سهام: وكيفاش طرا حتى بنتك بغات تطلق؟! ياك كانت ديما تݣولنا عاجبها الحال فداك الشمال وفرحانة مع راجلها للي يبغيها ويدابز عليها
الام: اوا الله يعطي لبناتك زهر حسن منها هادشي منقول
سهام: امين واخا انا مدرت فيها والو غير كنسول راني مرت عمها ولا ممنحقيش
الام: مقلت والو.. هي طلقت ماشي تفضحت ياك راجلها تابعها مطيح الذل براسو تابعها وهي مابغاتش حتى تشوف فيه اوا كولشي على عينك اسهام
سهام: وكان غير رجعت معاه اصاحبتي شنو فيها الا تزوج ݣاع عليها
الام: ونتي ترضايها هي لا ربي علاش خلق وفرق ريوس للي مقدرش لشي حاجة يتسع
سهام: انا جاتني عادي
الام: حيت نتي كنتي التانية ههه وااللولة مقدرتش ومشات سهام الله يرضي عليك هاد الموضوع ميتجبدش قدام لبنت
سهام: عادي ازهرة غير نتوما زدتو فيه
الام: انا مها وعارفة غير فهاد لوقيتة راها دوزت معاه 10 سنين من عمرها ماشي ساهلة
سهام: انا منݣوول والو وصي غير لوخرين
الام: واخا.. نوصيهم باش حتى وحدة ميتجبد ليها صداع مع رشيد راكم عارفينو كيف داير وحتى الا فات رشيد انا منفوتووووش بناتي ميتقاسوش حتى بنص كلمة
سهام: عاااارفينو، وعارفيينك.. (رجعت لشغلها حتى دخلت) نعيمة جلسي ابنتي راكي متقلة وجيتي مع هاد المشاكل
نعيمة: مكاين حتى مشكل ختي وبغات ترجع لدار باها هداك راه عرس هههه
الام: فين راجلك ابنتي؟!
نعيمة: راه عيطولو فالخدمة خاص رجعو.. وو
الام: سيري ابنتي مع راجلك
نعيمة: حرت والله
الام: معندك متحيري ابنتي سيري ووجدي راسك.. (دارتلها إشارة باش تمشي من بعد ويهضرو خرجت وكملو شغلهم قالبين الموضوع…)
توادعو مع نعيمة للي مشات مع راجلها من بعد مدورات مع مها وخديجة اما مريم حالتها ميسورة، دازو على ملاك للي دارت ليهم الطيارة باش تشوفهم
نعيمة: اويلي فين تمشي!؟!
ملاك: غير المطار معاكم ازمر مالكي كتويلي علينا غتمشيو ونرجع فحالي (شافت فحميد) عفاك عفاك
حميد: اختي على الراس والعين ولكن شكون يرجعك لصفرو؟
ملاك: طاكسي
نعيمة: طاكسي املاك!!!
ملاك: (خرجت عينها) اه طاكسي غنشدو من المحطة لمرجان ومن تماك نشد اخرى لكار لغزاوي
نعيمة: (بقات كتشوف فيها طيرات القضية فيها شي حب مبغاتش تضيعها عليها) واخا وقلتيها لماما
ملاك: (خرجت عينها) ضرووري
نعيمة: (قوست عينها فيها وحركت راسها كدورو) سيري جيبي ساكك وكان متعطليش املاك (مشات كتجري شافت فراجلها) باينة قاانطة مسكينة مع هاد المشاكل..
حميد: انا قلت غير غتعذب ولكن هي تعرف وسي رشيد يكون عارف..
نعيمة: بحال فاش كان كيعرف نهار كنت كنتلقاك
حميد: هههه ااااه وااقوليييييها من صباح…
(ركبت معاهم مشاو موسقين وصلو للمطار دخلت معاهم على مقاد حميد الإجراءات القانونية ديالهم بقاو مقهويين)
باك شنو دار مع داك جلاخة
نعيمة: راك شفتي هو لاسق وبابا قال كلمتو وبقات الكلمة على خديجة
ملاك: الاااااا مستحيل ترجع ليه (كتشرب العصير) انا ومنها نلسق لمو شي مونتيف يغبر لمو شقق
حميد: صافي يتفارقو وكولها يشد طريقو
ملاك: وراه داكشي للي خاص يدار هي مزالها صغيرة تجيب سييد سيدو شتي خديجة كانو عليها الخطاب على لغرق غير هي تبلات ودوزت عذاب القبر فالدنيا مع داك الجحموم
نعيمة: ههه ناري شحال عزيز عليك
ملاك: (كتلعب بحواجبها) كيقطر من عيني
نعيمة: هههه
حميد: وانا؟!
ملاك: آش جاب لجاااب ݣاع متقارن راسك مع داك ايخااان نتا راك لحلاوة نتا راك
نعيمة: وبااااركااا
ملاك: (ميقت فيها) الغيرة ديال جوميا
حميد: هههه حمقات وصاافي (سمعو نداء للطيارة ديالهم لايطالي، شاف فنعيمة) نعوووم!!
نعيمة: (مغبنة) مسخييييييتش احميد
حميد: ههه حتى انا ولكن احبيبة هادي هي الدنيا..
ملاك: (كتشوف فيهم)
نعيمة: (بتنهيدة) صبر.. (ناضو توادعو مع ملاك وحميد حلف ليها وعطاها فلوس تاكسي للي معروفة كتكون غاالية مشاو وهي كتشير ليهم جلست وهي حاضياهم حتى غبرو.. هزت تيليفونها تصوني على يوسف للي دارت تلاقا معاه حتى جلس اونفاص ليها خلعها زول نظاظرو)
يوسف: اهااااه كملي اشمن مونتيف غتلسقي لسيد مسكين؟!!!
ملاك: (دارت يدها على فمها كظحك) هههه سمعتينا شحال فيك تبݣيݣ اخووويا
يوسف: (تبسم) صراحة كنت طالق سطولاتي معاكم
ملاك: عمرتيهم مزيان
يوسف: عمرووو.. حقدتي على هاد عمر ياك عمر؟!
ملاك: اه
يوسف: حتى انا حقدت عليه مزال تنقولها الا بغيتي شي محامية تنعرف وحدة تشطحو مزيااان
ملاك: انا نقولها لختي
يوسف: اممم شنو بانلك غدا نتلقاو فافران ندوز ناخدكم دوزو وقيتة تفوجو فيها ورجعكم فالوقت
ملاك: افران؟!!
يوسف: غدا كنتجمعو كاملين بحال تقولي الشلة فيهم صحابي ولاد لافامي كاينة حتى ختي غيثة وهي للي أكدت عليك تجي قلنا نمشيو لتماك نبدلو الجو شوية وخصوصا ختك محتاجاااا
ملاك: (مكرهاتش) مااااا معرفتش
يوسف: منتعطلوش وحتى الا تعطلو هوما انا نوصلكم للحومة عارف باك صعييب فهاد الامور، نتي تبرزطتي بزاف بغيتك ديفولاي شوية
ملاك: (كتفككر) والله معرفت
يوسف: انا قلت فرصة ومناسبة وحتى ختك تبدل الجو وحتى نتي صراحة بغيتك تجي
ملاك: (بغات تسول علاش بغيتني ولكن متزربش..) انا نفكر ونرد عليك
يوسف: فوقما قلتيها غتلقايني عندك واخا نمشي لافران نتي غير عيطي انا نرجع عندك
ملاك: (تبسمت) هو انا كنحشم
يوسف: (خرجو عينيه، طانز) وايلي متقوليييهااااااش
ملاك: ههه والله الا كنحشم غير مبيناش فية
يوسف: امنا بالله هه
ملاك: تأ كطنز!! والله الا غنحس براسي بحال شي دخيلة عليكم
يوسف: لاا نهائيا راه شحال من واحد كيجيب شي واحد عزيز عليه..
نقولك حاجة كنحس بحال انا وياك تنتعارفو سنييين هادي
ملاك: بالصح!!
يوسف: والله من اول حوار دار بيناتنا اول هضرة اول ظحكة كنت فواحد الحالة خااايبة جيتي بحال شي عسيييلة
ملاك: (تبسمت شحال كتحماق على طريقتو فالهضرة بقات كتشوف فالزاج مقدرتش تشوف فيه وبحرا كتجمع التبسيمة، جا السرباي بقا كياخد الكموند كتشوف فيه، ݣاع معايير الجمال للي كانت كتمناها بيض عينيه زوورق ولا خوضر مكيهمش مهم ملونين، زعيعر حتى من شنايفو زوينين طويل مثقف خدام مستاقل براسو كيحتارم المرأة وكيعاملها معاملة زوينة زائد الاهتمام مكيفرض عليها والو وعاد كلامو لحلووو ليها)
يوسف: رجوع الله اشريفة
ملاك: ههه غير تفكرت شي حاجة
يوسف: اممم شنو هي؟!
ملاك: والو والو غير شي حاجة فالدار وصافي
يوسف: بغيت نسولك
ملاك: شنو؟!
يوسف: فية فضول على شي واحد زعما مكاين حتى شي واحد فحيااتك ؟!!
ملاك: شي حاجة دايزة وصافي، صراحة مكنتش عاطيا هادشي شي أهمية كبييييرة صافي كنت دايرة بين عيني القرايا نجحت جلست عام شوماج غير تندفع فليكونكور دفعت لماستر متقبلتش كنت طالبة نكون غير فلائحة الانتظار درت باك حر اخر تسجلت فشعبة ديال الانجليزية وربي جاب هاد الخدمة فنفس العام عاود جري جري فيها وقتي كان باين يعني هاد السلتات للي كندير دابا مكنتش كنديرهم..
(كتحاول توصلو على قبلو شنو دارت)
وانا مكنتش كلوومهم يعني عادي الواحد يبغي يتلاقا يخرج يزيد يتعرف وانا مكانش عندي الوقت
يوسف: وانا؟!
ملاك: (بغات تيستيه) ههه مالك نتا
يوسف: على حسابي درتي هاكا؟!
ملاك: حيت عتابرتك صديق ووو ثقت فيك بزااف عقلتي نهار قلتي شي مرات كتعطي ثقتك لواحد عرفتيه مدة ساعة ومكتعطيش الثقة لواحد عرفتيه سنين هاكا وقعلي معاك
يوسف: (تبسم وحرك راسو) كاينة نتمنى نكون قد هاد الثقة
ملاك: حتى الا مكنتيش غنلسق فيك شي منتييف حتى نتا
يوسف: ههه لا صراحة نخاف على راسي معاك
ملاك: (تبسمت) غير خاف..
بقاو مجمعين فجو الظحك هضرة كتجبد هضرة ومكرهتش يبقاو غير مجمعين كتر ولكن ملاك كان خاصها ترجع.. وصلها لصفرو حطها حدا العمالة شدت تاكسي ومشات للدار قبل ميدخل باها كانت الامور عادية دخلت الكوزينة لقاتهم كيطيبو دجاج محمر
ملاك: شكون جاي؟!
مريم: (بتذمر) راجلي وولادي
ملاك: يااااي توحشتهم والله باينة توحشووك امريم
مريم: حاشاك توحشو الخدامة ديالهم
الام: حتى نتي ابنتي شحال كتزيدي فيه راه ولادك غيتوحشوك وحتى راجلك
مريم: الله يهديك اماما أنا للي عارفاهم راني كنخطاهم كيتلفو
الام: اوا الله يخليك ليهم ابنتي
مريم: انا بغيتهم يبغيوني انا ماشي غي حيت كنطيب ونجمع ونخبز ليهم ومنعرف شنو
الام: بنتي راه هادي هي خدمتنا مع ولادنا راه هادي هي التربية خطينا من دوك الافلام التركية والميكسيكية الدنيا راها هاك وهاك
ملاك: لا انا باغيا نزها مبغيتيش نربي
الام: نتي سكتي
مريم: اوا والراجل؟!
ملاك: اختي سي حسن زوين وظريف كيحتارمك ومكيخسرش ليك الخاطر
الام: قولي الحمد لله ماشي كولشي كيكون عندنا ابنتي وزولي عليك دوك الافلام التركية راه هوما للي خرجو عليكم البنات اليوم
مريم: مغتفهمووش اللهم نسدوها هنا
ملاك: انا فاهماااك اختي خاصو ي..
الام: (هزت صندالتها ضرباتها بيها قبل متكملها) الله يمسخك اشعالة لعوافي سيري تمشي من هنا
مريم: ههه خليها عليك اماما
الام: دايرة راسها فاهمة كولشي
ملاك: وراني فاهمة ماشي غي حيت ممزوجاش مفاهماش شتي نتي براسك خاصك تهضري على حقك
الام: سيري سيري تمشي شحال فيك ديال الفلسفة الخاوية..
خرجت ملاك كتعوج فمها مشات لبيت مها تبدل حوايجها لقات خديجة متكية فنموسية ديال مها
ملاك: خدوووووج.. خديدييييجااااا خدووووجا.. دووووجا
خديجة: اممم
ملاك: مالكي ناعسة
خديجة: غير ضارني راسي قلت نتكى شوية جا رجل مريم؟؟
ملاك: مزال.. باينة غير غيتعشا يقولها زيدي نمشيو السيد فيكون مشاااااارجي هه
خديجة: (ضارت عندها) بعدا هو مكيسخاش بيها
ملاك: مشا داك لحمار؟!!
خديجة: مشا حلف ولد لحرام لا طلقني
ملاك: وماالو على هواااه يطلقك بالسيف علييه
خديجة: مصااااب
ملاك: شوفي الا مطلقكش طلقي مو
خديجة: (زادت تازمت)
ملاك: اجي نطلعو لسطح تبغي غدا نضربو شي سليتة خفيفة ظريفة
خديجة: ما فيااااش اختي والله
ملاك: (هزت حواجبها بجوج) غتعجبك
خديجة: فين؟!
ملاك: بلاتي ونقولك فين، دابا نوضي هزي بيجامة لبسيها وخرجي ظحكي ونشطي متبينيش حتى لديك المسمومة دمرت عمي راكي مفقوسة وأصلا علاش غتفقسي على داك لمريض
خديجة: شكون سوق
ملاك؛ وغير نوضي نجمعو شوية مع مريم قبل متمشي (فرحانة كتشطح) اصلا غنبقاو انا ويااااك
خديجة: هههه نتي هي المستفيدة الوحيدة فهاد طلاق
ملاك: هههه بالفرحاات علية…
كما العادة راجل مريم كيجي ميبس راسو باش يدي مرتو واخا تكون 4 دصباح يعطي صواب يهضر يجمع فحدود هو معروف بالتيقار والظحك الا كان فحدود ولكن واعدها فاش تمشي معاه لأزرو يكمل شي خدمة ومن تماك تجمع حوايجها حيت غيسفرهم يبدلو الجو وقدام باها حلف وأصلا هي متقدرش تهضر المشكلة ديالها حتى واحد ممعتابرها مشكلة وكيحسسوها انها غير مبالغة منها وملقات ميدار فحياتها بغات تخرب بيتها بيدها
مريم حتى هي مجازة ونهار جا خطب فيها وعاود كان شركة هو تجلس فالدار مع كل وسائل الراحة لدرجة داير ليها شهرية وعمرو قصر من الناحية المادية معاها بلعكس كولشي تحت تصرفها كتلبس غير اللي خرج حتى من ذهب عندها كتجمع فلوس ولكن داكشي للي بغاتو ملقااتوش… مشات معاه من بعد مودعات خوتاتها دورات مع خديجة حتى هي وبقاو هوما فبيت التلفازة ناعسين بوحدهم حتى كتشوف مرت عمهم سهام مدخلة بنتها للي عندها 11 عام تنعس حداهم وللي كتوصل الهضرة لمها بالحرف والنقطة والفاصلة… مكان غير تسلتو كل وحدة غنست عليها كاشميرا وطلعو لسطح سادين من موراهم لباب باش يهضرو على خاطرهم وحتى الاا طلع شي واحد يعرفو ويسكتو..
خديجة: شكون هدا واش صاحبك
ملاك: الااااااا واش حمقة بالصح راه غير amie وصافي ولكن كنتيق فيه بزااف
خديجة: كفاش هاد amie عاود نتي باينة طايحة فيه غير من المعاودة
ملاك: ايخان لوااه هانتي غدا غتشوفينا وتفهمي دابا ماشي هضرتنا هادي شنو بالكم كنعرفك كتحماقي على افران
خديجة: مبقيتش كنحملها شحال كنت كنمشي ليها مع داك لحمار
ملاك: وصافي شحال كنبغي نسيك فيه ونتي غير كتجبديه الآلة ديريه مات وهانتي بكيتي وشبعتي عليه بكا نمشيو نفوجو شوية
خديجة: راني مزالة مزوجة املاك
ملاك: ومالي انا قلت ليك نمشيو نديرو شي حاجة ولا نفسدو راه كاينين بنات وخت يوسف حتى هي عارضانا انا جاتني عادي نمشيو
خديجة: اوا وبابا وماما
ملاك: نقولو ليهم نخرجو غير هنا وأصلا غرجعو قبل حتى ميجي بابا نتي عارفاه السبت كيتعطل فالقهوة بزاف حتى لغدا مكيجيش ليه
خديجة: معرفت وكفاش غير amie
ملاك: ونااااااري فين شديتي مزالة قديمة حتى نتي، هو هكاك كيعتابرني وحتى انا مفهمتش شنو مفهمتيش وحتى الا كانت شي حاجة مزال حنا غير كنتعارفو وصافي حتى حاجة ممزروبة
خديجة: متزربيش على راسك اختي حتى لزواج ومتزربيش
ملاك: مهم دابا شنو بان ليك غدا لبسو هو يجي يدينا ونمشيو عجبنا الحال نبقاو معجبناش رجعو حتى حاجة مصعيبة التاكسيات موجودين
خديجة: (بتنهيدة صونا عليها راجلها قطعت عليه) عمرني تخيلت يديرلي هاكا
ملاك: مصدقش ولكن حتى نتي دابا يبان سيد سيدو
خديجة: (بتنهيدة) داك الحب للي كان فاللول مبقاش ولكن واخا هكاك مهانتش علية العشرة دوزت معاه بزاااف املاك وعمرني فكرت نخليييه كنت كنقول غنكون بنت لحرااام
ملاك: قولي كان مدوزها عليك اخديجة نهضرو بالمنطق مكانت فيه حتى شي شرط فداك عقد الزواج للي شارككم مطلعش راجل بعدا طلع بنت الناس وعاودت ستر راسو هه
خديجة: هههه
ملاك: مسكينة العروسة جديدة غتصدم
خديجة: (شافت فيها وطرطقت بالظحك) هههه حتى انا كنت كنصبر راسي مرة مرة بلبوسان
ملاك: ههه بنااااقص الا بقات غير فلبوسان مالي أنا مزوجة غير باش نتباس الاااااا والله حتى نديرلو الشوهة
خديجة: هه اودييييي كترة الهم كظحك..
ملاك: شنو بانلك على غدا
خديجة: معندي حتى ملبس املااك
ملاك: ياك خلات ليك نعيمة ديك اللبسة غتجيك زوينة نتي طويلة بحالها
خديجة: هي صحيحة علية بزاف موحال واش تجيني
ملاك: شوفي شي حاجة من عندي تقدر تجيك شي حاجة ولكن ماشي فسراول
خديجة: وماما تبغي؟
ملاك: ماما مصاب غير تشوفك نضتي من لفراش وظحكتي شوية راها مفقوسة مسكينة عليك…
اصبحنا واصبح الملك لله..
غيثة: يوسف غيجي ا..؟!!
يوسف: (طلعها وهبطها قبل متكمل هضرتها) شنو لابسة بالظبط اغيثة (هز حاجبو مفيكسي عينيه فعينيها)
غيثة: يووويووو…
يوسف: الا كنتي غتمشي هاكا غير بلا متحلمي اغيثة والله متعتبيه بهاد الحالة
غيثة: واخا حبيبي نبدل غير قولي
يوسف: راه حشومة تخرجي هاكا لحمك يشوفو للي يسوا وللي ميسوااش
غيثة: مكنتيش هاكا (هز حاجبو) والله حتى كنت غنبدل اصلا بانلي الجو بارد بزاااف
يوسف: ماشي قضية الجو بارد راه نتي خاصك تفهمي هاد لباس ديال المونيكات ماشي ديالك
غيثة: انا نبدل واش غنمشيو دابا
يوسف: (رجع شاف فلمرايا رش بارفان ديالو) سيري مع لبنات انا نلحق عليك
غيثة: صافي داكشي لي كنت بغيت اصلا درت مع لبنات وخفتك متبغيش
يوسف: اممم
غيثة: (بغات تسولو وتراجعات) حقا ديك لبنيتة غتجي؟!
يوسف: مزال معرفت
غيثة: مزيان كتبان زوينة قالتلي نتوما اصدقاء
يوسف: اممم
غيثة: انا نبدل ونرجع عندك باش على الاقل ترضى علينا
يوسف: خاصكي تكوني نتي راضية على راسك اغيثة
(مشات من حداه كما العادة كتطنش هاد الهضرة جبد تيليفونو صونا على ملاك مجاوبتش.. حط تيليفونو لبس ساعتو حتى صونات بنمرة اخرى بقا مجمع كيظحك حتى جات ختو)
غيثة: معامن كتهضر؟!!
يوسف: واخا من بعد.. (قطع شاف فختو كانت لابسة كولون كحل فيه تقيطعات فالركبة مع بوط طويل تريكو كحل لاسق ومونطو طروا كار فلبلو غوا.. حرك راسو باعجاب) وداك المكياج
غيثة: نوووووو نتا هضرتي على لباس المكياج نهار اخر هه عفاك عفاك عفاكم الا المكياج اخويا نقدر نعوااج ولا ندخل كوومة
يوسف: هه سيري وكان.. (ملاك كتصوني) ياله سيري وبلا داك تشيطين ولبسالات متخلينيش نبقى نقمع فيك قدام بنادم اغيثة
غيثة: وحتى نتا رخف علية شوية اخويا
يوسف: نتي متفرطيش وانا!!
غيثة: صافي صافي فهمت (دارت يدها على شنايفها رسلات ليها قبلة) باي باي
يوسف: بسلامة.. (رجع صونا على ملاك) بونجووووغ
ملاك: اهلييين
يوسف: شي خبر زوييين
ملاك: ههه بحالاش
يوسف: غادي تجي؟!!
ملاك: (دخلات لبيت مها جبدت لحوايج وهي دخل مها) ماما غنخرجو انا وخديجة
الام: (حطت شبكة ديال التصبين) فين؟!
ملاك: نخرجو شوية مع مخداماش قلت نضربو دويرة نتغداو برا والا بغات تشري شي حوايج راه معندها والو ورجعو منتعطلوش (قبل متجاوبها) عفاك اماما راه الليل كامل وهي تبكي والله خفت شي نهار تنعس متنوضش بهاد الفقسة وقلت بعدا تبدل الجو وتعرفنا راحنا معاها مغنمشيو فين راه غير فالمغرب ههه غير كنظحك معاك مهم غير نبدلو الجو براسي شحال هادي مخرجت هنا راه حتى صحابات معنديش عفاك اماما عفااااك
الام: وفين تمشيو
أمال: يمكن نزيدو لفاس يييييمكن حيت كاين بزاف دلبرومو تماك يمكن يمكن وصافي.. ولا ندورو غير هنا اللي درناه غنعيط ليك فالتيليفون
الام: ومتعطلوش
أمال: الااااا (مكرهتش تقول الصراحة
ولكن عارفة الجواب شنو هو حتى تخرج وتعيطلها)
الام: واخا بنتي (جلست كطوي لحوايج وهي تجي ملاك كطوي معاها) شت مرت عمك جات حطات بنتها حداكم فالليل
ملاك: راكي عارفة باش تشد الرادار
الام: مهضرتوو فوالو قدامها
ملاك: لاااا طلعنا لسطح جلسنا شوية ورجعنا
الام: لبسو مزيان راه الجو مغيم بزاف برا ومتعطلووش
ملاك: اه داكشي فاش فكرت (ناضت جبدت حوايج دخلت عندها خديجة شافت فيها مبقاوش باينين دوك ليطراس للي كانو فيها.. حركت راسها ان كولشي هو هداك) اجي ختاري شنو تلبسي
خديجة: للي عطيتيني املاك
ملاك: (شافت فحوايجها وحيت غيكونو حاضرين بزاف من الطبقة للي بحال يوسف خاص يكونو فالمستوى جبدت لختها لبيسة للي كانت شرات اخر مرة ومن زهرها كانت باغية تنقس فالسروال بقات شحال كتفكر حاجتها عزيزة عليها ولكن شافت فختها) هاكي لبسي هادي
الام: نوض نشوف شنو كيديرو (خرجت مهمومة على بنتها)
خديجة: زوينة بزااف
ملاك: غتجيك نتي حسن حيت طويلة علية
خديجة: ونتي شنو تلبسي
ملاك؛ واحد اللبسة جابتهالي نعيمة نتي عارفاني كنحماق على سبرديلة معنديش مع لكلاص
خديجة: (لبست دوك لحوايج جاوها هوما هادوك حيت كانت ضعاافت كانت طايتها زوينة طويلة 1.70 وكولشي عندها حدو قدوو ووزنها 60 كيلو وقبل كانت كتر واخا هكاك بقية الانووثة) السروال قصير شوية
ملاك: مباينش ههه هادشي عاد كنت مزال نقصو مفهمتش شنو غدير بهاد الطولة
خديجة: هه على بوونتة كيدايرة
ملاك: ماشي بحالك اطويلو عوراجا
خديجة: ههه بااز (شافت فلمرايا) قلتيلي غيكونو بزاف دالناس
ملاك: (لبست كابيتشو طويل حد ركابي مع كولون وسبرديلة) صراحة هاكا مريح حيت قالي غنبقاو فالغابة
خديجة: الا الغابة عطيني شي لبسة بحالك
ملاك: نيت مسخيتش بديك اللبسة تكرفس تماك هه هزي للي بغيتي شحال وانا كرغبك تلبسي هاكا
خديجة: هه نتي هي نتي، (زفرت) حيت ازين الجلابة كانت ملزوومة علينا (هزت كابيتشو مجاهاش طويل بحال ختها لبست سروال للي خلات ليها نعيمة ديال دجين جاها شوية واسع ولكن جاها مستيلي وسبرديلة بقات كتشوف فلمرايا) ياااااه 10 سنين بيني وبين الرومي
ملاك: جاك زوين وبنتي صغيرة ولكن غنبانو لابسين بحال بحال
خديجة: لبس لفيست مع السروال يجي
ملاك: اه تجي زوينة نعطيك داك ميني بوط لي خلات نعيمة يجي معاها (بقاو يلبسو ويقادو حتى خرجت بلبيسة زوينة)
ديري مكياج يغطي دوك لخبيشات
(حتى هي مكانتش عاݣزة دارت وغطات للي كاين دارت ايلينر خفيف عيات فملاك والو حدها قدات رموشها دارت ايكخون ديال الشمس وعكر خفيف للي موالفة كديرو..)
خديجة: كيجييت؟!!!
ملاك: تبدلتي بزااف جات معاك العزوبية حسن من زواج ههه
خديجة: اودي كنا ضايعين هه…
سلتو كما موالفة ملاك كتخرج مكيشوفها حد عاد عيطو على مها علموها راهم خرجوو مشاو ضارو من الدرب للي كيخرج على واحد التسيير أغلبية كتكون خاوية فصباح على مينوضو مرضيين الواليدين، هادشي كامل باش ميدوزوش قدام باهم فالقهوة ويرجعهم للدار اللهم حتى الا رجع وسول يحطوه امام امر الواقع وكاينة مهم تطاكي عليهم على ميرجعو…
ملاك: ناري كنحس براسي بحال كنخرجك طريق
خديجة: ههه علاه مالنا شنو كنديرو
ملاك: معرفت مكنحملش نكذب على ماما ونتخبع على بابا
خديجة: حتى دابا رجعو
ملاك: زمر مكتشجعيش حتى نتي
خديجة: ههه ودابا غير شنو باغية
ملاك: غنقول لماما راحنا فإفران
خديجة: الحب ومدار فيك اختي
ملاك: اييييييخان لواااه، شحال من مرة نعاودها ليك اااااااناااااااا ويووووسف صحااااااب اصدقااااااااء مكتفهمييش راه ماشي بالضرورة نكونو كنتبغاو باش نتلقااو
خديجة: لا والو مدخلاتليش لراسي
ملاك: اوا ديريليها زويتة ودخليها، مهم شوفي هو مقالي والو وانا مقلت ليه والو حدها كيقولي كنرتاح فالهضرة معاك ولمعاودة وحتى أنا هكاك ولكن شحال باش دابا كنعرفو معمرو مقالي حتى نتي زوينة ولا شي حاجة كتعجبو فية واش فهمتي.. حدها واحد نهار قالي انا كنتيق فيك واخا مكنعرفكش بزاف وحتى أنا هكاك كنحس
خديجة: وشنو كيتسنى
ملاك: ههه وشكون عرف
خديجة: ونتي عاجبك؟!
ملاك: (تبسمت) والا هو الا على الزين زويييييييييين راكي شفتي تصاور وظريييف ظرييف وكولشي فيه زوين انيييق وراااقي عرفتي بحال شي أمير كفاش كيهضر وكيحتارمني وعاد قشووبي، ولكن الا هو مهضرش انا مستحييييل مغنقول والو.. (صونا عليها كانو ديجا دايرين يتلقاو فلبلاصة فين راهم) صافي انا شفتك (مشاو لجيهتو)
خديجة: ناري اول مرة نديرها كنحس براسي كنخون عمر
(دارت عندها ختها خنزرت فيها) ماشي زعما الحب معرفتش زيدي وكان.. مغتفهميش….
يوسف: (خرج عندهم مبتاسم مد يدو) ياكما تعطلت
ملاك: لا لا حتى حنا عاد وصلنا.. وو هادي هي خديجة ختي وهدا يوسف (شافت فيه زعما شنو صيفتك) amie ديالي
يوسف: (مد يدو متبسم) مشرفين لالة خديجة كيف بقيتي؟؟
خديجة: (حشمانة مهبطة راسها) الحمد لله اخويا ربي يخليك
يوسف: مشينا؟!!
ملاك: اوك.. (ركبت ملاك حداه وختها اللور.. معجبة لطموبيلتو للي زوينة)
يوسف: أغلبية كولشي غلقاوه تماك..
ملاك: ممم مزيان ولكن حنا غرجعو بكري حيت قلتي نتوما غتباتو
يوسف: كوني هانية الآلة ملاك العصر ان شاء الله نرجعو مقياس للي تبقاي تزنزني علية.. (شاف فخديجة للي تبسمت) كيف بقيتي اختي من داك نهار
ملاك: (شافت فيوسف مخرجة عينها مكانتش قالت ليها راه هو للي هزك معايا ولكن هو كيصوݣ وغير كيزيد يهضر.. ضارت عند خديجة) هو للي هزك معايا وديناك لطبيب
خديجة: (خرجت عينها فيها كاشارة الا بقات فيك) الحمد لله اخويا شكرا حيت عذبتك معايا
يوسف: مكاين حتى شي عذاب انا مزال كنقولها الا بغيتي شي محامية مرحبا
ملاك: اه حقا الاثنين نمشيو عندها ياك كاينة ففاس
يوسف: انا نديكم عندها
ملاك: بلا منعذبك
يوسف: الله يهديك اشمن عذاب مرحبا فأي وقت…
بقاو مجمعين كيهضرو فجميع المواضيع حتى وصلو لافران
خديجة: (كتشوف فهاد لمدينة للي جات ليها هي وعمر فايام الحب وتمعشيق ودابا بحال حتى شي حاجة مكاينة ولا بقات، شعلت تيليفونها جبدت تصاور عرسو كتزومي كتسائل اولا هي مدارش ليها العرس تانيا تصاور كولهم كان ظااحك فيهم شوفاتو فعروستو للي كانت زوينة، كيوكلها لاطارط لابس كوستيم زوين..
بقات كتحرق وهي كتشوف كل تصويرة حتى شافت لباب تحل خرجت دغيا من تصاور هزت عينها للي كانو مضببين)
وصلنا؟!!!
ملاك: اه ياله هبطي ناري بيهم بزااف خرجي شوفي
(كان يوسف مشا يسلم على صحابو وولاد عائلتو كانو بزااف الطوموبيلات مساتفين) واش انا كنحلم نااااري تستيييفة ديال التيتييييز ااااح اقلبي
خديجة: (حتى هي كتشوف) لا شفت فالزين بزااف ولكن مفرقين ماشي مجموعين فقنت واحد
ملاك: ههه رجوع الله راكي مزالة مرت الراجل انا جات علية
خديجة: اوا متعاوديش تخرجيني نشوف هاد الخير ختك كانت محرووومة
ملاك: هههه بااااز عاد كنتي كتخنخني على عميمير ديالك
خديجة: حنا ولاد اليوم اختي
ملاك: (طرطقت كظحك) هههههه (خلات شي انظار عليها حتى جات)
غيثة: اوووو ملاااااك!!! صافا حبيبة
غيثة: (حنات عندها تسالمو) عجبني الحال منين جيتي شكون هاد لغزيولة لي معاك
ملاك: هادي ختي خديجة.. هادي خت يوسف
(تسالمو غيثة عرفاتها على شي بنات للي بينهم صحاباتها بنات لافامي دارت معاهم صوااب ومشاو..
رجع يوسف سد الطومبيل ودخلو *لعين ڤيتيل* *ain vitell* المعروفة تماك بالراحة والاستجمام بلاصة كتريح الاعصاب كان بارد الحال ولكن الحماس كان مدفي الجو.. تمو داخلين كانو بيهم شي 40 واحد وأكثر )
يوسف: (مشا حدا ملاك) ملاك هانتي سيري مع غيثة باش متبقاوش بوحدكم نمشي نشوف واحد لكليكة ونجي عندك
ملاك: اه واخا
يوسف: متحشميش
ملاك: هههه (مشا شدت فذراع فختها، وبقات كتشوف فالتيتيز سوا بنات ولا دراري كولشي حالتو نقية.. عجبها الحال بزااف وسطهم مكرهتش حتى هي وكان تولدت لباس عليها مكيكونش اقصى طموحها طموبيل تكون كتفكر دير مشرووع كبير… )
خديجة: الله يا ختي فيلم دالخلعة هدا ههه
ملاك: وناااري عاد كنتي كتغبني على عمر دابا
خديجة: بلا متفكريني
(نيت صونا تيليفونها جبداتو لقاتو هو قطعت عليه)
شوفي دوك لبنات شنو لابسين واش مجاهمش لبرد
ملاك: (شافتهم كانو زوينات شعور المكياج لباس) كولها كيلبس شنو مرتاح فيه
خديجة: قولي كيلبسو شنو غيخلي الواحد مرتاح فاش يشوفهم اما البرد راه علينا كاملين
ملاك: هههه ممكن
خديجة: (وقفو فواحد لبلاصة فيها كراسة خشبية كيكونو جوج كبار وفوسطهم طبلة بالسيمة والطبيعة للي دايرة بيهم بحال طبيبعة للي كانت فمسلسل تويلايت Twilight طبيعة كتخليك مرتااااح بلا حتى شي مجهود.. كانت للي كتصور للي كتجمع للي كيتمعشق…)
خديجة: صوريني نحطها فسطاتي نفقسو شوية
ملاك: (شدت من عندها التيليفون) اول خطوة غديريها اخديجة هو تنسايه متسنايش منو يشوفك يتفقس ولا يفرح ولا يزمر خاصكي نتي تنسايه ديريه بحال عمرو كان فحياتك.. راه خاصك تبلوكيه اصلا وتمحي نمرتو من تيليفونك ومن عقلك ومن قلبك ومن حيااتك… حتى الا هضرتي عليه هضري بصفتو مات
خديجة: (بتنهيدة) الهضرة سااااااهلة اختي حسابلك غنبكي عليه الا بكيت راه بكيت على الشمتة والحݣرة على تكلاخي وعلى تضحيتي للي درت عليه كل نهار كنت نقولو يقطع داك لحشيش ونبدا عليه ولا ترموا بانفسكم للتهلكة كل نهار والغباء للي فية لوكان انا سمعتها مرة وحدة كنت مشحاااااااال هادي ملحتش راسي للتهلكة ورجعت فحالي اختي منين كان مزال الوقت
ملاك: (درعتها بيد) ياك فهمتي دابا وعرفتي راه مزال ديري شحال من حاجة حرمتي راسك منها تفائلي الحياة زوينة ومزال الخير قداام معرفتي ربي دارلك هاد طريق باش تفاجا عليك حيت كانت نيتك زوينة وعمرك فكرتي تغذريييه غير هادي كافية وشتي ربي والله كيجازي للي كيصبرو طوال الوقت ولا قصااار غير تفااائلي الخير مزااااااااال كاين وربي كبييير الحمد لله..
يوسف: (جا مع اخر جملة متبسم) قالتها لالة ملاك مزال الخير كااين لقدام وربي كبير….
ملاك: ههه وكذبت؟!
يوسف: (جلس اونفاص معاهم) لا بلعكس (شاف فخديجة) انا منين كنسمع كلامها كنحس بواحد التفائل خطييييير
خديجة: (تبسمت) عندك الصح أنا للي كبيرة منها وغير مكتكونش راشقة لي هي كنعيط ليها من ديما كانت كتقولي طلقي واجي فحاالك هههه وميمعتش ليها
ملاك: هههه شتي وكان سمعتي كلامي
يوسف: هادي هي الحياة تجارب وكولشي تيجي مع المكتاب
ملاك: (صونا تيليفونها كانت نعيمة) سمحولي نجاوب ورجع… الوو…..
يوسف: (شاف فخديجة) سعداتكم بهاد لحميمقة
خديجة: (تبسمت) ملاك راه هي الروح فديك الدار
يوسف: (حرك راسو) الله يخليها ليكم.. قوليلي اختي خديجة تبغي ترجعي تقراي؟!!
خديجة: قالتها لي ملاك ولكن مزال مفكرت
يوسف: تقدر تكون هي الخطوة للي عتحررك من بزاف دالقيوود للي كتحسي بيهم
خديجة: (بقات كتشوف فيه عمر راجلها كان زوين ماشي شي واحد خايب ولكن يوسف!! حتى نقاوة والثقافة والفلوس كيلعبو دور كبييير ولكن مصطلحاتو بحال كيشرح شي درس…) اه عندك الصح
نطلق بعدا حيت هادشي للي مخليني مربوطة ويكون خير
يوسف: القرار عندك نتي تسناي حقوقك ولا تشدي حريتك دغيا حيت للي فهمت هو مباغيش طلاق
خديجة: لا لا انا بغيييت نطلق غندير طلاق خلعي عطاتني ملاك قريت عليه ف Google.. اصلا شنو عندي منتسنى منو عارفة انه معندووش رياال يعني غيدوزهم حبس وميحطش فرنك وانا مبقيت بغيت واالو بغيت غير لهنا وراحة لبال
يوسف: حسن ليك، باش تعرفي نيت شنو ديري
خديجة: (تبسمت) 33 عام شنو باقيلي مندير
يوسف: راكي بالصح مزال صغيرة نتي شنو بغيتي تقراي ولا تخدمي نتي غير نوي الخير وربي غيسهل الامور
خديجة: ان شاء الله.. (شافت فغيثة كتعرف ملاك على شي بنات هي لقصيورة فيهم تبسمت) ملاك دغيا تفاهمت مع ختك
يوسف: (ضار شاف تبسم ورجع شاف فيها) كدخل الخاطر
خديجة: غير الخاطر!!
يوسف: ههه امم (حك تحت شنافتو) قالت ليك هي شي حاجة
خديجة: لا كتقولي يوسف غير amie ديالي وصافي
يوسف: (حرك راسو بأه.. بقاو مجمعين كيهضرو فبزاف حتى جات ملاك هو مشا عند شي دراري عاد وصلو.. جايبين صيكان كبار معاهم كولشي دراري مشا كيعاون وهوما بداو كيجبدو طوايس كبار فيهم لحم للي فيه صوصيط كبدة كلوة قلب كفتة خير دربي كاين تماك ملاك وخديجة بقاو كيتشاوفو بيناتهم على هاد الوليمة جاو شي رجال من الهضرة بيناتهم باينة كيتعارفو من قبل وماشي اول مرة خداو من عندهم داكشي باش يشويوه)
ملاك: اااح هادشي جابلي الجوع
خديجة: ههه بزااف، نبقاو ديما نجيو معاهم املاك
ملاك: وشكون كره.. شنو قالك يوسف؟
خديجة: والو بقينا مجمعين وصافي..
خديجة: (كتشوف هادشي عاجبها بزاف عاد ليكوبل للي كاينين تماك كفاش معانقين والظحك والنظرات هادشي كانت محرومة منو واخا كانت مزوجة عن حب ولكن فهمات زواج عند حب كيعني غير ف شهر واحد من بعد كتبدا الدرجة تهبط درجة درجة.. اولا حيت ساكنة مع العائلة للي أغلبية الوقت كيكونو بحال لخوت قدامهم ومرات بحال شي خدامة والخروج الزنقة مانعها والا خرجو كيخرجو مجموعين عيات تغوت تدابز معاه جاتو للحيلة واالو للي فراسو فراسو ممنوع داك تخربيق للي كان كيسميه تبرهيش واخا كان عايشو معاها فالمصاحبة هزت حواجبها مخرجة عينها كاشارة تحاول تخرج راسها من هاد الدوامات وتقبل ان داكشي مكتااب)
هادوك ويليييييي والله الا باسها
ملاك: هههه (حانية راسها فالتيليفون) حتى انا شفتهم ودرت راسي مشت والو
خديجة: لمسخ
ملاك: اختي شتاقيناه هاد الساعة ههه
خديجة: هه نتي راكي مبقيتيش كتحشمي
ملاك: غير ظاحكة ازمر سلمت عليك نعيمة راه قلت لماما جينا لافران
خديجة: اوا!!
ملاك: خاصمتني ولكن قنعتها مهم منتعطلوش وصافي مقدرتش منقولهالهاش اختي
خديجة: مزيان.. يوسف ظريف بزااف
ملاك: اه بزااف كتحسي بيه جانتل مان
خديجة: كنشوفو ونشوف عمر كنقول غير دفنت راسي باباطل وصافي..
ملاك: اصلا مكاين حتى وجه المقارنة (شافت دراري مجموعين وماشين من جيهة لباركينغ) فين ماشيين هادو عاود كانو مدفييين الجو
خديجة: ههه (حركت راسها بمعرفت) خاص نعاود نقرا املاك وخاص ندفع طلاق دغيا مبقيتش بغيت نبقى على عنق داك لحمار
ملاك: ان شاء الله الاثنين نمشيو للمحامية ولقرايا لباك ديالك مزال فلفاك نشوفو مع les camarades يوقفو معاك راه ساااهلة ترجعي تقراي احسن حاجة مخرجتيهش من لفاك اما دابا الا مكانش عندك باك جديد مدفعيهش فلافاك
خديجة: اممم، مصااب يقبلوني وووخاص نمشيو لفاس بغيت نتقدا من السقاط
ملاك: هههه مبقى حد كيتقدى من السقاط اختي
خديجة: وااايلي علاش؟ كانو فيه بياسات واعرين
ملاك: كان أغلبية دابا غير دوك الإفريقيات للي مزال كياخدو منو
خديجة: وعلاش؟!
ملاك: كاين بزااف فين تاخدي نمشيو Marwa كيكون مرة فيها حويجات زوينين ورخاس lc waikiki ووبزاف
خديجة: صافي نتي تعرفي دابا، ولمكياج؟!!
ملاك: نمشيو عند مول لمكياج وخودي شنو بغيتي
خديجة: حتى نتي املاك تبقاي ديري شوية شوفي هنا لبنات كيف دايرين راه هاكا بغات الوقت
ملاك: لااا حبيبتي قاااانعة براسي، براكة ماما مخلياني نخرج فوقما بغيت هاكا مرتاحة كتقولي نهار تزوجي وديري للي بغيتي بحال مكتعرفيش ماما اخديجة
خديجة: وانا كنهضر غير على لمكياج للي كيخبي لعيوب
ملاك: وانا ما فيا حتى عيب الحمد لله بشرتي كل ويكاند كنقابلها بلماسكات ونقيها نتي للي خاصكي دابا تهلاي فراسك شوية وتصحاحي
خديجة: (بحماس) اه غرجع نتهلى فراسي خاص نخدم اختي باش منتفناش فالحياة وفديك الدار
ملاك: ان شاء الله رجعي قراي وميكون غير الخير… ووراه دموندبت ليك من عند زينب صاحبتي ضبرات ليك على ديك اللحسة الصحراوية
خديجة: (فرحت) مزياااااان انا اصلا دغيا كنصحاااح
ملاك: ههه ارا متصحاحي مع راسك غير نساااي الهم راه كولشي ضاااير على النفسية….
غيثة: (بصوت عااااالي) يِيييييييييـــيْ لبسو لحوايج
….: غيثة شكون هاديك لبنت للي لابسة الزيف مع خوك
غيثة: (كتشوف متبسمة فاللي جاي) هاديك ملاك l’ami ديال يوسف وهاديك للي معاها ختها
…: فشكل يوسف مصاحب مع بحالها
غيثة: شنو للي فشكل وهو قال غير صديقة وحتى هي هكاك مكنظنش الا كانت بيناتهم شي حاجة غيخبيوها ونتي عارفة يوسف وليصطواغ ديالو
….: سي عارفين يوسف ماشي ستيل ديالو تخيليها مرت خوك هههه
غيثة: (ضارت شافت فملاك) بلعكس غزالة واش مشفتيهاش كيف دايرة غزالة شهوة منها، ملامحها كولهم طبيعيين منافخة مفاشة
….: اربي اش تتعرف هاديك فشي عمليات تلقايها نازلة من شي جبل
غيثة: ختي واش انا ملقيت امتى وفينمن نمم فوحدة متتعرفني لا انا لا نتي.. (تبسمت) خليني نمتع عيني (غير شافو دوك جماعة جايين محملين تجمعو متبسمين..)
ملاك: ههه واش تحولو هادو لعيساوة ولا شنو ياكما غيجعو الغرامة ههه
خديجة: ياك قلتيلي لباس عليهم
ملاك: هههه مالك تخلعتي
خديجة: ههه لا غي حيت قلت لي لباس عليهم
ملاك: وحݣرتي عيساوة يقدر بنادم غير زاهي (تبسمت شافتهم جايين كيظحكو كل واحد شنو هاز ها النفار ها الغيطة ها لقراقب ها الطارات لكبار الدربوكة وتعارج.. قلبت على يوسف بعينيها حتى هو لابس بحالهم هاز قراقب تبسمت ديك اللبسة الوزانية كل واحد شنو اللون للي لابس بين لحمر وبين بيض وكحل بين لزرق جايين بحال شي زربية وهوما مجموعين مكرهتش تصور ولكن خافت من ردود الفعل واكترية مكتعرفهمش.. شاف فيها يوسف دارت ليها إشارة زعما راك زاز وكيشير بيدو باش تقرب تبسمت و بقاو هي وختها جالسين بعاد شوية مزعموووش وكولشي مجموع عليهم حتى تهزات الدنيا بصوت ديك الغيطة كيسييي وحتى مول الطارة ودوك لقريقبات للي فيها)
اححح قلبي تهز مع ديك الضربة
خديجة: عنداك يشدوني رياح
ملاك: (دارت يدها على حنكها) والله يا مك وديريلي شي شوهة حتى نكرك
خديجة: ههه وغير قلت
ملاك: شوفي اخديجة والله حتى نكرك معنديييش مع دوك تواشا حقا نطيح ولا شدوني هبطوني
خديجة: ههه طلبي التسليم
ملاك: نطلب غااااا التيساع الا كنتي منهم والله حتى نكرك هاما كنحلف
خديجة: ههه يا اختي شحال باااااݣص بحال شي حلمة زويييييينة (كتشوفهم كيظحكو وكتحسر على راسها انها مكانتش ݣاع عايشة… مافيقهم غير صوت زوين من دقات من دوك طبوول كتزعزع لعظام ديال الواحد وكتعطي حماس كبيييير واخا تكون فاااشل وطلق حلقو مبانش حيت الشلة دايرين بيهم وعاد شي ݣور والناس للي تماك جاو يتفرجو…)
مولاي صلي على محمد وعلى..
سداتنا اله وصحبه الكرم
يا ربي صلي على محمد وعلى..
سداتنا اله وصحبه الكرم
من يعتصم بيك يا…
خيرا الورا شرافاااا..
الله حافظه من كل منتقم..
الله الله الله الله الله الله..
الله يا مولانا
الله الله الله الله الله الله..
يا ربي خود بيدي..
هنا بدات الدقة العيساااوية كولشي كيغني وكيردو عليهم خلاو السياح للي تماك كيجيو بالسيف عليهم وعاد الصوت الجماعي والفردي كان خطير والاجزاء الحماسية للي خالقينها الشلة خلا لخواتات ناضو من بلاصتهم حتى لقاو راسهم مع جماعة كيصفقو ويغنيييو بهاد الكلمات للي حافظينها كل صغير وكبيرة فينا كانو كلمات لله والرسول عليه الصلاه والسلام على رسول كولشي قلبو كيتهز…
كولشي كان محيح وكل دقة وصوطة فداك النفااار كتخليك كترجفي باش تشطحي ولا تحيري مهم ديري شي حركة بقاو هكاك لمدة وحتى شي سياح اجانب طلبو منهم شي طرح ويتصورو معاهم مرفضووش كانت أجواء خلات خديجة تنسى مشاكل ديالها وخلات ملاك تقتل داك الملل والروتين فاش كانت عايشة شوية قالوها شعبي الظحك والنشاااك كان غير مزلع….
كولشي حيح للي شطحت للي حيرت ملاك وختها حدهم كيصفقو ويردو على المغنيين شي ساعة واكتر وهوما هاكاك وقفو لغنا وشطيح وبدا كيتفرق المجمع بقات غير الشلة كيظحكو بيناتهم.. ملاك وختها رجعو لكرسيهم حاسين بطاقة إيجابية خطييرة كل وحدة وعلاش متحمسة ونطقو فدقة وحدة
الللله على نهار
خديجة: هههه علاش انا فرحانة بحال مناقصني خير
ملاك: هههه زمر ماشي نفرح ليه وتجي تندميني بهاد الطاقة السلبية للي عندك
خديجة: هه والله حتى حنا نستاهلو نعيشو بحالهم
ملاك: (بحماس) صافي انا غنشري طموبيل (تشاوفو بيناتهم وظحكو من قلبهم) باسم الله عليك ابنتي كفاش تعيشي بحالهم
خديجة: معرفت نطلق ونتزوج شي واحد من هنا (شافت فيها) انا زوينة
ملاك: هه زوينة خاصك غير العقل
خديجة: معاك بالصح
ملاك: نبداوها كذوب ااااه يا ختي شحال زوينة كتشقشقي بالزين ويلي على طولة وعلى طاااي غير مانكة وصافي
خديجة: على زمرة
ملاك: هههه ياله ختاري شكون عجبك
خديجة: (تبسمت وشافت فيها) زعما حݣرتيني
ملاك: لاااااا بلعكس ترجعي تهلاي فراسك فين تبان شي زبلة هنا قدام زييينك
خديجة: يا ختي كطلعيلي لموراال
ملاك: غااا نتي هبيلة وكتيقي قلت ليك خاصك العقل هههه (وقف حداهم يوسف) هههه جات معاك تعيساوت
خديجة: الله يعطيكم الصحة والله عاد فهمت منين قلتي غنبدلو الجو
يوسف: (حط يدو فوق صدرو وحنا راسو) بكل فرح
ملاك: واش غير صحاب لي بيناتكم ولا مرة مرة كتخرجو ديرو بريكول
يوسف: ههه مرة مرة، حنا قلال فاللول كنا شي 10 كنا قرينا لمدرسة وحدة وبقينا مجموعين من بعد كل واحد فين لاحتو الدنيا واخا هكاك فالمناسبات الاعياد مكنقطعوش التواصل بيناتنا من بعد كل واحد جاب صاحبو او تزوج او جاب صديقتو وبقات الشلة كتكبر لدرجة ولينا بحال شي عائلة حتى من واليديها تعارفو بين وليديهم للي ولاو نساب للي بقاو اصدقاء… وتقريبا اي واحد دار شي مناسبة كيمشي معاه هاد الفوووج كااامل
ملاك: الله اكبر بلا متحتاجو تعيطو لشي ضياف
يوسف: هه هاكا ولفنا صحاب بزااف واي واحد حتاج شي مساعدة كيلقاها فقدر المستطاع ديال كل واحد فينا.. وشحال من واحد تزوج فهاد لݣروب
خديجة: (تبسمت) عقبالك اخويا
يوسف: امين.. انا نحط علية هادي ونجي
خديجة: خليك بيها تقدر تحايدها يضربك لبرد شوف الدنيا شحال غيمت صاك برد واحد
يوسف: زعما!! منتابهتش
خديجة: اه والله وأصلا جاتك زوينة ياك املاك
ملاك: اه اه (ضارت كتشوف وحدين بعاااد عايشين الغراام)
يوسف: ميغسييي..
ملاك: (عاد ضارت عندهم) عايشييين
يوسف: اممم ياكما جاكم الجوع؟!!
ملاك: اه صراحة بزااف
يوسف: هههه نتي بالظبط متحتاجيش (شاف فخديجة) معمر شي مرة مهضرناش ومجبدناش حس الماكلة فيها كتقولي الماكلة هي كولشي فالحياة
خديجة: ههه
ملاك: شوفو شوفو شوفو (شافت هداك النيت للي كان كيحب ويتمعشق حاني على ركابيه شاد فيد الورد واليد التانية بواطة حمرة محلولة باينة فيها خااتم) هههه واش راحنا فالمغرب للي كنعرف بشااااااااخ
يوسف: هههه no c’est le Maroc que j’aime
خديجة: (كتنهد) اللللللله سعداتها
ملاك: ههههه فشكل هادشي هههه وكان كنت فبلاصتها نهبل بالظحك (مشا يوسف كيصفق حيت لوخرا بغات وناض عنقها كيدور بيها وهوما يبداو عيساوة كيغنيو ليهم ودراري لوخرين هزو الدي للي بغا يتزوج فرحانين بيه كيطيطشوووه ولبنت طايرة بالفرحة كيعنقوها لبنات ويغوتو)
خديجة: ياله نقولو ليها مبروك
ملاك: انا مكنعرفهاش باش نقولها مبروك
خديجة: اوا راحنا مجموعين دابا حشومة نمشي انا اصلا نتي معندكش مع هادشي
ملاك: هههه غير سيري احنينتي.. (بقات كتعجب هي غير كتصفق وتغني وتحرك رويسها.. )
الله مصلي علييييك ارسوووول الله….
تحطات الماكلة فطوابل وحداها طباسل للي بغا شي حاجة كيهزها بحال شكل بوفي ديال المشاوي… كولشي تجمع كياخد شنو بغا باش ميجمدش داكشي واكترية ضبابة نزلت،، يوسف مشا قاد جوج طباسل لملاك وخديجة قال ربما يكونون حشمانات قلب على مونادا خدا ليهم جوج كانيطاك جوج خبزااات مشا جيهتهم فين جالسين لقاهم جاية راسهم عارف هادي غتكون غير ملاك… رجع داكشي وخدا هو ومشا جلس حدا صحابو…
كولشي نااشط وكلها ومجموعتو.. كملو الماكلة تعاونو جمعو داكشي وللي شاط داروه فربوع ديال الخبز كما موالفين كيعطيو لدراري صغار للي فطريق ولعظام لكلاب..
يوسف: اجيو معايا نعرفكم بعدل على صحابي (مشاو معاه كانو جالسين فالارض مفرشين كويتة رحبو بيهم كما ديما وجلسو حداهم حتى جا واحد اخر جلس حداهم)
غيثة: (هزت قرعة متحرك راسها متبسمة) لعبو اللعبة ديالنا
يوسف: غيثاااااا!!
…: اهااااه توحشناها وشحال متجمعنا نيت لعبووها
غيثة: صافي لعبو (شافت فملاك حيت هي للي اول مرة تكون معاهم اما خديجة جالسة مبعدة عليهم كتقرا لميساجات ديال عمر للي كيبكي ويزاوݣ باش تسمح ليه وتنسى فكرة طلاق) ملاك!!
ملاك: اهااااه (كدور عينها حيت شافت كولشي شاف فيها) حم لعبو معنديش مشكل
خديجة: (ناضت من كرسيها وحنات عند ملاك) انا نمشي.. بغيت نغسل يدي (بغات تدخل طواليط)
يوسف: انا نمشي معاك
غيثة: بحال ديما تتهرب.. (بداو اللعبة وبداو الاسئلة وملاك غير كتسمع مرة ظحك مرة توتر مع صاحب الجواب حيت كيكون شي سؤال قرطااس.. هز واحد القرعة وجا الراس فيه والقاع فيها)
ملاك: انا!!
اورطيغا: (شاف فيها) شنو اخيب بلان وقع ليك فاس؟!!
ملاك: (كترمش عينها بزاف) بحالاش؟!
اورطيغا: مثلا تݣريسيتي ولا شي حاجة!!! فايت ليك تݣريسيتي؟!!
ملاك: (حركت راسها باه) اه واحد نهار ف…بنسودة كنت فعرس خرج فية شمكار ݣريساني
اورطيغا: (هز حواجبو بجوج) ولد لحرام
غيثة: ومخفتيش انا الحمد لله عمرني طحت فهاد الموقف ناري نموووت
ملاك: (بكل ثقة) لا اصلا الشمكارة مخاصكش تبيني انكي خايفة منهم خرجي عينيك فيهم هداك غير حيت كان هاز جنوي كبير مخبع فيه اما اغلبيتهم كيكونو مرعودين
غيثة: ويلي انا تنشوفهم من لبعد تنبقى نترعد عاد نخرج عيني ههه
…: شنو خدا ليك
ملاك: ااا أيفون ديالي
اورطيغا: (تبسم نصف ابتسامة)
مرة جاية حضي راسك..
(دور القرعة ورجعت جات فيها هو راسو فيها مقوس عينو فيها)
شكون نتي؟!!
ملاك: (متوقعتش سؤال بحال هدا ظحكت) انا ملاك
اورطيغا: اممم فشكل (جمعت الابتسامة تنوات منو وهاد الجواب ديال “فشكل” )
غيثة: وصافي انا ݣاع متتجي فية هاد القرعة
(ناضت اونفاص معاه فين جالسة ملاك كيلعبو وملاك ضاربة الطم مرة مرة كتهز عينها فداك للي سولها كتسرق شوفات فيه.. كتشووف فابتسامتو كان سمر والمشكل اول مرة يجيها شي واحد سمر وزوين، كان باين عليه قشووبي كيظحك مع كولشي تماك.. عينيه عسليين الا ظحك كيغبرو لحية خفيفة سنانو بويض كملو اللعبة بقاو مجمعين بيناتهم ولكن معرفتش علاش محملاااتوووووش بقات مخسرة وجهها فيه بلا متحس.. بقات جالسة كتشوفهم مجمعين فشي حاجة للي معارفااهاش حتى ناضت كتمشى تماك بوحدها…)
خديجة: خرجت من الحمام لقات يوسف واقف مع شي وحدة حنات راسها وتمات ماشية صونا تيليفونها كان عمر قلبها تكمش حسات بكره كبييييير لدرجة مترددتش هاد لمرة وجاوباتو بكل ثقة وهي عارفة صافي دفناتو واخا مدة قصيرة الا من شحال هادي كان قلبها كيموت نهار على نهار وجات السبة..
وي
عمر: مزال مبغيتي ديري عقلك اخديجة
خديجة: (تبسمت بكره) عقل!! علاش خليتلي شي عقل عمر نتا عارف مزيان كما أنا عارفة نتا مكتولدش نتا عااااݣر وربي جابلي السلة نيت باش نتهنى منك
عمر: خديجة!!!
خديجة؛ مكاين لا خديجة لا خرا اه نتا مكتولدش كنا بجوج دايرين عين ميكة ولكن باش تكون شماتة وتمشي تزوج اخرى بلا حتى متعلمني وكتقول لبابا وفوسط جماعة نتا للي مزيان
عمر: مقلتلو والو راه قلت ليك بغاو يفارقونا
خديجة: شوف بلا متبقى تخربق علية انا عمرني باقية نشوفك راجل بين عيني من نهار وصلتني تصاورك دفنتك وبكيت عليك يوماين ونضت بحالا عمرك كنتي
عمر: عمرك غتهناي مني وعمري نطلقك
خديجة: (بانفعال) انا بغيت غير نعرف شنو للي كان مصبرني هاد المدة كاملة معاك صابرة على الذل والجوع والبرد معاك
عمر: معليش اخديجة نصبر لأي كلمة كتقوليها ولكن بغيتك ترجعي للدار
خديجة؛ (عصبها) حيت عارف هاديك للي تزوجتي غدا ولا بعد غتلوووحك وتفضح ياك.. والله لا رجعت ليك واخا تبقى اخر ذكر فهاد العالم
عمر: وانا طلاق والله منطلقك
خديجة: شكون قالك انا كنتسناها من عندك انا نخلص لبرا ونعتق راسي مستحيل اعمر نرجع عندك لا نتا لا عائلتك للي من نهار اللول درتوني خدامة الله ياخد فيكم الحق يا ولاد لكلاب (بقات كتغوت) أنا للي درتها لراسي اناااا، اما وكان من شحال هادي درت الحل لراسي من نهار عرفت حقييقتكم نرجع لدااارنا (سمعاتو قال اووووف زاد عصبها بهاد البرود) الله يعطيك موصيبة يا ولد لحرااااام كنت راني معاك مكنت لا مزوجة لا واالو
يوسف: (من غواتها فالتيليفون بلا متحس شافها فديك الحالة كترعد مشا عندها) خديجة كالم طوا مالك؟!
عمر: (منين سمع صوت راجل عاد توݣض ووقف) شكون هدا شكون هدا للي معاك
خديجة: (شافت فيوسف بعينين دامعين وهي كتنفس بصعوبة قطعت لابيل وطفاتو نيشان حيت عارفة غيبقى يصوني) خرج علية
يوسف: واش راجلك؟! مفهمتش علاش تتقولي هاكا ومكبرة الامور نتي مزال صغيرة والعمر كامل قدامك
خديجة: انا فثلاتين اشمن صغيرة اخويا الله يهديك
يوسف: ههه ݣاع مبيناش فيك
خديجة: (وسط دموعها تبسمت) هه
يوسف: هادشي كامل غتهناي منو وتنسايه والوقت كينسينا فكولشي
خديجة: امتى!! راه عيييت مبقيتش بغيت نبقى على رقبتو بغيت غير رتاح
يوسف: صبرتي سنين مقدراش تصبري هاد الايام
خديجة: (حركت راسها بلا) اقسم بالله مقادرة
يوسف: صبر الآلة خديجة وكولشي غيفوت نهار الاثنين غنلاقيك بواحد السيدة متخصصة فهادشي غطلقي دغيا وسيري عيشي حياتك قراية مزال تعرفي على شي ولد الناس
خديجة: براك الله وفيك اخويا بالصح كنحس براسي تقلت عليك بزااف واخا کاع مكتعرفني كتسمعلي
يوسف: لا نهائيا
خديجة: علاش كدير هاد الخير معايا واش نتا ناقص صداع الراس هه
يوسف: (تبسم) تيعجبني ندير الخير تيعجبني نسمع مشاكل الناس ولقيتك بالصح تستاهلي يوقف معاك الواحد ملاك عاوداتلي شوية من للي عشتيه مع راجلك وصبرتي ولكن هو للي غدر بيك يعني يستاهل اي حاجة ديريها فيه كما أنا سمعت ليك فيجي شي نهار وشي واحد يسمعلي بحال الفيلسوفة ديال ختك
خديجة: خيرك عمرني نساه اخويا
يوسف: مدرت حتى خير متعرفي شي نهار نوقف عليك حتى انا ونبلبل عليك شوية هه
خديجة: للي فجهدي وكتر نديرو والله اخويا
يوسف: الله يكبر بيك نرجعو؟!
خديجة: اه ملاك غتكون كتقلب علية.. (هزت راسها) يااااااه الثلج كيطيييح
يوسف: من قبيلة بدا غير كنتي مطايفة
خديجة: ههه والله محسيت بيه…
ملاك: (فينما دازت كتبسم وتزعط فشي واحد كانو دراري انواع واشكال بقات كظحك على راسها جبدت لكيت من تيليفونها دارت موسيقى دياسك للي كتبغي وتمات ماشية كتمنظر واخا لبرد عاجبها الحال حست انها كتستنشق هواء نقي وحتى المنظر كان كيخليك فعالم ااااخر تخيلت راسها بحال بيلا فيلم ديال تويلايت
طبيعة عين فيتيل كانت غزالة وزادها داك الثلج للي بقا كيطيح دازت حدا شلال قشعت شي كوبل عاطيها لتشلقيم بقات مبلݣة عينها فيهم مقوسة عينها مسكانية فيهم وكملت طريقها كتبسم)
وانا لاش كنتبسم، زعما هاد التيتيز كامل مكاينش للي عجبتو.. داك ايخان ديال يوسف بطييء بطييء
(تفكرت يوسف واهتمامو)
باينة عاجباااه ولكن شنو كيتسنى هههه ناري الا حتى انا طلب مني زواج بحال ديك لبنت والله حتى نتشتت بالظحك عليه يا ربي غير ميديرهاش ههه
(بحال شي هبيلة دايرة سيناريو كتخيل وتجاوب راسها وظحك صونا عليها عمر قطعت عليه وبلوكاتو كملت الموسيقى كتصنت بيها ودندن ومرة مرة تهز برويسها الا داز أغنية ديال الراب… مشاات مدة مدت يدها كتأكد وتشوف حبيبات الثلج كيطيحو تبسمت مدت وجهها باش يطيح فوق وجهها غير تقاست فيه تبورشاات حلت عينها دارت تشوف من حواليها واش كولشي فرحان انه كاين الثلج كيطيح وهي متقشع حتى واحد حايدت لكيت باش تشوف مزيان بالصح واش مكاين حد مبان حتى واحد بلعت ريقها وقلبها زدح زدحة وحدة ومعدتها تكمشت بالخلعة)
اويلي…. فين مشاو هادو؟!!!
(هزت تيليفونها من جيبها خرجو عينها مكانت حتى شرطة ديال الريزو هبطت من داك الشلال بشوية باش متزلقش حيت كان مخزز ومعرفتش اصلا اش مطلعها لتماك..
ݣاع لبلايص كيبانو متشابهين منين دازت مباينة حتى طريق وعاد الارض فازݣة بقات واقفة كتحاول تسمع صوت لوخرين وااالو عرفت راها بعدت وتلفت وقفت فبلاصة كدور بلاصتها كتحاول تفكر اشمن طريق فاش جات واالو الغابة كبييرة ومكاين حتى شي إشارة تبين ليها المخرج)
هانتي غير بلا بكا بلا ندييب يمكن جيت من هنا البكى معندو باش ينفعني
( عينيها تضببو بلبكى كتشوف الارض واش يبانو زطامي الارض بدات كتبياض والثلج بدا كيجهاد)
اويلي واش غنبقى تالفة حتى نتجمد مشيييت فيييها..
(طاحو عليها شي افكار خلعوها بقات متمشية حتى سمعت شي اصوات مشات كتزرب طلت بانو دراري ولكن ماشي لكليكة للي كانت معاها تخبعت من مور شجرة مراقبااهم كتشوفهم هازين قرعة خضرة داروها فشكارة باين انه شرااب بقات صاااقرة شافتهم وقفو وتمو ماشيين خافت تبعهم يعيقو بيها يدوروها اكترية غيكونو شاربين ميعقلوش عليها.. مشاو بعدو محستش انها هاديك هي طريق مناش وخافت تبعهم وعاد هي مدازتش بين دوك بين شجر هنا جاتها لبكية ديال الخلعة حيت مقادرة تغوت ولا تعرف فين تمشي وخايفة طيح فشي وحدين شافت فتيليفونها رجعت شرطة ديال الريزو ولكن مغتشعلش ليها الكونكسيون حيت دايرة غير *6 والصولد مبقالهاش ورجع الريزو مشا عاود….)
~~~~~~~~~~
كان كولشي متحمس لهاد الثلج حيت غيصبحو فميشليفن يتزلجو كما كانو متوقعين، ودابا كيوجدو راسهم يتحركو من هنا يقلبو فين يبانو والليل ويخرجو يكملو السهرة.. خديجة عيات تقلب على ملاك مبانتش مشات عند يوسف
خديجة: خويا يوسف.. حم سمحلي عفاك واحد دقيقة
يوسف: اه شنو مالكي؟!
خديجة: ملقيتش ملاك ݣاع خاصنا نرجعو للدار ماما كتصوني علية وانا منين رجعت وانا كنقلب عليها
يوسف: وايلي (جبد تيليفونو صونا عليها..) الريزو يمكن معندهاش ياكما مشات لطواليط.. انا نمشي نشوف تماك بقاي نتي هنا ولا سيري تخبعي فالطموبيل ديالي (مد ليها الساروت ديالو) عاقلة عليها؟!
خديجة: معليش نتسناك هنا
يوسف: غيتفزݣو حوايجك، غير سيري متخافيش معندها فين تمشي…
يوسف: (قلب عليها فطواليطات مكيناش شاف فدوك المحالات ديال الخشب للي تماك كيبيعو داكشي التقليدي ديال المنطقة والو سدو كاملين حتى لعساس للي تماك لقاه لبس جاكيطتو وداخل لبيت ديالو اكدلو انه مكاين حد تماك وأصلا الا بقا شي واحد غير يمشي حيت غتكون ليلة ثلجية)
واخا شريف الله يكبر بيك
(صونا تيليفونو كانت ختو)
وي غيثة
غيثة: يوسف فينك
يوسف: ملاك معاك؟!!
غيثة: ملاك!! الاااا انا راكبة مع اورطيݣا كاينة غير سوكا صاحبتي
يوسف: مشفتيهاش ݣاع؟!!
غيثة: لا، علاش ملقيتهاش؟!!
يوسف: لا (قطع عاود رجع صونا واالو مكاينش شي تواصل عرف تيليفونها خاااارج التغطية، شاف فجيهة الغابة تقريبا للي كان جالس ومبيكنيكي خرج غوووبش حيت حاسها مسؤوليتو اخر مرة كانت جالسة مع ختو يعني ناضت تمشات غتكون دخلت)
بففف غتكون تلفت لداخل
(بقا بوحدو واقف تالف معرف ميدير وكيمسح الثلج من على وجهو شاف فجيهة الطوموبيلات بقاو كيزيدو بشوية باش ميزلقوش ضار شاف اورطيݣا جاي..)
اورطيغا: شنو؟!!! ختك ݣالتلي شي وحدة معاك تالفة
يوسف: اه ديك لبنت للي جبت معايا باينة تلفت لداخل
اورطيݣا: سبحان الله من اللول شفتها (خسر كمارتو)
يوسف: (مسمعوش) خاص ندخل نقلب عليها ميمكنش نمشي ونخليها
اورطيݣا: (مكره) ندخلو بجوج للي لقاها يعلم لاخر
~~~~~~~~~
ملاك: (سمعت صوت رجالي ماشي واحد ماشي جوج ضارت كتشوف الرؤية مبيناش تخبعت من مور شجرة وهوما كيقربو حتى شافتهم جايين كيغنيو.. حسابلها دوك لبراهش للي كانو باغيين يشربو ولكن ماشي هوما)
خويا عفاك فين طريق الخرجة
بقاو كيهضرو بالشلحة فهمت غير تاربات (بنت)
ملاك: انا تلفت هنا…
(شافتهم جايين حداها وهي بقات واقفة كيبانو رجال كبار فالاربعين لابسين لباس شتوي والرزة فوق راسهم)
منين نخرج؟!!!
واحد فيهم شير فاتجاه وكتحس بيد تحطت فوق صدرها تزعزت ولكن هو مطلقش حتى رجعت اللور كانت غطيح حيت زلقت
ملاك: الله ينعل جد باباك الكلب يا شمااااتة انا كنسولك ونتا…
(شافتهم كيظحكو زادت تخلعت كتر ملقات غير تجري مع الخطوة اللولة زلقت طاحت كتسمع غير الظحك ديالهم عاود وقفت حاضياااهم بنص عين والخوف عاميها)
والله للي قربلي حتى نقتل مو
(حنات كمشت يدها فوسط داك الثلج هازة حجرة شيرت بيها ولكن خانوها يديها بقوة البرد وصلت الحجرة لواحد فيهم غير لصدرو زادو كيظحكو مقربين ليها دغيا جرااات بغات تبعد تخلعت دغيا الثلج بدا كيتماااسك فالارض خوفها صوتهم باينة كيقولو متهربش وواحد كيعيط لاخر باش يشدووها طلقات حلوووووقها كتغوت
يووووووووووووسسسسففف
حتى شدها واحد مكمش ذراعو على عنقها ووجهها واليد لوخرا دايرها فوق فمها.. باغي يسكتها ولكن وااالو عضاااتو وكتحرك راسها بزااف مكملة فغوااااتها ودموع فعنيها خايفة من بزاف ديال السيناريوهات…..)
نعيمة: (صونات على خديجة للي عاد شعلت تيليفونها جاوها بزاف لميساجات حيت تعطلو كانت بغات تصوني على ختها ولقيتها مشاعلاش الكنكسيون )
افينكم البنت مالكم طافييين تيليفوناتكم بجوووج
خديجة: لاااااا
نعيمة: ملاك شحال وانا كنصوني عليها واالو كيقولي خارج التغطية
خديجة: (متوترة) غير الريزو مع بدا الثلج كيطيح
نعيمة: اوا رجعو فحالكم قبل متقطع طريق
خديجة: اه داكشي نيت
نعيمة: فوجتو شوية؟!!
خديجة: (مبقى خاطر) اه مزيااان فوجنا بزااف (تخلعت من قضية ملاك مزال طافي تيليفونها)
نعيمة: مالكي؟؟
خديجة: اه… والو غير داك زمر كيصدعني وصافي
نعيمة.: بلوكيه وتهناي
خديجة: مزال محتاجاه على حساب طلاق
نعيمة: اممم مهم رجعو راه ماما خايفة عليكم وماحد بابا نيت مرجع للدار راه ݣاع معارفكم خرجتو
خديجة: اه داكشي نيت
(قطعت قبل متبقى تجبد ليها لسان حيت معروفة نعيمة كتوصل لمها كولشي واخا يوصيوها ولا يرغبوها..
بقات مرعوودة فبلاصتها مكتفة واش تخرج تقلب ولا شنو دير حتى نمرة يوسف معندهاش وما حد مزال مبان اذا مزال متلقات.. شافت كولشي مشا بقاو جوج طموبيلات)
~~~~~~~~~
ملاك: (جبد واحد معاها بطرشة حيت ضرباتو بركلة لحجرو حتى تصمكت وبقات كتسمع فودنيها غير طيييييييييييييييييييط وبحرا كتحل عينها للي وحدة بكترة الطرشة تضببت ليها رجعت شافت فيه جمعت الدفلة وبزقااها عليه مخرجة عينها الخوف والصنطيحة
ورجعت كتغوت حتى صووتها تبح وجاء الفرج للي خلاها تحمس شوية)
يوسف: ملاااااااك
ملاك: (سمعت صوتو زادت ماركا كتر وكتر مع قصيرة حكمها حتى رجليها مواصلينش للأرض) يوووووسف يووووووسف انا هنا طلق اولد لحرااام يا ال**** ها هو جاي للي كيندم ***** (لوخرين تشاااوفو بيناتهم كيهضرو بالشلحة دفعها طااحت وهو يبان واااحد عقلت عليه داك سمر ودوك زادو مع طريييق وقفت كتشير) ها هوما مشاااو من هنا تبعهم تبعهم
اورطيݣا: واش مريضة فك** نتي اش جابك هنا
ملاك: ها!!! (بحرا كتنفس) راه مشاو من هنا (كتشيرلو ومزال طايحة)
اورطيݣا: وشنو نتبعهوووم!! (بإشارة) تحركي زيدي
ملاك: (بقات مصدومة منو توقعت يتبعهم يضربهم ولا يجي يبغي يشوف شنو وقع ليها وعاونها توقف)
اورطيݣا: واااا تحركي ابناااادم (كيسمع صوت يوسف كيعيط)
…يووووووسف
(ضار عندها مخسر وجهو والثلج كيزيد يجهاد.. )
واش مضروووبة بشي فردي خاااوي اش جااابك هنا؟!!!
ملاك: (غير كتشوف مكتهضرش حتى بان يوسف مشا جيهتها شدها فذراعها كيعاونها توقف)
يوسف: واش بيخير؟!! موقع ليك واالو؟!!!!
اورطيݣا: جر صاحبتك نتحركو من هنا نخرجو بالطموبيلات قبل متقطع طريق
ملاك: (بكترت الخوف والرعب للي عاشتو حست باستفزاااز كبير) انا مقلتش ليك قلب علية باش جاي كتغوت
اورطيݣا: (ضار عندها) ومزال تتحلي فمك؟!!!
يوسف: (كيشوفلها فوجهها بحنية) وقعات ليك شي حاجة
ملاك: (حركت راسها بلا)
اورطيݣا: (ضار كينݣر كيتبع خطوات رجليهم باش يوصلو لطموبيلاتهم مخليها من موراه كتغلي مرضاااتش عاد طلعت معاها خصر ليها الهضرة واستهزأ بيها بقات غير كتسب وتلعن نساها فالخلعة للي كانت فيها ورجعت كتحس غير بالكره من جهة هاد خينة للي واخا كان سبب باش عتقها ولكن…)
ملاك: (كيتمشاو بالزربة وشافت فيوسف) صدعتك معايا
يوسف: لا بلعكس خفت عليك، خفت عليك بزااف هاد الوقيتة منين كتخوى الدعوة هنا متتكونش مأمنة زيد نتي راكي مسؤوليتي
ملاك: انا معرفتش كفاش رجع درت لكيت وبقيت ماشية طالقة رجلي حتى لقيت راسي تالفة
يوسف: وكان قلتيهالي نتمشى معاك ماشي تمشي بووحدك
ملاك: نعاود!! ابدا واش نعاود نجي اايفران
يوسف: نو بلعكس هادي هي الدنيا مغامرات عقلتي هه
ملاك: (تبسمت بلا نفس هزت عينها فداك الشخص للي قدامها.. كانت بغات تشكي ليوسف ولكن قالت بلاش صاحبو يدابز معاه وهي مشافت منو غير الخير بقاو مدة كيزربو ولاخر للي قدامهم كيݣيديهم عاد وصلو لساحة واسعة للي من تماك يخرجو لباركينغ..)
الحمد لله منين جيتي والله
يوسف: وعلاش كنت غنخليك الحمقة (وصلو لطموبيلاتهم لاخر زرب ركب فطموبيلتو وزاد واخا طريق عامرة ولݣليصاج غير هو)
ملاك: مال هاد زمر داير هاكا
يوسف: ههه متديش عليه كوميم جا قلب معايا عليك
ملاك: (خسرت وجهها) بناااقص من تقلابو (خرجت خديجة كتستفسرها فين مشات وعلاش بلغوات) صافي اخديجة من بعد
خديجة: راه خلعتينا عليك كولشي مشا بقينا غير حنا
ملاك: وحتى دابا موقع والو حنا غنمشيو (ركبت لقدام ختها ركبت اللور) معرفت طريق كيف غتكون
يوسف: ههه نسولوك نتي الآلة ملاك (شافت فيه زعما شنو كتقصد) أنا للي خدام فالنقل والتجهيز
ملاك: هههه والله كنسى شي مرات انا نصوني على واحد السيد (كتصوني)
وي سي عبد العزيز لباس عليك… الحمد لله ربي يخليك.. قوليا طريق صفرو ايفران ممقطوعاش؟!!.. ݣليصاج؟!! ومقطوعة؟! بالصح؟!! اويلي!! وايموزار كندر حتى هي؟! واش بالصح؟!! وامتى تقاد؟!
طريق بولمان!! بعيييدة..
(كتشوف غير باها بين عينيها)
ااااه لا لا غير وحدة من لفاميلة وصافي.. واخا سي عبد العزيز ربي يخليك شكرا سلم على لمدام… (قطعت كترمش بالزربة)
يوسف: شنو؟!
ملاك: قو****
يوسف: (ظحكاتتو ولكن مظحكش وشاف اونفاص معاه)
خديجة: متقوليهاش املاك (خبطت ففخاضها) اليوم يقتلنا بابا اوييييلي استغفر الله شنو درنا فضيحة فضييحة فضييييييحة
يوسف: (خلعاتو ضار عندها) متخافيش
خديجة: (دغيا رجعت كتبكي) غيقتلنا بابا
ملاك: (مخرجة عينها كتفكر)
يوسف: انا نديماري غير بشوية عليكم نوصلو لفوسط لمدينة متخافوش كولشي عندو حل..
خديجة: (كتخبط وتبكي اللور خايفة من ردة فعل باها وخافت بهاد الفعل يردها لراجلها كعقاب مزال مطلقت وشنو دارت اما الا سخن من جيهتها مغيبقاش فصفها خاافت بزاف قلباتها بكى وندييب.. اما ملاك للي غير ساكتة ومرة مرة كتعظ شنافتها من لداخل وكتشوف فطريق للي شافها يقول غير كتمنظر وهي عقلها رااه خدام يوسف حداها مفهم والو وديرونجاتو خديجة بلبكى ديالها…)،
الأم: (من بعد مسدو الضواية من سطح حيت دايرين الالمينيوم الا كانت شي شتا ولا ريح كيسدووه ونيت بدات شتا وكيدخل برد قاااسح حيت الثلج فالنواحي.. شعلو الشوميني لبست بينوارها وضوبلت تقاشر والفولار عاد هزت تيليفونها صونات على ملاك ولكن مجاوبتش على خديجة حتى هي مكتجاوبش خافت عليهم وهي دخل سهام هازة صينية فيها اتاي منسم وطبيسيل ديال الفاكية وتمر..)
سهام: فين بناتك ازهرة؟!!
الام: بغيتيهم؟!!
سهام: لا غير هدا ماشي وقت الدوران لمووت برا دلبر وسما كحلة باينة شي شتا جاية
الام: اممم اوا الله يرحمنا
سهام: اميييين، غيكون الثلج فايفران
الام: يمكن
سهام: وفينهم
الام: كبي كاس اتاي.. مقلتيليش على دارت واش دخلي ليها؟! باش مرة أخرى متبقايش تقوليلي معلمتكش
سهام: اختي 20 ألف ريال جاتني قاسحة منين كيجيوك نتي لفلوس! ولكن حݣا راه بناتك بخيرهم
الام: يا سهام قاعدتك هي قاعدتك غير تنقزي فالهضرة انا مكنهضرش على 20 كنهضر غير على د4 الاف
سهام: اه هاديك بغيتها عيني فداك الدبليج غير ديريني اللولة ناخدها
الام: على حساب القرعة فيمن تجي (حاضية تيليفونها بطرف عينها مبينة الهدوء ولكن كانت مفقوووسة من لداخل كتغلي….)
~~~~~~~~
ملاك: (عصبتها خديجة بداك لبكى هزت تيليفونها اخر حل بقى ليها مجاوبتش المرة اللولة ورجعت صونات جاوب ولدها بقات كتلطف معاه عاد عطاها مو) مريم صافا؟!!
مريم: الحمد لله اختي رجعتو من افران ولا مزال
ملاك: (عرفت هادي ختها نعيمة للي علمت كولشي راهم فايفران) مهم حم مزال حم
مريم: امالكي كتحنحني
مريم: هانتي سمعيني اختي بلا متخلعي ولا ضهشري طريق مقطوعة وغريسكيو الا رجعنا
مريم: بالصح؟!
ملاك: اه معرفت منقول لماما وعاد بابا مهم انا فكرت كاين حل واحد غنقولهم جينا عندك
مريم: اوا اجيو
ملاك: وااا حتى لازرو مقطوعة المشكل فبابا
مريم: هو غيتقلق ويغوت عليكم ولكن شنو غيديرو طيرو
ملاك: مكاينش شي حل اخر دوزنا وقت زوين (شاف فيها يوسف تبسم ورجعت تبسمت معاه) زوين بزااف هدا سبب كااافي باش نتحملو الغضب ديالو ههه
مريم: اوا وماما
ملاك: غنخليها ليك نتي كتعرفيلها كتر منا كاملين غير قوليهالها نتي انا مقدرتش نقولها ليها والله
مريم: اممم واخا لالة ولكن الا تقادات طريق
ملاك: (خرجت عينها) ضرووري غنمشي
مريم: لا غتجي عندي
ملاك: والا ماااا حلوش طريق (بقات مقوسة عينها حيت دغيا كيحلو طريق لازرو)
مريم: معرفت
ملاك: والا جينا معطلين وراجلك شنو نديرو معاه؟! انا راه كتحشم منو بزاف
مريم: نتي عارفة عبد الحميد كيف كندير ليه واصلا هو كيجي معطل يعني غدخلو تنعسو نيشان
ملاك: بفففف نهار بغينا نشطو الطرقان تسدو ههه (نسات يوسف حداها) وكتقوليلي راه عندك زهر تا منين جا لبا هاد زهر
مريم: هدا ميكون غير زهر خديجة لعوج ههه
ملاك: هههه (تفكرت يوسف وهي تجمع الظحكة) باشما جاوبيني باش نهضر مع ماما
مريم: واخا.. فين تباتو؟!
ملاك: غنشوف شي اوطيل ضرووري (كتشوف ايفران) الجو غزااااااال هنا كتحمقني افران وهي هاكا وعاد المنظر
مريم: هههه كنتخيلك غدا شنو تابعك ولكن عيشي هاد سويعات حيت غدا غيقلب عليك بابا الدار
ملاك: هههه التغيير مرة مرة مفيييد ديما تبقاو زوينين.. (قطعت كان يوسف وصل قدام مخيمات كيتكراو وكان تماك للي وصلو قبل منهم.. شافت فيوسف)
غينوضو عليا القربالة فالدار
يوسف: ماااامـ… الغلط ديالي صراحة
ملاك: لا لا بلعكس معليش غيتقلق منا ومن حقو ولكن حتى انا دوزت وقت زوين (تبسمت) يستاهل (ضارت عند خديجة) ولا لا!!
خديجة: (شافت فيها بخوف حالة فمها وكانت في حالة ذعر)
ملاك: (رجعت شافت القدام) غاا بووومة، متخافيش غنقولو انا للي ديتك ونتي مبغيتيش ولكن خفتي تخليني بوحدي مهم انا نعرف شنو نقولو غير بلا متخافي…
خرجو من الطوموبيل بالزربة مخبعين من الثلج شافت ملاك فسمية كان مكتوب ((comping Farah)) لقات تماك الناس للي كانو فصباح معاهم، غير شافتها غيثة تمات جاية عندها ملاك هازة راسها كتشوفها بحكم طويلة عليها
غيثة: فين كنتي املاك ؟!
ملاك: غير تما وصافي
غيثة: اورطيغا حتى هو خرجو تيقلب عليك.. جا معاكم؟!!
ملاك: شنو هاد سمية عاود؟!
غيثة: ههه هاكا عرفتو منين كنت صغيرة قوليلي واش هو برا مع يوسف؟؟
ملاك: لا هو كان رجع بوحدو.. (تبسمت معاها وهي كتسب فيه من لداخل)
غيثة: بالصصصصح!!! اممم وغيرجع!!
ملاك: (طانزة) مقاليش واش يرجع معلمنيش
غيثة: اوكي انا نسول يويو حيت كنا راكبين معاه ومنين وقع هاكا صونا على أنس هو جابنا وقال غنلحق عليكم
ملاك: (مشات وهي بقات كتشوف فيها)
معرفت اش عاجبها فداك العزي الجحمووم الله يعطيه موصيييبااا
(شافت فختها للي جاية وشنايفها بياضو بالخلعة) أمالكي اخديجة؟!
خديجة: خفت املاك واش نتي مكتخافيش راه بابا يقتلنا يا ختي على هاد لبرودية للي فيك
ملاك: وشنو غربح الا خفت صافي للي عطا الله هو هدا واش حنا كنا ناويين على شي مباتة
خديجة: اوا وبابا؟!
ملاك: راني قلت ليك شنو غنقولو
خديجة: ويلا ردني لعمر
ملاك: لبعااابع لواااه، واش هادشي لعب دراري صغار غي حيت غضب غيردك لراجلك وفكري شوية بعقلك اصاحبتي شي مرات غير كتبقاي تخوري
خديجة: اش دانا لشي افران
ملاك؛ وصافي حتى نتي، خلينا نكملو هاد نهار زوين شوية براكة غير الخلعة للي شفتها فديك الغابة الكحلة تفووو
خديجة: خاصك ذبيييحة وكان متلفتيش وكان راحنا دابا فصفرو
ملاك: اااخر مرة نعاود نجيبك معايا اخديجة غير كوني هانية
خديجة: ونتي ضامنة راسك باقية تخرجي
ملاك: مرة جاية غنبقى نعلمهم وصافي علاش مالي منخرجش، ها الناس خارجين كيظحكو شوية ويفوجو بادب واحترام ويرجعو لديورهم شنو وقع لهم
خديجة: (كتشوف فختها صغيرة ولكن عادي تكون شجاعة عليها راها ديال راسها ماشي وحدة مزال مزوجة واخرتها لقب مطلقة لا خدمة لا ردمة لا شخصية من لفوق) معيطاتلكش مريم مزال محاوبتك شنو قالت ماما
ملاك: مزال، واا صافي بلا متخافي غنقولو ليه قنطنا مشينا عند ختنا ومحسابناش يشدنا الثلج ويييك ويييييك شحال فيك
خديجة: بففففف يااا ربي فكها من عندك
شي واحد من دوك الشلة نطق انه مبقاوش ليشومبر لكولشي حيت واخا دارو حجوزات ولكن بزاف كل واحد فيهم جاب معاه الزايد
ملاك: (شافت فخديجة للي خبطت فخاضها عاود وكتويل) عفاك غير نتي متبقايش دعي!!
خديجة: واش أنا للي عمرت لوطيل اويلي استغفر الله فين نباتو وفين نعطيو الراس
ملاك: يااااااي إلهي وكان ممشيناش انا وياك للحمام نقول راكي كتدعي معانا ونتي مزال على جنابة… ها لعاار غير سكتي حنا ماشي بووحدنا بحال بحال هاد الناس غنمشيو مجموعين لبلاصة اخرى غير متبقايش تويلي وتخبطي راه كنكره هاد تخربييييق…..
كانو الناس ديال داك الاوطيل دغيا لقاو ليهم الحل وصيفطو البقية لمبيت اخر وللي قرر يمشي يكري دار راه مشا وللي بغا يبقى مجموع راه بقا..
يوسف تم جاي وختو من موراه ملامحها معصبة حيت مخلاهاش تبقى بايتة هنا، وحتى صحباتها مغيمشيوش حيت كل وحدة وبيمن مرتابطة.. مشاو شي وحدين اخرين معندهاش معاهم شي معرفة ركبت معاه لقدام وهي كتنتر مشاو غير بشوية فطريق حتى جا ميساج لملاك
مريم: ماما غتقتلك ههه
ملاك: (تبسمت ورجعت كتبت لميساج)
موتة وحدة للي كاينة اللهم نعيش حياتي ههه
(ردت التيليفون لصاكها وعندها واحد الطاقة إيجابية كبيرة لدرجة عامياها على شنو غيوقع منين ترجع للدار عارفة مها غتحاول تقنع باها وعارفاه مغيقبلش ولكن غيتأكد انه كانو مع ختهم.. وهادشي للي مخليها مرتاحة نسبيا وصلو لداك المبيت داير بحال شكل فيلا ولكن فيها بزاف ديال ليشومبر ريسطو ديسكو_بار.. مع دخلو شافت ختو تقلبت ورجعت كظحك، استقبلهم واحد كيشرح ليهم ثمن لبيوت هو بغا 2 وحدة كبيرة فيها 3 لبلايص ووحدة فيها غير بلاصة ومعندوش مشكل يشارك مع شي دراري الا كان)
ملاك: بشحال لبلاصة؟!
يوسف: (شاف فملاك باش تسكت)
ملاك: (جبدت بزطامها) لا ضرووووري نخلص علية وعلى ختي
يوسف: ههه ملاك
ملاك: والله كنهضر بالصح
يوسف: واخ انا نتحاسب معاه ونجي تعطيني لفلوس
ملاك: (حلت بزطامها كاينة 70 درهم كتغرد تماك خرجت عينها.. كان قدامها غير تدفع الصنطيحة والجبهة وللي ليها ليها)
لا يوسف غير قولي عفاك مكنبغيش نكون متقلة على شي واحد ونتا خيرك سابق وبزاف واااا عفاك خليني على خاطري
يوسف: (قرب حداها حط يدو على بزطامها وهي مكملة فالتمثيلية) ملاك حنا مبيناتناش صافي مرة أخرى وخلصي على راسك وحتى علية واخا
ملاك: تأأأ!!
يوسف: وصاااافي غيطيرو لينا بشنابر ونبقاو تنقلبو عاود
ملاك: عيقتي ايوسف والله.. صافي واخا ولكن اخر مرة.. انا كنقووولك
يوسف: ههه (مشا كيكمل الإجراءات جا طلب ليها كارت ناسيونال ولكن تحججت انها نساتها مجابتهاش خدا غير ديال خديجة حيت محكروش بزاف.. ضارت كتشوف الديزاين حتى كيبان ليها جالس طالق رجليه مفرقهم شوية وغيثة حداه وشي بنت اخرى.. كانت كتسناه يشوف فيها باش تخسر كمارتها ساااعة والو.. وراهم يوسف الشومبر طلعت هي وختها مع دخلو شافو منظر زويين 3 ديال لبلايص وحدة مقابلة مع 2 والبيت كان مصرووع بزواق والديكورات وعاد المنظر اهم حاجة مع حطو رجليهم جاهم لبيت سخون كان مطلوق الشوفاج ينعسو عريانات ݣاع ميحسو بالبرد للي برا مشات ملاك حدا باب لبالكون للي كان من الزاج شافت لاطيراس وهي عامرة ثلج تبسمت)
ملاك: هدا هو للي باغية فهاد الدنيا بيت وناموسية يكونو ديالي وباي مسدود علية
خديجة؛ هههه هادشي للي خلاني نوض نتزوج حتى كنتصدم ببيت فسطح حالتو
ملاك: انا منك وشفت داك الديكور من نهار اللول نهرب
خديجة: صعييييب اختي غير كتقولي
ملاك: (تكات فنموسية للي جاية اونفاص ليهم) تنعس حداك غيثة باش متقولش عزلناها وخليناها تنعس بوحدها
خديجة: شحال خفيفة ديك لبنت
ملاك: قزقازة بزاااف تقولي يوسف ماشي خوها هو رزانة وتباتة
خديجة: دبا تسمعك..
ملاك: (هزت كتافها ممسوقاش) اللللللله على راحة، دابا بيني وبينك هادشي ديال هاد نهار ماشي خسارة فيه شي غوتة..
خديجة: هههه كااينة
الام: (بقات مبلوكية العشية تعاشات وكولشي كيسول على بناتها.. صونات على راجلها مجاوبهاش صيفطات ميساج)
لبنات راني صيفطتهم يباتو عند ختهم فأزرو ويبدلو الجو شوية
(صيفطات الميساج ويدها على قلبها كتسنى دابا يصوني دابا يصوني وااالو.. دخلت لبيتها صونات على ملاك وهي معصبة)
ملاك: (قفزت منين شافت لابيل ديال مها كانت غيثة وصاحبتها معاها وخديجة متكية فبلاصتها ناضت خرجت كتزرب حتى بدات تجري دغيا عمرات لفيلا ملقات غير تخرج برا جاوبت بالزربة قبل متقطع)
الوو
الام: الا بقات فيك يا الكلبة يا بنت لكلاب
ملاك: أماما غير نفهمك
الام: اش عند مك متقوولي ولكن لافوت من اللول ديالي يانا للي طلقت ليك..
ملاك: واماااما والله مكنت عوالة على شي مباتة انا معرفتش الثلج غيطيح اليوم
الام؛ منين بدا يطيح يا الجيفة ديك الساع شدو طريق
ملاك: والله ملقينا شي طرونسبوور شنو قال بابا؟!
الام: كتخافي متحشمي حسابلك الا دوزها باك انا ندوزها.. (زادت خفضت صوتها) فين بايتين
ملاك: ها.. عند مريم فأزرو
الام: الله يمسخك يا لحمارة ومزال زايدة فيه والله يا مك لا بقات فيك فين بايتين؟!
ملاك: والله اماما غير طريق مقطوعة حنا فلوطيل ندير معاك ݣاع أبيل فيديو شوفي
الام: باك يصوني تقولو عند ختك تفوت 9 متجاوبيهش
ملاك: اه واخا، شنو قال؟!
الام: وختك فينها؟!
ملاك: معايا
الام: غير على ما تجي يا بنتي ونوريك مزيااان
(قطعت مفقوسة رجعت صونات على راجلها مجاوبش)
باينة حاطو بعيد عاود…
(خرجت جلست مع مرت شيخها)
لبنات مشاو لعند ختهم مريم
الجدة: من الخير بنتك خديجة تبدل الجو شوية قبل متبدا تسمع لهضوور
الام: داكشي نيت، واصلا الهضرة للي غتوصلها غترجع لمولاها بالضووبل.. انا من ديما معلماهم ميردوش لكلام ولكن فهادشي غنخليها ترد كيف بغات
الجدة: عندك ديك خديجة ممقرساااش ازهرة شتي ملاك متخافيش عليها ولكن خديجة
الام: اش غنقولك الا متقرستش مزيان فهادشي للي وقع ليها انا مبقالي منقرس فيها ونعلمها… (ملاك كتصوني ابيل فيديو، وكتقطع عليها) نشوفو باها شنو غيدير هي بغات ترجع تقرا
الجدة: اش عندها مدير بشي قراية تعلم ليها شي صنعة حسن
الام: هي تختار يا ربي غير يخليها وكان
الجدة: كما قلتي يا ربي غير يخليها….
ملاك: (صيفطات ليها اوديو) عفاك اماما متقلقيش، وغير فهمي بابا والله مدرناها بلعناي كنتسناو غير الثلج يحبس باش نمشيو لعند مريم لأزرو (صاطت بيدها على ريحة الݣارو للي شماتها)
عفاك متقلقيش….
ملاك: (كتنقز بالبرد تسخن يد ويد كتشد بيه التيليفون مديرونجيا بريحة الݣارو.. والو مها مابغاتش تجوابها عيات تصيفطلها الاوديو ليميساجات ولكن رتاحت منين عاودات ليها الحقيقة وعارفة مها غتوقف معاها رجعت صونات على مريم شكراتها على الوقفة معاها وواعداتها غير يوقف الثلج غتهبط عندها لأزرو
ملاك: الا كوني هانية…
مريم: واااعنداااك اختي انا نتسناكم وباشما علميني قوليلي واش نتوما بوحدكم
ملاك: اه بوحدنا راني قلت ليك جينا بغينا غير نفوجو…
قطعت ورجعت صونات على مها أبيل ڤيديو والو غير كتقطع عليها)
وغير جاوبي نوريك فين انا
(ضارت باش تدخل غلبها البرد وهي كتكتب ميساج لمها حتى دخلت فشي واحد هزت راسها غير لقاتو غووبشت كتطلع وتهبط فيه بكل كره اما هو هاز راسو كان لابس جاكيط وداير بوني حنا عينو لعندها لاح الݣارو وكان مبعدتش رجلها كان فيجب فوقها وكانت نفس الشوفة فيها او اكتر)
يخ على بنااااادم..
اورطيݣا: (بقرف) غتبقاي مبلݣة فية
ملاك: على زيييينك، واش نتا مريض للي كتهضر معايا هاكا
اورطيݣا: (بلكنة فاسية ولكن مخضرة) وغبري من قداامي نوريك لمريض كيداااير
ملاك: (صاطت بنيفها وحيدت من حداه ميمكنش شحال كتكرهو لقات يوسف واقف مع شي دراري شاد قهوة فيديو تبسمت)
الحمد لله على نعمه يوسف وصافي (مشات عندو طلت برويسها مرققة صوتها)
يوسف
يوسف: اه ملاك.. (شاف فداك الشخص) سمحلي (مشا عندها) نهار معكس هدا
ملاك: ههه شوية
يوسف: هضرتي مع مالين الدار طمنتيهم عليكم
ملاك: اه صافي قاديت الامور
يوسف: نتمنى مينوضش ليك شي صدااع حيت بالصح مغيعجبنيش الحال
ملاك: لا لا ان شاء الله مايكون والو.. غير خديجة شوية مرعوودة مزال عاقلة على بابا هادي 10 سنين
يوسف: (بتسائل) مثلا!!!
ملاك: راك عارف بحال أي أب كيخاف على بناتو مممنوع الخروج ممنوع لمباتة برا واخا تكون العائلة ممنووووعة اصلا متناقشهاش حتى معاه حتى صحابات ممنوعين كيقولنا نتوما جيش دلبنات اش ديرو بشي صحابات ههه وهاد النوع دلمسافرات راه من المحرمات عندمنا
يوسف: من جهة مزيان هادشي
ملاك: (حركت راسها باه) صراحة كنفتاخر حيت انا بنت بابا.. هو حمانا من بزاف دلحوايج خاايبة غير حنا الله يهدينا
يوسف: ولكن قاسح شوية
ملاك: هو هكاك داير التركيبة ديالو هكاك دايرة شنو يدير ولكن عمرو خلانا ناقصنا شي حاجة الحمد لله
يوسف: وعلاش خديجة تتقول تزوجت غي حيت هربت منهم
ملاك: (فخاطرها الله يعطيها اللقوى) هه خديجة كانت باغيا تعيش مراهقتها شوية وبابا وقف ليها فالخلق وهي تنوض تزوج.. تزوجات واخا بابا مقبلش عيا فيها راك غير كضيعي راسك ولكن حيت شافها لاصقة فيه قالها ضبري راسك
يوسف: اممم دونك هي للي غلطت
ملاك: اه.. ولكن الدنيا هي هادي مرة تغلط مرة تصحح غلاطك ميمكنش كولشي يمشي على هوانا
يوسف: بالصح.. (شير لاماشين) قهوة ؟!
ملاك: اهااااه واخا
يوسف: (تمشاو بجوج مشات تجيب قهوة وهوما كيهضرو كتحس بيه باغي يعرف كولشي واخا هي كتهرب وكتبينلو انهم احسن عائلة…)
صراحة هادشي للي ولينا تنشوفو دابا لا لبنات ولا دراري خاص يكون شي اب بحال باباك فكل الدار باش ياله ياله يجيب التعادل
ملاك: ضروري شي واحد قاسح واحد مرطب
يوسف: انا غنكون قاسح مع ولادي
ملاك: ههه وانا غنكون مرطبة…
بقاو مجمعين شحال حتى هبطت ختها عندها وتعابير الخلعة مزال فيها للي شافها كيعرفها مستريسية ومخلوعة
خديجة: نتي هنا وانا كنتسناك لفوق
ملاك: (خرجت عينها كتهضر وهي سادة سنانها) صوني علية ديك الساعة وغتعرفيني فين انا
خديجة: شنو قالت ليك ماما
ملاك: (خرجت عينها فيها مكتبغيش تهضر قدام يوسف) والو صافي مقالت والو
خديجة؛ كفاش صافي عيطتلي مخلات فية غير اللي نسات وحالفة فينا
ملاك: تأ (هزت حاجبها معاجبهاش الحال مهبطة راسها)
يوسف: معليش هي غير خافت عليكم
خديجة: وييييه موصيبة وخلاص
ملاك: (بغات تدور فيها عصبتها بهاد البهلان الخاوي، ولكن مابغاتش تطيح بيها قدام شي واحد كوميم راها كبر منها شي حاجة كتبقى بيناتهم)
يوسف: الا حبس الثلج نخرجو ندربو ضويرة
ملاك: اهاااه
اورطيݣا: يوسف
يوسف: سمحولي انا جاي
ملاك: (غير مشا ضارت عند ختها مكشكشة) مفهمتش نتي مالك؟!
خديجة: مالي؟!
ملاك: بزاااف على هاد الخوف اااو من قبيلة وانا كنقولك صافي صافي كولشي غيكون مزيان صااافي ونتي غير مكتويلي وتبكااااي عيقتي، وقدامو عاد، مالكي على هادشي فراااني شي شوية اخديييجة ݣاع للي هنا عرفوونا هاربين من الدار
خديجة: (معجبهاش الحال تغوت عليها) راه خفت وصافي
ملاك: ݣاع خفنا ومكنديروش هاد الحالة راه مخاصش تبقاي تبيني لبنادم راكي متفتفة وعندك شي مشكل شي حاجة غنفكوها بجوج ماشي بالضرورة العاااالم كامل يعرف
خديجة: (عمرو عينيها بدموع) ياك اختي
ملاك: بففف أخديجة انا كنفهمك ماشي بالضرورة العالم يعرف شنو عندنا ماما هضرنا معاها انا ومريم وتحل كولشي بابا الا غوت غنقولو أنا للي بقيت كنصدعك ولسقت فيك ودرتيلي خاطري ومشينا شتي وكان مكانتش مسلكة ماما غتقولي يحبس الثلج اجي
خديجة: (حنات راسها جات شي بنت كتسول ملاك على شي حاجة وهي بقات كتمشى حتى خرجت فلاطيراس مغطية من الجهة الأخرى جالسين شي وحدين مشافتش وهي جرت كرسي جلست كتشوف الثلج للي مزال مجهد والبرد فيها… من نهار تزوجت وعرفت الواقع المر ديالها مع راجلها مقدرتش تخلى عليه باسم الحب وحتى متبينش ان اختيارها كان غلط بحكم كولشي كان ضدها فالاول، وكانت غتكون بنت لحرام الا طلقاتو غي حيت فقير واخا هو ظحك عليها ومقالهاش حالتو بالظبط ولكن من نهار بداو خوتاتها كيصرفو عليها وكل شهر وحدة كتعطيها فلوس للي فيهم حمامها وسقاطة للي كتشهى وكدخلهم بتخبية بحال مدخلة لحشيش وحوايجها ولات كتحس بالذل وقيمتها لتحت بين خوتاتها، واخا مكانوش مبينين ليها وكيتعاملو عادي، الا هي داك النقص ديما ملازمها.. لدرجة كتخاف تهضر مع شي وحدة ناقصة باش ميقطعوش عليها لفلوس.. مسحت دموعها لي كانو شلال حيت نفس الاحساس حساتو دابا مع ختها صغيرة للي وصفتها بالمتفتفة قصدت ولا لا مغيتبدل واالو فاحساسها انها غير وحدة بدون شخصية ومعندها قيييمة…)
غيثة: (مع ملاك) قوليلي الصراحة لبنات كاملين تيسولو واش بينك وبين خويا يوسف شي حاجة؟!
ملاك: شكون هاد لبنات
غيثة: متعرفيهمش
ملاك: يعني حتى هوما مكيعرفونيش غير فضول منهم بغاو يبقششو فشي حاجة مكتخصهمش
غيثة: (مفهمتش واش حتى هي جمعاتها معاهم ولا تزيد تسول ولا تسكت) امم!!.
ملاك: قولهم ياكلو اللوز (بقات كتشرب من القهوة)
غيثة: كفاش!!.
جات وحدة من دوك لبنات كانت زوينة وغير لميكاب للي دايرة واعر مبينها بحال شي مودل عاد لباس واخا كان لموت دلبرد لابسة داكشي خفيييف
ا…: قوليلي نتي (شيرت بصبعها بطريقة مستفزة من فوقها لتحتها) هي صاحبة يوسف؟!
ملاك: (تبسمت) ياله لقيتيني كنقول لغيثة خاصكم تاكلو اللوز
ا…: What!!
شنو دخل اللوز فالهضرة؟!
ملاك: دابا واحد جدي باقي حي تبارك الله عمرو شي 100 عام كان كياكل االلوز بزااف
ا…: (باستغراب) ومن بعد اللوز للي خلاه عايش لدابا
ملاك: لا حيت كان كيديها فك*** ومكيبقشش فحوايج غيرو
تصدمو دوك لبنات واورطيݣا داز من حداها بلهلا يطريه ليه تبسم
ملاك: كولي اللوز راه مزيان للصحة
( طلعتها وهبطتها)
وهاد المرة نيفك خشيه فيك ماشي فحيااتي بقات فالطووولة والعقل وااالو!!
( عوجت فمها وتمات ماشية من حداهم كتقلب على ختها)
ا…: واش يوسف بعقلو مصاحب مع هاد الهمجية؟!! فولييييغ
غيثة: مااام.. صراحة ماشي شغلنا مكانش خاص نسولووها
ا…: هادي للي قلتي مأدبة
غيثة: مدخلينيش فهادشي اخر مرة نعاود نسول ليك
(شافت اورطيݣا جالس مع شي وحدة وهي مرة مرة كضرب فخضو منين كتبغي ظحك)
هدا مكيعيااش كل شوية مع وحدة
ا…: (ضارت تشوف) جالس عادي ماشي بالضرورة غير الا ظحك مع شي وحدة صافي راها صاحبتو
غيثة: اممم
ا…: خوك مزال داير ليك الزيار
غيثة: بزاااااف حتى خنقني والله مكنعرفش نتحرك
ا…: شوفي نصيحة نتي زوينة بزااف اغيثة بعدي من هاد الشلة وختاري للي بغيتي
غيثة: (شافت فاورطيݣا بحزن) معرفتش اصلا متنفكرش کاع فهادشي ولا فشي واحد (رجعت شافت فيها) انا باغيا غير لبس على خاطري ونسهر معاكم سي تووو…
ا…: يوسف هادشي لي غيخرج عليه ويخليه فالتالي الزيارة ديال واالو بحال كابر فشي عائلة معقدة،، وعاد جايب كلوشارا باغي يدخلها للفاميلة
غيثة: صراحة كان جاي مع ياقوت بزاااف ولكن هي…
ا…: نتي معارفة والو
غيثة: ومبغيتش نعرف بين اي جوج متتفهميش شنو واقع بيناتهم مهم (بملل) مغنخرجووش؟!!!!
ا…: لا غنخرجو تنتسناو غير الثلج يخفاف وتقاد طريق فالليل كاين صواري غزاالة فداك لوطيل
غيثة: ياااااي
ا…: عقلك غير فالنشاط
غيثة: وكاين ما احسن من النشاااط….
غربت الشمس وكل واحد فين مجمع ومعامن ملاك جالسة حدا ختها ولكن عقلها مع مها للي كترغبها باش متقلقش منهم وانهم حتى هوما كانو محتاجين خريجة بحال هادي يفوجو بيها ويكسرو داك الروتين للي عايشين فيه.. اما خديجة راجلها منين سمع صوت يوسف وهو صاعر عيا يصوني يصيفط فلميساجات واالو مكتجاوبش..
ملاك: جاني الجوع
خديجة: (لا رد هي مزال مقلقة منها ولوخرا مكيناش فهاد العالم حيت محساتش براسها غالطة)
ملاك: (صونات على مها وجاوبت) حشومة عليك اماما من قبيلة وانا كنصوني عليك (شافت فيها خديجة)
الام: هانا شنو بغيتي؟!
ملاك: وعفاك اماما متقلقيش.. (لا رد) جا بابا قلتيها ليه؟!
الام: جا بالزربة بدل ومشا
ملاك: فين؟! (وقفت مخلوعة) واش جاي عندنا؟!
الام: من زهركم مشا للزاوية هاد الليلة ولكن مغيعجبوش الحال
ملاك: (تبسمت) واااااا زهر هدا (شافت فخديجة) بايت فالزاوية
الام: اوا ومنين يجي شنو نقولو؟!
ملاك: هانتي اصلا هو كيجي حتى لمور لفجر كينعس ديك الساعة ولا جوج وكيمشي للقهوة لكري شكون عرفو اصلا حنا مكاينينش فالدار واش بايتين ولا لا
خديجة: ههه
الام: نكذب على باك ابنت الحرام؟!
ملاك: هو اصلا مغيسولكش
الام: منين جبتي هاد التحراميات منييييييين
ملاك: ههه من بعد ونعلمك ازين
الام: وبااااز ابنتي بااااز..
ملاك: ههه ناريخهفنا على والو خديجة كانت غتبول على حوايجها قالك بابا يرجعها لعمر والله ويرجعها حتى رجع معاها يا حبس يا صبيطار
الام: صباح يشدكم هنا
ملاك: لعشية عفاك عفاااك!! (مغمضة عين كتسنى ردة فعلها حتى سمعت طيط طيط ديك شافت فالتيليفون) قطعت اه اه بنادم شحال قاسح
خديجة: شنو قالت
ملاك: شتي خفتي على والو اصلا بابا مكاينش ومسايقش لخبار اصلا حنا برا الدار
خديجة: اوا شنو ندير ماشي مطورة بحالك وبحال لوخرين غير ضعانة ومعندها شخصية
ملاك: (بتقالة) يااااه على هضرة كيف دايرة.. ازمر نتي عندك شخصية حسن منا كاملين غير باش طلقي راجلك للي كنتي كتحماقي عليه وحطيتيه سطل بلا تقرقيب راكي حسن منا وبزاااف
خديجة: (دغيا طلعت ليها لمورال) زعما!!
ملاك: والله راه اصعب قرار هو طلاق ونتي مفكرتيش فيه حتى ساعة قلتي طلاق واخا الكلب عيا يرغب ويزاوݣ بلعكس إنتي كدة
(دارت ليها إشارة 👍)
فية الجوع!!
خديجة: (ناضت من بلاصتها حلت باب لبالكون) واقلة الثلج حبس؟
ملاك: سمعت كاينة شي صوارية نخرجو معاهم
خديجة: (بلا تفكير) اه
ملاك: مصاب يكون فيها شي عشا دلفريع وكان غير دارونا الجزء الثاني ديال شوا كان وااااعر ديك الشرمولة مابغاتش تنسالي
خديجة: ههه همك فكرشك
ملاك: (زفرت) عرفتي قبيلة تخاريت مع واحد المونيكة قبيلة تفوو مكنحملش للي يحتاقرني ولا يطيح مني وانا قابلة الاستفزاز
خديجة: ݣاع متديها فيهم
ملاك: كــــيّتهم شكون سوق ليهم والله للي قلب علية حتى يلقاني…
غير تقدات طريق عن طريق الجماعات باش الطموبيلات يتحركو اتفقوا يتلقاو فاوطيل**** على حساب صواري للي كانو متافقين عليها عشا من بعد ينشطو شوية، ركبو فالطوموبيلات وتحركو قبل مشاو لريسطو جاية فوسط ايفران جلسو كݣروب واحد مقادين ليهم طوابل فخط واحد عاطيين ديكور وللي تماك مستمتعيش مع المجموعة للي مطلعينها نشاط وحيوووح، ملاك وخديجة مجمعين مع بعضياتهم مع هزت راسها شافت قدامها كان جالس كحل العفطة قدامها حاني رراسو وغيثة كتهضر فودنو وظحك وهو كيتبسم حيت صدااع عوجت فمها كتبرݣم، شافت فيوسف لقاتو كيشوف فختو شوفات ديال لقتيلة جامع فمو باينة كيتغدد
ملاك: حم يوسف
يوسف: (بملامح غاضبة شافها) وي
ملاك: (سكتها بهاد الملامح معرفت متقول) ماا والو
يوسف: pardon، شنو درتي مع ماماك
ملاك: كولشي مزيان.. مالك؟!
يوسف: بففف والو.. (الازعاج باين عليه) مديريش فبالك.. (تحط لعشا للي هي طلبت بورغر وختها بيتزا.. كولشي كيتعشا كملو ملاك طارت لاكيس خلصت عليها وعلى ختها بكارت ݣيشي رجعت وبلعاني حتى وصلت حداهم عاد جبدت بزطامها دارت كارت ݣيشي قدامهم للي شافها وللي لا مهم يعرفو راها خلصت برزقها ماشي ملسقة على يوسف وجايبها يصرف عليها…)
يوسف: (جلست حداه) باااز الآلة
ملاك: هه وبزااف عليك
يوسف: خلصتي علية ياك؟!
ملاك: (تبسمت) ضرووووري
يوسف: الا!!!!
ملاك: علاش؟!
يوسف: واش نتي حمقة؟!
ملاك: (بقات كتشوف فيه هي اصلا مخلصاتش وهو كيهضر بجدية وحسابلها غير كيظحك)
يوسف: غنتقلق منك الا خلصتي
ملاك: وانا نقدر على تقليقتك صراحة مخلصتش هه
يوسف: خيس!!! ههه قلت ليك نتي جلدة
ملاك: ههه معرفت منين نشدك (بقاو ظاحكين وعنين عليهم..)
~~~~~`~`
مريم: شششت سكت اداك البعلووك غتصدع خولاتك
حسن: علاش جاو؟!
مريم: اه جاو عياو يتسناوك ونعسوا
حسن: مفخباريش
مريم: هانا قلتها ليك مهدي وأمين نوضو تنعسوو غدا تابعكم لماتش ديالكم
مهدي: واش جاو بالصح اماما؟!
مريم: (كتشوف فيهم عيات تقري فيهم)
تحركو نوضو
حسن: ياله نووضو (مع غوت عليهم جمعو الوقفة وناضو.. شاف فيها) ياله نوضو نعسو حتى حنا
مريم: غير سير نتا انا لحق عليك
حسن: لا بغيت نعس معاك
مريم: (شافت فيه)
مكتقالش هاكا بففف عييت من هادشي، والله حتى عيييت
(ناضت مقلقة منو كما العادة لا كلمة زوينة لا دلع لا رومانسية عندو غير نيشان باش جاي باش ضاااير….)
ناضو الشلة هبطو لصواري ملاك وختها غير كيشوفو بجوج وتابعييينهم يشوفو فين غيوصل هادشي أول مرة يدخلو لهاد العالم ديال الديسكوتيك وجود الصخب وضواااو
خديجة: (كتغوت فودن ختها) واش كاين هنا شراب؟!
ملاك: معرفتش.. موحااااااااال علاه باغية ضربي شي كويسات
خديجة: ههه باش نسا هم عمر
ملاك: شويني فيييه هداك غير ݣارو تنسايه بيه
خديجة: هه شوفي لبنات شنو لابسين عاد كانو لفوق مستورين، تأ حنا شنو لابسين
ملاك: (شافت فراسها وفختها) ههه هااانية حتى نتي راكي لابسة زوين
خديجة: واش متأكدة مكاينش شراب؟!
ملاك: علاش ؟!
خديجة: راني مزالة مزوجة زعما
ملاك: هههه ومن مور ما طلقي هانية ياك؟!! هههه
خديجة: ههه يمكن..
ملاك: (بقات كتشوف فدوك الأجواء الضو الطاغي زرق عاد الأضواء لملونة جليسات فشكل وللي كيبقى واقف وكل واحد شنو كيشرب وللي كيتمايل يشطح وحتى لݣور كاينين مرة كتكون الزدحة مرة موسيقى هادئة..
بقات كتفوه)
جاني نعاس
خديجة: حتى انا
ملاك: ولكن منسخاش نمشي.. (بقاو غير كيشوفو ويبرݣݣو بعينييهم كاين شي لقطات فين شي كوبل كيتباسو كدور تشوف فخديجة كتلقاها حالة فمها فيهم ظحكت على منظرها) نمشيو؟!!!
خديجة: وشكون يدينا؟!
ملاك: نشوفو شي تاكسي ماشي بالضرورة يدينا شي واحد
خديجة: الااا يوقعنا بحال كيف وقع ليك صباح
ملاك: هاديك غابة وحنا دابا فمدينة (جبدت التيليفون لقاتها 2)
وييييلي بزااف، (ناضو خرجو من تماك قبل ميخرجو)
تسناي هنا
(خرجت برا كان لمووت دلبرد ولبشار قلييييل ولمووووت دالسم، بقات كتقلب على تاكسي لقاتهم مساتفين فواحد القنت.. مشات رجعت عند ختها وهي كترعد بالبرد) راه كاينين ياله بالزربة
(هزت قرعة صغيرة ديال لما شربتها عاد خرجت عند ختها مشاو بالزربة هاربين من لبرد، ركبو فأول وحدة عطاتهم ملاك سمية ديال لبلاصة فين كاينين وزاد بيهم وهوما كيتعاودو على شنو شافو وكداز نهار حتى وصلو جبدت 20 درهم ومداتها ليه ضار شاف فيها)
…: شنو هادي؟!
ملاك: فلوس مالك!!
…: واش كطنزي الأخت؟!
ملاك: مكنطنزش (مفهمت والو) ردلي الصرف
…: ههه ومزال كتقولي نرد الصرف اختي، راه خاصك تعطيني 100 درهم..
ملاك: 100 درهم واخا تكون جايبني من صفرو!! من طنجة ومنعطيكش 100 درهم ههه سمعتي شنو قال 100 درهم!!!
ملاك: (حلات لباب منرفزة)
خرجي خرجي هذا حسابلو كنسكوهم
(تمات خارجة وحتى خديجة خرجت وللي غير كدور فعينيها خايفة خرج مول الطاكسي معصب ووقف عليها وقفت قدام هازة راسها فيه ودايرة يدها فجنبها)
ياك لباس ياك ما نخاااافو
….: حطي لفلوس
ملاك: (علات صوتها ما ربما شي واحد يسمعها حيت الطاكسي وقف بيهم حدا باب لڤيلا)
هاي هاي هاي وباغي تݣريسيني من لفوووق
(شنق عليها ولكن ماشي بقوة)
وااااااا عتقووو الروح باغي يݣريسيني ويقتلنيييييي، بغا يتعدا عليااااااا
خديجة: (كتخبط ففخاضها) اويلي اويلي اويلي…
….: حطيبي فلوسي دابا
ملاك: (بقات كتركل فيه باغية تشنق عليه ولكن طويل عليها موصلاتوش)
طلق الحمااار والله حتى نديك فين تربااااا ولكلبة اجي عاونيني فيه ونتي غير كتخبطي الله يعطييييك موصييبا
خديجة: (بقات كتجرو) طلق من لبنت واش هي قدك باش كضربها
اورطيغا: (جاي غير بسروال كيطمة وتيشورت كيجري عندهم جبد لاخر من كتفو) طلق من لبنت ابنادم
….: يخلصوني
ملاك: (كتقاد حوايجها) خلصتو وبغا يݣريسيني
اورطيغا: (رجع شاف فيه) واش خلصاتك؟!
…: (جبد 20 درهم) واش هادي خلصة جايبها من بار وهادشي للي عطاتني
ملاك: كفاش جايبها من بار الله ينعل جدك الحمار بزاااف عليك انا
اورطيغا: واااا هنيينا تا نتي
ملاك: لا مهانيااش ونتا غنعيط ليك لبوليس باش نوريك تمد يدك علية
…: راه من صباح وهي ضربني انا حدي وقفتها اخاي باش تعطيني فلوسي
ملاك: (كتصوني بنيتها على 19 ولكن كيطلع ليها الخط مشغول)
انا انوريك
(مرضياش خصوصا قدام هاد الشخص للي كتكرهو)
….: (عارف الا جاو لبوليس معندو ميردولو حقو بلعكس كتبان شيطانة وتقدر تلبسو بتحرش ولا ضرب ولا تلسق فيه شي مونتيف)
اورطيغا: شحال خاصك
ملاك: متخلص علية منخلص عليك
…: (بقا كيهضر بالشلحة وباينة مكره مفهمو حتى واحد) الله يخليها كوورسة
اورطيغا: سير اعشيري من هنا من اللول وري لبنادم الطريفة باش تتمشي ومتبقاش تعدى بيدك
….: (هز عينو شاف فلكاميرات فالمدخل)
ملاك: وداك الصرف؟!!!! متردوش؟!
اورطيغا: (شاف فيها مخسر كمارتو) بنادم سهران فلبرد باش يجيبها من فم سبع حتى يتلاقا مع بحالك يندمووه ويزيدو يكرهو مو فهاد لبلاد
ملاك: ماشي سووقك مقلتش ليك اجي دخل بيني وبينو وانا كنهضر على حقي وقادة بيييه
اورطيغا: (عض لسانو فاقساه الطاكسي مشا فحالو وهو عرف راسو الا هضر غيكمشها بشي صقلة زدح فيها وتم داخل)
ملاك: (حتى بعد) لعما تفووو على جنس والله مفهمت هاد نهار عيييت نزين فيه وزهري تلاقيت غير مع هاد لخرا تفوووو
خديجة: الحمد لله اختي بعدا دازت طريفة
ملاك: ياله نطلعو تفوووو تفوووو (تمات ماشية وختها من موراها مشاو لبيت) انا نهبط لتحت
خديجة: (كتموت بنعاس) فين ماشية عاود املاك
ملاك: غير لتحت نعسي نتي.. تصبحي على خير…
خديجة: متمشي حتى لشي بلاصة (حيدت حوايجها حيت لبيت فيه الشوفاج وكان داافي لدرجة نعست غير بكولون وديباردور..) تصبحي على خير…. ومتعطليييش….
هبطت لتحت بقات كدور مكاين حد حتى دخلت لصالة كان غير باب واحد فيها للي محلول، لقات جليسة زوينة ضو خفيف باين كانو شي كوبلات ولكن مع الضو متقدرش تفرز ملامحهم مزيان كان ميني بار تماك وموسيقى خفيفة..
مشات حتى لاونفاص لباب الزجاجي للي كان مسدود ولكن من برا ضاربين ضو زرق وحمر على لاطيراس للي عامرة ثلج جلست كتشوف فداك المنظر، كتفكر شنو داز عليها هاد نهار من الغابة لدابا عند الطاكسي تفكرت داك للي سماتو بينها وبين راسها كحلوش نسبة انه سمر كفاش كيعاملها وباين انه محملهاش وحتى هي كرهاتو واكثر، ولكن بحكم عقليتها كتبغي تكون إيجابية كتر وكتخلي اي حاجة خايبة متفكرش فيها تفكرت النقطة زوينة من هادشي كامل هو يوسف جبدت تيليفونها كانت بغات تصوني عليه ولكن خافت يكون مشغول هي مزال معرفاتو مزيان ومزال معرفت شنو كتعني ليه واخا كيبان مهتم وبزاااف ولكن مزال مقال والو اما عليها متنكرش انها ممعجباش بيه كولشي فيه زوين، اناقتو زينو بيضيتو كلامو تقالة ديالو خدمتو اهتمامو بيها كولشي فيه زوين تمنااتو يكون هو صاحب دعوتها ضارت كتشوف فالي حداها كانو عاطيينها لتشلقيم تنهدت ورجعت شافت فالثلج)
..هادشي كامل للي كنعيشو دابا وهاد الحرية غدا غتسالي وغرجع نداحس مع بنات عمي وخوهم وختي ونلبس حوايجي بالزربة فبيت ماما وعاد خديجة للي مفهمتش شنو بدلها مكانتش خوافة لهاد الدرجة كانت بحالهم مكتسمحش فحقعا ودابا غير مرعوودة خاصها تعاونها ترجع ثقتها فراسها..
(حسات بتقل اخر على كتافها وعارفة باها صعييبب واخا كيشجعو ختهم ولكن هو واش غيرجع يخليها تقرا!!! راه مستحييييل بقات كتفكر حتى وقف عليها السرباي)
…: مدموزيل تشربي شي حاجة؟!
ملاك: اممم بغيت حليب بلويزة كاين!!
…: اممم لا مكاينش تقدري تلقايه فلكافي ديالنا
ملاك:. شنو كاين هنا؟!
…: (تبسم دايرلها إشارة على ميني بار لقات داك اورطيغا نيت تماك واقف شرب شي حاجة)
ملاك: اممم شرااب!! لا اخويا انا مكنشربش
…: اوكي مدموزيل (مشا وهي دارت كتخسر كمارتها)
ملاك: (حست براسها تقيييل وتكات على الكرسي حست بالبرد ضربها وعظامها كيزيدو يتكووها بقات كتفكر حتى ظحكت بوحدها)
نهار بغيت نكون حرة مشيت لبار جوج مرات وعاد فنهار بغاو يتكرفسو علية.. صراحة بابا عذرتو منين ربطني حدااه انا ماشي قد شي حرية ولا شي زمر ههه قالك لبار من هادي للݣارو نيييت…. (حست بشي واحد جلس حداها ضارت لقاتو يوسف، تبسمت)
جيت؟!
يوسف: علاش معلمتينيش غتجيو؟!
ملاك: (زفرت) صراحة معجبنيش داكشي تماك جاني نعاس معنديش مع دوك الاجواء
يوسف: وعلى الاقل علميني ماشي ترجعو بووحدكم راكم أمانتي املاك
ملاك: مبغيتش نصدعك
يوسف: بااز.. تصادعتي مع شي واحد
ملاك: وصلها ليك داك كحل العفطة؟!
يوسف: كحل العفطة!!!!
ملاك: حم داك صااحبك
يوسف: اه
ملاك: (شرحاتلو على صيغتها هي) هادشي للي وقع
يوسف: هادشي علاش قلت ليك مترجعيش بوحدك.. فين ختك؟!
ملاك: نعسات
يوسف: حتى غيثة خليتها طلعات تنعس.. مجاكش نتي نعاس؟!
ملاك: جاني.. نوض حتى انا شحال الساعة عندك؟!
يوسف: 5
ملاك: (طرطقت عينها) سييييييير ههه انا مشيت نتا باقي سهراان؟!
يوسف: هه حتى انا نمشي نرتاح
ملاك: تصبح على خير.. (مشات من تماك طلعت لشومبر ديالها لقات غيثة كديماكيي وجهها وللي عجبها مكديرش الحس على قبل خديجة حيدت حوايجها حتى هي تسنات طواليط تخوا حيت حست بلغيݣل جاتها شعلت لبيل بقات كتقلب فصاكها الحاجة الوحيدة للي عمر حيدتها منو اولويزة كاحتياط ..
خرجت غيثة)
غيثة: الزين فاين كنتي؟!
ملاك: غير لتحت انا جاية.. (دخلت كما توقعت قدات امورها ولكن كتحس بالسخفة خرجت ملقاتش غيثة دخلت ففراشها وكانت هاديك هي نعيييسة…)
اصبحنا واصبح الملك لله…
ملاك: (صدعها التيليفون وهو كيصوني مكتحلش حتى عينيها مزيان وكتقطع فمها محلول وبحرا كتنفس حتى جاتها خديجة كتزعزع فيها) اممم
خديجة: فيييقي راه ماما من صباح وهي كتصوني
ملاك: (دارت على ظهرها كتمتم بفمها ونيفها مخنوق) شنوووو اخديجة!!
خديجة: ماما قالت رجعو دابا قبل ميجي بابا
ملاك: (بحرا كتنفس حلت عينها مكمشين) شحال الساعة؟!
خديجة: 9
ملاك: بفففف ياله نعست (دارت يدها جبهتها) اراااااسي
خديجة: (دارت يديها فجبهة ختها) فيك سخاانة
ملاك: علاش داز علية قليل (لاحت عينها كانت غيثة ناعسة دايرة ديك لعيبة على عينيها مرسومة فيهم جوج شفار.. زفرت هزت تيليفونها رجعت صونات على مها)
الو ماما
الام: فينكم فطريق؟!
ملاك: مزال مخرجنا اماما غير نفطرو ونجيو
الام: تفطرو والله يا مك ومتكوني هنا مع 10 حتى..
ملاك: واخا اماما واخا
الام: الله يرضي عليك ابنتي بلا متزيدي تصعبيها علية وعليك
ملاك: واخا اماما والله دابا غنخرجو
الام: مالكي ضربك لبرد
ملاك: ههه ضربني الثلج
الام: (تبسمت) متعطلوش ابنتي.. (قطعت دارت تيليفونها يتشارجا خرجت من بيتها ومشات للكوزينة)
سهام: امدرا فين بناتك
الام: قلنا ليك عند ختهم اسهام واش كل مرة تسوليني عليهم
سهام: انا خفت عليهم شت باهم معجبوش الحال
الام: اوا الله يمسخك فين شتيه ݣاع ياك جا بدل حوايجو مشرب حتى كاس دلما ومشا وبااااز يا لالة باااز
سهام: الااااا كيشتي لوسي كنعرفوو مكيبغيش بناتو يباتو من غير دارهم
الام: باتو عند ختهم ماشي برااانية
سهام: يرزيني فصحتي يا ختي بناتك عزاز علية بحال خوتاتي..
الام: هه عاود خواتاتك راكي تزوجتي على كبرك اسهام انا فيتاك ب5 سنين اش داك لشي بناتي..
(جات تهضر وزربت عليها)
مهم عارفة بناتي عزاز عليك بلا متهزي ليهم شي هم راهم كبارات وعارفين شنو كيديرو انا جيتيني رديتي منها حجاية لبنات نشطو وشبعو مع ختهم وجايين فطريق ونتي هازة هم مكاينش للي انا مهم ومهازة والو.. مهم ديري لغدا بزايد هاد نهار جايين شي ضيااف
سهام: (هاد الأمر للي كتكره تسمع) شكون هاد ضياف
الام: هادشي للي قال شيخي صباح انا نمشي نطرف الدنيا…
خديجة: (كتلبس حوايجها وبصوت خافت) ملاك لكارت ديالي بقات لتحت
ملاك: ناخدوها منين نكونو ماشيين (ناضت دخلت لطواليط كان ضروري خاصها تبدل وحتى لحريق حسات بيه كاين تحت كرشها.. غسلت وجهها شافت فلمرايا وهي تشوف حنكها كاين طراس زرق تماك من الطرشة للي عطاها هداك فالغابة)
القطع ان شاء الله نتا وهداك كحل العفطة تفووو باش يتبعو يضربو ضار عندي انا شماتة لاخر..
(خرجت برا كانت خديجة لبست حوايجها لبست حتى هي وكانت مدݣدݣاااااااا بحرا كتقد تهز يدها.. قادو فولار ديالهم فلاو لبيت باش مينساوش شي حاجة ديالهم، وتمو خارجين كان صقييير مكانش هداك لومبيونص ديال لبارح هبطو لتحت بالسيف كولها وفوقاش كمل السهرة ديالو)
مكرهتش نفطر عاد نمشيو
خديجة: هنا؟!
ملاك: لا هنا باين غيكون لغلا نمشيو لشي محلبة
خديجة: ومغتصونيش على يوسف تقوليهالو؟!!
ملاك: خفت يكون ناعس حتى هو منعسش بكري (هزت تيليفونها) نخلي ليه غير ميساج فلواتس وصافي مكاين لاش نصدعو
*صباح الخير يوسف انا وختي مشينا لصفرو مبغيتش نديرونجيك تهلا فراسك وشكرا بزااف على لبارح*
ملاك: (صيفطاتو ودارت تيليفونها فصاكها) ياله نجيبو كارت ديالك
خديجة: مزال مكتبينيش لاكارت ديالك هههه
ملاك: (خنزرت فيها وعيباتها) هاهاها متعاوديش تجبدي هاد الموضوع واكترية قدام يوسف والله حتى نتسيف عليك
(وصلو طلبات كارت ديالها وهو يصوني يوسف) يوسف
خديجة: فايق مسكين..
ملاك: الو.. صباح الخير.. ههه لا لا مغنهربش غير خاص نمشي راك عارف..
(شافت داك اورطيغا وقف وموراه شي وحدة مشافش حتى فيها)
انا فالريسيبشن
اورطيغا: (خدا كارت ديالو هي كتشوف فيه.. خلص بكارت ݣيشي كان لابس كابيتوشو واسع وداير القب على راسو)
ملاك: (ضارت كتقلب على يوسف ولكن طالقة ودنيها مع لاخر باينة مروح حيت صوتو مخنوق، بقات كتشوف فيه شوفة هي التالية مشافهاش فيها طلعت وهبطت فلبنت للي معاه كانت بحال شي ݣاورية لابسة كولون مطرطق طويلة وحتى هي كابيتوشو واسع وصل يوسف، بزز عليهم دخلو فطرو ومن تماك وصلهم للتاكسي حيت ملاك رفضات تعذبو يوصلهم حتى لصفرو عيا ووالو رفضاات مشاو لصفرو وهو رجع،)
خديجة: وكان خليتيه يوصلنا
ملاك: ولفتيها ههه؟!!
خديجة: هههه عجبني الحال بزااااف
ملاك: (تكات راسها على الكرسي) حتى انا (غمضت عينها مسخسخة..) انا نتكى شوية على منوصلو
خديجة: واخ.. (بقات حاضية طريق كانت كولها بيضة بحال شي زربية حست بطاقة إيجابية كبيرة ونفسها كتخفاف شوية بشوية وصلو لصفرو كان لموت دلبرد حطهم قراب شوية دارو من مور القهوة وصلو للدار كان لباب محلول دخلو نيشان لبيت مهم خديجة بدلت حوايجها لبست بيجامة وخرجت عند مها وملاك بدلت اولويز ولموسخة لواتها فميكا دارتها فبوبيل ديال طواليط وتكات فالنموسية مغطية ب4 كواش عارفة راسها مقفراها مقفراها اللهم ترتاح هو اللول….)
الام: (رحبت ببنتها عادي قدام مرت عمها ومرت حنينها، كتسولها على ختها مريم بقاو جالسين مجمعين حتى ناضت دخلت لبيتها لقات ملاك تحت لفراش كيتسمع غير جخيرها)
نتي للي جا معاك نعاااس قلبك بااااارد ابنتي
(لا رد، مشات نترات لفراش من عليها كتشوفها حنوكها مزنݣين وفمها محلول شوية حلت عينها للي حساهم متقلين عليها)
ملاك: (بصوت مخنوق) ماما عفاك خليني نتكى شوية
الام: (دارت يدها على جبهتها لقاتها شاعلة) نعطيك دوا؟!
ملاك: (بحرا كتقد تهضر) اه
الام: (بقات كتنݣر عليها وفنفس الوقت بقات فيها معرفت شنو دير عطاتها من دوا للي كتجيب نعيمة معاها من برا شرباتولها وهي مزالة كتنݣر رجعت غطاتها)
حتى تفيقي على خير ونوري لمك..
(بقات كتشوف فيها بقات فيها ݣاع داك لحلوف للي كانت تحلف باش تعصيها طاااار طفات عليها الضو وخرجت برا جلست معاهم شوية دخل الاب سول على بناتو واش جاو عيط على خديجة تبعو لبيتو لقا ملاك ناعسة تحت لكواش تبعاتهم الام دغيا خايفة يغوت ولا يقول شي حاجة تجرحهم وخصوصا خديجة اما ملاك عندها مناعة من غوات باها)
الاب: معامن تشاورتو لبارح؟!
خديجة: (كضور عينها كتشوف فجهة ملاك تنوض تشرح وتقولو داكشي للي كانت كتقولها فايفران)
الام: راه صونينا عليك نتا مكتجاوبش لبنات قنطو مشاو عند ختهم
الاب: مدخليش ازهرة؟!
الام: كفاش مندخلش سبحان الله راه كما بناتك بناتي واش مكتشوفش حالتهم كيف دايرة ولا بغيتي حتى يمرضو لية عاد نبقاو ندورو بيهم صافي بغاو يفوجو شوية صيفطتهم عند ختهم مكملوش نهار مشاو باتو ليلة وعلى النبوري جاو
الاب: (شاف فيها مخنزر واخا قاسح حتى ليها مكيبغيش يقلقها) انا معندي بنات يباتو برا دارهم
الام: نعل الشيطان ارشيد راه كانو عند ختهم ماشي براني
الاب: كانو عند نسيييب انا هاكا كنشووفها
الام: مرة فزمااان ارشيد
الاب: اوا وخديجة للي مزالة فعنق السيد وهي داخلة خارجة
خديجة: (مناش خافت فاش طاحت اما ملاك حالة عينيها تحت لفراش حتى التنفس ناقصة فيه باش ميعيقش بيها فايقة، قطعت الزي وخلات ختها تهز الدقة)
الام: لبنت غدا غتمشي للمحكمة
الاب: (شاف فبنتو) لبارح راجلك صونا علية وقالي سمع صوت رجال
خديجة: هداك راه حمار ابابا (خرج عينو فيها) راه غيدير كولشي باش ديما كيرجع فية لا فوت وهو يبان مزيان
الام: ياكما غي حيت باقية مسمية عليه يمنع عليها الخروج شكون هو يكون فملك الله للي يجي دابا ويتشكى!! صوني عليه دابا دوزولي
الاب: بلاش
الام: (قلبت الموضوع) دابا ارشيد شكون هو للي يتكلم على بنتي وهو قاااهرها الله ياخد فيه الحق دااابا نوريه يهضر على بنات رجال ومزال عاد كيحل فمو
الاب: (كيكالميها) لبارح راه سمع للي سمعو مني انا من اللول مكنتش باغيه وكان ملسقتش فيه بنتك ودارتنا الشوهة باش تدييه
خديجة: (كتبكي) والله ابابا الا ندمت
الام: صافي ابنتي براكة من لبكى
الاب: خاصها تبكي راه 10 سنين هاديك للي ضاعت من شبابها منين شافتو هاكاك العام اللول جي فحاالك ماشي حتى شرفتي معاه
خديجة: (بقات كتبكي بحرقة)
الام: رشييييد (خرج من لبيت مقهوور واخا تكون هضرتو قاسحة ولكن هم كبير تزاد على قلبو راه بنتو وحس بالشمتة… من اللول كان ضد زواجها بغاها تكمل قرايتها بحال خواتاتها واخا متخدمش ولكن تقرا هو عندو لقرايا حتى الا مخدمت تنفعها مع ولادها وفالدنيا ولكن هي عقلها كان عامر غير بالمراهقة الخاوية زائد كان عارفها غتكرفس هو مكرهش تعيش فمستوى حسن من للي كانت عايشاااه معاه ماشي تمشي تذل وتكرفس….)
الام بقات كتهدن فخديجة للي بقات كتبكي اما ملاك دايرة قرب تحت الكاشة بحال ماشي هي هادي للي من لبارح وهي تزعم فيها وتقولها أنا للي نهضر مع بابا ونتي غير رجعي اللور داز نهار عادي يوسف فالليل صونا على ملاك هضرو شوية بحكم مكانتش تقدر تهضر معاه بزاف وحتى المرض لعب عليها…
اصبحنا واصبح الملك لله..
ملاك: (فاقت شوية مصحصحة على لبارح وهاد مها تهلات فيها بدوا وحتى لعشوب لبست حوايجها وخرجت مخلية ميساج لخديجة كتأكد عليها 10 تكون عندها حدا لخدمة باش يمشيو لفاس على حساب المحامية للي غيديها ليهم يوسف.. خرجت من الدار دازت للقهوة لقات باها سلمت عليه بوجهها البريئ بحال مدايرة والو ولكن هو مزال مقلق..)
بابا اليوم غنمشيو المحامية على حساب خديجة
الاب: شحال خاصك فلوس
ملاك: حم، يمكن نعطيوها ديك 1000 درهم فاللول راك عارف المحاميين
الاب: وانا شنو عرفتي فشي محاميين
ملاك: اما غير قلت راك عارف
الاب: شنو عارف (تبسم) مالي كتشوفني مزوج طلق فالمحاكم
ملاك: ههه لا زعما راك عارف ديال الضوسي
الاب: (جبد رزمة من جيبو عطاها 1100 درهم) هاديك عطيها لختك تشري شي بيجامة ولا شنو تبغيها
ملاك: (فنفسها وانا؟!!) واخا (باستلو يدو) بسلامة..
الاب: اجي هنا
ملاك: شنو
الاب: اخر مرة تخرجو بلا شواري
ملاك: راه خديجة للي رغباتني وانا بقات فية وخرجت معاها ومشينا عند مريم
الاب: حتى منكونش كنعرفك.. (تبسمت معاه ومشات كتنݣر علاش ميعطيهاش حتى هي واخا خدمت متكرهش للي يضور معاها.. شدت تاكسي صغير للخدمة تماك عاد فطرت بقات كتخدم ومجمعة مع الزملاء ديالها طلبت تخرج مع 10 لقات ختها نيت جات لابسة زوين من لحوايج للي خلات ليها نعيمة ومقادة وجهها شوية من غير لعمر للي باينة دارتو حتى ركبت التاكسي.. مشاو للمحطة ركبو فتاكسي كبير ونيشان للأطلس فاس فين كان كيتسناهم يوسف..
مع وصلو لقاوه تماك سلمو عليه وطلعو عند المحامية للي رحبت بيهم وملاك كتعبرها بعينيها حيت كانت مرحبة بيهم زيادة عن اللزوم..
دخلو فالموضوع وعلاش جاو)
…: اممم واخا، مدام خديجة واخا تعاوديلي شوية حيت القاضي او القاضية للي فيشدو الملف ضروري غتسولك وغدخل معاك فالتفاصيل وخاص كلامنا انا وياك يكون مطاابق
خديجة: (بتوتر حشمت من يوسف للي جالس بعيد شوية ولكن منتابه معاهم)
هو صيفطيني لدارنا وتزوج غير ختو للي صيفطاتلي تصاور العرس اما ݣاع منعيقش بيه
….: (كتكتب فشي ورقة) زيدي شرحي كتر علاقتكم من اللول
خديجة: حم، انا تعرفت عليه منين كنت كنقرا فلافاك فاللول كان قالي خدام فشي شركة وهو على قد الحال وكان قالي ساكن بوحدو فبرطمة فوق عائلتو مهم كان كيبان ضريف ومزيان معايا منين تزوجت بيه ومشيت عندو لقيتو كان خدام غير فهوندا مع خوه للي براسو كان مشيبو قلييل فين كان كيبغي يخدم معاه كتافو باردين و كنا ساكنين كاملين وعاطييني بيت فسطح كنت مكرفسة انا هادشي وكنت صابرة حيت كنت كنقول يجي نهار وربي يفرج علينا يخدم خدمة زوينة ويقدر يكريلي بوحدي كنت متأملة الخير.. كنت معذبة مع عائلتو حيت كانو كيعتابروني برانية عليهم بحكم هوما شماليين وانا كانو كيقوليلي نتي غير من الداخل ماشي كولهم ولكن أغلبيتهم مهم كنت بغيت لولاد درت التحاليل للي طلباتوو مني طبيبة درتها وهو مكانش كيبغي يديرهم..
…: بعدا واحد النقطة كان تيصرف عليك؟! مقومك زعما
خديجة: (باحراج) لا غير خوتاتي للي كانو كل مرة وحدة فيهم كتصيفطلي علاش قدات فكل شهر وفاش كان كيمشي يجيبلي فلوس كيهز منهم ولا كيحسب دوك لفلوس انه دياولو ويديهم وانا كنبقى رغبو يعطيني منهم
ملاك: (غير كتسمع نسات راه يوسف معاهم وستفزاتها كلام خديجة بلا متحس)
واوقولها حتى على نعاس للي كان عاجز
خديجة: (شهقت حشمانة خرجت عينها شافت فيوسف وحنات راسها)
ملاك: (عاد طلعت معاها) حم راه سميتو عقد نكاح (زادت عورتها) حنا علاش كنتزوجو
يوسف: انا جاي (خارج شاد الضحكة)
ملاك: (دارت يدها على وجهها) ناري نسيتو حدانا ههه
خديجة: مكتحشميش
ملاك: ومالي كذبت اصلا من الاول هو سميتو عقد نكاح ماشي عقد موضفة عمل كملي ومتنساي والو
….: ختك عندها الحق هاد التفاصيل مهمة…
خديجة: (بقات كتعاود حتى حست براسها عاودات ݣاع للي عندها مع ذكر زوين والخايب) ولكن باش يتزوج علية وانا صابرة عليه هادي منقبلهاش
…: سمعي نتي مزالة صغيرة متقوليش صافي انا طلقت صافي مبقاش عندي أهمية ضعت وداك لكلام الخاوي بلعكس غتكون هادي هي البداية ديالك
خديجة: (حركت راسها باه) بغيت نطلق من اول جلسة
…: ان شاء الله هادشي كامل للي قلتي هو هداك والزوج ديالك؟!! ضروري خاصو يكون حاضر باش متأجلش ليك الجلسة هو ضروري غيكونو جلسات ديال الصلح ولكن اذا تشبتي بقرار ديالك انشاءالله تاخدي طلاقك
خديجة: (تطفات الابتسامة) هو مغيجيش
ملاك: غيجي الله يجعلني نصيفطلو فلوس لكار
خديجة: واش نتي مكتعرفيش عمر
ملاك: الا مجاش بالخاطر غيجي بالحيلة نتي غير صبري
…: ضرووري خاص يكون باش قدام القاضي غتزيدي تقنعيه اكتر وضروري غيكون شي تصرف عدواني منو للي يخليك رابحة عليه يعني الا هضرتي من الناحية الجنسية اي راجل كتجيه ديك النغزة ديال متيرضااش
ملاك: ساهلة نشعلوه
…: هههه دابا فهمتوني مهم انا غنعمر الضوسي وغندفع الطلب فلعشية باش منزيدوش نتعطلو الزوج ديالك غالبا 3 ايام غتوصلو الدعوة ولكن واش متأكدة غتنازلي على الحقوق ديالك
خديجة: انا عارفااه معندو حتى شي ريال يعني غير غنحكم على راسي بالمؤبد معاه وحقي الوحيد هو نولي ديال راسي
…: واخا الالة خديجة غتخلي لية المعلومات ديالك باش نبقاو على تواصل
ملاك: وشحال لفلوس؟!
….: كنفتح الضوسي ب1000 درهم هاد الثمن غير ليكم حيت من طرف يوسف والباقي مغيكونش شي حاجة حيت مقدرة الوضع المالي ديالكم
ملاك: لا حتى حنا مانبغيوش ناكلوك فحقك بلعكس خدمتك خاص تخلصي فيها
….: مغتكونش شي حاجة حيت الجلسة مغطولش يعني القسم لكبير هو باش نفتح الضوسي مهم معالينا المهم هو طلاق خديجة
ملاك: (جبدت 1000 درهم حطاتها فوق لبيرو) انا عارفة يوسف غيكون وصاك علينا ولكن باش متخلصيش لا الحمد لله كولشي كاين
….: الله يقوي الخير الآلة مهم انا غير نكمل الضوسي ونرجع من المحكمة غنعطيكم التاريخ دالجلسة غنحاول تكون فالقريب
خديجة: ان شاء الله عفاك اختي غير ديري جهدك معانا بغيت دغيا نتهنى منو
…: كوني هانية الآلة خديجة ان شاء الله غتهنااي وتعيشي حيااتك (ناضو لبنات سلمو عليها خرجو كان يوسف كيتسنى برا حتى المحامية خرجت سلمت عليه ولكن بليبيز، ملاك بقات غير كتشوف وخديجة كتشوف فختها خرجو بتلاتة)
يوسف: صافي كولشي هو هداك
ملاك: قالت غترد علينا ياك ايوسف متأكد فيدها شي حاجة زعما ماشي غير زواق على لخوا
يوسف: الله اودي هاد السيدة راه قرات معايا وكانت من الأوائل وكنعرف خدمتها متقونة بزااف
ملاك: امممم مزيان مهم حنا نمشيو دابا شكرا بزاااف
يوسف: ااااالبنت، فوقاش نعاودو نتلقااو؟!
ملاك: (تبسمت) التيليفون بيناتنا…..
خديجة: (صونا عليها راجلها وجاوبت مبعدة عليهم شوية) اشنووو؟!
عمر: (لكنة شمالية) علاش مكتجاوبيشي؟!
خديجة: واش نتا حمق صافي مبقى بيناتنا واالو اعمر مهم انا دفعت لطلاق ترجل مرة وحدة فحيااتك واجي طلقني (قطعت وبقا كيصوني وهي طفي التيليفون فمرة.. رجعت حدا ختها)
ملاك: (شافت فالساعة) خاصني نمشي لفاك
يوسف: علاش؟!
ملاك: بغيت ندفع لماستر حيت قالولي تفتح هاد السيمانة ونجرب حظي عاود معاهم
يوسف: علاش مكتقبليش؟!!
ملاك؛ دفعت مرة بقيت la liste d’attente مبقيتش سولت ودابا قلت ندفع عاود الا كتااب
يوسف؛ مزيان احسن حاجة نوصلكم الا بغيتو
ملاك: لا لا بلاش غير سير لخدمتك براكة غير هادشي للي كدير معانا ايوسف
خديجة: الله يرحم بيها الواليدين اخويا
يوسف: طلعو
ملاك: وصافي ايوسف تاكسي غتدينا راه غير ظهر لمهراز قريب من هنا بلا منشدووك
يوسف: (حل لباب اللوراني) طلعي اختي خديجة، نتي بعدا تتسمعي الهضرة
خديجة: (تبسمت وطلعت، طلعت حتى ملاك وصلو لفاك ديال الاداب)
ملاك: انا غنمشي لمصلحة الطلبة بقاو نتوما تسناوني هنا
يوسف: (حرك راسو باه شاف كانو الطلبة دايرين وقفة احتجاجية على شي مطلب شاف فالكافيتيريا) ندخلو نشربو قهوة على متجي الآنسة ديالنا
خديجة: (شافت فيها كانو غير لي جون حيت اصلا فيها غير الطلبة مخلطين ولكن دخاخن الكارو خارجة من تماك بحال شي مجمر شاخض) ناري بحال شي كانون
يوسف: ههه نجيبلك قهوة ولا تبغي شي حاجة اخرى
خديجة: (بخجل) لا غير قهوة وشكرا (مشا جاب جوج قهوات وجلسو فالسور بقات كتشوف فهاد الاجواء والندم غالب عليها هي للي سمحت فلفاك وفلقرايا وتبعات زواج وكان غير زواج يفرح)
يوسف: مالكي؟!
خديجة: وكان متزوجتش بداك السيد وكان راني خدامة بحال ملاك
يوسف: داكشي مكاتيب مخاصكش تقولي هاكا
خديجة: أنا للي ضيعت راسي بيدي ايوسف حتى ملاك جاوها لخطاب شحال من واحد ومبغاتش قالت حتى تخدم ونحقق أحلاامي
يوسف: شوفي نتي ربي مكتبلك حاجة وملاك مكتبلها حاجة انا ومكتبلي ربي حاجة ميمكنش نبقاو نقارنو راسها بالناس هاكا غير غتمرضي
خديجة: وشنو ندير
يوسف: (شاف فيها بقات فيه من نهار شافها وهي كتبكي ودابا باينة جامعة لبكية غير من شنافتها التحتانية لي كترجف) خودي طلاق ديالك ومن بعد بزاف دلحوايج يبانو
خديجة: بابا مغيخلينيش نعتب باب الدار نتا عارف الوحدة منين كتطلق
يوسف: مالها كفرت راه تطلقت عادي
خديجة: (تبسمت) غير عندك عادي اما حنا لا غيولي كولشي بلحساب ورقة وستيلو حتى هاد لخروج غيولي عندي بلحساب
يوسف: خدمي!!
خديجة: والخدمة ساهلة لقاها؟!
يوسف: (بقا كيشوف فيها) قوليلي شنو المعلومات ديالك نقاد ليك CV ونقلب ليك على خدمة…
يوسف: (بقاو ساكتين شاف فيها كانت زوينة يعني تهلا فراسها شوية تولي قرطااسة الطولة وضرافة يمكن اول مرة يشوفها مزيان…) مكانش تيعاملك مزيان؟!
خديجة: (شافت فيه ولكن منين كتجي عينها فعينو كتحشم تلقائيا وقالت وجهها فالأرض)
صراحة فاللول دزواج كان كيعاملني زوين ولكن من بعد لا يمكن حيت كان عليه داك الظغط بزااف من مو ومني انا قلة الشي حتى صافي كنبغي نجي فحالي كيبقى يبكي علية ودغيا كنسمح المرة اللولة التانية التالتة حتى رجعت ألف، من بعد مبقاش مسوق حيت كنت ديما كنعاود ليه الا رجعت دارنا مغيقبلوش نعاود حياتي كنت كنحط عليه الرأس زعما هو شدني منها شحال من مرة هو جرا علية (بابتسامة حسرة) وانا كنت كرغبو يسمحلي حيت تظلمت منو او من مو
يوسف: وعلاش هادشي كامل
خديجة: حيت مكلخة وكما كتقول ختي مريم مدلولة هههه
يوسف: (كيشوف ظحكتها غريبة بحال غير فمها للي كيظحك عينيها لا) متقوليش هكاك على راسك انا صراحة شفتك كنتي بنت الناس معاه
خديجة: (شافت فيه كتأكدلو) لا والله الا مدلولة عارفة، عارفة راسي شنو كنت كنسوى وكفاش كنت كنشوف راسي والناس شنو كانو كيشوفوني
يوسف: هاديك سميتها تضحية
خديجة: كنضحيو على شي حاجة للي تستاهل للي عطااتك كتر مخدات منك كتقول اه نضحي ولكن باش تعطي لشي حاجة معطاتكش ويمكن كتسنى منك ديك التضحية على انها وااجب كتولي سميتها ذل راه قالوها وممذبوش
يوسف: هادي غتكون هضرة ملاك
خديجة: (هنا ظحكت بنيتها) ههههه (حتى ظحكاتو.. حركت راسها باه)
يوسف: عارف هاديك الفيلسووفة
خديجة: كلامها معقول والله
يوسف: لا من منظوري انا تنشوفها لا انا شفتها منك تضحية يا ريت كولشي تيفكر بحالك هاكا نضحي مع للي تنبغي ونتي ظحيتي بأهم زوج حوايج الوقت والأمومة
خديجة: (تنهدت) ووقفت فوجه كولشي عليه ايوسف مخلاليش فين نهز العين ولا الرأس فشي واحد
يوسف: مخاصكش تلومي راسك حيت غطيحي فدوامة ممنهاش خروج علاش درت وعلاش فعلت وكان وكان.. غتخلي راسك عايشة فكابوس وتغرقي فهم التفكير وندامة ونتي اصلا الوقت مزاااال قدامك
خديجة: هادشي وكان كانت باقية عندي 20 عام
يوسف: علاش شحال عندك
خديجة: حم طالعة ف 33
يوسف: بنيتك اخديجة (شافت فيه باستغراب) انا من كلامك قلت السيدة قربت تقفل 50 عام
خديجة: ههه لواه لواه
يوسف: والله حتى مزالة صغيرة
خديجة: (تبسمت) عرفتي (شاف فيها باهتمام وهي تبسمت) لقيت كولشي فظهري ماشي كما كنت متخيلة وكنت خايفة منو بزااف بلعكس لقيت (ظحكت) هه كيعاملوني بحال عندي 15 عام والراجل ظحك علية
يوسف: العائلة شي حاجة للي مهمة
خديجة: بزااااف كنحس بيهم خايفين علية معرفوش انا من شحال هادي كنت باغية ندير هاد الخطوة ولكن مكانتش عندي الشجاعة وخفت من ردة فعل ديالهم
يوسف: ودابا؟!!
خديجة: اوووو بكل فرح غنديرها ههه صافي باب العشرة تسد بيني وبين داك السيد.
يوسف: وووو مثلا مثلا كون مثلا ملقيتيش دعم من عائلتك
خديجة: مكنتش غرجع ليه كنت نمشي لشي مدينة نخدم على راسي ولكن منبقاش معاه….
يوسف: هو تيدير محاولة معاك برجوع
خديجة: اه
يوسف: ونتي مغتحنيش فيه؟! مثلا شي نهار يبقى فيك
خديجة: داابا!!! لا انا دابا معتابراه بحال شي واحد غريب علية منكذبش علية الشوفة فيه مطلعش وكنتفكر للي داز علية كنكرهو الف مرة فدقيقة..
كرهت حتى الشوفة فيه بحال كتحشم من راسي علاش بقيت هاد المدة كاملة معاه معرفتش كفاش نوصفها ليك ولكن كلمة كتر من الكره كنحس بيه من جهة هداك بنادم…
ملاك: (راجعة لعندهم من بعد محطات لوراق ديالها عجباتها الفكرة ترجع تقرا حمسوها شي طلبة تماك لقاتهم مجمعين كيظحكو قربت لعندهم) ياكما تعطلت
بجوج دقة وحدة
خديجة: اه
يوسف: لا
خديجة: (شافت فيه متبسمة)
ملاك: كان زحام ولكن واحد الرفيق هو للي وقف معايا قالي شي 3 ايام ورجع عندو نيت نهار ترجعي عند المحامية
يوسف: مزيان ان شاء الله يقبلوك
ملاك: حقا غدا نمشي ليسي ندفع ليك ديري باك ليبر حيت رجع قانون خاص لباك جديد ونتي سحبتي ديالك
خديجة: لا لا ختي والله ما فيا للي يرجع يقرا انا صافي عقلي خوا من لقرايا
يوسف: بلعكس لباك غيعاونك
خديجة: انا للي عارفة راسي انا ليام ورجعت كنساها عاد نبدا نقرا من اللول
ملاك: وشكون قالك تحفظي اصلا نصيفطو ليك كولشي
يوسف: (طرطق عينو كيرمشهم بالزربة) بغيتيها تنقل؟!!
ملاك: هم!!! اه
يوسف: لااا حتى لنقيل لا
ملاك: وراه عادي كولشي كينقل باش يدوز زعما جات عليها هي
يوسف: انا ممتافقش مع قضية نقيل تجيب لباك بذراعها
ملاك: (مبغاتش تزيد تناقش معاه فهاد المسألة حيت كيجيها خارج من عالم زمردة) مهم فكري وردي علية، مشينا؟!
يوسف: نتغداو بعدا
ملاك: مشا الحال وعاد خاص رجع للخدمة
يوسف: ربع ساعة املاك مجاتش نرجعكم فوقت لغدا
خديجة: منعذبووكش
يوسف: الآلة عذابكم راحة
ملاك: (تبسمت) واخا سيدي (ركبو معاه فالطموبيل تبسمت وهي كتشوف الطلبة تفكرت أيام لفاك وفاش كانت كتقرا الليدو ولبروليطاريا ودباز على الطوبيس شافتو شاد طريق ديال صفرو وقف فتيطانيك دخلو كل واحد وشنو خدا كما العادة بقاو مجمعين وصلهم لحدا خدمة ملاك وهو رجع فحالو..)
خديجة: يا ختي هاد يوسف مسكين خدام علينا تاكسي
ملاك: ضريف بزااف
خديجة: بزااااف واش نتوما مزال ݣاع مبيناتكم شي حاجة؟!!!
ملاك: (دارت حركة فوجهها ديال معرفت وكأنها ممسوقاش) براسي زعما حنا دابا عادي راه من اللول قلت ليك amie هو مزال مقالي والو وانا هاني كنتسنى تجي شي حاجة من عندي لاااا
خديجة: يعني حتى نتي عندو غير amie
ملاك: معرفتش كل مرة وشنو كيبان يوسف باينة من داك النوع لمرزززززززز ن ميجيش ويطيح غير هكاك السيد قااااري باغي شي وحدة دماغها عااامر
خديجة: ااااااه بالصح
ملاك: مهم تبغي تبقاي معايا ولا تمشي؟!
خديجة: نمشي حسن راكي سمعتي بابا
ملاك: صافي (جبدت من بزطامها عطاتها 10 دراهم فلوس تاكسي) انا 4 نكون عندك
خديجة: واخا بسلامة (خرجت من تماك اول تفكيرها ج فيوسف كفاش هضر معاها قبيلة وكفاش كيقنعها ان للي دارتو تضحية وبحالها قلال يعني ماشي مدلولة وعاد فاش قالها تمنيت لوكان كولشي بحالك تبسمت، ضارت شافت تاكسي جاي شيرااتلو وقف ركبت وزاد بيها…)
دازت الايام الاب بقا كيزير مع خديجة فلخروج ونيشان قالها ممنوع الخروج حتى يكون علاش ومكيناش شي حاجة سميتها قنطت وبغيت نخرج، وحتى هوما لبدوها حتى جا الوقت للي غتمشي فيه عند المحامية هنا خلاها تمشي، لبست كسوة كانت شراتها شتوية فستيل تركي دارت شال متناسق اما لمكياج دارت ايكخون مسكارا حتى خرجت بعدت من قهوة ديال باها دارت عكر خفيف.. وصلت لتجهيز…
ملاك: (خرجت عند ختها مكرهة) خديجة غير شدي تاكسي وسيري نتي اما راني غارقة خدمة
خديجة: لا متخويش بية املاك عفاك
ملاك: اويلي على نخوي بيك اخديجة والله اختي الا راني غاارقة خدمة وعاد شي مسؤولين غيجيو ضروووري نبقى هنا مصالحش نمشي سيري نتي قضي الغراض
خديجة: نمشي بوحدي؟!
ملاك: ياكي عاقلة على فين جا المكتب ديالها انا نكتب ليك فميساج لادريس ديالها غير توصلي شدي تاكسي صغير قولو لادريس هو غيوصلك حتى لتما وهي راها فلبروميير ايطاج
خديجة: (خايفة ومدهشرة) واااخ (جات تعطيها ملاك فلوس) راه عطاني بابا صباح
ملاك: (رجعت فلوسها فالبزطام) انا غير نسالي لحق عليك بقاي شاعلة الكونكسيون صافي
خديجة: صافي (تسالمو دخلت ملاك بالزربة وهي تكرهت مشات للتاكسيات تسنات التاكسي تعمر ب6 لبلايص جلست فيها وشدت طريق حتى جاها ميساج من عند يوسف تبسمت وهي كتحل لميساج تقراه)
يوسف: سلام خديجة لباس عليك واش غتجي اليوم نتي وملاك تنصوني عليها متتجاوبش
خديجة: (تبسمت كتكتب فلواتس) سلام يوسف انا لباس الحمد لله ونتا لباس عليك؟
انا جاية لفاس بوحدي حيت ملاك خدامة ومصلاحلهاش مسكينة تجي معايا (بقات مترددة واش تصيفطلو حتى دارت envoyé بقات كتسنى ݣاع مكتب، حتى طلعلها لابيل ديالو توترت قطعت الصوت بقات كتشوف هادوك للي راكبين معاها حتى واحد ممسوق ليها جاوبت كتحنحن صوتها)
حم الو؟!
يوسف: صافا خديجة؟!
خديجة: الحمد لله ونت؟؟
يوسف: الحمد لله قوليلي واش ركبتي ولا تبغي نجي نجيبك؟!
خديجة: لا انا قربت راه وصلت ݣاع حدا الملعب دلكورة
يوسف: صافي مزيان انا تلقايني تنتسناك حدا المكتب
خديجة: (عجبها الحال) صافي واخا شكرا
يوسف: مبيناتاش (قطع مكانش غيمشي عندهم اليوم حيت مصالحش ليه عندهم شي شغل فالمكتب ولكن.. مشا عندها خلا الخدمة يخدمها فالدار من بعد، ونيشان مشا المكتب.. مع وقف لقاها واقفة حانية راسها قلب على بلاصة حط طموبيلتو ومشا لعندها متبسم وقف حداها هزت راسها حايد نظاظرو ديال الشمس) خديجة
خديجة: (بقات مبهورة فيه كان طويل عليها شوية ماشي بحال راجلها لي كان قدها فالطول عاد لابس لكلاص جاي بحال شي واحد مهم خارج من شي مسلسل تركي بلا وجهو للي كولشي فيه مرتب اناقتو للي باينة فيه فشخصيتو وفكلامو) حم سلام
يوسف: نطلعو؟!
خديجة: فين؟!
يوسف: ههه لعند المحامية
خديجة: اه حم دوخاتني الشمس (زادت قداامو اما هو تبسم شاف فسما اصلا كانت مغيمة زاد من موراها وهو كيتبسم…..)
يوسف: (بقصد خلاها طلع دروج قبل منو مقوس عينو فيها بانت انها زادت فالوزن كانت لابسة كسوة واسعة من لتحت ولكن كاين الفرق تبسم وشي حاجة دازت فبالو… وصلو عند المحامية بقاو سابقهم واحد تسناو شي 2 دقايق بلا كلام دخلو عندها كتراجع معاهم شنو حطت فالمقال وداتو المحكمة وبغات تزيد شي حوايج للي يزيدو يكونو فالصالح ديالها باش يكون طلاق دغيا ومنها تقريها شنو تقول
المحامية: من ناحية المعاشرة كان عاطيك حقك
خديجة: (بقات حانية راسها بحال مسمعتش السؤال وهي فخاطرها كتقول وواش هدا مغينوضش يخرج حتى صدمها)
يوسف: خديجة جاوبيها، هادشي غيعاونك بزاااف
المحامية: انا ممكن نعمر اي حاجة من راسي ولكن بغيت نعرف منك نتي شنو كاين
خديجة: حم… (بصوت شبه مسموع) شنو!!
يوسف: (قوس عينو فيها مزياااااان)
المحامية: راجلك واش كان مريض كان عاجز من ناحية المعاشرة؟
خديجة: احم هو (تزنݣت) كانت عندو مشكل حم مبغيتش نهضر فهادشي حيت صافي هاد لحوايج كانو بيناتنا مبغيتش نخرجها كيبقاو اسرار
الم..: ولكن ضروري من هادشي باش كتزيدي تقنعيهم كتر حيت نتي للي دافعة طلاق
يوسف: علاش خفتي منو؟!
خديجة: لا ماشي خفت غير صافي مبغيتش نتحاك معاه هاكا انا عارفة هو كان مريض مؤخرا شي عماين وحتى مكانش كيولد
الم..: هاد الامور ضروري غتسولي عليها حيت من أسباب طلاق للي دافعة نتي هو زواجو عليك بلا علم زائد العقم زائد مكينفقش عليك
خديجة: (سكتت بقات معاها كتشرح ليها وغالبا الجلسة غتكون من دابا شي سيمانة وخاص ضروري يحضرو بزوج فالجلسة اللولة ومن بعد بغا يحضر ولا لا مكيهمش. خرجو من تماك)
يوسف: خديجة بنتيلي بحال مبقيتيش باغية طلاق ياكما!!
خديجة: مفهمتش!!
يوسف: معرفتش قلت يمكن مسخيتيش ولا مترددة فهاد طلاق يمكن هضر معاك ولا شي حاجة فحال هاكا
خديجة: لا لا لا لااااا بلعكس مكرهتش دابا يقولولي هاكي لبرا ديالك نتي مطلقة حرة ديال راسك حتى ديك العدة مبغيتهاش
يوسف: هه ضرووري منها
خديجة: (بينها وبين راسها راه دوزت العدة قبل حتى منطلق..)
يوسف: واش حتى لمؤخرا عاد مبقيتيش مرتاحة معاه
خديجة: (بقات كتشوف فيه كان اول واحد تهضر معاه فهاد الامور هو راجلها جاتها فشكل تهضر مع اخر فهادشي) حم خاص نمشي
يوسف: وقت لغدا
خديجة: ولكن مكيناش ملاك معانا
يوسف: ماشي مشكل نتغداو بزوج ونوصلك
خديجة: مجاتش حشومة مرة أخرى (صونا باها) نجاوب بابا (بقا كيتصنت واخا داير راسو كيخربق فالتيليفون قطعت وجات حداه) خاص نمشي بابا كيسول امتى رجع
يوسف: منين مبغيتيش تبقاي تغداي معايا نوصلك بعدا
خديجة: بلاش والله، حن انا مزال مطلقت ووو (حشمت تقولهالو) انا عارفة نيتك زوينة ودايرني بحال ختك ولكن مصااالحش واكترية مكيناش ملاك عفاك غير فهمني
يوسف: (بقا كيشوف فيها شحال) بالصح كلامك بالصح نوصلك للتاكسيات هادي مافيها واالو بحال موصلك تاكسي ووو انا عتابريني صدييق ديالك (أكد عليها) صديييييق فوقما بغيتيني انا موجود، شنو ما بغيتي
خديجة: (تبسمت) لهلا يخطيك اخويا (ركبت معاه وصلها لتاكسيات ركبت هو مشا وهي رجعت فرحانة لصفرو…)
خديجة: (وصلت فرحانة بنفسية زائدة بزاااااف صونات عليها مها باش تجي نيشان للدار مدوزش على ملاك داكشي للي دارت نيت ولكن قبل دازت محال مكياج خدات 200 درهم ديال مكياج وريحة ديال لعبار 30 درهم coco_chanelle دخلت للدار متبسمة كانت عامرة مشافتش شكون تماك مشات لبيت مها خبعت مكياجها لبست بيجامة من للي شرات جديدة لوات شالها عادي صونات على ملاك مجاوبتهاش ياله بغات تخرج وهو يصوني تليفونها كان يوسف تبسمت ورجعت بالزربة مسورتة لباب شافت فلمرايا راسها مفرنسة)
حم الو..
يوسف: وصلتي؟؟
خديجة: (جلست فالكرسي اونفاص لمرايا) اه انا فالدار
يوسف: مزيان، صراحة بقيت مقلق شوية
خديجة: مني انا؟!
يوسف: اه
خديجة: علاش؟!
يوسف: مبغيتيش تغداي معايا ودرت بناقص حتى انا
خديجة: (تبسمت) والله مصالح، راني قلت ليك شنو كاين ومنبغيكش تبقى بالجوع
يوسف: ربع ساعة مكناش غنتعطلو وانا تيعجبني الحال نوصلْـــــ..ـــكم حاجة تنديرها بخاااطري وانا عاجبني الحال
خديجة: لا لا حشومة والله انا راه كنحشم بزاف كتعذب معانا بزااف لهلا يخطيك اخويا
يوسف: (سكت مدة)
خديجة: (ظحكها سكااتو) يوسف!!
يوسف: اممم
خديجة: صراحة الله يعطيك ما تمنيتي من نهار عرفتك ونتا داير كتر من جهدك معانا عاونتيني بزااف بزاااف
يوسف: انا هادشي للي تنديرو تنديرو وانا فرحان
خديجة: ههه هي كتبغي تعذب راسك وصافي
يوسف: هههه لا ماشي مع كولشي ملووكة راها بحال تقولي عشييرتي
خديجة: لهلا يخطيك اخويا يوسف حتى نتا عزيز عندها بزااف
يوسف: شنو كنيتك؟!
خديجة: املال
يوسف: مشرفين لالة خديجة أملال انا يوسف الادريسي
خديجة: هههه مشرفين
يوسف: ولكن أملال والادريسي ماشي خوت؟!
خديجة: هاا!!
الام: (دخلت عند بنتها ودغيا هبطت التيليفون بحال كتلعب فيه) خديجة بنتي من قبيلة وانا تنتسناك تخرجي من لبيت
خديجة: انا جاية اماما بغيتي شي حاجة؟!
الام: ياله سربي راه ناسك هنا
خديجة: ناسي!!!! واش عائلة عمر؟! اش جابهم هنا ؟!
الام: راكي عارفة علاش جاو دابا خرجي خلينا نشوفو اش غيقولو عاود
خديجة؛ (بخوف) انا مرجعش معاه اماما
الام: وزيدي غير نشوفو شنو بغاو قبل ميجي باباك راه تبخولي راسي بالهضرة (سدت لباب ولوخرا هزت التيليفون لولدنيها)
خديجة: الو
يوسف: متخرجيش عندهم مبغيتيش صافي حتى واحد ممنحقو يبزز عليك شي حاجة بلا متخرجي
خديجة: معرفتش علاش جاو مفهمتش شنو باغيين مني لا انا كنت حاملاهم وهوما كتر
يوسف: صافي بقاي فبيتك متخرجيش
خديجة: مغتخلينيش ماما
يوسف: وشنو غديري!!
خديجة: نخرج انا راه كلمتي هي كلمتي واخا نعرف نهرب.. انا غنقطع ايوسف قبل ميجي شي واحد يسمعني كنهضر
يوسف: غير سالي وكتبيلي فلواتس نتسناك
خديجة: واخا…
خديجة: (قطعت معاه وعقل كيقول ليها شنو كديري؟!!! ملاك! عمر! شنو هادشي اخديجة شافت فالتيليفون للي جايها منو اهتمام كبيييير وكانت محرووومة منو وهي تنطق)
🗣️ مدرت واالو السيد غير كيسول عادي باغي يدير الخير… علتش نبقى نحسبلها فشي حاجة اخرى قال صدييق و وعمر شي راجل عاملني بهاد ظراافة
(غووبشت وخرجت من لبيت مسورتاه كما العادة مشات للكوزينة لقات مرت عمها كتقشر بطاطا)
فين ماما امرت عمي؟!
سهام: فالصالون مع ناسك، اوا شتي ها هوما جاو يردووك حني الراس ومتبقايش معفرة المرا عندنا غير دارها وراجلها
خديجة: كفاش؟!
سهام: وشنو بغيتي تبقاي هاكا مااانتي مزوجة ماناي مطلقة ديري عقلك ابنتي راكي مدوزة معاهم عشرة مضربيهاش فالزيرو
خديجة: (معصبة) حياتي هادي مشغل حد فية امرت عمي ماشي بابا وماما مكيقولوليش هاكا ونتي تجي تبقاي تهضري بحال هاكا
(خرجت من الكوزينة اييه هي تشمتت وكتحتارم وحشومية ولكن حتى هي بخبيزتها، دخلت للصالون لا سلام لا كلام جلست فالسداري اللول بين هوما جالسين لداخل بحكم الصالون ن كبيير هاز 10 ديال سدادر)
الام: خديجة اجي ابنتي حدانا
ام عمر: لا سلام لاكلام اخديجة
خديجة: (كتشوف فيهم مخنزرة) لمن نقولها لناس غداارة كركباتني ومشاو يلعبو علية
الام: خديجة
خديجة: (وقفت) شنو درت ليك نتي (موجهة الهضرة لعݣوزتها) يدك مكنتش كنخليها تقيس فلما بنتك، بنتك للي من لحمك ودمك ومكانتش كتحن فيك نتي عارفة مزيان ولدك عااااݣر مكيولدش علاش ماشية مزوجاه؟! عارفة ولدك كان مريض هادي عماااين وكان كيقلب على دوا ويجي ويبكي عليك تعاونيييه وماشية تزوجيه؟!!!
ام عمر: (بلكمة شمالية) هضري اختي زهرة هانتي بنتك ميقد عليها حد ماشي تقولي كنت معدية عليها ولا حݣراها
الام: خديجة نعلي الشيطان ابنتي الهضرة بلعقل
خديجة: اشمن عقل اماما نتي معارفة والو شنو دوزت مع هاد الناس حيت مكنتش كنعاود ليك (شافت فالعݣوز) شتي ديك بنتك للي كنت كنظل ندابز معاها هي للي صدقت فيكم هي للي وراتني حقيقتكم وبيناتلي على الغدر للي غدرتوني
ام عمر: دابا مديريش عقلك ولدي راه حاالتو
خديجة: يموووووت انا بغيتلو لموووت
ام عمر: اييييييوا حدك تم
الام: متغوتيش على لبنت براكة غير الحمد لله رجعاتلي بعقلها وبصحتها انا مخلياااك داوية ولكن شغل الكسالات كامل كنعرفو ليييه
خديجة: (جاتها لبكية) للي نطولوه نقصرووه انا كنت طالبة على طلاق من شحال هادي وكنت كنحشم ودرت حساب العشرة ولكن منين جات من عندكم فرحت (تبسمت ولكن هضرتها بحرقة حيت كتغوت) بغيت نطلق من ولدك اليوم قبل غدا
ام عمر: حتى حنا مكن..
الام: بلا متكملي هضرتك صافي نتوما مبغيتوهاش وهي هكاك تلاقينا خوت نتفارقو خوت حيت الا بدينا شدلي نقطعلك غيخص شي حد فينا فهاد المجمع وانا عارفة راسي مغنخسش
خديجة: (بفرحة) ياله لباااااااب الحباااب (تبسمت بهستيرية وهي كتنهج) عقلتي على هاد الكلمة قلتيهالي مرة جوج وعشرة ياله جات نوبتي (بلغوات) لباااااب وخرجي علية
الام: (ناضت جيهة بنتها ولوخرين وقفو حسابلهم غضربها حيت معروفا عليها حقانية ومصواابة حتى من خديجة خبعت وججها حتى شافتها عنقتها) بغيتي ترجعي لطبيب عااود راه حتى حد ميردك ليك صحتك حنا ستقبلناهم حيت بابنا مفتوووح لكولشي ماشي عادتنا ابنتي نطردو حتى حد وكيطرد من دارو غير الكلب للي كيظل ينبح
ام عمر: زيدو زيدو لكار لي جابنا يردنا وورقتك غتوصلك
خديجة: (دعم امها خلاها على خاطرها) ولدك للي غتوصلو ورقتوو وغنخليهالو متووورخة فديك الحومة ولدك ماشي راااااجل وهاني مزال كنعاودهالك ولدك مكيولدش مضيعوش حتى ديك بنت الناس معاكم وتاااقي الله راه عندك بناااتك انا بغيت ربي ياخدلي حقي منك وانا كنشوف لا نتي لا ولدك
(خرجو عائلة عمر مكرهين مكانوش متوقعين هادشي فمرة اما خديجة جلست كترتاح اخيرا واخا نفسها ديااااق عليها خرجت شنو فقلبها اخيرا تواجهااات مع للي كانت مطيرة نعاس من عينيها سنييين بقات مها كتلومها باش متعاودش تصرف مررة اخرى مع شي حد هاكا وخاصها تشد راسها القبااحة معندها فين تنفع انا هي هم وحيداااتو من قلبها كلام وزولاتو من قرجطووتها عذاااب ومحاتو مع الدمعة للي سالت من عينيها فرحااانة بهاد الانتصار على هاد الحرب النفسية فاش كانت عايشة.. خرجت زهرة وهي كتشوف فبنتها كتحول وتبسم ومرة تبكي خلاتها فراحتها حست بيها رتاحت وكانت خاصها عاد الكومبة مع ام زوجها، مشات عيطت لرشيد تعطيه التقرير بعجاالة قبل ميجي وأصلا هو مباغيش بنتو ترجع….)
ملاك: (كملت خدمتها خرجت وهي مسخسخة وصلت حدا القهوة ديال باها لقاتو برا بقات كتسناه يكمل الهضرة مع شي رجال حيت مجاتش دوز بحال مشافتوش ومتسلمش عليه، كمل ومشات عندو باستلو يدو) بابا لباس عليك
الاب: الحمد لله ابنتي عاد كملتي هاد نهار معطلة لا!!!
ملاك: اه عيييت بزااف كانت عندنا خدمة بزاااف على حساب طريق ديال تاهلة وعاد فية الموووووت دالجوع
الاب: سيري لدار ابنتي ورتاحي
ملاك: واخا بسلامة (تمات ماشية حتى كيبان ليها الإكس إذا رجع من سطاج، ومعاه هادييييك قلبت وجهها كتدعي فيه فخااطرها عام وهي معاه حتى التالي عاد قالها مصالحينش لبعضياتنا واخا عرفت انه تقاتل وبغاها ولكن.. قلبت وجهها وحتى هو داز بحال عمرو عرفها..
غير بعدت قلبت وجهها شافت لوخرا كفاش شادة فذرااعو وماشيين خطوبتهم كانت منين تفارق معاها بشهر للي عارفة انها من عائلتو والخايبة انهم باقييين جيران!!! مشات للدار جبدت تيليفونها ملقات حتى شي ابيل من عند يوسف تعجبت موالف كيصوني عليها فهاد لوقيتة وهي مبغاتش تصوني باش ميقولش كتلسق فيه وأصلا معندها نيت ݣااانة لشي هضرة شوفت لاخر عصبااااتها
دخلت كما العادة لي كيلعب فلمراح للي مجمع لقات خديجة كتقاد مع مها ومرت جدها كيقادو ماء زهر وكيقطروه الريحة كانت فااايحة وعاطية دارت شهيق حتى دخلت ديك رويحة لريتها)
اللللللللللله… شحال كتحمقني هاد الريحة
خديجة: (كانت مرتاحة وفرحانة) الزين جيتي نوض نحطلك تغداي
ملاك: اه اختي على منبدل حوايجي عرفتي كنموت بالجوع (هزت يد مها للي خدامة بيها باستها) رويييحة قاديلي ماما واحد شوية نديه للسيدة للي خدامة معايا كتموووت عليه
الام: واخا ابنتي (سلمت على مرت حنينها) زييين كيف بقات ليك رجليك
مي حلو: انا مزيان الحمد لله
ملاك: ههه ابعدا مكترضاايش تقولي راني مريضة
مي حلو: المرا مكتمرضش
ملاك: الحمار وكيمرض امي حلو
الام: الله يقلل حياااك هه
ملاك: ماما انا اليوم خديت ديك دارت دابا غنبدا نقلب نشري شي حدييدة
الام: صافي نويتي
ملاك: اه صافي عييت بالتاكسيات ونيت نبقاو نتسراو شوية
الام: (تبسمت)
ملاك: مالكي ظحكتي؟!
الام: غير هاد التاكسيات للي قهروك عارفة شنو تابعك من مور الطموبيل ها المازوط ها لوراق
ملاك: نخسر على راسي شنو فيها الفلوس كي الروز الحمد لله
الام: هه انا داكشي للي بغيت ابنتي خسري على راسك غير هو ديري شي ذهبيات بعدا
ملاك: اش بغيت بالجالوق ندير الطموبيل ونكمل دارت وندير هم
الام: نتي تعرفي
ملاك: (حطاتلها خديجة لغدا مشات كلات عاد دخلت بدلت حوايجها وهو يصوني يوسف هضرو شي دقيقة كلام عادي قطع مشات جلست معاهم كتعاودلها خديجة شنو داز وكفاش هضرت وملاك كتزيد تشجعها عاودات ليها شنو دار معاها يوسف والمحامية وعطاتها خطة باش تجيب عمر غير من التيليفون ناضو كيجمعو ديك روينة وملاك كطرف معاهم حتى هزت تيليفون خديجة للي كيصوني لقات يوسف كاتباه باسم يوسف نيت تعجبت حيت للي عارفة مبيناتهمش توااصل… اه كان خدا نمرتها باش الا مجاوبتش ملاك ولكن على حساب المحامية، معرفت واش تجاوب ولا)
خديييييجة خديييييجة!!!
خديجة: (جاية هازة سربيتة كتمسح يدها فيها) انعااام
ملاك: (باستغراب) يوسف كيصوني عليك
خديجة: (لون وجهها تخطف) شنو بغا؟!
ملاك: معرفت شوفي نتي ياكما المحامية قالتلو شي حاجة
خديجة: يمكن
ملاك: هاكي جاوبيه (عطاتها التيليفون وبقات واقفة حداها)
خديجة: (جاوبت) الو (شافت فختها وحست احساس خاايب بزااف)
يوسف: صافا خديجة؟! شنو درتي مرديتيش علية
خديجة: الحمد لله كولشي مزيان ونت
يوسف: صافا الله يكبر بيك الآلة قوليلي شنو درتي مع دوك الناس؟! بقيت مديرونجي عليك ومشطون
خديجة: الحمد لله كولشي بيخير ونت؟!
يوسف: (حس بشي حاجة ماشي هي هاديك نفس الجملة كتعاودها دار فبالو شي حد واقف حداها ومقتدرش تهضر على خاطرها) الحمدلله، انا شوية ونصوني عليك واخا!!
خديجة: واخا خويا اه… لا .. شكرا بزااف (قطعت)
ملاك: شنو بغا
خديجة: المحامية سولاتو واش عندي شي ورقة دالخدمة ديال عمر وقلتلو لا
ملاك: امممم يا ختي لحلاوة هاد يوسف حنيييين حنين
خديجة: امم (تبسمت) اه ظرييف..
ملاك: ظريف وسكتي كولشي فيه زوييين.. (رجعت كتقاد فجميع فين خلاوها مدات مجابت..)
يوسف: (دخل لدارهم كانت عامرة حيت عارضين العائلة بيناتهم سلم على لافامي ومشا جلس حدا باه للي كان شاد التسبيح كيذكر بقاو كيهضرو فالخدمة للي كانت الحركة عيانة بمعنى مكاينش شي كوموندات كباااار يعني تقريبا غير كيخدمو غير المحلي ويوسف ولا عندو الوقت مزاااحم حيت كاين شي معرض كبيير وكيوجدلو)
اب يوسف: وكيف عامل مع الخدمة التانية
يوسف: الحمد لله كولشي ماشي مزيان
اب يوسف: ومناويشي تزوج اولدي انا قدك كنتي نتا كتقرا
يوسف: (تبسم) قريب ان شاء الله انا تنقلب على شي بنت الناس
اب يوسف: اوا بنتا الياقووت وحدة منا متزيدوشي تعطلو قدما هاك
يوسف: (بانزعاج) ماشي الياقوت الواليد.. (عارف باه خارج التغطية ولكن حسن ليه ميعرف غير الحاجة زوينة) مهم نهار يكتاب ان شاء الله ونلقى راحتي مع شي بنت الناس غنمشيو لدارهم (وقف) انا مشيت
اب يوسف: فاااين غادي؟! جلس تعشا معانا مبقيتش كتعمر معانا فالدار
يوسف: عيااان الواليد وبغيت غير نعس والدنيا عامرة الويكاند غنجي نجلسو هنا معاكم
اب يوسف: (خلاه على خاطرو اصلا هو كيخلي كولشي على خاطرو مساااالم) للي ريحك اولدي
يوسف: (باسلو راسو ومشا الا شافتو مو غتبزز عليه يبقى حيت كتغضب ليه وهو مكيقدرش يقلقها ولكن محتاج يبقى بووحدو.. حتى من صحابو كولشي كان عتازلو كان بغا يبقى غير بووحدو وهاد الفراغ عمر بملاك معرفش شنو يصنفها فالاول واش معجب بيها كحبيبة ولا صديقة ولكن للي عارف انها كانت كتعطيه طاقة إيجابية كبيرة بلا متحس لا هي لا هو خرج من قوقعة كانت غضيعو، حتى بدا بغا يدقق فيها ويكسر داك الحاجز للي بيناتهم وهي تبان خديجة ختها.. معاها حس فشكل معرفش داك الإحساس واش شفقة ولا شي حاجة اخرى!! ولكن معاها حس برجووولتوو زايدة نغزة عكس ملاك للي ممكن يكون ضعيييف قداامها
(بدا كيحط حوايجو فوق النموسية للي كانت ملمطة مزيااان خشة مكدوورش وحتى من حوايجو كيحطهم للي تطوا وللي غيتعلق وللي غيمشي للصابون)
تفكر ياقوت لبنت للي دوز معاها 4 سنييين.. دوز معاها كولشي كانت بنت زوينة بزااف فاسية قحة ابا عن جد رزانة والقوافي والكلام لحلوو زائد كانت مهلية فراسها مزياان من ظفار رجليها لشعر راسها لباس المكياج روايح كولشي فيها كان زوييين ومثالي ولكن مجرد كيتفكرها كيحقد بغاها وبغا يكمل حياتو معاها ولكن هيا دكشي للي بغات عكس هو شنو بغا…. غير كيتفكرها اول حاجة كيدير كيصوني على ملاك للي مجاوباتش ورجع صونا عليها جاوبت)
ياكما مشغولة البنت
ملاك: لا غير كان التيليفون فبيتي ومسمعتوش
يوسف: اممم كيف داز نهارك؟!
ملاك: مزبل
يوسف: ههه علاش؟!
ملاك: الخدمة الخدمة الخدمة وبزاااف
يوسف: مباغاش تحللي فلوسك؟!
ملاك: حتى يحللو هوما عرقنا على زين خلصتهم
يوسف: شحال كتخلصي؟!
ملاك: ماشي شي حاجة
يوسف: فايتة سلم 10
ملاك: داااك السلوم نيت
يوسف: هههه معليش راكي مكرياش ومكتخلصي لا ما لا ضو يعني ديال راسك
ملاك: لا والو مكفيانيش
يوسف: اممم محتاجة فلوس؟!
ملاك: (فخاطرها ااااااه) لااااا
يوسف: اي حاجة بغيتيها انا موجود
ملاك: اه حقاااا ممكن نبغيك فحاجة الا كان ممكن،
يوسف: بكل فرح
ملاك: انا كنقلب نشري شي طموبيل ومتقتش نقلب بوحدي راك عارف يديروها بية قلت يمكن نتا كتعرف شي واحد
يوسف: اه تنعرف واحد مزياان يجيبلك طموبيل مزياانة نتي غير قولي شنو باغية بعدا عندك بيرمي
ملاك: هه بيرمي، ضرووري انا قول تولدت كنصوووݣ
يوسف: ههه دابا نشوفو اعمي الشيفور قولي كفاش بغيتيها
ملاك: هه، مهم اولا واهم حاجة بغيت مازوط ماشي ايصانص
يوسف: ههه اهاه وشنو اخر
ملاك: مااا تكونش غالية فلوراق
يوسف: ههه زيدي
ملاك: علاش كظحك علية
يوسف: لا والو كملي مزال تنتسنى اشمن نوع؟!
ملاك: مااا… معنديش شي فكرة صراحة غير تكون مكتكونصوميش بزااف المازوط (هنا طرطق بالظحك) عيقتي علاش كظحك؟!
يوسف: ههه والو والو
ملاك: والله حتى تقول
يوسف: والو غير عجبني تفكييرك اهم حاجة مكتكونصوميش…
يتبع
التعليقات 0