الأعين كلها كانت على غلام من غير نجمة ل كانت منزلة راسها للارض متوثرة كتفكر فيه شنو غيقول ، تقاد في جلستو مسند ظهرو على المخدة ،يد مسرحها باستقامة على فخضو واليد لوخرا تانيها ، عبد الهادي مع خليفة مركزين معاه ،لكبيرة شبه مرتاحة اما واحد فاطنة عينيها قرطاس جامعة غوباشتها فيه كتسناه اش غيقول ، واحد تاجة كي لامانة كبرات ومبقا ليها قدما فات ، بصوت خشن و بكلام عين لَعْقَلْ ، واخا عصبي وعلى نقشة هضرتو موزونة معندوش مع كثرة الهضرة والا دوا يخلي لكبير وصغير يتسنط ليه نطق وقال ~ جمعتكم بغيت غير نجدد معاكم الوعد ل مخلفتش بيه ، غير كل حاجة كتجي بأجلها
مرتي ل هي بنتكم !! تشكات مني ليكم بلي مقصر من جيهتها فشي حوايج !! منلومهاش ، بانت في حياتي فوقت مكان عندي مندير بشي زواج خليتها وزدت تا نلقى راسي ونتقبل الوضع ل كان فوق طاقتي ،الغلط وقع مرة وحدة ومغيتعاودش ، ضغط على حروف لكلام وقال ~ ماشي خايف من واحد فيكم ، حرك راسو بلا~ ولايني حيت الراجل هو الكلمة وانا كلمتي وحدة ، بنتكم دابا مرتي على سنة الله ورسوله وملزومة مني عيب عليا الا خليتها شي نهار ناقصاها شي حاجة ولا حتاجت شي حاجة ومعطيتهاش ليها ، تجلس فدارها معززة مكرمة نخدم ليل نهار ول طلبتها توصل تال عندها ، عمر ينقصها خير معايا ، هي تاكل وانا نبقى بجوع هي تكسى وانا نبقى عريان عمر شي حد غينقص منها لا فغيابي ولا فوجودي حيت مكانتها فهاد الدار من مكانتي …
لكبيرة كانت هاد الهضرة بالضبط موجهةة ليها حيت فاش نطق ركز عينيه فيها نطق عبد الهاادي ل شافيه برضى عاجباه هضرتو ~ الله يرضي عليك اولدي !! ويرحم من ربااك بنتنا دابا راه من بعد الله وليتي نتا المسؤول الاول عليها عاد حناا ويهمنا نطمنو عليها وبهضرتك حيدتي واحد الغمامة كانت على قلبي من جيهتها حيت اخر مرة شفتها مكانتش عاجباني وبقيت مشطون ولكن كتبقى راجلها قلت تتهدن الامور بيناتكم وندوي معاك وجابتها الفرصة والعراضة جات من جيهتك ول بغيت ندوي فيه سبقتيني ليه ووضحتيه نقدر دابا نرتاح
كان مشابك يديه كيتسنط ليه خلاه حتى سالا كلامو وجاوبو~ اي زوج ملاگين الا وغيكون بيناتهم شي غيار ، ولكن !! هاد المرة الا وقع هز صبعو بتحذير وشاف فيها كانت كتسمع ليه بلاما تهز راسها ~وفاتت عتبت باب دارها بلى شواري تعرف راسها من ديك ساعة مطلقة !! حيت معنديش لمرا لي تخرج بلى ريي وتتحدى كلامي ، قراري كنقولو ليكم حداها ونتما شهود عليها ، وشي لاخر كيبقى بيني وبينها من بعد ونقولو ليها
شاف في فاطنة ل حس بيها باقا مغلغلة عليه ونطق ولدك الالة فاطنة يستاهل مجرا ليه حيت قلل مني وبغا يبين عليا باضرو وهو مافاهم تاا حاجة ، داير فيا قبيح وعلامن عليا انا ؟؟ شكون هذا ل يدخل على راجل ومرتو بديك طريقة راه واخا يكون باها معندوش الحق يديرها
فاطنة مقدراتش تسمع سيرة ولدها وتسكت جوباتو فالبلاصة وقالت ~ حط راسك فبلاصتو وسمع على ختك ل سمع على ختو وقولينا شنو غدير ؟؟ ،ترضى عليها يتمسحو فيها رجلين ترضى عليها بيت هو اللخر متكسابوش اشمن زواج هذا
هاد المرة جوبتها لكبيرة ل كان قلبها علاين يتفرگع ~ لبيت ل مكانش ، رجع دارو الالة فاطنة وتفرش باحسن مكاين والدهاز ل جات بلا بيه بيدي خرجت خديتو ليها بحالا واخداه لوحدة من بناتي
وقفهم بيديه حاط صبعو على فمو بمعنى سكتو ~ ششش !! مغاديش نرجعو اللور من جديد ونعاود الهضرة من زيرو ونحكو على ضبرة راه ل خاصو يتگال قلتو ول كتسالني وفيتو وباقا ليا حاجة وحدة باش كلشي يكمل على اكمل وجه وبما يرضي الله ، جبد جوا من جيبو ووقف برجولية وهبة غادي لناحيتها مد لايدها وقال بأمر ~ بسم الله!!
هزت عينيها بثقالة حناكها موردين شافت فيه وفيديه لممدودة قدام عينيها ، بعدم فهم حركت ليه راسها ونطقت بصوت رقيق سمعو غير هو ~ شنو هذا ؟؟
غلام بلل حلاقو وعدل من نبرة صوتو ~ شرع الله وأمانتك !! ل كانت ذين على ذمتي وجا وقتها باش نوفيها ليك
كان الصداق المسمى بينهم ول مخداتوش نجمة ومعمرها سولت فيه حتى مع راسها ، مدت يديها ميترعدو وشدات الجوا رجع لبلاصتو برضى ونجمة حطات صداقها فوق رجليها اما لكبيرة حسات بدنيا كدور بيها
وذن العصر ناضو الرجال يصليو ،غلام خرج على برا والعيالات جلسو مع بعضياتهم ،نوضات نجمة ختها توريها البيت أما حتى مها مقدات على دروج طلعتها لسطح لي تبدل وبااان فيه الصليح .ودخلتها لبيت اللي عجبها صباغة زينة وفراش يعمر العين عجبها الحال جرت فاطنة ختها وجلستها على طرف السرير ونطقات بحنان نااااذر لما نجمة كتشوفو منها ~ شوفي انجمة هدا كيتحسب زواجك التاني واخا مدخلتيش كتسماي تزوجتي زوج مرات !! سمعي مني ابنت بويا اش غنقوليك وديري بكلامي حيت باين هاد ولد الناس شاريك ، لعدوزة عندك حارة وصعيبة نهار جات خطباتك لولدها ل مات كانت ضحكتها موسعة فمها ولكن اليوم ملي هاد ولدها كيهضر هي كانت مرسومة على جبهتها لغبينة، رااجلك صعيب وباينة فيه ماشي بو وذينة ومو خايفة عليه منك لتقلبيه وتحرضيه عليها داكشي علاش تقلبت عليك خاصك تكوني رادة البال معاها وكنظن راك فهمتيني راك عجينة قصريتي
اما طفيلاتك كوني معاهم مرود وفيه الكحل الحار لكن مع التدويزة كيرطب العين ،ماشي تولي ليهم جفاف يمسحو بك الدروج ،نجيو للمهم ل هو راجلك ول مسخن فراشك خاصو عمرو يشوف عيبك وديما مرحبا وواخة ولي حبت خاطرك حيث بالمهل يتكال بوذنجال …
نتي ماشي بهيمة باش يزيدك فينما بغا لكن الرجال كلهم هاكا كيبغيو يكونو شوكة وغير واقفة ولي قالوها خاصك تقولي واخة والكلمة كلمتهم بالحق خاصك تطوني ليه لبيبة وحبيبة وميتخافش عليك لوحي ليه الكلمة وسط الضحك واللعب وهوا غيدير اللي بغيتي وعمرك تجبدي ليه عيب دمو دارو ليا وفعلو ليا خليها تجي منهم ويبقاو مرعودين الخصام ديالهم خليه لتحت وملي طلعي لفوق نتي شيخة ديال راجلك
وماشي كلمة زوج تهزي جلابتك وتمي جاية لعندي هاد المرة دخلتك المرة الجاية منقولش ليك شكون ؟؟
جي مرحبا بيك لكن تجي ونتي راسك مرفوع ماشي تجيني دليلة وزوج دموع من العين
راجلك حار ونتي ل خاصك تتنازلي شوية باش يعرف راكي دايرة ليه قيمة واي حاجة وقعت فهاد البيت كتموت فيه تخاصمي وتصالحي فيه عمر شي واحد ميعرف اشنو بيكم
طاح عليها الضيم ورا ممشاو عائلتها مسخاتش بيهم ومسخاتش بتاجة هبطو دموعها كيجريو ملي تفكرت بلي معارفاش امتى مازال تقدر تشوفهم مرة خرا صافي مبقاتش ديال راسها وقت ل رشقت ليها تخرج ولا تزيد فين بغات ووقت ما بغات ، دابا ولات مسيرة خاضعة لكلمة راجل مكانش ليها على البال ولا في الحسبان ….
ناضت حيدت لقميص ل كانت لابسة بدلاتو ببجامة النعاس سرحت شعرها وجمعاتو كوتشوفال جلست مقابلة مع المرايا كتشوف في وجهها مرجعتش كيف كانت قبل ولكن شوية بدا يبان فيها الضو ، هزات كحل غنجي فحم دوزاتو على عينيها من دمعة لبرا عوداتو زوج مرات حتى برزو عينيها ما شاء الله ، رشات من عطرها الانثوي البارد ، ذهنت رجليها ورطبتهم مزيان ، ملي سالات بقات ترتب فداك لكوافوز ل كان خاوي ، وكتدوي مع راسها وقت ل كانت خدامة مكان عندها فين تحط اش كتشري ودابا ملي عندها بيت خصوصي ليها معندها ما تحط فيه ، تنهدت بقلة حيلة توحشت تخدم وتوحشت جيبها عامر ،جلسة الدار حاسة بيها مرضتها شحال قدها تمد ايديها ليه وتطلب منو لفلوس مرة غيعطيها ومرات لوخرا غيقوليها مكاينش ، هزت كتافها مصممة الا دخل تدوي معاه بالخاطر واللين وتطلبو يخليها ترجع لوزين فين كانت خدامة ، حلت لمجر بان ليها عكر لفاسي نساتو واش كاين خلطت منو شوية وحطاتو على فمها عطاها لون غزال ضافت منو لحناكها زادها سر على سر وشافت فراسها وقالت ~ دابا اه ،رجعاتو لبلاصتو وهي تشوف جوا ديال لفلوس ل عطاها حلاتو تشوف شحال فيه لقاتها مبلغ كبير معرفت شنو دير بيه وهي غير جالسة مكتخرجش ،ناضت خشاتو بين حوايجها ورجعات تكات على الناموسية كتلعب بخصلات من شعرها وعينيها على الباب والمگانة ،مرة مرة تسترق السمع واش غتسمع صوت خطاويه ولا لا ،كتسنى فيه امتى يحل الباب ويدخل كتسنى فيه امتى يقوليها لكلام ل غيكون غير بينو وبينها جاها لفضول تعرف …
فجأة تحل الباب قفزت من بلاصتها حاطة يدها على قلبها ل كان كيزدح بجهد مخلوعة شافيها وقال ~ خلعتك !!
بتوثر جاوبت كتمتم ~ امم لا لا غير كنت ساهية
غادي كيتمشى بشوية عليه وقف حدا الماريو كيقلب على صاكو فين كانو حوايجو ، بدا يحك على قرفادتو مضيق عينيه كيتفكر فين حطو حتى سمع صوتها الانثوي كيخاطبو ~ كتقلب على شي حاجة ؟؟
بتساؤل جااوبها ~ صاك ل فيه حوايجي مبانش ليك ؟؟
عضات على شفايفها بعفوية ~ الا بغيتي صاك راه معلق اما الا بغيتي حوايجك راه طويتهم ودرتهم فجيهتك ،،لفت وجهه لجهة الماريو حل لباب وهو يلقى كلشي مقاد ومطوي على حقو وطريقو سراول بوحدهم وتريكوات بوحدهم عجبو الحال واخا مبينش بدا يبدل حداها ممراعيش ليها كلات لحم ضفارها بالحشمة ، حنحن حلقو بخشونة وقال ~ …سمعيني فاش كنتي ساهية ؟؟ شاف فعينيها لقاها كضور فيهم كي ذيبة لبس حوايجو وكمل كلامه وقال شاغلاك شي حاجةة ؟؟
گاع الهضرة وتخراج لعينين ل كان فيها تبخر ، بالدعقة نسات شنو بغات تقوليه وضربت طم كتشوف في سقف عاضة على فكها
رجَّع شعره لور و ضار يشوف فيها بعينين طايحين و تم قاصدها داير بلاصة حداها ، دار مخدة على كتافو مكالي بيها خشب الناموسية و طوا يديه حدا كرشه حتى تطراسات ، بدات كطرطق صباعها وهو متبع ليها العين و فمها لي كان حمر زادت كلاته بسنانها ، عينيها كيضورو في گاع البيت تقول عاد شافتو ،كان باين عليها التوتر و الخوف و هادشي لي زاد خربقه في عقله ،باغي يعرف مالها قرب يديه ليديها و فكهم رحمها من داك الحر لي كانت عاطياهم ، هزات عينيها فيه كتشوفيه باقي شادها من يدها ل كانت كترعد بين يديه ب نظرة حرك ليها راسو وقال كيتحسس ملمسها الرطب بصبعو الخشن ~ كنسمع ؟؟
شدة باش شاد ليها يدها وريحتو ل ختارقت جيوبها الانفية خلات لهضرة تتبخر في دماغها وتولي فخبر كان !! هزت عينيها فيه وشافت حروشيتهم ووعات على راسها معامن هي !! نبرة صوتو باش كلمها فكروها في كلامو ل قال من شوية، معندوش لمرا ل تخرج من دار .. وتجي دابا تقوليه باغا نخدم ؟؟ غتكون كتقلب على صداع بيديها ، ساست دماغها من لخوا الخاوي وقالت وهي مخلية يدها رهينة يديه ونطق قالبة الهضرة ~ شنو الهضرة ل كنتي بغيتي تقول ليا بيني وبينك واخا نعرفها ؟؟
تقاد في جلستو كيمسح على وجهو وكيشوف فيها كيفاش بدات تطلق معاه ، كان منغم مزيان كامي حتى مقاد ومزاجو عالي وهادي هي الفرصة فين يدوي على خاطره نطق بفحيح بعدما بلل حلقو بكاس الما كان محطوط فوق لكوافوز ~ واخا الالة واخا راني قلتها ليك نهار خديتك ودابا غنعاودها ولكن هاد المرة بطريقة مغايرة …
حط عينو مرة على عينيها ومرة على حواجبها حاضي ملامح وجها ، عوجت فمها منزلة راسها الارض قلبها بغى يسكت شوفاتو بحالا كيجردوها من حوايجها مقدرتش تبقى تحقق فيه ،حست بيديه رخفه من يدها وحطهم هاد المرة على ذقنها هز راسها ورجع قابل عينيها مع عينيه ونطق اسمها بلسان ثقييل ~ نجمةة !!
دقات قلبها سمعتهم في وذنيها ورا منطق بسميتها بلاما تحس حلات فمها شوية وجوباته بصوت خافت ~ نعام ؟؟
غلام بنظرة حادة رمقها بتنبيه~ عمررك تفكري ديري ش حاجة تخليني نكعى عليك !!
حنحن حلقو وكمل قايل ~ تقليقتي خاايبة ومغتعجبكش المشكل ل وقع هاد المرة كميت عليه گارو ودوزتو ولكن عقد حجبانو مزير على سنانو، تعاوديها وتصغري مني غتخسريني ….تكوني بين يدي سامعة لكلامي نهزك على كتافي بزوج اما الا قلبتي على شري مغاديش نعقل عليك نديرك عمرك كنتي ومنحنش..!! شاف الخوف في عينيها وهو كيهضر ورجع كمل بنفس النبرة ، مكنقوليكش هاد الديسك دابا باش نخلعك !! بغيت غير نوعيك بيني وبينك ونعرفك اخطائك راه مكايناش شي مرت راجل ل كتخرج بلا شوارو مكايناش شي وحدة كتزوج بواحد وكتلبس كادوات راجل اخور ، تفكر نهار الخلخال وهو يتعصب زم فمو ورجع زفر بجهد كيخنزر فيها ~ ودايراه بلا حشمة قدام عيني شنو بقى؟؟ وغير ديري ليا الالة طانگة في وذني وعكري ليا حسن ….عمر شي ولد لمرا صغر مني !! باه ومي ل ولدوني دايرين ليا حساب مغتجيش نتي تلعبي عليا عشرة وتصغري بيا قدام عائلتي وعائلتك ندفن مو حي هادا ل يديررهاااا
حاجةة اخراااا هز حجبانو لسمااا~ ملي كنقوليك ديري زيف وستري شعرك مكيعنيش انني باغي نفرض عليك حكامي ونبان واعر،ضرب على صدرو بجهد انا الالة مبغيت حتى گنس مخلوق يشوف ليا فمرتي حيت ل شافيك نص شوفة غنتقب لمو عينو واش وصلنا لهادشي حنا گاع ، تستري على برا وهاهو بيتك عندك ضوري فيه نتي عريانة ملابسة حتى شرويطة جر زغبة من شعرها بشوية وقال مقرب لجهتها حتى مبقى ميفصل بيناتهم والو ~ واش مفهووم ؟؟
انفاسو كانو كيضربو في وجهها سخان ، دوزات لسانها على فمها ل نشف بللاتو وهما يستقرو عينيه على شفايفها ، حمرين ومنفوخين قرا جوابها من حركة شفايفو بلاما يسمعو ، رفعاتو على العالم مع كل مصة فم ولا تمريرة لسان كدير ، مرة تميل عنقها جنب حتى تبان رقبتها مرة تنزل ليها الكسوة ويبان بياض لحمها ، حط يدو ليمنا على خصرها وغرسها فيه حتى توعتت تمكن منها وجرها بعنف لجهته حتى ترمات على صدرو ملاصقين بزوج نطقت اسمو بدون شعور بصوت خايف وقالت شفايفها كيترعدو ~ غلاام ؟؟
عينيه صغارو كانو حمرين معسلين حط صبعو على حنكها ل كان شاعل فيه العافية ونطق عاض على جنب فمو ~ دويي مالك !
كانت حاطة ايدها بزوج على ذراعو شادة فيه بانوثة عنقها الطوييل حليب صافي مزيناه خالة كل مرة عينيه كتهرب ليها ، بعدت عليه شوية وقالت بلطف ~ صبرر عليا شويية ؟؟ خاايفةةة !!
بدا يرخف على خصرها وملامح وجههو بداو يتزيرو بعدما ترخى معاها بلا هواه ، مرا كاملة مكمولة قدامو من راسها لرجليها كتنبض بالانوثة وحلالو اكيد غتفيق رجوليتو ، جنس حواء ل عرف في حياتو كانو قلال غرق في تمارة متناسي غريزتو حتى جات ل فكراتو فيها ، زأر بصوت مرتفع وبعد عليها معاجبوش الحال ~ كنخللع اناا ؟؟
بغا يبعد وهي تشدو من ذراعو بترجي كتدوي بلين ~ حاشة غيرر صبر عليا شوية ؟؟ فهمني ل داز علينا مساهلش
غوت بجهد وقال ~ صااافي سكتيينا حبسي هنااا ؟؟ وقف قالب سيفتو وهي تنوض معارضة طريقو ~ عفاك متقلقش عليا انا ماشي ..
حمر فيها عينيه وهي تضرب طم ، زير عليها من ذراعها ونطق معصب ~ حاجة اخرا نسيت مقلتها ليك !! الا كنت معصب ولا مقطوع فوتي ساحتي..
دفعها من عليه بلاما يشوف في وجهها ولا تعابيرو وخرج مكشكش ، بقى فيها الحال وندمت راسها ل قالت ليه ديك الهضرة عند بالها غيعدرها باقا ممولفاش عليه بصفتو راجلها خاصها معاه شوية الوقت هادشي ل كانت محتاجة تشرحو ليه ولكن معطاهاش وقت..
دازت ساعة وزوج وثلاتة ومدخلش تخلعت بزاف فين غيكون مشى يكون سمح فيها تاني؟؟ عينيها تغسلو لاحت عليها زيف سخوه على راسها وخرجت من لبيت لسطح يضرب فيها البرد ، كان السم كيطيح ، ربعات يديها مخشية في بعضياتها ومشات لجهة شرجم تطل خرجات راسها بشوية وهي تبان ليها طوموبيلتو مبلاصية مخرج يدو من زاجة كيكمي خرجات عينيها كتحقق مزيان بان ليها الكرسي ل فجنبو عامر غيكون معاه شي حد ، سمعت صوت باب طوموبيل كيتحل عضات على فمها ورجعات بخطوات اللور بلور ليشوفها الدورة ل ضارت بغات ترجع لبيتها وهي تزطم فيد شخص تاني حتى طاح زيفها ، بالخلعة معرفات مدير بقات دور فراسها يمين وشمال تلبكات وقلبها كان غيسكت ، شافت في عبيد ل كانو عينيه صغار كيشوف زوج من الحاجة شارب حتى فايت لقياس ، بلا ما يوعى شد فيدها باغي يدوي غير حل فمو ز شمات ريحة الشراب وهي تنثر يدها منو وبعدت من طريقو هازت زيفها وداخلت كتجري لبيتها كتنهج ، سدات الباب حاطا يدها على قلبها ل كان غيخرج ، كتلعن راسها اش خرجها لسطح في هاد الوقت ، خوف بدا يسرا معاها من صبع رجلها صغيير وهو سارح ذاتها تنملت مازال كتحاول تفهم اش طرا وهي تسمع صوت غوات مجهد على براااا ميزت صوتو وعرفتو شكون
طالع فالدروح كيطرطق في عنقو ،باغي يسد عينيه يرتاح تابعو غدا خدمة ونهار مشارجي خاصو يفيق مع لفجر ، بان ليه باب سطاح محلول ،ضيق عينيه مستغرب ، عاقل على راسو سدو ميمكنش يخليه مترع ، گرن حجبانه وهو كيسمع الهضرة ..كان واقف سي عبيد سكران ومفوت بصوته العالي كيدندن ويغني راشقة ليه …غلام غير بان ليه فديك الصورة حيط يرده لحيط معقل على راسه حتى تم غادي ليه باندفاع قرب لجيهته وطلعات معاه ريحة الشراب ، سيد مفوت وطالعة معاه السكرة ،خيب سيفتووو وكرز على يدييييه بقوة قبل مايشنق عليه ، كان مغيب ماهواش هنا نقز من بلاصتو كيتمايل فاش غووووت ليه فوجهه صاعر نطق ~ الله يلعن عدو *** الكيدار … !! جاااي لياا سكراااان ؟؟ دااخل لديلمك على دااار فيها لعياالات شارب ؟؟
شنق عليه من الكول وجرو لعندو نازل عليه براس خلاه دايخ كان غيطيح ورجع جروو لعندو من جديد العين في العين مخنزر وكيغووووووت ~ بقات ليك غا البلية هااااااا ؟؟ عندك صحتها ها ؟؟ رجعو ضربو بكرووشي وجمعو بشمال جابو الارض حتى تردخ ليه راسو مع الارض ….جمع قبضة يدييه ونزل عليه بكروشي للفم خلا دمو دايز وبقى عليه بتصرفيق وكيسب فيه من سمطة لتحت ~ الا بَّا مقدش علييييك غلبتيه ، اناااا نعاود لملتك تربيه من لووول
سلخو مزيان خلاه طايح الارض سخفان منشور حال رجليه ويديه بزوج مشبح ، وقف غلام على وقفتو حيد دجاكيطة كيغلي لاحها باقي مبرد ،مشى يقلب على هراوة ~ الا مربيتك خليتك تبول فسروالك حني ليا بدا يغوووت ويستنجد بمو كيبكي ويطلب في خوه بلسان ثقيل ~ لعاار اخوياا لعار عمريي نعاود ، هادي وتوبة عمرو يجي ففمي
واقفة ورا الباب غتموت بالخلعة من جهة ومن جهة اخرا بقى فيها لوسها ، باغا تخرج تفك وخايفة على راسها منه ، صوت بكاه قطعها طراف اما ملي كتسمع صوت الضرب كتحس بسخفة ..
فاقو خواتاته وباه ومو على صوت غواته لكبيرة دغيا ميزات صوت ولادها شكون كيضرب وشكون كيتضرب، تبعو مصدر الصوت منين جاي وطلعو نسا كيتجاراو …..اما خليفة بقى لتحت فبلاصته مخليه يربيه عارفه ضاسر وضسارة مو غتخرج عليه وفينما يدوي معاه تقوليه ولد جيله ،ساعة جا ل يگاده …
طالعة كتعفط فحوايجها وتغوت من بعيد ، مع دخلة بان ليها طايح الارض وجهه مضروب وجيهت فمه دايز بالدم ، ضربات على فخاضها بقوة وغوتات ~ انااااا مزااااوگة اولدي الا مطلق منه….
مشات تجري تحنات على ركابيها مجبدة فوقه مكالياه وغلام فوق راسها هاز عصى بلاما يخمم نزل عليه ليده تا نتافض بغوتة وقاليه تحت من سنانو~ هااد اليد ل تهز شراااب نهرسس دلمهاا !!
شدت لغلام فرجلييه كتبووس فيهم وتبكي عشرة دمعات من لعين ~ ها العار اغلام صافي باراكا ،باراكاا !! غوتتت كشاكشها خارجين
زير على يديه كيتغدد عصباته جر رجلو وشافيها مخرج عينيه وكيغوت هذا جهدو عليها جات مو~ شفتييي ضسااارتك فين وصلتنااا ؟؟
لاح ديك لعصا من يديه بجهد تا تقسمت على زوج وكمل كيهلل ~ غلااام عطي لخوك اش بغا ! غلاام زيدو لفلوس مقادينوش ! غلام !غلام !
والبرهوش تحل وضسر وساب فات لكارو ومشا لشرااب …عقله غيخرج بالغوات عمرو ضن غيشوفه فهاد للمنظر ،داير صاحبه وولده مكيكبر فيه حتى حاجة ،داير فيه الثقه ~ نضرب تمارة ليل نهاااار ، شق حوايجو من عنق كيحس بذاتو سخونة والعافية شاعلة فيه ~ وواحد باغيني نصرف علييه هو وبليتو ، عطاه ببوطي لفخض شراااب عندك فلوسو دوي ، عند بالي راك راجل ساعا قول نتا غا شماتتة
لكبيرة تبكي وتنتف في شعرها ~ وا باراكا عليه ميبقاش يعاود ، واش نسيتي يامك اولدي كلكم دزتو من هادشي هضر معااه بالعقل راه باقي صغير
يااااك الواليدة ؟؟ قالها غلام وهو كينهج موجه هضرته لمو وعينيه فعينيها كيلومها ~ نسيييتي نهار حصلني الواليد كنكمي اش طرا ليا ؟؟ الا نسيتي نفكرك ياك شهرررر شهررر وانا كنبات غا فطرقان ، جرا عليا من دار وما رجعت تا خدمت ، تقارنيني بهادا !! عمري قلت ليك اري باش نكمي ولا اري باش نزمر ؟؟ ..حتى الا كميتو ضرب على صدرو، جاااات معايا كنشريه بفلوسي ايوا وهاد الكيدار لبرهوش الشماتة ل مبغا يقرا ،مبغا يخدم ،ما بغى يدير تا زفتة فحياته بقاليه غا شراب شنو ؟؟ بغيتيني نزيد قراعيه مع الگفة ولا شنو ؟؟ قالها بتساؤل كيشوف فيها ، معندها متقوليه كل كلمة عنده فيها الحق ولكن كيبقى كبدتها غتغطي عليه
هبط لعنقو جرو من حوايجو وكيدفل عليه ويمرمد فيه ولكبيرة ملي غلبها عطاتها لغوات~ واا عتقوني اعباد الله ،غينترزااا فولدييي ؟؟
جيران فاقه والحومة خاصها غير شنو تسمع ، كلشي كيتفرج من الشراجم…..بنات خليفة لاصقين مع الحيط تا وحدة مقادا تقرب ، زهرة مبانت لينا غا نجمة ، دق وتعاود عليها تا حلات كانت لابسة حوايجها ودايرة زيفها عينيه حمرين وباين عليها الخوف ،شافت فيها مخنزرة وقالت ~ كلشي فاق ونتي ماالك صمكة ولا ميتة؟؟ خرجي شدي راجلك جريه و دخليه ولا تا طيح الروح ؟؟
دفعتها من يدها لجهة غلام ، كتعض على فمها معارفة مدير ،بان ليها صدرو عريان وعروقات كيقطرو يد هاز منها عبيد قاجو وجهه زراق وكتحاول لكبيرة تفكه منه كان كيبكي ويطلب ~ والله منعاود اخويا ، طلقني راني سخفت ،وامي دوي معاه…
قربت منو نجمة شداته من يده كتجر بكل قوتها وكتدوي بصوت باح مقاداش تخرج الهضرة ~ باراكا عليه اغلااام عفاك
عض على فمو وضار مطرطق عينيه ، شافها قدامه وزاد كملت ليه الباهية وجعل غوت عليها تااا قفزت ~ اش كديرري هناااا ؟؟ بامر ~ دخلييي فحاااالك !!! دخلي حيدي عليا من هنااا!! ياك قلت ليك ملي نكون معصب منشووفكش قداامي اش خرجككك من بيييتك
طلقت منو ورجعت بلور عمرها شافتو فهاد الحالة ،مقدرتش تزيد تجاحد معاه تسوخرت بعيد كتفرج فيه اش كيدير مضيقة على عينيها مقاداش تشوف ، بانت ليه مازال واقفة وهو وينطق باعلى صوووت ~ بييييييييتككك
دخلت للبيت وسدات عليها وهو رجع لايح يديه على خوه و حلف ميطلق منوو ، مو تزاوگ و خواتاته كل وحدة عاطية لحلقها الجهد معارفين ما يديرو و إلى قربو ليه غيخطلهم معاه وهوما صحة على قد الحال … هزو من الارض كوله كيترعد رجليه فاشلين و الهضرة بزز باش كتخرج ليه حاس غير بالدم دايز ليه من فمه ، وهو ف ديك الحالة محنش فيه جرو كيف ليتيم غادي بيه تا وصلو للحمام خشا تيو في الروبينو و طلق الما على جهدو… ضار عندو كلو كينهج و خشاه ليه في فمه حتى تقطعت فيه النفس ،كيرحمو زوج دقايق و يعاود يخشي تيو ففمو
غلام وهو كيسب ~ تقيا الكلب ؟؟ الله يلعن ل داير راسو فيك ،ضحك باستهزاء وصلتي لشرااب گاع !…
محنش فيه ولا تحرك قلبه من جهته و فكرة خوه داخل بالكاو و مرته تما مع مو وخواتاتو كتخليه ميرحموش، دار عاامرة نسا خاصها الوقر ليوم جاي سكران غدا يتعرا عليهم … ترمات ليه الكبيرة على رجليه تزاوگ فيه و رامية عليه رضاتها و حليبها لي رضع … مشافش جيهتها ولا ريح بالها ، كيعاتبها بعينيه و كيقوليها نتي سبابه فهاد ضسارة ،حيت واحد بحاله ل بغاها كتجيه تال فمه معنده هم ولا مشاكيل اش مقربو لشراب لقبح وضسارة وخناث لوالدين هما ل كيديروها، بدات تريش في راسها وطاحت كتركل في الارض على الله يحن قلبه ومعامن هي !! بناتها شافوها في ديك الحالة تلاحه كيغوتو شادين في مهم لي عينيها تقلبو وراسها تعرا… اما غلام ما رحم خوه من ديك الحالة حتى شافو قريب يتقيا مصارنه رجع هزو من قرفادته وجارو منزلو مع الدروج مدردب… وكل درجة كينزلو منها كان عبيد كيغوت من الحر لي كيحس بيه … وصل بيه حتى لباب الزنقة مع الحلة رماه لبرا عينيه حمرين فيه حاس براسو تغدر و عضو من اليد لي كان مادها ليه كلشي كيطال ويوشوش مخلوعين
شافيه باشمئزاز ونطق ~… يا بوك إلى مربيتك منتسماش غلام ودابا تگعد قود عليا من هنا سير حتى تولي راجل و جي !!
دار لعند مو بغات تهضر وهو يغوت عليهم يطلعه وردخ الباب سده ~ طلعو فحالكم والله ميدخل ،طلعي فحالك ولا نخرج نكمل عليه قالها لكبيرة ل قلبها كان كيبكي دم على حالة ولدها صغير ، جروها بناتها طلعوها كلشي كيبكي اما غلام جلس في دروج داير يدو على راسو ، بقا شحال عاد حل لباب يشوف واش مزال برا ملقاهش عاد طلع لبيتو ساخط وكيسوط ،غسل وجهه ولبس غير سروال وتخشى في فراشه سمع صوتها كتبكي وهو يحيد عليها لغطاا ~ لااااش لبكاااا ؟؟
نجمة وهي كتنخصص ~ بقى فيا خوك !!
ضحك باستهزاء عقد حجبانو فيها وقال ~ وانا مكنبقلش فيكم ؟؟
وانا وااش مكنبقاش فيكم ؟؟ حمر فياا عينيه ونطق ، خويا ل بقى فيك واش ضلمتو تعديت عليه ؟؟
سكتت معرفت متقوليه ، وقف على طولتو لابس غير سروال وصدرو عاري ، كرشو لاصقة كتبري بالعرق ذاتو كيحس بيها مجمر وحامي ، لعرق ل باقي كيضرب ليه فراس حاس بيه غيطرطق ، مهانش عليه خوه باش يجري عليه ويدير فيه ديك الحالة كاملة ، ولكن كون ضحك ليك ودوزها غيتمادا والحرام كيجر معاه غير لحرام ليوم الشراب وغدا يعلم الله شنو حيت الواحد يا إما كيتحله عينيه فخطرة ولا كيتسده فخطرة …
حط يدو على جنبه وخاطبها باللوم وعتاب ندمت ل قالت ديك الكلمة ~ خوويا الالة ل بقى فيك قالها مورك عليها مزياان وكمل الهضرة ~ خسرت عليه دم جوفي باش يقرا ؟؟ باغي كتوبة باغي سبرديلات اخر مكاين ،باغي سيرڤيطات ل ملابسينش صحابه ، اللبسة يلبسها صباح عشية ميمشيش بيها ، وكنقول معليش ل تحرمت منو انا يديره هو بحال بحال ، معليش اغلام خدم نتا وتعرا وتحفى وخليهم هما يبانه ، خوتي كلهم هاكدا كنت نتعامل معاهم بحال باهم مسبقهم على راسي ودايرهم صحااااابي يجي دابا لبرهوش تاع لخلا يبغي يعبر ليا طونسيو جاي ليا سكران وطالع لهنا حدا مرتي وقدام عيني فقلب داري شنو علاش كيقلب ؟؟ بتساؤل حرك ليها راسو ~ شنو بغيتيني نصفق ليه؟؟
نخرج نخدم مع سروية مشابع تا نعاس مع كر*** نسيت راسي وحياتي ول قالوها خوتي مكاين غا واخة ول حب الخاطر عليها وهو مكاينش هناا ….
كيدوي وينهج صدرو ضاق عليه عيا وبانت على وجهه ~ قدو اناا ملقيتش ربع ل عايش فيه هو دابا حيت كون لقيتو واهلي مغنخدمش في الكرفي ، ريحة دم والبهايم سرحت ليا مع لعروق باش واحد يلبس ليا لماركة وفلخر يدير فعايل رعاوين ، ايوا الالة غا يبقى فيك وفيكم كاملين وانا كل مرة يجي بهاد الحالة نعطي لعدو *** قتلة كثر من هادي حتى يولي يشوف شراب ويقلب الدورة ..
سرسب عليها الهضرة خلاها حالة فمها فيه، كانت جامعة رجليها لعندها وحاضياه كيفاش معصب ، وعروقه منفوخين ووجهه مزير باغى يتفركع عينيه جغمة ددم ، كان كيدوي ويمشي ويجي في داك البيت ملي قال اش بغى قصد الباب يخرج ، عز عليها البرد وهو عريان باندفاع نطقت ~ اجي فين غادي كاين البرد ؟؟
شافيها واصل للحد سالات معاه الدنيا ومشاكلها وقال ~ اوديييي غا خليني الله يعطيني معاهم غاا الموت !!
خرج لسطح وهما يهبطو دموعها شلال بلاما تحس ، متنكرش عز عليها كيبان من براااا جليد بارد وقاصح ولكن هاز ما هاز جبال ، كلشي منه كيطيح وينوض راسه ووالديه ممسوقينش مو اول وحدة كتعرف غير خاص وارا ، وشوف خوتك عمرها قالت ولدي فين ناعس ولا طول الغيبة ولفه فلوسه وكلشي يوصلهم منه واخا ميكونش، بلا متفكر في العواقب لاحت على راسها زيف وخرجتت تقلب عليه لقاته جالس فوق كرسي كيمكي عاطيها بظهره داير راسه بين يديه وكينثر ويبخ بجهد داير لدخان طريق ، خطوة تقدها ووحدة ترجعها ، حس بيها وهو ينطق بصوت غليظ ~ كنكمي ؟؟
تنهدت وتمشات جيهته ،وقفت قدامه بنظرة حسرة ، شافت فيه راسها أيام كانت كتعطي بلا مقابل ،حاله من حالها حتى هي خدمت على الخوت وولادهم مرة يگرو بيه ومرة ينساوه معرفت لا حنان أب كيف داير لا كلمة مي وحنانها كيفاش داير عاشت ملاوطة تمنات كون واحد في خوتها حضن عليها وقراها كيف مكافح هو مع عائلته مكذبوش ل قاله الفول يتعطى ل معنده ضراس …
تحنات قفازي مقابله معاه كان البرد حسات بتبوريشة وهي كتشوفيه عريان وگعما حاس تقول لحمه ماشي منه ، هز عينه وهز معاهم حجبانه ، لاح لگاره بنثرة في الارض وعفط عليه كينش على دخان وفنفس الوقت كيعاتب فيها~ واش مكتسمعيش ولا شنو قلنا ليك كنكمي !! وقف زاعف وهي تشده من يديه مرجعاه لبلاصته ،جات تجره كانت غطيح لولة قبضة يدو لقوية ل زيرت عليها من ذراعها ، زأر فوجها بمعنى شوفي اش كنتي غديري وهي تهز كتافها وقالت بعنااد ~ بغيت ندوي معاك جلس وسمع ليا !!
وقف من على الكرسي كينفت الدخان من فمه وكيهضر مسلم امره~ جلسي بعدا وهضري كنسمع…!!
جلست فبلاصته وتكلمت كان عاطيها بالظهر ووذنه معاها ، نطقت عينيها الارض وبصوت حنين قالت ~ حااسة بيك اغلام !! وشايفه نتا قداش هاز مسؤولية الدار كاملة بكبيرها وصغيرها وهادشي جاني نتا كديره ماشي حيت مفروض عليك ، هزت راسها بلا وكملت ، حيت نتا معتابره وااجب عليك ، عرفتي قليل لخوت بحالك فهاد الوقت ، شكون باقي فهاد زمان يعطي ومياخدش يخمم لغيره وميخممش لراسه يرضي والديه ويطيع كلامهم …متسناش شي حد يگر بيه هادشي غادي يوقف معاك وربي غيجازيك عليه وان شاء الله تانتا غدا يوليو عندك ولاد ويعاملوك بالمثل
ضرب قلبه بجهد ورا مسمع هاد الكلمة ، يوليو عنده لولاد عمره جاته فباله انه ممكن يتزوج ويدير تريكه ، توسعو عينيه ورا مقالتها وحس بإحساس فشكل معارفش يوصفه كملت كلامها وقالت ~ انا ملي نطقت بقى فيا خوك مقصدتش انك تعديتي عليه وظلمتيه انا عارفاك كتقلب على مصلحته وانا معاك ف هادشي غير صوته وهو كيبكي اثر فيا ، سكتت شوية وكملت بنبرة صوت أعلى من قبل ملي سمعت تحنحينته مبغاتوش يقاطع كلامها ، وتا نتا بقيتي فيا وانا حاسه بيك قداش صعيب عليك تضرب خوك صغيير ، غلام انا راه مراتك يعني من هنا لقدام غنخمم فيك كيف غنخمم فراسي وكثر، الا تقلقتي غنتقلق والا ضحكتي غنضحك والا مرضتي غنمرض عمرك تحسب راسك انك زايد ناقص حيت نتا ساوي عندي ،بلعت ريقها حاسة بحلقها نشف ،نتا الراجل ل مديتي ليا يدك ول غتكون فكتافي وغنكون واقفة معاك وفجنبك سوا ضالم ولا مظلوم …
اه بصح أنا مزال مكنعرفش مزيان ومكنعرفش طبايعك كيف دايرين ،حيث انت وريتيني منك في الاول غير طبعك الخايب و الصعيب … غلام لي كيمد يديه و مكيتفاهمش و لي عقلو قاصح و مكيسمعش ،كيدير لي كيقوليه راسه و مكيتفاهمش … و لكن شفت شي حوايج خلاوني نعرف قلبك الحنين في جيرانك بقى غير عائلتك وخوك الى ضربتيه راك متخلي لي يقرب ليه كتبان صعيب في واليديك ولكن واخد رضاتهم بلا متحس… رخف على راسك و متفكرش بزاف لي غلط اليوم غدا يتعلم الدرس….
بجرأة وقفت وقربت منه تشوف ردة فعله دار لعندها كيشوفيها بنظرة غريبة عمر شي وحدة تجرأت ودوات معاه بهاد طريقة مو ل ولداته ومكتعرفش ليه ، كمشت على دراعها فمها ولا حمر بالبرد تنهد من الداخل حتى خرج نفس سخونة من فمه ونطق بأمر ~ البرد علييك دخلي تنعسي
بلاما تخمم شدات ليه فيديه ~ حتى تدخل وندخلل ، وتانتا راه البرد عليك
جبد گارو من جيبه وقال محرك راسه لجهه لبيت ~ نكمي هذا ونجي ، بقات واقفة ليه عصبة وهو ينطق بصوت غليظ
وااا دويييييناا
مر اسبوع الأيام دازو فيه نهار بحال لاخور، يفيق لخدمته على بكا لكبيرة وينعس على بكاها ، ملي جرا على عبيد ما بقى رجع زاوگت فيه يقلب عليه ويرجعه لدار ومبغاش صمم يخليه يتربا حيث الا داخل عليه شي مدارو ، أسطوانه خووه مرضاته فراسه مكرهش يغبر وجهه عليهم شوية ميف ديما ولكن ميقدرش ..مكاينش بوحده ولات معاه نجمه كيفكر ليها كثر من راسه ، معنده لمن غيخليها ومكاين فين غيديها داكشي علاش جالس وصابر ….. صبيحة نهار جمعة فاق بكري ورجع بكري مكاين ذبيحة مكاين سوق كان نهار راحته دخل لعندهم مع وقت لفطور ، كان كلشي مجموع من غير خليفه ل فطر هو لول وناض ،كلاو جميع فجو مكهرب لكبيرة الدغمة مدوزتهاش جالسة وتتنهد وتنين بغاته يحن ويرحم كبدتها ولكن معامن هي !! شرب كاس اتاي ووقف غادي خارج وهي تنطق عاقدة راسها وعينيها منفوخيين ~ مبقيتش فيك يااك اوليدي !! مبقاش فيك داك الولد ومقلتي واش واكل ولا ناعس ولا شارب ، واش ترزيت فواحد ونزيد تاني
نجمة سرطت دغمة بزز دورت عينيها فزهرة لقاتها كتخنزر فيها وتبرگم تحت من فمها اما غلام، كان كيشوف ف مو شوفات مكتبشرش بالخيير مع بغى يهضر مع سمع صوت باه كينادي عليه ،لعن شيطان ومشى لعنده للبيت يبدل ساعة بخرا بلاما يجاوبها حيت غيتسمى خايب
جالس حدا باه ل كان بحال لكبيرة خايف على ولدهم صغير كيبقى طيش وبلا عقل ، هاز تسبيحه صحته ولات على قده نهار ل دوزه كيتحسب ليه نطق وقال وهو كيربت على كتافه غلام ~ سمع اولدي !! عارف عقلك يوزن بلاد ومكدير الحاجة حتى كتكون متاكد منها وعمري نعارضك ..
نهار خرجتي خوك من الدار كنت متكي وعاطي لراسي الراحة عارف راسي والد سبع يتقلدو بيه الشلاغمية وايني نعل الشيطان وعفس على نفسك وشوف دمك اشمن ارض شاداه ،قلبي وقلب مو مهولين عليه و الدمعة منشفاتش من عينيها عييت منراري و نصبر ونتا راك عارفها كثر مني
غلام مسح على وجهو بتعب وقال كيطمنه ~ خباره عندي ابويا ، مجريتش عليه ونسيته واش عارفني نديرها ، راه جالس عند صاحبه مكاين لاش تهول ولا تنغص
خليفة حس براحة سرات معاه عنق ولده برجوليه راضي عليه ~ هاكداك نبغيك وكنت عارفك مغدوزوش
حرك ليك راسه ووقف ~ الله يديمك فوق راسنا !!
باس ليه راسه و دا رضاته وخرج لبرا مع غيحل باب الزنقة غيتساطح وجهه بوجه عبيد لي كانه عينيه حمرين و منفوخين باين ندمان حالته حالة ولابس لحوايج ل خرج بيهم مسخين و لحيته دغيا كبرات.. تلاح على غلام معنقو كيبكي ويطلب منو السماحة و يبوس ليه في يديه خوه الكبير وكيحتارمه ومكانته من مكانه باه من الواجب عليه يحتارمه و يقدره ..كيدوي ويتنخصص ~ سمح ليا اخوياا غلطت وعمري نعاود ولا باقي نقرب لشي شراب معندي مندير بيه
كان كيخنزر فيه مدار تا ردة فعل لا زوينة لا خايبة ، عبيد يعنق وغلام منزل يديه
عبيد ~ انا عارف راسي خيبت صورتي قدامك ، وانا مستاعد ندير ما بغيتي غير شوف فيا ودوزها هاد المرة حرمت عمري نعاود ..
شدو من كتافه جرو مبعدو على باب دار وقال بلاما يحن ~ ضربوك لحيوط تمرمدتي عرفتي بحق النعمة ل عايش فيها ، طلق منو مطلعه ومنزله وقال، شفتي حوايجك وريحتك فين عمرك وصلتي لهاد الحاله ومازال مشفتي والو ، كنقسم برب الكعبه اولد ميمتي الا غتشوف معايا لويل الا عودتيها خطف ليه عبيد يديه كيبوسها وغلام مبعد لتيساع ~ هاد المرة قتلني الا درتها اخويا !! اول واخر مرة مبقاتش تتعاود حن فيا راه معنديش من غييرك يحن
حك غلام على صدره منخص ،طلع نفس ونزله وجاوبه ~ دااازت !! غندوزها ليك وننسا ولكن مرة جايا غندفنك من حياتي ونتا حي ، غنسى عندي شي خو سميته عبيد ونتا عارفني مزيان اش كتسوا
وهو حادر راسه عينيه حمرين كمسح عينيه بكمام حوايجه ~ عارف اخويا كون هاني وتا انا غنعطيك وعد راجل
ونزييييدك !! نطق غلام وهو ماسكه من ذراعه ~ غتوجد ليا راسك تخرج تخدم معايا تقلب على صرف حيت انا مبقى عندي ما نعطيك هز صبعه بإندار وقال ~ مع لفجر نلقاك لابس واجد وفايق تخرج تشوف طرف الخبز منين كنجيبوه باش دير بحسابه وتعرف علاش تصرفه …
جبد گارو من جيبه لاحو ففمو وخدا بريكة شعله ونثر منه نثرة طويلة صاط دخانها وقال ~ يله دخل لعند مك بكي معاها شويه
دخل على لكبيرة غير شافته وهي تنوض تلاح عليه هو يبكي وهي تبكي رجعات دار عزو تا بكات وساللت وبدات تعض فيه وتعاتب فيه على شراب ل قرب ليه ، خلاتهم نجمة مع بعضياتهم وطلعت لبيتها تجمعه وتشمسه كتجمع في حوايج مسخين باش يتصبنه وهو يدخل عليها شحال مشافته كيخرج ويخليها ناعسة ويدخل يلقاها ناعسة ، شافت فيه وقالت بابتسامة بجنب فمها ~ بغيتي شي حاجةة
غلام قصد الماريو ياخد حوايجه وقال ~ حطي داكشي من يدك ولبسي باغيك نتي !!
مقابل مع لمرايا كيقاد صدايف قميجته ، رتب شعره لمخبل ول عاطيه منظر زوين ، قاد لحيتو بيديه لبس ساعته ومنساش البارفان رش منو ، ل يشوفه في الكرنة ويشوفو دابا ميقولش هذا غلام !! …كانت حاطة حوايج ل غتلبس كتسنى فيه يخرج باش تبدل على خاطرها حشمت منه ومزعماتش تتعرا قدامه ،كان حاضيها من لمرايا كيشوف كيفاش جالسة وتهز لحوايج وترجع تحطهم وتضور فعينيها كي المشة عاق بيها ودار راسه مكلخ ، ضار لعندها بتساؤل بعدما سالا وقال~ مغاداش ؟؟
هزت عينيها فيه بلا وقالت متحمسة~ لا غادا غير هو ، بلعت ريقها وكملت بشوية حادرة راسها بحشمة ، بغيييت نبدلل
سمعت صوت تنهيدته وخطواته القوية ، بنص عين لمحاته هز شي حاجة من الماريو وخدا سوارته وقصد الباب~ انا لتحت متعطليش !!
بفرحة ناضت كتزرب ، كانت غاسلة وجها ومطرفة حالتها لبست صايا لون واحد جايا على طايتها كتهبل ومزينة بفرافر من تحت مع قميجة مزركشة بلوان مبهجة ، قادات وجهها خفيف ضريف كحل ممعيقش وشوية عكر ففمها مباينش ، لاحت على شعرها زيف مرخوف وفي رجلها تأنقت بصندالة طالون مبينة بياض رجليها هزت صاكها بعدما خشات فيه شي حاجة من فلوس ل عطاها فصداق رشت ريحتها وخرجت بثقة وفرحانه كيعجبها الحال ملي كتلبس وتتمكيج وتتقاد عينيها كيتحله والفرحه كتدخل لقلبها وكتبان على وجهها ل كينور ،هابطة فدروج كتقرقب بطالونها وكتمشى بالمهل ،سمعت صوته في صالون كيدوي وهي تم داخلة لعندهم قلبها كيضرب وحشمانة من شيخها توقف قدامه وهي فهاد الحالة ، صوت الكعب العالي خلا كلشي يهز راسه ويشوف شكون جاي ، حتى وقفت قدامهم ورمات سلام وهي كتعض على فكها بتوثر ، عمرهم شافوها بهاد الحالة مولفين عليها يا بالبيجامة با بجلابة ، كلها وباشمن عين كان كيشوف بيها ، خليفة عاجبه لحال مرت ولده على خير مع ولده ، لكبيرة معرفت باش تبلات اما زهرة نار الغيرة بانت فعينيها ، غلام كانت عينه على عبيد فين كيشوف لقاه حادر راسه مهازوش وهو يجمع الوقفة يطير بيها من تما بلاما ينطق بحتى كلمة ، مع غيفوت لبيت وهي تنطق لكبيرة بتساؤل وملامح الحيرة على وجهها ~ فيين غاادي اوليدي !!
دار لعندها جامع حجبانه ونطق مستغرب~ وفين عمرك سولتيني فين غادي ولا منين جاي !!؟
حست بالكربة طلعت مع ذاتها ~ غير حيت شفت معاك نجمة قلت لتكون واقعة شي حاجة ولا عائلتها عندهم شي حاجة هذا وكان
غلام عايق بيها وغادي معاها على قد عقلها ~ غير ريحي بالك نتي ومتفكريش بزاف خارجين وجايين متسنوناش لغدا معارفش معاش غنجي …
هزت ليه راسها بواخة كتعوج ففمها وعينيها على لعروسة ل لابسة ومقادة والفرحة باينة على عينيها ، حست بنغيز مريم ل كانت جالسة حداها ول قربت من وذنها وقالت ~ أَمِي !! عفاك قولييه يديني معاه تانا باغا نخرج مالي معلياش الله !!
مكانتش من لعاگزين وقفتهم من جديد وهاد المرة دوات مع نجمة خافت من ولدها ليقمعها مشات للحيط لقصير ~ نجمة بنتي !! حاسة بيك حشمانة دي معاك مريم تونسك فطريييق؟؟
ضحك بسخرية وهو كيحرك راسه ونطق ~ حشمانة ؟؟ تونسها في طريق ؟؟ علاش مالها خارجة مع راجل غريب ؟؟ واقلة نسيتي الواليدة بلي راه مرتي وانا راجلها
لكبيرة بلعت ريقها حاسة بغصة ~ وانا غا على قبلها وصافي ، مهم ل بان ليك
غلام حس براسه غيبدا يتعصب ~ اودي بان ليا نخرج حسن ليا !! وقف داير ليها طريق قدامه وقال ~ خرجي محدها راشقة ليا
معودتهاش معاه تمشات قدامه كتهز وتتحط بلا تصنع مشية طالون هي هاديك كلها انوثة وأناقة ، باغي يدوي ورابط لسانه حتى يفوتهم مع وصلو لباب زنقة وقبل متحله شدها من ذراعها مقرب لجهتها وقال وعينيه كضورو عليها ~ اش هاد الحالة ملقيتي متلبسي غير هادشي ، هبط عينيه لطالون ل واخا علات بيه مزال عند صدره نطق من تحت سنانه ~ وهذاا لاش لابساه ؟؟
هزت كتافها بعفوية وقالت ~ عفااك اغلام !! ياك خارجة غير معاك وزايدون شوف بدات كتدور على راسها ومرة مرة تقيس فيه وكتدوي مرتاحو وهو غير كيشوف ~ لابسة مستور ، وشعري مغطي ومدايرة حتى حاجة فوجهي غير الا بغيتي تخسر خاطري ، ذبلت ليه عينيه وقالت كتسبل فيهم وزايدون هادو هما حوايج لخروج ل جبت معايا كلشي بقى عند ختي
دوز يديه على شعرو كيعض على شفايفه صدرو كيطلع وينزل وقال بفحيح ~ قداامي !!
ف بيت النميمة و تقرقيب الكيسان جالسة زهرة وجها حمر مطلعة شوكتها تقول غير لفعة وباغا تلذغ ، مزال بين عينيها تصويرة نجمة مفركسة ومقادة متسرطاتش ليها تشوف ليام ضاحكة ليها ، دخلات عليها لكبيرة بصينية في يديها حطتها قدامها و تنشرت حداها فقصتها باينة على وجها هزات داك البراد و بدات تكب فيه بلا تناويل ، شافت فيها زهرة بنص عين ~ راجعيه الكبيرة شفتك تلفتي ؟؟
الكبيرة حطت البراد من يديها بنثرة وربعت يديها~…الله يلعن ل بقى ليه شي عقل ، تي شفتي خوك ؟؟ ندبت حناكها وخبطت فخضها ، انااري على ولد كرشي دغيا بدلاتو لمرا حولهم كيقولوها راجل ل ضاربو ضاربو على بين فخاضه
زهرة ضحكت مخسرة سيفتها و طانزة على مها ~ … هااا ويلي قالت ليك بدلاتو مرا ، تي فين شفتي هاد لمرا نشوفوها معاك ؟؟ راه غا غراب مخشي في البيت ا ميمتي كبي كبي شي كاس نرجعو بيه الراس راه غيطيح عليا راك معارفة والو غا مكفية عليك القفة فهاد الدار
الكبيرة بعدم فهم ~ اش باغا تقولي گري راني كنعرفك
زهرة تكات على جنابها و صغرت عينيها في مها ~ ربي لما قولي ليا ؟؟ واش رادة لبال ولا معمية شفت مرت ولدك عمرها فاقت دوشت مالها تتبقى بجنابتها ولا شنو، راجل يديه ليل ويجيبو ليل وغا هاز شوكته
الكبيرة شافت فيها مخسرة سيفتها ~ … بقى ليك غا داك الشغل لبين لمرا وراجلها تا هو داحسي معاهم فيه، وشكون قاليك كتبقى تال صباح ودوش راه كاين ليل
زهرة بضحكة مايعة ~ كتبان على الوجه اميمتي ونحلف ليك ونبصم بيدي ورجلي تا مرت ولدك وولدك معليهم حالة مرا وراجل وبالامارة سروال ل منهار خداته مشفناه ،دارت سبة براجل كون كانت لالة وبنت سيدي تسد لينا بيه عينينا
الكبيرة حطت ليه بنتها الملح على جرح تنهد قايلة ~… رجعتنا شفاية و ضحك بين الناس گاع عيالات الدرب فرحو بعريسااتهم و تقبو لينا العينين إلا هاد الجمرة الطافية كحلت ليا سيفتي ومخلاتني نفرح لا بلول ولا بثاني
زهرة كتحلف وتعاود ~ … إلى ما عجبتك فيها اميمتي راك مولدتي فيا غا الخلا لكان غا كتافها في هاد الدار غنطيحهم ليها ونخليها عريانة وسط العديان
الكبيرة عارفة بنتها اش كتسوى و لي شرباته لراجلها حتى دايرة ليه ساكته والمسكوته غتشربو لنجمة ، جبدت عليها نواضها و لاحت عليها زيفها خايفة ~ … هاااا العار ، انا ساخطة عليك إلى قربتي لخوك ومرتو ها ودني منك ا زهرة راه ممعاهش اللعب ومبقيتش قادة على شي صداع يفوت فيك شي دقة
زهرة ضربت على صدرها كتحلف~ … إلى ما شويتها ما سميتيش زهرة غا ربعي يدك وتفرجي ول بغى يديره يديره حتى يبقى يشوف في وجهها بعدا عاد يجي منها
راكبة فجنبه حاسة براسها طايرة بحال الفراشة راسمة ابتسامة ساحرة على وجها مرة مرة تشوف راسها فالمرايا ، معارفاش فين غادي بيها مطمرة وساكتة محتاجة تخرج وتبدل الجو بحالا حس بيها قنطات ، لمعت عينيها وهما دايزين من حدا الحي فين ساكنة ختها تنهدات بصوت وصل لعنده دارت كتشوفيه كان مركز على سياقة وعينه على الطريق ، حس بيها حاضياه وهو يضور شافيها ونطق بتساؤل~ مالك اش كاين ؟؟
ترددات قبل متنطق ،دارتها فيد الله وتكملت ~ كون غير وقفتي نطلع بالخف نشوف ختي وناخد شي حوايج ديالي بقاو هنا خاصيني ونمشيو ؟؟
كان واقف في سطوب حرك راسو بلا وقال ~ ل خصاتك في الحوايج هانتي خارجة غناخدها ليك
جوبته بواخا بلاما تجاحد معاه ،رجعت تقادت فبلاصتها طافي حماسها ، رد ليها البال غمض عينيه ورجع حلهم مباغيش يشد العكس ، ضور الڤولون ودار دوميتور ورجع ، بدات كضحك بشوية بشوية ،مرة تتاكد واش راجع بصح مرة تشوفيه حتى وقع قدام دار ختها ،سكت طوموبيل ورجع لكوسان اللور وقال ~ متعطليش انا كنتسناك !!
ضحكت تا بانو سنانها وهبطت كتجري فرحانة لباب كان محلول طلعت بجرا فدروج حتى دخلت ، كانت فاطنة بوحدها فدار باركة تكسكس في سميدة حتى وقفت عليها نجمة ، متنكرش فرحت بشوفتها وكملت فرحتها ملي شافتها فأحسن حال ، تسالمو وتعانقو وعرفت منها سباب مجيتها خلاتها دخلت تجمع حوايجها وهي تمسح يدها وهبطات لعنده فين واقف بطوموبيل ،دقت عليك فزاج طوموبيل غير شافها ونزل لعندها باحترام سلم عليها من تيساع بلاما يمد ايديه حتى مدتها ليه هي وقالت ~ طلع اوليدي تسنا فدار عيب تبقى على برا !!
غلام منزل يديه باستقامة وحاط وحدة فوق ختها ~ ماشي مشكيل الحاجة مغتعطلش تاخد اش بغات ونمشيو تابعانا طريق !!
بضحكة خاترة قال ~ عارفة ومغاديش نشدكم غير هي ساعفني ودير ليا خاطري وتسناها لفوق نيت بغيت ندوي معاك
في الوقت ل نجمة فلبيت كتجمع حوايجها بزربة خايفة تتعطل عليه كان جالس هو في صالون وجالسة فاطنة معاه فنفس سداري وفي نفس الوقت مبعدة عليه احتراما ليها عاد ليه ،بترحيب قالت ~مرحبا بيك اوليدي غلام ..سكتت شوية وكملت ، سمح ليا بغيت نوصيك دغيا قبل متجي نجمة حيت مبغيتهاش تسمعني
حط ايدو على صدرو وحنحن ~ …مرحبا !! قولي اشنو عندك انا كنسمع ؟؟
فاطنة كتدوي وعينيها على الباب ~شوف اوليدي أنا كبر منكم بزوج وديت في ليام وجبت حتى طاح زغب راسي ل بغيت نقولك هوا تهلا في ديك يتيمة الحيين ، حلت عليا عينيها حتى ولفتني وولفتها وعجنتها على يدي …مغنشكرهاش حيت ختي ولا بنتي ولكن غنشكرها حيت صبااارة وعمرها تقول عييت من غير الا لوصلت فيها لعظم …شفتي هادي ل قدامك ،دوزت عليها لي متقدش عليه شي بنت فسنها ماشي حيث ظلمتها ولكن منها من ولادي حيدت الكبدة وحطيت بلاصتها حجرة باش نربيهم وتحد مينعت فيهم، خدمت عليا صغيرة وكبرت معايا الكبار والصغار وعمرها عزت فيا الحاجة واخة مبينت ليها محنة ، تنهدات ونطقات ولدي غلام !!وصيتي ليك نجمة مغنقولش ليك متبكيهاش ،متخصرش ليها الخاطر ،الغيار كيوقع بين زوج ريوس ،ولايني كون نتا الجدر ومتخليهاش تعطش ،خاصها الحنان ل ملقاتوش لا عندي لا عند باها الله يرحمو لا عند مي االله يطول فعمرها ،نجمة صبارة وفي نفس الوقت هشيشة متوركش عليها باش متقصمش ،خدم معاها غير السياسة راه معندها لا مع حرب ناس ولا صداع اللوايس ، جرها لعندك وغطيها بجناحك ومتقساش عليها باراكا غا ما داز عليها وانا متاكدة عمرها تحافيك ،تهلا فيها وانا متاكدة انها غتهلى فيك وفواليديك واللي نوصيك مدخلش بين مك وخواتاتك وبينها خلي لغى العيلات للعيلات حدرتي راك من الحق كنتي غايب وسمعتي من بعيد سوس ودنيك اوليدي واخر حاجة واخا فين توصلوا متخليهاش تخرج غضبانة حيث معندها غير الله ونتا ،أنا غير ضيفة فهاد الدنيا وغيجي وقت لي نخفف الزيارة وبغيت نمشي مرتاحة عليها ولهلا يدخل بينكم شر العباد والله يتاويكم للخير ويكونو بينكم ولاد صالحين لي يكونو بيكم
غلام كان غير ساكت وكيتصنط لهدرتها، كلامها فهمه مزيان كتفى يهز ليها راسه بابتسامة ونطق بما قل ودل~~~ مراتي تحت جناحي وعمرها تخرج منو حتى نموت
خدات حوايجها وكل مكيخصها وخرجت معاه وهاد المرة بهواها ماشي بزز منها جنبو على جنبها ماشي جارها … كانت راكبة حداه فطوموبيل فرحانة حيت لبى ليها طلبها وخلاها تشوف ختها واخا مشبعتش منها شدتهم فاطنة يتغداو لكن رفض بالقطع وقررات تخليه على برجه، كانت جالسة معاه والوجهة معارفاهاش فين مرتاحة وقلبها هاني فينما بغى يديها هي قابلة ، كان صقيل في طوموبيل عينو قدامه ايدو على جبينو مكالمي وراخي فيه النفس والاول مرة ميتعصبش مع طريق ،هز يدو وكسر داك صمت بأغنية لمجموعة السهام غادي منغم بيها ومرتاح الطريق كاملة وهو راشقة ليه ، مرة مرة يلووح ليها نضرة يلقاها كتشوف ف
جنب الطريق على محياها براءة لا توصف ، مدة وهما غاديين تاوصلوو لوجهتهم بلاصة شوا وتشنشيط والدخاخن طالعة فالسماء ، وقف طوموبيل فواحد القنت ونزل خلاها تا نزلات كتشوف فين هي لاول مرة كتجي لهاد بلاصة عجبها الحال وكتموت على هاد الجو ، كان سما صافية وشميسة سخونة، قرب منها مكمش يديه بلا هواه كيفليها بعينيه ويشوف زحام وكمية ناس لي مجمعين الغادي وجاي ، بانو ليه زغيباتها خارجين من الفولار قرب وهو مخنزر ،حط يديه على بشرتها الرطبة رجف قلبها وتورده خدودها كثر ماهما موردين مع الشمس ، قاد ليها شعرها كيدفعه بعنف لداخل مباغيش شعرة منها تبان ولا زغبة منه تخرج ، هبط ليها الشال تا لجيهت عينيها وهو كيزفر ، شاف يمين وشمال وشد يديها مزير وقصد واحد الطبيلة وهي بحال لبنية الصغيرة قلبها كيخفق بجهد ، غادة موراه وعينيها على يديه لكبيرة والحرشة ل تملكه يديها ومزير عليها بعنف …
جلس حاطها قدامه مخليها تشوفو غير هو حاجب عليها البشر ، كان زحام ودنيا عامرة ل جاي باش يتقدى ل جاي باش ياكل ، عاقد غوباشتو وكيقلب بعينيه يله غينطق وهو يجي عامل تما كيمسح في طبلة وكأي بائع كيزوق باش يبيع نطق بدون قصد ~ شنو حب الخاطر ؟؟ شاف فنجمة وكمل ل تشهيتيه امدام عندنا هناا ؟؟
خنزر فيه غلام ووقف على طولتو قالب برجليه واحد الكرسي كان حداه بشوية ، جرو من قاميجته لعندو ونطق وهو مكره~ انا غير صووور بنت ليك حداها ؟ علاش كتسولها هي بالضبط انا فين ؟
نطق الراجل كامل كيترعد مفهم والو صدمه وخاف منه ، وخاف حتى على خدمته نطق وهو كيرغب فيه ~ سمحلي اخويا انا مقصدت والو ….
غلام بعينين بحال نسر مكرهش يشرشمو غا مركن ~ الراجل كيدوي مع الراجل ، ما عدا الا كنتي مرااا ؟؟
بلع ريقه مقدرش يجاوبو فأشد حوارهم دخل موول القهوى ، قرب كيسمع الغوات ودخل بين المعماعة حتى بان ليه غلام ، حل فمه بابتسامه ~ سيي غلااااام هنااا !!
شافه غلام وهو يرخي من الولد ل كان منزل راسه ، مول شي غوت عليه بانفعال وقال~ تحرك من هنا !!
ورجع شاف فغلام حال ذراعو باغي يتسالم معاه وكيكبر بيه ~ سي غلام عندي في المحل !! وزارتني البركة أَأَخِي كي درتي ليها ؟؟
بادلو السلام وحط ايده على صدره وقال ~ الله يكبر بيك !! هانية ابا كريم كلشي هو هاداك ؟
كريم وهو كيربت على كتافه ~ الله يحفظك !! نهار كبير هاذا ؟؟
بدا يصفق كيغوت على الخدامو ~ قادو ليا احسن طبلة فأحسن بلاصة في القهوى …
جاوبو غلام وهو باقي محافظ على ملامح وجهه الحادة ~ الله يحفظك …
تقادت ليهم بلاصة نقية وبعيدة على الناس واخا القهوة كانت مطرطقة ، طابلة تصاوبت خصيصا لييه وهو فديك ساع ل يخدم غلام من ديما كيتعامل معاه ومن عندو كيتقدى وسميته بوحدها ملي تسمعت تما ، خلات گاع گزارة يجيو يسلمه عليه ، نجمة غير حاضياه كيفاش مكبرين بيه ويضحكه معاه وكلها يعرض عليه بوحده جنازته حاضرة معاهم ولكن عقله وعينيه فكل مرة كيمشيو ليها حاضيها ومغافلش عليها ، شاف حتى عيا وهو يستاذن منهم وقال ~ نخلييكم مرة اخرا معايا دار !!
خلاهم ومشى لعندها غير شافته جلس بدات تفرك فيديها بابتسامة جانبية ، جلس بأريحية على كرسي مجبد رجليه تحت طابلة وقال بتساؤل ~ مرتااحة هنا ولا نبدله لبلاصة ؟؟
نجمة حركت راسها بلا ~ لا مزيان قهوى زوينة ؟؟ باينة عندهم ماكلة زوينة زحاام عليهم !!
غلام دور وجهه كيشوف ونطق بغمزة ~ مابيهاش !! شنو مشهية تااكلي نفسك فشي حاجة ؟؟
عضيت على جنب شفتها سفلية وحدرت عينيها وجوبت بشوية ~ ل جبتي ليا هو هاداك معنديش مشكيييل ناكل معاك كلشي
تسربات طبلة بگاع ل كاين تما ، سخون وفتي براد اتاي مشحر ، خبز حامي زيتون وشلاضة بماطيشة والبصلة وعاد المشاوي ، تحلات ليها شهية وجاها جوع خدا صينية قدامو وقلب البراد مزيان وكب ليها هي اللولة ومد الكاس خداته من عنده كيتسناه يبدا باش تبدا وهو ينطق ~ كووولي !! جينا نتغداو منتفرجوش فهادشي يله بسم الله
دخل فأكل مباشرة مهزش راسه كان كياكل بنفس مفتوح وحتى هي هاكداك مرة مرة يحط ليها حسات براسها وهي معاه كانها كتعرفه من زمان ، الخرجة دايزة خفيفة على القلب واخا هضرته قليله ولكن افعاله كثيرة كيفاش حاضي ملامح وجهها ومن عينيها كيعرف واش خاصها شي حاجة ، غيرته ورجوليته ل باينة من تصرفاته مجلسها في القنت مكتشوف حد وحادي مع حوايجها وزيفها
كمل هو لول ووقف بعدما قال بنبرة أمر~ كملي ماكلتك نكمي ونجي ؟؟ حركت ليه راسها وخرج وخلاها خاصه يقاد مجاجو ضروري لاح گارو ففمه بعدما شعله وداز يحاسب وهو يوقف عليه كريم كيحلف ~ اش كديرر اسي غلام حط فلوسك فجييبك ماشي حشوومة !! ليوم نتا فضيافتي !!
غلام حرك ليه راسو بلا وهو كينطق ~ واا خليني اصاحبي من هاد الهضرة !! جيت نتغدا بفلوسي قول شحال عندي ولا عمري مازال ندوي معاك ولا نحط رجلي عندك ونتا عارفني كي داير ؟؟
كريم معاجبه حال ~ اش وصلنا لهاد شي دابا ؟؟ تا مالك راسك قاصح !!
غلام خشا يديه في جيبه جابد ماسة تاع فلوس ~ هاكا غنكون براحتي !! قول شحال عندي بلاما تكعيني ؟؟
دار ليه خاطرو وباش ميخسروش خلاه يخلص ،وغلام مكان غيتزحزح ليه من تما تا يحاسب معندوش مع حاجته فابور نفسه حارة وطرف من النفخة يعيش… رجع لعند نجمة كانت سالات ماكلتها وكتسنا فيه حرك ليها راسه من بعيد بمعنى مشينا ، ومشى حتال عندها باش يتحرك جنبه على جنبها دوزها غسلت يديها ورجع شدها من يدها وخرجه وهاد المرة لوجهه اخرا
عجيب أمر الدنيا !! شكون يقول نجمة مع غلام كيتمشاو مع بعض؟؟ مصغر خطوته باش يمشي معاهت فنفس الوثيرة شاد فيديها وهي مزيرة عليه ومرة مرة يجرها لعندو محاوط على خصرها بتملك الا دازو من بلاصة الزحام ….. نظرات عينيه حادة وقاسية عاقد غوباشته وحاضي عينين الرجال واش غيجيو عليها ، شكون كان يقول بلي البنت ل كانت كتبكي قبل شهور حيت غتزوج ب خو راجلها هي نفسها ل خارجة ومع نفس الراجل خدودها وردية وعينيها كيلمعه ، لو رجعت بيها الايام اللور وحكاو ليها اسطر من قصة حياتها وشنو غيوقع معاها مكانتش غا تيق !! سبحان من يبيتها فشان ويصبحها فسان ربي بوحده القادر فرمشة عين يبدل حياتنا يا إما للأحسن ولا للأسوء ، غلام ونجمة من الاول كانو مكتبين لبعض ومعاوية حطو ربي فطريقهم فقط باش يجمعهم في الحياة الدنيا ….
بإصرار منه كان غادي بيها للقيسارية يتقدا ليها بيدو لحوايج يقوم بدوره كرجل على أكمل وجه ، اول مرة كان اختبار دارو لمو باش يشوف واش غتعاملها بحال بناتها ولا غتكبر كرشها ووقع ل مكانش ليه على البال خدات الحق لكبير مع بناتها وخانت الامانة وهادشي مكانش متوقعه ،داكشي علاش قرر ميحتجها لحتى حد ول بغاتها ياخدها ليها بنفسه ويخلي مو فتيساع هو مرضي مو اه لكن ماشي ولد مو كيف كنقولو…..
غادي معارفش فين يمشي اول مرة يدخل لشي بلاصة فيها حوايج لعيالات ممولفش بهادشي وبزز منه خاصه يولف كان ضاغط على نفسه على قبلها غادي دافع صدره عينيه كيدورو على صحاب المحلات كيشوف منين يدخل وباش يبدا كان تالف ، هبط لمستواها ونطق في وذنها باش تسمعه حيث كان صداع ~ مكنفهش فهادشي الا كتعرفي منين نتقداو وريني !!
نجمة حشمات منو بلعت ريقها وجوبت ما بغاتش تقجر عليه ،يله عطاها صداقها وتزيده بالحوايج جاتها ناقصة ~ راه خدات ليا خالتي لكبيرة داك نهار صافي باركا غير داكشي…
غلام زفر بصوت مسموع وجاوب ~ هانتي قلتيها هاديك خالتك وهذا راجلك ل غياخد ليك ، يله الله يرضي عليك وديري ل قلت ليك نقضيو الغرض ونرجعه فحالنا
قيسارية ل جاو ليها منها نفسها كتقدا نجمة وهي ل جات ليها مع كبيرة عارفة صحاب محلات وعارف كل محل وشنو كيبيع وشنو كيجيب دخلو لبلاصة بيجامات شكال ونواع والألوان ، تحتار العين والقلب يعشق كلشي….حط يده على جنبو كيدور عينيه هز حجبانه وشافيها ~ شوفي شنو عجبكك !!
جا عندها صاحب المحل كيتبسم وكيوريها في البيجامات لمعلقين ~ شوفي الالة شنو خاصك كلشي موجود ، هانتي هاد الموديل حط يديه على واحد البيجامة ومع بغى يمدها ليها ، مع يوقفو غلام جارو من ذراعو مخنزز فيه وهاز حجبانه لفوووق بتعالي وقال ~ الشرييف !! غا رتاح نتا وسير تْرَيَّحْ راه عندها عينيها كتشووف بيهم اش بغات !!
بنبرة صوت قوية قال كلامه ورجع حنزز فيه كيطلع وينزل مقوص فيه عينيه وكيتسناه ينطق بشي حاجة باش يتور عليه ، شاف فيه مول المحل خلعووه عينيه لي مخرجهم فيه معودهاش معاه تركن في القنت اما نجمة قلبها بدا يضرب خافت من صداع ،عرفتو من نوع ل على نقشة يضارب في زنقة وغتلقى معاه مشكل ، قربت لغلام باهتمام باغا تنسيه فسيد ليصدق مكبر معاه لخصام على شي حاجة متستاهلش ونطقات وهي كتشير بيدها لواحد بيجامة كتسول فيه تاخد رأيه عاطياه اهتمام ~ شووف اغلام هادي زويينة عجياتك !!
كان موديل طويل موبرة بالقصبي فيه طريزات خفاف مزينين صدر ولكمام ضيق عينيه كيشوف وخاطب مول محل ~ جبد لوان ل فيها !!
زهري ،والبيج ،لحمر ،وزرق ، لقصبي…. بخمسة تحطو فوق طبلة نفس قياسها ، لون ينسيك فلون نجمة عينيها مالو للحمر وغلام حط يده على زهري لون هي ماشي من عشاقه وقليل فين كتلبسه، طول شوفة فداك اللون عجبه وتخايلها لابساه ، كان كتشوف فيه وتشوف فاللون الأحمر ، تنهدات فاش شافت اللون ل عجبه ، أما هو حقق فيها شوفة وقرب منها كثر ونطق وهو كيسولها ~ اشمن لون عجبك ؟
توردو خذوذها من قربو ليها ، كان كيحقق فملامحها شوية حنحن بصوت قوي باش يسمع جوابها ، توترات وهي كتشوف فعينيه كيختارقه ملامحها بعنف ورجعات سمعاته نبرة صوتها الضعيفة ~ ناخد زهري ل عجبك !!
بانت شبح ابتسامة خفيفة على شفايفه ورجعات تلاشات تدريجيا …شاف فمول المحل وهو معبس نطق وهو كيقول ليه ~ جمع ليها لوان كاملين !!
مسولش على ثمن ومكيهموش بشحال همه الوحيد يوفر ليها داكشي لي قاد عليه ، تلبكات بصدمة معرفت متقول بزاف عليها هادشي معينهاش ترزيه فجيبو ، قالت وهي كتشوف فيه مخرجة عينيها ~ بزاااااف علييييك غالييييييييين غير وحدة براكة ….
كبل يديه مع يديها فور ما مد ليه سيد الميكة مد ليه خلاصه غير الورقات ، ورجع نطق فوذنيها ~ تا حاجة ما بزاف !! لي بغيتيه وكنت قاد عليه نحضرو تال يديك ، الله يعطينا غير منين نعطيو
بريق من دموع كتاسح عينيها تصدمت وشكرت الله فسرها ممتيقاش واش هادشي ل كتعيش واقع ولا حلم زوين وغتفيق منو شي نهار ، بلى متحس شدات فيديه بقوة بلاما تنطق بحتى كلمة
كانت فرحاانة ودنيا مسايعاهاش ، بحال البنت الصغيرة ملي كيشري ليها باها لعبة وكتفرح بيها ، وشكون فينا كتكره تشري لحوايج، أي وحدة منا الا دخلت عليها شي حاجة جديدة سوا من جيبها ولا من عند اقرب ناس ليها كتفرح وكيبان ليها كلشي فعينيها زوين وهكدا نجمة اهتمامه بيها عجبها حسات براسها مدللة ، دلال وخنات ل معرفاتوش مع حتى واحد ،مكبر فيها حتى حاجة راجل فحل كامل مكمول سخي حاجته ماشي دياله ، عوضها بطريقته على الحگرة ل مارست عليها مو ، خدا ليها عوض الحاجة ربعة خمس وفينما يدوز من قدام شي محل يهز عينه ويقول شوفي هنااا هي قنعت وهو مازال حاس براسه مقصر…….
يده مطلقتش من يدها كأنه خايف تتوضر عليه دازو لهاد المرة لمحل شافو مختص فلي شوميج دونوي شكال ونواع سوتيامات وسليبات اخر مكاين فداك الوقت كل ماا يرضي انوثها كاين ، قوص عينيه فواحد البينوار حريري مع ملابسه داخليية فالأسود ، وقصد المحال هي بحال الدمية حداه كتمشى بخطواته غير متبعاه
كيشوف فالملابس الداخلية اشكال وانواع تمتم بين شفايفه ونزل لمستواها كيسول فيها ~ خودي ديكشي لي بغيتي انا خاطيني سوق نسا هادشي مكنفهمش فيه !!
زادو خذوذها توردو كتر وهي كتشوف فين جايبها حشمات منو وحدرات عينيها مقدراتش تهزهم فيه ،توترات كتر ورجعات جاوباته وعينيها فالأرض حادرين ~ بلاش عندي خلينا نمشيو …
حس بتوترها ورعشة يديها لي فيديه عرفها حشمات ، شاف فمول المحل ونطق ~ عطيني هذا ، كان البينوار الحريري بشوميز دياله وبملابسه فالأسود ضد لون بشرتها البيضة ، وكمل وهو وكيقول ليه ~ زيد معاك من هادو . ..
كانه ملابس الداخلية بجميع الألوان نطق البائع وهو كيشوف فيه ~ اشمن قياس اسيدي؟
شاف فيه غلام مخنزز هو براسه معارف والو وهي فجنبه كترعد بالحشمة حك على لحيته وسولها بعينيه بمعنى شحال ، عمرها عرفت طاي ل كتلبس من ديما كتقيس على ظهرها فوق الحوايج وكتشري ، تخشات فيه طالعة معاها صهدة ووشوشت ليه بشوية وهي مخشية تحت ذراعه ~ معرفتش مولفة نقيسهم عليا
هبط لعندها وقال بعد فهم ~ في زنقةة !!
شاف فيه غلام مخنزز هو براسه معارف والو وهي فجنبه كترعد بالحشمة حك على لحيته وسولها بعينيه بمعنى شحال ، عمرها عرفت طاي ل كتلبس من ديما كتقيس على ظهرها فوق الحوايج وكتشري ، تخشات فيه طالعة معاها صهدة ووشوشت ليه بشوية وهي مخشية تحت ذراعه ~ معرفتش مولفة نقيسهم
قطب حجبانه مصدوم وقال بعد فهم ~ كيفاش كتقيسيهم ؟؟ واش في زنقة ؟؟
بللات حلقها كدور في عينيها معرفت باش تجاوبو ، كان كيسولها مخنزر ،عينيه عليها كيتسنى جوابها ل ملقاتوش لدابا كيف دير تشرح ليه شافت حتى عيات وردت عليه ~ ماشي داكشي ل على بالك غير من فوق لحوايج
مماتش غير خرجو مصارنه ، صاط بصوت مسموع وهز صبعو لمول المحل كيختار وكيوريه شنو يعطيه عينه ميزانه عبارها فعينه تحت صدمتها هي ل خلاتها تحل فمها بغيض ، جمعهم ليه في بلاستيكة خلص وتحركو من تم خلات حتى فاتو مول المحل وهي تنطق وكون غير بقات ساكتة ~ والا مجاونيش نضيعو فيهم !!
تمتم كيستغفر مولاه ووقف وسط طريق ضاير لعندها ~ الا مجاوكش غنقطعهم
جرها من يدها بشوية وشاف قدامه كيدوي بسخرية مسمع ليها الهضرة~ زويينة هادي سيدة باغا تقيسهم قدام عباد الله جبديهم نتي حسن !!
الصمت كان من طرفها مجوباتوش ،دغيا خسرت كمارتها ودارت فيها مقلقة وظالمها ، داز من حدا طبلة زيوف وتفكرهم ، دوا معاها غير بعينيه بمعنى عزلي وهي دافعة كبير ومنفخة ومهربة عينيها منه دوات تحت منها وبجميل قالت ~ خودهم على ذوقك تاهما راك تبارك الله كتفهم فكلشي ملي عرفتي عبار سوتيامات منخافش عليك
جاوبها بابتسامة جانبية ودارها ليها على قد فمها معندوش مع الحزارة ، خدا ليها ل بان ليه قدامه دازو لعند مول روايح وماكياج دهزها منهم تاني بلاما يعبرها وخداو طريق الرجعة ،كانت كتسنى منه كلمة خفيفة يحاشيها ليها بيها باش تترخف ساعة خلاها كتشوى فوق مجمر هي ل شعلات نارو
مرة تنهد مرة تصوط مرة تفك زيف حارت وهي جالسة فوق داك الكرسي حتى عصباته ونطق بلا شعور ~ ماالك كتبربصي فبلاصتك !! جلسي وزگاي !!
عضت على فمها بجهد وشافت فيه كتخنزر ونطقت معاجبها حال ~ دابا ماالك تقلبتي عليا هاد القلبة بوحدك بقاو فيك لفلوس ل خسرتي عليا بناقص منهم معندي مندير بيهم الا كنتي تخرجني ساعة وتنغصني عشرة سوايع
ضرب فران صيك حتى تخبط ظهرها ، حيد السمطة بالنثرة وتقابل معاها حاط يدو ليسرة على لڤولون قال بأمر بنبرةة صوت زايدة نغزة ~ شووفي فيا !! كانت حادرة راسها مقاداش تهزو فيه وهو يدير شرع يدو شدها من فكها وضورها عندو حتى تاوهت موعتها حطت يدها على يدو ل على وجها كتحاول تفك منه وقالت بصوت مغبن ~ اييي وعتيني طلق !!
نطق مخرج عينيه ~ حيت مكتسمعيش راسك قاصح قلت ليك شوفي فيا شوفي متكبريش الموضوع وتقلقي على والو حتى الا بغيتي هاد المرة تنفخي نكون بعدا مزرق ليك شي عين ..طلق من فكها وبدا يعيب في هضرتها ل قالت “بقاو فيك فلوسك ” ، فلوسي الالة كنديرهم فجيب ماشي في القلب كيتخسرو غا على البراني بقلب بارد عاد نكبرهم فيك وش نتي شوية لاباس ؟؟
هادشي كله علاش دايراه واش باغاني نخلي مراتي تجبد بزازلها برا ولا شنو، قليل نفس انا كنبان ليك لهاد درجة ولا مكتشوفينيش راجل
حسات براسها تزير عليها ~ واش عارف شنو كتقول ؟؟ دابا نتا ل كبرتي الموضوع ماشي انا عرفتي شنو ، شافت قدامها كتنفس بزربة بقوة الاعصاب يله نمشيو !!
عض على قنوفتو باغي يدوي وهو يدير بناقص وسكت حيت الا دوا غيوعتها وهو باغي يخلي نهار يدوز على خير بنثرة شد بلاصتو وكسيرة مخلي وراه لعجاج مسافة طريق وكانو قدام داااار باش جاي باش دار شوية ويقلب واحد بكروستو لولا صوت لكلاكصون ل طلق ليه ول خلا كلشي يطال يشوف اش كاين
وهدا حال الدروبة الشعبية خاصهم غا علاش يطالو وما يعاودو وفاش يتفرجو و الجلسة قدام البيبان كيعطيوها عشرة لضس، شافيهم غلام محرك راسو وناعل الشيطان على هاد القعيدة … وقف طموبيلتو و تم نازل منها ضار كيشوف في نجمة لقاها تالفة مع راسها مشا حتى الشرجم ودق عليها تنزل ومشا لباب لوراني يهز منو شنو شراو … غمضت عينيها بعصبية وحلت الباب بغنج مع نفخة تابعاه حتى كيجي في وذنها صوت انثوي رقيق غريب عليها … ضارت بالمهل مضيقة عينيها ترضي الفضول لي طاح عليها ،حتى كتصدم بامراة كاملة مكمولة واقفة قدامها مناقصها خير ومعندها مناش تتعاب ،لابسة جلابة لاسقة عليها في الكحل و شعرها في لون لبستها وجهها مرايا وروايحها تعطعط ك ثير غريزة جنس رجال وتحرك الغيرة فقلوب نسا …غير شافها وهو يتشربن وعروق راسو تزيرو معندها علاش تحشم معيطة ليه قدام مرتو…. قربت منو صباح كتشوف فيه بتطلعية و تهبيطة عجبها و حركات فمو وعصبيتو كتسالي معاها مداتهاش في الولية ل واقفة حداه ول قلبها قرب يسكت قربت حاطة يديها على دراعو و كتشوفيه بعينين منيمين باغا تفقص نجمة وغرضها من اول هو هذا ~… غلام غبرتي عليا قالتها كتعوج في مشيتها وهضرتها
غلام سد داك الباب وعينيه نزاحو لنجمة ل كانت حالة فمها كتشوف قلة لحيا والوقاحة ل كتوقع قدامها وكيفاش سيدة كتتغزل براجلها بدون مدير ليها اعتبار وفنفس الوقت كتستعقل خليقتها في اشمن قنت بانت ليها محست غير بصوتو مزعزعها ونطق ~ … دخلي بحالك نتي !!
نجمة كون لقات الارض تحل وتخشا فيها يقمعها قدامها هادي مدوزهاش ليه واخا معرت شنو يوقع شافت فيه مصدومة وقالت وهي غادا~ … ما قلتي عيب دابا نيت
عطاتو بالضهر وصوت طالونها غير مزاد علاا وهو كيزيد يغلي من الداخل ديالو هز راسو لقى شي عيالات كيطلو عليه وبسخرية قال ~ كنبيع الغبرة أنا هناااا ولا شنو ؟؟
صباح كانت متكية ليه على طوموبيل كتسناه يسقيها بشوفة من عينيه وهو يدور ليها مغدد وسنانو لوبيا عليها ، عض على شلقومتو التحتانية بعصبية و شدها من دراعها وخبطها مع طوموبيل حتى شوية ويدخل ليها راسها مع الزاجة وعطاها علاش كتقلب ~ … يا بنت ** واش باغاني نقتلك ولا شنو واش هضرت بيدي محشمتي !! وهضرت بالاداب ما فرقتي طريق اصل مي… بالغوات قال ، اش باغا ؟؟ راه بقا ليا معاك حل واحد غلوح مك من شي قنت ونتهنى من هاد الفريع ** ديالك
صباح عطاتها لدموع و شادة على ذراعها ومادا ليه حنكها … ~ بغيتي ضربني ضرب هانا معنديش مشكيل ..لي سال ليا الدم منها كاين دواها غير متقصحينش ف هذا قاست قلبها..بدات كضرب على صدرها و تبكي مع تنخسيسة طالعة منها … هذا لي معندوش الدوا كيموت كل دقيقة عليك باغيك وشاريك اولد خليفة واش ساهلة عليا دوز صباح وعشية بلاما ندويك نشوفك مخرج مرتك كي سمن مع لعسل وانا ل كنبات نهتهت بيك
قلبو طاب وتنفخ من اغنية حشاكم ل كل مرة كتطلقها ليه كتجيه مرا ومباغيش يدي ذنوبها هز يدو فوق راسو مستسلم
وقال ~ فرقي ساحتي اختي ها العار راني مباغيش نرزي راسك على قبلك غنولي مولا وليدات وعندي مسؤولية
حسات براسها كيضور ملي سمعت هضرتو كيفاش مولا وليدات ،باقا كتحاول تستوعب وهو يحل باب طوموبيل هز شغلو وزاد وخلاها تابعاه باغاه يتسنى يشرح ليها ساعة بلا فايدة
نهار كلو وهما قاتلهم لفضول غلام فين مشا مع نجمة كون لقاو ل يجيب ليهم خبارهم ويخلصوه ميقصروش ، دازو عليهم داك سوايع ثقال رحمة گعما مسوقة كانت مخشية في كوزينة كتعرف غير ترون وتوجد مريم كتموت بسم حيث خوها خرج مرتو ومداهاش معاه ،أما زهرة قلبها غيتفرگع عارفة طبع خوها مزيان سخي وكريم وهادشي مبغاش نجمة هي ل تفوز بيه ، كانت جالسة مع لكبيرة لابسة جلابتها كتسناهم غا يرجعو تبرگگ وتمشي تطل على دارها هضرة تجبد هضرة موضوع يجبد موضوع حتى تفكرو معاوية بداو كل وحدة تطيح دمعات عليه باقي فراقو جديد وغير كيتنساو موتو نطقت لكبيرة وهي كتبكي بالصوت وتمسح دموعها بكول بيجامتها ~ نوضي ازهرة اري ليا تصاورو نشوفو ونحيد شوقي منو
تنهدت هاد الاخيرة وقالت وهي قاصدة لماريو ~ الله يهديك امي غير غادي تزيدي تمرضي اشمن شوق غيحيدو …
دارت ليها خاطرها ومدات ليها الالبوم ل جامعة فيه گاع تصاورو ملي كان صغير تا كبر كتشوف تصويرة بتصويرة تبكي عليها شوية وتبوسها وتدوزها لبنتها حتى طاحت فتصويرة ل خلاتها تعدد بصوت عالي ~ الله على وليدي !! كنتفكر داك نهااار بحااالا غا لبارح
كانت تصويرة تاع نجمة مع معاوية ل تصورو فالعرس ل تعارفو فيه كملت نواحها وقالت~ جا لعندي فرحان وقاليا مي !! شووفي هاد البنت اش بان ليك فيها عجباتني وبغيتها.
مخلاتهاش زهرة تكمل خطفت ليها تصويرة من يدها وقالت معصبة ~ صافي سكتينا امي كان نهار كحل ل خليناه مشا فيه لداك العرس كون قلنا ليه متمشيش مكان لا غيمشي لا غيتلاقا بهاد كحلة العفطة
لكبيرة عينيها تورمو وتنفخو حركت راسها راضية بالقدر ~ مكاتيب ابنتي ، تكات لمخدة وقالت …صافي جمعي عليا هاد شي بلاما نصدق عليه لبكا فهاد نهار لكبير عند الله …دارت ل قالت ليها مها جمعت اش بغات وخلات اش بغات مع غطرق لماريو سمعو صوت كلاكصون طوموبيلتو طلات زهرة كتجري بتخبية ولكبيرة ل كانت باغا تنعس تسابقت معاها على شرجم كيشوفو من ورا الشق بلاما يخرجو راسهم ليطليهم تبعو الواقعة من اول للخر الوقت ل طلعت نجمة جلسو بحالا مكاينة حتى حاجة رمات عليهم سلامها وطلعت لبيتها كاعيا فرحو ورجعو كملو تفراجهم وغير حسو بيه طالع رجعو لبلايصهم لكبيرة حزمت راسها متكية على سداري كتنين وزهرة جلست حدا رجليها كتمسدهم ليها دخل هاز بيديه بزوج تحلو عينيهم ومريم جات من لبيت لاخور لبيت فين جالسين تشوف اش جاب مع دخل سلم على راس مو وقال بتساؤل ~ الواليدة ماالك ياكما عياانة ؟؟
لكبيرة بنبرة صوت مهلوكة ~ مرييضة اوليدي
قاطعتها زهرة وقالت بلاما تشوف فيه ~ ضلت نهار كامل هاكدا منزلتش الدغمة مع قرجوطها معلت مالها
مداهاش فزهرة بحالا مكيناش شاف في مو وقال مخاطبها ~ تبغي نديك لطبيب ولا نجيب ليك شي دوا شنو مشعية شنو باغا ؟؟
لكبيرة حركت راسها بلا ودوات بشوية ~ لا اوليدي دابا نولي شوية الله يرضي عليك
هو واقف ومريم عينيها على ميكات شنو فيهم نكقت متسترق النظر ~ خويا جبتي ليا معاك شي حاجة ؟؟
غلام وهو غادي طالع لبيتو ~ هادشي ماشي ديالك وهاد المرة الا بغيتي شي حاجة وصيني عليها …مشا وخلاهم كيبرقو فعينيهم ،شافت زهرة فمها كتغدد ~ مشا ولدك امي مشا !! غا بكي عليهم بجوج بنت التالفة داتهم ليك وغتقتلنا معاها بالفقصة
ما جات الكبيرة فين تجاوبها حتى تسمعت غوتة خلات الدار تطيح و تنزل
الا قلت ركيزة الدار وعمارتها غنقول باا !! سواريها وعمودها غنقول با !! بلا بيه الدار تريب هو السد والسند وتاج الزمان وغير سباطو عند الباب يخليك تحس بالامان …رحمة ككل مرة غير يأذن الاذان تسخن الما وتمدو لباها ل كيكون واقف يتسناها باش يتوضى الا هاد المرة ملقاتوش واقف على رجليه كان طايح الارض حوايجو ساردين بالعرق وعينيه مقلوبين قلبها تقبط لاحت السطلة من يدها حتى تكفح ماها وغوتات ربي ل خلقهااااااا ،تلاحت عليه تقلب فيه وتبكي هي هبيلة عليه وزادت كملت ، خليفة ل كان نعمة الاب لولادو ضرب تمارة فصغرو باش يرتاح معاهم فكبرو والحمد لله ربي عطاه عوض في دنيا وعطاه خليفة اخور يخلفو في الارض ل هو غلام ول غير قصاحو كتافو جلس باه معزز مكرم فدار بعدما مرض وصحتو قلالت ،فشبابو كان صعيب ومكيحنش كبر الرجالة ولعيالات وملي كبر ومبقا عندو جهد تسوخر اللور وسلم زمام الامور لشبل الاسد…..
هاد الاخير ل كان طالع لبيتو مسخسخ هاز فيديه حوايج نجمة وناوي يسمعها زوج كلمات تعلقهم فوذنها ، مع دخل من الباب مخنز فيها بغى ينطق وهو يسمع قوة لغوات وتابعاه كلمة بااا ل خلات ركابيه يتحشو ، لاح شنو فيدو ونزل كيجري حاس براسو ركابيه خاوين مقادش يخطوي بيهم لاول مرة غيكون خاايف ، خايف على راسو يتحرم من عيطة بااا …..بعينين خارجين وقلب قرب يسكت نزل متبع صداع منين جاي لقاهم كاملين واقفين عند دروج فين كان لحمام مجمعين عليه بناتو زكلها ومنين شاداه وتنوح اما لكبيرة جالست الارض تبكي وتعيط على ل يبكي معاها ، قرب لعندهم كيدفع فيهم وعينيه كيقلبو عليه ملهوف ، لقاه صفر عينيه مقلوبين وفمو بيض جلس على ركابيه في الارض هزو من ظهرو وتكاه عليه مخلوع كيقلب فيه ويدوي معاه وهو مكاينش هنا~ جااوبني ابوياااا راك خلعتييني !!
جابو ليه خواتاتو لما ولفم منين يدوز مسدود مكنزز مبغاش يتحل ليهم ، كلشي كيبكي هبطت نجمة ل مقدراتش تبقى لفوق كتشوف من بعيد وتحصر بقى فيها شيخها وما بيدها مدير نطقت موجهة هضرتها لغلام وهي كتقرب منو~ خاص تديييه لسبيطااار اغلام !!
گعدو شوية بغى يهزو بالحق دروج مضيقين وملويين كيف غيدير يهبطو كلاه بيد وعطاهم ظهرو وقال لزهرة ل كانت قريبة منو ~ تكييييه ليا على ظهري !!
زهرة بالغوات جوبتو ~ شنوو بااغي ديير تكرفسو
نطق مشربن حاس بجوفو شاعلة فيه العافية ~ ديري ل قلت ليك بلاما تكثري الهضرة واااااش وقت خرااك دابا ..
معودتهاش معاه حطاتو ليه على كتافو ركبو على ظهرو كيفما كان كيركبو خليفة ويلعب بيه ملي كان صغير هابط عقلو خارج شادو من يديه ومتحكم فيه هبط كيجري وخواتاتو وراه وجههم سارد دموع خشاه في طوموبيل بغات تمشي معاه نجمة دار شافيها كارز على سنانو وجهو حمر خلعها ورجعات باللور محتاجش يهضر وجهه كان داوي عليه ، زنقة كلها تجمعت عليهم عبيد جاي كيجري شدو غلام من عنگرتو دفعو جهة الباب وقال ~ ركب جلسس حدااا باااااك
مشا طاير بيه مخلي لعيالات وراه مجموعين عليهم نسا ديال زنقة كيواسيو في لكبيرة
صالون عمر عيالات شي باغي يواسي شي باغي يبرگگ شي غيبقى ضارو راسو الا معرفش شنو وقع لشي خليفة ، شي داير فيها طبيب كيقول موحال يتگعد منها كلها كان يلغي بلغاه وكلهم كانو مجمعين على لكبيرة ل كتعدد ايمانها ضعيف ممتبتاش راسها ~ وااااا زماااني والا مشيتي لمن غتخليني وا غطى راسي وا دفى فراشي ….
هي تقول وزهرة تجاوبها ~وا با وغتخليني لخلا وشكون يحل ليا لباب وا با متلوحناش للخوت راه يعفطو علينا وياكلونا لحمة وعظمة
ضروري من حشيان الهضرة ل عندها في دم ، مخلية ناس نصهم يتغامزو ونص لاخور كيزيد ملحة على الجرحة ~ مسكينة عاد حطات الولد تحت التراب الا زادها الراجل تتسطى
الدنيا عامرة والداخل كثر من الخارج ، نجمة جالسة في قنت سداري غير كتشوف بعينيها الوقت كيدوز ثقيل وعقارب الساعة كأنهم واقفين وساعة كدوز بعام قلبهم مهول باقين مسمعو حتى كلمة تهمد لهيبهم ، وسط صداع ولبكى سمعات توشويش بين لعيالات ل كانو عينيهم عليها بتناوب وحدة تغمز لوخرا بلا حشما بلا حيا كيطلعو وينزلو وكلها وشنو كتقول…نطقت مرا دايرة يديها على فمها باش ميعرفوش شنو كتقول مدارتش بحساب صوتها ل وصل لعند نجمة ~ وهانتي ياختي ليك على مرت غلام زوينة وغزالة خسارة معندها زهر ترملت قبل متعرس ورجعت تزوجت بلا عرس
جوبتها ل حداها ~ واش هي بصح مرت خوه جاتني تبدلت على نهار ل شفناها في العزو
~ ايواا غلام غيكون مهلي فيها نتي عارفاه كيف داير ،راه غي خيرو بان عليها وتنورت
~ بقات فيا غا صباح الزغبية شحال كتسنى في نهار ل تزوج بيه ساعة مضربو حسبة لدنيا ل قالت كلمتها لخرة
~ شفتها مبانتش ليا مولفة تكون من لولين الا وقعت شي حاجة عند دار سي خليفة
~ اويلي ومبقى ليها معنى دابا !! ل كانت تجي على قبلو راه عَمَرْ دارو وجاب مْرَا شنو يديرها ضرة
حسات بسخانة طلعات معاها ووذنيها ممتيقينش شنو كيسمعو ، شكون هاد صباح ل كان باغيها وباغاه وجات هي وقفت في طريقهم وذنيها بداو كيصفرو مبقاتش قادرة تبقى جالسة حداهم ، مشات لكوزينة خدات كرسي جلست عليه حدا رحمة ل كانت تبكي وتمسح في جلايلها حتى كتسمع صاحبة صوت الرقيق من جديد هاد المرة داخلة وعينيها حمرين تكات على حناك رحمة كتبوس فيها وتعنق ~ رحمة ختي كيف بقى با خليفة واش باقي معندكم شي خبار
رحمة وهي كتحرك راسها بلا بقلة حيلة معند الميت ميدير قدام غسالو ~ واالو اختي صبااح داه غلام وكنتسناو فيهم يا يرجعو معاه يا ما يرجع بلا بيه …. قالتها ودموع عينيها تسابقو عنقتها تحت نظرات نجمة ل كانت كتربط لخيوط فدماغها وكتستعقل وتفهم ، عرفات بلي هادي هي ل داير عليها الفيلم بلعت الريق وتعقدت ليها في الحلق ، غصة وواحلة فيه مقادة تطلع ولا تنزل ..
اخيرا جااء الفرج طلع عبيد كيجري كيغوت على خواتاتو يقادو بلاصة باهم فلبيت ، كلشي وقف يشوف وبناتو يتجاراو حتى كيبان ليهم غلام راجع مركبو من جديد على ظهرو غير هاد المرة خليفة حال عينيه ، لقلوب تهنات والبسمة ترسمات من جديد على وجوه عائلتو دخلو تبعوه كيتجاراو با با با ، حطو غلام فبلاصته كيقاد فيه وفنفس الوقت كيجاوب على اسئلة مو لكثيرة مالو شنو عندو اش وقع ليه ~ طااح ليه السكر الواليدة !! واش هاد الراجل ممقابلينوش فماكلتو ولا كيفاش
لكبيرة وهي محنية كتبوس فيدين راجلها ل مهلوك وواخا هاكداك كيطبطب على راس مراتو باليد الثانية ~ تجي فيا وماشي فيك اعمارة داري !! كنقوليك كوول وتهلى فراسك ونتا غا كتخمم
غلام كان واقف كيحك على راسو بعياء وفنفس الوقت كيشوف في نجمة ل واقفة حتى هي ، شوفاتو خلاوها تهز يديها وتتاكد من زيف واش مقاد على راسها ، اشار براسو لزهرة مخدمها ~ جبدي لباك حوايج جداد هادو ساردين وخرجو خليوني نبدل ليه يرتاح ووحدة فيكم تقاد ليه شي حاجة ياكلها
نساحبات نجمة للكوزينة توجد لعشى فحين رحمة كتعمر اتاي لجيران وكلها وبشنو تشغلات لكبيرةة خرجات تشكر جيرانها وغلام بقى فالبيت ممفارقش باه ….تحط لعشا وتعشاو ووصل وقت نعاس طلعت نجمة للبيت عيانة ونهار داز عندها طويل وعامر حسات بيه مبغاش يسالي ، لقات حوايج مليوحين فين خلاتهم طرفاتهم في القنت وبدلات حوايج دار بحوايج نعاس كيف غتخشى ففراشها وهو يحل الباب ودخل دارت شافت فيه وشافت بين عينيها صباح وكيفاش تعامل معاها وقمعها قداها باقا واحلة ليها مبغاتش تدوز ، ماشي وقت ل تعاتبو ولكن مغدوزهاش ليه هزاات لغطا بشنتة وتخشات ففراشها قالبة وجهها هادشي كلو هو جراه معاها ، خلقو مضيق ومافيه ميسايس ، سد عينو بقوة ورجع حلهم وهو فطريقو ليها شدها من دراعها بجهد جمع ليها ذراع وشعر حتى غوتت موعتة
العامين اللولة ديال زواج كتكون بحال الا غادي وسط حقل الغام كل مرة شد ليا نقطع ليك … الراجل مع لمرا كيبغي كل واحد فيهم يفرض نفسو وشخصيتو على لاخور تحت شعار شكون الأقوى ؟؟ كيكونو مرة ضاحكين وبزاف مرات مخاصمين و على اتفه حاجة يتناقشو ويديرو من حبة قبة ل قدر يسلك ويدوز هاد الايام بشربة الما نجا ،ول كان صبرو قليل ومعندوش قوة التحمل كيقطعوها مع بعضهم هبرة تبرا ، وهادشي ل واقع بين نجمة وغلام لا هي عارفة طبعو صعيب وشنو كيعجبو وشنو ل لا …ولا هو عارف شخصيتها لمتمردة ونفسها لعزيزة ….
جرها من ذراعها بجهد حتى جمع مع يدو شعرها ل كان على راحتو حسات بالزغب تنتر ليها من الجدر غوتت متألمة ودمعو عينيها ل كانو على سبة ونطقت منرفزة ~ طلق مني وعتيينيييي !!
غلام دورها لعندو ودفعها لجهة الحيط وهاد مرة شدها من ذرعانها بزوج وعينيه كيشوفو فيها بعينين كي دم نفسو غير منتاظم جنناتو بحركاتها وتصرفاتها وغير كيدوز ليها ويصرط ومبقاش قادر يستحمل ، خلقو ضيق وممساليش لتصرفاتها الصبيانية فهاد الظروف نطق بخشونة ~ ديييييري عقلك انجمةةة دييييري عقلك هانا كنحدرك وقلتها ليك مرة وزوج وتالثة راه موصيبة متخليينيش نكعيك !!
قلبها كيترعد بالخوف وواقفة جبهة ودايرة فيها مخايفاش خرجت عينيها وقالت مندافعة ~ شنو ل بقى مدرتيش ، قاصت جلدة راسها وقالت شعري ونتفتيه ذراعي فكل مرة مزرگهم بشدات يديك ماالي شنو درت ليك لهادشي كامل ؟؟
غلام خرج لسانو عضو ورفع يديه بحالا غيجمعها معاها وتراجع وقال كارز على سنانو ~ الشريفة !!كطنزي على عدو ربي ولا شنو ولا باغا ترديني كامبو …..داير ليك خاطرك ونراري بيك درت وذن ميكة ودوزت شي حوايج ، وتكمليها تلوي عليا فترمتك فزنقة جهلتيييي ولا مالك؟؟ …عضتت على شفتها التحتانية بعفوية مهربة عينيها منو خلاتو غير مزاد جهل …بتاسم باستهزاء وطلق منها كيقاد ليها فحوايجها بنفخة وكيهضر فنفس الوقت بنبرة تحذيرية ~ متبقايش تلعبي لديلمي على اعصابي هاني كنعاودها ليك ولا ؟؟ ضرب الحيط لي كانت متكية عليه بقوة حتى غمضت عينيها قلبها علاين يسكت قرب حدا وجهو جهة وذنها وبنفس سخون نطق ~ الضربة جاية فوجهك
حست بالبرد ضرب وجها حلات عينيهها لقاتو سد الباب وخرج ..كتبغي تكحلها كتعميها كتقرب منو خطوة كتلقى راسها راجعة بخطوات لور، كتقول صافي عرفت طبعو كتشمت وتلقى راسها معارفة فيه والو ، عيات طاقتها ستنزفات معارفاش كيفاش تتعامل معاه ميمكنش تزيد تلغي شخصيتها كثر من هاكدا الخدمة وجلست منها الزيف ودارت ليه خاطرو، لبس وكتلبس ل يرضيه ولكن باش تمحي شخصيتها فخطرة وتخليه يدوز عليها مغاديش تقدر ، يقمعها وتبقى ساكتة مغتستحملش ، يلعب ورا ظهرها على راحتو وهي ساجنها بحال الطير هادي ل مغتكونش ليه واخا دوز معاه الحرب ..
تخشات فبلاصتها كتقلب على نعاسها ل هرب فعز لعيا ، كانت حاطة يدها على كفها عينيها صغارو وترخات بعد صراع شد فيها نعاس حتى كتحس بيه داخل للبيت ريحتو تقلب بالگارو باينة فيه كامي حتى مقاد بدل حوايجو وتخشى حداها ، ضربتها ريحته ل تغلغنت مع نيفها وقرجوطتها وخلات نفسها يتقطع بلاما تحس بدات تكحب بأعلى صوت حتى تقجات وقفت شادة على صدرها كتنهج وقف شعل ضو وجاب ليها كاس الما وعينيه كيفليوها مشطون عليها بلاما ينطق بحتى كلمة بقى واقف عليها حتى كملاته حجبانه معقودين بقلل ، تنفست الصعداء وعاد حسات براسها تنفست مدت ليه كاس بعياء وهي كتمسح لما ل نازل لعنقها مد يدو ودوز سبابتو على اسفل شفايفها كيمسح وبتساؤل قال ~ شويية دابا
جوبتو نجمة بنبرة حزينة ~ حمد لله …قالتها ورجعت تكات فبلاصتها بوجه معصور …خرج غسل وجههو مزيان وفمو واستبدل ريحة الگارو بريحة عطرو عاد تخشى حداها كانت غفات تقابل مع وجهها حاضي ملامحها كتبان بريئة ولكن لسانها طول منها ، كيغوت عليها ويتنادم معاه الحال حتى كيقول نرطب معاها ولكن تصرفاتها كتخرجو عن طوعو وكيلقى راسو كيقصاح فتعامل ديالو ،قاد ليها لغطا بين جنابها من لبرد وتقلب على ظهرو كيشوف فسقف حتى داتو عينيه ……
~~~~~
شمس نهار جديد ضوات وكسرت عتمة الليل ، فاق غلام قبل منها نعاسو خفيف دغيا كيفيق كان معول ينوض بكري يمشي يخدم على راسو لكن مرضة باه مكانتش ليه فالحسبان …حل عينو كيتاوب شافيها بنص عين لقاها ناعسة على كرشها نص في لغطا مليوح بيجامتها طلعت وعرات على سيگانها شعرها نص فوق ناموسية ونصو في الارض دافنة وجهها تحت وسادة ، ناض من حداها بلاما يصدر حتى صوت قضى حاجتو ورجع بدل عليه كانت باقا على نفس الحال ،طرق عليها البيت ونزل يطمئن على باه ل كان فايق فطر هو لول وشرب دواه جالسة جنبو لكبيرة كتعاود هي وياه حتى دخل عليهم غلام باس على يد مو وراس باه وقال ~ بوووياااا !! حرك يدو بتساؤل ونطق ، كي كتحس بروحك ليوم مزياان حسن من لبارح !! ؟
خليفة ل وجهو نور ورجع فيه ضو جاوب وهو كيرضي عليه ~ نحمد الله ونشكرو اولدي حسن من قبل عذبتكم وهولتكم معايا !!
غلام شد يدو باسها وخشاها بين يديه ~ نفديك بدمي ابا متقولش هاد الهضرة مالك جاي طالبنا الا مهزوكش هاد لكتاف غا هرسهم ، ديها غا فراسك وفصحتك ومتخمم فحتى حاجة الهم لوحو ليا ورتاح نتا
خليفة طبطب على يد ولدو ~ الله يرضي عليك اولدي ويعلي شانك !! نطقت لكبيرة دايرة فيها مقلقة ~ صافي شفتي باك ونسيتي مك والبزولة ل رضعاتك مكاين لا كي صبحتي لا والو ؟؟
غلام ضيق عينيه كيشوف فيها دايرة غضبة بلعاني قال وهو كيغمز باه ~ هانتا غتبدا عليا تاني رضعتك وهزيتك فكرشي وخرقتك بضحكة خاترة مشى حداه معنقها وحاط راسو على كتفها مغمض عينيه ~ نتي عمارة دار الواليدة !!
لكبيرة قلبها هشيش دغيا بدات تدمع وتبوس ليه فراسو ~ الله يحفظ ليا اولدي ويفرحني بشوفة وليداتك ياربي
وقف على طوولتو وقال بصوت غليظ ~ امييين اميين !! كاين شي فطور ؟؟
لكبيرة وقفت تابعاه خارجين من بيت باه مخلينو يرتاح غادين لصالون~ هاهما خواتاتك كيوجدو فيه ، فين هيا نجمة باقا ناعسة ؟؟
غلام جلس ناشر يديه على لمخاد وزهرة قدامو كتمسح في طبلة قال كيوجه هضرتو لمو ~ مازال نااعسة خليها حتى تفيق بوحدها
دات زهرة هاد كليمات معاها في وذنيها ل خلاوها تغلي بحال لما ،دخلت على رحمة لكوزينة لاحت سربيتة من يظها بنثرة وقالت ~ باقا مكوزة وهي لي جات معاها مقالت نوض نشوف شيخي طايح مريض الله ينعسها في بلاصتو
دات زهرة هاد كليمات معاها في وذنيها ل خلاوها تغلي بحال لما ،دخلت على رحمة لكوزينة لاحت سربيتة من يدها بنثرة وقالت ~ باقا مكوزة وهي لي جات معاها مقالت نوض نشوف شيخي طايح مريض الله ينعسها في بلاصتو
جوبتها رحمة ل كانت تشحر فأتاي ~ سكتينا اختي دابا يسمعك ويوريك وجهك فالمرايا
زهرة هزات كتافها ممسوقاش ~ معندي لا فالقيد لا فرباعتو دابا نفرجك فيهم سيد من دابا نفس ولات ضربو عليها قاليك خليها تنعس خديم عندها حنا !! بالحق غا تسنى على خبزتها طيب والله ما تبقى فيها دارت علامة فالحيط بدفالها وتكات عليه كتحرك رجليها بعصبة
فاقت نجمة عيانة مقادراش تنوض حلقها مجروح وباين عليها لمرض من وجهها لمخطوف ، قاومت ودارت روتينها ديال صباح ونزلت اول حاجة دارتها دخلت لعند شيخها تشوفو كي صبح كان متكي كيسبح دخلت لعندو تحنات على يدو باستها باحترام وقالت بصوت مبحوح ~ عمي كي بقيتي شوية ؟؟
خليفة وهو كيبتاسم ~ حمد لله ابنتي الله ينورك
نجمة وهي حانية راسها بحشمة ~ مشهي شي حاجة نوجد ليك شي حاجة ؟؟
خليفة تنهد براحة ~ لا ابنتي باغي حاجة وحدة نشوفكم مرتاحين وعلى خير ونشوفك فرحانة وسطنا والا بغات تجيني لموت مرحباا
باست على يدو كتصاوب في زيفها ~ الله يطول فعمرك حتى تفرح بوليداتك ، كتفى يهز ليها راسو بأمين وخلاتو ومشات ….دخلات للكوزينة عند لبنات لقاتهم كيهزو لفطور لصالون قالت لرحمة باعتذار~ غا سمحي ليا مفقتش عاونتك صبحت عيانة شوية !!
دازت من حداها زهرة خبطتها من جهة كتفها حتى تدفعت على الباب وقالت ببرود مطولة هضرتها~ مشفتكششش !!
غمضت نجمة عينيها كطلع النفس وتنزلها بصوت مسموع متحكمة فراسها مبغاش دير عقلها فيها ،قررات تعطيها نخال وتخليها تموت فسمها شافت فيها باحتقار ومشات لبيت تحت نظراتها كانت بغات تفقصها صدقت هي ل مفقوصة ، لاحت ليهم صباح الخير وجلست حدا غلام ل ضرباتو ريحتها الفطرية دور وجهو لعندها وقال بينو وبينها ~ مال صوتتك !!
عند بالو باكية جوبتو حادرة راسها ~ غير صبحت عيانة شوية ..
كبات زهرة اتاي مدات لكلشي كاسو ونقزات نجمة شافيها غلام بقزيبة عينو محاملش كمارتها هز كاسو عطاه لنجمة وقال لزهرة بأمر ~ خوي اتاي ولا حطي صينية قدام ناس ل كيعرفو ليها !!
هادي هي الحياة !! كلها صراعات الا مكانتش مع الراجل تكون مع العدوزة الا مكانتش معاهم بزوج تكون مع اللوسة ولا بين الخوت ….حتى واحد ما مهني ولاقي راحتو كل واحد عندو شي حاجة منكدة عليه حياتو وخااصها تقاد، الكمال لله وحده اما العبد ديما مخصوص ل عندو المال معندوش الصحة ول عندو صحتو معندوش الزهر ول عندو هادو كاملين معندو تا حد فحياتو ……
كملو داك لفطور بالكشايف غلام غا حاضي مع زهرة كيتسنى ليها الغلطة ويقلب عليها طبلة يبرد فيها لقديم وجديد ، اما نجمة باقا حاسة براسها بحال الضيفة الغير مرغوب فيها ، خايفة تاكل ويحسبو ليها دغامي راحتها نعادمت ، جالسة فوق قلبها وديما دايرة بحساب تصرفاتها معايشاش بطبيعتها ….
تسمع صوت دقان في الباب نايضة تسابق رحمة وزهرة على لباب حتى دفع عليهم غلام طبلة بجهد كيتنثر ووقف غادي لعند باه ~ وحدة فيكم تنوض !! زفر بجهد وقال تموتو على زنقة كون قلنا جيبو شي حاجة من كوزينة تبداو تعگرو لينا هنا ….خرج مخليهم كانو حادرين ريوسهم غير حست بيه زهرة مشا وهي تم نايضة معندها نفس، الهضرة كدوز ليها من حدا وذنيها ماشي حتى كدخل…. مشات تحل ممفاكاش اما رحمة عوجت فمها كتدعي على ختها تحت منها ديما سامعة الهضرة بسبابها ، مشات كاعية ورجعات حالة فمها بضحكة تال وذنين ضرسة اللخرة كتبان ، كتعوج في مشيتها وكتدوي عينيها على مها وبملامح وجه بشوشة نطقت ~ ميييي !! صباااح ل كانت عند الباب طولت سميتها ضد فنجمة مسكينة وكملت كلامها ~قالت ليك جيران داخلين في لعشية يشوفو با كيف بقى !! وقالت تاني متعذبي راسك بوالو كلشي غنجيبوه معانا ، عوجت فمها كتقلي سم لنجمة …ياختي مسكييينة ديك البنت كتبقى فيا ياا خسارة خسااارة خسارة ..تخبطت على سداري كتنهد وتلوي فلسانها وكتعود فديك يا خسارة ..
من لداخل كانت بركان شاعل ومن برا كتبان جامدة بحال الثلج هاد سمية ولات كتنرفزها وتلعب على اعصابها …حطات الكاس وبدا تجمع في طبلة وهي تنطق لكبيرة داوية معاها ~ نجمة بنتي !! خلاتها حتى لتافتت ليها وقالت ، الله يرضي عليك شوفي شنو خاص في الكوزينة وشنو نوجدو على قبل لعشية ،واخا غيجيبو معاهم دواز اتاي تاحنا نديرو لازم
نجمة قالت وهي راسها غيطرطق مزير عليها وعينيها وارمين ~ واخا اخالتي كوني هانية
نفسها حارة وشقاها كثر من نفسها وواخا تكون مهلوكة توقف عظم ، زيرت على شعرها ودارت حزوارتها على جنابها وبدات بتخمال لبيت فين غيجلسو ضياف ، ركانيه جبدتهم شقا ديال لحس ودوز معندهاش معاه ،فاطنة كانت هتلر من ناحية لحداگة كتبغي كلشي متول وهادشي نجمة تحمد عليه الله حيت دگاتو فيها ..كانت مرفوعة كتلمط وتزير سدادر حتى سمعت صوتو ل قفزها خلاها حطات يدها على قلبها مخلوعة ~ اش كديري !! قالها بنبرة عالية
شافت فيه وعينيها على يدها بمعنى راك كتشوف وهو يقرب منها حط ليها واحد سداري كان مهزوز ~ هادشي ثقيل واش بوحدك باغا تهزيه ولا شنو دريات فيناهما
مسمعتش ليه كملات تلماطو وهي كتدوي مكملة شغلها ~ معرفتش كلها وشنو كدير وزايدون صافي ساليت
حطت ايدها على جنابها كتنهج نيفها حمر بالمسيح وعينيها مدمعين باين فيها المرض وهو كيتفحص في وجها قال عزت عليه ~ صافي باراكا عليك طلعي رتاحي ليك !! حالتك معاجبانيش !!
نجمة كتمسح على جبينها بظهر يدها ومهربة عينيها منو ~ ماشي مشكيل غدا نولي لاباس
مجات فين توصل لعشية حتى نجمة ورحمة سرباو الكوزينة بتحميرة الوجه اشمنك يا كيكة ومسمن بطبوط لبغرير دارو لازم ووفاو وهادشي مغريبش على دار سي خليفة وذن العصر وتسمع لغى عيالات الدرب قدام الباب كانو كيتجمعو كل وحدة هازة بين يدها طبسيلها مغطياه بسربيتة بنوع ، حلت عليهم زهرة الباب واقفة كترحب فيهم بابتسامة صفرة معندهاش مع الغادي والبادي ومَنْ وَالَا ،الا بغات تصاحب ودير معرفة وجي عندي ونمشي عندك خاصهم يكونو راجعين عليها بمنفعة اما ل مافيه نفع مكتشوفش فيه ، دخلو لصالون فين تلاقاتهم لكبيرة لابسة احسن قميص عندها مسوكة لفم ومكحلة العينين مزينة يدها بنبالتها وسرتلة الذهب الله يخلف على كرشها وما ولدات اما عنقها كان كيضوي بگورميط غليظة ذهب حر ، جلسات فمها مترع مكاين غا مرحبا وزيد القدام ~ نهار كبير هادا اجاراتي الله يخلف عليكم وعلاش محنين ريوسكم
~ نتي مولات الصواب الالة كبيرة تا حاجة من هادشي من مقام وجهك غير قبلي علينا قلنا نجيو نطلو ونشوفو سي خليفة مسكين كيف بقى !! راه عار جار على جارو
لكبيرة بتنهيدة طالعة من القلب ~ ايوا اش غنقوليك ؟؟ الحمد لله على كل حال حسن من البارح نقزها عمارة الدار عقبال منجيو عندكم في الفرح
~ الله يخليه ليك ولوليداتك اختي !! عرفتي لبارح نعاس مشفتو تا نحط راسي وتجيني تصويرتو قدام عيني وهو مركبو غلام مسكيين عقلو بغى يخرج
نقزت وحدة اخرا ~ علاه لا ؟؟ راه باه هاداك الله يحفظو ليكم ويطول في عمرو حتى يشوف ولادو
واااحد السلام وعليكم ~ قالتها صباح ل داخلة مع ختها لابسة جلابة باقا جديدة مقادة شعر والوجه تقول جاية معروضة كانت معيطة على لاَصْ ، هازين ميكاتهم وطباسلهم حطو داكشي فوق طبلة ودازت ضربتها بتسليمة من قنت لقنت حتى وصلات حدا لكبيرة وطاحت عليها عنقتها ~ خالتي !! كيف بقيتي وكيف بقى الخاطر مع الخلعة شوية ؟؟
لكبيرة وهي كطبطب على ظهرها ~ يسول فيك الخير ورباح حمد لله ابنتي خرجات منا
صباح وهي كتبوس على راسها ~ الله يجعلها ليه وليكم نهاية الاحزان ياربي…تقادت في جلستها دايرة رجل على رجل مبينة رجليها ل مصبغاهم بالحمر ومزينين بخلخال رقيق كتنش على وجهها بيدها حاسة بصهد وعينيها كيضورو ويقلبو حتى ستقرو على زهرة ل كانت حاضياها وكتشوف …
نطقت جارة قديمة لكبيرة حطت هي وياها في درب لولين عزيز عليها لفضول ومكتديهاش سوق راسها كانت سميتها رقية حلت فمها ودوات ~ لكبيرة عرووستك شفتها مكاينااش ، قالتها وهي مقربة لعندها كتوشوش ، ياكما مشات غضبانة ثاني ؟؟
لكبيرة مرضاتش مسحات على حناكها وبضحكة مصطنعة جوبتها ~ لا كااينة هاهيا غتجي غمزت زهرة ل سمعت شنو دار وهي تمشي تعيط عليها ، دخلت عليها لبيت بلا دقان بلا هم يحزنون عارفة غلام مكاينش كانت متكية كتسنط لعظامها حتى درمت عليها ودخلات موقفت حتال قلب البيت ~ تبارك الله ناعسة ودوك ناس ل لتحت شكون يتسهر عليهم انا ؟؟ هذا هو صواب والاداب واستقبال الضيف هاكدا كديرو ليه الا جا عندكم
وهانتي قلتيها الا جا عندنا ضيف ماشي عندكم ، دابا نتي ل خاصك تعري على كتافك وتوريني حنة يدك اما انا واحد الشقا ل متقديش عليه درتو والاداب والصواب نحنتك فيه وهاد المرة دقي في الباب راني مركبة دفة ماشي خامية باش درمي عليا بلا موجب شرع ، خنزرت فيها نجمة حاطة يدها على جنبها وكتحرك رجليها بعصبية اما زهرة حلت فمها هازة حاجبها ليمن وكتوعد ليها ~ عري على نيابك وخرجي عينيك دابا نفگصهم ليك والا ساليتي هاد زابور هبطي سلمي على جيران راجلك كيسولو عليك وهادي الالة راه دار باه وهاد الباب ل كتدوي عليه مشري من جيب خويا
خرجت وخلاتها واقفة فبلاصتها راسها كيدور وكتسائل اشمن ذنب دارت فحياتها حتى تلاقا مع وحدة بحال زهرة شنو دارت ليها گاع باش تعاملها هاكدا واصلة لحد الكره معاها وهي مدايرة لا بيدها لا برجليها ، ستغفرت الله وحلات ماريو كتقلب لى بيجامة تلبسها ،الا كاينين جيران غتكون صباح معاهم ونجمة من نوع ل عزيز عليها تلبس وتبان ويديو ميعودو عليها في نقا سوا فحالتها ولا فدارها ، خدات بيجامة من ل شرات مع غلام كانت طويلة وبجياب ، جاتها كتحمق تقول مفصلة عليها مشطت شعرها واخا كيعگرها راسها جمعاتو الفوق بإهمال ولاحت عليه شال مرخوف كاينين غا لعيالات معليها حرج قادات وجها باين وممعيقش لبسات ذهبها ونزلت …كانو كيدويو ويهضرو بيناتهم ، رحمة وجدات صينية وحطاتها قدام لكبيرة تعمر وصباح دفعات صدرها قدامها وترمتها وراها وناضت دايرو فيها مولات دار كتسخر على لكبيرة ، كلشي كيدوي حتى دخلت عليهم نجمة إسم على مسمى كتقطر بالحشمى والحيا والعفا ل قلالت فهاد زمان دغيا حناكها تزنگو وهي مداهم تسلم على الوحدة وختها مع ابتسامة خفيفة راسماها على فمها سالات وجلست في بلاصة كانت خاوية ومن زهرها لعوج مكانت غير حدا رقية جارة لكبيرة لفضولية ، جلست حادرة راسها وكتجاوب على قد السؤال من كيدايرة لاباس متشرفين بيك حتى نطقت هاد الاخيرة ~ ايوا الالة نجمة كي جاك زواج وكي داير معاك غلام ؟؟ كاين شي وليدات ولا غتخبيو علينا تاني كيف سروال !!
دخلت صباح هازة مقراج ما عامر فيديها مع هاد الكلمة وقفت ساهية كتسنا جواب نجمة ل غتخرج من فمها ، اما بنتنا سعدها حاار تا باب مكيجيها منو البرد كلشي عاطيها بصهدو حتى من جيران باغين يدخلو ليها بين اللحمة ولعظم ،سعدات ل داها سوق راسو وداها في حياتو وقال عليه حياة ناس ، ل باقا بلا زواج يقتلونا بإمتى نفرحو بيك ول مزوجة من شهرها لول يتبعوها بسؤالات كاين شي وليدات ؟؟ واش محاملاش ؟؟ ول والدة تاهيا مقايلينهاش الا كان عندها واحد يقولو ليها خاصك تخاويه والا كان عندها زوج بنات يبيعوها لعجل لا خاصك لولد ولا كانو لبنات خاصك بنت الحاصول سعدات ل داها فجهة ل ضاراه …..
سؤال دخل لدماغها وضرها في قلبها واش غتبقى ديما تسمع هاد الكلمات ، السروال ،غلام، دابا تزادتها لولاد !!
واش هيا مزال معارفة فين راسها من ساسها ، ناسها والدنيا عليها مضاربين وحالفين حياتها لتقدات وتكمل بهاد مسامر الميدة اللي كل مرة ناغزها واحد من قنت، تنهدت تنهيدة ديال الگلب جامعة فيها شلا أحاسيس، الالم ل كتحس بيه فكل كلمة جارحة كتعرض ليها والحزن ل ولا ديما مخيم عليها أما الحگرة هي هادي ل كتعيشها دابا، غريبة وسط مجمع ديال لعيالات مكتعرف فيهم حتى وحدة وباغين يعريو على حياتها شخصية ل كتخصها غير هي، بأشمن حق ؟؟….. دارت عند الجارة وقالت بنار شاعلة فجوفها ~شرفيني بسميتك الآلة ؟؟
بضحكة صفرة جوبتها ~رقية !! خالتك رقية وجارة عدوزتك سنين ومنين هادي ،هزيت راجلك باقي غير لحيمة
بلات حلقها وطلعت النفس وهبطتها بثقالة كأنها داخلة امتحان شفوي زينت شفايفها الحمرين بابتسامة كتحمق مخبية وراها شلا غدايد جامعاهم نطقت وعينيها على رقية وعينين الكل عليها هي كيتسناو جوابها ~ عاشت الاسامي الالة رقية والله يعشر خطواتك على هاد المجية نتي مولات الخير ، بابتسامة خفيفة حركت راسها وقالت مكملة هضرتها ~غير هي معرفتش كيفاش نجاوبك ، الا كانت نيتك زوينة باغا تعرفي عيشتي مع راجلي غلام كيف دايرة غنقولييك ، هزت راسها فصباح ل رخات وذنها ~ عايشين بحال گاع لمزوجين في بدية زواجهم ،نهار طالع ونهار نازل حتى نلقاو الموجة اللي نقدرو نعومو فيها بزوج بلاما تغرقنا ….رجعت قالت وهي هازة حجبانها ،أما لا كان سؤالك حتيت صواني بكيسانها فغنقولك غير سميت غلام تعطيك الخبار خيل برگي فحل الله يحفظو ليا ولميمتو وخواتاتو وباه راك عارفاه بلاما نحتاج نشكرو ليك تا حاجة متخفى عليك ..
نجييو لسروال الالة رقية تبارك الله راك باينة مرا وتاع زمان ولادك يكونو قدي وكبر گاع نتي ل خاصك توريني الخايب من زين وكتعرفي حسن مني بلي سر لبيت كيبقى فيه يعني مكاين لاش تلاحي ليه تعرفيه ، كون بغا راجلي أسرار فراشو يخرجو ميجيبنيش لدارو وينعسني في فراش جديد نسخنو ليه كوراه باقي مع بنات الزنقة اللي طامعين فيه ويهدرو عليه ،باش يتسماو راه فلان مع فلانة
نجمة بدات نارها تطفى وهي كتشوف وجه لمرا ل تزير كملت بلاما تخمم ~ ولا سولتيني على الولاد غنقوليك ، لا نتي لا أنا كنفرقو لرزاق كلشي بيد الله سبحانه وتعالى ونهار يكتاب وتعمر الكرش وإن شاء الله فالقريب غتكون في خبار البعيد قبل القريب حيت ماشي حرامي غنخبيه، حمد لله بباه زماني وتاج راسي الله يطول فعمرو ويكثر رزقو ،ايوا وهذا مكان الالة رقية ومديريهاش مني قلة صواب
ختمتها بغمزة مع ضحكة خفيفة وقمعة سخونة لرقية ولأي واحد كيبقى ينبش على حياتها مع غلام وقرطاسة باردة لصدر صباح جمداتها خلاتها واقفة رجليها مشلولين عطااتها قالب تبقى جالسة عليه حياتها كاملة ، عرفات شكون هي نجمة مرت غلام وبلي ماشي غشيمة وساهلة ضوري براجلها متولد ويعيش ليها مرا قراتها فاطنة ورباها زمان وقصحتها الدنيا ، لكلام ل كانت باغا نجمة تقولو ليها من اول معرفتها حطاتو ليها قدام الجيران لي عارفين صباح كدور بغلام ، غلام سخن كتافها وجات تسخن فراشو المعنى واضح وباين
رقية بقوة الصدمة هزت ايديها وضحكت واحلة ليها ،نطقت وجهها معارفة فين تردو حدها قالت~ الله يتاويكم للخير ويعطيكم الدراري والهراري
وسمعت امين من عند نجمة ل غير قالتها وخرجت من مجمع النفاق لا هما من سهمها ولا هي من سهمهم ،باغين علاش يتعودو وفيمن يشدو تقرقيب الناب وهادشي مكتعرفش ليه عاشت مع فاطنة سادين عليهم بابهم وشادين وقرهم ولكن جوابهم ورا نابهم ل وقرهم يوقرون ول جبدهم يلقاهم …
تفرتك لمحمع وهي تم طالعة لعندنا لكبيرة كتلهت في دروج وفقصة شاداها كلشي توقعاتو حتى لمرت ولدها تقلب لحيا على جيرانها مطاحتش على بالها ، حلات عليها البار ودخلت بلا موجب شرع
نجمة كانت مجبدة كتسنط لعظامها ل ضارينها حتى معرفت باش تبلات ،وقفت قدامها لعدوزة مگرفضة ليها وزهرة فجنبها كي لفاگو عينيها غيشرشو ، نطقت لكبيرة بلوم وعتاب ~ يااك انجمة يا بنتي يا عروستي !! تحشميني مع جييراني بغيتي يديرو بيا فضيحة كون سكتي وقلتي ليها مبغاش غلام وصافي
ناضت تقادات في الجلسة شعرها تطلق وراها فاقص لعدو ، نطقت ببرود وقالت ~ وقر الشيخ منو اخالتي ، جواب ل كانت كتقلب عليه راه سمعاتو !! اسرار داري بيني وبين راجلي مغنديرش بيها بوق كلشي كيقلب على سروال داكشي كيخصني انا وهو نتوما معندكم بيه سوق
زهرة كحزت مها لجنب وقالت متمردة ~ كيييفاش معندناا بيه سوووق هااا !! واش معارفة عادات معارفة تقاليد ضيقت عينيهافيها وقالت ..، اه نسيت حتى تكوني كابرة مع مك باش توريهم ليك راك كبرتي بحال حمام لخلا معندك والي ولا من يربيك
تنهدت مافيها ل يتعاطا مع وحدة مسالية راسها مولفة بمضاربة لحمامات سوقها خاوي ،كانت غتخليها وتسكت وشافت حتى عيات وعطاتها ل جايا كتقلب عليه ~ وهانتي كبرتي وتربيتي فداركم وكتعرفي لعادات وتقاليد لاش مخلية دارك وولادك وجالسة مقابلاني باغا تريبي عش خوك ل عاد كيقاد فيه ، معلموكش لمرا بلاصتها حدا راجلها الا كنت انا حمام لخلا نتي راه لا كلامك ولا حشيان هضرتك كتدخل لوذني حيث الكلمة من عند الرخيص، ما تزعزع ما تقيص
زهرة قلبها بدا يضرب في المية جمعت على قبضة يديها بزوج باغا تلاح عليها وهي توقف وسطهم لكبيرة كتخرج فبنتها عينيها ~ هبطي بحالك لاش تابعاني انا جاايا ندوي ونتي لاش باغا تحمي سوق
زهرة كتحلف من ورا مها بيديها ~ ضسرك علينا حتى فرعنتي ووليتي تحلي فمك على لالياتك غا تسناي الا مخليتوش يخرجك مع باب دار راني شياطة لعيالات !!
غادا تعاير وتسب ومها كدفع فيها حتى خرجتها من البيت مشاو وخلاو نجمة دايرة وجهها بين ايديها معصبة ناضت لداك الماريو خدات منو داك سروال فرقتو على زوج ولاحتو الارض وجلست حداه كتبكي باش تبرد شوية ، بعد المرات دموع كيفاجيوها علينا وكيريحو القلب … فينما تحسي براسك فضتي ووصلات بيك الحد ل مبقيتيش قادة طلعي النفس بكي حتى ترتاحي !! سيقت وجهها بدموعها حتى تفشت ونفسها تقاد قادت شعرها وجمعت الوقفة تنوض تجمع دنيا قبل ميدخل غلام وهو يحل عليها الباب بحالا عيطت عليه ، عينيه كان كيقلبو عليها نيشان كانو عاينيها بحال جمرة اثر لبكا باين عليها ، قرب منها بخوف كانت واقفة على الحيط كتهرب وجهها منو شدها من ذراعها كيحرك فيها وكيدوي بتساؤل محيد شعر على وجهها يوضاحو ليه ملامح وجهها ، وهو يعقد غوباشتو تلقائيا قال بنبرة فزعية ~ مااالك ؟؟ علاش كتبكيي !!
دوز صبعو على حناكها ل كانو ساردين كيتحسسهم !! وغير كلمتو بحالا قاس ليها جرحة من جديد خلا عينيها ينزفو بدموع ،دارت ايدها مخبية دموعها وكتبكي بصمت ،دور يدو على خصرها مقربها منو وكيهز ليها فراسها تشوفيه ودقات قلبو كيضربو بجهد باغي يعرف شنو واقع ليها
دوز صبعو على حناكها ل كانو ساردين كيتحسسهم !! وغير كمل كلامو بحالا قاس ليها جرحة من جديد خلا عينيها ينزفو بدموع ،دارت ايدها مخبية دموعها وكتبكي بصمت ،دور يدو على خصرها مقربها منو وكيهز ليها فراسها تشوفيه ودقات قلبو كيضربو بجهد باغي يعرف شنو واقع ليها ~ هضرييي ماالك متعصبينيش
كتمسح دموعها ونيفها بيدها وكتحرك راسها ~ والو والو غير كنبكي ما واقعة حتى حاجة خايبة !!
هز فيها حاجبو مخنزر ،كذبتها مدوزش عليه ~ سبحان الله كنرضع صبعي انا ولا شنو ؟؟ حمر فيها عينيه حتى خلعها ~ قلت ليك شكون دوا معاك ؟؟
تجبد لختو ومو صداع وتكون سباب ل تخليه يخرج يعرعر عليهم ، تعاود ليه على جيرانو ومقالو ليها وبشنو عگروها ،متقدرش تفضل تسكت ولا تزيد الخل على لخميرة هي زينة فعينيهم وتزيد تكمل ، ماشي كلشي كيتقال، يبقى فيها الحال الا باتت كتحك فيها اما جواب ل يريحها راه عطاتو ليهم في وجههم هو تخليه بعيد على سوق النسا ، هزت ايدها كتجمع فشعرها ملاهية معاه باغا تفلت من بين يديه وفنفس الوقت كتدوي بنرة مبحوحة ~ غلام !! شنو نقوليك شي حاجة مكايناش ل عندي قلتو ليك
زفر بجهد كيمسح على راسو معاجبو حال وهي تجي عينيه على سروال لمقطع تحنى هزو بين يديه كيشوفيه وملامح الحيرة ترسمو على وجهو نطق كارن حجبانو ~ شكون عطااك هذا !!
صمت!! الا كان الحيط يدوي غتدوي ، بسخرية قال ~ الواليدة ياك نبازاتها عارفهم سروال صباح ديرو فصينية تهزو فعلام ودير الحيحة باش تبان على ناس برا ولدي راه راجل …كانت كتفكر على شي كذبة تقولها ليه وهو يزعزعا من يدها مدوزهاش عليه ~ بلاما تكذبي وترجعيني ميخي وجاوبيني ولا مغيعجبك حااال واش هي ل عطاتو ليك …كيدوي بالغوات وضاغط على سنااانو حتى ضرووه وما تهنى حتى عطاتو جواب ل كيستنى يسمع قالت اه وشداتو من ذراعو بعيون مترجية كتطلب فيه ~ عادي اغلام كأي ام بغات صباح عروسة ولدها راني جاوبتها وتفهمت ومقالت حتى عيب ؟؟
حرك ليها راسو كيحيد ايدها من ذراعو باغي ينزل ممفاكش ~ياك بغات غا الدم ؟؟ بنظرات حادة نطف ، انا غنوريه ليها !!
فينما كيتقاد كيعوجوه مكيضلمهمش كيضلمو راسهم معاه وحدة بحال لكبيرة عارفة ولدها كيف داير غتفادا صداعو وفمو الخايب ولكن عزيز عليهم يعصبوه و يرجعوه ميسواش هز داك سروال لمقطع بين يديه وهبط جاعر لعندهم كيدير زوج درجات فدرجة وجهو تعصر بدم وعروقتو تنفخو من النوع لي مكيبغيش الحگرة والظلم ، كيكره لي يدخل ليه فحياتو وخا معرف شكون يكون يوقفو لعند حدو ، يديه الكبار مكمش بيهم داك السروال ، وسنانو بعنف كيتقرقبو ، نزل لتحت وقصد الصالة كيقلب على الكبيرة بعينيه نفسو كضرب سخونة … بانت ليه جالسة ومجمعة مع بنتها وباينة علامن كيهضرو وشكون من غيرها نجمة ياكلو في لحمها وينقصو من ذنوبها، تقدم بخطوات سراع ، يسالي هادشي ويوقف هاد قلة لحيا والعفة … محس براسو غير وهو لايح داك السروال فوووووق الطبلة بعينين كي الصقر ~ شنو هادشي الكبيرة ؟ قلال لحيا بيناتنا تال هاد الدرجة !! وليتو باغين تطفلو على راجل ومرتو فبيت نعاس !! ضربتها اللقوة معرفت باش تجاوبو ، مدارتش بحساب هاد اللحظة وهاد لكلام..كتبغي تدوي وتوحل ليها الهضرة ، نقذتها زهرة ل شافت فيه وقالت ~ اش كتقول اخويا ؟؟ اشمن بيت نعاس هادشي راه عادي وورثناه على جدودنا وعادة كنديروها ملي حلينا عينينا جات عندك وولات عيب
ضار شافيها مخنزررر زير على قبضة يديه وقرب لعندهاا وهي كترجع بلور خافت على راسها منو، هز يدو كيحرك سبابتو وقال ~ نتي دخلي سوووق راااسك كتسمعي !! كنهضر مع مك تسنطي وتركني ولا خرجي ق *** عليا من هنا
لكبيرة وهي كتهدن الطرح ل شافتو سخن ~ نعل شيطان اولدي راه عندها صح تا هي درنا ليها هاد العادة
قال مقاطعها بنبرة صارخة ~شيييطاااان هوو بنااادم !!
كيغوت بصوت عالي كشاكشو خارجة …شيطان هو لي كيدخل بين زوج فبيت سادين عليهم !! قالت ليك درناها لختك !! وديريها لختي ولا نبگ الا راجلها مقطوعة فيه النفس متقارنينيش بيه ، راجل ل يخلي مرتو سامحة في ولادها وخيطي زيطي مخيطة زناقي تاهو نسميه راجل
هزات الكبيرة راسها فيه معارفة متقوليه قالت الهضرة دوز بيني وبين نجمة وتمد ليا السروال وخبارو متوصلش ليه بينها معاه ساعة صدق العكس والروح غطيح عندها في الدار ، زهرة مرضاتش يعيرها وصوتو واصل لمرتو متسرطاش ليها قدامها قالت مبردة على راسها باغا تشعلو ودخل ليه شك فراسو ~ وتا هاديك عندك مرا!! كون كانت لالة وباغاك كون عطاتنا سروال بينها وبينها بتحميرة وجهها ساعة باينة
لاحت ليه هاد لكلام وسكتت خلاتو جااعر هز قرعة الما من فوق طبلة وشير عليها بيها من زهرها خوات وجات في الحيط
زهرة خرجت عينيها قلبها غيسكت ، كون منزلاش راسها القرعة كانت غتسيل دمها ، اما لكبيرة طلقت البولة في سروالها بالخلعة ولات كتندم فراسها اش داها تدوي ولا تكلم، وسي غلام مزال مقنعش ومبردش تم غادي ليها ووقفات مو بينو وبينها كتدفع فيه حيت الا شدها بين يديه يجمع ليها فم ونيف ~ ها العار اولدي ها العار !! باك كيسمع ومريض تلقاه طلع ليه سكر ، رمات ليه زواگها وقالت الا مدرتيش على وجهي دير غير على وجهو ، عض على فكو ورجع شاف فزهرة دمو كيغلي جاتو دمو ولحمو أما يقجها ويقطع نفسها وهو كيتحلف نطق~ والله حتى نعطبك ؟؟ ومتفوتيش ساحتي غنخرج فعودك ،لولة داازت وتانية هاهيا دازت وثالتة بربي مندوزها ليك
رجع شاف فمو نفسو كتخرج بعنف ، ويديه معصورين زرقين، بانلييييه غير شرجم جنبو خشى يديه فيه بلاما يفكر ، خلاهم كيغوتو بجوووووج بيهم ، وهز سروال لي منوضين عليه حالة مسح فيه وقال ~ بغيتو غير الدم ، لاحو بنثرة فالهوا حتى طاع الارض ونطق. ، راهو خودوه
خرج وخلاهم وحدة جلست حدا لوخرا كياخدو انفاسهم ، وبناتنا لوخرين دخلو كيتجاراو لعندها يشوفو اش طرا ، زهرة فمها زراگ وشفايفها كيترعدو وكتردد بيهم ~كاان غيقتلني كان غيقتلني !! شفتي امي هادي غير البدية وبقية مزال مشفناها مع صفرة جلد ، حرشاتو وعمراتو مزيان وصيفطاتو لينا ولكن غا بلاتي الا هادي مغدوووووزش وميصبحش عليها الحال
خرج غلام برا الدار حتى يلقى راسو ويرجع، اما نجمة شدت بيتها مبقات خرجت منو الجو تكهرب ل خافت منو هو ل طاحت فيه وصداع كبر وغواتو وصل عندها وعرفت طرح مدازش بسلام ومكاين ل يعطيها خبارو ، بقات فداك البيت تجي وتمشي حتى داخت وصهدت ، خرج مبقى دخل تشطنت عليه والغايب حجتو معاه عارفاه كيف داير يغبر تا يعيا ويولي ليها، جلست حتى عيات وقررات تنوض تغسل عليها توگض شوية وداكشي ل كان بقات جهد نص ساعة في الحمام حتى خفافو عليها عظامها عاد خرجت لابسة بينوارها وجرية وحدة نيشان لبيتها مخلية حوايجها ل حيدت برا دوش، مشات لماريو كتقلب بين حوايجها على شي حاجة تلبسها وهي تجي عينيها على شوميز ل خدا ليها كانت علقاتو مع الحوايج ،باين من طيارة اسود فحم كيبري هابط حتال لتحت ببينوارو تشهات تلبسو وتشوفو كيف غيجي عليها تلاهي وقتها ،نشفات راسها وذهنات لحمها ولبساتو وقفت قدام لمرايا كتشوف فيه ،ترسمت على وجهها ملامح البهجة ل سرعان متمحاو فلمح البصر ودازت ليلتها بحال لون ل لابسة
نجمة مازال نية وبزااف ، عاشت الفقر والقهرة وعانات فصغرها وكبرها ونهار كضحك ليها ليام كتنسى اش داز عليها وكتخدم قلبها وكتغلب عليها عاطفتها عند بالها مزال مع فاطنة ل تعيرها ومتخلي ل يعرها تمضغها ومتسرطها، مبغاتش تفيق من الگلبة وتعرف وسط من عايشة عند بالها هضرة زهرة غا زايدة وفمها ل لطويل ومتقد دير والو بالحق كانت غالطة ،وغلطة الشاطر بعشرة وهادشي ل وقع !! جالسة ف وكر الثعالب ومخلية حوايجها بلا عساس شنو كتسنى من وحدة بحال زهرة ومريم يصبنوهم ليها !!؟
لا !! زهرة كانت كتسنا غير الفرصة وجاتها لبين يديها ،ونجمة ل قدمتها ليها على طبق من ذهب ….
كان طالع فالدروووج مكره يديه كتزدح مجرووحة ملوية عليها فاصمة بيضة عيا وبزاف كيقلب يشري راحتو ومعرفش كيفاش، وهو غادي للبيت بانو ليه حوايجها فالأرض مليوحييين ، عرفهم ديالها بيدو شراهم بلاما يتردد قرب يهزهم وهي طيح تصويرة كانت مخشية ف جيب بيجامتها، تصويرة ل غتضرب رجوليتو فعرض الحائط.. قوس حجبانو بجووج وهزها بين يديه جامد كيتاكد منهم كانت صورتها مع معاوية ضاحكين ، ضحكة ل راسمة عمرو شافها منها، قلبو تزير كيشوف ويديه كيتقالو عليه …قلبها لجهة تانية يشوف تاريخ ل خداوها فيه وهو يقرا ل مكانش ليه على البال
“حبيبي معاوية كل ليلة كنبات نحلم بيك كنلبس كيف كان كيعجبك وكنتخايلك قدامي وحدايا صورتك مكتفارقينيش كنصبح عليها ونعس عليها
توحشتك وغتبقى فبالي ومغنساكش وتا حد ميجي فبلاصتك الله يرحمك “
حس بدمو فار ،رجوليتو تمست وغيرتو تحركت كتبقى مرتو عرضو شرفو ، وجهو حمار ويديه زراقو بقوة الضغط لي ضغط عليهم ، كمشها بين يديه حتى غبر وجهها ودخل بجهالة للبيت عينيه مضلمين ومكيشوفش قدامو ، كيضحك باستهزاء وهو كيردد شنو مكتوب عليها ببرة عالية وبشخشرة في صدر تحت نظراتها المصدومين… ملي كمل شافيها بنظرة حادة هاز الصورة فيديه كيحركها مع الريح وحجبانو عاليين ، كانت واقفة قدامو لابسة نفس شوميز الكحل المنحوس ل ندمات على نهار ل حطات ايدها عليه شعرها مطلوق عشوائيا فمها كيترعد من الخوف منو ايديها كتفرك فيهم بتوثر ، كتشوفيه بترجي باش يتيقها مزال تحت تأثير الصدمة، مقادة تخرج حتى حرف من فمها ، لسانها ثقال وقلبها كينين بصمت ، السكوت ديالو زاد خلعها ، رجعات بخطوة لور كتقلب على شي حاجة تستر بيها راسها وهو ينطق وقال بالغوات ~ جمدي فبلاصتك ؟؟ حاضي عينيها ل كتشوف في بينوار …. كتستري غير قدامي ؟؟
نجمة بللات حلقها بريقها ل حسات بيه نشف ونطقت سميتو بصوت كيرجف ~ غلاام !! عفاك تسنط ليا عاد دوي
قصر المسافة وقرب منها جرها من يدها مزير على ذراعها البيضين حتى تاوهت وقال ~ شنو هادشي ، راجل واحد في الواقع معمرش ليك عينيك ،قلتي نعيش مع الثاني في الاحلام هازاه معاك فينما مشيتي توحشتيه ومنسيتيهش وتا واحد ميحلى ليك فبلاصتو ،زير عليها شوية وينصل ليها كتفها وقال مغدد ، دوي الكلبةهه !!
تجمعو دموع في عينيها وحطت يدها فين حاط يدو باغا تحيدها ممتيقاش شنو كيقول~ حااشااك اسيدي !!
عض على فمو حتى شرمو ودوا بزعف ساد ليها فمها صوتها مباغيش يسمعو ~ راه لحد ساعة مكالمي ومباغيش ندفن عدو ربك فبلاصتك ولكن نتي ملي جيتي ونتي كتقلبي عليا ، عطيتك لحرية درتليك قيمة ونتي تسيبي !! لاعبة فيها بنت لغرام الحب ورسائل مقنعتكش انا واقلة حيت داير ليك الخاطر ايوا تسناي نبردك ….!!
مشى طرق الباب ولاح الصورة ل فيدو وبدا يحيد في حوايجو حاجة بختها بدا بتريكو لي نصلو بيد وحدة حتى بان صدرو لعريض من جهة لكتاف قدامها كانو فيه بعض اثار ضرابي قدام ، تبعو سروال بسرعة البرق وملامح وجهو معقودين، ومشى لعندها جرها من سمطة شوميز بجهد عليه حتى تقطع ليه فيدو،أما نجمة المغبونة الدم هرب منها … بغاه حلالها ويسخن فراشها لكن ماشي بهاد الطريقة
بقات قدامو عريانة كثر من الاول الشوميز من النص مقطع والنص التاني مساتر والو كطلب وتزاوگ~ غلام غير سمع ليا!! الله يرحم باك العزيز عندك خليني غير نهضر ودير ل بغيتي !!
فيناهو غلام كان مضارب مع السمطة التانية يحيدها ،تقاس في رجولتو وناوي يبين ليها واش راجل ولالا هضر مغدد ~ ياك تانتي باغة هادشي…داكشي علاش لابسة هاكدا ولا يكما كنتي لبساه لشي راجل اخر حيث كيباليا دودتك طويلة
مع هاد الجملة مع دفعاتو عليها بقوة معرفتهاش منين جاتها وقالت بحدة وهيا كتحاول تستر صدرها اللي تزلع قدامو ~لهلا يحييك تنكون موسخة ولا فحال البنات اللي عرفتي ..تربية فاطنة هادي اللي قدامك وقبل من هادشي كنخاف الله قبل منخاف العبد …
رجع عندها وخشا وجهو في وجهها صاعر وكيدوي كشاكشو خارجين بنبرة عالية ~وملي كتخافي الله اشنو كدير عندك تصويرتو ؟؟ كتفكري ايامكم اللي فاتت ،داكشي باش كتقولي ليا بلاتي نولفك ، يعلم الله اشنو طرا بيناتكم وجاية تلعبيها عليا حاگا خايفة
رجعت خرجت عينيها فيه وكشرت على نيابها حتى هيا ورفعت من حدة صوتها ~ راني قتليك لهلا يحييك معاوية عمرو ……..
مخلاهاش تكمل سميتو ،شد ليها دقنها وفمها بايدو ظاغط عليهم حابس فيها النفس والبكية والحگرة وكلشي ~قلت لملتك هاد الاسم منبقاش نسمعو من فمك !! قلتلها ولالا ؟؟ ولكن سرييي ل مهرستش ليك فمك نهار نطقتيه وفدعت ليك رجلك نهار لبستي خلخال ل جايب ليك ، كيهضر ويزيد يزير عليها حتى تقصحت تاع بصح كمل كلامو ، عند بالي مرا حرة غتفهمي غير بالهضرة ساعة نتي غا شياطة لعيالات كتفهمي بالعصا والنغزة
الصعرة شدتها ديال بصح ولاو فيها قوة زوج الناس تعصبات ومبقاتش عارفة شنو كتخرج من فمها ، دفعاتو من على وجها حتى تشرمت ليها شفتها وصاحت في وجهو قايلة ~ هاداااك ل مباغيش تسمع سميتو كاااان راااجل عليك!! عمرو حط عليا حتى صبعو بقا غير يجي يطعن في شرفي سمعتي وكنت كنبغيه وعمري غنساه وتا حد مغيجي فبلاصتو صافيي !!
مع كملاتها تسمع صوت صفعة قوية جاتها الحنك على غفلة مضناتوش غيمد يدو عليها وبالفعل دارها ولو رجع بيه الزمان اللور غيعاود يديرها بدون ندم كان حاس بنار كتحرقو هانتو فرجولتو وهبطات من قيمتو عطاها كلشي وعتابراتوو صفر لا قيمة ليه، عيا يدير ويفعل باش يكون ليها الشخص لي تمناه وتبغي ، الشخص لي يمد ليها ويوفر ليها كلشي ، جات اليوم وحساتو بلي معندو حتى دور فحياتها ، تصورت في وجهها اثار صبعانو ،حر الضربة وجهدها خلاها تطيح اللور مجات فين تستوعب اشنو قالت واشنو طرا كان صوت الباب تزدح بالجهد خارج وخلا غير الصوت موراه …خلى بنت في ريعان شبابها ، مليوووحة فالأرض مع شوية ديال دم دايز مع شفايفها ، دموعها فخدها نازليين ، تسممت بحروف ماشي من نفس طينتها ولا حتى موالفة بيهم ، عمر شي حد سبها وطيح من قيمتها ولا طعن في شرافها .. خلى طروفة الزاج مغروسين في قلبها ل كيينزف بالقهرة والحگرة ، حگرها ومخلاهاش فين دافع على راسها ، ولا حتى تقول اش عندها ، خلى عروق قلبها تجمد من الدم ويسري بلاصتو السم .. تكمشات فالارض شبه عارية جامعة راسها وحاضناه دموعها هابطين على خذها ، وقلبها كيبكي جرحها وخلاها مليووووحة فالأرض خلى نذبة معمرها تحيد ولو طال زمان
خلى لهيب قلب مشتعل ….خلى وخلى وخلى
صبح عليها الحال فأسوء حال ، جفونها متلاقاوش دموعها متحبسوش، جنب فمها وارم حنكها حاسة بيه مبنج اما دنيا كتبان ليها بحال لغمامة الكحلة كتمطر بدموع عينيها ،واخا الجو مشمس مناضتش من بلاصتها بقات فبيتها حاجبة فيه لمن غتعطي وجهها للعديان يتشفاو فيها وصلو ل بغاو حسدوها على ضحكة ل بدات كترجع !! على الايام ل بدات كضحك !! على ربيع حياتها ل بدا يزهر !! على الراجل ل نوات تكمل معاه حياتها وخلى قلبها كينزف ومشى ،مغتحطش عليه اللومة ومغتلومش حتى راسها كلشي من ل مكيخافوش الله ل كيفرقو زوج بالباطل اشمن ذنب دارت ل كتحاسب عليه في دنيا قبل الاخرة ،علاش ملي حلت عينيها في الدنيا وهي كتهز اللومة بلاما دير علاش ، دايرة بحال ل غادي وسط الغيس يهز رجل وتغرق لوخرا…….
جنابها عياو بتمغيطة ناضت تحركت من بلاصتها دخلت طواليت غسلت وجهها ورجعت من جديد سدت عليها فبيتها المظلم مكاينش ل حاشاه ليها حتى بيخخ، بقات على داك الحال حتى سمعت صوت دقان فلبيت دارت زيفها على راسها وناضت حلات كانت رحمة هازة فيديها بلاطو فيه لغدا والخبز وسعت عينيها على جهدهم شي يهودي مات فالملاح وحدة من بنات لكبيرة فيها لمحنة ولا جاب ليها الله ،كيف دخلت عينيها جاو على حالتها ل كانت كتضر فالخاطر حطت لبلاطو فوق كوافوز وقالت ~ ياكما صبحتي عيانة !!
جوبتها على قد سؤال ~ اه شوية وصافي قلت نرتاح
رحمة حسات ببرودتها معاها في الهضرة وهي تشير ليها للماكلة وقالت ~ مهم انا جبت ليك لغدا الا جااك جوع ،والا بغيتي شي حاجة عيطي عليا !!
حركت ليها راسها بالايجاب مقادة تخرج حتى حرف من فمها ورجعت سدت عليها شافت ديك الماكلة وخلاتها مهجورة فين محطوطة ، مكفاهومش سمموها بفعايلهم جايين يسموها فالماكلة ثقتها نعادمات جمعت كلشي وحطتهم في كفة وحدة وغلام مزال حايرة اشمن كفة يكون، مقلقة عليه ولكن عاذراه مبغاش يمشي من بالها حالتو وهو كيزار قدامها جاهل ملي شاف تصويرة تنهدت بعياء ورجعت لبلاصتها حطات راسها على لمخدة يله غتديها عينيها وهي تسمع دقان فلبيت من جديد ، زفرت بعصبية وناضت تشوف شكون تاني وغير حلات لباب دموعها هبطو بلا حباسات
قدما كنتي قوية قدام لغريب وخبيتي دموعك كتجي قدام لحبيب لقريب وكيخونوك ويهبطو بلا شوارك ، كتولي بحال البنت صغيرة كتبكي وتشكي ، فاطنة كانت جايا معولة تزف خبر خطبة ولدها عبد الله لنجمة وتعرضها هي وعدوزتها لخطبة ل غتدي لنساب ،صدقت نسات علاش جات ملي شافت حالتها ،جرتها من يدها وطرقت عليها البيت ،جلستها قدامها وخلاتها تعاود ليها ل وقع معاها من نهار رجعت معاه لدار لحد ليلة لبارح ،دمعة وخنونة تبكي وتشكي حتى فرغت ل فقلبها وحبست ، فاطنة كانت عاطياها غير وذنيها خلاتها على خاطرها حتى كملت كلامها عاد نطقت معاجبها حال ~ لافوت فيك ابنت ميمتي !! متعلمتي مني والو هضرتي كنقولها ليك كتخليها وتنوضي ، كرفضت على يديها وكمل عاقدة حجبانها ، هاد الراجل ل جيتي لعندي تشكاي منو وتبكي ومعاجبك حال حگا مداير ليا بيت كي ناس وكنعس فصالون حگا ممعبرنيش واجباتو مقايمش بيهم وقلنا مكاين باس حقك ودوي عليه وجبدنا ليك وليه وذنيه تا دار ليك التاويل والگود ايوا وهو شكون ل دار ليه لگود معاك ، لقيتيه ولد ناس راجل وتديريه قدامك وفجنبك سترك ومبرحش بعيبك اما يفضحك مع لبراني قبل من لقريب ويوريك شحال وهو مزوجك وميحطش عليك يدو ..بدات كتعيب فيها مغددة وسنانها لوبيا عليها كون كانت تاع ضرب مترددش ، لاواه صبر عليا تا نولفك ؟؟ مسكينة مشوگ فيك على قلة لعيالات راه يجيو معاه غا بالفاتحة ،انا قلت بنت بويا ضربات لحديد بلاما نقلل عليها حيا ونسول ساعا نتي جايا عندو غا باش تاكلي لخبز ، من حقو يضربك ومن حقو يتيق بلي مازال قلبك مع خوه ، شفت في لغرايب تا عييت وهادي تعتك عمرني ريتها ، عمري شفت وحدة كتجري على نعمتا بيديها تا شفتك نتي ، ربي جاب ليك خبزة ونتي مراضياش بيها ، شنو بغيتي يدير ليك ابنت ليوم يهزك فوق راسو ويفرش ليك ريش النعام ولا يلقى تصويرة ومكتوب عليها ديك قلة لحيا ويصرطها ويسكت وكون دارها نعيب عليه الراجل ل مضربو نفس على مرتو نتعزا في حياتو
بعتاااب وقفت هازة صبعها كتهدد فيها ~ نجمةةةة !! ندمتيني ل حطيت رجلي لعندك ،كون بقيت فمحالي حسن ليا منسمع هاد لخوا لخاوي منك ، واااش عند بالك زواج هو بغيني نبغيك ، زواج هو المعقول هو العشرة هو راجل يخاف الله فيك ولكن نتي باين ليا بغيتي غير زواق ل كيطير اما لمعقول بزاف عليك مقدتيش عليه ومعرفتيش ليه
عطاتها بظهرها وقصدت لباب تخرج غادا دايخة وهي تعترض نجمة طريقها ووقفت قدامها ~ فين غادا اختي بقاي معايا شوية عاد جيتي وجلسي بعدا وسمعي مني
فاطنة هزات ايديها مباغا تسمع منها حتى حاجة سادة وذنها ~ جيت نطل يقطع طلي !! معندي منجلس معاك ولا نسمع منك، الا بقيتي بهاد الحال ل نتي فيه منبقاش نعتبها عندك
كحزتها من ايدها تا بغات تخرج وهي ترجع تحلف عليها ~ ونزيدك تاني ديك سوسة تاع لوستك نهار عطاتني بوجهها قلت ليك رأيي فيها وحضرتك منها على هاد نهار وهانتي ضرتي تا عييتي وجيتي على هضرتي ونرجع نقوليك نتي منك كلشي نتي ل عطيتيهم حياتك يخرجو ليك عليها حيت لمرا لحارة لموكظة هي ل تجمع ركانيها وتخبي وسخها وتطم حاجتها ونتي غا محلولة ل جا يديرها بيك …
حلت لباب وهي تشدها نجمة من يدها كتبوس فيها ~ واختي فرحت قلت جيتي تخفي عليا ساعة زدتي على مابيا
تنهدات كأنها هازة حمل ثقيل على كتافها وتلفتت عندها ترجع ليها عقلها ~ ل نقدر نقوليك هو داك راحل الا فرطتي فيه سيلي ليا الا لقيتي بحالو وشمت بصبعها على ذقنها ، حيت قليل ل يدير ليك شان وقيمة قدام عائلتو مكاين غير ل يرجعك بحال لبهيمة
دازو ايام قليلة جرح وجهها برا وقلبها ولف ، دوزت هاد ليالي كتفكر مع عقلها واخر كلام من فاطنة ليها قبل متخرج مخرجش من بالها “وصيتي ليك ابنت بوية جري راجلك ليك ،ليطيرو ليك بيه الحادقات والبنات الحرات وبين الراجل ومرتو مكاينش الحيا وملي كيجمعهم فراش ومخدة كيوليو عين وحاجب لا العين كتعلى ولا الحاجب كينزل ونعرفك ابنت ميمتي كتفهمي لغايا بلاما نقلل عليك الحيا ” ….
كانت دنيا هانيا بحال هدوء ل كيجي ورا العاصفة ، كتنزل كل صباح تعاون رحمة بلي قدت عليه وتاكل وتطلع مداو منها باش ينقيو سنانهم مضاربين مخاصمين مصالحين سرها عندها غير هي وراجلها وصاحب دعوتها ، زهرة خوات دار مبقاتش شافتها من اخر مرة وهناتها ….ككل نهار جالسة فوق نموسيتها لي لحد الان مزال مسخنات ،باقا باردة فحال قلبها غير هاد المرة هيا اللي بردتها وخلاتها كيف لون اول واخر سوميز دونوي لبساتو فحياتها، تنهدات تنهيدات كثااار لربما يدخل النفس لي يروي صدرها ويخليها تحس بالراحة هزات مخدتو لي توسد سويعات قليلة ماشي حتى ايام كتشوفيها بحزن مغيم على عينيها ،فيقها من عذاب الضمير صوت الباب لي تحل على غفلة ول دخل منو الشخص لي تسناتو هاد اليومين .. وجهو مظلم وعيونو حمرين بحالا مناعسش من نهار خرج من عندها مهرس ، قال سلام بنبرة صوت باردة وجلس في طرف النموسية حداها ،جوباتو على سلامو فنفسها مقدراش تشوف فيه ولا تسولو فين كان حيث عارفة راسها المساهم الرسمي في حالتو الحالية ،وقفات تبدل البلاصة ولا تخرج للحمام المهم متبقاش معاه باغا تهرب والسلام باغا تخفي ضربات قلبها المسموعة ولي غيخرج من بلاصتو ،كيف وقفات شد ايديها وقال بنبرة مختالفة على لي مولف يهضر بيها~جلسي ابنت الناس نهدرو شوية !!
كلمة بنت الناس خلات الرعدة تشدها من صبع رجلها الصغير وتوصل لجدور راسها بتنهيدة كبيرة خدات بيها اكبر قسم ممكن من الأكسجين ومحاولات كثيرة منها ترتب حروف في لسانها باش تقاد امورهم جلست في بلاصتها وضارت كلها لعندو وقالت ~مرحبا الله يسمعنا خير
غلام بملامح ممحية قال~ من اول نهار عرفتك وحتى قبل منشوفك عرفتك على أساس مرت خويا الله يرحمو ولي غتكون مت ولادو وشائت الاقدام ووليتي أرملة حتى قبل الزواج وتفرض عليا زواجي بيك ،منكرش تكرفصتي في دارنا لكن مكان في خباري والو وانا بعدت باش منآديكش ….أو بالأحرى مناديش راسي وباش نتقبل في حياتي وحدة بغاها غيري وحتى هيا بغاتو وهاد الشخص قريب مني كيف ندير نحيدها من دماغي ، ضيق عينيه الحمرين ~ أنا معنديش بوطونة في راسي غنقول طفي ولا مسح وغتمسح، انا ولد المسلخ حياتي كلها وسط الدم ووسط اوسخ الناس ، دارنا كنت كنجي ليها مرة في السيمانة نطل نتقدى نحط فلوس ونمشي عايش حياتي كلها بلا أساس
بغات تقاطعو على الهضرة تدخل وتدوي ولكن مخلاهاش قال ببرود ~~اليوم أنا اللي غنهدر ونتي غتسمعيني شتي ملي كنهدر بهاد الطريقة والا مبقى عندي فين نزيد خليني نكمل كلامي دامني مكالمي راسي بزوج بكيات ديال الکارو
سكتات وهيا خايفة من باقي الحديث ،كيف قلت ليك عشت ولد الوقت وفاس فيما ضربت نحفر كيما رباني بويا
وملي كتاب المكتوب وشفتك وعرفتك ماليك حتى سباب قلت صافي نجمع تانا راسي ونكمل مع هاد بنت الناس وندير تانا وليداتي اللي عمري فكرت فيهم ،وليداتي كانو خوتي ووالديا نهار كتشدني على العيلات عطا الله الخير موجود
لكن عمر بنت المرا مشركت معاها الهدرة ولا دوزت كيف دوزو قراني ،شفت ضلم مي ليك وخرجتك خديت اشنو حب خاطرك، وملي بغيت شرع ربي قلتي خايفة وبغيتي تولفي واخا من حقي في أول يوم تكتبتي تحت سميتي ، كدوري بلا زيف وممسوقاش ودوزتها خرجي من الدار ودوزتها
لكن نلقى تصويرتك مع خويا وسط حوايجك وكاتبة عليها شيحوايج بلاما نقولهم ،لهنا ووصلنا للخر نتي عمرك غتكوني ليا وانا عمري نقيسك ولا نصفى من جيهتك لانو أنا صفيت وشربت المرار ونتي مصفيتيش ، تنهد مراضيش على شنو كيقول ولكن نفسو فتيفو مقادرش ~ هزي اللي عجبك من البيت وغدا غنعيط لخوك يجي يديك وبيناتنا الورقة لي تكتبت تقطع.
يتبع
التعليقات 0