ملاك: (هازة كفوفها لسما كدعي وهي كتنهد) ياااا ربي حبيبي وهاد نهار عفو علية من هاد الوحدانية، ها نتا كتشوف كولها فين كيتمعشق خوتاتي كاملين تزوجو لبنات للي عرفت وللي معرفتش وانا غير مبروك عليك مبروك عليك حتى اما بغيت يتقالي مبرووك…
(دورت راسها كتشوف جيهة لباب واش كيشوفها ولا كيسمعها شي واحد خفضت صوتها كتر)
بغيت غير شي واحد يكون معقول وزوين ولباس عليه مطالبة واالو من هاد الدنيا يا سيدي ربي حبيب اه ويكون طويل وبيض صااافي..
(سمعت عياط مها ناضت بشوية) الاحد اركاابي
( زولت لباس صلا جمعت صلايتها طواتها حطاتها فوق النموسية ديال مها، علقت حوايج صلا وطلت على لمرايا هزت عكر ديال بصبعها ملست على راسو وطلات لشنايفها باش متجيش معيقة ونفسو دارتو لحناكها كتماصي بيه غير حشمت ديرو فوق عينيها او بالمعنى خافت تجي معيقة فالمكياج مسحت صبعها فيديها باش يمشي اثار العكر شافت فلمرياا ودارت يدها على خصرها)
هادشي غير عكر وكيف ردك اما الا مشيت لكواافورة ويلي ويلي لعروسة تنوض ونجلس انا بلاصتها…
(لبست قفطانها للي عاد خدماتو ليها ماماها وهي كدندن داها وداها والله ما خلاها… عاود رجعت لمرايا وكنشوف باعجاب فراسها) السر السر نازل علية غير تبارك الله علية وصاافي يا ربي منتعينش تأ.. وكان غير كان بابا يقرا علية شوية دالقران دغيا كتشد فية العين
(طلقت ظحكة على راسها فكت شعرها من لبانظة نزلت براسها نفضلاتو وعاد هزت شعرها بحال حضرت، غير شافتو فلمرايا وهي تعوج فمها)
ولكن منخافش على وجهي غير هاد شعر يشد علية العين ويشدها وعلى قبيلة كاااملة تفو خرجت عليه..
(كتشوف فشناتف للي طايرين لفوق) ماشي بالضرورة تحتارموني ݣاع هاد الاحترام ݣلسو شوية واش معندكم نفس غير نهز عيني فلمرايا توقفو فرحوني شي نهار وبقاو ناعسين يخخخ
( شعرها كان رطب ومرولي من لتحت شوية ولكن دوك بيبي هير للي كيكونو فالمقدمة كانو ممصنفش ما هوما روطب ما هو حرش ديما مشنتفين بزااف.. دهنت زيت الورد عليه مشطاتو وجمعاتو سفنجة ولكن دوك شناتف عندهم رأي اخر)
غير للي يݣرج باباكم عاود
( نعست دوك شناتف بمقيبطات لوات شال فالݣرونة مخلياه مرخوف عليها جا مع القفطان للي كان ثليجة فلݣرونة ولبيج لبست شربيلها شافت اخر مرة فلمرايا تبسمت مع راسها هزت تيليفونها وخرجت لقات مها جالسة مع مرت حنينها كيتعاودو ولكن الصوت كان غير مهموس…)
مي حلو: على سلامة فين تعطلتي ازين
الام: (تبسمت مع بنتها) هانتي اللون للي معجبكش جاك على مزيناتوو مرة خرا تبقاي تبعي هضرتي
ملاك: اه جا زوين، انا اصلا كولشي كيجي علية زوين
الام: (ميقت فيها وظحكت) هي غضبري على عريس ههه
مي حلو: انا بعدا ݣاع منسخا بيك تزوج اربي كيف تكون هاد الدار بلا بيها
ملاك: تكون كي بغات تكون انا بعدا نسخا بيكم جملة منوليش ندور راسي لجيهتكم
الام: زيدي تحركي ونتي للي ضربك ضااربك على زوااج رزقك يجي يجي
مي حلو: ݣاااع الا مالقينا للي يديك نزوجوك لخْلِيفٓة ولد ختي شهوة منو
ملاك: لواااه ايخان (مها خرجت عينها فيها) واخا نبقى بايرة منديييش
مي حلو: علاش اش ناقصو
ملاك: لا والو ناقصو غير الطولة والبيوضية ولفلوس
مي حلو: هانتي (هزت يدها وفرقت صباعها)
شوفي صباع شي طول من شي،
(وثناتهم)
وهنا كيرجعو قد قد
الام: لا حول ولا قوه الا بالله العلي العظيم
ملاك: هههه عندك امي حلو بلاصة لعقل
الام: بجوج معندكم عقل (دوزت نمرة راجلها كتصوني عليه علماتو راه كملو باش يجي يديهم لعرس…. خرجت مي حلو غير دازت ملاك حدا مها) دايرة عكر
ملاك: (خرجت عينها) لاا
الام: سبحان الله تزاديتي معكرة
ملاك: راه غير القفطان فلكرونة وتعكس على وجهي وطلع السر علية
الام: طلع الباكوور مسحي داك زبل من وجهك
ملاك: راحنا ماشيين لعرس ماشي لݣنازة وزايدون ݣاع لبنات كيماكيو انا جاتني فشوي دلعكر
الام: انا مك للي كبر منك عمرك شتيني خارجة دايرة هاد لعجب
ملاك: واااحتى نشوفك خارجة إماما راه 28 عام مافيها باش شوية..
الام: مجاتش فالعمر ابنتي جات بالحشمة وكان خليتي حتى نوصلو لدار العرس وديريه حدا لعيالات ماشي تخرجي بيه للزنقة وقدام باك
ملاك: والله مباين بزاف
الام: انا كنصحك ونتي ديري للي بغيتي (خرجت وبقات كتشوف حتى بغات تمسح شنايفها وهي تراجع مشات لبست عباية كحلة وتبعاتهم خرجو وصلو الطموبيل وهي تحني راسها باش ميقشعهاش باها نيشان ركبت حدا مرت حنينها اللور..)
وصلو لدار العرس للي كان خو مرت عمها شحال كانت كتكراشي عليه ولكن منين سمعت انه مباغيش وحدة خدامة محملاتوش سلمو على الناس وجلسو فالصالون فين كاين غير لعيالات،
بقات غير كدور عينها أغلبية بنات العائلة مزوجات وعاد للي كاين صغار عليها بوليداتهم بقات غير هي للي مزال متزوجت حتى من خوتاتها مزوجات للي على برا ولي فمدينة اخرى، وكنت العادة جاها السؤال المعتاد المكروه مزال متزوجتي؟!!!
ملاك: (بظحكة صفرا) مزال
….: ايييه اوا معليش صبري وكان واخا راك ابنتي كبرتييييييي
ملاك: ههه نصبر مالي جالسة بالجوع ولا فزناقي راني الحمد لله فدار با معززة مكرمة خدامة على راسي (مكانتش مها حداها) اش غيزيدني زواج الا كان بحال زواج الدّل (ووركات على الداال)
….: (تقرصت) علامن كتلوحي الهضرة ابنت الزهرة؟!!!
ملاك: ملحت على حد مالكي اخالتي حادة غير مقرووصة انا غير قلت معندو باش يفيدني زواج الا مكانش شي زوااااج بقيمتو نيييييت اما الا جينا نشوف حقا خاصني نتزوج غير حيت كبرت (دارت إشارة زعما لا حول ولا قوه الا بالله العلي العظيم) الله يكبرنا على طاعة الله ورسوله وربي الا كان مكتب علية منتزوجش راه خيييير ولا نعتارضو حتى على كلام ربي
….: (دارت ابتسامة استهزاء) من الخير اااه بالصح
ملاك: (تعصبت ولكن بقات محافضة على الهدوء) داكشي للي كاين اخالتي حااااددة
….: اممم فين مك
ملاك: مشات الكوزينة (باغا تنفاجر عليها وفيها ميسمعها الهضرة ولكن هاد السيدة بنت عم باها معروفة بصداع يعني غتكبر المشكل وغتبقى هي الخيبة للي محتارماتش كبر منها ناضت من حداها.. هزت تيليفونها شافت فالساعة ودخلت الفايسبوك طالعة هابطة كتبرد الفقسة حتى جاها ميساج من عند بنت خدامة معاها)
*الزين غدا غنخدمو نهار كامل ديري بحسابك وعلمي مالين الدار*
فرحت كيعجبها تبقى فالزنقة كتر واخا غتلقى مشكل.. طفات الكونكسيون وتطلقات الموسيقى اكيد الشعبي للي ناضت تشطح وهي بقات غير كتشوف فالمعزومين كتبسم كتلاحظ للي ماكيين وجوههم الي مزوجات واش ظاحكات واش ناشطات واش مغبونات غير كدور عينها وكتسنى بفااارغ الصبر امتى يتحط لغداااا وكانت الريحة ديال الدغميييرة كتعطعط وكتشهي!!… جات مها عندها غمزتها باش تجي ناضت من تماك تبعاتها لبيت فين كانت شي مرا غليضة وقصيرة تبسمت حيت قصر منها كانت لابسة كولشي بيض والذهب ذهب ذهب… سلمت عليها بإستغراب وعرفت لبلان فيه شي عريس تبسمت بخجل واخا هي اصلا محشمناش
الام: اوا هادي هي بنتي ملاك (تبسمت مع بنتها) هادي خالتك نجية للي ساكنة فبني ملال
ملاك: (مرققة صوتها وكتنعم فيه)
لباس عليك اخالتي!!
(كتفكر غير فصهد بني ملال ولكن معليش لكليما فالذمة)
نجية: (كتعبرها بعينها مزيااااان) تبارك الله الزهرة والدة غير الزين
ملاك: (تبسمت) الله يطول فعمرك اخالتي
الام: اوا خالتك نجية بغاتك لولدها احمد الا كتاب
ملاك: (معجبتهاش سمية كتفكر كيف دلعو ولكن هانية بقات محافظة على الحشمة باغية تعرف المفيد وتشوف تصويرتو وشنو خدام)
نجية: اوا ولدي راه زيييييين رجال بغا شي وحدة زينة وحشومية
ملاك: الله يجيبنا فصواب اخالتي…
نجية: مهم ولدي كاين فالطالياان (قالتها وكطولها)
الام: انا نمشي نطل على الكوزينة هانتي ابنتي هنا..
ملاك: (فنفسها… الله غنمشي ناكل بيتزااا نابولي وباسطا ونغني مع زوجي لعزيز بيلا تشاااو اااح على روووما والرومانسية… طلعو لقلوب فعينيها حتى صدمتها)
نجية: ولكن كاااايݣول يرجع حدا ميمتو
ملاك: علاش؟!! (بلا متحس)
نجية : واش يدير فبلادات الناس يرجع وراه داير علاش يرجع بخييرو وخميرو
ملاك: اهااااه (شافت فالباب بدات احتمالية متقبلش كطلع)
نجية: بحالا معجبكش الحال
ملاك: لا مقلت والو ههه علاش يعجبني الحال ولا لا
نجية: شتي ولدي راه لباس عليه رزقو يعيش بيه دواااااار
ملاك: وشنو مشا يدير فالطالياان؟
نجية: (عوجت فمها) الموهيم.. انا نصورك باش يشووفك نتي عجبتيني يعني غتعجبيه (جبدت تيليفونها تصورها)
ملاك: (دارت يديها على عدسة الكاميرا وبقات متبسمة)
كفاش تصوريني وريني زين لعزارا بعدا عاد نشوفو قضية تصوريني
نجية: (جبدت تيليفونها عندها) كفاش نوريه ليك ههه راه رااجل علاه مزال نتي باغية تخيري وتختاري
ملاك: (هزت حاجبها) اه مزال، مزال نعزل ونتشرط ونكركب بنادم للي مجانيش على هوايا
نجية: (خنزرت فيها) شتك بحالا كترادي معايا؟!!
ملاك: (مبردة) خالتي راه من حقي نعرف حتى انا معامن غنكمل حياتي
نجية: ولدي زييين مرتو اللولة حمااقت غي حيت طلݣها
ملاك: اااااه مرتو اللولة؟!! علاه فايت فيه زواج؟!
نجية: (ببرود) اه فايت مزوج جوج عيالات وحدة ماتت وحدة طلقها
ملاك: اممم (فنفسها) علم الله التالتة كيف غتصيفطوها
نجية: شوفي ابنتي هو معليه والو راه برزقو غيبقى يجي يزورنا جوج دلمرات فالعام ومعايا ميخصك خير وحتى شقا غتشقاي غير علية وعليك
ملاك: سمحيلي اخالتي مكنتزوجش لعيالات
نجية: ها!!
ملاك: ياك نتي باغياني نكون عروستك نتي نخدم عليك ونبقى معاك اشمن ربح عندي فهاد البيعة وشرية
نجية: اش راكي سايرة تݣولي
ملاك: شوفي بلاااا متفرعي لية راسي من قبيلة وانا مرطبة معاك ونتي مخرجة عينيك فية بحال لبومة وجالسة تعبريني بحال غتزوجيني لشي امير قالك بخيرو وخميرو ييخ مزال مبغيتو تنقارضوو (خسرت وجهها) قالك ميخصك معايا خير لا باااينة!! عليها وحدة صيفطتوها لربي والتانية طلقتوها
نجية: (طلعت فيها وهبطت) هاكا غتبقاي بايرة
ملاك: اللهم بايرة ولا نعيش مع شعشبونة بحالك خلاص علية الا كان شي زواج فحال هاكا مبغيتووش
نجية: وااا ديريها فين تجيك ابنت الزهرة
ملاك: دااارلي نيت للي مخلية لغدا دجاج محمر وجاية ندي ونجيب مع بوونتة ( شافت فيها مخسرة كمارتها خرجت وزدحت لباب كتقلب على مها تعاود ليها وعاد جعرت منين لقات لغدا تحط والناس بدات تغدا طلعت للكوزينة لقات مها جابسة كتعاون وكيوجدو فتحضير الطبق الثاني لحم بالبرقوق واللوز)
الام: بنتي اجي حدايا حتى نحطو حنا وكولي معانا فين السيدة للي كانت معاك
ملاك: (مقدرتش تهضر حيت كانت الكوزينة عامرة ولكن جاوبت مكرهة) راها لتحت
الام: اممم (من شوفات بنتها باينة معجبهاش الحال طمرت حتى جات نجية وقفت عليهم بصوت عالي)
نجية: واااا منين ولدتي هاد الجنية البايرة نسيتي تربيها الآلة زهرة
ملاك: (وقفت) ولدتها من ط(دارت مها يدها على فمها)؟!!!
الام: سكتي نتي (قوست عينها فنجية وتبسمت حطت المغرف، وربعت يدها وشوفاتها حارين فيها) عرس الناس انجية حرام يتقلب بجنازة تااقي الله فعمرك وسيري تغدااي
نجية: واش عارفة مݣالت بنتك ولا نتي مولفاها طبيعة
ملاك: (مقدرتش تبرد اعصابها وقفت ياله ماشية لجيتها جبتها مها عاود من يدها) طلقيني عليها اماما والله متبقى فيها
….: ماشي هضرة هادي الآلة نجية لبنت مابغاتش صافي ماشي تجي تقولي كلام على لالة زهرة
الام: (بحزم) ملاااااااك خرجي من هنا، ونتي انجية يا تخرجي بروووحك يا واحد فينا للي يخرج من هاد الكوزينة (لوخرا شافت كولشي ضدها هزت يدها دخلت صباعها تحت فولارها ونتفت نواضرها للي نصو بيض نصو حمر)
نجية: ها هي الا بقات فيكم (تمت خارجة كتنݣر حتى العرس مبقاتش فيه…)
الام: للي معاه ربي ميخاافش.. (ضارت عند بنتها) شنو وقع باش جاية لمرا تحلف علية انا للي عمر وحدة مهزت الراس فية هادي جاية تنتف نواظرها علية!!!
ملاك: والله اماما مدرت والو هي جلست علية لواه خاصك تخدميني ونتي غير بايرة ومعرفت شي هضوور بحال انا الا متزوجت هاد ولدها غنموووت انا اصلا مبغيت لا زواج لا زبل عااااايشة حياتي هاكا حسن
الام: سكتينا من هاد الهضرة وهي مزال عندي معاها الهضرة بقاي حدايا هنا متمشيش (جلست فالقنت ملاك مغبنة صحتها كترجف حيت مجاوباتهاش ومضربتهاش معاودتش هضرت تسربا لغدا ولعيالات بداو يمشيو عاد تجمعو صحاب الدار وحطولهم يتغداو ملاك دغيا نسات وبدات تاكل.. كملو جمعت معاهم وبقات جالسة حتى جا باهم يديهم دارو معاهم باش لغد ليه يرجعو يحضرو لحنة لعريس وحتى اليوم الموالي عاد يمشيو يروحو لعرووس..
مشاو فطريق هي غير كتسمع باها ومها كيهضرو بقات كتشوف فالسرجم وصلو للدار كانت عامرة كنا ديما 2 عمامها بعيالاتهم وعاد باها.. كرهت هاد العيشة المجموعة واخا الدار كبيرة الا ديما كتحس براسها غير ضيفة معندها بيت فيه خصوصية مكتلبس على خاطرها ومعمرها عقلت تجبدت فالسداري كيف بغات احترام لعمامها وجدها وضياف للي على طووووووول… غير وصلت دخلت لبيت مها سبقت باها باش تبدل على خااطرها لبست بيجامتها وبقات حتى جات مها للي عاودت ليها شنو وقع وزادت من عندها… )
ماما واش ماشي بزااف على هاد العيشة؟!!
الام: (تنهدت) وشنو المعموول؟!!
ملاك: بابا ݣاع معندو حتى رزق جامعو نشريو فديور الضحى ومنبقاوش فهاد زحاام انا والله حتى عييت ودوك لبز مكيخليونيش نعس حتى ل12 دالليل عاد كيبان ليهم الظحك واللعب شحال من مرة مشيت للخدمة ناااعسة غير الشاف ديالي شحال من مرة غوت علية منين كيلقاني مكملة نعاسي فلبيرو
الام: وشنو ندير ابنتي علاش انا مكرهتكش تزوجي باش حتى نتي تكوني بدارك وحدك وديري وليدات
ملاك: اوا ونتي؟!!! وهاد تمارة؟!!
الام: انا ولفت ابنتي كوووووونت نهضر ونغضب ولكن دابا ولفتهم وولفوني وخدمتهم مشرووكة ابنتي حتى هوما ولفو بيناتهم
ملاك: آش جاب السكنة للخدمة
الام: ابنتي انا وباك وصلنا لخزييت على هادشي مبغاش قالك مو كتمووت وتوصيه على خوتو ميتفرقش عليهم
ملاك: والعذاب للي عايشين فيه (بزفرة) انا غدا غنتعطل الخدمة كتيرة
الام: قوليها لباك ابنتي
ملاك: بابا غير كيسمع مني الخدمة كيقولي جلس فداركم بلا متصدعيني عرفتي اماما والله مكرهت شي انتقال من هنا
الام: بوحدك؟!!
ملاك: يالهي معايا
الام: هههه واش كظحكي علية ابنتي ولا على راسك فين غتمشي
ملاك: بغيت نمشي غير #فاس ياك بعيدة على #صفرو غير ب30 كلم…..
اصبحنا واصبح الملك لله…
فاقت ملاك على صوت الريڨي ديالها ناضت وهي شادة فراسها كما العادة منعستش بكري عاود..
حطت رجلها للارض ودغيا قفزت رداتهم للسداري طلت بانلها شي واحد ناعس تحتها وحطت رجليها فراسو تأفأفت زحفت بقاعها حتى لاخر السداري عاد وقفت جمعت فراشها ولمطت الطلميطة قدات لوسايد هزت كاشميرة ديالها حيت كان الجو خريفي، ووسادتها وخرجت لوسط الدار كانت الحركة فيها حيت كولشي كيفيق بكري مهضرت متكلمت نيشان مشات لبيت مها دقت مجاوبها حد عرفت لبيت خاوي دخلت كما العادة مكرهة من هاد المعيشة للي واخا كبرت فيها مقدرتش تولفها مكترتاح غير فالخرووج لدرجة كانت اجتماعية وشعبية مع كولشي الا مع الناس للي ساكنة معاهم واخا كولشي كيبغيها.. هزت من لماريو حوايجها كان تريكو واسع كحل فيه رسمة مظلة بالابيض سروال بويفراند دهنت إكخو فقط لوات شال كحل شافت فلمرايا وهي مخنزرة تمت خارجة من بعد مهزت صاكها دازت لبست ڤانس وخرجت من لباب بلا متعلم حد ولا حتى تفطر معاهم.. شافت الجو كان مغيم عݣزت دخل جيب جاكيط ديالها حنات راسها وتمت زايدة غير خرجت من الحومة دازت من حدا القهوة ديال باها وعمامها زادت حشات راسها فالارض كتقلب على تاكسي غير لقات ركبت ونيشان للسونطر ديال مدينة صفرو فين كاينة خدمتها…
ملاك: خويا عفاك التجهيز..
(جبدت تيليفونها صونات على لبنت للي خدامة معاها)
فينك امدام… هاي هاي على الناس.. بصحتك الآلة اشمن قهوة؟!! اممم #بيرلا إوا مزيان انا نسبقك للخدمة (قطعت بقات مراقبة طريق حتى حطها قدام المديرية الجهوية للتجهيز والنقل جبدت 10 دراهم عطاتهالو رد ليها 3دراهم خداتها وهبطت دخلت كتلقي التحية من هنا وتبتاسم مع هادا وهادي، بحال كانت فدارهم فحبس وخرجت للحرية.. دخلت المكتب فين كاين 4 ديال لبيرويات كانت هي صغيرة فيهم جلست وكرشها كتغرغر بالجوع.. هزت تيليفونها فتحت الكونكسيون لقات ختها مصيفطا ليها اوديو فلواتس غتجي هاد لعشية وغديرها مفاجئة لدارهم تبسمت عاجبها الحال ردت عليها)
بغيتي تسكتي لماما لقلب اش غتفاجئي بعدا يقادو ليك غير لبيت فين تنعسي نتي وراجلك..
(عاود صيفطات ليها اوديو)
الصاطة متنسايش دوك لبياسات للي وصيتك عليهم وفلوسهم راهم واجدين ختك عندها لفلوس كي الروز..
(دخلت صاحبتها جايبة معاها ساشي فيها الرايب وملوية فيها املو حطاتولها فوق لبيرو.. طلت عليها وشنو فيها)
جات معاك شي فاطر فبيرلا وشي يضرب لمسمن على قلبو
حكيمة: وبااااز الآلة قولي غير شكرا والله يرحم الوالدين اربي ديك الخلصة ديالك فين ماشية
ملاك: باغية نشري حديييدة اختي
حكيمة: على ظهري
ملاك: حمدي الله نتي بعدا جاتك غير فلفطوور (تبسمت وشافت فعزيز للي كتغدا معاه) تبارك الله على السي عزيز
عزيز: ههه ياك بعدا
ملاك: خاصك تزيد صداق للمدام
عزيز: بلا نتعمريها عاود (هز شي ضوسيات) ديري بحسابك كولشي رجع اللور بقيتي غير نتي (تم خارج)
حكيمة: هههه وجهك مقزدر
ملاك: فاش بقيت؟!
حكيمة: حقا مقلتش ليك المدير علمنا السيمانة جاية عندنا فورماصيون فمكناس ولا كازا مزال نبات بالظبط كولها فين غيمشي
ملاك: سيمانة!! حلفي بالله
حكيمةة: مالك فرحانة انا بعدا مغاداش غندخل نقولو بنتي بقيتي غير نتي وداك خينا
ملاك: انا بعدا غادية ايييتوووب واخيييييراااا
حكيمة: ههه سيري احبيبة تمتعي محدك صغيرة غير غديري وليدات غيتقصو جناحييك
ملاك: لقيت باهم بعدا اودي خليها على الله.. خاص غير بابا ميعكسليش
حكيمة: ان شاء الله ميعكسش
ملاك: حقا مقلتش ليك لبارح شنو وقع لي فلعرس…. (بقاو مجمعين الخدمة كتكون قليلة كولشي مشا بقات هي كتكمل شي حاجة عاد رجعت للدار….)
مع دخلت للدار لقات ختها وراجلها جاو والمفاجئة كانت حاملة وكرشها واخا صغيرة ولكن باينة فرحت ليها بزاااف حيت عارفاها كانت تحماق وتحمل وشحال دوزت عند الاطباء وحتى دوا العرب…
بقات كتشد فيها وفرحانة وفوسط ابتسامتها قلبها تكمش وخلعة خلات معدتها كترجف تفكرت العمر كيمشي وهي باغيا ولاد وشي عريس مزال مكتاب للي كانو جاوها شي 5 ضروري كيكون شي ديفو يا على مانضتها يا مكيعجبهاش هو يا طلع شمااتة واخا كانت #كتبغييييييييه وخلاها ومشا..
حنات راسها من بعد محلات ابتسامة خفيفة سلمت على حميد وسولت على احوالوو وباركات ليه وهي تجرها تعنقها مرت حنينها للي حسات بيها وقرات افكارها
مي حلو: (جبدتها كتهمس ليها) كولشي عند الله قريب الهبيلة غير صبري
ملاك: (تبسمت) مبقا صبر هههه ان شاء الله امي حلو مكاين والو.. نوض انا نبدل قبل ميدخل بابا
مي حلو: سيري ابنتي الله يرضي عليك
ملاك: (ياله سدت باب لبيت وهي تفتحو ختها) الناس يا ختي تقلوو
نعيمة: هه (لمست على كرشها) شوية
ملاك: (حطت يدها على كرش ختها) معرفتيش شنو عندك؟!
نعيمة: ولييد الا كتاب
ملاك: بوزنطييط وصااافي جيبيه اختي كيشبه ليك ماشي عزي بحال بااه
نعيمة: ههه ياك لمك يسمعك حميد يشنق عليك زعما راكي عزيزة عليه
ملاك: وحتى هو عزيز علية ازمر غير كلمة الحق وصافي بغيتيني نكذب
نعيمة: الله يمسخك
ملاك: ههه (كتبدل حوايجها)
نعيمة: مزال مهداك الله تجي عندي شي تسافيرة
ملاك: لحزقااااااا اختي
نعيمة: يا ختي غير فين كتجمعي هاد لفلوس 4 سنين مكتصرفيش منهم
ملاك: (دارت يدها) خمسة وخمسين السلامة كتحسبيلي
نعيمة: باااز
ملاك: اختي بغيت نشري شي حديدة نتي عارفة من نهار كنت كنقرا أمنيتي نشري شي حديدة
نعيمة: الله يسهل عليك احبيبة
ملاك: اميييين.. قوليلي نتي مزال هنا
نعيمة: ماشي بزاف غدا غنمشيو لفاس نضربو شي دويرة ومن موراها مكناس باش نشوفو دارهم اوا ومن بعد رجعو شي سويمينة هنا ونمشيو
ملاك: بالصح!! (فكرت فيها) انا عندي غيينيون لمكناس مزال معرفت بالظبط يمكن مكناس ولا كازا مهم المدير غيرد علية الا مكناس لصقي فية نمشي معاك
نعيمة: لصق فيك ههه كوني هااانية
ملاك: عرفتي نبغيك تمووتي وتلسقي فية حتى تحشميهم راكي عارفة بابا مكعرر فهاد القضية بكي وسخفي قولهم كنتوحم عليها واالو هاد السيدة تبقا معايا
نعيمة: ههه عاد الا عرفك باغية دفعي ميطاسيون
ملاك: اختي راه تقهرت بهاد العيشة ديال السردين وكان غير كان عندي بيتي بوحدي نصبر ولكن راه بزااااف
نعيمة: (بتنهيدة) عاارفة للي كاين وكان اصاحبتي ضربتيها بشي تزويجة
ملاك: ومال اختي رجال دايرين صف برا راه واالو القضية ناااشفة
نعيمة: غااا صبري راكي مزالة صغيرة
ملاك: ههه اه مزال كرضع صبعي
نعيمة: دابا تزوجي وتولي ترضعي حاجة اخرى
ملاك: شكون!!
نعيمة: صبعك ههه..
ملاك: ها!!!!!
نعيمة: هههه مهم منين يخوي حميد الكوفر غنخلي ليك لعيبة ديالك تماك حتى ندخلها بوحدها
ملاك: كفاش صبعي؟!!
نعيمة: ههه انا مشيت..
اصبحنا واصبح الملك لله…
كما العادة ملاك دارت روتينها الصباحي للي كل نهار كيعصبها كتر وكتر ولكن مكتقول والو حيت باباها صعيب اولا وتانيا مها كظل تصبرها وتالتا حيت كتحشم من ناس ديال الدار حيت حتى هوما معندهمش ذنب فهادشي وصية حداها للي مرة دعي معاها مرة دعي فيها….
لبست حوايجها كانو عاديين سروال تريكو فولارها سبرديلة وصاك مشات للخدمة بلا متقولها لحد لدرجة ولات عندها عادة وحلاوة عندها تخرج كتسلت بلا ميشوفها حد شي مرات كتخيل انها عايشة بوحدها وكتخرج بلا ميقولوا شي حد فين ماشية ومنين جاية شافت فلباب للي اونفاص معاها كما كتقولو الباب للي كانت كتشوفو جنة ورجعت كتشوفو جهنم.. كملت طريقها خدات تاكسي ونيشان لخدمتها.. عرفت ان الفورماسيون كاينة فمكناس قنعت للي خدام معاها وكان مرشح وبقوة حيت عندو تجارب تمشي هي ويرشحها للمدير وحيت عزيزة عندهم كاملين بعفويتها وتقشابها وحتى خدمتها ملقاتش مشكل رجعت للدار فرحانة لقات كولشي كيوجد باش يمشيو يحضرو للحنة ديال لعريس وحتى رجال معروضين
ملاك: (متكية فوق النموسية) ماما راه غدا غنمشي لمكناس
الام: تالفة!! فاس ماشي مكناس
ملاك: لا ماشي على حساب العرس انا غنمشي على حساب الخدمة عندي فورماسيون سيمانة تماك راه شحال وانا كنغيط بيها
زهرة: بينك وبين باك
ملاك: والله الا صدقتي شماتة معندك كلمة (جات بغات نضربها وخبعت وجهها)
نعيمة: ههه غير كظحك
زهرة: توريني فهاد لبونتة
ملاك: نتي للي والدااني قصيرة زعما كفاش خوتاتي كولهم طوال الا انا متفاهماتليش هاد القضية
زهرة: راه قلت ليك لقيناك غير حدا لبركااسة
نعيمة: ونااااري واش كتسكتي نتي.. ماما شوفي بغيت تمشي ملاك معايا لمكناس، اصلا من لهيه دايرة باش نرغبكم عليها
عفاك رغبي بابا يخليها (كتمسكن وحاجة يدها على كرشها كتماصيها) راكي شفتي خالتي تماك بوحدها وكتنعس بكري تمشي غير تونسني والله كنقنط وحتى حميد غير كيوصل تماك كيخرج عند صحابو
الام: (دوروها فالوسط) نقولها لباكم ابناتي
ملاك: علاش نتي ݣاااع معندك كلمة عليه!!!
نعيمة: سكتيييي… اه عفااك غير قوليهالو هامتي شنو بان ليك غدا ندوزو العرس معاكم ومن بعد نطلعو لمكناس حنا هي تخدم وترجع تجلس معايا
ملاك: اهااه حتى هادي مزيااانة
زهرة: حتىىىىىىى نهضر مع بااكم…
نعيمة: صافي مزيان…
(ملاك لبست جلابة لوات شال على راسها شافت ختها كتماكي وجهها.. بقات كتشوف فيها هدا قانون فدارهم نهار تزوجي خرجي حتى عريانة ديري للي بغيتي الا كان راجلك راضي ولكن محدك تحت جناح واليديك غتمشي بقانوونهم هوما، ممنوع تحيدي فولارك ممنوع زناافي والدوراان الا في حدووووووووووود ممنوع المكياج ممنوع صحاباااات وخيطي بيطي…
ناضو خرجوو مشاو حضرو المناسبة للي كانت مها متخوفة ينوض صداع عاود ولكن ديك الجنس مجاتش اما ملاك كانت كتقلب عليها حيت حتى مشات للدار عاد تفكرت شي كلام كان خاصها تقولها تزيد تقليلها السم..
رجعو للدار قبل ميدخل باها ينعس جمعت حوايجها للي اغلبيتهم من للي جابت ليها ختها هزت من بزطامها 500 درهم حطاتها تحت حوايج مها، وهادي عادة كل مكتخلص كتعطي لمها فلوس وزادت حطت ليها 200 درهم دارت بحساب انها غتكون فاس يقدر تخرج وتبغي تشري شي حاجة..
دخل باها تفافات حيت كتعطي لمها بلا خبارو ماشي حيت مغيبغيش ولكن هو عندو فكرة أن مها ممحتاجاش وكولشي كيوصل حتى لعندها وكولشي كيعطيه ليها وهي كتبغي تعطيها حيت كتفرح وكيعجبها الخال واخا رفض امها ولكن عارفة من لداخل ان مها عاجبها الحال…)
ملاك: بابا
الاب: (رشيد) قالتلي مك غتمشي لمكناس
ملاك: اه على حساب الخدمة انا مبغيتش ولكن فية النوبة باش نمشي نحضر لشي اجتماعات الا بغيتي متمشيش نشوف ندير شي شهادة ولا معرفت
الاب: وميصلاحش تبقاي تمشي وتجي
ملاك: بابا هاكا قلت ندير ولكن نعيمة لسقت فية وبغاتني نمشي نبقى جالسة معاها عند دار ناسها ومع الحمل معرفت ولات عاطياها غير لبكى قلت متخليهاش بوحدها الا بغيت نتا زعما
الاب: اممم اوا رد لبال لراسك ابنتي وفوقما صونيت تجاوبي الله يرضي عليك
ملاك: اه ضروري ابابا (باستلو كتفو)
تصبح على خير
(خرجت من تماك هازة كويشتها ووسادتها.. باها ماشي شي واحد قاسح ولكن خاصك تلتازم معاه بالشروط ديالو باش يكون معاك مقاد.. مشات للبيت فين كتنعس لقاتهم مزال مجمعين حطاتهم فالجنب قلبت على ختها بعينيها مكيناش هي وراجلها وعيب تمشي لبيتهم دق عليهم.. بقات كتفوه وعينيها نايمين هزت تيليفونها طلقت لويفي دخلت لواتس لا ميساج لا والو للي كانت معاه تفاارق معاها بسبب تافه وفنفس الوقت جاااارح بالنسبة ليها وتخطى الحدووود..
وكان اتاني واحد كيرفض تكون بيناتهم علاقة زواااج بهاد السبة..
محست حتى نعست جالسة حتى فيقها عمها قادات نعاسها ولكن بدا كيطير وهي كتفكر فالإكس كفاش حلمت معاه بالحرية والاستقلال لدرجة وافق على شروطها كاملين مقابل يتعاونو على زمان ومكانتش رافضة المهم كانت غتستااقل وتعيش الحب معاه حتى صدمها برفضو فاااخر دقيقة وهوما مخطوبين..
دارت السيري للي متبعة بقات كتفرج فيها حتى نعست…)
اصبحنا واصبح الملك لله..
ملاك دازت للخدمة خدات الأوراق من عند المدير عطاها فين غتمشي ولي غيكون كولشي على حساب الخدمة خرجت نيشان ركبت مع ختها وراجلها مشاو لدار العرس للي كانو كيركبو فالطموبيلات ركبت معاهم ماماها ومرت حنينها،
مشاو ناشطين والمسافة كانت قصيرة بحكم صفرو وفاس بيناتهم 30 كلم ،
بقاو متبعين الطوموبيلات حيت غيمشيو لدار لعروسة هي اللولة عاد من تماك يمشيو للقاعة.. مشاو معاهم #لبنسودة هبطات مها ومرت حنينها وهوما بغاو يضربو دويرة حتى يبغيك يمشيو للقاعة ويعلموهم
نعيمة: ناري فين ساكنة!! بعيييدة صدقت مكنعرفش فاس والو
ملاك: (ميقت فيها) لا غير قريتي 3 سنين فظهر المهراز وصافي
نعيمة: هههه هانتي قلتيها قرينا (كتعاود لراجلها) بابا 6 دلعشية كيخصنا نكونوها حدا القهوة ديالو مشغلوش واش تكون شي ماتيير مهمة فلعشية ولا لا مهم 6 يشوفنا
حميد: ههه وايلي
نعيمة: والله مرة مرة للي كنا كنسلتو لتاجموعتي ناكلو صلاد فروي اااح تشهيتو احميد بزااااف
ملاك: حتى انا
حميد: ختك كتوحم ونتي لاش
ملاك: تعز فية صلاد فروي اراجل ختي لعزيز
حسن: لا لا بلعكس بالفرحاات اخت مرتي لهبيلة ههه
ملاك: (تبسمت كتشوف فشواريع فاس… فاس والكل في فاس للي قلبتي عليها تلقايها.. مشاو لتجموعتي جلسو فوحدة من دوك لقهواي للي تماك وكولشي تخصص صلاد فروي طلبو 3 وبقاو مجمعين)
حميد: دابا نتي ساهلة دفعي وراقك القنصلية طلبي ڤيزا، غيقبلوك
ملاك: حتى انا فكرت فيها واكترية منين نعووومة حاملة دابا نقدر ندفع نجيبها مع لولادة
حميد: حتى مي غتجي لعندي باش تقابلها اجي معاها ومنها ديفولاي شوية متعرفي ضبري على شي راجل تما
ملاك: الا هو مضبرش علية منقلبش عليه انا اوا صااافي داكشي للي بقا
نعيمة: اجي حقا سمعت سيهام مرت عمي كتقول على شي خطبة
ملاك: اماسي خطبة هاديك راها مزعزعة، عرفتي هاديك مو فاش تمات خارجة قالتلي كتبيلي نمرة تيليفونك فورقة وشحال كتخلصي
نعيمة: هههه يمكن غير فضول منها
ملاك: الله يهديك انعيمة وكان غير هضرت مع راس طارو دولدها كنت غنݣر بلا ميسول اصلا ميشمش من عندي ريال ونيت نسولوا باش نشوف الا عندو شي براكة يسلفهالي باش نشري شي حديدة ساعة بجووجنا كنا داخلين على طمع
حميد: هههه معندك مديري بيه الراجل للي ميصرفش عليك معندك مديري بيه انا كنتعجب للي باغيها تخدم عليه
ملاك: منهم عداااد اخااي حنييد غير الله يلاقيني مع شي بوكو حبة بحالك
نعيمة: (خنزرت فيها نعيمة)
ملاك: )بغات تقادها) ويكون غير ولد الناس وظريف, مالكي كتخنزري؟!
نعيمة: باااز… (كملو مشاو يكريو تكاشط يحضرو بيهم نعيمة دازت لكوافورة دارت ميكاب خفيف جايها زوين انا ملاك اكتفت بعكر خفيف احتراما لقرار مها عيات ختها فيها غير تحمل ولا دير ايلاينر ولكن مبغاتش كانت مقتنعة بقرار مها هي مكرهتش ولكن معندها غراض باش تفادا شي صداع ولا مشاحنة بينها وبين مها وعلى والو… عيطو ليهم مشاو للحي بقاو فالطموبيل حميد طلع عندهم..)
نعيمة انا نمشي نجيب روشارج ونجي
نعيمة: خلي حتى يجي حميد
ملاك: لا لا حشومة مكيبغيش يشد من عندي درهم
نعيمة: ههه وداكشي لي كيعجبك نتي
ملاك: ههه حيت مزال غنبغيه فشي حوايج اهم من روشارج د10 دراهم، وايلي نضيعو وجهها على 10 دراهم!!
(خرجت كانت الدنيا عامرة بزاف قلبت على شي حانوت والو دارت الدورة السيكتور لاخر مشات دارت روشارج بقات كتخرب فتيليفونها حتى تساطحات مع واااحد غير بعدت راسها شافتو برد ليها لما فركابي رمشت جوج مرات وقلبها غيسكت كتشوف واحد داير كمامة وداير نايڤية على راسو فيدو هاز سيف ولا موس كبير مفهمتش داك لعجب مهم طويل ولاوي بحال فواطة فيها الدم، والدم باين جديد..
صوتها بدا ميرجف)
عفاك غير مضربليش وجهي (مدتلو تيليفونها) هو للي عندي والله غير هاكو وخليني نمشي راني غير يانا للي عند ماما (بغات تبكي)
عفاك اخويا انا معروضة غير لعرس هنا مكنعرف حد هنا….
ملاك: (مقدرتش تهز عينها فقط كتشوف يدو للي هازة داك لمووس وبقايا ديال الدم فيدو طبعت معاها شي سخونية غريييبة مع صباع رجليها حتى عينيها ضببو وصوتها كيرجف) عفااااك اخويا مضيعنيييش
….: نتي بنت الحومة؟!
ملاك: (حاضية غير يدو) لا خويا انا غير معروضة اصلا اول مرة نجي لحي بحال هاكا
…: (متقل فهضرتو للي كانت مخضرة) كفاش هاد بلان عاود حي بحال هاكا!!
ملاك: والله اخويا متفهمني غلاط (مكتشوفش فيه.. بغات غير تبكي ساعة والو تحجرو عينيها حاضية غير داك لموس ولكن صوتها قاضي غرااض.. مداتلو التيليفون) هاكو خودو
…: (شدو من عندها تبسم التيليفون لافيشور كولها مشخشخة) هدا زيدي عليه 20 درهم وشريها باكية ماركيز
ملاك: والله مكنكمي
….: (عض على لسانو مخسر وجهو مد ليها التيليفون) شريييه محدووو رخييص
ملاك: شنو هو؟!
شخص: اورطييݣا…. (Ortèga) ياله اصاااحبي
….: (ياله ضار يشوف شكون عيطلو ملاك خطفاتلو التيليفون من يدو هزت جلايلها وعطاتها بجرية وحدة كتجري بحال شي واحد عاد مطهرينو.. تبعها حتى ضربت الدورة ضار فحالو وتم ماشي عند للي عيطلو…)
~~~~~~~~~
ملاك: (محبست جرا حتى لحدا دار العرس قلبها كان غيسكت شافت فتيليفونها) الحمد لله يا سيدي ربي هادي والتووبة هادي والتوبة الحمد لله الحمد لله..
(جاتها السخفة ياله بانت ليها مها جاية جيهتها دارت ابتسامة ممبينة والو والا مبقات لا مكناس لا والو..) ماما
الام: فاااين كنتي اديك ؟!!!
ملاك: (بحرا كتهضر) مشيت درت روشارج وجيت كنجري خفت تكونو مشيتو
الام: بانتلك الروشارج غير هنا الحماارة خلعتينا عليك راه راجل ختك مشا يقلب عليك
ملاك: هو ديما روطار عمرو لحق شي حاجة
الام: ها!!!
ملاك: والو والو انا نقول لنعيمة تصوني عليه راه علمتها قلتلها غير ندير روشارج وصافي
(بحرا كترد النفس عاد قدرت دور تشوف داك السيكتور مناش هربت على الله يبانلها تشوف غير كمارتو ساعة واالو غير برااهش للي تم كيشطحو على انغام الدقة العيساوية للي بدات ركبت فالطموبيل كولها فين كينݣر عليها ولكن هي معندهاش الطاقة باش تهضر معاهم ولا تشرح بقاو متبعين موكب العرس للي مشاو مباشرة لقاعة العرس للي كاينة فطريق موزار كانت قاعة زوييينة من الدخلة للي كانو السرباية تعرضو المدعوين كاملين بالحليب وتمر معمر ملاك غير كتدور عينيها ضنات غتكون شي قاعة غير عادية بحكم السيكتور ماشي شي حاجة ولكن بانلها العكس قبل مدخل القاعة دازو على الدقة المراكشية وعلى عيساوة جوج فراقي واحد حدا واااحد وكلها كيحنت التاني وجريدة كانت كولها ضوااو دخلو للقاعة كان عالم اخر كولشي واقف مع الدخلة ديال العروسة كيديرو صواابهم الا هي جلست كتشرب حليب وترد الروح بيه دازت على كاسها وكاس ختها ومها..
باقي بين عينها غير ديك اليد للي هازة داك الموس وصباعو للي فيهم دم قديم وعلم الله ديالمم.. بلعت ريقها كتخيل لوكان قتلها ولا دار فيها شي فضيحة بقات غير كتحمد الله.. تهزات العروسة بالعمارية بقات متبعاها مكتصفق موالو غير حاضيااها مقوسة عينها فيها هنا طيح هنا طيح.. عاد تمو العائلة جالسين حداها فنفس الطابلة بقاو مجمعين وهي غير كتشوف..)
نعيمة: العرس كولو بااااݣص تي نوضي خضري عينيك وجيبينا شي عريس فاسي
ملاك: (تبسمت نص ابتسامة.. هزت راسها كتشوف الناس مكستمين والحالة وكااااين التيتيز) اودييييي
نعيمة: ههه خارجة من الاعماق
ملاك: بحال داك شكل ديال شي مش حداه صندوق دالسردين ومقادرش يهز شي وحدة
نعيمة: هههه حالتك صعيييبة اوا نوضي شطحي متعرفي
ملاك: لهلا يحيييه نوض نكوز ل20 باش يطلع لي واحد
نعيمة: ماشي كوزي يا البعر ولكن غير باني فالصووورة على هاد لسان للي طول منك غتبقاي هاكا
ملاك: بلاش منو ݣاع… عندك شي عكر (طلبت العمر بحال طالبة ݣارو)
نعيمة: ههه اه نوضي معايا لطواليط حتى انا نقاد راسي…
اورتيݣا: ديالكم داك العرس أجمي؟!!
…: ديال بنت القادوسي ممعروضش ولا!!
اورتيݣا: (شاف فيه ديك الشوفة ديال بنيتك وكمل كيمسح شعرو بالفوطة)
هو هدا انا مشيت كولشي يتسد مزياان وغدا لقاكم مع 6
(بقا كيتمشى على رجليه حتى خرج للشاريع.. فين كاينة قهيوة، تماك حاط الموطور ديالو ركب فيه دار الكاسك ديمارا وكعط خلا غير الصوت موراه…)
~~~~~~~~~~~~
زهرة: ملاك مالكي معجبتينيش
ملاك: والو غير عييت وصافي واخا نخرج جريدة اماما
زهرة: حطي قاعك الارض قالك تخرجي غيكونو غير لعزارة للي معمرينها
ملاك: اوا داكشي علاش بغيت نخرج
زهرة: (خرجت عينها فيها اصلا عينيها للي كيبانو حيت لابسة لتام)
نعيمة: جعت
ملاك: نتي جاية غير على كرشك
نعيمة: بااز الآلة بحال أنا للي من قبيلة وانا ناكل فالحلوة..
زهرة: اللقوى شوهتووني يا بنات الهم…
(كملو العرس مع 12 دالليل خرجو برا) ماما واش بالصح غترجعو لصفرو؟!
الام: اه ابنتي نعسو فدارنا وراك عارفة باك راه سيمانة وهوما يطلبوه يخلينا نجيو هنا
نعيمة: وشحال والناس كيرغبووكم تباتو عندهم
ملاك: لعساااك اماما معندك فين ترجعي لداك الحي تمااك غير لكلوشارا والله ومااتمشي حتى نعيط لبابا
الام: سكتي حشومة نص ديال هاد الناس للي هنا من تماك
نعيمة: ناري ويسمعووك ازمرة
ملاك: (هزت كتاافها) معارفين واالو (ودعت مها للي رجعت لفاس مع عمها ومرتو ومرت عمها ومرت حنينها…
وهي بقات مع ختها وراجلها للي قررو يبقاو فاوتيل هاد الليلة وغدا عاد يمشيو لفاس مكانش عندها مشكل مدام راجل ختها للي غيخلص عليها مشاو لbarcelo للي كاين فالسونطر دخلو وهي كضور عينها عارفة راجل ختها طااالق اللعب ومهلي فراسو وفختها داكشي باش كيعجبها تخرج معاهم مرة مرة) باين غيكون غالي
نعيمة؛ نعام؟!!
ملاك: والو والو..
نعيمة: بففف عييت ظهري غيتقسم
ملاك: قوليلي واخا غنسواك للمرة الألف على ميجي، حميد دغيا تقبل..
نعيمة: ملاك زعما نتي اول وحدة كدافع على هاد الموقف واخا نتي ختي صغيرة الا خديتها من عندك مكنتسناش بنادم يتقبلها ولا لا حيت اصلا ماشي شي حاجة للنقاش بالظبط ديك القضية خط احمر حتى واحد ممنحقو يتناقش وداك عريس الغفلة راه قالتها لي ماما
ملاك: (قفزت) شكون؟!
نعيمة: معرفت هداك للي دابز معاه بابا عرفي راه معندك فيه خيير
ملاك: شي مرات كنقول كنتسرع دغيا كندابز خاصني نبقى نهضر مع بنادم بشوية
نعيمة: معندك متفهمي اختي صافي موقفاش الدنيا
ملاك: صافي سكتي راجلك جاي.. قالك مواقفاش الدنيا نتي باتي معنقة راجل وانا قوليلي مواقفاش الدنيا
نعيمة: هههه
حميدة: نعووومة ترتاحي شوية؟!
نعيمة: اه عييت بزااف
ملاك: انا بغيت نجلس شوية هنا معليش
حميد: اه خودي راحتك غير متخرجيش برا (مد ليها كارت ديال باش تفتح بابها) حدا شومبر ديالنا نيت، محتاجة شي حاجة اختي؟!
ملاك: لا لا لهلا يخطيك اخويا غير سيرو ترتاحو.. (هوما طلعو وهي بقات كتشوف مكاين غير لݣور والناس لكلاص هزت صاكها للي دايرة فيه بيجامتها وبقات كدور دخلت المطعم للي كان فيه ضو خفيف وشي حاجة قليييلة للي كتاكل قشعت كاين شراب تما خرجت بقات ماشية حتى خرجت فلابيسين كان مقاد زوين ضو خفيف فيه كل مرة كيتيدل موسيقى كلاسيكيه كاين بنادم للي جااالس تماك للي واقف.. تمشات منيشة على كرسي للي كيكون من شبكة معلق فحديدة وكيطيطش بيك جلست فيه حاطة صاكها حداها كتسمع الظحك وكاين لي ناض كيشطح على انغام الموسيقى، للي كيشرب كانو عينيها غير كيسكانيو مكيهداش كتبرݣݣ واااحد بواااحد…)
ملاك: (شحال كيعجبها تكتاشف وتعرف الناس كفاش كيحسو وهوما ملعقيين مكرهتش تكون حتى هي ملعقة ولكن ماشي لدرجة الهوس همها هو تشري طموبيل ديالها ومن بعد تشري دار هادي هي قائمة ديالها بقات كتشوف وفنفس الوقت تفكرت شنو وقع معاها وغير ربي للي حفظها من لݣريسااج تبسمت منين الشفار ظحك على تيليفونها جبداتو كتشوف معندهاش فالتيليفون شي حاجة يعني يكون غير كيقضي الغراض وكانت ياله خداتو سباب تشخشيخة للي فيه هو نهار تفارقات مع صاحبها للي غير تفكراتو عبست كانت حتى ولفاتو وقلب عليها.. ضورت عينها شافت واحد كيشوف فيها حتى هي بقات كتشوف فيه حتى تم جاي عندها حشمت وطلقت رجليها للأرض باش الكرسي يحبس من التحرك)
….: بوحدك؟!
ملاك: حم اه علاش؟!!
…: معرفتش قلت نجي نجلس حداك ولكن خفت تكوني مع شي واحد
ملاك: لا.. انا بوحدي (بقات كتحنزز فيه شنو لابس تريكو بيض لاسق عليه فوقها ڤيست سروال دجين وݣاط مبووݣص بقات غير كتحنحن واهم حاجة زهر بالداخل ديالها دارت ابتسامة عريضة🤡)
مد يدو عندها…
يوسف: انا يوسف
ملاك: (تبسمت ومدت يدها) ملاك
يوسف: مشرفين أنسة ملاك (ضار من مورااه جر كرسي وجلس حداها)
جاني فضول شنو مخليك جالسة بوحديتك هنا
ملاك: (تبسمت) عادي جلست وصافي ضرووري نكون مع شي واحد باش نجلس
يوسف: لا لا ولكن معرفت بغيت نعرف وصاافي
ملاك: معرفتش ههه معرفت منقول جيت هنا عجبني الجو وبقيت جالسة ممحتاجااش تفلسييف احم زعما عادي
يوسف: اممم نتي من فاس؟!
ملاك: وكان كنت من فاس شنو غيجيبني نجلس لوطيل
يوسف: (حك على حنكوو) سؤال بليد ياك
ملاك: ههه شوية
يوسف: (تبسم) منين نتي
ملاك: ههه صفرو
يوسف: غير فالدوورة مجريين عليك مالين الدار
ملاك: ههه بحال داكشي
يوسف: اشمن موصيبة درتي عاود
ملاك: (ظحكاتها الطريقة كفاش دغيا دخلو فالموضوع وفنفس الوقت كتشوف دوك سنينات وتبوݣيصة وزعورية بحال شي مودل لبناني ولكن هدا كان زايد نغزة حيت بخلاصة الزين الفاسي)
واالو غير هوما للي ظالميني ومكيفهمونيش
يوسف: نتي غير ديريها قد راسك وقولي متيفهمونيش
ملاك: حتى نتا معاهم زعما قلت نتا هو للي كتفهمني
يوسف: (شاف فيها سكت وتبسم) شنو مخليك بوحدك
ملاك: اولا انا مع ختي وراجلها هوما طلعو يرتاحو وانا جيت هنا تانيا ماشي عيب نجلس بووحدي مرة مرة الواحد تيبغي يديفولا غير مع راسو
يوسف: اممم نقطة تاالتا
ملاك: ههه معرفتش نتفكرها ونقولها ليك
يوسف: انا نتسنااك.. باقية نتي غدا هنا
ملاك: لا غدا غنكون فمكناس ان شاء الله
يوسف: علاش؟!
ملاك: (تبسمت) وعلاش باغي تعرف
يوسف: غير خفت عاود تهزي راسك وتقول بعد غدا انا مشيت لكازا
ملاك: ههه لا حدي مكناس ومن موراها راجعة لصفروو ان شاء الله…
جات سرباية مقربة ليهم طابلة مسحتها بزيف و رجعت للكريسة للي فيها طلبات الزبائن حطت موخيتو وبلاطو خشب صغير فيه انواع فرماج مقطعين قطع صغيرة وبلا ديال نودلز..
السرباية: شي حاجة اخرى موسيو!!
يوسف: ملاك شنو تاخدي
ملاك: لا شكرا (حطت يدها بامتنان على صدرها)
يوسف: (شاف فالسرباية) انا نولي نعيط عليك..
ميغسي..
(هز عصي السوشي كلا من النودلز وتبعها بنوع ديال الفرماج ملاك كتشوف فيه كفاش كياكل )
منين عينيك فيه نجيبو ليك
ملاك: هههه لعشا للي كليت انا حسن من هاد ايندومي
يوسف: هههه (هز شرب من العصير ). شنو كليتي
ملاك: كنت فعرس (لعبت بحواجبها بحال كتقلي ليه السم بقا كيشوف فيها وهو كيتبسم حتى حشمها وحنات عينها) حم..
يوسف: (رجع كياكل) هي معرݣاها مزيان
ملاك: امممم
يوسف: بالصحة لالة (هز بفرشيطا فرماج ومادو لجيهة فمها) نشركو طعام.. (تبسمت مدت يدها هزت الفرماجة وكلاتها بقا كيشوف فهاد الحركة وتبسم) اوا
ملاك: اوا زيد عليها ايوا وشري حليوة
يوسف: نعام!!
ملاك: والو غير تفكرت شي حاجة
يوسف: هه (جاتو فشكل مكتسولوش الاسئلة للي ديما كتطرح عليه) بون انا يوسف
ملاك: بالصح!!
يوسف؛ ههه هاكا قالولي منين كبرت
ملاك: سبحان الله ݣاع مبيناش فيك
يوسف: ههه نتي بزااف.. (كياكل واخد راحتو) قريتي فاس؟!
ملاك: اه 4 سنين خديت فيها الإجازة
يوسف: فاش؟!
ملاك: علم النفس
يوسف: اممم عليها
ملاك: عليها شنو؟!
يوسف: رتاحيت معاك فالهضرة
ملاك: ممكن (تبسمت فخاطرها كتخيل راسها فالعمارية معاه ومرة مرة كتصبع لنجية ومرت ولدها)
يوسف: انا كنت ايكونومي خديت الماستر.. ودابا تنقرا العام الثاني ديال القانون
ملاك: علاش!!
يوسف: غير تخصص تيعجبني وصافي بغيت نعرف حقوقي ههه
ملاك: اممم مزيان
يوسف: الراس شحال ما عمر مزياان
ملاك: صراحة انا كان همي غير نخدم وصافي تكون عندك كرطونة تخدمك
يوسف: وي عرفتها غير منين خديتي الإجازة على 4 سنين
ملاك: ههه العام اللول كنت دايرة العربية معجباتنيش داكشي باش بدلتها، والاجازة خديتها بمونسيو (كذبت) وغير ف3 سنين
يوسف: اممم وعلاش مبغيتيش تكملي فهاد التخصص اجي شنو خدامة بعدا
ملاك: فالتجهيز
يوسف: وشنو علاقة علم النفس بالتجهيز
ملاك: عندها علاقة انها كتعتابر إجازة وداكشي للي كان مطلوب فالخدمة
يوسف: (دار تعبير فوجهو انها لا علاقة وكمل الماكلة)
ملاك: (ضورت راسها ولسانها كياكلها باغية تعرف خدمتو ولكن مزعمتش تسول)
يوسف: (مسح فمو بموشوار) الحمد لله.. متأكدة ملاك مبغيتيش شي حاجة
ملاك: تأ
يوسف: اوكي.. فين خليناها
ملاك: (طانزة) فقرايتي وعلاقتها بخدمتي هه
يوسف: (تبسم) ماااا متتبغيش دخلي فكرة انه الانسان تيقرا شي تخصص ويخدم خدمة للي معندهاش علاقة بقرايتو
ملاك: يمكن داك الانسان كيكون ملزم ومعندوش اختيار ونسبة الحظ باش يخدم قليلة داكشي باش الواحد كيبغي غير يلسق فأي خدمة مع الدولة إجزاة علم النفس اقصى طموح فيها استاذة للي هي اصلا ولات صعييييبة وشرووطها #ممقبولاش…
يوسف: نتي من داك النوع للي تيقولو لبلاد معطاتناش وكدا
ملاك: (زفرت ومن تعابيرها كانت جدية) اممم بلادي كنبغيها وعمرني كرهتها ولكن صعيب ديما تاخد للي بغيتي فيها اكترية منين مكتكونش كااالة صحيييحة
يوسف: معرفتش انا تنقول للي قرا وعرف كفاش ييوصل غيوصل
ملاك: ولكن ايوسف ضروري خاص تكون خلفية للي دعمك كتكون مبنية عليها دوك الطموحات ماشي كنعمم ولكن الأغلبية كيقراو يخدمو وبعاتدو يقراو غير باش يعمرو راسهم (تبسمت)
يوسف: (قوس عينو فيها كانت اول وحدة بلا مباشر وبلا حتى متعرفوو مزيان كتقولو غير حيت نتا عندك باك واصل داكشي باش وصلتي) ممكن
ملاك: هه (هزت حواجبها كتلعب بيهم وهادشي فيها قعيدة) كاينة ماشي ممكن
يوسف: (كظحكو بتعابير وجهها) علاش مكملتيش فعلم النفس ودرتي كابيني ديالك كنتي غتوصلي
ملاك: انا كنشكيلو بالعݣر وهو كيقولي اش خبار دراري ههه
يوسف: ههه معاك بالصح
ملاك: ودغيا حكمتي علية غنوصل متعرفني انا كلي عقد ميمكنش نداوي شي واحد وانا براسي خاصني نداوا هه
يوسف: حنا كاملين تنحتاجو مرة مرة نمشيو لطبيب
ملاك: مقلتش العكس ولكن انا غير كفوووؤة باش نكون مختصة نفسانية ماشي حيت العقد ولا شي حاجة اخرى ولكن معنديش الطاقة والقدرة نسمع لشي واحد ويفرعلي راسي بمشاكيلو، انا بغيت غير نخدم وصافي يعني حبا فالمادة لا غير
يوسف: (بقا كيشوف فيها وفهاد الصراحة) المادة ماشي هي كولشي
ملاك: ههه عاود!! لا اسيدي ماشي هي كولشي ولكن هي كتر من النص (تبسمت وحركت راسها كتأكد كلامها)
يوسف: ممكن
ملاك: هه.. (طيراتو انه تقرص)
يوسف: عجباتني الصراحة ديالك
ملاك: ممكن هه
يوسف: (بقا كيظحك) بون.. تتعرفي فاس بزااف يعني جايلاها
ملاك: ماشي بزااف أغلبية كنت من لفاك لصفرو قليل فين كنا كنسلتو مرة مرة
يوسف: كنتو؟!!!
ملاك؛ انا وخواتاتي وشي مرات بنات الجيران
يوسف: شحال عندك من ختك
ملاك: (مدت يدها مفرقة صبعانها) خمسة
يوسف: خايفاني نعينكم هه
ملاك: ههه لا وانا الساتة
يوسف: تبارك الله خوت دراري؟!
ملاك: لا غير بنات
يوسف: مزيان كولكم فصفرو
ملاك: بقيت غير انا فالدار بربعة بيهم تزوجو وحدة فكندا والتانية بلجيكا وزوج فالمغرب وحدة فأزرو ولوخرا فمارتيل
يوسف: والخامسة
ملاك: (بابتسامة حزينة) الله يرحمها
يوسف: اه سمحيلي الله يرحمها
ملاك: امين.. كانت ماتت صغيرة ولكن انا من ديما كنحسبها مع الفرقة
يوسف: صعيبة
ملاك: معرفتش، صراحة انا مشفتهاش كنت مزال متزاديت ولكن ماما كانت كتهضر عليها بزااف داكشي باش ديما فبالي .. ديما كنحسبها كاينة (قبل ميسول) ماتت بسخانة
يوسف: (متأسف) الله يرحمها
ملاك: اميين.. ونت؟!
يوسف: انا عندي خويا كبير مزوج فاس وختي صغر مني.. حقا شحال فعمرك؟
ملاك: ماشي حشومة تسول بنت على عمرها!!!
يوسف: عادي الواحد كيتقبل السن ديالو واخا يكون قرب للربعين!!!
ملاك: ها!! (بلا شعور) بزاااف عليك تتكون عندي 40…
يوسف: هههه غير ظاحك معاك ناري نتوما لبنات حتى لعمر وكتبغيو ديما تبقاو صغاار
ملاك: ماشي مسألة نبقاو صغار ولكن تأ… مهم انا عندي 27 عام طالعة ف28
يوسف: وايلي مبيناش فيك
ملاك: (تبسمت) عارفة كولشي كيقولهاالي
يوسف: أهم حاجة يكون الواحد متصالح مع ذااتو
ملاك: هاااء عيقتي (جات بغات تنوض وهو كيموت بالظحك هو دار يدو بجوج لجيتهتها بلا ميقيسها)
يوسف: حبسي حبسي ههه والله كتباني صغييورة كيوووت ولكن عندك عقل كبير وزوين تبارك الله
ملاك: (تبسمت) عارفة
يوسف: (صونا تيليفونو مباشرة ضار كيشوف فجنابو هز جاوب) فين اعشييري.. اه بالصح.. انا بقيت مع واحد (شاف ملاك وتبسم) الأستاذة نسيت راسي معاها..
(ملاك فرحات ولكن مبينتش حدها دارت ابتسامة ديال الخاطر وقالت وجهها كتشوف شكون هاز التيليفون وكيهضر معاه)…
صافي اعشيري غدا نكون تم.. (قطع)
صاحبي كان معايا نسيتو وانا تنهضر معاك
ملاك: ياكما تقلق
يوسف: لا مبيناتناش هاد لخصاايل مدام جلست وخديت راحتي الا عاجبني الحال، ياكما ديرونجيتك الآلة ملاك؟!
ملاك: لالا..
يوسف: مزيان اوا فين خليناها
ملاك: معقلتش
يوسف؛ خدامة فصفرو؟!
ملاك: اه
يوسف: كنتي قلتي غتمشي لمكناس كونجي؟!
ملاك: لا عندي غيينيون تماك شي سيمانة ومنها نجلس مع ختي
يوسف: اممم يعني ساهلة تهبطي لفاس
ملاك: علاش؟!
يوسف: باش نتلقااو
ملاك: ههه معرفتش على حساب
يوسف: الا مجيتيش انا نطلع عندك فين عندك لوطيل ولا غتجلسي مع ختك
ملاك: مزال معرفت بالظبط شنو ندير
يوسف: بون غناخد نمرتك باش حتى انا نعرف شنو درتي
ملاك: نمرة!!!!
يوسف: وصافي متدفعيش شبابك غالي علينا راها غير نمرة
ملاك: (خيبت كمارتها فيه بمعنى بنيتك!!)
يوسف: (تبسم) 06
ملاك: ههه (فتات نمرتها عليه صونا عليها فلبلاصة طلعت نمرتو وهي تشوف الساعة كانت 4) اويلي 4 دصباح
يوسف: (تأكد) اه
ملاك: (وقف) نمشي نعس ناري عنداك يكونو قلبو علية وملقاونيش
يوسف: كانو غيصونيو العالمة
ملاك: بسبابك تعطلت
يوسف: ههه نشوفك غدا؟!
ملاك: معرفتش شنو غيديرو لوخرين
يوسف: مهم انا صونيت عليك متنسايش قيدي نمرتي عندك واخا
ملاك: واخ.. (وقفت وهو يبتسم..)
.
يوسف: اووو (كيشوفها طولها وكيتبسم شافت فيه مخرجة عينها بمعنى ياك لباس) صافي، نوصلك لاشومبر
ملاك: (تبسمت) لا. تصبح على خير
يوسف: تصبحي على خير حتى انا غنمشي للدار
ملاك: جلس تبات
يوسف: دار باك لقديمة
ملاك: هه غير بغيت ندير صواب وصافي (شيرت بيدها) باي باي (ضارت وهي فرحانة خرجت عينها كتعوق فوجهها بالفرحة ) يا ربي من ديما كنت كنطلب الزيين ونصلي وندعي وخرجلي هاد الخير وييييلي وكان كنت كندير قيام الله استغفر الله وكان راه هبطلي سيدنا يوسف.. (مشات طلعت لشومبر منقزة دروج مفرنسة بدلت حوايجها وبقات كطل من شومبر حتى كيبان ليها خارج غير على رجليه قطع طريق وركب مع شي واحد تبسمت وهي كتشوف وكتشطح بقزيبتها رجعت الناموسية تلاحت فيها طايرة فسماااا…)
ملاك: (ناضت طلقت شعرها وتكات كتلعب بخصلات شعرها من لتحت وتبسم وعينيها كيبريو اول مرة واحد يهضر معاها بلباقة كان باين انسان واعي ومثقف ولباس عليه وزعر كتفكر باتسامتو ومني كيظحك ليها وسنيناتو ولباسو حتى طريقتو فالماكلة وكفاش كان كيشوف فيها وهي كتهضر واعجابو بطريقة تفكيرها هاد 2 سوايع للي جلست معاه حسات براسها فعالم اااخر هزت تيليفونها بالغلط دخلت للكاميرا حتى كيبانو ليها دوك شناتف طالعين ونيفها اكبر عضو فوجهها خيبت وجهها خرجت دغيا ورجعت دخلت les contrats قلبت على نمرتو وكتفكر بابتسامة إلحاحو باش يعاود يشوفها وباش حتى تقيد نمرتو حمقاااتها كتشطح بقزيبتها واخا ناعسة) يس يس يس
ناااري انا غير الا ظحكلي شي واحد كنتزعط بففف ولكن هادا راه يخليك مزعوووطة فيه واخا معرفت شنو يدير..
(مشات كتقلب فلواتساب تفكرت الشفار منين ظحك على تيليفونها وهدا مقال حتى كلمة خايبة)
لمݣرد بوه للي فيه لفهامات شو سيااادو الشفار بن الشفار لاااخر
(قلبت تصويرتو كان دايرها بقات كتزومي كان ظاحك لابس لبلدي استنتاجات كان فشي عرس ولا شي مناسبة تبسمت لا اراديا ياله خرجت من التصويرة وهو يصيفط ليها)
Coucou
(خرجت عينيها ولقاتو كيكتب)
باينة كنتي تتبرݣݣي فتصويرتي
ملاك: هههه (ظحكت ودارت يدها على فمها)
يوسف: شديتك قيطي
ملاك: ههه تيقتي راسك كنت غير دايزة
يوسف: اممم لواتس عندك مارشي
ملاك: تصبح على خير
يوسف: غدا نصوني عليك
ملاك: اوك
(خلاتو كيكتب وخرجت من لكونكسيون عاضة على شنافتها)
بففف تحصلت… هه عادي عادي الا متشديت الي م نتشد غدا
(ناضت مشات لطواليط عاد بقات كتبرݣݣ فالشومبر للي كانت خطيرة جهة كطل على الشارع وبالظبط كتشوف فالبرج وجهة اخرى كطل على لابسين دارت شهيق عمييييييييق حتى حست بريتها دخلها لهوا عاد زفرت متبسمة كانت غير بديباردور واخا بارد الحال شوية.. سدت السرجم، ولكن شكون كيحس بشي برد دخلت الحمام شافت راسها فلمرايا كتقاد شعرها دايرة الفرقة وكتخبع الݣصة من مور ودنيها، وتبسمت كتعاود شي هضرة قالتها وكتشوف كفاش كانت كتبان مرة ظحك على راسها مرة تفكرو وتفرفر رجعت لبلاصتها شعلت التلفازة دارت MBC2 قطعت الصوت طفات الضو وبقات غير كتشوف 1 2 3 وهي تنعس…)
~~~~~~~~~~
اصبحنا واصبح الملك لله
ملاك: غير فاقت هزت تيليفونها هو اللول كانت 9 صباح تعجبت كفاش فاقت بكري واخا مخداماااش وكان ممكن ترتاح وعاد ناعسة حتى ل5 بقات فبلاصتها كتقلب على شي طوف زوينة تحطها فلبروفيل بقات كتشوف مطولا مترددة تحط وحدة واقفة ولا جالسة.. فالاخير خرجت خلات نفس لفوطو للي كانت من ݣوݣل تصويرة ديال وحدة عاطية بظهر جالسة على كرسي كتشوف فلبحر بالبيض ولكحل طفات الكونكسيون ودخلت كتعاود تقرا الكونڤيرساسيون القصيرة للي دازت بينها وبين يوسف وكتفرنس بوحدها.. معرفتش واش تصيفطلو ولا لا ولكن فكرت انها احسن هو يسول.. عاود شعلت الكونكسيون كتمنظر فلفايس حتى صونات ختها..
وي…
نعيمة: فايقة؟!!
ملاك: من قبيلة عاد فقتو نتوما
نعيمة: حميد فاق بكري ودابا جا فيقني قالي نهبطو نفطروو لتحت
ملاك: صافي انا لبس دابا.. (ناضت ياله بغات تجمع فراشها وهي تلوحو على الارض بغات تجرب حياة الترف شوية ومتجمعش اول مرة فراشها لبست شنو كانت لابسة لبارح حيت جابت غير بيجامتها) عنداك غير يكون هنا يحسابلو معندي ملبس… (تفقست ملقات حتى عكر خرجت عند ختها دخلت مدرمة دارت ايكخون وعكر خفيييف رشت من عطرها وخرجو هبطو لتحت فين كاين بوفيه مفتوح ختارو شنو بغاو ومشاو حدا بيسين تحت إصرار ملاك للي بقات كدور عينها واش يبان ولا لا….)
نعيمة: (شافتها بحال كتقلب على شي حد) مالكي؟!!
ملاك: والو حقا امتى غنمشيو مكناس؟!
نعيمة: ياك نتي حتى الاثنين عاد خدامة؟!
ملاك: اه
حميد: غير نتغداو نمشيو الوالدة كتسنانا فلعشا
ملاك: منزيدوش زعما شي نهيير
حميد: علاش آنسة ملاك؟!
ملاك: غير نتسراو فاس وصافي عجبني الجو فيها
حميد: الجو للي فاس هو للي غتلقاي فمكناس وحتى تماك غنخرجو نساري ختي فين بغات
ملاك: اممم بعدا نعيمة كتشكى مكتخرجهاش وكتبقى غير مع صحابك..
نعيمة: (مسختها وفرشتها بقات غير كترمش)
حميد: هههه ختك مكتسترش لا لا هاد المرة نخرج لكبيدة
ملاك: اوا هكاك تهلا فيها النفسية ديال الحامل ماشي هي العادية
حميد: بدات الفيلسوفة (كملت فطورها حتى صونا تيليفونها وطلع باسم you بقات كضور عينها متقدرش تجاوب حدا راجل ختها قجاتو ودارتو تحت الطابلة باغا تجاوب ولكن.. حتى قطع) تفو
نعيمة: مالكي؟!
ملاك: مبقاش عندي مع الكاشير وكليت منو معجبنيش.. (ختها رجعت كتجمع مع راجلها وهي عقلها طااير معرفت كيف دير تسلت غيبقاو عليها فين غادية) نمشي لطواليط
نعيمة: حتى انا نمشي معاك
ملاك: زيدي سبحان الله طواليط كتبانلك غير معايا.. (مشاو دخلت جلست فوق لاشاص صونات عليه ومجاوبش)
ياكما تقلق يا ربي ميكونش من داك النوع!!! تفو هاد الماركة دغيا كطير..
(ياله بغات تخرج رجع صونا عليها كتهضر بشوية)
الوو..
يوسف: صباح الخير
ملاك: صباح الخير
يوسف: قلت غتصبحي ناعسة
ملاك: هه وعلاش صونيتي علية ولا زكارة باغي ضيعلي نعاسي
يوسف: ههه شي يصبح خدام شي يصبح ناعس حتى لهنا ممتافقش
ملاك: ههه
يوسف: صاڨا ملوكة
ملاك: (مفرنسة) الحمد لله ونت؟!
يوسف: الحمدلله (جاو شي ناس كيهضرو معاه وهو كيهضر بلونݣلي وكانت مسرحة عندو) واخا شويش ونهضر معاك املاك
ملاك: اوكي (قطعت وهي كتفرنس)
احح على شويش
(حتى سمعت الدقان من عوايدها مكتعاودش لخوتاتها خرجت لقات ختها كتميق ليها)
غير واحد كنعرفوو ازمر
نعيمة: ومالي انا شنو قلت هه
ملاك: مكاين والو غير معرفة وصافي
نعيمة: اممم معريييييفااااا
ملاك: وصافي انعييمة متمرضيناااش ياله خلينا راجلك بووحدو دابا صور ليك بيه شي وحدة واخا وجهو متشوف فيه حتى وحدة موحمة
نعيمة: بااز (ضربتها لظهرها) بزااف عليك الكلبة، من ديما كتخبي علينا حقا فلويكاند غتجي خديجة ومريم
ملاك: بالصح مزيااانة والله توحشتهم مكرهتش حتى لبقرة ديال فاتي تجي طالعة فعماين مدخلت المغرب.. ماشي بحالك نتي كل شوي هانتي مقلزة عندنا طيحتي بقيمة اوروبا
نعيمة: ههه لبيي داوروبا ازين ماشي هو ديال كندا…
خرجو من الاوطيل قبل 12 باش ميتحسبش عليهم نهار اخر نيشان هبطو لرصيف بقاو ضايرين نعيمة شرات شي حاجة لحماتها ومنساتهاش بالخليع ريجيم والحلوة الفيلالية حيت عزاز عندها، اما ليها دارت حتى ترجع مرة اخرى وتاخد معاها مشاو لشي رياض تغداو ضربو تصيورات ملاك حطات فسطاتي فيديو قصير على لماكلة مبينة فيه الرياض وجزء من رصيف حيت طلعو لفوق كياكلو فأجواء فاسية 100٪..
فلبلاصة منين شاف سطوري صونا عليها يوسف ناضت من حداهم مبعدة جاوبت
ملاك: وييي (كتلحنها)
يوسف: اشمن رياض فين راكي
ملاك: هه مقريتش سمية علاش؟!
يوسف: انا وشي ناس جايين لتماك
ملاك: ناس؟!!
يوسف: كروب دالخدمة بغاو يجيو لتماك (عجبها الحال منين برر ليها) راكي عارفة اي واحد براني تيجي لفاس تيبغي يشوف هادشي ديالنا
ملاك: اممم
يوسف: تغديتي ولا مزال؟!
ملاك: لا كليت
يوسف: بالصحة.. نشوفك؟!
ملاك: انا مع راجل ختي ماااا…
يوسف: اه قلتيلي تتحشمي منو لبارح صافي ماشي مشكل امتى غتمشي لمكناس؟!
ملاك: دابا شوية
يوسف: انا نطلع عندك ياك معندكش مشكل؟!
ملاك: اممم (جاوبت زعما ممسوقاش) اهاااه..
يوسف: صافي مهم نكمل مع الناس ونهضر معاك (قطع شير لدراري باش يجيو كانو تجار من دبي 2 مغاربة مصري وخليجي بغاو ياخدو السلعة وكان التعامل مع عائلة يوسف… مشاو لرصيف كما موالف مع الناس لبرانية كيوريهم المآثر التاريخية ديال مدينة فاس العرييقة رصيف كان عاالم ثاااني من للي شافوه فوسط المدينة غير كتوصل لرصيف كظربك ريحة الجلد مخلطة مع خليع شباكية تريد… واكيد الحلويات الفاسية للي معروفة بحلوى مولاي ادريس للي كتكون منوعة بين النوݣا ڤاني شكلاط بيسطاج فريز زنجلان لوز كاجو… واكيد كرم البياعة للي كدوز من حداهم كول واحد فين كيمد ليك تذوق حتى تخرج من داك السيكتور شبعان سوا عندك ولا معندكش فلووس وهادشي مخافيش على ناس فاس اهل العزة والكرم وحسن الضيافة..
وبلا منساو حلاوة لسان للي معروفة عليهم بامتياز على الصعيد المغربي.. موصلو للرياض حتى الطاقم تقداو من خيراااات فاس..)
~~~~~~~~~~~~~
ملاك: منمشيوش نشوفو شي حويجات فالبرج؟!
نعيمة: حميد صالح؟!!
حسن: اه بغيتي تشري شي حاجة؟!
ملاك: اه.. (مشاو البرج بقات كدور ومدير شي فيديوهات زعما شولينغ تايم.. حتى لقات شنو بغات كانت اول مرة تاخد لبيسة كلاص فيست طويلة مع سروال ديالها سانبل فلماغو ولاكن جاي مع طايتها زوينة مع بودي بيض ساامبل خدات شال طويل فلماغون ولبيج وميني بوط طالون فلبيج)
نعيمة: خودي صوييك معاه
ملاك: (طالع ليها الدم كانت اللبسة غالية) حتى لسويقة كيكونو رخااس تماك اصلا غنحايد لبوط اويلي غير بوحدها 500 درهم مالوو كيمشي بوحدو ومزينينها قالك حقا برومو الله يمسخهم
نعيمة: ههه باااز صرفي على راسك شوية
ملاك: راه بغيت نشري طموبيل انعيمة وكنبعد على لكريدي يعني ميوصل شهر 12 حتى نشريها
نعيمة؛ ولكن احبيبة حتى المظهر راه مهم.. من نهار عقلت عليك نفس ستيل سبرديلة كابيتشو سروال دجين مشبهتي لينا فوالو وعاد قد هاك خاصك الطالو شوية ….
..شدو طريق لمكناس بالظبط لويسلان قبل ميدخل حميد للحي ديالو مشا تقدا مزيااان من لحم خضر فواكه حتى ريڤيطايمة دخلو للدار معرضة ليهم مو وفرحانة بحمل نعيمة للي كانت خايفة من مسألة شي واحد مكيودلش حيت مدة زواجهم كانت 6 سنوات وعاد كتب الله.. دخلت ملاك معاهم صم بكم عمي حدها كتبسم كتحشم بزااف منها زادت تجمعات العائلة وكانو غيدوزو العطلة مجموعين بقات جالسة مع ختها..
ملاك: نعيمة ختي اما غنمشي لوطيل حسن
نعيمة: علاش؟!!
ملاك: اختي الدنيا عامرة والله كرهت ديك النعسة فالصالون عاود وراكي شفتي كولشي جا ميمكنش يخرجو شي حد من بيتو على حسابي صافي نمشي لوطيل وغنبقى نجي عندك كل نهار غير نعاس للي يديني ليه
نعيمة: لا .. بابا مغيبغيش
ملاك: وشكون غيقولهالو شفتيه غير كل نهار كيصوني ابيل فيديو صافي راه غير نعاس للي فلوطيل عفاك والله شحال وانا كنتسنى هاد الفرصة وهنا كنحشم مغناخدش راحتي غنكدها عليك وغنمرضك حتى تكرهي علاش جبتيني معاك
نعيمة: عارفة راسك
ملاك: (خرجت عينها) اه
نعيمة: (بقات ساكتة مدة) صافي وااخ
ملاك: انا نشوف لوطيل للي عاطييني غالبا كيعطيو فندق ibis غعرفو حميد فين جاي
نعيمة: اممم ومتقوليش غتمشي هاد الليلة باتي هنا غدا عاد سيري
ملاك: واخا… (بقات غير صاقرة حاضية تيليفونها مولاش ݣاع صونا عليها حتى تنوات تحط لعشا تعشات الخدامة كتجمع خرجت الجردة مع ختها ولويساتها.. غير كتسمع حتى جا وقت الفرج وعطاوها تنعس وزهرها جا مع لبز عاود مبينت والو حدها ريݣلت الريڤي وحاولت تنعس واخا مكرهتش يوسف يصوني عليها ولكن باش تصوني هي لا..)
~~~~~~~~
اصبحنا واصبح الملك لله…
ملاك: (غير صونا تيليفونها فاقت اصلا كانت كانت ناعسة معذبة لبست حوايجها من سكات خرجت للحمام دهنت ايكخون ودارت عكر خفيف تحسبا الا جا على غفلة،
خرجت كانت شوية دالحركة بغات تسلت ولكن طاحت فعݣوزة ديال ختها للي حلفت ليها متخرج حتى تفطر وملاك معندهاش مع الفطور مور لفياق خاص حتى دوز ساعة او اكتر.. خرجت شدت تاكسي نيشان لمولاي يوسف فين نعت ليها حسن، ومن حسن حظها الاوطيل مكانش بعيد بزاف على الخدمة.. دخلت عرفت براسها ونيشان لقاعة الاجتماعات فين غدير اجتماع ديالهم..
دوزت صباحها جابو ليهم غدا للي عبارة عن صونويتش وكانيط للي كلا وللي مكلاش حتى يخرجو برا هي كلات صونات على مها هضرت معاها شوية كملو الاجتماع خرجت فضلت تمشا على رجليها شوية، كانت اول مرة تجي لمكناس مكمشة على صاكها دايرة احتيطاتها وفنفس الوقت مبهوورة فجمالية هاد لمدينة صونا تيليفونها جبداتو بالفرحة حسابها يوسف ساعة كانت ختها مجاوبتش بحجة مكتجاوبش فالزنقة بقات مكملة كتشوف لحوانت وصلت KFC تشهات داك دجاج زعمت ودخلت جلست شادة الموني كتقرا الاسعار ومشوكية من داك لغلا داك سطل دجاج كانت كتقول الا طار شانو غيكون ب50 درهم ساعة لقات باك فيه 3 دطروفة للي ب70 بقات كدور عينها جاها السرباي)
مزالة كنشوف اخويا..
(مع دار مع جمعت الوقفة خرجت)
هذا غير نهار اللول وشحال خسرت فيه حتى رجع ليه من بعد..
(وصلت لوطيل عرفت عندها حجز باسم المؤسسة على حسابهم ولكن ممعاه لا فطور لا غدا لا عشا.. عرفت من صاحبتها انهم مخصصين ليها ميزانية ديال 100 درهم فنهار حتى ترجع ويعطيوها ليها عجبها الحال طلعت الشومبرة كانت زوينة كطل على السونطر ديال مكناس ومع بقا كيظلام الحال كان الجو غزال صونا تيليفونها كانت ختها…)
وي نعيمة.. عاد خرجت من الخدمة وتمشيت كنت ناسية التيليفون صيلونص.. بالصح راكم لتحت مزيان بحرا نطلع باليزتي.. واخ انا هابطة…
داوها للدار معاهم تعشات تماك وباصرار منها وصلها راجل ختها لوطيل.. (هزت تيليفون ها قرباتو لوجهها) دلات شلاقمها مفهمتش نهار كامل ما صونا موالو
ملاك: حتى يانا دغيا كنولف تفوو..
(متقدرش هي تصوني شعلت التلفازة)
وكان غير شريت شوية ديال سقاطة ندوز بيها الوقت.. ولاد لحرام هاد رجاال الله يعطيهم الغراق من الطرف للطرف
(ريگلت الريڤي دارت تيليفونها يتشارجا وبقات متبعة فلم حتى نعست..
دازت يوماين مكاين لا حس منو لا والو وهي نفس الروتين صباح كتخدم كتغدا فالخدمة ولعشية كدوز ختها عندها اليوم دارت معاها باش تخليها بغات دوش وترتاح شوية صبح الجو مغيم احسن جو عندها ولكن مزال دافي لبست كابيتشو فالكحل طويل شوية مع سروال بوي فراند وڤانس فلكحل مع شال فالكحل وصاكادو وجهها دهنات ليه ايكخو وعكر خفيف خرجت لخدمتها بلا فطور كما موالفة كتحسب فدماغها مبقالها واالو وتشري لطموبيل خاص للي ييعرف الحديد باش متقولبش وعاد باها واعدها يعاونها وصلت للخدمة.. وصل وقت لغدا عرض عليهم واحد غيدوز فترقية مشاو لقصر الدجاج كل 3 فدجاجة بلعيبات دياولها روز شلاضة فريت صوص، كلاو نشطو رجعو الاجتماع ضربت 4 سالاو وتمو خارجين.. مع كانت ديجا دايرة ليزيات طلقت موسيقى وبقات كتمشى وكدندن مع راسها)
يوسف: (عيا يكلاكصوني عليها ويخرج راسو كيعيط) ملاااااااك ملاااك..
(والو هي مكيناش فهاد العالم شافها كتهضر بوحدها ومرة مرة تحرك راسها عرفها كتمزك.. قلب فين يحط الطومبيل والو الدنيا عاااامرة مكان غير يوقف دوزيام بوزيسيون هبط بالزربة وقف عليها حتى تساطحات معاه.. )
ملاك: ( مع غوبشت هزت راسها فيه تصدمت مخرجة عينها) يووسف؟!! (مزال الموسيقى خدامة وعلى جهدها)
يوسف: اجي ركبي معايا
ملاك: (بصوت عالي) شنووو قلتي!!!
يوسف: (تبسم حط يدو فوق ودنيها زعما باش تطفيها جبدت التيليفون من جيب السروال حبست الموسيقى وهي مصدوومة فرحانة ومفقوصة حيت لابسة هاكا ومديراش عكر حيت مشا مع لغدا شافت فيه كتعض على شنافتها باش يحمارو) اجي ركبي معايا
ملاك: فين؟!!
يوسف: الطومبيل منين خرجتي من الخدمة وانا تنساينك من تما وانا تابعك
ملاك: اااااه..
يوسف: واجي ركبي
ملاك: (مترددة) ضرووري ؟!!
يوسف: مغنااكلش غير على ملقى فين نحطها ونزلو
ملاك: انا نتسناك ولا نتبعك
يوسف: حشومة نخليك تسايني ولا تبعيني غير طللعي متخافيش
ملاك: انا نساينك هنا (شيرت بيدها حدا مول الزريعة)
يوسف: شوفي انا مزال ممغدي (كانو واقفين قراب حدا KFC ) مهم باش منبسلش عليك كتر مبغيتيش تركبي معايا دخلي تسنايني تماك انا نحطها فشي بلاصة ونجي عندك دغيا
ملاك: (فرحت من كلاويها ياله جات تهضر وهو)
يوسف: ياك عارضااني بعدا
ملاك: (بنصف ابتسامة) مرحبا (حنات راسها ودخلت كتندب اه باغية تشوفو ولكن تعرضو وهي حارمة رااسها) اووهو حتى لهنا منتاافقش احّييييي خلاتها ماما واش أنا للي نعرض
(شافت فلموني)
يا ربي ميبقالهمش دجاج.. بففففف
جا عندها جلس مقابل معاها ولباغفااان ديالو عاطية. برݣݣت كتشوفو لابس كلاص ومقاد الحالة بحال قرا افكارها وهو يظحك
يوسف: موظفة اخر زمن دابا نتي غتقضي مصالح الناس انا نجي المكتب هاكا لقاك نحسبك غير تتسناي باباك ولا ماماك
ملاك: (لعبت بحواجبها) هاديك غير نعمة انني كنبان صغر من عمري
يوسف: ههه (طل براسو معوجو) عجبني ستيل ديالك
ملاك: (فرنست)
يوسف: عرفتي جيت طااير عندك باش منفلتش وقيتة دخروج الموظفين
ملاك: (بلا متحس) علاش تلفات ليك نمرتي؟!!
يوسف: لا عندي.. غير بغيت نديرها ليك مفاجئة
ملاك؛ اممم
يوسف: بحالا معجبكش الحال
ملاك: لا بلعكس زوينة.. مزيان
يوسف: 3 ايام مهضرناش
ملاك: اه بالصح واقلة كنتي مشغوول اجي ياكما مزوج ههه
يوسف: باش عرفتيها
ملاك: (جمعت الظحكة) حلف بالله
يوسف: مكنتش بغ (شافها وقفت) فين غادية؟!!
ملاك: معندي مندير برجال مزوجين
يوسف: ههه زربة خااايبة هادي جلسي (كتشوف فيه شااكة) هه جلسي أملاك
ملاك: (جلست ولكن مترددة) واش بالصح انا مكيعجبنيش الحال نكون فهاد الموقف واخا غير صدااقة معندي مندير بهاد تخربيق
يوسف: وحتى انا ضد داكشي كوني هانية ماشي أنا للي نتزوج ونخرج نتزلل باغدون على هاد المصطلح ولكن كوني هانية
ملاك: (عاد رتاحت ولكن متصرطاتش ليها يغبر هاد المدة كاملة) اممم مزيان
يوسف: ضارني الجووع من لفطور وصلت مع لكليان المطار شديت طريق لعندك
ملاك: شنو خدام؟!! زعما ماشي تطفل غير بغيت ن…
يوسف: عادي سولي انا اصلا كنت غنعاود ليك.. الالة انا خدام فالصناعة التقليدية مع الواليد داكشي ديال الاواني الزليج…
ملاك: (باينة فيه كتر ولكن ماشي مشكل زلايجي المهم هو تحسين النسل وباينة لباس عليه هدا هو المهم وعاد زعر) مزيان فين عندكم المحل
(وقف عليهم السرباي شافتو كيشوف فيها وفنفسها هدا مصر ودايرها بالصح ويلي للي جمعتو فسيمانة غيفرتكو لية هدا فساعة) حم انا غير موخيطوو عفاك
يوسف: لا انا الجوع للي فية ديال بالصح (دموندا اغلى طبق ومعاه شي مقبلات هي عينها غير فلموني كتجمع الثمن شحال جا حست بالسخفة والبكية محست حتى نطقتها منين مشا السرباي)
ملاك: شفتك بحال داخلني على طمع!!
يوسف: (تفرشخ بالظحك وهي كتبسم متحسرة كتبغي ظحك ولكن مطلعاتش ليها مابغاتش تخرج ليها حتى غير كنظحك، جاه تيليفون بقا حداها كان كيهضر بالفرونسي بطلااقة فهمت كلامو ولكن متقدرش تهضر بحالو راه كان ݣاوري الي كيهضر مع شي مغريبي.. شاف فيها)
فين خلينا هههه طامع فيك هههه
ملاك: (بغات تنقذ الموضوع وبدات الهضرة تفهم من داكشي للي سمعاتو كيقول) كتبيعو السلعة لبرا
يوسف: اه حنا عندنا ديبو فيه صنايعية وحرايفية هوما كيخدمو كنبيعو لهنا فالمغرب كامل وكنصدرو حتى لبرا ولكن اغلب المبيعات كتكون بلݣرووو بكميات كباار
ملاك؛ (يعني لباااااااسوووون عليه) اممم مزيان
يوسف: اوا وانا تنخدم باش ناخد طرف الخبز معاهم كما قلت ليك مع الواليد ولكن فالاصل الشركة ديال 3 من العائلة كولها والنسبة ديالو
ملاك: يعني كتاخدها قد ذراعك
يوسف: exactement ماشي حيت الواليد ميسور غنتااكل عليه حتى انا قرييت وكنخدم معاهم وكناخد للي كنستاحق وفنفس الوقت عندي بوسط فالصناعة التقليدية
ملاك: (تبسمت عجباتها عقليتو) زوين تفكييرك
يوسف: صراحة مكنتش هاكا ولكن مع الوقت بنادم تيكبر تيستافد تينضج تيعرف انه خاصو يعول على راسو
ملاك: (حركت رأسها باه) بالصح الواحد زوينة يبدا من الزيرو كيحس بقيمة الفلوس (تحط شنو طلبو) ومكيضيعهمش غير هكاك فالخااااوياات
يوسف: بالصح.. (بقا كياكل) كولي
ملاك: (مخلصة مخلصة اللهم تاكل ولكن بغات تبقى كيوت) مفيااش
يوسف: (جبد فخض ومدو ليها) هاد المرة نشركو طعام
ملاك: ههه بحال جدة كل مرة تقولي نشركو طعام باغي دير شي فضيحة وتشركني معاك ولا شنو؟!
يوسف: فحال داكشي كولي بالصحة
ملاك: (شدات من عندو كتاكل بشوية ومرة مرة تهز فريت محست غير ندامجات هو كيعاود على خدمتو وهي كتصنت كيعجبها تسمع الناس وتستافد كتر.. كملات) الحمد لله
يوسف: الحمد لله.. (ناض غسل يدوو رجع جلس) دابا نمشيو نديرو قهيوة ياك مسالية؟!!
ملاك: اممم صراحة كنت بغيت نمشي نتقدا ولكن ماشي مشكل صافيى حتى لغدا
يوسف: لا مزيان نمشي فينما بغيتي
ملاك: (تبسمت) انا نغسل يدي ونرجع (غسلت يدها رجعت لقاتو خلص السرباي بكارت ديالو) لالا انا لي عارضااك… تأ حشووومة يوووسف من اللول تااافقنا أنا للي عارضاااك (كتعاودها)
يوسف: (شاف فيها الشوفة ديال بنيتك) اصلا أنا للي كليت كولشي
ملاك: (رمشت بالزربة وهي كتشوف لعظام للي قبالتها يمكن كلات كتر منو بدوك لعظاام) حم لا حشومة قلت أنا للي نعرضك صافي عفاااك متعاودهاش مرة أخرى قولي شحال نعطيك بعدا لبار ديالي
يوسف: هههه نعلي الشيطان
ملاك: لا واالو
يوسف: بحال درتيها الآلة.. ياله مشينا!!! (مكرهتش تزغرت بالفرحة خرجو ومزال كيشد فيها على الصكادو واللبسة دخلو لبيم هي كتجمع على حساب استطاعتها حتى شافتو حتى هو كيتقدا واكيد تقدية ديالو ماشي هي ديالها خدات داكشي مكتبغيش تعيق وتفشر خدات للي بغات، خلصااتو خلص حتى هو وخرجو)
دابا ركبو فالطموبيل والله معندي الرجلين للي يتمشى
ملاك: ههه شارف
يوسف: لا والو معنديش مع لماارش بزااف
ملاك: (بتردد ومبيناها ركبت معاه مشاو لوطيل تم داخل معاها حتى شافتو بساشيات ديالو مشا ريزيرڤا شومبر هنا دخلوها تناوي) باينة لعشا غنصرفو ****….
ملاك: حم (رجع عندها منين خلص الشومبر) اممم يوسف انا غنعطلع نعس شكرا بزااف على المجية ديالك تصبح على خير بسلامة
يوسف: وايلي غتنعسي دابا؟!!
ملاك: (خرجت عينها) اه
يوسف: قلت نسهرو شوية نهضرو
ملاك: راك عارف الخدمة و..
يوسف: منشدكش بزااف طلعي رتاحي واحد الساعة ومن بعد نتلقاو لتحت نهضرو الا بغيتي نمشيو لشي كافي ولا نبقاو هنا ومن بعد طلعي نعسي حتى انا عييت شوية اليوم
ملاك: (مشا بالها بعيد) واخا ولكن منتعطلش بزااف
يوسف: واااا شحال دافعة علينا كبير
ملاك: ههه #دفع_كبييييير_تعيش_كبير
يوسف: (تبسم) عندك الصح.. انا شي ساعة ونصوني عليك (مد ليها الصاشي للي عامرة) هادو دوزي بيهم وقتك
ملاك: لا لا انا شريت ديالي، هادو دياولك
يوسف: وصافي شدي
ملاك: لا منشدش انا شريت للي بغيت ماشي معناها مشيتي معايا انك تشريلي
يوسف: وصافي
ملاك: لا مكيعجبنيش هادشي ايوسف علاش غتشريلي وانا عندي
يوسف: ملاك انا هادو شريتهم ليك عفاك شدييييهم متخليش دوك الحواجز بيناتنا راه عادي
ملاك: ماااا مجيااش والله مااجيا، انا شريت للي بغيت تأ مرة أخرى منعاودش نقولك ياله معايا
يوسف: سيف عليك نمشي شدي هادو وكوني تتسمعي لكلام
ملاك: هه وباااز (شداتهم) واا شوكراااان واااخر مرة حيت هادشي مكيعجبنيش كنعاودهالك
يوسف: هه بالصحة
ملاك: (مشات لاسانسور متبسمة ليه غير تسد لباب نقزت بالفرحة شافت فشنو شرات هي وشنو شرا هو)
من اللول ابنادم متخلينيش نضيع فلووسي ولكن هانية هانية يااااي هههه باينة طااايح فية ااااااح على شهيييبة غنولد الزييين
(وصلت لاشومبغ تكات بالفرحة جبدت كتاكل بيمو وكتفكر فيه وتفرنس صونات ختها خافت تقولها يجيو يديوها جاوبت كان ابيل فيديو حتى كتصدم بخوتاتها مريم وخديجة معاها)
مسخوطات مكتعلمووووش
نعيمة: ههه غيدخل حميد ويجي يجيبك ولا شدي شي تاكسي واجي داااابا
مريم: تجي بوحدها فهاد الليل؟! ويلي لااا
نعيمة: راه الدنيا مزال عامرة ماشي بحال أزرو دغيا كتخوى
خديجة: حنا عنا فمارتيل الدونيا زااهية تبقى حتى ل
مريم: أݣݣݣݣ (كتعيبها مخرجة سنادرها) قادي غير هضرتك ازمر
خديجة: هضرتي معوطة شعندك نتينا تعوج فدوقمك هايداااا
مريم: واش مريضة ميات مرة كنقوولك متهضريش قدامي هاكا نتي بنت صفروو آش جاب الشمالية لجد باباك
خديجة: راجلي الحبيبة دقلبي
مريم: ايخان لواه هو جات معاه يهضر بيها ونتي لاش؟!
خديجة: راه غير كنبغي نشد فيك مكتقبليش ظحكي امريم ݣااع
مريم: كنتقبل ولكن مكيعجبنيش نشوفك كتهضري بشي لكنة ماشي ديالك نتي بنت الاطلس وراجلك هو للي شمالي
ملاك: (غير كتشوف ووكتحلف فخاطرها متمشيش اه كتحماق على خوتاتها توحشاتهم ولكن يوسف!! راه حتى هي بغات راااجل)
نعيمة: مالكي امريم معجبتينيش وحتى ولادك مجبتيهمش معاك هاد المرة وكفاش بعدا طلبك راجلك وخلاك تجي
مريم: كيقراو شنو نجيبهم يديرو هنا
نعيمة: قولي مالك مخاصمة مع راجلك
مريم: شي نقاش وصافي وبغيت نرتاح شوية
نعيمة: مهم ملاك انا نصيفط ليك حميد
ملاك: راني مريضة حتى لغدا ونجي بكري
مريم: باش مريضة؟!
ملاك: اختي يمكن لبرد فية سخانة لباردة وبغيت غير نتكمش ياله شربت دوا وبغيت نرتاح خفت نخرج ويضربني البرد كتر
مريم: دابا نجي عندك
ملاك: (خرجت عينها) لا لا غير خليك انا مزيانة الا كانت شي حاجة نصوني عليك
مريم: لا منخليوكش بوحدك غير يجي راجل ختك نجيو عندك نشوفوك
ملاك؛ الله يهديك اختي والله فية نعاس انا غير نتكى شوية الا شفت راسي بقيت هاكا انا نصوني عليكم يجي حميد ولا وتجيو نتوما
نعيمة: صافي واخا نعسي شوية ورجعي صوني علينا….
ملاك: مكتبغيش تكذب عليهم وفنفس الوقت حست بختها مريم عندها شي مشكل حيت مموالفاش تسافر حتى لعند نعيمة لمكناس أغلبية كيتلقاو فصفرو ولا لوخرا كتمشي عندها لأزرو وعاد بلا راجلها ولادها.. راس كيقولها شدي تاكسي وسيري عندهم وراس كيقولها السيد ضارب طريق جاي على حسابك تمشي وتݣردعيييه.. زفرت كتفكر ناضت لطواليط توضأت صلات لبست كيطمة واسعة ولوات شال عليها بقات كتنقب من سقاطة لي مشتتة فوق النموسية كتسنى الاتصال ديالو..
~~~~~~~~~
نعيمة: ياله نمشيو لبيتي
مريم: حشومة شنو يقولو نااسك تعزلنا عليهم وبقينا نهضرو عليهم
خديجة: لا لا ههادو راهم مثقفين نهار انا طرتوعلى زواج نعيمة جلست تختار مزيان… انا ونتي غير جينا وطحنا ههه
مريم: (بتنهيدة) مكاااتيب ولا وكان راحنا بقينا بحال شي بواط دالسردين فداك الدار شي على شي ههه
نعيمة: حتى ملاك غير كتشكى
مريم: لبنت كبرت عندها الحق بغات غير بيت مطالبة والو عيات فبابا يبني ليها فسطح وهو ميبس راسو لا حقا سطح للجميع
خديجة: وكان قبلت بداك حمزة
مريم: علم الله اشمن سبة مقالت لا غير الا دار معاها شي حاجة خايبة اما كانو كيتبغااو وجات مواتيين.. بعدا هي هضرت وانا بغيتها تهضر ماشي تعيش عيشتي
نعيمة: الله يهديك اختي مريم ياك عايشة بيخير
مريم: صعيييبة انعيمة تزوجي واحد مقاري مواعي كتكوتي كتهضري معاه كتجيه بحال شي كائن غريب عايشة فالجحيم معاه والله
خديجة: هادشي مقلتوش حتى أنا للي مدوزينها علية لعدوزة ولويسات وحتى الراجل للي ولينا انا وياه بحال الخوت تماك
نعيمة: نهار االلول قلت ليك متسكنيش فدار لعݣووز وكنتيىغير طايرة ودايرة فيها فاتن حمامة حتى قرايتك مكملتيهاش بحالنا وزايداها بعيشة الويل تماك
خديجة: اوااااا الراجل على قد الحال
نعيمة: وكان غير هو فهاد الدنيا؟!
خديجة: وصافي اختي نعيمة كنا كنتحابوو راه واخا هكاك مسكتاش على حقي
نعيمة: لبعر لوااه، اواا ونتي امريم مالك؟!!
مريم: معرفتش ملقيت قدامي غير هزيت جلابتي وجيت هنا علمت هاد البقرة لقيتها على القرص حتى هي
خديجة: هههه اختي الحلاوة هي نتجمع معاكم اش بغيت بداك زبل للي طليتو
نعيمة: ههه ضاربة الدنيا بزقلة
مريم: درتي داكشي للي قلت ليك بعدا؟!
خديجة: مزال بلحق غير رجع نديرها شحال قلتي من نهار
مريم: ديريها سيمانة
نعيمة: صبري حتى نولد انا عاد حملي باش يصلاح نجي نحضر ليك
خديجة: شتي لولاد غير كيتسناو راه 10 سنين ابنتي
مريم: علاش راجلك مبغاش يدير التحاليل
خديجة: قالك مكاين والو وهو ممزروبش
مريم: هو ممزروبش نتي مزروبة لعمر كيفوت راه كدا وتلاتين عندك باغيك حتى توصلي 40 عاد يفكر
خديجة: اوا اش ندير
مريم: انا شاكة منو
خديجة: (تبسمت بمرار) وانا متأكدة غير معديين وصاافي
مريم: (حركت راسها كتنهد) انا بعدا حرافتلي مع داك الراجل
نعيمة: وغير قولي مالكي
مريم: مااا عرفتش اختي كنبغي معامن نهضر ندي ونجيب هو حدو يهضر معاك شنو خاص للدار صافي لولاد حتى هوما طالعين ليه كنقنط حتى صحابات مكيفرحووش همهم غير راجلهم انا كنبغي نعيش الحياة وهوما غير كيدفنوني تماك…
ملاك: (تكرهت فراسها بغات تمشي وبغات تبقى.. صونا تيليفونها غير شافت نمرتو تبسمت نسات خوتاتها وجاوبت كتعوج) وي يوسف
يوسف: رتاحيتي شوية واخا تنزلي عندي؟! ولا نطلع!!
ملاك: (تعصبت) فين غطلع؟!
يوسف: ههه وا نزلي انا نتسناك (قطع بقا كيتسناها حتى نزلت تبسم) نخرجو شوية!!
ملاك: نبقاو غير هنا كاينة جليسة زوينة حدا لابيسين
يوسف: وي شفتها مشينا.. (مشاو جلسو خدا هو قهوة وهي عصير بقاو مجمعين هضرة كتجبد هضرة واغلبية هو للي كيعاود تسناتو يهضر على صحباتو ولا الإكس والو… صونا تيليفونها والو مكتجاوبش)
جاوبي ماشي مشكل
ملاك: غير خوتاتي تجمعو هنا كانو بغاوني نجلس معاهم هاد الليلة
يوسف: وعلاش ممشيتيش
ملاك: ماا غير مجاتش درت معاك ونݣردعك
يوسف: ههه لا مجاتش تݣردعيني
ملاك: شتي ههه اصلا كنت عيانة قلتهم حتى لغدا
يوسف: شكرا حيت بقيتي (دار حركة بجوج صباعو) زادتني نغزة هادي
ملاك: هه (غير صونا راجل ختها) ناري حميد..
يوسف: شكون حميد
ملاك: (بلا متحس) سكت (تصدم بقا غير كيشوف)
الو.. اخويا حميد.. لا انا فلوطيل علاش جيت؟!!.. (وقفت مخلوعة) كاملين.. صافي انا جاية.. انا جاية (قطعت حيت قالها نطلعو عندك شافت فيوسف) جاو خوتاتي انا نمشي عندهم
يوسف: نمشي معاك!!
ملاك: يوسف انا بنت صفرو ماشي كاليفورنيا.. (شيرت بيدها) بسلامة
يوسف: انا نصوني عليك.. (زربت خرجت معصبة، تبسم لديك للزربة ديالها وبقا جالس مرجع راسو اللور ومغمض عينيه..)
~~~~~~~~~
ملاك: (بقات كطل شايفاهم مجمعين مشات لجهة لاسانسور عاد تمات ماشية جيهتهم خلعت ختها مريم تعانقات مع خوتاتها وظحكم واصل لكوولشي..)
حميد: اجيو نمشيو لكافي
(تبعوه وملاك متوترة حيت خافت تلقى يوسف تماك، وداكشي نيت للي كاين وزوينة جلسو حدااه هو تبسم وهي دارت راسها عمرها شافتو ولا عرفاتو زاد بقا كيظحك.. بقاو مجمعين وهي غير حشمانة)
مريم: كيف بقيتي الشينوية ديالنا مزال مبغيتي طوالي
ملاك: مريييييم! (بتعالي) عاجبني طووولي قولي كيف داير ابراهيم واسماعيل مجبتيهمش معاك؟!
مريم: لا قاريين.. كيف راكي مع الخدمة؟!!
ملاك: مزيان الحمد الله
خديجة: اويلي مالكي مزيزنة ماشي من عادتك
ملاك: (خرجت عينها فيها) غير مريضة وصافي
نعيمة: لعجب (شافتها مجالساش على خاطرها ومرة مرة كتلوح عينها مرة تبسم مرة بحال تحشم، شافت من جنابها كان واحد جالس واخد راحتو كيتبسم معاها شكت فالقضية بقاو مجمعين ونعيمة كتبرݣݣ فيه، حتى ناضو مشاو فحالهم ودعاتهم طلعت لبيتها عيا يرغبها تهبط مبغاتش بقا كيشد فيها على شنو سمع كملوها تيليفون حتى غلبها نعاس ونعست…)
فاقت فرحانة شافت فتيليفونها كان مصوني مرة وحدة حيت هي من الناس للي كدير صيلونص وهي ناعسة يوقع للي يوقع اهم حاجة نعاس.. رجعت صونات عليه
حم الووو…
يوسف: بغيت غير نعرف شكون وظفك نهار اللول 8 ونص آنسة ونتي خدااامة مع 9 امتى عوالة تمشي
ملاك: ههه (كتمسح وجهها) غنوض نصلي لبس ونهبط ماشي شي حاجة للي ممفهوماش
يوسف: نتوما لبنات دغيا كتخرجو؟!! بالنية!!!
ملاك: ههه عادي والله
يوسف: يهديك الله غير داك الوجه عندكم فيه نص نهار
ملاك: بانلي عرفتي غير هاد النوع اولا انا ماشية نخدم ماشي ماشية معروضة ههه ثانيا ممحتاجااااش ندير شي حاجة
يوسف: هه هانا على ممحتاجااااش مهم عندك 10 دقايق نشوفو هاد صلابة ديالك، كنتسناك فلفطور
ملاك: هه واخ.. (قطعت ناضت فرحانة دخلت الحمام خرجت موضية صلات صلاتها لبست اللبسة للي شرات ففاس قدات الشال من بعد مدارات ايكخون وعكر خفيف.. هزت صويك دارت فيه صوالحها وخرجت هبطت عندو كان طالب فطور جلست مقابلة معاه)
صباح الخير
يوسف: صباح النور لغزاالة (طلعها وهبطها) ستيل جديد؟!!
ملاك: صدقت معروضة هه
يوسف: اممم هي غير رجع فحالي
ملاك: غنبقى نهار كامل مع خوتاتي شفتي شنو دارو لبارح وغدا ان شاء الله غرجعو لصفرو ضرووري نبقى معاهم
يوسف: اممم مقلتيش هادشي لبارح فطري بعدا
ملاك: فخبارك انا معنديش مع لفطوور
يوسف: علاش الفطور اهم وجبة..
ملاك: حيت فاش كنفطر كيجيني نعاس ههه فهم تسطى
يوسف: اصلا كولشي عندك مقلووب (بقاو كياكلو ويهضرو) 9 و10 دقائق آنسة!!!
ملاك: معليش اصلا نهار التالي ساعة روطار ماشي مشكل
يوسف: (تعجب وكملو وصلها) نتسناك نتغداو
ملاك: بلاش ايوسف حيت اصلا 1 ونص غيجي راجل ختي يديني عندهم
يوسف؛ اممم.. واخا لالة انا نهبط لفاس التيليفون يبقى بيناتنا
ملاك: اوك.. شكرا على كولشي
يوسف: العفو واخا مدرت واالو ياله سيري باش متعطليش
ملاك: (تبسمت معاه عاجباها العلاقة، تمشي شوية بشوية واخا حاسة انها كتعرفو من شحال هادي.. دخلت للخدمة وهو مشا فحالو دوزت صباحها جا راجل ختها خداها لعندهم الدار حيت الجمعة وكولشي مجموع بقات مجمعة مع خوتاتها وكيشكرو فيها حيت اول مرة يشوفوها مبدلة ستيل.. دوزت نهار معاهم مرة مرة يوسف كيصوني عليها،
الغد ليه رجعو لصفرو وملاك تفكريها فيوسف كيفاش غتولي تشوفو على خاطرها بحال فمكناس مستحيل تخرج معاه فصفرو وفاس وقتها باين وصعيييييب تسلت..
وصلو للدار دخلو كانو موجدين كاسكروط مطرطق وباها ذبح حولي هادي عادة كيديروها لاي واحد جا من الابناء ودابا 3 دلبنات غبرو ورجعو.. جلسو مجمعين حتى دخل باهم فرحان ببناتو بقات كتشوف فيه ملاك.. هو أب بحال جميع الاباء كيخدم على ولادو باش يوفر ليهم شنو محتاجين الحب ديالو ليهم كيوصل عن طريق الفعل مكيخليهمش مخصوصين ولكن مكاينش الاحضان والكلام الحلو داكشي شافتو مرة وحدة منين تزوجو خوتاتها عنقهم وبكا فبيتو هي مكتلوموش حيت كل واحد والطريقة باش كيعبر بيها على الحب ديالو هي كتلومو على حاجة وحدة على الضيق فين عايشين..
دخل جلس بيناتهم كل وحدة كيسولها على صحتها على راسها وراجلها وولادهم..)
خديجة؛ مزال مكتاب ابابا
الاب: كولشي مع تيسير الله ابنتي.. (شاف فملاك) تهنيتي منا هاد السيمانة
ملاك: ههه لااااا بابا ههه غير شوية
الاب: اوا مزيان الله يرضي عليكم نمشي رجع للقهوة ياله اولدي حميد معايا
حميد: ياله اعمي…
داز الويكاند كولو ظحك ونشاط مع خوتاتها لدرجة مريم نسات الهم للي هربات منو واخا راجلها صدعها فالتيليفون هو وولادها باش ترجع حيت مكيعرفو يديرو واالو من غيرها ولكن هي معاجبهاش الحال هاد النوع من الاشتياق ديال غير باش تقضي ليهم دوك الاشغال المنزلية لا هي محتاجة تسمع توحشتك امرتي توحشتك اماما محتاجين ليك تكوني معانا توحشنا الحضن ديالك توحشنا ظحكتك وهضرتك يقولو ليها انهم ميقدرووش يعيشو بلا بيها تسمع منهم كلام زوين ومشجع باش تعطي اكتر وبكل حب ماشي غير واااااجب عليها كأم او كزوجة… وهادشي للي مخليها معذبة نفسيا فحياتها معاهم معاهم…
خديجة: (كيناقشو معاها) ولكن مرتاحة ماديا امريم
مريم: شي مرات اخديجة هادشي كيكون حسن من لفلوس
خديجة: مكاينش ما حسن من لفلوس هانا مزوجة مزلوط وعايشة فالعذاب النفسي والمعنوي والجسدي ههه
مريم: كيجيبلك الله
خديجة: وااقلة اختي بغا يجيك سن اليأس
مريم: ههه الا جاني سن اليأس وانا كنتعامل هاكا غتلقاوني منتاحرة شي نهار
الام: الله يستر ابنتي شوفي ها باباك حتى انا مكي..
نعيمة: ماما بابا كان كيظل يسمعك فالشعر ويغني ليك وحتى فعرساتنا ديما هاز ليك بلا متكذبي
الام: اييه ولكن
مريم: مكاين بو ولكن بابا داير ليك اعتبار وقيمة قدام العائلة كاملين حتى حد مكيقد يتنهنه معاك وحتى هنا شوار شواارك
الام: بنات لكلاب مالكم دورتوني فالوسط قول اعووذ بالله
نعيمة: ههه حيت باغيا تواسينا بشي حاجة فيها لكذووب
الام: ونتي شنو ناقصك مع حميد
نعيمة: ولد موو بزاااف
الام: ومالو غيكون ولد مك نتي؟!
نعيمة: ماشي هكاك كيشاورها فصغيرة ولكبيرة بزااف كيبقى يعاود ليها كولشي بالمعنى الحرفي (خرجت عينها) كوووووولشي،
الام: اوا ونتي
خديجة: انا بييييس ههه لولاد معنديش كل نهار كنظل نبكي وهو ولا هنا مو انا وياها كيف ضراير مكتحتارمني مكنحتارمها اما الراجل غير بسمية يمكن انا كنكون راجل عليه شي مرات
الام: الله يسهل عليك ابنتي غير هو ديرو التحاليل ماشي عيب يكون منو ولا منك ومنها ترتاحو
خديجة: انا درت هو للي ممقتانعش يديرهم.. شوفي اماما كنقول الا لولاد مكتبهمش علية الله ماشي مشكل وحتى الا هو مكانش كيولد بلاش دوك التحاليل باش ميتأزمش واخا هكاك منكرش العشرة
نعيمة: الطب راه تقدم اختي علاش غتحرمي راسك وانا كنعقل عليك منين كنتي بزقوولة ونتي جامعة مونيكات ديالنا كاملين دايراهم ولادك
خديجة: وشنو ندير نبزز عليه شي مرات كنحمد الله حيت مولدتش معاه
نعيمة: وكان نتي وكان بزز عليك
خديجة: صافي خليونا من هاد الموضوع فين ملاك شتها غير كتغبر
نعيمة: بانلي كتهضر مع شي واحد
الام: شكون؟!
نعيمة: معرفتوش راكي عارفة مكتعطيكش شنو تحت راسها وفنفس الوقت مكنخافش عليها قادة براسها
الام: الله يسهل عليها مسيكينة ياله نوضو جلسو مع جماعة حشومة نخليوهم بوحدهم… ونتي اخديجة راجعي راسك ابنتي الا غير الماكلة وشراب راكي كنتي شابعااهم فدار باااك ونتي امريم راجلك من نهار كان هكاااك للي كبر على سي حاجة كيبقى فيها ونتي ونعيمة خليه يضبر راسو المهم هو معاك مزيان…
ملاك: (كانت فسطح حدا عش لحمام كتهضر بشوية وفنفس الوقت حاضية واش جاي شي واحد) غدا غنبدى الخدمة ان شاء الله
يوسف: مزيان وووكفاش غنتلقاو؟! ضرووري خاصنا نعاودو نتلققاو
ملاك: هه معرفتش هنا فصفرو مااا..
يوسف: ما شنو عادي واقلة
ملاك: انا عائلتي كولها هنا ومبغيتش شي واحد يحل فمو علية ولا على بابا وماما
يوسف: اممم وشنو ندير انا نضيع!!
ملاك: علاش غضييع شنو غينقصك الا مشفتينيش
يوسف: (بجدية) رتاحيت ليك املاك معرفت جيتيني بحال نقيطة دلعسل تحطت فوق قلبي كيعجبني نااقشك وهضرتك
ملاك: (فرنسات لدرجة مقدرتش تسد فمها غير كتعوجووو باش تحاول تسسدو)
يوسف: وعندك عقلك زوين عقلتي كفاش تعارفنا هضرنا بحال شي وحدين 10 سنين وهوما تيهضرو
ملاك: اااه هه حتى انا دغيا دخلت معاك فالهضرة واخا معروف علية مكنتجمعش بزااف مع الناس مكنعرفهمش
يوسف: وشنو نديرو دابا صفرو مبغيتيش نتلقاو فيها عندك حل هو تبقاي طلعي لفاس
ملاك: لاااا واش حمق بابا عارفني امتى كنخرج من الخدمة (هي ساهلة تخطف 2 سويعات لفاس ولكن بغات هو يرغب ويزاوݣ واكترية ديك اللكنة الفاسية الحلوة)
يوسف: ملاااااك راه ضروري نتشاوفو على الاقل جوج ولا 3 دلمرات سويييعة كاافية فشي كافي
ملاك: اممم والله معرفت
يوسف: صافي الالة متتعاود غير الصلاة على النبي انا نجيبك وردك
ملاك: اممم نفكر
يوسف: واخا لالة
ملاك: اوا.. (سمعت صوت باها وعمامها جاو) يوسف من بعد ونصوني عليك بابا كيعيط لية
يوسف: واخا منين دخلي لبيتك صوني علية
ملاك: (عوجت فمها) واخا (قطعت كتشوف وتنهد) قالك بيتي (شافت فلحمام) لحمام وعندو بيتو بقات كتشوف فسطح كبير الدار كبيرة كانت على شكل رياض ولكن ماشي شي حاجة كاينة وسط الدار مفتوح على شكل ضواية وكاينة كتغطى بالال الا كانت شتا.. كتعشق تفاصيل دارهم سطح كولو محبيقات وزراايع وعش دلحمام وفالقنت كاين جليسة ودايرين باش فوقها اما لتحت مع الدخلة ديال الدار كاينة جريدة صغيورة فيها 4 دالشجرات 2 شجر حامض و1 لوز و1 كرمة وعاد فالجنب زارعين لويزة قصبر معدنوس كرافس نعناع شيبة وعاد كاين باب الخشب غليض كبير كدخل كتلقى حمام فالجنب وصالون كبيير مفرش بالبهجة لقديمة وكتزيد كتلقى وسعة كبيرة للي مسقفة فيها سديدرات وكاين كراسة فالقنت كاين ڤيزان مزروع فيهم الورد ولا شجيرات صغار والوسط كاين نافورة صغيرة مافيهاش لما قليل فين كيديرو فيها لما وبين الكوزينة وبيت الجلاس كاينة سقاية تقليدية بالفسيفساء مع صنبور ذهبي وحداه كيسان نحاس فالذهبي تشهاي تبقاي غير تشربي منو
عاد كاين بيوتة ديال 3 الولاد باها. جوج عمامها وواحد ديال الجد ومرتو وبيت فيه لولاد فين كينعسو وفيه حتى التلفازة وصالون كبير وبيت صغير دايرينو للي كيجي ضيف وهو للي شحال وملاك كترغب تاخدو ولكن باها كيقول الا هي خدات حتى لوخرين غيبغيو وغتنوض الفتنة للي هو ولا كولشي في غنى عندها….
ملاك: (هبطت من سطح كانت مريم ختها كتهضر فالتيليفون مع راجلها كتأكد ليه انها مزال متجي باغية ترتاح.. شافت مرت عمها كتلبس فولدها للي كيقرا فالسادس سبرديتلو) مرت عمي مشفتيش بابا كان كيعيطلي؟!!
سهام: (مكرهة) خرج
ملاك؛ ووو خديجة؟!
سهام: كانت فالكوزينة مع عزيزة
ملاك: (دخلت الكوزينة لقاتها كتعاونها فطياب مرت عمها وكتنكت معاها) اممم دجاج محمر
عزيزة: وبلدي
خديجة: عرفتي شحال توحشتو فالشمال مكيطيبوهش هاكا بحالنا
عزيزة: كل بلاصة وطيابها حنا فوادزم ومعندناش هاد طياب حتى جيت لصفرو عاد عرفت دجاج بلدي كيدار فيه التحميرة ولكن بنييين
خديجة: بزااااف
عزيزة: ماماك غديرلك لعرݣ بلحمام (حمام كيكون معمر بلمساخن ولعشوب بالنسبة للي كتبغي تحمل)
خديجة: (بتنهيدة) بلا متصدع راسها للي دارو الله هو للي يكون
ملاك: (كتشوف فختها للي تزوجت على عمر 23 عام دازت 10 سنين كل مرة كتشوفها ولا تهضر معاها على فكرة زواج هوما متقاربين بزااف ونهار خديجة كتبغي تفرغ شنو عندها كتلتاجئ لملاك هي حااامقة تكون ام، تزوجت راجلها عن حب شحال بكا ورغب باش يتزوجها وحتى هي كانت غتحماق وتزوجو رغم انه كان كيجيها عروض زواج حسن واهم كانت غتخدم ولكن هو خيرها وختارتو اكيد تغربت للشمال وبقات كتجي تلاتة دمرات فالعام ولكن ديما على كونطاكط معاهم… خرجو من الكوزينة بقاو مجمعين)
خديجة: معامن كنتي كتهضري دابا اديك شنيولة
ملاك: ههه حتى واحد
خديجة: زعما زعما!!!
ملاك: كنهضر عادي مكاين واالو لحد الان
خديجة: اممم اوا منوياش ديرينا شي عرس القنطة اصاحبتي من نهار تزوجت كوليت تصادفت مع شي عرس هنا من غير نعيمة ختي
ملاك: ههه الا لقيتيلي شي عريس نديرو
خديجة: جيبيه راسك مرة أخرى متلومينيش انا
ملاك: مدارش راجلك التحاليل
خديجة: (تقلبو ملامحها لجدية) ملاك بلا منهضرو فهادشي عفاك والله قلبي طاب منين جيت ونفس السؤال كيتعااود
ملاك: وعلاش مجاش هو معاك من ديما كيجي معاك
خديجة: براسي مفهمتش كفاش خلاني نجي بوحدي متناقش معايا موالو عاد عطاني 500 درهم هاد المرة
ملاك: 500 درهم جاتك شي حاجة
خديجة: نسيتي ياك كان كيعطيني غير فلوس المركوب ونتوما للي كتهلاو فية
ملاك: بناااقص حسن جيتي بوحدك مكنحملوش
خديجة: والله الا حسن هاكا وأصلا كنت جاية هو قالي سيري ترتاحي كنت دابزت مع ديك لمسمومة دختو وهي هاديك جا التيليفون ديال ختك وتميت جاية فرحت والله كنت مغمومة
ملاك: يخخ كولك طاقة سلبية
خديجة: هههه والحيوانة داكشي للي كتقوليه بينك وبين نفسك متسمعيهش لبنادم
ملاك: هه معرفت منقولك اختي باينة فيك ممرتاحاش، طلبي
خديجة: عاود ههه
ملاك: وبغبتك ترتاحي شوية
خديجة: لا لا والله محدي معاكم مرتاحة وحتى نتي ربي للي مكتبها هي للي تكون الواحد علاش يمرض راسو وصحتو على شي حاجة ممكتاباش ليه
ملاك؛ عندك الصح
خديجة: شفت ديك سيهام غير هازة زنافرها باقية ولدي ما ولدي
ملاك: ههه ولات كتعيطلو مول الدار واخا مرت عمي عزيزة حتى هي عندها حمزة ومحمد غتخلي القنط علينا منين تمشي
خديجة: عقلية دلخ** زعما هوما حيت ذكورا يورثو
ملاك: ماما ݣاع مكتسوقلها اصلا كولشي كيدوز بشوارها هنا فالدار وكتزيد تفݣس
خديجة: حيت بابا داير ليها القيمة حتى انا تماك كيبغيو يدوزولي من قضية لولاد ولكن بعدا كيوقف ليهم وحتى انا مسكتاش
ملاك: هههه اصلا الا بغيتي شي هجووم تعييطة وحدة نكونو عندك
خديجة: ههه لا لا قادا بشغاالي…
ملاك: (بقات كتشوف فيها) يا ختي تبهدلتي وضعافيتي بزااف
خديجة: ههه لا حولة ولاقوة الا بالله العلي العظيم نوضي بعدي مني…
اصبحنا واصبح الملك لله…
ملاك: (فاقت مدݣدݣة مقدرتش تنوض حيت سهرت لبارح بزاااف كانو خوتاتها ناعسين كل وحدة شادة سدااااري ولبزازو نعسوهم فالصالون بقات شي دقيقة كتستوعب شكون هي عاد صحصحت جمعت شعكوكتها هزت تيليفونها وقفت بغات تجمع بلاصتها)
مريم: ملووكة غير سيري احبيبتي لخدمتك انا نوض نجمع ليك بلاصتك
ملاك: يخليك ليلي..
(حنات باستها فحنكها اما خديجة مكرشخة بنعاس خرجت كانت الحركة فالدار حيت كيكونو كيوجدو لفطور لولادهم وليهم دخلت لبيت مها كما العادة بدلت حوايجها هزت لوراق للي خدمت بيهم فمكناس تلاقت مها للي بززت عليها تفطر جلست حطات ليها مها اتاي ومسمن بسمن ولكليلة والعسل الحر ريحة منو كتخليك تاكلو واخا تكون شبعان.. ناضت ملاك الكوزينة جابت صوينية ديال نحاس صغيرة كيحطوها الا كان شي ضيف مهم حطت كاس ديال اتاي دايرة فيه عريشات ديال النعناع وطبسيل صغير ديال الطاوس فيه مسمنة مشات لڤازات جابت الورد دردراتو على طبيلة للي قرابتها للنافورة وبقات كتصور ب (mode nuit) باش كتبان الصورة خطيييرة شحال صورت من وحدة باش عجبتها وحدة وحطاتها فسطاتي ديال الواتس والفارس والانستغرام مقصوودة لشخص واحد وكتبت تحتها *اللهم ادمها نعمة واحفظها من الزوال*)
الام: (كتراقب بنتها من بعيد مقوسة عينها فيها…)
ملاك: (كلات شوية شربت نص الكاس هزت صاكها خارجة وعينها فالتيليفون واش شاف سطاتي ولا مزال حيدت الكونكسيون ودازت من حدا قهوة ديال باها للي كان برا مشات عندو باست ليه يدو) بابا
الاب: الله يرضي عليك ابنتي ماشية للخدمة
ملاك: اه ابابا.. حم يمكن غنبقاو نديرو شي اجتماعات ومرة مرة غنبقى نتعطل (ياله جا يهضر) ماشي بزاف غير ساعة ولا ساعة ونص ماشي ديما ومرة مرة يبقاو يصيفطوني لمكناس ولا فاس ديبلاصمون فيها فلوس
الاب: (حرك راسو بأه) واخا ابنتي غير تبقاي تعلميني فوقاش
ملاك: ضرووري ابابا انا مشيت
الاب: ياكما خاصك شي فلوس؟!!
ملاك: لا عندي الحمد لله بسلامة
(رجعت باستلو يدو ومشات بقا فيها الحال علاش كذبت ولكن هادي الطريقة الوحيدة باش تلاقا بيوسف باها عمرو طمع ليها فالخلصة ديالها كتعقل مرة بغات تعطيه طلاها ومعجبوش الحال وشحال غضب عليها بقات غير مرة مرة كتشري ليه حويجات والا عرف كتعطي لمها لفلوس مغيعجبوش الحال تحت شعار أنا للي قاد بيكم.. ركبت فتاكسي للي التسعيرة فيها موحدة 7 دراهم والاماكن البعيدة 10 دراهم مشات للخدمة كما عادتها نشطت مع الزملاء ديالها حتى صونا عليها يوسف تبسمت وخرجت الجردة ديال الخدمة..)
الوو…
يوسف: فين هاد الرياض عجبني الديزاين ديالو
ملاك: ههه صباح الخير بعدا
يوسف: صباح النور لالة ملاك كيف صبحتي؟!!
ملاك: الحمد لله ونت؟!
يوسف: الحمد لله باقي فبلاصتي هاد الساعة ولكن شي ناس مهليين فريوسهم فاطرين فطوووور مظخم
ملاك: ههه (بفخر) هاديك غير دارنا
يوسف: اممم غزالة تبارك الله ولفطور متيول تجيك الشهية واخا تكون مسقووم
ملاك: شوية وصافي
يوسف: لا لا بالصح.. بصحتك الآلة
ملاك: الله يعطيك الصحة
يوسف: شنو درنا نجي لعندك
ملاك: ماشي اليوم
يوسف: واخا لالة.. كيعجبك داكشي التقليدي ديال الاواني
ملاك: (عادي عندها مكتسوقش) بزااااف كيحمقني كيعطي واحد اللمسة خااصة فالطبلة العين كتاكل قبل الفم (هضرة مها منين كتبقى تحطلها كل كاس من قنت)
يوسف: قلت ليك تيعجبني تفكيرك
ملاك: ههه بعدا كنتفاهمو فشي حوايج
يوسف: حتى انا كركز فهادشي بزااف من ديما مطايف مع مالين الدار حتى قلت نبعد وليت عايش زوفري ومنظم داكشي كيفها بغيت انا.. حتى دارنا كيهتمو فهادشي ولكن ماشي بداك التدقيق للي تنبغي انا
ملاك: (خلعها) بحالاش؟!
يوسف: السربيتة كيفاش تكون مطوية فوق طباسل وووو الفرق بين الطبسيل للي خاص بكل ماكلة مهم بحال هاد لاتويات تيهموووني بزااف
ملاك: لاتويات؟!!
يوسف: ههه لعيبات زعما..
ملاك: ههه معرفتك فاسي مخضر ولا فاسي ولد القاع والباع
يوسف: ههه (تفرشخ بالظحك) على حساب المواقف هه
ملاك: مزيان مهم بلاتي غندخل عند المدير عندي اجتماع معاه
يوسف: هههه كلمة اجتماع كتجيني كبيرة عليك
ملاك: ههه طرف الخبز اش ندير
يوسف: ههه واخا لالة ولكن ديري حسابك غنجي عندك مع 3 ونص (قبل متهضر قطع هي فرنست ومشات رجعت لخدمتها…)
ملاك: (خرجت مع 3 ونص فرحانة بمكالمتو انه حدا لباب صونات عليها مريم مجاوبتش.. خرجت من الخدمة كما قالت ليه ماشي قدام الخدمة يدور الدورة على حساب ميشوفوهمش الناس… غير شافتو فرنست مشات نيشان لطموبيلتو للي كانت من نوع Audi A4 لون كحل كانت شيك.. خرج من الطومويبل فتح ليها لباب وهاد التعامل كيحمقها)
.. هااي
يوسف: ساعة غتمشي معايا فيها ونرجعك
ملاك: (ياله بغات تركب وهي توقف مبدلة ملامح وجهها) فين؟!
يوسف: ههه مغنخطفكش
ملاك: حتى انا غير سولتك فين؟!!
يوسف: عيد ميلاد ديال ختي قلباتلي راسي نحضر معاها بغيتك تحضري تبدلتي الجو ياك قلتيلي قنطتي
ملاك: (بقات كتشوف فيه جاب الله لبست حوايج للي عطاتها نعيمة ڤيست فلكحل طويلة مع سروال دجين وسبرديلة) ولكن ممقداش ماااا مكنتش عوالة
يوسف: (كحز طلع فيها وهبط) بلعكس غزيييولة طبيعية وليلي الشرف تكوني معايا كنبان انا خاطفك
ملاك: (قلبها كيشطح السامبا) امممم والله معرفت نتا عارفني اصلا معارف فية والو ياله تعرفنا معرفت واش نتيق فيك..
يوسف: هم!!!
ملاك: تأ اووف معرفتش والله مموالفاليش كنمشي لشي بلايص مكنعرفش الناس فيها
يوسف: انا قلت ليك ساااعة بلمشيان ولمجيان يعني نحضرو معاها ربع ساعة وصافي تنواااعدك
ملاك: وكان غير قلتيها قبل
يوسف: الا على لكادو..
ملاك: لا ماشي على لكادو اصلا انا غير معروضة ومتنعرفش ختك علاش نشري ليها كادو
يوسف: هههه كتعجبني فيك هاد الصراحة.. نمشيو قبل ميمشي الحال
ملاك: منتعطلوش!!!!!!
يوسف: وعد…
ملاك: (معجبهاش الحال بزاف خصوصا معلمهاش وغيكونو افراد عائلتو والامور اصلا مزال مواضحة بيناتهم وهو مزال مقال والو شافت فيه وحركت راسها)
ولكن منتعطلوش والله محاملة نمشي..
(بقا كيظحك طلق موسيقى ايطالية كلاسيكيه وبقا كيهضر على ختو لي فعمرها 26 ولكن مزال طايشة بزااف وهادشي مخليه ديما فصراع مع الطريقة باش كتعيش حياتها.. هي فقط كتصنت ليه ومكتعطيش رأيها مخلياه كيعاود…)
~~~~~~~~
مريم: فيين تكون مشات؟!! بفففف مداتش حتى تليفونها
نعيمة: خاص نقولوها لماما هادشي مكيتخباش امريم
مريم: عاود انعيمة هاد القاعيدة مزال مبغات تحايد منك واش للي من فمنا لودن ماما
نعيمة: وراه خفت عليها
مريم: راحنا عيالات دابا نعولو على راسنا ماما الا قلتيها ليها حدها غتشد الركنة تبكي وتندب بحالا ماما غتخرج تقلب عليها شي مرات كتعصبيني انعيمة حتى كنبغي نضربك
نعيمة: وراه غير خفت اختي والله مبقيت كما كنت
مريم: (جلست كتشوف فالارض) فين تكون مشاااات!!!!
نعيمة: نقولها لحميد يقلب عليها؟!!
مريم: باش عاود يهزها منك نيشان لمو راكم بجوج غير خيارة تحزمت بفݣوسة وقالت لها نقطعو الواد
نعيمة: هه بحال كتشوفي فيها
مريم: (زفرت) غلبس جلابتي نخرج نقلب عليها نعيمة الا وصلتي الهضرة لماما متلومي غير راسك
نعيمة: كوني هانية اختي….
مريم: (بقات كتشوف فيها متايقاش)
نعيمة: والله كوني هانية صم بكم
مريم: غير الله يستر مع الله يحفظ معاك…
ملاك: فين كاين هاد لانيف؟!!
يوسف: la suite عارفاها؟!
ملاك: (حركت راسها بلا) لا
يوسف: بانلي متتعرفي فاس والو
ملاك: (بلا متحس)
انا هبطت لفاس نقرا ماشي ندور فلقهاوي
(هادي حالتها منين كدير شي حاجة مباغياهاش ومارضياش عليها ودارتها غير باش ترضي الطرف لاخر)
يوسف: ملاك!!!
ملاك: (تبسمت) كنت معصبة فالخدمة متديش علية
يوسف: شنو مقلقك؟!!
ملاك: والو والله pardon.. قربنا؟!!
يوسف: اه.. متبقايش مقلقة حتى انا لبارح دازو شي كواليس معجبونيش، دازتلي شي هضرة من تحت الطابلة جاب الله داخلين لهاد الضومين بذراعنا اما بنادم ياكلنا
ملاك: (حركت راسها باه)
يوسف: هادي هي الدنيا املاك طرف الخبز صعيييب ههه
ملاك: ههه كاينة
يوسف: شنو الهدف ديالك؟!
ملاك: معرفت فاللول بغيت نشري شي حديدة
يوسف: اممم شنو بغيتي بالظبط؟!!
ملاك: مقررتش شي حاجة ولكن مهم عندها 4 روايض وصافي
يوسف: هههه يعني تريبورتور لا حيت هو للي عندو 3 وكاينة هوندا تكملي الخدمة وخرجي ضربي شي بريكولات
ملاك: هههه معنديش موشكيل
يوسف: بالصح شنو بغيتي
ملاك: والله معندي مسكل حتى ايركاط قاضية الغرض
يوسف: عرفتي غتحسي بواحد النشوة خطييييرة منين غتركبي فشي حاجة شريتيها من جييبك
ملاك: (ظحكت بفرحة كتخيل) اااه
يوسف: غيعاونك باباك أكيد!!!
ملاك: لاااااااا غي حيت أنا للي بغيت نعتامد على راسي ميمكنش هو غيبقى مقابلني غير انا وووو انا الحمد لله موظفة وبرزقي وجمعت براكة..
يوسف: تيعجبني تفكيييرك أملاك بزااف مكرهتش ختي تكون بحالك والله مكرهت تكونو صحابات تردي ليها غير لعقل شوية
ملاك: (بابتسامة) علاش لا!!
يوسف: هي حبووبة بزااف اجتماعية، غير هو اجتماعية كتر من لقياس ولكن عقلها خفيف وانا خايف عليها
ملاك: دابا توعى مع الوقت
يوسف: نتمنى.. واخا عمرها ماشي صغير باش عاد نتسنى منها توعى
ملاك: ماشي لعمر للي كيخلينا نوعااو
يوسف: وشنو؟!
ملاك: المواقف للي كنتصادفو معاها هي للي كتخلينا نفرقو بين للي صالح لينا وللي غيغرقنا
يوسف: يعني!!
ملاك: كما قلتي نتا اول حاجة كنبداو بيها هي نعتامدو على راسنا ولكن انا منقدرش نحكم فحالة ديال ختك وميمكنش نعطي احكام حيت انا براسي شي مرات كنكون طااايشة (تبسمت) خير مثال انا معاك دابا يعني كذبت وهربت وخارجة مع واحد ياله عرفتو بشي 10 ايام بحد ذاته هدا تصرف طااائش هه
يوسف: او.. ههه معندي منقول ولكن انا عمرني غناذيك ولا حتى نفكر ولا نخلي شي حاجة تاذيك.. بلا متأنبيلي ضميري اصلا مديراش شي حاجة للي ݣغااااڤ
ملاك: ههه اوك
(وقفو حدا القهوة خرجت ملاك متوترة.. حل الكوفر هز منو هو 3 الساشيات وحدة كبيرة و2 صغار.. وتمو داخلين كانت القهوة محجوزة لمدة ساعتين بمناسبة عيد ميلاد، دخلو كانو شي وحدين من العائلة ولكن الشوفة تركزت فيوسف وللي داخلة معاه وحدة!!!!!…..)
ملاك زيدي
ملاك: (فنفسها يا بسم الله….)
يوسف: (جلس ملاك فطاولة للي كان محطوط فيها سريبيتات بالغوز وفاز فيه وردة بيضة وطبيسيل فيه ماكارون فالالوان وطبسيل وفيه شكلاط فالالوان..) انا جاي..
ملاك: واخ (حركت راسها كتفادا تشوف شي واحد هزت تيليفونها دارت صيلونص حلت الكونكسيون طالعة فلفايس بكل توتر ومشافت فيه والو…)
يوسف: (جات عندو ختو مدت حنكها بلبييز وكما ديما ظاحكة وناشطة شاف فحوايجها كانت لابسة ميني فالغوز ديال الجلد ودوني قصير فلبيض والميكاب كان تقيل.. دار حركة فوجهو انه معجبوش لباسها وهي كعادتها مكتسوقش) Joyeux anniversaire ghita
غيثة: ميغسي حبيبي (مظحكش معاها) وصافي يويووو واش غتبقى مقلق مني حتى هاد نهار هانتا غير صحابااتي كما شرطتي ولافامي
يوسف: وشنو يمنع هاد نهار (دور عينو) الدنيا مخلطة ونتي هاكا مفهمتش
غيثة: (بدلع) يووووسف وصاافي شكون هاديك زوينة للي معاك خدامة معاك؟!
يوسف: اجي نعرفك بيها عاد نسلم على مالين الدار ترزني شوية
غيثة: اممم وقولي بعدا شكون هي
يوسف: (شدت فذراعو جارها لعندها شافتهم ملاك تبسمت كتشوف فيهم وكتشوف هاد لعرااا باينة عائلة كووووول وشرب وقفت) ملاك غيثة غيثة ملاك
غيثة: (كانت السباقة مدت حنكها بلبييز) متشرفين ملووكة
ملاك: Joyeux anniversaire ghita مكنتش عارفة ووو يوسف جابني على غفلة
غيثة: مرحبا بيك احبيبتي المحبة ديالك كافية، تجي معايا حدا لبنات
ملاك: (بلطف) ممعليش نبقى هنا
يوسف: انا غنمشي نسلم على لافامي ونجي غيثة الا كنتي غطفي شي شمع زربي ملاك خاصها ترجع للدار
غيثة: واخا حبيبي.. (جلست حدا ملاك كتشوف فيها)
ملاك: (توترت) صافا!!
غيثة: ههه باغدون كنت كنبرݣݣ فيك مديراش المكياج!! سعدااتك تتقدري تخرجي بلا بيه انا واالو متنقدرش وديما مدابزة مع يوسف عليه ياكما هو للي مانعك
ملاك: ههه (عاد فهماتو منين قال اجتماعية كتر من لقياس..) لا
غيثة: ههه متجيكش غريبة انا هاكا للي عندي تنقولو كما جا
ملاك؛ مزيان الواحد يكون عفوي
غيثة: زوينة نتي تبارك الله عندك ملامح زوينين بزااف
ملاك: عويناتك احبيبة حتى نتي غزيولة
غيثة: (بكل ثقة) عارفة ههه.. قوليلي نتي هي حبيبتو؟!!
ملاك: حم كفاش؟!
.غيثة: حبيبة ديال يوسف
ملاك؛ ههه لااا عفوية كتر من بزااف
غيثة: ههه مهم جيتو مواتيين
ملاك: انا ويوسف غير des amis مكاين والو
غيثة: (غمزتها) هاكا تتبدى
ملاك: ههه (جا يوسف لقاهم كيظحكو)
يوسف: غيثة ياله طلقينا لفرااجة
غيثة: اوكي دابا.. ملاك انا غناخد نمرتك من عند يويو
يوسف: (خرج عينو فيها) يووووسف… (مشات صفقات وقفات الديدجي كتهضر بتحلوين وبكل دلع باش يتجمعو يطفيو شمع يوسف بغا ينوض ملاك وعتاذرات بحكم مكتعرف حد حتارم قرارها مبغاتش تبان لعائلتو بقات هي كتصفق من لبعد يديها كياكلوها تصور هادشي وهاد التحفة فين كاينة الديزاين كان خطييييير ولكن رزنت راسها بالسيف خصوصا انها مكانتش من المدعوين.. تم يوسف جايب ليها طرف ديال الكيكة ليها وليه شافت فالساعة)
ملاك: يوسف خاص نمشيو
يوسف: كولي بعدا (كلات منها حمقتها لاطاغط اول مرة تذوق بحال هاد الطعم شافها متوترة هو فهم انها خافت من الوقت) انا جاي (مشا لبيفي خبر ختو للي جات عند ملاك وودعاتها خرجت برا كتسنى يوسف حتى شافتو جايب بواطة ليها)
غيثة صيفطات ليك هادشي… واخا كنت باغيك تزيدي تجلسي شوية
ملاك: مكاين علاش تعذب راسها والله
يوسف: اشمن عذااب (حل لكوفر) اجي ملاك
ملاك: (مشات عندو لقات كرطونة فالبيض ولزرق حلها كانت تستيفة ديال طباسل من صغير لكبير كل حاجة منها 6 وفنيجلات مع معيلقات صغار وزليفات كولهم نفس الديكور من الصناعة التقليدية الفاسية بين لبيض ولزرق سطاها شافت فيه)
هادشي غزاااال
يوسف: باش تعيقي علية بيهم فسطوريات
ملاك: هههه هو مكنعيقش
يوسف: عجبني بزاف داك الديكور فصبااح وانا وياك كيجمعونا بزاف ديال الاذواق ومنهم هادي قلت غيعجبك
ملاك: لااا يوسف منقدرش نشدهم من عندك
يوسف: معجبوكش؟!!!!!
ملاك: لا بلعكس كيحمقو ولكن حشووومة
يوسف: خلينا من التيريري ديالك
ملاك: لا مكاين لا تيريري لا والو غير هو….
يوسف: وصافي املاك جبتهم ليك بالشهوة هادو غير سوڤونير وصاافي قولي لمالين الدار شريتهم ولا خليهم فبيتك فطري بيهم بوحدك
ملاك: ماشي مسألة عن…
يوسف: ملاااك الكادو متيتردش
ملاك: (هي غتحماق وتاخدهم ولكن داافعة كبير)
يوسف: عفاك.. كادو صغيير وصافي شونتيو ديريلي الدعاية ݣاع ههه
ملاك: ههه بلعكس عجبني قيمتو كبيرة
يوسف: صافي!!!
ملاك: هه مخليتلي منقول الا زدت قلت لا غتبقى تبكي علية هنا
يوسف: ههه بااز الآلة خليتيني نرغبك باش تشدي كاادو جايبة ليك
ملاك: هههه بزعطة زعما شكرا
يوسف: العفو الآلة.. مشينا باش متبكيش علية الا عطلتك
ملاك: سييي غنبكي ياله زيد..
(ركبو فجو الظحك طالق موسيقى كلاسيكيه وناقص الصوت حلت لبواطة كان فيها من كولشي حتى قريعة صغيرة ديال العصير كلات منو وحتى هو كيمد يدو ياكل وشادين طريق لصفروو مع الرومبوان ديال البهاليل كتشوف فوحدة للي لابسة جلابة اورونجية شعر مشنتف وجارة الشال فيدها وبحرا كتمشى حققت فيها حيت دازو من حداها وهي تصدم لوخرا بحرا كتقد تمشى…)
وقف وقف
يوسف: شنو واقع
ملاك: (خرجت راسها من الطومويبل متأكدة) وقف عفاااااك
يوسف: (زاد شوية ووقف) شنو واقع املاك؟؟!!
ملاك: (حطت ديك لبواطة اللور وفتحت باب الطومبيل خرجت بالزربة هو مفهم والو.. متبعها بوجهو شايفها كتجري)
خديييييجة خديييييييييييجاااااااااا…..
(جرات حتى وصلت مقابلة معاها شافت وجهها كولو مخبووش وعينيها جمرة حمرة وشنايفها مشققين وبويض)
اويلي مااالكي
خديجة: (بعياء شافت فختها ولاحت راسها على كتفها كتبكي بكل حرقة عنقتها ملاك)
ملاك: قوليلي مالكي شنو وقع ليك واش جابك هنا؟! ما.. (قبل متكمل اسئلتها حست بتقل ختها كانت غطيح معاها شدت راسها غير بالسيف جات جالسة وختها طايحة عليها….. خاافت عليها عمر شي واحد سخف ليها بين يدها ولا شافت فخوتاتها شي وحدة سخفت)
خدييييجة خديييييجة..
(يوسف شاف الديكور خرج كيجري وجا عندهم…)
يوسف: اشنو واقع؟! شكون هادي تتعرفيها؟!!
مريم: (عيات تقلب مشات حتى للشلال للي جاي وسط لمدينة حيت عارفة ختها كيعجبها داك القنت وااالو مكاين ليها حتى اثر بقات كتقلب غير تماك فديك جريدة مشات حتى السويقة واالو صونات على نعيمة) والو؟!!
نعيمة؛ والو حتى ملاك مكتجاوبش ياكما كاينة معاها؟!
مريم: حتى أنا هكاك فكرت بففف لوكان غير تجاوبنا تهنينا بعدا مفهمتش علاش مكتجاوبش حتى هي
نعيمة: هداك راه جاي
مريم: خليه يجي باش نوريوه بنات الناس كفاش دايرين، لحمار مكركب ختي وهو مشا يعرس على خاطرو مزال غدااايدي نفشهم فيه
نعيمة: بففف يحسن عوانها
مريم: (بتنهيدة) يا ربي غير لقاوها، صافي قوليها لماما مبقى ميتخبع دابا انا نعاود نصوني لديك البرهوشة ولا نمشي لجهة خدمتها الا كاينة تماك فديك القهوة
نعيمة: صافي انا نقولها
مريم: داكشي فاش كطيري بعدا…
(قطعت عليها وبقات مأزمة خافت على ختها بزااااف ماشي ساهلة تكوني جالسة حتى يوصلوك تصاور عرس راجلك من لوووستك للي معندكش معاها… رجعت صونات على ملاك وجاوبت هاد المرة)
مريم: (بعصبية كبيرة لدرجة غوتت عليها ) انا بغيت نفهم غير علاش مكتجاوبيش فداك لخرا للي عندك
ملاك: (بخوف) مريم تلاقيت خديجة كانت حالتها وسخفاتلي فطريق
مريم: اويلي فين لقيتيها
ملاك: فطريق فاس
مريم: فينكم دابا واش داها تماك؟!!
ملاك: (عضت على شنافتها هي براسها غيسولوها اش داك لتم) حنا ف كلينيك ****
مريم: فين جاي هدا؟!
ملاك: ف***
مريم: انا جاية دابا هي كيف راها ؟!
ملاك: ياله شوية باش دخلت عندها طبيبة سخفااانة مفه.. (قطعت عليها وشافت فيوسف) يوسف غير سير وسمحلي بزااف
يوسف: واش نتي حمقة اخر مرة نعاود نسمعك تتقوليها مرة أخرى وكان نتي فبلاصتي غتخليني
ملاك: (بصوت خافت معندها ݣانة) لا
يوسف: اوا صافي مغنمشيش من هنا وحتى الا جاو فاميلتك انا غرجع اللور نبعد
ملاك: معرفت شنو وقع ليها مسكينة
يوسف؛ يجيو وغتفهمي سيري نتي حدا لباب نبقى بعيد عليك باش منسببش ليك شي احراج مع فاميلتك
ملاك: (تبسمت بامتنان وبقات حدا لباب صونات عليها نعيمة) الو نعيمة
الام: (صوتها لاكح) فينكم ابنتي وفين خديجة
ملاك: لقيتها فطريق سخفت وجبتها لكلينيك.. (بقات مها مخلوعة وهي كتسايس معاها عطاتهم العنوان (وقطعت)..
(رجع صونا عليها راجلها)
ياكما حس بيها هاد ايخان؟!
(جاوبت)
الو.. لا حنا ماشي فالدار.. مكيجاوبوكش؟!!.. علاش شنو واقع؟!… لا مفخباري والو واش تخاصمتو؟!… حنا فكلينيك خديجة سخفت وجبتها.. (عطاتو لادريس) واخا.. صافي.. (قطعت بقات واقفة وهي دخل مريم جاية كتزرب بديك الجلابة ودرتها مخربقة كانت صحيحة شوية وطويلة واخا كبيرة عليهم الا مهلية فراسها بزااف وملامحها زوينين)
مريم: فين ختك؟!
أمال: لداخل شنو واقع
مريم: داك الكلب دراجلها ختو صيفطات ليها تصاور عرسو
أمال: (شهقت) تزوج عليها؟!!!!!!
مريم: (بتنهيدة) الله ياخد الحق
أمال: (بقات مصدومة شحال وختها صاابرة كانت زوينة عليه مثقفة وقارية وهزاليه هبالو ومستغنية على اهم حواجة فحياتها غير باش تكون معاه وهادشي باش جزاها تفكرت شحال تعذبت والحالة فاش لقاتها فيها وكان دارت شي كسيدة ولا وقعت ليها شي حاجة ولا شي حد استاااغل حالتها وداها تكرفس عليها ونييت بان قدامها وكانت حالتو خايف ملهووف غير قرب حداهم قبل متنطق مريم وقفتملاك قدامها وللي كانت حاقدة عليه من شحال هادي من تعاويد ختها دفعاتو بكل طاقتها)
أمال: مزال عندك يا شماااتة الرجلين للي تجي بيهم لعندها؟!!
يوسف: (تصدم بقا غير حال عينو كيشوف حتى لابيل للي كان مدوز خلاها وبقا حال فمو فيها..)
مريم: (كانو على سنانها) ملاااك
ملاك: شنو جاي دابا دير جاي تكمل عليها
عمر: (بصبعو.. واللكنة الشمالية) مدخلوش بيني وبين مرتي
مريم: كفاش اشريف مندخلوش جوج كلمات لباب للي دخلي دابا منو خرج غبر من وجهنا الهضرة ماشي معانا حنا
عمر: انا جاي عند مرتي دورتوها وعمرتوها علية من اللول حتى واحد مكان حاملنا بزووج
ملاك: (بعصبية) واش نتا مريييض؟!! هادشي كامل للي درتيه معاها ومزال كتقول عمرناها عليك انا من هنا نعطيك جواب ختي طلقها صافي مبقات بيناتكم عيييشة وتهنااات منك وغتشبع راحة
مريم: ملاااااك
ملاك: (ربعت يدها بعصبية مكرهتش طير عليه تقجو نسات يوسف للي جالس فالجهة الاخرى فكرسي وكيشوف فيهم.. وصلات نعيمة وراجلها) واااا خربش دخل عندها
مريم: فين ماما؟!
نعيمة: راكي عارفة مغتجيش، وأصلا بابا مزال مفخبارو.. نتا هنا اداك الميكرووب؟!
حميد: شنو ديك الخدمة للي درتي مع مرتك على الاقل علم ماشي تخليها فدار غفلون حتى يوصلوها تصاوركم هادي هي الرجلة عندك قاد بشي حاجة تسنطح وقولها فوجه بنادم ماشي تغذرو
نعيمة: (تبسمت من هضرت راجلها وموقفو وضارت عندو) نتا ممحتاجش تعلمني حيت مغديرهاش
ملاك: (مزال هازة راسها مخنزرة فيه شاف فيها عوجت وجهها بحال شي ولد صغير) شوفي فية أوجه الويل
(جاو السيكيريتي كيسكتو فيهم ملاك خرجت مقدرتش تبقى تماك كتشوف فيهم كيهضرو معاه بشوية وكيلوموه علاش مخبرهاش وقالهالها زادو عصبووها مكنتسناش منهم يهضرو معاه خاص ي… تبعها يوسف)
يوسف: ملاك ملاااك
ملاك: (وقفت وشافت فيه بغضب) يوسف صافي غير سير سمحلي بزااف صدعتك معايا والله مكنتش بغيتك تعرف هاد المشاكل ݣاع صافي سير فحالك
يوسف: (مموالفاش كيتقبل للي يغوت عليه هاكا ومداير والو ولكن عذرها واكترية منين شافها محروقة على ختها) حنا كنزيدو نتعاارفو عادي نعرف مشاكل ديالك وتعرفي ديالي عاد قبيلة تنعاود ليك على ختي راه هاد الامور عادية
ملاك: ولو…
يوسف: ملاك حاولي تكالمااي مزال ختك غتعطي كلمتها فهادشي.. وانا تنعرف محامية توقف معاكم فأي إجراءات ولكن حاولي تبعدي من صداع متجبديش طلاق غير الا هي قررت
ملاك: انا راه (معصبة مغزفة) شماااتة لاخر
يوسف: انا عارف بلان ماشي ساهل وجاتك النفس على ختك
ملاك: (مكرهة) ااااه
يوسف: ولكن العصبية مغتجيب حتى شي نتيجة شوفو صحة ختك هي اللولة عاد شوفو معاه هو (حركت راسها باه) ومزال الوالد ديالك غيجي وحتى راجل ختك راه واقف معاكم
ملاك: يوسف غير سير حيت اغللببية غير غتفيق غنمشيو ولا يقدر بابا يجي هنا
يوسف: حم، واخا ولكن صوني علية غير تكوني بوحدك.. نتسناك!!
ملاك: واخا شكرا بزااااف وو
يوسف: واصافي من هاد نهار زولي هاد التكليف للي بيناتنا والرسميات شكرا متشكرا مالنا فبيرو
ملاك: (تبسمت بلا خاطر) ان شاء الله
يوسف: بسلامة.. (رجعت هي طلعت وهو مشا فحالو فكر يخلص لحساب ولكن خاف يسبب ليها شي إحرااج ولا شي مشكل وباين عائلتهم ماشي اوبن ماين غيبقاو عليها شكون وكفاش واسئلة في غنى عندها لا هي لا هو….)
خرجت عندهم طبيبة للي علماتهم انها خاصها تبات هاد الليلة حيت جاها انهيار عصبي ودݣو ليها إبرة للي خلاتها تنعس وبغات تراقبها منين تفيق صباح بقاو كيتشوفو كاملين فعمر للي بقا كيدور عينيه
ملاك: عفاك واخا تعلمي لبوليس
طبيبة: (باستفهام) علاش؟!
ملاك: حيت هاد ل (شدت لسانها) هو سبابها باش وصلت لهادشي
طبيبة: (مكرهة حتى هي) هو فعلا خاص قانون للي يحمينا حتى نفسيا، على أي انا غنكتب ليها شهادة طبية تعاونها فالملف ديالها
عمر: اييه ايييه (كيشير بيدو) باغيا تغرقيني نتي ولا شنو
ملاك: عيطي دابا لبوليس ها هو إهانة موظف وبغا يضرب ݣاع انا شااهدة والله حتى نشهد
طبيبة: سمع ابنادم هنا فالمصحة كاينين ناس خاصهم الراحة هاد تاصوفاجيت ديالك ديرها فالزنقة
ملاك: (بحرقة) هاكا كيدير لختي
مريم: (عاجباها ختها حيت مبغاتهاش تطلع حانية الراس) صافي ادكتورة شكرا بزااف واش ختي مزيانة؟!
طبيبة: (هزت حاجبها) خاصها الراحة وصافي، الله يسر الامور وحاولو تبعدو عليها المشاكل هاد العمر ماشي ديال هاد الطبخات الله يستر كيكونو شي مرات خايبين (دارت يدها فجيابها وتمات ماشي مخنزرة فلاخر للي مقدرش يزيد يهضر منين سمع قضية البوليس وعارف ملاك تشهد فيه اصلا من شحال هادي قالتهالو فوجهو معرفت ختي شنو عجبها فيك…)
مريم: لا حوله ولا قوه الا بالله العلي العظيم
ملاك: شنو دارت ليك ختي باش ديرلها هاكا داااارلك ان شاء الله كحلة زحلة
عمر: الهضرة ماشي معاكم مع باكم
كولهم خنزرو فيه حيت عارف نقطة الضعف ديالهم
حميد: شنو زعما كتستقوا على نسا مكاينش للي يسكتك نتا انا خووهم وهاديك للي لداخل ختي
عمر: خاي حميد خليك بعيد على هاد الموضوع نتا مدرتي لي والو
حميد: هاد خليك بعيد مكانتش فاش كل مرة مصيفطلي باش نصيفط ليك لفلوس
ملاك: (مخسرة وجهها فيه) خخخخخ تفو على بنادم البوطة وفيها النفس عليك
عمر: بعدي مني نتي، وانا مدرتش شي حاجة حرام ربي محلل لية نتزوج وحدة جوج وتلاتة وربعة
ملاك: محلل لرجال ماشي لعيالات (هز يدو مغزف وهي مدت راسها لجيهتو) قييس قيس الا سميييتك مك راجل قيس يحسابلك انا هي هاديك للي راك منعسها لداخل
حميد: (مشا دفعو) ياله قيسها
نعيمة: ملاك بعدي من الوييل.. (شدت فكرشها حيت حيت بحريق بكترة هاد الاعصاب) حميد عفاااك، شنو غنديرو دابا
ملاك: مكاين ميدار هادا غيطلق ختي
عمر: (بقا كيظحك وخرج من حداهم مخليهم كيغليو) انا عند باكم ههه قالك طلقها
حميد: والله حتى يدي كيرجفو عليه
نعيمة؛ اش تخلى بشي صداع الكلب لاخر بقات فية غير خديجة مسكينة باين شنو كانت عايشة مع هاد لحمار
مريم: ياااااا ربي… انا غنبقى معاها هاد الليلة سيرو نتوما
ملاك: بابا خاصو يعرف
مريم: راه مشالو هاد الكلب
ملاك: (قلبها ضرها على ختها دخلت شافوها ناعسة ومجرحة وجهها بظفارها بقات مريم على برا وهوما مشاو وصلهم للدار وحميد مشا للقهوة يعرف شنو غيوقع.. بقات مهم كتبكي على بنتها)
من اللول محملتها مقبلتها تزوج بيه من نهار اللول عيييت وبعدها عليه وهي كان راسها يااابس
نعيمة: حتى يانا شحال هضرت معاها والو راسها كان عامر غير بتخربيق قالك الحب الزعتر لوااه
الام؛ (بقاو صاقرين وهادشي كان غير فبيت نعاس ديال مهم حتى واحد مفخبارو شي حاجة..) فين لقيتيها ابنتي؟!
نعيمة؛ اه حقا فين لقيتيها نتي؟!!
ملاك: (حنحنت فلداخل ديالها)
شافتها واحد السيدة خدامة معايا كانت شادة طريق لفاس اوا بحرا لقيت شكون يوصلني عندها جبتها فتاكسي وجيت
الام: فين كانت ماشية
ملاك؛ مسكينة راها كانت طاجة لوكان طاح فيها شي شمكار ولا شي واحد وداها ولا دارت شي كسيدة فين كنا نوصلو
الام: (بتنهيدة) الله يستر.. الحمد لله موقع ليها والو دابا
نعيمة: زعما ترجع معاه
ملاك: مستحيييييييل……
يوسف؛ (بقا كيصوني على ملاك مكتجاوبش تفهم انه مصالحش ليها… نيشان شد طريق لدارهم مع دخل لقا ختو فالجردة مزال بنفس لباس وكاينين معاها صحاباتها جالسين طالقين موسيقى كايهدرو ويظحكو…
ماسلم موالو دخل للدار معندووش مع صحاباااتها لقا باه ومو جالسين بوحدهم هي شادة التيليفون وباه شاد التسبيح وكيتفرج)
السلااااام عليكم…
اب يوسف؛ عليكم السلام… الله يرضي عليك اولدي (باس يدهم وجلس حداهم)
يوسف: هانتوما بوحدكم فين لوخرين
ام يوسف: مشاو يخرجو يشمو شويش دلهوااا
ام يوسف: قبيلة شفتك دغيا دخلتي وخرجتي
يوسف: كان عندي ميدار
ام يوسف: وشكون ديك لبنيتة للي كانت معاك قبيلة فاش جيت
يوسف: (مد يدو كيحك على قرفادتو) غير amie وصافي
اب يوسف: يوسف غدا ولدي حاول تجي بكري على حساب دوك الناس وخوك غنصيفطو لكازا.. انا نمشي نصلي لعشا
يوسف: واخا الواليد.. الله يقبل حتى انا شوية ونمشي
ام يوسف: انا مفهمتشاااي علاش متبقيتشي معانا فهاد الدار واسعة وعريضة ونتا ماشي كاري برطمة
يوسف: الوالدة خليني مرتاح هاكا وتبارك الله الدار عامرة عليك.. متهضريش مع غيثة على حساب داك لباس ودوك لبنات
ام يوسف: وماالو لباسها ايوسف راه هدا هو لباس هاد الجيل غير تكبر غتبدل ولبنات الله يعمرها سلعة هوما وعائلتهم
يوسف: تكبر؟!! راه 26 عام تبارك الله
ام يوسف: يوسف… متبدلتشي الموضوع مزال منويتي تزوج اوليدي فاين هي ديك الياقوتة ديالك
يوسف: (وقف) انا مشيت راكي سمعوي الواليد (حنا باس يدها وجبهتها ومشا بقات غير كتشوف فيه…
كانت امرأة فالخمسينيات ولكن مزال شادة فراسها ومهلية مقطعة شعر كاري للي كان حمر بصبايغ جامعاه بأستيك كتخبي الشيب، دايرة شال لاوياه ومخلياه مرخي.. الوجه بيض وكاين بعض تكاميش والنمش كامتمقادة ميكاب خفيف حيت كانت فمناسية دبنتها لابسة ݣندورة ودايرة رجل على رجل رجعت هزت التيليفون ونيشان للواتس…) لا حولة مع ولاد هاد الوقت وخلاااص
يوسف: (مشا لدارو للي كانت مجهزة بأثاث عصري كانت نقية بزاف حيد طباطو مع لباب لبس بانطوفة شاد التيليفون كيصوني رد الصباط لبلاكار، جاوبت) وييي ملاك!!
ملاك: (فسطح حيت مقدرتش تبقى وهي كتشوف باها مستقبل راجل ختها) وي يوسف
يوسف؛ كيف بقات ختك؟!!
ملاك: معرفتش طبيبة قالت جاها انهيار عصبي وشدوها تبات حتى لغدا عاد تجي للدار
يوسف: اممم الله يشفيها هي تتجي صعيبة
ملاك: مصعيييبة موالو بحال هادا کاع ميبكيو عليه الناس
يوسف: هههه
ملاك: كظحك!!!
يوسف: هي الحمقة راها تتبكي على العشرة وعلى التضحيات للي دارت عليه وعلى شحال من حاجة
ملاك: (بقات ساكتة طلت من ديك الضواية كتسمعو كيقول انه مدار حتى غلاط ومبغاش يجرحها ويقولهالها وصافي ) صراحة هادشي كيخليك متفكرش فزواج
يوسف: علاش؟! ميمكنش تحكمي على زواج كامل بتجربة وحدة فاشلة
ملاك: عرفتي شحال كانت كتبغيه؟!
يوسف: حتى نتي كولشي تيتنسى مع الوقت نعرفو ناس نكرهو ناس نبغي ناس جداد وهي هاكا ماشية الحياة
ملاك: مصااااب تنفرو فمرة.. ترجع تكمل الإجازة ديالها ولا دير شي ديبلوم اي حاجة تعمر وقتها
يوسف: شنو كانت دايرة
ملاك: جغرافيا
يوسف: بقالها عام؟!
ملاك: لا واخا قرات 3 سنين معمرها دخلات حتى شي ماتيير
يوسف: (تبسم)
ملاك: كظحك؟!
يوسف: (ظحكااتو عصبيتها خاصها غير معامن) هههه شوفي ترتاح غير نفسيا وكولشي ملحوق من بعد..
مريم: (رجعت للدار وبقات نعيمة معاها على متبدل حوايجها حيت كانت لابسة غير جلابة وملبساش مزيان منين عرفو بلاصتها وجاها لبرد حيت جالسة غير فالكرسي.. دخلت لبيت مها معصبة من الهضرة للي سمعت وللي مرضها هو الاب للي كيبرد والجد كيقولو غير دي مرتك مع الوقت تفهم) واش هاد بابا هبل ولا كفاش كيقولو دابا دير عقلها رجعت هي الغالطة؟!!!
الام: وشنو ابنتي يقولو طلقها
مريم: (خرجت عينها) اه
الام: الله يهديك ابنتي شكون للي كيبغي يخربها على دار بنتو
مريم: انا غنخرج عند بابا الا هو سخا بيها أنا نديها تعيش معايا بعدا حتى عندي الكلمة فداري ماشي كولشي كيجي يري علية ويدخل
الام: (خرجت مريم زادحة لباب مخلية مها كتقطع من لداخل ديالها وكملت ليها اخر كلمة قالتها ليها…)
مريم: (طلت من باب الصالون) بابا بغيت نهضر معاك
الاب: بنتي صافي خلينا نعلو الشيطان
مريم: (دخلت) راها كانت غترجع ليك ميتة وكان ماشي ملاك للي عتقاتها وغير الناس للي وراونا فين كانت طاجة… فين غتصيفطها ابابا؟!
عمر: والله اختي حتى غنديرها بين عيني
مريم؛ اشمن عينيك اخويا عمر واش ختي ومكنتيش قاد عليها وعلى مصرووفها كفاش حتى نضتي تزوج وقادر تصرف على زوج عيالات
الاب: مريم!!
مريم: راه حنا للي كنا كنصيفطو لختنا باش تكسا وتمشي للحمام ابابا راها كانت عايشة معاهم غير خدامة هدا للي كيقووك بغا لولاد.. (شافت فيه) باش عرفتي راسك نتا ماشي عاݣر؟!
عمر: هاء سي رشيد شنو هاد الهضرة ولينا نسمعو فدارك؟!
الاب: (شاف فبنتو بإشارة بعينيه قالها تمشي.. خرجت معصبة وهو دار عندو) درتي نتا شي تحاليل؟!!
عمر: (مخرج عينو) اه درت صحيح فصيح مبيا واالو وبنتك صبرت عليها 10 سنيييين (شاف فالجد للي مقتانع) كاين شي يصبر ولدابا باغي مرتي وهي تربيلي ولادي انا مغنحرمهاش منهم
الاب: وبنتي دارت التحاليل؟؟
عمر: قالت دارت (بتشكيك دار إشارة الله واعلم فوجهو), وكان كولشي عندها هو هداك هادشي للي قالت
الاب: قالت!!! اممم مهم نتا نعس هاد الليلة مكاين للي يهضر معاك غدا ويفتح… (الاب خرج وتبعو باااه هز عينو شاف فملاك للي كطل عليه مخنزرة بقا كيشوف واالو محدراتش عينها بحال كتلوومو
غضباانة منو مكان غير هو حنا عينو زاد ودخل لبيتو والجد مشا لبيتو)
سهام: كتسنى راجلها يجي من القهوة باش يعاود ليها كولشي حيت هادو مغيعاودو والو…
~~~~~~~~~~
اصبحنا واصبح الملك لله
كاين للي نعس كاين للي تسنى صباح ملاك لبست حوايجها مشات للخدمة خدات داك نهار عاد مشات المصحة لقات طبيبة خرجت من عند ختها دخلت لقتاها جالسة ومريم شداها فيدها كتقويها بالهضرة شافت فملاك وغرغرو عينها
ملاك: بحال داك الق*** ݣاع مكيبكيو عليه الناس
خديجة: (كتشهق) غدرني غدرني.. كنت (الحروف كيسرطو ليها فحلقها) صااابرة على كولشي
ملاك: وعلاش غتصبري عليه شنو زايدك باش تصبري معاه مكان عندكم لا ولد لا بنت لاش تصبري لاتا؟!
مريم: ملاااك
ملاك: اختي انا ماشي كنبغي نزيدك ولكن شوفيها من قنت اخر ربي بغا ينجيك منو وبانت حقيقتو اللهم دابا كركبييه عليك ولا ترجعي يركبك شي مرض بالاعصاب
خديجة: (قلبها مقسح بزااف رداها غير على عينها وكتبكي…)
تمات خارجة كان باها مع راجلها حدا الاستقبال غير شافتو خديجة قلبت وجهها ولكن وقفو
الاب: (حط يدو على كتفها) بنتي لباس؟؟
خديجة: (مقدرتش تهضر حركت غير راسها باه)
الاب: ياله نمشيو للدار
عمر: خديجة وا خديجة (مكتشوفش فيه خرج الاب) راني كنبغيك غير نتي
ملاك: (باستحقار) خلص بعدا كيف الناس
عمر: (خرج عينو) اش نخلص؟
ملاك: (عوجت ملامح وجهها كتعيبو) اش نخلص!! خلص فين كانت ناعسة مرتك للي كتبغيها غير هي وبسبابك نتا دخلت لصبيطارات للي عمرها دخلت ليهم
مريم: (بعياء) ملاك صافي
ملاك: اوا خلص
عمر: وعلاش جيبينها لصبيطارات ديال لفلوس ؟! مالو ديال الدولة فاش مقصر
خديجة: (شافت فيه متحسرة غضبانة ياله بغات تهضر ومريم شداتها من ذراعها)
مريم: شششت بلا متعصبي راه معاك رجال (هزت حاجبها لختها)
ملاك: (كتستافزو) صرررااااحة كلمة راجل راه كتعطى لمرا ولذكر وفهاد الوقفة معطية غير لعيالات سير اباابا تكمش بقالك غير ززواج نتا مزال باقي للي كيصرف عليك وعاد هاز خنافرك مكذبوش للي قالو داافع نخوة على لخواااا
عمر: (هز صبعو معصب) دخلي سوق راسك ولا غتلقاي وجه اخر
ملاك: وسييييير تمووت وكان كنت منك نحشم بدال متصيفط مرتك لصبيطار تولد كيف رجال مصيفطها كتبكي على الرجولة للي ما فيكش سكت سكت خلينا ساترييينك شوية (حلت بزطامها كتجبد الزرقات كتعوج خلصت فالاستقبال وعطات 50 درهم لبنت للي تماك كبقشيش وكتميق على راجل ختها)
لفلوووس مووجووودة الحمد لله
عمر: شتي كفاش كتعاملني هاد لبرهوشة دختك ستي
خديجة: (بصوت باح) عطيني براتي اعمر وطلقني (حنات راسها وتمات خارجة تبعاتها ملاك كتعوج فمشيتها)
ملاك: سمعتي طلقها (كتلعب بحواجبها)
رجال اخر زمن
(خرجت مخلياه جاي من موراهم كينݣر كان رجل ختهم كيتسناهم ركبو وخلاوه يجي على رجليه ومعجبوش الحال يخليييوه من موراهم..)
~~~~~~~~~
يوسف: (خرج من المحال فين الناس كيتواو فالثمن هو فقط كيزين ليهم البضاعة يتفنن فالشرح ديالها مع ذكر التاريخ وطريقة العمل ولاكيس ماشي عليه.. كان معروف بالماركوتينغ ديالو يخليك تشري واخا متكونش عواااال.. جبد تيليفونو صونا على ملاك مجاوبتش حتى كيشوف باه واقف حداه) الواليد (حنا باس ليه يدو)
اب يوسف: الله يرضي عليك اولدي.. شنو درتي مع الناس
يوسف: كولشي هو هداك
اب يوسف: الله يرضي عليك اوا بغيت اولدي تدخ…
يوسف: الواليد انا مرتاح هاكا كنتخلص على خدمتي معاكم بلاش داكشي ممحتاجش لشي صداع الراس حتى خدمتي لوخرا مرتااااح فيها
اب يوسف: للي بانلك اولدي منين تكمل دوز للمحال ديال الحاج بن ربيعي بغاك تعاونو شي شغيل
يوسف: اه راه هضر معايا فالتيليفون من تماك غنمشي للخدمة ديالي خاصك شي حاجة؟!
اب يوسف: الله يرضي عليك اولدي… (مشا يوسف كيتسنى ملاك تصوني عليه منها مشوش عليها منها فضول باغي يعرف شنو غيطرا والحركة للي دارت البارح عجباتو جاتو شجاعة غير كيتفكرها كيظحك كفاش وقفت فوجه راجل ختها.. كانت كتبان فشكل ورجعت فشكل منين تعصبت…)
مريم: (راكبين لبنات اللور والاب وحميد لقدام.. بشوية كيهضرو حيت لوخرين كيهضرو فمسائل اخرى)
ملاك شحال خلصتي ؟!!
ملاك: (عنقت ختها للي فالوسط) مكيهمش لفلوس مهم صحة ختي
خديجة: (جمعت الظحكة واخا ما فيها للي يظحك) غير قولي املاك
ملاك: علاش كتسولو دابا
مريم: غير باش متشدكش شي كريز ههه محدنا حداه
ملاك: لواه لواه رديتوني زقرااامة لهاد الدرجة اشمن فلوس يبانو قدام خدييديييج
خديجة: (تبسمت) فوق 1000 درهم؟
مريم: فوق 1000 درهم وكان قالوهالها وكان راها كتطلب فيهم تجفف لكلينيك باش متخلصهاش (كولشي تفرݣع بالظحك)
ملاك: يااااك!!
الاب: علاه ملاك للي خلصت؟!!
ملاك: (دغيا جاوبت) اه ابابا لاخر قالك علاش نديوها لصبيطارات ديال لفلوس الزقرام لاخر عندو غير فلوس العرس (قرستها مريم فظهرها باش تسكت) متسكتينيش امريم
مريم: (قلبت وجهها لسرجم) لقواااا
خديجة: (تشجعت) بابا انا مبقيتش بغيت نرجع معاه
الاب: (سكت مدور وجهو وهنا تكهرب الجو ملاك كتسنى الاب يهضر تحمست كتسنى شي جواب من عند باها يبرد نار بنتها ساعة سكات للي كيزيد يقتل هو للي كاين.. شافت فختها كتشوفها غير دموع للي باينين فجلابتها الاورونجية.. وصلو الحومة وهاد المرة دخل باها لبيت نيشان و)
اجي معايا خديجة
خديجة: (متوترة) واخا بابا (بقاو هوما برا ودخلو للبيت ݣاع العائلة كتسنى شنو غيوقع حيت بحضور عمر وهضرتهم وغواتهم لبارح كولشي ساق لخبر.. دخلت سد لباب وشاف فيها)
الاب: شنو قلت ليك نهار اللول ابنتي
خديجة: (صوتها كيرجف) منتزوجوش
الاب: وشنو اخر؟!
خديجة: (كتبكي وتشهق)
نتحمل مسؤوليتي الا طرات شي حاجة
(كتشبك يدها متوترة)
مكنتش دايرة بحساب لغدر ابابا (هزت وجهها شافت فيه)
انا كنت صابرة معاه
الاب: نتي بغيتي تصبري نهار اللول هو مكذب فوالو قال انه عايش مع دارهم وكيخدم على عائلتو ونهار كاين ونهار لا
خديجة: وكنت صابرة
الاب: نتي عارفة زواج حللو ليه الله
خديجة: وحتى انا ربي حللي طلاق (بترجي) صافي العيشة معاه كحلة والا رجعت ابابا غادي غير يزيدو غير يتكرفسو علية الموت ولا الرجعة لتماك
الاب: (حرك راسو باه.. خرج من لبيت كان كولشي مجموع)
مالكم مجموعين هاك؟!!! ياله لي عندو شي شغل يقضييه
(تم داخل عمر.. وصوت باهم زاد علا باش كولشي بنتابه لكلام حيت ماشي ديما كيهضر) هاد الشي كيوقع فالعائلات لبنت كترجع لدار باها تعيش معززة مكرمة مكاين للي يهضر معاها منها منكم كاملين.. (خنزر فعمر) والسلام عليكم
عمر: سي رشيد وا سي رشيد
الاب؛ صافي اولدي كما تلاقيتو خوت غتفارقو خوت
عمر: انا مبغيتش نتفرق على مرتي راه حرام هادشي
الاب: ها هي قدامك هضر معاها.. (خرج ورجع)
وحتى رجع انا ودخل نتا لهاد الدار ياله خرج
(ملاك تبسمت ابتسامة شريرة كتشوف فيه وكتلعب بحواجبها كتقليلو السم وهو مغزف فيها شافت فمها ولكن لقات مرت عمها كتميق غير خرج باها دخلات عند ختها)
ملاك: (كتلحنا وتفرقع فصبااعها) صافي بابا غيطلقك منو
خديجة: (بحزن) مصااب
ملاك: (شافتها مظحكتش، جبدت من بزطامها 600 درهم للي شاطت ليها من فلوس للي عطاها المدير على حساب الاكل ديال السيمانة للي دوزت فمكناس ومداتها ليها) نخرجو بلاتي وشري للي بغيتي
خديجة: (شافت فختها) واش راكي لباس املاك؟!!!!
يتبع
التعليقات 0