اورطيغا: (ناض من نعاسو كان محتاج هاد الحمام بزاااف حس بعظااامو تقاادو وخفافو علييه شاف فالساعة كانت 11 من 9 وهوما كيصونييو علييه د الحاج أمينة شريف غيثة… ناض دار روتينو الصباحي صلا صلاتو لبس مزياان دار كاسكيط والقب الفوق وخرج هاز التيليفون) فييين
شريف: (كانو خرجو يتمشااو فالارجاء) حنا خارجين
غيثة: فاق؟! عطيهلي
شريف: هاك غيثة (عطاها التيليفون)
غيثة: من قبيلات وانا تنصوني عليك!
اورطيغا: ياله فقت ازين
غيثة: اممم وشنو غدير دابا؟!
اورطيغا: غنفطر من موراها غنمشيو فحالنا
غيثة: صافي واخا، مهم أنا نركب معاكم زعما غير باش نخليو العرسان ديالنا على خاطرهم.. بسلامة (ردات ليه التيليفون) كملي حيت هي قبيلات صونات علية قالتلي زعما باش نهضر معاك من تيليفوني ونحطك امام امر الواقع مبغيتش حتى نقولهالك
شريف: مزيان منين مدرتيهاش
غيثة: واش صافي متصالحووش؟! نتا وخويا تفارقتو مع صحابات دقة وحدة
شريف: المكاتيب ولكن هو بعدا دابا طاح على بنت الناس وعائلة مزياانة
غيثة: اه بالصح المهم يكون مرتاح معاها عقبال ليك حتى نتا
شريف: ونتي منفرحوش بيك
غيثة: (زفرت بتيسيمة) دوك للي تيجيو معرفت ماااا متيعجبونييش
شريف: وعلاش؟!
غيثة: انا مكرهتش شي رااجل للي نكون معاه وحاسة بيه غيحميني ديال بالصح يعني يمووت على قبلي متتهمنيش المادة قد ميهمني يكون رااجل
شريف: اممم لالة غيثة كبرااات
غيثة: ههه غير نتوما للي حاݣريني
شريف: لا لا محاݣرينكش ان شاء الله مزال يجيك للي تبغي خااطرك
غيثة: ولكن يوسف متتعجبو حتى حاجة تنديرها ورجع تيريكلتمي على كولشي حتى لباسي ومع صحباتي واصدقائي وحتى الخروج ودخوول
شريف: هو من خوفو عليك شتي يوسف قيسو فعينو ومتقيسوش فغيثة
غيثة: (تبسمت) وحتى انا تنبغييه ولكن راه رجع تيقولي عمل الفولار
شريف: ههه مزيااانة فكري فيها
غيثة: شريييف حتى نتا!!
~~~~~~~~~~
اورطيغا: (داز خدا فطورو زائد ووصا على جبانية ديال البيصارة و4البيضات بالخليع ومشا جهة ديال مو حنا باس راسها) زييين
أمينة: هدا هو اختي زهرة ولدي
زهرة: تبارك الله
اورطيغا: (من بعيد) السلام عليكم خالتي
زهرة: عليكم السلام اولدي
أمينة: هادي ماين خديجة مرت يوسف
اورطيغا: مشرفين اخالتي
زهرة: الله يبارك فيك اولدي
أمينة: واش هاد نعاس احبيبي؟!
اورطيغا: نهار العطلة هدا الوالدة، اش نفيق ندير مع النبووري!!
أمينة: وسير فطر احبيبي باش نمشيو (مشا شاف ملاك جالسة حدا الزاج كطل على لابيسين دار للسرباي إشارة يجيبو لطبلتها مع جلس حداها كانت خاشية فمها خبز فيه البيض والأمهات طرطقو العينييين)
احااي!!
ملاك: (بقات كدور عينها وشاف فيها زعما شنو!!)
زهرة: (حاضية لباب الا دخل باها مكاينش للي يفك ومغيحشم من حد وهو غير حدا لباب كيهضر مع فاطمة)
أمينة: (اخر حاجة تبغي هي تعايب مع هاد الناس للي عجبووها ورتاحت معاهم وعارفة ولدها غير زااهي وكاع لبنات ديالو..)
ملاك: (كملت لمضيغ ودوزت جغمة بأتاي شافت فاتجاه مها للي دارت ليها إشارة بعينيها مخرجاهم تنوض من تماك) يييخخ غير محرمها علية
اورطيغا: (تبسم فاهم لبلان وأصلا عارفها غتنوض) بالصحة ازين
ملاك: يوحل ليك فركابي
اورطيغا: (غمزها) يفوت غير المعدة ويوحل فينما بغاا (خنزرت فيه مغددة وزادت مشات خرجات لبرا مشابعااش دورت عينها كتفكر الحساب على باها اصلا، عيطات لسرباي دموندات كريب بالشكلاط وعصير مونغ يجيبو ليها برا.. اما هو بدا ياكل حتى سمع ميساج قلب بيدو كانت تحت سربيتة من جيهة فاش كلات ملاك مسح يدو وهز التيليفون مدايرا ليها لا الشيمة ولا الكود دخل لميساجات نيشان كيمضغ قراه)
“غنجي لعندك لفاس، بغيتك غير تعطيني فرصة نشرح ليك”
اورطيغا: (لوا شنايفو وخرج من لميساجات حتى جاه اخر)
“براسي مكنت عارف والو وكل كلمة قلتها ليك كانت خارجة من قلبي، كنبغيك املاك غير سمعيني وعطيني فرصة غنشرح ليك كولشي وغتفهميني”
اورطيغا: (تبسم طاانز)
باقي الصاط شي حد تيتعنب هاكا!! طيحتو الدل علينا..
(مسح دوك الميساجات وبلوكا ديك النمرة ورجع التيليفون فين كان مكمل فطورو حتى شافها جاية مخنزرة مقصدااه مهضرش معاها وهي خدات تيليفونها ورجعت بلاصتها كتصور داكشي لي دموندات وهو دار كيشوفها دايرة جلسة تصوير للعصير ولكخيب تبسم وضار مكمل فطورو…)
~~~~~~~~~
الغالية: (بغات تنفارد بخديجة ووالو صونات على ولدها يجيبها عندها ومبغاش بحجة خاص تمشي مع واليديها عندهم شي شغل رجعت صونات على بنتها للي كانو راجعين فطريق) فين خاااك؟!!!!
غيثة: (طالع ليها الدم مخلاهاش تركب مع اورطيغا) ها هو صايݣ
الغالية: جاية معاكم هاديك؟!
غيثة: خديجة!! لا هوما مشا لصفرو
الغالية: (زادت تفقسات) مزيااان (قطعت وبقات سير واجي مابغاتش تصرط ليها مطلقة وكبيرة فالعمر وعاد لسانها طويييل حسابلها غتغلبها بالهضرة ساعة حتى لوخرا بخبيزتها ودافعة كبييير)
علاه مالها متكون بخبيزتها وهي مطلقة وداية وجايبة فالوقت ايييييه اولدي شحال رغبتك وهانتا غتفهم علاش محملتهاااش من اللول!!
اب يوسف: تهلا اولدي راك طحتي فنقرة نسااب الله يعمرها داار
يوسف: بالصح
غيثة: خوتاتها كولهم حلوة وحدة تنسيك فلوخرا واكترية مريم
يوسف: متنعرفهاش بزااف انا تنعرف غير ديك البرغووتة
غيثة: ههه رجعو دابا عندك جوج برغوتات ولكن من هنا بلاصتي متاخدها حتى وحدة
يوسف: لا لا نتي لالة غيثة بووحدها وحتى ملاك عندي عزييزة (شاف فباه) فيلسوفة تتمشى على رجليها
اب يوسف: لا تبارك الله البنات بعقلهم وباهم رزييين
غيثة: شنو زعما انا متتشكروش فية ݣاع هاكا!!
يوسف: ههه بدينا!!
غيثة: اوا شوية هاكا وشوية هاكا
يوسف: نتي راك بزااف منهم ݣاع ههه سمعت الحاج بنسليمان تيعرضهم
اب يوسف: اه عرضهم عتاذرو قالو مرة أخرى
يوسف: يعني حتى هوما بغاهم؟!!
اب يوسف: معلووم.. ناس فالمستوى
يوسف: سبحان الله كولشي بغاهم الا الوالدة صباح صيفطاتلي ميساج دوختي مفهمتش مالها معايا الا بقات هاكا انا بناقص علية من داك العرس للي يكون مخبع فيه السم مع العسل، من ديبااار انا مابااغيش
اب يوسف: دابا نهضر معاها اولدي
يوسف: الله يهديها وخلاص….
وصلو لصفرو دخلو مسخسخيين زهرة نيشان مشات عند أنير توحشاااتو بقات كتراري بيه وملاك غير مخنزرة فيها لدابا مقرباتوش.. خاصمات عليهم سهام حيت حتى هي بغات تمشي لمولاي عقوب ووعادوها يعاودوها على حسابها مرة أخرى..
خديجة: (دخلت بيت مها تجاوبو واخا هي تماك حيت مقدرتش تطلع لسطح وخصوصا مخاصش البرد يقيسها..) يوسف!!
يوسف: حبيبة كيف وصلتي؟!!
خديجة: الحمد لله ونتوما وكيف لقيتو خالتي الغالية
يوسف؛ صاڤا الحمد لله صرااحة كنا محتاجين هاد الحمام
خديجة: ااااه
يوسف: المرة جاية نمشيو الراس فالراس باش نحكلك وتحكيلي
خديجة: ههههه اممم
يوسف: حداك شي واحد
خديجة: اااه
يوسف: حقا ملاك غترجع لفاس؟!
خديجة: اه غدا قالت لينا غترجع مزال عندها الخدمة تماك
يوسف: مزيان باش متقوليش لية لااااا وكدا
خديجة: ههه علاش؟!
يوسف: وشكون يعمر الدار غتبقاي مع خييتك منين نكمل الخدمة نخرجو نشوفو داكشي للي نااقص
خديجة: اممم وقولها لبابا
يوسف: اه.. اه ضرووري ناخد إذن نسييبي وانا نقدر ندير شي حاجة بلا بييه
خديجة: ههه بحالا كطنز
يوسف: ههه لا ولكن ههه عاجبني هاكا مزيان صرااحة هاكا غتربيلي بنتي وولدي ياك ياخدو مني الإذن اكترية البنت وديرلي قيمة
خديجة: (تبسمت) بجوج بينا نتعاونو
يوسف: اااه ولكن نتي بزااف نتي غتكوني معاهم فالدار كتر مني انا
خديجة: ان شاء الله
يوسف: اوا شنو تديري
خديجة: والو جالسة حدا ماما وأنير
يوسف: زوينة هاد سمية شلحة!!
خديجة: اه
يوسف: شنو تتعني؟!
خديجة: بحال تقول بالعربية أنوار ياك أماما (حركت راسها باه) بحال تقول القمر ولا الهلال النور بحال هاكا
يوسف: طرباتني
خديجة: اممم
يوسف: ياله حبيبتي حتى تكوني بووحدك نكملو فالواتس.. (قطع معاها وهبط من بيتو كانت مو جالسة مع ختها مهضرش نيشان مشا لبلاصة التلفازة جالس كيتفرج)
الغالية: (بغات تصالحو)
ولدي خاصك تمشي باش دموندي على القاعة ماشي حتى يقرب العرس ويبقاو يتفرعنو علينا
(حرك راسو باه)
ونتا تكلف بدراري ديال عيساوة ودقايقية والفرقة راه فيهم صحاابك يااك!!
(غير كيحرك راسو)
خاص خديجة تجي باش نمشيو لعند النݣافة تختار لحوايج ولمشيطة.. وعاد خاص نمشيو للخياط ندفعو دهاز باش بحرا يوجد
يوسف: ان شاء الله
الغالية: (شافت فختها وهضرت بشوية) شفتي!!
الخالة: اوا هادشي للي تيخلي لولاد يهربو عند عيالاتهم وينفرو موااتهم حتى نتي سايسي ورديه لعندك ماشي هربييه يبقى بعدا حاط الرأس عليك وتبقاي نتي الري وشوار..
أصبحنا وأصبح الملك لله…
ملاك: (فاقت معطلة شوية واخا فطرو حداها وصداع الا كانت مرخية مقدرتش تنوض حطت ليها خديجة لفطور بقات كتاكل وتفكرت بلان اورطيغا لبارح تبسمت بلا متشعر واكتر حاجة مفرحاها هو رجوعها لفاس وزوينة المدير عجباتو خدمتها وكانت عندها بريم..)
خديجة: ملاك، يوسف بغاني نجي لعندك باش نبقاو نخرجو نتقداو فراش الدار
ملاك: شوفي مع بااك!!
خديجة: ونتي تبغي؟!
ملاك: (عيبتها) ونتي تبغي؟! وتي سييييري من داك تخربيق ديالك حسابك انا هي نتي
خديجة: حشومة عليك شنو درت انا
ملاك: ههه (بغات تهضر وهي تسكت اصلا مزاجها زوييين متحتاجش ضيعو) مهم نتي شوفي مع بابا
خديجة: بيناتهم هو ويوسف انا قلتلو تفاهم مع بابا
ملاك: مزياان.. (جاها ميساج من عند وفاء كتسولها امتى تجي) حقا فكرتيني قول لماما تقادلي فطوايص داكشي درفيسة
خديجة: على حساب صاحبتك
ملاك: اه.. (تغداو بقاو مجمعين طلعت لسطح تجيب حوايجها شافت فسطح دار حمزة تبسمت مكتحس بوااالو!!!) ناااااااااري انا مكربيش الكبدة اه اه شحال خايبة انا هههه..
(هبطت كظحك حتى كتشوف يوسف جا زادت ظحكت ووعرفاتو طااايح فختها مبقاش كيخوي من عندهم وفلحظة تفكرت ان فاس مغتبقاش فيها ديما، غترجع سوا من بعد سيمانة جوج او تلاتة وختها غتزوج وترجع للدار ولحياتها لقديمة المملة وتبقى تعصب غير بوحدها ودابز على السداري للي حدا السرجم وتسناهم يخويو باش تنعس، رجعت لسطح فثانية تقلب مزاجها اول واحد جا فبالها هو اورطيغا واخا معندهاش معاه او يمكن #مكانش عندها معاه الا كيفوج عليها كيخليها بعدا ناسية مشاكلها ماشي بالضرورة بظحكو ولكن حتى بطنيزو مدابزتو مهم كيلاهيها.. وحتى يوسف غيتشغل مع مرتو وهادشي طبيعي ميمكنش يبقى مقابلها راه الوحدانية للي كانت كتخليه معتابرها صديقتو متقبلة منين غيتزوج غينقص شحال من حاجة وختها للي واخا كانت هازة من جهتها وكان عندها موقف كبييير وصل لحوايج خايبين الا كانت مونسااها عاود شافت فسطح حمزة لقات براسها كتحس غير بالكره وصافي.. معرفتش شنو دير باش تعطي لراسها طاقة ايجابية خممت وعاودت خممت مزيان حتى قنعت راسها انها غتبدا القرايا فلفاك وغتحجج الويكاند ديما دوزو ففاس تجيب بوليكوبات ومرة فالسيمانة تهبط واخا مصاريييف ولكن ااااامممممم تبقى مع وفاء (دارت ابتسامة عريضة) غير مع راسها كتقاد مزاجها ..
سمعت كيعيطو ليها تبسمت ها هي لقات لراسها مخرج ميمكنش تدفن راسها فصفرو بين الخدمة والدار.. هبطت هازة حوايجها دخلت لبيت مها حطاتهم تماك حتى كتشوف أنير فايق ويديداتو كيتحركو مكيبكي مواالو قربت لييه كطل عليه مزال صغيييييور بزااف زعيعر وعويناتو زوورق كيشوف فسقف حتى ظحك حلت عويناتها هازة حواجبها كرد فعل لأي واحد كيشوف ملاك كيظحك تبسمت ورجعت دغيا جمعتها)
خاينها مع وحدة زعرة ويجي يقول (كتعيبو) ندمت حتى عضيت فالحجر الله يمسخك ونتا كنتي متع راسك بزعورية وتجي ديرلي فيها فقيه وتقول بايت فالزاوية (خلعها منين طلق غوتة)
اويلي تاااا ماالك.. (شافتو رجع حمر كيتعصر ويبكي)
ويلي الشيييطاان غيقولو غير قرستك (ياله بغات تهبط من النموسية تبعد دخلت مها)
زهرة: شنو درتيلو؟!!
ملاك: والله ما انا والله مقستو (ضربتها لكتفها) والله مقستو زمر كدااير والله مقستو
زهرة: خرجي لمك (خرجت كتلقى يوسف وباها جالسين فوسط الدار حسابلها جالسين فالصالون)
ملاك: سلام
رشيد: ضربتييه؟!!
ملاك: (خرجت عينها مرضاتتش واكترية يوسف للي شاد الظحكة) مقستووش
رشيد: (جنو وجنونو تخراج عينيها) هه حسن علوان هاد الولد راك عارف مع صغيرة مبغاتش للي ياخد ليها بلاصتها
ملاك: ايخااان لوااه (قالتها فنفسها قوست عينها فيه باينة كتقول كلام مقادراش تقولو بفمها للي خلا يوسف يظحك خنزر فيها باها وهي كتشوف فيه هكاك وهي ترجع للبيت كتحيح وتنݣر ولكن بصوت خاااافت باش ميتسمعش ولكن كتحرك يدها راسها تجننات…)
رشيد: صافي اولدي شي يوماين ونهبطها لفاس
يوسف: (كان بغا يديها معاه ولكن صوابهم ومعقولهم مقدرش يهضر) مرحبااا اسي رشيد
رشيد: انا نيت غنهبط خاص نجيب شي سلعة (بصوت خافت) وان شاء الله عندنا شي تسافيرة (رفع صوتو) هبط باك واجيو تقهواو عندنا وحتى الحاج بنسليمان
يوسف: اهاااه ضروووري اسي رشيد غير دابا راه مشطونين مع العرس وتوجاادو، (وقف) انا غنمشي يمكن ملاك غتدي طموبيلتها اما نوصلها معايا
رشيد: غتديها على حساب الخدمة ونيت متبقاش كتسنى فالطاكسيات وتعذب
يوسف: اه داكشي نييت (خرجت زهرة أنير وخديجة حطت اتاي وحلاوي والفاكية جات مرت حنينهم ومرت عمهم بقا شاد أنير كيلعب معاه وحداه خديجة مقشبيين طلعو لسطح دارو سيلفي بتلاتة وعاطيينها للظحك وجمووع
اما ملاك كانت غضبانة فبيت مها كتسنى يوسف يمشي فحالو باش حتى هي تمشي..)
~~~~~~~~~~~~
تلقاو فدروج هي طالعة وهو هااابط
وفاء: عاش من شاااافك فين غابر مبقيتيش جيتي هنا ݣاع
اورطيغا؛ بقيت فالدار لوخرا
وفاء: (جات تقيسو فوجهو وهربو جمعت يدها) الحمد لله راك بريت وحتى العين مبقى فيها والو
اورطيغا: ونتي درتي عقلك شوية!!
وفاء: عفاك متفكرنيييش راني متبعة مع طبيب
اورطيغا: معاودش تعرض لييك؟
وفاء: هددتو فالتيليفون يعاود يبان نمشي نديكلاري بيه كرهتو وكرهت الشوفة فيه ونهار للي تلاقيتو فييه
اورطيغا: حسن، ياله تلاحي
وفاء: حقا اليوم غترجع ملاك
اورطيغا: اممم (تم هابط فدروج معلابالوش وهنا تأكدت ان مبيناتهم واالو متسوقش اصلا شحال مبقى عمر هنا فدارو ولا حتى سول عليها.. طلعت لدارها صونات على ملاك لقاتها قربت تدخل للحومة… مشات للبيت حلات السرجم باش يتهوا البيت وكانت ديجا مخملاه ومبدلة الكوڤر والوسادة خير ملاك عمرها تنسااااه..
عطرات الدار وحطات عصير وشي تخربيق فوق الطبلة حتى سمعت لباب كيتحل مشات عنقااتها ودخلت معاها حوايجها هاد المرة جابت باليزة دايرة حساب الدار ماشي لوطيل جبدت ليها حقها من الحلوى ديال سبوع وكانت معا طيبت ليها ملاوي كيكة قراشل وجابت رفيسة سخنوها هي وبداو كياكلو مجمعين كتعاود ليها الجديد وأنها بدات حصة مع طبيب نفساني..
صونا عليها يوسف للي شد عليها انها غاارت من خوها وهي كتحلف مدارت ليه واالو حتى قلبوها ظحك عاود ليها انه كان باغي يجيب خديجة ولكن فشل يقنع نسيبو يعطيه بنتو ظحكت عليه بقاو مجمعين حتى بغات تمشي تنعس باش ترتااح… عيا معاها باش تمشي معاه للدار ولكن مابغاتش بحجة أنها كتحشم ولكن هي مكترتاحش لمو للي منين كتشوفهم وهي كتشوف فيهم بشوفة دنيوية وهي مغتقبلش على راسها يتقلل منو ومن جهة كاين يوووسف للي غدير بوجهو اللهم متمشيييش….)
اصبحنا واصبح الملك لله..
فاقت معطلة دغيا لبست حوايجها باش تمشي للخدمة ركبت فطموبيلتها ومشات نيشان لتمااك دوزت وقتها خرجت مع 2 صونات عليها غيثة مجاوبتهاش خافت تقولها تجي للدار عاودت صونات جاوبت ومصممة تقول لا هي ل..
ملاك: وي غيثة صاڤا!!!
غيثة: الحمد لله احبيبة غتكوني جيتي لفاس ياك
ملاك: اه
غيثة: الا بغيتي نتلقااو نتغداو الا كنتي مزال متغديتي
ملاك: اهاااه مرحبا فين كاينة؟!!
غيثة: نتي فين!! انا فالسعادة نصيفط ليك لوكاليزاسيون؟!
ملاك: واخا انا فالأطلس مهم غير صيفطي.. (قطعت) نااري هاد فاس شحاا فيها دالمصااريف واقلة نعيط ليوسف يجي يخلص!! لا لا اويلي حشوومة مجايااش ݣاع
(مشات للݣيشي جبدت فلوس وهي حاضية جنابها) الرعب…
(ركبت فطموبيلتها دايرة أبليكاسيون #ويز باش تديها نيشان البلاصة ومن طريق مختاصرة ومعامرااااش)
~~~~~~~~~
اورطيغا: اهلان اهلان اهلان بالزين دالعالم
غيثة: (مفرنسة بدلع) salut
اورطيغا: (كيقطع شي لحم) بيخير!
غيثة: صاڤا الحمد الله ونتا؟!!
اورطيغا: الحمدوو لله شنو جابك هنا؟!!
غيثة: دايرة انا وملاك خت خديجة نتغداو اونصومبل هنا وتنتسناها تجي
اورطيغا: امم (لعب بلسانو فوسط فمو) مـــــمزيان، فين غتمشيو؟!
غيثة: والله مزال معرفت عرضتها ومعرفتش فين ههه ومعرفتش هي شنو تتبغي؟!
اورطيغا: سيرو لريسطو **** تماك بلاصة نقية
غيثة: اممم صراحة كانت شهوتي فالسوشي ولكن معرفتش ملاك واش تيعجبها ولا لا!!
اورطيغا: هاد الريسطو فيه كولشي للي بغات شي حاجة طلبها
غيثة: مزيااانة، اجي تغدا معانا
اورطيغا: ممساليش ازين
غيثة: وا عفاااك غير 10 دقائق (قوس عينو بحال كيفكر) عفاك عفااك!!
هانتا قبل متجي قولي شنو ندموندي تلقاه وااجد باش متبقاش تسنى وترجع لخدمتك دغيا
اورطيغا: صافي باشما نجاوبك.. سيري باش متعطليش على لبنت
غيثة: انا نعاود نصيفطلها سمية ديال الريسطو بااااي (دارتلو بيز من لبعد) متعطلش…
اورطيغا: (تبسم مشات وكمل خدمتو.. شي 5 دقايق تمو داخلين شريف ويوسف)
واش هاد المحال تقلب زااوية!!!
(بقاو كيظحكو حيت باينة جاو قبل منهم شي وحدين.. عرضوه لغدا وجاتو يصيفطهم لفين كاينين لبنات باش ميبقاوش بوحدهم وغيلحق عليهم وميكونش متطفل..)
~~~~~~~~
ملاك: (غير شافت يوسف داخل فرحت لغدا على حسابو اذا ولكن حيت كاين الزايد واخا شريف وكتعرفو مغترتاحش شوية جات مهم عندهم كانت فالسعادة كتوجد للعراسية خرجو عندها برا حيت مابغاتش تدخل عندهم، بقا شريف شافت فيه كان زويين ولكن باقة عاقلة قلبت عليه فالانستغرام ويمكن مزوج ولا خاطب مهم ديال شي وحدة وأصلا معندها ݣانة لهادشي وعاد تكون مع واحد مشروووك..)
شريف: كيف غادية مع الخدمة؟
ملاك: مزيان الحمد لله (بقاو كيهضرو هضرة كتجبد هضرة… حتى جلس حداهم اورطيغا كان عاود عليها على شي موقف مضحك مع يوسف بقاو كيضحكو)
اورطيغا: شنو مظحككم!!! (شاف فملاك بجمووود هاز حواجبو وفخوه ورجع شاف فيها زعما شنو)
ملاك: (بقات ساكتة كتشوف فيه وقلبت وجهها بحال مسمعاتوش هز حواجبو بجوج كردة فعل!!)
شريف: فييين!!
اورطيغا: فين!! ( رجع شاف فملاك للي قلبت وجهها شاف فيها شوفة فشكل خلاها مفاهمة ومعارفة متقول!!! حتى دخل يوسف وغيثة جلسو مجمعين كيهضرو أغلبية شادين فيوسف للي باينة متحمس لهاد زواج كل واحد شنو خدا فالماكلة كيتسناوها)
ملاك: (تيليفونها صونا كانت بريڤي ياله بغات تهز تيليفونها شافت اورطيغا كيشوف فيها) شنو!!
اورطيغا: شنو للي شنو (قلب وجهو، شاف فيوسف) اش تمااا
يوسف: حقا هضرلي مع دراري ورصي معاهم نهار 15
اورطيغا: كيف واالو كنت باغي العسري
يوسف: ههه هداك حتى لسبوع ان شاء الله
اورطيغا: صافي ضرباتك الحزقة من داابا!! قلتلك من الاول اش داك لشي زواج
غيثة: زعما مغتزوجش نتا فمممممممرة؟!
اورطيغا: (شاف فيها ديك الشوفة ديال بنيتك هز كاس ديال ماء شرب وتحط الغدا بداو كياكلو ملاك ركزت فهضرة ديال غيثة وشافت فيوسف كفاش كيقطع ستيك ديال لحم وياكل ويمسح جناب شنافتو حتى جابلها الظحك)
يوسف: اوا وونتا اشريف
شريف: انا هاد الساعة دااير بووز ولكن الا لقيت بنت الناس غنوي الحلال
يوسف: بنات الناس مجوودة (غمزو اورطيغا غير حاضيهم بعينييه)
اورطيغا: وكان عرفتكم غتكونو غاملين فهضرتكم هاكا منجييش بحال شي مراهقين غير زواج زواج
يوسف: منين غتكبر غتفهمنا
اورطيغا: (شاف فيه ميق)
غيثة: حتى نتا خاصك تفكر فزواج
اورطيغا: حتى نزوجوووك نتي ونشوفو معايا ديك الساااع
غيثة: اممم
شريف: حقا الحاج كريمو كان بغا كموند كبيييرة وانا غدا مسافر شدها نتا
اورطيغا: واش انا عندي فين نحك الراس اشريف باش نشد خدمة اخرى
شريف: سعد ولاخر حتى هوما مبغااوش وانا محتاج هاد تسافيرة بزااف
اورطيغا: اودي غنوحل غير فدوك لوراق اما شي لاخر هانية مولفين تماارة.. مهم صافي غير سير نتا انا نشوف كنديرلها
شريف: الله يحفظك لية اخويا
اورطيغا: (كمل ماكلتو بالزربة ووقف حيت خاصو يرجع باش يصيفط الدري يتغدا) انا عارضااني ملاك
ملاك: (بلا متحس خرجت عينها فيه) معرضتكش
اورطيغا: ههه انا عارضك الآلة (جبد 200 درهم حطها فوق الطبلة)
ملاك: لا ل(خرج زربان كيجاوب فتيليفونو شافت فلوخرين)
يوسف: (دارلها إشارة بعينيه زعما عادي بقاو مجمعين وهي غير كتسمع حيت كيهضرو فأمور عائلية فهمت شريف مبقاش مع خطيبتو.. ناضو دراري كل واحد مشا لخدمتو وبقاو لبنات كيجمعو فداكشي ديال العرس خداو ديسير وكولها كتخطط فلباس والمكياج وحايرين شنو الكادو للي يديرو لخووتهم جا السرباي باش يجمع الطبلة)
غيثة: عفاك تيراميسو كيتكات اومبوغطي (كانو دراري خلصو) هدا ناخدوه لاورطيغا للمحال.. امم معليش املاك نمشيو عندو! هو المحال ديالو غير هنا!!
أمينة: (كانت جالسة جارتها للي كتبيع ليها داكشي المخدوم باليد زكيشربو أتاي فوسط الدار ومجمعين حتى شافت أب ليلى داخل وبان فيه الهم بزاااف وموراه شاب فقياس ولدها باين ولدو للي مجاش المغرب منين كان صغيير، بقات فبلاصتها من نهار دابزت معاهم معاودت هضرت معاهم شافت مو جات عنقااتو وحتى ختو والهضرة غير بالفرونسي مكاين حتى كلمة بالعربية خرجت مفتاحة كترحب بيهم دخلو للصالون، قالت فنفسها)
الخايب هنا هو للي جا يدخل لهاد الدار
…: اوا نخاليك الحبيبة مع ضياافك
أمينة: بسلامة جيبيلي الكحل للي وصيتك عليه وديك التبريمة (بقات جاالسة كتشرب فأتاي حست بالقنط معندها لا فين تجي لا فين تمشي مشات لبيتها لبست جلابتها دارت فولارها هزت صاكها صونات على الحاج للي كاين على برا علماتو غتسبقو لدار للي فالسعادة هبطت خرجت من تماك نيشان شدات تاكسي ومشات…)
اورطيغا: (كان خدام فجوج حوالة كيفصل فيهم بالماكينة حتى كيشوف غيثة داخلة هي وملاك للي كدور عينها فالمحال وقف الماكينة ومشا جيهتهم)
غيثة: (حطات ساشي فوق الكونطوار) جبت ليك الديسير وللي تتبغي
اورطيغا: (هزو متبسم) يخليك ليلي
غيثة: (تبسمت بدلع)
ملاك: (بقات كتشوف فيه اول مرة تعرف خدمتو مزيان وتشوفوو خدام لا هي كتعرفو عندو شي علاقة مع لحم ولكن اخر حاجة توقعاتها هو يكون ݣزار!!! لابس طابلية فيها بقع صغيرة ديال الدم وداير ليݣات جاها فشكل حسابلها غير كيبريكولي مرة مرة وفلوسوو موجووودة كاينين.. بقات كتسنى غيثة تكمل حتى شاف فيها وقلبت وجهها زعما مكنتش كنشوف فيك المحال عمر)
غيثة ياله نمشيو خلي السيد يخدم
اورطيغا: (هز حاجبو فيها)
غيثة: اه اه.. شوف الا درتي شي برݣرام عيط لية.. زعما لينا حنا مزالين هنا فالسعادة كندورة
ملاك: انا خاص نمشي غدا خدامة بكري
اورطيغا: (حرك راسو باه ومشا كمل شغلو ولبنات خرجو ولا ملاك جرات غيثة للي مسخاتش تخرج..)
غيثة: واش بالصح غتمشي حيت مزال انا باقية غندور
ملاك: ااه عييت منعستش لبارح بكري وفقت على النبوري وتسخسخت
غيثة: صافي احبيبة سيري ترتاحي انا نعيط لصاحبتي مرة أخرى ونعاودوها باش نيت نوجدو للعرس
ملاك: اهاااه مرحباا تبغي نوصلك لشي بلاصة؟!
غيثة: انا نتسنى صاحبتي تجي هنا (تسالمو ملاك مشات وغيثة رجعت دخلت للمحال بقات جالسة فالجنب)
اورطيغا: دخلي تسنايها لدااخل (دخلات وجلست مبعدة شوية كيقطع) مشات صاحبتك
غيثة: ااه قالت عياات، مسولاهاش حتى اشمن اوطيل جالسة فيه
اورطيغا: (بقا سااكت خدام حتى كيشوف مو دااخلة وغير شافت غيثة معاه لداخل عجبها الحال حيت كتعزها بقاو مجمعات حتى جات صاحبتها مشات وبقات مو حدااه) طلعي للدار غتخنقك الريحة هنا
.أمينة: شنو كانت كدير غيثة معاك؟!
اورطيغا: راك شفتيها كانت تتسنى صاحبتها هنا
أمينة: امممم
اورطيغا: وا سيري سيري
أمينة: فوقاش دير عقلك كولشي موجود وحتى العروسة غير نتا ميبس راسك
اورطيغا: غيثة راها بحال ختي
أمينة: ايييه تيقتك انا نطلع متعطلش على لعشا اولدي
اورطيغا: شوفي غير خليكم على خاطركم داير مع شي صحابي
أمينة: غتسد المحال تمشي لاصال غتجي تلقى ماكان موجودة كولها وسير
اورطيغا: واخا الشاف
أمينة: واخا ياله بسلامة….
وفاء: ياله معايا اصاحبتي غيعجبك الحال
ملاك: مفياااش
وفاء: بااز اختي منين جيتي ونتي الخدمة الدار الخدمة الدار مكتملييش!! راه اراي مترجعي لصفرو وتبقاي من خدمتك للدار
ملاك: (باغية تخرج) معرف!!
وفاء: واا غير ياله.. غيعجبك الحال اصلا الناس نقيين وكلااص ومنتعطلوش
ملاك: (فكرت ياك غير حفلة شنو غيوقع تمشي حتى هي تبدل الجو شوية وتعرف على ناس وتخرج من ديك القوقعة وهي نفس الناس للي عرفت من صغر هوما للي كتعرف.. ناضت لبست تريكو لاسق وسروال دجين ومن الفوق مونطو دارت شالها رشت بارفان خفيف وخرجت لقات لوخرا لبساات) مغنتعطلوش؟!!
وفاء: وصافي كوني هانية
ملاك: (خرجو من تماك ركبو فالطموبيل كتوريها فاتو مرجان وفاتو ولاد الطيب.. خرجو برا فاس وشدو طريق ايموزار) واش مزال بعييد!!
وفاء: لا لا قربنا فهاد القهوة (دخلت ملاك تماك كان منتزه فيه قهوة ريسطو بلاصة الالعاب قاعة حفلات وجردة مقادة كانو بزاف الطموبيلات كانت حفلة بين طلبة الماستر ولي برف… هبطو بجوج)
شوفي الا قنطتي قوليهالي نرجعو فحالنا
ملاك: واخ (مشاو للقاعة دخلو لداخل عطات لانڤيطاسيون ديالها وللي من حقها تجيب شخص واحد معاها ودخلو الصالة كانت بريڤي داك نهار حيت مكرية لقات ضواو والاجواء ولبوفي زوييين والموسيقى كلاسيك عاد اهم حاجة التيتيز التيتيز التيتيز، تبسمت نقطة ضعفها الزيين)
هادشي زوييين
وفاء: قلت ليك غيعجبك الحال
ملاك: (بقات كتشووف شوية وفاء مشات لشي كليكة مكاين غير التسلام بالوجه والتعنااق اصلا عقلية اوبن ومكاينش غير كووول وشرب… ضورت عينها وفخاطرها ميمكنش قوة هاد التيتيز للي هنا وعاد قرايين وكاين للي خدام خدمة زوينة وغير مكمل قرايتو مشات وقفات حدا طابلة مكاينش كراسة كتبرݣݣ حتى شافت واحد هاز ݣيتار طلع للخشبة للي كانت تماك والاضواء عليه بقا كيضرب الݣيتار وكولشي منتابه حتى بقاو كيغنيو معاه بالطاليانية بقات غير كتشوف عجبها الجو بزاااف مكرهتش تصور ولكن خافت من شي قمعة بقات مستمتعة بداك الجو كولشي كيغني وعاد هزو يديهم هازين بيل وماشيين فايقاع وااحد جا فبالها اورطيغا وفاش شافتو خدام وفاش كان مغدي معاهم تبسمت فاش قال عارضااني ملااك.. شافت شي وحدين مشاو هزو من لبوفي حتى هي مشات هزت طبسيل كتعزل واخا كولشي كان زوين من المملحات والحلويات.. عاد كتوصل لميني بار ختارت موخيتو فروي غوج ورجعت الطابلة كتاكل وتشوف جات عندها وفاء معاها شي واحد مكانش زوين وباينة كبير شوية ولابس كلاص)
وفاء: هادي صاحبتي ملاك.. هدا بروف ديالي وفنفس الوقت عندو مكتب
ملاك: (ممدتش يدها غير تبسمت) مشرفين استاذ
….: قالتلي وفاء كنتي بغيتي تقيدي فلماستر
ملاك: (شافت فوفاء ورجعت شافت فيه) اه
…: واخا قبل ميبدا التسجيل غتجيبيلي الوريقات ديالك وان شاء الله يكون خير
ملاك: (تبسمت) ميغسي
وفاء: (غمزتها متبسمة) انا جاية…
يوسف: (كمل خدمتو ومشا لدارهم وهو كيهضر مع خديجة فالتيليفون غير وصل قطع معاها لقا باه ومو جالسين فالجردة مشا عندهم سلم عليهم ولكن مزال الاجواء مكهربة مع مو جلس)
الواليد شريف راه لقا ليك داكشي للي بغيت فكازا وغدا غيطلع تماك
اب يوسف: تاصل بية قبيلة وقالهالي
يوسف: مزيان، فكرت علاش منديروش عرس خفيف ضريف هنا فالجردة عندنا الدار كبيرة وتييسع لحبابنا وصحابنا بلا قوة الهرج والخسراان
ام يوسف: (كتبغي ترطبو معاها) وااا صباح اولدي رصينا مع قاعة البهجة
يوسف: غير ضياعت المصاريف وصافي
ام يوسف: نتا اولدي كون هاني كولشي علينا حنا، راك الفرحة للي كنت تنحلم بيها من نهار تزاديتي (بقات كتبكي) انا عندي داك نهار هو احسن نهار فحيااتي نشوفك عرييس
يوسف: (وقف عنقها كيمسح دموعها بلا ميهضر، حتى بردت بقاو كيهضرو غير على العرس وقالهم خديجة غتجي هي وباها يوصلها عند ملاك واصرو عليه باش يعرضوهم) اوااا نمرة سي رشيد عندكم نتوما تاصلو بييه
اب يوسف: اه ضرووري
الغالية: اوا الا هاكا اولدي خاص نخرجو نجيبو شي حاجة لخديجة
يوسف: بحالاش؟!
الغالية: دخلتها اول مرة عندنا ومنكونو شاريين ليها والو حشومة ݣاع!!
يوسف: اممم اهاااه
الغالية: وخاص نخرجو انا وياها فاش تجي ونمشيو لكاميليا باش تختار داكشي دالعرس ميمكنش نلبسها على ذوقي ربما تكون شهوتها فشي حاجة
يوسف: (تفاجئ) اممم حتى ذوقك الوالدة مكاينش بحالو (تبسمت) ولكن بالصح بغيتها تختار هي شنوو تبعي..
صافي واخا غدا وهضرو بيناتكم فاش تجي..
(بجدية) الوالدة انا مبغيت حتى شي مشاكل بيناتكم غير تيقي فية خديجة بنت الناس درويييشة مع الوقت غتفهميها وتبغييها
ام يوسف: ولدي غتكبر وتولد وليداتك وغتفهمني انا معنديش مشكل مع مرتك راه اي وحدة كنت غندير.. هاديك كانت ردة فعل عاادية ونتا عارفني اولدي شي مرات متنتحكمش فراسي فالكلام للي تنقول ولكن للي خاصك تعرف انك نتا طرف من قلبي وعويناتي وللي درتيه وبغيتيه انا معاك فيه..
يوسف: (هز يدها باسها) عارف الوالدة
اب يوسف: الله يهديكم ويهدينا اجمعيين حتى نتا اولدي تهلا فيها الا كانت بغات تقرا ولا تخدم عاونها
يوسف: لا لا انا وياها متفاهمين
ام يوسف: شوف نتا خرج هاد السوق انا غنعمر ليها وقتها
يوسف: (تبسم) وقتها بغيتو يعمر غير بية
ام يوسف: ههه كوون هااني
يوسف: بغيتها تعرف هاد كاميليا وحتى توريها spa ومنين تتقداو وو حتى ندخلها fitness مهم بحال هاكا
ام يوسف: ضرووري اولدي راه مدام يوسف ولدي الغزال..
يوسف: صافي، مهم انا نطلع نبدل حوايجي باش نخرجو نجيبو شنو خاصك
ام يوسف: صافي واخا أنا نتاصل بفاطمة باش تجي تطيب على حساب غدا
يوسف: اهاااه..
ملاك: (بقات كدور فعينها منين مشات وفاء، ضارت تبسمت مع لبروف للي تماك ياله جا يهضر وباين من شوفاتو للي غيااكلهم بيها عرفت غيضسر زربت عليه هزت تيليفونها)
باغدووون
(دوزت اول نمرة كانت عندها وبالصدفة كانت ديال يوسف جاوب) الوو
يوسف: (صوت الموسيقى كتر من صوتها) وي ملاك متنسمعكش… ألووو
ملاك: (دارت يد فودن وكتغوت)
الووو!!
(شافت فلاخر وتبسمت زعما غنخرج وخرجت من تماك) بففف خ** على ***
يوسف: ملاك!!!
ملاك: (عاد شافت فالنمرة ورجعاتو لودنها مخرجة عينها) وي يوسف ياكما صدعتك
يوسف: لا… (بعد من حدا مو) فين نتي؟!
ملاك: انا فواحد صوارية
يوسف: كفاش!!
ملاك: حفلة ديال صحاب الماستر
يوسف: فين؟!
ملاك: فففف عرفتي شي قهاوي كاينين فطريق ايموزار
يوسف: (شاف الساعة كانت 8 ونص) مزيان.. ماشي مشا الحال عليك؟!!
ملاك: واحد شوية ورجع.. الامور هانية!
يوسف: هانية!!
ملاك: ياله بسلامة (قبل ميجاوب تقطع الاتصال حيت الروشارج ديالها تسالات، رجعت دخلت لقات بدات الزدحة وكولشي كيشطح رجعت اللور غير كتفرج دارت سيلفي حيت شافت شي وحدين كيتصورو.. عاود رجعت للبوفي اول مرة متهتمش لداك التيتيز للي تماك جات عندها وفاء كتحنقز وظحك)
وفاء: (قربت لودنها) غنكملو السهرة فايفران
ملاك: (شافت فيها جامعة الظحكة) ايفران!!!
وفاء: اه نمشيو مجموعين غيعجبك الحال تمااك بزااااف عرفتي دايرين بروݣرام خطيييير وزويينة مدكاينة الثلج
ملاك؛ لا لا منمشيش
وفاء: عفاااااك نمشيو نفوجو شوية
ملاك: لا ختي غير سيري اصلا انا مفيااش للي يمشي لتماك وغدا تابعاتي الخدمة
وفاء: غنجيو بكري
ملاك: لا وفاء قلت ليك لا هي لا.. نتي بغيتي تمشي سيري اصلا نتي كتعرفي هاد الناس
وفاء: (خرجتها لبرا باش يتفاهمو ويتسامعو مزيان) عفاااك
ملاك: الااا، صافي جيت معاك هنا بدلت الجو صافي نتي غير سيري اصلا نتي كتعرفي هاد الناس انا لا يعني مغنكونش مرتاحة وزايدون مبغييتش
وفاء: صافي بلا منمشيو
ملاك: وعلاش كتربطي راسك معايا نتي بغيتي تمشي سيري انا غرجع للدار عادي كنت ديجا مشيت لايفران وبدلت الجو سيري نتي
وفاء: ومتقلقيش
ملاك: وعلاش غنتقلق (تبسمت) جيت معاك الحفلة ودوزت وقت زوين الله يجعل البراكة انا هادشي كاافيني
وفاء: حقا داك لبروف
ملاك: شوفي الا كان غيعاون حبيا تباركالله الا عينو فشي حاجة عوجة بلا منوضها صباط معاه والله منتزاااݣل
وفاء: لا لا كوني هانية
ملاك: مهم اجي صوريني هنا عجبني الديكور من بعد نمشي انا ونتي سيري فين بغيتي تمشي
وفاء: والله مكرهتك تمشي معانا غيعجبك الحال
ملاك: لا ختي انا اصلا ديك ايفران معنديش معاها بزاااف…
اورطيغا: (كمل الخدمة مشا لصال تحرك شي 45 دقيقة، عاد طلع للدار لقا مو ياله جات من Spa) بالصحة زيين
أمينة: عقبال نمشي هاد المرة مع مرااتك
اورطيغا: ههه انا ندخل ندوش
أمينة: الناس كيݣولو اميين
اورطيغا: (دخل دوش قاد حالتو لبس حوايجو وخرج عندها لقاها حاطة ليه لعشا) متسنايش الحاج!!
أمينة: شوية وغيجي نتا كول بعدا واش الحاج غيكال هادشي
اورطيغا: (كانو بزااف دالاصناف عارفاه كيبغي هادشي من مور لاصال كلا وهو مجمع معاها كتعاود ليه على حالة اب ليلى وحتى ولدو للي جا وعلى مفهمت مزاال مطولين ففاس والحاج أصر باش يجلسو فالرياض) نتي بقاي هنا ماشي بالسيف عليك تكوني تماك اصلا الحاج شرالك هاد الدار على هادشي
أمينة؛ ونخليهالهم!!!
اورطيغا: انا تنشوف راحتك هي اللولة الواليدة
أمينة: راحتي تمااك راهم هوما ضيااف وانا مولات الدار عجبهم الحال ولا كرهو والحاج فنظرك غيخليني نبقا هنا وحتى الا جبت غيبقى من هنا لهيه وغيزيد غير يمرض
اورطيغا: نتي تعرفي
أمينة: ولكن اولدي ديك بنتهم الشهبة شهوا منها وشحال كتبغيني
اورطيغا: زوجيها الحاج
أمينة: (ضرباتو فكتفو) واش نتا ضور دورة وتݣول زوجي الحاج!!!
اورطيغا: اوا شنو تتسناي مني
أمينة: بغييتك نتا تزوج واش مكتفكرش راه الولد ولا البنت للي غتولد ميجيو فين يكبرو حتى يلقاوك شارف
اورطيغا: وشكون قالك انا باغي شي ولاد ولا شي زمر هاكا صولو عايش مفييك وفوق فݣيݣ
أمينة: عاايش مزمر لواااه، واجي بعدا شفتك مشريت لا دار لا حتى حاجة فين كيمشيو فلوسك
اورطيغا: غاا فلخوا الخااوي وصافي الله يهدينا وصافي
أمينة: ومبرد!!
اورطيغا: ههه وشنو ندير للي عطا الله هو هدا نبحيو على خنز الدنيا!! الله يجعلهم فجيبنا وميكونو فقلوبنا
أمينة: (قلبت شنايفها مخسرة كمارتها) الله يستر دييير علاش ترجع اولدي واش انا غنبقى دايمة ليييك
اورطيغا: الدوام لله (عاود ضرباتو ولكن بقوة) هههه امزااال شادة فرااسك
أمينى: واش انا كنهضر معاك بنيتي ونتا كتفلى!!
اورطيغا: (كياكل بالزربة كمل اخر معلقة دالروز دارها ففمو وهو واقف هز العصير وهي كتنݣر دخل للكوزينة زاد فيه جوج معالق ديال megamass وهبط عليه خاصو يكمل يخرج قبل ميجي الحاج ويبدى الطرح ديالو حتى هو.. دخل لبيتو هز المسائل ديالو وسوارت الدار رش بارفان ديالو دار كاسكيط مشا باس راس مو للي كتجمع الطبلة)
انا مشييت
أمينة: الله يرضي عليك اولدي فكر فهضرتي الا خاصك شي حاجة ݣولهالي ولكن فكر مزيااان
اورطيغا: خاصني غير تكوني مزيااان وشي لاخر ملحووق.. (زرب دغيا خرج ركب فطموبيلتو ومشا للحومة..)
يوسف: (كانو شراو لخديجة بيجامة زوييينة وحيت محجبة شراو ليها فولار معاها خداو ليها باغفان وشرات ليها حلقات ذهب كان كادو ديال مامااه لعروستها اما هي وسييلة كتحاول ترجع علاقتها مع ولدها للي باين من كلامها اخر مرة خلاه مكره منها وعاد منين شاورت ختها خوفتها أن ولدها يقدر يكرهها بالكلام للي قالت ليه.. تبسم)
غيعجبها الحال بزاااف
الغالية: وشريتو الخاتم؟!
يوسف: اه خدات وااحد ولكن مكرهتش ناخد ليها شي واحد سامبل
الغالية: علاش كفاش خدات اللول
يوسف: (مابغاش يقول معربن) لا هدا بغيتو باش تبقى تلبسو ديما ولاخر تلبسو فالمناسبات وصافي
الغالية: اممم اجي خود ليها واحد سامبل عجبني (رجعو لذهايبي وهي مفقوسة على هاد الخسران فعروسة متستاهلش ولكن مكتبينش ختار واحد ساامبل فيه حجيرة صغييرة عجبو) عارف لقياس ؟!
يوسف: اممم يديداتها مطيبزين شوية.. امم هدا هدا غيجيها
الغالية: اوا صافي خود هدا وحتى اذا مجهاش نردها انا وتبدل ولا تاخد قياسها
يوسف: (حرك راسو باه) صافي مزياان
الغالية: باقية شي حاجة اخرى!!
يوسف: لا صافي.. الحوايج حتى نعطيها تشري للي بغات
الغالية: غير متكترش لحقاش كل مرة الموديل تيتبدل وغتجي هنا غتبغي تمشي مع الموضة
يوسف: داكشي نتوما تعرفووه كتر مني
الغالية: صافي مزياان نتا خرج هاد السووق….
~~~~~~~~~~~~~~~
ملاك: (عاودت دخلت مع وفاء شي ربع ساعة هوما مشاو مجموعين وهي ركبت راجعة فحالها استمتعت بعدا هاد العشية وصلت لبلاصة سميتها ولا الطيب كان أغلبية الحوانت سادين الا شي قهاوي قلاااااال وشوايات وصلت لسطوپ وقفت فيه جبدت تيليفونها باش تطلق الموسيقى مع الطموبيل حتى كتسمع الباربريز تشخشخ خلعها غير تشقق ولكن متهرسش هزت عينها برعب كتشوف منين جاية الضربة كتشوف ولد صغير تكون عندو تقريبا شي 10 سنين واقف كيظحك شافت فالزاج قلبها تكمش بحال ضربها فعيينها الدنيا خاوية شوية مكاين للي يجي حلت لباب وخرجت مشيرة يدها ليه معصبة)
الله ينعل **** بوك للي حطك يا ولد الكلبة والله يا مك ونش (بقا داك الدري واقف حتى كتشوف دراري صغار عليه وقدو وكبار شوية كيتجمعو حدااه وهي مزال كتحرق لييه مفقووسة غير تجمعو شافتهم كيحنييو للأرض دغيا دخلت لطموبيلتها هاربة من داك الكرط للي تابعها)
ويلي ويلي ويلي على ولاد ل**** مشات الطموبيل (حنات راسها وكتسمع غير طق طررررق تشاااخ والزااج قرب يتشخشخ هزت راسها شوية شافتهم جاايين خاافت مكاين حتى شي راجل جا عندها يدافع ولا شي واحد يهضر معاهم اصلا سطوپ جاي فالخرجة شوية حيت الحومة بعيدة على المدينة مداخلاش حتى فالمجال الحضاري (مافيهاش البوليس فيها الجدارمية..) بقات كتولول مخلوعة وهنا خافت حتى على راسها الطموبيلة كانت مديماريا بقات كتكللاكصووني واالو مخافوش حتى هزت راسها وكسيرات بشوية خايفة دووز على شي برهوووش بقات كتكللاكصووني موقفااش وهوما غيغوتووو جا برهوش من الجهة ليمنية خرجلها فطريق هاز خشبة وهي صايݣة بشوية ضرب ليها لڨاار من لتحت مع الخوف بقات كدور بالفولون حتى هربت ليها الطموبيل زاالقة مسموعين احتكاك روايض وطارت بيها فوق طروطوار ودخلت فبوطو ديال الضو… بقات حانية على لفولون مخرجة عينها مصدووومة خايفة هزت عينها بلعت ريقها من الخوف كتشوف فداك البوطو وكتخيلو غيطيح عليييها يديها جمدو فلڤولون عينيها غير مبلقين وفمها محلول ياابس كتشووف قلبها غيسكت وكتحس بحريق فصدرها بقوة الدخلة فوق طروطوار زيرت عليها لاسانتير دوك دراري تشتتو هاربييين عاد بداو الناس من بعيد كيجييو حيت تسمعت الضربة مجهدة ليهم…)
~~~~~~~~
ملاك: (كتشوف غير فالبوطو واش غيطيح عليها ولا لا حابسة البكية بالخوف شافت راسها بوحدها جاتها حݣرة كبيرة وعاد مدارت والو باش يهجمو عليها هاكاك.. بداو كيتجمعو عليها شي رجاال وللي كان جاي بالطموبيل وقفو يشوفو شنو وقع وللي باغي يعااون بغاو غير يحلو لباب عليها لقاوه مسدوود هي غير كتشوووف اونفاص معاهم مصدوومة وكيديرو ليها إشارة تحل لباب بقا تنفسها كيضيييق عليها والخلعة راجعة عليها مقدرتش تحل لباب مقدت تيق حتى فشي واحد، بقات كتقلب على تيليفونها ويديها غيرجفو بغات غير تصوني على يوسف ملقاتوش متأكدة كانت حطاه على الكرسي التاني للي حدااها وبقوة الضربة طاح كتسمع الدقاان خافت تحل متاااقتش والناس باغيين غير يجبدووها..
حتى شافت جدارمي جاااي عاد قدرت تحل لباب فمها حست بيه يبس وقلبها غيسكت حيدت الصمطة وتمات خارجة داايخة وااقفة غير بالزز شادة فباب الطموبيل كتقلب على دوك لبراااهش والو واش كاينين، سدت الطموبيل خايفة يشفرولها صاكها)
الجدارمي: ياك لباس الآلة
ملاك: (كترجف) كنت واقفة فسطوب حتى جاو شي براهش كيضربو بالحجر وهازين هراوات بغيت غير نهرب منهم حتى دخلت هنا
…: (واحد من المتفرجين) انا غير شفت لكسيدة عرفت غتكون مراا للي صايݣة هههه
ملاك: (ضارت عندو مخنزرة) اوا الله ينعل للي ميحشم كيتك نتا للي معندك حتى كرويييلة تصوݣها غير كتشوفو لاليااتكم بطموبيلاتهم كتوحلكم هنا (دارت صبعها فحلقها)
….: هههه بردي على راسك
ملاك: تفو على كمارة نتا للي برد على راسك وهكاك غتبقى ديما لتحت لتحت ولمرا تبقى حسن منك فاشما جييهتها المعقد
….: (بقا مخنزر ويتحلف فيها) عندك زهر كاين (على الجدارمي.. صبعاتو ميقة فيه وقلبت وجهها)
الجدارمي: (من بعد معاين الطموبيل دار اتصال كيعيط لدراري باش يجيو يديرو محضر ويشوفو الكاميرات)
عندك شي اصابة ولا وقعت ليك شي حاجه
ملاك: (مخنزرة زادها لاخر باستفزازو وحشمت توري بيدها بلاصة صدرها للي ضرااها)
لا دابا لا ولكن معرفتش انا دااايخة خاصكم تشوفو الكاميرات باش هاد لبراهش يتربااو ماشي للي ولد شي بعلوك يطلقو علينا راه اغلبيتهم ترباو خايفين من لمرا تكون حسن منهم كبار وصغاااار…
(هزت راسها منفخة من دوك لي كانو ظحكو عليها ومشات كتشوف فالطموبيل للي تشخشخت من القدام بقا فيها الحال بزااف عليها هي شحال كتحاول عليها باش فالتالي يطرا ليها هاكا!!!!
بقات هكاك وااقفة كيضرب فيها البرد باش توݣض شوية رجعت حلت باب الطموبيل كتقلب على تيليفونها لقاتو مرمي تحت الكرسي جبداتو بغات تصوني على يوسف ملقاتش الروشارج..)
خ** زيدني حتى نتا!!!
(شدت بلاصة صدرها فين كاين لحريق شوية وهو يصوني تيليفونها كانت وفاء، جاوبت دغيا)
الو وفاااء
وفاء: فين ازين وصلتي للدار؟!
ملاك: لا انا درت كسيدة
وفاء: اويلي وكيفاش وقع ونتي لباس؟!
ملاك: الحمد لله شوفي صيفطيلي روشاارج
وفاء: مزال ازين موصلت غير نوصل نصيفطهاليك
ملاك: بففف كنت بغيت نصوني على راجل ختي يجي بغاو يحݣروني هاد لق*** للي هنا
وفاء: مكاين حد تماك عنداك يݣريسيوك
ملاك: لا راه جا واحد الجدارمي كيتسنى صحابو يجيو يديرو محضر ولا معرف
وفاء: شوفي انا نصوني على اورطيغا هو يجي عندك
ملاك: زعما!!! مابغيتش نصدعو
وفاء: مغتصدعيه فوالو اصاحبتي وأصلا مخاصكش تبقاي تماك بووحدك واش فالسي طيب؟!
ملاك: اه
وفاء: لا لا خاصو ضرووري يجيك انا نصوني عليه الا كان مساالي….
ملاك: (بقات جالسة لداخل بقات فيها طموبيلتها بزااااف مدارتها لا بيدها لا برجلها بقات كتستغفر الله وتحمدو وتشكرو فنفس الوقت، شادة تيليفونها حتى الكونكسيون مابغاتش تخدم ليها تكرهت اخر مرة تخلي تيليفونها بلا روشاارج معرفت واش اورطيغا يبغي يجي ولا لا ندمت علاش غوتت عليه شي نهار ولا سبااتو خافتو يتعفر وميبغيش يجي، خافت يقولها ليوسف ويوسف يقولها لخديجة وتماك غتوصل لواليديها اش جا مفهمهم هي شنو كانت كدير فطريق موزار بقد مبدلت الجو بقد مندمت علاش خرجت.. صونات عليها بريڤي جاوبت بالزربة) الووو
حمزة: ملاك صاڤا!!
ملاك: حمزة!!!
حمزة: اه.. علاش كتسنااي شي وح.. (سمع طيط طيط عاود رجع صونا كتقطع علييه حط التيليفون مكره مكانش خاصو يمشي من دارهم، منين عرفها من مو انها جات ودابا رجعت لفاس معارف لا فين تكون لا والو.. فكر كفاش يدير ويعرف من الخدمة فين غتكون شادة لوطيل هدا احسن حل لقاااه باش يتلقاها…)
~~~~~~~~~
اورطيغا: (مجاوبهاش فاللول حتى رجعت صونات عليه عاود عرف غتكون شي حاجة ناض مبعد على ولاد الحومة للي مجمع معاهم) وي وفا
وفاء: اورطيغا بغيتك فواحد لبلان
اورطيغا: شنو؟!
وفاء: ملاك، دارت كسيدة (لا رد) وبقات بوحدها وحݣروها دوك لبراهش تما فولاد الطيب وخافت بزاف
اورطيغا: فين هي؟!
وفاء: ولاد الطيب
اورطيغا: وهي بيخير؟!
وفاء: اه بيخير ولكن خاافت تماك بقات مقطووعة، مهم عفاك الا صل..
اورطيغا: صافي قطعي قطعي انا نمشي عندها (قطع ومشا لطموبيلتو نيشان زااارب ماشي مكسيري مخلي دراري مفهمووش عاد كان كيقول عياان مقادر يدير واالو شوية شافوه كسيرا ومشا..)
~~~~~~~~~~~~~
ملاك: (جاو الجدارمية كتشوفهم كيقلبو فلبوطو كتر مفهمت والو عاد شافو فطموبيلتها مهرس الباربريز ومقيوسة القدام يعني مكانتش مسرعة عاودات ليهم شنو وقع سنات المحضر ومن حسن حظها كاين كاميرات يجبدو دوك البعالك) اه عاقلة على شي وحدين
جدارمية: الكوسطاطور شوية ويجي
ملاك: صافي شكرا ياك تبقاو هنا خفت من هاد الهجيج للي هنا (مستفزة هداك للي كان كيظحك عليها)
جدارمية: متخافيش..
ملاك: شكرا.. (بقات وااقفة والموت ديال البرد بداو دوك الناس كيمشييو شحال وهي كتسنى حتى شافت طموبيلة ديال اورطيغا وقفت
(كاينة طريق وحدة للي كتدي لسي طيب داكشي باش لقاها دغيا)
فرحت بزااف سدت باب طموبيلتها مشات جييهتو اخييرا شي واحد كتعرفو هبط من الطموبيل شاف فيها وشاف فطموبيلتها والجدارمية)
اورطيغا: شنو وااقع؟!
ملاك: (شادة لبكية وصوتها كيرجف) واحد ولاد لكلاب كنت واقفة فسطوپ حتى بقاو كيضربو بالحجر خفت جيت نهرب واحد تعرضلي بهراوة ضرب البولة القدامية محسيت حتى الطموبيل بقات كدور بية حتى دخل فية داك زمر دالبوطو
اورطيغا: هو للي دخل!!
ملاك: (حركت راسها باه) اصلا الطموبيل بحال شي كرطونة
اورطيغا: واش نتي لباس بعدا!!
ملاك: هادي سلعتك ماشي شغلي من اللول عرفت هاد البيعة وشرية متمااش
اورطيغا: (غير شافها كدخل وتخرج فالهضرة عرفها الطوب ديال الخلعة راكباها، وخايفة وصوتها فيها رجفة ديال لبكى وعينيها فيهم دمووع) ششش صافي متخااافيش ياك نتي موقع ليك والو الحديد يمشي ويجي
ملاك: (بلا متحس شهقت) تقصحت هنا (دارت يدها فصدرها)
اورطيغا: واش فبز***
ملاك: (صدمها كانت عيشة الدور وياله غتبكي.. خنزرت فيه) واش نتا مريض!!
اورطيغا: وا معرفت فين تماك ولا صدرك ولا تكون تفرݣعت ليك شي وحدة (خلاتوو واقف وتمات ماشية تبعها ظاحك) هه صافي صافي انا منويت والو.. (بقات مربعة يدها مغوبشة)
صافي وريني فين مقصحة؟!!
ملاك: واش نتا مريض ؟!!
اورطيغا: وااا معرفت فين تماك ولا صدرك ولا تكون تفرݣعت ليك شي وحدة
(خلاتوو واقف وتمات ماشية تبعها ظاحك)
هه صافي صافي انا منويت والو…
(بقات مربعة يدها مغوبشة)
صافي وريني فين مقصحة؟!!
ملاك: (بعصبية تنرڤزت حتى ظحت عليها وعلى طريقتها) اوووووف
اورطيغا: (شاف الكوسطاطور تماك مشا كيكمل الإجراءات مع الجدارمية وحتى هو دخل كيعرف شنو كيقول وهي بقات وااقفة بعييد مطمئنة انه غيحل المشكل، کاع الخلعة للي كانت فيها والخوف بديك الكلمة للي قال نساها وبقات غير ديك الكلمة فودنها كتعاود وبصوتوو وعاد.كتخيل راسها كتوريه)
ملاك: يخخخ مكيحشمش.. (بقات كتشوف فيه عاطيها بظهر مرة يظحك معاهم وكيقيدو، رجعو البوطو وحتى هو معاهم تبسمت فلحظة نساات كوولشي غير ضار جمعتها شافتو هز التيليفون كيهضر مع شي واحد باش يجي ياخد الطموبيل باش ياخدها للݣراج تقااد قطع معاه وحتى الجدارمية مشاو هوما والكوسطاطور)
واش ثقة هدا للي ياخد الطموبيل
اورطيغا: وااايلي زعما يبيدقني فطموبيل ݣاع باش نعري مو
ملاك: وااا غير سولت ناااري
اورطيغا: متخااافيش غيديها للݣراج منين خديتي الطموبيل نهار اللول الا كانت عندك شي حاجة مهمة حيدييها من تماك باش يدور بيها مزيان
ملاك: وووبشحال واش أنا للي نخلص ولا لاصيرونص
اورطيغا: زول منها بعدا داكشي ديالك والثمن من بعد متخافيش مغتكونش شي حاجة تقييلة
ملاك: (مشات حلات الطموبيل هزت غير صاكها وشي وراق ديال الخدمة) ولاد لحرام الله ياخد فيهم الحق هاد نهار يالا ربي لهلا دوزها لشي واحد فيهم
اورطيغا: زعما مقلتي والو باش تهجمو عليك (هز حاجبو) متنظنش..
ملاك: لا
اورطيغا: شكييت
ملاك: هه والله معرفت حتى لقيتهم كيضربو بالحجر اصلا مفهمتش علاش
اورطيغا: وشنو جابك هنا؟!!
ملاك: كنت مع وفاء فواحد القهوة كانو دايرين حفلة
اورطيغا؛ (زفر لا رد مصور وجهو)
ملاك: شنو!!
اورطيغا: واش باك مصيفطك تخدمي ولا تخرجي من أي واحد!!!
ملاك: (غووبشت قالبة وجهها طلب منها الكونطاكط مشا ديمارا الطموبيل لقاها كديماري هبطها من طروطوار وهي غير كتشوف فيها مشخشخة من القدام.. هبط من تمااك ورجع للبوطو) علاش كولشي كيشوف تماك كتر مكيشوف فالطموبيل
اورطيغا: حيت تزݣلتي ازين من خطية ديال 2 دالكيلو؟!
ملاك: 2 مليون!!! علاش؟!
اورطيغا: البوطو ديال الضو الا طاح ولا عواج كتخلصيه
ملاك: ومالي درتها بالعاني
اورطيغا: وشكون سوق بالعاني ولا بالصح المهم البوطو ميوقع ليه والو
ملاك: اويلي!!
اورطيغا: سيري طلعي للطموبيل راه برد الحال بزااف
ملاك: وطموبيلتي تبقى بوحدها
اورطيغا: حلي لكوفر ندخلوها (شقلبت عينها) انا نبقى هنا معاها غير سيري
ملاك: (حركت راسها باه مشات ركبت فطموبيلتو كيشوف فيها
ماشي مشكل هو يبقى فالبرد مهم طموبيلتها متبقاش بوحدها!! حرك راسو بلا حولة كيتسنى دراري وعينيه بحال صقر كيدورهم واش يبان شي برهووش من دوك لبراهش حتى جاو دوك دراري بجوج جايين فمطور واحد رجع بيه ولاخر بالطموبيل ديال ملاك للي غير منين صاݣها مافيهاش شي ضرر كبيير… مشا ركب فطموبيلتو)
اورطيغا: شوية دابا!!
ملاك: (حركت راسها باه صااقرة مقادرااش تهضر وحاطة يدها فوق صدرها شاف فيدها ورجعت حيدتها قبل ميقول شي كلمة)
اورطيغا: مقصحة بزاف؟!
اورطيغا: واش مقصحة بزاف؟!
ملاك: اممم شوية يمكن لاسانتيغ
اورطيغا: اه هي للي من الجبدة المجهدة للي تديير تضر
ملاك: اممم
اورطيغا: (بقا كيشوف فيها وكيقرس شنايفو كيفكر باغي يهضر وفنفس الوقت كيسكت راسو مكيبغيش ينصح بنت تبعد من بنت حيت ميمكنش يحكم على شي حد وكما قال يوسف هي بعقلها وتعرف وغيعرف!!)
مهم (شاف اونفاص معاه) نمشيو لطبيب؟!
ملاك: لا.. ماشي شي حاجة
اورطيغا: بانلي بحال تضرك بزاف!! وغتنفعك حتى فلاصيرونص
ملاك: (بألم) اه كضرني
اورطيغا: (تبسم) معشية بعدا!!
ملاك: (تبسمت بلا جهد) ما فياش الجوع براكة غير هاد الخلعة (ديمارا طموبيلتو وبغات دير لاسانتيغ بغا يقرب عندها وهي تبعد مخرجة عينها) شنو!!
اورطيغا: (رجع لبلاصتو) الا كنتي مقصحة بلاش مديريهاش
ملاك: والا شدوك لبوليس
اورطيغا: نخلص على مك الخطية مالها غتخلعنا ولا هادي اللولة!!!
ملاك: نااري على ألفاااظ
اورطيغا: (مدارتهاش مشا حتى هو غير من دروبة كسيرا نيشان ل CHU “مستشفى الحسن الثاني” خلاها فالطموبيل مشا دور مع العساس دخل هو بقا شي نص ساعة أو اكتر كتسناااه سااهية رجعت عليها بالخوف والخلعة
وكان ماتت كفاش غتكون ردة فعل مها باها خوتاتها عائلتها غيبغيو يهبلو عاد مها غتمووت جاتها لبكية وعينيها دمعو باغية غير تمشي تبقى بوحدها تبكي وتفش قلبها.. غوبشت مفهمتش علاش اصلا جات هنا بغات تمشي فحاالها جا اورطيغا حل لباب وبقا متكي عليه جا يهضر وسبقاتو بانفعال بلا متحس)
ملاك: علاش مخليني منشوورة هنا!!!
اورطيغا: (تخضر عليها) وبنااادم مشيت كنشد ليك النوبة باش دخلي نيشان ديري الراديو على صدرك.. (بعد من تماك) سربي راسك هبطي دخلي ديريه
ملاك: متهضرش معايا بحال هاكا
اورطيغا: شنو بغيتي رغبك!!
ملاك: (خرجت من الطموبيل كيشوفها ماشية جهة التاكسيات باغية غير تبكي وترجع تنعس وتكى مشا بالزربة شدها وهي كتنتر)
اورطيغا: غنخلط مك الا مرصيتييش
ملاك: (حانية راسها مغوبشة وجامعة فمها) طلق (شافت فيه) وضرب ياله ضرب!!!
اورطيغا: (طلق منها كيشوف فيها زفر ورجع شاف فيها بعينين نايمين وكان مسخسخ.. هضر بهدووء) انا خليتك هنا مرتاحة فالطموبيل باش ديري الراديو راه مهم لصحتك اولا، وتانيا مبغيتكش دخلي تشوفي شنو تيوقع فهاد الليل تماك فليرجوونص شي حوايج خايبين
(شافت فيه بعينين مدمعين ونادمة)
انا عارفك غتكوني مخلوعة ولكن الحمد لله خرجت سلامااات انا الآلة نفرحك بواحد لبلان… غتخرج ليك فلوس صحيييحة فلاصيرونص
ملاك: (زلقت ليها الضحكة) هه
اورطيغا: وييينو هانتي تظحكي
ملاك: هه وصافي غير خرجااتلي
اورطيغا: المهم راه صبعي تم
ملاك: فين!!!
اورطيغا: (لعب بلسانو فظروصو) ياله ندخلو.. (حنات راسها مشا هو سد طموبيلتو ودخلو لداخل كتشوف للي مشرمل ومشرملة ودمايات وللي سخفانة، نيشان دخلها عند طبيب لداخل دخلت بغات دير راديو ومقدرتش تعرا لطبيب خرجت عندهم)
شنو!!
ملاك: ها!! لا والو غير.. (بلعت ريقها معندها متشرح غيبلزها عاود شافت فطبيب) واش ضرووري نحايد حوايجي؟!!
اورطيغا: ااااه.. معليش ادكتور تجيب شي فرملية الله يحفظك البنية عندي تتحشم تسمح فصحتها ووو.. (تعامل معاه عيط لوحدة جات دارت ليها الراديو وخرجت عند اورطيغا جاب الورقة ديال الراديو كيشوفو)
….: الحمد لله مكاينش شي هرس ولا شي حاجة ݣغااڤ.. كاين عندك كدمات مع مساج غنكتبو ليك وغتبرااي ان شاء الله
اورطيغا: (هز داك الراديو كيشوفو وهي من ظهر باين ليها صدرها مرسوم خرجت عينها فيه فااقسها تبسم بعياااء وهي طيراتو ليه..) معندكش هرس..
اورطيغا: (هز داك الراديو كيشوفو وهي من ظهر باين ليها صدرها مرسوم خرجت عينها فيه فااقسها تبسم بعياااء.. وتفكرت!!!!! طيراتو من يدو وقف) مشينا!!
ملاك: صافي تسناني انا نقاد داكشي للي بقا (خرج جبدت كارت ناسيونال ديالها كملت الوراق CNOPS وݣاع للي تحتاج عاد خرجت عندو مشاو لبرا فسكات ركبو بجوجهم عيانين شافت فيه وهو راجع باللور بالطموبيل)
حم شكرا
اورطيغا: (حرك راسو باه)
ملاك: كنقولو العفو
اورطيغا: مزيان
ملاك: (شقلبت عينها حتى شافتو شد طريق بقات متكية على الكرسي كتشوف الشاريع خاوي ناس قلاااال حتى دخل لشاريع “بن علي” وقف قدام محال طلات كان ديال الماكلة)
علاش وقفنا هنا
اورطيغا: (بعياء) بغيت نقصي (حك جبهتو)
ملاك: (حركت راسها باه شافتو هبط رجع طل عليها)
اورطيغا: الحار ولا بلا حار؟!
ملاك: معليش بلااش
اورطيغا: نزلي نزلي غيعجبك (حركت راسها باه سدت سراجم وهبطت كان عامر ولكراسا قلال وعامرين فيه عائلات ولكن الريحة كانت خطيييرة شافت فالشواية كان الصوصيص ومعروف ديال فاس كيكون كتر من لذييذ وخصوصا ديال الكبدة او الكفتة بقات واقفة حدا الطموبيل وهو لداخل شوية شافتو مشا الحانوت للي حداه جايب جوج كانيطات مدهم ليها ورجع جاب جوج شباكي وكرسي حطو حداها)
جلسي
ملاك: (جلست مد ليها شبكة ديالها كان الصوندويتش عاااامر مطرطق وهو كان جايب 3 تبسمت لداخل ديالها حيت كانو كبااار كفاش غيكملهم!!! حط الشبكة فوق طموبيلتو وبقا كياكل وحتى هي بقات كتاكل بدات بعضة صغيرة وغير طلعت معاها البنة بقات كتاكل فخاطرها بحال جالسة بوحدها ودوز بمونادا)
اورطيغا: جوع قديم ابنت العبد
ملاك: هه هادشي زويين
اورطيغا: تزيدي؟!!
ملاك: لا لا (شافتو نفض يدو ومزال كيمضع دخل حتى خرج بطبيسيل صغير فيه فيه شي 5 دالحبات كباار حيت عندهم حجم كبير.. تبسمت) شكرا
(رجعت كتاكل كملت شافت فيه قرب يكمل بقات جالسة وصاقرة ناضت غسلت يدها لحقها خلص وهي تجبد 20 درهم مداتها ليه)
اورطيغا: شنو بغيتي ݣارو!!!
ملاك: هااااء!!
اورطيغا: جمع جمع زعما جابداها قداام الناس
ملاك: وحشوووما نتا خل…
اورطيغا: (شاف فيها ديك الشوفة ديال بنيتك خرج تابعاه طلع وحتى هي طلعت طلق موسيقى ديال الملحوون تبسمت وهو كيدندن قلبت وجهها كتشوف فطريق حتى وصلو للحومة) سيري تسنايني حدا لباب
ملاك: علاش؟!
اورطيغا: بغيت ندخل الحانوت نجيب شي حاجة ومبغيتكش تبقاي وااقفة تتسناي برا
ملاك: اصلا غنطلع للدار (هزت صاكها الراديو ووراقها)
شكرا بزااف (اول مرة غتشوف فيه بامتمان هو غير كيشوف فيها بعيينيين نايمييين.. حرك راسو بآه)
( هبطت بالزربة دايزة من حدا دراري للي حتى واحد مهز الراس وهوما عارفينها كانت مع اورطيغا..
هو دخل الحانوت خدا عصيري مادلين جلس مع دراري للي كل واحد وشنو كيدير للي كيكمي الحشيش للي كيكالي للي كتنفح كولها وبليتو.. هز راسو كيبانلو الضو ديال بيتها مشعول كل شوية كيهز راسو.. بدا كيغلبو نعاس ودع دراري وطلع لدارو مع بدل مع طاح نعس…)
اصبحنا واصبح الملك لله…
خديجة: (كانت لبست جلابتها باش يوصلها باها لفاس معاه، جمعت شي حويجات فصاك وشافت فمها للي حتى هي كتجمع حوايجها تحت إصرار فاطمة بنتها باش تمشي معاهم للشمال) هههه باش عرفتيه غيتبعك
زهرة: انا للي عارفة.. (جمعت حوايج حتى انير) شنو هاد الجلابة لابسة اخديجة!!! لبسي بعدا جديدة للي خيطتي حشومة تمشي لدار ناسك هاكا
خديجة: مرتاحة فيها…
زهرة: كفاش مرتاحة فيها؟؟ واش حماقيتي
خديجة: انا عارفة شنو كندير
زهرة: بنتي بلا منوصيك رزني وعرفي شنو كتقولي وشنو كتخرجي من فمك
خديجة: كوني هانية الا الغالية حسابلها غتقريني انا ضرووصي راه طاحو فهادشي
زهرة: الله يهديك ابنتي واش نتي داخلاها حرب
خديجة: فاللول لا ولكن منين عرفت نيتها معايا ناقصة، حتى انا غنمشي معاها غير بالمهل ضرافات منفعتنا فوالو فاللول
زهرة: الله يهديكم وصافي متخليش راجلك يجي فالوسط
خديجة: لا لا كوني هانية عمرو يحس من جيهتي بشي حاجة
زهرة: اوا حتى هاديك راها مو حتى نتي غيجي نهار وتكوني بلاصتها
خديجة: هههه متخافيش نضرب ونقيس.. وانا عمرني نتكرفي ولا نقلل من شي بنت الناس
رشيد: (دخل عندهم) ياله ابنتي دغيا راه تابعني شي خدمة فالقهوة وخاص رجع دغيا
زهرة: (قلبت وجهها عارفااه غيزربها باش يرجع دغيا يمشي معاهم فالعشية..)
خديجة: (باها خرج للقهوة على متبعو سلمت على كولشي وخرجت لقات حمزة حدا لباب كيشوف فيها) سلام
حمزة: خديجة فينها ملاك؟!
خديجة: علاش كتسول احمزة؟!
حمزة: بغيتها بغيت نهضر معاها
خديجة: شوف اخويا نتا ولد الناس وعمرنا شتنا منك شي عيب وعزيز عندنا ولكن ختي بعدها نتا مزوج وقريب يتزاد عندك بنت ولا ولد
حمزة: قوليلي غير فين جالسة فاس
خديجة: منقدرش
حمزة: عفاك اختي محتاج نهضر معاها
خديجة: سمحلي منقدرش (مشات وخلاتو وصلت عند باها وشدو طريق لفاس) بابا ياك عارف عائلة يوسف عارضينا لغدا
رشيد: اممم
خديجة: دغيا نتغداو ونتا الا بغيت ترجع
رشيد: ان شاء الله (بقاو كيهضرو على يوسف وخدمتو وهي عاجبها الحال وصلو لفاس لقاو يوسف كيتسنااهم حدا قهوة موناليزا حط خديجة على ميقضي باها الغراض عاد يرجع يتلقاو يمشيو لدارهم)
يوسف: (كيشوفها كانت لابسة جلابة ودايرة كاب من الفوق دخلو لقهوة فين عاودو الفطور فجو الظحك والغزل)
ملاك غتكون خدامة
خديجة: اه
يوسف: اممم.. حبيبة هاد الجلابة تتجيك شوية مزيرة لا!!(رمشت عينها زعما متفاجئة) كنت شفت لبيسة لبارح عجباتني تبغي نمشيو نقيسوها!!
خديجة: حم اهاااه.. (ناضو بجوج مشاو لبوتيك قيست حوايج جابهم ليها قيستهم قداامو كان مونطو طويل حد ركابي جايها مسانتري سروال توب وتريكو العنق لاسق وبقات بالصباط) زوينة
يوسف: (تبسم عاجبو الحال) جاك زوين هاد ستيل
خديجة: ولكن الفولار مجاش معاه
يوسف: نشوفو شي حاجة
خديجة: وومنعاودش لبس الجلابة!! نبقى بهادي؟!
يوسف: اه خليك بيها (مشا يخلص وهي متبسمة عارفة معجباتوش الجلابة وحلفت مغتولي تحن فولد لمرا كما كانت مع عمر.. اه كتبغي يوسف ولكن خاصها تبقى تبغي حتى راسها شوية بغا الزين والأنااقة يفوورني عليها…)
خديجة: (مشات خدات شال تابع للبيسة خرجت عندو من بعد مقداتو وعاودت ميكاب خفييف تبسمت وهي شادة فيدو كبتمشااو) يوسف واش خفتي نحشم بيك (وقف شاف فيها) انا اصلا كنت غنشري حويجات من لفلوس للي عطيتني نتا وحتى للي عطاني بابا جلابة لبستها حيت موالفااها
يوسف: اش هاد الهضرة اخديجة
خديجة: (بهدوء مع ابتسامة) عادي انا منويتش فيها شي حاجة خايبة نتا موالف ستيل ديال لحوايج مع لبنات وانا ولفت جلالب وللي كان كنت كلبسو حيت داكشي للي كان عندي ومفرووض علية
يوسف: (بقا كيشوف فيها)
خديجة: هه مالك؟!
يوسف: انا مقصدت والو
خديجة: عادي والله حسابلك غنتقلق منك بلعكس نتا غير كتبغي تشوفني زوينة وأنيقة باش نواتي حبيبي لغزاال
يوسف: (هز حواجبو محرج مبغاش يجرحها شدها فيدها مزير عليها) باغدوون
خديجة: يووووسف عادي ههه
يوسف: (حيرااتو ولكن تبسم لمس النضوج للي فيها.. رجعو كيتمشااو.. صوناو على ملاك كانت بقات ليها شي نص ساعة وتكمل الخدمة)
تجي عندنا؟!
ملاك: صافي غير قولي فين تكونو ونجي عندكم… (قطعت ورجعت للخدمة مقادراش تركز، الخوف ديال لبارح وفنغس الوقت تعامل زوييين ديال اورطيغا للي مخلاهااش..
صونات عليها وفاء مجاوبتهاش معندها خاطر.. مع كملت خرجت رشت بارفان ديالها شدت تاكسي مشات لعندهم للقهوة للي قالولها وصلت كتقلب عليهم حتى وقف يوسف شافتو مشات مدت يدها سلم عليها متبسم حفظها ممنوع تسلام بالوجه وقفت خديجة سلمت عليها وجلست حداهم)
يوسف: كيف غادا مع الخدمة؟!
ملاك: مزيااان الحمد لله، نتا اليوم مخدمتش؟!
يوسف: لالة خديجة جات ونخدم؟!
ملاك: ههه كاينة..
يوسف: بلا منقولك واش تشربي شي حاجة!! خاص نمشيو للدار تيتسناو فينا
ملاك: (بزفرة عارفة غيلسقوو فيها واخا متبغييش) ضرووري نمشي انا؟!
يوسف: ضرووري ومأكد ومافيهاش نيقاش
ملاك: هه
يوسف: خلي طموبيلتك هنا متخافيش عليها
ملاك: اصلا مجبتهاش
يوسف: خليتيها فالحومة؟!
ملاك: اممم (ركبت معاهم كتسمع حدييثهم وكلامهم حست بصدرها ضرها حطت يدها تمااك.. وصلو لتماك هبطو) مغنتعطلوش ياك؟!!
يوسف: علاش؟!
ملاك: غير عيانة شوية وصافي لبارح منعستش بكري
يوسف: رتاحي هنا
ملاك: يوسف نتا عارفني
يوسف: ودابا دخلي، غيعجبك الحال غير دخلي
ملاك: اممم داخلة المهرجان زعما
يوسف: هههه (دخلت عيط على مو للي خرجت متبسمة استقبلتهم جات غيثة حتى هي ومرت ولدهم بقاو جالسين مجمعين يوسف جر خديجة طلعها لبيتو كيوريها الدار)
الغالية: (متبعة ليهم العين منرفزة حاضياها ملاك حتى ضارت متبسمة) قالي يوسف عندك فوغماسيون هنا
ملاك: اه
الغالية: قولي نتي سباب باش تلقااو سيدي يوووسف وخيبتك؟!!
ملاك: (هزت صبعها لسما) ربي للي كيلاقي فسما وكيجمعهم فالأرض اخالتي
الغالية: (شافت فيها الشوفة ديال اتبقيستر) اوا جلس جلس
ملاك: (شافت فغيثة وظحكت بقاو مجمعين حتى جا باها تجمعو على طابلة لغدا كياكلو الحد الان الغالية وخديجة منفاردووش باها كان مزروب مشا وخديجة وملاك بقاو واب يوسف وولدو لاخر خرجو للخدمة) اممم مشينا!!!
خديجة: اهاااه (شافت فيوسف) سير رجع للخدمة حتى لعشية ونتلقاو واش غتبقى بلا خدمة
يوسف: ههه
الغالية: (تبسمت مفقوسة) حقا غدا معروضين كولنا لدار الحاج بن سليمان
يوسف: (شاف فخديجة) نمشيييو!!
الغالية: بيان سيييغ لالة مفتاحة كتأكد حضور مرااتك، العائلة بغاو يعرضوها من شحال هادي ويتعرفو عليها صافي خديجة ولات وحدة منا وحتى ملاك
خديجة: (تبسمت) مرحبااا
غيثة: اه اه غيعجبكم الحال بزااف تمااك (مها شافت فيها عارفة غاية بنتها وعلاش كتحماق تمشي لتماك وخصوصا فاش كنكون شي عراضة حيت غيكون..)
الغالية: سير طلع لبيتي جيب كادوات (طلعت غيثة وجابت ساشياات)
يوسف: (وقف متبسم هز بواطة ديال الخاتم للي ختار) هدا ديالي وتا باقي ديال الوالدة
خديجة: (تبسمت فرحانة وملاك حتى هي متبسمة كتشووف)
غيثة: انا وياك املاك معندنا للي يجيب لينا شي حاجة
ملاك: ههه (الغالية مدت ليها البيجامة وبواطة حمرة حلاتها خديجة عاجبها الحال)
خديجة: غزااااااال اخالتي هادشي ربي يخليك ليا (حلت بواطة كانو حلقات ذهب ناضت حنات لعندها معنقها بيد)
شكرا بزااف
الغالية: (بقرف مبية غير الابتسامة عنقتها وبهمس) عقبال نشري ليك الكفن ان شاء الله
خديجة: (كانت متوقعة منها كولشي الا هاد الهضرة مدارت حتى ردت فعل بقات متبسمة رجعت مدت ليها الحنك لاخر) ان شاء الله تساليني نلبسوولك فالقريب.. شي كادو فاااعل تااارك
الغالية: (حركت راسها باه يوسف متبسم كيشوف فيهم) قيس البينوار واش يكون قدك يمكن يجيك
خديجة: (حيدت المونطو حطاتو ويوسف جلس مقاد معاها اول مرة يشوف طايتها حيت لابسة كولشي مزير ليهونش، الكرش مكيناش جنااب داخلين وكااااين صدر دايرة بحال شي دكاالية بانت فيه لمعة الاعجاب ومو ندمت علاش طلبت منها حيت من تعابير وجهو باينة عاجبااااه وزاادو قيست البينوار كولشي شكر فيها عاود حطاتو ونتض لبسها مونطووها شدلها يدها حل بواطة جبد الخاتم.. ظحكت) ياك شرينا واحد داك نهار
يوسف: (تبسم جبد الخاتم وهمس فودنها)
كولشي ديالك
(لبسو لصبعها ملاك وغيثة ومرت ولدها كيصفقو ويظحكو والغالية غير كتشوف فهاد تبرهييش)
خديجة: هههه حشمتتووني
الغالية: (محست حتى ميقت فيها ودغيا قلبت ملامحها الابتسامة ناضو من تماك توادعو وخرجو، يوسف موصلهم للحومة)
يوسف: ملاك بلا نوصييك متخرجوش من هنا
ملاك: متخااافش
يوسف: (ضور عينو) فين طموبيلتك
ملاك: اممم (غيعرف غيعرف) لبارح دخلت فبوطو وراها عند الطولي كتقاد
يوسف: كفاش دخلتي فيها ؟!!
خديجة؛ اويلي واش درتي كسيدة؟!!!
يوسف: كفاش دخلتي وفين كنتي؟!
ملاك: ماشي شي حاجة..
يوسف: شنو للي ماشي شي حاجة فين هادشي وإمتى وكفاش؟!
ملاك: يووسف والله اخويا الا عيييت حتى لمن بعد ونهضرو (وقف قدامها هزت عينها فيه متبسمة) مكاين واالو ها انا صحيييحة قداامك غير هربت بية الڤولون وصافي، ووواصلا اورطيغا عاوني بزاااف….
يوسف: ( الحومة كانت عامرة بالطلبة للي كيقرا للي كيتسنى الطوبيس للي باغي يتغدا فدوك سناكات، وهو كيشوف فملاك للي كتسلم على شي طالبة)
خديجة: ياكما تكون تقسحت وغير مخبية
يوسف: (حرك راسو بمنعرف.. شافها كتسلت بغات دور باش طلع) اجي اجي نتي مزال مكملت معاك الهضرة
ملاك: (ضاارت بعيا) يوووسف والله حتى عياانة
خديجة: سمعي بعدا شنو بغا يقول!!
ملاك: ما وقع واالو صافي عادي عمرها وقعات ليك ضربتي طموبيلتك وديتها تصلح صافي هادشي للي كاين
يوسف: وعلاش معيطتيليش؟!؟ معيطة لاورطيغا
ملاك: (هزت حاجبها) يوسف عنداك تقولها قدام بابا ولا شي واحد
خديجة: (غير كتشووف) ياله سير ايوسف باش متعطلش
ملاك: وصاافي سييير بغيت غير نعس (تبسمت) وااا زمر
يوسف: مهم انا بلاتي غنجي ناخدكم لدار الحاج
ملاك: بففف وكان غير عفيتوني والله مافيا للي يمشي صافي ها خديجة تمشي هوما بغاو يتعرفو على مرتك انا اش حرق شطاطتي فهاد المجمع
خديجة: حشومة اختي هوما عارضينا معليش نمشيو
ملاك: (حركت راسها باه يوسف مشا وملاك وختها طلعو دازت من حدا دار اورطيغا واش كاين ولا مشا يخدم تبسمت على اهتمامو البارح حلت باب الدار ودخلو، وفاء مزال مجات مشات لبيتها) هدا هو البيت للي كارية
خديجة: يا ختي غزااااااال لبيت، وحتى الدار فراشها زوييين ديك البنت مكيناش؟!
ملاك: لا يمكن مزال مجات.. خديجة من دابا انا اسراري ومشاكلي وأخباري وخباركم مكيعرفها حد
خديجة: وعلاش كتوصيني
ملاك: كنوصيك بلش متبلبلييش ماشي ضرووري كولشي يعرفنا ولا يعرفني علاش مطوية، جمعي هضري ولكن فحدوود هانا كنوصي فحووودووود
خديجة: واخا لالة
ملاك: ياكما عيانة تنعسي
خديجة: صراحة فقنا بكري وعيني كيتلسقو بنعاس
ملاك: اجي ندخلو لبيت ونعسو حتى انا مسخسة
خديجة: والله منعس فبلاصتك ونخليك ممرتاحاش
ملاك: ههه غابلا متحلفي اصلا غنفرش ليك فالارض ضهري واجعني ههه نتي عارفاني مكنقدش على نعاس الارض
خديجة: هههه هادشي باش كتعجبيني معندكش علاش تحشمي (ملاك عطاتها بونجة دارت عليها كوفر بوسادتها وعطاتها كاشة وهي كاشة جات بغات تسد السرجم وهي تقشع طموبيل ديال اورطيغا بقات كدور عينها وتقوسهم كدير الزووم بانلها.. كتشوفو مع شي رجال واقفين حدا شي أرض للي فيها طراكس كتخوي الرملة ولا كتحيدها)
ملاك: شنو كيدير هدا هنا!! (بقات حاضيااه حتى جات خديجة هبطت الريدو)
تهلات فيك العݣووز
خديجة: علم الله شنو كتحفرلي
ملاك: ههه محاربين من دابا، مسكين يوسف للي غتجي فيه الدقة
خديجة: لا لا كوني هانية هوا خاارج من هاد لحساباات..
ملاك: مزياان (مشات لطواليط تعراات وشافت فلمرايا لقات كدمة فصدرها كضرها مزيرة عليها ورجع لونها كيولي غامق ولكن تبسمت)
ميمكنش هاد انفصال الشخصية للي فية!!!
( لبست حوايجها ورجعت للبيت لقات ختها متكية طلقات الشوفاج باش يسخن لبيت وتكات بلاصتها)
خديجة: فين وقعات ليك هاد لكسيدة؟!!
ملاك: (كتفكر فاورطيغا) ولاد طيب
خديجة: فين كاينة!!
ملاك: غير هنا.. (ضارت للحيط غمضت عينها) انا غنعس…
اورطيغا: (كمل شي شغال من الحومة وطلع لدارو بدل حوايجو للي تكرفسو ومشا للمحال ديال شريف باش يشوف الخدمة مع الخدامة ديالو ويعرف شحال من صݣيطة دخلت وخرجت والكموند للي خرج داكشي دالحساب ديالهم واكترية كان كموند كبير فيه خدمة ديال البونات والشيكات عاد رجع للمحال ديالو نفس الخدمة غير كان داكشي خفيف تفكر طموبيلة ديال ملاك صونا على الدري لقاه مزال خدام فيها وأهم حاجة داها الميكانيكي مكانش شي ضربة خايبة والموتور متقاسش)
صافي نتا غير غيز البلان الحساب على تالي…
ياله تهلا…
الله يحفظك..
(قطع معاه حيت دار معاه يوماين اخرى عاد تكون وااجدة رجع لخدمتو صونات عليه مو مأكدة عليه يحضر لعشا ولقاها خارجة باش تشري كادو لمرت يوسف للي غتجي عندهم كان غيقطع معاها باش متسناش ومغيجيش وهو يسكت عرف حتى هي غتكون تماااك.. بقا فخدمتو حتى كيدخل عندو يوسف)
نهار غليض هدا
يوسف: (تبسم) خرج عندي واحد دقيقة
اورطيغا: واخا (حط الليݣات والطابلية خرج عندو) ياك لباس
يوسف: قالتلي ملاك شي كسيدة ما كسيدة
اورطيغا: اه لبارح!!
يوسف: مقلتولي والو
اورطيغا: وعلاش انا نقولك؟!!!
يوسف؛ خاص نعرف
اورطيغا: وا هي مقالتش ليك انا لاش نقول وزايدون ماشي شي حاجة الطموبيل ديتها لصاحبنا وهي مزيانة
يوسف: (حرك راسو باه) ولكن كان تعلمني واش هي للي عيطت ليك
اورطيغا: اه
يوسف: اممم… مهم انا جيتك على دلك لبلان
اورطيغا: اهاااااه!!! ولكن خاصو شوية دالخدمة…
~~~~~~~~~~
فاطمة: (كانو مشاو للمضيق بالظبط مارينا سميير كراو شالي على لبحر ومها حتى هي شالي اما رشيد خدا اوطيل فوسط لمدينة باش يخليها على خاطرها كما شرطات باش يمشي معاهم)
ماما هاد نهار خلي معايا أنيير ونتي ها مارينا كبيييرة سيري فينما بغيتي ولكن متهربيش ههه
زهرة: (تبسمت محركة راسها باه..
هزت صاكها معاودااتش ضارت من موراها.. واخا كان البرد والريح ولكن هادشي شنو كانت محتاجة حيدت صباطها وتقارشها وفضلت تمشي حفياانة كانت الدنيا خاااوية كتفكر فهادشي للي راها فيييه تفكرت عائلتها تنهدت مع زفرة طوييييييلة، واش يكونو مزال عاقلين عليها واخا هي مزال عاااقلة على داك نهار بحال اليوم نهار خيرووها وختااارت عمرها غتندم على هاد الاختيار حيت مرتاحة فيه وهادشي للي كان خاصو يكونو عليه حتى هوما يمكن!!
ولكن هوما تشبتو… ومشاو!! ويمكن عمرها تعاود تشووفهم ماشي يمكن لا متأكدة (شافت فلبحر غرغرو عينيها) توحشااتهم ومعارفاش شكون مزال حي وشكون مات وشكون تزاد كتعقل كانت هي الوسطانية فخوتها… زادت تأزمت منين تفكرت هادشي حتى وتبغي تعاود تشوفهم ولا تواصل معاهم مستحيييل راه رشيد قلب وقلب مكاين حتى شي اتصاال ولا عنوان ولا شي أثر ليهم…
عاد تفكرت خيانة رشييد للي شفعلو شوية ماشي مسامحااه حيت العشرة ولا البغو ولا الحب للي جمعهم!! ولكن الوقفة للي وقف معاها ميمكنش تزيد وتخليييه داكشي للي كان دارو معاها فاللول وفصغر عمرها تنسااه وحتى هي كانت نعمة الزوجة.. شدتها قشعريرة منين قاستها موجة 38 عام مشافت لبحر ولا شمات رييحتو هزت عبايتها باش يقيسها الما كتر بقات كظحك بحال شي وحدة صغيييرة بسبابها كانت حارمة بناتها من سفر فالصيف كانو حدهم صفرو ولا العروبية ولا فاس… معرفتش واش كان غلط تحرمهم اكيد غلط ولكن هي كان اكبر شرط عندها هي متعاودش تخرج من الدار ولا تسافر لشي مدينة كانت هي باااغية تبقى حاجبة ومتخرج الا للضرووورة….)
يوسف: (طلع عندهم للدار دق حلاتلو خديجة لابسة بيجامة ولاوية الشال) مزال ملبستي؟!
خديجة: صراحة معرفتش شنو لبس جلابة ولا العصري حرت
يوسف: لبسيييي (كيطلع وبهبط فيها حيت بيجامة لاسقة شوية) اممم اللبسة للي خديت ليك صبااح ولكن متاحيديش المونطو تمااك فمرة
خديجة: ههه لااا واش انا حمقة
يوسف: ومديريش مكياج
خديجة: ههه علاش نديرو مالي غادية العرس (كانت دايرة فونطوتان ماسكارا وايلينر خفييف مجايش مجبد وفاغاجو وعكر خفييف) دخل راه مكيناش صااحبت ملاك
يوسف: اه تنعرفها
خديجة: (ضارت عندو) منين كتعرفها
يوسف: خديييجة سيري لبسي دغيااا راه تعطلنا ووو مرة مرة نساي ومتلبسيش الشال نشوفو داك السااالف
خديجة: اممم (مشات رجعت للبيت فين كانت ملاك كتلبس وكتهضر مع مها ابيل ڤيديو)
ملاك: والله حتى تشهييت نشوف البحر عرفتي شنو هاد الويكاند نمشي لشي بلاصة
زهرة: بوحدك؟!
ملاك: لا مع خديجة ويوسف حتى هوما بغاو يمشييو
خديجة: ههه امتى!!
ملاك: سكتي (قرستها) ياله احبيبة بسلامة عليك
زهرة: سلمو على أمينة
ملاك: شكون أمينة واش (بغات تقول مامات اورطيغا) اه واخا (قطعت من بعد موصاتهم يرزنو ويحصنو.. بقات كتشوف فلمرايا وكتقاد شالها وفبالها واش غيمشيو لدار واليدين اورطيغا!!! يعني غيكون تماك فلتت ليها تبسيمة ودغيا قمعت راسها كتلوم راسها)
مــوووســتـااااااااحـيـيـيـيـيــــل اوييلي
خديجة: شنو؟! مالكي؟!!
ملاك: والو والو (هزت تيليفونها صونات على وفاء للي لقاتها مزال فايفران قطعت) يوسف برا؟!
خديجة: اه سيري جلسي حداه على منكمل (خرجت ملاك بقات مجمعة معاه ولامها علاش مخبراتوش بالكسيدة وعاوداتلو من اللول وأنها ماشي هي للي صونات على اورطيغا وبلعكس دار معاها أحسن بليزيييير ومخلاهاش بلعكس وقف معاها حتى وصلها للدار)
ملاك: اصلا معنديش نمرتو ومعنديش شي تواصل معاه ولكن لبارح (تبسمت وهي كتشكر وتعاود عليه)
يوسف: وااااا هو مراد صرااحة يتعول عليه غير مرة أخرى تبقاي تعلميني الا كانت شي حاجة أنا راه خوووك للي معندكش.. باغدون دابا ولا عندك واحد صغير واحد كبير
ملاك: خلينا مزيانين ايوسف
يوسف: داك الولد معندو حتى ذنب املاك
ملاك؛ يووووووسف
يوسف: صافي انا ساااكت..
(خرجت خديجة عندهم)
هانا على الزين ديالي
(هزو صيكاانهم وخرجو هابطين مع دروج فين دق يوسف على اورطيغا وملاك حست بسخوونية فراسها حتى حل وشافت فيه كان مزروب حل ودخل دغيا)
هاحنا هبطنا لتحت تنتسناااوك
ملاك: لعماا (مشافش حتى فييا!!)
(هبطو، تبعهم جا عندهم سلم على خديجة كيسولها على أحوالها وصوااب وشاف فملاك مهضروش غير تسالمو من لبعد ركبو فطموبيل ديال يوسف هو حداه ولبنات اللور من مورااه ملاك وزادو فطريق…)
اورطيغا: (طلق موسيقى الملحون تبسمت وهي كتصنت للكلمات وشافت فيه واخا مكيبانش ملامحو وداير كاسكييط.. قاد لمرايا دالسرجم للي من جيهت كيشوفها كتشوف فيه مقوس عينو فيها حتى نغزتها ختها كيتخابرو.. قلب وجهو كيشوف فااشاريع حتى وصلو لمدينة وقفت الطموبيل فلباركينغ هبطو كيشوفو اورطيغا مشا سلم على شي دراري)
ملاك: ااااه دابا هدا راجل مو وباه لحقيقي هو لي مات داك نهار
يوسف: فهمتي دابا هه
ملاك: (تبسمت) اه
يوسف: ولكن متجبديش هاد الموضوع بالظبط حدااه ولا معاه زعما منين نكونو مجموعين
ملاك: (بفضول مقوسة عينها) علاش علاش!!
يوسف: (خرج عينو فيها) ملاااااااك
خديجة: ونااااري حتى نتي شحال فضوولية اختي
ملاك: زعما نتي ربح, الفضول للي فيك نتي ما فحد ݣاع متشوفها هاكا راها حتى هي بريݣييݣة
يوسف: ياااك
ملاك: وحتى نتا نيت برااسك بلا مدير فيها مبادئ ومنعرف حتى نتا برݣااااݣ
يوسف: ههه صافي صافي ستري ما ستر الله (تم جاي عندهم اورطيغا وتمشااو وصلو لباب الرياض كان عادي باب خشب كبير بجوج دفاات واحد فيهم شبه محلول دفعو اورطيغا ودخل يوسف حل الدفة التانية) تفضلو مرحبااا مرحبااا بييكم
ملاك: (خنزرت فلاخر للي كانو خاصو يعرضهم ويقول مرحبا فنفسها) صواب ديال جوج دريال
اورطيغا: (ضار عندهم داير يديه فجيابو) انا راه بحالي بحالكم غير ضييف (ملاك حنات راسها حتى شافت فمو للي جات عندهم كترحب والابتسامة عرييضة خرجت الغالية حتى هي كتبسم وترحب بيهم شافت فيه كان مقنت وكيشووف فيها..
دخلو لبنات للصالون فين كانو نسا وعلى راسهم مفتاحة للي جالسة فراس الصالون امرأة صحيحة وقصيورة وجهها مدور لابسة قفطان بروكار ودايرة الجوهر ولويز فعنقها ودايرة صبنية بيج على راسها والشمار على كتافها وذهوبات فيديها وحداها صينية كبيرة فيهم كيسان البلار وبرارد وصينية فيهم تعامر للي كيتحطو فيهم أتاي السكر والنعناع ومبخرة فيها بخوور العوود..)
مفتاحة: (بشبه ابتسامة خاصها ديما تكون صاارمة) مرحبا وألف مرحباااا بلالة عرووستنا
الغالية: سيير بوس يد لالااك مفتاحة هادي راها شريييفة ومعزتها غاالية علينا (خديجة تبسمت ومشات، ملاك تشحنت مخرجة عينها حتى شافت ختها سلمت على لوخرا بالوجه عاد تنفست اما كانت غتشلل الا دارت شنو قالت ليها الغالية #بأمر.. الغالية بغات تموووت مرضااتش قدام نسا ولاد الحاج طييح عروستها بكلامها وعاد متبوسش يدين مفتاحة!!!!!)
خديجة: مشرفين اخالتي
مفتاحة: لالة مفتاحة.. هاكا كولشي تيعيط علية
خديجة: مزيان (بابتسامة) مشرفة بمعرفتكم (كملت تسلام على البقية، ملاك جبدت موشوار من صاكها دارتو على نيفها كتمسح، جلست فالقنت حلفت لا مشات سلمت ݣاع قالت غير السلام من لبعيد)
مفتاحة: (طلت على ملاك) ونتينا متجيش تسلم!!
ملاك: فية رواح خفت نعدييك اخالتي وتمرضي
مفتاحة: (شقلبت شنايفها معاجبينهاش شافت فالغالية مخنزرة ومدورة راسها زعما هادشي واالو اما الغالية بدورها تمنات الارض تبلع وتصرطها) كنزة نوض.. (شافت فخديجة) اشمن دوار نتوما؟!
خديجة: تاهلة ولكن مكنمشيوش تماك بزااف حتى بابا تزاد فصفرو
مفتاحة: مزياان..
خديجة: (شافت فالغالية لقاتها مخنزرة فيها) خالتي لباس عليك
الغالية: (بنفور) الحمد لله
أمينة: (داخلة هازة بلاطو ديال الحلوى) مرحبا وألف مرحبا والله هاد جماعة ناقصانا فيها غير لالة زهرة مرحبا ببنيااتي زيدوو لدااخل جالسين على برا ويلي امفتاحة مخليا لبنات هنا زيدو ابنااتي
مفتاحة: (كتفقصها كتفقصها كتفقصها منين مكتقولهاش لالة وعاد دايرة فيها مولات الدار) لواه لواه ميحتاجوشي يتعرضووو راه هوما منا دخلو احبيبااتي نهار كبير هدا..
حطو خير الله فالطبلة لبنات غير قيسو فالماكلة وشادين كيسان اتاي ديالهم، كولها فين كيجمع وحتى مينا مجمعة معاهم وظحكها واصل للبيت اما الغالية صقيير وسكات مرضااتش تخنقت اخر حاجة توقعتها من عروستها تحشمها قدام الناس!! استئذنت من مفتاحة وناضت خرجت من تماك كتقلب على يوسف تبخ سمها علييه تشكي مدارت مرتو فيها..
يوسف: (فسطح كاين هو واورطيغا للي كيكمي وكيطلو على باقي الرياضات للي كاين للي داير انيماسيون فسطح) شريف مزال ميجي
اورطيغا: مزال (هز راسو صاط الݣارو بشوية) ، والله حتى انا محتاج شي تسافييرة وعاد الخدمة كتيرة هاد ليام وكان ماشي نتا منجييش هنا
يوسف: اشمن خدمة
اورطيغا: شي شيكات وشي وراق خاص ندخلهم فواحد لوجيسييل هاد الليلة ولا غدا باش غدا نصيفطهم مهم كولها خدمة شريف حيت كان عندو كموند كبيييرة
يوسف: اممم بالصح هاد الايام مخدم والو عقلو كان تاالف
اورطيغا: ماشي ساهلة عليه ها باش خايبة تربي الكبدة على شي بنت ***** فهاد الوقت
يوسف: كاينين بنات الناس
اورطيغا: مقلتش العكس ولكن هو البلان من شحال هادي كان باين ليه غير هو للي كان عور وكيتعاااور
يوسف: اودي.. ماشي مشكل منين عااق لا هو لا أنا راه بيخير اما حتى انا كنت غكنتقولب تقوليبا خااايبا
الغالية: (كتصنت عليهم)
اورطيغا: (باستهزاء) وراهم كانو صحابات ݣرعة محزمة بفݣوسة وقالت ليها نقطعو الواد
يوسف: ههه
اورطيغا: زعما بغيتو ديرو بلان الݣور جوج صحاب يتزوجو جوج صحابات وتبقاو اسرة مع بعضييكم بربعة بييكم طرررر، مك عرفات؟!!
يوسف: لا مبغيتش نقولها والو صافي انا طوييت الصفحة وسالييت داك تخربيق
اورطيغا: وكان قولتيهالها باش تعرف متبقاش كل شوية نجبد ليك هاد الهضرة حيت هي كتعرف ياقوت مزيانة ونتا للي خايب ݣردعتيها
يوسف: معندها ما تعرف شوف ربي جاب لي بنت الحلال قدامي براكة علية.. (الغالية مفهمتش شنو دارت الياقوت شنو هاد الموضوع للي ولدها كان غيتقوولب فيه معاها..
هبطت من تمااك لقات بنتها جات عاودت ليها شنو دارت خديجة واخا عارفة بنتها معندها باش تنفعها ولكن غير تعاود متبقاش معصبة، دخلت عائلة ليلى جاو شافت معاهم ولدهم لي جا سلم على الغالية دخلو للصالون بقات كتشوف ودارت إشارة لبنتها باش تشوف رجال ديال بالصح ماشي متبعة اورطيغا هي مهضرتش ولكن شوفاتها هضرو)
ام ليلى: (دخلو هي وبنتها سلمو اما ولدهم سلم من بعيد وهز تيليفونو مقنت دخل اورطيغا ويوسف جلسو فالجهة الاخرى لقا ملاك كتسرق الشوفة فلاخر للي كاين معاهم ومعرفش شكون هدا)
يوسف: واش نتا ولد سي محمد
ادم: (مد يدو) اه ادم (سلمو عليه بزوج، اورطيغا بقا كيشوف فيه)
يوسف: انا يوسف ولد سي عبد الكريم وهدا اورطيغا ولد الحاج بنسليمان
ادم: (دار حركة بوجهو بين ان عندو معلومات عليهم) مشرفييين
يوسف: لينا الشرف (بقاو كيهضرو وكيعاود ليهم على المشكل ديال بااه للي خلاهم مخليين كولشي وغيبقاو معاه حتى يحل المشكل وعوالين يجلسو مدة فالمغرب..)
اورطيغا: (واخا مكيشوفش فيها مباشرة الا حاضيها بطرف عينو كتسرق الشوفات غير ضارت جيهتهم ضارت مخنزر فيها دايرة فيها الشوفة ديال لاش كتشوفي هنا!!! قلبت وجهها معوجة فمها مراضيااش)
ياااا رب العااااليي…..
ادم: (شاف فيه حيت معطاهش وقت بحال يوسف اما ختو كتشوف فيه بندم ندمت بزااف علاش دخلت باها وغيثة كتشوف فيها عرفتها طايحة فيه)
رحبو بيهم حطو لعشاا على جوج جهات كلاو وهوما مجمعين.. ناضو لبنات واخا عياو يشدوهم يباتو عتاذرو يوسف خرج حتى كيشوف مو خارجة معاهم برا)
الغالية: اجي خديجة معايا (تم حتى يوسف جاي معاها) بغيت اولدي خديجة هضرة ديال لعيالات
خديجة: (مشاو مبعدين) نعام اخالتي
الغالية: منين قلت ليك سلمي على لالة مفتاحة علاش مسلمتيش عليك سلام مقاد؟!! زعما عيب تسلمي على شي واحد كبير فيدو؟!
خديجة: مااا سلمت عادي منويتش شي حاجة
الغالية: معاديش هاديك راه لكبير وصغير تيسلم عليها ويبوس ليها يديها تجي نتي بنت البارح ومتبغيش علاش؟! زكارة فية؟!
خديجة: مقصدت واالو ممكن مع الوقت ولكن مجاتنيش مرا كبيييرة للي نلسم عليها هكاك
الغالية: هي كلامي ممسموعش اخديجة طلبتها منك ديري بيها
خديجة: حااشااا
الغالية: (لقاتها كتهضر بصوااب وأصلا يوسف قريب وحاضيهم) متعاودهاش مرة أخرى… هاد السيدة عندي عزييزة بزااف
خديجة: ان شاء الله..
خديجة: (سلمت على حماتها للي حاولت تكون معاها مصوااابة وودعاتها تحت انظار يوسف للي مشات عندو متبسمة دخلت مو جارة بنتها للي باغية تخرج.. اورطيغا كان سبقهم للطموبيل مشاو فحالهم راجعين…
وصلو للحومة هبطو حدا باب الدار فين يوسف همس لخديجة تسنى شوية اما اورطيغا طلع بالزربة)
حم هانا تابعاك اختي غير طلعي
ملاك: (فهمت راسها) اه اه يوسف تصبح على خير اخويا (طلعت حتى هي كتسمع همسهم وظحكت خديجة)
غير للي يعيط لوالديكم على لبوليس هههه لمسخ….
(بقات كظحك وهي كتخيلهم حتى وصلت الايطاج التاني فين خرج فبها اورطيغا بقات واقفة كتشوف فيه، تكى على لباب)
اورطيغا: (مد ليها بومادة شدتها بتردد) خودي
ملاك: شنو هادي؟!
اورطيغا: (بإشارة) دهنيها لصدرك (هزت راسها مغوبشة) هدا راه مساااج الخاامجة دهنيها لصدرك فين تقصحتي
ملاك؛ اممم
اورطيغا: داك العقل عندك!!
ملاك: تأ!!
اورطيغا: باقي فيك الحريق
ملاك: صراحة ااه
اورطيغا: معليش دابا تبرا مع الوقت بقاي دهني هاد المساج.. الطموبيل شي يوماين ونجيبها ليك
ملاك: وووبشحال
اورطيغا: مزال مقالي واالو..
ملاك: (حركت راسها باه) قبيلة شنو كنت ك (جمعت لسانها كانت غتسولو شنو كنتي كدير فالارض وخافتو يفهمها بالصح حيت رجعت كتهتم بيه) تصبح على خير
اورطيغا: اجي.. (متبعها) اديك الوزغة
ملاك: (طلعت بالزربة هاربة من ومن مشاعيرها حلت لباب وسدااتو واقفة من مور لباب كتلهت)
الاااا اويلي واش هبلت واقلة غير من الكسيدة كولشي تخربق علية!!!
لا لا ميمكنش انا والعزي!!!
صافي هنا عرفت الضربة بالصح أثرت علية!!!
ولكن آش جاب صدري لراسي؟! باين شي عرق تما تلاشا!!!
(دخلت كتحايد شالها متبسمة رجع كيجي فباالها واخا كتعيى متفكرش فييه دخلت لبيتها وجلست فوق النموسية شادة الشال كتقمع فراسها)
لا لا مزال كنفكر فحمزة!! اويلي ميمكنش مكنحس بوالوا من جهة حمزة واش قلبي سااهل يبغي للي جا فطريقو!!!
وشكون اورطيغا؟؟!!! بففف غير غنتعذب عاود وصااافي يخخخ ديما كنتعلق غير فين نتفلق…
(كتحاول متفكرش فيه وهادشي بحذ ذاتو كيخلليها كتفكر فيه… دقت خديجة ناضت تحل لباب حتى لقات يوسف معاها دغيا تخبعت من مور لباب وهو رجع اللور.. ردت لباب وكيسمعوها مشات كتجري هو سلم على خديجة للي دخلت وهو مشا فحالو..)
خديجة: (مشات عندها كتعاود ليها شنو قالت ليها حماتها وكيضحكو على مفتاحة) مكنتش عارفة اورطيغا ساكن هنا
ملاك: اممم
خديجة: باينة حتى هو معندوش مع لهييه سمعتيه فاش قال حتى انا بحالي بحالكم غير ضيف بقا فية
ملاك: بالصح (لبست بيجامتها) ولكن شفتي داك التيتيز للي دخل
خديجة: اااااه شتك مرة مرة كطلي ههه
ملاك: ههه وبزاف انا غنمشي لجهنم غير على عيني مكنقدرش نتحكم فيهم
خديجة: هههه عادي عادي الشوفة اللولة من حقك
ملاك: (مشات للحمام توضات صلات لعشا ورجعت للبيت لقات خديجة كتهضر فالتيليفون) الا بغيتي سيري لوسط الدار وهضري على خاطرك
(دارت ليها بيزو وخرجت وهي بقا تفكيرها فيه دارت مسلسلها كتفرج باش تنسى عاد تفكرت لمساج ناضت عرات راسها ودهنااتو)
لوكان كان كيبغيني غيقولي واش ندهنو ليك.. ولكن انا مغيعجبنيش الحال
واخا ميعجبنيش غير يضسر هانية انا زعما نتقلق وهو يفهم…
اصبحنا واصبح الملك لله..
فاقت ملاك مشات لخدمتها فتاكسي ومكانتش طموبيلة ديال اورطيغا يعني خرج يخدم بكري ضربت 12 خرجت ساالتة من تماك صونات على خديجة كانت فاقت وجمعت ديك الدار وكانت وفاء جات وفطرو بزوج، دازت الحومة عاود مكاينش مشات لفاك لقات راسها تقبلت فرحت بزااااف صونات على زهرة بشرااتها ورجعت للدار فرحانة عاود حطت خديجة لفطور وبقات غير هي ووفاء جالسين حيت خديجة ناضت للبيت لاخر كتهضر فالتيليفون مع راجلها..
وفاء: شنو درتي فطموبيلتك
ملاك: (كتاكل) مزال كتصااوب
وفاء: قوليلي الصراحة واش نتي واورطيغا!! (بهمس غمزتها) مصاحبين!!
ملاك: واش حمقة!! (كتعيبها) هننننن…
وفاء: ههه وا ميمكنش اصاحبتي عرفتي لول لبارح منين درتي لكسيدة عيط علية مخلاليش غير للي نسا تخيلت وكان شدني حداه وكان هرسني من شي قنت
ملاك: علاش؟!
وفاء: قالي نبعد منك ومنبقاش نخرجك معايا وبزااف دالهضرة هو بقا فية الحال ولكن راه بالصح بمجرتي علم شنو كان غيوقع ليك، الله يستر
ملاك: (بقات غير كتشوف واش تفرح ولا شنو!! مشدت ديك الابتسامة غير بستة وستين كشيفة.. مدارت حتى شي ردة فعل فوجهها) ماشي شغلو هو بالصح وقف معايا ولكن ماشي شغلو فية باش يبقى يدير هاكا
وفاء: عرفتي كيهضر معايا فالتيليفون وهو مغلغل انا قلت راكم مصاحبين وخايف عليك واخا انا عمرني نفكر نآذيك
ملاك: متعمريش راسك
وفاء: يقدر املاك يكون هو كيبغيك ولا عاجباااه
ملاك: (كتشرب أتاي وقلبها كيضرب فالتسعييين زعما يكون…)
غير كتخربقي يدي هاد الموضوع
وفاء: نااااري شحال معندكش معاه
جات عندهم خديجة كتعلمها باش توجد راسها باش تمشي معاها يتغداو)
سيري غير نتي مع راجلك
خديجة: اويلي لا نمشيو كولنا والله منخرج بلا بيك
ملاك: فية نعاااس اصاحبتي وزايدون خاصكم تبقاو بجوج لاش كتحرجوني وانا وحدانية ههه
وفاء: ههه حسيييت بيك اعشيرتي
خديجة: وعطا الله الايام نكونو بوحدنا دابا ياله معايا عفاك عفاك
وفاء: (وقفت) انا غنمشي لتازة الا بغات ختك تبقى فبيتي هانية
خديجة: معليش اختي شكرا بزااف
وفاء: والله الا هانية راه عارفاني ملاك خودو راحتكم متبقاوش مزاحمين خليك فبيتي
ملاك: غتعطلي؟!
وفاء: شي يوماين.. (خديجة مشات كتلبس وملاك كتقاد معاها دارت ميكاب خفيف وملاك بقات بحوايجها دارت غير ديودوغو ديالها وعكر خفيف.. خرجو برا كيتسناو تاكسي لقات اورطيغا فالارض ولكن هاد المرة كيهبط الطوبية من الكاميو مع شي دراري بقات غير كتشوف فيه عيات تجي معاه فالشوفة ووالو مشافهاش، وقف تاكسي ركبو وزادو وهي حاضياااه كيهبط الطوبية مفهمت واالو هدا واش خدام ݣزاار ولا بناي ولا سمساار!!!!!)
زهرة: (فاطمة هناتها من الولد ماشي كرها فيه ولكن بغات تبقى تبقى بوحدها، كانت فكافي ديال لوطيل كتفطر بوحدها رشيد شافتو جالس بعييييييد حدا البحر عارفاااه مغيخليهاش تبقى بوحدها ولكن نسبيا رتاااحت شوية، باش تكون عندها نفسية وتبدا توجد لعرس بنتها وتكمل حياتها.. مشات لشاالي ديال بنتها دقت عليها لقاتها تماك)
بنتي بلاتي الا مكنتيش دايرة شي برݣراام مع راجلك نمشيو لفنيدق نتقدا شي حاجة
فاطمة: اهاااه امتى تبغي!! حتى دابا
زهرة: لا حتى تشاوري مع راجلك بغيت نتقدا شي حوايج لختك
فاطمة: الا بغيتي ندخل لسبتة ونجيبلك شنو بغيتي ولكن يمكن تبغي تختاري
زهرة: لا صافي مزياان انا نجيب ليك الفلوس عارفة ذوقك زوين (جات لوخرا تهضر) غنجيبلك الفلوس والا بغيتي تعطيها شي حاجة بيناتكم
فاطمة: ههه واخا
زهرة: ياله دخلي ابنتي قوليها رااجلك باش الا صلاح تمشيو دابا وترجعو قبل العصر باش حنا رجعو
فاطمة: وعلاش صبري زيدي شي يامات
زهرة: ابنتي العرس مبقالو والو خاص نمشي بحرا نوجد وغير يكمل نعاود نساافر.. (شدات أنير وولاد بنتها ولوخرين مشاو وهي بقات حتى جلس حداها رشيد)
غنشدو طريق اليوم
رشيد: (بخدوء) نمشيو
زهرة: (مكتشوفش فيه) غنمشيو لفاس ندوزو على ملاك وخديجة وغنمشي عند لالة مينا مرت سي بنسليمان لدارها يمكن نبات عاد نهبط لصفرو ورخف على لبنت.. (بقا غير ساااكت كيتسناها تهضر وتقول مسامحاه وهي سكتت كتلعب مع دراري صغار حتى صونات عليها فاطمة بنتها ابيل ڤيديو كتوريها شي تفاصل ولباس داخيلي ختارت لخديجة وحتى لملاك تفصيلة ولباس داخلي.. خرجو من سبتة وصوناو على باهم باش يجيبهم لعندهم تماك يتسراو شوية عاد يشدو طريق لفاس..)
~~~~~~~~~~~
وصلت خديجة وملاك لدارهم فين كانت كتسناهم الغالية وغيثة باش يمشيو للنݣافة.. داهم يوسف صايݣ بيهم كانت غير قريبة ليهم مدخلش بقا فالطموبيل دخلو كيشوفو تكاشط
الغالية: اممم وريني بعدا لاغوب (شافت فخديجة) مرت ابني كتعمل الفولار متعطينيش شي حاجة معرية ولا غتبغي تزولو؟!
خديجة: علاش نحايدو؟!
الغالية: قلت.. (جابت ليها شي شكال اما غيثة وملاك كيشوفو ليهم شنو يكريو ملاك هاد المرة بغات تبان زوينة تقاد وتأنتك ختارت وحدة فالحمر وغيثة ختارت جوج
انفاردت الغالية وخديجة فالقنت كيختارو)
بلا متختار نتي باين على ذوقك الزين طلقك داك روييجل اللول
خديجة: (بقات سااكتة مطنشاها ختارت وحدة دخلت تقيسها كتسب وتلعن.. قيستها عجبها راسها جاتها مزيرة شوية فالفوق ولتحت واااسعة) ملاااااااااك
الغالية: خرج عندنا الحبيبة ديالي (خرجت خديجة لبنات عجباتهم والغالية معاجبها والو واخا جات زوينة ولكن زعما عطاتهم الاوكي وخا متطلباتش منها،
ختارت خديجة تكشيطة فلبيج باش دخل الدخلة اللولة وأصرت على لبيسة ديال شلوح واخا الغالية معجبهاش الحال وبغات ترفض ولكن أصرت عليها وأكدت وختارت حتى الاكسسوارات ديالها.. ختارت المكياج للي عاوناتها غيثة فيه اما المشطة متحتاجش فقط الشدة ديال الفولار للي غتشريهم هي حيت بغات تلبس جديد.. كملو من تماك خرجو عيطو ليوسف للي جا عندهم بغا يديهم يشريو لحوايج ولكن خديجة عتاذرات باش يرجعو هي وختها للدار حيت غيجي باهم ومهم عندهم ونيت تشري حوايجها ومتكونش الغالية معاهم)
الغالية: (ضربت الطم معرضتهمش يوسف مرضاااش وغيثة كدور عينها كتسنى مها تهضر اما لبنات ممسوقينش، ركبو حط مو وختو وكمل بخديجة وملاك للي كانو بغاو يرجعو فتاكسي ولكن رفض مشاو للحومة وخديجة وملاك صورو داكشي ومزال كيهضرو ويتناقشو ويختاارو اما هو معجبوش الحال وعاد.كيشوف خديجة مسوقتش وكيزيد يتأكد انه ختار الصح..)
يوسف: (مع وصلو للحومة كيلقى اورطيغا جالس مع شي دراري لحوايج مغبرين وشاد بيدو نص باݣيطة (كوميرة) ديال المعقودة وحاط حداه الدكة استغرب من حالتو هبط عندو ولبنات تابعين من اللور بشوية) فييين
اورطيغا: (جاو لبنات حتى هوما وكولشي متسغرب) فين
يوسف: كنتي تتبني؟؟
اورطيغا: غير صاحبي كانت عندهم الطوبية وعاونتهم
يوسف: هه بريكول ناضي
اورطيغا: نعيط ليك فلبريكول الجاي
يوسف: هه لا لا نتا عارفني مع هاد العالم
اورطيغا: هه (طل على ملاك بطريقة حتى فرنست، تبسم) عندي واحد الخدمة فلبيسي متعاونينيش فيها؟!
ملاك: (حركت راسها) لا
اورطيغا: (هز حواجبو كأنه متوقعها كياكل) باش تعجبك دغيا تدير الخير
ملاك: هاهاها
خديجة: لا لا ختي كدير الخيير
اورطيغا: مشتناااش.. واخا فيك أسْمِيمُّو
ملاك: (ميقت فيه وهي فرحانة ولكن دايرة تعابير ديال ممسوقاش..)
اورطيغا: (بقا كيقول ليوسف على شكون للي صاوب معاه الطوبية حتى هز حاجبو) ماشي باك هداك
ملاك: (شقلبت) قديييمة
يوسف: (ضار لقاه فعلا هو) سي رشيد
ملاك: (ضارت اصلا كانت عطاتو العنوان للي كان باين وأصلا مخاصهاش تخاف مكانتش بوحدها معاه شافت فاورطيغا لقاتو كيظحك عرفاتو طاحلها على النقطة، رجعت شافت فباها ومها للي هازة أنير سلمو عليهم) جيتي كتجري!!
زهرة: دوخني بداك جرا
ملاك: ياله طلعو ونيت ترتاحي
زهرة: عارضااني لالة أمينة
اورطيغا: (هز حاجبو كيتصنت واخا حاني راسو كياكل)
خديجة: حتى حنا لول لبارح كنا عندهم
ملاك: طلعي بعدا ترتاحي شوية
زهرة: (بهمس) سير جيب لحليب وليكوش على مرتاح شوية ونيت تجيب السخرة للي قالك خوك
رشيد: (هز راسو فالموبل شاف فملاك) هنا ساكنة؟!
ملاك: اه هنا مع شي طالبات الموبل كامل فيه غير الطلبة الطالبات زعما
اورطيغا: (مدار حتى شي حركة اصلا مباغي حد يعرفو ساكن هنا)
يوسف: (خاف يعرضهم ومو دير شي ردة فعل خايبة ويصدق متحاشم من اللول بقا غير ساااكت فقط مشا مع رشيد واورطيغا دار راسو مكيعرفش يوسف هبط كاسكيط ديالو هو ديك الدكة فيدو ومشا يكمل مع دراري الخدمة..)
ملاك: (وصلو ليطاج التالت ومها كتلهت) يا ودي ياودي اش داك لشي بز
زهرة: حسابلك لمك مزال فية الجهد ديال هاد درووج (دخلو للدار عجباتها بزااف ولبنات بدلو حوايجهم)
ملاك: حقا قبيلة مشينا للنݣافة ناااري ياماما داكشي عندها واااااعر
زهرة: وختارت خديجة داكشي زوين؟!
ملاك: اه ختارت كولشي زوين وحتى انا ختاريت تكشيطة
زهرة: هاي هاي هاي تكشيطة مرة وحدة باك برغيب كلبسوك قفطان شي حمار مات
ملاك: بحالا علمك الله (خديجة هازة أنير كتلعب معاه وتراري بيه) وكفاش هاد العرااضة واش دغيا وليتو صحابات وهي اصلا اش عرفها غتكوني فاس؟! واش صافي تحابيتو؟!
زهرة: جابتها الهضرة وصافي ومن داك نهار مقطعناش الهضرة
ملاك: وااا هي زويييينة عرفتي منين كنا عندهم رحبت بينا بزااف ولكن واحد شعشبونة تماك محملتها مقبلتها من دوك لفيسياات القحات قالت للغالية مكتعرفي واالو بحال شي بومة (قلداتها) مكظحكش
زهرة: ههه مينا عرضتني فدارها لوخرا للي فالسعادة
ملاك: علاش عندها دار اخرى اممم قولي تماا (فخاطرها..) كيمشي
زهرة: اممم ملاك بنتي هزي خووك هو مسيكين غير ملايكة
ملاك: باش هاد المرة تقولولي قتلتييه لا لا اختي حجاركم يشدووكم.. تشربي أتاي ولا العصير؟!
زهرة: باااز يا لالة
ملاك: حسابلك نسيتلكم منين شوهتوني قدام يوسف انا مقستو مزمرتو وكولكم كلمة وحدة ضربتييه
زهرة: ههه كنظحكو معاك يا الهبيلة وصراحة مدوزتيش قليل على ولاد عمك لعصى للي كلاو مساكن فصغرهم مهم وعمرها عطاتها ليهم
ملاك: دارو علاش!!
زهرة: (دورت عينها) زويينة الدار تبارك الله
ملاك: صراحة ماما مكرهتش حتى انا نكري شي دار ونفرشها هاكا ويكون عندي بيتي
زهرة: الليلة!!
ملاك: كفاش لليلة؟!
زهرة: غي ماشية معاك على قد عقلك واش هبيلة ولا مضرووبة فراااسك
ملاك: اوا وداك العذاب ماشي بزااف علية حطي راسك بلاصتي
زهرة: انا حطيت راسي بلاصتك وخرجت بنتيحة منبعدش على واليدية حيت غيجي نهار ونفرقهم بحال كما خوتاتك فرقوني وكلها مشا لدارها
ملاك: ويلا متزوجتش نبقى تحفة فداك البيت
زهرة: لا لا تزوجي للي لسانهم سليط بحال دغيا كيطيرو
ملاك: لا لا كيطيرو نيت وانا قربت نشيب (بقات كتنݣر خرجت عندها خديجة كتراري بانير) جا معاك شي bébé
خديجة: دعي معايا اختي دعي
ملاك: انا نبغي ندعي معاك ولكن كاين عندي شي دعاوي ديالي أهههههم (ضربتها مها) ههه وغير كنظحك سيري اخديجة الله يجعلك تحملي من اول بوسي
زهرة: (ضربتها ضربة خفيفة لراسها) كوني تحشمي
خديجة: هههه امييين، ماما تيليفونك كيصوني
زهرة: (هزت تيليفونها للي كان كيتشارجا وناقصلو فالصوت، كانت أمينة جاوبت) اختي.. هانا عند بنتي.. (شافت فيهم) يجيو معايا؟!
ملاك: (حركت راسها باه)
زهرة: مرة أخرى اختي دابا كولها دايرة بروݣرامها (ملاك خنزرت فيها كتنݣر) صافي انا نتسنى الراجل يجي ونجي عندك.. ان شاء الله احبيبة ربي يخليك.. (قطعت شافت فملاك) من امتى كتبعيني لديور؟!
ملاك: وغير قنطت
زهرة: ها ختك معاك..
ملاك: ختي غيجي راجلها يخرجها…
(بقاو مجمعين حتى جا رشيد باش يوصلها لعند أمينة للي باغياها تباات ويبقاو مجمعين وحتى زهرة مرفضااتش واخا رشيد عيا يعكس وصلو للعنوان)
رشيد: زهرة انا غلطت معاك وفحقك ولكن شوفي من حالي شوية انا باغيك ومتفرقني معاك غير الموت.. ولكن باش تباتي فديور الناس ومكنعرفوهمش حتى مزيان ومخليك على خاطرك قدري هادشي للي فوق جهدي (مكتهضرش بقا كيفهمها ان هادشي كيطيح منو ويديها فينما بغات ولكن ماشي عند الناس تبات، هبطت من الطموبيل مشا لباتيسري جاب شي حاجة دخلها معاها فيدها هزت صويك فيه حويجاتها وحويجات أنير وتفصيلة شراتها ليها من الشمال حتى وقف عليها اورطيغا للي كان فالمحال ديالو ومو موصياه يحضييهم باش يطلع زهرة)
اورطيغا: خالتي
زهرة: اهلان اهلااان ولدي لباس عليك
اورطيغا: الحمد لله (تبسم وشاف لبيبي وفيها) الوالدة تتسناك
زهرة: انا نتسنى عمك رشيد يجي باش نطلع (اورطيغا حسابلو غتجي بوحدها كفاش معاها راجلها والحاج مكاينش!!! فكر خاص يسد المحال ميمكنش يخلي مو مع شي راجل غريب حتى وقف حداهم سلم عليهم ومد الساشي لزهرة ومعاجبوش هادشي ولكن هي لقات راحتها هاكا واخا غير مرة وحدة أمينة فهمتها شنو بغات توصل ليها واخا مقالاش ليها اسرارها عاودات غير شنو وقع مؤخرا وانا معندهاش العائلة ونيت وغات تعرف كتر قصة أمينة.. جاها الحنين لصحابات للي تحرمت منهم فأيام مراهقتها ولمستها هاد الايام مع أمينة للي حتى هي كتجمع بيناتهم قاسم مشترك بلا واليدين واخا هوما فالحياة..)
رشيد: انا مشييت وو (معرف ميقول حيت باين مغيتبدل والو باس ولدو وهي مشات مع اورطيغا بقا غير متبعها ركب فطموبيلتو وشد طريق لفاس..)
أمينة: مرحباااا وألف مرحباااا نهار كبير هدا اختي زهرة ( رحبت بيها بكل فرح اورطيغا دخل شاد ليها الصاك وداكشي للي جابت حطهم فلبيت)
حبيبي غير تكمل جيب داكشي، غنمشي لصال؟!
اورطيغا: لا.. هاد نهار لا (حسابلو غتجي ملاك وخديجة.. هبط من تماك ورجع لخدمتو عيط لفرناتشي يشوف واش قرب داكشي..)
علاش مجاتش!!
ملاك: (بقات جالسة بوحدها حيت خرجت خديجة مع يوسف واخا بغاوها تخرج ولكن خلاتهم على خاطرهم وحلفت متخرج، كانت بغات تمشي مع مها اول مرة تبغي تمشي معاها لشي دار ومداتهاش، ولكن هو واش غيكون تماك!!!
مشات لبالكو طلت واش كاينة طموبيلتو ملقاتهاش فهاد الوقت كيكون فالحومة، رجعت جلست وكتفكر وكان غير قبلت تعاونو بعدا يكون سبب باش يتشاوفو شنو غتكون ݣاع هاد الخدمة!!! حست بالقنطة علاش ميجييش!! تكون غير طموبيلتو تعرفو راه كاين شوية قرنت حواجبها)
ولا غيكون مع شي وحدة وعلاش نتي اصلا كتفكري فيه واش هبيلة ناااري واش كتقلبي على شي مشكل عااود!!! بففففف وشنو ندير انا دابا!!!!
~~~~~~~~~~~~
مريم: صافي أبابا خليها هاد الليلة خالتي أمينة مرأة معقولة ورزينة معندك مناش تخاااف..
والله حتى فاهمااك هي طلبت غير هاد الليلة مغتاخدهاش عادة هاد المباتة ولكن مرة مرة يتلقااو..
صافي أبابا غير متعصبش..
اه هضرت معاها راها جالسة معاها..
واخا أبابا.. انا نهضر معاها.. بسلامة عليك.. (قطعت وهبطت من سطح مكتبغيش تهضر قدام راجلها واخا بيناتهم عشرة الا عمرو عرف مشاكل عائلتها كيعرف غير الحاجة زوينة باش كل واحد يبقى فقيمتو…)
~~~~~~~~~~
أمينة: (كتبكي) توحشتهم بزاااف غير ختي مرة مرة كتصورهملي وتݣولي خبااارهم ومرة مرة كنصيفطلها فلوس دواهم
زهرة: (كتبكي معاها حتى هي قلبها محرووق على واليديها للي معرفتهمش واش ميتين ولا حيين راه 37 عام معرفت عليهم واالو..) وكان غير مشيتي اختي عندهم
أمينة: (حركت راسها بلا) دفنووني اختي زهرة وانا حية شحاال هادي.. انا للي عارفة الا مشيت معندي فين ندخل ختي كطلقلي معاهم ابيل فيديو بتخبية الا جا شي حد وشحااال من مرة تجبدا سيرتي كيتبعولي بالله يرحمها
زهرة: (ألمها هادشي للي كاسمع) حشومة عليهم
امينة: سنييين وانا نسمع مينا الله يرحمها اشنو بقالي ماندير تمااك اختي ولا فين ندخل
زهرة: ديري غير محاولة وسيري شوفيهم دي معاك ولدك
أمينة: ولدي!! لا لا لا أبدا علاه نزيد مااعليييه ونكمل شنو خاصو
زهرة: لا حول ولا قوه الا بالله العلي العظيم حتى هو مسكين مدارها لا بيدو لا برجلو
أمينة: وكان غير درت علاش طلقت كيفي كيف الناس منين عرفوني حاملة شماتة لهلا يرحمو نكرني وحتى عائلتي ماشي من العاݣزين نكرووني وكان غ… (سمعت لباب تدق ووهي دير إشارة باش يسكتو وبقاو كيمسحو دموعهم بجوج وزهرة هزت الولد كتعنقو مستحيل تخلا عليه من مور مسمعت قصة مينا وولدها) ولدي (ناضت من حداها مشات للكوزينة) جبتي احبيبي داكشي
اورطيغا: اه جبتهم خليتهم فد.. (كيسمع صوتها مخنوق وكتجخر بينفها) مالكي كنتي تتبكي؟!
أمينة: لاااا
اورطيغا: وا هنييينا علاش كنتي تتبكي عاود؟!! باينة جبدتي داك الديسك الحااامض
أمينة: (كديرا إشارة يسكت) وصاافي اولدي وصاافي الله يرضي عليك
اورطيغا: (بقا كيشوف فيها حتى عنقها وهي غير كتنهد) سيري انا نقاد الصلاد
امينة: لا لا ولدي
اورطيغا: (معجبوش الحال) وااا صافي سيري متخليش السيدة بوحدها عارضااها باش ديريلها سهرة الدموع!!
مينا: (ظحكها ضرباتو لصدرو)
اورطيغا: غير سيري كملو تهرنيط ديالكم انا نقادها ياك تتعجبك للي تنصاوب غير سيري باش نزرب عليها.. (باستو فكتفو ومشات وهو دار الطابلية الخاصة ديالو حط الخضرة للي غيحتاج غسلها فشبيكة وبدا كيقاد عارفها فاش كيتجبد داك الموضوع كيطيح عليها الضيم وهادشي للي مكيبغييش……)
اورطيغا: (حط داكشي ف3 ديال الأطباق محلق عليهم مقاد كولشي من ديزاين من المذاق من ليصووص كولشي مقادة هو هداك.. حبو للطبخ عالم الاخر كيلقى راحتو فيه وكيعجبو يستكشف أذواق مختالفة ويتعلم بزااف دالحوايج من غير الطبخ التقليدي المغربي للي كيجيه صعييب شوية
جاب الطنجية باقية سخونة كتكشكش مطيبهالو فرناتشي مراكشي وللي علمو كفاش يقلد الطنجية، حطها فطبسيل جات مو عاجبها الحال دغيا ردها كظحك جابت اللوز كانت لانو وسالقة البيض معجبوش للي يزيد الزوائد فطياابو بقات كظحك وهو كيبالغ باش يزيد يظحكها، مشات للبيت كتجمع الطبلة وحطو داكشي زهرة كظحك من هاد لعشا للي مصاوبو عزري كفاش مقاد وباين كيشهي عاد كل بلا كيشبه لاخر بحال كولي كولي عاد المنظر يا سلاااام)
زهرة: تبارك الله عليك اولدي عذبناااك معانا
أمينة: يا ختي كيحماق على طيااب
اورطيغا: (وقف مخضر) كفاش تنحماق على طياب بانلك فية سميتي زوبيدة!!
أمينة: ههه وا فين تبان شي زوبيدة قداامك
اورطيغا: جلسي جلسي راكي بديتي تلاشي متدييش عليها اخالتي مرة مرة كتبقى تلاشي
زهرة: ههه الله يخليها ليك
اورطيغا: اميييييين (جلسو كياكلو ناض الباف طلق ليهم الطرب الأندلسي ناقص الصوت كياكل معاهم ومجمع حتى هو معاهم كبعاود على طرائف الحاج والخدمة وذبيحة خلاهم غير كيظحكو وزهرة تعجبت فيه مكانش كيبان هاكا من لبعيد تحكمي عليه انسان منغلق داك للي مكيحمل حتى واحد ولكن منين كتقربيلو!! وعاد طيابو للي فرح بيه مو ولكن ديك شلاظة للي جمع فيها الخضرة الفواكه وصوص لافوكا وقطع دجاج ولا حوت معرفتش بالظبظ مقدرتش توقف من ماكلتها وغير حشمت طلب لاغوسيت بقا أنير كيبكي مسحت يدها هزااتو موجدة ليه لحليب)
اورطيغا: (مشا غسل يدو حيت ديجا واكل مع صحابو عاد طلع للدار تم جاي من عندهم دارلها إشارة تعطيهلو شدو ولكن معارفش حتى قداتولو مو) هاي هاي على زريييقة متخليش مك تعشااا على خاطرها اعشييري
زهرة: هههه
أمينة: (كتشوف فولدها بحب) عفاك اولدي نوض تزوج بغيت نفرح بيك ونشوف وليداتك ونحضنهم ونربيهم ليك..
اورطيغا: (بقا كيشوف فيها ورجع شاف فأنير للي ظحك معاه حتى تبسم)
أمينة: (كتنغزها باش تعاونها ولوخرا حشمت ميمكنش مع السلام عليكم مع نوض تزوج.. فتحات معاه الموضووع والو مكيجاوبهااش حتى سكتات)
اورطيغا: (وقف ومدو ليها) انا غنمشي للدار نخليكم ترتاحو
زهرة: الله يرضي عليك اولدي والله يخلف عليك
اورطيغا: بالصحة خالتي (حنا باس جبهة أنير وتبسم ملمس صبيعات يديداتو، مشا لبيتو بدل حوايجو هز شي وراق بيسي سمع دقان لباب كانت مو مشات تحل)
أمينة: انا نحل اولدي (حلت لباب مصدووومة مستغربة مخرجة عينها مخلوعة وهي كطلع وتهبط فيها الشوفة) ليلى!!!
ليلى: (حتى هي تصدمت من وجود مو فدارو!!) حم طاتي أمينة!!!
أمينة: (بقاو غير كيتشاوفو وهي طلع معاها سخونة إذا كان كيجيبها لهاد الدار يعني بالصح كيجيب لبنات هنا ولكن هادي!! بغات تسخف وداااخت خرجت وسدت لباب من موراها كتهضر بهمس) شنو كديري ابنتي هنا؟!
ليلى: مااااممم حم مكنتش عارفااك اطاتي هنا
أمينة: عندمن جيتي؟!! واش ابنتي غالطة فالدار؟!
ليلى: لا مممم (حشمت شوية) جيت عند أورطيغا!!
أمينة: ولدي؟!! (بصدمة) جيتي عند ولدي مراد؟!!
يوسف: (شد فيد خديجة وبصبعو لكبير كيلعب بخاتمها) مشا الحال يمكن
خديجة: اممم اه ياله نمشيو ملاك غتكون مزال كتسنى
يوسف: (حرك راسو بلا) تنهضر على الدار! لدارك! لدارنا انا ويااك!!
خديجة: (خرجت عينها ولكن متبسمة) يووووووسف!!!
يوسف: حبيبة ديوسف عيووون يوسف!
خديجة: (تبسمت) كتبغيني؟!! (تكات على ويدها على خدها) كتحس براسك كتبغيني؟!
يوسف: (تبسم معوج راسو فيها) اه وليت تنبغيك اخديجة كولشي تيجي معاك تدريجي وفنفس الوقت تيجي حلو.. ونتي؟!
خديجة: (تبسمت بقات ساكتة حتى نوااتو بحال كتفكر)
يوسف: ولو إعجاب؟!
خديجة: ههه لا الإعجااب كاين ومرتاحة معاك بزااف وأي ىحاجة كتكون باسلة بلا بيك
يوسف: (تبسم) ووو قلبك؟!
خديجة: غيكون هبيل الا مبغااكش
يوسف: اححح هادشي بزاااف
خديجة: ههه ياله ديني للدار
يوسف؛ وشنو هاد النموسية منشريوهاش
خديجة: دابا؟!!
يوسف: ههه غدا باش حتى الا!!!
خديجة: ت..تت واالو.. هه ياله ديني لعند ملاك ولا غنحرشها عليك
يوسف: لا لا اختي الا هاديك مقاد على مناتيف ههه
خديجة: عرفتي عندها شي أفكار
يوسف: هه عاد تقوليلي!! (ناض وقف هز مونطو عاونها تلبسو كان ديجا مخلص.. ركبو فالطموبيل وبقا كيدور بيها فلاڤيل فجو شاعري وظاحكين..)
~~~~~~~~~~~~~
أمينة: واش جابك ابنتي عندو؟؟ (كطلع فيها وتهبط كانت لابسة مونطو تحتها كسيوة فوق ركابي وبوط حد الركبة وطالقة شعور وروايح)
ليلى: غير احححم غير مابغاش يجاوبني اطاتي وكنت محتاجة بزاف نهضر معاه
أمينة: واش بيناتكم ابنتي حتى يهضر معاك ولا تهضري معاه؟! الا شي حاجة ضرورية قوليهالي انا ولا تسنايه يجي للدار
ليلى: (بالفرونسي) حنا فعلاقة.. زعما حنا مع بعضياتنا زعما كنا!! اممم طاتي هو دابا كارهني درنا مشاكل انا وياه زعما ماشي درنا انا للي درت معاه مش.. (شافتو حل لباب رجعت خطوة اللور حنات عينها وهو بقا مخرج عينو بحال شايف شي شيطان)
اورطيغا: (بهدوء) مي دخلي عند السيدة (ضارت مو خنزرات فيه شياط كيخرجو من نيفها)
الحم (عارف شنو تابعو معاها) صافي غير دخلي.. (دخلت زادحة لباب مع وقف شاف فلورخرا عاود حلاتو موجهة الهضرة ليهم)
اخر مرة اااااااااخر مرة امراد!!! ونتي ابنتي متعاوديش تجي هنا هو عزري معندك مديري فدار واحد عزري اه وماشي دارو هادي دار العائلة الله يرضي عليك ابنتي تكون هادي اخر مرة
(شافت فولدها حركت راسها بلا معاجبهتش الحال حنا عينييه قاالبهم مكره)
شد ليها تاكسي تمشي عند واليديها
ليلى: ولكن اطاا.. (سدت الباب بشوية هزت حواجبها باحراج وشافت فاورطيغا للي مخرج عينيه…)
اورطيغا: (غير سدت مو لباب وطرقاتو ضار عند لوخرا وعصب مخو بقا يتفرݣع اصلا الشوفة فيها كتجيه مستفزة دفعها للحيط حتى تزدح راسها وتقسحت مكيهموش تكون بنت ولا دري) شنو جاية الق*** ديري هنا!!!
ليلى: اااح (بألم دارت يدها من مور راسها) اورطيغا خاص ضرووري نهضرو (شافت فيدها واش كاين شي دم)
اورطيغا: (جرها ما ذراعها غارس ريوس صباعو باغي يبعد باش متخرجش مو وتسمع شي حوار مخاصش تسمعو ولا تعرفو ولا تكون كتطل عليه وحتى اخرى تابعاه فهدوء مشات معاه دخلو للمصعد ورك باش يهبطو لكاڤ كيحاول يهدأ راسو ميديرش جريمة للي يندم عليها داك الغضب خاص يهدأو ويتحكم فيه.. بنبرة صارمة وبشوفة مستقزة) سمعي نتي اخر مرة ااااخر مرة تعاودي تحطي رجلك هنا
ليلى: بغيتك غير تعرف انني كنت طايشة داك نهار وضيعتك وضي..
اورطيغا: سمعيني نتي، انا داك نهار جبتك حيت كنت باغي غير **** سوا كنتي نتي ولا غيرك يعني مكاين حتى شي حاجة سبيسياال فيك من غير ندوز ساعتي معاك لا غير
ليلى: (شافت فيه مدمعة) ولكن انا ماشي ق***
اورطيغا: لا نتي كبيرتهم نتي باطرونة ديالهم نتي والز*** ديال باك، مهم انا مفهمتش علاش نتي باك تتصيدو فالناس ولكن (هز يدو) معندكم متصورو مني ومعندي مااا نخسر ميسطااارة دوز عليك نتي وياااه وبيييييس
ليلى: (حركت راسها بلا)
مكنتش باغيا داكشي يوصل هاكا وبابا مااامعرفتش جاني غير هو نتاصل بيه يجي ي..
(تحل باب المصعد وخرج تبعااتو)
اورطيغا: (ماشي جهة طموبيلتو حل لباب حط البيسي ولوراق وشاف فيها بغات تشدو وضار عندها كيهضر باستفزاز بحال شي حقاارة) اخر مرة تحطي رجلك هنا
ليلى: نتا ظلمتيني
اورطيغا: (هز حواجبو بجوج) اوك
ليلى: اور…( جات تشدو بغضب دفعها بجهد حتى طاحت وباينة تقسحت حيت غوتات لوا شنايفو كأنه مداير والو ركب فطموبيلتو ديماراها وطل عليها من السرجم)
سيري قلبي على للي يبردها ليك فهاد الليل واخر مرة تجي عندي
(بزق عليها وطلع الزاج وخلاها مليوحة تم زايد
تكره بزااااااف من بعد جلسة زوينة مع مو جات كلبة ضربات كولشي فالزيرو حتى قال هزيت يدي على هاد تخربيق وقفت يشد طريق مزيان، من دابا غيبدا لونكيييط معاه وعاد مو غتاخد موقف منو ويمكن تمنعو من الدار.. زاد تعصب مشا للحومة قبل مينزل شاف ضو بيت ملاك مشعوول هز دوزانو بقا كيفكر مدة زفر منين كتكون كيكون الموود… هبط سلم على دراري للي جالسين تماك ونيشان طلع.. ولكن طلع لطابق الثاالت دق لباب)
ملاك: (عاطية لخديجة الساروت حتى رجع دق بالجهد.. بعصبية) شكون!!
اورطيغا: مال مك كتغوتي.. انا
ملاك: شكون نتا
اورطيغا: (تبسم واخا معصب شاد لساانو باش مينطقهاش بصعووبة) اورطيغا
ملاك: (قلبها زدح قربت لحدا لباب) شنو بغيت؟! ما كيناش وفاء
اورطيغا: انا بغيتك نتي.. (خرجت عينها) قلتي قبيلة غتعاونيني
ملاك: (تبسمت) مقلتش
اورطيغا: (بهدووء) سيييي وعندي شهوود
ملاك: (مفرنسة كتلعب بشعرها) وشكون هوما
اورطيغا: ختك ويوسف ومول الحانوت
ملاك: ههه دابا شنو بغيت
اورطيغا: وحلي ونفهمك
ملاك: لا قولي من هنا انا بوحدي فالدار
اورطيغا: (حل لبيسي دار clé USB) خاص هادشي للي فلوراق يدارو فهاد clé وانا عارفك عندك مع هاد تواشي
ملاك: اممم
اورطيغا: ياله حلي لباب
ملاك: صافي حط داكشي حدا لباب انا ناخدو
اورطيغا: واخا يكون حشييش مديريش هاكا
ملاك: ههه (هزت كتافها) وصافي بلاش ݣاع
اورطيغا: (حط داكشي كيف قالت ليه) شحال باش رجع عندك
ملاك؛ اممم شي نص ساعة
اورطيغا: صافي مزيان انا هبطت (هبط نص دروج كيتسناها من مور الحيط شي دقيقة مكملاش كيشوفها حلات لباب دايرة شال هزت داكشي وهو يبان ليها)
تعشيتي؟!!
ملاك: (مبغاتوش يشوفها بديك الحالة واخا ديجا شايفها نهار انتحار وفاء) اه اه (دخلت كتزرب وسدت لباب عليها..)
اورطيغا: ههه موصييببا
أمينة: (بقاو مجمعين هي وزهرة للي مجية ديال اورطيغا عجبتها وامينة كتزيد تشكر فولدها بقاو على جموع حتى لفوقاش عاد داتها لبيت ضيااف نعساات هي وأنير وهي مشات لبيتها مفقووووسة مفقووووسة اخر حاجة تبغيها هي ولدها يدير لراسو هاد المونتييف براكة غير باها ومها كيكرهووهم عاد يتصااحب مع بنتهم!!!
لوكان ماشي زهرة للي كانت تماك متخليش ليه وعاد كان كيجييبها للدار يعني كيجيب قبل واخا ديجا نبهات على هاد القضية كتسنى غير يصبح الحال وتفاهم معاه مزياان وغيكون كلام اااااااخر معاه
الا هادشي للي متقبلووش….)
~~~~~~~~~~~~
اورطيغا: (بقا مجمع مع دراري وهو يوصل يوسف وخديجة خرجو من الطموبيل ومن الساشية للي هازة خديجة باينة غيكون عشا ملاك اذا ممعشياش علاش كذبت عليه!!!!.. وقف مشا عند يوسف للي عيطلز سلم عليه وعلى خديجة من لبعد)
يوسف: نسيبة راه عندكم فالدار مهليين فيها شوية؟!
اورطيغا: اممم خليتها هي والوالدة عطاتها دير السيما لسطح
خديجة: ههههه
يوسف: هه مزيان تفاهمو بزوج بعدا
اورطيغا: بزااف فولة وتقسمت على زووج.. (كان بغا يعاودلو على بلان ليلى ولكن مخاصوش يعاود…
مشا رجع جلس مع دراري وهوما طلعو شاف فالساعة كملت نص ساعة وتم طاالع كيدندن وصل للباب كيسمع هضرتهم وظحكهم دق كان بغا يلقاها غير هي..
تحل لباب كان يوسف للي حلو عارفو عندو الحق حيت مرتو تماك وملاك فحكم ختو ولكن!!!
ملاك كانت جاالسة فوق السداري ولعشا محطوط فوق الطبلة ولكن لبيسي كان فوق حجرها وهي مربعة رجليها كانت لابسة كيطمة واسعة ومقادة الشال غير شنو كانت لابسة قبيلة، عيات تخرب فداك لبيسي داكشي غير ديال الخدمة تصويرة هي التالية مكيناش فيه.. شافت فيه)
ملاك: انا كملت (دخلت اخر رقم من دوك الوراق ولكن عرفت شحال من حاجة على الخدمة وتصدمت من المبالغ للي كدخل من تݣزاارت)
يوسف: درتينا خدمة لملووكة
اورطيغا: (دار راسو مسمعووش يوسف جلس فالجنة الاخرى وهي سدت لبسي) لععععز.. (هز لبيسي ودوك لوراق)
ملاك: (بقات كتشوف فيه)
اورطيغا: درت ليك الأرارة!!
ملاك: شوية (تسناتو يتبسم بحال ديما ولكن باينة طايرة ليه)
اورطيغا: (شاف فيوسف) ياله هابط؟؟! يمكن لبنات بغاو ينعسو ولا يرتاحو
يوسف: بالصح (موجه الهضرة لملاك) حتى انا خاص نمشي غدا خاص نسربي الخدمة باش نجي عندكم بكري
ملاك: صافي واخا (خرجت خديجة مبدلة حوايجها لابسة بيجامة طويلة مع بينوارها وشالها)
اورطيغا: مهم (شاف فملاك ولكن ديك الشوفة ماشي ديال شكر) شكرا، (بقا واقف شي 2 ثواني عاد ضار) تهلاو (تم هابط شوية عاد جا يوسف عندو للدار كيقولو شنو غيديرو لغد ليه) حتى انا خاصني نجيب شي نموسية هنا
يوسف: حسن ليك اصاحبي الا بقيت ونتا تتنعس هاكا غيفرعك ظهرك
اورطيغا: مهم غدا الا ساليت لحق عليكم
يوسف: مزيااان ولكن جيب لعبار
اورطيغا: عارفوو
يوسف: تهلا.. (خرج مخلي اورطيغا حال لبيسي كيشوف خدمة ملاك للي دغيا دارتها بقا عقلو مشغوول كيفكر يمكن رجعت مع مول الميساج ومحتارمة غياابو داكشي باش محلاتش لباب ليه!! وولكن قبل علاش كانت كتحل ليوسف!! نفض دوك الافكار ومشا ينعس ينعس حسن ليه…)
اصبحنا واصبح الملك لله..
رشيد: (كان كيتسنى زهرة تصوني عليه حتى صونات مريم كترغبو باش تزيد حتى لعشية، مكان عليه غير يوافق على أمل ترجع زهرة لعندو…
صونا على ملاك وجاوبت معطلة)
ألو ملاك
ملاك: (خرجت من الاجتماع) نعام أبابا
رشيد: مك مزال باغيا تبقى تمااك
ملاك: اه انا للي رغبتها بغيتها تبقى تخرج معانا حيت خديجة بغات تختار شي فراش وبغيناها تبقى معانا
رشيد: قولي نتي المحرضة عاود
ملاك: ههه وا غي حيت شحال متسارينا قلت نستغلو الوقت محدنا هنا ففاس انا مكرهتش تبات معانا ولكن مابغاتش
رشيد: واخا ولكن غير يأذن العصر نجي نجيبها
ملاك: واخا بابا (قطع ورجعت الاجتماع بقات خدامة ضربت 12 وهي تسلت.. ركبت فتاكسي ومشات للسعادة فين وصفات ليها أمينة حطها حدا بوتيك حوايج معروف عرفت لبلاصة هنا كاين محال اورطيغا تمشاات بضع خطوات معرفت واش دخل عندو ولا لا خافت يسميها كتلسق ولكن بغات تشووفو.. قنعت قنعت قنعت راسها ودخلت حتى الا حصلت تسول غير فين جات دار مو مباانش ليها..)
على زهر..
(خرجت من تماك كتقلب على العمارة قرات عمارة احمد 2 كانت هي للي قالت ليها أمينة، دخلت مشات للمصعد دارت الطابق 4 كانت عمارة زوينة ونقية داكشي ديال Luxe مشات للدار 12 دقت وهي تحلها أمينة سلمت عليها ورحبت بيها دخلت كانت مها ياله دوشت ليها وحتى لانير)
ماما ياله نمشيو
أمينة: مزرووبة ازين؟!
ملاك: (بابتسامة) خديجة كتسنانا
أمينة: اوا تغدااو وسيرو
ملاك: والله الا كتسنانا ختي ياله معانا نتي اخالتي
أمينة: ربي يخليك ابنتي غيجي عمك الحاج باش يمشي يدير كونترول على داك القليب عندو
ملاك: اااااه الله يشافييه
زهرة: هاكي شدي خوك على ملبس واش كاين البرد برا!؟!
ملاك: (شداتو) شهدي اخالتي عاود يقولولي معرفت شنو درت ليه
زهرة: ههه هبيلة
أمينة: نتوما للي جبدتوها
ملاك: هاااه عاوداتلك والله مقستو داك نهار وهوما يلسقوني
أمينة: معليش ابنتي (ظحكتها الطريقة باش شدااتو) شحال باقيلك الخدمة ففاس؟!
ملاك: مزال معلمني المدير ولكن كان زادني 10 ايام
أمينة: وفين جالسة فلوطيل؟!
ملاك: لا كريت مع شي طالبات
أمينة: ردي البال ابنتي واخا لبنات راه ما فيهم تقة (حركت راسها باه) وشنو درتي فقرايتك
ملاك: تقبلت وغنكمل ان شاء الله
أمينة: براڤو عليك ابنتي لقراية شي حاجة مههههمة للبنت
ملاك: داكشي نيت (بقاو كيهضرو وملاك فنفس الوقت كتبرݣݣ فالدار للي كتحمق من الاثاث من كولشي..
مها لبست حوايجها توادعو مع أمينة متوعدين يتلقاو فالقريب وشكراتها على حسن الاستماع والضياافة وحتى لوخرا حست براسها تفاجاات منين هضرت وفرغت شنو عندها هبطو من عندها) شدي خوك مزيان
ملاك: الآلة ماشي خويا هدا ولد راجلك
زهرة: خوووك وغيبقى خووك، والله يرضي على بنتي شوفي شحال غزييول وديريوييش مسيكين
ملاك: (ميقت فيها عطاتولها وهي هزت الصاك بقاو واقفين كيتسناو شي تاكسي وكطل مرة مرة فالمحال اصلا حتى طموبيلتو مكينااش وقفت ليهم تاكسي ركبو نيشان للحومة هبطو لقاتو مكاينش حتى هنا استنتاجات اذا كاين فبنسوودة طلعو للدار كانت خديجة طيبت لغدا حيت صباح خرجت لسويقة تقدات لحم ونصباتوو وشوية دالخضرة) وكان غير مطيبتيش قلت نخرجو نتغداو برا
زهرة: براكة عليك من ضياعة الفلوس اديك البنت
ملاك: ويييه بالصح
زهرة: ههه باااز
ادم: (بهدوء وكان طلعو هاكا ديما كيبان هاااادئ) راه ميمكنش نتا غير تفكر يقدر يكون شي واحد..
اب ليلى: عييت نتفكر اولدي عيييت والو، اصلا شحال تنجي للمغرب ݣاع باش ندير لعدياان ومعنديش حتى شي منافس هنا شكون غيكون شي مرات تنقول غير تغالطت لشي واحد وجات فية الدقة
ادم: متنظنش.. ولو نتا غير تفكر شي نهار درتي مع شي واحد شي جست خايب للي بقا عااقل عليه وفاش جاتو الفرصة ردها لييك
اب ليلى: (عقلو حفا وهو كيفكر ميمكنش معندو حتى شي عدااوة) مهم نتا غترتاح هنا؟!
ادم: (هز كتافو بلا مبلاة) معرفت.. مهم انا غرجع لفرنسا باش نعرفهم غنكمل الخدمة غير من بعيد ونشوف مع الفرع للي عندنا هنا باش نرجع نجلس على خاطري
اب ليلى: اه حسن وحتى المحال ديالي راني كلفت صديقي تمااك يشدو
ادم: اوك.. ولكن فاش غرجع مغنبقاش هنا غنشوف شي اوطيل فين نجلس
اب ليلى: كاينة الدار
ادم: خودو راحتكم نتوما انا باغي نبقى بوحدي.. نتا عارفني.. (وقف هز جاكيطتو لبسها) غنمشي (خرج تلاقا شريف للي تسالمو بالحضن بقاو كيهضرو شحال عاد كل واحد مشا لشغالو..
خرج كيتمشا على ميوصل للطموبيل للي كرا كيفكر كانت جاتو فرصة يرجع يخدم بين المغرب وفرنسا ولكن رفض وشحال مرجع ولكن دابا رجع على حساب مشكل ديال باه للي مغيفلتهاش لهدا للي حفر لباه هاد الحفرة وردمو فالمغرب…)
~~~~~~~~~~~~~
اورطيغا: (رجعت للمرة التانية صونات عليه مسح بالفوطة شعرو الفازݣ غمض عييينو كيتسنى السباان) الوالدة
أمينة: (بفقسة) الغمة الغمة الغمة!!!!
اورطيغا: قلت الوالدة ماشي مّي
أمينة: ومزال كتقابح؟!!
اورطيغا: مي واخا نحلف ليك مغتيقينييش
أمينة: (كتغوت صااعرة حيت بوحدها فالدار) شنو غنتيق وهي كانت فم لباب لبارح وكان دخلت وشافتها لمرا تقول أمينة مربات وواالو الدار قاالبهالي دعاارة تبارك الله وانا كنقول خليت الدار فيها رااااجل
اورطيغا: ههه
أمينة: تهجروو
اورطيغا: (جمع الظحكة) والله متنهضر معاها راه هي للي لاسقة فية
أمينة: ايهاي ايهاي هااي لاسقة فيك ولد دريس جطو نتا؟!!
اورطيغا: ولد الݣرسييفية واجرك على الله
أمينة: مكنظحكش امراد
اورطيغا: (بجدية) اخر مرة غيتعاود داكشي راك شفتيني وكان كنت درت معاها غتجي عندي فداك الوقت؟! ولا الدار عامرة ؟! راه هي للي لاسقة ظحكت معاها مرة وهجراتونا والدار متنجيب ليها حد
أمينة: بعد من هادشي اولدي راك غتخرج على راسك كيفاش بغيتي ربي يسهل عليك ونتا كدير فالمنكر
اورطيغا: اعووذ بالله متندير والو الوالدة
أمينة: الله يمسخك، هاااا ودني امراد منعاودهاش مرة أخرى نوض تزوج حسن ليك اولدي ولا هاد تخربيق للي ماشي فيه (كانت غتحايد ليه سوارت ولكن غيحس بحݣرة كتر وكتر وهي مقدرتش)
اورطيغا: (ها مناش هرب هاد المحاضرة للي كتكون قااسحة واكترية هو غالط وظالم نفسو) صافي الوالدة
أمينة: بعد من هاد طريق اولدي ودير عقلك راك ماشي شي واحد للي مراهق
اورطيغا: صافي الوالدة كوني هانية (قبل ميكمل قطعت عليه، حتى قال الامور بدات كتقاد ولكن ها بلان خرج من الجنب وعاد مو!!!)…
اورطيغا: (منين قطعت عليه زاد كمل وزاد تكره وحقد اخر حاجة بغا يسمعها من مو هي هاد الهضرة وباينة زادت خافت علييه حط حوايجو للي غيلبس سمع صوت بيبي صغير مشا جهة ديال لباب عرفهم نازلين رجع لبس تريح دار كاسكيط هز لمتر بقاك يعبر لبيت ويعبر بلاصة النموسية، وهضر مع نجار يجي يقاد بلاكارات فالدار كاملة… صونا على يوسف وهو كيطل من البالكون ولكن مباينش كيشوف فيهم) فييين
يوسف: انا تحت الدار تنشوف طموبيلتك هنا
اورطيغا: اممم
يوسف: واش غتلحق ولا تمشي معانا؟! فينك نتا؟!
اورطيغا: لا غلحق عليكم مزال عندي شي شغاال فين غتكونو بالظبط؟!
يوسف: فمرجان طريق مكناس محال سميتو استقبال
اورطيغا: ااه صافي واخا.. (صونا على النجار كان قريب تسناه حتى جا وراه الموديل للي بغا فبيت نعاس ووراه يقاد بلاكار فبيت صغير وعاد فالكوزيينة خدا العبارات كيركز على الخشب المزيان.. مشا لاخر فحالوو عاد هبط اورطيغا ركب فطموبيلتو ونيشان تابعهم..)
خديجة: (خرجو عينيها فهاد الاثاث للي كتشووف حاجة كتنسييك فلوخرا كولشي زوينين وستيل تركي وكاين حتى ستايلات اخرين)
يوسف: بقاو معانا اخالتي
زهرة: معليش اولدي حنا غير هنا كنضورو ونتوما ختارو على خاطركم
ملاك: (كتشوف فخديجة للي مشات لبيت نعاس هو كان مبيهش ولكن كاين ما احسن) نبقاو اماما راه شفني مسكين هو كيرغب
يوسف: هههه تتفهميني
ملاك: (كتقليلو السم، بقات مها كظحك مابغاتش تخلق لبنتها صداع ماشي مها تكون ومو متكونش هاكا هي فكرت مشات ملاك عند خديجة وهي بعدت كتشوف فالاثاث مخلياهم بوووحدهم) اجي شوفي هنا
خديجة: عجبني هدا داير بحال دالمصريين مذهب زويين
ملاك: اييه ولكن حنا مغاربة دابا شوفي هدا زوين وسامبل حسن من هدااك
خديجة: زعما!!
ملاك: اه، شوفي باش ميبقاش يعقب عليك ديما سيري للسامبل بيت نعاس كيكون هاااادئ
خديجة: انا بغيتو يكون كبير
ملاك: شكون؟!
خديجة: بيت نعاس ازبل هههه (مهم هازة لوليد كتراري بيه حيت بقا كيبكي ليها جبدت قادات ليه لحلييب)
يوسف: زين شنو عجبك؟! (حط يدو تحت ظهرها)
خديجة: هدا (للي وراتها ملاك تبسم) وي حتى انا عجبني (بقا كيقلب فيه جا السيد للي تماك كيوريهم فيه ملاك مشات عند مها لقاتها كتشوف ناموسية صغير باينة بغات تشريها لانير)
ملاك: دابا البرهوش تكون عندو نمسيتو وانا لا؟!
زهرة: ههه حتى نتي فاش كنتي صغيرة درناها ليك
ملاك: (عوجت فمها مشات كتقلب بوحدها شافت من الزاج اورطيغا داخل شحال رجع كيعجبها هاد ستيل للي كيلبس صبوور، تبسمت مقدرتش حتى تخبعها عطات بظهر كدير حركات معاقين تخبع ديك الابتسامة البلهاء وكدير راسها كتقلب فشي حاجة ضارت لقاتو حدا خديجة مكرهتش تمشي ولكن مغتمشييش…
شحال رجعت كتفرج وترتاح فوجوودو شافتو كيقلب حتى هو فالنموسيات وكيقلب براسو بحال تالفة ليه شي حاجة دارت راسها مشافتوش ومشات حدا يوسف وخديجة وكتبين صوتها)
صافي ختاريتو هدا؟!
يوسف: خديجة عجبها هدا وحتى انا عجبني بزااف وعاد الخشب ديالو مزيان صدقنا تنختارو فحال فحال
ملاك: مزياان بالصحة والراحة شنو اخر غتاخدو؟!
اورطيغا: بسسس (ضارو بتلاتة.. ولكن عينو فملاك) واخا تعاونيني
ملاك: (تبسمت) خويا انا مخداماش هنا
اورطيغا: اممم.. وغير اجي ختاري معايا شي حاجة باش مناخدهاش… (فرنست ميقة فيه ومشات حداه) راه رجعنا سباان ومتخلا متقال فينا ها المݣرد ها الحازق
ملاك: مقلتش التانية!!!
اورطيغا: اممم بعدا اللولة كاينة!!!!
ملاك: ههه (وقفت كدور كتشوف ضارت بغات توريه واحد لقاتو كيشوف فيها وترها) وااا شوف هدا؟!
يوسف: (واش داكشي للي كيشوف صحيح ولا غير كيتهيأ ليه واش هاد الجوج بيناتهم شي حاجة من الكره رجعو كيختارو بزوج؟!! وكيظحكو!! بقا غير حاضيها)
خديجة: يوسف!!
يوسف: وي حبيبة
خديجة: شنو!! فين سهيتي؟!
يوسف: واالو والو، شنو بانلك؟!
خديجة: انا قلت الصالون حسن ناخدوه من عند شي نجار يكون بلدي حيت كاين العصري فالدار ومنها يكون ميلونج بين التقليدي والعصري زعما راه خدمتك هادي نوريك فيها ههه
يوسف: بالصح هاكا كنت باغي من اللول ولكن قلت نشوف نتي شنو بغيتي
خديجة: اممم.. نتا قلتي بيت خاص نديرو لضيااف نشوفو شي ناموسية عادية ماشي من هادو للي غاليين ولبيت لاخر (تبسمت) نخليوه bébé الا كتاب
يوسف: (تبسم) حبيييت
خديجة: (تبسمت، ملاحظة ملاك فمحلها خاص تختار بشوية ماشي غير تجي وتختار ذوقو صعيب معندوش مع المشعشع كتحاول تفكر اثاث دارهم باش دير بحاالو شافت صالة مونجي فالبيض سااامبل) هادي تجي زوينة فالكوزيينة
يوسف: ناكلو فالكوزينة؟!
خديجة: عادي! شي مرات اممم معرفت نكون مثلا تنطيب ونتا جالس حدايا ولا جات عندي شي وحدة من خوتاتي ولا ختك ونبقاو مجمعين تماك بلعكس كتجي زوينة
يوسف: صراحة فكرة
خديجة: والماكلة فالكوزيينة ماشي عييب غير نتا ممولفش المهم لبلاصة خاص تكون نقية وصافي
يوسف: لا لا متفهميش غالط
خديجة: لا مفهمتكش غالط غير كتشرح ليك حيت فدارنا دايرينها كتعاون حتى فطيااب وفجموع وأصلا نتا اش عارفك فهادشي ديال لعيالات ههه
يوسف: الآلة للي درتيه انا معاك فيه.. (تبسمت بقات كتشوف ختارت وحدة غير بجوج كراسة.. بقاو كيدوورو وحاضي العين مع ملاك واورطيغا اما مهم كتهضر بعيد فالتيليفون..)
اورطيغا: (كيحني يشوف هداك للي ختارت ليه حتى فلان مزيان) مزوييينش
ملاك: (ميقت فيه) الله يستر ولاش مصدعني من صبااح
اورطيغا: اجي.. (مشات من حداه كتشقلب فعينها وهو تابعها متبسم بقا كيشوف فديك النموسية جات عندو لبنت للي تماك وهنا ملاك قلشت متبعاهم بعينها كيظحك وهي كتشرح لييه وكيشوف فيها معجبهاش الحال)
ولد لحراام
زهرة: شنو؟!
ملاك: (مغوبشة) ماشي معاك
زهرة: شداتك الحالة عاود!! (جا يوسف وخديجة للي كملو الإجراءات ديالهم باش ياخدو داكشي للي ختارو على ميرجعو يكملو ولاخر بقا واقف مع ديك لبنت كتوريه موديلات اخرين خرجو وهي كدور عنقها حتى بعدو مفهمتش علاش لدابا مزال تماك!!! دخلو لمرجان.. ملاك غير صااقرة ݣاع داك الظحك والنشاط رجع ليها بالعكس وقندشت بغات غير تمشي فحالها، جا باهم باش ياخد مها تقداو شحال من حاجة تماك وعطاتها 500 درهم واخا مابغاتش ولكن بززاتها عليها.. هوما مشااو وهي بقات مع يوسف وخديجة للي كيقلبو فالمااعن ناشطيين وهي من موراهم مبقالها خااطر حتى مشاو لماكدو وجلسو تماك…)
اورطيغا: (خرج من المحال كان قالو يوسف غيكملو الدوران ويجلسو فماݣدو مشا جهة طموبيلتو حلها حط الوراق تماك حيت غيصيفطوه ليه للدار ولكن مدارس بحال يوسف للي زاد 50 درهم باش يجيبوه دغيا.. بقا كيشوف جهة ماݣدو واش يبانو واالو الدنيا عامرة بزااف سد طموبيلتو صونا عليه شي صاحبو جاوبو وبقا كيهضر معاه وهو كيقرب حتى شافهم بقا واقف حتى كمل عاد مشا جيهتهم كانو لخوتات جالسين حدا بعضياتهم ويوسف اونفاص معاهم جلس حداه)
يوسف: عاد كملت!!
اورطيغا: (حط التيليفون) اه (مسح على وجهو بتعب)
يوسف: بانلي تقديتي مزيااان هه
اورطيغا: (فهم قصدو) نتا عارفني متنزݣلش الهوتة
ملاك: (معجبهاش الحال بقات غير صااقرة كدعي فيه فخاطرها)
يوسف: نوضو خودو شنو بغيتو
خديجة: (شافت فملاك بجوجهم عمرهم جاو ليه)
ملاك: ياله نوضي
خديجة: شنو تبغيو نتوما
يوسف: للي جبتو
اورطيغا: معنديش مشكل
يوسف: ( عطاها كارت ݣيشي ديالو مشات ملاك دافعة الجبهة وخديجة لحقاتها)
قالي شريف ادم رجع غيجلس مدة هنا
اورطيغا: (بتعابير وجهو زعما ماشي شغلو)
يوسف: فشكل داكشي للي وقع مع سي محمد (باقي عاطيه داك التعبير وان هاد الموضوع مكيهمووش يعني غير سدو..) حقا تقادات طموبيل ديال ملاك
اورطيغا: مزال
يوسف: خديتيها لداك خونا
اورطيغا: اممم..
يوسف: شنو بانلك فشريف حتى هو يتوكل على الله ويخطب ملاك
اورطيغا: (مخسر وجهو) واش هاد ملاك متقلة عليك؟!
يوسف: هه عادي بحال ختي
اورطيغا: وااا غيثة اولى!! ولا هي ماشي ختك؟
يوسف: زعما!! شريف وغيثة؟!
اورطيغا: وبانلك غير ملاك وشريف اصلا ملايقينش لبعضيااتهم تااكلو وهو تيشوف
يوسف: ههه اممم هادي عندك شريف دروييش ولكن لا لا حتى ملاك درويشة
اورطيغا: (بعياء) سد هاد الموضوع الله يرحم ليك الواليدين والله اصاحبي عيقتي فيه متتقولش ديك البنت كفاش تتحس براسها بحال شي شارفة فاتها الوقت ونتا تتقلب ليها على شي عريس هنيينا اصاحبي
يوسف: واش قالت ليك شي حاجة!!
اورطيغا: لا (عاود هضر) بينتها، شووو شريف راه بعقلو وبعينيه الا بغا شي حاجة هو يقصدها ويمشي عندها متحتاجش تزين ليه شي حاجة وبالعربية والتاعرباات خرج سوق هاد تخربيق ونتا باغي تقلبها حرفة وتبقا تزوج الناس
يوسف: (شاف عندو الحق يمكن ملاك ميعجبهاش الحال) اوا ونتا؟
اورطيغا: ههه واش انا تنهرب من الوالدة ولقااك نتا اسيدي تزطمتي بصحتك القاالب خلينا حنا عليك فالتيساع باغيين نبقاو معذبين فهاد الأرض غير خلينا
يوسف: ههه (صونا تيليفونو كانت مو جاوب كانت هي وغيثة قراب) اجييو.. لا لا اش هاد الهضرة تتقولي غير اجييو.. (قطع حتى لاخر كان جاوب فتيليفونو…) غتجي الوالدة، الوالدة وغيثة
اورطيغا: (حرك راسو باه طل كتبانلو ملاك شادة فختها وواحد خدام فماكدو كيشرح ليهم وباينة غير من ديك الشوفة وتكية للي دايرة على ختها عاجبها داك خونا للي كيشرح.. هز حواجبو بجوج وعاطياها للظحك عض شنافتو التحتانية ورجع شاف فيوسف)
ماشي تعطلو؟!!! نووض شووفهم!!!
الغالية: (مكانوش خارجين هي بلعاني بغات تجي حيت عارفااه غيتقدا بيت نعاس من محال استقبال حيت شحال وهو كيسول عليه والناس كيشكرووه، وبغات تكون معاهم وصلو هي وغيثة لماݣدو لقاو غير اورطيغا للي جالس غيثة تبسمت شدتها قبل ميوصلو عندو) شوفي اديك القزقازة من هنا نقولهالك
غيثة: ماااماااااا
الغالية: نطلق عليك غير يوسف يبهدلك قدامهم هانا تنقول ليك جمعي راسك لالياااتك تيقلبو على رجال ونتي لاسقة فشمكاار دلخلا اسمعي اوالله متحلمي بداك نهار لي تجمعي معاه نموووت ومنعطيكش لييه
غيثة: غتبقاي هاكا غرجع فحالي
الغالية: ياك؟!
غيثة: ااه حيت عييت بهاد الهضرة شمكار شمكار!! بزااف!! اورطيغا عزيز عليا وصافي متنسايش راه كبرنا كولنا مجموعين
الغالية: باسم الله عليك!! اش كبرك معاه زيدي زيدي خلاص علية قالك كبرتي معاه اش جاب لجااب
(شافو يوسف خارج هو خديجة هازين بلاطويات فيهم ݣلاص وموراهم ملاك هازة حتى هي بلاطو حيت دارو بحساب حتى الغالية وغيثة، تبسمت كتسالم معاهم غيثة جلست حدا اورطيغا لسقت فيه وملاك جات اونفاص معاه معندهاش الخاطر وهي كتشوفهم كيضحكو ولوخرين كيصدمو فالغالية انهم ختارو شحال من حاجة ومعاهم نسيبة من الفوق كانت بغات تسخف ويوسف تحط بين نارين وكيشوف الفوار كيخرجو من نيوف مو..
اما هي حانية راسها على لݣلاص كتاكل فيه حتى زطم عليها هربت رجلها وشافت فيه لقاتو كيشوف فيها هز حاجبو فيها حتى كتجبدو من كتفو غيثة مليوح عليها)
غيثة: (بهمس) شوف حضي راسك من ديك ليلى
اورطيغا: (ضار عندها)
غيثة: ليلى بنت داك محمد للي جاو من فرنسا
اورطيغا: مالها؟!
غيثة: سمعتها تتقلب عليك، هاكا تتقلب فين تتكون والخدمة ديالك والدار للي ساكن فيها من غير السعادة.. حقا فين ساكن؟!
اورطيغا: منين جبتي هاد الهضرة
غيثة: كانت تتسول مرت سعد وهي عاودات لبنتها وبنتها عاودات لية حيت مفهموش علاش تتسول عليك
اورطيغا: (حرك راسو باه ساهي)
غيثة: علاش تتسول فيك
اورطيغا: (لوا شنايفو بمعرفت بعد راسو ورجعت جبداتو) امم
ملاك: (كتعيا تهرب عينها وتلقا راسها كتشوف فيهم)
غيثة: قولي بالصح فين سااكن
اورطيغا: كل مرة فاوطيل.. (تعجبت ممتيقاش) يوسف هو هدا انا مشييت (وقف شاف فملاك للي هازة تيليفونها كتخرب فيه، هز تيليفونو وتم ماشي فحالو متبعالو العين ومتبعالو دعاوي)
يوسف: (واخا عيات متبينش ولكن بانت فيها وتقرساات خديجة بقات كتوري لملاك شي تفاصل صوراتهم ليها الغالية باش تختار) الوالدة!!!
الغالية: ام ولدي!!
يوسف: (بهمس) راه واخا كانت معانا نسيبة ولكن مسكينة بقات مبعدة يعني ختارينا انا وخديجة هي مابغاتش دخل
الغالية: معليش
يوسف: (حرك راسو باه) خديجة ختاريتي شي حاجة
خديجة: انا غنشوف ذوق ملووكة حيت صراحة مكاينش بحال ذووقها، اممم عجبوني هادو وهي اممم بغيت ليها هدا وحتى غيثة نختار ليها هدا، هادو كادو من عندي هه
غيثة: ميغسي حبيبة
ملاك: (تبسمت فوق خاطرها باغية تريش غيثة والسلام)
الغالية: (شدت فمها ومتحكمتش فنظرااتها للي كانو قرطااس…)
ملاك: (طارت ليها بلمزيااان واش هو للي يفرحها وهو للي يقلقها) لا لا لا انا مموالفاش هاد زعلووك
خديجة: شنو؟! زعلوك؟!
ملاك: ماشي نتي..
الغالية: ياكما تتوحم ؟!
خديجة: كفاش؟!
يوسف: مالكم؟!
ملاك: بفف مزال منمشيو؟!
خديجة: شحال وليتي تحماقي تجلسي فالدار
ملاك: (مجاوبتش بقات غير صااقرة شافت فغيثة للي كتلعب فتيليفونها اول حاجة جاتها فبالها كفاش هي كتهضر مع اورطيغا واش تكون بيناتهم شي حاجة!! راه باينة منين جلسو وهوما وش وش وش.. فنفسها كتعاودها “مخاصش يطلع لية الدم ماشي غير ظحكنا شوية صافي راه بفففف”
وقفت)
انا نمشي ندور لهيه
غيثة: صبري نمشي معاك (ملاك مكرهتش تجمع معاها بشي تصرفيقة وتقولها ها العار اختي الا ما بعدي مني… مشاو لجهة LC Waikiki كيتجمعو)
الغالية: ولدي جيبلي شي صلاد متغديتش مزيان..
يوسف: اهاااه (وقف كيشوف فيهم بزوج وخايف من مو تقول شي حاجة خايبة لخديجة)
خديجة: (عرفاتها صدرااتو قلبت نظراتها من ابتسامة لنظرات جامدة فيها حيت عاطياه بظهر وقلبت وجهها كتسنى القرطاس والمعياار وكتخدم المناعة)
الغالية: جالسة تتشتتي ففلوس ولدي على قبيلتك!! حسابلك غنخليك ضربي ݣاع داكشي للي بناه وضيعييه عليهم قالك تتختار فتفااصل حمدي الله غير على راسك للي غلبسووك
خديجة: (زيرت على تيليفونها متيقاش فيها) مفهمتش اخالتي
الغالية: يخوي ليك ضرااس قدي قدك وتتقوليلي خالتي
خديجة: مفهمتش شنو بغيتي نقولك؟!
الغالية: تقاال ليك ابنت لحراام
خديجة: (منين عرفتها كتسب وخرجت ليها يعني مكتسجلهاش) أسمعي اديك العقروشة انا والله حتى نخرج فيك والله يا مك حتى نحمقك الا مبعدتيش علية
الغالية: باني على حقيقتك
خديجة: ماشي حقيقتي هدا التعامل للي كيليق ليك.. نتي مبغياش للي تحتارمك وتعامل معاك مزيان وتوقرك وهدا التعامل للي يجي معاك وحدة شارفة مرضيااش تكون عندها كنتها حسن منها
الغالية: ههه هاكاااوا على حسن مني باااش!!
خديجة: (هزت حاجبها) باشما بغيتي (كتفقسها) صغيرة وزوينة وجههي ممكمش شعري مشاايبش ماشي بحالك شي الشيبة العاصية
الغالية: (طاحتلها فالنقطة.. بعصيية) الشيبة العاصية هي مك
خديجة: ههه ويلي ويلي يا ربي توصلي لظفرها واش شفتي راسك وشفتيها هي كفاش داايرة!! تحشمي قداامها ههه انا كنقولهالك من دابا فالعرس متبانيش قداامها ولا عرفتي مزيان غير باني بحرا تحاايدي العين على ميمتي الحبيبة اااا اخااالتشي
الغالية: (بقات صااقرة مخنزرة حتى طلقت ظحكة صفرا) اوا الايام بيناتنا الشلحة الخانزة
خديجة: (من ظحكتها عرفت راه يوسف جاي) كوني هانية اخالتي ولدك فعيني والله متخاافي واخا زعما امم.. ولكن حتى أنا راه قارية وكنت حبست فلفااك زعما عندي مستوى…
الغالية: (بقات غير كتشوف حط ليها يوسف العصير وجلس حدا خديجة بهدوء مدرعها والغالية حيت براسها تقوولبت..) مقلت والو على قرايتك ابنتي
خديجة: اه بالصح انا غير قلت وصافي (كتموه انها كتجمع الموضوع، تبسمت وشافت فيوسف) تعطلتي
يوسف: (معاجبوش الحال) كان عامر لداخل
خديجة: اممم (شافت فالغالية تبسمت وغمزتها)
الغالية: (قربت تنتفس راسها)
يوسف: (عرف مو غطيح بخديجة بخصوص قرايتها واخا منبهها انها مدخلش وعلم الله شنو قالت وللي عجبو هدوء خديجة ومافيهاش مك قالتلي ودارتلي بلعكس بقات ساكتة حتى رجعو لبنات) صافي نتحركو؟!؟
الغالية: انا مزال ندخل المرجان نقضي شي غراض
يوسف: صافي انا نمشي نوصل لبنات
الغالية: بقاو معانا
يوسف: غيكونو عيااو
خديجة: معليش الا بغات خالتي نبقاو ماشي مشكل
ملاك: عييت انا والله منعست مزيان لبارح وفقت بكري بقاو نتوما انا ناخد تاكسي ونمشي
يوسف: صافي نمشيو نخاف تسخفي وتجيبي سبتك علينا
ملاك: ها ها ها
الغالية: اوا معليش ديها ترتاح غير هي ماشي عندها طموبيلتها؟!!
يوسف: (سلم على مو مجاوبهاش بقات هي وغيثة وهوما مشاو ملاك متلية من موراهم مخلياهم على خاطرهم) شنو قالت ليك على لقرايا
خديجة: مقالت والو
يوسف: خدييييجة..
خديجة: وصافي ايوسف،، قولي داكشي للي ختارينا عجبك وإمتى غيجيوه للدار؟! ناااري شحال متحمسة حتى داك الكوفر غزااال
يوسف: المهم هو يعجبك نتي عرفتي الا بغيتي نمشيو لواحد المحال ديال لمااعن
خديجة: نمشيو (بفرحة) كننموووت على لمااعن
يوسف: هه علاش؟!
خديجة: معرفت اي وحدة كتبغي تشري لماعن وفاش كنت للهييه معمرني شريت حتى كاس كان كيبقى فية الحال
يوسف: دابا الآلة غتشري للي حبات خااطرك
خديجة: (تبسمت فرحانة) خاصني نكتب كلشي فورقة باش منضهشرش هاكا كتقولي ملاك باش منين نوصل للمحال منبقاش غير كرون ونتلف
يوسف: صراحة فكرة ههه عندها شي أفكار
خديجة: ههه
يوسف: تبغي نمشيو دابا بانتلي ملاك عيانة
خديجة: اممم لا حتى لغدا سير نتا خرج مع صحابك شوية من لبارح وهوما مبرزطينك باش تخرج حتى لغدا ونخرجو بدل الجو معاهم
يوسف: (تبسم بحب طلعو للطموبيل ملاك ركبات اللور مكرهاااا دارو موسيقى عايشين معاها وصلات الحومة مكيناش طموبيلتو لامت راسها مخاصهاش تبقى تقلب علييه صافي تخوي راسها منو اصلا غير فضوول لي كان فيها عليه مكاين حتى حاجة اخرى….)
يتبع
التعليقات 0