هم ونزاح وقدرات تنفس .. جلسات بوحدها فالخدمة وقات كتفكر وتقول. . شووف ليك السيد اللي درت ليه الخلع هوا نيت اللي فكني من تزويجة فالصو .. ناري العيب شحال خايب وشحال زوين تجاوب الناس بلخير .. كنحس براسي منسوا والو وحتى الوجه باش نشوف فيه مابقاش عندي .. على الاقل كن تعامل معايا خايب كنت غنبقا مرتاحة ونخرجو للعيب مايبقاش فيا الحال .. لاكن دابا وليت انا اللي مامزياناش وانا اللي مانسواش.. شداني لشي خلع اعباد الله وفين كان عقلي وفين كنت كنفكر .. وشووف دابا واش باقي نرجعو كي كنا .. واخا نحلم بيها بالالوان مانرجعو على الضوسي لكحل اللي عندي .. كن واحد اخر مايشوف فيا حتى الشوفة واخا نكون انا اللي كنفرق الزين على عباد الله .. بلحق هادا دوايا هادشي اللي يصلاح ليا .. الراجل المسكد هانا خليتو لرجاء اللي تعرف ليه اما انا سري ولاد لحرام .. كنت مزوج براجل تتمناه اي وحدة وفاللخر ضيعتو وشوف واش نلقا واحد نكمل معاه حياتي ولالا .. ولا توقع شي معجزة ونرجعو .. هه .. واخا نطير مايردنيش بلا منطمع فشوية دالخير دارو معايا ..
سهات كتخمم وتدي وتجيب حتى عيات .. عقل كيقول ليها يردك وعقل كايقول ليها والله لا حلمتي بيها . اش دير ما دير تبين ليه انها ندمات وتبدلات وتحاول تردو ليها هادشي الي كان مزال كيشوف جيهتها بعدا ومزال ماحشم من التعدد .
بعد تفكير عميق قالت خلي ينسى ليا هاد الزبلة دالزواج ويحن الله .. ماشي بيه فيه نبقا نزنزن عليه .. خلي كاع حتى نرجع للمغرب .
دخلات سوق راسها وشدات فتربية بنتها وخدمتها وبينات على الكفاءات ديالها ودارت لواليديها مفاجأة ديال الحج على الله يغفرو ليها ديك الهربة اللي دارت لبنتها .. كان هاداك هوا النهار الكبير عند واليديها ماتوقعوهاش وعرفات باها باغي يحج لاكن العين بصيرة واليدًقصيرة ومابغاش عيسى يخلص عليه شي ريال ولا يديه الا الى كان غيخلص على راسو وعلى مرتو .
العيد كيقرب والضيم كيطيح على سارة وتوحشات تعيد مع دارهم .. ريحة العيد فلندن مكايناش .. لا اجواء ولا حتى حاجة .. اما عيسى وواليديها مشاو للحج وخداو معاهم ساجد.. بقا غير الحاج الحجوجي الكبير اللي مامشاش بسبب المرض ديالو والعيا والتعب ومشات فثر مرتو تحج ودير عليه عمرة ودعي معاه ينوض بالسلامة
العيد الكبير فلندن .. صبحات سارة خدامة فيه ومكاين عطلة ولا والو .. تقول مكاينش العيد. الضيم والقنط وتزيرات حتى بدات كتبكي فالبيرو بوحدها ورجعات تكمل خدمتها .. خرجات فالعشية ومشات دارت خدات شوية داللحم وكبدة وداتهم للدار هي وبنتها شواتهم فوق الشواية ديال الضو وعلقات البولات والاضواء فالدار ولبسات واحد الجلابة ولبسات بنتها حتى هي وجلسو كيتعشاو خالقين الاجواء غير بيناتهم وكيتجمعو ويضحكو ..جاها اتصال مم عند عيسى وفتحات ليه الكامرة شافتو جالس على ناموسية بسورفيت رمادية ..لاحت شال على راسها وابتسمت قالت ليه عيد مبارك سعيد
قاليها علينا وعليك كي دايرين لاباس كي دوزتو النهار
قالت ليه خدمت عاد دابا قلتا نديرو شوية الباروك .. ونتوما. كي داير بابا لاباس عليه
رد بالايجاب قاليها الحمد لله كولشي مزيان .. حنا عندنا الفجر غادي نوض دابا نتلاقا بيهم لتحت فالاوتيل نمشيو نأديو المناسك
ابتسمت وقالت ليه الله يقبل .. ها جنة هاهيا
دورات الكامرة لجنة وحل عينيه ابتسم قاليها هوووه بالصحة والراحة شكون جاب ليك الجلابة
قالت ليه ماما
قاليها بالصحة..وعيد مبارك سعيد
قالت ليه كتمضغ الكبدة اميين حنى بعدا عندنا العيد فدارنا نتوما كاع ماعندكم فالمغليب
بدا كيضحك قاليها غير نتي اللي عندك العيد حنا لا
هزات كتفها ورجعات للكبدة ديالها ماداتهاش فيه وعيط لسارة قلبات الكامرة عندها قاليها مالها واش عيانة؟
قالت ليه لالا ماعندها والو .. راك عارفها كي دايرة ..
حرك راسو وتنهد قاليها على تهلاو فراسكم
ابتسمت وقالت ليه ماتنساوش دعيو معانا
دار ابتسامة خفيفةوحرك راسو وقطع . حيدات تيليفون قدامها وقالت لجنة قداش عزيز عليك باباك؟
ردت جنة قالت ليها عزيز عليا
قالت ليها شكون عزيز اكثر ؟. انا ولا باباك
ردت جنة : نتي اماما
قالت ليها سارة وباباك حتى هوا زوين وكيبغيك علاش مكتبغيش تهضري معاه ؟
بقات جنة ساكتة مطولا كتاكل فاللخر قالت بعفوية عندو ساجد نتي ماعندكش ساجد
تصدمات سارة قالت ليها كيفاش؟؟ شنو عندو ؟؟
بقات جنة ساكتة كتقطع الكبدة وتلعب وقالت ليها مكنبغيش بابا انا كنبغيك غير نتي وميما وباسيدي مكنبغيش بابا ومكنبغيش ساجد ومكنبغيهمش
بقات سارة مصدومة حالة فمها وناضت من بلاصتها جلسات حداها كتشوف فيها قالت ليها علاش ؟؟ شنو دارو ؟. وساجد شنو دار ليك ؟؟ ياك كيبغيك وجا عندك حتى للهنا
شافت فيها جنة هازة حجبانها وببرودة صدمات سارة قالت ليها ماكنبغيهمش.. مابغيتش؟
طاح السقف على سارة من كلام جنة وطريقتها وقالت ليها شنو دارو ليك واش كاين شي واحد مكيبغيش باباه وخوه؟
هزات جنة كتفها قالت ليها ماشي خويا دابا يعطيه بابا بززاااف ديال خوتاتو هااكا بزاف .
دارت سارة يدها على فمها ماعارفات شنو تقول وكيفاش تعامل معاها؟؟ ويلي شنو كتقول هاد البزة وهادشي. كله جامعاه وساكتة ؟؟ هادشي كله خرج من بنت صغيرة !! كيفاش وعلاش؟.
بقات غير كتشوف وساكتة وهبطات ديك الللقمة بزز وعقلها مع بنتها .. دوزو العيد ديالهم على طريقتهم وومن ساعتها وسارة مشطونة وعقلها كيفكر فكلام بنتها .. كيفاش تبدل ليها تفكيرها وتحبب خوها وباها ليها .. وراش كاين شي بنت اللي مكتبغيش باها ولا خوها ؟!!
من يومها وهي كتحاول تصلح تفكير جنة وكتشري الهدايا وتقول ليها رسلها ليك باباك. وتشري وتجيب وتقول ليها شراها ليك ساجد .. ولفاتها ديك القضية ديال شرا ليك باباك شرا ليك ساجد وكتجلس وتشكرهم ليها وتسايس معاها حتى لواحد النهار شرات ليها لعبة وسولاتها جنة شكون شراها لي ؟
قالت ليه سارة انا اللي شريتها
قالت ليها جنة بابا شرا لساجد
شدات سارة راسها قالت ليها باباك ماشراش لساجد . ساجد كبر هوا اللي كيشري ليك دابا وكيتسناك ترجعي للمغرب..
قالت ليها جنة وعلاش بابا ماكيتسنانيش
قالت ليها سارة كيتسناك وغادي يجي عندك فعيد ميلادك فالشهر الجاي
قالت ليها جنة انا بغيت عيد ميلاد هاد النهار
قالت ليها سارة عيد ميلاد كيجي بوقتو
غضبات عليها جنة ومكان على سارة غير تشري لحلوى وتديها للدار وتشعل ليها الشمعة وبقات كتقول ليها هابي بيرتاي ..صونا ليها تيليفون وكان عيسى . فتحات ليه الخط مباشرة فجنة .. ضحك وقاليها ياك حتى للشهر الجاي
قالت ليه سارة قالت ليك بغات عيد ميلاد ليوم .. هاحنا درناه ..
قاليها عيسى وماقدرتيش تسناي باباك حتى يجي
هزات جنة كتفها قالت ليه انا ماما دارت ليا عيد ميلاد حسن من ديال ساجد
الايام كتجري والوقت كيطير والعمر كيمشي . سنتين مرت بلمح البصر وحان وقت العردة للديار .
حطت الطائرة على ارض الوطن ونزلات بشنطها وهي في غاية السعادة والفرحة لقات واليديها في انتضارها عند بوابة المطار .. اول حضن عطاوه لجنى .. بكاء. عناق اشتياق وتبادل الاحضان وبعدها العودة للبيت اللي هجرات لمدة سنتين .. لقات رحال واليديها فيه وحطات شنطها حتى هي فغرفتها وبدات كدور من ركن لركن مشتاقة لبيتها وراحة غرفتها واواني مطبخها .. اما جنى فكانت الاولى فالسباق لغرفة نومها وعناق العابها القديمة واغطيتها وجذران بيتها .. سرور وسعادة غمرات البيت .. تجمعو على العشاء فجو عائلي سعيد خالي من المشاكل.. تكلم الامام وخبرهم بقراره .. انه يدير صدقة كبيرة فالناضور . وطلب منهم يلمو الشنط ديالهم من جديد .
وكان ليه ما طلب.. شدو الطريق وفطريقهم وهي راكبة اللور جاها اتصال من عند عيسى وماقدراتش ترد .. حسات براسها انها كترتاكب جريمة وانه راجل غريب عليها وباها قدامها كيسمع . قطعات الخط. حتى رن هاتف بباها وسمعاتو كيقوليه حنا فالطريق الناضور غنديرو الصداقة وبدا كيعاود ليه ويتجمع وقطع .
من بعد سيفط مسج ليها قاليها علاش ماقلتيش ليا غتمشيو الناضور ؟ الواليد مريض وتزاد عليه الحال وكنت كنتسنا ترحعو ندي ليه جنى يشوفها .
بقات ساكتة كتشوف فالمسج وهزات راسها قالت لباها واش فراسك عمي الحجوجي مريض تزاد عليه الحال
قاليها لا مافراسيش !
قالت ليه راه مريض قالت ليا يسرى بغا بشوف جنى
قاليها متفاجأ ماقالها ليا حد ابنتي !! غنوصلو ونعيط ليه .
سدو الموضوع وكنلو الطريق حتى للدار وبقات كدور بباها باش تعرف اخبار الحجوجيين .. دخل عندها من بعد صلاة العشاء كيتنهد شافها بغات طلع الباليزة وقاليها غير خلي ديك الباليزة غنمشي الصباح لفاس .. راه الحاج مريض تزاد عليه الحال بصح
قالت ليه واش عيطتي ليهم؟
قاليها هضرت مع الحاج عيسى قالي مريض راهم كلهم عندو فالدار .. واقيلا شي حاجة واقعة مابغاو يقولو لحد المهم الصباح نمشيو نشوفو شنو كاين نديو البنت .. كنشم شي ريحة ماشي هي هاديك
انتابها شعور غريب اثناءها ونفس الشعور اللي جاها عند المرحومة لبنى عاود جاها وقالت ليه ياكما شاد الفراش
قاليها داكشي اللي غايكون غير مابغاو يخلعو حد .. حتى عيسى قالي بغا جنى يشوفها جدها ..ًشي حاجة كاينة
صبحو من جديد شادين الطريق لفاس على الصباح .. الامام وبنتو وبنت بنتو .. وصلو للفيلا دالحاج الحجوجي لقاو سيارات كثار تما مصافين .. دخلات شادة لبنتها فيدها ولقاو الناس جالسين وجههم اصفر . استغربو كانه كلينيك فقلب الدار .. جات عندهم الحاجة نزهة سلمات وطبطبات على كتف سارة وهزات حفيدتها قالت ليها اجي اماما يا ضو عويناتي توحشتك ابنتي.. توحشتك الكبيدة ديالي الله الله على بنتي كبرات وماشفتهاش .
داتها وموراها سارة لغرفة نوم الحاج الحجوجي لقاوه مستلقي على فراش الموت وجنبو يسرى كتبكي ووارلادو طايح عليهم الضيم.ً شافت يمين يسار مالقاتش عيسى ..ًولدو فقط اللي كيمشي تما ومشا عند جنى فرحان عنقها وعنق سارة قاليها جيتو !!
باستو وعنقاتو وقالت ليه اه غادي نشوف الحاج ونجيو توحشناك حتى حنا الحبيب
قاليها واخا انا غنهبط عند بابا نعطيه شارجور ديالو ونرجع
ابتسمت ليه مشا وجلسات جنب الحاج شدات ليه فيدو باستها وقالت ليه عمي .. واش عرفتيني؟
سد عينيه ابتسم قاليها بصوت تقيل ووجه اصفر ولحية بيضاء عرفتك ابنتي.. فين جنى
هزاتها قدامها وراتها ليه وهز يدو لمس وجهها البريئ وباس يدها وقاليها تهلاي فيها .. الله يرضي عليكم .. انا راضي عليكم كاملين كبير وصغير ..
غرغرو عينين سارة وشافت فالحاجة اللي واقفة جنبو من الجهة الاخرى كتبكي .. اما يسرى ماقداتش تصبر وخرجات من البيت سدات الباب وراها خلاتهم بوحدهم .. تحنات سارة على يدو كتبكي طلبات منو السماحة وبدات الصورة كتكرر من جديد.. نفس الاجواء نفس الاحساس ونفس النضرة .. كانها كتسترجع ذكراياتهل يوم رحيل لبنى .. عرفاتو غادي يموت لأن نضراتو كانت نقل نضرات لبنى الاخيرة .. وحتى هوا كان مبتاسم مطمأن حيت عارف راسو غيمشي ومرتاح حيت غسل دنوبو فالحج وادا الواجب ودار اللي عليه وشاف ولادو واحفادو .. بين اصوات النخصصات والدموع تحنات ليه على يدو قالت ليه با الحجوجي.. مكاينش من غيرك من بعد الله اللي يجمع ليا الشمل مع راجلي وبنتي.. انا ندمت وتبت .. بغيت نرجع .. تعلمت من الدنيا ما يكفيني .. مابقا كيهمني لا مرى لا جوج .. كيهمني عشي يتلم .
هزات عينيها فالحاجة اللي شدات فيدها وقالت ليها ماشي وقتو ابنتي دابا راه حالتو ماتسمحش ليه .
من كلام الحاجة كان كيبان انها عندها امل يرجع يبرى عكس سارة اللي كانت حاسة انه غادي يموت ودوك النضرات مايخفاش عليها ابدا .. ماخلاتهاش الحاجة تستنزف ليه الطاقة اكثر وخرجاتها من البيت بالهداوة قالت ليها خلي المشاكل الشخصية لمن بعد الله يرضي عليك .
مسحات سارة دموعها وحركات ليها راسها بالايجاب وشدات بنتها فيدها ..حتى كانت غتزيد وهزات راسها فعيسى اللي طأطأ راسو قاليها السلام وهز جنى ابتسم ليها وعنقها ودخلها معاه للبيت هوا ومو .. نزلات خلاتهم ومشات جلسات مع النساء مقابلة مع رجاء اللي مربعة يديها كتشوف جنب .. دخل ساجد لقا سارة جالسة سولها على جنى قالت ليه مع باباها لفوق ومشا تبعها كيجري ..
بقات جالسة مطولا فصمت حتى واحد ماكيهضر مع لاخر حتى نزل عيسى هازها فيدو وبدات كتركل نزلات عند ساجد وعيطات ليها سارة جات عندها وتبعها حتى ساجد.. شدات ليها فيدها قالت ليها شنو قاليك جدك؟
حركات راسها وقالت لقها هضر غير مع بابا
قالت ليها سارة شنو كان كيقول ليه
قالت ليها جنى قاليه با سيدو ديرو العش ديال الطيور ..
قاليها ساجد لاا ماشي العش ديال الطيور !!
قالت ليه جنى واش نتا كنتي جالس عند بابا نتا كنتي حدا الشرجم انا كنت جالسة عند بابا
شاف ساجد فسارة قاليها لا ماشي هاكاك
قالت ليه سارة شنو قاليه ؟
جا ساجد يهضر عيطات ليه رجاء بنرفزة قالت ليه اجي لهنا ومشا عندها جراتو من يدو كتهضر معاه وسارة كتشوف فيهم .. فلت ليها فاخر لحضة ومالقات غير جنى تسولها قالت ليها شنو قاليه باك سيدك فالبيت اماما ؟
قالت ليها جنى قاليه ديرو العش ديال الطيور عندكم ..زعما يشري لينا بابا العش نديروه فدارنا ويجيو ليه الطيور
قالت ليها سارة كيفاش العش ؟ نو سمعتي بالتفصيل شنو قاليه باك سيدك لباباك؟
قالت ليها جنى واا ماما واش مكتفهميش..راه قاليه جيب سارة وجنى فالعش مع الطيور .. مالكي مكتفهميش؟ قالو عاصيتك باش تجيب العش الى ماجبتيهش مانراضيكش؟
قالت ليها سارة باستغراب عاصيتك!! زعما وصيتك!! قاليه وصيتك
قالت ليها جنى هاديك ااه ولاكن بابا مابغاش يشري لينا العش قاليه عندو العش ماباغيش يدير فيه المشكل
بقات سارة غير كتشوف فيها مافهمات فيها حتى حاجة وكلاها الفضول بغات طرطق وجراتها خرجات لبرا كتسولها حتى شافت ساجد خارج وجراتو عندها قالت ليه ساجد اولدي قول ليا داكشي اللي قال باك سيدك لباباك؟؟
ميل ساجد راسو قاليها ماعقلتش
عقدات سارة حجبانها قالت ليه زعما نتا ذكي دغيا نسيتي؟؟
رمش فالجنب قاليها ماعقلتش اطاطا سارة نسيت
دفعاتو جنى بغيض قالت ليه نتا ماشي خويا ماتجيش عندي
جراتها سارة من يدها قالت ليها حشومة اش هاد قلة الاداب خوك كبر منك
نترات جنى يدها قالت ليه شير عند باباك اللي كيشري ليك الطيور ويشري ليك العش ماتجيش عند ماما
بصوت مرتفع حاد قالتها حتى انتبه ليها عيسى من باب الفيلا وهوا مع خوه وتلفت شاف فيها وجا عندها قاليهم اشنو كاين
بقا ساجد ساكت وسارة بارتباك قالت ليه والو غير جنى كتتتت. راك عارفها
جلس القرفصاء قدام جنى قاليها شنو بغيتي ابابا مالكي
دورات وجها بعدوانية خشاتو فجلابة سارة البيضاء وقالت ليه ماشي بابا انا مكنبغيكش كنبغي ماما
تبدل اللون فوجه عيسى وشد ليها فيدها قاليها حشومة بابا شنو كتقولي ؟؟
بدات سارة كتزراق وتصفار وكدخل وتخرج فالهضرة انا جنى نترات يدها وشدات فسارة قالت ليها نمشي بحالنا لندن مانبقاوش هنا
جرها بزز عندو باغي يهضر معاها وهي كدفع بيديها وطلقها مشات عند مها .. هز راسو فسارة هاز حاجبو وقاليها مالها علاش كدير هاكا ؟
عقدات حجبانها ماعجبهاش السؤال وقالت ليه ماعرفتش انا براسي علد كنسول مالها شنو وقع ليها
وقف شاف فساجد قاليه واش قلتي ليها شي حاجة ؟؟
حرك ساجد راسو قاليه لا ابابا ماقلتش ليها حتى كلمة هي بوحدها دفعاتني قالت ليا نتا ماشي خويا سير عند باباك
تصدم عيسى وكملات ليه جنى قالت ليه نتا ماشي خويا ااه ماكنهضرش معاك
جراتها سارة وراها قالت ليها حشومة هادشي واش حماقيتي علاش كتقولي ليه هاكاك
بقا عيسى ساكت غير كيشوف فيها ماعجبوش الحال وحتى المورال عندو طايح .. جرها من يدها قاليها شنو دار ليك ساجد يالاه قولي ليا شنو دار ليك؟. غادي نعاقبو الو دار ليك شي حاجة
هز ساجد يديه قاليه وامادرت ليها والو اعباد الله
تلفت عيسى قاليه سكت نتا
خرجات جنى عينيها وفمها كي النقطة قالت ليه مابغيتش خويا .. غتجيب ليا ماما خويا جديد حسن منو يالااه
رجع وجه سارة حمر شهقات وهز عيسى عينيه شاف فيها قاليها شهادشي ؟ً فين تعلمات هاد الهضرة؟؟
جلسات سارة القرفصاء قالت لجنى بعصبية منين جبتي هاد الهضرة شكون قاليك هادشي؟؟ فين تعلمتي
نترات جنى يديها بجوج قالت ليهم وابعدو مني انا غنرجع لندن بوحدي كااع يالاه .. مابغيتكمش غنمشي عند بابا وماما وحدين خرين
تمات غادية بوحدها قالت ليها سارة سيري. اختي نشوف فين حدك يالاه ؟؟ يالاه سيري
حمر فيها عيسى قاليها بشوية على البنت مالنا ياك لاباس؟؟ ااش كتعرف قرينة هادي
قالت ليه بعصبية وعلاش كتسولني مالها وفين تعلمات هادشي؟. حساب ليك انا عملتو ليها ؟؟
خزر فيها قاليها قلت ليك علمتيه ليها؟؟ واش قلتها ليك بفمي ؟
ربعات يديها قالت بيه مانعرف بان ليا بحال الى بغتي تقولها
بقا مخرج فيها عينيه وبعدهم تدريجيا بمعنى الله يعميها ليك وشد فجنى كيهضر معاها بالهداوة وهي حلفات ما تبقا فيدو ورجعات عند مها لسقات فيها فاللخر حط يدو بعفوية على راس ساجد قاليه صافي خليها حتى تبرد ماتهضرش معاها دابا
بقات جنى كتشوف فيهم بنص عين واحد اللحضة طلقات واخد الغوتة ووجهها فجلابة سارة ولاسقة ليها فرجلها وبدات كتنقز وتبكي قالت ليها نمشيو بحالنااا نمشيو بحالنا …
خلعاتهم بديك الغوتة حتى رجعات سارة كتفتف قالت ليها واخا واخا صافي يالاه نمشيو
هزاتها فيدها قاليها عيسى اجي عند بابا بغا يسكتها ويدورها شوية لاكن قلبات وجهها وتعصرات كي الخشبة كتغوت قالت ليه ماشي بابا الاا الاا ماشي بابا .. جرات سارة من الفولار قالت ليها بجنون نمشيو بحالنا .. مات سارة بيها كتجري خلاتو واقف وطلعات فالطموبيل دباها وعيطات ليه قالت ليه راه جنى مابغاتش تجلس وعاشنو طرا ليها هاشنو طرا قاليها ديها خرجيها من هنا مامزيانش ليها تبقا هنا الدرادي الصغار اي حاجة كتشد فيهم . ديمارات الطموبيل خرجات من تما داتها لواحد الغيسطو وجلساتها شرات ليها عصير وحلوى وجلسات حداها دايرة يدها على خدها وكتشوف فيها كتمص فداك العصير وتبررق بعينيها .. قالت ليها سارة غلاش كديري ليا بحال هاكا ديما مشوهاني؟ اش دار ليك باباك مسكين حشومة وحرام داكشي اللي درتي غادي يعاقبك الله
مازال ماكملاتش هضرتها صونا ليها عيسى كيسول على بنتو كي بقات وشنو كدير ..طمناتو وعطاتو خبارها وخبرها انه حجز ليهم فأوتيل يجلسو تما احسن من اجواء المرض والاكتآب اللي فالفيلا وعينين الناس وقبلات بالعرض وخدات العنوان وخبرات باها ومشات للاوتيل جلسات فيه حتى وصلات الطناش ديال الليل ..صونات غلى باها تسمع اخبارو وجنى ناعسة حداها رد عليها عيسى قاليها كيقرا القرآن على الحاج ماعندوش كي يدير يجاوب وسول على جنى طمناتو مرة اخرى ورجعات نعسات .
الجوج ديال الليل رن الهاتف وكان باها .. ردت دايخة بالنعاس ..فاجأها باها بخبر الموت المحزن اللي طير النعاس من عينيها وصمك ليها ودنيها جابها واقفة ماعرفهات اشنو دير .. تمشي ولا تجلس؟ شنو دير ؟ وبنتها؟ الى مامشاتش غادي تحل فان عباد الله عليها .. والى مشات غتنوض الحرب مع جنى وتأزمها وتسهر بيها .. سمعات صوت عيسى كيهضر مع باها وتقطع الخط فجأة .. من موراها بدقيقة صونا ليها قاليها بلا متجي خليك مع البنت تما ما عندها مادير هنا .
داخت ماعرفات مادير ولا ماتقول ..قالت البركة فراسك ورد عليها قاليها لهلا يوريك باس ..هادي هي الدنيا المهم خليك مع البنت بلا ماتجيو حتى يصبح الحال ويحن الله
خبر محزن بكاها .. تفكرات تعامله معاها وكيفاش كان رجل طيب وفمو مكيجبدش العيب .. بين ليلة ونهار مشا عند اللي خلقو وخلا وراه الدنيا مقلوبة .. اولادو اللي عارفين بينهم وبين الله مابكاو ما ندبو ما دارو كنارة .. الحزن فالقلب معالم بيه غير الله لاكن العقل والتبات حاضر . اما البراني اللي جا يعزي منهم اللي عزاو داك الصباح وجلسو بحال ايها الناس ومنهم اللي بغاو يبينو الحزن بأي طريقة .. بالبكا بالانهيار بالصراخ .. لاكن كان ليهم عبد الجبار الاخ الاكبر للحاج عيسى .. اللي سمع صوتو كينوض ليه يسكتو بجوج كلمات حتى دخلهم فجواهم وعم الصمت والهدوء والتعزية بصوت منهفض بلا صدع وبلا ضجيج .. غسلو الميت وغسلوه اولادو .. واللي عايش على برا دخل واللي فمدينة اخرى وصل والمغرب فبلاد اخرى رجع وتجمعو الخوت واحد واحد بلا مينقص منهم حتى واحد. كانو بالتمام والكمال واحد وعشرين واحد ابن وابنة وابنة .. تسعة وطناش لذكر .
ولد مع الزوجة الاولى تسعة .. والثانية ستة ..والثالتة اربعة واخرهم الحاجة لاللة نزهة جوج . ولاول مرة فالتاريخ يتجمعو الابناء كلهم بلا ماينقص ولو فرد منهم وتلمو فالفيلا هم والعاىلة كلها ..منهم المتشدد فالدين لاقصى الحدود ومنهم ومنهم اللي داير جهدو وعلاش قادر ..كلها وحياته وكلها وهمو والعالم دياله. وفين داتو الوقت .
خرجو الحاج مع العصر يدفنوه ومشاو معاها مئات الناس اللي كيعرفوه .. كان راجل مزيان ومتقي الله واسمه ساطع وعندو مكانة ..ترفع له القبعة ..راجل خدم لدينو ودنياه .. خلا ثروة لا تعد ولا تحصى وخدا معاه تروة لاتعد ولا تحصى من الاعمال الحسنة والكل كيشهد ليه بالكلمة الطيبة والكل وقف فجنارته اللي ملات شوارع حتى تعجبو الناس لداك العدد الهاىل من الناس والسيارات اللي غاديين بالجنازة.. اللي سول وقالو ليه فلان كيتحسر على موته ويدعي ليه بالرحمة والمغفرة ويذكره بالكلمة الطيبة .
تلمو الناس فالفيلا اللي ماقدات لا لعيالات لا لرجال واضطرو يزيدو الخزاين فالجردة والطبالي للناس باش يتعشاو .. كان واحد المسكين دايز حالتو حالة لباسه مقطع هاز واحد الخنشة وكيبان بحال الى هبيل شوية ..لقا عيسى وواحد من خوتو اللي فالخاريج واقفين متكيين على واحد الفيراري كيهضرو بجوج ووقف سلم عليهم باليد قاليهم شكون اللي مات ؟
قاليه الابن الاخر الواليد
عاود سلم عليهم قاليهم البركة فراسكم وبغا يدخل للفيلا ومتردد قاليهم نديرو الواجب
كان غرضه يتعشى وحرك ليه عيسى راسو وقاليه الابن الاخر دخل الشريف دخل ..نهار نموتو غنديو معانا غير طرف ديال التوب
كان داخل مع الباب ورجع عند عيسى شار ليه بيدو قاليه ماتاخد غير اللي مقسم ليك الله .. فيك فيك واخا تهرب لآخر الدنيا ..داكشي اللي مكتب عليك الله غاتعيشو
بقا عيسى كيشوف بنضرات باردة هوا وخوه والمتشرد كيهضر واحد الشوية ربع يديه وسد عينيه وبدا كيجود القرآن بصوت تقشعر له الابذان وكيتلو عليه بعض الصور من صورة النساء …تصدمو فالصور دالو والتجويد بقواعده ..ابتسم كيسمع ليه حتى سالا ودخل مع الباب تعرض ليه واحد من المنضمين ديال الجنازة كان غيرضو وقاليه عيسى خليه يدخل ودخلو داه جلسو فطبلة كبيرة كانو فيها بزاف من الناس اللي دخلو ما فحالهمش واي واحد متشرد ولا كيجمع الزبل او ضايع فالدنيا سمع بموت الحجوجي التاحق بعين المكان ..خصصو ليهم طبلة طويلم فيها اكثر من ثلاتين واحد وحطو ليهم نفس الاطعمة اللي حطو للناس من جهة اخرى وفرقو عليهم علب بلاستيكية باش اللي بغا يجمع شي حاجة يديها معاه وفوق هادشي خرجو ليهم صدقة نقدية فأضرفة لكل واحد فيهم وخلاوهم مشاو بحالهم كيدعيو ويكررو الدعوات مع الحاج المتوفي .
كانو النساء على طاولة المائدة جالسين كيهضرو وكانت بينهم اخت عيسى الكبيرة اللي عمرها بانت وكان كتبان عليها صعيبة فالتعامل وكلامها قاصح .. قالت ليها اختها وحدة اخرى شقيقة .. قالك با الله يرحمو قبل مايموت وصا عيسى يرد مرتو اللخرة .. ومابغاش ..
ردت عليها اختها قالت ليها كيفاش وصاه يرد مرتو كون قاليك هاد الهضرة؟
قالت ليها سمعت نزهة كتقولها ليسرى قالت ليها وصاه وهوا شاد ليه فيدو قاليه مرتك وبنتك خصك تردهم .. وعيسى قاليه ماخصني لا بتعدد ولا بمشاكل مشات اللي كان كيعول عليها واللي كانت السند دياله فهاد الدنيا ..من موت لبنى حلف ما يعاود يعدد
ردت اختها الكبيرة كتنهد قالت ليها ايييوا شتي..الدنيا مادايماش.. عاد كانت لبنى الله يرحمها فالحياة .. مشات صغيرة
ردت عليها اختها الاخرى قالت ليها بقات فيه لبنى كطلع وتهبط ..هزيتي واحد وحطيتي واحد
ردت عليها الكبيرة قالت ليها وراه عشرة ديال سنين ..بسيف ماتبقا فيه وتجيه صعيبة ..ولاكن وصاه با خاصو يطبق الوصية . صافي لبنى الله يرحمها مشات وحنا غنتبعوها ودابا الحق الاول للاحياء اللي باقين فالدنيا وديك البنية اللي عندو … عمرني شفتها انا شحال تكون عندها دابا
قالت ليها الاخرى حتى انا عمرني شفتها بغيت نشوفها ..ماشفتها لا هي لا امها .
ردت الكبيرة وقالت ليها مادارت فيها مايصلاح ماجات حتى تعزي فينا ..ياحسرا كان شيخها ومات كيوصي عليها وهي ماقدرات حتى تجي ساعة دالمكانة وتمشي
قالت ليها اختها راها فلندن يمكن هادشي اللي سمعت .. اجي ياك طلقها بثلاتة ماشي حرام يردها ؟؟
تنهدات الكبيرة وقالت ليها وااقيلا كانت تزوجات من موراه وطلقات والله واعلم ..
ردت الاخرى وقالت ليها تسمع رجاء وصية الحاج لعيسى طيح بالعضام
هزات الكبيرة حاجبها قالت ليها طيح بالاعضام ولا طيح بالارياح وماتجبديهاش ليا .. باااز ليه اللي مزال معاها .. هي براسها جات ضرة على لبنى وخرجاتها من عين لبرى وماخلات فيها غير اللي نسات .. عايراتها بالعكر ودوزات عليها السيراط .. نسات هادشي بان ليها غير تجي عليها الضرة .. نسات اش دوزات على المرحومة من السم .واخا هاكاك هاهواك بقا شاد فلبنى وباقي كيتحسر عليها لدابا وعيا يصبر فاللخر هاهواك طاح مرض بالطونسيو بسبب الموت ديال لبنى.. بقات فالاولاد ! هاهي ماولدات ما دارت والو وبغاها
كانو جالسين كيهضرو حتى سمعو صوت الصدع من لفوق مع صوت الامداح .. ناضت الاخت الكبيرة بسرعة وكانت طويلة وعامرة وهي الابنة الثانية من بعد عبد الجبار واخته شقيقته ..كانت لابسة قميص بلدي كحل والشال والبلغة وعينيها منفوخين بالبكا ..مشات كتجري تلاقات مع الحاجة نزهة فالدروج كتجري وكل وحدة سولات لاخرى على شنو واقع وحتى وحدة فيهم ماعارفة شنو كاين .. وصلو للطابق الثاني لقاو رجاء وسط العاىلة وجهها احمر مقابلة مع تجمع اخر ديال النساء .. شافو شكون وسط داك التجمع لقاو سارة وحتى وجهها احمر كتنهج ..اش واقع ما واقع نوضوها تما سباط.. علاش؟. على قلة الشغل وكل وحدة كتقول هي اللي جبداتني لا لخرى اللي جبداتني .. هزات رجاء يديها كطل على سارة باغة تاكلها وقالت ليها ها منين دخلي وها منين تخرجي يا خطافة الرجال .. تعياي دوري عمرك تستاقري ولا يقبل عليك شي راجل ..
ردات عليها سارة من لهيه قالت ليها بزاف عليك نتي اللي لسقة يا المدلولة دبصح انا بزاف عليك مانوصلينيش وتقلاي فسمك
هزات الاخت الكبيرة يديها وقالت فوجه رجاء .. ايييواااا ماشي دار باكم هادي باش تغاوتو فيها .. نسيتو راسكم فين ولا نفكركم
قالت ليها يسرى انا غادي نعيط ليه دااابا باش يجي يشوف بعينيه هاد المهزلة اللي دايرين لينا فالكنازة وماختارمتو حتى واحد .. ماحتارمتو مشاعرنا
جبدات تيليفون كترعد وحيداتو ليها الكبيرة من يدها قالت ليها ماتعيطي ليه مايعيط ليك .. دااابا غتجمعو حوايجكم .. اللي عندها شي صاك تهزو وتزيد مع الباب يالاه
هزات سارة صاكها مارضاتش تمات غادية ويسرى تابعاها كتجر فيها اما رجاء خرجات عينيها فالكبيرة وقالت ليها ماشي نتي اللي توريني اش ندير ..راكي لاللاهم هما ماشي لاللة انا
خرجات فيها الكبيرة عينيها وقالت ليها جوج كلمات ..غتزيدي مع باب الدار ولا غنخرجك كتعتري فجلايلك .
قالت ليها رجاء هانا خرجيني الى سميتك مرى
جراتها الحاجة من يدها قالت ليها الله يهديك تورية بعدي من الصدع .. خليك فالتيقار خليها منو ليه يجي يوريها شغلها
وصلات سارة للباب مارضاتش والبكية شاداها نترات يدها من يد يسرى ومشات كتبكي خرجات كتقلب بلا عقل على بنتها .. شافتها مع عيسى على برا هازها ومعاه خوتو واقفين كيضحكو معاها وكل واحد شنو عاطيها ..دازت قدامهم بحال البرق بقا عيسى غير كيشوف وتبعها للطموبيل هاز جنى . قاليها مالك اشنو كاين ؟
قالت ليه جيت .. درت الصواب .. صافي الله يعاون عمرني غنحط رجلي هنا فهاد الفيلا والى عاودتو شفتو هاد الوجه دفلو عليه .
خدات بنتها وطلعات سدات عليها الباب وزادت مشات بقا واقف فبلاصتو ورجع دخل بالزربة كيجري صادف يسرى قدامو قاليها شنو وقع مال سارة خرجات كتبكي
بلعات ريقها قالت ليه دابزات هي ورجاء .. ولاكن رجاء اللي طارت عليها مع الدخلة كانت كتقلب على ماما تعزيها ورجاء نقزات عليها على قضية الرجوع ما الرجوع والوصية اللي وصاك بابا ..
عطاها ودنو قاليها كيفاش؟؟
قالت ليه راه منعرف شكون وصلها لرجاء قاليها بابا الله يرحمو وصاك على سارة باش تردها ونتا مابغيتيش.. وهي فاش سارة دخلات شعلات ماعقلاتش على راسها وطارت عليها قالت بقات عليها يا المدلولة ومايقبل عليك حتى واحد واخا تبوسي اليدين والرجلين مايرضكش وعيتي ديري. عيتي تفعلي هاهوا عبر عليك قال لباه وهوا على فراش الموت منرضهاش وهاديك تكفيك ووو
هز يدو قاليها صافي صافي صافي
زاد دخل طلع لفوق لقا الجوقة تفرقات .. تلاقات تورية وهزات يدها قالت ليه سمع اعيسى .. راك دخلتي لفعة للعائلة .
ضرب فيها ومشا كيقلب على رجاء لقاها جالسة كتسوط وتنفخ باغا طرطق وحرك يدو قاليها يالاه .. يالاه جمعي الوقفة زيدي
وقفات قالت ليه هما دارو بيا وبدات تبكي وهز صبعو على فمو قاليها منسمعش الحس دياالك .. ولا هاد الهاد الصداقة غتولي كنازة .. يالاه زيدي قدامي وقطعي الحس
خرجها لبرا وعطاها الساروت قاليها سيري للدار
ضارت عندو بغات تشرح ليه وخر عينيه قاليها تحت سنانو سيري. للدار .. نيشان الدار
قالت ليه ساجد ..
قاليها معنعاودش معاك الهضرة ياك .. وبلا مطلعي ليا طونسيو فهاد الليل .. يالاه تحركي للدار
طلعات سدات عليها وبقات كترجاه بعينيها ومشات شدات الطريق ورجع دخل كيقلب ختو الكبيرة .. تلاقا وحدة من خواتاتو لخرين قاليها فين لاللة ؟
قالت ليه لفوق فالبيت وطلع نبشان دخل لواحد البيت كبير يعرف اش وقع لقاهم مجمعين تما كلهم كل واحد مصدوم فقنت ومو معاهم حتى هي كتحك بوحدها مارضاتش مرت ولدها دير ليها ديك الفضيحة .. غير دخل دارت يدها على جبهتها قالت ليه انا بالله وبالشرع مع ديك المرى عندك ؟
قاليها شنو وقع ؟
هزات تورية يديها قالت ليه هاهما يقولو ليك شنو وقع انا جيت نفك الجرة مشيت بين الرجلين
وقفات واحد ختو وحدة اخرى قالت ليه انا نعاود ليك شنو وقع بليديطاي الحاج .. انا كنت هنا وجات سارة .. ماعرفتهاش تبدلات عليا من العرس ديالها ماشفتها .. سولاتني على الحاجة قلت ليها واقيلا فالبيت .. جات رجاء خارجة من طواليط شافتها وطارت عليها قالت ليها مزال جايا برجليك اخطافة الرجال وبقات كتعاير .. قلت ليها انا مالكي اويلي شنو وقع خلعاتني وجيت نفك وكنسمع غير رجاء كتعاير .. قالت ليها سارة انا ماجيتش عندك جيت عند خالتي نزهة .. شداتها رجاء من يدها بغات تجرها جات لمياء (اخته) لمياء شداتها كتفك .. بقات كتغوت وكترعد ..
قاطعاتها لمياء وهي جالسة قالت ليه عرفتي عينيها وصلو لفمها خلعاتنا بغات طير عليها تاكلها والسيدة كتهرب منها … حنا كنقولو ليها الكنازة وصوت الذكر كيتسمع وحشومة هي تصمكات راسها ماعقلاتش عليه كن بقاو طيط اطيط كن قتلاها ولا ضرباتها بشي عجب تصفيها ليها .. انا قلت صافي تسطات
قالت ليه تورية السيدة شي حد وصل ليها شي هضرة .. شعلات .. ايييه ماشي ساهلة تسمع ديك الهضرة ولاكن ماشي وقت الحساب والدباز ماحتارموش الروح ديال با اللي مزال كتسارا بيناتنا .. ماوقرات حتى واحد
شاف بنص عين فيها قاليها اشمن هضرة ؟
قالت ليه لمياء شي واحد قاليها راه با وصى عيسى يرد سارة وهوا مابغاش قطع ليه الياس . هادشي اللي بدات كتقولو لسارة وتعايرها بيه .
شاف بنص عين فمو ودار فيها شوفة حادة حتى هزات صبعها قالت ليه والله اولدي ما قلت ليها شي كلمة … سولاتني يسرى على شنو كان كيقول با لعيسى قلت ليها كان كيوصيه يلم الشمل ديالو مع بنتو ومرتو وهوا مابقاش قادر لايكلف الله نفسا الا وسعها ..
قالت ليه يسرى وانا والله ماقلتها ليها
وقفات تورية قالت ليه شوف باش تكون هاني .. حتى وحدة ماقالت ليها شي حاجة .. كون هاااني راك عارف خواتاتك .. شووف دابا منين جاتها الهضرة وشكون اخر كان معاكم فالوصية.. وزايدون راه با وصاك اعيسى .. وصاك والوصية غتبقا دين على رقبتك ونتا تعرف اخويا العزيز .. اللي سلكاتك ديرها .. اما باش تشك فينا ولا فمك راه ماشي خرج لينا العقل باش نجيبو الهضرة ونعطير هضرة .. وديك المرى عندك راه مامربياش.. ماوقراتنا .. ماحتارماتنا .. مادارت بوجه شي واحد فينا .. جيت لقيت الريكاطة ؟!! هزني غواتها مت الطبلة لتحت طلعت كنجري !! ماحتارماتني حتى انا اما لخرى قلت ليها زيدي فحالك زادت فحالها
قالت ليها الحاجة ماكانش عليك تجري عليها ماجات عند حتى واحد جات عندي تعزي
قالت ليها تورية واش انا عرفتها بعدا شكون ؟؟ واش الصوت عالي عاد غنبقا نسول شنو واقع .. صافي بجوج بداو كيتعاطاو جريت عليهم .. لخرى مازادتش الهضرة مشات كطير ايوا ولاللة رجاء بغات ضربني ايوا فكها دابا يامن وحلتيها
وصلات للاوتيل وطلعات كتبكي .. جنى لاسقاها كتسول مالها حتى بدات تبكي معاها حتى هي فالاخير هزاتها عنقاتها ومسحات وجهها باش بنتها ماتبكيش وحاولات تنعس واخا شي نعاس ما بغا يجيها .. بقات ساهية وضوء القمرة داخل من النافدة وهي فالفراش مع بنتها كتدوز صبعانها على شعرها الناعم حتى صونا تيليفونها على حجرها وهزاتو كترمش بتتاقل . شافت رقم عيسى وتخض قلبها من بلاصتو .. ماتوقعاتش يصوني عليها وهوا اصلا مشغول مع الصدقة والناس .. خلاتو كيرن عرفاتو غيسول غير على بنتو وصافي لهادا مجاوباتش ومابغاتش حتى تسمعو صوتها من بعد التبهديلة اللي تبهدلات قدام العائلة .. رجع معاها الندم الشديد وتمنات لو يرجع الوقت للور وتسامح مع الحاج الحجوجي وتخرج بحالها وماتعاودش تحط رجلها تما .. لاكن مع الاسف اللي كيفوت مكيرجعش وماعليها غير تكمد حرقة الندم بالبكا الصامت باش متفيقش بنتها .. بحر الندم وعزة النفس اللي فاقت وكبريائها اللي تشرد بقات كتعض شنايفها وتكمدها بالدموع على سالو بالدم بلا متشعر واستمرت على داك الحال وكتقرا المعودات باش تبر او تنعس وتنسا .. بقات تقرا تكرر المعودات وعاود رن الهاتف مرة اخرى وكان عيسى .. هاد المرة هزاتو قطعات عليه وطفاتو وتقلبات كتنخصص سدات عينيها وبقات كتكرر المعودات حتى نعسات رتاحت .
اما فدار العزو مكان نعاس.. باتو سهرانين حتى للفجر مع بعضياتهم واحد فاش مشغول .. الى الناس الكبار والاطفال اللي نعسو ومنهم ساجد اللي نعس فبيت جدو وفبلاصتو .. تهدنات الاوضاع مع الفجر ورجعات الفيلا كيما كانت والاشغال انتهت .. صلاو صلاة الغجر الرجال اللي بقاو مجموعين وكل واحد فين مشا يرتاح ..
رجع عيسى لدارو لقا رجاء جالسة وعينيها منفوخين بالبكا كتسناه وطول الليل مانعساتش .. غير دخل وقفات ليه بغات تهضر لاكن هز يدو وقفها وحيدها لافيست من الدخلة قاليها مافيا اللي يهضر .. مزال نتفاهمو على داكشي اللي درتي .. اما دابا ما دوزيش قدام عين
مشا. لبيت النعاس حيد حوايجو ونعس وسط الناموسية ، جات تنعس مالقاتش بلاصة وماقدراتش تفيقو ولا تحركو وخلاتو ومشات بلاصة ولدها ونعسات .
كانت ليلة شاقة ومتعبة وطويلة .. فاق الحاج مع الحداش ودخل دوش . خرج لقا فطور ملكي فوق الطبلة محطوط .. سبق بالدواء. وجلس فطر ماهزش راسو فيها . اما هي صبحات متولة وجامعة الدار وكدور بجنابو . خصك الماء ؟. خصك العاصير ؟. نزيدك السكر .. مانطق ماهضر معاها ماشاف فيها وهي كطلب الله يبقا ساكت وينسا اش وقع .. بغات تعرف اشنو كيدور ليه فراسه وفاض كيفكر وشنو كيطيخ وعلاش لحد الساعة باقي ساكت .. قهرها السكات وخافت يصدمها بشي قرار من مور داك الصمت وبدات كتفكر تفاتحه فالموضوع . خلاتو حتى فطر وسمعات تيليفونو كيصونو ناضت كتجري. جابتو ليه .. شد تيليفون سكتو ونفض يديه وجر الفوطة على كتفو قاليها اجي لهنا
سمعات ديك اجي لهنا رجعات زرقة بحال البحر وجلسات متوثر قدامو .. هز راسو كيشوف فيها مطولا وهز صبعانو بجوج قاليها غادي ندمك على ديك الفضيحة اللي درتي ليا البارح فالموت ديال با .. كاع الناس ساكتين وجالسين الا نتي .. غير نتي اللي عندك المشاكل وكتعصبي.. همك الوحيد فالدنيا سارة .. ماهمكش الموت دبا انا همك غير سارة ماترجعش ياك .. وادابا حلي ودنيك مزيان وسمعي.. غنرد سارة.. وغندير بوصية با الله يرحمو .. ومزال غنوريك مزيااان شنو كيوقع للمرى اللي كتعلم ولدها يجيب الخبار .. كان مربي ساجد .. كان مكيعاودش الهضرة فاش كان مع لبنى .. جا عندك فسدتي ليه الترابي .. فسدتي ليه اخلاقو .. مكتعلميه الحلال من الحرام .. مكتوريه الدين اللي نتي اصلا ماكتفقهي فيه حتى حاجة .. وبزاااف جامع ليك ارجاء ونتي ولا بغيتي تفيقي وتقادي .. لبنى اللي كانت كطاكي عليك الصهد مشات الله يرحمها .. اللي كانت كدير ليك العقل شوية هاهيا مشات .. بقيتي بوحدك مكاين لاشكون يستر فعايلك .. لاشكون يحبسك من الفضايح لاشكون ينبهك على داكشي اللي كديري .. تعريتي .. دابا وجدي راسك للشواية باش نعلمك كيفاش الناس كيجلسو فالجنازة ودايرين عقلهم
بقات كتشوف فيه وتبكي قالت ليه انا هزني خاطري ماعقلتش على راسي ماشعرتش .. اي مرى بلاصتي تقدر دير ديك ردة الفعل
قاطعها قاليها لا ماشي اي مرى .. غير االلي مكتحشمش بحالك .. اما العيالات اللي بحال لبنى وبحال بزااف منها.. مكيديروش ديك الفضيحة وفالكنازة والناس حاضرين . اشنو دابا ربحتي ؟. ها سارة غترجع يالاه بردتي ؟؟ غواتك نفعك ؟. ضسرتك ورخيت ليك وكنقول خليها دابا نقاد دابا دير عقلها ومافينا مايهضر مافينا اللي يجبد الصدع .. ونتي والو نيبالا .. داخلة الربعين ودايرة عقلك فوحدة مزنزنة كتاااااااار منك غاسل عليها يدي هاديك كاع .. هي بعدا كتحشم مرة مرى على وجهها اما نتي والو بلاكة فين مامشيتي كتفكي حريرتك بالدباز .
صبحات كتجمع حوايجها تمشي بحالها هي وبنتها بإحباط .. حطات الشنط ديالها فالباب وجلسات كتسنى باها اللي كان بايت فغرفة اخرى يعيط ليها باش تهبط ويمشيو بحالهم .. لاكن فاجاها اتصاله وقاليها باللي غيرجعو لدار لعزو وباللي الحاجة قالت ليه جيب معاك سارة وكتأكد عليه. هنا رفضات رفض قالطع واخا ماشرحاتش لباها على السبب لاكن حس بيها عندها شي حاجة اللي خلاتها تقطع رجلها ومابززش عليها .. اتاصل بعيسى اللي وصل ليه طلب مو وقاليه باللي عيانة ليها البنت وخصهم يرجعو بحالهم . قطع معاه وكانت اثتائها كتلبس جلابتها.. جاها اتصال من عيسى وطلات شافت شكون المتصل وخلاتو كيرن جوج وثلاتة حتى رسل ليها مسج قاليها جاوبي ضاروري
ردت عليه قبل ما يقول شي كلمة بصوت بارد قالت ليه الى كنتي كتسول على جنى راها لاباس الحمد لله وغادي نوجعو بحالنا للناضور نديرو الصداقة نن بعد يوماين غنرجعو للرباط صافي؟
قاليها مالك مالك غير بشوية .. علاش مكتجاوبيش؟
عطات التيليفون لجنى قالت ليها هضري مع باباك
ناضت نفضات الوقفة وجنى كتمد ليها تيليفون وتقول ليها بغا يهضر معاك وهي كتقوليها الى ساليتي الهضرة قطعي
قطعات عليه جنى تيليفون وعاود صونا وردات عليه سارة مع البدية قاليها شهاد شغل البراهش كديري
قالت ليه شنو بغيتي بنتك هانا قلت ليك عليها كولشي شنو بغيتي اخر ؟
قاليها اجي مع عمي عندنا ليوم للدار ..
قاطعاتو ويدها على جبهتها قالت ليه شوف انا غنقول ليك كلمة وحدة .. قولو عليا مامزياناش قولو عليا ماتسواش اللي عجبكم قولوه . صافي غسلت يدي منكم ورجلي الى تحطات عندكم حيدها ليا .. المرحوم اللي درت بوجهه وكان بحال بابا مشا عند الله .. بقات بيني وبينكم هاد البنت مرحبا الى بغيتو تشوفوها .. سي حاجة اخرى الله يرحم ليك الواليدين ماتعيطش ليا . بيناتنا الاحترام واخا نتوما ماخليتو فيها لا احترام لا والو .. سمح ليا دابا غادي نمشيو
قطعات عليه ولاحت تيليفون للجنب وجلسات كتفكر فهضرتها .. صونا عليها باها قاليها نزلي عندي نتي وجنى لتحت وخلي البالز مغنمشيوش دابا .
نزلات عندو جلسات هي وياه وبقا كيشوف فيها بتساؤل قاليها مالك مع ايت الحاج ؟؟ شنو واقع
دورات وجهها وقالت ليه والو مابغيتش نمشي ماعندي مندير عندهم
قاليها قالي عيسى ماتمشيوش راه جاي هوا والحاجة .. المرى عاد لبارح دفنو ليها الراجل ليوم خارجة جايا علاش جايا؟
بقات ساكتة وبالتدريج بداو عينيها كيغرغرو وبدات تعاود ليه شنو وقع ليها حتى عيات وهبطات وجهها كتمسح عينيها . بقا باها ساكت غير كيشوف قاليها وعلاش هادشي ماقلتيهش ليا؟. علاش بقيتي ساكتة؟
قالت ليه مابغيتش الصدع
قاليها الصدع وقع ونتي ساكتة عليه ؟؟ مزياان
وصل عيسى ومو بالابيض وختو تورية الكبيرة وعبد الجبار .. بلا متشعر سارة ابتسمت وناضت سلمات عليهم حشمات تقلب وجهها وهما قدامها .. عنقاتها تورية وشدات فكتافها قالت ليها سمحي ليا .. سمحي ليا بزاف انا ماعرفتكش لبارح وماعرفتش شنو وقع كااع .. الكنازة والصدع نايض داكشي ماكيدارش .. عاد فهموني البنات شنو واقع
حطات الحاجة يدها على كتف سارة قالت ليها هادي ختو الكبيرة دعيسى تورية
كحزات سارة بارتباك قالت ليها جلسي اخالتي جلسي ماتبقايش واقفة . وبقات كضحك بقا باها غير كيشوف فيها .. تقول جايين ضياف وكدير فالصواب بقا غير اتاي تحطو ليهم والسيدة ولات حمراء غير كضحك وتقوليهم ماشي مشكل ماوقع والو مكاين باس الدنيا هانيا انا اصلا نسييت
بقا عيسى غير كيشوف فيها هوا وباها .. هزات تورية جنى عنقاتها كتبوس فيها وتراري بيها وداوهم معاهم للفيلا .. فالطريق فالطموبيل رهي اللور وباها حدا عيسى فسيارة كبيرة رسل ليها مسج قاليها غتوصلي للفيلا نحيد ليك رجليك .
هزات عينيها شافت فيه فالمرايا وهوا كيشوف قدامو وقلبات وجهها مربعة يديها فصمت .. دخلو للفيلا وجلسو مع العاىلة ودارو ليها خواتاتو استقبال مختالف .. مكاين غير البوسان والتعناق والترحيب واخا وجههم اصفر بالبكا والعيا وجلسوها وسطهم فرحانين بيها وجنى .. اما الحاج الامام مشا مع الرجال ومالقا فين يهضر ولا يقول شي كلمة .. ماخلاوش ليه مايقول .. ايوا حشومة المرى جات برجلها وباقا حازنة وبالابيض!!! فين باقي ليهم يهضرو ولا يلومو ؟! صافي هادي تكفيهم وترد ليهم اعتبارهم . اما عيسى مشا كيقلب على ساجد .. خرج لقاه فالجردة مع الكلب وعيط ليه بصوت صارم جابو عندو وقاليه تبعني
طلعو لبيت فالفيلا وسد عليه الباب وجلس على واحد الكرسي ووقفو قدامو عطاه ودنو وقاليه فاش كنا جالسين مع با سيدو سمعتي شنو قلنا
حرك ساجد راسو بالايجاب ووجهه اصفر عارف شي حاجة وقعات وشي زبلة دارها .. هز فيه عيسى حاجبو قاليه فاش نسولك جاوبني بلسانك .. سمعتي ولا ماسمعتيش؟
حرك راسو بالايجاب كقفقف قاليه سمعت
قاليه شنو سمعتي؟
قاليه با سيدو كيوصيك
قاليه ولمن قلتيها؟
بقا ساجد ساكت وعينيه فالارض كيترعد .. عاود سولو عيسى بحدة وحمر فيه خلعو حتى قاليه قلتها لماما
هز عيسى حاجبو قاليه هاااا.. قلتيها لماماك !! علاش قلتيها لماماك؟
قاليه هي سولاتني
قاليه وكيفاش سولاتك ؟ باش عرفاتك كنتي معانا؟
قاليه كنت مع طاطا سارة وجنى .. قالت ليا طاطا سارة فين كنتو قلت ليها مع با سيدو وبابا
قالت لينا شنو قال لباباك .. صافي وعيطات ليا ماما .. ماقلت والو لطاطا سارة جنى اللي بقات كتخربق عليها كتقول ليها قاليه شري العش ما العش وبابا مابغاش يشري العش وانا بغيت غير نصحح ليها ابابا حيت بقات كتخربق وكتقول ليها العش ديال الطيور .. صافي وماما عيطات ليا قالت ليا شنو كتقولو .. قلت ليها والو ماكنت كنقولو والو .. وبقات كتقول ليا غادي نتخاصمو ومغاديش نديك للنادي نهار الاحد وقلت ليها
خرج فيه عيسى عينيه قاليه هادا هوا الراجل ديال الدار علامن معولين ؟؟ انااا شنو قلت ليك شحااال هادي؟؟؟ شنو قريتك ؟؟
بقا ساجد ساكت وجر عيسى من الكتف بصبعو قاليه جاوبني شنو قريتك
بقا ساجد كيتمتم ويبكي ويتفتف بين الحروف.. عن ابن مسعود قال : قال رسول الله (ص) لا بلغني احد من اصحابي عن احد شيء، فإني احب ان اخرج اليكم وانا سليم الصدر .
خزر فيه عيسى قاليه زييد
رد ساجد كيتفتف ويبكي وعينيه فالارض ملعون ذو الوجهين ملعون ذو اللسانين ملعون كل شغاز، ملعون كل قتات، ملعون كل نمام، ملعون كل منان .
حط يدو على خدو كيمسح الدموع وعيسى كيشوف فيه قاليه ماعلمتكش شنو كيعني هاد القول ؟. ماوصيتكش باش تجمع لسانك .. وتسد فمك .. واللي سمعتيها تخليها عندك ؟. ماوصيتكش تسكت وماتنوضش الفتن بين الناس بشنو سمعتي .. عرفتي دابا شنو درتي؟. درتي فتنة .. والفتنة اشد من القتل…
تزير ساجد قاليه سمح ليا اخر مرة نعاود
رد عليه عيسى بصرامة لا غير عاود .. عاود باش نتبرا منك .. انا معنديش الولاد اللي كينشرو الفتن بين الناس ويتسببو فقطع صلة الارحام ويديرو الصدع بين الناس .. درتي كما كيدير الشيطان .. هادشي اللي بغيتي ؟ باش ماتمشي للنادي وشيتي بشنو كان كيوصي با سيدو !!! ها ربي فضحك وغيحاسبك وداك النادي اللي كنتي غادي تمشي ليه صافي سالينا منو ..اخر مرة غتمشي.. باش تتعلم تسكت وماضحيش بالاسرار دالناس وتشعل العافية بيناتهم .. يالاه سير تحرك من قدامي
بقا ساجد واقف كيردد سمح ليا لاكن عيسى بقا مصر على موقفه وخرج خلاه فالبيت واقف .. مشا تركن فواحد القنت وهبط راسو كيبكي في حين تصادف عيسى مع تورية فالدروج قاليها سيري شوفي ساجد راه قصحت معاه خليتو كيبكي تما ..ماتخليهش بوحدو
هزات راسها قالت ليه مالو علاش اش دار
حرك راسو قاليها واغير سيري عندو سكتيه .. هوا اللي قال لرجاء على الوصية
خرجات عينيها قالت ليه ياكما ضربتيه
قاليها ماضربتوش ولاكن عطيتو با عمرو يعاودها
مشات كتجري وتعيط على ساجد ديالها فخاطرها
تغداو مع الناس فالفيلا ودارو بيها خواتاتو كيفرشو ليها ويديرو ليها الطريق منين دوز .. باش حتى الى طلبوها للزواج مرة اخرى ماتردهاش فوجهم واخا راه هي نيت اللي طالبة عليها .. ولاكن هما معارفينش ومعاندهمش منين يعرفو .. السر مشا مع الحاج وبقا مع الحاجة اللي مكتدي خبار مكتجيب خبار .. دوزات النهار ونساوها فداك التجرتيلة اللي دازت منها .. مافراسهاش باللي خواتاتو كيمهدو ليها .. صافي عند بالها ردها ليها عيسى فوجهها .. وحسب ما شمات من خبيرات قالت مع راسها كافيه دواج واحد وعش واحد وماعليها غير دير راسها ماشمات خبار مافهمات والو باش مايطيحش كبريائها قدامهم اكثر.. ولاكن الحقيقة كلها مغطية بالغربال ..واللي فراس الجمل فراس الجمال .. ديرها غير زوينة توصل وتوصل والفضيحة بالاخص كتوصل بحال النيزك .
المهم رجعات بحالها راشقة ليها من واحد الناحية انا عيسى ماعاردات شافتو ماعاود شافها .. مشات لدار باها للناضور هي وبنتها ودوزو صداقتهم اللي كانو عوالين عليها ورجعات بحالها لخدمتها وشتيني ماشتك.. تسد الموضوع ماعاودش تجبد .. لاكن الغريب فالامر واللي جديد عليها هوا ختو الكبيرة اللي كيقولو ليها كولهم لاللة حيت كبرو قدام عينيها بحال امهم ..خدات نمرتها وبغات تتقرب منها وتجرها لجيهتهم ..ورجعات هي وياها وختو لمياء فالواتساب هاك بالاك ..سيفط لي دعاء نسيفط ليك ورد.. ورينا جنى .. والاخبار بيناتهم كدور ..وعاد يسرى اللي حتى هي رجعات من جديد علاقتها معاها وحسات براسها عندها قيمة وسط منهم ومكبرين بيها وكيسولو فيها.. حتى لاللة نزهة ..حتى هي كل مرة تسول على حفيدتها المجعورة .. بسم الله الرحمان الرحيم تقول فيها شي جن .. البنت كتكون صحة سلام حتى كيتبدل ليها المجاج .. دخلاتها تقرا فالثاني وماتفاهمات ليها لا مع معلمين لا مع تلاميد .. كل مرة معيطين ليها ودوز تجري من الخدمة ديالها تشوف مالها ..ديما البنت كتبكي ديما كتشكي ديما كترد بعدوانية ..حارت معاها وباها مكاينش اللي يعاونها عليها وشاد كونجي وجالس ففاس . دازت العشرت الايام الاولى بحال الحشر عند سارة مع بنتها .. مكاين غير جري عليا نجري عليك .. دخلاتها تكمل فالمسرح ديالها وبالكشايف باش لقات كروب ديال المسرح بالانجليزية .. البنت نفرات ليها العربية وكتجيها تقيلة وطويلة فالهضرة .. والمعلمين حارو معاها .. فالحصة دالفرونسي تهضر بلونكلي وفالعربية كذلك. اما عند لونكلي فعاجبو الحال ومجلسها قدام عينيه واخا بعد المرات كطيح ليه اليد مع الرجل فاش حتصصحح ليه وتحشمو حتى كيبقا غير كيشوف فيها ولا يقول ليها ايوا اجي شرحي بلاصتي حسن ؟! عزيزة عليه حيت خفيفة وذكية وكتلقطها فالسما ..ولاكن عيبها واحد مكتسكتش وحشماتو فالادارة واخا كايعاملها مزيان .. قالت ليهم مكيشرحش. مزيان ..خلاتو غير كيشوف ولاكن ماداش عليها وبقا كيضحك ..
ايوا النهار لكبير هوا نهار و صبحات سارة فالخدمة .. وصبح عيسى فالبيرو . من الكنازة ماشافتو ونهار غدق عليه اول حاجة غطلبها هوا تخرج بكري.. دقات عليه بحال علدتها القديمة . الاحترام ولاكن ماتسرطش ليها الرفض ديالو ليها وبقا واحل ليها فحلقها ..ًرجعات كتخدم ونفسها فالسماء. دخلات هادة راسها كتشوف قدامها وهوا فالبيرو .. زادت وقالت ليه السلام عليكم مسيو حجوجي.. الى كان ممكن نخرج دابا نمشي لاجتماع الاباء فمدرسة بنتي
هز عينيه شاف فيها كيفكر ورجع حدر راسو قاليها باها غيمشي سيري كملي الخدمة ديالك
حركات ليه راسها وخرجات كتردد مع راسها وتقول .. سير نيت خاصك تمشي وتفرج بعينيك وتعرف بنتك كي دايرة .. مزيان هادشي نيت اللي بغيتي ايوا دابا غادي نتفرج عليك مزيان خصوصا الى دارت ليك شي فضيحة تما قدام الجميع هاداك هوا النهار الكبير
خرج السي الحجوجي صحة سلام من الخدمة .. ديمارا السيارة وزاد خلفة للمدرسة .. مكيعرف حتى واحد وحتى واحد مكيعرفو .. عاد بدا شي يعرف شي .. جلس مع الناس فالاجتماع كيتسنط .. عرفوه المعلمين باها ايوا بداو عليه بالشكاوي.. هادا يشكي عليه من هنا ولاخرى تشكي عليه من هنا وهوا داير رجل على رجل وكيسمع .. بقا فير كيشوف فجنى اللي ماحشمات ماستحيات ضربات المعلم فالوجه قالت ليه منقراش عندك .. بابا غيديني لندن يالاه
بقا عيسى غير كيشوف فيها وهي لاسقة حداه بحال التولالة مهبطة راسها وكتسمع شي مواقف ضحك عليهم حتى شبع وشي افعال بقا مستغرب كيشوف فجنى وكيقول مع راسو واش هاد البقة كدير هادشي كامل مابايناش عليها كاع .. ماهضرش معاها وعنقها بيدو واخا سمع فضايحها كلهم لاكن عجبو الحال فاش قالو ليه كتقرا مزيان مكترضاش تسمع شي نقطة احسن من ديالها وكملاتها وجملاتها قالت للمعلمة دلعربية نتي غشاشة عطيتيه تسعود وانا جوج
بقات المعلمة غير كتشوف فيها والكل كيضحك وعيسى واحد منهم قاليها علاش عطاتك جوج
بدات كتمسكن قالت ليه مابغاتش
رباات المعلمة يديها قالت ليها علاش ماحفضتيش المحفوضة ؟
قالت ليها جنى كتعطيهم لي ساهلين وانا كتعطيني صعابين
الحاصول داز الاجتماع بحال النكتة وكامل على موضوع جنى حيت هي نجمة الحلقات دائما . خرجات قدامو كتماييل لابسة صاية فيها المربعات وليبة وصباط وقميجة بيضاء وكرينات بخيوط فالابيض وكتغني بلونكلي ..غلى غفلة جا عندها واحد البعلوك كيجري جرها طيحها يعلم الله اش بينو وبينها حتى حصلها خارجة وبعت عليها .. قبل مايلحق عيسى يفك ناضت كضرب بابركول فالخوا وماجات فيه حتى دقة فالاخير تعصبات وتكرزات طلقاتها فالسما .. شدو عيسى وشدها قاليه علاش ضربتيها ؟. قاليه هي قطعات ليا ورقتي
قالت ليه جنى وفمها محلول كتبكي هوا سرقها ليا الاول
جرهم دخلهم للادارة وبقاو ميقلبو على ولي امر داك الولد .. هزها عيسى فيدو حتى بانت مو وقاليها عيسى علمي ولدك مايضربش
قالت ليه مو راه اسيدي بنتك كتعدى عليه ديك المرة هضرت مع الام ديالها تبعد منو ..
قاليها ماتعداتش عليه قدام عيني جا جرها
دور عينيه على غفلة يشوف فجنى لقاها كتقلي السم بعينيها لداك الدري حتى بدا كينقز بلاصتو ويغوت كيقول لمو شوف كي كدير ليا غنضربها غنضربها
خرجها عيسى هازها وهي معنقة ليه عنقو جلسها فالطموبيل اللور .. مابغاتش تجلس قالت ليه نجلس لقدام بقا كيسايس حتى بعد جهة جردة كبيرة فيها طريق طويلة وجابها قدامو كيدير ليها الخاطر وعطاها تسوق بيه فالمقود وبقا كيوريها وهي مبرقة عينيها كتحفض الدرس .صونات ليه سارة تعرف موقعهم ولحقات عليهم لقاتو كيدور بطموبيل فبلاصتو وقدامو جنى ،، نزلات عندهم قالت ليه كي داز الاجتماع
حرك راسو كيتنهد قاليها مزيان ونزل من الطموبيل قاليها خليها معايا هاد العشية حتى تعيا ونردها
قالت ليه غتخرج بحوايج المدرسة قاليها غير خليها غنخرجها هي وساجد
ربعات يديها وقالت ليه لالا حتى لمرى اخرى غنديها
شدات فيده بنتها وشد فيد بنتو وشاف فيها قاليها قلت ليك غنخرجها غير هي وساجد ..
بقات كتشوف فيه وتراجعات وابتسمت لجنى وودعاتها ومشات بحالها خلاتو معاها ورجعات كتنهد للدار .. الله على راحة اخيرا غدوش فخاطرها وتكا واحد الشوية.
لقات فرصة دور براسها شوية بلا نترون ليها جنى اغراضها وتهرس ليها النص او تلبس ليها حوايجها او دير شي كارتة
ردها فالعشية طايحة بالنعاس نزلات عندها طلعاتها وقاليها راه تعشات غير ديها تنعس .. شافت فساجد وابتسمت وباستو قالت ليه طلع تبات مع جنى
قاليها تلفت ليه عيسى وحط يدوعلى راسو قاليها مرة اخرى ان شاء الله
ودعها ومشا واستمر الحال غلى ماهوا عليه .. ماتبدلات حتى حاجة فالخدمة ..نفس الروتين والمعقول والمساىل الشهصية كتبقا على برا وفالهاتف النقال . وصلات الربعين ديال الحاج وعيطو ليها باش تمشي وحتى باها عيطو ليه .. مشات على نيتها للصدقة وواخا صادفات سارة رجاء حسباتها مكايناش.. يكفيها اهتمام العاىلة بيها .. دازت الصدقة على احسن ما يرام حتى لمور العشا وفجمع الرجال ونن مور الخطبة دالامام تكلم عبد الجبار اللي فمتابة الاب قدام الاخوة من بعد ما مشا البراني وفاتح الامام فموضوع الزواج .. عم الصمت وبكلام رزين وموزون تكلم عبد الجبار ودخل بخيط ابيض.. الامام حار فموضوع بنتو اللي كل مرة كيتجد. ماعرف مايدير خصوصا فاش سمع بوصية الحاج لولدو بعد اخذ ورد قاليهم انا منعطيكم مانحيد ليكم .. ها البنت هاهيا راه هي تعرف مصلاحتها.. باش ماشي ليوم ولا بعدو نوليو واخدين العيب ويقول الله يلعن اللي كان حيلة وسباب.
وفعلا الكل خرج سوق هاد الزواج هاد المرة ..بقا الخط بين شارة وعيسى..جابوها حضروها ومكانتش متوقعة يطلبوها.. حلسوها قدام عيسى وحضرات مو وختو لكبيرة وخوه وباها .. بقات ساكتة مهبطة راسها كتسمع وهوا مربع يديه قالب وجهه وكيشوف فيها بنص عين وفشنو كيدور ليها فراسها . سكتات حتى شبعات فالاخير قبلات . وبوصية الخاج زعما دوزاتها باش تحافظ على دم وجهها فهاد الرجعة . قلبها فرح من هنا ورجاء سخفات ليهم لهيه .. عتقوها بالماء والسكر وحلفات ماتنوض .. دارت ليهم كنارة .. كاين اللي بقات فيه جا فصفها كاين اللي ماعجبوش الحال على داكشي اللي دارت وكانها كتمتع بيه داك الزواج .. خلاها عبد الجبار حتى توكضات ومشات وقف عليها قاليها كنتي فرحانة فاش كنتي عروسة .. دابا بغا يسكت ليك القلب مالك على هاد الفضيحة واش نتي اللولة ولا اللخرة .. بدارك بولادك حمدي الله خلي السيدة تجمع شملها وتجمع بنتها براكة من هاد الجهل اللي فيكم
خرج خلاها ماحنش فيها بقات كتبكي حتى طابت مالقات ليهم جهد ..قالت ليها الحاجة الى ماقديتيش صافي كما حلل ربي الزواج حلل الطلاق ماشادك حتى واحد بزز لا نتي ولا هي
قالت ليها يسرى حتى نتي راكي جيتي على لبنى ضرة ودخلتي عروسة وعاجبك الحال .. المرحومة نهار طاح ليها النص طاح بسبب هاد التزويجات عليها واخا قبلاتهم وبززاتهم على راسها ومامشات ضرة على حتى وحدة .. اما نتي ارجاء راك مادرتي فيها مايصلاح وماخليتي فيها مسكينة غير اللي نسيتي ..بغيتي طلقيها من راجلها كاع وشبعتي فيها معيور ..كان عاجبك الحال كنتي عروسة جديدة وعند الشان والمرشان قلتي هاديك قديمة اجي ندردك عليها ..ها ربي دوقك من نفس الكاس ثلاتة ديال المرات غير الى مابغيتيش توبي
قاصح حسن من كداب هادشي اللي طبقو عليها عاىلة عيسى .. اما هوا ماكانش تما كاع ..خرج مع الامام للجردة وجلسو بجوج وعيط لسارة جلسها قدامهم مستغربة .. بعد صمت طويل تنهد الحاج عيسى وقال لباها اش غنقول ليك اعمي .. راك عارفني مكنخبي عليك والو .. كنستاشر معاك ونعاود ليك اكثر من خوتي .. الوصية ديال الواليد الله يواليه برحمة الله هاهي غنطبقوها ونلمو الشمل من جديد ..ولاكن هاد السيدة ..واش قادرة تحافظ على هاد الشمل ولا غتشتت باباه من الشهر الاول؟
شاف فسارة بجدية وقاليها قدام باك غنقولها ليك .. واش نتي قادرة تحافضي على هاد الزواج ولالا؟
بقات ساكتة مطولا حشمات قدام باها اللي بدوره قاليها جاوبي
قالت ليه ان شاء الله
قاليها من هنا غنقولها ليك .. انا مزوج وعندي ولد ونتي عارفة .. قابلة على هادشي ؟
بقات ساكتة مطولا وقلبات وجها كتمص شنايفها ورجعات شافت ليه فعينيه مطولا بحال الى كتقول ليه علاش كتسولني شنو بغيتي بالضبط تسمع ؟؟
عاود سولها وحط صبعو على الطبلة قاليها جاوبيني واش نتي مستعدة تصبري .. وتخلي بنتك تعيش بين واليديها ولالا
بعد نضرات طويلة وعميقة كيتسنا الرد ديالها وعينيها فعينيه حركات ليه راسها بالايجاب عاضة على شنايفعا وقالت ليه غلى قبل بنتي .. غادي نصبر
حرك راسو وشاف فالامام قاليه دابا كاين مشكل واحد ..مدام هي قابلة تصبر وانا قابل نصبر غادي نقول اللي كاين .. انا وبنتك خدامين خدمة حساسة ..بجوج بينا فبوسط واحد
استغرب الامام بقا كيشوف فيه قاليه كيفاش هاد بوسط واحد
فسر ليه عيسى كولشي وحط النقط على الحروف وفهم باها نوع الخدمة وانها كتبقا فالسر لاكن بصفته امام ومن خير الناس وكاتم الاسرار صارحه عيسى واصبح الامام فاهم وعارف وغادي معاهم فنفس السياق ، تنهد عيسى تنهيدة طويلة وقاليه المشكل اللي عندي دابا ..هوا التعدد مننوع عليا وانا المنصب ديالي حساس..ماشي بحال من قبل كنت فتخيزوغ ماشي مشكل ..ولاكن دابا شكل اخر وبتدلات الوضعية .. اولا منوع عليا التعدد ثانيا واخا نتزوجها بوحدها واحد فينا غيتبدل لسياج اخر منوع راجل مرتو ولا اخ واخت ولا نفس الكنية فنفس البلاصة .
بقات سارة كتشوف فيه تصدمات عاد استوعبات الامر اما الامام بقا ساكت غير كيسمع .. الحل الوحيد باش تنفد الوصية ويرتاح الحاج فقبره ونأديو هاد الامانة هوا زواج الفاتحة . شرعا غنتزوجو زواج كأيها الناس لاكن قانونيا ميمكنش ليا وهادشي غيبقا سر بيناتنا حنا بثلاتة .. المسألة القانونية حتى واحد مغيعرفها
ربعات سارة يديها مصدومة وقالت ليه لاااالااالااا انا منقدرش نتزوج غير بالفاتحة !! ونبقا هاكا
هز عيسى يديه قاليها هادا هوا اللي كاين مكاين حتى حل اخر ..
قالت ليه وحتى لامتى هادشي غيبقا ؟؟
قاليها حتى نشد التقاعد ديك الساعة نديرو العقد
تنهد الامام قاليه اش غنقول ليك اولدي.. هادشي مكانش على البال ..زواج الفاتحة فهاد الوقت مابقاش .. ليوم ولا غدا توقع شي حاجة هاد البنت تمشي ضحية لا ورقة لا قانون يحميها
حط عيسى يدو على الطبلة انا من جيهتي غنعطيك العهد قدام الله .. هاد السيدة عمرني نضرها ولا نآديها الا الى ضرات راسها بيديها .. ورقة غنعطيها ليك فيها اعتراف مني انني مزوج هاد البنت .. غتبقا عندك تحمي بيها بنتك الى شكيتي فيا ولا خفتي مني.. راك عارف فاش خدام وعارف كولشي دابا وانا براسي هادشي اللي كندير ماشي فالمصلحة ديالي ومغامر وانا اللي خاصني نخاف .. ولاكن نتا السي الحاج من حقك ضمن الامان لبنتك وحتى هي من حقها تخاف على راسها
بقا الحاج ساكت وبتردد تلفت عند سارة قاليها شنو بان ليك دابا فهادشي شنو كتقولي نتي
لقاها تالفة ماعارفة راسها من رجليها كلشي تقلب عليها وتصدمات مكانتش ضاربة ليه حساب .. قالت ليه ماعرفتش هادشي خصو الوقت ونفكرو فيه انا مكنعرفش الزواج دالفاتحة .. كنعرف غير العقد
قاليها عيسى فكري مزيان مزال قدام الوقت .. المهم انا اللي عندي هانا قلتو والباقي عليك نتي
بقات ساكتة كتفكر مطولا وقالت ليه ويلى جاو هاد الولاد كيفاش غنديرو ليهم
قاليها ماتخمميش فداكشي حالو ساهل.. شوفي واش نتي مقتانعة بشنو قلت ليك .. اما حياتنا غنعيشوها عادي غير ديك الورقة دالعقد اللي مغتكونش.
رجعات اللور قالت ليه خليني حتى نفكر .. هادشي صدمني منقدرش نقرر فيه دابا
تفرق المجمع ورجعات بحال للرباط مرفوعة .. اخر حاجة تفكر فيها هوا الزواج دالفاتحة .. من جهة ارتاحت لكلامو ولمسات فيه الصدق ومن جهة اخرى خافت يخرج ليها شي مشكل من شي جهة والدنيا والزمان ماتعرف الوقت اش تجيب.. بدات تسول وتبحث وتسول المستشارين القانونيين على قضية الزواج دالفاتحة وقالو ليها انه معترف بيه في حالة توفا الزوج ولا خرج هاد الزواج للعلن . فقطً يكونو عندو شهود وادلة كيتبتوه والقانون كيوثق داك الزواج .. فسرو ليها مساطر كثيرة خدات منهم داكشي اللي بغات وقررات من بعد شهر ديال التفكير والبحث.. حتى لقاىها بعيسى فالخدمة كيدوز صامت كل واحد كايديها فخدمتو ومكيسولها مكتسولو .. التيقار والحدود والاحترام كاي مدير وموضفة .
بعد تفكير عميق جا الرد من عندها وقبلات .. قبلات وفنفس الوقت خايفة على راسها . مكتوبها دفعها من اللور وترفع ليها العقل حتى لقات راسها وسط عائلتها فالناضور لابسة قفطان ابيض وكتقرا قاتحتها وسط الحضور ..دار ليها باها صدقة كبيرة ساق فيها الخبار الصغير والكبير .. انها رجعات لراجلها الاول تجمعات فيها العاىلة ودوزو اللامة من بعد ست اشهر على موت الحاج .. وتزجات سارة بالفاتحة واخا مكانتش مقتانعة بيها .. لاكن مدام باها حاضر وعاىلتها وعندها شهود والكل عارفها رجعات فما عندها مناش تخاف .. تحفظ السر بينها وبين عيسى وبين باها .. وحتى امها مافخبارهاش باللي مدارتش العقد ..دازت اللامة على خير وركبات مع راجلها فالطموبيل اللور هي وبنتها وشدو الطريق للرباط كل واحد كيشوف قدامو .
كانت فهاد الاثناء رجاء فقلب دارها غادية جاية غتسطا ..امها واختها كوثر جالسين قدامها غثر كيشوفو فيها وهي بحال المجنونة كتحلف وكتقلب على تخريجة ليها
وقفات اختها كوثر بهدوء وقالت ليها شحال وحنا كنوصيك ..شحال وحنا كنهضرو معاك كنقولو ليك ارجاء راه الراجل مكيبغيش المرى اللث دافعة الجهد وكتعنى بالقوة .. هانتي بحال ديما كتجيبيها غير فراسك
وقفات امها قالت ليها دابا شنو اللي غريب ؟. مالكي غتسطاي؟. صافي تزوج الله يعاونو راه مولف مالك نتي مابغتيش تديها فدارك وولدك .. واش اعباد الله ولدك مامربياش عليه الكبدة .. ولدتيه لحتيه لضرتك الله يرحمها .. والحمد لله طلعات بنت الناس رباتو احسن منك .. بقيتي مقابلة الصحابات كيعمرو ليك راسك وكيوريوك شنو ديري وانا اللي مك مكانتش كتعجبك هضرتي.. كنتي كتقولي سكتي اش كتعرفي . ها هضرتي وقفتي عليها
قالت ليها كوتر دابا صافي سكتونا بلا ناتبقاو تحبدر القديم والجديد.. هوا ماجابش مرى اخرى رد مرتو وباه وصاه دار بالوصية .. نتي دابا عندك دارك ..قوليه ليه بغيت نرجع لخدمتي.. قوليها لثه نيشان يردك للخدمة .. ساجد صافي كبر راها هي بنتها صغيرة ومزال خدامة
قالت ليها امها اابنات الناس القرصات المطورات ماشي بحال هادي فيها غثر الصدع والغوات .. هاديك عارفة شكادير وعارفة كيفاش دير بلاصتها .. ها الفم الماضي والدراع الكاضي
قالت ليهم كوثر وصافي براااكة .. دابا خاصها ترجع تخدم .. ماتبقاش جالسة فالدار وحاضياه .. تخرج تعمر وقتها وتشغل راسها وعقلها ..من نهار جلسات لا شغل لامشغلة وهي اللور اللور ها الجناب خرجو ها الشراوط مابقاوش ولات غير البيجامات وحاضياه فين مشيتي فين جيتي وكتبرد الجنون فساجد مسكين اللي مدار ليها والو .. شي نهار يطج يهرب بسبب النكد وهاد الطاقة السلبية اللي عندك فالدار .. خرجي خدمي وتعرفي على الناس ولهي راسك ماتخليش لراسك الرقت فين تجلسي تفكري .. صااافي دابا اللي عطا الله عطاه تقبليها والى ماقدرتيش تقبليها طلقي منو وهنينا كاع من هاد المشاكل
هزات رجاء يدها قالت ليها والللللاااه لاطلقت وخليتو ليها .. الى منرحلها ونردها منين جات ها انا ها نتوما …
هزات مها صبعانها قالت ليها غتبقاي كطيري كالطيييري حتى ديري شي موصيبة ..بعدي من الزمر عاطياك التيساع عطيها التيساع كما قبلات قبلي ولا طلقي كي قالت ليك ختك وهنينا ..مرضتينا ولينا خايفين نفيقو على شي كارثة من جيهتك..
قالت ليها رجاء سكتي الله يعطيك الستر انا معصبة ونتي كتزيدي تكملي عليا .. غير سكتي ديها غير فراسك
سدات معا فمها قالت ليها هااااك افمي … الله يطليك بيهم .. انا اللي فمي كياكلني هانا غنسكت
قالت ليهم كوثر وااابردو السوق .. وصافي من هاد الصدع .. نتي ماعجباتكش هضرتنا واخا كنوصيوك وكتجي غير فهضرتنا .. ضبري راسك .. راكي ضعتي وعايشة فمتاهة وماحاساش براسك حتى تفيقي شي نهار وتندمي.. درتيها بين عينيك صافي حلفتي عليها ضبري راسك ..فوتي عليك ساجد وبنتها ..بعدي عليها .. وماكرهتش تبعدي منها حتى هي . غير فكري فكري فراسك واش نتي تستاهلي ضيعي حياتك على قبلها؟ واش تستاهلي؟. مالكي شنو ناقصك غير الاهمال والنكد اللي خلاك هاكا والجنون اللي فيك كتجنني .. بردي وجلسي ..هادارك ها ولدك وراجلك كما هوا راجلها ..ديري بهضرتي غييير جربي جربي وخرجي للدنيا شوية خرجي من القوقعة اللي نتي فيها . والله حتى تبدلي ..
خبيرتهم مشات من واد لواد ماداتهاش فيهم كاع . اما الزوجين وصلو للدار ودخلو ليها لاول مرة بجوج .. اول مرة يشوف دارها الجديدة .. جلس بحال الضيف على واحد الفوطوي وجلس على رجلو جنى ..اما سارة لزمات الصمت وداخلة سوق راسها مكتهضر مكتنطق . دخلات الباليزات للبيت حطاتهم وكانت موجدة ليه جيهتو فين يدير حرايجو فالبلاكار .. علقات ليه اللي يتعلق وستفات اللي يتستف حتى سمعاتو كيعيط ليها وخرجات لابسة بيجامة محترمة عبارة عن بيجامة قميجة بالكمام وسروالها .. لقاتو واقف قاليها شي صندالة ندخل نتوضا
حركات ليه راسها ومشات جبدات ليه صندالك باها اللي عندها فالبلاكار عطاتها ليه ودخلات معاه كتوريه ودور .. ها البلاكار فيه كولشي. .. ها الفرطات ها البينوار الى بغيتي دوش .. ها المجر هادي ها هادي وخرجات مشات للروتين ديالها كتصاوب الماكلة اللي تاخد جنى معاها الصباح للمدرسة وكتوجد الفطور على الطبلة وتستف وغطات داكشي بمنديل ومشات مع بنتها للبيت .. خرج لقا السجادة قدامو صلى وناض كيهضر مع رجاء فالعلن ويسول على ساجد وسارة كتسمع .. فين ديك الايام اللي كان كيهضر بالتخبية .. رجع كيهضر قدامها وحتى هي لاحضات الفرق فراسها ..جاتها عادي يعيط ليها وحتى الطريقة باش هضر هضر عادي وقطع ..اما جنى تزادت فيها ضلعة ..كاع العابها حبداتهم كتوريهم لباها وكتوريه الكتب ديالها وحتى خوايجها جبداتهم كتوريه وكتنقز من جهة لجهة فالدار .. تمشي توريه الديكور تقوليه بابا شوف .. توريه القصص بابا شوف .. توريه كوزينتها بابا شوف . كولشي وراتو ليه وداتو للبيت قالت ليه اجي نوريك بيتي وجبدات ليه الجديد والقديم فاللخر عنقاتو كتشوف فيه قالت ليه تديني للمدرسة غدا ؟
بدا كيضحك وعنقها قاليها ان شاء الله . يالاه نعسو باش الصباح نفيقو بكري.. هزها معاه لبيت النعاس نعسها حداه في حين كانت سارة فالحمام كتمشط شعرها وتتعطر ..لبسات سوميج خفيفة عليها بينوار وجهزات راسها بحال العروسة وطفات الضو ومشات لبيت جنى طل عليها مالقاتهاش ورجعات لبيتها لقاتو متكي معنقها عندو كيقرا ليها قصة ..بقات كتشوف فيهم ورمشات سدات الباب ومشات لبلاصتها حداهم دخلات بالادب وجمعات شعرها مقالت ليهم لا طابت لا تحرقات .. سكتات وطلعات عليها الغطا كتسنط ليهم كيهضرو على القصة حتى نعسات وسد الكتاب حطو ..هزات سارة راسها قالت ليه غتهزها لبلاصتها؟
طلع لغطا على بنتو قاليها لا خليها تنعس هنا
رمشات سارة وحركات راسها ورجعات لبلاصتها نعسات
صبح الحال صباح جديد قدام عينين عيسى .. سارة جديدة اللي معتامدة على راسها وهازة المسؤولية .. وتعودات على الفياق بكري وتربية بنتها ..منها الام والاب فنفس الوقت .. نسات واش الاب حاضر وبعفوية قالت لجنى اللي جالسة على الطبلة حدا باباها كتفطر
فطري دغيا باش نديك بمدراستك اماما غيمشي عليك الحال
تكلم عيسى قاليها غادي نوصلها انا. ومسح على راس جنى قاليها يالاه فطري باش متعطليش
حركات جنى راسها كتفطر وفنفس الوقت حطات قدامها سارة علبة ديال اغراض الشعر ورقفات وراها بنفس بيجامتها اللي كانت لابسة بالليل فالاسود وبانطوفة كحلة مزغبة غليضة ودايرة بانضة على راسها من القدام جامعة ليها شعرها على وجهها وكتمشط لجنى شعرها وهي كتفطر ودفرو ليها وتلسق ليها المقيبطات .. مابقاش ليها الوقت كاع باش تفطر ومشات لحقات تلبس حوايجها وصباطها وتقاد حجابها وهزات صاكها مزورية خرجات عندهم قالت ليها يالاه غيمشي عليك الحال اماما
تلفت عيسى كان لابس لباس رسمي كيشرب قهوى قاليها مغتفطريش
ردت على عجلة قالت ليه مشا الحال
قالت ليه جنى كااع مكتفطر ماما مسكينة حيت المدير ديالها قبيح الى عيط ليها وكاع مالقاها يغوت عليها .. ياك اماما .. داك الزمر ديال داك المدير الله ياخد فيه الحق
تنكات سارة خرجو عينيها وعيسى اكثر منها شاف فجنى قاليها الله ياخد فيه الحق !!
حركات راسها قالت ليه دابا ربي يعدبو
زربات عليها سارك عطاتها الشكارة قالت ليها بارتباك سيري مشا عليك الحال سيري ونقصي من الهضرة .. يالاه سربي راسك
هزات سوارتها تخرج موراهم لاكن حط عيسى صبعو على الطبلك دالفطور قاليها جلسي تفطري
قالت ليه باحراج لالا بلاش مافياش
دقدق على الطبلة قاليها جلسي فطري عاد اجي .. يالاه
خرج سبقها خلاها واقفة وجلسات حطات تقلها كله فوق الطبلة وبقات مصمرة كتشوف قدامها.سمعات الباب تسد وعاود تحل جات جنى كتجي عندها عنقاتها وباستها ورجعات مشات وبقات بوحدها هزات الكاس كتفطر ومستغربة فبنتها .. كيفاش بنت صغيرة كتفهم وكتعقل ..مجرد كلمات كانت كترددهم سارة على الصباح فاش كيكونو خارجين شداتهم جنى وفهماتهم .. هاد البنت بكل صراحة خص الواحد يعرف اشنو كيقول قدامها . لاكن تأثرات سارك بكلام جنى حتى درفات دموعها .. ماتوقعاتش بنتها تحس بيها وتهز همها وتحن فيها .. كانت كتشوفها محرد طفلة كتقرا فالثاني ماكتعرفش ومزال صغيرة لاكن هايهات هايهات ..
فطرات على كلمات بنتها وغيات داكشي وخرجات طلعات فسيارتها للخدمة .
بدات النهار بمود جديد .. كلمات جنى بقاو كيتكررو فمسامع ودنها طول الوقت .. عيط ليها عيسى وناضت مشات للبيرو وتأثير الاحراج مزال شاد فيها ..كانو عندهم قضايا عليا عليها ضجة من الراي العام خدامين عليها وكان عندهم بحث ومعلومات كيتسناوها .. قربات منو وهوا منهمك فالخدمة داير النضاضر كيوريها شنو دير وهي متبعة معاها فصمت .. كترات من الصمت حتى ولفاتو .. واحد اللحضة وهوا كيشوف فدوك الاوراق قاليها نقصي شوية من الروايح اللي كديري
تفاجآت وتلفتات شافت فيه قالت ليه نعام؟
الروايح اللي كديري مجهدين شوية نقصي منهم
بقات كتشوف فيه بنضرات حادة وقالت ليه واش صافي هادشي اللي كاين نمشي؟
قاليها صافي هادشي اللي كاين
جمعات دوك الاوراق ومشات بنرفزة خرجات من البيرو رجعات للبيرو ديالها وجلسات ..مارضاتش يقول ليها ديك الهضرة وحلستت كتخمم فيها شحال حتى حا وقت الغدا ونزلات تتغدا هي وزميلتها فالعمل وسولاتها قالت ليها واش ريحتي قوية ؟؟
قالت ليها زميلتها لااا بلعكس انا كيحمقووني روايحك وديما كنسولك عليهم .. اللي شميتها فيك كنجري نشريها
قالت ليها سارة بصح ؟؟ جاب ليا الله بحال الى كنقوي منهم .. بعد المرات كنبدا نخلط وهاد الصباخ خلطت بين جوج ريحات وحدة درتها فيدي ووحدة فحوايجي جاني راسي كترت
قالت ليها زميلتها اويييلي كتهضري بصح .. فنننة كتحمق ااشنو دايرة ؟
قالت ليها سارة السمية وبقات من بعدها موسوسة .. دوزات لغدا ديالها ومشات رجعات لخدمتها .. خرجات من بعد انتهاء الدوام فطريقها لمدرسة بنتها لاكن اتصال عيسى اللي خبرها انه غيدور يجيبها ردها من الطريق لدارها .. دخلت بوحدها ضارت بالدار شوية نقاتها بالزربة بحال ديما ومشات لبيتها لبساتها بيجامة رمادية بنفس الموديل .. قميجة وسروالها من حرير ومشات تشوف راسها شوية وترد تقتها بنفسها وتهتم بمضهرها ونضافتها الشخصية وتجلس وريحة الانوثة فيها ماشي بحال الراجل وهي دابا مزوجة .
لبسات واحد الخلخال رقيق وغسلات وجها ودارت ليه ماسك ومساج ردات فيه الدم ورطبات وجهها وطلقات شعرها الطويل الاشقر اللي مر عليه الزمن ما داز فيه المقص حتى شافت طوله وصل لمؤخرتها فجأة بلا ماتنتابه .. سرحاتو ولواتو ويفي شوية عطا منضر جذاب وطلقاتو وهزات بخاخ بريحة العود بدات ترشو على شعرها من هنا ومن هنا حتى عطا فالحمام فجأة تفكرات كلام عيسى وحطاتو بعداتو للجنب وماعاودات رشات على ريحة اخرى .. حطت مرطب للشفاه واليدين ودارت بوندو من حرير مرصع ببعض الاحجار على راسها و مشات للكوزينة حلات ثلاجة كتوجد كاسكروط ..بدات بالقهوى والعاصير وهي تسمع الباب تحل وجات جنى كتجري فيدها حلوى سلمات غليها وقالت ليها مشينا جبنا الحلوى تعطلنا عليك
عنقاتها سارة قالت ليها لا ماتعطلتوش يالاه سيري حيدي. حوايجك غتوسخيهم
دخل وراها عيسى شاد الكرفاطة فيدو حط ليها شي كراطن ديال الماكلة وشاف فيها بنص عين وعي كدور فالكوزينة ماعطاتوش وجهه وحدها ردات عيه السلام وقطعات الزي
قالو للسم باش كتقتل ؟. قاليهم بالتقالة .. هادشي ماطبقات سارة مع سيد الحاج .. صوتها كيتسمع غير الى بغات تهضر مع بنتها .. بنتها ولفات سيستيم من صغرها .. تمشي تقرا تجي خصها الرسوم ضاروري فوقت كاسكروط .. جلسو معاها فالطبلة كيتفرجو فالرسوم حتى هما فصمت .. وبيما ان سارة كتصاوب ليها غدا خفيف ولفات تعوضو ليها فكاسكروط .. ديما تحط ليها وجبة كاملة وهاد المرة حطات ليها داند فقطيبات مشوي معاه خضرة فسلطة والفرماج مقطع وكاس ديال الليمون وخبز الشعير . خان عيسى كيتسنا تحط ليه حتى هوا لاكن جلسات وهزات كاس ديالها دالقهوى .. بقا كيشوف فيها وسولها قاليها واش غير اللي جنى اللي صاوبتي ليها ؟
حيدات الكاس من فمها كترمش قالت ليه واش بغيتي حتى نتا؟
دور وجهه قاليها لالا صافي غير سولتك
حطات الكاس ناضت للكوزينة حطات السلطة اللي بقات كلها فطبسيل وخرجات من الثلاجة لاداند مشرمل مقطع ولبسات قفازات ودار ليه ثلاتة قطبان دالعود ودارتهم فالفران طابو وخوات ليه العاصير وجابت البلاطو بالزربة حطاتو ليه دوخاتو .. فالاول قاليها علاش شقيتي راسك فاللخر جر البلاطو قاليها احسن جا فوقتو شي عشا مكنتعشاه
قالت ليه علاش مكتعشاش؟
قاليها بعفوية غير على حساب الريحيم وصافي كيطلع ليا طونسيو كنبغي شي حاجة خفيفة .. ماتبقايش تكتري الملحة وصافي
قالت ليه اصلا ماكلة جنى مسوسة مكنديرش فيها الملحة بزاف
قاليها حسن
سكتات كتفرج فالرسوم طالقة رجليها فوق المخدة يرجع فيهم الدم وهوا حداها كيضحك مع جنى .. رتاحت شوية وناضت قالت ليه عفاك انا غادي نمشي نعس شوية هانتا معاها .
حرك ليها راسو وتبعها بالعين حتى غبرات مشات للبيت تنعس ديك النعسة اللي مهمة ليها بزاف من بعد الرجوع من الخدمة وبالضبط مع الخمسة كتبغي تنعس واحد الساعة . بقا مقابل جنى حتى دازت ساعة شاف سارة مزال مافاقت وهوا بغا يخرج وعنق جنى قاليها سيري شوفي ماماك واش مريضة
مشات جنى كتجري جات مع سارة انا بات عينيها وطلعات حداها قالت ليها ماما واش مريضة ؟
قالت ليها لا احبيبة مامريضاش
قالت ليها جنى بابا قالي سولي ماماك واش مريضة
قالت ليها لا هانا غنوض سيري لبيتك حفضي الحوار اللي عطاوك فالمسرح
باستها جنى وخرجات كتجري عند باها قالت ليه لا مامريضاش
تخشات بين رجليه لاسقة فيه وهوا كيشوف فيها بابتسامة ويمسح على شعرها وقال. المؤنسات الغاليات
ضارت عندو قالت ليه مكنسة؟؟
ضحكاتو بلهلا يطريه ليه حتى شبع وصححها ليها قاليها المؤنسات ماشي مكنسة
بقات كتسول وتهضر معاه وطيطش بين وكابيه وتلعب واحد اللحضة قالت ليه قداش كتبغيني
قاليها كنبغيك كتر من راسي
قالت ليه ماما كتبغيني قد هاد الكون
قاليها حتى انا كنبغيك قد هاد الكون
قالت ليه وساجد
قاليها حتى ساجد بحال بحال بحوج .. نتي بنتي وهوا ولدي
قالت ليه انا حاع مكنبغي وهزات كتفها بغات تغضب وشدها جلسها قاليها كنبغيك نتي ودابا كتبغيني؟
حركات راسها بالايجاب بدا كيضحك .. خرجات عندهم سارة غير شافها وقف قاليها غنخرج غير لهنا ونجي
شدات فيه جنى قالت ليه نمشي معاك
لسقات عليه لسقة وحدة وخرجها معاه بقات غير سارة والروتين حتى للحداش ديال الليل عاد رجع عيسى وهاز جنى ناعسة فيدو
شداتها سارة قالت ليه نعسات بلا عشاا؟
قاليها تعشات هي وساجد
استغربت قالت ليه فين تعشاو قاليها خرجتهم بجوج غير هنا وصافي .
داتها سارة حطاتها حداها فوق الناموسية الوسط وعيسى موراها قاليها ماتحطيهاش فبيتها ؟
قالت ليه غير خليها هنا احسن .. كاينة لاسوب الى بغيتي تتعشا
رد بتعب قاليها لالا بلاش غنمشي نصلي
سكتات ونعسات بحوايجها واخا بيجامتها فحد داتها هي وتوبها وملمسها وصدرها العاري كيجدبو .. طلعات عليها الغطا وحطات يدها على بنتها وسدات عينيها بغات تنعس .. حسات بيه دخل وسد الباب ونعس حداهم لكن ماحلاتش عينها .. واحد اللحضة حسات بيدو تحطات على يدها فوق جنى حتى تبرش لحمها وقالت يمكن غلط غيهزها .. لاكن بقات يدو محطوطة وحين لاخر كيحركها .. هزها طلع الغطا على جنى وعاود حط يدو عليها مرة اخرى وهي قاطعة النفس تحت الغطا
نوع من لاستقرار والراحة النفسية رجع لحياة سارة وحتى لجنى .. اسعد فالمدرسة مكاين غير بابا بابا .. اما سارة مسمية مزوجة وشي زواج ماشافتو على حقيقته .. لاكن فرق كبير بين حياتها بوحدها وحياتها مع راجلها وبنتها .
دوز معاها اسبوع بدون ملل مع جنى السريعة .. زاد تعرف على بنتو وطبايعها اكثر وتقرب منها اكثر وبدا دوره كأب فتربيتها .. يوقفها معاه فالصلاة ويحفضها القرآن ومن الليل لليل كيدير ليها الرقية با تهدن .. من نهار جلس معاهم فالدار وهوا كل مرة منين يسمع غواتها .. مرة من الحمام مرة من الكوزينة مرة من بيت النعاس.. كينوضو يجريو يشوفو ااش واقع مكيلقاو والو .. كيلقاوها تعصبات مع شي حاجة وغوتات .
صبح اول صباح ليهم فالويكاند من بعد اسبوع ديال الخدمة ..
فاقت سارة شافت حداها مالقاتو لا هوا لا هي وناضت شافت وجهها فالمرايا وجمعات شعرها وخرجات سمعات صوتهم من الكوزينة ودخلات لقاتو بالشورط قصير بحال ديال السباحة وكحل وهوا دالنعاس وتيشورط ووبانطوفة واقف فلكوزينة ومجلس حداه جنى فوق بوطاجي وشاد الموس كيكرض لافوكا بشوية ويهضر مع جنى
ابتسمات سارة قالت ليهم صباح الخير
شافوها بجوج ردو عليها بصباح الخير وقالت ليها جنى حنا كنصاوبو الفطور
ضحكات سارة قالت ليها ايوا مزيان صاوبو الفطور
مشات للحمام غسلات وجهها ومشطات شعرها طلقاتو وقادات حالتها لبسات سوميج كيوت فالغور بيبي وبينوراها من لفوق بحزام ودارت بانضة وبانطوفة بيضاء والريحة وخرجات للكوزينة لقاتهم كيحطو الفطور على الطبلة .. ضارت عندها جنى اللي جالسة على البوطاجي وقالت ليها ماما جيتي زوينة
تلفت عيسى اللي كان كيسخن الخبز شاف فيها من راسها لرجليها ورجع للخبز .. حطات معاهم الفطور وجلسو كيجلسو كيفطرو والحوار كله مع جنى ..
مسحات ليها سارة فمها وقالت ليها كولي يالاه باش نمشيو للحمام
قاليها عيسى بغيتو تمشيو للحمام ؟
قالت ليه اه
قاليها خليو حتى لغدا وسيرو ليوم قلنا نخرجو نتغداو مجموعين ونديو معانا ساجد
ربعات جنى يديها قالت ليه عاوتاني ساجد
قرب ليها عيسى قاليها ساجد خوك الكبير .. انا فاش نموت ونمشي عند الله غيبقا معاك ساجد هوا اللي غيحميك وتلقاي قدامك . الى عاودتي قلتي شي حاجة بحال هاكا على ساجد غنتخاصم معاك
ربعات يديها كتشوف قدامها معصرة فمها حتى بدات كتبكي ودفعات الطبسيل مشات كتجري غضبانة .. تنهد عيسى وحط السربيتة بغا ينوض ..اما سارة بقات بلاصتها كتشوف غير بعينيها وبلا متشعر حطات يدها على يدو قالت ليه خليها .. هاهي غترجع
رجع جلس وقال ليها مفششة بزاف
ردت عليه ببرودة كتفطر قالت ليه ماكديرش ليا هادشي غير حيت نتا كاين دابا.. خليها غتبكي شوية وترجع اما الى تبعتيها دابا غتوحل معاها ديما .
تنهد قاليها ماعرفت مالها ساجد
شافت فيه قالت ليه ماعرفتيش؟. .. كتغير
حرك راسو قاليها بزاف زعما على هاد الغيرة
قالت ليه الغيرة كتخلي الواحد يدير كتر من هادشي.. هاهي بنت صغيرة وكتغير
بقا مهبط راسو كيشوف فيها بنص عين وقاليها منك تعلمات الغيرة
ضحكات وقالت ليه ورتاتها مني .. اصلا اللي مكيغيرش معندوش قلب وماعندوش احساس ..اما اللي كيغير عندو كولشي.. الحمد الله انا تهنيت من هاد الاحساس بفمرة ..دمر ليا حياتي ومانفعني بوالو
قاليها دمرتي حياتك بيدك .. حتى واحد مادمرها ليك
ردات عليه قالت ليه غير كيجيب ليك الله ..كن عرفتي الغيرة شنو كدير كن فهمتي شنو كنقول ليك .. عارفة راسي غطت ودرت شي حوايج ماخصهمش يدارو
ولاكن ماشي لخاطري.. انا عذرت راسي واحد اخر مابغاش يعذرني ماعندي مندير ليه
هز حاجبو قاليها تخلي راجلك حتى يسافر وتجاوبيه عادي فتيليفون ومن موراه دير ليه الخلع هادا عادي؟
قالت ليه راني قلت ليك شنو عندي.. انا عندي اسبابي الخاصة
جمع يديه قاليها واخا قولي ليا شنو هما الاسباب اللي خلاوك ديري هادشي ؟؟
هبطات راسها ببرودة قالت ليه اسباب كثيرة .. زايدون ديك الصفحة من حياتي طويتها ونسيتها ودابا بديت صفحة اخرى .. على قبل بنتي وعلى قبل وصية الحاج بحالك . وغير تهنا مغنتبعك لا فحياتك ولا فزواجك مع رجاء ولا فحتى حاجة .. بغيتي تجيب حتى الثالتة والرابعة ماعنديش مشكل .. الى كنت آديتك فالماضي سمح ليا
بقا غير كيشوف فيها وحرك ليها راسها بتتاقل قاليها باقا كتسولي واش آديتيني
حركات راسها قالت ليه بعدا سولت واش آديتك ماشي بحال اللي كيآدي ويزيد بلا ميسول
دخلات عليهم جنى كتبحلس تلفتات ليها سارة قالت ليها اجي تكملي فطورك باش تمشي مع باباك
ناضت جلسات بنتها ومشات للبيت وجدات ليها حوايجها وجمعات حوايج الحمام ولبسات بنتها ومشطات ليها وخرجاتها عندو ..
قالت ليها جنى غتمشي معانا اماما
قالت ليها سارة غنمشي للحمام انا غير سيرو
قلبات وجهها ماشافتش فعيسى تشوف حتى اش كيقول . بقات معاهم حتى خرجو وزادت خلفة للحمام. ايوا حمام واشمن حمام نهارو نهار .. من الاسبوع للاسبوع كدور بحالتها من لفوق للتحت باش دوز السيمانة مرتاحة .. نضمات حياتها ووقتها احسن من الاول ورجعات للدار بنفسية جديدة وريحة منعشة.. وقفات قدام المرايا كتلبس مجوهراتها اللي حيدات قبل ماتمشي حتى دخل عيسى ومعاه جنى وساجد ..دخل عليها عيسى للبيت لقاها واقفة قدام المرايا فبيجامة بيضاء نفس الستايل والشقة كتبان وجوج سنسلات كيلعبو الوسط .. قلب عينو منفخ قاليها جا ساجد مع جنى
قالت ليه الى جا مرحبا بيه الدار دارو
خرجات عند ساجد كان جالس بعقلو وقف سلم عليها وعنقاتو هضرات معاه قالت ليه ياكما دارت ليكم جنى شي حاجة برا
قاليها لا مدارت والو
قالت ليه مرحبا بيك اولدي راك فداركم
حطات ليهم تقيوتات وكاسكروط وجلسات معاهم شوية وناضت وجدات العشا ودارت بحساب الريجيم دعيسى .. حطو العشا تعشاو مجموعين وخرج عيسى وصل ساجد عند مو اللي جالسة معاها مها وختها. غير دخل قالت ليه رجاء عاش من شافك
بقا كيشوف فيها مطولا قاليها عندك بعدا العينين باش تشوفي ؟
ديها فولدك شوية ولا قوليها نيشان .. قولي مابغيتش نربي مافيا اللي يربي
ربعات يديها قالت ليه انا مافهمتش كيفاش بغيتي ندير لهاد الدري؟. كيفاش بغيتي هاد التربية تكون
قاليها ماتعلمتي والو من لبنى الله يرحمها ؟.
دورات وجهها كتنفخ وكانت على سبة كتقلب تفش غضبها .. امها وختها كيقولو ليها سكتي وهي كتهز كتفها .
قاليها عاودي بحتي فيه وفليه ولا هدديه .. هادي اللخرة ليك هاني كنعلمك .. والله ومابعدتي منو ولا شميت شي تنقنيقة حتى ندمك على حياتك سمعتي..
قالت تحت لسانها اصلا راني ندمانة عليها
قاليها لا مزال ماشفتي الندم الله يعميها ليك
رجع بحالو معطل لقا سارة فبلاصتها هي وبنتها كتقوا ليها قصة .. حيد حوايجو بقا غير بالشورط وسارة كتشوف فيه بنص عين حاللة فمها فيه ..واييه يا الايام .. رجع معاها الحنين والقلب شعلات فيه العافية كتحس بالحنان كينبع من داك الصدر . تكمشات كتشوف بعينيها وتقول مع راسها شووف انا كفاش كندير عليه ونتشوط عليه وهوا السيمانة كلها كنمشي ونجي قدامو بشعري مطلوق والحالة وماداهاش فيا .. كيبان ليه يقرا القرآن غير بالليل اما بالنهار لا.
عنق جنا وكمشها عندو قاليها مزال مانعستي
قالت ليه فين مشيتي؟
قاليها وصلت ساجد ورجعت
قالت ليه كاع مافيا النعاس. وعنقاتو دوزات يدها على صدرو وقالت ليه يااه فيك الشعر بحال سنوو!!
طلقات سارة الضحكة مم نيفها وهي مخشية فتيليفون فاش سمعاتها وعيسى كيشوف قاليها سنوو؟. شكون سنو؟؟!!
قالت سنوو؟؟ هاء ماعرفتيش سنوو؟
شاف فسارة قاليها شنو كتقول ؟
قالت ليه سولها هي اللي عارفة انا ماعرفتش شكون هاد سنوو
قال لجنى شكون سنوو؟؟
قالت ليه واسنوو الكلب اللي كان عندنا فلندن
تقطع الحس فعيسى قاليها الكلب؟؟!!
اما سارة تقجات بدات كتكحب وناضت شادة حلقها وعينيها حومر مشات للكوزينة وتفركعات بالضحك حتى شبعات ورجعات كتشوف قدامها حيت الى شافت فيه غضحك ليه فوجهه .. دخلات بلاصتها سمعاتو قاليها وا عنداك يعضك
قالت حنى كضحك لا كاع مكيعض
قاليها كيعض شعري انا
رجعات جنى اللور كتشوف فيه وضارت عند سارة قالت ليها ماما بصح كيعض
قالت ليها سارة مانعرف !
ضحك عيسى وحل يدو قاليها مكيعضش كنضحك معاك
رجعات اللور قالت ليه علاش كدبتي
قاليها ضحكت معاك ماشي كذبت
طلق يدو حداه جات حدا جات على يد سارة وهوا كيهضر مع جنى ..قالت غيهزها لاكن خلاها ومن بعد تحرك وحركها وزاد قربها وهي كذلك هزات صبعها وشد فيها ..تدريجيا حتى شبكو الاصابع تحت الفراش وبداو اللمسات بين الاصابع وفنفس الوقت كيهضر مع جنى قاليها واش ماباغش تنعسي
قالت ليه علاش فيك هنا الشعر
قاليها ماشي بزاااف
قالت ليه لا بزاف ماما مافيهاش الشعر بحالك
دورات سارة وجهها ولات حمراء وجمعات يدها وعيسى كيشوف فجنى قاليها وشكون قاليك مافيهاش
ضارت جنى عند سارة قالت ليها وريه ياك كاع مافيك الشعر
قالت ليها سارة نعسي نعسي كنقول ليك نقصي من الهضرة
قالت ليها واقالك فيك الشعر
قالت ليها سارة خليه دابا ونعسي الجوج هادي
جرها عيسى قاليها اجي نقرا ليك اجي باش نعسو مشا الحال
شدها عندو قرا ليها قصة حتى نعسات وناض هزها بلاصتها ورجع سد الباب .. كانت ناعسة عاطاه بالضهر ودخل حداها طفا الضو ودار يدو على خصرها عنقها .. حلات عينيها قدامها والقلب غيسكت ..من اللمس للنفس والصمت والسكات حتى قبل عنقها وقلبها جيهتو كيقلب على شفاهها وهي كذلك .. كانو الانفاس بحال الغاز بمجرد ماتلاقاو الشفاه اشتعلت نيران يستحيل ايقافها .. شوق وجنون ولهفة وقبلات حارة واشتياق الاجساد لبعضها .. اهات خرجات عن السيطرة ووقعات معاشرة بحالها عمرها عاشتها سارة من قبل واخا كانت مزوجة بيه جوج مرات ..لاكن البعد والحنين خلا المشاعر والاحاسيس تتضاعف اكثر ودوم لمدة اطول حتى صبح الحال
صبح الحال عليهم بلا نعاس متكيين كيهضرو .. صفاو الخواطر واعتاذرات على الخلع اللي دارت ليه واعتذر غلى اي حاجة جات من عندو خايبة .. عم الصمت وابتسم قاليها توحشتك . تزنكو خدودها وقالتها ليه حتى هي وبداو الاعترافات من الطرفين حتى سمعو الدقان فالباب وناضت سارة لبسات حوايجهها قالت ليه الضرة دبصح كدق
بداو كيضحكو حلو عليها الباب ودخلات كدور فعينيها قالت ليهم علاش ديتوني لبيتي
قاليها عيسى حيت بيتك فيه غتبتبقاي تنعسي بحال الاول
قالت ليهم انا بغيت ننعس هنا
خلاتها سارة معاه كيوريها ومشات دخلات للدوش وعيطات ليه قالت ليه جيبها ليا دخلها ليها شداتها غسلاتها مزيان وخرجاتها ليه وخرجات موراها لقاوه دوش فالحمام ديال الدار وواقف فلكوزينة كيعمر اتاي.. فجأة صونا ليه تيليفون كان ساجد كيسول واش منخرجوش.. قاليه عيسى وجد راسك هانا غندوز عليك وخلر سارة وجدات راسها وخرجو مجموعين دوزو الاحد كاملين فين حين كانت رجاء فالدار الشعر فالسما بحال البوهالية .. فين هي رجاء اللي كانت خدامة ومتولة .. تهزات وحدة وتحطات وحدة وحتى الخدمة مابغاتهاش عتاكفات هي وجميع الخبائث وحتى الروينة ولات عندها عادية ونهار ومطال شادة تيليفون . دخل عندها ساجد فالعشية كاره يدخل للدار .. قاليها جمعي الحوايج كل حاجة فين مرمية دار طاطا سارة زوينة على دارنا
ناضت ليه شداتو نزلات عليه بواحد الدقة خلاتو يابس قالت ليه ها طاطاك سارة عجباتك دابا طاطاك واسير عليا لبيتك وشبع بكا ..والى وصلتيها لباك غنكويك من دوك الشنايف
دفعاتو لبيتو خلاتو كيبكي حتى شبع وحتى المدرسة رجع كيمشي ليها غير فلعشية مكاينش اللي يفيقو الصباح ويحط ليه الفطور وعيسى عند بالو راه كيمشي فالترونسبور .
جاه اتصال فالخدمة جالس فالبيرو من مدرسة ولدو على الغياب دالصباح قلب ليه المورال كله ديال داك النهار .. عيط لسارة للبيرو دخلات بابتسامة وقربات عندو عطاها واحد الملف قاليها واش تكملي ليا هاد الضوسي بغيت نخرج عيطو ليا من مدرسة ساجد
شداتو فيدها قالت ليه اه واخا ماشي مشكل وبدات كضحك خرجات لخدمتها وخرج وراها مشا سمع الخبار اللي ماحملش.. رجع للدار على غفلة عند رجاء لقا الروينة والدنيا مقلوبة .. وهي ساهية قدام التلفازة.. سرح عينيه مزيان قاليها اش هادشي ..هادا راه غار ماشي دار ..الحيوان فاش كياكل كيبعد من البلاصة فين كلا وينقي بلاصتو وينعس فيها اش هاد الزبالة
طلعات عليها الغطا قالت ليه انا مريضة ..
قاليه واش نتي ديما مريضة؟. بزاف على هاد الشكاوي!! وداك الولد اللي شبعان غياب واش مابقاش فيك
قالت ليه مرييضة ربي اللي عالم بيا
قاليها الى مريضة ها الاطباء .. شهر ونص ونتي فين ما نجي انا مريضة.. انا مريضة.. شوفي شي مرى تجمع ليك هاد الزريبة هادي راه مابقاتش دار .. بسيف ماتمرضي ونتي جالسة وسط هاد الحالة ومعيشة معاك الولد وسط هادشي ..كاع الطاقة السلبية جمعتيها .
بقات ساكتة وهوا كيشوف ديك الحالة قاليها بحدة تهزيييي ولا غنهزك من تما واش باغا تخرجيني على طوعي
ناضت وقفات بالزربة كدور بلاصتها دايخة ماعرفات باش تبدا وهوا كيدفع برجلو داك الحوايج اللي فالارض ومشا لبيت النعاس لقا الناموسية عامرة حوايج وبدا يلوح فالارض وينكر معصب مالقا فين يبدل ورجع خرج قاليها غنرجع نلقا هاد الروينة نتفاهم معاك هانا فين علمتك
عيط لساجد خرج عندو ومشا للدار عند سارة مالقاهاش.. عيط ليها فتيليفون جاوباتو قالت ليه انا مشيت غير عند طبيبة وهانا راجعة .
قاليها علاش ماقلتيهاش ليا قولي ليا غنمشي ماشي نجي مانلقاش فالدار
قالت ليه وصافي ماتقلقش هانا جايا .. مالك معصب شنو عصبك
قاليها والو هانا فالدار حتى تجي
وصلات للدار ومعاها بلاطو دالسوشي وشي مقبلات لكاسكروط حطاتهم فالكوزينة .. شافتو طالع ليه الدم ماضارت جيهتو حتى جا راسو للكوزينة كيشوف اش كدير وسولها قاليها علاش مشيتي للطبيبة ؟. دورات عينيها فيه بقات كتشوف فيه مطولا وقالت ليه انا حاملة
تفاجا ساجد اكثر من باه وخاف يدخل للكوزينة ومكانش قاصد يسمع..وقف بعيد سمعو قاليها حاملة؟. الله يكمل بلخير .
قالت ليه فرحان؟
ضحك قاليها وعلاش منكونش فرحان؟
قالت ليه حيت عارف المشكل اللي عندنا .. مزوجين بالفاتحة وصافي وخدمتي وخدمتك حساسين كيفاش غنديرو
تنهد وعنقها قاليها من هنا لتما يحن الله .
رجع ساجد اللور بقا ساكت وجلس كيدير معاهم كاسكروط وجنى منوضة الروينة .. شدهم عيسى حداه بجوج قاليهم غيجيكم واحد خوكم ولا ختكم جديد
ساجد بقا ساكت حاذر راسو وجنى كتشوف فيه مافهمات والو وفمها عامر .. قاليه عيسى مالك مافرحانش؟
قاليه ساجد لا فرحان .. غيير فاش غيجي مايبقاش ليك كااع الوقت ليا
تصدم عيسى وسارة حتى هي قالو ليه فدقة وحدة لاااالاا بلاصتك بوحدها وجنى بوحدها وكلكم بخال بحال .. الاب يفرق فكولشي الا فولادو ميفرقش بيناتهم واخا يكونو عشرة
سولاتهم جنى شكون جاي وتلفت عيسى قاليها ماماك غتولد ليك واحد خوك ولا ختك اخر قريب
لاحت الفرشيطة وناضت كتزعرط خلعاتهم ومشات كتجري وتقوليهم انا مابغيتوووش مابغيتوووش مابغيتش خويااااا
شد عيسى فوجهه قاليها كيسوط يالاه ها المعقول
تنهد لاح السربيتة على الطبلة وناض كيسوط تبعها يحزرها فالبيت
بالكشايف باش فسرو لجنى ورطبوها ورجعو ساجد حتى هوا على خاطرو وكملو كاسكروط ديالهم هانيين.
كانت نوبة المبيت عند رجاء بحيث كان عيسى كيدير يوماين فكل دار لاكن فغالب الاحيان مستاقر عند سارة وحوايجو كلهم عندها فدارها وتما فين كايلقا راحتو ويلقا النضام والطاقة الاجابية .. اما دار رجاء ولات كيبات فيها فوق خاطرو وبزز منو وكيبان ليه بيت النعاس ديالو بحال الحبس ..مامصدقش راسو انه كان عايش تما وكيدوز وقتو كله تما ..مامصدقش راسو ودابا رجع كيجلس بزز وحتى ساجد كيخرجو من الدار ويديه معاه فغالب الاوقات .. علاقتو مع رجاء توترات وتدهورات وهي براسها مابقاتش عارفة تتعامل ومابقاتش قادرة تصبر على المهل وولات باغا كولشي بالزربة ..حتى الضحك مابقاتش كضحك وباغا فيمن تفش غضبها . دخلو معشيين من عند سارة لقاوها عاد كدير العشا وقاليها عيسى مايحتاجش بلا متصدعي راسك .. الحمد لله اللي جمعتي هاد الروينة
قالت ليه عاد ولات كتبان ليك الدار مرونة شحال هادي كانت عاجباك
قاليها داكشي اللي لقيتني كنقول مع راسي حتى انا .
خلاها ومشا صلى صلاتو وطاح كيخمم كي يدير يأدي الواجب معاها وهوا فوق نفسو حتى باش ينوض ماقادرش او مابقاش عندو الرغبة من جيهتها .. وحتى هي العكز قتلها ماخلاهاش حتى دور بحاليتها وتجيب ليه الرغبة ودخلات معاه فمعاشرة كحلة مابغات كاع تبدا .. النفسية ديالو مامستاعداش وعيا يحاول والو كل شوية ينعس ليه ..بصحيح العبارة الرغبة ماكايناش وعاد بيناتهم الصدع والجو مامناسبش وهي بدات دير شغل العاهرات باش زعما تجدبو ليها وفشلو فالنعاس ساعا فشلاتو نيت فاللخر تكا على ضهرو قاليها ميمكنش
قالت ليه كيفاش؟
قاليها هادشي راه بقواااااعدو واش غير اجي وطيح
جلسات قالت ليه اوييلي هادشي عمرني شفت هادشي فحياتي
هز يديه قاليها هانتي شتيه دابا .. ماعندي مندير ليك
قالت ليه هادا غير شي عكس ولا شي عجب وقع ليك ميمكنش هادا راه تقاف
قاليها وانعلي الشيطان اشمن تقاف وتقافة .. شوفي المشكل فين كاين راه بحال المرى بحال الراجل .. حتى هي بعد المرات مكتكونش عندها الرغبة وكدير الخاطر .. حنا الرجال ماعندنا كي نديرو الخاطر هوا اللول عاد اجي نتناقشو
ناضت قالت ليه ميمكنش الراجل دبصح فين ما مشا يحفر
ناض طلع ليه قاليها للى بقيت معاك هنا غنحفر ليك شي قبر نوريك الراجل دبصح
لبس حوايجو وخرج خلاها .. حتى فات العمارة عاد تنفس ومشا عند سارة حل الباب لقا السكات والضلام والريحة ياسلام .. سد الباب بشوية ومشا لبيت النعاس لقاها ناعسة فبيجامتها شعرها مطلوق والريحة فالبيت كتحمق .. حيد حوايجو ودخل للحمام اللي فالدار باش مايفقاش بتقرقيب ورجع لفراشه دخل حداها قاسها حتى قفزات وناضت جلسات شاد فصدرها قالت ليه ناري حرام عليك خلعتيني فهاد الليل اشنو جابك
سرح يدو كيضحك قاليها جابني الهوا وعنقها قاليها غا بشوية عليك ماتخلعي ما والو
باسها وماكانش عوال على شي حاجة حتى جراتو ديك البوسة لبوسة اخرى ومن البوسات للمسات ماعاقش براسو حتى دخل فمعاشرة معاها لطف الجو ونعس .
رجاء فاق عليها شيطانها وناضت محلفة على سارة .. هاي هاي نتي تقفي عليا الراجل .. وراكي قادة بشغلك .. بدات دور وتسول وتقلب باش تفك التقاف.. مع مكتعرف حتى واحد ولا شكون تسول اش قاليها راسها المجرمة .. قاليها راسها سيري للسوق ديال العطارة ومشات كدور بين العطارة ديال الفاسوخ واللي معلقين الجلود والريوس الضبوعة وشاقت المحل لكبير فيهم ومشات عندو سولاتو قالت ليه شي فقيه صحيح يفك ليا شي تقاف.
سيفطها عند واحد المرى قاليها دقتها ماتنوش العجاج.. مشات ديك الساعة للعنوان فواحد شعبي حالتو ودخلات لقات لقاتها عامرة وجلسات مع العيالات كتجمع .. مجمع عند شوافة اش غيجيدًمن غير البلا .. عاودات ليهم قصتها باللي راجلها تزوج عليها ومابقاش كيشوف جيهتها وبقاو عليها العيالات ها شنو ديري ليه ها شنو ديري ليه انا رجلي غزيت فمو قاديتو مع الطريق كان تصاحب ليا مع واحد الكرطيطة وبداو عليها مشيت عند فلان وفلان وهنا بدات تعرف رجاء الميدان كي. داير وتفهم .
دخلات عند الشوافة جلسات قالت ليها ها اللي كاين ها اللي كاين وبدات الشوافة الملعونة كتشوف ليها فالماء وريحة الجنس والنجاسة كتعطي فديك الدار . قالت ليها راجلك اختي متدييين بزااف ومحصن .. صعيبة فيه الخدمة .. ماعندو لا تقاف لا والو
قالت ليها رجاء راه مكينعسش معايا .. رجعنا بحال الخوت ما مرة ماجوج ولاكن داكشي ماكيتحركش..
قالت ليها مكاين منخبي عليك . راجلك واكل التقاشر على مرتو .. هاهيا باااينة .. مكيشوفك لا نتي لا وحدة اخرى الضبابة فعينيه كيشوف غير مرتو .. هاهيا زعرة وسالف عندها وبيضاء وزوينة .. حزامها عامر
قالت ليها رجاء كيفاش حزامها عامر
قالت ليها الشوافة مرتو حاملة كرشها باينة
قالت ليها رجاء اوييلي على حاملة كااع ماحاملة ؟؟!!
قالت ليها الشوافة واشوفي وسولي انا هضرتي مكتعاودش
قالت ليها رجاء دابا شنو واش غيبقا معاها مغيطلقهاش؟
قالت ليها غيطلق .. ولاكن مغيطلقهاش هي .. الطلاق كاين وهي ضربات لسقات عندو
قالت ليها رجاء كيفاش غيطلق شنو زعما غيطلقني انا !!
قالت ليها الشوافة مهم هادشي لللي كاين هاهوا قلتو ليك بغيتي تخدمي ليها هي خدمي اما هوا محصن وحتى هوا بجوادو دايرين بيه المسلمين بزاف .. هي عندها العين والعاشق عندك منين دوزي ليها
خرجات رجاء كتفكر لقات دو العيالات مزالين جالسين شافوها صفراء قالو ليها مالكي قال ليهم شنو كاين .. قالت ليها وحدة واخا يكون ماشي غير محصن واخا يكون كيصلي على هيضورة السبع .. غنديك غنوريك واحد كيخدم لكل واحد بطريقتو .. الى كان كيشرب يخدم ليه بالشراب والى كان متدين يخدم ليه بالقرآن
تخلعات رجاء قالت ليها اوييلي استغفر الله منقدرش القرآن كاع ؟؟
قالت ليها لخرى وباش بغيتيه يجي اللي كيصلي ويعبد الله كيخدم ليه بداكشي واللي خارج الطريق بحالنا كيخدم ليه بخرجان الطريق ..ماشي يخلط شي مع شي.
واخا هاكاك رفضات رجاء تمشي لاكن قبلات طير سارة من بلاصتها بأي طريقة ، بدات الشوافة تجبد منها فلوس شوية بشوية فاش شافتها عندها بدات طلبهم صحاح. نهار على نهار بدا راسها كيعمر بداكشي حتى رجعات موسوسة .. الى ضرهها راسها تقول شي واحد كيخدم ليا .. الى وقعات ليها شي حاجة تقول ضربوني بالعين .. وصات ساجد يجيب ليها من دار سارة شي شرويطة من حوايجها لاكن مابغاش وكيرجع عندها طويل ديما وكتبقا تصبن فيه بالمعيور.. الشوافة قالت ليها كلمة وحدة.. جيبي شيحاجة من حوايجها عاد نخدمو فالصح .. رجاء ماقدراتش توصل لحوايجها وحدها جابت تصويرة والصورة مكافياش للشوافة وكيقضيو بالسحور دالشمع والتصويرة حتى يبان البديل .
فديك الاثناء كانت سارة فالدار ناعسة على الفوطوي عاد رجعات من الخدمة وكرشها ديال ست شهور قدامها ..لابسة سوميج كحلة بلا سوتيامات وكتسوط بالصهد وماكفاهاش التقزاب ماكرهاتش تتعرا كلها .. طالقة رجليها فوق المخدة وعلى عنقها مخدة كدير اوطوماتيك كدير للمساج للكتاف والعنق وحداها الطبلة مربعة فالصالون الرومي ومتكية سخفانة .. جا عيسى جلس حدا رجليها وحط البلاطو دكاسكروط .. دار يدو على رجليها قاليها شوية ؟
حركات ليه راسها فشلانة قالت ليه غنموت بالصهد
قاليها ماشي بزاف مكاينش الصهد .. يالاه نوي تاكلي شوية
هزات يدها حطاتها على كرشها قالت ليه مافياش حاسة بالسخفة غنعس شوية
عطاها كاس دلافوكا قاليها شربي هادا ونعسي
مدو ليها شرباتو ورجعات تكات سدات عينيها وهوا حداها كيشوف فالتلفازة وياكل حتى بدات كتهضر وتقول شي كلام مامفوهمش .. تلفت باستغراب سمعها كتردد اية الكرسي لاكن ماكتكملهاش وكتكملها بلسان ملوي وكلمات غير مفهومة .. حركها وعاود حتى فاقت مخلوعة وناضت جلسات عطاها الماء تشرب قاليها مالكي .. كتحلمي؟قالت ليه ماعرفتش واش كنحلم ولا بصح .. المهم انا ناعسة هنا كما دابا فاش كنت ناعسة ولاكن جات واحد المرى من الباب كتجري عندي وانا ناعسة هنا بلحق نتا مكاينش حدايا .. حتى هاد الماكلة وهاد الطبلة وهادشي كله شفتو والبلاصة هي هي نفس الضوء نفس كلشي بحال الى كيتكرر المشهد بطريقة اخرى .. جات ديك المرى من باب الدار وزعما جات وبداو الزغاريت وبدا بحال الى العرس فالدار ولاكن انا متكية عادي كما انا غير كنسمع صوت الزغارت والضحك وهي بغات تركب ليا وحد الدمالج فيدي ديال الذهب كبار .. ماخليتهاش ولاكن شداتني من يدي بزز وانا كندفعها وقجيتها بقيت كنقرا عليها اية الكرسي وفكل مرة كنقرا كنبقا نهبطها هنا حدايا فوق الزربية وانا متكية بلاصتي وفاش كتلف ليا الاية كيتلوا ليا لساني كتبدا هي تنوض وتكبر وكنعاود نقرا عليها وكتبدا تصغار وتهبط فالارض وفاش كنتلف كتبدا تنوض وكتشوف فيا وجهها كيخلع ..
كانت غتموت بالخلعة ويديها كيترعدو .. شد ليها فيديها وعطاها الماء شربات وقاليها نوضي لبسي شي حاجة طويلة واجي
مشات لبسات عباية وغطات راسها ورجعات سخفانة حداه وهوا فسورفيت ديال الدار .. تكات على رجلو وبدا يرقيها .. فالاول مشا مزيان وشوية بشوية بدا كيكرر بعض الكلمات وبدات كتنفض من بلاصتها بحال الى كيضربها الضوء وكتبكي وتشهق حتى خرجات جنى من البيت كتجري شافتها هاكاك وبدات كتبكي معاها .. اضطر عيسى يوقف وردها للبيت سد عليها عطاها فاش تلهى ورجع عاود من الاول ونفس الشيء تكرر.. بدات تبكي وتنخصص تقول مات ليها شي واحد وبدات تنفض من رجليها .. كمش ليها يدها بجوج وحط ركبتو على رجليها باش قدر يكمل الرقية حتى سالا وخلاها كما هي فبلاصتها وغطاها نعسات وناض كيمسح على شعرو ويخمم .
فاقت تقول حتى حاجة ماوقعات ولاحت لغطا بغات تاك لقاتو حدا رجليها جالس .. تلفت مسح على راسها وضهرها قاليها شوية باش كتحسي؟
قالت ليه كنحس بالراحة وفيا الجوع
قاليها مابقيتيش كتصلي
قالت ليه كنصلي ونقطع مع الحمالة كنعيا
هز حاجبو قاليها مع الحمل كنعيا!! نوضي توضاي دابا وسيري تصلي.. الصلاة مغنتفهامش معاك عليها الى ماقدرتيش صلي جالسة المهم صلي.. هادشي اللي كيوقع لي كيوقع ليك سبابو البعد على الله . يالاه سمعي الهضرة الله يرضي عليك وسيري
مشات توضات صلاة ورجعات خفيفة مفوهة جلسات كلات حتى شبعات وتكات على كتفو قالت ليه عييت فشلت
ناض مع الفجر يصلي ونوضها معاه بزز منها .. هوا كيجر وهي كتجر فاللخر هزها قاليها والله حتى تنوضي غتعلبيني ولا
داها وقفها قدام المراية توضات والنعاس قاتلها ومشات وقفات وراه كتصلي وتفوه وتسجد وهوا كيطول فالسجدة بزاف حتى كيديها النعاس وتنوض من جديد . طاحت كاو مور الصلاة نعسات احلى نعسة حداه وعاودو ناضو للخدمة سبقاتو هي ودوز هوا جنى للمدرسة وتفكر شي وراق عندو فالدار فواحد المجر عند رجاء ومشا نيشان دخل للدار لقا الحس مقطوع . هز عينو هاكا وهاكا الروينة تقول الدار فيها عيشة الروبالة .. مشا كيقلب فالمجر مالقاش الاوراق وبدا كيقلب فالبلاكار ورجاء مكايناش قال يمكن خرجات للحانوت ولا مشات توصل ساجد والصباح كولشي نايض يخدم . جر واحد الكافوز حدا راسو فين كينعس وانتبه لشي خاجة فالارض فوق الكوافوز . دار يدو جر داكشي لقا ميكة ملوية فيها شي بخور وشي تخربيق دخلو ليه الشك بقا كيشوف شداكشي كيخلع ريحتو خانزة .. لواه وردو بلاصتو عاق بيه عندو علاقة بالشعوذة وماشي بعيد يكون سباب فداكشي اللي كيوقع لسارة وهما ضرايرات. خلاه كما هوا وخرج ماخلاش الاثار ديالو فالدار وزاد خلفة للخدمة
عيط لسارة دخلات عندو قاليها جلسي وجلسات قدامو .. بقا كيشوف فيها مطولا قاليها واش عيانة؟
قالت ليه شوية وصافي واقيلا عندي فقر الدم
قاليها غنخرجو شوية بكري نمشيو نديرو التحاليل .. ماحلمتي والو لبارح
قالت ليه لا نعست مزيان .. ماعرفتش علاش وقع ليا هاكاك اول مرة يوقع ليا بخال داكشي
قرب من البيرو صغر عينيه قاليها ردي بالك .. وحضي حوايجك . ونقصي شوية من الزواق العين خايبة
دارت يدها على جبهتها قالت ليه خليني . مافيا اللي يهضر ولاهيلا فشلانة واش كاين ما تعطيني نقضي
هبط راسو كيشوف فاوراقو قاليها مكاين مانعطيك سيري تنسطي لعضامك حتى تمشي بحالك
ناضت خرجات رجعات للبيرو ديالها عاصرة على واحد الضوسي على خاطرها حتى سالات الخدمة وخرجات تلاقات هي وياه ركبات حداه مشاو هزو جنة وداهم لللابو دير التحاليل وخرج قاليها هانا جاي
طلع فالسيارة وزاد نيشان داير النضاضر دالشمس حتى لرجلين واحد المرى كتبان محترمة ودايرة الدرة وكبر من سارة .. هبط الزاج وتلفت قاليها ها تصويرتها . ها العنوان .. الله يعاون
طلع الزاج زاد فحالو في حين شدات المرى تصويرة رجاء مشات نيشان ركبات فطموبيلتها ومشات للعنوان مباشرة وقفات تقريبا ساعة دالمكانة حاضية حتى شافتها خارجة من العمارة وركبات فطموبيل كاط كاط كحلة مشات . لحقات عليها المرى تابعها طول الطريق ودخلات وراها للحي ودخلات موراها عند الشوافة وجلسات حداها وهضرات معاها غلى اساس جايا تخدم وسجلاتها كتهضر وتقول ليها شنو دير ولمن خدمات وخلاتها حتى جلسات قدام الشوافة وصوراتها بتليفون ودازت موراها هضرات مع الشوافة على اسس عندها غرض ومشات بحالها كضحك على شنو شدات عليها .
اما سارة وكعادتها تكات فالدار وعيسى فالبيت ساد عليه كيرقي ليها الماء حتى سالا وجابو قاليها هادا الماء دالرقية شربيه وعطي منو لجنى ونوضي تصلي المغرب يالاه
بدات كتسوط وتنفخ جرها بزز منها داها وبقا كيدفع فيها بالسيف ولا بالخاطر تصلي حتى تتفك العقدة اللي عندها ديال الصلاة وكل ليلة حتى كتنعس جنى ويشدها يرقيها فالبيت وبنفس الطريقة وكل مرة يبدا يقرا عليها تبدا تبكي وتبغي ضرب ولا تزدح رجلها وكيحكمها خايف تقيس راسها ولا كرشها بلا متشعر
الاسبوع الثاني من الرقية والمعانات اللي رجعو كيعيشو كل ليلة .. لحسن الحظ زرب عليها عيسى بالرقية واخا حس بالنفورها من جيهتو ومكتبغيش تنعس معاه حتى كيقرا عليها عاد كترتاح وترجع لحالتها الطبيعية .. ماهتمش عرف القضية فيها إن وتأكد وداوم على العلاج بالرقية بلا ميقول ليها لا شنو عندك لا مالك باش متخلعش وتمرض وهي حاملة يقدر يأثر على نفسيتها هي والجنين .. فكل مرة تسولو كيقول ليها العين الحسد ونتي زوينة نتي فاعلة نتي تاركة كتشد فيك العين وينسيها من هنا ومن هنا ..
الجاسوسة متبعة التجسس على اكمل وجه .. البلاصة اللي حطات فيها رجاء رجلها كتلقاها تما بالمرصاد حتى جمعات الرابور كله فضوسي ومشات وقفات جنب الشارع بالطموبيل ووقف جنبها عيسا هيط الزاج وحتى واحد فيهم مكيبان .. خرجات يدها مدات ليه الضوسي شدو وزادو كل واحد مشا فجهة .. وقف حدا باب العمارة حل الضوسي تفرج فالتصارر مزيان لداخل فطموبيل وشد كارط ميموار دخلها فواحد تيليفون تسنط بتمعن للحوارات كلها وتفرج ففيديو ديال رجاء جالسة عند الشوافة .. سد داكشي كله وهز داك الضوسي طلعو للدار ودخل كيعيط على ساجد خرج عندو من البيت كيجري وهي خرجات من بيت النعاس كتجري. قالت ليه مالك شنو كاين
قالت لساجد جمع الكتب ديالك والادوات يالاه معايا
رجع ساجد كيجري ماعاود الهضرة جمع كولشي تقول كان كايتسناه يديه وخرج قاليه عيسى هبط للطموبيل تسناني تما وعطاه الساروت ووقف حسكة لرجاء قاليها لبسي جلابتك تحركي
قالت ليه علاش شنو واقع
خرج عينيه فيه بغضب قاليها لبسي وتحركي
مشات كتجري لبسات جلابتها وفولارها قالت ليه فين باغي تديني علاش كتخرجني من داري
قاليها هاد الدار غنديرها فالبيع ودابا غتزيدي معايا ولا غيهزوك من هنا بالفضيحة
بقات كتسول علاش شنو درت وضرب ليها التصاور ديالها كلهم فوجهها قاليها ها شنو درتي .
طاحو التصاور فالارض صدموها بقات كتمتم وخرجها من تما قطعها الحس فالدروج ماخلاش ليها فرصة تجمع الحوايج ديالها وسكتها حيد ليها سوارت الطموبيل وطلعها اللور قاطعة الحس قدام ساجد .. وقف ليه حدا دار سارة قاليه طلع عند جنى حتى نجي ونزل ساجد .. بغات تهضر قالت ليه ولدي. سكتها قاليها ولدك نعلة الله عليك .. ولد لبنى هاداك .. داك الولد. تيتم نهار مشات ليه مو دبصح اللي وكلاتو شرباتو ورباتو ورعاتو .. انا نتي ماكنتي كتسولي فيه لا واش كلا واش شرب. واش ناعس واش بايت فالزنقة .. مدخلة ليه السحور للدار باغا تسكانتيه .. ولدي هه.
سكتها. ووصلها لاكار قطع ليها ورقة لمدينتها عند والديها وسيفطها وحلف ليها الى تفنفنات يسيفطها للحبس .
مشات رجاء وتبعاتها البرية ديال الطلاق بلا حتى ماتستاشر ولا تحاول ترفض .. طاحت ليهم بالعضام فالدار والصدمة كانت قوية عليها .. وقفات ليها مها حدا راسها قالت ليها ياااك قلتها لك .. قلتها ليك وقفتي على هضرتي
قالت ليها كوتر عييينا نهضرو تبحبحنا معاك .. الجهد اللي دافعة عمرني شفتو عند شي وحدة .. هاهوا طلقك وخدا ليك الولد
قاطعاتها مها قالت ليها الولد بلا ماياخدو باغي باااه .. واش هي ربات فيه شي عضم باش يروم ليها .. حتى الولد اللي يشد الراجل هرب عند مرت باه مع باه .. اش بقا ليها .. حررات فالولد العيشة عمرو يسول فيها .. مكيحسش بيها كااع مو مو ماتت وطاح وناض عليها ها اللي مايربيشً. ولادو بيديه .. ها اللي مايدخلش سوق راسو .. ها دواك قتلتينا الله يعفو عليك .. ربعين عام شكون باقي يقبل عليك
جلسات رجاء من بعد ما بكات حتى تقهرات وشدات راسها قالت ليهم باصرار غادي يرجعني.. طال الزمان ولا قصار غيرجعني
قالت ليها كوثر بواحد الصبع هاااا اللي غيردك خليتي فين ترجعي..هوا تهنا منك ويعاود يردك .. صاااافي عيسى الحجوجي داتو سارة لا موراها ولا من بعدها يعاود يتزوج واخا يوقع اللي وقع
قالت ليهم حتى هي طلقها وعاود وردها حتى انا عيردني
قربات ليها مها وجهها قالت ليها ااانوضي.. والله تما لا زطمتي.. لا عائلتو لا طواسلو غادي يقبلو عليك .. كحليتها مع الكبير والصغير هادا دواء اللي مايعرف بحق النعمة ويحمد الله ويحضن ولادو ويخليوهم يبغيوه ويولفوه
قالت ليها كوتر هاديك ردها حيت خلات بلاصتها نقية وعاىلتو باغيينها وباه وصاه يردها وكتعرف كي دير بلاصتها .. حتى ولدك حضناتو ليك وكسباتو لجيهتها ونهار يشد الباك ويسيفطو باه للخاريج يقرا عمرك تشوفيه .. غيولي من المطار لعندها نيشان..
شدات امها يديها قالت ليها اييييه كنتي راس وليتي رجلين.. فين يا الدار ويا الذهب ويا الخدامة والكاطكاطات .. الماكل كي دايرين والحوايج كي دايرين والشان والمرشان.. حتى الخدمة دابا والله لا دار فيها يدو
قالت ليها كوتر يدير الزمر .. تنوض تقلب فاش تخدم وتكمش واش هوا حصلها كتسحر والسيد بقا ليه شوية يولي من اولياء الله الصاليحين وماعدا عندهم من الشرك بالله ويزيد يتلفت ليها .. غير الى بغا يشاركها الجريمة راه ربي وساخط عليها على هادشي اللي دارت ويغفر كولشي الى الشرك بيه .. عاد عيسى يشوف جيهتك ولا يعقل عليك كتحلميييي وهوا قريب من الله كيصلي صباح وليل وشركتي باللي خلقو وخلقك ترحمي على راسك .. نتي راه خاصك الحج والاعتكاف وقيام الليل والسجود والركوع صباحا مساءا وشووووووف تشوف واش ربي يسمح ليك
اما الحي الشعبي اللي كان جامع شلا خبائث .. جات ليه دورية سرية ماعرفها حتى واحد منين خرجات ليهم وهزات الشوافة باللي معاها وتفضح كولشي وتنقا الحي من ديك الخبيثة.. خرجوها مكبلة والجيران كيتفرجو ويتشفاو ومن السطوحة كينعلوها . اللي مافهمش اش واقع كيسول ويخلل ودنيه .. قالك ما قالك شي وحدة جات سحرات لراجلها وعاق بيها وهوا يدو طويلة فالخزن وجمع الحب والتبن.. بالحق هنا عباد الله من ريحة الخنز والبخور وشحال من واحد رحل من تما بسبب الروايح اللي كيشم نهار ومطال وشحال من واحد مرض ومرضو ولادو وديما الصدع ديما الروينة فديك الزنقة .. تنهات القبيلة والعقبة للي باقين الله يهز شرهم علينا .
اما لاللة سارة فعوض البنت رجع عندها الولد والبنت .. ساجد ونعم التربية والبنت يالاطيف .. ولانقولو تبارك الله غير مزال صغيرة وصافي.. الفرحة عند سارة بطلاق رجاء اكبر من فرحتها بولادة بنتها التانية وعقدها القانوني مع عيسى .. اما الفرحة اللي مابعداها فرحة .. هوا الكادو باش واعدها فعيد ميلادها . جاب ليها الحج فعيد ميلادها وصبر عليها حتى كبرات البنية شوية وداها معاه حجو بجوج وغسلو الدنوب بجوج ورجعو عند واليديهم كانهم عرسان جداد
النهاية
التعليقات 0