🔖الفصل الثاني : جنون العقلاء

🔖الباب الثالث : لقاء العناد بالكبرياء

تونار: عيطو وقالو ليك نهار الاربع كاينة عملية تهريب … اذن العملية مغاتكونش الاربع … كاتكون ايما لتلات او الخميس …. وغالبا التلات ….

سلطان : وعلاش !!

تونار : قالو ليك الاربع كاينة عملية .. باش نتا تطلق شكوكك من جميع الايام وتشد غير فالاربع ….

سلطان : وعلاش لي الخميس وماشي التلات !

تونار : الى مشيتي نتا نهار الاربع حاصرتي الحدود والباراجات ….. نهار كامل تشمشتي فيه وماداز حتى حد …. اش غادير !

سلطان : غانبقى عاصر تما سيمانة حتى يدوزو

تونار : حتى هوما سبقوك وفكرو فهاد الجواب المنطقي … داكش علاش مغايدوزوش الخميس لانهم غايلقاوك تما … اذن التلات …

سلطان : وعلاش لي ماشي الاثنين

تونار : ليوم هو الاحد …وهو النهار لي كايتجهزو فيه الكاميوات … جوج مدن فين كايتجهزو الكاميوات هنا فايطاليا … اما ميلانو او طورينو … وباش غيوصلو للحدود ديال سويسرا والنمسا لي غايقطعو منهم غايخصهم نهار …. غدا مغايوصلوش … اذن حتى لتلات …. وهنا فين تعرف بلي الاربع مستبعد حيت غايكونو خرجو الحدود …..

سلطان : هاكداك … اذن كتأكد ليا شكوكي دابا بلي المتصل هو نيت من العصابة بغا يبعدني على النهار لي غايهرّبو فيه ! ولكن صبر….. نتا باش كاتعرف هاد المعلومات كاملة على الحشيش وكاتفهم فيه !

تونار : ( نفخ الدخان وشرب من كاسو عاد جاوبو ) كانفهم حتى فالقضايا ديالك واخا انا ماشي عميل … اذن عادي نفهم فالحشيش ومانكونش بزناز …..

سلطان : ( بقا كايشوف مدة وضحك هاز كاسو يجغم منو ) كاتوترني بعد المرات هههه ….

تونار : خدم على نهار التلات وطلق الخبار فالدورية يجهزو لنهار الاربع باش الجاسوس ليبيناتكم مايعيقش … ختار شخص واحد كتيق فيه هو لي يعاونك … الباقي كلهم خليهم على اساس نهار الاربع…..

سلطان : سيدرا … مكنتيق فحتى حد من غيرها …..

تونار : ڨابيني ….. انا خصني نمشي دابا ( طفا الكارو ديالو فطفاية وجغم ما تبقى من كاسو دالقهوة لي رافقات حديثهم ) قبل بغيتك تلقى ليا هوية لبنت فعمرها 18 عام … بغيتها هوية ايطالية

سلطان : شنو !???? ألا اصاحبي صعبتيها عليا ماتحرجنيش

تونار : ماصعيب عليك والو …. وجدها ليا فهاد الاسبوع محتاجها ضروري …..هوية تكون بجميع اوراقها … ملي توجد قولهالي نعطيك صورة ابنت طبعها على الهوية …

ناض ولبس كاسكيطتو وهز سوارتو وخرج مخلي سلطان كايفكر منين غايجيب ليه هاد الهوية حيت مكقدر يرفض ليه حتى طلب لان الفضل ديالو عليه كبييييرر … وهو معامن كايستاشر فجميع قضياه وديما كايلقى ليه الحلول ….

وصلات طموبيل تونار لفيلا فحدود 23h … عطا الكونطاك لعساس وطلع كل مرة كايعوج فعنقو بسبب العياء مزال مشافش النعاس من نهار هزها فالكوبطير … داخل للدار وكايتمنى مايلقاهاش دارت شي مشكل … كان الظلااام فدار وكولشي طافي… فهاد الوقت كولشي كاكون فبيتو و الخدم فالدار ديالهم لي ورا الفيلا …

طلع لبيتو … حل لباب وداخل بحذر و فأتم الاستعداد لاي هجمة منها … ولكن لقا الضو مطفي و الهدووووء !!! .. غير تحطات رجلو فالبيت تشعل الضو حيت هاكاك مبرمج ….ضور عينيه مبانتش ليه …واقف بحذر ومستعد لاي حاجة … بحالا عارف شي عاصفة تقدر تقوم فأي لحظة ومزاجها مافيهش الثقة … مبانتش ليه فالارجاء … هو يسمع صوت أنفاس هااادئة …. هبط عينيه للسرير وهي تبانليه مكمشة وسط المخاد وجامعة رجليها عندها وناعسة جامعة ملامحها والحزن باين في وجهها رغم غفوتها ….حط تجاكيت وقرب بشوووية طل عليها من لفوق…. لا فعلا ناعسة !! اكيد كتمثل !? ماتكونش سخفانة !!! … اسئلة كايجولو فدماغو … حيد الليگة وحط صبعو تحت نيفها لقا فعلا كتنفس…. فرقع صبعانو حدا وجهها يختبر تمثيلها ….ولكن ماتحركوش جفونها حيت عارف كون كانت كتمثل كون دارت شي حركة لا ارادية قدام الفرقعة داصابعو …. تأكد انها ناعسة عاد خلاها ومشا لدريسينغ غير دخل لاحظ انه حوايجو مامحطوطينش فبلاصتهم …. الروايح ماشي كيف خلاهم …. عرف الى دخلات … تاحاجة ما غريبة عليها .. وحدة مكتحرمش حتى وجودو تحترم غيابو وعدم لمس اشيائو !? .. بدل حوايجو بعد ماغلق لبس سيرفيت …. بدل الماسك لي على وجهو لبس واحد جلدي بحال بانضة كاتلبس فالوجه لي كايقد انه ينعس بيها … عاد خرج من الدريسينغ وعينيه مشات لعندها … قرب للسرير ورجليه ماشيين بيه بلا اذن منو … وكلس حداها فالسرير … كايشوف فيها كيفاش مكمشة وجامعة رجليها … جر الغطا يلاه بغا يغطيها بشوية باش ماتفيق …. هو يعلي حاجبو ولاحو عليها بججهد زعما بدون اكتراااث … من بعيد كيبان عليه بحالا كايدابز مع شي حد كايهضر ليه فودنيه .. بحالا كايدابز مع الروح لي كاتحركو وكايقول ليه ماديريش هاكا ….

رما عينيه على وجهها …شكلها وهي ناعسة مكيوافقش ابدا شكلها هي فايقة … لي مكيعرفهاش دغيا غايتخدع فهاد الملاك الطااااهر لي ناعس بهاد الهدوووء … طووول فيها النظرة ومايكدبش ان شكلها مافيه تاحاجة كتعيب …. الخالق أبدع فتقويمها …. تقاسيم وجهها, شفارها ,جفنها لي على شكل غيبمة فسماء صافية … وشنيفات مجموعين بحال حبة الكرز لي كانوضعوها فالاخير على الكيك كلمسة اخيرة … نيفها مسبوك ووديناتها صغار …. وياريت كون حلات عينها واكتمل القمر …

تنهد معمق بعد معاق براسو راه سها فيها باعجاب نوعا ما … ونطق بكلمات هامسين

تونار : امتى دخلتي لحياتي !! … وكيفاش … وعلاش سمحت ليك ! الى كنتي نتِ باقا منضجتيش وصبيانية فافكارك وباقي عندك الحياة مجرد لعبة ورهان .. انا علاش مشيت معاك فنفس الطريق !? انا علاش ماقلبتش على شي حل لي نخليك تهضري بيه بسهوولة ! علاش فضلت نبقى شاد معاك هاد العناد !! فإمكاني بابرة صغيرة نخليك تروي ليا شنو طرا …. وحتى شنو مزال ماطرا ! … واش انا خايف من شنو غاتقولي ليا داكشي باش كنأجل ! وكنتمنى تطولي فعنادك وتربحيني وماتهضريش ! ومانعرفش بلي عندك علاقة بالماضي وبلي قتل عائلتي ومانقطعش نسلهم كيف كنظن !! والثقة لي عمرني درتها فش حد وعطيتها غير لجدي تخيب !! …. واش هادشي هو لي مخليني نأجل فالموضوع ونشد معاك العناد ونطول فاللعبة لي فالمفروض كون سالات فالصباح !! بلا ماندخلك لداري ولا لبيتي ..ولا تلبسي حوايحي … ولا تنعسي ففراشي …. ولا تخليني نهضر عند راسك ونتي ناعسة كيف شي مراهق … ولا حيت بغيتك مزال معايا !!! ولا حيت لقيت فيك شي حاجة كنت كانقلب عليها !!! ولي مزال معارفش راسي كيفاش نسميها ولا شنو هي !! … بغيت غير نعرف علاش كانقرب ليك بلا منخاف من نظراتك ! واش حيت نت الوحيدة لي ماستغربتيش من شكلي ! … علاش كنتجاوب معاك ومانحبسش كلامك فالحرف اللول … واش حيت نتي الوحيدة لي كتهضري بلا ماتهربي من عيني !! …. كيفاش دابا نت ناعسة ففراشي ! كيفاش طورات الامور حتى لهاد الحد وسمحت ليها !? ولا ومزال كنفكر نطورها مزال! …( علا راسو للفوق كايتنهد ورجع شاف فيها ) شوفي اللعبة حتى لفين طولات… خليتني بسباب عنادك ماشي غير نخليك فارة تجارب … انما ندير فيك حل لكاع مشاكيلي … اهاه ! اش فيها … نتي لي تحديتي ونتي لي بغيتي …. اذن تحملي …. ( تنهد ) ففففف غريب ! فالوقت لي كنت كنضنك نت مشكلتي .. وليتي الحل !! مافيها باس تزيدي تحملي نتائج رهانك … مزال غادفعي ليا كتر … الخلاص ديال لعبتك لي وصلاتنا لهاد الحد … مزال غانحتاجك …. تحررني …. ونحررك …..

خلاها وناض هز سوارتو وواحد المونطو دارو فوقو وخرج …. ديمارا الطموبيل واتجه للمصحة .. خدا الاذن ولبسوه اللباس الواقي ودخل لجنب جدو … قرب الكرسي حدا السرير وشد ليه فيديه ….. وحاول تاهو ينعس ويخرج شوية المشاكل من عقلو ويرتاح ولو لساعتين …. ويد جدو فيديه كل مرة كايقربها لفمو يبوسها … حتى غفاااا على الكرس متكي راسو للفوق … وباين من عينيه انه كايحارب حتى فأحلامو … والسلام لي كايضن انه الى هرب للنعاس يلقاه …. فأول غمضة جفن كايتضح ليه انه السلام مكينش فالنعاس … انما السلام كايجينا على هيأة شخص كيشد بيدينا ويجبدنا من بركة الوحل لي كانكونو عالقين فيها … ماحدنا مستسلمين وهي كتزيد تمتصنا للداخل … حتى كايججي داك الشخص ويجبدنا بكل قوتو … كانتشبتو بيديه وكالقاو راسنا كانطلعو شوية بشششوية .. والى رخلينا شوية كانزيدو نهبطو …. داك الشخص هو السلام …. نهار نطلعو من البركة ونعانقوه وتهطل علينا الامطار الموسمية تغسلنا من بقايا الوحل لي عالق فينا … عاد غانحسو بالسلام☆

الساعة الثامنة صباحا ….

دخلو زوج ممرضات للانعاش جارين واحد الطاولة فضية متحركة ديال المعدات … هوما يوقفو ملي بان ليهم تونار ناعس وشاد فيدين جدو ومزيرر عليهم كيف شي طفل صغير خايف من الكوابيس …. وجدو فاايق وحال عينيه كايشوف فيه برضى وحب كبير فعينيه …. وزاد مغطيه من الغطا ديالو … ومبتسم فيه ابتسامة سعاادة ملي فايق ولقا حفيذو ناعس فجنبو … واحد المنظر لي خلا الممرضات واقفات وكايشوفو مدة … حب جميييل كايربطهم … فاش كاكيونو زوج فالديناا .. لي معندهم تاحد من غير بعضياتهم …. هزو من تحت لانقاض وهو كومة من النار .. وبعدو على الخطر وجاو لهنا لايطاليا …. حاااارب باش يعيش ويكبر ويقرا واخا بجسد مشوه … حااارب معاه لاخر نفس وتحدى التنمر ونظرات المجتمع هو وياه … ومن صغرو هو يكايبعدو على الدم و القتل والحرام … علمو الصلاة .. علمو جميع الاركان .. علمو الخير قبل الشر .. وعلمو ان لن يصيبنا الا ماكتبه لنا … وعلمو ان خير الانتقام هو انتقام الخالق عز وجل … وبعدو على الانتقام لعائلتو بحجة كولشي مات فالانفجار وماكان حتى شي غدر كانت غير حادثة … الكدبة لي مزال مايقدرش ييصدقها تونار لان واخا كان فصغرو طفل متوحد وتضطاربات الذاكرة ديالو وماعقلش بزاف على داك الاحداث الى انه عاقل شوووية على اللحظة لي قاليه منير جدي غايحرقكم …..عاااقل مزيااان ….

الممرضة 1 : (بلايطالية بهمس ) سيدي … غانخرجوك للغرفة العادية الى كتحس براسك بيخير

الحاج : شششش … ( شاف لعند تونار) حتى يفيق هو …

ابتسمو الممررضات وقربو خداو شوية من دمو للتحاليل … وخرجو كايهضرو

مررضة 1 : واش دابا اختي مسكين غايبقى عايش بالماسك طول حياتو !?

ممرة 2 : لاسف اه …. نهار آخر عملية كنت معاهم انا فالبلوك دارها فهاد المصحة …. عرفتي كون كان وجهو متلبس بالجلد كنقسم ليك تاكان غاياخد ملك جمال الكون … تقاسيم وحهو وتفاصيل ملامحو والحفر لي بين شفايفو … شي حاجة واااو ….

ممرضة 1 : راها باينة غير من عينيه وشعرو …. نتمنى يلقاو لي النسيج الجلدي فاقرب وقت …

ممرضة 2 : مافخباركش اش دار جدو !

ممرضة 1 : شنوو !???

ممرضة 2: ( شافت مع جنابها واش مكاين حد وكملات ) كنت معاهم فاش هضر سينيور ماون مع الدكتور مالديني .. وسنياو على شي وراق كايعنيو بلي الى مات كايتبرع بالنسيج الجدي ديالو كامل لحفيذو

ممرضة 1 : وااااو واش بصاح !?????

ممرضة 2 : بحالا سمعتيها بودنيك … زيدي دابا بزززربة لشومبر لخرا ونكملو هضرتنا ..

فالغرفة

تونار بدا كايحس بشي حاجة فشعرو …. بدا كايحرك ملامحو ويخسرها تاحل عينيه …. لي الصباح كايكونو قصة اخخرى فالجمال … لااامعين ومفتوحين فاللون …. بلون و جمال اليرقات فأواخر مارس ….. استرشد و شاف بزربة جيهة جدو لقاه كيبستم فيه وكان كايمشط ليه فشعرو الحريري بيديه المتجعدين …. كان شعرو كولو طاح على الباندة لي لابس فوجهو .. وناض تقاد فالگللسة كايحل عينيه مزيان وصوتو متخشن بالنعاس

تونار : ججدي !?? …. كتحس بشي حاجة !ىنتا بيخير ( كايفحصو بيديه )

الحاج : ( ببشاشتو وابتسامتو الملائكية ) راني بييخير بيخير … جدك مزااال آولدي بشبابو وطاقتو … ( كيكحب وتونار قلبو كايتقطع ) عيش قدي عاااد هضر

تونار : ( جاوب مبتسم ) جدي … رد البال لصحتك عفاااك .. الى بغيتيني نعيش قدك عيش معايا وكون حدايا …. ( باس يديه ) خلعتيني عليك آالشاب الشاييب ديالي …

الحاج : ههه توحشت نسمع منك هاد الشاب الشايب …. مكنعرفك كتمدحني ولا اش كدير ههه ( باس تاهو يديه ) مكاين لاش تخلع … انا بخيير وجاو قالو ليا غايخرجوني منهنا لشومبر …

تونار : وماشي غير هاكا … غانخرجوك كاع للدار وترجع لفراشك …. دارك توحشاتك …

الحاج : ان شاء الله اولدي … داري ماتوحشاتنيش غير انا … توحشات تشوف حتى الضحكة من عينين آسكور ينو …

تونار : ( بقا مدة كايشوف ورجع تبسم بزز على نفسيتو ) انا بيخير اجدي … انا بيخير

الحاج : ( كايكحب ) كح .. ككح …ولدي … توحشت نشوفك ضاحك … باركا عليك اولدي خدم على قد استطاعتك …. اجي عندنا لدار .. بغيت نشوفك مرتاح ومستقر .. وبوليداتك

تونار : ماشي بلاصة هاد الهضرة اجدي ولا وقتها ….. علاش دابا كتفكر فهادشي انا لاباس عليا فكر غير فصحتك … راه الى خطيتيني نتا … حياتي غاتسالي

الحاج : لا اولدي …. داك النهار لي نخطاك ان …. عاد حياتك غاتبدا ( ابتسامة مشعة فوجهو )

تونار : ( علا حاجبو ) جدي !!!

يلاه غايجابو تفتحات الباب ودخلات الدكتورة والدكتور بابتسامة ليهم … تونار تنهد وناض كايحك فشعرو … و هوما قالو نتيحة التحاليل وفحصوه وخرجوه للغرفة العادية لي يرتاح فيها بين ما خرج قرار الخروج …

يلاه مدخلينو لغرفة فوق السرير المتحرك …. كانت الحاجة حكيمة داخلة … هوما شدو عليه فالشومبر وبقات غير هي وتونار حدا الباب

الحاجة : قوليا اولدي …كيف بقا

تونار : صافا .. يخرجو من عندو ودخلي جمعي حوايجو … نص ساعة وغنحي موراكم نخرجكم …

الحاجة ابتسمات اخيرا غاتهنا من ريحة السبيطار … وتونار دخل هضر مع الدكاترة لي مكلفين بيه … وخرج لطموبيلتو يمشي للدار يشوف الموصيبة لي مخلي تما ويدوش …

يلاه دخل تونار للدار وهي تلاقاه إيطو …

ايطو : ( بقفطانها ومگفضة عليه كيف ديما) ولدي … كيف بقى الحاج

تونار : ( مد ليها واحد الورقة ) عنتي … غايقراو ليك شنو مكتوب تما .. شي حوايج ماخصوهمش ياكلهم جدي وشي حوايج خصو ياكلهم .. حاولو توجدو Menu جديدة بداكشي لي مكتوب فالورقة … ووجدو ليه الغدا راه شوية وغايجي للدار

ايطو : آآآلله على خباااار … على سلاااامتو مسكين

تونار : ( حك فشعرو ) آححم .. آه .. ما طراا واالو !!!

ايطو : بحالاش اولدي

تونار : والو … ننساي ..

ضرب على كتفها وطلع فالدروج وهي هزات الورقة للخدمات لي فالكوزينة يقراوها ليها حيت هي لي مكلفة بالطياب …

تونار طلع للجناح ديالو … فتح لباب وشاف مباشرة للسرير بانتليه مزالا كيف خلاها لبارح ناعسة … قرب لعندها وعلا حاجبو باستغراب

تونار : واش هادي مكتحركش !!!

تعجب كيف خلاها كيف باقيا!! … شاف معاها مطول ومع ملامحها وابتسم جانبيا …

تونار : هه!! بنت ابليس ..

خلاها واتجه لدريسينغ هز حوايجو لي يحتاج ودخل لدوش …. خدا دوش وخرج لابس سيرفيت اديدياس ولبس ماسك جديد … ووقف كايقاد شعرو ولبس كاسكيط وهو كايفكر فالغدا ديال جدو والريجيم حتى تفكر شي حاجة وضار عندها غير براسو ملي تفكر راه ماكلات والو من داك العضة فسنيكرز البارح فصباح

تونار : شييييييت !!! فففف هادي غاتموت ليا هنا غير بالجوع ! نسييييتها كاع ….

كلس كيحك على ذقنو يفكر فشي طريقة يطلع بيها الماكلة للبيت بلا مايعيقو …

خرج من الجناح وهبط فالدروج دخل عندهم للكوزينة كانو منهمكيين فالتوجاد … غير شافوه وهوما يتسطرو وتقادو فالوقفة مستغربين !! مامولفش يدخل عندهم للكوزينة …

ايطو : ( هززات سربيتة كاتمسح يديها وقربات عندو ) آسكوور ينو … خاصاك شي حاجة اتساينو !?

تونار : مزال مافطرتش … ااه . ممم ( كايتلبك فاش كايبغي يكذب )

ايطو : ( استغربات عمرو دخل لكوزينة يقول جيعان حيت مولف كايكلس فطبلة ) راه اولدي وجدنا ليك الطبلة فاش جيتي كنا كانتسناوك غير تهبط !! واش ماعجبكش داكشي ?

تونار: ااه .. لااا .. بغيت نقول آه… زعما لا فففف ( كايحك فشعرو وهوما كايشوفو معاه عبقري فكولشي كايوصل حتى للكدوب كيولي اغبى شخص ) واش انا نعيب طيابك اعنتي … غ غير هو بغيت لبيتي لفوق ..

ايطو : ها ! ياك مكايعجبكش اولدي تاكل فبيتك !???

تونار : ( كايسرط ريقو اقبح شعور عندو هو ملي كايضطر يكدب ) ودابا بغيت …

خلاهم وطلع للجناح هارب من عينيه باش مايرتكبو ويفضحوه …

فتح لباب لقاها باقا ناعسة …. واش هادي ميتة !? تسائل وقرب هبط راسو عليها كايسمعها واش كاتنفس …. وهي تضرب لنيفو واحد الرائحة غرييبة … جراتو كيف شي مغناطيس لرقبتها … وغمض عينيه كايستنشقها وكايحاول يشبهها لشي حاجة باش يتعرف ديالاش هاد الريحة ….فاكهة !! زهرة !! بذور ?? ….. كانت كتشبه لزهرة الفانيليا قبل النضج ديالهاا … وكتشبه لرائحة الصباح ف الخامس ابريل … وفيها شوية من رائحة التراب المبلل … واحد الريحة كتبعث البهجة والتفاؤول …. ريحة لامل ربما !!

بلا هواه جلس على السرير وقرب راسو لرقبتها كتر كايستنشقها حتى كاتغلل ليه فالعمق ديالو كاتخليه يحس بشعور غريب كاينتابو ….كانها موسيقى بلا صوت فودينيه … تيااارر كايجدبو وهو مجرد قارب بدون مجاديف قدام داك التيار … ريحة كاتخليك تسافر لواحد المكان بعيييييد كأنه الجنة …. حس بقلبو انشرح … بحال شي سماد كايترش فوق نبتة دابلة وكيحيها من جديدد …. انتابو شعور الحامل الموحمة ملي كتقرب ليريحة اللوز الحامض … غرق فيها مغمض عينه وكايرقب لرقبتها ببطء يلاه غايتحطو شفايفو يلتهم المكان لي خارجة منو هاد الريحة … حتى كاينتفض مع دقة فالباااب … ناض على سرير مغمض عننيه وكايضور شاد على راسو كايلعن لداخل ديالو …

تونار: اش كادير .. اش كاااديييررر …

تنهد وقب للباب حلها يشوف شكون الطارق , كانت نور … بابتسااامة عريضة وهازة بلاطو ديال الفطور …

نور : صباح الخير .. عاد جيت من الكلية وقاتلي دادا ايطو عمي غايخرج …. على سلامتو

تونار اشار ليها براسو وهز عليها البلاطو جا داخل وهي تعيط ليه ..

نور : آء … ت توونار …

تونار : مم !?

نور : ااء … ( وترها ماقدراتش حتى تهضر ) ل لا والو صافي …

شد الباب برجلو حيت يديه فيهم بلاطو … وقرب حطو على الطابلة … وشاف فيها كايحاول يقنع راسو انها مجرد فأر تجارب … حتى لو كانت ريحتها زوينة بداك الشكل وهي ناعسة …. مكيهمش! حتى وهي بهاد الجمال الشرقي … مكيهمش … وحتى وهي بهاد الانحنائات المغرية .. مكيهمش …

كلشي غايزول ملي غاتفيق وتبدا فالطلاسيم الشيطانية ديالها وتخرج تاني العسل على فمها …. كولشي غاايوزووول …

حل واحد المجر وعمر واحد الابرة بواحد المحلول …. وكلس فجنبها عرا ليها دراعها هو يشوف درعانها كولشي مخبوشييين ومجروحين … سها فيهم وهو كايشوف كيفاش غير جرحات صغار وكايلفتو الانتباه قد هاكا !!!! فما بالك بجسد كلي التشوه !!! مابغاش يشوف عندهم مزال وماهتمش حتى لمنين جاوها ودگ ليها الابرة وهي تبان ليه خسىات ملامحها مع وخز الشوكة .. شوية رجعات لسباتها بدون ماتفيق …

وهو تبسم استهزاءا بهاد الحركات الطفولية لي كدير … وكايقول كون ترشد براسها كيفاش كاتكون وهي ناعسة كاع مادير ديك الزعامة كاملة ملي تكون فايقة ….

عند نور …

نزلات من دروج تاتضربات فختها لي كانت طالعة

نورة : اااء !! فينك كنت كنقلب عليك

نور: ( كلسات فالدروج محزنة ملامحها ) موحال هادشي واش غايصدق لينا آختي …..

نورة : ( كلسات حداها ) علاش !! اش وقع

نور : طلعت ليه البلاطو دالفطور … قلت نتقرب منو ويعرض عليا ندخلو نفطرو بجوج … ففف ساعة مردش عليا حتى السلام …

نورة : تاء ??? بحالا شي حاجة جديدة علينا !!! على امتى هو هضر معانا اصلا .. امتى هضر مع ماما … ياك كاهضر غير مع عمي و دادا ايطو …امتى دخلنا لبيتو !

نور : واا انا غانكون مرتو زعما انورة

نورة : وهو عارف هادشي !? لا .. اوا خلي حتى تولي مرتو ونشوفو كيفاش غايتعامل … اما دابا ماتسبقيش الربيع على الشتاء وخلينا نشوفو بعدا عمي ملي يجي وتهضر معاه ماما اش يقول ….

نور : ففف كنتمنى ….. ( شافت فيها وعينيها لمعو ) كان يمكن يلاه دوش .. ماتصوريش شحال كيبان شعرو زوين وهو فازك …. وواحد الريحة كاتعطي منو…اااااه

مورة : هاهي غاتبدا تاني … نوضي راك سمعتي ماما شنو قالت نوضي نوجدو بيت عمي …

نور : هاء ? وفين دادا ايطو هي توجدو !

نورة : على من امتى الخدامات كايدخلو لبيوت النعاس … نووضي دغيا تبعيني ورمي عليك العكز غايقتلك ..راك اتولي مرت الراجل زعما

نور: ( ناضت بزربة ) على ود العينين الخوضضضضر ديالي نفرش الدارر كاملة

عند ليديا …

حسات بشعور ووخز فمعدتها وشقيقة فراسها وفممها بحالا متكتل … بدات كتحل عينيها بشوووية بحال منزر الفتنة ملي كتفيق…. ولا بحال شي عاصفة يله كاتبدا …. حاسة بالقوة لي غاترفع بيها الجفن على العين ماعندهاش … فيها السسسخفة وكرشها عامرة غير بالما حتى تزيرات ب پيپي … بشوية بشووية كتسترشد وتفكر راسها اش واقع وفين هي … يلاه غاتكا وهي تشوفو كالس قدامها على واحد الكرسي … جلسة السلاطييين , رجل على رجل بالغرور المعتاد ديالو قدامها …. شدات على راسها …حسات بلي ماعندهاش القوة حتى تهضر ولا تغوت … يلاه حركات لساتها تنطق …. حتى انتفضات كاااااملة على السرير وهو متبعها فحركاتها عارف مالها وشنو خلاها تنتفض هاكا …. حيت عاقت بلسانها تحرك ….

ليديا : ( كاتحرك لسرانها ففمها ) ااء … ك كااانهضر !???? ك ك انهضر ?? ( شافت فيه وضحكة كتشع وجهها ) كننهضضضر !??? ت تحرك . تحرك لساااني

تونار غير كايشوف فييها … وهي تفكر انه اصلا سبابها وهي تخنر ….

ليديا : ياكمااا كاتسنا مني نششكرك ????

تونار : ( تقاد فالكلس وتنهد ) صباح الخير

ليديا : غاتعاود ديرها لياااا بالله حتى ننددددمك .. ( بالغوات كلمة مور كلمة ماتيقاتش راسها كاتهضر وهي تخرج كاع داكشي لي كان فداخلها من البارح ) انا ماشي لععبة عندك …. ماعرفتش اش جابني لعندك اااصلا … اشكون نتا لي تححبسني هنااااا .. ( خرجات غضبها كامل ) كتسول فيا شكون انا … على اساس انا عااارفة شكون نتا …تا من وجهك مخبيه عليا بحالا فيك زين جنون غاناكلووووك …. غروووورك لي زايد عل حدو راه قادة كسرو بككلمة مني …. راك باقي مكتعررفنيش مزياااان قااادة ن( قاطعها بجدية )

تونار : تزوجي بيا !

ليديا : ها !!!!! ن .. نعام !!! م ماسمعتش !!!!!!

ليديا غير كاترمش فيه وتسنى اعادة لكلامو لي ظنات يمكن غير توهماتو …. وتونار جالس بنفس وضعيتو ببرود بحالا قال شي حاجة عادية !! .. انتفضات وتقادات فالجلسة كترجع شعرها للور لي مسكوب فوق وجهها

ليديا : عاود شنو قلتي !!!

تونار مدة غير كايشوف فيها…. عاد حسات ذاقت العداب لي كانت كاديرو هي للاخرين فاش مكتبغيش تجاوب على شي سؤال فالبلاصة … تنهد وحيد رجل على رجل وكلس عادي مربع يديه

تونار : داكشي لي سمعتيه هو لي كاين

ليديا: ( جاتها الضحكة ديال الغضب ) لا لا …. ( شافت فيه بجدية ) واش عارف راسك اش كاتقوول

تونار : ( ببرود كايزيد يستفزها ) اش قلت !?! واش تزوجي بيا ? آاه يمكن المشكل انه شاورتك وكنطلب الاذن منك …فالوقت لي ماخصنيش ندير هادشي …. حيت نتي غاتزوجي بيا سواء بغيتي ولا مابغيتش ..

ليديا : ( ناضت على سرير كتمشي وتجي حداه كاااضحك ضحكات فقمة الغضب تجاه استفزازو والبرود لي كايهضر به … ورجعات ضارت عندو ) واش حاس براسك شنو كاتخرج على فمك ???? كيفاش سواء بغيت ولا مابغتيش ? تقدر تعطيني شي عقد موقعاه معاك كايعني انني بعت ليك راسي !?

تونار دار فيها واحد الشوفة باردة كتر من مزاجو …. ورجع ناض عندها وهي بدات كاترمش بشوفات ديال الحذر, علاش نايض عندها وشنو غايدير … قرب لعندها وعينيها فعينيه وقال بصوت منخفظ

تونار : حنا ناضجين بما يكفي نتجاوزو العقود ونتيقو فبعضياتنا ( ليديا علات فيه حاجبها ) هذا كلامك نتي ولا لا !!!!

ابتسم بعينيه وبعّد عليها وهي كتذكر امتى قالتها …حتى ذكرها هو معاود كلامها ديال البارح كأنه حفضو ….

تونار : عندك خيار واحد … وهو تصبر ليا وتستحملني حيت باليا غانطول معاك .. لانك لا نتا غاتنحني ليا وترغبني و لا انا غانحني ليك ونجاوبك …. غانبقا فوق قلبك كنزنزن فراسك بحال الشيطان .. نمرّض فيك صبح وعشية حتى تولي نتا كاتقوليا بعدي مني وخرجي عليا و إلى بغيييت انا داك ساعة نمشي ولا لا …. ( ليديا غير كاترمش متغربة كيفاش الءاكرة ديالو كتهز هاشي بهاد الدقة ) اش باليك ? نوقعو شي عقد اتفاق ولا راحنا ناضجين بما يكفي نتجاوزو العقود ونثيقو فبعضايتنا !!! ( ضار عندها ) ودابا تفكرتي !!!!

ليديا : ( مزيرة على سنانها ) وباقا عند كلامي …

تونار : مزيان … اذن ماحدك باغيا تبقاي معايا …. انا ولد الناس ومغانقبلش بيك بلا زواج فداري ….

ليديا : ( شافت فيه مطوولة وقربات عندو علات فيه راسها بنظرة غطرسة ) اممم … دابا نتا كتحاول تخليني نتراجع على كلامي …. ونتوسل ليك باااكية ونقول ليك عفاااك طلقني نمشي فحالي ! كتقلب على اي حاجة تخليني نقوليك طلقني نمشي فحالي انا كنستسلم …لاعب معايا لعبة نخشي ليك راسك فالما ونحسب شحال تستحملي بلا تنفس ????? …. ( كتمشى حداه وتهضر ) قضية فأر تجارب شفتيها مخلعاتنيش .. قلتي اجي نخلعها دابا بالزواج !! ( ضحكات باستهزاء ) ههه ضحكتني واخا ماشي وقتو …. معارفش الى راك كتعاقب غير راسك …. الى كنتي قلتي مع عقلك اجي نزير عليها القبر باش يجيها ضيق وتمشي بوحدها … غير كون هاني … وااخا يضياق قبري حتى يولي بحجم 2 ميلم … ( ضاحكة فوجهو ) خاطري واااااااسعة آمول عينيا …

تونار : عينيك !!!!

ليديا : ( علات حجبانها ) على ماشي عينيك ولاو عينيا دابا !

تونار : اهاه … و من امتى !

ليديا : منهار شفتهم … كيفما نتا هزيتيني من السيرك بلا خباري وبلا شواري .. هزيتهم ليك بلا خبارك اتساينووو …. ( نتهدات ) اوووه ….. قوليا الى مانجحاتش ليك فكرة الزواج …شنو غادير ليا فNext levell ???? غير باش نستعد لانه معزازينش عليا المفاجآت …

تونار : نفهم من كلامك انك قابلة !!

ليديا طلقات قهقتها الشريرة ومشات بشوية تاجلسات على الفوطوي رجل على رجل وهو متبعها ….

ليديا : ( كتلعب بخصلات شعرها ) مممم قوليا كيفاش حتى طاحت عليك فكرة الزواج دابا ! اااه ولا ياكما منظري وانا ناعسة حرك فيك الغريزة الضعيفة ديالكم و حيت نتا ولد الناس قلتي زواج حسن من لحرام !? نو نو نو … ماتشوفش فيا هاكاك انا كنعذرك … حيت منظر جسدي الفتان فاش كنشوفو انا فالمرايا كايشهيني … فما عساك تشوفو نتا لي راجل …. الغلط ماشي ديالك .. انا لي زوينة بزاااف …

تونار : ( طلع معاها وهبط ) اوووه … زيادة على العجرفة …. كاينة النرجسية !

ليديا : ( شافت مع راسها وشافت فيه) نستاهل ….

تونار تمشى تاهو للفوطوي لي مقابل معاها وجلس ثم قال وهو كايطالعها

تونار : مكنستغربش من شنو كايخرج منك ….. ديما متوقع الاسوء ….( طول فيها الشوفة ) ماتكونش سميتك لاقيس ! لانها هي لي كتواتيك

ليديا : لاقيس !!

تونار: كاتعرفي شكون هي لاقيس ?

ليديا : ( علات حاجبها ) شكون

تونار: بنت ابليس …. من شدة هوسها بأجساد النساء تلعنات ….والفرق بينها وبينك انها تعجبات باجساد النساء ونتي تعجبتي بجسدك … لي مكنضنش واش يستاهل تلعني عليه ….

ليديا : اووووه !! اللهم زدنا علما….. منفاك كل مرة كايزيد يعجبني … منغير ان كايمتع ليا عيني… كايزيد ليا حتى فقاموسي المعلومات ….. آآآآه بمعاملتك هادي كتزيد تشبتني بهاد المنفى كتر الى نتا كضن راك كتقسى عليا هههه ( شوووفة خطيييرة دارتها فيه ) وعلاش كنشوف فعينيك حتى نتا نظرة لاقيس لجسدي ??? قرّب وروي عطشك ماتخافش مغانمنعكش … باش متبقاش تشوف من بعيد كيف داك الوليد الصغير لي شاف الشوكولا وماعندوش فلوسها ….

تونار : مم للاسف … هو مكانش عندو فلوسها … وانا ماعنديش مع الشوكولا أساسا ….

ليديا : هههه كاين شي واحد مكتعجبوش الشوكولا

تونار : انا .. خصوصا الشوكولا لي كاتعرض راسها بسعر رخيص ……

ليديا طلقات ضحكتها و ناضت كاتمشى على گدامها تاوصلات عندو وهبطات راسها لمستواه بنظرااات كايتلفو العقل

ليديا : الشوكولا… لي خلاتك سيمانة بلا عقل …. وخلاتك ترعد بالاعصاب … وخلاتك تجيبها لدارك وتخبيها فالحمام كيف شي مراهق يلاه جرب المصاحبة … وتخليها فبيتك لابسة حواايجك … ومن فوق هادشي تبنج ليها لسانها حيت مكتستحملش كلامها … ومنغير هادشي تقرب لرقبتها وتنستشق ريحتها كيف شي بيبي توحش صدر ماماه( تونار كايشوف معاها محملش راسو فهاد اللحظة وهي كتكلم بطريقة قمة فالاغراء ) وملي كتقرب ليك بحال هاكا كايترسمو فعينك خطوط حمريييين كون كانو كايهضرو كون قالو رحميني .. ولي تخليك فقل من 24 ساعة طلبها للزواج كاع …. رخييصة !! اذن كيفاش غايكون الغلاء بالنسبة ليك ????? ( تونار ماحملش حيت عاقت بيه ملي قرب ليها ) اااه ولا قول ليا.. الشوكولا لي كاتشوفها تقدر توقف ليك هنا (شارت للحلقو ) وملي تهبط للمعدة تسسمك وطيحك قدامها قتيل…. كدير السبة بانها رخيصة باش متاكلهاش !!! واخا نتا عارف غالية لدرجة كاينة غير وحدة منها فالدنيا كاملة !!!

تونار دفعها عليه حتى طاحت الارض ووقف عند راسها

تونار : بحالا طولتي لكلام بلا فايدة شوية لا !!! ….

ليديا رجعات وقفات وشافت فيه

ليدي : ياما دفعاتني الدنيا حتى طحت وكنرجع نشد فيدي لوخرا ونوقف .. مغانحيرش دابا فدفعة منك نتا …. طولنا الكلام بلا فايدة اذن نرجعو للفايذة …

مشات كلسات على السرير

ليديا : مغانسولكش شنو خلاك تبغي تزوج بيا … حيت باين السبب الله يحسن العوان صعيب يقاومني شي حد … ولكن غانسولك شنو لي غايخليني انا فنظرك نبغي نتزوج بيك !!!!!!

تونار : ( هبط عندها راسو ) كاين سؤال آخر حسن من هذا … هو : شنو لي غايمنعني انا متزوجش بيك …

ليديا : هذا عندي جوابو ( عينيها فعينيه ) اكيد انا لي غانمنعك ..

تونار : آآآه غاتمنعيني كيف منعتيني نقطع حسك !?

ليديا : ورجعت خليتك ترجع ليا صوتي …يعني كيف غانتزوج بيا بزز مني .. قادرة نخليك ترجع تطلقني

تونار : هه ! نتي انتقلتي للطلاق كاع ! انا لي خصني نسول على next levell يمكن ماشي نت ….

تونار تبسم بعينيه باستفزاز ورجع تقاد فالوقفة ودار يديه فجيبو

تونار : ملي نقضي حاجتي منك … غانطلقك قبل ماتطلبيها … فكري فالموضوع … واش تزوجي بيا وتزيدي تحملي تجاربي لي غانجربهم عليك … ولا تقولي ليا اصلك وبنت من نتي ونحررك تمشي فحالك … شوية وراجع ليك … فكريي على خاطرك … يا تهضري وتخسري رهانك … ياتزوجي بيا …. ( بجدية كتر ) تزوجي بواحد عمرك تحلمي تشوفي وجهو …( شاف للبلاطو دالفطور ورجع شاف فيها) كولي باش ماتموتيش ليا هنا بجوع …. باقي محتاجك … آمولات عينيا ( غمزة على لبااااااارد)

هز سوارتو ولبس كاسكيط وخرج وهي متبعاه بعينيها كترمش …. وتحاول تستوعب ….

مكتب العميد ..

جالس متوسط الطاولة وضايرين به عملاء الدورية … بما فيهم سلطان ..لي جالس بجدية وكايلعب بالقلم بين صبعانو .. ومحقد عينيه فالبنت لي قدامو عقلو مكاينش كاع مع هضرة العميد … وباين على وجهو غضب كبير ….

العميد : اذن كنضن كولشي مفهوم … غاتجهزو يوم الاربعاء … مابغيت يفلت حتى شي واحد منهم …. خصنا ننهيو امر هاد المافيا فاقرب وقت ممكن .. ( بحدة ) الهضرة موجهة ليك اجون سلطان …

سلطان : ( بنفس نبرة الغضب كايهضر وشوفاتو فالبنت لي قدامو ) حاضر …. الملف انا متكلف به … وانا عارف كيفاش خصني نخدم

العميد : ( مخنزر فيه ) الطريقة دكلامك معايا أجون سلطان مكتعبجنيش …. رد بالك

سلطان غير ساكت مخنزر والبنت لي قدامو متوترة …

العميد : ملي عارف خدمتك … نتمنى حتى ملف مستر x يتحل فاقرب وقت ممكن … بقات قدامك غير 28 يوم ….

سيدرا : ( كاتشوف فسلطان وشافت عند العميد تلطف الاجواء ) اء … ر راه الملف دمستر اكس خدامين عليه … و وماشي ساهل اننا نحطوه بين يديك فوقت وجيز …. كيف كتشوف حتى المكتب الفديرالي الامريكي عاجز .. ماشي غير حنا …. و .. وما رسلو لينا الملف ديالو الا وحتى استسلمو .. اذن نتا عارف ان لامر مساهلش وخاصنا ليه وقت .. ماشي الغلطة ديال سلطان

العميد : ( تهدن ) ماشي مشكل .. كنتيق فيك نتي بالخصوص …( سلطان غايتهرس الستيلو بين يديه ) اذن … مكاين حتى شي سؤال !!! ( الكل صامت ) تقدرو تفضلو ….

ناضو كاملين وسلطان كايتسنى غير الفرصة فين يشدها حتى نطق العميد بابتسامة لسيدرا

عميد : سيدرا … تسناي نت مزال ….

بقات سيدرا كاتشوف معاهم ومع سلطان …. فلخر خرجو وهي شدات لباب وقربات جلسات وهو داير فيها نظرات المعجب المراهق …

العميد : احم … العرض ديالي … باقي محطوط قدامك ….

سيدرا : ( تنهدات ) س سمحيلي … ولكن ماشي من حقك تستغل ظروف مرض الام ديالي ….

العميد : ( قرب ليها ) مالي درت شي حاجة خايبة !!! شفتك محتاجة للمساعدة قلت نعاونك

سيدرا : واخا محتاجة .. كون كنت من النوع لي كنطلب المساعدة … كنت نطلبها من اقرب الناس ليا

العميد : دابا كتشوفني واحد غريب عليك ???

سيدرا : س سيد العميد … انا ( كتحك على جبهتها ) شووف … انا ماشي من عادتي نكون وقحة ولكن انا صريحة هذ طبعي …

العميد : غاتبقاي كاتشوفي فماماك كتموت ومحتاجة للعملية وتخليها تموت على ود هاد الكبرياء ديالك … ياك حطيت الشيك قدامك على بياض … راه الى مااتت مغاتقدريش تعيشي بعذاب الضمير وتقولي ياريتني قبلت الشيك

سيدرا : ( كتفرك فيديها على المكتب ) ولو .. الى اضطريت نطلبها من اصدقائي المقربين

العميد : ( بدا كايضحك بصوتو الخشن ) انا عارف بلي مامقرب ليك حتى حد من غير سلطان .. آه ولا ياكما غاتطلبي الفلوس من واحد عليه الديون وخدام على عائلة على قدها فالمغرب !!!

سيدرا : ( حمارو عينيها وتعمرو بالدموع ) ه هداك شغلي ….

العميد : ( شد يديها وهي تخطفها ) سيدرا ..قبلي الشيك …. ونقدي حياة ماماك ….باركا من العناد

سيدرا : ( طلعات فيه عينيها لي قطرات منهم دمعة دالقهرة ) نتا عارف بلي الشيك ديالك ماشي مجاني وماشي عن طريق الانسانية

العميد : بغيت نفهم من كلامك هو حياتك … غلا من حياة ماماك !!!!! ( سيدرا هبطات راسها والدموع كاتقطر على لبيرو ) ولا كاتقولي مانديش واحد كبير عليا !! علاش الشباب باش نفعوك ??? كتواعدي مع واحد سكير كل ليلة فالبيران و عامر ديون وماشي حتى من ديانتك ونتي عارفة المسلمين كايمنعهم دينهم يتزوجو بشي حد منغير ديانتهم هادشي لامكنتيش كتفكري تضحي حتى بعقيدتك على قبلو … ولي حتى الملفات ديالو مكيساليهمش …. وكتسناي منو يسعدك آ سيدرا !!! يقدر ينقد ليك ماماك من الموت كيفما غاندير انا !!!

سيدرا وقفات بغغضب وهضرات بصوت منغنغ بالدموع

سيدرا : ماننسمحلكش …. آخر مرة تهضر على سلطان بهاد الطريقة ….آخر مرة تتدخل ليا فحياتي الخاصة

العميد : مممم … ( تكا على لكرسي وشعل السيكار ديالو ) تيقني …. ها الحب الساذج ماعندو باش ينفعك … حيت حب مستحيل … وغير دياناتكم المختلفة يعطيوك الجواب , بنت زوينة وجذابة وذكية بحالك خاص يكون فجنبها راجل لي يقدر يأمن ليها الحب .. والسعادة .. وحتى الفلوووس ..ماشي واحد مهلي فشعرو ولحيتو كتر مامهلي فخدمتو

سيدرا خلاتو وانصرفات يلاه غاتحل لباب وهي تسمع

العميد : القرار بين يديك …سولي راسك شنو غلا عندك واش حياتك ولا حياة ماماك …. واش تختاري السكير لي مقدش حتى على القضايا ديالو … ولا حياة ماماك والشخص لي قادر يوفر ليك لي حطيتيها عليها يديك ومن فووق هادشي ينقد ماماك وتقدر دير العملية ….

سيدرا مدة شادة على لپواني وعلات يديها مسحات دموعا تحت عينيها الزرقييين بلون السما .. وردات خصلات شعرها الذهبي لي مشدود فذيل حصان لور … تنفسات مزيان عاد حلات لباب وخرجات ..يلاه غاتشوف قدامها تمشي لمكتبها وهي تشوفو متكي على الحيط مربع يدو كايتسناها وعلى عينيه نظرات الغضب .. وماشي اي غضب .. غضب الرجل المغربي الريفي ….

فالمشفى …

وصل تونار بطموبيل قدام المصحة ونزل مرتاح شوية ملي غايخرج جدو من السبيطار .. حيت غير فكرة انو ناعس والسيروم فيديه كاتخلعو .. نزل واتجه لغرفتو لقا الحاجة حكيمة لبساتو سيرفيت وسبادرين … وجامعة صاكو وهو كالس على سررير .. مشا باتجاهو كلس حداه وباس على راسو المكسي بخصلات بيضاء …

تونار : الشاب الشايب ديالي … . مشينا !?

الحاج : مكرهتش آياسكور ينو غير امتى ندخل لداري ..

تونار : تاهي كاتسناك … تكا عليا بشوية عليك .

نوضو وتكاه على كتفو شادو وهز الصاك على الحاجة حكيمة بيدو الاخرى وزاد بالشوية والحاجة تابعاهم …

الحاج : ( ناعس عليه وكايتشمى بشوية ) ايييييه … الدنيا ياولدي … هاكا خرجتك واحد النهار من السبيطار حتى نتا … وقلت موحال آسكور ينو يعيش ليا مزال … قالو ليا مغايطولش وقلبو مغاستحملش ( تونار عينيه تغرغرو بالدموع ) قلت ليهم سمّيت ولدي توناروز …سميتو كاتعني بلي حتى حاجة ما مستحيلة , حيت حتى واحد النهار قالو ليا مستحيل يكون عندك حفيذ وجااااني حفيذ …. ملي قالو مغايعيش ماتيقتهمش كاع …. كنت كنسمعك اولدي كل ليلة كتبكي من الحريق .. وكولشي فيك كيحرق .. وكتنوض مخطوف بالليل .. حيت كتفكر وجهك لي شفتي فزاجة لي كانت فسبيطار … ( تونار حااابس راسو بزز ) كل صباح كانقول يمكن غالقاك متي حتى نتا وندفن راسي معاك حي .. ولكن آسكور عاااش ليا وكبر وهاهو ولا طوول مني ومتكيني على كتافو … داكشي علاش اولدي الى قالوليك لداخل راه جدك مغايعيش عنداك تيق بيهم ….

تونار : ( نظف صوتو بزز من نبرة الضعف ) ااء اش كاتقول اجدي … مقال حتى واحد شي حاجة . ب … بحال هاكا

الحاج : هههه آسكور ينو مزال مكيعرفش يكدب وكايولي يتفتف فالهضرة بحالا غايشهد فالمحكمة هههه …. لي قالوه ليك اولدي راه قالوه حتى لحاجة …

تونار خنزر وضار عند الحاجة ضرب ليها تخنزيرة كاتهد اركابي علاش قالتها ليه وختمها ليه بشوفة كعني منبعد ونهضرو …. كان وصل لطموبيل وحل لباب دخلو

تونر : ماتيقش بيهم غير كايهضرو ..

الحاج : ( تونار كايقادو فالمقعد الامامي ) على انا علاش عاودت ليك هادشي كامل … غير باش حتى نتا ماتقيش اما انا عااارف بلي لي كتبها الله هي لي كاينة ( تونار كايدير ليه حزام السلامة وهو يشد ليه يدو ) جدك مزااااال معاك ومغايخليكش غير شووف فعينيه وماتبقاش تهرب راسك ….راه دموعك كنحس بيهم بلا مانشوفهم ….

تونار : ( باس على يدو وبدا يرمش يبعد داك اللمعة من عينيه ) لا لا اشمن دمووع .. غ غير .. مروح شوية …( شاف فيه ) جدي راه ضحكتك ساوية عندي الدنيا كاملة … وريها ليا…..

ضحك ليه و تونار تاهو تبسم بانكسار وشد عليه لباب والحاجة ركبات لور … وديمارا انطلق وكايشوف فيها من المرايا بنظرات رصااصيين .. والجد كايهضر فجميع المواضيع باش يخلق الجو … حيت هو براسو حاس بلي مابقاش ليه بزاااف ….وعارف تونار غايننهار من بعدو داكشي باش داير لي فجهدو يزوجو ويخلي ليه اسرة قبل مايموت ….

وصلات الطموبيل للڤيلا … وتونار نزل بززربة حل الباب لجدو …. ومنزلو بشووية وايطو والخادمات جاو كايجريو لاستقبالو ومعاهم نور ونورة … ليديا كانت فالسرجم للفوق كاتشوف غي من الزاج ….

ليديا : شكون هادوك ????? واش باباه هاداك ? هو لي كان مريض اذن !!! شكو داك االبنات وداك المراة ? خواتاتو وماماه يمكن !!! .. شوف على شوفات كادير فبناتها ?ياااربي السلامة ماحملتهاش … على الله ماتكونش مّو ….ففف وهاهي كانت كاع مّو انا آش دخلني

بحذر وعناية كايتمشى بجدو خايف عليه من الارض لي زاطم عليها … وليديا مراقباهم

ليديا : اهااا … شوووف اش كايخرج منو … وانا بقا ليه غير القرطاس ماطلقوش عليا !!!! .. معاهم داير كيف داك الخروف لي يلاه تزاد وانا معايا عنتر ابن شداد ….

فالدورية

سيدرا شافت فسلطان وتخطاتو باش تمشي وهو يجبدها من دراعها النحيلة حتى تصدمات فصدرو …

سلطان : ( كايشوف معاها ) عندنا بزاف مايتقال .

جرها من يديها هي تابعاه بلهلا يكزيه ليها ودخلها للبيرو ديالها وحكم الاغلاق وهي تنتر من يدو بعدات ….

سيدرا : ماعنديش فاش نهضر …

سلطان : ( كايقرب ليها ) فين تيليفونك !!!!!

سيدرا : ( بارتباك ).. ف فالمكتب

سطان : ( دفعها للحيط وجا قدامها ) فهميني دابا شنو كايعني هادشي !!! ( بجنون ) نتصل ماتجاوبيش .. نجي لدار ونسمع حسك لداخل وماتحلييش لباب …. نكتب ليك لميساج وطلع ليهم vu ولي حمقني كتر هو على حد علمي راه مواقع بيناتنا والو .. اخر مرة سهرنا وضحكنا ونشطنا ….. جاك تيليفون ومشيتي بلا ماتعلميني …..موراه سيمانة ونتي غابرة , علموني غير هنا بلي طلبتي عطلة و ماقلت والو … وملي جيتي ونتي كتهربي وهاد الاهمال ديالو والو اش كاااايعني دابا ????

سبدرا كاتشوف فعنيه لي طالما عشقات فيهم هاد النظرة و الدم الحاااار لي كايجري فيه … ولكن مستحيل تشوف فعينيه نظرة اخرى من غير الحب .. مستحيل تشوف فعنيه نظرة الشفقة تجاهها ولا نظرة العجز … حيت اكيد غايدير لي فجهدو ينقد ليها ماماها ويمشي يكلف على راسو بديون جديدة … وهي عارفة ماعندوش تاهو منين يجيب لفلوس والخلصة ديالو نص كاتمشي للمغرب لعائلتو ونص للديون والايجار …. وهبطات راسها متهربة ….

سيدرا : سلطان .. مواقع والو .. غ غي انا .. م مبرزطة شوية هاد الليامات

سلطان : (طلع ليها راسها تشوف فيه ) اهاه وشنو مبرزطك

سيدرا : ( بارتباك) ش شي أمور ..ع عائلية

سلطان : على حد علمي مكتملكي غير ماماك ????

سيدرا : ( دفعاتو وقالت بالغوات) اوووووووف كاتحقق معايا ولا شنو …. بلاصة هادشي ركز على خدددمتك وبعد مني … جوج ملفات محلولين عندك المجهود لي كدير تحقق معايا دابا ديرو فيهم ونفع راسك ونفع ايطاليا معاك …

سلطان رجع عندها وشدها من دراعها مزير عليها وهي كتألم

سلطان : عينييييك راني حافظهم بحال سميتي وكنيتي ……هضري قولي شنو كاااين

سيدرا : س سلطان … سلطان راك كااضرني

سلطان : ( طلق ليها يديها وقرب عندها شد ليها وجهها ودوا بحنية ) عينيك زرقين بحال الما … اي حاجة كتبان واااضحة فيهم ومكيعرفوش يخبيو .. شنو سباب هاد النظرة الحزينة لي فعينيك احبيبتي ??? شنو واقع ليك ….امتى ولاو بيناتنا الاسرار آسيدراا ….

سيدرا : مكاين والو آسلطان … تيق بيا مكاين والو … ه هرمونات وصافي

سلطان : مممم .. هرمونات … (تنهد و بعد عليها ) على خاطرك … مغانبززش عليك .. الى كنتي نت مابغاش تعاودي ليا .. شكون انا لي نبزز عليك

سيدرا : سلطان ماديرش هاكا

سلطان : ( بالغوات وركلة فابيرو ) وكيييييفاش بغيتني نديييرررر كييفااااش !?????? حبيبيتي لي مكتخبي عليا تا اسم الشمبوان لي كدوش بيه … مخبية عليا علاش خدات عطلة سيمان وعلاش مكتجاااوبنيش وتنكر من الفوق … اشنو بغيتني ندير

سيدرا : شششششش سكت وااش باغي تفففضحنا وتشوهنا …. سسسكت …. اووووف اسلطااان عصبيتك زادت على حدها

خلاتو وخرجات لتخات عليه لباب لقات كولشي مطلع راسو من البوسطات ديالهم وهي تخنزر فيهم وحناو الراس على كمبيوتراتهم واتجهات للمكتبها ….

وسلطان ضرب واحد الكرسي مع الحيط شخشو عاد كلس كايكمي الكارو ديالو ويتهدن ….

على المائدة

مائدة طعام مستديرة جامعة الجد ومراتو و بناتها … ثم قنديل الطاولة ومنيرها كان هو وجود تونار على الطاولة العائلية لي ماجلس عليها من سنين …كايفضل ياخد غداه بوحدو او مع جدو فبيتو … ولكن ملي دابا جدو ممكن تكون ايامو معدودة فهاد الحياة … مابقاش باغي يضيع حتى دقيقة ومايكونش فجنبو ويخلق ليه الجو العائلي … ويحاول يبان حدا جدو انه طبيعي و مؤهل يكون فوسط اجتماعي ويقدر يتحاك مع الناس … حيت عارف ان عزلتو كانت اكبر هم على كتاف جدو …. ودابا بغا يبين ليه بلي حفيذو طبيعي فنفسيتو … ويخليه مرتاح عليه فهاد الايام الباقية .. ومايخليهش بوحدو حتى دقيقة ….

إيطو على راسهم واقفة وعلى راحتهم ساهرة .. بينما الخادمات كايصبو فالطباسل .. الجد فرحان وضحكتو حتى لودنيه …. والحاجة غير كتغامز هي ونورة … بينما نور حاطة مرفقها على طاولة ومتكية وجهها على يديها وساااااهية فيه كتنسج فخيوط احلامها الساذجة … لي فالقريب ربما غاتهجم عليهم احد أشرس العناكب ….

الجد سرعان ماتجمعات ضحكتو وخسر سيفتو ملي حط الدغمة ففمو وشاف عند تونار مخسر ملامحو وتونار جمع الضحكة بين شفايفو الزهريين ….ثم نطق

تونار : غاتولف .. غاتولف

الحاج ضور عينيه عند الحاجة باستنجاد ليها تدخل وهي هبطات راسها حابسة ضحكة على ملامحو كيف ولات .. ورجع شاف فإيطو حتى هي هبطات راسها ببقلة حيلة

ايطو : م .. ماعندي ماندير ليك الحاج …

الحاج : ( سرطها بسييييف وشاف فتونار ) واش انا جججن ??? ها ! جن

تونار تبسم جانبيا وواضح ابتسامة ديال بزز وبلا خاطر … ومسح ليه تحت ففمو بقايا الكسكس ونور عينيها تحولو لمغناطيس لسق على حركاتو وتصرفاتو الحنااان مع جدو …وتخيل راسها هي لمن كايمسح تحت فمها

تونار : ( عمر ليه معلقة اخرى ومدها للفمو ) يلاه آجدي .. مغاديرش ليا بحال شي بيبي صغير اولا ???

الحاج : ( قرب يبكي ) بحال التراااب اولدي ….

تونار : ( خشا له المعلقة بزز كايمضغها مخسر قرب يردها ) لا لاااا … لا .. غاتكملها وغاتكمل الطبسيل …. ممنوع الملحة وحتى السكر مزال … ( ضور عينيه لعندهم فطبلة بصراامة وانتزع اللنظرة الحنينة لي كانت فعينيه) ممنوع … يدخلو للدار السكريات … ولا المقليات و الفاستفود و الماكلة لي فيها السعرات حرارية كتيرة و الصودا ( مشروبات غازية )… ولي بغا ياكلهم… ياخدهم بعيد على الدار …. اما هنا … ممنوع .. ولي عارض كلامي ( ضور عينيه عليهم بتحذير ) مانضمنش ليه راسي….

ايطو : ( بغات تبرد الجو ) الا .. لا آولدي صافي غانمشيو على داكشي لي مكتوب فالورقة

الحاج : ااء .. ص صافي اولدي … علاش تعصبتي دابا ?

تونار : ( تنهد ورجع تبسم وشاف عند جدو ) شكون معصب ? أنا ???? لا ميمكنش نتعصب فنهار بحال هادا

نور : ( بغات تتدخل وتحاول تولف عليه وتولفو عليها ) ا قلت زعما ….علاش مانشوفوش ليه .. بغيت نقول نشوفو لعمي اخصائي التغدية غاي ( كتلعثم قدام نظراتو ) …غاينصحو كتر ( شافت فيهم وفنورة لي خنزرات ) شبانلكم ???

تونار : ( سرط ريقو مكيحملش لي يتفهم عليه وضار لعندها ) بحالا معجبتكش !!!

نور : ( فشلو ليها الركابي ) لا …. لااا ماشي هاكا لا …غ غير قلت زعما .. حيت نتا كتكون مشغول و مكتجيش ديما للدار … ( قاطعها )

تونار : من اايوم … مغانباتش بعيد على الدار خدمتي نقضيها ونرجع …. ( ضار عندو وباس يدو والجد مبسم بحنية ) ماعنديش شي حاجة اهم من جدي دابا….

جدي : ( شد ليه على يدو ) الله يرضي عليييك

تونار : يلاه يلاه …الطبسيل يكمل … والا نقطع حتى اتاي ….

جدي : لا لاااا ااتاااي لاااا ….

تونار : هي الى كملتي طبيسلك باش تاخد دواك …

الجد بلهلا يطريه ليه زير على نفسو وكمل طبسيلو مافيه لا مذاق لا بنة …. و نورة كتاكل بسيف وماماها كتهدنها بعينيها … غير سلاو الغدا دفعات الكرسي بعصبية ومشات … خلاتهم غير كايشوفو .. تونار ماكترثش مهبط عينيه على الكينة لي غايعطي لجدو كايجبدها من لومبالاج ..والجد بقا غير كيشوف ماعرفهاش علاش تعصبات هاكا ….الحاجة تبسمات ليه ومشات تبعاتها وتبعاتهم حتى نور ….

خرجات نورة لجردة كتمشي وتجي معصبة وحكيمة ونور تبعوها و ليديا فالسرجم شافتم فداك المنظر وحلات الزاج بشووووية تخرج ودنيها تسمع

الحاجة : علاش درتي هاكاك آليهودية قداامهم واش باغيا الحاج يشوف ترابيك خاسرة وانا كنعيا نزين فيكم قدامو

نورة : ( معصبة كتغوت ) وااااش سمعتو ااااش قاال ???? ايييه جدو مريييض ماقلنا والو الله يشافيه … ولكن نديرو معاه حتى حنا الريجيم علاش ????? علاش يدخل لينا فشنو غاناكلو حنا … ممنوع شوكولا ممنوع ليموناض ممنوع الفاستفود ( المأكولات السريعة ) آو مااالنا اش واقع

نور : ( كاتشوف موراها وترجع تشوف فيها ) شششش شش واش باغا تسمعك دادا ايطو توصلها ليه سخونة … هضري بشووية …. ماقطع عليك والو قالك بغيتي تاكليه كوليه برا … زعما ماشي حدا عمي الحاج

نورة : والى بغيت ناكل انا فالداار ها ???? بغيت نطلب ماكدو بغيت ناكل شوكولا .. بغيت فالدار علاش يحيد ليا ????? زايدون عمي الحاج مكيخليناش نخرجو فوق التمنية دليل .. وديما كانطلبو بيتزا لدار … شنو دنبنا حنا الى هو مريض

الحاجة حكيمة : سسكتيني حسسك … صافي دابا نهضر مع الحاج يهضر معاه .. ماتبيني والو نتي

نورة : آآه بحالا الحاج ديالك كايقدر يرد عليه لهضرة وهو كايدير ليها كيف لما القليل

الحاجة حكيمة : صااافي هنييينا … كولي فزنقة مايحد ليك حد … صافي تايدي مول الامانة امانتو ويتطلق سراحكم

نورة : ( جلسات شادة على راسها ) اوووووف … هادشي الى تحركتو ودرتو شي حاجة وتزوجات نور بيه … والا حياتنا غاتولي جحيم ال مشا حتى تزوج بشي وحدة اخرى ….

نور : كيفاش يتزوج بشي وحدة اخرى !???? راك كاتقولي هادشي فوجهي زعما !!

نورة : ( كضور راسها مستهزأة بالوضع ) هاا? غيرتك لي خاصاني دابا !! آنوضي ابنتي من الاحلام نووضي راه باقي ماولاش راجلك وباقي ماكايشوفش حتى فيك ….الوصية ديال الشارف راها عند المحامي دابا .. وراه يكون كايقلب على عروسة لتونار لي تورث النص فهاد العائلة … لعبهاا مزياااان الشارف ..بغا يطمع البنات بالفلوس باش يقبلو … حيت عارف تاوحدة ماتقبل بواحد عمرها تشوف وجهو من غير هاد الهبيلة هادي … والطماعات موجودات على هاد الحساب دغيا غايلقاوها ….تحركو ديرو شي حاجة والا حياتنا فهاد الدار غاتولي جحيم …. فلول داك الشااارف غايعيشنا معاه كاملين فالرجيم وملي يموت … حفيدو يدير مابغا هو ومراتو لي غاتولي الري والشوار ومولات الدار …..على ماشي غايتكتب ليها النص فالدار !!! والنص فالاملاك …. تقدر تجري علينا كاملين وتجري عليك حتى نتي اماما … ( ليديا فالسرجم وسعات عينيها وحلات فممها ملي سمعات قضية النص فالاملاك ) دييرو جهدكم يتزوجو هاد جوج فاقرب وقت … تكتب الاملاك فسيمتها ودخلنا معاها ….ويموت الى بغا يموت …. ملي تولي الفيلا فسمية ختي …. نشوف هاد تونار واش غايعطي أوامرو بحال دابا ….. ندير انا وااد دالشوكولا دايز وسط الدار والى سميتو راجل يهضر ….

الحاجة حكيمة : ( ضرباتها ) سككتي حسك يسمعك شي واحد .. سودانية وگاادية يابنتي مايقرب ليك حد ..

نور: تونار مغايتزوج بحتى شي وحدة من غيري .. الى انت عينيك غير على الاملاك .. انا عيني عليه وعلى الاملاك … شادة فيه بيدي وسناني …. وغاندير جهدي كامل .. باركا غير تسنيا داك الورقة ونقربو ليا بطريقتي ملي نولي شريكتو فالزواج وشيركتو حتى فالاملاك ….. نتلاقاو فالدار وفالخدمة حتى يولفني بزز عليه …. وزايدون مكاينش بنت المراة لي تشركني فيه … والى حتى كانت … نحيييها على وجه الكرة الارضية

نورة : شي واحد يفيق هادي من احلامها و ويوريها الواقع شنو فيه ….. وااختي … وااااسيندريلا .. راه تونار علامن كنهضرو الراس القاسح والعين الحمرا ومكيحشم مكايخاف وكلمة ” لا ” عندو بحال شريب الما ….. دعيو الله يقنعو جدو … والا مشييينا فيها ….

الحاجة حكيمة : ( طلعات راسها للفوق ) لي مجا لا بمحبة لا بحزار … يجي بالمجمار

نورة : ( شدات على راسها ) لا صافي هادشي لي كان خاصنا غاسحور …

الحاجة حكيمة : على ودكم على ود مستقبالكم دفنت شبابي مع راجل شارف … وقادرة ندير كولشي …. نتوما غير سكتوني حسكم وديوها فقرايتكم داكشي ضربوه على حسابي

نور : والله وتمشيو توكلو لراجلي شي حاجة حتى نفضحكم … راه راجلي هداك ومانبغيش شي حاجة تقيييسو ولا تآذيه ….

نورة: ( شافت فماماها )ولا راااجلها هي صاافي عقدات عليه … دغيا ريديتيه راجلك.?

نور : ااه عقدت .. وغانزيد نعقد مية الف عقدة …..

الحاجة حكيمة : ماترادوش عليا هنايا دابا .. تكعدو راه عندكم القرايا …. انا غانهضر مع الحاج صبرو غي يخرج تونار ..

نورة : وديري جهدك وتفكري بلي راه راجلك ماشي عمك … زيدي نتي راه تعطلنا …

جرات ختها دخلو يهزو صيكانهم يمشيو يقراو.. وتونار عطا لجدو دوا وطلعو لبيتو …..

اما ليديا خداو ودنيها اش كان خاصهم .. ومشات بشووية ساهية حتى للسرير كترمش هنا وهنا ويتعاود داك الحوار فودنيها بزاف دالمرات …. عاد توضحات ليها نوعا ما الصورة ديال هاد العائلة و اش واقع بيناتهم …وكتحرك صبعانها بحالا كاتحسب وهي كتحاول تفهم وتلاقي فالاحداث

ليديا : د دابا .. دابا الراجل لكبير ملامين عليه هادوك كاعيطو ليه الشارف !! وهاديك گالسة فنيت عليه شبابي على زينها رالة كتبان صغر منها ….. ففففف …..دابا هاداك جدو … فين والديه ? ….. ( ناضت كتمشي وتجي ) اذن هادشي علاش بغاني لزواج !?? باش الاملاك ماتمشيش بسيمة شي وحدة اخرى …. ويكونو بسميتي انا لي غير عبدة عندو .. كيف قال يقضي حاجتو ويطلقني …يعني كيف قدر بإبرة يشلل ليا اللسان .. قادر يخليني بشي إبرة اخرى نوقع عل شي تنازل كيف قريت فمادة القانون … ممم اذن هاكا مخطط ليها سي تووونار …. وهاكا مخططين ليها دوك قشبال وزروال لتحت …. دابا الراجل باينة فيه مريض وكايموت وهوما هاماهم غير الفلوس ??? يعني مكايعني ليهم والو داك الراجل !? وتونار غايكون مخدوع فيه حيت باين شحال كايبغيه غير من الخلعة ديالو عليه … وعلى مافهمت باينة مول عينيا معيشهم المرار …هه!!!!!!

سهااات ولاقيس لي ساكنها تربصات وبانت فعينيها

ليديا : اذن … هو كايخطط لمصلاحتو .. وهوما كايخططو لمصلاحتهم … وليديا !!! ( طلقات ضحكتها الشريرة ) تخطط تاهي لمصلاحتها …. و غاتضرب ليهم كوولشي فالصفر …. هوما ماعرفينو فاش كايفكر … وهوما ماعررفهمش اش كايخططو فضهرو .. وانا عارفة كولشي هههه .. اش هاد الزهر عندك اليديا ….

ضحكات وكلسات دايرة رجل على رجل كاتشوف فواحد المنحى

ليديا : وداك الواد ديال الشوكولا غاتغرقي فيه الغزالة ديالي … ونتا لي كنتي كضن بسهولة غاتقدر تطلقني … مستحيل تقدر …. و نتي يا مولات الظفيرات ( نور ) الى كنتي كاضني تونار ديالك .. راك غاالطة بزاف…. ( رجعات كاتلعب بخصلة من شعرها ) ياك هو لي قلب عليا …. وهو لي جابني .. وهو لي طلبني للزواج …اذن لا ذنب لي ههههههه قلتليه من قبل غايولي يطلب يتفك مني ومانمشيش هههه …..ممممم ولكن صبر حاجة اخرى مافهمتهاش ? نفس لكلام لي قاليا قالتو هاديك لتحت .. عىوسة ماتحلمش تشوف وجهو .. على مالو وجهو ???? … مم تاهدا اليديا تعرفيه بشوية … نتِ عرفتي اسرار العائلة كاملة فنهار وماتعرفيش مال وجهو ….ماشي ديالك آليديا … ههههه

عينيها تعمرو بالطموح الحماس وتحلات ليها بيبان يال احلام جديدة … غاتزوج براجل عشقاتو من اول نظرة .. وغاتصبح شريكتو فالاملاك من الفوق … وتهنات من المستعمرة ومن الحفرة …. اذن دابا عاد غاتبدا الحياة بالنسبة ليها … رغم ان كلمة أملاك ماشي هي لي جدباتها … كتر ماجدباتها و ثارتها كلمة “شريكة” … حيت هي الفلوس آخر همها لانها كبرات فالثراء والعز مكتعرفش شنو هي الحاجة او تخص للفلوس وعمرها خرجات للعالم الخارجي باش تعرف اهمتهم وشنو ممكن يديرو …. انما فكرة غتتكون شريكتو يعني ماعندوش كيفاش يتهنى منها مزال هي لي حمساتها كتر …. شوية وهي تطلع حاجبها وقالت بضحكة

ليديا : بحالا سمعت منع عليهم الشوكولا ! هه ??! ولكن ليديا مكتمنع عليها والو ولسوء حظو هي لي تشهيت دابا … الى فالسما تنزل … والى فالارض تطلع …

ضحكات ونعسات كاتشوف فالسقف وكتقاد مخططاتها وشنو خصها دير وكيفاش تعامل وتحاول ماتستهنش بيه لان اتضح ليها انه تاهو ماساهلش …وبقا دابا همها الوحيد .. هو تعرف غير فيين هي !!!!

تونار حط جدو فالفراش وغطاه وجلس حداه

الحاج : ولدي لاكانت عندك الخدمة مانشدكش معايا انا بيخير

تونار : ( رتب عليه) اشنو دابا كتجري عليا

الحاج : لا آياسكّور ينو نتا عارف بلي كنتوحشك ومكرهتكش ديما معايا .. غي راني عارفك شحال هاز فوق داك الظهر قلت لاتكون مشغول

تونار : تاحاجا مغاتشغلني عليك

الحاج : ( تنهد واستجمع قواه ) اا . م .. مجاش عندك المحامي

تونار : ( عرف علاش كايحوم ) لا … علاش ? كاين شي مشكل

الحاج : لا اشمن مشكل غايكون …. غير سولتك …

تونار : ( شاد يديه فيدو ودخل فالموضوع لي شاغلو ) جدي … انا عارف هاد السؤال عاودتو ليك كتر من مية وخمسة وستين مرة …. ولكن … غانعاودو للمرة مية وستة وستين ( الجد معلي حجبانو ديما كايستغرب فهاد التدقيق ديالو فالحساب وتونار كمل بجدية ) وكل مرة كايكون عندي أمل جديد يتبدل الجواب ديالك

الحاج : سوّل اولدي … الله يسمعنا خير

تونار: ( عينيه فعينو ) مايكونش الماضي باقي حي !!

الحاج : ( سرط ريقو ) ا اش فكرك فهادشي دابا اولدي . هاد الموضوع سديناه زعما

تونار : ماعرفتش ( حيد كاسكيطتو وحك فشعرو ) شي حاجة عندي لداخل .. كاتقول ليا الماضي باقي حي ومماتش .. حتى يلا مكانش كامل حي شي حاجة مرتبطة بيه باقا حية …

الحاج : ب ( كاتصبب بالعرق جبينو ) … بحالاش اولدي

تونار : ممم … ياك حتى هوما كون كان كانو حيين كانو غايكونو كايضّنو بلي انا وياك متنا …. وهاحنا حييّن … زعما مايكونش تاهوما شي وحدين فيهم باقين حيين وحنا مافخبارناش …. !!

الحاج : ا لا لا اولدي انا بقيت حي حيت مكنتش فالدار ….. ونتا ر راه معجزة وصافي وكيف قلتي صاحبتك لي عتقك …

تونار : اامم .. تماما يعني مدام عتقني .. غايكون حي ?

الحاج : اولدي راه قتليك غير هزيتك داك ليلة جاني الخبار بلي تاهوما ماتو … لي زرع لينا … راه زررع ليهم حتى هوما وكولشي مات وتن……

قاطعو تونار ملي وقف بعصبية كايمشي ويجي

تونار : باركا اجدي باركا ….. واش هاد السنين كاملة مابغيتيش تيقني … ( كايضرب بصبعو لراسو بقوة ) شي حاجة هنا .. هنا كانتفكرها … باقي كنتفكر الولد لي قاليا جدي باغي يحرقكم …. ااه كان فيا التوحد .. ومعاقلش على بزاف دالحوايج كايخصو طفولتي ونسيت النص فعائلتي بسبب داك الاضطراب … عااقل .. عاقل على الصورة ديال داك الولد وهو كايقولها ليا .. ولكن هادي باقي عااقل عليها بحال الى البارح عاد ….

الحاج : ( خلعو ) تونار ينو .. اولدي راه كنتو صغار و ومكانش عارف يمكن آش وقع ويمكن سمع شي حاجة بالمقلوب ويمكن غير كايتهيأ ليك راه كنتي مريض اولدي فصغرك وديما كاتقول لينا شي حوايج مكاينيش كاتخليهم ( تونار كايزيد يعصبو هاكا ) … را كنا بزانازا وكان هاد الحروب بيتاننا .. واحد آخور لي نصب لينا هادشي وقتليك ماعرفتوش شكون كون عرفتو كون سيفطتك ليه تجيبو ليا مقطع طراف طراف .. راه كنا خدامين فالخطر وعندنا العدو مكتحسبش منهم بزاااف … ياك شفتي الارض بعينيك لي وريتك كيفاش ولات خالية كايرعاو فيها غير الكسيبة وداتها الدولة ..

تونار : (ضار عندو ) اش عرّفني آجدي راها نفس الارض ? وانا معاقل على وااالووو …..

الجد : واش مكاتيقش فيا اتونار ? انا نكدب عليك فحوايج بحال هادو ? بغيتي تشوف الارض لي كنا ساكتين فيها وريتها ليك … وسولتي حتى الناس وقالوليك أرض البزنازا هايديك لي تحرقات ف 2000 …. ارضنا بجوج حنا وعائلة هاد صاحبك …واش كون كان حي انا غانخليه بلا ماننتقم لدم ولادي ???? مكتيقش فيا ياك ??

تونار بقا يرمش وحس براسو تعصب حداه وهو كاتفادى دابا هادشي … ورجع جلس وباس على راسو

تونار : كنتيق فيك اجدي .. وكنتيق فيك كتر من اي حاجة فهاد الدنيا واخا نتا لي علمتني مانتيق فحتى واحد تقت فيك نتا …. ( باس يديه بجوج ) نتمنى ماتخيبش تقتي شي نهار آجدي …. كنتمنى …

المامون تزير قلبو بدا كايتفس بصعوبة

تونار : جدي !! جدي نتا بيخير ?? ( تخلع )

الجد : بيخير …. بيخير اولدي … غ غير هاد الموضوع كاي( قاطعو )

تونار : صافي صاافي الغلطة ديالي اجدي .. مكانش عليا نجبد معاك هاد الموضوع فوقت بحال هدا … سمح ليا الغلطة ديالي .. رتاح !! حاس برسك بيييخير ??

الجد : ماتبقاش اولدي تعاملني بحالا راني بيضة وغاتهرس … راني بيييخير

تونار : ( هبط راسو على يديه ) نتا ماشي غي بيضة وغاتهرس .. نتا كنزي … نتا عندي كولشي فهاد الدنيا.. الى مشيتي ليا الموت حسن ليا …

الجد : ( كايدوز يدو على شعرو وتونار ناعس عليه ) بعيد الباس بعيد الباس باقي صغيييير وباقي الحياة قدامك بجدك ولا بلا بيه … نسا اولدي هادشي … كنرغبك نسا هادشي وشوف لمستقبلك سنين ونا كنرغبك .. عائلتنا ماتت الله يرحها هدا مكتاب الله .. عيش اولدي حياتك وبعّد على هادشي وماتفكرش فيه

تونار : صافي اجدي… كون هاني ….

علا راسو وبدا كايحك فيعنيه يبعد داك الغضب وتنهد معععمق يستعد قوتو …ملي تفكر بلي كارتة اخرى كاتسناه فالبيت ….

تونار : نخليك ترتاح ونعس شوية .. ( شاف تحت لباب بانو ليه الرجلين ) غاتكون مراتك بغات دخل لبيتها … انا غير هنا اجدي مغانمشي فين ( لبس كاسكيطتو و ابتسم ليه وجا ماشي)

الجد ( وقفو ) : اييه …. آسكوور ينو

تونار : ( ضار عندو ) مايندين ? (شنو )

الجد : ( بضحكة فرحانة ) شنو درنا فالعروسة !

تونار: ( دوز يدو على وجهو بعياء وضجر ) فففف مكتعيااااش مكككتهذش اجدي وااالو

الجد : نتا لي واش ماعيتيش اولدي ?

تونار : صافي اجدي … عارف شغلي .. عطيني مزال الوقت ويكون خير … ديها غي فصحتك دابا

حاول يتبسم وحل لباب وهي تبعد حكيمة على لباب كانت كتسنط وشحال كيكره فيهم هاد القاعيدة وتنهد ومشا وهي دخلات لبيتها والجد باقي متبع اثرو ومبسم بعينيه دامعين

الجد : الوقت هو لي ماعنديش اولدي …. ونا الى تبعتك عمرك غاتزوج … غاندير شرع يديا ولي ليها ليها ….شحال قدك تعصب

تمشى تونار حتى للباب دجناحو وهو يوقف … وضار جيهة الحيط القصير المطل على وسط الدار وشد فيه بيديه … واش يكون فعلا جدو على حق ! ولكن هو صورة الولد الصغير لي قاليه ان جدي غايحرقكم باقيا فودنو … يكون فعلا كاملين تحرقو ! ..

هاد الاسئلة كاتجول فدماغو بشك كبير لي كان نساه شوية وفيقاتو ليه ليديا بالتعويذة … نساه نهار طلب من جدو انو يشوف الارض لي كانو ساكنين فيها واش فعلا خالية أو لي حرقهم استغلها … اكيد هادشي لي كاين فالواقع .. اما المامون مكانش اقل ذكاء منو … مشاو وداه لواحد الارض كانت خالية فملك الدولة وحتى هي كانت تحرقات … ومشا خلص شي رجال تما يديرو راسهم دايزين باش يسولهم تونار ويقولو ليه كانت اررض المامون وعائلة اسراج الله يرحمهم … وتحرقات حداه ارض بزناز اخر … الامر قنعو بعض الشيء … و معزة جدو عندو خلاتو نوعا ما يتيق فيه … مكاملاش 3 ساعات ورجعو لان الجد ديما رافض تمام الرفض يگلس فالمغرب … عارف ان لاجلسو بزاف غايبحث كتر .. شي لي مساعدش تونار فالبحث هو داكرتو لي كبرات مضطربة بسبب التوحد لي كان عندو … معاقلش على بزاااف دالتفاصيل فصغرو …عاقل فقط على ببغاء … وصاحبو … واخا هوما كايتفكرهم بصورة متقطعة فدماغو لدرجة اسمائهم نساهم …. معاقلش على عائلتو .. معارفش اسم جد صاحبو … معارف والو … لي عارف هو عائلة صاحبو كانت باغا تحرقهم…. منين رجعو للمغرب حاول يوضع الثقة فجدو ويتيق بيه هاد المرة …. لان عمرو ظن ان الجد ديالو تقدر توصل بيه يخلص ناس يكدبو عليه .. كون جاتو مع شخص آخر عمرو يتيق .. ولكن جدو كايتيق فيه .. بعد مرات مكنكونوش اغبياء غير الشخص لي كانتيقو فيه كاتكون عندنا ليه واحد المكانة كبيرة لي كاتخلينا نتيقو فيه بالعمى ….

رجع لحياتو وحاول يركز على خدمتو و مباراياتو لي كل مرة وفاش كايدير وغالبا كايكونو فالرياضيات … وابحاثو بخصوص الادوية … ولي حاز اخر مرة على جائزة بسبب اختراعو للدواء لأصحاب فقدان المناعة المكتسبة … ولي كايتباع بالملاين للمستشفييات لكبار .. وكايخلي ديما عندو جرعات احتياطية من اجل المرضى الفقراء لي كتقدم مجانا … رغم ان هاد الدواء كايتصنع منو قليييل فمختبرو … لان المادة لي كايتصنع بيها خصها تكون كثييييرة يلاه تعطي واحد العصارة قليييييلة …ورجع كايركز مع العلاج النفسي ديالو والجسدي مع الطاقم الطبي الخاص بيه لي فيهم جوج ديال الدكاترة لي رافقوه من الطفولة ديالو .. واحد عالج ليه التوحد وباقي كايعالجو نفسانيا وواحد خاص بالتجميل ….

ركز على حياتو وبعّد شوية على الشك يلاه بدا كاينعم بشوية ديال السلام .. ظهرات ليديا فحياتو بداك التعويدة لي قلبات كووولشي ….

نظارتو كاتمشي من اليمين لليسار وهو شارد الذهن … كايحط قدامو اسوء الاحتمالات … كايحاول يزيد يتحداها باش ماتهضرش … وماتقولش ليه الى جدو كدب عليه ويفقد الثقة فاخر شخص تبقى ليه …. ولكن الشك كياكل فراسو … خصو يعرف وينهي هاد المسألة فاقرب وقت …

التفت لباب وتنهد معمق وحلها…

حل الباب وهو يشوفها جالسة على الفوطوي … وشادة عندها واحد الكتاب كان رواية انجليزية للكاتبة ” اجاثا كريستي” كانت رواية على الجريمة …مركزة كاتقرا بعينيها …

علا حاجبو ,آخر حاجة كان كايتوقعها منها هي تكون قارئة لروايات !! … وعالم الجريمة من الفوق … شد الباب وتقدم وهو يسمعها هضرات ومهبطة عينيها على لكتاب

ليديا : باش تكون عندك رواية بحال هادي … ( طلعات فيه راسها ) غاتكون بوليسي اذن !!

تونار : ( تكا على جنب الحيط وربع يدو )ماعلموش ليك انه خاصك طلبي لاذن قبل ماتحطي يديك فوق شي حاجة ماشي ديالك !! …

ليديا : ( كتقرا فالكتاب ) حتى نتا حطيتي يديك على شي حاجة ماشي ديالك …. لي هي أنا ( بللات صصبعها بريقها وقلبات الصفحة )

تونار تحنى عليها وحيد ليها داك الكتاب دارو ورا ظهرو وشاف فيها وهي كترمش فعينيه لي فاش كايكونو قراب كاتحس بحالا كاتشوف فضوء الشمس وقال بصوت هامس ونظرة ماكرة …..

تونار : وليتي ديالي دابا

ليديا بقات غير كاتشوف ماتنكرش ان هاد الجملة خلات بذنها يقشعر….لاولمرة فحياتها كاتسمع شي حد كايناديها بانها ملكو …. القرب ديالو وهاد الرائحة لي كاتفوح منو لي مخلطة برائحة السيجارة ورائحة الغرور ورائحة الرجولة… ثم جاوبت بنمرة واضح عليها الاضطراب ….

ليديا : م مفهمتش …

تونار : ( وقف باش مايزيد يشعل الاجواء كثر ) فأرة تجاربي …. يعني ملكي

ليديا عاد فهمات الى راه كايهضر على الرهان لي بيناتهم تأففات بغضب على سذاجتها سافرات بعيظ .. وناضت تخطاتو عاطيا بالظهر وحكات عينيها حسات فيهم بوخز ملي طولات الشوفة فعينيه وضارت عندو بنظراتها الشريرة …

ليديا : نتمنى ماتراجعش شي نهار وتقول العكس … لان فأرة تجاربك كتفكر انها غاتبقى ديما تعطيك النتيجة العكسية لكاع تجاربك لي غاتحطهم عليها … لو تجرب عليها فصل الشتاء واش غايطرطق فيه الرعاد … هي غاتردو ليك ربيع وتحل فيه الورد ….

تونار : ( طلع معاها وهبط )مكنضنش انك بقوة هادشي كامل …. راك كاتقولي كلام كبير عليك

ليديا ضحكات وقربات عندو كاتشوف ففمو متفادية تطلع عينيها لعينيه ودوزات صبعها على وجهو من فوق الماسك

ليديا : كانعشق لي كايستاهن بيا …

تونار دفعها عليه وتمشى حتى للمكتب ديالو وجلس على الحافة ظالبيرو وربّع يدو …

تونار : ممم … راك ضعيفة اساسا …. حتى من الزواج ماقديتيش عليه , ومغاتقديش عليه و(قاطعاتو بثقة كبيرة)

ليديا : موافقة …

تونار تبسم جانبيا كان عارف خصها غير تحدي بسيط وتلبي ليه اش بغا .. اه فعلا ذكية ومراوغة وقوية …. ولكن باقا طفلة صبية عزيز عليها تلعب الرهانات ….

ليديا : ( ضربات شعرها للجنب ) ولكن عندي شرط

تونار : اهاه

ليديا قربات لعندو وشافت فيه بجدية

ليديا : بغيت نشوف وجهك ….ونعرف علاش كادير هاد الماسك ….

تونار سكت مدة وحيد الكاسكيط وخربق شعرو بيدو وهي تكمش ملامحها قضا عليها فهاد اللقطة مكرهاتش دغيا تحيد الماسك وتتلاح عليه …. شمر بنيفو ورجع شاف فيها….

تونار : ابنت الناس ماشي سمعتي الزواج مشا عقلك بعيد … الزواج لي طلبت منك انا … هو غاتوقعي على واحد الورقة … منبعد غاتلعبي دور الزوجة الودودة قدام الدار …. حتى نشوف امتى غايسالي هاد الحبس لي غايجمعني معاك .. منغير هادشي … ( ضور راسو بالنفي ) مكاينش شي حاجة اخرى …

ليديا : هه !! ( قربات خطوة اخرى ودوات بصوت مغري ) نتمنى تبقى عند كلامك ….. غانفكرك بيه واحد النهار … ( طلعاتو وهبطاتو بعينيها ) قنع راسك واش تصبر عاد قنعني ….

ابتسمات ليه وبعدات عطات ليه بالظهر وهو يتنهد كتغير ليه جميع المفاهيم فاش كاتكون قدامو كايضبط راسو بالسيف …. وهي ترجع تضور مرحماتوش حتى دقيقة

ليديا : الى ماشفتش وجهك … مغانتزوجش

تونار : ( حل المجر جبد باكية دالكارو ) ماشي بخاطرك

ليديا : ياكما بشي ابرة تاني !!

تونار : ( شعل الكارو ودارو ففمو عوجو للجنب يهضر) بكااامل قواك العقلية ….

ليديا : كتحلم

تونار : ( نفخ الدخان ) غانشوفو شكون لي كايحلم فينا

ليديا : الى خليتني نوقع بزز عليا … غير بلا متفرح بالانتصار

تونار : راه قلت … غاتوقعي بخاطرك

ليديا : بلا منشوف وجهك …

تونار: اساسا عمرك غاتشوفيه

ليديا : علاش !!!

تونار : كون جاوبتي نتي اصلا على سؤالي بسهولة كاع ماتكوني نتي هنا دابا ….وكتسنايني انا نجاوب ?

ليديا : ( بقات مدة كاتشوف فيه كايكمي عاد هضرات ) فخبارك مزال ماعارفش انا اش كاندير هنا … وشنو بينك وبينيك

تونار : بيني وبينك … سؤال وجواب ….

ليديا : اهاه … والى حصلتي على الجواب … غاايسالي هادشي لي بيني وبينك !

تونار : ( نفخ الدخان كايشوف فيها) على حساب الجواب شنو غايكون ….

ليديا : ( عوجات معاه راسها ) بغيت نفهم .. مدام قدرتي تسكتني … وقادر تخليني نوقع على الورقة بكامل قواي العلقية وبخاطري …. مقادرش تخليني نهضر !!!

تونار كمل داك الكارو فالطفاية وناض لليفوطوي تلاح ليه معلي راسو للفوق كيتنهد وحدة ورا لوخرا بحالا هاز جبل على ظهرو ….

تونار : فخبارك … كنتمناك تربحي الرهان …

ليديا : ك كيفاش !! مانقوليكش شكون انا ?

تونار : ممم … مكرهتش … تبقاي مطولة فرهانك …. وعمرني نعرف شكون نت ….

ليديا : علاااش!!!!!

تونار: راه ديجا قتليك …. صعيب يكون جواب لكل سؤال

ليديا : مممم فهمت … كدير ليا دابا هاكا باش انا نقوليك شكون انا بخاطري زعما ….

تونار : ( شاف فيها وتبسم جانبيا ) ممم آه ….

ليديا تبسيمتو لي دار ماعرفاتش علاش حركات فيها شي حاجة للداخل … قربات بشوووية لعندو تاوقفات قدامو

ليديا : مناش خايف ! عندك شي علاقة بأصلي وشكن انا

تونار : يمكن تكون … وكنتمنى ماتكونش

ليديا : علاش كتمناني نربح الرهان وماتعرفش شكون انا …

تونار : ( عوج شفايفو ) ماعرفتش

ليديا : ( مدة كاتشوف فيه عاد نطقات ) فاش كنخافو من شي حاجة …. كنواجهوها … ربما الجواب لي غاتسمعو غايكون اسهل من اننا نعيشو وسط عداب الاسئلة حياتنا كاملة …..

تونار : هه ! فاللول بحّيت معاك باش تقولي ليا شكون نتي مابغيتيش … ولي مابغيتش انا نعرفك شكون .. بديتي تقنعيني باش نعرفك … اشمن نووع دالبشر نت غير قولي ليا ?

ليديا بقات ترمش بعويناتها فيه كيف شي فارة .. فعلا !! هي اصلا مخصهاش تقوليه … واش رغبتها هي مايعرفش شكون هي .. ولا رغبتها فقط تمشي ضد التيار !!! … شافتو سااااهي فيها وباين عقلو سافر … وهو يتكلم

تونار : اشنو كنتي غاديري … لو لقيتي شخص لي قتل ليك عائلتك كاملة ….

ليديا ضحكات وهو ساهي فعينيها وضحتها … هاد الضحكة كانت مختلفة ماشي بحال القهقهات الشريرة ديالها … هادي كانت كيف شي ضحكة عصفورة مع صديقاتها …. ضحكة خفيييفة ونوعا ما عيااانة

ليديا : مغاتيقنيش لاقتليك غانشكرو حياتي كاملة ههههه

تونار : ( علا حاجبو ) حاقدة على عائلتك !

ليديا شافت لواحد الزاوية وهو قاد الجلسة ديالو … داك الزاوية كاتشوف فيها اوشن بنظراتو … اغتصاب العروس الصغيرة و انتحارها ….زواجها …. الكدمات لي فوجه خواتاتها … ماماها وكرسيها المتحرك.. الارواح لي تزهقات فالمستعمرة … ثم , نطقات شاااردة

ليديا : الى كانت شي حاجة اكبر من الحقد وأبلغ منو …. فأنا كنحسها من جيهتهم ….

تونار : ( مصغر عينو ) علاش !!! مكانوش كايعاملوك مزيان

ليديا : هه ! انا كون لقاو العافية يشعلوها فيا … ولكن مكانوش وعمرهم قدو عليا …

تونار : اذن ! مكانوش كايعاملو الناس مزيان !!! ضالمين مثلا !! قتاالة !! غدارين ?

ليديا غير تبسمات بلا متجاوب وتونار حس بلي عائلتها هي نفسها لي قتلات عائلتو غير ملي سمع انهم قباح … وناض على لي فوطوي بلا مايدير صوت لي يكسر شرودها وتفيق حيت بانت ليه ساهية .. ومد يدو هز واحد الساعة قدييييمة بسلسلة طويلة … وكلس على ركابيه قدامها وهي سااااهة وكتشوف شريط حياتها كولو قدام عينيها …. تابدات كتبان ليها داك الساعة كتمشي وتجي حداها بين عينيها وهو هازها من السلسة ديالها وهي البؤبؤ ديالها كاميشي يمين ويسار تابع ديك الساعة لي كتجرفها شوية بشوية للسهو …. وكيهضر بصوت هامس مايفيقهاش …

تونار : اي .. بي .. سي .. دي…. كملي معايا

ليديا : ( متبعة بعينيها داك ساعة لي كتمشي يمين ويسار) او … ايف … جي…

تونار : وان … تو …ثري

ليديا: ( لسانها ثقال ومتبعة مع السلسة ) فور … فااايف … سيكس .. سيفن …

هاد المراحل باش عقلها يتبرمج على انها تكمل على الجملة …..

تونار : آن دو .. طخوا كاط

ليديا : سانك… سيس… سات …ويت

تونار : انا سميتي

ليديا : لييديا …

تونار : ( كاسرط ريقو خيفان من اجوبتها) انا كنيتي

ليديا : كاع مكنعرفهاش ..

تونار : انا بنت

ليديا : الريف

تونار : الواليد ديالي سميتو

ليديا : سميتو حفيظ

تونار : خدمة الواليد ديالي هي

ليديا : هي الحشيش .. بنزناز

تونار الريق جف ففمو وعينيه حماارو .. ورجع كمّل ..

تونار : ح حشيش!! هوما بزانازا .. و….

ليديا : وصافي

تونار : ايوز ايوز يسضويت توناروز .. علمها ليا

ليديا : علمها ليا خويا

تونار : ( بدا كايرمش وعلا حاجبو ) خويا سميتو

ليديا : سميتو منير …

تونار بقا غير كايشوف حتى الاسم معاقلش عليه ورجع كمل

تونار : خويا فعمرو …

ليديا : مكنعرفش عمرو

تونار : ايوز ايوز .. علمها ليا خويا .. وخويا علمها ليه

ليديا : خويا علمها ليه …ممم .. مكنعرفش شكون علمها ليه … علمها ليا وانا صغيرة

تونار : كنكسن ف

ليديا : فالناظور

تونار : كنخدمو الحشيش فبلاد …

ليديا : فبلاد الشاون .. وكتامة

تونار: لي مكلف بالخدمة كاملة هو

ليديا : هو جدي .. اوشن …

تونار : اووشن !!!! م مايمكنش !!

علا حاجبو حيت عرفو هو لي كايسيفطو ليه قبيلتو الكاميوات .. وهوما لي لعبو عليه آخر مرة … استغرب !! اش جاب تاهاادا ? …. يلاه شاف راسو راها قربات تفيق وهو يكمل

تونار : جدي جاب الاراضي ديال كتامة من …

ليديا : من . … م ماعرفتش

تونار : جدي الاراضي دكتامة جاوه من …

ليديا : م .. م من … ماعرفتش

تونار : ( كتنهد ) جدي حرق عائلة و …

ليديا : م .. ماعرفتش …

تونار ناض وزف بداك الساعة الارض حتى تهرسات وبدا كايضور ويرد فشعرو للور حيت شاف مغايصور منها والو حيت داك الوقت باقي متزادت ومستحيل يعاودو ليها بحال هادشي …. وليديا فاقت فور ماسمعات الضربة فالارض بقات غير كاترمش مافاهمة والو

ليديا : اش واقع !! ( كاتشوف فتونار واقف وهي عاد شافتو كالس ) هذا امتى وقف ….

ضار عندها وهزها مكمش على حوايجها وقفها وجيفها بيديه حاس براسو غايحماق

تونار : كييييفاش مااعرررفففتش .. كييييفاش .. علاااش معرررفتييييش خخخصك تعرفي

ليديا : ط طلقنني … طلق اش كتقول … ( كتقاتل تفلت)

يلاه غايهضر وهو يسمع دقة فالباب ولتخها على سرير غير كايمشي ويجي بالجنون … وكايحاول يهدن فراسو … ورجع جرها من يدها لاحها فداك البيت ودار صبعو فوق فمو

تونار : شششششش … قطعي الحس ..

شد عليها الباب وتقدم كايتأفف للباب رغم ان مبلغهم انه مكيحملش لي يدق عليه الباب … وليديا فداك البيت مفاهمة والو وقع ليها بحاالا توقف عليها زمان ثاانية …. حيت كانت فشكل وفرمشة عين ولات كاتشوف شكل اخر .. حيت الوقيتة لي كان منومها هي مشعراتش وممسوحة من ذاكرتها .. وقع ليها بحال شي فيدو مقطعة منو شي لقطة , توناار حل لباب بججهد وهي تخطف نور … وهبطات عينيها

تونار : مايندين ” شكاين “

نور : ع .. عمي .. عمي الحاج … ر راه .. بغاك ..

تونار لتخ الباب فوجهها .ودخل جلس على السرير شاد على راسو وليديا حلات لباب وخرجات عندو

ليديا : نقدر نفهم اش واقع ! شي حاجة تمسحات من دماغي بحالا دازت عليا شي حاجة ماشفتهاش ! كنت جالس .. شوية وقفتي معصب …. م ماشفتكش امتى وقفتي وعلاش تعصبي واش وقع … شي حاجة فلتات ليا !!!

تونار علا راسو للفوق وسمية اوشن كتزنزن فدماغو … اذن هادي حفيذتو اش جابها للسيرك … و وخوها اش عرفو فالتعويدة ! … نفض راسو مزيان … ورجع وقف بعد مانفض الغضب شوية وتحكم فاعصابو

تونار : قطعي الحس وبقاي هنا … غانشوفهم اش بغاو … رجعي قراي كتابك ومادريش الصوت …

جا ماشي وهي تشدو من دراعو وضار عندها مخنزر

ليديا : حتى لإمتى غانبقاو هاكا !!! …

فجناح الجد …

متكي على سريرو وتسبيح فيدو وضاحك حتى لودنيه و الحاجة حكيمة حداه تاهي مبتسمة …. ونورة جالسة على الكرسي حداهم وهي تجي نور ..

نور : ( ملامحها حزانين ) عيطت ليه اعمي ….

الحاج : ومال إيجي ينو ( بنتي ) مقلقة ??? قاليك شي حاجة

نور : ل لا الو .. غير … لتخ عليا لباب

الحاج : واش نتي كاتدي عليه ماعارفاهش كيف داير … دابا ان شاء الله ملي تزوجو تعرفي ليه وتحفضي طباعو ونتي لي ترجعيه لطريق آيجي ينو ….

نور : ( ابتسمات بخجل وهبطات راسها ) ا ان شاء الله اعمي

الحاج : راه واخا يبان ليك هاكا راه حنيييين … راه مزال يتعرف عليك كتر وتقربو من بعضياتكم ويلقاك واقفة معاه …. غاتشوفي فيه واحد الوليد صغييييرر ساكنو لداااخل ..

نور : ا انا … انا اعمي م ماعنديش مشكل نصبر شحال مابغا … مهم هو يكون بيخيير ومرتاح

الحاجة حكيمة : كون ماتجبدش معاه الموضوع دابا الحاج … ا انا قتليك حتى تبرا .. ماشي تهضر معاه دابا … حنا علمناك غير نتا …..

الحاج : واش هاد الخبار كايتعطل …( بضحكة ) راه ملي قلتي ليا بنتي نور باغيا حفيدي … هادي الدنيا ومافيها… وحتى هو غايفرح … حيت انا حاااس بولدي داير بحال هاكا حيت فبالو بلي عمرو يقدر يأسس عائلة ولا يلقى بنت الناس ( شاف فنور وشد فيديها ) وهي غير حدانا وماشفناهاش

الحاجة حكيمة : واخا هاكا موحال يبغي الحاج راك عارفو

الحاج : عارف .. ولكن انا ماعنديش الوقت لي نتسناه … انا عارف مصلاحتو كتر منو .. عييت نشاورو ونعلمو وراسو قاسح … دابا غانحطو امام الامر الواقع

نور : ( وسعات عنيها كاتشوف فيهم ) كيفاش اعمي الحاج

الحاج : ( بضحكة ) انا عارف اش كندير غير تهناو .. بغيت غير نتهنى عليكم …. ونمشي مرتاح

يلاه غايجاوبوه هوما يسمعو دقة فالباب وحلها … دخل كايشوف فيهم مجموعين مفاهم والو … والحاج اشار بيدو لحكيمة وبناتها باش يخرجو ….

ناضو تاهوما خرجو وتونار متبع ليهم العين … ورجع شاف فجدو

تونار : ياك لاباس !!

الجد : قررب… قرب آياسكّور ينو عند جدك …

تونار باستغراب قرب عندو وكلس حداه

الجد : جدك فرحاااان آولدي ….

تونار : ( بابتسامة جانبية ) الله يسمعنا خير

الجد : قنعاتني الحاجة وبناتها ( شاف فيه ) باش نمشي للمغرب ….. وبغيتك تقطع لينا فاول طيارة …

تونار : !!!!! ( طلع حاجبو ) ياك نتا سنين هادي حالف ماترجع …. اش واقع دابا ? وفرحان عاد !! هضر معايا نيشان بلا تلاوي ….

الجد : فرحااان حيت غانرجع للبلاد …. اولدي شحال بقا ليا انا فهاد الدنيا .. بغيت نمشي ونودع بلادي … ونودع داري …. ونموت وسط ترابي

تونار : دابا نتا فرحان .. حيت مراتك قنعاااتك تموت وسط ترابك ! على اساس كنتي حيران فين غاتأُوغگانيزي الموت ديالك وكتقلب فين غتموت … وهي جات وقاااتليك ها فين تموت .. وعجباتك الفكرة هادشي علاش راك فرحان !!!!

الجد : ( كايرمش ماعرفو كايطنز ولا داوي بصح ) اااه . اه اولدي … ملي عرفت راسي غانموت وسط ترابي رتاحيت

تونار : اوووه !!! على اساس تما كايعادو بلي كاينظمو الموت من داكشي … نقلبو ليك شي قاعة تاهي مثلا !!!

الجد : ( كايرمش ) دابا كضحك عليا

تونار : ( ربع يدو ) لا شوووف نتا شكون كايضحك على لاخور .. السيد ياقي حي يرزق كيقلب هو فين يمووت …..لا وفرحان حيت لقاو ليه فين ….آ شنو لا مشينا ومامتيش نقلبو تا على شي حد يقتلك تاهو باش تكمل فرحتك !!!!

الجد : آسكووور ينو ??? بحالا معصب وباغي تجيب السبة على جدك

تونار : علاش هادشي لي كاتقول نتا مكيعصبش ?? نوض انا نقطع ليك فالطيارة نديك فين تموت !! وندير خاطر للحاجة ديالك وبناتها … لي ماعرفنيش شكون غايسبق فيكم .. كايقلبو ليك فين تمشي تموت مااابقيت فاهم والو …

الجد : آوولدي … انا عارف الاعمار بيد الله …..وماعرفنا شكون السابق… ولكن هاد الشوية دالعمر لي بقا لينا بغيت ندوزو فبلادي ….

تونار تنهد شد راسو بين يديه مدة عاد طلع راسو وعينيه حومر وشد فيدين جدو

تونار : جدي …. نتا عارف انني كنت اول واحد كنرغبك ترجع للبلاد …وتمشي تزورها … انا ماشي ضد تمشي نديك فوق كتااافي … ولكن غير جيني للصراحة وقوليا علاش باغي تمشي ..و بلا كدوب راك عارف هادشي ماواكلش معايا .. غير اجيني للصراحة …..

المامون بقا كايشوف فيه كايعرفو فاش كايدير هاد الشوفة دايرة كيف الفرصة الاخيرة .. وعارف مغايتيقش الكدوب .. وهو يجمع نفسو

الجد : مغانقووولكش ( ربع يدو بعناد كيف شي دري صغير وضور راسو لجنب كايشوف للفوق )

تونار : ( باستغراب ) جدي !!!!

الجد كايطلع كتافو بعدم اكتراث

تونار : آلحاااج … ( كايطل عليه براسو ) قوليا و نديك للبارك تلعب .. انشري ليك شوكولا ….

الجد : ( كايحرك كتافو ) مغاانقولش ….

تونار : ( كايطل عليه براسو تابعو فهبالو ) عفااك عفااك

الجد : مغااانقولش هي مغانقولش

تونار : ( تنهد ) داكشي لي كايضور فراسك آجدي ينو الى كان مغايعجبنيش نصحك تشد تسبيحك وتشد القبلة … وتشد الارض …

الجد : ( شاف فيه بزربة) لا نووض ضربني احسن

تونار : وااا عللى حساب اش كتفكر دير ….

الجد : واش عيب لا بغيت نوجد لولدي ساربرايز …

تونار : ( كايشوف فيه ) سوبرايز اجدي … سوبرايز …

الجد : هااااديك

تونار : ( مصغر فيه عينو ) علاش شي عقل كايقولليا هادشي ليكايضور فراسك دابا مغايعجبنيش ….

الجد : يعجبك ولا مايعجبكش … قرار جدك تحتارمو

تونار : مايخصش غير حياتي …. ونحتارمو ونهزو فوق راسي ….

الجد : دابا واش غاتنوض تقطع لياا ولا لا

تونار : لا … حتى نعرف شنو سبب هاد المشية وهاد الحب لي نزل ليك على لبلاد فنهار

الجد : آوالله مغانقوليك كلمة … حتى نمشيو …

تونار : نمشيو ? حنا وصلنا كااع لنمشيو … باااقين فيك نتا واش غاتمشي .. عاد نشوفو أنا …

الجد : غاتنوض تقطع هي غاتنوض تقطع

تونار: ورااااه انا لي غانتقطع دابا لامخويتيش ليا داكشي لي كايضور فراسك ….

الجد : غانمشيو … هي غانمشيو … اشنو تخصر الخاطر لجدك لي قرب يموت ????

تونار: ودابا لقيتيها ليك سبة ?

الجد : دابا نتا حفيذي ولا العدو ديالي ….

تونار : اجدي … حضر عقلك معايا .. ( كايضرب بصبعو فسعتو ) 20 دقيقة باش خليتك هنا صحة سلام ومشيت …. تعيط ليا.. اجي راه غانمشيو لمغرب باش نموت فيه … شوية راه موجد ليك تما سوربرايز وتريكتك كانت مجموعة حداك … وانا كنشوف شي حاجة كضور ليكم فالراس …. ياكما شي زواج هدا من بنت البلاد !!!

الجد : ( طيرهالو فالسما ) اشمن زواج … الله يهديك …. كون تسمع ودير الخاطر لجدك لي ماباغي ليك غالخيرر

تونار : الخير لي دير فيا هو تديهاا فصحتك انا قاد برااسي …. وانا راه مكيمكنش نخلي شغالي ونمشي لمغرب اجدي .. ماشي وقت نسافر فيه دابا .. وعارفني مكنرتاحش تما

الجد : وغير نهار …. نهار لي طلبك عليه جدك رفضتييه

تونار : ( شد على راسو ) وشوووووف اش نزل عليك تاني اجدي ..

الجد : آخر مغايطلب منك جدك … هو نمشيو مغرب وكلس معايا غير نهاار ….

تونار: راك كاتقول ليا المستحيل .. كيفاش نكلس معاك غير نهار .. واش عارفني غانفرقك ونخليك فدولة وانا فدولة ? شفتيني خليت كلشي وجيت عندك .. الى باغي تمشي للبلاد مغانحيدش ليك خليني تانسالي شغالي ونمشيو ….

الجد : واااااالو … آش عرفني انا منهنا لغدا واش غانعيش ? والى تبعت شغالك مغايساليوش

تونار ( كايطلع راسو فاسما ) اللهم طووولك ياروح ….

الجد : باركا ماتسوط عليا… نمشي للمغرب هي نمشي … وبجوج بينا … عندك شغالك قضيهم ولحق عليا ……

هو كايهضر وتونار كايشوف فيهم داك شوفة ديال يااااربي تصبرني

الجد : ماطلبتش المستحيل … بغيت نمشي لداري وموجد شي حاجة لحفيذي …

تونار : وحفيذك غايقبل ليك كولشي الا شي حاجة كتخص حيااتو .. اطووونسيون …..( وقف ودار يدو فجيابو ) خليني تانفكر مزيان ونرد عليك ….

الجد : ماعندك ماتفكر مابغيتيش تقطع ….بنتي نور تقطع ليا ….. ونتا تلحق عليا بسيف عليك

تونار : ( بتحذير وغضب ) تمشي بلا خباري نوض العااافية فالداررر وعارفني نديرها

الجد : ماتدينيش للمغرب أنا لي غانوضها

تونار : ( دوز يدو مسح على وجهو ) واش اانا كايلاقيني الله غير مع المعكككسين …..

الجد : دابا اش درنا

تونار : ( مشا رجع كلس حداه وشد فيديه ) جدي …. آش كايضور فراسك مكيهمنيش .. نتا عارفني كتهمني صحتك كتر من أي حاجة فالدنيا … ولكن غانطلب منك طلب وااحد … ( بكل جدية ) ماتحطينيش فموقف لي نختار فيه بين حياتي وصحتك ….

الجد : ( بشوفة حنينة هز يدو دوزها على شعرو) حياتك اولدي دفنتيها … وجدك باغي يحييها ليك … لاكان خوفك على صحتي غايقدر يرجع يحيي ليك حياتك .. مغانترددش نبتزك بها … انا ميت ميت …مهم هو نتا تعيش ….

تونار غمض على عينيه مزير عليهم كايتحكم فعصابو مايقولش شي حاجة يندم عليها … ورجع حلهم حوومر

تونار : انا هضرت وقلت أش عندي … معزتي عندك هي لي غاتحكم دابا..( ناض وقف ) فوقاش باغي تمشي

الجد : ( بابتسامة) ثَيوْشّا … “غدا”

تونار تنهد وبقا يفكر واش يقوليه على ليديا وبلي لقا البنت لي غايتزوج …وفكر ان ليديا مافيهاش الثقة فاي لحظة تقدر تخرب كولشي بعنادها …اذز حتى يقاد هويتها ووراقها ويتزوج عاد يواجهو …ورجع سكت وشاف معاه وخرج بدون جواب و الجد ضحك بتبسيمة حنينة عارفو مغايدوزوش … شد تونار فالحديددات ديال الدروج كايتنهد ويفكر كيفاش يدير فهاد الموصيبة تاني … عارف ان جدو كايخطط لشي حاجة فنفس الوقت ماباغيش يقلقو او يخسر ليه الخاطر … وعارفو مغايتفاكش .. ليديا هي الحل دهاد المشكل … اللهم هي لي يقدر يتهنى منها فاي لحظة بلا مايعدبو ظميرو .. ولا يجيب ليه شي بنت من المغرب يكرفصها معاه …اما ليديا كتبان ليه ديال التكرفيص … وهو عارف اصلا لي غايجيب ليه غاتكون جاية غير طامعة فالورث لي غايكتب فسميتها …. اما هي شكون تقبل على واحد مشوه بحالو … خصو يتزوج ليديا فارقب وقت ..

تاجه لجناحو لقاها كتمشي وتجي شافتو وقربات لعندو

ليديا : ( بملامح جدية ) مغاتخرجش على داك الباب حتى تقوليا هاد الطريق فين كاتخرج …

تونار بدا كايشوف وتمشى لسيرو كلس وكايشوف فالحيط قدامو مشتت بصرو مدة عاد نطق

تونار : طريق كانت مسرحة،… واضحة .. ( شاف عندها ) بعندااك رديتيها متاهة …( شاف فيها ) ودابا الى لقيتي الباب … خرجي … وخرجني حتى انا معاك

ليديا : ( مدة كتستوعب كلامو وجاوباتو عينيها فعينيه من بعيد ) الى انا بعنادي رجعات الطريق متاهة .. نتا بعنادك وضرتي السوارت ديال داك الباب لي ممكن نلقاها …..

تونار : اذن متعاوديش تسولني على طريق فين كتخرج …

ليديا : غانبقاو ديما فيها ؟ مغانوصلو لوالو ؟ ….

تونار : ( وقف وتمشى لعندها ) لي بغا يوصل … كيتمشى ، مكايباقاش واقف فبلاصتو ….

ليديا : فين غانمشي معاك ؟؟؟؟

تونار : للعدول ….

ليديا : ( العين فالعين وكلمة بكلمة) مغانتزوجش فمتاهة .. اظعف الايمان نشوف وجهك

تونار : على هاد الحساب غاتبقاي واقفة … والطريق عمرها تسالي ( كايقرب عندها كتر) غانبقاو نضورو فنفس الحلقة … ( ليديا متبعة عينيه لي كايقربو ليها) وعمرنا غانوصلو …..

ليديا : نشوف وجهك ولهلا يجعلني باش نوصل ….

تونار صغر فيها عينيه وحوارهم متسلسل كأنه مخطط ليه وحافظينو كايجاوبو بعضهم فنفس الثانية .. طوول حوارهم وهوما عينيهم فبعضهم بالهمس كايتجاوبو بحالا ولحد كايتحدى لاخر شكون يغلب فالهضرة وشكون يستسلم ……

تونار : الفضول بزاف مامزيانش … ديما كايجي وراه ذنب

ليديا : حتى باش تخلي ناس تحس بالفضول من جهتك راك ساهمتي فداك الذنب

تونار : شنو مخليك باغا تشوفي وجهي

ليديا : هاد الشهر طوّل عليا وكنتسنى القمر يكتمل ….

تونار : قمرك مخسوف ….

ليديا : حيت انا شمسو …

تونار : وحيت نتي كتشوفي راسك شمسو .. مستحيل يبان ونتي قريبة ليه ….

ليديا : و شنو دنب الشمس فظلام ليل ؟؟

تونار : شنو ذنب الليل حتى يردوه ظلام ؟

ليديا : خلي الشمس تضويه ؟؟؟ علاش كتبعدها !!!

تونار : ماحدها قدامو غايبقى ديما مكسوف …

ليديا : الى تنازل شوية على كبريائو واكتمل …. الشمس غاتبعد من قدامو وتمشي لجنبو .. غاتبقى ديما فجنبو وماتخلاش عليه …

تونار : الى اكتمل … مستحيل مزال الشمس تشرق …

ليديا : اش عرفك فضو الشمس ونتا ضلام ؟

تونار : الضو منو انا مصنوع … اش دنبي الى كان ضاير بيا الظلام ….

ليديا : ( مدة كاتشوف فعينيه وقربات كتر ) الشمس الى طمنات كتضوي … والى تقلقات كتحرق … رحم نارها

تونار : حتى ترحم كسوفي …

ليديا : بغات تشوفك مكتمل …

تونار : ( قرب كتر وشاف فعينيها ) والى غربات ؟

ليديا : مستحيل … ( دايبة فعينيه ) تحديت النجوم كاملين ودرت لي فجهدي نكون انا احسن نجم .. وانا المختلفة عليهم كاملين … الى هوما كايضورو بيك بالليل … انا كنطلع غير بالنهار .. ونهار نقرب ليك كايكون نهار مميز كايتسمى الخسوف …. انا احسن نجم بين كاع نجوم واجملهم .. انا لي مكاينش حتى نجم كايشبه ليا ….طمعت فالقمر ومكاينش لي يحيدو ليا …. غير ديرها فبالك

تونار بعد عليها رااجع بلووور كايشوف فيها

تونار : شنو هو الجمال بنسبة ليك

ليديا : هو داك الحاجة لي كتكون فينا باش تميزنا ومايكون كايشبه لينا حتى شي حد

تونار : وبلا بيه ….؟؟؟

ليديا : مانعيشش

تونار طووول الشوفة ومشا هز سوارتو وكاسكيطتو وتمشى تالباب وهضر

تونار : اذن بلا متحلمي بداك القمر يكتمل …

حل الباب وخرج وهي بقات واقفة كترمش بقوة مكانت عاااايشة اللحظة ماحساتش كاع واش خرج …

تونار مشا قطع لجدو وعائلتو فطيارة … فإمكانو يرسلهم فطائرة خاصة ولكن مكيبغيش يبين نفودو …

ودخل لطموبيل وصونا فتيل حتى جاوبو

سلطان : كنت غادي نتصل بيك ….

تونار : اش وصيتك عليه مزال ماوجد ؟

سلطان : لا اصاحبي عطيني مزال شوية دالوقت …نقدرو نتلاقاو؟ محتاجك

تونار : بخصوص آش

سلطان : مستر اكس … عندي شي معلومات جداد مهمين بزاااااف … ضروري نتشاور معاك

تونار : فينك نتا

سلطان : فالبيرو

تونار،: انا جاي

قطع عليه تيل وصاگ حتى لخدمة سلطان.. لبس كاسكيطتو ونزل من طموبيل مهبطها على عينه … ركب فالسانسور وهبط لاكاڤ لتحت فين كاينين البيرويات ديالهم … غير دخل بانليه الرووووييينة وكولشي كايجري سلطان كان واقف مع العميد … غير شافو داخل هضر فودن العميد

سلطان : هاهو لي هضرت ليك عليه غايعاونا بزاف نلقاوه …. راه عالم فلك ونابغة وذكي بزاف …

العميد : شكون مكيعرفوش ( كايشوف معاه) مول الماسك لي معارف تاحد علاش مخبي وجهو ….واش متأكد منو ؟؟؟

سلطان : مية فالمية ..

دخل للعميد للبيرو وسلطان لوح لتونار وجا عندو

تونار : ( بغمزة متسائلة حرك راسو تجاههم ) اش واقع

سلطان : دخلونا معلومات قلبو لينا كولشي …

تونار : ممم … ضروري نعرفهم ؟؟؟ ولا مكاين لاش

سلطان : على انا علاش جبتك … هضرت للعميد عليك وبلي يمكن نتيقو فيك … غانديرو اجتماع وغاتكون حاضر معانا …. تسنا هنا نجيب الملف …

مشا سلطان وتونار بقا كايحك فدقنو من فوق الماسك .. وقرب بخطوات بطيئة باتجاه مكتب العميد لي كانت الباب ديالو مردودة … وبداو كايتسرب ليه صوت العميد وهو كايهضر فالتيليلون

العميد : مايمكنش ليا دابا … فهمني راه الدورية مقلوبة سفاها على علاها فقضية مستر اكس … آش عرفني .. واحد العميل جاب داك المخترع … قال يقدر يعاونا … داك الفللكي … طونار مول الماسك … لا لا اشمن مشكل غايدير حنا قضية مستر اكس بعيدة علينا ….آه آه داكشي مناش خايف … باينة عليه دكي وباينة غايكون كايشاورو فالنازلة والطالعة وحتى فقضيتنا … لا لا متخافش غاناحد احتياطاتي كولشي كايحتارممني هنا وتاهو واجب عليه يحني راسو فالمكتب ديالي ماشي ورشة اختراعاتو هادي .. الدورية كاملة رحبات بالفكرة ديال سلطان اننا ندخلوه للاجتماع .. منقدرش نعارضها غايشكو فيا … انا غانشوف شنو تحت راسو … مكنضنش غادير لينا شي مشكل …

يلاه كايهضر هو يطلع عينيه وبانليه واقف قدامو … تلف وحط تيليلون دغيا متوتر

العميد : ااء … م مم ( خنزر ) من الادب تطرق الباب وتطلب الاذن

تونار : جوج دالمرات … الي كان عندك مشكل فالسمع ماشي ذنبي ….

العميد : ( ربع يدو ) اذن نتا هو طونار

تونار : ( جا يجلس على لكرسي ورجع وقف كايشوف عندو ) تاهو نطلب الاذن ؟؟؟ ممكن !!!

العميد : جلس ..

تونار : ( جلس ) شكرا … ( شاف لتيليفون ديالو) ياكما قاطعتك على شي حد مهم ….

لعميد : لا .. المهم عندنا دابا هو قضية مستر اكس

تونار : ممم قضية تهريب المخدرات فالحدود

لعميد : ( كايرمش فيه وترو) تماما …

تونار : وعلاش لي عاطين اهمية لهدا بالضبط بوحدو … بينما عندكم عملية تهريب مبلغ عنها نهار الاربع ومعاطينهاش هاد الاهمية تاهي ؟؟؟؟

العميد : ( جبهتو كتعرقق وضابط راسو تأكد بلي سلطان مكيخبي عليه والو ) هاديك قضية ساهلة …نهار الاربع غانمشيو نشدوهم … قضية مستر اكس لي صعيبة ومبهمة

تونار : ( حاني راسو كايضور ستيلو بين يديه على البيرو) بحال بحال … بجوجهم قضية مخدرات … وقضية مستر اكس … كون استهنتي بيها كيف اسنتهني بالاخرى كانت غاتبان ليك تاهي ساهلة …. وممكن تكون غيرر قدامك وماشيفهاش … تماما بحال القضية الاخرى … مستهن بيها حيت عارف مولاها غير قريب ( طلع عينيه شاف فيه) منكم

العميد : مافهمتش !!

تونار : دابا تفهم …

بقاو ساكتين مدة ونظرات رصاصيين كايتبادلوهم … حتى دق الباب سلطان .. وكان موراه الايكيب كامل .. وقف العميد باش يتجه بيهم لطاولة الاجتماع لي قدامو … غير هو زاد وتونار تبعو بعينو تامشا وجبد تيليفونو من جيبو خدم بخفة السكانير وحطو فوق التيليفون لي كان كايهضر فيه العميد … حيت لابد ماخصو رقم التيليفون والمعلومات لي فيه .. وصعيب تحصل على رقم دتيليفون الشخصي دالعميد حتى لي معاه معندهمش وواضح انه هاتف مكيعطي رقمو لحتى شي حد ….

وناض تاهو معاهم لطاولة الدائرية وخلا تيليفونو يدير خدمتو … وشد الكرسي ديالو … ترحيب روتيني به … ثم قللو الضو وناض سلطان كايشرح فالشاشة لي قدامو

سلطان : المعلومات وصلونا من هاد البلاد لي كتبان قدامكم … المخدع الهاتفي رصدناه انه فليبيا(كايوريهم فشاشة و تونار مصغر عينو شكون هادا لي فليبيا ) الاتصال هانتوما نعاودو نسمعوه ( طلق التسجيل لي كان بالانجليزية والصوت بحال شي روبو عليه التعديل باش كايخفيو الصوت )

سلطان : آلو ..

– مكتب العميل سلطان ؟

سلطان : ياس ….

– عندي معلومات قوية بخصوص قضية مستر إكس

سلطان : نعاام ؟؟؟؟ عارف راسك اش كاتقول

– باش نزيد نطمنك .. انا غراضي تلقاوه … ونعرفو حتى انا شكون وتكون عندي ليه زيارة مميزة …

سلطان : شنو المعلومات لي عندك وشكون نتا

– مغانقدرش … انا غير مجهول غانعاونك بزاف فالقضية …. مستر اكس غاتوصلكم ليه واحد البنت … صورتها غانرسلها ليك برقم مجهول فتيليفونك الخاص …. الى لقيتو داك البنت هي لي غاتوصلكم لمستر اكس …. انا متأكد انها هي معاه حاليا … بجوجهم

سلطان : وشكون هاد البنت وفين عرفتيها نتا

– البنت من المغرب … منقدرش نزيد نعطيك معلومات كتر …. فين كنعرفها الامر كايخصني …. الى لقيتوها .. راكم غاتلقاوه …

سلطان : انا بغيت مستر اكس .. لحد الان مزال ماستفدت تاشي حاجة منك

– على الاقل دابا غادي تقلب على شخص ملموس … ماشي على الهواء ….. مستر اكس شخص بحال الهواء .. لا صوورة ولا صوت ولا رائحة ….يدوز من قدامك وماتعرفوش …. اما بفضلي غاتقلب على شخص بالصورة ديالو فسجييل الهويات المغربية .. وهي لي غاتوصلكم ليه … نتمنى القبض عليها يكون فاقرب وقت …. “طييط طيييط طييط”

تقطع الاتصال وتونار جاااالس بهدوووء ودماغو خدام .. عرف الى داوين على ليديا … ولكن باش عرفوها معاه ؟ وشكون هاد الناس وهو مكيعرف حتى شي حد من ليبيا وهاد الدولة جامعو بيها غير السيرك ..

سلطان : تونار .. اش باليك

تونار : كلامو معقول …. ممكن نشوف صورة البنت …

سلطان بينها ليهم فشاشة كانت صورتها فالسيرك كتلعب فالحبال …تونار شافها وكرز على سنانو ولكن على برااا كايبان الهدووووء …. تعصب من حاجة وحدة فهادشي كامل هي مايقدرش دابا يخدم ليها هوية مدام سلطان شاف صورتها دابا …. حمد الله لي كان مزال مجاب ليه الصورة …..الزهر كايوقف معاه دييييما …..دابا هصو يقلب على شي طريقة لي يدير ليها هوية وسط هادشي كامل …. وتحنحن كايهضر ببرود ….

تونار : مممم …. خاصكم تلقاوها فاقرب وقت

العميد : عندك شي حل

تونار : الهويات …

سلطان : اتصلت بجميع المكاتب والادارات … مكاينش حس صورتها فسجيل الهويات …. قلبنا فاكبر المحركات … البنت بحالا مكيناش على الكرة الارضية

العميد :هادشي مغريبش … بحالها بحالو ….

سلطان : تونار اش باليك … فكرنا اننا نستعينو بالراي العام ونشرو صورتها على نطاق واسع … مدامها راقصة فالسررك لابد متكون كتخرج ….

تونار : راها حتى هي جزء من الرأي العام و اقل شىء غاتكون كتفرج فتلفازة … غاتخليها تحس انها مبحوث عليها .. وعمرها غاتخرج مزال غير لاكانت متنكرة …

سيدرا : عندو الحق …. غاتاخد احتياطتها كتر …

العميد : يلاه عطينا الحل …جبناك باش تعطينا الحل وراك غاتخلص عليه

تونار : ( شاف عندو وهضر بحدة زعزو) فلوسك خليهم عندك .. جيت نأدي واجب الصداقة لا غير …. وانا ماشي مصباح علاء الدين نحضرها ليك … بشر بحالي بحالك الفرق هو انا كنخدم عقلي ونتا لا .. (كايقول جملة كتخليه يتعصر من داخل ….و رجع شاف فسلطان ) ماعلينا … كاينة طريقة وحدة لي تخليك تطلعها .. هي الطعم …

سلطان :بحالاش ؟؟ عندك شي فكرة

تونار : فكرة لي غاتخليها تجي برجليها لعندك …

سلطان : اهاه؟

تونار : مدامها كتعرف شخص بهاد السرية .. ومع ذالك كترقص فسيرك وكتحرك بين الدول من المغرب لليبيا وتدوز فالمطار … الا وعندها هوية مزورة عايشة بها ….

سلطان : ااه حتى انا هادشي لي فكرت فيه .. ومدام مستر اكس كيتعامل بالديب ويب الا وهاكر كبير …. وغايكون تم تهكير السجييل ومسح هويتها وهزيتو …

تونار : الحل … هو غاتصاوب ليها هوية جديدة .. وغاتاخد معااير وجهها انطالاقا من للصورة لي عندك نسخ ليها صورة جديدة بالبروكرام التلقائي … بإسم دشي سيدة اخرى يكون السجيل ديالها عامر جرائم …( متبعين معاه )داك ساعة عاد يمكن ليكم تستاعنوا بالرأي العام … انه لي شاف هاد السيدة يتصل لانها متهمة بجرائم مثلا السرقة او النصب والاحتيال .. هوما لي كايتفعالو معاهم الرائ العام حيت كايخافو تنصب عليهم تاهوما ويديرو لي فجهدهم باش يتم القبض عليها ……بشرط يكونو جرائم من المجتمع … بحال النصب فالزواج الابيض … هاد الجرائم كايتحرك فيها الرأي العام …ثم السيدة غاتشوف ان صورتها تشهرااات .. ويمكن يرجموها بالحجر الى خرجات …..غاتغي تحد المشكل و تجي برجليها تقدم شكاية انهم منتحلين الشخصية ديالها وانها بريئة من كل هاد التهم ……

سلطان : غاتدخل للمخفر وهي عارفة راسها مبحوث عنها ؟

تونار : على نتا غاتقول ليها عارفك مع مستر اكس ؟؟؟؟ باش غاتعرف هي اصاحبي بلي راكم عارفينها .. هي غاتجي على ود تهم اخرى … غاديرو ليها التمويه ….

سيدرا :وشنو مخليك متأكد غاتجي باش دير شكاية بهاد النوع

تونار : غاتشوف الاخبار .. وغاتعرف انه ماتقدرش تتن

مشى او تدوز فالمطارات بخاطرها .. وغاتجي تحل المشكل باش تكمل حياتها عادي .. اي واحد فبلاصتها غايديرها

سيدرا : ( كاتشوف معاهم) جاني كلامو منطقي

العميد : وعلاش غانصعبو علينا … من لول نشرو صورتها بجرائمها … مستحيييل ماتخرجش هاد البنت … اكيد محاطين بها جيران … اقارب … ناس لي كتشوفهم فالسيرك

تونار : اهاه .. هاد السيرك لي مصورة فيها اشمن سيرك ؟

سلطان : الجندل .. فليبيا

تونار : سولتو ناسو واش شافوها ؟

سلطان : قالو آه .. ولكن معارفين عليها تاشي حاجة بانت فعرض واحد وغبرات بحال الى الارض تشقات وبلعاتها

تونار : ( شاف عند العميد ) اوا ممكن نعرف كيف غادير تلقاها بالبحث فسيرك دابا ؟

سلطان : كنضن تونار عندو الحق معندناش كيف نديرو نلقاوها الى مجاتش هي لعندنا .. لي صعب علينا الامر ان معندهاش هوية مسجلة اما كون قبضنا عليها فساعات قلال… مخصهاش تحس اننا عرفناها الى يديها فيد مستر اكس .. وتقدر تكون هي كاع … خصها تجي وهي عارفانا كنقلبو عليها على ود حاجة اخرى ….

العميد : اذن نطلقو الاتهام دابا ؟؟؟؟

تونار : ( شاف عندو ) باغي تطلقو من الفدرالية هنا؟

العميد : ومنيين غانطلقوه فنظرك

تونار : جرائم النصب والسرقة … امتى ولاو كاتكلفو بيهم ناس من الفدرالية ؟ باش تزيد تبين ليها ان جريتمها كبيرة داكشي باش نتوما لي مكلفين بيها ؟ حيت على مكنعرف راه جرائم السرقة والنصب كيتكلفو بيهم المخافر الصغار …. هنا القضايا الكبيييرة !!! ( شاف عنهم ) اولا انا غالط

احد العملاء : تماما .. غاتشك ان الامر مفبرك … بالنسبة لوحدة دكية بحالها مدام قادرة خفي هويتها بهاد الشكل وتكون فيد مستر اكس … قادرة تعرف ان جريمة النصب والاحتيال فقضايا الزواج الابيض ممكلفينش بيهم حنا ….حنا مكلفين بشيء لاخور لي مخبعاه … ولي مامكلفيتش بيه المخافر الصغار غاتمشي فأماااان تقدم شكايتها …

تونار : ( شاف فيه تاكمل الهضرة ورجع شاف فالعميد ) واش متأكد داك الشارات ديالك ؟؟؟ ( نظرة حادة) ولا غير شريتيهم ؟؟؟ مظنيتش عميد بهاد الغباء مكيفرقش بين الملفات المكتب ديالو وملفات المخافر الصغار ( العملاء طرطقو عينيهم كيفاش كايهضر معاه ولاخور ساكت ليه حيت عارف راسو اش داير)

العظيد : ( جبينو كايتعرق وضربات قلبو كتزاد كايحسو عارف عليه شي حاجة ) احترم رااااسك

سلطان : ( بغا يقلب الموضوع ويلطف الجو واخا عجبو فيه ) ادن نتمشاو على هاد الخطة … تقدر تجيب نتيجة …. نتمنى نجحو …( شاف فتونار،) اصلا اي حاجة دار فيها تونار يديه كتنجح ….

سيدرا : صراحة كان خصك تكون عميل ولا محقق …

تونار : ولا عمييد كاع !! ( شاف فالعميد بنص ضحكة مستهزأة شدها معاه هاد نهار ورجع شاف فيهم ) حيت بانليا … سهل بزاف تحصل على الشارات بدون تعب ….

العميد : ( بتخنير فيه ) سالا الاجتماااع …..

سلطان :ولكن باقي مااا

العميد: راه قلت سالا ….

سلطان خنزر وشد البيسي ديالو بزعفة …. والعملاء ناضو مشاو وتونار داز بالخفة للبيرو هز تيليفونو وضار عندو بانليه جالس فكرسيه وغارس راسو بين يديه … ضحك ضحكة جانبية وخرج ….

ليبيا …

سليم مشدود بسلاسل فواحد الگاراج وكولو دمايات وكدمات قدامين ووجداد… واضح انه مدة هو كاياكل فالعصا … تاتحلو البيبان ودخل عيسى …

سليم : ( طلع راسو معاه كايقطر بدمايات ) س سيدي … لقد اعترفت لك بكل شيء …اذن دعني وشأني …

عيسى ضور عينيه شاف مع رجالو …

عيسى : حرّروه ….

بداو كايفتحو ليه فالسلاسل … وتلاح سليم على،رجليه كايبوسهم وكايشكر فيه …. حتى كايتفرگع رراسو بدمايات تيرا فيه من الفوق … هو يلحو برجليه باقي كايترعد ويتركل … حتى مات …

عيسى : ( شاف مع رجالو) سليم …. عبرة لجميعكم …..

خلاهم وخرج كايرد سلاحو وهو يجي عندو واحد الراجل حاني راسو كان من الخدم القداااام ديال القصر … وطلب منو يبيع ليه ولدو باش يعوض بلاصة سليم وشراه عليه بالفلوس بحال العبيد …

– سيدي … ابني ملكك الان ( شاف موراه كان واقف داك الشاب ) انه ذكي جدا .. ومتعلم … و ايضا مطيع …. اعتبره ساعدك الايمن ( شاف فولدو ) انصت يا بني .. انت لان ابن عيسى … اِرضيه واعصيني …( شاف فعيسى) اطلب منه ما تشاء … انه ابنك الآن ….

عيسى : لقد ترعرع في قصري …. انه ابن القصر .. لكن هناك شرط آخر

الشاب : كل شروطك ننفذها بالدم والروح سيدي

عيسى : ( مايقدش ينسى سليم ولي دوز معاه ماشي قليل) من اليوم فصاعدا .. سيصبح اسمك .. سليم …

الشاب : كما تشاء

خلاهم ومشا دخل للقصر واتجه لجناح الست ماما لي ناعسة فالفراش كاتشوف غير فالسقف وتشللات بالكامل ..دخل وقطر ليها بعض القطرات ديال الماء ففمها وجلس فجنبها شد يديها

عيسى : كيف حالك اليوم؟؟؟؟

الست ماما : ( عوجات راسها بشوية معاه وهضرات ثقيييلة ) ب بخير …

عيسى : افعل كل ما في وسعي لاستعادتك …. لم يتبقى امامنا الكثير من وقت … كنت مضطرا لاخد تلك الخطوة الجريئة …،

الست ماما : ( بصوت متقطع ) ل .. ل لما لم تخبرهم بإسمه ال الحقيقي .. س سيفلحون ف في القبض عليه بسرعة …

عيسى : غرضي ليس القبض على القربان … اذ تم القبض عليه سيتدمر كل شيء … غرضي هو القبض على الفتاة ….

الست : س ستعترف لهم بمكانه … وسيتم القبض عليه ولن نتمكن آن ذاك من ل لحصول .. ع على قطرات دمه اذ اعدموه او سجن … سجن في مكان سري

عيسى : تلك الشمطاء ستعترف ؟؟؟؟ تلك التي تحملت صعقات الكهرباء وظلام الحفرة ؟ تلك الشيطانة لن تعترف لهم حتى لو تطابقت السماء على ارضها … سيجلدونها ولن تعترف … انها ماكرة …

الست : و ومذا ستفعل اذ تم القبض عليها

عيسى : اذ لم تعترف سيطلقون سراحها .. لانه لا دليل يثبت كلامي وانها فعلا تعرفه … عند اطلاق سراحها سأختطفها من جديد … لازالت الخريطة توضح انهما لن يفترقا مستقبلا … سيعود اليها لأخدها … ولن اعيد نفس الخطأ الاول لو كلفني الامر باحتجازها في قنينة ماء …. الان انا بحاجة اليها …. بحاجة ان اعرف اي الدول هي موجودة …

الست : و ولماذا اتصلت بالعميل الايطالي … هل هي في إيطاليا ؟

عيسى: لست اعرف … اتصلت به لانه العميل المكلف بقضية المدعو بالمستر اكس … اذ تم القبض عليها سيتسرب الخبر عبر الصحافة وستتضح الدولة التي تم القبض عليها فيها … ومن هناك يمكنني معرفة الدولة التي ينتمي اليها …..

الست : ما تقوله بعيد المدى .. و وانا لا وقت لدي

عيسى: حتى لو اخدوك لعالمهم …. سأفعل ما في وسعي لاستعادتك … لن اعيش بدونك ….. ثقِ بي … ساحل الامر ونعود لحياتنا السابقة وستستعدين حياتك وعافيتك

فمكتب سلطان

جالس سلطان فمكانو وقدامو تونار

سلطان : هضرتك معاه دخلات ليا الشك …،كتعرف شي حاجة انا معارفهاش

تونار : مكنهضرش بلا دليل

سلطان : كتخلعني بعد المرات …

تونار : ( شاف فيه مطول) تعلم ماتبقاش تيق فلي قراب ليك ….. جيتني شاب طموح .. وولد بلادي … قلت مع راسي تستاهل هاد النصيحة … تيق فالغريب وماتيقش فالقريب

سلطان : ( مدة كايستوعب ورجع ضحك) هي منتيقش فيك حتى نتا …

تونار : من حقك …

سلطان : هههه حااضر اسيدي هه اه نسيت بخصوص الهوية لي طلبتي … عطيني مزال شوية دالوقت

تونار : عدرتك … عندك قضايا بزاف فوق راسك … مامزوربش بيها خليها منبعد … زرب غير على ديال اابنت … الى تعطلتي ليوم تكون واجدة

سلطان : راهم خدامين على استنساخ الملامح فصورة اصطانعية …. متخافش … ولكن المشكل هو الهوية ماعنديش شكون لي نتيق فيها ونخليها عندو بلا متخرج فيد شي واحد يخدمها كيف بغا خصوصي ليكيب غاتكون عارفها مزورة غاينوضو يديرو بيها اي حاجة وانا عارف معانا جواسيس ..راك عارف غاتكون عندنا غير هوية وحدة الى مشات صعيب تاني نردوها … لانها مكيناش فالسجيل … ومكاينش ممن غيرك اتونار نأمن عليها تكون عندك ….

تونار : ( هبط راسو كايلعب باوراق واحد الكتاب ) لا … حطيتني امام امانة صعيبة … غير عفيني

سلطان : متردهاش فوجهي …

تونار : واخا … ملي مصر بحال هاكا … ( شاف فيه ) نأمنها …

سلطان : ( طول يدو ضرب على كتفو ) صاااحبي لي كنعرف ….

فمكتب سيدرا …

حانية على المكتب كتخدم …تاصونا تيليفونها غير شافت الرقم من المستشفى جاوبات بسرعة

سيدرا : آلوو …

دكتورة : ضروووري تجي دابا وبزززربة

سيدرا : ( وقفات ) م ماما … م مال ماما

دكتورة: تزاد عليها الحاااال … خصها ضاروري تدخل للبلوك دااابااااا

سيدرا : ص صافي صااافي ( كتمشي وتجي كتقلب على تيليفون تهزو باش تخرج هو فودنيها ) صافي دخلوووها انا جاية ….

دكتورة : مااايمكنش … حتى تخلصي راكي عارفة القانون

سيدرا : ( وقفات مصدومة دموع جامدين فعينيها ) شنوو ؟؟؟؟؟؟ ماما كتموووووت ونتي باقيا كطلبي لفلوووووس

دكتورة :الآلاف لي كايموتو كل نهار

سيدرا انفجرات بالبكا كتوسلها وطاحت للارض

سيدرا : م ماااعنديش المبلغ كااامل … عفااااااك عفااااااك عتقي ليا ماماااا نبيييع ليك رااااسي وعتقييها

الدكتورة : القانون واضح … كون جات عليا نديرها ليها … ولكن الادارة مغاتوافقش … وانا مافجهديش نديرها من جيبي … هاحنا كنتسناوك …

تطلق تيل و طاح من يديها كتبكي حاسة بقلة حيلة وماماها كتموت بين يديها … ورجعات وقفات بزربة ومسحات دموعها وهزات صاكها وقفات مطووولة قدام الباب كتستعد … تنهدات بعمق وخرجات متجهة بزربة لمكتب العميد … دقات ودخلات بلا متسمع الادن

العميد غير شافها داخلة كتبكي فحالة لها يرثى …. ناض وقف جاي بجيهتها …

العميد : سيدرا ؟؟؟

سيدرا : غاتعتق ليا ماما ياااك

العميد بزز على ملامحو تشقات الضحكة … ودغيا جمعها حيت الوقت ماشي مناسب …

العميد قرب بغا يطلع يدو يمسح دموعها وهي تبعد راسها

العميد : غاندير اي حاجة تسعدك … مكنستحملش نشوف دموعك ….

سيدرا : بغيت غير ماما تعييييش( بالبكاء)

العميد : تعييييش …. ولكن ر ررراك عارفة انا …(قاطعاتو)

سيدرا : ندير ليك اي حاجة بغيتي غير عتق ليا ماماااا كتترجاااك ….خصها دابا دخل للبلووك …

العميد : واخا … نهار لكبير هو لي تشافا ماماك ونديرو العرس وتولي ديااالي اسيدرا … شفتي طنت قتليك تاحد مغايقد يعيشك سعيدة بحالي انا (قاطعاتو بهستيرية)

سيدرا : ماما كتموووووت سسسربي

العميد،: ندوزو لبنك هو لول ..ياك هي باقا فمستشفى ايسواريز ؟؟

سيدرا : ااه باقا سسررربي

هز لافيست ديالو دغيا وحل لباب خرجو سيدرا كتجري هو تابعها … وتونار لي كان غير حدا الباب … شمر بنيفو وهبط كاسكيط على عينيه وزاد كايضور فراسو …

هبط لطوميل …،ركب بلا مايديماري غير كالس فيها وكيشوف فالتيليفون للمعلومات لي كلها تنسخات عندو …. تفكر الحديث لي سمع بين سيدرا والعميد … وهو عارف سلطان شحال باغيها … غير من الحديث واضح انها باعت راسها ليه …. وواضح ان العميد مغايديرش شي حاجة فابور ….عارف انه آذى سلطان بزاف وهو دنبو انه تاق فيه…. مكرهش يدير شي حاجة ليه يكفر بها ذنبو …..

تونار،: اشنو سمية داك السبييطار …( كايحك دقنو يتفكر … ) اسوااريز … ( طلع دليل الهواتف وجبد رقم المستشفى واتصل )

-مستشفى ايسواريز آلو

تونار : بغيت نسولك ( كايحك فىاراسو ماعرف لاكنيتها لا والو) سيدرا … سيدرا واحد ااسيدة عشرينية زعرة راه الام ديالها مريضة عندكم

– ماعرفتش ؟ واش الانسة سيدرا لي تابعة للمكتب الفدرالي؟

تونار : تمااااماا …. الام ديالها غادخل للبلوك ياك ؟

– اه اسيدي … كايتسناو توقيعها

تونار: مصاريف العملية انا لي غانخلصهم .. عطني رقم الحساب ….مابغيتش نتعرف شكون .. فاعل خير…..

عطاتو رقم الحساب وحول ليهم المبلغ لي طالبين …

سيدرا والعميد وصلو للمستشفى .. داخلة سيدرا بهستيرية كتجري للشومبر ديال ماماها .. والعميد تابعها ووقف فالريسبسيون

العميد : لارا سنتياغو … شحال كتطلب العملية ديالها،؟؟؟؟

البنت : الادارة هي لي تقدر تقول ليك … ولكن راه العملية تخلصات …

العميد : شنو؟؟؟؟؟؟ شكون خلصها !!!!!

البنت : فاعل خير .. شي واحد مجهول دار هاد الجميل ….

العميد : ( مسح على جبينو) اش هااااد الموصيبة ….

– نعام اسيدي،؟؟؟

ضار عندها شاف معاها

العميد : رقم الشومبر

-11 اسيدي

خلاها وطلع لقا سيدرا كاتبكي حدا الباب ومشا عنقها

سيدرا : دااوها …. دخلوووهااااا ( كتبكي)

العميد : ماتخافيش كولشي غايدوز مزيان وعلى خير .. انا حليت المشكل وخلصت المصاريف

سيدرا : ( بعدات منو ) تخرج ماما على خير و نخدم فيهم ليل ونهار نردهم ليك

العميد : نتي عارفاني ماسلفتش ليك ….

عرفات قصدو ومشات كلسات شدات على راسها …

عند تونار …

وصل بسيارة للدار … حبسها وهو كايضور تيليفونو فيديو ويحاول يلقى فخ مناسب لي يطيح فيه العميد … طيحة لي مافيهاش سبيل للنجاة …فنفس الوقت فكر حتى فعائلتو وصحة جدو … خصو يتزوج بليديا قبل مايمشي الجد يدير لي فراسو … ومنبعد غايشوف كيفاش يخرجها من داك الجرائم لي غايتنسبو ليها … وكيفاش يحل مشكلتها لان مايمكنش تبقى ديما مسجونة عندو واحد نهار غاتخرج …. وحتى هو مايمكنش يبقى حياتو كاملة عايش هاكا …. خدم عقلو ورسم خطططة مزيان فدماغو .. من الداخلة للخارجة …

ونزل من الطموبيل طلع سبق البيت دجدو لقا مراتو كاتجمع ليهم الحوايج غايمشيو للمغرب … مطولش فالبيت وتاجه لجناحو .. وهو ماشي فطريق ولا كايحس داك الجناح فيه شي حاجة خاااصة … بجمال داك اللمسة الاخيرة لي كانزيدوها فوق شي حاجة … شي حاجة بدلات ليه الجناح كليا …. شي حاجة سرية خاصة به غير هو تاحد معارفها ….

حل لباب هو يشوفها ناعسة على الكنابي والكتاب مطلوق فيديها …. واضح انها غفات وهي كتقرا … قرب ليها بشوية وحيد الكتاب من يديها حطو على جنب … وجلس بجانبها كايشوف فيها …

تونار بعد خصلة من شعرها على عينيها رجعها للور … وبقى كايشوف فيها وكايتكلم غير مع عقلو …

تونار : كون جيتي فشي وقت آخر … مع شخص آخور … مع وضعية اخرى … مكانش غايخليك الواحد ضيعي من يديه …. ولكن للاسف نتي فبلاصة غالطة مع شخص غالط …

رجع ناض وقف ودار يديه فجيبو وضربها برجلو تفيق وهي تخطف وفاقت كترمش فيه …

ليديا : مصررفة فيك شي عيب،؟

تونار : نوضي بغيت نهضر معاك …

ليديا: ( ربعات يديها وعوجات راسها معاه) جلالة تووناار .. تواضع وبغا يهضر معايا ….

تونار : حتى نت تواضعي وجاوبيه …

خلاها ومشا كلس على السرير مقابل معاها واخا بعاد

ليديا : اش بغيتي ؟؟؟؟ …

تونار : تحلي ودنيك …

ليديا : دماغي كامل محلول … ودني خضرة فوق طعام

تونار : كاينة شي اومور خصك تععرفيها …

ليديا : يا نعرف كولشي … يا مانعرف تاحاجة تبقى تقطر عليا مكاين لاش …

تونار : اش بغا تعرفي ؟ ….

ابتسمات شوية بشوية وناضت كتمخترر تاوصلات لعندو وهو نظرتو فيها جامدة … وعلات رجلها حطاتها على سرير وهبطات براسها دوزات بيديها على وجهو من فوق الماسك وهو عينو فعينها ودوات بصوت مججبد و قمة فالانوثة

ليديا : بغيت نشوفك ….

تونار مدة كايشوف فعينيها … وعينيه كايهبطو لشفايفها … بدا كايقرب بلا هواه .. .بحال شي ميغناطيس كايجبدو .. تالواحد اللحظة لاحها فالارض وناض كاينهج عاطيها بظهر باش مايفضحوه عينيه ولاح الكاسكيط كايرد شعرو لور وهي طايحة فالارض وهضرات بكل جدية ونرجسية …

ليديا : هادشي لي كادير فيه راك غير كتعدب بيه راسك … انا مكنعياش ومكنستسلمش … بغيييتك .. هي بغيتك … ييتطمع عليا الكوون كاااامل …. مغانتخلاش ….

تونار : ( ضار عندها ) لي يسمعك … يقول كتهضري على واحد سنين هادي ملي عرفتيه … منين جبتي هاد بغيتك ؟؟

ليديا : (قادات كلستها فالارض متكية على السرير ) ليلة واحدة كانت كافية …. نتربط فعينيك … ويبانو ليا كيف جي نجمة عاااالية …. خصني نوصل ليها بأي ثمن كلفني …. نقيسها بيدي …. ونشبع منها ….

قرب عندها تابقات كاتشوف غير سباطو … وهبط عندها تحنى وجات عينيها فعينيه … فهاد النظرة عينيها كايدمعو بسبب جادبية عينيه وهضر بصوت ثقييييل ورخم … وبهمس خفيف

تونار : بغيتك بلغة لاقيس … هي تحدي باش نحصل عليك … ونهار نحصل عليك .. نهزك بحال شي ديبلوم نعلقو فللحيط نتباهى بيه ونرضي غروري ونقول حصلت عليه …. ومن ثم … تشوفي ش تحدي اخور ليك تزيديه على انجازاتك …. بغيتك بلغة لاقيس هادي هي .. وتونار ماشي هو لي يكون مجرد اسم فلائحة الانجازات ديالك ايما يكون العنوان … وايما يبقى التحدي لي خسرتي فيه … خليك كتشوفي النجوم غير من البعيد .. نهار تقربي مغايعجبوكش …

ليديا : عندي بلاصة فسماك ومن حقي نشوفك…

تونار : اشمن حق عندك عليا ؟

لبديا : بغيتك … وليتي رغبتي … ورغبتي كتنفد …

تونار : باقي متزادش لي يردني رغبة …

ليديا : بغيت نشوف وجهك …

تونار : نهار لقاك تستاهلي تشوفيه … غانعريه قدامك …

ليديا : نموووووت .. نموت ونعرف علاش مخبيه

تونار : مدام فيك غير الفضول … عمرك تحلمي تشوفيه …

خلاها وتاجه للمكتب حل مجر جبد كارو وتكا عليه كايشعلو … وليديا ناضت بشوية لعندو …

ليديا : تونار …..

تونار كان كايشعل البريكة وتوقف على الحركة … بحال شي فيديو توقف .. لاول مرة يسمع سميتو بحال هاكا وبهاد الصوت … رجع تنهد وشعل الكارو .. جبد منو ونفت الدخان وشاف فيها بمعنى شنو

ليديا : دير لينا شي حل … مستحيل نكملو هاكا ….غانقتلو بعضياتنا غير بالفقصة ….

تونار تنهد ومشا جلس على الفوطوي كايشوف فيها بكل جدية … وهي تعصب من تأخر ديالو فالرد ..

ليديا : راه كنتسناك تجاوب ؟؟؟؟ كنحسك كتنتقم لكاع هادوك لي كنت نلعب على اعصابهم فجوابي …

تونار : ها علاش قتليك انا مرايتك …

ليديا : غانبقى هاكا طول حياتي ؟؟؟؟

تونار : لاقيس … انا وياك … مجامعنا والو وعمرها غاتكون …. ديري فبالك ان لي بيني وبينك هو سؤال وجواب …. تعطلتي فالجواب وتعكلات القضية ….

شفتي عنادك فين وصلنا ؟

ليديا : عنااادنا …. ماتنساش انك نتا لي رفضتي تطلبها مني بأدب وتعري وجهك …

تونار : نتي لي بديتي .. بسبب قصوحية راسك .. طريق عندنا طولات ودخلنا فبيبان خرين انا وياك … او بالاحرى … ان لي دخلتك …باش تعرفي نتيجة عنداك معايا بشحال كتصرف …. مكنتش كنضن غانتعاقب حتى انا معاك … ( جبد من الكارو ونفخ دخانز وكمل الهضرو ) دابا حتى الى كاع تنازلتي … وقلتي ليا نتي شكون ومنينن جايا وبنت من …. مغاتهنايش مني ….

يديا : وعلاش

تونار : حيت غاتولي مراتي ….

ليديا : هاه ؟؟ راه قتليك كتحلم … نتزوجك بلا منشوف وجهك مستحيل

تونار : معنديش المستحيل فالقاموس …( دوز لسانو على شفتو ومصهم ورجع هضر ) جدي مريض … وباغي يدير لي فجهدو يزوجني …. حيت كيضن انني غاتبقى طول حياتي بوحدي مدام مزال ماكايناش هادي لي تقبل تتزوج بواحد مغايبينش ليها وجهو ….. بغيت نحقق امنيتو .. وتتزوجي بيا قدامو …،تلعبي دورك باتقان …،الزوجة الودودوة المطيعة … وغاتببقاي محبوسة فالمنفى ديالي … حتى لنهار تتنازلي وغايتطلق سراحك ونتهنى منك ومن وجودك واستعامرك لحياتي …

ليديا : هادشي لي كاتقول فيه … تقبل بيه شي وحدة اخرى من غيري ….ماشي ليديا ….

تونار : ليديا … هه … لاقيس كتناسبك كتر …

ليديا : لا ومغير ليا الاسم من الفوق … سارقني .. ونافيني … و حابسني … وباغيني نتزوج بك بزز ومبدل ليا سميتي وكتمشينى بهواك … و انا ؟؟؟ ممنوع عليا حتى نتعجب بيك ؟

تونار : تعجبي بيا !!! ( جابت ليه الضحكة وخبلها ) تعجبي بواحد وجهو مخبع ؟؟؟؟ …. هاداك الغزالة راه مجرد فضول وحريق الراس … ماشي اعجاب كيف كضني ..

ليديا : علاش كنحسك متايقش فراسك

تونار : انا واقعي …. ماشي بحالك عايشة كتغداي على غرورك وتخيلي راسك اجمل ما صنع الكووون ….

طفا الكارو فالطفاية وناض باتجاه البيت لي فيه اللوحات ديالو …. وبدا يجبد فالسطولة دالصباغة راشقة ليه يبدا شي لوحة .. تاحسها تبعاتو .. حيت مدة وهي واقفة كتستوعب

ليديا : اش قصدتي بهضرتك ؟؟؟؟ كيفاس كنتخيل راسي !!!

تونار كايعلي كمامو وعينيه على الصباغة مجاوبهاش

ليديا : خصك تعرف .. انه انا ماتخلقش مني جوج ….انا لي الواحد كنشووف فيه كايدووووب … وتتا براسك شحال من مرة دبتي قدااامي وكبريائك العوج منعك تخضع …انا لي مكاااينش لي مشافهاش وسبح الخااالق … انا لي مكااااينش لي يرفض شوووفة مني … ورفضك نتا … راه حيت عندك نتا شي خلل ماشي انا ( تونار كايحك سنانو بلا مايبين ) علاش كنحسك غيران مني ؟؟؟؟؟؟ حيت انا حسن منك ؟؟؟؟؟؟ … وكون كان العكس وكنتي حسن مني فالجمال … كنتي غاتكون معري وجهك تفتخار بيه …( جمع قبضة يدو وهي كتحاول ترد الاعتبار لكبريائها لي خدشو) اشنو دنبي لاكنت حسسسن منك ؟؟؟؟ واجمل منك ؟؟؟؟ اه انا مشايفاش وجهك .. ولكن تكون لي تكون مستحيل تكون بحااالي … وغايجي نهار لي تطيح الراااس وتجي خاااااضع ليا … وتعترف بلي انا اجمل ماشاف عيينك …. لي هوما دياولي … آمول عينيا

قبل ماتكمل كلامها كان جرها مز شعرها حاكم راسها وسط قبضة يدو وهي كتنتتررر وكايخشيه ليها فالصباعة الكحلة كاامل كاؤغطسووو ويضربو فاللوحة مغززززف … وعينيه حمااااررو بالاعصاب والاستفزاز ….

تونار : هاد وجهك الزوييييين لي فرعتيي ليااا مخيي بيييه .. هاا كيفااااش كانشوفووو اناااا ..

كايغمس ليها وجهها فالصباغة ويزيد يضربها بجهد مع طابلو تتلطخ فيه ….وهي كتحاول غير تفلت وتغوووت

تونار : هاكاااا كايبان لياااا … هااكاااا ( مغزززف عليه ومجنز ) وجهك هذا الزويييين ؟؟؟ هااا كيييفاش داااايررررر …

علا ليها راسها شداها من شعرها وكايوريها الطابلو ديال لطخات وجهها بالصباغة الكحلة …

تونار : شوفي مزياااااان هاد الطابلو … اانا معنديش دنب الى المرايا ناافقاتك وكدبات عليك … هااااا وجهك كيفااش فعيينيااااا …. شفتيه ؟؟؟؟؟ راك واخا تبقاي العام كامل كتمشي وتجي حدايا بهاد الوجه لي كضنيه زوين .. مغايتحررركي فيا حتى شششعرة …. مااعجبتنيش ومكتعجبينيش وعمرك مغاااتعجبيني ….غاتبقاي تباني ليا وحدة حمقة كتشششكر فراسها وفوجهها المعفن … حيت فمخها النقص …. الى كنتي نتي عاجبك هاد الوجه لي مافيه مايتشاف … راه ماشي ضرووري يعجب الناس كااااملين … كاين ماحسن منك وساكتين …. جمعي عليااا غررووورك وسيري قلبي علامن تمارسيه ماشي معايا هاااا وجهك فعيني كيف داير وبهضرتك غير مكتزيدي تعيفيني فييييه

ضربو ليها مع طابلو وخلاها وخرج معصصصب … وهي طاحت على داك الطابلو والصباغة مزلعة ضايرة بيها وكالسة وسطها فااارض جااااااامدة مكتحركش….

يتبع