليفون كيلعب وبقات جالسة هي وياه على اضواء المطعم الخافتة كيشوفو فالشارع المنير من لداخل .. تنهدات وتفكرات شيء ما وقالت ليه . تفكرت . قبل مانسا راني بغيت نسيفط بابا وماما للحج .. وماقلتهاش ليه حتى ندير ليه مفاجأة
ابتسم وقاليها مزيان الله يسر
قالت ليه بغيت نقولها باش تكون على علم انهم غيمشيو معاك فنفس الكروب .. والى كان ممكن دخلهم معاك للكروب ديالكم
رد بالايجاب وقال .. ان شاء الله
ابتسمت وقالت ليه الله يقبل ليكم .. ماكرهتش حتى انا نمشي للحج ..
قاليها ان شاء الله كلشي عند الله قريب
قاليت ليه كل عام كتمشي؟
قاليها لا ماشي كل عام .. هاد العام قلت نمشيو نحجو . منها حجة وندير عمرة على لبنى الله يرحمها
بقات ساكتة كتشوف فيه مطولا وقالت ليه خلات بلاصتها
تنهد وربع يديه قاليها كلنا ليها ..
وتلفت عند ساجد ابتسم وجرو عندو عنقو بيدو طبطب عليه حيت كان كيسمع وكان مزال متأثر بموتها لاكن ماكيدير حتى ردة فعل .. ابتسم ليه عيسى وقاليه غنديرو عمرة على ماما لبنى ياك
حرك ساجد راسو وبقا ساكت كيشوف فتيليفون وسارة كتأمل فيهم بجوج. . قالت ليه غتديه معاك
حرك راسو بنفس الابتسامة قاليها ان شاء الله الى كتاب
ابتسمت وقالت ليه ان شاء الله الله يقبل . نمشيو واقيلا مشا الحال
حرك راسو وناض وقف قاليها اري ليا جنة نهزها وهزها باسها وعنقها ناعسها خرجها وصلهم حتى للدار ودخل حط جنة بلاصتها وشاف فيها قاليها يالاه هوا هادا .. تهلاو فبعضياتكم وردو البال لراسكم
ابتسمت قالت ليه الصباح غتمشيو ؟
قاليها ان شاء الله .. دوز واحد اربع شهور ولا ست شهور ونعاود نجي نشوفها .. ردي ليها البال عفاك
تحنى على حنة باسها فراسها وخرج مشا بحاله وكانت هاداك اخر لقاء بناتهم واللي من بعده كملوها اتصالات فقط عبر الهاتف وكل واحد رجع للروتين ديالو
الايام كطير .. سارة من الدار للخدمة ومن الخدمة للدار .. دخل عليهم فصل الشتاء وزاد الجو كآبة وواخا كيخرجو واخا كيدورو لاكن الشمس اللي محتاجينها مكايناش . استمر الحال على ما هوا عليه حتى جاها اتصال من عند المحامية ديالها واحد النها وقالت ليها راه طليقك تاصل بيا على قبل الدعوة ديالك فالمحكمة واش فخبارك
استغربت سارة وقالت ليها لا مافراسيش علاش؟
ردت المحامية وقالت ليها تدخل باش تسالي هاد المهزلة وطلب مني الملف ديالك لاكن ماقدرتش نعطيه ليه
بقات سارة ساكتة وكتفكر مطولا وقالت ليها غير عطيه ليه
أكدات عليها المحامية وقالت ليها الى عطيتو الملف غنخرج من القضية
قالت ليها سارة الى كان غيتدخل يفكني من داك الجرتومة غير خليه يتدخل .
قبلات المحامية طلب سارة اللي قطعات معاها وتاصلات مباشرة بعيسى سولاتو على الاحوال وقالت ليه راه المحامية قالت ليا بغيتي الملف ديالي
رد عليها قاليها اه انا طلبتو ليها نشوفو هاد القضية اللي مابغاتش تسالي
قالت ليه اه ماشي مشكل قلت ليها عطيه ليه .. سمح ليا السي عيسى على هاد الديغونجمو ماكنتش باغا نشطنك فالمشاكل ديالي
قاليها امم.. مهم دابا نتي ديها فخدمتك وردي البال للبنت وحنا هاحنا غنفكو هاد الدعوة
شكراتو حتى طيباتو بالشكر ورجعات لخدمتها وروتينها ونعسات على جنب الراحة مدام عيسى اللي شد الملف ديالها فالطلاق أكيد بين يديها .. بقات كتسناه على احر من الجمر حتى فاجأها اتصال عيسى وهي فالخدمة واول حاجة سولاتو عليها مللي جاوبات هي الدعوة ديالها وقاليها باستهزاء.. السيد مشا كيخطب وكيبني فالمستقبل فجهة اخرى .. قلتي ليا شريك فشركة
قالت ليه اه
قاليها شكون قالها ليك ضحك عليك هادا .. هادا خدام فسونطر دابيل وكيتفلا عليك
قالت ليه يمكن دار فاييت ولا وقع ليه بروبليم
ضحك قاليها بروبليم .. ااودي . المهم على سلامتك راك تفكيتي
قالت ليه بصح صافي طلق؟
قاليها طلق ؟. واطلقناه غيابيا بغا ولا كره كن جات عليه هوا ميطلقش .. المهم عل سلامتك ..مرة اخرى عرفي فين كتحطي رجلك زوج طلق غيطيحك شي نهار فشي سفاح .. المهم الكداب فلتي منو مرة الجايا ردي بالك
قالت ليه واخا شكرا سمح ليها عدبتك السي عيسى ..سلم على رجاء وساجد وتهلا فراسك
يتبع
التعليقات 0