🔖الفصل الثاني : جنون العقلاء

🔖الباب الخامس : البقاء للاقوى

كملات طريقها لي كانت كلها فضول واستكشاف لعالم جديد عليها ، عالم العلن …

العالم لي كانت كتحلم بيه طول حياتها فوسط منفاها ،

كتتمشى مستكشفة كأنها أليس فبلاد العجائب …

وكل مرة تعوج شفايفها بخيبة لهاد العالم لي كانت كضنو فشكل ، ساعة جاها عادي جدا ، … لانها من النوع لي كتعشق الاشياء الخارقة للعادة ، الاشياء الكبيرة والمميزة ، العادي مكيستهويهاش ابدا.

للمرة الثانية كانت غاتدهسها طموبيل كون ماهرباتش مفزوعة من الكلاكسون .. ولسقات مع الحيط ديال الشارع … الكلاكسون كان بحال شي فرقعة اصابع فيقتها من سهوتها ….عاد كاتشوف راسها الى ضلام عليها الحال .. وهي فعلا معارفاش فين كاينة ….

الكل قاصد شغالو و هي تايهة !! … فضولها للعالم الخارجي خلاها تنسى ان عندها وجهة ….

ضارت موراها تتذكر طريق العودة لداك البوتيك حتى بانت ليها طموبيل جاية من داك الشارع والفار ديالها قوي خلاها تحط يديها على عينيها ، وفرانا قدامها نازل بجهالة ونعيمة نزلات موراه … لي غير فقدات اثر ليديا رجعات كتجري عند تونار خبراتو …

نزل بجهالة ومخلوع و عينيه حووومر جرها من دراعها كايغووت ويسب .. وهي بدون جواب غير كاتشوف فيه بحالا راها فشي سههوة مزال مفاقتش …

تونار : الى باااقي عتتبتي لمك داك لباااب نحرررم حياااااتي تااغانقطع مك اناااا لي هصني لعقل داااير راسي فييك انا …. طططلعي … طلللعي

طلعات مزادتش معاه ركبات وزاد طريق كلها غوات وسب وهي غير ساكتة كترمش بعينيها …

تاحاجة من كلامو مكتأثر فيها … ماراهاش فداك العالم ، ملي كايكون كايغوت عليها شي حد وهي ساكتة راه ماشي خايفة او راضية !! راه هي كتكون مكتسمعوش اصلا … كتكون مشغولة مع راسها .. راسها لي اهم من عصبية اي واحد…

ساهية كتحاول تقارن سداجة احلامها .. وان هاد العالم البسيط جدا والعاااادي .. كان حلم أزلي بنسبة ليها !!!! كتسول راسها واش كاع احلامها نهار يتححقو غايكونو عااادين بحال هاكا !!!

واش كاع احلامنا لي كانحلمو بيهم باللون الوردي ..ونتخيلو ان حياتنا غاتزهر نهار يتحققو … كالقاو راسنا نهار نحققوهم انهم جد عااااادييين ومايستاهلوش داك التشبت كامل،!!

شنو السبب ؟؟؟ واش أحلامها لي كانو عادين … او ان الشغف لي كان عندها نهار كانت باقا كتحلم … فقداتو

نهار تحقق الحلم !!! واش فعلا الشغف هو لي كايخلق الفرق ؟

او ان ولاو عندها احلام اخرين من غير العالم الخارجي …لي كتفكر فيهم دابا

كحلم مثلا ( ضارت لعندو كاتشوف فيه وهو صايك معصب ) يكون عندها ولاد معاه !! حياة مستقلة بجانبو !!! كحلم … تشوف وجهو مثلا !!! ….احلامها الجديدة خلاوها تنسى القديمة ويبرد الشغف …

والسؤال تبادر لدهنها …. “ونهار يتحقق هاد الحلم تاني …. غايجيني عاااادي كيف ليوم !!!! نهار نشوف وجهو وجسدو .. غايبرد فيا الشغف؟ او غايزيد يشتعل !!! او غايكونو عندي احلام جديدة معاه ؟

واش فعلا بعد ما كانت احلامي متعلقة فقط بيا … ولات دابا متعلقة بيه حتى هو !! احلامي ولا دابا حلضر فيهااا هو ؟ انا امتى تقسمت لنصفين يا عالم ؟؟

لحظة !! وانا علاش غانحلم ؟ نتشبت بحلم بعييييد ووننسى انني نعيش هاد اللحظة لي كانت حتى هي فالقديم مجرد حلم !! …. نبقى عايشة فقط كنحلم ونتسنى .. ومانعييش انا اللحظة ….؟؟”

تبسمااات ببلاهة غير مكترثة لامر عصبيتو ولا لحجم الفعلة لي دارت عاد دابا شوية …. وقربات عند دراعو عنقاتها وتكات راسها عليها وهو بقى غير كايشوف عين فطريق وعين فيها وباقي محافظ على تخنزيييرتو …معارفها كاع اش باغا تصنع واش كاع كلامو مأثرش فيها ؟ معارفش الى هي ماسمعاتوش اصلا …. لا ووقت التعناق ؟ كأنها مدارت والو …..

وهي فقط وسدات دراعو ونعسات مبتسمة بعد ما طبعات قبلة على كتفو …. قبلة ك ” شكرا ” مثلا !!

بعد مسافة كانو وصلو لدار … تونار مع التعنيقة لي دارت ليه مزادش لكلام … غير نزلو طلعها ديريكت لفوق .. يلاه بغا يبدا يناقش لقاها غير ساهية بوحدها ، مشات ديريكت لفوطوي وكلسات كاتشوف فمنحى واحد ومرة تبتسم مرة تجمعها … كتخلعو بشي لقطات …

تابانت ليه طلعات راسها فيه

ليديا : فوقاش غانشوف وجهك ؟؟؟

تونار : مافهمتش ؟؟؟

ليديا : مزال مناوي تخيليني نشوفك ؟؟

تونار : ( بدون رد اكتفى فقط بنظرات الاستغراب عاد جاوب ) جيني من للخر

ليديا وقفات عندو وشاافت فيه

ليديا : ماتعطلش بزاف ….ماتخليش حتى تبرد داك الرغبة لي فيا … ونهار نشوفو غايجيني عادي …. ماضيعش ليا المتعة وخليني نشوفو ماحدي كنحلم به … حيت حتى الزنقة لي كنت كنحلم نخرج ليها … وماخرجتش نهار كانت عندي الرغبة قوية …. خرجت تالمنبعد … ماحسيت بوالو … واش حيت الدنيا على برا مازويناش .. ولا ماشي كيف تخيلتها … ولا حيت انا بردت …..

يلاه غايجاوبها وهي تتدق لباب وخلاها وزاد حل لقاها ايطو

ايطو : ولدي شفتكم طلعتو بزربة مالحقتش نهضر معاك .. راه العشا وجدناه وجدك راه لتحت بغاكم تعشاو معاه .. كنا كنتسناوكم غير نتوما تجيو

وما ليها براسو ودخل لاح الكاسكيط وبدا كايرد شعرو لقدام لي رقد بالكاسكيط … وكلس كايتنهد وهي قربات عندو

ليديا : واش عندك المشكل ف انك تهبط نتا لتحت ، ولا ف انك خصك تتصرف على اساس راجلها … ولا المشكل هو خصني نهبط حتى انا

تونار : ( شاف فيها ) علاش غاتنزلي نت ؟؟؟

ليديا طلقات قهههقهة ديالها المتمردة وشافت عندو

ليديا : كتحلم واقلة بالالوان ههه … .

خلاتو ودخلات لدوش كضحك وهو غير مزاد زفر النفس عارف مغاتخليهش ينزل بوحدو ومحااااملش تنزل كاع واللقطة دشوفات دأمير مزال مانساها رغم انه مكيبينش شعور الغيرة لانه تعود يعيش بحال الآلة بدون احساس وكاع الاحساسيس لي دفنهم جات حياتهم وهادشي لي كايزيد يعصبو …. ت

نهد كايحاول يصنع شوية ديال الصبر لراسو … لا من ناحيتها لا من حياة امر الواقع لي لقا راسو امامو … ولا كيفاش غايتصرف وهو مكيحملش لبراني عاساك لاكانو من عائلة حكيمة لي مكيحملهااااش …

استغل الوقت لي هي فدوش لبس سيغفيط يلاه كايعلي سلسلة لقاها خرجات …

ليديا : نزلو دابا ؟؟

تونار : ليديا … كوني كتسمعي لمرة وحدة فحياتك … والله تااامعندي كراااام دالخاطر لي نهضر باركا غير شنو دوزتي عليا ليوم راني بحييييت …. واش نرغبك؟؟ عيااااان اليديا عياااااان

ليديا : ( قربات عندو وحطات يديها فوق الماسك ) ماخلاقش لي يعيي ليا انا راجي ، عيان رتاح معايا …ماتخافش قادرة نعيييك ونريحك ونمرضك ونداويك …. ولكن راه نخليك تنزل يضوروك كيف بغاو … ( كتقلدهم ) مرحبااا بيكم هدااا راججل بنتي …هادا رااااجلي .. هادا راجل ختي .. ( شافت فيه ) لا ، نتا راه راااجلي انا .. وانا لي خصني نكون معاك، مكايهمنيش شكون يردوني … لا بنت خالك لا بنت عمك .. لموهيم لا انا و لا هوما ماانقدرو نكرو حقيقة انا مراتك … وانا عارفة راسي شنو كانسوى وشكون انا وشكون هوما .. والى هوما بهاد اللعلبة ظنو غايقهروني …. راه كايقهرو غير راسهم مظهرهم كتيجيب الشفقة

تونار ماقدش مزال يهضر رغم انو عندو بزااااف دالحروف خاص تتحط فوقها النقط … ولكن خلاها وزاد وتاهي تبعاتو ….مابقاش عندو الطاقة لي يتناقش ولا يهضر وعارفها اعند من الاسمنت

طاولة الاكل كانت عاامرة وغير سمعو صوت الكعب ديال ليديا الكل هز عينو عاد لمحوهم نازلين فالدروج .. تونار لاشىء كايبان عليه اما ليديا فالابتسامة المستفزة لقلوب الحاسدييين مرسومة عريضة على وجهها ….. واشرف غير كايحك فيديه تحت طابلة … وامير باقي غير كايشوفها كاينتابو احساس غريب … كأن شخصتها الغريبة و هاد الاحساس لي حاسو من جيهتها … سبق ليه وحسو من قبل

تونار بدون كلام منو جر الكرسي وجلس بعد مالقى نظرة على جدو لي مبتسم برضى ، لانه غير هبط الا وراه عارف بحالا دار انجاز وفرح لي راه كايتنازل على قبلو وهاد اللعبة ديال يهددو بحياتو وصحتو باش يفرض عليه شي أوامر كايديرها لصالحو ماشي لصالح نور، كايديرها باش يحاول يخليه يتعود على الناس والغرباء ويجلس وسطهم براحة ومايبقاش حبيس قوعقتو …

رغم ان تونار بحالا كالس على الشوك ومامرتاحش وحتى اشرف و امير ماقدوش يهضرو معاه حيت ديجا سامعين على طبعو وانه منطوي على نفسو لاقصى درجة … ولكن تاحد معارف حقيقتهم ان عائلتهم كلها تحرقات لان المامون محلف حكيمة على المصحف وتاهي ماقلتهاش حتى لبناتها لي عارفين ان فقط طرا مشكل فدارهم بسبب بوتاغاز لي أدى فحرق والدين تونار وتونار تاهو وملي كايسولو على العائلة كايقوليهم فدولة اخرى غالبا كايقول المانيا والبعض فايطاليا … حكيمة بوحدها لي عارفة ان النسل كامل مات …

اشرف ضحك و بغا يستفز شوية باش يكبر من الحصيصة لي غاتعطيه ختو ويدير خدمتو مزيان … وخاطب الجد

اشرف : تبارك الله هادي هي حفيذة خوك لي قالت لينا حكيمة ….

ليديا طلعات عينيها بزربة و تا تونار شاف فجدو !!! …. ادن مكدبش الجد فهويتها !! و ليديا كتسائل واش هادا عاود لمرتو كولشي و لا قال ليهم راها كدبة وهوما معارفينش راها حقيقة ؟؟؟ … اذن الكدبة لي كدبو باش يغطيو زواجهم هي وتونار ويبروو وجودها فالدار ماشي كدبة !!! راه حقيقة

المامون : ( بضحكة ) ايييه هي هادي .. ( شاف فيها ) الامانة ديال خووويا وولدو …

اشرف : تباركالله ( ليديا غير معلية حاجبها فهاد المسرحية ) تاهي كانت فالخارج …حيت قاتلينا حكيمة خوتك وفاميلتك كولها فطاليان

المامون : يييه تاهي تما …

حكيمة : ههه تربات معانا مسكييينة .. اوا في سبيل الله درناها بحال بنتنا … عشرين عام وهي غير معانا تاكل و تنعس عندنا … ليااام … ( تونار سنانو كايتحكو داخل فمو وهي كتحاول طيح بها زعما )

ليديا اخيرا نطقات بابتسااامتها و صوتها المجبد لي شعرة مكتهزوش و مكتأثرش فيه

ليديا : كتر خيييرك كولشي كتفكريه … ولكن راه فعمري غير 18 عام آرااالة ينو ( جداتي )…

حكيمة ؛ ا .. اااه اه .. والعقل دالكبر … نسيييت ( شربات كاسها )

ايطو كتحط على الطبلة و امير مصغر عينو فليديا وهاد الصوت لي مخافيييش عليه !!! هاد النبرة دالريفية لي تكلمات بها وهاد كمية الدلع لي فهضرتها مكاينش منها جوج … كاينة غير وحدة وهي لي كايحاول يتذكرها فين سمعها …وتونار عينيه عليه كيفاش كايشوف فيها… وعارف دوك النظرات ديال راه كايتذكر شي حاجة حيت هو عارفو سامع صوتها …. ونفسو تزيرات فيه وصدرو تنفخ و مزير على يديه تحت الطبلة باش متبانش عصبيتو قدام جدو …. تاسمع

نور : ( بضحكة كتستغل الموقف لصالحها ) حطي ادادا ايطو ل تونار … دوق من هادو ( بحرج ) انا لي صاوبتهم

تونار فقط ووما براسو وليديا مبتسمة باستهزاء لحالتهم لي ماهزاتش فيها شعرة لانها تاااايقة فراسها و تايقة فيه …

بدات كتحطو حداه بريوات ديال لحوت .. كان العشاء كله بحري …

اشرف : ( مخاطب ليديا لي منلي هضرات زعزعو صوتها ومكرهاتش متسكتش كاع ) شنو سماااك الله

المامون : ( تدخل حيت باليه تونار غادي يشعل ) ليديا ….سميتها ليديا .

اشرف : تباركالله …. بحالها بحال سميتها ، كاتقراي اليديا

يلاه كتبغي تحاوب كايسبق المامون وتونار مزيرر على الكاس فيديه

المامون : اااه كاتقرا … اييطو ( خصو ينسي لهضرة ) حطو لينا حتى الصوبا … كدير ايطو شي صوبة ديال الحوت من داكشي

اشرف : ايييه تباركالله راني كندوق … قولي ليا اليديا ونتي كاطيبي ؟

ليديا : (بابتسامة ) القلب ….

اشرف : هههه ( طلق ضحكة كاتشبه شخصيتو وتونار حط يدو على فخدها بمعنى تزيدي كلمة نطيرو ليك ) لا من ناحية القلب باليا كااااطيبيه …

المامون ماعجبوش لكلام الاخير وحكيمة بدات تجبد مواضيع اخرى تغطي على تعناب دخوها لي زاد فيه حيت مابقاش داخل غير فاللعبة هو راه تعجب ديال بصح .. وليديا جوابها على نابها ولكن يد تونار ليتحطات عليها تحت الطبلة فهمات معاناها مافيها لي يزراق لحمها حيت عارفاه شارجاتو هاد نهار مزيان ومزال متفركع دبصح …

اشرف : اوا نور نت مرتاحة … كيف جاك الزواج ( نورة ضاحكة كتغمز ليه بمعنى براافو )

نور : ( كاتشوف فتونار وفيه وليظيا دايرة فيهم شوفة شفقة واستهزاء لحالهم) مرتااااحة بزااف ….

اشرف : وتهلى لينا اسي تونار فبنتنا … راه خديتي لمليح.

ليديا حبسات الضحكة بطريقة مفروشة وعلات عينيها لي بحال عينين لحرباء

ليديا : اخر مرة سمعت هاد الجملة … كان جدي باغ بگرة …..

كولشي خنزر من غيرها هي لي شربات من كاسها بهدوووء … ونور جاااوبات

نور : اوا كية لي مايتباع مااا يتشرا ….

ليديا : وكية لي غير كايتكرا ….( غمزتها

نور : المكري بالعز ديالو وكيعطي خلاصو فالشهر

ليديا : ونهار يحتاجو دارهم غايتريييو عليه …

المامون باليه الطرح سخن وكولشي عارف راسو كادب و لاخرين عارفينو كايكدب وكل واحد فيهم متيق كدبتو … وتحنحن يفرتك الجو

المامون : تعشاو تعشاو باسم الله …

نورة : اوا اليديا … امتى نفرحو معاك تانتي ….

ليديا : حتى نفرحو بيك نت … حشومة نتقدم قدام لكبيرة

نورة بقات كتحقد فيها عينيها منين مادازوها مكتقهرش وامير مزادش عااد فااطبلة وناض لبرا خرج بزربة كأنه مخنووق كولشي تبعو بعينو وليديا متبعاه تاهي ، عاد تفكرات راه هضرات وهو سامع صوتها وكتسول راسها ياكنا عرفزي،!! … و اشرف بدا يضحك باش يخفف الجو وماينتابهش المامون للنوضة لي دار فجأة ، اما هو اخرج لبرا وبعد على الدار وكلس شاد على راسو …

اشرف: ههه لا ان شاء الله نفرحو بك نت ونورة …

تونار كان مخنزر فيييه و مزير على يدو هو يحس بالفيبرور فجيبو و بعد على طبلة عرفوه غايجاوب لان جبد تيل وبعد عيهم

تونار : اش كاين

– اجي دابا لعندي ، جابو ليا الرجال خبارات صحاح على داك السيد …

تونار : لقيتو فين هو

– تماما

تونار : انا جاي

قرب لطبلة عندهم وخاطب جدو

تونار : بصحة .. عندي شي شغال ضرورين …( غمز ليديا تبعو ) ….

المامون باقي يلاه غايهضر يشدو وهو زاد للباب وليديا ابتسمات وناضت تبعاتو

ليديا : فين ماشي ؟؟؟؟

تونار : ( بعصبية بين سنانو ) غاتكملي لعشا ديالك وغاطلعي لفوق قسما بالله وتهبطي مغاندوزها ليك … يهضر معاك شي ***** من هادوك ضوري فيه .. مغانتعطلش

ليديا : واااغير قولي فين ماشي

مجاوبهاش ومشا لطموبيل وهي واقفة متبعاه بعينيها والجد كايحاول يشرح زعما لاشرف انهم ترباو مع بعض ومتقربين داكشي باش تبعاتو معارفش الى اشرف عارف كولشي … مشا تونار بعد ماخلا نظرات التحدير لليديا من طموبيل … غير غبرات عليها طموبيل ضارت تدخل حتى سمعات موراها

امير : لبنى ….

ليديا بقات واقفة فبلاصتها شحال وضارت عندو كان واقف ويدو مدلي منها كارو مشعول ضرب فيه النص

ليديا : سميتي ليديا

امير : سميتك لبنى …( مخنزر فيها ) صوتك باقي لدابا كايدق فراسي … حسابتك نسيت الششمتة !!!!!!

تونار وصل لكباريه ودخل بزربة طلع لفوق ديريكت لفين كاين البيرو ديال البركاك لي كايجيب ليه الخبارات كان البيرو كله مجهز بالشاشات دالكاميرات لي كايبينو اش لتحت … غير شاف تونار داخل وقف يررحب ضاااحك .. وجلسو ورجالو واقفين عند راسو

تونار : ( شاف مع داك رجال لي وقفو عند راسو ) را ماهازش لا سلاح لا وااالو .. غير طلق اش عندك

– والواحد هو لي ياخد احتياطاتو دنيا والزمان ونتا كتقلب كتر من الزمان ..( لاح ليه الضوسي قدامو )

حلو تونار هو يلقاه ملف طبي كايوضح تشخيص لحالة سرطان متقدمة جدا و ميؤووس منها …. وشاف فيه بصدمة

تونار : نوووو

– لاسف ….. باليا الايام دارت خدمتها قبل منك ….

تونار : ( كمش داك الملف بين يديه مزير على سنانو ) باااقي حي ..( تلاح كمشو من حوااايجو ) بررربي وتقوووليا مااااات حتى تبعووو

دوك رجال بعدوه عليه وهو كايتنتر منهم و داك الراجل قاد حوايجو

– تههههدن … تهدن شوووية ( هز يدو بمعنى طلقوه ) شررب ليك كاس دالما وتهدن …متخاافش راه باقي حي … ولكن حالتو ماشي دلاباس … تيق بيا الى شفتييييه غايبرد فيك كولشي

تونار ملي سمعو حي عاد گلس كاينهج كانت غاتجيه اكبر فقصة الى مات بلا مااايحرق جثتوو بيديه … وداك الراجل مكمل معلوماتو

– بحثنا فالنسل ديالو كامل .. بناتوو وحفيذاتو راهم كلهم مزوجات لعند بزنازا بحال شي رهينات .. ولادو دخلو للحبس شي حد بلغ عليهم هزوهم جملة وهاد اوشن هدا راه ديما مخرج راسو وولادو هاد المرة وحلو ديال بصح.. ولي سمعت مابغاش يخرجهم من الحبس وفهاد الازمة لخرا فين مكاين شي عدو عندهم راه مشا شهد ضدهم القضية عندهم كبييييرة راه القليلة شي ربعين عام لي غاتعطى ليهم راه مزال ماتحاكمو … قاتلين الرواح ماشي غير لحشيش القضبة عندهم مروونة فتبييض الاموال والتزوير كولشي بيع بيهم خصهم غير يتهناو منهم راك عارف حال سوق الحشيش طلع عليا ليوم نطلع عليك غدا غييزو ليهم باش يخورو ليهم الكريق راه داك المسخوط د اوشن مكتسح ….ولكن لي عطاهم الضربة القاضية ومشا سيفط شي واحد يشهد فالمحكمة هو واحد بزناز كان غايتنساب معاهم وفللخر هربات العروسة … جمعها ليهم هداك حب وتبن …. و بقى واحد حفيدو كايقولو هاجر لبرا منعرف فين صد تايقولو كان عندو شي معارف تاهوما بزنازا على برا راه غايكون معاهم … هداك بضبط ماعندي عليه تامعلومة …و المرا ديال اوشن راها فدار العجزة كايعاودو تخلخلات … وعرايساتو هربو راه كل وحدة فين تجلات تطلقو ليهم شواري ووحدة راه داوها مع البعتة لي كاتمشي لتركيا … داك شي لي على بالي وبالك راك عارف …. و وداك اوشن راه فداك المصحة سميتها فالوراق راه فالرباط كايموت بووحدو كي الكلب فاش نفعووووه الفلوس دابا هاداك ( تونار رجع كايشوف لسمية المصحة ) مهم راه هادشي لي كاتقوليك راه مافيهش التخرخيش خارج من لسان شي واحد كان خدام عندهم طاحو عليه الدراري سرسب ليهم كولشي … تاحد مابقى يخاف منهم رااه تفرتك ليهم الشمل داك الحمية ديالهم لي كانت كتغلب السبع تفركتااات …. بقى غير داك حفيدو باقي كنقلب عليه راه هو نيت هرب وتاختو هربات .. هادوك طلعو ليهم من الجنب غير هو باقي حي وختو على ماسمعات هربات فشي كاميو لي تبلغ به راه ياما تاهي فالحبيبيس ولا تحرقات مع الحشيش ….مهم ضررررربهم الخلااا ديال بصصصصح …..

تونار : سميتو منير هذاك لي هرب لا ؟؟؟

– اييييه منير هو هاداك …. تبغيه تاهو ولا ؟

تونار :كووولشي بغيتهم

هز داك الوراق كايشوف فسمية المصحة … و جبد تيليفونو تاتسمع صوت المسج وصل ل التيليفون ديال داك الراجل وردو لجيبو

تونار : ها فلوسك وصلات … كمل على خدمتك نكمل لخلاص ….

خلاه وخرج ….

ورا الدار على واحد الكرسي جالسة ليديا وحداها أمير وليديا غير كاتشوف فواحد المنحى قدامها ….

امير : ( شاد على راسو ) مزال مامتييقش … تامن سميتك كادبة فيها !!! ( شاف عندها ) اناااا شنو دنبي حتى تلعبي عليا هاكاك ؟؟؟؟

ليديا : ( ضارت عندو بزربة ) ونا شنووو دنبي !!! وشنو دنب لي ماتو عندنا ولي انتحرو ولي تقتلو ؟؟؟ تاواحد ماليه شي دنب … ( رجعات كاتشوف قدامها )دنيا لي لعبات عليك ماشي انا ، … كيفما انا الدنيا لاحتني فداك العائلة … نتا الدنيا لاحتك ليا ….

امير : واش مأنبكش ضميرك ؟

ليديا : مالي اش درت ؟ عطيتك درس فالثقة !! راه من قبيلة ونا كنتسنى منك كلمة شكرا ومسمعتهاش !!

اميرا : ونزيدك شكرااا !!!!

ليديا : دابا خرخاش داير ليا عليه هاد الحالة

امير : واش حسابتك انا بقى فيا تيليفون !!!! راه الشمتة هاديك

ليديا : اوا بلاصة ماتلومني لوم راسك مالك على داك الكلاخ كامل شااري الحوت فالما …

امير : ( كايشوف معاها وفوجهها لي ضارب فيه ضو الگمرة كأنها المراية منعاكسة ، مدة ساكت تا ابتسم ) غير شفتك اول مرة قلت هادي ماشي انسانة عادية … اما تكوني هاربة من شي قصة خيالية واما نت هي نيت مولات الصوت لي كان متلفني على القبلة … جمالك ماشي عاادي فيها شي حاجة مختلفة …

ليديا : ( شافت فيه ولعبات بعينيها بغرور ) مابغيتش نقاطعك ولكن هاد الجمال لي ماشي عادي ولا ديال واحد آخر دابا …

امير : وهااادشي لي زاااايد محيرني كايتقب فراسي …. وحدة بحالك مع واحد لي عارفين عليه محروق ؟؟؟؟ واش ابنت الناس متأكدة نت بشر بحالنا !!!

ليديا : بشر آه .. ولكن بحالكم لا ( بتسمات ليه ابتسامة استفزاز ورجعات كاتشوف قدامها ) لي قلتي عليه محروق نهار تشوفو كيف كنشوفو انا … غاتنوض تشعل العافية فوجهك …..

امير : كتبغييييه !!

ليديا : ونبغييييك نتا مثلا ؟؟ لي وجهك وجه عادي بحال جميع الوجوه !! صوتك صوت عادي بحال جميع الاصوات !! و تصرفاتك عاديين و ومتاح للجميع يشوفوك ملداخل ومن برا …. ومكلخ ملفوق ( جمع فيها حجبانو ) لا لا آلغزال … انا ماشي ديال العادي إما واحد مكاينش بحالو فالكون … وإما بلاش ….

امير : فششكال … بالله ايتا فشكل، عرفتي مابقاتش فيا الشمتة كتر مابقى فيا انني فقدتك … كنتِ شي حاجة غرييبة فحياتي منقدرش نحدد شكون كنت بالنسبة ليا … ولكن مور الشمتة .. عاد قدرت نحدد … نت راك كنت هي التصرفيقة لي عطاتني الدنيا ….

ليديا : واخا انا عمرني عرفت الدنيا …. ولكن جيت ليها خصيصا باش نخليك تعرف الدنيا ….. ( وقفات ) تصبح على خير ..

امير : ( طلع يدو فيها الخاتم ) مغاتباركيش ليا .. خطبت

ليديا : مبروك ليك … والتعازي ليها

امير : هه !! كاطيحي فمعناويتنا دابا ….

خلاتو جات ماشية تاسمعاتو

امير : حضي راسك من هاد الناس ( ضارت عندو ) ماعرفتش علاش باقي كنعاونك !! ولكن كنحس بيك واخا لفعة .. صادقة ، .. هاد الناس حضي منهم خصوصا عمي … راهم كايضنو داخلة على الطمع

ليديا : عمك !!

امير : عمي اشرف ، خال نور .. معارفش انا اش طاري واش مزوج بيكم بجوج نيت … ولكن حضي راسك منهم ومنو ….لاكنت كتبغي راجلك بصح .. مغتطيحيش فاالشبكة … مهم حضي راسك وصافي

ليديا : مكضنش بلي هاد النصيحة خصك تقولها ليهم هوما !!

امير : ( حك فراسو ) واحد فالحالة ديالي عارفك اش كتسواي خصو يقولها ليهم هوما صراحة…ولكن ماعرفتش علاش حسيت براسي فصفك … مكاينش لي يليق ليها واحد بحالو قدك نت …

طلعاتو وهبطاتو ودخلات …

يلاه داخلة لدار تتجه للدروج وهوما يبانو ليها مجموعين على المامون و الممرضة حاطة ليها بانيو وهو كايستفرغ …. و نورة مبعدة عيفانة و اشرف غير كايشوف من بعيد ونور وحكيمة كايشوفو معاه وايطو كتبكي لحالتو ….وهي تقرب ليه كايبان وجهو صفار والاستفراغ زاد كمل عليه .. مسحات ليه الممرضة فمو وايطو دات داك البانيو …

الممرضة :الحاج كتحس براسك شوية نطلعك تنعس حسن !!!

المامون : ( عيان وفشلان ) لا .. ت .. تايجي تو .. تونار

الممرضة : راك عيان الحاج خليني نطلعك لفراشك حسن ….( كضور براسها لعندهم وتومي غير بعينيها بلي راه عيان )

ليديا واقفة فبلاصتها وحاسة بشي شعور غريب فلداخل ديالها وهي كاتشوفو فداك الحالة وكتحس بلي حالتو مكتبشرش بالخير وهي كتفكر فرد فعل تونار كيفاش غايكون !!! الامر ألمها لمجرد انه هو غايتألم …

شوية بدا كايترعد بالبرد والتبوريشة و اشرف ااضطر انه يهزو وطلعو لفوق كايترعد والمررضة شافت عند ليديا

المررضة : لاقدرتي تعيطي لسي تونار عفاك ….

نور خنزرات علاش شافت عند ليديا وهي لا .. لان الممرضة ولفات تشوفو مع ليديا وماشي مع نور ..

نور : ( بتخنزير ) انا غااانعيط ليه …

ليديا غير واقفة ماكترثاتش، بالها غير مع حالتو … وطلعات فدروج تابعاهم و نور جبدات تيل تصوني ليه تادخل امير

امير : اش واقع !!

نور : والو .. غير عمي لحاج تزاد عليه شوية لحال

امير : وااايلي !!! ياك عاد داابا كان مزيااان !!! ….

نور : ماعرفناش شوووية هو يتبدل ( كتصوني ) نشوف تونار فين هو يجي يشوف جدو …

تونار كان يلاه ركب فطوموبيل كالس فيها وشاد على داك الملف كايقرا فالسمية يلاه غايديماري يشد الطريق للرباط … هو يصوني ليه تيل … شاف رقم عرفو ديال نور لانها سبق واتصلات وهو كايحفض بسرعة فائقة ، غير شاف رقمها تفزع وجاوب بزربة حيت مدام غاتصوني الا شي حاجة واقعة

نور : الو .. تونار

تونار : اش كاين ؟؟؟؟

نور : اا .. ر را … را عمي ل لحاج شوية تز

مزال مكملت كلامها قطع تيل وكسيرا دغيا للدار و هي بقات تشوف لتيل وامير مراقبها

امير : قطع عليك !!!

نور : ( كتحاول تتبسم ) لا … هه .. غير يمكن الريزو

امير : نوورر … واش بصح نت مزوجة بهاد السيد ؟ وكتهضري معاه هاكا كترعدي ؟؟؟

نور : ( خنزرات ووراتو الخاتم لي خداتو غير بوحدها ) وهدا شنووو هااا ؟؟؟ ر راه غير ماعرفتش كيفاش نقولها ليه وخفتو يتخلع ( داير فيها شوفة شك ) زايدون ملي يجي ينعس شوفو لبيت من غايدخل …

خلاتو وطلعات فالدروج وهو متبعها بعينو …..

ليديا حتى وصلات قدام البيت دالمامون كانو دخلوه وشدوه موراهم .. حطات ييديها على لبواني .. فللخر طلقات كتهز فكتافها متصنعة عدم الاكتراث ، ومشات بجيهة البيت ديالها وكلسات تما كتلعب برجليها … باغا تقتل فيها لداخل كل الاحاسيس ديال الشقفة تجاه شي حد … موت ؟ عادي كلشي كايموت .. ماما وماتت .. دنيا كاملة غاتمووت ! انا شكون كااايجيني كاع يبقى فيا !!!

يلاه كتقول بحال هاكدا هوما كايتسربو لدماغها كاع الابتسامات لي دار فوجهها … و ” ايجي ينو ” لي سمعات منو ولي عمر شي حد ماقالها ليها من قبل بهاد الحنية ….

شوية نفضات راسها ودخلات للدوش غسلات وجهها مدة كتخبط فيه بالما البارد مكتحملش بحال هاد الاحاسيس …. غير خرجات وهي تسمع فران قوي ومشات لسرجم كتجري دوزات الريدو بان ليها تونار لي جا …. وكلسات قالبة شفايفها مأزمة لحالتو … الشخص لي كتبغيه مكتحملش تا تشوفو مقلق …. ليديا مكتبغيش بحب عادي ، ليديا حبها متملك لدرجة حقدات على مرض الحاج علاش بسبابو غايتأزم تونار وعلاش هاد المامون كاين فالدنيا اصلا الى كان غايقلق تونار …

تونار طلع كايجري عندو للبيت حلها بجهالة لقاه ناعس فالسرير وهوما واقفين عند راسو وهو مبتسم واضح انه كان كايضحك معاهم واخا حالتو كاتبان عيانة بزاف ودايرين فوقو زوج مانطات وجبهتو متعرقة ، تونار غير شافو مبتسم عاد رجعات فيه الروح …ومشا قرب عندو كايقلب فيه و يقيس فجبهتو واش راه بيخير وهو شد على يديه بيدو المتجعدة

المامون : ( بصوت عيان ) فين كنت اولدي فين تعطلتي خليتي العشا ومشيتي

تونار : غير شي شغال … نتا بيخير ؟؟؟ اش وقع ليك عاد خليتك مزيان

الممرضة : غير رد حاشاك لي كلاه وجاتو تبوريشة دالبرد

تونار : تا سخانة طالعة ليك اجدي

المررضة : را عطيتو واحد الكينة غاتنزلها ليه

المامون : ( باس يدو فوق القفاز ) راني بيخير اياسكور ينو …. ( شاف عندهم ) عرفتو علاش كنعيط ليه آسكور ينو ؟؟؟ ( بابتسامة ) ملي كان صغيييير … كان بيييض بزاف بحال النور … ( تونار كايرمش بيعينيه وهوما كايسمعو ليه ونور ضاااحكة كتسمع ) وكان شعرو حريييري ووجهو تباركالله بحال داك الفرخ الصغير ديال الحجل واخا كبر …( كايدوز يدو على الماسك ديالو ) وغطا عليا وجهو … بااااقي بحال الحجل فعينيا

تونار : ( بعد وجهوو وهبطو كايحك بصبعو تحت دقنو مكيحملش هاد المواقف ورجع شاف فيه ) حاول تنعس شوية ترتاح … الى شفتي راسك عياان بزاف نرجعك لكلينيك ( شاف عند الممرضة ) رجعي ليه السيروم حسن

المررضة : اه راه لقيتيني عيطت عليهم يجيبوه … غانركبو ليه ومن الاحسن يبقى ففراشو .. ماحتى فلاكلينيك ماعندوهم مايديرو ليه … الماكلة نقصاات ليه شوية تشدات ليه الشهية و السيروم غايعاونو

تونار : ( كايدوز يدو على جبهتو ) واشد شد شوية فراسك اجدي واش سخيتي بييينا ولا شنو

المامون : وشكووون يسخى بيكم اولدي .. تازيانت الدنيا وتونار تزوج ليا … شكون يسخى …( تنهد ) الاجل ماعارفو حد امتى مكتب …

اشرف : الله يطووول لينا فعمرك آلحااااج .. نخليو ليك الرااااحة الله يجيب ليك الشيييفة .. حتاجيتوني ولا شي حاجة انا غير هنا …

ماحاشاهاش ليه تونار و خرج ونورة تبعاتو .. وحكيمة كتقاد المانطة على رجلين المامون ونور كالسة تاهي كاتشوف فتونار لي مرادش ليها لبال كاع واش كاينة تما بالو غير مع جدو

المامون : سير اولدي حتى نتا ترتاح .. انا بييخيير الحمد الله بلا متخلع ..

تونار : ( كالس عند راسو ) وغاتولي حسن ( باس على يدو )

الممرضة : لاجاك النعاس آلحاج غير غمض عينيك الكينة راه غاترخيك شوية ماتخافش … تنعس حسن

تونار تكاه على كتفو وكايدوز يدو على راسو والمامون واااضح عليه العياء رغم انه كايخبي وكايشوف مع نور كيف كاتشوف فتونار ويتنهد على حالها …

حكيمة : ندير ليك اللويزة آلحاج ؟؟؟

المامون : مكاين لاش مقادش عليها

الممرضة : الكينة غاترخيه بلاش من اللويزة …

المامون شاف فحكيمة وشاف فالكلسة لي دايرة نور كتسنى … هو يتفكر انه واعد حكيمة يقنعو بلي هاد الليلة ديالهم بجوج …. و حاول يبتسم واخا معاجبوش هادشي ولكن غير باش نور متحشمش قدام عائلتها هو هادشي لي فبالو معارفش الى لاعبين عليه كاملين وشاف عند تونار

المامون : نوض اولدي ترتاح حتى نتا راني وليت لاباس

تونار : لا غير خليني معاك هنا …

المامون : كون تسمع …. هاد ليلة انا بغييت تبات معايا ليديا ….فين هي مابانتليش،؟؟؟؟؟

الكل شاف فيه ونور طرطقات عينيها الا تونار لي فهم دغيا فاش راه كايفكر ..

نور : ك كيفاش ؟؟

حكيمة : اولي يالحاج !

المامون : رشقات ليا انا على داك البنت هي تقابلني هاد ليلة ( شاف عند الممرضة ) غاسيري تنعسي نت ابنتي عيطي عليها هي باغي نتجمع معاها هاد ليلة معارف حد شحال بقى ليا فالعمر … ونت احكيمة نعسي مع نورة ….

تونار : ( تنهد ) حاول تنعس .. نععس اجدي نعس …. تالغدا وآرا ماتجمع معاها …

المامون : لا والو بغيتها انا هاد ليلة ….

تونار : يهديك الله … هاهي غاتجي تجمع معاها ونباتو معاك بجوج اسيدي

المامون : لا بغيتها بوحدها ملي كتكون معانا مكتهضرش هي معايا منعرف كتحشم منك .. خلينا بوحدنا شوية واش غاناكلها …

تونار : ليديا كتحشم ؟؟؟؟…

المامون : سير آيطو عيطي ليا عليها .. صااافي قلت لي عندي …. تاهي ولات من العائلة اولا ؟؟؟ وانا بغيت نتجمع معاها هاد ليلة وهي تقابلني … ونتا سير ترتاح ( كايومي ليه بعينيه جيهة نور وتونار فاهمو من الاول )

ايطو مشات وتونار شد على راسو وحكيمة ونور عااااد سرا معاهم البلان الى بغا يخلي تونار لنور ويبعد ليديا هاد الليلة …..

ايطو مشات للبيت دقات عليها وحلات وهي تقفز ليديا حسابتها تونار …

ايطو : ( بنفخة ) الحاج بغاك …

قالتها بنفخة ومشات خلاتها غير كترمش … علاش غايبغيها !!؛ واش هدا كايودع نيت ؟؟

بقات واقفة شحال كتفكر فللخر اتجهات لغرفتو حلات لباب وهي تجي عينيها مبااااشرة فتونار … عاد شافت عند الحاج لي ضحك

المامون : اجي اجي ابنتي .. دخلي

ليديا تقدمات وغير ساكتة مفاهمة والو ونور كاتشوف بشوفات شريرين وناضت بزربة تمشي توجد راسها وحكيمة تبعاتها … نورة غيرر شافتهم خارجين مصااافين تبعاتهم تاهي دخلو لبيت نور لي غير كتنقز

نور : ناااااااري شحال مطور هاد الحاج تاهو ههههه

نورة :واش واااقع مالكم ؟؟؟؟

حكيمة : الحاج قالك ليديا تبات معاه هاد ليلة تقابلو

نورة : هاااااء ؟؟؟؟

نور : مافهمتيش ؟؟؟ واباااش تخوي لينا الطريييق انا ورااااجلي

نورة :وااايلي ( ضرباتها لكتفها ) ونا نقول مالك ناشطة … ( شافت لشعرها ) واابوكلي داك الشعر يبان منفوخ تغطي العيب

حكيمة : انا كون تسمعي ليا خليك عزبة هداك مافيه ثقة .. يدخل معاه غير باش نقهرو لوخرااا تعرفك تانتي مساهلاش ولقاو باش نعايروها تاهي …

نورة : راااجلي وحلااااالي … ( ضارت لمرايا عضات على شفايفها ) اوووووف شحال ونا كنتسنى …اخيييييرا غانكون معاه فبيت واااحد …

ليديا تقدمات وكلسات فجنب السرير حدا تونار وكاتشوف مع المامون

ليديا : كيف بقيتي شوية ؟؟؟

المامون : الحمد الله .. فين كتغبري مكانشوفكش كاع ..

ليديا : ( شافت فتونار ورجعات شافت فيه ) غير هنا ..

المامون : راه هضرت مع تونار .. هاد الليلة بغيتك تباتي معايا ابنتي … شلاااا ماعندي نقوليك ونوصيك ….

ليديا : هااا !!! ( شافت عند تونار كاتسولو غير بعينيها هو غير كايتنهد )

تونار : جدي ..داكشي لي كتفكر فيه راه مامخرجش … والله ماامخرج بالله ….

المامون : عااااارف … وعارف مكاين لي يفرقكم … غير ديرلي الخاطر هاد ليلة لي هنا فاميلتها راه بقالهم غير غدا ويمشيو ..( باس يدو ) عااافاااا اوليدي

تونار خطف يدو دغيا … حاس براسو حاط رجليه فوق القنابل اي حركة تفركع شي حاجة خايف على جدو بزاف ومضطر انه يقول غير وااخا

المامون : ياك ابنتي مافيها باس تباتتي مع هاد المريييض تقابليه ….

ليديا : اء !! م … مافهمتش ؟!!

تونار : والى درت ليك خاطرك وخليتها ليك هاد ليلة غدا غاتطوي عليا الموضوع مم !!!! غدا مغاتجدبش ليا حس هادشي مزال …..

المامون : والله اولدي ماااااتخرج عليا فمي شي حاجة ديرلي الخاطر غير فهادي راني واعدتهم وهادي اللخرة

تونار : واخا … هاهي غاتبات معاك .. ولكن راه غانشد عليكم لباب … هادي نعاسها تقيييل والدار القضية مخلطة راك عارف ….

المامون : ( ضحك على لغيرة ديالو ) اودي زيد قفل آخور غير خليها ليا

تونار : ( حط ليه راسو على كتفو ) واحاول تنعس يلاه راه مغانمشي تانشوفك نعستي

المامون : والله بيا لادرتيها .. تقول جدك شرف مغايفهمش تخليني نعس وتهزها وتمشي … نووووض سير دابا دير لخاطر لجدك …. ( شد فيد ليديا لي غير كتبرقرق بعينيها ) وليديا هاهي معايا مكاين لي يقرب ليها ( كايدفعو ) نووووض سيير وااانوض مايبقاش التقليد على جدك

تونار : ( تنهد ) واخا هاهو نااايض ….خليو معاكم الفرملية هنا … ( ناض وجرها من يديها وقفها عندو) تسنى تبدل حوايجها وتجي

المامون : ( شدها من يدها لوخرا وليديا غيير كاتشوف ) لاا وااااااالو .. سير جيبهم ليها

تونار : وصااافي راه واعدتك والله حتى تبات معاك . غانهضر معاها وصافي

المامون،: آمنا بالله …..

جر ليديا وخرجو من الغرفة وليديا جات قدامو وقفات

ليديا : مااافهمت تاحاجة ؟؟؟؟؟؟؟ اش واقع ، واش بغاني نبات معاه باش نتا تمشي عند نور ؟؟؟

تونار : ( كايشوف معاها ودوز يدو على وجهها ) ها باش كتعجبيني ، كتختصري عليا الامور

ليديا :دابا انا نبات معاه ونتا غاتمشي عندها !!

تونار : واش منتيك !! ( جرها من يديها لعندو كايدوز يدو على وجهها ) دابا واش نرضي راسي ونديك معايا ونعصي جدي … ولا نرضي جدي نخليك ليه ونعصي راسي ….( بابتسامة ) ديري حل يالاه معايا حتى نعس ورجعي عندو ….

ليديا : ( بنصف ابتسامة ) اشنو كايضور فراسك

تونار كايشوف معاها حاس برغبة قوية تجاهها ماعمرو حس بيها ملي كانت غير قدامو ، رغم ان الوقت ماشي مناسب يفكر حاليا فغريزتو الجنسية ولكن بمجرد ما عرف ان هاد الليلة غاتنعس بعيدة عليه جاتو رغبة بحال المغناطيس كاتجبدو لشفايفها …. بحالا كاتقوليه ” في ثغرها يوجد السلام “

هاد ليلة لي رجع من نص الطريق ومامشاش عند اوشن ومضطر انه يبات فالدار ومايسافرش وجدو فهاد الحالة هاد اليلة بضبط كايفكر كيفاش غايدوزها وحتى من ليديا لي غاينسى معاها الواقع مغاتكونش !!! …غمض على عينيه وهبط بشوية لشفايفها ويدو جراتها من خصرها لعندو … وتاهي غمضات عينيها وغاصت معاه فقبلاتو …

ونورة كانت خارجة من البيت غير شافتهم طرطقات عينيها … ورجعات ضارت براسها كاتشوف فنور كتوجد راسها !! … مدة كاتشوف فيهم بلا ماتهضر … حتى كانت غادخل تقول لنور شوفي .. فللخر ضورات راسها وشدات لباب ومشات معصبة مراقبة غير من بعيد ….

ليديا بعدات عليه راسها كاتشوف فيه بقلق مطلعة حجبانها حيت غير من طريقة التقبيل هي كاتقراه

ليديا : واقعة شي حاجة مافخباريش !!

تونار اكتفى انه حرك راسو بالايجاب ومزال نشوة القبلة فعينيه

ليديا : وامتى تولي فخباري

تونار : ( كايرد شعرها ورا ودنيها مطالع وجهها ) حتى لغدا …

ليديا : ( علات يدها شدات وجهو من فوق الماسك ) نجي معاك !!

تونار : مكرهتش ….

ليديا : ( تنهدات ) غاتمشي عندها ؟

تونار : واش فنظرك نت كنتيق نعس حدا شي واحد من غيرك !! ( قصد الماسك ديالو هي بوحدها لي كايتيق فيها انها مغاتحيدوش ليه بليل )

ليديا : ( دارت فيه ابتسامة ) باش تزيد تأكد بلي عمرك تلقى بحالي وعمرها تكون ….

تونار : ماعنديش فيها الشك

ليديا : وجدك ؟؟

تونار : ماواعدتو بوالو

ليديا : هااء !!! راك حلفتي ليه كاع ؟؟

تونار : حلفت اني غانخليك معاه … ماهضرتش انا على شي حاجة اخرى !! ….

ليديا : مغايتقلقش

تونار : كنعرف نهدّيه ….

ليديا بقات غير ساكتة كترمش وهو هبط لفمها باسها بوسة خفيفة …

تونار : مزال غانتفاهمو على الاعصاب لي ركبتي فيا هاد العشية ….سيري دابا عندو … توقع شي حاجة علمييني فالبلاصة …ردي معاه لبال واخا !

ليديا : مكنعرفش نعس حدا شي واحد .. غانعس بحوايجي !!! مستحيل يديني النعاس

تونار : من الاحسن ….

ليديا : ففففف … عررفتي مابغيتش حتى نخسر خاطرو … حسيت باغي يدير الخاطر لكولشي وصافي !! ….

تونار : ليديا كتفكر لشي وااحد !! لعجب

ليديا : كنفكر ليه حيت نتا كتفكر ليه …. وبغاه يبقى مرتاح باش نتا تبقى مرتاح … ( قربات عندو كتر وعلات فيه راسها ) تيق بيا … مكيهمنيش شي واحد من غيرك نتا …..

مجاوبهاش اكتفى فقط بنظرات حاملين كمية كبيرة من المشاعر خصوصا لصراحتها و النفاق لي عمرو كان فيها ، …. وهبط راسو حتا تحطات جبهتو على جبهتها و قال بصوت شبه طفولي فيه رغبة كبييييرة كأنه رجاء

تونار : يلااااه معايا …..

ضحكات وباستو ففمو

ليديا : سييير تنعس … انا غانرجع عندو… نيت باغا نهضر معاه فبزاف دالحوايج … باغا نعرف على أصلي كتر ومكاينش لي غاينفعني كتر منو ….

تونار : من الاحسن بلاش راه عيان ، حتى لغدا الى صبح مزيان وهضرو .. غير خليه ينعس يرتاح

ليديا : واخا …. ( بعدات ) يالاه تصبح على خير …

ابتسمات ليه وضارت تمشي تالقاتو شدها من يديها كأنه مساخيش بحالا غاتمشي لشي بلاد بعبيييدة …. وضارت عندو كضحك

ليديا : راه بيناتنا غير زوج بيوت …

تونار : شدي لباب بساروت .. مابغيتش نشدها انا باش لاوقعات ليه شي حاجة أجي عندي علميني … ماتنعسيش الى ماشديتيهاش بساروت

بيدا : وشكون غايدخل !!!

تونار : مكاانتيق فحد …

ليديا : تييق غي فيا …

ابتسمات ليه ومشات وهو متبعها بعينيه فلخر حك فشعرو ومشا بعياء وعكز لبيتو ..

ليديا غير حلات لباب لقات الممرضة كاتغطيه

ليديا : ( بالهمس ) صافي نعس !!!

الممرضة : راه خدا الدوا بقى كايتعافر مع النعاس كايتسناك حتى غلبو .. ( بعدات وجات حداها )

الممرضة : غانهبط نجيب لما … تشربي حتى نت

ليديا : بلاش .. كلمي ليا معاك غير لبنى

الممرضة : لبنى !!

ليديا : لبنت لي كتكون معايا

الممرضة : نعيمة سميتها لا

ليديا : ( بابتسامة ديال خزيت ) لبنى …

ممرضة : ( باستغراب ) اااه .. واخا …

مشات الممرضة وليديا طلات عليه بان ليها نعس … وتقلبات لكانابي كتقيس فيه بيديها جاها مريح مابيهش دوز عليه هاد الليلة لي اصلا موحال يديها نعاس فيها .. وبقات كاتقادو تنعس فوقو حتى سمعات دقة خفيفة فلباب ودخلات نعيمة ..

نعيمة : بغييتيني ؟؟؟

ليديا : ( مشات عندها لباب كتهضر بالهمس باش مايفيقش ) جيبي ليا مانطة تكووون جديدة ماقاسها تاشي واحد … ومخدة جديدة ويكونو رطبين …

نعيمى : غاتباتي هنا !!

ليديا : آه …

نعيمة : ماتقوليش ليا استسلمتي !!!

ليديا : مافهمتش !!

نعيمة : قبيلة الحاجة حكيمة قالت لينا نوجدو ليها تنعس فبيت بنتها لوخرا .. ملي سولوها علاش مغاتنعسش فبيتها سمعتها قالت ليهم غاتنعسي نت مع الحاج باش تونار غايبات مع نور .. سمعتها وقلت نت موحال تخليهم

ليديا : هه ! ومافيها باس الواحد يحلم شوية ولا ممنوع !!

معيمة : يعني ماغاتخليهمش ؟

ليديا : شفتي الغزالة واخا نبغي انا هو راه مغايبغيش وحاجة الدل غير بصحتها بيها .. نت حضييها لياااا مزيان .. لي طاحت عليها ودنيك هزيها ليا …

نعيمة : الله اووودي .. واخا طيرتيها منا خلعة قبيلة قلت توضرتي موحال نلقاوك ..مهم انا نجيب ليكم خبارهم غير تهناي …

ضحكات ومشات وليديا دخلات لبيت جالسة على الكانابي وكتلعب برجليها كتفكر .. حتى دخلات الممرضة كتقاد تاهي بلاصتها فين كتنعس …

اما تونار خدا الدوش لي كايناسب الحالة ديالو بالمعقمات ديالو … ولبس سيرفيت كحلة وكلس على البيرو شعرو باقي فااازك كايقطر ليه على وراق المصحة لي شادهم بين يديه .. كايقرا فداك لااسم ويعاود … وحطهم مطلع راسو للفوق كايفكر كيف يدير يسافر غدا وجدو فهاد الحالة .. فنفس الوقت مقادرش يصبر امتى يشد اوشن بين يديه ويشوفو كتاكل فيه العافية …. واش يسبق الانتقام ولا يسبق جدو لي يقدر يغدرو فاي لحظة ويموت بلا مايشوفو ولا يودعو ولا يحضر ليه … واش غايخلي اوشن للمرة التانية يحرمو من انه يودع جدو كيفما حرمو انه يودع عائلتو !!

فلداخل ديالو راه حاس وعارف ان جدو فاي لحظة يقدر يموت .. واخا مقادرش يعترف بهادشي فالداخل ديالو …. وبقى كالس على المكتب غير كايسوط طاوي يديه تحت راسو ….

نعيمة طلعات لفراش لليديا … وقادات ليها بلاصتها ومشات … وليديا دخلات ففراشها كتحاول تنعس … كاتشوف عند الممرضة نعسات .. والدنيا ساااهطة وهي النعاس مابغاش يكحل عينيها .. فايقة كاتشوف فالسقف لي داخل ليه شوية ديال الضو من البالكون دالبيت .. مرة تفكر فتونار واش يكون نعس .. ومرة تفكر فشنوو شاغل بالو وشنو لي غايكون وقع .. مرة تفكر للمامون غدا ملي غايرد الخبار بلي تونار ماباتش مع نور كيف كايحسابت ليه .. تاطار عليها النعاس بمرة

اما نور فبيتها كتمشي وتجي متوترة لابسة بينوار طويل فالابيض حريري وتحتو شوميز ديال النعاس ومقادة راسها وضاربة تعكيرة وراشة احسن ماعندها فالبارفان كانت موجدة راسها وكتسناه يجي ، حتى جات بلاصتو نورة لي غفلات مها خلاتها تانعسات وجات عند نور تتأكد واش بصح بات معاها وتحيد الشك ساعة لقات شكها فمحلو ونور بوحدها ، …

نور : ماايمكنش .. لا غايكون باقي مع جدو ..حلفي تاشفتيه دخل لبيتو ؟؟؟؟؟؟

نورة : هادشي لاماكانش غايكون نعس دابا … كلس ليك هو وياها فالكولوار كايتباوسو حشمت تانشوف فيييهم … ولد الحرام كنت حاگرااه … صدق بواااااس مع راسو ….فلللخر مشا لبيتو ماخرجش كاع وهي راها مع الحاج شفت نعيمة طلعات ليها لفراش

نور : وعلاااااش ماقلتيهااش ليا

نورة : اش غانقوليك ؟ ماكنتش بغيت نضيع ليك المورال ونت كتوجدي راسك .. واصلا حتى كون قلتها ليك .. اش كنتي غاديري مثلا ؟

نور : ( كلسات معصبة وزفات بالتيليفون لي كان فيديها فالارض ) اووووووف … اش غاندييير دابا غدا غاتصبح كتشفى فياا ونا لي كااانقاد راسي من قبيلة كي لحمااااارة

نورة : كاين حل واحد

نور : ( ضارت عندها ) شنوو هو

نورة : سيري نت عندو … ياك راه بوحدو ؟

نور : ها !!!! ( مدة كترمش فلخر قلبات راسها ) لا لا … اويلي اش غانقولليه ؟ .. لا ماميكنش .. نمشي ندق لباب وندخل لا لا لا ماشي لداك درجة نت عارفاني باقي مكنزعمش عليه … انا حسابتني هو لي غايجي لعندي ياك قالي عمي الحاج غايجي عندك

نورة : واراك مغاتشديش ودخلي عندو … نت غادخلي بالعز ديالك وبزز عليه …

نور : مافهمتش ؟؟؟

نورة :انا غانمشي نفيق خالي … ونوريك اش غانيدرو …

ناضت بزربة تحل لباب و نعيمة هربات تخبات مور الحيط حيت كانت كتنسنط على لباب … ونورة مشات باتجاه البيت لي ناعس فيه اشرف وامير … اما نعيمة بقات كتولول ومشات كتجري لبيت المامون …

ليديا مزال مبرققة عينيها فالسقف الليل طويل وهي كتحسب ليه فالدقايق امتى يسالي …. حتى شوية سمعات دقة فلباب خفيفة وناضت تحلها حيت دارت بوصاية تونار وشداتها بساروت …وقربات هضرات بالهمس

ليديا : شكون !!

نعيمة : أنا …انا غير حلي

ضارت ليديا بانوليها ناعسين .. وحلات لباب

ليديا : ( بالهمس ) اش واقع ؟؟

نعيمة : نااااري يالالة … داااك نور راها غاتمشي عندو لبيت

ليديا : ( جمعات حجبانها ) كيفاش غاتمشي عندو لبيت ؟؟؟؟؟؟

بدات نعيمة كتعاود ليها وكل مرة ضور موراها تشوفهم واش فاقو …

نعمية : والله حتى سمعت هادشي بودني .. وقالك داك خالهم لي غايحل المشكل

ليديا : ( كتفرك فيديها ) سيري حضيهم الى دخلات لبيت وحل ليها الباب ..اجي علمني بززربة … سسسربي

مشات نعيييمة و ليديا دخلات لبيت كلسسات فبلاصتها كتلعب برجليها بتوتر وحالفة حتى تبيتها هاد ليلة فالجحيم لامشات تادخلات عندو …

اما نعيمة بقات سامرة عليهم حتى بانليها اشرف ونورة دخلو للبيت عند نور … شوية خرجو ضاااحكين ونورة مشات لبيتها … ونور واشرف زادو لبيت تونار …. ونعيمة تابعاهم فضلام كاتجسس…

نور : دق نتا … ( شادة على قلبها ) اوووووف خايفة كون غير رجعنا حسن …

اشرف : تااابربي تابتاتي معاه … والا انا ماااشي اشرف … هادشي فسبيل الله عنداك يحسباتك على ود الفلوس … غا نور وحدة لي عندنا ماخلاقش لي يبكيها لينا …

دق لباب ونور شادة على قلبها ….

تونار كان واقف فالبالكون كايشوف بواحد المنظار صغير فااسما … غير سمع دقة فالباب لاحو بزربة ومشا قال غير شي حاجة واقعة لجدو .. حل لباب بخلعة هو يبان ليه قدامو اشرف بضحكة كايبانو فيها ضراسو ونور مةوراه مخبية حشمانة كأن الحشمة كتواتيها،!!!! بقى غير كايطلع فيهم عينيه ويهبط مافاهم والو وكالعادة مكيبان والو على وجهو من غير البرود !!

اشرف : آمسلخييييير انسيبي( جاب نور قدامو ) واهانا جبتليك عروستك ههه راه غاكتحشم مسكينة لاديش عليها …

تونار غير واقف كايشوف فيه جامع تخنزيرتو واشرف كايطل براسو على لبيت ودخل بلا حشمة بلا حيا وتونار بنفس وضعيتو مخنزر فنور لي مقداتش تعلي فيه عينيه

اشرف : تباااااركالله تباركالله …. هدا هو بيتك ابنت ختي ، تباااركالله … الله يزيدكم من فضلو …

ضار عندو تونار كايحك مور عنقو كايحاول يتحكم فأعصابو وااخا يديه حابسها غير بزز ماتجمعش معاه بشي كروشي يريب ليه سنانو … و اشرف ضاحك باستفزاز وقرب عند نور شدها من كتافها

اشرف : يالاه تصبحو على خير تعطل الحال واقلة نخليكم ترتاحو … وانتي ابنتي راه بلاصتك حدا راجلك دابا مجاتش تنعسي حدا مك….. ( شاف فتونار لي مضيق فيه عينيه قرب يخلطو ) وماتقلقش منها انسيبي راها حشووومية وصااافي …..

ضحك ليهم وخرج وشد لباب موراه وتونار واقف مزير على القبضة ديالو … و نور بسبب الماسك ماقدرات تعرف لا واش مقلق ولا هادئ ..وقربات عندو بتوتر تبرر الموقف

نور :ر .. راه . راه ماعرفت مانقول ليه .. و

يلاه كاتهضر تاسمعاتو لتخ واحد الديكور كان على المكتب هو لي جاه على يدو تشخشخ مع كملها مع واحد الكرسي بركلة و نور تخطفاات شادة على قلبها وهو كايمشي ويجي كايرد فشعرو لور ، وهي قربات تهبط البولة فسروالها ماحسابتهاش غايدير بحال هاكا بغات غير تضور ترجع فحالها ندمات على الساعة لي جات فيها لعندو …

تونار : ( ضار عندها مغزف هزها من حوايجها بيد وحدة وهي مغمضة على عينيها مزيرة عليهم ولات باغا تشق لاارض وتبلعها وهي كاتسمعو كايسب غير بتخصار لهضرة وهو مخرج فيها اعصاب النهار كاااامل طرطقوهم فيها ) شهاااد التخررررربيق دابا شهاااد ال****** ….. واااش مريييضة نت ف**** ولا ماااالك …. مااالقيتي مااااتجيبي ليا انا بقى ليا غير ال**** يدخلو لعندي …

لتخها من يدو تاجات على السرير كايمشي ويجي وهي بدات كتبكي ماحسابتحاش غاتكون ردة فعلو بهاد العنف هي ماعرفاش ان فيها غايبرد جنونو هاد الليلة …

نور : (كتحاول تهضر وسط الخوف والاحراج وهي كتشد بداك البينوار وداك الحالة ) اا انا .. انا غير

تونار : ( قرب لعندها تحنى شاد على ركابيه ) مافهمتش انا واش عندك عقل كاتفكري بيه ولا آش …. علاش قابلة على راسك هادشي !!!! واش انا تزوجت بيك ؟؟؟ واش أنا واعدتك بشي حاجة ؟ واش انا عمرني شفت فيك ؟؟؟؟؟

نور غير مهبطة راسها كتهز كولها وتنخصص وزراقت بالخلعة خايفة يهبط عليها بشي تصرفيقة هو قدامها كاينهج كيف شي ثور

تونار : الطرييقة لي كتفكرو بها مابغاتش تفهم ليا اانا !!!! واش عندك عااادي دخلي لبيت واحد مزوج مارااابطك بيه والو من غير ورقة مزوورة !! واش راااضية بهادشي على راسك !!!!

طرطقات بالبكا والتنخصيص وهو دوز يدو عى وطهو وقف و بعّد عليها كايبرد فراسو لان شفق على حالها واخا عصباتو ولكن الدل ماليه دوا وهي بقات تبكي بصوت مرتفع

نور : ا انا… غ غير .. خ خالي و وصافي لي …. ( شافت فيه معصبة و فنفس الوقت خيفانة ) حتى انا مراة مزوجة … نتا تمارس زواجك ك كيف بغيتي وانا ؟ غير بالسمية !! ؟

تونار : واش انا منعتك ديري شي حاجة ؟؟ سييير اختي ديري نت عشرة دالرجال فنهااار عييييشي كيف بغيتي شكون ماااانعك ؟؟؟؟…. واش باغين تخرجوني على طوعي واش كاتشوفوني ساكت حيت جدي مريض صافي راه عااحبني هادشي !!! واش ماغااات****وش عليا ؟؟؟؟

نور : ( كتمسح دموعها ) ب بلا .. باا ماتسب .. ه هانا غانمشي .. ر راه غ غير خالي مابغيتش نتحشم ح حداه …( شافت فيه ) و …. ودنووبي على رقبتكم

كايطلعها ويهبطها شنو لابسة ودار ضحكة ديال خزييييت

ناضت باتجاه لباب تحلها وشافها ماشية ثقييييلة و تنهد

تونار : رجعي لهنا دابا غير رجعي … ملول ديري فيك هاد النفس ..

جرها من يديها تااغوتات ولاحها على السرير وهي طرطقات عينيها كاتشوفو قرب عندها … بقات غير كترمش وهو حل المجر ديال الطابل دونوي … وجبد الحبل لي وجدو يربط بيه ليديا فاش يكونو ناعسين مع بعضياتهم وهي غير شافت داك الحبل طرطقات عينيها مافهماش علاش جبدو !!! وآش غايدير ليها

ليديا واقفة فلباب مزيرة على لبواني وكارزة على سنانها وهي كتسمع فنعيمة كتعاود ليها …

نعيمة : سيري عندهم من الاحسن …

ليديا : ماشي نت لي غاتقولي ليا اش غانديرر… سيري تنعسي ..

شدات عليها لباب ونعيمة بقات غير كتبلق بعينيها ومشات .. اما ليديا كضور فلبيت بوحدها وهوما ناعسين … فللخر حلات باب لبالكون بشووووية وشداتها باش مايدخلهمش الريح ويفيقو …. وخرجات كتطل كايبان ليها الضو مشعول فبيتو … وبقات كترمش بعينيها وتفرك فيديها …

شوية بان ليها الضو تطفى،!!!! نزل عليها العجب !!! .. وقلبها كايتلوا من لداخل بالفضول اش غايكون طاري تما بيناتهم .. وطلعات فوق الحديدة ديال البالكون معلية يديها و دروس ديال التواازن جا للوقت لي ينفعوها … وتمشات بمرونة على داك الحديدة حتى نقزات لبالكون لاخور.. وتاني طلعات فوقو كتمشى تانقزات للبالكون ديال بيتهم عاد تهنات … على قبل توصل لعندو القدر خلاها تتخطى منافي واسوار و مجاري الصرف الصحي .. مغاتحيرش دابا فجوج بالكونات …

بانتليها لباب محلولة و الريدو دايز وغير ضو خفيف جاي من اباجور ديما تايخليوه مشعول .. بقات كتمشى على گدامها باش ماتصدرش شي صوت .. ودوزات الريدو كتطل غير براسها وهي تجمع الضحكة ملي شافت المنظر قدامها شدات على فمها باش متفضح ….

كانت نور مربوطة مع السرير وهو ناعس على الفوطوي بعيد عليها … ناعس على ضهرو وطاوي يدي تحت راسو واضح يلاه كايديه النعاس .. غير من داك الربطة لي داير ليها وداك النعسة لي داير مرتاح عرفاتو راه ربطها باش متجيش بالليل تحاول تحيد ليه الماسك … بقات كتضحك غير بوحدها وبعدات كتخرج الضحكة فالسر جاتها الهيستيرية .. كاع الاعصاب لي تعصباتهم ملي شافت المنظر برداااات وعرفات بقيمتها عندو شحال ساوية … رغم انها تاهي دخلات لحياتو رغما عليه الى انها عمرها حسات معاه بالدل …. كاتشوف فنور بداك البينوار دالعرايسات وداك الحالة وتزيد تضحك .. بقات فالبالكون عااسة عليه حتى بان ليها صدرو كايطلع الزفس ويزفرها بانتظام عرفاتو راه نعس … ماشي بحال فاش دايكون فايق الحركة ديال النفس فصدرو كتكون مبدلة بسبب التنهيدات ….

وشافت لعند نور بانتليها معلقة فداك السرير يديها مربوطين مع الحديد و فايقة راسها مايل للجنب على كتفها ، النعاس مكحلش عينيها وواضح شحال مكتأبة …. وهي تحل لباب دخلات كيف شي جنية من العدم تاقفزات نووور من بلاصتها بالخلعة و ليديا دارت صبعها على فمها وهضرات بالحس

ليظيا : شششششش …. ( شافتها مطرطقة عينيها بحالا شافت شي جنية وبصح باقا كتستوعب واش هادي بشر ولا من الجن ؟؟؟ لانها ماشي طبيعية ابدا ؟؟؟ وهي تزيد بخطوات لقدام وشدات موراها لباب دالبالكون كتهضر بالهمس ) ماحشوماش عليك تخلي لباب محلولة عند راسو مسكين يضربو البرد …. ( كتعلي عليه الغطا محنية عليه ) قلبك قااااسح يا ضرتي … ( كاتشوف فيه ) سبحان الله دغيا نعس !! ملي كانكون ظعاه مكااينعس تالفجر .. باينة كاتجيبي النعاس للواحد دغيا ( علات راسها شافت فيها وعلات حاجبها ) مالك كاتشوفي فيا هاكاك ؟؟؟ عيب نجي نعس مع راااجلي ،؟؟؟ ….. راه بيتي هادا واقلة !!!

زادت كاضحك وكلسات على الكرسي دالمكتب ديالو دايرة رجل على رجل

ليديا : مرحبا بضرتي معانا …. واش ديما غاتجي تنورينا ولا غير ليوم ؟؟؟؟

نور : ( بالحس مغددة تحت سنانها ) الله ياااااخد فيك الحق

ليديا : اووه !!! حيت سمحت ليك دخلي لبيتي وتنعسي حدا راجلي ، بغيت نقول ( حابسة ) مربوطة حدا راجلي ههه ( قادات جلستها على الكرسي كتهضر غير بالحس باش مايفيقش ) واش حسابتك كون مابغيتش انا كنتي غادخلي لهاد لبيت ؟؟… حيت انا بغيت ، وحيت انا قبلت وعطيت ليك مجال ، عرفتي علاش ؟ حيت تايقة فيه ..وعارفة مغاتهزي فيه شعرة

نور : ( محقدة فيها عينيها ) حيت داير ليه الطلامييس عميتي ليه عينيه … ديري لي ديري كتبقاي الطماعة لي داخلة بالغدر .. نتي مكتبغيهش وانا فضلت الدل على نخليه ليك ….اييييه الدل مهم نطلع بنتيجة ومتربحيش نت

ليديا : والموصيبة مغاطلعي غير بالدل … حيت لدالى نتي ختارتي تكوني مدلولة وماتخليهش ليا … انا ختاريت نكون بعزي ومنخليييهش ليييك … انا عارفة ونت عارفة بلي لي طامع فهاد الفيلم راه هو نت و عائلتك .. هضرتكم كلها دازت على ودني خليني ساكتة حسن

نور : كنت ماشية فحاالي … هو لي قالي غير رجعي ( بنظرة تحدي )

ليديا :هه !! باش ازيدي تعرفي قيمتك وديري فيك شوية دنفس

نور : باش نخليه ليك ؟؟

ليديا : هو من الااساس راه ليا …. الوقت لي كاضيعيه فهاد الدل كون درتي خيير فداك لي سيغن ( الهالات السوداء ) داويتيهم وتسنيتي شي عريس جديد .. مالك فاقدة فراسك الامل حتى لهاد الدرجة ؟؟

نور : ( نور قلبات راسها لجنب ) طلقي ليا يدي .. بغيت نمشي

ليديا وقفات كتقرب عندها

ليديا : لا لا لا مايمكنش .. فين غاتمشي فهاد ليل ؟؟ لا نتي ضييييفة عندنا ( نور ضارت كاتشوف فيها موسعة عينيها بالفقصة وليديا هبطات يديها كدوز صبعها على وجهها ونور كتبعد وجهها ) غاتباااتي معانا …. انا وراااجلي .. وعلى عينيك غاتشوفي هو ديالمن ..( شداتها من فكها ضورات راسها لعندها ونور كتنتر منها ) عااارفة بعدا علاش رااابطك ؟؟ ( غير كاتشوف فيها محقدة ) حيت مستحيل يتيق فيك .. حيت مكتعني ليه واااالو

نور : هه !!!! زعما نتي مكيربطكش .. ياك الحبل كان هنا

ليديا : كايربطني … وديالي هاد الحبل ، غير هو الفرق بيني وبينك …. نت ربطك فاش بغا ينعس … ونا كايربطني ملي كايبغينا نعسوووو ( غمزاتها بمعنى راك فاهمة )

نور : ( بحقد وكره ) ماتستااااهليهش

ليديا : نستاهلو ولا منستاهلوش مكاايهمش .. لي كايهم هو راه ديالي … تقبليها بروح رياضية الغزالة ( كطلعها وتهبطها وطلقات قهقهتها المستهزأة بالحس ) وموووجدة راسك ههه . ياااااخسارة تونار ماعندوش مع الحوايج … تايبغي الجسد كيف خلقو مولاه …. عندك هاد الجرأة ؟؟؟ …. نوو ؟… واحتى يكون عندك الجسد بعدا هههه

وقفات كتضحك و كاتفتح فصدايف الكسوة لي لابسة حتى حلاتها كاملة طاحت مع رجليها ونور كتراقب اش كادير هادي وبان جسدها المنحووووت غير بدو بياس وحيدات الليبا تاهي و لاحت صباطها ونور طرطقات عينيها

نور : اش كاديري نت ؟؟؟؟

ليديااا مجاوبتهاش وحيدات الفيليل من شعرها حتى تطلق كامل ونور كاتشوف معاها ومتنكرش ان جسدها خطيييييير الشيء لي كايخليها تزيد تشعل بنار الغيرة وتزيد تأكد ان لا مجال للمنافسة و #البقاء_للاقوى … وكتزيد تتحرق وتشوى وتلعن فرااااسها لي جات لهاد لبيت ، وليديا قربات لكوافاوز هزات بارفانها رشااتو .. وتمشات بشوووووية بجهة تونار ونور كاضور فراسها لجنب لاخور مغددة كتحك رجليها على داك لفراااش .. وهي دخلات حداه فداك الكنابي وهو غير وصلاتو ريحتها لنييفو رغم انه ناعس دماغو استنشقها و جبدها عندو عنقها كيف موالف ، مواعييش بشنو اقع … حسابتو راه ناعسين عادي !! ….

نور قلبات راسها لجنب مزيرة على عينيها وسنانها … وليديا بالعاني كاتبوسو وتسمع ليها باش عمرها مزال تحلم تعاود تدخل عندو للبيت …

تونار كمش ملامحو وخشا ليها راسها تحت دراعو كيف موالف فالنعاس ديالو … وهي كل مرة تطل بعينيها تشوف فنور ….

نور غير قلبا راسها وعاضة على شفايفها ودموع كايسيلو من عينيها .. وليديا تنهدات و بعدات بشوية عليه وناضت هزات بينوارها معلق لبساتوو… واتجهات لعندها ونور مابغاتش تعلي فيها راسها وكلسات على السرير حداها

ليديا : وكتبكي ملفوق !! قابلة على راسك هاد المصير وكتبكي ؟؟؟

نور : ( تحت سنانها ) تفرررقي عليا

ليديا،: تفرقي نت علياا .. كون عطيتوني تيقار مغانجبدكمش … واش كاينة شي مرة على وجه الكرة الارضية غاتقبل تشارك راجلها مع وحدة أخرى ؟؟؟؟؟

نور : ( شافت فيها ) قولي هادشي لراسك

ليديت : منييييين جاك نت راجلك ؟؟؟ … هادشي راه مافيهش مزال نقاش … تونار ديال ليديا … وليديا ديال تونار غير دخليها لدماغك وجمعي راسك … عندك الحياة كلها بين يديك .. حرة !!!! كتمشي فين بغيتي … عندك ماماك .. عندك ختك .. عاااايشة بيخير !!!! وكتبكي ؟؟؟؟؟؟واش عارفة ان كاينين ناس فهاد دنيا معاك راه كايتزادو فبيت عمرهم كايخرجو منو ( نور علات فيها عينيها ) ماتايخرجوووش كاااع … نهار كايخرجو على الباب كايكونو ماشين لمنفى اخور … لمنفى راجل ماشي هوما ختاروه .. ويقدر يكون فعمرهم غير سطاش لعام وغاتمشي عند راطل فعمرو ستين عام يغتصبها بوحشية فليلتها لولة ويكمل عليها ولدو …. ماين لي كاتنتحر و كاين لي كتكمل الظدة السجنيية ديالها كتحارب حتى تمشي للقبر، …. ونت؟؟؟؟ …. عطاك الله كولشي سااهل الحياة لي كتمناها اي وحدة …. وحاطة راسك فهاد المواقف ؟!!!! مكاين تاشي حاجة اخرى فهاد الدنيا لكبيييرة لي شحال من وحدة كتحلم تخرج ليها تلهييييك وتخويه من دماغك ؟؟؟ راه مكاتجيبي ليا لا غيرة لا والو … كانجيبي ليا هاد الساعة غير الشفقة ….

نور : ونت مالقيتيش فالدنيا لي يلهيك عليه ؟؟؟؟؟ زعما هو ختارك ماتلاحيتيش عليه يا الطمااعة؟؟؟

ليديا :انا ماشي هي نت .. ماتقارنيش راسك بيا واش نت تقدي عليا ؟ نت بحالي ؟؟؟… انا هي لي مستحيل يقاومها شي واحد كيفما بغا يكون.. الى قلت غانديه كانقد بيهااا وكانخليه هو يطلبني نديه مكنتلاحش عليه مدلولة .. ( كطلعها وتهبطها ) سمعي لنصيحتي راه كانعطيها غير مرة وحدة ومكنعاودهاش …. جمعي راسك وهادشي لي بقى فيك …. وعمري راسك بحوايج لي ينفعوك … قراي لغة جديدة وتعلمي ثقافة جديدة و حسني من راسك كايبانليا دماغك خاوي كايسوط فيه الريح …. وخوي من راسك راجل مزوج حيت مغتقديش تنافسني .. نهار تشبهيني فوجهي و جمالي … و 6 لغات لي كنهضر بيهم …وعدد الكتب لي قريتهم ولخصتهم … وعواصم جميع الدول و ثقافتهم وتاريخهم وقوانينهم وعملاتهم لي حافضاهم عن ظهر قلب … كل نقطة فالدنيا سميتها كنعرفها …. نهار توصليني فهادشي … نقدرو تنافسو .. اما دابا راااه لا مجال … بقيتي فيا داكشي باش كنصحك ….كانشوفك غيؤ مگدمينك …. سيري خدمي على راسك حسن ماتبقاي متبعاهم راه غير غايخرجو عليك … من الاحسن ماتعاوديش مزال ديري معايا شي لعب ولا دخلي معاهم فشي لعب حييت بوحدك لي غاتآداي …. وكولشي غايرجع عليك كنحدرك … والنصيحة والتحذير مكنعاودهمش جوج دالمرات

نور : ( بنفخة رغم ان كلامها تغلغل فيها ) مامحتاطاش لنصيحتك

ليديا : مزال غاتوقفي عليها ( ناضت وقفات ) انا منك من بعد هاد الليلة .. يا نقتل راسي … يا نحيي راسي من جديد ….. والاحتمال التاني لاكتتي بعقلك راه هو لي غاتختاري …

خلاتها ورجعات لبلاصتها ومابغاتش تزيد عاد تفقصها رغم انها مخشية فيه كامة وزاد هو معنقها ولكن غير كتنهد وكاتشوف انها مايمكتش تغير من وحدة بحالها …. بل الشقفة وصااافي لي تقدر تحس من جيتها لهاد الضحك لي دايرة فراسها …ونور مزيرة عل عينيها وقلبها كايتطحن من لداااخل بحالا الصخور كاتحكو ويتضاربو ويتسحقو فالداخل ديالها …..

جا صباح جديد يمحي ظلام ليلة طوييييلة دازت على نور لي ماقدرات تنعس شوية حتى صبح الحال …

تونار بدا كايحل عينو غير فبلاصتو يلاه شاف فالسقف مزيان هو يتفكر اش وقع الليلة الماضية …. حتى حس بشي حد فجنبو وضار بزربة بانتليه ليديا لي مخشية فيه مع الكنابي ضيق مخشية كاملة فجنبو …. بقى كايشوف فيها ويرمش !!!!!! هادي امتى جات ؟؟؟ شنو وقع !!! شنو لي داز ليه …. ضار براسو لجنب لاخور بانتليه نور على السرير باقا مربوطة وراسها طايح على كتفها ناعسة … وشد على راسو …. وكل مرة يتحنى يشوف فليديا ويحاول غير يفهم هادي كيفاش وصلات لعندوو ؟؟؟؟

وناض تكى كالس كايخربق فشعرو ويرمش كايحاول غير يقاد شي فكرة فراسو تالباب راه شادها كيفاش دخلات ؟؟؟ طل براسو على لبالكون وهو يعض على شفتو بمعنى التسلييييم.. وهبط عينيه عليها كايضور فراسو ويتسائل اشمن نوع دالبشر هي … وباغي غير يعرف واش طرات شي حرب بيناتهم وهو ناعس ؟ واش ملي دخلات كانت لوخرا فايقة !!!و باش عرفاتها معاه واش كاين شي إشارات وبراهين لي يتبتو ليه ان هاد السيدة كتنتمي للبشر ؟ … مية سؤال وسؤال غير هي لي غاتعطيه جوابو واخا ولا كايتوقع منها كولشي …. مابقاتش كتصدمو …، ناض بشوية كايحيد يدو تحتها … وعلا عليها الغطا غطاها .. وشاف عند نور وتنهد على هاد الحالة لي وصل ليها فايق وسط جوج عيالات ،

دخل للدوش … كمل روتينو وبدل حوايجو و مشا للحبل لي رابط به نور فسخو ليها تاطاحو يديها حداها …. وهز تجاكيتو وسوارتو وخرج كايطلب التسليم من سوق العيلات ومن ليديا الى بغات شي حاجة ….

اتجه ديريكت لبيت جدو … دق تاسمع اذن الممرضة حيت عارفها ناعسة لداخل مابغاش يدخل غير هاكاك … حلات ليه لباب حيت كان مسورت ليديا خلات فيها السوارت …. ودخل لقاها كتركب ليه السيروم وجدو فايق مخنزر …

تونار : صببباح الخييير ( كلس حداه باس على راسو وكايتحسس جبهتو ) شوية ليوم ؟؟

المامون : ضحكتو عليا ياااااك .. فين هي ليدياا ؟؟؟؟

تونار : ( ضار شاف لفين كانت ناعسة ورجع شاف فيه ) جيت انا ملي كنتي ناعس نوضتها مشات كانت ناعسة معدبة لهيه … وجيت عندك انا بلاصتها … واشنو هي حسن مني ولا كيفاش

المامون : ماباااااتتش هنا بلا متكدبو عليا

تونار : وا رااه فراشها آجدي نعل ااشيطان

الممرضة : والله الحاج تاباتت هنا … كنت باقا فايقة ملي طلعو ليها الفراش ونعسات ..راه غير كيف قالك سي تونار ناضت فصباح ( كتصاوب ليها الفاصمة على الابرة ) من صباح ونا كنحلف ليه لاشفتها بعيني باتت هنا ولا بغا يتيق

تونار : مزال مافطر !! وجدي ليه فطورو انا غانعطيه ليه ….

الممرضة : اه لقيتيني غانهبط دابا …

مشات وهو شاف عندو جدو شاد على يدو

تونار : ماعجبتينيش هاد صبح .. صفاريتي بزاف اجدي مكتبغيش تاكل مزيان …راه التغدية لي غاتشد فيك

المامون : ماضحكتوش عليا …. ؟؟؟

تونار : عمرني ضحكت عليك ؟؟؟

المامون : باتي مع نور ؟؟

تونار : هي باتت معايا …..

المامون : فبيتك ؟؟؟.

تونار : اييييه .. كيف طلبتي ..دابا مزيان غاتشد عليا هاد الموضوع ؟؟؟

المامون :ياك ماطرا تامشكل ؟؟؟

تونار : اش غايطرا .. راه غاتكون دابا فهمات بلي خصها تمشي طلب الطلاق …من الاحسن …

المامون : ( شاف للتحت )بيناتكم مهم انا الوعد لي عطيت وفيت بيه

تونار : اودي نتا غير رتاح …. كلها قاد يخرج راسو

المامون : وفين هي ليديا

تونار :راه قتليك نوضتها تمشي تنعس لهيه

الماموز : هاء ؟ ونوور ؟؟؟

تونار : راها معاها

المامون : شهاد التخربيق

تونار : وانسوووولك نتا اطدي لي بديتيه ملول ( رطع تبسم ) ماتفكرش فهادشي … هادوك راهم عيلات .. والعيالات اجدي ، خطاااار

المامون : ( جابليه الضحكة ) اودي الخطر بانليا كاين غير عندك اولدي أما نور درويشة

تونار : تاهي درويشة غير مايجبدها حد وصافي

الماموون : وفين هي دابا تجي تفطر معانا

تونار : وااقلنا ليك ناعسة مالك باغي تشاركني فالمراااة كتسول فيها كتر ما كنسول فيها انا !!!!!

الماموز ضحك باريااحية ورضا كبير و وعنقو عندو

المامون : شحال توحشت نشوفك فرحااان … شفتي ديما كنت زقوليك تزوج راه المراة بوحدها لي تقدر تزين ليك حياتك

تونار : حياتي زوينة بيك اجدي

المامون : جدك مدايمش اولدي …. جدك دار لي فجهدو يخلي ليك لي يعوضك غيابو … ويموت مرتاح

تونار : واشفتي الهضرة لي مكنحملش ( المامون غير ساكت ) نزلك شوية لتحت حسن ؟

المامون : لا لا اولدي ماقادش باغي غير ننعس مابقيت كنقد نكلس

تونار : ( كايدوز يدو على شعرو مقلق على حالتو لي زايدة وكتدهور ) وا كول مزيان باش تدير القوة فيك اجدي .. راك غاتولي مزيان ان شاء الله غير زيير معانا حتانتا

المامون : معاش غاتمشي لداك الندوة

تونار،: والله ماعرفت ، ماغانمشيش يمكن

المامون : ولا اولدي سير ، عيش حياتك طبيعي علاش كتعزل راسك على الناس باش حسن منك هادو لي مبينين وجههم ؟ يوصلو لحرف واحد من لي قاريه نتا ؟؟؟؟…..

تونار : ( تنهد يقلب الموضوع ) راه ضومونضيت ليك على شي فيتامينات غاتشربهم غايعاونوك شوية وداك سيروم ماتاخدوش …

الماموو : علاااااش اولدي كتعدب فراسك … واش لاجات الموت حا غانردوها !!

تونار : دابا علاش كتهضر عى الموت مافهمتش ؟ خلي عليا دابا الموت وفكر فصحتك ….

باقين كايهضرو حتى طلعات الممرضة ببلاطو ديال الفطور وتكاه باش يفطرو ..

اما نور فاقت ولقات راسها غير هي وليظيا فلبيت ويديها مطلوقين ، ناضت وكلسات على السير وبقات كاتشوف فيها وهي ناعسة وفعلا حسات بدبحة دالغيرة فقلبها من جيهتها ومن جيهة جمالها لي كايزيد يبرز وهي ناعسة وكتبان انها ماشي بنت عادية بالمرةشيء لي كايخليها تتأكد علاش هي من دون كاع لبنات لي بغاها واحد بحال تونار لي كانو يقولو مستحيل يتمكن يهضر مع شي واحد من غير جدو .. رجعات غمضات عينيها مزيرة عليهم مدة و ناضت خرجات مباشرة لبيتها .. غير دخلات لقات نورة وحكيمة تما كايمشيو ويجيو كايتسناو فيها … غير شافوها انهالوا علبيها بالاسئلة وهي بحالا مكتسمعهومش ،اتجهات لسريرها وتخشات ففراشها و غمضات عينيها وجهها بااااارد وشاااااحت بحال الموتى … وحكيمة نورة عياو يهضرو بحالا داوين مع الحيط فللخر فهمو راه قمعها كيف العادة وخرجو خلاوها تنعس، حيت غمضات عينيها غير هوما خرجو وهي تحلهم كاتشوف فالسقف بوجه شبه ميت ….

تونار فطّر جدو وكلس معاه مابغاش يفرقو حتى دقيقة والمامون كايعاود ليها دكرياتو وحكاياتو لقدااام … وتونار باغي يستغل كل ثانية وكل دقيقة مع جدو ويشبع منو …

ليديا فاقت من نعاس بشوية كتكسل على عادتها كيف فياق الاميرات كولشي عندها بالثقاااالة ، تكات فمكانها كتحك فعينيها وشافت لسرير مابانتش ليها لا نور لا تونار .. وناضت كتطر رجليها لدوش خدات دوش ولبسات بينوارها وكلسات على كرسي كتدهن فرجليها وترطبهم باللوشن تاسمعات دقة فالباب .. وموراها دخلات نعيمة هازة بلاطو ديالو الفطور

نعيمة : صبااح اخير الالة …. جيت قبيلة ولقيتك باقة ناعسة … هاهو فطورك

ليديا : ( عينيها على رجليها ) فين تونار

نعيمة : مع جدو الالة

ليديا : وضررتي لعزيزة

نعيمة : نااااري كون تشوفيها كيفاش خرجات منهنا بحال الموتى دازت حدايا وشافتنيش كاع ومشات لبيتها

ليديا حبسات على الدهين وكاتشوف غير قدامها حتى ابتسمات ورجعات كتكمل

ليديا : مزيان .. على الله هادي دير ليها شوية دالعقل حيت المرة الجاية الى باقي جبدوني مغانرحمش …

نعيمة : راه كايغيرو منك … كايشوفوك زوينة عليهم و راجلك كايبيغيك وهي ماديهاش فيها عليها كايموتو

ليديا : مامحتاجاش لهاد الهضرة أزين انا عارفة راسي شنو كانسوى (طلعات راسها كاتشوف فيها ) مكاينش فالدنيا لي مكايغيرش مني ..منك وجبد … ولكن واش غاتوصلوني ؟ لا … اذن تفرجو من بعيييد …. قهوتي معطرة ؟

نعيمة : ( شقلباتها ) ها ؟؟ اا .. ا اه .. كيف كاتبغيها

مشات تجيبها ليها وهي تحل لباب ودخل تونار … نعيمة غير شافتو حطات ليها الفنجال حداها وخرجات وليديا ماعلاتش الراس على رجليها لي كتدهن فيهم وهو شد لباب وزاد دخل

ليديا : ( عينيها على رجليها ) وااش عارف حجم الخطأ لي كادير ملي كتفيق قبل مني !!! ( طلعات فيه راسها ) ومكنصبحش على عينيك،!!

تونار: هبالك تاني !!

ليديا حطات اللوشن وهزات كاغيط مسحات يديها وقفات ماشية عندو

ليديا : علاش حليتي ليها لباب ؟؟

تونار : حيت دقات

ليديا : وعلاش دخلتيها ؟؟

تونار : حيت دخلات

ليديا : ( وصلات لعندو ) وعلاش دخلات ؟؟

تونار : حيت بغات ( يلاه غاتهضر هو يبوسها من فمها وقال بابتسامة ) صباااح النگير … ( على وزن صباح الخير )

ليديا : توحشتيه !!!

تونار : ( بضحكة شيطانية كتأسر القلوب ) حددي شكون فيهم … النگير ولا الخير ( غمزة )

ىيديا : مكاينش شي خير بلا نگير

تونار : ها نگير شفناه ( قربها لعندو معنقها ) وافين الخيير

ليديا : دخلتيه عندك اابارح

تونار،: ( بتصحيح ) ربطتو عندي لبارح

ليديا : مهم دخل

تونار : ( مصغر عينو ) باش عرفتيها نت … ومنين دخلتي ؟؟؟

ليديا : مكتندارش بيا

تونار : بنت ابليس

ليديا : ونتا هو بنفسو ….

تونار : وليتي دايرة الجواسيس ماعندي مايتسالك

ليديا : نخلي راجلي وضرتي فالبيت بلا ونيس !! ….

تونار : مكتزگااااايش ….

ليديا : على رزقي حتى الطيران نتعلمو وندير الجناح

تونار : هادشي نقزتي البالكونات ونت بلا جنحين … ونهار ديريهم فين غاتوصلي

ليديا : مكيهمش فين، مهم راه غانديك معايا ماتخافش …

تونار : ( حيد الشعر على عينيها باش يبانو ليه كتر لان هوما نقطتة قوتو وضعفو ) قرب يسالي هادشي..

ليديا : راه خصو يكون سالا … غير الى كان ماعندها نفس

تونار : ( هبط راسو لعندها كايشوف فيها وكايشوف انها هي الحاجة الوحيدة الزوبنة فحياتو دابا) منين خرجتي ليا !!!

ليديا : باش تمشي وتشكر داك لبلاصة ؟؟

تونار : هه !!

ليديا : جدك ماحسش !!

تونار : عرفت نرقعهاا ، گولي ليه نضتي فصباح ….

ليديا،: خصني حوايج

تونار،: ( طلع حاجبو ) باقي تاذكري لحوايج على فمك ماحشمتيش

ليديا : واش لي مهووس بالورود وشاف جردة مغايشمش،؟

تونار : بغيتي تخرجي انا نخرجك ماتلعبيش عليا

ليديا،: خرجتيني نتا ،!!!! كتخرجني من الليل لليل بحالا كنسرقو

تونار : واش عرفتي شنو هي تخرجي بوووحدك راه كنت غانتسطا كاع الافكار ال**دة جات لبالي،!! توضري توقع ليك شي حاجة ضربك طموبيل ….

ليديا تنهدات وبعدات عليه كضور فالبيت

ليديا : صدقات ماشي كيف بحال كنت كتخيل !! الدنيا على برا فشكل …. واش هي خايبة ولا غير انا لي كنت بوحدي ؟؟؟ يعني الدنيا كتعكس اش فينا …. لاكان معايا الونيس وشي حد عزيز غاتبان زوينة والى كنت بوحدي غاتبان خايبة !!! مملة ….( ضارت عندو وقربات ) بغيت نجربها معاك … نتأكد واش الدنيا لي قبيحة …. ولا نتا لي مكنتيش فيها ؟؟

تونار بقى غير كايرمش فيها ورجع تنهد كأنها كطلب منو يمزق روحو … اصعب حتجة بنسبة ليه عي يضور فالشارع مع الناس …. ورجع قلب الموضوع وجبدها من يدها لعندو …

تونار،: فطرتي !!

ليديا : ماعمرك غاتحقق ليا هاد الحلم ياك !!!

تونار : فطرتي !!

ليديا : جرب تخرج حتى نتا ، ربما حتى نتا بحالي مكانتش كتعجبك الدنيا حيت مكنتش معاك

تونار : فطرتي !!

ليديا : ( قلبات عينيها ملي شافت راسها كتخوي لما فرملة ورجعات شافت فيه ) مزااال

تونار : ( مد يدو لمجر دكوافوز كبير جبد العصابة دعينيها وبدا يربطهم ) اجي تفطري وخلي لسانك يرتاح شوية

ليديا : واااالاااا .. راه يلاه فايقة باقي تامافطررت

جرها من يديها لسرير … .

تونار : وا هانتي غاتفطري

ليديا : ( بعگز تابعاه ) تووونار

تونار : غانعيط ليها

ليديا : ( ضحكات ) موولات الريش ؟؟ ( البينوار لي كان لابسة نور فيه بعض الريش)

تونار،: ولايني مكتحشميش

لاحها على سرير وهي تتاضحك وغير تلاحت تحل بينوار وبانت هضبتها المنحنية لي كتخلي دماغو يوقف بادية من صدرها لخصرها .. الهضبة لي كل مايشوفها يفكر ينتحر من فوقها ، غير الفرق ان الانتحار على هاد الهضبة كايحيه من جديد ….

اشرف و نورة لتحت كايدرسو خطتهم ويحاولو انهم مايديرو تاحاجة تضيع ليهم بلاناتهم .. اما نور غير فبيتها وكاتشوف فالسقف كيف شي واحد خداو منو روحو …وامير فالبيت كايجمع حوايجو باش يمشي …

مايقارب ساعة عاد ليديا تطلق صراحها من بين احضان تونار ، ولاح عليها ايزار باش مايشوفش آثار الجروح لي كايخلي عليها من بعد كل علاقة …. وكيف العادة غير كايدخل للدوش هي كاتحيد العصابة …. بقات ناعسة غير فبالاصتها مسخسخة ومرة مرة تتضحك ، كل مرة تايفاجئها بالجديد فالفراش لي كايخليها تنسى كلشي .. كل مرة كايزيد يبين ليها حبو لي مكيعرفش يقولو بالكلام …. مكيعرفش ابدا بهضر على احاسيسو ولا يعترف بهم لنفسو ، رغم الالم ىي كاتحس بيه بسبب خشونة جسدو.. الى ان هرا هو المميز فعلاقتهم .. تونار بدل حوايجو وخدا حمامو الخاص ، وكلس على الحافة ديال البينوار وطول العلاقة وهضرة ليديا كاتطرق فراسو وااشغف لي كانت كتهضر به … كتيحس براسو اقل ما يمكن يقدم ليها بعد كل ما قدمات ليه من تحمل لألم خشونة جسدو بعد كل علاقة وماتتشكاش من حبها لي كتخليه يتأكد ان مكاينش فالدنيا لي يبغيه قدها … ورجع وقف قاد سعرو ولبس طربوش كحل رجعو للور ….

خرج لقاها باقا ناعسة فبلاصها حنيكاتها حميمرين بالقبلات …. ومبتسمة فيه …

تونار : نوضي تفطري دابا

ليديا : خليتي ليه منين يدوز ..

تونار تبسم وهز تيليفون شاف فيه تالقى راسو سهااا عقلو ماشي معاه كاع … ورجعو للجيب ومشى عندها كلس حداها كايدوز يدو عى شعرها وهي كاتشوف معاه

تونار : تايحرقووك !!

ليديا : امتى كانت شي حاجة منك كتحرقني ،؟؟

تونار : دنيا وحدة لي كاينة على برا … اشنو غايبدلها لاخرجنا بجوج

ليديا : ( كاتشوف فيه مطولة فرحانة لي فكر فكلامها ) مكنعرفو النتائج … حتى كانديرو التجارب ولا لا آدكتور !!!!

تونار : لي عارف انا … الدنيا مكتبدلش ، باغا تبدليلي حتى مفاهيمي الفزيائية !!!!!

ليديا،: ملي قدرت نخليك تفكر فهاد الامر نقدر نبدل اي حاجة

تونار : لقيت راسي باغي نجرب …..

ليديا : وعلاش هاد التنازل كامل زعما !!!! ( مصغرة عينيها )

تونار : ( دوز يدو على جسدها من فوق ليزار على داك الجروح ) كنضن راني مدين ليك باعتدار

ليديا : ( شدات على يدو) مابغيتش خرجة بهاد الطريقة … بغيت تخرجني ونتا لي باغي ….

تونار : هاد المرة على قبلي …. ( شد فيديها وشبك صبعانهم وهي كاتشوف فيديهم وتشوف فيه ) ماتورينيش الدنيا كيف دايرة ؟؟؟؟

ليديا : هههه …. جيبلي غير الحوايج

تونار : ( دوز يدو على وجهو ) آراسول لله الحوايج تاني !!!!!!

ليديا : هاد المرة سيفطلي غير داك العجب ديالك ، ضرتي التالتة

تونار ضحك ووقف كايشوف لتيل

تونار : هاديك لي تصلاح معاك

ليديا : زعما لي صنعتي روبوت كان صعيب عليك تصنعها راجل،!!!!! مافهمتش علاش انثى بالضبط

ابتسم لغيرتها لعوجة ومشا متجه لباب

تونار : كون كانت راجل مكناش غانتفاهمو انا وياها … هاهي غاتطلع عندك

ليديا : ( نايضة لاوية عليها ليزار ) تلحق عليا لدوش منها دير ليا الصابون لضهري هه

تونار تاحل لباب ورجع طل عليها بصوت مرح وضحيكة شقية باينة على عنيه

تونار،: ضروري تكون روبوت !!!

ليديا : ههههه سير سير …

ضحكات ودخلات لدوش وبحالا طلبات عليها يلاه شدات لباب لقاتها موراها واقفة كتقرا عليها فوائد الاستحمام

دخلات ليديا كتستحم فنفس الوقت كتشرح ليها ستيل لي بغات والروبوت كاتوريها .. مجات تكمل الدوش تاكانت الطلبية ترسلات لاقرب بوتيك … وخرجات تاخد فطورها بهدوء …

اما تونار كالس مع جدو لي هو كايعاود ليه وتونار بالو ساااااارح غير مع انتقامو وكاس دالقهوة فيديو … كيفكر امتى يقدر يسافر لرباط .. خايف يتحرك و جدو توقع ليه شي حاجة ويتغدر فيه …. وخايف يبقى كايتسنى حالة جدو تتحسن ولاخور يموت باااارد .. فامكانو انه يسيفط ليه شي حد يصفيها ليه فثانية وحدة … ولكن باغي هوو .. باغي هو لي يقتلو بيدو ويبرد النار لي شاعلة فيه …. بااغي يشوفو باغي يتلاقى بهاد الشخص لي وضع نهاية لننسل ديالو ولحياتو تاهو وقتلو على قيد الحياة …

رغم انه عيط للكلينيك لبارح وكايسول على حالتو وكايدفع ليهم مصاريف العلاج المتطور غير باش يبقى حي … تاجات الخادمة علماتو ان شي طلبية باسمو وصلات وآمرها تطلعها لعند ليديا …

بقى مع جدو نص ساعة لي غاتوجد راسها ولا حافض ليها التوقيت … وخرج لسيارة كايتسناها …

ليديا رشات بارفانها كلمسة اخيييرة .. بغوب تحت الركبتين بيج وهابطة بالصدايف تالحت .. وقبعة سوداء و قفازات و صاك طويل و صباط عالي … نزلات فدروج شادة بطراف صبعانها كأن الشباك غاياكل ليها يديها … دارت النظارات فعينيها ونزلات لجردة كتقلب بعينيها على طموبيلتو تتسناه حداها وهي تسمع تعييطة موراها وضارت..

وتونار كايشوف فيهم من بعيد ….

قرب امير لي كات هاز فاليزتو وتاهو كان خارج وهي كطلع معاه وتهبط …

امير : كنت كنتسناك تنزلي …. مجاتنيش نمشي بلا مانقوليك بسلامة

ليديا : ( كاتشوف ليه مع الفاليز ورجعات شافت فيه ) ودابا قلتيها ولا مزال ؟؟

امير : ههه واغير صبري مالك … سير واش غانتشافو مزال والا لا

ليديا : ولقائك فاش غايفيدني،!!

امير،: يالاطيف خاصك غير فيمن تبروفيطي …. مصلحجية مع راسك

ليديا : ( ربعات يديها ) كاينين جوج انواع دالناس فهاد دنيا … نوع لول المصلحيين ونوع تاني هوما ضحايا ديال اللولين .. فكنفضل نكون مصلحجية ومنكونش ضحية

امير : ياودي الضحية ديالك راه مزغرتة عليه مو .. ماعلينا … واخا مافيك مايتشرف به الواحد انا تشرفت بيك .. وكنتي شي حاجة سبيسيال دازت فحياتي غانبقى نعاود عليك لولادي .. كنتمنى ليك السعااادة من قلبي والله … تا نور حتى هي .. كنحسها غير نية لبارح بلا متحس كاع اعترفات ليا بلي تونار مامززوجش غير وحدة .. باش تعرفيها ماعندهاش مع تاحراميات … ماتحقديش عليها هاديك راها غير متبوعة

ليديا : من طبعي كنحقد على لي ضعاف اما لوخرين شاپو ليهم راهم كايحاربو ومكالسينش يندبو على زهرهم …

امير،: منين نت منيييين …

ليديا : من البلاصة لي مانتمناها لتاواحد يكبر فيها

امير : زعنا مايمكنش تخلي ليا رقمك !!! نبقاو على تواصل ؟ ..

غير قالها علا عينو موراها وليديا حساات بشي حد وقف وراها وضارت … لقاتو تونار بحال ظلها واقف موراها كايشوف فامير

تونار : ( بحدة ) كااين مانقضيو !!

امير،: ل .. لا .. لقيتني كانقول ليها غير، بسلامة …..

شاف معاهم وجر فاليزتو مشا وتونار متبعو بعينو وليديا ضارت عندو

ليديا : حساابتني باقي منزلتي

تونار،: ياكما قاطعتكم

ليدية: ( مصغرة عينيها فيه ) صبر صبر …. نتا تاتغير ولا جاب ليا الله ؟؟؟؟

مردش عليها واكتفى بتخنزيرة ومشا لطموبيل وهي تبعاتو كضحك وضور فراسها وركبات كدير حزام الامان وتهضر معاه

ليديا : قول مغانحلش ليك لباب وصافي، ماتبقاش كل مرة دير ليا السبة بشي حاجة …

ماردش عليها كاع وتاهي فطريق ولا كايعجبها غير تشوف وتزيد تتعرف على هاد العالم … الصمت فطموبيل وهادي هي عادتو واخا كايتقلق مكيبان عليه والو .. كايبقى جامد الملامح وقليل فين كاينفاعل رغم انه كايتحرق من داخل ، دخلو لمدينة وهي عينيها كايتحلو مخرجة يديها من زاج كأنها كتلامس الهواء لي دازو فيه الناس … غادي بيها فالمنعطفات ديال مدينة الحسيمة … تاوصل لكورنيش ديال صباديا وحبس طموبيل كان شبه خاوي لانه ماشي الصيف باش يعمر … اابحر كايبان صااااافي وهادئ … وليديا غير حبسات طموبيل نزلات بززربة تمشات حتى للحيط للقصير لي كايطل على لبحر .. وهو شد الطموبيل وتبعها كان الريييح وشعرها كايديه معاه… وعينيها كايلمعو ولات كل ماتشوف البحر كاتفرح كانها كاتشوفو لاول مرة ووهو وقف حداها داير يدو فجيابو وعاطين بظهرهم للمارة لي كتمشى موراهم فالكورنيش اغلبية ناس بسورفيت كايديرو لاماراش و عيالات جارين بوسيت دولادهم وبعض العشاق ….

تونار كايتتفس بعمق هاد النسيم واخا هو ولد المنطقة وكان كايهبط لمغرب عمرو جا لهنا او تجرأ انه يخرج لبلاصة فيها الناس …وليديا غير ساكتة وكاتشوف فالبحر مبتسمة ….

ليديا : كيف كايبان ليك لبحر ليوم !!!!

تونار : مبدل على كيف كنت نشوفو من بعيد …

ليديا : ( ضارت عندو ) شفتي علاش قتليك ملي كاتمشي لشي بلاصة مع شي حد ماشي هي بوحدك

تونار : واخا هاكاك مامرتاحش …

ليديا : خاصك غير تولف واخا صراحة ماباغاش انا تولف الامر

تونار : علاش ؟

ليديا: حيت كانشوفك وحاسة فالمستقبل غاتلقى الجلد … مغاتبقاش هاكا وغاتولي تخرج عادي بين ناس ماتتحتاجش تولف على نظراتهم لغريبة ليك ولا حتى توقف عاطيهم بالظهر

تونار : كنحس !! مافهمتش علاش اغلبيتكم لي جا يهضر يقول كنحس … فين المنطق؟؟؟

ليديا : علاش نتا كتكدب الاحاسيس!!!

تونار : تخرربييق

ليديا : داكشي لي وقفك مورايا ملي كنت كنهضر مع امير ماشي احساس !!!!! ماشي غيرة هاديك لي راك حسيتي بيها !!!! تكدبها تاهي

تونار : هاد الموضوع لصالحك ماخصوش يتجبد مدام انا سكت خاصك تحمدي الله …..وسمية داك خينا لمصلحتك ماتعاوديش تخرجيها على فمك

ليديا رجعات كاتشوف قدامها ضربات الطم ، رغم انها مكتخاف من والو … الى ان عصبيتو مكتحملهاش كتحسها كتغير ليها صفو الاجواء، كاتلقى راحتها كتر ملي كايكون هادئ … وهي من نهار لقات امير فالدار وهي حارصة باش مايخلق ليها الامر حتى مشكل مع تونار ….

بقات واقفة كايشوفو فالبحر حتى طلعات فوق داك الحيط القصييير وهو مراقبها وحلات يديها بحال شي عصفور و طلعات راسها للسما فرحااانة ..

ليديا : كنننحس بلي راني فشي حلم من داك الاحلام لي كنت كنحلم بيهم فوق سريري ….

تونار،: عنداااك طيحي

ليديا : ( ضارت عندو ضاحكة وهو عينيها الضاحكين كاينسيوه فكولشي ) انا مكنطييحش … طحت مرة وحدة ومعاودتش نضت … هي نهار طحت فعينيييك

تونار فقط مبتسم ومدات ليه يديها شدها وبقاو كايتمشاو وهي على داك الحيط كتلعب كيف شي بنت صغييرة … و تونار ماشي ومهبط راسو مكيحملش يشوف فيه شي حد … وليديا بالعاني كتهضر معاه وتثرثر باش تنسيه فنظرات المارة ….

تمشاااو مدة طوييييييلة حتى وصلو لنهاية الكورنيش ورجعو لطموبيل، بالحديث محسوش بالطريق. ….واغلبية الحديث ليديا لي كتهضر هو طبعو انه كايجاوب على قد سؤال او مايجاوبش كاع …

تاجهو لواحد للمكان اسمو،” بوكيدان ” كاين مابين الحسيمة و امزورن معروووف بالحوت … رغم انها بغات تنزل ، احترمات رغبتو حيت شافتو تنازل تاهو على قبلها ودار لي فجهدو و غير انه خرج لبرا راه كافي يبين ليها بلي باغي يتغير وكل مرة تخليه يزعم على حاجة … بقى غير فطموليل واشار لواحد بيدو طلب منو اش بغا وجابو ليه لطموبيل و مشاو لبلاصة حدا البحر فطريق الساحي … وخرجو تغداو تما وبقات ناعسة على كتفو تاااغبرااات الشمس وغطسات وسط البحر تاركة موراها جو شاااااعري لا مثيل له ، كان الهدوووء حتى كسرو تونار ….

تونار : لقيت جدك …

ايديا : ( علات راسها فيه ) فين هوو ؟؟؟؟ مشيتي عندو

تونار : ( كايهضر بهدووء كايشوف فالبحر ) مزال .. راه فالرباط ، خفت نمشي وتوقع شي حاجة لجدي ومنحضرش ليه …. غدرني فعائلتي مابغيتش نتغدر حتى فجدي بسبابو

ليديا : واش كايدير هو فالرباااط ؟؟؟

تونار : مريض … ( بضحكة مستهزأة ) سرطان فمراحلو الاخيرة

ليديا : شنوووو !!!!! ( تونار ضار شاف فيها ) كيفاش ؟؟؟؟؟ هاكا بهاد اابسااااطة !!!!!

تونار : تماما ، هدا هو السؤال لي طرحت حتى انا …. ومابغيتوش يموت بهاد البساطة …( بعنين بحال نار وزير على سنانو ) بغيتو يموت كايترجاني نرحمو ..

ليديا : يلااااه نمشيو اش باااقي كتسنى،؟؟؟؟

تونتر،: راه قتليك شنو شادني … ولكن الى صبح جدي مزيان راه غدا غانمشي …

ليديا : غاااانمشيو … ماشي غااااتمشي

تونار : فين غاتمشي نت

ليديا : حتى انا عندي بزااااف مانقول ليه … تيقني اكبر عداب ليه هو يموت على وجهي انا …. وجه اكتر وحدة كايكرها فهاد الدنيا

تونار : ( رجع شاف قدامو ) گلسي للارض

ليديا : رااه ماشي غير نتا لي آذاك .. والله وتمشي بلا بيااا مانسمح ليك

تونار : ( ناض كاينفض سروالو من الرملة ومدلها يدو ) نوضي مشى الحال تعطلت على جدي

ليديا شدات فيه وناضت كتنفض حوايجها … وهو هز داكشي لي كلاو فيه مشا لاحو فواحد الپوبيل و تاجهو لطموبيل حل ليها ركبات … وديمارا تاهو وهي دورات ليه المرايا تاني كتقاد فراسها .. هو يضروها ليها تاخنزرات فيه .. واشار ليها تهبط الواقية دالشمس

تونار: راها عندك تما خلي هادي هنا كانشوف بها الطريق

غير هبطاتها هي تبان ليها مراية وحلات عنيها بفرحة

ليديا : ياااااااي وعلاش ماورتيهاليش ..( بقات كتصايب فلافرونش ديالها )

تونار : غادي نمشي نشوف جدي وغادي نخرج … عندي ندوة

ليديا : ( كتصايب عكرها وتهضر ) وهاد الندوة مغانكونش فيها انا

تونار : نو …

ليديا : ( تنهدات )ممم … اساسا لبلاصة لي غاتعطي فيها وقت لحاجة اخرى من غيري بلا منكون فيها حسن .. لامر مكايليقش بيا نمشي لشي بلاصة ماشيين ليها ماشي على قبلي ….

تونار : أجلي هبالك تالمنبعد وسمعي ليا ….ماتخرجيش من البيت تااانرجع …

ليديا : اصلا نمشي فين مامشيت كنرجع لحياتي الطبيعية … الحبس !! …

تونار : دار مخلطة ونت عارفاني مكنتيقش فهادوك وحتى فيك … كلسي فالبيت تانجي …

وصلو للدار ونزلو هي طلعات لبيتها وهو داز عند جدو … يلاه كتحيد القفازات ديالها وهي تسمع دقة و موراها داخلات نعيمة كتسلت متوترة وبااينة حامية بشي خبار

ليديا : اش كاين !!!

نعيمة : ناااااااري يالالة شنووو سمعت

ليديا : شنو سمعتي !!!!!

نعيمة : شتي داك الموصيبة دبنت حكيمة … هي وداك خالها سمعتهم فالجردة قالك هاد الليلة فاش غايمشي سي تونار لندوة ، هداك خالها غايخلي حتى يشوفوه دخل بطموبليتو وتصوني عليه تعلمو فتيليفون ويجي عندك يضور بييك هنا فالبييت باش يجي يشوفكم وتتبت عليك الخياااانة …

ليديا بقات غير فبلاصتها كترمش فلخر بدات كاتوسع الابتسامة على فمها شوية بشوية تاولات ضحكة واااااسعة كضحك بحالا سمعت شي نكتة …. ومشات گلسات كضحك وتمسح تحت عينيها

ليديا : هههههههه ضحكت حتى نزلو ليا دموع الله يعطيك شي خير …. عاااودي شنو قلتي هههههه

نعيمة : حق مولاااااانا تاهادشي لي سمعت

ليديا : ههههه … صاافي هدا جهدهم ؟؟ ههههه

نعيمة : اويلي نت هادشي جاك ساااااهل ؟؟؟؟

ليديا : هههههه اووووف كرشي ضرااااتني …. والله تاكايبقاو فيا بحال هاد الناس ههه ماعندهم تاحاجة فهاد الدنيا حتى من الدماغ لي يفكرو بيه بحال الناس معندهومش هههه ( بدات كتجمع الضحكة وحافضاات غير على الابتسامة ) واخا خليه يجي عندي …نيست حتى أنا غانحتاج الوناسة مدااام تونار مغايكونش

نعيمة : نعاااااام،؟؟؟؟؟ اويلي عنداك تمشي طيحي ليهم فالشبكة راه هادشي لي بغاااو

ليديا : ( ناضت كضحك ) سيري سيري لشغاااالك فييين غانطيح آلبنى ، واش لي باغي يصيد كايمشي يصيد بشبكة متقووبة !! ( جات داخلة لدوش وهي ترجع ) اااه .. جيبليا النمرة ديال ضرتي العزيزة دااابا متعطليش

نعيمة : وعلاش !!!

ليديا : نسول فيها كيف بقات ..مانديروش الصواب ؟!!!!

ابتسمات ليها ابتسامة صفرة ودخلات لدوش و نعيمة مفاهمة والو لي متأكدة منو انها شي حاجة كدور ليها فالراس ونعمية هبطات لكارني لي فيه ارقام موالين الدار ديال المغرب .. وقيدات الرقم وطلعات عطاتو ليديا لي لقاتها كتبدل …. لبسات كسيوة قصيرة حرير وبينوار ديالها فالموڤ طويل حتى لتحت …. وكلسات كاتمشط شعرها غير سمعات لباب كتحل خبات الورقة لي فيها النمرة دغيا فالمجر … دخل تونار وباينة فيه مقلق … مدواتش معاه بقات غير متبعاه بعينيها كاتقول مالو هذا !!؛ هز حوايجو ودخل لدوش يبدل لان ماعندهمش دريسينغ تما لي يبدل فراحتو … وهي غير دخل مشات كتجري لفين حط تيليفون وسوارت … وشعلات تيليفونو بزربة عين فتيل وعين عليه … ومشات لبلاصة دالميساجات وركبات الرقم دنور وهي عاضة على شفتها كضحك بشيطانية كتبات ليها رسااالة ورجعات مسحاتها وحظرات الرقم باش متعاودش تعيط ليه ولا ترسل ليه شي حاجة … ومسحات كولشي ورجعات تمشط شعرها ضاحكة كتلعب بحجبانها ولسانها كيف شي افعى … حتى بان ليها خارج وريحة بارفانو ضرباتها لنيفها .. بسروال دجين اسود ومونطو انيييييق اسود قصر .. وصباط طالع … عضات على جنب شفايفها وهي كاتوشف معاه كايضور بالكاريزما ديالو و الثقاالة ديالو وشخصيتو لي مامنهاش زوج … كايقلب فليكاشكول وناضت عندو كتتغزل به بعينيها و عنقاتو من لووور

ليديا : گلس معااايااااا

تونار : ( هز كاشكول وضار عندها ) مغانعتطلش

ليديا : ( حيداتو من يديه كاديرو ليه ) اش هااااد الاناقة كاملة ممم !! …. تكايس راه قلبي هشيش

تونار : ( هبط باسها ففمها ) انا مشيت … ماتنعسيش تسنايني

ليدييا : على انا نقد يديني نعاس ملي شفت هاد الاناقة ( كاطلعو وتهبطو باغراء)

تونار : ( ابتسم ) غاتخلصيييها

ليديا : ( كتقلب ليه كتر ) بغييييت نخلض … عنداااك تعطططل عليا ( باستو ) غااانتوووحشك

تونار : ( تكا على لبيرو معنقها ) واشنو دابا كتقلبي عليا مانمشييش ؟

ليديا : لاااا سير … ( كتقاد ليه الكول ديالو ) غير هو .. اجي بكري ( غمزاتو ) …

تونار : ( ضحك ليها وبعد متجه كايجمع وراقو ) غانقوليهم يطلعو ليك تعشاي ومتخرجيش من البيت

ليديا : قوليا بعدا مالك جييتي مقلق ؟؟ واش جدك مريض بزاف

تونار : ( تغيرو ملامحو ) حالتو مابقاتش عاجباني …. وليت مسعد لشي خبار فاي لحظة …

ليديا : ( حزنو تعابيرها لاجلو ) ربي يكون معاه ….

رجع تنهد ومشا هز تيليفونو وسوارتو ووراقو … ووصل تالباب ضار عطاها بوسة فالهوا ومشا … وهي مشات لبالكون حاضيااااه تااامشات طموبيل ورجعات دخلات كتحك فيديها وتضحك

ليديا : اوا دتبا اجي لعبو شي شووووووية ههه ندوزو وقيتة بينما جااا مول عينيا….. الواحد مايقنطش نعاهم تباركالله ( كلسات على الفوطوي رجل على رجل ) قلتها ليها من قبل الى مابعداتش عليا غادي تخلص … وهاهي غاتخلص …( ضحكة شريرة كدوز لساتها على شفايفها ……)

نور دوزات نهار غير فبيتها مكتأبة ونازل عليها الضيم تفكيرها كولو غير فاليلة الماضية كاتحاول تستوعب وتعرف راسها اشمن طريق غادية فيها …

كانت طلعو ليها تتعشى والبلاطو محطوط على الفراش كتلعب بمعلقتها حتى سمعات ميساج فتيليفونها حلاتو غير شافت شكون المرسل طاحت المعلقة من يديها وماحدها كاتقراه ماحد عينيها كايتوسعو

تونار : فكرت مزيان وبغيت نعطيك فرصة … غانرجع من الندوة ونجي لعندك … هبطي لبيت ديال الضياف مابغيتش ليديا تعرف ولا حتى واحد ، وجدي راسك هاد ليلة بغيت فعلا تكوني مراتي …

نور تحلو عينيها وكتسرط فريقها بلا ماتحس ناضت واقفة وكتمشي وتحي فالبيت …. ورجعات ضارت للمراية كاتشوف فراسها وتكلم راسها

نور : كيفاش ؟؟؟؟؟ مافهماش !!!و .. ولكن ؟؟؟؟ …

رجعلات كلسات على سرير كاتشوف قدامها وترمش … هاد الميساج ابدا مكيوافقش شروط المنطقية !!!ولكن حقيقي … واش كل مافكرات فيه وتشجعات ليه هاد النهار باش تنساه وتعيش حياتها غليخربو ليها،؟ واش تعطي لراسها فرص تخرى قبل ماتيأس !!!! واش فعلا باقي أمل !!!!!

الابتسامة تشققات على فمها .. وناضت هزات التيل كاتعاود تقرا فداك المساج تاولات كتبووس فيه بالفرحة …ومشات كتجري لبلاكارها حلاتو …. وهي كتخيل اش غايقول ليها ملي يجي لعندها حتى تحلات عليها لباب ودخلات عندها نورة لي استغربات فاش شافتها واقف وضاحكة،!!!

نورة : سبحان لي بيتها فشان وصبحها فشان ؟؟؟ كون مكنت نعرفك ختي كون قلت تشيرتي ؟؟؟؟

نور : ( كتقيس عليها بعض الكسيوات ضاحكة ) شنو حسن … هادي ولاا هااادي

نورة قريات عندها حاطة يديها على جبهتها

نورة : واش نتي شوية لاباااس !!!

نور : لااباس .. ونت !!!!

نورة : لا لا انعيك لمي ودادا ايطو يجيبو داك المبيخرة حسن … نت مااااعجبتنيش

نور بقات ضور بعينيها واش تقولها ليها فلخر تفكرات انه منعها ورجعات ضارت كتقيس عليها ونورة بلاكة كاتشوف فيها

نورة : وراه هاكا كايبدا الحمااق !!!

نور : ( ضارت عندها ) اييه حمقة وحماقي عاجبني غا عطيني التييييقار ……

نورة :دابا انا قوليلي غير شنو طرا لبارح والله ينعل لي مايعطيك التيقار

نور : خصوووصيااااتنا انا وراجلي مكنعاودهمش

نورة : نعااام نعاااام !!!!!! راجلك لي صبحك بحال البولة المحرروقة ؟؟؟؟ … تي قوليلي اش واقع ولا نعيط لمي

نور تأففات بغضب وبقات دافعها لباب تاخرجاتها

نور: من بعد منبعد ومنعاود ليييك

دفعاتها ونور كتغوت وتدق وهي سورتات لباب وليديا لي كانت مور الحيط كضحك و كتومي لنعيمة تسكت …. قاطعين الحس فالظلام حتى مشااات نورة وهي طل نعيمة من واحد السرجم ورجعات عنظها غمزاتها …. بمعنى هدا هو الوقت المناااسب

انا نور كتوجظ فراسها وخايفة يطرا تاني شي مشكل يضيع هاد ليلة ورجعات تبسمات بعد مكانو ملامحها دبلو ….

اما اشرف كان فجردة كايكمي وشاد تيل كاتيفرج فلايف دواحد خيتي تاسمع شي حد جاي عندو هو ينقص للتيل … ملي شاف شكون جاااي عندو وووسع عينيه وطاح ليه الجوان من يديه وحل فمو …. رجلات حفيااانين وخلخال كيف العادة مزينهم … ومشيتها لي كيف الحووورية …. وهازة بينوارها بيدها على طريقة الامييرات وضااااحكة فوجهو … وهو تلف ليه الشغل غير مطرطق عييينيه !!!!! هادي قاصداه ولا عينيه غالطين ولا لكتامية لي مقضي پيرمي ….معارفش لشرف ان اقوى كتامية واخطرهم هي لي جاية عندو دابا

اشرف تزعزع ليه الدماغ وهو كايشوف هاد كتلة الانوثة جاية لعندو وعطرها مدوخو وبياضيها عماه …. تاوقفات حداه

ليديا : ( بصوت قمة فالانوثة ) گالس بوحدك ماعندك وناااااسة !!!!

اشرف : ( حاال فمو كي الضبع ) هااا ؛!!!!!!

ليديا : ( طلقات ضحيكة قمة فالاغراء وعضات على شفتها ) شفتك من لبالكون …. مهموم ووحداني …قلت تكون محتاااجة وناسة …

اشرف حال فمو تاشوية عاد جمع راسو ولاح الجوان زطم عليه وضحك من ودنيه

اشرف : ايييه اييه مكرهناهاش ….

ليديا : .. اوا زعم

اشرف : ك … كيفاش

ليديا : عينيك عليا .. وزعامة فين آ هي !!!!!

اشرف : ( ضحك ضحكة عبيطة وبدا يحك تحت فمو ) ودابا ..دابا متأكدة زعما من اش كاتقولي

ليديا : ( كاتقرب عندو ) نتا راجل وانا مرا … نتا محتاج ونا محتاجة…. ( غمزة ) بيت ضياف غايكون خاوي هاد ليلة ….. شبالك !!!!!

اشرف : ( بصدمة جلس مامتيقيش الى جات عندو برجليها ) ا .. ايه لا…. ا اه

ليديا : دابا آه ولا لا !!

اشرف : اايييه اييييه …. ( رجع وقف ) واش متأكدة

ليديا : على كلعبو هنا ( كطلعو وتهبطو ) شفتك عجبتيني … شوفننطي تانتا من داخل اش باغا .. وغانعجبك

اشرف : ( جا يقرب ليها وهي بعدات وجها غير بالفن ) هاد الليلة هاااااد الليلة !!!!

ليديا : خير البر عااااجله

اشرف : ( كايحك فراسو ويضحك ) واش فخبارك كتت جاي عندك هاد ليلة

ليديا : اووووه بصاااح !!!! مكانتش فخباري

اشرف : سبحان الله بحالا قريتني

ليديا : (طلقات ضحكتها الشيطانة ) متخافش من هاد ناحية … نقراك ونفهمك ونعرضك غير كون درس مفيد ليا ومتساليني غير عشرين على عشرين … عنداك تقولها لشي حد مابغيت شوهة … ( غمزاتو ) نتلاقاو فبيت الضياف مور لعشا …..

خلاتو ومشات وهو باقي حاااال فمووو مامستوعبش وكل مرة يضحك كي شي هبيل ….. مع دخلات مع لقات نعيمة كضحك كانت حااضية ليها …

نعيمة : نااااااري خطييييرة الالة ، هي غانحضرو شي فيلم هاد ليلة ؟

ليديا : تبعيني

طلعات ليديا فدروج ونعيمة موراها تاوقفو قدااام لباب دبيت نور ونعيمة كتسائل هادي اش بغات تاسمعاتها …

ليديا : الو !!! تونار …( نور كانت مع لمراية سمعاتها وهي تقرب لباب كاتسنط ) لقيتني غادا عند جدك…. ماااتووحشتينيش انا توووحشتك واخا هملتيتي هاد نهار ماعرفتك فين صابح كتفكر ..( نعيمة مطرطقة عينيها وكتحفظ دروسها لي ولات طلب تسليم من نهار،عرفاات ليديا ) غاتعطل بزاف؟؟؟؟ ماااااتباتش هنا،؟؟؟ عللى فين اتبات،؟؟؟؟ اااااه … اوا صافي ماشي مشكل خدمتك هي لولا … تالصباح ان شاء الله …..

ابتسمات ليديا باستهزاء وشيطانية وهي كاتشوف ضل دالرجلين تحت الباب

و مشات للبيت ديالها و نعيمة تابعها اما نوور طارت بالفرحة ، عاد تأكدات بلي بصح باغي يبات معاها وصدر ليديا خصوصا فاش سمعاتها قالت هملتيني ….ومشااا تكمل تسكادها ضاحكة لي لحياة عطاتها فرصة اخرى … .وليديا فلبيت ونعيمة حداها كطوي ليها حوايجها فبلاكار … وهي كاتمشي وتجي وتفرك فيديييها خايفة يجي تونار فشي وقت ماهواش يضيع ليها لبلان…..

نعيمة : هانا ساليت الالة .. انهبط لتحت نجيب ليك لعصير لي بغيتي ونمشي نحضيهم ليك

شدات لبلاكار ومشات وليديا مرة تضحك مرة تتحمس …..ونعيمة جابت ليها عصير و رجعات هبطات حاضاهم لييها … تابانت ليها نور كتسلت كي شي تعريجة مزوقة لبيت ضياف ولوخرين كايتعشاو … تاسلاو وهوما يخرجو اشرف و حكيمة ونورة حدا لباب ونعيمة تابعاهم كتسنط

اشرف : وتاااااانحلف لييييكم بالله تاهي لي جات عندي واش هادشي فيه لكدوب

نورة : شفتي شفتي اش قتليكم ….. راها مكتسوااااش ( ضحكات ) ربي ملي كايبغي يفضح شي واحد …. هااااهي جات برجليها …. هناتنا من الدنوب …

اشرف : انا اصصصدمت ملي جات عندي واااتصرفقت اخووتي .. واه واه واه شحال زاعمة وااااخاطيييرة … لي كنا خايفين منو صدق هو طالب علينا …. واشووف دنيا

حكيمة : ولااااااايني جلاخة هادي …. اويلي حي شنو مدخل علينا للعائلة …غايصدق هادشي ونوصلها للحاج سخووونة تشوفو لامحط ليه السخط والرضى

نورة : حمدتك ياااارربي وشكرتك غانتهناو منها … اللله دابااااا عاد تهنيت كنت خاايفة ماتبغيش صدقات البييضة حامية فيها

اشرف : باش تعرفو خالكم عندو مااااايقول ووبراكتوو

حكيمة : ودابا غاتمشي عندها ولا كيفاش ؟؟

نورة : واالااااا تسنى تايجي تونار .. باش مع الدخلة مع لفضييييحة…نرويوها اللعب معانا بشحال طالع

حكيمة : وباش غايعرفها هو فبيت ضياف مع اشرف ؟؟؟

نورة : حنا نقولوها ليه …. اش كانديرو حنا هاء ؟

حكيمة : اححّي اش غانقولو ليه، دوز تشوف مراتك

نورة،: وااالااا … نقولو ليه حقا دوز هز معانا شي حاجة ثقيلة ….

حكيمة : وعلى الله هادشي يصدق داك شيطانة تمشي دير شي حاجة وتخرج منها …. سهلتيها غير بالعنين كتاكل الله يستر

اشرف،: وعندااااك الحق اختي … حق مولانا حتى كدوخ لواحد

نزرة : هاد المرة الشغل مغيز وهي لي طالبة عليها …. تفوووو كتت عارفاها من داك النوع ( شافت مع خالها ) وااسير سير وجد راسك سيرر ….. حنا انبقاو فجردة نتسناوه رااه عيطليه جدو قبيلة قاليه الحداش نكون فالدار …راه قربات لحدااش … ياااااربي يااااربي هاد ليلة نتهناو منها ويكركبها لللزنقة ياااربي .. وبحلاااااوتك ياخالي نتهلاو ليك ..

اشرف : ماتخمميش .. غاقولولي شمن زنقة غاتكركبوها وصافي ….

نورة : وباااز بغيت نعرف غا اش عاجبكم فيها

اشرف : قولي اشنو فيها مكيعجبش ….

حكيمة،: وانوض احنيني نوض ونتا سحتي …يخ لي فيه شي طبيعة ما يبيعا ….

الهضرة لي ضارت طلعاتها نعيمة سخونة لليديا حطاتها ليها وليديا كضحك عليهم وعلى كلاخهم ….وداييرة رجل على رجل فالكرسي فالبالكون كتشرب من عصيرها بهدووووء ..

اما نور فالبيت كل مرة تطل من السرجم واش جا وقلبها كايرفرف بالفرحة والخلعة والتوتر..

و اشرف فأتم الاستعداد تڤيپي عليه نورة باش يدخل للبيت …

ونورة وحكيمة فجدرة كالسين … وليديا كطل عليهم ملفوق ضاحكة عليهم كتر ماضاحكة عليهم الدنيا وضارت عند نعيمة

ليديا : ياك الڤيزيبل ديال الضو ديال داك لبيت عرفتيه !!

نعيمة : اااه قبيبة ملي قلتيها ليا بقيت نجرب تاالقيتو …. علمتو بصباغة ددضفار

ليديا : غير يجي داك روميو داخل عند ضرتي العزيزة للبيت طفيه

نعيمة : حااااضر الالة …انا نزل لتحت باش نحضيهم

نزلات نعيمة وليديا فلبالكون تاشافت الفار ديال طموبيلتو ضرب فالباب و دخل و هي تزيد تووسع ضحكتهها ولاقييس تماما مرسومة فملامحها بأدق تعابيرها متحمسة للفيلم دهاد لليلة تتشفى فيهم ….

وصل تونار ونزل من طموبيل طالع لبيتو وهي تللقاه حكيمة اما نورة بعيدة كطل وجبدات تيل صونات وقطعات على اشرف

حكيمة : اوليدي جابك الله .. خويا ماعرفتو فين هو يلاه حل لينا غالبلاكار فبيت ضياف نجبدو الموانط حلف لابغا يتحل …. عافا اوليدي لامكنتيش عيان

تونار مجاوبهاش قليل فين كايهضر معاهم او يمكن منعدم لكلام ، وزاد قدامها وهي تابعاه كي البطة هي ونورة لي لحقات عليهم تتشفى وهو مور ظهرو يتخباو خمسة بمشيتو المتجردة …

اما اشرف غير ڤيپات عليه نورة مشا للبيت يلاه حط يدو على لبواني نعيمة هبطات الفيزيبل ديال الضو … ونور بقات تشوف علاش تقطع الضو … وهي تسمع لباب تحلات وعضات على شفتها قالت هو طفاه باش ماتشوفش تشوهاتو يمكن … اما اشرف بقا يضحك قال موجدة ليه شي حاجة مفاجأة …. وكايمسع النفس والحس فالبيت ودخل …

نورة حيدات داك البينوار لاحتوو باش غير يقيسها يقيس الجلد وبقات بكسيوة رقيييييقة شفايفة … وليديا نازلة فدروج بشوية عليها تاتشفى كاتشوف فتونار متجه لداك لبيت لي كاين فالطابق لتحت …. يلاه حل لباب ونعيمة علات الڤيزيبل تشعل الضو.. وحل عليهم لقا اشرف قرب يقيس نور وونور شبه عريااااانة .. وحكيمة غوتااااات و نورة حالة فمها بصددمة !!!!! وتونار واااقف كايرمش باستغراب اش هادشي !!!! وهوما يسمعو شهقة موراهم وضارو

ليديا : اووووووه ماي كوووود ؟؟؟؟؟؟ زنة المحاااارم عندنا فالدار ؟؟؟؟؟ نووووو…. ضررررتي العزيزة لي مزوجة وعلى ذمة رااااجل مع خاااالها،؟؟؟ ( شدات على قلبها ) اووووه مايكوووود ……اعود بالله من شيطان الرجيم الله منهادا منكااااار ( شدات لنعيمة عينيها ) ماتشوفيش المنكر ويلي ويلي ويلي …

نورة سنانها كايتحكو بالاعصاب والشمتة بلا متحس غوتااات

نورة : نننتي يااااا اللفعة نت موووولاتها

يلاه بغات تلاح عليها وليديا مشات كتجري تخبعات ورا ظهر تونار

ليديا : لههههلا ينزل علينا شي باطل … كاتشوفو بعيينكم لبنت وخااالها فلبيييييت لا حشمة لا حياااا…لا هو حشم على عاراض ختو … لا هي حشمات على عراضها لي بالرااجل والضرة يااا حسرة ….

تونار ضار بعينيه ونور كتتبكي زكادير براسها لا واشرف غير حال فمو كايطلب التسليم وحكيمة سخفات وتونار غير كايرمش فهاد المسرحية مزال مافاهمش اصلا اش وااقع،!!! مال هادو ؟؟؟

نورة،: مااااامااا …. مامااااا ..( شافت عند نعيمة ) جييييبي الما كاتشوووفي فيا

نعيمة : ( علات راسها ) انا كنخدم غير مع مادام ليييديا

نورة علات عينيها محقدااااااهم فليديا وليديا ضحكة الشر على وجهها … وتونار عوج فمو على هاد المهزلة !! ورجع طلع بهدووء وليديا حبسات الضحكة وضارت عند نور بمعنى ماتسووووق غير ليك ابنتي ….كايزيد يبرد ليها جنون بهاد البرود لي كايتعامل به معاهم ….

ليديا : (كطل على حكيمة ) اووووه سخفاااااات !!!! مسكيييييينة …. (وقفات كاتشوف فيهم ) مرة اخرى ملي تعاودو تحطو ليا شب مصيدة قالطرييق. . حضيييو لاتزطمووو فيها ( ضارت عند نورر لي كلها كاتنخصص ) تكبرو وتنسااااو ….( شافت فالخال وغمزاتو تاگلس على سرير مفشلة ليه ركابي)

نورة : ( بالغوات ) ببببببببببببعدي منا … ياالشييييطاااااانة …..يااااااالللفععععة

يلاه كاتغوت هوما يسمعو ملفوق طل عليهم

تونار : ( بتخنزير وهدووء كايهضر ) سشششش …. الراجل مريض فالدار لا !! ( شاف عند ليديا ) طلعي نت …..

ليديا ضحكات ليهم بشيطانية ومشات طلعات عندو دازت من حداه لقاتو مخخخنزر فيها بمعنى دخلي لبيت غير هي دخلات لتخ عليها لباب وداز عند جدو …. طمن عليه لقاه ناعس وايطو عند راسو كتقرا لقرآن كانت شادة لباب ماسمعاتش اش طرا لتحت.. عاد مشا لبيت لقا ليديا كالسة على الكنابي رجل على رجل وكضحك فرررحانة وتلعب بخصلات شعرها …… وتاجه بهدوء لواحد المجر حلو …. وجبد صمطة دالجلد وبدا يلويها على يدو وليديا طرطقات عينيها

تونار : انا شنووو قلت قبل مانمشي ( شااف فيها ) هممم !!!!!!

ليديا : ( كاتشوف الصمطة وكاتشوف فيه وناضت هربانة كترجع بلور ) ت تونار .. ر راه مدرت واااالو

تونار،: اناا ..انا كتعرفيني انا!!!! … انااا شنو قلت قبل مانمشي !!! ( كايقرب لعندها وهي كتبعد )

ليديا : ن نكلس فالبيت

تونار : هاااااا …. ونت شنو درتي !!

ليديا : ( راجعة بلور هاربة ) كلست فالبيت …. و وماخرجتش … ت تاجيتي نتا

تونار : اوووه …..بصاااح ….متأكدة ؟؟؟؟

ليديا : ( كتسرط فريقها ) ح حيدها من يديك ونهضرو

تونار : وشكون هاديك لي خرجات عند داك الزا*ل كتق*ح*بن عليييه … غير كتشبه ليك وااااقة ياك !!!!!

ليديا : ك .. ها ! ك كيفاش ( تزدحات مع لحيط موراها،)

تونار : فيييين هاااربة فين مااشية،؟؟؟؟ ( وصل لعندها ) هبببطتي عندو ولا مهبطتيييش !!!

ليديا،: ع عندمن لااا … لللاا مهبطتش

تونار: ( شحطها لفخدها بصمطة تاغوتااات،) هببطتي وبلااا مهبطتيييييش

ليديا : هههبطت …. ( جات هاربة هو يشدها ) ططططلق مني والله حتى نددددمك طلق منني

تونار : هاااا !!! هببببطتي ( زادها شحطة اخرى تاتهزات ) وانا شنووو قلت لييييك !!

ليدسا،: تونار تعاود ضررررية اخرى والله تاااااندمك

تونار : ( زادها لوخرا بجهد تاشهقاااات،) اش غااديري ….. وريني آش غاديري ….( شدها من شعرها وهي كتغوت ) كنننهضر معاااك بالعقل …. مكنغوتش عليك كندوز ليك فعايلك قلتي هدا وااااقلة سااااهل .. هدا مكيفهمش … يااااك !!!! تهبطي ت*ح*بني على ال*وامل فقاع دااااري آليديا .. مراااتي،!!!!

ليديا : وااطلاق طلاق مني …. كون مدرتش هاكاك كون لعبو على ظهري هو وختوو كي بغااوووو

زادها شششحطة اخرى تاعواجات شادة على رجليييها .. ولاحها على السرير وشد ليها وجهها بيدو مزير عليه وهي محقدة فيه عينيها

تونار : هاد الت*حبيييين المرييض انا لي غاااانبريك منوو …..ماابغيييتيش تببدلي

ليديا : وببببببعد مني راك مافاهم وااالو

تونار : اش غانفهم ؟؟ اش غانفهم ؟؟ شنو غااانفهم منغير مراتي بانت ليااا فكاميرا دجردة مااااشية عند *ااامل اش غانفهم !!!!!! شنوو قلتي لييه هم ؟؟؟؟؟؟ شنووو كنتو كاتقولو ( شحطها تاني تابقات تغوت هو يشدليها على فمها ) ششششش حسك قطعييه زايدها لمك بالغواااات !!!؛، مضلووومة … شنووو كنتوو كاااتقولو !!!!!! علاش مشيتي عندوووو … ( زاد شحطها بجججهد ) واش باغااا نقتل دييييلمك

ليديا واخا حيد يدو على فمها بقات جامعة شفايفها ومحقدة فيه عينيها وماباغاش تهضرر

تونار،: زكييييرر؟؟؟ رحعتي للقوة ديالك …. باغاني حتى نقتلك عاد تهناااي !!!؛ ( هزها من حوايجها وقفها كايدفعها للباب ) ههههبطي سيري عندوو …… نزززلي يلللااه سيري آش كااتسناااي …. ( رجع لاحها على سرير ) كتتت*حبني ليا على *وااامل ….. ناااقص انا صداع ناااقص اعصااب !!!! شحال وانا كندوز ليك هاااا ( ضرب يدو مع الحيط ببووونية ) شحاااال وانا صااابر …..

ليديا غير محقدة عينيها فيه وساكتة كضور فعينييييها وهو يلوح داك سمطة من يدو لتخها …. ومشا سورت لباب بساروت هزو معاه فجيبو ودخل لدوش زدخ لباب تاتزع لبيت … وليديا واقفة فبلاصتها الشحاطي كايحرقوها ففخادها وكاتشوف فداك الصمطة فلاارض … وشافت للبالكون ، وهي تتجه ليه فتحات لباب وبقات كطل براسها لتحت .. حيدات صندالتها لاحتها وطلعات فوق شباك دالبالكون وبدات كتنزل بلور شادة فالشباك وكاتشوف للتحت ، الخوية لي بانت ليها كتحط فيها رجليها ووتشبت بيديها كيف الخرباء، تانقزات للشجرة شدات فيها وهبطات بشوووية نقزاات لجردة …. ومشات هزات صندالتها لبساتها وبقات تحت داك الحيط مخبعة كتقلب بعينيها فين كاينين الكاميرات لي شاافها منهم تالقاتهم فشي شجر اونفاص مع فين كان كالس أشرف لبارح .. وهي تبعد منهم وتمشات تالفين عندهم الحقول دأشجار الزيتون واللوز .. وبانتليها دار تما على شكل تشاابولا بالخشب دفعات لباب لي كان غير مردود ولقات تما غير البالات ومواد الفلاحة وشي خناشي .. وخلات لباب مفتوح شوية باش يدخلها الضو دالجردة و تكومات تما محقدة عينيها وتحلف فيه تااتخليه هاد ليلة يبااات يقلب تخرجها منو … وعرات كسوتها على فخادها كاتشوف فيهم حووومر بداك الشحطات وكاتسوط عليهم تبردهم وحالفاها فيه تاتندمو ….فيها مايخرج للزنقة كاع ولكن نفسها عندها عزيزة متقدرش تكرفص راسها … هي خصها غير تندمو ماشي تجيبها فراسها كانت ناوية تتخبى غير فشي بلاصة فالجردة وملي لقات هاد الپريتشة جاتها من الجنة والناس …. واخا ااريحة مجهدة دالغمال و الخناشي ولكن صابرة كيما نعروف عليها الصبر ديما فالحوايج لي كاديروهم فراسها …

تونار خرج من دوش وضار بعينيه كايبان ليه البيت خاوي والباب مسورتو فين مشات هااادي ؟؟؟!!!! هو يشووف لعند البالكون لي باليه ريدو كايديه الريح و مشا بالزربة كايطل لتحت … خرج دغيا كايجري هبط فالدروج ونعيمة شافتو خارج كايجري وتبعاتو مفاهمة وااالو اما التاباقي كلهم طلعو لبيت نور كايبردوو الفقصة والشمتة بكاس دالما حتى بدات نور كاتهررررس عليهم وترعرع وجرات عليهم وشدات لباب طاحت عليه كتبكي على سدااااجتها والنية ديالها لي خلات كولشي يلعب بها كيف بغا وعلى الميساج لي تيقاتو بحال شي حمقة ….

تونار خرج كايطري كيف شي هبيل ونعيمة تابعاه عرفات شي حاطة واقعة … حل لباب وخرج كايقلب يمين وشمال كاينة غير الطريق لكبيرة …. يلاه ضار يرحع يديماري طموبيل يقلب وهي تبان ليه نعيمة مخلوعة موراه تخطاها بحالا ماشفهاش ومشا ديمارا طموبيل خرج ، وهي طلعاات للبيت لقاتو خاوي فهمات الى ليدياا مكايناش !!! ولكن امتى خرجات وعلاااش!!!! …

تونار خارح كايقلب غير تما وكايسول راسو كيفاش غير فهاد الوقت هادي هرربات اكيد مغاتكوتش بعدات هادشي لامادارتش اطوسطوب لشي طموبيل هزاتها والليل هدا….

اسوء الافكار كايجيو لبالو … وسنانو كاايطحنو ، كايرد الحر غير على الفولون والكسيراتور… ندم لي دخل لداك دووش وهو عارفها مكتسكت الا وكتسكت على خزيييت … راسو غايطرطق عليه هو كاايقلب ويضرب بالفار واش تبااان ليه ..

وليديا توسدات واحد الخنشة وتكومات فالارض مخنزرة ناعسة غيير سمعات طوموبيلتو خارجة بدات تضضضحك بالشيطانية عينيهاااا بحالا مرسوم فيهم لسان الافعى … كل الشر جامعاه فعينيها …وعاد ماحلات ليها النعسة وهي حالفة تاتبيتو كايقلب كي لهبيل ….

طلع معاه الروبو تعطييه تسطيلات الكاميرا كايصوگ وكايشووف .. واالو مااكيناش كايقول كيفاااش هادي خرجات بلا متسجلها الكاميرا !!!! ورجع تاني لدار دخل لجردة كايقلبها قنت بقنت وهي غي سمعات خطاويه ضااايرين بها تخبعات مور شي خناشي وقطعات الحس …

حل لباب كايضرب بالبيل دالتيليلون مابانتش ليه … ورجع خرج كايقلب تاسمع شي تخرخيش موراه وضاارر بزربة لقاها نعيمة

نعيمة : و واااش … وااش مدام ليديا مكايناش !!!

تخطاها بدون جواب مكيعرفش يهضر مع شي حد اخر منغغير جدو وهي …

كايقلب بالبيل وتاهي كتقلب معاه … وهو قلبوو قرب يسكت ليه … ملي يأس من الجردة رجع للطوموبيل ديماراها تاني ويديه ولاو يترعدو وعينيه حمااااارو .. غير فكرة انه يخسرها ولا توقع ليها شي حاااجة، كااضرو للدااااخل.. هو عاارف مامشات عند هاداك إلا واشي حاجة تما و تاالمنظر لي شاااف قبيلة الخال مع نور حسو داخل فهادشي ديالها ….. ولكن غي من خلال اش شاف فالكاميرا بغا يجن جنووونووو وتصرفها مكاايبرر وااالو .. يوقع لي يوقع ماخصهاش تتجرأ وتغري راجل آخر وهي مزوجة … ولكن هادشي كون كانت انسانة عادية ماشي ليديا لي كتنطق الغرابة باسمها …

الناس نعسات وليديا نعسات من غير نعييمة لي فلبااب كتسنى .. كتخاف تمشي ليديا وهي بنات فيها آمال تديها معاه لايطاليا وكتهلى فيها ….

ساعة الخمسة دصباح وتونار باقي كايتسارا داك منطقة شبر بشبر … وتامن الكاميرات الطائرة طلقهم وسجل فيهم صوررتها باش يديرو ليه اشعار لاشافو شخص كايطابق داك الصورة …

الحال بدا يصبح عليه وعينيه منفووووخين وزادو حمارو … مزال مامستوعبش فكرة انها مفقودة !!! هربات ؟؟؟؟ … عقلو بغا يخرج من بلاصتو هو كايتخيل وقعات ليها شي حاجة ولا هزها شي واحد ولا عمرها غاترجع … كاينفض راسو من هاد الافكار وكايقول يرجع يلقاها فالدار ولا غاترجع مااايمكنش تمشي فمرة ….مايمكنش يكون فقدها للابد !!

الساعة دارت السبعة ديال صبح عاد دخل للدار … طالع بزربة للبيت على أمل يلقاها ناعسة تما غير دخل بانتليه نعيمة على واحد كرسي دصالمونجي ناعسة …. تخطاها وداز طلع لبيت .. لقااه خاااوي بااااقي كايضرب فيه الريح !!! لا اثر ولا رييييحة ……

لتخ واحد الفاز وكلس شاد على راسو عينيه كايعطيوه الحريق وراسو كااايتشق ….

تاسمع الهضرة فبيت جدو ومشا للبيت … وتيل فيديه كل مرة يطل على اشعارات لي كاميغا … بانتليه الممرضة و لي كايجيب ليها السيروم كايهضرو وجدو فايق ولكن واضح عليه فشلاااااان وعيان …. وتونار مشا بزربة كلس حداه هو يقيس فيه بانليه يديه باااااردين على عكس راسو لي سخون بزااف و باس يدو

تونار : جدي !!! كيف صبحتي،؟؟؟؟ كتحس براسك مزيااان شوية

المامون : ( بسيف كاينطق ) الح الحمد للله

تونار: ( قلبو ضارررو ) لا والة اجدي ماعحبتنيش هاد صباح ( شاف عزد ممرضة ) فوقاش طلعات ليه سخانة هااكا،؛؛!!!!!

الممرضة : من الفجر راه دابا نزلات شووووية الحمد الله …

تونار : ( باس يدو ) ندخل ندوش ليك .. قاد تنوض معايا ؟؟؟

المامون غير ضور راسو بلا وتقلب على الجنب

المامون : بغيت غير نعس اولدي غير خليني

تونار : ( الممرضة ) جيبيلي شي حاجة فزكيها نديرها فوق راسو

المررضة : حاضر…

مشات وهو يد فالتيل ويد فجدو تاجابت ليه بانيو وفيه زيف نقي وبقا يعصرو ويدييرو فوق راسو

تونار : والا اجدي وااا زيير معانا … تشجع شووية تانتا ( بحرقة ) لمن باغي تخليني هم ؟

المامون : ( ضحك ) راني مرتااااح من هاد ناحية اولدي داباا

تونار،: ( تفكر ليديا لي مفقودة وقلبو غير مكيتزير عليه ) خليك هاكا انا جاي ….

خلا ليه داك زيف وخرج لبالكون ملي تفكر السيد لي كايجيب ليه الخبارات وسيفط ليه صورة ليديا و معاها الطلب يقلب عليها فارقب ووقت .. عاد خرج عند جدو كايدوز يدو على راسو ….

تونار : فطرتي ولا مزال !!!

المامون : ( طلع راسو فيه ) ماااعجبتنيش …مالك آياسكور ينو داك العينين مانعسوش بانو ليا

تونار : لا غير مانعستش بكري وصافي

المامون :حااااافض داك العينين واش يخفاو عليا …

تونار : ماديرش فيك شوية دالقوة نخرجك لبالكون حسن!! تاهاد البيت هاكا مشدود يخنقك ….يمكن لاشميتي شوية دالهوا ترتاح

المامون :واش كون كنت قاد غاتلقاني هنا !!! كون راني لتححت مع ااشجيرات ديالي كنسقي فيهن ونب

تقطعات فيه الهضرة ماقدش يكمل و حبسها القوة واااالو باش يههضر …. وتونار ماقدش يشوف فهاد المنظر مزال كايحس الشرايين ديالو لداااااخل كايتمزقو .. وناض خرج كاع بززربة والممرضة تبعاتو بعينيها والمامون عينيه تعمرو بدموع … وتونار هبط فالدروج تالجردة برا ماكلس حتى لواحد الكرسي عاد كلس كاينهج وعينيه تنفخووووو ولمعو … فيه حرقة لدااااخل لي كايشوف جدو كايفقدو من بين يديه ومريض وتالهضرة مابقاش قادر دابا يعضرها …. وهو مقادر يعاونو بوالوو … مقادرش يرجع ليه صحيحتو …. كايشوف ان حياتو كلها بحووثااات فبحوثاات ولقاحات وماقدش يخترع حتى لقاح لجدو ضد السرطان … مقادش يداويه ولا يرجعو كيكان ….

طلع راسو لفوق كايزفر النفس حاااااارة السيوفة كايتغرزو فالداخل ديالو و ليديا كملات عليه …

ماقدش يطلع لبيت عند جدو كاع مقادش يشوف فيه ملي وصل لهاد الحالة كاملة …. وبقى كالس غير بووحدو ومطلع راسو لفوق لي يشوفو من بعيد يقول هدا ماعندو وااالوو من هاد الهدوء لي كالس به وواضح عليه والماسك لي مخبي تعابيرو .. ولي يطّلع على الداخل ديالو يلقى شحال كايصراع وكل شوية يشوف لتيل كايتمنى غير ترجع بعدا ليديا لي مولف يشوف فوجهها وينسى كوولشي … ولا كايقول دير لي بغات دير غير طلع قدااامي وترجع ….

تاسمع تيل كايصوني ليه ولقاه داك سيد وقاد كلستو كاايحك فعينيه وجاوب بعيااااء

تونار : شي خبار ؟؟؟؟

– بغيت غير نعرف شكون هاد الزين كامل لي سيفطتي ليا .. هادي لالقيتها نوضرها ليك انا

تونار غمض على عينيه كايتحكم فاعصاابو

– مهم راه طلقت الرجاال يقلبو عليها ماتخافش … لعشية تكون بين يديك …… وراك دوااااق ماعندي مايتسالك …اه و…

قبل مايكمل لتخ داك تيليفووون فالاارض شخشخو

ورجع تكا لور وليديا كطل عليه من الشقة دلباب .. فللخر خرج ديمارا طموبيبتو ومشا يقلب تاني … عقل معاها وعقل مع جدو ….

اما ليديا خرجات من داك الكوخ كتضحك وتنفض على حوايجها الغبرة وفرحانة لي وصلات لمبتغاها وهبلاتو هاد ليلة …لان جسدها ليه ثثمن ميككنش يآديه بلا مايدفع الثمن …. عاد دخلات بهدووء لدار طلعات لبيتها بدات بالدوش هو لول لان عافت ريحتها فداك الكوخ .. نظفات ولبسات حوايج خرين ….. ومشات كاتقلب على الكريمات والمرهمات لي دير لهاد الطبايع لي محملاتهموش … موالفة كتلقى آثار ديال الاحتكاك و الجروح لي مور كل علاقة جنسية بسببو ولكن كانو عاجبنيها … اما هادو ماحملاتش حتى تشوف فيهم … تاسمعات دقة فلباب ودخلات نعيمة

نعيمة : شفتك طالعة فدروج متييييقتش …. فيييين كنتي شطنتينا علييك

ليديا : ( ببرود كتقلب فكريماتها ) شكون نتوما ؟؟

نغيمى : انا و وسي تونار …. لبارح ليلة كاملة وهو كاقلب عليك !! تخخخلعنا عليك والله … فين كتت

ليديا : ( شافت فيها ) و فين كنت؟؟؟؟؟ ….( هزات واحد كريم ) هدا ريحتو حسن … وكاتبين فيه كايرطب .. واخا مانحتاجش رطوبة ….( طلعات راسها فنعيمة ) جيبيلي عصير وشي حاجة حلوة …. راشقة ليا …

نعيمة بقات غير كرمش تعودات على هاد الغرابة ديالها ومشات غير كتفكر وتهضر مع راسها كتخلي بنادم موراها كي لحمق….

ليديا دهنات لحمها وطلعات ليها عصير وحلوة وكاتشربو بشوية عليها فالبالكون وكتفكرو كيفاش كان وتضحك ….، الفرحة ديالها وقمة السعادة هي ملي كترد دقتها مضوبلة لشي حد وتتشفى فيه من بعييد …

تونار تاني عيا بالتقلاب ورجع باش يطمن على جدو حيت قلبو معاهم بجوج …. عمرو مكاين كايضن شي نهار يقدر يعطي لشي واحد نفس المكانة لي حط فيها جدو تاجات ليديا …

دخل لبيتو لقاع ناااعس ولا دوا كايرخيه حالتو مابقاتش كتعجب ونقطة الددم مابقااش فوجهو .. حيد داك المنديل على جبهتو بانتليه بردات شوية ونزلات الحرارة وغطاه … مدة غير كايشوف فيه ويتحسر على حالو … عاد خرج من حداه يلاه كايشد لباب هو يبان ليه اشرف ماشي هو وختو غير شافوه وقفو كايسرطو فريقهم …. وتونار جابو ليه الله لبين يديه ونشا كمشو من حوايجو وعطاه ركلة وحدة لور جابو كايتكركب فالدروج و حكيمة جات تغوووت هو يضور عندها تونار داير صبعو على فمو مخنزر بمعنى جدي ناعس

تونار : شششششششش

غاسمعاتو قطعات الحس وغوتات فنفسها شادة على فمها … وهو طل على اشرف بانليه تتقسح ونايض كاايجري شاد على يدو لي واقلة تهرسات .. وتبعو فدروج و حكيمة تبعاتهم كتجري تفرق … اشرف كايجري وهو موراه تاوصل عليه لدخلة دلباب وعطااه ركلة اخرى تاني كركبو على الدريجات داالباب ولاخور غوووت من حر حريق يدووو …. ورجع تاني هزووو من حوايجوو وحكيمة تابعاه شادة فيه وكتبوس فكتفوو …

حكيمة : لعاااار لعااااار لاماطلقو على وجه جددددك لامااااططلقو

عطاه ضربة برووسية تاطيحوو كاو للارض ديخان وعكاه بركلة لكرشووو وحكيمة كتغوووت وتزاوك ونورة جات كتجري شدات على فمها …. وهو مكيهضرش غير كايضرب ….. و أشرق كاايفلت منو تامابقااش قاد يتمشى هوو غادي و تونار موراه ضربة بضربة تاولا هارب على يديه ورجليه كاييزحف تاوصل لباب لكبير ودفعو تونار بررركلة ….وشد لباب بحالا لاح شي طارو دزبل وليديا ملفوق كتفرج وتضحك ..

تونار : ( ضار عندهم ) يعتب سنتمتر لداخل ددالدار …. غاتبعووه …

خلاهم وزاد وحكيمة خرجات كتجريي عندو هي ونورة لبرا ونورا عيطات لومبيلونص …

اما ليديا كملات لفراجة ودخلات لدوش كضحك كاتبروصي سنانها ….

وتونار دخل لبيت لاح سوارتوو وجبد تيل آخر يصوني على هاداك واش لقى شي خبار تاسمع باب دوش تحلات هو يعلي عينيه بزززربة لقاها خارجة مبتسمة كيف شي حلم جميل وكتمسح يديها فالفوطة وخاطباتو

ليديا : كتقلب على شي حاجة !!!!!

تونار غير واقف فبلاصتو وكايرمش .. هادي تاني مرة كاديرها به … تخليه عقلو غايخرج ويرجع يلقاها كان مواقع والو كتلعب بقلبو كيبغات ….

وهي مشات كلسات دارت رجل على رجل على عادتها كتلوي فخصلة من شعرها

ليديا : الى توضرات ليك شي حاجة نقلبو معاك !!!

تونار : ( تحت سنانو ) ببببنت ابلييبيس .

ضرب واحد طبلة برجلو وهي كاتشوف معاع ببرووود

تونار : اش كااايقووووولييك داك العقل بغيييت غانفهم …. ( كتقرب عندها يديه سابقاه يخلطها ويكمل على مابقى من اشرف ) فيييين كنتي !!!!!!…

وقفات مقاربة معاه عينيها فعينيه

ليديا : خرجت نشم شوية دالهوا ….الامر خدا مني ليلة … فين كاين المشكل !!!

تونار : ( جيفها بيدو ) فييييين كنتي

ليديا : ( حطات يديها على يدو فعنقها ) تزيد مزال تزير غانمشي بلا رجعة هاد المرة ..

يلاه كملاتها لاحها فوق السرير وبدا يظشي ويجي ويررد فشعرو لور …. وواضح عليه قداش متوتر

وتاجه للبالكون تاهو شدو بسااروت … تاسمعها موراه

ليديا : وااخا تشد عليا فقرعة …. لابغيت نخرج غانخرج ونتا عااارف هادشي ….

خلاها وخرج باش متيزيدش معاها فالكلام يصدق مخلطها ، يمشي يبدل ساعة باخرى تايبرد ، وسورت عليها لباب من برااا تاهي …. وخرج شد فالحديدات ديال الدروج مزير على عينيه باقي مامتقيش واش بصح رجعات ولا غير حلم ….. عاد تهنى بالو من واحد الناحية بعدا ….

ومشا عند جدو …. اما ليديا مشات لسرير مبتسمة تخشات فبلاصتها منعساتش مزيان ليلة لماضية .. وكاتفكر كيفاش كان مخلوووع وكيفاش شاد عليها لبيبان وشي حاااجة زوينة فقلبها لانه باش اول مرة تحس شي حد خايف من فقدانها لهاد درجة !! رغم ان ضربو ليها لبارح ماننساش ليها …ولكن ليديا ديما كاتشد العصى من لبلاصة لباردة وماشي من سخونة ….

تونار عند راس جدو شاد فيديه كل مرة يبوسها …. وجهو شااااااحب وعيان … يلاه رتاحت واحد لبلاصة فدماغو من ناحية ليديا … وهي تعمر بأوشن لي مزال مايقدش ينعس لاماامشاش عندو … كايدوز يدو على يد جدو وبالو سااااارح…والجد فعلا كايحس براسو قوتو كاتلاشا منوووو وروحو كايحسها لداخل فيه بحاال شي ريشة خفيييييييفة غاطير فاي لحظة…

ملي باليه نعس والممرضة طلعات رجع ناض مشا للبيت لان مكيبغيش يبقى بوحدو ضروري يبقى ليه معاه شي حد لاوقعات شي حاجة …..

حس براسو برد شوية عاد رجع للبيت باش مايضربها تاني لان عارف راسو ملي كايفقد اعصابو كيف كايولي ، دخل لقاها نعاسة وكلس حداها فسرير كايشوف فيها .. كيف العادة البراءة لي كتنزل عليها فالنعاس كتكدب كااااع داك التشيطين ديالها وهي فايقة

عارف انها ماشي انثى عادية .. عارف ان شخصيتها هي هاديك وماعندهاش كلمة ” حشوووومة ” فقاموسها … ولكن الامر خلاه يجن واخا صعيب يبدلها ويفهمها انه كاينين شي حوايج عيييب على الانسان يديرهم … وهي كتستغل انوثتها فكل شي كسلاح بنسبة ليها … ماحسش براسو بسبب العياء ديال الليلة الماضية لي مانعسهاش ولي فااطر فيها بالكارو .. لقا رااسو نعس تاهوو راسو عند راسها …

اما حكيمة ونورة كلسو يبكيو مع خوهم حدا لباب تاجات لومبيلونص من ايت قمرة وهزوه لسبيطار ….لواوه كلو فالفاصمات ودارو الكبص ليديه وعندو تاكسر خفيف فالورك وخرحوه لواحد شومببر عامرة معطوبين بحالو ، كولو مغلف …. ودخلات عندو حكيمة ونورة لقاو عينيه تنفخاات … و كايهضر طانز على حالوو

اشرف : كانت كاااتقولها ليا مي …. وكنت كنكدبها … كاتقوليا ماتشفاش اولدي راه لي تشفى تبلى … وهانا غلفوووني تانا بحالو واشتوو ..

حكيمة : واااكي كتحس اخويا ياكما كايحرقوووك

اشررف : وااادگدگني .. واااافررتت ليا عضااااامي الله ياخد فيه الحق …. دگدگتوووناي

نورة : وتانتا اخالي ماتعررفش دافع على راسك مخليه كايدفع فيك كي بغا ؟؟؟

اشرف:اش غاااندافع اش غاندافع وهو داخل فيا كي الثور ( كايشوف فحكيمة ) والله يااااخد الحق فلي كان حيلة وسباب

حكيمة : ماابزز عليك حد وفلوسك غاتاخدهم واخا مانفعتينا بوالو

نورة : انا لي بايتة نخمم فيه وصااابحة نخمم هو داك اللفعة كيدارت عرفاتنا وسبقاتنا ونور كيدارت وصلااااات للبيت هادشي لي ماااتفهمش ليا … وعلاش تونار ضرب هاكا خالي زعما على ود نور ؟؟؟؟؟؟؟؟

حكيمة : تامن نور ضرباتها اللقوة حلفات لاهضرات … ياكما تكون دايرة ليا شي حاحة لبنيتي ؟؟؟

نورة : مسخووووووطة لا مسخووووطة هاديك بزااااااف …. مووصيبة شييطانة فصفة انسان

اشرف : لاتسعفووووني بااااعدو من الزمر هاديك مابالي غاتصورو منها لا حق لا باطل غاتهناو سيدة حافضة سواريها ….وسيرو ضوو بالحااج ماحدو فالحياة يكتب ليكم لخير … هاديك غانساوها … لفعة كضهشر بنادم كدووووخ هاديك لي مايدوخ

نورة : نستسلمو ليها ؟؟؟؟ والى مات بلا مايكتب .. تدي حب وتبن !!

اشرف : ياك مزال ماكتب لا لهادي لا لهاديك …. وملي يموت تغبنو على داك ( خسر سيفتو شد على لورك ديالو ) اااايييييي غايبعيت نجبدو هو يحرقني اعوووود باللله ….

حكيمة : واغي برا برا ليا اخييي ونديك معايا لدار نكمدك يترخفو عضامك.

اشرف : يااالاطيف يالاطططيف واش نرجع انا لداك الدار بغيوه يقتلني وانا مزال تامتزوجت …. لا لا لا انا شدووولي فلوووطيل عطا الله لي يكمدولي عضامي

نورة: يااااااه على بشاار يدو مهرسة وكولو مشخشخ وباقي يفكر ليا فالبنات

حكيمة : ( كلسات شادة على حكنها ) انا خااايفة غير على بنتي لا تعقد ليا ….بغيت غانعرف اش وصلها لتما.. تسليييييم منين سلاطت علينا داك الجن غاتعقد ليا لبنت

نورة : وتانتي غاخرجة واحدة مع صحابتنا ملي نرجعو لطاليان تولي كي كانت اصلا غير كنجيو لهنا كاينزل لينا المورال من عند الله

حكيمة: تاديك خيييتي مااااابقااش عاحبني هادشي معاها كولشي كايرجع ليا على بنتي وحااافضة صواريها اللفعة …

نورة : دابا شوفيلنا مع الحاج يسني لينا لالوراق ولا غير.يبصم قبل مايعگدهم … وهادييددك ملي تلقى.الفلوس بااااح غاتمشي بوحدها .. ونوليو نحضيييو هضرتنا فين كاتقال باااين ليا كتترو عنددنا الودنين فداك دار وداك نعيمة غامااشية وطالقة الودنية …

اما نور مابقاتش متحملة الجلسة فداك الدار .. وتفكرات عمتها لي فالناظور ولي كاترتاح بزاااااف ملي كاتمشي عندنا … بنصائحها الحكيمة لي كتعطيها …..واخا ماماها ونورة مكيحملوهاش ولكن هي عندها عزيييزة ….

لبسات حوايجها وهزات فلوسها وهي مصممة غير تمشي لشي بلاصة بعيدة .. كرهات راسها كرهات تونار كرهات ماماها ونورة وكرهات كوووولشي … طلعات سلسلة دجاكيط ودارت يديها فالجيب ودارت القب فوق راسها ، وهزات كارطابل ددالضهر فيها حوايجها …. وخرجات من دار بقات كتمشى فداك الطريق كادير اطوسطوب للخطافا لي تما تاوصلوها لمحطة ددطاكسيات …. ومشات كتقلب على طاكسي لناظور …. بانليها واحد غايخرج خصو بلاصة وهي تتلاح عليه تركب تالقات واحد آخر سبقها وركب …

نور : وااااااامولاي .. واشريف انا لي سبقتك

طل عليها من طاكسي

– نعااام ؛!!!

نور : راه انا لي سبقت

– على شكون راكب انا ولا نت !!!!

نور : ( شافت عند الشيفور ) عافاك اسيدي هضر معاه محتاجة نمشي مافيا لي يستانا طاكسيات اخرين وزايدون انا لي شفتك لولا هدا منين جا

شيفور : وغاصبرو صبرو تالى ماالقيناش نقلبو ليك ببلااصة مع واحد اخور ( طل عليه ) فين تنزل نتا آولدي

– ( كايشوف لتيل مامسووقش وكايهضر ) براشمة دلكبداني

الشيفور : ااه صااافي غير ركبي ابنتي هادا مغايكملش معانا … ركبي … ديير واحد لبلاصة … كحزي اشرفية شوية لهييه ….وحطي ولد على رجليك

– اييه ايه فين غتزيد هادي !!!!! كاتشوفنا هنا مزاحميييين

نور : اوا نزل لامابغيتيش …. بحالا انا مشتاقة فزحاام راه باغا نمشي وملي فيك هاد نفاخة كاملة شري طموبيل وتهنى

الشيفور : وغاااابلعقل بلعقل .. غير تكاحزو شوية البنت قليولة مغاتاخدش بززافف دبلاصة ….

بدا الولد كايسوووط وكحز للجنب هو كالس فالوسط وحداه من جيهة لوخرا مراة وولدها على رجليها …. وزادت ركبات تاهي كايتداحسو وغير كايسوطو لا هي حاملاه لا هو حاملها …. وزاد بيهم التاكسي

شيفور : وغاسمحو لينا آشرفة …

– ياودي زيد زيد كون حساابتنا هاكا كون خلصنا كورصا نمشو هانين

نور : تادابا شكون شادك ؟

– ديري غا شكارتك لور زايداني ضييقها تاااهي … هادي قليولة هااااادي !!!!! راااها دير مني جوج اشريف

نور : ااحترم رااااسك

نطق واحد الحاج راكب مع شيفور لقدام

الحاج : واااهنيوووونا خليونا نعقلو على هاد الطرييق

بدات تخنز فيه وهو بادلها نفس التخنزير وكملو طريقهم وكل مرة يدفعها وهي دفعو … تاقربو يوصلو وحيد الكيت من ودنو وبدا يستعد ينزل وهو يلقاها نااااعسة عليييه وبقى غير كايرمش فيها وشعرها لي كايبان شوية تحت من القب ديال الجاكيت طايح على عينيها مجعد …. جاتو الضحكة زهو كايسول فراسو علاش لبنات ملي كاينعسو كايوليو كيوت هاكدا وملي كايكون فايقين يالاطييف !! بانليه تيليفون مشعول ومطلوق فيديها بتينة نعسات عليه وحيدو ليها بشوية كايشوف لعندها ولعند تيليفون وركب رقمو صونا على راسو يطلع ليه رقمها ومسح لابيل ردو حداها ….. وهو يدفعهااا بكتفو تاناضت مخلوعة

– تتكككعدي غااانزل

عند ليديا

بدات كتفيق وكتحس شي راس آخر مثقل معاها لمخدة وهي تلفت ليه لقاتو تونار …. بقات كترمش فيه مامولفاش تفيق قبل منو !! وماشي ديما كاتجيها الفرصة ديال تشوف فيه ووهو ناعس .ٌ … عينيه وهوما مشدودين عصبوها كيف شي لوحة خباو منها النص خاصها يتحلووو تكمل ليها الصورة ….وريحتو الطبيعية كتضرب فنيفها كاتخليها تنتشي ….

يديها من تلقاء نفسهم تهزو وتحطو عليه فوق القناع وهي كاتشوف السمطات ديالو ورا ودنيه …. بداو صبعانها كايكلوووها تحيدو …. وتشوف وجهو … وتشغي غليييلها ، الشيطلن بدا يغلب عليها الوعد ديالها كتحاول تنساااه….. كاتسرط فريقها وضياقو عينيها …. ويديها كايمشييو لداك الصميطااات تحلهم يطيح داك القناع .. وتشوف اخييييرا وججهو ويكمل القمر ……..

يديها قاسو فاللصقة تحيدها وبداو صبعانها كايترعدو و كتعض فشفايفها وتسرط فريقها مزيرة على عينيها كأنها غاتفك شي قنبلة .. تالواحد اللحظة ماقداتش وبعدات يديها مزيرة عليها … قلبها ماخلاهاش ، ماتكرش انها كلها شوق امتى يطيح هاد الماسك وكاتشوف ان راجلها ومكتعرفش وجهو !! غريبة .. ولكن ثقتو ماتقدرش دمرها او بلاحرى ماتقدرش تخلف شي وعد عطاتو …

هو يحل تونار عينيه فيها لي واضح كان فايق … وهي غير شافتو شاف فيها بدات كترمش ، وهو دار يدو تحت راسو ..

تونار : يلاه حليه ….

ليديا : (كترمش وبعدات عينيها عليه وواضح باقا مقلقة ) مكنتش باغا نحلو .. غير كانشوف

تونار :من امتى ولاو فيك لكدوب

ليديا : ( شافت فيه ) باشمن وجه كتهضر معايا

تونار :بالوجه لي تموتي باش تشوفيه

ليديا : غييير فضوول …

نفضات عليها الايزار وهزات بينوارها لبساتو من البرد وخرجات للبالكون ، هاد نهار قلبها مززيير بزاف .. وحلمات شي احلام مامفهومينش .. حلمات المستعمرة كتهدم بحال شي زلزال ضرب فيها .. كتسمع صوت الاستنجادات وحلمات باوشن والمامون لابسين مزيان كأنهم فشي حفل ….. خصوصا منظر المستعمرة كتريب ياجورة بياجورة الامر زير قلبها .. وكتحس بشي حاجة غاتوقع …. تاحسات بتونار موراها معنقها .. وخشا راسو فعنقها

تونار : متعاوديهاش ….

ليديا : ( سكتات مدة عاد هضرات ) نهار تعاودها غانعاودها

تونار : ( بعياء ) علاش نت هاكا علاش

ليديا : كون مكتتش هاكا ، مكناش غانتفاهمو … ( ضارت عندو) الهندسة كاتقول ان الخطان المتوازيان واخا عمرهم يتلاقاو هوما بوحدهم لي يقدرو يكملو مع بعضياتهم حتى لنهاية الطريق حتى لاماكانوش مكملين حباً كايكملو عنادا… والفزياء كاتقول ان المتناقضات هن المكملات … والبيولوجيا قالت ان الحجر يعيش بالماء …..

تونار : ( دوز يدو على شعرها كايمشطو بين يديه ) ولبارح الحجر .. عطش بزاف

ليديا : هو لي بغا ينشّف الما ….

تونار : كان بغاه غير يدوز ليه بوحدو ماشي لكولشي

ليديا : يرسم ليه طريق

تونار :وغايتبعها!!

ليديا : مافيهاش الشك …

تونار :واخا الحجر عمرو يخضار ولا يدير ليه شي وردة

ليديا : الما مكيميليش للورد … حيت الورد ضعيف وغير شوية دالما يقتلو …. كايميل للحجر لي كايتحملو بتقلباتو المزاجية ….

تونار : علاش مشيتي عندو

ليديا : ( تنهدات ) فخبارك …واخا لبارح كنت فرحاانة حيت كولشي تقلب ليهم … دابا حاسة براسي مابقيتش قادة ( طلعات فيه راسها ) بصح … عيت !!! لا ماشي عيت انا ملييت !! بغيت نعيش شوية فالسلام بلا مانحضي مع هدا وهدا ….

تونار : اش داارو ليك !!!

ليديا : ( ضحكة استهزاء ) يغريني قاليك !!!!

تونار : ( تعلا حاجبو ) نعام !! ( جرها من يديها ) ااجي لهنا عاودي ليا …

جرها معاه لداخل كلسو على لكنابي هو مقابل معاها وعاودات ليه …هو كايتجنن وكارز على يدو حابس الغضب ديالو ولكن هايهات الحمرة ديال عروق عينيه كاتفضحو ، وغير طريقة باش عاودات ليه بدون ماتتعاند معاه و تشد الزكير و تطلب مقابل باش تعاود عرفها عياااات ديال بصح .. ولا ليوم ماشي على برجها ماعندهاش طاقة للعناد ولا لتاحاجة …. كملات ليه هو متبع معاها ، هادشي ماتفاجأش منو، متوقع منهم كولشي ومنهار فكها من يديهم هو مستعد لاي حاجة ، الحاجة الوحيدة لي كانت كتخليه مطمئن هي عناد ليديا و تاشيطانيت ديالها لي مايقد حد يديرها بها… رغم ان الامر طحنووو من دااااخل ولكن حدا ليديا مابين والو …. وديجا الوقت ابدا ماشي مناسب وهوما نقطة حساسة عند جدو لا جرا عليهم هو آذاهم غايتشكاو عليه ويزيد يهز الهم ….

تونار : واخا هادشي كامل ، كان عليك تقوليهالي بلاماديري شرع يديك … داك البنت تقدر تعقد غير بسبابك

ليديا : فهاد اللعب ضروري مايتعقّد شي واحد فينا ، المهم مانكونش انا وصافي !!!

تونار : كون جات فشي ظروف آخرى .. كون تلاحو لزنقة باش يعرفو اللعب بشرفي بشحال كايتخلص.. ولكن جدي رابطني .. عزازين عليه ..

ليديا : حقي انا ديتو بيدي متحتاجش …

تونار : هادوك تنطابق السماء على الارض مانبغيكش تللقااي بيهم ولا منلبعيد … تانمشيو منهنا … وحتا فايطاليا رزقهم غايديوه فلوس ويخويو عليا الدار .. مامستعدش نخوي انا الدار لي فيها ريحة جدي ….

ليديا : هي مغايرجعش معانا !!

تونار دار ضحكة استهزاء لانه عااارف مزيان الاشارات لي بدا يعطي جسم جدو شنو كايعنيو …. وناض

تونار : غانمشي لعندو …وهادوك غير تهناي هادي آخر مرة يقربو فيها ليك … ( مشا لباب وهي تعيط ليه)

ليديا : تونار ….

تونار : نعام !!

ليديا : بغيت نطلب منك واحد الطلب .. عارفة ماشي وقتو وخصك تگلس مع جدك ولكن بغيتو ( دار فيها نظرة تساؤل ) بغيت نمشي لمستعمرة

تونار : ؟؟؟؟ علاش !!!

ليديا : غير ديني …

تونار : ( طول معاها الشوفة ومستعد هاد نهار لشي حاجة منها غير من هاد المزاج الهادئ لي صبحات به ) لبسي ….

خلاها وخرج وهي اتجهات لبسات حوايجها كانت الساعة الحداش … هو طل على جدو وكلس معاه شوية واخا غير نااااعس مافقش كاع كايحل عينيه شوية ويرجع يشدهم …. باس على راسو وخرجلقى ليديا واجدة كتسناه ومشاو لطموبيل ركبات بدون مااقوليه حل لباب ، خلاتو مستغرب !! ركبات وتكات راسها لور وسااااكتة ….. وهو ديمارا وعينيه عليها

تونار :واقعة شي حاجة !!!

ليديا : همم( حركات راسها بمعنى آه )

تونار : شنو هي ؟

ليديا : ماعرفتهاش

تونار،: فين

ليديا : ( اشارت لقلبها ) هنا

تونار مابغاش يزيد يتجاوب معاها لان فاهم وعارف حالتها ، لا بل هو قاري و دارس هاد الحلات …

لي الواحد كايكون عندو شي فالداخل ديالو لي هو براسو ماعندوش ليها تفسير ….

كمثال انه تشوف دخان طالع من وراء الجبال … الدخان شفتيه ولكن شنو كايتحرق ماتقدرش تتحددو …

هاد النفسية كتجي بعد التراكمات لي فلداخل ديالنا … لي تقدر تفجرهم فقط شي حاجة بسيييطة كنوم مضطرب او شي كابوس او فقط اكلة تحترقات … خلاها على خاطرها لان احسن علاج لهاد النفسية هو تقدم لراسك شنو بغات ، واخا صعيب تحدد شنو كتبغي النفس فهاد الحالة لان كايولي كولشي باسل ، مي فحالة ليديا هي عندها رغبة لي كاتحسها مناسبة باش تتخلص من هاد الغمامة الكحلة لي تحطات فوق راسها هاد صباح ….

فمكان آخر ….

تحط طاكسي بيض قدام بيبان مستعمرة أوشن المنسية ، …. خرج منها منير وجبد صاكادو ديالو من الكوفر لبسو فظهرو …. وعلا عينو مع المستعمرة .. وقلبو ضرو ودار غير ضحكة مستهزأة !!! كأن عمر كانت هنا الحياة ؟؟؟ وحقيقة، امتى كانت هنا الحياة ؟؟؟

ضحك ضحكة خارجة بقسوة ….خارجة بحرقة على حال المستعمرة لي تفناو فيها عمامو وباه وجدو …. على المستعمرة لي كانت مخلياهم يحكمو شمال افريقيا ….لي كبر فيها طغيانهم و ترعرع جبرتوهم …ضحك على الدم لي تسفك هنا وعلى شحال من روح خرجات فالمحمل ….

من ديما منير كايحس بهادشي غااالط .. كايحس بيه مستنقع ، ولكن هو كولشي دايرو ضد فجدو لي دخلو لهاد العالم رغما عليه .. بغا يوريه النسخة لي دار منو … بغا يوريه نتيجة الاصرار ديالو على منير يشد السلاح ..بغاه يحمل ذنبو طول حياتو … وديما كايقول … نهار نقتل ونهار ننصب ونهار نزني ونترمى فحضان الحرام دنوبي كلهم عليك .. لان هاد طريق دخليتيني ليها بزز …

مكرهش يعاود يحي الحياة فهاد المستعمرة ويخرج عمامو و باه ويرجع كولشي كيكان … ولكن مايقدر يدير والو الى مكانش اوشن … لي ماعندو تاشي معلومة عليه اخر مرة سيفط ليه رسالة كايقوليه “بعد من الحرام وماتعدبنيش كتر راه بوحدك لي دنبك باقي تابعني ” هنا عرفو غايكون بدا حياة جديدة …. لان كواشي باعو والفلوس ديالهم مشاو للخيريات .. ووهو مزاال مصر يكمل فهاد الطريق غير باش يزيد يعدبو …. خصوصا ملي لقاه دخل عمامو وباه للحبس ومابغاش يدّخل باش يخرجهم …

عارف المستعمرة تباعت … عارف النساء والرقبات تطلق سراحهم … لي معارفش هو علاش جدو دار هاكا ؟ هو كاع معارفو راه كايصارع الموت بوحدو …. !!!

جبد تيليفون صونا طلب يجيبو ليه طموبيل لان جا من المطار غير فطرونسبور فضل انه يكري من الناظور …. وقرب للباب شد فداك الشباك دالبيبان وقلبو كايتقطع على المستعمرة كيف ولات … الحرام دغيااا كايرشا سبحان الله !!!!!!! دغيا كايبان فيه الصدأ ….

زعزع داك البيبان مابغاوش يتحلو لان مشدودين بسلسلة والقفل وهو باااغي يدخل ..

فور ماجا للمغرب قبل مايقلب على ليديا بغا يجي لدارهم واخا غير يبوس حيوطها ويمشي رغم انو مزال فحيرة واش يبوسها ولا يلعنها !…

طلع فوق الشباك ديال البيبان ونقز نزل الارض كاينفض فحوايجو وبقى كايشوف فالساحة والجرادي لي كولشي ولا خاااالي بحالا سمحو فيه مية عام !!!!!!

كايتمشى وكايضور راسو بحسرة كبيييررررة مزير على سنانو وتايضرب الزطمة بجججهد فالارض على الحرقة لي فقلبو … تاوصل لبيبان وتسلق فوق واحد القادوس طالع للبالكون ديال البيت ديالو …..

تلاح للبالكون تاولاو يديه مجروحين مسح دمهم غير فسروالو ونفضهم وبانليه الباب دزاج دالبالكون مشدودة حاول يدير يديه يشوف واش بيتو باقي مفرش مي الريدو ماخلاه يشوف والو ….

هو يضرب داك زاج ركلة وحدة شخشخو … و دوز الريدو ودخل …. لقى بيتو تمامااااا كيف خلاه … فقط الغبرة لي متراكمة عليه والشمس ملي دخلات البيت ولات فيه ضبااابة دالغبرة ، داخل كاينش بيدو على وجهو مصغر عينو …. كولشي كيف خلاه تاحاجة مامبدلة فراشو .. مكتبتو … بيرو ديالو … بلاكارو .. شبكة دكرة السلة …. العلاقة لي معلقين فيها السوارت ددطموبيلاتو لي كانو عندو … غير الفيراري ، مرسيديس، لامبرجيني …

رجليه فشولو عليه ملي تفكر الحياة لي دوز فهاد البيت وطاح كالس فالارض حاط راسو على الحيط عاض على شفتوو … وجبد كااارو شعل وبدا يكمي ودموع فعينيه وكاينفت معاه مراااارة الاشياء لس كانت ليك ومابقاتش ….والغريب انه ولا ضااااحك .. كايمي ضاحك كانو كايتشفى فراسو القديم .. فمنير الطاغي لي كان كايضن جبروتو عمرو يسالي وطغيانو معندوش حد !! كايضحك على رااااسو ويتشفى فرااسو بمراااارة وحرقة …

حتى قربو لاقليم الدريوش … عاد تكلمات ليديا ..

ليديا : بغيت ليصونص … متنساش تشريه

تونار : ( كايشوف لطريق وجاوبها ببرود وبساطة ) باغيا تحرقيها

ليديا : باغيا نمحي ليها الاثر ….

تونار : خصك تمحي ليها الاثر هنا ( ضرب ليها فدماغها ) اما على الارض ماعندها باش تنفعك

ليديا : ولكن الامر غايكون مسلي بنسبة ليا …

تونار : متأكدة !!

ليديا : على يقين ..

تونار دار سينيال ودخل لبومبة …. خدا ليها ليصانص ، هو نهار شرا داك المستعمرة شراها خصيصا باش هي تخرج فيها غليلها …. وكان كايتمناها تحرقها ، عارف شحال غايكون زوين داك الشعور ، كايشبه للانتقام المدمر …

دار ليصونص لور وفالكوفر … ودخل لطموبيل ولاح عليها بريكة شداتها

تونار : يلاه تحرقي كاع لي يطير عليك النعاس

ديمارا طموبيل وهي ملامحها جامدين تاستوعبات جملتو مزيان عاد ضحكات … ضحكة كلها مكر وعينيها كلهم شر ….

مسافة حتى وصلو لمستعمرة وباركا طموبيل و هي تنفسات مزيان ونزلات كاتشوف معاها … وهو تكا على طموبيل مربع يديه

تونار : نعاونك …

ليديا : حل ليا غير لباب ….

رما ليها السوارت ومشات تحل داك القفل لي بقات شحال شاداه بين يديها فللخر فتحات لباب وشافت موراها لعندو بمعنى اجي .. وهو مسايراها باغيها غير تششافى …

شدات فدارعو وداخلة مبتسمة كأنها كاتسارى فشي جردة …

ليديا : شفتي لهييييه !!! تما كانو عندنا الخيول … ملي كنت كندير شي حاجة لداك اوشن … كان كايربطني حداهم …. باش زعما يباتو كايرفسو فيا …. معارفش على الخيل الاصيل كايعرف المعدن الاصيل وكيستحيى يقرب ليه … معارفش الى كانو فرحانين حيت وحدة بحالي دخلات عندهم وحسن ليهم الشرف … ( تونار كايسمع ليها ولا كايعشق غرورها ) شتي فهاد المستعمرة قبل مايضربها الخلا …. كان كولشي عندو تمن غااااالي .. عرفتي صالون عندنا شحال كان ساوي ؟ عرفتي هاد الخصة شحال كانت ساوية .. عرفتي العيلات هنايا ثمنهم قداش ؟؟؟ عرفتي جدي شحال كان ساوي ؟ كوولشي كان عندو ثمن … كولشي كان داير راسو ثمن غاااااالي بزاف …. الا أنا … ( شاف عندها مستغرب حيت مستحيل ترخص راسها كايتسناها اش تقول ) عرفتي علاش معنديش ثمن غالي ؟… حيت انا عمرني مكنت للبيع ..

ابتسمات ليه وطلقات منو كاتمشى وهو تابعها …

ليديا : تاواحد … تا واحد فهاد الدار مكنت كنحس من جيهتو بشي حاجة … إلا ماما … مغانقولكش كنت كانبغيها .. ومغانقولش كنت كنكرها .. انا ماعرفتش راسي شنو كنت كنحس من جيهتها… شعور غريب ملي كنتفكر دمها فدمي … غلاوة دمي من دمها … ولكن كنت مقلقة منها بزاااف وباقية مقلقة …. مكنتش كنبغي الضعف ديالها ….ولا الدل لي كانت مستحملاه … كون كانت الام كانختاروها ، مكنتش غانختارها … كنت غانختار الام لي تشرب دمهم … لي تملح ليهم العشا بالسم وتصبحهم كلهم ميتين وتهزني وتهرب ….. كنت كنفضل الام لي تحرق العالم على ود كرامتها ….داكشي علاش انا أم ديال راسي واب ديال راسي ….. انا كولشي ديال راسي …

تونار : لنفترض دابا كتسمعك …. اش تقولي ليها

ليديا : في حاااالة ما دخلت للجنة وتلاقيتك …. ديري راسك ماعرفتنيش ، مابغيتش حتى فحياتي الاخرى تكوني عندي ام ضعيفة رضات بمصير يتباعو بناتها بأزهد الاثمان …..

تونار : ماتبغيش تمشي تحرري خواتاتك ؟؟

ليديا : لا …. هوما رضاو و راضيين .. كون كنت كانشوفهم تقاتلو … يستاهلو يتحررو …. اما لي كايلبس فيديه مينوط ديال الدهب ويبدا يتباهى بيع قدام المسجونين بحالو بداك المينوط شحال ساوي …. يستاهل الحبس مدى الحياة …

تونار : ونت كتحسي براسك حرة دابا …

ليديا : كتعرف خيوط العنكبوت ! ملي كايشدو وسطهم شي فراشة … وكتبدا تتحارب وتتفك … وملي كتفك وطير كاتلقى باقي جناحها كايعكلوها فالسما … حيت باقين الخيوط لاسقين فيها …. باقين لاسقين فيا جوج خيوط ….هاد المستعمرة .. و أوشن ….

يتبع