🔖الفصل الثاني : جنون العقلاء

🔖الباب الرابع : كن معي قذرا !!

بعد 4 ساعات …

جالسة حكيمة على الكرسي فالكلوار وغارسة راسها بين يديها باقيا بقفطانها … و نورة حداها كطبطب على ظهرها ونور هازة تكشيطتها البيضة و الحنة خضرة فيديها وكتمشي وتجي و تولول على زهرها … تاعلات حكيمة راسها بنرفزة

حكيمة : دوزي تكلسي دوختني الله يعطيك مايهزك عليا

نور : ( قربات عندها كيف الحمقة ) غايموت ياك غايموووت ليلة عررسي غانتسمى عروسة منحوسة دابا ياك اماما

نورة : بغيت نعرف انا غير شنو طرا بيناتهم لفوق تاوصل لهاد الحالة .. لا لا هادي شي حاجة تما

نور : هااااا هاااهو جا لي يقول الحق شهدي اختي شهدي ياك السبب غاتكون داك خيتي لي جاب معاااه … بنات الزنااقي حتى هوما ولاو يدخلو لديور لكبار … شهدي شهدي اختي لاوقعات ليه شي حاجة هو وياها السباب ….

حكيمة غير تتنهد و نور كتمشي وتجي وتهضر غير مع راسها ونورة غير كتفكر وتحاول توصل لشي تحليل منطقي …

نور : لا لا لا انا مانبقاش هاكا … انا غانمشي عندو …. راه انا هي مرتو ماشي هاديك …

حكيمة : ( بزعفة ) ككككلسي الارض … كلسي ماتكمليش على مابيا … واش عارفة شنو هي يموت الحاج هو باقي مكتب ليك والو … واش عارفة ولا لا … دووووزي تكلسي نتسناو هاد الطبيب آش غايقول

*فمكتب الدكتور

جالس تونار و ليديا و الدكتور كايحاول يشخص ليهم حالتو وويوعيهم بالخطورة دحالتو دابا ….

الدكتور : خليوه يبات هاد ليلة فالانعاش … وغدا ان شاء الله نخرجوه لشومبر عادية وتقدر تشوفو … ( تنهد ) وييكون خير

تونار : ( شد على راسو مدة كايحك فجبهتو ورجع شاف فيه بعيون متعبة بزاااف ) مغايبراش ياك ادكتور …. مغايبراش

الدكتور : راك عارف الحالة كتر مني … احسن حاجة تقدو تقدموها ليه فأيامو الاخيرة … انه يحظى باوقات سعيدة مع عائلتو وحتى الماكلة ياكل لي بغا ولي تشهات خاطرو غير حيدو عليه داك الريجيم مافايد بوالو … حاولو تخليوه مكالمي ما امكن و مرتاح …. وربي يخفف عليه

تونار غير غارس رااسو كيف شي واحد مقبل على الانتحار وتاحاجة مكاتشبتو بالحياة …و ليديا طولات فيه الشوفة وشافت فدكتور

ليديا : امتى يقدر يخرج

الدكتور : من الاحسن يبقى شوية عندنا تحت العناية … حتى تستقر حالتو ويفوت هاد الازمة … ويمكنليكم تخرجوه يرتاحو فدرو حسن هنا راه ماعندنا مانديرو صراحة … ( تنهد ) حنا كلنا غانموتو واحد النهار … كيف ما الجد ديالكم … المرض تمكن منو وانتشر … ولكن هادشي مكايعنيش نعجلو بالموت ديالو ونحكمو عليه بالاعدام ونبقاو نعصبوه ونوتروه … بالعكس نخليوه ما امكن مرتاح ونخليوه ينسى انه مريض …. حتى توصل ساعتو بدون مايكون معدب فوسط شي ازمة …. الواحد تايفضل يموت فدارو بين ولادو مشهد ماشي فلومبيلونص ولا فالانعاش ….وماعرفنا كاع شكون غايسبق والاعمار بيد الله ….. و …

باقي مامكلش كلامو كان تونار ناض خرج مابقاش قاد يسمع مزال ونفس الكاسيطة كتعاود بين اطباء ايطاليا والمغرب وليديا ناضت تابعاه هازة قفطانها لقاتو كلس على الدرجة وحاط راسو على جنب الحيط … منظر خلاها تكسر من داخل … اول مرة تشوف شي واحد فهاد الضعف .. شافت عينيه كيف تعمرو بالدموع .. جاها فشكل تشوف تونار كايبكي !! ….

بقات غير واقفة وكتفرك يديها مع قفطانها بتوتر ماعرفات واش تقرب ليه ولا اش دير باش تواسيه .. وهي اصلا مكتعرفش تتكلم فبحال هاد اللحظات … ومشاات عندو جلسات حداه وغير كاتشوف فيه تانطق هو قبل ماتهضر هي كايشوف فالفراغ

تةنار : نهار ماتو عائلتي كنت باقي صغير على انني نستوعب موتهم …. وكبرت وانا حاط عائلتي كلها فيه … ليوم عاد انا كنحس براسي غادي نفقد عائلتي …

ليديا : احم .. ااء … ( غير كتمتم اول مرة يهرب عليها الكلام ) ا .. ع عادي … و وراه كلها لينا .. زعما كلنا ليها … و و… وراه كاملين غانموتو غاتموت نتا وغايموت جدك .. و زعما حتى حنا غانموتو .. وان شاء الله دابا دابا حتى الى مات نتا دابا تلحق عليه لتما … ان شاء الله دغيا غادي تبعو … لا لااا .. الا لااا .. لا زعما بغيت نقول الله يستر … ففف م موهيم الله يشوف من حالو و ومن حالكم ويشافيه و ويطول فعمرو والله يبارك … لا زعما … الله ي ..ماعرفتش ..،الله يدير شي حاجة وصافي ..

تونار طلع فيها عينيه ولقاها غير كتفتف.. غير شافتو كيفاش كايشوف فيها وهي تقلب نظراتها لنظرة حنييييينة نظرة كانت اشبه بالعناق … نظرة كافية تخليه تحس بالدفئ و غير من خلال النظرة قالت ليه ” انا معاك “… النظرة كانت ابلغ من الكلام المتلعثم .. ولغتها اكثر فصاحة ….

شمر بينيفو يحاول يبين انه قوي … وشاف عندها مجدد قواه

تونار : سيري مع لحسن يصولك لوطيل …. ماديري هنا

ليديا : ونتا ؟؟؟؟

تونار : غانبات معاه …. منقدرش نجي

ليدسا : خليني معاك

تونار : قلت ليك سيري … ( شاف معاها بداك القفطان) بدلي غير حالتك …

باقين كايهضرو حتى وقفات عليهم نور هازة تكشيطتها وحكيمة ونورة تابعينها

نور : ( مطرطقة عينيها فيهم وللقرب لي جالسين بيه وهوما طلعو فيها الراس ومابغاتش تبين باقي مكتزعمش عليه ) كيف بقى عمي الحاج ….شنو قالو ليك …

تونار شاف فيهم وزير سناااانو حاقد لان عارف هوما سبب فهادشي وهوما لي عمرو راس جدو …. وناض بززربة مشا وليديا بقات كضور عينيها عليهم وطلع وتهبط وهوما يتجمعو عليها كيف ثلاثي الخطر وحكيمة تقدمات موجهة الكلام ليها

حكيمة : خرررررجي عليا منهنا … نعلة الله وعلييييك شوفي فين وصلتيييييينا … خرجي علينا حنا معندناش بنات زنقة يداخلو معانا فماشكلنا

نورة : الى عندك شي نفس سيري منهنا السيد راه مزوج وبمراااتو ……ونتي لاسقة فيه

نور : محشمتيش كتلسة مع راجلي فلوطيل وبااااشمن صفة اصلا جاية لهنا نتي شنوو كتجينا ….شنو علاقتك بيييينا.. حنا عائلة بيناتنا ونتي مالك

حكيمة : اييييه شكووووون نت اصلا

ليديا كتسمع ليهم بكل هدوووء ونظراتها الشيطانية لي تشكلو على وجهها كان كلامهم غير ضحكها ماشي عصبها كتعشق تعطي ردود افعال معاكسة مع شنو كايضن الطرف الاخر غادي دير… وناضت بشوية نفضات قفاطنها وقربات عند البنات طلعاتهم وهبطاتهم مزيان وزنااااتهم فدماغها ….وقربات عند راس الحربة حكيمة شافت فعينها وهضرات بريفية حيت عارفاهم ريافا

ليديا : ( نظفات ودنها ) نعام ؟؟؟؟؟

حكيمة : ايييييه شكوووون نت

بيديا : ( قهقهات وقربات ليها كتتر وقالت بالهمس فودنها ) ضرّة بنتك …..

غمزها وهزات قفطانها ومشات تبعات تونار وهوما بقاو كايولولو من شنو قالت ويكدبو ودنيهم …. ونور سخفات على نورة ….

مشات ليديا كتقلب على تونار حتى لقاتو واقف كايشوف لتيل شافها

ليديا : غانمشي نبدل ونرجع عندك …

تونار : لا،… كلسي تما تانجي الجو مكرهب وديجا خصنا نهضرو انا وياك …

ليديا بقات كترمش فيه كيفاش نهضرو ؟ …هذا علاش ناوي ؟ …. شافت حالتو كيفاش دايرة مابغاتش تزيد عاد معاه الكلام وهو اشار للحسن الشيفور ديال جدو … وأمرو يوصلها لوطيل وهي ماشية وضايرة كتشوف فيه تاهو بادلها نفس النظرات و دخل محتاج يكلس شوية بوحدو يعالج الامور و يفكر فحل اوسط … ومشات ركبات فطوموبيل وغير ساهية لور وكتفطر للثلاثي و كيفاش غاتعامل معاهم مستقبلا ….. وبانو ليها من نهار لول دقو ناقوس الخطر …

تونار كان داخل حتى جات عندو نورة كتجري

نورة : توووونار تونار .. نور سخفاااات لينا عيط على شي طبيب … عفاااااك …

تونار شد على راسو هدا مكان خصو …. وهضر مع واحد فرملية ومشا … ونورة حسابتها غايوقف على ها

هادشي بيديه ساعة خلاهم ومشا ديجا مكيحملش يتخالط بالناس بزاف نظرا لحالتو … ومشا لبلاصة ديال الانعاش قلب على جدو فين كاين وقف تما كايشوف فيه غير من الزاجة …. و هم كبير هازو فعينيه وقلبو منكسر على جدو لي غايخليه وحيد …. واكبر يتيم فالدنيا …. كان عايش وجدو هو لي عاطيه سبب لحياتو وليوم حتى السبب دحياتو مغايبقاش …. مكيقدرش حتى يفكر فيها انه غايموت …. غايخليه حتى هو …. حس برجليه فشلو عليع بقوة التفكير وجلس على واحد الكرسي تما كايشوف للفوق وكايفكر فشي حل لهاد الموصيبة لي طاحت على راسو و كايحاول ما امكن يتفادى انه يفكر فالمواجهة ديالو مع جدو وشنو قال ليه حيت غير مكيزيد يتأزم .. وتايقول فراسو لي وقع دابا راه وقع … جدي غلط لانه مشاورنيش وانا غلطت ملي ماقلتش ليه تزوجت …. خصني نحقق رغبة جدي وسعادتو فنفس الوقت نحقق رغبتي وسعادتي … وكايقلب على حل لي يحقق بيه جوج رغبات فدقة وحدة …

ليديا وصلات الاوطيل وطلعات لجناح فين هوما … حيدات صباطها وتلاحت على السرير جالسة كتكاول ترد الشريط اللور وتستوعب حجم المشكلة لي هوما طايحين فيها … الراجل لي تزوجات بيه وجاية باش تعرف على جدو كاتلقى راسها معروضة هي وياه لعرسو .. وجدو مزوجو بالتخبية عليه بوحدة هي عارفاها وسمعاتها الى غير طامعة فالدار … وهادشي موقفش غير هنا بل دابا الجد بين الحياة والموت وبقاو ليه ايام قليلة و كيفاش غايصبر تونار من ورا موتو ومايدخلش فإكتئاب ومايديرش شي حاجة فراسو …. تونار لي ولات كتفكر ليه كتر من راسها وسعادتو ولا هي سعادتها وتعاستو من تعاستها .. وكتخاف تفقدو منبعد مالقاتو وكان بنسبة ليها هو لي عطاها الحياة وجابها لدنيا ماشي ماماها …..

شوية تفكرات كلام الثلاثي ليها و ابتسمات بجنب فمها ملي تفكرات كيفاش كانو كايهضرو معصبين وهي المتعة ديالها هي نهار كتعصب شي واحد ….و رجعات قالت مستهزئة بالوضع …..

ليديا : جاب ليا الله فاش نخرج وحمي نهار نحمل …..مهم نبدل بيهم الروتين ويفوجو عليا شوية ….( تفكرات هضرتهم ) بغيتو الدار … هه!؟ … غانخليها قبركم وعمركم تخرجوها غير تهناو …..

*اليوم التالي

غرفة دالمستشفى …

مستلقي المامون على السرير مغطي النصف ديالو بإزار اخضر و يديه خارجين منو ويدو فيها السيروم كانو يالاه خرجوه من الانعاش … وهو باقي نااعس ووجهو صفر بزاااف وعينيه دخلو …. وتونار شاد فيديه وناعس عليه … تاحس ييه كايتحرك فيديه وناض مخطوف كايتحسس فوجهو

تونار : جدي … جدي كتسمعني … جدي

بدا المامون كايحل عينيه بصعوبة وتلفت شاف لعندو وشفايفو بالكاد كايتحركو باغي ينطقق بصوت ضعيف

المامون : ت،..،تونا ..ر

تونار : ششش هانا معاك رتاح …. كيف كتحس براسط ….

الكاكون : ازوغ آمان ( بغيت لما )

ناض تونار بزربة هز كاس دالما و بدا كايحاول يكعدو شوية شربو داك الما عاد رتاح شوية المامون

المامون : ( عينين عيااانين ) آمي نو ( اولدي) ن نيش .. نيش ازوغ ( انا … انا بغيت )

تونار : شششش متهضرش دابا … رتاح …. ديها غير فصحتك كولشي راه مزيان آجدي ديها فصحتك ومغايكون غير خاطرك … ( المامون كايشوف فيه بأسف وندم كبير فيعينيه )

المامون: س سمحاي .. سامحاااي ( سمحلي )

تونار : واا اجدي هضرت معاك صافي …. مكاين وااالو .. انا لي غلطت معاك ماشي نتا .. رتاح انا غانمشي نعيط لطبيب يجي يشوفك … صافي ؟ رتاح…

خرج من شومبر ماشي بجهة الدكتور وهي تقرب عندو حكيمة بغات تسولو واش فاق مجاوبهاش كاع وشافت عند بناتها لي كانو بدلو داك تكاشط ورجعو

حكيمة : حراااااام واش يرد عليك الكلام ….. شوفو لمن غانعطي بنتي .. مكيحسبنيش تالحساب تقول انا لي حرقتو … مالو معانا منهار كان صغير هاز زنااافرو لسما عاجبو راسو وكون كان عندو غير شي وجه بحال الناس

نور : كولشي كان غادي يكون مزيان وكنت انا لي غادي نبدلو كون مدخلاتش داك اللفعة وسطنا .. منين تسلطات عليا منين

حكيمة : واش ندخل دابا عند الحاج ولا كيفاش

نورة : وراكي مرتو بسيف عليه تدخلي …. نتي اولى تكوني حداه ماشي هو …. .

حكيمة خلاتهم وحلات لباب على المامون غير شافها عينيه تعمرو بدموع وهي قربات عندو

حكيمة : الحاج !! كيف بقيتي الحاج خلعتينا علييييك … بناتي مساكن مسكتووووش من البكا ومشافو النعاس ولا كحلو بيه اما نور سخفاااات كاع مسكينة

المامون : ( سرط ريقو كايحاول يهضر ) ح حكيمة … س سامحاي احكيمة ( سمحيلي )

حكيمة : الله الحاج اش هاد الهضرة

المامون : س سمحولي كاملين ع على هادشي ل لي درت ف حفيدي …و وفبنتك …

حكيمة : لا لا الحاج ماتقولش هاكا نتا درتي غير لي بان ليكم ل مصلاحتهم … وان شاء الله هادشي يبقى غي تعاويظ ودابا يتفاهمو ويعجبهم الحال نتا غير تهنى

المامون : ( كايهضر بزز ) لا .. لا احكيمة لا …. ت تونار تزوج ا حكيمة …. تزوج فطاليان ( حكيمة طرطقات عينيها حيت واخا هضرة ليديا متاقتش قالت غير كتكدب )

حكيمة : اوييييييلي على تزوج

المامون : ( كايكح ويحاول يهضر ) ت تزوج …. تزوج

يلاه غاترد عليه هو يدخل تونار لي غير شافها واقفة تما و المامون هابطة ليه دمعة تععصب مكيحملش حتى يشوفها

تونار : خرجي برا مايدخل عندو حد السيد محااج يرتاح

….يلاه برا …

مزادتش معاه لكلام وخرجات مصدومة باتجاه بناتها لي كايشوفو معاها وهي مرفوعة

نور : ماما ؟؟؟؟ ماما مالك قالك شي حااجة

نورة : ماما هضري خلعتينا

حكيمة : تزوووجها … كلام اللفعة كان بصح ماشي كدوب… تزووجووو دارها لكافر بالله … دار لي فراسو

نور : ( بغوتة) شنوووووووو

نورة : (طارت شدات على فمها ) سكتيييييييينا …. اويلي اماما اشنو كاتقولي كيفاش تزوجو ياك جدو زوجو بنور

حكيمة : قالك ( كتهضر مرفوعة ) تزوح فالطاليان … تزوج بجنسيتو لوخرا

نورة : بنت الحرااااااااام عرفاااااات تلعبها ….. بنت الحراااام . هي هي لي كانا كانسمعوها داك نهار فبيتو وقالينا الروبو …. والله تانحلف علييييها الى هي

نور : ك كيفاش .. كيفاش د دابا هي تزوجاتو قبل مني

نورة : معرفت مهم والله حتى هي لي كانت داك نهار ( شافت عند ماماها ) ودابا كيف غانديرو فالدار ؟؟ لمن غايكتبها راجلك

حكيمة : دابا نساو عليا الدار وفكرو كيغاااانديرو تهنااااااو منها …..

نورة : ( بقات كتفرك فيديها هي مولات الافكار الشيطانية ) نرجعو لدار ….. وغانوريك … هنا .. هنا فالمغرب غايفرتكو عشهم …..

نور : حححلفي اختي

نورة : كالعبو هنا …. هادي باليا واقلة ماعرفاش معامن طاحت ….. غير بلاتي عليها

فالغرفة

سالا الدكتور الفحوصات وتكلم شوية على جنب مع تونار على حالة المامون ثم مشا .. وتونار ابتسم و باين العيااااء على ابتسامتو الباهتة وعينيه لي مشافوش النعاس .. و مشى تكا جدو شوية على السرير وجلس حداه

تونار : غاتخرج فالعشية ….

المامون : ( تبسم و شد فيدين تونار) علاش ماقلتي ليا والو .. ونتا عارفني كنحلم بنهار لي غاتزوج فيه

تونار : تيق بيا الى قلت ليك كنت مترردد .. كنت خايف منها …. م ماعرفاش كيفاش نشرح ليك .. مكنتيقش فردود افعالها

المامون : بغيت نعرف كولشي .. فين عرفيتيها وبنت من هي

تونار : بنت من ههه … راه على داك بنت من طالع ليا الفيلم اجدي ….

المامون : كيفاش ؟

تونار : الى قدرتي تعرف نتا بنت من غاتكون درتيا فيا خير كبير … ( رجع تبسم ) غير لي بغيت نقوليك باش تتهنى … حفيدك تزوج بإرادتو .. ورغبتو … ماشي غير على قبل التزييرة لي درتي ليا .. انا تزوجت حيت فعلا لقيت راسي محتاج لاستقرار … ولقيت كلامك على صح .. مخصنيش نبقى دافن راسي

المامون : ( ضحك بفرحة بانت على وجهو ) كتهضر بصااح

تونار اكتفى انه حرك راسو بالايجاب بابتسامة حنينة كايحاول ما امكن يبقى مبتسم حداه ومايهضر فحتى شي مشكل لي يوترو او يقلب ليه المزاج …. والجد بانت الفرحة على عينيه لي اخيرا اقتنع يتزوج ويستقر …وداك الفرحة عب كترجع فتونار الحياة وكتعطيه امل انو جدو باقي مطول معاه …

المامون : ( رجع تفكر شي حاجة وجمع ضحكتو ) ومزال ماقلتي ليا والو على داك الخبار ديالك فالمحكمة … مافهمت والو قلتي ليا ماشي هضرة دتيليفون .. يلاه عاود ليا دابا

تونار : ( شاد بخاطرو ما امكن ) داكشي جزء من الاستقرار لي قررت نعيشو .. كنتي ديما كتسولني علاش عايش فالخفاء ومكنبغيش نسافر بزاف فالمطارات .. كان سبب شي بحوثات كنديرهم بالعشبة دالحشيش .. اتهمتني الدولة على اساس كنتاجر فالممنوعات .. ( المامون طرطق عينيه ) ولكن متخافش .. تبرأت ملي عرفو بلي مكنتاجرش غير كنخدم به ….وراه ديجا كنت قلت ليك هاد الفكرة ملي كانت عندي خمسطاش عام .. ومابغيتيش .. قلتي ليا بعد على داكشي… ولكن را ( قاطعو )

المامون : ولكن درتي لي فراسك كيف ديما … وااااشفتي دابا المشاااكيل

تونار : مكاين بو مشاكل الحمد الله .. خدام دابا قانوني و داز التفشيش لمختبر ديالي وكنخدم بعلم الدولة … غير تهنى …

المامون : عرفتي شحال فرحتيني ولا معرفتيش …. دابا عااااد تهنيت اولدي اونموت مرتاح

تونار : دابا مكنهضروش على الموت ومغانهضروش عليها … دابا غانهضرو على صحتك لي خصك تديها فيها اما الموت راه لااعمار بيد الله ….

المامون : وهاد البنت ….. شكون هي وفين تعرفتي عليها وكيف درتو تزوجتو

تونار : هه … هاهي جاية … وسولها نتا نيت … حيت انا والله معندي ليك شي جواب .. انا براسي معارفش امتى وكيفاش دخلات حياتي …لي عارف ومتأكد منو ….( شاف فيه مطول وخرجها بزز ) مرتاح معاها ….

المامون : ( ابتسم ليه وفهمو ) ولكن واخا هاكاك خصني نتلاقاها … ونشوفها ونعرفها كيف دايرة

تونار،: ( حك شعرو وتنهد ) اااه تعرفها كيف دايرة …. واااه ضروري ….غير الله يستر وصافي ( رجع طلع راسو ) واخا .. واخا اجدي … واخا

المامون : ونور … راه مغان( قاطعو)

تونار: من بعد .. من بعد ونهضرو فموضوعها .. نساه دابا … ولا عرفتي باش ترتاح كتر .. انا غانتكلف ….

المامون : تونار … ( حزنو ملامحو ) مابغيتيش تضيع فرحة البنت … لي عطا الله دابا عطاه … تزوجتي ايه .. ولكن حتى هي طمعات بالزواج بيك انا لي شفتها شحال كانت فرحانة مسكينة ينو .. كمل على خييرك وتهلى فيهم بجوج ….. على وجه جدك …

تونار شد على راسو وهبطو

المامون : الله يرضي عليك اولدي … حتى هي مسكينة فرحانة وبغاتك ….. وزايدون الشرع راه عطاك ربعة… ولكن مانحرمكش من سعادتك الى كانت مراتك ماموافقاش نشوفو شي حل لي مايتضرر فيه تاواحد .. حيت حتى هاد البنت رتاحيت ليها غير من طريقة لي عاملاتك بها … مكان كايقدر تواحد يهدنك ملي كتعصب من غيري انا ملي كنتي صغير … كايهدنك غير لي كايخاف عليك ديال بصاح …لي كايخاف عليك بلا مايخاف منك …..ولكن راه حتى نور مابغيتش نضيعها ….

تونار : ( تنهد ) خلي علينا دابا هاد الهضرة .. انا غانتكلف بيه ومغيضر حتى واحد غير تهنى … نوض نحيد ليك هادشي نوض كتبان بحال شي وحدة يالاه ولدات ( كان لبس كسوة دسبيطار ) نلبسك حوايجك سخان حسن …

المامون : بزاف عليك …بلحيتي ورديتيني كنولد

تونار : انوض نوض ….نتا كتولد هاد ساعة غير الكواريث ..( شافو خنزر فيه ) وانوض باش نجيب ليك اتاي ….

على برا

حكيمةوبناتها باقين كايبنيو ويهدمو ….

حكيمة : بغيت غير نعرف منين تسلطات علينا منين

نور : مووصييبة.. موصيبة وطاحت عليناااا ….

نورة : دابا غير تهدنو… الحمد الله غير لي الراجل بيخيرر وماماتش … يكتب لنور دار كيف واعدنا وخرجي تانتي عينيك آماما …..

حكيمة : اشمن دار اشمن .. راه قال غير النص فالدار نص لاخور غايخليه لحفيدو

نورة :موهيم بعدا مغانتلاحوش لزنقة … ويكتب ليها النص فالمعمل و الشركة .. ونبيعو داكشي ونعيشو مخيييييريين

نور : وتووونار لا لا لا انا مغانعيشش بعيدة عليه …

نورة : وبقاي تحلمي ليا نت بتونار … اشغاديري بواحد محروق بغيت غا نفهم .. ومامعبركش اصلا …. لبارح سخفتي وماتسوقش حتى ليك ولا قاليك حتى كيبقيتي .. فففففف ودابا خصنا نشوفو كيف نتهنااااو من ديك اللفعة لاتمشي تلوا على الحاج تاهو ويصدق كاتب ليها وماشي ليك

قفزوووو من تحنحينة وصوت من موراهم رغم انه هادئ ورقيق الا انهم تفزعو

ليديا : اححم احم ..ممكن نعرف هاد اللفعة لي كتهضرو عليها شكون!!! …

ضارو موراهم ببطئ هوما يلمحوها .. كايطلعوها ويهبطوها .. بغوب قصيرة … مزيرة من الفوق و مفرفرة م تحت بيضاء بدوائر سوداء .. مع صندال عالية فالاحمر وحقيبة صغيرة بحزام طويل حمراء و قبعة فوق شعرها المسدل للمؤخرة … و نور ناضت بزعفة كتخنزر فيها و ليديا قربات عندهم بهدوء وشياكة حيدات نزظاظرها من عينيها بإتكييت الاميرات …

ليديا : لا غير سولتكم.. حيت كنخاف من اللفاع ….( موجهة كلامها لحكيمة وكاتشوف فعينيها مباشرة …. اما لوخرين مكتحسبوهمش ) تايقولو اللفعة عندها زوج بلايص فنيابها كتقدف منهم السم ( شافت فبناتها بزوج ) الله ينجييييينا منها ومن نيابها بجوج… ( كتزيد تقرب) وكايقولك حتى فاش كتلسع شي واحد ومكيگرش فيه سمها … ( قالت وراسمة على وجهها تعابير الاستفزاز ) كاتسسمم راسها .. وتموت بسمها ….( بهدووووء) غييييييير بوحدها …..( حلات عينيها فيهم ) ماتيقتونيش ؟ ( بابتسامة ) دابا توقفو على كلامي …..( شافت فيهم ) زوييين تكوني لفعة … ولكن لي حسن هو تعرفي امتى خصك تكوني لفعة .. و فيمن تقدفي سمّك ….. غير باش مايرجعش عليك وصافي … نصيحة يعني …..

حكيمة : اش جاية ديري هنا ؟؟؟؟

ليديا : ( بابتسامة ) عيط ليا رااجلي .. معرفتيش علاش زعما ؟؟؟؟؟ … مممم غايكون إما توحشني … و إما محتاجني نكون بجنبو …. ولااا ( بضحكة ) يمكن بغاني نحضيه من اللفاع

ضحكات ليهم باستفزاز و تمشات لامام خلاتهم كايغليو بسمهم وبالاخص نور ونورة حيت كايشوفو قدامهم كتلة من الانوثة والجمال لي مايوصلوهاش حتى فطقطقة كعبها العالي … وهي ضور عندهم وشعرها كامل كايضور معاها بتباهي …

ليديا : هادي هي لاشومبغ ياك !!! …

نور : ( ربعات يديها ) غيييير رجعي مغايخليك حد دخلي …. راه جراو علينا وغايجريو عليك تانتي

ليديا : اووووه ( قربات عندها ) وانا هي نتوما !!!!!!

نور : ( طلعات فيها صبعها ) للزمي حدك حسن ليييك

ليديا : ( شافت لصبعها ورجعات شافت فيها )فخبارك كنشمأز من لي طموحو ظعيف … طماعة طماعة اللهم طمعي فيها كبيرة … النص اش غايدير ليك … ؟؟؟؟ نص فالدار .. ونص فالمعمل ( طرطقو عينيهم ) والنص فالرااجل تاهو هه …. ( دوزات يديها على شعر نور و نور نترات راسها) تعلمي من لالاك ….. لي مكتطلب والو … ومع دالك ….كتصدق هي لي واخدة كولشي … ( شدات ليها فمها بطراف صبعانها ) وشدي فراسك بلا متسخفي … حيت نت ماشي انا باش يتخلع عليك ( بوسة فالهواء من شفايفها الممتلئين ) ڤااابيني سينيوورا ( غمزة )

ضحكات ليهم ودخلات بمشيتها لي كيف شي حمامة …. وحلات باب الشومبغ ….

ونورة ضربات فوجهها

نورة : اويييييييييلي سمعات كولشي

نور : على ماشتيهاش هي اش قالت ….تاهي طمااااااعة بنت الحرام ….

حكييمة : هاد خيتي باليا تاهي عينيها فالورث… هادي مااابانتليش ساااااهلة…. باغا تجمع حب وتبن .. الى حنا طمعنا فالنص هي راه طامعة فكولشي

نورة : تامانكونش انا هي نورة …. بالله لاخليتها تحلم حتى بالثلث … ايهاي هاي داخلة عليا شااااخدة …. غير بلاااتي عليها ….

تونار كان يالاه لبّس لجدو وكايصايبو فبلاصتو وهي تحل لباب ليديا ضاحكة وهوما تلفتو ليها وتونار كايطلع ويهبط لحالة لي جاية بيها .. وقاد جدو وقرب لعندها كايهضرو بتوشويش والمامون كايشوف فيها مبتسم عمرو كان يحلم ولا يظن ان تونار غايتقرب من شي شخص اخر منغيرو …

تونار : اش هاد الحالة جاية بيها نت …

ليديا : ( كاتشوف مع راسها باستغراب ) مالها حالتي !!! نجي نطل على واحد مريض خصني نجيب ليه معايا الحياة والالوان والتفاؤل والجمال باش يصح دغيا ويبرا .. ماشي بحالك نتا ولا هادوك لي على برا مبهدلين كافيين يسكتو ليه القلب غير بداك الكحولة لي تحت عينيهم ….

تونار : ( شدها من دراعها ) بغا يهضر معاك … بالله وتمشي حتى طولي داك اللسان و لا تقولي شي حاجة تعصبو حتى تعلقي داك سيروم بلاصتو

ليديا : غير نزيدك لمعلوماتك اراجلي لعزيز بلي هو هنا بسبابك نتا …. وكون مادخلتش انا فالوقت المناسب كنتي غاتكون دابا كتقلب لون الزليج لي يجي مزيان فقبرو … الى كانت شي حاجة كتعصبو راه طولة لسانك نتا ماشي انا

كتهضر وتشوف لعند المامون وتضحك زعما مكاين والو …

تونار : شكون جابك

ليديا : داك شيفور .. شكون من غيرو يعني

تونار : منعرف .. كنتوقع منك اي حاجة ….

تونار تنحنح وابتسم وضار عندو زعما مواقع والو

تونار.: اا .. موهيم .. هاهي … ليديا

المامون : ليديا !! ثاريفشت ؟ ( ريفية )

ليديا : يِّيه …..( اه)

تونار : يالاه .. غانخليكم تهضرو شوية ( شاف لعندها ) متكتريش عليه…

خلاهم وخرج كايدعي الله ماديرش شي هبال لي يضرب ليه هادشي فزيرو فنفس بغا يعطيهم الخصوصية … وهو يشوف الثلاثي قدامو و شاف لعند نور لي غير شافتو شاف فيها وقفات متوترة … وما ليها بعينيه تبعو وهي توسع عينيها على حجمهم وشافت عند حكيمة ونورة وهوما كايميو ليها تبعو دغيا بفضوووول غامرهم شنو غايكون بغاها وهي تبعو رجليها فاشلين عليها مامتيقاش الى اول مرة غايجمهم شي حديث وكتخيل كيييفاش غاتهضر حداه وبدات تدرب من دابا ….والسؤال الاهم … علاش باغاها ؟

ابتسمات ليديا للجد … رغم انها عمرها تلاقاتو وعمرها عرفاتو ومكايربطها بيه والو .. ومكيهمهاش اصلا … ولكن كتحسو شي حاجة ثمينة .. ملي كتغوص فأعماقها باش تقلب على الاجابة علاش هو حاجة ثمينة بنسبة ليها .. كاتلقى السبب هو انه اكثر حاجة كايبيغيها تونار فهاد الدنيا … واكثر حاجة غالية عليه و اكثر حاجة كتسعدو … داكشي علاش المامون بنسبة ليها شي حاجة خاصها تحافظ عليها …. لاجل تونار وصافي …

ليديا الانسانة لي كتبغي فقط الحاجة لي كتخصها .. بغات راسها … وبغات تونار حيت فقلبها … و بغات المامون حيت فقلب تونار لي كاين فقلبها …..

الباقيين مكيهمها حتى شي واحد وتقدر تعفط على كولشي لاجل مصلحتها ….

الجد حول نظرتو للصرامة معاها كنوع من الاختبار لشخصيتها …. وهي جرات كرسي وجلسات حداه وتبسمات بلباقة

ليديا : شوية دابا ؟ نتمنى تكون تحسنتي ….

المامون : لاباس … ريفيتك قلعية ماشي بحال ديالنا حناا الحسيمة … نت من الناظور ؟

ليديا : الى كان كايبانليك انا من الناظور …راه غانكون من الناظور .. واش انا غانكدبك

المامون : وماشي حتى الناظور … ريفيتك ديال الكبداني … ” اقليم الناظور “

ليديا : كلامك هو الكبير

المامون : مم .. شنو سميتك

ليديا : ليديا

المامون : عرفت ليديا … كنيتك

ليديا : اسراج

المامون : اسراج ؟؟؟؟؟؟؟ ( قاد االجسلة ديالو على سرير حال عينيه ) كيفاش اسراج

ليديا : اه اسراج ؟؟ مالك توترتي ؟؟؟

المامون : ( سرط ريقو ) م .. مافهمتش … اسراج … نت معارفاش الى تاحنا كنيتنا اسراج ..

ليديا : ( ببساطة ) اه عارفة …

المامون : واش صدفة هادي ؟ ح حيت ( كايفكر مخلوع ) نتي من الكبداني .. وو كننيتك اسراج … اام . ب بغيت … بغيت نقول ش شكون عائلتك

ليديا : كتعرف شي حد تما كنيتو اسراج من غيركم ؟؟

المامون : ( بدات جبهتو كتعرّق ) ها ؟ لا … لا مكنعرف حد غير سولتك

ليدييا : حتى انا

المامون : دابا واش بغا تسطيني نت ولا مالك … ( انفعل وكاينهج خايف يكون لي كايفكر فيه بصح ) و .. واش ماقال والو تونار ملي لقا كنيتك اسراج

ليديا : لا !! …. علاش تبدل لونك مافهمتش ( قربات عندو كتر لان ردة فعلو مفروشة وكتجيب الفضول) وها انا كنيتي اسراج …. ومنبعد يعني ؟

المامون : لا .. غ غير كنسول … ح حيت كنية اسراج .. كنية قليلة … قلت فشكل تكون حتى نت كنيتك لسراج

ليديا : كنية قليلة ؟ علاش لي متقولش معدومة .. ومواليها كاع ماتو .. وبقيتي غير نتا وتونار … انا فنظرك اش غايجيبها ليا الى كانو كاملين موالين هاد الكنية ماتو ؟؟؟

المامون : ( مسح العرق على جبينو ) هادشي .. هادشي لي لقيتني كنسول راسي … تونار لي عاود ليك هادشي ؟؟ بلي العائلة ماتت !!!

ليديا : مممم … هو …

المامون : ( كايمسح العرق على جبينو ) … عيطي ليا لتوونار

ليديا : واخا غير تهدن … انا غانعيط ليه ….

ناضت بشوية وخرجات من شومبر غير شدات للباب بقات متكية عليها كاتفكر

ليديا : هادا مالو ملي سمع بلي كنيتي اسراج تبدل فيه اللون ؟ وتخلع بحال هاكا ….بحالا مخبي شي حاجة ؟ تخلع ملي سمع شي حد اخور كنيتو اسراج من غيرهم ؟؟؟؟؟ يكون عارف بلي فيهم لي باقي حي ومخبعو على تونار باش ماياخددش من الجلد ولا كيفاش ؟ واش باغي حفيدو يبقى ديما محروق ؟ … وحاجة اخرى … الى كانت التعويدة خاصة بتونار … علاش منير علمها ليا … وعلاش هاد السيد دغيا عرفني من للكبداني غير من هضرتي ادن ديجا معاشر مع ناس الكبداني … ولا هو من الكبداني كاع … تخربقت … تا تونار مُصر بزاف يعرف عائلتي ومنين جيت !!!! مالهم مع هاد الكنية،!!!! ولا يكون غير جاتو غريبو غريبة شي حد منهم باقي كنيتو اسراج !!!!! لا لا هادشي لي كاين … واخا خصني نتأكد مزال

يلاه استفاقت من افكارها وهي تشوف حكيمة ونورة دايرين فيها شوفات شريرين ونورة قربات عندها كتجنن فيها …

نورة : اوووه خرجتي تقلبي على راجلك …. ( كتطلعها وتهبطها ) تعطلتي اكبيدة …..حيت هو راه جا و دااا مرتو ومشا …..

ليديا : ( طلعات فيها حاجبها ) وفين …

نورة : وشكون عرف .. راجل ومرتو بغاو ياخدو راحتهم ..

ليديا شاافت معاها وخلاتها ومشات غير خرجات من الباب كتقلب عليه هو يبان ليها حدا طموبيل ونور حداه وباينة يلاه وقفو تما … ومشات بشوية تخبات ورا الشجرة تسمع آش كايقولو …

تونار : ( مربع يدو على الطوموبيل ونور كتشوف وتسناه يهضر ) شنو خلاك تقبلي بهاد الطريقة فالزواج !!!

نور : ( كتفرك فيديها ) ت … ت تاحاجا …

تونار : القاعدة كاتگول … اي حاجة كنديروها … ٱلا وعندنا علاش كانديروها …

نور : ااه بصح … ( كتحاول تجمع شجاعتها تهضر معاه بطلاقة وبدون توتر ) ا انا .. ق قبلت .. حيت ب بغيت … حيت

تونار : غير باش نطمنك ( علا يدو ) مكنضرب .. مكنعض مكندير تاحاجا غير هضري نيشان بلا متخافي …

نور : ل لا حاشا حاشا واش نخاف منك ( كتسرط فريقها وتحاول تهضر ) ا انا … انا سمعت باغي تتزوج .. و وكتقلبو على عروسة .. س سمعت جدك كايقول واخا يعرف يشريها بالفلوس … ا انا اصلا .. م ملي جيت لعندكم .. و وانا .. ماعرفتش كيفاش نشرح ليك .. ك كنحس بلي كنميل لداك العالم لي نتا عايشو .. الى كاع كايجيهم غريب انا كان عاجبني ….ك كايعجبني الغموض ديالك و والصراحة .. ك كنت معجبة بيك وبشخصيتك بحال شب نجمة بعيدة … و وملي سمعت كايقلبو على عروس مابغيتش شي وحدة لي تجي غ غير طامعة ….ب بغيت لي ت تستحقك … و ومكاينش شي واحدة كتستحقك من غيري …( ليديا مصغرة فيها عينيها )

تونار : مزال مجاوبتيش على السؤال لي عطيت ليك …

نور : ها ؟ ر راه .. راه هو هدا الجواب

تونار : معنديش انا غراض بهادشي كااااامل … مسولتكش على اش خلاك تقبلي بزواج هداك شغلك .. سولتك على شنو خلاك تقبلي بهاد طريقة دالزواج … لي بدون خباري انا …

نور : ( مالقات ماتقول ) اؤ ..

تونار : نگولو جدي حيت مصلحتو نتزوج قبل مايموت وبغا يدير اي طريقة نتزوج بها … ونت شنو مصلحتك …

نور : ( كاتسرط فريقها وتلعب بعينيها ) ر راه .. راه شرحت ليك

تونار : ايه .. هادوك اسباب لي يخليوك تبغي الارتباط بطريقة لي توافق كرامتك … وغاترفضي الزواج بهاد الطريقة … اما الاسباب لي خلاتك ديري هاد نوع دالزواج هي لي بغيت نعرف انا … اسباب جديدة كتبان ليا و خصها طبق فاقرب وقت…. والا مكنتوش غاتزربو بهاد زواج …اش كايضور فراسكم !!!

نور : ش شوف .. اانا راه ا تبّعت الهضرة د دجدك وقاليا من بعد نهضرو انا وياك … و ونتفاهمو و نتاوفقو …

تونار : شنو سميتك بعدا

نور : ( باستغراب علات راسها جاتها فشكل سميتها ومامسوقش ليها وهوما ساكنين فدار وحدة) نوور

تونار : نوور … انا تزوجت … كنضن راكي عارفة هادشي ( قاطعاتو )

نور : لا لا تيق بيا اتونار والله مكتستحقك هاديك راها غير طماااعة … بودني سمعتها … ( ليديا وسعات عينها ) قالتها ليا قبيلة قبل مادخل عندكم … قاتليا فوجهي انا طاااامعة فكولشي ماشي بحالك غير فالنص .. سول ماما ونورة .. والله تاقالتها لينا

تونار : ( قاد الوقفة وربع يديه ) واشمن نص طامعة فيه نت

نور : ( وسعات عينيها عاد سرات معاها ) ا .. فيك .. ز زعما ن نتا …. ز زعما النص فيك

تونار : وهي قالت باغا كولشي … اشنو قصدات بكولشي …

نور: الاملاك والدار و كولشي

تونار: ممم ونت قصدتي النص فاش !!!

نور : فف فوااالو …

تونار : فوالو … مزيان ….

نور : لا لا .. ماشي هاكاك.. عنداك يحسابتك بلي حنا حنا طامعين …. راه غير جبدنا الهضرة ..

تونار : لا لا حاشا … ( رجع وقف مزيان وقاد الجاكيت ديالو ) قاليا المحامي بلي جدي كان مواعدك يكتب ليك النص فكولشي ( نور طرطقات غينها ) … ومزال ( قاطعاتو تاني )

نور،: لا لا والله ماعلى هادشي تزوووجتك

تونار : ششش ( بنرفزة ) خليني نكمل هضرتي …. ( قطعات الحس ) وعدو غايتنفد …واخا هادشي خصو يتكتب لماماك بصفة الزوجة ديالو نتي علاش …. ولكن ماشي مشكل رغبتو تنفد … حنا ماشي ولاد الحرام باش ضيع ماماك فسنين زواجها … وااخا ملول كانت باغيا منو غير الوراق .. وإلا شنو غايخليها تقبل على راجل فالسن ديال باها و بحفيدو من غير الوراق طبعا ( قاطعاتو تاني وهو زير على عينيه)

نور : لا لا راك غاااااالط فماما والله هي عزيز عليها بزاااااف و غير كت..

شافتو كيفاش تعصب من مقاطعتها وشوفات لي كايديرفيها ورجعات سكتات …

تونار : نقدر نهضر ؟؟؟ ( غير دايرة راسها فالارض ) حقها غاتديه … وماشي غير النص .. تاخد كولشي كاع اش فملك راجلها غاتاخدو ( نور وسعات عينيهاا وليديا غير كاتسمع ) … وهادشي راه من حقها بلا هااااااد التلاوي كااااملين وهاد الافلام… وبلا متزوجي نت كااع … ادن آ … آآ

نور : نوور …

تونار : اذن آنور … طمني عائلتك معاك وگولي ليهم راه بالزواج ولا بلا زواج … حقكم غاتاخدوه … ولي كاتقولي على ليديا أنها داخلة بالطمع ليديا انا لي جبتها ماشي هي لي جات وماشي هي لي رتبات زواجي بيها بلا خباري .. . و ماعندها تاشي حق فأملاك جدي … ليديا مراتي انا … وحقها فأملاكي انا متحتاجش طلع الافلام باش تاخد حقها وانا راه مغانخليش ليها الفرصة فين تحتاج شي حاجة من جدي راني بخدمتي… هاداك رزقكم نتوما ومكاين لي غايحيدو ليكم … من جهة اخرى … سيري عيشي حياتك وقراي قرايتك ( باغا تهضر وخايفة تقاطعو ) حاليا ماحد جدي مريض منقدر ناخد تاشي قرار الى ماكانش بالرضى ديالو … نت غاتحاولي تقنعيه بلي مابغيتيش هاد الزواج … و فأي لحظة استعدي توقعي الطلاق بلا مشاكيل حيت اصلا هاد الزواج بلا معنى .. مفهوم ؟

نور : ( طلعات عينها فيه قربو يبكيو ) والله الى راك ضالمني بزاف … انا مابغيت لا دار لا املاك لا تاحاجة مابغيت والو .. تيق بيا ( هبطات ليها دمعة ) غير

عطي كولشي هادشي لمراتك لوخرا وتمشي لا بغات … انا بغيتك … بغيتك نتا ( ليديا مزيرة على يديعا )

تونار بدا كايتهد ويحك فشعرو كايكره بنادم المعكس باركا غير مامدوزة عليه ليديا…وهي تقرب منو كتر وليديا مزيرة على قبضتها تاجرحو ظفارها كفها ….

نور : تونار عفاك .. عطيني فرصة نتا راك عمرك تعرفتي عليا … عطيني غير فرصة وغانبين ليك شكون لي كاتستحقك … وشكون لي داخلة غير على الطمع … عفاك .. عفاك عطيني فرصة نثبت ليك حُسن نيتي

بغا يهضر ومالقا مايقول و افيه مايزيد يهضر … تاطلع الخرف يتهجاه ويرجع ردو بمعنى هاد الموقف لا يستحق الكلام …. علاش هو لييديا تعششات فدماغو غير بقوة شخصيتها .. لي واخا تعجبات بيه وفرضات راسها عليه فرضاتو بكبرياء و ماخدشاتش ولو انش من كرامتها ….

خلاها ومشا وهي بقات كتعيط موراه ورجعات تكات على طموبيل كتبكي .. اول مرة كاتهضر معاه قد هاكا وكانت اقبح هضرة دارتها فحياتها … مظنناتوش بهاد القسوووة والانانية كاملة ….

تونار جا داخل هي تبان ليه ليديا جاية وعلا حاجبو

تونار : علاش خرجتي ؟؟؟

ليديا : ( بابتسامة ماكتبينش الغضب ديالها ) جدك بغاك ….

تونار : علاش ؟

ليديا : توحشك ..

تونار : بلا ضحك …. شنو واقع ؟؟؟؟

ليديا : اش غايطرا مالك وليتي تخلع غير بوحدك .. ( جراتو من دراعو ) زيد راه بغاك …

مشاو لشومبر وليديا كاتشوف فلوخرين غيرر بنص عين مزال مزعموش يدخلو عندو خايفين يجي يزعف عليهم تاني … ودخلو عندو والمامون لونو كان مبدل وتونار شاف عند ليديا وشاف عند جدو

تونار : مالكوم ؟؟؟؟

المامون : لا … لا اش غايكون اولدي .. غير واش كتجينا هاد البنت ؟؟؟؟

تونار : ( شاف فليديا ورجع شاف فيه ) علاش ؟؟

ليديا غير ساكتة باغا تقرا من تصرفات المامون شي جواب ..

المامون : واحيت كنيتها بحال كنييتنا

تونار : وعادي راه تزوجنا و خدات كنيتي …

المامون بقى مدة كايشوف ويستوعب … وهي تشقق الابتسامة حتى ولات ضحكة ديال الفرح … عاد رتاااح قلبو …

المامون : اااااه ههههه .. دابا نتا عطيتيها الكنية ههههه .. يااااوديييي …..فشكااااال .ههههه …. اجي اجي ابنتي اجي ( ليديا غير كاتشوف تصرفاتوو الغريبة وقربات عندو ) وعلاش ماقلتيش ليا

ليديا : ماسوليتينيش منين جبتها …

المامون : ايييه ايه … والله الى فشكااال حسابتني كنيتك بحالنا … ففف الحمد الله

لييديا : الحمد الله !! ( كاتشوف فتونار لي بان ليها واقف كايحلل الاومور وبلي هاد ردة الفعل مغادوزش عليه مرور الكرام …. ) وها انا كنيتي كاع بحالكم .. فين كاين المشكل ؟؟؟

.المامون : ( جمع ضحكتو ) لا .. مكاين حتى شي مشكل …..

تونار : ( رجع كلس حداهم ) شوية دابا كتحس براسك بيخير ( قاس فجبهتو ) راك حسن من قبيلة ….

المامون : لا لاباس اولدي … ( شاف فليديا ) وعلاش ديتي اكنية ديالنا .. معندكش كنية نت

تونار : لا اجدي راه( قاطعو )

الجد : بغيتها هي تهضر

ليديا : مكنعرفش كنيتي ….

الجد : وعلاش ؟؟؟؟

ليديا : تقدر تقول مامعتارفينش بيا

الجد: شكووون ؟؟؟

تونار : الدولة … الدولة لي مزال مامعتارفاش بيها …( كايخنزر فيها ماتلوحش ليه اجوبة صادمة حتى يعاودو ليه بشوية ) ملي تزوجتها مكانش عندها كارط ناسيونال … ووراقها ديال الازدياد والحالة المدنية بقاو فالمغرب … ودرت ليها كارط ناسيونال بالكنية ديالي انا

الجد : ممم وشنو كنيتك هنا فالمغرب

تونار : ( شاف فليديا بشيطانية ) ااااه ….. شنو كنيتك ؟؟؟؟

الجد : هاء ؟؟ على نتا معارفش

تونار : ( داير يدو على وجهو ) والله ماااعارف

ليديا : تانا ماعارفاش .. كنعرف انا غير كنيتي اسراج …

جد : عجيب هادشي ديالكم !! مخبيين عليا شي حاجة ؟؟

ليديا : العالم كولو مخبي شي حاجة …. وكل واحد عندو شي حاجة مخبية .. غانكون كنافقك لا قلت ليك لا

المامون : ها ؟ ااه .بصح …يييه عندك الحق واانعرفو شوية بشوية

تونار : جدي … ( شاف عند ليديا ) كيف جاتك ليديا

المامون : غرريبة …

تونار : ( كايشوف فيها ) على هي فين عمرها كانت بحال البشار …

المامون : وفين عائلتك ابنتي هنا ولا فطاليان

تونار : جدي خلي عليك هاد لاسئلة وملي نمشيو للدار غانعاودو ليك كووولشي .. راني معاك مغانهربش ….

المامون : ايه .. ولكن خاصني نقول ليكوم واحد الكلام وغاتسمعوه مزيااااان بحوج بيكم ونت بالخصوص ابنتي

ليديا : اهاه

المامون : دابا نت معزتك من معزّة تونار … وراك فمقامو مدام مراتو وختارك هو …ولكن ابنتي راك شفتي وحضرتي على اش وقع وحنا راه عندنا نيشان نيشان .. البنت راه بنت مراتي وتربات حدا عيني وانا المسؤوول عليها وفمقام باها ولا جدها …. والبنت راه بغاتو … وطمعات وفرحات بزواجها بيه .. مجاتش ابنتي نجيو تالدابا ونضيعو فرحتها كيفاش غاتعيش هاد البنت مجروحة ؟ وانا لي واعدتهم مانموت تانخلي كولشي على خاطرو مانمشي هاز الهم ديال تاواحد .. دابا ابنتي ديالي .. خصك تسمعي ليا اش كانقوليك .. داكشي دالفشوش دالعيلات خلييييه عليك وعطيني عقلك … البنت زوجتها بالوكالة لتونار وراه تونااار ماااعمرو عرررفها … وباليا حتى هي باغيا تزوج بيه … دابا ابنتي فرقو الصبر ومافيها باس ماضيعوش ليها الفرحة ديالها … و( قاطعاتو ليديا )

ليديا : يبقاو مزوجين زعما ؟؟؟

تونار وسع عينيه كايخاف من ردود افعالها

المامون : ايه ولكن ماشي بحال هاكاك .. قلت مع راسي مجاتش نقولو ليها لااا نوضي دابا طلقي ونرجحوها وهي الحنة باقيا فيديا مسكينة ينو … وحشومة قدام عائلتها فين غادير وجهها … بعدا بشووية حتى تفهم رراسها بلي هو تزوج .. وتبغي طلق راسها و تنساه … مادابا جات شوية مممم راك عارفة …. مجاتش نجرحوها حنايا راها عندي عزيزة وبحال بنتي ووباقا صغيرة

ليديا : لا لاا لا .. من هاد الناحية غير كون هاني ( تونار دار يدو على وجهو كايشوف فيها متبع هادشي فين غايخرج ) تبقى قداش مابغات حتى تفهم على خاااطرها بلي راه عندو مولاتو … وتبغي طلق بخااااطرها .. وحتى باش ترتاح كتر انا بيدي غانوقف عليها نهار تبغي طلّق ونسولها ونأكد عليها واش بخاطرها ماشي بزز ….

المامون : ( صدماتو ) آراسول الله !!!!

ليديا : مسكينة حالتها كتقطع فالقلب …. لا مرحبا بيها ماعنديش مشكل

تونار غير متبعها مصغر عينو عارفها شي حاجة كضور ليها فالدماغ

ليديا : نتا غير رتاح ليييينا وكون بيخير وماتهز الهم لواالو انا غانيدرها كتر من اختي .. و ماماهم نبغيها كيف بغيت جدااااتي …. ونعاملها كيف كنت كنعامل جداتي … ( تونار تفكر نهار عاودات ليه بلي كركبات جداها فدروج وشد على راسو )

المامون : اوا ابنتي هادا هو المضنون فيك ..،الله يجازيك بالخير غير هو بغيتك تعرفي بلي ر راه غايتكتب ليها النص فالدار والتاريكة ديالي

ليديا : ايه من حقكم بصحتها … ولكن ياك مغايجريوش عليا ؟؟ ولا شي نهار يكون تونار فخدمتو ويبغييو يخرجوني ويتحماو عليا ( تونار قرب يعض فلحيط )

المامون : اعود بالله لا لا لا هوما ماشي ديال هادشي ابنتي دابا تعرفي عليهم راهم الله يعمرها سلعة

ليديا : لا هناك الله تعرفت عليهم والله يعمرها سلعة مساكن …. ولكن الدنيا والزمان .. وزايدون ياك كايقولك الشرع عطا ربعة ولكن خصنا نعدلو بين العيالات ؟؟ وصافي مدام غايتكتب ليها النص .. راجلي يتكتب ليه النص لاخور .. باش نكون انا كالسة فملك راجلي ماشي فملكهم … نبقى انا ضيفة عندهم مجاتش اولا ؟

تونار : وشكون قاليك غاتسكني معاهم ؟؟؟؟ ( مخنز فيها ) مديش عليها غير كتخربق هادي … عطيهم رزقهم كامل … راه حقهم هاداك حنا مخصنا والو وليديا راه غاتعيش معايا دلي غاتصح شوية نتا غانمشيو

ليديا : لاااااا … انا نقولها ليك حدا جدك انا مكنحملش نعيش بوحدي وكانخاف اصلا ( تونار ووسع فيها عينيه وكايتحلف عليها ) بغيت نعيش معاهم بحال خواتاتي دخلو لخااااطري بزاااف .. والى مابغيتيش يكتب ليك يكتب ليا ااانا.. باش نضمن بلاصتي ….

المامون : داكشي لي فكرت فيه ابنتي قبل متهضري ..( شاف فتونار ) حتى باش هاد خينا لاكان ناوي يدير شي حاجة ملي نموت وكان مزوج بيك غير على قبلي …. وملي نموت يتهنى منكم … غانكون دگيت ليكم الوتد عندنا…. لا نت لا هي … حيت مااااانعرف ماباليش فهاد تزوجية ديالكم

تونار : جدي ؟؟!!!!!؟؟؟!!

جدي : ششش خليني نكمل كلامي … ماعندو كيف يتهنى منكم داك ساع ملي دخلو فالاملاك ….. واهكدا غانمشي مرتاح

تونار : تمشي مرتاح ونا تحرر عليااااا عييشتي

ليديا : ( شدات فيدو ضاحكة كتقلي ليه السم ) لهلا يجيب مايحرر عليك عيشتك اراجلي العزيز … غاندير لي فجهدي باش تعيش مرتاااح فالعش الزوجي ديالك المضوبل ….

تونار : ( تحت سنانو ) غير بلاتي ابنت ابليييس بلاتي

المامون : واااادابا رتاحيت وهدا هو كلام الحق .. ( شاف فليديا ) ولكن مزااااال خصنيي نعرف عائلتك ونكلس معاهم ونشوفوهم ونديرو ليكم شي ليلة… مجاتش هاكا

ليديا : ( كاشتوف تونار لي مغدد ) اصلا عائلتي كلها كالسة حداك دابا …. ( كاتشوف فتونار بكل حب ) حداك الام لي جابنتي لدنيا ..والاب لي علمني كيفاش نخرج لدنيا …. و والاخ لي خاف عليا من الدنيا …. والجد لي حماني … والجدة لي حنات عليا …. وعائلتي لي عطاتني كنية .. ( تونار طلع عينو فيها كتسالي معاه ملي كاتشوف فيه بهاد النظرة ) كلهم راهم كالسين حداك …. ( شدات فيد تونار ) وكلهم كاينين فتونار … وماعنديش من غيييرو

تونار حيد يدو من يدها كايسرط فريقو حشمااااتو حدا جدو والمامون بدا كايضحك على ردة فعلو …..

المامون : الله يتاويكم فالخييير

تونار : اا جدي .. موهيم …. نتا خصك تنعس .. ولا عرفتي مراتك غادخل عندك من الصبح وهي حدا لباب .. هضر معاها تاهي باش يرتاحو من جيهة حقهم باليا راه خايفين تموت ويبقاو بلاش … فهمهم الى حنا ماشي ولاد الحرام … انا اجدي ( كايحك فشعرو ) غانمشي نبدل حوايجي ونجي نخرجك منهنا صافي ؟؟؟

الماون : صافي اولدي الله يررررضي عليكم

تونارو غمز ليديا تنوض تبعو وتاهي وودعات الحاج بابتسامة وتبعات تونار وخرجو من الشومبر غير هوما مشاو حكيمة وبنتها دخلو عندو ..

تونار وصل لطوموبيل فتح لباب وركبها وهي غير كضحك عليه … وركب كسيرا مشا … ونور كانت جالسة على واحد الكرسي تما متبعاهم بعينيها الباكييين ….

ليديا : ( قبل مايبدا يهضر سبقاتو ) مكنسواش ومكنحشمش و مكنستحياش و وبنت ابليس ومافيا ثقة وغاتقتلني وتفعلي و تتركلي …. صافي فهمناااا .. صافي … ( غير كايسوط ) هادشي راه مغايعرف يحلو لا جدك ولا نتا .. وواصلا اش دخلك فسواق العيالات … هادوك انا قااااادة بيهم غير قابل جدك وديها فشغالاتك

تونار : مازااااال انا مافهمتش علاش الدار علاش

ليديا : ياكما باغيني نخليها لدوك رباعة الطمعات ؟؟؟؟

تونار : واحقهم هاداك

ليديا : خراهم هاداك منين حقهم ؟ منيييين ! جدك الدار عامرة بالخادمات كايقابلوه مالها هي لي ضربات عليه تمارة ؟ … و نتا ربيتي راسك براسك ….حقها داتو وكتر …. صاوبات الوراق و قرّات بناتها و كبراتهم على ظهركم …. وعلم الله على شحال حاضنة ديال الدهب والفلوس ..

تونار : ونتي مااااالك

ليديا : ونتا مااااالك …

تونار : ليديا بعدي من هادشي

ليديا : تونار بعد من هادشي

تونار : واش مكتفهمييشش

ليديا : واش مكتفهمش

تونار :: ( علا يدو ) راه غاااااانضرب والديك

ليديا دارت عينين القطة الحزينة وهبطات شفايفها

ليديا : ونسخى علييييك

جمع داك البونية وضربها فالفولون كااااينهج بالاعصاب لي كدير فيه

ليديا : تونار …. ( شدات فيدو لي فوق الفيتاس ) انا قادة بيهم وعااااارفة شي حوايج معارفهم لا نتا لا جدك وعارفاهم اش كايسواوا خاصك تشوف كيفاش تلاقاوني لباب … ماحد جدك فالحياة خصو يعرفهم على حقيقتهم حيت باليا غالط فيهم بزاف … انا لي كنسمع الهضرة لي كتقال فالظهر

تونار : جدي مابغيتوش يدخل فهادشي وماخصني صداع … واش باليك انا مكنعرفهومش ؟ ولا صعيبة عليا نجري عليهم ؟؟؟ ولدن راه ولفههم وهوما لي كايعمرو عليه فاش انا مكنكونش معاه …

ليديا : عارفة اش كاندير … والقضية دابا كتخصني حيت هادوك باغين شي حاجة دياااالي … وانا حاجتي تاواحد مايقيسها …

تونار : دابا انا شي حاااجة ؟؟؟؟؟

ليديا : ( بضحكة ) شي حاجة غااااااالية بزاااااف

تونار : ( يد فالفولون ويد شدها من شفايفها ) راااه نسمع شي صدااااع درتيه بهاد الفم لي مكايسكتش غانقلعو ليك

ليديا : ( كاتبعد وتضحك) طلق طلق مسحتي ليا العكر ديالي .. هادوك خياتي انا لي غانعرف ليهم نتا غير خليك بعيد وخلي العيلات مع بعضياتهم اصلا مكتعرف للمرا غير للمرا

تونار : اررربي سلاااامة

ليديا : خلينا من هادشي غير هضرة خاوية …. شي حاجة اخرى كتزنزن ليا فدماغي

تونار : مالكي ؟؟

ليديا : جدك ملي سمع كنيتي اسراج تبدلو فيه الالوان والعرق نزلات معاه … ( تونار عين فيها وعين فطريق ) وقالي تونار واش ماقال والو ملي عرف كينتيك اسراج .. كان كايهضر وهو مخلوع … وفلخر قاليا عيطي ليا عليه … مافهمتش علاش تخلع هاكاك

تونار : غانعرفو هادشي نهار تواضعي و تگولي ليا طاسيليتك منييين …

ليديا : راه انا معارفة والو على طاسيليتي لي نقوليك اصلا … لي عارفة هو بنت الناظور ومن الكبداني … وجدي سميتو اوشن وبابا حفيظ …

تونار بقى شحال ساااكت فلخر وقف طموبيل فجنب طريق وهي كتشوف معاه تابان ليها كايضحك ضحكتو الخفيفة وكايضور فراسو يمين وشمال وليديا سرا معاها الموقف وهي ضور وجهو لعندها

ليديا : ايييييه راه مااعترفتش ليييك .. راه …ففف … شوف عندي … راه والله ماخسرت …

خرج من طوموبيل على الطريق الساحيلي كايضحك وهي تابعاه جاتها البكية

فرحتو مكانتش انه عرف هادشي حيت هو سبق ليه وعرفو نهار التنويم …. فرحتو هي انها بدات كتتضح ليه شخصتيها العفوية …. وانه قدر يبدا يبدلها شوية ويحيد منها قسوحية راس كيفما حتى هي بدلاتو …

ليديا : تونار والله ماخسرت .. اصلا ماشي هادا هو السؤال لي مراهنين عليه انا وياك …. نتا خصك تعرف شكون علمتي داك اللعبة .. ماش منيين انا

تونار : ( ضار عنها ضاحك ) موهيم بديتي كتگري ….. شوية بشششوية تگولي كولشي …

ليديا : ( جاتها لبكية ) تونار راه والله ماااااخسرت ..

تونار كايضحك عليها وجبدها لعندو وهي غير كاتغبن وهبط راسو كايشوف فيها

تونار : ليوما قلتي بنت من نت ..وغدا نعرف منين تعلمتي حتى داك اللعبة ….

ليديا : مغااانقولش ليك واخا تموت غير الى بينتي ليا وجهك ….

تونار : خسسرتي ابنت ابلييس

ليديا : مخسسسسسسرتش

تونار جبدها لعندو فلمح البصر غاص وسط شفايفها كايقبل بشراسة ممزوجة بحب ولهفة …. وهي كتقاوم فلوخر استسلمات .. راجع بيها لور حتى تضربات مع الطووبيل … كايقبلها بكل حححب ليها ولشخصيتها ولكلامها ولتصرفاتها المميزين … حتى بدا كاسمع الكلاكسوناات ديال الطموبيلات وعلا راسو وهي بقات كضحك

ليديا : مارحناش فايطاليا راه المغاربا هادو هههههههه

تونار طلع حاجبو هدا هو الجو لي مكيحملش … الجو ديال الحضية والتبركيك ….وحل ليها لباب طلعات …..

وصلو لوطيل وطلعو لجناحهم هي غير وصلات مشات كلسات على الفوطوي رجل على رجل وهو حل واحد ثلاحة صغيرة جبد الما

ليديا : ( بحماس و شيطانية ) ععرفتي شحال متشوقة نمشي لداركم ونسكن معاهم … يااااااي غايولي عندي فاش نتلهى … كنحمااااق على داك الشعور ديال الغيرة والحسد ملي كانشوفو فعيون الناس من جيهتي …

تونار : ( كايشرب لما وكايشوف فيها ) كانگوليك نت شي عرق عندك مامقادش فداك الراس …..

ليديا : نتا غير تفرج … وشوف شكون لي عروق راسهم غايطرطقو هههه

تونار : ( بتحدير ) ليييديا ..

ليديا وقفات وناضت عندو وعنقاتو بيديها من عنقو كاتشوف فعينيه بابتسامة

ليديا : انا عارفة اش كندير .. وديما دير فبالك بلي مكنتعداش … و لي تعدا عليا كايلقاني … ومكنكدبش … و مكنطمعش … انا كنستولي ….

تونار : مابغيت مشاكيل آليديا خصوصا فهاد الوقت … هادوك راهم نقطة حساسة عند جدي .. وعزاز عليه

ليديا : نتا اعز منهم عندو … انا مغانيدر ليهم والو … والو غير تهنى …. غير غادي يبدلو ليا شوية دروتين ويحيدو عليا الملل ..

تونار : ( تنهد وبعد ) اودي منك ليهم غير مانسمعكش كاتزنزني عند راسي … ومابغبت تامشكل ولا صداع يوقع فالدار …

خلاها ودخل باش يداوي راسو ويعقم وهي ضحكات

ليديا : واخا امول عينيا ….. ههه ( تكات على لباب لي مشدودة ودقات ) تونار .. ماتبغيش نعاونك زعما

تونار : ( بابتسامة كايحيد البانضات ) بقات فيك الشمتة ديال بديتي تگري وانا مزال ماوريتك والو ….

ليديا : قتليك مخسرتش .. وهانا قتليك كاع شكون انا … شنو استفدتي

تونار : نتي غير لفضول غايخليك تسرسري كولشي

ليديا : ماشي بوحدك لي تقدر تروي ليا فضولي… كاين لي كايعرف كتر منك … وهو لي غايعمر ليا الخانات الخاوين لي فراسي

تونار،: مزيااان … باش لقا عندك الجدول واجد ….

ليديا : ( بعد مدة كتفكر ) توونار

تونار : ممم

ليديا : كايجيني واحد الشعور … بحالا انا وياك ماضينا مرتبط …. ماعرفتش شي حاجة بحال هاكا …( تونار بدون رد ) بجوجنا ريافة …. وجامعانا داك التعويدة … وجدك انفعل ملي سمع كينيتي اسراج …. امور مواضحاااش ….

تونار : كولشي دابا يتوضح ….. والى قلتي ليا شكون علمها ليك غاتكوني نقصتي عليا نص الطريق

ليديا : ونتا شكون علمها ليك

تونار : جدي

ليديا : وجدك شكون علمها ليه ؟

تونار : ماعرفتش

ليديا : عمرك حاولتي تسولو ….

تونار : نو …

ليديا : ( مصغرة عينيها حيت هي عاقلة منير لي علمها ليها ولكن معارفاش منير شكون علمها ليه ) جدك .. جدك يكون زعما كايعرف عائلتي ؟؟؟؟

تونار مجاوبهاش حتى خرج من الدوش كان عقم ولبس الاسود على عادتو .. وخرج تايقاد فالماسك

ليديا : كايبان ليا جدك عندو شي حاجة مخبية ….

تونار حط تيليفونو لي كان كاييشوف فيه ومشا كلس على الفوطوي

تونار : من صغري وانا كنسولو على العائلة لي حرقاتنا فين هي …. وهو تايگول ليا ماتو ….

ليديا صغرات عينيها وقربات عندو

ليديا : عائلة لي حرقاتكم ؟؟؟ قلتي ليا حادث لا ؟

تونار : نو … موهيم مكنعلقش بزاف كان عندي مرض نفسي ملي كنت صغير … الميموار ديال الطفولة بقات عندي متقطعة … لي عاقل عليه هو ولد صغير كنا كانلعبو انا وياه … وحدرني ان عائلتو غاتحرقنا …. ماتيقني تاشي واحد … حتى وقع لي وقع …

انا عاقل مزيان على هادشي وجدي كايحاول يكدبو ….وانا كنحاول نتيقو … المشكل هو معاقلش على داك الولد ولا سميتو ولا عائلتو ولا حتى حاجة اخرى … عاقل غير ملي كان كايجبدني داك الولد تحت العافية وجاو داوه .. كان هو سبب باش انا عايش دابا … متأكد انهم مشاو لبعيد مغايكونوش ماتو … متأكد راه عايشين ….. حيت مية فالمية الى دارو جرم بحال هاداك غايهربو مغايبقاوش تما ….جيت سنين هادي هنا للمغرب كنسول على العائلة لي كانت سلكنة حدانا وقالو ليا تحرقات مور ماتحرقات عائلتي .. يعني حتى هي حرقوها … ماتيقتش جاني بحالا داك الراجل حفظو جدي اش يگول ليا … ملامح وجهو كان كتفضحو ديما … يقدر نت حاتك غريبة انه توتر ملي سمع كنيتك اسراج …. انا ماستغربتش حيت عااارفو مخبي شي حاجة …

لييديا : فشكل هادشي ….

تونار : كنحس به باغي يبعدني على الانتقام … وماباغيش نعرف هاد العائلة فين كاينة … ( شاف فليديا ) ولكن نت عندك شي خيط فهادشي ….

ليديا بقات غير كترمش واقفة .. يوقع لي وقع هي التحدي ديالها متخسروش … ولكن الجد يمكن غاتقدر تعرف منو الحل لهاد اللغز …. ورجعات شافت فتونار …

ليديا : اذن غاتكون شي عائلة قاطعة يدها من يد الرحمان هادي لي غايقتلو نسل على قدو ؟؟؟؟؟

تونار : مكنعرفهومش … ولكن باينة عندهم نفود مدام قدرو يزرعو المين ( القنابل ) تحت الدار …..

ليديا : والى كانو باقين عاييشين .. نتا غاتقد ليهم ؟؟؟ جدك اذن راه مبعدك على الخطر وعارفهم اش كايسواو

تونار : ممم .. الفرق لي كاين هو جدي عارفهم اش كايسواو .. ولكن ماعرفينيش انا اش كنسوى …

ليديا : ( قربات تاوقفات حداه ) عرفتي شنو هي بحرقو نسل على قدو ببرود… ويعرفو واحد فيهم باقي حي …. يعني راه تقدر تبلغ بيهم و تحبد وراق الماضي.. راه غايصفيوها ليك على الصباح …. جدك راه عندو لحق يخاف ….

جبدها من يديها تاكلسات على رجليه كايشوف معاها وابتسم جانبيا وبدا تايقرب نيفو لعندها تايشمشم فيها وهي مستغربة

تونار : كنشم شي حاجة

ليديا : ؟ شنوو ؟؟؟؟؟ ماشميت الو

اةنار : ( كايتسارا بنيفو عليها ) مممم ريحة الخوف هادي

ليديا : ( بعدات راسها ) اه خوف …. انا مكنخافش على راسي كتر مكنخاف تآدى شي حاجة مني … ونتا واحد مني ….

تونار : ( بعد الشعر على عينيها ) بغيت نسول هداك لي قطر السم فلسانك … واش العسل تكب ليه بالغلط ولا كيفاش هه !!

ليديا : هههه حتى كانكون كنهضر بعقلي عاد نتا كايجيك تضحك ….

تونار : دابا نت مناش خايفة ؟

ليديا : عليك … مابغيتش نخسرك من بعد مالقيتك اتونار …..

تونار : ( شد وجهها عندو وباس جبهتها ) مااتنسايش راني واحد مدات منو لا الفيديرالية لا تجار النوار ف ديب ويب لا اسرائيل شي حاجة … غير تهناي ….

ليديا : واهوما عائلة كيف قلتي ونتا راه غير بوحدك .. بسيف غانخاف

تونار : ( عوج معاها راسو ) علاش بوحدي … نت مامعاياش ؟؟؟

ليديا : هههه … كنهضر ديال بصح

تونار : وحتى انا كنهضر بصح .. ( شد يديها ) لي عندو زحدة بحالك تخلعو شي حاجة … نت كافية تقلبي العالم ماشي غير عائلة

ليديا : اوا حتى يجرب شي واحد يقيس شعرة من شي حاجة ملكي وتشوف ….. نقلب الكون ماشي غير العالم

تونار : هادي هي ليديا لي كنعرف …. بنت ابلييس

تبسم وقرب لشفايفها وطبع قبلة

تونار : يلاه تكعدي عليا …. غانمشي نخرج جدي ونرجع عندك …

ليديا : هاء ؟؟؟ غانمشي معاك ….

تونار : غير خليك رتاحي هنايا .. وبليل غانجي نجيبك

ناضت عليه منرفزة

ليديا : غاتمشي بوحدك وتكلس تما وحتى ل لليل عاد ترشق ليك تجي تجيب ليديا ؟؟؟؟؟؟ عارف الى مشيتي حتى عتبتي داك لباب بوحدك راه غانتبعك

تونار : غانشد عليك لباب

ليديا : تشد لباب نهرس هداك ( وراتو جهاز انذار الحريق ) ونرون هاد لوطيل كامل ونخرج ….

توناار وسع عينيه وبقا كايشوف فيها كايطلب التسليم وهي مشات هزات صاكها وتقابلات مع المرايا … جددات العكر ديالها لي تمسح شوية وهو كايشوف معاها مستغرب .. عكرات شفايفها ومسحات ببصبعها جنب فمها وشافت عندو

ليديا : صافي واجدة يالاه … ( كاتشوف مع راسها ) ولا اش باليك نبدل الكسوة ؟ …

تونار طالع راسو للسما كايسوط وهز سواارتو وخرج وهس تابعاه ضاحكة منتصرة كيف العادة ….

–انا هي الوصية …

–وانا هي الوفية ….

–أحبني لكوني من جده أمانة …

– لكن انا أحبني لكوني إنسانة …

– هو ميراثي …

– هو كنزي …

– اخبرونني انك افعى سوداء..

– انا ايضا اخبروني انك عقرب اخضر

– لكن الافعى أخطر

– والعقرب أحقر ….

–ستظلين دوما الانذل

– لكنك ستظلين دوما في الاسفل

– اي حب هذا و انت ستسممينه ان اقترب …

–لا فقد أخدت من الافعى فقط جمالها وتركت السم للعقرب ….

– هو لن يحب افعى مخبولة …

– بل لن يحب عقربا مذلولة….

– هو قدري .. هل ستتحدين القدر والقضاء ؟

–هو حبي … هل ستمزقين القلب لأشلاء ؟

– حبه لك نزوة من النزوات …

– تِعجبنني حين تُلقين النكات …

– ستنتهي ايامك و انا من سأبقى …

– عفوا …. فالبقاء للاقوى ….

الباب الخامس من رواية توناروز : ” البقاء لأقوى ” حرب بين سحليتان … على وريد واحد ….

حرب الزوجتان على قلب واحد …

🔖الفصل الثاني : جنون العقلاء

🔖الباب الخامس : البقاء للاقوى

دخلات ليديا لواحد الصالة كلها نقوش تقليدية و مفرشة بفراش مغربي عريق طاغي عليه الستيل الامازيغي … كاتشوف بعينيها وتدور بكل ارياحية كاننها فالبيت ديالها … ملي عرفات ان تونار تزاد هنا ودوز طفولتو هنا … بغات تتعرف على كل اركان هاد البنت كاننها كتعرف على طفولة تونار … طقطقات كعبها العالي كاتسمع فالدار كاملة … و ريحت عطرها مالية المكان … اما تونار كان مع جدو للفوق طلعو لفراشو حيت يالاه خرج من السبيطار…

خرجات من داك الصالة وبقات كتمشى فواحد الكلوار طويل و تقيس بيديها الديكورات المحطوطين فالقنات … حتى كتقرب تدخل فواحد المراة ….

كانت امراة قصيرة القامة و ملامحها صغار ورقاق رغم كبر سنها … شعر ابيض مجعد كايبان من تحت الفولار لي مشدودة لور و اقراط ( اللويزة ) .. و لابسة قفطان مكفض مع حزامها ديال لاستيك وسروال ابيض فضفاض قصير من تحت وبلغة .. واضح عليها امراة خفيفة و حادكة و معقولة ومرحة … كاتشوف فليظيا بنظرة صارمة كانها عدوتها …

ليديا فحصاتها مزيان وتخطاتها باش تمشي وهي تعمر عليها الطريق … دازت لليمين دازت حتى هي لليمين .. دازت لليسار دازت حتى داك المراة لليسار .. وهي توقف ليديا مربعة يديها بمعنى واش مغاتخلينيش ندوز … وهي طلع داك المراة صبعها فليديا بتحذير بالريفية بصوت رقييق طنان

ايطو : شوفي عندي العكر وكنعرفو كاملين نديروه … الطاكون وداك طق طق طق كنعرفو كاااملين نديروها … ولي زين راه زين … الزين للمسرارات والعكر للمشرارات … راه الى مشيتي تاقربتي للحاج ولا عائلتو انا لي غاتلقايني فطريقك … انا معاهم سنييين هادي خدامة عليهم ومنقبلش تجي شي وحدة تشتتهم ..

ليديا : اوه !! كاع هادي محبة عندك للحاج ؟

ايطو : اييييه ونموت معاه …ونقتل لي يقرب ليه

ليديا : ( ربعات يديها وقربات عندها) وهادشي فخبار مرتو ؟؟؟؟ ( ايطو غير كاتشوف فيها ) زعما لي بغيت نقول …. سعدات مراتو عندها خدامة كتبغي ليها راجلها بهاد الطريقة .. زعما هاكا محبة اخوية ديال الله ( ايطو خنزرات فيها وليديا شدات على فمها ) لااااااا عنداك تمشي تفهيني غلاط …. انا راه مقصدتش تكونو دايرين علاقة غير شرعية فالسر و كتمناي امتى تاخدي بلاصة مرتو و ماشي بعيد تكوني والدة معاه كاع … لا لا لا مقصدتش انا هادشي كاع .. والى نت فكرتي فيه كايعني هادشي لي كايضور فراسك … فففف المراة مسكينة دايرة فيك الثقة ومدخلاك لدارها وباغيا تلوي ليها على الراجل

ايطو : ( حلااات فمها على وسعو ) لكداااابة لگرطييييطة قلبات عليا الشوارج ….الشيطانة للفعة لي باغا تشتت الشمل …الحاج بحال بّااااا وكتر من با يااا المجريييييمة يااالحنش لي باغا دخل وسطنا

ليديا : ( خنزرات ) وا بعدي من الطريق قبل مانبدا بشملك هو اللول ….. وقيلي شري عليك حسن ليك…. راه من غدا نقدر نردك سارقة الخبز واخا تكوني نت لي عاجناه …..

دفعاتها لجنب تاكانت غاطيح وزادت …..

زادت ليديا تاوصلات للفناء ديال الدار وايطو تابعاها وهي توقف كتسمع الخدامات كايهضرو مع حكيمة

الخادمة : اوامر سي تونار الالة … هو لي طلب منا نقادو ليه البيت هو ومراتو لي جاب معاه

حكيمة : ( صرفقاتها تاتسمعات التصرفيقة بجهد فالدار كاملة ) حطي طااابليتك وخرجي عليا … مزيان تباركالله هي لي مخدماك ولا انا … سيك تونار راه مزوج ببنتي … وبنتي هي لي من حقها داك البيت وداك الجعيفة ترجع منين جات بزااااف عليها البيت ….( شافت عند خدامة اخرى ) سيري نت انعيمة قادي حوايج بنتي فالبيت ديالو

نعيمة : سمحيلي الالة منقدرش …. راه سي تونار لي آمرنا .ً.

يلاه غاتجاوب وهي تسمع ضحكة دليديا بشر كبييير وجايا كتضحك و بقات كاتشوف فحكيمة لي ولات محححمرة بالعصاب

ليديا : لي سماك غير نافقك الله يسمح ليه … حكيمة و مكتحكمي فوالو هههههه …. ( ضارت عند نعيمة ) فرشي الايزار على ااسرير بالكحل … تونار كايعجبو الكحل فاش كايتحط عليه ( ضارت عند حكيمة ) بياااض ليديا

حكيمة : ضحكي … ضحكي مزيان ( كتقرب عندها والحقد كايغلي فعينيها ) غاتهجري ضحكك كامل وغانرد عليك هاد الدار جهنم

ليديا : اووووه !!!!! ( رسمات ملامح حزينة على وجهها ) صراحة صدمتيني فيك … العيالات بلاصتك كايتمناو يردو دارهم جنة ونت باغا تنكديها وترديها جهنم …فففف مكتبغيش الخير لحفيذو ومرات حفيذو قلبك كحل …. صراحة الحاج مسكين تزرف ….( شافت عند ايطو ) كون دا هاديك حسن ليه …

حكيمة : ججمعي راسك البرهوووووشة وعرفي اش كتخرجي مع فمك

ليديا : هههه برهووشة … ايه برهووووشة( غاتقرب عندها ) وغااااتشطحك على صبعها

حكيمة : ( طلقات ضحكة مستفزة ) هااااهااااايااات …. اوا ورييييني حنة يديك … باليا باقي ماعرفتيش راسك معامن

ليديا : شرفيني ؟؟؟

حكيمة : انا راه حكييييييمة بنت ( قاطعاتها ليديا )

ليديا : اووپ …. مامشرفاش بيك اصلا ….. ( قربات ليها كتر تالسقات معاها وجاو عينيها فعينين حكيمة و ايطو كاتشوف هي والخدامات ) ولكن انا … غانعرفك مزيااااان براسي ….. من دابا شوية غاتتعرفي عليا شكون انا …..

بعدات عليها وضارت عند الخدامات

ليديا : وحدة فيكم طلعني لبيت الحاج .. بغيت نطمن على جد راجلي كيف بقى مسكين …

زادت وحدة قدامها وليديا غمزات لحكيمة وطلعات وحكيمة كلسات كتنهج بالاعصاب وايطو حداها كتعاير ….

طلعات تابعة الخادمة حتى وقفو قدام بيت الحاج

نعيمة : هاهو الالة … انا سميتي نعيمة راه وصاني سي تونار والحاج الى بغيتي شي حاجة عيطي ليا

ليديا : ممم …. تقدري تمشي …

مشات و ليديا تبعاتها بعينيها تامشات وهي ضور لواحد المرايا تما فالكولوار وقربات كاتشوف فراسها ومبتسمة ابتسامة لاقيييس

ليديا : (كتقيس فوجهها) نمووووت فيا … اش هاد الزين كامل يا سيدي ياربي …. ( حزنات ملامحها كدوز يديها على وجهها) سمح ليا عفاك … ولكن ممضطرة…

قالتها وهي تجمع مع راسها بتصرفيقة بقووووووة ورجعات كاتشوف فحنكها تطبعو صبعانها فوجهها حمرييين … وبدات كتجمع فملامحها بحالا غاتبكي و بدات كتنهج و الممثلة لي فلداخل ديالها خرجات .. ومشات كتجري لبيت فتحاتو بجهالة وتونار و الحاج شافو للباب

تونار : ليييديا؟؟؟؟؟

ليديا دخلات كتبكي بججججهد و تلاحت على تونار عنقاتو والمامون كايشوف مفاهمش وهي بلعاني كتهضر بريفية

ليديا : ديييييني منهنا … عفااك اتونار يلاه نمشيو ديني منهنا منقدرش نكلس هنا

تونار بقى كايرمش وردها قدامو مصغر فيها عينو حافظ حركاتها كلهم وكايقراها من عينيها ….وهي تبعد عليه كتشهق وتبكي وهو ربع يدو كايشوف فيها مصغر عينيها باغي يعرف فين غتوصل

المامون : ابنتي … فهمينا غير مالكي ياك لاباس

ليديا : سمح ليا … سمح ليا جايا نبرزطك ونتا مريض … ولكن منقدرش انا عندي غير كراااامتي .. شوووف وجهي شوووف ( كتقرب عندو و تونار كلس شاد على راسو )

المامون : اررررربي سلااااامة شكون دار ليك هادشي

ليديا : انا ماقلت والو دخلت وبست ليها رااسها بحال مييييمتي وربي شااااهد عليا.. وهي تقوليا الخدامة بيتك واجد وانا بالفرحة طالعة نشوف بيتي وهي مراتك تجبدني من شعري وصرفقااااتني ( كتبكي بجهد والمامون وسع عينيه وتونار داير فيها الشوفات ديال التسليييييم ) مااااعمر .. ماعمر شي واحد فدنيا قدر يحط عليااا يديييييه انا منقدرش نصبر لهاددشي

المامون : ( شاف عند تونار ) شششفتي قتليك قبيلة راه سمعت تصريفقة شي واحد تضرب ونتا كتكدبني ..

ليديا : انا مقدرتش نرد عليها الكلام هي كبيرة عليا وفمقام ميمتي ومساااامحاها ( تونار كايضور فراسو ) ولكن لا .. مانقدرش نصبر راه عندي كرامة … نووض نووض اتونار ديني فحالي انا نكلس فلوطيل ونتا بقى مع جدك … هجرووو ليا فرحتي وانا لي جاية فرحانة نتعرف عليهم ونديروهم خواتتي واخا معندي حد فهاد دنيا

المامون : اعوود بالله واش هادي هضرة كتقال .. حاشا حاشا تاهادي داركم دابا ….. و حكيمة راه غير معرفت كيفاش وصافي ماهي مدايراش هاكا

ليديا : حتى انا داكشي لي قلت … غير يمكن محملاتنيش حيت ضرة بنتها …. ولكن اش ندير قلبي لي بغااااه واش يحيدو ليا تونار من قلللللبي ( تونار وسع عينيه مصدوم )

المامون : اييييييطو …. اييييييييطوووو

تونار : جدي هنيينا .. صافي ليديا دابا تسكت …( ناض وقف ) تكعدي نت گدامي

المامون : ( شد ليديا ) خلي لبنت والله لامشات لشي بلاصة بالله شوف وجهها كيداير حشووومة …. او البنت مسكينة يالاه جات .. ( ليديا تكات حدا الجد مخبعة فيه و كتقلي السم لتونار بعينيها عرفاتو عايق بها حيت الوحيد لي عارفها مستحيل تبكي ولا يصرفقها شي حد اصلا) اجي اجي ابنتي ومسحيها فيااا ….اييييييطو

مع تعطية للخرة ايطو دخلات مخلوعة هي تشوف ليديا كتنخصص فحضن الحاج وحلات فمها

ايطو : ايااااااووووو ؟؟؟؟؟

المامون ناض تكى على السرير وليديا كتغبن وتونار كلس وربع يدو كايتفرج ….

المامون : فين هي حكيمة ؟؟؟؟ شنو دارت ليها هاد البنت مسكينة

ايطو : ( مصدومة ) ش شنو دارت ؟؟؟؟ م مسكينة !!!!!!

ليديا : ماعليتش اخالتي … نتوما كباارات عليا وواجب عليا نحترمكم … واخا جرحتيني تانتي بكلامك و قستتيني فشرفي هاانية ماشي مووشكيييل

ايطو : انااااا ؟؟؟؟؟

المامون : اوا علاش آ ايطو هادشي ماشي ديالك

ايطو : يعطيني رزية وكية و عضة الحية ماا قلت ليها شي حااااجة

المامون : عيطي ليا لحكيمة …..

بقات كاتشوف مستغربة وهبطات و ليديا ناضت وقفات

ليديا : ماااتزعف عليها ماضربها ماتقيسها منها لمولاها …. انا ماشي مشكل حيط قصير وظهري مالح( تونار كايرمش فيها )

المامون : كلها يلزم حدو.. ايه عارفين ماساهلاش عليهم يتقبلوك …ولكن نتي مادرتي والو ومرات حفيدي لازم من الاحترام …..

ليديا :وااانتا تعرف ….

كاتشوف بنص عين فتونار لي داير يدو على وجهو ومتبع هادشي ديالها … تادخلات حكيمة و موراها بناتها وايطو وهي تمشي ليديا تخبع فمامون زعما كتخاف وتاهو حضنها ونظرات تونار قصة اخرى ….

حكيمة : اش وااااقع الحاج

المامون : علاش ضربتي لبنت ؟؟؟؟

حكيمة : نعاااام نعااام ؟؟؟؟؟ اشمن بنت ؟؟؟؟؟

المامون : ( شاف فليديا ) ماشي حشومة نهار لول ديالها تبكيوها اش دارت ليك كاع

نور : ماما ؟؟؟ ضربتيييها ؟؟؟؟

حكيمة : اووولي حاااااي اش هاد البااااطل

ليديا : ( ناضت قربات عندها بنظراتها الشيطانين لي مكيشوفهمش المامون حيت عاطية بالظهر و الهضرة حلوة متناقضة مع عينها .. ) مااااشي مشكل … راك فمقام ميمتي وغاتكوني ضربتني غير بالنفس لي جاتك على بنتك مسكينة … راه صعيبة نهار عرسك تلقاي عروسة اخرى بلاصتك … الله يحسن عوانكم صراحة .. واخا ضربتيني وتقسح وجهي ولكن ماشي مشكل .. قلبي بيض ودغيا كنسى ….

حكيمة حالة فمها هي وبناتها فالنظرات الشريرة لي دايرة ليهم وكايشوفو الخبث ديالها فين واصل ورجعات رسمات ملامح البراءة وضارت عند المامون

ليديا : نكبر وننسى …( رجعات ضارت عندهم ) وحتى هوما يكبروو وينساو …..( غمزاتهم )

حكيمة : ااء .. و واش . واااااش شتيها الحااااج ..( غاتحمقها ) شتيها كيف كاااتشووووف فيا

نورة : (بحقد) اللفعة الگرطيييييييطة

المامون : نووورا …. حشومة هادشي والله الى حشومة واش هي قللات عليكم الاحترام

ايطو : اويلي و كحل ليلي ووسخ جليلي وظلام قنديلي ….. شنو باقاااا مزال مادارتوووووش يالحاج يالي فوق راسنا تاج …

ليديا : ( عوجات معاها راسها ) ايطو ؟؟ ماحسابتنيش شاااعرة ؟؟

سمعو تنحنيحة ديال تونار لي طفح كيلو من هاد المسرحية و وقف …

تونار : ماوقع والو … ليديا جدي خصو يرتاح وكنضن هضرت معاك فهادشي ( مشا ووما ليها بمعنى تبعيني ) يلاه

ليديا : بصح عندك الحق ( ضارت عند المامون ) سمح ليا اعم … ا ا… و ولا … نقدر نقوليك جدي ؟؟؟؟؟؟

حكيمة وبناتها حلو وفمهم وايطو خلاص تزلع و المامون تبسم ليها

المامون : ( بابتسامة حنينة) الله اودي

ليديا : ( ضحكات وطولاااات فيه شوفة صادقة ) يالاه .. . نخليوكم ( ضارت عند حكيمة ) ونت اخالتي ماوقع والو مكنهزش فقلبي .. و نتمنى ديريني شي نهار وحدة من بناتك …( حكيمة مطرطقة عينيها وكتزغل بالاعصاب ولوخرين مصدومين لان لاعلاقة هضرتها مع نظراتها )

قالت دوك الكلمات وتبعات تونار و نور متبعاهم بعينيها … وضارت عند المامون لي كايهضر معاتب

المامون : حكيمة … عارفاني رجل معقول … كلها خصو يلزم حدو ….

حكيمة : ياااك الحااااج ؟؟؟؟؟ ليا كاتقول هاد الهضر ….نتا راااك مكلوووووبة عليك القفة معارف وااالو راه( قاطعها )

المامون : راسي ضارني مابغيت نسمع والو … كيفما نور مراتو .. ليديا تاهي مراتو …. وليديا كنضن اكتر وحدة قريبة ليه لانه هو لي ختارها وتزوجو بالرضا والطاعة … ييه الغلط هو خبا عليا ولكن تانا خبيت عليه … ونت ابنتي انور خصك تقبلي هادشي وخصك تسمحي ليا بزااااااف نت اكتر وحدة ضالمها هنايا … ولكن متخافيش ابنتي حتى نت حقك كاين وواطب عليها تحترمك تاهي و حتى هو …

نور : ( دمعو عينيها وكتعصب غير من داخل ) ع عمي الحاج … ا انا معندي باش نآدييها … واخا هي آداتني بزاف ودات ليا اكتر حاجة بغيتها … ولكن اعمي راك غالط فيها بزاف … راه ماضريفاش كيفما كتبين حداك

المامون : تكون كيفما بغات تكون لي كايهمني هو مفاهمة مع راجلها …ما انا راه ايامي قليلة …

حكيمة دفعاتها وزادت عند المامون كلسات حداه

حكيمة : الحاج …. كيف ما كطلب منا نحترموها … وعطيتيها مكانة فهاد الدار وبيت كاع وخدامة ديالها … انا مطالبة والو لبنتي … من غير تاهي يكون حقها فهاد الدار كييييف لوخرا …..وتكون ببيتها تاهي مع راجلها

المامون : حق نور محفوظ … كتاب المكتاب و ولينا بجوج عروسات فالدار .. خصنا نعرفو كيف نديرو نتعاملو ومنكونوش همجين كيما ضراير دشحال هادي . . البنت راه ضريفة خصكم غير تفهموها … كون مكانت مزيانة مكانش غايتزوج بها تونار راكم عارفينو كيف داير مكاينش لي يرتاح ليه و ملي رتاح ليها هي راه معجزة … كلها عندو حقو وكلها يلزم حدو .. وتاحد مايضيع …..

حكيمة : لا المامون بنتي ضاعت … هي جات غير لبارح وعطيتها البيت … اوا فين بيت بنتي لي باقا عروس مع راجلها ؟؟؟…

المامون : انا ماعطيتهاش البيت… هو لي قاليهم يحطو حوايجها فبيتو انا هادش مكنداخلش فيه.. ومسألة الببت راه هو لي خصو يقرر .. ونور هي لي خصها تكلس معاه ويهضرو على هادشي انا غاتجيني فشكل نجبد ليه هادشي راه غايحشم مني( نور تحرجات ) امور كتخصهم هادي …

حكيمة : دابا بنتي انا تبقى مزوجة فالوراق ولاكيفاش

نور خرجات كاع لبرا وبقات واقفة متكية على الحيط ومطلعة اسها للفوق .. وحكيمة كتحاول دير كاع الطرق لي تنكدها على ليديا واخا هي مهامهاش ينعس معاها بالعكس مكتمناش لبنتها زواج كامل مع واحد مشوه ..ولطن خصها تعصب ليديا …وتنتقم …وايطو خرجات عندها و عنقاتها كتحاول تواسيها و طلقات دموعها فكتف ايطو لي كطبطب بشوية على ظهرها…

المامون : حكيمة قلت ليك هادشي مكيخصناش

حكيمة : ( بعناد ) كايخصنا … راه انا لي كانشوف بنتي كيفاش كتعدب .. ملي جا وهو منخلها وتابع غير لوخرا راه تاهي بكرامتها

المامون : نكونو واقعيين … راني فرضتها عليه احكيمة كيف بغيتي يتقبلها …

حكيمة : هادشي كون فكرتي فيه قبل ماتزوجهم هاكا …. ياك نتا لي قلتي غاتقبلها مع الوقت ؟؟ واااكيفاش دابا

المامون :هادشي كون مكانت مراة اخرى بينتاهم .. والقلب كايعمر غير بوحدة آحكيمة …. نور لي نقدر ندير ليها هو نوفر ليها حقها وماتظلمش …. ولي بغاتها جاتها ….

حكيمة : بنتي ماخصها فلوس خصها كرامتها …انا ماقابلاش و مغانتهنى تانشوف بنتي حتى هي ببيتها مع راجلها بووحدهم وتجرب لوخرا تاهي المعنى ديال اراجل المشروك ماشي غير بينتي لي تعدب .. اش غايقولو العائلة فاش يجيو فسبعيام ؟؟؟؟ ويبغيو يشوفو بيتها ها ؟؟؟؟؟ ..

المامون : وايكون خيير.. يكون خييير دابا نهضر معاه …

حكيمة : ( وقفات تمشي ) دير شي حل الحاج .. رااك غاتخلييييها مرووونة بزااااف

لاحت ليه هاد الكلمات كيف الجبال على ظهرو ومشات وهو تكى كايتنهد ويفكر فشي حل اوسط .. لي تمناه هو حفيدو يلقى نصفو التاني … وهاهو لقاه وشاف النظرات لي بيناتهم وكمية التفاهم …. ولكن نور باقي مامهنيش من جيهتها ….. اما ليديا تبعات تونار لبيتو …. هو دخل كلس وهي دخلات كتشوف مع البيت كان هادئ وعاااادي جدااااا … سرير متوسط الغرفة .. و بالكون بباب ديال الزاج … و زربيات و بلاكار و دوش صغير … و تيلفزيون فالحيط …. ولي فاليز ديللها محطوطين …. تونار خلاها تاكملات الجولة ديالها على البيت بعييها عاد نطق

تونار : ودابا نهضر ؟؟؟؟

ليديا : لا بلاش … ( حطات صاكها و مشات عندو طلعات على رجليه كلسات فحظنو وعنقاتو ) فخبارك شحال توحشتك

تونار : الكحل راه مكايتصبغش …….

ليديا : وشكون لي قاليك نتا كحل

تونار : شنو دك الحاااالة

ليديا : ( كتهضر وتلعب بالصدايف ديال قميجتو) هوما لي جبدوني …

تونار : نت يقد عليك شي واحد نت

ليديا : ماشفتيش كيفاش ضارو بيا لتحت .. وداك حكيكو قالت ليا نرد عليك هاد الدار جهنم . وريتها شوية من صهد جهنم باش ما تبقاش تهضر على شي حاجة متقدش عليها

تونار : شكووون ؟؟؟

ليديا : ( بضحكة مرحة ) حكيييكو ههههه

تونار : ( جابتليه الضحكة ومابغاش يبين ) واش مكتحشميييش … خلي عليك موالين هاد الدار آليديا الله يرضي عليك

ليديا: انا قلتها ليك وعارفني مكنتراجعش فكلامي .. مغانجبد حد .. ولكن الى جبدوني غايلقاوني … نوع من الدفاع عن النفس وصافي .

تونار : شنو قاالو ليك

ليديا : والو .. قاليك مامنحقيش يكون عندي بيتي معاك …

تونار : ماشي هوما لي كايقررو ( طلع يدو كايقيس فوجهها باقين آثار صباعها ) طرشتي راسك آبنت ابليس ….

ليديا : عندك شي دليل

تونار : ( هز يديها وحطهم فوجهها جاو مطابقين الصبعان ) و ديالمن هاد اليدين ؟

ليديا : هزات يدي وضرباتني بيها ( قربات عندو كتر ) واااكدبني تافهادي …

تونار : دابا آش كديري آش

ليديا : ( بالهمس ) توحشت رااجلي …

تونار : ماشي وقتو .. تكعدي

ليديا : ( كتقرب كتر ) وقتو ….

تونار : ( جابتليه الضحكة ) راه غاندمك.

ليديا : ( كتقرب لشفايفو ) ندمني …

هزها عليه ولاحها فوق السرير وهي بدات كتضحك

ليديا : كيفما كان الحال راك عريس .. اشنو تبقى نتا بلا ليلتك مجاتش ههههه

تبسم يالاه غايقبلها هو يسمع الباب كتدق … وغمض عينيه وليديا شدات على راسها

ورجع ناض حل لباب بزعفة لقاها ايطو ….

ايطو : وو … ولدي تونار … ر راه … الغدا واجد … تطلع لجدك لبيتو يتغدى ؟

تونار : واحد نص ساعة ….

ايطو : لا ولاكن غاي…

شافت لعندو للتحت وهي تحل فمها وتقطعات فيها الهضرة وهبطات كتجري فالدروج .. و تونار مافهم والو ماردش لبال و رجع شد لباب وليديا دايرة داك الضحكة دخزيت

بيديا : سير …. تايتغدا جدك واجي … نص ساعة مكافيانيش … مرانيش فالمعسكر …

ماسمعش ليها وجا لسرير نصل ليها كسوتها وهي كتضحك

ليديا : تونار …. سييير حتى لبلاتي

تونار : متبقايش تشعلي وترجعي بلور ولا غانصمكك ..

نصل ليها الحملات و ربط بيهم عينيها حيت مازال ماحلوش ليفاليز يجبد العصابات …

اما ايطو هبطات كتولول و حكيمة كانت واقفة على الغدا فالطابلة ودايرة شوفات الشر على وجهها و نورا بحالها …. اما نور غير كالسة بكآبة كتلعب بمعلقتها فطبسيل كانو موجدين كسكس … وكتشوف للحنة فيديها .. و ايطو جات عندهم صفرة وشافو معاها

حكيمة : ايييطو ؟؟؟؟؟

ايطو : ( حلات يديها ) گد هاكا يا خوتي كد هاكا شفتووو بعيني … گد هاكا حق مولانا

نورا : اش كتخربقي نت ؟؟؟؟

حكيمة : شنو شفتي

ايطو : شفت لي مايتشافش لا بلعاني لا بالغفلة …شفتو ياخوتي واقف كي الدايلة وغليض كي النخلة و قاسح كي راسي ….

نورة : مال هادي بدات تخرج وتدخل فالهضرة ….. واش عيطتي ليه يغدي جدو ؟؟؟؟؟ راه خصنا نتغداو جيعانين …

حكيمة : راه غايكون كاايجبد ليها ودنيها لداخل راه شافها كيفاش كانت كتشوف فينا وكان عايق بيها حسيت بيه … هتداك مدوزهاش عليه ماشي بحال المنونخ دجدو… ( ضاحكة ) غير بلاتي عليها ونضربها بسلاحها

ايطو : ياتي آش غاضربي اش … راه هي لي كاضرب فالكبال …حوووجي انا لي فاطرة بالكرموس ……كلسو تغداو دلسو …. ناس تغداااااو وراهم كاياكلو ديسير و حكيمة وياختي راه مساهلاش ….

نورة : مالكي تشيرتي نت ؟؟؟؟؟

ايطو : ( شافت مع جنابها وقربات عندهم بااحس ) لقيتهم كاااييي .. ييي … راكم عارفين اش كاايييي

نورة شهقات ونور وسعات عينيها بصدمة

حكيمة : كيف داااارو ليييها ؟؟؟؟

ايطو : كيف كتندار دارو ليها …داكشي لي شفت اختي حكيمة .. القوام صحاح الجلدة ماتت ولكن العصبة حية ….

نور جرت الكرسي بحهد وغوتات حمممرة مطلعة صبعها بتهديد فحكيمة

نور،: بيتي .. بيييييييتي هاد ليلة يكوووون …..

طلعات كتجري معصبة وهوما متبعينها وحكيمة تنهدات ومشات تابعها ونورا شافت فايطو

نورة : واش شفتيهم عريانين حلفييي ؟؟؟؟؟

ايطو : شفتو غامغطي علم الله عريان كيفاش داير .. حاشاك حاشاك ..

خلاتها ومشات تابعة نور

ايطو : وانووور .. وصكعة انا منك نهرب ونحمد الله ونتي باغا البيت يا الصكعة راك غير قليولة معندك صحييييحة …..

عند ليديا ….

ناض عليها وجر عليها الايزار و لبس البانضة ديالو … وكايشوف لعندها ضاحكة وعينيها باقين معصوبين ….

لبس البانضة ورجع حداها هي حسات به نعس حداها ترمات فحظنو عنقاتو …وكدوز يديها على درعانو العريانين …

ليديا : فوقاش تحقق ليا امنيتي نشوفهم … عيت نتخيل كيفاش غايكونو ….( تونار غير ساكت ) كنتخيلهم بحال الحجرة ديال المِسك … حرشة و قاسحة … ولكن اجمل منها مكاين …

تونار اكتفى فقط انه باس ليها راسها

تونار : متأكدة باغيا تبقاي هنا ؟ سمعي لكلامي وخليك فلوطيل

ليديا : بغيت نبقى معاك فين غاتكون نتا ….

تونار : مابغيتكش طيحي فالمشاكيل …. عارفاني معنديش مع دوك الناس راه غانسمع دارو ليك شي حاجة غانلوح شي وحدة منهم من السرجم …

ليديا : على هوما يقدرو …. راني قادة بيهم غير تهنى وديها فجدك وصحتو هادوك خليهم انا لي غانعرف ليهم …..

تونار : ماعجبنيش تنافقيه هاكاك ليديا جدي ماشي لعبة فيديك … ردي البال لهاد القضية حيت غانتقلب عليك … راه كولشي الا هو ….

خلاها وناض لدوش … كالعادة سمعاتو شد لباب ….وفكات عينيها ….وناضت لبسات ملابسها الداخلية و حلات ليفاليز لبسات بينوار اسود قصير … حتى سمعاتو خرج من دوش … غير بالبانضة و سروال وبودي ايلاستيك كوحل كايلبسهم ديما من تحت باش مكاتجيش البانضة باينة ومشا حال لافاليز ديالو… و هي مشات عنقاتو من للور مدة عاد هضرات … كلمة كانت كافية و أبلغ من مية جملة ….

ليديا : منافقتوش ….

خلاتو ودخلات للدوش وهو تبسم بجنب فمو و هز سروالو دجين لبسو … مع شوميز كحلة وكويرة .. و لبس كاسكيط والماسك فوجهو جلدي … لبس القفازات وفرجليه گاط طالع …. وتمشى لبيت جدو لقاه ناعس وزاد غطاه باايزار وهبط لتحت لقا غير نورة لي على طبلة كتاكل ديسير غير شافتو جاي وقفات …. وهو تكا على كتفها هبطها على الكرسي زعما رجعي تاكلي … تاجات عندو ايطو حانية راسها و ونورا مرة مرة كاتشوف لتما …..

ايطو :س سمح ليا اولدي برزطتك قبيلة

تونار : ماشي مشكل … انا غانخرج … عطي لليديا الغدا ديال جدي هي غاتغديه وتغدا معاه تما ….

ايطو : ( طلعات راسها حالة فمها ونورا وحلات ليها الماكلة ) هااا ؟؟؟؟؟؟؟ ..

مردش عليها وخرج هز طوموبيل ومشا ….

فإيطاليا …

وصلات سيارة بي إم قدام باب واحد الفيلا …

نزل واحد منها باتجاه الفيلا من و بقى كايشوف معاها ولي فطموبيل صايگ تاهو كايشوف بعينين مترقبين…. حتى باليه لباب الصغيرة تحلات وخرج منها واحد واضح عليه عساس … وشاف عند الراجل لي جاي مقصد كان راجل طوييييل و مملوء البنية .. واضح عليه ملامح اجنبية وشعرو خفييييييف قريب للصلع …

العساس : كتسول على شي حد

الرجل : هنا كايسكن مستر اكس !!!!

العساس : مستر اكس ؟؟؟؟

الرجل : الفلكي

العساس : سينيور تونار ؟؟؟؟

الرجل : تماما …

العساس : لا اسيدي ..راهم مسافرين

الرجل : وفييين ؟؟؟؟؟؟

العساس : منقدرش نعطيك معلومات اخرى .. لي نقدر نقوليك راهم خارج البلاد و مزال مدة عاد غايرجعو …. الفيلا فيها غير الخدم…

دخل داك العساس وشد لباب وهو رجع لسيارة ولقا لاخور غايقتلو الفضول

– اش وااااقع ؟؟؟؟

– مكاينش فاابلاد .. قالك الفيلا خاوية … ناس لي سولنا فااشركة ديالهم عندهم الصح راهم خارج لبلاد فين بالضبط هي لي خصنا نعرفو …

– غايكون عااااارف داك العساس … علاش خليتيه يمشي كون جبتيه نهضروه بطريقتنا

– واش حماقيتي ؟؟؟؟ باش نتفضحو الى كنبحثو من ورا ظهر البوس ؟؟؟؟ راه مخصناش نخليو مورانا ذرة ديال الشك والا مشينا فيها… انا مفهمتكش اصلا علاش مصر لقاوهم قبل من رجال دومينيك …

– المسألة ولات عندي شخصية … خصني لقا لبنت لي معاه …. قبل مايلقاوهم هوما …

– شي حب قديم هذا !!!! غير محيها من بالك … البوس لى مشا حتى شدو راه غايشد حتى البنت .. ضروري نتفكو منهم بجوج … حيت باينة حتى هي داخلة معاه فهادشي ماشي نتهناو من واحد وتخرج لينا وحدة ..

– ( ضار عندو بزربة ) دااااكشي علاش باااغي نلقااها …. مغانعاودش غلطة درتها جوج دالمرااات … داااك البنت مخصهاش دخل فهادشي … ( ديمارا) غانشيو نقلبو اشمن جااايحة مشاو ليها هادو ….. تاسميتو ماعارفينهاش مزيان ..

– قال ليا للعساس سميتو تونار …

منير سمع الاسم وحبّس الطموبيل مدة كايشوف قدامو ويحاول يتذكر الصدى ديال هاد الاسم فين سمعو من قبل ….

– منير ؟؟؟؟ مالك؟؟؟؟ منييير

– ( ضار عندو )لا … ل لا والو …

رطع ديمارا طموبيل و تايهضر مع راسو

منير : لا لا …آلا مايمكنش … مستحيل … الا …

نفض راسو من هاد الافكار … شخص واحد لي كايعرفو بهاد الاسم مستحيل يكون حي بل من سابع المستحيلات …. حاجة وحدة لي متأكد منها هي ليديا غاتكون عرفاتو من خلال تيليفون …… حيت قبل ماتمشي قاتليه هضرات مع ناس بزاف … منهار شافها فتلفازة هو غايحماق يلقاها حيت كان ندم بزاااااف على لي دار حتى ولات ندبة فحياتو .. وملي لقاها حية خصو يصلح غلطو وماتعاودش مرتين وتقتل على يد العصابة الاسرائيلية …..

ليديا خرجات من الدوش ووتقابلات مع المراية جالسة على واحد الكرسي ولابسة كسوة طويلة مطلعاها على رجليها كتدهنهم بالمرهم كيف كل مرة كايمارسو كتبقى عليها اثار الاحتكاك … حتى سمعات لباب تحلات بجهد وبدون صواب ولا دقان ودخلات ايطو شادة على نصها

ايطو : ( كطلعها وتهبطها ) گاليك سي تونار دخلي تغدي جدو

ليديا مشافتش حتى لعندها وكتدهن فيديها وتدهن رجلها برااااحة عاد جاوبات وعينيها على رجليها

ليديا : ماعلموكش دقي البيت قبل ماتحليه ….

ايطو : لا ماعلمووووونيش

ليديا : ( طلعات عينيها فيها ) انا نعلمك … برا .. دقي البيت عاد دخلي

ايطو : وااااحلمي فعز النهار ….

خلاتها ومشات وليديا تبعاتها بعينيها ورجعات كملات على خاطرها ووقفات كتقاد كسوتها لي كانت طويلة باليدين على ود دوك الاثار و بالصدايف حتى لتحت بحزام رقيق … و صندال عالية يالاه غاتنشف شعرها تطرقات لباب ثم تحلات ودخلات الخادمة نعيمة

نعيمة : لالة …. الغدا واجد لسيد لحاج … و طلب منا سي تونار باش نت لي تغديه حيت هو خارج و طلب منا يتحط غداك معاه .. نديوه دابا لبيتو ؟؟؟؟

ليديا : دخلي انعيمة دخلي .. نعيمة سميتك ياك …

دخلات نعيمة مبتسمة وشدات موراها لباب

نعيمة : اه الالة

ليديا : ( طلعات فيها راسها ) كتعرفي تنشفي الشعر؟

نعيمة : ها ؟؟ اء … ااه .. كنعرف

كلسات ليديا على الكرسي ومدات ليها سوشوار صغير و نعيمة شداتو وبدات كتنشف شعرها وهي معجبة بطولتو و كثافتو ولمعانو … وليديا كاتشوف فيها فالمرايا بعينين نوعا ما فيهم نظرة حنين ..

ليديا : مليوم … ولات سميتك لبنى

نعيمة : اء !!و ولكن … سميتي نعيمة الالة

ليديا : ( بنظرة قوية من المرآة كأنها الفرصة الاخيرة ) شنو سميتك ؟؟؟؟

نعيمة : ( هبطات راسها ) ل ل لبنى … لبنى الالة ..

ليديا : مزيان ….عجبك شعري؟

نعيمة : اه … غزاااااال تبارك الله

ليديا : ( مفتخرة براسها ) اكيد خصو يعجبك … نشفيه مزيان ومتزيريش عليه فيديك ….آ لبنى

كاتشوف معاها كيف كاتصاوب فنفس الوقت كتبتسم بعض الابتسامات بلهاء .. اكتر حاجة كتشتاق ليها فمستعمرتهم بعد امها هي خادمتها لبنى .. كتحس براسها لقاتها من جديد واخا ماشي هي …ولكن هي من النوع لي فاش كتفقد شي شخص مكتحزنش عليه .. بل كتحاول تلقاه فشخص آخر وتكمل حياتها .. حيت كتآمن ان وجهها مخصوش يترسم عليه ملامح الحزن بتاتا ….

كملات ليها شعرها وناضت وقفات كاتعلي شعرها للفوق … و توجهات لصاكها جبدات منو 400 درهم … مداتها ليها و الخادمة بقات كاتشوف …

ليديا : بغيتك ودنيا … وعينيا … ف غيبتي

نعيمة : ( شدات داك الفلوس بلهفة واااضح كان محتاجاهم وقالت بضحكة ) شكرااااا الله يخلف عليك

ليديا : غاتاخدي كتر الى جيتيني على لكانة

نعيمة : ( بفرحة ) الله اودي لهلا يحشمنا انا عبد مشرط حناكو قدامك

ليديا : عندك باسبور ؟

نعيمة : ها؟؟؟؟ ل لاااا ..

ليديا : جمعي وراقك نعطي لتونار يوجدليك عقد عمل فايطاليا … غاتمشي معايا ملي نمشي …

نعيمة : ( حلات فمها بعدم تصديق ) حلللللفييي ….

ليديا : مكنكدبش ….

نعيمة بغات تعنقها بالفرحة وحشمات كاتنقز غير بلاصتها و ليديا تقلبات للمرايا كتركب اقراطها

ليديا : مابغيتك تسمعي لحتى شي واحد فهاد الدار من غيري … وغانتهلى فيك مزيان ….

نعيمة : غيرر نت لي كاينة الالة .. انا ملول ومن زطمة لولا ديالك فهاد الدار عرفتك نتي لي غاتكوني مولات الدار .. راكي مرات سي تونار الشرعية …..

ليديا : مممم …( ضارت عندها ) عندك نمرة دتونار ؟

نعيمة : اء ل لا … ولكن كاينة فالكارني تحت

ليديا : سيري دخليها لتيليفونك واجي ….بغيت نهضر معاه تيليفوني خليتو فايطاليا ….

نعيمة : هي لوووولا الالة ليديا …

مشات نعيمة و ليديا رشات بارفانها و بدات كاتقاد مكياجها .. مع اللمسة الاخيرة مع نعيمة دخلات

نعيمة : ها هي الالة

ليديا شدات تيليفون …. وبدات كاتصوني وشافت عند نعيمة

ليديا : واقفة كاتشوفي فيا ؟؟ جمعي لبيت … ودوش تاهو منبغيش قطرة دالما فيه…. حوايج تونار ماتقيسيهمش حتى بطراف صبعانك … انا غانهزهم ( سمعات الخط تحل ) الو .. تونار

تونار : ليديا؟ اش هاد الرقم

ليديا : اوا شفتي سيادتكم مخليني بلاا تيليفون حتى وليت نطلب الخدامة ….

تونار : ماعندك ماديري بيه

ليديا : فينك قالو ليا خرجتي ؟؟؟؟

تونار : عندي شي اومور نقضيها …

ليديا : مزيان .. ملي تجي نبغي نعرفها شنو هي….. حاجة اخرى .. قالو ليا نغدي جدك ؟ نتا لي بغيتي ؟ علاش ماغديتيهش نتا

تونار : باش تغداي معاه …

ليديا : مافهمتش

تونار : متاكلي حتى حاجة مواكلش منها هو … وملي تبغي شي حاجة سيفطي داك لبنت لي خليتها ليك .. هي تجيبهاليك من برا هاديك البنت راها على يدي وانا لي جبتها … واخا ؟؟؟؟

ليديا : سحارين ولا كيفاش ؟

تونار : كنتوقع اي حاجة …..

ليديا : يخليلي لي كايخاف عليا

تونار : راني فطريق … حتى نجي

قطعات عليه وعطات تيل لنعيمة

ليديا : تونار لي جابك ؟؟ امتى

نعيمة : شي ربع سنين هادي الالة ملي جا اخر مرة سيد لحاج لهنا قال لشركة لي كانت مخدماني يجيبوني لجدو ….انا جيت من الشركة ماشي بحال لوخرين لي هنا جابتهم ايطو من دوارهم …

ليديا : ودابا مابقيتيش ديال جدو ؟

نعيمة : لا دابا سي الحاج عندو الخدامة لي قارية التمريض والاسعافات انا ماقارياهش منعرفش نسعفو لاوقعات شي حاجة ..

ليديا : ممم فهمت …. دي الغدا لبيتو …. غاناكل معاه من نفس الطبسيل

نعيمة : كنت باغا نقولهاليك الالة حيت كانو ( شافت موراها لباب مشدودة وقلت بالحس ) كايوشوشو فالكوزينة مع ايطو لي طيبات … علم الله اش باغين يديرو ليك فماكلتك الله يستر ….

ليديا : مممم … واخا .. تغداو هوما ؟؟؟؟؟

نعيمة : تغداو ولكن الالة نور مزال قالت لينا لالة حكيمة نطلعو ليها تاهي لبيتها ..

ليديا : مممم …عرفتي اش غاديري ؟ غاتهبطي تقوليلهم نتي لي غاتكلفي بالغدا …ليا و لضرتي لعزيزة ….غاتجيبي بلاطو للحاج … وبلاطو ليا …وبلاطو ليها … والبلاطو ديالها هو لي غاتجيبيه ليا .. وبلاطو لي عطاوك ليا .. غاتديه ليها ؟ …. فهمتي ياك ؟

نعيمة : ( ضحكات ) ههههه خطيييييرة الالة ….

ليديا : يالاه سيري ….

مشات نعيمة كتجري و ليديا تمشات بشوية عليها حتى لغرفة ديال الحاج …. لقاتها خاوية و كاتسمع تخرشيش ديال الما فدوش ديالو … وقربات جيهة البالكون كتطل للتحت … حتى سمعات لباب تحلات وضارت بان ليها المامون خارج وشادة فيه الخادمة الممرضة ديالو واضح عليه انه تقيا …. هو شاف ليديا وتبسم وتاهي بادلاتو نفس الابتسامة … ومشات شداتو على الممرضة عاوناتو حتى رجع لفراشو ….وطلعات راسها فالخادمة ديالو

ليديا: غير سيري …. راني هنا

وومات براسها بالايجاب ومشات وليديا جرات كرسي جلسات حداه

ليديا : كيف بقيتي شوية ؟

المامون : ( تنهد ) صابرين لحكم الله …فين تونار

ليديا : قال عندو شي غراض مشا ليه

المامون : هنا ؟؟؟؟؟ شنو عندو هنا

ليديا : معرفتش … قال راه خارج الحسيمة

المامون : ( بقى قلبو كايدق ) عيطي .. عيطي عليه يرجع

ليديا : ( حسات بيه تبدل ) علاش ؟؟ ياك لاباس

المامون : ا .. لا غ غير ..مكيعرف حد هنا وو .. وخفت عليه يي ( قاطعتو )

ليديا : يتوضر ؟ هههه فعمرو تلاتين عام غير رتاح … ( ضارت بعينيها على لبيت ) بيتك فشكل …. فيه هدوء مميز … ماشي بحال البيوتا لوخرين .. شنو السر زعما

المامون : ( بشوق وحنين وابتسامة باهتة كايشوف مع الجدران ) حيت هاد البيت فين تزادو حفادي .. و ولادي …. وهنا فين لعبو .. وعلى هاد السرير نعسو على رجليا ورجلين رالاهم الله يرحمها …. و الله يرحمهم اجمعين

ليديا : ( ضارت عندو ) عارفة ماشي وقتو …. ولكن تجبدات الهضرة … قاليا تونار شي واحد هو لي حرقكم وكانت بيناتكم عداوة فتجارتكم … وقال ليا ماتو حتى هوما … نتا كاتضن بلي ماشي هو لي حرقكم ولي حرقكم حرقو تاهو حيت لاغدا طرا انفجار اخر فدارهم … ولكن تونار كايقول انه متأكد هو لي حرقكم .. وهداك الانفجار الثاني ما مات فيه حتى واحد من غير تمحى آثار داك الدار و شي كوارى ديالهم كايقول ان هاد الانفجار التاني مكينش بصاح غير وهم خلقتيه نتا وقصة خيالية من دماغك باش تبعدو على الانتقام و داك الارض لي ديتيه ليها ماشي هي ديالكم .. جاني هادشي غريب … وشنو كانت تجارتكم بعدا ؟؟ .. تونار قال ليا الفلاحة

المامون : هادشي قديم ابنتي ودازو عليه سنين ….غير نسايه عليا ….مكنبغيش نهضر فهادشي …

ليديا : ممم…. واخا …وحاجة اخرى وسمح ليا … ايوز ايوز … نتا لي علمتيها لتونار ياك

المامون : ( بضحكة ) اييييه …قالها ليك باقي عاقل عليها ؟؟؟؟؟

ليديا : بااااقي ….. وكنعرفها حتى انا …..

المامون : علمها ليك ؟؟؟؟

ليديا : لا … ( المامون استغرب ) كيفاش وصلات لعندي .. هي لي بغيت نعرف

المامون : ك … كيفاش ؟ نت شكون علمها ليك

ليديا : ونتا لمن علمتيها من غير تونار

المامون : مكيعرفهاش شي واحد من غيرو ابنتي .. هاديك غير لعبة درتها ليه باش يسكت من البكا وبقى ديما كاديرها …. وهزها فعقلو ..

ليديا : ايوز ايوز يسضويت توناروز .. حتى انا كنعرفها …ومكنتش كنعرف راها ديالو وتقالت ليه وبسميتو.. كان كايحسابني غير لعبة عادية بحال ابرا كطابرا … وتونار بالصدفة فالسيرك دليبيا سمعني كانقولها …. مكنت لاكنعرفو لا كايعرفني … وباقي لدابااا باغي يعرف شكون علمها ليا …. ولي صدمتي كتر قال راها ديالو … ومكيعرفها حتى شي واحد من غيرو هو تعلمها ملي كان صغير منك نتا … ادن اش وصلها ليا انا لي ملي تعلمها هو انا باقي متزاديت كاع ؟؟؟؟؟؟ …وبعيدة عليه كل البعد ….زعما نكون مابعيداش كيف كنضن وبيناتنا شي خيط

المامون : وشكووون علمها ليك نت ؟؟؟؟؟؟؟

ليديا : ملي نعرف شكون علمها لهداك لي علمها ليا …غانقوليكم شكون علمها ليا ….

يالاه غايهضر وهي تدق الباب ودخلات نعيمة جارة طاولة دالاكل

نعيمة : الغدا وجد …

جراتها لعند ليديا ووشوشات فادنها

نعيمة : شكك كان فمحلو بداو يوصيو ويعاودو على طبسيل ديالك وطبسيل ديالها ويأكدو عليا منغلطش …. باينة فيه شي حاجة الالة ….

ليديا تبسمات وومات ليها تمشي وهي بقات كتضحك بشر

يديا،: ( مع راسها ) يبان المفعول ونعرفو شنو كان فالطبسيييل .. وباش بغاو يستقبلوني ….

تنهدات وحاولات تعاونو يتكى وبانت ليها الطاولة ديال الفراش القصيرة وحطاتها على رجليه وبدات كتحط طبيسل ديالو دكسكس مع الفواكه وكاس داللبن …. وهو شد المعلقة يدو كترعد

ليديا : نعاونك ؟

المامون : لا ايجي اينو غير تغداي …

هزات معلقتها وبدات كتاكل من بلاطوها و كاتشوف لعندو …الكسكس كلو كايطيح من يديه ومشات كلسات حداه وحيدات ليه المعلقة من يدو

ليديا : خليني نعاونك ….

تبسم وعطاها المعلقة وبدات كتوكلو …. ملامحها تبدلو وبقات غير كتحاول تتنفس بحالا تخنقات وهي كتسرق منو الشوفة مرة مرة … احساس صعيب متملكها .. احساس جديد عليها … احساس المشاعر لي كتحاول تقتلها …

مدات ليه تاني الكاس ديال اللبن وهي كاتشوف معاه … وحتى هو مبتسم ومطمئن على حفيدو معاها … وكايلمس فيها الصدق فالمشاعر …. سالا غداه وبدات كتقشر ليه تفاحة ….وساااكتة وواضح عليها سااهية

المامون : تفكرتي شي جدك ولا الوالد ديالك كنتي كاتوكليه ؟؟؟

ليديا حبسات على التقشار وبقات مدة جامدة عاد بدات كتبسم باستهزاء ورجعات كتكمل تقشارها …

ليديا : لا … هادي اول مرة …. غانوكل فيها شي حد بيدي …

المامون : ماقلتيش ليا …. فين عائلتك

ليديا : معندي حد

المامون : مايمكنش

ليديا : ( عطاتو تفاحة ) لا يمكن … مكرهتش يجي شي واحد ويحرق ليا النسل ديالي كامل حتى انا … كنحسدكم والله

المامون : الله واكبر ؟ واش عائلتك مامزيانينش ولا ؟

ليديا : هه !! … واخا هاكاك … كنحس براسي كايسالوني ومدينة ليهم بكلمة شكرا … خصني نشكرهم .. حيت بسبابهم وليت ليديا لي مكيخلعها حتى شي واحد فهاد الدنيا …

المامون : ( مسح فمو )يكفاي … يكفاي ايجي ينو ( بمعنى شبعت ) تغداي نت ماكليتي والو …

ليديا عاد ضارت لبلاطو ديالها كتاكل ودماغها مشغول حاسة بحالا خسر ليها الجو

المامون : ملي تسالي عيطي ليا لتونار الله يرضي عليك قولي ليه فين ما كنتي اجي جدك بغاك ..

ليديا بقات غير كترمش بعينيها هاد الخوف كامل لي كاتحسو فالمامون ملي سمع تونار خرج ماشي عادي و مابقاتش قادة تحبس الفضول … هادشي خصو يسالي هي تحط المعلقة وضارت عندو

ليديا : خلينا انا وياك نثيقو فبعضياتنا …. كنحسك مخبي شي حوايج غير عندك … وحتى انا …. شحال من سؤال كايضور فبالك من جيهتي .. وحتى انا…. كتحس براسك عندك حمل واسرار فوق ظهرك مكرهتيش تبوح بيهم وتفك الحجاية … وحتى انا ….( شدات فيدو ) بغيت نعرف كتر … بغيت نعرف الخيط لي كنحسو رابطني بتونار واش كاين بصح ولا غير اوهام !!!

المامون : ( بقى كايرمش ) عيان …عيان ابنتتي … غير قلبي هاد الموضوع …. علاش كتقلبي فهادشي نت ؟؟؟؟..

ليديا : عيان حيت هاز هادشي فقلبك بوحدك .. تيق فيا …. مغاتندمش … خوي قلبك وغاترتاح وتقدر تبرا كاع ….

المامون : كل مغانقوليك غاتمشي تقوليه لتونار .. وهو لي سيفطك ليا هادشي مغاتجيبيهش من راسك ….

ليديا : كون كنت كانقوليه .. مكانش لدابا كايتسنى يعرف غير شكون علمني داك اللعبة … انا كانقول غير لي بغيت نقولو و فالوقت لي بغيت انا …

المامون خنزر و ضور راسو وهي تنهدات خصها دير اي حاجة يتيق بها … وبعدات عليها داك الطبلة وكلساات دايرة رجل على رجل … من زمان وهي كتقلب على الشخص المناسب لي تبوح ليه باي حاجة فقلبها بدون متخاف انه يغدرها ….. وكضن انه جا ااشخص المناسب … وفالوقت المناسب ……و للحدث المناسب

كتكس بان المامون هو لي غايقدر يفك كاع الحجايات ديالها …هو الشخص الكبير لي دا وداب وفالدنيا و ريفي و يقدر يفمها …والاهم هو كتحسو مخبي شي حاجة لي يمكن متعلقة بها ….

ليديا : سميتي ليديا … وبصح كيف ضنيتي انا بنت الكبداني واخا عمرني شفتها ….. ( المامون كايسمع ) تزاديت فمستعمرة محبوسة …. عايشة منفية 18 عام كاملة عمرني خرجت البيبان ديالها … تزاديت وكبرت و قريت وتداويت وضحكت وبكيت غير فالبيت ديالي ….

عشت بوحدي انا ومرايتي ….

المامون ضور راسو بزربة

المامون : وعلاش ؟؟؟؟؟؟ شكون كان حابسك

ليديا : جدي … ماشي بوحدي .. كاع العيالات ديال المستعمرة لي تزادو فيها ولا لي دخلو ليها عروسات .. كلنا سجينات …. اما الدراري هوما الامراء،… كانو عايشين بحرية … ومنهم خويا لي كان هو العكاز ديال جدي …. لي بغاها كتحضر ومخلا حتى شي بلاد .. حيت ببساطة هو ولد وحنا وبنات

المامون : وفين هو دابا

ليديا : قتلني … ومشا

المامون : قتلك ؟؟؟؟؟

ليديا : مممم عند بالو قتلني … معارفش الى هو راه حياني …. عطاني حياة جوج دالمرات …. المرة الثانية نهار طلق سراحي وعاوني نهرب .. والمرة لولا …. نهار علمني داك اللعبة …. حيت بسبابها انا تلاقيت بتونار وعرفت الحياة شنو هي …. واخا مكنحملوش وكنكرهو .. لا شي حاجة كتر من كنكرهو .. … ولكن كنحس براسي خصني نشكرو قبل مانقتلو

المامون : خوك لي عملها ليك ؟؟؟؟؟؟ وهو شكون علمها ليه

ليديا : ماعرفتش …

المامون : شحال فعمرو

ليديا : هه!! ( باستهزاء لحالها ) حتى هي ماعرفتش … تزاد قبل مني .. غالبا من بحة صوتو وتقاسيم وجهو كايجيني فآواخر العشرينات …

المامون : ( مصغر عينيه و قلبو كايخفق بشكل ماشي عادي ) يكون قد تونار ؟؟؟؟

ليديا : ماااعرفتش ..

المامون : ( ضار عندها ) شنو كايديرو عائلتك؟ شنو كنيتهم … ومنين بلادكم ….

ليديا : ماعارفاش كنيتنا … لي عارفة هو جدي … سميتو اوشن

المامون الصدمة توسعااااات على فمووو وعينيه ووجهو حمااار بزااااف لدرجة ليديا وقفات بخلعة … منظرو تغير فثااانية وحدة… والنفس مابغاتش طلع ليه

ليديا : ااء الحاج … ل لحاج ؟؟؟؟ ( بالغوات ) عتقوووووووووني …. الحااااج …. عتقوووووني( كاتحاول تفتح ليه سلسة دسورفيت لي لابس يتنفس ووالو )

دخلات الممرضة كتجري و تابعاها ايطو وحكيمة و نورة اما نور مزال شادة عليها فبيتها … و تبعوهم الخدمات والممرضة تلاحت عليه كاتحاول تساعدو على التفس وتسعفو … وليديا كاتشوف مصدومة ومخلوعة فنفس الوقت حتى حسات بشي يد جراتها منلور بقوووة

حكيمة :اش درتي للحااااااج يالفعة صااافي تنهيني بغيييتي تقتليييييه باش تورتي .. صاااافي تهنييييتي دابااااا يااا لفعة يااا لمجرمة …. قتلتييييه

ليديا مقادراش تهضر غير كاتشوف مخلوعة عليه وكتفكر فردة فعل تونار …. مكتسمعش كااااع لاش كتقول حكيمة ….

الممرضة : بلا غوات عفاكم خرجو لبرا وتصادعو … عطيني كاس دالما

مشاات ليديا كتطري كبات ليها كاس دالما عطاتو ليها والممرضة كتحاول تشربو

الممرضة : خررررجو منهنا … سربيو .. خصو ويتفس

خرجو كايتجاراو وحكيمة خرجات كتجري تعيط لتونار باش تفضح ليديا جاتها من الجنة والناس… وليديا حلات الشرجم والبالكو ديال البيت وكاتشوف معاه ومابغاتش تخرج

الممرضة : اجي عاونيني عفاك … شديه منهنا انا غانجيب الابرة … جاتو كريز …

ليديا يديها كايترعدو وخايفة .. ومشات شداتو وهو كاحاول وينزاع يتنفس … والممرضة حلات الابرة من الغشا و عرات ليه دراعو باش تضربها وليديا ضورات راسها مكتحملش تشوف هادشي ..

تونار كان فالطريق و هو يوصلو الاتصال وضار يزززززربة حتى تسمع الفران وسط طريق ورجع مكسيييري بكل ما فالطموبيل من سررعة كايضوبل فالسبارات بطريقة جنونية ….

بدا كايتهدن المامون وهوما واقفين عند راسو … اما ليديا دخلات لبيتها .. كتمشي وتجي شادة على راسها كاتحاول تستوعب هادشي لي واقع !!! …

علاش هو ولا فهاد الحالة لمجرد انه سمع اسم ” اوشن ” شنو غاتكون علاقتهم لي خلاتو ينفعل لهاد الدرجة المميتة؟؟؟؟؟ …اذن بصح كاين رابط بينها وبين تونار … وباين رابط العداوة مدام انفاعل المامون لهاد لدرجة …

تونار وصل لدار حتى من طموبيل خلاها أمارش ماشدش حتى لباب نازل بجهالة طلع فدروج كايجري لبيت جدو حلو … لقاه مكااالمي بسبب الابرة لي خدا ولكن واضح عليه الصدمة .. كايشوف غير فالسقف وعينيه حومر و لونو صفار … وكايسرط فريقو شوية بشوية …

و حكيمة شافت تونار و بدات تبكي زعما ..وايطو عند راسو كتنش عليه بواحد الزيف … وتونار مشا عندو كايجري شد على يدو

تونار : جدي ؟ ميشيوغين !! سنخرعداي ( جدي مالك ؟ خلعتيني )

المامون مجاوبوش او بالاحرى محاسش ومواعيش كاع بشنو كايضور قدامو ولا شكون كايهضر معاه كايفكر غير فاسم اوشن لي كايتعاود فودنيه بصوت ليديا للمرة الالف ….

تونار علا عينيه فالممرضة

الممرضة : متخافش تعدا الازمة .. حالتو دابا ضعيفة واي توتر بسيط كايقضي عليه … خدا الكالمون و غانعطيه الماغنيزيوم ..

تونار : وشنو وترو ماافهمتش ؟؟؟؟

حكيمة : هااااديك مراااتك .. خليناها معاه جوج دقايق تعطيه يتغدا هانتا كاتشوف .. علم الله اش قالت ليه ولا اش دارت ليه حتى ولا هاكا …. وااش بغات تقتلو ولا مالها؟؟؟؟

تونار مضارش عندها كاع غير كارز على سنانو وكايشوف عند جدو …

نورة : وبلا حشمة بلا حيا خلاتو هاكا ودخلات شدات عليها فبيتها … مكلفاتش راسها حتى تتطمن عليه ….عصباتو وهربات ….عارفة راسها خدماتها … منعرف اشنو باغا عندنا …

تونار ماصبرش مزال …. و ناض بززربة مشا ونورة شافت فحكيمة وحبسو الضحكة ديال الشفاية … وناضو بشوية تبعوه اما ايطو كاتشوف غير فالحاج بأسف على حالتو حتى كتبغي تبكي ….

تونار دخل لبيت وحل لباب بجهالة وهي ضور ليديا شافتو جاي عندها جااااهل ولتخ لباب موراه وحكيمة ونورة كايتسنطو فالباب … ومشا عندها جيفها بيديه حتى بدات كتخنق

تونار : ( تحت سنانو بانفعال وتوتر كبير ) يااااك قتلييييييك بعدي على جدي رااه نشرررررررب دمممممك

ليديا : ( كاتخنق فيديه ) كححح .. كح ت ت و ن ار .. ط طل طلق .. ت وو ناا ر

تونار : (مجيفها وكارز عليها بكل قوتو ) اشنووو قلتي لييييييه

ليديا مابقاتش قادة كاع تهضر كتحس بالاكسيجين تقطع فيها … وهو محاسش راسو بسبب الاعصاب حتى بانتليه كاتغمض عينيها .. عاد وعا براسو وطلقها طاحت فالارض كتحاول طلع النفس بصعوووبة وعينيها كيتشدو وشادة على عنقها وتونار واقف كايرمش مفاهم والو .. وسرط ريقو ونزل عندها …

تونار : ( كايضرب فوجهها ) ليديا ؟؟؟ .. ليديااا

ليديا عينيها بداو كايتشدو وكايشوف صدرها كايتعلا مقادراش تنفس وتلاح عليها حل ليها فمها وشد ليها نيفها …وبدا كايحاول يدير ليها تنفس اصطناااعي …. و نورة شافت فحكيمة بمعنى مال هادو قطعو الحس …

بدا كاينفخ فالرئة ديالها ويحاول يخرج منها النفس ويرجع يحيد فمو يتنفس ويعاود تاني الكرة مخلوووع وكل مرة يضرب فوجهها

تونار: ليديا .. ليييديااا حلي عيينيك ليييديااا …

هزها بزربة حطها فوق السرير وحل لباب بجهد ماردش لبال حتى لنورة وحكيمة ليكانو مور لباب وخرج كايجري فتح لباب على جدو وكولو كايترعد وشاف فداك الممرضة بمعنى اجي .. والجد كايشوف غير فالسقف ويفكر كاع مراه تما باقي فالصدمة ديالو ..و المررضة و ايطو قربو عنو

تونار،: ( كتيهضر بزربة متوتر ) ليديا .. ليديا تخنقات… عندك االاكسيجين ؟؟ سررررربي

الممرضة مشات كتجري هزات الجهاز لي كان عندها تما للطوارئ للحاج … وخرجات تابعاه كتجري لقاتها فوق السرير فقدات وعيها وركباتو ليها بزززربة

المررضة : اوييييلي اش وصلها لهاااد الحاااالة …

حكيمة ونورة وايطو دخلو كايشوفو و ايطو كتطل براسها …وتونار كايغزل بالخلعة ومشا حداها كايشوف فيها ويشد فيديها ونورة مراقباه كيفاش مخلوع ونسى جدو كاع

تونار : … ليديا حلي عينيك شوفي فيا .. لييييديا ..

المررضة : ( شافت للجهاز لي ففمها ونيفها بدا كايتضبب ) صافي راها كتنفس … خليها شوية وغاتفيق راه حبس الاكسجين على دماغها ( شافت لعنقها مجيف ) راك كنتي غاتقتلها على شوية ….

تونار ضار بعينيه هوما يبانوليه واقفين عند راسو وزعف بجهد حتى قفزهم

تونار : خرجوووو عليا منهناااا خليتوه بووحدو ؟؟؟؟

حكيمة ونورة خرجو كايجريو و ايطو ماشية وكضور براسها كاتشوف فليديا واخا مكتحملهاش بقات فيها حيت شافتها شحال كانت مخلوعة عليه وواضح مدارتهاش بلعاني … وتونار شاد فيديها عندو لي ولات سخوووونة وكايقيس فجبهتها …والمررضة كاتشوف فيه وتستغرب كيفاش وحدة بالجمال ديال ليديا مزوجة بواحد بحالو كله مغلف و عارفاه محروق ومشوه كامل ووحدة بحالها قادرة تجيب اجمل الرجال حتى لرجليها … اشنو لقات فتونار مكاينش فالرجال الاخرين .واخا متنكرش ان الكاريزما ديالو خيالية وبحة صوتو قصة اخرى .. كايخليوك تنسى الشكل ديالو بمرة …..واش فعلا قصة الجميلة والوحش حقيقة؟ وكاتشوفو كيفاش مخلوع عليها ومن عينيه واضح شحال متعلق بها … وشحال كايبغيها وكاتقول بسيف يبغيها وهي كتفتن بالزين ….. ساهية فيهم حتى سمعاتو

تونار : مالها مفاقتش ؟؟؟؟

الممرضة : شوية وغاتفيق غير خليها ترتاح هانا معاها …

تونار : اش وقع مع جدي ؟؟؟

ممرضة : كان عادي دخلات عندو وقاتلي راني معاه غير نمشي .. وخرجت لپوز دالغدا ديالي نتغدا … حتى سمعتها كاتغوت وتعيط عتقوووني …. ماعرفتش اش طرا بيناتهم …

تونار : صافي غير سيري عند جدي … ياك هو لاباس دابا ؟؟؟؟؟

ممرضة : لا الحمد الله .. غير مكيشوفش كاع لعندنا غير سااهي .. ماعرفتش فاش كايفكر ….

تونار : انا غاانجي عندو ….

ناضت مشات وهو بقى حدا ليديا وكل مرة يتأكد واش كتنفس مزيان … وكايتفادى يشوف فصبعانو لي مطراسين فعنقها مكيحملش راسو … كان بدون وعي منو ومخلوع ومتوتر ماحسش براسو حتى خنقها … بدا كيدوز يدو على شعرها كايبعدو من على وجهها النايم …. وهبط براسو بشوية باسها فجبهتها وقرب لودنيها

تونار : ليديا …..

ليديا كاتسمعو وكتحاول تحل عينيها ولكن مقادراش …

تونار : ( باسها فودنها ) حلي عينيك راه مدرهاتش بالعاني …. راه عندي غير نتوما بجوج

ليديا غير كاتسرط فريقها بصعوبة وناض مشا تاني يطل على جدو اما حكيمة ونورة دخلو لعند نور كايعاودو ليها اش طرا …. دخل لبيت جدو لقى المررضة كالسة مع ايطو تما …

تونار : ( شاف عند الممرضة ) سيري عند ليديا الى فاقت عيطي ليا ( مشات لممرضة وشاف عند ايطو ) تغداو ؟

ايطو : الحاج تغدا ولكن مراتك راه طبسيلها مقاستش منو ..

شاف تونار لعندو بانليه يلااااه معلقة لي تنكلات منو وتنهد

تونار: دي هادشي منهنا ..

هزات داكشي ايطو وهو قرب عند جدو

تونار : جدي … تسريداي؟ ( كتسمعني ؟) ميشيوغين خزاد غاي ( مالك؟ شوف لعندي )

الجد ضور راسو بشوووية شاف فتونار وبقى كايرمش فيه .. يحاول يثبت فراسو .. خصو يكمل على مابدا ومايضعافش فاللحظات الاخيرة و يموت مرتاح و مايخليش موراه حفيذو قتال …. وحاول يتبت راسو وبين ليه مكاين والو … ويكمل على مابداه مايجيش حتى للخر ويضيع كولشي … وواضح ليديا وتونار ماعارفين والو ومخصهمش يعرفو كاع …..

تونار : ( باس يدو ) علاش كدير فراسك هاد الحالة وكتخلعنا علاش ؟؟؟؟

الجد : ( كايهضر ثقيل ) ليديا فيناهي …..

تونار : شنو قالت ليك ؟؟؟ علاش وليتي هاكا ؟ قاتليك شي حاجة عصباتك

الجد : لا …. راه غير كسكسو لي وحل وماقديتش نكحب مزيان وتخنقت ….. راه خلعتها عيط ليها تجي لعندي فيناهي

تونار : كسكسو ؟؟؟؟؟

الجد : واااه امينو ( اه اولدي )

تونار : ( زير على عينيه) كسكسو دار فيك هاد الحاالة كانرضع صبعي انا

الجد : ودابا عيط ليا ليديا …

تونار : حتى تقول ليا شنو بيناتكم وشنو دارت ليك

الجد : والله اولدي … بي لله مدارت ليا شي حاجة واهانتا حلفتيني كاع ….

تونار : ( تنهد واخا عارف تما شي حاجة ) راها نعسات شوية …. دابا تجي

الجد : نعسااااات ؟؟؟؟ ( مخنزر فيه ) اش درتي ليييها

تونار : والو … تكا نعطيك تشرب واحد الكينة بين مافاقت

الجد : الكينة عااااود

تونار : ضروري

تكاه عطاه حبة دالماغنيزيوم وبقى عند راسو حتى رخاتو داك الكينة وداه النعاس …و تونار غطاه وخرج لبيتو لقى المررضة جالسة على كرسي شادة تيليفونها وليديا باقى ماحلاتش عينيها

تونار : ( شد لباب موراه ) مفاقاتش

المررضة : لا مزال ولكن شوية وتفيق راها كتحرك عينيها …

تونار : صافي سيري عند جدي بقاي حداه ماتخليوهش بوحدو … الى خرجتي نت خلي تما شي واحد معاه …

وومات بالايجاب ومشات وهو بقى كالس حداه شاد فيديها عندو مقربها للفمو … وكايشوف فيها ومراقب كل حركاتها …مكيفكر لا فشنو طاري بيناتهم ولا اش واقع … كايفكر غير فصحتهم بجوج خصها تتحسن يوقع لي ويوقع مهم هوما يكونو معاه … هي وجدو .. اغلى جوج دالناس عندو …. ملي يبراو ويوليو مزيان عاد يفكر فشنو طرا بيناتهم ….واخا متأكد لسان ليديا السليط غاتكون قالت ليه شي حاجة ودماغو كايمشي غير لانها عاودات ليه طريقة زواجهم هي وياه . . ولا علاقتهم كيفاش بدات … ولكن ماباغي يفكر فوالو حاليا باغي غير يفيقو ويشوفهم بيخير ….

شاد فيديها عندو ومتكي حداها وكايمشط شعرها باليد الاخرى … وبدا كايحيد ليها داك الجهاز باش يشوفها واش كتنفس بلا بيه .. بانتليه كاتنفس عادي وحيدو ليها لاحو لجنب … مابغى حتى حاجة تحجب وجهها عليه ….. خصو يشوفو كامل

وكايدوز يدو عليه و على شفايفها وهبط براسو حدا راسها وحاط جبهتو على جبهتها …..

تونار : بوحبر ينو شم … ( الروح ديالي نت)

بعد 30 دقيقة ….

بدات كتحاول تفيق ليديا وتحل عينيها واخا كتحس بشعور بحالا حلقها مبنج بسبب تجييفة لي دار ليها … وناضت كتحاول تتكعد .. وهي ضور جنبها بان لها كالس على كرسي مربع يدو ومطيح راسو لجنب جهة كتفو ناعس …. حيت مشافش النعاس كاع من لي جا وخا هو طبيعتو من صغرو مكينعسش بزاف بسبب دماغو لي ديما محلول خدام مكايحبسش …ولكن هاد الايام الاخيرة مانعسش كاع من غير ساعات قلال فطيارة وفلاكلينيك وواضح عليه العيا …

ماحكراتش فيه بمرة حيت بالها غير مع المامون … وناضت بشوية بلا متصدر شي صوت لي يفيقو… وهزات صندالتها فيديها .. وخرجات بالحس من البيت عاد لبسات صندال وهي توقف عليها الممررضة

ممرضة : مدامم لي(قاطعاتها بهمس دايرة صبعها على فمها)

ليديا: شششش

الممرضة سكتات باستغراب حتى لبسات صندالتها و قاتليها تبعيني حتى وصلو لغرفة ديال الحاج عاد وقفات

ليديا : كيف بقى؟؟؟؟؟ عيان بزاااف ولا ؟

الممرضة : لا لا غير كريز راه فاق دابا هضر مع راجلك مزيان

ليديا : و .. ومعرفيتش اش قاليه وفاش هضرو ؟

الممرضة : لااا مكنتش معاهم

ليديا : بوحدو دابا ؟؟؟

الممرضة : ااه يالاه خرجت من عندو غانجيب ليه كاس دالعصير كان ناعس يالاه فاق …

ليديا : خلي العصير بلاتي شوية … حتى نقولهاليك ..

حلات ليديا لباب ودخلات كان متكي غير شافها هو يتكعد كلس

المامون : شدي لباب …

شدات ليديا لباب وكتقرب عندو

ليديا : كيف بقيتي خلعتينا عليك ؟؟؟؟

المامون : ( كحز لجنب دار ليها بلاصة ) اجي كلسي حدايا هنا اجي..

مشات ليديا فنفس الوقت كلها توتر وخايفة بزاااف من علاقة اوشن بيهم …..وكلسات حداه هو دخل فصلب الموضوع مباشرة كانه مصاابرش كاع …

المامون : شنو قاليك تونار فاش جا ؟ قلتي ليه علاش وقع لي هاكاك وعلاش كنا كنهضرو ؟

ليديا : واعدتك مغانقول والو ..وانا نموت ومنرجعش فالوعود ديالي ..واخا يقتلني .. دابا راه خليتو ناعس مشافنيش باش جيت لعندك

المامون : ( مصغر عينو فعنقها ورجع تنهد ) ضربك ياك

ليديا : ( شافتو فين كايشوف ودوزات يديها على عنقها ) خلينا من تونار …. ( الفضول كايحرقها ) علاش ملي سمعتي سمية جدي وليتي بحال هاكاك …. غانحماق بالتفكير

المامون : متكدبيش عليا … تونار عارف عائلتك شكون ؟

ليديا : لا … معارفهمش …

المامون : معارفش شكون هو جدك ياك ؟؟ وعمرو تلاقاهم

ليديا : لااا ..هو كايعرفني انا وانا ناكراهم اصلا

المامون : وجدك دابا فين هو ؟؟؟؟

هو كايسول وهي مكتزيد تتأكد راه عندهم علاقة وكتحاول تقول كوولشي غير باش تفهم

ليديا : ماعرفتش انا هربت من عندهم شحاال هادي .. غايكون غير فمستعمرتو كيف ديما …

المامون : واش جدك ( مصغر عينو ) سميتو ميمون …البزناز لي فالكبداني ؟؟؟

ليديا : ( سىطات ريقها ) اه .. كتعرفو ؟؟؟؟

المامون : عندو ولد سميتو حفيظ و حفيدو لي تقريبا قد تونار سميتو منير …

ليديا: ااااه … وحفيظ هو بابا …ومنير خويا

المامون شد على راسو كايتنفس وينهج

المامون : اش هاد الموووووووصيبة هادي .. هزيتو حتى لطالياااان باش نبعدو على هاد لعائلة .. جات عندو حتى لتما …. اش هاد شي ااربي ….

ليديا : بعدتيه على هاد لعااائلة ؟؟؟؟؟ م مافهمتش ؟؟؟؟ ج جدي … جدي كتعرفوه ؟ كاتعرفو عائتي تونار كايعرفنا .. عندكم شي مشكل معانا ؟؟؟؟؟ ..شي حاجة كبيرة ياك ؟؟؟؟؟ (شدات فيديو وشفايفها تاترعدو ) قوووليااا .. وصلني لراس الخييييط عفاك

المامون : ( شاف فيها ) نت مغاترجعيش لعائلتك ؟ مكيقلبوش عليك زعما ؟؟؟؟

ليديا : مكنضنش … خويا لي عاوني نهرب واصلا كان دلير ليا بلان باش نتقتل …. حيت قالي غانهربك فكاميو داسبانيا وغاتاخدي حريتك تما …. حتى كنلقاه هربني فكاميو لي ماشي لليبيا …. وملي كلست ظع راسي وفكرت …. لقيت راسي سمعتهم واحد نهار كايهضرو على داك الكامييويات كاتحرقو و كايبلغو بيهم … وانا لاول مرة فحياتي تكلخت وتقت فيه وكانت اول واخر مرة نتيق فشي واحد واخا يكون با … يعني هو هربني فالكاميو لي عارفو غايبلغو بيه واما غانتشد طول حياتي اما غانتحرق فيه …

المامن : اربي سلااامة ؟؟؟؟ هادو واش غير لي بغاو يتهناو منو كايحرقوه ؟؟؟؟ وااخا ختووو نت ؟؟؟؟ وجدك وباك ماحنوش فيك ماقلبووش عليك راكي كبدتهم زعما ….

ليديا :ههههه حبتيلي الضحكة واخا ماشي وقتها …. جدي كون مكانش معتبرني صفقة غاتجيب ليه شي بزناز .. كان قتلني ولا دفني حية شحااااال هادي …تلقاهم دبحو خروف ملي تهناو مني ….

يتبع