كانت جالسة حاطة يديها على خدها و تخمم شاعلة فيها العافية تقول خوها عدوها ولا واخد ليها ورثها ، ضربت على صدرها و تمت نايضة ناوية على خزيت … لبست جلابتها في دروج بلا ميشوفها حد مكيعرفوها لا اكتى مشات ولا امتى جات ،خرجت قاصدة دار صاحبتها و كاتمة اسرارها موصلت عندها حتى ريقها نشف غير دخلت عودت ليها اش كاين تظوي وتستاراح … نصحتها لي بحالها في الفعايل ميخافو العبد و لا الخالق عندهم الدنيا خالدة و لآخرة مكيناش قاطعين يديهم من رحمة الله و دينو ،شكرت ليها سي فقيه وحيث زهرة ماشي من عاگزين جمعت الوقفة تگعدت معاها ولطريق الشرك قصدو وفي كل خطوة كتشكر ليها السيد و خدمتو ، الضحكة رجعت ترسمت على وجها وضمنت ل فبالها غيطرا ~… عرفتي يا صحبتي و نتهنى من هادشي احسن زردة نديرها نبردو بيها و ندردگو على ديك بنت الحرام … قربو لباب الشريف كيف مسميينو غطات وجهها على الناس و ناسية لي خلقها كيشوف و ذنوبها كيتقيدو على كتافها، ضاربة الدنيا بركلة مكتقولش غدا يوم الحساب و نخاف ربي كتعرف غير تعيش اليوم تدير الذنب ولاخور دافعة فيه العربون … دخلو عند السيد وهي كتسمي الله خايفة من الجن يسكنها غادا وتشوف في جنابها تدفل فعبونها …كانت دنيا عامرة قلالات خوف الله كثار ول كيشركو ما ليهم عدد ل باغا تضرب گارطة ول باغا تهز الخط ،ل باغا قبول ول باغا دير محبة بينها بين راجلها و..و…و… وصلت نوبتها على شحال دخلت مع صحبتها للبيت عندو كان جالس و حاط رجل على ختها رمات السلام ورجعو عليها ونطق بلاما يشوف فيها ~ اش حب الخاطر علاش قصدتيني !!
جبدها جبد دموعها تقول مهمومة و باغا لمن تشكي … جبدت تصويرة الصگعة ل خدات من بيتهاو مداتها ليه وعلى عينيها الشر و الحقد حالفة فيها و في لي طايح في كرشها، شافيها و مركز شوفتو كيتسناها تنطق ،بداو دموع لكذوب نازلين و تضرب في صدرها وتنطق بالخبث …~ قصدتك و المقصود الله أسيدي الى ما فكني و برد ليا حرقة قلبي، كان كيتسناها تعطيه ما عندها ~ قولي الشريفة اش عندك ناس برا كيتسناو !!
زهرة حطت ايدها على تصويرة ولحنت صوتها ~ هادي اسيدي مرات الخو وراك عارف بلا منقوليك ، رجعت طيح في دموعها لي ولاو شلال قدامو، من نهار شفناها ما شفنا الرباح عفطتها عفطت غراب و كلامها سم بلا مداق ، بدلت علينا لي بقى لينا في الدنيا خونا الشريف خونا ، بدات تعدد وتغبن وتشهق ل يشوفها يحلف حتى محگورة كملت كلامها على نفس بنفس سمفونية لحزينة ~ تشوينا في الغالي الاول هي سبابو حتى مات لعبت على الخوت و بغاتهم ليها بجوج استغفر الله واحد سيفطاتو القبر ولي كان هازنا قلباتو علينا و من بعد الله طامعة في رحمتك حتى انت ترجعو لينا الا هي فقيهها صحيح نتا تقوليه مكتعرفش
شد التصويرة بين يد كيشوفيها ونطق ~ خدمتي كنهز الخيط كنشوف ، انما ما كنفرق شمل ما كنحرق قلوب أنا من بعد الله كنجمعهم و الغيار كنحيدو
جبدت من صدرها فلوس كثيرة مدتهم قدامو ~ قصدت بابك متردنيش وميخصك خير معايا ل حليتي عليها فمك نحطها قدامك ، حرك ليها راسو بطمع وقال ~ هاد المرة غنخالف وعدي و نحيد هاد اش سماها الله ،طارت زهرة بلا متحس نجمة نجمة بنت تاجة أسيدي ،كمل على كلامو وقال~ شنو بغيتي بضبط نطججها نفرقها على خوك
زهرة مسحت دموعها و لاحت عينيها على صورة نجمة لي كان شاد و خرجت عينيها كتهضر و الشرار خارج منهم ~ بغيتها الراس لي تهز يطيح و اليد الحنينة عليها ترگد بغيت بيتها يولي ضلام و ماكلتها لراجلها سم و قطران هنيني منها و من حسها و حتى لي طاح في كرشها بغيت حياتها تولي عذاب و الاهم من هادشي الوريت ميتزادش وقلب خويا عليها يكحال
ناعسة فبيتها بعدما غطاها وخرج كتحس براحة من نوع خاص عمرها عرفتها كيف دايرة من قبل ،إحساس جديد وزوين تزاد لحياتها وزينها ، فرحانة وعينيها كيبريو قلبها كيفرفر وشعور غريب تملكها غتولي أم غتكبر روح وسط منها غتجي لدنيا وغتزيد تضويها عليها غتسمع كلمة ماما غتربي وتسهر وتكبر ..مخيلتها خدامة كتصور ليها كرشها منفوخة وبنتها ولا ولدها بين يديها ضحكة على فمها كانت مترعة ، كتنهد من اعماق قلبها كتخرج من جوفها عبئ الايام الثقال ل دازت منهم صافي مبقاتش ليهم بلاصة فحياتها هاد لفرحة جات وغطات اي مُرْ دازت منو ، من ليوم أيام جديدة وحياة زوينة كتسناها مع راجلها ول فكرشها غتأسس تاهيا اسرة وغتعطي لولادها لحنان وغتمارس الامومة ل تحرمت منهما فصغر غتعيش معاهم الطفولة ل تسلبت منها وهي بنت صغيرة غتشوف راسها فيهم ول تحرمت منو هي غتعوضو ليهم هما !! ..بقات على داك الحال صورة تديها لصورة وذكرى تجر وراها ذكرى مكمدة وسخونة وسط من مانطة جديدة حتى غفات بلاما تحس ….
مكانش كيقل عليها فرحة !! واخا وجهو مباينة فيه حتى ضحكة ولكن قلبو كان ناشط وفرحان جبهتو مسرحها وعقدة حجباتو مفكوكة ، هرمون سعادة مأكتيفي وحاس براسو ممحتاجش يكمي باش يقاد مجاجو ، دخل لعند باه كان جالس في قنت لبيت مشعل تلفازة ناقص منها صوت وكيسبح وصلتو لخبار من عند مرتو بطبيعة الحال ولكن كان كيتسنى يسمعها من عند ولدو لوذنو خليفتو في الدنيا و خيالو في الدار ومخابش ضنو دخل غلام مقوس عينيه ل كيضرورو على بيت يشوف باه فين جالس لقاه فالقنت فبلاصة غير بلاصتو تمشى لعندو و بوجه مبشور تحنى باس يدو وراسو وجلس فسداري حداه وقال كيطبطب على ركبتو ~ بووياا !!
ضحك ليه فوجهو فرحان فرحة ميعطيها لحد شاف فعينين ل كانو مشكيل بنظرات غراب على غير عادتهم وجاوبو ~ ولديي !!
نطق بعدما حنا راسو وقال برجولية كيعض على فكو ~ وصلتك لخبارك !!
خليفة حرك ليه راسو وبلل حلقو وقال بصوت نبرتو على قد الحال لقراجط ضياقو والحلق عيان~ خير الخليفة لراجل هو ولدو و ان شاء الله يكون عزري يهز سميتك و راسك كيف هازهم ليا و مخلي ليا الخاطر عالي و ممكبر فيا والو و ممخلينيني نضرب حساب للهم براسو
غلام بتاسم من كلام باه ل من ديما كيسمعو وكيجبر بخاطرو بيه هز يدو و باسهم ليه من جديد وجاوبو ~ رضاتك فوق راسي و خاطرك فوق خاطري لي بغيتيها نحضرها و لي خرجت من فمك بسم الله عليها
خليفة هز راسو للفوق بفخر ،فرحان بولدو وبعطية الله ليه ، راجل بشلاغمو مسخن بيه كتافو يتمنى يرزق اي جبيب واحد بحالو ~ … عرفت اش ولدت وشنو ربيت ..سكت شوية كيسبح ويوزن لكلام في دماغو قبل مينطق ، جمع تسبيح فيدو وقال ~ حاجة وحدة الله يرضي عليك ل نوصيك عليها الوقت والزمان والوصية ما تقتل ما تحيي ، حنحن غلام مكيبغيش يسمع كلام الوداع والوصايا ل من ديما كيتهرب منهم ، زير على قبضة يدوو ورخفهم باه بيدو ل حطها عليه وقال ضاغط على كل كلمة كيخرج من فمو ~ تسنط لياااا الموت بيد الله ماشي بيدينا ، داكشي علاش اولدي نوصيك تتهلى فمراتك ومتغيرهاش !! نهار شفت هاد بنت ناس قلبي رتاح ليها وعزت عليا وبقات فيا داكشي علاش مبغيتهاش تخرج من هاد دار ، كانت باينة معدنها صافي وصبارة ودبابة هي ل غتليق ليك وتصبر معاك وتهرس من جهدك شوية هو وكيدوي وملامح غلام كيتزيرو
خليفة عرف شنو بولدو وشنو كيضرو هز ايدو لظهرو وطبطب عليه وكمل كلامو بصوت عيان ~ مكاين لاش تعصب اولدي هادي راه مرتك نتا ومگالعها ليك حد ،ربي مكتبها ليك نتا قبل من خوك هو الله يرحمو جا عزاب فهاد دنيا كان خيط ل جمع شملكم ومشا عند ل خلقو ،داكشي علاش كنوصيك متغيرها ما تأديها و متخلي حد يهرس ليها خاطر راه الذنوب منها و الاجر في طريقها بغيت نهار ربي يدي امانتو نكون فرحان ليك ومرتاح عليك والله يطول ليا العمر حتى نشوف ولادك كيكبرو قدامي
جمع لوقفة ل فيه شي بلية صعيب تحيد منو ، تنهد بصوت عالي ونطق بصوت غليظ ~ الله يرحمو ويطول لينا فعمرك !! محتاجني فشي حاجة قبل منمشي ؟؟
خليفة حرك ليه راسو بلا وبتاسم ابتسامة جانبية عارف طباعو ولدو ونفسو الخايبة ~ الله يرضي عليك اولدي نوصيك غير على مرتك تتهلى فيها وفلي جاي فطريق
هز ليه راسو بالايجاي وحط يدو على عنگرتوو وقال وهو غادي ~ معنديش غلا منهم ومنكم !!
الله يرضي عليك و يتبت خطاك اولدي ~ قالها أب غلام دعوة داها معاه ولدو ، خرج على برا كيشم لهوا يعمر بيه ريتو جالس فكرسي فراس درب ل دايز يجي يسلم عليه عاطي من وقتو وداير صواب مع جيرانو بانت لي صباح كتسد فالباب وعينيها عليه قاصداه وهو يجمع الوقفة دخل لدار ، نهارو زوين وباغيه يكمل مزيان مبقا عندو هضرة معاها ولا بمرتو وخصايل شمايت مكيعرفش ليهم ،طلع لسطح متقل خطاويه غادي يشوف مت ولادو حل الباب ودخل بانت ليه ناعسة مخشية فبعضياتها وجهها حمر بسخونية قرب منها وتخشى حداها وهي مجايبة لدنيا خبار القيامة نايضة عليها وناعسة حاطة يدها على خدها وسارحة عجول الاخرة ل باغا تسحر ليها ول كتدعي عليها ول كتدوي فيها ، حط ظهرو على ناموسيو ووجهو فسقف ايديه على جبهتو مع غيغمض عينيه حس بيها كتململ حداه ضور عينو ليها بدات تاوب ناضت مخلط عليها ليل ونهار عند بالها كانت غاطسة فحلم زوين وفاقت منو ساعة حوايج ل لابسة وابتسامة غلام وهو كيشوف فيها اكدت ليها بلي ل وقع علم ماشي خيال، نطقت بصوت ناعس كتمسح وجهها كتستعقل ~ غلاام شحال ساعة نعست بزاف يمكن فات الحال!!
حل دراعو بلاما يتكلم فهمت بلي خاصها تخشى فيه كيف ديما قربت منو بمانطتها خشات راسها في عنقو كتمخشش فيه بحال ديما ايدها حاطاها فوق كرشو ورجلها فوق فخضو وهادشي كيسلب ليه العقل كتجيب فشوشها وكتدلع عليه كتحسسو برجوليتو وكيحس بلي معاه انثى بكل معنى جاوبها وايدو كتحيد زغب ل على وجهها ~ ويفوت مالك شنو تابعك لغدا كيوجدو فيه !!
خاطرها مكيعطيهاش تجبد وتمسكن ووحددة اخرى تشقى عليها وتطيب وهي ناعسة واخا تكون فيها لموت خاصها توقف ودير حقها في الشقى نفسها الحارة خارجة عليها ~ خاصني نهبط نعاون رحمة غتكون يدها بوحدها حشومة !!
خنزر فيها وبدل نبرة صوتو وقال بعتاب ~ رااعي شوية لراسك ولروح ل هازة !! تا حاجة مغتهرب دار الهلا يطرف بوها الا مقدوش على شقاها نجيب ل تعاون نتييييي تركني وتسنطي لعظامك وديها فراسك وكولي ورتاحي ونتي عاد بادية و لويتي
فلتت ليها ضحكة ،مكذبش حاسة براسها فاشلة وذابلة وجهد مكاينش غير غالبة فراسها نطقت بغنج~ واخا اسيدي انا غنتفشش عليك شوية ونتشهى عليك ونتوحم عليك عنداك غا ، حط صبعو على شفايفها ممخليهاش تكمل الكلمة…دار لعندها خاشي يدو تحت من ظهرها وزايد خاشيها فيه حتى لاصق كرشو مع كرشها وقال وعينو على فمها ~ ل طيح فبالك قوليها ليا نحضرها واخا فثلث الخالي بغمزة قال~ واقلة باقي مكتعرفينيش مزياان
بابتسامة رضى جوبت وهي كتلعب فحوايجو ~ عارفااك ديرها وتفوتها لهيه اراجلي لحبيب
مع كملتها حناكها بغاو يطرطقو بالحشمة اما هو شعلاتو بدا يصوط بنفس حارف ومسموع وايدو ممتحكمش فيها باغا تمشي لخيرو وتقيس فرزقو حتى سمعها نطقت بصوت شبه مسموع ~ قالت ليا طبيبة ياك قولي لراجلك ميقربش ليك تيشد الولد بلاصتو
فراناتو بهاد الكلمة زفر بجهد وقال بسخط ~فين قرات مالو على سبةة !! تنهد وجمع يدو لعندو مكتفي يبوس راسها وقال ~ نصبرو شي يومين واخا راه قطعة خاايبة هادي !!
عنقاتو بفرحة معارفاش شنو كيتخبز وراها وشنو كيتسناها هادشي ل كتعيشو مقارنة بلي الجاي غير الركود المؤقت
مكاينش ل غيبغي ليك الخير كيفما غيبغيه لراسو ، الانسان بطبعو اناني وعزيز عليه حب الذات كيقول مكاين غير راسي ومن بعدي الطوفان ، بنت فريعان شبابها شنو دارت ليها حتى تبغي تاذيها بشرك الله ، تسحر ليها تتفرقها على راجلها علاش تغصبها ففرحتها واش دنيا دايمة واش الانسان ضامن عمرو غيعيش فيها خالدين اكيد لا ربي خلق الحيااة وخلق حتى الموت قدما عشنا فدنيا غيجي نهار ونموتو وغنتحاسبو فيه على كل سيئة وذنب درناه فحياتنا داكشي علاش خاص الواحد يخدم لدنيتو كأنه غيعش أبداً ويدير لاخرتو كأنه غيموت غدا ….
زهرة من نهار لي ضربت ضربتها و هي غابرة و فايتة عتبة مها ما كدوز عليهم ولا تعرف خبارهم و لا هوما عارفين خبارها شدت دارها وحجبت فيها كانت كتسنى خدمتها تبان لكن للقدر رأي اخر وربي لطيف بعباده لقوله
” يا ابن ادم لو اجتمع الانس والجن علي ان يضروك بشئ
لن يضروك الا بشئ قد كتبه الله عليك “
~~~~
طالعة لسطح مكفية على القعدة والفراكة كتصبن وتعاود وفجنبها خديجة كتشلل وتنشر وواحد لعروسة سادة عليها بيتها ومطرقة ، فقل من شهر وغير وجدو وراق العقد دار عبد الهادي العرس لبنتو وصيفطها لعند راجلها دخلات على فاطنة مباركة مسعودة لبيت ل كانت كارية في سطح كتمعش منو، عايشة خواتو اخيرا حن عليها راجلها وجمعها فدار ملك ليه هي وولادها ، مع بغات تدخل ليه ناس جداد ترزق معاهم حيت كانت فلوس كراه معونة بيه لمصروف وزيد وزيد ساعة عبد الله قلب عليها وجهو وعينو ولات كبيرة مبقاش باغي يعيش مع مو لتحت وياكلو ماكلة وحدة بغا راحتو مع مرتو ل تمسكنات حتى تمكنات دخلات فلول بحلاوة لسان ومن بعد ولات باغا تيقار وراحتها فدار بوحدها ، قلبت الولد على مو اليد ل كانت معوناها وكانت تمد وتعطيها تقطعت وحيت فاطنة نفسها خايبة معوداتش معاه الهضرة سايراتو فلي بغا ل يضرگها بخيط تبني عليه صور عالي ، كان مرة وهو جاي من الخدمة ومقدي لمرتو يجيب فيدو ميكة يجبر بخاطرها بيها حتى مبقا تفكرها لا بخبزة ما وراها وجهو كيف داير ساكنين فدار وحدة مرة يصبح ولا يمسي عليها ويومين لا وبقاو على داك الحال حتى ولفات واخا دقتوو جاتها صعيبة في البدية ولكن الايام بدالة والوجوه كتغير ….سالات صابونها ونزلت مخليو خديجة تكمل تسياق ، المغرب قرب ياذن ولعشية تعاشات مع غتدخل الكوزينة تشوف شنو دير وهي تسمع صوت دقاان مجهد في الباب …حطات يدها على قلبها مخلوعة ومشات تطل تشوف اشمن خبار جاياها فهاد الوقت ، مية فكرة وفكرة جاتها فبالها ، طلات وبان ليها لوجه ل عند الباب مغريبش عليها ضيقتها عينيها وقالت كتفكر ~ أ شكوننن !!
هزات راسها وجهها مخطوف منو لون ضعافت وذبالت وزجها كحال ل يشوفها تخفى عليه وميعرفهاش ~ هادي انا اخالتي فاطنة ،وردية صاحبة نجمة !!
الوقت بدالة وكتقهر !! كاين لي تعلي شانو و كاين لي تنزلو للقاع وتخليه ضحكة لعديانو.. وردية رشاتها ليام وكبرتها قبل الوقت مرض ولادها ساسها وخلاها شدات طريق لحرام ل شحال تهربت منها وشحال غوتت وشحال عارضت وملي تقاست في كبدتها ل ولات كتموت قدام عينيها ستسلمات وهزات يديها وحنات راس بزز منها ردخات لراجلها ومشات معاه في هواه معندهاش بديل كان خاصها تختار يا ولادها يا تعصي ل خلقها ايمانها كان ضعيف، شنو فيها كون تشبتت بدينها وصلاتها ودارتها فيد الله وصبرات ..قلة الشي ل دازت فيهاا والخدمة ل جراو عليها منها والمرض كلشي تجمع عليها فخطرة ومبقا كيبان ليها قدامها غير داك الباب ، الباب ل غيديها لطرييق جهنم بعينيها محلول وهادشي كانت عارفاه مزيان، كانت كل نهار قبل متنعس وغير تحط راسها على مخدة كيعذبها ضميرها والموت كتحضر بين عينيها كتقول ليوم حنا عايشين غدا نصبحو ميتين كتبكي حتى ينشفو دموعها وتقول غير هادي وتوبة وغير يصبح الحال تنسى مداز عليها فليلها وتكمل في معصيتها بحالا حتى حاجة مكانت ، فلوس لحرام حلات ليهم العينين وطمعاتهم كتقول غير نشري هادي ونحبس نزيد هادي وباراكا حتى شهر جرها لشهور وباقا مكملة ،راجلها يخدم ويسحر وهي تشد ليه سربيس حالتها حالة لوجه ل كان مضوي كحال مبقا فيه ميتشاف وصحتها تهدات اما ضحكتها ودمها لخفيف ل كانت كتمتع بيه ماتو مع قلبها بسيف فاطنة متعرفهاش ، عذرتها و بسميتها فكرتها حتى تصدمت فيها لاحت ليها ساروت وتسناتها عند دفا حاطة يديها على حناكها قلبها مقبوض ، اشمن خبار جايبة ليها فداك الوقت ،سلمت عليها ومشات بيها لصالون مكرهتش تجر من لسانها الهضرة قبل متجلس خاطرها علمها ، بعدما سولو فبعضياتهم نطقت فاطنة بلا زواق ل فقلبها على فمها معندها متخبي ولا تصبغ في الهضرة ~الله ابنيتي و شهاد الحالة وليتي فيها حتى وجهك معرفتو مالك زراگيتي وضعافيتي وغبرتي ، واش رحلتي من لبلاصة ل كنتي ساكنة فيها نجمة بغات تحماق عليك قالو ليها مبقاتش تما تسناتك توصلي ليها خبارك حتى عيات ونيسات
وردية تنهدات منزلة راسها حشمانة من نفسها وشنو غتقول ليها قصتها خايبة لمعاودها ~ بزز مني اخالتي فاطنة ، ساطت هم مخرجاه من قلب جوفها لعامر وقال ،حكمت عليا ظروف نخوي ديك دار والخدمة بردو عليا كتافي منها
قاطعتها شافت فيها بقلق ونطقت ~ ياك لاباس وليداتك كيف بقاو ياك عائلتك على خير وبخير
كانت كتسنى ومتوقعة تقوليها مشاو عند ل خلقهم ساعة فرح قلبها من شنو سمعت
وردية بابتسامة صفرا قالت ~ لاباس عليهم نقزوها حتى قلت غنودعهم ساعة رجعو ليا من الموت
فاطنة وهي فرحانة ~ ايوا الحمد لله ومالك كتقوليها وونتي طالع ليك الدم حالتك معاجبانيش ابنتي
بدات وردية كتحك في يديها باغا تهضر وخايفة تسمع من لمنقي خيارو عارفة فاطنة ل تقولو وراك تقولو قدامك ~ خليك من حالتي وسمعي ل جايا على قبلو ، راني غير سلت خليت دنيا عامرة ومطرطقة وراجلي بوحدو وقلت والو نجي لعندك مهما كان نجمة صاحبتي وختي كيف دايرة هي بعدا ؟؟ تزوجات ياك !!
فاطنة دخلها الشك و قلبها تقبط عليها~ خلعتيني وراسي زند عليا فاش باغاني !! اه نجمة تزوجت حمد لله ربي رزقنا بولد ناس ل صانها من لكلام الغادي وجاي راه جالسة معززة مكرمة مخاصها خير تهنات من تمارة وخرجت صباح بكري وشوفات ناقصة تاع ل يسوا ول ميسواش
وردية جبدت من صدرها صورة صاحبتها و عشيرة ايامها ،ل دوزوه بزوج ماشي قليل تقاسمو الهموم والافراح ياما ضحكو وبكاو مجموعين شطحو وغناو ضاربو ودافعو على بعضياتهم كانو دايرين كي لحلاقم مكيتفارقوش ولكن الحياة فرقاتهم بزز منهم كل وحدة فين تجلوقت على لوخرا وتقطع حبل الوصال ل كان بيناتهم ، حطت تصويرة فوق طبلة كترعد وفاطنة غير متبعاها بعينيها ولفضول المروع قاتلها ، طرطقت عينيها وگرنت حجبانها بعدم فهم وقالت وهي كتهز تصويرة ختها وكتشوف فيها ~ مال هاد تصويرة غوتت حتى قفزتها ملي شافتها منزلة راسها الارض وساكتة ~ طلقيني خلاص ونتي تبعكي عليا فالهضرة ناضت من بلاصتها تتقابلت معاها وقالت ، خوي ل عندك راه قلبي بغا يسكت شكون عطاك هاد تصويرة واش كانت عندك دويي !!
وردية عضت على فمها ونطقت حشمانة منها كتدوي بلاما تشوف فيها ~ جابتها وحدة لراجلي بغاتو يسحر لنجمة ويفرقها مع راجلها
فاطنة ركابي فشلو ليها وگرام لعقل ل بقى كان غيزهق ~ اشنو !!؟ كيفاش يسحرو ليها شكون هادي وامتى راجلك ولا مشعوذ يا لعياذو بالله ؟؟
سرطت هضرة فاطنة كيفما كتدوز شوفات الناس الخايبة فكل مرة كتخرج من دارها تقدا ولا تمشي لحمام ولفات تنعات صبعان مرت شواف مرت سحار مرت مشعوذ كلها كيف كيعيط ليها ل يتلبذ ليها ول يهرب منها ، هزات ايديها لفوق بقلة حيلة وقالت ~ هادشي ل عطا الله اخالتي مكاين منخبي عليك ، حسات بضيق فصدرها وبتنخصيصة شدتها بكات عليها حتى مقدت دمعة وخنونة وهي تعاود وتساراح ~ بزز منا شدينا داك طريق تسدو البيبان في وجهي شنو ندير ولادي يموتو زوج فريخات ل نكساب من ذنيا يضيعو مني …داز عليا وقت ملقيت فيه مناكل ل حطيت عليها يدي تتخصر راجل شاد ركنة وانا كثر منو شفنا حتى عيينا طلقتها بكلمة آآآه خاتمة بيها هضرتها وقالت ~ ختارينا طريق ل تفرضت علينا هادشي ل عطا الله
فاطنة معارفة متقول مصدومة من شنو كتسمع جاتها عزيزة اما تجري عليها من دارها ~ رحمة الله واااسعة عطا الله ميدار متقوليش ليا هاد تخربيق ديالك حگا والواد ملقيتا مناكلو
قاطعتها وردية الهضرة دابا معندها باش تنفع ل عطا الله عطاه وكفة ذنوبها عمرت ~ ماشي وقتو اخالتي مجياش باش تلوميني انا عارفة راسي غالطة من ساسي لراسي داكشي علاش مكاناش عندي لوجه ل ندق فيه بابك ونجي نشوف صاحبتي ول جابني ليوم غير هي وجايا ودايرا هادي ورايا قاصتها جبهتها وباش منطولش عليك جات وحدة فهاد ايام عند راجلي وقالت ليه …
عودت ليها ل تقال بالحرف من طقطق لسلام وعليكم ومن نعت ل عطاتو ليها وردية عرفت فاطنة شكون هي حطات يدها على فمها وقالت ~ هادي ختو زهرة اللفعة تابعة ديك البنت باغا تخرج ليها على حياتها معرت اش دارت ليها الله ياخد فيها الحق عاد تفتحت دنيا في وجهها وبغاو يظلمو ايامها بغيت ربي يكحل لبناتهم سعد ، ضارت في وردية بنبرة عتاب اجي نتي ياكما راجلك طمع وبغا يضر ختي قسما بالله حتى نقلب عليك فين ساكنة ونجي تال بابو ندير ليكم شوها
وردية جوبتها مريحة بالها ~ هي الملحة دودت؟؟ الا خليتو يضر صاحبتي غا يضرني ، انا راه تبريت فيه وهانا كنريح بالك تا دابا ، عليك لامان نجمة تا حاجة متلوطها ولكن راه مكاينش غير راجلي بوحدو ل كيخدم وكيف جات عندو تمشي عند غيرو باينة فيها مساهلاش سيدة مرجعة نجمة خايبة كون غير مكنتش نعرف طينتها نتيق مهم نتي فرگعي رومانة وديري شي حل
فاطنة شافت بعيد وقالت ~ داكشي ل غيكون بقات ليها غا صحتها ترزيها فيها الا ملقاتش ل يوقفها عند حدها انا نوريها لولة دازت وتانية دازت بالحق تال سحور لا غدا تلقاني فباب دارهم مع صباح
مقدرتش تغمض وتنعس مرتاحة ملي حطت راسها على لمخدة وهضرة وردية كتاكل في دماغها كلشي يدوز لمعيور مكيلصق الضرب يبرا والهرس يتجبر ولكن سحر دقتو صعيبة ، مكرهتش تسد عينيها وتحلهم تلقى صباح طلع تمشي وتخوي ل عندها وتبرد العافية ل شاعلة فيها كون لقات زهرة قدامها تدير فيها شرع يديها وتربيها حيت ناقصة تربية ومكتخافش الله ، بصعوبة داتها عينيها فاقت مع لفجر صلاة وفطرت ولبست جلابتها وجلست مقردة فوق سداري حتى يطلع صباح مزيان جات ناقصة تمشي على بونبير ، غير بانو ليها صحاب ثمنية قاصدين مدرستهم وهي تسد بابها وسورت ومشات نايضة فيها الحراقية ضربتها كعطة على رجليها غادا وتستاراح الطريق ما بعيدة ما قريبة وصلات كتنهج وقلبها بغا يسكت بقات شحال واقفة قدام الباب بلاما تدق تاخد نفسها باش تلقى جهد للباقي ، خبطت في الباب بصواب والاداب مهما كان جايا لدار ناس ختها بقات شحال تدق وتعاود حتى طل عليها غلام نزل حل ليها سلمت عليه باحترام وقالت منزلة راسها ~ سمح ليا الا صبحت عليكم
قاطعها عاطيها تيساع تدخل ونطق بصوت باح عاد فايق من نعاسو ~ الله ياودي مرحبا فأي وقت دخلي …عرفها متجيش وتجي غير الا مكانت شي حاجة واقعة بغى يسول وطمر وخلا الهضرة تجي من عندها كان سابقها في دروج طالع ويغوت بصوت حاد على لكبيرة ~ لواااليدةةة فااايقة !!
لكبيرة خارجة من البيت كتصاوب فزيفها بتساؤل حركت راسها لولدها كتسولو بمعنى شكون ، جاوبها وقال ~ خت نجمةة
عوجت فمها مخسرة سيفتها وقالت بنفاق ~ مرحبا مرحبا نهار كبير هذا !! سلمت عليها وقالت ، دخلي زارتنا البركة
فاطنة كتقلب بعينيها على شيطانة تشوف وجهها واش كاين ~ الله يكبر بيك !! بان ليها غلام غادي وهي توقفو ، تعالا اولدي عندي ليك شي كلام ؟؟
ضيق عينيه وحرك راسو بمرحبا ودخل معاهم لصالون ل كان مطرف، جلسو بثلاثة لكبيرة غير كضور فعينيها باغا تعرف اش واقع اما غلام ضرو راسو وجالس مصبر راسو بزز
نطقت لكبيرة باغا تسرق الهضرة من فم فاطنة ~ الله يسمعنا خبار الخير !! ياك لاباس شنو واقع
فاطنة بلاما تحشم ولا ترمش ضربت ليها الهضرة في وجهها بحالا عطاتها تصرفيقة ~ مشفنا خيير مع بنتك الالة لكبيرة ،هزت عينيها في غلام وقالت الا سخات عليك مرتك انا راه مساخياش عليا ختي يا إما دير ليها حل ولا نرجعها معايا منين جات
زير على قبضة يدو ما فاهم والو تعصب وجمع الوقفة وشافيها مخنزر وقال حتى هو كثر منها لسانو مبري منو ~ مالنا على هاد الهضرة !! شنو واقع لهادشي كامل شنو دارت ختي حتى جايا باغا تاخدي مرتي من بين يدي شكون عطاها ليك من اصلو باش تديها معاك
فاطنة طرطقت عينيها فيه حمرين طونسيو طلع والخز وصل لراس ~ سول ختك ل بنتو ليها متفارقتوش ورا تصويرة ل دارت ليكم قالت ارا نوض نسحر ليها
كانت ناعسة مجايبة لدنيا خبار مرة مرة تجيها صوت هضرة ختها في وذنيها وتكذب راسها تتقول غير كنحلم ، علات الاصوات وهي تنوض تتأكد تسنط من ورا لباب وفعلا وذنيها مكذبوهاش هادي فاطنة لبسات عليها ودارت زيفها وهبطات كتجري في دروج مخلوعة ،ختها رجلها ثقيلة متظقش بابها غا هاكدا ميكون غير مها واقعة ليها شي حاجة ، بقلب مفزوع ووجها صفر دخلت مهرولة وكترعد عليهم البيت حتى تعكلت بزربة لي كانت مثنية وجات الارض
فاقت من غرق نعاسها مخلوعة وحالتها حالة ميبغيها لا ربي لا عبدو ،غير الافكار الخايبة ل كيدورو فبالها مرة تقول مي وقعات ليها شي حاجة مرة خويا، هابطة فدروج معاقلاش عليهم وجهها صفر ناشفة من الدم ويديها كيترعدو رجليها خاوين دخلت عليهم بعقل مرفوع مكتشوفش قدامها عينيها غير على فاطنة ل وجهها مكيبشرش بالخير هناا زادت تاكدت بلي مجيتها ماشي عادية ،حطت يديها على قلبها وقالت شااهقة ودموع على عينيها سابقينها ~ ختيييي !! اش واقع ياكما ميي وقعت ليها شي حاجة ؟؟
زربية كانت متنية مردتش ليها لبال بغات تزطم عكلتها جات طايحة الارض غلام كان عاطيها بظهرو مجا فين يدور يشوفها حتى لقاها مجبدة قدامو قلبو تهز من بلاصتو نزل لعندها راكع على رجل مخلووع ، خنزر فيها ودوا بصوت عالي ~ غاا بشويةة عليك تمشاااي زعمة راه دويت معاك
شدها من يدها كينوض فيها دقات قلبها مسابقين مع بعضياتهم كانت كتسمعهم في وذنيها ،لكبيرة شادة سداري متحركتش غير كتخمم والوجع شادها اما فاطنة تحنات على ختها كتمسح على وجها وتقول ~ بسم الله عليك اختي نتي فعار الله مي مواقع لي مي والو متخلعيش
عونوها حتى جلست فوق السداري فمها بيض كتلتاقط انفاسها ل كانو غيتقطعو بالخلعة ل مكاين ما وعر منها ، مشا غلام لكوزينة خدا لما جايبو تشرب وعلى وجهو الله يقربلها كان ما عاجبو حال كلشي من فاطنة بنسبة ليه هي سبابها باغي يدوي ويلوم ويغوت ولكن فنفس مراعي لمرتو مباغيش يهرس خاطرها ويغيرها مهما كان نسيبتو زاطمة عندو فدار
قرب ليها الكاس لفمها وهي كتلهت قلبها كان غيخرج بالخلعة بزز باش رجعت نفسها و تهدنات شوية ، ضارت عند فاطنة لي بان ليها وجها ماشي هو هداك ختها وتعرفها من الطيارة
نجمة بإلحاح ~ ختي مالك قولي ليا شنو واقع انا عارفاك مزياان متجيش عندي مع صباح غير هاكداك
الكبيرة لي كانت كتسمع و تحك على فمها بيديها و حنكها لي گاع هبطاتو غا بينها وبين راسها طارت على نجمة جلست حداها و كتمسح ليها على ضهرها مبغات فاطنة تخرج حتى كلمة من فمها ، ملقات حتى سبة من غير تزف عليها الخبر ل يقدر يلجم ليها لسانها ~ مكاين والو ابنيتي طلعي نتي لبيتك ترتاحي وخلي داك التيلاد لي هازة في كرشك يشد بلاصتو حفظك الله كون وقعت ليك شي حاجة فين كنا غنوصلو؟؟
فاطنة هزت حجبانها مخرجة عينيها من شنو سمعات قالت بتساؤل وهي كتشوف في نجمة والفرحة بدات توضاح على وجهها ~ تييلاد !! واش حااملة اختي ؟؟
فعز ما واقع ليها بتاسمت ابتسامة جانبية وحطات ايدها على كرشها مكمشة على حوايجها وشافت في الارض حشمانة من ختها وقالت ~ اه اختي يله عرفت هاد سيمانة عندي شهر وشي حاجة دابا ، كنت جايا عندك نقولها ليك ؟؟
قدما فرحات زادت تشوشات خافت ليها على ل فكرشها وعرفات شنو سبب ل خلا زهرة ترجع تأذيها وزادت صممات تفضح المستور كبرها تصغار والساكت عن الحق شيطان اخرص ، شافت نظرات نجمة الاستفسارية فيها وهي تدارك الموقف وقالت ~ الله يثبت حملك اختي عدوزتك عندها الحق سيري رتاحي انا غير كنت بايتة نحلم بيك وخاطري تهول عليك قلت والو نجي نشوفك وحمد لله انا غنرجع فرحانة
ماشي صغيرة تسكتها بهاد الكلمات ،جلست تاهيا مطمرة بزز منهم ممفاكاش وقالت ~ وملي مواقع والو خلييوني جالسة ،حوطات ختها بذراعها وكملت ~ نفرح بيك اختي شوية مكتجيش عندي ديما
لكبيرة بغات تصدرها بأي وجه كان ، قالت بحيلة ~ وهي الا نضت عمرتي شي براد نتجمعو عليه لبنات باقين ناعسين كيف شفتي ختك جايا على صباح ماشي هو هذا الوقت ل كنفيقو فيه ؟؟
بلعت ريقها وتزيرات ولكن ما عند الميت ميدير قدام غسالو دارها هادي تقول مبغات وهي واخا عروسة ولدها كتبقى غير ساكنة معاهم فيها معندها تا شبر منها ديما غتبقى تحس براسها غريبة مدار ماكلتهم مشروكة ،جمعتت الوقفة تحت نظرات غلام الحادة كان باغي ينفاجر في وجههم كامل ولكن مراعي وبزااف
غير درقات عليهم وجها و حطت فاطنة يديها على جنابها وخرجت عينيها في غلام بحالا ريشة قدامها ماشي راجل بطول وعرض وهز يغطيها هي و لي فايتها في الغلض
فاطنة قلبها كان مهول و نجمة كتبقى بنتها و رباتها ماشي غير ختها ~… اسمع اولد ميمتو ديك البنت في يدي غتمشي و هاد الدار ما بقات ليها فيها گعاد طير و لا نزل راه دمي هاديك اما انت غا مخطط معاها بخط زناتي
جاوبها مشربن عندها زهر مكالمي روحو بزز اما يجري عليها وميحريش ~ لحد ساعة محتارمك حيت عندي فدار داكشي علاش وزني كلامك وعرفي كيفاش كتدوي راه راجل ختك لي قدامك ماشي عبيد عندك ،ياكما مسلفاني ساعة وجا تديها راه مرتي هاديك بشرع وبالقانون من نهار ل ضربت عليها داك خط زناتي لي كتدوي عليه مبقيتو كتسالو فيها حتى زغبة من شعرها برضاتي نخليها تشوفكم والا مبغيتش ترضاو بزز منكم جيتيني لصواب اا معام فيه للعيب انا مولاه
حتى هو ماشي ساهل و لا جغمة الما وتسرط زاد قرب ليها وقال هضرتو إلى هي خرجات عينيها هو قرب ليها بجبهتو و بعينين عامرين تحدي كثر منها ،قال اش عندو وسلام
فاطنة وساع مومو عينيها فيه وقالت كتطلعو وتنزلو ~ وياخويا ملي نتا سخون لهاد درجة ومفرعن دير حل لمرتك مع ختك ولا هاديك دمك مخليها تمسح فهاد بنت ناس صباطها كيف بغات ونتا تسوخر لور وتفرج بغيتيها تشد ركنة ولا ترزيك وترزيها فلي فكرشها
لكبيرة ضربتها النفس على بنتها ل سمعها يقول غا ضلموها وهي عارفة الجمل بما حمل غير كتعاما وكضرگ شمس بالغربال~ ايوا حدك تم راه بنتي هاديك ل سايرة من صباح تاهمي فيها وانا صابرة ليك عندك شي دليل بلي سحرت ليها ولا غا هضرة وسلام لكلام كلنا كنعرفو ليه افاطنةة واتاقاي الله وها حجر العافية و رميت عليك العار في هاد الصباح إلى ما بدلي ساعة بختها وخلي الوقت هانية هادشي راه مكيقبلو لا ربي ولا عبدو حشومة گاع يتگال هادشي ونتي في الدار الكبيرة و الزاوية الواحد يدخل ليها خاصو يدخل وهو موضي ونتي كتلوحي علينا الكذوب و البهتان في هاد العتبة وردي بالك ا فاطنة دعوتنا خايبة وحنا راه شرفة
فاطناه بضحكة مستفزة ~ شايلاه ادار الشرفة !! جبدت تصويرة نجمة من جيبها وقالت ~ هاد تصويرة كانت عند بنتك وداتها لواحد لفقيه كيسحر بغات تفارق ختي على.
ولدك وترزيها في شبابها علاش الله واعلم ، على أشمن شرفة كتدوي واس عارفة بحق لجواد ،راه حتى حنا شرفة و دمنا حمر ماشي مخلوض وعامر غدر … حنا مربين و ربينا ولادنا على خوف من لي خلقهم اما العبد بحالنا كنخرجو فيه واخا يبقى عرق فينا ،كنربيو ولادنا على القبلة ماشي سحر
حبل الحياة قصير ودوام هذا ، شحال قد الإنسان يصبر ويدير عين ميكة ، شحال قد الإنسان يمثل راسو صمك مكيسمعش باش يخلي عش حياتو الزوجية يكمل ، غايجي النهار لي الأسرار يتفضحو المستور يرجع مكشوف وينقلب السحر على الساحر ، نجمة بقلبها زوين والحنين ربي عاونها وجاب ليها وردية فطريقها فكات خبال حياتها وبينات برهان الحية ديال زهرة، ديريها غير زوينة إلى ربي بغى يفضحك راه فرمشة عين … نجمة سكتات على ضلم زهرة ليها بزاااف وخلاتها تطاولات عليها ووصلات بيها حتى لسحور باش تشتت ليها شملها وترزيييها فمستقبلها من بعد ربي ما خلى ضحكة ترسم فشفايفها والنور سعادة يضوي على وجهها وجات دابا بغات طفيها قبل ماتشعل ،تحرر ليها عيشتها وتسود ليها أيامها وتنغص عليها فرحتها بلي فكرشها ،هذا حال لي قلبو كحل، يتبسم فوجهك تبسيمة صفرة وهي حية تحت تبن سمها حار يقتل كرهها لنجمة قد بحور العالم علاش واش دارت ليها ربي لي عالم واش الغيرة من زينها ؟ ولا الغيرة حيت دات ليها خوها، رسمات عيبها معاها من نهار الأول شافوها من تما كرهاتها كره كبير محملاتش دخل بيناتهم وتكون منهم وفيهم لقاتها دريويشة وسكوتية وهذا حال السكوتي يعيا بالظلم ونهار يتفرگع يهز راسو ويطج هادشي لي بغاتو هيا تخوي ليهم الساحة باش قلبها يبرى ويرتاح ، وهاهي نجحات والعافية زندات وقدرت تخلق لخصام ولا بالمعنى الحرفي تقبات الورقة مع نجمة ، وخلات حبل الإحترام بين العائلات صعيب يرجع يتقاد….أما لكبيرة عارفة بنت كرشها اش كتسوى سحارة وبطابع ، وكانت متأكدة بلي مغتقيلش مرت ولدها حيت ما مرة ما زوج هددت وتحلفت عليها وهادي ايام غابرة رجليها متحطوش عندها فدار ولكن شنو دير غتجي مع البراني عليها اكيد لا غتزوق وتمدح وتدافع على دمها ولحمها واخا تعرف تحلف بهتان وكذوب،
فاهمة الحياة بالطريقة غالطة فعوض تنهي على المنكر وتحط بنتها قدامها تشبعها هضرة وتبعدها على نجمة دارت العكس ، خرجات عينيها فالكبيرة تحلف وتعطي القلبها ، شيطان يقول هادي هي شيطانة …متقولش استغفر الله العظيم ، وتمشي تنهي بنتها لا زايدة فيه ، وباغا تحشم بفاطنة وتحطها بوجها قدام غلام ، باغا تبين ليه بلي ختو بريئة من هاد الكلام وايني معامن جات فاطنة عارفة قوالب شارفات دغيا حطات ليها كل شي فالطبلة وجبدات ليها البرهان
لكبيرة كتشوف في تصويرة وكتضور في عينيها وتمثل تقول واقفة قدام الكاميرا ~ فاطنة جمعي عليا هادشي ديالك اش دارت ليك بنتي حتى جايا تبلاي عليها ، شكون كذب عليك ومنين بغات هي تجيب تصويرة نجمة
فاطنة بضحكة مستفزة دوات منرفزة ~ غتوريها اش دير ، كيف قدرت تخشي تصويرة ليها المرة اللولة بين حوايجها تا دابا دير لعجب منتصدمش فيها ومعندي علاش نتبلا عليها هي بذات ، بتحدي كتشوف في لكبيرة بنتك سحارة وتعالي حيديها ليا من فمي
غلام كان كيصوط كاره راسو أما نجمة كانت كتسمع كلشي دارت راسها غادا لكوزينة وبقات مخبية كتسنط ماهياش درية صغيرة غا يدوزوها عليها بزوج كلمات حگا والواد ختك توحشاتك وجات تشوفك ، عارفة ختها مزيان كبرات معاها ممعودينش ليها عليها ، الجدال ل داز بيناتهم داز كلو على وذنيها وغير سمعت حس السحر يديها بداو يترعدو وتخلعات خافت على راسها من شياطين الجن يأذيوها ،ياما سمعت قصص فاش كانت في المعمل وبنات تعذبو في حياتهم وباقين لدغبا كيعانيو ، الا خطاتها صحتها شكون بغا يهزها ويكون بيها وبلي فكرشها دابا مبقاتش بوحدها مخاصهاش تكون انانية خاصها تفكر فيها فولدها ولا بنتها وتنقدهم باش ميضيعوش كيف ضاعت هي ، تجمعو دموع فعينيها ودخلت لعندهم بصوت باكي كتشوف فغلام ل كان معصب ~ شنوو بغات مني ختك !! فاش اذيتها حتى تأذيني ، من نهار ل دخلت عندكم وهي محاملانيش ،مخلات مدارت باش تفرقنا ودابا وصلات بيها تسحر ليا علاش هادشي كامل ؟؟
جوبتها لكبيرة باندفاع مخنزرة فيها ~ حاشاك حتى تكون بنتي سحارة !! علاش غتبغي تاذيك مالها بايرة ولا محرومة من ل عندك
نجمة شافت فيها وجوبتها مخرجة عينيها ~ ختي مغاديش تكذب عليها انا عارفاها مزيان الا قالت هاد الهضرة مية مية كاينة مغتجبش وترمي عليها الباطل
لكبيرة شافت فغلام ل كيمشي ويجي فداك صالون سوق لعيالات حما ومراعي وداير الخاطر ومباغيش يندم على شي حاجة من بعد ويتسرع ، خاطباتو مو بعتاب وقالت ~ ختك كتعاير قدامك وكيصبنو فيها ونتا ساكت
معندك حكام وكلام على مرتك ، ضربها ليها بتخنزيرة حتى سرطت ل بقى من لكلام ومشا لعند فاطنة عيا ميكبح فنفسو ومبقاش قادر ،كانت واقفة وحداها نجمة ل ضربها ليها بشوفات حارين خلعوها ونطق تحت من سنانو ~ جايا كتدوي ومنوضية ليا الفتنة فقلب داري وكتغوتي غرضك تخرجي على ختك وتشتي عشها ولا شنو !!!
هو عارف ومتاكد ختو قبيحة ومتسواش ولكن عمرو توقع توصل بيها وتحفا ليها جرية انها تبغي تاذي اي واحد مهما كان ، باش غنتاكد بلي انا بصح ختي سحارة عطيني دليل ماشي غير. هضرة وتجعويق
فاطنة بإصرار ~ ناس ل وصلوها ليا مغاديش يكذبو عليها وزايدون مكيعرفوهاش ، شافت في نجمة وقالت ، سحار ل مشات عندو راجل صاحبتك وردية وهي ل جات دقات بابي الله يرضي عليها ، شافت تصويرتك وعاود ليها على ل جابتها ليه وملي وصفتها ليا عرفتها هي
لكبيرة ضربتها بضحكة هستيرية وقالت ~ الحمد لله بفمك قلتيها !! سحارة والكهنة نتوما ل مصاحبين معاهم وكتصحبو كلشي بحالكم ،عينيها شرار طالع منهم ودغيا خرجت نيابها ، قالت ليك بنتي سحارة يا رباعة سحارة هما جايين ترميو علينا باطلكم ،شافت فنجمة مخنزر ~ صافي حملتي وتمكنتي وخرجتي نيابك علينا رجعتينا ممزيانينش وختك المزيانة عمرتي كرشك وعضيتي فينا ،حركت راسها بتبوحيط ، صدقتي مافيك خير هادشي كلو فيلم دايراه مع ختك فاش عينك هاا !! تخرجيه من دار باه تحوزيه ليك بوحدك
بغات تقلب عليهم الگفة دغيا حلات نجمة فمها مصدومة من شنو كتسمع ممتيقاش معامن هي عايشة وكتشارك معاهم نعمة وحدة اش هاد لعگوزة لي كتكوي وتبخ فنفس الوقت ملقات باش تجاوبها وهي تنطق فاطنة ل ستفزها كلام لكبيرة ، وقفات حداها مابقى احترام بيناتهم ، حمرات فيها العين كتشوف فيها ونطقات ~ الفييلم هو لي دايراه انتي دابا وكدافعي على السحارة دبنتك اما حنا بعاد الله يحفظنا على الحرام ، كناكلو داكشي لي قسم لينا الله حامدينو وشاكرينو ختي معندها علاش تسيف عليكم وولدك الا خايفة عليه منها تا دابا حوزيه نتي نيت اما هي نهزها هي ولي فكرشها مغتغلبنيش كيف كبرتها نكبرو
قاطعها غلام شاعل من كلامها متصرطتش ليه ، أعصاب دنيا ودين تجمعو عليه فديك اللحظة محاول يتكالمي باش ميقولش شي حاجة تخصر خاطرها ساعة الحد وصل وعيا ~ الالة عرفي اش كتخرجي من فمك هادي لي كتهضري عليها مراتي وهازة ولدي فكرشها ماشي حنا فسوق دلال جايا باغا تدي وتربي ولات سيبة ، صبرت ليك بزاف ملي دخلتي وكندوز وصبر تقادا ودابا غنقوليك زوج كلمات يا اما تجلسي ضيفة معزوة مكرمة يا إما نساي طريق ل جابتك لهنا
نجمة معرفت باش تبلات بحالا صرفقتيها عارفة ختها نفسها عزيزة عندها وبزاف متقبلاتوش يجري عليها ،نطقت بصوت كان خافت وبدا بشوية بشوية يعلا ~ ياااك اغلام كتجري على ختي قداامي
فاطنة قادات حوايجها وقصدت الباب الا كرامتها متهانش ~ مقلتي عيب دارك خارجة ليك منها وختي راه نبهتها وهي تعرف مصلحتها لهلا دوزو بخير
ضربت فيهم وزادت بغات تبعها نجمة تجري وهو ويوقفها بصوتو ل كان بحال الرعد ~ تفوتي داك الباب تمشي معاها بمرة
صدمها بكلامو كيفاش نطق وجرى على ختها ، وهي متأكدة ختها كتقول غير لي كاين ولكن ديك الحر والفقصة باش هضرات فاطنة متقبلهاش ، أي إنسان فساعة غضب يسمع ديك الهضرة مغاديش يعجبو الحال سيغتو شخصية بحال غلام مرضاش تقول ليه ندي ختي ونهزها هي ولي فكرشها ، علاش هو ماشي راجلها ؟ ماشي عندو الحق فيها ؟ شكون هي لي تجي تا لوسط دارو وتلووح ليه كلامها ، زاد صدمها فاش نطق قايل ليها تعتبي الباب تمشي فخطرة ، حسات بقلبها شقوفة حداها ضورات وجها كتشوف فيه مكسورة الخاطر والقلب ورجعات وقفات قدام ختها ل كتلبس صندالتها قبل ماتخرج خلات ليه كلامها يبقى محفور فراسو على طول سنين ~ انت راجلي وعلى راسي وعينيا ، ونبقى محتارماك حتى لأخر أجل فيا ، ولكن عندي أخت وحدة تجري عليها حدايا بحال إلى جريتي عليا تا أنا أولد الناس !! وكيف انت مرضيتيش ختك تهان حداك واخا عارفها ديرها وتفوتها تا أنا مرضاش ختي تهان فدار راجلي وانا فيها ، إلى مزال باغيني راك عارف فين تلقاني !!
طلعت لبست جلابتها وخرجات مع ختها قلبها مهرس شقوفة دموع فعينيها مجموعين ، وشوية شوية بداو ينزلو على خدودها بقوة النفس مقدراتش طلعها كتحس بروحها غادي تزهق من جسدها باغا تغوت تسب تعاير ومقدراش ،دغيا شدات فيها فاطنة مگوداها معاها وخرجات ،لكبيرة تسلتت من حداه دخلت عند بناتها ل كانو يتسنطو ورا لباب فحين غلام جلس فوق صداري نفسو ضياقت عليه شعور غريب ممفهومش تملكو خاطرو عيا ..شاد راسو بين يديه كيفكر فيها وفحياتهم لي من نهار تزوج بيها وهما بين سين والجيم والمشاكل ل مكيتقضاوش ….اما خليفة كان فبيتو وسمع كلشي وضرو قلبو وخاطرو على ولدو ل ملحق يتهنى ويفرح جات عاصفة طيرت ليه عش الزوجية ل بدا يبني وخلاتو ناقص بلا مرتو
فرمشة عين جَوْهُمْ تقلب وحياتهم ل كانت ملونة بألوان وردية ظلامت في عينيهم والضحكة لي كانو راسمينها تمحات والفرحة تلاشات …هادشي ل وقع ميرضي تا واحد كيخاف الله ، وخليفة منهم غاضو حالو وطلع ليه دم من مرتو وبناتو عيا يسايس ويدوز ويقول يكبرو ويديرو عقلهم ساعة والو ل فيه شي طبع كيبقى فيه حتى يديه معاه ، كون مزال قادر يهز سمطتو ويعاود ليهم ترابي من اول وجديد ميترددش بالحق خانتو صحتو وعيا بقى راس مالو غير لسانو وكلامو ، كان جالس فبيتو كيتسنى فمرتو تعطيه وجهها باش ينقي ليها وذنبها ويوريها ذنوبها ل غيوصلوها لقعر جهنم بعينين مغمضين ، شافها تعطلت وهو ينادي عليها بأعلى رنة صوت باقا عندو جهد الا جهد الله بزز سمعاتو جات تجري قلبها يضرب فالمية دخلات وجهها مخطوف مازال كدير بحسابو وكتخاف منو شحال سلخها فأيامهم بزوج ، دخلت تقاد في كمايم قفطانها وكضحك ضحكة صفرة تبرد بيها على فعايل بنتها قالت وهي كتقرب منو وعينيها على ملامح وجهو ل مكيبشروش بالخير ~ سي خليفة فقتي !!؟ فطورك دابا يوجد ؟؟ بغات تهرب وهو يوقفها بكلامو ، رمقها بشوفة حادة وقال بصوت غليظ ~ بقا ليا شي نعاس معاكم لا نتي لا بنتك أ دوي ؟؟ باستهزاء قال : قالت ليك فطورك يوجد فين عندو منين يدوز، محشوماش عليكم شنو بغيتو عند ديك البنت فاش وصلتكم مال بنتك على هاد لفعايل باقا مبغاتش تحشم؟؟ شحال من مرة تبريت منها واش بغاتني نضرب عليها من حالة مدنية باش ترتاح ؟؟
بلعت ريقها معرفت باش تجاوبو بقات كدور فعينيها وتعرق وتنشف قدامو ،متوترة ومعارفة متقدم ولا توخر ،بنتها خرجات ليها من جنب، قربات منو باغة تسايس معاه ونطقات وهي محنية عند ركبتو فين كان جالس حاطة يدها عليه ~ سي خليفة البنت حنا معارفينهاش واش بصح هادشي دارتو ولا باطل طيحاتو عليها فاطنة فهاد الصباح …
قاطعها نافض يديه من يديها، ونطق وهو محمر فيها لعين ~ شكون ولد لاخور انا ولا هي علاه انا مكنعرفش زريعتي اش كتسوى غاتجي هاد فاطنة طيح عليها الباطل غا هاكاك ؟ هز يدو ضاغط على كلامو ونطق ~ انتي عارفة وانا عارف ديك البنت اش كتسوى مزيان مجرمة ومعندها دين لي مشات تسحر لمرات خوها تشتت ليه شملو تجي دابا باغا توريني فيها ،كتجي من بنتك؟ باغين ترزييوني فولدي يخوي عليا الدار ويحرمني منو تا هو ؟ عاجبك لي دارت اشريفة
ضارت بيها الدنيا ملي تمعنات في هضرتو مزيان ، عندو الحق يقدر يخوي ويمشي عليها من دار حيت مغيجيش ويفرط فمرتو وولدو مغيجيش ويرجع لنقطة الصفر من اول وجديد مغيرجعش ديال راسو بعدما ولف نجمة فحياتوو ، مقدرتش تفكر فيها حتى فبالها نذبت حظها وضربات على فخاضها فايقة من الصدمة ووقفات كترعد ~ لا إلا هادي!! ولدي هنا يبقى معايا فالدار ، وانا لي غادي نحل هاد الموشكيل، إلى كانت غير زهرة غادي نتبرى فيها تشد تيقارها ورجليها متبقاش تحطهم فهاد الدار غير كون مرتاح اعمارة الدار
خنزز فيها طالع ليه دم من المنكر لي كيوقع فدارو ومقادش يوقفو~ مشفت راحة معاكم سمعيني نقوليك هز صبعو كيحرك فيه بتهديد ، غتوصلي ليها هضرتي بالحرف وتقولي ليها راك كتقلبي على شي سخط تديه من عندي !! هاد دار تضرب عليها من ساعة اليوم ونهار توريني وجهها فيها نلوحها لزنقة ونتبرا فيها الا يوم دين ونتي عارفاني نديرها
بغات تلحون عليه وتطيب خاطرو بلكلام الرطب بالحق كان شاعل غوت بجهد في وجهها وقال ~ هضرتك خليها عندك يا إما تردعي بناتك ولا والله ميعجبك حال معاهم هانا علمتك ونتي عارفاني اش كنسوى على كبرك نصيفط عند خوتك ونجيب لالاك لدار مرا تصونها وتجمع شملها ماشي تسكت على تفراقو
صدمها بهضرتو تغرغرو عينيها وبدات تنحط عليه تما ~ سخيتي بيا وهانت عليك العشرة !! وانا مالي فهادشي كلو الا بنتك مولات الفعلة انا شنو ذنبي
قاطع هضرتها وقال ~ ذنبك معرفتيش تربي بناتك !! لمرا ل متنهي ومتوري منحسبهاش مرا
بغات تزيد تناقش معاه وهو يوقف و مقاطعها بمعنى سكتي وقال ~ خرجي وسدي داك الباب وصيفطي ليا رحمة وجهك منشوفوش عندي فالبيت تا تفكي حريرتك
خرجات لكبيرة كتعتر فجلايلها ، هزات جلابيتها وخرجات كتجري من الدار قاصدا بنتها ،خاصها ضروري تحل هاد الموشكيل قبل مايزيد يكبر ،كلش تقبلو الا راجلها وولدها يضيعو منها متقبلهاش …كلام خليفة خلعها نبرة صوتو وهو كيدوي كانت جدية وهي عارفاه مزيان عشرة زمان غادين لثلاثين عام كتعرفو من شوفت عينو شنو بغا يگول ،تنهدت وهي فطريق كتخمم كيف دير تفك خبال حياتها ، فين كانت وفين ولات قبل ميموت ولدها معاوية كانت راضية على حياتها وعاجباها ،راجل كيبغيها وصاينها حاط عليها وحاطة عليه الراس وولاد مرضيين سامعين هضرتها المرحوم عمرو مخصر ليها كان ل قالت ليه عليه يقول اه ، مزال غلام قاصح وراسو يابس نهار جا وفاتحها في موضوع زواجو فرحات ليه وقالت الله على راحة منها نعمر ليه دارو ومنها نجيب ل تقابلو وتوجد ليه ساعة متمشي فين مشاك الله هاداك مشا لدارو دايمة ول عمرها نوات تزوجو هو ل تزوج ضنات حاجة ووقعات فحاجة اخرا
معاوية كان تحت يديها وعجينتها اما هادا مكيحيرش فيها كيدير ل مسلكو ولايق ليه مكيسكتش على ل مكيعجبوش ومكيدوزهاش بساهل ، غادا في الطريق كانت زهرة ساكنة قريبة ليها معقلتش على راسها امتى وصلت قدام بابها بقوة تخمام صافي دات ليا ولدي غيعزل ويخليني ،انا ل كبرت وصهرت ورضيتو راجل تجي مرا غير لبارح تدي الجمل بما حمل ، صافي قلبات عليا الراجل جات غا لبارح وبغا يلوحني مع بناتوو على ودها ،هضرة كثيرة دازت في مخيلتها حتى راسها كان غيطرطق كتدوي بوحدها بحال لمسطية
خبطت فيال باب على جهدها حتى سمعت صوت تخلاف عاد زولت يديها كانت لوسة زهرة هي ل حلت عليها لابسة بيجامة وزيف ودايرة طابلية على جنابها كيف ديما ، شافت لكبيرة وضحكت في وجهها وتحنت سلمت عليها ~ كيدايرة اختي لكبيرة لاباس عليك
دخلت مدرمة مرفوعة بعدما سلمت عليها سلام ناقص وقالت ~ واحد لالة مولاتي مازال ناعسة كتشخر !!
خرجت من لبيت كتاوب شعر مطلوق والعينين مجبدين بالكحل لابسة بيجامة غطرطق عليها ، شافت فلكبيرة وهي تخلع ممولفاش مها تجي لعندها ~ ميي !! ياك لاباس واقعة لبا ولا خوتي شي حاجة عمرها كانت ليك مصبحة عليا !!
حطات يدها على جنابها مگرفضة وقالت بصوت عالي ~ نعسي وكوزي ورتاحي نتي ل جات معاك اما انا من نهار ولدتك مشفت نهار زين
خرجت في مها عينيها وغمزت بمعنى سكتي وقالت للوستها ل كانت واقفة كتسمع ~ سيري وجدي لينا لفطور ومتجيبي صينيية حتى نقولها ليك
دارت ل قالت ليها وهي تقدر تقول لا ولا ترفض واخا دار دار خوها ولكن كلام لكبير ديال زهرة ، راجلها مكيدوي حتى تعطي هي رأيها في الحاجة مجلسة ختو معاها فدار كبرت وبلا زواج ماشي حبا فيها وانما جايباها تراسة تخدم وتشقى عليها باش هي تديع وتخرج وتخلي لي يقابل ليها دراري حتى تجي وقت ل رشقت ليها ، دخلت زهرة كتنگر لصالون كتصاوب في شعرها ومعاجبها حال~ عيبنا ميديه غيرنا لاش كتدوي حدا هاديك وهي باغا غا متعاود
حركت ليها راسها بطنز وقالت ~ ويلي مي !! زعمة راك كتخافي من هضرة الناس غا قولي ليا ابنت كرشي انا فاش اذيتك فاش ضريتك علاش باغا تشتي ليا شملي وشمل ولدي ها ؟؟
زهرة ضيقت عينيها باستفسار وجمعت راسها بزيف وهي كتدوي ~ اويلي امي مالك على صباح شكون عمرك عليا صاافي متكون غا لمزابية السحارة قلبتك عليا وعمراتك !!
جوبتها وقالت ~ سحارة هي ل ولدت من كرشي، ادوي ؟؟ مكفاكش لسانك سليط خدمتي تشيطين ديالك باغا تسحري لخوك وتفارقيه مع مرتو
قلبها بدا يضرب وملامح وجهها تبدلو فرمشة عين بدات كدور فعينيها وتقلب على حجة دافع بيها على راسها ~ اش كتقولي امي اشمن سحور شكون قاليك هاد الهضرة واش هاد الباطل تحط عليا ؟؟
كتفكر مع راسها وكتقول شكون يكون وصلها ليها، جوبتها لكبيرة كتشالي بيدها ~ديريها غا زوينة ابنيتي توصل توصل ،ملي ربي بغا يفضحك داك تال عند راجل صاحبتها ل هزتها سخونة وقالتها لفاطنة خلاتها جايا تسمعنا حروشية صوتها وتبودر علينا مع صباح
نوضتي ليا القيامة في الدار فرتكتي لخوك شمل وفارقتيه مع مرتو بغيت نعرف غير شنو دارت ليك من ديما نشوف ونسكت ونجي منكم بدات تخبط في جنابها وتنذب حناكها ~ نكذب ونغطي عليكم نحلف بالله غير على ودكم ونتوما مكاينينش هنا اشووفي هاه ،خرجت فيها عينيها وقالت مطرطقاهم ~ راه ماشي نتي ولدتك وخوك خريتو هاداك راه هو عينيا ل كنشوف بيهم على ودو نحافيك
هاد لكلام جا معطل كون ناضت معاها نوضة ديال صح من الاول مغيوصلوش لهادشي دابا فات لفوت ، عطاتها زهرة لكذوب ول تبوحيط كيف ديما ~ غا كذوب امي !! ياك مرت سحار صاحبة نجمة ايوا دايرينها غا بلعاني مكتحملنيش مرت ولدك من نهارها مكتشمنيش معفرة وعاجبها زينها، سركم نتوما ل بغيتوها ليه كون جات عليا نزوجو لالاها هاهي نعتت ليها لكوزينة وقالت ~ هازا ليا دار والولاد وختها حارة بحالها رجليك تغسلهم وتبوسهم ليك بالحق سركم وحدة بحال هاديك شطحاتك وخلاتك بالخلعة جايا لعندي كترعدي ، من عندي انا الله يجعلها تبقى منين جات عاد غنرتاح
لكبيرة تشهمت خبطت كرشها ونطقت ~ هاكي اكرشي هاكي اكرشي ومولدتي انا فهمو كندادي وهو فتقلاع وتادي !! انا ل غيصيفطني باك وبسبابك ابنت لحرام ، تلاحت عليها كتعض وتضرب وتخبط وزهرة مبعدة يديها وكتغوت فوجه مها ~ اويلي واش تصطيتي صافي سحورها قدا فيكم !! وامي راه معامن شفتك معامن شبهتك الا صاحبتها سحارة مغتكونش كتخدم ليها واتي سيري جري على راسك وعلى ولدك ل قلبتو عليك وخلاتو غير يشوفها يقول لعيد غدا ،ونتي عاضة فيا انا كون لخدمة ل خدمت ليها بصح تقضات كون تهنيتي منها ديما بالحق عندها زهر فلتات هاد المرة
جلست فجنب سداري حداها سخفانة حاطة يدها فوق راسها ~ شهمتيني ابنتي عرفتك مولاتها وكذبت راسي شحال من مرة قلتيها ولكن لا الكبدة مخلاتنيش نتيق بلي بنتي تاذي شي حد ، غوتت وخرجت عيني على ودك وهانا جبتها فراسي ، جمعت الوقفة وقالت ~ سمعي نقوليك من ساعة اليوم متعتبيش باب داري وباك كيقوليك راك قلبتي على سخطو ،نساينا حد الله بينا وبين ديك الطريق انا مبرية منك
لاحت ليها كلامها وعطاتها بظهر وخرجت ،جبدت رجليها على سداري مبردة عارفة مها غير معصبة تخليهم حتى يبردو تبوس يديهم وبزوج دمعات ينساو ل فات
كيف كل يوم من نهار مشات النجمة ل دخلت وسط ظلامو ونوراتو مكيدخل لدار حتى كلشي كينعس ، ولا كيبان ليه البيت غير بلاصة كينعس فيها بارد وكحل فعينيه ، كيجي و كيتلاح فوق ناموسية ينعس وغير يحل عينو يخرج منو مقادرش يجلس بوعيو فيه ،مبقى لا ياكل معاهم لا يجمع ، شبعاااان غا گارو ريحتو كتشم من بعد زوج دروبة فينما يتفكر كلامو ليها وكيفاش قصح معاها وهانت عليه يخنق ريتو بدخان كينتاقم من راسو ولا كيتلف مجاجو الله واعلم ل عارف بلي كلام فاطنة عصبو وحسسو بلي هو لا شيء من حقو يتقلق ، من حقو يدافع على ولدو ولا بنتو لي باقي مجا لهاد الدنيا ، علاش هو ميت ولا معدوم باش يخلي فاطنة تربيه ، علاش هو فهاد الفيلم كامل مكاينش علاش ميديروش بحسابو علاش وعلاش وعلاش ، كان طالع في الدروج بخطوات ثقال عيان بالكاد كيهز رجليه ، بلاما يهز عينو فطبقة فين كاينين دارهم ، غادي طالع نيشان لبيتو مباغي يشوف حد ولا يدوي مع حد حتى سمع صوت باه كيغوت عليه ، كان في الصالون جالس كيتسناه
بلا كلمة بلا زوج هز فيه عينو وحط ايدو على سداري حداه بمعنى جلس …غلام تنهد وجلس حداه ، حط خليفة ايد على ظهرو ومطلعها ومنزلها بالراحة وايد على فخدو وقال بجبر خاطر ~ المرضي ديالي لمسخن كتافي وكتاف خوتو
الصمت سيد الموقف معندو باش يجاوبو مكاينش الخاطر للهضرة غير حاني راسو وعاقد حجبانو وكيسمع ، تقاد خليفة في الجلسة وقال ~ اسمع اولدي سوق النسا سوق مطيار ملي تكون فيه دخل صمك وخرج عما ، خليهم بيناتهم منهم لبعضياتهم نتا متجي من حد لي دازت قدام عينك وقف عليها وندير لمولاهاا الاعتبار …أما ليي دازت وراك دير عين ميكة حيت هداك غير حديث لعيلات قدما كبر غيصغار
وختك ربيعنا وسقيناه وبسكاتنا وطولت بالنا طولناه منقدرو نحبسو السقا منقدرو نقطعوه …..شوكة ووحلت في اللها
ولكن هادشي مكيعنيش غنسمعو ونسكتو وندوزو لا كاين كلام وكلام كثير وانا هاد المرة مدوزتهاش ليها وراني صيفط ليها مك نقات ليها وذنيها ونقيتهم ليها حتى هي حيت مردعتهم من اللول كيقول ربط تلقى متسيب وزهرة ضسرناها بزاف
ظحك باستهزاء من سمع كلمة صيفط مك وحنحن وقال ~…واش مي ليي دافعت عل ختي صيفطيها تجيب لمرتي حقها و طفي هاد النار اللي گدات فيا ، مي اللي كانت فلول باغاها ليا وعجباها وملي بغيتها أنا تقلبت عليها …مي لي مفهمتهاش واش باغاني غير بوحدي ليها ولخوتي لكن لبنت الناس لا ….دابا كون ختي دارو ليها ناسها هادشي كانت غتسكت وتخلي الظلم ،تنهد بصوت عالي ودوا مقجوج نبرة صوتو حزينة وكتقطع في القلب ~وااابويا أنا عييييت حتى قلت ربيت الريش وتانا ولا عندي قن فين نسخن جنابي ونعرف فين نحط حوايجي تانا وليت نقول غندير التريكة وهانتا تشوف على عينيك شنو وقع علاش مفرحوش ليا ،ياك نتوما ل بغيتوني نتزوج ونجمع راسي نتوما ل ختاريتو هاد بنت ناس ونوضتو القيامة باش نتزوجها شنو تبدل واش نساو ولا شنو واش انا ختاريت واش انا ل طلبت ومت على زواج ياك البنت بيدكم جبتوها وبززتو عليا نتزوجها وخيرتوني بين سخط ورضا شنو ل تبدل دابا علاش ملي القلب مال والگسدة رتاحت كبرو هاد الراحة فيا ؟؟….
عض على فكو وسكت شوية وشاف بعيد ورجع قال ~ ملي كنت غير دايع وكل مرة بايت في قنت مرة فوق ياجورة مرة في الطموبيل حتى من الروضة نعست فيها ديك الساعة كانت التبسيمة كبيرة وكلشي فرحان ودابا ملي وليت هاني مع مخي قتلوني بنبازاتهم
شاف في باه ونطق بحدة واخد قرارو ~ اسيدي الا مبغاوهاش مرحبا أنا غنخرج نكري ليها وعمرهم يشوفو وجهها ووواجبي من جيهتكم غنقوم بيه غنجيب ل ناقصكم حتى يدي مول الأمانة أمانتو حيت انا مغاديش نلوحها مغنتعداش على ولية معندها حتى حد فدنيا ومغنخلي حد يتعدى عليا واخا نعاير ونغوت ونجري عليها راه غير من فوق الگلب انا ماشي ولد لحرام ونتا عارفني مزيان
نقز باه من بلاصتو بخوف ميتخيلش دار بلا ولدو ، ووقف قدامو وقال بترجي ~ لالالا هادي لي عمرها تكون نتا هو عمود هاد الدار وعمرك تخويها ولكان على ختك عمرها توصلها وهادي كلمة مني غير رجع مراتك والباقي غيتحل
وهنا فين عواجت الفگوصة ،غتبغي تجي ليه وتنسى شنو خرج من فمو ،حالتو من جهتها عالم بيها غا الله شابك يدو مزير عليهم ومكنزز على سنانو ،فهمو خليفة وهو يدوي مبرد عليه ورجع جلس حداه ~اللسان مافيه عظم اولدي وساعة الشيطان كيحظر نهدرو مع خوها وهو مول العقل واكيد غيدخل بخيط بيض نتا مترفد هم لوالو كلشي غيرجع كيف كان !!
عض على جنب فمو بنرفزة وقال بعدما ضغط على بلاطو كان محطوط فوق طبلة وقال ~ الا رجع هذا بحال قبل حتى انا غنرجع ، ساط بصوت مسموع ووقف بعدما باس على راس باه ~ الله يخليك ليا ابويا ؟؟ نتا بعدا رافد همي
ربت على كتفو بعينين مغرغين وقال حابس دمعتو ~ طلع اولدي رتاااح وغدا مدبرها حكيم !!
غير خرج غلام هبطو دموع من عينين خليفة بقى فيه ولدو ،هضرتو حلت عينيه على شحال من حاجة كانت ضاراه وهما مسايقين ليها خبار ،كانو باغينها غا باردة من عندو ومحاسينش بيه حيت ماشي كثير شكوى كيكتم فقلبو وكيتو كتكبر معاه ماشي غير هو ل كان كيبكي لكبيرة كاع الهضرة دازت على وذنيها …من نهار النقاش وهي حاضية معاه معاش دخل ومعاش خرج وكيف شافتو دخل عند باه تسنطات عليهم و هضرتو كانت بحال خنجر تغرس ليها فقلبها وخلاتها تبكي دم ،هاد الايام دازو عليها ثقال من جهة راجلها ل مقاطع كلامها ومن جهة ولدها ل مبقاتش شافتو ولا سمعت صوتو ولات غا ضور وتبكي فحال تربية وتصلي وتشكي ، والهضرة ل سمعت زادت على ما بيها دخلت على خليفة وتحنات على ركابيه كتبكي ~ ها العار اخويا لما سمح ليا واخا مدايراش علاش ومن غدا نمشي ونداخل على نجمة ونرجعها لدار غير نرجعو كيف كنا قبل راني كنتقطع وكنتشوى من زوج جوايه
ضور عليها وجهو ووقف ~ داك سووق غتخرجي منو بعيد عليك ولي عوروه صغار غيقادوه لكبار غا كوني هانية
قال كلامو وضرب فيها وزاد لبيتو مخليها بوحدها شربها من نفس الكاس ل شربت منو نجمة
رجعت نجمة لعادتها لقديمة ،مدمرة وغير كتبكي وحاسة بدنيا كحلة فعينيها حزنها هاد المرة كان أضعاف ل حسات بيه قبل ، معنوياتها كانو فالحضيض مكمل عليها الوحم وقوة التفكير ل غتسطيها ، مقدرتش تتيق بلي ل عاشتو مع غلام ول حسات بيه كان كذوب ونزوة حيث داكشي ل كانت كتشوف فعينيه غير واخا عمرو قاليها كنبغيك ولكن كان كيحسسها بقيمتها عندو من معاملتو ليها وبقربو منها كيفاش غيجي بسهولة ويتخلى عليها كيفاش قدر ينطق ويقول كلامو يجري على ختها ويجري عليها معاها ، مهامهاش زهرة وشنو حفرت وراها قدما همها راجلها ل كانت كتسنى منو يحميها ظار ضظهرو ليها ومرة اخرا كيخدلها ، ل فايتين قدرات تدوزهم ولكن هادي حاسة بيها ثقيلة وصعيب تغفر
صعيب تسمح ليه وترجع تضحك وتشوف فعينيه ،حاسة بيه لاحها مع ل فكرشها فوقت محتاجاه فيه محتاجة اهتمامو ورعايتو وطبطتو ،محتاجة راجلها حداها تفشش وتدلع عليه ولكن كيف ديما كتقدر اي عاصفة تبعترهم وتلوح كل واحد منهم لقنت وتفرقهم يمكن مزال رابط ل كيجمع بيناتهم ما قوا ورجع متين يمكن اهتمام بوحدو مكافيش بالحق ل كتحس بيه من جهتو ماشي غير اهتمام ولات كتحس بيه جزء كيتجزء منها ملي كتشوفو قلبها كيضرب بجهد كتوحشو فقربو وبعدو
ولات كتشوف دنيا فعينيه ، ليالي ل دوزتهم بعيدة عليه كانت كتحارب فيهم مع نعاس والتفكير ،حست براسها ذبلت فغياب الساقي ل كيرويها من حبو واهتمامو مرة كتقول غنسى ل وقع وندوز كيف كل مرة ومرة كتحقد وكتقول هادي اخر مرة وملي كترجع تفكر فالولد ل جامعهم كتلقى بلي معندها متعطيه شكون غيهزها هي وياه ميمكنش ترجع عالة على ختها من جديد قبل كانت خدامة ودابا شكون غيصرف عليهم كاملين حتى من عبد الله من نهار جات مطيب خاطرها بكلمة وقال مالك حكي ليا وعاودي وخوي قلبك عليا ولات عايشة فدوامة وفكابوس معارفاش امتى غتفيق منو …
قدرت من جديد تغمض عينيها بعد محاولات عديدة فشلت نعست محطمة ودموعها على خدها وفاقت عليهم مزال مفزگين مخدتها ناضت على ايدين ختها كتفيق فيها تنوض تفطر فاطنة ل دايرة خمسة على فمها ومجابدة معاها تا موضوع كتوجد وتحط ليها ومخلياها على خاطرها ،حطت ل قسم الله فوق طبلة خبز واتاي وزيت كيف كل نهار ناضت نجمة بعدما صبحات على ختها بصوت باح وعيان غسلت وجهها وجلست حداها كتدوز دغامي بزز كتقوت على قبل ل فكرشها اما الا جات عليها معندو منين يدوز ، سالاو لفطور مشات فاطنة ترد لغدا وتعجن ونجمة شقات علاش قدات مكايسة على راسها وواخا تبغي دير ما كثر عيانة ومرهقة وطاقتها تستنزفات بقوة المشاكيل شوية كيسمعو دقان في الباب بلاما تحس طلات من شرجم اشوف شكون براسها عريان
بلاما تحس وتوعى على راسها طلات من الشرجم براسها عريان عقلها باش تفكر بيه كان مرفوع ومقاداش تركز فشنو كدير تصرفت بلا هواها حتى شافت شكون عاد ستوعات على راسها كان بابا عبد الهادي ل واقف قدام الباب ، لاحت ليه ساروت ومشات لاحت عليها زيفها ووقفت معرضة ليه تستقبلو بعدما علمت فاطنة بمجيتو ، كانت عارفة سباب هاد المجية اكيد وصلاتو لخبار بشي طريقة،
تنهدات بتعب ورسمات ابتسامة مزيفة تضحك عليه بيها دخل هاز فيدو ميكات عامرين ميمكنش يدخل على خواتاتو خاوي ولفهم قاعدة وداو عليها ، نطق بصوت عالي كيف عوايدو وقال ~ وااحد السلام وعليكم !!
تحنات نجمة على يديه باستها ليه وباستو فكتفو وجوبت تحت منها ~ وعليكم السلام ، بابا لاباس عليك صحيحتك مي ، مالين دار !!
هز يدو معنقها من كتافها وقال ~ جمعي كلشي وقولي بخير !! واحد فاطنة مكيناش ؟؟
مزال مكملها تمات خارجة من الكوزينة كتمسح فيديها بسربيتة ~ مرحبا مرحبا زارتنا البركة اخويا !! سلمت عليه وقالت بعتاب ولوم ، باينة جابتك غا نجمة اما والله متدق بابي
طبطب على كتفها بطيب خاطر وقال ~ غا مع مشاغل الدنيا اختي مكنساليش ، اما نفوتك لهيه
دخلو جلسو في الصالون نجمة فجنبو حادرة راسها مقاداش تهز عينها فيه حيت فاضحينها بغيمة الحزن ل ساكناهم ، وفاطنة فجنبو الثاني غير كتشوف وكتسنى فيه يبدا الهضرة ، كسرات الصمت وهي توقف وقالت بغات تخليه على خاطرو مع نجمة ~ نمشي نوجد واحد كويس اتاي نجلسو عليه علاما يطيب لغدا !!
وقفها بكلامو وهو كيشوف فنجمة ~ جلسي نتي اختي بغيتك !! ها بنتي تعمرو ليا نشربو من يدها شحال مبقات صاوباتو توحشت مذاقو
بابتسامة باهتة ناضت مرجعة زيف ل طاح ورا ظهرها ونطقت ~ هي دابا اخويا !!
خلاها حتى خرجت وهو يتقاد في الجلسة وشاف فختو مقابل معاها ~ اش هادشي واقع !! مال نجمة مع راجلها ؟؟
جمعت حجبانها دغيا وجوباتو بتساؤل مخسرة سيفتها ~ شكون وصل ليك لخبار ؟؟
عبد الهادي ستغفر الله وقال ~ مبقاتش فشكون وصلها ليا يا هاد لمرا بقات في المفيد ، شنو طاري عودي ليا شنو كاين من فمك باش نعرف كيفاش نتصرف
تنهدت وهزات كتافها وقالت ليه بندم وحسرة كبيرة ~ اش غنقول ليك اخويا ما هما نساب طحنا فيهم غير ضاعت الدرية
من بين يدينا، خبطت على صدرها~ ندمت على النهار لول لي قلت ليها مرحبا يجيو ودخلتهم لداري و قبلنا بهاد تزاويجا كون عكست ليها كون راها عايشة بخير عطا الله ولاد ناس في دنيا
تبدلو ملامح وجهو وتشطن من هضرت ختو عارف فاطنة ميمكنش دير من الحبة قبة ، مسح جبهتو من لعرق بسباب الصهدة ل طلعاتو وقال ~ فهميني شنو وقع لهادشي كلو، انا جا عندي هاد صباح راجلها قاليا راه وقع نقاش بيناتهم ومشات معاك من دار وبلي باغي يجي مع باه هاد لعشية يرجعها
فاطنة عوجت فمها طالع ليها منو دم ~ معندو ما يجي يدير عندي ،بدات تولول وتمص في شفايفها ياندامتي بان ليا لبرهان لمرة لولة فاش مات راجلها ، كان عليا ديك ساع نشدها من شعرها ونجرها معايا نكتفها ولا ندگدگها معندها مدير بيهم ، شافت فيه لقاتو مضيق عينيه كيتسناها تدوي وبدات تعاود ليهم شنو وقع ومع كل كلمة كيگرن ويعقد جبهتو ختمت هضرتها وقالت ، ديك العدوزة ودوك طفايلات ممعاهم عشرة ، شوف حالة البنت كيف رجعات كانت هاكا اه ؟؟ نتا كتعرفها كثر مني
وراجلها شنو قال فهادشي ، نطق بيها عبد الهادي لفاطنة وهي تجاوبو كتضحك باستهزاء ~ شنو عندو ميقول وقف مصدوم في هضرتي ومنطقش بالحرف خلا ساس لكلام وشد فقزيبت لهضرة قالتها وعضات على شفايفها ملي شافت تخنزيرة خوها وقالت ~ غا تزبقت ليا اخويا !!
قلبت ليه دغيا الهضرة وكملت كلامها ، كي قلت ليك خلا ساع الموضوع وشد فالكلمة ل قلت نديها ونكبر ل فكرشها كيف كبرتها
شابك خوها حجبانو بعدم فهم وقال بتساؤل ~ كييفاش ل فكرشها ؟؟ واش !!
زفرت بأعلى صوت وجوبتو ~ اه اخويا حاملة !!
معرف واش يفرح لختو ولا يكعا على حالها تنهد وقال ~ لا حول ولا قوة الا بالله العلي العظيم , اش بغات عندهم هاد ختو شنو دارت ليها هاد البنت باش تجازيها هاك ياك حسناات ليها بواليديها علاش تردو ليها بالمنكر
فاطنة ~ قليلة خوف الله اخويا وخايبة وواعرة شفتها وميزتها من اول محطت رجليها فعتبتي كتشوف لفوق مكرهاتش تتقب سقف بالكبر ل فيها وزادتها نهار مات راجلها لول جاياني بلا حشما بلا حيا حگا والواد اراو دهاز خويا ل مات وكملتها بالمعيور مخلات فيها يا قتالة رجالة يا المنحوسة اوديي الهضرة كثيرة وسكات حسن راه غا مؤخرا بغات تفارقها مع راجلها وملي مصورت والو مشات لطريق سحور ومالنا على هاد لقرع نمشطو ليه راسو واخا يكون هاد الراجل ل مخلقو مخلق غيرو
قاطع هضرتها معجبو حال ~ تقاي الله اختي دابا راه ولينا في تيلاد جاي في طريق واش بغيتيها تكبرو بلا اب هاا ؟؟ نسيتي مداز عليك نتي ملي مات المرحوم وخلا فعنقك ولاد صغار شكون عقل عليك !!
تغرغرو عينيها ملي فكرها فالذي مضى ايام صعيبة دازت منها متبغيهاش لعدوها تكرفصت وتمرمدت ودازو عليها نهارات ملقات متلبس فيهم وليداتهما كانت تصبن حوايجهم وتكمدهم في مانط حتى ينشفو وترجع تلبسهم ليهم ، مسحت على عينيها قبل متطيح دمعتها وقالت ~ لهلا يجعل ايامها بحال ايامي !! الله يخليني ليها حية ….
قاطعها بالغوات ~ الالة هاد الهضرة معندي مندير بيها راجلها شنو ذنبو يتحرم من ولدو ختو شرانيا وهو مالو
فاطنة بعصبية ~ سمعني نقوليك اخويا الراجل هو ل يدير لمرتو لعز اما الاكان يسكت على تمرميدها غيبقى عند مو نيت محتاجة بيه ،راه دقا والحين خسرت عليها كلمة باغا تقلبي ولدي عليا ودرتي سبة
نتي وختك بسحور متيقوش هضرتي واخا غا شوية هادشي ل بقى فيا
عبد الهادي شابك ايديه فحيرة من امرو كيفكر ~ ايوا وهي شنو دارت من ورا هاد الهضرة هزات صاكها وجات معاك هذا هو ردان لعقل ل رديتي ليها
مهما كان هاديك راه دارها وهاداك راه راجلها ياك مضربها ما مهرسها ممخليها بجوع غا مو قالت هاد الهضرة نضتي نتي جريتيها وخرجتو شنو بغاتو يبيع مو ولا يلوحها في زبل
فاطنة نطقت بلا شعور ~ مدى منهم ختارو عيالاتهم وفضلوهم على مواتهم وعلاش نجمة متكونش منهم ولا حيت حتا غا دراوش غا بنات تاجة لمسكينة
عرفها كتمعني على عبد الله وبنتو وهو يجمع الوقفة متفادي يزيد يسمع شي كلمة اخرا منها ، انا نطلع نشوف نجاة وننزل راه جبت واحد دجاجة رديها لغدا أختي والله يكملك بعقلك وجدي لناس ل جايين في لعشية والا بصح كتفمري فختك وكتبغيها ردي ليها عقلها المرا من سهم راجلها وانا ملي غيجي ،عندي ليه هضرة ونجمة ختي من مقام بنتي ل غنبغيه لنجاة ونجيمة غنبغبه ليها
عطاتو ضحكة صفرا وقالت تحت من نيفها بعدما مشا ~ هاحنا غتشوفو
كيقوليك المثل اللهم ضربة بدمها ولا كلمة تبقى محفورة بسمها ، عارف راسو غلط فحقها وبزاف وهذا هو طبعو لعايب كيتعصب وكيزرب في الهضرة مكيضربش حساب لشنو كيخرج من فمو حتى كيفوت لفوت ، صمم يمشي يداخل عليها ويرجعها عمر الكوفر بتقدية وسكر ل غيديهم معاه فيديه و طلع لبيتو جبد ولبس احسن معندو باغي امتى يشوفها ويرجعها لدارو عند بالو جالسة كتسناه غا هو يجي وتبعو ، باقي غالط حيث القلب المجروح خاصو وقت باش يبرا وهاهيا رجعت معاه غيبقى ديما بينها وبينو واحد شق واضح وباين مغيغبر على شحال ، تقاد وتريح ونازل فدروج يشوف باه واش واجد باش يتحركو وهو يجي وجهو فوجه اخر وحدة باغي يشوفها فهاد ساعة ،جايا بلا حشمة بلا حيا داخلة لدار كتضحك وراسها مرفوع
تقتل الميت وتعزي فيه ،عند بالها هضرة مها غا خضرة فوق طعام وغا كلام وداز ساعة لقاتو واقف في وجهها ودغيا تعصر فيه دم ، عيا يراعي ويتلي عيبو معاها كتبقى ختو لكبيرة وهي مبغاتش تحشم ودير بحساب الدم اول مجات بغات تمد يدها تسلم عليه وهو يدفعها حتى تخبطت على الباب وغوت حتى خرج كلشي لوسط دار يشوفو اش كاين ، لقاوه واقف في وجهها شانق عليها من حوايجها وكيهلل ~ شنو جاايا ديري هنا باشمن وجه توريني سيفتك !! كنت مخليك نتي لخرة عندي اهم منك ساعة زربانة على راسك
زهرة بدات تمتم وتشوف فوالديها وتمسكن ~ كذوب داكشي اخويا ممنو والو وحق ربي لحبيب الله يعطيني ويرزيني فولادي واش انا غنسحر لخويا غنضرو وهو عمرو ضرني وشكون قال ديك صاحبتها تكون غايرة منها وبغات
قاطعها بصوت عالي كيضحك بسخرية من كذوبها ل عيا منو وفنفس الوقت كيزيز يزير عليها ~ اسمعي الالة داك خبير ديالك خليك عندك انا ماشي هو لكبيرة نتيقك عييت منك ومن فعايلك ولكن زدتي فيه جمعت ليك بزاف وجا وقت نتحاسبو ، طرطق فيها عينو وقال كيخبط يدو مع الباب ~واش باغاني نلوح مرتي فزنقة باش تبردي ،ايوا غا تهناي عمرها تكون ليك
تدخلت مو كيف ديما جات وسطهم وقالت ~ونعل شيطان اولدي راه الخاوة حدها دنيا
جاوبها كشاكشو خارجين ناس في زنقة كيسنطو ~ الله يقطعها خاوة الا كانت بحال هاكدا ،دفعها وساس يدو عايفها وشاف في باه واخد قرارو ~ قلتها ليك ابويا وهانا كنعاودها دابا قدامكم كاملين ، ليوم غتختارو يا إما بنتكم فهاد دار يا إما انا
شحال من واحد تعشم فكلمة الخاوة حدها الدنيا ، وقليل ل كيعرف بحق هاد الكلمة وكيدير ويقد بيها في زمان الدم ولا بحال الما وولات الاخوة غا بسمية ، شحال من خو قتل خوه وشحال من خت صيفطات خوها لحبس فهاد الوقت مكاين غير راسي يا راسي وَلاَّ الحقد والغبينة وطمع عامي لقلوب وَلَّا الحقد والسم مسيطر على نفوس ، وسم ل هازاه زهرة فقلبها تجاه نجمة كبير وبلاما تحس قاست بيه خوها ل كان مشعل ليها صبعانو لعشرة شمع ،نسات شحال كان يتقدى ويصيفط ليها تجي خاوية وترجع محملة ، تجي زاوية ويرجع جيبها عامر دار ليها العرس وسبوعات لولادها وجات دابا مفرحتش ليه ومردتش ليه واخا غا بضحكة ظفر ملي دارو معاها ، مبغاتش تقتانع ودخل لراسها بلي ديك لولية صافي ولات مراتو وشريكتو فهاد الدنيا ومغيفرقو معاها غير لموت ،هي نوات ليهم على الغدر وربي فيقهم لا هضرتها ولا بكاها وقفو معاها دابا ، الدنيا كتدور والشدة ما تدوووم، شحال قدها تشربو وتعطيه ، يجي النهار لي يفيق ويمرمد بيها الرجلين و هاهي دابا واقفة من كلامو مصدومة وعينيها مغرغرين كيفاش كيخير والديه بينو وبينها ملامح الصدمة على وجهها مرسومة وهي كتشوف فيه كيدوي جاهل كلامو جدي ومافيهش لمزاح نطقت بغات تأثر فيه وقالت بلحن حزين~ ياك اخويا !! باغي تحرمني من دارنا ونبقى بلا حباب ، ياك اخويا بغيتي ترجعني يتيمة ووالديا باقين حيين ،شافت في مها وبدات تبكي لكبيرة قلبها حن ولكن مقدرت تقول والو قدام شوفات خليفة لقاصحين ،خنزز فيها غلام طالع ليه دم كتفى منها وصبرو تقادا عينيه رجعو حمرين ومتبت راسو عليها بزز ، ضحك باستهزاء وقاليها ~ خويا ؟ على اشمن خو كدوي ؟ خوك ل من تزوج ونتي تكبي ليه ليصانص على العافية ،خوك ل كتجري ورا خليان دارو ، كنقول هنا تعيق وتنعل شيطان ونتي غا ما فرعنتي ، ضيق فيها عينيه بزعف وقال ، بالحق صافي فات لفوت فيقي الالة خووووووك حسبي راسك من ليوم دفنتيه ، نتلاقاك فزنقة ديري راسك مكتعرفينيش قوليهم الله يخليه سلعة ميسواش ، وأنا عليا شوفة منبقاش نكملها فيك وهاد الدار إلى مزال شفتك فيها كدوري، كنقسم برب الكعبة حتى رجلي غتقطع منها ،شاف فباه وفالكبيرة لي حانية راسها وقال بتهديد ~ نغبر ومتعرفونيش فين زدت وواجبي معاكم نقوم بيه من بعيد ،شافيها بغمزة وقال ياك هادشي ل كنتي باغا توصلي ليه ايوا ها مرادك تحقق ،والديك هاهما عندك مگالعهم ليك حد الا رضاو على شنو كديري يعطيوني غا حريتي وميكتفوش ليا يدي ويخليوني نعيش هاني مع مراتي
هضرتو كانت واضحة حيت دموع مو وتنخصيصها وشوفات باه ل كان كيشوف فيه بيهم كانو بحال سلاح موقفينو فبلاصتو مقادرش يتحرك مكرهمش يسهلو عليه شنو بغى يدير ، نطق باه ل قرب منو ووقف كيشوف في بنتو ل تبكي وتمسح وايدها على حوايج مها كتغمز فيها تطلب عليها ،نطق خليفة بحدة وقال~دارك هي راجلك وولادك !! دويت معاك شحال من مرة قلت ليك باغا تجي لهاد دار معززة بحال الضيفة حتارمي ناسها،ايوا ونتي مبغيتيش ومحشمتيش معرفتش أنا كيفاش كتفكري وكيفاش قدرتي توصلي حتى لخوك
تلاحت ليه على يديه بغات تبوسها وهو يرجع بخطوة اللور غضبان منها وقالت ~ والله ابا انا مدرت حاجة …
قاطعها حاط يدو على قلبو وكيدوي بشوية وينهج ~ سمعي كلامي حتى لاخر ، سكت حتى خدا نفسو ورجع كمل هاز يدو كيدوي بيها ، أنا مزرعتش فيك هادشي باش نحصدو ،اشمن وجه نشوف بيه مولانا ملي يسولني على تربيتك ياك تانتي عندك راجل ومعاه وليدات وعاطيك حريتك ولا تقولي واخداها بزز منو الا مخفتيش على راسك خافي على دوك دراري تورتيهم دعاوي الناس… كون غير ضرتك نقولو غرتي منها ولكن هيا مرت خوك بينك وبينها شلا دمايات فاش وصلاتك ها !! حرك راسو بأسف ، دوزت ليك ابنتي مرة وزوج وحد هنا باااركااا، من ساعة ليوم هاد دار متبقايش تعتبيها حتى نموت وجي قلبي على حقك فيها ، نعت لكبيرة ولراسو وقال ، مك ولا انا الا توحشناك كنعرفو نعت بابك غنجيو تال عندك ،ماشي حنا نجمعو ونتي تجي تشتي ومخليا دارك مجموعة
بحالا عطاها زوج تصرفيقات تلفها على باب الدار فين جا بقات واقفة مكوانسيا عمرها ضنات باها غيجري عليها من دارهم ل كبرات وربات فيها ولاويبغي ينكرها من الفوق ، اللسان باش تزيد دافع بيه على راسها تشلل وثقال رجليها تحشو ، بقات واقفة وكتشوف حتى زاد نطق غلام وكمل على ما بيها ~ سمعتيييه !! ديري نفس فيك هاد المرة جرتك سلكات على خير على وجه والديك المرة جاايا مغيعجبكش الحال معايا غنحل لراجلك عينيه لعامياهم وخبتك الا وصلتني هاد المرة غتلقايني فقلب دارك
شاف في باه وقال ~ بويا انا لتحت كنتسناك
خرج وتبعو خليفة ديك ساع مبقى عندو حتى كلام يزيدو اما زهرة ملقات غا مها ل خسرت عليها زوج تطبطيبات لظهر وقالت ليها بحنان كتبقى بنتها واخا يعطيها كلشي ظهرو هي غتحل ليها يديها ~ خلي حتى تبرد الدعوة ابنتي وجي لمواج عالية دابا وبيدك هيجتيها
جالسة فالبيت بوحدها كتطلع وتنزل النفس بصعوبة ، لابسة قميص خفيف مبين قوام جسمها الضعيف حاطة شال على راسها ويديها باين عليهم التوتر بقوة الرجفة ل شاداهم ، دقات قلبها كتسمعهم فوذنيها كأنها أول مرة تسمع صوتو الخشن ولا كلامو الثقيل ، حنحنتو وكلامو لقليل ل نطق بيه اول مدخل خلا مشاعرها يتخربقو واحاسيس غريبة راودتها بين الاشتياق الحب الحزن وخيبة الأمل …..كانت معزولة فبيت وكتسنط على هضرتهم ، تقول اول مرة يدق بابها وهذا نهار خطوبتها عليه ، كأنها اول مرة غادي تشوفو وتتعرف عليه ، وجهها تحقن فيه الدم بالخلعة من المواجهة ل ممستعداش ليها دابا ، تزنگو حناكها وطاح عليهم سر ل عطاها جمال رباني سبحان من خلقها كانت كتغزز شفايفها بقوة ويديها مرة تجمعهم مرة تطلقهم ، طال الانتظار كانو كيدويو و مجمعين على مواضيع مختالفة مرة يضحكو مرة يتناقشو حتى بدا يجيها النعاس عاد جاها العفو وسمعت صوت بابا عبد الهادي ل كينادي عليها ، جات لعندها فاطنة ل كانت مخشية في الكوزينة مبغاش تشوف غلام مقلقة وباقا شادة فخاطرها من جهتو نطقت وقالت ~ سيري تكلمي لخووك صاطت بصوت عالي ، هاحنا غنشوفوه شنو غيديرر !!
مجوبتهاش كتافات تاخد نفس طويل تاخد بيه حيز من الراحة وتقصدهم ،رجليها كانو تقال عليها وقلبها دقاتو زادو تسارعو ووجها رجع بحال المطيشة ، دخلت حانية راسها ونطقت بصوت انثوي رقيق السلام وعليكم ، ردو عليها السلام والصوت الوحيد ل جا فوذنها وميزاتو بينهم هو صوتو ، حسات بكرشها كترفرف مكرهتش تهز راسها تشوفو وتشوف وجهو وحركاتو تهضر معاه وتزيد تسمع رنات احبالو الصوتية ل توحشات وفالنفس الوقت منفخة ومعاجبها حال وحاسة بخيبة أمل من جيهتو ، تقدمات للقدام متوترة وكلمة مقدرات تنطق بيها ، بان ليييها شيخها جالس حدا خوها قربات باست على راسو بإحترام وقالت~ عمي كيف بقيتي ؟
تبسم كيحترم نجمة وعندو عزيزة من عند الخالق طبطب على يديها بفرحة ونطق ~ منين شفتك ابنتي على خير راني تا أنا بخير …
قالت الله يكبر بيك اعمي ومشات جلسات حدا خوها بلاما تعبر غلام ولا تسلم عليه ولا تشوفيه تخليه يقطع شوق بشوفة من عينيها ، كان حاضيها و حاضي يديها وعينيها ، قميص جاها غزال ولونو وتاها، كيحس بيها بصح نجمة مضوية ليه ضلامو، تنهد وهو كيشوف السر لي على وجهها ، حاضي جميع تحركاتها، الحنين والشوق كل شي تجمع عليه فهاد اللحضة ، فحين هي جلسات مشافتش فجيهتو بالمرة
كب ليها خوها اتاي مدو ليها وعطاها طبسيل لفاكية تهز ل بغات خدات تمرة بقات تدور فيها ففها ملاهية الوقت ،طال سكاتهم وواحد جالس على الجمر مكرهش يوقف يجرها من يدها حتى حد مكيتسالو فيها حاجة شوف مبرد ليه جوف حس بيها مقلقة منو وباقا هازة من جهتو وهو ينطق خليفة ل شاف نظرات ولدو وحركات حجبانو ل بداو يتعقدو وقال ~ ابوا ابنتي نجمة مزال مقلقة علينا
بلعت ريقها وشافت فيه بنص عين بعدما حطات الكاس ~ احم حااشة اعمي معندي علاش نتقلق عليك
كانت كتدوي معاه بحالا غير هو ل كاين وواحد طول فعرض جالس حداه تقول مكيبانش هادشي بدا ينرڤزو ، تقاد عبد الهادي في الجلسة ودخل في الموضوع ونطق موجه هضرتو لغلام ~ غلام ولديي !!
واش مزال باغي مرتك وهادشي ل جاي في طريق، واش قاد بيهم !!؟؟
علاه كون مكانش عينو فيها غيكون جالس قدامو وصابر ساعتين كيدويو فلي كاين مصبر راسو غير حيت عارف فلخر غيخرج وهي معاه ، عدل غلام من نبرت صوتو وقال مشابك يديه وعينيه على نجمة ل كانت كتشوف في للارض ~ نهزهم بين سناني
جاوبو عبد الهادي وهو كيشوف في خليفة ~ايوا سمعني نقوليك اولدي الله يرضي عليك قدام باك ، الوجه لمشروك مكيتغسلش بغيتي بنتنا غتدير ليها سكنة راسها ربي مفرق ريوس غير باش كلها يدير اش بغى
خليفة تقبض عليه قلبو وتبدلو ملامح وجهو اما غلام بقى غير كيشوف ، خوها هذا من حقو يقول ل بغى كتبقى ختو ول طالها بزاف ومتقدرش شي وحدة تصبر عليه ، نطق خليفة قبل من ولدو وقال ~ عوينة وحدة ل كنشوف بيها وبغيتيه يفرقني
عبد الهادي هز راسو وقال ~ ايلا كنتي باغي ولدك وبغيتيه يعيش هاني مع مرتو غتبغي ليه الخير والخير في البعد حيت سكنة معاكم جابت ليهم غا مشاكيل ، شوف حالة ختي اسي خليفة يرضيك هادشي تقبلو على وحدة في بناتك ، لبنت بقوة المشاكيل نعمة مبقاتش كتدوقها اللهم تشري راحا بالها وولدك راهو عندك مغيفوتك ، المهم هذا هو شرطي الا قبلتو بيه الا مبغيتوش ..
قاطعو خليفة ل شاف حتى عيا ولقى من كلام عبد الهادي بلي مصمم عل قرار ومغيتراجعش عليه ،مبغاش يزيد الخل على خميرة ويسود حيات ولدو وهو ينوض عند نجمة وقال معنقها ~ واخا ابنتي انا موافق ولكن عندي ليك طلب الا جات على خاطرك ديريني باك وقبلي بيه ، فعوض متكري عند البراني بقاي فين ساكنة وبني كوزينتك وعزلي ماكلتك متحرمنيش من حس وصوت ولدي فدار خليه يبقى حدايا وفجنبي حتى الا جاتني لموت لقاه حدايا
موقف صعيب تحطات فيه، جالس حداها كيطلب ويزاوگ وهو في عمر باها كون بقى في الحياة ، استعطافو رهق قلبها وحننو وبقى فيها ولكن كيف دير ؟؟ كيف دير ترجع لدار ل مكيحملها فيها حد وغير كيشوفو فيها يضورو وجههم عليها ،
يتغامزو من وراها ويهزو كفوفهم ويدعيو فيها، كتحس بينها وبينهم مسافات طوال وكتحس براسها عبء ثقيل ولا لعنة وتحطت عليهم ، مكترحتاش وعمرها حسات براحة وهي جالسة وسطهم ،كتاكل تحت المجهر ل كيدوزوها منو، حاضينها معاش فاقت ومعاش نعست وامتى دوشت ، قشابة جديدة الا تزادت عليها كيحسدوها عليها
عمرها ضحكت من قلبها وهي معاهم عمرها سمعت كلمة الطيبة منهم ، عيات من الاهانة والحگرة والشوفة الناقصة ل كتشاف بيها
ومهما كان هادشي كلو كانت صارطاه وصابرة عليه ولكن توصل بيهم للاذية فذاتها وصحتها متقبلتهاش مكتأذي حد علاش ياذيوها ، ودابا كيطلب منها تبقى فنفس الدار ل عاشت فيها هادشي كلو ؟؟ طلب صعيب قدام دموع رجل كبير في العمر، خليفة عزيز عندها وبزاف ولكن تا واحد مغيكون عز ليها من نفسها، معرفت متقول ليه بقات ساكتة وكدور فهضرتو فدماغها باش تعرف باش تجاوبو ،عينين غلام عليها واذان عبد الهادي مفتوحة بغى يسمع منها شغتقول ، بللات شفايفها ل نشفو وقالت بحزن ~ شغنقوليك اعمي نتااا عزيز عندي وكلامك فوق راسي ولكن انا ديك دار أذاوني فيها بزااف ، دخلت عندكم دايرة نيتي وفرحانة كنقول غنكون وسط عائلتي بالحق ،حدرت راسها وسكتت شحال وقالت بلاما تهز عينيها فيهم ~ لقيت كلشي كيكرهني قبل ميعرفني اولهم بنتك !! زهرة صعيبة وبزاف مكتبغينيش من اول مشافتني وهي سباب مشاكيلي من اول زواجي ونتا شاهد على هادشي حيت ما مرة ما زوج جيت لعندك وتشكيت ليك وفكل مرة كتمادا ودير مكثر
مكدير لا بحسابك ولا بحساب حد، وليت خايفة على راسي منها كيفاش غنحس في الامان وانا قريبة ليها ، كيفاش غنسى ونشوف مزال في عينيها ،اللهم الهنا وتيقار باش نبقاو مزيانين
شد فيدها وطبطب عليها بحنان وقال ~ كنواعدك ابنتي وهاد المرة وعد الحر دين عليه عمرها تقرب ليك ، ولا تبقى تدخل لدار من اساسو انا نبهت عليها تبقى فدارها وتقيلك عليها مننكرش بنتي ومجهدة ولكن راه عمر العين تفوت الحاجب وعمرها تفوت هضرتي وتتحداها غير رجعي لدارك نتي فحمايتي وحمى راجلك
ضحكت باستهزاء على هضرتو وقال ~ مغاديش نكون بنت لحرام ونمنع بنت من والديها هادا ماشي حل !! هكا غتزيد تكثر عداوتها ليا شكون انا ل غنجي غير لبارح نحرممها من دارهم ونحرمها تشوفكم علاش اعمي نهزوها منين ثقالت مشكلتها معايا ماشي معاكم اللهم انا ل نخرج من ديك دار وراجلي كيف قال خويا الا كان باغيني يدير ليا حل
أنا ولدكم الا بغاني راني معاه على حصيرة ومخدة لدوام وعمري نحبسو عليكم ولا ندخل بيناتكم وبابي عمرو ميتسد في وجهكم لكن بنتكم طغات ومخافتش من مولاها عاد غدير بحسابكم ولا تخاف منكم
حسات بيدو تهزت من فوق يديها وكتافو ترخاو وحنا راسو لتحت بيأس وقال بحزن ~ ل بغيتي ابنتي الا مدرتيش بكلامي معندي منقوليك هاهو راجلك عندك يدير ل ترتاحو فيه بزوج
هنا جا وقت غلام يدوي تحولو ليه الانظار ، نطق عبد الهادي وقاليه ~ شنو بان ليك اسي غلام فهاد لكلام واش قابل تخرج من داركم وتبني عشك بعيد على والديك
جاوبو غلام بلاما يفكر واخد قرارو ~ انا والديا فوق الراس عمري نفوتهم ولا نتبدل عليهم حتى يوقف اخر عرق كيضرب فيا ومرتي فنفس كفتهم صافي تزوجتها لدوام مغتفرقني عليها غير الموت الا كان البعد غيخليها مرتاحة وغنعيشو فيه هانين انا متاكدة بويا مغاديش يوقف في طريقنا
شاف في باه ل جاوبو وقال كيتنهد ~ انا بغيتك اولدي تكون غير مرتاح
نطق وعينيه فنجمة ل كانت عاطياه مشي وكتشوف فكلشي الا هو ~ وانا راحتي مع مرتي !!
حرك عبد الهادي راسو براحة وحول نظراتو لخليفة بغاه يبقى فخاطرو ~ اش قلنا اسي خليفة على خاطرك
تخشا خليفة فجواه وطاح عليه ضيم كان باغي عائلتو تكبر وحفادو يرباو معاه ، ولد مات ليه ولد ميعولش عليه ، اما غلام هو ظهرو ل كيتكى عليه قال بحزن ~ معندي منقول الا كانو متافقين منزيدهم غا الخير ، واخا انا صعيب عليا الولد ل كنعول عليه فكلشي يسكن بعيد عليا ولكن راحة مرتو اولا ،كنظن عندك لولاد وفاهمني اسي عبد الهادي وتا نتي ابنتي نجمة راك غتولديهم وغتحسي بالكبدة ،
انا ماشي ضد ولا نحسد ولدي على راحتو وسعادتو معاك بالعكس الله يهنيكم ويزيدكم غير انا من كنكون معاه مكنضرب الهم لحتى حاجة كنعس مرتاح حيت هوو لاعب دوري فدار ، مكنختار عيد مكنجيب ذبيحة مكنمشي لسوق مكنكيل زرع ، مكنعرف ما ولا ضو ، هو صحتي ل تهدات وعيني ل طفات ورجليا ل بداو كيخونوني ،كنت متمني نشوف ولادو كيكبرو قدامي ماشي بعيد عليا ولكن مكتاب كيتصرف
ميمكنش كلشي فحياتنا يكون كامل ضروري غتكون لخبزة ناقصة ، نجمة كانت مكسورة من لداخل كتشوف ربي عطاها راجل وسيد الرجال ولكن خوتاتو سمهم سم لفعات هادشي بلى مو ل كتكوي وتبخ وشكون فيهم غادي يحن عليها فديك الدار من غير خليفة لي كتحس بيه حنين معاها وكيحترمها كلامو أثر فيها بزاف وخلاها تهز عينيها وتشوف الحزن لي على وجهو …كيفاش كيدوي مضيوم وعينيه وشوفاتو كاملين لغلام كيشبع قلبو لحزين ل شافو يقول غتفرقو عليه وتبعدو وتاخدو منو فخطرة ، بقى فيها وتأملاتو لمهلة كتخمم شنو هي هاد الحياة ؟ والو غانعيشو فيها مرة وحدة ، وغانموتو مرة وحدة واش غانديو معانا شي حاجة ؟ فركات يديها مع بعضياتهم حنينة وقلبها خارج عليها مسالمة وقلبها بيض تفكرات الموت علينا حق إلى مشات وقعات لخليفة شي حاجة ومات عمرها تسامح لنفسها غتسمى فرقات اب على باه وخلاتو مشوي ، هي ماشي بنت لحرام ولا قلبها حديد هي نجمة لي تربات على الحب والخير… هزات عويناتها لكبار فخليفة ووقفات باست على راسو وقالت ~ مغنرضهاش ليك فوجهك حيت نتا عزيز وغالي عندي ومقامك من مقام المرحوم “كتقصد الأب ديالها ” مغنحرمكش من ولدك ولا حفيدك غير هي حاجة وحدة، ل عشتو منبغيش نرجع نعيشو مرة خرا
سكنة فسطح قابلة عليها ولكن بشرط بنتك منشوفها متقيسني متقرب ليا متأذيني لا من بعيد ولا من قريب ، كلها تايقارو حسن باش نبقاو مزيانين والعشرة تطول وتدوم
تهز قلبو فرحتو معاطيها لحد ، فرحان بولدو ل غايبقى معاه ، واخا كان خدام وكيبان في زناقي ولكن كان كيفول مع راسو عندو دارو نهار غيرجع غيرجع لدارو اما باش يدير دار اخرا لعيد عليه. جاتو ثقيلة وقاصحة ، وقف وعنقها من كتافها بمعزة وقال ~ مدام النفس كطلع وتنزل فيا مغتشوفيها فدار لا بالخير لا بالشر وانا ماشي ولد البارح غنضحك عليك بكليمات راني في مقام باك وكلمتي سيف منرجعش فيها
هزات راسها برضي وهزات عينيها فغلام ل كان كيطلع وينزل فيها عاض على شفايفو بمعنى اه ونشدك فرحان بيها وبقلبها لكبير ل مكاينش بحالو
خرج عبد الهادي مع خليفة يصليو العصر ومنها يخليوهم يصفيو خواطرهم ، غير تسد عليهم الباب وهو يرسم غلام ضحكة جانبية على فمو اما لالة فنة تبدلات تقول هزيتي وحدة وحطيتي وحدة اخرا ، فينها البنت ل كانت جالسة حشمانة وعينيها فالارض، دفعت صدرها لقدام ودارت رجل على ختها ،هزات راسها الفوق كتشوف في صباغة الحيط بحالا عمرها شافتها كتضور فعينيها بكبرياء وشنتة وتأفأف وتصوط فحين هو ربع يديه ورخا ظهرو متكي بأريحية متبع ليها لعين من راسها تا لصبعها صغير مرة تقاد زيف مرة تگفظ كمها كان كيحس بيها بحال شي فراشة ملونة ليه حياتو ،حياتو ل مبقاتش كتسوى بدونها ، ول غير كتبعد عليه كيسوادو الأيام فوجهو ، خلاها على خاطرها مفشهاش كيشوف فين حدها شحال قدها تهرب عليه عينيها ، شوية وهي تحيد شال من فوق راسها وحطاتو فجنب سداري طالقة ليه سالفها الطويل وكتشالي بيه لوور باغا تجعرو ، بحركاتها خلاتو منيم عينيه فيها مملش من شوفاتو ليها ، حتى هزاتهم فيه واخيراً وحنات عليه كانت كتصوط ويديها على عنقها البيض كتنش بصباع يدها الرقاق رفعات حجبانها مقرونين دافعة عليه زينها غالي ،ونطقت كتزرب في الهضرة وتعوج في فمها ~ بغيييتك تعرف حاجة !! هزت حاجبها لسما وقالت قالبة عينيها أنا راجعة على ود عمي خليفة ماشي على ودك ، نتا راك جريتي عليا من دارك ومن حياتك
حنحن بصوتو الغليض، وهو كيشوف فيها فجميع حالاتها فتنة بالنسبة ليه ، ناض قرب منهاوجلس فجنبها حاك يدو على اسفل ظهرها حتى قفزت مبورشة وبعدات عليه شوية خايفة تذوب حداه عينيها كتشوف فجهة اخرى وتعض على قنانفها بتوثر ، ونطق مقرب فمو من وذنها وقال ~ باراكا على داك فم الشرنة من العضان هلكتيه
هزات عينيها فيه كتشوف باستفهام دايرة فيها قليلة فهامة ~ شنوو ؟؟
تنهد من نبرة صوتها الرقيق ل شتاق ليه ، حط يدو على فكها متبث وجهها مع عينيه كيشوف فعويناتها لي سالبينو، بلل حلقو تفاحة ادم كتحرك ونطق بغمزة ~ خليييييييينا حتى نكونو بجوج فبلاصتنا وارى متعضي فييييييهم
عوجات فمها وبعدات ايدو وعينيها عليه ، متنكرش ريييحتو وملمس يدو خلاتها تحس براحة وتعرف شحال توحشاتو ،ولكن عزة النفس ل فيها دايرة ليها حالة ، رجعات لبرودتها معاه ثاني وقالت هازة كتافها ~ متبدلش الهضرة وتضحك عليا بكلامك انا ماشي بنت صغيرة ، نتا جريتي عليا انا وختي ،نتا سمحتي فيا وتخليتي عليا وماشي اول مرة كديرها من ديما كتعطيني بظهرك وكتسخى بيا
خوات قلبها ورجعات كتمسد يديها بحزن ،الدموع تجمعو فعينيها والحزن طغى على ملامح وجهها رجعت بيها الذاكرة لداك نهار ل قاليها الا فتي العتبة مترجعيش ، كيفاش موقفش معاها ودار ظهرو ليها قلبها حست بيه معصور واخا يدير ل يدير تا كلمة مغتطيب خاطرها كانت غير دايرة معاه الما منين يدووز حيت معندها فين تغضب وهي متقلة معندها حتى شي بيت ولا صنعة تسترزق منها معندهاش من غيرو هو ، قرب منها ريحتها مسك كتجدبو ليها بلى ميحس تنهد باغي يشد يديها ويراضيها حيت عارف راسو غالط وجرحها ساعة لقى نجمة وحدة خرى حداه ~ دفعات يديه عليها معفرة وبعدات عليه راسها خلاتو كيشوف فيها كيغلي ودم وجههو تراكم فرمشة عين ، نطقت بصوت عنيف وقالت ~ راه قلت ليك متقرب مني متقيس فيا فكراتو في الجملة ل قال ” الا فتي العتبة سيري مع ختك ومترجعيش ” صافي حرمتيني على راسك
وقف شافيها مشربن عطشو ليها حامي وهي بحال القنبولة طرطقات ليه فالوجه كتحرم وتحلل ليه ل بغات ، جاي ناوي وباغي يحس بيها يعنقها ويشم ريحتها وهي معفرة عليه ومقلقة وكبرت كلمة قالها فلحظة غضب كيشوف فيها دموع مجموعين فعينيها ومباغاش تبكي حداه ولا تبين ليه شحال فگعانة عليه
جمع يديه على شكل لكمة وقرد الأرض حداها حاط يدو على ركابيها كيشوف فعينيها ونطق ~ واش غا تدي عليا انا غا هبيل
وملي كنتعصب فمي كينطق بالخوا الخاوي وخاصة معاك ، داك الكلمة راه خرجات غير من هنا لهنا ،اشار ليها من جهة عنقو لفوق ، اما هذا حط يدو على قلبو وكمل ، كانت شاعلة فيه العافية ، راه مكرهتش ديك ساع نجرك من شعرك ونخيط لحمي على لحمك، هزو يدو وعض على فكو وبدا يحاسب ويفرغ قلبو ، واش انا ماشي بنادم معندي نفس معندي كرامة نسمع ختك باغا تديك وتربي ولادي وتهزهم قالت ليك ، واش بنت ليها مشلول ولا قليل نفع مافيا فايدة ، راه لكل فعل رد فعل امراتي زوينة وهذا هو رد فعلي هاكاك داير مكنعرف نصبغ مكنعرف نجامل
هو كيدوي وهي كتحرك رجليها بعصبية وكتسمع ليه ، حسات بيدها خشاهم وسط يدو كيمسح عليهم وهي تشوف فيه كان مضيق عينيه وحاضي ملامح وجهها كيعبر ليها طونسيو واش هدات ولا باقا مفرعنة ،من تنفسها بانت ليه بدات تكالما وهو يزيد يحط تلج يبرد الحرقة ويضمد الجرحة وقال بزز منو ل باغي زين يصبر ~ وا حني شوية !! والا كان على ختك واخا الالة انا نطيب خاطرها
وقف تحت نظراتها حل لباب وامرها باش تعيط لختها من بلاصتها رفعات صوتها وغوتت ليها بصوتها الأنثوي هاد الاخيرة كانت مخشية في البيت سمعت صوت ختها وخسرت ملامح وجهها فهمات شنو جاري ، تمات جايا فوق قلبها مبغاش وجهها يجي فوجهو ، دخلت للبيت حادرة راسها للارض مبغاش تدوي معاه باقي هضرتو كتسمعها في وذنيها ، ضغطت على قلبها وقفت كتصاوب في زيفها وقالت سلام تحت منها موحال سمعها ، كان واقف عينيه على نجمة وعينيها هي كتناوبهم عليه هو وختها دوز يدو على لحيتو حاس براسو غلط فعلا فحقها ومتستاهلش منو ديك الهضرة ، شخصيتو شبه متسامحة ماشي من نوع لي يعتاذر ويدير الخاطر ولكن كل شي يهون قدام مخلوضة لعيون بلل حلقو كيشوف باش يبدأ معاها الكلام وقبل مينطق بأي كلمة قرب منها ومع واصلة لعند كتفو تحنى باس على راسها وبلاما يشوف فيها قال بصوت خشن~ سمحي ليا الا غلطت فحقك !! ساعة غضب دخل شيطان وسوس ودار ما بغا وقلت ل قلتو فوق من قلبي ، هاديك الدار دار بنتك يعني دارك حتى نتي مكاينش فرق بيناتكم ..جي جلسي قدما بغيتي حسبيني بحال ولدك الخايبة الا هزيت فيك عيني حاجة وحدة ل نبغي ، هز صبعو ونجمة خرجت عينيها حاضية فمو اش غيگول خافت يجي يكحلها يعميها من جديد عارفاه معندوش مع زواق ~ منبغيش ل يدخل بيني وبين مرتي !! عندنا شي مشكيل نحلوه بزوج بيناتنا ل لقا باش يخيط يخيط بالبيض
نطقت فاطنة وجوبتو وهاد مرة هزات راسها فيه نيت مورياه قصوحية وجهها ~ هاد الهضرة خاص تقال ل كيجري فخراب بيتك مع هاد بنت الناس ، تقولها ل باغين يشتتو ليكم شمل ويخليوها لايحة حوايجها ودايعة اما انا راه تصرفت من خوفي عليها ، خفت يتهدم بيتها
وتا دابا باقي الحال ياك رجعت المياه المجاريها ايوا نبغيك غا تقد بيها هي ول فكرشها ودير ليهم فين يعيشو حيت لوجه لمشروك عمرو ما يصفا
كلشي كيفوت ويدوز ولكن ماشي كلشي كيتنسى …نجمة دوزتها لغلام وعائلتو هاد المرة كيف دوزت ليهم ل فات واخا نغصوها عليها ونكدوها عليها وهي فرحانة بحملها ولكن معندها مدير مغرفتها وما هزات ليها ..برد خاطرها من جهتو شوية بعدما عتاذر من فاطنة حيت بنسبة ليها قاسها فمومو عينيها تتقبل على راسها المعيور والاهانة ولكن ختها تبقى بعيدة وموقرة هاد الاخيرة ل بعدما عرفات نجمة غتعزل عطاتها من كل حاجة شوية.. باش تبدا حتى وكان تشري ل خاصها بحالا علمها الله بلي العدوزة قلبها كحل ومغتحنش فيها خصوصا ملي عرفت بلي غتعزل عليها تما كحلت بالعما وولات كتبان ليها مممزياناش
بعدما رجعت مع غلام لدار وشيخها ، الشيخ ل كان فرحان ولدو ما خرجش من عشو باقي تحت من جناحو وقدام عينيه باقي هو كبيرة لعيلة وحفايدو غيترباو على ايديه … دخلو على لكبيرة ل كانت جالسة عاقدة نواظرها النعمة مدايقاها عندها گنازة بلا ميت صعيبة عليها تجري على بنتها من دار شافت غير دموع بنتها وبقات فيها مشافتش دموع نجمة ل بكاتهم دم كل مرة كتسممها زهرة بفعايلها بالحق هادي هي مرت الولد ديما غا تبقى غير دخلية على العائلة قليل ل تحسبها بحال بنتها .. دخل عليها ولدها هو لول ل وجهو عاد تفك وتبشر هاز صاك وشنو جابو من عند فاطنة فيدو حطو فدروج حتى يطلعو، فجنبو كانت نجمة ل قلبها كيضرب وتقبط عليها الدار كتشوفها كحلة فعينيها ، دخلو لصالون كان كلشي جالس حتى من مريم ورحمة شافوها وضحكو بزز منهم ابتسامة مصطنعة عطاتها لكبيرة لنجمة كتمثل بلي فرحانة بمجيتها ولكن لون وجهها كان برهان ، صفر وذابل وزادت تقجت ملي سمعت هضرة خليفة لكانت موجهها ليها بعدما نطق قال ~ هاهيا بنتي نجمة قبلت ترجع لدار الله يرضي عليها !! ومن ليوم كانونها غيولي بوحدو شاف فغلام وكمل كلامو ، عدي دابا بلي عطا الله بينما قاديتي كوزينة على حقها وطريقها لفوق فين تطيب مرتك وهادي راه كتبقى داركم ابنتي كاملة فينما عجبك جلسي مكاينش ل يمنعك
هزت ليه نجمة راسها وقالت بصوت خافت ~ الله يكبر بيك اعمي
جاوبو غلام بدورو وهو حاضي وجه مو ل تبدل ونطق حاضي ملامح وجهها ~ غدا نعيط لمعلم يقاد ها ليا فأقرب وقت
لكبيرة بلعت ريقها مبللة حلقها ل حاسة بيه نشف ، هزت حاجبها معاجبها حال وطاح عليها الضيم وقالت ~ وعلاش هادشي كلو ابنتي شنو وقع تا تعزلو ماكلتكم ، انا هاد الولد راه الوقيتة ل كنشبع فيه منو شوفان هو عند الماكلة وتا داك وقيت غنتحرم منو ،هاااه تنهدات بصوت مسموع عينيها تغرغرو وقالت ، دايم الله كلشي زين !!
زير غلام على يديه شارب طباع مو ل كتبغي تلوي يديه ببكاها كيشوف راسو كيتقسم كلها كيجرو لجيه الا ختار مرتو وطلب راحة بالو غيتسمى مسخوط والا ختار والديه غيظلم معاه مراتو ، كان رجل فالعافية ورجل فالشوك علاش هاد صراع بين عدايزات ل كيكون اول زواج علاش لعدوزة كتكون انانية ومكتخليش ولدها يعيش براحتو مع مرتو علاش كتعيش حياتها وكتبغي تعيش تا حياة عروستها تحت ما يسمى ولدتو وكبرتو باش تجي نتي ونعطيه ليك ، راه الزواج سنة الحياة شحال مكان صغير هاد الولد غيكبر ويتزوج ويأسس حياتو بلي بغاها قلبو قبل يسكن معاك سمعا وطاعة ختار سكن مستقل الله يعونو
ضيق عينيه كيعض على فكو وشوفاتو نار اما نجمة فضلت سكات حيت قرارها محسوم تا حاجة مغتأثر عليه، دوا بصوت خشن وبنبرة حادة معاجبوش الحال من تصرفها ~ مالي غادي للمريخ ؟؟ الله يهديك الواليدة انا فوق منك طالع نازل عليك
مالنا على هاد الهضرة دابا ؟؟
مسحت عينيها كتعوج ففمها حابسة البكية وقالت بشنتة ~ صافي اوليدي انا مقلت والو الله يرضي عليك دير لي ترتاح فيه
كلامها نابع بسباب خوف من تخنزيرة خليفة ل عطاها ليها ، هز ليها راسو هاد الاخير ونطق ~ ويهديك الله يا هاد المرا خلي عليك لولد مرتاح مع مرتو هاهو فوق منك مگلعو ليك حد ، جمع نوضتو وقبل ميخرج من البيت قال كيشوف فبناتو وكينبه عليهم ، مرت خوكم فتيقار نسمع نبشة منها عليكم ميعجبكم حال ، رحمة بنتي جمعي ليها شي كيسان وديك البوطة عطيها ل زايدة ومنها زوج في كوزينة
حركات ليه راسها بواخا ومشا لبيتو وخلاهم كيضورو عينيهم وكابحين غضبهم حتى خرج غلام ونجمة طلعو فحالهم عاد كل وحدة نفسات عن حقدها ، نطقت مريم بغل ~ وشوفي ليك على الكلبة غا حملت شتات لينا شمل اما الا غرقاتو بالولاد علم الله
كلها وهمو جوبتها رحمة ل تفكيرها كلو غير لكوزينة ~ شووفي هاه ،كتدوي مع مريم ل ممسوقاش كتقاد فصباغة ضفارنها ل تخربقت ، طياب عليا ولماعن وتسياق علييك وبقاي ظايرة ليا رجل على رجل بحالا عندك لخديم
مريم كتهز في كتافها ~ واخا غا حلمي
رجعت شافت رحمة في مها وقالت حاطة يدها على جنابها كتخمم ~ اشمن كيسان امي نعطيها واشمن ماعن
جوبتها لكبيرة مخنزرة ~ تعطاها !! الماعن كانت تجيب فيهم من دارها كيف لالياتها ل بغى لعزيل يگد بيه ، الا سولك باك قوليه عطيتها وخليها حتى وكان تهبط تطلب من عندك شي طبسيل وديك ساع نوريها
حتى مش مكيهرب من دار العرس !! نجمة لو كان لقات ل بغات فدار عدوزتها واخا غير شوية لهنا والكلمة طيبة عمرها تفكر تطيب وتاكل بوحدها ولكن عيات وطابت وكتافات ،تقهرت من شنو ضاير بيها تعيا دير ليهم الخاطر ومكاينش ل كيديرو ليها ، تعيا تشقا وتدمر ومكاينش ل معترف بيه ، تظلم وتحگر ومكاينش ل يدوي على حقها.. جا الوقت ل تفكر فراسها واخا غير شوية وتقلب على هنا بالها
طلعت لبيت لقاتو حالتو ، المانطة مليوحة فوق ناموسية وحوايجو مزلعين في الماريو ومخسرين ، دخلت كضور فعينيها مصدومة وهو وراها كيتنهد براحة پولة لبيت رجعات ليها ، مدواتش معاه ومشبعاتوش من صوتها مزال ، داخلة عاطياه بظهر حيدت جلابيتها وزيفها قاتلاه بنخال وهو وراها متكي على ناموسية متبع ليها العين ، وقفت قدام لماريو كتقلب على بيجامة تلبسها محست غير بيديه معنقين كرشها ولحيتو كتدغدغ عنقها ، غمضت عينيها مبورشة من قربو ليها قلبها بدا يضرب وصدرها كيطلع وينزل حتى كانت غتسيح وهي تلفت ليه حاطة يدها على صدرو كتبعدو عليها وكتشوف بعيد مبغاش تضعاف قدام شوفة عينيه ولا ترجف بلمسة يديه قالت بفشوش خاوي ~ بلاتي خليني ندوز نجمع هاد دنيا
حاصرها بيدو بزوج كيطلع فيها وينزل هاز حاجب ومنزل لاخور باقي يشوف حدها فين ~ خلي مها هاكا مرونة فين كاين المشكيل !!!
عضت على فمها وشافت في وجهو مزيان ، لحيتو زادت كبرات وطوالت ، عينيه ناعسين وتحت منهم كحل بسهير ليل ، دارت ايدها على جنابها وتكات على دفة ماريو كطلع فيه وتنزل ~ شنو بغيتي اغلام !! راه مزال مقلقة وطالع ليا دم منك ومننساهاش ليك
غلام موسع خاطرو بزز منو ، هز صبعو كيلعب في وجهها ~ غنسيك فيها وفراسك غا كوني هانية ، هانتي بقينا فراديين يعني مكاين حگا خاصني ننعس بكري باش نوض نعون ختك في فطور لا حگا نطيب عشا
زارتها ابتسامة خفيفة ملي فهمت قصد كلامو وطلقت اهات مرتاحة شكون كرهت تبقى ناعسة ف حضن راجلها مع صباح بلتما دير بحساب حد كيتسناها ، توجد وتطيب ل خطر على بالها ،تشقى بگانتها وتاگل بشهيتها ، وهي كتفكر محست غير بشفايفو خطفو قبلة من فمها ل كانت كتعض فيه بعفوية وهي سارحة بمخيلتها ، مزال مستوعبت البوسة حط يدو على خصرها وهزها بين يديه يروي عطشو منها ، ونجمة ل كانت كتحلف وتمرد عليه مكيناش هنا كانت ذايبة كتغوص فبحر العشق والهوى
هادي هي الحياة بين الراجل والمرا ، بكلمة منو يبكيها وبكلمة منو قادر يراضيها
نجمة حكايتها مع عكوزتها ولوايساتها مسلاتش ..بعدما رجعات وعزلات طيابها تلقاو ليها ببرودة وحطوها سطل بلا تقرقيب كلها عاطيها شبر تيساع بحال شي جارة ولا وحدة غريبة علييهم ، يطيبو ويوجدو شهيوات ضد ويحلو الباب على وسعو زگارة باش تشم ريحة وتتشهى وهي واحلة فروحها لا حنين يقرب ليها ولا رحيم يمد ليها تذوق وحملها صعيب مرضها وأكتر حاجة مرضاتها هي سمهم القاطع ليها ، كيشوفوها بعد المرات كتقطع كيشدو بابهم عليهم ويخليييوها فألمها بوحدها كتوجع ولا حولة ولا قوة إلا بالله من شر الناس وشر الحسادين ،كانو كيعذبوها بالبارد نتي ل بغيتي الفراق وتحمليه بغيتي راجل بلا ولديه وا خوديه ، مكاينش ل تفكرها فيهم حتى بخبزة محروقة، سمهم خلاها تحس براسها وسط حرب أهلية صعيب تنجى منها رغم هادشي قدام غلام كانت كتبين الضحكة قلبها مشوي وكتقول الحمد الله قاليك تبع الطريق الرحمان والطلب الرحمة والغفران والى تشد باب يتحلو بيبان ، هادو كانو دعيوات نجمة ليها كل ليلة ونهار…..دازو اأيام وشهور كرشها بانت وتقلات والوحم ل كان قاهرها داز باشما عطى الله ،ملقات حتى واحد في جنبها من غير غلام ل يدمر بنهار في زنقة وبليل غير يدخل عليها يدير طابلية ويغسل الماعن ويطيب ويجمع روينة عمرو تشكى ولا قاليها افف زدتي فيه ولا مال دار هاكدا ولا حس برجولتو عليها وقال حگا انا راجل منعجبن منصبن كان ونعمة الزوج لعجينة عجنها وطيبها كان ليهاا رفيق بمعنى الكلمة مخلاها تحتاج والو ل تشاهاتها يطيبها ليها واخا ميعرفش مهم يغمض ليها عينيها بيها ،هون عليها ايام صعيبة ل ملقات فيهم تا حد من غيرو ، زادت بغاتو وزادت علاقتهم توطدات وكبرات ولات فعينيه كلشي وولا فحياتها كلشي …
كيف كل يوم الحال سخون وهي كرشها قدامها معذباها لابسة كسيوة قصيرة وسالفها جامعاه للفوق شفنجة بياضها الناصح مشرق وحنيكاتها مزنگين بسخونية ذاتها ، زادت غلاضت الشيء لي زادها جمال على جمالها ، صيگانها عمرو ورجليها زادو تنفخو بانت عليها راحة البال ولهنا كانت ضارباها بتكحيلة من دمعة لعين لطرف وعكر خفيف
مجبدة فوق سداري ل كان في لبيت وقدامو تلفازة خداها تتلاها بيها وتونسها ملي يكون فالخدمة كيف العادة كتفرج ومتبعة مسلسلها المكسيكي ل ولا عندها إدمان حتى دخل محمل يديه عامرين ومتقل بخير مولانا ، دوز عينيه كيشوفها مجبدة رجليها فوق لمخدة حاطة يديها على حنكها وساهية محساتش بيه ركز فتفاصيلها كانت بحال شي ورييدة متفتحة زوينة ورزينة ، حط تقدية ودخل حتى حنحن عاد دورات وجهها فرحانة بشوفتو جا ل يآنس وحدتها حطات يديها على جنبهاا باغا توقف ،متقلة بروح منو كتنبض فيها حتى وقف شاد فيها تعكز عليه حنى عندها وحط بوسة جنب فمها دغدغها بخشونة لحيتو شدها من خصرها ونطق وهو كيبوس فراسها ويعاود ~كيف داز نهارك امراتي !!
شعور بالفرحة والحب ساري فگاع جسمها وهي مخشية فيه وحاطة راسها على صدرو بين أحضانو كيبوس فراسها ويدفيها بيديه ، معاه كتحس براسها عندها قيمة كيدير ليها شان وحاطها فمرتبة عزيزة ، داكشي ل كانت كتمنى فراجل حياتها لقاتو فيه ، هزات راسها كتبسم وتسبل فعينيها ~ لاباس الحمد الله ونتا كي داز نهارك ؟
حط يدو على كرشها وايد على حنكها وفنفس الوقت كيحرك عنقو بعياء ~ كيف ديما !!
من صوتو وحركاتو باين عليه لعيا ولكن عمرها سمعتها من فمو ، عمرو قال عييت بالخدمة ونهاري كان صعيب هم الخدمة كيخليه فيها وانفوا كيدخل عندها كيلبس قناع تاني ، باست كتفو بعفوية حركة كانت كفيلة تمحي تعب نهار وصداعو ، ضيق عينيه وتنهد بلاما يدوي ، كتعجبو بتقديرها ليه كيفاش مكتعيفش ريحتو ل كلها دم وكتحل احضانها ليه فأسوء حالاتو ، حط قبلة على راسها ورجع بلور وهو كيدوي ~ ندخل ندوش نحيد هاد الحالة ونوجد ليك عشيوة ترحميني عليها !!
عينيها تحدرو على لميكة بفضول بغات تحني تهز تقدية تشوف شنو جاب معاه وهو يجرها من يدها وقال بتحذير ~ حطي داكشي تما !! شحال من مرة كنقوليك متهزي حتى حاجة ثقيلة !!
جوبتو بخفوووت عينيها كيبريو ~ بغيت غير نشوف
هز فوطة من ماريو بيد ويد لوخرا هز بيها لميكات وقال ~ اجي معايا نوريك !!
خرجو لكوزينة ل تبنات في سطح وجهزوها بشوية كل مرة يشريو حاجة حتى كملات ، بدا يجبد التقدية ويحط اول حاجة خدا لعنب غسلو ومدو ليها عنقود تنقب ورجع جبد من ميكة طيحان كبير معمر كفتة ومخيط خاصو غير لفران قال بغمزة وهو كيوريها ~ غيعجبك وقفت عليه حتى عمرووه
حلات عينيها معاه وقالت بدهشة ~ هذا كامل بغينا ناكلوه اغلام !! كبير قسم وهبط لماماك منو
غلام جبد لاطة من فران حطو فيها وقال ~ ديالهم وصلهم ، مهم هاهو نشعل عليه وقابليه من بعيد وعنداك تحرگي يدك تاني وتقولي ليا مشفتش الفران ها وذني منك انا ندوش بالخف ونهبط نشوف الواليد فاش بغاني ونجي نتعشا بزوج
تبسمات بمحبة وكتافات تحضيه شنو كيدير وفنفس الوقت كتاكل وتبنن فالعنب وفيه كيف كيتحرك برجولة ، مع طويل وعريض عندو هيبة من عند الله
خرج من دوش عينيه حمرين طل عليها لقا بطاطا كتقلى وشلاظة تصوبت طل على الفران ونقص عليه ونزل لعند باه يشوفو ، كان فالبيت هو لكبيرة ل كتجمع في حوايج وتقاد في صيكان دخل عليهم بملامح مستفسرة وقال باستفهام ~ مساافريييين !!
هز خليفة راسو وجاوبو وهو كينعت ليه يجي يجلس حداه ~ اه اولدي غنمشي نطلو على لعروبية انا ومك شي سيمانة ونجيو !!
قال غلام بعدما جلس ~ طرييق سلامة !! حرك راسو بتساؤل ~ غادين غير نتوما لبنات فين غيبقاو
هنا ضارت لكبيرة مگرفضة عليه كانت على نقشة وباغا ليه غا سبة ~ كيفاش فين غيبقاو ؟؟ غيبقاو هنا فدارهم ولا تاهما بغيتو تحرموهم منها
عقد حجبانو فيها وشافيها بحدة كارز على سنانو وجامع قبضة يديه ~ لواليدة واش وذنيك كيسمعو شنو كيخرج من فمك ولا غير داوية ، واش ضروري فينما ندوز عندك تسمعيني شي كلمة تبغي تجبدي بيها عيبي بلعاني وترجعيني ممزيانش
بغات تهضر وهو يقاطعها كيهز فيديه ويورك على كلامو ~ سولتك جوبيني قلت ليك فين غيبقاو ومعامن تقولي هنا وصافي انا محرمت حد من حد ل بغيتيه الله يهنيك بيه
بغى يجمع الوقفة وهو يشدو خليفة من يدو ،كان فيدو عكاز غير حشم من ولدو اما يصيفطو لمرتو لفم يهرسو ليها دوا وقال ~ فمك غاا تاع تهراس اهاد لمراا ، مبغيتيش تتردعي خرجي لعند بناتك خليني ندوي مع ولدي بخاطري يخخزيت
خرجت كتنفخ وغلام حادر راسو كيحسبن فسرو ،طبطب عليه باه وقال ~ على داكشي علاش بغيت ندوي معاك !! بغيتك ترد البال لخواتاتك فغيابنا ولخوك تاهوا !! شوف اش خاصهم خوك معاش كيدخل ماشي يضمنو نتا بابك مسدود عليك يقولو دنيا سايبة ، نعول عليك ؟؟
حرك ليه غلام راسو وقال ~ كون هاني ابويا واخا يكون بيني وبينهم كلومترات عيني عليهم تمشيو وتجيو بسلامة
وقف وخشى يدو فجيبو جبد بزطامو وخرج منو ضمسة لفلوس بدا يحسب حتى مقد ومدهم لباه في الاول تحجج ورفض بحجة خليهم عندك عندي رزقي بالحق عطاهم ليه صحة ، خشاهم في قب جلابتو وقال ~ ديرهم تحت منك وقت وزمان ، سلم على ناس لعروبية والا خصاتكم شي حاجة نمرتي ياك مزال مقيدة فاجوندا عندك
خليفة جبدها من جيبو ~ هاهي اولدي ديما معايا
باس على يديه ~ لهلا يخطيك ابويا ،
حتى خرج وفات لباب وهو ينعل شيطان كتبقى مو واخا ضربو گاع ميحافيهاش ، دخل لعندها لبيت فين كانت جالسة ودايرة فيها كاعية ول شافها يقول مظلومة ،لقاها حاطة يدها على مخدة ونافخة ريشها وكتشوف في سما بشنتة وغير شافتو دورت وجهها ، جلس حداها كيتنهد ويمسح على لحيتو شهماتو من نهار عزل ماكلتو وهي قالبة دمها عليه ، خسر عليها كلمة وحدة ~ الواليدة خاصك شي حاجةة !!
جاوباتو نافخة بلاما تشوف فيه ~ مخاصني والو الحمد لله عندي رزقي
جبد شي بركة من جيبو دارها ليها فيديها وباس على راسها وقال ~ رزقي هو رزقك عمري جيبك انا عارف طبعك
لكبيرة من ناس ل عينيها بحال سميتها ..عزيز عليها تبان قدام ناس ، تدي وتمد وتعطي وانا ولدي ورزق ولدي وعندي وشوفوني…. وغلام عارفة نقطة ضعفها مزيان نهار يلقاها مريضة ومهمومة يمدهم ليها ورقات تصح وتوگض ، كيف مدهم ليها فيدها هزات عينها فيه وقالت بصوت بدا يلين ~ الله يرضي عليك
تنهد بصوت مسموع وقال ~ هانية الواليدة الله يوصلكم على خير ، بغى بمشي وهي توقفو بكلامها كتلحبذ ~ بقا معانا اوليدي تعشى رحمة كطيب داك طيحان ناكلوه مجموعين شحال متجمعتي معانا على طبلة
لاح ليها صنارة وقال ~ ونجمة اميمتي تتعشى راسها كتبقى بلاش نهار كامل تعدي بلي كاين حتى كنجي فليل
لكبيرة بقلب حاقد مافيهش ذرة شفقة وقالت حشومة مرا واحلة فروحها ~ وهي ل بغات شكون ضربها على يدها كانت معانا تبغات وحدها ايوا تقد عليها
عض على فكو كان يتسنى منها تحن وتقوليه تهبط تاهيا تتعشى معانا بالحق خاب ظنو وقال راسو تفرع عليه فهاد زوج دقايق ل نزلهم ~ بصحة والراحة الواليدة انا طلعت فحالي
مشا وخلاها حالة فمها وغتاكل جنابها بلغدايد
طلع لقى طبلة محطوطة ولعشى وجد وكانت كتسنى فيه غير هو ، كلاو بزوج فجوهم الخاص مرة تسولو مرة توكلو مرة تفشش عليه ملي كملو ماكلتهم جمع طبلة وحلف عليها متغسل حتى حاجة حتال صباح وتاهيا كانت طالبة عليها ، خرج يقاد مجاجو على برا وهي ستغلت غيابو بدلت عليها وطلقت شعرها تقادت وتعطرت وتخشات في فراشها كتسنا فيه وداكشي ل كان بحال كل نهار نعسات على صوتو ويديه كتلعب فشعرها
صبح الحال عليها بوحدها فالفراش غلام مشا الخدمة كانت العشرة شبعت نعاس ناضت كتكسل فبلاصتها كرشها سابقاها مع غتحل باب بيتها وهي تلقى مريم واقفة فوجهها ملامح وجهها تخطفو عمرها عتبتها عندها وشنو جابها دابا
جايا لعندها بزز منها كانت واقفة حاطة يدها على جنابها ما طويلاش بزاف كانت محسوبة على لقصارات فورمتها غزالة من عند الله زينها طبيعي ومقبول شعر كحل كحولية مولانا لابسة جلابة تاع داك الوقت مخبية فيها ليهونش ل عندها فايضين كون محاجتها متدقش بابها ومتجيش لعندها شافت فيها نجمة بملامح مخطوفين مستغربة منها عمرها دارتها ولا كانت ليها ومع صباح ،قالت بصوت خايف ويدها على قلبها خايفة تكون واقعة شي حاجة حيت عرفت من زمانها بلي والديه مسافرين ~ مريم !! ياك لاباس ياكما واقعة شي حاجة ؟؟
مريم زمت فمها حتى عوجت قنوفتها وبدات ترمش فعينيها محاملاش تهضر معاها ~ والو باس اش غيكون واقع غير بغيت من عندك شي حاجة وصافي
رتاح قلبها نسبيا وسرعان مرجعت قوست حجبانها وقالت بتساؤل حالة باب لبيت في وجهها ~ شنو بغيتي خصاكم شي حاجة فدار لتحت
سبقتها مدرمة بلا احم لا دستور متسنااش تقوليها دخلي ولا اجي دايرة فيها قايدة ودار با وبيت خويا ونتي غا زايدة هنا ، موقفت حتال قدام الماريو كدور عينها فلبيت اول مرة تشوفو بعدما جهز بالكامل ،رمات عينها على كوافوز ل كان عامر بداكشي ل كيحمقها روايح مستفين عكورة منوعين كل ما يخص لبنات ، تنهدت من لقلب تنهيدة عامرة حقد وقالت كتعوج فهضرتها ~ بغيت شي لبسة من داكشي ل خدا ليك خويا نلبسها غادا خارجة ، سكتت ورجعت كملت هضرتها بزربة ، انا ورحمة غادين معروضين عنددد تحججت بالكحبة حتى دورتها في دماغها ومجات فبالها غير سمية زهرة قالتها ليها حيت عارفاهم دايرين كي لما والعافية شي مكيدوي مع شي
هزت ليها نجمة راسها بواخا مخرجة راسها من داك سوق ومدارت فبالها والو ،بحسن نية وبقلب صافي حلات ليها لماريو كتوريها ،معتابراها بحال ختها خديجة عادي بنت فسنها تبغي تلبس وتبان وتقاد تاهيا بنت ودازت من ديك المرحلة ، قالت نكسبها ونقربها مني تعمر وقتي ونديرها بحال ختي وننساو ل داز ، بالحق مول نية وقلة نية مكيتلاقاوش ، حطات العين وفهات في كسوة مزال جديدة بتكيتها عمرها جات فوق لحم نجمة مجابتهاش لفرصة تجي عليها شدتها بين يديها بعينين معجبة وممبيناش ~ واقلة نعدي بهادي هي ل كنظن غتجيني
مقدرتش تردها ليها في وجهها وتعزها فيها بغات تبدا صفحة جديدة معاها وينساو المشاكل لدازو بقلب صافي قالت ~ بصحتك جااتك شنو خاصك تاني معاها صندالة ولا صباط
مريم تحلو عينيها وطمعت ~ وريني وانا نختار ونشوف ل يعجبني
وداكشي ل كان خدات صندالة عالية قيستها واخا معرفتش تتمشى بيها مزيان دفعت صنطيحتها ل كتكساب…… وبلا اذن مشات جلسات قدام كوافوز وتقادت على خاطرها وتزوقت وعامت بريحة ماشي حتى رشت وملي سالات رمات عينيها على وذن نجمة بانو ليها طوانگ ديال ذهب كيبريو شافتهم وقالت ~ اري نجرب واش غيجيو معايا !!
نجمة تشوكات طوانگها عزاز عليها وعمرها حيدتهم من وذنها …كيفاش تجرأت تطلبهم منها حتى كانت غتلبي ليها طلبها وفاخر لحظة فاقت ورجعت بلور وشدت يدها عندها وقالت ~ مكيتحيدووش من وذني لاصقين
ميقت فيها مريم وهزت ليها راسها بنفخة وقالت بصوت ثقيل على لقلب ~ واخا الالة ماشي مشكيل مهم انا مشيت
حتى بغات تسولها واش خوك فخبارو خارجين وهي دير خمسة على فمها وسكتات جاتها غريبة هاد المشية بقات كتشوف فيها وهي نازلة مع دروج ، مستغربة منها ومن كلامها وتصرفاتها بلى متزيد تفكر نفضات راسها ….
روتينها ديال صباح قضاتو بشوية عليها بدماغ وبال هاني مدات مجابت فطرت وجمعت بيتها وروينتها وشي حويجات قلال صبنتهم ونشرتهم شوية حتى كتسمع صوت خطوات طالعين في دروج مشات بالخف دخلات للبيت ضنات يكون عبيد واخا منبه عليه غلام ميقربش للفوق بالحق الوقت وزمان سبحان لما يسهى ،بالحق كانت رحمة مطلعة شبكة صابون وطالعة ، هزات حجبانها بصدمة وخرجت لعندها سلمت عليها بإستغراب
رحمة كتنهج وزاعفة ومعجبها حال ~ ل وجهو وجه تمارة تبقى ديما مكتوبة عليه يخخ
نجمة غير كدور فعينيها ~ علاش مالك واش ممشيتيش مع مريم قالت ليا معروضين شفتك غتصبني
على نيتها سولات وهي تفافا رحمة وبينت خوفها ،هزت شبكة وطارت من حداها وكتدوي عاطياها بظهر ~ اه لا مشات راسها وانا غنلحق عليها !!
جوبتها نجمة باه وسكتت هاديك مشات لصابونها وزينة سمية قضات ل تابعها ،بقات من هاظي لهادي حتى داز نهار وتعاشات لعشية كانت متكية كيف عادتها شافت ساعة بان ليها قرب وقت ل غيدخل فيه غلام وهي تجمع الوقفة تقاد شي حاجة يدوزو بيها أتاي حتى طلعت لعندها رحمة مخلوعة وكتهرنن
وجها صفر ، ويديها كيترعدو بالخوف ، غوتات كتطلب فيها وتعاود ~ نجمة انا مزاوگة اختي الا معتقيني ليوم الا جا غلام وملقاش مريم مشينا فيها
طرطقات عينيها مصدووومة مفاهمة والو وفنفس الوقت كتسولها ~ اويلي علاش ياك مشات غير عند زهرة
جاوباتها وهي كتويييل وتعاود ~ غير كذبت عليك ممشات گاع عندها ها العار لما ستريها راها بلعت ريقها وقالت ، خرجت مع صحبتها وتعطلت قالت ليا قبل العصر تكن هنا طلبتني وشحال بكات عليا نغطي عليها وداابا تعطلت وخفت يجي وميلقاهاش يقتلها ويقتلني معاها وانا مدرت لا بيدي لا برجلي
حست نجمة بدوخة شدتها ، تسندت على الحيط ،فمها نشف وشحفة شدتها فين بغات تكون مشات واش هاد الهم نزل عليها نطقت بخوف ~ شنو بغيتيني انا نقوليه منقدرش نكذب عليه اختي
رحمة بغات تبوس ليها يدها بالخلعة خوها وعارفة اول حاجة غيديرها قبل ميطلع لبيتو غيدوز عندهم هو لول ، قلبتها في دماغها مزيان وقالت ~ غنقوليه مشات لحمام ونتي متجبدي حوايج ل عطيتيها ولا كلام ل سمعتيه من عندها
كيقوليييك حبل الكذوب قصير ، شحال قدك تخبي وتغطي غادي يجي نهار لي تحصل فيه وتودي، ديرها غير زوينة ، عمر السر يبقى مدفون ، ومصير الكذوب مكشوف …. لا انتي ولا غيرك تقدري على قدرة ربي ، قالت كذبة صغيرة وتفوووت معارفاش مور كذبة يجييييو كذوووب …مريم بقوة لحكام وزيار تخنقات وكانت غير كتسنى الفرصة ل يتطلق ليها فيه لجام ،
حنا البنات عيبنا واحد ، أي وحدة فينا كتبغي تخرج وتلاقى تحب وتتحب ومريم من هاد النوع ، المراهقة لي جاتها وطيشها ، خلاها دير أي حاجة ، باش تخرج للزنقة ، الحكام والضغط لي كتعييشو خلاها تكذب كذبة بيضة ل غترجع عليها بموصيبة كحلة ، هي باغا تلبس وتعطر دير ماكياج وتشوف زينها فعينين رجال باغا تبان واخا تجيبيها فعضامها ودير مشكل لراسها لمهم تخرج وربي كبير .. طيشها خلاها تطغى وتمرد ،وشكون يقابلها؟ ولا يكون بيها؟ الكبيرة همها الوحيد نجمة ، هي لي حاضية فعواط لي تحضي بنتها وتقابلها مقابلة نجمة حتى خرجات بنتها من يديها
~~~~~
شافت باها ومها سافرو قالت حگا دنيا ربيع والجو بديع ندير مبغيت نسات غلام ل مكيجيو والديه قدامو والو ول الا شاف عليها ل ميعجبوش يحسن ليها شعرها بلا ما ويربطها بسناسل ويجيه قليل
نجمة دخلات فمشاكيل مكانت ضاربة ليهم حسبة كانت هانية مهنية مع مخها شنو بغات عندها هاد مريم حتى تنكد عليها نهارها ، الخلعة شدتها من كرشها اما رحمة حداها داخلة خارجة لطواليط طاحت عليها كرشها ، تكمل من طواليط عزكم الله تطل من شرجم حاضية وكتطلب الله ~ ياااربي فوت ليا غا هادي وعمري نعاود !!
ضفارها كلاتهم وجهها صفار مخرجة راسها من شرجم صغير تبرگگ وكتقلب على وجه ختها وسط ناس شوية وهي تبان ليها طوموبيل غلام ، هنا قلبها بغى يسكت ، خبطت فخضها بحر جهدها وقالت لنجمة لمكانتش كتقل عليها بالخلعة ~ ناااري راجلك جااااا !! ناري على هاد بنت لحرام لخانزة نشدها ناكلها بسناني …..
نجمة بدات تندم فراسها واخا مدايرة والو معرفت مدير واش تخبي عليه وتدوز شوكة بلا دم واش تقول ليه وتحل عينيه خافت يدير فالبنت شي حاجة وذنوبها يبقاو على رقبتها مغيرحمها تا واحد فيهم وضوسيها زين معاهم وغيكمل ، فوضت امرها لله ودخلت لبيتها جلست بعدنا نزلت رحمة
كان جاي عيييان ومسهوووت بالخدمة باغي اكتى يحط عظامو ويرتاح ، بانت ليها جالسة وكتشوف جييهة الباب تبسم وقرب لعندها بتبسيمتو ل كتبان كي لهلال باسها فجنب فمها وبادلاتو لبوسة بلا خاطر ، هز عينيه كيحقق فيها بانت ليه غريييبة وماشي على هواها وجها صفر جلس حداها بالو مشطون و حط يديه على حناكها كيقيس فيهم ونطق ~ مالك واش مريضة !!
كانو عينيها كيدورو فجهة اخرى بتوثر معرفات شنو تقوليه واش تصارحو ولا تسكت وتدوزها هاد المرة جوبتو مساعفة ~ لا مزيان غير كنت ناعسة ، وقفت هربانة من اسئلتو وقوة ملاحظة ل فيه ، عارفاه كيفليها وحفظ طبعها ~ انا نمشي نطفي على واحد حرشة
تبعها غادي يغسل وفنفس الوقت كيدوي ~ انا نغسل ونهبط لعند لبنات يطلعو يشربو معانا اتاي
بحالا خوا عليها لما بارد حسات بتبوريشة وجمعت يدها حاضنة راسها بيهم ، اما هو قال هضرتو ونزل دخل لدار بان ليه صقيل متجرأش يحل لبيوت على خواتاتوو بدا ينادي عليهم بصوت عالي حتى خرجت رحمة حازمة راسها ~ خويا مالك خاصاك شي حاجة
غلام بأمر قال ~ طلعي نتي وختك تشربو اتاي فيناهيا بعدا ؟؟ دخل لبيت بان ليه خاوي ، نعت ليها للبيت لاخور واش كاينة فيه حركت ليه غير راسها بلا اما لسان تزيزن ، بدات تخرج حروف من فمها مرعدين ،عينين كانو مترقبينها كي صقر شوفاتو حاريين كيجيبو تمام ~ فيناهيااا ختكك !!
رحمة سنانها كيشطحو ~ في ل ح ما. م م
يتبع
التعليقات 0