تافقو باش يشوفلها شي طموبيل وغير توجد شي حاجة غيجيبها لعندها ولا تمشي عندو لفاس.. بقا كيعاود ليها انه كاينة عرضة ديال العائلة فالدار ومبغاش يحضر، واهم حاجة كتعجبو فملاك كيبقى يعاود بلا متقاطعو ولا تعطي رأيها بحال شي طبيبة نفسية كتسمع ليه لدرجة قال ولأول مرة العائلة غيبقاو يسولو وينبشو فشي حاجة للي ماباغيش يهضر فيها والا جاوب غيكون جواب خاايب داكشي باش كيتهرب ويخلي كولشي زويين على ميقاد بزااف دالامور فحياتو وحتى الا تسول غيعرف الجواب للي غيكون رزيييين.. بقا مدة كيهضر معاها حتى لحقت خديجة بيها لسطح قلبو الهضرة كيهضرو على طلاقها وقطع
خديجة: شنو قالك؟!
ملاك: غير هضرة عادية وصاافي
خديجة: بانلي بقات كتقاد الامور بيناتكم
ملاك: اختي مكتقاد والو هو كيهضر معايا عادي انا تعلمت حاجة والله مندير شي خطوة الا مدارهاش هو والله منعاود نتزرف
خديجة: احسن حاجة والله متخليش شي واحد يتحكم فيك متكونيش بحالي احسن احلامها هو راجل يبغيها
ملاك: انا مباغيا لا للي نتحكم فيه لا للي يتحكم فية باغيا غير التعادل ونعيش بيييس (وقفت) تسخسخت بلمزيااان هاد نهار نمشي نعس
خديجة: حتى انا عييت عرفتي كتاشفت صفرو باارد على مارتيل
ملاك: وايلي تما راه لبحر يكون برد من هنا
خديجة: والله الا العكس تما كاينة الرييييح بزاف ولكن هنا سمييقلي عرفتي شحال هادي مجلست فيها هاكا عاد طلع معايا البرد مزيان
ملاك: (بالشلحة) اصميييض اصمييض (البرد.. هبطو لبيت لجلاس لقات مرت عمهم فرشات لولادها بتلاتة سدادر عندها 2 ولاد وبنت)
شتي قلتلك غتولي تساابق معانا ههه
خديجة: (خرجت من لبيت حتى رجعت جايبة عبانات معاها (فراش الارض للي كيكون غليض ركنو الطبلة بالجنب فرشو فالارض))
ملاك: بفففف ما فية للي ينعس فالارض
خديجة: هوما للي غينعسو فالارض
ملاك: راه غتبقى تزمر علينا فصباح
خديجة: نزمرو حتى حنا ماالها كبرها تصغاار راه مزالها مكتعرفني مزيان
ملاك: (بظحكة شريرة) ههه
هكااك رجعي خديجة للي كنعرفو
(هبطو دراري بجوج للي مكرشخين بنعاس عاد فرشو هوما بلاصتهم، )
هادشي للي كيعصبني بزااف فهاد الدار عندهم لفلوس علاش مبناوش لفوق عاد يديرو فسطح شنو بغاو
خديجة: اودي هاد الهضرة طبنا معاهم حتى شبعنا شكون سمعك بابا وعمامي عندهم بيوتهم حنا مخليينا مضاربين عاد متعقليش على نزهة وجيهان كنا كنتناتفو على لبلايص هههه ودابا كولها شد قنت عرفتي شحال هادي نشفتهم
ملاك: مبقاوش كيجيو بزااف هنا من نهار رحل عمي المرة اللول قلييل فين كيجيو اما دابا منين مشا لأكادير فين تلحقيهم شوفي يا ختي تبع بناتو ههه هو للي عبر….
خديجة: كان حنيييييين فشكل عرفتي مسكين شحال من مرة عيطلي فالتيليفون وفاش كانو كيجيو فالصيف لتماك كان كيعيطلي نتلقاو وكنت كنحشم كنبغي غير نعرضهم
ملاك: مكانوش كيبغيو
خديجة: ماشي مكانوش كيبغيو ولكن وكان جبتتوهو ومرت عمي وبناتهم ورجلاتهم غيديرو فية مبغاو راكي عارف زعما العݣوز للي حاكمة وكنت كندير بناقص واحد نهار مسكين دور معاايا عطاني ستلافريال وبيجامة
ملاك: اختي كولشي من مرت عمي قلبها زوين ماشي بحال هاد حيزبووونة…
اصبحنا واصبح الملك لله…
ناضو صباح على النفخة ديال مرت عمهم مهضرتش معاهم ولكن بينتها كتخبط فالكيسان وتمتم وتكملها تبقى تعنق ولادها بحال الا قتلوهم هوما كيتغامزو عليها ويظحكو حتى مهم فاش عاودولها جات معاهم وكما كتقول داكشي بين صغار مندخلش انا..
ملاك: (غير سمعت كاين التخمال تكرهت.. كتكره شي حاجة سميتها شقا وشغل عكس خديجة لي يد بيد معاهم وعاد هي كطيير حادݣة وناااار فهادشي دشغل ملاك عطاوها تجمع سطح وتسيقو طلعت لتماك طلقت لباف صغير ديالها موسيقى حجيب كتشطب وتشطح مرة مرة وتغني
🎶🎶مزييينو ووليييد…🎶🎶
هزت راسها وهو يبانلها حمزة الإكس ديالها كيطل عليها من سطح المقابل معاهم بقات كتشوف فيه شحااال وحتى هو غير كل واحد والنظرات ديالو)
#فلاش_باك
ملاك: (رجعت من الخدمة بكري دازت من حدا القهوة حاضية واش كاين باها واخا هي عارفة راه ممكن للي لداخل يشووفك ونتي متقشعيهش مزيان زربت فالمشية السيكتور خااوي كما تقال ليها للي غدخل من باب دارهم دخلت للباب للي مقابل مع باب دارهم..
قلبها كان كيضرب ف2000 هادشي راه كتر من شهر وهي كتقول نديرو منديروش نديرو منديروووش حتى هوما نفس لبلان الدار بحال شي رياض مقادينو مزيااان دخلها نيشان لبيتو وسد لباب تبسم وهو كيشوفها متوترة ويمكن تكون كترجف بالخوف والخلعة)
حمزة: متخافيش املاك
ملاك: نااااري شنو درت تفوووو وكان غير مسمعتكش بغيتي تخرج علية
حمزة: ههه شنو درتي؟! جيتي عند حبيبك
ملاك: (شافت فيه هازة راسها) عنداك شي واحد يكون شافني والله حتى يقتلنا بابا انا والله حتى نبيعك نقولهم دخلني بالسيف علية
حمزة: ههه (بغا يعنقها وهي دفعو بيدها) شنو
ملاك: (بنبرة عالية مخرجة عينها هازة صبعها بتحذير) راه هضرنا فهادشي احمزة متبقييسني منقييسك عرفتي شنو حل هاد زبل نمشي نتا مشيتي بعييييييد حسابلك انا ساهلة ليك
حمزة: مكتيقيش فية احبيبة؟!
ملاك: ماشي قضية تقة ولكن من اللول تفاهمنا براكة غير هادشي لي درت
حمزة: (قرس حنكها متبسم) عجبني الحال بزااف
ملاك: (معصبة) حل هاد زمر نمشي
حمزة: (كيشوف فيها بشوفاات كلهم حب وفرحة) كتبغيني املاك؟!
ملاك: (بنبرة قاسحة عكسو هو للي كيهضر بشوية ومتبسم) لوكان مكنتش كنبغيك منتزطمش ونجي عندك
حمزة: ههه عارف احبيبة (شدها فيدها وجرها جلست فوق فوتووي عاد لاحظات بيتو للي كان زويين وفلحظة تخيلاتو بيتها حتى هي وهو جلس اونفاص معاها) حتى انا تنبغيك بزااف، (بجدية) بزاااف املاك
ملاك: (عاد تبسمت وشافت فيه كان زوين بييوض كما كتبغي وطويل مفورمي مهلي فصحتو ولباسو مزياااااان، كانت مو هضرت مع مها وجاو هي وخالتز شافوها كيتسناو غير باه للي مسافر يرجع باش يخطبو خطوبة رسمية ويطابوها من عند باها ويكون كولشي بقواعدو) زوين بيتك
حمزة: بيتنا
ملاك: (تبسمت حشمانة وهي كتخيل انهم ناعسين بجوج مفهمتش علاش عقلها خدم مود ديال السفااالة)
حمزة: فين ساهية؟!
ملاك: حم لا والو نمشي انا
حمزة: بهاد الزربة
ملاك: حمزااااااااا
حمزة: وصافي احبيبة غير شوية 5 دقايق!! (جبد بواطة ديال الشكلاط للي واعدها بيها عجبها الحال بغا يعنقها ووالو دارليها خاطرها ناض خرج شاف الاجواء سطوح وسراجم عاد خرجت بالزربة وهي فرحانة دخلت لدارهم وقلبها كيضرب بالفرحة والخلعة…)
ملاك: ( دخلت للدار فرحانة وكيزيد بكلامو ميساجاتو باينة وكانت متأكدة من حبوب ليها…..
دازت يوماين مستغربة مكيجاوبهاش وكيتسمع عندهم صداع ليييل ونهار مفهمتش والو وحتى مها تسنات تجي مو تفهمها بحكم جورتهم كانت زوينة وكانت كتعاود ليها كولشي، حتى جات مو عند مها كتعتاذر ان الولد عندو شي مشاكل وخيرها فغيرها مفهموووش ولكن من هضرتها باش السبب علاش هنا زهرة دارت عين ميكة حيت شافت جارتنا معندها حيلة حيت بكات وطلبت سماااحة ولكن ملاك حقداااات وكرهت وتكرهات قالو لخوتاتها للي كانو كيوجدو للخطوبة ان ملاك مبغاتش حيت متفاهمووش، واخا هكاك بقات كتصوني عليه مدة يوماين حيت تصدمت ماشي هدا للي كان حامق عليها وباغي يتزوجها مسخاتش بداك الحب وداك الاهتمام حتى عطاها السبب للي جاها بلييد فجأة حست بداك البغو للي بغاتو تبخر استسغراااتو بزااف قطعت ومن تماااك مهضرووش من موراها مشا سطاااج مولاش بااان حتى عاود رجع وعرفت انه هو كمل حياااتو ودخل ليها وحدة اخرى)
#عدنا
ملاك: (شافت فيه بكره محست حتى هزت صبعها صبعاتو) وبقا حاضيني **** وسير**** من هنا
حمزة: (بقا غير كيشوف فيها ماشي اول مرة كتكون هاد ردة الفعل منها كانت اليوم وكانت من نهار اخر ابيل بيناتهم، حنا عينيييه وهبط من سطح..)
ملاك: ولد **** مزال عندو لوجه للي يشوف فية
(كملت شغلها حيت فترة الحزن عليه داازت ولكن مزال حاسة بالشمتة، سيقت سطح طلت من لفوق لقاتهم مزال كيسقاو مشات جلسات شادة تيليفونها طالعة هابطة فالانستغرام كتجاوب للي كتعرف دخلت لانستغرام ديال يوسف حتى بانت ليها تصويرة وتحتها ortega دخلت كتقلب فتصاورو اخر تصويرة حاط هي نهار افران شاد طبل كيضرب شافت les j’aimes لقات اكتر من 2000 دخلت كتقلب فليكومنت بزاف بنات وكاين حتى دراري أغلبية هو مكيجاوبش حتى جيم مكيديرهاااش
ملاك: اه اه شحال منيييفخ
( رجعت كتقلب فتصاورو لوخرين أغلبية الطبيعة لبحر الماكلة باينة هو للي كيطيب باينة غير من ليكمنت قليل فين كاينين تصاورو طاحت فوحدة باين فيها بقات كتزومي فيه عينيه عسليين مقوسهم بالشمس للي ضاربة فيه لونو اسمر صافي لحية عامرة وكحلة شنايفو كبار شوية ولكن مطراسيين مظاحكش نيفو كبير شوية، حسانة عادية وحواجبو مظروب فيهم من واحد الجنب جايينو زوينين.. عوجت فمها)
زوين ولكن ولد **** دوريجين الكحلوش لاخر الله يعطيه موصيبة دوزها علية داك نهار..
(خرجت من ديك التصويرة بقات كتقلب وتبقشش كتشوف شكون اكتر وحدة دايرة ليه جيم وتعلق لقات غيثة ظحكت باستهزاء)
وطااااايحة السيدة فيه معرفت اش عجبها فيه حاس **** تقول شاد سما بصبعو ولا ب***
(خرجت من لكونت ديالو مشات كتبقشش فديال يوسف ملقاتش شي حاجة ديالو من غير وحدة للي حاط فلبروفيل أغلبية ديال الزليج وخدمتو ولا تصاور مع شي اجانب)
كونت ديالو غامل.. ولكن عامر تيتييييز
(خرجت من تماك صورت قنت فداك سطح بغات نحطو فسطاتي ولكن معجبتهاش التصويرة للي جات مظببة)
خاص نبدل هاد التيليفون رجعو تصاور فيه حالتهم (ناضت طلت عليهم لقاتهم كيفرشو اذا سالاو عيطت على ماماها)
ماما واش نسد راه لبرد
الام: غير سدي ابنتي
ملاك: (سدت ديك الضواية للي كانت بالأليمينيوم ولكن ساهلة حيت مقادينها يا تسد بالضو يا باليد وكتحتاج مجهود شوية، هبطت بقاو مجمعين كتشوف خديجة شادة تيليفونها وكظحك)
معامن كتهضري؟! (وطلت لقات لواتس ديال يوسف) هاي هاي هاي
خديجة: (بتوتر) علاش؟!
ملاك: مقلت والو ولكن شفتكم رجعتو صحاب
خديجة: غير كنظحكو
ملاك: مالي أنا قلت كتبكييو
خديجة؛ واش معجبكش الحال؟!!!
ملاك: (هزت كتفها) عادي (شافت مرت عمهم مكتهضرش معاهم) انا نمشي نشد لبلاصة ههه
خديجة: اااااااو الله لا نعسات ولادها تم غير جلسي تعشاي على خاطرك
ملاك: نمشيو غدا الحمام؟!
خديجة: نمشيو..
ملاك: (متكية فبلاصتها جات مرت عمهم شعلت الضو لقاهم هبطو ولادها لتحت عاود شافت فيها ملاك متبسمة ابتسامة شريرة وشادة الظحكة بالسيف من دوك النظرات ديال حݣرتوولي ولادي)
خديجة: شي حاجة امرت عمي
سهام: (منفخة) لا والو غير جيت نشوفهم مساكن واش مغطيين ولا غير مليوحين
خديجة: شتي فالارض كيتغطاو حسن من للي ناعس فسدادر لكواش كيطيحو ليهم
سهام: اممم.. ولكن ياكلوها فظهرهم وعاد لبرد عليهم
خديجة: الله يهديك امرت عمي هوما صغار اشمن ظهر للي يوجعهم ولا بعوااج هاحنا شحال نعسنا فالارض منين كنا قدهم معواج موالو
ملاك: (حابسة الظحكة بالسيف وهي كتشوف مرت عمها كتسمم بوحدها) هه
خديجة: طفي معاك الضو امرت عمي (رجعت شادة تيليفونها عاطيينها كيري حتى خرجت)
ملاك: ههه كتسالي معايا هاد السيدة مقروسة غير بوحدها
خديجة: تعاود لراسها..
ملاك: (كتفرج فشي سيري متبعاها هزت راسها طلات على خديجة لقاتها كتبسم عاود، مهضرتش بقات غير كتشوف مقوسة عينها كتسكاني ولكن مباني ليها والو، حتى رجعت كتكمل لفراجة..
دازت ايام ملاك كتلاحظ خديجة ويوسف كيهضرو بزااف وحتى هي كيهضر معاها عادي باقي نفس الظحك نفس النقاش ولكن حتى حاجة مطورت بيناتهم كما كانت متوقعة عكس خديجة ويوسف للي كتشوفها ديما ظاحكة معاه لدرجة هي تبدلت مبقاتش مهمومة بلعكس دغيا خرجت من داك المود للي جات فيه…)
~~~~~~
غدا الجلسة اللولة ديال طلاق كانت خديجة مخلوعة بزااف وعارفة راجلها مغيجييش وغير غتزيد تعطل فطلاق وهي باغيا تفك كان عندها سبب ورجعو جوج اسباب.
ملاك: (جالسة فلبيرو ديالها) عندي خطة باش نجيب داك لعوج
زينب: (الي معاها فالخدمة) شنو هي؟!
ملاك: نصونيو عليه نعطيو لعبد المولى (خدام معاهم) يهضر معاه يقولو شي لعبة على خديجة تخليه يجي مكشكش
احلام: زعما؟!
ملاك: راه مزال حامق ترجعلو ولا عرفتي هضري نتي نيت قولو شد مرتك على راجلي وراكي عارفة داك تبوحيط ديالك
احلام: واش نتي باغيا تكمل بشي حد مقتول وشي فالحبس
ملاك: مكاين لا قتيلة لا والو نتي غير ديري هادشي راه قبيلة شريت نمرة ب5 دراهم، (دارو النمرة فتيليفون ملاك هضرت احلام معاه وهي تبكي وتبوحط وعلماتو هو كاين فالمحكمة هو للي غيعاونها غدا باش دغيا طلق ويتزوجو تسالات الروشارج بقاو كيظحكو حتى رجع صونا غيهبل راه خديجة كانت تحت جناحو كفاش طلاق وعاد باغيا تزوج مدخلتش ليه راسو بقات كتعاودلو وتعطيه اوصاف خديجة وهو زاد تأكد حيت داك نهار سمع يوسف كيهضر معاها.. حيدو النمرة وبقاو مجمعين حتى وصل وقت باش تمشي لقات يوسف برا تبسمت ومشات عندو)
فين؟!
يوسف: كانت عندي شي خدمة هنا وقلت نشوفك فين غابرة
ملاك: غير مع الخدمة نتا للي غابر
يوسف: حتى نعاود ليك من بعد، نوصلك؟!
ملاك: الاا
يوسف: نوصلك غير لراس الدرب
ملاك: الا اخوويا كنحاول نتفادا المشاكل راك عارف
يوسف: هه واخا لالة مهم غدا من مور الجلسة نديك تشوفي شي طموبيلات
ملاك: صافي!!
يوسف: بحالا مبقيتش باغية
ملاك: بلعكس عرفتي شحال كنتسنى، غدا عندنا الجلسة فالمحكمة
يوسف: اه فراسي غنكون تماك
ملاك: بلا متعذبي راسك
يوسف: لا لا عادي اصلا عندي شي غرااض
ملاك: اممم مزيان
يوسف: مبغيتيش نكون معاكم؟!
ملاك: غير مكنبغيش نصدعك وصافي
يوسف: لا مكاين لا صداع لا والو
ملاك: اوك، انا مشيت باش منتعطلش حتى لغدا ان شاء الله
يوسف: ان شاء الله..
اصبحنا واصبح الملك لله…
خديجة الليل كامل منعساتش كتصوني على راجلها مكيجاوبهاش باغيا تعرف واش يجي ولا لا بقات على اعصابها غير يوسف للي صيفطلها ميساج حيا فيها الأمل بكلامو زوين للي كولو طاقة ايجابية…
الليل كامل مغمضاتش مع كولشي فاق عاونات فلفطور تسنات ملاك تفيق حطاتلها تفطر
ملاك: (كتاكل وفنفس الوقت كتهضر) بايتة كتقلبي ففراشك
خديجة: (مهمومة) والله مجاني شي نعاس
ملاك: اااكوني هانية عميمييير غيجي
خديجة: أنا للي عارفاااه اختي راه راسو قاسح داك الحيوان
ملاك: يكون خير (ناضت بالزربة) من نهار جيتي وليت نفطر فالدار
الام: (دايزة من حداها) ياك لمك انا كنت كنحطلك الرهج؟!
ملاك: هههه ديما طالقة سطولك السلامة يا ربي
الام: (ضربتها الراس) سيري تمشي لخدمتك
ملاك: (وقفت كتمسح فمها) انا غير نكمل مع خديجة غندوز نشوف شي طموبيلات
الام: باك غيمشي معاك
ملاك: بلاش عليه
الام: (خرجت عينها بصرامة) باك غيكون معاك
ملاك: (أفأفت فنفسها) واخا (مشات لبست مونطو ديالها كانت لابسة سورڤيت مع سبرديلة قدات شالها قلبت على مظلة ملقاتهاش خرجت مع بغات تسد لباب خارج حمزة داير فذراعو لعيبة ديال لبوليس، عوجت كمارتها)
صبحنا على الله
حمزة: (تمشاو بجوج فالدرب مكاين حتى واحد من غيرهم من غير صوت شتا للي كيتسمع) ملاك
ملاك: (دارت قبها كدندن واخا مدايراش لكيت)
حمزة: (بقا كيشوووف فيها) ملاك بغيت نهضر معاك (والو لا رد عارف شنو كيعصبها وهو يهضر بالشلحة وهنا دارت مخنزرة)
ملاك: (بتهديد) ترجل وعاودها بالعربية!!!!!
حمزة: (شاف فيها الشوفة ديال المشتاق مولف هضرتها وعاذرها حيت عارف مزيااااااااااان شنو داير) توحشتك
ملاك: يتوحشك الشر يبقى تابعك بحال خيالك (مشات فحالها حيت خرجو من دريبة وزربت حيت خرجت فالقهوة ديال باها حتى عيط عليها)
أبابا
الاب: قالتلي ماماك اليوم غتشوفي شي طموبيل
ملاك: الا كتاب
الاب: انا غنجي مع ختك للمحكمة نكملو شغلنا ونمشي معاك
ملاك: ياله كنت بغيت نقولهالك ابابا منقدرش نمشي بوحدي صراحة، ونتا اصلا تعرف حسن مني ومنها دير البركة ديالك
الاب: واخا بنتي الله يرضى عليك
ملاك: ولكن غيكون معانا السيد للي غيوريني للي جابلي الطموبيل
الاب: شكون؟!
ملاك: خدام معانا أحم وكنت سولتو وشافلي مسكين
الاب: اممم واخا سيري باش متعطليش….
ملاك: (كملت خدمتها من بعد مرغبت المدير تاخد لعشية وصل الوقت وبينات لعمر فين وامتى، جا باها عندها كانت خديجة معاه صفرة فوجهها ركبت معاهم ومشاو شدو طريق فاس)
الاب: علاش حتى لفاس صفرو ما فيهاش المحاكم؟!
ملاك: غي حيت أبابا بدينا مع ديك المحامية تماك وصافي
الاب: وغتبقى طالعة هابطة لفاس
ملاك: حتى ابابا نتا فاس غير فراس الدرب
الاب: وااالو شغل لعيالات ديما ناقص (شاف فلمرايا لقا ملاك كتعيبو جاتو الظحكة كتر قاعدة فيها مابغاتش تحايد كمل طريق كيسول فخديجة حتى وصلو للأطلس فين كاينة محكمة الأسرة لقاو المحامية كتسناهم اما يوسف كاين على تيساع حيت خديجة قالتلو بابا جاي معانا، هبطو عرفو باها على المحامية هضرت مزيان وعطاتهم أمل كبير وكانت قدات ݣاع الإجراءات خاص غير تشد النوبة دخل ومن الاحسن يكون راجلها باش دغيا تيسر أمورهم، تمو داخلين)
ملاك: (كتلوح الهضرة لباها) مزااال باقي قدامها بزااف دالناس (باها شاف فدوك للي جالسين) اه اه شحال دالناس باغيين يطلقو زواج مابقى فيه نفع
الاب: الله يصلح الحال وصافي
ملاك: واقلة العزووبة حسن (خنزر فيها باها) نمشيو نتسناو النوبة ااااه شحال ديال لعيالات كولشي جاي يفرتكها ههه
الاب: (شاف فساعتو) مزال الوقت انا نمشي نقضي شي غراض نجيب شي قهوة وصاوني عليها شي كليان غير تقرب النوبة صونيو عليا
ملاك: ضروووري ابابا غير سير كون هاني
الاب: انا مشيت خاصكم شي حاجة؟!
ملاك: لا غير متعطلش (مشا وشافت فخديجة) ياله نخرجو برا على ميجي
خديجة: واخ (مخلوعة بزااااف وخايفة عندها احساس خاايب عمرها توقعت توصل مع راجلها لطلاق بقا فيها بزاااف الحال، غير خرجو جا عندهم يوسف كيجمع معاهم وكيحاول يجمع مع خديجة بزاف للي بانت فيها الخلعة اما ملاك عينيها كتقلب غير على عمر واش غيجي ولا لا بقاو اكتر من ساعة وهوما برا المحامية مكلفة منين توصل نوبتهم غتصوني وأصلا عندها جلسات اخرى..
ملاك بقات على اعصابها حتى كيبان ليها عمر داخل وباين كيقلب تبسمت ابتسامة شريرة بعدت من حدا خديجة ويوسف حتى وصلت حداه دارت راسها كتهضر فالتيليفون)
ملاك: وييييي… اه غير تاخد طلاقها وتهنى من داك زمر غدير الخطوبة… ههه اشمن عدة قولي هي منين تزوجات وهي فالعدة ههههه (مكملتها حتى لقاتو قدااامها شنق عليها)
عمر: (باللكنة الشمالية) شنو ابنت ***** قولي نتي للي خرجتي عليها وكتعمري راسها
ملاك: (كتنتر) عتقووو الروووح اعبااااااد االله عيطو لهداك لبوليسي للي فبراااال
(ياله بغا يضربها بقات كتنتر حتى هي برجليها ويديها باغية تقمشو ولكن الطول ممساعدهاش تجمعو شي ناس باغيين يفاكو ولكن هي باغية لبوليسي يحضى بقات كتستافزو بختها وهو كيزيد يصعر حتى قبل متكمل هضرتها جمع معاها بتصرفيقة حتى طارت دمعة من عينيها ياله غيسب حتى نقزت بقات ظفارها جارين حنوكو بقات كتغوت انها مستحيل تقبل بيه وهو مزوج ختها واخا يبقى اخر واحد شدوه شي رجال للي فهمو من كلامها انه كيتحرش بيها واخا هو راجل ختها، بقا صااخط باغي يوصل ليها يقتلها حتى جا واحد دفعو)
اورطيغا: (بقا كيسبو وحتى لوخرين هكاك حيت بقات فيهم ملاك.. خديجة ويوسف جايين غير حيت تجمعت الجوقة حتى تصدمو بهاد الجوقة للي فيها ختها وراجلها تدخلو السلطات والناس كولشي مع لبنت من للي سمعوه وللي شافوه فرتكو الجوقة للي تجمعت وعمر كيحلف البوليسي للي مقنتو جات المحامية للي عجبها الحال وهادشي غيعاون قضية خديجة، اما اورطيغا حاضي ملاك للي رجعت لملامحها بحال موقع والو عصبااتو بهاد التقلبات)
اورطيغا: واش الميكروب كل مشت كمارتك تلقى واحد شااانق عليييك!!!
ملاك: (كتحرك حجباانها بالزربة كازة على سنانها) ونتا مااالك
يوسف: اييييه تكلماااو ملاك شنو وقع؟!!!
اورطيغا: (بزق فالارض) على فيݣورااات.. (مشا من تماك مكره كينݣر)
يوسف: (ضار عند ملاك كيشوف حنكها ليسر حمر ومجروحة جرحة صغيرة) شنو وااقع؟؟ وعلاش ضربك؟!
خديجة: علاش معيطتيليش وعلاش ضربك؟!!!
ملاك: (حكت بيدها فبلاصة الطرشة) صافي داك لحمار جا بقا هضرة مني منك حتى دار ديك الشووهة ولكن والله متبقى فيه
خديجة: (فنفسها حمدات الله حيت جا وفنفس الوقت كتحس بدين كبير على رقبتها من جيهة ختها للي وقفت معاها بزاااف وكتر من بزااف)
سمحيلي بزااف اختي
ملاك: (ممسوقاش) جابو ربي دغيا يتفك عليك ونيت مع هاد المونتيف ههه
يوسف: (شاف فيها باستغراب) مونتيف!! لاااااااا متقوليهاش املاك
ملاك: (خرجت عينها) مالي شنو درت
يوسف: ملاك!!
ملاك: (ممسوقاش مشات عند المحامية للي لقاتها كتغرق ليه وجمعت شي شهود ݣاع اما هو شادو مخازني فالقنت وكيشوف فيها شوفات ديال لقتيلة)
يوسف: مفهمتش مباغيش يطلق وجا نهار الجلسة (هز حاجبو) علاش زعما (متبع ملاك بعينيبه معرفش علاش حس عندنا يد فهادشي)
خديجة: (بحزن) يمكن حتى هو بغا يتفك
يوسف: ونتي بقى فيك الحال؟!
خديجة؛ راني عاودت ليك ايوسف علاش بقا فية الحال هانتا شتي بسبابي شنو وقع لملاك
(شهقت)
ويلي ويلي بابا داااخل
(زادت مخلية يوسف واقف ضار شافها مشات عند باها للي دخلو للمحكمة، معرف واش يمشي فحالو ولا شنو يدير عااارف منطقيا وجودو ماشي فمحلو ولكن شي حاجة مخليله يبقى تماك.. )
الاب: (جات ملاك عاوداتلو بعجالة بلا ذكر التفاصيل، كان بغا يمشيلو ولكن المحامية كالماتو حيت غتزيد تعقد الامور ويرجعو فقضية اخرى، وصلت نوبتهم دخلو غير خديجة راجلها والمحامية)
~~~~~~~~~
يوسف: (مشا عند اورطيغا لمحكمة الجينايات للي لاسقة على محكمة الأسرة يشوف واش سالا الجلسة ديالو لقاه مزال كيتسنى) فيين
اورطيغا: (مكره) فين
يوسف؛ مزال مكملت؟!
اورطيغا: (بقا كيخصر الهضرة وللي تماك شي كيخنزر شي ممسوقش)
يوسف: هاد الامور غير المحامي كيتكلف بيهم علاش نتا جاي
اورطيغا: خويا رزقي نوقف عليه قالك لحم مذبوح بطريقة غير شرعية انشوفو كفاش هاد بطريقة غير شرعية كتر هاد خوروطو بزااايد علية
يوسف: ياك بان شكون عطا داك البلاغ
اورطيغا: هو للي مخليني واقف باغي نتواجه معاه
يوسف: من الاحسن بلاش معندو باش يفييدك الحكم باين لجيهتك صافي خليه منو لمولاه
اورطيغا: هو وكان ماشي فيد المخزن والله منخليه لمولاه يدوز عند هاد العبد لله وديك الساعة نخليه لمولاه.. خاي يوسف نتا عارف الحاج بسباب هاد لبلان دواالو مرض وطاح لفراش
يوسف: واخا هكاك حقك مغتجيبوش بيدك هو غيتخلص
اورطيغا: غي**** عندو 6 شهووور الا دارو معاه الخااايب
يوسف: (معرف ميقولو) صبر وصافي مبقيناش تنشوفوك لتحت وحتى شفيق تيتشكى منك
اورطيغا: اوديييييي الوقت وصافي (عيطلو المحامي.. بإشارة وداع) هادي هي تهلا..
يوسف: بلاتي غنجي عندك المحال
اورطيغا: (حرك راسو بأه مدام لوخرا كانت معاه الا هي المعنية وهي للي غتجي تشري الطوموبيل وكاره يوووشفها مرة أخرى ولكن احترامو لكبير ليوسف مغيقول والو وغيتعامل عادي… الا مستفزاتوش….)
ملاك: (حاطة يدها على حنكها باش باها ميلاحضش لاطراس عارفاااه ميتهنى حتى يقتلو) احم بابا غتبقى معايا، ولااااا غترجع؟!
الاب: واش ضرووري هاد نهار ابنتي الخدمة مزيرة شوية
ملاك: اه ضرووري درت مع السيد حشومة هو رسالي لبلان وانا نخوي بيه لا لا أبابا مجاياااش منݣردعووووش
الاب: (نهض فيها) هضري مقاد بحال لبنات
ملاك؛ حم هضرت عادي ابابا
الاب: عمك باغي يخرج يقضي شي غراض
ملاك: (على قلبها زربت عليه) صافي غير سير نتا ابابا نمشي انا وخديجة
الاب: سمعي نتي كتخرجك خدمتك خديجة طلقت ومبقاش داك دخول ولخروج بزاااف
ملاك: مالها نهاية العالم راه غير طلقت ماشي كفرت (شافتو خنزر وخافت يعكس ليها) حنا اصلا كنخرجو غير الا ضرووري معندناش مع الزنقة شتي ابابا وكان ماشي الخدمة نبقى غير فالدار والله الراحة على الزنقة انا اصلا بيتووتية
الاب: (حرك راسو بأه حتى فتح عمر لباب خارج كااعي نيشان توجه الباب لخرووج خرجت خديجة متبسمة هي والمحامية كيهضرو) امدرا
المحامية: ان شاء الله الجلسة الجاية غتكون بنتك حرة
الاب: ان شاء الله وبالنسبة للحقوق ديالها
خديجة: سمحت فكولشي ابابا والله مبغيت والو منو بغيت غير رااحتي انا نخلص براتي وبراتو غير نتهنى
الاب: ان شاء الله تبنتي (حرك راسو باه خديجة ضارت تقلب على ملاك لقاتها كتشوف فالجهة الاخرى لقاتها حاطة على شي محاميين مجمعين تبسمت شافت فتيليفونها مكرهتش تعيط على يوسف وتقولو تهنيييت والقاضية سمعتها وشكاتلها بحال كتشكي على صاحبتها قالت كووولشي وهو غير كان كيسمع ومتنكرش منين بكى مبغاش يتفارق معاها فكرت فيايامهم ولكن هي صممت عرفت الا رجعت غترجع مدلولة ويوماين ويرجع لعادتو وعاد غترجع والضرة كاينة معاها فنفس الدار.. وحيت خايف سخط مو ومغيطلقهاش خرجو من تماك وملاك كتأكد على المحامية للي خاصهم يرجعو ليها قدام باها باش يأمن ويكملو ليها الاتعاب ديالها..
هزت ملاك تيليفونها وصونات على يوسف قدام باها)
ملاك: سلام عليكم صاڤا خويا يوسف… صونيت عليك حساب دوك الطوموبيلات للي قلتيلي… صافي صيفطلي فين كاين المحال نتلقاو تماك حيت حنا كان عندنا شي غراض غندوزو نتغداو عاد نجيو… شكرا اخويا (قطعت وشافت فباها) مشينا ابابا
الاب: غير قولي اديك البرغوتة فوقاش قلت غنتغداو
ملاك: ومالك بغيتي تخلينا بالجوع والله حتى نعيط على زهيييرو
خديجة: هههه زربت عليك أبابا فهادي
الاب: ههه واخا لالة فين تبغي تغداو
ملاك: فينما (ركبو فالطموبيل مشاو لكاطر كوان carte coin متخصص فدجاج محمر طلبو دجاجة جا معاها الروز لفريت صوص وكوكا، كلاو حتى شبعو وناضو مشات ملاك لحانوت خدات مسكة ليها وجابت وحدة لخديجة يهضمو فطريق صيفط ليها يوسف لوكاليزاسيون كان محال فمونفلوري مشاو لتماك نيشان حطو الطوموبيل حتى كيبان ليهم يوسف)
ملاك: ها هو ابابا السيد للي قلت ليك عليه (فنفسها عقبال فين نعرفك عليه نهار الخطوبة وتقولي يا زين مختاريني)
الاب: (تسالم معاه يوسف وكما العادة كان فقمة اللباقة والرقي وداك لسان لحلو الفاسي.. مخلي ملاك وخديجة كيفرنسو..)
يوسف: السيد عندو 3 ديال الطموبيلات ياريس طويوطا، فورد فييستا، وووو كاينة كيا
ملاك: بشحال؟!
يوسف: هه شكون فيهم؟!
الاب: نشوفوهم بعدا ابنتي وديك الساعة نتي ختاري
ملاك: اه بالصح غير بغيت نعرف….
ملاك: (قربو للݣراج للي كان كبير طرطقت عينها مفهمتش هدا فينما مشات كتلقاه بقات غير مدور عينها بزااف على هاد الصدف المنحوووسة عوجت كمارتها مرضياااش بيه يكون طرف فهاد لبيعة وشرية
مشاو باها ويوسف كيشوف الطموبيلات بداو باللولة شافت فيها عجباتها ياريس فلݣرونا وباينة نقية بزااف، لاخر داير راسو ممسوقش كيهضر ويشرح وحداه ملاك قدام باها كانت كتحاول ترزن بزااف ومظيرش شي غلط ومتشوفش حتى فاورطيغا باش ميكونش بيناتهم شي احتكاك، اما خديجة حاضية غير يوسف للي كيجيها بحال شي ملاك نازل من سما الهضرة بشوية واالابتسامة مكتخطاش وجهو وعاد شي مرات كيشوف فيها ولكن نظرااات زويييينة، بقاو كيشوفو الطموبيلات عجبو باها من غير كيا للي مبغاهاش شاف فبنتو)
الاب: شنو ابنتي
ملاك: (تبسمت اخيرا الحلم كيتحقق.. تبسمت بحب وبحماس) شنو بان ليك نتا ابابا؟!
الاب؛ هاد الجوج مزيانين نقيين، مزيانين
ملاك: (حركت راسها باه وفنفسها كيا غتكون رخس منهم كاملين ولكن هوما يعرفو كتر ضارت لقات اورطيغا كيشوف فيها بلا متحس لعبت بحواجبها وكدير شي شوفات كتستافزو هو اصلا غير كيشوفها كيتعصب بلا ميحتاج وهي كيعجبها تعصبو علاش معارفش وكيتمنى متاخد حتى شي وحدة من هادو)
اورطيغا: (عيطلو يوسف باش يتافهمو على لفلوس بغا يصيفط لاخر مول المحال ولكن لقاه مشغول مع كليان اخر مشا جيهتهم شاف فالاب حرك راسو) سلاام عليكم (كولشي رد عليه الا هي)
يوسف: الناس بغاو يعرفو شحال الثمن ديالهم بزوج كيا بلاش
ملاك: حتى هي نعرفو ثمنها
اورطيغا: (كيهضر وكيشوف بين يوسف ورشيد) حيت من طرف يوسف وموصيني بزاااايد عليكم نقولكم الثمن اللخر
الاب: الله يكبر بيك اولدي
اورطيغا: مرحباا حبيبي (ميقت فيه ملاك على هاد الكلمة ولكن مشافش فيها)
بون..
ياريس 8.300 مازوط وعامرة ضاربة 10.000 كلم
فورد فييستا 8 مازوط ضاربة 80.000 كلم
كيا ايصانص ضاربة 10.000 ب6
ملاك: (شهقت مطرطقة عينها على هاد الاثمنة يوسف جابتو الظحك وفنفسها هادشي عاد موصينو)
الاب: (عارف السوق كيف داير وغير من الشوفة اللولة عجبوه الأثمنة واخا غيديها لميكانيك اخر يقلبهم، شاف فبنتو للي مصدومة)
اثمنة معقولين ابنتي
اورطيغا: هدا الثمن للي طالبين ماليهم انا مزايد عليكم حتى فرنك وكاينة رونج ولكن غالية عليكم
ملاك: (هزت حاجبها كانت غتهضر تسكتو ولكن معندهاش ثمنها ولا حتى قادة بمازوطها ولا وراقها يعني غير غتخسر صورتها)
الاب: الله يكبر بيك اولدي (شاف فبنتو) معندك فين تشاطري هههه غير متحاوليش
خديجة: هههه طحتيلها فنقطة الضعف
اورطيغا: (قوس عينو فيها كيتسناها تهضر وهو مكرهتش كولشي يديرلو 10 غير يوسف للي رغب زائد مغيدي والو معاها عرفو بريكول حااامض من أحمض وحدة شافها..) مرحبا تفكر على خاطرها غير هاد الاثمنة غير ليكم اما نبيعهم كتر وطايرين
الاب: (بقا كيوريها الأب وهو مايل لياريس عاجباه بزااف وثمنها هوتة وعاد نقية ومضرباش لكيلوميطراج.. ) هادي مضرباش بزااف
اورطيغا: هادو طموبيلات ديال الشركات للي كيكونو جلسو بزااف وكيخرجوهم للبيع من بعد مكيقادو وراقهم
رشيد: اممم مزيان عليها نقيين (شافها تزيزنت) شحال جهدك ابنتي
ملاك: (بصوت منخفض) 4 (كولشي تصدم كيشوف فيها….)
اورطيغا غير سمع 4 ضار مشا دخل الݣراج كينݣر كيحس براسو كيكرهها وعاد غضيع عليه هاد لبريكول للي كيربح منهم مرة مرة
يوسف: (تبسم داير ليها الخاطر وكيغطي على ردة فعل اورطيغا) 4 غتجيبلك شي طموبيل ولكن غتبقاي واحلة غير مع الميكانيك وصداعات الخاوية
الاب: (بحزم) كتفلاي؟
ملاك: لا ماشي 4 غير انا درت بحساب 4 مينقصش لينا شي مليون ولا جوج
يوسف: انا كنعرفو مزيان منين قال مواخد حتى ريال مكذبش يعني بثمن باش ماليها بغاو يبيعوها انا عجباتني ياريس حيت شفتها معقولة بزااف فالثمن ونقية ولكن الاختيار تيبقى ليك غير رأي وصافي ولا لا سي رشيد
الاب: اه عندك الحق، ملاك واش حنا كنتفلاو هنا!! واش عندك فلوس؟!
ملاك: اه عندي خاصني غير مليون ولا جوج
الاب: (خرج عينو فيها وهي مشات وخبراتو فودنو حاني عندها هز راسو شاف فيها) صافي انا نعطيها ليك (شاف فيوسف) صافي قول لصاحبك نضرب بيها ضويرة
يوسف: اه ضروووري (مشا دخل جاب سوارت عطاهم لباها ركبت ملاك حداه وخديجة اللور قالو باها يركب معاهم ومبغاش خلاهم على راحتهم وفنفس الوقت باش ميسميهمش غيسرقوها)
الاب: (بقا كيصوݣ وكيسيي فيها راه عندو خبرة قديمة وكيوري لملاك للي كتفليها فالقجر واش ناسيين شي حاجة وتشوف فيها ولكن الثمن مزال مصدومة فيه 3 سنين وهي كتخدم جمعت حصيصة حتى ربت الكبدة عليهم ولكن مظنتهاش غطير فمرة… شافتو وقف حدا شي ميكانيك) غيعاود يشوفها مزيان
ملاك: اه (هبطو لبنات) ناري شحال غالية
خديجة: ياك عندك كتر
ملاك: سكتي ميسمعكش بابا بعدا نطير منو دوك 2.. ( بقاو مدة عاد جا عندها باها باينة الطوموبيل مزيااان مدايرة فيها لاصباغة لا كسيدة)
الاب: متفلتيش هاد الهمزة ابنتي الطموبيل زوينة وراقها وحتى الكونصوماصيون
ملاك: راه غير مكملينش فلوس وعاد الكتبة ولوراق
الاب: انا نسلفك
ملاك: (خرجت عينها) تسلفني؟! ياك قلتي غتعطيني 2 مليون اوا والكتابة وداكشي كادو من عندك
الاب: ههه منين جبتي هاد البخل
ملاك: معرفت شكون للي بخيل فينا كتحسب على بنتك جوج ديال،
الاب: ياك
ملاك: يمكن طلعت كنشبه ليك (خديجة شهقت حتى شافت باها كيظحك) رجوولة بحالك هه
الاب: دوك لفلوس نعطيهم ليك ابنتي فشي حاجة للي تستاهل وتكوني واقفة عليها اما دابا لا غير سلف وفراس كل شهر نبغيك تعطيني حتى تكمليها نتي تبارك الله خدامة وفلوسك ديالك بوحدك
ملاك: (خسرت كمارتها فيه) بقالك غير نمشيو لشي مقاطعة نݣاليزيوها كل شهر نعطيك 200 درهم
الاب: ههه وااا هو الا بغيت نضمن حقي معاك هاكا خاصني ندير
خديجة: ههه (بقات كظحك وفنفس الوقت مستغربة كفاش كانت قاتلة راسها فالحياة بتحت شعار بعدا راني مزوجة مستوورة وهي مكرفسة نسات ان عندها باها يوقف معاها فكولشي وعاد ملاك كفاش مرتاحة وكتهضر مطلووقة مع باها واش هو للي تبدل ولا هي كانت كتقلب غير على شي راجل وصافي..)
ملاك: (بقات كتفكر الا مشراتش دابا الطوموبيل عمرها تشريها كتحاول تقنع راسها هي للي دارت لفلوس ومزال دير كتر وتدفع فلبرطما كما مخططة… عقلها خدام معاها كيقنهعخا وقلبها مسخاش بالفلوووس للي ربات الكبدة عليهم ومسخنينها)
الاب: تصوݣي نتي
ملاك: لا لا منقدرش
الاب: وغير اجي ياك أنا للي معلمك الصوݣان داك العام (ركبت وركب حداها ماشية غير بشوية وحاضية مع لبشار) بانلي ابنتي نتي غتلصقي 30 ماشي 90
ملاك: (مكتهضرش مكوانسية مع الفولون)
الاب: عنداك عنداااك من هنا.. سيري لهيييه.. ديري السينياال… امنهنا الخرا (حبست وطرطقت بالظحك وخديجة مصدومة)
هههه انا مصااالحش نوريك كل مرة علمتك كنبات بالاعصاب
ملاك: ههه راه غير مضهشرة وصافي (رجعت ديمارات كتصوݣ ولكن بشوية حتى وصلو الݣراج وقفت حداهم يوسف خرجو مشا الاب كيتفاهم معاهم لداخل كان حتى للي مخرجها وغيبيعها، كان راجل كبير فالعمر نفس الثمن للي كان قال اورطيغا، خرجو عند ملاك جبدت دفتر الشيكات ديالها مشاو يتكاتبو
ملاك: حم ها خديجة تبقى حداك
يوسف: بلا منمشي معاك متأكدة؟!
ملاك: لا لا بلا بابا معايا، والعدول غير هنا نيت طلعو هي وباها وداك الراجل بقات كتشاااطر معاه حتى تشاطرت معاه وحايد ليها 1000 درهم عطاتو الشيك من بعد مڤيريفياه باها شدت لوراق ديالها سنات خرجو هي وباها ظاحكين رجعو للݣراج كان اورطيغا مشا فحالو للمحال كيتحسر على هاد لبريكول ولكن كولشي داز فوجه يوسف..)
يوسف: بالصحة والراحة
ملاك: شكرا خويا
الاب: عذبناك معانا اولدي
يوسف: بكل فرح اسي رشيد
الاب: مرحبا بيك عندنا فصفرو انا عندي قهوة ف****
يوسف: ان شاء الله نجي شي نهار نشرب قهوة عندك
الاب: مرحبا بيك اولدي
ملاك: واش غنصوݣ حتى لصفروو؟!!
مشات صايݣة من مور باها غير بشوية حتى حست براسها غتطلق خديجة مبغاتش تركب معاها خافت على روحها طريقة كاملة وهي كتهضر مع يوسف فالتيليفون عاطيينها للظحك وكيظحك عليها على تاشطارت ديالها وصلت لصفرو قطعت عليه خايفة من لبوليس واخا اصلا كانت دايرة مكبر الصوت بقات بشوية كتصوݣ كتحاول مضهشرش ومتخلعش بدات شتا كتنقط عجبها لحال كدير سويݣلاص فرحانة بطموبيلتها وصلت حدا القهوة ديال باها تبسمت كتحاول تشوف واش شافها شي حد من المعارف يعرفها راه شرات طموبيل وقفت حتى هي جا عندها باها هبطت الزاج
الاب: شتي من اللول تحايدي الخلعة والخوف المهم هو تبعي قانونك ومتهوريش
ملاك: هههه ويييه (شافت فخديجة مصغرة عينها) نتي والله لا ركبتي فيها
الاب: متحلفيش!!! مهم حطيها هنا فلبارك نوصي سعيد عليها
ملاك: بابا خليني نخرج ماما نضرب بيها شي دويرة عفاك عفاااك
الاب: لا وحتى نتي نساي الضوران راه حدك الخدمة
ملاك: تأ!! وااابابا عفاااك غير هنا فالشاريع ورجعو عفاااك عفاااك الله يرحم ليك ميييمتك سيري أحنة الله يرحمك فهاد نهار ويوسع عليك
الاب: هه حتى لغدا ونخرج معاكم دابا سيري للدار
ملاك: (شافت فيه ديك الشوفة خازنة اووف فخاطرها حيت عارفة الا نطقتها غيهرس عليها ديك الطوموبيل ديمارات دخلت لباركينݣ 10 دقائق وهي كتقادها، هبطت سدتها بالاوطوماتيك واخا هكاك متاقش ورجعت كتقلب لبيبان بربعة كتخمم خاصها تجيب ليها شي باش تغطيها مشات لعندهم كانت باغية توريها لمها رجعت صورتها باش توريهالها ومشاو للدار وكل وحدة باش فرحانة… )
~~~~~~~~~~
اورطيغا: مشا للدار لكبيرة فين كاينة مو والحاج والعائلة هي كانت على شكل رياض كبير، دخل نيشان عند الحاج للصالون لكبير للي كانو معاه شي صحابو، جالس لابس جلابة فلݣرونة غليضة كما ديما انيق واخا مريض الا كيستقبل ضيافو مأنتك، باسلو يدو وراسو سلم على صحابو
كيف بقيت شوية الحاج؟!
الحاج: الحمد لله على كل حال اولدي قضيتي الغراض
اورطيغا: (بقا واقف) كولشي مزيان
الحاج: دزتي للمحال؟!
اورطيغا: (جبد شي شيكات من جيبو دايرهم فجوا حطهم فالطبلة حداه ورجع وقف مقابل معاه)
الحاج: اممم (هز داك جوا مقربو ليه، رجل باينة فيه صارم شوية واكترية فهادشي ديال الخدمة عندو كولشي بحال بحال سوا ولدو سوا الخدام عندو مكيبغيش للي يتهاون فخدمتو والخدمات هي اللولة ومسبقة على كوولشي) مزياان جلس
اورطيغا: عندي شي شغال مزال نقضيهم
ااحاج: الله يرضي عليك
اورطيغا: (تبسم معاه بابتسامة مواصلاش للعين هو وللي كانو معاه، خرج من تماك خرج عينو وزفر بحال كان شاد التنفس ديالو، كيحس بحال راه ولد صغير مزال فالإعداادي قدام الحاج…
جات عندو بنت عمو وتبسم تسالمو بليبيز شوية ديال الظحك سول على مو كانت فلبيت لفوق طلع عندها هو رياض متكون من 2 طبقات كبيييير حيت جامع عائلة كبيرة دق كانت مع شي مرا) الوالدة!!!
ام اورطيغا: #مرااد دخل احبيبي دخل
اورطيغا: (دخل غير شاف ديك للي معاها كحل بلعمى معندوش معاها) مسالية شوية
ام اورطيغا: سلم بعدا اولدي
اورطيغا: سلام.. مسالية جوج دقايق
نرجس: اويلي اسيدي مراد حنا ݣاع مبيناش ليك تجي تسلم علية وتسقسي على حالتي
ام اورطيغا: مزروب شوية اختي نرجس (خرج هو وتبعاتو مو غير وصلت لعندو ضربااتو لذراعو) واش هاد تفرعين قدام الناس
اورطيغا: الوالدة نتي عارفاني معنديش مع ديك السلعة
ام اورطيغا: قلبك غير كيزيد يقساح اولدي صافي عفا الله عما سلف
اورطيغا: هاديك نتي ماشي انا وعلى وجهك مخمجتش لمها ديك الكمارة (تأفأفت حيت عارفة لوخرا شنو دارت وعارفة ولدها طبعو وكفاش كيتصرف) مهم نتي بيخير؟!
ام اورطيغا؛ اشمن بيخير، وليت كتغبر بزااف لهاد الدرجة مبقيتش مرتاح هنا معايا
اورطيغا: بحال نسيتي راني تطردت من هنا واحد نهار
ام اورطيغا: لا منسيتش ومتنساش حتى نتا راني رجعتك بعزك وبقيمتك الله يرضي عليك امراد متزيدش تقسح راسك
اورطيغا: قيمتي انا للي تنديرها وغنديرها بعيد من هنا للي تيجيبني هنا هو نتي
ام اورطيغا: رجع اولدي راني وليت كنتوحشك بزاف
اورطيغا: الوالدة نهار تعيطيلي غتلقايني حداك وبلا حتى متعيطي انا كنجي نشوفك
ام اورطيغا: جلس تغدا معايا
اورطيغا: (هز حواجبو متبسم باسلها جبهتنا وحنا باس يدها) تهلاي (مضارش من موراه خرج نيشان طلع فدوك دروبة الضيقين مغوووبش مغينساااش….)
زهرة: فرحت بطموبيلة بنتها وهي كتشوف تصاور عجبها الحال بزاف هاكا كانت كتمنى بناتها يديرو مستقبلهم شافت فبنتها جراتها باستها فحنكها…
ان شاء الله نشوفك عروسة ابنتي
ملاك: (كتلعب بحواجبها) فالقرييييب
زهرة: شكون هاد المسخووط
ملاك: (كتعيبها) هنننننعععع مسخوط قالك بالفرحاات عليه يجي طااالب رااااغب مزااااوݣ
خديجة: حم واش كتهضري على يوسف؟¡!
ملاك: (خنزرت فيها) نتي وليتي كتر من نعيمة
زهرة: وقوليلي ابنتي واش غتخبي على ماماك شكون هدا وشنو كيدير
ملاك: مزال اماما حنا ياله فترة تعارف صراحة راه شحااال وحنا كنهضرو معمرو مقالي على زواج ولا حتى كنعجبو هو غير كيلمح ولكن هضرة مزال مقالهاش
خديجة: يمكن حيت كيعتابرك غير صديقة بالصح كما نتي كتعتابريه
ملاك: معرفت
خديجة: (شافت راسها بدات كتعيق وهي ضرب الطم حست بتيليفونها كيڤيبري فجيب بينوارها مبقاتش كديرلو الصونيط جبداتو بشوية كان هو نيييت قلبها زدح حتى ترمشو عينها بالخلعة والفرحة!!) انا جاية
(ناضت من حداهم)
ملاك: صراحة مشطبة مع هاد خينا
زهرة: وقلتيلو علية
ملاك: ماماااااااا انا هادشي مكنتناقش فيه مع حد وحتى حد مشغلو فهادشي كما بغا يكوون (بكره) وهداك حمزة الا كان شماتة راه ماشي كولشي بحال بحال
زهرة: عادي ابنتي راه كل واحد كيختار شنو بغا وحتى حمزة ولد الناس من حقهم يختارو ونتي من حقك تختاري
ملاك: من حقو يختار فية شنو بغا ولكن نتي خط احمر
زهير: (تبسمت وجبدت بنتها لحضنها) مزال كتبغي حمزة؟!
ملاك: (زفرت بتنهيييدة، متنكرش انه بغاتو من قلبها وحلمت بأحلام وردية معاه وحتى هو كانت كتلمس حبو ولكن) دابا شنو ندير مع هدا اماما واش نمشي نخطبو انا نيشان
زهرة: هههه تبع للي يبغيك ابنتي وحتى نتي خاصك تبغيه بعدا
ملاك: انا راه فينما كنشوف الزين كنبغيه راه الا ديتو علية راه مكرهتش نبقى زوج طلق زوج طلق زوج طلق لي شفتو ديالي وللي مشفتوش عندي فيه النص نجربهم كااااملين
زهرة: (قرستها حتى غوتت) الله يقلل حياك ابنت لحرااام خرجتيلها نيييشان
ملاك: هههه غير كنظحك (دخلت خديجة عندهم) شكون هضر معاك؟!
خديجة: حتى واحد
ملاك: اممم زعما زعما
خديجة: علاش كتقوليلي هاكا
ملاك: غير يكون عمر كيرغب عرفتي اماما (عاودات ليها شنو وقع وراتها تحت عينها باقي حمر) كنت بغيت ندير ليه شكاية غير بابا للي مخلانيش حيت مقلتش ليه على الضرب
زهرة: لا حول ولا قوه الا بالله العلي العظيم الحمد لله تفكينا منو
خديجة: قالتلي المحامية دغيا غنطلقو …
دازت سيمانة الامور كانت عادية ملاك كل مكتزيد تطلق يدها فالصوݣان كتر خرجت باها مها وختها دارت بيهم وتعشاو على برا على حسابها دخلو للدار وكان باين عليهم دوزو وقت زوين كأسرة ملاك كانت مسخاتش ترجع من الزنقة هي كتبغي هاد الدار ولكن هي كتمنى غي دار صغيرة جامعاهم ويكونو بوووحدهم ماشي تكون عايشة فدار العائلة.. بدلو لبنات حوايجهم ملاك بقات فبيت مها وخديجة تسلتت حتى طلعت لسطح واخا كان البرد قااااسح تكمشت فالقنت مقردة جاوبت وهي كتهضر بشوية
يوسف: علاش متتجاوبيش؟!
خديجة: خرجت مع ماما وبابا وملاك
يوسف: اممم وانا متفكرتينييش
خديجة: (تبسمت ولقلوبة خارجين من عينيها ممتيقاش شنو كتعيش دابا وشنو كتحس ومعااامن!!) فكرت
يوسف: بغيت نصوني عليك ابيل فيديو نشوفك
خديجة: لا لا مصالحش انا غير فسطح وظلام وكنهضر بشوية باش ميسمعنيش شي واحد
يوسف: وانا بغيت نشوفك
خديجة: فين؟!
يوسف: مكرهتش نجي ولكن عارفك متبغيش تخرجي عندي، نشوفك بعدا فالتيليفون غير تصويرة
خديجة: لا لا مصااالحش
يوسف: عفااك
خديجة: معرفتش ايوسف كنخاف نكون كندير شي حاجة غلاط
يوسف: غلاط؟! شنو للي غلاط فهادشي
خديجة: نتا كتبغي ملاك!!
يوسف: (رمش 3 مرات وجلس فوق لفوتوي) ملاك عزيزة علية بزاااف وعندها بلاصة كبيرة ولكن حب امممم لا
خديجة: وهي؟!
يوسف: هه متنحسش بيها تتبغيني فمرة معتابراني صدييق لا غير هه ملاك تبغيني مستحييييل
خديجة: ونتا فاللول؟!
يوسف: دابا تديري هاكا باش تلفيني على التصويرة
خديجة: ههه لا غير بغيت نعرف
يوسف: واش هي قالت شي حاجة؟!
خديجة: لا
يوسف: اذا صافي انا وياه des amis وصافي
خديجة: عمرك بغيتيها؟!
يوسف: هههه خدييييجة دابا متصيفطيش التصويرة
خديجة: عفاك جاوبني
يوسف: وعلاش تتسولي؟!
خديجة: بغيت نعرف ضرووري
يوسف: باش نسدو هاد الصفحة انا وملاك بيناتنا علاقة زوينة مفيتاش الصداقة لا قبل لا دابا لا من بعد وعمر تكون شي حاجة، ودابا بغيت تصويرة
خديجة: هههه نشووف
يوسف: نتسناك!!
خديجة: انا نهبط دابا قتلني البرد
يوسف: منهضروش فالليل؟!
خديجة: مصالحليش، نهضرو فالواتساب
يوسف: مكيقنعنيش اخديجة ياك كولشي تينعس دغيا هضري نتي معايا
خديجة: راه كنعسو قبيلة انا وملاك وبنت عمي وولادهم فبيت لجلاس كولنا فبيت واحد
يوسف: امم حسابلي عندك بيتك نتي وملاك
خديجة: لااااا (بتنهيدة) هادي عندها قصتها بوووحدها
يوسف: عاوديهالي
خديجة: (بقات كتعاودلو كولشي ݣاع للي خباتو ملاك فرشاتو خديجة….)
يوسف: (كان كيسمع ليها مزيان، وعاطيها ودنيييه) واخا هكاك ماشي سبب باش تنوضي وتلوحي راسك لزواج ياك خوتاتك كاملين هاكا، صراحة مفكرتيش مزيااان
خديجة: (حسابلها غيتعاطف معاها) معليييش للي دازت على الراس كتعلم الواحد
يوسف: (شاف الجو عاود غيتكهرب) حقا شكرا بزااف على لكادو
خديجة: ههه اويلي اشمن كادو؟!
يوسف: هاداك المقطر ديال زهر (رش منو فالجو واستنشق منو)
خديجة: (فرنست) ماشي كادو غير كنا كنصايبوه وفكرت نخليلك شوية عجبك!!
يوسف: صاوبتيه نتي؟!
خديجة: اه هداك أنا للي قطرتو بيدي
يوسف: اممم.. رشيتو فبيتي بقات الريحة عاطية بحال تنشم خديجة
خديجة: (تبسمت) علاش ساك (سمعت ملاك كتعيط ليها) ملاك ملاك كتعيط بسلامة بسلامة (قطعت ناضت مكوانسية بالبرد ورجليها نملت عليها بقات كتجر فيها فتحت باب سطح بشوية وسداتو بالحس ياله تلوح رجليها جات فلخوا وهي تكروع بالخلعة طكات على وجهها بيدها زيد سادة فمها باش ميتسمعش حسها، تكورات فقنت دروج بغات توقف رجليها عاطياها لحريق بحرا نااضت بشوية زااامة لحريييق وهبطت كتعرج باقي درووج مزيرة على تيليفونها للي مطلقاتوش دخلت البيت لقات ملاك فرشات ليها بلاصتها تحشاات مغطية وجهها كيتألم فصمت سمعت ملاك داخلة طافيى الضو عاد حيدات لغطا)
ملاك: فين وليتي كتغبري نتي؟!
خديجة: كنت غير فالصالون كنتفرج فالفدييوهات
ملاك: اححح دݣدݣت هاد نهار (ياله غتكى وهي تجي مهم شعلت الضو) مالكي؟!
زهرة: (بفرحة) نعيمة ولدت
ملاك: (تبسمت) شنو ولدت؟!
خديجة: (تݣعدت حتى هي) على سلامتها مسكينة
زهرة: اويلي مال وجهك نتي؟!
كولشي شاف فيها وحتى ولاد عمتها للي تماك
خديجة: (قاست فجبهتها وحدا ودنيها) مشعلتش الضو وطحت من دروج وانا هابطة من سطح
زهرة: وعلاه هابطة كضهصصي؟!! (مشات تجيبلها شنو تدهن)
ملاك: كنتي فسطاااااااااح!!!!!
خديجة: اه اه قبييلة (حركت يدها للي عاطياها لحريق وهي تلقاها صباعها مجرحيين حيت كالات فيهم على وججها والتيليفون) احح
ملاك: ههه ناااري وليتي مزوقة
خديجة: والله الا كليتها بلمزيااان
ملاك: (صونات على نعيمة ابيل فيديو جاوبتها كتبارك ليها وظحك على شعكاكتها وراجلها كيقاد ليها شعرها من مور ودنيها جات زهرة كداوي بنتها ودهنت ليها الزبدة على لبلايص للي منفوخين وكيزراقو فوجهها ويدها حتى جابو لبنيتة لمها بقات كتوريها ليهم وهوما فرحانين جا حتى باهم كيشووفها وعينيه دمعو فرحااان كيحماق على زيادة لبنات كولشي العائلة تجمعت عليهم خديجة بالفرحة هزت تصويرة ديال بنت نعيمة للي صيفطات ليهم وصيفطاتها ليوسف)
خديجة: ختي ولدات (فلبلاصة صونا عليها مشات كتسلت للحمام جاوبت وهي كتهمس) الوو
يوسف: تبارك الله على لفنكوشة وعلى سلامت خييتك
خديجة: ربي يخليك (كتستغفر الله حيت ذكرت الله فالحمام)
يوسف: زوييينة تتشبه لخالتها
خديجة: ملاك؟!
يوسف؛ ههه لا نتي
خديجة: اممم.. عرفتي طحت من دروج وانا هابطة كوولي موعتة ههه
يوسف: ياكما تقصحتي؟!
خديجة: شوية معرفت وجهي كيف غيصبح غدا
يوسف: جاوبيني ابيل فيديو
خديجة: لا لا عفاك وأصلا مغنبانش ليك عندي كاميرا دالقدام مهرسة ومضببة
يوسف: متتبغي لا تصيفطيلي تصويرة لا ابيل فيديو وحتى الشوفة ممااا…
خديجة: يوسف انا مزال مطلقت
يوسف: هادشي للي مخليني مكنبزز عليك والو…
خديجة: (تبسمت مفرنسة غير سمعت صوت باها قريب قطعت دارت التيليفون فجيبها وخرجت من الحمام كولشي فايق كولشي فرحان بالخبر دزيادة….)
اصبحنا واصبح الملك لله فرحو لنعيمة بزااف وفنفس الوقت صبحات مها كتبكي جاتها قاسحة تكون بعيدة على بنتها للي فالغربة واخا عݣوزتها مشات عندها وكاينين عائلة راجلها تماك الا ماشي بحال بلاصتها ومغيدلعوهاش بحال مها ويشدولها الخاطر دالخاطر…
غير رشيد للي بحرا كيهدأ فيها ناضو بناتها حتى هوما كيكالميو فيها ملاك مشات للخدمة وخديجة بقات مع مها وفنفس الوقت دايرين ابيل فيديو مع نعيمة..
ملاك: (صونا عليها يوسف بقات كتشوف فلابيل لاحظت انه تبدل معاها بزاف مبقاش كيصوني بزااف وهضرتهم قليييلة زائد مكاين حتى تطور فعلاقتهم وهادشي مخليها قنطاانة من ناحية الحب والرومانسيه، معرفت كفاش تحسب هادشي ضرها خاطرها حيت كان عاجبها داك الاهتمام فالاول ورسمت شحال من حاجة فبالها عليه ولكن مدام نقص التعامل الا مكاين واالو… تقطع لابيل حطات التيليفون فوق لبيرو دارت نظاظر بروطيكسيون كملت خدمتها فلبيسي نص ساعة رجع صونا عليها جاوبت)
وي..
يوسف: اهلين وسهلين
ملاك: (عوجت فمها) اهلااان
يوسف: فين غابرة
ملاك: مع الخدمة وصافي
يوسف: كيف غادية مع الطوموبيل
ملاك: مزيان الحمد لله
يوسف: (حس بكلامها ناقص) مخاصماني
ملاك: لااااا
يوسف: علاش متتسوليش فية؟!
ملاك: سول نتا نيت.
يوسف: ياك العفريتة صونيت ليك لبارح واليوم متتجاوبيش وباغي نهضر معاك ضروووري فشي موضوع
ملاك: خلينا ايوسف راه كنتي كتصوني ميات مرة فنهار
.يوسف: (بقا ساكت مفهمش واش هادشي كيعني شي حاجة عندها)
ملاك: (بغات تدارك الموضوع) نورمال les amis مكيغبروش على بعضياتهم معرفتش علاش حاسة هاد البعد فيه شي ريحة ديال الزعطة
يوسف: (تبسم) نتي اول وحدة نعاود ليها كوني هانية عليها تنقوليك باغيك فشي حاجة.. ملاك نتي عندي عزييزة بزاااااف مغنقولكش بحال ختي ولكن تنحس بيك قريييبة لية تعرفت عليك فوقيتة للي كنت محتاج انسان بحالك فحيااتي
ملاك: (تبسمت)
يوسف: حقا مبروك لبنوتة عند خيتك
ملاك: (جمعت الظحكة) منين عرفتيها؟!
يوسف: امم قالتهالي خديجة
ملاك: اممم الله يبارك فيك العقبة عندك
يوسف: (زفر) امييييييين
ملاك؛ مالك
يوسف: والو قلت ليك مزال نعاود ليك شي حاجة، مهم داك صاحبي للي شفتوه خطب فايفران عرسو قرب ونتوما من المعروضيين
ملاك: بالصح؟! فين؟ ففاس؟!
يوسف: لاأ تتعرفي هرمومو
ملاك: اه ضرووري وشكون ميعرفهااش
يوسف: تاااااااامااااك
ملاك: وايلي علاش داروه تماك؟!
يوسف: اصلهم بزووج وختاروه يديروه تماك بدوك التقاليد ديالهم
ملاك: اممم هرموووموو
يوسف: ضرووووري تكوني
ملاك: ههه والله معرفت راك عارف الدار
يوسف: غير فكري اصلا العرس من دابا 15 اليوم
ملاك: معرفت!!! نشووف….
ملاك: (وصلت لحدا القهوة وهو يصوني تيليفونها بمجهول مجاوبتش دخلت لباركينغ حطاتها، كما العادة قلباتها مزياااان واش مسدودة واش مخبوشة عاد تمات ماشية فحالها وكدور تشوفها حتى سمعت)
حمزة: بالصحة الطوموبيل
ملاك: (ضارت لقاتو هو طلعاتو وهبطاتو ورجعت شافت فطريق حتى شافتو وصل حدااها) واش مريض نتا فراسك
حمزة: مكنتش هضرت قبل ولكن دابا باغي نهضر املاك
ملاك: خويا قلب على جدي هاد الساعة ها لعاار
حمزة: مغتسمعيليش؟!
ملاك: وعلاش غنسمع ليك مالي مك!! وااا سير تزمر نسااا راه شي نهار عطييتك وقت (زربت حشات يدها فالصاك جبدت الساروت حلات دخلت وزدحت لباب على الجهد) خرا كدااير (فنفسها فين كنتي منين كنت نبات كنبكي عليك… دخلت لقات الجارات جاو يباركو على زيادة بنت نعيمة، ومنهم ام حمزة للي كانت عندها عزييييزة من شحال هادي اما دابا نفرتها كما نفرت ولدها معندها غراض تكون سباب ولا لا… سلمت سلام عادي بحال شي زوفري مقطوووع ودخل لقا الدار عامرة، وخرجت)
خديجة: (كانت كتعرج برجل واليد ملوية فيها الفاصمة.. تبسمت معاها) الزين جيتي
ملاك: (ديجا عصبها حمزة) علاش قلتي ليوسف نعيمة ولدات؟!
خديجة: (توترت) ها مااا…
ملاك: الاااااااالة متبقايش تعاوديلو كولشي انا مكنبغيش نعاود اسرار دارنا لحتى شي واحد لاش نتي ماشية معاودة ليه
خديجة: (بقات غير جامدة)
ملاك: واش نتوما كتهضرو بزااف؟!
خديجة: ماامم.. لا علاش؟! مرة مرة زعما مااامممـ…
ملاك: مكيهمش الموووهيم غير متنسايش راك مزال حتى مطلقتي
(دخلت مخنزرة لبيت مها تبدل حوايجها مخلية خديجة مصدومة واقفة فوسط الدار هازة طبسيل دالحلوة للي كانت غدخل بيه عند الناس للصالون وتفكيرها غير فيووسف وفهضرة ختها…
اما ملاك غير بدلت لبست بيجامها طلعت لسطح نيشاان جالسة فالقنت مربعة يدها معصبة بزاااف، شافت فسطح للي مقابل معاهم تنهدت كتفكر وهي مخنزرة…)
#فلاش_باك
حمزة: ولا فيييينك
ملاك: وااا تسنى ازمر
حمزة: عاود املاك والله المرة جاية مندوزهالك
ملاك: راه زمر عندي هي كبيييدة
حمزة: انا باغي كبيدة ازمرة
ملاك: ههه (خرجت من الحمام كانت شي 3 دصباح طلعت لسطح كتسلت سدت لباب من موراها كان هوا دااافي حيت كان الجو فأواخر الربيع طلت برويسها كان متكي على الحافة ديال سطحهم تبسمت وقلبها غيطير بالفرحة قالتلها بشنايفها وحلقها منطقهاش) توحشتك
حمزة: عليها بغيتي تشوفيني
ملاك: حمزاااااا بحالا معارفش بابا وعمامي
حمزة: قلت ليك نمشيو لفاس ولا ايفران ولا مكناس
ملاك: واش نتا حمق انا الدرب الي مورانا ومبغيتش نتلقاك تماك بقالي غير نشد طريق معاك
حمزة: قربي بعدا
ملاك: غتنقز عندي ههه
حمزة: اه
ملاك: ههه (قربت حتى شافتو هاز سلوم ودارو بين ديور بجوج) اويلي واش حماقيت نتا
حمزة: بحال داكشي
ملاك: (كتشوف لقاتو بالصح باغي يديرها وهي تزعزع داك السلوم) والله حتى نشوهك احمزة (بقا كيظحك) انا نفيق ليك بابا حسابلك منديرهاش والله حتى نلسق فيك مونتيف
حمزة: هههه عاود ديريها بية
ملاك: نتا راك عارفني
حمزة: (رجع السلوم وحنا على ذرااعو كيشوف فيها بحب )توحشتك املااااك، توحشتك بزاااف
ملاك: (خلاها دايبة وقلبها كيضرب)
حتى انا ولكن منقدرش ندير داكشي للي بغيت مستحييييل نتلقاك لا هنا فصفرو لا فاس لا ايفران لا مكناس لا حتى بلاصة نبغي لا صداع لا نبقى خايفة وكنشوف من موراها
حمزة: بغيت نشووفك مندير والو غير نشووفك راه 4 شهوور مشفتك
ملاك: (بقات كتشوووف فيه وتبسمت وتبسم) لا مصالحش..
#عدنا
ملاك: (كانت مربعة يدها ومغوبشة حتى شافتو هو نيت فسطح كانت ديما هادي هي وقيتهم للي كيتلقاو فيها، منين قل اهتمام يوسف وهي فهاد الحالة مخربقة بين ذكرياتها ووقاعها للي رجع فيه الماااضي…)
خديجة: (غير صونا تيليفونها مشات لبيت مها سدات من موراها متوترة ومكرهة وكلام ملاك كيضور فراسها) الو
يوسف: خديجة صاڤا؟!
خديجة: الحمد لله
يوسف: مالكي؟!
خديجة: يوسف (مسخيااااش ولكن..) انا مزال مزوجة مزال متطلقت علاش كتهضر معايا بزااف
يوسف: (بقا ساكت مدة) تنلقى راحتي معاك تنلقى راسي تنصوني عليك وباغي نهضر معاك باغي نعرف عليك كولشي
خديجة: ميليقش
يوسف: علاش ميصلاحش نتي فحكم مطلقة يعني بقات غير الورقة توصلك
خديجة: وملاك؟!
يوسف: عاود ملاك ؟! شنو واقع اخديجة؟! مفهمتش كلمة زوج ملاك
خديجة: متعاودش تصوني علية مزال (قطعت وقلبها كيتقطع زيرت على التيليفون بيدها ومحست حتى دموعها نزلو يوسف كان بحال شي بلسم فوق جرووحها دغيا نساها فكولشي نسات راسها بيه ونساها فعذابها وزواجها الفاشل للي كان سنين خلاها بحال شي بنت صغيرة مراهقة اول مرة تعرف على شي واحد كانت كتعيش معاه إحساس زوييييين… شافت فالتيليفون مرجعش صونا زاد قلبها تكمش عليها حتى جاتها الردة ومعدتها ضراااتها بقات غير كتبكي مسخياش بيييه اصلا علاش غيولي يصوني عليها وحدة مطلقة لا خدمة لا صنعة لا والو علاش يبقى مهتم بوحدة قالتلو بعد مني وغيرها يتمناااو ربع الاهتمام للي عاطيها بلا مقاااابل… عذراتو الا تقلق منها ولكن شافت هدا هو الحل ميمكنش تكذب راسها هي مزال حتى مطلقت والمشكل لكبير هو ملاك ختها للي وقفت معاها وكتسنى منو شي حاجة.. بقات كتنهد باغيا غير دموعها يحبسو واخا دغيا كيبان فيها البكى، شافت فلمرايا كتمسح على وجهها بقات جالسة ساااهية مشات للواتس ديالو مكرهتش تصوني عليه ولكن.. طفات تيليفونها فمرة باش متفكرش تعاود تصوني ولا تكتب ليه شي حاجة،
خرجت برا لقات ملاك كتغدا فالقنت ضرها خاطرها بزاااف مشات للكوزينة لقات مها كتقاد لعشا واخا مألمة بقات كتعاونها)
ماما مزال ماارد عليك بابا
زهرة: (بقات شادة الموس واليد التانية شادة باطاطا كتقشرها) شنو نقولك ابنتي نتي عارفة باباك مزيان
خديجة: (بحزن) مابغاش
زهرة: نتي عارفاه مزيان قالك هو مكلف ليك مكاين لا خدمة لا والو وحتى لقرايا مابغاش غير مديريش فخااطرك ابنتي ربي للي غيشعل عليك ويرزقك
من عندو
خديجة: (حركت راسها باه مكانتش متأكدة 100٪ يبغي ولكن كان عندها أمل، نهار بغات تزوج خيرها وهي ختارت طريق غالية وكتخلص فيها دابا، ودابا كتحمل مسؤوليتها)
زهرة: مزال ابنتي يسهل عليك الله وتعاودي تزوجي
خديجة: (تفرݣعت كتبكي) شكون اماما يبغي وحدة بحالي راجعة مطلقة من بعد شحال من عام وبلا ولاد
زهرة: ربي للي كيفرق ابنتي ماشي العبد نهار يوصلك رزقك راه غيجي حتى لعندك ومكاين للي يحايدو ليك واخا تنطاابق سما مع الأرض
خديجة: (تندهدت محركة راسها.. دخلت ملاك هازة طبسيل فين كلات) مزال مبدلتي حوايجك
ملاك: مزال فية الجوع مبقيتوش كتخليولي بزااف واش مطيبتوش لحم هاد نهار
خديجة: اويلي على ممطيبينش انا مخلية ليك الفخض كامل
ملاك: لقيت غير المرقة وجوج زيتونات
خديجة: ولفريت
ملاك: مالقيت والو
خديجة: (شافت فمها عارفين شكون كيهز الماكلة) راه عيقو اماما
ملاك: واش دوك لهجيج عاود؟!
زهرة: صافي ما وقع والو ها لعشا ابنتي قرب يطيب وكولي
ملاك: ولفريت!!!!!
خديجة: انا نقلي ليك كيييلو
ملاك: ماما هضري معاهم والله مشبعت دابا نمشي نخرج نشري شي حاجة نكمل بيها
زهرة: ملاك جلسي للأرض شنو بغيتي نطيب ليك
ملاك: واش لخروج حتى لهنا لحانوت لا!!!!
زهرة: سيري خرجي انا بغيت باك يطيح فيك تم
ملاك: (بقات كتقرس ففخضها بالأعصاب مكرهة)
خديجة: انا نقلي ليك دابا لفريت سيري نتي بدلي حوايجك…
يوسف: (بقا غير جالس من مور داك لابيل حتى دخلت مو عليه تبسم معاها بهدوء) صاڤا؟!
ام يوسف: علاش الحبيب ديالي مبقيتشي تجي لعندي؟!
يوسف: غير مع الخدمة وصافي
ام يوسف: وهاد الخدمة شاغلاك علية!!! قولي ختك قالتلي تتعرف شي وحدة
يوسف: وشنو المشكل؟!
ام يوسف: والياقووت؟!
يوسف: (مكره) المكاتيب الوالدة كولشي بالمكتاب
ام يوسف: ألأ انا بغيتكم تصالحو خلاص طولتو هاد المرة
يوسف: (هز حواجبو بجوج وشاف بجدية فمو) هادشي للي تيخليني منجيش بزااف الوالدة
ام يوسف: هاء؛!
يوسف: اه انا وديك الإنسانة تفارقنا وكل واحد شد طريقو ومن ساااااابع المستحيلات نرجعوو…. ونزيدك انا عمرت راسي باخرى
ام يوسف: اوا وهادي للي باغي تزوج متقوليش ديك نصف سااانتيييم للي جبتي فلانيف ديال خيتك
يوسف: (عض على شنافتو) نهار نبغي نتزوج غنعلمكم الوالدة خليني هاد الويكاند هنا ولا تبغيني نمشي
ام يوسف: لا لا صافي انا ساكتة ولكن هاديك احبيبي منتقبلهاش (تم واقف وهي تشدو حتى رجع جلس) انا سااكتة…
~~~~~~~~~~~~
ملاك: (بقات كتفرج فسيري متبعاه فتيليفونها طلت على ختها لقاتها صاقرة مهزاش تيليفونها كما العادة ضربت فيها لبيل ديال التيليفون) تبعي شي مسلسل
خديجة: (بغير نفس) مفياش
ملاك: هو للي كيقتل الملل والله واحد كنتفرج فيه وااعر وااعر تفرجي فية تركي من دوك للي كيعجبوك
خديجة: شنو سميتو
ملاك: لا أحد يعلم عرفتي البطل ناااااااري
خديجة: فين نتفرجلو
ملاك: (ناضت من بلاصتها دايرة لبيل هزت ليها التيليفون من تحت لوسادة حلاتو وهي خديجة تخطف التيليفون حيت كانت مكبرة صورة يوسف حيدتها ولوخرا ميقت فيها خرجت من تماك وطلقت لويفي)
باسم الله عليك مالكي تخلعتي
(عطاتها التيليفون ومهضرتش، انسطالات ليها تيليغرام télégramme ودارت ليها المسلسل عطاتها الحلقة اللولة)
فاللول غيجيك مقناط ولكن دغيا غتولفي وتبغي تعرفي شنو يطرا من بعد
خديجة: القصة زوينة؟!
ملاك: البطل كيحمق
خديجة: والقصة القصة
ملاك: راه كنشوفو البطل هو اللول واش زوين وعاد واش كيعرف يبوس عاد كنشوفو القصة
خديجة: (خرجت عينها) سكتي راه هاد الواشون غير كيعمرو سطولاتهم
ملاك: يعاودوها لمهم مهم تفرجي وغير تكمليه بداي مرعشلي اححح هداك علام اخر اللباقة كدايرة وجنتلمان والحب والاحطرام اححح كيتي كنطيح غير فولاد لق****
دازت ايام نفس الروتين يوسف معاودش صونا على خديجة مرة مرة كيهضر مع ملاك للي بقى فيها الحال حيت بدا كيبعد وهي مغتشدش فيه، خديجة حست باحساس خايب مكانتش مسوقة لطلاق ولا حتى كتفكر فراجلها ولكن دابا طاح عليها الضيم وبانت فيها حيت قبل منين كانت مع يوسف كانت فيها طاقة كبيرة وديما ظاحكة وناشطة دابا رداها غير لشقا والتخمال فين كتلقى راحتها شوية وكتفرغ غضبها لا جديد يذكر..
حتى جا باها فصباح جايب برية فيدوو
زهرة: رشيد ماشي من عوايدك كتجي دابا (خديجة وقفت حداها هازة الشطابة متكية عليها)
رشيد: (مد ليها لبرا وشاف فبنتو للي خايف عليها ولكن مدام شافها مرتاحة معاهم) براتك ابنتي
خديجة: (قلبها زدح بقات غير متبعة ديك لبرية)
رشيد: (مد ليها 500درهم)
تجي ختك وسيري شري شي حاجة ابنتي حويجات للي خاصك
زهرة: (شدت لفلوس غمزات راجلها يمشي قبل ميجيو العائلة الكريمة شاف فبنتو طبطب على كتفها ومشا جرت بنتها ومشاو لبيتها، حتى شافت بنتها كتبكي) مالكي يا لهبيلة ديري فراسك هاكا ياك تهنيتي منو
خديجة: (كتبكي) الشمتة اماما الشمتة ماشي ساااهلة
زهرة: (عنقت بنتها) دابا يجيب ليك ربي ما حسن ابنتي
خديجة: (غير كتبكي جاتها قاسحة بزااف جميع ذكرياتنا جاتها على بالها مع راجلها زوينين والخايب بكات على عمرها للي داز بكات على بزاااااااف دالحوايج بقات معاها مها كتواسيها خرجت من لبيت مخلياها ترتاح.. شافت ديك لبرية عنقتها بحال شادة عمرها للي مشالها هباء منثور مع عمر.. )
~~~~~~~~~
ملاك: (وصلت حدا القهوة وهو يوقفها باها) بابا
رشيد: بنتي خرجي ختك سيرو للقيسارية تشري شي حويجات
ملاك: (باستغراب) اهاااه
رشيد: متعطلوش ابنتي الله يرضي عليك 6 تشدكم هنا (مد ليها 50 درهم) كولو ديك الكفتة للي فالمارشي راه كانت عزيزة عليها وجيبي لمك شي واحد
ملاك: واخا (شداتها مكاين لا ابابا عندي لا والو.. تعجبت من هاد سخاوة شكت يكون غوت عليها ولا شي حاجة صونات عليها) فين
خديجة: (صوتها مخنوق) اهلان
ملاك: ناعسة؟! شوفي لبسي حوايجك نخرجو باك راه قالي نخرجو
خديجة: ما فياش املاك
ملاك: لبسي خلاص باش منتعطلوش عطانا 2 سوايع نمشيو فيها لفاس
خديجة: (بقات ساكتة اوطوماتيك جا يوسف فبالها للي مكرهتش تقولو انا طلقت ولكن منين غير حتى هو راه باين مبقى واااالو بيناتهم)
واخا
(ناضت مرخية لبست كسوتها للي شرات ليها مريم دارت شالها شافت فوجهها عينيها داخلين بلبكى مغتدير والو فوججها..
هزت فلوس للي عطاها باها دارتهم فصاكها وحتى ديك لبرا خرجت برا لقات مها عاودات ليها حتى دخلت ملاك فرحانة كتحماق على الزنقة وتسركيل)
ملاك: لبستي انا دغيا نبدل علية ونجي.. توما مالكم؟!
خديجة: حتى لبرا ونعاود ليك
ملاك: واخ انا دابا نجي خدووج ديريلي فخبيز شي حاجة كنموت بالجوع
(مشات للكوزينة دارت ليها فربع خبز ديال الدار 2 فرماجات وكونفيتير جات ملاك بدات كتاكل وتدوز بأتاي ومهم كتوصيهم ميتعطلوش مع سدو لباب لوخرا كتاكل وتهضر)
واش دابزتي مع بابا؟!
خديجة: لا.. غير جاتني لبرا ديال طلاق
ملاك: كح كح (تقابلت معاها وشافت فيها حتى زغرتت بشوية) راه خاصك تفرحي يا الهبيلة
خديجة: (تبسمت) فرحت غير جاتني قاسحة شوية
ملاك: لبدية للي صعيبة من بعد كتولفي (غمزتها) هههه
خديجة: هههه بااااز غير هبيلة وصافي…
ملاك: (ركبت فطموبيلتها غير فاتت قهوة ديال باها طلقت أغنية ديال بلقيس على جهدها “تعالا تشوف كيوليت صغاريت وزيانيت… معاك كنت….” بقاو كيظحكو ويغنيو معاها شدو طريق نيشان لفاس) تهلى فيك بابا الصاطة
خديجة: (تبسمت) مسكين وكان تشوفي كيفاش مدلي لبرية تقول هو للي طلقني
ملاك: بابا حنييييييين
خديجة: بزاااف والله املاك الا ندمت عنداك شي نهار تلوحي راسك حتى نتي بحال هاد تزويجة سمعي كلام بابا راه هو للي مايعرف مصلاحتنا
ملاك: هاد الساعة الكلب ملقيناه يقولنا هاو هاو
خديجة: ههه بناقص الا كلب كلب اللهم راكي فدار باك معززة مكرمة واكلة شاربة ناعسة
ملاك: وفين هي اختي **** فييين راني كبرت.. هاد الساعة أوالله ويجيني واحد كيبيع النعناع نتزوجو ونطلقو الغد ليه
خديجة: هههه نتي ماشي غير كبرتي نتي راك طبتي
ملاك: هرييت هريييت
خديجة: غير هو راه مكاين لا قراية لا خدمة
ملاك: واش غنقوولك اخديجة نتي عارفة عقلية بابا هاد الايام صبري بحال والو يجي نهار ويفهم
خديجة: موووووحاااال
ملاك: متعرفي غير صبري دابا الاهم هو رجعتي ديال راسك
خديجة: حقاا قوليلي شفت حمزة داك المرة حاضيك من سطح
ملاك: يمشي **** يحضي خطييبتو ولا معرفت اش كتجي لموو
خديجة: لا راه مرتو دارو لاكط
ملاك: امممم
خديجة: لبارح منين كنتي فالخدمة جات مو عندنا سمعتها كتعاود لماما بينو وبين مرتو شي مشاكل هي بغات دير العرس وهو مابغاش وحتى مو بغات العرس اوا راه واقف ليهم عصى قالهم نمووت وداك العرس هو للي ميدارش
ملاك: ( بقات مركزة فطريق وتفكرت فاش كانت معاه وكانو بزوج كيحلمو بالعرس ويخططو حتى فين يديروه وشكون يعرضون والموسيقى) اممم
خديجة: شحال مزويناتو اختي معرفتش علاش متفاهمتوش
ملاك: (معندهاش العظم فلسان) اوا حتى نتي كنتي مفاهمة فاللول مع عمر وفالتالي طلقتو التفاهم كيبان من بعد
خديجة: (ضربت الطم عارفين ملاك غير جيب يا فم وقول)
ملاك: (تكرهت من راسها ولكن كان رد فعل غير محسووب) متفاهمناش لقيت راسي ممرتاحاش معاه زواج حاجة والمصاحبة حاجة
خديجة: مكااتيب
ملاك: (وصلو لحدا المركب الدنيا مزحمة والسيمي) شي ماتش سالا يمكن
خديجة: عمرني تفرجت فشي ماتش
ملاك: قوة لبراهش تماك تمشي تشبعي غير تخصار دالهضرة وفالتالي يقلبوها مطايفة بيناتهم متعرفي لا للي رابح لا للي خاسر
خديجة: وييييه ولكن داكشي فالتلفازة كيبان زوين
ملاك؛ حيت كيوريو غير زوين. خاصني نهرب من هاد زحام (خافت تكلتكصوني ويقلبوها معاها حجر بقات ماشية شوية بشوية ومشات على طريق مرجان) فين نمشيو؟!
خديجة: معرفت
ملاك: نمشيو للكرامة تماك كاين حويجات زوينين (بقات ماشية حاضية غير المازوط) اه اه 100 درهم دغيا مشات هاد السيمانة
خديجة: هههه (كظحك عليها حيت سيمانة وهي كتقول نفس الهضرة، دورت وجهها بقات كتشوف دوك الفيلات للي فطريق صفرو من السرجم حتى كيبان ليها يوسف واقف حدا طموبيلتو هو وشي دري متيقاتش بزااف على هاد الصدفة لدرجة رمشت عينها بالزربة بحال كتمسحهم شافت فختها لقاتها كتشوف فيه)
اممم هداك يوسف؟!
ملاك: اه عارفة هادي دارهم جيت معاه واحد نهار لهنا
خديجة: لدارهم؟!!!!!
ملاك: غا بشوية عليك بقيت برا (صونا تيليفونها كان هو عرفاتو شافها دارت مكبر الصوت) فين
يوسف: وقفي اديك البرغوتة رلك دزتي من حدايا
ملاك: اااااه بالصاااااح؟!!
يوسف: وجهك قاسح اختي
ملاك: مشفتكش (كتعوج وكظحك خديجة.. وقفت) فينك نتا
يوسف: انا جاي (قطع وهضر مع خوه) انا جاي.. (تمشا لعندها قشع شي وحدة راكبة معاها فلبلاصة طيرها غتكون خديجة دار من جهة ملاك وحنا لسرجمها) اهلان وسهلااان…
خديجة: (توترت بزااااف ݣاع ديك صفوورية للي كانت فيها خدوودها رجعو حوومر حست بالرجفة والفرحة مخلطة وهي كتسرق الشوفة فيه) سلام
يوسف: (مشافش فيها) عليكم السلام
ملاك: كنت هربت من المركب راك عارف فاش كيكون شي ماتش كفاش كتكون طريق
يوسف: اممم زعما مجيتيش كتقلبي علية
خديجة: (قلبها ضرها مشاف فيها مسولهاش حتى واش لباس حتى من سلامو كان ناقص)
ملاك: (ميقت فيه) معرفتش علاش غنقلب عليك ضاربني تران!!
يوسف: ههه مقبولة فين ماشية؟!
ملاك: للكرامة بغينا نديرو الشوبينغ شوية
يوسف: اممم بالصحة منتلقاوش من بعد!!
ملاك: والله معرفت الوقت مزاحم بحرا نتقداو مووووحال معندناش الوقت
يوسف: غير كافي
ملاك: مبغيتش نصوݣ فالليل ايوسف مرة اخرى
يوسف: انا نصوݣ ورجع فتاكسي
ملاك: اويلي لا واش حمق
يوسف: وااا صافي هضرنا غير تكملي من الشوبينغ ديالكم غتلقاوني فتيطانيك اليوم كانت واحد البيعة وشريا من داكشي راني قلت ليك عليها لبارح
ملاك: اممم مزيان
يوسف: انا نوريك تختاصري عليك ومتمشيش فزحام (وراها طريق للي دير باش تخرج فالكرامة) وبشوية عليك
ملاك: واخا بابا
يوسف: ههه وكبرتي عليها!!
ملاك: ههه (مشات صايݣة وشافت فخديجة للي مقروسة) شتكم مهضرتوش
خديجة: شنو غنقولو؟!
ملاك: مقلتيلوش على طلاق راه كان خيطي بيطي معانا تقول معندو شغل ههه
(حركت راسها بلا)
حشومة شحال وهو واقف معاك
(بقات لوخرا ساكتة حتى نشطت وفرحت بشوفتو رجع ليها الحزن كتر من اللول، للي مصبرها شوية مزال غتولي تشوفو على الاقل تبقى عايشة على ذكريات اهتمامو بيها.. وصلو للكرامة حطت الطوموبيل للي مزال عندها مشكل كدير تحطها مقاد وديما مهبلة للي كيݣيديها بقاو كيدورو خدات خديجة 2 سليبات كولون وبيجامة وملاك خدات صاك فلبيج خدات 2 شيلان واحد ليها واحد لخديجة وشرات لمها بينوار بقاو متمشيين كيتمنظرو خدات لمرت جدها صابو وتقاشر)
حقا شري مونطو
خديجة: بقاتلي غير 300 درهم
ملاك: الا خاصك شي حاجة نزيدك (دخلت بقات كتقيس حتى عجبها واحد سانبل طويل مكيتسدش وبلا حزام جاها هو هداك زادتها ملاك 70 درهم ومشاو للطموبيل ربع ساعة عاد خرجت حيت زيروها جوج)
خ*را ميكشوفوش 90 على الاقل كل واحد يعطيني متر
(مدات جوج دراهم للدري للي خرجها ونيشان مشات للقهوة صونات على يوسف كان تماك دخلو بجوج مشادين كان فالقنت لابس مونطو وتريكو بالعنق كان انيييق وكلاس كما ديما قليييييل فاش كيكون لابس سبوور تبسم معاهم مشاو لعندو وقف على مجلس كيرحب بيهم كما ديما دوموندا ليهم عصير وحلوة للوحدة وهو خدا كافي كريم وتشيز كيك بقاو كيهضرو وخديجة غير حانية راسها ومرة مرة كتشوف فيوسف حست براسها تختقت والو ممعبرهاش نهائيا بحالها بحال الكرسي الرابع للي حداها)
ملاك: خاص نمشيو وصلت 7
يوسف: انا نوصلكم
ملاك: لا لا بلاش نمشي بشوية
يوسف: لا والو منقدرش نخليك تمشي فهاد الليل (وقفو باش يمشيو مشات ملاك لطواليط وهو بقا كيخلص جلسو كيتسناوها فجو مكهرب شاف فيها وهو مغوبش)
خديجة: (حلت صاكها وهي كتشجع فراسها هزت لبريا وحطاتها فوق الطبلة من جيهتو شاف فيها وفديك لبرا هزها حلها عرفها ورقت طلاق تمات ملاك جاية مهضرووش دارها فمونطو ديالو وخرجو ركبت ملاك حداه وزادو كيعطيها شي نصائح ديال الصوݣان فطريق وهي كتصنت ليه حتى وصلو نص طريق وتبادلو هي كتصوݣ وهو كيوريها بالخاطر كتر من باها…)
يوسف: حقا عرس دصاحبي هاد الويكاند حنا غنهبطو بالاحد
ملاك: (مركزة فالصوݣان) راك عارف ايوسف
يوسف: ديري شي سبة غيعجبك الاجواء تماك
ملاك: (خسرت كمارتها) فهرمومو ؟!!
يوسف: ومالها هرمومو اجي نتي شلحة؟!
ملاك: نص نص بابا شلح كيهضرو بيها مرة مرة هو وجدي وماما لا ولكن حنا مكنعرفو فيها واالو
يوسف: منين اصلكم
ملاك: من هرمومو نيت ههه واحد لعروبية سميتها بني مكود وعندنا حتى العائلة فتاهلة
يوسف: امم مزيان اشليحة ديالنا (خديجة غير كتشووف) مهم حنا تجمعنا غنمشيو فواحد بتي باص حسن ما كل واحد يمشي فطموبيلتو وشديت ليكم جوج بلايص
خديجة: (اصلا دايبة فيه محيدتش عينيها من عليه وغير سمعت هاكا تمنات تمشي معاهم)
ملاك: والله معرفت ندير محاولة مع بابا ونشوف. واش غتباتو؟!
يوسف: لا حتى العرس دايرينو غيبداو بكري، شوفي راني عارفة كولشي تابعاه الخدمة فالاثنين يعني قبل المغرب كولشي فيكون فدارو والجو زوين مكاين لا ثلج لا شتا
ملاك: نشوف مع بابا غدا رد عليك منواعدك بواالو
يوسف: واخا لالة.. (وصلو هو غير قرب لمحطة ديال التاكسيات نزل خديجة خرجت من اللور شافت فيه لقاتو كيشوف فيها وحتى ملامحو تقلبو مبقاش ظاحك حنات راسها وركبت حدا ملاك زادت عاد تفكرت الكفتة دازت لأقرب شواية خدات لمها سندويتش ومشاو للحومة حطت الطموبيل وكتمنى باها ميخرجش تسلتو دغيا ومشاو للدار كيزربو ويظحكو… وصلو دخلو نيشان لبيت مهم بقاو كيبرحو يعيطو ليها حتى جات جبدت ليها ملاك السوندويتش)
ملاك: بابا سول فينا؟!
زهرة؛ لا (وراتها ملاك لبينوار عجبها بزااف) علاش عليك ابنتي راه باقيين جوج جداد موصلتهمش
ملاك: ماشي بحال للي كنجيب ليك انا
زهرة: ههه كولكم بحال بحال
خديجة: (تقرست حيت عمرها شرات لمها حتى تقشيرة)
ملاك: بصحتك ازين هادو عطيهم لمرت حنيني مي حلو
زهرة: الله يخلف عليك ابنتي. شنو شريتي اخديجة (بقاو كيوريوها وهي كتاكل حتى شافت ملاك جاية كتبحلس عليها) اش تما؟!
ملاك: جاتني عراضة عاد دابا
زهرة: هههه قولهم مكيبغيش بابا
ملاك: ݣاع الخدمة ماشية الا انا والله حتى غنتحشم عرضوك حتى نتي قلتلهم ماما حاجبة وعطيت الكلمة غنمشي انا وخديجة
زهرة: زعييييمة الآلة
ملاك: عفاك هضري مع بابا والله حتى نضور معاك
زهرة: ههه واش حساب لمك انا رشايوية بحالك
ملاك: عفاك عفاك اماما قنطنا وخديجة راه سخفتلي فالطموبيل بلبكى ديتها دݣت شوكة عاد جبتها واش بغيتوها تنتااحر السيدة راه مكتااائبة شوفي وجهها شحال صفر وعينيها داخلين غير شهادة الضعف ماشية على رجليها
خديجة؛ (مصدومة وكترمش فعينيها)
ملاك: عفاك اماما والله حتى حشومة هادشي راه شي نهار تلاقونا طجيينا
زهرة: بلا داك تنووعير ديالك
ملاك: ݣاع للي معايا فالخدمة ماشيين الا انا نحشم والله نقولهم حقا بابا متخلنيش نحضر لعرس فيه للي خدامات معايا راه دايرين عراضة دلغدا قبل العصر نكونو هنا
زهرة: (صغرت عينيها فيها) وكاين شي عرس كيتسربا فيه لغدا قبلا العصر!!!!!!
بقات كتحايل على مها وترغب وتخنزر فخديجة ترغب للي مقدرتش حيت مزال كتحس براسها بحال شي برانية وغير ضيييفة وكتقبل انها رجعت لدار باها مبقاتش محسوبة على راجلها واخيييرا الام بغات ووافقت تقولها لباها بقاو كيجمعو داكشي للي تشرااا زهرة خدات داكشي لمرت شيخها مخبيين على مرت لوسها حيت جاتها حشومة بزااف وفنفس الوقت متقدرش تلزم على بنتها تشريلها لمرت عمها بالسيف عليها..
زهرة: (من بعد متعشاو وكولها دخل لبيتو بقات كتحلون على راجلها وتسمعو لكلام زوين للي كيعجبو يسمع حتى حسات بيه رشااااا وغيدخل معاها لمسݣي) حقا لبنات معروضين لعرس
رشيد: خلينا دابا من هاد الهضرة
زهرة: شوف من صباح وهوما يرغبوني ومنها خديجة نييت تبدل الجو راه اليوم دوزاتو خايب مسكيينة
رشيد: ديالكن هاد العرس
زهرة: صاحبة ملاك فالخدمة عرضوني حتى انا وقلت غير لبنات للي يمشيو يبدلو الجو وشرطت عليهم ميتعطلوش
رشيد: جابوها مع نهار للي خاص نكون فيه فالزاوية شكون يجيبهم وشكون يديييهم
زهرة: ويلي استغفر الله اسيدي رشيد علاه ملاك معندهاش طموبيلتها العرس راه غير هنا مبعيدشاااي
رشيد: كتسبقيها ازهرة وكديريليها طريق!!!
زهرة: هههه خليهم يفوجو شوية حنا مزيرين ليهم ولكن شوية نرخفو شوية هاك وشوية هااك
رشيد: (حرك راسو بأه هو غراضي يدوز نيشان وهي عارفة فين تشدو مدام مغيتعطلوش والعرس غير هنا……)
~~~~~~~~
خديجة: (بقات مقابلة التيليفون دابا يصوني دابا يصيفط ميساج اي حاااجة!! وااالو متكلم معاها محشااه ليها تفقست وندمت علاش وراتو الورقة هي قصدها انه صافي ولات حرة هضر معايا واالو… شافت فختها كانت كتفرنس ضرها خاطرها خافت يكون يوسف هو للي كيهضر معاها وماشي بعيييد راه شافتو كفاش مهتم بختها وهي لا، راه شافتهم قبيلة كفاش منساجمين فالهضرة والظحك وكفاش خاف عليها وكيوريها الصوݣان وشاد معاها الخاطر بزاااف.. بصوت خافت) ملاك ملاااك
ملاك: اممم
خديجة: معامن كتهضري؟!
ملاك: حتى واحد (رجعت كتفرنس وشافت فختها للي جالسة) امالكي ضربك حمار الليل ولا شنو
خديجة: لااا.. معامن كتهضري
ملاك: مكنهضرش
خديجة: وعلاش كظحكي
ملاك: سوقك ههه
خديجة: واااا غيير قولي معامن كظحكي
ملاك: وغير فلم ازمر (ضورت ليها التيليفون كانت لقطة هي هاديك)
خديجة: اوييييلي استغفر الله العظيم واش نتي حمقة لاش كتفرجي فالمسخ
ملاك: سكتي الخرااا (شيرت لولاد عمها للي ناعسين) لقطة وداازت
خديجة: ونتي لاش فرحانة
ملاك: هههه عجبني الحال
خديجة: ههه نتي مخاصكش تزيدي سيمانة معانا خاصك تزوجي اويلي على لبنت تصطاات
ملاك: ههه والله مسلسل فششششكل
خديجة: راه نيت باين فشكل
ملاك: اري تيليفونك نديرو ليك تفرجي فيه ونتي بحال ديك ليتيمة للي تابعة الهدية
خديجة: هه لا لا خلينيغير مع تواركااا اختي مزالة متبعة رامو مزال مسااليتو
ملاك: اااااه رامو غزااااال
خديجة: والفيييلم
ملاك: اوا راه هو للي داير عليه الفلم، خليني نكمل اخديجة…
يوسف: غيثة من هنا نقولهالك بلا متفرعي لية راسي داك التلسااااق فاورطيغا بلاش منو قيلي عليك السيد
ام يوسف: اورطيغا اورطيغا عيطولو بسميتو نيشان مراد ولا نيت عيطولو غير ولد ل (ضار ولدها عندها هاز حاجبو) بناااقص علية من سميتو ونتي اديك الزرمونمية نسمعك شفتي ولا حتى قلتي ليه السلام متلومي غير رااااسك
غيثة: انا تيعجبني نعيطلو باورطيغا وزايدون لكليكة كاملة هاكا تتعيطلو وهو ولد عمي الحاج بن سليمااان علاش تتكرهيييه هاكا
ام يوسف: (ميقت فيها) ايييشوينيفيييييك
يوسف: واش متتسمعيش انا شنو تنقول؟؟!!
غيثة: يوسف نتا عارف انا وياه غير des amis ومتنساش هو محسوب من العائلة علاش حتى نتا تدير هاكا
يوسف: مشفتكش تديري هاد التعامل مع كولشي سمعي اغيثة نقسم بالله ونشووفك تدوري بساااحتو غنتفاهم معاك وقدااامهم وقدام مك
ام يوسف: ويلي استغفر الله على مك سميتها ماماااك
غيثة: والا بغا يشطح معايا ولا يهضر ولا يظحك نقولو لاااا خويا مابغاش نهضر معاك حيت تيحتاقرك
يوسف: نتي عارفة علاش تنهضر راك 26 عام خليك محتارمة هاد السن متصرفيش بحال عندك 15 عام خليني معاك ومعاه مزيانين اغييثة
غيثة: هادشي غير علية فاش نتا تتكون مع ديك ملاك متتقولش هاكا
ام يوسف: شكون ملاك متقوليش ديك نص سانتيييم
يوسف: اولا ديك ملاك محتارمة راسها فكولشي كلامها لبسها والتيقار يا ريت تكوني فحالها والله نتمنى تكوني فحاالها
ام يوسف: لواه لواه اسيدي يوسف بنتي غيثة شهوة منها متولة وغويييولة وعسل تحطها على الجرح يبرى اش جابها لهاديك للي متنعرفو لا أصلها لا فصلها
يوسف: مقلتش العكس ولكن بنتك قاافزة مبرهشة انا هضرت ونتي ديري للي يسلكك
(جلس مقابل مع التلفازة وهي بقات كتغبن وتدلع كما موالفة على مها مشات لبيتها جمعت صويك للي دارت فيه لبيسة والاكسسوارات والميكاب والصندالة لبست حوايجها حتى صوناو ليهم هبطو طلع يوسف وختو اما باه ومو غيجيو فطموبيلة مع اباء اخرين للي من ولادهم رجعو اصحاب، جمعو لبلايص بقاو جوج للي فصفرو)
اورطيغا: شكون باقي هنا
يوسف: ملاك وختها
اورطيغا: (خسر كمارتو وحط راسو على الزاج طالق رجليه حتى شافهم طلعو جلسو فالجهة الاخرى للي من حداه) طلق شي ديييسك اتوفيق
توفيق: ها هو داكشي للي تتبغي (طلق اغاني ديال الملحون الفاسي)
ملاك؛ (عوجت فمها) اغاني ديال فسيخ اللوز
خديجة: شششت غيسمعك (يوسف ظحك اما لاخر سمعها وممسوقش حيت معندوش الخاطر للي يتناݣر معصب وممكن يضربها ݣاع الا مبعدتش من طرييقو)
غيثة: (كطل مرة مرة على اورطيغا داير القب ديالو ومتكي على الزاج هاز تيليفونو كيخرب معبرهاش كما موالف شافت فخوها للي لقاتو كيشوف فيها) شنو
يوسف: شنو نتي؟!
غيثة: والو غير شفت طريق من لهيه
يوسف: تماك غير جبل
غيثة: اوووف ايوسف مالك معايا هاكا
يوسف: تفرجي فطريق ياك لسقتيني باغية تشوفي الطبيعة وتفرجي فالطبيعة
غيثة: (ضارت مكرهة حتى داخت مع شي لويات) دخت
يوسف: تكاي على كتفي وغمضي عينيك
خديجة: (طالقة ودنيها معاهم وفنفس الوقت متدمرة من جيهتو للي معبرهاش نهائيا…)
وصلو لهرمومو كان لمووت ديال البرد واخا الجو كيبان مشمش وديك المنطقة معروفة ففصل الشتاء كيكون فيها البرد بزاايد نزلو من لباص للي حطهم قدام دار جدات العروس
ملاك: (وقفت فلباب كتشووف) انا حسابلي غيكون شي عرس مضخم للي شافهم يقولو معرفت شكون هادو صدقو دارو عرس غير هنا
خديجة: (حركت راسها باه هي بالها مشغوول)
اورطيغا: غنتسناااك حتى تكملي نمييمتك على خااطرك. (دارو بجوج وهبطو من لباص مهضروش معاه اما هو هبط طااير مبعد)
ملاك: تفووو شحال مكنحملوش، الله يسمحلي من بابا مكنتش كنحمل نجي هنا معاه ودابا هاني سالتة وجيت لهرمومو
خديجة: حشوومة املاك واش حنا ممعروضيش وكنزيدو نحلو فمنا
ملاك: ومالي انا عيبت هنا انا هضرت على الفشر للي كان فهاد العروسة وكدفع البخ فايفران مشفتيهاش كيفاش كانت كطيح منا الشوفة وعاد جات تقولي شنو بينك وبين يوسف تقول شغل مها وفالتالي مدارتش العرس حتى بحال لالياااتها
خديجة: هاديك هي العروسة؟!
ملاك: اييييه يمكن كانت صاحبت يوسف
خديجة: الااا صاحبتو ويجي زعما عادي!!! ومنين محاملاهاش لاش جينا اصلا؟!
ملاك: اولا حنا عرضنا صاحب يوسف مكيهمنيش تكون مرتو ولا لا تانيا جاية نضبرو على شي تيتيييز واش مشفتيش هداك للي كان راكب القدام غير مهند وصافي
خديجة: هههه ويوسف؟!
ملاك: للي جا باسم الله
خديجة: باااز وفين هاد النݣافة للي قلتي نكريو عندها
ملاك: ماشي نݣافة راه داك سميتو انس وخوه عاديل اه حقا نتي شحال مجيتي معانا لهنا داك العام فاش حضرنا لعرس ولد خال بابا كرينا من عندو
خديجة: اه عقلت جيتو انا للي كنت خارجة راسي من كولشي
ملاك: عندو داكشي زوين رخيييييس ونقي
خديجة: ورخيييس ههه وياااالا مشاو علينا
ملاك: شوفي حنا غنقولو ليهم عندنا شي غراض وخاصنا نمشيو نقضييوه، ولبنات دخلو يلبسو غيحشمو على وجههم وشي واحد فيهم غيدينا وغيردنا زعما جنتلمان وداكشي مغيخليوناش بوحدنا
خديجة: باااااز
ملاك: (كتلعب بحواجبها) مصاااب يكون داك مهند ههه (شافت يوسف، تبسمت معاه) يوووسف (جا عندهم) حنا غنمشيو نجيبو حوايج من عند واحد المحال
يوسف: فين؟!
ملاك: غير هنا قريب
يوسف: عارفة فين؟!
ملاك: اه راه ماشي اول مرة كنجي لهرمومو
يوسف: نمشيو على رجلينا؟؟
ملاك: (عݣزات تمشي على رجل) عندي هنا شي عائلة ونتا عارف اصلا جينا غير سالتين
يوسف: اه بالصح انا نجيب الساروت نديكم
ملاك: متعذبش راسك
يوسف: مالي غنخليكم تمشيو بوحدكم ولكن باش تقادو راسكم خاصكم تزربو
ملاك: (لعبت بحواجبها) منحتاجوش للي زين راه زين هههه
يوسف: (تبسم) هه هادي كاينة اشنيولة (دخل لديك الدار)
خديجة: (صافي تكرهت نص شوفة مكيشوفهاش فيها هادي ماشي تقليلة هادا راه كره ندمت علاش جات كانت غالطة منين قالت غير مقلق وصافي السيد قلب قلبة خااايبة طلعو معاه فطموبيل صغيرة ديال شي واحد ومشاو بقا هو برا كراو جوج قفاطن موبرة وجوج صنادل اما الشيلات جايبينهم لقات دراري ديال داك طريرور خدامين فداك العرس دارت معاه تخلي لحوايج عند واحد فدراري بحكم المعرفة خلصوه ورجعو للدار يلبسو باش كولشي يمشي دقة وحدة…)
لبسو حتى هوما كانت وحدة فدوك لبنات كتقاد ميكاب وغير من لماتريال للي جايبة باينة بروفيسيونيل
خديجة: (مكرهتش دير ولكن تحشم تمشي طلب كانت جايبة شي ميكاب هزت مراية كدير) ديري املاك؟!
ملاك: لا
خديجة: ديري غير شوية
ملاك: عكر خفيف انا دابا نديرو
خديجة: ديري غير ايلينر وماسكارا
ملاك: وشنو بقا سقلي ههه راه ساهل علية ندير كولشي ݣاع ولكن صافي انا ماباغاااش
خديجة: (قداات هي وجهها جات زوينة بحكم حروفها زوينين وغير شوية دلميكاب بدلها ملاك عكرت ومسحاتو بقا غير شوية على شنايفها تبسمت عارفاها كتحماق ديرو ولكن الوعد لمها خلاها مديروش.. شافت فختها ملامحها زوينين وبكترة ديما ظاحكة ناشطة منعاكس على وجهها لي قليل فين تكون فيها شي حبوبة ولا زوج وحتى زهرة كتهلى فيها بالوصفات الطبيعية فلويكاند…
بقاو كيتسناو صونات مهم جاوبوها ان الامور هي هاديك وهي تنطق ملاك قالتلها راهم فهرمومو ومغيتعطلوش حيحت عليهم مزيان وقطعت)
علاش قلتيهالها؟!
ملاك: منين كتشد طريق مكيعجبنبش نبقى كاذبة عليها اللهم نقولهالها متعرفي نوصلو ولا منوصلوش
خديجة: معمرها تعاود تخلينا نخرجو دابا تشوفي
ملاك: غتعاود غير منبقاش كاذبة عليها هاكا كنكون مرتاحة فدماغي
خديجة: (وقفو باش يمشيو شافت كولشي هاز جوا) اشنو تماك
ملاك: (حااااضية معاهم) الغرامة يمكن مغيعطيوش كادويات مشفت حتى واحد جايب شي كادو غير فلوس (عقدت حواجبها وهي كتشوف الزرقات كيتحطو تماك) اش هاد لبعر عاود
خديجة: هههه اوا شنو نديرو انا جبت 100 درهم
ملاك: صافي نتي 100 وانا 50 ها 150 شكون بحالها تفااااطح غدير لباس غير على ظهرنا
خديجة: ههه انا نمشي نجيب جوا وحتى نتي غديري 100 درهم
ملاك: كونتي كتعرقي معايا فيهم
خديجة: ههه باااز
ملاك: يا ربي ميكتبوش سميتهم متعرف هادي من هادي (بقات حاضية يمكن متافقين شحال كيعطيو ولا موالفينها جابت خديجة جوا حطت فيه 100درهم وهي عاطياهم بظهر وملاك جبدت بزطامها) عندها زهر معنديش الصرف
خديجة: ههه ديري وكان (حطت ملاك 100 درهم بقا جوا عند خديجة كولشي ناض باش يخرجو ركبو فداك الباص ومشاو لقاعة البرج، خبرات ختها) فية الجوع
ملاك: حتى انا.. (كتشوف فداك زعر كان جالس مع داك للي كتكره شاف فيها وتبسم وحتى هي ردات ليه الابتسامة)
اورطيغا: (شاف فيها لقاها متبسمة) شي حاجة؟!!
ملاك: (شقلبت عينها متكرهة كتكره لقمييع بغات تبقى لبقة وكلاس، دارت جيهة ختها غمضت عينيها كازة على سنانها بكل عصبية بصوت خاااااافت) هاد الق**** شي نهار نقتل مو
خديجة: هههه حݣرك حݣرك قدام مهند ههههه… (معاودتش ضارت وصلو للقاعة العرس كان فالبدايات العروسة مزال مجات دخلو كان الحضور وحتى القاعة مقادة زوييينة بديكورات عصرية وفالقنت جليسة ديال شلووح جلسو فطابلة خديجة وملاك مبهوضييين)
شحال غزااااال هادشي
ملاك: جيت القاعة واحد المرة مكانتش هاكا صاوبو هادشي زوين صراااحة (شافت بزاف دلبنات لابسين اللبسة ديال شلوح بالموزون والحلي، شوية تسمع دقات ديال احيدوس وداخلين للقاعة مخليين ليهم الوسط خاوي رجال لابسين جلابة بيضة بالرزة والموزون فالجنب، ولعيالات لابسين كساوي ديالهم الخاص باحيدوس مع الموزون كولشي المدعووين وقفو حيت الجوق للي فالجنب نبه ان العروسة وصلت للي خرج وولي بقا فالقاعة تسمع النشاط برا والعروسة جاية بدخلة ديال عيساوة غير وصلت لداخل الجوق بدا كيغني كانت العروسة بالعمارية وسابقها راجلها لابس لباس تقليدي جلابة بالتحتانية ديالها فالابيض وداير الخنجر فجنبدو مع خيط ديال الموزون فالاحمر كنوع من التقاليد كيظحك ويرحب بالناس مع ابتسامة عريضة ويدو فوق صدرو امتنان المدعوين للي فرحانين معاه فليلتو، اما العروسة لابسة اللبسة البيضة وكتشير بيدها على الحاضرين كانت زوينة خديجة وملاك غير كيشوفو مكيعرفو حد غير دافعين الجبهة وحاضيين البشااار)
وصلت لعروسة لبلاصتها فين كانت الكوشة بين التقاليد ديال شلوح وفيها لمسة عصرية خدات تصيورات هي وراجلها ودغيا نوضوها خرجت من تماك بقا غير العريس كيجيو صحابو وفاميلتو يتصورو معاه الفرقة للي فالوسط كتسخن وباينة غدير شي طرح مع دخلة لعروسة للي دغيا هربو بيها
ملاك: علاش ميشركوش رجال مع لعيالات زعما دارو بيناتنا شيووخ زعما حيط مغيشوفونا منشوفووهم!! الطنز وكان نيشان نتخلطو راه كاين مزال للي ماد يدو لحنا وكيتسنا
خديجة: ههه حتى هاكا جاية زوينة كولها فقنت وبيناتنا غير الوسط شي كيشوف فشي
ملاك: تزوجنا بكرييييي.. يا ختي هادشي شحال زوين مكرهتش نكون العروسة
خديجة: (دايرة يدها على حنكها) بزااااف (تنهدت تفكرت عرسها، العرس للي دارو ليها باها ولكن فاش مشات عند راجلها دارو غير ليلة وصافي، كتقلب بين الحضور ومكيبانش ليها عقل كيقولها جمعي وطوي وقلبها مسخاش بيه…
بقاو احيدوس غيغنيييو وكان صوتهم غزاالةوخصووصا ديال وحدة وهي دارت الدخلة حتى شخضووها منين العروسة دخلت لابسة لباس شلوووح القفطان الأبيض وصايتو المشبكة للي فيها نواشات زائد الاكسسوارات للي فعنقعا وراسها وكانت دايرة شديدة دشلوح بدرة حمرا و4 دلبنات هازين فوال فوق راسها وهي شادة مرايا كتشوف فيها ظاحكة وباينة فيها طايرة بالفرحة، ضايرين بيها صحاباتها وبنات عائلتها دايرين الموزووون ودرة شلوح كيصليو على نبي ويزغرتو هازين شمع كبير مزوق بين الاخضر والذهبي والابيض والنقري كان منظر ودخلة زوينة بزاااااف قدامهم المصور حتى وصلو حدا العريس، كانت ام العروسة تماك غير وصلت بنتها هزت من الطيفور #الحنديرة (كيكون مصائب بالخيط فالابيض او الاصفر فيه رموز الأمازيغ بالاحمر مع موزونات وكيكون غليض شوية) ولبستها لبنتها مع مساعدة النݣافة شدها راجلها من يدها وتمشاو فالوسط واحيدوس شاخض حتى وصلو للنص وبقا كيشطحها وهي حشمانة وغير كتحرك فكتيفاتها وبخطوات بسيطة دخلو الشباب معاهم ملاك مع قصيرة كيبانو ليها غير ريوس حيدت الصندالة وطلعت فوق الكرسي دابا كيبان ليها كولشي النشاط وشطيح مكرهتش تصور هادشي توريه لماماها ولكن مزعمتش بقات كتحرك كتيفاتها مع ايقاع ديال احيدوس شافت حتى يوسف كان بحال شي مونغوليان مكيعرفش يشطح الشلحة كيتهز كامل بحال ضاربو الضو ظحكت عليه شير ليها تجي ومبغاتش دارتلو إشارة بلا وهي كتبسم رجعو العروسة لبلاصتها فين كانت غتنقش وبقات الشخضة مع احيدوس والشعبي ديال شلوووح كيخليييك فعالم اخر تشطح واخا تكون حجر، هبطت ملاك من الكرسي وقفت حدا خديجة هزت راسها فيها مع طويلة وزادت بالطالون)
اه اه شحال فيك فالطول
خديجة: هههه لعاار الا ملبسي طالوك كتباني بحال بنتي
ملاك: (لبست الطالو جرت ختها تشطح حشمت) وشطحي مكيشوفنا حد اجي نصونيو على لبنات ابيل فيديو نوريوهم (صونات على نعيمة ومريم وفاطمة للي فكندا بقاو كيشطحو قدام الكاميرا وماشيين مع الايقاع حتى وقف من موراهم يوسف ضارت ملاك كظحك)
يوسف: هاي هاي على شليحة فين مخبية هادشي
ملاك: (دارت يدها على وجهها) حشمتيني
يوسف: هههه اجيو الوسط
ملاك: (تفكرت ابيل فيديو اما خديجة حبست شطيح وجلست، شافت فالتيليفون كانو خوتاتها مقربين وجههم لحدا الكاميرا لدرجة نيفوهم كيبانو كتر من عينيهم كيبرݣݣو كتر هزت دغيا التيليفون قطعت) هه خوتاتي
يوسف: اممم مزيان.. (كيقرب لحداها باش تسمعو) اوا عجبكم هنا؟!
ملاك: (حتى هي) بزااف صراحة زوينة دير عرسك مختالف وبعيد على لمدينة الرجوع للأصل فضييلة
يوسف: ماشي مسألة مختالف هوما مكانوش بغاو العرس وعائلتهم بززو عليهم وقالو يديرو عرس فين تولدو وصراحة احسن حاجة دارو
ملاك: (تبسمت وحركت راسها باه، شافت الناس بقاو كيجلسو) مغنتعطلوش ياك
يوسف: لا شي ساعة وغنمشيو راه واعدتك قبل المغرب ان شاء الله تكوني فداركم
ملاك: ان شاء الله… (مشا هو حدا صحابو وجلست حدا ختها للي غير مكتزيد تقرس كتر وكتر..)
ملاك: (جلست مزالة كتحرك كتيفاتها حتى وقفت حداها امرأة هزت عينها حيت باينة جاية موجهة ليها حققت عقلت عليها ام يوسف هادي كانت لابسة داكشي مأنتك وشيييك ولاوية عليها فورير واهم حاجة مباينش عليها عمرها، تبسمت) سلام
ام يوسف: نتي صديقة ديال يوسف؟!
ملاك: اه انا ملاك وهادي ختي خديجة (شافت فختها) هادي ماين يوسف
ام يوسف: ماين!! حم واش جيتي مع يوسف لهنا ولا جيتي مع احلام (لعروسة) صاحبتك
ملاك: شكون احلام؟!
ام يوسف: اممم ( فنفسها معارفاش حتى شنو سميت لعروسة) اذا جيتي مع ولدي يوسف
ملاك: اه واش كتهضري على لعروسة كانت عرضاتنا منين كنا فايفران علاش؟!
ام يوسف: لا والو بغيت نعرف
ملاك: اممم مزيان جلسي اخالتي دابا تعياي (محملتهاش حيت كتشوفها غير من تحت نيفها وهادشي كيستافزها)
ام يوسف: (باغا تهضر وكتراجع حتى كتحرك فمها وكتسكت) غير بغيت نسول فيك وصافي
ملاك: يسول فيك الخير (مشات وملاك ظحكت) ههه تفقست
خديجة؛ اويلي وكظحكي مالها شنو بغات
ملاك: معرفت لجدها باينة محملاتنيش يمكن حسابها صاحبة يوسف (كتعيبها) نتي صديقة يوسف
خديجة: وعلاش زعما متحملكش
ملاك: نتي عارفة دوك الفيسيييات المأرتتات (عويقات)
خديجة: باااااينة صعيبة
ملاك: موحال وكان كانت صعيبة وكان خرجت شنو بغات تقول باينة كتخاف من ولدها (هزت كتفها) حتى نتي بففف شت معجبنا حد هنا واش كولشي اونكووبل غير حنا للي سولوباطير هنا
خديجة: ههه عندك يوسف بعدا براكة عليك
ملاك: فرعتيلي *** بهاد يوسف يووسف هو مزال حتى مهضر وعاد العاقسة ديال مو باينة عليها عاافية والله شتك كترتي
خديجة: ناااااري واش مكتحشميش
ملاك: ومالي كذبت راه مكرهتش طردنا من هنا، (شهقت) اويلي
خديجة: مالكي؟!
ملاك: دابا فهمت كولشي حسابلو اممممم!!! دابا حنا جينا مع يوسف يعني داروني انا صاحبتو ااااااااه عاد فهمت تفووو على ديكور
خديجة: (بقات غير كتشوف فيها وفهاد العقل مكيبقى فيها الحال على راسها وكتشوف ختها عايشااها كوول وعلى ربي.. تنهدت مكرهتش تكون بحالها ها ختها كانت مع يوسف ويمكن كانت مزعوطة فيه منين حست بيه تبدل هي بعدت ممسوقاش عايشة حياتها مكتخليها مرهوونة عند حد عكسها للي كتمنى يوسف يرجع داك الاهتمام للي كان..
ناضت منين سمعت اغنيتها المفضلة “تربات ايغودان” كانت فرقة احيدوس خرجت من القاعة بقات كتشطح قدام ختها للي كتصفق ليها بغات غير تنشط جبدت تيليفونها بقات كتصورها)
خديجة: ههه اويلي لاااا
ملاك: كملي كملي والله تقنتيها (بقات كتشالي بيدها وتصور ختها للي طلقتها لحيوح وقلبوها الشعبي ديال الشلحة وماااشية مع الايقاع مزيااااان)
هادييييييك هههههه
(صونات على مها ابيل فيديو للي جاوبت وبقات كتفرج فخديجة كتشطح وجات حداها بنت اخرى كتشطح معاها مع دورت ملاك التيليفون لمها قطعت عليها)
ههههه مشييييت فيها كفتة مصهدة….
ملاك: ويلي على مك الشيخة منين وفين تعلمتي هادشي
خديجة: (جلست كتلهت) شطيح هو للي كان مونسني لهيه غير كنكمل شغلي كنطلع لبيتي نطلق الموسيقى وندردݣ على العقرووشة حتى نشبع
ملاك: ههه وكان ماشي بابا مزير الدعوة خدمي شيخة والله حتى نديرو لباس معاك
خديجة: ها ها ها
ملاك: والله حتى غير شيخة (كتاكل من المكسرات للي قدامها) علميني ديك الدورة للي كديري
خديجة: ههه مع قصيرة غيحسابوك غير طريمبو كيدور ههههه
ملاك: ههههه ناري كنتخيلني (بقاو مجمعين فتخيلي ما تخيلي حتى تحط لغدا ولا عشا مهم كانو ميتين بالجوع، كملو بقاو فبلاصتهم كيشوفو لعروسة للي دخلت بلاغوب بغات تلوح الورد وشي بنات من موراها)
حتى هادو تقاليد ديالنا؟!
خديجة: ههه غير كيبغيو لبنات يظحكو
ملاك: نوضي اخديجة جربي حظك
خديجة: اويلي لا حشومة ما انا من صحاب ولا من العائلة وعاد كينوضو غير العزبات
ملاك: منين كنتي تضربي فلحم علامن كنتي محسوبة
خديجة: زعما نتي كنتي جامعة يدك
ملاك: ومقلناش دابا نوضي نوضي انا عارفة مغنوصلش كينتلف غير فالرجلين نتي بعدا عندك المؤهلات
خديجة: (بقات كتشوف هي باغيا تمشي علاش تخليها فقلبها ياك مكيعرفها حد ناضت متوجهة فين كاينين قلبت بعينيها على يوسف مبنلهاش بعدا ميشوفهاش، بقات واقفة كتسنى حتى بدات العروسة كتستاعد تلوح لبنات كيحسبو ويظحكو لاحت خديجة بطولتها دارتلهم زربة عليه دغيا تمكنت لقفاتو من وحدة وكولشي ضار كيشووفها كانت بسيطة فلباسها مكياجها شالها ولكن كانت زوييينة وزادت ابتسامتها وهي مقربة الورد لوجهها بحال كتشمو حيت كان ورد حقيقي، تمشات قاصدة ختها لي كتصورها فيديو حتى شافت يوسف جالس اللور متكي على الحيط وكيشووف فيها مفهمتش ديك الشوفة مموالفهاش منو هاد الشوفة قلبت عينيها دارت راسها بحال مكتعرفووووش.. جلست موترها.. بعد تقطاع لاطاغط كولشي ناض كيحط الغرامة ملاك قفزت ناضو حطاتو وجاب الله مكاين لا تبراح لا والو ولكن كاتبين سمية وهي كتبت غير حرف #م ناضو لكليكة باش يرجعو فحالهم ركبو فالباص داوهم لديك الدار فين بدلو فالاول كانو غير لبنات تقريبا للي مجمعين كيعاودو احداث العرس وكيشوفو تصاور ويظحكو دخلو بدلو حوايجهم حتى هوما)
ملاك: ناري كنت درت مع لاخر نعطيه لحوايج تماك ونسيييت اصلا مديناش حوايجنا
خديجة: وشنو نديرو دابا
ملاك: غرد لحوايج منخليهمش عندي (زربو خرجو) شوفي بقاي نتي هنا انا نمشي دغيا راك شفتي دوك لبنات بحرا كيتحركو
خديجة: نمشي معاك
ملاك: غير خليك باش تصوني علية الا كانو قربو يركبو انا نمشي كنجري (زربت مشات بقات خديجة واقفة حدا لباب حتى جا عندها واحد)
…: Salut
خديجة: حم سلام
… نتي معانا ياك؟!
خديجة: (بقات كتشوف فيه معرفاتوش) شكون نتوما؟!
…: حنا ياك نتي وختك للي هزيتكم من صفرو، نتوما للي من طرف يوسف
خديجة: اه اه انا غير معرفتكش
…: حتى دابا نتعرفو (مد يدو) انس….
خديجة: (حشمات تخليه بلاكة مدت يدها) خديجة
انس: عندك شطيحة زوينة (تبسم) نتي شلحة ؟!
خديجة: حم اممم اه
انس: مكذبوش منين حقي فشلوح ولا طيح الروح
خديجة: (تبسمت كان قدها فالطول زعيعر بييوض ولكنتو ماشية لجبالة) نتا من جيهة تاونات
انس: أيااو باش عرفتيها؟!!
خديجة: هههه بهاد أياااو نييت
انس: ههه انا أستاذ تنقري فاس ونتي؟!
خديجة: والو ماا خداماش (كتشوف فيوسف للي جاي جيهتهم)
يوسف: انس تكلم لمرتك
خديجة: (خرجت عينها فيه منين قال مرتك وحتى لاخر بحال تضهشر مشا بلا ميقول بسلامة حنات راسها مربعة يدها)
يوسف: فين ملاك؟!
خديجة: (كتجاوب وهي كتشوف بعييد) مشات ترد لحوايج واش غنمشيو دابا؟!
يوسف: مزال شوية.. (مشا من حداها معصب وهي بقات واقفة مكرها…)
ملاك: (دازت للتعاونية ديال حليب خدات دويرة جبن قياس كيلو و5 لتر من لبن باش تصالح مع مها من زهرها لقاتهم مزال باقيين بقات كتمشى بالزربة قربت لديك الدار كيبان ليها اورطيغا مقرد وشاد راسو بحال نزلت عليه شي موصيبة مشات جيهتو حطات داك لبيدو كتلهت)
مالك؟!
اورطيغا: (هز راسو كانو عينيه حووومر وحتى حنيكاتو تحت عينيييه بقا كيشوف فيها مهضرش)
ملاك: (هو مكتحملوش ولكن فضولها وبقى فيها شافتو وقف وهي تهز راسها)
اورطيغا: (قلب وجهو ومشا من حداها)
ملاك: (ميقت وجهها)
يبكيو عليك شحال حاسب ف*** العزي لاخر الله ي****
(هزت بيدو ديالها ودارت وهي تلقاه عوجت فمها)
اورطيغا: عنداك يمشيو عليك
ملاك: (رداتلو الصرف ومشات وهي كدندن لقات ختها واقفة فين خلاتها) دخلي غير من لبرد بعدا
خديجة: شنو داكشي جايبة؟
ملاك: لبن وجبن للي كيعجبو ماما
خديجة: هههه كترشيها عاود
ملاك: (حركت راسها) غا صبري دابا تعرفي شنو غتسمعنا
خديجة: واش حتى فاش كنتي بوحدك كنتي كتسلتي هاكا
ملاك: لا اصلا كنت مع لاخر يعني حدا الدار مكناش كنتلقاو بزااف وبوحدي مكنتش كنبغي نخرج
خديجة: (حركت راسها باه بداو كيطلعو جلسو وبقات كتعاود ليها على انس سمعت كيقلبو على اورطيغا وهي تعاودلها ملاك كيف لقاتو حتى سمعت راه رجع لفاس)
ملاك: حسن مفهمتش اصلا كفاش صحابو صابرين عليه
خديجة: يوسف قبيلة جا سول فيك
ملاك: حتى هو مبانليش (جبدت تيليفونها صونات عليه مكانش حال الواتس) غيثة فين يوسف؟!
غيثة: (بحزن) رجع لفاس مع اورطيغا
ملاك: اه صافي.. (تعجبت حيت ياله باش تلاقااتو كفاش مشاو!! انا على يوسف كان عليه غير يقولهالها شدو طريق هوما حطهم منين هزهم وكانت حاطة طموبيلتها تماك، ركبو فيها ومشاو للحومة بانلها حمزة هاز صويكو ومشي بشوية فجنب طريق بقات كتكلاكصوني وهي تهضر بغرور)
منين ندخلو فيكم قولو اي واح راه كاين طريطوار ابنادم مشي فيه
حمزة: (تبسم وهادشي للي كيفقصها مكيعطيهاش خو جوابها، زادت فالسرعة متبعها حتى شافها طلعت فوق طريطوار وحفظها الله كانت غدخل فقهوة ديال باها وتجمع ݣاع داكشي للي جالس تماك مشا كيجري عندها والناس تجمعو حيت بنت رشيد مسبوهاش كيسولوها غير على راسها للي شادة فالڤولون ومصدومة بغات تعيق ساعة كانت غتجيبها فراسها)
واش بيخير؟!!
ملاك: (شافت فيه وحركت راسها باه والناس مجموعة داخت)
حمزة: قادة تصوݣي؟!!
ملاك: (فشلت مضهشرة ومصدووومة مفهمتش كفاش هربت ليها، خرجها وختها كتر منها شافتو طلع فالطموبيل) فين دايلي طموبيلتي
حمزة: نحطها فلباركينغ متخافيش
ملاك: (جابلها السرباي كاس دلما وكيدعي معاها مقدرتش تشربو جرت فذراع ختها خايفة غير باها يخرج يسمعها خل ودنيها قدام الحومة كاملة، تبعو حمزة لباركينغ تهرب من دوك الناس )
..صافي موقع والو..
..امين شكرا اعمي..
..امين اعمي…
..واخا شكرا اخويا…
(بقات كتجاوب الناس مشات لباركينغ لقاتو تماك واقف هاز الساروت حلت الطموبيل جبدت لبن وجبن للي تفكراتو)
حمزة: (مد ليها الساروت) ملاك تبقاي تردي لبال، الصوݣان مافيهش اللعب والظحك، الحمد لله على سلامتك (شاف فخديجة وتبسم)
ديها للدار راه داخت
(مشا قبل متهضر سدت الطموبيل ورجعت كتأكد واش مسدودة شافت فقدان الطموبيل واش كاين شي خسااااائر عاد تهنااات كاين خربشات من لتحت تديهم لطولي يستيكيهم)
خديجة: لطف الله، اخر مرة تعاودي ديري بحال هاكا..
ملاك: (بقا فيها هاد الجست للي دار ولكن غير كتفكر انه تزوج كتكرهو وتزيد تحقد….)
ملاك: (جالسة فلبيت ساهية كتلعب بشعرها وكتشد أعطرافو محولة عينها معاهم وكتحايد لي بوان منهم) معرفت يوسف علاه مسولش ݣاع فينا مموالفالوش!!
خديجة: (بتنهيدة اصلا كانت كتفكر فيه صونا تيليفونها كالعادة عمر للي متصرطاتلوش قضية طلاق كيف كانت تحت جناحو وبين ليلة ونهار طلقاتو،) صوني عليه نتي سولي فيه مافيها باااااس
ملاك: الا هو مسولش، منسولش انا
خديجة؛ (حركت راسها بآه حايرة واش تصوني عليه ولا لا،) انا جاية
ملاك: (هزت تيليفونها مشات نيشان للفايس ديال حمزة حتى من الحالة مدايرش متزوج قليل فين كيحط شي سطاتي قلبت فليجيم أغلبية للي معاه ديرالو قلب ❤️ وحدة اسمها أسماء عوجت فمها مشات لانسغرام دخلت لكونت ديال يوسف نيشان لواحد التصويرة كانت جماعية فايفران وكل واحد حدا راسو مطاݣيه دخلت لعند اورطيغا كتبقشش فتصاورو حاط داكشي ديال طياب بزااف وكل مرة شنو مطيب)
روتيني اليومي وصافي… ودايما فيها النفخة على لخواااا
(كتشوف وتعجب هي للي بنت مكتعرف دير والو من داكشي حاط تخلف الا شي شاف كبييييرة مطيب داكشي زوين وحتى التصوير عندو ديال لفريييع، شافت شي تصاور قلال ديالو واغلبية مع صحابو ولا فلاصال كتزوووومي قنت بقنت…)
زوين ولكن حمار
(خرجت كتقلب على داك زعر للي كان معاهم لقاتو دخلت كتشوف فتصاورو السيد خارج حتى لبرا مزعمتش تصيفط ليه انڤ ظنا منها كالعادة الا عجبتو هو غيصيف لي ماشي انا هو يقلب علية ولا غنكون مدلولة.. بقات كتبقشش من واحد لواحد مكاين غير للي كيتلفها..)
خديجة: (صونات عليه فالواتس حتى قطع راسو وجعها قلبها مكمشة من داك الريح للي بااااارد فسطح، ياله راجعة باش تهبط وهو يصوني ابيل عادية قلبها وصل ل100 وهو كيضرب يدها بقاو كيرجفو معرفت حتى كفاش تجاوبو توحشاااتو بزااف وغضبانة منو وݣاع الأحاسيس مخربقين عندها)
حم ألو
يوسف: وي خديجة
خديجة: حم صونيت عليك بغيت غير نسول فيك (بقا ساكت) مرجعتيش معانا وبقيت مشطونة عليك
يوسف: مشطونة علية!!! مشفتش هادشي ونتي واقفة مع داك الكيدار
خديجة: شكون؟!
يوسف: شوفي نتي
خديجة: هو للي جا وقف علية الا كنتي حاضي مزيااان غتعرف المنظر كفاش كان
يوسف: اممم
خديجة: ياله بسلامة
يوسف: بلاااتي
خديجة: ياااك نتا بيخير؟! حيت رجعتي بلا متقولها زعما ماشي تقولهالي غير كولشي بقا كيقلب عليك وصافي
يوسف: صاحبي ماتلو باه ورجعت
خديجة: ايييه مسكين الله يرحمو ويصبرو
يوسف: امين
خديجة: (عضت على شنافتها مبقالها متقول) سمحلي الا صدعتك بسلامة
يوسف: (عصباتو) عندك بسلامة بحال شريب لما وغير معايا يمكن كل دقيقة بسلامة ومنين ترشق ليك متعاودش تصوني ولا حتى تكلفي راسك تسولي
خديجة: مفهمتش
يوسف: صافي مقلت واالو
خديجة: لا قولي شنو بغيت تقصد
يوسف: متتشوفيش راسك غالطة معايا؟!!!
خديجة : نتا للي بعدتي
يوسف: انا!!!!!
خديجة: اه نتا
يوسف: من بعد ونهضرو اخديجة
خديجة: (ياله جات تهضر وهو يقطع ميمكنش قطع فلحظة شحال وهي كتسناه يمكن شي شهر ولا أكثر.. بقات كتصوني عليه واالو حتى تعصبت وبقات كتسب وتنݣر ندمت علاش سولت فيه ولا عبرااتو… ملقات غير هبطت لتحت حالفة عمرها تعاود تجاوبو ولا تهضر معاه وتصوووم شي حاجة اسمها يووووسف…)
اورطيغا: (غير سمع موت الأب ديالو للي واخا ممسوقش ليه ومعارفوش حتى كيف داااير لا فوجهو لا فتعاملو و للي ممعتابروش فالأصل ولدو….
مشا رجع لفاس خبر الام ديالو للي وصلها الاخبار من عند حبابها عذرها انها مابغاتش تمشي معاه ولكن هو دار صاكادو ديالو فظهرو هاز وراقيه ونيشان مشا لتران ركب #لݣرسيف فين أصلو واخا هو خلوق وزيادة ففاس وعمرو وطا هاديك الأرض…
فهاد المشية رجعو الذكرياااات من جدييييد وتفكيرو فهادشي كتر
الأب ديالو كان متزوج الام ديالو وبسباب شجار مع العݣوزة للي كان دااائم تحط فالاختيار واكيد ختار مو بلا نقاش ولا حتى يعبر الزوجة للي كانت فأول الحمل ديالها ولكن لا هو لا هي كان فخبارهم..
وقع طلاق عائلتها مهزوهاش حيت عيب طلق بنتهم ومعندهمش فالعائلة لقب متزوجة وكانت نفسها حارة ركبت اول كار للي كان ماشي لفاس.. بفلوس طلاق بدات حياتها من تحت الزيرو واخا عرفت راسها حاملة مخبرت حتى واحد غوات على راسها وحسيت راسها مقطوووعة من شجرة… فاللول كرات براكة دالقزدير فالليدو خدمت فمعمل لخياطة فالحي الصناعي للي كان قريب لبلاصة فين كراات، ناس الحي الشعبي عرفو قصتها وداروها وحدة منهم وكان لقبها مينا الݣرسيفية، ولدت وكانت ولادتها صعيبة شوية قابلوها شي جيران دارت ذبيحتها كبرت ولدها بمساعدة جيرانها وحتى هي كانت طيبة معاهم ومنساتش خيرهم ليومنا هدا
سهل عليها الله جمعات براكة للي كانت مليون شرات البرااكة بيها باش تهنى من لكرا وتضمن مستقبل لولدها وليها واخا غير ببراكة،
بقات من معمل لمعمل وتعلمت تعول على راسها وتجيبها من فم سبع كبرت ولدها للي كبر فيه حس المسؤولية يخرج من المدرسة نيشان يمشي للسوق يبيع الملحة ولا الميكة ولا يبقى يتصخر وكان بعلم الام ديالو للي عيااات تنهااه ولكن أغلبية شباب الحي كانت نفسهم حاارة وهو كبر معاهم وشاف وتعلم منهم وحتى دوك شماكرية كانو عاطيينهم بالتيساااع..
حتى شافها الحاج للي اعجب بيها وبقا ملاحقها وهبلاتو بالرفض ديالها ونفسها الحارة حتى تزوجت بيه واخا كان فارق السن 18 عام الا منين تقبل ولدها وواعدها غيديرلو مستقبلو قبلت، خداهم من براكة لرياض فااخر وكبييير، تعرفت على ولادو للي كبار على ولدها وكانت حتى العائلة ساكنة تماك عندهم دار اخرى فالسعادة للي مرااا مرا كيمشيو ليها ولكن السكنى كاينة فالرياض منها منهم….
كبر ولدها وخدا نسب ديالها حيت راجلها الأول نهار ساق لخبار مبغاش يعتارف بولدو وكولشي تاهمها بالفساد حتى قاطعات عائلتها لسنوات عاد تدخلو شي ناس للي ردو العلاقة للي بقات جد سطحية كانت مسامحة غير من الفوق الفوق لا منها هي لا من عائلتها، الحاج بن سليمان للي كانت مكانتو واااازنة ففاس كان باغي يرد اورطيغا على كنيتو ولكن هي مقبلاتش وهادشي زاد عجبو ومقللش من تربية ولدها قراه كبرو علمو الحرفة وتاق فيه وكيعاملو بحالو بحال ولادو الاخرين….)
ام اورطيغا: (بقات جالسة كتسمع لنݣير اخت راجلها للي مفهمتش علاش اورطيغا يمشي يعزي فواحد عمرو سول فيه، ضارت مخنزرة فيها) انا ممربياش ولدي على الحقد الآلة مفتاحة
مفتاحة: ولدك تربى عندنا هو معندو علاقة بلاخرين باش يمشي حتى لعندهم
ام اورطيغا: نعلي الشيطان واستغفري مولاك هاد الهضرة مقلتها حتى انا للي مو وعشت لمرااار معاهم
مفتاحة: وهادشي فخبار خويا؟؟
ام اورطيغا: (بقات كتشوف فيها مكرهتش غير تنوض تريشها ولكن هاد ختو كبيرة كولشي كيحتارمها واخا عقروشة وهي عينين راجلها حيت ديما خايفة عليه وكتبغيه بزاااف معندها لا ولاد لا راجل)
حنا علاش غنصدعو الراجل بهاد تخربيق
مفتاحة: حيت خويا خاصو يعرف كووولشي فهاد الدار مزيان تبارك الله ربي الولد وفالتالي يمشي يقلب على باه للي لاحو وهو لحمة ودابا ماشي يقلب عليه تحت تراب
ام اورطيغا: (معصبة هزت صبعها) حدك تم الا نتي كتبغي خوووك بزعطة انا ولدي عندي هو عيني باش نشوف طريييق كلمة أخرى ضدو غنسى هادشي للي جاااامعنا وانا دابا للي غنوووض نمشي عند خوووك للي فرعتيلي راسي بيه من صباح.. (ناضت مكرهة من ديما هي العذاب ديالها فهاد الدار من نهار جات.. مشات عند راجلها للي لقاتو ناااعس وكان ياله ضارب دواه خرجت معصبة هاد الحالات فين كتحس باليتم معندها لا علامن تشكي ولا علامن تبكي… صونات على ولدها لقاتو ياله وصل كانت صونات على ختها باش يتعرض ليه ولدها لي عندو علاقة مع اورطيغا ويوريه الدار دباه…)
اورطيغا: ( مع وصل لقا ولد خالتو علاقة عادية ماشي عائلية وسلام والعضور، وصل لدار باه كانت دار عادية من جوج طبقات وخزانة حدا باب الدار كان الليل والناس كيسربيو لعشا عرف انه تدفن كان باغي يحضرلو قبل ميتدفن معرف شكون يعزي ولا معامن يهضر عاونو غير ولد خالتو قلب على اخ المرحوم للي يا حضرة عمو مشا قدملو اورطيغا وهنا كحل بالعمى.. شافو الدري جا للي عمرو جا عندو ولا سول فيه!! كولشي طاحت فبالو انه جاي على حساب الورث وفقط!!!!!!)
خديجة: (بابتة كتقلب مجاهاش نعاس طلت على ختها شعلت لبيل لقاتها ناااعسة حالة فمها ومرة مرة كتجخر من نيفها حيت معذبة فنعاس ناضت قدات ليها راسها مع الوسادة غطاتها مزيان ورجعت جلست بلاصتها مفهمتش واش هادي دازت عليها الخلعة وشافت خطيبها لقديم للي دازت بيناتهم قصة حب زويييينة تزوج وحدة أخرى والبتب على الباب وباينة مزال كيبغيها ويخااف عليها وحتى هي تأثرت وفالتالي تنعس!! عاااادي!!! وهي غير مجاوبهاش يوسف كيف بغات خلاها كتقلب شعلت الكونكسيون لقاتو مصيفط ليها ميساج زربت دغيا قراتو)
“” خاص نهضرو دابا مكاينش شي عذر”””
خديجة: (بقات كتقراه وتعاود وخايفة من كلمة مكاينش شي عذر عاود وصلها ميساج من عندو)
“”امتى نتلقاو اخديجة؟!!!””
خديجة: (طرطقت عينها معارفة متكتب ولا متجاااوب عاود صيفط ليها علامة استفهام
“”؟؟””
زعما وهي تكتب شنو كاين)
انا بغيت نتلقاك حيت حتى انا بغيت نفهم منك شحال من حاجة ولكن
يوسف: 2 سوايع كافيين
خديجة؛ كيف ندير ليها؟!
يوسف: باغية تلاقايني؟!
خديجة: اه
يوسف: نهار يصلاح ليك قوليهالي حيت عندي شي كلام ماشي ديال التيليفون اخديجة
خديجة: (بقات ساكتة كتحس بيه كيهضر بجدية شوية دخلوها تناوي هو باقي عزري وزوين وخدام شنو غيبغي من مطلقة وتعاملو تبدل منين طلقت وجوج سواايع!!!، بحال والو غراضو من الأول كان جنسي عرفها طايحة فيه وبغا يستاغل فيها كيف بغا..
افكار كيديوها وأفكار كيجيبوها معاودتش كتبت وحتى هو مولاش كتب طفات الكونكسيون وبقات كتقلب وتخمم حتى أذن الفجر وسمعت الحركة فالدار، ناضت حتى هي توضات مشات للصالون وبقات كتصلي وكتدعي الله يدير ليها تاويل دالخييير..)
يا ربي الا فيه خير كتبو لية والا ناوي الشر يا ربي بعدو علية ما بعدت سما على الأرض..
مشات للكوزينة عجنت لمسمن كتبرد فيه غدايدها بقات كتورق وتخبز عطات لرجال يفطرو للي خرجو عاد لحقت مرت عمها ومها
زهرة: (شافت داك طرح لمسمن للي كان كتير) مالك ابنتي على هاد الفيجطة عندك الموسم؟!!
خديجة: غير فقت فقت قلت ندير فطور
زهرة: باك مخلانيش نفيق قالي راه خديجة كتوجد لفطور ولكن مقلتش كديري هاد لمسمن كاامل، اصلا ابنتي راه لكونجيلاتور غير جبدي وسخني
خديجة: معليش
سهام: خساااارة هاد لحداݣة بلا راجل
خديجة: (معصبة) الخايبة هي راج…
زهرة: (زربت عليها قبل متكملها حيت عارفة بنتها شنو غتقول) خدييييجة سيري ابنتي لبيتي ونعسي ميصدعك حد تماك
سهام: وشووووفلك انا نشكر فيها وهي ترد الهضرة علم الله شنو كانت بغات تݣول
زهرة: بعدي من لبنت اسهام متعاوديش تجبديها باش متسمعيش للي ميعجبكش
سهام: راها بحال ختي كنهضر معاها
زهرة: الآلة حسبيها حتى بحال خالتك وعطيها الاحترام ها ودني منك اسيهام انا تبريييت بنتي راه جوابها على فمها وماشي غير هي ݣاع بناتي تحتارميهم عينيهم يعطيهم ليييك ولكن تطنزي عليهم يدوورو عليك
(خرجت من تماك مشات كتجمع الدنيا فين فطرو رجال ناضو لبز للي داخلين مع 8 ناض شيخهم للي صم بكم عاطيهم التيقار ومرتو حلاااااوة معاهم فطرو مجموعين عاد تماك ملاك فايقة فطراتها مها بالسييييف وخرجت للخدمة ديالها….)
اورطيغا: (لقا تعامل خااايب من طرفهم كاملين كان ممكن يدير شي صداع وشي شوهة وغتجيييه باردة على قلبو ولكن هو كان غراضو يعزي فقط ويرجع بقا فالقنت كيشوف بعينيه وكيشوف عينين حاطين عليييه شحال كان كيغير من اي واحد عندو فاميلة خال هالة عم عمة ميهمش يكونو مشاكل مهم يكون عندك جذوووع… وقف بهدوء وتم راجع للمحطة واخا ولد خالتو عيا يرغبو يمشي معاه مابغاش ميمكنش يمشي معاه حيت حتى تماك غيلقى نفس التعامل ونفسو تحمللات بزااف موحال قادر يزيد يتحمل ذباااانة تزنزن حداه عاد واحد يطيح منو وهو نفسو حارة، اول كار ماشي لفاس ركب فيه..
كان كيحس باحساس فشكل راجع من مدينة للي عمرو جا ليها ومنين كان صغير كان باغي يجي ليها ويتواجه مع باه ماشي حبا فيه ولكن يتبت ليه انه ولدو وان مو ماشي خرجت طريق بلعكس جابتها من فم سبع كبراتو وقراتو وحتى منين تزوجت دارتو هو اهتمامها الأول، كان باغي يتواجه مع عائلتو ديال باه وديال مو ولكن منين وصل حس براسو بحال شي دخييييل غريييب فوسطهم كولشي كان كيشوف ويخنزر متوترين من شي حس ديال شي ورث وخافوه يتقاسم معاهم هاديك الدار للي مكرهش وكان دخل ليها كان بغا يجرب الاحساس ولكن مكانت حتى شي دعوة لا من قريب لا من بعيييد.. وهادشي بقا فيه كتر وكتر
تظلم منين كان فكرش مو ومنين تزاد ومنين كبر.. دابا بين عينو غير يوصل ويكبر راسو براسو واخا راجل مو مهلي فيه ولكن جايبها بذرااعو يخدم ليل ونهار فينما يبريكولي غير باش يدير شي حاجة ديالو وحتى واحد ما يمن عليه…
ساعاااات ديال طريق وصل لمحطة بوجلود فاس دار صاكادو فظهروو للي مفتحوش مفهمش اصلا علاش داااه شد تاكسي صغيرة…)
السعادة الله يسهل عليك
(ركب وزاد التاكسي منعسش حتى دقيقة وصل لتماك طلع للدار للي كانت ديال مو مفرشة كولشي فيها زويين مأنتك ومشيك حيت حتى هو كيفرش بذوقو نيشان لبيت نعاس ديالو حيت فيها حتى بيت نعاس ديالها كتجي مرة مرة هي والحاج.. هز تيليفونو كتب ميساج لمو أنه وصل للدار وغينعس يرتاح دار صيلونص التيليفون تغطا مزيان وجبد عليها..)
~~~~~~~~~~
يوسف: (فالفطور جالس مع باه ومو وختو وخوه ومرتو وولادو صغار كيفطرو مجموعين وفنفس الوقت كيتناقشو كمل ماكلتو هز موشوار مسح فمو ورجع طواها حداه للي فتاتة دالخبز ولا عظم ديال الزيتون مكاينش.. بهدوء) شنو فيها الا بغا يعزي فباه مفهمتش علاش كولشي دخل فحيااتو عكسو هو للي متيدخل حتى فشي واحد
ام يوسف: انا تيجيني غير شمكار الله يخليه بلخلا
غيثة: حشومة اماما تقولي عليه هاكا
يوسف: (ببرود قاد الفنجال ديال القهوة مع ليطاس ديالو، وشاف فيها) باش حكمتي عليه شمكار؟!
غيثة: مفهمتش حتى انا
ام يوسف: متتشوفش حالتو انا مفهمتش الحاج بن سليمان قامتو وقيمتو كفاش قبل يكون عندو ربيب فحال هكاك نقولو عشق ديك (بقرف وتعاااالي) اشنو سميتها!!!
يوسف: ههه انا نتيقك معارفاش سميتها؟!
ام يوسف: ماشي موضوعنا، هي نقولو شوية عدلت من الحالة ديالها ولكن ولدها غير بوبنات (غيثة حبست الماكلة) حالة حالة شمكار وديك الهضرة ديالو تتخلع انا تندوز من حداه تنخاف يݣريسيني
يوسف: هه حيت هو شعبي مع الناس نتي حكمتي عليه شمكار واش عارفة هداك السيد شحال تيخدم؟! هداك الحاج بن سليمان عرفتي شحال كيتيق فيه ولا لا؟! عرفتي شحال تيعول عليه؟!!!
ام يوسف: حيت دايرو خديديم ولاخر تيظل يبوس اليدين والرجلين باش يرضااو بيه وعليه بحلاس لاااخر
اب يوسف: كلام كبييير هادا الآلة الغالية
يوسف: (محملش تفكير مو) صدمتيني صراحة كنت تنتخيلك راااقية على هاكا وتفكيرك زويين (ناض كيتأفأف) انا مشيت
ام يوسف: يوووووسف يووووووسف (بتعصب لاحت السربيتة فوق الطابلة) شتي هاد الولد كيف ولا
اخ يوسف: راه خو صاحبو وعاد شفيق عزيييز عندو عادي ميعجبوش تهضري عليه هكاك
اب يوسف: وبلا صاحبو راه تيبقى واحد من العائلة متنسايش الحاج بن سليمان راه ولد خالي وكبرنا مجموعين والا عتابر داك الدري ولدو اذا راه ولدو وولدنا كاملين
ام يوسف: لهلااا يحيييه حتى يكون منا اوا خلااااص علية هادشي للي بقااا لينا
غيثة: (ناضت معصبة حتى قاست كاسها ديال العصير وتزلع) نتي بزاااااااف…
خديجة: مجاهااش نعاس فبيت مها تفكيرها كولو كان فيوسف كيفاش دير حتى تلاقا بيه الا قالتها لملاك غتلقى ليها الحل ولكن!! فالاصل مابغاتش ملاك تعرف!! والخروج بلا بيها مستحيل!! حيت بااها ماانع عليها الخروج فمرة خرجت من لبيتكولشي مشغول للي كيطيب للي كيجمع رجعت سدت عليها لباب وسورتاتو، صونات على مريم ختها.. بقاو كيهضرو شحال عاد نطقاتها
خديجة: مريم بغيت نقولك واحد الحاجة؟!
مريم: ياكما خاصك فلوس؟!
خديجة: لا لا بابا مهلي فية وحتى ملاك. انا بغيت نخرج نتلاقا واحد السيد
مريم: شكون؟! وإمتى
خديجة: اليوم هو كنعرفو.. بغا يتلاقا بية وبغا يقولي شي حاجة ضرووري قالي لكلام ماشي ديال التيليفون
مريم: ختي خديجة نتي ياله خرجتي من تجربة للي كانت فاشلة ودازت عليك متزربيش عطي راسك وقيييت ترتاحي فييه وتفكري مزياااان
خديجة: واش أنا صغيرة امريم باش نعاود نغلط بحال اللول هدا راه خخمتلو مزيااان عرفتي هاد السيد راه منين ماااا جيتيه زوين اصلا براسي كنقول كفاش حتى بغاني عزري ديال راسو زوين لباس عليه وقاااااااري
مريم: بغاك يجي للدار.. اجي بعدا امتى عرفتيه ونتي ياله طلقتي وكنتي فمشاكل مع راجلك
خديجة: الصراحة قبل منتطلق كنا كنهضرو فالتيليفون وعاوني ووقف معايا بزاااف وحتى من ملاك كتعرفو، ودابا منين تطلقت بغا نتلقاو قالي سااعة فشي قهوة نقولك شنو بغيت ونتي قرري تكملي معايا ولا لا
مريم: فصفرو؟!
خديجة: هو اصلو فاسي ويمكن نتلقاو غير هنا مبغيتش نبعد
مريم: اممم معرفت اختي كتجيني زربتي لا؟!
خديجة: هدا بالظبط انا خاصني نطير بيه ههه قبل ميطييرو بييه
مريم: ههه شوفي مع ملاك
خديجة: مبغيتش نجبد ليها صداااع قلت نتلقاه بوحدي حتى نشوف شنو باغي وديك الساعة نشوف مع ملاك ماشي حتى هي نخسر ليها الصورة مع بابا
مريم: وهي للي غتفكك صراااحة
خديجة: فكري معايا فشي حل اخر
مريم: اممم معرفت ديري السبة بالحمام واخا انا معاجبنيش هادشي زربااانة ومزال حتى فالعدة وغتلقاي اااخر!! وتخرجي مسلتة صراحة مكيعجبنبش هادشي ومكرتاحش فيه بغا يقولك يجي للدار
خديجة: واا راه غير قالقهوة وهو محتارمني بزااف وبلا ميحتارم ݣاع واش انا هبيلة ندير شي حاجة!! فكرت فقضية لحمام خفت ماما تقولي لا ولا تلسق فية مرت عمي ولا بنتها
مريم: قوليها غير لماما بوحدها ولكن ديري عقلك مطوليش حتى ساعة متكمليهاش سمعي شنو بغا وخودي وقتك ونتي كتفكري متعمريش غلطة بغلطة
خديجة: واش عاد توصيني ددددددرت عقلي وعمرني نعاود شنو كنت درت مع عمر
مريم: وعنداك تعاودي لهادا راك تزوجتي بعمر غي حيت ضيعك
خديجة: الاااااا واش انا حمقة مهم اناا نشووف واش تصدق لية هاد قضية الحمام بلا متقوليها لملاك غديرلي الطر حتى رجع ونقولها كوولشي
مريم: لا لا كوني هانية..
خديجة: (قطعت معاها مشات عند مها جرتها قالتلها بغات تمشي للحمام ورغبتها بزااف مها بغات ليها بشرط متعطلش حيت الحمام غير فالحوومة، شافت فالساعة كانت 11 ملاك كتجي بين 3 حتى ل4، دخلت لبيت مها صونات على يوسف للي جاوبها مع الصونيط اللول)
حم انا دابا صالح لية نتلقاو
يوسف: (مكانش متوقع بهاد الزربة وكانت عندو خدمة) عطيني ساعة
خديجة: ساعة!! ساعة بزااف ايوسف انا غير غنسلت
يوسف: كان خاصكي تعلميني قبل راه انا فاس ونتي فصفرو
خديجة: صافي الا مصلاحلكش صافي بلاش
يوسف: انا دابا نشد طريق عندك… تعطلي غير شوية فالدار
خديجة: صوݣ بشوية راه سلامتك اهم من شي ملاقية
يوسف: ( تبسم قطعت معاه، زرب على الدري للي خدام معاه عطاه خدمتو حيت موالفين هادشي مرة مرة، ركب فطموبيلتو وتم شاد طريق لصفرو….)
يوسف: (وصل لبلاصة للي دار مع خديجة يتلاقاها فيها شافها هازة صاك وحداها سطل كبير وقف حداها شافت من موراها واش حاضيها شي حد حيت خرجت من الجهة الخلفية ديال الحومة فين كاينة تيرا كبيرااا منين هزهم نهار فاش مشاو لايفران، اما هو كيشوف الجلابة كفاش تطراسات عليها حيت كاينة الريح.. نزل حل الكوفر دخل فيها الصاك وسطل للي خاوي) طلعي اخديجة
خديجة: اولا قول غير السلام
يوسف: حيت عارفك ممرتاحاش بغيتك دغيا طلعي
خديجة: امم (ركبت وقلبها كيضرب خايفة بزاااف وكانت منعاكسة على وجهها) عنداك غير يشوفنا شي حد
يوسف: متخافيش، فين تبغي نمشيو؟!
خديجة؛ (شافت فيه) معرفت (بقا كيشوف فيها كانت قدات شوية من وجهها ممعيقاش باينة طبيعية ومع صحاحت) يوووووووسف!!!
يوسف: (رمش بزاف دالمرات كيركز معاها) فينما بغيتي نمشيو!! فاس؟!!
خديجة: خفت، وفاس بعيييييدة، حسن نبقاو غير هنا
يوسف: نمشيو لشي قهوة
خديجة: لا لا بابا كيعرفوه بزااف خفت
يوسف: تيعرفو باباك ماشي نتي
خديجة: واخا هكاك غير خلينا بعاد على لقهااوي
يوسف: نمشيو لشي ريسطو منبقاوش بوحدنا فالطموبيل اخديجة (بقات ساكتة صاݣ وهي حانية مخبعة تبسمت وفنفس الوقت تخلعت تفكرت باها خافت تفكرت ملاك خافت من ناحية أخرى سرقت شوفة فيه تبسمت حتى تبسمو عينيها.. بقا كيقلب بعينيه شاف واحد على الشاريع)
يوسف: بقاي هنا ندخل نشوف الاجواء (حط الطموبيل دخل لتماك وهي غير كتقلب بعينيها واش كاين شي واحد من عائلتها على برا حتى شافتو رجع حل لباب)
لداخل خاوي شوية نطلعو الفوق حسن؟!!
(حركت راسها باه هبطت بالزربة دخلت لتماك على يدها شمال كاين دروج طلعت وهو جاي من موراها غيييييير بشوية، طلع لقاها جلست عاطية بظهر تبسم عينيه مشاو نيشان الكرسي والخير للي جالس فيه وفاايض دغيا هرب عينو ومشا جلس مقابل معاها حط سوارتو وشاف فيها)
اخيرا
خديجة: (تبسمت) والله مجالسة على خاطري
يوسف: وي باينة، ولكن شي كلام خاصو يتقال فايس تو فايس وجه لوجه
خديجة: كنسمعك
يوسف: انا كنت مقلق منك
خديجة: يوسف انا درت للي خاصو يدار والا تقلقتي راه مشكلتك واخا انا كان كيبان لية نتا متفهم زائد هادا هو المنطق
يوسف: (حسابلو غتعتاذر) ولكن انا كانت نيتي زوينة مكنت لا طامع ولا باغي حتى حاجة
خديجة: عارفة ولكن كنت مزال محسوبة على واحد اخر واخا كنت غنهضر معاك مكنتش غنكون مرتاحة ونهار وقع طلاق راني وريتو ليك
يوسف: اممم يعني مغالطاش
خديجة: (تبسمت) لا داكشي للي درت صحيييح
يوسف: (قوس عينو فيها) طلاق كنت متبعو يمكن كتر منك ونهار خرج طلاق قبل متوصلك كان فخباري، ولكن كنت كنتسناك تهضري معايا معرفت تبان بلاصتي على الاقل عندك
خديجة: يووسف اه كنت كنتوحشك ووو منين قطعت معاك وانا ناقصاني شي حاجة كبييييرة ولكن اللهم هكاك ولا نبقى فتأنيب الضمير
يوسف: (بقا كيشوف فيها مد يدو شد يدها) حتى انا توحشتك وبزاااف وكنت تنفكر فيك بزاااااااايد
خديجة: ههه بامااارة مكنتيش كتطلع فية حتى الشوفة
يوسف: بغيتيني نتفضح راني طايح فيك ههه براكة غير طاايفت مع صااحبي فالعرس
خديجة: هههه (كتحس بيدو داافية عجبها الحال اما هو كيشوف فيها بغات تجر يدها وشدها بالسيف خرجت عينها فيه) واااصاافي
يوسف: حم، العدة شحال بقالها 3 شهور ونهار بزااف
خديجة؛ هههه كتحسب!!!
يوسف: سيييي، واخا اصلا مخاصش تكون العدة حيت مكانش قاسك فأخر مرة يااك عماين؟؟!
خديجة: (وجهها رجع حمر شافتو دغيا نقز) يوسف
يوسف: (بجدية سحب يدو بشوية وتكا بيديه على الطابلة عينيه فعينيها)
انا باغي نهضر معاك فكولشي اخديجة حيت نيشان من مور العدة غنجي نخطبك باغي نفهمك وتفهميني غراضي معاك زواااج يعني عشرة يعني نكمل حياتي معاك تكوني مرتي ونكون رااجلك باغي نجح علاقتي معاك باش نحطو النقط على الحروف..
المصاحبة تبرهيش دي فية ونجيب فيييك مبقيتش ديال داكشي وحتى نتي تيبانلي معندكش مع هاد خوروووطو صافي شفتك عجبتيني رتاحيت معاك رسمت معاك طريقي باقي جواابك نتي شنو باغيا؟!!
(بقات مطرطقة عينها والسرباي جا ياخد الكموند….)
اورطيغا: (فاق من نعاس على يدين مو للي كتفيقو وتلمس على راسو حل عينيه بالزز) الوالدة!!
ام اورطيغا(مينا): صباح الخير حبيبي
اورطيغا: (بصوت غالبة عليه بحة دنعاس)
..صباح الخير
(مسح على وجهو)
..شحال الساعة ؟!
مينا: 12، فيق اولدي انا نحط ليك تاكل شي حاجة، الحاج بغاك
اورطيغا: (حل عينو مزيان) راه برا؟!
مينا: واه جينا بجوج مقلق شوية (بترجي) متديش عليه اولدي الا عصب عليك. لا قال شي كلمة
اورطيغا: علاش غيعصب علية اصلا؟!
مينا: عفاك اولدي سمع كلامي.. (خرجت وهو بقا ففراشو غمض عينيه مدة 15 ثانية فحال كيدير روديماري لاح داك لفراش من عليه جلس كيمسح على وجهو وراسو عاد وقف لبس بنطوفتو وخرج من لبيت كيجر رجليه دخل لطواليط غسل وجهو ومشا للصالة فين جالس الحاج شاد التسبيح كان لابس جلابة فاسية فلكرونة مع طربوش ديالها شاف فيه ودارلو إشارة بعينيه باش يجلس قرب حداه اورطيغا باسلو يدو وجلس بقات مو كتحط ليه لفطور للي جابتو معاها من الدار وللي دازت خداتو من المحلبة لتحت حتى عمراتلو الطبلة مزيااان)
رتاحيت شوية احبيبي؟!!
اورطيغا: مزيان ( وقف مشا القنت فين داير ركن ديال قهوة دار كبسولة ورجع جلس هز فنجان قهوه جغم منو)
الحاج: (ختم التسبيح ولواه على يدو بلكنة فاسية) ديما تنقولك شرب اتاي هو اللول
اورطيغا: ضارني راسي خاصني قهوة نرد بيها مزااجي
الحاج: لالة مينا جيبي اتاي وهز علية هاد القهوة
اورطيغا: (زفر ولكن فنفسو، جابت مينا صينية ديال اتاي كبت للحاج وولدها وليها بقا كيفطر بصمت ويدوز بأتاي عارف الحاجة مغيهضر حتى يكمل ماكلتو هادي حاجة كانت كتعجبو فيه يعني ممنوع الهضرة فوسط الماكلة، كمل على خاطرو ومو غير متبعة ولدها ومتأترة بيه بزااف)
مينا: ولدي علاش مجلستيش مع خالتك؟!
اورطيغا: مبغيتيش
مينا: اممم غير باش متعذبش
الحاج: كملت اولدي؟!
اورطيغا: (مسح يدو وفمو بسربيتة) الحمد لله.. شنو حب الخاطر الحاج؟! (فنفسو ياله بدا دراما)
الحاج: واش عمرني قصرت معاك فشي حاجة؟!
اورطيغا: (جات تهضر مو وهو يهز يدو زعما انا نهضر شاف فالحاج للي مفهمهاش منو واش غيرة ولا تحكم)
…الحاج انا من نهار عقلت عليك كنتي نتا هو الواليد واخا ماشي من دمك ولحمك ولكن درتك با تهليتي فية كبرتيني وعمر شي حاجة مغتبدل ومزال كولشي هو هو ولكن باش توصلني خبار داك السيد مات حسيت براسي خاصني ندير الواجب ديالي معاه ومشيييت
مينا: الله يرضي عليك اولدي (شاف فيها الحاج لي حرشاتو ختو مزيان) باش تعرف الحاج شنو ربيتي خاصنا نفرحوا ونݣولو الحمد لله على تربيتنا لولدنا كبر وقلبو نقي وبيض مكيحقد ما فيه سم
الحاج: انا مكنتش بغيتو يمشي لتماك نهائيا
اورطيغا: (ببرود) علاش؟!
الحاج: حيت داك السيد ظلمك نتا والام ديالك
اورطيغا: ومغنكونش بحالو انا
الحاج: كان عليك تشاورني
اورطيغا: وكنت عارفك مغتبغيش
الحاج: (بقا ساكت باينة معجبوش الحال) كانت عندك خدمة أهم من داك المشية للي منفعاتك بواالو
اورطيغا: (مبغاش يطول فالموضوع) الخدمة دابا غنمشي نقضيها وشي لاخر انا كلفت بيه شفييق
الحاج: قضاها ولدي سعد
اورطيغا: بحال بحال المهم تقضاات
الحاج: (شاف فيه) لا ماشي بحال بحال كل واحد منكم عندو شغااالو ونتا كان هداك شغلك
اورطيغا: (كبشد أعصابو) باش نعوضها الحاج؟!!
الحاج: عندك سيمانة تخدم مع الݣزارة من صباح حتى للتفرقة وفالعشية المحال
اورطيغا: (بشوفات باردين) ولخلاص؟!
الحاج: بحالك بحالهم
اورطيغا: لا حيت غندير جوج خدمات نخدم بحال الݣزارة ومنها كنكونطرولي فيهم
مينا: (معجبهاش الحال) الحاج!!
الحاج: واخا
اورطيغا: (وقف) انا غنمشي المحال دابا وغدا ان شاء الله غنبدا الخدمة
مينا: (بقا فيها الحال على ولدها ناضت تبعاتو مخنزرة فالحاج) اولدي
اورطيغا: (كيلبس سبرديلتو) نعام الوالدة
مينا: جلس رتاح هاد نهار وانا غنهضر مع الحاج
اورطيغا: علاش غتهضري معاه؟!! الخدمة هي هادي راه ماشي فرزيات راه حتى ولادو لوخرين كيديرلهم هاكا عادي، وانا خدمتي راه كنتخلص عليها مهم غتبقاو هنا؟!!
مينا: لا غرجعو لهيه وغتلقاني مقدية ليك مبقات عندك والو
اورطيغا: صافي
مينا: (غير وقف عنقااتو وهو بادلها العناق ولكن بجفااااء، باسلها راسها هز بزطامو تيليفونو ومشا سلم على الحاج وخرج من تمااك…) بونوي
خديجة: (تصدمت ياله بغات تبينلو انها معقولة وماشي ديال تصاحيب ساعة سبقها بقات غير كتشوف فيه معرفت متقدم ولا ما توخر)
يوسف: عارف نتي خرجتي من تجربة فاشلة وغنجيك زربت عليك
(زادت تصدمت حيت حسابلو زرب عليها وهي كانت طاالبة عليها) ومهضرناش بزاااف ولكن شنو الفائدة نهضرو ونديرو كولشي قبل زواج ومتنظنش حنا اصلا باغيين نضيعو الوقت انا شخصيا مبقيتش باغي نضيع الوقت
خديجة: همم!!!
يوسف: انا عارف نتي خرجتي من تجربة فاشلة وحتى انا بحال خرجت منها، ولكن هاد المرة بغيت نتزوج قرب للربعين معندي لا ولاد لا مرا لقاها فداري مليت من الوحدانية وصراحة اخديجة عجبتيني فاخلاقك فحناانك زائد كتيريني بزاااف كنشوف راسي معاك مرتاااح
خديجة: (غير كتزيد طرطق عينها وتصنت مخلياه يهضر)
يوسف: بغيتك تجاوبيني
خديجة: ماااامـ..
يوسف: عرفتك مدة قليلة ولكن حسيت براسي مرتاح حكمت وفكرت بزااف من كلامك عجبتني عقليتك كتهتمي بية كتقلبي فية وهادشي للي باغي انا اهتمام هادشي للي خاصني انسان يهتم بية ونهتم بيه يبغيني ونبغييه
خديجة: (فنفسها: غير نتزوجو نغرقك اهتمام) بغيت نسولك ومن بعد نسد هاد الموضوع وعمرو يتجبد باش حتى انا نكون مرتاحة (حرك راسو باه منتابه معاها) ختي ملاك واش كانت كتعجبك؟!
يوسف: (تبسم) ملاك ملوووكة صعيب متعجبش الواحد بتفكيرها عفويتها ظحكها كتعطيك طاقة إيجابية نهار تلاقيت ملاك كنت مدمر كاااره حااقد هضرت معاها بانتلي جالسة بوحدها وللي معايا كانو صدعوني بتبوزيق ديالهم 2 دقايق خلاتني كنظحك لا وبقينا تناقشو بزاف دالمواضيع براسي كنت تنقول ميمكنش واش هدا هو للي كان ساد عليه والدنيا كحالت وتيقول عمرها تقاد خلاتني نعاود نفكر واش بالصح داكشي كان يستاهل وليت كنهضر معاها بزااف وصراحة (قوس عينو بحال كيفكر) مكانش عندي مشكل تطور علاقتنا ولكن هي كنت كنحسها معتابراني ديما صديق لمحت المرة اللولة ووالو قلت صافي نكملوها هاكا مدام مرتاح وهي مرتاحة هاكا منضيعش انسانة بحالها كما تتقولي عشيري وهي عندي عزييييزة بزاااف ماشي حمق نضيعها
خديجة: (مفرحتش حزنت حيت بالصح ختها كانت كتسنى منو هو للي يهضر يعني وكان هضر وكان هوما بجوج مع بعضياتهم ويمكن هوما للي كانو غيجلسو فهاد الجلسة)
يوسف: صافي جيتي نتي بقينا ملهيين معاك وتقربت منك لقيت فيك حنان وووااااهتمااام مكاينش عند بزااف حتى من الإعجاب جذبتيني ليك
خديجة: وملاك؟!
يوسف: هه باغيا دخلي ملاك صحة ملاك عندها عقل خطير الف واحد يتمناها و من اللول هي حددت العلاقة وانا عجبني الحال،بالصح سعدات للي غتكون من نصيبو.. وولكن نتي جذبتيني باهتمامك لية ووو حتى فيزيكموون كتخليني نفكر فيك بزااف
خديجة: و
يوسف: من اللول قلت نهضر معاك بصراحة نتي سولتي على ملاك وانا عاودت ليك شنو كاين بالظبط ملاك عمرني جيت على بالها ممسوقاش معتابراني صديق أخ وغنبقى ديما هكاك هي عندي عزيييييييزة بزااف ولكن نتي كنحس بيك الأنوثة الاهتمام لعقل وهادشي للي طالب انا
خديجة: (بقات ساكتة حيت السرباي حط ليهم الماكلة ومشا رجع شد يديداتها للي مطبزين ورووطب)
يوسف: سالينا موضوع ملاك هنا؟!
خديجة: (حركت راسها باه) هي مفخبارها والو
يوسف: (باستغراب) علاش قلت نتوما بحال صحابات!! علاش مقلتيش ليها غنتلقاو؟! ميمكنش اما قلت هي عارفة كولشي
خديجة: حم لا مقلتها حتى لواحد
يوسف: فشكل!! علاش مقلتيلها والو؟!! واش حشمتي؟!!
خديجة: اممم
يوسف: بون انا نقولها ليها… غيعجبها الحال بزاااف…
يوسف: واش متأكدة مقلتي والو حيت أنا ديجا منين بغينا نتلقاو قلتها ليها وبحال كانت عارفة
خديجة: (قلبها زدح وبان فيها تبدلت) علاه شنو قالت ليك
يوسف: قالتلي كانت شاكة ودابا تأكدت صافي مهضرناش بزاف حيت كانت خدامة ومصلاحلهاش تجمع
خديجة: اممم مزيان (تبسمت) يوسف انا خاص نمشي
يوسف: كولي بعدا
خديجة: مشا الحال غير خليني عفاك نمشي باش منعيقش قلت ليهم غنمشي غير الحمام يعني ضرووري غندخل نص ساعة للحمام
يوسف: اممم شهيتيني فشي تحميمة
خديجة: ههه يوووسف مزال مولفت نهضرو بحال هاكا والله كتجيني فشكل
يوسف: خاصك تولفي ازين (كلات شوية بقاو كيهضرو ناضو ردها منين جابها جات خارجة تبعها، هبط جبد من لكوفر سطل ديالها والصاك للي حلو جبد شي حاجة من جيبو ودغيا دارو فالصاك ياله جات تهضر)
ششششت تابعك الحمام نهضرو فالتيليفون بلاتي ياله سيري باش متعطليش (مخلالهاش فرصة ترفض رفض كذابي..)
فكري فهضرتي انا بالصح باغيييك
خديجة: (تبسمت) يكون خير
يوسف: (بنظرات إعجاب) سيري باش متعطليش
خديجة: (تبسمت معاه) بسلامة..
(مشات كتزرب وبقا متبعها حس بالراحة شحال وهو كيتسنى يتلاقاها باش يحط النقط على الحروف.. زاد بطموبيلتو ونيشان لخدمة ملاك….
اما خديجة دخلت الحمام كتزرب خلات صاكها عند الي مقابلينو حيت فيه فلوس وخافت يسرقوها اللهم تعطي 2 دراهم ولا تمشي ليها كاملة..
كان خاوي شوية دخلت للداخل قدات لبلاصة سيقتها وخوات على راسها الما غسلت شعرها دارت باندوش وخرجت لبست حوايجها ومشات للدار باش حتى واحد ميشك فيها)
~~~~~~~~
مينا: الحاج الولد واكلها فݣلبو ونتا كتزيد تقسح معاه
الحاج؛ مخاصوش ياكلها انا بااااه هداك السيد بلا منبقاو نكترو فالهضرة الله يرحمو ولكن ماشي بااااه، راه باش يمشي يقلب عليه ويبكي هادي خاصو يتعاقب عليها كتر
مينا: شكون ݣالك بكا هو سمعو مات مشا يعزي باش تعرف ولدي مربي مهازش فݣلبوو محااقدش حنا تظلمنا انا ويااه ولكن حنا مكنظلمووش
الحاج: (معصب) أنا للي باه ماشي هو وسالينا
مينا: (مفهمتش علاش غار) وعلاش عاطيه ديك الخدمة
الحاج: كنحكو
مينا: راه طااااب الحاج طاااب الا بقيت هاكا غيطير من يدنا واش نسيتي منين رديناه!!! بففف لا حول ولا قوه الا بالله العلي العظيم انا عارفاك مبغيتيش ولادك يديرو محالات ويتفرقو ولكن ولدي راه كيدمر ليل ونهار وخلصتو بحال الخدام للي عندك دااار مقدرش يديرها حتى من الطموبيل معندوش ولادك كاملين عندهم ديورهم وطموييلات الا هو كتحااسب معاه على ريااال
الحاج: (بقا سااكت عارف ولادو كيسرقووه الا اورطيغا رجع كيسبح اذا مغيجاوبهاش)
مينا: انا نهبط للصالون نكمد عظامي حيت بالصح فقستيني (مشات لبيتها جمعت صويكها وهبطت ل Spa لي كاينة تحت البرطمة ديالها…)
ملاك: (ألح عليها يوسف باش تخرج.. خرجت عندو بملامح جااامدة لقاتو فطموبيلتو غير شافها خرج مبتاسم عكسها) وي يوسف
يوسف؛ مخاصمة معايا؟!
ملاك: لا (هزت كتافها بحال مستغربة) علاش غنتخاصم معاك؟!
يوسف: متتسولي فية مواالو
ملاك: غير مع الخدمة
يوسف: شفت ضريبة فطموبيلتك ياك لباس
ملاك: غير ضريبة وصافي
يوسف: ملاك بالصح مالكي؟!
ملاك: والو ايووسف مقلت والو وعندي الخدمة حتى نهضرو فالتيليفون
يوسف: وقفي.. نهضر معاك بعدا
ملاك: (ربعت يدها متأفأفة) نعام
يوسف: لا قوليلي مالكي ياك تافقنا على الصراحة
ملاك: الصراحة كنتي مخبيها علية نتا ماشي انا منين كنت تنسولك فين غابر كتقولي غير الخدمة والخدمة كانت عندك هي خديجة (باستغراب) علاش مخبيين هادشي وانا للي لاقيتكم يعني خليتوني على برا من حيااتكم وحتى دابا غنبقى على برا (ضارت ومشات فحالها مخياه وااقف غير كيشوف ركب فطموبيلتو وزاد حاس باحساس خاايب ملاك عندو عزيزة ومبغاش يقلقها…)
~~~~~~~~~
ملاك: (بقات مفقوسة فلبيرو تختقت كتحس بالأرض مهازااهاش كتحس بالخياااانة منهم بجوووج وخصوووصا خديجة جا المدير كيسول على شي حاجة حتى مشات هضرت معاه)
سي عبد الله كنت سمعت كاينة شي خدمة فرباط
عبد الله: اه متقوليش عاود باغية تمشي
ملاك: اه عفاك
عبدالله: صعيب ابنتي راه غدا غيمشيو وصيفت سميات للي غيمشيو وحتى الضومين ماشي ديالك
ملاك: (حركت راسها باه) الا كانت شي حاجة اخرى صيفطني انا عفااااك (البكية واقفة ليها فحلقها.. مقدرتش تبقى حداهم مشات خرجت من المكتب للحمام بكات علاش على الاحساس الخايب للي عندها ومفرزاتوش مزيان.. خرجت من تماك المدير عطاها تمشي خرجت من تماك هاربة من شوفااتهم مشات ركبت فطموبيلتها مشات نيشان للشلال جلست فطبيلة طلبت أتاي وبقات غير صااقرة كتحاول تحلل وتناقش علاش هي مقلقة)
يوسف مكنتش كنبغيه ولكن كنت دايراه احتياطي اذا علاش بقا فية الحال علاش كنحس بيهم غذروووني واش حيت كان كيعجبني!!! وحتى الاعجاب محسووب وحتى هو كان معجب بية كفاش هو مع خديجة دابا؟!! وعلاش خديجة مقالت لية واالو!!! ياك كنا كنتعاودو كولشي (بقات فدواامة تفكرت فاش كانت كتعاود لختها شحال عاجبها يوسف وكان مناسب ليها كتزيد غير تمرض بقات كتقوي راسها براسها مخاسش يبان ضعفها قدام حتى شي واحد ملفات شفقة من عند حتى واحد فيهم شافت الساعة كانت 3 ونص ضارت جنابها كان الشلال معامرش بزاااف خرجت من تماك وتاجهات لدارهم كتقري راسها وتعاود تصرف عاااااادي….)
خديجة: (كانت فرحانة ولكن ردة فعل ملاك خالعاها كتر ومعارفاش كفاش تشرح ليها وتعاود ليها من اللول!! واكترية منين سبقها يوسف كانت كتنقي مع ماماها الجلبانة فوسط الدار بحكم كاينة شميشة.. غير شافتها دخلت بقات كدور عينها ووقفت) زين جيتي نمشي نحط ليك لغدا
ملاك: (بلا كتشوف فيها، بأمر) سربي راسك
زهرة: هاي هاي خدامة عند مك
ملاك: ههه وداكشي نيييت
خديجة: (ضارت شافت فيها بحزن ومن بعد مشات للكوزينة جبدت تيليفونها من جيب لبينوار كان يوسف كيصوني عليها جاوبت بهمس حاضية لباب) الوو
يوسف: زين ديالي (تبسمت) بحالا توحشتك
خديجة: ههه لوااااه لوااااه
يوسف: والله حتى موحشك وبزاااااااااايد
خديجة: اممم
يوسف: ونتي ؟!
خديجة: انا مزال كنحاول ندخل هضرتك فراسي راك زربتي علية اليوم زربة نيييت
يوسف: مزربت والو راه كانت باينة طااايح فييك وعجبااني
خديجة؛ ههه
يوسف: امتى نعاودو نتلقاو ولكن اخر مرة تعاودي تخرجي بديك الجلابة
خديجة: (تبسمت بمكر) بديت تنصحاح واقلة
يوسف: هو من جهة الصحة خودي راحتك ولكن لباسك ميكونش مرسووم عليك ومعيق
خديجة: كتبان معندكش سوق زعما (كطل واش جاي شي واحد)
يوسف: من اي ناحية
خديجة؛ زعما مكتحكرش على لباس عندك هانية
يوسف: مدام نتي غتكوني ديالي وحلالي وعاجبني من الاول طريقة لباس ديالك وشايفها اذا مبغيتش شي حاجة تبدل، انا اخديجة منين نويت زواج منك ختاريتك حيت كبيرة فعقلك عارفة بحق زماان ومحتارمة راسك يعني تزيري وتزوقي لا
خديجة: اممم صافي؟!
يوسف: هههه وحيت مخلياني تنحلم بيك كل ليلة
خديجة: ههه قطع قطع انا نحط لغدا لملاك ومن بعد نهضر معاك
يوسف: جات ملاك؟!
خديجة: اه عاد دابا
يوسف: مقالت ليك والو؟!
خديجة: لاااا غير رغباتني نحطلها تغدا كتجي جيعانة من الخدمة
يوسف: اممم معرفت يمكن مقلقة مني ولا مقلقاها شي حاجة قبيلة معجباتنيش، انا بلاتي ونصوني عليها
خديجة: امم اهااه واخا (قبل ميهضر قطعت حيت سمعت مرت عمها جاية.. تبسمت واخيييرا رجع ليها احساس الحب والدفء والحنان للي افتقدااااتو أعوام وقااالت حياتها ضاااعت وعمرها باقي عاود تعيش هاد اللحظات.. اعتبرت راسها محظووووووظة بزااااف مزال حتى العدة مكملت وواحد حامق عليها وباغيها براسها ممتيقاش وكتسائل شنو بغا من وحدة مطلقة لا خدمة لا والو وقداامو لبنات اشكل انواع يتمناو يتزوجو بيييه..)
ملاك: ( تحط ليها لغدا وحنات متقطع الخبز كتبغي دوز ديك المرقة وهي نفسها مسدوودة مشافتش فختها للي حاسااها كتشوف فيها مع كترمي الخبز فمها كتبغي تردوو حطات داكشي مموالفاش ليها تمشيلها الشهية هاكا شي حاجة فحلقها حابسة عليها الماكلة شافت فمها) ماما انا نخرج لبيم ورجع
زهرة: وكان دزتي ابنتي قبل مترجعي علاه حتى دخلي وتخرجي
ملاك: مغنتعطلش اماما وراه غندوز قدام بابا نقولهالو نيت واش انا غنغفلو ونمشي كنتخبا بحال شي ق**** من مور ظهرووو
خديجة: (بحال تضربت بالضو شافت فيها ولوخرا واالو مكتشوفش فيها)
نعيمة: جمعي فمك الحمارة ولا نوض لمك
ملاك: اممم مهم انا مشيت خاصك شي حاجة ازيين؟!
(حركت راسها بلا غسلت يدها فديك النافورة لبست سبرديلها وخرجت من لباب مخلية خديجة مشوووكية فالهضرة للي توجهت ليها مباااااشرة.. كان بيم حدا القهوة وباها لداخل مبانش ليها داك الغضب للي فيها خلاها متسوق لواالو دخلت هزت سليلة كدوور خدات شيبس شكلاط طونيكات عواصر دانونات بيمواات قرعة صغيرة ديال نوتيلا خرجت من تماك كتحس باحساس خااايب معرفتش كفاش تخطاااه دغيا، نفسها عزييييزة عليها بزااف مكتبغيهاش تجرح ولا تألم خاصها دغيا تلقى الحل باش تكون مرتاحة كتجنن الا بقات هاكا عمرها عاشت الحزن بحزنوو ضروووري تقلب على للي يفرحها واخا بسيناريوهات خيالية من راسها المهم متبقاش فموود الحزن والهم وجود الكابة والخيانة، قربت للدرب حست بخطوات مزروبين من موراها حتى وصل حداها شافت فيه مكرهاتش تلومو انه هو سباب وكان كانو مزوجين ݣاع متحس بهاد الاحساس الخايب وقفت بووحدها وهزت راسها شافت فيه بغضب كبيييير)
ملاك: شنو احمزة شنووو؟!
حمزة: مالكي؟!
ملاك: واالو
حمزة: (شاف فالصاك ديال بين للي باين منو شيبسات) نهار تديري فصحتك هاد الجريمة تنعرف شي حاجة مقلقاتك شنو بيك املاك!
ملاك: (بقات كتشوف فيه) ومنين نتا فاهمني هاكا ومهتم بية علاش طلعتي اكبر شماتة معايا علاش خليتي حتى قربت الخطبة ومصيفطلي مك حقا ولدي زرب ومزال مكيفكر فزواج وعندو مشاكل ولا بالمعنى الواضح ولدي ماشي رااجل ديال زوااااج
حمزة: نتي سباب من اللول وكان صارحيني مكانش غيكون حتى شي سر بيناتنا
ملاك: فاش نصارحك واش نتا كنتي غتزوج بية انا ولا ماما وتانيا انا للي ميقبلش بماما مندخلوش حتى من شتا منشوفش حتى فيه وأصلا شكون نتا للي دخل فحيااة ماما لا نتا لا طاسيلتك كاااملة
هبة: حمزااااااااا
(حتى واحد فيهم مدار بقاو كيتشاوفو بجوج بغضب، هادي كانت مرتوو تمت جاية عندهم وملاك مشات)
هبة: علاش ك(شدها حمزة برك على ذراعها شافت فيه) أي..
حمزة: هاديك بنت حومتي ماشي اول مرة تعرفيها اهبة بلا ضسارة ولا تبرهيش كلمة منك متعرفي شنو ندير ليك
ملاك: (وصلت لدارهم طلت لقاتهم بزوج كيشوفو فيها، دخلت لقاتهم مزال فين خلاتهم) اه اه شحال جاابلك اماما ديال الجلبانة
زهرة: 20 كيلو
ملاك: ومااالك تابعك عام ديال الجوع
زهرة: هههه ومزال النص فسطح
ملاك: غير كتبغي تعيي راسك مع هاد الجلبانة ولكن نييت مكاين ميداار اللهم تنفي على قلبك
زهرة: حطي حوايجك واجي تعاوني
ملاك: جيت احبيبة عياااانة من الخدمة ومنوسخش ظفاري تبغي نمشي بيهم خوضر للخدمة ونضيع لبريستييج
زهرة: ههه اش راكي مقدية
ملاك: (تمت داخلة لبيت مها) الا بغيتي شي حاجة من هنا أااااماما هزيها انا غنخبعو فبلاصتي
خديجة: (غير كتشوووف من جهة بقا فيها الحال وعرفت ختها ماشي غير مقلقة وبقا فيها الحال!!! ومن جهة أخرى معندهاش الوجه للي يهضر….)
يتبع
التعليقات 0