اورطيغا: (فاق بكري كان ديجا علم عمر أنه غيغبر صباح كامل بحكم الخدمة، داكشي الخاص ديالو خباهم فالمجر للي كيسدو، ومشا لبن سودة مكانتش خدمة كثيرة قرا ميساج ديال ملاك تبسم صونا عليها مجاوبتش حيت مزال مكتفيق لقا سعد تماك استغرب حيت ماشي هو الي كيكون فهاد الوقت، مسلمش عليه كأنه مكاينش ݣاع، دخل لبيت كيبدل حوايجو لبس بوط لميكا وخرج من تماك كيشوفو كيهضر مع دراري تماك)
مغنبدااوش الخدمة هاد نهار!!!
سعد: دراري ممخلصينش فخدمتهم دلبارح
اورطيغا: (هز جوج جناوا ديالو كيضربهم على شكل إكس بحال كيمضييهم وهو مقوس عينو فييه)
مغنخدمووش؟!!!!
سعد: هدا للي نتوما تتبغيو تخدمو معاه!!
اورطيغا: (كيشوف فهاد بنادم من ديما كيبغي يحايد ليه خدمة ذبيحة، شاف فهادوك كيشوفو فيه واقفين فبلاصتهم)
مبغيتوش تخدمو ألف واحد باغي يحرك كتافو ويخدم
سعد: شحال ونتوما خدامين معانا فالتالي ها شنو غتسمعو من واحد خدام معاكم بحالو بحالكم!!!
اورطيغا: (من ديما كيستافزو هاكا قدام الناس)
هانتا هضرت ال**** انا بحالي بحالهم غير خدام ماشي تنخلص فلعباد، (رافع صوتو) انا داخل 5 دقايق متبعني حد وااا بربي لا حط شي واحد رجلو هنا!!!
(تبسم بسخرية)
حيت كلمتي من كلمة الحاج
(دخل كيشوف مكاينش ريوس بزااف هاد نهار ولكن كانو يديه كياكلووه على سعد!! شاف الخدامة كيدخلو وكل مرة كيقرا درس باش ميتيييقش فالناس..
دخل سعد مخسر كمارتو كيتمشى ببطئ وداير يديه من مور ظهرو كيتمختر فمشيتو اورطيغا كيسلخ فحولي بالزربة جبد دوارة شقها على زوج لاحها قداام رجلين سعد داك الخنز تفرق عليه مجلخ ليه حوايجو)
واش ابنادم داخل المووسم!!!
سعد: (مخرج عينيه فيه وفحوايجو) مزال غنتحاسب معاك
اورطيغا: دابا ولا بحال ديما غتخليها كريدي!!! (ضار كيكمل خدمتو هز كرشة اخرى ضار كيقلب عليه ولاخر زرب خارج كينݣر قبل ميجي فيه زبل.. كمل شغلو مخلي لوخرين كيكملو صݣايط ومشا للبيرو كان سعد ومعاه اب ادم)
خلاصي
سعد: (حسب شحال من راس وبدأ يحسب الفلوس حطهم فوق الطبلة مكيهضرش حيت فوقو الكاميرا ولكن بيناتهم نظرات ديال القرطاس حسب اورطيغا فلوسو تماك ملقاهمش ناقصين عاد تم خارج نافخ صدرو كيتمشى بشوية)
شفتي
اب ادم: غير تنشوفو تنحس بالطونيسو طاحلي زعما الحاج مدار فيها ما يصلح!!!!
ملاك: (كانت على غير نشاطها عاود صونات على اورطيغا مجاوبش عرفاتو غيكون غاارق خدمة..
جاتهم حتى هوما خدمة ديال شي طرقان.. بقات ملاهية فيها رجعت صونات على وفاء جوج نوامرها طافيين جاها إحساس خااايب انها تكون وقعت ليها شي حاجة ولا علاش غتطفي نوامرها واكترية النمرة للي قالت انها عاطياها غير المقربين.. صونات على مريم تشكات ليها على القهرة للي فيها عاود ولكن لوخرا راه سبقتها فهادشي وملقاتش حل ما عليها غير بصبر)
وانا لقيت حل
مريم: عاود تقولي تخرجي تكري!!
ملاك: لا نشري نيشان
مريم: هههه كتعجبيني بعظا كتطلعي النيڤو
ملاك: كنهضر معاك بالصح امريم
مريم: ملاك بابا مغيخليكش تخرجي وحتى ماما
ملاك: اوا!!!
مريم: انا نعاود نهضر معاه دابا
ملاك: راه مشا لبلاد صباح هو وحنيني، شوفي انا نكمل شي خدمة ونعاود نصوني عليك
مريم: غير متقلقيش
ملاك: وحتى ونتفرݣع شكون مسوقلي فديك الدار ولكن غير صبري دابا نشوههم
مريم: ههه عاود
ملاك: اه (قطعت معاها وجاوبت خديجة) مشات شعشبونة
خديجة: احم الحمد لله ونتي
ملاك: (عضت لسانها بدات كدور عينها) متقوليش سمعت
خديجة: ههه سمعي انا رغبت ماما وقالتها لبابا باش تجي عندي هاد لعشية
ملاك: بالصح!!
خديجة: اه غير عيطي ليها ياك غدا ويكاند تجلسي معانا هاد لعشية تبدلي الجو شوية
ملاك: امم خاص نطلع لفاك نمشي نقاد شي حاجة نكمل وندوز عندك
خديجة: (دخلت لبيتها وسدت لباب) عفاك اجي املاك راه غنتفرݣع هنا من صباح وانا كرغبك عفااك
ملاك: خديجة مافيا للي يسمع ديك زمر دعݣوزتك، واش يوسف حداك؟!
خديجة: لا فالخدمة
ملاك: اختي انا براسي بغيت نرتاح (شافتها ساكتة) شوفي نكمل من لفاك ونجي عندك
خديجة: واش دايرة مع مراد؟!
ملاك: خديجة من بعد ونهضر معاك عندي شي خدمة
خديجة: صافي انا نتسناك (قطعت معاها وبقات متكية على ميجي يوسف حتى سمعت الهضرة خرجت لقات غيثة ومها لابسين حوايجهم وخارجين)
فين ماشيين؟!
غيثة: اماما والله حتى بيخير غير خليني مرتاحة هنا
الغالية: زيدي نشوفو هاد لخياطة للي فراسك (شافت فخديجة) منين يجي قولو حنا مشينا للدار يتبعنا هو بوحدو الا خليتييه
خديجة: (طانزة) لا عفاك مشتاقة نجي عندك
الغالية: دابا تشتاقي تبقاي فهاد الدار غير صبري علية قد مطوال يعجبك اديك الهجالة وهاد الدار من اللول كانت لمولاي يوسف ولالة الياقوت
خديجة: سيري سيري استغفري مولاك وصلي ركيعات هوما للي غينفعوك اما الا لقيتي مقابلاني غادي غير تحماقي ومتوصليش لشنو باغية
غيثة: (كتسمع وكتشوف ولكن عقلها فعالم ااااخر) لا غرجع هنا اماما مرجعش معاك…
الغالية: (بعصبية) زيد علية نتي خلاص وانا تتقول مال لبنت مدوخة وهي جالسة مع مكلخة
خديجة: الله يعفو عليك ديها فبنتك حسن متبقاي مقبلاني..
الغالية: (زربت خارجة مخلية لباب محلول جارة غيثة) انا نوريييك لالاااك اش سااوية!!!
اورطيغا: (رجع للدار لقاها عامرة كاينة مو وختها بنتها وعمر سلم عليهم من بعيد دخل نيشان يدوش كينݣر تعطل تماك كان باغي ينعس شوية عاد يهبط للمحال غير يتكالما حيت عيا يبين البرود ولكن سعد عصبو هاد نهار!!!
خرج من تماك مشا لبيتو سد لباب جبد خلاص اليوم خبعو فين موالف كيخبع الفلوس حتى الجمعة ويديه للبنك كما موالف.. لبس حوايجو صلا الظهر دخل للكوزينة كانت مو كتحط ليه غداه)
حطيهلي فالصالون
أمينة: باش تعاود توسخ الزربية، ياله جات قبيلة هادي تاني مرة كنصبنها وعمر شي ضيف جلس فيها
اورطيغا: واش انا مومو تتقردي فية هاكا!!!
أمينة: (ضارت عندو كتشوف فيه) مالك كتبان ماشي هو هداك!!! ياكما على حساب ختي وولادها للي جاو؟!
اورطيغا: ااابناقص من شي غدا (خرج من الكوزينة)
عمر: مرااد وااامرااد
اورطيغا: (شاف فيه كان فلبيت، بنرڤزة) شنو!!
نعيمة: اجي اولدي جلس ترتاح (جاية مو هازة بلاطو فيه غداه طبسيل كسكسو وكاس لبن)
أمينة: اجي احبيبي تغدا (اورطيغا غير كيشوف تبعها جلس شاف فلبنت للي تماك لابسة داكشي محتارم حانية عينها اول مرة يشوفها مكملش ثانية فيها) جلس اولدي
اورطيغا: (رجع هز لبلاطو) واش واحد ياكل نتوما جالسين انا نتغدا فلكوزينة (قبل متهضر مو مشا للكوزينة حط كياكل هز تيليفونو مدوز نمرة ملاك مجاوبتش شاف فالساعة كانت 2 ونص رجع صونا جاوبت)
فيين اتووت
ملاك: (بملل دايرة يدها على حنكها) باقا فالخدمة، ونت؟!
اورطيغا: انا ياله جيت للدار
ملاك: مزيان
اورطيغا: نجي عندك؟!
ملاك: لا.. عاد تفكرتني شحال صونيت عليك هاد صباح
اورطيغا: ملاك (سد باب الكوزينة برجلو) داز صباح **** بحال ***””
ملاك: واا مرااااااد
اورطيغا: عيوون مرااد.. بغيت نشووفك البنت نهرب بيك شوية
ملاك: هه فين غتهرب بيا؟!
اورطيغا: معرفت مهم نتلاحو لشي كوان نديرو سانديكا متحركة وانا وياك راس فالراس وجبيكا
ملاك: هههه شنو!!
اورطيغا: مديريش فبالك هادي غير لغة عوازا تنفهموها غير بيناتنا
ملاك: ههه
اورطيغا: شنو منشوفكش!!
ملاك: انا نقدر نهبط لفاس نمشي لفاك نقاد شي ورقة وغندوز عند خديجة
اورطيغا: مسمعتش سميتي فهاد لپَّاسِيُووو
ملاك: ههه
اورطيغا: جا معاك الظحك ابنت رشيد
ملاك: (غير قال سميت باها غوبشت)
اورطيغا: امتى غتجي وكان؟!
ملاك: معرفتش شي ساعة ونص نخرج من الخدمة ندووز للدار بعدا عاد غنجي
اورطيغا: علميني غتلقايني تنتسناك فالحومة
ملاك: اوكي…
الغالية: (خداتها عند طبيبة تجميلية للي خبرتها ان الجرح مزال جديد خاص يبرا بعدا ضرووري عاودت ليها الفاصمة ورجعو فتاكسي)
اش غتمشي عندهم ديري
غيثة: (معجبهاش الحال تديها لطبيبة) بغيت نرجع عند خويا كرتاح عندهم
الغالية: واش مشفتيش مرتو كفاش محاملة حتى واحد يجي عندها! مسمعتش شنو قالتلي واش معندك نفس الحمااارة!!!
غيثة: (بعصبية) هضري على راسك انا خديجة باغياني شنو بغيتيها تبقى غير تتسمع منك ومتجاوبش
الغالية: هاااه!!! هاد الأخلاق تيمشييو, ياك ابنتي!!
غيثة: ماما خليني مع يوسف هاد الايام
الغالية: صونا علية ادم راه فرنسا واش عارفة؟!!
غيثة: (قلبت وجهها مباغياش تسمع سميتو حيت هادشي كيخليها كتر باغية ديك الكينة)
الغالية: علاش ابنتي مقبلتيش بيه ولد مأدب وباينة باغيك
غيثة: واش بالسيف؟!
الغالية: بقاي متبعة ديك الهجالة حتى تخرج عليك (وصلو لحي خرجت من الطموبيل زادحة لباب عليها)
سمحلي اشريف راه هاد الجيل غير الله يستر معاه وصافي
(خلصاتو وخرجت تابعة بنتها كتنݣر عليها)
~~~~~~~~~~~~~~~
زهرة: (من بعد مقطعت مع مريم بقات كتفكر شحال ولكن!! محست حتى نطقتها) وينوض صداع اللهم صداع ولا بنتي تحماق!!
(مشات لبيت هزت الساروت ديال ديك الغرفة واخا جاية حدا طواليط ولكن اللهم شحال وهي كتفكر فهاد الحل!!!
حلتها فيها كيحطو ربل ديال الدار والزيت البلدية، بقات كتشوف البيت صغير مساحتو 2 متر ونص على 3 يقضي الغرض مشكل للي فيه خاصو صباغة ضرووووري حيت حيوطو مقشرين ويتنقا مزيان وخاص فراش وهادشي للي هنا يتلقالو بلاصة حيت فيه طونات ديال الزيت البلدية للي كيحتاجو العام كامل، دخلت مرت الجد)
غنرد هدا بيت لملاك تبقى تنعس فيه
مرت الجد: مسكينة لبيت حالتو
زهرة: نقاادو ميمكنش نخليها هكاك شفتي لبارح شحال بكات بغات حتى هي فين تخشا وتلبس لي بغات وتنعس بيه وتخبع حوايجها
مرت الجد: انا من عندي نبدا نخمل معاك
زهرة: هاد الزيت للي معرفت فين نديرها!!
ملاك: (دخلت للدار لقاتهم مجمعين فداك لبيت، مشات لبيت مها نيشان كاعية تبدل حوايجها وتقاد راسها باش تمشي تشوف للي كيطير عليها هاد الغمة!! حتى دخلت عندها مها)
غنمشي لفاس اماما عندي شي حاجة فلفاك وندوز عند خديجة شوية ياك عيطاتلك قالتها ليك
زهرة: باتي معاها (شافت فيها ملاك ممتيقاش) راني قلت لباك باش تعاونيها فالتخمال ونيت راجل ختك عندو شي خدمة فرباط وختك غتبقى بوحدها هاد اليوماين
ملاك: (بقات كتشوف فيها وتخطيطات فراسها وجاية مع الويكاند) مقالتليش!!!
زهرة: عاد عرفت حتى هي، واالكن !!
ملاك: مكاينش واالكن اماما معندي فين غنمشي كوني هانية…
ملاك: (مشات كتجمع حوايجها شافت فأنير للي كيغاغي بحال كيعيط ليها ويقول دا دا دا… مشات عندو تكات على ظهرها حاطاه على كرشها)
شنو اداك البرهووش
(كتجرو تبوسو فحناكو وهو كيظحك)
نديك معايا!!! (كتجرو تبوسو دخلت مها وجلست حداها)
ماما راه نقدر نمشي نتلقا بشي واحد
زهرة؛ واش باغياني لمك نحلف عليك متمشي!!
ملاك: وباغياني نكذب عليك!!! (غتقلب الموضوع باش مها متحسش بالهبة ديالها مشات فمهب الريح)
ماما هادي شحال وانا كنصوني على وفاء ومكاين خبار عليها تيليفوناتها طافيين
زهرة: معندكش نمرة مها؟
ملاك: لا.. معمرني هضرت معاها حدي كتقولها سلمي على صاحبتك وانا هكاك، والله حتى خفت عليها
زهرة: وهي باقية فأكادير؟!
ملاك: داكشي للي كنت عارفة منين مشات من عندنا
زهرة: معرفت ابنتي يكون خير ان شاء الله
ملاك: واش يوسف غيمشي لشي بلاصة!! قبيلة مقالتلي خديجة والو
زهرة: عاد شوية صوناتلي جاتو شي خدمة لرباط ضرووري براسو معجبوش الحال! وهي مبغاتش تمشي لعند حماتها وشتك نتي وباك بحال المش والفار اللهم تمشي تونسيها وتفوجي شوية
ملاك: امم (رجعت كتلعب مع أنير ناضت كلات شوية من للي حطات ليها مها جمعت طبسيلها غسلاتو ومشات هزت بليزتها للي جمعت حوايجها فيهم، سلمت على مها وخرجت من الدار، جارة بليزتها كتكتب ميساج لاورطيغا)
“”انا عاد خارجة من الدار””
(مجاوبش ردت التيليفون للصاك شافت حمزة هاز صاكو وجاي زربت خرجت من دريبة وهزت تيليفونها كدوز نمرة خديجة داز من حداها منطق موالو.. وهادشي عجبها)
الوو.. اهلين.. واش يوسف مغيكونش؟!! اه جاية
اممم صافي واخا.. امتى تكوني فالدار.. صافي معليش اصلا حتى انا عندي ميدار.. واخ
(ركبت وزادت فطريق صونا عليها اورطيغا علمها غيكون فالحومة دوز عندو ويطلع معاها لفاك طلقت موسيقى وكتصوݣ بشوية حتى وصلت لفاس وبقات رادة لبال مع طريق.. وصلت للحومة وحطت طموبيلتها حدا طموبيلتو بقات فيها باش تصوني حتى وقف كيضرب بيدو فالزاج.. تبسمت ردت التيليفون للصاك وخرجت هازا مع شي وراق اول مرة ميمدش وجهو)
اورطيغا: زيين!! (تبسمت) مشينا؟! الجو مغيم
ملاك: شفت غتطيح شتا هنا (سدت الطموبيل ومشاو بجوج كان كيهضر مع شي دراري وهي كتأكد من الملف فيه داكشي للي تحتاج حيد ليها الملف باغي يحلو وهي تجبدو دغيا)
مرااد!!
اورطيغا: اش مخبعة تما!!!
ملاك: ههه مفترجعش للمحال
اورطيغا: تطرديني؟!
ملاك: بلعكس بغيت ندوز هاد لعشية معاك
اورطيغا: نغيزو هاد لبريكول ديالك وأنا معاك… (وصلو لفاك قضات شغلها وخرجو من تماك)
فين تمشي الزين ديالي
ملاك: اممم معرفتش
اورطيغا: الدار!!
ملاك: ههه حلم..
خديجة: (كانت خرجت هي ويوسف ياخد شي حوايج على حساب هاد الاجتماع للي غيكون مهم وغيجي شي وفد هو للي غيستقبلو واخا هاد الغفلة معندوش معاها ولكن الخدمة هي هادي واكثر حاجة شاغلاه هي ختو اما خديجة غتجي عندها ملاك تونسها..)
يوسف: متأكدة منتقاداش؟!
خديجة: صافي ها ملوكة غتجي ونخرجو انا وياها
يوسف: معرفت اش دير غيثة منين مشات لتماك!
خديجة: وكان غير قلتها لخالتي الغالية راه حتى هي خاص ترد ليها لبال الحمل مخاصش يكون غير عليك راه حتى لعبه خاص تكون عليها العين
يوسف: انا عارف شنو غندير…
(دخلو لقهوة يجلسو شوية عاد من بعد يرجعو للدار هو غيشد طريق لرباط وهي غتسنى ملاك تجي..)
~~~~~~~~~~~~~
الغالية: (وصلو للدار غيثة مشات لبيتها نيشان مباغية تهضر مع حتى وااحد حتى دخلت مها كتهضر فالتيليفون.. مداتو ليها)
ادم بغا يهضر معاك
غيثة: (بخوف شدت التيليفون) ألووو
ادم: غيثة خلعتيني عليك شنو واقع؟!
غيثة: غير طحت وتجرحت فراسي
ادم: واش شي حاجة ݣغاااڤ؟!
غيثة: (كتشوف فمها للي كتقولها ترطب معاه وتهضر مقادة) لا
ادم: متأكدة!!
غيثة: اه (شافت فالنمرة كانت ديال فرنسا) هاك ماما
ادم: بلاتي.. توحشتك اغيثة
غيثة: (مجاوبتش عطات لمها التيليفون) تيضرني راسي بغيت نعس.. (تكات مغطية وجهها..)
الغالية: (كملت مع ادم للي كيتشكى انه مكتعطيهش وقت وانا اورطيغا كيلعب بعقلها وخاصهم يديرو حل حيت بسبابو تفارقو..)
يا ربي امتى نتهنى من داك وجه النحس!!
(رجعت عند بنتها)
مزال مدير عقلك ابنتي!!
غيثة: علاش شنو درت؟!
الغالية: ابنتي ادم راه شهوا منو مالك مديرش عقلك معاه عطييه وقت
غيثة: مبغيتش اماما واش بالسيف؟
الغالية: بغيت غير نعرف شكون تيلعب ليك فداك الراس!!
غيثة: بغيت نرجع عند خديجة عفاك اماما ها هي غتجي ملاك ختها بغيت نبقى مع لبنات
الغالية: خلاااااص علية بقالك غير هادوك طيح من مستواك وتجلس معاهم
غيثة: خرجي عفاك بغيت نعس (بقات كتنݣر عليها ولوخرا معندها خاطر كتبان غير تنوض تضرب مها باش تسكت من نݣيرها صووتها محاملاش تسمعو)
اورطيغا: (مشا خدا ݣارو من حدا باب لفاك الجو بكترة مكان مغيم بدا كينقط ستا خفييييفة، اما هي دار لقاها واقفة مع جوج بنات ودري شعل الݣارو وبقا مقوس عينو فيها كيشوف فالدري كفاش كيشوف ويهضر معاها ضارت كتقلب لقاتو كيشوف دارتلو إشارة يتسنى متبسمة قلب وجهو كيتشفى فحاالتو وبقا كيتسنى كان جو زوين بالنسبة ليه حتى جات عندو.. لاح الݣارو عافس عليه)
شكون هادوك
ملاك: كانو طلبة، دارو معايا يعطيوني تلخيصات الدري للي كنعرفو بزاف كان قرا معايا ودابا راه أستاد
اورطيغا: مزيان، امتى غيجيبو ليك التلخيص
ملاك: عطيتو email ديالي وغيصيفط لية كولشي
اورطيغا: مزيان (شافها مشات شرات حلوى فتحتها ودارتها فمها وتمو هابطين للحومة)
باش غتنفعك هاد لقرايا زعما الا الخدمة راكي خدامة
ملاك: تنفع فزيادة
اورطيغا: ومتنفعش تجي بيها لفاس خلاص
ملاك: ههه لا
اورطيغا : امم شحال تتخلصي؟!
ملاك: هه غييير شي براكة، الحمد لله معندناش ومخصناش
اورطيغا: ههه نتي بزااف.. تتعاوني فمصروف مع باك
ملاك: (خرجت عينها) لاااا… بابا للي مسكين باقي كيصرف علية، عرفتي عمرو بغا يشد درهم من عندي حتى فاش شديت اول صالير عيت فيه ووالو مقياس بحرا بغا واحد الجلابة خيطتها ليه
اورطيغا: اوا مال مك على هاد تقمشيش!!
ملاك: ماشي تقمشيش غير معزيزش علية نخسرهم على التفاااهة باش منين نحتاجهم لقاهم ماشي نخسرهم فتخربيق
اورطيغا: اوا وفالصح للي قلت ليك هداك نهار ؟!
ملاك: معنديش داكشي للي قلت (كترمش عينها) تسلفني!!
اورطيغا: (بنظرة شك) منتيييقش الا عطيتك رزقي بحال الا لحتو فالواد
ملاك: ياااك!!!
اورطيغا: (بقا كيشوف فيها جرها من فكها حيت تقلقت) شحال تبغي وكان انا ريتي ونحطها معاك ماشي غير فلوس؟!!
ملاك: (تبسمت من كلامو وقفو حدا الموبل) غير كنظحك معاك
اورطيغا: (بدات شتا تجهاد والناس كيختباو) ياله نطلعو للدار على متحبس ونكملو هضرتنا
ملاك: (بحرا كتحل عينها بنقاطي دشتا للي كتجي على عينها حيت ضروري خاصها تهز راسها باش تشوفو) الدار الدار الدار!! شنو مشكلتك نتا؟
اورطيغا: نتي
ملاك: كفاش انا!!
اورطيغا: نتي مشكلتي، والم*** تنحب هاد المشكلة!!
ملاك: انا مشكلة؟!!
زهرة: (كانت كتخمل داك لبيت ومرة مرة كتجي سهام طل عليها وتمشي حاايرة معرفتها علاش خرجت دوك الطونات ديال الزيت من تماك وداك ربل وهي ما فيها للي تخمل)
سهام: الزهرة!! خلي حتى لشي نهار اخر ونخملو
زهرة: غير سيري جلسي اسهام انا كنقاد هاد لبيت
سهام: واش دخل الفار عاود؟!
زهرة: لا (بقات كتشوف فلبيت ضرووري خاصو يتصبغ حيت حيوطو مقشرين خرجت كتحرك الطونات ديال الزيت فالقنت على ميجي رشيد وخوه يطلعوه لبيت سطح)
هنا غتبقى تنعس ملاك
سهام: فهاد لبيت؟! ياك هدا بيت لخزين!!!
زهرة: سهام البنت كبرت وخاصها بيتها ان شاء الله على ميسهل الله وتمشي لديوانها غيبقى لبنتك صفاء تاخد راحتها حتى هي
سهام: وهادشي فخبارههم؟!
زهرة: لا ولكن سيري قوليها لراجلك الا بغيتي دابا
سهام: مݣلتش هكا غير (بقات سااكتة حتى هي مكرهتش لولادها بيتهم وجاتها ناقصة فحق ولادها علاش حتى هوما ميكونش عندهم بيتهم كما غيكون لملاك!! ولكن بقات سااكتة)
عندي واحد الخامية ديرو فالسرجم
زهرة: براك الله وفيك اسهام غير خليه من بعد الا حتاجيناه انا راه عندي واحد وباها يجيبلها شي حاجة تقضي بيها غير فين تبقى طيح الرأس وصافي
سهام: اوا تبقى تنعس حداها صفاء
زهرة: ههه شي مرات تنعس حداها علاش لا!!
سهام: (دخلت للبيت وشعلت البولة) البيت خاصو صباغة وشي حكة للأرض فاااعلة تاركة
زهرة: غدا رشيد يجيب الصبااغ على ميتصبغ ونحكو راه صغير دغيا دغيا ندوزو وعندي موكيط يجي قد لبيت
سهام: اممم
زهرة: هانتي ملاك ان شاء الله تمشي لدارها ويبقى هاد لبيت لبنتك تاخد راحتها فيه، لبنات راه دغيا كيكبرو وكيبغيو بيتهم بوحدهم ياخدو راحتهم
سهام: هي كاينة شي حاجة فطريق
زهرة: (باش تبتها) اوا غير خليها مستورة ودعي معاها يتيسر ليها أمورها
سهام: نشااعالله ملاك عزييزة عندي وكان رطبت داك الراس وكان راها مجوجة خويا وبدارها
زهرة: معليش فوقما كتب سيدي ربي رزق مرحبا بييه…
~~~~~~~~~~~
اورطيغا: (هز حواجبو بجوج وجمع فمو) هادشي للي سمعو ودنيك الشيخة!!! مهم….
(دور عينو فالدري للي كينسنااه, جبد من جيبو سوارت دارو وحطو فيد ملاك بلا ميعيق)
سيري طلعي غير تحبس شتا غنجي عندك نمشيو لشي قنت
(شافت فيه بغات تهضر)
ياله سيري بقاي بووحدك
(دورها جهة لباب وهو مشا عند الدري معرفت مدير من غير طلع…)
ملاك: (طالعة فدروج عاد طلعت معاها راها قالها كنبغي هاد المشكلة)
والمشكلة هي انا!!! (ظحكت) يعني قالي كنبغيك ولكن المشكلة علاش!!!
(بقات كتفرنس دازت من حدا دارو وطلعت للدار لفوق للي مزال عندها سواارت حلت ودخلت حتى طلت عليها وفاء من بيتها تصدمت)
وفاء!!!
وفاء: (تبسمت بحزن كانت ضعاافت مشات باتجااهها)
ملاك: علاش طافية تيليفونك (جات عنقتها طلعت معاها ريحة العرق كتسلم ورجعت شافتها) مالكي؟!
وفاء: والو… غير كنت هنا سادة علية وصافي
ملاك: من امتى وفوقاش رجعتي من أݣادير؟!
وفاء: جلست غير شي 3 ايام وجيت هنا
ملاك: وعلاش مقلتيلي والو ومالكي ضعافيتي هاكا!!! واش عندك شي مشكل ؟!!
وفاء: دخلي بعدا (سدت لباب ومشاو جلسو) توحشتك
ملاك: حتى انا ولكن علاش كنتي طافية تيليفونك؟! راه بالصح تخلعت عليك
وفاء: كنت بغيت نجلس بوحدي وصافي
ملاك: واش الأمور مزياانة؟!
وفاء: صاڤا ونتي؟!
ملاك: لا لا بيك شي حاجة (قربت حداها) قوليلي شنو عندك ياكما عاودتي درتي شي حاجة فراسك؟!
وفاء: (تنهدت وحركت راسها بلا) كنت غندير ولكن شديت راسي غير بالسيف كنحس براسي مخنووقة يدي مربوطين مقادرة ندير واالو
ملاك: علاش؟!
وفاء: معرفتش حتى الماكلة مقداش ناكلها وليت كنخااف مكنقدرش حتى نعس كنحس الا نعست غيخرجولي ويخنقوني ويعذبوني
ملاك: غير من الشيطان واش مرجعتيش عند طبيبة للي كنتي عندها؟!
وفاء: (حركت راسها بلا) محاملة نشوف حتى شي واحد ومقادراش نهبط فدروج
ملاك: (بقات كتشوف فيها بقات فيها) دخلي دوشي بعدا وصحصحي هادي ماشي وفاء للي كنعرف!! انا نقاد ليك شي حاجة تاكليها
وفاء: كنخاف نموت
ملاك: استغفر الله ، وفاء مالكي؟!
وفاء: معرفتش (عينيها خارجين) وليت كنخااف مكنعسش الضو كيبقى مشعول غير باش ميخرجلي حتى واحد
ملاك: ازمر متخلعيناش
وفاء: (ظحكتها) عييييت بغيت نعس غير شوية
ملاك: نعسي، هانتي دخلي دوشي كولي شوية ودخلي نعسي انا هنا كنتسناك
وفاء: وغتبقاي؟!
ملاك: واااا هو مراد كيتسناني ولكن منقدرش نخليك هاكا مهم متفكريش نتي دخلي دوشي راه ريحتك تطفش بلد (بقات كظحكها دخلتها للدوش جايبة ليها حوايج مشات حلات لبيت ديالها يتهوا شوية حلت باب البالكو كيبان ليها مراد حدا الموبل للي كيتبنى دوزت الريدو وبقات كتجمع زبل للي تماك ولحوايج الموسخين دارتهم فالشبكة… حطاتهم حدا الدوش باش دوزهم فلماكينة ومشات للكوزينة التلاجة خاوية من غير الطوست وفرماج، قلبت فمجر الكوزينة لقات ميكة دارت ليها لويزة كتبخ ودهنت الطوست من بعد محمراتو دهناتو بالفرماج صفات لويزة واخا جاتها الريحة فشكل من بعد مزادت شوية دسنيدة دارت داكشي فبلاطو وحطاتو ليها على متخرج من الدوش سمعت الدقاان مشات حلت لقاتو هو تبسمت)
مراد!!
اورطيغا: (مخزز فيها) فين صيفطتك انا تجلسي؟!
ملاك: صيفطتني نطلع للدار!!
اورطيغا: واش شي واحد مصيفطك لية تخربقيني ابنت العبد!!! واش غير شاداها عكس والسلام!!!
ملاك: واش بعقلك امراد غنجلس عندك فالدار؟!! (خرجت وفاء من الدوش متجر رجليها لاوية عليها فوطة صغيرة باين صدرها وفخاضها مراد شاف وهي ترد دغيا ملاك لباب خارجة)
اييييه شنو كتشوف؟!!!
اورطيغا: (ببرود) مشفتش
ملاك: (هزت حاجبها) انا شفتك كفاش كتعبر فيها بعينيك!!! واش نتا مريض؟؟
اورطيغا: (شد ليها فكها وتنترت معصبة) هضري مقااد ولا نكركب مك من دروج
ملاك: (دفعاتو من صدرو وظحك على طريقتها للي معصبة) عاودها وشوف شنو غندير
اورطيغا: هه (ظحكاتو ودار يدو على صدرو) وا بنادم راه الشوفة اللولة من..
ملاك: (بعصبية) حدر عينيك تعلم تحدرهم مرييض كدااير (جات داخلة وهو يشدها من ذراعها) متقيسنيييش
اورطيغا: متنترييييش!!!!
ملاك: (خرجت عينها) شغلي هداك
اورطيغا: بعدا انا صيفطتك للدار اش تديري هنا ؟!!
ملاك: (كعات) طلق من يدي امراد
اورطيغا: (مكيرمشش) مطاالقش
ملاك: (بقات كتشوف فيه بغضب وتحدي وهو محيدش عينو قلبت وجهها حتى طلقها وشد بيديه كتافها بلطف شافت فيه)
اورطيغا: شنو تديري هنا واش متيقاش فية!!
ملاك: ماشي مسألة ثقة انا طلعت هنا حتى كلقى وفاء فحالة خاايبة وانا شحال وانا كنقولك لبنت غاابرة تيليفونها طافي حتى لقيتها هنا ماشي هي هاديك راها غير كدخل وتخرج فالهضرة بحال هزيت وحدة وحطيت وحدة! وفاء ماشي هي هاديك!!!
اورطيغا: حتى انا ماشي هو هداك وكنت باغي نجلس معاك فخاطري فهميني حتى انا املاك باغي نحس بيك قريبة مني
ملاك: مغنجلسش معاك فالدار بوحدنا امراد
اورطيغا: علاش؟!
ملاك: منحاتش نشرح ليك
اورطيغا: (كيقنعها) معمرني نآذيك
ملاك: واخا هكاك بوحدنا لا
اورطيغا: (بنفس الوضعية بقا كيشوف فيها حتى عض شنافتو لتحتانية وهي كتهرب عينها من الشوفة فيه، مطارق فالراس كيتضاربو عقل كيقولو صافي معندك مدير بيها ميمكنش العلاقة تبقى ناشفة على الأقل غير احضاان، والعقل لكبييير لاسق فيها راحتو لقاها معاها ومستاعد يتنازل على راسو وميتنازلش عليها)
ملاك شوفي فية (شافت فيه)
انا مغندير معاك والو ميمكنش نبزز عليك شي حاجة ماشي حيت باغي نحافظ عليك وحتى لحلال ونقييسك وداك الهيت (وترها ووساعو عينها كتسمع بانتباه)
انا مبغيت ندير والو قبل حتى ميكبر هادشي بيناتنا ولا تكوني نتي، حبست من بزاااف دلحوايج حيت أنا مبغييتش انا مبقيتش باغي فهمتي!!!
ملاك: (غير كتشوف وعقلها خدام تيق ولا متيقش!! ولكن كفاش ماشي باغي نحافظ واش هي مكتيروش مكتعجبوش كانثى!!!)
اورطيغا: الا قلت ليك بغيت نبقى معاك غي باش نبقاو بجوج على راحتنا وصافي
ملاك: (معرفت متقول تقدر غير غتزبلها الا هضرت حيت بقاو استفهامات فراسها من لكلام الي قال!!!)
اورطيغا: (معجبوش سكااتها كأنها كتأكد ليه انه ماشي محل ثقة بالنسبة ليه) هضري ابنادم قولي شي حاجة!! قولي شنو عندك باش نفهمك!!! عقلتي نهار قلتي الثقة هي كولشي انا باغيك غير تيقي فية
ملاك: انا تايقة فيك امراد
اورطيغا: ولكن!!
ملاك: مكاينش ولكن مدام كنغامر ونجي عندك ونتلاقا بيك ونكذب على دارنا ونجي نشوفك ونمشي معاك نشد طريق جلست معاك فسطح الا وتايقة فيك (هزت كتافها) هادشي للي عندي نقولو ليك
اورطيغا: مزياان حتى انا هادشي للي باغي ومن بعد يجيو حوايج اخرين
ملاك: بففف شنو هاد لحوايج عاود!!
اورطيغا: (تبسم) نهار تحسي براسك باغية تعنقيني وتبوسيني غتلقايني وااجد
ملاك: سبحان الله عاد كنتي فقيه وحبستي واخا ماشي على قبلي!!!
اورطيغا: (,غمزها) ندير معاك استثناء ازين
ملاك: هههه (زاد قرب وجهو وهو حاني شافت فعينيه)
اورطيغا: منبغيكش تخاافي معايا واخا نيتي غاارقة معاك ولكن هانا شاد لفران معاك نتي
ملاك: كفاش معايا انا ومعامن مشادش!!! سمع امراد انا مكنتعاتقش فالخيانة
اورطيغا: الخيانة الله اكبر اش وصلنا لهاد الافلام المكسيكيه
ملاك: واااا الموووهيم نهار اللول قلتها للي يمشي علية غيمشي عليك
اورطيغا: دابا شنو فيها الا هاد الهضرة للي تنقولوها فدروج دخلنا للدار وقلناها حتى هنا راحنا بوحدنا ودروج حتى هوما مغريين ماشي غير الدار
ملاك: ههه نساااا
اورطيغا: اجي شوفي غير بيت نعاس راه انا غير مراد ماشي وحش غنطير عليك ونغتاصبك واخا التر** المرعودة تتكون مزيرة على العادية فاش كي..
ملاك: اوووو (دفعااتو) وااا مرااد تأ.. انا ندخل نشوف لبنت حسن
اورطيغا: سبحان من خلقك هنا بغيتي ندخلو والدار لتحت لا!!
ملاك: شكون قالك اصلا دخل ه.. (شافتو دخل مدرم ساد لباب من موراه، تبعاتو مخنزرة جلس طالق رجليه مفرقهم كيغمزها تجي فوق رجلو وكيضرب فوق فخضو) دابا امراد وكان لبنت كانت عريانة!!
اورطيغا: (فنفسو اصلا شاف كولشي، هز من كاس لويزة جغم مخمج وجهو ورد الكاس) شنو دايرة فهاد *****؟
ملاك: (هزت كتفها) علاش مالو لويزة
اورطيغا: اجي ذوقي واش لويزة ولا حنة ولا شنو هاد!!! (ناض عايف مشا للحمام)
ملاك: (طلت على الكاس شمت لا هي لون لويزة لا ريحتها) ويلي على فضيحة كنت غنقتل لبنت (دات الكاس لاحت داك لما وللي بقا فالابريق رجعت لقاتو رجع جلس) يمكن تلفت مفرقتش بين لويزة ودوك لعشوب معرف هي للي ناضت دارت هادشي
اورطيغا: يا ودي على بنات اخر الزمن!! مهم اجي جلسي حدايا نكملو..
ملاك: (جلست كيسمعو شتا زادت مجهدة)
اورطيغا: احححح هاد الصوت تيطربنيييي
ملاك: (تبسمت) حتى انا
اورطيغا: (بعينين نايمين) حتى نتي ازين ديال!!!
ملاك: امم.. شوف واخا نسخرك (حرك راسو باه) وفاء قالتلي شحال هادي مكلات شي حاجة نجيبلها غير شي سوندويتش ولا صلاد عرفتي دخلت لقيتها قبيلة فحالة خايبة ورغباتني نبقى معاها شوية غير باش تنعس حيت رجعت كتخااف
اورطيغا: تنعس ونبقاو هنا نهضرو على متفيق ونخرجو ماشي تسبݣي علية!!! (تجري علية)
ملاك: (تبسمت) كتشوف غير مصلاحتك!!!
اورطيغا: (هز تيليفونو قالها لشي واحد يتسخر دار يدو على الميكرو) تبغي شي حاجة!! (حركت راسها بلا.. قطع معاه حط التيليفون وهي تصوني مو قطع الصوت وردو فوق الطبلة)
ملاك: علاش مكتجاوبهاش؟؟! (عاودلها على عمر للي كتلسقو ليه.. جات الماكلة هبط ليها لحدا دارو مشا الدري عاد طلع دخلتها ملاك لوفاء كلات منها وبززات عليها شربت مغنيزيوم باش ترخا وخرجت عند مراد للي لقاتو متكي)
برد الحال!!
اورطيغا: اوا خاصنا دفا!!
ملاك: ههه.. نجيبلك تغطا
اورطيغا: حشووومة فحقك نتي كولك كاينة ونتغطى
ملاك: تأ…
(جلست مبعدة هز حواجبو بجووج) شوية وخاص نمشي عند خديجة
اورطيغا: ياكما غيهبطو لصفرو عاود؟
ملاك: لا غنبقى معاها (بابتسامة) غنبات اليوم وغدا حتى الاحد فلعشية عاد غرجع حيت يوسف غيمشي لرباط على شي خدمة ومبغاتش تبقى بوحدها
اورطيغا: هاااا لكلام الزين للي تنبغي نسمع
ملاك: ههه غنجلس مع خديجة
اورطيغا: بحال خديجة بحال مراد الله يجعل غير الصحة والسلامة
ملاك: ههه لأ خديجة
اورطيغا: (حرك راسو باه حك راسو) شي حاجة عندي هنا، اجي لعبيلي فشعري
ملاك: علاش فيك القمل!!
اورطيغا: واحد لوبسيون ديال الرومانسية معندكش!!
ملاك: ههه (تبسمت بحب وشافت فيه)
اورطيغا: (كتعجبو هاد الشوفة دالاعجاب منها) شنو فيها!!! (جا يهضر صونا تيليفونو كان الحاج جلس وجاوب كانت شي كموند كبيرة الغد ليه، قطع ورد التيليفون الطبلة)
ملاك: حسن عوانك مكتعيااش
اورطيغا: الخدمة هي هادي احبيبة (فرنست اما هو خرجت ليه عفوية، حط لوسادة حداها وكحز نعس مغمض عينو بغات تبعد ولكن كانت الحافة دلفتوي كيحس بيها)
خليييك اديك الوزغة واش انا مقرب ليك
ملاك: وااااااهبط شوية
اورطيغا: (بابتسامة شاف فيها بخبث بعينين نايمين) فين!! (جات نايضة وهو ينوض جلس طالق رجليه وكيشوف فيه) مزيان هاكا؟!
ملاك: شوية!! انا نطل على وفاء واش نعست!!!
اورطيغا: (بزفرة) لييك الله العزي (بقات كظحك لقاتها نعست كتجخر رجعت جلست كيهضرو وموضوع كيجب موضوع نسااو رااسهم فظحكهم ونقشاتهم ربعت رجليها وهو جالس على راحتو كيتعاودو.. حتى فاقت وفاء كانت لابسة بيجامة تيشورت بسروالها وجات جلست حدااهم…)
انا مع زواج ليلة تدبيرو عام
زواج صعيب ومسؤولية اه هو زوين ولكن خاص فيه بزااف دالتنازلات والتضحيات الاعجاب الحب الشهوة مكافيينش واقعيا خاصنا نفكرو مزيان فهاد الشريك للي غرتابطو معاه واش مكملين بعضياتنا واحد شوية!! حيت مستحيل يكون الكمال
القصة للي كنكتب من الواقع ديالنا كاين للي بقات كتجيه احداث مملة عادية روتينية غنقولك غتوحشي هاد الهدوء
وتاني حاجة كنأكد عليها العلاقات مكنديرهمش مثالين فقصصي كنركز على زوين والخايب… وكنحاول كل شخصية نبين فيها كولشي باش تكون قصة منطقية
أمينة: (حشمت حيت عمر بقا كيتسنى اورطيغا يخرجو بجوج وولدها مكيجاوبهاش فالتيليفون مالقات غير لبست حوايجها وخرجو مجموعين كيدورو فاس.. دخلو لقهوة بالصدفة كتلاقا مع خديجة ويوسف للي جاو سلمو عليها وعلى ضيافها يوسف رجع لبلاصتو)
كدايرة ماماك وخوتاتك شحاااال مشفتهم
خديجة: الحمد لله اخالتي حتى انا شحاااال مهبطت لتماك
أمينة: امدرا!!!
خديجة: هه مزاال نزيد شوية
أمينة: على مولانا ابنتي كولشي بوقتو زيين فين ملوكة مجاتش عندك؟!
خديجة: قالتلي غتجي اليوم حيت يوسف مسافر فالليل غتجلس معايا هاد اليوماين راها يمكن فلفاك شوية ونجي عندي
أمينة: هاااااااه هكااك (عاد عرفت علاش ولدها خارج التغطية) اوا غدا ظلو معايا
خديجة: مرة أخرى أن شاء الله
أمينة: (طلت على يوسف). ولدي يوسف غدا مرتك تجي ظل معايا راه كاينة غير ختي وبنتها وهاحنا موانسين
يوسف: (بابتسامة) مرحباااا
خديجة: (تبسمت) ربي يخليك اخالتي
أمينة: اوا ساعتكم مبروكة نمشي عند ختي (ودعاتهم ومشات وبقاو لوخرين جالسين كيهضرو فموضوع غيثة للي شاغل بال يوسف!!)
~~~~~~~~~~~~~~
اورطيغا: (فست قلبها كتعاود وتبكي على شنو كيوقع معاها) علاش مالكي؟!
وفاء: معرفتش.. (غمضت عينها كتفكر غير الليلة للي كانت فلقبور) مبقيتش قادة نجلس بوحدي
اورطيغا: ربي كلب
ملاك: ههه واش بنيتك!!!
وفاء: ههه وااا فكرة صراحة، ولكن ماشي كلب قطة بعدا!!
ملاك: (صونات عليها خديجة وقفت تجاوب) الو (بغات تمشي تبعد)
اورطيغا: هضري هنا
ملاك: (شقلبت عينها وبقات واقفة علماتها كاينة مع وفاء وأصرت عليها تجيبها معاها حيت مكاينش يوسف وحتى ملاك رحبت بالفكرة قطعت ورجعت جلست) تمشي معايا لعند خديجة راجلها مسافر هاد اليوماين ومنها متبقايش بوحدك
اورطيغا: وشنو حنا منخرجوش؟!!
ملاك: (بقات كتشوف فيه) حنا…
اورطيغا: نوصلو وفا للدار عند ختك وحنا غنتحركو لشي قنت (وقف قبل متهضر) انا نتسناكم لتحت متعطلوش (بقات تابعاه كتعيط ضار عندها فدروج) مال مك
ملاك: خليها حتى لغدا…
رشيد: (رجعو هو وباه من لبلاد رصاو على حساب محصول التفاح.. حطولوهم اتاي على مكملو عيطاتلو مشاو لبيتهم وبقات زهرة كتهضر معاه ماشي كتشاور ولكن كتعلمو باش غدا يخرج يجيب لملاك شي بيت نعاس ديال واحد ويجيب صباغ يدوز البيت!!)
رشيد: راه غنوضو غير صداع ازهرة على والو ها خويا حتى هو غيرجع
زهرة: يرجع مرحبا بيه دارهم هادي هو بنياتو الحمد لله كولها بدارها وولدو تبارك الله راه كبير وخدام مبقى لملاك فين تنعس حداه
رشيد: اوا حتى هوما غيقولو الولد كبير خاصو فين ينعس
زهرة: البنت عندها 30 عام مبقالها فين تزيد تحشا حدا لبراهش وانا قاديت ليها الغرفة وغتنعس فيها ولا غتشوفنا شي سكنة اخرى
رشيد: (بقا كيشوف فيها)
زهرة: شنو؟!
رشيد: كنشوف واش هاد لبنت مزال مبغى يجيها رزقها نتهناو عليها
زهرة: للي مكتبو ربي غيوصل دابا هي أمانة عندك كمل على خييرك لبنت راه غطج ونتا عارفها جداام مبينتلها مخويت حتى بيت اصلا ديك الغرفة كندخلو ليها مرة فشحال منين كنبغيو نجبدو الزيت ولا الزيتون ولا كندخلو شي حاجة مهرسة تما
رشيد: (جلس فوق النموسية) ومنين نجيبلها انا هاد النموسية راكي شفتي لفلوس فين مشاو هاد صباح
زهرة: جيب غير من لقديم سير للسوق غدا جيب ماطلة جديدة وشي لاخر غنشريه من عند نجية بغات تبيع داكشي ديال حمزة لقديم بقالها فلبيت وانا ناخدو نموسية وماريو صغير وكوافوز
رشيد: بشحال؟!
زهرة: مسكينة قالتلي خوديه غير انا مبغيتش عطيتها فيهم 1000 درهم
رشيد: اممم انا غدا بلعشية نجيبها ليك
زهرة: غدا صباح شوفنا شي صباغ يدوز داك لبيت
رشيد: واخ وشنو اخر نتي مزال غتبقاي غضبانة علية!!!!
~~~~~~~~~~~~~
أميمة: (شافتو مكيوبخها مكيغوت عليها غير شاد ليها الخاطر وللي بغاتو كيديرو وعاد مشارك معاها لفراش مكيتعصب مواالو)
خاصك تديني لفين دافن ولدي
حمزة: واخا غدا بلعشية
أميمة: لا صباح
حمزة: خدام صباح خارج مع 2
أميمة: ماشي شغلي غدا صباح بغيت نمشي نشوف قبر ولدي للي دفنتوه ونتوما معالمينييش!! عطاتكم خاطركم دفنو ولد ومو مزال حتى مشاافتو!!!
حمزة: كيحس بتأنيب الضمير كياااكلو مكيقد لا يهضر لا يجااوبها غير كيشوف بعينيه ويتفقس فالداخل…
ملاك: خليها حتى لغدا!!
اورطيغا: (معجبوش الحال مزال مشبع منها وهو للي سامح فبنادم كاامل على قبلها هي مبغاتش تزيد تبقى معاه مولاش جاوبها خلاها واقفة وهبط
على ملبست وفاء وهزت حوايجها هبطو عندو كان واقف مع شي دراري ودعهم ومشا عندهم للطموبيل)
ملاك: (كتشوف فعينيه ولكن مكيشوفش فيها باين كااعي) مرااد!!!
اورطيغا: (شاف فيها بغضب) ياله سيري باش متعطليش (قبل متهضر مشا لجهة طموبيلتو مصوني على مو للي داير التيليفون فودنو مراقب ملاك ومو كتسبو علاش مكيجاوبش!
شافها رجعت اللور خرجت راسها تبسمت معاه واالو مكحل بلعمى كملت طرييقها حيت خايفة يصوني باها على خديجة ويلقاهاش..)
وفاء: وكان غير بقيتي معاه شوية باينة تقلق
ملاك: الا زدنا شوية بوحدنا يا يغتاصبني يا نغتاصبو
وفاء: هههه كتفوجي علية
ملاك: كلون انا لمك!! عاوديلي نتي شنو وقع!!!
وفاء: معرفتش هاكا وقعلي
ملاك: وعلاش مجيتيش عندنا لصفرو حسن متبقاي هنا ولا مشيتي لتازة لداركم مخاصكش تبقاي بوحدك
وفاء: الا مشيت لتازة غنزيد غير نكمل وداركم حشمت منكم بزااف
ملاك: (بقات ساكتة هي براسها ملقيتش راحتها عاد تجيب صاحبتها مشاو لدار يوسف ملقات فين تحط الطموبيل بكترة مكانت عامرة بالطموبيلات صونات على يوسف للي علم الكونسييرج دلموبل حل ليها الݣراج وهبطت لباركينغ دالعمارة عاد طلعو عند خديجة للي كانت لابسة وأصرت يخرجو يتعشاو برا وهادشي بخبار يوسف.. حتى هي كانت محتاجة تفضفض.. ملاك صونات على اورطيغا ومجاوبش)
اه اه تقليقة ديال هاد ايخان صعييبة
(ولكن هاد المرة متااقتش فراسها كتر راه عاااجبها وكل حاجة فيه باغياااه! حتى هي كيتحركو فيها مشاعر وبغات تكون قريبة منو ولكن ديك انا حبست ماشي على قبلك معجبتهاش خاصو ديما يكون ملهووف وهي للي رافضة باش تحس بأنوثتها!! رجعت كتبت ليه ميساج)
*مراد انا غنخرج مع خديجة ووفاء نتعشاو*
(صيفطاتو وجلست كتسنى والو مجاوبش صونات مها أبيل ڤيديو جاوباتها كيبان ليها باها هاز أنير كيطل عليهم بقاو كيهضرو شوية مقالوش ليها على بيت نعاس قطعت معاهم عارفة باها كيتأكد فين هي! رجعت شافت واش رد ووالو!! كانو خديجة ووفاء كيتعاودو وهي ديرونجات معرفت فين زاد واش بقا فالحومة ولا رجع للمحال!! رجعت حدا لبنات)
فين غنمشيو نتعشاو؟!
خديجة: فينما بغيتو انا عارضااكم
ملاك: مم نمشيو للسعادة (بقاو كيتغامزو عليها ويشدو فيها خرجو مشات بيهم ملاك للسعادة اقرب ريسطو لمحال اورطيغا بقات كتقلب على طموبيلتو ملقاتهاش.. دخلو لبنات وهي تصيفط ليه ميساج)
*حنا فريسطو ******
والله لا عاودت دابا كتبت ليه شي حاجة يمشي ي*** ݣاع!!!!
أمينة: (جا عندهم مراد لفين علماتو ومشاو باش يتعشاو مع جاه ميساج فين كاينة قلب الدورة) باسم الله عليك ، فين اولدي ماشي؟!
اورطيغا: كاين حدانا واحد القنت زوين غيعجبكم ديال العائلات
نعيمة: (عجبها الحال هدا كيعني انه قلب على بلاصة زوينة باش يكبر بخالتو)
أمينة: وااه.. (بقات مجمعة مع ختها وبنت ختها للي شرات ليها لبيسة كادو وحالسين اللور وعمر مسكتش من الهضرة كيعاود لمراد على العيشة فالسويد.. وصلو كتبانلو طموبيلتها تماك دخلو مجموعين كان الريسطو عامر جلسو عائلتو فالقنت وهو واقف كيقلب بعينيه حتى كيسمع ظحكتها مجهدة حتى دارت يدها على فمها، غوبش كتبانلو كتاكل وظحك جلس مقابل معاها كيتحسر على تفكيرو مني ظن انها منين مجاوبهاش غتكون مأزمة ولا منوغشة حيت مقلق منها!!!
حتى كيقول صافي وصلت ليها وكضرب ليه كولشي فالزيرو رجع حااير معاها باغي يعرف غير واش بجوجهم كيحسو نفس الاحساس!!! واش عندو أهمية كبيرة عندو!!!
بقا كيسمع كولها شنو طلب فلعشا وبقا كيشوف السرباي مشا عندهم هي كانت حانية كتاكل هزت تيليفونها بحال شافت الساعة ورجعت حطاتو كتب ليها ميساج)
“”بربي تعاودي بحال ديك الظحكة حتى نهجرو لمك”””
ملاك: (قرات لميساج وهي تخرج عينها هزت راسها كتقلب قلبت راسها كتقلب عليه كيبان ليها فالقنت سااامر عليها تبسمت مع شافت للي جالسة حداه جمعتهم ورجعت ضارت… هو قال ولد خالتي وخالتو شكون هاديك!!! )
أمينة: ولدي غدا عندك الخدمة كتيرة؟!
اورطيغا: كاينة البراكة غدا علاش؟!
أمينة: غير قلت تدي عمر يشوف مولاي يعقوب فصباح وترجعو
اورطيغا: (شد لسانو وهي كتهضر) كاين تاكسيات تيمشيو لتماك اما انا غدا عندي الدعوة مزيرة فصباح
عمر: معليش حتى لشي نهار اخر وننضيو كاملين
اورطيغا: ان شاء الله (هز راسو مالقاهاش كاينين غير لبنات) انا جاي!! (مشا لطواليط كما توقع كاينة تماك كتغسل يدها دخل وسد لباب ضارت هي بهدوء كتشوف فيه بحالا عارفاه غيتبعها)
شنو هادشي ديالك نتي؟!!
ملاك: (بهدوء) مراد انا قلت ليك علاش مشيت!!!
اورطيغا: وخرووجك؟!
ملاك: انا بعدا حتى علمتك اما نتا لا
اورطيغا: (مقرب ليها) انا غراضي نبقى معاك ماشي نبقى حاضيك من لبعد
ملاك: (تبسمت) شي واحد غيجي!!!
اورطيغا: (كترجع باللور وهو كيزيدها حتى دخلت لطواليط وهو واقف مكالي لباب بيديه حاني براسو) شنو نتي؟!
ملاك: هه شنو!! واش غنبقاو فطواليط بنيتك امراد!!!
اورطيغا: متتخليليش الحرية نتلقاو فشي بلاصة
ملاك: العشية كاملة وحنا بجوج راه فاش مشيت للدار صونا علية بابا ابيل ڤيديو كيشوفو فين انا!! واش باغيلي صداع!!
اورطيغا: فالليل غينعسو مغيصونيوش
ملاك: هههه قلتلك كتحلم
اورطيغا: منديرو والو!!! مبغيتش نتلقاو فالدار المشاريع اي بلاصة فين ترتاحي نتي!!
ملاك: مراااد سير رجع تعشا بانلي الجوع ممخليكش تفكر مزيان
اورطيغا: ونبقى ضايع انا؟!
ملاك: اللهم ضيع نتا ولا نضيع انا هه
اورطيغا: (حط يدو على قلبو) نتحمل مسؤوليتي العمر
ملاك: (خرجت عينها كظحك) مرااااد
اورطيغا: (تحل لباب زرب على ملاك سد عليها باب طواليط دار لقا مو زفر) شنو!!
أمينة: مال مك سكنت هنا!!!
اورطيغا: غتبعيني حتى فاش نبغي ****
أمينة: طليييه يا الجحموم مبقيت تحشم!! ظحك شوية مع الناس ونتا محاملهمش!! صافي جاو عندنا راهم ضيافنا
اورطيغا: ضيافك نتي
أمينة: ضيافي هوما ضياافك ونتا غير متلقى مدير تخبع فطواليطات (حك فراسو) وصافي اولدي ديرلي الخاطر وعطيهم وجه زوين
اورطيغا: صافي واخ غير سيري
أمينة: زيد ݣدامي (متهنات حتى جراتو من تماك اما ملاك هابلة بالظحك عليه، خرجت دارت عكر خفيف وخرجت رجعت حدا لبنات للي مجمعين.. ناضو من تماك شافت فمراد للي كان كيشوف فيها هزت حواجبها متبسمة بقا غير متبعها مقوس عينو فيها، خرجو ياله كيركبو لقاتو من موراها كيحس بجاذبية خطيييرة من جيهتها كتخليه مساخيش بييها بحال شي مغناطيس!!)
ملاك: خلعتني ههه
اورطيغا: (جرها مبعدة من الطموبيل) غدا غتكون عندي خدمة مزيرة صباح ولكن وجدي راسك فأي وقت نقولك خرجي غتخرجي باغي نهضر معاك فشي لعيبة ديالنا!!
ملاك: امم غدا عارضانا مك
اورطيغا: طاتي تعلمي طاتي اديك البخوشة واش باغيانا نبداوها صباط من اللول!!!
ملاك: ههه
اورطيغا : نصوني عليك تخرجي، ياله سيري (مد حنكو يسلم عليها وبعدت وجهها شدها من قرفادتها دفعها شوية)
سير سير اخاي
(مشات كظحك دار يديه فجيابو ركبت فطموبيلتها وزادت… خرجت مو للي خنزرت فيه مجلسش معاهم مزيان ومشاو نيشان للدار كان بغا يمشي يبات فالليدو وحلفات ليه يبقى مع ولد خالتو دخل لبيتو هز حوايجو دوش بقا مجمع شوية مع عمر فلبالكو غير علماتو ملاك انها فبلاصتها مشا لبيتو شد معاها الهضرة شي ربع ساعة ونعس.. اما هي بقات مجمعة مع لبنات..)
أصبحنا وأصبح الملك لله…
غيثة: (كتحس براسها مخنووقة فاقت بتعب كبير واخا مدايرة حتى شي مجهود منين جات من دار يوسف وهي غير متكية صونا عليها يوسف للي اصلا متجسس على تيليفونها كتصطانع القوة والنشاط باش متزيدش عليه راه شافت حالتو كيف داايرة،
قطعت معاه رجعت بغات نكتب لادم ميساج ولكن مسحااتو على وجه يوسف خاصها تنسى هادشي تقوي راسها براسها دخلت الحمام قضات روتينها دوات الجرحة للي دايرة فيها غير فاصمة صغيرة ومع لافخونش مكتبانش، غدا عندها موعد مع طبيبة باش تستيكيها وقررت حتى من سطاج غتبداه باش تعمر وقتها..
هبطت تفطر كانو مجموعين مها وخالتها وبنت خالتها جلست حداهم مرشقاش ليها)
الخالة: غيثة حبيبة قالتنا ماماك كاين شي عريس غزاااال
غيثة: مفخباريش!!
الخالة: شنو اسمو
الغالية: ادم زين سمية غزااال شهوة منو متختاري من رجال غير هو
غيثة: بفف وكان غير قلتيلو كاينة حبيبة
بنت خالتها: ههه نتي مبغيتيهش انا علاش نبغيه
غيثة: معرفتش سولي ماما للي لاسقة فيه
الغالية: شتي كفاش ولات!!!
الخالة: حشومة اغيثة تقول على ماماك هكا حنا راه تنبغيو مصلاحتكم الا العريس ما فيه ميتعاب علاش رافضااه
الغالية: اوا قول!!
غيثة: مكاين والو اطاتي انا مبغيتش وصافي واش زواج بالسيف!!!
الخالة: لا ماشي بالسيف ولكن نعطيو فرصة ممكن يكون فيه خير
غيثة: ما فيهش خير ومبغيتوش ونسدو هاد الموضوع هنا اماما
(وقفت دايرة بناقص من شي فطور خرجت للجردة.. صونات على اورطيغا بنمرتها مزال مبلوكية رجعت صونات بريڤي مجاوبش كتعرف فهاد الوقت مكيكونش مسالي.. صونات على خديجة عرفت كاينة ملاك ووفاء وكتسمع الموسيقى وظحكهم)
ماشي مشكل نجي عندك؟!…
واخا انا نجي..
(قطعت طلعت لبيتها لبست حوايجها مها كتعيط ليها مسوقتش ليها ومشات خرجت زااربة..)
الغالية: (دارت يدها على راسها) حيرتني معاها هاد لبنت مابقيت عارفة مندير معاها اختي…
~~~~~~~~~~~
غيثة: (وصلت لعند خديجة دخلت لقات لبنات ياله جالسين يفطرو حيت مفاقوش بكري وكانو عاطيينها غير النشاط على صباح جلست حداهم مستمتعة بأحاديث لبنات وفطرت معاهم، جبدت خديجة CD ديال العرس كيتفرجو وملاك شادة تصاور كتفرج فيهم)
ملاك: (شافت تصويرة فيها هي واورطيغا وساعو عينيها نسات راه تصورت معاه، كان زويين شاد أنير شدتها كتشوف كانت كتخنزر فيه ولكن هو ظاحك وشاد يد أنير كتزومي ديك الابتسامة عينيه حتى لباسو!! تبسمت على منظرها هزت عينها شافت فغيثة للي عاودت ليها خديجة شنو لقاوها داك نهار واخا كانو شادين ولكن دابا تأكدت عليها!!!)
غيثة بديتي سطاج؟!
غيثة: نهار الاثنين ان شاء الله
ملاك: مزياان غتعمري وقتك
غيثة: (عرفتها غتكون عارفة راه ب3 بيهم عندها علاقة معاهم يا خديجة يا يوسف يا اورطيغا) اه بالصح من موراها غنفتح مشروع لية
ملاك: احسن حاجة هو يكون عندك مشروع
غيثة: بالصح
ملاك: (خبعت التصويرة غتديها وكملو كيتفرجو وكان حديثها مع مراد قلييل حيت ممساليش…)
غيثة: (,ناضت ممرتاحاش كنحس بيهم عارفين وكيظحكو عليها، دخلت للكوزينة كتعيط) خديييييجة!!! خديييجة
خديجة: (ناضت عندها كتستفسر) مالكي ؟!
غيثة: شوفي حلفي بالله واش ملاك قالهالها يوسف علية!!
خديجة: والله مقالها يوسف ولا مراد شي حاجة، الحمقة كوني هانية وأصلا الحمد لله نتي مزيااانة صافي غلطتي وداازت ديري بحال موقع والو
غيثة: بالصح؟
خديجة: والله ياك صافي مبقيتيش غتشربي داك السم شوفي نتي غزالة وقلبك زوين علاش غضيعي راسك
غيثة: (بحزن) عفاك متقوليهالهاش مبغيتش الناس يبقاو يشوفو فية شي شوفة ناقصة وانا والله مغنعاود ندير داكشي
خديجة: كوني هانية.. شوفي خالتي أمينة عيطت علية عرضانا اليوم لعشا غنمشيو كاملين تبغي تمشي معانا؟!
غيثة: لا لا انا منمشيش حشمانة من اورطيغا وعارفاه غيبقى يلومني وماما راكي عارفاها معندهاش مع طاتي أمينة تمشي تجي من مورايا ولا شي حاجة اللهم بلاش رجع للدار
خديجة: زعما!!
غيثة: صافي غير سيرو.. حتى تكونو خارجين وانا ناخد تاكسي للدار (رجعو كيكملو التفراج جابو لغدا ونوضتهم خديجة يسيقو معاها ويمسحو لحيوط فجو الموسيقى والظحك حيت قربت تجيب فراش الصالون..)
ملاك: (كتمسح المكتبة والكتوبة صونا تيليفونها كان هو تبسمت)
ويييي
اورطيغا: تاكلي فار مشوي
ملاك: ييييععععع
اورطيغا: شنو فيها
ملاك: (متبسمة كان الييم عندها عيد ميلادها لكن مقالت ليه والو) …والو
اورطيغا: متوحشتينيش
ملاك: سيييي
اورطيغا: قوليها، عاوديها بسبليونية
ملاك: (خرجت عينها) كتعرف سبليونية
اورطيغا: سماوني اورطيغا غير هكاك
ملاك: حقا كفاش بلان هاد سمية؟!
اورطيغا: حتى نتلقاو، مهم انا دابا غادي للدار نزول علية هادشي ندوش ندوز للمحال عندي شي خدمة تماك وباني عندي
ملاك: نجي عندك انا؟!
اورطيغا: غديري فية بليزير، اصلا غتوصلي لبنات للدار هي هاديك
ملاك: صافي واخا ولكن منتعطلوش باش متعيقش مك
اورطيغا: مك يا مك.. بسلامتك هي عاد غتعيق ؟!
ملاك: لاااااا متقولهاش
اورطيغا: ومال جدك؟! للي معرفش اليوم غيعرف غدا
ملاك: و هه مهم حتى تعلمني صافي حنا دابا خديجة دايرة ليها حملة نظافة
اورطيغا : هي حادݣة!!
ملاك: هه كنطيير مع طيور
اورطيغا: بشااااخ غير ضايع فيك ابنت رشيد ياله تلاحي..
(قطعت معاه ورجعت كتمسح عاود لكتوبة)
وفاء: عنداك يتمسح ليك شي حرف بكترة لمسيح
ملاك: ها هاها سيري كملي شغلك بقاي حاضيااني!!!
ادم: (كان فالمطار تلاقات بيه ليلى للي جات من الجنوب من بعد مكانت كتسارا تسالمو بالأحضان)
صاڤا!!
ليلى: صاڤا كنت تنتسناك تقولي صافي رجعي مفهمتش علاش رجعت نتا للمغرب؟!
ادم: ديجا قلت ليك غنعيش بين هنا ولهيه شنو دار الواليد فالجلسة دلبارح
ليلى: تأجلت عاود، مفهمتش علاش تيجرجروه بغينا رجعو فحالنا خلاص
ادم: حتى هنا مزيان لا!!
ليلى: ههه شوية خاص نعمر وقتي باش يعجبني الحال
ادم: (ركبو فتاكسي) انا غنشووف (زادو فطريق صونا على شريف علمو راه جا المغرب) متتلقايش بشريف
ليلى: (خسرت كمارتها) نوو علاش غنتلقاه
ادم: هه صافي فهمت (بقا كيشوف فطريق وتبسم ابتسامة جاانبية على فشنو كيفكر…)
~~~~~~~~~~~~~~
من بعد موصلت لبنات وطلعو هي مشات عندو للمحال لقاتو كيوري الدري على شي كموندات غيجيو كليان ليهم بقات واقفة تم جاي عندها كيطلعها ويهبط فشنو لابسة نفس ستيل ديالها وللي عاجبو كولشي واسع وفنفس الوقت زويين مد حنكو تبسمت عطاتو بظهر خاارجة كتقلب على طموبيلتو
ملاك: فين طموبيلتك، اه وديير حسااابك مغنتعطلوش
اورطيغا: شي أوامر اخرى الالة غزاالي!!
ملاك: اممم (هزت كتفها) مع الوقت
اورطيغا: الطموبيل ديتها لاڤاج (هز ليها سوارت طموبيلتها من يدها) زيدي
ملاك: ما فيهاش المازوط بزااف
اورطيغا: هههه عطي نتي ربعميا وانا ربعميا ونقسمو صبر
ملاك: ههه فين غنمشيو؟! (ركبت كدير لاسنتيغ)
اورطيغا: شتا تطيح غنمشيو لشي كوان نتكمشو
ملاك: غيييييير تهناا راه منمشيش معاك للدار وأنا توقف على راسك
اورطيغا: (صايݣ ماشي للحومة وهي كتحلف مجاوبهاش وقف بالطموبيل) يا صاااافي هنييينا
ملاك: (سكتت خرجو دايرة يدها على راسها كتبعد شتا من على وجهها شير براسو تبعو تبعاتو قاطعين طريق كتشوفو ماشي للموبل للي كيتبنا)
مراااد!!
اورطيغا: جبت من عند السمسار سوارت تشوفي ديك الدار للي قلت ليك عليها
ملاك: (تحمست) بالصح!! (حل لباب ودخلت) واش 14 المليون بلفينيسيون؟!
اورطيغا: اه ومعاها شيفور وطيابة وشي ݣراج ديري فيه مشروع…
(طلعو ليطاج اللول كتشوف مكانتش الدار مقسمة مزال كولها طوبية والياجور محطوط تماك والرملة.. بقا كيشرح ليها فين الكوزينة والبيوت طواليط الصالون وهي متبعاه عاجبها الحال)
اورطيغا: كاينة هادي غتكون شي 70 متر وللي حداها كبيرة وولكن زايدة فالثمن يمكن فيها شي 140 متر حيت لبلان فيه 200 متر.. الموبل فيه 3 الطبقات وكل طبقة فيه جوج ديور بحال للي كاريين فيه
ملاك: وفهاد ليطاج كاينة الدار!! حيت بانلي كبير
اورطيغا: لا الثاني هادي غتكون زايدة على حساب فيها لاكور
ملاك: (باعجاب ممتيقاش حلمها لكبير غيتحقق) زوييينة بزاااااف، ولكن التسبيق طالب بزااف
اورطيغا: شحال جهدك؟!
ملاك: معنديش صراحة، معنديش حتى النص
اورطيغا: شحال ما عطيتي فالتسبيق طريطا تتكون ناقصة وتسالا ليك دغيا باش تجمعي لفينيسون
ملاك: (حركت راسها باه)
اورطيغا: تشاوري مع واليديك بعدا عاد نشوفو التسبيق وشحال يقسمها ليك من عام
ملاك: وعلاش نتا متاخدهاش
اورطيغا: يدي متقوبة اوين للي تربحو فصباح تيديه الليل
ملاك: ههه خاصك تجمع راسك شوية
اورطيغا: صافي هانتي شري الدار وانا نصلحها ونكتوبها فالنص
ملاك: ههه داخل على طمع؟!؟
اورطيغا: (تبسم قرس حنكها) مهم نتي شاوري واليديك ويكون خير، الواحد شحال ما جمع فلوسو فلحيوط مزيانة ومربووحة
ملاك: (تبسمت مكرهتش تعنقو، ولكن بغات تستفسر واش مغيشريش الدار!! وفين غيتزوجو؟!! كان كيهضر فالتيليفون بقات كدور كمل وجا عندها) امتى اخر أجل ؟!
اورطيغا: ماشي بزااف حيت هادي هوتة والشناقة تيقلبو على بحال هاد الهموز..
ملاك: ولكن غير هضر معاه يصبر علية على منشوف مع بابا
اورطيغا: (حرك راسو باه) مشينا؟!
ملاك: (حركت راسها باه هبطو من تماك مشاو اتجاه الطموبيل صونا تيليفونو جاوب حتى سمعاتو كيهضر مع غيثة ركبت وحتى هو ركب كيسمعها كتشكى من مها.. كمل معاها وقطع شاف فملاك للي كانت هازة التيليفون)
اورطيغا: (دار يدو على الكرسي للي جالسة فيه ضاير عندها) غتكوني سامعة بشنو وااقع
(حركت راسها باه) باش منطايفووش، منين عقلت على راسي وغيثة بحال ختي صغيرة وهي من بين الناس لقلااال للي انا عزيز عليهم
ملاك: كاين فرق بين عزيز بحال خوها وبين تتبغيك وبانية حلمات معاك بزاف
اورطيغا: وشنو ذنبي الا كنت سيكسي
ملاك: (بجدية) مرااااااد
اورطيغا: رية مرااد!! (تبسمت) كما قلت ليك (بإبهامو لمس على حنكها) منقدرش نسمح فيها وهي ماشية للموت برجليها على الأقل غير بالنصيحة !!
ملاك: (حتى هي إنسانيا بقات فيها ولكن راه خايفة على راسها) مشكلتك امراد نتا زهواني
اورطيغا: هههه انا!!! الله يهديك ابنتي راك غير ظالمااني
ملاك: اممم مسكييين
اورطيغا: نمشيو بعدا لشي قنت فين تبغي تمشي؟!
ملاك: شي بلاصة مكالمية
اورطيغا: (كيصوݣ) مكاينش حسن من الدار غير نتي تتبغي تعقديها ولا متيقاش فراسك معايا!!!
ملاك: التواضع
اورطيغا: مبغيتش نديرك فعقلي اما وكان شحال هادي طيحتك…
ملاك: (بثقة متبسمة هزت كتفها) جرب..
اورطيغا: لا لا نخاف عليك..
أميمة: (كانت جالسة فلبيت، دخلت عندها ختها للي كتنبهها على تعاملها الخايب مع راجلها وعݣوزتها وشيخها وانهم شحال ما صبرو عليها غيتقلبو عليها)
ميقدروووش
…: علاش ميقدروش نسيتي كفاش كان كيعاملك قبل
أميمة: هاديك قبل ميقتل ولدو
…: حمزة مقتلش ولدك، هو كتاب عليه يكون فالجنة!! ختي أميمة ديري عقلك
أمينة: غنديرو منين كولهم غيحسو باش حسيت
….: (عصبتها عيات دايرة ليها خاطرها) سيري تزمري نتي ݣاع مبغيتي ديري عقلك مشفتيش مرت عمي طيح ونوض وحتى عمي مسكين مرض، راجلك طيح صحتو وغير ساكت ويرغبك مفهمتش فين زايدة باش تقادي زواجك معاه جالسة كتخربقي انا غرجع اليوم للدار نتي ماعينكش فشي زواج اللهم تفارقو
أميمة: ياااك ونخليه القزمة!!
….: شتي القزمة غير مسوقة السيدة عايشة حياتها انا شحال وانا هنا معاك واحد مكيشوف فلاخر غير نتي كتخيلي مهم انا غنمشي…
أميمة: سيري اصلا نتي وكان كنتي مزوجة ووالدة كنتي غتفهميني!!!! ولا بحالك مغيفهمش هادشي..
….: لا حول ولا قوه الا بالله العلي العظيم…
~~~~~~~~~~~~~
الغالية: على سلامتك اولدي.. مرحبا… اجي فوقما بغيت… صافي واخا اولدي
(مشات لبيت غيثة كانت كتبدل حوايجها حيت عاد دخلت من عند خديجة)
لالة غيثة مولاتي
غيثة: نعاااااام أماما
الغالية: ادم رجع
غيثة: (قلبها ضرب تفكرت الحبة!! كتحس براسها غتسطى هي راه ماشي قطعت كينة عادية كتحس براسها بحال قطعت شريب الماء وبقات عطشاانة… هزت كتفها بلا مبالاة)
وانا مالي !!
الغالية: حياااني علييك باينة فيك منين سمعتي سميتو تفافيتي
غيثة: ماما هو ممزيانش لية علاش مبغيتيش تفهمي ادم ممزيانش لية
الغالية: واخا قوليلي شنو ممزيانش فيه
غيثة: تيمشي لي بواط ويمكن كيشرب ݣاع انا متيعجبنيش داك ستيل
الغالية: اوا راه ولد الوقت
غيثة: هادا للي تيديرهم ب10 ولد الوقت واورطيغا للي راجل تتقولي عليه شمكار
الغالية: لا إله إلا الله ها هي رجعتلي لداك لقييط
غيثة: مرجعتش انا غير عطيتك مثال
الغالية: سمع ابنتي انا ماماك وتنبغي ليك الخير عطيه فرصة ومتعرفي
غيثة: لا
الغالية: سمع نقولك هو بلاتي غيجي يشوفك
غيثة: مغنهبطش
الغالية: ديك الساعة غيكون كلام اااااخر!!! لبش شي حاجة مقااادة وصايب داك الوجه رجعتيه حاالتو…
(دخلت لريسطو كان الضو فيه خااااافت واغلبية طوابل فيهم شمع للي ممكن ضوي ليك ماكلتك مزيان جلست ماشي جلس قدامها جر الكرسي وجلس حداها بقات كدور عينها لبلاصة زوينة والموسيقى حتى هي زويييينة وكلاسيكية)
اورطيغا: عجبك لقنت!!
ملاك: برتوش وصافي
اورطيغا: هههه (كيمسح على وجهو) قلتلك نمشيو للدار
ملاك: مراد الدار هي للي مندخلهاش معاك!!
اورطيغا: غير بالفن دخلتك ليها قبيلة راه قلتلك متنديرش دماغي معاك (بقات كتشوف فيه) علاش خايفة مني؟!
ملاك: بلا متسول راه باينة غنمشيو للدار شنو غنديرو مثلا؟!
اورطيغا: (تبسم غامزها) مكاين غير شوا ولكوا
ملاك: (كتشوف فيه واش ظحك ولا تقلق هزت الموني حايدو ليها) شنوو!!!
اورطيغا: كملي معايا الهضرة
ملاك: معندي منقول
اورطيغا: (جرلها كرسيها لدرجة رجلها قاست رجلو) مبغيتيش تبقاي معايا متنجيكش على البال وتتبغي تبوسيني؟ تعنقيني!!!
ملاك: لا (رجعت بالكرسي حتى كانت غتقلب وشدها)
اورطيغا: امااال مك
ملاك: مراااد
اورطيغا: شنو مراد راه خاص نهضرو فهاد توااشي ضرووري
ملاك: علاش؟!
اورطيغا: باش نكونو مفاهمين فكولشي ازين
ملاك: (متقدرش تسولو هي براسها مزال مباغية تزوج دابا تعرفو مزيان ويعرفها عارفاه عندو ماضي كحل ومعقد من بزاف دلحوايج ميمكنش تغامر حتى تعرفو هو قد المسؤولية باش متزيدش تعقد حتى هي براكة غير خيانة باها للي مرضتها!!! بقات كتشوف فيه)
اورطيغا: باغي العلاقة بيناتنا تكون دموية
ملاك: ههه كفاش هاد دموية؟!
اورطيغا: نخلطو شي فشي ونميكسيو شي كائن
ملاك: هههه (كيضحكها بهضورو)
اورطيغا: تنهضر بالصح أجمتي، نغيز بلان ونجيو عند سي رشيد
ملاك: اممم (هزت الموني كتفقسو باش تفرح وتعنقو ولا تبوسو هز داك الموني وحطو فوق حجرو) مراد!!
اورطيغا: هزيه دابا
ملاك: راه كنحشم مكنعرف منقول
اورطيغا: ساهلة انا واحد مريض فراسو عصبي كل نهار بدماغ
ملاك: وانا وحدة مكنسمحش فحقي وكنرد الكلمة بجوج مكنعرف لا نطيب لا والو ومبرداااا
اورطيغا: ونمووت معاك
ملاك: (فرنست مهبطة راسها)
اورطيغا: شنو واش متتحسيش ابنادم عطيني شوية دالانوثة ودوك الالعاب دالأرانب
ملاك: معرفتش امراد انا مكنعرف منقول فهادشي كولشي فوقتو زوين
اورطيغا: (هادشي للي كيعجبو فيها وكيخلييه مربووط فيها) ولكن سمعينا شي لعييبة
ملاك: (تبسمت كتشوف فيه حايرة فشنو تقوول)
اورطيغا: (مد حنكو) ياله غير بوسيني
ملاك: (بعدت مرجعة راسها اللور حشماانة) هههه… اه فكرتني علاش كيقولو ليك اورطيغا!!!!
الغالية: (استقبلت ادم وليلى استقبال زوين للي كان جايب ورد مأنتك شوكولا فااخرة وهادشي كيعجبك الغالية وكيتير انتباهها)
مرحبا مرحباااا
(كان جالس حتى اب يوسف استقبلهم وجلسو تحط القهوة وبلاطو حلوى مشكل كيسولو على الاحوال)
ليلى: فين غيثة
الغالية: ها هي تلبس وتنزل (شافتها نازلة لابسة سورڤيت خرجت عينها ماشي هاكا قالت ليها تلبس، ووجها مدايرة فيه قطرة دالمكياج)
كما قلت ليكم عياانة بزااف مسيكييينة وبانت فيها
ليلى: (سلمت عليها ومدت يدها لادم للي معجبوش الحال) صاڤا غيثة
غيثة: الحمد لله
ادم: غيثة!! صاڤا!! (حركت راسها بلا كتفادا تهضر معاه)
الغالية: الا بغيتو خرجو برا الجردة وجلسو…
~~~~~~~~~~~~~~~~~~
طلبو عواصر بقاو مجمعين عيا يجبدها يرطبها واالو شاف حتى عيا وقلبوها ظحك وجموع، خرجو ركبو ومشا يوصلها للدار دمو..
ملاك: شوف بلا متعيق عاود بحال داك نهار قدام مك راه كنحشم
اورطيغا: (كيشوف فعينيها ومرة فشنايفها) اممم
ملاك: (تبسمت) احم، غتعطل؟!
اورطيغا: ماشي بزااف 9 ونص تنسد
ملاك: ياله بسلامة (جات خارجة شدها من يدها جارها لعندو خرجت عينها مكالية بيدها فوق صدروو) اويلي واش نتا كيقيسك جهل
اورطيغا: (كيلعب بلسانو فوق ضرستو) متنسخاش بيك البرغوتة
ملاك: (تفكت منو) متعاودش دير هاكا واش مكتفهمش
اورطيغا: غير بقاي تجهليني هاكا حتى نشد مك فشي زنقة متتخرجش طااالب غير بييييسة اعباد الله
ملاك: (خرجت من الطموبيل وحتى هو متبعها كيشوف عمر جاي وشاف فملاك للي كانت كتهضر بوحدها وكتنݣر على هدا للي كل مرة جارها راه ميمكنش راه هي للي غتفقد السيطرة!!!! ظحكااتو تبعها.. اما مراد بقا كيشوف فيه مقوس عينيه واش يمشي يخلي دار بووه ولا شنو حتى وصل عندو)
عمر: بدلت الطموبيل؟!
اورطيغا: لا
عمر: غتخدم ولا نخرجو نضربو شي دويرة
اورطيغا: (نعل الشيطان من دوك الافكار راه ماشي كولشي عارفو معاها) غنخدم ياكما تمشي تقهوا
عمر: لا لا نجيب قهوة ونجي نجلس حداك داك الفوق عامرة بلعيالات..
(مشا للمحال تبعو من بعد مجاب القهوة اما الدار لفوق بقاو مجمعين ملاك كانت غير كتشوف فديك البنت متنكرش انها زوينة ولكن تفقست من جلستها مع مراد فدار وحدة وعارفاه مكيزݣلش!!!!
الغالية: (من بعد مخرجو للجردة شافت فراجلها) السيد حااامق باغي البنت وهي معفرة عليه
اب يوسف: الا باغي لبنت يقصدني انا وخوتها
الغالية: اوا حتى تبغي هي
اب يوسف: كفاش حتى تبغي راه الهضرة معانا حنا!!! شنو هادشي الآلة الغالية (وقف) انا نخرج
الغالية: الحاج خليهم يهضرو
اب يوسف: واش بعقلك الغالية!!! (خرج عندهم للجردة كانو ياله جلسو) سلام عليكم ولدي اجي معايا
ادم: واخا… (وقفو بعاد) عمي قبل متهضر كنت بغيت نهضر معاك غي حيت عرفت غيثة مريضة جيت هاد نهار اما انا كنت ناوي نجي بوحدي ونجلس معاكم على منتافقو
اب يوسف: مرحبا
ادم: انا ماشي بزاف باش عرفتكم عن قرب وعجباتني غيثة بغيت نتزوج بيها، وتنتسى منها تعطيني الأوكي باش نديرو شي حاجة رسمية بين العائلة ويحضر معانا الحاج بنسليمان
اب يوسف: وهادشي فخبار العائلة ديالك!!
ادم: اه، وكولهم عجبهم الحال كما قلت ليك تنتسناو الموافقة ديال لالة غيثة
اب يوسف: ولكن!
ادم: عمي انا ضروري خاصني جواب غيثة باش نجيو انا بغيت نجي نشوفها قدامكم ونعطيها الوقت للي بغات تجاوبني
اب يوسف: (غير كيسمع)
ادم: حنا اعمي متنتلقاوش وحتى التيليفون قليل بزاف فين تنهضرو، بغيت حتى نعرفها موافقة عاد نزيدو خطوة للقدام
اب يوسف: يكون خير اولدي (جابت ليهم الخدامة العصير والحلوة وغيثة وليلى كيشوفو فيهم)
ادم: حنا غنمشيو دابا اعمي ومنين تبغيو عيطلي انا نخلي ليك الرقم ديالي حيت بغيت نجلس معاها غير 5 دقايق كما قلت ليك الا وافقت باش نديرو داكشي رسمي
اب يوسف: (نعم ليه وخرج هو وختو وهو مشا عند بنتو جلس معاها…)
~~~~~~~~~~
ملاك: (كتشوف فلمياء للي منين عرفت مراد طالع جمعت شعرها للي كان طويل ومسبسب دايرة ظفيرة مرخوفة، مالقات فيها حتى شي ديفو!!! الا هي بنت وعجبتها كفاش متعجبش العزي!!!
سمعت صوتهم داخلين للدار كيهضرو على الكورة، خبرتها وفاء ناغزاها)
وفاء: جمعي عينيك على لبنت راكي كليتها
ملاك: (معصبة) انا كليتها ونتي كليتيني
وفاء: لبنت مسرارة (ضارت مخنزرة فيها) هههه والله حتى نتي فسيسرة
ملاك: زمرة (صيفط ليها ميساج فلواتس فيه بوسة تبسمت)
شحال مكنتيقش فيه!!!
(بداو كيحطو لعشا عرفت دراري بغاو ياكلو بوحدهم عجبها الحال واخا كتبغي تشوفو ولكن هاكا حسن!!!)
أمينة: (كبت نعيمة العصير) انا نوض ندي لدراري العصير، (شدت فركبتها للي كضرها) ملاك بنتي واخا توصليهم لباب الصالون!!!
ملاك: واخا.. (وقفت لبست صندالة ديال أمينة وتمات ماشية)
أمينة: (عيطاتلو بصوت عالي) مرااااااد ولدي ها ملاك جايبة العصير
ملاك: (متبسمة ماشية كتمختر حتى وقف ليها شافت فيه) خلعتني
اورطيغا: ناوية دخلي بسلامتك!!
ملاك: (بدلع) اااه
اورطيغا: منين هاكا سبقيني لبيتي انا جاي
ملاك: ههه بقا كتحلم
اورطيغا: غير بقاي دافعة علينا شبابك غالي حتى نطيرلك من يديك!! (شد لبلاطو متكي بكتفو على الحيط) راك شفتي ضاير بية التيتيز!!
ملاك: (حسابلها هضرلها على بنت خالتو للي اصلا مقروسة منها ومن جلستها معاه وحدة!!
شافت فيه شوفة دالقرطاس وهو متبسم قاريها انها غاارت بصبعها ميلت داك لبلاطو فاتجاه كرشو جاو كيسان العصير مقلوبين عليه زرب عليهم عتق غير الكيسااان ميتهرسووش وداكشي بارد فكرشو، خرج عينو فيها وهزت حاجبها بتعالي ماشية راجعة لبيت)
أمينة: (سمعت تقرقيب لكيسان وملاك داخلة لبيت) مرااااااد
اورطيغا: (حاني شاد الكيسان للي تخبطو فلبلاطو ومصدووم فيها، شاف امينة جاية كتنݣر على الزربية للي توسخت شوية من الجنب وعمر وقف جاي يشوف شاف فحوايجو)
صافي موقع والو انا نمسحها
أمينة: ياكما تجرحت!!!!
اورطيغا: لا لا صافي غير سيري كملي عشاااك (هضر بشوية وااقف شاد لبلاطو) ياك قلت ليك متصيفطيهاش والدري هناا!!! (دخل عمر جلس منين ملقى وقع والو)
أمينة: والله يا مك وتكون غوت على لبنت
اورطيغا: (زاااافر) وانا نقد غا صبري شنو تابعنا لا نتي لا انا
أمينة: بيناتكم زعما نتا ربح
اورطيغا : سيري وكان سيري (مشات جابت مو باش يمسحو العصير وهو جمع معاها داكشي دا الخاوي للكوزينة ودخل لبيتو بدل تيشورت ديالو اصلا جاه شوية دلبرد لبس قبية خفيفة شاف فلبيت كانت عاطية بظهر وكتاكل بحال مدارت واالو!!
من اللول عارفها مسااهلاش بغا يشوف غيرتها !!!
حاس براسو مزال غيشووووف معرف يظحك ولا يتعصب رجع للصالون)
عندك مع تصبان زرابي (جابتلهم أمينة كيسان العصير)
أمينة: بعد ولد خالتك
عمر: هههه انا وخويا وبا للي كنصبنو فالدار
اورطيغا : قولي هاد العائلة هاكا داايرة (خرجت أمينة كظحك)
عمر: ههه انا نوريك با قبل منجيو للمغرب هاد المرة (جبد التيليفون
كيوريه فاش كيكونو كيصبنو كانت دارهم زوينة، دايزين فتصااور حتى طاح فتصويرة ديال باين اورطيغا دغيا قلب)
معرفت منين جات هاد التصويرة
(مع دايرين ݣروب فالعائلة دلواتس تصيفطات منين كانو كيهضرو على مجية مراد وامينة فلݣنازة وكيشوفو وجه الشبه بينو وبين باه حيت كان هو الحديث للي ميدور بيناتهم فاش تجمعو)
اورطيغا: (مكانش عارفو ولكن من الطريقة والشبه شك، حس بانفعال) رد رد ديك التصويرة نشووف!!!
عمر: (جبد التصويرة وعطاهالو مراد كيشوف فباه نفس سموريتو تقريبا وحتى عينييه اما ملامحو ماشية لأمينة)
اورطيغا: (خسر كمارتو فالتصويرة وعطا التيليفون لمولاه وكملو كياكلو فصمت من بعد مكانو ناشطين!!! باش نسا راسو تفكر غير للي ضرباتو بعصير وزعامتها!!!)
كملو عشاهم لبنات جمعو معاها واكترية لمياء وخديجة للي غسلو لماعن جففو الكوزينة وهوما مجمعين كتعاود ليها على العيشة برا قادو الدنيا وجلسو مجمعين…
ملاك: (كانت مفقوسة، معجبهاش الحال كفاش كيشوف فبنت خالتو وكيوصفها بالتيتيز واخا تكون زوينة، الا منين عندو هاد الشوفة يعني عاجباه وجالس كيتخيل فيها وبحال والو يبين إعجابو ومع عايشة على برا وهو كان حلمو لكبير يمشي لبرا كتزيد تصعرها!!!
تمو نايضين شافت فالصالون كان غير عمر متكي كيلعب فالتيليفون ويهضر بالفرونسي اول مرة تشوفو دخل من لباب كان كيهضر فالتيليفون شافها كتشوف فالصالون ودغيا قلبت وجهها)
اورطيغا: غيثة من بعد ونصوني عليك واخا!! (ضارت خنزرت فيه ملاك)
صافي اختي!!! .. واخ..
(قطع شاف فيهم)
ماشيين؟!!
أمينة: عييت معاهم يباتو
خديجة: معليش اخالتي راه جلسنا وفوجنا الله يخلف عليك اجيو عندي شي نهار
أمينة: ضرووري ان شاء الله
اورطيغا: (كيشوف فملاك للي قالبة وجهها) جلسو ها بيتي نعسو فيه نمشيو انا وعمر عند شريف
أمينة: واه ابناااتي
خديجة: مرة أخرى اخالتي غدا دايرين نمشيو للحمام بكري (بقاو كيهضرو وملاك قالبة وجهها باينة فيها كاااعية حيت مكتجاوبش، تمو خارجين)
اورطيغا: صافي الوالدة دخلي انا نهبط معاهم
(توادعو معاها وهبطو فالمصعد فسكااات مشاو للطموبيل كان عندو الساروت ديالها فتح ليهم لباب، معيط ليها وباينة حتى هو منيرڤي)
ملاك اجي
ملاك: (فبلاصتها) وي!!! (طلعو لبنات كيتغامزو عليها باينة مخاصمين)
اورطيغا: شنو داكشي درتي لفوق وبربي وكان مكانوش الناس حتى نخشي مك فقرعة انا تكبي علية داكشي!!!
ملاك: (حساب ليها غيعتاذر ولا يبرر ليها طلعاتو وهبطاتو جرلها فكها وضربت يدو بشوية) متعاودش ديرلي هاكا ابنادم
اورطيغا: سيري دابا طلعي لبرويطتك من بعد ونتفاهمو مزيااان فهاد صلاااابة دياالك
ملاك: سير تزبل (زربت طلعت للطموبيل قبل ميتبعها، بقا وااقف كيشووف رجعت بيها اللور بقا وااقف وقفت حدا رجليه كتشوف فلمرايا عاد كسيرات ماشية) *****
اورطيغا: (حاضي طموبيلتها كتبعد رجعت غيثة صونات عليه بريڤي قطع قبيلة كانت كتبكي مفهم والو كيسمع غير كيبززو علية جاوبها حايد ليها لبلوك وصونا على نمرتها)
عاودي من اللول مفهمت والو منك
غيثة: ماما تتبزز علية ادم وانا مبغيتووش ومبغاتش تفهم
اورطيغا: ادم ولد محمد للي فرنسا؟!
غيثة: اه، حنا كنا غير اصدقاء و مفهمتش جا قبيلة عاود هضر مع بابا وديك لمرات مع ماما، وانا مبغيتش وماما لاسقة فيه فيه انا متقلة عليها فهاد الدار!!!
اورطيغا: (سكت مدة) واش هو للي تيعطيك لادروݣ؟!!!
اورطيغا: واش هاد خونا هو للي عطاك لادروݣ؟!!
غيثة: (بخوف) لاااا
اورطيغا: متأكدة!!!!
غيثة: (تفافاات) والله (خايفة عليه هو ويوسف راه باينة مغيتعاتقوووش معاه وهي اصلا مغتبقاش تشوفو واللومة اللولة والأخيرة عليها اللهم تطوي هاد الصفحة واخا مقادااش!!!)
اورطيغا: وشكون؟!
غيثة: من لفايس
اورطيغا: اممم… مهم مكاينش للي غيبزز عليك شي حاجة اختي
غيثة: (حركة راسها باه وقلبها تعصر بكلمة اختي للي رجعت ففمو بزاااف) شكرا حيت سمعتيلي
اورطيغا: فوقما بغيتي، سيري نعسي غدا ونرجع نهضر معاك حيت باقي متقتش فبزاااف دالهضرة للي قلتيها اختي غيثة ومحدك تتخبعي مغتستافدي لا نتي لاخوك لا حتى واحد
غيثة: (بحزن) تصبح على خير…
اورطيغا: (قطع رجع صونا على ملاك مكتجاوبش)
واه ابنت رشيد بقالك غير ضربيني!!! أنا للي غنخرج فهاد ضسارة ديالك (ظحك بفقسة على زعامتها راه عطاتو درس تغلط تخلص)
(طلع للدار كان عياان جاه ميساج من عند وفاء)
وفاء: ملاك اليوم عيد ميلادها
اورطيغا: (تبسم) يااك!! وشحال وصلت العزبة؟!
وفاء: 20 ومشفتك مشفتني ههه
اورطيغا: غنشريهالها معاك!!
وفاء: االاااا راه حلفاتلي حتى تلسقلي شي مونتيف الا قلتها ليك
اورطيغا: (تبسم من ديك مونتيف ومشا باش يطيح الراس حيت الا صونا غادي غير يداابزو… مزال متسرطاتلوش بلاطو دالعصير للي قلبت عليه وعاد النفخة وتحنزيزها فعمر!!!)
~`~~~~~~~~~~
ملاك: (جاها ميساج بنمرة غريبة كتقرا)
*توحشتك احبيبة بزااف بغيت نرجعو لأيامنا لقديمة تبقاي تجي عندي للدار ونعيشو الحياة كيف كنا راك شفتي مرتي راني صابر عليها غير شوية على حساب الواليد ونكركبها مها بحال ديما*
ملاك: شنو هاد تخربيق تووووهمة هادي!!! (فكرت فحمزة ولكن ماشي أسلوبو فالهضرة واشمن دار كانت كتمشي تعيش معاه هو اصلا حتى السلام مبقاش كيقراها عليها كاين احتمال غير ميساج غلط حطت التيليفون فوق الطبلة شافت فوفاء للي معنقة القران باش تنعس ورجعت كتشوف فسقف)
واش هدا مفخباروش عيد ميلادي اليوم؟!!!
وباش غيعرف وانا عمري قلتهالو!!!
(شافتو معاودش حتى صونا تكات حتى هي كتنهد غير كتفكر اورطيغا عجباتو هاد بنت خالتو لي بانت كيطير عليها نعاس!!)
بنت لحرام صراحة زوينة وحتى خوها زوييين ولكن انا باغية داك الجحموووم ومبغيتو بشوف حتى فشي خر** من غيري!!!
أصبحنا وأصبح الملك لله…
يوسف: (كان فالاجتماع حتى صونا تيليفونو كانت نمرة جديدة استئذن منهم وخرج جاوب) وي!!
ادم: سلام يوسف انا ادم
يوسف: (باستغراب) وي ادم صاڤا!!
ادم: طرونكيل ونت
يوسف: الحمد لله شنو حب الخاطر!!
ادم: بغيت نهضر معاك فموضوع غيثة
يوسف: (مع راد البال معاها بزايد) وي!!
ادم: غنجيك من التالي انا خيتك كنت تنشوفها شحال عجباتني وبغيت نخطبها من عند واليديك ونتا
يوسف: (بقا كيسمع)
ادم: صراحة ايوسف نتا تتعرفني صريح كنت تنهضر معاها قبل العرس كانت فشكل ومن بعد تبدلت علية لدرجة مبقاتش تتبغي تهضر معايا وانا عندي غيثة عزيزة بزاف لدرجة تنبغيها وبغيت نكمل معاها حياتي.. واخا دابا بقيت تلقى منها غير الصد مبقاتش ضريفة معايا كما كانت مزال انا باغيها بزااف (كيهضر بحال شي زماݣري)
يوسف: (غير كيسمع وكيربط الاحداث)
ادم: انا مبغيتكش تعصب حيت كنا تنهضرو واخا هضرتنا كانت قليلة ومحترمة حيت تنحتارم العائلة، وشفتها يمكن شي زوج خطرات ولكن انا حبيتها وعارف عائلاتنا مزيانين وبغيتها لزواج كنت قلتها لواليديك ومزال تنتسنى الرد ديالهم
يوسف: اممم ادم واخا من بعد ونصوني عليك
ادم: واخا انا نتسناك (قطع ومسح وجهو كأنه كيزول داك القناع ديال ضرافة لي كان كيهضر بيه معاه والمشكل ان شي مشاعر عندو اتجاه غيثة حقيقيين،
البنت قالتلو ان خوتها بجوج شدوهم بالدليل ومطلقوها حتى ضربوها واكترية واحد كان قبيييح بزاف شك غيكون اورطيغا ماشي أشرف!! يعني غيثة تعرفت كتعاطا والخطة ماشية كما صاوبها ورسمها،
دابا خاص يرجعها كطلبو كما كانت…)
~~~~~~~~~~~~~~
ملاك: (فاقت بكري مشاو لصبا متعطلوش ورجعت نعست، ضربتها الفريقة عاود معطلة كانت باغية تشبع نعاس كتسمع خديجة ووفاء مجمعين بقات فبلاصتها هزت التيليفون لا أبيل لا ميساج من عندو!! رجعت التيليفون تحت وسادتها وجبدت عليها.. حتى رجع صونا تيليفونها كانت مريم ختها قطعت الصوت دارت صيلونص محد فيها نعاس وترخاااات..)
~~~~~~~~~~~~~~
أميمة: (كتشوف فحمزة للي كيلبس حوايجو باش يمشي للخدمة) واش باغي طلقني احمزة؟!
حمزة: (شاف فيها من لمرايا وهو كيمشط شعرو) لا
أميمة: غنبقى معاك بشروطي
حمزة: شنو هوما؟؟
أميمة: نخرجو نكريو
حمزة: (ضار عندها ببرود) سمعي أميمة من نهار مات ولدنا وانا شاد ليك الخاطر ماشي غير انا كولشي فهاد الدار انا باغي نصلح الا كاين ميتصلح بغيتي ابنت عمي مرحبا مبغيتيش مغنشدكش معايا وفكري مزياان.. وهاد مغنخرجش منها
(هز صكادو ديالو وخرج لخدمتو عقلو مكيفكر فواالو اصلا الوقت وقف فنهار للي دفن فيه ولدو، مقادرش يزيد ولا يخرج من داك الاحساس ومن داك نهار وهو محبووس…)
اورطيغا: (كمل خدمتو اليوم كيعطي روبو للدري لي معاه، كمل من بنسودة مشا للدار كانت خاوية حيت مشاو للرياض من غير عمر للي خرج كيتسارا كما العادة، دوش عليه داك الوسخ بدل حوايجو هز تيليفونو صونا على مو عرفها مغيجيوش للدار صونا على عمر كان قريب،
صونا على ملاك للي مسولتش فيه مجاوبتش كرجعش صونا عليها..
هبط للمحال وبقا كيستف السلعة جا عندو عمر للي تطلقو شوية فالهضرة بقاو مجمعين حتى رجعت كتبت ليه ميساج)
ملاك: كنت كنغدا مسمعتوش
اورطيغا: (عصباتو بهاد البرود جاوبها)
مزيان
ملاك: (معجبهاش ردو بقات كتشوف فالميساج)
اويلي ياكما هدا طلعتلو فالراس!!! مراد للي كنعرف مغيجاوبش هاكا!! ياكما ملقى فية نفع وغيدفع!!!!
(كانو خرجو جابو معاهم معقودة كلاوها ودازو للصالون خديجة ووفاء قادو ظفار وشعر ووالوجه وملاك قدات غير ظفار دايرة بوز ڤيرني حيت مع غسلت جاتها العادة الشهرية!!
بقات حايرة واش تصوني ولا لا كتفكر شنو قال لبارح وعاد هضرتو مع غيثة!!! معرفت واش هادشي للي كدير فيه تبرهيش ولا شنو والمشكل معاه مكتقدرش تحكم فغيرتها عاد طلعت معاها بلاطو للي قلبت عليه دارت يدها على فمها شاهقة بحال كانت فغيبوبة، لوكان دار ليها هي هكاك مكانش غيعجبها الحال!!!
جلست كتندب وتأنب فراسها وفنفس الوقت مقادراش تصوني صيفطت ميساج)
كداز صباحك!!!
اورطيغا: بحالك
ملاك: (غوبشت رجعت كتبت ليه) هي داز زوين
اورطيغا: (بقا غير كيشوف فداك الميساج ويجاوب عمر…)
ملاك: (مجاوبهاش) بحاااااالا حسيت براسي توحشت العزي ديالي
اورطيغا: (مشافش الميساج)
ملاك: ولد لحرام!!! كفاش كيتمسح هاد زمر الميساج وصل (مكيكتبوش حتى فالواتس!!! )
اورطيغا: (مع قراه تبسم) هانا جاي أخاي عمر
عمر: واه واه خود راحتك
اورطيغا: (دوز لابيل جاوبت معطلة بحال ديما) شنو فيها البنت
ملاك: والو كنجمع حوايجي باش نرجع لصفرو
اورطيغا: والله حتى نتبع اصل مك حتى لتم نتݣرع عليك اصلا هادشي علاش تتقلبي
ملاك: ههه
اورطيغا: متجيش عندي؟!
ملاك: لمحال؟!
اورطيغا: اه
ملاك: اممم معرفت!!!
اورطيغا: صافي نتسناااك، راك وليتيلي بلية الموضيييبة الا مشميتش مك منكونش هو هداك!!!
خديجة: (شافتها فالحمام لابسة وكتقاد فراسها) فين ماشية املاك؟!
ملاك: (كتعكر) خارجة بغيتي شي حاجة؟!!
وفاء: حتى انا غنمشي
ملاك: لا لا راه غرجع هنا عاد نهبطو لصفرو ونتي راه هضرت معاك غتمشي معايا هاد اليوماين ميمكنش نخليوك من مورانا
وفاء: حشمت كل مرة جاية عندكم
ملاك: اوا سيري لداركم لتازة ماشي تبقاي هنا ختاري يا معانا يا نديوك لكار تمشي لتازة
وفاء: مبغيتش نمشي دابا مخارية معاهم على حساب جواج من داك الكلب
ملاك: اوا ياله معايا هاد اليوماين ومن بعد يحن الله،، موووهييم متعطلونيش
خديجة: مكتبغيش تݣر يا ختي قولي ماشية عند مراد وهني السووق!!
ملاك: (عوجت فمها هزت سوارت وتمت خارجة ركبت فطموبيلتها كتسخنها شافت فوحدة واقفة طويلة متكية على طموبيل كيا كتهضر فالتيليفون لابسة داكشي لاسقة عليها) اه اه شحال ضعيييفة!!! (كسيرات ودازت من حداها وهي تسمع)
الياقوت: واش غتوريني فدار يوسف مرتو بقات مع ختها لفوق وهو سافر لرباط
ملاك: (فرانااات ووقفت خرجت راسها من السرجم) كتسولي على خديجة!!!
الياقوت: (هزت حاجبها) باغدوون!!!!
ملاك: (ماشي من العاݣزين سكتتها وخرجت من الطموبيل) سمعتك قلتي دار يوسف ومرتو بقات معاها ختها ميمكنش تكون هادي كاملة صدفة
الياقوت: (طلعتها وهبطتها كتهضر بالفرونسي) شكون نتي
ملاك: (جاوبتها بالفرونسي) انا خت مرت يوسف شكون نتي للي كتسولي
الياقوت: دخول الصحة هدا سير اماما قضي ليك شي غراض
ملاك: (كتقوس عينها فيها ونفكر كلام خديجة) باااينة نتي هي الق**** للي مصيفطاك الغالية خلاتها خديجة طويلة وضعيفة بحال شي فزاااعة متكوني غير نتي
الياقوت: ونتي هي البونت للي عرفاتهم!!
ملاك: (بافتخااار) شخصيا انا للي خرجت فيك وفللي مصيفطااك، ودابا دوري **** من هنا
الياقوت: على مستوى!!!
ملاك: (هزت التيليفون مدوزة نمرة يوسف وهي كتشوف فالياقوت جاوبها) يوسف كاينة هنا شي وحدة كتقلب عليك سمعتها كتقول كاينة غير مرتو مع ختها راها طويلة وضعيفة مسلوتة عينيها صغييورين وفمها كبيير
الياقوت: (هزت حواجبها من هاد الوقاحة!!)
ملاك: واش غتجي اليوم حيت الا مكنتش غتجي ندي معايا خديجة للدار ولا نعيطو البوليس!! (كتشوف فيها مخشرة كمارتها بحال شمت شي خ***) متعرف تكون مع شي عصابة وبغات تنتاقم ولا منعرف…
واخ (قطعت منين حست بيه تعصب)
تمشي ولا نعيط البوليس اصلا شكون دخلك هنا نورماال غير سكان العمارة للي كيدخلو هنا!!!
ولا بقا عااقل عليك منين كنتي كتجي ديري سوايع تسخيينية مع نسيبي لعزيز!!!
الياقوت: (طلعتها وهبطتها وركبت فطموبيلتها ووجها كيقطر السم وصلت حداها)
قولي لختك عن..
ملاك: وسيري **** بنتلك انا القو*** ديالك سيري قلبي ليك على شي ڤيكتييم خديجة راه تصوط فيك تغبرك سيري سيري تحركي من هنا..
ملاك: (بقات واقفة هي غير شكت ممكن انها تكون هادي هي الإكس للي عاودت عليها خديجة داك نهار فاش هجمت عليها هي والغالية)
بخخخ بنادم مكيحشمش!!!
(رجع صونا عليها يوسف جاوباتو وهي راكبة شادة طريق)
وي يوسف…
آه مشات..
والله مفهمت حتى انا..
صافي باشما علمني الا كنت باقي معطل تماك تمشي معانا اصلا توحشناها فالدار..
ههه حتى نتا ضرووري راك درتي بلاصتك عندنا…
غير مسخرة وصافي..
صافي واخ.. واخ باي..
(قطعت كانت وصلت حطات طموبيلتها حدا طموبيلتو حيت مخلي على حساب المحال بلاصة للي كيجي يتقدا، دخلت مدرمة كان عمر دورت عينها حسابها غتلقاه هو)
احم سلام
عمر: سلام غير تسناي اختي ها هو شوية ويجي مول المحال (حركت راسها باه، عاد تفكرها للي شافها لبارح) نتي ساكنة هنا
ملاك: لا
عمر: لبارح شفتك فالليل فهاد العمارة
ملاك: (هي عارفااه) اممم (الا جا لقاهم مجمعين غيذبحهم بجوج)
مهم انا نتسنااه
(خرجت برا لقاتو جاي زااارب، تبسمت نسات راه كانو مطايفين وهاد الابتسامة مديرها غير باش الا كانت دايرة شي زبلة ومبغاتش بنادم يعيق)
اورطيغا: عاد وصلتي؟!
ملاك: اه ملقيتكش لداخل وخرجت
اورطيغا: مزيان.. مشيت خلصت لابونمو نسيت لبارح مخلصتهاش وتقطعت مهم بقاي هنا.. (دخل) عمر هانتا هنا مغنتعطلش
(وراه شنو يدير وشنو يبيع جالس جالس اللهم يتنفع منو)
عمر: صافي غير سير (شافها معاه)
اورطيغا: (دار يدو فكتف ملاك) نطلعو للدار؟!
ملاك: لاااااا حولة ولا قوة الا بالله العلي العظيم (ماشية جهة طموبيلتها وهو تابعها)
اورطيغا: (شير ليها طلع لطموبيلتو) غير صبري لمك حتى نحكمك تبقاي ترغبي على قهوة والله يا مك متخرجي من الدار
ملاك: كتعيبو وكظحك… (ركبت حداه مديماراش ضار عندها)
اورطيغا: انا تقلبي علية العصير وتخضري علية!؟!
ملاك: حمد لله جا فالعصير ديك الهضرة دلبارح خاصك عليها ذبيحة وبموس حافي
اورطيغا: اشمن هضرة!!
ملاك: على بنت خالتك حشوومة السيدة ملتازمة وضيااف عندكم يااا حسرة!! ونتا كتشوف فيها ديك الشوفة!! باااااااز
اورطيغا: (بقا غير كيشوف) حق الرب داكشي للي مداوهش مني رجال بشلاغهم نتي غتصيفطيني الحبس حال عيني!! اشمن شوفة وهضرة!! واش نتي ڤيييو البنت متنطلعش فيها حتى الشوفة!! اخر حاجة تنديرها هي ندور بشي وحدة من الفاميلة
ملاك: اممم تيقتك..
اورطيغا: (صاݣ لقهوة قريبة ليهم دخلو جلسو طلب قهوة وهي خدات كافي كريم.. تقابل معاها بجدية)
فاش تنشوف شي حاجة معاجبانيش تنقصدك املاك ماشي تنتفخ ونبدا نشقلب فعيني (كيعيبها) ومنبقاش نهضر ونجاوب
ملاك: اممم
اورطيغا: جلسي كتمأمئي علية مهم من اللخر سمعت راك شرفتي وانا معطانيش خاطري تبقاي بايرة قلت ندير فيك حسنة
ملاك: (ميقت فيه) حسنة!!! حسنة ديرها ففف (خرج عينو فيها) فـــ…ـفرااسك للي قدك ولادهم كيقرااو ونتا مزال عاطيها لالة ومالي وتقرقيب سطالي
اورطيغا: (بقا كيشوف فيها حتى ظحكت) حلي فمك
ملاك: ههه (دارت يدها على فمها) علاش؟!!
اورطيغا: نشوف غير الطول دلساانك فين حدو!!
ملاك: (تبسمت كتشرب من قهوتها)
اورطيغا: نتي عارفة معنديش الدار وخدمتي كاينة مع الحاج (انتابهت ليه) غدا ولا بعدو يجري علية ولا يودع نبقى الله كريم (هز يدو)
ملاك: ولكن منخافش عليك كتجيبها من فم سبع
اورطيغا: (تبسم كيشوف فيها)
ملاك: (بجدية) هنا كنهضر على الثقة للي تايقة فيك امراد وووحيت اكيد نتا عقلك محدود غير فالدار كتفسرها اانني متيقلش فيك!!!
(قوس عينو) بلعكس انا تايقة فيك نعطيك حياتي ونغمض عيني حيت عارفة شكون معايا
اورطيغا: (كيشوف فيها متبسم) تعطيني غير حياتك!!
ملاك: اووف امراد!!
اورطيغا: واخ، من اللول قلت ليك داكشي للي باغي معاك ماشي ديال نهار ولا يوماين!!
انا باغي يا ندفنك يا دفنيني، معمرني غنسمح فيك فيك ابنت الناس!! ولا نسمح فمسؤوليتي من جيهتك غندير فبلاصة الوالدة (متبسم)
ملاك: ههه لوااه لوااه
اورطيغا: ولكن ضرووري خاص نقاد شي حاجة
ملاك: (براسها مابغاتش تزرب مزال حتى هي خاصها تقاد!!! حركت راسها باه)
اورطيغا: (ربع يدو على الطابلة) غير بغيتك تفهمي حاجة انا كنت ضد شي زواج وهاد تخربيق ولكن معاك, هانية غنغاامر
ملاك: هههه (فهمت قصدو ممكن تعبيرو خانو يكفي انه تبدل على يدها هزت حواجبها بنظرة انتصار)
اورطيغا: بدينا!!!
ملاك: هه غير محسووس يا ربي السلامة!!
اورطيغا: نتي متافقة معايا زواج مسؤولية ومسؤولية كبييرة
ملاك: اه
اورطيغا: قبل مندخلو لهاد الهيت خاص بجوجنا نتفاهمو على بزااف دلحوايج
ملاك: وووو أهمها خدمتي مغنجلسش منها!!
اورطيغا: انا ماشي ضد خدمتك ولكن كفاش غنديرو ليها نتي فصفرو وانا فاس؟!
ملاك: غندفع ميطاسيون ونتسنى ياك اصلا قلنا مزال خاصنا الوقت
اورطيغا: (بقا كيشوف فيها) واخا نخليو هاد الهضرة حتى التالي
ملاك: لا امراد انا خدمتي والله منخرج منها
اورطيغا: غا بشوية عليك ابنتي انا خدمتك مغنخرجكش منها ماشي باك دمر عليك وقراك باش نجي يانا نخرجك (تبسمت) بلعكس خدمتك زوينة وعارفك نتي فارضة احترامك انا كولشي فيك عاجبني من غير لساانك
ملاك: (كتقليلو السم) دابا يعجبك
اورطيغا: (جغم من القهوة) نذوق ونشوف (جمعت تفرنيسة وهو مقوس عينو فيها) معرفت اشمن ذنب درت فحياتي حتى تبلييت بيك
ملاك: الا نتا ذنب انا ذنووب
اورطيغا: هاكا غنبقاو كلمة بكلمة!!
ملاك: اوا عرف شنو كتقول الفم للي يقول زمر يقول تمر
اورطيغا: (شعل الݣارو صونا تيليفونها كان يوسف شاف فيها) جاوبي
ملاك: راه وقع واحد المشكل.. (جاوبت)
الوو!!..
بالصح..
صافي مزيان.
. صافي واخا اخويا…
بسلامة (قطعت)
عرفتي شنو
اورطيغا: (طانز عليها) شنو!!
ملاك: ههه لقيت صاحبت يوسف لقديمة فلباركينغ وكتهضر مع شي واحد فالتيليفون كتقولو راه يوسف مسافر بقات غير ديك مرتو وختها فالدار… (عاودات ليه بالتفاصيل) كتعرفها نتا
اورطيغا: اممم
ملاك: اوا صافي جاوبني يوسف دابا قالي صافي تهبط معاك خديجة انا فاش نكمل غنجي ناخدها
اورطيغا: مزيان وحتى وفاء؟
ملاك: اااه عييت فيها سيري لداركم لبنت راه كضييع شفتي كولات؟
اورطيغا: (لوا شنايفو..) مهم (عيط السرباي طلب حلوة صغيرة خلاها تختار اشمن مذاق، فهمت بغاها على حساب عيد ميلادها) الشارفة
ملاك: ههه (جابوها حيت كانت واجدة جبد شميعة صغيورة فالغوز وشعلها ببريكة عجبها الحال بزااف أول مرة تحتافل بيه)
اورطيغا: ياله طفي
ملاك: متغنيليش
اورطيغا: بلاتي نجيب الموزون نشطح!!
ملاك: نااري نتا!! (غمضت عينها وطفات الشمعة هزت عينها فيه جبد من جيبو بواطة فلكحل)
ماشي كيكون حمر؟!
اورطيغا: جبتو اصورتي مع وجهي ههه
ملاك: ههههه (ظحكت بالجهد)
اورطيغا: ااايوا جمعي ظحكتك (حلاتها كتبسم كان ݣورميط ذهب حتى صحح ليها انه خلخال عجبها الحال بزااف) شحال دابا عندك!!
ملاك: شي براااكة ههه
اورطيغا: (اصلا مكيهموش شحال عندها حيت فكل الاحوال كتبان ليه صغييورة كان داخل شريف وشي وحدة مشادين اليدين، قلب وجهو دار راسو مكيعرفوش حتى جا وقف) فين
شريف: (شاف الشمعة وسط الطورطة شاف فاورطيغا بابتسامة عرفو غيشد فيه مزياان) ديالمن عيد ميلاد
اورطيغا: ديال الاستقلال ساعة مبانلي استقلال
شريف: ههه تنقدم ليكم اسماء (تبسمت) هدا خويا صغير مراد وهادي ملاك
اسماء: مشرفين
ملاك: مشرفين
شريف: نخليوكم، جوايوزاني ڤيغسييغ ملاك
ملاك: ميغسي (حتى واحد معرضهم يبقاو حيت بجوج بغاو يكملو أهم موضوع راه مستقبلهم هداك)
اورطيغا: (لوخرين مشاو وهو هز معلقة كياكل) قلتلك نمشيو للدار
ملاك: هههه واش مفطوم على الدار
اورطيغا: انا تيعجبني نجلس فالدار اكترية فايام البرد
ملاك: ونتا عارفني مغنمشيش معاك
اورطيغا: تنجرب حظي ماتعرفي شي نهار تبغي
ملاك: (بقات كتاكل) مراد انا غنمشي دابا مبغيتش نصوݣ فظلام
اورطيغا: (حرك راسو باه جا السرباي قالو يجمع ليه الحلوة تديها معاها وصيفط جوج مورصويات لطبلة شريف وأسماء.. ركبو فالطموبيل وصوناو على ملاك علموها كانو خارجين هي وفاء) قولهم يجيو عندك للسعادة بلا متمشي حتى لعندهم
خديجة: صافي واخا حنا قراب لتماك..
ملاك: (قطعت رجعت جبدت بواطة ديال الخلخال وتبسمت كتقيس فيه) عجبني بزااف
اورطيغا: عرفتي شحال من مرة كنت بغيت نعطيه ليك
ملاك: (تبسمت) عاد كتاب
اورطيغا: ولكن متلبسيهش
ملاك: بغيت بابا يمحيني من الحالة المدنية
اورطيغا: هكاك الله يرضي عليك جمعيه خبيه لية
ملاك: (تبسمت) حقا غيثة شنو بغاتك داك نهار
اورطيغا: شي واحد بغا يخطبها وهي مابغاتش ومها مبززة عليها
ملاك: ديك مها!!!
اورطيغا: مكاينش للي غيخرج على ديك البنت قدها
ملاك: قولي الصراحة.. عمر كانت بيناتكم شي حاجة نتا ويااها
اورطيغا: الغالية!!!
ملاك: ها ها ها نتا عارف علامن كنهضر
اورطيغا: (حرك راسو بلا) غيثة من ديما كانت بحال ختي وحتى حاجة مغتبدل…
خديجة: (واقفة هي ووفاء كيظحكو مجمعين، صونا يوسف بعدت شوية كتهضر وتمعشق مع يوسف للي مبقاش كيسخا بيها وواعدها المرة جاية غيسفرها معاه..)
وفاء: (وقفت بوحدها كتشوف الدنيا كدوور بيها كتحس براسها كولشي ضار كيشوف فيها بحال دايرة شي فضييحة!! ضرب الرعد بقا كيبانلها #عاود لكحولية ضايرة بيها وخاصها تهرب)
خديجااااا خديجا هربيييييي
(بقات كتغوت كتبانلها خديجة خدااوها دوك للي فظلال بقات كتغوت وتعيط ليها)
خديجة: (مفاهمة والو مشات عندها دغيا ولوخرا كتمرغ فالارض ويديها ورجليها بحال مشللين)
وفاء: خديجااااا (كتبكي وكتشوفهم رابطين ليها يدها ورجليها باغيين يردوها عاود لقبور…)
تجمعو الناس كيشوفو فيها بحال شي وحدة مجذووبة وكدير شي حراكات بيدها ورجليها وخديجة جالسة على ركابيها كتحاول غير تفيقها وتحل عينها ردت التيليفون لودنها
خديجة: يوسف من بعد ونصوني عليك (قطعت قبل ميجاوب كتبغي تصوني على ملاك والناس ضايرين) كحزو شوية عليها واش هدا وقت التفراج!!
وفاء وفااااااء
وفاء: (تخيلت انهم كيخنقووها وسكتت كتحاول غير تنفس وهادشي للي كدير كل مرة جاتها هاد الحالة!!! غير كضور عينها)
خديجة: ملاك فينك اجي دغيا وفاء طاحتلي فطريق
ملاك: حنا قربنا واش سخفت؟؟
خديجة: معرفتش طاحت كتغوت (شافت طموبيلة ديال اورطيغا وقفت حدا محال ديالو قطعت تمو جايين عندها بجوج اورطيغا كيبعد فبنادم كيشوفو فيها مخرجة عينها وكدورهم هزها اورطيغا ماشي بيها للمحال كانت غير طبيعية تبعوه لبنات حطها فوق الكرسي ومبغاتش تجلس كانت مجيدة بحال شي خشبة بقوتو مقدرش يتنيها تجلس!!! تبعو عمر لداخل بشوف شنو وااقع!! عاد دخلو لبنات حيت جرا بيها)
اورطيغا: واااافااااا
وفاء: اممم اممم (كتوريه شكون كاين)
ملاك (جابت كرطونة فرشتها وحطها تماك) وفاء ماالكي… هضري!!!
عمر: (كيشوف فهادشي وهي كتشير بعينيها)
صبر صبر نقرا عليها
(شافو فيه بإستغراب قرب حداها حط يدو فوق راسها مقايسش شعرها كيقرا بصوت هادئ وتجويد يقشعر له الابدان!! كولشي سكت ومنهم وفاء للي كتشوف فعمر للي مغمض عينييه)
ملاك: (باعجاب كتشوف فعمر اورطيغا حتى هو واقف كيشوف حتى بدات وفاء كتبكي بحال شي بنت صغيرة وبصوت مسموع يديها ورجليها ترخااو مبقاتش مكنززة، خرج اورطيغا من تماك سد لباب ديال المحال رجع كيشوف فملاك محيدتش عينها من على عمر وقف حداها ضربها لقرفادتها ضارت شافت فيه خنزر فيها شقلبت عينها شافت فوفاء للي جلست ودارت راسها بين رجليها لي جامعاهم)
خديجة: (حنات عندها) مالكي احبيبة شنو وقع ليك؟!!
عمر: (وقف شاف فوفاء وشاف فاورطيغا) القران هو دوانا اللول اختي (تم خارج تحت نظرات لبنات للي تعجبو بيه)
اورطيغا: واافا صاڤا!!!!
ملاك: ياكما مسكونة!!!
اورطيغا: (حتى بغا يحني عندها ووقف) متخلعيناش اصاحبتي!!!
غيثة: (كانت خرجت من عند طبيبة تجميلية كتقاد ليها الجرحة وهي خارجة لقات ادم) ادم!!
ادم: (قرب ليها) علاش تتهربي مني؟!!
غيثة: ادم ديجا هضرنا هداك نهار وسالينا
ادم: (بهدوء) ياك قلتيلي تتلقاي راحتك معايا
غيثة: (كيخليها تحن لداكشي للي كتشرب بقات كتشوف فيه كيهضر. عقلها كيفكر غير فالراحة للي كتحس فيها من مور لكينة!! حتى حط فيدها كاس ورقي من للي كيكون مغطي) شنو هادشي!!
ادم: لويزة وصافي قلت ترخيك شوية!! تتباني معصبة
غيثة: (كتمنى يكون فيه داكشي حيت نفسيتها عياااااااات بزاااف وهي كتقااوم)
ادم: كصديق عارف ماماك تظغط عليك بزاااف انا قلتلها خليك على راحتك ولكن هي كل مرة تتصوني علية وتتقولي غيثة كضيع بغيت بنتي تكون معاك وتتفرض حوايج ماشي شغلها فيك ومتيعجبنيش الحال تقول عليك مكلخة متتعرفيش تختاري
غيثة: (ديجا كتقولهالها شي مرات على حساب اورطيغا) ماما!!!
ادم: جوهرة بحاالك حشومة يتقال عليها هكا!!! متيعجبنيش الحال انا حتارمت قراارك وبعدت دابا جيت نهضر معاك غير كصديق
غيثة: لا ميمكنش ماما تقول علية هاكا بلعكس نتا للي لاسق فية
ادم: مغلسقش فيك مكيناش شي حاجة بالزز اغيثة، اه انا بغيتك ولكن صافي نتي مبغيتيش ميمكنش غنشدك بالسيف وربطك حدايا مشيت فرنسا باش رتاح وفكرت مزيان صافي موضوعنا تسد داك نهار ويا ريت تفهمي لالة الغالية هادشي!!
غيثة: (بقات غير كتسمع بلا متحس شربت من ديك لويزة هزت يدها للي فيها الكاس) ميغسي!!
ادم: فوقما حبيتي صوني علية!!
(شافتو حتى هو مشا بقات واقفة وقلبها وكولشي فيها كيرجف واش بالصح مها بغات تهنى منها!!! وهي بالصح علاش لاسقة فادم هاد اللسقة كااملة!!! متنكرش انها تيقت كلامو حيت للي قالو منطااابق على شنو كاين وكيوقع فالدار!!)
~~~~~~~~~~~~~
اورطيغا: متخلعيناش اصاحبتي
ملاك: كفاش!!
اورطيغا: تنهضر مع البنت
ملاك: بالصح تخلعنا عليك
خرج اورطيغا من تماك ودارو بيها لبنات عطاوها تشرب وهي كتعاود ليهم شنو شاافت
ملاك: راه غير تهيئات وصافي
وفاء: والله حتى كانو بالصح!!!
ملاك: وحنا كنا معاك مكان حتى حاجة خاصك ديري الرقية اوفاء
وفاء: (بخوف بقات غير كتشوف كولها عرقااانة)
ملاك: واس شفتي هداك للي قرا عليك صوتو شحال غزاال!!!
خديجة: اه تبارك الله انا ورتاحيت فاش كان كيقرا هداك راه هو ولد نعيمة (دخل اورطيغا سكتو)
اورطيغا: الحال بدا كيظلام املاك بحرا توصلو..
خديجة: بابا يشوف شي واحد من الفقها لي كيكون معاهم فالزاوية يديرلك الرقية
وفاء: (غير سااكتة نوضوها رجليها فشلو عليها خرجت كتمشى بشوية كان عمر فالكرسي شافت فيه، بعياااء)
شكرا اخويا
عمر: الله يشافي اختي… (خرجو برا اورطيغا كيهضر مع ملاك حتى ركبو وشدو طريق لصفرو…)
غيثة: ( بقات كتمشى وكتشرب كانت ترخات من داك كاس لويزة تبسمت وهي عارفة انه فيه شي حاجة واحسن من داكشي ديال قبل، مابغاتش تمشي للدار جلست غير فكرسي فالجردة رجعت كتبان ليها الدنيا غوووز وقلوب فسما فرشات دايرين بيها، جلس حداها ادم للي مراقبها تبسمت معاه)
اورطيغا!!!
ادم: (جمع الابتسامة) اورطيغا!!!
غيثة: ادااااااام!!! هههه شي مرات كتبانلي بحال اورطيغا حنيين فحاالو وبيناتكم لقب مشترك هو مسكين واخد تهمة شمكار ولكن نتا واخد لقب ديال ولد الناس ولكن نتا هو الشمكار
ادم: اممم… باقية تتبغيه؟!
غيثة: (رجعت راسها اللور مغمضة عينها متنهدةا) عمرني نساااه
ادم: وهو ؟!
غيثة: ولفتو متيبغينيش هههه عادي يبغيني ميبغينيش انا غنبقى تنبغيه حتى نموووت
ادم: (حرك راسو باه مفقووس رجع شاف فيها مغمضة عينها كتعجبو بزاف وكيكرهها كتر حيت فضلت عليه شمكار!!)
اجي معايا
(وقفها شد فخصرها وهي كظحك مشاو لطموبيلتو وهي كتلعب معاه فوجهو بحال شي بيبي، وظحك كانت خارج التغطية فمرة!!! صونا على شي واحد أمن ليه بلاصة بعيدة على فين ساكن كيشوفها ناشطة تبسم هادشي للي باغي يوصلو هبطت معاه صونا تيليفونو خلاها واقفة حدا لباب ورا ليها فين تمشي وهو جاوب كانت الغالية سولاتو على غيثة واش تلاقاها ونكر بحجة عندو شي خدمة مزيرة من بعد ويصوني عليها.. قطع ولحق عليها كانت كتشوف فلمرايا للي معلقة حدا لباب وتعوج شد خصرها دق حلو العساس باليد للي سلم عليه مد ليه 200 درهم لاخر مدلو الساروت وركبو فالمصعد قصدو الدار )
غيثة صوني على ماماك
غيثة: مبغيتش… فين حنا
ادم: ياك نتي مع اورطيغا معندكش مناش تخافي
غيثة: (تبسمت وشافت فيه) كنتي تتمنى تكون بحالو نتا رطب بزاااف هو حرش رااجل (تبسمت) عمرك تكون اورطيغا
ادم: (بقا متبسم جبد ساشي من جيبو جبد منها حبة حطها تحت لسانو وحبة قربها لشنايفها حلت فمها بشوية حطها تحت لسانها وسد ليها فمها بشوية جلس حداها)
شنو تقدري ديري على حسابي باش نبقى نعطيك للي بغيتي
غيثة: هههه غيشدك خويا يوسف غيقتلك
ادم: هههه وشكون اخر عارف
غيثة: اورطيغاااا
ادم: اممم ولكن هو للي كيصيفطني عندك
غيثة: هههه غيقتلووووك!!! (كانت كتزيد غير تشحنو الهدوء كامل للي كيصطانعو خلاه يجرها لبيت نعاس وحتى هي مكانش منها شي مقاومة!!!!)
أميمة: (فسطح كانت حاضية طريق امتى تجي ملاك وتبان ليها، حيت سمعت من نجية اليوم غتجي هي وختها غير شافتها من راس الحومة مشات كتجري هبطت حلت لباب وقصدتها ركلات باليزتها بعييد)
ملاك: بنت الق***!!!!! (شافت فلباليزة للي عندها بحال عينيها حيت كادو من عند اورطيغا رجعت خنزرت فيها)
واش نتي هبيلة!!
أمينة: اه (مخرجة عينها) وغنهبلك معايا والله حتى نخرج عليك والله حتى نخليك كترمي حوايجك فزناااقي
ملاك: (كتشوف فهادي للي حاقدة عليها وهي مدايرة ليها والو!!!)
خديجة: سيري بدلي ساعة بأخرى حسن ليك أميمة ولا مغيعجبك حال
وفاء: حيوااانة كدايرة!!
أميمة: (كتغوت) كتحمااو كتحمااو اليهوديااات!!!
ملاك: (محست غير نقزت عليها مكتهضرش كانت غير كتجبد ليها حناكها بظفارها وتخبش وتنتفها خرجو الجيران خديجة ووفاء كيفكو يدها من شعرها للي يبسو فيهم خرجت نجية سهام وحتى زهرة بالجهد باش هزو ملاك من عندها للي حتى هي تخبشت حدا نيفها دخلوها للدار وهي كترركل ترجع ليها كتحلف فأميمة للي كانت باغية هاد المدابزة)
نجية: اش هاد لفعاايل فيك
أميمة: (دفعت نجية) بعدي مني نتي هي القو**** ديالها الله ياخد فيكم الحق كاملين والله حتى ندمكم
(دخلت بحرا للدار لبست شالها وعبايتها جرت صندالتها هزت بزطامها وخرجت تحت انظار الجيران للي غير شافتهم بقات كتبكي وتغبن)
شفتو شفتو الحݣرة فين وااصلة!!!! جابوني لحم ولاحوني عظم وكملوها كيسلخو فية وانا ياله كملت نفاسي على ولدي للي بسبابهم مات!!!
(مشات كتبكي خرجت من تماك بدلت ملامح لبكى وشدت تاكسي الكوميساريا…)
~~~~~~~~~~~
ملاك: والله متبقى فيها الا هبيلة انا كتتتتتتر منها
زهرة: من فوقاش ولينا ندابزو بحال هاكا فزنااقي الحمارة
ملاك: وشنو بغيتيني ندير؟! نسكتلها؟! (دخل رشيد) نخليها طلع فوقي!!
راه هي للي جبدتني ها لبنات سولوهم حيت أنا مغتيقونيش
خديجة: بابا راه أميمة للي جات عندها باغيا ضاارب انا مفهمتش هاد لبنت مالها حاقدة على ملاك؟!!
رشيد: (غير كيشوف حيت كولشي جا معاها واكترية منين جات نجية كتطلب سمااحة وعارف بناتوو مكيدابزووش)
لا حول ولا قوه الا بالله العلي العظيم هضري مع مرت ولدك المرة جاية تعرض لبنتي غنمشي نديكلاري بيها
ملاك: علاش حتى لمرة جاية دابا
نجية: ها العار ابنتي حتى حنا راه غير طالبين سلاك معاها
ملاك: وانا مالي علاش انا كل مرة مهجمة علية
سهام: ولدك للي خاصو يدير حل لهادشي اختي نجية
زهرة: صافي ارشيد سير لخدمتك
رشيد: علاش مال حمزة؟!
زهرة: زعما يهضر معاااها باش تجمع راسها….
الغالية: (كتهضر مع ختها حايرة وخااايفة)
البنت منين خرجت فصباح مولاتش رجعت اختي ….
صونيت عليه، عاد قطع معايا براسو كيصوني عليها متتجاوبش غتحمقني ديك البنت!! راه خارج كيقلب عليها
لا متكونش عند هداك الشمكار يخااف على راسو…
هانا تنتسنى اودي متلقاش سلاك مع يوسف لي رجع بحال خيالها غيخرجلي على لبنت ويعقدها…
واخا ختي.. بسلامة (قطعت رجعت صونات عليها مكتجاوبش..)
الله يا ربي فين غتكون مشات هاد البنت!!!
يا ربي متوقع شي حاجة خايبة لبنتي!!!
~~~~~~~~~~~~~
حمزة: (خرج مرتو للي كتغوت قدام صحابو اخر حاجة توقعها هي تجي عندو للخدمة حشم قدام الناس وهي كتعاير ان وحدة كدور براجلها وهو عاجبو الحال غي حيت ولدهم مات ورجع لصاحبتو لقديمة)
أميمة شنو هادشي!!
أميمة: (كتبكي وتمسكن) هي للي خدات ولدي مني وخداااتك حتى نتا وخلاتك بلا عقل!!! شطناتك علينا وكملتها جات اليوم كتغوت وتسبني حيت مات ولدي وتعايرني بيه
حمزة: لا ملاك مغديرش هاكا
أميمة: مزال كدافع عليها احمزة؟! واش معندكش قلب؟! واش مكتحسش بية وداك لحيمة للي دفنتي بيدييك مكتحسش راك غدرتييه وكنتي سبابو!!! تخيلو مسيكين شحال تعذب منين كان كيموت!!
معندكش القلب احمزة معندكش!!!
حمزة: عندي أميمة ومتبقايش ترجعيلي موت ولدي ربي بغاه وداااه!!! ولكن شنو هادشي درتي وداك المحضر؟!!
أميمة: مغتنازلش احمزة ولا عاود قلتلي تنازلي غنعتابرك نتا للي قلتلي ولدي معاها وغنبقى ندعي عليك حياتي كاملة!!
(مشات شدت تاكسي وهو بقا واقف مشا رغب الشاف ديالو باش ميتسجلش داك المحضر، وعطاه حمزة ورقة انها كداوا عند طبيب نفسي وأنها من نهار مات ليها ولدها وهي هاكا تفهمو ولكن حضور ملاك ضرووري باش يتعطا ليها إنذار واكترية جاية أميمة مضرووبة وكولها خبااش…)
~~~~~~~~~~~~~~
ملاك: (نسات دوك الاعصاب والمشاكل وبقات كدور عينها فلبيت ممتيقاش عندها بيتها كتشوف النموسية ديال واحد وكوافوز مع ماريو صغير فالجنب ريدو هادشي للي فيه مخلي البيت ضيق شوية ولكن فعينها كيبان جنة!! سدت لباب ودوزت الساقطة للي اصلا مراكبااش اي واحد يدفعو يدخل، بفرحة هزت تيليفونها ممتيقاش صونات على اورطيغا ابيل ڤيديو جاوبها كان فالمحال)
مرااااد
اورطيغا: (كيشوفها فرحانة قلبت الكاميرا كتوريه لبيت كان متواااضع ولكن حمقها وحتى هو عجبو الحال ) خاصك تفرحي حيت عندك واليديك تيبغيوك هاكا
ملاك: (قلبت الكاميرا لوجهها كتنقز) بالصح كانت مفاجئة زوينة بزاف بزاف بزااف
اورطيغا: وشنو باقي خاصك؟!
ملاك: (تبسمت من اهتمامو عارفاه غيبغي يجيبلها شنو ناقصها) والو
اورطيغا: وااايلي وانا!!!
ملاك: هههه متخيلش شحال فرحت
اورطيغا: دوماج مغتنعسيش فيه بزااف
ملاك: علاش؟!
اورطيغا: بلاصتك حدايا ازين ولكن نخليو هاد لبيت لولدنا..
بلاصتك حدايا ازين ولكن نخليو هاد لبيت لولدنا
ملاك: ههه علاش بالسلامة ناوي تاخد لبيت؟
اورطيغا: لا حاشا نخليو البجغوط عندهم حتى يكبر ويصيفطوه لينا على منصدرولهم شي بجغوط اخر
ملاك: ههه قلتلك داخل على طمع
اورطيغا: من ديما صبعي تم
ملاك: احم، مراااد معرفتش كفاش نقولهم على الدار
اورطيغا: ضروري املوكة خاصكي تردي علية الدار من غدا يعطيو فيها حتى 20 مليون لفوق، ..حيت عارفك تتجمعي لفلوس وباغية تشري الطموبيل الدار وشحال من حاجة داكشي باش توسطت ليك فهاد لبريكول
ملاك: عارفة ولكن معرفتش!!! حتى لفلوس معنديش هوما هادوك
اورطيغا: انا نهضر مع السيد يهبطها ليك ل7
ملاك: ولكن الدار مزال خاصها لفنسيون
اورطيغا: خلصيها بعدا وكملي طريطا والفينسيون حالها سااهل اصلا غتخليها غير لكرا وهاكا غيكون عندك مشروع تدخلي منو الفلوس
ملاك: (كتفرنس بالفرحة مكانتش متخيلة من هاد الشخص غيكون متعاون معاها هاكا وعاد كيزيد يحمسها)
اورطيغا: ولا خليها نعيشو فيها
ملاك: ههه معنديش مشكل
اورطيغا: تكتبيلي النص
ملاك: هااااا وتخصار الهضرة دابا علاش؟!
اورطيغا: معندكش ياما ارحميني فهاد تواشا
ملاك: ههه ولكن علاش حتى نتا متشريش دار منين كاين هاد رخا هاكا
اورطيغا: داكشي خرجي سوقو، خليه انا نتكلف بيه الموهييم دابا نتي شوفي مع دااركم ومن بعد ليها ألف حل
ملاك: (حركت راسها باه ولكن خاصو يشري دار فين يسكنو ولا هو معول يسكنو فلكرا!!) غير نلقى بابا فمزاجو غنهضر معاه ولكن مغنقولوش نتا زعما من طرفك شوف كفاش تلاقيني مع السيد ونتا متبانش
اورطيغا: علاش!!
ملاك: ها!! غير باش يطيح عليك السر نهار العرس
اورطيغا: ههه تعلمتي نقايم ابنت رشيد
ملاك: هههه
اورطيغا: مهم للي بغيتي ورتاحيتي فيه نديرو معاك (جا عمر من موراه شاف فملاك قلب التيليفون)
شي حاجة اعمر؟!
عمر: تتعرف شي واحد كيكري اللوطو غدا نمشيو لمولاي يعقوب
اورطيغا: كاين واحد عشيري معامن غتمشي؟
عمر: انا والوالدة وختي، خالتي أمينة ݣالت مصالحش ليها
اورطيغا: علاش؟!
عمر: على للي فهمت عندها شي رونديڤو مع طبيب على حساب الحاج
اورطيغا: ااااه صافي دابا نشوفلك (رد التيليفون كيشوفها) من بعد ونصوني عليك (حركت راسها باه وقطعت)
ملاك: (زفرت بفرحة كتشوف لبيت) خاصني نزوقو شوية خاصني تريا زربية ڤايوزات مرايا شلا حوااايج خااصين.. (خرجت نسات صداع للي كان حتى لقاتهم جالسين دايرين يدهم على خدهم)
مالكم؟!!
حمزة: (جالسين فالقهوة، حشمان هضر مع رشيد على شنو وقع وكيحلفلو بالله حتى هو حشم وملقى جهد ليها عاودلو كولشي على معاناة ديالو من نهار دفن ولدو باه مكيسمعلوش كولشي محملو الذنب!!)
غادي غير تسني على عدم التعرض
رشيد: (معجبوش الحال) حنا مكناش بغينا نمشيو لبوليس درنا بوجه الجورة ودابا كتقولي بنتي تسني!!!
حمزة: نتوما راكم عائيلتي اعمي رشيد راه غتهبلني كل نهار وكل دقيقة تبقى مهبلاني وتسبي فية موت ولدي
اب حمزة: (من الموت وهو عيان) ولدي الا بقات هاكا غنهضر مع خويا يجي يهز بنتو
حمزة: مقدييتش نصيفطها فهاد الحالة بغيتها غير تبرا راه هضرت معاها قلتلها البنت اعمي اجي نصلحو الا كاين ميتصلح ووالو راسها يااابس
رشيد: اولدي ماشي هي تسناها تبرا وتخرجلي على بنتي الا ولدها مات كان مكتاب ربي بنتي معندها يد فهادشي صافي كنتي ناوي تخطبها متفاهمتوش حيت بغيتها تجلس من الخدمة وكلها شد طريقو حبيا بقيتي خوها وهي ختك
حمزة: (كانت هادي هي السبة للي قالو باش مكملش داكشي) وانا راضي بالمكتوب وملاك بحال ختي صغيرة
رشيد: سمع!! مغنتسنهاش تخرجلي على بنتي اولدي، حتى حنا غدا غنشكيو بيها راه الكاميرات كاينين
حمزة: (بقاو ساكتين خاص يقنعو أميمة تنازل على المحضر) انا غنديها تنازل والا ملاك بغات تشكي انا نكون شاهد معاها وفصفها
رشيد: معندها متنازل مزيان وصلت للمخزن باش وحدة مدور بلوخرا، بنتي ماشي ديال هادشي من ديما داخلة سوق راسها مكتجبد حد مكتهضر مع حد من خدمتها للدار وتجي مرتك ديرلها الشوهة هادشي منقبلوش
حمزة: والله اعمي رشيد منويت هادشي يوصل هاكا براسي كنت فالخدمة حتى جات كتغوت
رشيد: (بعدم صبر كيفكر غير فبنتو) اوا زير ولا طلق…
~~~~~~~~~~~~~
ملاك: (منين عرفتها شكات بيها خافت غير على خدمتها وخافت هادشي ميتفهموش اورطيغا!!! بقات غير صاقرة شافت فوفاء للي مخرجة عينها) وفاء متوصليهاش لمراد
وفاء: علاش؟!
ملاك: هو محسوس من موضوع حمزة بلاش
خديجة: بالصح داك نهار راه برغيب باش مخليناهش يدوز فيه
(عاودات ليهم على داك لبلان ملاك دارت راسها ممسوقاش لديك الشكاية همها دابا غير موضوع الدار خاصها تقادو ناضت هزت حواجيها من بيت مها وداتهم لبيتها كتستف فداك الماريو حلات الدفة لقات مكتوب بستيلو كحل ملاك Malak تبسمت ظنت انها مها للي كتبتها بقات كتعاونها خديجة للي كانت كطويهم مقادين ويستفو اما وفاء داتها مي حلو وسهام لعند راقي فالحومة من بعد معاودو ليهم شنو كيوقع ليها…)
خديجة: شنو غديري املاك
ملاك: معندي مندير غدا نمشي الكوميساريا مالها غتخلعنا!! مدرتش منخافش
خديجة: بنت لحرام وانا للي شحال بكيت عليها فنهار الصدقة
ملاك: اودي بنادم قبيييح…
غيثة: ( هزت راسها من على يدها بحال كانت ناااعسة مفعول الحبة بدا كيمشي كتشوف بعينها كانت فقهوة وعينيها بحرا كتحلهم مزيان!! حكت راسها لقات راسها فقهوة جالسة بوحدها كتفكر انها كانت مع ادم اخر واحد عقلت عليه ولكن دابا ممعاها حتى وااحد!! هزت تيليفونها كان شحال من ابيل ديالو وديال مها ويوسف والساعة كانت 10 دالليل تخربقت فراسها واخا مزال حاسة انها مرخية مفاهمة واالو صوتها كيتعاود بين ادم واورطيغا ولكن للي عاقلة مزيان عليه هو ادم!! صونا تيليفونها كان هو جاوبت)
ألو!!!!!
ادم: (مخلوع كان صايݣ ووقف فالجنب) غيثة!!! فينك من صباح تنصوني عليك متتجاوبيش؟!
غيثة: ياك كنا بزوج؟!!
ادم: منين تلاقيتك صباح حدا طبيبة مشييت فحالي، دابا فينك نتي؟!! حنا مخلوعين عليك بزااف ومعايا حتى ماماك لالة الغالية؟!
غيثة: ماما؟!!
الغالية: (عطاها التيليفون) فينك ابنتي خلعتني عليك؟!! وحتى خوك يوسف ملقى جهد باش يرجع يقلب عليك وخوك اشرف تيقلب عليك!!
غيثة: علاش تتقلبو علية!! انا كنت مع ادم
الغالية: ادم كاين معايا لعشية كاملة وهو تيقلب معايا مخلي خدمتو وشغاالو
غيثة: (تخربقت مفهمت والو واش كان كيتهيأ ليها ولا حماقت هي كانت مع ادم ولا اورطيغا ولا كانت بوحدها!! وكفاش كيقلبو عليها و هو كفاش كيقلب عليها مع مها) انا فقهوة
الغالية: (حلقها نشف بالخلعة) اشمن قهوة ابنتي الله يهديك
غيثة: (كدور عينها كان محطوط فطبلتها تشيز كيك موكول منها شوية وكاس عصير مشروب نصو شافت فلموني)
قهوة ****
(قطعت وشافت فهادشي للي محطوط امتى كلات وشربت!! باينة هي فلفوقي حيت طابلات خاويين غير شي جوج دليكوبل للي جالسين بعاد، ناضت كتحس بنصها التحتاني ضاارها جاو فبالها ذكريات كانت عريانة وشي واحد فوقها قلبها ضرب!! هزت صاكها جات عندها سرباية )
….: مدموزيل مزال غطلبي شي حاجة اخرى!! (حركت راسها بلا) عندك 170 درهم
غيثة: (مزال مرخية!!) ختي واش كان معايا شي واحد!!
…..: (بثقة) كانت معاك بنت تغديتو هي مشات ونتي بقيتي خديتي حلوة وعصير
غيثة: بنت!!! انا تغديت هنا!! (حلت صاكها جبدت كارت ݣيشي مشات خلصت رجعت دخلت لطواليط مفهمتش هاد لحريق للي ياله جلست تبو* وهي تغوت بالحريق وعينيها دمعو مفاهمة واالو كملت بصعوبة مسحت مكاين واالو لا دم لا حتى حاجة هزت سروالها بصعووبة، خرجت كتغسل يدها شافت فلمرايا كان وجهها صفر! خرجت لقات مها وادم تماك كيقلبو غير شافوها جات عندها مها جمعت معاها بتصرفيقة خفيفة شدها ادم معنقها وهي مخشية فية شادة حنكها)
ادم: لالة الغالية ماشي تصرف هدا!! كنا مخلوعين عليها نعرفوها غير واش بيخير!!
الغالية: (بغات تبكي) خلعاتتي عليها وهي جالسة مرتاحة العشية كاملة وحنا تنقلبو تجاوب غير فتيليفونها!!
معرفتهاش حية ولا ميتة!!! راه قلبي كان غيسكت بالخوف عليها
غيثة: (مفاهمة واالو بحال كانت فشي حلمة خايبة وفاقت فيها.. بقا جارها ادم وخرجو ركبها اللور وهي شادة فحنكها والغالية كتحس براسها غتسخف)
ادم: (بهدوء مبين الخوف) غيثة حبيبة فين كنتي خلعتينا عليك!!
غيثة: (كتشوف فيه باستغراب) معرفتش
الغالية: (بعصبية) حتى رجعو للدار وغتعرفي
ادم: لالة الغالية عفاك ماشي هاكا تتحل الأمور، (طل عليها من لمرايا) شيغي حنا تخلعنا عليك ولكن المهم هو نتي دابا بيخير!!!
ياك نتي بيخير؟!
علمو يوسف راه لقاوها فقهوة وكانت غير بغات تجلس بوحدها هضر معاها كيسولها غير على حالتها وهي كتبين ليه نفس كلامهم للي قالو ليه واخا كانت فحيرة كبييرة ومفاهمة والو!! وحتى هو حاير معاها كيتسنى يكمل خدمتو ويرجع عندها!! بقا معاها ادم فبيتها من بعد مطلباتو يبقى بوحدو
غيثة: (كتبكي) ادم واش ماشي كنت معاك!!
ادم: مكرهتش اغيثة ولكن احبيبة انا جيت عندك نطمئن عليك وكما العادة جريتي علية ومشيت حتى صونات علية لالة الغالية خليت شغلي كامل وبقيت تنقلب عليك خفت عليك بزااف اغيثة عفاك متعاوديهاش!
غيثة: (غير كضور عينها غتحمااق جرها عنقها)
ادم: متقلقيش احبيبة من ماماك هي كانت غير خايفة عليك واخا نورمال كان خاصها تعنقك ماشي ضربك ولكن انا هنا انا ديما تنكون معاك
غيثة: (غير كتشووف بعدت منو)
ادم: مكرهتش نبقى الليل كامل مع (دخل خوها اشرف كيغوت عليها وادم وقف فالوسط كيهدنو وهي والو غير كتشووف خرجو) غيثة بدلي وتكاي باش ترتاحي انا نوصيهم يقادو ليك لويزة
غيثة: لويزة!! اه جيت عندي عطيتني لويزة واش عقلت انا عقلت عليك جيت وعطيتني لويزة واورطيغا!!! لا قلتلي شي حاجة عليه!!
ادم: انا غنجي عندك نعطيهالك رتاحي شوية اشيغي (سد لباب كيشرح لأشرف ان ختو منهارة يمكن داخلة اكتئاب وبغات تبقى بوحدها رجعت عندها الغالية كتنݣر عليها بدلت لوخرا حوايجها ودخلت لفراش غير كضور عينها عطاوها كينة كترخي بقات كتفكر حتى ضرها راسها ونعست بلا متحس!!…)
~~~~~~~~~~~~~~~
أصبحنا وأصبح الملك لله
حمزة: عندك جوج حلول تمشي تنازلي ولا تمشي لداركم
أميمة: ياك احمزة بنتي على حقييقتك كولكم ضدي اصلا كنتي شاديني غير على الولد منين قتلتوه بغيتو تلوحوني حتى انا!؛! وكان غير قتلتوني حتى انا
حمزة: ابنت عمي ديري عقلك شوية
أميمة: مدايرااهش
حمزة: راه حتى هي غتمشي دير شكاية وعاد الكاميرات والتسجيل راه جاي فصفها ومن التالي انا غنوقف معاها ميمكنش ضيعي لبنت غي حيت كتغيري منها
أميمة: كنغير!!!
حمزة: طلعلي هاد تخربيق ديالك فراسي حشمتيني مع عمي رشيد الله ينعل نهار للي هبلت وكنت حمار وتزوجتك فيه!!!
(هادي مدارتش ليها لحساب.. بقات ساكتة شافت فلمرايا وجهها كولو مخبش مشات معاه دخلت عند البنت دارت محضر هو خرج وبقات كتهضر مع البوليسية)
ختي انا بالصح بغيت نتنازل باش ميطلقنيش راجلي حيت معندي فين نمشي واليدية ميتين وانا يتيمة قلتلو تزوج بهاد صاحبتك للي ضرباتني ومتبقاوش فلحرام ولكن
(بحزن بقات كتبكي والبوليسية عزت عليها وفهمتها شحال من حاجة….!!! )
ملاك: (فاقت صباح قبل متمشي للخدمة علمها باها باش تمشي الكوميساريا كان بغا يمشي معاها ولكن تشجعت تمشي بوخدها اصلا مخايفااش!!!!
مشات لكوميساريا سولت ان وحدة دارت عليها شكاية بقات كتقلب على سمية عرفتها من طرف المفتش حمزة صونات عليه بقات واقفة حتى جا عندها شافت فيه بوجه بااارد)
حمزة: ملاك شنو كديري هنا؟!
ملاك: جابتني البرهوشة دمرتك موهيييم.. فين غنمشي؟!
حمزة: راه تنازلت على الشكاية عاد دابا صونيت على عني رشيد
ملاك: اممم وفين ندير انا الشكاية
حمزة: اجي معايا املاك (تبعاتو بقاو حدا لباب مخرجوش) غير مسحيها فية هاد المرة
ملاك: اوا المرة جاية!!!؟؟ مرتك مناوياش على خير احمزة و انا ممسالياش لهاد تبرهيش
حمزة: عفاك املاك
ملاك: (كتشوف فيه تبدل 180 درجة ضعااف تحت عينيه كحالو)
شوف انا ماشي من حقي ندخل ولكن حل مشاكلك معاها فهمها انا معندي حتى شي دخل فحريرتكم
حمزة: (حاني راسو ومحرك راسو باه)
ملاك: (مموالفاهش هكا معرفتش ولكن بقا فيها!!) أحمزة!!
حمزة: (كان بحال سااهي… شاف فيها) كوني هانية املاك اخر مرة تعاود تعرض ليك
ملاك: (حركت راسها باه) شكرا (خرجت من تماك كتقلب على طموبيلتها والو مكيناش هي متأكدة حطتها فهاد لبلاصة قلبها ضرب)
اويلي (كتزيد تحل عينها توسعهم ممتيقاش)
اويلي تشفرت!!!
~~~~~~~~~~~~~~~
غيثة: (فاقت على نݣير مها ويد كتلمس راسها حلت عينها غير بالسيف كان يوسف تبسمت) يوسف!!
يوسف: (تبسم معاها ظنا منه انها كانت غير بغات تبقى بوحدها حيت كدوز من وقت صعييب) غتعطلي على الخدمة!!
غيثة: الخدمة!!
يوسف: نسيتي راك اليوم غتبداي اليوم
غيثة: اوووو نسيت (دارت يدها على راسها)
يوسف: تيضرك راسك؟! (الغالية مخرجة عينها كانت كتضنو غيغوت عليها!!)
غيثة: لا.. انا نقاد راسي ونهبط (وقفت نايضة دازت من حدا مها مكضويهاش دخلت طواليط مع حيدت سليب بانو ليها نقط الدم فيه)
ماشي وقتها!!!
(غير جلست ت*** وهي تشعل معاها العافية حتى دمعو عينها مفااهمة واالو كتجيها غير لقطات انها كانت فعلاقة ولكن هي معمرها وصلت لداك النيڤو!!! مفاهمة واالو ومكتين حتى واحد غيفهمها!!! ناضت مسحت كأنه مكاين والو غتسطى باغا تعرف غير شنو طرا!!!…)
ملاك: (كتقلب وتبكي على طموبيلتها رجعت دخلت دغيا الكوميساريا)
طموبيلتي مشااات!! واااا عباد الله طموبيلتي مشااات
(جات عندها بوليسية وهي كتبكي)
اجي معايا اختي راه ملقيتش طموبيلتي
(خرجت لبرا كتوريهم فين حطاتها جا عندها حمزة غير شافتو مشات عندو)
أحمزة مشاتلي الطموبيل الله ياخد الحق فيك نتا ومرتك!!
حمزة: فين حطيتيها؟!! (كتوريه فيه) ياكما الديبناج خداتها هنا راه كيحطوها غير المسؤولين؟!
ملاك: (خرجت عينها) وباش نعرف؟! باش نعرف (بانفعال) كاينة شي بلاكة هنا! ظ
حمزة: صافي تهدني متبكيش
ملاك: دابا خر** طموبيلتي دااابة
حمزة: (ظحكاتو) صافي واخا غير سكتي من لبكى!!
(صونا تيليفونها كانت زينب كتعلمها كاين اجتماع، اما هو دار اتصالو مع البوليسي للي مسؤول هاد نهار مع مول الديبناج عرف راه عندهم ياريس حمرا دايينها لفوريان مشا عندها)
انا نمشي نجيبها تسناي هنا
ملاك: خاص رجع للخدمة دابا واش عرفتي فين هي؟!!
حمزة: صافي سيري للخدمة نتي، انا نجيبها ليك تماك (حركت راسها باه مشات بالزربة كتشوف تاكسي ركبت ومشات للخدمة قلبها كان غيسكت هي فهاد المواقف دغيا كتبكي حاجتها عندها عزييييزة بزاف واخا يكون شارجور ديال تيليفون…
لقلدات ميساج من عند اورطيغا علمها هاد نهار عندو مدبووز بالخدمة مجاوبتش باقية كترجف على شنو وقع ليها دخلت للخدمة اعتذرت على تأخرها وعطات السبب وبدات خدمتها…)
~~~~~~~~~~~~~
يوسف: (كيتسنى غيثة فطموبيلتو تجي باش يوصلها للخدمة وكيهضر مع خديجة فالتيليفون)
غير صبري احبيبة…
كان خاص نجي نشوفها واش بيخير…
غرجع لرباط..
بقات شي يوماين ياك نتي مرتاحة…
انا بعدا ممرتاحش ولفتك بزااف (ركبت غيثة)
ههه صافي واخا… من بعد ونصوني عليك
(شاف فختو ضار عندها بجدية)
غيثة حبيبة معودتيش قلبتي على هداكشي!!!!
غيثة: (حركت راسها بلا وجاوها ذكريات ديال ادم عطاها لويزة اذا عاود عطاها داكشي) والله مقلبت اخويا عليه ولكن لبارح مشيت للقهوة معقلتش على راسي يمكن نعست ونسيت راسي
يوسف: تيجيوك بزااف هاد الحالات؟!
غيثة: لا يمكن كنت باغية نبقى بوحدي وسهيت ونعست
يوسف: ولكن ماشي بهاد الطريقة علاش عندك التيليفون غير باش تعلميني!!
غيثة: (تبسمت وباستو فحنكو) واخا
يوسف: غرجع غنمشيو لطبيب
غيثة: وطبيب علاش؟!
يوسف: غنمشيو لطبيب اغيثة وغنقولها الوالدة
غيثة: لاااا عفاااك غتبقى نعايرني بهادشي نتا عارفها ايوسف صافي غترجع ونمشي نجلس معاك شي يامات عفاك متقولهاش ليها
(حرك راسو باه، كسيرا دازو فطرو بجوج فجو الظحك حطها حدا لاتوليي وهو شد طريق رباط دخلت لقات أسماء للي وصا عليها شرييف مزيان وبدات فسطاجها… صونا تيليفونها كان ادم تفكرت كفاش وقف فوجه مها لبارح ولكن واخا هكاك مغتحلوش طريق!!!)
ملاك: (دخل عندها حمزة كانت كتهضر مع اورطيغا ابيل ڤيديو شافتو تصدمت حيت عارف لبيرو ديالها… حسابلها غيجيبها لدارهم ماشي لخدمتها) احم (معرفتش كفاش تقطع حيت غتجي معيقة)
حمزة: ديبناج حط الطموبيل حدا لباب
ملاك: اااه.. (بغات تقطع وكتسمع فودنها حيت دايرة لكيت شكون هدا معامن كتهضري!)
شكرا..
(مبغاتش تذكر سميتو)
حمزة: العفو.. وداكشي دلبارح نساايه كنواعدك مغيتعاودش داكشي املاك
ملاك: (فنفسها: يا ودي غير سير فحالك) صافي واخا
حمزة: الله يعاون!! (مكتقدرش حتى تبسم حنات عينها شافت فاورطيغا للي ملامحو ديال واحد طالق ودنيه وكيسول شكون)
ملاك: غير الطموبيل..
زينب: (داخلة) هاي هاي هاي.. شنو كدير حمزة عندنا؟!!
ملاك: (مشافتش فزينب للي كتسبها فخاطرها شافت فاورطيغا للي هز حاجبو) صباح طموبيلتي داوهالي دي (قطع.. شافت فزينب) توااااام ان شاء الله توااام اختي ويكونوا ترييببل ولا ف4 ا
زينب: الله يا ختي حشومة عليك انا غير جوج مهبليني
ملاك: ها هي عندك ازيينب!! (صونا أبيل عادية خرجت من لبيرو) الوو
اورطيغا: كفاش بلانك نتي؟!
ملاك: صباح جاو ديبناج خداولي الطموبيل وهو مشا جابهالي للخدمة!!
اورطيغا: واش دخل **** فيك؟!
ملاك: غير بليزير
اورطيغا: لبليزير هو للي غيجي فمك (مجنن) انا نسالي ونجي لمك
ملاك: (جات تهضر وقطع) سير تخ** نتا عاود بفففف (مشات شافت الطموبيل عاد طلعت معاها)
كفاش فمي؟! تفووو هادشي للي كان ناقصني هاد نهار!!!
(قلبت طموبيلتها مغتهضرش معاه دابا خلاتو حتى يتهدن حيت مغتعاودلوش على قضية الشكاية خافت ميتيقهاش وعاد حساسيتو من حمزة طااااالعة رجعت دخلت كتبت ليه ميساج ورجعت مسحاتو حيت غيزيد غير يتعصب عليها!!)
~~~~~~~~~~~~~
اورطيغا: (رجع كيفرق على الجزارا ومعصب كان غيدابز مع واحد غير دخلو الناس مكيعجبوش لقائها بحمزة بالظبط وعلاش اصلا مقالتلو والو على الطموبيل يعني وكان مهضرش معاها فديك لوقيتة مكان غيعرف واالو هادشي كيزيد يمرضوو مزال مبغات تعلم وتفهم انه كيبغي يعرف عليها كولشي… جا عندو شريف)
واش خوك مغيجيش ياخد رزقو!!!
شريف: معرفت صباح كامل كنصوني عليه مكيجاوبش
اورطيغا: مهم انا غنمشي دابا عيييت وخاصني نرجع للمحال
شريف: قالك الحاج دوز عندو للرياض
اورطيغا: حتى الليل دابا معندي ݣانة نسمع لداك الديسك ديالو الحامض
شريف: صافي غير سير انا نكمل مع دراري…
ملاك: (مرجعش صونا عليها كملت الخدمة ومشات لطموبيلتها صونات عليه قطع عليها ورجع صونا) وي مراد
اورطيغا: مزال مبغيتي ديري عقلك املاك؟
ملاك: عاود غندابزو على والو؟!!
اورطيغا: كفاش على والو و****د علاش جاي عندك لبيرو وجايب الطموبيل من الفوق!!!! واش تتسطاي علية ولا تتريݣلي؟ راه والله حتى نخرج ف***** نتي وياااه
ملاك: متبقاش تخسر الهضرة
اورطيغا: راك تتصعريني ابنااادم!!!
ملاك: برد باش نعرف نفهمك (سكت) طموبيلتي داوها ديبناج وانا كنت مزروبة ومشا هو لحق جابهالي للخدمة هادشي للي كاينة
اورطيغا: يلحق بيها باك!! ووخلي مها ݣاع تمشي لفوريان
ملاك: وعلاش؟! هو غير دخل باش متوصلش تماك
اورطيغا: (بتحذير) سمعي أملاك حمزة ماشي غير ولد جيرانكم للي غندير عين ميكة ونفهم انكم تربيتو عائلة وحدة كما قلتي وكبرتو مجموعين!!
لا هو ونتي كان بيناتكم شي حاجة ومتتهمنيييش حيت تسالات!! صافي غتساليه حتى نت من حياتك بحال عمرك عرفتييه انا هادشي للي تنعرف معندكش 300 درهم باش تخرجيها انا نخرجها ليك ولكن ماااطوفيييش بسااحتو هادشي الا بغيتي نبقاو مزيانين!!!
هادي اخر هضرة غنهضروها فهاد ****
ملاك: (بقات كتفكر فهضرتو)
اورطيغا: ماااعلينا الميساج عندك دابا غنتكى من بعد ونهضرو (قطع معصب موالف كيشد معاها الهضرة حتى كتوصل لدارهم ولكن عصبااتو وغيدا غير يهضر الهضرة ويقولها كلام يجرحها اللهم يقطع رد الماعن للكوزينة للي تغدا فيهم ومشا يتكى شوية باش يهبط للمحال ويمشي للحومة..)
ملاك: (صاݣت لدارهم تلقات بباها سلمت عليه) بابا بلاتي بغيت نخرج نتقداوشي حاجة للبيت
رشيد: نتي ومن؟
ملاك: لبنات
رشيد: حمزة قالي شنو وقع صباح
ملاك: بابا هاديك خيتي والله حتى هي للي جات عندي واش انا موالفة كنضارب مع الناس هنا؟!
رشيد: واخا هكاك غير تشوفيها قلبي طريق ابنتي حنا ماشي ديال هادشي
ملاك: واخا ابابا انا نمشي نتكا شوية عييت
رشيد: سيري ابنتي…
وصلت للدار تبسمت من بين هاد المشاكل عندها بيتها تقصدو تكا وتكالما فيه… مع دخلت لقات بنت عمها متكية تماك غوبشت ودخلت منرفزة عارفة هادو خدايم مرت عمها حطت الصاك بالجهد جبدت من الماريو بيجامتها وهي كتخبط فلباب ولوخرا فايقة ولكن مجبدة فوق النموسية
ملاك: ماماااااا ماماااااا (كتلبس بيجامتها) مااامااااااا
زهرة: (منين شافت ديك النمرة فتيليفون رشيد وهي دااايخة شادة راسها بيديها!! اكترية منين قلبت عليها فݣوݣل وعرفت ديالمن!!)
ملاك: (دخلت عندها كان أنير ناعس) ماماااا
زهرة: مال مك.. هضري بشوية خوك ناعس
ملاك: ديك الخ*** للي مجبدة تماك بحال سلوݣي شنو غنديرو معاها دابا
زهرة: بنت عمك شنو فيها طلبتني تتكى حيت راسها واجعها
ملاك: فيها هداك راه بيتي خصوصية ديالي هاديك امداام!! ولا علاش نايض هاد الفلم من نهار اللول!!
زهرة: فرقيني عليك هاد الساعة املاك!!!
ملاك: (كتشوف فيها باينة طايرة ليها) مالكي دابزتي مع بابا؟!
زهرة: مدبزناشاااي سيري خليني نعس
ملاك: راه الا مناضتش غنضربها
زهرة: ملاك خلينا من صدااع
ملاك: صداع هو للي بغات تجبدو سهام وفين لبنات؟!
زهرة: مشاو لفقيه يعاود يقرا على وفاء ومشات معاها مرت عمك للي راكي صاعرة عليها
ملاك: هداك اجر بينها وبين للي خلقها مضربها حد على يدها تمشي معاها
زهرة: باااااز على هاد السنطيحة ابنتي للي عندك باااز، سيري خليني نتكا شوية غداك راه فالكوزينة
ملاك: وا قولي مالكي بعدا
زهرة: مماليش ابنتي مماليش غير عيينا صباح صبنا لكواش وعييت..
ملاك: (حركت راسها باه مشات للكوزينة حطت غداها كلات كتفكر غير فاورطيغا للي دغيا تقلب عليها دغيا دغيا خاصو يفهمها، غسلت فاش كلات مشات لبيتها وطلقت الموسيقى فتيليفونها دايرة الشلحة جايبة شطاابة كتشطب شافت لوخرا واالو مكتحركش شافت فالساعة لبنات مزال ميجيو بدلت حوايجها هزت صاكها وخرجت من الدار قالت السلام لوحدة من جيرانهم ومردتش عليها وعاد دخلت زادحة لباب فوجهها)
لقطع أبنت لحرام!!! مال هادو معايا!!
(زادت ممسوقاش مشات لطموبيلتها صونات على اورطيغا للي جاوبها بصوت نعسان)
ناعس؟!
اورطيغا: اممم.. شنو فيها؟!
ملاك: (مرضياش ولكن مبغاتش لخصام يكبر) انا خارجة للسوق
اورطيغا: علاش؟!
ملاك: بغيت ناخد شي حاجة لبيتي
اورطيغا: اجي عندي لفاس ونخرج معاك
ملاك: بزاااف وبابا داير معايا ساعة منفوتهاش
اورطيغا: صافي واخ، خاصك شي حاجة؟!
ملاك: (هضرتو ناشفة) لا
اورطيغا: نصحصح ونصوني عليك
ملاك: واخ (قطع وحطت التيليفون مشات تقضي شغلها باش متعطلش…)
وفاء: لقات راحة كبيرة على القرآن للي كيتقرا عليها رجعت للدار مهدوودة واخا مدارت حتى شي مجهود ولكن كتحس براسها مسخسخة مشاو لبيت ملاك فين خديجة صيفطات بنت عمها تمشي تكا فبيت مها على مترتاح الضيفة
ملاك غتكون جات؟
خديجة: 5 ونص هادي غتكون جات ، شوفي تكاي نتي رتاحي انا نمشي نطل على ماما
وفاء: شكرا بزاف اختي على هادشي للي كديرو معايا
خديجة: مبينتناش اوفاء ولكن هادي ديرلك العقل
.وفاء: نمووووووووووت ومنعاودهاش
خديجة: الله يهديك اختي (سدت لباب ومشات دقت على مها كانت كتهضر مع مريم للي عرفوها حاملة فرحو بزاااف ورغبتها يجيبها راجلها واحد السيمانة وخلات حتى تشاور معاه!)
خديجة: فين هي ملاك؟؟
زهرة؛ خرجت مشات تشري شي حاجة خصاها
خديجة: كانت دايرة معانا نمشيو معاها
زهرة: بنتي داك دخول وخروج بزاف راك عارفة باك
خديجة: كنا غنمشيو غير للسوق
زهرة: (حركت راسها باه وباينة ماشي فدماغها) حقا مال وفاء؟
خديجة: براسها معارفااش منين مشات لأكادير قالت مشات لشي سيد من تماك وهي هكا
زهرة: مسكينة ولكن خاص ضروري تمشي عند مها ماشي كرهتها ولكن مها خاصها تعرف
خديجة: مها خاصها غير فوقاش تزوجها مااااعجباهمش التطليقة ديالها
زهرة: لا حول ولاقوة إلا بالله العلي العظيم شي أمهات الله يهديهم وصافي… هانتي مع خوك نمشي نتوضى وصوني على ختك تخف رجليها ترجع…
وفاء: (هاد المرة تفكرت داكشي للي وقع ليها بلا ميجيوها هادوك!! ديك الليلة للي جبدت من داك القبور داكشي للي دارت لراجلها عمرها تنسااها من تماك مبقات شافت الخير ندمات علاش مشات تقفو على لبنات الا هي لقات راسها كرهااتو ومبقاتش باغيااه وباش تكفر الذنب وتحايدو من على رقبتها فضلت تغامر وتحايدو ليها وتبات ليلة فالمقبرة على مكمل الفقيه داكشي!!)
~~~~~~~~~~~~~
نجية: (خداو أميمة لدارهم) هانا تبريت لوسي ولمك ابنتي ديري عقلك!!!
هادوك الناس جيرانا وحبابنا قبل حتى ميتزاد حمزة للي تريا وكبر عندهم ونتي مشيتي درتي هاديك الكارثة
أميمة: كفاش كبر عندهم ياك ديك زهرة ماشي م
نجية: هانتي اختي أسرارنا رجعو علكة فام الناس شوهتني مع كولشي انا هزيت يدي عليها!!!
ام أميمة: يا ربي هاد لبنت من ديما مهبلاني
أميمة: (غير كضور عينها هي للي فراسها غتوصلو توصلو وغادير داكشي للي بدات وكتخطط ليه واخا بقطيع الراس ميمكنش بووحدها للي تخلص مات ولدها ضاعت طايتها وحتى الا طلقت شكون غيقبل بيها يعني هي الخاسرة ودوك الجوج غيعيشو الحياة!!!
لاموها واليديها باش تجمع راسها حيت حتى هوما لاحظو انها تبدلت بزااف فاللول شدولها الخاطر ولكن من بعد جاتهم صعاابت بزااف وبراسهم خايفين من كلمة مطلقة وترجع ليهم بنتهم!! وشكون غيفهم الناس انهم غير متفاهموش راه ولد عمها الا مصبرش عليها هو وعمها غيصبر البراني!!!!
خلاوها بحجة ترتاح ودير عقلها ونجية وراجلها مشااو حيت حمزة قالهم تبقى يامات تماك على متقااد…)
نجية: (فطريق) ضيعنا ولدنا كان علينا نخليو يطلق واخا عرفها حاملة
اب حمزة: (تنهد نااادم حتى مقداتو نداامة) حتى دابا للي بغا يديرو يديرو
نجية: الا على ملاك ميعطيوهاناش واخا نبوسو الرجلين…
ملاك: (كانت شرات شبيكات فلبيض ديال بلاستيك باش تقسم بيهم القجورة خدات زربية فلغوز مشعرة وخدات كوڤر ديال بلاصة وحدة بين الغوز ولبيض خدات أبجورة فلكريستال خدات بنطوفة خاصة غير ببيتها وخدات شوفاج باش يسخن لبيت، خدات جوج وسيدات صغار مشعرين على شكل قلب خدات صلاية فلغوز، صافي اكتفت بهادشي حتى ترجع مرة أخرى تكمل فرحت بهادشي بزااف.. رجعت للدار خرجت من طموبيلتها موالف كيصوني دازت اكتر من ساعة منين قالها نصحصح ونهضر معاك ومصوناش!!
بقا فيها الحال ولكن هي شرحت يعني علاش غيبقى شاد فخاطرو وهو اصلا قالها شنو فقلبو وهي قتانعت بيه نسبيا، حلت الكوفر شافت باها شيرت ليه باي باي تم جاي عندها بقات كتوريه بفرحة شنو شرات مع ذكر الثمن وشحال تشااطرت وهو كيظحك عاجبها الحال وصل معاها للدار شافت حمزة خارج من دارهم)
حمزة: سلام ياكما نهز معاك شي حاجة اعمي
ملاك: (كان لباب محلول دخلت مقالتش حتى السلام وباها بقا كيهضر مع حمزة مشات لبيتها لقات وفاء ناعسة تماك)
دايرين النوبة اليوم
وفاء: ههه (كانت فايقة) هانا غنوض
ملاك: (حسابلها ناعسة) اغير كنظحك معاك، غير خليك ناعسة
وفاء: وريني شنو جبتي (دخل باها داكشي مهضرش على وفاء حيت بانتلو داخلة سوق راسها مكتخرج موالو صوتها مكيتسمعش فالدار ومحتارمااه، وحتى زهرة طمناتو انه فخبار دارهم جلستها معاهم…)
زوييين هادشي كيوووت
ملاك: ولكن اهم حاجة (جبدت من صاكها فرخة كبيرة) غنديرها على برا على منركب الصاقطة (جبدت ملصقة كبيرة فلحمر مكتوب ممنوع الدخول)
وفاء: ههه نيشان اختي.. (غمزتها) راكي عامرة ذهوبات
ملاك: ها هاها بناقص للي يعاود ليكم (عرفتها كتمعني ليها على الخلخال.. جلست كتعاود ليها شنو وقع ولتاحقات خديجة)
كنت غنموووت
وفاء: بعدا حمزة صوڤاك فهادي
ملاك: (بينها بين راسها وتجبد ليها صداع مع مراد) وييه
خديجة: ولكن واخا هكاك متظحكيلوش
ملاك: وعلاش غنظحكلو سيري سيري
خديجة: حقا مريم حاملة… (بقاو مجمعين جات مها كتشوف فشنو شرات والكوڤر للي فرشت)
ملاك: احم ماما ماشي حتى نتي خاصك تعرضي على خالتي مينا وتكبري بيها
وفاء: (كتقاد ليها لقجورة وتستف ليها مقيبطات الزيوت دشعر لي ماسك والميكاب.. تبسمت من زعططة ملاك للي كتفكر تعرف مو باش تشوفو)
خديجة: (قرستها ملاك تهضر) اه بالصح شحال وهي تعرضنا وعاد معاها ختها ومن ديما مكبرة بينا انا وملاك..
زهرة: (فكرت فيها) اهااه الا بغاو دابا نصوني
ملاك: غدا.. اممم غي حيت معنديش خدمة بزاف غرجع بكري، ونييت يصلاحلي نتسخر ليك وعلاش لا تعشا معانا
خديجة: ههههه اه اماما
وفاء: ههه
ملاك: (خرجت عينها فيهم علاش كظحكو) مهم نوض انا نتوضى… انا غير قتارحت وصاافي…
اورطيغا: (كان جا عندو الحاج كيتحاسب معاه فاللخر ديال شهر وهادشي كيديرو فݣاع المحالات ديالو، مو كانت حتى هي معاهم لداخل حتى صونات عليها زهرة بقا ودن معاها وودن مع الحاج)
رمضان مبقالو واالو وانا للي غنشد دبيحة نهار كامل
الحاج: ماشي بزاف عليك؟!
اورطيغا: لا.. مبزاافش علاش غنجيب ݣزار وانا ولد الحرفة
الحاج: (تمنى ولادو لوخرين يكونو حاريين بحالو) صافي وخلاصك غيضووبل
اورطيغا: عارف..
الحاج: مراد مزال باغي تمشي لبرا!!
اورطيغا: وعلاش تتسول؟!
الحاج: كفاش علاش تنسول نسيت انا راني باك
اورطيغا: (شاد لسانو) لا نتا عارف الضوسي توسخلي ياله تنقاد الا باقي فيه ميتقاد انا وكان شحال هادي خويييت
الحاج: معلييش اولدي هنا خير من لهييه
اورطيغا: امم مهم، (سمع مو وافقت على لعراضة) هضر مع سعد وشفيق باش ميديروش لعصى فرويضة ونقلبوها مطايفة قدام الناس ونديرو الشوهة ليك على والو ذبيحة غنشدها نهار كامل منين نكمل للي عندو شي سݣيطة يجي يهزها والمحال بحال ديما غنحل حدي المغرب
الحاج: حل من مور العشا
اورطيغا: تنكون عيان
الحاج: خلي الدري يحل جوج سوايع تيكون البيع وشرا فداك الوقت ودير بحال شريف
اورطيغا: شواية!!
الحاج: جرب
اورطيغا: حدايا بزاف خليني غير فهادشي بحرا تنجيب بيه نهاري
الحاج: (حرك راسو باه ضار عند زهرة للي عيطت ليه باش يمشيو حيت تحرك بزاف هاد نهار خاصو يرتاح) شكون للي هضر معاك (اورطيغا كيجمع لوراق)
أمينة: لالة زهرة عرضاتني غدا انا وختي عندها… شنو بانلك الحاج؟!
الحاج: (حرك راسو باه هادشي راه سنين وهي محرومة منو خاصها تعوض منين لقات ناس مرتاحة معاهم.. تم خارج برا ميقلب المحال واش نقي ويقلب لحم ويشوف الدري..)
أمينة: شنو بانلك اولدي نمشيو نخطبو!! ماشيين ماشيين
اورطيغا: (شاف فمو) سيري تبعي راجلك
أمينة: حتى لفوقاش؟!
اورطيغا: نهار يكتاب الوالدة سيري دابا
أمينة: دير حسابك نتا غدا للي غتوصلنا وتبقى معانا لعشا حتى ولد خالتك غيمشي
اورطيغا: علاش مفخبركش لعراضة لية نتوما غير دايزين طريق فوجهي
أمينة: ههه
اورطيغا: اوا شتي.. ياله شرييه محدو رخييس (مع خرجت هز تيليفونو صونا على ملاك مجاوبتش حتى هو مزال مبغات تبرد ليه فقسة ديال حمزة يجيها لبيرو ويكون مزال بيناتهم تعاامل!!! رجع صونا عليها أبيل ڤيديو جاوبت كانت لابسة حوايج صلا)
فين نتي!!
ملاك: (ببرود) فالدار
اورطيغا: باش تتعجبيني تديرها يزلق فيها جمل ولكن السنطيحة ديما حاضرة!!
ملاك: مدرت والو راني قلتلك غير مع التلفة مخليتنيش حتى نشرح ليك مزيان، راه حسابلي فاللول تشفرت !!
اورطيغا: غتشفر من حدا القهوة!!
ملاك: لا كنت حطيتها قدام البنكة للي حدانا ومرديتش البال راه بلاصة بريڤي حتى خرجت مالقيتهاش وهو كان تماك ومشا حسابلي غيردها حدا القهوة ماشي يجيبها عندي للخدمة
اورطيغا: رد بالك معايا املاك هادشي راه ما فيهش الظحك
ملاك: علاش كتخوفني هاكا!!
اورطيغا: متنخوفكش ولكن هاد لفعاايل معندييييش معاهم وقلتها ليك ألف مرة!! نتي ديالي حتى **** ميهز نص شوفة فيك
ملاك: حاول متبقاش تخسر الهضرة
اورطيغا: وريني شنو شريتي…
يتبع
التعليقات 0