الفصل 7

واقفة قدامو كتڤيپري وكتطلب من الله متدخلش دابا وتحشمها قدامو وتخليها عليهم بزوج ، اما هو دار يدو فجيبو هاز حاجبو لسماا متبع عينين رحمة ل كيتحلو ويتسدو بتوثر ، قال مقوس عينيه وبنبرة صوت قوية ~ علاش خليتيها مشات راسها

مولفة كتمشي بوحدها ؟؟

رحمة بصوت مرعود عضات على فمها كتبرر ~ لا اخويا راه مشيت انا وياها ، غير سخفت وسبقتها خليتها ورايا كتغسل شعرها راه يله كيف دخلت

حرك ليها راسو بالله يجعلني نتيق ، كان موقفها قدامو وكيسول بحالا جالسين فكوميسارية مرحمهاش شوية وتگر بلا عصا من ديما كتخاف ومعزيزش عليها المشاكيل وعمرها دارت علاش … شوية سمعت صوت دقان في الباب هنا رحمة مشات عند الله ورجعات

للحياة قلبها كتسمعو في وذنيها كيزدح الخطوة مبقاتش قادة تخطيها قال بأمر مگاود مع الباب ~ سيري حلي على ختك نشوف هاد الحمام ل بقات فيه تال دابا

جوباتو بصوت ضعيف بالكاد سمعو ~ واخا اخويا !!

مشات تجر في رجليها وكتمتم تحت فمها ~ اميمتي اميمتي فينك وتعالي طلي على هاد لحريرة ل ميجمعوها شراوط ، كون لقات دوك دروج يطوالو وميتحدوش تبقى غا هابطة ومتوصلش لباب تودر عليه ويتعكس ميتحلش والموصيبة كان واقف وراها يشوف شكون … باش متزيدش تعَيَّقْ حلاتو على وسعو حاسة بسخفه وهي ترجع فيها الروح ملي شافت صباح ل قدامها جايا ببيجامتها معندها ل يحكمها تقول كتسارا فبيت نعاس رمات عينيها على غلام ل غير شافها خسر سيفتو ودرگ عليها وجهو اما هي لحنت صوتها وسمعاتو ليه ، صافي البيبان ل كيديو ليه تسدو في وجهها وعرفات عمرها مزال تجمع بيه مشا منها وداتو نجمة وهي بقات وغتبقى مشوية عليه مابيدها مدير من غير تشوف فيه وتنهد لا هو من صحاب لعينين زايغين ولا بوبنات ل غيخون مرتو معاها طبعو شارباه ما مدارش لحرام تا وهو زوفري ويجي يديرو دابا ؟؟ …خبطت حناك رحمة بسلام بلعاني وقالت كتغمز فيها وتقرص ~ رحمة لاباس عفاك كلمي ليا مريم ؟؟

رحمة عضات على فمها بمعنى اش كاين ونطقت ~ راه في حمام !! كنت انا وياها انا سبقتها وهي مزال مجات بغيتيها فشي حاجة ؟؟

خبطت على جبهتها بلطف وقالت ~ سبحان ل ميسهى نسيت راه قالت ليا غادا ليه صافي ملي تجي قوليها سولت فيها انا مشيت

عطاتها بظهر وتسنات حتى سدت رحمة الباب ومشات بالخف لدارهم لقات مريم ورا الباب كتطل من شق ، قالت وهي طالعة في دروج ~ تبعيني الموصيبة ليوم سلكاتك منها رحمة قالت ليه مشيتو الحمام نتي وياها وخلاتك وراها !!

مريم تابعاها مخلوعة تخاف متحشم ، خرجات ونسات راسها وتحلات حتى تصدمت وهي راجعة من طوموبيلت خوها ل واقفة قدام الباب كحلت بلعما وعرفت ليلتها كحلة وهي تقصد غا صباح ل فكت ليها جرة دخلتها لطواليت خشات راسها تحت روبيني سرداتو غسلت وجهها ودارت صابون لعينيها حمرتهم عطاتها سطولة وفوطة راس ورجعتها تحلف عليها الا بصح كانت في سخون

طالعة هازة سطولة وكتنهج وتمسح وجهها وتعاود لقاتو واقف في وجهها شافتو وقالت كتسخفن عليه ~ خوياا سلام مدت ليه يدها وحطات دوك سطولة وسط دار دايرة يدها على قلبها كتقن فن الثمتيل ~ اووف سخفت لحمام شحال عمر ورا ممشيتي ارحمة !! لعار مدي ليا كاس لماا على وقفتك

كون لقات تقجها تا يخرجو عينيها بالحق دازت في وجه غلام ل واقف حاضي لفيلم هز يدو وقال بنفخة ~ طلعو تشربو اتاي بعدا وتكون الهضرة

غير غبر من قدامهم وحسو بيه طلع في دروج مشات رحمة سورتت الباب وگفضت كمامها وجات ليها تسب وتعاود ~ والله ما كتحشمي ابنت لحرام !! كنتي غتخرجي عليك وعليا ، شحاال ساعة فين بقيتي تال دابا قلتي ليا شوية ونرجع هادي هي شوية كون بتي في زنقة حسن

ميقت فيها ممسوقاش ، اشارت ليا بيدها بمعنى سكتي وقالت ~ هنينا دابا يسمعك وديك ساع عاد يورينا !! ياك دازت هاد المرة ايوا صافي مديريش من حبة قبة بقيت مع البنت في دارهم محسيناش بالوقت حتى داز

وقفت غادا لبيتهم ورحمة وراها كتحيد جلابتها وحيدات حوايج نجمة ل كانو تحت منها مگفضاهم شداهم كمشتهم ولاحتهم في ماريو حيدات صندالة من صاك وكلشي رجعاتو لبلاصتو دارت زيف حياتي ولبست بيجامة وكتدنن ووحدة حداها غتموت بالفقصة

وهي مكيناش هنا ، خرجت ودارت مبغات وسلام لقات رحمة حاضياها ودموعها دايزين كانت على سبة خاصها غا علاش تبكي ، قربت منها كتنغز فيها وتدوي معصبة ~ دابا مالك دايرة لينا مندبة ؟؟

رحمة كتهز في كتفها ~ اخرر مرة ديري ليا هادشي معرفت منقول لخوك وتا دابا طلبي من الله مرتو متقوليه والو حيت عاقت

مريم هزات حاجبها بتعجرف~ بغاتني نضربها ليها بشي نتفة تحل فمها وديك ساع نوريها واكلة دگة واكلاها مهم ندير علاش

رحمة وقفت كتمسح دموعها بجلايلها ~ زيدي طلعي راه كيتسنى فينا وفرقي عليك البنت وفرقيني عليك معاها

طلعو لسطح تما كانت طبلة على برا وكراسا نجمة حاطا صينية ودوازها جالس غلام كيكب اتاي تا وقفو خواتاتو ، هزات نجمة عينيها فيها بلا حول عقلها ممستوعبش كيفاش كذبت عليها وتيقتها دغيا دارت سيناريو فدماغها ومثلاتو ونجمة حيت ضبعة تيقاتو ، مقدتش تدوي معاها سكتت مد ليها غلام كاس اتاي خداتو من عندو في سكات وكلاو في سكات حتى نطق هو وكسر داك صمت وقال موجه هضرتو لخواتاتو ~ داك خيطي بيطي لزنقة نقصوه تا حد مكاين في دار مجاكم الحمام تال ليوم !! وملي عينيكم تمشيو قولوها ليا ديك سااع

جوبتو مريم كتنقز ~ اخويا راه كان خاصني نمشي ضرووري وراني طلعت صباح عند نجمة وعلمتها وقلت ليها نيت تمشي معانا ومبغاتش خافت تسخف فيه مع سخونية

ضار لعندها كيشوف فيها لقاها حالة فمها ، كتكذب عليها في وجهها بلا حشمة بلا حيا ،بغات تنطق وهي تشوف شوفات رحمة المترجية ونعلت شيطان وسكتات كتفكر كيفاش تقولها ليه ، معندهاش مع كذوب ومتبغيش راجلها يعيش فدار غفلون كون كانت عارفاه من نوع ل متفهم ومتحكم فراسو غتسارحو دغيا ومترددش ولكن عارفاه يدو سابقاه خافت يدير شي كارتة تندم عليها هي حياتها كاملة

خلاهم مجموعين على صينية وهز كاسو وهبط لزنقة يكمي ليه شي واحد وستغلت تما نجمة الفرصة وقالت مخنزرة في مريم ~ سمعي نقوليك هادي دازت مرة اخرا والله منعقل عليكم انا ممولفاش نكذب على راجلي

مريم جغمت من داك الكاس بصوت مسموع وقالت كتعوج فهضرتها ~ وشكون قاليك كذبتي عليه ؟؟ راه بصح كنت في حمام حيدت زيفها من فوق راسها ووراتو ليها سارد، شفتيه يعني غا كوني هانية مكذبتيش على راجلك غير حيت كنت في الحمام مع صباح ومبغيناش نقولوها ليه حيت غلام سكتات وافأفت وقالت من نهار تزوجك مبقاش بغانا نجبدو سميتها فدار خسارة مدوزوش لقليل هادوك زوج بالحق عادي تاحاجة مكتدوم

قالت هاد الكلمة اللخرة مطولة

لاحت ليها كلامها غير بالفن كتستفزها بيه وفالنفس الوقت كتمسكن ودور بعينيها مع رحمة خلاتها تلونات ومعجبها حال جالسة كتسمع على راجلها هاد الكلام وسمية صباح باقة فوذنيييها كتعاود متنكرش احساس بالغيرة انتابها

خلاتها كتنوي فدماغها شي حاجة مكيناش ومكاينش ل كيخرج على لمرا من جهة راجلها قد شك ، كانت على سبة وهرموناتها مزاگينش واستفزاز مريم ليها وموضوع صباح ل بنسبة ليها مزال متطرقش معاه حيت عمرها جبداتو هي وياه رجع كيحوم ليها في الدماغ ، دوزت ديك لعشية ماشي على برجها غير مساعفة ومكابرة غلام غبر عليها مطلع حتى اذن لعشا وفات كانت كل مرة تطل من شرجم بتخبية واخا منبه عليها حاضية باب جارتها باغا تشوف شي حاجة وخايفة منها

هادي حالة المرأة فاش كتغير، عيبنا واحد وكل وحدة فينا كيفاش غيرتها دايرة بقات من شقيقة كطل تا بان ليها جاي هاز ميكة فيديه ونيشان فتح الباب ، مهزش عينيه فجييهة اخرى طلع نيشان دخلات بحالها لبيت طالقة شعوورها

بزز منها تغير عليه علا ماشي راجلها وبات ولدها ل جاي !!؟ راجل بحالو الف وحدة تمناه راجلها ومن نصيبها وشنو فيه ميتبغاش واخا عارفة ومتاكدة منو بلي ماشي من نوع زهواني … من ديما وفكل مرة كيخرج معاها عينها كتكون عليه كتلقاه كيشوف قدامو ولا حاني راسو شوفة مكيشوفش في نساا الا مجابتها صدفة وصافي ، طريقو حافظاها ووقتو تقاد معاها من خدمة لدار دار خدمة ونهار مكيكونش خدام يخرجها يساريها ولا يدوزو هو وياها ، هادشي كلو يخليها ترتاح ولكن بعض مرات الشك كيقتل والشيطان كيوسوس وحيث هي كتبغيه بزز منها تغير من صباح عليه ، كتبقى كانت معاه قبل والعلم الله شنو دوزو هي معارفاش …عمرها تجرأت تسولو وعمرو فصح ليها بشي حاجة كتبغي غير تسل الهضرة من لسانو باش يريح قلبها ل كينبض بيه وشاعل بالغيرة من جيهتو ولكن مكهنيش بالها ساد داك الباب وموضر سوارتو وهي موضوع صباح واخا تعيا تنساه كيفكروها فيه بزز منها ، كيبغيو يقيسوها في نقطة ضعفها ل هي غلام وحبها ليه كيبغيو يشعلو العافية فقلبها وينكدوها عليها ويفكروها بلي نتي غير دخلية جيتي فرقتي بين زوج كيبغيو بغضياتنم ، كيبغيو يخليوها تشك فحبو ليها وبلي ما هي الا مرا تجبر يتزوج بيها …..

شافتوو طالع هاز فيدو وهي تمشي كتجري تقاد حالتها عزيز عليها تشوف راسها بعينيه واخا تكون فيها الموت كتبغي تقاد وتبان زوينة ، سرحت شعرها وطلقاتو ورشات ريحتها ومشات جلسات قدام تلفازة دارت راسها كتفرج….دخل عليها وحط الميكة فوق طبلة وقال كينصل في دجاكيط ل لابس ~ شوفي شنو جبت ليك !!

قلبت الميكة فرحانة عمرو نساها ديما مفكرها بداكشي ل كيعجبها ، لقات شوية سقاطة والفواكه الجافة غمزها وقال بعدما جلس لايح ايدو على كتفها ~ حتى نتعشاو وحطي لينا شوية نتقوتو بيهم ونشدو ليه

بابتسامة جانبية حركت ليه راسها بواخا كتفكر فشي دخلة تبدا بيها كلامها عندها متقوليه ، حتى نطق وقال كيشوف في ساعة ~ داااك الميخي تاع عبيد معرت واش دخلل ولا مزاال !!

قلت حاطة راسها على كتفو وكتلعب فصباعو ل على كتفها ~ تبارك الله راه راجل ميتخافش عليه !!

غلام بنبرة قوية ل سمعو يقول كيتناقش ماشي كيدوي ~ الالة يجلس مع خواتاتو يعمر دار ملي نكون في خدمة واحد فينا يبقى هناا !!

نجمة بغات تشوف شنو فراسو منها تعرف ردة فعلو الا بغات تعاود ليه على مريم ~ علاش زعمة مدايرش فينا ثيقة خايفنا نخرجو !!

حيد يدو من على كتفها وقال بنرفزة ~ وااا الله يهديك !! ميق فيها وقال معوج فمو ~ تخرجو ؟؟ بغيتوني نهرس لشي وحدة فيكم ركابيها ، قبيلة غا دوزت تاع الحمام ونعلت شيطان ، بغاو لحمام تتكون الواليدة وتديهم معندناش لبنات ل يخرجو يديعو فزناقي يتزللو عليهم رعاوين

نجمة تنهدات وقلبت ليه الهضرة وقالت ~ غيرة ولا حكام

غلام ضربها لنيفها بخفة ~ سميها كيفما بغيتي قاليك ربط تلقى متسيب …مابغاو يقراو يتركنو تا يجيهم رزقهم وديك الساع الله يربح بنادم خاصو علاش يحل فمو بنات فلان وخواتات فرتلان نصدق مكحلها مع شي حد راك باااقا معارفاني مزياان شفتي مني غا شوية

خلعها خلاها غا كدور فعينيها وكتشوف اش بقى عندها متقوليه ترزى فيه وهي باغاه ومحتاجاه فحياتها ،سرطت الهضرة ل عندها ليه وقررات لكلام مع لكبيرة اما غلام دمو حامي وسخون ومغتقلبش لراسها على خراب حياتها ، حسات بيدو طالعة نازلة مع ظهرها بورشها وترخات جرها من خصرها وقربها ليه وخشى يدو فجيبو جابد منها بركة تاع لفلوس وحطها ليها فوق طبلة وقال ~ هاكي هاد الاماانة خزنيها عندك !!

قالت بسم الله وهزتها كتشوف وعينيها كيسولو ~ ديالاش هادي!!

اشار لكرشها وقال ~ نوجدو ل داكشي ل جاي !! بلل فمو وقال كيعبر بيديه ومرة مرة يحك لحيتو لمضلمة ~ كل مرة نعطيك ل قسم الله خزنيه عندك باش نهار تولدي ان شاء الله نلقاهم

بدات كتفشس عليه بدلال عفوي وقالت حاطة يدها على كول تريكو كتلعب فيه ~ غدير لياا سبوع وتذبح الحولي ؟؟

غمض عينيه ونزل لعنقها باسو حتى دغدغها ورجع حال عينو فيها وقال كيدوي بجدية ~ الا حياااااني الله غنذبح ثور !! ومغنديرش سبوع ،حرك ليها صبعو بلااا وقال ،غندييير عرس !! العرس ل مدارش ليا غنديرو لولدي ونفرح بينا ان شاء الله

حسات بالبكية والفرحة مشاعر مخلطة ، غرغرو عينيها دغيا مسحتهم بطرف صبعها وقالت ~ الله يجيبو على خير يارب

باستو فحنكو وقالت من جديد محدو باقي رطب معاها ~ غلااام نسولك !!

جمع ليها شعرها ورا ظهرها محرك راسو باه ~ مالك شنو !!

بححشمة وحناك مزنگين ~ مندمتيش حيت تزوجتي بيا !!

شافت فيه هز حاجب ونزل خوه وهي تكمل وقالت ~ زعمة بغيت نقول راك عارف زواجنا كيف كان ؟؟ لتكون كنتي باغي شي وحدة اخرا وتفرضت عليك انا وسمحتي فيها شنو زعمة مكنتي كتبغي تا وحدة ولا حاط عينيك

كحاز عليها شوية كيشوف فيها ويعاود راخي عينيه ومهدن ، كانت حاضيا ملامح وجهو ل معرفتش تفسرهم كتسنى فيه يدوي يريح قلبها يقوليها كاينة غا نتي وباغيك غير ونتي ل حبيبتي ، هضرة الافلام ل كتحلم بيها وكتعجب كل درية وكتبغي تسمعها ولكن هي تلاقات مع واحد خضر مجندر كلام المعسول جاهل فيه ومكيفقه فيه والو معندوش معاه ، شابك يدو كيضور في صبعانو وقال كيضحك بنخوة ~ دابا انا كنقول ليك تولدي غندير عرس ونفرح بينا ونتي باركا عليا مندمتيش حيت تزوجتي بيا !! كون كنت ندمان ابنادم غتلقايني جاي مخشي فيك كوراني حاطك سطل بلا تقرقيب تشوفيني كي لهلال فينما ندخل عندك نرسم على جبهتي الله يقربلها منقوليك تا سلام !!

هزات كتافها كتلعب بشعرها وقالت كتعوج عليه فهضرتها ~ واش ممنحقيش نسول راجلي ونريح قلبي …قوص حجبانو فيييها كتحمقووو فاش كتبدا تشيطن وتعوج كيحسها بنت صغيييرة شد يديييييه خدى يديييها وصطهم كيبانو صغاار قدام عضمة يديه الكبار حقق فيييها لقاها كتشوف فيييه كتسناه ينطق بشي حاجة يخلي قلبها يرتاح والغيرة تلاشى

نطق هاز راسو وقال ~ من حقك تسولي على راسك !!

رجع سولها كيخمم~ دابا ل شاغلك هو واش كنت مع شي وحدة قبل منك

بللات حلقها وهي كتشوف فعينيه لي كيشوفو فيها بأريحية ويديييه وسط يديييها كيدوزو ، رخاها بهاد الطريقة ~ اه

تبسم شبه ابتسامة وهو حاضيها وعايق بيها باغا تعرف وباش ميخليييهاش كتخمم جاوبها فالحين ~ نتي لي هنا حط ليها يديها على صدرو جيهة قلبو ورجع كيشوووف فعينيها ، وعمر هاد العينين تحطو فشي بنت المرا من نهار وليييتي على سميتي مكتووووبة

ضيقت فيه عينيها منفخة وقالت ~ غير حتى وليت على سميتك يعني قبل متزوج بيا كانت شي وحدة في حياتك !! شنو سميتيها صباح يااك

طلع حجبانو فاهم واخيرا الموضوع ل كياكل فدماغها يعني سامعة بصباح وبقصتو معاها ، جاوبها في ساع باش ينهي هاد الموضوع لي معاجبوووش يهضر فيه هو جاي وباغي يرتاح معاها ، وهي كتنبش وتسول على وحدة عمرو حس بيها ولا واعدها بشي حاجة نطق زاعف ~غنقوليك واحد الحاجة ودخليها هنا قاس راسها بصبعو ونطق مخرج عينيه ، غنجاوبك غير باش نتهنى من هاد سمية ل بغاو يلصقوها فيا صحة وبزز ، ديك سيدة عمرها كانت ولا غتكون جامعانا شي حاجة من غير جورة والله ينعل اصل مها جورة درنا معاهم زوين ندمونا ….تعصب وتقلبت گانتو فدقيقة خلاها غير كتشوف فيه كيفاش تعصب عاد كان لاباس بيخير وعلى خير بغى ينوووض وهي تشابك يديها مع يديييه وكتنيييييم عينيها فيييه باغا تلييينو ومتخليييهش معصب، قربات لوجو وباستو بجهد ونطقات ~ متقلقش مني ، غير بغيت نعرف واش راجلي ممشاركاني في بغوك تا وحدة وصافي ..طول فيها شوفة كيحرك راسو حركات دائرية بمعنى معامن انا وقال ~ تا انا جاوبتك من غيرك مكايناش بنت لمرا لي نهز فيييها تا نص حاجب

حطات راسها على صدرو فرحانة بكلامو عنقاتو وقالت وهي مخشية فيه غكير بالفرحة ~ الله يخليك ليا يارب

وما حلاها جلسة جالسين بزوج بيهم وثالتهم ل جاي في طريق في الكرش كيركل في مو قفزت في حضن غلام تقالت اي بصوت مسموع ،ضحك ضحكة خاترة عليها وقال حاط يدو على كرشها كيتحسسها ~ وصل علييه الوقت بدا يركز تاني ها ؟؟ قالت ليه اه مذبلة عينيها وجاوبها كيضحك ~خلييييه يدير ما بغى

علات راسها فيه وقالت مقوسة حجبانها ~ باش عرفتييه ولد والا كانت بنت !!

جمع وجهها بيدو وقال كيتسارا عليها بعينيه ~ معنديش مشكيل ل جابو الله مرحبا بيه ، واش انا كنت معول على هاد الخير ل عايش فيه باش نتشرط دابا …تنهد من قلبو وقال حاط راسو على راسها كيدوي ويشوف بعيد ~ وهبني الله حياة كيف ناس مستقرة وليت نعرف راه من بعد نهار كاين ليل غا ندخل ونتركن نتخشى حدا مرتي نعس مخشي فيها ، وليت نتجمع على طبلة في الوقت ونضرب الهم لغدا ، خفيت من شوية الجعرة ل كانت فيا ووليت نخدم عقلي حيت عرفت كاين ل كيتسناني

مكنتش هاكدا انجمة جيتي تبدل فيا بزااف هاد غلام ل قدااامك بفضلك نتي ولا عندو حياة

حسات بضيم طاح عليها وبعينيها جايين بدموع تخشات فيه معنقاه بجهد مكرهاتش تدخل وسط ضلوعو ،كلامو اثر فيها بزاف وكيف هي كانت عندها دور في حياتو زوينة تاا هو مركز حياتها جا نقذها من شحال من حاجة دار ليها العز وخرجها من القهرة والحگرة وذل ل كانت عايشاه ولات عندها حياة واستقرار واخا مكاملش ولكن كلشي مع الوقت يتقاد حيت لا بد من عثرات في الاول وما بعد العسر يسر

مكرهتش لو فرحتهم ل كانو كيحسو بيها فنفس اللحظة تبقى للابد بالحق لا ضلام حزن يستمر ولا نور فرح يدوم حياتنا تقدر تقلب فلمح البصر داكشي علاش الانسان يخلي الايام تدير ل بغات وكيفماا بغات …

سيمانة ل دوزت لكبيرة وخليفة بعيدة على دار دازت على بناتهم طايرة اما على نجمة كانت ثقيلة بغات امتى يرجعو لدارهم باش تتهنى على راجلها من طيش خواتاتو خافت من موضوع مريم ليتكرر مرة اخرة وترجع تخرج ويعيق بيها غلام وتكحال القضية ما هنات حتى سمعت واحد صباح صوت شيخها وعدوزتها عاد رتاح بالها وبغات تنعس على جنب الراحة سااعة شكوون خلاك ….

كانت جالسة مريم حدا لكبيرة حامية فيها البيضة كتمشي وتجي شعلات فيها العافية كل مرة تطل من شرجم وترجع تجلس حتى زفت عليها لكبيرة بمخدة وقالت كتغوت ~ واااااا ريحي الارض وسدي داك الشرجم دابا يشوفك شي واحد من خوتك ؟؟

قالت بارتياح وجلست مقربة من مها ~ غلام وقتو معروف تال لعشية وعبيد را ناعس وحدة وزوج والا فاق ، وقفت كتشوف وقالت ، انا غنطلع لسطح نشوف لمانطة واش نشفت ولا لا يومين باش نشرناها

حركت ليها مها راسها بلا حول وكملت على تفراجها كتاوب باقي شاد فيها لعيا تاع طريق ، اما مريم طلعات دايرة سبة وغرضها كان باين قصدت نجمة نيشان ل كانت في كوزينة كتطيب ليها باش تتغظى من البيض البلدي ل جابو من لعروبية ول عطاتها منو لكبيرة وهو وشي باروك دازت غير على وجه غلام وخليفة اما متدوقهاش ، دخلت عليها مريم بلاما دير الحس وقالت بتمسكين ~ نجمةة ختي !!

قفزت حيت كانت ساهية وضارت لعندها شادة على قلبها وقالت مخلوعة ~ قفزتيني ديري غا الحس مالك !! خدات تنفسها وحركت يدها بمعنى مااالك !!

مريم عضت على قنانفها وعينيها غير كيدورو ~ بغيت غير نقوليك راه صندالة ل خليتي عندي تقطعات ليا وديتها تصاوب وانا غنمشي نجيبها ليك اختي سمحي ليا عطلتها عليك

حركت ليها نجمة راسها بنفي وقالت شارباها ما وكيف قالو لوالا الذيب كتدار بيه غا مرة ~ لا غا خليها معندي مندير بيها بلاما ديري بيا سبة وتخرجي ، داك المرة دازت وهاد المرة غنقولها لباك منك ليه ديك ساع ، لاحت ليها كلامها ودخلات لبيتها وسدات طالع ليها دم من هاظ الموضوع ، كيفاش بعلوكة بغات ترجعها لعبة فيديها تحركها كيف بغات نهار توقع ليها شي حاجة تلصق فيها ،مريم تعصبت وعينيها ولاو حمرين تقطعت على زنقة باغا تخرج وربي كبير هبطت لعند مها فيساع وقالت بكذوب ~ مي راه نجمة بغاتني نتسخر ليها انا نمشي دغيا نجيب ليها اش بغات ونجي غا لصيدلية خاصها شي دوا سالا ليها

لكبيرة قالت بعدم فهم ~ اويلي على تسخري ليها ؟؟ مولفة كتجيبي ليها شنو بغات ؟؟

مريم كانت لابسة واحد كسوة لاحت عليها جلابة ودارت زيف وكتدوي ممخلياش لمها الفرصة باغا غير امتى تسلت ~ ومتعطلينيش امي كوراني فاش مشيت وجيت دابا كون قلت ليها لا يجي خويا يصبني وانا مقادا على معيورو وتقولي ليا وكون مشيتي وشنو فيها كي درنا وحلة !!

لكبيرة واخا دخلها شك سلمت امرها لله وخلاتها تخرج قالت ربع ساعة المگانة مدات مجابت بالحق ولينا فساعة ومرجعتش

فساعتين ومكاين عليها خبار وهي تطلع لعند نجمة ل كانت متكية مجايبة خبار لهاد الموصيبة ل وحلت فيها حتى دقت عليها عدوزتها وقالت بلوم ~ اشمن دوا سخرتي عليه مريم راه مشات ساعتين وزيادة وباقا مجات !!

نجمة حسات بوجهها ولا سخون غيتفرگع قالت ليها باقا كتستوعب ~ اشمن دوا !! مسخرتها على حتى حاجة اخالتي غير كتكذب !!

لكبيرة خرجت عينيها كي القطة فيها مكرهتش تتلاح عليها ~ مالها مولفة كتكذب باش ديرها دابا ؟؟

جوبتها نجمة فالحين مقاطعة هضرتها وقالت ~ ايوا ملي جابتها الفرصة سمعي اش دارت بنتك من قبل …

عودت ليها ل وقع كامل وكيفاش خبات على غلام على ود صداع كملت كلامها وقالت ~ وراه طلعت عندي دابا وقالت ليا بلعاني صندالة تقطعت ومخلياها تصاوب نجيبها ليك وانا قلت ليها غا خليها معندي مندير بيها …بنتك باغا سبة باش تخرج ودارتها بيا انا ، شوفي اخالتي نقوليك انا الا سكت وكذبت على راجلي مرة دابا مغنعودش نكذب عليه إلا سولني غنقوليه لي كاين !!

لكبيرة حسات بدوخة شداتها تحنات بغات تبوس يد نجمة وقالت بخوف ~ ها العار ابنتي !! ستريها وقولي بصح مسخراها ليوم يقتلوها

بدات تخبط في فخاضها ~ وا ميمتي اش غنقول لباها الا فاق وسول عليها ، وا ميمتي اش ندير الا مجاتش ، واممتي فين مشات هاد بنت الهم وفين كان مخبي ليك هادشي الكبييييرة فيين ؟؟ هبطت لدارها تجري ونجمة معاها لكبيرة كتطل من شرجم وتعاود شوية صيفطت رحمة تشوف واش كاينة فدرب وعند البنات ل كتعرف اما نجمة جالسة فوق سداري كتطلب من الله يدوز هاد النهار على خير قلبها مقبوض ومزير عليها خايفة على راجلها بزاف حيت عارفاه كن ديما فوجه المدفع …. فاق خليفة وتم خارج من البيت كيعيط على رحمة دير ليه يتوضى ، لقى مرتو كتطل من شرجم غوت عليها على باب جهدو وقال ~ لاش خاشية راسك في شرجمم علاش كتطلي

ضارت لعندو وجهها صفر الهضرة مكتخرجش ليها وقال بغوات ~ فييينها رحمةةة ؟؟ غوتت على مريم تاهيا مجوبتوش وهو يخنزر فيها كيقلب عليهم فالبيت ~ مريم مكينااش

لكبيرة معرفت متقول ليه من غير ل تقال ليها ،قالت كترعد ~ رحمة هايا جايا ، و مريم راه مسخراها نجمة تجيب ليها شي دوا وراه ساعة دابا وباقا مجات يمكن ملقاتوش كتسناهم يجيبوه

قاطعتها نجمة وقالت ~ لا اخالتي مسخرتها تجيب ليا حتى حاجة غير كذبت عليك

عارفة بلي غتزيد تكرههم فيها ، عارفة بلي العداوة غتكبر والحقد غيزيد الا ممشاتش على هواهم ولكن ميمكنش تكذب فهادشي … ماشي كل مريم عذرة ماشي گاع ل سميتها مريم داخلة سوق راسها وعفيفة ،الا وقعت ليها شي حاجة خايبة غتسمى هي ضامنة ل كتغطي عليها والا فتحت ليها هاد الباب غتولفها وغديرها ق و ا د ة كتسرح ليها طريق تمشي تخرج تديع ، شنو ل يخليها تكذب مرة وزوج وتحجج بحبال خاوية باش تخرج ، كون كانت نيتها صافية مغتعتبش الباب وهي عارفة عندها رجال فدار كيتسناو ليها الغلطة ، غدير كيف ختها وتخاف وتردع ولكن هي طغات ومحارت فحتى واحد وما دارت لا بحساب باها ولا غيرو خرجات بالعلالي وحيت نجمة زايدة ناقصة ارا نديرو سبة بيها فكل مرة ، ولكن حن تمحن ل يبغى يدير الخير يديرها فراسو عاد علاقتها مع غلام تقادت وزيانت ميجيوش دابا بزبايلهم ونبايزهم يخرجو عليها الطليب ل طلباتو ليها عدوزتها مگرش فيها متقدرش تسكت على بحال هاد شي مريم فسن صعيب وخاص ل يرد ليها البال ماشي يزيغها تدير شي موصيبة تندم عليها حياتها كاملة الا كان قولها للحق غيزيد من عداوتهم معاها ماشي مشكيل الاهم غيجي واحد نهار وغيقولو الله يعطي ستر لفلانة كون ماهيا كوراني درت شي موصيبة ،

شافت فشيخها حاطة لكبيرة بوجهها وقالت ~ لا اعمي مسخرتها على حتى حاجةة وعمري نسخرهاا غير كذبت عليك !!

خليفة بحالا تكب عليه سطل الما ولا يقطر بالعرق وختل توازن ديالو كون ما نجمة ل مشات تجري شدت فيدو مسنداه عليها كون طاح على وقفتو ، ضار شاف فمرتو بحدة وقال هاز سبابتو قدام وجهها كيدوي بعتاب ~ كتكذبي باش تضرگي على فعايل بنتك !! علم الله من امتى كتخرج وفين كتمشي وحنا مجايبين خبار مدوزة علينا نتي وياها دكاكةةة !!

جات لعندو عينيها يقطرو وقالت كتحلف وتعاود ~ ترزى فيا الا كانت مولفة كديرها ، انا غير خفت وقلت نقول هاكداك البرهوشة ممولفاش ليها معرفتها فين مشات وشنو ل طججها

شكون طججها ؟؟ فأي مشكل كتبغي تدخل فيه عروستها زعمة بناتي مبقاو لقاو راحتهم ، كتبغي تخلي صورة بناتها مزيانه ولهلا يقلب مع ديك بنت ناس….طلعت رحمة وملامح وجهها

باينة عليهم الخوف ، كتشوف في المنظر ل قدامها وباغا تعرف شنو تقول حتى دوا باها وقال كيغوت ~ لقييتيها !! فين زادت لكلبة ليوم بيا ولا بيها ؟؟

عرفت بلي ساق لخبار ول عطا الله عطاه ، ل كانت خايفة منو وقع بالحق بينها وبين راسها كتقول سرها هي ل مكتحشمش ، جوباتو كتمتم وقالت ~ ملقيتهاش ابا !! سولت صاحبتها قالت ليا مجاتش لعندها

غير سمع هضرتها دخل لبيتو كيهرول لاح عليه جلابتو ودار طاگيتو وخرج مستند على عكازو ، عارضت طريقو لكبيرة وقالت ~ تسناني نمشي معاك شووف حالتك دابا طيح في زنقة ولا توقع ليك شي حاجة

شافيها بنظرة حسرة ونطق ~ شنو ل غيوقع ليا كثر من هادشي ، بنتك بغات دير وجهي فتراب الكبيرة ، الوقت ل كنت انا خدام نتي فين كنتي علاش مربيتيش بناتك ؟؟

خلا ليها هاد لكليمات في وذنها وخرج عينيه خارجين اما هي دخلات كتخبط في فخاضها وكتويل للبيت ….واش بصح مرباتش بناتها ولا هما ل صعابات ، ل عليها دارتو وكأي أم ورات ونبهات ونتفات وقرصات ولكن كيف كيقولو لوالة كل زبيبة ف ك ر ها عود

بدات تبكي وتضرب في صدرها وتعدد ~ اميمتي وتعالي طلي على بنتك شوفي فين كان مخبي ليها هادشي !! كنترزى فولادي واحد بخوه ياربي الا كانت من عندك مرحبا والا كانت من عند العبد لا سماحة ليييه …شافت نجمة واقفة جامعة يديها وكتشوف فيها وتسمع بالم بقات فيها وهي تنطق بعتاب وقالت ~ قلت ليك ستريها وغطي عليها غير هاد المرة علاش فضحتيني وحطيتيني بوجههي العلم الله اش غيديرو فيها دابا نتي معارفاش تريكتي ….تنهدات وجلست فوق سداري منزلة راسها لتحت بحالا دايرة زبلة ونادمة عليها ، فحين ل خاصو يحشم هي لكبيرة ل كتقول هاد الهضرة وبنتها معارفة اشمن جايحة شاداها ~ حبل الكذوب قصير اخالتي الا نتي خايفة على بنتك انا خايفة على راسي من ولدك !! شافت فيها وهزات راسها بتساؤل وكتعتليها نظرة حزن ~ الا وصلاتو لخبار شنو غيدير فيا ، كيفاش مزال غيتيق فيا وانا كذبت عليه زوج مرات وخبيت موضوع كيخص ختو وسولني ونكرت فوجهو ..لولة دوزتها ليها وتبريت فيها ولكن تانية هي ل قلبت عليها

ضربت لكبيرة طم مخنزرة مجوبتهاش عارفة كل كلمة خرجت من فمها عندها فيها الحق ، الوقت كيمر والقلب كيزيد يتشوش بغات طل من شرجم خافت تزيد الخل على الخميرة بقات غير غادا جايا فداك الصالون ورحمة ونجمة حداها حاضينها كل وحدة فيهم ربي ل عالم بيها ، لولة خايفة ختها تحصل مع شي حد وتتنكد عليهم كاملين وتانية خايفة من ردة فعل راجلها الا جا وسمع اش وقع مكاين ل خالعها قدو شنو غيدير وكيفاش غيتصرف …..

الغوات مجهد كيتسمع من برا ، صوت غليظ كيسب وصوت بكاا رقيق كيتسمع ، لكبيرة ناضت قافزة من فوق صداري حاطة يدها على قلبها ل غيسكت عليها هادو ولادها ….صوت عبيد وغواتتو وسبانو ختارقو طبل وذنيها حلات شرجم حتى تخبط كيطالو كاملين حتى من نجمة معاهم ، شافوه جارها من شعرها كينتفو ليها بين يديه وكشاكشو خارجين بحال شي مصعور وطلقوه فالزنقة بين عينيه غير صورتها وهي معكرة ومقادة لابسة لباس مزير عمرها لبساتو حداهم وطالقة شعرها كتشالي بيه ، بين عينيه غير سيد لي مقنتها كيبوس ويتلمس فيها بلا حيا بلا حشمة ، باقي فوذنو صوت صاحبو وهو كيقول ليه واش ختك هاادييي !! كيفاش غتكون نظرة صحابو عليه وهما شافو ختو فقنت خالي بايعة راسها رخيصة ومخلية يد محرمة عليها تقيس في لحمها وكتعبز فيها وهي كتضحك عاجبها الحال كانها بائعة هوى معندها اصل ولا دين وملة

عبيد تعماو عينيه ودمو سخن ومرضاش قدام صحابو حس بروجولتو تمست وبلي ختو هانتو وعفطت عليه هو وخوه وباه برجليها ،محس براسو غير غادي كيجري شاد رعواني ل معاها بين يديه كيعطيه لوجهو مخلي دمو دايز وفمو خدام كيسب من سمطة لتحت مبقاش حاس براسو ، كان قبيح وبحال طبع خوه عندهم نفس الدم الحامي ، ولا كيبان ليه قدام عينيه غير الموت والحبس لمهم يرفع راسهم وتا الا مشا وترزى فشبابو يقولو مشا على قبل شرف والعرض ل كان فداك الوقت غاالي وكيتعناو بيه ، جروه صحابو وفكو سيد من بين يديه خافو يقتلو اما مريم خلاتو مشغول بيه وجرات لدارهم غادا وتبكي وتجري تبعها بجرية وحدة ملقى راسو غير مليييوح عليها شدها شانق عليها من گنة شعرها وجارها فالدرب وكيركل برجليييه فجنابها ،شعر لي طالقاه كيقطعو ليها بين يديه صوتها بح بالغوات وزايداها كتعير فيه محشماتش …. الكبيرة غير شافت المنظر من شرجم وشافت لباس بنتها ل ماشي نفسو ل خرجت بيه عرفت دارتها قد راسها جابتها فيه ،بقات تغوت ربي لي خلقها ونزلت تجري في دروج ، تصادفت معاه مطلعها جارها وهي تنطق كتطلب ~ها العار اولدي طلق منها ها العار غادي تقتلها وتمشي الحبس

غوت على الكبيرة عينيه حمرين كيف الجمرة متطفى شعلتهم حتى يصفيها ليها ~ اليوم نقتلها بيا ولا بيها ****

نزل عليها بالتصرفيق وسط الدار تا طاحت الأرض وجمعها معاها بركلة وهي تعودو كتعير فيه ~ ماشي شغلك فيا بعد من .. وقفات الكبيرة باغا تجرو ،

وكتدوي فنفس الوقت ~ غاا قول ليا شنو دارت خليني مني ليها دابا تموت فيدك!!!

عبيد كيغوت وعروقت وجهو باينين قلبو غيتفرگع ووجهو ولا حمر بقوة الغوات ~ وااااااااا مي لقيتها مع واحد ز ***** كيبوس فيهاااا وعاجبها الحال الق** الخانزة وكتضحك شوهتني قدام صحااابي !!

صرفقت لكبيرة وجههة صدمة ل عطاتها بنتها مكانتش ليها على البال نزلت لعندها كتقرص وتعض ~ ياااك ابنت لحرام هذا هو دوااا ل مشيتي تاخديه لمرت خوك كتكذبي باش تخرج بغيتي تشوهيني في درب وتشوهي خوك بغيتي يدفنوك ، كلاتها وتلاحت جلست حداها سخفانة كتبكي وتدوي ~ وهانتي سنيتي على موتك !! مكاينش ل يفكك منهم ليوم

دخل عبيد لبيتو جبد عصا مخبيها وخرج لعندها باقي مبرد حالف رجلين ل يعتبو الباب ويتعراو يتهرسو ليها هزها من ذراعها بغا يعطيها ليها الراس وهي توقف لكبيرة على ركابيها كتدفعو من رجليه وكتدابز باش تنوض وتغوت ~ عتقوني اعباد الله !! عتقيني انجمةو …

بدات تطلب نجمة تعتق الروح حيث عارفة الا مفكتهاش اليوم موت بنتها على يدين خوها ،نجمة بخوف وجهها صفر واقفة كتشوف في الكبيرة كتبوووس يديها باش تعاونها ~ عتقيني ابنتي اليوم يقتلها حسبيها ختك وعتقيها

وقفات بيناتهم باغا تجر عبيد تبعدو على ختو شافتها مريم ومرضاتش تتفرج فيها وهي كتاكل لعصا ، باش تدفع عبيد هزات رجليييها باغا ضربو لكرشو باش يبعد عليها مكتجي غير فكرش نجمة لي غوتات وشدات كرشها متنية على زوج

كيقوليك واحد المثل بعد من الصداع و غني ليه وواحد نجمة تعرضت وحضرت ليه من ديما كتكون غير هي فوجه المدفع كيعيطو ليها غير الخايبة عمرهم حضروها لزوينة ….ماكان ليها لا على البال و لا على الخاطر اش غيوقع و لا شنو غتشوف قدامها ليوم ، الروح غتطيح و تقدر تكون هي السبب فيها حيت مكذبتش ومسترش وديك الساع النفس اللوامة ل عندها مغتخليهاش في راحتها إلى مريم وقعت ليها شي حاجة ….شافت حتى عيات و ترمات وسط منهم تفك وتدفع عبيد على ختو ل كانو عينيه عليها يقتلها عاد يبرد حر الشمتة ل شمتاتهم رجعتهم بيادق وشفاية وسط الجيران ،فجأة معرفت الضربة ل تعطاتها للكرش منين جاتها كان قوة الغوات وقوة ليدين كيفكو وهي دايخة وسطهم حتى كتحس بالم رهيب فكرشها جلست متنية مكمشة حاضناها كتغوت بينها وبين راسها وكتنين بحر دقة ، عبيد رجع اللور مكوانسي كيشوف في مرت خوه حس بالصهدة طلعت معاه ولا كيقول يمكن انا ل قصتها واش جا مفكو من يد غلام ولكنازة غتولي زوج ليوم اما الكبيرة شافت اش وقع وعرفت شكون ضرب طارت عليها كتقلب فيها شدتها من يدها ودخلتها للبيت معوناها وكتراري بيها قلبها بغى يسكت وماشي حبا وخوف عليها جلستها فوق سداري ونطقت شفايفها كيترعدو ~ ميمتي ميمتي ميمتي ، كتشوف فيها فمها ولا بيض نشف تقول داخلها الموت عطاتها تشرب وهي كتقلب فيها ~ باش كتحسي ابنتي ياكما شادك شي وجع !!

نجمة حست براسها بردت ودقات قلبها كتحس بيهم في وذنها كيضربو بشوية بلعت ريقها وقالت كتنهج ~ ش شويةة !! تگعدت من على المخدة ونطقت بخوف كتحسس كرشها ~ عنداك يكون وقع لولدي ولا بنتي شي حاجة

لكبيرة كتعض على قنوفتها وتبرد السوق ~ لا متخافيش غير مع الخلعة غيكون هبط ليك طونسيو هانتي جلسي هنا رتاحي تا يفوتك الحال

قصدت ولادها وخصوصا عبيد ل كان واقف داير يديه على راسو وكيمشي ويجي وقالت بعتاب ~ صافي هنيتي بغيتي تقتل مرت خوك ول فكرشها وديك ساع شوف اش غتقول ليه !!

عبيد بدا يغوت مشربن ~ الواااليدة بلاما تبقاي دوخي عليا وتسكتيني بهاد الهضرة مرت خويا مقربتش ليها وبنتك والله ايلا دوزتها ليها مشى جر كرسي من الكوزينة گلس فيه كينهج اما لكبيرة دخلت لبيت فين هربت مريم مع رحمة وقالت بصوت تحت منها ~»بغيتي تقتليها ابنت الحرام !! ضربتها لذراعها بقوة وقالت ، طلبي الله ميوقع لداكشي ل فكرشها والو ومتعرفكش راه نتي مولاتها اما اجا ميفكك من غلام

على ذكر سميتو تسمع صوت القوي داخل كي رعدة عامر دم

كان خدام هاني مهني نهارو دايز في الغوات وتمارة وفريع المخ كيف ديما وهذا هو درهم الحلال ما كيصورو حتى كيعرق وينشف عليه وشكون قدر ؟؟ سمع صوت تليفونو كيصونو جبدو وحطو على وذنو بلاما يقول الو ،سمع صوت باه مرعود قلبو تهز من بلاصتو وما جا فبالو غير مراتو ل متقلة كيگول وقعت ليها شي حاجة لاح الگارو من فمو ونطق بخوف ~ اش كااين ابوياا مااالك !!

الكلمة ل خسر عليه باه خلاتو جاي طاير متلفتش وراه ولا تكلم لواحد من رجالو ل كان كيغوت عليه ، طول طريقو وهو تاني جبهتو وجامع قبضة يدو والهضرة ل سمع كتاكل في دماغو ” المسخوطة تاع مريم معرفناها فين مشات ” معقلش على طريق كيفاش قطعها كان ساگ وعقلو مرفوع ختو وتربات قدام عينيه وعارف معدنها مزيان كتطير وكون ما حاكمينها ورابطينها تسيب ، كيفاش دارت حتى خرجت وفاتت العتبة ل مبري فيهم عليها ، لقى باه واقف في راس درب مقدرش يطلع لدار بلا بيه ركب معاه وعاود ليه شنو وقع بالحرف ، وصلو قدام الباب جوقة لعيالات ل تجمعت كانت باقا متفرتكت لعينين كلهم كانو عليهم وهادشي زاد سخن غلام وفيض دمو، عض على فكو من الداخل وطلع سابق خليفة ل حنى راسو الارض حشمان يهزو قدام العادي والبادي ، ما وقف بو لحية غير وسط الدار عينيه خارجين وصدرو كيطلع وينزل غوت باعلى صوتو حتى تجرحو قراجطو وقال ~ مررررررررريم م م م !!!

السمية ل تسمع صداها وسط الدار كاملة نجمة ل كانت مركنة ناضت مخلوعة ايدها كيترعدو متناسية حر الضربة خايفة على راجلها اما مولات زبايل ولفعايل لكحلا وجهها تخطف منو اللون دايراها قد راسها وتخلعت ل كيخاف مكيديرش علاش ، بدات كتبكي وتخبات ورا مها كتبكي وتطلب فيها تفكها منو حيت عارفاه وعارفا عصاتو مغاديش يعقل ويحن فيها غتشوف معاه ل عمرها شافتو الا عبيد قاليه فين لقاها وكيفاش لقاها ، هاد الاخير كان داير راسو بين يديه وعلى فمو غير كلمت فين غنعطي وجهي من صحابي حتى بانت ليه غلام وقف ومشا لعندو وقال كيشالي بديك لهراوة ~ شوهتنا اخويا غديير بوووم وسط الدرب

غلام صبرو تقادا شنق عليه وقال ~ …فييين كانت !!

عبيد مكانش من العاگزين فعلتها شواتو في قلبو و ضحكت فيه صحابو ل فيهم عديانو وباغين غا فاش يجمعو بيه ، حدر راسو وقال حشمان من خوه ~لقيتها اخويا وواحد المسخ غير في الخلا و القيفار و مخلا فين حط يديه

غلام غير سمع اش كيتقال حس بوذنيه كيصفرو ، نجمة كانت عينيها على راجلها لي يديه بداو يحلو في سمطة سروالو ، دخل خليفة سخفان و كينهج وغير سمع هضرة عبيد طلع ليها السكر و بدا يغوت ويخبط الباب بعكازو ل طرقاتو لكبيرة شافها مبغاتش تحل وهو ينطق بعصبية ~ ومتحلي هاد الباب حتى تولي حرااام علياا !!

سلمت امرها لله وشافت فبنتها وقالت ~ قلبتي على خلا عشتك بيدك ، حلي لبيت ارحمة !!

غير تحل البيت دخل خليفة هو اللول ل نزل بعكازو على مريم للضهر غوتت غوتة خلات مها تخبط ف فخاضها ، نزل عليها ثاني بضريب وهو كيهضر على راسو و سميتو و شرفو كان كلو كيقفقف ~ الله يلعن النهار لي تزاديتي فيه كون عرفت غطلعي رجليك سايبين كون دفنتك نهار ولادتك ، ياك ابنت الحرام ممنقصك من والو ؟؟ اش بغيتي عندي هذشي باش تجازيني !!

غلام كانت موقفاه نجمة ل قربت منو كتبكي خايفة وربي ل عالم بحالتها شدت فيه من حوايجو كطلب فيه وتبكي ~ عفاك اغلام حضر عقلك ونعل الشيطان عندك تدير ش حاجة تندم عليها من بعد !! فكر فينا راه كلشي كيتحل بالعقل

بحالا كتكب لما فالرملة هي كتدوي وهو كيلوي فديك السمطة على يدو غير كمل رمقها بشوفات عمرها شافت بحالهم وقال ~ دخلي سوووق راااسك وبقاي فتيساع ، كتسمعييي !! قالها بصوت عالي حتى قفزت من بلاصتها ودخل لبيت تعرضت ليه مو لي طاحت ليه على يديه كتبوس فيهم و تزاوگ ليه في الحليب لي رضع و لكن هو كانو عينيه عميين من شنو سمع ، خوه لي كان البكا غيبكيه مراضيش و نفسو كتاكل فيه ، وباه ل كلو كيغزل قدام عينيه تخطى لكبيرة سايس هضرتها و عينيه نيشان عليها بدات تغبن و باغا تزاوك غير هي قالت ، خويا أنا مزاوگة ما حست غير بدم سخون هابط ليها من حدا وجهها كانت الضربة لي عطاها بالبزيم مخسرش عليها كلمة وحدة سبق يدو خلاها غوتت حتى تجرح حلقها رحمة غير بان ليها دم طارت لبرا كتبكي و كتغوت على نجمة تعتقها وعلى عبيد يفك ولكن شكون يقدر يدخل ولا يوقف بينو و بينها …غلام كان واصل للحد في الاعصاب ديالو و بحالا شديتيه و خويتي عليه الما القاطع دمو هارب منو ، مشا شدها من شعرها و هزها منو ودفعها ملصقها مع الحيط كيزدح ليها فراسها ويسب ،مخلا لا ملا ولا دم كل شي جبدو وحتى من تربيتو مو طعن فيها …لكبيرة منظر بنتها كلاها في كبدتها بدات تضرب ليه فظهرو باش يطلق وهو كيغوت جاعر ~ هااكاك امي ضربي ودافعي على بناتك !! بغيتي تخلينا نتي وياهم مسكة بين لفام ، بغيتي تلبسينا دفينا وترجعينا وليات ،كيدوي ويضرب ويسب كشاكشو خارجين مريم قوتها سالات معاه مقدتش عليه ونجمة بكات حتى بردات عمرها شافت ولا عاشت هادشي تاع اليوم ..مطلق منها حتى كانت سخفانة فيدو لاحها فوق سداري وحل لماريو كيجبد فحوايجها ويلوح برا البيت ، الكبيرة كتبكي ومعنقة رحمة عبيد مربع يديه وكيشوف فخوه اش غيدير اما خليفة قدما قلبو ضارو عليها قدما بغاها فيها حيت ل دار الذنب يستاهل لعقوبة

خلا ليها الماريو كيصفر ووقف فوجها وقال ~ ها لحوايج ل كتخرجي تزك ك ي بيهم على رجال غنشعل فبوهم لعافية باش نعلمك قدامنا تغطاي وتخرجي تال برا وتعراي ، جرها من شعرها ورجع قال ، وهاد شعر ل عاجبك وفرحانة بيه انا غنعجبك فيه جبد من جيبو جنوي صغيرة كيكون هازها معاه وهي كتغوت مسالي ليها جهد ~ لا اخويا لااا!! عفاك شعري لااا

وشكون داها فيها ولا فطليبها حكمها مزيان وضور سالفها على يدو الكبيرة شدت ليه فكتافو كتبوس فيهم وتطلب ~ وجه الله اوليدي إلى مطلقها عليك ، باراكا ل درتي فيها عمرها باقا تعاود ولا تعتب خطوة ورا الباب

غلام ضحك ضحكة استهزاء وقال ~ تخرج ؟؟ علاش باقا غتفكر في لخروج دابا

ضار عند مو عينيه في عينيها وهو مزال شاد شعر ختو ، هادشي لي حنا فيه ديري في بالك نتي مولاتووو ودابا رجعي ربي برهوشتك ، يالاه غتجوبو كان ضرب ليها شعرها زغبة بختها مگرش فيه غواتها مگرش فيه بكاها ، تعمات ليه البصيرة ومندماش شعر ل كتعنى بيه وخرجات تشالي بيه خلاها بلا بيه خلاها كيف دري وسلبها الحاجة ل كتباها بيها كل مرا

البنت جلوسها في ظار باها واخا دير ربعين عام تبقى تحت جناح واليديها حتى يجي حلالها و لي يكون بيها ، مريم مكانتش ضاربة حساب لشنو يقدر يوقع ليها إلى حصلوها و كانت دايرا في بالها غوات و الصداع و السوق يبرد، مفكرتش الدينا غتقلب عليها و الوقت غتجي ضدها و لي تبع طريق الشيطان هادشي لي تستاهل و لي يليق ليه ، غلام مبردش ليه الخاطر ومكرهش رجليها يحشهم ليها ماشي غير يقطع ليها شعرها عينيه معميين و مكيشوف حد قدامو وحتى من حوايجها خرجهم السطح خسر عليهم قرعة ديال ليسانس ووقيدة ها هي بقات لا شرويطة لا ختها بالحق تستاهل هادي دير ليها عقل ولي عطى زك* لهلا يفكو ..يله تعرف بقيمة الهنا ل كانت عايشة ومرتاحة فيه وشان ولمرشان ل كانو دايرين ليها خوتها قيمتها لا هي لا ختها كانت لفوق عالية ممخصصينهم من والو فلوس وهبة وذراع حامي وباش ردات ليهم الجميل ،قلبات على زطاط كتخرج لعندو كل نهار المراهقة لعبات بييها وخلاتها متفكرش فشرفهم ولا شنو يقدرو يحسو وهي فحضن واحد غريب كيقيص فشعرها ويبوس فيييها بالنسبة ليها هي غير تعيش ديك اللحضة وربي كبير ،تخرج تلاقا تصلگط وترضي جموحها ونعرة ل شدتها مفكرتش فشرف عائلتها مفكرتش فخوتها لي يقدرو يقتلووه بسبابها جالسة معليها مبيها معاه كترومانسا مع راسها نسات بلي دنيا صغيرة تا لقات عبيد مسلط عليييها دمو سخون حامي وغلام ل قاليه دوز تريح مكتعرف والو تلقى سلاكة مع لول وتاني والله ميدوزها ليها وداكشي ل كان كلات قتلة وطاحت من عينيه بحال الدمعة وخرجات من فمو بحال الدفلة

بعدما كمل على شنو كان كيدير راسو كان مرفوع ومعاقلش على مو ل ولداتو فديك اللحظة غوت على عبيد بأعلى صوتو وخرج هاد الاخير لي كانت الشمتة مزال كتاكل فيه و حر مريم مزال ما برد ، لبس في رجليه و لاح عليه جاكيطتو و قصد الباب تابع خوه حيت قاريه مزيان شنو غيدير وتاهو بحالو حالف حتى يقلب على لي طيح بيهم و بوجهم بغى يمرمد …خرج لقى غلام واقف كيتسناه هز فيه عينو لقاهم حمرين و يديه كلها كترعد جبد گار من جيبو لاحو في فمو وجر خوه قاصد طوموبيل وقال~ ولينا رعاوين و يتضحك علينا ولا شنو ، فين شفتي الكلبة !!

حك عبيد على قرفادتو و تكلم حادر راسو ~.. التيرا فين كيتباعو الطريفات

غمظ عينيه و عض على فمو حتى حس بمذاق الدم ، ما هضر ما تكلم ركب في طموبيلتو وقصد لبلاصة ل قاليه خوه وكيدوي منيرڤي ~ ونتا ملي شفتيها اش درتي !! جايني لدار بوحدك ل كانت معاه دوزتيها ليه ولا غلبك ما قديتيش عليه ؟؟

عبيد كان كيدوي مراضيش على راسو ~ لا اخويا متفاكيتش معاه راه غير دراري فكوه من يدي وهرب ولكن نسول عليه ونلقاه نلقاه

عين على طريق وعين عليه كيشوف فيه بعتاب وكيخنزر~ ديك ساع مطلقووش نتا گاع واش حتى فهادي منقدرش نعول عليك ولا شنو ؟؟ ديك ساع هرس ليه رجليه باش كيمشي وجيبو ليا نوريه يضحك على بنات الناس بشحال كيتقام بالحق غا بيا ولا بيه نجبدو من كرش مو

وصل لبلاصة ل نعتها ليه عبيد ول شحال خدا منها دخانو لكبير وصغير كيعرفو فيها …نزل من طموبيلتو و عينيه كيدورو شافوه صحاب الحال والبلية تمو جايين عندو كيجريو يسولو عليه و فيه وهو يعطيهم النعت لي عطاه عبيد ،معطلوهش ديك ساع جبدو ليه سميتو و كنيتو و الزنقة فين كيعيش ، شاف غلام في عبيد مطلعو ومنزلو من الفوق التحت ونطق ~ رجع بحالك و منعاودش نسمع بووك رجليك كيمشيو و يجيو في هاد القنت كتسمع !!

حرك ليه راسو باه ومشى ما خلا ليه فين ينطق ولا يهضر مازال ،تا تأكد منو رجع وهو يركب في طموبيلتو وقصد المرگد فين وراوه ، القيسارية وبالضبط سوق الخضرة نزل من طوموبيلتو وغادي بلباس الگرنة ممسوقش نص في ناس حاضينو كيفاش غادي نافخ صدرو شعرو مخربق ولحيتو طويلة عشوائية كيدوز يدو عليها مرة مرة ، عينيه كانو كيضورو على صحاب ديسير واحد بواحد كيقلب عليه عطاوه نعتو فيديه سمية موشومة قد سخط صغر عينيه حتى بان ليه صاحب دعوتو ناشر رجليه و جابد جوان كيبرم فيه ، وجهو ملون بعلامة البصمة ل خلا فيه عبيد وجا ل يكمل عليه ، تمشا لعندو بخطوات تقال حتى وقف عليه حاط يديه على جنابو كيطلع و يهبط فيه وغير لاخر هز عينيه فيه وهو يدفل عليه غلام. حدا رجليه و هضر مخسر سيفتو ~ انت هو عبد الكريم !!

مكانش من العاگزين ولا نكر شكون هو ،خنزر فيه بدورو ووقف مقابل معاه واصل ليه حتى صدرو حتى في الطولة محگور حط الجوان فوق الكروسة و جاوبو كيتنفخ كون عاودو ليه على شنو غيوقع ليه ميقرقبهاش مع ختو باش ميتلاقاهش ~ اييه هو هذا وشكون انت ؟؟

غلام عارف راسو اخرتو في هاد الفيلم الحبس و لا القبر ضحك باستهزاء و هز كيلو ديال الميزان و عطاه بيه لراس بلاما يخمم خلاه مليوح شاد راسو و كيغوت بحال الولية ودماياتو دايزة تحنى عليه و تكلم بخشونة ~ راجل مك هذا !! كتعرف مريم ايوا خوها وسير قيد بيا اولد الزانية ، رجع دفل عليه و عفط ليه على يديه كيعفس يبرد قلبو و لا بغى يبرد ، هادي هي اليد لي تحطات في ختي مكانش حاس براسو اش كيدير و لا بلأخر لي كان كيغوت من الحريق ما حيلتو لراسو و لا يديه لي كتضغط مع الارض ، الناس تجمعو عليه شي كيقوليه نعل الشيطان و شي كيقوليه يستاهل ولد الهم عطيه وشوية تمو جايين صحابو دايرين فيها واعرين باغي يتحاماو كون يعرفو معامن هما تا حد ميدخل بيناتهم ، غلام مهامو لا حاحة لا ملاحة داير كي الجبل واقف مقدوش ياخدوه من بين يدو ولا يدفعوه عليه ، ل يجر ثيران في الگرنة ويسلخهم يغلبو نص ميترو ورابعة اللحم ، نزل لعندو شانق عليه من عنقو وقال ضاغط على سنانو ~ عقلتي على سميتها ولا دايزة بحال نقطة وسط وسخك هاا !! مع كملها نزل عليه بكروشي حتى دفل الدم من فمو وقال بصوت مرعود ~ عقلت اخويا

قال كيترعد ندمان ل دوا معاها ولا وقفها ولا تزلل عليها من اصلو ~عقلت اخويا ها العار عمري نطوف بساحتها مازال ندمتت

وشكون سمعو كروستو تقلبات ونيفو تهرس خبار وصلات لمو جات تجري تشوف ولدها كياكل لعصا على يد راجل ماشي رعواني بحال ل ولدات طاحت عليه كتعنق وتمسح في وجهو ل عمر دم ومبقاش مفرز ~ اميمتي ولدي بغا يرزيني فيه وا عيطو المخزن عيطو لبوليس

جر غلام كرسي وجلس داير رجل على ختها ونطق مخسر فيها سيفتو وقال ~ سيري هاهيا الكوميسارية فدورة ونشوفو شكون غيمشي لحبس انا ولا ولدك ل معدي على وحدة قد ضفرو باقا مينوغ !!

ركبتها لخلعة من صبع رجلها صغير هبطت على فخاضها كتخبط فيهم بحال گاع لعيالات مبغاش ولدها الوحيد يدخل للحبس قالت نايضة لعند غلام كتطلب ~ انا مزاوكة فيك اولدي اش وصلنا لشي حبس كلشي كيتحل بالمفاهمة

ضحك باستهزاء ووقف هو لاح صنارة والحوتة غتجي تال عندو ~ زاوگي في ولدك وربيه كيفاش يفوت عليه بنات ناس الا مولف يضحك عليهم ويدوز عند بالو دنيا سايبة ،ساعة طاح فيا انا خلاه نعاود ليه تربية ونحد ليه ضسارتو ، دار شافيه هاز يدو كيهدد ويتحلف ~ منامتي معاك مسلاتش هناا وهاد لوجه عقل عليه مزيان ومتنساش راك درتيها مع غلام ولد خليفة وسول عليا مزيان وتمعن بشنو غتسمع في وذنيك

~~~~~

نهار داز كحل مغيم على دار كاملة خليفة ساد عليه بيتو مخرجش ، مريم دايراها يغرق فيها جمل ومقلقة عاطيا وجهها للحيط ،رحمة حاطا يدها على حنكها وكتشوف اما لكبيرة بيجامتها ل فوق لحمها سردات عليها بالعرق گاع قراعي لما خواتهم غير حاطا راسها على لمخدة تشرب وتدخل لطواليط اما واحد نجمة طلعت لبيتها خايفة كترعد ما بقاتش خرجت لماكلة مداقتهاش عمرها شافتو فحالة ليوم كيضرب فختو بكل قوتو بحالا راجل ل واقف قبالتو محنش فيها وماقالش ولية ومعندا جهد تهز دقة وكملها قطع ليها شعرها لهاد درجة قلبو قاصح ومافيهش لمحنة تصدمت وبزاف وسنانها كيترعدو ، عمرها تنسى شوفاتو الحاديين وصوتو القوي ل مازال تاثيرو على وذنيها…خوفها على راسها زاد كبر كثر وكثر كيفاش إلى عرف كانت مخبية و متسترة عليها في الخرجة الاولى اش غيدير فيها و ووجها لمن تعطيه في كل مرة كتفكر راسها خاصها تواجهو كيشدها لوجع ،بقات على داك الحال ودماغها خدام كيرجع ليها في سيناريو تاع ليوم ل مقدراتش تتخطاه وتنساه حتى تحل الباب ودخل بلاما تحس قفزت من بلاصتها وجهها رجع بيض ، رد ليها البال وهو يضيق عينيه وقال ~ وليت كنخلع

معندها بلش تجاوبو عينيها كانو على حوايجو ل موال فيهم دم ،ركزت مزيان بانو ليها ايديه حتى هما عامرين هو وتريكو ودم جظيد ريحتو وصلت حتال نيفها بلاما تحس دارت يدها على فمها وناضت كتجري خارجة من للبيت تحت نظراتو

نجمة فكرت حتى عيات قلبها كان قريب يوقف لا راحة لا شهية غير كتفكر إلى راجلها ساق الخبار يقدر يصومها و ميبقاش يشوف فيها ، عارفة قدما سكتت مريم ولا لكبيرة غا يدويو وميدوزوهاش ليها داكشي علاش جمعت شتات نفسها ودارتها في يد الله وقالت ليه ل كاين ما زادت ما نقصت برأت ذمتها قدامو وحيدت الهم ل كان مثقل على كتافها ومقلق راحتها ، وراحتها هي غلام يكون تايق فيها و معاها وطريق بيناتهم بيضة وواضحة ، اه تعصب و غوت عليها مزيان حس براسو ضحكت عليه وهي كتشوف في وجهو ولكن شاف حتى عيا و حط راسو في بلاصتها وراعا ليها وحذر الراس ودوزها خصوصا ملي عرف منها ملي رجعت عودتها هي فاش حطاتها بوجهها مع خليفة ….

دازو يومين عليهم ديال الاكتئاب و العذاب مريم مسكتتش من البكا وجهها كولو مضروب وشعرها لي مشا ليها وولات كيف العزري، فينما تقابل مع المرايا وتشوفو تكحل بالعما وتدير گنازة ، خوتها نفاوها اما باها مبقاش كيشوف ليها في الوجه ولات عايشة تحت ضغط كبير لماكلة متقد تاكل والثقة فيها نعادمات ولا كتطلب من الله يحنن قلب غلام ويسمح ليها وتتهنى ولكن معامن هي مع واحد قلبو من الحجر بالنسبة ليه هو مدار ليها حتى حاجة هي لي دارت وجنات على راسها …. خرجت عند مها بعد ما سمعت خوها خرج لخدمتو ونجمة شدت وقرها في بيتها و باها مشا الجامع يصلي ليه ركعات ينفعوه عاد تمات نايضة جلست حدا الكبيرة لي كانت حاطة يديها على خدها و عقلها يخمم في المشاكل ل تبلات بيها بلاما ضرب ليها حسبة وسط الدار

مريم لايحة عليها شال مغطية شوهتها ~… اش غندير ا مي فهاد شعر امتى غيطوال ولدك غيضحك فيا لعديان

طلعت فيها وهبطت عينيها بشوفات قاصحين وقالت معوجوة فمها ~ نوضي غا من حدايا ولا ابنيتي سخطي ينزل عليك شكون ضحكهم فينا حنا ولا نتي شديتي الدار و گلبتيها ليا سفاها على علاها الضحكة مبقات طل علينا من ورا وجهك و مصايبك

مريم بدات تاني تبكي و عرات ليها راسها ~… واخا يكونو شافوني معاه في بيت النعاس ميديرو ليا هاد الحالة قطعو ليا شعري و خسرو ليا وجهي حتى الحمام صافي مبقيتش قادة نمشي ليه

الكبيرة ضحكت باستهزاء~ حتى يخليوك تمشي ليه نسااي داكشي ل كان قبل تخرجي معايا ولا توقفي قدام الباب ولا تمشي قيسارية ولا حتى لحمام مبقاك هنا حدايا حتى يجي لي يسترك

مريم خسرت ملامحها ~ علاش يسترتي مالي جايبة ليكم شي كرش راه غا لقاني واقفة معاه

لكبيرة غضات على فمها مغددة ل بقى كملتو ليها بنت كرشها ~ على داكشي لي شاف خوك عبيد جاك قليل ؟؟ اسمعي ابنت كرشي نقوليك البنت لحاگها لخيمت بوووها ما تخرج ما طل من شراجم وبنات الناس و بنات الاصل و الشرف مكيعطيوش لحمهم بالرخيص بالعكس كيجلسو متبتات حتى كيمشيو بالهمة و الشان اما نتي ابنتي توسختي و تخلطو فيك ليدين

شكون هاذا ل مازال غيقبل عليك جيران گاع داو خبارك راسي مبقيتش قادا نهزو في عيالات الدرب من هضرتهم ل كيف سم وملي نتي زغبك الله وبغيتي تخرجي لاش واقفة في بلاصة كلشي غيعرفك فيها راه قاليك ق ح ب مع نصارة وليهود وخلي جيران شهود !!

مريم هزات كتافها وقالت كتنفخ وتسوط~ صافي امي عفاك بلاما تزيدي على ما بيا سترتوني وسمحتو ليا بكري راه اللحم الا خناز كيهزوه ماليه

ضربتها لذراعها وقالت ~ ومالنا دابا لحناك لزنقة حمدي الله وشكريه باقا جالسة هنا وكدوقي نعمة تا نشوفو اخرتك شنو

بدات تمتم وقالت ~ كون غير خليتوني مشيت عند زهرة نبدل لحيوط راه غنطرطق

علات لكبيرة من نبرة صوتها وقالت بالغوات ~ راه انا ل غيطرطق فيا شي عرق غبري من حدايا الله يعطيك الغرق !!

شافتها غوتت ناضت تعوج ما تحشم ما ترمش دخلات لبيتها وخيطتو على باب جهدو بسيف عارفة دار خاوية ومكاينش لي غيدير ليها لجام …

تعشات لعشية وجاي راجع لدار كيف العادة جايب تقديتو معاه مع غينزل من طوموبيلتو مع غيوقف عليه راجل مكيعرفوش باين على وجهو الوقر وصوتو وهضرتو معقولين نطق بلطف وقال ~ ولدي غلاام ياك !!

ضيق عينيه وهز راسو باه ~ هو هذا !! اش حب الخاطر

جاوبو حشمان يديروها صغار ويوحلو فيها لكبار بالحق كل دار تلقى فيها كيدار ~ انا اب عبد الكريم اولدي كنظن عرفتيه الخضار ل جيتي لسوق وتناقشتي راك عارف بلاما نكمل

غير جبد ليه سيرت الموضوع وهو يحس بدمو غيبدا يسخن ميل راسو لجنب كيمسح على وجو ومزير على سوارت طوموبيل ل كانو فيدو وقال بصوت خافت ~ دخل في موضوع !! ، بان ليه وجهو ماشي وجه تمرميد ولا المحاكة مبغاش يقصح معاه وحتارم كبر سنو وعطاه وقتو يسمع شنو عندو وتا راجل دخل في موضوع وما نطق غير بالمعقول ~ مهم اولدي انا عودت ليا مولات دار على شنو وقع وماجيت هنا الا وانا حشمان منك ، كاين ل كيعطيه الله ولاد يفتاخر بيهم ويعليو ليه راسو وكاين ل خاشينو ليه فتراب وانا منهم

اي حاجة درتيها فيه من حقك وانا لو كنت بلاصتك ندير بحالك وكثر الا العرض والشرف خط حمر والدراري الا غلطو نوريوهم الغلط ديالهم ونصحوه حنا الكبار بيناتنا ..انا منكذبش عليك سولت وعرفت بلي راك راجل مزيان حقاني ومعقول داكشي علاش جيت برجلي لعندك نطفيو الغضب ونهيو صداع ومن غدا نجيو نخطبو فدرية ختك لولدي

حنحن غلام بصوت مسموع وقال مقطب حجبانو معصب ~ البنت انا اشريف خرجت سوقها من داك نهار كاين باها هو ل يعطيك ولا يقلع ليك دوي معاه

تزوج ولا تجلس بنسبة ليه ولات نقطة على السطر ضيعت قيمتها عندو بيدها ومبقاتش كتهمو ، ملي ولات بضاعة رخيصة كيقيس فيها ل يسوى ول ميسواش مابقاتش كتهمو ، ملي ولات تكذب باش تخرج تلاقا بواحد كلو خطوط مبقاتش كتهمو …كان غيلوم راسو ويسمح ليها لو كان حارمها لا هي وختها من شي حاجة لو كان مكبر فيهم شنو خصهم، ل بغاوها كانت كتوصلهم خاصهم غا يقولو ارا وكيجبد ويعطيهم وبعد المرات بلاما يدويو كيعمر جيبهم كيغمض عينيه على عكر ولا على شعر ولا صباغة دايرينها فدار بينو وبين راسو كيقول يحدو منها شهوتهم وباش تجي دابا وتضرب كلشي فزيرو وتديرو صفر على شمال يصومها فخطرة ويديرها عارف راسو قلبو حجرة تا حاجة متلينو …غادي طالع لبيتو وملاذو بلاما يدوز على مو هاد الاخيرة ل كانت حاضية لباب يتحل ،خطوت رجلو وصوت صباطو ملي كيتمشى كانت كتسمعها ، عندها امل غيحن قلبو فلي ولداتو ويطل عليها ولكن مشاكل الحياة قصحوه وطلعو ليه فراسو ونغصو عليه حياتو هادشي ل قالت بينها مع راسها ملي سمعت حسو غادي وكيبعد تنهدت كتدور عينيها فدار ل ولات بنسبة ليها غير خربة ظواوها معمشين وحيوطها حازنين من نهار ل فارقها صاحب الضحكة ل كان عاطيها الروح…

لكبيرة بنسبة ليها مدفناتش غير ولدها دفنات معاه حياتهم كاملين وبقاو غير لگسدات ل عايشين….

كانت واقفة في كوزينة كتوجد لعشا بزز منها نهار كلو وهي ناعسة كتحس براسها كرشها ولات ثقل من قبل مرة مرة تهزها من لتحت حتى ترتاح وترجع تنزلها ، غادا جايا كتوجد بخطوات ثقال مظاهر العياء باينين على وجهها ومعندها لمن تشكي الوحدة قتلتها وما لقات معامن تحكي مولفة الا ثقالت عليها هموم دنيا كتعود لصحيبتها ولا خديجة وكتخوي شوية وتنفس على كربها ودابا مكاين غير الحيط قدامها ل تعاود ليه بلاما يجاوبها كتسنى غير امتى تولد باش يعمر عليها دنيتها ويلون حياتها بلون مبهج … طفات على عشا بعدما طاب غسلت وجهها ل خلعها في لمرايا كان صفرر وباهت فمها مشقق وناشف، حسات براسها كبرات بزاف من نهار حطت رجلها فهاد الدار ، تضحك شوية و تبكي بزاف و تقول خليها على الله الدنيا هكا دايرة كتلعب بيك كيف بغات..دخلت لبيتها شافت فساعة وتبسمت ، وقتو وصل !! حيدت بيجامة ل كانت لابسة ولبسات وحدة اخرة جديدة كتفوح بعطرها الفطري دوزت تحكيلة على عينيها ضوات بيها شوية على وجهها.. وجلست قدام التلفازة كيف كل نهار بلاصتها المعتادة ل غير يدخل يلقاها فيها …تحل الباب ودارت لعندو راسمة ضحكة على وجهها وسرعان ما محاتها ملي شافتو كاعي ، نزل لحنكها طبعو قبلة مع تنهيدة عامرة هضرة شداتو من يدو وبلاما يتكلم جلس حداها راخي ظهرو على المخدة وهي تكى على ذراعو مشابكة صبعانهم بزوج وقالت بصوتها ل كيهدى من روعو ~ ماالك شفتك عيان ومقلق شنو وقع !!

غلام تقل عينيه فيها براحة ونطق~ …غا صداع الراس ، قاد جلستو وحدر راسو التحت منزل العيا عليه . .. جا عندي بات داك المسخ لي كتعرف ديك الكلبة وقاليك طالب يدها الزواج !!

نجمة جوبتو باهتمام ~ ونتا شنو بان ليك !!

غلام حرك فمو جنب كيسوط ، دغيا حجبانو گرنهم ~ يضبرو لمحاينهم سيفطتو عند باها انا معنديش دخل في هادشي لي بغى الموت راه البحر خرجت سوقها نهار ضربات ترابي باها وسميتو في الحيط وخرجت مطولة لزنقة بحالا معندها ل يحكمها ،ما تسالني حتى حاجة من غير نهار لقاها خارجة نهرس ليها ركابيها غيرها تفوت ساحتي

نجمة قلبها لحنين خارج عليها ، نطقت بغات تصفي لخواطر وتخلي لما منين يدوز بين الخوت ~ راك خوها اغلام معندها حد من غيرك ، بغات تجبد سيرت معاوية و رجعت سكت وقالت ~هي غلطت ولكن إن الله غفور رحيم و مسامح كريم متكونش قاصح

غلام حيد يدو من ويط يدها وتم نايض ~ …وانا ماشي كريم ، أنا غادي نكمي ليا شي واحد نرجع مجاجي

رجع شافيها زاعف وقال معاجبو حال ~ نساي عليا هاد سيرة سديناها

الحال كان على ما هو عليه المحزون فدار وسباب مريم هاد الاخيرة ل ضربت الدنيا بركلة مقابلة غا شعرها وتمشط فيه قدام لمرايا وتدهن في زيوت باش يطوال وتدعي فلي كان حيلة وسباب ، اما مها كيتها كية راجلها هجر فراشها وخلاها بحال الحنش لمقطوع ليه راسو ، رجع لومة كلها عليها هي ل معرفتش تربي ومربطتش بناتها باش نلقى ما تسيب حتى كبرت كل وحدة فيهم وعر من لوخرا …..كانت جالسة شادة صينية قدامها كتشرب اتاي لعشية وتدوزو بلويزات تا سمعو صوت دقات جرات رحمة كتجري تشوف شكوت كتموت على حلان الباب ،حطات يدها على جنبها وقالت بشوية ~ علامن كتسولي اخالتي !!

~ كاينة لالة لكبيرة !! حركت ليها رحمة راسها باه وهي تكمل هضرتها وقالت ~ سيري قولي ليها واحد لمرا طالبة ضيف الله !!

طلعت كتجري ف دروج قالت لمها بالحرف شنو تقال ليها ، لكبيرة شدها لفضول بغات تعرف شكون وهي تنوض كتقاد في حوايجها وشدة زيفها وطلات من دروج لفوق وقالت ~ طلعي الالة مرحبا بيك

طلعت أم عبد الكريم ل بغات تطرق مسمار ولدها ليوم قبل غدا ، علاش لا وهي غتناسب مع خليفة وغلام لمرا بغات تضرب زوج فواحد كانت جايا وجايبة معاها سكر سلمت على لكبيرة ل دخلتها لصالون لمقاد ولمفرش تبدلت الصينية وتحطت وحدة اخرا على حقها وطريقها بدوازها ومدخلو في المعقول حتى تشاركو طعام

عاد قالت ليها شكون هي وعلاش جات

حطات صفية كاسها فوق طبلة وكملت هضرتها ~ ايوا شنو قلتي الالة لكبيرة ، انا جيتك نيشان وقلت ليك ل كاين وراه راجل متعيبو حتى حاجة من غير ذراعو وولدي بذراعووو كي الفاس فينما حطيتيه يحفر

لكبيرة زمت فمها معرفت متقول

ليها معيباتوش حيت خضار وكيبيع فسوع حيت راجل بنسبة ليها مكيتعابش ، ولكن كانت باغا بنتها نهار تزوج ويجيوها الخطاب يخطبوها حيث جالسة فدار باها معززو مكرمة ماشي حتى الفاس توقع فالراس

حركت راسها بلا بلاما تفكر ونطقت ~ بنتي مازال صغيرة وطايشة ومبغاش نزوجها دابا وتا باها مغاديش يبغي

جوبتها صفية ~ فهمتك ولكن هادو هما لبنات كيكونو زريعة لبلاد ودارهم خااالية تشاوري مع بنتك هي اللولة وشوفي شنو تقوليك متوقفيش في سعدها

ضحكت باستهزاء فخاطرها والهضرة واحلة ليها في الحلق ، الا كان بحال هاد سعد الله يقطعو…بضحكة صفرة نطقت وربعت يديها كتخمم ~ يكون خير

رحمة ل كانت كتصنط هزات الخبار حامية وحطاتها لمريم ل كانت غطير بالفرحة كتنقز وتضحك وغير تشوف في لمرايا ويبان ليها شعرها تشدها البكية ~ اويلي غنبرز بهاد شعر هاكا داير

رحمة عيبت فيها وقالت كتشير بيدها ~ وتا يقبل با بعدا !! علاما سمعت مي قالت ليها بنتي صغييرة منزوجهاش دابا

مريم جوبت بعصبية ~ تالين تنولي قدك ونشرف وميساومني حد ،الا اختي انا باغا نتزوج وبغيت عبد الكريم هو ل يكون راجلي

رحمة ضرها خاطرها من هضرة ختها لدخلت ليها لصميم وعگرتها ، وهي كرهت تتزوج شنو ذنبها الا باقي حتى واحد مجا دق فبابها حتال دابا من ديما باغا تاهيا تتزوج وتكون عندها دارها وكوزينتها وتطيب لزمانها ولكن ماشي گاع ل حلمنا بيك كيتحقق ناضت من حدا مريم بلاما تجاوبها وخرجت مشات لكوزينة تنصب لعشا دير ل كتعرف ليه وتخشى في كوزينة ل دخلت ليها صغيرة ودازو سنين عمرها فيها بلاما تحس اما مريم تكات على سداري وكتحلم براسها فوق العمارية وفجنبها عريسها ل كيبان ليها فعينيها سلطان زمانو ، غرها لوشام ل فاليد وغرها زين والقباحة كانت كتقول يا هو يا بلاش ودابا غدير بالمستحيل باش تاخدو

كما تديين تدان ولو ضار الزمان ، ول درتي فناس غيدار فيك … ل ضلم غيتضلم ولي شمت غيتصاب بما شمت ….لكبيرة ياما ضربات لمعاني لنجمة ياما فقصتها وبكاتها ونغصتها بمعيورها ، كانت تخرج البارود من فمها بلا مضرب حسبة معندها سوق فلي واقفة قدامها وباركا تلوح عليها فسمها ل كينخر فيها وياكلها ويبكيها بلا صوت وبلاما تجاوب ولا تقول آه ، كانت كتكابر وتدبب تغمض عينيها وتدوز ستقبلت الاساءة بإحسان حيت مآمنة بكلمة كل مسيء بما اساء …وهاهو جا النهار ل كل واحد غيشرب من نفس الكااس ل سقاها بيه ، كلمة منحوسة ل داروها ليها بحال حبل داير على عنقها بطلعة ونزلة يقجوها فيها حتى تقطع فيها النفس والعرس ل تعيرت حيت جات بلابيه ودهازها ل مدارتوش وفطورها ل مجابتوش تا مريم وقع ليها كثر وجدر بعدا نجمة تخطبت بشانها وتزوجت بعزها اما مريم غتمشي بدلها غتبقى ديما موصومة على جبهتها حصلت معاه وحيت بنادم عزيز عليه يزيد من جنابو يقدرو يديروها حملت قبل متزوج هي وياه ….هادي هي الدنيا الغرارة ل ضحكاتو البارح تبكيه ليوم ول تعجب تدوز ليام وتخليه يتبلى ، ولكبيرة معرفت باش تبلات وهادشي ل تسلط عليها بسباب بنتها معرفت مدير فيه ، الراجل ل كانت متمنية يخدم قلبو ويحن فبنتو وكان عندها يقين غيرفض زواجها ومغاديش يقبل يصلح الغلط بغلط كبر منو صدق واافق ، تلاقا ببات الدري فجامع قنعو بكلامو الموزون وقال الله يسخر ل دار الذنب يستاهل لعقوبة ، اما حتى غلام شد فريو وكلمتو عيات مو تمشي وتجي عليه باش يتدخل مدات منو لا حق لا باطل كلمتو كان سيف على رقبتو وفى بيها ، بقات وتْشَّوَات حتى عيات وفلخر لقات راسها غتصيفط بنتها عروسة بلا عرس ، مجاتها هدية مخيطات تحتية زربو عليها زربة خايبة وهي باغيا وفمها محلول عاجبها الحال عند بالها زواج فيه غا ليل النهار معرت فين نساتو ، معذورة طايشة ومزال رمانة مغمضة مولفاها باردة وكتشوف غا زوين عمرها سمعت على الخايب مولفة غا كدوزها على بنادم ومازال دوز عليها وتذوق لمرار وتحس بيها مزياان ….

كلشي كان حاط خدو على وسادتو وناعس الا هيا !! كانت فالبيت ل فيه بناتها عينيها على مريم ل وجهها مبشور وكتبان مرتاحة فنعاسها علاش لا وغدا هو نهارها نهار ل غتزوج بيه وغتربط حياتها فيه مع انسان عرفتو مدة قليلة وجاها على هواها وگانتها كيت مها ل عينيها نشفو وحاسة براسها مزوية مقادة تضحك كيف ناس ولا تنطق وتقول زوجت بنتي وحيدت اللوم عليا ،كانت جالسة مقردة مطرطقة عينيها بحال موكة دماغها خدام كيغزل لحرير وينسج الصوف حتى صبح الحال واذن لفجر ، توضت وناضت صلاة وكتطلب من الله ميكملش هاد زواج شنو تقول لجيرانها لعائلتها لخواتاتها ، كلشي كان كيتسنى نهار ل تعيط عليهم فيه الكبيرة وتقوليهم مرحبا بيكم لعرس فلانة حيت عارفين خليفة صاحب عراضة وواجب وكيسكت لفام والعرس كيبدا عندهم قبل بشهر مكاين غا كول ووكل لغنا بليل ونهار كلشي كيكون على حقو وطريقو من ليلة الحنا حتال لحزام سبعيام ودابا مكاينة لا خطبة لا حنا كاين ضريب صداق والله يعاون وجهها معرفت لمن تعطيه ،اش تقوليهم زوجت مريم بلاما ندير العرس ممولفاش عليهم كلشي غيتنوى ول خافت منو غتوقع فيه وبنتها وسيرتها غتولي على كل لسان

برقت شمس النهار سخونة صهدها واصل لقاع الدار وغير وصل شعاها وقاس عينين عروس اليوم وهي تحلهم كيلمعو وناضت بزربة ، الصبا ل كانت تتشوى ليل كلو يطلع هاهو بان ، تمات خارجة من البيت كتمايل بحال الريشة ل كيلوحها الريح من قنت لقنت، وقفة وحدة لقدام لمرايها تشوف زينها واش باقي ولا ذبل ، الزين ل غر شلا بنات وعما ليهم البصيرة ، غسلت وجهها ودخلت لصالون فين كتفطر رحمة ومها واخا هاد اللخرة كاسها كان غير كيشوف فيها متحلف على جغمة ريقت بيها وبللات حلقها ل واحلة فيه غصة ، دخلات عليهم بضكتها ل واصلة لفين وقالت بصوت ملحن ومسموع ~ صباح الخيير عليكم !! كتفطرو بلا بيا ؟؟ زعمة اخر فطور ليا معاكم !!

دموع طاحو من عينين لكبيرة كيتسابقو وتبعوهم شهقات هما ، حطات يدها على عينيها وبدات تنحط وتفش قبلها، مشات لعندها مريم كتعنق فيها ~ وا صافي اماما متبكيش شحال قدي نبقى حداك غنتزوج غنتزوج اللهم من دابا تتهناو مني ومن صداعي وهاهي رحمة مونساك شوية !!

هزات راسها وعلات عينيها فيها بعجرفة كتحرك ليها راسها بمعنى دابا يزيان ويعجبك دفعتها بديها ومسحت عينيها ونطقت بصوت باكي~ سيري تجلسي ابنيتي غيجي نهار ل غنقول ليك علاش طيحتهم وغتقولي ياريت كون رجع بيك زمان لنهار ليوم

هضرتها مطربتهاش حيت فالاصل مبغاش تسمعها ، دماغها كانت حابساه منقوشة فيه وفذاكرتها غير لييوم غنتزوج والسلام ، سمعو صوت الهضرة واللغى تاع دراري صغار كانت هي زهرة ل طالعة جارة معاها زوج من ولادها وجايا جابتها لوجيبة اما متدخلش لدار ولكن خليفة غمض عينيه ومبغاش يحرمها من هاد ليوم ، كانت جايا لابسة جلابة لاصقة عليها نص فشعرها باين گاع ذهبها دايراه صباغة فرجل حمرة والمسكة في الفم كطرطق فيها ،كتنهج وتقرص في بنتها ل لاصقة فجلايلها وتدعي فيها كيف دخلت للبيت لاحت الصاك بزعف وقالت سخفانة ~ يا لاطيف !! واحد السلام وعليكم ، تلاحت عليها مريم تعنق فيها وتعاود تلاقاو البعرة وختها قالت معلقة فيها وكتدوي ~توحشناك يااختي الدار صقلت بلا بيك

غمزتها زهرة وقالت وهي كتسلم على مها ورحمة ~ هاد القنبولة كاملة ل فرگعتي نتي فوجهنا وكتقولي الدار صاقلة ايوا الله يعطيني وجهك لمصندل !! حققت فيها شوفة وقالت ، اجي بعداا ؟؟ قربت منها مريم وهي تحيد ليها زيف من على راسها وهي تبدا تولول وتزيد على ما بيها ~ اويلي على صگعه ليام هو مالو على هاد تقريعة كاملة دارها ليك، مشات جلسات كتضحك من قلبها وتعاود وقالت شادة فيها ~ راجل غتطلقي عليه هاد شعر البوهالي غيتصدم جبدت زيف من صاكها ومداتو ليها باقي بميكتو ~ هاكي ديري زيف جبتو ليك هو وجلابتو رجعت شافت في لكبيرة وقالت ~ تا تعطيني فلوسهم راه ما عنديش غا بقيتي فيا تهرني غا تمشي بلاش بلاش هانا عتقتك!!

لكبيرة جوبتها زاعفة تحزمت بحزام راشي لبنت ل تحط عليها راس خوات بيها والولد ل مولف يخلي جيبها سخون حلف درهم من فلوسو ميتخسرو على هاد نهار وحيت لكبيرة يدها متقوبة ومكتعرفش تخبي لدواير زمان ملي بغات وجهها قمشوه لمشاش ~ خليها سرها نيت هي ل حامية فيها البيضة تمشي بالحوايج ل تكساب تال عندو ويكسيها

زهرة حركت راسها بسؤال ~ صداقها !! دهازها !!

جوبتها باستهزاء وعينيها على مريم ل كتفطر وتبنن خاوية راسها من هضرتهم ~ الولد راه غا طالب معاشو نهار يصور ونهار لا مجامعش راسو وممعولش يتزوج مداير تحت منو حتى ريال ،باه قال لباك هاد الهضرة وحيت هاداك عندي نفسو فنيفو قاليه حتى انا معاطيش بقرة يكون غا راجل ويتهلى فيها

زهرة عضات على قنانفها وقالت ~ زويينة هادي اللهم الزهو ولا هاد زواج القهرة باين من اولو

جمعت الوقفة لكبيرة نافضة راسها من هاد الهضرة ل غير كتزيد تعصبها وهي مناقصاش قالت كتشوف فبناتها وتدوي معاهم بأمر ~ ياله كلها تشد قنت لعشية راه دغيا توصل باقي خاص نطيبو لغدا شحال من حاجة توجد

زهرة نصلت جلابتها ومشات قصدات سجاالة حطات كاسيطة شعبية وحمات الطرح وقالت ~ راه واقلة عندنا عرس ماشي گنازة

ناضت تشطح وتجمع ومريم لقات ل بغات مسايراها اما مهم ضحكة مجاتش على فمها ورحمة دايرة كيف حمار بالبردعة مخشية غا فتمارة الوقت ل هما لتحت كيبززو ضحكة ويرفعو صوت غير على قبل جيران نجمة كانت لفوق باقا فوق ناموسيتها وجهها عرقان وظهرها كيتقسم ومرة مرة كتحس بنغزات حااارين في كرشها ، ناضت فعز الألم عاضة على شفايفها كتبرد فيهم حس الوجع لي كيزورها مرة مرة ول معارفاش شنو سبابو، مزال في سابع بينها وبين ولادة شهرين ، تعافرت حتى مشات للحمام معكزة على الحيط ويدها تحت من كرشها ل حاسة بيها ثقيلة ومدلية كيف دخلت بغات تقضي حاجتها وهي تحل عينيها بخوف قلبها بدا يضرب

مكانتش بخير !! من يوم الصداع وهي كتحس براسها ماشي على برجها غير كتكابر وواقفة بزز تطيب علاش قدات وترجع تنعس ، فكل مرة كانت كتحس بنغيز فكرشها كتصرفو عادي وكتقول منزيدش فيه ، يمكن حيت ثقلت يمكن وصلت شهور لخرة حجج كثيرة لقاتهم لعياها ولمرضها وصبرت حتال صباح ل فيه غيتغير كلشي…..

كانت حاسة بوجع مكيتوصفش وألم مكيتحكاش وبكا دوافع ديالو كثيرة بزاف ، حاسة بضيق حاسة بضيم حاسة براسها وحدانية معندها حد ….مها زوجتها ونساتها وختها عمرها رجعت طرقت بابها حتى من خوها عمرو هز تليفون ولا كلف راسو يدرم لباب عليها يزورها ويصيل رحم معاها ، هادي هي نجمة !! وهادي هي حياتها كسرة الخاطر مرافقاها من وهي بنت صغيرة حتى كبرت معاها….

هلكت نفسها بتفكيرها الزائد في الحوايج الخايبة ل مخسرين خاطرها حتى فاقت من غرق نعاسها على وجع نفسي وجسدي ، مكانتش باغا تنوض باغا غير ترتاح ولكن بزز منها الا هي رافضة توقف الوجع ل كان كيحسك فيها وقفها صحة… كانت حاطة يد ليسرا تحت من كرشها المرخية والنازلة لتحت وحطات يدها ليمنا على اي حاجة كانت قدامها معكزة عليها باش تمشي للحمام ،شعرها مطلوق وذرعانها عريانين كانت لابسة گندورة نص كم قصيرة صدرها باين وصيگانها مفضوحين مكانش وقت تفكر فيه وفحكامو تدير زيف ولا تستر روحها حاسة بالموت كتقرب منها ،حاسة بالخنقة فقلبها وحالها مغير ، دماغها كيصور ليها شي حوايج كبدتها مبغاش تتقبلهم بلا ما تحس كانت كتبكي وهي شادة طريقها للحمام غادا كتخطوي شوية وتوقف بزاف جهدها مسالي ،موصلت حتى فات الفوت حست شي حاجة هابطة معاها طلات بين رجليها كتلقى لحم رجليها تلون بالحمر ، تحقن دم فوجها وفمها بياض خفقان قلبها زاد ومحست براسها غير وهي مغوتةةة ربي ل خلقها صرخة أم ممزوجة بالدموووع بغاتهم يسمعوها ويعتقوها ويكونو معاها …حلقها تجرح بلا فايدة مطرقين بابهم وكيشطحو ويردحو وهي لفوق بوحدها عندها غير الله ، جمعت قوتها وخرجت من حمام قاصدة دروج وكتغوت من جديد على الله يرحموها ويوصلهم صوتها، دموعها كينزلو فوج بفوج مسابقين مع دقات قلبها ل كان غيسكت

كسرت الدروج عاد فطنت بيها لكبيرة وتحشو ليها الرجلين بعدما سمعت غواتها … أما حتى بناتها قالو هادي غايرة من الفرح و باغا ترجعو قرح لي نيتو خايبة وفعلو قبيح كيشبه ناس بيه بالحق ماشي كلشي كيحقد ويغير ، طارت لعندها عدوزتها شادة على ركابيها وتجري حتى كتبان ليها النجمة المطفية جالسة في الدروج وشادة كرشها خايفة على ل فيها لطيح قلب الام ل مكاينش بحالو ، خرجو عينين لكبيرة وحمرت حناكها طرش معرفت باش تبلات تحنات علييها كتسول وتسال و لتحت رجليها رادة البال

عينيها كانو على بين فخاضها ورجلها نطقت مرفوعة ~مااالك اش وقع ليك واش طحتي ولا شنو !!

نجمة كانت عاضة على شفايفها وكتحرك راسها بلا شعرها لصق على جبهتها ل سردت بالعرق وقطرات منو شاقين طريقهم على وجهها وصولا لنص صدرها ~ لااا لا لا !! غوتت بأي وبدات تبكي وتطلب فيها ، كنموت بالوجع عتقيني مبغيتش ل فكرشي توقع ليه شي حاجة باقي عليه الحال

لكبيرة تلفت ولات على فمها غير كلمة اميمتي طرطقت عينيها فنجمة وقالت دايخة ~ شنو ندير واش نعيط لراجلك ولا شنو ؟؟

حسات بوجعة قوية شدتها وهي تزير على يدها بقوة حتى غرست فيها ظفارها وغوتت بنبرة صوت عالية بلاما تشعر براسها ~ عيطي ليه ولا ديري شي حاجة مهم عتقيني متبقايش تفرجي فيا !!

هبطت وخلاتها جالسة فوق دروج دخلت بمشية مزروبة وملامح مشطونة زهرة من ترعيدتها عرفت واقعة شي كارثة طفات سجالة وتمات جايا لعندها كتحرك فيدها وقالت ~ شنو واقع ماالها كتغوت !!

لكبيرة بلاما تكلم مشات لتليفون هزاتو وبتلفة قالت الو حتى خداتو ليها بنتها من يدها ~ واا رجوع الله امي!! كتهضري مع جنون قولي مالك

مداتو ليها وقالت كتمشي وتجي حاطة يدها على جنابها ~ سربيني وعيطي لخوك مرتو واقلة بغات تولد …في سرها كتدعي تكون غير ولادة ومتكونش حاجة اخرا دم لي سارح بين رجلها مخلوض خلعها ، عطاوها تدوي معاه غير شاف نمرة دارهم جاوب بصوت مندفع وقال ~ اش تمااا !!

لكبيرة قتلاتو غير بالخلعة ملي نطقت وقالت ~ عتقنا اوليدي مرتك معرت مالها كتغوت وشادة فكرشها واقلة غتولد

كان جالس كيكمي غير سمع هضرتها وهو يوقف بجهد وركبو الخوف لتوقع ليها شي حاجة كانت هي نقطة ضعفو ميبغيش يتضر فيها ، تصبب العرق في نص جبهتو وحس بذاتو شعلت فيها العافية وقلبو كيحرقو حط ايدو عليه وركب طوموبيلتو

مكسيري في طريق اي طوموبيل كتعرقلو وتعطلو كيحط يدو على كلاكسون وكيشر بيدو باش يضوبلها ويزيد ، عقلو كان معاها هي وگسدتو كانت بوحدها ل سايقة فبلاصتو ،طريق لدار جاتو طويلة تقول اول مرة يشدها كيحس براسو واقف بلاصتو ممحركش، موصل حتى عقلو خرج حل لباب ونزل مخلي باب طوموبيلتو محلول ،لقى خليفة قدام دار كيتسنى فيه فزنقة موقفش وسمع ليه شنو بغى يقول معذور حالتو عالم بيها غير الله ، طلع بجهالة غادي كينقز بثلاثة الدرجات حتى وصل لسطح ..كانت مزالا في نفس لبلاصة وبنفس اللباس غارقة فماها، تحنى عليها وشدها بيدو بزوج وتعلقت عينيه على عينيها ل طابو بالبكا وقال بصوت مجروح واحلة ليه الهضرة مقادش يخرج لحروف مقادين ~ متبكييش انا غنديك دابا سبيطار ؟؟

حطات يدها على لحيتو كتستنجد بيه وكتدوي بعينيها وتنين ويد لوخرا هزت بيها ايدو وحطتها على كرشها وقالت بحزن مغيم على عينيها وبنبرة صوت كتضر في الخاطر وتكسر الروح ~ مبقاتش كتحرك !!

غير سمعها وقفز فوق منها مشا لبيت هز ليها جلابة وشال وخدا فلوس من الماريو وخرج لعندها سترها ونزل هازها بين يديه وهي متعلقة فيه وكتبكي بلا صوت على كتفو ، مو فداك الوقت كانت غادا جايا وراه مكانش عقلو معاها باش يشوفها ولا يسمع كلامها معقل عليها حتى كانت راكبة وراه في طوموبيل وحط نجمة حداها ، كانت غادا معاه بلا جلابة حتى تبعتها ليها رحمة لطوموبيل اما خواتاتو لوخرين كيطلو بحال جيران من الشرجم وحدة كتلوي في مسكتها وكتشوف فيهم ببرود تقول عديانها أما ولوخرا همها غا راسها وضريب صداقها ل غيتضرب ليها في زيرو

سبيطار مكانش بعيد عليهم وهو غادي معاقلش على طريق دغيا وصلو وقف قدام المستعجلات هبط بجرا هزها من جديد ودخل ومو وراه تجري وقفو حارس الامن ل فالباب كيف العادة سبيطار المخزن ومن لا يعرفه فين غادي واشمن طبيبة ودوز من هنا وسير خلص الصندوق ، غلام گرام صبر معندوش وذرة لعقل مغاديش يخدمو كيطلب الله فسرو ميبانش قدامو شي حد يستفزو يخليه يبرد فيه هم الدنيا ل راكبو ، صيفط نجمة ل جابو ليها كروسة مع مو ومشا يخلص ، زهرها وقف معاها فطبيبة ل كانت حاضرة ولكن موقفش معاها فشنو كانت كتمنى وتطلب فديك اللحظة

مكتاب عليها تعذب مكتاب عليها تبكي مكتاب عليها كيف ديما تالم وفرحتها متكملش كتفارق الناس ل كتبغيهم قبل متشوفهم ولا تقطع وحشها فيهم حتى كتقرب توصل عنان السما وكتجي شي حاجة تخبطها لقاع الارض

شحال صعيب نخسرو ل بغيناهم من قلبنا !! فاللحظة ل طبيبة كتقلب فيها وتشوف في تلفازة عينين نجمة كانو معاها كتشوف ففلذة كبدها ساكنة بدون حراك غشاوة من دموع عمرات عينيها وتنخصيصة طلعتها من اعماق قلبها تخلطو مشاعرها ببكاء وانين وقلبها شاعلة فيها العافية بالحسرة والالم ،كتحس بلغة حارقة وصلت لقراجطها باغا تدوي ومقادا تخرج حتى من فمها من غير هضرة متقطعة بأهات قالت بعصوبة ~ فرحيني وقولي ليا ل فكرشي مزيان ؟؟

تاكدات مرة وعشرة قبل متخرج شي حاجة من فمها ولكن كلشي باين حيدت ايدها وقالت كتطبطب عليها ~ الله يعوضك

هادي هي الكلمة ل سمعتها ومن وراها مبقات سمعت حتى حاجة من غير ~ مدام مدام مدام !! شكون جا معاها

نجمتنا طفا بريق عينيها وحماسها ماتت فرحتها وفاقت اوجاعها كانت كتشوف فنقطة فارغة فسقف وكتحس بسنانها كيتراقصو من حر البرد ، دخلت لكبيرة كتجري وقالت طبيبة موجهه هضرتها ليها ~ شنو كتجي لمريضة !!

لكبيرة عينيها على نجمة وعين على طبيبة ~ انا انا ادكتورة عدوزتها وراجلها راه برا

جوبتها بأمر وقالت ~ كلميه ليا يسني ليا على هاد الورقة خاص نهبطو سيدة دابا لبلوك تفتح ، التربية ل فكرشها ماتت

إحساس صعيب وشعور متبغيه لحتى وحدة ، إحساس كيقسم الظهر ويعصر القلب ويكحل الدنيا فعينيك، مساهلاش تولدي والتربية ل كنتي كل نهار كتحلمي وتتمناي وتتسناي امتى يخرج لدنيا وتهزيه بين يديك تشووفي عينيه ل غيكونو بحال الگمرة يضويو دنيتك وتبوسي يديه ل مترجية فيهم يكونو بحال دوا والگومة ل يداويو ويمحيو ليك گاع الخايب ل داز في حياتك وتشيء الاقدار ويموت قبل ميحل عينيه ف الدنيا يمشي قبل متشمي ريحتو قبل متحضنيه وتحسي معاه بشنو معنى الأمومة ، يتبخرو الايام الزينة ل كنتي كترسمي فخيالك كيف غتكون وهو معاك فيهم ، قبل متفرحي بيه ومعاه ، قرحة مكانتش على البال ، الكبدة حارة و فراقها صعيب و ماليه دوا اي امراة كتحلم بوليدات يملئو الفراغ ل كاين فحياتها ، كتكون كتحسب للايام وشهورة ل فاتو ولي باقين قبل ما تهز فيهم نسخة منها بين يدها وهاكدا نجمة فرحتها كانت ما عاطياها لحد راجلها حداها و ثمرة حبهم قريب تكون وسطهم ما ضربت حساب الغدر و كيفاش القدر راسم ليها حياتها ، مكتاب الله غتصرفو كيف ما بغى يكون ممنوش هروب …

ليها الله وهو ل معاها كانت في البلوك نصها مبنج و نص لا فايقة و كتشوف مكتحس بحتى حاجة من غير الالم النفسي والصراع الداخلي ل عايشو قلبها وكبدتها ، دموع عينيها كانو كيف الشلال دايزين قلبها كيتحرق ،راسها غيطرطق فكل مرة كتغمض عينيها وترجع تحلهم تقرص راسها وتقول على الله يكون غير كابوس ونفيق منو شوية ترجع تقول يغلطو ويخيبهم الله توقع معجزة فزمن مبقاش المعجزات ولي فكرشي غيكون حي كتناجي لي خلقها يوقف معاها حتى تفرح بمولودها و بعويناتو محلولين كان كيتسمع فداك البلوك غير صوت الالات خدامين وصوت تنخصيصها ل كيعلى فكل مرة وهو كيتحاول تشوف وتطل عليهم شنو كيديرو بلا فايدة ، كثر اللغى وتوشويش وسمعت الفرملية وهي كتخاطب الطبيبة~ الله وأكبر

قلبها تكمش و غمضت عينيها كتبكي وهي في ديك الحالة دعات على لي وصلها لتم و في كبدتها شواها ، هزات الطبيب التربية و تقدمت عندها كتشوفيها كيف مغمضة عينيها وغير قالت ليها الله يعوضك بالخير ، حلات عويناتها على لحمة بيضة بدمها وجه ملاىكي وشعر مسبب مناقصها حتى حاجة من غير النفس والروح ل داها مولاها ، مكتحركش ل شافها يقول ناعسة حلات فمها بغات تدوي وسنانها ل كيتراقصو بالرعدة مخلاوهاش نطقت بكلام متقطع بزز باش فهمو مغزاه ~ ب ببنت ولا و و ل د

جوبتها بأسى وقالت متاسفة على حالتها ~ بنية دابا ربي يعوضك المهم تنوضي غا نتي بصحيحتك

نجمة حركت ليها راسها بلا ومدت يدها لمربوطة باغا تقيصها ~ عنداك اد دكتورة لبرد عليها

دات البنت وبعدتها عليها بقات فيها كتبقى امراة وقلبها كيتحرك في هاد المواقف

ماشي غير نجمة ل كانت كتعاني، غلام كان بحالها متقاسمين نفس الوجع ، ربي ل كان عالم بيه فديك اللحظة من برا كيبان واقف كي جبل ما هزو ريح ولكن من الداخل كان بحال الحيط الراشي غير تدفعو بيديك يطيح ،كان يضل خدام يجري ويجاري يخدم ويعرق ويجمع في الفلوس ناوي ل مداروش ليه ومفرحش بيه فراسو يفرح بيه فزيادة ولدو ولا بنتو كان كيتسنى داك نهار ومتشوق ليه بفارغ الصبر ، ل وقع عمرو كان ليه فالحسبان بالفم جاتو عادي تنطق بيها طبيبة وتقولها ليه تقبلها وقال قضاء وقدر ولكن ملي دخلوه فين حاطينها يشوفها قبل ميعطيوها ليه باش تدفن ، غريزتو الابوية تحركات وغلام الصغير والحنين ل عمرو عرفو حيا فيه فديك اللحظة ، دازو دموع عينيه سكوتين بحال لما نازلين غاسلين وجهو كيشوف فلحمو ودمو ملوي قدامو ومغطي بالبيض ملاك نازل من سما حورية الجنة ماشي بنت دنيا ، نزل لجبهتها ملصق جبهتو معاها كانت باردة بحال الثلج غمض عينيه كيحفر فذاكرتو اول واخر ذكرى ليهم بزوج قبل ميطبع بوسة على جبينها ويخرج من تم ،مقادش يزيد يتعلق بيها كثر وكثر ، كان حاس براسو فدنيا غير ل عايش فيها دماغو ممعاهش ورجليه ماهازينوش مو كتدوي معاه والهضرة كتردد في وذنيه بحال الصدى كيتعاد فبير غارق ، غادي ومعارفش فين حتى حس بيد لكبيرة شداتو وجراتو لعندها عنقاتو بيدها بزوج ،بقى فيها ولدها ل ترزى فكبدتو بكري نطقت وقالت مواسياه ~ طير تلقاه فباب الجنة نتا ونجمة ان شاء الله اولدي هادي غير صدقة صدقتوها

كان خاشي يديه فجيابو وكيتسنط لهضرتها بلا رد فعل تنهد بصوت مسموع قلبو عامر وكتافو ثقال كأنو هموم دنيا كاملين هازهم فوق منو ولاول مرة معارف ميدير ولا كيفاش يتصرف ~ شنو غنديير دابا

وقفت مگاوداه معاها من يديه بزوج وقالت وهي كتمسح على وجهو ~ سير عند طبيبة خود ورقة باش تدفنها مسيكينة

نطق كيمسح على لحيتو ل طاحو فوق منها قطرات من دموع عينيه ~ ونجمةة !!

لكبيرة طبطبت على كتافو كتصبرو ~ انا غنكون معاها متضرب حسبة وعيط لباك علمو

مشا ودا معاه هضرة مو فوذنيه ،قصد مكتب طبيبة ل غتسني على ورقة الوفاة دخل لعندها كيدفع رجليه صحة وغير شافتو وهي تشير ليه بيدها يجلس على الكرسي ، قبل متمد ليه علاش جاي نطقات وقالت ~ جلس بينما عمرت ليك الورقة !!

قاطع هضرتها واستفسارات كثيرة مرسومة على محياه ~ شنو وقع ؟؟ كلشي كان مزيان كانت متبعة مكانتش كتشكى من حتى حاجة

جوبتو طبيبة كتحرك راسها بلا وأعلم ~ شنو غنقوليك اموسيو غلام غالبا كتوقع كيتوقف قلب جنين، كان عندي شك تكون تلوى عليها الحبل السري وتخنقات مي لااا !! ضيقت عينيها بتشكيك وكملت على هضرتها ، واش فايتة مرتك طاحت على كرشها ولا تضربت ليها

خرج عينيه وهز حاجبو وقال بإنفعال ~ مفخباريش علااش ؟؟

جوبتو بتشكيك ~ حيت كاينة واحد طبعة زرقة فراسها وكبيرة مي تقدر تكون غير توحيمة

خرج من عندها هاز الورقة فيديه وهضرتها دخلت لدناغو ووسوساتو ،لقى لكبيرة في وجهو وهو ينطق بحدة ~ واش نجمة تضربت فكرشها !!

جاها على بغتة وجهها تلون وبدات تدخل وتخرج في الهضرة ~ هاا كيفاش امتى لا شكون قاليك هاد الهضرة ؟؟

الحي أبقى من الميت ،سوا عرف غلام ولا معرفش واش غيرجع بنتو للحياة ؟؟ ل عطا الله عطاه ، مكتابة عليها تموت فديك ساعة وفهاد اليوم والضربة غير سبب جات فطريق وتقادا بيها الاجل …ضحكت لكبيرة بهاد الكلمات على الضمير الميت ل عندها ل كيحيا غير وقت ما بغا، عمرو أنبها ولا نهاها كيسوقها لفعل الخايب بعينين محلولين وقلب مرتاح ، نطقت مجاوبة ولدها ل كانو عينيه محمرين فيها كيتسناها تجاوبو ~ لا اولدي ،شكون بغا يضربها ؟؟ ولا تضربات غنخبيو عليك !! بتساؤل طرطقت فيه عينيها كتدوي متأكدة ل شاف الوقفة والهضرة يقول مرا دزمان حقانية مكترضاش بالمنكر وتسكت عليه ~ واش هادشي تاع تخبية !! اشارت ليه براسها ، سير اولدي نعل شيطان، وقف على گنازة بنتك راه قلت ليك ماشي بنت دنيا غير صدقة صدقتوها دابا ربي يعوضكم زوج وثلاثة !!

وگاع ل كلاتو المعزة فوق الجبل كتخلصو فدار الذباغ بمعنى الا ضحكت عليه هو بزوج كلمات حيت خايفة منو شي مدارتو حيت الخوف من الله ل شانو عظيم خوف منو نهار كيتحاسب كل إنسان على فعلو ، غير مشا يقضي اش تابعو وهي تضور مع ل تما ودخلت لعند نجمة ل كانو مزال مخلينها في البلوك لابسة لبس السبيطار عريانة لا من تفكرها ولا حن عليها لا أم واقفة في جنبها ولا اخت تواسيها وتطيب خاطرها بكلام يخفف عليها ، لا مانطا جديدة تغطى بيها لاحوايج سخان يدفيوها ، لقاتها كترعد بالبرد غير شافت عدوزتها وهي تضور وجهها محاملاش تشوفها ، بسبعة لوجوه كل نهار عاطياها سيفا منهم معرفت اش من گنس تصنفها، قربت منها تطمن وتدير فيها حنينة وقلبها عليها وهي تطلق نجمة من فمها دعوة خلات قلب عدوزتها يتهز من بلاصتو ~حق بنتي وحقي ناخدو منك ومن ولادك غدا قدام الله !! بدات كتنين وكتألم وهي كتفكر صورة بنتها ل فارقتها دنيا معاها قبل متلاقيها ،حطات يدها على وجهها كتبكي وتمسح وصوتها مجروح كجرح قلبها ل مزال كينزف كتدوي بصوت متألم ،ممسامحاش ومغنسامحش الله ياخد فيكم الحق فگاع ل درتوه فيا

لكبيرة صرطت ريقها وتلبكات معرفت تخطي خطوة لعندها لقدام ولا ترجع بيها لور لجهة لباب ، شنو ما قالت مغاديش تبرد نار ل شاعلة فيها نطقت بتردد وقالت ~ بنتي نجمةة نعلي شيطان

اش درت ليك لا أنا لا ولادي !! بنتك بغاها الله وداها ،فاش ضريناك حنا، زعمة نتي مولات لقلب ولكبير حطات يدها على كتفها ودوات ،نعذرك ل فيه منبغيه للا لعدو ولا لصديق

ضحكت باستهزاء وجوبتها كتطلع النفس وتهبطها بزز ومرة مرة الفتحة تضرها ولكن ماشي بحال خاطرها ل موحال يبرا~قولي فاش مضريناكش !! من نهار دخلت عليك عروسة ونتي شوفتك ليا شوفة خدامة وجفاف جبتيني تمسحي بيا يديك وبناتك رجليهم وملي شفتي ولدك في صفي كولكم جيتو ضدي بغيتوني يانكون عبدتكم يا ناكل لعصا …گاع الخايب حطاتو قدام عينيها وقالتو ~شديت وقري ومقلتونيش ، كلشي نمضغو من جهتكم الا هادي مغدوزش !! شافتها كتشوفيها وكتمسكن دايرة فيها معارفة والو غير مضلومة وهي تنطق نجمة بعدنا بللات فمها بلسانها ~ نتي عارفاني علاش كندوي كنتي واقفة وشفتي شكون ضربني برئي دمتك هادوك ل كتجي منهم ولادك مقلتش لا ول ماتت حتى انا راه بنتي وبنت ولدك وإلا عرف مغاديش يسكت

لكبيرة تصدمات حلات عينيها فيها وقالت بلاما تحس نسات بلي زواق دغيا كيطير وبنادم دغيا يتعرف معدنو ~ اش بغيتي تقولي ليه بغيتي تزيدي تكحلي قلبو على خوتو وتعمي ليه عينيه عليهم ؟؟ حركت يدها بنهي واشارت ليها بلا ، مدخليش سوسة بينك وبين دمو وتعمريه باراكا ل فيه وفينا راه غلام ل كان شحال هذا تبدل على يديك مبقا كيحن فينا مبقى كيعرفنا ، ناوية تزيدي تعمري ليه راسو بلي مكاينش !! بنتك علم الله بيها اما ديك الدقة كون كانت هي سباب كوراه مزدتيش نهار بيها وهي فكرشك من ورا مكليتيها متديريناش سبة

خنزرت فيها نجمة و مسحت دموعها من عينيها ، عرفت لي قدامها ما عندها لا قلب و لا ضمير تبسمت ليها بحرقة وقالت ليها مكتفية ~ لي نقولو ليك هو حسبي الله ونعم الوكيل يمهل ولا يهمل ربي غيجيب ليا حقي منكم حتال عندي ودابا الى باقي عندك شي وجه تخافي بيه الله سيري وخليني ،شافت نجمة قدمها وقالت بكلام شبه مسموع ~ كي دوزت وحمي بوحدي تانفاسي غيدوز

الكبيرة معجبهاش كلامها و

متسرطش ليها حست براسها قللت عليها الحيا و العفا و تطاولات عليها و هي اشمن ذنب دارت فيها ، بقات شحال وهي مربعة يديها وكتشوف في مراة الولد و سيفتها خاسرة قدامها قالت بدون متراعي فين هي وشنو واقع ليها ~ اياه امرات ولدي هذا هو المضنون فيك عطيتك الولد و نتي تزويني بلسانك الماضي خرجتي ضلعة عوجة ابنت تاجة

نجمة شافت لتيساع وقالت بصوت عيان جهد ل بقى ليها سالاتو فالهضرة ~ متوصليش لمي وتربيتها فينا على الاقل مكنضرو حد ما كنديو ديال حد وباقا كنقولها بلساني الماضي ل معاجبكش نتلقاو فدار الحق ومغنسامحش على ل درتي فيا و دابا عطيني بتيساع ولا يجي ولدك نقوليه اش كاين شري راحتك محدي عاطياها ليك خرجت من عندها جلست فوق الكرسي شادة على قلبها معارفة متقدم ولا توخر جات تكحلها عماتها باش تكسبها لصفها مصبرتش لهضرتها ، دعا نجمة عليها وعلى ولادها بقى كيدور في دماغها وكياكل فيها ، نفضت راسها من دوك الأفكار فور ما بان ليها ولدها قاصدها وهو ساخط وجهو شرف قبل الوقت الشوفة فيه ترجعك لغلام ديال شحال هادي ل غير معصب وعاقدهم نظرتو تخلع والكلام من فمو يخرج بحال البارود يوجع …وقف على مو وقال بأمر ~ اش باقا ديري هنا !! سيري لدار جيبي لسيدة ما تاكل وما تلبس انا غندخل نشوفها ونمشي نقضي اش تابعني

لكبيرة وقفت راسها دايخ عليها وجوبتو بواخا ومشا فحين هو بقى شحال يتسنى يدخلوه لعندها عكسو بحجة لبلوك فيه لعيالات معريات وجيت هو كرابا ولاو طالبين معاه سلاكة ، دخل لعندها شافها من بعيد وجهها صفر كيخلع شعرها عريان وعنقها كيبان وعينيها ناعسين قرب منها بخطاويه ثقال معارفش شنو يقول بلش يواسيها وهو بروحو محتاج ل يواسيه

هي وهو عايشين نفس المعاناة وكيتألمو بزوج بيهم غير كل واحد فيهم وقدرة التحمل ديالو وصبرو …. نجمة مرهفة الاحاسيس ودموعها كينزلو على سبة فأتفه الاسباب ، كيفاش مينزلوش وهي فقدت قطعة من روحها ، جاتها صعيبة تشوف لعيالات كل وحدة فيهم حاضنة ولدها وفرحانة بيه وهي لا ، صعيب تكوني نافسة بلا ولد مترضعي متهزي متراري تذوقي مرارة الفقدان وتحرمي من حاجة كانت كتنبض فالداخل ديالك ، كتكبر نهار على نهار كتحرك شهر وخوه ، تباتي تحسبي الليالي وتسناي ليوم ل غتولديه فيه ، فجأة بحالا عمرو كان كيتبخر بحال الماء وكيمشي فرمشة عين ، إحساس صعيب لهلا يكتبو على أي وحدة، صعيب تتخطاي دغيا وتتجاوزي صعيب تعوضي النقص ل فيك ول كتشوفيه فنظرة الناس ليك المتأسفة ونتي كتسمعي هضرتهم وكتراقبي نظراتهم ل غير مكتزيد تدمرك ~~ مسكيينة ولداتها ميتة !! ~ مسكينة مفرحات گاع ببنيتها !!

ناهيك على ل جايا بلا حشمة بلا حيا تسولك باغا تدي متعاود كيف طرا ليك وكيف جرا وكيفاش وعلاش واش محسيتيش واش دزتي ياكما صگية طرطقات والبنت نشفات ياكما كنتي تنعسي على ظهرك وتلوى عليها الحبل السري وتقجات ..ياكما ياكما ياكما !! كيبقاو يحكرو ويزيدو يضروك فنفس الجرحة ل مزال دايز دمها بلاما يراعيو ..نجمة كتافات وصلات لحدها وعيات ولات عايشة صدمة نفسية حاسة براسها صعيب تطلع منها ، كانت مغمضة عينيها كتسنط لحرها وهاربة من الواقع ل قدام عينيها حتى كتشم ريحة مغريباش عليها ضورات وجهها وشافتو بان ليها بحال الما وسط الصحرا القاحلة بحال نور وسط العتمة ،بان ليها راجلها وسندها بعد الله كتفها وظهرها ورفيقها في الدنيا وشريكها في الفرحة والحزن بدون متحس مدت ليه يدها وبدات كتبكي بصوت مسموع وقالت منهارة ~ غلام !!

عض على فكوو من الداخل وحاول يخبي حزنو واخا عينيه فاضحينو ، شد فيدها وقرب منها وايدو تانية كتقيس راسها وكتقاد فزيفها وفنفس الوقت كيدوي بنبرة خافتة مكالمي روحو ومصبرو لهلا يشوف فحالو المهم هي نجمة عندو ~ هاانا امراتي شوية ؟؟ بغيتي شي حاجة نجيبها ليك !!

زيرت على يدو ونطقت بصوت باكي بلاما تحس لسانها نطق بلي فقلبها وقالت بصوت منخصص ~ بغيت بنتي !!

صاط بجهد حتى حست بأنفاسو السخونة كتضرب في وجهها وقال كيصبر فيها ~ أمرُ الله معندنا منديرو ، هز راسو بتساؤل وقال ~ واش نعتارضو على قضاء الله دابا يعوضنا ربي كبير

هادشي ل كانت كتمنى فديك الساعة كتمنى العوض الجميل ل ينسيها فكل مر مرت منو ، هزات راسها من على يدو بعدما بللات كمو بدموعها وقابلت عينيه مع عينيه ل كانو طافين وقالت ~ قولها لمي وفاطنة !!

دوز ابهامو على حنكها مسح مجرى الدموع وهز ليها راسو بواخا وتمتم ~ لعشية نرجع لعندك مشهية شي حاجة نجيبها ليك معايا !!؟

حركت راسها بلا أشمن خاطر عندها ولا شهية لشي ماكلة حاسة براسها مگهومة وشبعانة كأنها واكلة ل يكفيها ايام طويلة

مشى فحال سبيلو وخلاها محصورة بين ربعة لحيوط كتشوف فيهم وفكل مرة كتقول راني غير ناعسة وكتعيش حلمة وغنفيق منها ..بالحق مكاينش شي نعسة كتطول لأيام واسابيع وشهور كثيرة ، كانت جالسة فبيتها وكيف كل مرة غير تكون ساهية ولا كتفكر كتسلل لذاكرتها اسوء ذكرى عاشت فحياتها ذكرى وفاة فاطمة الزهراء بنتها لحبيبة ل تعطاتها سمية وتخشات تحت الثراب ، فلوس سبوعها تدارت بيهم گنازتها و وثور ل كان غيتذبح على سميتها تذبح فعشاها ، ل حضرو لكبير وصغير عائلة غلام وحتى نجمة منهم تاجة وفاطنة لكانو مع نجمة وبيها خصوصا هاد اللخرة ل عاونتها حتى تخطات وبرات واخا جرح القلب صعيب يلتائم بالحق مع الوقت كلشي كيتنسى والانسان كيتناسا ومكيبقاش سجين اللحظة كيخرج بشوية من حطام نفسو وكيرجع يفتح ورد حياتو من جديد ….

ل داز فحياة نجمة كامل من صغرها لكبرها ومعاناتها كانو فكفة وموت بنتها جا فكفة بوحدو ولعله من الخير

~فعسى ان تكرهو شيء وهو خير لكم وعسى ان تحبو شي وهو شر لكم فالله يعلم وانتم لا تعلمون ~

من ورا هادشي ل وقع ليها تقوات مناعتها وشخصيتها ضد الهضرة والمعيور ضد خبت بنادم وحقدو حطات كلشي في خانة معزولة وكتعامل مع كل واحد بلي يستاهلو ،مزال عايشين فدار وحدة غير لوجوه ل نقصو زهرة رجليها ثقالت من دار ومريم ستقرت مع عنثر زمانها ل جا داها بلا شان ولا مرشان غير فاتت ايام لعزو وكوغط عليها ومشات بلا تاويل وهادشي ل فقص لكبيرة وطيح من صحتها النص ولات مريضة بسكر والملحة ،فينها لمرا ل كانت الضحكة متفارقش وجهها ولات ابتسامتها غابرة مكتباش زادتهم ضربة ل خدات نجمة ل كانت بمثابة الجوكر ليها لزمت كلشي عند حدو وولاو خايفين فأي لحظة توشي بيهم لغلام كانت غديرها فالأول ولكن فكرت بزاف بلي لو خبراتو شنو غيدير عارفاه متسرع غير عقلاني متعصب وقاسي كون كان كيتصرف بحكمة مغتخبيش عليه بالعكس غتشكي عليه وتقاسم معاه همها ولكن هي تقاسماتو مع الله وبكات وشكات عليه ودعوة المضلوم ليس بينها وبين الله حجاب

شكات لله همها وبكات عليه ودعوة المضلوم ليس بينها وبين الله حجاب ،العلامة بانت فيهم وهي كتشوف وضحكتهم تلاشات قدام عينيها وحياتهم تقلبات بين ليلة ونهار ، مريم الراجل ل كانت تقول غير هو ولا نموت خرجها من عين لبرا ولا يصبحها على دموع ويمسيها عليهم يجلس فالحبس كثر ميجلس برا ، ونهار يخرج يعطيها قتلة تيخليها گاع زرقة … وعلامن تبكي ولمن تشكي همها… خوها ل غيكون معاها وفصفها ويدير ليها لعز حطها سطل بلا تقرقيب خسراتو بفعايلها مبقاش كيعرفها خلاها عايمة في بحر لوسخ ل غطست فيه حتى بقات بوحدها في وجه لمدفع والاب خليفة ل تجي غضبانة عندو هز راسو ومشى لعروبية ولا يجلس تما كثر ميعمر لمدينة هرب من صداع والمشاكيل أما الكبيرة ولات صحتها على قدها مبقات قادا على صداع تا من الراجل ل كانت متفرقش جنبها على جنبو تقول مخيطين بخيط واحد سمحت فيه وجلست حدا رحمة ل قابلة على عيبها وساتراه وغاسلاه واخا اغلب الوقت كتشكي وتبكي وتمن عليها بيه وتأفأف بعييت وبزاف عليا ولكن معندهاش لبديل مكاينش من غيرها يقابلها ،كلشي يتعوض حتال الصحة فاش كتخطى مولاها كيعود مدلول لا حنين لا رحيم ،داكشي علاش الله يقاد البصر مع العمر مانمحنو مانتمحنو …ناضت بنفس الطولة وتجريدة ل يشوفها يتشهى يجلس ويدي ويجيب معاها فالهضرة ولكن الغالب الله الخاطر ضياق ومبقات عندها گانة ولات تاكل القوت وتسنى الموت كانت غادا للحمام تقضي حاجبها محست براسها حتى عمرت گاع حوايجها من جديد عيطت على رحمة تجي تفكها وتغسل ليها هاد الاخيرة ل كانت طالعة لسطح كتحيد لحوايج وتطل ليها شوية تمتع عويناتها بشوفة الزنقة ل فين وفين ولات تخرج ليها ، حتى كتسمع لكبيرة كتعيط بسميتها عوجت فمها وتنهدات بتعب ملي سمعتها قالت ” جي بدلي ليا ” دخلت لعند نجمة لكوزينة كتأفاف وقالت بعدما جلست على الكرسي ~ انا اختي عييت والله فنهار وليت كنبدل ليها كثر من ثلاتة المرات معرفتش واش مي كديرها بلعاني ولا بصح

نجمة حركت راسها بلاحول ولا قوة الا بالله وجوبتها بعتاب~ واش كاين شي حد غيتفايل على راسو بقلة الصحة !! نوضي تكلمي لمك وشوفي اش بغات راه معندهاش من غيرك يهزها … هزت كتافها سايسة هضرة نجمة من عقلها واش فتا عليها ~ راه مكايناش غا انا ندير نوبة مع دريات واه، واش وليت يوميا نصبن لحوايج وملي كنقوليها ندير ليك لخروق مكتبغيش شحال قدني نبقى تابعاها ونصبن ونجفف ونبدل يدي طابو بتيد وجاڤيل خاصني لعوين يد وحدة مكتصفقش

بقات داوية حلفت هي الا نعلت الشيطان ونزلات صمكت وذنيها مخلية حناجر لكبيرة كيتذبحو بتعياط ،شافت نجمة حتى عيات وغلبها وجهها مرگات ودارت بحساب راجلها ل مهمها كان هادي كتبقى مو ول لو كان حاضر بيدو يدوش ليها ويبدل ميعيفهاش ومهاز فقلبو من جيهتها لا حقد لا غبينة ولو تدوز عليه بموس حافي ، حطات نجمة شنو فيدها ومسحتهم ونزلت بلاما تفكر زوج المرات هي باغا الله مبغاش العبد

نزلت بلاما تفكر زوج المرات هي باغا دير لاخرتها اما دنيا فايتة ، قلبها كبير دغيا تناسات فعايل لكبيرة حتى لاحت الشر وراها ودارت الخير قدامها وهبطات ، لقاتها كتفسخ في حوايجها وسط الدار واقفة فحالة لاحول ولا قوة الا بالله عليها كلشي نازل مع رجليها والريحة عاطية من باب لفصيل تقدمت لعندها نجمة بابتسامة بعتات الراحة في قلب لكبيرة حيدت ليها السروال ل كان مطلي وهازاه فيدها وقالت بصوت حنين بقات فيها عدوزتها والحالة ل وصلت ليها ، كيف كانت نخوة وشان ، العين محكلة والفم مسوك الذهب فسنان والحناني في اليد والرجل القفطان ل لبستو صباح تحيدو في لعشية وريحة الورد الريحان فشعر ~ حطيه اخالتي من يدك واجي معايا نغسل ليك !!

جوبتها وهي حشمانة منها وكتنزل في قميصها تستر عورتها ~ حاشاك ابنتي غا خلي حتى تجي رحمة بلاما نعذبك ..

نجمة حركات ليها راسها بلا وجلست قفازي كتمسح فرجليها بداك سروال وفنفس الوقت كتدوي~ رحمة ممسالياش ، ديريني بحالها راك فمقام مي وهادشي واجب عندي متحشميش مني

جوبتها بتنهيدة وقالت ~ الله يرضي عليك ابنتي هذا المظنون فيك ، نجمة كتمسح ولكبيرة كتدوي ، اييه اليام اولنا ضعف واخرنا ضعف ..الصحة ابنتي كتخون مولاها وكيولي حمل ثقيل على ولادو

عزت عليها وكلامها اثر فيها تفكرت ميمتها لحبيبة ل حتى هي مريضة وشادة ركنة وغير مرت خوها ل قايمة بيها جوبتها وقالت بنبرة صوت باغا تبكي ~ شدة وتزول دابا ربيي يفرجها وترجعي حسن من الأول ، جمعت الوقفة وجهها حمر وقالت ،يله تغسلي

مشات معاها الحمام حطاتها تما ورجعت دارت برمة الما تسخن ودخلت لبيت جبدت ليها حوايجها ، وعلاما يطيب لما سيقت داك دنيا قبل ميجي غلام ولا عبيد من خدمة وتحشم لكبيرة منهم عيبنا واحد وسعداتك افاعل خير.. دخلت للحمام غسلت ليها من ساسها لراسها بلاما تعيف منها ولا تقول اووف ويعع كانت كتغسل بقلب مسلم دارتها بحال ختها ولا مها ،عومتها ونشفتها لبستها حوايجها ومشات معاها حتال بلاصتها عاملتها بحال دري صغير ل مزال معارف والو ،لكبيرة شبعتها دعاوي ورضا تدور تدور وتقوليها سمحيليا ابنتي على ل فات

هزت فيها نجمة عينيها وضحكت فوجها وقالت ~ الله يسامح الجميع ومن ليوم انا ل غنقابلك الا بغيتي شي حاجة تقليد الله فعنقك عيطي ليا نجي لعندك طايرة الا مهزك هاد الكتف يهزك لاخور

طلعت نجمة لبيتها زاعفة خاطرها ضرها بزاف على عدوزتها ل بقات فيها وكسرت نفسها ،اييه يا الزمان الغدار يطيح ل كان سلطان ويطلع ل كان راعي و ل كان يتعنى بالجاه يولي معندوش ولي يتعنى بالقوة تتهد صحتو وبفلوس دنيا ميقد يشريها….. وزادت مرضات ملي تفكرات بناتها ل شحال مطلو عليها ولا سولو فيها وقالو هاديك أُمْنَا نهزوها بسنانها ونقابلوها كيف هي زمان رارات بينا بالحق قلوبهم قاصحة وكحلة وعامرة حقد وغبينة كون لقات نجمة تاجة تهزها بسنانها متقولش لا ولكن هاد الاخيرة نفسها عزيزة متفوتش عبد الهادي وولادو عياو فيها بناتها يشدوها بلا فايدة كتقوليه نبقى مع ولدي حتى نموت وحتى هو ولا مرتو ممقصرينش من جهدهم عليها ….

دخلت للكوزينة تكمل لمسمن ل كانت بادية فيه ،صينيتها دالفضة واجدة بكيسانها و برادهاا وفنايقها… تقاوتها محطوطين ومغطين ،فرحانة بشكون جاي ،شحال مجات لعندها وشكون من غيرها فاطنة ل مفكراها فوقت ل خواتاتها لاخرين نسينها من صغرها لكبرها ، طاب لما وطفات عليه علاما توصل مجات فين تكمل وتبدل عليها حتى سمعت صوت صونيت فالباب ل حلاتو رحمة ، طلعت لعند نجمة ل ستقبلتها في الدروج كانت لابسة قفطان خفيف وجامعة شعرها لفوق مقادة وجهها بداكشي بلدي دزمان لكحل في العينين الخلخال فرجلين عارفة دار مافيها رجال عبيد ودخل مع غلام لخدمة ومكيجي تا يروح ليل ، تعانقو وتسالمو عاد دخلو لبيت ،نجمة فرحتها بانت على وجهها نهار ل كتدق فاطنة بابها كتحس بمها ل جايا عندها ماشي غير ختها وتستاهل هاد الكلمة حيت بصح حسبتها بحال بنتها …جلسو فالبيت ل عزلت نصو وولا تاع لبركة ،كيديو ويجيبو في الهضرة سال وسول على الحال والاحوال حتى نطقت فاطنة وهي كتميل راسها جهة الباب بصوت خافت قالت ~ كيف بقات عدوزتك شوية ؟؟ بعيت ندوز نسلم عليها ساعة الباب كان مسدود

جوبتها منيمة عينيها بقلة حيلة ~ مسكينة اختي !! تقولي هزيتي مرا وحطيتي مرا ، مرة تعقل وعشرة لا ولات كلشي ديرو تحتها هادشي كلو سبابو فقايص بنتها ركبها سكر ولعب عليها

فاطنة حركات راسها متاسفة على حالتها ~ الفقصة راه كتدي لقبر مكديرش غا سكر ،ايوا اش غنقوليك انجمة ربي كبير و مكينساش عبادو وليني الله يسامح و يخفف عليها و يگعد بوسادها ، شدها من يدها كتطبط عليها ~ على وجه ولدها سامحي ليها ابنتي دنيا فانية وفايتة

نجمة خرجت تنهيدة حارقة من القلب ~ من جهتي اختي انا مسامحاها فكل كلمة جرحتني بيها وا حاجة اذاتني فيها ولا صفة نعتتني بيها سوا فوجهي ولا فظهري ، هي معليها والو كلشي من بناتها كانو مزيدينها للعافية ويظلو يحرشو فيها ونهارقلالت صحتها معقلوش عليها فين وفين ل تدوز شي وحدة تطل عليها ولا تشوفها

فاطنة حسات بالحرقة ل فقلبها فاقت بلعت ريقها وقالت بغصة ~ الوردة كتولد الشووكة ل تدگها هي لولة ..

شافت فيها نجمة كيفاش كتدوي بنبرة حزن عرفت شنو بيها وعلامن كتدق بهضرتها ، جوبتها كتسل منها لكلام ل واحل باش تتفش وترتاح ~ باقي الحال هو الحال مع عبد الله مهداهش الله وحل عينيه وشامن بيمن مزوج

فاطنة شافت فيها كتضحك بسخرية ~ قاليك وريه وريه ولا عما سير وخليه ، وعبد الله كيتعاما ما مرة ما زوج طاح فيدو سحورها مرة تقوليه مك مرة تقوليه قبول اه حگا على العين وباش نبقاو نبغيو بعضياتنا مرة يصيفطها لدارهم وغير يروح عليه ليل يمشي يجيبها ، بخرت رقيت ووالو بغاها وقابل عليها ببعرها منو ليها وتا دابا فات الفوت راهم تشاركو ذنوب

نجمة حركت راسها بلا حول ولا قوة الا بالله بقى فيها خوها ل ميستاهلش وحدة بحال نجاة بالحق هو ل تدفگ وتبعها في هواها ~ ل عطا الله عطاه ملي ولاوو لولاد فالوسط مبقى كلام

فاطنة تنهدات طامة قلبها ومنيسة منو ل مصبرها انها كتبغيه ودايرة ليه كيف لما لقلبل وكلمتو فوق راسها ~ داكشي ل كاين الله يهديها على نفسها وعلى داك لكبدة لمعاودة نتمنا ليهم غير ايام زينة اما انا دوزت ايامي نربي دوك لوليدات ل باقين عندي حتى ونكبرهم حتى هما باشما عطا الله

نجمة ~امين اختي امين، قولي ليا فين وصلتي فتوجاد لخديجة ؟؟ أفأفت بقلة حيلة وقالت ~ مكرهتش نكون معاك ونعاونك ولكن راك عارفة طبع غلام كيف داير تا يقرب العرس ان شاء الله ونطلبو نجي عند قبل بشي سيمانة

فاطنة متنكرش مكرهتش نجمة معاها توريها شنو دير وتشاور معاها حيت زواج البنت مساهلش ~ راني سايرة كل مرة ندهز ليها معايا الله حسن من كلشي وراني عارفة ما بيدك والو راجلك هو اللول لعقوبة ليك تانتي اختي نتي وياه يفرحكم سيدي ربي بشي عزبة ولا عزري يعوضوكم على كلشي

شافت نجمة وحناكها ل تزنگو منزلة راسها للارض حشمانة ووجهها غيطرطق وهي تعيق بيها غمزتها وقالت ~ ياااكما ؟؟

هزات فيها عينيها فرحانة وزفت ليها خبار الخير ل هبطت على قلب فاطنة بحال لما بردت داك الحرقة ل كانت شاعلة فيه من شوية ~ شهرين هادي مجاتني وخايفة اختي منكذبش عليك!! خايفة ندوز وتقوليا مكاين والو مبغيتش نتحرم من هاد الفرحة ل كنحس بيها ،خايفة داكشي ل كنحس بيه نكون غا وهم كنتوهمو !!

گفضت فاطنة كمام جلابيتها ونطقت بتساؤل ~ دخلتي لطواليط ولا مزيرة !!

حركت ليها راسها بلا وقالت بعدم فهم ~ مزيرة شوية علاش اختي ؟؟

شافتها جمعت الوقفة فور مكملت كلامها وهي تقوس حواجبها فيها كتشوفينا شنو غدير ،حركت ليها فاطنة يدها وقالت بأمر ~ هزي قفطانك وتكاي على عين گفاك !!

سايرتها فشنو بغات ونفذت ل قالت ليها بالحرف ، تحنت لعندها فاطنة حطت يدها جهة الوالدة كتقلب فيها وتعاود بحركات دائرية بصبعانها لوسط و جناب حتى لقات لي كانت كتقلب عليه قالت بفرحة ~ حااااملة اختييي الله يكمل عليه ويتبثو فكرشك ياربي

نجمة قلبها سمعت ضرابيه فوذنيها جمعت الوقفة كتقاد في حوايجها وممتيقاش ~ واش بصح اختي باش عرفتيها ؟؟

جوبتها بعدما جلست بلاصتها كتقاد حوايجها ~ ل بان ليا راني قلتو ليك وغدا سيري تأكدي عند طبيبة هادشي مافيهش مزاح ، وبقاي متبعة معاها حتى تولدي ان شاء الله !!

جوبتها بحماس غطير بالفرحة مرة تجلس مرة تنوض تلفتها لخبار ~ ضرووري اختي من غدا نكون عندها ونقوليك شنو كاين ، تلاحت عليها عنقتها ، الله يخليك ليا ياربي

فاطنة تبسمت وسرعان مخزنتها ضحكتها ~ اميين ياربي ، ونووضي معايا نطل على عدوزتك حشوومة نجي تال هنا ومنشوفهاش

نجمة حلات الماريو خدات زيفها لاحتو على راسها وجبدت شي فلوس وفنفس الوقت كتدوي ~ واخا اختي هي اللولة ،نيت اتاينا نشركوه معاها نعمرو عليها مسكينة ، تلفت عندها وقربت منها وحطات لفلوس فيدها ومزيرة عليهم ~شوفي والاه حتى تاخديهم عوني راسك بيهم وخودي شنو خاصك للعرس راه مساهل

نترت يدها منها بالقوة وحتى هي كتحلف وتعاود ، مرا بحالها راضية بالقليل ل عندها ، كرشها شبعانة ونفسها عزيزة عليها مكترضاش طيح بقيمة راسها وكرامتها وبولادها مع نسابها قالت بصوت منفاعل ~ والله ما يطيحو فيدي !! متضربي حسبة ليا عندي رزقي ودايرة بحساب هاد نهار وعاد راني كريت الحانوت ل فدار نعاون بيه راسي

نجمة ردة فعل ختها كانت عارفاها ومتأكدة منها غير قالت تجرب حضها معاها وصافي ، ميخفاوش عليها طباع فاطنة وداك النفس الحارة ل كتملك من بكري نطقت مقلقة ومعاجبها حال ~ حتى انا خديجة راه ختي وهادشي واجب عليا نديرو معاها ولا حاسباني برانية عليك ؟؟ والا مبغيتيش الالة گاع تشديهم من عندي فلوس انا غناخد بيهم حاجة اخرا ومتقوليش ليا لا حيت غنتقلق منك وشوفي شكون يوقف معاك فالعرس

فاطنة ميقت فيها وقال دايرة ليها الخاطر ~ من هنا لتما ربي تما دوزي قدامي نشوفو لمرا قبل ميطيح عليا ضلام !!

عزيز عليها جماعة لحباب ، طبلة دايرة بالكيسان ، خبز الشعير مع طبسيل العسل وأركان لوز وتمر وگركاع ، كيتفاجا قلبها ملي كتلقى لموجود ل تستقبل بيه ضيافها دير صواب والواجب وتكبر بيهم فقلب دارها ،كانت جالسة متربعة سداري ل يشوفها وهي كتدوي وتضحك وتعاود يقول سبحان مبدل الاحوال ، فرحت ملي فاطنة درمت عليها الباب ودخلات ونستها وفاجات وحدتها عمرت عليها ودات معاها فالحديث كيتفكرو وقائع زمان وكينعلو شيطان لغرار ل دخل بيناتهم وحاول يفرتك شمل زوج الناس كتاب عليهم يتزوجو فسما قبل الارض ، لكبيرة ل لو رجع بيها الوقت اللور متسمعش لري بناتها ل بغاو يهدمو البيوت ويفرقو زوج الريوس جامعاهم طريق الحلال بالحق مفاتش الحال دغيا عرفت إن الله حق ربي كيبغيها ل حل ليها عينيها فدنيا ومخلاهاش غافلة على شنو كدير ….

شابكت لكبيرة يدها مع بعضياتهم كتصيغ نبرة لكلام قبل متگولو ، بندم باين على عينيها ل عمرو بالدموع شافت فكل من نجمة وفاطنة وقالت ~ ل معرف خسرك أختي فاطنة ،قلبك كبير غير داك نهار تقول لبارح ، جريت عليك وطرطقت عيني فيك فقلب داري ولكن قلبك سميح وبنت ناس معدنك صافي بحالك بحال نجمة مكذبوش ل قالو تزوج جدود قبل لخدود

فاطنة طبطبت ليها على يديها مريحاها وقالت بقلب كبير ~ الزمان غدار وغرار الالة الكبيرة كيقريك و يفهمك خيوط حكايتو و القلب البيض واخا يكون مولاه قاصح يرجع يرجع ونتي قلبك بيض و عارفة طريق الله ، ل نوصيك عليه ردي بالك لصحتك هي الدايمة ليك و شدي في حبال الضحكة لا تعود تالفة عليك عمري قلبك بالخالق باش تنوضي و تشدي ولاد ولادك

كلمة ولاد ولادك فيقت عليها وجع كان راگد ، تفكرت بنت ولدها ل ماتت ول بيدها تسترت على ل يقدر يكون سبابها ، نزلو دموع عينيها ل ولاو على سبة مكانتش هكا تبين ضعفها قدام من والا ولايني مقداتش ، جوبتها بصوت نغمتو باكية~ گعما نستاهل نهزهم ويقولو ليا جدة

خطفت نجمة الهضرة من فمها مكاين لاش يرجعو بلور ل فات دفنوه ومات ~ منجبدوش ل فات حنا ولاد ليوم وان شاء الله قريب تهزي طرف من غلام ووعد مني نتي ل غتسميه

مسحت ل بقى من دموعها وقالت بشوق ~ اربي واش حااملةةة ؟؟ فرحيني و خلي قلبي يتفاجا

حركت ليها فاطنة راسها بأه وقالت متيقنة ~ بداكشي ل تعلمت من حَنَّة كنقول راها هازة في كرشها والله واعلم تاني !!

حققات لكبيرة شوفة فنجمة وشافت ل كانو غافلين عليه ، العينين راگدين وشفار مبرومين ،أكدت هضرة فاطنة وقالت بدورها وهي كتضرب يد فختها وابتسامة على فمها ~ صافي باينة فعينيك !! هزات كفوفها لسما وقالت بصوت عالي ~ حمدتك ياربي وشكرتك !! زولتي غمة قلبي وخففتي الثقل من فوق كتافي ، ياربي يكون عزري وعطيني صحتي وخليني حية ليه حتى نحضر لزيادتو غيكون ولدي ونربيه على يدي

نجمة غلبو عليها دموعها ولات كل كلمة كتخرجها مع شهقة ~ كنواعدك سمية ل فبالك هي ل غتعطى ليه

سبحان مبدل الأحوال ربي كيبيتها فشان وكيصبحها فشان شكون قال الكبيرة توووب وتحط الراس تعيا ومتلقى ونيس يونسها ولا حبيب يوقف معاها من غير بنت الناس لي كانت تسممها بكلامها وتسمعها لي ميتسمعش و ها هي دابا عرفاتها شكتسوى وفهمات بلي غلطات فحقها الحديث طوال بيناتهم والكبيرة مقاداها فرحة نجمة ممخلياش من جهدها تعاونها وتقرب ليها وتشوف اش ناقصها فحين الكبيرة غير كتشوف وتبسم الكلام قلال ليها وملقات حتى شي كلمة تكفيها حقها …فالوقت لي هما كيتعاودو رحمة كانت مع زهرة ومريم لي واقفين قدام لباب جايباهم كيف العادة حاجتهم كيتناقشو لتحت بيناتهم كلها ومين سمها يضرب.. مريم جايا يديها زرقة مضرقاها

القهرة باينة على وجهها تزادت فعمرها عشر سنين فوق عمرها بسباب زواج دل مافيهش بركة الوالدين.. ندمت حتى طرطق الشيب فراسها ولات تقول اش داني وعلاش مشيت ،وگاع ل تفطحاتو فدار باها وفشوش ل كانت دايراه على مها وختها والمرار ل كانت مدوقاه لنجمة خداتو بثاني ولمثني ، عرفت شنو معنى لعدوزة واللوسة

والراحة ولهنا مبقاوش عرفو طريق لحياتها ، شرباتو معا عائلة الراجل مر حنطل والوجه زوين ل كانو عاطينها فلول تغسل وجار منو زواق فليام لولة وذاقتو معاهم سم سرح ليها مع دم ، وملي تسدو فوجها بيبان الرحمة ومعقل عليها حد وكلشي خلاها تعوم بحرها قصدت زهرة

لخت لكبيرة توريها وتنصحها وتقريها وتاهيا مبخلتش عليها جرتها معاها لعافية تونسها فطريق شرك باش تزم عليها لفام

وتسد لراجل عينو وتلجم ليه فمو وتخليه يشوف ويسكت

جات لعند رحمة تسلف من عندها عارفاها خازنة تحت منها ومكاينش من غير غيعتقها ،راجل درهم هي لخرة مكيمدها ليها فيدها سرها تكبرت على نعمة وهاهي شداگتها

مريم وهي كتخنز في رحمة ل مسحت سما بليگة وحلفت بهتان ~ بالعمى واش عندي ومنين جاوني ؟؟

كرفضت فيها زهرة كتطلعها وتهبطها تقول كتسالهم ليها ~ تي مالك متمسيش ومترحميش عوني ختك عجبتك حالتها گاع زرگة عطيها خليني نمشي لعند سيدة تصاوب ليه دقة قبل متسد

رحمة هزات كتافها وقالت بالغوات ~ وعونيها نتي نيت ولا فيك غا حلان لفم والهضرة وزايدون منعاونكمش على المعصية

ضربتها زهرة لذراعها بلاحشمة ولا محنة خبطة بقات توزوز فكتفها ~ سدي فمك شوهتينا غديعي خبارنا وبلاصة متعونينا غتضربي لينا طرر

بدموع تماسح ل نزلتهم مريم على رحمة بدات تغبن مغطية وجهها وكتدوي بنبرة حزينة ~ ياك اختي كبرتي فيا لفلوس وعنداك شي نهار تجيك خباري قتلني لمسخوط ديك ساع هانا قدام زهرة كنقولها ليك ومشهداها عليك متعريش على وجهي ماتشوفيني متبكي عليا

بقات رحمة كتشوف فيها ، خافت بصح على ختها وخصوصا مين شافت ذاتها مطبوعة. ومرسومة بيديه وكلات امرها الله وجيدتت بزطام من طابلية ل محزمة بيها وعطاتها داكشي لي كانت جامعة ، عاد نطقات معصبة ~ شدي هادشي لي عندي فهاد الساعة ،عنقاتها مريم فرحانة كتبوس فيها وكتهضر ببرودة بحالا داكشي لي ناوية ديرو عادي بالنسبة ليها ~ رحمة هادشي يبقى بيناتنا ، أنا غادي ندير ليه غير باش ميبقاش يهز يدو عليا راه شي نهار يقتلني

سكتات رحمة مبغاتش تزيد تعلق على كلامها وطلعات

قصدت مريم وزهرة الوجهة فين غادين طريق شرك والسحر وتشعويذ ل كيعرفو ليه ناس يتوجهو لقبلة ويدعيو الله وهما متبعين الشيطان …

فطريقهم كتبان ليهم صباح هي وبنتها نازلين من طوموبيل بعيد على الدرب ، قوصات زهرة عينيها فيها ووقفات تسناتها تا قربات منهم وهي تنطق بلا سلام ~ هاي هاي على صباح مبقيتيش تحشمي خرجتي ليها طاي طاي !!

خنززات فيها هاد الأخيرة ل كانت لابسة ومقادة لحالة، وجهها هاز لماكياج حتى مقاد وريحت عطرها تشم من اول الدرب ،جوبتها مكشرة على نيابها وقالت بنبرة حادة ~ علاش خرجت ليها طاي طاي شفتيني مهزوزة فصطافيط البوليس !!

ضحكات مريم مدرگة وجهها مراضياش بيها تدي خبارها وتضرب ليها طر بلا بندير ~ اللهم طوموبيلت البوليس ولا لبراني حيت هاد الدرب خاصو غير بيمن يدوز كيسان أتاي

تبسمات صباح وهي كتبوس فبنتها وكتقلب فعينيها محاملاش الوقفة معاهم كلاو فيها حتى شبعو وقتلوها بوعوذ فارغة ~ بات بنتي هداك ماشي حد غريب عليا

شافت زهرة فختها بعينين كيضورو وبابتسامة ساخرة نطقت ~ هي صافي تصالحتو والما لقى منين يدوو بيناتكم

قاطعت كلامها قبل ما ترجع تلعب ليها بعقلها تاني وقالت ~ وشنو بغيتيني نبقى نسمع فالأمال الكاذبة من عندك خويا خويا !! شوفي اختي خوك تزوج شاف حياتو ودگ وتادو و تا أنا باغا نشوف حياتي !! اللهم نكويها فيدي جمرة حامية ونقطعها هبرة تبرى ولا نبقى تابعة واحد عمرو متلفت ليا ولا غيتلفت ولا مساومني من أصلو ، تران راه غادي بالقدام ليوم انا صغيرة غدا نشرف ونبقى بوحدي فهاد دنيا ومنلقى علامن نحط الراس

وانتي عارفة وانا عارفة شحال تسنيت فيه ودرت المستحيل باش نكون معاه بالحق هو أسس حياتو مع غيري الله يهنيه من عندي مكتابيناش لبعضياتنا حسن ليا نختار ل شاريني هو ل يصلاح يقابل معايا بنتي الحياة هاكذا بغات !!

طولات فيها زهرة الشوفة وخلاتها حتى كملت هضرتها ودارت ليها بسلامة بيدها بلاما تجاوبها بحتى كلمة جرت مريم ل تعلقت فيدها وداتها معاها تغرقها بذنوب

سدل الليل ظلامو وضوا القمر مع نجوم مكانو ومن غير نجوم سما كانت نجمة كتمشى فوق الارض لابسة قميص حرير وطالقة سالفها الطويل كيف كيحبو غلامها ،حناكها عكري منهم وكحل عينيها منافس هو وليل فلونو لكحل المخملي ، تقادات وتزينات على جال تزف خبر حملها لمولا دارها تفرحو كيف فرح قلبها ،حسات بيه دخل وهي تبسم فرحانة ،معاه كتحس براسها كاملة مناقصها حتى حاجة ..حيد صباطو وعلق دجاكيطو عاد قرب ليها مدوخاه بعينيها …جلس حداها مقرب منها حتى نتفضات فاش حسات بيديه على حناكها وعينيه مستقرين على عينيها ،حطات راسها على كتفو وهزات يديها كدوزها على صدرو وقالت مختاصرة لكلام مقاداش تصبر ~ غلام !!! غدا بغيتك توصلني عند طبيبة

قوس عينيه وحركها من خصرها لعندو كيشوف فيها وكيفليها بعينيه ، جمع يدها بجووج بقبضة يديه ونطق ~ مالك !! ضاراك شي حاجة مريضة ؟؟

بلات حلقها وشافت فيه كتضحك وقالت ~ اه حاسة براسي عيانة وبغيت نمشي نتاكد

غلام بعدم فهم حرك راسو ويديه بتساؤل وقال بنبرة خشنة ~ وشفتك كتقوليها ونتي كضحكي حط يدو على جبهتها وقال ، يا طالعاك سخانة يا كتريگلي عليا

رجعت ضحكت من جديد وهي تشوف شوفتو الحارة ليها وجمعتها ، سيد خضر مجندر معندوش مع المزاح ولا تطوال الهضرة قصرت عليه المسافة ولاحتها ليها ناشفة بلا زواق ~ أنا حااملة !!

تنيات ل كانو على جبهتو تسرحو والحجبان لمگرونين تفكو.. الفرحة بانت على وجهو وابتسامة الخاترة لي قليل فين كتشوفها ترسمات على فمو بلاماا يحس جرها لعندو صدرها على صدرو كيدوز يديه على شعرها وكيتنفس بجهد معارف ميقول فرحتو كانت كبيرة ، قال كيطبطب على يدها ~ مشهية شي حاجة نمشي نجيبها ليك !!

تعلقات فيه معنقاه بحرارة عينيها كيبريو بالفرحة ونطقات مستغلة الفرصة محدو فرحان ~ بغيت حاجة وحدة وقبل منقولها ليك قوليا اه عليها

ضيق عينيه ورفع حاجو بمعنى هضري وهي تكمل وقالت ~ بغيت هادشي ل غيدزاد الا كان ولد ماماك ل تسميه

شافتو خسر سيفتو قالب عليها كمارتو وهي تشد وجهو بيدها مضوراه لعندها وقالت ~

دير ليها خاطرها ومتكسرش فرحتها سمية ممگرونة بحتى واحد

جوبها منفخ وقال بصوت غليظ ~ حتى يزيد ونسميوه سعييد

مرت سنوات طويلة ، تطوات فيها ذكريات قصة نجمة وغلام ل بدات مع جيل تمانينات ومزال لدابا مكملة مع جيل لعشرينات ، سنين دازو وايام فاتو بحلوها ومرها تعاشت مع ناس فيهم ل مات ومنهم ل مزال عايش فدنيا وفيهم ل حل عينيه وركب مكمل معاهم لحكاية فقطار الحياة ….

عام ورا عام حتى لقات راسها وصلات لفوق ستين عام ،نص لول فحياتها داز صعيب عليها تيتمت ومها وباها مزال على قيد الحياة، ملعبات متسركلات تكرفصات ودخلت تخدم وهي مزال خاص ل يخدم عليها…هربت من تمارة لوزينات وبغات تكمل دينها بالحلال ودخلات بنيتها وقلبها في زواج مع ل ختارتو يكون شريكها فدنيا حتى لقات راسها مزوجة بخوه ،تزويجة مكانتش ضاربة ليها حساب ومكانش ليها على البال قبلات براجل عمرها شافتو ولا عرفات حتى سميتو ، قبلت بيه وحنات راسها ل ياما داز عليه ، حگا خايفة من كلام الناس وتنعاتهم بالحق ل مكانتش دايرة بحسابو هو ل طاحت فيه ، عاد ما تكرفصات وزادت قاصات وتالمات وحتى من لعصا خدات ولكن ربي كبير فكل ضيق كان كيدير ليها طريق ،كان ليها عوين وجازاها على صبر سنين براجل لو رجعات بلور متختارش غيرو فدنيا وبوليدات عمرو حجرها ورجعو الفرحة ل غابت على حياتها، ولدت زوج بنات وزوج ولاد عندها بدنيا ومافيها عوضوها على فقدان اول فرحتها عونوها على تربيتهم رحمة ولكبيرة….

لكبيرة ل مشات لدارها الدايمة بعدما حقق ليها ربي رجاها وفرحها بشوفة حفيدها ل عطاتو السمية لعزيزة ، كبراتو في حضنها ودارتو ولدها وحتى زيانت ليها الفتلة وتقادا دقيقها أما راجلها كيبقى راجل مكيعرف حزن مكيشد حق الله ، قبل مينشفو دموع ولادها بغى يعمر دارو ويكمل حياتو حيت دنيا على قولتو مكتوقفش ،بناتها جدبو وحيحو وشكون فاق ليهم من نعاس دار ري راسو ومشى خطب بوحدو، بالحق انا اريد وانت تريد والله يفعل ما يريد ، قبل ميضرب خط زناتي مول الأمانة دا امانتو وتبع مراتو ، حبل الحياة قصير اليوم ليك وغدا عليك ،موتو كانت صدمة لحبابو ل باقييين مولفو موت مّْهُمْ زادهم باهم بالحق ماشي كلهم ،كلها وهمو وزهرة همها لفلوس وتفرق الريوس الصغار ملي تضرگو لكبار ، فعشا باها طالبت بحقها فالدار ل بناها غلام طوبة طوبة بعرق كتافو ومن جيبو شحال صعيب دار لي بنييتي وكبرتي فيها وعندك ذكريات كثيرة عليييها تباع وتقسم على الورتة لي معرقو مهزو مبناو ، غلام ولد الناس الحياة قراتو وراتو وعلماتو القناعة نهار زهرة طلبت حقها رجع لور موافق معارض خلاهم كيفصلو ويخيطو كيف بغاو دارو شرع يدهم قلبو على شاري وهو مبعد لتيساع كيتحسر على البيت ل حل عينو فيه وفي ركانيه … كلها خدا جطو حتى من عبيد ل كان عاد تزوج وكيأسس فحياتو وتا واحد فيهم متفكر ختو رحمة يتيمة الواليدين ل بقات لا ميمة لا بو لحنين لا راجل تلقى وقت الشدة وضيق لا ولاد تحط عليهم الراس من غير نجمة وغلام لي فتحو ليها بابهم تعيش معاهم تحط راسها على راسهم، وهاهي شافت الولية لي كانت تحگر أخر أيامها استقبلاتها بقلب كبير فدارها ودارت ليها شان لي مدروهش ليها خوتها عتابرتها ختها نهار تبكي تمسح دموعها ونهار تمرض تشافي جروحها عمرها شافت فيها بعين عوجة ولا قالت ليها شي كلمة تجرحها دايراها مولات الدار والري والشوار هز رحمة حط رحمة وولادها مكاين غير عمتي يا عمتي بسيف رباتهم مرا فحلة كتخاف الله علماتهم يحتارمو لكبير وما يحگروش على صغير خداو منها الزين والقلب البيض السميح ومن غلام الهبة والنخوة ونيف العالي المرفوع في سما

جا لعيد لكبير وفرحتو والجو لكيدوزوه بحال كل عام فدار ل بنى غلام فالعروبية خليفة قبل ميموت دگ فيه ڤيس لبلاد وريحة الثراب ،ولف يحل لباب يلقى شجر زيتون داير بيه يسرح عينيه لولاجي والبحيرات كيشوفو فيه هادشي ل بقى ليه من ريحة والديه، كانو مجموعين فالسطح كاملين ، نجمة لابسة گندورة طويلة وزيفها على راسها مغطية شعرها ولات الصلاة والدين ، زينها مازال باين فتان مدا منها الكبر والو من غير خطوط رفاع جهة لعين أما رحمة شرفت قبل الوقت وتهدات صحتها ،كانت غير جالسة وحاضية بنات خوها ل حانين كيعمرو السطولة بالماء ويوجدو فين يغسلو الدوارة .. فالجهة الثانية واقف غلام نفس الطولة والتجريدة ،واخا بلباس الذبيحة النور كان باين على وجهو باقي بولحية كحلة ، ل شافو يقول مزال صغير نفس التخنزيرة والجهد باقي فيه ، واقفين فجنابو ولادو رابطين ليييه الضحية واحد شادو من رجلين لقداميين والتاني من لورانيين وهو وسط منهم باغي امتى يدبح ، نطق معصب وكيتنفخ ويدوي قاصح مع ولادو ، شاف فولدو لكبير مخنزر وقال ~ شد البهيييييييمة مزيان وحيد عليا ديك القنبة جمع رجليه غير بيدك !! وريني جهد ولا مربي الصحة على لخوا

معودهاش معاه ولدو ولا هز فيه العين ،حدر راسو وطبق ل قاليه كيحتارموه وهضرتو مكيسمعوها زوج المرات ، مع بغى يتحنى يضحي دور عينيه ملقا لا بنات لا ختو لا مراتو وهو يلوح جنوي من يدو ونطق بزعف ~ واا فينكم !! واش غنبقاو حاصلين هنا ، بأمر قال ~ كلشي يجي يحضر لذبيحة واش كنذبحو لجيران ولا ليكم ، جات نجمة كتضحك معاه وتغامز مع رحمة ~ مالك تاني صابح معصب خاصك غا معامن هاحنا جينا يله قول بسم الله وبدا يحرك ليها راسو معاجبو حال وقال ~ بناتك فينهما ، تمات جايا دعاء هازة تليفونها باغا تصور ~ هانا ابابا

يله غينطق وختك وهي تبان وراها احلام مگفظة على سروالها حد الركبة وجامعة شعرها بزيف حياتي ناوية تعاون وتمرمد ~ هانا واش نشد معاكم ابابا

لاح ذراعو على كتفها معنقها وقال ~ معلوم اماما شدي مع خوتك حوليكم هذا ديري فيه لي بغيتي ، ضحكت من قلبها وتقدمات بلاما تخاف وعلاش غتخاف وهي تربات وسط رجال وسط أب داير بحال ضل مكالي عليهم البرد والصهد ، كيتعرى هو باش يكسيهم هما ،كيتحرم من ل بغا باش يشري ليهم ويعطيهم ،كبرهم قانعين وشابعين هازين راسهم قدام الناس وبيه مفتاخرين وكيقولو انا بنت فلان وانا ولد فلان تزاد راجل وكبر راجل ووولد رجال وبنات بمية رجال… تحنات على ركابيها شادة مع خوتها الحولي من رجليه كتقاتل باش ميتحركش، خدا غلام جنوي دايرو وراه قابل لضحية راسها مع القبلة سما الله وقال الدعاء ونحرو ،ضربة وحدة نازل بيها حتى سيل دمو وقف كيغسل في جنوي غادي يخبيها ببدو وفنفس الوقت كيدوي ~ طلق الحولي امعاوية خليييه يتركل

قالها ومشى لحدا ختو رحمة تحنى جالس قفازي وقال كيدي ويجيب معاها في الهضرة ~ كيف جاك الخوادرية الحولي

رحمة فرحانة ضحكت ليه فوجهو وقالت ~ تبارك الله وصلاة على نبي يله كملت كلمتها وهو يبان ليها الحولي وقف وبدات تزغرت وقالت ~ عمرك طوييل اخوياا

تعاونو دراري ومعاهم دعاء على الحولي تا علقوه فين غيتسلخ من جهة معاوية ، ومن جهة عبد الرحمان كل واحد فيهم هاز موس كيسلخ لبطانة من جيه وغلام مرة مرة يطل عليهم يوريهم من صغرو مزيدهم للقاصح ومحانش فيهم، سالاو سليخ وجمعو ديك الدم من الارض نطق معاوية لي دا من باه غير طولة والقلدة ~ عبد الرحمآن هز الحولي من لتحت مزيان نديوه جيهة لوخرا باش دم يقطر على راحتو…

حرك ليه عبد الرحمان راسو بواخا وتحنى هازو مقاتل معاه ،گارن حجبانو وعاض على فكو كان نسخة من غلام دا منو الملامح والصفات والشخصية لقبيحة

اما لعيالات نجمة كتغسل في دوارة وعينيها على ولادها منهم معاوية ، عطاتو سمية بعد حرب طويلة دخلت فيها مع غلام عاد قبل وسما بيها كون ما مو ومرضها ميعطيهاش لولدو ، فجنبها كانت رحمة باغا دير يدها فالما وربي كبير توحشت شقا وتمارة الجلسة وقلة ميدار كيمرضوها ويخليوها تفكر لخوت ل عمرهم هزو تليفون وسولو فيها ….دعاء وأحلام هازين تليفون كيعيطو على لحباب ويباركو لعيد لصحاب ،كبرو صوت وقربو حدا مهم معيطين لجداهم كيف كيقولو ليها وغير سمعو صوتها وهما ينطقو فدقة وحدة كيتسابقو ~ وااا مي مبروووك عييدك كيف لقيتي حوليك

جوبتها فاطنة كتبسم كانت في سطح مع ولادها ل كبرو وتزوجو وولدو ليها لحفايد قالت بصوت قليل وجهد مسالي ~ نحمدو الله ابنييتي الله يجعل البركة ، ياك نتوما لاباس مك عمتك كلشي بخير !!؟

مسحت نجمة يديها وقربت من تليفون باش تدوي مع ختها ~ كي دايرة الحاجة كي بقيتي شوية

فاطنة عدوها تدوي فتليفون غير دايرة ليهم الخاطر وصافي ~ وهاني نحمد الله ، واا امتى غتجييو ؟؟ راه خديجة وبناتها قاليك ميجيو لعندي حتى تجي نتي ودريات باش تلاقاو كيف كل عام

جوبتها نجمة وقالت كتضحك ~ وضروري يومين ونرجعو نگرضو حولينا ونجمعو روينتا ، وا عنداك تقربي لشي حاجة ديها فراسك وخلي دراري هو يكرضو ويعاونوك راني كنعرفك

حركت فاطنة راسها وقالت ~ حتى الا بغيت فين هي الصحة !! يله سيري بسلامة وسلمي على رحمة وغلام ودراري قبل منسى تلاقيت بوردية فصلاة العيد وسلمات عليك بزاف ولش عرفتي بعدا شكون

كيف دير تنساها صاحبة زمان ل مبقات تلاقات معاها ومقلبتش عليها كتافات كل متفكرها تطلب الله يهديها ويسمع ليها ، قالت بتنهيدة ~ يسلم عليها الخير ،يله بسلامة هاد ساعة !!

نطقو بناتها ~ بسلامة أ مي

كلمة مي مجاوش وقالوها غير هاكداك ، نهار حلو عينيهم فدنيا تاجة كانت عند مولاها ماشافت حتى حد من حفايدها من غير معاوية ، وكانت احلام الصغيرة فبنات نجمة تبكي وتقول لمها صحاباتي عندهم زوج جدات وانا لا ، حضنتها فاطنة بقلب حنين وقالت ليها انا هي جداك ومن تما مشات عليها وداو عليها عمرهم قالو خالتي مكاين غير مي

شعلو لفاخر وتلفو القطبان وتجمعو على طبلة كياكلو ويتمازحو ويتسنطو لناس الغيوان وجيل جيلالة والسهام ، غلام قطع جوعو وخرج برا قاد مجاجو عاد دخل لبيت يتكا ويرتاح هو وولادو حيت عياو اما نجمة ورحمة ولبنات بقاو جالسين فلاطيراس على برا منهم لجردة كيشمو لهوا ويتمتعو بالاجواء ، ناضت احلام هازة بين يديها لمجمر غادا مبعدا سخونيتو عليهم وقفت نجمة تابعاها داوية معاها بصوت عالي باش تسمعها ~ أحلام حطييه غير تماااا بااراكا عليك ودخلي حيدي من شمس ابنتي راه سخونة وواعرة

محست غير بصوت ل من فين لفين ل كتسمعو ، تمات خارجة من باب صغير تاع دارها ل كانت كتشوف فدار غلام بحكم ارض باهم واسعة وعريضة عناد وضد فخوها بنات حتى هي ،كانت لابسة عباية كحلة وشادة عكاز فيدها ، قربات منها وقالت حاطة يدها على جنابها ~ هااديك هاااه سيري لأرض بااااك وغوتي الا عندك شي أرض

والا عندك نفس متحطيش مرة اخرا رجليك فأرض باا ؟؟

شافت فيها نجمة بابتسامة سخرية وقالت ~ جايا لداري مع راجلي وولادي وفينما حط رجليه تا انا معاه فيها

زهرة تعصبات وبسم ل فيها نطقات ودوات محشمانة لا من سنها لا من شيب ل كاسي شعرها قالت مغددة غايرة من لماهم وجماعتهم وضحكتهم ~ واسيري يا قتالة الرجال ، يا ل تزوجات واحد وقتلاتو ودات خوه

حلت فمها مسداتو كلشي كيتفرج ، بنات نجمة غير كيشوفو هما ورحمة بغاو يدويو وهي تحط نجمة ايدها على فمها وقالت ليهم بأمر ~ سكتوو !! خليوها ل فيها يكفيها ناس غيعيبو غير عليها مهما كان عمتكم مدويو متخليو لناس فاش يهضرو يقولو بنات نجمة وغلام ممربينش ، جرات رحمة نجمة وبناتها ودخلو سادين لباب ومخلين اللفعة تموت فسما

باقا زهرة هي زهرة ما عيات ما تابت ما تهدات بغيت نريح قلبكم ونقوليكم نعلت الشيطان وطلبت الغفران من الرحمان وخدات عقابها فدنيا على شر اعمالها ولكن غنكون كنكذب ماشي كلشي كيتجازا في دنيا كاين ل ربي كيبغي يخليه فغفلة حتال نهار الحساب وزهرة ومريم واخا كبرو ولولة دارت لحفاد وتانية لولاد ولكن باقين قلبهم كحل وسمهم طاغي وباقي دم جوفهم هي نجمة وفين ما كتعطاهم الفرصة واخا كتكون مرة فشحال ولا بد يسمموها بشي كلمة ولا بشوفة بالحق نجمة صمكات وذنيها شحال هادي وخلاتهم يلقاو فعلهم …هادي هي الدنيا فيها زوج طرقان ل بغى جنة وحياتو تولي زوينة يمشي فطريق الحق ول بغى جهنم وحياتو تكون مظلمة يقصد طريق الكفر

سدت عليها بابها ودخلت لصالون مع بناتها تحت حيرتهم ودهشتهم من شنو سمعو وحدة كتشوف في لوخرا وكيسولو بعضياتهم ، نطقت أحلام باهتمام مسولة مها وقالت ~ شنو قصدات عمتي كيفاش خديتي لخوت مفهتش

تبسمت نجمة معارفة منين تبدا عمر قصتها عودتها لبناتها ماشي حيت حشمان لا ، الماضي بنسبة ليها كتاب وطوات صفحتو ، شافت فرحمة ل كانت منزلة راسها الارض حشمانة من فعايل ختها وقالت بتنهيدة مهمومة باينة على نبرة صوتها ~ بغيتو تعرفو!! شافت فضول فعينيها وكملت على كلامها وقالت قصتي قصة ،قصة بنت بغات ………..

~~~~~

بقلم الكاتبة ✍️👇

قطعت طرف من لحمي وسيلت دمو وانا كنكتب كل كلمة وكل سطر وكل جزء فقصة نجمة وغلام ،قصة إنسانة قريبة لقلبي وقصة ناس مزال لي حي منهم كنشوفو ولي مات الله يرحمو

صعيب تكتب على اهلك وناسك وحبابك وصعيب تفتح جروح مزال مبراوش ، حيت الا جرحك البراني تعاير وتنسى أما الا جرحك لقريب كتبقى جرحة محفرة ، وهادي حالتي وانا كنسمع قصة نجمة فكل دمعة من عينيها كنبكي معاها وكل تنهيدة من عمق قلبها كنتألم معاها… معشتش تفاصيل كبيرة لكن شهدت على أحداث كثيرة ومكتبت القصة الا ولقيتها فعلا خاصها تقرا ،نستافدو منها وتكون عبرة وفي نفس الوقت نخوي مساحة من قلبي لأحداث كانت ومزال حمل ثقيل على كتفي….

نجمة اسم على مسمى نجمة مضوية على وليداتها وحبابها ولحد الساعة مزال محبوبة عند الصغير قبل الكبير ، إنسانة كتمنى لگاع ناس الخير ، لي شافها يحبها بوجها لمنور المبشور ، مولات القلب لكبير ودار لكبيرة …كلشي باغي يعرف شكون هي نجمة !! ممكن تكون أنا ممكن تكوني نتي ممكن تكون خالتك ولا خالتي، عمتك ولا عمتي ، نجمة شوية منها فكل وحدة فينا ، كل وحدة منا قاصات بحالها و تعذبات تكرفسات تنازلت على حقها وسامحات ، فيها منا ل قلبها كبير ل كتسامح وكتبغي لناس لخير ، ل صبااارة وعلى قد صبرها ربي مغينساهاش كيف تفكر نجمة ، قصتها مسالاتش هنا قصتها مزال مكملة مع ولادها وحفايدها بلسااانها كنقوليكم ، شكرا لكل وحدة قرات القصة بقلبها.. بقات فيها نجمة وبكات ولاحداثها على احر من الجمر تسنات ، الله يعطيكم كفاحها وصبرها وطيبوبة قلبها

إهداء

للعائلة ل قطعنا معاهم صلة الود.. بحالا عمرهم كانو ولا كنا وكيفما هانت عليهم عشرتنا هانو علينا !!

لنائمين في القبور ل فارقتنا معاهم الدنيا ،كنترجاو الله يتغمدهم برحمتو الواسعة ويلاقينا بيهم فالفردوس الاعلى.

النهاية