حالتها ورا نطق كلامو متمناهاش لعدوها ، كيفاش الورقة لي بيناتنا تتقطع !! علاش النور ل عاد بدا يضوي في حياتها يتخطف بلا سبب ، حسات بقلبها تزير عليها وحسات بيه كيضيع من بين يديها ، قيمة الحاجة مكنعرفوها حتى كنقربو نفقدوها وهادشي ل وقع معاها ، شحال تكبرت وتعفرت وعلات من شانها حگا خاصني نولف حگا باقي منسيتش ، صبر ودبب معاها ، دوا باللتي هي أحسن وهبط من نفسو شحاال من مرة ونزل كواريه على قبلها وهي مكايناش هنا ، كينعس حداها مرتو حلالو عندو فيها الحق من صبع رجلها صغير لراسها وكيكبح غريزتو على قبلها، حارماه من حقو فالفراش ومتقبلها كيقول هنا تعيق غدا تعيق !! ديما زايد بخطوة عندها لقدام وهي بهضرتها وفعايلها مرجعاهم مترو لور ، وصل بيه الحد ل مبقى عندو فين يزيد حيت غيظلم راسو ويقتل نفس ل خلق الله فيه بغير حق ، داكشي علاش مشى لاخر طريق كان مفكر يسلكها حيت بهاد الحال ل هي فيه شي نهار تبقى بين يديه يا مهرسة يا معوقة مباغيش مرا يشاركو راجل خور معاها ولو فالخيال ، مباغيش مرا گسدتها حاضرة معاه وقلبها واهباه وكيفكر فواحد اخور ،مباغيش مرا تقارنو براجل سبق فحياتها ومات وذكرياتهم بزوج مزال حية ترزق ….
عينيها ترجمو باش كتحس ماشي حيت غيطلقها وصافي ، ولكن حاسة براسها ضراتو وجرحاتو بهضرتها وبيدها وصلاتو لهاد الدرجة ديال البرود ل كيدوي بيها معاها …كان بحال جليد بعينيه طاافين وصوت مجروح …غلام لي عمرو حدر راسو وهو كيدوي ، شافتو ليوم بركان وهامد !! حسات براسها هرسات فيه حوايج كثييييرة بالرغم انها مظلووومة بحالو وغير تلاحت بين الرجلين ، الا قدرت ترجع بلور كانت غتسحب كلامها ل كان بحال خنجر طعنو فقلبو ، هزت عينيها فيه وبغشاوة دموع معمراهم قربت منو وحطات ايديها على حناكو مترددة وسنانها كيتراقصو بخوف ورجفة مشاعر مختلطة كيعتاليوها، هزات ليه راسو ونطقت بصوت رقيق ونبرة صوت مبحوحة ~هضرتي وخويتي كل لي في قلبك وانا عذراك ومغنلومكش نستاهل كل كلمة قلتيها ولكن قبل بغيتك حتى نتا تسمع ليا وموراها تأكد اني غندير لي بغيتي ول يريح خاطرك وبلا نقاش ، تنهدت بصوت مسموع كتشوفيه مداير حتى رد فعل ومعندوش استعداد يتسنط ،وهي تنطق مصممة~ كيما عطيتك فرصة بغيت فرصتي ، تانا ندوي وندافع بيها على راسي وباش ما حكمتي عليا قابلة
حيد يدها من على وجهو مهرب منها عينو مكتفي وقال~ كنضن مبقا ميتقال !! صافي لي وصلني منك كافي ووافي وحياتك لي دازت مع خويا ولد بويا مغنهدرش عليها حيث مغيتبدل والو ،تران كيمشي غير نيشان مكيرجعش اللور ..
بدون استسلام حطات ايدها على يدو وكرزت عليها بقوة وبنضرة متمردة كتوصل ليه غتسمعني بزز منك نضرة خلات شبه ابتسامة باهتة تظهر على شفايفو، بلل حلقو وقال ايدو المطلق سراحها فوق ركبتوو وايد لوخرة محتلاها نجمة ل تمناها تكون هي ضو حياتو الكحلة ~ قولي!! هانا كنسمع خلينا نساليو هاد المرمة باش نرجع لگرنتي ودمياتي وناس لي يقبلو عليا أما الزواج باستهزاء نطق ، مخاصنيش بأعصاب زيادة على ل فيا وبمرا تقلل من قيمتي وتبغي تنقص من رجولتي طرف من نفخة يعيش نقطع مها هبرة تبرا ومازال متولدت هادي ل ترجعني ديوتي ..
زينت وجهها بابتسامة خرجت غصب عن قلبها لمضيوم وقالت ~ مزيان تبين لناس أنك قوي وقلبك حجر !! وطرجم حنيتك وخوفك على ل ليك بالغوات والضرب وخبيط البيبان وتكملها بالدخان لريتك ، ولكن أنا نجمةة !! مرتك گعما تحتاج هاد القوة معايا …..شافتو گرن حجبانو وملامح وجهو تبدلو شفايفو تحركو غيقول شي كلمة وهي تسبقو في الهضرة وتقول ل رتباتو فعقلها قبل متلفو ~ مهم خلينا في موضوعنا !! بللت حلقها وكملت ، نهار خطبني خوك اغلام، مكنت كنعرفو ولا كيعرفني ،مخيطنا دروبة ولا فصلنا زناقي ، شافني وشفتو فعرس بنت معايا ف المعمل مخرجت معاه مخرج معايا متقهوينا مشدينا في اليدين ،وربي شاهد عليا بلي عمرو حط عليا حتى صبعو صغير، وعمرنا هضرنا شي هضرة خارج إطار الاحترام ، تلاقيتو زوج المرات بالحساب واول كلمة خرجت من لساني هو الا بغيتيني يجمعنا المعقول ….تكاتبنا ومع ذالك مجمعت بيناتنا حتى حاجة من ل فبالك واخا كان راجلي وحلال عليا ،ولكن مبغيتش نخيب ثيقة والديا فيا …صعيب عليها تعاود هادشي ولكن بزز منها تحيي جرح الماضي ~ انا اغلام تكرفست ديال بصح من صغري لكبري ضربت تمارة في الماگز والمعامل كون عيني في الوسخ غير شعري يجيب ليا لي يصرف عليا ولكن انا باغا غطا لراسي وسترة لجسمي وهيبة بين ناسي وظهر ساندني ماشي عود راشي ينزلو عليه قطرات لما ويتنفخ وغير تشرق عليه الشميس يتفرتت ، طلعت النفس ونزلتها بضيق وهي كتكلم ~مبغيتش الحب ولكلام لمعسول بغيت راجل وظهر متين باش الا ضاقت بيا دنيا وضربوني حيوطها نلقاه فجنبي نتكى عليه ونحس معاه بالأمان ، رجعت مخيلتها للور وقالت ~نهار قالو ليا غتزوجي بخو راجلك ترددت في الأول وفي الاخير وافقت حيت خفت من هضرة ناس وتنعاتهم فيا ونهار شفتك وخرجت معاك حمدت الله وشكرتو عليك وقلت نعمة وربي جازاني بيها بعد صبر سنييين ، عمري شديت معاك ضد غير كيبان ليك بالعكس ، قلتي ليا جلسي من الخدمة وحدرت راس وقلت منحافيش كلام راجلي ، الزيف معمري درتو ولا ولفتو ونهار فرضتيه عليا مقلتش لا كلامك على راسي، أما الخلخال ل كتحاسبني عليه كيتعتابر ديالي ومولاه الله يرحمو وربي يحاسبني ونتا متسمحش ليا لا دنيا لا اخرة للبستو باش نتفكر بيه شي حد لبستو لانو ورتي حلالي وهدية تعطاتني ، وثالت حاجة ول هي تصويرة ل وصلاتنا لديك ليلة ل تخيلتها مغايرة على كيف دازت ، وقفات غادا على صباع رجليها قصدت لمجر وهو مضيق عينيه حاضي كل حركة كدير هزات قرأن صغير بين يديها ورجعات لبلاصتها حداه وهاد المرة مقربة منو كثر من قبل ،حطاتو بين ايديها وقالت كتحلف ~ ماشي ديالي وماشي انا ل حطيتها بين حوايجي ،شافيها هاز حاجبو بمعنى كيف ندير نتيقك وهي تزيد تحلف وكتبرهن ~ ايه انا ل فصورة مع خوك وراك شفتيها بعينك ،بينو وبينو ناس اخرين خديناها فنفس لعرس ل تلاقينا وتعرفنا فيه تصويرة ل كانت معايا انا لقاها عبد الله وتحرگات مبقاتش وهاديك معرفتش منين جات ولا شكون خشاها بين حوايجي وحتى ديك الهضرة معارفة عليها حتى حاجة ، كيف غندير نكتبها وانا مكنعرف لا نقرا لا نكتب وعمري رجلي تحطت في مدرسة وظهري هز شكارة ، واش عمرك شفتي شي امي كيتهجى !!
حيدت المصحف وقربات منو وهاد المرة قربات بجرأة خافت على راسها من فراقو خافت تفقدو بعدما لقاتو خافت يغلب عليها الزعل ويضيع من يديها ويبقى ذكرة زوينة تندم عليه طول حياتها ، دورت يديها ل كانو كيترعدو على ظهرو تخشات في صدرو معنقاه وكتشم فريحتو ، حطات راسها عليه براحة كتسمع دقات قلبو ل كانو كيضربو بجهد بلاما يتحرك من بلاصتو كان مصدوم من شنو سمع ومصدوم كثر من جرأتها المفاجئة قالت وصوتها غالب عليه نوع من حشمة ~غلام !! نتا راجلي وتاج راسي وعمري منخونك حتى في الحلم ، نتا عمود بيتي ودفا فراشي ، مغنكرش بالاول كرهتك خصوصا ملي مك وختك ضلموني ولاو يتعداو عليا بالهدرة ونت مهناش !! مليوحة بين الرجلين ونتا مكاينش !! ولكن من بعد ملي بنيتي ليا سقف يغطينا بزوج وتفرش باللي تشهاه خاطري نسيت ، ملي شفتك واقف في وجه المدفع وكدافع عليا قدام القريب قبل البعيد بغيتك راجلي !! و بو ولادي وغطى راسي ،فرطت فيك مرة ويستحيل نعاودها ولو على قطع رقبتي ، ناضت بشوية وجلست فوق رجليه مقابلة عينيها مع عينيه وريحتها مخلطة بريحتو ونفسها متازج بأنفاسو بعيون مترجية وبصوت انثوي رقيق قالت ~ كنترجاك تغفر زلة لساني ل نطق بكلام مافيكش غير باش نغيضك حيت هنتيني !! نتا راجل و كيحنت الرجالة نديرك قدامي ونتمشى معاك براس عالي متباهية بيك زماني ، حطت ايدها على خدو ل شعلت فيه العافية، كنواعد لي تخسر خاطرك من هنا لقدام عمرها تكون قلتي شوفي ل بغيتيه في البيت وخوديه ، تا حاجة فهاد البيت ولا فدنيا غتساوي ظفر رجليك انا بغيتك نتا تكون راجلي وخويا وبا ونكون عكازك في دنيا …
كان كيشوف فيها بنضرات في شكل كيتسائل شكون هادي ل قدامو واش نفسها نجمة ل عاش معاها هاد ايام فبيت واحد ولا لحشيش دوخ ليه الراس ولعب عليه ، زربت عليه وشافت فيه بعيون راغبة فيه وطاغية عليها الحشمة ل كتناساها وكتعوضها بمواقفو معاها وبكلام ختها ل وراها غلطها وفيقها من الگلبة ، دفعت الجبهة وقربات من شفايفو وقالت عينيها على فمو ~ عمرني نفرط فيك مزال حنن قلبك ومتسمحش فيا ، انا باغاك وغنبقى نبغيك طول ما حييت فدنيا ، عمري نلقى بحالك حيت غير نتا بنسبة ليا ل كاين غلام واحد كتشبه لرلسك ومكاينش من غيرك ،حطات شفايفها الحمرين على شفايفو لي سخااااان بقوة العصاب ل كان راكبو وباستو اول بوسة تذوقها فحياتها ،بوسة ليها الف معنى ومعنى بوسة وحدة عذراء فالحب …
كان مغمض عينيه ومبنج من ملمس شفايفها ،تصدم من كلامها وجرئتها ورجولتو تحركاااات بلهلا يتبتو ليه، فصلت البوسة وشافت في عينيه وقالت ~ اليوم غنبرهن ليك بلي أنا ليك ونتا ليا وعمري كنت ولا غنكون لشي حد من غيرك ..
رجعتات لشفايفو باستهم وطلعت لعينيه عطاتهم قبلة اعتذار كل هادشي وهي واخدة راحتها وانفاسها كيخرجو ثقال وسخان ختمتها بقبلة في العنق خلاتو يجهل عليها وينسى راسو ومو ل ولداتو ….
انثى كاملة الأنوثة مهزوزة بين دراع شخص عطشااااان وللحلال طعم اخر !! قطعة ورى قطعة لاخر شرويطة، آهااااات مسموعة ،قبل متبادلة ولمسات وغزل خشن لشخص لا يفقه في الغزل حتى اسمو وحرارة أجساد فوق قدر مملوء حب وبالاخير صرخة الم ونشوة نهاو خصام وزعل لشخصين جمعهم القدر والنصيب باش يعيشو تحت سقف الحب
ناعسة وسط احضانو مغطين بغطا واحد اللحم على اللحم بدون حواجز ، موسدة صدرو وايدها فوق كرشو كتلعب فيها ،حناكها غيطرطقو بالحمورية والحشمة اما قاعها قصتو بوحدها، قناع الجرأة ل كانت لابسة تبخر كل مرة تعض على شفتها تحتانية لي كملات على ما بيها وهي كتفكر كلامها ل ميجي والو قدام اش دارت ، اما هو صوت دقات قلبها كان كيسمعهم من بعيد ، كان مرتاح ومرخي يد حاطها فوق شعرها كيدوز عليه بحنان ، وايد فوق ظهرها كيحركها طالع نازل منتاشي برطوبة بشرتها لي ما فيها حتى عيب ، واخد راحتو فملكو ل تملكو وبصمو بسميتو ابتسامة رجولية لابسينها شفايفو وعقلو ساااارح وفشنو كيفكر ؟؟ غير بوحدو ل عارف..….
قاطعت صمتهم وقالت بلاما تشوف فيه ~ غلام !! ،زير على لحمها بيديه الصلبة وجرها لعندو من خصرها زاد خشاها فيه وايدو كتلعب على شعرها مقوس حجبانو كيتسناها تكمل كلامها ، قالت وهي كتعوج ففمها بدلال عفوي ~ بصح غتعيط لخويا يجي يديني !!
بحركة صغيرة وبدون مجهود جابها فوق منو ،رجليها مخشيين وسط رجليه ، سالف العودة عندها نازل على وجهها وغطا صدرو ملاقي يديه على ظهرها ، وصدرها حر طليق قدام عينو ، عيونها سلباتو وخلاتو حط شفايفو بنهم على شفتها جيعان ومزال متعطش ليها وغير مكابر ،فصل القبل ونطق بعينين معسلين وبنفس دافي ~ شكون خوك !! وشكون غيخليه يديك ،هضرة ودازت!! من ليوم جنبي على جنبك وليتي تحت جناحي وعمرك تخرجي منو حتى ندفنك ولا تدفنيني …
زينت وجهها بضحكة وتمخشت فيه كتبربص فوق منو، نطق بقلب مرتاح وكطلب الله يديم فراحتو وقالت ~ الله يطول فعمرك مازال الحال متدفني دابا مندفنك حتى نشوفو ولادنا ونكبروهوم ويوليو قدنا
هز ليها راسو بأمين وحاول يتقاد في الجلسة وجارها تجلس قدامو ،غطاها بليزار مدفي جنابها من البرد حشمتها باينة من ترعيدة جسمها كل مقرب منها وحط يدو على ملمسها ،حناكها كيحس بسخونيتهم وصلات لعروق قلبو ، وانوثها الطاغية كترجع تفيق رجوليتو ل غير مكابر وخايف عليها من نزواتو وبحر الشهوة ل عاد دخلت ليه ،تنهد وهز ليها دقنها بايدو وقال بجدية مسامرو معاها مزال خاصهم يتطرقو
~ مغنهدرش فلي داز باش منخسرش خاطرك وفي نفس الوقت منسخنش الجمرة اللي عاد طفات في قلبي ول مزال دخانها كيخنق فجوفي ، أنا ماشي ديوتي ولا بارد الگلب باش نقبل كلامك ولا حتى كلام غيرك كنعرف مرتي ديالي مديال حد مباغيش يتگرن سميتها بسمية حد من غيري واخة يكون خوها ،أنا هاكا داير وتربيت هاكا مغنقدرش نتبدل بين ليلة ونهار ، سميه تملك سميه خرجان لعقل هادشي ل عطا الله ، حاولي تبدلي فيك ش حوايج كيما كتشوفي راه تبدلو فيا شلا حوايج معاك وهادشي كامل حيت انا باغيك وبدى الخاطر كيميل ليك ، عرفتي كون غيرك ل نطق بنفس كلامك كوراه حسب سنانو قدامو ، بالحق جيتيني نتي !! ليد تشلت قدامك ، نزلت عينيها بحزن ملي تفكرت ل وقع ورجع قابلهم معاه وبخشونة كيدوي ~ انا مباغيش نرجعو للور حيت ل داز دفنتو وفات ،حنا ولاد ليوم انا باغي نعيش معاك ل جاي مرتاح البال بغيت ملي ندخل مع هاد الباب نخلي غلام ل شفتيه هاد ليومين ونولي غلام ل حيييتيه ليوم داكشي علاش كنقوليك هاد الهضرة باش تسمعيها مرة حسن من عشرة ، مدرتش ليك زيف باش نفرض رجلتي عليك ونحكم فيك ابدا !! الزيف سترة ليك نتي ،ملي تكوني قدام الغاشي واخا يكونو غير عيالات بحالك زيفك يكون فوق راسك وملي تكوني معايا هنا فبيتنا لبسي ل عجبك وديري ل يحلال ليك ولا بقاي نتي گاع كيفما ولداتك مك هاكاك نيت باغيك هانا قلتها وللمرة الالف عدتها
حاجة اخرا الاحترام يكون بينك وبين مي وانا عارفك مربية وميحتاجش نوصيك ، حثيت العيلات ونبايزهم معندي مندير بيه مي عليك بالتيقار ظالمة ولا مظلومة أنا راه ماشي بو وذنين راه بحرف واحد كنعرف اشنو طاري وانا عارف كيفاش نهدر ووقتاش نهدر وحقك منخليهش ضايع واخا نعرف نموت ، حركت ليه راسها بالايجاب بمعنى ل قلتيها هي ل غتكون ، زهرة ختي قالت لك كلمة عطيها عشرة وانا عطيك الاوكي عليها والاخرين منضنش يوصلوك بشي حاجة
أما با هذاك تاج راسي وراسك خدميه كأنك كتخدمي باك الله يرحمو ماشي شرط عليك لكن راحة ورضى ليا ورحمة لواليديك ،وواحد خويا القنت لي يعمرو تخويه نتي الا ماعادا الا كنا مجموعين ، أما نتي!! فك خبال شعرها الذهيبة وهز خصيلات كبار حطهم ورا وذنيها وقال منهد ~ وليتي وغتبقاي ديما اللُّب زوين ديال حياتي ..
لمح ابتسامة جميلة ترسمت على وجهها عاجباها الكلمة ل نطق بيها ،سهاد شوية ورجعات تفكرات ل نغص عليها فرحتها ضيق عينيه وهو كيشوفيها بين لسانها هضرة باغا تقولها ومتردةة ، حط يدو على جنبها وقال بامر ~ خرجي اش عندك !! نجمة فركت شعرها بثوثر ~ وتصويرة شكون يكون حطها وبغى يفرفنا ،شاف في الفراغ عاض على فكو من لداخل كيتوعد ~ نتي غا رتاحي لياا ومتعمريش راسك بهادشي الصياد نعام يلقاها يلقاها
تكى على ظهرو مرتاح وهي حداه مخشية فضلوعو مدوزين ليلة مغينساوهاش بزوج
فايقة مع نبوري مكفظة على بيجامتها وجالسة في الارض رجليها بزوج مسرحاهم ووسط منهم قصرية دلعجينة ،جامعة شعرها ل باين من نواظرها حمر وبدا يشيب بزيف حياتي ،طوانگ الفروج في وذنيها كيلعبو معاها وهي كتدلك وتعاود حتى كطرطق عجينتها ، تكورها فهاد اليد وتصيفطها لوخرا كتنهج ، تفكرت نجمة ل كانت تگلع الحاجة من يديها وديرها فبلاصتها كانت هازة عليها الحمل تاع دار ومتعرف معاها فشقى غا شي حاجة قليلة ، حركت راسها كتمتم بين شفايفها مشوش تفكيرها وواخدة بالها شنو دارت وباش فكات حريرتها مع راجلها ، لكبدة تهولت عليها واخا ماشي بنت كرشها ولكن بنت قلبها ، ل تبغيه لخديجة غتبعيه ليها فوق من نفسها كتقصى عليها حيت عارفة مغيدوم ليها غير راجلها ودارها شحال قدها تبقى تتلاوط وتضرب تمارة صحة مكدوم وزين كيبقاو غا حروفو ، لا خو غيعقل عليها ولا خت غتدوم ليها اللهم تدگ وتاد خيمتها وتعمرها الا كتب الله وتصبر ، هذا هو زواج فيه غا ساعة ليل ل زوينة اما سوايع لوخرا كيبغيو صبر وكلها وشنو هزات ليها مغرفتها ….
وقف عليها عبد الله كان خارج من بيتو مبكر لابس ومقاد لاح عليها سلام وتقابل مع لمرايا، قالوها هم ينسيك فهم ، هم نجمة نساها الهم ل كيتسناها ،هادا هو حالو كيوجد لخطبتو بيديه كيعمر برا كثر مكيعمر لداخل ، غطات عجينتها هازة يديها وعاطياه مشي الا كانت ديك لمرايا ل مقابل معاها تدوي تجاوبو فاطنة ، جمعت الوقفة معكزة على السداري بمرافق يدها وهو يعاونها ..قلبت عليه وجهها نفسها حارة ومراضياش على زواجو وفقصتها تعاودها لحفار قبرها ، قاطع طريقها كيدوي بنرفزة ~ وا الولليدة ل عطا الله عطاه وعلمتيهم على نهار الخطبة مكاين لاش توحليها ليا فرحي ليا راني ولدك ماشي عدوك ، زواج كتبو مولانا وبنت خوك هي ل مكتابة ليا
شحال هربت من نسوبية عبد الهادي ولقات راسها فلخر واخدة بنتو ، كيفاش دخلات لدماغو نجاة ل عمرو فكر فيها كمرا تعمر دارو ، من نهار شد ركنة ومرض هزيتي عبد الله وحطيتي واحد اخور بلاصتو ، لبنت ل كان حاسبها بحال ختو عاد بانت ليه مرا ومابحالها وحدة خرا ، ولا يدوي عليها وباغي يتزوج بيها ليوم قبل غدا …لوا ليها يدها وذراعها ومشا لعند خالو وفاتحو في موضوع بلا شوارها وشنو يدير لميت قدام غسالو خالو فرح بيه راجل لبنتو وهي عيات ترجع ليه عقلو لراسو خسر عليها كلمة وحدة يا تمشي معايا في خطبة وفجنبي يا نمشي بوحدي وعمرك تشوفي وجهي
عبد الله بنسبة لفاطنة ولدها اللول وراجلها بعد المرحوم كتبغيه كثر من خوتو واخا صباع اليد كاملين بحال بحال ولكن كيبقى هو غيرهم هز معاها حمل خوتو ومسؤوليتهم وبلاصتو فقلبها بوحدها ميعمرها حد ، متقدرش تخسرو ، فوق من قلبها واخا گاعما راضية على هاد زواج غدير ليه الخاطر ودير معاه صواب حتى يصاوب الله من عندو ..
بعدتو من طريقها ودخلت لكوزينة كتقلب في ثلاجة تالفة على شنو كانت باغا دير ،قالت ضاغطة على نفسها ~ تا دابا الله يكمل عليك وعليها ويتاويكم للخير !! غنكويها اولدي جمرة فقلبي ونرسم ضحكة بلعاني ونزغرت اول تزغيرتة ولخرة في حياتي حيت غادا بيك للعافية
عبد الله گرن حجبانو وقال ~ اعوذ بالله من شيطان الرجيم !! اش هاد الهضرة امي ؟؟ شكون دارت ليك لبنت ل مكتحمليهاش
فاطنة ~ مدارت ليا مدرت ليها ل بغيتيه هانتا وصلتي ليه وسبت خطبتك وعقدك عليها ولكن من هنا نوصيك نتا ومرتك وخليني مع دمي فتيقار متجيش على شيبي تحاشمني معاه بالحق الهضرة ماشي هنا !! لهضرة لهيه قدامكم بزوج واسير قضي الا عندك ميتقضى خليني فشغالي
على قلة لعيالات ناس يعدو من دمهم واحد طلاني بيه
صباح ماشي بحال باقي الايام !! صباح مكانش كيستناه غلام…. قبل ميذكرو ليه حس زواج عمرو حلم ولا نوا يدخل لمعقول ويصبح ويمسي على وجه لمرا ل ختار باش تكون شريكة حياتو ، بالحق من نهار تزوج وتگرن معاها تحت سقف واحد، كأي رجل شرقي ستنى نهار ل يكمل زواجو منها ويذوق حلاوتها ، أما نجمة عكسو ملي كبرت وحست بجنابها وبأنوثها وكأي بنت مادة ايديها للحنة كانت كتسنى هاد صباح امتى يجي ويدوز كيف بغات وبلا عكوس وربي مخيبهاش
فاقت قبل منو كان ناعس منشور على كرشو وايدو حاطها على كرشها مغيب وغارق فنعاس ،تبسمت بحياء وهيا كتفكر ليلتهم كيفاش كانت وزعامة ل معرفت منين جاتها واخا هيا غير بدات وخلات الباقي كلو عليه بعدما جرأتها تبخرات ملي بداو في المعقول والصح …
حيدت لغطا وتسلتات من تحت ايدو بلاما يحس بيها هزات بيجامتها من الأرض تسترات بيها وزيف حياتي ل كانت خشاتو في المجر ول كان عليه عربون عفتها وطهارتها ودم وجهها ل بقات محافظة عليه خمسة وعشرين عام بلاما تتغر ولا تنجارف بإسم الحب ، بغاتو ليها ذكرى توريه لبنتها وتبقى تتفكر بيه ليلتها اللولة ،مشات لماريو خزناتو بين حوايجها وهزات فوطة وبيجامة دافية وطويلو وديريكت مشات للحمام …كتخطوي خطوات بطيئة ،عاد رجع معاها حر العسل ل داقت البارح ،دوشات واغتسلات وكل قطرة كتنزل على داتها ليها معنى وإحساس جديد ، ولات إمراة كاملة مكمولة دابا وفحياتها رجل ل تسقيه حب ويعطيها اهتمام …
كملات وخرجات لبيتها تاني بلا حس تأملاتو كان مزال ناعس على غير عادتو وجهو مرتاح وتنفسو عادي بقات كتشوف فيه وكتشكر الله على عطاياه راجل تمناه اي بنت وكيما كنقولو كامل مكمووول والكمال لله وحده ،كتحرك في البيت بحال الفراشة كتجمع الحوائج لي كل بياسة فين مليوحة بحالا كانو فحرب ،حرب كتكون من ثلات حروب …ج=جماع ن=نفس=س=سرير
وبين الجيم والسين اهات وحدة كانت عاطشانة للغرام وشخص مفتقد للاهتمام والحنان …حركة من هنا وهنا حسات بيه تحرك وحل عينيه ل كانو عليها لكن مقدراتش تشوف فيه دارت براسها كتخمل والبيت نقي حنحن وتفوه بصوت مسموع وناعس وقال ~صباح الخير
جوبتو بصوت خافت بالكاد سمعو شاغلة راسها بلاشيء ،
مد ليها ايدو ونطق بعدما تگعد شوية وتصاوب في جلستو ~ اجي عندي !!
قلبها بدا يضرب والفرحة تسلات ليه ،قربت منو كتمشى بشوية وغير تمكن منها جرها حتى طاحت على صدرو وطاحو معاها خصلات ساردين من شعرها ، زير على خصرها نص في بيجامتها ل لابسة طلعت مع يدو وعرات على بياض لحمها ل بان ليه من جديد ، الفراشات كانت كتحس بيهم كيطيرو فكرشها ، حسات بسخونية فحناكها كضحك بعينيها وتشوف ليه فعينيه ل كانو غياكلوها ~ قلنا صباح الخير !! ضربها بغمزة وقال ~ ولا نقولو صباح السر اللي نازل عليك
معامن كيدوي وفيمن كيتغزل، نجمة الله يرحمها مسكينة فين اللسان ل يجاوب الزعامة مشات مع هاديك لي خدا البارح ، كان غلام مدور خصلات من شعرها على صبعو كيلعب بيهم ومضيق عينيه كيشوفيها قربت تسرط قنانفها~ كندوي مع الحيط ولا شنو !! علات عينيها وأخيرا جوباتو بصوت مبحوح ~ صباح النور وتيسير !!
غلام هز حاجب ونزل لاخور ونطق ~ صباح الحرفي معنديش معاه جرها لعندو بمعزة ودرعها وباسها في راسها بوسة طويلة بوسة احترام وتقدير ، مينكرش عجبو الحال وبحال گاع رجالة كيبغي يكون اول واحد لشريكة حياتو فالفراش ، كيبغيها تكون ليه عذراء الجسد والمشاعر الاولة مهم والثانية مع الوقت كتقاد ، دورو دابا يخلي قلبها ليه ويمحي من بالها اي ذكريات اخرا يزاحموه ، فصل القبلة بلاما يسخا وقال ~ غنوض ندوش ونهبط نشوف الواليدة ومن بعد مزال لينا كلام بغمزة وكثير …قاليها بأمر ~خليك بلاما تنزلي غنقولهم يطلعو ليك الفطور ولا نجيبو ليك معايا ملي نكون جاي مشهية شي حاجة ؟؟
هزت راسها وقالت بنفي ~ لا لا غير خليني ننزل معاك نوجد لفطور … شاف فيها مقاطعها بتخنزيرة ~اكره معندي نعاود كلامي قلت متنزليش يعني متنزليش ممجبوراش تدخلي كوزينة
قالت مساعفة مكتبغيش صداع وأكره حاجة عندها يهبط عليها شي حد عينو ولا يدوي فظهرها وهادشي الا وقع الا منزلتش الاسىلة المحرجة والصداعات الخاوية مناقصينهاش باغا تعيش مرتاحة وبسلام نطقت بعينين مترجية مزوقة الهضرة وكتلوي عليه فلسانها ~ نوو ماشي خدامة غير انا ل بغيت نوجد ليك فطور بيدي ولا مباغيش ذوق اتاي ديالي
حرك ليها راسو عايق وقال مخلينا على خاطرها ~ واخا الالة
حيد الغطا عليه ووقف مسفح قدامها مخاصو حتى خير دور عليه الفوطة وقال وهو قاصد دوش ~ سبقيني وانا نتبعك !!
قادات حوايجها جمعت شعرها ولاحت عليها زيف ممخلية حتى زغبة تبان لحكام وميدير ، هبطات لقاتهم عاد فايقين من نعاس رحمة فلبيت كتجمع لمانط وخليفة جالس في صالون بعدما ولا شوية ،عبيد ومريم معليهم حرج ناعسين اما لكبيرة جالسة وحداها زهرة ل صبحت عليه مع نبوري جايا تضور عينيها كي البومة ،بابتسامة مشرقة وملحة وسر باينين على وجهها رمات سلام ودخلات باست على يد شيخها وطمنت عليه وخرجت للكوزينة تحت نظرات زهرة المصدومة
منورة وبحال الوردة كتدور في الكوزينة بخفة هرمون سعاد كان فالعالي ، وجدت اتاي على حقو وطريقو وبالخاطر صينية ودوازها مقاد من كلشي ليه خبز وزيت وزيتون وكل ما يخص لفطور ، كانت كتسربي وتحط فوق طبلة بحب وعينين العدوة عليها ، جايا تسوق لخبار عند بالها غتلقاها مغبونة وتبكي ساعة انقلب السحر على الساحر لقاتها في ابهى حلة وأحسن حال ، مجات فين تدخل رحمة لكوزينة تعاون نجمة حتى لقاتها سالات ووجدات ولفطورها حطات ، مشاو جلسو جميع فصالون والكبيرة كتقلب وتشقلب فداك البراد وعينيها غير مضيقاهم على عروستها حست فيها شي حاجة مبدلة وعلى خير عادتها ، لهنا وراحة البال والقلب الا كان مرتاح وناشط كتبان على وجه مولاه ، كمل غلام لزهرة لباهية بعدما شافتو نازل ومقاد روايحو تشميها من بعيد ولاول مرة غوباشتو مطلوقة، شبه ابتسامة باينة على فمو جاي وكيقاد فشعر لكتيف ولحيتو ل مزال عليهم اثار لما ،عينيه حمرين باينة فيه كان فسخون
رمى السلام وعليكم تحت نظرات الكل عليه لكبيرة كتشوفيه بعين المحبة غا كيبان ليها كتنسى كلشي وتقول لعيد غدا ، دخل لعند باه جلس قفازي بعدما باس على راسو وتحنى شد يدو بين ايديه كيبوس على ظهرها وكيسول فيه بإطمئنان ~ بوويا !! عمارة دار وهاكا نبغيك جلس وسط منا وعمر علينا مكيجيش معاك المرض !!
حط خليفة يدو لوخرا على راسو وفرحتو متعطى لحد كيطبطب عليه وكيتكلم ~ الله يرضي عليك اولدي ، نتا خليفتي والا خويت دار بيك وبوليداتك تعمر
غلام مكيبغيش يسمع هاد الهضرة واخا لموت علينا حق وقف منهد وقال ~ الله يطول ليك فعمرك حتى تهزهم فوق كتافك …
داز لعند مو عارفها هبيلة ونص عقل تغير عليه من نفسو ماشي غا من باه ، باس على راسها ودا رضاتها ، زهرة تخطاها بحال ذبانة كأنها مكيناش الا جفر على شي حد كيسد عليه في خطرة كون ما باه ومرضو يجري عليها ولكن مود ديالو فالعالي مغينزلوش بيها ، تحرك يجلس حدى نجمة لقا رحمة عمرت لبلاصة بلاما يقول عيب ولا حشومة وقف عليها وقال ~ ختي رحمة طلعي لهيه نريح فبلاصتي
بتاسمت ليه وناضت مخلياه حدا مرتو ، جلس حداها هي ل سردت بالحشمة طلعت معاها لكربة حتى حسات ذاتها كتفور ،منها ليه وباقا كتحاول تقبل معاملتو جديدة ليها اما قدام ناس غيغرقها فارضها ، جلس ملاصق عليها قرب لجهة وذنها وقال بصوت كيسمعوه غير هما بزوج ~ نتي ل عمرتي اتاي !!
حركت ليه راسها بلاما تدوي ،عطاها ابتسامة جانبية وقال لمو ~ اش كتسناي الواليدة كبي نشربو ؟؟
عطات لكل واحد كاسو بداو يفطرو تحت صوت غلام وهو كيجغم فكاسو وكيتبنن ووحدة حداه مكرهتش تنوض قليل ل داها فيهم وفهم ما عادة زهرة ل كانت كنتفرج فلفيلم لقطة بلقطة ممفلتة حتى حركة ، كيفاش جالسة نجمة وكيفاش غلام كيشوف فيها وتبسيمة ل مرة مرة يرسمها على وجهو وهو ل من ديما صابح مقطوع وعاقدهم ، ل يشوفو وهو كيهرس في الزاج وباغي يضربها بقرعة ميقولش هو هادا ل جالس كيفطر مرتاح وسط الصالون قالوها على وجه شي كيدوز شي
~ سلعة مبقاتش شفت محطوط لا لوز لا گرگاع ولا داكشي كيشوفوه غا ضياف حنا معليناش الله ، قالها غلام موجه
قالها غلام موجه هضرتو لرحمة ،جوباتو لكبيرة مضيقة عينيها بتساؤل ~ ومن امتى اولدي كتاكل هادشي !! ونتا كي كنحطوه ليك نهزوه
جمع الوقفة وقال ~ حقي عطيوه لمرتي !! مهم انا على برا كبي شي دكة والا خاصة شي حاجة ارحمة قوليها دابا قبل منخرج على برا عاد تم جايا تنقزي لعندي
رحمة كانت هي مولات دار لكبيرة متعرف معاها والو ،گاع ل مخصوص في كوزينة كتعرفو، جوبتو فمها عامر ~ كلشي كاين اخويا ؟؟
لكبيرة قالت وعينيها على نجمة وفنفس الوقت كتسمع ليه ~ قلتي ليه على خطبة خوك !! غنمشيو ولا لا غير باش نديرو بحسابها وناخدو لكادو ونكبرو بختك كيف جات لعندنا تعرضها وكبرت بينا
نجمة هزت عينيها فغلام ل ضيقهم بعدم فهم وقال ~ اشمن خطبة وامتى جات ختك ، بغات تدوي مو وهو يقاطعها مهم من بعد نخرج نكمي ونجي
مشا وخلا عينين ختت عليه اتاي وحل ليها كلشي كيفطر فخاطرو الا هي جمعة الوقفة مها كتدوي معاها وذنيها كانو مصمكين مكتسمعش حلات باب زنقة وخرجات مسلتة قصدت دار ل بغات انفوا تحل عليها الباب ودخلت وهي تجلس فوق درجة كتغوت ~ قلنا ليك كتبي شي حاجة فرقيهم ماشي قربيهم !!
الخاوة حدها الدنيا !! هاد المثل ل مكتعرفوش زهرة من نهار وعات على راسها فدنيا وهي انانية كتقول غير أنا ومن بعدي طوفان ،تسبق راسها على خوتها ومها ومتعقل لا على بعيد ولا قريب متوقر لا كبير ولا صغير ، كلامها حاار تعطيها ليك قدامك ووراك بلا حشمة بلا حيا ، الوحيد ل دايرة بحسابو شوية هو غلام حيت كان بحال بنك بنسبة ليها كتعرف منو غير بغيت وولادي خصهم، تزوجات راجل درويش حگرت عليه ودارتو خاتم فصبعها كتمشيه كيف بغات من ديما كتخدم ليه مكفناه باش يبقى غا ساكت ،خلصتو كتضربها فجيب وكتنطز على دارهم ، هازها غلام من كلشي ليها تقديتها توصلها كاملة مكمولة تاكل ويشيط عليها وتعيق بصدقتها علامن بغات ودابا معقلتش عليه مقالتش خويا لحنين ضرب علينا تمارة وجا الوقت يرتاح ، عاش مجلوق وجات لمرا ل تونسو فحياتو ، كبر نفرحو بيه ونشوفو وليداتو ،لا حسداتو على ضحكة وعلى لمرا ل عمرت عليه بغاتو يبقى تحت يديها ومتجيش ل تشاركهم فرزقو ، بغات ديرهم كاملين تحت صباطها وتمشيهم بصبعها صغير بالحق طاحت فنجمة حرة الا كان المقص يدي من ضس تدي منها هي ….
صبحت على صباح حاطة يدها على جنابها وكتنفخ وتصوط وعينيها كيقطرو بسم ،جايا فرحانة تنطنز وتشفى رجعت هي ل شفايا ، قالت بالغوات مخرجة عينيها فيها ~ قلنا ليك كتبي هضرة شعلي فيه العافية ،يقراها يهرسها ، فرقيهم ماشي قربيهم ، سيد مصبح علينا مبسم باينة مشبعاه فليل وهي حداه حناكها معصورين بدم عولت عليك وتحزمت بيك ساعة كنت غالطة !! بإحتقار قتلت ~كون كانت منك الكاينة كوراه معاك، متجيش وحدة بنت لمعامل تلوحك لتوش وتبرع فخيرو ونتي ديتي معاها هذا ،صبعت ليها وجلست على درجة صدرها كيطلع وينزل بالغدايد ،كانت زوينة واخا زين زين لفعل عامرة ومربوعة القد وجها داير وعاطية للعين ، جلست حداها صباح رجليها مشللين كانت كتسنى تسمع كلام يفرحها صدقت منغصة بتساؤل شافت فزهرة وقالت ~ معرفتيش شنو وقع ،كوراه مشافتش تصويرة
زهرة جبدت مسكة لاحتها في فمها تسرط بيها الفقصة ~ شاافها وشفتو بعيني !! تبعتو حتى هزها من بين لحوايج وسمعتو وهو كيغوت وصداعهم وصلني ، قلت غنجي نلقاه وصلها لباب دارهم وتفكيت من كمارتها،ساعة لقيتها واقفة فوجهي وكيضحكو مخاصهم خير
بدات تبكي وتنزل فدموع الدل ، دموع وحدة بلا كرامة باغا فيمن تلصق ~ خوك مشاا من بين يدي ازهرة ختي!! داتو ليا الكافرة بغبت ليها رزية !!
وقفت زهرة دماغها سارح لبعيد وكيخمم ~ هاد المرة غنعول على راسي منعول على حد وديك ساع الامجاتك خبارهم راك مكتعرفينيش
وقفت حداها بأمل باستها على جبتها بترجي وقالت مطمعاها ~غير فرجيني فيها ونتهلى فيك !! والله اختي حتى سنسلة ذهب ناخدها ليك عمري بيها عنقك
عوجت فيها فمها وقالت بجشع ~ هاحنا غنشوفو !!
هادي هي زهرة من نوع ل كيبغي ل يكبر ليه شان ويلحس ليه الكابة تحزريها وتشري وتعطيها ، تديها لحمام وتعرضي عليها وتكبري بيها عزيز عليها تبان على ظهور عباد الله ،عندك نتي حبيبتها ونور عينيها معندكش متخسر عليك حتى كلمة مسكينة ، تربات في الخير وولات اكبر جيعانة مكتشبه لحتى واحد من قبيلتها كتشبه غير لراسها
وقف على برا شعل گارو المورال طالع ليه هرمون سعادة مأكتيڤى ،سف الدخان وهو كيتفكر مولات السالف ل ولات مرتو ومسؤوليتو ل عاد حس بيها كثر وبدات تسرا فدم ،تحرك لجهة طوموبيل قصد طريق المارشي ، يد سايق بيها ويد شادة الگارو ، الرجولة والشموخ عنوانو والطولة والتجريدة هيبتو نزل بعد ما شاف مول الفواكه الجافة طلب منه وهو كيضور عينو على الطبلة ~ عمر ليا من هنا ثمر مزيان اغلى مكاين ومن هنا خلط ليا اللوز مع الگرگاع والبيسطاج كيلو من الحاجة
نطق العطار وهو فرحان صباح زين الله يجيب ليه عشرة منو بسد ويمشي بحالو~ مرحبا مرحبا هي لي متعاودش ،مد ليه شوية لوز وتمر وگرگاع يذوقو ويولفو المحل ، اكتفى بثمرة مبغاش يردها فوجهو ،خاشي يدو فجيبو مخنزز تقول ماشي هو لي كان من شوية كيتبسم ، نطق ورجع قاليه بأمر ~ عرفتي شنو زيدني نفس هادشي وديرهم بوحدهم فميكة اخرا
قاد ليه ل بغا خلصو وهز الميكات ل كانو عامرين حطهم في طوموبيل ورجع ضرب دويرة يشوف شنو كاين مازال ، اشمنك يا ديسير اشمنك يا سقاطة خداهم لدارهم ول عزيز عليه …رجع لدار بعدما شرا وتقدى مع نزل من طوموبيل هاز ومحمل تم خارج عبيد من دار ، حيد غلام نظاظر من عينيه وقوس حجبانو فيه وهو كيقرب منو وخوه حادر راسو حشمان عاد فايق من نعاس ل خدم رجع ول بايت عساس فاق ،تحنى يهز معاه وهو يوقفو بيدو وقال بكلام قاصح كيف ديما ~ غا خلي انا نهز مازال بكتافي الحمد لله نخدم فيهم !! طلعو ونزلو باستهزاء مخسر فيه سيفتو ،كندوي معاك بحالا كنكب لما على رملة انا حشمت ونتا لا كتافك قد لبغل وصابح ناشر رجليك فدار ،بنرفزة سولو ~ واش مباغيش تتقاد ؟؟
عبيد بصوت منغنغ بحالا باغي يبكي نافخ ريشو على لخوا ~ واخويا كنتسناك تجرني معاك !! سولت عليك يومين مكنتي فدار غابر
قاطعو هضرتو ممدخلهاش لراسو عارف كتافو باردين ميقد على والو ~ طريق الگرنة راك عارفها نجرك ذبيحة نتا !! ولكن بسيف جيب معمراه ليك ل مضسراك، كون كان خاوي كون لميكة بعتيها ، قال جاعر ~ غبر عليا كمارتك صباح لله !!
دخل لدار كيتمتم بين شفايفو قشعتو لكبيرة من الصالون ل كان اونفاص مع باب زنقة بان ليها محمل وهي تشرع فمها وقالت كتسمع ليه الهضرة ~ الله يجيك الخير اوليدي بصوت عالي كتغوت على بنتها ، رحمةةة خودي تقدية من عند خوك
خرجت رحمة كتجري لباب كتسمح فجلايلها ~ اويلي يا خوية غير عيط نهبط نهز معاك ؟؟
مد ليها زوج ميكات وشي لاخور خلاها فيدو و نطق ~ مكاين لاش تهبطي عندي مالي مگرووووض غير الواليدة الله يهديها !! انا طالع لبيت ،بتساؤل نجمة معاك ؟؟ جوبتو براسها وهو ينطق قوليها تجي لعندي بغيتها !!
نطقات وعينيها على لميكات ل معمرين يدو لفضول ودخول الصحة باغا تعرف شنو فيهم ~ واخا خوية انا نعلمها…
طلع مع الدروج بخطوات ثقال ، مخلي رحمة متبعة ليه لعنين كتبرگگ ،كل وحدة من خواتاتو كانت بخبيزتها وهادي كانت فضولية وتعرف شنو واقع فيها شوية من توصال لهضرة بالحق كتخاف وغالبة عليها عاطفتها ، غير غبر على عينيها وهي تدخل تقدية لصالون وحطاتها حدى عينين لكبيرة ، لي غير شافتو طلع سولاتها باهتمام~ شنو دا معاه فيديه؟
نطقات رحمة وهي كدور فيعينيها راسها ضارها~ معرفتش شنو فيهم مهم باين داكشي ثقيل امي !!
خطفات الكبيرة الميكات كتقلب اش فيهم ورجعات سولاتها~ وشنو بغى سمعتو طول معاك الهضرة ؟
جلسات حداها باغا تشوف شنو جاب ~ بغى نجمة قاليا كلميها
قوصات الكبيرة حجبانها معبسة ومعاجبها حال ، ونطقات وهي كتنيم فعينيها ، ~ امممم ميكون غير جاب ليها من هاد الخير لي عطانا ،حنى ل كثار جاب لينة غير هاد الشوية وبنت فاطنة ل بوحدها عمر ليها ميكاتها بوحدها ، اوى شي يولد ويخرق ويوكل ويربي وحدة جات خذاتو واجد كامل مكموووول
نقبات رحمة من اللوز وناضت طايرة ~ خليني نمشي نعلمها طلع عندو قبل مايبدا يغوت علينا تاني
مشات كتجري كانت نجمة كتكمل في الغدا ،كطير منها وتقاد من هنا حتى وقفات عليها رحمة خلعاتها ~ نجمة ختي طلعي عند راجلك بغاك !! حطات شنو فيدها بزربة فرحانة ومسحاتهم وهي كيطل بعينيها ~ فيناهو !!
رحمة وهي مكملة على شغلها ~ راه طلع سيري لعندو !!
جوبتها بابتسامة خفيفة ، وخرجات من الكوزينة طالعة فالدروج غير بشوية ، خدودها حمرين بالسخونية ديال البوطة ، لقاتو متكي فالناموسية ويديه بجوج طاويهم مور راسو كيتسنى فيها ،شافت فيه حشمانة وهي كتقرب منو وقالت بعدما عدلت من نبرة صوتها ~ قالت ليا رحمة بغيتيني
عينيه كيتساراو على وجهها براحة ، ارتباكها وهي حداه كيسالي معاه ، شير ليها على الميكات وقال~ شوفي شنو فيهم !!
بحال البنت صغيرة رسمات الضحكة على وجهها وحلات الميكات كتجبد الحاجة بختها جاب ليها داكشي ل كيعجبها ،فرحت وقالت بدلع عفوي ~ شكراا بزاف هادشي ديالنا وخالتي معطيتيهاش
ناض مقرب لعندها تحت نظراتها عينيها ل بداو يلمعو قال وعينو على قوامها الممشوق ~ داكشي ديالك حقهم راه وصلهم بحالك بحالهم ، هادشي خليه حداك هنا ضوري وكولي يجيك جوع بليل انا مكاينش مكاين لاش تنزلي هزي وخودي حتى نضبر فشي ثلاجة صغيررة نخشيوها هنا فلبيت لبغيتي تبردي شي حاجة !!
عجبها الحال وبزاف داكشي ل كتفكر فيه كيقراه قبلها حقاني وهادشي ل عجبها فيه ، كل واحد حاطو فمرتبة ل خاصو يكون فيها ، عاد بدات كتعرف شنو هو دلال بوجودو وشنو معنى يكون عندك سند ورجل يفكر فيك يخرج ويجيب ليك ، يمد ويعطيك قربت منو بلاما تحس وحاوطت ايديها على خصرو تعلات على صباع رجلها وعطاتو بوسة في الخد خلاتو يترفع ~ الله يخليك ويديمك عليا نعمة عمري منتحرم منها ياربي
حسات بتنهيدة طالعة من أعماق صدرو ، مكانش كيتسنى منها هاد الهضرة بنسبة ليه هذا واجب مولف كيديرو وعمرو سمع عليه لا جزاء ولا شكور
ليلة أخرى من ليالي الحب جمعاتهم من جديد ، جسد هائج عيون تشع بالرغبة انفاس ساخنة وآهات حب تنبعت من وسط عُشْ الزوجية ، كانت ناعسة ومخشية وسط من صدرو بلا حتى شرويطة مغطيين بغطا خفيف وشعرها مطلوق حداها كتلعب فزغب صدرو بيديها ، بلمسات خفاف، عينيها مغسولين من النعاس كيلمعو وكيشوفو فالفراغ وسارحين مع خيالها ،كلها وربي شنو كيعطيه ولي زرعتيه تحصدو ، كانت باغا و متمنية عيشة هانية وراحة البال… دراع قاصح فين تخبى وصدر حنين فين تحط الراس ، وتحمد الله وتبوس يديها بزوج صامت حتى صامت و فطرات عليه راجل قاد بيها بالفم والذراع لقات فيه الدا والدوا ل جا يضمد گاع جروحها ، ويهز معاها ثقل ل حطاتو الدنيا فوق كتافها ، خلاها مضرب حساب لا لغدا ولا تفيق تضرب الكرفي مع السروية جلسها معزوة مكرمة
قاليها يا بنت الناس انا ماشي خانز مال ، عند لي يعييشك واكلة شاربة ومينقصك خير معايا ، قالت ليه نجمتنا الغالية واش ندير بخنز الدنيا وانا عندي سيد الرجال ل صيفطو الله كعوض ليا في الدنيا !! زوج صالح قاصح وفنفس الوقت حنين ، فلوسو دايرهم فجيبو ماشي فقلبو ، كيشعل على نقشة وفرمشة عين كيطفى قلبو بيض ونيفو فسما الزين زوين حاجب وعين ….
حسات بحروشية يدو ل كيدوزها على ظهرها المكسي بذراعو، منيم عينيه وحاس بهمووم دنيا فهاد اللحظة غابو من عقلو ونزاحو ،مرخي و عاجبو الهدوء والراحة لي كيحس بيهم معاها ، ملمس يديها الحنين لي فوق صدرو رفعو لدنيا جديدة عمرو عرفها كيف دايرة حتال بين يديها ، بينو وبين حضن حنين يتكى عليه من زمان ايام كان ولد صغير تعييه دنيا بتلاويحها ويقصد مو تطبطب عليه وغير كبر وصوتو غلاظ قصح قلبو ودفن إحساسو حتى جات ل تحييه فيه …دازت مدة من الوقت عليهم على نفس الوضع ، فتحت عينيها هي لولة ل غمضو بلاما تحس كانو معسلين وحناكه حمرين بسخونية ، مزالا بين قبضة يدو علات عينيها كتشوف فيه كيف مغمض لحيتو كحلة وقوية ، حطات يديها على وجهو كدوز عليه بحنان وكتلعب بزغب وجهو حل عينيه فعينيها نيشان ،عطاها شبه ابتسامة وقال مضيق عينيه وهو كيلعب ففروة شعرها ~ شوية دابا رتاحيتي ؟؟
جمعت رجليها وجوبتو كتحنحن وهي كتقطر بالحشمة ~ ها اه مزيان !!
زاد زيرها لعندو بتملك من خصرها ورجع غمض عينيه ونطق باهتمام~ فوقاش كاينة خطبة خوك ؟
هزات راسها فيه لقاتو مغمض عينيه ستحلات يديه لي على شعرها ونطقات ~ فهاد السيمانة !! سكتات شوية ورجعات كملات ليه الهضرة كتعض على شفتها مضيقة عينيها خايفة من جوابو ، بغيت نمشي قبل بشي يومين نوجد معاهم ومنها نعاون ختي !! شنو بان ليك ؟؟
نطق ببرود بلاما يفكر مرة اخرا وقال ~ لااا !! نهار الخطبة ونديك في صباح ونجيبك فلعشية ، شافها غتحرك شفايفها وهو يوقفها قبل متبدا وقال ~ بلاما تعيي راسك بالهضرة مكتعاود غير صلاة على نبي ، طلق منها وتگعد كيقاد ظهرو على كادر ناموسية وفنفس الوقت كيدوي بجدية وبنبرة صوت ضعيفة ~ كلمة وحدة عندي غيرها مكاينش تمشي وترجعي فنفس النهار
بلعت ريحتها مدببة معاه مافيها ليشد ضد خايفة منو يجلسها فخطرة يديرها ويفوتها وهي كتجمع شعرها الطويل هازاه الفوق مخلية عنقها يبان قالت بنبرة مغايرة على باش دوات معاه ~ واخا ل بغيتي
تنهدات ونطقات بواخا ل بغيتي فوق قلبها وخاطرها مخسر ، مكرهتش تمشي لعند ختها توقف معاها وتعونها وتشوف شنو خاصها عارفة العين بصيرة واليد قصيرة وفاطنة وولدها على قد الحال والخطبة خاصها فلوس وتوجاد والبركة ل عطاها غلام فصداق باقا مخبياها ومكاينش ما حسن من فاطنة تعاونها بيها ، ولكن معندها مدير حْكَمْ القاضي ومعليها غير ترضخ ليه ،جات بغات تنوض تلبس حوايجها ل كانو مليوحين نص عند رجليها ونص فالارض وهو يدورها لعندو من ذراعها مخنزر وقال ~ شفتك دغيا عگدتيهم اش كاين !!
هزت كتافها وقالت باغا تسلك معاه الجرة ~ مقلت والو !! غير جاني البرد بغيت نلبس عليا
هضر تحت من سنانو ونطق بسميتها ~ نجمةةةة !! راه حنا ماشي ولاد صغار تفگعي على سبة ،كاينين شي حوايج باينين يله قلنا بسم الله وبغيتي تمشي تجلسي عند ختك خوك يعمر فراشو وانا بغيتي تخويه ؟؟
ضحكات بلاما تحس وقربات منو كثر وقالت برضى ~ حاشا واش نخوي لفراش، انا غير قلت نمشي قبل بيومين نشوف ختي اش عندها واش خاصها معندهاش من غيري ومعندي من غيرها ، بحزن كملت وقالت ،اخر مرة جات لعندي هو نهار ل تخاصمنا فيه كانت جايا تعاود ليا على خطبة وملي لقاتني فداك الحال مقالت حتى كلمة خرجات مقلقة وخاطرها مغير داكشي علاش قلت ليك هاكداك ولكن صافي نسا ، تكات على صدرو كتمخشش فيه بحال المشة وقالت ،وديرني مقلت والو كلامك هو ل غيكون….
قالو ناس الزمان الصلح كيكون بين المضارين والمشادين في باب المحكمة الا الراجل والمرا صلحهم كيسالي بحديث الوسادة لي فيه كتنسى الشهادة وفيه كتسالي العداوة وتجي موراها المحبة والحلاوة اللي كتكون غير مخزونة حتى يتلقاو في فراش واحد وتم فين كيولي السر ديال زوج الناس واحد وفيه كيتفك اي سحور وعكوس وقالو ناس زمان ثاني لي كيتخبى على قيد القدا كيجيبو المقدم في ليلة مضلمة وعلى غشا مخدة ….نجمة قدرت ترطب غلام بكلمة فوق مخدة وتعنيقة وخلاتو يلين ويجبر بخاطرها وهاهي دابا لابسة ومقادة وغادي بيها ليلة قبل عند ختها ، وقف قدام باب دار فاطنة كانت لعشية عاد جاي من الخدمة باقي بلباس الگرنة ولعيا باين على ملامح وجهو ، حجبانو ملاقين وعينيه مشربنين جاي بيها ومساخيش ، هز فران امان وقال فوق من قلبو ~ بغيتي على خاطرك هانتي عندك ختك !!
زنقة عامرة والعيالات كيشوفو بغات تبوسو وحشمات كتافات تحط ايدها على يدو والفرحة باينة على عينيها وصوتها ~ قلبي غيبقى معاك !! وغدا نكون حداك !!
ميل ليها راسو بالايجاب وقال وهو كيجبد جوا من جيبو ~ هاد الأمانة وصليها لختك وباركي ليها نيابة عليا ، مد ليها تاني فلوس اخرين وكمل ، وهادو ديريهم فجيبك الوقت وزمان يبقاو عندك لتخصك شي حاجة !!
بغات تعتارض وهو يحط صبعو على فمو وقال سكتينا وسمعي الهضرة يله نزلي غنبقا هنا الا كانت قولي لشي حد يطل من شرجم باش نتحرك
جوبتو بتساؤل ~ علاش مغطلعش معايا ، طلع تشرب اتاي وترتاح عاد تحرك
جوبها وهو كيشوف في شنو لابس~ حوايجي مطلين دم مجاتش ندخل بيهم ،وصلي سلامي لختك و تهلاي ليا في راسك راه امانة عندك حتى ناخدك و ديك الساعة أمانتي ترجع عندي ،باس ليها راسها ونطق~ يله نزلي !!
ل قال لعصيدة باردة يحط يدو فيها ،وهاد المقولة كتنطابق على العرس خطبة ختانة ولا اي لامة كاينة توجادهم صعيب لا من ناحية الجيب ولا صحة ، فاطنة من نهار حددات نهار الخطبة وهي مشغولة ووجها حمر بجرا من هادي لهادي ،ايدها بوحدها ومعندها عوين خايفة من كلام الغاشي لي منو متسلك باغا تحميرة الوجه ليها و لولدها وشكون غلى ليها من الكبدة الحارة عبد الله العين دامعة عليه و لكن بولادو باغة تتهنى …كانت حاطة حوايج ل شرا ولدها للخطبها خاصهم يتطواو ويتقادو في صواني الطباسل يعمرو سلعة والحلوة تتقاد ،مية حاجة وحاجة خاصها تصاوب وايدها ورجليها فاشلين ، حسات براسها عيات وشدتها الدوخة جلست ترتاح وهي تسمع الصوت لي خلاها تنوض طايرة بالفرحة و تعول عليه في الشادة و الفادة تلاحت عليها معنقاها تقول شافت هلال رمضان …
فاطنة نسات اخر لقاء بيناتهم سلمت عليها وجلست حاسة بحمل وبدا يخفاف من على كتافها ~… ربي بعتك ليا بحال درهم الحلال لي يعرق عليها الحداد في نهار الحر ابنت مي
نجمة باست ليها راسها و عينيها غيخرجو بالفرحة ~… مالك اختي لي تقال عليك تخفاف عليا ، قالت وحطات صاكها ل كانت جامعة فيه حوايجها
فاطنة كتشوف في صاك والخوف بدا يتسلل لقلبها ول تنسى من البال تفكراتو~ اجي بعدا ميلت ليها راسها ، ياكما جايا غضبانة ولا صيفطك تاني ؟؟
جوبتها بضحكة معرية على سنانها ~ ونعلي شيطان اختي لا!! جيت غير ضيفة خفيفة نعاونك ونحضر لخطبة خويا وغدا نرجع بحالي ، جايا بخاطري وبخاطر زماني وهو ل جابني تال هنا ، مدات ليها الامانة ل كانت تحت كم جلابتها وقالت ، وصيفط ليك معايا هادي وقاليك الله يكمل بالخير
فاطنة عاد طلقت البشرة وتهنات ~ ايوا حمد لله الله يكملك بعقلك ، خدات من عندها الامانة حلاتها لقات فيها فلوس كثيرة ممقصرش من حقو قالت بكبرانية ونفخة ~ هادشي بزاف ابنت مي !! حشومة منقدرش نقبل
نجمة رجعتهم ليها وقالت بغضب ~ ختي هادي غير امانة وانا وصلتها ليك غرامتي انا وراجلي لهدية مكترجغش
خشاتها فصدرها وقالت برضى ~ ايوا الله يكثرهم عليه ياربي ويرزقو منين يعطي !! بتساؤل قالت ، هنات الوقت عندكم
جوبتها بحشمة ~ الحمد لله ل خايفة منو غير رتاحي من جيهتو تقضى وامورها هاد ساعة مزيان
فقالت فاطنة براحة ~ داكشي ل بغيت الله يتاويكم للخير ، ضربت على راسها وقالت ، نسيت مسولتك راجلك فين هو وناسك فيناهما
وقفت نجمة مخلوعة وقالت ~ ناري نسيت طلي عليه اختي راه قاليا ملي توصلي طلي عليا شوفتك نساتني كلشي
طلعت فاطنة فوق سداري لقاتو خارج من طوموبيل غيدق وهي تنادي عليه سلم عليها من بعيد عيات فيه يطلع ستعذر منها ومشى
بدلات جلابتها ببيجامة وقبل متحط ايدها فحتى حاجة جلست مقابلة مع ختها تعرف قصة الخطبة وواش العروس نفسها لبنت ل كيعرف ويقيل يخرج معاها ،وغير عودت ليها فاطنة وخرجت سمية نجاة من فمها وهي تصرفق ~ اش كتقولي اختي !! واش نجاة نجااة بنت بابا ؟؟ اش جمعهم ببعضياتهم ياك كان يقوليك ختي وعمري نشوف فيها والبنت ل كانت معاه فين هي شدت على راسها مصدومة وقالت، واش كتدوي بصح واش غدا غنديو الخطبة لنجاة !!
فاطنة جوبتها والغصبة فقلبها ~ كيفما كتسمعي ، نهار جيت عندك فاض بيا الكاس ،درتها حجة وزيارة نعرض عليكم ونفش قلبي عليك ساعة رجعت بزوج غصات …معلينا المكتاب كيتصرف بغاها وبغاتو مغنوقفش كي موكة فطريقهم نشوف ايامي معاهم كيف غتخرج واش غنتلى ولا لا
ملقات باش تجاوبها عارفة بنات خوها مساهلاش ومجات وتزوجاتو الا وشي حاجة كاينة تم وعيشة فاطنة مع دمها فدار وحدة عدوزة وعروستها غتحرر ايامها ، ضربت طم مبغاتش تزيد على ما بيها ناضت فاطنة للكوزينة تشوف اش تقضي وتحزمت نجمة لدهاز الخطبة وجدت ل غيتوجد وستفت ل غيتستف حارة و تاويلها ما بحالو تاويل وكل حاجة تتحط في بلاصتها ولي بانت ليها عوجة قادتها و حس الوسخ مخلاتو في الارض كيف وجها البيض كيف شقاها و حداگت يديها كملت لي عليها و رجعت صايبت شالها لي كانت عاقداه فور راسها باش ميخنقهاش وجلست ترتاح دخلت عليها فاكنة بصينية اتاي والحلوى ل يشوفها وهي جايا هازة راسها ميقولش هي ل كان ظهرها محني عوج وتالفة ، جات ل نضات ليها كلشي وخلاتها غير كتشوف مكاينش ل يعرف شقاها وتاويلها قد نجمة كلات الدق والماضي من عندها حتى طلعت كتشبه ليها ……
المشتاق وإلا ذاق !! دَوَزْ ليلة طويلة متلاقاوش فيها جفون عينيه ، ليلة باردة بحال ثلج عيا يتقلب فوق ناموسية مرة على كرشو منشور حال رجليه ومرة على ظهرو حال عينيه وراسو في سقف عيا يقلب على نعاسو ملقاش ، ولفها فجنبو مخشية فيه ولا مبعدة منو مهم حدا عينيه ، وصلها برجليه وعاد طلعت معاه ندامة …ليلة دازت عليه كحلة زحلة فينما يطردها من خيالو ترجع ليه فأبهى حلة وهي مزيزة وهي ضاحكة وهي مخشية فيه وهي كتفشش عليه مغمض حتال لفجر وكون زاد كثر كان بلاما يخمم يمشي يجرها يجيبها بلاما يحشم …. فاق معطل حل عينيه بثقالة وعينو كتشوف في الفراغ شحال وهو كيفكر في المرا ل جات دخيلة لحياتو ودابا مبقاش قادر بلا بيها شحال وهو كيفكر و عقل يديه و يجيبو حتى ضحك على راسو بسخرية وقال بين دماغو ” جات ل تحدهم ليك ابا غلام ” ناض من بلاصتو غسل وجهو وبدل حوايجو وتم نازل لتحت كيسمع كثرة الهضرة و اللغى تقول الخطبة عندو في الدار ماشي عند ماليها …هابط مع الدروج كيحك على لحيتو لي زادت كبرات و بيها باش معروف “بو لحية ” من سميات ل تعطاو ليه بلا ذبيحة ل يعرفو ول ميعرفو يعيط ليه بيها ، حل باب لفصيل ودخل وسط الدار لقى مو و خواتاتو معمرين الصالون حوايج ممخليينش بلاصة فين يجلس و يعقل على راسو و فطورو حط يديه على جنابو كيتسنى يردو ليه البال يخويو ليه بلاصة مكايناش فيهم لي شافت جيهتو كل وحدة فيهم عقلها مشغول فشنو باغا تلبس و كيفاش خاصها طلع وتبندر وتعيق على لوخرا … عصبوه حتى راسو تزير غوت غوتة خلات الكبيرة تلوح لي في يديه و تلفت ليه ~لله يا وليدي طيحتي فيا النص !!
لاح شي قفاطن كانو محطوطين على سداري فقنت تاني وجلس كيخنزر فيهم وحدة بختها ~ مالكم على هاد الحالة ؟؟ واش الفرح عند الناس و النزاهة لمالين الدوار و حبسو من الغوات داك الراجل مخليتوهش حتى يرتاح في مرضو !!
الكبيرة معرفت باش تبلات خافت تقول شي كلمة متعجبوش يدير ليهم بناقص منها مشية و يخليهم منشورين في الدار بعدما وجدو ، شافت حتى عيات و رطبت الوقت معاه وقاتبطيب خاطر ~وراك عارف اوليدي الجهد ماشي منا غا نشاط الفرح وصافي
شافت في بناته مبرقة عينيها فيهم كانت كل وحدة تتشوف في لوخرا منزلين قمقومهم كيفاش جا طفاهم في دقيقة ، قالت بالغوات وهي كتأمر ~ شفتكم حالات فمكم وحدة فيكم توجد لخوها لفطور دغيا …
طارت عليه زهرة تعنق فيه وتبوس ليه فراسو كتحزر وتبزر هادي هي فرصتها محد نجمة مكايناش ، الا تقات شر حسن ليها اما الا شدات معاه ضد جابتها فراسها وفجيبها قالت باغا تلوح عليه طلاميسها ل ميقدي فيه حتى حاجة ، حافظ صواريها خلاها تبوس فراسو حتى تعيا وهو مصغر عينيه و كيدور فعايلها في دماغو باغي يشدها حية …ناضت من حداه كتشوف في مها و فيه وكتضهر بيديها و عينيها مقلوبين ~ احسن براد لخويا الحبيب مشحر و كيبرد القلب و يرجع المجاج علاه شكون بقى لينا من غيرك عوينة وحدة كنشوفو بيها الله يجعل لينا فيك البراكة …نطقت بيها و مشات من قدامو كتزرب داخلة الكوزينة مخلياه متبع ليها العين و ضحك ضحكة خفيفة عارفها اش كتسوى و شنو مو مخرجة من كرشها ختو ومن دمو و فعايلها حافظهم و قاريهم مكتقول هاد الهضرة الا وبغات حاجتها منو كيف ديما فهاد دنيا مكاين حب فسبيل الله كلشي ولا بالمقابل خود وارا
شحال وهو يتسنى حتى جابت ليه داك لفطور حتال فوق طبلة تكب وتعطيه اش هاد لحنانة طاحت عليها كي شتا ممولفاش ليها كلمة قالتها ليها مها بعدما فطر غلام وهز دگة فيدو وخرج لصوالحو ، جوبتها زهرة معاطياهاش كبة من راس الخيط ~ اش فيها امي !! علاه اول مرة نوجد لخويا لفطور ، مالكم نكارين الخير ديما ماسحين سما بليگة سلامة ياربي منكم !!
لكبيرة وهي كتطوي في قفاطنها بعدما عزلات شنو غتلبس ~ صافي سكتينا ورحمينا من شر لسانك خلي نهارنا يدوز مزيان ، شافت في بناتها ونطقت ، جمعو هاد دنيا وطيبو لغدا دغيا نتغداو بكري ونخرجو غلام راه غادي يطل غير على خدمتو ويرجع مافيا ما نسمع على قبلكم شي كلمات منو ، ل بغات تصبغ وجهها تزوقو بكري وسترو شناتفكم تا توصلو لدار العرس
مريم هازة صندالة بين يديها ومعاجبها حال ~ ناري امي دابا انا لبس هاد صندالة هاكدا دايرة مجاتني گاع مع هاد القفطان ، بغيتو ضحكو فيا العادي والبادي يقولو نسابنا كيحشمو ولا شنو
لكبيرة ضيقت عينيها فيها عارفة بنتها ميعمر عينيها الا تراب ~ ل عندك لبسيه مبقى وقت لشريان دابا تال لعرس وارا ماتباني
مشات كتنگر وتنتر ،زهرة جلست مشبحة وطالقة يديها على مخاد كتخمم ماهامها لبس ولا زواق قالب غالب ل لبستو غيجي عليها ، اما رحمة جرات لكوزينة توجد لغدا ل غيوحل غير فيها اللهم تحيدو على تيساع …..
صباحو داز فتمارة جري عليا نجري عليك هذا هو طرف ديال الخبز صعيب الا معرقتيش عليه متصوروووش والا مكنتي سيدي ومولاي وبذراعك والله مكاين لي يعتقك ولا يرحمك حتى بجدريال، وهو مين كان صغير يتلاوح من هنا ويرجع لهنا ، ويجيبها من فم السبع ، سخونة ويمدها لعائلتو ودابا زادت مسؤوليته بمراتو باغي مزال يتقاتل ويعطيها، باغيها متخص من حتى حاجة ، فعز تفكيرو ساس من يديه أخر شغل قضاه ركب فطوموبيلتو وشد الطريق ، شاعل گارووه كيتكيف باش يقاد مجاجو واخا ميتقاد تا يشوف الشاطناه ، مسافة الطريق وكان حدى باب دارهم ، هبط طلع لبيتو غسل وبدل وتعطر ورجع نزل بعدنا علمهم يخرجو يوصلهم ، متسناش بزاف بانو ليه وحدة ورا لوخرا لابسين ومقادين قفطان تحت جلالب وزيوفة على راس ونظاظر في العينين بلا شمس ، برگم شوية ونگر عليهم سكتاتو لكبيرة وهي فجنبو كتسل الشوكة بلا دم حتى وصلو لعند فاطنة ، نزلو خواتاتو هو لولين مع مو طلعو بلاما يتلفتو فيه ولا ينطقو بكلمة ، وقبل متنزل لكبيرة مد ليها شي بركة باش تدير الواجب ل عطاه لمرتو بقى بينو وبينها مبغى يدخل شي فشي ، رضات عليه لكبيرة وطلعات بعدما وصاها تكلم ليه نجمة لدروج
نعسات معنكشة حيت راحتها بقات معاه ولفات بيتها وبلاصتها ل حداه ، بعدما كانت تتوسد صدرو وتتغطا بذراعو ، شي حاجة نقصتها وهي ماشي معاه ، فاقت قبل من كلشي الدار كانت مجموعة ودهاز مقاد ومحطوط فوق طوابل كلشي موجود وهو هاداك ، قصدت الكوزينة وجدت فطور على حقو وطريقو سرباتو فوق طبلة ناضت فاطنة ل رتاحت فوجود نجمة مكتهز هم حتى حاجة وهي معاها ، نوضو لعريس ل تابعو لحمام اما خديجة جابدة عليه وتا مها محاشتوش ليها الا حضر لما كيبطل تيمم ، داز داك صباح وقبل ميوصلو لمعروضين دخلت نجمة ضرباتها بتحميمة ديال الغذايذ فركات لحمها حتى رجع كيشعل وبشرتها كتلمع، ذهنات بعطر زيتي ناس زمان كانو يستعملووه ريحتو كتشبه المسك والعنبر لبسات قميص ملون مطروووز بالصقلي الحر ، جا مع بنية جسمها ضعيفة حزمات خصرها النحيف بمضمة ذهبية سالفها طويل نشفاتو وسرحاتو مطلوق بحالخيط الحرييير ذهبي من عند الله كيبري ، كتافات بكحل فعينيها جبداتهم مع ملونين زادو برزو كتر ،شوية د العكر الفاسي حطاتو ففمها بارد وهزات شالها قاداتو فوق راسها لي شافها يقول سبحان من خلقها، متسمات نجمة تا كانت ديك نجمة لي معاندة مع القمر فسما ، جات قتالة بلا زواق بلا لوان ربي رسمها وحطها لوحة فنية قدام عبادو سر من عند الله نازل عليها ، لبسات صندالة عالية وزوينة فرجليها ، الفرحة والبهجة منورة وجهها ،ابتسامة خلابة على محياها ،و للفتنة عنوان سميتها نجمة ….
بداو يوصلو المعروضين من عائلة عبد الله وحدة مور وحدة ،ستقبلتهم فاطنة بوجه بشوش واخا قلبها منغص تقول غادا بلعزو ماشي بلهدية ، طرطق الصالون بالناس وبينما تجمعو عمر اتاي وتحطات الحلوة ، ونجمة كتطير من هنا لهنا بحال الفراشة عارفة تخطوي بداك طالون ل قاد ليها المشية وخلا عينين النسا كلهم عليها، وهي خارجة من الكوزينة جات عينيها فوجه عدوزتها وبناتها ل تمو داخلين مع الباب ل كان محلول ، ضيافها ودابا جاو لدارها ترعت فمها وسلمات عليهم وحدة بوحدة وهي كترحب وتعاود ومعوناها فاطنة ل محملت زهرة مقبلتها دازت على وجه غلام اما تكركبها كيف اخر مرة بالحق كلشي يهون على ود كحل لعيون
فاطنة وهي كترحب ومادة يدها ليهم يدخلو ~ مرحبا بيك الالة لكبيرة دخلي دارك هادي !!
لكبيرة وهي كتحيد شال على كتافها ~ ترحب بيك جنة والله يكمل بالخير على ولدك ، قبل متمشي لصالون بلغت نجمة بشنو قال ليها ولدها ، بنتنا لمعو عينيها بحال سميتها وطارت من حداهم وعينين مريم على رجليها ،كانت نازلة في دروج هازة على قميصها وقلبها كيفرفر باغا تشوفو وربي كبير ، كان نازل بديك الطولة والفحولة عاطي العين ، لا من مشيتو ولا من ملامح وجهو تحسيييه راجل وسيد الرجال وقف عند الباب وغير سمع صوت خطواتها دخل وسدو عينيه مستقرين عليها وهي نازلة مكفظة ومبينة على فتنة سيگانها ، هاد المرة شافها على غير العادة واتاها البلدي وجات معاه السر نازل عليها تقول هي العروسة ، حنات عينيها حشمها بشوفاتو ونطقات بلهفة ~ طلع متبقاش هنا واقف !!
قرب منها كتر حتى طلعات معاه ريحتها ، سكر بلا شراب ستقرو عينيه على شفايفها ل كانو بحال دم الغزال ، كيفيقو الميت من القبر ، قرب ليها حتى لصقت معاه وحط يدو على شفايفها مسح ليها فمها ونطق كيهبط القفطان مغطي رجليها وحاقد ~ شفتك بحالا نسيتي راسك وسبتي !!
لابسة ومقادة راسها وهو داك الراجل الحرش لي نفسو حارة و ميبغيش شي حاجة ديالو تشاف بعينين المحبة من عند الغير غيرتو حارة وهذا عيبو وعلاش لا كاين شي راجل فهاد الدنيا ميغيرش على حاجتو ؟؟ من غير لي نفسو ميتة و بينو وبين الرجلة غير الخير والإحسان ، هي ملكو وعينو مشبعاتش منها كيفاش يخلي واحد اخور يتمنضر فزينها … حيراتو بكحل عينيها وفتناتو بمسك عطرها وبلى ميحس هز صوتو عليها طبعو هاكدا داير خضر فكلامو داكشي علاش كيسكت كثر ميدوي حيت الى هضر كيرونها مكيعرفش يزوق الهضرة ويشكلها ، عندو نيشان نيشان…
طووول فيها شوفة وهاد المرة مخنزز فيها ، شداتو الغيرة بلا هواه نذم ل صيفطها لهاد العرس خلاها واقفة كتشوف فيه بعيونها السالبين مواتاها فدنيا غير داك كحل لي تزوقات بيه هي مضوية وزادت نورات خلاتو تالف ودمو حامي ،معارف واش يتقدم ولا يتوخر يديه فيديها معاه للدار …نسمات فيه عويناتها كتزيد جمر على العافية باش يزيد يزند نبرة صوتو القوية فهماتها وسبب تخنزيرتو عليها عرفاتها ،عينيه فضحوه وهادشي عجبها كلنا كنبغيو نبانو ونزيانو قدام رجالنا نشوفو راسنا فعينيهم حيت هما مرايتنا نسمعو كلام الغزل منهم ل يرضي كبريائنا ، قربات ليه وحطات يديها على صدرو باغا ترطبو وترطب قلبو عليها ونطقات وهي عاضة شفايفها ~ لا والله مقصدت كنت هابطة فالدروج والحزام طاح ليا غير هزييييتو وهما يبانو رجليا
طول فيها شوفة ، يدو مستقرين على جنبها وونطق بخشونة ~ الالة يطيح الحزام ولا ميطيحش ستري روحك ، انا هنا مكاينش حتارميني فغيبتي ماشي ديري لي بغيتي
بضحكة سالبة لعقول تعلات على صباع رجليها وعطاتو بوسة لحنك سكتاتو بيها وقالت باغيا رضاتو وتطيب خاطرو نطقت بصوت منثوي رقيق~ توحشتك !!
كلمة كانت كفيلة تحرك إحساسو وتهيجو وتشعل قلبو كثر ما هو شاعل زير على قبضة يدو زغب يديه وقف وقال مضيق عينيه فيها معندو باش يجاوب وممولفش على هاد الهضرة ، نسا ماشي هما رجال لعيالات سلاحهم لسانهم ودموعهم ورجال كيعرفو غير لتطبيق معندهمش مع شفوي ،كلمتها رضات غرورو كرجل شرقي حر ، طفات شوية من ديك حرارة الغيرة لي شداتو عليها ، ملمس شفايفها رهاف حركوو مشاعرو بقوة طفات عصبيتو وبرداتو قرص فيها حجبانو ونطق وهو كيشوف فعينيها بعدما حنحن ~ ديري عقلك ابنت الناس ، عين هنا معاك وعين لهيه متخمميش
يديها الحنان دوزاتهم على عنقو حتى تبورش ونطقات ~ عارفة غير مقصدتش رجعات سولاتو ممفاكاش ~ وانتا متوحشتينيش ؟
طلعها وهبطها سر نازل عليها ، طول فيها شوفة ونطق جارها من خصرها بقوة ~ وعلااش انا هنا، وعند من جاي موحش فخوك ؟؟
فلتات ليها ضحكة من القلب على إثر كلامو بغات تدوي وهي تسمع صوت فاطنة كينادي عليها نازلة في درووج ، حاولت تتفك من بين يديه وهو يحمر فيها وقال ~ زگاااي !!
وقفت بحال لباب ل كانت متكية عليه جامدة متحركتش ، رخفها من بين يدو وحدر راسو ملي قربت حداه ختها ، واخا مرتو وميتسالو حد فيها شي حاجة ولكن احترام لكبر منو واجب عليه بينو وبين مرتو يدير فيها ما بغا وقدام البراني لا عارف ل عليه ميتسناش ل يوريه ، مدت يدها سلمت عليه وتسوخرت اللور وهي كتغمز ختها وكتدوي بعتاب ~ شفتك موقفة سيد عند الباب !! طلع اولدي غلام لدار لفوق راه كاين عبد الله حشومة توقف هنا !!
حرك راسو بلا ونطق وعينو على نجمة ~ غير سمحي ليا عندي شي خدمة، جيت جيت هنا قلت نشوف مولات الدار ونمشي؟؟
قالت ممفاكاش ~ وضروري تكون معانا ف خطبة منتاش غريب ومغادينش عند البراني خويا عبد الهادي غيتقلق عليك وهو يوصي ويعاود!!
حدودي ومعندوش مع عراضات من ديما مكيمشي عند حد عائلتو ودارهم عارفينو رجلو ثقيلة ومكتطوالش ،جوبها بما قل ودل ~ مرة اخرا ان شاء الله
بغات تخليه على خاطرو ومتحكرش عليه فهمت طباعو وعرفتو كيف داير ،طلعت فحالها وبقات نجمة معاه وحداه ل غير غبرت ختها من حدا عينيها وهي تدور لعندو معوجة فمها وكتدوي بدلع عفوي ~كنت باغاك تمشي معايا !!
ضيق فيها عينو ~ دوينا صافي ، خشى يدو فجيابو ونطق بتساؤل ، فاش غتمشي نتي ومعامن !!
نجمة هزات حجبانها بحيرة وقالت ليه ~ والله معرفت ختي يمكن جايبة شي هوندا غتجمعما فيها مهم نشوف
عقد غوباشتو وجاوبها كيهز فيدو بنقاش ~ كيفاش هوندا غتمشي فهاد الحالة اش جا مطلعك ونزلك وغادي وجاي حاضيكم مشتتين في زنقة ياك لاباس اودي !!
ضربت طم معندها باش تجاوبو حيت الا قالت شي كلمة تكون كتكذب عليه تنهد بصوت مرفوع وقال~ انا برا مخشي فطوموبيل ملي تبغي تمشيو نوصلكم نتي ودار ورجع فحالي تنرجع ليكم
مخلاش فرصة فين تجاوبو تسنا حتى طلعت وخرج على برا ، كلشي كان موجود وكيتسنى يخرجو خديجة لبست قفطان وطلقت شعر ل حمقها عاد تصاوب صباط طالون تطوال شوية اما وجهها دارت كلشي بتخبية ومكدوزش من حدا فاطنة خايفة تغسلو ليها ، بعدما كملت نجمة وسالات جاتها ناقصة تبعد على عائلة راجلها دخلات لعندهم للبيت فين كانو معزولين تشوف اش خاصهم واش باغين وهي تندم ل عتبتها ، نطقت مريم بلا متحشم وقالت مطرطقة عينيها ~ نجمة انقيس صندالتك
جاتها عيب تقول ليها لا ماهياش جيعانة بنت خير ومربية فيه ، بابتسامة باهتة حلتها ومداتها ليها تقيس بلاما تردد ، خشاتها مريم فرجلها بلهفة وقالت كتوري لمها وخواتاتها ~ جات معايا ياك !! نغزت لكبيرة وقالت بلاما تعبر مولات الأمر ~ ماما قووليها تلبس صندالتي وتخلي ليا ديالها !!
ل كابر في الخير يشم ايده ويقنع ول تربى فجوع واخا يكون مال دنيا بين يديه عمرو يقنع ..كبرت ممخصوصة من والو ل بغاتها تلقااها ول حلت عليها عينيها تجي حتال عندها ، تعلمت كلشي ونساو معلموها القناعة كرشها كبيرة ومحسادة ومكتعجبها غير ل عند غيرها مكترضى لا بالقليل ولا بالكثير ل شافتها ديالها ول مشافتهاش تا هي بغاتها لا حشمة ولا احترام لسانها كبير وغير تنبش وتقلب على الصداع والمشاكل ، مقرات متخرجات باغا غير تلبس وتقاد وتعيق وتبان مكرهاتش تطير غير غلام ل حاش ليها جنحين … شاافت فيها نجمة مصدومة منها ومن هضرتها ماشي حيث عجباتها صندالة وبغاتها بالعكس نجمتنا كتقنع بالقليل مكيهمها لا ذهب ولا فضة لا حوايج ولا زينة لي صدمها هو كلام مريم لي موجهاه لكبيرة ، علاش لي متسولهاش هي وتقولها نجمة بغيت لبس صندالتك اش فيها ؟ علاش بالضبط وجههت لهضرة لمها مال لكبيرة غدير سيف ماضي على قنعها باش تعطيها ليها صحة ، معرفت فين تصنف تصرفها واش حگرة ولا قلة لحيا وتربية ، مخلاتش لكبيرة تدوي ولا تكلم سبقتها بنتنا و علات شوية على قفطانها حتى بانو رجليها ونطقات ببرودة معصبة ومحافضة فنفس الوقت على هدوئها~ غتجيك كبيرة شوية امريم انا رجلي غلاض وعامرين وهاد نوع صنادل كيبغيو يجيو لاصقين ، جوابها خلا مريم حالة فيها فمها وفالنفس الوقت مرضاتش تقمعها بديك الطريقة هبطات عينيها لحدى رجليها كتوريها شوفي الفرق لي بين رجلي ورجليك ، ومكذباتش عليها بيضين ومطبزين حتى من ظفيرات نقيقين وگدامها حمرين واش هما ديال مريم رقاق وغامقين، شداتها الفقصة وبغات تبكي ، شافت فيها وكملت هضرتها بنفس البرود والقرطاس البارد~ يمكن ذوقي عجبك ولكن ذوقك ماشي هو ذوقي الا عطيتك صندالتي منقدرش نلبس ديالك ، هزت حاجبها يله معايا لبيت ونوريك ل عندي ل عجبتك متغلاش عليك من غير ل فرجلي حيث نويتها ليا ولبستها
كملت ليها كلامها وتسناتها تنوض معاها واخا عارفة مغديرهاش وداكشي ل كان قالت ليها لا براسها زامة فمها ،جوبتها نجمة وقالت على راحتك ومشات وخلاتهم متبعين ليها العين ، زهرة مكرهتش تلاح عليها تنتفها ولكن ايديها رابطهم غلام ، اما لكبيرة بلعتها وسكتات باشمن حق تاخد من عند مرت ولدها وتعطي لبنتها هاد اللخرة ل عقدت حجبانها وكحلت بالعمى حلفت فيها وناوية مدوزها ليها
سمعو فاطنة كتنادي عليهم ينزلو ومول هوندا لتحت يطوط لتحت يطوط ينزلو ، ناضو كيجرييو خواتات غلام بحال دراري صغار هازين قمايصهم وصيكانهم وهابطين مسابقين ، كانت طوموبيل ديال غلام مبلاصية حدا الباب ركبو لور أما لكبيرة جلسات لقدام حدى ولدها كتعنگر وتمختر معرية على ايديها ومبينة سناسل عنقها بقى واقف حاضيها تنزل ، حتى بانت ليها بعيدة هابطة ، كيشوف فيها بانت ليه ماشي على بعضها ،ديك الفرحة واللمعة طفات من عينيها ،كانت لابسة جلابة فوق قميصها وحادرة راسها التحت كتضور عينيها كتبان ليها طوموبيلتو عامرة وخواتاتو جالسين على راحتهم اللور مدايرين بحسابها غتجلس حداهم شافت فيها فاطنة وقالت ~ طلعي لهوندا معايا
عين عليه وعين على ختها معرفت اشمن جهة تصد ، حتى كتشوفيه نزل كيقاد حوايجو وقرب لعندها مكمش جبهتو
طلعها وهبطها ونطق وهو كيدوي مع ختها ~ غير سيرو انا غانجيبها معايا
جرها من يدها لجهة طوموبيل حل باب اللور بانت ليها مريم مخنززة فيها ، ورجعات شافت فيه ونطقات ~ طونوبيل عامرة اغلام ، نمشي مع ختي حسن ؟
حمر فيها وهو يضور كايغوت على خواتاتو يتسوووخرو لووور ويجمعو رجليهم ، طمووو وبداو شي كيدخل فشي حتى لقاو ليها بلاصة، حنات راسها ومشات تطلع وهو يشدها من يديها كيشوف فيها بعبوس وباستفهام ~ مالك ؟ بنتي ليا ماشي هي هاديك؟
هزات عينيها فيه بلا كانة وقال ~ لا غير راسي ضرني فايقة بكري يمكن داكشي علاش عيييت شوية ….
شدت بلاصتها ومشا لبلاصتو مديماري ، مرة مرة يضور لعندها مجاتش ورا لمرايا باش يشوف على خاطرو ، دماغو تنوا معرف شنو بيها فينها لبنت ل باستو وضحكتها فالتة دابا راكبة وراه مقرصنة وهادشي مبغاهش بانت ليه صيدلية في طريقو وقف طوموبيل ونزل معرفوه فين مشا ، رجع دغيا وهاز فيدو ساشية ل كيف طلع مدها ليها وقال باهتمام وهو عينو عليها ~ تمشي شربي وحدة باش يفوتك راسك وتكوني وااكلة باش مضركش
هزت ليه راسها بشكرا عاجبها الحال ، موقف صغير منو كينسيها گاع الخايب ، كمل على طريقو وكل مرة توريه منين يدوز حتى وصلو على الهوندا ل وقفت قدام دار خوها ،كانو طبالة والغياطة على برا كيزمرو وعائلة لعروسة وحباب مها هازين مراشهم ويشطحو …نزل كلشي من طوموبيل وغلام حلف ميتحرك من تما حتى يحضي ل كيخصو دار ليها الحصار مولفة توقف لوسط تغمي وتشطح وتحير ودابا غير مبعدة لتيساع كتفرج وتصفق والعينين عليها
جالسين فصالون ل كان يجري فيه الخيل ، گاع ل تما كيعرفو نجمة بوحدة بالوحدة يجيو يسولو عليها واكلهم لفضول على حالها وحياتها ووجها يعطيهم لخبار ، جالسة حدا تاجة ومبينة بيوضية سنانها سر نازل عليها تقول هي لعروسة، تزنكت بالحشمة وبقوة سال وسول تجاوب هادي وتعاود تسول لوخرا ،دايرة رجل على ختها مبينة على صيگانها راخفة زيف من فوق راسها وخصلات باينين من شعرها ، تاجة مقاداها فرحة تضور وتعنگ فرحانة بوريدتها كيف كتقوليها ل رجعت فتحت ونورت وعلاش لا وهي مع ل يستاهل ، ستأذنت منهم وناضت هازة شوية قميصها لفوق ، كتقلب على دادا مت نجيمة ونجاة كيف كتعيط ليها ،تدير يديها معاهم وتعاون فاش مجاب الله ،مهما كان كتجي لهاد دار مجاتش تجلس دابا كيف الضيفة،دخلت لكوزينة على غفلة لقات لعروسة وختها باركين يدگو فمسمار تاع لخشب في الباب تدق وتعاود قوصات حجبانها فيهم مفاهمة والو ونطقات بتساؤل ~ شنو كديرو ؟
جوبتها نجيمة مگرفضة دايرة يديها على جنابها باغا غا تعاير وتشاد بلا سلام ولا كي دايرة اعمتي قالت بعجرفة ~ لباب تهرس كنسمروه !! قالتها مستهزئة ورجعت كملت كندقو في الخشب خايفين من عينين العديان ل كتسارا ول الله يستر كتقب الحيط، شافت فختها كتحشي لهضرة لنجمة ~ اييه اختي نجاة سولي لمجرب لتسال الطبيب
خرجت وخلاتهم حسن متجبد خنزهم ، مافيها متسمى تاني خايبة وواقفة في سعد لبنات رجعات لبلاصتها عارفة سعدها حار أما لعروسة كملات على شنو كدير دايرة بين بزاازلها طوبات سكر ل ناوية تعمر بيهم لفنايق باش يعمرو اتاي حگا والواد باش تبقى ديما حلوة فعينين راجلها ، شكون كذب عليها واشمن فقيه قراها راه ل مجا بمحبة ميجي بحزارة ، كملت على شغلها وخرجت من كوزينة وختها وراها بحال ظلها مشات للبيت دارت قبول تحت حوايجها وعلقت عقيق كحل في دراعها تحت القفطان وخرجت لصالون حاادرة راسها الارض زعمة حشمانة وشي وجه مباينة عليه حشمة ، جلست حدا فاطنة ل قلبها ضاق عليها وشنو بيدها مدير تكتب عليها المكتوب وولدها ل عزل ياما هربت منها ورجعت ليها وقدر الله كيتصرف
دازت ديك الخطبة كيف ما عطا الله عبد الهادي كبر بضيافو ومخلاش من حقو تحطت الماكلة وكرم ل دقو بابو وملي كتشبع الكرش كتقول لكرش غني ، تطلق شعبي رجالة كانو بعاد على لعيالات فدار لفوق ، نوضو نجمة صحة وخايفة من وصية راجلها ل اسر عليه عبد الهادي يبقى معاهم وكانت عارفاه غيشدو حيت ل جا قدام بابو مكيرجعش ، ناضت متلبكة كتشطح وتشالي بيدها بلاما تشعر بغات تخطي خطوة لور جات فوق رجل عفطت عليها بطالونها كانت مريم ل بقى ليها نقشة وتفرگع وكملتها ليها نجمة وتعالي دخلي ليها لراسها بلي غير جات فيها
قوصات حجبانها وحنات شدات على رجليها جاب ليها الله فاش تشد لقاتها سبة باش تجبدها ، حنات نجمة كتسولها بخوف ونطقات وهي كطلب منها السماحة ~ ختي مريم سمحيلي والله مقصدت مشفتكش واش ضريتك ؟
دفعات يديها لي محطوطة عليها وخنززات فيها ونطقات ~ ايييه ايييه مشفتينيش تيقتك ،نغزتها لكبيرة تسكت وعيبهم ميديه غيرهم بزز سرطتها دابا ولكن ساعة اخرا لا
لي شطح شطح ولي نشط نشط ، العشية دازت بيخير وعلى خير ، كلهم عيانين من الشطيح رجليهم كيزدحو ، من غيرها هي لي كانت تطير من هنا وتجي لهيه وتعاون ، تسخر على هادي وتمد لهادي تملك منها الإرهاق والعيا ديال بصح تعاشات العشية وكلها بدا يمشي بحالو جا الوقت فين تا هما يخرجو ، عنقات مها ختها فاطنة ونطقات ~ الله يجعل كل شي مبارك مسعود اختي الله يكمل ليه
بادلتها العناق ونطقات وهي كتشوف فيها معاجبها حال ~ امين امين ، سيري راه راجلك كيتسناك انا يجي مول هوندا ونزلو…
ودعاتها الكبيرة بدورها وبيضت ليها ونزلو البنات كيتعاودو ويتوشوشو ونجمة برانية وراهم ،كان واقف لتحت كيكمي وعيان بدورو ، ولكن مورالو عالي غادي تنعس حداه مراتو ل دوز ليلة قاصحة بلا بيها
طلعو فالطوموبيل كيف جاو كيف ديما مو لقدام ميحيدهاش طبيب، تسناها تا وصلات هي لخرة وعينيه عليها، باين عليها العيا وتمارة ، قرب منها ونطق بإهتمام~ شوية دابا ؟
هزات راسها فيه ونطقات بابتسامة~ مزيانة حسنن !!
طلعات اللور مريم غير كتخنزر فيها كتسنى الوليمة فين تشدها هازة من جيهتها بلا سبب …وصلو لدار نزلو هازين ميكاتهم وطالعين من غيرو هو لي وقفها وقال~ سيري نيشان لبيتك رتاحي انا شوية ونطلع عندك متنعسيش..!!
ميلات ليه راسها باه وطلعات مع دروووج كرشها الفراشات كتفرفر فيها ، بانت ليها مريم واقفة قدام لفصيل كتسنى فيها مگفضة على يديها ، جامعة الصعرة من القمعة لي دارت ليها هزات عينيها وقالت بغصبية~ دايرة فيها واعرة قدام عائلتك ، وكملتيها عافطة عليا بالعاني باغا تهرسيني من صبعي
صدماتها بكلامها لي مفهمات منو والو، هي غير قاصتها اشمن صبع بغات تهرس، بالحق شكون غادي يفهمها ليها ويدخلها ليها لعقلها لام ل تنهيها كتفرج فيها ،طلقات سمها فتانية وقبل ماتجاوبها نجمة كملات ليها الهضرة ~ الا كنتي عورة ديري نظاظر عاجبك زينك ورجليك
نجمة معرفت باش تبلات راسها دايخ عليها وما خاصها غير هادي فهاد ساعة تنهدت معندها جهد وقالت ~ سمحي ليا غير مشفتكش
طبطبت على ذراعها وبغات تطلع وهي تشدها من شعرها ضورتها لعندها حتى غوتت مقصحة ~ ااااه واش تسطيتي !!
والله ينجينا وينجييكم من سم النسا ،ومريم عقرب صحيحة، مكانتش باغا تسلك جرة لا كانت باغا الروح طيحها فهاد الليل جوبتها بشر كتعلي فكتافها ~ تا انا سمحيليا مشفتكش!!
دخلت بيناتهم لكبيرة تفك الجرة قبل متكبر القضية اما لخواتات لخرين وحدة منهم زندت الفاخر وساطت عليه حتى شعل وجلست تفرج
بقاو كلمة من ها لوخرا من لهيه بغات نجمة طلع بحالها رجعت جرتها الدورة ل غدور بعصبية مندافعة قاصت لكبيرة ل كانت على سبة طاحت على يديها وعطاوها بناتها لغوات
تبوحيط عشرة لزيرو مي مي مي
كيكمي يقاد دماغو معرف راسو باش تبلى كيسمع فالغوات ، لاح الگارو بنترة وهو يدير جوج خلفات فخلفة ، طالع كيجري ، غير كمل دروج بانت ليه الكبيرة مجبدة فالأرض وخواتاتو مجموعين عليه شادة على يدها كتنين نزل كيقيس فيها وهي تنطق اللفعة الكبيرة وقالت ~ مزيان تبارك الله مرتك ولات تضرب مي اسي غلام هادشي ل بقى
شفنا وسمعنا من مشاكل دنيا حتى طبنا وبحال سم اللوسة وفعايلها ونبايزها ماداز على عينينا…بالحق ل أصلو دفلة عمرو ماا يحلى واخا تحطو فجبح نحلة ، الله ينجيينا وينجيييكم من لي وجهو كيضوي ، وقلبو كيشوي ، تقتل الميت وتمشي فگنازتو وشكون من غيرها اللوسة سوسة ل سوى صبغتيها ولا غلفتيها تبقى بقعة كحلة في حياتك كاينة ل الأيام تهدها وترشيها وكاينة لي غير ما كتزيد في سوادها وريحتها وزهرة منهم خاصها غا لوجيبة فين تبخ سمها لِ جمعت وملقات فين تْسَيْبُو وهاهي جاتها الفرصة تال عندها
شافت القضية سخنات باست يدها وبدات ، تشعل الحطب وتخلي العافية تطلع بحال ابليس يدير الزبلة ويكحز اللور يتفرج ،لسانها سليط عينيها عامرين خبث اما يديها ، يد تسبح ويد تذبح ، معرفناها شيطانة ولا عفريت فصفة انسان…….
كان ناشط مخاصو خير، الهم ل كان مسهرو ومهرب عليه النوم زولو بيديه ، محبوبتو ل باتت بعيدة عليه وخلات فراشو يبرد جابها معاه حالف متبقى تبات غير فجنبو وراسها على كتفو وقدام عينيه هي سبقاتو وهو وقف يقاد گانتو كان معول على ليلة بيضا بلا نعاس بحال ل قبلها غير هاد اللخرة بتفكير وهادي ناوي فيها يروي عطشو منها ويبرد لهفتو عليها وشكون خلاه يفرح ويتهنى المشاكل كيتبعوه فينما مشى حتى كيگول هادي دازت وتجيه لوخرا ،كان منغم ينثر ويبخ حتى كيسمع صوت لغوات واللغيط دالعيالات وشكون من غيرهم خواتاتو لمنغصين حياتو من صغرهم لكبرهم مشاكيل دايرين لگنازة والميت فار من ديما يديرو من الحبة قبة ويضخمو الامور ، عفط على لگارو برجلو وطلع يجري في دروج ودماغو كيمشي بيه للخايب موصل حتى عقلو خرج ، لقى مو مجبدة تاهيا باغا غا سبة تنشر عليها شدت يديها ونيمت عينيها وبدات تنين تبوحيط تعطيه قتلة ، عينيه كيضورو ويسولو وقبل مينطق بكلامو نقزت ل متسمى رامية باطلها على نجمتنا ل غير حالة عينيها مصدومة زينها زين وردة وسعدها سعد قردة، العكس تابعها فصفة بنادم فينما مشات ، الا كانت عائلتها ل من دمها ومعندها معاهم زهر غتلقاه مع البراني صافي نيسات وليوم زادت تأكدات ، كانت جايا فرحانة واخا عيانة توحشت راجلها وغطا راسها توحشت ايدو دافيين كتافو لعراض ، توحشت راسها معاه جامعهم فراش واحد كانت فرحانة ومتلهفة وفرمشة عين طفى شوقها وتبخر حماسها، تلاح عليها باطل قدام عينيها كون غير دارت علاش ميبقاش فيها الحال بغات تعرف شنو دارت ليهم وشنو بغاو منها علاش هاد الحرب الباردة ل منوضين ضدها ، مريم عينها فحاجتها باغا تلبسها قبل منها مكرهتش تعريها وتلبس من ماريوها وزهرة سنانها لوبيا عليها مكرهتش تحل لباب وترميها ، عمرت عليها الراجل وقالت ليه شنو بغات ورجعات اللور كطلعها وتهبطها بعينين الغدر باغا فيها الخدمة كتقلب على العيب وعلى جوى منجل فهاد الليل ، من بعد ما زنداتو بكلامها السام والكبيرة زادت تجبدات فالأرض شوف المنكر وقلة الدين قالوها ل فاتو كاين النية وكاين الذيب كاين الخاين وكاين الحبيب وكاين الساهل وكاين الصعيب ز هادو جمعوا كاع خيوبية الدنيا
ل عضو لحنش كيخاف من شريط ، ونجمة دازت عليها معاهم ايام كحلة زحلة مشافتش فيها نعاس ، جراو فيها على خراب بيتها وترياب عشها سكتات فيها مرة ومدافعتش على راسها ومغتعودهاش مرة اخرا ، مقدرتش تغمض عينيها وتخلي الباطل ينزل عليها وهي كتفرج ، شافت في زهرة وقالت معاجبها حال بنبرة صوت دفاعية ~ نعلي شيطان ومتزيديش فيه فين ضربتها وانا غير جيت فيها وهي طيح !! حاشة واش نهز يدي ولا تا نعلي صوتي على مرا فمقام مي واخا غير فزنقة فما بالك عدوزتي …
بغات تجاوبها زهرة وهو يقاطعهم مخرج مشاكشو كيغوت محاملش يشوفيهم كيترادو حداه ك طعارج ، هز عينو فنجمة وحمر شوفتو فيه ونطق بصوت عالي ~ طلعيييي لبييتك الهضرة ماشي هنااا !!
اللهم ضربة بدمة ولا كلمة بسمها ،مرضاتش يدوي معاها بديك النبرة تشق الارض وتدفنها وميضحكش فيها خواتاتو ل كانو طالبين عليها متسرطاش ليها بقات عقدة واحلة في قرجوطتها مقادة تبلعها ولا تخرجها ، غشاوة دموع حجبات عليها الرؤية خلاتها طالعة فدرجة ومشايفاش ختها ، اما هو عدوه ل يضرب كلامو في الحيط حذرها مرة ومية ورغبها على مو باش تحدر الراس واخا تضلمها هو غيجيب حقها
وهاهيا اليوم كسرت كلامو وكانت السباب انو مو طايحة في الأرض على حساب كلام خواتاتو اما حتى الحنانة منكرت مقالت اه غير ساكته وكتشوف ……هزها بين ذراعو لصالون ونطق وهو كيسول فيها بقلق ~ كي كتحسي براسك امي ؟ واش موعتة نمشيو للطبيب !!
نطقات زهرة كي لگلية كطرطق وتنقز غا بوحدها ~ فعشو وكينشو اخويا ،دفعتها جابتها الأرض متكون غير هرساتها ، شوف قلة ترابي فين وصلاتها ولات تهز يديها على منا وحنا حداها ….
خنزز فيها ونطق وهو معصب ~ سدي غا فمك وسكتي قبل منسكتك بطريقتي ،بالغوات غوت ارو الماااا !! ياخزيت تعاشات لعشية تاني عمري شفت معاكم نهار زين ضروري تختمو نهار وديرو تا مصيفطت فكلشي ..
جابت ليه ختو كاس الماء مدو لمو تشرب وهي تمسكن وتمرضن مهضراات مشرحات غير حس بيها تهدنات وهو يجمع الوقفة من فوق سداري باغي يعرف اش وقع ، عودو ليه ل بغاو نطقت مريم كتبوحط كانت مركنة فقنت لبيت بعدما لاحت لفتيلة وبردت قالت بصوت مضيوم دايرة فيها ظريفة وما بيدها ولا برجليها ~ هادشي وقع اخويا على صندالة شفتها عندها قلت ليها نقيسها نقصت مني قدام ناس وقالت ليا معرية على رجليها متجيش معاك نتي وتاني في الخطبة ناضت تشطح وبلعاني عفطت عليا شوية وتهرس رجلي وسمحي ليا مسمعتها من فمها وملي جينا لدار قلت ليها راك عفطتي عليا دفعتي تا طاحت مي والباقي راك عرفتيه …
تشربن ديال بصح عرفت تخشي ليه وسط الهضرة زوج حوايج غادي يشعلوه مزيان ، قاليك اللفعة كتولد ما طول منها ومريم تربية زهرة ولكبيرة طالعة مطرقة من صغرها ،تعماو ليه العينيه طلع معاقلش على دروج كينقز فيهم تا وصل قدام البيت بانت ليه صندالة ل نايضة عليها القربالة محطوطة قدام الباب كانت عالية وطالونها مقمق هزها بين يديها وعلى حر جهدو وبكل قوتو گرضها ولاحها وسط البيت وهو كيغوت ~ هادي هي صندالة علاش منوضة لقيامة !!
كانت كتشوف فحاجتها مقطعة قدامها وممتيقاش ، عارفاه فزغي وميكيتحكمش فراسو بالحق الا متسنطش ليها هو شكون غيسمع ليها الا منصفهاش شكون غيجيب ليها حقها الا متيقهاش شكون بغى يتيقها ، كانت مبدلة حوايجها وجالسة فطرف ناموسية وغير شافت ردة فعلو جمعت الوقفة وتمت جايا لعندو بإنكسار قالت بلوم كتعاتبو ~ القاضي في المحكمة وكيسمع من زوج جوايه ونتا شفتي غير ل تقال ليك …
قاطعها وهو كيقرب منها عاض على فمو من لداخل حتى سيل الدم ل تمذقو ونطق مزير على سنانو ~ ، شفت مي طايحة فالارض وبفمك حكمتي على راسك مضاربين على قراب ف*ك الليل الا هما قلالت عقل نتي مولاتو
هو كيدوي وهي دموع كيتجمعو ليها فعينيها مبقاتش سمعات شنو مازال كيقول ، ضرهت خاطرها من جهة هادشي ل وقع ليها ومن جهة اخرا حيت مكانش فصفها مكانش عادل معاها مسمعش ليها غوت عليها قدامهم وقمعها ، ايه مو وكتبقى مو ومغتجيش فوق منها بالحق تا هي مرتو وامانة عندو الا كلشي وقف في وجها هو خاصو يكون فجنبها ،بلعت ريقها وهو حاضيها بعينيه كيتسنى فيها تدوي تدافع على راسها بالحق فات الفوت مبقى عندها ميتقال هزات الراية البيضا ، رجع نطق من جديد باغي يشد يدها ~ ياك انا قلت ليك جلسي تركني لاش تنوضي ولا تشطحي كندوي مع الحيط ماشي مع بنادم
باستهزاء ضحكت دغيا وصلوها ليه سخونة ديرها غا زوينة دغيا توصل ،بعدت عليه ممخلياهش يقيس فيها وقالت بنفخة ودمعة من عينها غذرتها ونزلات بزز منها ، مسحتها بكبرياء مراضياش تبكي حداه وقالت ~ صافي انا ل غالطة مبقى عندي منقوليك باش تسمعو !! عطاتو بظهرها بغات تهرب لحمام تبكي على خاطرها وتبين ضعفها لنفسها قاطع طريقها مزير على ذراعها عينيه حمرين ~ نجمةةةةة !! نطق سميتها بصوت قوي اكيد معصب ، معصب منها ومن راسو ومن مو وخواتاتو ومن هاد مشاكيل ل منغصة عليه حياتو ، ليلتو تصورها فشكل وسالات بشكل اخور
كمدت حر الشدة فقلبها وهربت عينيها عليه حيت غير الشوفة فيه غتخلينا تنفاجر حداه بالبكا وهادشي مبغاتوش ، وهي كتحاول تفك يدها نطقت بصوت مستسلم ~ صافي اغلام انا ل غالطة وسمح ليا الا جيت بلاما نقصد فخالتي مغاداش تعاود مرة اخرة ، وتا الا مبغيتيش تسمح الحُكم ل ترضى بيه انا قابلة عليه
هربت منو للحمام سدات عليها وجلست فكرسي تما تنحط حتى تبرد مخبية منو ، ماشي عيب تبكي قدامو ولكن مبغاش تبقى فيه ، هي بغاتو ينصفها بالحق كانت مستنية منو قبل ميغوت عليها يسولها هو اللول ويعرف اش وقع وميدخلش ولو ذرة شك لراسو بلي يقدر تأذي مو حيت عمرها ديرها
خرج من البيت كيمسح على راسو داز من حدا حمام سمع صوت بكاها خلاها على خاطرها ونزل وهو فدروج سمع صوت رحمة كتدوي مع مريم بعتاب كانو غير بنات بيناتهم اما لكبيرة دخلت لبيت عند زمانها ل تشطن عليها قالت الاخت وسطانية ل صغيرة ~ نتي ل بديتي لخصام مكتحشميش البنت عليك فتيقار بغات تعطيك حاجتها مرحبا مبغات لبسي ل عندك
جوبتها زهرة عاجبها الحال وقلبها برد ~ طلعتي مساهلاش عويفية مع راسك شبهتيني نااري وندير يدي فيديك ..
مزال مكملت هضرتها معرفو راسهم باش تبلاو دخل عليهم لبيت شد مريم من شعرها لاويه على يدو وجارها منو منزل ليها راسها في الارض وهي تحتو تغوت وتركل
الا غوت عليها ميخلي ل يغوت عليها يمد يدو عليها ويقطع الايد ل تهز عليها ، مقامها من مقام مو الا كان ميبغيش مو تتمس فحتى مرتو كذلك ومثال وختو الا ملقاتش ل يوريها عيبها هو غيطبق معاها مبدأ العين بالعين والسن بالسن والبادي اظلم نطق وهو كيزير على شعرها ~ بقات غا برهوشة تاع لخلا تعلمت تبول في طواليط على لبارح تقلل لحيا على مرتي
من ديما متسرع لسانو ويدو سابقينو كيعرف غير يجرح مكيتحكم فأفعالو تا كيفوت الفوت ويبرد عاد كيستعقل ، ماشي من نوع ل يتأنى ويحل وذنو ويتسنط كيطلق سمو فرمشة عين تا كيجلس ويتهدن عاد كيخمم وماشي من نوع ل كيتحرش ولا بو وذينة الهضرة مكدخلش لوذنو باش تخرج منها عارف مزيان خواتاتو شنو كيسواو ولكن مو كتبقى مو كيفما كانت خاصها الوقار والاحترام ايدك واخا تكون مجدامة راها منك مغتقد تقطعها ولا تتبرا منها غتبقى لاصقة فيك ومكتوبة عليك ،عيبو عارفو وطبعو الصعيب بالفطرة وارثو عصبي وحشايشي وانفعالي ومكيعرفش يدوي والا تجمع هادشي كلشي فشخص واحد باين البرهان بلا كثرة لكلام ….
لوا شعر مريم على ختو بلاما يحن ولا يخمم جرها تحت منو وهي تغوت وتهرنن ول عندها گالتو ~ وااخويا الله يرحم باك والله منعاود الا قالت ليك شي حاجة راه غا كذبات عليك انا منتفتهاش غير جريتها وجيت فيها ..
هي كتدوي وهو كيزيد يزير عليها، قاليك خلي الكذاب تا يسهى وسولو وختو بلا هادي ولا ديك غير بالعصى گرت بشنو دارت ،جمع قبضة يدو وضرب بشوية على راسها وكيدوي مشربن ~ برهووشةة مع راسك جالسة في الحمام تنانفي ، جبتها جفاف عندك تا تمسحي فيها يدك ،شنق عليها داها وجابها وقال راني كنعرف زكوم بلادي مزيان اش كيسوى متحتاجش تقوليا
خرجت مو مع باه ، باه ل مبقاش عارف شنو هو لهنا ،كل نهار فيلم جديد عندو فدار ، بناتو ضلعة عوجة عيا يقاد فيهم ووالو الا مداروش بحسابو هو كبيرهم غيديرو بحساب مرت خوهم ، رجع اللور وتفرج عمرو عارض ولدو ولا دخل بينو وبين خواتاتو عارفو مكيضلم مكيتعدى ول ضسراتو لكبيرة يحدهم ليه غلام ،اما مرات دار ول كبيرتها غا بسمية مولات الري وشوار ل خاصها تنهي وتوري كتفرج فظلم بناتها لعروستها وكتشوف فيه بعينيها وساكتة ….بالحق ل خوه فجماعة ميخافش والا بغاك القايد غير قلز لمخازنية ….
بحال عوايدها دخلت تفك هاديك بنتها مبغاتش ل يقيسها ولا يمسها وبنات ناس لهلا يقلب بالحق كما تدين تدان وهادي غير دار صابون ل غسل شي غسيل غينشرو ، خداتها من بين يديه بزز دارتها وراها شادة على يدها وكتغني ظلموني هز يدو وقال بتنبيه وهو كيضور عينيه على مو وخواتاتو وحدة بوحدة عينيه حمرين كيف الجمرة صدرو كيطلع وينزل تقول مسابق ضيقهم فيهم بشوفات حارين ودوا مغدد ~ ديك سيدة ل لفوق تقيلووها عليييكم مررحبا متقيلوهاش ل مرباتوش لكبيرة انا نربيه
جوباتو مو كتدمع بلعاني وقالت بنبرة مضيومة باش تبقى فيه~ ومالهم اش دارو ليها نعل شيطان اولدي لغيار ولا بد منو يضاربو ويتصالحو
لكببيييييييرة !! قالها بصوت عالي حتى قفزو ونطق~ بغيتي توحشي هاد الوجه يتعاود هادشي بربي حتى نهزها ونزيد ندير لولاد وندگ لوتاد فقنت اخور حتى تشداقيني حط يدو على وذنو محركها ~ هاانا علمتك !!
قاليك بيني وبينك ذبحني وقدام ناس لا تفضحني …نجمة جاتها قاصحة غلام يغوت عليها ويهينها قدام ل ليه هي مرتو ومنو وفيه خاصو يدير بحسابها كثر منهم خاصو يهز بيها ويكبر بيها قدامهم ماشي يغوت عليها ويطيح منها ، بعدما سيقات وجها بدموعها تخشات ففراشها مقربة لحافة الناموسية عاطيا لبلاصتو بظهرها كتطيب فنعاسها قبل ميجي مبغاش يدخل عليها ويلقاها فايقة مافيها ل يدوي ولا يتكلم معاه ل عطا الله عطاه والفم ل قال زمر كان خاص يقول تمر ، الوقت ل هي لداخل مخشية فبعضياتها دافية هو على برا كيضرب فيه البرد وما بغى يبرد كيكمي ويعاود هو وليل صحاب وحباب من ديما ماشي غير دابا ، شحال من برا بقى فايق مخاصمين رموشو مملاقينش وتا دابا مبغاوش يتلاقاو كان ناوي ليلتو دوز فشكل وخرجت غير متوقع الوقت ل خاصو يكون مخشي فمرتو مدفي رجليه ومسخن عظامها وعظامو ، جالس يديه جامدين وقلبو حامي ،زوج ولا ثلاتة ليل عاد دخل لبيتو ، كانت ناعسة وماهياش هنا مكمشة فبعضياتها ومغمية راسها تنهد بصوت مرتافع ضايق عليه صدرو وخاطرو خاسر لاح حوايجو لمسخين ل خانزين گارو ولبس حوايج خرين تخشى حداها وبقوة لعيا داه نعاس ،غفى هو لخر وفاق هو لول كيجري على لقمة العيش ،بانت ليه ناعسة على كرشها النص في لحمها ممغطيش قاد ليها المانطة وحط فمو على جبهتها وخرج حست بيه وتنهدت وقلبها حيت مضيوم عودت بكات، حتى كتقول ياه ليام تسگدت ليا وكتزيان كترجع تنكدها عليها وتخياب ، رجعت غفات ومفاقت حتى فات الحال ناضت على خاطرها سوا فاقت بكري ولا معطلة غتبقى عروسة كحلة زحلة واخا تغمس فلعسل ميدوزوهاش ، هبطات لقات دنيا مطرقة مريم سادة عليها بيت وزهرة مشات لخربتها لكبيرة قالبة عليها وجهها غير رحمة ل دوات معاها اول حاجة دارت قصدات مو باست على راسها وعتاذرت منها واخا مدايراش علاش وشقات علاش قدات وغير تغداو وطلعات ومتلاتش نزلات ، دوزات نهارها بين لحوايج تطوي وتستف وملي سالات حست براسها عرقت دخلات نيشان للدوش تخفف عضامها ضرباتها بحكة وخرجات لبسات بيجامة قصيرة شوية بسروالها ، وهزات الفوطة كتنشف فشعرها وتعاود عينيها حمرين بدوش وحناكها مزنگين هزات واحد الكريم كان شراه ليها جلسات تذهن وتعاود ، سالات من لتحت دازت لشعرها لمعذبها تسرح وعقلها وتفكيرها فيه غير هو مهضر متكلم معاها معطاها فرصة دافع على حقها مجا لعندها مفيقها مطيب خاطرها بقى فيها الحال كيف منخلها حلفات تا هي متهضر معاه ولا تناقشو فالموضوع مهما هو مصمم يسكت وما يدويش تا هي غادير داكشي لي حادگ فيه تا يعيا واحد فيهم…فعز تفكيرها سمعات الخلفات فالدرووج رنة صباطو كتعرفها بقات محنية كتجبد فسالفها ،دخل عليها بانت ليه عاطياه بالضهر و شعرها لي سالب عقلو نازل تال الأرض وباين فازگ ريحة شمبوان من لباب شمها ، كيشوف فيدها ل على خير كيدوزو على خصلاتها ،حنحن بصوت مسموع ونطق – السلام عليكم !!
جاوباتو وهي باقة خدامة وعاطياه غا بظهرها اما وجهها معندو ميدير بيه ،نطقت بصوت تحت منها بلعاني دارتها وقال~ وعليكم السلام
عض على فمو كيتمم تحت شفايفو ومشا ديريكت بدل حوايجيو قدامها ومشى تجبد، داير يديه مور راسو وشاد عينيه وساكت وتاهيا مورياه سكاتها ومعفرة وملايحاش عليه راسها ، كملت ورجعت حطات الكريم فوق طابل دونوي بشنتة حتى تسمع صوتو وبدات تجمع الحوايج ل حط ليها فلبيت تردخ هادي وتهز هادي ، كتعوج عليه وتوريه فصالتها وفينما تتحرك خيرها يتحرك معاها تحنى شعرها يسبقها دوز من حداه ريحتها تبقى وراها حتى گهماتو وطيباتو ونبرة صوتها ولا حتى عينيها موراتو ، غمض عينيه وحلهم وزفر بجهد وهو ينوض من بلاصتو جرها من يدها ضورها لعندو ، قوس عينيه وهز حاجبو فيها اما هي ملامح وجها جامدين ولكن قلبها يعلم بيه غير مولاه ، حرك راسو بتساؤل وقال وهو مقرب لعندها كيهز راسو باش تشوفيه ~ مااالناااا!! هادشي غا سميتك نجمة ودايرة هاد الحالة كون كنت گمرة اش غديري
فگعانة منو وهازة خنافرها لسما وغضبانة ….خاطرها من لداخل كتنهيها وتقوليها دوي معاه تلين قلبها تنسى ودير شي باس مكان ،وعقلها خدام كيعمر فيها ويشارجيها يفيقها ويوريها ، محنيه وريييه عيبو ونخليه !! علاش لي ميسمعش ليك…علاش لي يغوت عليك قدام العادي والبادي كانت باغاه يفهمها يجييب ليها حقها وينصفها بالحق ميحك ليك غير ظفرك وميبكي ليك غير شفرك …جات وسط ذياب تجمعو عليها كيحفرو فين يطيحووها والراجل لي تهز بيه الراس مجاش منها ، فعوض لي يكون معاها وفجنبها عطاها اللسان الماضي ، وغوت عليها قبل مايسمع كلامها حلمات بزااف ونسات المكتوب ودابا جاي بزوج كلمات معرفاتو باغي يضحك ولا يطنز خلاتو حتى كمل وشافت فيه كتعض على فمها وكتشوف فالبيت كلو الا هو وقالت كتلعب بشعرها بعفوية ~ هاد ساعة غا نجمة !! نجمة طافية عمرها توصل لگمرة !!
دوز صبعو الخشن على ملمس بشرتها وقال منعس عينيه صوتو مكالمي ومبرد ناسي لبارح وهمو غا فلقدامو ~ يطفى غلام وتبقى نجمة
جاي يضحك عليها بزوج كلمات كيتسنى منها تعنقو وتضحك ليه وتخشيه وسط منها وينساو ل داز معامن هو قالت كتقلب على شي سلخة من عندو شافتو راشقة ليه قالت ارا نعصبو ~ غلام انا عييت بغيت نمشي عند ختي شي ايام نجلس معاها !! بغات تقطع عليه لما وضو تعاقبو بطريقتها تحرمو من راسها ، تطفي عليه شمعة ل جات ضوات ليه حياتو
حمر عينيه حتى قفزت وتخلعت من شوفاتو لِ ولات كتعرفهم مزيان شنو كيسواو جرها من يديها بقوة ونطق مخنزر ~ تركني الأرض حسن ليك قبل منوريك !! قالت ليك نمشي عند ختي.. جرها من دراعها كينثر فيها ، شفتي نهار خديتك مبقاو كيتسالو فيك والو الا رشقت ليا وبگانتي وبخاطري نديك نهار ونجيبك والا مبغيتش هنا مبقاك والا كاذب عليك راسك عتبي الباب!!
شافت فيدو فين حاطها ورجعت شافت فيه بنظرة غِييير، مولف عليها كتدوي معاه كتقطر بالحشما والحيا ودابا متمردة وحاقدة بصوت باح قالت ليه وهي كتبعد منو مبغاش تقرب ليه ولا تقيص فيه~ شنو غدير غتضربني ولا تزيد تغوت عليا ولا تنتفني بحال ختك!! عادي غير خود راحتك ولفت الحگرة ماشي شي حاجة جديدة عليا ..
محملش اش كيسمع كلام الحق مبغاه حد مكذبتش عليه قالت ل كاين من نهار حطت رجلها فعتبتهم وهي كتحگر من صغير والكبير وملي لقات يد حنينة ل تدوز عليها يدها وتطبطب حسدوها عليها ،زير على يديها بقوة محسش براسو حتى نفاعل من هضرتها، قرب منها جوج خطوات وزفر فوجها بقوة ~ نجججججمة سدي فمك ،حقك راه جبتو ليك باقي مزادش ل يحگرك وانا كاين
قاطعاتو بابتسامة كتسخر بيها من راسها وقالت ليه بتساؤل ~ ايوا وراسك كيف دير تجيب ليا حقي منو ها !! بداو دموع كيتجمعو فعينيها تاهما على سبة وخاص غير ل يجبدهم ، بلا متحس بدات تشهق وكتدوي كيقرب منها وكتبعد وفنفس الوقت كتهضر ، كتعرف غير تغوت كتعرف غير تلوم شفتي غير مك ل طايحة في الارض وعينيك تعماو ملي شفتي فيا
مبنتش ليك زيفي طايح بوحدي بين خواتاتك حاگريني محسيتيش بيا وشنو ضارني ،همك غير كلام خوتك لي كولو كذووب فكذووب عرفتي غير تسمع منهم ل بغاو يقولو ليك هزات يد لمحررة مسحت بيها عينيها وقالت معلية حجبانها معاجبها حال ~ بنت البارح هازة يدها عليا وناتفاني وانا خاصني نسكت ونحدر الراس ونحتارم على اشمن احترام كتهضر
مقدرش يشوفها مضيووومة مولف بدموع لعيالات ولكن دموعها اثرو فيه مكتبكيش فشوش خاوي كتبكي بضيم ،دمعة كتنزل مسابقة مع ختها ،خلاو قلبو يضرو عليها جمع قبضة يديه مع كل كلمة كتنطق صدرو كيطلع وينزل وخاطرو كيغلي نطق مزير عليها من خصرها ملصقها فيه راسها خاشيه فعنقو بعنف بزز منها وكيدوي تحت من سنانو~ نغوت عليك ومنخلي لي يغوت عليك ، صوت من غير صوتي الى علا عليك نسكتو فخطرة ، حقك جبتووليك وشعرك لي جراتك منو جريتها منو، انا مك انا باك لي أذاك أذاني
بعداتو عليها بالفن حيت الخاطر ل تهرس خاصو شحال عاد يتجبر نطقت وهي غادا لبلاصتها وقالت ببرود ممدخلة حتى كلمة من كلامو لراسو حيت الهضرة كتبقى غا هضرة ~ تصبح على خير !!
كرز على يديه بقوة عارف راسو متسرع وخضر ومكيعرفش يتعامل ولا يحزر ،ضرب لباب بقوة وخرج لسطح يكمي خاصو يتكالمى ويهدي من روحو قبل مايهرس دار كاملة هادشي ل كيقد عليه لغوات وصداع والكلام القاصح ، ضرب الرعد بأعلى صوت متزعزعش من بلاصتو واقف وشنا فوق راسو خيط من سما البرد كيضرب ليه فوجهو
يستاهل البرد ل ضيع دفاه ، هادي دير ليه عقل ويعرف معامن هو نجمة ماشي هي زهرة ولا لكبيرة نجمة نيفها فسما مكترضاش بنص كلمة دوزت ليه لولة وتانية ولكن هادي شريعة النبي معاه ، الا هو كيعرف يدوي بالماضي هي غتقتلو بسكاتها
لسان مافيه عظم ، فلحظة غضب وتسرع فمنا كينطق بهضرة كندمو عليها من بعد وغلام حس بالذنب تقليقت مرتو قلقات راحتو عند بالو بكلمة حنينة غايخلي قلبها ينسى ويسامح ، ولكن هادي ماشي أي وحدة هادي نجمة لي رضات بالذل حتى مقدات حتى قلبها طاب ودابا وقتها فين ترجع حقها بيدها ماشي بكلمة حنينة غادي تنسى غواتو ليها ، لا راه الجرح يبرا ويصير ملموم وايني كلام العار كيبقى فالقلب مرسوم .مخشية فبلاصتها دموعها هابطين حسات براسها مكتسوى عندو تا بصلة جرات الغطى وغمضات عينيها مكمشة يدها فبعضياتهم جرح قلبها كينزف فحين هو سرد بالماء حتى سحات شتا عاد دخل …بانت ليه مكمدة ففراشها ناعسة تنهد وبدل حوايجو ، عاد دخل لبلاصتو كيفكر كيف يدير معاها شنو يدير باش يراضيها ، فعز نعاسها سمع ديك الشهقة ديال البكى كتزوورها نذم وقرب لجيهتها قاد ليها لمخدة شم ريحة شعرها وتكى قريب منها غمض عينيه على ريحتها حتى ذاتو عينيه …
فاقت على راحتها راسها شوية كيضرها شافت بلاصتو ملقاتووش تنهدات وناضت قدات حاجتها ونزلات لتحت ، بانت ليها الكبيرة فالكوزينة كتوجد الفطور بيديها دخلها لعجب ، باست على راسها وقالت ~ الصباح الخير خالتي كيف بقيتي !!
نطقات وهي معاجبها حال ، ولي فيها ممهنيها كتنگر وتعاود ~ هاني الحمد لله ،شيخك عيان ومكاين لي ينوض لهاد الدار يخملها تا من لفطوور خاصني نوجدو راسي رحمة تقهرت بشقا ، عرفت المعنى عليها شافت فيها وحيدات ليها صينية من يديها ~ غير جلسي اخالتي انا نقاد الدار اليوم ونحك الماعن غير رتاحي ..
كانت طالبة عليها مقالتش ليها لا هادو هما لعدايزات اغلبيتهم كتبان ليهم عروستهم خدامة جابها ولدها تشقى عليهم بزز منها خاصها دير وتفعل متقولش لا ولا عييت ولا مقديتش ولا تفيق معطلة ولا عيانة روبو كتخدم بضو كون يصيبوها تبقى واقفة في كوزينة متحطهاش للارض ،بلا حيا رجعت قالت ~ كاينين شي ماعن خاصهم جيكس ابنتي ، هاد كلمة بنتي كتلوحها باش تحنن قلبها زعمة راك بحال وحدة من بناتي كلمة خارجة غير من لسان اما قلبها كحل قطران
هزات ليها نجمة راسها باه، ومشات كملات توجاد لفطور معند الميت ميدير قدام غسالو تنهدات بتعب حطات داك لفطور تعتق ااروح وزهرة ولبنات مفاقو تا لزك نهار خارجة مريم كتفوه غير شافت نجمة صبحت على الله ،نطقات وهي كتشوف فزهرة ~ صبحت عليك نهاري كحل مافيه ضو ابنت ميميتي كحزي من حدايا ها عار ربي !!
كتحشي لهضرة لنجمة النتفة ل عطاها غلام غير مزادت زرعت فقلبها الحقد والكره من جهتها ،غمزاتها لكبيرة تسكت وهي تجاوبها زهرة ~ كووولي كووولي فعشنا وينشنا ولينا نخافووو وحنا فدارنا ، مبقات راحة فهاد الدار
وقفو ليها شدگ فحلقها محسات براسها غير نايضة من حداهم دمعة يتيمة نزلات من خدها دخلات الكوزينة كتجري جبدات دووك لماعن تفش فيهم قلبها باش يرتاح وترتاح حيت القلب الا كان مهموم كتبان على وجه مولاه ..
دوز صباحو كامل فتمارة غارق فيها وناسي همو ومشاكيلو، من بعد ما سالا غسل يديه ووجهو عاد تكيف ليه گارو قاد بيه مجاجو هز تجاكيط ديالو وقصد طوموبيلتو فطريقو داز عند مول لفولارات خدى ليها شكيلات جداد وكيفكر شنو يزيد ياخد يراضيها وينسيها فشنو دار خدا ليها بيجامات ل هز فيها عينو وعجباتو ياخدها باغي يراضيها ومعارفش كيفاش ممولفش الحزارة وعمر شي وحدة دفعت عليه زينها غالي حتال نجمة ،خلاتو يومين مقطوع الراس صامتو
دارتو مكاينش واخا ناعسة حداه، ولات تنعس بعيدة عليه بعدما ولفاتو شعرها يلعب فيه ،وهو كيختار شنو ياخد بانتليه شومييز زوينة حمرا صدرها مشبك ونازلة توبها ساطان ، بلى ميخمم شراها ليها ورجع بحالو شاد طريق الرجعة مسافة طريق وكان قدام الدار هابط هاز بيديه بزوج كيف بلاصة طوموبيل بانو ليه عينين صباح عليه هبط يتنثر كيف عادتو يخطب ويردخ بمشية ثقيلة دافع صدرو وعينيه قدامو معبرهاش حتى سلام ل مولف يقولها ليها من بعيد قطعها معاها حطها سطل بلا تقرقيب
باش يله تعبر شبرها وتجلس عليه ماليها معنى مزوج وحدة ويدوي مع لوخرا… بعينين حزينة رمقاتو كتحصر عليه كيف كان معاها وكيف ولا ..تقول حطيتي واحد وهزيتي واحد اخر هيبتو ورجولته الطاغية ميزااه على الف راجل ..بغات فيه شهامتو وعشقت فيه رجولتو وعزت نفسو وشخصيتو وهيبتو ل فارضها على ناس درب من راس الراس كلشي داير ليه لحساب من وهي بنت صغيرة غير تحط راسها على المخدة تحلم براسها معاه ضلمت راسها وبنتها بزواج كان وسيلة تغيضو وتنساه بيه فوقت ل هو مكانش فايق ليها من نعاس وممدخلش لراسو لبنات.. تنهدات بحزن كيف شافتو دخل لدارو وزدح لباب فوجها بجفاء طالع فالدرووج كيشم ريحة جافيل من لباب ، قوص حجبانو ودخل لصالون بانت ليه زهرة ولي معاها جالسين حاطين مسلسل والكبيرة حداهم ، غير شافوه ناضو كيف جنووون كيجريو خايفين منو وحناو بغاو يهزو عليه التقدية…وقفهم بيدو وقال بلا حشمة ~ هادشي ماشي ديالكم !! فين هي نجمةة !!
تلونات زهرة كدور فعينيها كيف شيطان ونطقات وهي خايفة ~ كنت اخويا كنغسل الماعن انا نحلف وهي تحلف خداتهم من يديا
حرك ليها راسو يمعنى تيقتك ومشى لجهة الكوزينة لقاها واقفة على بوطاجي كتحك وتعاود جامعة شعرها بزيف حياتي مگفظة كمايم و بيجامتها كلها سردات عليها نكق حتى قفزها ~حيدي داكشي من يدك وطلعي
بلاما تشوفيه قالت ~ نكمل ونطلع
حمر فيها حتى قفزت وقال بالغوات ~ قلت ليك طلعي …!!
لاحت شنو فيدها ورضات غرورو ، طلعت قدامو وهو وراها كانت غادا على صباع رجليها كتهز وتحط عليه تما وكل رجل عارفة فين تحطها غادي وراها متبع ليها لعين كيعبرها من رجلها لراسها مشيتها ميزان دخلت لبيت وغير حلت لباب حيدت زيفها من على راسها كتنفس ، كتبين ليه بلي بزز عليا دايراه قادات خصايل شعرها كتمسح على وجهها ، حط شنو جاب ليها فوق ناموسية ونطق وهو كيحيد في دجاكيط بأمر ~ حيدي ديك بيجامة غاا تمرضي
شافت راسها البيجامة بصح فازگة عليها ، تنفسات بتعب ، ودخلات قدامو كتلوى عليه بمشيتها هزات بيجامة اخرى ، من بلاكارها ، حتى نطق هو ~ شوفي شنو فالميكات ولبسي شنو عجبك تما…كيتسناها تهزهم تشوفهم لقاها مداتهاش فيهم معجبوووش الحال…مشات لماريو هزت منو بيجاما من عندها خفيفة ودوبياس بدلات حداه وقدامو بحالا مكاينش زولات بيجاما وتبعاتها ضوني وشورط ،وصلات لسوتيان وهي تعطيه بظهر ..حيداتهم خلات ضهرها مكشووف حداه بيض ناصع وهزات سوتيانات اخرين لبساتهم خلاته كيبلع فريقو لي نشف عينيه مستقرين عليها بهدوء تام حلات شعرها ل نزل على طولها غطات بيه انوثها ولبسات سليب على خاطرها وبشوية عليها بلاما تحسيو بوجودو وهادشي فقصو وشعل فيه العافية كثر ماهيا شاعلة انفوا حطات يدها على بيجامة غتلبسها ناض لعندها جاعر جرها لجهتو ونطق معصب وواصل لافان ~~~~
كثرة الخصام ملح المحبة !! الحياة بين زوج مزوجين ماشي ديما كتكون زربية مسرحة لا بحالها بحال لبحر مرة هايجة مرة هادية ، بحال السما مرة صافية مرة مغممة ،بحال الجو مرة مشمش مرة ريحو كيطير وكيبقى عاصفة ودايزة قدما طولت غتهدى وتقاد دنيا وتحلى وراها…
كان جاعر عليها موحش كلشي فيها وهي عاطياه مَشِّي ، كيدوي معاها وكتصمك وذنيها، من برا كتبان ممسوقاش ومبردة ولكن من لداخل كانت شاعلة فيها العافية خايفة يزيد يغضب ويخرج ويخليها ويزيدو ايام لخصام ثاني وفنفس الوقت مرضياش تسمح ليه بسهولة ، ل دارو ليها مغدوزوش بساهل حيت الا فوتت هادي ودارت عين ميكة غيولفها فيها علاش ما عوداتو يتعود خاصو يعرف بلي تقليقتها خايبة ويدير بحساب لسانو ويعرف شنو كيخرج منو ، لسان ل مافيه عظم ممكن يجرح ناس وينزل دمعات ويسهر عينين ويألم قلوب وهي قلبها ولا طايب كثر من قياس ولات دمعتها مخبية فطرف عينيها ولا خاطرها على سبة داير بحال الجرحة ل غير تقيسها دوز بدم وتعگر …
واقفة قدامو لابسة دوبياس فالكحل عكس لون لحمها شعر حرير مسرسب من عند الله وجهها مافيهش قطرة ماكياج مزنگة غا بسخونية ل طالعة من جوفها ، غير حطات ايدها على البيجاما بغات تقيصها وهو ينوض جاعر وانما لصبر حدود داك لگرام ل بقى ليه تقادا معاها ، خطف بيجامة من يدها كان غيقطعها وتراجع لاحها مع الحيط وعض على لحم فكو من لداخل كيبرد فراسو العصاب ل شدو ، شد ليا نقطع ليك معندوش معاه ، دوي معاه ولا حافيه فخطرة غنج لعيالات مكيعرفش ليه ،جرها من يدها شوية ويفكها ليها وضورها لعندو مقابلة معاه حجبانو مقرونين وعينين مطرطقين ،من الداخل ربي ل كان عالم بيها قلبها غيسكت ومن برا كتقن فن النخال ، نزلات عينيها الارض حتى دلا شعرها مبغاتش تشوف فيه وهو يمد يدو لفكها شدها منو حتى قابل كحولية عينو مع مومو عينيها لمخلوض بلهلا يطريه ليها ، ونطق مزير على يدو وكيدوي من تحت سنانو تقول مقطوع ، لمجاج ل قادو قبل ميدخل عندها تبخر مع تعاملها البارد من جهتو دوا معصب وقال~واش مكنبانش ليك فلبيت ولا شنو ؟؟ كندوي مع الحيط ولا مع بنادم ،كيدوي ويزير عليها بلاما يحس كمل كلامو حاضي ملامحها كان محني لعندها ملاصق وجهو مع وجهها ،رجعت حمرة وصدرها كيطلع وينزل قدامو لاقات جفونها مبغاش تشوفو مبقى عندها متقوليه وهو يرجع ينطق مكشكش وحرك راسو بتساؤل وقال ~ تي مال عدو ** درتي ليا حالة هاد يومين واش كتقلبي على شي كارثة معايا قوليها نخرج نقلب عليها ونغبر عليك وجههي باش تتهناي فخطرة حيت داكشي ل بان ليا باغا ؟؟ قلنا كلمة ندمتينا قالبة وجهك عليا وتنفخي وتسوطي راسك انا مهرب المشاكيل ونتي كتقربيهم ليا
بلعت ريقها ل كانت حاسة بيه نازل فجوفها مر ،ورجعت حلت عينيها لي عمرو دموع كتشوف فيه مضيومة برودة دمها مشات ورجعات سخونة بمعاملتو وقصوحيتو كتقول هنا يلين هنا يحن عاد مكيزيد يوعار ويقسى ، هزت ايدها ل كانت كترعد حطاتها على يدو ل كانت مزيرة على فكها باغا تحيدها ملامح وجها تعقدو بألم وعتها كتبقى على سبة وهشيشة عكس هو ، حس بيها ورحمها من قبضة يديه ل تحولت من فكها لخصرها حطها تحت ظهرها فوق لحمها لعريان حسات بيها حرشة وسخونة محدو كيزير عليها وكتزيد يحرقها بلهيب جسمو كان بحال البركان شاعل ~ مبغااش تدويي !! مكبرة فيا صووتك !!
عيات تصبر وتربط لسانها حيت الا مشات حتى دوات غتزبلها وهي معصبة ل فقلبها كتقولو بلا تخبية عندها يا بيض يا كحل لملون مكتعرفش ليه ~هادشي لي كتعرف دير ياك ؟؟ خليني ساكتة حسن حيت الا دويت مغتعجبكش هضرتي
هز حاجبو ليمن وزاد غرس صباعو فلحمها ~ غا نطقي وقولي اش عندك فشي قلبك وخويه !!
طرطقات ليه فوجهو نيت كانت على سبة من صباح وهو يقلب يجبد عيبها وهاهو غيلقاه ، كانت كتغوت وتبكي ايدها بزوج حطتهم على صدرو كتدفع فيه وهو لاصق ممفاكش ممخليش ليها فين تحرك مقوس حجبانو وراخي عنگرتو كيسمع ليها ~ نتا باغي غير تعاير ودير كوارث وتعصب وتهرس وتتضرب وتجرح هي كتدوي وهو كيزيد يزيرها لعندو وسنانو عاضين فبعضياتهم ، بدات كتغبن بصوتها وكتبكي وتدوي فنفس الوقت بهضرة مقطعة ~ انا شنو درت ليك گاع !! واش انا ل قطعت ليك صندالة عزيزة عليك بلا موجب شرع ، واش انا ل غوتت عليك قدام عائلتي وهبطت من قيمتك ، واش نتا ل تحگرتي وانا زدت حگرتك معاهم وزدت طلعت كملت عليك
قرب ليها صدرها كيطلع ويهبط قدامو بيض مبندر ،نزل عينو نيشان كيروي عطشو فخيرو ل مزلع قدامو ومقادش يتمتع بيه حيث شوف ميبرد جوف تنهد بصووت عالي مخرج عصبيتو وانفاسو الحارقة ….وجرها من خصرها كثر لعندو كيدوز على شعرها بحنان وهي كتشهق فحضنو وترتاجف دموعها عمرو وجها وعنقها نزولا مع فرقة صدرها ، قلبها كان عامر محدها كتبكي وهو كيزيد يزيرها لعندو بقوة باغي يخشيها فيه فشلاتو ببكاها وخلعاتو عليها بلاما يحس شد وجهها بين يديه الغلاض وباس على راسها ونطق بنبرة صوت خافتة سخونة كتضرب فوجها ~منقدش نحگرك ولا نشوفك كتحگري ، الا غوت انا منخليش ل يرفع صوتو من ورايا عليك راني نهد دنيا ونقلبها على ودك !!
عضت على شفايفها بدلال ونطقت ~ اممم باينة !!
حنى باسها فالعين لولة وداز لتانية كمل بحناكها حتى حس بيها حبسات من دموع ، عينيه على فمها لصقها معاه كتر ونطق ~ صبري تقادا !! صندالة ل بقات فيك من غدا نشري ليك عوضها عشرة غا هنينا وسلكي معايا جرة
فكرها فيها بلاما تحس نفخت وهزت كتافها وقالت معبسة تاني وثالت ~ انا بغيت صندالتي عزيزة عليا علاش تقطعها !! بالحق نتا ديما حارمني من حوايج ل كيعجبوني شعري كفنتيه ليا بزيف خلخالي قطعتيه ولحتيه صندالتي هرستيها كتدوي وتمسح دموعها وكتنفخ دغيا تزنگت وشفايفها تنفخو نيفها رجع حمر مسح ليها عينيها من جديد ونزل صباعو لفمها دوز عليهم زغب لحمو وقف ولا كينهج ويد لوخرا هابطة مع سلسول ظهرها ،حل ليها سوتيان بلاما تحس ونزل لخصرها كيدوز بحنية ،حلات فمها بشوية متبعة ملمس يدو فين واصل عينيها بداو يتنيمو وكرشها كتفرفر ،شوية خشى يدو فسليبها تما ترفع مبقاش عاقل على راسو ، كان كيشد راسو عليها بزز بكلشي فيها كتحرك رجولتو وتفيق شهوتو وهي باكية وهي مقلقة وهي ضاحكة وهي منفخة هزها لعندو غادي بيها لمحكمة العشق فين غيوضع حد لخصامهم بزوج فين غيعتاذر منها بالحب واهات العشق،حطها بشوية لايح لميكات ل كانو تما وفرمشة عين ولات التحت وهو فوق منها مكالي ثقلو كيدور عينيه عليا بعدما سلبها زوج قطعات ل كانو على لحمها بابتسامة جانبية شافيها وهي كتخبي وجهها بشعرها ، كثلة من انوثة قدامو متسناش كثر قبل ميدوق رحيق عسلها ل تحرم منو بعد خصام بنسبة ليه ليلة منو كامت بعام، ايديه كانت كتحرك بحرية في هضبات حلالو وحتى هيا مبخلاتش عليه بلمساتها دافيين ل كيجعروه
فوق لفراش كيتنسى الخصام والعتاب الهمسة كتخفي الدموع ، واللمسة كتهمد الوجع أما القُبلة كتجبر القلوب ،نجمة قدما كانت معصبة تفشات قالت ل عندها وبردات ، مغتنكرش تاهيا عينها فيه واخا كتقول يخخ عليه وشكون يدفع كبير على الحب بعدما ذاق حلاوتو
كثلة من انوثة قدامو متسناش كثر قبل ميدوق رحيق عسلها ل تحرم منو بعد خصام بنسبة ليه ليلة منو كانت بعام، ايديه كانت كتحرك بحرية في هضبات حلالو وحتى هيا مبخلاتش عليه بلمساتها دافيين ل كيجعروه ول كانو اشارة منها ليه باش يبدا فرحلة الشهوة والرومانسية ول بصم فيها صكوك ملكيتو عليها وداق العسل الصافي ل كينقط من شهد خالص حالف ميوقف حتى يكملو ويحل رموز احاسيسها ويخليها تطلق اهات وانين معلنة بيهم طلوعها اول درجة من سلم الرغبة والشهوة والجموح معاه من جديد….
~~~~~
دازو أيام والليالي وسيمانات ولاو شهورة ، وغلام ونجمة دايرين بحال الرياح الموسمية كل مرة بحال كيتصالحو ويتخاصمو ،تنفخ بنهار عليه وفليل تلقى راسها مخشية وسط منو كتضحك معاه مخاصها خير ،واخا مبغاتوش ومكانش فارس احلامها ولكن كيبقى اول راجل حسسها بأنوثتها وعرفت معنى الحب معااه ، ملي قربت منو وعرفاتو وولات معاه زوج فواحد فوق السرير مبقاتش قادرة تبعد عليه كأنها كتعرفو من زمان يا رحمان، كتغضب فوق من خاطرها عليه وفنفسها كتدعي يحزرها باش يطفي غضبها و فليل تخشى فيه ، بحالو كانت متقدرش تطول في خصامها معاه واخا يدير ل يدير غتسامحو بعد العتاب حيت معندها هروب منو ، مغتلقاش بحالو راجل قبل بيها في زمن المرا الهجالة كانت وصمة عار ، ل بغات فيه انو عمرو عايرها بماضيها ولا بشنو وقع ليها ولا جبد ل فات على فمو بالعكس كان راجل ونص نساه ورماه فخانة المهملات حتى خلاها بينها وبين روحها تنسى باهتمامو بيها شي راجل غيرو واش داز فحياتها، عرفت معاه الفرح و البكا و الضحك لقاتو ولد باب الله وعايش بلي مقسم ليه العالي مولانا في وقت لي كان خاطرها مريض و عيونها بكى و دم كانت كتصلي و تدعي طالبة من الرحمان يبرد حرقة قلبها غلام كان هدية من عندو و دوا ليامها رتاحت ليه من بعد ليالي كحلة و عرفت ليه فاش سمعت لختها في شهوراتها معاه حفضت خطاويه و ريحتو لي سابقاه حتى ولات في كل ما تحس بيهم قلبها يقفز و تسكت فيه
كيقول ليك زوج دالحوايج رد بالكم ليهم بين المرأة والراجل ، المرأة تكره فالراجل البخل والكذب والخيانة ، والراجل يكره في المرأة التمرد والتبذير واللسان السليط ، بلا هاد الحوايج تعيشو مزيانين بيخير وعلى خير ، بين نجمة وغلام كان الإحترام لي افتقدناه هاد الزمان مكانتها عندو كبيرة كانت ولا زالت وغتبقى اول مرا كتحتل مملكة قلبو وعقلو ،كيدير ليها حساب كيفكر فيها ويسبقها على راسو ولما لا وهي لي ساكنة قلبو وعقلو ، فحنيتها وظرافتها ملكات جميع حواسو ، واخا باقي كيتعصب بعد مرات من فعايلها وفشوشها عليه ولكن كيحاول يكالمي روحو معاها بزز منو ، حيت مكاينش غيرها لكتقرا همو دخلت لحياتو بحال النسمة بردت صهدو وضوات طريقو وخلات لدنيتو معنى وطعم بعدما كان عايش غير بسمية ولا يدخل يلقى شكون يتسناه الا تعطل تشطن عليه الا مرض تقابلو وتداويه.. مبقاش عرف شي حاجة سميتها يبات برا بيتو ولا من خدمة لدار دار خدمة جنبو على جنب مراتو ميغفى غير حداها وما تحلى ليها النعسة غير فوق صدرو ، لعدوزة كتبقى عدوزة مرة تضحك ليها مرة تبكيها اما طفيلاتها مذوقينها لمرار كل مرة بحاجة ولكن على وجه لكتاب كتباس الجلدة
صبح عليها صباح نهار اخور من حياتها وماشي بحال عوايدها ما فاقت ما نزلت عند ناسها راسها مقلوب عليها و صدرها دايق بيها و غير كتحل عينيها كتحس بالدنيا كدور … شافت الوقت داز و مبقات نعسة في الفراش كابرات ولاحت عليها العگز و ناضت كتمشى غير بثقالة حاسة بعضامها طايحين و عينيها لي مقاداش تحلهم … نزلات التحت بالكشيفة دنيا كدور وخاطرها عايفاه دخلت فين جالسة الكبيرة و بناتها لاحت عليهم سلام الله وجلسات حداهم كلهم كيشوفو فيها شي كيطلع شي كيهبط وشي كيقول هادي واكلة دگة من الراجل و ساقله عليها … مكاينش لي قاليها نوجدو ليك اتاي ولا مالك ا فلانة حتى نطقت الكبيرة لي كانت كتفليها بعينيها معاجبها حال كيف ديما ، كانت مربعة يديها قدامها و مصغرة عينيها فيها كطلع وتهبط بحال الحية ~… نجمة بنتي مالكي واش صابحة عيانة لا شنو ؟
هزت عينيها و غمضتهم ثاني كتحس براسها ثقيل ~… عيانة بزاف واقيلة ضربني البرد
طلعت فيها زهرة و نزلتها و قالت بينها وبين راسها ربي يزيدك ويعطيك حتى متلقاي رجلين يهزوك نتهناو منك
زهرة بضحكة صفرة شافت في رحمة وقالت فوق القلب~ … نوضي جيبي لمرات خوك كويس ديال اتاي ترجع بيه مجاجها راه مريضة مسكينة …
داكشي لي دارت ناضت بجرا وجدت صينية وجابت ليها حتى لصالون حطاتو قدامها مع علات البراد كتكتب وطلعت ريحة اتاي ونجمة عينيها تقلبو وطارت للحمام تقيا و تعطي لقلبها والوجع شادها… أما زهرة غير شافت شنو وقع قدامها كحلات بالعمى وطرطقات عينيها بصدمة فالكبيرة ،خبطت حناكها وتمت مهبطاهم بندبة ~… وااااا قفارت علينا اميمتي هادي لخرة ليناااا ،مرت ولدك باينة هازة فكرشها …
متقدرش لكبيرة تخبي فرحتها ترعت فمها وبدات تضحك وجمعت الوقفة بغات تبعها وهي توقفها زهرة وقالت بنفخة ~ فين غادا جلسي الارض شفتك عجبك الحال!!
عوجات فمها فيها وخرجات فيها نيابها وجوبت ~ شفتك قد القب قد السطل ياكما نسيتي راسك ؟ الا بصح حاملة ل فكرشها ولد ولدي يعني من لحمي ودمي لكبدة لمعاودة هاديك !! كيفاش مبغيتينيش نفرح ؟
غمضت عينيها وحلتهم ونطقت كتعمر راس مها بلي كاين ولي ماكان، تشنديل كطير فيه~ مي يهديك الله ! شفتي هادي الا ولدت مع ولدك داتو ليك ، راه فقيهها صحيح ، مشفتيهاش كيف كترضو خاتم بين صبعها علم الله الا عمراتو ولاد وجهو يقلبو عليك غيولي كلشي بين يديها وديك ساع عنداك تجي تبكي عليا وتشكي
فالوقت ل شيطانة كتخدم مساوسها نجمة مصارنها حطاتهم ،هزت راسها دايخ غسلت وجهها وطلعات لبيتها مبقاتش قادة توقف تجبد فبلاصتها حاطة راسها على لمخدة لموت داخلاها ، فداك الوقت تليفون الدار كان كيصوني ، تليفون ل خداه غلام اول مخرج كانو بثمن وقلال فداك الوقت والهضرة بالگرام والحياب كلشي كان ليه الهمة وشان ، صونا جوبت رحمة كتخاكف مع زهرة من نهار ركبو ليهم مكاينش من غيرو كيط فيه يطمن عليهم وفكل مرة يتخاطفو شكون يجاوب ، سول على مرتو كيف العادة وعرف من جدة مو العريف حالة نجمة ، تشطن بالو وتلفت عليه الخدمة حط كلشي من يدو وشد طريق، كان صايگ كيفكر فيها شغلات بالو وتشطن وميهنى تا يشوفها ، وقف طوموبيل حدى باب دار ونزل طالع كيخلف جوج درجات فدرجة جاي بلباس الخدمة معندو لا فقايد لا فرباعتو ، ما وقف حتال قلب صالون لقى لكبيرة جالسة وشياطينها دايرين بيها ، دغيا وقفات زهرة شيطانة لكبيرة ديالهم ونطقات ~ خويا دخل نقاد ليك شي براد اتاي كيف ديما ؟
نطق وهو عينيه كيقلبو عليها ~ فيناهيا نجمة ؟
جوبتو الكبيرة معوجة فمعا مولف كيف يدخل يسلم عليها ، ساعا مقربش منها بسباب سهوتو وعلقو لمشغول على مرتو وكيف ديما خاصها علاش تفگع قلبت عينيها عليها ودوات بنبرة مغايرة وقالت ~ ما بيها والو غير عيانة راها طلعات ترتاح مع الكلمة اللخرة كان فالدرووج دخل عليها كانت مجبدة فالفراش فاشلة وعينيها مسدودين ، قرب منها كيشوف لونها مخطووف صفرا كيف لخرقوم …حط يديه على حناكها وراسها كيقلبها واش فيها سخانة ونطق بخوف متملكو ~ نجمممممة ماالك ؟
هزات راسها تقيل عليها نفسها ضايقة مقاداش تدوي ~ والو غير عيانة يمكن ضربني البرد لبارح دوشت في صباح ونزلت
بلاما يدوي قرب منها باهتمام جلس حداها بلباسو لمسخ وقف راسها وتكاه على كتفو كيقلب فيها يقيصها فراسها ويعاود لحناكها وهي عاجبها حال عمرها عافت لباسو ولا ريحتو، بالعكس كتفرح حيت خدام بعرق كتافو هز يديها فاشلين قربهم لفمو باسهم ونطق ~ نوضي نديك لطبيب حالتك معجباتنيش جوبتو بعينيها ونطقات بصوت بالكاد سمعو ~ لا بلاش مكاين لاش نتكى حتى تفوتني
ناض ممسوقش غيظير ل قاليه راسو كيقلب على حوايجها يلبسهم ليها ،حتى دخلت عليه لكبيرة وقالت ~ خلي عليك البنت مرتاحة راه غا نزلة وغتفوتها مكاين لاش تحط فلوس عند طبيب على والو !!
دار شاف في مو معجبو حال مكيبغيهاش تدخل بينو وبين مرتو من ديما كيتبرا منها ول فدماغها فدماغها نطق تحت من سنيه وقال ~انا علاش خارج في سروية نضرب تمارة الا مديتها لطبيب فاش غنخسر هاد لفلوس الا مخسرتهم دابا ؟؟ ….ربط لمو لسانها بلجام غليظ ضربتها من وراه اللقوة وطمرت
الهم المنحوس خليتو فدار جيت لقيتو فدار لعريس ، فينما مشات قلة زهرها يسبقها ل سمع كلام عدوزتها يقول هادي عروسة خايبة ومتسواش مربعة يديها ومعمرة ولدها عليها وهي متحني متدني متقوليه لا مك لا ختك بنهار تخدم عليهم كي لحمار بالبردعة وبليل عاد تضرب لفگد وتدور براسها ، ونهار طاحت وجات فيها مكاينش ل عقل عليها واول وحدة لكبيرة ل كون كانت وحدة من بناتها ل مريضة كون طارت بيها لطبيب وحيت هادي غير نجمة مسكينة مبغاتش يتخوا عليها الجيب، الحاصول مول القلب الصافي ديما زهرو حافي وهادي غير الدنيا الدوارة وسمطة كدور ولبزيم غيجي نهار ويفلق ،كانت مطرطقة عينيها فيه معجبهاش كلامو وملقات متقول ليه ، تلجم ليها لسانها وهي كتشوف الخوف لي فعينين ولدها على مراتو السم منها يتقطر تقول ماشي عروستها هادي ضرتها ، تعميرة زهرة ومدير واقفة فالدروج طالقة وذنيها وكتسمع كلام خوها ، بشنتة ناض كيقلب ليها على جلابتها لبسها ليها و عطاها شالها ونطق وهو كيشوف فمو كيدير ل فراسو وممحتاجش ل يوريه ~ غنديها لطبيبة الواليدة باش نعرف اش عند مرتي بلاتي ندوز !!
حمضات فمها فيه جامعة يديها بزوج ونطقات ببرود ~ وتسنى بعدا نمشي معاكم كاينة واحد طبيبة غير قريبة هنا فدورة !!
مخاص تا حاجة تفلت ليها خاصها تگلس على يديه وتدق مهرازو باش تا حاجة متفوتها نزلات فالدروج كتعيط لزهرة وتغمز فيها تمد ليها جلابيتها ، فحين هو مرفوع كيشوف فيها ذابلة ومرة مرة يقلب ليها جبهتها بخوف واش فيها سخانة .. فالأخير قاد ليها شالها ، وحاوطها من خصرها نازل معاها غير بشوية ..فرحت لإهتمامو بيها والخوف لي فعينيه عليها حاسة بدنيا كدور وايني صابرة وشادة فيه ، ركبها لور حيت مو طلعات تبندات لقدام جالسة كيف عوايدها تقول لبلاصة مكتوبة فسميتها ومعند حد الحق فيها ، مسافة الطريق كانو فالطبيبة ، نزل شد فيها ومو معاجبها حال غير كتأفأف وتعاود من زهرهم ل تما كيعرفو لكبيرة وولدها سرباوهم ، دخلت معاها لكبيرة وهو بقى على برا جبد گارو محتاج يكمي كيمشي ويجي مشطون عليها !! بعد تقريبا كثر من ربع ساعة ، خرجات عندو مو معوجة سيفتها متعرفها فرحانة ولا حازنة عينيه على نجمة كيشوفيها كانت مزنگة وابتسامة جانبية مزية فمها ونطق مسول مو ~ ياك لباس شنو گالت الطبيبة واش كل شي مزيان ؟
شافت فعينيه الخوف ل عمرها لمحاتو الاهتمام المسؤولية الحب ل مراتو ل عمرها ظناتو غيكون ولا غيعطيه لشي وحدة ،هزات راسها فيه ونطقات مع ابتسامة خرجت ليها ~ اوى مبروووووك عليييك اولدي الطبيبة قالت غيجيك شي وليد ولا بنيتة فالطريق …قلبو بدا يضرب بجهد ،قوس عينيه ل عليهم غشاوة بسباب الفرحة ل غمرات قلبو تبسم إبتسامة ل قليل فين كيشوفوها كيستوعب شنو سمع …
وليد ولا بنية كلمة عمرو ماحلم ولا تخيل انو يسمعها كان كيسمعها بزاااف من عند الناس لولادهم لبناتهم لحبابهم لكن هوا لا كانت حياتو مختاصرة انو يجيب قوت يومو لمو وباه وخوتو لي هوما ولادو وفقط !! وكيف كنقولو كان عايش جوال فين راح عليه الليل يبات دابا واخا معرف فين يكون يبات حدى مراتو لي مسخنة فراشو ومدفية قلبو ولي عيشاتو وحسساتو بشي حوائج عمرو حس بيهم ولا عرفهم اشنو هوما ..جر نجمة عندو وباسها في راسها بوسة طويلة ختازل فيها جميع انواع الاحاسيس ودمعة يتيمة نزلت من عين البنت البسيطة لِ قدرات تجمع ليها جنابو وتكبح ليه غضبو وقوتو واعصابو وصبرات ليه وصبرات لمعاملة ناسو ليها وفرحاتو بكلمة خلاتو يحس بنفسو بنادم وعندو دور ….تاهو غتولي عندو التريكة لي غتسخن كتافو كيف ما سخن كتاف باه ومو وخواتاتو حتى هو غيوليو الناس يعطو عليه …بات فلان ولا فلانة ،غيدي المدرسة وغيجيب منها غيكسي ويصبط غيهز لحمو ودمو ويخرج يساري ويلعب شلا افكار طاحو ليه في بالو لكن كان باغي ينفارد مع راسو باش يستوعب انو المستحيل مع الله حقيقة
رجعو لدار عينيه محلولين وراشقة ليه كتبان ليه دنيا زوينة فعينيه دخل لصالون مع نجمة كانو جالسين خواتاتو واكلهم لفضول ، نصلت لكبيرة جلابتها لاحتها على سداري وقالت لبناتها وهي كتنهج سخفانة من دروج ~ قولو لخوكم مبروك غتوليو عمات !!
رحمة فرحات ناضت عندو تسلم عليه وتبارك لنجمة اما مريم ميقت ودارت راسها مسمعتش شنو تگال وواحد زهرة شعلت فيها العافية ، جاب ليها راسها خوات الما في رملة كانت باغا تفرقهم دابا اش جا مفرقهم ، بللت حلقها وقالت باينة عليها الكعية ديك مبروك خرجتها من فوق لقرجوطة ، شاف غلام فمو وقال وفنفس الوقت عينيه على نجمة ل كانو حناكها سخان ~ لواليدة ردي معاها البال متهزش ثقل ومتوقفش في كوزينة ترتاح والا بغات شي حاجة كيفما كانت نجيبها ليها !! ملي منكونش انا نتي عيني هناا ؟؟
لكبيرة مسحت على وجهها كتضحك ضحكة صفرة ~ اش عندو ميوقع ليها اولدي الا كانت كرشها مطياحاش واخا دردگ معندو ميوقع ليها ، كنت حاملة بيك كرشي لفمي ونتحنى على لقعدة ونجفف على ركابية وهانتا ولدتك راجل تبارك الله الا شقات راه غا تشقى غا عليك
عوج فمو بشووفة حارة وجاوب ~ الالة انا معندها متشقى ليا ،دوك لحوايج ل كنحط تخلي بوهم مسخين نجي نشتف عليهم برجلي وكرشي هازها تديها غا فراسها ، حول عينو لنجمة وقال ~ سمعتيني !!
حركت ليه راسها بواخا وناضت باغا تمشي لبيتها تبدل وتكى وهو يوقف خارج معاها وهي تنطق لكبيرة بلاما تشعر ~ اويلي على الراجل تقول غا هي والكلبة ل ولدت
زهرة كانت غا كتشوف وساكتة دماغها غايب لبعيد قالت لمها بلاما تعطيها وجهها ~ باقا مشفتي والو الكبيرة ،أيامك غيحرارو ودابا دوقي ليك من لمسگي
يتبع
التعليقات 0