الفصل 1

__تقديم__

الحب من اجمل و اسمى المشاعر اللي يمكن يحس بيها الانسان…. اللي تخلي شخص كبير يرجع صغير….. كتخلي البالغ يرجع طفل….. كتخلي الشايب يرجع مراهق….. كتخلي قلبك يضحك و الحياة تبان لك وردية و كلها زوييينة….. كتخلي الخايب يبان لك زوين….. و الحار ذوقو حلووو….. و القطران تشم فيه ريحة الورد و الياسمين…. ولكن الحب بوحدو مكافيش يبني علاقة….. الحب بوحدو مكافيش تعيش مع شخص….. الحب محتاج بزاااف الركائز اولها الاهتمام…..اذا مكانش الاهتمام مع الحب مكتكووونش عندو الحلاوة….. محتاج للاحترام…. اذا مكانش الاحترام المتبادل مكيكونش عندو طعم….. اذا مكانتش الثقة غيريب داك الحب بحال شي عمارة مبنية بالمسوس….. الحب فزماننا رجع حاجة نادرة تلقاها….. رجع صعيب تلقا الحب….حيت شااااع و ولا كولشي كيتغنى بيه…..رجع وسيلة كيلعبو بيها الناس…… رجع تجارة كيبيعو فيها و يشريييو….. و الاكثر انه تكون خوف عند الناس من الحب…..عكس ان الحب يعتبر اسمى شعور و من الاحاسيس المقدسة اللي يقدر يحس بيها الشخص…..❤️

شخص واحد، و ألف حب…🤍

——————

فواحد من البيوت المغربية…

الام: اااديك جنية تي سربي خرجي خلاص جيبي القفاطن من المصبانة

البنت: وااا بلاتي اماما ينشف ليا الماسك سكتي خليتي منهضرش 😐

الام: الله ياربي الله واش هاذ التريكة عطيتيني سيري يا بنتي يا ياسمين انا بغيت لك غا دود ياكلك كثر من ديك الدودة اللي فيك

ياسمين:ههههههه اماما الله يهديك صافي هاني خارجة ( غسلات وجها من الماسك ديال النشا و الروز مطحون و دانون مسوس اللي خلا ليها وجها كيشعل و رطيطب بحال بشرة دراري صغار و رشات ماء الورد و خلاتو تا نشف رطبات بكريم نهاري و خرجت شعرها مسبسب كيضرب فآخر ظهرها جمعاتو بقراصة)

ياسمين: على فين ولدك راه طنطينة هادي فين غنخرج

ثورية: انا عرفتو فين زاد تلقايه تاني فالبلاي عفا بنتي لوحي جلابتك و دوزي جريه معاك غيسطيني

ياسمين: بفففف واخا واخا نشوفو فين غنخرجووو ( هزات جلابتها كتلبس فيها و داوية) دعاء غتجي لهنا عاد نمشيو ولا غنلقاوها تما

ثورية: غنلقاوها تما حيت معاها عدوزتها

هزات ياسمين راسها بايجاب و خرجات و بينما رجعات نعرفكم عليها…..

ياسمين بنت فعمرها 23 عام بنت اقل ما يقال فحقها انها حسناء بجمال طبيعي فتان… شعر متوسط الطول اسود كسواد الليل كيملع و رطب كيتسبسب فوق ظهرها و وجهها…..عيون لوزية خضراء و اااه من فتنة العيون الخضراء…. لون اخضر فااااتح و صافي كيخلي شوفتها تديك لعالم ثااااني بشفيرات قويين و كحلين طالعين بزيت الخرواع اللي مكيخطاش عينيها و حواجبها كل ليلة…. حواجبها كثاف شوية و كحلين جايين مع وجهها و عطينها مظهر طيبيعي فوجهها…..فيم صغير منيفيخ و حميمر و بشرة بيضاء صافية من غير بعض الشوائب الصغيرة كحال جميع الفتيات…… بيضا كيف الحليييب و شعرها و حروفها الكحلين كيعكسو لون بشرتها حتى كتبان بلقة الذرعين و السيقان كيف قوالب السكر وهي كلها كتبان بحال البيض المنقي…..بفورمة منقولوش وااالو بووومبة و منقولوش ماعندها والو…. فورمتها جاية مع سنها و طولها صدر على قد الحال و لكن اللي نقصو ليها ربي فالصدر عطاه ليها فالمؤخرة….مجاياش كبيرة ولكن مدورة بشكل وااااضح و فاتن تتبان كثر ايلا لبست البلدي….. متوسطة الطول ايلا حطيتها وسط القصار تبان طويلة و ايلا حطيتيها وسط الطوال تبان قصيرة…..

بالنسبة لشخصيتها فهي نوعا ما مركبة…. شخصية انطوائية صعيب عليها تخالط مع اللي مكتعرفش كتفضل انها تبقى بوحدها على انها تخالط مع الناس و فنفس الوقت عندها شخصية مرحة و حنينة مع المقربين ليها…… ظريفة و حشومية بزاااف…. معندهاش الصحابات صاحبتها هي ختها و هادشي راجع لبعض الاحداث عاشتهم ملي كانت صغيرة (مع الاحداث تعرفوهم)…. الى گلسات مع البراني تتزنك و تصفار و تخضار يسولها كيدايرا تقوليه مبروك العواشر و ضحوكية ديما غي ضاحكة و لكن لا بقات تاتقلقات تتشد فخاطرها ديال بصح و تتحقد و هذا ديفوها يعني دير معاها هاه و لا هاه تتقولك باي.

خدات الباك ديالها و كانت معولة دير شي ايكول لاكن كان السوي طالع قرات عامين شعبة المالية و المحاسبة و كملات عام دالاجازة المهنية و دابا گالسا فالدار تترتاح و اصلا متتقلبش على خدمة ولا شي حاجة حيت كيجيها صعيب تخالط مع الناس هي فالقراية و ملقاتش كيفاش فضلت انها تريح فدارهم حسن ليها…..

ماماها لالة ثورية مرة فعمرها 45 عام مدا منها زمان تا نبشة تزوجات على 19 عام بسي مصطفى بابات ريم اللي فعمرو 52 عام عندو مگازة كبيرة ديال لباس رجالي نسائي اطفال تقليدي كيدير كولشي كيتعامل مع خياطة هنا و معامل فتركيا و مصر و امارات كيجيبو ليه السلعة و التواب مهم ناس ميسورين ولدو البنت اللولة دعاء 28 عام مزوجة و والدة وليد فعمرو عامين و نص موراها ب 5 سنين ولدات ياسمين عاد ولدات اخر العنقود محمد خليل فعمرو 14 عام و جمعات و طوات لتزيد شي كرش يوليو يربيو معاها بناتها……

ساكنين فحي عادي كالم و شعبي فنفس الوقت دار فيها 4 الطوابق الطاج اللول مخرجينو كلو مگازات ديال باها و وحدة كارينها… الطاج التاني فيه صالون كيكلسو فيه و كوزينة كبيييييرة و بيت مها و باها و دوش و طواليط و صالة متوسطة، الطاج الثالث فيه بيتها و بيت خوها و الشي لاخر مطلوق جوج صالات كبار مفرشين باحسن فراش غي الفريع للضياف و الطاج الرابع مقسوم فيه كوزينة ديارين فيها الماعن الثقال و القمح و دكشي و الشي لاخر مطلوق سطح فيه كليسة زوينة بالخدادي و دراگة مصاوبها هي و ختها كيتجمعو فيها ينممو.

مشات ياسمين للمصبانة جابت قفطانها و قفطان مها اللي غيلبسو فعرس بنت عمها و صاحبت ختهااااا و دازت للبيار جرات خوها معاها غادين فطريق و مقاردين غير بيناتهم……

ياسمين: شوف حالتك تشوفك مك تاكلك الشعر توسخ و الوجه عامر تراب راه زعمة غادي مع باك راجل

محمد خليل: واناااا منلعبش او بغاتني نبقا حداها تيتي نيني ( كيطلع و يهبط فيها مخنزر داير فيها راجل) و نتي اش هاد الجلابة باش خارجة راسماك كاملة غي حيديها

ياسمين: (جمعاتها معاه للجدارة الوذن) جمع قبك اشريف راه مك هاديك زيدون شفتك باغي ترجل عليا والله يامك تانعاود لك الختانة ( مازال ما كملات هضرتها تا داز واحد بالاوطو كيطلوط)

الولد: بغيت نشوف غا النحلة اللي خرجات هاد العسل و غي هزي فينا الحميمة

محمد خليل: هدشي اللي بغيتييييي وليتي تبيدقي فينا ( و دار تيعاير فيه اما هي راه طلعاتها تزنيكة و مركات بدات كتجر و تعاير تا وصلو للدار)

ياسمين: يخ على حالة غا اللي بغاااا يخرج معاك لشي قنت وااااا ثورية راه مكنظلمش ولدك ( طالعة و كتنسل فجلابتها لابسة بيجامة شورط و ديباردو حرير حمرين على لحمها البيض الصافي واخدين منها حتة دخلات لبيتها علقات جلابتها و تلاحت فوق السرير هازة تيليفونها تا صونا فيدها)

ياسمين📱: الو حبيبة صافااااا؟

دعاء📱: بيخ بيخ العمر و نتي صاا.. رصا الزمر خليني ندوي ( كتجاحر مع ولدها اللي كيجر ليها التيلي يهضر مع ياسمين) ياختي هاد الخانز كيطنتر باغي يهضر معاك

ياسمين📱: صافا بيبي حمدلله اريه ليا الحبيب ديال طاتي

دعاء📱: داه باه عليا يخليني ندوي معاك فخاطري گولي ليا متجيوش نتي و ماما تلبسو هنا و نمشيو مجموعين

ياسمين📱: سبقتيني يله بغيت نگولك جيو نتوما هنا و نلبسو و نمشيو راه ماما باقا غارقة فالشقا تال الحنة مخلاتها فيدها غتمحيها بجافيل

دعاء📱: الله يهديها و صافي مبغاتش تعطي الراحة للراسها وا گولي ليا……. ( بقاو مجمعات ياسمين كتصبغ فدفارها و داوين تا عيطات عليها ماماها يديرو الگوتي باش ميجوعوش فليل “شكون لي عمرو دار هادي و فاللخر تنجوعو 😂😂😂” هبطات هازة ايديها اللي مزينين بحنا خفيفة من حنك العروسة الفال باش تبعهم تا هي و مصبغاهم بالگرونا كيحمقو و اليدين بيضين كيفتنو)

ياسمين: ماما واش مبغاش يهديك الله تخلي ديك الحنة غير تاتحضري بعدا و رجعي حكي الحيوطة و عاودي ليهم الصباغة

ثورية: تصحابيني معفونة و باردة الگلب بحالك انااا ياختي يكونو غادين بيا للروضة و منخليش داري مقلوبة سفاها على علاها كي المدلولة…..

طمرات ياسمين مورا ما سمعاتها مها القاسح شربات كاسها و كلات و ناضت غسلات فمها و دارت ليه لصقات ديال كريست لتبييض الاسنان و غسلات وجها بجيل ديالو و رطباتو عاد دازت لشعرها هو اللول صاوباتو بالبلاك سامبل و جات لتحت و بوكلاتو و جمعاتو الفوق باشما يعرقهاش لببسات تحتاني دقفطانها فاللون الازرق الملكي و بدات كتخدم وجها و عينيها بلون باج و نيود و كتافات بماسكارا طلعات بيها شفارها تا ولات شوفة فيهم تفتنك و دارت عكر نييود زاد برز فمها المثير موراها لبسات الفوقاني دقفطانها اللي تاهو ازرق ملكي مطروز و منبت بالعقيق و دارت مضمتها و الاكسسوارات ديالها و طلقات شعرها دارت ليه اكسسوار ديال الشعر فالجنب نزلات عند ماماهااا اللي لبسات تكشيطة فالاحمر و دارت شالها و كحلات عويناتها العسليين و دار عكيكر خفيف لقاتها شادة مبيخرة ديال الضو دايرا فيها العود القماري بخرات راسها و بنتها و رشات ياسمين ريحتها اللي عمرها بدلاتها اللي كتميز بريحة ديال زهرة الياسمين و خرجو عند باها و خوها

مصطفى: تبارك الله ما شاء الله تاااا راه انا اللي والد الزين و واخد الزين الله يحجبك ابنتي

ياسمين: (تزنكات و مركات خصوصا انها مكديرش الماكياج قدام باها الا فالمناسبات مشاب باست ليه على كتفو) امين ابابا الله يخليك لينا

ثورية: (هي بدورها حشمات و حمارت و خضارت قدام ولادها) هههه ايوا صافي الحاج متزيدش فيه

كيتغزلو ببعضياتهم و ياسمين و خليل كيشوفو فيهم تا سالاو على خاطر خاطرهم

مصطفى: ايوا ركبو خلاص راه غنتعطلو غيكونو مشاو للقاعة

ركبات ثورية حدا مصطفى و ياسمين و خليل لور و بقات كالسا على التصاور و السنابات بوحدها و مع خوها تا وصلو و نزلو قادات جلايلها و بداو داخلين و عيساوا ملقين ليهم فالباب شربو الحليب و كلاو التمر و دخلو لقاو عمها و مرتو و ام العريس و باه سلمو عليهم و باركو ليهم و دخلو مجموعين حيت العرس مخلط. ياسمين دورات عينيها فالقاعة تا بانت ليها ختها و عدوزتها و راجلها و مشاو عندهم سلمات و گلسات حدا دعاء اللي حتى هي لابسة تكشيطة فالخضيضر ملكي و شعرها كحل مسبسب و العوينات مجيبدين كحلين و الفيم منيفيخ كتشبه لباباها و الفورمة اللي هي احسن حاجة فيها طويلة و مگدرة واحد مولاي الصدر و الطرمة كيشاليو من بعيد مكلسة فوقها اويس اللي واخد شعر ماماه رطيطب هابط على عينيه و عوينات باباه الزورق و حداها راجلها ياسين التيتيز بو عوينات زرقين وكيل ملك و عائلتو ميسورة و حداه مو لالة رحمة الاناقة و الشياكة واخا قويصحة شوية ولكن معامن دعاء مكاين ما قصح من راجلها و رطباتو…. بشوية ديال التلحليح وشي كادوات تترجع زبدة بين يديها….

ذعاء: شوفي العوجة ديال مريم اش لابسة ( بنت عمهم كتمشي للامارات ضاربة واحد تكشيطة ديال النمر واخا زوينة ولكن راحنا عارفين السمعة ديال النمر فالمغرب 😂😂😂 راحت الهيبة و ضاربة طاطواج لحجبانها و ترمتها حنك طالع حنك هابط)

ياسمين: ها الفلوس ها الذهوبات و اللي فيها ممهنيها باقا غا هي هي ياختي (دورت عينيها لواحد الجيهة ركزت شحال عاد دوات) شوفي هاديك ماشي مرات عبد الغاني

دعاء:(دارت شافت فين كتشوف) واللهيلا هي (شهقت) هيييييه حااااملة

ياسمين: ناري مك يله الولد عندو ست شهور هزات تاني…..

نخليو هاد الجوجات كيبرگو و نمشيو لواحد البلاصة قريبة ليهم

مرة1: قولي ليا انعيمة البنت اللي كانت داخلة مع مرات لوسك بنتهاا

نعيمة: ايييه هاديك بنتها المتوسطة مورا دعاء كنة لالة رحمة راك تتعرفيها

مرة1: ايه ايه عرفتها الله ياودي صحبة قديمة و تا كنتها تبارك الله زين زينة و حادگة و تا ختها تبارك الله زينة و فاتت ختها كاع

نعيمة: هاديك قالت لختها متعرفي والو اختي زهور واخا القرايا و كولشي حادگة و تتحط من ايدها غا العسل متشبعيش من ماكلتها مهم مربياهم على التاويل و الحداگة تبارك الله ولكن لاش تتسولي عليها؟

زهور: ايوا اختي زوجنا الكبير نشوفو مع الصغير اللي راه شيبني مبغا يتزوج مبغا يجمع راسو الخدمة و تبارك الله كاينة الدار كاينة الطوموبيل بلاصة وحدة جوج و لكن الزواج اللي مابغا ينور ليه كلا مرة خارج ليا مع وحدة زهواااااني ياختيي و باقا ملقيت تاعتوووو و عشقت ليه هادي طاحت على قلبي كيف النقطة ديال العسل…

نعيمة: ايوا شغنگول لك الالة زهور راحنا ولينا عائلة البنت متلقايش بحالها ولكن راك غظلمي راسك و ظلميهم بزوح البنت ماشي ديال التكرفيص

زهور: دكشي اللي قلت تا انااا ايلا جبتها ليه انا راه بغا يقوليا تزوجي بيها نتي غي ضد اما هي راها غزالة تفتنووو تبارك الله عليها عمرني شفت بحال زييينها….

نعيمة: ولاد هاد الوقت بغاو يزوجو ريوسهم تجيبيها ليه يوقع شي مشكل يقولك نتي سبابي و يخليها ليك و يزيد و فكيها نتي ديك الساعة

زهور: بصح اختي ايوا الله يصاوب

رجعو كيرحبو بالناس و يسلمو عليهم و مرة مرة عينيها كيهربو عند ياسمين اللي ناضت كتشطح مع ختها و خير ربي كيتهز، نرجعو عند ياسمين اللي حما الطرح و نادت كتشطح مع ختها و خوها برزانة و بالقاعدة و مسعودة تتحرك و الحشمة حاااضرة تا دارت على غفلة تصدمات ملي لقات وحدة فبنات عمها شادة عليها فيديو مشات عندها تحنات على ودنها باشما تعيقش

ياسمين: تقوى اش كديري لاش كتصوري فيا معارفانيش مع هاد الفعايل

تقوى: مكنصورش فك بعدي مني

ياسمين: اري نشوف اري ( كضارب معاها تحيد ليها التيلي و لوخرا مباغاش تا نتابهو ليهم الناس و جات مها و مرت عمها و نسيبتها كيجريو)

ثورية: اش واقع هنا مالك ابنتي مع بنت عمك

ياسمين:(تدوي مع مها و حشمانة من نسيبة مراة عمها اللي جات) كنشطح مع دعاء تا درت لقيتها كتصور فيديو باقا مبغاتش تحيد منها هاد الخصايل بناقص گاااع من هاد العراس…

نعيمة: تقوى اش هاد الفعايل ياك قلنا ليكم فالباب ممنوع تصوير 😡

تقوى: مصورتهاش هي اوه فنما بنت ليها تبغي ضارب معايا

زهور: لواه ابنتي البنت بعقلها لاش غضارب معاك اري لينا التيلي نشوفو

تقوى: مبغيتش تيليفوني نعطيه لمن بغيت

دعاء: هاديك الجنية اري التيلي قبلما نعيط لعمي ( باها تتموت منو بالخوف)

تقوى قفزات و عطاتو ليها لقاتها كتصور بكاميرا ديال واتساب لواحد الگروب مختلط مسحاتو و قلبات ملقات والو و لاحتو عليها

دعاء: گروب ديال الدراري الخانزاااا تشوهي ختي الحمارا

ياسمين:( قفزات و صفارت و خطفات تيلي تتقلب خافت تكون لايحا شي حاجة) حشومة اتقوى اش هاد الفعايل واش تا هاد المناسبة مناخدوش راحتنا فيها

تقوى: ( قلباتها بكاااا و خايفا من باها اما مها مجاتش گاع) واللهما ناوية نشوهك غا كنضحك معاك متوصليهاش لبابا

ياسمين مزادتش الكلمة و دارت خارجة يضرب فيها البرد بالزربة باش غادة دخلات فشي واحد جات فصدرو تقصحات فجبهتها مع صدرو قاصح و تعكلات بطالو شدها و هزو عينهم دقة وحدة طلقات منو و قالت بصوت حنين و خفيف و تزنيكة طالعاها من غير ديال الفاراجو

ياسمين: سمحليا ( و مشات بزربة خلاتو متبعها بعينو و عينيه حوالو فمسعودة تا عاق براسو و دار قاصدهم)

الشاب: اش واقع هنا مالكم ( هبط عينو فتقوى اللي كتبكي و هز عينو فدعاء حوالو عينيه تاني مداهاش فالخاتم اللي دايرا ولا ولدها اللي شاد فجلايلها)

زهور: والو اولدي غي واحد سوء تفاهم تحل

الشاب: مال الآنسة كتبكي ياك لاباس ( دار عند دعاد اللي معصبة كتنهج) ياك لاباس ا مادموزيل

قبلما تجاوبو دواا شي واحد موراها : مادام عافاك

دار عندو الشاب و تفاجأ : السي ياسين هذا اهلا اهلا سمحلي ميحسابنيش المدام

ياسين: مكاين تا مشكل اسي نجم الدين ( تصافحو ضاحكين) ياك بيخير الامور مزيانة

نجم الدين: هاد الساعة كولشي مزيان نتا بيخير الواليدة و الوليد بيخير…. ( بقاو كيكملو فالسلام ديالهم فحين ثورية مشات هي و بنتها و عدوزتها گلسو و نعيمة و زهور رجعو لبلاصتهم و تقوى طفات التيلي گاع)

نمشيو عند ياسمين اللي دارت ورا القاعة لجيهة اللي كطل على البحر و بقات گالسة كيضرب فيها البرد و شعرها كيطير و نسمات العطر ديالها مالية المكان تا سمعات شي حس تلفتات لقاتو ولد عمها و خو العروسة كبر منها بعام و نص مراضعين مع بعضياتهم و عزيز عليها مفاهمين

منصف: مال الزين كاعي على الوضعية

ياسمين : كاين غي ميعصبك امنصف والله ( حطات راسها على كتفو) ميخليوكش هاني

منصف: ( هز ليها راسها تا شافت فيه) هدا هدا هدا عشيري كاعي بصح مالك

ياسمين: تقوى صوراتني ملي كنت كنشطح مع دعاء و كانت غتلوحها فگروب ديال الدراري غي حصلتها

منصف: واااايليييي بنت الق*** مازال مابغات تمرگ تنمشي ليها و ( قبلما يكمل هضرتو سمع مو كتعيط ليهم باش يمشيو يجيبو العروسة من عند الزيانة او النگافة) يله دابا نتحركو نجيبو رانيا و خلي هاد سيجي من بعد

ياسمين: سير هانا ندخل لطواليط و نتبعك

منصف: واعليه……

مشات ياسمين للطواليط قدات شعرها و تريحات مزيان تا ولات اللي دازت من حداه يتبع ليها العين وصلات لباركينغ لقات طوموبيلات كاملين عامرة بلاصة وحدة اللي خاوية فواحد مولاتي الرونج كحلة ماط مجبدة قداش لقات اللور فيه شي بنات تقادة ديال خوها و القدام خاوي ركبات القدام عند بالها لوطو ديال شي واحد فالعائلة تا جا سيكم نجم دين هاز گارو كينتر منو و ريحة ديالو مخلطة مع البارفان اللي خلاوها تهز عينيها بلاما تحس فديك الكتلة ديال الجاذبية لابس كوسطار كحل و مرجع شعرو لور كيبان كيبري بلجيل لي داير و داير ساعة جلدية باينة فيها غالية متنكرش انه وسييم ولكن شي حاجة فيه مخلياها مطمنش ليه و نافراه و هو كان ماشي قل منها تاهو مصدوم فيها و عينيه مبغاوش يحيدو على فمها و صدرها من هادي لهادي حتى استقرو فعينيها اللي بهروه بلونهم الجذاب و خلاوه يسهى فيهم و مع كل ترميشة كترمش كتخلي قلبو يضرب و يزيد يتنشوى… ردات ليه البال فين كيشوف و خنزرات فيه بشكل لا ارادي و قالت بصوت خفيف

ياسمين: سمحليا ركبت بلاما ناخد اذنك عند بالي ديال شي واحد فالعائلة

نجم د: ( شاف فيها بشوفة ديال الشهوة و قال و عينيه فالتين بنظرة لعوبة) لا لا مكاين تا مشكل حنا دابا ولينا عائلة اولا لا ا انسة؟

ياسمين : ياسمين و شكراا

نجم د: مشرفين الالة ياسمين معاك نجم الدين خو احمد (العريس) ايوا الالة ياسمين مشرفتيناش شنو كتجي للعروسة (عينيه على الفرقة د صدرها والبيوضة و واحد الخالة جات الوسط حوااالو صافي)

ياسمين: (محملاتوش من اللول و زادت كملات ملي شافت نظراتو اللي عراها بيهم) انا بنت عم رانيا (العروسة)

وصلو و وقف الطوموبيل محتال يدور تا لقاها نزلات كتقاد فجلايلها بطا عليها غا ايمتا تنزل من حدا هاد التامل اللي ملي ركبات معاه و هو كيعبر فيها تقول باغي يفصل ليها جلابة. مشات كتجري جيهت منصف اللي كيشطح مع الرما تا قفز من حر القرصة…..

منصف: (قرب لجيهة ديال ودنها) اححح امالك ابنت اللخ على هاد القرصة مالك

ياسمين:(كتخنزر فيه مغدة و مرة مرة عينها كتهرب لجيهة ديال نجم اللي باقي مبغا يحشم) غنشتف على والديك الحمار مشيتي و خليتيني صدقت جايا مع داك خو راجل ختك كون زدت معاه دقيقة خرا يغتاصبني ويلي بقا ليه ايعريني

منصف:( كيضحاااااك بحكم مضاسرين على بعدياتهم و قراب بزاف) تجي فيك الكوية غا ضحك فالزرق 😂😂😂😂 مهم اللي نصحك اختي بعدي من داك المكبوت راه معروفة عليه عندو البنات بحال القوامج و انا من عندي غنحذرو يفوتك عليه…..

ياسمين: ايوا لهلا يحييه المكبوت اللي قالها ليه راه من اللول محملتوش متخافش ( قاطعهم صوت النگافات كيصليو على النبي مخرجين رانيا بتكشيطة فالبلون كاسي كتهبل بزين و السر طالعها شاد فايدها احمد اللي لا يقل عن خوه وسامة غا هو تتبان فيه الجدية كثر)

مشاو بيهم لطوموبيل ديال احمد رونج فالبيض مزوقة بالورد الطبيعي ركبو اللور و ساق بيهم صاحبو تا عيطات رانيا لياسمين تركب معاها القدام و ياسمين بغات طير بالفرحة اللي تفكات من الزويمل و هو غي كيتغدد بغاها ترجع معاه على الاقل يطلع بالنمرة.

مشات ياسمين ركبات و سدات الباب بشوية و بالاداب و دارت عند رانيا و راجلها بواحد الابتسامة زوينة و عينيها فرحانين كدل على انها فرحانة لبنت عمها و ختها الكبيرة و فنفس الوقت حشمانة منهم و دوات بصوت رقيق حنين

ياسمين: مبروك عليكم احبيبة بالرفاه والبنين و الله يكمل علييكم بالخير

رانيا: امين ازين ديالي ربي يخليك العقوبة ليك ان شاء الله و تبعيني فالقريب العاجل

احمد: امين اختي الله يحفظك كيما قالت رانيا العقوبة ليك نتي و داك راس الطنگ

ياسمين عاد نتابهات للولد اللي صايق اللي ملي طلعات ماسمعات صوتو ولا التامسات شوفاتو ليها مطلعش فيها گاع لعين دارت جيهتو تا كتفاجئ بواحد الكتلة ديال الوسامة گالسة حداها اميمتيييي

الولد: ( شاف فيه من المرايا) هاد راس الطنگ عندو سميتو امولاي السلطان اون بليس شكيت عليك غي خليني هكا زواج معاك معامن جا ولا لا ختي رانيا

احمد: اسمح لينا ادكتور فارس و لكن راه عندي احساس كبير غتبعنييي مغاتخرج من هاد العرس تتكون دبرتي على المرا ( كيغمز فيه و كيشير لجيهة ديال ياسمين)

رانيا: تا انا عندي هاد الاحساس ههههه هو و حتا ياسمين منمشي تا نشربها حليبي و نعطيها تمرتي و البوكي دفلوغ ديالي كله في سبيل الله

انتبه فارس لياسمين و دور وجهو بشوية لتلقي النظرات سهات فعينيه الكوحل و هو سها فعينيها الخوضر اللي اساسا مكاينش اللي مكيسهاش فيهم و يسرح فيهم…. عاقت بزربة براسها و حدرات راسها تا سمعاتو قال

فارس: سلام آنسة ياسمين صافا؟

ياسمين: ( مسمعاتوش و هي اصلا لعبات عليها الحشمة و الرهبة كن انها كالسة حدا واحد مكيعرفها مكتعرفو) سمحلي مسمعتكش

فارس:( ضحك ضحكة خفيفة مبينة سنيناتو البويض مستفين و الغمازة اللي فخدو خلات ياسمينة تبتاسم ابتسامة خفيفة) قلت لك سلام كيبان ليا عيتي و العرس مزال مابدا

احمد:( كضحك و كيشير لرانيا ليهم بزوج) اش هدشي اياسمين و حنا معولين تنشطينا…..

ياسمين:(تزنكات و طلعاتها الحمورية و تخلطت مع الفاراجو و قالت باحراج) هههه لا لا غي سهيت شوية سلام اخويا صافا؟

فارس: ( هز ايدو حطها على ذقنو و شافيها بتمعن بنظرة عادية فيها لمحة من الاعجاب مخفاتش على ياسمين و الاهم انها مكانتش بحال نظرة نجم الدين ليها اللي كانت كتحس بيها تدخل ليها مع عظامها و تجرحها) الحمد لله و نتي انسة ياسمين

ياسمين: انا مزيان شكرا

اكتفى يهز راسو و رجع لسوقانو و هي بدورها هزات تيلي ديالها و خشات راسها فيه متفادية الاحراج تا وصلو لقاو عيساوة ملقين ليهم فباب القاعة نزلات كتقاد فجلايلها و دارت بعفوية جيهة ديال فراس لي زادت صدمة على صدمة ملي شافت طولتوووو و عرضو و عضلاتو ولات غي تتبيض فعويناتها ما خلا ليها متقول بوسامتو و رزانتو و باينة فيه واعي.

دخلو لعرسان بعيساوة و دارو شي وجيبات موراها دخلو رما و ناضت العائلة كاملة كيشطحو بيناتهم و ياسمين غي واقفا و تتشطح بايديها مكرهاتش تمشي تريح غي ختها اللي مزيراها و باها و عمامها تيشطحو طالقينها تسرح سالا طرح و عنقها باها هي من جيهة و ختها من جيهة هزات عينيها بعفوية تاكتجي عينها فعينو جمعات عينيها مغوبشة و حدرات راسها حشمانة ملي رمقاتو ملي غمزها كأنها كتعرفو من زمان…. كتلة من الوقاحة و الجرأة مقابلة معاها محملتش شوفتو ليها و معاملتو و كرهاتو من فعايلو قبل حتى ماتعرفو…. هزات وجها و دوراتو جيهة لوخرى تا كتشوف فراس گالس فطبلة معاه بنت حداه لا تقل عنه جمالا بقفطان بوردو و فولار ذهبي و مكياج خفيف قالت ياسمين راها مراتو او خطيبتو مرتو مشات من بالها هضرة احمد قبيلة معاه حولات عينيها جيهتو لقاتو كيشوف فيها بزربة دورات عينيها باحراج قبلما تلمح شبه الابتسامة اللي دار بحالا فهمهاااا مشات جيهة لي طواليط جمعات شعرها نص جمعة حتى بان وجها المدور و عنقها الطويل بيض كيشقشق فيه خالة وحدة بارزة رشات ريحتها تا ولات كدوز كتخليها عاطية خرجات تلاقات مع نجم فطريق ابتاسمات ليه و حدرات راسها بزربة غادة مكتحملش تبقا مع شي واحد غريب بوحدها و عاد راجل تتمرض هضر نجم مقاطعها……

نجم: خليتينا ا ياسمين كنتسناو فيك ترجعي معانا ولفناك 😉

ياسمين:( شافت فيه بزربة و حدرات عينيها كتفكر هاد الكمية ديال الوقاحة و الجرأة بحالا كتعرفو من زمان) سمحليا كان خاصني نعلمك

نجم:( تزير و معجبوش الحال تقمعو هو اللي مولف البنات غير مشتتين عليه…..تزنك ولكن جمعها بضحكة) لا اياسمين وايلي غي قلت زعما غترجعي معانا

ياسمين: مكتابش نخليك دابا بسلامة ( و دارت غادا قبلماااا يجاوبها باغا غي تفك من هاد ز-ام-ل اللي سلط عليها الله)…..

مشات ياسمين لقاتهم مهبطين رانيا باللبسة دالحنة مشات گلسات مع ختها و هكا بقات رانيا كتلبس و تحط تا لبسات لا غوب و جا وقت الحليب و تمر عيطو على ياسمين تعطيهم البلاطو مشات بابتسامة زوينة و غتموت بالحشمة و كاع الانظار مصوبة جيهتهاااا و هدشي اللي مكتحملش عطاتهم و جراتها بزز رانيا و كولشي كيضحك عليها عطاتها تمرتها و حليبها مخلية بنات عمامها لوخرين غيتفركعو. قطعو الكاطو و كلاوه و جا وقت البوكي د فلوغ اللي جات رانيا تال عند ياسمين و عطاتو ليها

ياسمين: واش متافقين عليا باغين تزوجوني و ربي كبير نورت ليكم هاد الليلة ( تضحك بخفوت)

رانيا: بغيناك يا الحبيبة تبعينا القفص الزوجية و على الله يتحقق اللي فبالي ولا لا ادعاء

دعاء: خلي مها هاديك بغات تبور حدى ثورية

كملو ضحكهم تا جات اللحظة دالوداع بكات مها و باها و خوها و دعاء و بكات عليها تا ياسمين حيت كانت ليها نعم الاخت بحال دعاد و منصف و كثر خرجو معاهم تال الاوطو و مشاو هوما لوطو ديالهم بعدما تافقو مع مامات رانيا باش يديو ليها الفطور لاباغطومون ديالها فالصباح.

وصلات ياسمين و دارهم للدار مهدودين من الباب لاحت طالون و طلعات كتجر فرجليها شادة فخوها اللي كثر منهاااا وصلات دارت روتينها و عمرات لالاغم و تلاحت كاو.

صبح الصباح ناضت مبوقة ولكن ضروري يمشيو مع مراة عمها ناضت غسلات وجها هبطات فطرات و طلعات رطبات وجها…… دوزات لابيل لدعاء اللي كانت تاهيا يله فاقت بقاو داوين و لبسات جليليبة دالحضور فاللون القصبي و دارت مسكرة و فاراجو كريمي و عكيكر خفيف جات كتحمق مع بقايا الكحل دالبارح فعيونها….. طلقات شعرها و دارت اونسوبل دالنقرة خفيف سنيسلة لاصقة فعنقها و كورميط و خاتم و حوالق ديال الفراشة ايلا جيتي تقلب ليزاكسيسوار ديالها اتلقاهم كاملين فيهم فراشات و الايد لوخرا دارت ساعة فالاغجونطي مع الحنة و الظفيرات مصبوغين لبسات بليغة طالعة شوية و بانت قصيورة هزات ساك صغير……هبطات لقات ماماها واجدة هبطات سبقاتها لقات باها مديماري لوطو تسخن حيت مغيمشيش باها و خاها الفطور غي دالعيالات ركبات برونشات تيلي و طلقات موسيقة خفيفة و تسنات مها تا هبطات ماماها و تحركو داوين وصلو لدار عمها نزلو تلاقات مع منصف فدروج ماماها طلعات و هي بقات معاه

منصف: فين احبي كيصبحتي

ياسمين: الحمدلله فيا نعاس

منصف: يله ضربي معايا لعند حادة طيابة موصياها الواليدة على الغدا نجيبوه

ياسمين: الااااا اخويا غي سير صهودات وانا لابسا نعرق

منصف: حيدي سوقك خاوي

كملات ياسمين طريقها و كلا مرة تسلم على وحدة كون دارت الفوندوتان كوراه مشا سلمات على ختها و ولدها و شدات ولد ختها قدامها كتلعب معاه…..

♥️تسريع الاحداث♥️

وصلو لبرطمة درانيا اللي جات فحي راقي كالم زلزلوه بالشطيح ديال الدقايقية حلات عليهم رانيا بقفيطين دجوهرة و شعرها طويل مسبسب موراها والحنيكات حومر حداها احمد بجبادور خفيف بيض ضحكة واصلة ليه لودنين (هو معامن جات الضحكة بايت كينقب على الذهب الاحمر) مع بداو كيدخلو دكشي وصلات مامات احمد و خالاتو و عماماتو و طاسيلتو و معاهم غي شي ولاد تقادا دياسمين هكاك و معاهم الشارف د نجم دخلو تأنسطلاو و بدا شطيح و بقاو شاطحين لاعبين تا ودعو رانيا و هبطو كاملين اما احمد و الرجال غي تعشاو و هبطو توادعو مع رانيا حيت الغد ليه غتسافر لسيمانة دالعسل و تاهما غيسافرو هبطو مجموعين ضاحكين تا جات عينها فعينو و حدرات راسها بزربة هو بتاسم و نزل راسو عايق بيها و هي فطنات على راسها ملي لقات مها و مراة عمها متاجهين جيهتهم تبعاتهم سلمات على احمد موراها فراس لي غي تلاقاو ايديهم حسات بواحد الشرارة دازت بيناتهم خلاتها تهز عينها فيه بالزربة و هو كيشوف فيها بنظرة عميقة مركز فعينيها خلاتها دير مقارنة خفيفة بينو و بين نجم اللي كيشوف فيها بنظرة كتعريها كتخليها تشمأز من راسها رخات من ايدو بزربة حشماااانة من الملامسة و هو بدورو جمع يدو بزربة هزات عينها فعينيه لقاتو تيشوف فيها بنظرة عادية باردة و فنفس الوقت متفحصة كتحس بيه مركز فعينيها بحالا باغي يقرا شي حاجة نزلات راسها بزربة و دازت مخلياه موراهت تيشوف فيها و تيحلل فهاد الحشمة اللي فيها. دارت سلمات على نجم بلا نفس محملاتوش و مرتاحتش ليه عكس فراس هو كان من نوع اللي تتكره ولي كتحسو باغي فالبنت غي جسدها. رجعات للواقع على صوت نجم البايخ

نجم: سلام ياسمين صافا؟

ياسمين: (بابتسامة صفرة محاملاهش و محافظة على راسها محدور) الحمد لله شكرا

نجم:( تقرص حيت مسولاتوش هو كيداير و حاس بيها محاملاهش و لكن حطها فراسو و حالف يدوق حلاوتها اللي بايعاها غالية) حتا انا الحمد لله البارح مشيتي قبل ما ناخد النيم باش نبقاو على اتصال

ياسمين: (بلاما تحس هزات عينها و خنزرات فيه) كان عليا نقول لبابا بلاتي نعطي لسي نجم النيم مهم نخليك سي نجم خاصني نمشي تعطل الحال (دارت مخاطبة ماماها) يله اماما نمشيو راه تعطلنا شوية و بابا يبدا يصوني

ثورية: واخا ابنتي يله بسلامة علك انعيمة بيناتنا تيليفون بسلامة اولدي طريق سلامة…..

تبادلو سلام و ودعات احمد بلاما تشوف لا فنجم ولا فارس و زادت سابقة ماماها لباركينغ ديمارات لوطو و مشات مخلية ماماها كدوي بوحدها و هي خاطرها مزير

ثورية: ااااااا الخير وااااا كلميم راه معاك داوية

ياسمين: سمحي ليا اماما مسمعتكش شنو گلتي

ثورية: على انا قلت غا حاجة يعطيك الويل مالك مغيرة

ياسمين: لا مامغيرة والو غي عيت و صافي و مشبعاناش نعاس

ثورية: ممممم نعاس ايوا توصلي و نعسي تا شهر

كملو طريقهم وصلات حطات لوطو فالباركينغ و تمشات هي و ماماها و الدنيا مزال عامرة مع الصيف و جاو فشارع رئيسي دواز و فيه رواج طلعو سلمات على باباها و خوها و مشات لبيتهااا بدلات حوايجها ب كسيوة دالنعاس و ديماكيات وجها و غسلاتو و رطباتو دارت الطيارة لتيلي ديالها باشما يصدعها حد و تكات و بقات كتفكر ففراس و فنظرات اللي كان كيدير فيها معرفات واش اعجاب واش فضول واش غي صواب معرفاتش و مشا تفكيرها لنجم اللي غي جا فبالها خنزرات و بدات تتعاير فيه فخاطرها ان كانت ياسمين تتمقت شي حاجة فالدنيا فهي تتمقت الراجل الزلال النسونجي اللي متيحشمش و تيبغي فالبنت غي جسدها و فهاد اليوماين عرفات بيلا هاد نجم واه فات هدشي و اللي شافها ديالو و اللي مشافهاش عندو نص فيها……

هكا هي ياسمين ديما كتفكر قبل ما تهضر و تفكر قبلما تصرف و مكتخلي تا حاجة تنغص عليها حياتها و فرحتها و السلام الداخلي ديالها مدام علاقتها مع واليديها ختها عائلتها و اقرب المقربين ليها مزيانة فمتحتاجش تزيد تفكر فحاجة اخرى انسانة متسامحة مع نفسها و ذاتها❤️.

مشات ايام و جات و دازت بالضبط عشر ايام بلا تاشي حاجة سبيسيال فحياة ياسمين غي دار و مرة تخرج مع ماماها مرة مع ختها مرة مجموعين تال نهار اللي قررو فيه هي و وخوها و واليديهم يمشيو يسافرو شي يامات يبدلو الجو تافقو باش يمشيو مورا اربع ايام نيت بينما جمعو الدار و جمعو الحوايج و داكشي.

فعشية من العشيات گالسة ياسمين بكسوة ديال الدار فالبالكو اللي كيطل على الشارع دايرا فيه كليسة زوينة مبرونشية تيلي مع الباف و مخدمة موسيقى خفيفة ديال فيروز حيت تتسطا عليها تا طلعات ليها ابيل من عند رانيا اللي كانت يله يوماين باش رجعات من السفر

ياسمين: الوو حبيبة صافا عليك شخبارك نتي و احمد؟

رانيا: الحمد لله ازين واللهيلا بيخير و نتييي شتعاودي

ياسمين: الحمد لله بيخير هاد ساعة غي دار

رانيا: حسن لك دابا توحشي داركم متبقاي تلقايها

ياسمين: تتهضري بحالا معارفانيش

رانيا : ايوا خلاص عليا المهم بغيت نقولك شي حاجة

ياسمين: قولي اختييي

رانيا: غدا راكي معروضة عندي العشا راه عيطت تال دعاء و ياسين شي صحاب احمد محضروش للعرس و قالو ليه غنجيو عندك قلنا نديرو هكا حفيلة صغيرة شبابية بيناتناااا…..

ياسمين: ياك الالة صيف زاهي عندكم و انا كون غي عفيتينيي عارفااااني مكنحملش الاختلاط

رانيا: والله يامك تانجي نوريك غتجي هي غتجي

ياسمين: صافي صافي ياكما نجي صباح نعاونك

رانيا: لا لا كولشي غيتكلف بيه طريطور ماكلة و ديكور و كولشي

ياسمين: داكوغ ماشيغي واعليه نتشاوفو غدا ان شاء الله

رانيا: يله احبيبتي اتوت 😘

ياسمين: باباي 😍😍

بقات ياسمين فبلاستها دوزات لابيل لدعاء باش دوز عليها لغد ليه فطريقهم علمات ماماها و مشات توجد ماتلبس على تيساع جبدات كسيوة فالبلون كاسي فايتا ركبة شوية و مجموعة من الصدو و كمايمها جايين مزيرين تال مرفق و تنفخووو مزينة بوريدات ديال العقيق فالقهوي و الذهبي فالصدر و الايدين حطاتها و جبدات ليها صباط دومي طالون بيج بصاكو فالبيج و الذهبي لايقين للبسة اللي جبدت…..

كملات عشيتها عادي و فليل قبلما تنعس و هادي عادة عندها خذات كتاب تقراه ديال نظرية الفستق ( كنصحكم بيه البنات راه واعر) قرات شوية و نعسات…….الغد ليه فاقت فطرات و جمعات مع مها دار بسكات علاقتها مع مها باردة شوية حيت مها هي السبب الأول ديال هاد الشخصية ديال ياسمين حيت ملي تزوجت مها ب باها مكانش داير الحوانت و كدا كان ساكن مع دارهم و كاري حانوت داير فيه تبقالت و صبرات معاه وفالوقيتة فين ولدات ياسمين كان هو لاح راسو لهدشي ديال التواب والحوايج و هاجر للامارات و خدم مدة طويلة تما ديك المدة اللي كانت فيها ثورية الاب و الام و مقدراتش توازن بيناتهم كانت قاصحة بزاف و صارمة فالبنات ولكن حيت دعاء كانت كبيرة و دوزات واحد الفترة مع باها طلعات عادي اما ياسمين فكانت عايشا القميع و المعاملة قاصحة باش طلع مربية كانت فنما قالت شي حاجة تتقمع مخصهاش تهضر قدام الكبار مخصهاش تجلس معاهم مخصهاش تهضر مع البراني كانت مها تديها و تجيبها المدرسة الشي اللي خلاها تطلع حدودية و ماشي اجتماعية عكس دعاء وبقا عندها ديما داك الخوف من البراني متترتاح الا مع دارهم و فالدار نيت متتهدرش وقتما و قليل فين تتشاركهم واخا لتامسات حنان مها و باها من مورا ما رجع ولكن حيت ولفات عليها قاصحة بقات علاقتهم باردة شوية عكس باها اللي حنين فيها و كيسمع ليها واللي طلباتها تحضر و تاهيا حنينة فيه نهار يمرض تقابلو هي غير يعيط تمشي عندو واخا تكون فالهند……و هذا كان السبب الاول فشخصيتها المنعزلة و السبب الثاني اللي خلاها تزيد كثر فعزلتها و ميكونوش عندها صحابات هو الوفاة ديال صديقتها الوحيدة اللي كانت ديك الساعة كتقرا معاها فالتاسعة اعدادي و اللي كانت دوزت اليوم الدراسي ديالها عادي فالرجعة جايين كيضحكو و ينممو فعيباد الله حالهم حال البنات من سنهم حتى تفارقو فنص الطريق كل وحدة مشات فطريقها لدارهم لكن كان للقدر رأي ثاني بحيت و صاحبتها غادة فطريقها لدارهم و بغفلة منها مشافتش الطريق و دازت حتى ضربتها طوموبيل طاحت بموتتها….. تصدمت ياسمين صدمة عمرها وهي عاد كانت جاية معاها ضاحكين ناشطين تا كتسمع خبر موتها….. طاحت بمرضتهاو شدها اكتئاب كونما وقفة واليديها و ختها معاها حتي ولات شوية و مع ذلك مرجعتش دارت تا علاقة صداقة مع أي بنت كأنها نفرت الصداقة و تكون عندها تخوف من انها تصاحب مع شي بنت و تموت وهاد الواقعة حتى هي كان عندها دور فالشخصية اللي ولات عليييها ياسمين….. 😔

تغداو العائلة السعيدة و ناضو ينعسو اما ياسمينتنا مشات خلطات كوماج ديال القهوة و دانون مسوس منو كوماج منو ماسك خلاتو شوية و حكاتو و دخلات دوشات بالخف خرجات دهنات بلوشن ديال الياسمين تتموت على ريحتو و ريحة زهرة الياسمين و حتى هي كتجي مع شخصيتها و كاع كريماتها و روايحها فيهم منهااا لبسات دوبياس بيج و ديباردور و شورط لاصقين رطبين بيضين عاد لبسات كسوتها جاتها كتحمق طلقات شعرها القوي بلونو المميز كسواد الليل اللي شافو يظن انها صابغاه لكنو كان رباني مثل جمالها….. نشفاتو بسيشوار و سرحاتو بالبلاك وجات تال لتحت و بوكلاتو جاها تيضرب فاللخر ديال ظهرها كيلمع شافت فالساعة لقات مزال الوقت ناضت صايبات كافي كريم و خدات حريشة فيها فرماجة كلاتهم غسلات سنانهاااا و ووجها و رطباتو خلاتو يشرب بدما صبغات ظفارها بلون بيج بين ليها ايديها نقاياااا، بدات فوجها اللي داوت ليه بب كريم خفيف حيت ماعندها ما درق وجها صافي من غير بعض النمش الخفييييف ايلا مقربتيش ميبانش مرشوش فوق نيفها و حنيكاتها خفيف بزاف و عاد مفيهاش الهالات السوداء طبيعييي حيت تتنعس فالوقت و تفيق فالوقت دارت بلاشر كريمي بلون خوخي و عينيها كتافات ب ايلاينر خفيف جبدات بيه عينيها مبداتوش من اللول و ماسكارا طلعات بيها عينيها خلاتهم يطيحو الزرزور من فوق السور و دارت عكيكر خفيف كيلمع ماكياج خفيف بزااااف ولكن راه رجعها كتفتن ركبات حوالقها ديال الفراشة و دارت سنيسلة خفيفة فيها بزاف العلاقات دسال الفراشات نيت و دارت كورميطة خفيفة فيدهااا مع ساعة فالايد لوخرااا و دوزات ايدها بين خصلات شعرها باش يتحلو ركبات خلخالها فرجلها اللي عندها عزيز بزاف و متيحدش من رجلهاااا و لبسات صباطها يله بغات ترش ريحتها صونا تيليفونها و كانت دعاء تتعلمها باش تخرج رشات ريحتها و دارها فساكها مع العكر و مستلزمات اخرين و خرجات كتمشى بشوية و تتبان بحال شي قطعة فنية و هي بصح قطعة فنية من صنع الخالق تشوفها العين تفهى فيها و فحسنها و تسبح لخالق هاد اللوحة…. طلعات مع ختها بعدما سلمات و توجهو لعند رانيا داوين او بالاحرى دعاء و راجلها اللي داوين امااا هي ساكتة و كتشوف من زاج تا وصلو مع المغرب نزلوووو و دخلو طلعو فالسانسور دقات دعاء دقة تالمخزن حلات رنوش كضحك….

رانيا: واللهتا عرفت هاد الدقة غاتكون غي ديالك مصعورة بحالك

دعاء:(سلمات عليها و قالت) ايييوا شكون بغيتيه يدق ياسمين كوراحنااااا باقين هنااااا متسمعيش دقتهاااا

رانيا:(تتسلم على ياسين و سلمات على ياسمين) يادلي هادي راها الحنانة كولشي عندها بالخاطر و بشوية زيدو مرحبا دخلو نتوما بندتو قدام الباب.

دخلو ضاحكين و ياسمين تضحك حادرة راسهاااا و ماحملاش عارفا كاين غي البراني مرتاحت تا بان ليها منصف المنقد. سلمات على احمد و لقات سلام خفيف بفمها للحضور مقرباتش جيهة نجم الدين اللي جالس مع واحد جوج طعارج ولكن عينو عليها حيت فتناااتو ديال بصح خلاتوووو ساهي فيها و مشات جلسات مع منصف ضاحكين……

مدازش بزاف الوقت و تسمع الصونيت ديال الباب مشا احمد حل لقاه فراس معاه البنت اللي كانت فالعرس و بنت أخرى حتى هي محجبة غير هي ملامحها تيبانو مشدودين على لبنت لوخرى اللي غي كضحك هادي تيبان السم فوجها ولو زوينة ولكن سماهم على وجوههم هادشي كامل شافتو ياسمينة فنظرة وحدة خاطفة من بعد حدرات راسها تا عيطات عليها رانيا اللي كانت جالسة معاهم و معاها تا دعاء و راجلها

رانيا: ياسمين اجي اختي عطينا غي وقت و نتي لاصقا فداك بوراس (دارت مخاطباهم) مرحبا بالسي فراس و لالة نجوى شرفتونا (مخاطبة البنت لمسيسيمة) مرحبا بيك اختي

نجوى:( مخاطبة رانيا بملامح مبتهجة تتبان فيها ضريفة) ربي يخليك اختي مشرفة بيك

قطعاتهم ياسمينة اللي جات بخطوات خجولة لقات سلام و جلسات حدا رنوش اونفاص مع فراس اللي كان وسط البنات بجوج…..نطق احمد..

احمد:اييوا الدكتور ديالنا نجوى راحنا عارفينها ختك و الانسة لوخرى معرفتيناش عليهاااا

فراس: ايوا ياسيدي كظل تزين ليا فالزواج و تحاجي عليا تزوج تزوج تزوج شوقتينا نعرفو هاد زواج كيداير هادي بنت عمي و خطيبتي ليلى…

احمد:(شاف فرانيا و شافت فيه متفاجئين) هاي هاي زربا خايبة اسيدي هادي ايوا مبروك الله يكمل بالخير

بقاو تيتلقاو التهاني و ليلى تضحك ليهم غا بزز و تتشوف فياسمين اللي معبرتهومش بكلمة عند بالها راها متكبرة فحين ياسمين اللي غي سمعات هضرتووو هزات فيه عينهااا بنظرة فشكل و حدراتها بالزربة و حسات احساس فشكل بحال شي نغزة فقلبهاااا سرعان ما قفزان ملي سمعات صوتو فوق راسها…..

نجم:(اللي جا غفلة و من دون البلايص كاملين بانت ليه غير فحرف الفوطوي اللي جالسة فيه ياسمين من جيهتها قريب ليها بزاف) شكون تزوج تاني تا كتباركووو ليه (نزل عينو ليها و قرب ليها شيء لي خلاها تقفز من القرب ديالو و بانت عليها بيلا ممرتاحاش) ياسمين صافا….

فين ياسمين راها مكرهاتش تهرب محملاتش القرب ديالو و هو لاصق فيها و تيدوي فوق راسها لدرجة نفس ديالو تاضرب فراسها بدات تترعد و تتبعد جيهة رانياااا اللي تادوي و تاواحد مارد ليهم البال من غير فراس لي تيشوف فملاميحهااااا اللي تيبانو مخنوقين و جلستها ممرتاحاش ولكن مدواش كتافا يسكت لانه باشمن حق غيهضر فضل يسكت……نرجعو عند ياسمين اللي ناضت بزربة لطواليط تتجري مخلياهم تيشوفووووو سرعان مارجعو يدويو الا نجم اللي كان تيتسنا الفرصة و ناض تبعها بالشوية عليها وقف ليها فالكولوار اللي فيه الدوش و الطواليط مدرقين على صالون و الكوزينة تسناها تا خرجات ملامحها متورترين و زادو توترو ملي بان ليييها تمشات عادي باغا تخرج غي فاتو شوية وهو يجرها و لصقها مع الحيط و قرب ليها بزااااف ….

نجم:(كيشوف فوجهها و كيحول نظراتو من عينها لفمها لنمش اللي فيها لعينها اللي كل ما شاف فيها كيحس براسو كيغرق) ياسمين يا ياسمين كيفاش بلانك زعما

ياسمين:(تترعد و طالعانا تزنيكة و تاتنفس بزز خنقها قربو و ريحتو اللي مخلطا مع الكارو محملاش قربو ليها جمعات شجاعتها و قالت) بعد مني خليني ندوز

نجم:(ابتسامة جانبية و باقين عينيه تيدورو) دوزي هههه قبلما دوزي خاص نعرف مالك كتهربي مني (قرب ليها بزاف يزيد سانتيم يبوسها و هز صبعو دوزو من وجها لعنقها)

ياسمين:(تخنقات بزاف و قربات تسخف غي حسات بملمس صبعو محساتش براسها تا طلقاتهااااا بغوتة مجهدة قفزاتهم كاملين هو بعد بزربة مضهشر وهي طاحت جالسة تتنهج بصوت عالي بحالا كانت كتجري والدموع نزلو من عينيها بالزربة بعدما كانو محبوسين على طرفها)…..

جاو تيجريو كاملين غي بانت ليهم هكاك و نجم فوق راسهاااا عرفو شي حاجة كاينة جرات دعاء ورانيا هزوها و هي فشلات و تتبكي بجهد و تنهج بحالا كانت كتجري

دعاء:(تتهز فيها و تمسح فدموعها بملامح خايفا و مرعوبة على ختها) ياسمين حبيبة ديالي مالك شنو وقع لك

رانيا:(تاهيا خايفة عليها بزاااف تتحاول توقفها) مالك اختيييي مالك حاولي توقفي

منصف:(شاف ختو او توأمو طايحا و شاداها الحالة و نجم واقف عاق و مشا كيجري شنق عليه) اش درتيييي ليها الحماااار لاش قربتييي ليهاااا ياك حذرتك

نجم:(تاهو شنق عليه بملامح متهجمة) رخي مني الق**** راه مدرت ليها وااااالو

جاو الدراري تيفكووووو و احمد جر خوه لبرااااا

احمد: اش بغيتيييي عند البنت الحمار لاش مقرب ليها

نجم:(بملامح متأسفة) والله اخويا منويت فيها شي حاجة بغيت غي نمرة معرفتش غيوقع هدشي

احمد:(معصب بزاااف) واش نتاااااا مغتوبش من هاد اللولة اسيدييي فوت علك البنت اخر مرة تقرب ليها و دابا ذوب من هنا(دخل و زدح الباب على وجهو مخليه تياكل فراسو بالندم)

لداخل جلسو ياسمينة و عطاوها الما و معنقاها دعاء ليها و كولهوم تيشوفو بقات فيهم الا اللفعة ديال ليلى…..

دعاء: صافي احبيبة ديالي موقع والوووو هانا معاك

ياسمين: هنن.. ه هووو.. دعاء هو اختي

ياسين: صافي اياسمين تهدنيي هانا معاك مكاين لي يوصلك

منصف:(معنقها من جيهة لوخرى جابها لعندو تكاها على صدرو و هي زيرات عليه) صافي اختي صافي هانا حداك رتاحي…

بقاو تيهدنو فيها و يشربوها الما تا رتاحت و لكن مازال قلبها تيزدح و احمد و رانيا كيتأسفوووو و حشمانين من ناس اللي عرضو عليهم….. بزربة بدلو الجو و طلقو الموسيقى و تيحاولو ينسيوها و هي غي معنقة منصف و فراس تيشوف فيها بقات فيه تتبان بحال بنيتة صغيرة تا دوات معاه نجوى

نجوى: مسيكينة بقات فيااا معرفتش شنو وقع ليها غتموت بالخلعة

ليلى:(نطقات و السم كيقطر من عينيها) ايوا خلاص عليا الفشوش الخاوي حشوما تخصر لناس الحفلة ديالهم حشمو كاح

فراس:(اكتفى انه يخنزر فيييها تا طمرات بلهلا يحزقو ليها و شاف فياسمينة اللي مخشية فمنصف و صورتها حركات فيه شي حاجة معرفش شنو هي)……

كملو العشية ديالهم عادي حطو العشا كلاو و شربو من غير ياسمين اللي باقا الخلعة لاعبا عليها و دعاء و رانيا و منصف اللي مخلوعين عليها حيت هاد الحالة فايت تعرضات ليها بزاف المرات ملي تيبسل عليها شي واحد فالزنقة او تيوقف عليها و عارفينها تتمرض موراها و تيطيحو عليها عضامهااا بقاو معاها تا تهدنات و احمد كيتأسف و يعاود تا تهدناااات واخا حاسة براسها ثقيل عليها ولكن مابيناتش ليهم باشما تشطنهومش كثر خرجو و طلعو لوطو باش يمشيو لدار طلبات دعاء ياسين يخليها تبات مع ختها وتاهو مرفضش حيت شاف حالة ديالها و قالها بيلا ايرد لبال لاويس. حلو الباب بشوية و طلعو كان كولشي ناعس مشاو لبيت عند ياسمين جراتها دعاء عنقاتها بحنان…..

دعاء:(تدوز ايدها على ظهرها بحنان) مديريش فبالك اختي دازت

ياسمين:(نزلو دموعها و بدات تترعد و تشهق) اهئ هئ هئ خفت بزاااف خفت و… و مم. محملتوش خنقني

دعاء:(تتمسح ليها فدموعهاااا وشدات وجها بين ايديها) متخاافيش احبيبة ديالي طول ما انا معاك عمرك تخافي صافي حشومة هاد العوينات يبكيو نوضي نبدلو نعسو نوضي.

ناضت ياسمين بلا تاشي كلمة ودموعها مازال هوادين تتكره هاد الضعف اللي فيها و اللي كلما حسات بيه تتلوم مها حيت هي المسؤولة بالدرجة الاولى على هاد الشخصية اللي مهما حاولت تبدلها تيغلب عليها حنانها و ضعفها و خجلها، تتمنا تكون بحال دعاء قاصحة و جبهة و شخصيتها قوية ولكن الغالب الله متتقدش تبدل. بدلات حوايجها و ديماكيات وجها و تلاحت حدا ختها اللي بدات تتحك ليها فشعرها تا نعسات.

صبح الصباح و دخلات شميشة من شرجم خلاتها تغوبش بطفولية و تحل عويناتها المعسلين بالنعاس دارت بزز جيهة ختها ملقاتهاش عرفاتها اتكون مشات على حساب ولدها حاولات تنوض بزز و عظامها مدكدكين و راسها غيطيح دخلات للطواليط(حشاكم) قدات حوايجها و توضات صلات و هبطات تتجبد لقات مها بادية فالصالون تتجمع فيه و تخمل فيه تبسمات ليها و مشات فطرات و خدات دوا و دازت عاونات مهااا

♥️تسريع الأحداث♥️

دازو ثلاث ايام بلا تاشي جديد يذكر جمعو دار و خملوها باش تبقا نقية و خلطو شي حليوات باش يديوهم يبقاو يفطرو بيهم او يتگوتاو بيهم و مشات هي و مها لحمام باش يمشيو نقاياااا و اليوم هو اليوم الموعود ناضو مع الفجر توضاو صلاو و فطرو غي هي و مها و باها اما خوها مبجقل بالنعاس هبطات هي و باباها الحوايج كولا و الفاليز ديالو و ركبو باباها صايق و هي حداه باش تعاون معاه و ماماها لور منعسة عليها محمد خليل لي ناعس مسهوت و كانت الوجهة عاصمة جهة سوس ماسة درعة مدينة اغادير الحبيبة كانت المسافة ليها تقريبا واحد خمسة سوايع تقاسمو فيها طريق خرجو مع الخمسة تصباح وصلو مع العشرة مسهوتين و استقبلاتهم اغادير بجوها زوين و منعش…..

توجهو لحي المختار السوسي اللي كان قريب لمدينة و تماك فين كاينا شقة دعمها اللي مخلي عندهم السوارت فاقامة زوينة راقية بالبيسين و الجردة و العساسة فالباب اللور و القدام اقامة تيسكنو فيها غي شكون و شكون وصلو و حل ليهم العساس الباب بابتسامة حيت تيعرف سي مصطفى باركاو لوطو و هبطات ياسمينة لابسا كسيوا كحلة منقطة بالبيض كمامها طوال ثوبها مدوبل و فايتا ركبة و لابسة سبرديلة هابطة بيضة مع صاك متوسط بسمطة طويلة و شادة شعرها الاسود الفاتن كوت شوفال هابطة نزلات لالة ثورية تاهيا لابسة سروال مطلوق و شوميز طويلة و صبيبيط و نزل خوها و باها طلعو دكشي و لقاو الاثاث مغطي بايزارات و ريحة الغبرة عاطية صيفطو خوها و باها لسويقة يتقداو و مشات هي لسوبير مارشي تاخد مواد تنظيف من جافيل و تيد و سانيكروا و باش تمسح الزاج و طورشونات و كولشي و رجعات لدار حيت سوببر مارشي كاين فالاقامة نيت لقات ماماها حيدات ليزور و حلات شراجم مشات بدلات حوايجها بكسوة ديال الدار و جمعات شعرها بزيف حياتي باشما يتغبر و بداو الغسيل بداو بالكوزينة غسلو ثلاجة بجافيل و تيد و خدموها و دازو لبلاكارات جبدو منهم الماعن مغبرين متيتجبدو من صيف لصيف غسلو كولشي و مسحو لبلاكارات و رجعوهم خلاو غي فاش غيطيبو مشات مها خرجات لصالون و بقات هي تتحك فالركاني اللي جبدات منهم لعجب بقات تتحك تا طابو ايديها بجافيل سلات الكوزينة و دازت لبيوتة كانت شقة كبيرة فيها صالون كبير مفرش بالتقليدي و ثرية كبيرة و ديكورات تكلفات بيه مها ساست الفراش و دوزات عليه لاسبيراتور غسلات شراجم و مسحات ديكورات و طبالي و عاد كاين بيت كبير فيه ناموسية و بلاكار فالحيط و كوافوزات و طابل دو نوي تكلفات بيه هي طلعات الكوليس ديال البالكو و بدلات لكوفرلي بايزار و حطات هداك يتصبن و مسحات و صيقات البالكو و صالون صغير مجموع مفرش بدي فوتوي حالو ساهل عاد بيت صغير فيه جوج نوامس وحدة ليها و وحدة لخوها جمعاتو و سيقاتو و كاين دوش فبيت مها و باها و دوش خارج ديال الدار غسلوهم و حكوهم مع بغاو يسيقو دخل باها و خوها محملين بقفات ها الخضرة ها الديسير اللحم الدجاج و قفة هازها خوها بسيف فيها العطرية و الزيت و دقيق و دكشي حيت مولفين بماكلة ديال الدار واخا تيخرجو قليل فين تياكلو برااا خلات مها تقاد دكشي و دير لغدا و هي سيقات دار خلاتها تتشعل و ريحتها زوينة مجات فين تجلس تا لقات راسها تتقطر بالعرق ولات كولها تتلصق ناضت جبدات دكشي ديال دوش و دوبياس و بيجامة حريرية بسروال طويل و الفوقي نص كم فالازرق غامق دخلات غسلات غي لتحت مقاستش شعرها و غسلات وجها و توضات و خرجات صلات لي عليها و تغداو و تلاحو نعسو مكاين خروج ليوما…..

تصهطات تال العصر ناضت توضات صلات و دارت نظاظرها و هزات كتابها لاخت عليها شال و طلعات لسطح تنفرد براسها و تقراا تمشات تا وصلات الحافة ديال سطح و طلعات ليها وقفات ايلا شفتيها تصحابها غي باغا تنتاحر هي من ديما كانت مختالفة على كولشي مكانتش كتخاف من العلو و مكتخافش من ظلمة و متتخافش من الحشرات او الحيوانات بحال كولشي العكس هي تتخاف من بنادم عندها فوبيا من بنادم جلسات فالحافة و رجليها تيلعبو فالخوا تهرها طيح حلات كتابها و بدات القرايا و ندامجات معاها محاساش بالعالم الخارجي والشمس سانيا فيها تيبان شعرها كيبري مطلوق مدرق ليها ظهرها و خصلاتو كيطيرهم البرد مشكلين لوحة فنية من ابداع الخالق….موعاتش براسها تا حسات براسها مجرورة لور و مليوحة على شي واحد و راسها جاي فعنقو…..

هزات ياسمين راسها بشوية تتلقا راسها مليوحة على شاب مغمض عينيه بملامح متألمة اقل ما يقال عنه انه وسيم فثانية وحدة قدرات تشوف بشرتو القمحية و لحيتو الخفيفة البنية و حجبانو عراض ملامحو بشوشة و شعرو قوي و كثيف بني بارزة فيه الشمش حتى حل عينو و ياريتو ماحلها عوينات صغار فالاخضر غامقين و الاهم النظرة لي كانت فعينيه نظرة حنينة و متفحصة مقدراتش تحدر عينيها منهم هي لي مولفا متتنزش العين فالواحد هو الاخر اللي كان جارها عندو و مزير عليها بخوف كأنها شي حاجة غالية عندو و مقصح فظهرو حل عينو يشوفها تا كيلقا ملاك بين ايديه عيون خضراء صافية خايفة و نويف صغير عليه نمشات خفاف و فم منيفيخ تيترعد بشوية بشرة صافية و حنيكات حومر و شعر رطب مليوح عليه……سهاو فبعضياتهم مدة لا بأس بها تا عاقت براسها و بدات تتحاول تنوض فيقاتو تاهو و رخا ايديه عليها تا وقفات بزربة حادرة عينها للارض و وقف تاهو تيشوف فهاد الفاتنة الصغيرة ببيجامتها لي بارزة معالم انوثتها اللي تلاح عليهم الشال و الطول ديالها اللي يله كتوصل ليه لصدرو و شعرها الاسود الحالك حكاية اخرى اما هي فرفعات عينها فيه و هبطاتها بزربة ملي لقاتو تيشوف فيها تتفكر فهاد العملاق لي قدامها و هاد الجرة اللي دار ليها يدير منها ربعة بطول شاهق و تيبان عامر و مكضر ذرعانو كبار و صدرو مطراسي فتيشورت البيضة و الكرش كتبان عادية مكايناش و ممطراسياش تايبان عااامر و معظل وسيم بشكل رجولي و ملاميحو جادة و بشوشة فنفس لوقت سهات فتحليلاتها تا سمعات صوتو الرجولي اللي دخل مع مسامعها بحال السهم…..

الشاب: مادموزيل واش نتي مزيانة ياكما مقصحة واش كنتي باغا تنتاحري

ياسمين:(جاتها الضحكة من ديك تنتاحري ولكن مابيناتش دوات و عينيها باقين فالارض) لا انا مزيانة غير كنت كنقرى فكتابي

الشاب:(حل عينيه على جهدهم تيشوف فهاد الكائن اللي قدامو ملقا غي ديك البلاصة يقرا فيها) سمحي ليا ولكن واش ملقيتي غي ديك البلاصة تجلسي فيها راه خطر عليك

ياسمين:(هزات فيه عينيها ودوات و عينيها مازال معلقين فعينيه بنظرة غريبة ولاول مرة اطول فالهضرة مع شي حد غريب و تهز فيه عينيها ولكن شي حاجة فيها لداخل تتقوليها متخافيش اياسمين نتي فامان) ههه لا كاينين بلايص ولكن انا تنلقا راحتي تما سمحليا خلعتك

الشاب:(تيحول نظرو فوجها بنظرة عادية فيها لمحة ديال الاعجاب و ماشي دالشهوة حيت ياسمين قادرة تفرق مابين الاعجاب و الحنين و الشهوة) اودي نتي غي خلعتيني راه بغيت نجرك و خفت نقيصك تزلقي

ياسمين:(بابتسامة جميلة و هي براسها مستغربة فراسها و تتقول مع راسها بهاد زربة تطلقتي) نههه سمحليا اسيدي مقصدتش

الشاب: سميتي محمد سيدنا و سيدك رسول الله و مرة اخرى متعاوديش تخلعينا الخنفوسة (قالها على اساس انها باقة صغيرة حيت كاتبان عندها ديك 17 او 18 عام مضنش و مجاتش فبالو تكون عندها 23)

ياسمين: متشرفين انا ياسمين شكرا و سمحليا مرة اخرى خليتك فراحة الله (دارت تتقلب على كتابها اللي تلاح هو و كلاكيطتها و شالها هزاتهم و تمات غادة تا سمعاتو قال)

محمد: فرصة سعيدة مادموزيل ياسمين و مرة خرى متعاوديش (ضحك مبين على سنانو و فهات فضحكتو زوييينة بزاااف بتاسمات هي بدورها و زادت بتتاقل مخلياه موراها تيشوف فيها و يعبر فيها دارت بشوية على اساس غتلقاه عاطيها بظهرو تا لقاتو كيشوف فيها خرجات عينيهاا تا ضحكاتو و زادت كتزرب مخلياه موراها تيضحك

محمد: اخرتك وليتي تسها فبنت صغيرة ولكن زويينة و حلوة 😍

هبطات ياسمين بالها مشغول بيه و براسها تتستغرب فراسها مفهماتش كيفاش هي لي متتهضرش مع البراني دوات معاه و ضحكات معاه و كيفاش فقربو ليها مخافتش و محساتش بالخنقة و حسات بامان خلي زينو و وسامتو اللي خلاوها غي تتبقلل يمكن ميكونش زوين تالديك درجة و يمكن ميعحبش بزاف ولكن هي لتامسات فيه واحد الكاريزما و رجولة مخلطة مع حنان و ملامحو الحادة و البشوشة صنعو مزيج ولا اروع…… فاتت عليها ديك الليلة عادية تعشاو و نزلات هي و خوها لبيسين فين دايرين طبيلات بكراساهم و دي رولاكس هبطو يتبردو مشاو كلسو فالحاشية ديال بيسين و دارو رجليهم فالما و بقات تضحك مع خوها و تراشق معاه تا سمعات صوتو كيقول…..

محمد: عاوتاني الحافة هههه فنما نشوفك خاصني نلقاك فالحافة ديال شي حاجة

ياسمين:(دارت بزربة لقاتو هو ضحكات ضحكة خفيفة) دابا واخا نطيح ميوقع ليا والو

محمد:(جا تال حداها هز شورط شويا على فخادو باشما يتزير حيد كلاكيطتو و ريح بحالها) بغيت غي نسولك واش متتخافيش من العلو زعما راها فوبيا شائعة

ياسمين:(يله بغات تجاوبو قاطعها خليل)لا عااا..

خليل:(من صباح وهو حاضيهم تيقول هاهوما غيفهمو ريوسهم ساعة والو تادوا) انا هنااا اولاد ناس شكون نتا اخونا

محمد:(بضحكة تيشوف فيه تيحاول يدير فيها راجل) فين اعشيري بيخير انا غا فاعل خير نقذت ختك

ياسمين:(ضحكات وهي حادرة راسها و عويناتهااا تيبريو و حناكها حومر قرصات خليل بلاما تبين و قالت) قبيلة كنت فسطح تنقراااا كيما ديما و تلاقيتو تما

خليل: كنتي تاني دايرا ديك الجلسة العجيبة ديالك (دار تند محمد مخاطبو) هادي اعشيري راه واحد مجينينة تتمشي تال حافة و ترخي رجليها و تبدا تقرا ديما مسكتة للواليدة القلب

محمد:(تيشوف فياسمين اللي محملاتش راسها و طلعاتها التزنيكة) حشومة اصاحبي تقول على ختك مجينينة بالعكس هي هكاك كترتاح غي خاصها ترد البال و صافي ياك اياسمين؟ (تيشوف فيها بنظرة متفحصة فيها بعض من الاعجاب)

ياسمين:(هزات راسها فيه و بتاسمات بلاما تجاوبو و حنوكها حمرين الشي اللي خلاه يتسطا على حشمتها)

محمد:(كيشوف فيها و مخاطب خليل كيحاول يشدهم اطول وقت ممكنة مقادرش يزيح نظرو عليها بصورتها البريئة وشعرها كيطيرو نسيم خفيف حمقاتو ورجعاتو مراهق كيختالس النظر) مقلتيش ليا شنو سميتك اصاحبي

خليل:انا محمد خليل عندي 14 و نتاا؟

محمد:(بنبرة مازحة) انا غي محمد بلا خليل 28 عام مشرفين اصاحبي (دار مخاطب ياسمين اللي لاحظ انها غير على البنات اللي تيعرف واللي تيشوف تتحشم بزاف و محاولاتش تلفت انتباهو او شي حاجة هكا)

ياسمين:(وهي حادرة راسها حشمانة ولكن فنفس الوقت مخايفاش بحال ديما) ياسمين 23 عام.

محمد:(حل فمو و عينيه و وذنيه وكولشي ملي سمع شحال فعمرها ولا تيبان هكا 😱) 23 عام؟؟؟

ياسمين:(هزات فيه راسها و عقدات حواجبها باستغراب واخدة راحتها حيت خليل صونا تيليفونو ومشا يدوي مع الساطة تاعو) احم مالك؟

محمد:لا والو غي استغربت من عمرك انا قلت غتكون عند 17 او 18 او 19 كاااع اذا كثرتي 23 دقة وحدة اطرني راك بالغة

ياسمين:(ضحكات بخفة على هضرتو) هههههه تانتا كبير

محمد: لا اختي انا باقي شاب دغيا بغيتي تشرفيني احم

ياسمين:(طلقات معاه فالهضرة بلاما تحس) لا حاشة غي قلت

محمد:(لاحظ انها بدات كتطلق معاه فالهضرة ولكن مازال كتشوف لتحت و مازال حشمانة) ماشي مشكل الالة و نقدر نعرف هاد الانسة لي عندها 23 عام شنو تدير فحياتها

ياسمين:(ضحكات تاني معرفاتش علاش هضرتو تضحكها) ههههه والو غي جالسة فالدار خديت ديبلوم بالفينونس و درت ليسونس و جلست فالدار (مزعماتش تسولو ونتا كتافات تشوفيه و تعاود تحدر راسها)

محمد: مزيان الالة تا الجلسة فالدار مزيانة كرهت انا الجلسة ديال الدار

ياسمين:(شدها فضول كن جيهتو و بقات محتارة تسولو ولا لا فاللخر سكتات حيت مزعماتش عليه) تا الخدمة مزيانة ههه….

محمد:(عايق بيها مقدراتش تسولو وحلف تايجبد منها الهضرة جبيد) متتحاوليش تقلبي على خدمة ولا دوزي شي سطاج ولا ولفتي الدار

ياسمين: بصح ولفت الدار و اصلا متنتوالفش مع بنادم بزاف

محمد:(حس براسو ب حيت عتارفت وحيت شافها بدات تتطلق معاه وهو عرفها و قراها بيلا ماشي اجتماعية وماشي ساهل تتطلق مع الناس من راسها اللي ديما حادراه و هضرتها القليلة وتا ديك الجلسة بوحدها فالسطح يعني بنت اخرى فعمرها كانت اتنزل للجردة ولا لبيسين ولا تخرج طوطح فزناقي) مزيان تا ناس مافيهم مايدار ولكن تاني متتقنطيش من الجلسة فالدار

ياسمين:(ردات بعفوية) لااا واخا نبقا تا شهر بلاما نخرج

محمد: سبحان الله هههه ولله في خلقه شؤون اول مرة نشوف بنت عزيزة عليها الدار

ياسمين:(بضحكة خجولة بهراتو) تقدر تقول بيتوتية شوية(صونا تيليفونها و كانت ماماها تتقول ليها طلع حيت تتطل الوقت و محساتش براسها) سمحليا انخليك تعطل الوقت

محمد:(مساخيش ومكرهش يبقا معاها الليل كامل و هادي اول مرة توقع ليه) ماشي مشكل انا مازال هنا مازال ايام الله طويلة.

ابتاسمات ليه ياسمين و خرجات رجليها من الما صغيورين و بيضين و نقايا و مدايراش كاع صباغة تيبانو زوينين رد ليهم محمد البال و عجبوه……وقفات لبسات صندالتها و زادت تاسمعاتو قال :

محمد: ياسمين!!

ياسمين:(دارت شافت فيه مبتاسمة بخجل)

محمد:(تيشوف فيها بنظرة إعجاب مكاملاش 24 ساعة باش عرفها ودات ليه العقل) تصبحي على خير 😍

ياسمين:(مبتاسمة بخجل متقدرش تنكر انه عجبها ولاول مرة فحياتها يعحبها شي دري و تهضر معاه هكا اصلا) الله يبيتيك فراحة الله (قالتها بنبرة حنينة بزاف خلاتو يبتاسم و زادت خلاتو متبعها بعينيه تا دخلات وبقا هو تيفكر فيها مكاملش يوم و قلبات ليه دماغو دخلات ليه و عششات مكرهش يجلس معاها وتبقا تعاود ليه على راسها حيت لاحظ انها مختلفة كليا على بنات جيلها من جلستها فالسطح للحشمة والخجل ديالها لانوثتها الطاغية لبرائة وجها لهضرة خوها لهضرتاااا حركات فيه فضول غريب من جيهتهاااا وفنفس الوقت حاير كيفاش غيدير يعرف عليها كولشي حيت قدما هي تتبان ساهلة ولكن صعيبة و صعيبة بزاف)

اماااا هي مكانتش حالتها حسن منو دخلات شربات الما و مشات نيشان لبلاستها ولاول مرة مقراتش كتابها حيت اصلا بالها مشوش تتفكر كيفاش لاول مرة فحياتها تطلق مع شي راجل هكا من غير منصف و باها و خوها تا فالمدرسة عمرها دوات مع شي ولد قليييل و على شي حاجة مهمة ماشي بحال هذا اللي دوات معاه و كلسات معاه و تعاودات معاه والاهم انها مخايفاش منو بالعكس كانت واحد الهالة ديال الاطمئنان دايرا بيه خلاتها متخافش وتدوي براحتها و متنكرش انها تاهيا تمنات كون مصوناتش مها باش تزيد طول معاه فالهضرة عجبها من ناحية وسامتو و هضرتو و رزانتو وفنفس الوقت مزاحو الخفيف على القلب…….فاللخر خلات كولشي للوقت و نعسات كيما دار تاهو….

فاتو ايام لا بأس بها وبالضبط خمس ايام دوزتها ياسمين و عائلتها فالدوران و التبحار و العومان مخلاو لا تغازوت لا تيكيدة لا ايميوادار لا كروكوبارك مشاو تالوادي الجنة او paradise valley مهم دارو مزيان و سوق الحد خلاو ليه نهار ديالو خداو املو و زيت اركان و المنتجات التجميلية ديال التعاونيات خداو الحوايج و الباروك للعائلة و فهاد الخمس ايام قليل فين كانت كتلاقا بمحمد مرة فالمخبزة و مرة فسوبير مارشي تيتبادلو السلام و نظرات الاعجاب من عندو بالمقابل نظرات خجولة من عندها تالنهار اللي كان صافي محمد طاب و خدا خطوة باش يهضر معاها فاقت كيما ديما هزات الفلوس و خرجات للمخبزة بعدما صبحات على واليديها لابسة كسيوة ديال الدار نص كم فايتا ركبة و جامعا شعرها مخربق مشات و بحال عادتها وقفات برا تتخوا المخبزة حيت كتكون عامرا تا وقف عليها بجينز زرق و تيشورت اسود و سبرديلة تيبان شهوة منو فسر بجهد…..

محمد:(تيشوفيها و كيما ديما محمقاه ودايا ليه العقل خصوصا عيونها كيجيبو ليه التمام) صباح الخير

ياسمين:(هزات فيه عينها مبتاسمة ابتسامة جميلة قدرات فهاد الايام تولف عليه شوية) صباح النور

محمد: كيصبحتي اياسمين

ياسمين:بيخير الحمد لله و نتا

محمد:انا بيخييير خاصك غي نتي تكوني بيخير بصح

ياسمين:(مبتاسمة و عينيها فالارض مرة مرة تتطلعهم تشوف فيه متنكرش انه عاجبها هاد الاهتمام) الحمد لله

محمد:(كيشوف فيها حادرة راسها) ياسمين (هزات فيه عينها بنظرة مستفسرة و كمل) نقدر نشوفك هاد العشية؟

ياسمين:(حمارو حناكها و معرفات متقول) احم كيفاش

محمد: واش نقدر نشوفك هاد العشية فشي كافي عندي مانقولك

ياسمين:(تحرجات بزاف اول مرة يقولها شي واحد تخرج معاه معارفة متقول) احم… معرفتش والله

محمد:(تيشوف فيها برجاء محاول يقنعها) غير تيقي بيا واللهما ناوي شي حاجة خايبة بيت نهضر معاك فشي حاجة ميمكنش نهضرو فيها على الواقف

ياسمين:(لتامسات الصدق فعينيه و هضرتو و قررات ديرها فيد الله) احم واخا معاش؟

محمد:(بضحكة فرحان حيت قبلات) غي ملي حنيتي فينا مهم نتلاقاو مع الخمسة ونص و باشما نحرجكش خودي طاكسي وجي لاكوط حدا كافي جور اي نوي عرفتيها؟

ياسمين:(حشمانة ومباغاش اصلا تمشي ولكن فنفس الوقت عندها فضول شغيقوليها) وي عرفتها صافي بسلامة (دارت باغا دخل حشماااانة مقاداش تتهز فيه عينيها طبيعي وحدة عمرها فاتت مع شي دري سلام تجي دابا تافق معاه على فين غيتلقاو كتحس براسها كدير شي حاجة خايبة و كولشي ناس عرفوها لاش تتفق معاه ضحك هو عاق بيها حشمات و هدشي اللي مهبلو حشمتها اللي مكاينا فتاشي بنت)

محمد: اجي شفتك غادة عطيني نيم ديالك باش نصوني لك ملي توصلي

ياسمين:(عينيها فالارض) احم مجبتش تيلي نعطيك نيم ديالي تتصيفط ليا مسج.

خدا محمد نيم ديالها سجلها باسم ياسمينتي (السيد زاعم شوية مديوش عليه) صونا ليها و قطع و مشا لشغالاتو اللي من بعد غنعرفو شنو هوما…..

ياسمينة تقدات و طلعات معارفة متقول لمها مشات بزربة هزات تيلي لقات نمرة ممسجلاش عرفاتو هو دخلاتها باسم محمد و صونات لدعاء تعاود ليها و تستشيرها حيت متتخبي عليها والو

📱ياسمين:(عاودات لدعاء كولشي ولوخرى غي كتسنط تسناتها تا كملات) ايوا هذا مكان شنو بان لك اختي؟

📱دعاء:و هاد الولد باينة فيه معقول ولا من دوك صحاب الوقت زويزوات يتقهوى بفلوس باه يقتلك غا بالعصير تترجعي غا تشرشري

📱ياسمين:(كدوي باريحية حيت اكثر واحد متتحشمش منو و مطلوقة معاه هي دعاء) وا راه راجل راه 28 عام و منكذبش علك اختي اول مرة نطول مع شي ولد فالهضرة راه تصدمت فراسي

📱دعاء:(كضحااااك) هههههه وا انا وصدمتيني كنتسناك تقولي شي حاجة تتسوليني على دري عمرها كانت لك

📱ياسمين: واللهما نكذب علك تا حسيت بواحد الامان مخفت ما والو اصلا شوفة متيكملهاش فيا و مكيفوتش وجهي

📱دعاء: اييوا على الله يطلع ولد الناس راه كثرو ولاد الحرام و دابا نتي بغيتي تمشي تلاقاي معاه؟

📱ياسمين:(بنظرة حايرة معارفة مدير) واللهما عرفت من واحد الناحية شادني الفضول و شي حاجة الداخل باغا تمشي و فنفس الوقت خايفة و مقدراش نكذب على ماما

📱دعاء: ايوا سيري اصاحبتي راك كبرتي عاوتاني و خاصك تعرفي ناس و يعرفوك الناس تالين غتبقاي فهاد القوقعة

📱ياسمين: نتي عارفاني كنلقا راحتي بوحدي ولكن هذا رتاحيت ليه و خايفة املي يخيب

📱دعاء: مغيخيبش ان شاء الله غير سيري و ماما دوي معاها عادي راني عارفاك تتبقاي تفتفي قولي ليها شي صاحبتك تتقرا هنا و غتخرجي معاهاا

📱ياسمين: وااا بابا نلقا معاه السلاكة وماما لا غير دعي معايا و شنو نلبس و شنو ندير عاونيني

📱دعاء:(ضحكاتهااا) هههعه اغير بشوية علك تكالماي لبسي شي حاجة سامبل و شعرك تاهو خليه سامبل خليك بسيطة و مديري والو فوجهك عكير خفيف لا غير صافي سيري جلسي عادي دوا دوي سكت سكتي و حافظي على مسافة الامان بينك و بينو (فخاطر كورونا) و ميكون غي الخير

📱ياسمين:(متوترة و مخلوعة و معارفة مدير) بفففف صافي احبيبتييي شكرا بزاااااف (كملو هضرتهم خارج الموضوع تا سالات و ناضت لماريو جبدات جينز زرق مزير تا لتحت و قصير شوية مع شوميز لارج فالموف بارد طويلة شوية و هزات صندالة بلا فالبيج مع صاك فنفس اللون صغير و عندو سنيسلة طويلة حطاتهم و خرجات عند مها فالكوزينة تهدر معاها)

ياسمين:(متوترة و تتكاول تصرف عادي) ماما

ثورية:(تتنصب فالغدا اما تا مصطفى و محمد خليل مشاو يتبحرو) نعام ابنتي

ياسمين: عافاك بغيت نطلبك ايلا بغيتيي؟

ثورية:(دارت عندها تتشوف فيها كيفاش حنوكها حمرين و تتفرك فايديها مع البيجامة) قولي شنو بغيتي

ياسمين:واحد صاحبتي كانت تتقرا معايا فالباك و جات كملات قرايتها هنا و استقرات هنا و الصباح دوينا و قالت ليا نتلاقاو عشية (حادرة راسها مكتشوفش فيها عارفة راسها غتفرش متتعرفش تكذب و كتفرك فايديها)

ثورية:( عاقت بيها كتكذب مكاين لا صاحبتها لا والو و اساسا تتشوف فيها تتقفقف غا راسها) مممم صاحبتك ياك نتي مكديريش صحابات

ياسمين:( سكتاتها مبقات عرفات متقول ندمات تا دوات كاااع) احم… و… راه ماشي شي صحبة ولكن قرات معايا…..

ثورية:(عاقت بيها و عرفات القضية فيها شي بوشلاغم و حيت عارفة بنتها اول مرة ليها مابغاتش تحرمها و فنفس الوقت خايفا عليها) واخا الالة سيري نشوفو هاد صاحبتك و ردي البال متتطليش و لا وقعات شي حاجة صوني

ياسمين:(بفرحة عند بالها مها معايقا بوالو معامن نتي تلاحت عليها باستها و قالت بابتسامة) كوني هانيا و شكرا اماما (اكتفت ثورية تحرك ليها راسها زعما احياني و دارت تكمل شغالها اما هي مشات ضرباتها بتدويشة خفيفة بلي برودوي ديالها ديال الياسمين خرجات دهنات لحمها و عطرات تحت بيطانها و راسها كامل نشفات شعرها طويل و دهناتو بسيروم و خلاتو هكاك بوكلي كيجيها زوين خرجات تغدات مع مها و جمعات هي الماعن و مشات ترتاح هزات تيلي لقات ميساج من محمد)

💌محمد: سلام ياسمين صافا؟

💌ياسمين:الحمد لله و نتا؟

💌محمد:(مدازش بزاف و جاوب) فوق فيگيگ

💌ياسمين:(اكتفات بايموجي) ☺️

💌محمد:اشنو درنا دابا الالة ياسمين غتجي ولا لا؟

💌ياسمين:احم ان شاء الله

💌محمد:(فرح و بعدما كانت متكي ناض قاد الگلسة) هادي خبار زوينة مع الخمسة ان شاء الله حدا كافي جور اي نوي واخا؟

💌ياسمين:واخا صافي نخليك دابا بسلامة

💌محمد:بسلامة و ملي تخرجي من الدار صوني

💌ياسمين:ان شاء الله ☺️

شافت ساعة لقاتها الربعة عندها نص ساعة ناضت عاودات عطرات بيطانها و لبسات حوايجها خلات عقدة ديال شوميز محلولة منين تنفس و طوات كمايمها شوية دارت ساعة فالفضي و اليد لوخرى كورميط خفيفة و براسلي ديال كارتيي مع خاتم خفيف و حوالقها ديال الفراشة اما تا سنسلة ما بايناش جمعات شعرها كوتشوفال تا بان وجها الدائري و عويناتها خوضر كيهبلو كل من شاف فيهم دارت ايكرون ديالها مافيهاش اللون باش يبانو داك النمش اللي مزينها كتافات بماسكارا لعينيها و عكيكر خفيف رشات ريحتها و لبسات صندالتها طلات لقاتها الخمسة قل ربعين دقيقة هزات صاكها خرجات علمات ماماها و مشات خدات طاكسي تال لاكوط لقات دنيا عامرة صونات ليه قطع فالبلاصة و عاود صونا ليها

📱محمد:الو ياسمين وصلتي؟

📱ياسمين:(كانت واقفة حشمانة حدا القهوة من جنب موراها واحد الحيط فيه رسمة و حداها ناس كيتصورو مع ديك الرسمة) احم وي هاني حدا الكافي

📱محمد:(وقف كيقلب بعينيه مبانتش ليه) واخا تزيدي قدامها شوية مبنتيش ليا

📱ياسمين:(زادت لقدام الكافي تا بان ليها واقف كيقلب سرعان ماشافها شير ليها) صافي هاني شفتك…..

📱محمد: (واقف حدا طبلة فيها مرة زوينة فوجهها نور كيضرب فيها تكون عندها ديك 48 عام هكاك و بنت تاهيا زوينة تتشبه لمحمد تكون عندها ديك 17 18 عام و بنت تقادة ديال ياسمين) صافي تسنايني هاني جاي.

دار تيهضر مع المرة و يضحك معاهااا و مع البنات شوية شافتهم كيشوفو جيهتها و تيضحكو و ابتاسمات ليها المرة بزربة حدرات عينيها حشمانة تا وقف عليها سيدي محمد زين لابس جينز رمادي و شوميز كحلة ثاني ليها كمايمها كيبااانو ذرعانو عراض و مزغبين بشعرات زعرين و سبادري كلاص كحلة داير ساعة تتبان غالية وليد لوخرى كورميط ديال نقرة و شعرو الكثيف رطب مخليه عادي داير واحد البارفان يطيح زرزور من فوق السور تيبان بوكوص الشيء اللي ثار اعجاب ياسمينة و مقدراتش تتهز عينها تشوف فيه عكسو هو اللي خدا راحتو و وقتو الكافي كيشوف فهاد اللوحة الفنية اللي قبالتو لوحة من صنع الخالق ميمكنش تشوفها وما تقولش سبحان الخالق اللي صورها فاحسن هيئة من شعرها لعينيها لنيفها لفمها لخدودها لرقبتها للونها لفصالتها هبلاتو بطلتها البسيطة رغم بساطتها الا انها تتبان حسن من الف وحدة معرفت شنو تلبس خدا تقريبا شي جوج دقايق كيشوف فيها وهي مرة مرة فين تهز عينها فيه و تحدرها بالزربة تا دوا ملي عاق براسو عيط ليها

محمد: ياسمين 😍

ياسمين:(توما فيناهيا ياسمين راها حناكهااااا ولاو مطيشة حشمات بزاف من شوفاتو ليييها)….

محمد:(ضحك عايق بيها حشمانة عاود عيط) ياسمين (هزات فيه عينيها خلاتو عينيه يبريو) صافا؟

ياسمين:(بزز باش خرجات جوج كلمات و فداخلها تتنعل راسها كون بقات فدارهم حسن ليها) الحمد لله و نتا؟

محمد:(بنبرة حنينة و عينيه لامعين) فاحسن حالاتي عمرني كنت هكا

ياسمين:(ابتاسمات من هضرتو اللي تتخلي قلبها يفرفر) احم

محمد:(مهبلاه حشمتهااااا و عاجبااااااه) نمشيو لواحد الكافي فمارينا و اللي نجلسو غي هنا؟

ياسمين:معنديش مشكل

محمد:من الاحسن نمشيو لهاديك كالم تبغي نتحركو على رجلينا ولا نمشيو فالطوموبيل

ياسمين:(نقزات بزربة خايفة تركب معاه فطوموبيل) نتمشاو حسن

محمد:(ضحك بجهد تا هزات عينيها فيه عاقدة حجبانها باستغراب) هههههههه يله الالة (دار شير للمرة و البنات و تحرك وهيا حداه حشمانة مبعدة عليه بجهد ربع ميترووو مرة مرة فين تيلوح شي كلمة) تبحرتي شوية ولا بقيتي غي فالدار

ياسمين: وي مشيت شي جوج مرات معنديش مع البحر بزاف

محمد: ياك الالة علاش معزيزش علك ياكما مكتعرفيش تعومي

ياسمين: لا لا كنعرف غي حيت تيكون عامر بزااف و مخلط

محمد:بنتي ليا معزيزش علك الصداع و البلايص العامرة

ياسمين:قدما كانت البلاصة عامرة قدما كنتخنق

محمد:العجب انا اللي عارف البنات عزيز عليهم الصداع و لومبيونس

ياسمين:(تقرصات و معجباتهاش هضرتو معرفاتش علاش هي معاه و هو تيقارن بينها و بين البنات) اه (كانو وصلو قدام واحد الريسطو كتشوف لمارينا سميتها pure passion ريسطو راقية و محترمة دخلو و ختارو بلاصة على برا تتشوف للبحر واحد الجو يا سلام بقات كتشوف ياسمين كتشوف فالناس اللي كيجيو يتصورو و محمد تيشوف فيها باغي يستغل كل ثانية و انا كنشوف فيهم و شوف فيا نشوف فيك اطاجين الحوت تا طاب محمد و تقلا و دوا)….

محمد:ياسمين

ياسمين:(شافت فيه بسرعة و هاد المرة بززات على راسها تشوف فيه و طول الشوفة فيه) احم…. نعام

محمد:(اول مرة غتحراف ليه و ميعرف باش يبدا ولا يوخر خاف يجيها نيشان تفهمو غلاط و فنفس الرقت مابغاش يبقا يتلوا) عرفيني عليك كثر اياسمين

ياسمين:(باحراج معارفة متقول ايلا كان هو معرف ميقول غي هاد المرة هي راه عمرها تحطات فهاد الموقف) معرفتش شنو بغيتي تعرف

محمد:(بلاما ينتابه نطق) كووولشي (عاق براسو) زعما بغيت نتعرف عليك كثر

ياسمين:واخا انا سميتي ياسمين تازي عمري 23 عام خديت باك و ليسونس برو و جالسة فالدار عندي ختي كبر مني سميتها دعاء مزوجة و والدة و محمد خليل صغر مني ماما جالسة فالدار و بابا عندو ماگازة ديال الحوايج و ساكنة فكازا (شافت فيه بمعنى هذا ما كان)

محمد:مزيان الالة الله يخليهم ليك و نتي ماباغا تعرفي عليا والو

ياسمين:(الفضول اللي شادها من ناحيتو يمكن كثر منو و هادي اول مرة توقع ليها و تبغي تعرف شي حاجة هكا كانت كتكون فالدار و توقع شي حاجة و ميهمهاش واش تعرف ولا لا دابا مكرهاتش تبقا تسول فيه و يجاوب ولكن خجلها لا يسمح طبعا يله جات بغات تهضر هو يقاطعها سيرفور)

سيرفور:مرحبا شنو بغيتو تاخدو

محمد:كافي نواغ (دار عندها بمعنى نتي شنو تاخدي)

ياسمين: احم موكا ايلا كاينا

سيرفور:وي كاينا دقايق و يكون طلبكم واجد

محمد:(تسنا تا مشا و دار عندها) بيان سيغ غتكوني باغا تعرفي عليا واخا مقدراش تهضري هههه

ياسمين:(باحراااج) احم معرفتش

محمد: واخا الالة المهم انا محمد تاج الدين فعمري 28 عام قريت حد الباك خديتو و زدت عاماين بالسونطر و دخلت مع جدي تعملت الحرفة ديال ذهايبي ملي مات خلا ليا الحانوت ديالو فسميتي كبرتوو و رجعتو ماگازان و هادي عاماين باش حليت وحدة هنا و داخل مع الواليد فدكشي ديال الاثاث من رباط (قاطعو السيرفور اللي حط طلباتهم و كمل) الواليد مزوج بزوح عيالات الواليدة سميرة هي اللي شفتي قبيلة عندها انا و ختي احلام عندها 25 (كيهضر و مرة مرة يرتشف من كاسو وفنفس الوقت كيشوفيها متبعة معاه و مرة مرة تتهز عينها فيه) و ختي صغيرة نسرين 17 و مراة الواليدة حفيظة هي اللولة والدة ترينگة سعيد 36 و يوسف 30 و شيماء 27 و الصغيرة تيسير قدك 23 هي اللي كانت مع الواليدة قبيلة هي و نسرين هادو هوما تريكتي (ضحك بمرح) كثار ياك

ياسمين:(ضحكات بخفة و قالت) تبارك الله الدار عندكم عامرة هههه

محمد:مشفتي والو معانا جدة ماين الواليد و عمتي و بنتها و خوتي الدراري بزوج مزوجين و والدين المهم الدار تتنغل

ياسمين:تبارك الله الله يخليهم لك (ابتاسمات ليه بمودة)

محمد:(حمقاتو و هبلاتوووو و سطاتو و مخلاتش ليه طانطو دوا بلاما يحس) و يخليك ليا احم زعما يخلي ليك واليديك (حك شعرو باحراج على زربة اللي فيه شرب من قهوتو و يله بغا يهضر قاطعو تيلي ديالو كيصوني)…..

📱محمد: الو وي…… ايمتا جا……. شحال باغي…….. قولي ليه يدوز عند علي ياخد اللي بغا…… الله يعاون (قطع و دار عند ياسمين) سمحي ليا غندوز واحد لابيل

ياسمين: ماشي مشكل

📱محمد:الو علي…. بيخير نتا كيراك….. والله حتى مت…. شوف سمعني ايدوز عندك سعيد دابا عطيه اش خاصو و قيد شحال و عطيه يسني…….. صافي و ضرب و قيس…… حيد الله يعاون.

دار شاف فياسمين لقا عينيها فبرا مع الدنيا بدات تتظلم و دواو فمارينا مع اليخوت و الباطوات و الناس جو يا سلام شاف فيه بتمعن تيقول فراسو اش دارت فيا هاد البنت تا خلاتني غير هايم فيها اشمن سحور لاحت عليا شاف تا عيا وقرر يدخل فالموضوع نيشان

محمد:ياسمين هزي راسك نهضر معاك

ياسمين:(هزات فيه عينيها حشمانة حاسة بيه غيقول شي حاجة غتسالي معاها) احم هاني

محمد:(تيشوف فيها بحب نظرة خلاتها تسها حاط يدو تحت ذقنو و هايم فيها) نجيك من اللخر اياسمين نهار اللي شفتك فيه حسيت بشي حاجة فشكل عجبتيني بزاف و ملي هضرت معاك و زدت عرفتك شوية وخديت نظرة على شخصيتك زدتي عجبتيني كثر (ياسمين سمعات هاد الهضرة تصدمات هزات قرعة دالما شربات بزربة و حدرات عينيها باحراج) ايلا كنتي تانتي مرتاحة ليا ديري مع داركم شي وقيتة نصيفط الواليدة ولا نهضر مع الواليد ديالك

ياسمين:(صدمها بل جاب ليها للشلل متواقعاتهاااااش ابدا عرفات راسها عجباتو اي بنت واخا تكون عمية ملي غتشوف تصرفاتو و هضرتو غتعرف راسها عجباتو ولكن ملي دخل نيشان للزواج و المعقول صدمها متواقعاتهاش نهائيا خصوصا انها واخدة نظرة على ان الدري لا خرجتي معاه ميتزوجش بيك و كياخد غير اللي كتخطب ليه مو طبيعي ما مها تزوجات بهاد الطريقة و ختها تزوجات بهاد الطريقة و عانات و حتا رانيا راه متعارفات مع احمد و تباغاو تال فترة الخطوبة شنو زعمااا جات تال عندها و تقلبات الاية معارفاش انو الناس ممقادينش و الناس حجر و طوب كاينين ولاد الناس كيما كاينين ولاد الحرام متنكرش انها مرتاحة ليه و بزاف و ملي دوا معاها بالمعقول زاد كبر فعينهاااا كثثثر و لكن العين اللي طلع فيه و الصوت باش تهضر ماااابقاوش) احم

محمد:(عرفهاااا حشمات و مقداتش تجاوب ولكن ضروري خاصها تجاوبو و تقول تا هيا رأيها باش يعرف واش يزيد القدام ولا يرجع اللور) ياسمين كنسمعك عطيني رأيك و كيما كان غنحتارمو

ياسمين:(معرفاتش متقول من جيهة كبر فعينهاااا و بان راجل و معقول و من جيهة خرا مملهوفاش على الزواج او فاتها الحال او عندها شي فضيحة تسترها باش تقول موافقة و تزوج بيه نيشان مزال معارفة عليه والو من غير سميتو و خدمتو اللي مكاملاش ساعة باش عرفاتها) احم….. اانا معرفتش شنو نقولك… انااا… هو دابا (تلبكات و معرفاتش كيفاش تعبر على فكرتها وهو كيتسنا فجوابها و فنفس الوقت حابساه الضحكة على هاد التلفة اللي شاداهاااا)

محمد: شوفي ياسمين هزي عينك بعدا ( هزات فيه عينهاا) اللي كتفكري فيه واللي حاسة بيه قوليه غنحتارم قرارك كيما كان فاللخر راحنا غي كنهضرو دابا بلاما توتري

ياسمين: انا معرفتش كيفاش غنقولها لك…. انا منقدرش نوافق (هز راسو بسرعة جاب ليها الضحكة و كملات) احم متفهمش غلط….. انامنقدرش نوافق دابا حيت مازال مكنعرف عليك والو….

محمد:(بابتسامة مريحة من مورا الخلعة اللي شداتو) وا يصحابني شي حاجة كاااع هادي قوليها عادي مافيها والو لاش حشمتي

ياسمين:(عرقات و نشفات و مرگات) معرفتش خفتك تفهمني غلط

محمد: لاش ابنتي غنفهمك غلط عادي بغيتي تعرفي شي حاجة سوليني راه تا انا مازال مكنعرفكش مزيان ولكن اللي عارف انو من نهار شفتك و نتي فبالي و نتي معامن باغي نكمل حياتي

ياسمين:(بابتسامة خجولة كل مرة كيزيد يغرقها فكلامو المعسول و هضرتو الرجولية اللي تتخلي أنوثتها تنحني لييه معرفاتش باش تجاوب و كتافات بالابتسامة بينما هو عرف انها مقدراتش تجاوب حيت الحاجة اللي تأكد منها من خلال اللقاءات القليلة بيناتهم انها ماشي قليلة بل منعدمة الخبرة مع الجنس الخشن و متتعرف باش تجاوب) انا غنعطيك جوج حلول ونتي اختاري بيناتهم غي هو ديري فبالك راه تفكي مني مكاينش يعني نتي ليا و ان شاء الله نتي حلالي غي هو نصبرو علك بينما عرفتيناااا هذا مكتوبي و هذا ما حلبات البگرة (ضحكات بخفة و صوت رقيق على هضرتو جاب ليها الله شي شارف داوي معاهااا) كضحكييي ههههه ضحكي اختي نتي معامن جات…. الحل اللول نهضر مع الواليد ديالك و نصيفط الواليدة تعارفو و نديرو خطوبة و نتعارفو فالمدة بين الخطوبة و العرس (كيحاول يقرا ملامح وجها واش عجبها الحل اولا لا) و الحل الثاني هو نتعارفو فهاد المدة من هنا لعيد الاضحى اللي بقا ليه شهر و نصيفط الواليدة مورااه واخا مكرهتش انا موراه نديرو العرس گاااع مالناااا (شافها تاني ضحكات و قال فخاطرو يادلي هادي غتقتلني غي بالضحكة تهبل) اش قلتي

ياسمين:(معرفاتش ماتقول اول حاجة بهرها بالجانب الكوميدي فيه و تتسأل مع كيفاش هذا تطلق معاها فالهضرة بسهولة هي اللي خاصها شهر عاد تقدر تهز عينها فيه عجبوها الحلول اللي عطاها منطقيين و تاهيا من جهتها تاهيا مغتقدرش تخلا على اول شخص غتحس معاه بالامان مورا عائلتها الصغيرة و اول شخص غتخرج معاه و تهضر معاه من اساسو و القرار اللي غتاخد خاصو وقت و تفكير و مشاورات مع المستشارة ديالها اللي سابقاها فالحرفة دعاء) احم… تقدر تعطيني وقت نفكر و نرد عليك….

محمد:(بابتسامة حب مرتاح حيت مرفضاتش و مضاهرينش عليها اصلا ملامح الرفض يعني عارف قرارها كيما كان غيرضيه) خودي راحتك الالة وقتي كلو ديالك

ياسمين: شكرا (شافت فساعة يدها لقاتها ستة و نص تخلعات خافت تكون تعطلات و تعايرها ماماها ولا تخاصم عليهاااا) هييييه سمحلي ولكن خاصني نمشي تعطلت بزاف خاصني نمشي (جمعات الوقفة بزربة و خرحات تيلي مدوزة لابيل لماماها)

محمد:(دوخاتو و زربات عليه ناض بزربة حط الخلاص فوق الطبلة و تبعها لقاها واقفة قدام الباب داويا فتيلي)

ياسمين:(دوات مع ماماها مرعودة خافتها تغوت عليها ساعة ماقالت ليها والو و علماتها بيلا هوما فلاكوط فكافي جور اي نوي نيت غيتعشاو تما و يمشيو للدار ردات عليها ياسمينة بيلا غدوز عندهم دابا و دارت عندو) سمحليا بزاف زربتك ولكن خفت ماما تخلع عليا

محمد:(بابتسامة تيشوف هاد الكائن اللي قدامو خايفة مها لا تخاصم عليها حيت تعطلات فالوقت اللي ولاو دراري تيخافو من مهم و البنات تيخرجو قدام مواتهم فعلا فرق كبير) مكاين مشكل الله ياودي كولشي تال نسيبة تخلع تبغي نتمشاو تال طوموبيل و نوصلك

ياسمين: لا لا غير نتمشاو راهم غي فجور اي نوي

محمد: ياك الالة ايوا مزيانة للوداد الواليدة تما و هوما تما نضربو الخضر فالنمولي تما و نخرجو مخطوبين

ياسمين:(تيقاتو و خافت يديرها بصح باقا معارفة طبعو واش كيضحك ولا كيطنز ولا بصح يديرها) هااء لا لا اويلي عافاك متقول ليهم والو عافاك (تترعد غا بوحدها و حبساتها البولة و حالتها حالة هو غا معجب فهاد المخلوق اللي اتا بان)…..

محمد: بشوية عليك راني غي كنضحك واش حنا دراريي ولا الله يهديك

ياسمين:(بارتياح) تخلعت يحسابني بصح داوي

محمد:(ضحك بجهد على النية دهاد البنت) ههههههههه ماشي تال هاد الدرجة يله الالة نتمشاو

ياسمين:(خافت يكون باها ولا خوها نايضين و يشوفوهااا) لا لا عافاك كلا واحد يمشي بوحدوو عافاك

محمد:(تنهد مساخيش بيها) واخا الالة سيري قدامي هاني موراك ملي توصلي نهضرو واخااا

ياسمين: واخا ان شاء الله يله بسلامة

محمد:(مكره مكرهش يدوز معاهااااا مازال الوقت) بسلامة اختي بسلامة

ياسمينة:(دارت ضحكة خفيفة على ديك ختي و تمشات قدامو)

بقاو غادين هي قدامو و هو موراها بشي جوج خطوات واللي لاحظ انها اول حاجة لابسة مستور شوميز نازلة على مؤخرتها واسعة ممخلياش المفاتن ديالها يبانو و تفكر انها مكانتش دايرا الماكياج ولا صباغة ديال الظفار و هدشي اللي كيعجبو فالبنت مكيحملش قوة الصبايغ بلا فايدة و قوة زواق تتولي تبان بحال شي لوحة تشكيلية تتمشى و لاحظ عاوتاني انها بسيطة فلبسها و ممكلفاش على راسها بزاااف حيت من للعلاقات اللي دوز مع البنات كان كيشوف انه كتجي مزوقة و طالقة الشعر و دايرة قوة ليزاكسيسوار و قوة الروايح تتعدفو عكسها اللي ماشم ريحتها تا خرجو قدام الكافي و دازت واحد النسمة ديال البرد خلات ريحتها دخل مع نيفو وياريتو ماشمها ريحة خفيفة انوثية تتبين شخصيتها الرقيقة و البريئة……ثارت انتباهو طريقتها فالمشي كتمشي عادي بلاما تعوج ولا تتعمد تحرك مفاتنها و عاد راسها فالارض مكتبقاش دور فراسها و تشوف فهذا و هذي مشية بريئة خجولة تتعبر على طبعها الحشومي من اللخر جابت ليه التمام و مازال تتبهرو كلا مرة طيرات نعاسو و خلاتو هو اللي كان مازال مستبعد فكرة الزواج من بالو بحكم المشاكل اللي عندو يعجل بالفكرة و يضمنها لراسو قبل مايطيرو ليها بيه و كان تخمينو صحيح حيت عند ياسمين اللي كانت وصلات على عائلتها الصغيرة سلمات و گلسات كضحك مع باباها بخفة ايلا سولتيها شكون عزيز باباك ولا ماماك بلا تردد غتجاوب بابا سي مصطفى الحنان و القلب الكبير السخاء كيعطي بلاما ياخد عندو ياسمين شي حاجة غالية معندهاش ثمن ولو دعاء و محمد خليل ولادو ولكن ياسمين معزتها كثر و ماشي غي عندو فالعائلة كاملة ياسمين العزيزة والغالية متخسر خاطر حد متعدا على حد عزيزة على الكبير و الصغير فنما جلسات تتبقا متنوضش ايلا مدويتيها مادوي عوينات جداها ام باها و بلارة العائلة. هضرو شوية و طلبو العشا فالاثناء اللي كانو هوما داوين كان محمد وصل عند ماماه و خواتاتو

محمد: ها واحد السلام عليكم الاخوان مازال منويتو

سميرة:(بابتسامة بشوشة باينة فيها الطيبوبة والقلب الابيض) مازال اولدي هاد المدينة هواها خفيف ميسخاش بيه الواحد

تيسير: والله اخويا مكرهت نتحولو هنااا فروجية هاد المدينة و هواها نقي بعيدة على المشاكل

نسرين: كولشي على المشاكل سطري عليها راه هوما اللي مكرهينا…..

محمد: اودي حمدو الله مداخلين مع حد ما شركا مع حد وغا بنات

سميرة: ياما حذرتك اولدي و مابغيتيش تسمع ليا بالحق تا دابا ربي كبير و حقك محفوظ عندو

محمد: دكشي اللي كاين اميمتي

سميرة:(بضحكة عريضة) ايوا اوليدي بغيتي تنسيني داك الزين المسرار هو علامن دويتي ليا

نسرين: زويييينة ياخويا قوووووقة

محمد:(ضربها لراسها بخفة كيضحك) جمعي فمك هههههه اش هاد الاسلوب (دار عند مو مخاطبها) هي هديك اميمتي اللي نويت معاها الحلال

تيسير:(بهداوة و رزانة شخصيتها قريبة لياسمين الفرق هي انها اجتماعية و تتخالط مع الناس غي هي رزينة و هادية) الله يكمل الله بالخير اخويا باينا فيها بنت الناس

محمد: ربي يخليك اختي ياربي يسهل ندير ليكم شي عراسية مطرطقة

نسرين:(هضرات بلاما تحس) دوك القوم راه مخاسهمش بنت الناس تليق ليهم غا بنت الحرام

محمد:(ضرب فيها تخنزيرة تنوض الميت من قبرو و مها شافت فيها كتندب حناكها) نعام الاخت

نسرين:(عاقت اش قالت و ندمات ولات تتبيض بيضة هنا و بيضة فالعش) هاء لا اخويا زعما قلت لك راه قباح هادوك

سميرة:(كتسايس مع ولدها و تغمز فبنتها الغمزة العجيبة ديال الامهات) تهدن اولدي راك عارف ختك غا كتزبق فالهضرة

تيسير: لا بغيتي الصراحة اخويا مي و عيالات خوتي و شيماء ميوقرو حد عاد لا كانت درويشة و متهزش الراس ياكلوها بعظامها

محمد:(تنهد بتعب تيفكر كيفاش غيدير ليها) داكشي اللي لقيتوني كنفكر فيه ايلا كتاب و كانت من نصيبي راه مستحيل تجلس معاهم فدار وحدة ومن جيهة خرا ميمكنش نخلي الواليد بوحدو

سميرة:(بحكمة و حنية كيدوز يدها على ظهرو) خلي هدشي تيجي وقتو اولدي كلشي بوقتو مزيان

محمد: غير دعي اميمتي دعي

كملو هضرتهم و تعشاو و جمعو الوقفة كيما تا ياسمين و عائلتها اللي تعشاو و قررو ينزلو شوية لبحر يضرب فيهم الما نزلو مشا باها و خوها حدا الما فحين هي و مها شدو كراسا و جلسو مجمعين مستغلة ثورية الفرصة حيت قليل فين كتجلس معاها ياسمين و تحثت معاها هكا و قرات تقوليها الخبر اللي ماعرفات كيفاش توصلو ليها

ثورية:(كتبيض فعينيها عارفا بنتها و حساسيتها من جيهة الموضوع ولكن خاصها تقول ليها و تعرف رأيها تاهيا فيه) بنتي ياسمين دوري عندي نهضر معاك

ياسمين:(دارت عندها بابتسامة معرفاتش علاش ملي تفارقت معاه وهي مبتاسمة و ناشطة مقدراتش تفسر الشعور اللي كتحس بيه) نعام اماما…..

ثورية: عيطات ليا نعيمة ليوم (وهي كتعاود ياسمين وصلها مسج فتيلي نزلات عينها لقاتو من عند محمد كاتب فيه 💌محمد:القمر و البحر و نتي بزاف عليا😍

ابتاسمات بخجل بينها وبين راسها و مبغاتش دور موراها عرفاتو غيكون اللور ولكن معندهاش الجرأة الكافية باش دور تشوف فيه كتافات ب ايموجي فيه ابتسامة و دارت عند مها اللي كانت باقا تتهدر)

ياسمين: مسمعتكش اماما واخا تعاودي

ثورية:(ميقات فيها) مممم سهيتي ولا حضيتي داك المشقوف اش عندك فيه تا سهيتي

ياسمين:(بدات كتفتف و تبيض فعينيها) احم لا والو…. غ غا واحد المسج من عند دعاء اه دعاء

ثورية:(كضور فعينيها عايقة بيها مخبية شي حاجة) ممممم دعاء وا باز قلت لك صونات ليا نعيمة قبيلة

ياسمين: اه كيدايرا لاباس عليها

ثورية: لاباس سلمات علك و جابت لك شي خبار

ياسمين:(عقدات حجبانها باستغراب اشمن خبار غتجيب ليه مراة عمها) ياك لاباس منصف بيه شي حاجة

ثورية: لا لا مابيه والو غير عجوزة رانيا دوات معاهااا عليك

ياسمين:(باستغراب اكثر) علاش حماة رانيا غتهضر معاها ليا

ثورية:(عوجات فيها فمها بغيض) يشويني فيك مخك ثقيل حجرة

ياسمين: وا نتي من صباح ونتي تقطري عليا فالهضرة مافهمت والو

ثورية: بغات يا لالة تخطبك لولدها

ياسمين:(قفزات و تفكرات نجم و الحادثة كاملة حسات برجفة فذاتها كاملة محاملاش تفكر الواقعة) شكون ولدهااا

ثورية: يادلي راه عندها غير جوج ولاد احمد مزوج و لاخر سميتو نجم الدين (شافت فبنتها كتحاول تقرا ملامحها وبدات كتسايس) الصراحة مكرهتوش لك ابنتي راجل بخدمتو برزقوو تختاري بين العزارة غا هو

ياسمين:(بعصبية اللي قليييييل و نادرا فين تتخرج و تتبان ولكن ملي الموضوع فيه اكثر شخص كتمقتو و كتعافو سالات الهضرة ومحساتش براسها تا غوتات) كيفااااااااش

ثورية:(قفزات بالغوتة ديال بنتها و عرفاتهاااااا شربناااات ولكن معارفاش لاش هي دايرا فبالها ان نجم هو الرجل المثالي لاباس عليه و زوين و ميسور و مو ظريفة و غيوفر لبنتها اللي بغات معارفاش بيلا لالة بنتها تفضل تسكن فبراكة و تاكل الخبز و اتاي مع شخص يقدر المراة و ميشوفش فالمراة كأنها حاجة او سلعة او وسيلة يلبي بيها رغبتو على انها تسكن فقصر من قصور الف ليلة و ليلة و تلبس من اغلى الماركات و تسافر للاحسن لبلايس مع شخص كيعريها بشوفاتو كيخليها تكره انوثتها تكره كونها تخلقات انثى، خنزرات فبنتها وقالت) مالك ياك لاباس مالنا على الغوات قلت الحق مكاينش ماحسن من ولد زهور راجل و نص….

ياسمين:(تترعد بالاعصاب مهما حاولات تفكر او تخيل راسها معاه والو متتقدرش تتعافو كتشمأز منووو) واش عرفتي راسك اماما اش كتقولي ولا لا راه واخا يبقا هو اخر راجل على وجه العديم عمرني نكون ليييه

ثورية: ياااااك الالة بنتيييي وعلاش بسلامة شنو فيه هاد الراجل اللي معاجبكش

ياسمين:(بغيض) مكنحملوووووش كنكرهوووووو

ثورية: واش مريضة ولا باغا تمرضيني ابنت كرشي الزواج فيه مكنحملوش اللي كنعرف جاك رزقك غديه راه دعاء مكانتش تتحملو هاهيا دابا بيخير

ياسمين:(مصدومة فمهااااا غي تتشوف واش هادي هي الام اللي تتفكر لبناتها و تقلب على راحتهم هي لاحت اللولة و باغا تلوح الثانية) ماما الله يهديك واش اما هي دعاء (تغرغرو عينيها و حسات بالظلم) دكشي اللي دازت منو دعاء انا منقدرش ندوز تا الربع منوووو لحتي دعاء و مهتميتيش ليها تا كانت غتموت فيها و دابا كتعاودي نفس الغلط واش حنا بناتك ولا بنات ذرتك (نزلو دموعها و هزات ايديها تتمسح فيهم بعنف)

ثورية:(مأثروش فيها دموع بنتها مقتانعة بيلا هي اللي تتعرف و دعاء كانت غير تتفشش و هاهيا دابا بيخير و تا ياسمين غير كتفشش مايمكنش تفلت نسيب بحال هذا) حيت بناتي باغاكم تعيشو فمستوى حسن من هذا حيت بناااااتي بنات كرشي بغيتكم دييييو رجال بحال الجبال تكونو مراة فلان و فرتلان و تكونو همة وشان ولكن ماولدات كرشي غا الحاشية و ختها هلكتوني فصحتي كنجر بيكم للعز و نتوما باغيين تبقاو فالدل (تتسوط و معصبة معاجبها حال بنتها ترفض هضرتها بنتها اللي كانت تتقول الحنينة واللي تتسمع الهضرة و متخصرش الخاطر و للاسف هذا هو حال الدرويش و الساكت خاصو ديما يحني الراس و يدير الخاطر لهذا و هذا تا يبقا هو بلا خاطر ولو على حساب مصلحتو و رغبتو) واش بغيتي تبقاي تيتي نيني حدايا كيجيو فيك غير الرجال الهمة ونتي بغيتي تبقاي لاسقة ليا فجنابي تيفوتك الطران

ياسمين:(مصدومة من هضرة مها اي نعم كانت عارفة بيلا مها تفكيرها تيقدام فشي نقط ولكن ماشي لهاد الدرجة ماشي لدرجة انها تحسسها انهاااا مثقلة عليها و ان الزواج هو الحل ديال المراة باشما يفوتهاش طران صدماتهااااا و سكتاتها وبلاما تحس خلقات فجوة اكبر من اللي كانت بينها و بين بنتهاااا نزلو دموع ياسمينة و قالت بصوت مرتجف كيقطع فالقلب) ميحسابنيش مثقلة علك الالة ثورية و خاصك غير فين تلوحيني متخافيش غيجي واحد النهار و غنمشي و منبقاش مثقلة علك و قريب هاد النهار بزاااف غير هو كوني اكيدة انني عمرنيييي مغنكون لسي نجم ديالك مراة ولو نعرف نقتل راسي (ناضت كتشتف فرملة متجهة عند باها تقولو باش يمشيو مخلياها موراها تتعيط و تسب عندها فكرة و مقتانعة بيها ولو يجي باها من القبر متبدل فكرتهااا)….

توجهات ياسمين عند باها باكية هي من النوع اللي هادئة هادئة لدرجة كبيييييرة اعصابها ثلاجة الحاجة اللي كتعصبها مكديرهاش و كتبعد منها و كيما كنقولو الباب اللي يجيك منو ريح سدو و استريح و ياسمين غادا بهاد المبدأ مكتخلي تا حاجة تنغس عليها حياتها ولكن ايلا بقات تا تعصبات كتهيج بحال البحر كتجمع الاخضر و اليابس موراها كيبقااااو غير دموعها بحال اثار مياه البحر على الدمار اللي خلاه مورااااه……توجهات عند باها وقفات حداه علا فيها عينو لقاها بداك المنظر تخلع و قلبو قفز كيفاش حشيشة قلبو كبدتو و روحو والجزء الاكبر من قلبو كيبكي شنو بيها و شنو عندها شكون قلقها او قاسها هادشي اللي كان كيسولها و هي غير كتبكي عنقاتووووو و تكات على صدرو كتخرج فسمها على شكل دموع معنقة الصدر الحنين اللي تمناااات و ترجات تلقا فمها شوية من حنانو ولكن للاسف هادي هي الدنيا ماشي كولشي اللي كنبغيوه كنلقاوه و هادي حلاوتها طمنات باها بيلا بيخير و فشات قلبها بالبكا و خبراتو باش يمشيو للدار يرتاحو فعلا دكشي اللي كان مشات لدار مدواتش مع مها واخا سمعات غواتهم فالبيت و عرفات بيلا باها مخلاش لمرتوووو و عطاها عظم فين تكدد و زاد ريحها ملي اكد ليها على رفضو التااااام اولا استجابة لرغبة بنتو و ثانية حيت عارف نجم و عارف فعايلو و قيمتو اما ياسمينة فبدلات و هزات التيلي لقات مسج من محمد

💌محمد: وصلتي؟

💌ياسمين:(جاوباتو بلا خاطر) وي وصلت

💌محمد:(جاوبها فالحين) نصوني ليك؟

💌ياسمين:(صوتها مخنوق و باينا فيه باكيا و معندنها خاطر للهضرة) منقدرش ناعسة مع خويا فالبيت

💌محمد:(عاق بيها كتهرب حيت كون بغات تهضر غتلقا الحل و عذرها عارفها حشومية) واخا ارتاحي ❤️

💌ياسمين: 🥰

فاضت بياسمين وملقات تا حل من غير تعيط على دعاء واخا الحال معطل ولكن ايلا مخواتش قلبها و متنفساتش مغيديهاش النعاس و غتبقا فايقا الليل كلو فعلا دكشي اللي دارت صونات لدعاء جاوبتها مورا مانعسات ولدها عاودات ليييها كولشي من اللقاء تال الهضرة ديال مها تال رفض باها و حسات براسها ارتاحت شوية بحال شي جبل كان محطوط فوق صدرها و انزاح…..

📱دعاء: گااااع هدشي وقع فهاد العشية اناااا مفهمتش هاد ماما كيفاش كتفهم الهضرة راه دوات معايا قبل منك و سمعتهم ليها قلت ليها السيد ميصلاحش لياسمين ولكن اللي فيها ما هناها

📱ياسمين:(كتبكي بحرقة على داك الاحساس اللي خلاتها مها تحس بيه) ماما ادعاء سخات بيا و وليت متقلة عليها بغات غير فوقاش تفك مني معرفتش علاش كدير معايا هكا

📱دعاء:(كتنهد و تسوط بعصبية عزيزة عندها ياسمين بزاااف و ياويل اللي قرب ليها ولا دواها حيت عارفاها متتعرفش تجاوب و متتعرفش تاخد حقها و ثاني حاجة حيت حنينة و ظريفة ماظلم حد متعدا على حد) ياسمين حبيبتيييي تهدني مالك دابا محمقة راسك راه والله لا كنتي ليه مرا عاد بابا رفض يعني مستحيل

📱ياسمين: ولكن علاش دير معايا هكاك اهئهئ هئ فاش ضريتها ولا جرحتها ديما دايراها فوق راسي فاللخر تجازيني هكاااا….

📱دعاء:(كتنهد و تسوط بعصبية عزيزة عندها ياسمين بزاااف و ياويل اللي قرب ليها ولا دواها حيت عارفاها متتعرفش تجاوب و متتعرفش تاخد حقها و ثاني حاجة حيت حنينة و ظريفة ماظلم حد متعدا على حد) ياسمين حبيبتيييي تهدني مالك دابا محمقة راسك راه والله لا كنتي ليه مرا عاد بابا رفض يعني مستحيل

📱ياسمين: ولكن علاش دير معايا هكاك اهئهئ هئ فاش ضريتها ولا جرحتها ديما دايراها فوق راسي فاللخر تجازيني هكاااا

📱دعاد: نتي عارفة ماما ايلا نورات ليها شي حاجة فدماغها راه واخا تجيبي الكونغرس ميبدلوش ليها فكرتها و صاااافي طيبتييي عينيك و قلبك و طيبتيه ليا معاك نتي ليوما راه خاصك زعما تكوني ناشطة

📱ياسمين: ماخلات ليا فين نشط ولا نفكر تلفت و مابقيت عارفا مندير

📱دعاء: ماعندك ماديري علاما عاودتي السيد ولد النااااس و معقول و قصد الدار من بابها مدخلش من الشرجم و عاد راك مرتاحة ليه و عمرو قلل علك الادب لا بغيتي رأيي متفلتييهش

📱ياسمين:(بابتسامة خفيفة على شفايفها تنهدات بصوت مسموع) واللهما عرفت اختي فالخرجة ديال اليوم زدت ارتاحيت ليه كثر هضرتو معقولة و محاولش يقلل الحيا تا بكلمة حتى من الشوفة مكيفوتش وجهي كيبقى مركز ليا غير على عيني و فشكل معرفتش والله ولكن ميمكنش نوافق نيشان بحالا ميتة على زواج عاد ماعارفة عليه والو من غير هادشي اللي سطحي

📱دعاء: يا الهبيلة على انا قلت لك وافقي نيشان ثقلي وخليييه تايسولك و يعاود و يعاود عاد راه فترة الخطوبة راه مديورة للتعارف و هادي جاتك فرصة فين تانتي ديري دارك و وليداتك و تولدي ولادك صغيرة تعيشي معاهم و عاد يقدر يخليك تخدمي او تخدمي معاه كاع راه تبارك الله ميسور الحال

📱ياسمين: زعما هادشي اللي بان لك نتيييي

📱دعاء: ايه هدشي اللي كاين متجبدي ليه والو واحد السيمانة ولا جوج هضري معاه عادي سولك جاوبيه مرة مرة تانتي سوليه هكا شي سؤال تقلقليه و تعرفي شخصيتو كيداراااا ديك الساعة عاد ايلا جبد لك الموضوع قولي ليه هضر مع بابا واللي قالها بابا هي اللي نديرهااا و بابا راه غيسول و يسقسي و يعرف السيد كيداير وافق بابا هي هاديك ما وافقش نشوفو كي نديرو ليها واخا راه بابا 90 فالمية يوافق ايلا لقاه ولد الناس

📱ياسمين: (براحة ديما ملي تدوخ بيها تتلجأ لختها المنقذة ديالها و توأم روحها تترشدها و توجها للطريق الصحيح) ريحتيني اختي صافي هدشي اللي غندير غنخلي كولشي عالله شكرا بزاااف ادعاء ديما فجنبي وقتما حتاجيتك بصح شكرا ❤️

📱دعاء:(كضحك على هاد الهبيلة) ههههههه تا شوف هاد الحمقة على انا شحال عندي من ياسمينة قلبي الحبيبة ديالي راه غي وحيدة اناااا ديما معاك و فجنبك احبيبتي

📱ياسمين: الله يخليك ليا اكبيدة ديالييي و ميحرمنيش منك ❤️❤️….

كملو هضرتهم فمواضيع خرا واحد النص الساعة خرا و قطعو و مشات كلا وحدة تنعس املا فنهار جديد حسن من اللي سبقوووو.

فالصباح الباكر فاقت ياسمين على صوت التيلي كيصوني قفزات ملي شافت سميتو خرجات بزربة لبالكو ديال الصالون جاوبات بصوت ناعس مبحوح

📱ياسمين:الو

📱محمد: ياسمين صباح الخير

📱ياسمين: صباح النور

📱محمد:فيقتك يمكن

📱ياسمين: اه كنت ناعسة

📱محمد: ياسمين (تسنا تاسمعها همهمات) تقدري طلعي واحد جوج دقايق للسطح

📱ياسمين: احم كيفاش….. ولكن علاش

📱محمد:(بضحكة رجولية خاترة) ههههه ياودي غير طلعي و نقولك

📱ياسمين:واخة واحد خمسة دقايق (قطعاات و مشات تجري لاحت عليها بوليرو ساترها غسلات وجها و سنانها و جمعات شعرها و طلعات بخفة للسطح لقاتو عاطيها بالظهر كيشوف فالطريق لابس جينز زرق و شوميز بلومارين و صباط اسود سمع صوت خطواتها و دار عندها كيشوف فيها و مبهور بطلتها ضاربة فيها الشمس مخليا خصلات شعرها كتلمع سرعان ما قربات ليه و غاص فعسل عيونهااا و بريقهم اللي خلاه يفها فجمالها و يسبح لخالق هاد اللوحة……

محمد:(بابتسامة حب) ياسمين صافا

ياسمين:(هي بدورها كتبتاسم بخجل و حنيكاتها حومر فحال شي تفيفيحات) الحمد لله مزيانة و نتا

محمد: فاحسن حالاتي (سكت شوية وقال بلاما يحس) ياسمين.. واش ديما كاتفيقي هكااا

ياسمين:(عقدات حجبانها بعدم فهم) احم… كيفاش

محمد:(بارتباك على الزربة اللي دار) زعما واش عاد فايقا (مبهور بطلتها الجميلة اللي لبساتها كتواتيها وتجي معاهااااا ببيجابة حريرية نفس الستيل لي كتلبس ديما فالازرق السماوي مخليها تبان بريئة وصغيرة فعينيه)

ياسمين:(بخجل واضح عليها خجلها الطبيعي زايد عليه هضرتو ونظرااااتو اللي باينين عامرين بالاعجاب مستحيل متعيقش بيه) اه عاد فقت 😊

محمد:مزيان الالة بصحتك، ياسمين (هزات فيه عينها عارفاه باغي يقول شي حاجة حيت من اللقاءات القليلة بيناتهم قدرات تفهم النبرة باش كيعط ليها و كيخرج اسمها بنبرة حنينة و فنفس الوقت قوية معناها هزي عينيك شوفي فيا يا المتلفاني 😂) غنرجع للرباط اليوم

ياسمين:(كشرات ملامحها بحزن) علاش مازال الحال

محمد:(بابتسامة حنونة كيشوف فعينيها و يشبع منهم حيت قليل فين كتطلع فيه عينيها) بالعكس طولت و الخدمة كتسناا….

ياسمين: بسلامة (هزات عينيها فعينيه كنظرة اخيرة خجولة من عندها و مليئة بالحنان من عندو و زاد من حداها غادي فحالو مخليها موراه حاسة بالحنين ليه واخا كتحشم منو و مكتقويش فالهضرة معاه ولكن قدر يخلق لراسو بلاصة فتفكيرها وعلاش لا فقلبها دار شاف فيها عاطياه بالظهر و هي بدورها ثارها الفضول و دارت بخفة تلاقاو عينيهم مرة اخرى خالقين سيمفونية ديال النظرات سرعان ما دورات راسها بزربة وشافت قدامها و هو كمل طريقو مبتاسم و كيدعي الله تكون من نصيبو حيت قدر يعرف معدنها الصافي و شخصيتها الحنينة والخجولة اما عندها فتاهي مامنعاتش راسها من انها تهز ايدها لنيفها شمات ريحة ديال الكارو ديالو خفيفة غالبة عليها ريحة كريمها و تذكرات ملمس ايديه اللي مكانش رطب و ماشي خشن يد رجولية مزغبة و نقية ظفار حمرين و مقطعين نقايا و شنو كاين حسن من النقا لا بالنسبة للبنت ولا الولد اكثر حاجة كيرد ليها الطرف الاخر البال هي النظافة و الريحة الزوينة.

ماشي بالضرورة تكوني كديري بارفان غالي او حتى رخيص يكفي انك تكون ريحتك نقية ميشمش فك ريحة العرق او طياب او شي ريحة قوية خصوصا ان الولاد شمشامة (معلومة حقيقية من مصدر موثوق) واخا تكوني أجمل الجميلات اينفوا يشم فك الولد شي ريحة خايبة كتخيابي فعينيه و حتى بالنسبة لينا حنا البنات الريحة هي كولشي تقدري تزعطي فواحد عاطية منو غير ريحة ديال شومبوان و باندوش عاد ندوزو للكماليات الولد كيركز فاظافر البنت يكونو نقايا و ميكونوش طوال و ايلا كانت دايرة الصباغة متكونش مقشرة (مكندويش على هادوك اللي كيتزعطو فدوك ماليات الحجبان مربعين مطراسيين بالسيراج و صباغة خضرة مقشرة و خالة فوق فمها خضرة كندوي على الناس النقايا الواعيين) اللبس يكون محترم الاناقة مكتعنيش التعري او قوة الالوان او العقيق او قوة الاكسسوارات بالعكس البساطة مفتاح الاناقة و البساطة حتى فالميكاب ماشي وجهك بيض و عنقك كحل و عاد ماليات فوندوتان مقشر لماذا ياااا اختاااااه. (هضرت بزااااف فعاد الموضوع ولكن راه فعلا مازال فيه ميتقال و كيضر فالخاطر)….

نزلات ياسمين لدارهم تلاقات مع مها مدواتش معاها وتا ماماها محاولاتش معاها بالعكس مازال مقتانعة انها هي الصح وهوما كلهم غالطين (هاد النوع انا بالذات كيعصبني) خبرها باباها بيلا غيدوزو نهار برة غيمشيو لبيسين و يتغداو تما من بعد يمشيو لايميوادار يتعشاو تما و يرجعو مشات لبيتها جبدات كسيوة حمرة سميطات رقاق هابطة تال تحت الرحبة بصديفات وفيها جيوب جاية من الفوق مزيرة و ترخفات من عند الخصر دهنات لحمها بلوشن ديالها و رشات سبراي منعش فيه ريحة الياسمين الزوييينة و لبسات كسوتها اللي برزات لونها الابيض بانت وصطها بحال الملاك دارت اكسسواراتها من سنيسلة خفيفة و كورميطة و خلخالها اللي مكيخطاهاش طلقات شعرها البوكلي اللي درق كتيفاتهااا العريانين و دارت فوقو نظيظراتها ديال الشمش رطبات وجها ودارت ليكرون ديالها مشطات حواجبها الرقاق و اكتفات بماسكارا و مرطب شفاه فقط رشات ريحتها و هزات صاك ديال الحصيرة متوسط عندو صميطة طويلة و جاي هو ضاير…. رشات ريحتها الناعمة و لبسات فرجليها صنيديلة خفيفة ضربات طلة فالمرايا و يااااااااالهي ملاك كيتمشى فوق الارض (فينك امحمد تشوف الجماااااال) خدات صورة فمرايا طويلة فالكولوار بينات تفاصيل طلتها و دارتها فالانستغرام و صطوري واتساب. كانو كلهم موجودين هبطو داويا هي وباها ركبات هي تسوق باها حداها و خوها اللور طلق باها الشعبي عزيز عليه النشاط و توجهو لآكوابارك 🌼🔥

نخليو العائلة السعيدة تستمتع بوقتها و نهزو رحالنا فاتجاه العاصمة الادارية للملكة المغربية العاصمة الرباط و تحديدا المدينة القديمة لواحد من اعرق الرياضات اللي متواجدة بالمدينة رياض الحاج تاج الدين رياض كيتميز بكبر المساحة ديالو مساحة خيالية لدرجة انو تعرض على الحاج الله يرحمو يبيعو باثمنة خيالية ولكن كان رافض و كانت وصيتو قبل مايموت لولادو انهم عمرهم ميفرطو فرياض جدودهم الرياض كيسكنو فيه 3 اسر اسرة سي حسن تاج الدين اب محمد و عيالاتو بزوج و ولادهم و عيالاتهم و اسرة سي عمر تاج الدين اخ السي حسن المتوسط و مراتو و ولادو و اخيرا اسرة السي رشيد الاخ الاصغر و مرتو و ولادهم. على قد ماهما كثار الرياض كان ضامهم و فايتهم لديك جيه بحكم انه كبير و حتا الترميمات و الاصلاحات اللي دارو ليه قدرو انهم يستغلو بزاف المرافق كانت غير ضايعة الرياض فيه ثلاث طوابق و عاد السطح كدخل من الباب الضخم ديال الزنقة كانه باب قصر فعهد العثمانيين ف كولوار صغير فيه باب اخر اصغر من اللول كيخرج لوسط الرياض اللي كان سقفو عريان منطقة شاسعة وسطها نافورة كبيييرة فيها الماء صافي و بعض اشجار لافوكا و الخوخ دايرين بيها مضللينها فيها جليسة تقليدية و دايرين بيها البيوتة و الكوزينة اللي كانت كبييييييرة و واسعة فيها جميع اصناف الماعن اللي كاينين و الات الطبخ و كولشي الطابق كان فيه ايضا بيت السي حسن مع الزوجة الاولى ديالو حفيظة بيت كبير و باقي الغرف كانو عبارة على صالونات صالون كبيييييير غير ديال العرايض مفرش باجود انواع الثوب و فيه احسن و اجمل الديكورات مفتوح على صالون اخر قدو مفرش هو الاخر بطلامط فخمين و زرابي تركية و اجمل الديكورات حداهم صالون عصري مفرش بدي فوتوي ذهبيين فخمين بحال صالونات الافلام المصرية تاهو كان كبير و واسع و عاد فاخر الرواق من جيهة الدروج كان حمام مغربي بلدي بالعواد و القوادس فالحيط و احسن زليج و الشمع و المستحضرات البلدية من حناء مدقوقة على اليد و ورد و قرنفل و زيد و زيد اما الطابق الثاني فكانو فيه غرف النوم غرفة السي حسن الثانية و مراتو لالة سميرة تاهيا كانت كبيرة و مفرشة باحسن فراش جنبها غرفة السي عمر و مراتو لالة بهية و غرفة السي رشيد و مرتو لالة نرجس عاد غرفة الام لالة كلثوم و غرفة الاخت حكيمة عاد كاينين غرف الولاد…..

نبداو بولاد السي حسن غرفة الابن البكر سعيد و مرتو خولة حداها غرفة خوه يوسف و مراتو اميمة و حداه غرفة فيه جوج اسرة وحدة ديال نسرين و وحدة ديال تيسير و غرفة اخرى بحالها كانت ديال شيماء و احلام ولكن رجعو كينعسو فيها بنات عمر بجوج وحدة عندها 19 سميتها صفاء و وحدة قد نسرين سميتها سهام و غرفة ديال خوهم الاكبر امين و مرتو حياة و عاد غرفة البنت الوحيدة ديال رشيد فعمرها 24 سنة سميتها سلوى و غرفة بنت حكيمة امنية عندها 25 عام عاد اخر غرفة كانت غرفة محمد رغم انو مساكنش معاهم فالرياض الا انه مرة مرة كيدوز معاهم وقت و كيضطر يبات و الطابق الثالث فكان عبارة على غرف ديال الحفايد الغرفة الاولى ديال معاد و ادم ولاد سعيد و فوزية و الغرفة الثانية كانت ديال محمد امين ولد اميمة و يوسف و زكرياء ولد امين و حياة و عندهم بنت فعمرها 8 شهور مازال كتنعس معاهم و كاين فنفس الطابق حمام و مرحاض خارجيين و صالون دايرينو للدراري فيه الالعاب و التلفزيون و فاخر و ما تبقا 3 غرف للضيوف و اخيرا السطح اللي قاسمينو النص خاوي و النص فيه جليسة زويييينة بدريگة و مجموعة من المحيبقات فيهم نباتات مختلفة و سديدرات و وسايد و طبيلة خشبية الوسط و دايرين بيهم فنانيس و شمع جلسة حميمية زوينة و كان هذا هو رياض الحاج تاج الدين اللي كان مليئ بالحياة و الحركة و الغوات و البرائة و اللحظات الزوينة ولكن ملي كنذكرو الزوين ضروري يكون معاه الخايب و كيما هاد الرياض جامع بزاف الحوايج الزوينين مخبي حوايج خايبين و خايبين بزاااف اييلا تفضحو يقدر يتهدم ساس هاد الرياض العريق.

فغرفة من غرف الرياض كانت جالسة بنت ف26 من عمرها بنت رغم ان ملامحها زوينة ايلا انها كتبان فوجهها الحدة و الغرور و الغطرسة بعيون لوزية بنية اللون جميلة و زايدها الكحل الاسود جمال على جمال و لون قمحي و شعر اسود و قوام رشيق كانت جالسة فوق ناموسيتها و حداها بنت اخرى ظاهرة عليها ملامح الشر و الغرور حتى هي و كيدويو بصوت منخافض :

البنت2: ياخوفي تكوني كتلعبي بالنار

البنت1: مكاين لا نار لا والو اللي كنعرف انو ديالي و غيبقا ديالي طارت معزة نزلت معزة

البنت2: واش منيتك اصاحبتي راك مزوجة و والدة واش كتفهمي

البنت1: مكيهمنيش و مهامني لا داك الولد ولا الكلب ديال باه اساسا ندمت على النهار اللي تزوجت بيه فيه ولةن لا سماحة للي زرفني فديك التزويجة

البنت2: سمعيني ا اميمة راك غتندمي على هدشي اللي كديري راني خايفة عليك

اميمة: متخافيش عليا خافي على روحك اما انا راه كنبغيه و منقدرش نتفرق عليه و غيكون ليا طال الزمان ولا قصار و عارفة راسي اش كندير مناش بنت صغيرة مازال نجيبو تال بين يدي

البنت2: لا نتي حماقيتي واخا الالة هاهو تاهو باغيك اش غديري معاه غاطلقي ميمكنش وشنو غديري

اميمة: شفتي نهار يبغيتي ويقبل يكون ليا مغيبقا يهمني لا حلال ولا حرام ولا كان الحلال بلا بيه لاهوما الحرام معاه راه كنعشقو اعفاف

عفاف: فكري مزيان فكري راك ظالمة راسك و ظالمة معاك داك الراجل اللي نهار و ماطال ونتي تحرشي فيه على خوه شي نهار طيح روح بيناتهم

اميمة:(هزات كتافها بعدم اهتمام و ردات شعرها اللور) و طيح متكونش غي روحو و طيح روحمن بغات تكون مازال غندمر هاد العائلة غير بلاتي

عفاف:(كتشوف فيها بحيرة ولكن معندها مادير غير تعاونها) ونتي عارفاني انا ديما معاك ياك (قربات عنقاتها و ابتاسمات بشر)….

نخليو هاد الجوجات و نهزو رحالنا لكن هاد المرة مغنمشيوش بعيد بزاف غير فالرباط نيت اللي كان وصل ليها محمد و مو وخواتاتو راجعين من رحلة الاستجمام اللي كانو فيها باركا الاوطو قدام الباب و دق فالباب حلات ليه الخدامة دخلو النسا و هو بقا كينزل فالشوانط دخلهم و دخل كيسمع فصوت مراة باه حفيظة اللي كانت جالسة بنخوة فجليسة اللي كاينة وسط الرياض لابسة تكشيطة حمرة و لايحة درتها على شعرها الاحمر بالحنة دايرا سنسلة ديال الذهب ثقيلة فيها مصحف و يديها كيتخرشو بالدمالج و قوة الخواتم مرة يكون فعمرها 56 سنة باينة فيها واعرة و قاصحة مقابلة معاها سميرة ذرتها اللي كانت لابسة جلابة خفيفة مخيطة بالراندة و صبيبط دومي طالون و محيدة الدرة على شعرها الطويل رطب و دايرا ليه ليميش دايرا اونسومبل ديال الذهب خفيف راقي وجها مجبد و بيض و مكحلة عويناتها الخوضر بحال محمد زويييينة و مسرارة و باينة فوجها الطيبوبة و الحنان اما نسرين و تيسير فغير سلمو و طلعو يرتاحو سلم محمد على مراة باه بغير نفس مكيحملهااااش و ممسروطاش ليه و عليها خوا الدار مناسيش دكشي اللي دوزات عليه فصغرو طبيعي حاجة الصغر عمرها مكتنسا و تاهيا مكتحملوش حيت طلع حسن من خوتو الكبار و دار دكشي اللي مدايرينوش هوما مشروعو كيدخل الزبابل ديال الفلوس عاد داخل مع باه بالنص فالمحالات الكبيرة ديال الاثاث و ثواب الطلامط و باه منينما داز يرضي عليه ماشي بحال ولادها اللي طلعو بحالها الخبث سرى ليهم فالدم هزات فيه عينها و رجعات كتعبر فسميرة و قالت

حفيظة:(هازة حاجبها و كتعبر فسميرة اش تزاد فيها و اش نقص) ولفتي اغادير اسميرة و جات معاك

سميرة:(بابتسامة صفرة) ولافة اختي مكرهتش نسكن فيها عاد ولدي محمد الله يرضي عليه مخلا فين دانا و سارانا

حفيظة:(بسم و كره هي اللي عمر ولادها دخلو عليها تا قبطة ديال النعناع) ايوا محمد كتساري غير مك و حنا ماعليناش الله

محمد:(جالس مكفح بجلسة رجولية تيلعب بالكونطاك رد باستهزاء) لا حاشة اخالتي وقتما بغيتي تمشي نعطي سوارت لواحد فدراري يديك (قالها عن قصد حيت عارف ولادها ميديوها تال الطبيب وتاهيا متخويش الدار و تخليها خاصها تبقا فالدار تحكم فالكبيرة و الصغيرة و تسيطر على كولشي تدخل فالكبيرة و الصغيرة و تحرر العيشة فالكل عاد ترتاح)…..

يله بغات تجاوبو قاطعها صوت انثوي كبير فالعمر كان صوت جداه لالة كلثوم مراة فعقدها السابع مراة مبشورة و باينة فيها كانت زوينة فصغرها و كيما كنقولو ايلا مشا الزين كيبقاو حروفو لابسة قفطان بيض و محزمة بمضمة ديال الصم الحر و فرجلها شربيل حتى هو صم حر الوجه صافي بيض رغم التجاعيد لكن مازال زينة و اللي زايد مزينها طيبة قلبها و حبها للخير. محمد هو اعز واحد فحفايدها كيفاش ميكونش اعز واحد وهو الحنين فيها و ديما ضارب همها و يسمع ليها تمرض تلقاه حداها يموت عليها و تموت عليه كانت جنبها عمتو حكيمة اللي تاهيا زويييينة و شابهة لمها لابسة قميص جوهرة و درة و شربيل و ذهوباتها تشالي مات راجلها و خلا ليها بنت فعمرها 13 عام هزات راسها و سكنات بين خوتها و حدا ميمتها و اراك للحرب مع عيالات الخوت من غير سميرة اللي عزيزة عند الحاجة كلثوم و حتى حكيمة حيت مراة طيبة و خاطيها فعايل الشيطانات الخرين.

الحاجة كلثوم:(جاية كتخلف بشوية و ريحة المسك سابقاها) الغالي ولد الغالية على سلامتكم

محمد:(تلفت شاف فيها بعيون فرحانة وهو مبتاسم و ناض بزربة باس ليها راسها و ايدها و سلم حتى على عمتو و عنقهم بالجنب) الله يسلمك اميمتي كيبقيتي الحنينة (دار مخاطب عمتو) ونتي اعمتي كيدايرا

كلثوم:( سلمات عليها سميرة و خداتها بالاحضان تحت نظرات حفيظة و بهية اللي خلطات عليهم) الحمد لله اولدي بشوفتك وليت بيخير توحشتك الغالي

محمد:(مكلفش راسو ينوض يسلم على بهية اساسا اللي كيهموه فهاد الدار معدودين على رؤوس الأصابع كمل هضرتو مع جداه) حتى انا توحشتك بزااااف الحنينة و درتي فالطة نتي و عمتي و امنية كون مشيتو تبدلو غير الحيوط

بهية:(نقزات بلاما يدويها تاشي واحد) و حنا معليناش الله اولدي

محمد:(بلاما يشوف فيها قال) محبست على تاواحد الدار (كمل هضرتو مع عمتو) فين واحد امنية اعمتي غبرات

حكيمة:غتكون اولدي غير فالحانوت مع الدراري راك عارفها

كملو هضرتهم بلاما يعيرو اي اهتمام لدوك جوج لفعات كانهم مگالسينش تغداو و ناض محمد يطل على مگازتو وهو خارج هز التيلي بغا يصوني لياسمين صيفط ليها مسج فواتساب و دخل لسطوري ديالها لقاها لايحة ديك التصويرة هو يتصدم مابقا عارف مايدير هبلاتو و ثارت رجولتو فالحمر اللي لايق على جسمها بشكل خرافي اكيد هو بحالو بحال اي راجل فنفس سنو مكايعاني من تا مشكل ولكن عمرو ما هبلاتو شي وحدة لهاد الدرجة اكيد علاقاتو كثيرة ولكن عابرة اما ياسمين فحكاية اخرى غير شافها نواها حلالو نيشان وملي شاف التصويرة مكرهش يمشي يجيبها هكاك بيها يدوزها للعدول و يدخلها للدارو يزين بيها فراشو و مملكتو زاد اصرارو عليها و زاد قرر انها غتكون ليه فيما قريب سكرينا التصويرة و دوز ليها لابيل…..

عند ياسمين اللي كانو كيتغداو طلعات عندهت راه كيصوني ليها استأذنات منهم انها غتمشي للطواليط و مشات طارت لجيهة اخرى بعيدة عليهم خدات نفس عميق و شجعات راسها عاد جاوباتو

📱محمد:(كان سايق و طالق مكبر الصوت) الو ياسمين

📱ياسمين:(كتصفار و تحمار بحالا مقابل معاها) احم…. الو

📱محمد: ياسمين صافا؟

📱ياسمين: الحمد لله…. ونتاااا ؟

📱محمد:(تنهد) الحمد لله (بجرأة زوينة) ناقصاني غير نتي

📱ياسمين:(بحشمة صفارت و خضارت معرفات متقول) احم…..

📱محمد:(ضحك بصوت ثقيل رجولي بورشها) ههههه حشمتي تاني (قال بفضول) مازال خارجين؟

📱ياسمين: اه غندوزو نهار برا حيت راجعين بعد غدا

📱محمد:(باهتمام) مزيان الالة (بمزاح) نيت لا بغيت نشوفك ساعة ماشي بحال خمسة

📱ياسمين:(ضحكات بخفة) ههههه (سمعات خوها تيعيط و تيشير ليها من بعيد) نخليك دابا تيعيطو ليا

📱محمد:(مساااااخيش بيها مكرهش يبقا داوي معاها) سيري اختي سيري

📱ياسمين:(كيضحكها ملي كيقوليها ختي) هههه بسلامة❤️ (قطعات و بقات شادة تيلي دخلات لواتساب شافت التصويرة اللي داير فالبروفيل كان داير فيها النظاظر و تيبان وسيم بقات كتزومي و تنقص تا قفزها خوها اللي وقف عليها بغوتة)

خليل: واااا بجعد…… من صباح وانا نعيط (زدحها لكتفها بجهد)

ياسمين:(محسات براسها تا عطاتو لجدارة الوذن) امالك ازمر كتسالها ليااااا (دارت سابقاه) يله زيد قدامي تفو

مشات لعند واليديها اللي لقاتهم كيجمعو فحوايجهم شافها باها جات و قال

مصطفى: بنتي ياسمين هزي ساكك غنمشيو لدار غدا نشدو الطريق

ياسمين:(باستغراب) علاش ياك لاباس ياكما وقعات شي حاجة (بخوف) دعاء بيها شي حاجة؟؟

ثورية:(كدوي ببرود مازال هازة فخاطرها من جيهة ياسمين) مكاين والو باك عيطوليه مالين سلعة خاص نمشيو (ومشات خلات ياسمين غير كتشوف تنهدات و دارت عند باها اللي شاف كولشي اكتفى انو يضرع بنتو بجنب)

ياسمين:(تنهدات بحزن و حز فخاطرها هادشي اللي دارت ليها مها حسساتها انها فضلات البراني على كبدتها هزات ساكها و زادت مع باها بلا ماتزيد تا كلمة جلسات لور مع خوها و مشاو للدار يبداو الميناج و الجميع باش يخليو دار نقية من موراهم)

نخليوهم يقديو شغالهم و نمشيو للرباط تحديدا حي الرياض فين كان عندو المحل سطاسيونا الطوموبيل و نزل لابس سروال جينز زرق شوميز بلو مارين حالها من جيهة الصدايف اللولين كتبان منها سنسلة رقيقة ديال النقرة كتبري و تانيها من الكمايم داير ساعة جلدية فخمة و فاليد لاخرى براسلي رجالي خفيف لابس معاهم سبرديلة بيضة هاز التيلي و السوارت فايدو دخل كيدور عينيه كان السيكيريتي فالباب سلم عليه و دواو شوية على اش داز فهاد الايام من بعد دخل لقا شي كليان داوين مع البنت اللي كتبيع قصد البنت اللي فلاكيس سولها على البيع و دكشي و شاف البيسي شحال دخل و شحال خرج من بعد طلع للبيرو فين لقا علي صاحبو و كونطابل فنفس الوقت كيجيري ليه المحل منين مكيكونش تسالمو و سولو على احوال بعضياتهم وراه شنو داز هاد الايام موراها سولو….

محمد: سعيد معاودش داز من داك النهار؟

علي: الله يجيبك على خير جا البارح داا 40000 درهم قالك محتاجهم فالمحال

محمد:(دار عندو و عقد حجبانو باستغراب) معلمنيش و كون كانت شي حاجة ديال المحال غيعلموني الدراري (كمل بتساؤل) ياك كتريگل دكشي و كتعطيه يسني عليه

علي:(قال بتأكيد) كولشي هو هداك غير كون هاني غير هو علاش كتأكد عليا كل مرة نقيد و نعطيه يسني

محمد:(بضحكة جانبية) دابا تعرف علاش اعشيريي…. مشيتي عند الحاج البرهمي على وديت الخدمة ديال الكوليكسيون الجديدة

علي: مشيت و جبتها و بداو الخدمة فيها و واحد الشهر او عشرين يوم و غتخرج خاصك غي ضرب طلة على الموديلات في اي بي

محمد:(بنظرة حنينة) هادوك بالضبط خليهم عليا غنتكلف بكولشي ليهم حيت كيخصوني

علي:(لاحظ شوفاتو و قال بتلاعب) اش هدشي اجمي اش تما (بغمزة)

محمد:(عطاه بوكس) مالك اصاحبي زربان صبر و غتعرف كولشي….. يله نتحركو نتقهواو غنتعشا فالدار اليوم…..

مشاو الصحاب يتقهواو و رجع فالعشية محمد للدار لقاهم مجموعين كاملين فالصالون لتحت لقا السلام و جلس حدا جداه حتى سول باه

محمد:(حنحن و هضر بصوت رجولي قاصح) الواليد كيف غادة الخدمة فالمحال

حسن: مزيانة اولدي دخلات السلعة و خلصنا لي فورنيسور تحاسبنا مع مالين الضريبة و كولشي هو هداك (نقز عليه سعيد)

سعيد: ملي مكنتيش كنت شاد بلاصتك انا كلشي هو هداك (قال باطمئنان عند بالو مغيعرفش محمد بيلا خدا الفلوس باسم المحل) دخلو الفلوس من عند الكليان و گاع الكريدي تخلص منهم و شاط الرباح و راس المال من الفوق

محمد:(كيشوف فيه بتركيييز عارفو كيلعب موراهم فالنوار ولكن صابر تتجي من عندهم) مممم مزيان اسيدي غدا غندوز تما و نعاود نشوف الوراق و كلشي

يوسف:(بغيض كيشوف فيه شوفات قاصحين) ياكما متايقش فينا اسي محمد

عمر:(قال بحكمة عارف محمد اش كيسوا و عارف حتى خوتو) علاش هو اشنو قال تتقول هكا عادي بغا يضمن حقو

محمد:(كيشوف فيوسف و ضحك بجنب) كون متايقش فيكم اخويا غندخل البراني يقابل شغلي تنرجع

كلثوم:(بحنية دوزات يدها على كتق محمد و طبطبات) عارفينك اولدي نتا مول العقل و عارف اش كدير (دارت عند يوسف اللي كيشوف المعاملة باش كيعاملوه و يزيد يتغاض كثر) يوسف خوك دوا على زرقو و من حقو يحفظ رزقو….

يوسف سكت و معاود قال والو حتى بداو الخدامات كيحطو العشا بداو كيتعشاو واحد اللحظة محمد وحلات ليه و بدا كيكحب حتى مدات ليه اميمة الكاس مخلوعة بزربة

اميمة:(كتمد ليه فالكاس بخوف و كتخبط ليه فظهرو بحنية خلات كولشي يرد ليها البال) بشوية عليك بشوية…… خود الما

محمد:(باحراج تسببات ليه فيه كولشي كيشوف لجيهتهم خدا الكاس من ايدها شرب و حطو مكره محاملش تصرفاتها اللي كيجيوه تافهين و مبالغ فيهم) احم….. صافي اختي غير كملي عشاك شكرا

اميمة:(رجعات لبلاصتها و عينها عليه و الاخرين كلهم كيشوفو فيها تا نغزها راجلها اللي حاضر لحدث كلو و زاد طين بلة ملي شاف مراتو حتى هي مهتمة بيه) احم…. صعيب تشرق ليك فالماكلة حتى انا كتوقع ليا.

رجتو كاملين كياكلو عادي و حفيظة غير كتشوف فمراة ولدها ميخفاوش عليها تصرفاتها و هضرتها طبيعيي ماهيا كتقرا فعايل الناس و من ديما كتلاحظ اي حاجة كتخص اي واحد فالدار، لاحت عينها اميمة مرة اخرى عند محمد لقات كاسو خوا و خبزو سالا دفعات ليه الخبز بالزربة و عمرات ليه كاسو وهو بقا غير كيشوف حتى نغزاتها مراة لوسها من جيهة لوخرى و قالت

خولة:(بهمس) عطي لراجلك اصاحبتي الخبز مالك

اميمة:(دورات عينها لقاتو خبزو سالا و كيشوف فيها مداتو ليه بالزربة بابتسامة باشما يعيقش وهو فعلا معاق بوالو) احم…. غير مشفتوش

كملو عشاهم عادي و مورا العشا عمرو اتاي و شدو الجموع كلا جماعة بيناتهم و محمد كان شاد فايدو نور بنت امين و حياة كيلعب معاها بطبعو عزيز عليه الدراري الصغار و حنين فيهم كيتعجبو البراءة اللي فيهم و مكرهش يرجع قدهم معارفين لا كره لا بغض لا نفاق لا والو عايشين فسلام اكبر همهم يشريو لعبة جديدة كانت حداه جداه لالة كلثوم و مو سميرة و حكيمة و بنتها امنية داوين بناتهم كيتعاودو حتى هزات الحاجة كلثوم عينها فمحمد اللي كان كيضحك مع نور ويصور فيها و قالت بحنية

الحاجة كلثوم:الله على الغالي ولدي شحال عزاز عليه الدراري الصغار

حكيمة:(شافت فيه و ابتاسمات) الله يسر ليه و يدير حتى هو دارو و ولادو من صلبو

امنية:(بمزاح) هذاك راه ولا باير غنبقاو انا وياه حتى نظفرو الشيب لبعضياتنا فهاد الرياض

سميرة:(كضحك على هضرة امنية و دوات) ههههه ياك اختي ايوا غير دعيو معاه يسهل عليه الله راه قريب

الحاجة كلثوم:(بفرحة و ضحكة خارجة من القلب امنيتها تشوف ولاد الغالي ولدها كيما كتقول و بنت بنتها امنية اكثر جوج كيحنو فيها فالدار و يهزو همها) ان شاء الله ياربي من فمك لباب سما و نشوف وليداتو قبل مانموت هو و بنتي امنية

حكيمة: برا عليك اميمتي مازال تشوفي ولادهم و ولاد ولادهم

الحاجة كلثوم: ان شاء الله

عند محمد اللي تصور هو و نور ودارها فبروفيل ديال الواتساب دخل عند ياسمين لقاها اوفلين خرج يله رجع كيلعب مع نور حتى جلسات حداه بنت تكون عندها ديك 24 عام بيضة و شعرها زعر عيونها رمادية فاتحة و رقيقة رغم ملامح وجهها الزوينة الا ان العين مكترتاحش ليها سماهم على وجوههم كانت بنت عمو سلوى جلسات حداه و مدات ايدها لنور زعما كتلعب معاها

سلوى:(عينيها عليه فيهم واحد البريق كيلمعو بحال شي ولد صغير كيشوف فشي لعبة) محمد لاباس عليك….

سلوى:(عينيها عليه فيهم واحد البريق كيلمعو بحال شي ولد صغير كيشوف فشي لعبة) محمد لاباس عليك

محمد:(شاف فيها و ابتاسم من ديما حاسبها بحال خواتاتو و عمرو رد البال لتصرفاتها مد ايدو بعفوية خربق ليها شعرها من الفوق و قال) لاباس ازويونة و نتي لاباس عليييك

سلوى:(رغم انها مكتحملش واحد اخر يعاملها على انها صغيرة و كتبغي كولشي يدير ليها حساب و يعتابروها كبيرة الا ان معاملتو هو ليها خاصة مكتشبعش منها و كتفرح بيها ابتاسمات بفرح و قالت) الحمدلله بيخير بشوفتك (عاقت براسها ملي شافتو هز فيها راسو عاقد حواجبو باستغراب) احم زعماا بشوفتكم ملي رجعتو

محمد:(محكرش على الهضرة اللي قالت و كمل) مزيان الالة كيغادة مع الخدمة مزيان

سلوى:(فرحانة باهتمامو و كتهضر بحماس كانه كيعبر ليها على حبو) مزيان بزااف عاد خديت كونجي نسافر مع صحاباتي

محمد:(للحظة جات ياسمين فبالو اللي كانت تقريبا فعمر سلوى و سمح لنفسو يدير مقارنة صغيرة بيناتهم كانو تقريبا قد قد ولكن الفرق كبير لا من ناحية الجمال واخا حتى سلوى زوينة ولكن بحال ياسمين عمرو شاف عجباتو من اول لحظة و من ناحية الشخصية بحيت ياسمين كتحشم بزاااف بزز باش كتخرج الهضرة و هادشي كيخليه يزيد يغرق عكس سلوى اللي اجتماعية و متعالية و ديما النخوة و كتبغي تبان هي الاحسن عاق براسو فاش كيفكر و ابتاسم ابتسامة جانبية و قال بينو و بين نفسو راك كتغرق ابا محمد و رجع للواقع عند هاديك اللي براسها ساهية فيه و كتعبر فيه كتشوف امامها رجل متكامل وسامتو و فورمتو وحتى شخصيتو و هيبتو اللي كتفرض على اي واحد يحتارمو وايضا لمحة البراءة الطفولية اللي فوجهو اللي كتخليك ترتاح ليه و هي نيت اللي خلات ياسمين ترتاح ليه على عكس شي بعضين(راكم عارفين علامن داوية 😂😂😂) شاف فيها و قال) مزيان فوجي مع راسك (متسناهاش تجاوب ناض مد نور لماماها اللي شافت و قالت)

حياة: جات معاك الابوة اخويا

محمد:(بضحيكة خفيفة حك مؤخرة راسو) شوية و صافي

حياة:(بابتسامة من ديما عزيز عليها محمد و حتى ماماه على عكس حفيظة ولوخرين اللي دوزو عليها العذاب الاليم و كانت كتحن فيها غير سميرة و شحال من مرة وقفات فوجههم) الله يسر لك اخويا و نشوفو وليداتك حتى نتا

محمد:(ببشاشة محتااااج لهاد الدعوة اللي غير نطقات بيها جات ياسمين فبالو و زاد تأكد انها ملكات عقلو و تفكرو لدرجة ابسط حاجة كتخليه يفكر فيها) امين اختي (رجع جلس فبلاصتو مجمع مع باه و عمامو على المحلات والخدمة)….

دازت ليلة عند ابطالنا بزوج عادية و جا صباح جديد باحداث جديدة فحياة كل واحد فيهم بحيت عند ياسمين اللي فيقاتها ماماها بكري فطرو و بداو الميناج باش يخليو الدار نقية و متولة والنفس اللي فلالة ثورية مخلاتهاش تهنا و دگاتها تا فبناتها كلفات ياسمين بالكوزينة بحيت مسحات البلاكارات و خوات الثلاجة و غسلاتها هبط خوها داكشي كامل اللي فالثلاجة باقي صالح للكونسييرج اللي دعا معاه و سيقات الكوزينة مزيان رجعات كولشي لبلاصتو و مها كتنگر عليها رغم انها دايرا فوق جهدها ولكن الام المغربية اللي فيها ما هناها واخا تحكي الحيط بالكاغط الحرش و تعاودي الصباغة كتبقاي ديما فنظرها فنيانة سالاو الجميع و الميناج مع وقيتة الغدا لبسو حوايجهم و هزو الباليزات هبطوهم لطوموبيل بقا باها و مها سدو الشراجم و تأكدو من البوطة والبريزات عاد هبطو لطوموبيل مشاو لسوق الحد يتغداو فواحد من بين المطاعم الشعبية ديال الحوت اللي متلقاش بلاصتك وسطهم خداو طاجين ديال الحوت و المقبلات كلاو و شبعو و دازو خداو املو ديال اللوز و كاوكاو و زين اركان و خدات ياسمين زيت اركان التجميلي ليها و لختها و بعض المنتجات التجميلية و شدو طريق الرجوع كان باها سايق و هي حداه

فالعاصمة الرباط عند محمد اللي بات فالرياض ناض صباح بكري خرج دار شوية السبور و رجع للدار لقاهم كيفطرر يله غادي طالع تلاقا مع اميمة فالدروج

اميمة:(بابتسامة لعوبة دفعات صدرها و رجعات شعرها اللور الشيء اللي خلا ملامح وجها تبان و قالت بنبرة محلونة) صباح الخير اسيدي محمد

محمد:(هز فيها عينو عرقان و حنيكاتو حمرين ذاتو سخونة و البيل اللي لابس لاصق عليه مبين صدرو العريض كيبان وسيم فجميع حالاتو شاف فيها بداك المنظر لابسة قميص خفيف حالا ليه الصديفة الفوقانية خلات فرقة صدرها تبان حدر راسو بالزربة متحاشي

النظر فيها) صباح الخير اختي (بغا يدوز و حبساتو)

اميمة:(ميقات من ديك كلمة ختي و قلبات عينيها و زادت شوية قربات ليه مابقاش كيفصل بيناتهم بزاف) عاد جيتي من سبور ياكما نوجد لك الحمام لتحتاني

محمد:(محاملش هاد التقرب ديالها وهو نيت اللي كيخليه كافر على الدار و قليل فين كيجي ليها قال بنبرة قاصحة مبعد عليها) لا اختي شكرا (هز فيها عينو بتخنزيرة قاصحة خلاتها تفافا) نقدر ندوز (تسناها تا عطاتو الطريق و زاد بالزربة و خلاها متبعاه بعينيها و كتنهد و تنهد على هاد الزين وكون كان ديالها متخليه ناقصو والو و كتزيد تحقد على راجلها اللي معندو تا ذنب و تحقد بالدرجة الاولى على عدوزتها و خالتها اللي زوجاتها ليه…..اميمة من قبل ما تزوج كان كيعجبها محمد ملي كانت كتشوفو فالمناسبات العائلية و كذا كان كيحمقها على عكس عبدالله اللي من ديما كانت مكتحملوش بحيت كان ديما لاصق فيها و حاضيها تال النهار اللي جات حفيظة تخطبها فيه فرحات ضانة انها غتخطبها لمحمد ناسية يوسف و قبلات بلاما تعرف شكون باش تصدم نهار الخطبة الكبيرة بيوسف بكات ديك الليلة و جدبات وحقدات على يوسف و حفيظة و نوات انها غدخل على خرابهم و ان محمد غيكون ليها وفعلا من نهار دخلات عروسة لرياض الحاج تاج الدين وهي على عداوة مع حفيظة اللي كانت ضانة انها غطلع بخال خولة درويشة و حانية الراس تخضع ليها و تمشيها على هواها حتى صدماتها….

صدماتها من نهارها اللول ملي طلبات انها تشوف صباحها رفضات و خرجات فيها عينيها و من تما و هي معاها فصراع على عكس معاملتها مع سميرة اللي كانت كتعاملها مزيان اولا حيت ام حبيب قلبها و ثانيا حيت ديك السيدة مشافت منها غير الخير و دوزات مع حفيظة و شيماء و عيالات الاعمام ايام سودة لدرجة وصلات بيهم لضرب و الجرح و الاعتداء على اعراض بعضياتهم كانت اميمة قاصحة و شيماء بنت حفيظة قصح منها بنت مها متكبرة و مغرورة وحاسبة راسها غير هي اللي كاينة فالدنيا كتبدا غادة و تقول يا ارض انهدي ما عليكي قدي دوزو حروب و مازال كيدوزو فيها، نزلات اميمة كتمايل و تعوج و جلسات حدا راجلها بلاما تشوفيه هو اللي كان كيشوفيها بنظرة حب تتعجبو و تتهبلو بزينها العربي الاصيل و دلعها و تحلوينها)

نطلعو عند محمد اللي دخل لبيتو و ردخ الباب بجهد كيفكر فهاد المخلوقة اللي عكرات ليه صباحو بعدما صبح مرتاح و مزيان كيحاول يفسر فتصرفاتها تاعيا مالقاش ليهم تفسير اخر من غير انها باغاه و هادشي اللي عمرها تحلم بيه ولا يكون ليها حيت قبل ما تكون محرمة عليه عمرو كان يشوف فيها عاد مراة خوه و محرمة عليه ساط بجهد و نصل تريكوه معصب دخل يدوش، محمد على الرغم من انه شخص حنين و ظريف الا انه بالزربة كيتعصب على نقشة ابسط الاسباب تقدر تعصبو و تخليه يكفر ولكن كيرجع بالزربة و مكيهزش فخاطرو تقدر دير ليه شي فلاش يتعصب علك و يغوت علك و يقدر توصل بيه تا يضرب ولكن دوز ساعة او جوح و يرجع عادي ضاحك ناشط مكخليش اعصابو ينغصو عليه حياتو رغم انو كيحاول يتحكم فيهم ولكن يغلب الطبع عن التطبع، خرج من الدوش لاوي عليه فوطة من لتحت سامح لتضاريس جسمو المنحوتة انها تبان من الشوفة غتعرف انه انسان رياضي عندو ذراعين قاصحين و كبار صدر عريض و مخدوم و الكريشة عادية باينين عضلاتها خفاف ايلا غاب على التمارين كتبان واحد الشوية جبد سروال اسود و شوميز بيضاء حل ليها الصدايف اللولين كالعادة و هزها من جيهة الكمام دار ساعتو و براسليه نشف شعرو اللي كان نازل على عينيه و مشطو لور بلا جيل ولا والو خلاه طبيعي بلونو البني كيلمع و رش بارفانو الرجولي اللي كيخلي اي بنت شماتو تبعو بعينيها و تغيب لبس صباط كلاس و هز مسائيلو و نزل فطر معاهم متحاشي الشوفة فاميمة اللي كلا مرة تمد ليه حاجة لقدامو وهو معصب و مبغاش يبين للحظة جات فبالو ياسمين و ابتاسم و فكر انو تزادو سبب اخر يخليه يعجل فالزواج فطر و ناض خارج بعدما ودعهم ديمارا الطوموبيل و زاد متعمد انه ما يصوني ليها ما يصيفط ليها مسج مابغاش يدوي معاها بغا يخليها على راحتها تفكر على خاطرها و مشا للمحال ديال الاثاث شاف الخدمة محركة و الكليان موجود داز عند الكونطابل طلب منو الوراق كاملين و جلس قدام البيسي و بدا كيشوف اشنو دخل و اشنو خرج لقا شحال من حاجة ماشي تال تمااا واحد المبلغ كاينة الفاكتيغ ديالو ولكن ممسجلش و سلعة مسجلة داخلة ولكن مكايناش فالصطوك عرف ان القضية داخلين فيها خوتو خدا الوراق و داكشي و خرج مقال حتى كلمة مشا للمحال ديالو حط داكشي فبيروه و خلاه و هكا دوز نهارو عادي من الخدمة تغدا برا و مشا لشقة ديالو اللي كانت فحي رياض نيت فاقامة راقية و كالم بالعساس و جريدة و البيسين اقامة ديال الناس الهاي….

كانت عبارة على شقة كبيرة واسعة تقريبا 150 متر فيها كوزينة متوسطة مكبيراش و مصغيراش مجهزة بكولشي و صالون بلدي كبير و واسع مفرش بفراش زوين و صالون صغر شوية من اللول مفرش بفوطوي جلديين و فيه هوم سينيما عاد بيت محمد اللي كان كبيييير و واسع فيه بالكون كبير فيه جليسة بالمخاد و مفرش كلو بالكحل و البيض ناموسية كبيرة و فوطوي قدامها عاد الحمام اللي فيه لداخلو حتى هو كبير فيه بينوار و رشاشة و طواليط و بلاكار فين محطوطين لي برودوي ديال محمد من غير الحمام اللي كاين برا ديال الضياف و كاينة طبيلة بكراساها ديال الخشب تقليدية و ثقيلة و اخر بيت كان فالكولوار هو بيت صغير ديال الدراري داير فيه ناموسية كبيرة للضياف دارو كانت كبيرة و فروجية مريحة للنظر مضوية و داخلة ليها الشمس من كاع القنات مفرشها بالوان مريحة و حتى الصباغة كانت زوينة دخل للدار غتعرفها دار محمد بحيت تتعبر على شخصيتو الحنينة و المريحة هكا كمل نهارو فدارو مرتاح مع راسو.

اما عند ياسمين اللي وصلو مصهوطين خرج باها جاب العشا تعشاو و كلا دخل لبيتو دخلات حتى هي لبيتها خدات دوش خفيف و خرجات لبسات بيجامة عبارة على تيشرت و شورط بدون سوتيان حيت كتحيدهم قبل ما تنعس خلات شعرها السارد مطلوق مرتاح رطبات وجها و دارت مرطب ديال الشفاه و مشات جلسات فسريرها مشعلة ضو ديال فييوز حداها خفيف يله بغات تهز كتابها تقراه وصلها مسج هزات تشوف لقاتو من عند محمد فيه

💌محمد: سلام

💌ياسمين: سلام صافا

💌محمد: الحمدلله ونتي مزيانة

💌ياسمين:(كتكتب فالمسج و مبتاسمة) الحمدلله

💌محمد:(بتنهيدة جات تال عند هاد البعلوكة و تحدو ليه معرفش تا كيفاش يجر منها الهضرة) كيدوزتي نهارك

💌ياسمين:عادي رجعنا للدار هاد العشية

💌محمد:(متفاجئ وفنفس الوقت عجبو الحال حيت قربات ليه حتى يلا بغا يشوفها ساعة ديال الطريق كافيا) وايلي ياك كنتو مازال مطولين

💌ياسمين: اه ولكن بابا خرجو ليه شي مشاغل و رجعناا

💌محمد: مزيان الالة من الخير…. نقدر نصوني لك

💌ياسمين:(حشمات و ماعرفات ماتقول من جيهة باغا تهضر معاه و كتحس بواحد الحماس فشكل طبيعي بالنسبة لوحدة اول مرة غتهضر مع ولد عامة و محمد تاج الدين خاصة يعني عندها فضول تعرف عليه كولشي وفوق هادشي تعرف و تجرب داكشي اللي كيقولو البنات على العلاقات و على الشباب هدشي من جهة و من جهة اخرى اعجابها بمحمد و بشخصيتو اللي كثير فضولها و تخليها تبغي تعرف منو كولشي، بززات على راسها و زعمات) احم واخا

محمد تبشر ملي شافها مارفضاتش هو اللي كان متوقع انها ترفض و كان غيتقبل برحابة صدر حيت عارفها كتحشم و طبيعتها هكاك ولكن جاتو من الجنة والناس ملي وافقات فالبلاصة صونا عليها هي اللي تفافات و بقات شي 20 ثانية كتزعم فراسها عاد جاوبات بصوت خفيف و حنين

📱ياسمين:احم…. الو

📱محمد:(سرات معاه واحد الرجفة ملي سمع صوتها الحنين بورشاتو و خلاتو كيضحك على راسو هو اللي عمرها كانت ليه) الو ياسمين…. مزيانة؟

📱ياسمين:(هي بدورها ملي سمعات صوتو الرجولي اللي فيه واحد البحة خاصة غمضات عينيها و بقات شحال عاد جاوباتو) الحمد لله….. احم و ونتاا مزيان؟

📱محمد: مخير فوق السلك…. قولي ليا كيفاش حتى جيتو ياك كنتو مازال مطولين

📱ياسمين:(بتبرير) بابا هضرو معاه مالين السلعة و نيت عندو شي وراق ديال الضريبة خاصو يقادهم

📱محمد:(بتساؤل) مقلتيليش ديالاش المحل اللي عند باباك زعما شنو نوع التجارة اللي كيدير

📱ياسمين: احم اه…. عندو محل ديال الحوايج و التواب و داكشي

📱محمد:(باهتمام) مزيان الالة الله يقوي الخير (بمزاح) هي انا و نسيبي حرفة وحدة….

ياسمين:(حشمااااات و تزنكااااات و معرفات ماتقول بالزربة قطعات عليه و لاحت التيلي بعيد عليها تتشوف فهاد الكائن اللي زرب عليه و تتخبي راسها فالوسادة بحالا مقابل معاها شوية حيدت راسها و تكات كتركل برجليييها نخليكم تخيلو المنظر نتوما)

اما عند محمد اللي تصدم ملي قطعات عليه معرفش مالها خافها تكون تقلقات من ديك نسيبي اللي قال هو بحسن نية و صيفط ليها مسج فالبلاصة مغير و معاجبو حال عاد كان مزيان تا تقلب ليه المود

💌محمد:(بتبرير) ياسمين سمحي ليا مقصدت والو فديك الكلمة و غتكون اخر مرة

غير سمعات ياسمين صوت المسج تلاحت بالزربة على التيلي غير قراتو تصدمات عرفاتو تقلق من القطعة اللي قطعات عليه ولكن راه حشمات و تصرفات بلت عقل صيفطات ليه حتى مسج محاولة طيب خاطرو

💌ياسمين: احم انا متلقتش غير معرفتش منقولك مكاين لاش تستسمح

محمد قرا المسج و ضحك فالبلاصة عرفها غير حشمات و زاد عجبو الحال ملي صيفطات ليه مسج كتبرر هدشي كيعني انه ولا كيهمها و مابغاتوش يتقلق عليها عاد فوق هادشي فرح حيت متقلقاتش من كلمة نسيبي كتفى انو يقول ليها تصبحي على خير و ينعس و حتى هي بالعيا نعسات متقلبات تال صباح….. ❤️

دازو ايام و ليالي و بالضبط اسبوع دون جديد يذكر من غير بعض الطرائف و الاحداث العادية من بينها زيارة دعاء ليهم فاليوم الثاني من رجوعهم….. 🔥

<فلاش باك>🌺

عند ياسمين اللي كانت واقفا فالكوزينة كتصاوب فالملوي و حاضيا مع كيكة دايراها طيب فالفران و مها حداها كتوجد فالغدا كانت جاية لعندهم دعاء تشوفهم و تبات عندهم تغداو و ارتاحو شوية حتى لمورا العصر جات دعاء و ولدها و راجلها شربو اتاي و مشا ياسين و بقات دعاء اللي كانت غتبات مع مها و ختها تحيد منهم الوحش بدلات حوايجها ببيجامة من الحوايج اللي مخلية فالدار خلات ولدها مع جداه و دخلات مع ختها للكوزينة يجمعو الماعن ويتحثو وفخلال هضرتهم جبدات ليها دعاء محمد

دعاء: مقلتيش ليا باقا كتهضري مع داك الولد ديال اغادير

ياسمين:(كتهضر باريحية بلاما تحشم ولا تخاف حيت ملي كتعاود لدعاء كأنها كتعاود لراسها ماهيا ختها و صديقتها الوحيدة) مازالين كنهضرو اختي وهو كيلمح ليا ديما باش ندوي مع بابا

دعاء:(كتشلل معاها فالماعن و تحط و داويا) ونتي شنو بان لك فيه واش عجبك

ياسمين:(حبسات شنو كدير و دارت كتشوف فختها بابتسامة خجولة) بغيتي الصراحة اختي (ضحكات دعاء بمعنى غير گري اختي) كيعجبني و بزاف (طلعاتها التزنيكة) هو راه فشكل معرفتش

دعاء:(تتشوف فيها كتصفار و تخضار بغات تهدنها) تهدني ابتي نتي كترعدي و دوي بشوية شنو كيعجبك فيه

ياسمين:(بحماس خجول باغا تحاول توصل لختها الصورة اللي كتشوفها هي عليه) اول حاجك اختي زوين و بوكوس (ضحكات) هههه و شخصيتو زوييينة حنين و ظريف و ديما كيسول فيا و يهتم بيا…..

يتبع