ملاك: (بقات فبيت مها دارت لكيت طلقت موسيقى وبقات كتخربق فتيليفونها معندها نفس حتى لشي حاجة عقلها غبتفرݣع بالتفكير فهادشي للي وقع مابغاتش تسرط ليها!!! مدت يدها كتاكل شبس بلا شهية ودوز بلمونادا وتاكل الشكلاط فوقت واحد ممسوقاش لخالوطة للي كتاكل حتى دخلت خديجة وسدت لباب من موراها جلست فطرف الناموسية متوترة وحشمانة من راسها كتشوف فختها)
خديجة: (مدت يدها حطتهم فوق رجلين ملاك كتقيسها بشوية) ملاااااك, ملاااااك، ملااااااااك!!!!
ملاك: (حيدت لكيت من وذن وشافت فيها ببرود) شنو؟!
خديجة: مالكي؟! واش مقلقة مني
ملاك: لا
خديجة: ومالكي؟!
ملاك: واش انا جيت قلت ليك شي حاجة؟!
خديجة؛ حيت منين دخلتي مهضرتي مواالو, حتى منين بغيتي تخرجي مقلتيش ليا نمشي معاك
ملاك: علاش قالو ليك كنتلف فطريق باش نديك معايا؟! راه كنبغي حتى انا نخرج بوحدي ونشري شنو باغية وشنو مشهية لراسي ماشي ديما نديك معايا
خديجة: ملاك حبيبة واش مقلقة على حساب يوسف؟!
ملاك: هه وعلاش غنتقلق نتي كضبري على راسك وانا مالي
خديجة: كفاش كنضبر على راسي؟؟
ملاك: (طلعت وهبطت فيها وبنظرات باااااااردة) كيسمعتيييها مالي كذبت نتي باغية ضبري الله يسهل عليك، نوقفلك انا مثلا؟!
خديجة: (بقات كتشوووف فيها)
ملاك: شنو دابا؟! مزال شي حاجة!!!!
خديجة: (بلعت ريقها حيت عارفة ختها منين كتقلق كتسمعك للي عمرك تنوي تسمعو) هو للي تبعني ماشي انا (دارت فيها شوفة ديال بنيتك وتبسمت طانزة عليها) والله هو للي تبعني سوليه اخر مرة راه قلتلو متعاودش تهضر معايا ياك حتى نتي قلتيلي بعدي راكي مزوجة والله من تماك مهضرت لا معاه لا حتى مهضرش معايا وكان..
ملاك: علاش انا كتعاوديلي اخديجة هاد خوروطو ديالك!!! واش انا راسي فيه غير مشاكيييلك؟!
خديجة: ملاااااك عارفة راسي قلقتك ولكن راه كتقولي شي كلام قبييييح وكتجرحيني
ملاك: مسكينااااا مهم خديجة نتي عارفة مزيان للي فقلبي على لساني وانا مغنزوقش ليك الهضرة باش تحلا ليك وتجيك على الݣانة
خديجة: وانا عارفة قلبك زوين نتي مقلقة مني ولكن املاك نتي من اللول مكان عندك غراض فيه وهو راه كان دايرك بحال ختو (دخلت مها) حم
زهرة: مالكم سكتو؟!
ملاك: اللهم سكاات خديجة جاتها واحد الحالة غير كتبلبل وصافي مهم ماما راه جبت ليك داك الشكلاط للي كيعجبك من بيم شحااال مكانة جابوه، راه درتو ليك فبلاصتك
زهرة: الله يرضي عليك ابنتي (مشات جبدت باليزا صغيرة حطتها فوق النموسية) عيطلي باكم قالي نمشيو لعروبية مات عمو
ملاك: ااااه مسكين الله يرحمو، ونتي غتمشي؟!
خديجة: (مكمدا كلام ملاك فخاطرها وصااقرة) الله يرحمو
زهرة: غنمشيو كولنا ابنتي راه عم باك هداااك وشحال كان كيجي عندنا مسكيين والله منين سمعتها وفخاطري ضرني علييه
ملاك: انا الخدمة مزيرة عندي اماما وللي معايا خرجووو لرباط كاينة غير انا وزنووبة نقدر غدا نجي نعزي ولكن باش نبقى لا والله مصاالح
زهرة: اوا؟!
ملاك: ها (أشارت لخديجة) معندها ميدااار تمشي تبدل الجو تماااك وتبقى مونسااك
خديجة: اه، اه نمشي اماما
ملاك: نبقى فبيتك اماما ياك (حركت ليها راسها باه… لوخرا تجبدت ودارت يديها تحت راسها) اللللللله واخييييرا غرتاااااح
زهرة: ياك لمك غترتاحي حيت مك مسافرة
ملاك: هههه الاااااا نتي راك الحب غير ظهري عواجلي بسدادر وصداع داك لبراهش فداك لبيت واخيييرا نتهنى ونخلي خاطري صافي شوية
(بقاو كيجمعو لحوايج وبالصح فرحت بغات تجلس بوحدها تصفي دماااغها افكااارها ومشاعر ديااالها…
بالزربة بقاو كيجمعو حوايجهم غتبقى غير هي ومرت جداها للي مكتقدرش على لمركووب…)
رشيد: (كان كيتسناهم فالطموبيل برا خوه وبااه سبقووهم ودازو على شي عائلة داوهم معاهم) فين ملاك؟! مغتجيش؟!
زهرة: وخدمتها ارشيد؟!
رشيد: و تبقى بوحدها؟!
زهرة: راه مرت باك مكتخرجش وغتبقى مقابلاها وحتى نتا راك كتهبط مرة مرة لهنا هي مصالحلهاش مع خدمتها
رشيد: انا ديك فريفرة مااااكنبغيش نخلي ليها الحرية بزااااف
زهرة: هاديك راها بميااات رااجل وسكت راها جاية سيهام ومتبقاش تهضر على ملاك هكاك لا قدامي لا قدام شي حد اخر!! (ركبت معاهم مخلية ولادها حتى هي بحكم كيقراو، مشاو “لمنزل” فين كان عايش عمهم..)
~~~~~~~~~~
ملاك: (سدت عليها بالساروت جاها حنين كبييييييير تهضر مع حمزة معرفتش علاش هاد الاحساس جاها يمكن من ديما كان حنين وكان كيسمع ليها بزااااف وكيفهمها طاااير واخا غدرها وتقلب عليها الا حاااليا نسات كولشي بغات غير تهضر معاه قلبت على لواتس ديالو كانت مبلوكياااه ديبلوكاتو وبقات كتشوف شحال المحادثة للي بيناتهم مسحتها مشات التصويرة للي داير كانت ديال مو خيبت وجهها)
عقروووشة الله يعطيك المسخ فوجهي ظحكيلي وصاحبت ماما يا حسرة وفظهري بيعتيني العجل باااااينة نتي للي وقفتيلي فيها ماشي باااه كما قال.. الله يلݣيها ليييكم كحلة زحلة بعدتووني على للي بغييييت غي حييت.. (طلع ليها en ligne مزعمتش تصوني عليه تفكرت كووولشي وعاد اخير حاجة وݣضاااتها انه تزوج كمل حيااااتو.. تنهدت وخرجت من الواتس كارهاااه هو بدا حياتو وبدلها وهي مزال لاسقىة فالذكريااات ملقات معامن تهضر وتشكي، حلت لمجر ديال لكوافوز جبدت تيليكوموند شعلت التلفازة بقات غير كتقلب واالو حتى حاجة معاجباها جاتها فكرة تخرج تهز طموبيلتها وتضوور فالمدينة)
المازووووط لااا
(بقات كتاكل فديك سقاااطة تݣهمت دخلت للدوش ديال بيت مها حيت كان مقااد مزيان كولشي فيييه غسلت يدها توضات ومشات تصلي من العصر للعشا خلاتها مجموعة عليها)
الله يسمحلي وصااافي…
~~~~~~~~~~~
يوسف: (من بعد مصيفط ليها فلواتس وشحال صونا اخيرا جاوباااتو)
شنو هادشي اخديجة؟!
خديجة: (فطواليط كتهضر بشوية) راني فلعروبية
يوسف: اشمن عروبية؟!
خديجة: المنزل مات عم بابا وجينا لهنا
يوسف: الله يرحمو ولكن علاش معلمتينيش من قبل
خديجة: والله حتى تبرزطت وبقيت من هادي لهادي مساليتش ومبقيتش ݣاع بووحدي
يوسف: خديجة مبغيتيش نبزز راسي عليك ولكن تنحس خاصني نعرف ݣاع الخطوات ديالك فين جاية وفين ماشية متعاوديهاش مرة أخرى
خديجة: اممم لحكام زعما؟!
يوسف: لا ماشي لحكااام غير الحب هداااك
خديجة: (تبسمت حتى تسمعات ليه)
يوسف: يخليلي ظحييكة.. ياله بلا منشطنك معايا عندك كونكسيون؟!
خديجة: حم لا
يوسف: اوك غير توصلك تبقاي تردي علية براسي راني معرووض
خديجة: فين؟!
يوسف: عند العائلة
خديجة: واخا بالصحة والراحة (قطعت معاه ومشات خرجت بالزربة من طواليط حتى قبل ميودعها الريحة خنقتها رجعت لدار لعزو للي القران مطلوق فيها بالجهد جلست حدا مها غير وصلتها لكونكسيون تبسمت وبقات مكونيكطية معاه ولكن كتحاول متعيقش كتجاوب بتقاالة جملة منو كتجاوبو بكلمة وماشي فالوقت)
زهرة: معامن كتهضري اخديجة؟!
خديجة: اممم غير لبنات
زهرة: مزيان….
يوسف: (قطع معاها دار تيليفونو فجيبو كيحس براحة خطييييرة مع خديجة مهندس حياتو غيكون مرتاح معاها ضرب حسابو من جميع النواحي معاها بغاااها وكل نهار كيزيد يبغيها اكتر ماشي حب قويييييي من طرفو ولا من طرفها ولكن مرتاح بزاااف معاها عاجباااه الحب شاف معاه غير تبهدييل كما كيقول اما خديجة كانت عندها لمسة حنييينة فحيااتو واخا غير مدة قصيرة باش عرفها، بقا كيشوووف من سطح هاد المنظر الخلابي ديال فاس لقديمة الدنيا مزال مروجة ومن الاسطح كيتسمع الموسيقى الكلاسيكيه ديال الرياض للي كاينين قراب ليهم ضار كان واحد من بعيد واقف حتى هو كيشوف من هيئة ديالو عرفو مشا عندو حيت موضووعو بقى فبالو كفاش الكل هنا ضدو واخا هو مدار حتى حاجة مشا عندو)
اورطيغا
اورطيغا: (ضار عندو بملامح باردة) يوسف صافا؟!
يوسف: الحمد لله كيف بقيت؟!
اورطيغا: مزيان
يوسف: من جهة الواليد؟!
اورطيغا: (تبسم بسخرية) شكون فيهم؟!
يوسف: باك امرااد
اورطيغا: (ما فيه ميدخل فحوارات) مزيان
يوسف: متديش على هادوك للي لتحت نتا تدير داكشي للي مناسب ليك خليهم يهضرو ويقولو شنو بغاو مهم نتا شنو باغي
اورطيغا: (شاف فيه محرك راسو باه ورجع شاف بعيييد)
يوسف: الا حتاجيتي اي حاجة انا كاين ديرني خوك لكبير
اورطيغا: (تبسم) لكبير ݣاع
يوسف: كيف غادي مع العمل؟!
اورطيغا: (زفر) مزيان
يوسف: (شافو ماشي فمزاجو هضرتو قليلة معروف عليه شعبي غير الظحك والنشاط) نتا عارف الحاج بن سليمان تيحسبك واحد من ولادو
اورطيغا: معنديش مشكل مع الحاج قد معندي مشكل فية انا
يوسف: فيك؟!
اورطيغا: (ضار عندو) اه مزال تنتبع كلام (زفر وسكت) الواليدة للي واقفلي فطريقي اما منكونش هنا وكان من شحااال هادي خوييت
يوسف: باقي تتفكر فاوروبا اصاحبي.. شوف امراد نتا خدام هنا مزيااان علاش تتفكر تخوي اوروبا حتى هي غتمشي تكرفس فيها وتغرب وماعرفت يمكن تصدق ليك يمكن لا
اورطيغا: الغربة فينا فينا وتمارة حتى هي فينا فينا (بعينين نايمين) مكاين حتى شي فرق بحال هنا بحال لهيه
يوسف: (كيحس بيه طوب ديال مكتائب) بعدا نتا هنا وسط اهلك وسط ناس تيبغييوك
اورطيغا: شتي نتا ايوسف عايش فواحد العالم مثااالي عندك خدمة زوينة وكتخدم حتى مع الواليد ديالك ولكن بقيمتك عندك دارك طموبيلتك عائلة ديالك من لحمك من غدا متبقاش خدام مع باك تفتح بروجي ديالك مكاينش للي يوقف فطريقك، نبسطها ليك انا منقدرش نشري حتى موطور ضرووري (تبسم مفقوس) ندفع دومووند للحاج واش يوافق ولا لا ومن مورااه دوز لمجلس الشوورا مع الوالدة وشوووف تشووف
يوسف: (تبسم) هو تيخااف عليك
اورطيغا: خلينا من هاد الهضرة منكونوش طانزين
يوسف: واخا.. دير بروجي ديالك
اورطيغا: (زفر مكره من صباح وهو كيشرح ليه ودابا كيقولو دير بروجي) واخ
يوسف: ماشي بالضرورة شي واحد يعرف خمم شنو غدير وديرو فسكااات
اورطيغا: (حرك راسو بلا)
مباغيش يعرف من قنت اخر ويحس بية طعنتو انعاود نشرحها ليك هو غار غي حيت مشيت عزيت فداك السيد وعاد كملها خلاني سيمانة تنخدم فذبيحة مع الخدامة وتيتحاسب معايا على كيلو الا مبااانش
يوسف: ديكتاتوري هدا هه
اورطيغا: ههه فهمتي دابا
يوسف: اوا وداك محال ديال الطموبيلات للي كنتي خدام فيه
اورطيغا: مداخلش بشي فلوس صحيييحة هداك بريكول تيكون مرة مرة وصافي ومنين شفت داك وجه الخير اخر مرة من تماك نبقا بانت شي لعبة
يوسف: لاااااا الا ملاك متهضرش عليها هاكا
اورطيغا: (جمع شنايفو. حرك راسو باه)
يوسف: (كيفكر بنيتو حتى عيطو ليهم لعشا نزلو كان الرياض عامر حيت العائلة مجموعة كاملة غير تعشاو اورطيغا ناض خرج مشا فحاالو شداتو غيثة فلباب)
غيثة: (شداتو من ذراعو) اورطييييغا
اورطيغا: (ضار عندها) غيثة صاڤا!!!
غيثة: (تهزت مدت حنكها سلم عليها حتى هو) صاڤا فين كنتي غاابر متتجاوبش حتى فالتيليفون
اورطيغا: (عوج راسو) كنت مشغوول شوية واش بغيتي شي حاجة!!
غيثة: ضرووووري حتى نبغي شي حاجة عاد نتشاوفو زعما حنا des amis قبل من كولشي
اورطيغا: ضروووري غير سولت وصافي
غيثة: تبقى تجاوب فالتيليفون
اورطيغا: (تبسم) ان شاء الله
غيثة: فين غادي مزروب
اورطيغا: مزروب شوية كيتسناني صاحبي
غيثة: صاحبك؟!!
اورطيغا: هه غيثة من بعد ونهضر معاك مزروب شوية
غيثة: واخا فيك…. (مشا مزروب وبقات كتشوف فيه ماشي زربان بحال مطرد عليه شي واحد حتى غبر مع الدرب الضيق, عاد تمات دااهلة ومكملة السهرة…)
اورطيغا: ( رجع عاود صونا تأكد من الخبر، مشا لباركينغ هز لموتور للي شاريه مخبع ومنين كيسولوه كيقول ديال صاحبي، مشا نيشان المحال دلݣزارة للي عاطيه الحاج فالسعادة حيت عيطلو الخدام للي تماك لقا مندوب الصحة ومعاه بوليسي تماك) سلام عليكم
…: نتا هو مول المحال
اورطيغا: ديال الواليد، نتا واش جاي مقصد هنا؟!
…: اه حيت كاينة شكاية
اورطيغا: يعني نتا عارف المحال تابع الحاج بن سليمان باينة فية انا شي واحد حاج؟!
البوليسي: جاوب الدكتور على قد السؤال
اورطيغا: هو يعرف كفاش يسول زعما راك دوكتوور ولا غير محفظييينك #عاود ونبقاو طلع هبط فالمحاكم وسيير واجي وفالتالي ميكون واالو
دكتور: حم، مختالفناش كاينة شكاية ديال وحدة خدات من عندكم كمية كبيرة من الكفتة ولقاتها فاسدة
اورطيغا: معامن؟
البوليسي: جاوب على قد السؤال اولدي
اورطيغا: امممم وفين هي هاد السيدة؟ وفين الريسي بعدا باش تقدات من عندي؟
دكتور: (عطاه الريسي ديال المحال حيت للي كياخد كمية كبيرة من لحم كيعطيوه ريسي قراه شاف فالتوقييت بقا كيتفكر حتىعقل علييها وشاف فطبيب)
اورطيغا: (شاف فالي خدام تماك) خليهم يدخلو، (تابع طبيب للي داخل) حنا الحمد الله متنخافو غير من اللي خلقنا.. عنداك ماتقلب مزياان
طبيب: (دار خدمتو والبوليسي تابعو اورطيغا بقا غير كيشوف هادشي كيوقع غير فالمحال للي مكلفو بيه الحاج عكس المحالات لوخرين فين كاينين ولادو ولا خوتو.. هنا بدات كدخلو فكرة أن شي واحد من مور هادشي ومقصدوو وممستبعدش ولاد الحاج نيييت.. خرج طبيب كيكتب فالاجندا ديالو)
اورطيغا: (متكي على لبوطو للي اونفاص معاه) كنش وزيد غرقها على جد اصل منا
البوليسي: غنبقاو على تواصل معاك
اورطيغا: اصلا داير ابونمو معاكم غير هاد المرة مطولتوش!!
(مشااو بقا وااقف كينݣر ضار شاف فالمحال هو منين حل عينو مزياان حلهم فلحم وذبيحة كيعجبو هادشي بزااف وولفو ولكن حتى هادشي للي كيوقع معاه بزاااف ظغط نفسي كيعيى يخدم بنيتو وكيوقع معاه هاكا، عاد كمل مع واحد نفس الشكاية لحم فاسد غير هو وصلها للمحكمة وربح القضية ولاخر خلص الا جاه هادشي بزااف ماشي مرة ماشي زووج..
دخل لداخل كيشوف فالثلاجات كولشي نقي الارض البوطاجي كولشي نقي وبيدو كيوقف على كوولشي وهادشي غيضرب قيمتو قدام الناس للي كيوزع ليهم، بقا تماك شحال ممسروطاالوش حتى جاه لابيل من عند الحاج للي باينة وصلاتو لخبار تأفأف وزفررر مزيااان عاد حط التيليفون على ودنو)
الو….
كما ديما نفس الهضرة لحم فاسد…
اه شكاية…
(تكره) انا واقف على شغلي…
(وقف معصب) اه واقف على شغلي ومن ديما منقي كولشي حتى من ذبيحة ديال المحال فين كاين واقف عليها.. (مكرهش يقطع عليه)
انا معندي منقول بغاو المحاكم طريقهم باينة…
سمعة ديالك!! دابا أنا للي خارج على السمعة..
(مقدرش يكمل الهضرة معاه قطع تجنن حتى خبط داك التيليفون على الارض وضرب برجلو باب دالخشب حتى دخل صبااطو فيه)
***** الله ***** **** (جبد رجلو غير بالسيف حيت كان لابس بروطكان وحل تماك كيجبدو معصب خرج من تماااك مخلي الخدام للي معاه كيهضر مع الحاج…)
ركب فالموتوور مكيقشعش فطريقو وغير كيتحلف ويضاارب مع البرد للي كيضرب وجهو…
الحاج: (عرف من الخدام للي فمحال اورطيغا انه مشا فحالو معصب وراكب فالموتوور بقا غير كيضور فلبيت خايف عليه وفنفس الوقت مفهمتش اش كيدير عندو الموتوور للي منعو عليه من نهار لكسيدة للي دارها فصغر، حتى دخلت مرتو) مشاو؟!
مينا: واه.. مااااااا (كتقلب فتيليفونها) مصوناش مراد عليك! صونيت عليه تيليفونو مطفي عمرو دارها
الحاج: اممم
مينا: خاصك تحاول عليه الحاج شفتك زيرتي معاه بزاف شفتو حتى لعشا مكلاهش فخاطرو ناض تااالع معرفت فين زاااد
الحاج: ياك بغيتيه يطلع رااجل اوا خليييه
مينا: (هزت حاجبها) ولدي راجل بلا داك التزياار الحاج ولدي من نهار ولدتو والرجلة كتفكر منو فاشما جيتيييه
الحاج: زعما الآلة مينا انا بغيتو يتحك ويكسب الصنعة راه مزال يكبر وكولشي يرجع ديالهم
مينا: (بجدية) الله يطول فعمرك الحاج ولكن نقص شوية مبغيتش ولدي يعتقد ويمشي لشي بلية بكترة هاد لقصوحية (هزت حوايج للي تلبس ودخلت للدوش حيت نهار كامل بين طيابات والكوزينة وسير هنا واجي هنا…)
الحاج: (بردلو لما فركابي تلف معرف فين يكون مشااالو الولد!!)
~~~~~~~~~
يوسف: (وصل عائلتو للدار دخل معاهم حيت قرر يبات عندهم هاد الليلة شاف فمو مشات جلسات عكس باه للي طلع لبيتو وحتى غيثة مشات لبيتها) مزال مغتنعسي؟!
ام يوسف: مزال الحبيب ديالي..
يوسف: اممم.. فكرت مزيان شي شهرين ماكسيمووو غنمشي نخطب واحد البنت الا كتاب
ام يوسف: (بفرحة) شكون هاد سعيدة الحظ وللي مزغرتة عليها مها للي تزوج بسيدي يوووسف؟!! (دغيا خيبت كمارتها) متقوليش داك نص ميترو
يوسف: متعاوديش تهضري عليها هكاااك الواليدة
ام يوسف: (مخلوعة ودارت يدها على حناكها) اويلي استغفر الله!! هي؟!!!
يوسف: والا كانت هي مفهمتش؟!
ام يوسف: يوسف ولدي نتا كلاس وبعقلك وبزينك غتفكر فهاديك معيبتش على خليقة الله ولكن
يوسف: اولا ملاك ما فيها ميتعاااب اصلا باش تعيبي ولا لا ولا حتى تهضري على خليقة الله بلعكس كولشي فيها مقاد زوينة ومتقفة وقارية وتحنتك الا جيتي تناقشي معاها (عوجت فمها) وغير تكلماي ماشي هي علاش تنهضر هاديك راها بحالك ختي وكتر ݣااع
ام يوسف: (عاد تنفست) اممم حسابلي.. شكون هادي وشكون واليديها؟! ومنااين هي وشنو كتعمل؟!
يوسف: بنت واليديها ناس محتارمين صافي هادشي للي عارف
ام يوسف: كفاش صافي شكون هي وشنو خدامة وشنو اصلها وفصل واليديها دي معايا اولدي وجيب فالهضرة راه زواج هدا ماشي لعب دراري صغاار ماشي تلوح لية زوج كلمات وتقولي صافي الله يرضي عليك راه زواج هدا
يوسف: دابا نتي باغياني نعيش مرتاح ياك ؟؟!
ام يوسف: معلووم
يوسف: انا بغيت هاديك السيدة بلا متفاصلي فيها نهار يكتاب غتعرفي كولشي عليها وتمشي وتشوفيها وتشوفي فين عايشة وتعرفي مع عائلتها
ام يوسف: يوسف راك غير نتا ولد وحيييحد للي عندي مغنزوجكشااااي بأي وحدة
يوسف: ويونس؟!
ام يوسف: هداك زوجتو وتهنيت عليه واخا… مهم نتا للي بقيتلي الكبيدة وخاص نتهنى عليك
يوسف: واخا الوالدة..
ام يوسف: مخاصكش تزوج اي وحدة
يوسف: انا فعيني هاديك السيدة ماشي أي وحدة باغيها وغنتزوجها الا كتاب وشنوما كنتي غتقولي (وقف) تصبحي على خير ( مشا باش راسها وتم طالع خلاها كتغلي مدام قال هاكا الا عكس توقعاااتها مكانش فيها نعاس دابا زاد طار زائد تفقست… صونات على ياقووت لبنت للي كانت معاه مجاوبتش)
جاوبي حتى نتي تفووو.. بناااقص وكان طلعت قبيلة مع الحاج منسمعشي هاد السم…
الحاج: (مشربش دواه للي كينعسو ويرخيييه دار راسو ناعس حتى نعست مينة وخرج بشوية كيتسلت مشا دق فبيت ولدو لكبير خرج عندو)
ولدي سعد دابا خرج فتش على خووك
سعد: شكون؟!!
الحاج: مراد
سعد: (مكره ولكن ميقدرش يبين) مراد؟! وفين غنقلب عليه الواليد فهاد الليل راه فاس هادي
الحاج: (بحزم) جمع خوتك وقلب على مراد نبغي نعرف فين كاين فهاد الليل!!!! (قوس عينو جامع فمو كإشارة على جديتو فكلامو) نعرف غير فين كاين حتى واحد فيكم ميهضر معاه واخا تعرفو غير من بعيد وتردو علية (طلع وهبط الشوفة فيه ودار يدو من مور ظهرو) دابا
سعد: (حنا راسو) واخا الواليد (غير مشا هز راسو مخنزر فيه)
بقالي غير ولد لحرام نقلب عليه فهاد ليالي
(دخل لبيتو مكره مخلي مرتو كتسول والو مكيجاوبش صونا على خوتو ب2 يفيقو وحيت امر من باهم حتى واحد ميقدر يتمتم لبسو حوايجهم وتجمعو برا والبرد كيصوووط)
هادشي بزاااااااف
احمد: فين غيكون هدا وعلاش الواليد تيقلب عليه هاكا؟! واش دار شي زبلة عاود؟!
سعد: تقلاب للي تيقلب عليه ماشي ديال شي زبلة بالي خاايف عليه حنييين مسكيين فولاد.لحراام
شريف: ياكما واقعة معاه شي حاجة؟!!
سعد: ويموووووت حنا مااالنا
شريف: يموت!! واش نتا حمق هداك راه خونا ميات مرة نعاودها واخا ماشي شقيقنا ولكن راه تربى معانا عشنا وكبرنا فهاد الرياض ودابا تتقول يموووت (دار يدو فجاكيطتو) انا نمشي نقلب عليه خير منسمع هاد الكلام منك اسعد
سعد: شريف شرييييف (مشا زربان) حماااار (هز راسو لقا باه واقف فلبالكووو دور عينو لخوه وتحركو بجوج بلا كلمة ولا نفس)
شي حاجة واااقعة لداك الشمكار باش يبقى الحاج قاااارق هاكا تيتسناه
احمد: ولا الݣرسيفية دايراالو الحيحية ميرجع لفراش حتى يجيبلها ولدها (بقاو ساكتين ركبو فطموبيلة ديال سعد ومشاو ضاربين دورة حيت معندهم حتى فكرة فين غيكون اورطيغا ممداخليتش معاه باش يعرفو الكوان فين كيعمر وأصلا مغيقلبوش عليه واخا يعرفو يمشيو لاوطيل يكملو نعاسهم وميقلبوش عليه…)
~~~~~~~~~~
شريف: (صونا على اورطيغا تيليفونو طافي مشا لبنسودة فين كيكون شي مرات ملقااهش مشا لدار السعادة حيت ديجا موصل باه لتماك مالقاهش فكر بقاتلو بلاصة كيعرفو كيمشي ليها بزااف وديما على فمو الحومة للي تولد فيها، #الليدو دخل للحي للي كان سابقا كاريان ديور ديال لقزدير فين كان عايش من قبل مع مو قبل متزوج بباه دابا رجع كولو عمارات وتبدل واخا باقين ناسو ساكنين فيه حيت باش يهدمو ليهم ديارهم عطاوهم برطمات تماك حط الطموبيل وخرج شاف جماعة جالسين كيتكيفو مشا جيهتهم وهو متردد)
سلام عليكم
…: (بهضرة مخضرة) اش تماك العزييز
شريف: تنقلب على (شاف واحد ناض كيقلبلو جيابو وهو كيتمايل) معندي واالو
…: هاد البرويطة كاملة ومعندك والو جبد الحبيب داك لعاااقة وحط هاد لحويجااات
شريف:شووف غير تهدن انا جاي تنقلب على خويا هنا وصافي
….: (مبوق) خلص وقلب
شريف: حم (بخوف) انا تنقلب على اورطيغا (داك للي كان تيقلبو وقف شاف فيه) خويا اورطيغا
….: (للي كان جالس كيكمي ناض داايخ دار يدو على كتاف شريف وزاد بيه) خوك ومعارفوش فين ساااكن
شريف: ممـــــمعليش تنعت لية فين كاين واش هو هنا؟!
….: نتا داك خوه من باه؟!
شريف: اه هو انا وكاين خوتي اخرين
…: تتهلاو فيه بعدا؟!!
شريف: (بقا ماشي معاه فالخط وزايد معاه فطريق) راه خونا ضرووري،، واخا تنعت لية فين كاين (وقفو فالعقبة ديال لافاك) واش هو حدا لافاك
….: غتلقاه من مور الجامع الا وقف عليك شي واحد قولو انا من طرف اورطيغا وغيقيييلك عليه…
شريف: (زاد خاف ولكن تشجع وكمل طريقو فداك ظلام حيت مهرسين لبولة للي تماك، كان صقييير حتى الطلبة للي كيكونو معمرين القنت مكاينينش راه 1 دالليل.. قبل ميوصل للجامع وقفو واحد ݣريساه غير بالفن خدالو جاكيطتو صبااطو وتيليفونو عيا يقولو اورطيغا اورطيغا ويرغبو لاخر مخضر ودنيها مخدامييينش خدالو داكشي بلا غوات ولا حتى يجبد شي مضا ولا يخدم معاه الخشووونة ومشا فحالو…
بقا كيشوف فحالتو غير بتقاشر غير سمع كحان جاي من بعييد جرا للجامع فين كاين الضو.. بالخلعة غووت)
اورطيييغا.. اورطيييييييييغاااااا
اورطيغا: (ناض من تماك تبعو صاحبو للي جالس معاه من بعد ماسمع اسمو كيتعاود بلغوات، لقا خووه غير عاودلو شنو وقع معاه واخا حالتو باينة هبط كيهلل فالحوومة تلقاه من دوك للي كانو جالسين تماك لقا حوايج خوه وتيليفونو عندو خداهم من للي ݣريساه ولكن مابغاش يقولو شكون بسميو باش متنوضش شي مطااايفة #عااااود كالمااوه مشا لطموبيلة دديال خوه وجلس على اعصاابو من بعد خوه ملبس حوايجو)
وشنق على مو داك السااااع وعاد عيطلي ماشي حتى يكشطك
شريف: معليش معليش العنف مع العنف متيعطي حتى شي نتيجه
اورطيغا: بنيتك اشريف؟!!!
شريف: نتا عارف مواقف ديالي مزيان، ندوزو للمهم علاش طافي تيليفووونك الحاج تخلع عليك بزااف وتيقلب عليك
اورطيغا: هو للي صيفطك؟!
شريف: صيفطنا كاملين (تبسم) نعلمو خوتك ولا نخليهم يزيدو يقلبو
اورطيغا: (تبسم وتكا راسو على الكرسي كيلمس فذقنو، ضار شاف فيه كان كيمسح تيليفونو) طلع نجلسو شوية
شريف: نمشيو للدار حسن الحاج تيتسناك، (شاف فيه وعارفة مغيمشييش ضور راسو حيت اورطيغا هبط من الطموبيل، صونا على الحاج)
الحاج… اه لقيتو.. كاين فاوطيل.. عرفت من عند واحد صااحبي.. لا مهضرتش معاه.. اه وصييت علييه… مع السلامة.. واخا… تصبح على خير.
شريف: (تبعو وخرج من الطموبيل كيشوف فالحومة طلعو لموبل كان ساكن فدوزيام ايطاج دخلو للدار للي كاري، كانت دار صغيرة تكون شي 70 متر ما فيها لا فراش لا والو من غير بيت نعاس فيه 2 بونجات و2 ووسادة وجوج كواش وحوايجو مليوحين فكراطن تماك جلس اورطيغا وخوه بقا غير كيشوف)
جلس اصاااحبي
شريف: علاش مممفرش دارك؟! واش نتا هنا تتعيش؟!!!
اورطيغا: ههه ومالها؟!
شريف: الواليد تيخلصك بعدا؟!!!
اورطيغا: ههه جلس جلس (قوس عينو بحال غيتحلف) وعنداك عنداك اشريف تقولو فين انا ساكن راه الواليدة ومعارفة والو حتى قراااان معارفني سااكن هنا
شريف: وااا غير فرشها اصاحبي
اورطيغا: انا تيجيبني هنا غير نعاس، و مرااااااا مرة، علاش نفرشها؟!
شريف: تفرشها على حسابك نتا، كفاش قادر تجلس هنا؟!
اورطيغا: (جبد ݣارو ممن جيبو ودارو ففمو وهو كيهضر) مرتاح غير جلس نتا وخليك مرتااح
شريف: (جلس بحال شي بنت دخلت لشي دار اول مرة وحشمانة تبسم لاخر حتى غبرو عينيييه وشعل الݣارو) الا عرفتك رجعتي البلية غنقولها لالة ميناا
اورطيغا: (تبسم ونتر من الݣارو وصاط فسما) باقي على عرسك بزااف؟!
شريف: مزال.. ياكما بغيتي نديرو شي عرس انا وياك فدقة وحدة
اورطيغا: قياااس الخيير، انا عاد باقي نقولك الا ندمتي تراجع من دابا مكاين لاش تزيد تغرق راسك
شريف: اعوذ بالله علاش؟!
اورطيغا: نتا للي علاش نايض تزوج
شريف: باش نستاقر ندير وليداتي
اورطيغا: اممم بحال مناقصكش هم مع الحاااج بن سليمان وباغي تزيدو على راسك
شريف: انا عارف الواليد قاسح وبزاف ولكن راه تيبغيييك ونتا عندو عزيييز بزاااف
اورطيغا: (حرك راسو باه مد ليه الݣارو) شي نتيييرة؟!
شريف: مراااااد
اورطيغا: اممم عفا عليك الله.. قولي اشريف خوتك لوخرين ميكونوش هوما للي تيصيفطولي دوك الناس ونبقى طلع هبط معاهم فالمحاكم والضوسي يتوسخ مزياان
شريف: قلبت من موراهم
اورطيغا: متقوليش ماشي هوما
شريف: واااا هادشي للي لقيت
اورطيغا: متكونش نتا نيت (شاف فيه شوفة دالغضبة مخلطة بباتسامة) ههه وليت نشك فحواااايجي تطلق تطلق تكا تماااك
شريف: انا غنوض نمشي
اورطيغا: (حرك راسو بأه توادع معاه طل عليه من السرجم على ميوصل لطموبيلتو غير ركب تلاح فسداري تغطا وجبد عليها فلبلاصة…..)
اصبحنا واصبح الملك لله..
ملاك: (ناضت صباح مجبدة مزيااان ففراش مها توضات صلات كلات بيمو لبست حوايجها وخرجت كما العادة كتسلت هزت طموبيلتها ومشات لخدمتها صونات على مها تشوف كيف بقات وتعلمها راه ميصلاحش ليها تجي خايفة تصوݣ بقات كتعطيها اسباب، قطعت صونات فلبلاصة عليها خديجة مجاوبتهاش وحتى خوتاتها لوخرين كيصونيو معندها خاااطر تجمع ولا تجاوب شي واحد، كملت من الخدمة للي كانت فيها هادئة مشات لسناك خدات طاكوس وبيبسي تغدا جلست كتاكل فيه وكتفكر كفاش تهنى من هاد الاحساس للي عندها وكفاش تجاوز هادشي صونا عليها يوسف معرفتش واش تجاوب وتبين أنها ممسوقاش ولا متجاوبش وتقدر تأكدلو فكرة انها كانت كتفكر فيه بطريقة للي مفكرش بيها فيها… قطع ورجع صونا ملح يهضر معاها شافت بحزن فلابيل حيت جاتها فشكل هاد المرة تجاوب.. زفرت وجاوبت محاولة تبين راسها عااادي)
وي…
يوسف: قلبك قاسح اختي
ملاك: (ببرود) علاش؟!
يوسف: مبغيتيش تهضري معايا مخاصمة معايا لمن غنشكي انا؟! معامن غنعااود؟!! من لبارح تنصحوني عليك والو
ملاك: (شقلبت عينها) شنو بغيتي ايوسف؟!
يوسف: بغيت نعرف غير مالكي؟! انا كنت باغي نعاود ليك غير جات حاجة من مور حاجة ومكنتش متأكد نهار صافي قررت عاودت ليك
ملاك: يعني عارف شنو مقلقني.. انا غير حسابلي صديقة ديالك وكتعاودلي كولشي
يوسف: شوفي سوا كانت خديجة ولا لا نتي بلاصتك بووحدها عندي، براكة غير بسبابك خرجت من واحد النفسية كانت عندي خااااايبة
ملاك: (كتعوج فمها وفنفسعا ودخلتيني انا ليها) اممم
يوسف: فينك نجي عندك
ملاك: لا مصالحش
يوسف: خديجة قالتلي كولشي فالمنزل ونتي بوحدك
ملاك: واخا هكاك ايوسف انا تاقو فية ميمكنش نمشي لشي بلاصة وهوما دايرين فبالهم انني فالدار
يوسف: وفينك دابا؟!
ملاك: تأ، انا كنتغدا وغرجع للدار
يوسف: غير دخلي نصوني عليك باغي نهضر معاك
ملاك: يوسف!! واش زعما كتسنا تاخد الإذن مني باش تكون مع خديجة!! هاديك راه حياااتكم
يوسف: لا باغي نهضر معاك
ملاك: (زفرت) واااخ (قطعت متكرهة حيت هي بغات تصفي دماغها ماشي تهضر معاه عارفة مغيشوش عليها مكااانتش كتبغيييه ولكن بقا فيها الحال تخربقت كملت ماكلتها ومشات للدار مع داخلة كتحل لباب)
نجية: ملاك!!
ملاك: (ضارت عندها بملامح جامدة) شنو
نجية: (سلمت عليها بالوجه) الباركة فراسكم الحبيبة
ملاك: شكرا
نجية: فين ماماك جات ولا مزال؟!
ملاك: مزال (بان ليها حمزة وقف من مور مو وكيشوف فيها) بسلامة (دخلت وسدت لباب بشوية ماشي زدحاااتو كما كانت كدير فالايام اللولة من مور فسخ الخطوبة)
نجية: بسلامة بنتي.. (ضارت لقات ولدها للي حتى هو دخل وباين متغير زفرت دخلت لدارها وسدت لباب مشات لبيتو نيشان دقت عليه مجاوبش ومشات للصالة جلست قدام التلفازة وحداها مرت ولدها للي مكونيكطية مع تيليفونها وعاطياها للظحك ومرة مرة كتنقب من الحلوى للي محطوطة فوق الطبلة….)
مينا: (جالسة فالصالون كيشربو اتاي مع ضياف وهي دخل اخت راجلها) نكب ليك اتاي امفتاحة؟!
مفتاحة: (كتفقص كولشي كيعيط ليها لالة لكبير وصغير لقريب ولبعييظ الا هي) اممم
مينا: (كبت ليها ومداتو غير بيدها مواصلش لحتى عندها وهادشي عارفاه كيزعجها دارتها مقصودة باش تبين ليها انها ماشي خديديمة عندها هزت تيليفونها كتشوف بطرف عينها عيالات لوايسها ها للي ناضت قربت ليها اتاي ها للي ناضت حطت ليها مسمن والحلوى فطبسيل وقوة تبحلييس بحال معرفت شكون جلس حداهم حداها دارت التيليفون فودنها)
على سلامة منين جاوبنا (ناضت من حداااهم خرجت لوسط الدار وعينين عليها)
مال مك مكتجاوبش؟!
مفتاحة: (لفقسة) خويا خلا بنات القاع والباع وجاب لينا وحدة معربنة متفهم لا فصواب لا فواالو وغير تشالي بداك الولد تقول غير هي فالدنيا للي عندها ولد
اورطيغا: شنو الوالدة
مينا: كفاش شنو؟! رواااح دااابا لعندي
اورطيغا: ههه مع كتعصبي كتخرجو ليك الݣرسييفية
مينا: مرانيش نظحك اجي درك
اورطيغا: باش راااجلك هاد المرة يقطع علية الما والضو لا لالة خليني هنا مرتاح
مينا: اوا حتارموو
اورطيغا: الواااااااالدة!!! دابا شنو بغيتي راه لكليان واقف تيتسنى
مينا: تكمل خدمتك تكون عندي
اورطيغا: ان شاء الله (قطع ودار داك العظم (تيليفون عادي) فجيبو بقا خدام كيبيع ويعبر ويتعامل مع لكليان حتى وقف عليه الحاج فين قلييييييل فين كيجي، تفاجئ من الحضور ديالو ولكن مضرووور فخاطرو بزااف من جيهتو، نغز المتعلم ديالو يكمل مع لكليان وهو تكى فالكونطوار كيهضر معاه) الحاج.. دخل
الحاج: خرج عندي نتا اولدي (تم خارج من المحال)
اورطيغا: (حط ديك الطالبية هاز حواجبو بجوج متعجب من هاد الزيارة، زول ليݣات غسل يدو لداخل لبس جاكيط ديالو وخرج عندو حنا باسلو راسو حيت قصيير عليه)
زارتنا البراكة
(كيهضر بفمو ولكن عينيه كيقولو العكس)
الحاج: اجي معايا اولدي
(تمشا معاه ولاخر مفاهم واالو دارو الدورة فين مكاينش الضجيج بزااف ووقفو)
اخر مرة تعاود تطفي تيليفونك ولا تهرسو ولا حتى تعصب
اورطيغا: (كيقاد الجاكيك ديالو) الساعة الله الحاج
الحاج: امراد انا الا قسيت عليك حيت باغي مصلاحتك اولدي
اورطيغا: (حاني راسو هاد الهضرة عندو زايدة ناقصة، بقا غير كيسمع ليه حيت ميقدر يقلل احترامو ولا يتلاج معاه فالهضرة)
الحاج: وداك المطور بغيتك تنساااه متعاودش تركب فيه ولا حتى دور بييه
اورطيغا: (شاف فيه شوفة ديال بنيتك) مرحبااا!! نمشي على رجلي
الحاج: راه تنخااف عليك اولدي علاش متتفهمش.. انا غنعوضك
(مد يدو كيشير لطموبيل من مورا اورطيغا لاخر ضار كيشوف)
هادي ديالك
اورطيغا: (هز حاجبو) هادي!!
الحاج: انا تنعرفك اولدي تتخدم معايا بنيتك وداير كتر من جهدك وبغيتك تكمل هاكا ومبغيتك دير حتى حاجة من مور ضهري كولشي نعرفو عليك ولكن نعرفو منك نتا
اورطيغا: (بقا كيشوف فديك الطموبيل باغي يسمع المفيد لوراق علامن غيكونو؟!!!! رجع شاف فيه متبسم) براك الله وفيك الحاج
الحاج: راني قاديت ليك لوريقات كولشي هو هداك ولكن واعدني تبعد على المطور
اورطيغا: (بلا ميحس) الله ينعل شي موطور وما يجي منو
الحاج: هه الله يرضي عليك اولدي (مد ليه سوارت) توصلني للدار
اورطيغا: (شافو ضريف معاه بزاااف مسوقش المهم لكادو وماشي أي كادو ولكن مبينش داك الحماس لكبيييير للي للداخل ديالو بين فرحة عادية) مرحباااا
(مشا حل لباب ممتيقش واش هاد الطموبيل ديالو عارفها من النوع الغالي طلع فيها مكانتش جديييدة من لاميزو ولكن كانت نقية بزاااف وريحة نقا فيها كيشوف وباغي يقلبها على خاطرو ولكن حتى يكون بووحدو ركب الحاج وبقا كيخطب عليه عاود فطريق واورطيغا باغي غير يفرح على خاطرو بووحدو…..)
ملاك: (دخلت كان الهرج مشات للصالون لقات مرت حنينها للي مجمعة مع جارتها عيات فيها تحطلها لغدا ومبغااش حيت تغدات على برا، دخلت لبيت مها وبدات حوايجها توضات صلات جبدت سقاطة شعلت التلفازة وجلست كتفرج حتى صونا عليها يوسف ابيل فيديو استغربت ناضت دارت فولارها وهاد المرة ممسوقاش كفاش غتبان ليه.. سدت باب البيت بالساروت وجلست فالنموسية وطفات الضو كيبان غير ملامح وجهها مع ضو التلفازة) وي
يوسف: تسنيتك تصوني علية
ملاك: نسيت (شافتو غوبش باش متزيدش تعيق ويبدا يفهم غلاط) وصلت للدار بقيت مجمعة مع مي حلو وصافي
يوسف: مي حلو!!
ملاك؛ مرت جدي
يوسف: خاصك تهضريلي على العائلة ديالك شوية
ملاك: (طانزة) علاش خديجة مكتعاودش ليك؟! بسلامتها كتهز كولشي بالحرب والنقطة
يوسف: هه كتعاود ولكن نتي صريحة كتر ونتي عشييرتي
ملاك؛ عادي عائلة بحال ݣاع العائلات
يوسف: ملاااك واش غتبقاي هاكا معايا؟!!
ملاك: مبيا واالو غير نتا مفهمتش مالك وليتي حساس ايوسف كتر من لقياس انا هي انا
يوسف: ههه وليت تنحب ههه
ملاك: (كدعي عليه فخاطرها) مزيان
يوسف: ونتي مزال حتى شي واحد معمر ليك العين
ملاك: (بتنهيدة) صعيييييييب انا باغية شي واحد اول حاجة يكون رااجل
يوسف: كفاش زعما؟!
ملاك: معرفت.. مفهوم الرجولة عندي يكون هو راااجل معرفت كفاش نشرحها ليك هه
يوسف: ومالقيتي حتى راجل
ملاك: والو واااا تقول ولا يدور حتى كنقول هدا هو الراجل كيطلع روييجل وكفس من للي سبقووه
يوسف: اممم ان شاء الله مزال غيجي للي تقولي هدا هو الفارس المغواار ويطلع هو هداك للي باغية
ملاك: (هزت كتفها) اممم
يوسف: ول (هز راسو شير لشي واحد وظحك شاف فيها)
متقطعيش
(ناض من حداها بقات كدور عينها وتنݣر وتعاير، عجبها الحال منين حشات فيه الهضرة واخا مفهمهاش ولكن بردتها فيه حتى جلس قدامها اورطيغا بقات كتشوف فيه وباينة كيشوف فيها مكملش فيها جوج ثواني وكحز بكرسيه من تمااك هز يوسف التليفون)
ملاك واحد شوية ونصوني عليك
ملاك: (دغيا قطعت بقا بين عينها هداك للي طل عليها واخا كتكرهو ولكن غفلها بقات صورتو بين عينيها، صوناو عليها مها ابيل فيديو)
تووما مال هادو معايا هاد نهار
(جاوبت وهي تكون خديجة شقلبت عينها)
شنو!!!
خديجة؛ مزال مبغيتي تهضريني خلاص
ملاك: (بجفاء) كنهضر، شنو بغيتي ندير كتر من هاكا
خديجة: املاك اختي راه نتي للي عندي صاحبتي وختي وكنعاود ليها وكنخط راسي عليها علاش تقلبتي علية هاكا والله حتى حشوومة عليك
ملاك: اوووف اخدييجة اوووف، مفهمتش انا شنو درت عادي باقا انا هي انا
خديجة: (تنهدت ودات تيليفون لمها للي جالسة حدا الطيابات بقات كتهضر مع مها وظحك وقطعت باش مترجعش تهضر مع خديجة… خرجت بعيد وصونات على ملاك وجاوبتها)
انا هاد يوسف للي يفرق بيناتنا معندي مندير بيه
ملاك: هههه اوكي
خديجة: والله الا كنهضر معاك بالصح اختي انا عندي نتي أهم منو
ملاك: علاه بالسلامة هو رجع مهم عندك!! مبقاش هو للي لاسقك وباغيك
خديجة: والله املاك هو للي لسقني وانا لقيتو ظريف ونساني فداك الهم داكشي باش
ملاك: سعداااتك دغيا كتنساي نتي خاصك ديري سوايع لبنات طريقة نسيان زوجك في 5 أيام
خديجة: علاش كظحكي علية واش ممنحقيش حتى انا املاك نعيش حياتي
ملاك: عيشي اختي عيشي لقيتي علامن تعيشي عيييشي خودي راحتك غير نصيحة مني راك مزالة فالعدة ديالك ساليها بعدا باش تقدري تعيشي حياتك على خاطرك مديريش الغلاط مع كولشي بعدا يبقى وجهك مع ربي مزيان متخسريييش كولشي….
اورطيغا: (كانو جالسين مجموعين لكليكة للي منهم حتى خوه شريف كملو القهوة) كيف جاتك؟!
شريف: (باستغراب) من الحاج
اورطيغا: نقولك اه ونتا قول الله وعلم ههه
شريف: هه بالصحة سيدي شتي قلتلك الحاج ظرييف غير هو تيبغيك بطريقتو الخاصة وبالصح لبارح خااف عليك
اورطيغا: (حرك راسو بأه عاجباه الطموبيل عينيه كيبانو ظاااحكين، كان عيا بالكرا كل مرة ولا يطلب لصحابو بقا كيدور هو وخوه عاد مشاو للدار قالها لمو فرحات بزاااف ونسات التوبيخ للي كانت غتعطيه كاين للي عجبو الحال وكاين للي عادي وكاين للي حقد وزاااااد وكاين للي طلع لبيتو يشتف العائلة كبيرة وفيها بزاااف دالفصائل…
تعشا معاهم ومو مكرهتش ولدها ينعس معاهم ولكن….)
دازت سيمانة ملاك مضاربة غير مع راسها باها كان كيجي هو نهار وعمها نهار حاضيين القهوة..
رجعت من الخدمة لقات مها وكولشي رجع سلمت عليهم وجلست حدا مها معنقاها
ملاك: عطاك خاطرك تجلسي سيمانة كاااملة
زهرة: توحشتيني احبيبتي؟!
ملاك: هو توحشتك اه ولكن راه ولفت نعس فالنموسية
زهرة: هههه دابا تزوجي ابنتي وتكون عندك نموسيتك
ملاك: دابا انا حتااااااااااا نتزوج عاد تكون عندي نموسية (تبسمت باستهزاء) تخربيييق
خديجة: ماما علاش بيت ضياف متخليوهش ليها ياك غير مسدود وكتخليوه لضياف هي اولى ومنين يجي ݣاع ضيف هي تخويه مهم ترتاح راها موظفة وكتبغي تاخد راحتها شوية
ملاك: (عوجت فمها) سنيييين وانا نرغب ولكن (شافت فمرت عمها) مرت عمي لعزييزة عندها هضرة اخرى
سهام: يااااك اختي صدقت انا للي
زهرة: (شافت فيها) مقاالت والو بلا مديري فيها من الحبة قبة لبنات كيظحكو
خديجة: وشنو فيها ݣاع ملاك راه بنت كبيرة خاصها بيتها بووحدها موظفة عندها بزااف دلحوايج للي يخصها بيتها بوحدها وعاد حنا مكتعسوش بكري وهي كتبغي تنعس
ملاك: (كتشوف فخديجة بنص عيين)
سهام: انا مقلت والو شوفو مع باااكم انا معندي منقول لا اه لا لا
ملاك: (قوست عينها فيها) زعما زعما!!!
زهرة: (قرستها مها حتى نقزت) راني جبت ليك جبن للي كيعجبك
ملاك: اااااححح (كتحك فبلاصة القرسة) بشوية اماما
زهرة: نوضي تاكلي وعقلي على مك ديك المزبلة للي درتي ختك منين جات وهي تجمع فلبيت وليتي عزري تاكلي وتلوحي
ملاك: (خرجت عينها) مخليت والو
زهرة: سيري لمك من حدايا عاد مطرطقة عينك فية (ناضت ملاك بدلت حوايجها، حتى شافت ختها دخلت ودارت التيليفون فودنيها)
ملاك: (كملت تبدال لحوايج)
خديجة: يوسف انا قلت ليك قبيلة منقدرش نعاود نهضر معاك
(ملاك قلشت ودنيها كتر ودايرة راسها ممسوقاش كتطوي حوايج لخروج)
راني فهمتك ايوسف انا مزال فالعدة وهادشي للي كنديرو مصااالحش عفاك غير فهمني… (ضرها خاطرها) بسلامة
(قطعت ومشات جلست فوق النموسية خااافت من هاد الحركة تبعدو عليها بحال اللول وهاد المرة غتكون فمرة…)
ملاك: (كملت تبدال وخرجت مخلية خديجة جامدة فبلاصتها كتدعي الله ميتفارقش معاها طفات تيليفونها فمرة باش متصونيش هي عليه تنهدت حيت فكرت مزيان اولا باغية تعرف واش بالصح يوسف كيبغيها ولايق ليها ماشي غير نزوة واعجاب، وتانيا خايفة من ناحية الدين حيت بحثات وسولات فلبلاد مرا كبيرة فالسن وتالتا دارتها قدام ملاك مابغاتش تقهرها حيت ردة فعل ديالها باين ان يوسف مكانش مجرد صديييق عندها ولا معجبهاش الحال حيت خبااات، عيات تبعد راسها ولقات راسها كتبغيييه وزاد كمل هو انه مبادلها المشاعر…
رجعت ملاك دخلت البيت هازة شارجور ديالها وخارجة)
ملاك مزال مغتهضري معايا
ملاك: كنهضر اخديجة معاك
خديجة: هاكا كنا كنهضرو قبل
ملاك: اه هاكا غير هاد الساعة معنديش الجديد للي نجي نبلبل بيه وصافي وحتى ويكون مغتعرفي واالو علية
خديجة: انا عندي
ملاك: شنو؟!
خديجة: يوسف قطعت معاه انا بغيت ختي ترجع راه والله ثم والله ثم والله الا هو للي بقا تابعني
ملاك: مفهمتش علاش كل مرة كتحلفي واش انا جيت وحلفتك نتي عارفة مزيان انا ماشي شغلي فهادشي ديالك مداام قادة برااسك وشحال ونتي معاه وكتخططي غير باش تخبعي علية صافي مبقات هضرة، وانا عندي بزااااف دالأولويات فحياتي على هادشي
خديجة: عارفاك اختي خدامة وهادشي عاجبني فيك
ملاك: ماشي على خدامة اخديجة انا شي (سكتت حيت عطاتها بزااف وزفرت) مهم غير كيجيب ليك بالك انا متبدلت موالو عادي اصلا شنو وقع
خديجة: (بقات كتبكي) راني كنحس براسي متقلة عليكم
ملاك: كفاش متقلة علينا وانا شنو دخلني
(حبست فمها حيت بلا شعور كتخرج ليها هاد الهضرة)
راكي فدار باك مفهمتش منين كتجيبي هاد الحساسية دواالو وانا مهزاكش على ظهري باش تقولي تقتلي علية
خديجة: خيييرك عمرني نسااه نتي للي خرجتيني من داكشي للي كنت عايشاااه وعاونتيني بزااف
ملاك: (كانت غتقولها ودرتي بحتى للي كنت حاطة عليه العين وهي تسكت… قالتها بحسرة)
حنا خوتات وهدا هو دورنا فالحياة وحدة تعاون لوخرا وحدة تجيها النفس على لوخرا وحدة تحن فالتانية
خديجة: (هنا زاد بقا فيها الحال وقفت ومشات عنقت ختها)
عفاك متقلقيش مني
ملاك: (ببرود كتشوف فسقف مخنوقة من هاد العناق مكتقدرش تنافق وخصوصا المقربين ليها مقلقة هي مقلقة كتبغي تاخد وقت وتصالح منين يتحل المشكل.. واهم حاجة المشكل يتحلل من الجذور ديالو ماشي بدراما)
وصااافي حتى نتي شحال فيك ديال دراما مفهمتش نتي ويوسف هاد الايام غير لمحسوس على خوه
خديجة: (كتمسح دموعها) يوسف؟!
ملاك: اممم مهم انا غنمشي نتكا (خرجت مشات لبلاصتها جلست شادة تيليفونها دارت لكيت كتفرج فالتيكتوك ونقزت الانستغرام لقات يوسف حاط تصويرة فيها هو ولكليكة كاملة بقات كتزومي فيهم بانلها واحد بيض وزعر دخلت عندو كتفرج عجبتها سميتو شريف اول تصويرة غتلقاه مصور مع داك العزي كما مسمياه فوسط شي طموبيل هو مصور عادي لاخر لي داير إشارة بيدو بحال شي مريول عوجت فمها ولات قلبت فتصاورو لقات داير شي 2 ديالو وشي لاخر الطبيعة وصافي قلبت فلكومت وهي تبانلها chéri وهي تقلب ستة تسعود، رجعت خرجت من تماك بقات كتقلب حتى تحط لعشا مشات تعشات جات خديجة وهي دور الحيط مافيها للي يهضر…)
دازت 3 ايام خديجة رجعت غير ساهية وكتخمم تيليفونها مطفي اليوم الرابع على التوالي قلبها واكلها ولكن كتشوف هاكا خيييير وحين.. علاقتها مع ملاك شوية بعدا ولات كتجاوبها ومبقاتش كتعطيها القرطاس وداك الكلام للي يخليك متنعسييش لا ليل لا نهار…
كانت راجعة من الخدمة حطت الطموبيل فالباركينغ وهي دايزة من حدا القهوة كيبان ليها باها جالس مع يوسف طرطقت عينها مفهمتش هادا اش جابو يجلس كان صونا عليها ومجاوبتش حيت ختارت تبعد منو شوية بشوية.. مشات للدار وهي كتلفت ممتيقاش عينها، وتموت تعرف علاش كيهضرو حتى دخلت فحمزة للي كان حاضيها هزت راسها فيه وريحتو تغلغلت فنيفها
ملاك: (مخيبة وجهها) مكتشوفش؟!! عور!!
حمزة: (تبسم) نتي هي نتي داك الفم عندك قنبولة
ملاك: انا بغيتها تفرݣع عليك
حمزة: (بعينين ذابلين فيها) ونكون اخر وحدة شفتها هي نتي
ملاك: تشووف عينيك في كفااك حتااارم راسك اسيييي راك مزوج زعما.. رجال اخر زمن (مشات زاربة مخلياه كيشوف فيها، دخلت للدار كانت الدار عامرة بشي ضياف كما العادة مسلمتش دخلت لبيت مها حتى جابت خديجة صينية فيها غذاها طبسيل فيه مريقة دلحم والخرشوف وطبيسيل ديال زعلوك كانت غتعاود ليها شنو شافت ولكن كتحس بيوسف نقطة سودااا بيناتهم وأصلا مزال مصفاات باش تبقى تعاود ليها)
شكووون هادوك للي تماك؟!
خديجة: عائلة مرت عمنا سهام متسلميش عليهم؟!
ملاك: علاش جاو؟!
خديجة: اويلي املاك جاو يشوفو بنتهم ههه
ملاك: علاش ظحكتي؟!
خديجة: (جلست حداها) شفت مت سيهام من قبيلة وهي تسول فيك وتشكر فولدها صغير للي ظل سهام تفايش بيه، هداك للي خدام فالفوسفاط؟!
ملاك: امممم (كتاكل بالزربة) هادوك كيكونو كيتخلصو مزيان؟! واش هو زوين بعدا؟!
خديجة: معرفتش من شحاااااال هادي مشفتو.. منين كان مزال مخدم اجي شتك دغيا كتسولي عليه
ملاك: اممم خريبݣة معرفت هاد لمدينة كيف دايرة ؟!
خديجة؛ (بقات غير كتشووف فيها كتاكل وكتقلب فالتيليفون شحال كيتخلصو الموظفين للي تماك واكترية عارفاه داخل وكان قرااي وعاد عندهم كالة صحيييحة تماااك.. كملت لغدا) غسلي يديك بعداا
ملاك: (مسحت يدها)
من بعد من بعد
(مشات لمرايا مسحت فمها قدات شالها بقات بالسورڤيت دارت عكر خفيف ورجعت مسحاتو بقا غير لاطراس رشت ريحتها)
حتى تجمعي داكشي نمشي نطل على عݣوووزتي
(مشات وكطلب من الله يكون بعدا غير طويل وبيض وساكن بوحدو فشي دار تكون واااعرة ويكون كلاس ويعيشو الحياااااة دخلت كتسلم وهي كتبسم وتسول على الاحوال وعاطية صوااااب حتى مها وسيهام بقاو غير كيشوفو فيها…)
~~~~~~~~~
يوسف: (راجع لفاس عاود كيحاول يصوني على خديجة واالو طافي صونا عاود بريفي والو وحتى بالنمرة دالخدمة للي معندهاش كيعيط طااافي رجع صونا على ملاك حتى هي والو مكتجاوبش.. تعصب حس براسو تقطع عليه الما والضو…..)
ملاك: (بقات كدير معاهم الݣوتي وظحك مع مت سيهام وماشي معاها فالخط وعاطياااها الخاااطر حتى جبدت ليها حس زواج وولدها كيقلب على شي عروووسة) الله يسهل عليه اخالتي
زهرة: (كتخنزر فبنتها تجي تجلس حداها حيت عارفاها علاش قارقة تماك وعلاش كتقلب) ملاك سيري شوفي باباك واش جا
ملاك: مزال اماما (شافت فلوخرا تبسمت)
…: عرفتي الآلة زهرة ولدي تبااارك الله من جماعة مااا تختاريه غير هو الزين والفورمة وبخدمتو مااااشاء الله عقبال لبنتك بشي ݣرااد
ملاك: ݣراد!! اهاااه ماشاء ماشاء الله
خديجة: هههه (كتموت بالظحك وهي كتشوف فملاك للي تسيفت وزهرة كتجمع ليها معاجبهااش الحال حيت واخا يكون كما بغا والله متناااسب مع عائلة سهام وترمي بنتها للعذاب)
…: بغييييتو يا لالة زهرة يتجوج. يدير وليداتو ونربيهملوو وعييت نݣولو اوليدي حبيبي نوض تجوج كمل دينك نتا تبارك الله بخيرك وخميرك وميات بنت تمناااك وهو نووووون ݣالي مندي غير للي تختاريها لي نتي أمي والله مدخل لداري للي متكونيش راضية عليها
ملاك: اممم مرضي الواليدين
….: (جبدت تيليفونها اللقطة للي كتسناها ملاك بفارغ الصبر تشوف هاد الزين تقاداات فالجلسة) انا نوريه ليك كنا فعرس دولد خالتو شحال من وحدة حطت العين عليه تماك وهو وااالو غير حاني راسو ومنخل لية بناااادم معيييفر معييفر ههه
ملاك: (محست حتى دارت ظحكة صفرا) هيهيعي
…: (جبدت تصاورو ملاك طرطقت عيينها كتشوووف رجعت شافت فمو ورجعت للتيليفون)
ملاك: هدا هو؟!
زهرة: (عرفتها غتزبلها وقفت جارة بنتها لي مزال كتشوف فالتيليفون) نوضي ابنتي سيري عيطي لمرت حنينك
ملاك: صبري، واش هنا اخالتي جالس ولا واقف؟!
…: هاااا!!!
ملاك: (شدتلها التيليفون كتبرݣݣ) فين النݣدة!!!! فين الطوولة؟!!!
(ناضت مها هزت ليها التيليفون رداتو لمولاتو وخرجتها دفعاها لبرا بشوية وجمعت معاها بقرييسة فذراعها تسكت)
…: فين داتها مك؟
خديجة: (شادة الظحكة) غير تعيط لمرت حنيني مشات تشوف واحد الجارة اوا حنيني غيدخل دابا مكيبغيش يدخل وميلقاهاش
…: اوا بنتي هدا هو المعقووول حشومة الراجل يدخل وميلݣاش لمرا فالدار هاااااو حنا عدنا عيييب فالغرب
خديجة: حتى حنا
ملاك: اححح (كتحط بلاصة القرسة) انا بغيت غير نفهم واش هداك هو الزين والفورمة!! دااابا (بغات تدخل ووقفتها مها) داابا خليها تفهمني فديك التصويرة واش كان واقف ولا جالس
زهرة: ههه والله يمسخك اللي شافك كتهضري على الطولة يقول نتي مطفراااه ونتي بحال شي بوونت دلݣارو
ملاك: كيتووو انا بنت الأنوثة هي لقصوورية اويلي على الطولة والفورمة وهو مدكوك فالارض
زهرة: (قرست ليها شنايفها) سكتي لمك واش بغيتينا نباتو فالكوميسارية هاد نهار
ملاك: لا حول ولا قوه الا بالله العلي العظيم من صباح وهي مطمعاني وفالتالي ظحك علية جاتني البكية والله على شوية نصيفط لسي عبد الله يشوفلي شي بلاصة فخريبݣة
زهرة: ههه بااااااز يا بنتي باااز سيري سيري لبيتي جلسي تماك متخرجيش لعشا يجي عندك متبااانيش قدامي
ملاك: وانا عاد مزال نبااات الطولة والفورمة سيهام كتباان مرجلة عليه (جات مها باغية طرد عليها) ياك غرباوة كيكونو طوال وعرااض
زهرة: (بغات تزول بنطوفتها)
ملاك: هههه صافي صافي راه غير الفقسة ازهرة راااه هرمنا بغينا نتزوجووو خلاص
(دخلت البيت بالزربة قبل متجيها البنطوفة فوجهها)
تفووو حتى كنت كنتخيل راسي ساكنة فخربيݣة….
رشيد: (دخل لبيت نعاس لقا ملاك مجبدة كتاكل شيبس) عاود كتاكلي فداك المرض مبغيتيش ديري عقلك
ملاك: (جمعت الوقفة وردت شعرها من مور ودنيها بصوت خافت) غير شي مرات كنتشاهااها أبابا وصافي
زهرة: (دخلت وسدت لباب من موراها) اشنو كاين ارشيد كتعيط بحال واقعة شي موصيبة
رشيد: جلسي بعدا
زهرة: خير وسلام
ملاك: (بقات كدور عينها) نبقى انا!!
رشيد: جاو شي خطاب
زهرة: ههه هاد نهار سعدك واقف ليك البرغووتة
ملاك: (تبسمت حشمانة) شنو خدااام (شافت فباباها كيخنزر) وااا غير كنظحك
رشيد: ماشي ليها لخديجة (ضار شاف فملاك) هداك السيد للي كان معانا نهار شريتي الطموبيل منين كتعرفيه؟!!!!
ملاك: (بقات كترمش واش هادشي للي كتسمع بالصح!! يوسف خطب خديجة!!؟؟) هااا!!!
رشيد: (كيهضر مع مرتو) جا عندي للقهوة السيد مخلق تباركالله وهضرتو موزوونة قالي انا عارف لبنيتة عندك مزال مكملت العدة ديالها وانا نتسنى جوابكم منين تكمل يامها نعاود رجع باش تعطيوني الوافقة ونجيب فاميلتي ويجي يخطب
زهرة: مزيااان الله يكمل بالخييير
رشيد: شكون هدا؟!! (زعزع ملاك للي غير كتشووف) قلتي من الخدمة
ملاك: حم اه سميتو يوسف كنت عرفتو فالخدمة هو للي ضبرلي على طموبيل راك شفتيه داك نهار كنسمع عليه ولد الناس ومعقول كما قلتي مرزن (كتهضر وهي دايخة ومعرفت متقول)
رشيد: سيري عيطي لختك
زهرة: متقولي والو قدام الناس ابنتي
ملاك؛ (لبست بنطوفتها جمعت شعرها سفنجة وخرجت مصدومة حيت حسابلها صافي تفارقو وقدامها قالتلو بعد مني…!!)
رشيد: انا فاللول قلت غيهضر على ملاك حتى قالي خديجة قالي جا وسول علينا ومن داك نهار فاش تلقانا عجباتو لبنت واليوم جا هضر معايا
زهرة: مزيان مسكينة الله يجعلو حسن من داك للي فات ويعوضها شوية ياكما عندو وليدات
رشيد: لا عزري معمر فايت فيه زواج وكان شفتي تبارك الله الحالة وباينة نقي وولد عائلة الهضرة بشوية ومصوااب والله مقلت غيجي على ملاك حتى قالي لا كنهضر على لكبيرة
زهرة: مزيااان كولها ورزقها.. (دخلت خديجة بوحدها وملاك طلعت لسطح نيشان لكوان ديالها فين كتعرف تفكر على خاطرها) جلسي ابنتي…
ملاك: (راسها غيتفرݣع كفاش غتقبل بيوسف راجل ختها وهي كانت كتشوف فيه ممكن يكون راجلها ميمكنش تزيد تلوووم شي واحد لا يوسف لا خديجة وصلو لزواااج دابا!! ميمكنش تبقى هاكا ماشي هي للي خاص تبين ضعفها ويشفقو عليها وتسمع مسكييينة…
دابا عاد فهمت علاش العشية كاملة وهو كيصوني عليها كان غير بغا يقولها ليها حيت اخر ميساج كتب ليها كنواعدك اعشيرتي منعاودش نخبع عليك شي حاجة!!! حنات راسها على يدها كتفكر وتفكر هزت راسها ودارت يدها على فمها)
حمدالله بعدا مبغيتوش…. بزاااف كان غير كيعجبني وصاافي ويييلي على شووهة وكان بغيتو!!!
(واخا هكاك بقا فيها الحال شافت فسطح دار حمزة مكاينش معرفتش فوقما حست بشي خيبة أمل ولا تضرات فخاااطرها كيجيييها فباالها..
جاها لبرد هبطت كان باها مع جدها دخلت لبيت مها كانت خديجة كتهضر فالتيليفون شافت فيها بطرف عينها ووجها حمر والظحكة باينة فمها، عينيها، وحنوكها كولشي فيها كان ظاااحك والفرحة باااينة على وجهها شافت فيها)
اناا دخلت غير نهز تيليفوني
خديجة: دخلي دخلي.. اه ملاك… ههه واخا (مدت ليها التيليفون كتهضر فرحااااانة) يوسف باغي يهضر معاك
ملاك: (شدت التيليفون متبسمت موالو) وي.. لا مشفتوش.. والله مشفتو علاش غنكذب… اه قالهالي بابا (تبسمت) مبروك عليكم…
اصبحنا واصبح الملك لله..
ملاك: (منعستش مزيان لتاني مرة، معرفتش كفاش تعامل مع هاد الوضع تقطع معها!!! راها ختها, واي واحد غيسميها غيرانة وحسداااها، ويمكن ميفهموهااااش، ويمكن يسميو ختها داتو ليها وتبصم بسمعة خاااايبة للي هي فغنى عنها وحتى عائلتها!!! ميمكنش تنوض صداع ويكون البطل ديالها هو رااجل، فاقت خاسرة لبست حوايجها والو مكتهضر مع حد ممضوية حد، مشات لخدمتها نيشان غير دخل المدير مشاو عندو رغباتو الا كاينة شي ديبلاصمووو تمشي ليها ومكيهمش المدة شحال، واعدها وخرجت عاود مكتهضر مع حد فالخدمة وخا ماشي من طبعها تعاود لشي واحد مشاكلها العائلية وخصووووووصا هاد المشكل للي تماك عطاوها بالتيسااع، صونات عليها نعيمة وخوتاتها للي كانو كيهضر ابيل ڤيديو فݣروب دايرينو بيناتهم، والو مجاوبتش عرفت وصلهم لخبار.. سمعت شتا كطيح حلت السرجم بقات كتمنضر باغية تصفي غير دماغها شكون غيسمعها ولمن غتعاود جا فبالها حمزة أكتر إنسان حاليا مهتم بيها ولكن غير ديك مزوج كتخليها تكرهووو وتقلب ستة تسعود…
ندمت علاش معندهاش شي صاحبتها أنتيم كانت كتقول خوتاتي فيهم الكافية واكترية خديجة للي كانو كيتعاودو كولشي ولكن لقات العكس.. كملت سوايعها دالخدمة للي مدارت والو فيها ، رجعت للدار للي ولات كتجيها جحيييييييم ممرتاحاش فيها حااليا حطت الطموبيل وهي مستغربة من دوك الناس للي ضايرين بالأب ديالها باينين جاو من لبلاد غير بلباسهم للي أغلبية بالجلابة والرزة والسلهام خرجت من طموبيلتها وتمات ماشية هاد الناس مؤلووفين من العروبية ديالهم ولكن الهضرة بالشلحة حتى من جدها كاين تماااك مفهمت والو من غير #الواشون للي فهمتها)
بابااا باااباااا
رشيد: (شاف فبنتو وتعصب عليها) سيري للدار
ملاك: (بهمس) زمر كداير (مرضاتش اصلا مدايرة ليه واالو باش يغوت عليها، تمات ماشية وهي كدوور باغية تفهم غير شنو واقع، زربت مشات للدار قلبت على مها توصلهالها سخوونة لقاتها فبيتها دخلت عندها) عرفتي رويييينة برا وكاين بابا وحنيني (الجد) والناس دلبلاد وغير هضرت معاه تسيف علية قداامهم وقدام الناس للي فالقهوة كنت بغيت غير نسولو على شي حاجة فالطموبيل
زهرة: (ببرود) فين؟!
ملاك: براا حدا القهوة قلتلك ضايرين بيه شي ناس راه تعرفيهم
زهرة: (معندها خاطؤ) اممم سيري تغدااي
ملاك: واش معارفاش علاش؟؟! (شافت فمها حنات راسها باينة ما فيها للي يهضر) وااا ماما مالكي؟!!
زهرة: والو ابنتي سيري تغداي
ملاك: (حنات على ركابيها كتشوف فمها) واااا قوليلي مالكي؟!!
زهرة: والو.. صافي الله يرضى عليك ااااا ابنتي سيري تغدااي مفياا لي يهضر
ملاك: (بإلحاح شافتها طايرة ليها بالمزيان) وا قوليلي بعدا مالكي؟! واش مخاصمة مع بابا؟!!
خديجة: (دخلت وسدت لباب من موراها) ماما
ملاك: مالها؟؟! (سمعو الهضرة بزااف مشات طلت) جاو دوك الناس ياكما كاينة شي مشكل مع بابا؟! وااا مامااا
(شافت فخديجة) شنو واقع؟!!
خديجة؛ حتى انا والله معرفت منين خرجتي سمعت غواتهم من تماك وهي هاكا
ملاك: وهضري ازمرة!! اااا ماما زعما
زهرة: (غير ساهية مطرطقة عينها كتحرك راسها بحال كتجاوب الصوت للي كيتحاور معاها فدماغها ملاك غير كترمش مكتبغيش تشوف مها هكاك، وقفت) خرجو البنات
(خرجت من لبيت) رشييييد (جا كيجري دخل)
خرجو البنات
ملاك: (خرجت خديجة) قولولي بعدا شنو وااقع
زهرة: خرجي تبعي ختك
ملاك: لا حتى تقولي مالكي (ضارت عند باها) مالها ابابا؟!!!
(ميمكنش كتشوف مها معصبة وباها غير حاني الراس) شنو وااقع
زهرة: متخلينيش نخرج فيك اعصابي املاك خرجي..
ملاك: (مع خرجت من تماك مها زدحت لباب على جهدو حتى سكتو دوك الناس للي فوسط الدار حتى من سهام وولادها مكاينينش مشات دوز راس العام مع مها فبلادهم بانت مرت جدها) مي حلو شنو واقع؟!
مرت الجد: فين مكم؟!!؟
ملاك: دخلت هي وبابا
(شافتها مشات وهضرت بالشلحة مع دوك الناس بصواب دخلتهم للصالون تبعتها)
وا شنو واااقع حتى واحد مبغا ينطق بشي كلمة!!!! كديرونا التشويق زعما!!! شنو طاااري؟!!
خديجة: (طلعت لسطح فينما بانتلها الدنيا خاوية ولا ملهيين كتسلت صونات على يوسف وكما العادة كيقطع عليها ويرجع يصوني) الووو
يوسف: حبيبة
خديجة: (تبسمت حتى فرنست شحال بينها وبين هاد الكلمة)
يوسف: (تبسظ) قلتها من قلبي بلا منشعر
خديجة: هه
يوسف: شنو كنتي باغيا تقولي؟!
خديجة؛ معقلتش ههه
يوسف: الله يعطيني حتى أنا شي كليمة حلوة تنسيني فالعالم
خديجة: (ديما كيخليها فرحانة) مع الوقت
يوسف: ان شاء الله احبيبة، واخا نعيط ليك من بعد انا زربان والخدمة هاد نهار مزيرة شوية، محتاجة شي حاجة؟!
خديجة: لا غير صونيت بغيت نشوفك واش بيخير
يوسف: الحمد لله احبيبتي انا ساعة ونصوني عليك واخا
خديجة: واخا (قطعت وفرنست فرحااانة ميمكنش هاد الأحاسيس للي كيعطيييها لدرجة جلست تماك مستمتعة ومنشوية بهاد الشي للي مخليها فرحااانة…)
ملاك: (عقدت حواجبها بانفعال) كفاش؟!! واش بابا مزوج على ماما!!!!
مرت الجد: بالفاتحة بالفاتحة
ملاك: بالفاتحة ولا البقرة مهم مزوج عليها (بيد دارتها فحنكها) ويييييلي مسكييييينة!!!! وعطاااتو خاااطرو يتزوج عليها!!! ياك كيبغيها!!!
مرت الجد: ابنتي باك راه فكر غير فمصلا (شافتها طاارت من لبيت) ملاك ملاك (تبعتها شافتها مشات كدق على بيت مها بالجهد حتى حلو ليها دخلت زادحة لباب من موراها)
ملاك: (شافت فمها للي جالسة وباينة باكية زادت جعرت، شافت فباها مكضوييييش) هادشي باش تجاااازيها تزوج عليها!!!!
رشيد: ملاااااك خرجي من لبيت وخرجي هاد السوق
ملاك: (متحديااااه فالنظرات) منخرجش علاش تزوج عليها اسيدي
زهرة: (بصوت مخنوق) ملاك بنتي
ملاك: (جاتها لبكية من شوفة دمها ورجعت شافت فباها) نتا ش (باها طرطق عينو فيها وهي مقدرتش تكملها) ياله نخرجو من هنا اماما
رشيد: (جرها من ذراعها بقوة) خرجي هاد السوووق
زهرة: (وقفت) طلق من لبنت
رشيد: (طلق منها ومشا عند مرتو بغا يعنقها ورجعت اللور) عفاك ازهرة الله يسهل أمرك غير فهميني
ملاك: معندها فين تفهمك علاش غتزوج شنو ناااقصك 5 دلبنات وهي حاجبة مكدخل مكتخرج كلامك مكتهبطوش للأرض معيشاااك على كفوف الراحة وعاد… (بعصبية) شنو للي يخليك تغذرها أبابا وانا كنت كنشوووفك قدوة لية ونتا احسن راجل فالعااالم
رشيد: (حنا راسو )
ملاك: (بقهرة) ياله نمشيو اماما من هنا.. هنا كاين غير الغدارة
زهرة: (غمضت عينها بألم وتنهدت) سيري ابنتي ومدخليش راسك فهاد المشاكل
ملاك: نخرجو من هاد الحبس وميبقاوش المشاكل
رشيد: واش نتي بعقلك؟!
ملاك: (مقدرتش تزيد تحبس دموعها وحست بقهرة كبييرة) انا والله منبقى هنا (هزت صاكها للي تماك ديال الخروج وخرجت كتشهق كانت خديجة قدامها شدتها من ذراعها تستفسر غواتهم للي كيتسمع على برا، محست حتى غوتت عليها بكل طاقتها)
بعديييني حتى نتي….
(خرجت من لباب كتبكي وتشهق تلاقات حمزة جاي هو ومرتو للي شادة فذرااعو حنات وجهها للي باينة كتبكي وعاد صوت الشهقة للي واحلة فحلقها)
حمزة: ملاااك… (صور وجهو تابعها) ملاااك
اميمة: (شافت لوخرا كتزيد تزرب مضاارتش وشافت فراجلها) رجووع الله اولد عمي
حمزة: معرفت ماالها
اميمة: وحنا مالنا اه عرفتها بنت الجيران وكبرتو مجموعين ولكن شوية تهدن ماشي من حقك تسول
حمزة: (وقف مديرونجي) انا جاي
اميمة: حمزة حمزاااااا واش بنيتك (شافتو مشا كيجري تابعها) مريض كدااير الله يعطي لمك الغراااق اولد **** (مشات للدار تشكي لعمها ومرتو كيف ديما…)
ملاك: (وقفها حمزة وهي كتهرب وجها مقدرتش تحبس البكا ومقادراش تجاوبوو ولا تقول بعد مني)
حمزة: قولي غير ماالك؟!
ملاك: (فلتت ليه، كان حلقها مقجوووج كلمة مقدرتش تخرج ليها وصلت لطموبيلتها وهو تابعها حتى ركبت وشافت فيه) عفاااك احمزة بعدني
حمزة: منقدرش نخليك هاكا
ملاك: (كتبكي وهي كتهضر)
مكرهتش وكان كنتي… (كتشهق) كنت نتا اللول غنجي نشكيلو ونبكي عليه ولكن نتا ختاريتي وحدة أخرى عفاااااك بعد مني متعاودش تبعني ولا تهضر معايا متعاودش تعرفني ديريني ميتة كما حتى انا درت متي (ديمارااات وطلعت الزاااج كتمسح عينها ووجهها وهو وااقف مشوكي من كلام للي خرج من فمها، رجعت اللور وزادت فطريق مخلية عينيييه مضببين وفنفس الوقت متبع ليها العين حتى مشاات وغبرت…
تنهد حنا راسو وتم راجع لدارهم..)
~~~~~~~~~~~
زهرة: (بهدوء) توقع شي حاجة لبنتي ندخل عليك الحبس ارشيد
رشيد: (معارفينهاش خرجت) مع الوقت حتى هي غتفهمني
زهرة: خرج (جا يهضر وهي تغوت حتى طرطقو عينها) خررررررررج (بقات كدفعو وهو كيحاول يهضر) خررررج ولا عرفتي (خرجت من لبيت مكشكشة دخلت فخديجة حتى كانت بغات تطيح، مشات للصالون وشعرها نصو معري فين كاينين الناس) كولشي يخرج من هنا ياله ياله تحركوووو علية من هنا
الجد: (وقف) اش هاد الهضرة… زهرة!!!
زهرة: (شافت فرشيد) هوما ولا انا
رشيد: (شاف فباه مخنزر) خرجهم ابا دابا (جا باه يهضر.. رشيد معندو خاااطر) بلا منطردهم انا
الجد: (تحرج بزاااف خرجهم من تماك كيعطيهم أعذار ولوخرين متقبلوهاش اما زهرة رجعت لبيتها تابعها مرت الجد سدو عليهم لباب)
عجبك هادشي للي دارت مرتك
رشيد: (جلس مهموم ودار يدو على راسو كيهضر بالشلحة) مكانش علية نتبعك ابا فريك مكا
الجد: هادشي للي غيضمن لبناتك حقهم خاصك ذكر ومنين ربي جابو ليك نتا مااابغيتيهش… (كيلطف معاه) اولدي ها وحدة من بناتك رجعت وبنت باقية بلا زواج ومعرفنا الوقت شنو جاايبة نتا درتي هاكا غير باش تحافظ على رزق بناتك ورزقك باش ميضييعش خووتك كيخدمو ويخسرو نتا ضربتي على رزقك تماااارة
رشيد: (غير ساااكت خايف بزاااف من ردة فعل زهرة ومن نظرة بناتو، متنساتلوش كلمة ملاك كنتي القدوة ديالي!!!! عاد مرتو واش غترجع كما مواالفها!!!)
الجد: انا نهضر معاها اولدي راها كتسمع كلامي، دابا شنو غدير فداك ترابي مو الله يرحمها وخاصو يعيش معاك ميمكنش تلوح ولدك
رشيد: (حرك راسو وخرج من تماك شاف فخديجة للي كدق باب بيت مها بهدوووء خرج من الدار مهدوووود مقادرش يخسر مرتو وبناتو…
واكترية مرتو للي خسرااات بزااااااف على قبلوووو وكانت خسارة كبييرة للي ميمكنش ترجع…..)
~~~~~~~~~~
يوسف: (كانو مجمعين فبيار نفس الشلة للي كيلعب للي كيشيش للي مجمع.. حتى صونا تيليفونو كانت خديجة عطا العصا لصاحبو وتم خارج)
وي لالة خديجة
خديجة: يوسف ملاك خرجت معرفت فين زادت من قبيلة وحنا كنقلبو عليها
يوسف: كفاش خرجت؟! (شاف فتيليفون كانت 9 ونص دالليل) ماشي عوايدها!! شحال باش خرجت
خديجة: (بخوف) من المغرب مكتجاوب حتى واحد..
يوسف: بزاااف.. انا نصوني عليها
خديجة: كولشي غيحماق بالتقلاب عليها بابا مزال مدخل والا عرفها خرجاات مشكيييييلة عاود
يوسف: صافي صافي قطعي انا نصوني عليها (قطع شاف فاورطيغا للي كان حتى هو كيهضر فالتيليفون جا عندو دارلو إشارة يتسنى وهو كيسمع طيييط عاود رجع صونا عليها وتقطع حتى شحال عاد بااش جاوبت) الوو ملاك فينك؟!
ملاك: (بعصبية) شنو ايوسف!!
يوسف: فينك نتي؟!
ملاك: (بتنهيدة تبعاها زفرة) انا قربت ندخل لفاس كنت بغيت نصوني عليك واش كتعرف شي اوطيل حيت فصفرو حتى اوطيل مبغى يدخلني نبات قالك مكيستقبلوش بنات المدينة الله يغرق لمهم شقف
يوسف: فينك نتي دابا؟؟
ملاك: معرفتش ايوسف كتبانلي فاس قريبة وصافي
يوسف: انا نصيفط ليك لوكاليزاسيون تلقايني كنتسناك تماك
(قطعت رجعت صونا على خديجة وهو يهضر مع اورطيغا)
باقية ديك القضية ديال لبنت متباتش بوحدها فاوطيل ديال مدينتها؟!
اورطيغا: معرفتش..
خديجة: (جاوبت مخبعة) الو يوسف
يوسف: صافي بلا متخلعو عليها راها فطريق لفاس
خديجة: اويلي على منتخلعوش عليها خاصها ترجع يعرف بابا يقتلها ويخرجها منا حنا
يوسف: صافي خليها تجي نفهم منها الا كانت الضرورة انا نجيبها حتى لتماك
خديجة: راسها قااااااسح بزاااف
يوسف: شنو واقع
خديجة: مشاكيل ديال الدار هي بعيييدة على المشكل تأ بففف هضر معاها ايوسف ترجع راه غير غتزيد تكفسها على راسها
يوسف: صافي انا نتكلف هضري مع ماماك وقولها شنو كاين باش ترتاح وقولها ملاك فأمان معايا ولا عطيني انا نهضر معاها
خديجة: صافي صافي انا نقولهالها….
ملاك: (تبعت لابليكاسيون للي عطاها يوسف واخا مفهمتش اصلا علاش تجي لعندو، كان اوطيل نييت ولتحت ديالو فيه كافي ريسطو بيار… وفيه كانو مجمعين السلة ديالهم، وصلت بطموبيلتها لقاتو حدا باب الاوطيل كيتسناها طلت بروبسها) الدنيا عااااامرة بزااف ملقيت فين نحطها
يوسف: هبطي انا نباركي الطموبيل
ملاك: (هبطت كتنهد وجهها شاااحب وعينيها نااايمين بكترة لبكى جات عينها فاورطيغا حنات راسها ومشات حداه مبعدة بشي 2 دلمتر، بقات غير وااقفة مربعة يدها حتى دخل فيها واحد كيتمااايل سكراااااان كانت غطيح كلات شدت بيدها لبوطو للي قدامها)
اورطيغا: واش **** مكتبالكش البنت قدامك
(لاخر مْنَغَّمْ ماشي فهاد العالم بحرا كيشقلب عينيه…)
اجي حدايا نتي على ميجي يوسف
ملاك: (مداتهاش فيه بقات فبلاصتها عاقدة حواجبها، حتى تم جاي يوسف حداها) هادا هو لوطيل؟!
يوسف: اه هو (باستفسار) قوليلي بعدا شنو هو المشكل
ملاك: (بصوت مخنوق) مكاين حتى مشكل
يوسف: كفاش مكاين حتى مشكل علاش جاية فهاد الوقت لفاس ماشي من عوايدك تخرجي حتى فلعشية وعاد تباتي برا داركم؟؟؟ كيف درتي ليها؟!
ملاك: شغلي هداك ايوسف
اورطيغا: (هز حواجبو من طريقة حوارها مع يوسف واخا هكاك طالق ودنيه وداير راسو كيخرب فتيليفونو)
يوسف: لا ماشي شغلك بوحدو الالة، ماماك خيتك كولشي تيقلب عليك وعاد باباك الا عرف واش انا نوريك فباباك املاك شنو طااري؟!
ملاك: يوسف عاونتيني شكرا انا مكنعرف والو فاس اما منعيطلكش من اللول
يوسف: اولا أنا للي عيطت ليك.. ملاك شنوما كان المشكل راه تيتحل ولكن بالعقل قوليلي يمكن نعاونك
ملاك: (بقات كتشوف فيه) شكرا على النصيحة بغيت ندخل اصلا عيانة ومفيا للي يهضر
يوسف: ملاك قوليلي بعدا شنو واقع راه كولشي مخلوع عليك
ملاك: مفهمتش علاش كدخل راسك فشي حاجة بعيدة عليك ماشي غي حي..
اورطيغا: (عصباتوو) واا صْلِييييْبَة (صنطيحة) مع راااسك
ملاك: (بانفعال) ماشي شغلك
اورطيغا: السيد خايف عليك ونتي هازة خنااافرك وكتجبدي
يوسف: اورطيييغا (غمض عينو بامتنان زعما انا غنتكلف)
ملاك: دييييها فراسك ونتا طالق سطوولاتك هنا (يوسف وقف فالوسط) بنادم غير حاشي (سكتت معصبة)
اورطيغا: حاشي اش!!!
ملاك: بعدني
اورطيغا: مفهمتش اخاااي يوسف اش مصبرك على هاد لخلييقة (كمش صباع يدو نتخيل وجهها كيعنفجو بيدو)
ملاك: حسن منك لااااالاااك وفايتاااك باااااشمااااااا بغيتي
اورطيغا: (عندو جوج حلول يا يضربها يا يظحك…. وظحك) هههه
(بالصح ظحكااتو بداك المعيار اش غيجاااوب وكيشوفها بحال شي قنبولة وهادشي زاد خلاها مستفزة)
يوسف: (كتجنن وهي كتشوفو كيظحك، ضار عندها بهدووء) ملاااااك شنو واااقع
ملاك: (فلتات ليها لبكية) ماشي شغلكم (شهقت حتى بغات تقطع فيها النفس هنا سكتو بجوج تمات دااخلة لوطيل يوسف قوس عينو فاورطيغا مخنزر فيه لي دار إشارة زعما محسابليش غتبكي، وتبعها..)
يوسف: ملاااك ملااك…
خديجة: ماما راه (معرفت كيف تقولهاالها وهي كتشوووفها واصلة ليها العظم مكتبكيييش ولكن باينة مضممراااا)
ملاك بغات تبات فلوطيل
زهرة: واش هي بيخير؟؟
خديجة: (جلست حداها فالنموسية) راه معاها داك السيد لي جا يخطبني من عند بابا عندو ملاك عزيييييزة بحال ختو
زهرة: بنتي اصلا بميات راجل
خديجة: امم راه غيقنعها ترجع للدار
زهرة: صيفطيلو ميساج قولو غير يخليها على راحتها
خديجة: تبات فلوطيل؟! وبابا؟! راه يقتلها وينوض الصعرة هنا
زهرة: خليها على خاطرها (هزت تيليفونها صيفطات ميساج فالواتساب ديال بنتها)
ردي لبال لراسك ابنتي انا عارفاك فلوطيل دابا بغيتك تخوي راسك المشكل كيبقى بيني وبين باباك مدخليش راسك فهادشي وخلي الاحترام مع باباك انا قااادة بهاد المشكل الله يرضي عليك ابنتي
(صيفطاتو)
سيري ابنتي بغيت نعس شوية
خديجة: وملاك؟!
زهرة: صافي اخديجة راه هضرت، ملاك خليوها على خاطرها (خرجت خديجة ناضت زهرة سدت عليها بالساروت)
خديجة: (مفهمت والو كفاش يخليو ملاك تبات برا وبوحدها وفاس!!!!!!!! صونات على يوسف مجاوبهاش حدها مشات لبيت وجلست شاعلة التلفازة ولكن مكتفرجش مدخلتش ليها هاد القضية فراسها وهاد الحرية الزاااايدة للي ممولفاش هي بيها فاش كانت مزال عزبة.. وعلاش اصلا ملاك دابزت مع باها ياك زهرة مبردة السوووق…)
~`~~~~~~~~
ملاك: (بغات تساوم على الثمن ديال شومبر عاادية بغات غير تحط راسها على المخدة، حتى وقف حداها يوسف جابد فلوس)
شنو كدير ايوسف
يوسف: ملاك!!
ملاك: (تفكرت قضية خاص تجبد لاكارت ناسيونال قداموو)
اممم نسييت، مجبتش كارت ناسيونال ديالي
يوسف: عندك باسبور؟!
ملاك: شنو غندير باسبوور عندي فهاد الوقت!! صافي عفاك غير سير نتا ايوسف انا قادة بشغلي
يوسف: واش حمقة غنمشي ونخليك بووحدك (شاف فالبنت لي خدامة تماك) ميمكنش اختي بيرمي
ملاك: حتى هو نسيتو، مهزيتش مع الوراق
يوسف: متأكدة! مهم تمشي معايا للدار
ملاك: (شافت فيه الشوفة ديال بنيتك)
يوسف: ديال لافامي اما داري راني تنصلحها وكولها مخربة
ملاك: لا دارك لا دار فامييلتك، يوسف شووو بلا متصدع راسك معايا انا نضبر لراسي كنعرف شي بنات هنا غنصوني ليهم (تمات خارجة وتابعها مكرهة وكان غير كانت بوحدها وكان راها مرتاحة ندمت علاش صونات عليه ولا جاوبااتو)
يوسف: واش حمقة نخليك بوووحدك؟!!
اورطيغا: (كان باقي برا مجمع مع دراري للي غيمشيو يكملو السهرة فقنت اخر شاف يوسف تابعها ودراري بقاو كيتغامزو يعني صاحبتو… مشا حداخم) شنو واقع مالقيتوش لي شومبر
يوسف: نسات وراقها وكارت ناسيونال
اورطيغا: وباش كانت غتبات؟ بلقموول!!
ملاك: ديها فرااسك
اورطيغا: داك لسااان عندك طول منك ولكن عقلي علية كيف غنقرسو لييك
يوسف: نتوما بزاااف!!! ملاك ياله معايا للدار كاينة غيثة راك تتعرفيها وكاينة الوالدة كاينة مرت خوويا
ملاك: عفاك ايوسف والله بغيت غير نبقى بوحدي بلا متهز همي شكرا بزااف صدعتك معايا وديرونجيييتك على والو انا نشوف فين نمشي
اورطيغا: (جرو همس كيهضر بشوية مع يوسف) الا بغات تمشي للدار فالحوومة انا غنبات مع دراري.. (يوسف شاف فيها) مهم انا غنسبقك الحومة الا راسها رطاب وبغات تجي مرحبا.. غير حيت من طرفك اما من عندي الله يعطيها الغراااق (مشا فحالو مع دراري )
يوسف: (مشا عندها)
اجي نمشيو نتعشاو فشي بلاصة
(بغات ترفض وهو يجرها من ذراعها مخرج عينو) ملااااك راه مغنخليكش بوحدكم وعاد فهاد الحالة راه واخا نباتو بزوج فالزنقة
(رجع هادئ حيت عارفها مكتجيش بالعصبية)
انا نتسناك حتى تكملي وهضري حتى الا مبغيتيش مهم نبقى معاك واخا!!!
(مشاو ركبو فطموبيلتها وهو للي صاايݣها…)
يوسف: (بزز عليها تاكل شي حاجة بشرط يبقى ساااكت مهم ميخليهاش بوحدها، صونات عليه خديجة مابغاش يديرونجيها ناض من حداها مبعد وجاوب) وي خديجة
خديجة: امدرا؟!!
يوسف: صافي راها معايا بلا متخافو عليها
خديجة: سمحلي ايوسف برزطتك معايا
يوسف؛ واش حمقة ملاك عندي عزييييزة وغالية على قلبي بزاااف راه كنا صحاب حتى قبل منعرفك نتي معندك دخل فهادشي
خديجة: احم اه اه عارفة غير جات حشومة نبرزطوك وصافي
يوسف: واش بنيتك راه غنوليو عائلة وحدة ان شاء الله وانا ملاك تبرزيطها على قلبي بحال العسل أنا للي شاغلني هو متبقاش فهاد الحالة
خديجة: ان شاء الله.. واش هي بيخير؟!
يوسف: صراااحة ماشي ملاك للي مولف معصبة مغوبشة!! شنو مالها؟!
خديجة: شي مشكل بين ماما وبابا لدابا معرفت شنو وااقع الجو مكهرب وهي دخلت راسها وصافي
يوسف: اممم مهم انا معاها بلا متخافو دابا حنا تنتعشاو من بعد ونصوني عليك
(قطع ورجع عند ملاك للي كلات شوية حيت خاصها تشرب شي دوا راسها غيتفرݣع)
نكونو ماشيين للدار ووندوزو ناخدو دوا شي دوليبران ولا شي مالموديال الراس
ملاك: ديالمن الدار؟!
يوسف: (مابغاش يقولها ديال اورطيغا) ديال سيد من العائلة مكاينش مناش تخافي مأمنة..
ملاك: (هزت كتافها ممسوقاش) اخرتها مووت شنو باقي غيخلع كتر
يوسف: ههه تتسيفي املاك
ملاك: (أنبها ضمييرها لمعاملتو بطريقة خايبة ومشافت منو غير الخير ناااهيك على موضوعو مع خديجة ولكن دابا لقات منو غير الخير وخاايف عليها بحال شي خوها اه بحال خوها، وعاد عصبيتها للي مستحملها واخا ماشي ملزووومة عليه يتحمل ديك العصبية المستفزة)
شكرا بزاااف ايوسف
يوسف: باغي غير ظحيكة ديالك ترجع
ملاك: (بعينين دامعين، زفرت وهضرت من قلبها) تهرست فية شحال من حاجة ايوسف
يوسف: كولشي تيتصلح مع الوقت فخبارك نهار تلاقيتك كنت تنشوف الدنيا كحلة لبنت للي بغيتها ورسمت معاها شحال من حاجة فثانية وحدة منها تخلات علية وتخلات على شحال من حاجة زوينة كانت جامعاني انا وياها حتى من زواجنا كان قريب وكان قرار محسووم منها، فلحظة عطاتني بظهر وضراااتني بزااف، جلست معاك نسيتيني كولشي (تبسم) شفت الحياة بنظرة اخرى حمستيني على حوايج كنت غنتخلى عليها على اش!! على ود علاقة كانت فااااشلة ومتمسك بيها باغيها تنجح صحة ولكن بينتيلي شنو كتقولها هه ناقص واحد
ملاك: (تبسمت) ناقص مشكلة
يوسف: هههه ڤوااالاااااا
ملاك: (حركت راسها كتسمع ليه واخا معندها خاااطر ولكن من ديما كانت فضولية باغيا تعرف شحال من حاجة كان كيقولهالها دابا تعرفيها وعاد عندها مبدأ تسمع مشاكل الناس باش مشاكلها يبانو تافهييين وتلقى حل)
وفين هي دابا؟!
يوسف: مبقيت عرفت عليها والو، ومبقيتش باغي نعرف عليها واالو!! كولي بعدا
ملاك: (بقات كتنقب) وخديجة؟! دغيا نسيتي ديك للي كنتي معاها؟!
يوسف: (بجدية نقب من لفريت ديالها) لقيت حوايج أهم من دوك المؤهلات للي كنت راسم فراسي خاص ركز فيها، خديجة غيرها فكولشي ولقيت بالصح راسي مرتاح مع خديجة واخا ماشي مدة باش عرفتها ولكن راحة حلوة مع خديجة للي خلاني متفكرش بزااف نيشان بغيتها لزواج
ملاك: (فراسها وانا؟!!) مزيان خاصك تهلا فيها راها حنينة
يوسف: بزااااااااااف، هاد شي عاودتو غير ليك ومزال تجيبها الوقت ونعاود ليك بزااف المهم هو نتي خاصك ترجعي لملاك للي تنعرف، ومتقولي لخديجة والو
ملاك: متخافش
يوسف: شنو مقلقك؟!
ملاك: (تنهدت) والو غير انا اصلا ماشي فراسي (دارت يدها فراسها) ضرني راسي بزااف
يوسف: نمشيو؟!
ملاك: اه عفاك….
بقات فالطموبيل كتسنى يوسف يجيب الساروت للي باين براسو مكانش عارف هاد الدار فين جاية بقات غير كدور عينها كيف كان هاد الحي كانو غير ديور الكاريان فأيام قرايتها فلافاك ودابا رجع حي زوين كولو باطيمات حوانت تبدل بزااااااف.. جا عندها يوسف وخرجت معاه..
طالعة فدرووج لموبل كان ما بيهش عادي فيه ستة ديور كل طبقة فيها زوج ديور والكااااالم بحال مساكن حتى واحد، وصلو لدوزيام ايطاج حل باب لحديد وهي تنسمع الدار للي لاسقة عليها الظحك والهرااج حل لباب دخل ودخلات من موراه متوترة جابها هاد لبلان فشكل فدار مع راجل غريب!!!
شعل الضو كانت الدار خااااوية ما فيهاش لفراش بقات واقفة فوسط الدار ويوسف براسو كيقلب مفاهمش هاد الدار الخالية، لقى فبيت جوج سدادر ملاسقين كاينين وسادة وجوج كواش مشا لبيت اخر لقاه مسدود بالساروت هنا قالو اورطيغا عندو شي حوايج ديالو مهمين تماك وكيبقى مسورتو، واخا هكاك حلو بسوارت للي عطاه يعرف شنو تماك كما قال كراطن بزاف فيهم حوايج ومحلش شي لاخر، تعجب كفاش ممفرش دارو رجع سورتو،
مشا للكوزينة فيها شي كيسان مختالفين طبسيل وصافي طواليط بوحدها للي مجهزة ونقية رجع عندها)
يوسف: الدار خاوية حيت مساكنينش فيها كيجي غير السيد مرة مرة وصافي
ملاك: وميرجعش؟! زعما ميرجعهش هاد الليلة!!!
يوسف: لااا… كوني هانية اصلا الدار للي لاسقة فيها تماك غنكون انا، وهاد السيد ثقة راه من العائلة قلتلك معندك مناش تخافي واش انا غتهوني علية نخليك خاايفة!!
ملاك: (مترددة وممرتاحاش) زعما!!!
يوسف: نتي مبغيتيش تمشي معايا للدار وحتى هنا متخافيش (كيوريها فلباب الزكروم) غتسدي على راسك ومتخافيش مكاينش للي يدخل وااايلي املاك واش متتيقيش فية
ملاك: امممم صافي واخا (مشا يوسف خرج وهي تبعاتو سدت لباب مخلي غير ساروت فالقفل دوزاتو وطرقت الساقطات بجوج ودورت عينها فالدار)
شكون هاد المݣرد مقد يفرش حتى الدار..
(عوجت فمها نيشان دخلت طواليط عاد رجعت دخلت للبيت كدور عينها جلست حاطة صاكها كتحس براسها مسخسخة جلست تفكرت مها قلبها ضرها رجعت قرات داك الميساج ديالها حاطة راسها بلاصتها صعيييببة اي مرأة تقبل داكشي فاش كدوز مها.. مغتقدرش تقبل وباها كيبان ليها دابا هو داك الوحش للي ضيع الأميرة فحياتها.. رجعت كتبت لمها)
ماما انا دابا بيخير ولكن نتي لا, كفاش غتقدري دوزي هادشي!!! (مسحت اخر جملة حيت ميمكنش تزيد عليها، رجعت كتبت)
ماما انا بيخير بلا متخلعي علية غدا نجي الدار وسمحيلي بزاف غير تخنقت داكشي باش خويت الدار
(صيفطاتها كانت مشاعلاش الكونكسيون كانت خديجة مصيفطة ليها بزاف دلميساجات معندها ݣانة مدخلتش ومبغااش تقرا داكشي، حطت التيليفون وتكاات كتشوف فسقف، حيدت شالها طلقت شعرها كتحط فيه ورجعت تكات كتلعب بأطراف شعرها وكتفكر غير فمها وشنو غدير واش غطلق؟! واش غتعيش مع الراجل للي خانها؟! واش غيتشتتو واش مغيبقاوش فعائلة وحدة؟
هادشي كامل شاغل بالها تفكرت حمزة منين بان مخلوع عليها وهو مع مرتو تمنات وكان متزوجش كانت علاقتهم زوينة ولكن حتى هو طلع شماااتة تفكرت ختها للي لقات علامن تحط الراس كتحس براسها غتبقى وحدانية من بعد هاد الخيانات كاملة للي جاتها من اقرب الناس ليها… ناضت من تماك كدور فالدار دخلت عاود لطواليط بكترة مشربت لما، وخرجت كتبقشش فالدار للي ما فيها ميتبقشش قدات دوليبران فكاس حطاتو حداها على ميتشتش ورجعت تاكات كان شارجور نيت تماك وطلقت الكونكسيون كتحاول تنسي راسها ومتفكرش بزااااف….)
اورطيغا: (كانو ولاد الحومة جالسين خاالقين السعادة كما كيقولو طبيلة فيها سقاطة او ما يسمى بالقطعة الشيشة الݣارو.. دخل يوسف جلس كانت دار مفرشة زوينة ماشي ديال شي واحد زووفري شاف دراري ماشي شوحدين للي موسخين او شماكرية عرفهم اورطيغا بيه كاين فيهم زماݣرية حيت اول مرة يجي لهنا وجا غير على ود ملاك كانت موسيقى كلاسيكية.. بهمس)
صافي!!
يوسف: هي خافت شوية (اورطيغا جلس فالجهة الاخرى زعما باش يهضرو على خاطرهم وميسمعهم حد)
اورطيغا: معندها مناش تخاف الموبل نقي وأصلا شكون هدا للي مزغرتة عليه مرت باه يتوشي هنا
يوسف: ههه تيقولو مو.. (دور عينو فالدار) ديالمن!!
اورطيغا: (لاح فمو حبة كاجو) واحد السيد
يوسف: والدار لوخرا؟!
اورطيغا: شوف الحد الان عرفها غير شريف ونتا حتى واحد معارف نهار كنبغي نتكالما تنجي هنا
يوسف: انا حسابلي عايش فداك ديال السعادة
اورطيغا: بين وبين شي مرات كتعمر كنجي لهادي دايرها لنعاس وصافي انا جاي..
يوسف: (مدولو الشيشة عتاذر بلبااقة بقا مكونكطي مع خديجة فالتيليفون بغا يهضر معاها ابيل فيديو ولكن الكاميرا عندها مشخشخة ومهرسة وهاد نهار للي صالح ليهم حيت بايتة بوحدها فلبيت) غتكوني فشكل بلا حجاب
خديجة: هههه هاكا غتبقى مشوق تشوفني بلا حجاب حتى نكون ديالك
يوسف: (تبسم) غنرجع نتافق مع باك الخطوبة ولاكط فنهار واحد
خديجة: ههه زواج ليلة تدبيرها عاام داخل زربان ايوسف ومنبغيكش تندم فكر مزيان وحتى انا بغيت نفكر مزيان
يوسف: وعلاش غندم اصلا مهضرت مع باك حتى فكرت مزياااان ونتي عندك الحق تفكري حتى تسالا ليك العدة
خديجة: اممم زربا خايبة
يوسف: مغتندميش راني ولد الناس كولشي تيشهد فية بالخير
خديجة: ههه شكااار راسو
يوسف: وووو العرس؟!
خديجة: مال العرس؟!
يوسف: شنو تبغي ديري العرس؟!
خديجة: ماااا صراحة مفكرتش فيها نتا للي عزري واش تبغي العرس؟ اما انا درت عرسي
يوسف: خديجة نساي راك كنتي مزوجة
خديجة: اممم
يوسف: صراحة مبغيتش
خديجة: (بقات ساكتة) اوك
يوسف: ونتي؟! باغيا العرس؟! تنهضر بجدية
خديجة: (تفكرت كان باها دار ليها العرس واخا ماشي شي عرس كبييير حيت عائلة لعريس مكانوش باغيين) لا انا دوزت العرس اللول
يوسف: عاود (كان مبتاسم غير قرا شنو كتبت غوبش)
هضرنا داكشي خاصو يبقى ماضي
خديجة: مقصدت والو
يوسف: ماشي مهم تقصدي ولا لا ولكن داكشي يبقى ماضي انا نهار اللول قلت ليك اخديجة علاقتنا غتكون بحال انا ونتي اول وحدين فحياة بعضياتنا
خديجة: علاش كتحشم تقول انك غتزوج وحدة مطلقة؟!
يوسف: (بقا غير كيشوف هو فين قاصد هضرتو وهي فين مشا بالها خرج من الواتس حيت الا بقاو هاكا غير غيتخاصمو وهو فغنى هادشي.. رجع اورطيغا جلس هز من اللوز وبقا كينقب) هانية!!! نطلعو لسطح؟
اورطيغا: اه اهاااه. يوسف الا كنتي باغي تمشي عند صاحبتك للدار هانية
يوسف: شكون؟! شكون صاحبتي؟!
اورطيغا: للي فالدار عندي مالك دايخ!!
يوسف: علاش؟!
اورطيغا: هههه شوف نتا علاش!!
يوسف: (عاد فهمو حيت كان مشغول مع هضرة خديجة فعقلو)
انا نطلع لسطح
(تبعو اورطيغا طلعو كان البرد دار القب شعل اورطيغا ݣارو) هدا ݣارو ولا جوان؟!
اورطيغا: عفا الله (جبد ݣارو اخر شعلو وعطاه ليوسف) مزال حتى نتا كتكيف
يوسف: ساليت معاه.. (بقاو كيكميو ݣارو عادي) واش كنتي تتهضر على ملاك!!!!
اورطيغا: اه عليها علاش عندك بزااف
يوسف: جاوب تيليفونك بعدا
اورطيغا: (جاوب وهو كيشوف يوسف ويتبسم دارلو إشارة تسنى دقيقة!!) وي زين… لا كاين مع صاحبي.. لا صاحبي صاحبي من لافامي.. وصافي هضرت غتجي غتبقاي فالزنقة.. ههه (قطع وكمل بلميساجات)
يوسف: ياكما خسرت ليك لبلان
اورطيغا: لا لا.. أيااام الله طويييلة بانلي نتا للي ضايع ونتا واقف حدايا
يوسف: البنت راه بحال ختي
اورطيغا: ختك (خرج عينه زعما ممتيقش ورجع تبسم زعما كذب على واحد اخر)
يوسف: (سكت مدة بحال كيفكر ورجع شاف فيه) غنتزج ختها
اورطيغا: شنااااااوااا!! (جبد ݣارو من فمو) كان خاصني نجيب داك طرف لحشيش معايا صبر صبر.. (شعل ݣارو اخر) كفاش؟!
يوسف: ههه واش حتى نتا كنتي داير فبالك بيني وبين ملاك شي حاجة؟! كنا تنبانو كوبل؟!
اورطيغا: انا معلاباليش بيها اصلا وقضية اونكووبل كنتو تتباتو بحال شي قرعة وكاس ههه
يوسف: ههه متنمرش عليها هي عندي عزييييزة بزاااف
اورطيغا: صراحة قرار زوين متزوجهاش, تنأيدك (صفق كيظحك)
يوسف: مراااااد نتا اول واحد هضرت معاه فهاد الموضوع
اورطيغا: منين قلت مراد انا نسكت من الظحك
يوسف: فاللول قلت نجرب مع ملاك لمحت ليها والو السيدة مكيناش هنا معتابراني خوها شفت ختها
(بحال كيقلب على شي كلمة مناسبة)
كولها عاجبااني جاتني مناسبة لية بزااف وعاد بنات مربيين عائلة تهز ليك الراس
اورطيغا: امم اوا وهي؟!
يوسف: حتى هي تفاهمنا بزاااف عقلها كولشي عجبني
اورطيغا: لا على لوخراا.. منم مزيان الله يكمل بالخير حسن الواحد يضرب الحديد محدو سخوون هانتا شحال جبدتي مع ديك خيتي وفالتالي طلع بلانها خاااوي
يوسف: (تبدلو ملامح وجهو) متعاودش تجبدهالي
اورطيغا: مزيان والله مزياان (معقلش على ختها) وووختنا فالله
يوسف: شكون ملاك؟!
اورطيغا: اممم
يوسف: فليفلة اخويا صراحة انا كنت باغي نتزوجها موظفة موهيم تكون مستقلة ماشي ماديا ولكن ختها بدلتلي هاد الفكرة بغيت اخويا للي تهلى فية نكون عندها غير انا ندخل للدار نلقاها ديما تتسناني نربي وليداتي معاها ماشي نجيب مربية مهم عاجبني بزاااف هادشي..
اورطيغا: بغيتي البلدي وكان
يوسف: هههه مهم
اورطيغا: اوا لوخرا
يوسف: واخا نعطيك فرق بسيط، خديجة كتحسسك انها محتاجاااك ضروووري تكون فجنبها تعتاامد عليك فكولشي يعني الا خويتي بيها بقات خلا تتحس انك راااجل وحتى الا مكنتيش قاد بالمسؤولية كتخلييك باغي دير على قبلها بزااف
اورطيغا: اوا نص ميتروو
يوسف: ههه بحال كنتي بحال مكنتيش ههه عاد خاصك ضرب وتقيس
اورطيغا: ههه سي باينة فليفلة
يوسف: ملاك هي المثال ديال المرأة القوية،
اورطيغا: شحال ما بغات تقول تيبقى الرجل قواام عليها
يوسف: ههه هادي بالظبط صعييبة عليك
اورطيغا!! علية،!!! تا راك متتعرف واالو.. عرفتي مزيان عجبني الحال هضرنا فهادشي وعجبني الحال تجمع راسك وتزوج
يوسف: ونتا متزعمش
اورطيغا: الاااا الاااا خوويا انا داير بية انواااع علاش نقلب على الملل بيدي
يوسف: داكشي متيدوومش
اورطيغا: حاليا انا راسي عااامر بحوااايج أهم
يوسف: (بدات كتنقط هبطو من سطح) معرفت واش تكون محتاجة شي حاجة
اورطيغا: (عوج راسو بمعرفت ودخلو فحاالهم وحتى يوسف تبعو باغي يخليها على خاطرها…)
ملاك: (واقفة فطواليط دايرة يدها على حنكها مفقوسة وكتشوف فديك💩 للي تماك عيات تبرك على لما وكان مقطووع وهي متأكدة المرة اللولة كان لما راه جوج مرات!!!!!)
الله يا ربي مكفاش المشاكل فين كنت طحت فهاد الفضييييحة كتر… فين ندير وجهي صباح فين يجي لا يوسف لا السيد أوييييييييسييلي استغفر الله
(مشات كتقلب على شي قرعة تكون عامرة بلما كانت غير قريعة صغيرة للي شرات باش تشرب دوا وهاديك مغدير وااالو عيات تقلب ووالو رجعت لطواليط وبقات واقفة وكل مرة تجرب واش جا لما ولا لا)
تفوووووو مجاتني نحطها غير داابا.. (جاتها لبكية وبقات هيق هيق هيق تجمع كووولشي عليها وفاض الكاس… سمعت تيليفونها كيصوني مشات بالزربة لقات بريڤي شافت فالساعة كانت 1 دالليل جاوبت)
الوو
حمزة: مالكي املاك ؟!
ملاك: (قلبها زدح وجلست فداك السداري بقات ساكتة شحاال)
علاش كتصوني علية
حمزة: مقدرتش منصونيش عقلي حبس قبيلة
ملاك: حمزة نعل الشيطان نتا راك مزوج اش باغي عندي انا
حمزة: هاد زواج ممعمرليش العين انا كنت باغيك نتي
ملاك: (غصة وحلت فحلقها) كنا وكنتو صرنا وصرتي مزوج حتى حاجة مغتبدل واخا طلق مستحييييل نرجع معاك الثقة للي كانت بيناتنا تهرست وعمرها ترجع كيف كانت
حمزة: (بقا سااااكت شحاال) غتفهميني
ملاك: بلعكس غير غنحقد عليك انا كنشوووفك واحد شمااتة تخلا على وحدة كانو ناويين يتزوجو علاش على شي حاجة تاافهة
حمزة: تافهة!!!
ملاك: اااه تااافهة والخايبة انه ماشي حتى شغلك بحال شي واحد دخل فحياتك وقالك علاش ماماك سميتها نجية خاصها تكون فاطمة
حمزة: (بترجي) ملاااااك
ملاك: عفاك احمزة نتا فغنى على هاد المشاكيل وذنووب وحتى انا (بغات تضعااف ولكن..) مثلا مثلا شنو بغيتي مني نتيق فيك ورجع نبغيك وتجي عاود وتقولي انا تسرعت وهادشي مداخلش لراسي!!! شنو زعما كتفكر نهبط من قيمتي ونكون ديك العاشقة ديال راجل مزوج
حمزة: مزال تتبغيني؟!
ملاك: نكذب عليك الا قلت اه (ضرها خاطرها) وعفاك كما نتا عندك مرتك ودخلتي فعلاقة جديدة للي خاصك تلتازم بيها حتى أنا هكاك
حمزة: كفااااش!!!!
ملاك: كيف سمعت.. (قطعت وبزقت عليه)
المرض كيف دااااير زيدني حتى نتا
(بتنهيدة تفكرت باها ومها كانت علاقتهم قدوة ليها كفاش باها كيبغي مها وحتى مها كيفاش تحدات وبغات باها ولكن دابا كولشي تهرس حلت داك لباب وخرجت لبالكو كتبكي جاتها قااااسحة بزااف واكترية خايفة يكون طلاق للي عتابراااتو من حق الام ديالها من هاد الخيانة مسحت نيفها وعينيييها ضارت حيت جذبتها ريحة زوينة عارفاها ديال الشيشة لقات اورطيغا كيشوف فالشاريع وشاد شيشة الكترونيك)
اورطيغا: هو حسن دخلي وتسدي عليك
ملاك: (غوبشت وتمات باغية دخل)
اورطيغا: (بهدوء) غير باش حتى واحد ميحل فمو عليك تماك ساكن عزري غيشوف بنتك تتطل كولشي غيفهم غلاط
ملاك: (حتى شافتو هضر معاها مزيان عاد حركت راسها باه ودخلت سدت عليها لباب دوزت الريدو وتكمشت فبلاصتها راسها ضرها غير تفكرت الفضيحة للي كتسناها طواليط طار عليها نعاس…)
اصبحنا واصبح الملك لله..
زهرة: (منعست مشاافتو بقات غير جالسة فبلاصتها واخيييرا شكها كان فمحلو وحتى مرت شيخها نبهاتها واحد نهار كان رشيد وباه كيهضرو بالشلحة وباه كينصحو ينوض يتزوج باش يولد الولد قلبها ضرها معندها فين تمشي وفين تجي معندهاش #عائلة للي مبقاتش قابلاها!!!! بناتها كبرو ودارت نساااب والحفاد واش فهاد العمر عاد غتنوض تطلق وفين غتمشي لا فلوس لا صنعة واخا عارفة راجلها يقتلها ويقتل راسو وميطلقهاش!!
للي حارقها غير كفاش عطاااتو خاطرو اه كانت كتقولو الا بغيتي الولد نوض تزوج ولكن مكانتش كنقولها لا من قلبها لا من عقلها غير لسااان وصاافي ولا كانت باغية تسمع ديك والله منتزوج وحدة من غيرك باش يزييييد يصبرها على الايااام ويبرهن ليها ان اختيارها ليه كان فمحلو سمعت دقان فلباب مجاوبتش)
الجد: هدا انا ابنتي حلي لباب
زهرة: (ناضت دارت شال على راسها مأفأفة ولبست بينوارها وخرجت بنفس النظراااات ديال الحقد للي تملكووها) شنو بغيتي
كان اول مرة تهضر معاه بهاد الطريقة كانت ديما مثال ديال الاحترام التسامح والمحبة والوجه البشووش براسو جاتو قاااسحة واخا مقبلهاش فالاول ولكن مع الايام بدلت نظرتو ليها واهتمامها بيه منين ماتت المرحومة وكانت كتوقف معاه فكولشي لدرجة رجعت هي مولات الري وشوااار وكولشي يدووز على يدها فديك الدار..
الجد: بنتي نعلي الشيطان
زهرة: (فحلقها بزاااااف دالهضرة ولكن مزال وجهها غالبها وماقدرتش تخرجها لراجل قد باها) اممم
الجد: مع الوقت غتفهي علاش رشيد دار هاكاك راه كولشي فمصلاحتكم نتي وبناتك رشيد خدم ودمر ودار رزقو ماشي بحال خوتو للي انا ومنبغيش يديوها بااردة داكشي كيبقى ديالكم ابنتي، غير صبري مع الوقت كولشي كيدوووز
زهرة: مكاينش الوقت الحاج.. المحكمة للي جمعتنا انا ولدك غتفرقنا
الجد: وعلاش؟!
زهرة: (بحرقة ومعصبو) لا والو غير مالقيت مندير قلت نطلق نجرب الحياة وانا مطلقة كيف دايرة!! (بنظرات باردة) أاااااااااااااعمي ولدك عارف انا مغنقبلش يدخل علية الضرة ومدااام دارها وتحدااني بحال قالي سيري فحاااالك من داري وانا داكشي للي غندير
الجد: هو مغيدخل عليك حد نتي هي لي غتبقاي مرتو ومولات دارو وماين بناااتو ومولاتوحتى هاد الدار وما فيها
زهرة: (كتظحك بالفقسة) بناتو؟! هادشي للي كان معقدكم خاصكم الولد
الجد: بنتي رشيد دار غير لحلال
زهرة: (زاد استفازها) وحتى انا غندير غير لحلال ياك ربي محرمش طلاق ياك هاكا كاين فالدين الاسلامي؟!!!!
الجد: (تنهد) الله ينعل الشيطان ابنتي مضيعووش حياااتكم و و هو راه تزاد عندو ولد لبارح ومو ماتت الله يرحمها..
زهرة: (محست حتى خبطت لباب عليه زاد أزمها كتر وكتر قال يمكن غلط وتزوج ولكن ولد ݣااااع؟! لقات راسها هزت صاك كتجمع حوايجها ودموووعها على خدها.. لبست جلابتها دارت الاسدال ديالها لبست صابووها مشات لماريووها هزت فلوس هزت تيليفونها وخرجت من تمااك عيات ترغبها مرت شيخها وااللو مقبلتش مشات من الجهة الأخرى فين مدوزش على القهوة وهي معااارفة لا فين تمشي لا فين تجي.. وكانت هادي اول مرة من بعد سنوااااااااااااااات تخرج بوحدها…)
ملاك: (ضرباتها الفيقة هزت تيليفونها كانت 8 ديال صباح مشات كتجري لطواليط مقررة تهبط تسري بيدو ديال لما 5 لتر هي للي تفكها، جربت لما لقاتو رجع عاد رتاحت خوات لما وعطرت بسانيكروا للي خوات نصو عاد خرجت من تماك كان لبرد رجعت لفراش مكمشة شعلت الكونكسيون بقات طالعة هابطة حزنت حيت خاصها ترجع للدار ولكن معندها ميدااار رجعت ناضت جمعت لفراش فاش نعست لبست بانطوفتها للي جات بيها من الدار معرفت واش تخرج ولا تسنى يوسف فين تخلي الساروت بغات تصوني على يوسف خافت تزيد تصدعو اكتر شافت كانت 8 ونص خاص تمشي لخدمتها باش المدير ميتقلقش منها ويديرلها خاطرها باش يشوفلها شي فوغماسيون ولا اي حاجة مهم تغبر من تماك صوناو على يوسف مجاوبش، خرجت من الدار مع كتسد لباب ضارت لقات وحدة تماك هابطة من درووج كتشووف فيها تفكرت كلام لاخر منين قال دار عزري يعني باينة شنو غيشوفو عليها والهضرة لي تقول عليها)
سلام
…: (طولاتها وهي كتعبر فيها من راسها لرجليها) وعليييكم السلام
ملاك: (غوبشت) ياك لباس
…: شوفي نتي واش لباس ولا لا
ملاك: قو*** علية حتى نتي عاود هاد صباح بقيتيلي غير نتي شنو باغية نتناتفو هاد صباح مرحباااا
…: (بقات كتشوف فيها حتى جابت ليها الظحكة) هههه
ملاك: خرا (تمات هابطة من تماك بالزربة ركبت طموبيلتها الدنيا عاامرة بحكم لافاك قريبة بزااف، من تماك شدات طريق لصفرو صونا عليها يوسف جاوبت دايرة سبيكر)
كنت صونيت عليك ومبغيتش نعاود نصوني خفت تكون ناعس
يوسف: فينك واش خرجتي؟!
ملاك: اه ماشية للخدمة تعطلت ومعرفت فين ندير سوارت غير سمحلي نكمل الخدمة ونجيبهم ليك
يوسف: خلينا من سوارت، نتي واش صبحتي مزيان!!!
ملاك: (كتسبو فخاطرها حيت هاد الاهتمام ديالو كان عاجبها ولكن هو اختار…) الحمد لله الحمد لله شكرا بزااف ايوسف وسمحلي على لبارح عارفة راسي كنت قاسحة شوييية معاك
يوسف: شوية؟!
ملاك: هههه شوية ديال بزااف انا هي هادي
يوسف؛ حلوة على قلبي، ومنين سمعت ظحيكة لباااس ولكن خاصك تعرفي حاجة انا ديما موجووود فوقما حبيتي تهضري تخوي قلييبك انا كاااين بحال كيف كنا فاللول
ملاك: مييغسي والله
يوسف: كنعنيييها املووكة انا موجود فأي وقت
ملاك: عارفة عارفة وراك وفيتي ݣااع معايا (زفرت) الساااعة الله وصاافي
يوسف: مهم بلا متعذبي راسك انا بلاتي ندوز عندك ناخد الساروت
ملاك: متعذبش راسك
يوسف: لا بالصح باغي نجي.. ونيت نشووف خديجة
ملاك: ههه ديرني طريق
يوسف: راك عشيرتي زعما نتي للي تفهميني
ملاك: هه واخا.. ياله باي باي داخلة على باراج.. (قطعت هو صديق زوييين ولكن كانت كتمنى ما كتر كانت باغية هاد الاهتمام ومعاه حتى الحب.. 40 دقيقة وصلت لصفرو حيت طريق عامرة وهي اصلا كتمشي بشوية، نيشان لخدمتها مهمهاش شنو لابسة بحكم مكاينش التيتيز غير
الشرف والمزوجين للي خدامين معاها…)
~~~~~~~~~~~
كانت خديجة خرجت تبعت مها للي رغبتها ترجع للدار وحتى زهرة رجعت حيت ملقات فين تمشي ومبغاتش تزيد بنتها مريم مشاااكلها جاتها قاسحة تجلس فدار نسيييب داخت معرفت شنو دييير وصلت لخبار لمريم للي عيات تهضر وكتحاول تهدن ماماها وكان اخر حل هو تجي عندها لصفروو اما باقي لبنات خباو عليهم الموضوع..
زهرة: (جا راجلها يهضر مخلاتلوووش غير للي نسات كتهضر وتقول مهضرتش وحتى هو مزاد معاها حتى حرف اول مرة يشوفوه حاني راسو واول مرة يشوفوها كتغوت عليه بحكم علاقة الاحترام والهبة للي كان دااير عاود خرج هو وباه وبقات هي كيهدنووها دخلت لبيتها عاود سدات عليها)
خديجة: الحمد لله بعدا مكانتش سيهام وولادها يتشفااو ويديو ما يعاودو
مي حلو: (حركت راسها باه.. كتخمم عاد منين يعرفو راه بغا يجيب الولد باش يعيش معاهم…)
اورطيغا: (فاق على صونيط الحاج للي وقف بحال شي عسكري خاصو يمشي على حساب شي كموند كبييير بغاه شي صاحبو فكرو ان كولشي خاص يكون مقاد وفالوقت وأكد عليه ان عندو بريم فهاد البريكول، ياله هابط فدروج تفكر الوراق والكاشي ديالو عندو فالدار صونا على يوسف باش يقول البنت للي جاب تفتحلو لباب حتى كيصدمو خدات سوارت وومشات لصفرو حيح ومخلا فيها غير للي نسا وتغدد عليها مخلي يوسف حشماان حيت عارف الحاج بحال كيتسنى اورطيغا غير يغلط باش يديرو العقوبات)
…: (طالعة فدروج هازة معاها باݣيط وميكة فيها حليب وباكية كيري وبيض سمعاتو كيصعصع) امالك عاود؟!!
اورطيغا: (ساااخط شاف فيها وهو كيفكر) عندك شي مطرقة فالدار
….: اه عندي علاش؟!
اورطيغا: جيبيها (جات تهضر وهو يتخضر عليها) جيبيها الله يسهل عليك من بعد ونهضرو
…: (طلعت بالزربة مشات جابتها دغيا هبطاتهالو باينة مكره مع عطاتهالو بدا كيعطي لباب الخشب حتى خلعها)
دابا يجيييو عندك ݣاع الجيران
(والو مكيجاوبش غير كيضرب بديك المطرقة فالوسط دلباب وجناب مدة متهنى حتى فرع لباب بقا كيزيد حتى بيدو حتى شخشخوو وتجرح فيدو دخل بالزربة بقا عندو ساروت ديال داك لبيت فين مخبع ورااقيه هزهم سد باب لبيت خرج من تماك كان لقا الجيران دلتحت طلعو يشوفو هاد زديح)
وفاااا بروووجلة ردي لبال مغنتعطلش
وفاء: واخا
اورطيغا: (للجيران) سمحونا على تبرزييط (تخطااهم وتم خارج بالزربة ركب طموبيلتو كيلعن ويسب فملاك ونيشان لبنسووودة..)
~~~~~~~~~~~
ملاك: (جاوبت مريم للي عرفتها جات فتاكسي كبير ودارت معاها تلاقا بيها فالمحطة استئذنت من المدير وخرجت بكري تسناتها غير جات حداها عنقتها) شتي المصيييبة للي دار بابا واخا مبقيت كنحمل نقولو بابا كرهتووو
مريم: نعلي الشيطان احبيبتي ماشي هضرة كتقال كولشي يتحل بالعقل
ملاك: اشمن عقل خلا وكان تشوفي ماما ماشي غير تكرهييه عذبها فحياتها
مريم: ملاك اه مامانا لحبيبة وكنبغيوها وتطلب عينينا نعطيوهالها ولكن احبيبة راه هداك كيبقى بابانا وعلينا بالاحتراام شنوما بغا يوقع
ملاك: منحتارمو ميحتارمني هو ماشي غذر غير ماما رله حتى حنا
مريم: معليش معليش نمشيو للدار ونهضرو ولكن عفاااا حبيبة متهضريش هاكا قدام ماما بلا منزيدوها حتى حنا بالصح حالتها مخاصهاش تسمع هاد الهضرة
ملاك: كنت باغيااك غير فوقاش تجي
مريم: لا حول ولاقوة الا بالله العلي العظيم (صاݣت بيها للدار) مبروك عليك الطموبيل
ملاك: مبقات فرحة لوااالو
مريم: هههه كترة الهم كظحك هادي نتي كتقولي هاكا شنو خليتي لماما؟!!
ملاك: غنخرجو من الدار ونكريو انا وياها فشي قنت ومنبقاوش مع واحد خاااين بحاالو…
مريم: ملاااك.. حسابلك انا مبقاش فية الحال للي بكييتو ولكن شنو غنديرو
ملاك: نخرجو نكريو انا وياها
مريم: وفنظرك ماما غتخرج
ملاك: (بزفرة) عارفة… عارفة…
مع وصلو للدار كان صقييير غير خديجة للي جالسة دايرة يدها على حنكها غير شافت لبنات ناضت كتسلم عليهم وتعاود ليهم على زهرة للي مخلات فباهم غير للي نسات لدرجة حتى بقا كيبكي باهم وخرجو الجد من الدار
ملاك: واخا نشوفو بعيني هداك يبكي؟! ياك ديما مبكينا ومزير معانا ومعها ودابا ناض مزوج عليها على غدر كدااير!!
مريم: (خرجت عينها فيهاا) ملاااااااك
ملاك: انا هادشي طلعلي فصحتي صافي نخرجو نكريو انا وياها نعيشو بعدا مرتاحين فراسنا وحنا ضايرين بيها غير ذياااابة
خديجة: (تقرست وشافت فختها ومكرهتش تسولها واش بالصح أذيييتك وكنتي كتبغي يوسف لهاد الدرجة!!!!)
مريم: ماما فبيتها
خديجة: امم.. اه معاها مي حلو هي للي كتكالميها شوية جاب الله سيهام مكيناااش
مريم: امم
ملاك: وتكون مالها غتخلعنا
خديجة: غير مبغيتهاش تشوف ماما هاكا
مريم: (مشات دقت فبيت مها) ماما انا مريم (رجعت دقت حلت ليها مرت حنينها دخلو وسدو لباب من موراهم)
ملاك: مدخلوكش معاهم؟!
خديجة: لا كنت بقيت كنتسناكم، نحطلك تغداي؟!
ملاك: (جلست منرفزة فوق كرسي) مفياااش
خديجة: فين بتي البارح!!
ملاك: راك كنتي دايرة معانا المباشر زعما معارفااش ولا خاصني نبقا نعطيك الاخبار بالتفصيل
خديجة: علاش كتعامليني هاكا املاك!!!
ملاك: (ناضت كتݣمݣم بكلام ممفهومش جبدت تيليفونها كان كيصوني لقاتو يوسف جاوبت كتلحنها ) وييي يوسف.. (طالعة لسطح)
اورطيغا: (شاعل) واش نتي بنادم ولا حيوااان علاش خديتي سوارت معاك
ملاك: (تصدمت رجعت كتشوف النمرة وشنو سمية للي مقيدة فيها ورجعت التيليفون لودنها) يوسف؟!
اورطيغا: دابا تحطي سواارت فينما كنتي جيبيهم ولا نجيك فينما كنتي وبربي ما نزݣلك هاد نهار
ملاك: (مستغربة) شكون نتا بعدا واشمن سوارت
اورطيغا: (ياله جا يجاوب وهي تهضر)
ملاك: مسينا على الله عاود!! نتا باينة فيك شي شفااار الله يغبر لمك شقف يا لكلب تفووو كترتو (قطعت مستغربة عاد تفكرت سوارت للي بقاو عندها والسيد كان من طرف يوسف خرجت عينها ولكن تكالمات بحجة انه ماشي من حقو يهضر معاها بديك الطريقة خلات حتى يعاود يصوني وتسمعهوملو مزياان..)
حمزة: بسسسسس
ملاك: (شافت فسطح منين جاي الصوت خنزرت كان قريب ليها)
حمزة: شنو واقع معاك؟!
ملاك: ديها فرااسك
حمزة: شنو واااقع؟!!
ملاك: خرا مبقيت كلقى حتى بلاصة نجلس فيها فخاااطري
(هبطت كتنݣر رجع صونا يوسف جاوبت ولكن مهضرتش غير كتصنت حتى تسمعو)
يوسف: الووو ملاك!!
ملاك: وييي يوسف شكون داك الكيدار للي هضر معايا قبيلة
يوسف: اورطيغا، قوليلي فينك نتي واش خرجتي من الخدمة؟؟
ملاك: اه فالدار
يوسف: غير سوارت محتاجهم السيد
ملاك: واش الدار كانت ديال داك العزي؟!!!
(سمعاتو كيسب وهو يتقطع الخط بقات كضور فعينها حتى رجع صونا عليها)
يوسف: ملاك الا صلاحلك خرجيلي سوارت انا ندوز ناخدهم
ملاك: صافي غير تقرب انا نخرج عندك من الجهة الأخرى…
مريم: دابا اماما للي وقع وقع نتي شنو بغيتي ديري شنو مريحك
زهرة: (دايرة زيف حياتي لواياااه فوق راسها ومربعة فوق النموسية) الديرة مديرت الله
مريم: ونعمة بالله انا ماشي كنقولك باباك مغلطش غلط وبزااااااف وندم عرفتي صباح كيهضر معايا وكيبكي
زهرة: (غير ساكتة ساهية فقنت)
مريم: عفاك اماما متبقايش هاكا ياله معايا للدار ترتاحي وفكري مزيااان
زهرة: (ببحة) سنيييت على عمري من شحاااااال هادي ابنتي
مريم: علاش كتقولي هاكا من قبل واش مكنتيش ݣاع مرتاحة واش مدار معاك حتى حاجة زوينة تشفع ليه
زهرة: دار ابنتي حوايج زوييينة ولكن هادي خلات كولشي قبيييح وحتى حاجة مبقات عندها معنى
مريم: والله اماما الا فاهماااك ولكن
زهرة: انا كيبانلي غنخرج ندير الميناج ومنبقاش هنا
مريم: وزعما حنا غنخليوك اماما الله يهديك شنو كتقولي هضري امرت حنيني
مي حلو: ابنتي راه حتى السيدة ماااتت الله يرحمها
زهرة: واش انا همي فالسيدة واش ماتت ولا حية انا همي فالولد
مريم: انا نربيه
زهرة: ورااجلك؟! ولا ولات عندكم عادة لبنات رشيد تخرجو على زواجكم؟!
مريم: ولوحوووه اماما شنو ذنبو هو؟!
زهرة: والا بقا فيك اختي انا ولا هو
مريم: الله يهديك اماما واش كاين شي واحد يجي بلاصتتك ولا حتى فظفرك
(تسمع الدقان حلات مي حلو كانت ملاك)
سيري املاك من بعد
ملاك: (دخلت مشات عنقت مها) كيف بقيتي؟!
زهرة: الحمد لله ابنتي فين بتي لبارح
ملاك: فلوطيل
زهرة: (حركت راسها باه بقات كتلعب ليها فشعرها حيت تكات على حجرها حتى دخل رشيد حيت كان لباب محلول ضورت وجهها حيت ولات عادة عندها تحتارمو قدام الزايد) سيرو خرجو انا باغية نتكا شوية
رشيد: زهرة قدام بناتك ومرت با نعلي الشيطان
ملاك: مالها هي للي ناضت تزوجات من موراااك
مريم: ملاااااك
رشيد: نتي عليك بالاحتراام ومدخليش راسك فهادشي للي كبير عليك وانا راه باك متنسايش هادشي
زهرة: ملاك!! بنتي!!!!
ملاك: (تنادم معاها الحال ولكن مكتجي توزن الكلمة حتى كتلقاها خرجت وهادي مشكلتنا فاش كتكون معصبة)
رشيد: زهرة الله يرضي عليك (بترجي…)
زهرة: غدا غنهز حوايجي نمشي فحالي مبقات عشرة بينا ارشيد
رشيد: (بقا غير كيشوف فيها) انا والله مبغيتك تربي الولد
ملاك: (نقزت) اشمن ولد؟!!
مريم: خرجي نتي
ملاك: واش والد معاها؟! هههه اااه قول مراضيش بينا حيت حنا غير بنات
(بقات كدفعها مريم حتى خرجتها وهي مزال كتهضر)
باغي لولاد صحة على ظهر ماما مسكينة للي دارت على قبلك شحال من حاجة
رشيد: (بتعصب) انا كنت خااايف عليييكم واش انا دااايم ليكم
ملاك: والولد هو للي دايم لينا ابابا؟!! خايف علينا ونسيتي راه رزق بيد الله
مريم: (بغات تطرشها) سكتييييييي
ملاك: (بعصبية) منسكتش خااااايف علينا لهاد الدرجة كتب ليها داكشي للي خايفو يتشرك ماشي تقهرها هاكاااك
مريم: غتسكتي ولا نضربك
ملاك: (كانت غصة فحلقها خرجت من تماااك صونا عليها يوسف جاوبت بعصبية وصوتها كيرجف بلبكى وهي خارجة) شنووو!! (ضارت شافت فخديجة)
هاهي خديجة غتجيب ليك سوارت صوني عليها
(قطعت وتمات خارجة تابعاها مريم زربت ممسوقاش ليها خرجت من الدار لاخر للي كان يوسف بطموبيلتو كيتسنى غير قشعها خرج من الطموبيل تابعها حتى شدها من ذراعها… بعصبية ودموعها على خدها)
طلللللق منييييي
يوسف: ششش (هز يدو لسما) تكلماااي شنو وااقع مالكي؟!
ملاك: (بقات غير واقفة كتبكي حتى عنقها وهي غير واقفة بحال شي خشبة كتبكي رخف منها دغيا ورجع داير يدو على كتافها كيزعزعها باش تهز راسها فيه تهضر حتى وقفت خديجة حداهم للي شافت كولشي.. بعياء) صافي نمشي فحالي
يوسف: معندك فين تمشي طلعي الطموبيل انا جاي
ملاك: (كانت باغية غير فين تهرب مشات الطموبيل وهي تقشع اورطيغا تمااك وتمت زاربة دخلت للحومة حتى شدها من ذراعا شافت فيه)
ملاك: حمزة!!!
حمزة: (معصب) شكون هداك؟!!
ملاك: (بقات غير كتشوف فيه حتى من دموعها نشفو.. بعياء) شنو
حمزة: واا شكون داك خينا (رجع شاف فيه كانت ختها واقفة معاه ولكن ماشي وقفة ديال جوج غرباء) شكون هداك؟!
ملاك: ونتا سوق مك
حمزة: (جرها لبلاصة مظلمة حيت سمعو هضرة ديال بنات قرااب وقف مقرب ليها وحتى هي ستحلات ريحتو اصلا كتحمقها ريحة درجال، بقات جامدة هو كيشوف فالحيط للي اونفاص معاه وهي تحت منو هازة راسها فيه) ملاك شكون هداك للي كنتي معاه
ملاك: خطيب ختي خديجة
حمزة: (حنا راسو كيشوف فيها) والتعنيقة شنو محلهااا!!!
ملاك: عادي حتى نتا عنقتني واحد المرة ومكان حتى حاجة بيناتنا زعما حلال عليك وحرام عليه هو
حمزة: (ضرب يدو مع الحيط كانت اول ردة فعل عصبية من بعد السبان ديالها ليه) نصبر لكووولشي منك حيت أنا للي كنت شماتة معاك ولكن هاد الهضرة نقتلك عليها لاش معنقة داك خينا!!!
ملاك: (بتنهيدة وكانت غير مبالية) غير قتلني عادي
حمزة: (عض على شنافتو) مكنتيش هاكا!! تعنيقة ݣاع املاك!!!
ملاك: واا سير عند مراتك احمزة وقيلني عليك نعنق شكون ما بغيييت
حمزة: ا لا انا كنطلق أميمة حيت مبغيتهاش ومعرفتش نبغيها، وحدة للي معششالي فراسي وفقلبي هي نتي مكنت بغيت نقولك والو حتى نسالي الاجراءات معاها (بقات كتشوف فيه) ديك الساعة غرجعك لية
ملاك: (ميقت فيه) وشكون قالك انا غرضى رجع ليك كتحلم وااقلة!!
حمزة: انا عااارف، حيت طال زمان ولا قصااار غتعرفي شحال بغيييتك وكنت حمار منين ضيعتك
ملاك: (بقات غير ساكتة بعد منها خطوة) بعد
حمزة: (رجع بخطوة اللور) سيري للدار ماشي من عادتك تبقاي فزناقي فهاد الوقت وتعانقي
ملاك: اولا ديها فراسك وماشي شغلك فية تانيا نعنق شكون ما بغيت تالتا طلق مطلقش انا مستحيل نرجع ليك.. (فلحظة نسات كولشي واش تفرح ولا شنو دير تخلطت عندها الدعوة طلت على خديجة لقاتها مشات من الدرب لاخر للي كيخرج للدار جات ماشية وهو يشدها من ذراعها)
حمزة: سمحيلي املاك
ملاك: (جبدت ذراعها ولكن بهدوء ومشات فحالها حاسة بخطواتو من موراها فلحظة تبسمت حست بيه بالصح كيبغيها ومنساهاش بدات ديك الطاقة السلبية كتمشي شوية بشوية غير قربت للدار وقفت والغصة رجعت ليها)
حمزة: (بقا مدة واقف) مغدخليش خلاص؟!
ملاك: (تبسمت ومضارتش عندو حدها جاوباتو)
دخل سوق راسك
(دخلت للدار زاربة باش متفضحهاش الابتسامة كان صقييير باينة باها خرج طلعت السطح قبل ميشوفها شي واحد قربت لجهة سطحهم كتسمع فمو كتهضر معاه يهز عشاه حيت خدام الليل.. رجعت لبلاصة فين كتجلس واش تفكر فيه ولا فحريرتهم ولكن فضلت موضووع مها مزال متقبلت موضوع زواج باها حتى زادهم بالولد للي تولد…)
اورطيغا: واش بعقلك تتقلب على برهوشة فهاد الليل صافي خلي **** ضبر ل*** وياله نمشيييو
يوسف: (جاه ميساج هز تيليفونو كانت خديجة علماتو راه ملاك فالدار كانت فسطح، رجع التيليفون لقجر) بقات فيا ديك الحالة للي كانت فيها فشكل
اورطيغا: بانلي اخويا يوسف خاصك تعرف بعدا نتا شنو باغي واش هي ولا ختها؟!
يوسف: (هز حاجبو وشاف فيه) بانلي لحشيش دار المزيان معاك
اورطيغا: ههه حمار فطريق وغيتنكرى من هادشي للي نتا فيه
يوسف: سمع (شدو طريق لفاس) ملاك عندي عزييييزة وغالية بحال شكل غيثة عاد عندها واحد العقل زوييين بحال شي صديق مقرب عندك بزااف
اورطيغا: ههه لا باينة عقل زوين (هز سوارت كيلعب بيهم) جبتينا فااابور وانا اصلا مبدل الباب كامل
يوسف: (تفكر خديجة للي شحال مشافهاش زادت صحاحت وزيااانت كان باغي يشووفها يجلس معاها ويهضرو باغي بكتاشف كفاش كتفكر وكتهضر، وهو يلسق اورطيغا يجيو سوارت واخا اصلا ممحتاجينهومش)
اورطيغا: اجي بعدا وبغاولك الدار؟!!!! زعما قلتيلهم
يوسف: قلت ليهم بغيت نتزوج ولكن مزال مقلت التفاصيل
اورطيغا: غيبغيييو ان شاء الله اكترية الوالدة (بقاو ساكتين بجوج حتى تشاوفو وطرطقو بالظحك)
ههههه داخل فحرب اخاااي يووسف مع لالة الغالية
يوسف: هه هادي هي حلاوة الدنيا تقاااتل على شي حاجة ونتا عارف ديك الإنسانة تستاهل وباغيها
اورطيغا: البونتة ولا ختها!!! (دار مخنزر فيه) هههه مكتهضمليييش صراااحة
يوسف: بلعكس ضريييفة بزااف وعندها نيشان نيشان وتتوقف مع الواااحد
اورطيغا: اممم ههه مهم حطني انا فالسعادة
يوسف: متمشيش لدارك
اورطيغا: هاديك تيديني ليها نعاس اما هادي تيديني ليها التوتوووز تيتسناني فيها
يوسف: وااايلي ولالة مينا الا جات ليها على غفلة ولا الحاج؟!
اورطيغا: عارف وقتهم الوالدة تتعلمني اصلا.. باش منعاود لا نتحرج لا انا لا هوما
(حطو ولاخر كمل طريقو وفنفس الوقت كيهضر مع خديجة فطريق كتعاود ليه شنو وقع..)
~~~~~~~~~~~
جالسة مريم خديجة وملاك مربعة يدها فالقنت ممجمعاش معاهم وهوما كيهضرو ابيل فيديو مع نعيمة وفاطمة (ختها للي فكندا) كيهضرو فالمشكل هو باهم عزييز عليهم ولكن هادشي للي دار معجبهمش وبقات فيهم مهم واكترية كيعرفو القصة مزياااااان وباش ضحات معاه
مريم: ماما معندها فين تمشي ميمكنش على شحال صبرات وفالتالي تخرج من هاد الدار خاص تضمن حقها
خديجة: انا لوكان تجي على هضرتي تصبر متخرجش ياك داك الولد ماتلو مو نربيوه راه كيبقى خونا
ملاك: اشريييفة راه راجلك لقيته مزوج عليك وجايب الضرة ونضتي متينا فالطرقان تبكي وتنوحي حتى طلقتيه ولا نتي بنادم كتحسي وماما خشبة
خديجة: (تجرحت) ملاك شوفي شنو كتقولي
ملاك: كنقول للي كاين ولا نسيتي وقفتها معاك حتى هي
خديجة: منسييتش ولكن ماما راه بابا كيبغيها وهو مقادرش يعيش بلا بيها واش مكتشوفيهش شحال بكى وندم اه بقات فية وبزاااف وملقيت ليها جهد وحتى هو الله يسمحليييه شنو نديرو لوحوووه!!!
مريم: مالكم نتوما وليتو بحال المش والفار
ملاك: حيت معنديش مع المنافقين (وقفت وخرجت)
خديجة: لا حول ولا قوه الا بالله العلي مهم خليونا فهضرتنا…
دازت أيام زهرة بقات على موقفها ورشيد معياااش من طليب ورغيب مريم رجعت لدارها ومها مابغاتش تمشي معاها، ملاك مكتفرقش على مها وكلمة فمها الا بغيتي تخرجي انا قادة بيك ونخدم عليك ونهزك فوق كتافي..
زهرة: (كضحكها وهي كتعمرها وتحاول تقنعها باش يخرجو من الدار) اديييك فليفلة مال مك على هاد توسويس
ملاك: وشنو تقبلي تربي ولد من ضرتك تقبليها على راسك ازهرة!!!
زهرة: (بتنهيدة) ملاك باكم راه فكر فيكم وخاااف عليكم
ملاك: يمشي يزمر وكان خاف يكتب لينا كولشي
زهرة: سيري خرجي اديك السوسة
ملاك: هانتي طلقي راه يخرجلك بزااف دلفلوس نبيع الطموبيل ونحرݣو انا وياك لبرا
زهرة: هههه ايييه زيدي
ملاك: وانا كنقلب على حل معاك نتي قابلي الدار وانا نخرج نخدم عليك ازين ونضبرو على شي ݣور مكاين غير زعورية والعين زوورق
زهرة: ههه الحل ابنتي هو تخرجي هاد السوووق هداك راه باااك عرفتي وكان با (سكتت سارطة لسانها) باك كيبغيك بزااف ابنتي نتي وخوتاتك أنا للي كنعرفو منين صبر لهضرتك وهضرتي وردها بكا على عينييه راه كيبغيييكم
ملاك: (بتنهيدة) بقا فيا الحال بزاااف اماما مبقيتش كنقد نشوف فيه كنحس بيه خااني كتر مخانك نتي
زهرة: هههه والله مكاين للي كيفوج علية قدك سمعي ابنتي انا معندي فين نطلق مكتاابي نخرج من هاد الدار ميتة نيشان لقبري حيت معندي فين نمشي وحتى لخرووج منقدرش
ملاك: زمر نتي عاود علاش كتقولي هاكا
زهرة: (ضرباتها لكتفها) طليييه شتك زغتي لا!!!
ملاك: ضبري رااسك انا بعدا بقاتلي شي 2 سيمانات غنمشي لفاس ديبلاصمووو انا علمتك
زهرة: معندي منقوولك ابنتي الله يسهل عليك ولكن شاوري باباك بعدا ولا غنتقلق منك انا بزااف وبراكة من داك الهضرة الخاوية والسم للي كتسمعييه حيت هاد المرة غنووضلك انا
ملاك: هانتي بقى اقتراح واحد ياله معايا فاش نكون ماشية لفاس ياله معايا، أمنها تهناي من ديك زمر ديال مرت عمي مغتاخديش راحتك هنا ومنها ترتاحي وتفكري على خاطرك
زهرة: (حلت لمجر للي حداها جبدت وراق حطاتهم فوق النموسية) باك كتبلي الارض ديال الزيتون للي عندو فلبلاد
ملاك: (هزت لوراق للي كاتب ليها بيع وشراء 5 هكتار وفيها حتى دار) هااااااااه وحنا؟!
زهرة: ومالك مك نتي
ملاك: وشنو طالعلي انا من هادشي كامل!!!
زهرة: ههه (جات ضربها وهربت ليها) الله يمسخك يا الكلبة دابا نتي هي ضرتي نيشان
ملاك: هههه وطلعتي بخبييييزتك الزعرة هاي هاي على الارض انا واكلني قلبي عليك ونتي من مورايا كديري فمستقباالك
زهرة: هههه
ملاك: بصحتك الآلة وووو هانتي طلعتي لباس عليك شوفي بيعي كولشي منحرݣوش لبرا نمشيو بوراقنا حسن وبعزنا
زهرة: سيري تمشي.. (بقاو مجمعين حيت ملاك كتهرب تبقى مع خديجة للي ولات عاطياها الحب والغرام مع يوسف وقدامها)
~~~~~~~~~
يوسف: (بقا شحال كيوجد الهضرة ففمو وهوما كيتعشاو مجموعين) حم
(حط المعلقة حدا الطبسيل وهو موشوار مسح فمو ورجع مطوي شاف بين باه ومو)
انا قررت نتزوج
(كولشي شاف فيه)
غيثة: يااااااي وشكون هاد سعيدة الحظ
ام يوسف: اسكت نتي.. (هزت حاجبها) اوا اولدي غير جيتي ونويتي مقلتيلي واالو
يوسف: هانا تنقولها الوالدة انا بغيتكم كاملين تكونو مجموعين ونقولها
أب يوسف: الله يسخر اولدي هدا هو نهار لكبير عندنا
يوسف: امين الواليد شي 10 ايام هكاك ونمشيو عندهم نخطبو نرسييو معاهم وشي سيمانة ندير لاكط
ام يوسف: اوا دير لاكط نيشان علاش تخطب ݣاع
يوسف: واا هو مكرهتش (كولشي ظحك) ولكن خاص نديرو صواب ونكبرو بعروستي
اخ يوسف: هدا هو نهار لكبير اخويا نشوفو وليداتك حتى نتا
غيثة: انا عندي ميعاد هدا سر معارفو حد اسمها ملاك الآلة الغالية.. (خرج يوسف فيها عينو) ههه ماماااا
ام يوسف: الغمة بعدي مني حتى نتي (لاحت السربيتة والمعالقة)
بنااااقص من شي عشا
(طلعت ويوسف وباه كيعيطو ليها واالو.. يوسف بقى كيضور عينو هدا عاد مزال معرفت والو…)
ملاك: (طلعت لسطح لقات حمزة تماك وحتى هي كانت عارفاه كاين جات هابطة منفخة)
حمزة: سسسسس
ملاك: (ضارت جامعة الابتسامة) مالناااا
حمزة: اجي
ملاك: (ربعت يدها وتكات على الحيط) واش انا حتى فسطحنا مقادرة نجلس فخاطري بزااف هادشي
حمزة: (تبسم ووربع فوق الحيط كيشوف فيها بحب) نتعذب انا علاش تعذبي نتي
ملاك: (عيباتو مخرجة سنادرها) أنننننننننن وسيييييير تزمر
حمزة: (نطقها بلا صوت) توحشتك
ملاك: (بقات كتشووف فيه وتمات باغية تهبط شادة الابتسامة بصعووووبة)
حمزة: ملاك جااوبيني فالتيليفون (شافها كالعادة ممسوقاش هبطت تبسم وبقا شحااال تماك…)
~~~~~~~~~~~
خديجة: ملاك اجي (مشات عندها) خالتي نجية مع ماما
ملاك: وعلاش؟!
خديجة؛ معرفتش دقت سولت على ماما نيشان ودخلت لبيتها وسدو عليهم لباب
ملاك: اممم (بقات كدور عينها واش جا يخطبها عااود ولكن هي مزال مسمحااتو بقات غير كتشوف.. بغات تأكد من قضية الإجراءات ديال طلاق واش بالصح بداها)
سهام: توما ݣولو ليا مال الدار تݣلبت ساسها على علاها مبقيت نعرف فيها والو
خديجة: اش باغيا تعرفي امرت عمي عاد جيتي خليك غير تسخني بلاصتك (ملاك مشات وخلاتهم كتخرب فتيليفونها)
سهام: من نهار جيت مك غير سادة عليها حتى من الماكلة مكتاكلهاش معانا شي مرات مكنشوفهاش باليوماين!!!!
خديجة: راه قلنا ليك امرت عمي مريضة وطبيب قالها ترتاح
سهام: مريضة!!!!! ݣاع كنمرضو ومكتشدوووش علينا فبيتنا بحال هاك
خديجة : ياك شغل قاسماه معاك امرت عمي
سهام: اماااشي على شقا واش هو غيغلبني انا نهزكم كااااملين ومنهضرش (خديجة هزت حاجبها فيها) ولكن غير تبااان واش انا من نهار جيت مجمعت معاها موالو توحشناها
خديجة: ههه حتى هي توحشاتك طبيب قالها متحركش من بلاصتها غير تبرا راه غتخرج
سهام: سبحال الله مريضة علية انا، ومرت قربيش دخلت عندها
خديجة: حقا خاصني نقاد لعشا (مشات للكوزينة حيت كما العادة غتبغي تجبد ليها لسانها علاش وكفاش!!
تمت داخلة ملاك) هاي هاي لالة ملاك فالكوزينة
ملاك: معرفتيش علاش بغاتها ديك العوجة دنجية
خديجة: معرفتش
ملاك: (خرجت ديبلوكات حمزة كتفكر تصوني ولا لا فالتالي حطاتو ممبلوكياهش.. صوناو عليها غيثة) شنو بغات هادي عاود
خديجة: شكون؟؟!
ملاك: الوو غيثة صاڤا!!.. الحمد لله.. نتي مزيان… هههه اش كتقولي.. (خديجة حطت الموس كتشوف عارفاها من يوسف) هههه واش هو قال انا؟!… لا ماشي انا… والله ما انا الآلة انا من اللول قلت يوسف غير ami وصافي.. والله هههه ظحكتيني علاش متقتيش.. اممم معليش والله هانية.. وصراحة عارفة ولكن هو مزال مقالي قولي باش نقولك… يمكن خلاها ليكم مفاجئة.. واخا باي باي.. (قطعت جمعت الظحكة معوجة فمها)
خديجة: شنو بغاتك
ملاك: حتى هي كان كيحساب ليها يوسف معايا (تبسمت باستهزاء) السيدة فرحانة وكتزغرت
خديجة: حم يمكن منين كانت كتشوفك معاه فاللول علاش مقلتيلهاش ختي هي للي بغاها ماشي نتي؟؟
ملاك: (بدون شعور تبسمت باستهزاء طلعاتها وهبطاتها وخرجت من الكوزينة ولكن جاتها مستفزة بهاد السؤال…)
يوسف: (رجع من الخدمة نيشان لدارهم لقا غيثة فالجردة كانت مع شي صحاباتها جالسين مجمعين غير شافتو ناضت كتجري لعندو عنقاتو وكالعادة بدلع وغنج) الزين فين الوالدة!!
غيثة: الفوق من لبارح مخرجت من لبيت هههه قولي واش ماشي ملاك هي لعروسة؟!
يوسف: لا
غيثة: وشكون؟! عرفتي تحشمت عيطت ليها تنبارك عليها وهي وتقولي ماشي انا وظحك وانا ونقولها نوون نتي
يوسف: (خرج عينو فيها) واش حمقة؟!
غيثة: ومعرفتش حسابلي هي حيت نتوما شحاال من شهر ونتوما ensemble
يوسف: مغديريش عقلك اغيثة (تم ماشي وتبعاتو شداتو فذراعو) شنو
غيثة: وااا قولي شكوون زعما رجعتي لياقوت؟!! انا عارفااك مستحيل نرجع ليها وأصلا مبقاتش هنا
يوسف: خت ملاك هي لعروسة (تم ماشي وهي بقات مستغربة معرفتهاش، ختها!!!! تفكرت هي كانت معاهم فايفران وحتى فالعرس للي دار فهرمومو ولكن معقلتش عليها بزااف تمات ماشية عند لبنات بملامح مستغربة وبزااف)
…: امدرا عرفتي شكون سعيدة الحظ
غيثة: قالي ختها دملاك
…: واات!! اشنو تيخربق هاد خوك؟! كان مع هاديك وغيتزوج ختها
غيثة: وكان كانو بزوج مكانتش غتهضر معايا لبارح هاكاك وهي كظحك بلعكس كان عاجبها الحال، والله براسي مفاهمت
….2: انا عقلت عليها حتى هي دايرة الزيف، هههه مال ذووق يوسف هاد الايام
غيثة: براسي مفهمتش عقلي وقف معقلتش عليها انا كان تيحسابلي ملاك
….1: اودي لا هاديك لا ختها فين يبانو قدام ياقووت
غيثة: لا عفاااك بلا مقارنة مدام غتولي مرت خويا منبغيكش تطيحي منها هو أدرى، يوسف ماشي شي واحد صغيير باش مغيعرفش ولا علاش كان غيتفارق مع ياقووت غير الا لقا عليها شي حاجة معجباتوش
….1: باااز بحال مكنتوش صحابات نتي وياها
غيثة: اه وغتبقى صاحبتي ولكن خويا بوحدو وهي بووحدها متفاهموش الله يعاون لكل واحد
…2: (كتخرب فتيليفونها) كانت عندي صورتها فديك اللقطة فاش بدات تتلوز فعرس إلهام.. اممم وانا نفهم خوك باغي طرووفة ههه
…1: هه وريني ورييينيي نشوفها (جبداتو بقاو كيتفرجو فيها كان فيديو، ولكن عاطية بظهر) امممم غير شيييخة وصافي شلحة ياااك!!
غيثة: عطيني نشوف (شدت التيليفون صيفطاتو ليها فالواتس ومسحاتو ليها قلبت واش مزال باقي فشي قنت)
…1: شنو تديري؟!
غيثة: (قلبت واش كيدخلو عندها واخا كتمسحهم رجعت مسحت لفيديو حتى من Google photos ورداتو ليها) راني قلت ليك اصاحبتي راها غتولي مرت خاااي عرفتي الا هو ساق الخبار وعرف شنو عندك فالتيليفون فين توصلو اكترية راه رجع عصبي بزااف
…1: (عوجت فمها) اممم.. قوليلي اورطيغا مبقاش بان
غيثة: وعلاش تتسوليني انا
…2: هههه عاود تتنكري، راه كولشي عايق بيك طايحة فيه غير هو الزين راه مع واحد البنت تنعرفها
….1: للي خدامة فسونتر دابيل؟!
….2: هييييااااااااا باش عرفتيها!!
….1: لبارح هو حط plat فالانستغرام ديالو وحتى هي حطاتو فسطوري ديالها شي 5 دقايق مسحاتو
…2: التسليييييم منك ههه باينة كانت بايتة معاه
غيثة: (كتحاول متبينش واخا ملامحها تغيرو) علامن تتهضرو؟!
…1: عقلتي لبنت للي كانت فالعرس معانا فهرمومو للي بقاو كيظحكو قالو بحال شي ݣاورية ديك طويلة
غيثة: اممم
…1: اوا هي للي معاه
غيثة: مزيان.. شنو بانلكم نخرجو قنطت فالدار…
يوسف: (كيتسنى مو تخرج من الدوش جات لعندو نااافخة والشوفة ناقصة فيه)
بالصحة والراحة لالة الغالية
(مخلاتوش يبوس ليها راسها)
ههه راني بغيت غير نتزوج ماشي غنهرب
ام يوسف: شويني فيييك على تهرب واخا تمشي لفينما بغيتي وراك ورااك
يوسف: هه وشنو مقلقك؟!
ام يوسف: هاد الموضوع تجي تشاور معايا فيه انا اللولة نعرف اصل لبنت ومفصلها عاد تلوحو فالطبلة
يوسف: اممم وشنو اخر
ام يوسف: نهضر معاها نعرف كيف دايرة وكفاش تتفكر راه ماشي أي وحدة تستاهلك وتستاهل دخل لافامي ديالنا
يوسف: هوما عائلة محافظة معندكش كفاش ديري تهضري معاها حتى تصويرتها معنديش باش نوريهالك
ام يوسف: ياك!
يوسف: اه.. نهار الخطوبة ان نمشي شاء الله وتشوفيها وتهضري معاها كيف ما بغيتي
ام يوسف: دابا انا نبقى هاكا حتى الخطوبة واااخ ولكن شنو خدامة وشكون هي وبنت من وشنو كيعمل باها ومها وشنو وزنهم فهاد لبلاد
يوسف: هي مخداماش جالسة فالدار وهي بنت صفرو هادشي للي تنعرف عليها وبنت مأدبة وضريفة وماشية جنب الحيط
ام يوسف: صفرو!! هي شلحة؟!
يوسف: اه
ام يوسف: وفاين عرفتها؟!
يوسف: عرفتها صدفة وصافي
ام يوسف: لدابا معطيتنيش كلمة مقادة بنت من هي باها شنو خدام شنو عندهم وشنو لييهم
يوسف: عندهم الله ناس محتارمين مربينين بناتهم (جات تهضر ) لبنت رزينة وعجباتني وجاتني على الݣانة باها عندو قهوة هادشي لي عارف عليهم
ام يوسف: وشنو دابا انا باغيني نشري الحوت فلبحر
يوسف: هههه راه أنا للي غنتزوج ومغنشريش الحوت فالبحر غنشري بنادمة معاها راحة بالي ونستااقر وندير وليدات نخلي مرااا فالدار تربيلي ولادي وتهلا فية هادشي للي مهم عندي
ام يوسف: (بقات كتشوف فيه) لا انا هادشي مقابلاهش
يوسف: منتزوجش الوالدة؟!
ام يوسف: تزوج ولكن انا هادي معارفة والو عليها اصلها وفصلها ياقوت كنت تنعرف عليها كولشي السادة والفادة (شافت الابتسامة ديالو كتمشي) جيبها غير شي نهار غير شي سوييعة بعدا نشووفها وندي ونجيب معاها فالهضرة انا احبيبي قلبي عليك داكشي باش بغيييتك تختار للي تستاهلك
يوسف: انا عطيت الكلمة لباها السيمانة جاية غنمشيو ان شاء الله وانا عارفك مغتخلينيش بووحدي
ام يوسف: راني هضرت اولدي جيبها بعدا
يوسف: راه مغتجيش انا براسي متنشوفهاش.. اه واحد النقطة مهمّة انا كنآمن بالمكاتيب ولكن غتجيني قاسحة منك الا مشيتي معايا ومفرحتيش لية وحتى الا معجباتكش شي حاجة حتى نخرجو من عندهم عاد قوليهالي لبنت انا باغيها (وقف)
انا نقضي شي شغل ورجع غدا ان شاء الله نخرجو ناخدو صواب الخطوبة وبغيتك تكبري بيها… (باس ليها راسها وتم خاارج مخليها دااايخة تالفة ومفقوووووووووووصة…)
اورطيغا: (صونات ليه مو باش يجي يتعشا ضرووري مع العائلة كمل خدمتو طلع للدار حيت المحال قريب ليها دوش حايد ريحة لحم ودمايات لبس حوايجو للي أغلبية كيلبس سبوور تعطر ومشا للمدينة القديمة دخل كيبانلو العشا ماشي غير مع الدار تقريبا كاينة العائلة فيهم للي كيبغيه وللي كيكرهوو كما هو كيحس… بقا كيقلب على مو عارف القنت ديالها جالسة حدا الصينية ديال اتاي يعني مضطر يسلم على ديك القشلة كاااملة) الوالدة واحد دقيقة
مفتاحة: جلسو وهضرو هنا حدانا ماشي غير يسلم ويهرب
مينا: انا جايااا اولدي
مفتاحة: (بقات غير كتخنزر الوحيدة للي متشداتش ليها من بين عريسات خوتها وعرايسات العائلة كاملة والوحدة للي كتغيير منها كفاش كيبغيها خوها وحتى ولدها…) اتبقيييييييستر
اورطيغا: (كيهضرو بشوية حدا النافورة للي كاينة الوسط) مقلتليش كاين هادشي كامل
مينا: هادو راه عائلتك
اورطيغا: اشمن عائلة انا عائلتي هي نتي (خرجت عينها فيه) ووووالحاج وشفيق وشي حاجة…
مينا: شفتك بحلا مبقيتش تبغي تجي هنا ياك لباس؟!
اورطيغا: ممساليش الوالدة ممساليش (بانتلو شي تيتيزة بقا مسكاني فيها وكانت مور مو نيت باش متعيقش) شكون كاين هنا؟!
مينا: ولاد عم الحاج جاو من فرنسا
اورطيغا: اممم مزيان
مينا: شوف الحاج كيسول عليك بزااف ومعجبوش الحال منين قطعتي رجل
اورطيغا: صافي صافي انا غنبقى نتعشى عاد نمشي
مينا: اوا هكاك الله يرضي عليك، انا نتكلم لعمتك… (مشات مزروبة لداخل مباغياش تفوتها شي هضرة اما هو بمشيتو المخضرة للي مايلة “الهيب هوب” ماشي غير بتقاالة عندها وشوفاتو عليها وهي كتبسم وصل عندها نيشان سلم عليها بليبيز واخا مكيعرفهاش يمكن يكون شافها فصغر شي 2 دلمرات ولا 3 حيت مكيجيوش بزاف ومنين كيجيو هو مكيكونش تماك…)
اورطيغا: زين
ليلى: (ظحكها دارت شعرها من مور ودنيها) هه صاڤا!!
اورطيغا: (معندوووش مع الفرونسي) الحمد لله، معقلتيش علية؟!
ليلى: لأحححح
اورطيغا: اااححح اقلبي.. (بقات كتفرنس كيشوف فيها متبسم دايرة بحال شي ݣاورية زعورية والعنين زورق والطولة تفكر هاديك للي غتكون كتسنااه، غير هادي عندها هادشي طبيعي ولوخرا خادمة على راسها ولكن عندو مبدأ فراسو للي واجد هو هداك ميضيعش النعمة) اجي نوريك لاطيراس لفوق
ليلى: هه ديجا شفتو
اورطيغا: ماشي بحال كيف غتشوفيه معايا
ليلى: ههه اوكي (طلعو لسطح مكرهش يقولها انا نسبق ونتي اجي من موريا باش مبتبعولوش العين عاود ولكن.. دار يدو من مور ظهرها كيوريها بصبعو تبسمت لهاد الخفة كاملة لي فيه ضارت شافت فيه وكانو مقربين) معقلتش عليك
اورطيغا: (قريب منها) اورطيغا ونتي
ليلى: (باستغراب) اورطيغا!! سميتك هاكا
اورطيغا: انا نعاودهالك ازين بحال شي خرافة
ليلى: ههه
اورطيغا: هاد لبلان ديال اورطيغا واخا قلييل فين تنشرحو لشي واحد، فاش كنت صغير كنت باغي نحرݣ كنت طايش شوية درنا انا ولاد الحومة نطلعو لفنيدق مشينا لحدا باب سبتة بقينا عاصرين تماك تنتسناو شي دخلة ولا شي حاجة لسقو فيها وانا قاااني على واحد معاه شي صاحبو ولا معرفت حتى عرفت سميتو واحد شوية مشيت شديت فيد لݣاوري وهو بقا كيغوت علية وانا ت papi papi
(ظحك وهو كيتفكر الواقعة وحتى هي)
جاو البوليس ديالنا مفهمووش انا كنت تنقرى سبليونية شوية درت راسي ماشي مغربي وتنبكي ونطق شي كليمات والراجل تيقول ماشي ولدي تجمعو علينا داونا لبوليس عصرووني قلتلهم سميتي اورطيغا انا ولد هاد مع تصرفيقة اللولة ݣريت فكولشي وقلبتها عربية
ليلى: هههه
اورطيغا: صافي عطيتهم نمرة الوالدة جاو من فاس خداوني بقاو تيظحكو علية وتيعيطولي اورطيغا مطلعينها علية هكاك صحابي فاش عاودت ليهم لبلان وبقات علية سميت اورطيغا وحتى انا ولفتها
ليلى: هههه وعلاش كنتي باغي تمشي لاوروبا
اورطيغا: (دار يدو من مور ظهرها كيلعب بصبعو حيت مدارات حتى ردة فعلها انها مبغياش) ومزال باغي ولكن غير مسافرة
ليلى: امممم
اورطيغا؛ مهم شنو سميت الزين بعدا
ليلى: ليلى
اورطيغا: العربية عندك نقية
ليلى: ههه ضرووري هي باش تنهضرو فالدار وفلقرايا ضروري تنتبعو اللغة ديالهم
اورطيغا: مزياان.. (بقاو مجمعين تحت انظار للي كانت بعيييدة حضيااهم يدو مكيرساوش وحتى هي ستحلاتها خدا نمرتها وهبطو حيت ضرووري يمشي عند الحاج… دخل عندو المجمع رجال ومعندوش مع هاد جماعة جلس حدااه عطاه الرابور ديال الخدمة كما ديما حاول يتسلت ومخلاهش كولشي تجمع تعشااو وكيحس براسو بحال شي عسكري خاصو غير يدير الواجب عكس ولادو للي جالسين ظاحكين معليهم حتى مشاكيل فمحلاتهم عكسو هو للي كل مرة خارج مشكل…)
ملاك: (حيت باها بات هاد الليلة فبيت مها مقدرتش تدخل عندهاا بقات الليل كامل مديرونجية حتى جاها ميساج من عند حمزة فيه cc غير طلعلو الميساج وصل صونا فلبلاصة ناضت من فراشها دازت من حدا خديجة للي كتفرنس للتيليفون وهي كتميساجا وخرجت نيشان لسطح بلا حركة جاوبت) الوو
حمزة: واخيييرا
ملاك: علاش صيفطتي مك عندنا
حمزة: (كان متكي فوق نموسيتو) امتى؟!
ملاك: قبيلة
حمزة: شنو قالت؟!
ملاك: معرفتش شوف نتا؟!
حمزة: خفتيها تجي تخطبك!!!
ملاك: اه حيت مبغيييتش وعنداك تمشي ديرها
حمزة: علاش؟!
ملاك: مزال عندك الكمارة تقولي علاش؟! ياكما حسابلك احمزة انا كنتسناك غير نتا!!! دماغي عاااامر وخاطيني هاد تخربيق وتبرهيش
حمزة: أنا للي كنت كنتسناك وباقي كنتسناك عارف راسي غلطت ولكن بزاااف ولكن معطيتنيش الوقت نهضرو ونشرح ليك شنو بغيتيني نوقف فوجه با وانا براسي معنديش كفاش ندافع
ملاك: امممم قولي باااك هو لي… مهم معندك متشرحلي
حمزة: عندي وعندي بزااف ولكن منين جربت نبعد عليك لقيت راسي ضااايع ومستحيييل نعاودها ولا نخليك لغيري
ملاك: (تبسمت) مستحيل اصلا نعاود نعطيك فرصة واخا تقلب على راسك
حمزة: ههه نتقلب غير حني شي شوية
ملاك: موووووووستحيييل
حمزة: عفاك املوووكة والله مهنيت فراسي حتى دقيقة (سكتت) عطيني غير فرصة وللي آمرتي بيه وبغيتيه غيكون واهم حاجة غنسكنو بعيييد على كوولشي وللي رتاحيتي فيها هي للي غداااارر
ملاك: (بقات كتسمع تفكرت كلامو قبل مستحيل يخرج حيت غير هو للي عند واليديه ودارهم تقريبا بحال الدار فين عايشة يعني كبييييرة وباه مرفح) صعيب نعاود نتيق فيك ونتا اصلا مزال حتى مطلقتي صعييب نبني علاقة على ظهر وحدة نتا عارفني مزياااان للي منبغييهش لراسي منبغيهش لبنت الناس
حمزة: نتي عارفة هي للي بناتها على ظهرك
ملاك: لا نتا للي مكنتيش راجل معايا ولا بغيتي تفهمني نتا غير لعبة للي جات تلعب بيك
(زمتاتو بقا غير ساكت)
متبقاش تخربق علية فالهضرة احمزة
حمزة: ملاك سولي مي ݣاع انا دفعت لطلاق هي مسألة جلسات وصافي انا وديك السيدة كنا غير فصداع نتفاهمو نهار ونجلسو شهر مدابزين
ملاك: صداع ونتوما مزال مدرتو حتى العرس!
حمزة: مقدرتش نساك باش ندير العرس ونفرح
ملاك: للي سمعك يقول هاد السيد كان كيتسطى علية وهو على حساب حاجة ماشي شغلو فيها لا نتا لا باك حتى هو، تفارق معايا انا هاد الخزعبيلات مكدخلوش لراسي
حمزة: عرفتي … الحلم ديالي نولد معاك شي بنيتة و لا وليد (تبسم) وكان كنتي نتي ندير العرس وانا نهزك فالعمارية بالفرحة
ملاك: (تبسمت ولكن مكتبينش) اممم
حمزة: عطيني غير فرصة والله ثم الله انا معاك بنيتي كنبغيك بزاااااف املاك
ملاك: بسلامة (قطعت وبقات كتنقز بالفرحة شحال زوينة تلقاي للي يبغيك وتحسي بيها وحتى هي كيعجبها منساتوش 💯 رجعت حست داك الاحساس للي كانت كتحسو بيه معاه معرفت واش تيق ولا شنو دير ولكن مبدأ حتى يطلق بعدا.. رجعت كتسلت لبيت لقات خديجة مزال فنفس الوضعية)
خديجة: (شافت فيها ظاحكة) امم الناس ولاو كيتسلتو
ملاك؛ ،(مجاوبتهاش حيت تصنفات فقائمة الخائنين وصعيب تسمح ليها دغيا.. هي بغات غير اعتذار نااابع من القلب انها خبات عليها ولوخرا مكيناش فهاد العالم….)
رجعات كل صباح كتلقاه كيتسناها سوا كان خدام ولا لا متهنى حتى خلاها تبسم ليه ومبقاتش كتعايرو وتسبو فاش كتشوفو، وحتى التيليفون مكيقطعوش عليها رجع داك الحب والكلام زوين بيناتهم واخا مبينالو انها مزال مسمحاتلو وكاع الهضرة كتكون غير من طرفو، الا لدابا ماشي معاها مزيااان وتأكدت من مها انه كيطلق حيت جات مو كتعاود ليها انهم مبغاوهش يطلق ولكن هو والو مشا دفع فالمحكمة وزاااطم على هضرتهم كاملين هادشي زاد شجعها كتر وكتر وعاد عرفت ان حتى طليقتو متفاهمة معاه على طلاق..
صبحت فصباح مشات للمطار حيت ختها نعيمة غتجي بلا راجلها ونيت تحضر لخطوبة خديجة تلقات ليها وفرحت بزاااف ببنتها وكانو حتى عائلة راجلها معاها حيت غيمشيو لمكناس هو اللول عاد تهبط نعيمة ويلحق راجلها عندهم باش يحضرو للخطوبة ويرجعوو لمكناس حيت غيديرو سبوع… توادعت معاهم وبقات تماك حتى خلط عليها جا يسلم عليها بليبيز وهي تهز حاجبها فيه وهو يبعد كيظحك
حمزة: قلت زعما تنساي. لا تكوني موحشاني
ملاك: اش غنسى!!
حمزة: صافي مقلت والو.. ندخلو لكافي
ملاك: واخ ولكن منتعطلوش خاص نمشي نجمع حوايجي
حمزة: مزال راسك قاسح بلاش منها هاد المشية
ملاك: راه الخدمة والمشكل عطيت الكلمة يعني ماشي لعب دراري صغاار
حمزة: جاتني سيمانى بزااف وعلاش نتي بالظبط عارف ماشي من عوايدك تمشي
ملاك: اولا ماشي شغلك تانيا محتاجة نبدل الجو شوية وتالتا خاصني نبقى نخرج حتى انا
حمزة: اممم، من بعد ونتناقشو… الامور فالدار رجعت مزيان؟! (معاوداتلو والو غير استنتاج لحالتها كيف كانت وأصلا مو عوداتلو على المشكل حيت هي وزهرة صحابات)
ملاك: صاااڤا.. كولشي بيخير الحمد لله..(جلسو وبقات كتشوف فيه زوييين وهي كتحماق على الزين ليوضية وزعورية ديال شلووح ولكن مكتبينش وديما هازة خنافرها عليه) فين وصلتي مع مشاكل ديالك
حمزة: انا طالق كولشي للمحكمة للي جا يهضر معايا تردو وبقات جلسة وحدة حيت بزوج بينا متافقين
ملاك: ووو شنو ݣاع هاد المشكل للي يخليك طلق شوف يمكن تبقاو شي حل طلاق ماشي سااهل
حمزة: محبيتهاش.. مقدرتش نولفها فهاد المدة كاملة علاين عام واالو وديما صداع صدااع قلت نحدو هنا محد مزال مكاين والو بيناتنا
ملاك: وهي؟!
حمزة: تفاهمت معاها فهادشي قبل مندخل للمحكمة والفلوس للي طلبتها غير يخرج صداق غنعطيهم ليها
ملاك: اممم.. اشمن فلوس
حمزة: فلوس بغات فلوس.. مكيهمش الا دوك لفلوس نشري بيهم راحت بالي جمونفووو
ملاك: اممم
حمزة: (شد فيدها) انا باغيك نتي املاك
ملاك: (شافت فيه ببرود) حايد يدك احمزة (جبدهم متبسم وهي عكسو) اخر مرة
حمزة: مزالة قاااسحة
ملاك: انا ماشي سايبة
حمزة: اممم نتي لالة لبنات ولكن واحد الديكور معجبنبش منك املاك ومبغاتش يتهضم لية
ملاك: (حط الݣارصون الطلبية) ها لما جا، شرب ودوزوو
حمزة: تنهضر بالصح
ملاك: انا حواااااااايج هوما الا نتا عندك غير حاجة وحدة، وإيييلا بديت نهضر مغنسكتش ومغنوصلوش لشي حاجة مزيااانة (تبسمت) اللهم خلي البير مغطي
حمزة: ههه صافي صافي انا ساااكت (كان هاز ساشي حطو فوق الطبلة) غنساافر سيمانة ولا كتر على حساب سطاج يعني راس العام مغنكونش هنا
ملاك: شنو هادشي
حمزة: بتي كادو وصافي مترديهاش فوجهي (شدت الساشي بابتسامة طلت بعينها كانو بزاف دلبواطات وحطاتو جنب الكرسي) ميغسي واخا مكانش عليك تعذب راسك
حمزة: مكرهتش ندوزو معاك (زفر) عرفتي وكان كنتي نتي للي مرتي نسمع فسطاج وفكوولشي ونكون معاك
ملاك: ههه فالسبعيام دلباكور اه سمعتك، ولكن الايام لوخرين متنظنش
حمزة: ههه خاصنا نزربو
ملاك: وشكون قالك غنرضى بيك مزال مقررت لصلا شنو ندير معاك (وقفت) مهم انا خاص نمشي
حمزة: مزال الحال مشربتيش حتى عصير ديالك… شربيييه عاد سيري……..
ملاك: شربو نتا نييت
حمزة: بحال متقتيش فية؟!
ملاك: مهم تعطلت احمزة ضرووري خاص نمشي
حمزة: توصليني فطريقك؟!
ملاك؛ ومخايفش على عمرك
حمزة: موت وحدة للي كاينة اللهم معاك
ملاك؛ هههه بسلامة (هزت الساشي واخا بقا كيعيط ليها مضارتش عندو حتى بعدت دارت ليه باي باي من لبعد وكان متبسم حيت عارفاااه جاي بطموبيل حتى هو، وهي كتدير الماكسيمو باش متكونش شي خلوة بيناتهم حيت مزال معارفة راسها شنو بغات واخا تلاقاتووالا مزال غصة فقلبها من جيبيهتو… ركبت فطموبيلتها قلبت الساشي كتجبد بواطات وحدة فيها باغفان Si rouge باينة دوريجين، بواطة عامرة شكلاط والتالتة كانت طابليط Samsung تبسمت حيت كانت كتقولو فالليل كتبع المسلسلات والتيليفون كيديرونجيها مكتفرجش على خاطرها،
والرابعة كان فيها فنجال ديال القهوة مستيلي مكتوبة فيه Malak بالغطاية ديالو والطبسيل ومعلقة صغيرة ذهبية عجبها بزااف ردت كولشي اللور جبدت شكلاطة كلاتها وشدت طريق صونا عليها يوسف جاوبت وهي كتصوݣ)
وي
يوسف: شحال تتلبس خديجة فرجليها
ملاك: (عرفاتو كيتقدا ليختها حيت دايرين الخطوبة بعد يوماين) اممم 39
يوسف: ونتي؟!
ملاك: مالي انا؟!
يوسف: شحال تتلبسي
ملاك: وعلاش كتسول
يوسف: وهضري دغيا (مبغاتش) ملاااااك
ملاك: مفهمتش علاش كتسولني
يوسف: دابا غير قولي
ملاك: (مشقلبة عينها) 36
يوسف: هههه بورطكلي وصافي
ملاك: هه بحال داكشي نيت
يوسف: ياله شوية ونصوني عليك (قطع رجع عند مو كملو تقدية ديال الخطوبة للي كانت ديال لفرييع حتى من الحنة تمر معمر الفاكية كولشي خدااوه مقاد مصااوب من الملاح.. واخا مو متقبلاتش ولكن مسايراااه تموووت وتعرف شكون هادي للي لاسق فيها ومضيع خاطر مو.. تمو ماشيين للدار)
ام يوسف: علم الله فهادشي للي مزطمني فيه ايوسف
يوسف: ههه لعروسة لية نتي علاش غتزطمي؟!
ام يوسف: كفاش لعروسة ليك اشوينيييفيييك على هضور نتا مخبعها علينا مقدرتي لا توريها لا تجيبلي اصلها وزايدون واخا تكون مرتك راه غتولي مرت ولدي يعني عرووستي
يوسف: اصلها قلتو ليك مفهمتش شنو باغية تعرفي كتر ان شاء الله تعاشريها وتعرفي كولشي
ام يوسف: حتى يوقع الفاس فالراس؟!!
يوسف: اعوذ بالله، الله يهديك الوالدة انا داخل على زواج على لحلال ماشي داخل الحرب
ام يوسف: زواج والحرب بحال بحال بزوج بيهم خاصك تخميمة والف تخميمة
يوسف: حتى هاد السيدة راه خممت وخممت عاد نوييت وتقدمت ليها
ام يوسف: (مخسرا كمارتها معاجبها والو وصلو للدار دخلو شنو جابو بمساعدة المساعدة لي عندهم كولشي وااجد) اوا دابا شنو منعلمش لحباب
يوسف: فهاد الخطوبة غنمشيو غير حنا والحاج بنسليمان حتى نتفاهمو مع الناس على العقد وديك الساعات للي بغيتيه ديه
ام يوسف: والعرس؟! راه هضرتك مغتمشيش وليييد وااحد للي بقالي غنعملك العرس بغيتي ولا كرهتي
يوسف: هديك ضياعة دلفلوس زايدة فية وفديك بنت الناس
ام يوسف: مالك نتا مخصووص!! هي للي جايبها منعرف منين وحتى الخدمة مخداماش
يوسف: لا حول ولا قوه الا بالله العلي العظيم عاود!!! مهم انا خارج نمشي نطل على الدار واش كملو صباغة تبغي شي حاجة
ام يوسف: بغيتك غير دير عقلك هاد الساعة…
ملاك: (دخلت للدار نيشان لبيت مها لقاتها كتشوف الحلوة وتقلبها حيت عطاتها لشي وحدة للي قداتها ليها) ماما
زهرة: بنتي جيتي؟! تلاقيتي ختك نعيمة؟!
ملاك: (عاوداتلها كولشي ومتحمسين ومتشوقين امتى يشوفو حفيدتهم وحتى بنتهم للي غيجيو نهار الخطوبة، جلست حداها باغية تسولها حيت منين كانت جاية قشعت نجية خارجة من عندهم عاود) حقا قبيلة شفت نجية خارجة من عندك؟!
زهرة: فوقاش؟!
ملاك: عاد شوية منين كنت انا داخلة، واش صافي رجعتوو كتهضرو بحال اللول؟!
زهرة: اوا الله يسااامح الدنيا مدايمااش الواحد ميشدش فخاطرو ويمكن قبيلة غير جات جابت شي حوايج وصيتهم عليها مشفتهاش
ملاك: اممم وياك راجلها مبغانااش
زهرة: راني قلت ليك ابنتي هي معليها والو وراها غارقة مع شي مشاكل ديال ولدها وطلاقو، مهم شوفي سيري خرجي تسخريلي لعند مبارك مول لمااعن باك راه وصااه ناخد للي بغيت ومنها جيبي شي كيسان ..
ملاك: و ياله خرجي نتي وختاري شنو بغيتي ولا مزال باغية دفني راسك فهاد الحبس
زهرة: هههه واش لمك معييتيش ونتي كتخرضيني على باك
ملاك: مكنحرضكش بغيتك تخرجي حتى نتي تشوفي وتختاري للي بغيتي تشمي شوية ديال لهوا
زهرة: راه الجلسة فالدار أنا للي شرطتها ولا نسيتي، سيري وديري معايا ابيل فيديو جيبي داكشي زويين وعنداك تدي ختك معاك خليها تقاد حالتها
ملاك: لا منديهاش (خرجت من تماك مخدات حتى شي حاجة مفيدة من عند مها يعني مهضرش عليها… مشات هزت طموبيلتها، ودارت شنو قالت ليها مها ودازت تقدات شحال من حاجة رجعت كان ظلام الحال غير وقفت وقف عليها باها مخنزر مزال الاجواء بيناتهم مكهربة بزاااف)
حم بابا (باستلو يدو)
تسخرت لماما
رشيد: (كان ديجا معصب من نفور مرتو اتجااهو) اخر مرة تخرجي بلا شواري
ملاك: راه تقديت لماما ماشي خرجت كنتسارا
رشيد: ومزال زايداها بتخراج العينين
ملاك: (خرجت عينها) مخرجتهمش
رشيد: (بعصبية) تحركي للدار ولا نعميهم ليك
ملاك: راه عندي تقل نهزو بوووحدي
حمزة: (كان جالس فالقهوة مع صحابو نااض من بعد محضاهم باين باها كيغوت وكيشوفها بوحدها كتخرج تقدية من الكوفر)
رشيد: لا مزيان تبارك الله والله يا مك هاد الخدمة للي مزيغاك نخرجك منها ونجلسك فالدار نوريك تخرجي تكري
حمزة: السلام عليكم عمي رشيد كيعيطو ليك لدااخل، (رشيد داير يديه من مور ظهرو مخنزز من بعد معصبااتو بردان الهضرة للي ولا فيها بزاف وعاد ضدو فقضية مها)
حم كاين فاش نعاون
رشيد: غير سير اولدي انا غتوصل مع هاد جدام السخرة للدار
ملاك: (مراضيااش كانت باقية كتخرج من الطموبيل كريطنات الكيسان)
حمزة: بحال بحال اعمي رشيد انا اصلا كنت ماشي للدار نوصل معاها (بقا كيهز معاها خلا ليها شي حاجة خفيفة زدحت باب الطموبيل وتمت ماشية حمزة كيشوف فباها للي دار مخنزر من صوت الضربة بقا كيݣمݣم عارفها فلييفلة مشا من موراها غير ضارو الحومة فين ساكنين)
حمزة: سسس اديك شنيييولة
ملاك: بعدني احمزة
حمزة: مالكي مع باك عاود؟!
ملاك: يمشي يزمر
حمزة: اهيااااا شوية دالاحترام!!!
ملاك: نتا وياااه سيرو تزمرو الا لقيتو فييين (بقات كتزرب وهو معذب بتقل وحاول غير يوصل لعندها وشدها حدا باب الدار) حيد احمزة متمرضنيش حتى نتا عاود
حمزة: شنو وااقع
ملاك: واالو غير معرفت بنتلو فديك العصاارة عاود وجا قااصدني انا خرجت نتسخر لماما..!!!
حمزة: نعلي الشيطان املاك كما كان الحال باك هداك
ملاك: ونتا مااالك!! وزايدوون انا وبابا ونتا اش دخلك
حمزة: هه (بحرا كيشوفها مع قصيرة وتقل للي هاز) داك لسااان..
(هزت راسها فيه بتحدي)
خاااصو شي م (تحل لباب وخرجت خديجة) حم (رجع مبعد كتر)
خديجة صاڤا!!
خديجة: (تبسمت) الحمد لله اخويا حمزة ونتا لباس عليك؟!
ملاك: صافي احمزة شكرا حط داكشي حنا ندخلووه
حمزة: (مسمعش ليها دخل حطو فوق لبلاكار للي حدا لباب دسبابط وشي لاخر فوق الكرسي تم خارج شاف فملاك)
انا نهضر بلاتي معاك، جاااوبي..
(خنزرت فيه مابغاتش خديجة تعرف راه رجعت معاه وهي اصلا مزال كتفكر، دخلت وهو بابتسامة ودع خديجة للي عجبها الحال مع دخلت لقات مريم وولادها تماك جلست عاونوها فالسخرة وجات مها كتقلب كولشي جاها هو هداك وكانو الترتيبات مقادين وجدو كما كيوجدو لأي خطوبة من قبل من ديما كيبانو فمستوااهم مكيتكلفووش ومكيفرطوووش…)
يتبع
التعليقات 0