دعاء:(فرحانة لضحكة ختها و هادشي اللي كتعيش من ديما كانت كتمنى ليها شي ولد الناس اللي تعيش معاه هادشي باش حتى هي تكون فحال قراناتها و تجرب داكشي اللي كيدوز منو كولشي) ايوا باينة من هضرتك ولد الناس عاد ميسور و لاباس عليه يعني صبري شوية و دوي مع بابا
ياسمين:(بتردد) احم معرفتش اختي مازال بغيت نتعرف عليه كثر….و فنفس الوقت مبغيتش نبقا ندوي معاه مورا الدار….. دخت والله
دعاء:(نشفات ايديها بعدما سالاو و جرات ختها جلسو فطبيلة بكراساها فالكوزينة نيت، دعاء فاهمة ختها و حافظاها و عارفة بيلا هي اللي غترشدها لطريق الصواب) ياسمين ختي سمعيني (هزات فيها ياسمين عينها بتركيز) نتي بنت احبيبتي و اي بنت كيجي واحد الوقت و كتبغي تعرف على شي ولد الناس تبغيه و يبغيها و كل وحدة و فوقاش كيجيها هاد الوقت (كتدوي بثقالة و رزانة و كتحاول توصل الفكرة لختها) اخطر نوع هو اللي كتجيه فالمراهقة كتولي البنت دايخا سيرتو ايلا كانت خفيفة و مرخوفة و طايشا كتعرف على هذا و هذا و هذا و كتولي من واحد لواحد تا كتفقد داك ماء الوجه ديالها و ملي كتوصل وقيتة ديال الصح كتكون هي ولفات و مكتبقاش فيها الحلاوة (للحظة تغبنو ملامحها) و كاين اللي كتفرض عليه هاد الوقيتة بحالي انا كنت مازال مأجلاها حتى تصدمت بزواجي و عرفت بيلا جات الوقيتة اللي غنتعرف على داك الشخص و لحسن الحظ كان راجلي (ياسمين حزنات على ختها و فنفس الوقت مركزة معاها) و كاين اللي بحالك و هادشي قليل كتجيه فواحد الوقيتة كيكون دار عقلو و عارف يميز بين الصح و الغلط و نتي بنت و من حقك تعرفي على شخص و تبغيه و تعيشي معاه و توجو حبكم بزواج ولكن فحالتك نتي راه عندك الزهر اللي ربي صيفط لك هاد ولد الناس ناوي المعقول و الحلال من الاول و عطاك من الفوق فرصة فين تعرفيه و تولفي عليه (قالت بغيض) راه كاينين شي ولاد الحرام كيستغلو هاد الفرصة و هاد الحاجة ديال البنت فانها يكون عندها شريك اكفس استغلال و كياخدو منها اللي بغاو ياكلوها لحم و يرميوها عظم و كتبقى البنت مسكينة ضحية.
ياسمين:(فهمات هضرة ختها مزيان و استوعبتها ولقات انها على حق فكل كلمة قالتها ولكن) فهمتك اختي ولكن انا دابا شنو غندير
دعاء:(فقصتها) تي مالك مخك تقيل ديري راسك بندير اختشي (قالت بهدوء) دابا نتي اختي العزيزة جاك ولد الناس زوين و ظريف و حنين و راجل بدارو بمحالاتو بخدمتو برزقو و فوق هادشي ولد الناس و شاريك و باغيك المعقول و حتى نتي عاجبك و مرتاحة ليا فماعليك غير تشوفي رزقك و ديري حتى نتي دارك مع اللي رتاح ليه قلبك هانتي ماباغا لا تخدمي لا والو يعني مكاينش شي سبب مهم يخليك ترفضي اه غتبقاي تا يطير…..
ياسمين:(حشمات من هضرة ختها ولكن فنفس الوقت فكرات فيها ولقات انها مرتاحة ليه بصح و حتى ملي جبدات ليها ختها الزواج بيها حسات بواحد الراحة و فرحة عكس ملي دوات معاها مها على نجم نتفضات و ماعجبها حال) و اشنو دابا نقوليه موافقة
دعاء:(خبطات جبهتها بفقصة على هاد الخميرة اللي عطاها الله) الله ياربي الله على مكتوب (خدات نفس و بدات معاها تاني بالشوية) هانتي اياسمينتي احبيبتي نتي مغتقولي والو تصرفي عادي و دوي عادي حتى يجبد لك الموضوع غيسولك قولي ليه دوي مع بابا و يكون خير ديك الساعة هو غيفهم عطيه نمرة بابا يهضر معاه على اساس انه مكيعرفك مكتعرفيه غير شافك معاه و خدا النمرة من عند شي واحد و دوا معاه تماك بابا حتى هو غيسول و يشوف واش صالح ولا لا ايلا ارتاح ليه راه غيجي يسولك ديري راسك مكتعرفيهش قولي ليه اللي بان لك ابابا مبانش ليه فيه راه مغيدويش معاك من اساسو (شافت فيها و قالت) فهمتيني دابا
ياسمين:(حركات راسها بايجاب) فهمتك ازين لهلا يخطيك عليا (يله بغات تكمل دخلات عليهم مها طمرو)
<العودة>🌺
و هكا كانت ياسمين فهمات و اقتانعات بهضرة ختها و دازو يوماين اخرين كلا ليلة كدوي مع محمد و كيزيدو يتعرفو على بعضياتهم و يطيحو فبعضياتهم هو اللي ما بقاش كيدوز عليه النهار ايلا مهضرش معاها قدرات تخلق بلاصة ليها فقلبو و حياتو ولف عليها و بغاها تكون معاه روحا و جسدا حتى انه تخيلها مراتو و زادت شهوتو فيها مورا واحد الطريفة كانت وقعات بيناتهم
<فلاش باك> 🌺
بعدما دوزات معاهم دعاء الليلة ناشطين فاقت فالصباح مشات لدارها علمات لالة ثورية ياسمين باش يمشيو للحمام مورا الغدا ناضت ياسمين بلا عجز عليها جمعات الدار و خلات مها دير الغدا و هي دخلات للكوزينة…
خدات جبانية دارت فيها 3 المعالق كبار ديال المايونيز جوج بيضات جوج معالق من زيت اركان زيت الزيتون زيت لافوكا زيت الخروع و زيت اللوز خلطات كولشي مزيان عطاها كمية كبيرة ولكن يله تقدها لشعرها الطويل (البنات هتد الوصفة انا كنديرها و بالنسبة للي معندهاش هاد الزيوت كاملين دير اي زيت عندها انا قبل كنت كندير غير زيت زيتون) دخلات لدوش مشطات شعرها بداية من لتحت و هي غادة و كطلع ( هاد الطريقة حتى هي مهمة ملي يكون شعرك مخبل او بغيتي تمشطيه عمرك تبداي من الفوق حيت كيتسبب فتساقط الشعر بزاف بداو من لتحت و نتوما كتمشطو تال الفوق) قسماتو و بدات كدير فالوصفة قسم بقسم كدير هاد الماسك مرة فشهر و خصوصا مع الصيف و العومان الشعر كينشف و يتقصف دارت ليه الوصفة باش يتغدى بالزيوت و يرطاب و يرجع كيلمع طبقات الوصفة على شعرها و دارت ليه ميكة ديال الشعر (تقدرو تستبدلوها بالسولوفان)…
موراها دازت توجد تبريمة ديال الحنة صحراوية تحيد ليها الكحولة ديال البحر و داك التقشار خدات حنة طبيعية مطحونة فالدار دارتها فجبانية كبيرة زادت عليها خزامة مطحونة و زعتر مطحون و عرعار مطحون و الشيح و البابونج و الورد البلدي مطحونين و شوية ديال اداد تاهو مطحون (متقويوش منو لانه مسموم يكفي راس المعلقة) خلطتهم مزيان و زادت عليهم معلقة ديال النيلة الزرقاء جابتها معاها من اكادير و حلبة مطحونة و خرقوم مطحون خلطات هادشي كامل اللي ناشف بواحد الما مرقداه خصيصا لتبريمات دايرا فقريعة الورد البلدي و الخزامة و البابونج زايدة عليهم الماء المعدني و مرقداهم سخنات داك الما و خلطات بيه دوك المكونات مزيان حتى ولا خليط متجانس عاد زادت عليه الصابون البلدي بكمية كبيرة شوية خلطت كولشي و دارتو فبواطة مسدودة مزيان
مشات وجدات ماعن الحمام و الحوايج و حطاتهم، تغداو و جمعات الماعن موراها دارت كوماج ديال التخت ديال القهوة معصرة و دانون مسوس طبقاتو على وجهها و خلاتو خمس دقايق عاد بدات كتفرك بشوية على وجهها غسلاتو و بانت النتيجة بسرعة ولا وجهها نقي و كيبري موراه دارت ماسك ديال كاكاو مر و حليب مجفف و دانون مسوس خلطاتهم و دارتهم لوجهها و عنقها خلاتهم عشرين دقيقة غسلات ديال وجهها و خلات ديال عنقها لبسات جلابتها و دارت زيف و مشات هي و مها وصلو لقاو الحمام سخون و عامر دخلو لسخون و البنات و العيالات حلو فامهم ففورمتها و لونها على الرغم من ان عندها صدر صغير على قدها و لكن فورمتها زوينة و منحوتة غير انها عندها مؤخرتها كتجدب كتخلي الانظار كولها كتوجه ليها اما لونها يا سلام واخا مبرونزي ولكن باقي كيبان زوين و مافيه حتى نبشة دخلو دارو التبريمة اللي عطات ريحتها فالجلسة كاملة حتى كولشي رد ليهم البال شوية جات عندهم واحد المراة طلبات شوية (كولنا كنعرفو هاد الماركة) خلاو التبريمة تقريبا واحد عشر دقائق و غسلوها…..
غسلوها و خرجو للجلسة التانية يله بغات تبدا تحك بعثات معاها مراة فعمر مها ملي دخلات وهي حاطة عليها العين واخا حاكا جات عندها دارت ليها ديك الدخلة ديال حكي ليا ابنتي ظهري و ياسمين مرفضاتش بدات كتحك ليها و هي تبدا تسول فيها المراة
المراة: ساكنين غير هنا ابنتي
ياسمين: اه غير فالدرب لوراني
المراة: سبحان الله عمرني شفتكم
ياسمين: اه معرت
المراة: قولي ليا ابنتي شحال فعمرك
ياسمين:(استغربات لأسئلتها ولكن محكراتش) 23 عام اخالتي
المراة:(فنفسها مبايناش عليها فايتة الدرهم كاتبان صغيرة) وشنو كديري ابنتي فحياتك
ياسمين:(زادت استغربات من سؤالها و عصباتها كانت سالات ليها شللات ليها ظهرها و عطاتها الكيس بلاما تجاوبها) هاكي اخالتي ساليت
المراة:(لاحظت انها مجاوباتهاش و قررات انها تهضر مع مها) الله يرضي عليك ابنتي
ابتاسمت ليها ياسمين و بدات الحكان و الوسخ كيدردر بحالا عمرها حكات اما المراة فمشات عند مها من الجيهة لاخرة سلمات عليها و قالت
المراة: سميتي السعدية اختي و بغيت نسولك و مديريهاش مني قلة الصواب
ثورية:(برزانة) مرحبا اختي السعدية سوليني
السعدية:(عينيها كيشوفو فياسمين كتعبر فيها من الفوق للتحت) هاد الدرية بنتك
ثورية:(استغربات لشوفاتها ولكن بدا كيطلع معاها البلان) ايه اختي بنتي علاش
السعدية:(بضحكة غبية) كل خير اختي هاد البنية مزوجة مخطوبة داوي فيها شي واحد
ثورية:(توقعاتها كانو صح ولكن) اه اختي
مخطوبة(كذبات عليها لأنو اولا اخر حاجة تقدر ديرها هي تزوج بنتها من الحمام و ثانيا حيت باقا طامعة فبنتها تقبل بنجم الدين حسباتها صافي مخطوبة)
السعدية:(تلغات ضحكتها و جاو بلاصتها ملامح متأسفة) ايوا الله يسهل ليها اختي و الله يخليها ليك تبارك الله زوينة مكرهتهاش لولدي
ثورية:(بضحكة صفرة) الله يجيب ليه رزقو
السعدية: امين اختي خليتك على خير
عطاتها ثورية صوابها حتى مشات و عينيها معلقين عند ياسمين اللي حكات الحكة اللولة و باقي الوسخ متقطعش عيات و حمارت و سخفات خرجات للبارد حيدات البلاستيكة ديال شعرها خلاتو يتنفس و تنفسات هي و رجعات حكات و عاودات حتى تقطع منها الوسخ شللات و جلسات باش تغسل شعرها اللي غير طلقاتو تاجهو ليها البرابولات كولشي بدا كيشوف فيها ر يعبر فيها غير شافتهم مها قالت بينها و بين راسها العمى و عرفات بنتها غتهز شي دقة جات قدامها درگاتها تا غسلاتو مزيااااان بشومبوانها حتى حيدات ريحة البيض (نصيحة البنات اذا درتو شي ماسك لشعركم فيه البيض. و مبغاتش ريحة الزفورة تحيد ليكم من شعركم خودو معلقة ديال نيسكافي خلطوها مع الشومبوان و غسلو بيه) و عاد كملات عومانها حتى سالات، خرجات تلبس اول حاجة دارتها رشات ماء الورد على وجهها مزيان و طلقات شعرها نشفاتو بفوطة قطنية (هاد المعلومة مهمة البنات هاديك الطريقة اللي كنشفو فيها بيها بالفوطة راه غالطة اول حاجة خاصك تنشفي بشي حاجة تكون مية فالمية قطن ثانيا متفركيش الشعر مع بعضياتو غير مسحي عليه) نشفاتو مزيان و دهناتو بسيروم مرطب و ريحتو زوينة و جمعاتو عاد رطبات جسمها لبدا رجع للونو الابيض الصافي رطب و كيلمع و العيالات غير كيشوفو عند بالهم راها مزوجة حيت قوات 😂
لبسات حوايجها و جلسات سخفانة كتسنا فمها حتى خرجات مها حتى هي تلبس دهنات وجهها رطباتو بكريم ليلي حيت كان الليل طاح و جمعو حوايجهم و خرجو وصلو مصهوطين لقاو باها راد عشا خفيف و معمر ليهم اتاي كلاو جمعات الماعن و دخلات لبيتها بدلات ببيجامة واسعة تيشرت قطني و شورط و حيدات السوتيان خلات صدرها يرتاح و طلقات شعها لمبوكلي دارت مرطب شفاه و تكات سمعات صوت مسج من عند محمد….
سمعات صوت مسج من عند محمد
💌محمد: ياسمين سلام
💌ياسمين:(كانت ولفات عليه و بدات تتزعم شوية بشوية تهضر معاه تعاود ليه خصوصا انو كان كيعاود ليها كولشي داكشي اللي كان كيدير فنهارو بحيت كانو كيهضرو غير فالليل كيعاود ليها كولشي بسيف عليها خلاها تولفو و تفكر فيه و يعشش فدماغها و يملك تفكيرها و جزء من قلبها ولا بالنسبة ليها شخص مهم متقدرش دوز نهارها بلابيه خلاها تبغيه بشخصيتو الرجولية وفنفس الوقت حنينة بظرافتو و مزاحو و حتى المعقول اللي فيه خصوصا و انها اول تجربة ليها بغاتو بلاما تحس) اهلا
💌محمد: نقدر نصوني لك اياسمين
💌ياسمين: اه ممكن
💌محمد:(توحشها بزاااف توحش عيونها الخضراء اللي تتخليه يلعن المسافة بيناتهم فكل دقيقة تفكرهم بنظراتها الخجولة توحش خدودها اللي كترفع ملي كضحك و كتحمار ملي كتحشم توحش نيفها الصغير اللي كتهز ايدها مرة مرة تحكو و النمشات اللي فوقو توحش شفايفها الحمراء كحبات الكرز و سنانها البيضاء كاللؤلؤ توحش صورتها و هي حشمانة صورتها و هي كضحك صورتها و هي ساهية توحشها بتفاصليها الجميلة القاتلة طيلة هاد الايام كان كيصبر راسو غير ببعض الصور هزها من واتسابها و انسطا مفايتينش ستة صور) نهضرو فيديو
💌ياسمين:(طلعاتها التزنيكة و ماعرفاتش باش غتجاوب حيت على الرغم من انها بدات كتزعم شوية معاه فالهضرة و كتسول و تجاوب ولكن مصبرة راسها انه مكيشوفهاش واخا فالعديد من المرات كانت كتحشم ملي كيقول ليها شي حاجة و كتحمار و كتقطع عليه كانه قدامها ولكن كتزعم بحيت مكيشوفهاش اما دابا طلب انو يشوفها يهضر معاها صوت و صورة متنكرش انها حتى هي باغا تشوفو باااغا تكحل عينها بشوفة طلتو البهية و صورتو الوسيمة و الرجولية معرفاتش متقول ولكن متقدرش ترفض بقات قرابة العشر دقايق عاد جاوباتو) واخا
فالبلاصة شاف المسج ناض من السرير ديالو اللي كان فغرفتو ديال الشقة شعل الض ديال الفيوز الخفيف و دوز ليها لابيل هي اللي حتى هي كانت فبيتها مشعلة ضوء خفيف طالقة شعرها لايحاه عليها تقادات فالجلسة و قبلات لابيل باش يبان ليها سيدي محمد مقاد حتى هو فالتكية ديالو فوق سريرو كيبان غيو وجهو و عنقو و الجزء الفوقاني من كتافو كان لابس تيشرت ابيض شعرو الكثيف مخربق و مليوح على عينيه للحظة جاتها رغبة فانها تخشي ايدها فشعرو الرطب و تغلغلها مزيام و تحس بكثافتو هبطات عينيها لعينيه النايمين فيها كتشوف نظرة الاعجاب و الحب فعينيه بلاما يحتاج يهضر عينيه كيوصلو الميساج اللي مكيوصلوش فمو نزلات من عينيه للحيتو الخفيفة و فمو الوسط بحال القلب رقيق و لونو وردي صافي مفيهش زروقية ديال الگارو. للحظة ابتاسم و تاهت فسنيناتو المستفين البيضين و طلعات عينيها لعينيه المبتاسمين حسات بسهم اختارق قلبها نيشان من التقاء عيونهم و كانت حكاية حرب العيون بدات و ما ادراك ما حرب العيون كل واحد فيهم كيقول للاخر متعرفش هو منيم عينيه فيها بنظرة حب و هي هازة عينيها بنظرة خجولة قاتلة عندها خجل بريئ كيخليه تايه فهاد الانثى اللي سلباتلو قلبو و النوم من عيانو…..
اماا عندو هو فحكاية اخرى غير قبلات لابيل و بانت ليه حس بضربات قلبو كيتزادو…..و عقلو كيقول وقف و تأملي يا عيون فهاد المشهد الخرافي اللي عمرو يعيى ولا يمل من شوفتو محسش براسو حتى نطق “سبحان الله”……سبح لله عز وجل اللي خلق هاد الصورة و تفنن فيها…. بدءا من شعرها القوي الطويل اللي زادو الماسك بريق و لمعان جاتو هو الأخر رغبة فانه يلمس شعرها و ياخدو بين يديه و يشم ريحتو و يروي عطشو يشم حتى يدخل #عبق_الياسمين اللي شم فيه اول مرة مع عروقو كأنه مخدر…..مرر عينيه من شعرها لعيونها العيون اللي عمرو شاف ولا غيشوف ليها مثيل لا فشكلها ولا لونها ولا نظرتها نظرة خجولة مترددة خلات البؤبؤ ديالها كيدور من بلاصة لبلاصة……كيبين ان هاد الخجولة الصغيرة كتصارع مع نفسها باش تشوفيه و تروي حتى هي عطشها بشوفتو بقا حاضي عيونها حتى رمشات و يا الهي على الاحساس اللي حس بيه كأنها صيفطات رصاصة رعشة لقلبو و فراشات كتلعب فكرشو و كطير و ترفرف دور عينيه على بشرتها الصافية المنورة واللي زادها الحمام و الروتين اللي دارت قبل منو لمعان…….نور خدودها الحمراء اولا بالحمام و ثانيا بالخجل من الشوفات اللي كيدير فيها مقدرش يلمح النمش اللي فوق وجهها بسبب الاضاءة و نزل مباشرة لفمها تما كانت الضربة القادية ليه فمها الحميمر منيفيخ و كيلمع جاب ليه تمامو خلاه فلحظة يتخيلها بينو و بين راسو بين يديه و هو كيقبل فيها بكل حنان و حب دامت تخيلاتو لثواني حتى حسن براسو و وعا لقاها مازال حتى هي كتشوف فيه ممنعش راسو انه ينزل عينيه لعنقها الابيض الطويل اللي كيحس بيه كيغوت و كيقوليه لمسني بايديك و زيني بعلامة ملكيتك و قرصني ببوساتك و تجرأ و سمح لنفسو انه ينزل كثر حتى كانت الصدمة…..
التيشرت اللي كانت لابسة كان عنقو واسع الشيء اللي برز فرقة صدرها الصغيرة اللي يادوب تاتبان و ثوبو الرهيف خلا رويسات ثدييها يبانو بوضوح للحظة حبس الضحكة و قال بينو و بين نفسو بجرأة مدايراش الكمامة و ضحك ضحكة مسروطة باشما تحسش عاود شاف تما و حس براسو بدا كيتزير و يصهد قرر يدوي معاه باش يتفادا داكشي و قال……
محمد:(بنظرة حب) ياسمين لاباس
ياسمين:(فيناهيا ياسمين راها خشات راسها فعنقها ثاني و حشمات عينيها مقدراتش تهزهم فيه حلفات لا جاوبت)
محمد:(كيشوف فيها كيفاش حشمانة و كيدور عينيه عليها كيزيد يغرق كثر و كيحس براسو كيتيزير) واا ياسمين ههههه
ياسمين:(بالسيف هزات راسها فيها مزنكة و حشمانة غير شافت نظراتو و عاودات تاني هبطات راسها و همهمت) مممم
محمد:(ضحك بصوت رجولي) هههههههه وايلي على ممممم بگرة نتي ههههه….. وا هزي عينيك فيناااا واااه
ياسمين:(حتى كانت غتقطع عليه و عاودات تراجعات فكرات فهضرة دعاء وفكرات بيلا ممكن تكون بيناتهم شي حاجة ميمكنش تبقا حشمانة منو ديما و عاودات هزات فيه راسها ولكن هاد المرة مشافتش فعينيه و قالت بصوت خفيف) احم…. نعام
محمد:(كان عادي غير هزات راسها و دوات بحالا صيفطات ليه رعشة فالجسد ديالو كامل تبورش من صوتها الحنين و الخفيف مائل للهمس و جاو لبالو شي افكار استغفر الله منها و قال) غي ملي هزيتي راسك انعامة….. كيدوزتي نهارك؟
ياسمين:(ضحكات على التشبيه ديالو و قالت) ههههه… عادي… احم مشيت للحمام عاد العشية
محمد:(ضحك بصوت قوي خلاها تعقد حجبانها باستغراب شنو اللي خلاه يضحك هكا) ههههههههه هكاااااك و انا كنقول مال السيدة منورة و زايدة فالسر اطرني الحمام طيح عليك السررر خخخخخخخ
ياسمين:(حبسات الضحكة بزز على هضرتو و حشمات و بدات كتصفار و تخضار مكرهاتش تقطع عليه ولكن مجاتش يله بغات تهبط راسها وهو يلقفها)
محمد:(بصوت قوي) سطوووووب تنزليه تلقايني حداك…. نتي غتبقاي ديما حانية داك الراس خلينا نشوفو الزين المسرار اختي
بحب كيشوف فكل مناطق وجهها مرورا لشعرها و عنقها حتى للصدرها عشقها و عشق تفاصيلها الصغيرة خلاتو يبغي اتفه تفاصيلها و يحس بنشوة غريبة كتجرها ليه زادتو النشوة على الحب فخلقو مزيج رائع من المشاعر خلاتو يحس براسو باغي يطير لعندها ياخدها بين ذراعيه يضمها ليه و يزير عليها يستنشق ريحتها الخفيفة يغلغل يدو فشعرها الرطب يلمس بشرتها الرطبة يقبل شفتيها اللامعتين يدوز يدو على عنقها حتى يوصل لصدرها و يحط راسو عليه خلقات فداخلو جدل بين حبو و شهوتو، قلبو و عقلو….
ياسمين:(حشمات عاوتاني كثر و معرفاتش شنو دير واش تهز راسها او تحطو تهضر او تسكت كيخليها تالفة كيحيرها فذاتها كيخليها تسائل بينها و بين راسها واش بصح هي زوينة لدرجة تخليه يسهى فتفاصيلها معارفاش انه ماشي كيشوفها زوينة بل كيشوفها فاتنة كيشوفها اجمل وحدة فهاد الكون معارفاش انها بخجلها اللاارادي كتحرك فيه داكشي اللي عمر بنت المرأة قدات تحركو كتخلق فيه عاصفة ديال المشاعر، وهي براسها مكانتس احسن منو حال حتى هي كانت كتحس بنفس داكشي اللي كيحس بيه و يمكن اكثر، اكثر حيت هو رغم انه مازال مخليها على راحتها و مكيعبرش ليها بزاف الا انه على الاقل كيقدر يدوي و مرة مرة كيخرج داكشي اللي عندو و اساسا عارف اشنو عندو و باش كيحس و شنو هادشي عكسها هي اللي هادشي كامل جديد عليها و معارفاش تعامل معاه اللي عارفاه و متأكدة منو انها كتبغي هاد السيد و مرتاحة معاه و مندماتش انها عطاتو فرصة، هزات عينها فعينيه اللي منيمين بفعل المشاعر الساخنة اللي خلقات فيه و قالت) هاني….. احم كيدوزتي ننتا نهارك؟
محمد:(وصل للحد ديالو و بزز باش قادر يجاوبها و فنفس الوقت مازال باغي يهضر معاها و يشوف فيها) تمارة اياسمين…. لقيت شلا تخلويض فالمحل ديال الواليد
ياسمين:(كان ديجا عاود ليها بشكل موجز على شراكتو مع باه و المشاكل اللي عندو مع خوه عبدالله و حتى المشاكل اللي عندو فالمحل، قالت محاولة تفهم و فنفس الوقت تخفف عليه) واش نفس المشكل ديال السلعة و الفلوس
محمد:(بتعب) شي حاجة كثااار…. ليوم مشيت لقيت واحد الكليان مهم دار الكوموند على السلعة و تقبلات و صيفط لافونص و دارو معاه السلعة غتجي ولبارح و مجاتش و جا بغا يرجع لافونص ديالو قالو ليه لافونص تصيفطات للمالين السلعة و ميمكنش نرجعو ليك (قال بغيض) انا عارف الفلوس متصيفطوش الفلوس تخسرو و ميمكنش نخصرو هاد الكليان
ياسمين:(بتفهم و اسف على حالتو) و شنو المعمول؟
محمد: بالله تا حرت معرفتش مهم فكيتها مع الكليان و هضرت مع مالين السلعة غدا تكون عندو…. كيبان ليا اياسمين غنفك هاد الشركة
ياسمين: احم… ماعرفت مانقولك الله يعاونك
محمد:(بابتسامة متقوليش هذا اللي عاد كان كيشكي عليها) خلينا مني انااا قولي ليا اختي اشمن حمام مشيتي
ياسمين:(باستغراب) واحد ديال الدرب حدانا علاش
محمد:(بمزاح) باش نمشي ليه حتى انا راه خوك خايب جوع ما ربنا ينزل عليا السر اللي نازل علييييك ازين البلار
ياسمين:(قالت بعفوية و بلاما تحس) لا حتى نتا زوين.. حسات براسها اش قالت و تصدمات و كمل عليها عليها ملي سمعاتو كيضحك قطعات عليه بالزربة، طفات التيلي ولاحتو و تلاوحت لجيهة لوخرى من السرير كتندم فراسها.
عندو هو اللي سالات معاه ضحك تا دمعو عينيه و شافها قطعات حط التيلي و هبط عينو لجيهة حجرو لقاه باني خيمة قاليه
محمد:(مع راسو) ولا اصاحبي عمرها كانت لييييك ههههههه ياسمينة يا ياسمينة واش درتي فيا (تنهد و ناض ضربها بتدويشة و خرج نعس فالبلاصة)
<العودة>🌺
و هكا دازت السيمانة على الابطال ديالنا بجوج اللي ولفو انهم يهضرو كل نهار و ولات شي حاجة ضرورية بيناتهم.
اليوم ماشي كباقي الايام فاقت ياسمين على صوت الريفي دايراه مع التسعود كانت غتهبط للمحل ديال باباها تقابلو بينما قدا هو شي مشاغل مشات للحمام قدات حاجتها و دارت روتينها اليومي و خرجات جبدات سروال جينز ازرق كيجي لارج و واسع و عندو سمطة ديال الجينز نيت مع تريكو صيفي كم كتافو منفوخين لبساتهم و خشات التريكو فالسروال و لبسات معاهم سبرديلة بيضة مع تقاشر قصار مبينين خلخالها اللي مكيخطاها مشطات شعرها و دارت ليه ظفيرة ديال السبولة هزات تيليفونها و شارجور دارت ايكرون سولير و مرطب شفاه و ريحتها و خرجات فطرات مع مها و خوها و هبطات للمحل اللي كان باها ديجا حلو دخلات لقات فيه شي جوج كليانات حيت الصباح و باقي الحال مشات لاكيس جلسات و بدات تتخربق دوز الوقت دازت شي ساعة و نص و هي ساهية حتى حسات بشي واحد وقف عليها هزات عينها و تصدمات نلي لقاتو واقف قدامها بشحمه و لحمه الصدمة لجمات ليه فمها و للحظة سرات فجسدها رعشة ملي جا فبالها اخر لقاء بيناتهم…..
جا فبالها اخر لقاء بيناتهم اللي كان اكفس لقاء تفكرات جرأتو و ووقاحتو و تصرفاتو محشماتش منو بالعكس عقدات حجبانها بتخنزيرة قاصحة
شافت فعينيه المبتاسمين صيفطات ليه ديك الشوفة كيف السيف محاولة توصل ليه انها هاد المرة مغتخافش منو و مغتحشمش منو ولكن للحظة استغربات شنو ممكن يكون جاي يدير هنا من مورا اخر مرة و هاد المدة كاملة فالاثناء اللي كانت هي كتفصل و كيتخيط هو كان كيشوف فيها بعيون مليئة بالاعجاب و طبعا النظرة الزايغة ديالو اللي عمرها غتحيد منو كيشوف فوجها و فالنص الفوقاني ديالها اللي باين خرج لسانو دوزو على شفايفو و بادر فالكلام
نجم الدين: ياسمين صافا
ياسمين:(مخنزرة فيه و محاملاش تهضر معاه) شنو جاي كدير هنا
نجم الدين:(هز حاجبو و ابتاسم ابتسامة جانبية كيقارن بين هاد البنت الشرسة اللي قدامو اللي كتشوف فعينيه بعينين كينباعثو منهم شرارات الغضب دون اي مكان للخجل مع البنت اللي شاف اول نهار البنت الخجولة اللي مقدراتش تشوف فعينيه و اللي خافت منو ضحك برخامة و قال) ههههه تكالماي ازين مالك خفتي ناكلك
ياسمين:(ممستحملاش صوتو اللي كيلوث وذنيها و صورتو اللي كتلوث بصرها محاملاش تشوف فيه مازال) سولتك شنو جاي دير هنا….
نجم: كيفاش شنو جاي ندير هنا راك نتي اللي بغيتي تشوفيني (باستهزاء مخفيي موراه اعجاب كبير) الالة ياسمين
ياسمين:(باستغراب)كيفاش طلبت نشوفك…. ايمتا
نجم الدين: هاد الهضرة خاصاها شي جلسة
ياسمين:(بتخنزيرة) تبعني للبيرو (دارت دوات مع البنت اللي جالسة فلاكيس) سلمى هاني فالبيرو شوية و نرجع (ناضت غادة قدامو و هو تابعها من اللور عينيه على مؤخرتها البارزة اللي السروال العريض مادا منها لا حق ولا باطل عينيه تيدورو على جسدها من اللور و تيركزو على مؤخرتها و افكار سافلة كدور فبالو وصلات للبيرو حلات الباب دارت ليه طريق يدوز و خلات الباب محلول تحسبا لاي هجوم من طرفو عارفاه مافيه تيقة مشات جلسات فالكرسي مقابل معاه و حطات التيلي فوق الطبلة و دوات بغيض….
ياسمين:احم… ممكن نعرف دابا سبب المجية ديالك لهنا
نجم الدين:(بنظرة لعوبة تتخليه يبان وسيم) نسولك نتي آنسة ياسمين
ياسمين:(بعدم صبر) نتا اللي جيتي كيفاش غتسولني
نجم الدين:نتي اللي طلبتي تشوفيني (يله بغا يكمل قاطعو صوت تيليفونها اللي صونا باسم محمد لاح عينو ليه قرا الاسم بسرعة و شاف فيها باستهزاء فحين هي مدات يدها بسرعة وبارتباك قطعات عليه و شافت فيه حشمانة كمل هو بضحكة استهزاء) كلكوم بحال بحال واحد فالقليب و واحد فالجويب
بلاما يتسنا جوابها ناض و تمشى فاتجهها حتى قرب ليها و تحنى لعندها وجههو فوجهها اللي تلطخ بالاحمر و بدات تترتجف و عينيها كيدورو رجعو ليها لقطات ديال داك النهار و بدات كتحس بالنفس كيتزير فيها وهو كيشوف فيها و يتلذذ فالعذاب اللي هي فيه و كيفاش قدر يكسر ديك القوة ديالها اللي واجهاتو بيها زاد قرب لوجهها بزاف و قال بهمس كفحيح الافعى
نجم:سولي ماماك ازوينة و غتعرفي علاش انا هنا (قال هاد الكلمات اللي اصلا مقدراتش تستوعبهم بفعل القرب ديالو منها لدرجة ان نفسو كتجي فوجها للحظة كان غيتلاح على شفايفها الحمرين بفعل العظان عليهم و اللي كيرتاجفو ثاروه و حركو رجولتو ولكن تمالك نفسو و ضحك بجنب و وقف عادي قاد حوايجو هز تيليفونو و خرج كيصفر فرحان حيت شاف ان ديك القوة اللي واجهاتو بيها ماهي الا قناع لابساه و هادي اللي شاف دابا هي حقيقتها اللي كتخليه يستمتع باللعب معاها و طالب فالمزيد)
عند ياسمين اللي مازال كترتاجف و ترعد مكتفهمش اشنو كيدير فيها كيخليها تخااااف و ترعد بمجرد قربو منها كيخليها عايفاه و كيخليها تشوفو خايب و بشع بحال شي وحش رغم انه وسيم و جذاب ولكن هي ماشي كتكرهو بل كتمقتو بدات كتهدن بشوية هزات تيلي صيفطات مسج لمحمد باشما يفهمش غلط فيه
💌” سمحليا كنت مع بابا”
حطات التيلي و خدات نفس عميق عاد بدات كتفسر فهضرتو كيفاش غاب هاد الايام كاملة و جاي دابا و ملي سولاتو قالها نتي اللي بغيتيني قفزات للحظة ملي استوعبات هضرتو انها تسول مها علاش جا لعندها و بدات كتفهم البلان ولكن ماشي كامل ضروري تسول مها ناضت طافجة خرجات و سدات البيرو بدات خارجة حتى تلاقات مع باها كتجري مداتهاش فيه خلاتو كيغوت و يعيط ليها و طلعات كتجري و باها موراها حاس بيلا كاينة شي حاجة دخلات على مها اللي كانت فالكوزينة مخدمة الراديو كتسنط لام اف ام و كترد فالغدا جرات البريز ديال الراديو بقوة حتى تخبط الراديو الشيء اللي قفز مها و دارت بالزربة مخلوعة كتشوف فبنتها واقفة كتنهج و ترعد وجهها حمر بالاعصاب و جعرها مشنتف كامل من الجناب و باها موراها عاقد حجبانو باستغراب و غضب عارف بنتو ما كتوصل لهاد الحالة حتى كيكون السبب يستاهل و كتكون ضاقت بيها خرجات عينيها فياسمين اللي مازال لحد الساعة منطقات بحتى حرف غير كتشوف فمها و تزفر بصوت مسموع….
ثورية:(مخرجة فيها عينيها و كتغوت بصوت قاصح) ياك لاباس الالة مااااالنا اش كاين داخلة هاجمة…..
ياسمين:(بضحكة قوية ديال الاستهزاء) ههههههههه واش معارفاش علاش
ثورية:(كتشوف فيها مخنزرة على شوية غضربها و كتشوف فسي مصطفى اللي واقف فالباب حداه خليل اللي عاد ناض مخلوع ساكتين تيشوفو اش كاين) ايه معارفاش مالك داخلة عليا من الزنقة جاعرة مقطوعة ولا مكامياش
ياسمين:(كتاخد شهيق و زفير و كتحاول تهدن باشما تخرج شي كلمة ماهياش كتبقى مها ولازم عليها تحتارمها) غنسولك اماما و جاوبيني نتي اللي قلتي لنجم الدين يجي عندي؟
ثورية:(عاد سرا معاها القالب و عرفات بيلا جا ولكن خرجات عينيها كثر واخا شافت راجلها خنزر فيها بشوفة قاصحة خلاتها للحظة تفافا سرعان ما رجعات قصحات وجهها بالنسبة ليها هي عندها الحق و نجم مزيان و هوما معارفين والو) ايه انا اللي دويت مع لالة زهور و قلت ليها خاص الولاد يدويو قبلما نديرو شي حاجة رسمية
مصطفى:(مخنزر فمراتو و مكرهش يغززها بسنانو و يتلاح يسكتها كيشوف فيها كتعاود الغلط اللي دارت مع بنتها اللولة و كيشوف فياسمين صورة دعاء ملي زفات عليها الخبر ولكن ايلا كان قبل للدعاء فحيت عارف ياسين رجل طيب و ولد الناس و عارف حتى دعاء اش كتسوى اما فحالة ياسمين فمستحيل و واخة تنطابق السما مع الارض عمرها تكون ليه قال بصوت قوي) ثورييييية اش هاد الهضرة
ياسمين:(دموع دايزين مع خدودها كتبكي عشرة للعين و كتشوف فمها بنظرة فيها مجموعة من المشاعر اللي غالبها كتصب فنهر الحزن بما فيها خيبة الامل، الانكسار، و القهرة على مها اللي من المفروض انها تكون اقرب واحد ليها، تكون اكثر واحد كيفهمها من النظرة الاولى ولكن للاسف هادوك مكانو الا متمنيات و ربي كيختابر صبرها و ايمانها بام قاصحة مهامها الا الفلوس و المكانة الاجتماعية هادي راجع للقهرة اللي تزادت فيها و كبرات فيها بحكم كانت بنت نجار على قد الحال والد 6 النفوس ساكنين فدويرة صغيرة ايلا تغداو ميتعشاوش ولكن ثورية كانت ديما عينيها كبيرة تتشوف غير الفوق الفوق باغا تحقق كاع داكشي اللي محرومة منو حتى تزوجات بسي مصطفى اللي حتى هو مكانش احسن حال من باها و زادت تاني قهرة على قهرة حتى بدا بشوية بشوية كيمسك عليه الله و كيتزاد فالرزق و بدات حتى هي كتحقق فمطلباتها و بقات عندها واحد النغزة ديال انها متعيشش بناتها نفس داكشي اللي عاشت، شافت فيها ياسمين بنظرة مجروحة عميقة و قالت) كنقسم لك باللي خلقني و خلقك اماما مانكون لداك نجم مراة…..
خلاتها مخرجة فيها عينها مخنزرة مكرهاتش تلاح تشتف عليها و تنتفها و دخل ليها الفكرة لراسها ولكن متقدرتش بقات كتشوف فيها غادة حانية الراس متنخصص كتافها مهدودين عليها دازت فباها اللي كان كيشوفيها بنظرة حنينة حزينة على نوارتو الصغيرة زهرة الياسمين ديالو اللي كتبكي دموع كيتحطو كيف الجمر على قلبو كيف لا وهو اول راجل فحياتها اكثر واحد كيبغيها و اكثر واحد غيبغيها اول واحد بغاها و اخر واحد غيبغيها كيبغيها حيت كيبغيها حبو ليها مامشروط بحتى شي حاجة كيبغيها حيت طرف منو خلاها على راحتها فضل انه ميضغط عليها دابا بحتى حاجة تا ترتاح….
ضار شاف فولدو بمعنى سير مشى خليل لبيتو حتى هو مقلق على ختو و ضار مصطفى لعند ثورية اللي غير كتصوط محسش براسو حتى قرب لعندها شدها من مرفقها بقوة و جرها لعندو و كانت هادي اول مرة فحياتهم الزوجية غيعاملها هكا رغم انهم كانو كيتخاصمو و كولشي ولكن عمرو حط عليها يدو حتى لهاد المرة اللي فعلا بلغ السيل الزبى و طلع ليه الدم من طمعها و حبها للمادة…
مصطفى:(بالغوات) غتفووووتي علك البنت ولا لا راني هضرت معاك واش مريضة لحتي اللولة و وقف معاها الرضى و صدق راجلها ولد الناس باغا تلوحي الثانية للعذاب
ثورية:(خلعها بحالتو و كشاكشو اللي خارجين) صافي امصطفى رخي مني (كتنتر) رخي مني راني باغا غير مصلاحتهاااا
مصطفى:(بتعصب و صراخ طلقها حتى مشات و جات) مصلحتها تزوج بزلال يااااك مصلحتها تزوج بحمار ديال الخلا كيشوف فالمراة غااااا الناموسية النهار اللخر يخلييييها فالدار و يخرج يتزلل برا ديك ساعة غتنفعها الفيلا و الفلوس ادويييي (قرب ليها حتى درگات وجهها تصحابو غيضربها) الالة بنتي ممحتاجة لحد و نهار غتزوج غتزوج بلي باغا هي
ثورية:(بفقصة) خلييييها الحمارة دير اللي بغات و ضرب عليا عمرها مازال تسمع مني الكلمة تريكة الزلط
مصطفى: ساليناااا (معصب منها بزااف) سدي عليا هاد الخرا هنا و فوتي علك الدرية (دار غادي فحالو) ياخزيت على دار
خرج و خلاها غتاكل جنابها بالفقصة عرفات انه عمرو غيوافق عليه و حتى هي قررات تخرج سوق بنتها دير اللي بغات مدام مدارتش بريها فدير اللي بغات.
نمشيو عند ياسمين اللي دخلات لبيتها و درخات الباب بجهد تلاحت على ناموسيتها كتبكي بالجهد و تنخصص كتحس بالحگرة و بالظلم و كتحمد الله لي باها واقف فصفها اما كون بغا تاهو مكانتش غتردد انها تنتاحر تفضل الموت على نجم الدين حيت العيشة معاه بحد ذاتها انتحار بقات كتبكي و تنخصص حتى عينيها تورمو و حمارو سمعات صوت تيليفونها هزاتو بلاما تشوف شكون و جاوبات بصوت مخنوق و مبحوح مع شهقات خفاف باين انها كتبكي
📱ياسمين: الو اهئهئ
📱محمد:(سمع صوتها و قفز بعدما كان جالس فبيروه وقف بسرعة مخلوع) الوووو ياسمين مااالك
📱ياسمين:(غير سمعات صوتو و زادت فالفوليم ديال البكا كتصرف بلا عقل و بدون وعي) محمد اهئ هئ (كتبكي و تشهق بصوت مجهد)
📱محمد:(خلعاتو عليها بزاااف و معرف ميدير ليها بسرعة هز سوارتو و سد البيرو و نزل كيجري) ياسمين جاوبينييي الله يخليك مالك شنو واقع لك
📱ياسمين:(كتبكي عشرة للعين حتى فشلات) بغيت نشوفك هئهئ
📱محمد:(طلع لطوموبيل ديمارا) شوفي تهدني بعدا و لبسي حوايجك و اجي لكافي بيانكا هاني شاد الطريق عندك تهدني (مخلوع و كيتفتف كيحس بقلبو ايخرج من بلاصتو مخلوع عليها بزااااف) تهدني و بشوية علك
📱ياسمين: واخا اهئ هئ هئ متعطلش (بصوت ضعيف اختارق قلبو فحاب السهم) عافاك 😭😭.
قطعات عليه و لاحت التيلي وقفات و دموعها مازال هوادين غسلات وجهها و بانو عينيها منفوخين كيخلعو نصلات حوايجها بالزربة ما بطا عليها غير ايمتا تخرج كتحس براسها مخنوقة لبسات اول حاجة جات عليها عينها عبارة على كسيوة نص كم و عاودات لبسات سبرديلتها خلات شعرها هكاك مشنتف دارت نظاظر ديال الشمس يدرگو عينيها اللي مازال مدمعين هزات ساكها و نزلات بلاما يشوفها حتى واحد خدات طاكسي و توجهات للكافي اللي قاليها تعطل الطاكسي حيت الطريق عامرة فحين محمد اللي كان مكسيري لدرجة خلص بروصي فالطريق باغي غير ايمتا يوصل كانت سبقاتو هي جلسات فالطيراس اللي كان شبه خاوي بحكم يله 11 وصل و بقا كيقلب بعينيه حتى بانت ليه جالسة على غير عادتها جلستها كتوحي بالحزن اللي حاسة بيه وقف عليها و هي هزات فيه راسها كتشوف فنظراتو الحنينة و عينيه مخلوعين جلس حداها كيتنهد و قال….
محمد:(بملامح متفحصة) مالك اياسمين شنو بيك (تنهد) خلعتيني بزاف معرفتش كيفاش درت حتى وصلت
ياسمين:(باقا دايرا نظاظرها قالت بصوت مخنوق و خفيف) سمحليا امحمد ولكن…
محمد:(كيشوف فيها بأسى مكرهش يجرها و يعنقها ولكن احتراما لرغبتها مابغاش يدير حتى حاجة اكتفى انو يشد ايدها اللي كانت حاطة فوق الطبلة و دوز عليها يدو بحنان) تهدني بعدا و حيدي دوك النظاظر عاد ندويو
ياسمين:(هزات يدها لوخرى و محاولاتش تجر اللي بين يدو بالعكس هي مكرهاتش تلاح على صدرو و تبكي و تشكي و تعاود ليه كولشي حيدات النظاظر و شافت فيه قرات فملامحو الصدمة)
محمد:(بصدمة كيشوف فالعوينات اللي دارين كيف الشهدة رجعو منفوخين و حمرين حتى من البياض رجع حمر خلعاتو بزاف و قال) اش هادشي….. گاع هدا بكا اياسمين مالك شنو عندك
ياسمين:(غير جبد ليها البكا وهي تحدر راسها كتبكي تاني و تشهق و قالت بصوت مخنوق باكي) عيييت امحمد عيييت اهئ اهئ
محمد:(بعدم صبر طلق من يدها و ناض للكرسي اللي حداها جرها لعندو بدون سابق إنذار حاوطها بين ذرعانو و ضمها لصدرو و قال بصوت حنين مشا مع مسامعها بحال البلسم لجروحها) مال حبيبتي شكون قلقك قولي ليا
ياسمين:(كانت ديك التعنيقة بمثابة حلم بالنسبة ليها و تحقق كأنه ضغط على شي بوطونة نفاجرات بالبكا بصوت مرتافع خلات كولشي ناس اللي جالسين فالطراس يشوفو فيها وهو زاد تخلع و تعصب بغا يعرف مالها قالت بصوت مبحوح) مابغيتوش اهئ هئ هئ علاش دارت اهئ ليا هكاااا
محمد:(مزيرها عندو و كيدوز يدو على شعرها مخلوع وفنفس الوقت معصباه حالتها) تهدنييي اياسمين تهدني عاد عاودي ليا واش دار ليك شي واحد شي حاجة بغيت غير نفهم
قاطعو الكارسون اللي جا طلب ليه هو كافي نواغ وهي حليب باللويزة كيسمع فصوت شهقاتها اللي بداو كيتباطأو بشوية بشوية حتى بدا كيخفاف البكا…..
ياسمين:(بدات كتهدن بشوية كان حضنو ليها بمثابة بلسم تحط على جروحها ملي عاقت براسها معنقاه حشمات و زادتها التزنيكة على حمورية وجهها بالبكا هزات راسها عليه حادراه الارض و حتى هو ممتانعش عارفها كتحشم يكفي انه حقق واحد من الاحلام اللي كانت كتراودو طيلة هاد المدة اللي عرفها فيها بعدات عليه شوية ولكن بقات يدها بين يدو كيدوز عليها بحنان و كيشوف فيها بنظرة متفحصة قالت بشوية و صوتها مخنوق) سمحليا امحمد برزطتك
؛
محمد:(كان مزيان حتى سمع هضرتها تعصب و شوفتو تقلبات لتخنزيرة مد يدو بشوية لذقنها و هز ليها راسها بحنان حتى شافت فيه و فعيونو المخنزرين و قال بحزم) اش هاد الهضرة عاوتاني اشمن تبرزيط الله يهديك
ياسمين: غير قلت احم…. غتكون مشغول و شديتي طريق على ودي
محمد:(بابتسامة) واخا نكون فاخر الدنيا نجي عندك (قاطعو الگارسون اللي جاب الطلب) هزي شربي حليبك و تهدني عاد عاودي ليا
ياسمين:(عاد سرى معاها القالب شنو غتقوليه و اش غتعاود ليه خلاتها على الله و هزات حليبها كتشرب فيه)
محمد:(خدا قهوتو بدا كيشرب فيها و يفكر شنو ممكن يكون عند بنت فعمرها يخليها وصلات لهاد الحالة بقا مراقبها حتى سالات حليبها عاد خدا يديها بين يديه كيتحسس فيهم بحنان) ياسمين شوية دابا
ياسمين:(مقادراش تشوف وجهو كتفكر ملي كانت معنقاه وجهها مزنك و عينيها باقيين منفوخين قالت وهي حادرة راسها) شوية الحمد لله دابا
محمد: هزي راسك اياسمين (تسناها حتى هزات راسها فيه و كمل و عينيه معلقين فعينيها) تقدري دابا تعاودي ليا مالك
ياسمين:(بارتباك) دابا….. احم ه هو…. تخاصمت مع ماما ووو عيرااتني
محمد:(متيقهاش حيت باينة شي حاجة كثر من مخاصمة ولمن حتارم رغبتها) ماشي مشكل كتبقى ماماك و غتصالحو (قال بمزاح و ضحيكة حنينة) البكايية صدقتي عيشة دميعة مع راسك خخخخ
ياسمين:(ضحكات على هضرتو بشوية) ههههه
محمد:(بارتياح) غا ملي ضحكتي لينا اختي (كمل بجدية و زير على يدها حتى هزات عينها فيه) ياسمين بغيت ندوي معاك فشي حاجة….
ياسمين:(هزات عينها فيه استجابة لطلبو وكان عندها احساس انو غيجبد ليها الموضوع هدنات راسها فنفسها و عاودت شافت فيه) واخة احم
٠
محمد:(بجدية) كنت غنعيط لك قبل متعيطي نتي
ياسمين: احم…. علاش
محمد:(بمزاح) علك اختي…. بغينا نسولوك واش مغاديريش معانا شي حل
ياسمين:(حشمانة و بزز باش كتخرج الهضرة) ديالاش الحل احم….
محمد:(بجدية) ياسمين نجيك للصراحة… مابقيتش صابر بغيتك فداري
ياسمين:(بصدمة على جرأتو) احم… مافهمتش
محمد:(عايق بيها فاهمة ولكن كتهرب) ديري ليا شي وقيتة نجيو انا والدار نزوركم
ياسمين: هاء…. اش غنقول ليهم
محمد:(ضحكاتو) هههههه وايلي على شنو غتقولي ليهم هضري مع ماماك تقولها لباباك
ياسمين:(بسرعة و عفوية) ويلي منقدرش….
ياسمين:(بسرعة و عفوية) ويلي منقدرش (حسات براسها ملي شاف فيها و قالت) احم… زعما واش تقدر تهضر مع بابا نتا
ج
محمد:(بارتياح) اه حتى هذا نظر عطيني لادريس ديال الواليد نهضر معاه
ياسمين: واش دابا
محمد:(بمزاح) ايه الالة الليلة منرجع حتى نهضر معاه
ياسمين: واخة…
عطاتو لادريس و طلبو الغدا تغداو بعدما علمات ختها تقول للدار راه عندها تغداو انسومبل و خرجو بغا يوصلها و رفضات حدات طاكسي و توجهات لعند دعاء دوز معاها العشية وصلات لعندها لقاتها غير هي وولدها لقات فخبارها كولشي دوات مع مها و عاودات ليها على نهار العراضة حتى ندمات مها عاودات ليها ياسمين على اللقاء و شنو قالت ليه و كولشي
دعاء: اححح ياختي هاد محمد باينة فيه راجل وولد الناس تبارك الله
ياسمين: (بفرحة) خاصك تشوفي ملي كيبدا يدوي حنين كيجيني بحال بابا والله
دعاء: ياختي نتي المباركة يطلع بحال بابا عند شي تصويرة ديالو
ياسمين: اه تسناي (هزات تيليفونها دخلات للواتساب وراتها الفوطو دبروفيل كان لابس تيشرت و داير النظاظر تيبان زاز لوز) هاهو
دعاء:(كتكبر و تصغر فالتصويرة و تحقق فيه) زوين ياختي بوكوص و تيبان كتريزما و ظريف (تنهدات) ان شاء الله يطلع زهرك حسن من زهري
ياسمين:(عنقات ختها كدوز يدها على ظهرها بمواساة) حتى نتي زهرك زوين و مازال ربي يجازيك على صبرك….
دوزو الخواتات العشية مع بعضياتهم حتى ل6 خرجات ياسمين خدات طاكسي و دخلات لدارهم لقات مها جالسة غير شافتها ناضت عنقاتها فالاول و الاخير كتبقى مها و باغا غير مصلحتها، ديما الام كتبغي مصلحة ولادها و كتبغي ليهم كل خير الام مكاتبغي حتى واحد يكون حسن منها ولو خوتها و ولادها كتبغيهم يكونو حسن منها الحاصول الله يخلي ليكم امهاتكم و اللي ميتة الله يرحمها و يسكنها فسيح جناته
ثورية:(عنقات بنتها بحنان وقالت) سمحي ليا ابنتي راني ماكنتش عارفة سمحي ليا
ياسمين:(عينيها غرغرو و عنقات حتى هي مها زيرات عليها و قالت) ماشي مشكل اماما مسامحاك حتى نتي سمحي ليا رفعت علك صوتي
ثورية:(رخات منها و جراتها جلسات حداها) الحنينة ديالي قلقتك حتى بكيتي شوفي العوينات
ياسمين:(بابتسامة بريئة) نتي راك ماما واخا ديري لي درتي منتقلقش منك….
ثورية: الله يرضي علك ابنتي لا كان فالسما ينزل لك كان فالارض يطلع لك نوضي ابنتي خودي لك دوش ترتاحي و اجي نجمعو انا و بنتي الحبيبة
ياسمين:(وقفات باستها فحنكها) واخا يالحبيبة
فعلا مشات ياسمين تقدي مسائلها فحين محمد توجه لعند الاب ديالها اللي كان فالحانوت وصل للحي ديالها سول على البوتيك نعتوه ليه و تمشى شوية حتى لقاه متوقعش انه يكون كبير هكا و حتى الديكور و كولشي مزيان دخل توجه عند البنت اللي فلاكيس اللي غير شافتو عجبها بدات كتقاد فشعرها و تقرص فحناكها….
محمد: السلام عليكم
سلمى:(بصوت محلون و عينيها كيرمشو محاولة تبان كيوت) وعليكم السلام اسيدي اش حب الخاطر
محمد:(كيشوف فيها وقال بينو و بين راسو مال هاد المونيكة) كاين السي مصطفى
سلمى: احم اه اسيدي كاين تفضل للبيرو ديالو (وقفات و زادت قدامو تنعتو ليها غادة و كتعوج محاولة تبين المؤهلات ولكن معامن نتي اختي) هاهو اسيدي تفضل
محمد:(بابتسامة) شكرا
زادت هي و نظرها مازال معلق عليه اما هو دق الباب حتى اذن ليه مصطفى بالدخول حل الباب بشوية و بدا داخل بابتسامة وقف مصطفى احتراما له
محمد:(مد يدو يتصافح معاه) السلام عليكم سي مصطفى
مصطفى:(كيشوفيه و يحاول يتعرف عليه ولكن معرفوش مد يدو بدورو سلم عليه بنظرة مبتاسمة مزينة وجهو البشوش) وعليكم السلام مرحبا بيك اولدي تفضل جلس
محمد:(جلس فالكورسي بطريقة مأدبة و ابتسامة خجولة) ربي يخليك اسي مصطفى كيف دايرين الاحوال
مصطفى:(عجباتو طريقة هضرة محمد و الصواب و الاحترام اللي فيه) الحمد لله اولدي و نتا امورك على خير
محمد: الحمد لله بخير (قال بجدية) بلا شك غتكون معرفتينيش انا محمد تاج الدين ذهايبي فالرباط
مصطفى:(عقد حجبانو بتفكير كيحاول يستعقل الكنية حتى ضربات ليه طن فدماغو وقال بابتسامة) ولد السي حسن تاج الدين…
محمد:(بتفاجأ) ايه هو هذا اسي مصطفى كتعرف الواليد؟
مصطفى: كنعرفو اولدي فايت ليا تعاملت معاه بزاف المرات كيبقى شوية و كيف دايرين عمامك (بتذكر) سمحليا اولدي مسولتكش شنو تشرب
محكد:(باعتراض) لا لا مكاين لاش اسي مصطفى شكرا (قال بابتسامة فرحان حيت صدق كيعرف باه و عمامو يعني اختاصر عليه نص الطريق) الواليد و عمامي كلهم بيخير الحمد لله ربي يحفظك
مصطفى:(بابتسامة) ايوا الحمد لله اولدي (كمل بتساؤل) نقدر نعرف سبب زيارتك ليا
محمد: كل خير اسيدي (تقاد فالجلسة بجدية) جيت قاصدك اليوم طالب راغب فيد بنتك لالة ياسمين ايلا قبلتي عليا
مصطفى:(عقد حواجبو باستغراب) مرحبا بيك اولدي غير هو فين عرفتي ياسمين
محمد:(بثقة) شفتها مني كنا فاگادير تلاقينا فالجردة بحضور الابن ديالك و طلبت منها العنوان ديال حضرتكم و وقعو شي مشاكل مكتابش نجي حتى لدابا
مصطفى:(ثيقو حيت شافيه كيدوي ثايق فراسو لا ارتباك لا والو) مرحبا بيك اولدي غير هو الاصول تجيب واليديك و مديرهاش مني قلة الصواب
محمد:(بابتسامة لطيفة) الله ياودي الاصول معروفين غير هو بغيت ننهضر معاك انا اللول عاد ايلا كتاب نجيب واليديا باش حتى لا قدر الله و رفضتي منتسببش ليهم فشي احراج
مصطفى:(عجبو بالصواب اللي فيه و طريقتو فالهضرة و الاداب) الله يكملك بعقلك اولدي تبارك الله عارف باك و عمامك ناس طيبين و حتى نتا ولد مأدب و مصواب و من عندي انا الله يسخر ولكن الرأي فاللخر كيبقا ديال ياسمين
محمد:(بتفهم) طبعا اسي مصطفى سقسي البنت و باشما كان رد عليا باش نديرو شي زيارة انا و العائلة حسب الاصول..
مصطفى: ان شاء الله اولدي الله يجيبنا فالصواب (تبادلو اطراف الحديث شوية و ناض محمد مغادر بعدما تبادلو ارقام الهاتف)…..
بقا السي مصطفى كيفكر و لقا انه ولد الناس سمعة عائلتو طيبة و هو برزقو و حرفتو مصواب و مأدب و عجبو بزااف احترامو ولكن قرر انه ميقوليها والو ليوم حتى تهدن النفوس بقا هو فالحانوت…
فحين محمد شد الطريق للرباط فرحان و مرتاح حيت اولا وافقت عليه ياسمينتو و ثانيا حيت قبل بيه باها و مخيبوش قرر انه يدوز هاد الليلة فالرياض يعلم واليديه و نيت يشوفهم واخا مكره و محاملش كون جات فالصواب يعيط للي كيهموه لعندو للدار و يقول ليهم ولكن لازم هو اللي يمشي عندهم
وصل للرياض مع جوايه الثمنية فهاد الاثناء كتكون الدار كاملة مجموعين فالصالة الكبيرة كيتحثو و يتعاودو و يتناقشو دق فالباب حلات ليه دادة محجوبة خدامة و كتعتابر وحدة من اهل الدار من نهار تزاد لقاها كاينا سلم عليها و دخل عليهم فالصالة لقاهم كاملين مجموعين و اللي زاد فرحو وجود ختو احلام الحنينة ديالو هي وولادها و لقا حتى شيماء ختو من باه و ولدها سلم على الكل بالفم الا جداه باس ليها راسها و عمتو و مو و احلام اما شيماء سلم عليها غير بايدو من ديما معندوش معاها و من صغرهم كانو كيضاربو طالعين مكيتحاملوش جلس حدا تيسير و فجنبو الاخر جداه لايح يديه على كتافهم بزوج كيهضر معاهم على الحال و الاحوال حتى هز عينو لقاها مقابلة معاه لابسة قميص مزير عليها مبين فورمتها الجدابة و لونها المثير شعرها الاسود طالقاه و عينيها مكتخاطهمش التكحيلة جمالها جداب و عربي اصيل لكن تصرفاتها كيخليو السر يطير منها جات عينو فعينها ضحكات ليه بتحلوين و عضات على جنب شفتها و دارت عند راجلها اللي حداها حطات يدها على فخدو محاولة توصل ليه رسالة مشفرة ضحك محمد بسخرية و شفقة على حالها و حتى هي وصلها المسج دار راجلها عندها محاول يبدا مع الحديث اللي سالاتو قبل ما يبدا بجملة “ضارني راسي مافيا اللي يهضر” صرطها بدورو و وجع يكمل هضرتو مع باه حتى سمحو صوت محمد كيتكلم
محمد:(كحب بشوية ملطف صوتو و قال بصوت جدي) الله يخليكم واحد الدقيقة تسمعوني بغيت نقوليكم شي حاجة
حسن: تفضل اولدي قول
محمد:(حشم و فنفس الوقت بقا محافظ على الجدية ديالو) بغيت نكمل ديني و نتزوج ان شاء الله تمشيو تخطبو ليا….
بوووووم لاح القنبولة و تفرگعات و الودنين سمعو و انقاسمو الجهات جهة ملامحها كيعتليها الفرح و السعادة و جهة الصدمة و الفقصة و جهة ضحكة صفرة مورقة باين موراها كره كبير قاطع تفكير الجميع صوت تزغريتة حارة من عند كريمة عمتو..
حكيمة: لولوولولوي (بفرحة مسايعاهاش) الله يا ولدي هداك هو نهار العيد و الفرحة كاملة
لالة كلثوم:(عنقاتو فرحانة هي) ايه اولدي نهار مبارك و مسعود نمشيو نخطبو للغالي ولدي
عنقها حتى هو و بقا كيتلقا التهاني من عند اللي فرحانين ليه و حتى اللي
محاملينوش الا جوج اللي موصلوهش اميمة اللي طاح عليها الخبر كيف الصدمة فحالا خوا عليها سطل ديال الما طايب كيبربر و تبعو ليها بسطل مثلج مقدراتش تخيل انه باغي يتزوج و يبني حياتو و مستقبلو مع مراة غيرها اللي كان مصبرها هو عزوفو على الزواج اما دابا مقدراتش تخيل المنظر و كرهات هادي اللي غيتزوج بيها و توعدات ليها بشر دارت ضحكة صفرة و ناضت عندو باركات ليه وهو مشافش فيها گاع
الشخص الثاني اللي مدواش هي سلوى بنت عمو اللي كانت نوعا ما حشمانة ظنها انه غيخطبها هي و فنفس الوقت عندها تخوف تكون شي وحدة غيرها بركات فنفسها بزز و ناضت باركات ليه و جلسو كيتبادلو اطراف الحديث حتى دوات حفيظة بصوت مرتافع موجهة هضرتها لحسن
حفيظة:(بثقة فالنفس و ابتسامة مغرورة) ايوا خاصني نهضر مع ختي ربيعة نعلمها باش نمشيو
حسن:(باستغراب) علاش غتعلميها و علاش غنمشيو
حفيظة: باش نخطبو بنتها نجاة لمحمد
سميرة:(بصدمة) كيفاش اختي
حفيظة:(بتخنزيرة) اه ياك محمد بغا يتزوج ايوا كيما زوجت ولادي غنزوجو
جات تهضر سميرة وهو يقاطعها محمد بصوت صارم
محمد:(بجدية و تخنزيرة قاصحة فحفيظة) اول حاجة انا ماشي ولدك انا ولد سميرة (شاف فعينيها مركز) ثاني حاجة انا غنتزوج بلي بغيت انا ماشي اللي بغيتو نتوما و ثالث حاجة حتى كون مكنت باغي حتى وحدة سميرة اللي ليها الحق تلقا ليا عروستي
شيماء:(مخنزرة فيه و السم كيتقطر منها) اول حاجة اسي محمد حتارم مي و ثاني حاجة مي هي اللي كتزوج دراري ديال الدار يعني هي اللي غتختار لك……
حسن:(بصوت قاصح غوت) شيمااااااء هنينا (دار عند حفيظة) سمعتي الولد شنو قال غيتزوج بلي باغي هو (بغات تقاطعو خنزر فيها حتى سكتات مراضياش و دار عند محمد بابتسامة) من حقك اولدي تزوج باللي بغيتي غير هو واش كنعرفوها
محمد: مكتعرفوهاش ولكن تقدر تعرف الاب ديالها تعامل معاكم شحال من مرة سميتو مصطفى التازي
حسن:(حاول يستعقل ولكن خانتو الذاكرة) لا والو اولدي معقلتش ولكن اللي فيها الخير ديرها والله يكمل بالخير
سميرة:(كضحك فرحانة لولدها خصوصا انها شافتو كيفاش باغي ياسمين وحتى هي عجباتها) الله يسهل عليك اولدي و متسالني غير العرس المطرطق نديرو لك نتا و مراتك زينة البنات (كتقلي السم لحفيظة اللي غير كتسوط) و مدامك بغيتيها و بغاتك منزيدكم غير الرضى و الدعاوي الزينين يا المرضي ديالي.
كملو هضرتهم فهاد النحو الا سلوى اللي غير سمعات الاسم ديال اب البنت عرفات انها ماشي هي تسلات لبيتها رضخات الباب و طاحت موراه كتبكي بألم كانت متوقعة انها غتكون هي ولكن خابو ظنونها و تهرس قلبها على الولد اللي حياتها كاملة وهي كتسنا ولو نظرة منو من نهار حلات عينها وهي كتبغيه و معلقة بيه و بانيا امالها عليه رغم انو عمرو واعدها بسي حاجة او حتى فات معاها حدود الاخوة ولكن هي كانت كتفهم تصرفاتو غلط بكات و تنخصات وهي بدورها كرهات هادي اللي جات فبلاصتها و طبيعي انها تكرهها لكن الفرق بينها و بين اميمة انها اختارت تحتارم رغبتووو و حبها الصافي ليه خلاها تبغي فرحتو و سعادتو ولو على تعاستها هي….!
نخليوها هي و نتوجهو لغرفة اخرى فنفس الدار كانت فيها اميمة جالسة كتسوط معصبة تقيصها تفرگع شادة التيلي مدوزة لابيل لصاحبتها عفاف غير جاوبت سرسبات ليها كولشي باعصاب
عفاف: دابا شنو غديري عارفاك مغتسكتيش
اميمة:(بشر) ماشي انا اللي نسكت مازال يتسناو دقتهم والله عمرهم يشوفو النهار الزين طول ما النفس كطلع و تنزل فيا
عفاف:(بتردد) ولكن اصاحبتي راه كان غيجلس حتى يعيا و يتزوج نتي اللي غالطة
اميمة:(بتجنن) كيفاش غالطة كيفاش الالة ميتزوجش راه كنحس بالموت داخلاني العافية شاعلة فيا
عفاف: متنسايش راك مزوجة واش بغيتيه يبقى يتسنا فيك
اميمة: مستعدة نطلق على ودو كون يعطيني غير اشارة نقلب الدنيا على جالو (سمعات صوت حدا البيت عرفاتو غيكون يوسف قلبات بسرعة منحى الهضرة) صافي اعفاف دوزي عندي غدا مور العصر نمشيو…. يله احبيبة مع السلامة….
دخل يوسف مجنن و معاجبو حال معصب من محمد و كارهو كيفاش ديما هو محط الانظار ديما كولشي عندو فيه الزهر حتى نهار بغا يتزوج متسوق لحد و الاهم انه كسر خاطر مو و كلمتها و مخلاهاش تختار ليه كيفما اختارت لخوتو دخل كيسوط و معصب لقاها جالسة كتشوف فيه ببرود كيما ديما…
اميمة: مالك معصب ياك لاباس
يوسف:(كيسوط) مكينش اللي معصبني قد داك محمد (دار تيهضر معاها مغدد) كيفاش قدر يوقف فوجه الواليدة
اميمة:(بفقصة حتى هي) اصلا هو ديما هكاك معرت شنو حاسب فراسو (تتحاول تكره خوه فيه و تخلق الفتنة) ديما كيبغي يبان عليكم نتوما و يكون حسن منكم
يوسف:(زادت شعلاتو ولا كينهج عينيه ولاو حمرين) بزاف عليييه تايكون حسن منااا بعلوك ديال الخلا (بعينين حمرين و توعد) ولكن دابا تشوفيي اش غيوقع عليه
اميمة:(مازال كتزيد فيخرات) خاصو يندم و يعرف قيمتووو
يوسف:غينداااام غير بلاتي غيبقا على الضس
سكتات بعدما شعلاتو مزيان و خلاتو يزيد يكره و يتوعد ليه بالخيب و نزلات عندهم لتحت جلسات حدا عدوزتها اللي مكانتش حسن من يوسف كانو عينيها شاعلين بالغضب و فيهم واحد الشوفة قاصحة و حارة متتقبلاش كيفاش يرفض قرارها او بالاحرى كيفاش ميخليهاش دخل فحياتو متقبلاتهاش و حالفة تتبرد حرها فعروستو و ترجعها فنهارها
عند محمد فكان هضر مع باه خبرو بكولشي و قاليه غيمشيو نهار يرد عليه باها تعشاو مجموعين و شغلهم الشاغل زواج محمد اللي مفرح شي و قاهر شي سالاو العشا و كل واحد تكفح لبيتو الا محمد اللي مشا للجلسة اللي فسطح يكمي يله جبد التيلي يدوز نمرة ياسمين هو يسمع صوت المشي دور عينو حتى لقاها اميمة بلباس فاضح مقدرش يكمل شوفة فيها بالزربة نزل عينو مخنزر كانت لابسة شوميز دو نوي بيضة حريرية بارزة مفاتنها و لونها الجميل باين منها صدرها الكبير و البارز و طالقة شعرها كتبان فاتنة ثير اي رجل كيفما كان قربات ليه حتى دخلات مع نيفو ريحتها القوية عكس ريحة ياسمين الخفيفة اللي كتعبر على شخصيتها….
اميمة:(بصوت محلون) مبروك الزواج ء لوسي
محمد:(محاملهاش دار غادي) الله يبارك فيك
اميمة:(شافتو غادي مشات بالزربة شداتو حتى شاف فيها مخنزر) بلاتي نهضرو بعدا زربان
محمد:(دار تخنزر فيها و نتر يدو من يدها) كنسمعك دوي من اللخر
اميمة:(بنبرة محلونة كتقحبن عليه) بشوية علك احبيبي (رفعات حاجبها) شنو سميتها
محمد: شكون (اللي 😂😂😂😂)
اميمة:(بكره شديد) العروسة
محمد:( مكره منها و محاملش الوقفة معاها) ياسمين
اميمة: امممم ياسمين (هزات عينها فيه و قربات ليه كثر) باش حسن مني (تنهدات و كملات) شنو اللي فيها و مافياش….
محمد: ماشي ق*** بحالك و مريضة نفسية (خلاها و بدا غادي شوية وقف و قال) الله يشافيك (و مشا هبط)…..!
خلاها موراه كتغدد و تفقص مكرهاتش تغوت مشات كتجري لواحد الوسيدة محطوطة فالجليسة دارت فيها وجهها وغوتات بجهد تا ارتاحت و نزلات لبيتها لقات يوسف عاد خارج من الدوش لابش شورط مخلي عضلاتو باينين شافها بديك الحالة و بدا كيقرب ليها و هي كتبعد حتى لصقاات مع الحيط مخسرة ملامح وجهها محاملاهش يقرب ليها خشا وجهو فعنقها و بدا كيوزع عليه بوسات و يدو هابطة مع ظهرها حتى حس بيها بعداتو و خسرات عليه “عيانة مافياش اليوم” و تخطاتو متوجهة لبلاصتها مخلياه كيغلي و معصب ردخ الفوطة مع الفوطوي و مشا حتى هو لبلاصتو تخشا فيها…
نخليوهم و نمشيو لعند ياسمين اللي كان باها مقرر انه ميخبرهاش بالامر ليوم نظرا لخصومتها مع مها و حالتها حتى تفجأ انها تصالحات مع مها و جالسين سمن على عسل تبشر وجهو بفرحة وقرر يفاتحها بالموضوع ولكن تسنا حتى يفوت العشا و يتجمعو فعلا داكشي اللي دار حطو العشا تعشاو هزات ياسمين الطبلة و جابت ليهم الديسير باش يجلسو شوية يتحتثو و يقصرو حتى قرر انه يبدا فالهضرة…
مصطفى: بنتي ياسمين بغيت نهضر معاك فواحد الموضوع
ياسمين:(عرفات البلان متعلق بمحمد تزنكات و بانت فيها وبزز باش دوات) واخا ابابا
مصطفى:(مركز فملامح وجهها) اليوم جا عندي واحد الولد للمحل
ثورية:(بفضول) شكون هاد الولد
مصطفى: صبري يا هاد المراة (خدا رشفة ديال الما و كمل) جا عندي بخصوص ياسمين
ثورية:(دارت شافت فبنتها لقاتها مزنكة وغتسخف شربات البلان) ايه زيد
مصطفى: قالي انو تلاقا مع ياسمين فاغادير (دارت بالزربة شافت فيها مصغرة عينيها بمعنى تبارك الله على الحشومية) و ملي هضر معاها عطاتو لادريس قالت ليه شوف بابا ياك ابنتي
ياسمين:(ارتاحت شوية بحيت كانت خايفة يكون محمد قاليه على اللقاء ولا شي حاجة ولكن ارتاحت ملي قاليه هكاك و فنفس الوقت حشمات قدام باها مكرهاتش تنوض تهرب ولكن مجاتش خاصها تجاوب باها) اه ابابا
ثورية:(عاقت ببنتها و ورقات البلان ديال نهار صاحبتها عرفات بيلا غتكون تلاقات معاه) و كيف جاك هاد الولد امصطفى….
مصطفى: الصراحة ولد الناس و باه و عمامو معرفة قديمة تبارك الله بخدمتو و مأدب و مصواب
ثورية: ايوا مزيان و اش بان لك فيه
مصطفى: الرأي الاول و الاخير كيبقى ديال ياسمين واخا هو بان ليا ولد الناس (دار موجه هضرتو لياسمين اللي غير شاف وجهها جاتو الضحكة ولات فحال ماطيشة حمرة و خاشية راسها بين كتافها) اش بان ليك ابنتي
ياسمين:(هزات عينها فيه و كتسول واش من نيتو كيسول فيها راه مكرهاتش الارض تنشق و تبلعها عاد كيسول فيها واخا من جيهة كانت عاجباها هضرتو على محمد و على صوابو و ادابو مرة على مرة كتزيد تغرق فيه و تبغيه كولشي فيه زوين و كولشي فيه كيهز كيانها و يخليه يبان فعينيها غير على الكل ماهو غير عليهم بحيت هو الشخص الوحيد اللي قدر يكسر قاعدتها فالحياة دخل لحياتها بدون استئذان و زعزع روتينها سهات حتى عاود باها نده عليها عاد قالت و بصعوبة) انا مم…معرفتش…اللي بان لك ابابا
و ناضت كتجري لبيتها كتعتر فجلايلها حتى سمعو خبطتها فالدروج جمعات الوقفة كتحك فطرمتها من حر الدقة و كملات طريقها ماوقفات حتى لبيتها مخلياهم كيضحكو موراها….
مصطفى:(كانت جملة اللي بان لك ابابا بمثابة قبول حيت كون كانت رافضة غتدير ردة فعل اكثر عنف من هادي ولكن هي سلمات ليه زمام الامور يعني من جيهتها هي موافقة بقا دابا الرد كيرجع ليه) ايوا اش بان لك اثورية….
ثورية:(بضحكة عايقة ببنتها قابلة و عاجبها الحال و حتى هي عجبها الحال تتزوج بنتها بلي بغات و اهم حاجة ميسور و مغتعيشش الحرمان) اللي بان لك نتا اخويا القرار كيرجع لك اما حتى ياسمين راها قابلة
مصطفى: باينا هاد الجيل ولا هو كيدير شغلو ايوا غنسول على الولد و نشوف اخلاقو و من هنا لواحد اليوماين نرد عليه المهم نتوما وجدو ريوسكم لكولشي الاحتمالات….
ردات بالموافقة على كلامو و ناضو كملو سهرتهم فالبيت مخلين ياسمين طفات التيلي و بزز باش داها النعاس بالحشمة…..
دازو ثلاث ايام بحلوها و مرها دوزاتها ياسمين و مها و حتى دعاء فتخمال الدار و الحلوة خصوصا ملي سول السي مصطفى على محمد و سمع عليه غير الخير هو و عائلتو و قرر انه ميوقفش فرزق بنتو و يرفض عريس كامل تبارك الله و على قول الرسول صلى الله عليه وسلم:
{إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير}
و حتى هو دار بهاد الحديث و قرر انه يرد عليهم اليوم و يحدد معاهم موعد اللقاء او الشوفة باش يديرو كولشي على اصولو…
صاوبو الحلاوي الاشكال و الانواع خملو الدار و بدلو الطلامط و خلاو كولشي كيشعل مشات ياسمين للحمام مع دعاء و دوزو احسن تحمحيمة بالماسكات و التبريمات حتى رجعو كيف الحمامات و فهاد الثلاث ايام دوات مع محمد مرة وحدة و غير كلام عادي روتيني مجبدش ليها الموضوع باشما يشتتش ليها تفكيرها و يخليها على راحتها حتى ياخد الرد من عند باها….
فصباح يوم جديد كان محمد فالمحل ديال الاثاث اللي ولا كيعمر فيه معظم وقتو بعدما لقا بزاف التخلويض و اللعب فالنوار فقرر يوقف على شغالو الشيء اللي ولا كيسبب ليه العديد من المشاحنات مع يوسف اللي فغالب الاحيان كان محمد كيتفادا الصداع معاه و كيخليه اما حتى سعيد مكيلقاش معاه المشكل حيت عباد الفلوس هداك و كل مرة كيطلب منو مبلغ من المال و محمد مكيترددش فانه يعطيه ليه كيصيفطو عند علي اللي عارف خدمتو كيعطيه يسني عاد كيمد ليه بلا حساب ولكن اللي كان شاغل بال محمد هو فلوسو فين كيمشيو مرتو بخدمتها ممحتاجاش و ساكن مع الواليدين واكل شارب و كان متخوف محمد من انه يكون كيلعب بذيلو و يكون متورط فشي مصيبة…..
جالس محمد فالبيرو كيراجع الحسابات حتى صونا تيليفونو بنمرة ممقيداش جاوب بهدوء و رزانة اذا به كيتفاجئ بسي مصطفى النسيب ايلا كتاب تبادلو السلام و السؤال على الاحوال و كذا حتى فرحو اب ياسمين بالقبول و ريح قلبو اللي كان واكلو و شاغل بالو طيلة هاد الايام اللي مرو تافقو على الزيارة اللي قررو انها تكون بعد يومين باش يتعارفو و يقررو موعد الخطبة الرسمية توادع محمد من السي مصطفى….
قطع الخط و هو فرحان و مرتاح البال و متشوق للعيشة مع ياسمينة قلبو اللي فمدة وجيزة خلاتو يبغيها و يتمناها حلالو دون اي مجهود منها فقط ببساطتها و خجلها و جمالها الرباني مترددش انه يدوز ليها المكالمة لكن مجاوباتش….
مجاوباتش حيت مكانتش حدا التيلي عذرها و ناض فرحان توجه للرياض فين كانو العيالات جالسين فباحة الدار حاطين بريرد ديال اتاي مجمعين معاهم حياة و اميمة و حتى شيماء اللي لاحظ انها طولات فالجلسة هاد المرة ولكن معارش الامر اهمية اخر واحد يقدر يتشوش عليه هو شيماء سلم عليهم و باس راس سميرة و حكيمة و لالة كلثوم و جلس حداها معنقها الشيء اللي غدد حفيظة و فقصها كونو مدايرش ليها قيمة
ممعتابرهاش من اساسو بحال كل ما فالدار اللي دايرين ليها الف حساب الا هو اللي على قولتها خرج ليها من الجنب و مازال فقصتها ديال زواجو بلي ختار هو مبرداتش حتى زف عليهم الخبر اللي نزل كيف السم على قلب اميمة اللي تأكدات ان ناقوص الخطر بدا كيدق عندها و انها لازم تخطط و تفكر كيف دير تلغي هاد الزواج ولكن للحظة تراجعات على فكرة الغاء الزواج و قررات تمسكن حتى تمكن….
محمد: الواليدة (دار عند كلثوم و حكيمة) الميمة وعمتي وجدو راسكم تمشيو تشوفو الناس بعد غدا
سميرة:(طلقاتها بتزغريتة حارة فرحانة لولدها) ايه اولدي موجودين من دابا يوم المنى احبيبي
حكيمة: تبارك الله على ولدي محمد الله يجعل كولشي مبارك و مسعود و يتمم كولشي على خير
شيماء:(بسم) فين ساكنة هاد البنت و فين غنمشيو
محمد:(بابتسامة استهزاء) ماشي غتمشيو غيمشيو غتمشي الواليدة و عمتي و مي و احلام و الواليد و عمي عمر لا غير
شيماء:(بصدمة) لاواه زدتي فيه نتا بزااف (مخنزرة فيه) ماما هي اللولة خاصها تمشي يكفي انك كسرتي كلمتها
محمد:(شاف فيها ببرود ممزكش ليها من اساسو) دويت و ساليت هادو اللي غيمشيو حتى للخطبة الرسمية و نمشيو كاملين
حفيظة:(بكره عرات على نيابها) ايوا سمع اولد سميرة مايجيك مليح راه والله و مامشيت انا لا مشا حد ولا تم هاد الزواج كتسمعني
محمد:(معطاهاش اهمية و مجاوبهاش اصلا وقف هز سوارتو و تكلم موجه هضرتو للي كيهموه) المهم الخبار فراسكم وجدو داكشي اللي كديو (جبد واحد البركة من بزطامو مدها لمو) وجدي اميمتي كولشي على حقو و طريقو تقداو كولشي و بزايد واللي خصات صوني عليا نجي حتال عندك…
سميرة:(بفرحة مسايعاهاش) الله يرضي عليك اولدي مكرهت نهبط القمر و نديه لبنتي ياسمين (تبسم ليها محمد و دار غادي و هي تابعاه بالرضا حتى جات فمسامعو هضرة شيماء)….
شيماء:(بكره و سم مكتبغيش اللي كون حسن منها و جاها هادشي مبالغ فيه عاد فقصة انها مغمشيش و مها مغتحظرش) ايوا صافي غتزوج بالاميرة ديانا
محمد:(و هو غادي رد عليه بصوت مستهزء قصدو يفقصها و يسممها) حسن منك و منها…
خرج و خلاها كتغدد موراه و مها كثر منها اللي حلفات انها غتحرر فيهم هاد الفرح خصوصا ملي شافت سميرة فرحانة و مسايعاهاش الدنيا و كتناقش مع الحاجة كلثوم و حكيمة على شنو غيديو و كتزيد غيرتها من سميرة تكبر و نار الحسد تشعل فقلبها….!
كملو نهارهم عادي فالرياض جاو للغدا كولهوم باستثناء محمد و خبراتهم سميرة فالغدا بالموافقة و شي فرح ليه و شي كرهو و شي حالتو عالم بيها غير الله تغداو و ناضو يديرو القيلولة الا حفيظة اللي جرات حسن و بدات كتشكى عليه و هو راسو اساسا متبوخ عليه بالخدمة و المحل و عارفها حتى هي مساهلاش و المشاكل و صداع هي مهم خسر عليها جملة وحدة
“الولد عندو مو دخل فيه نتي حكمي فولادك و الفرح فرحو يدير اللي بغا و يدي اللي بغا”
و دار عطاها بظهرو يرتاح فحين هي العافية شعلات فيها و باش تهمدها خاصها تشوف سميرة وولدها كيقاسيو و زيد عليهم العروسة الجديدة اللي مشاكيلها سابقينها و توعدات ليها بالعذاب المرير فحين ياسمين مسكينة مداريا بوالو فرحانة انها غتزوج بالولد اللي ارتاح ليه قلبها و بغاه و كدعي الله يدوم عليها فرحتها و يتمم ليهم كولشي على خير….
فاقو اهل الدار من القيلولة قبل صلاة العصر و هبطو الدراري و الحفايد يلعبو وجد الكاسكروط صلاو العصر و كلاو و شربو و قررو انهم يخرجو يتقداو داكشي اللي غيديو بدلات حكيمة و سميرة اما حتى الحاجة كلثوم مقادراش على دورانهم عاوناتهم بالدعاء قررو يديو معاهم امنية و تيسير منها يونسوهم و منها ياخدو رأيهم مخلين حفيظة و شيماء موارهم كيتفقصو و يتغددو على القيمة اللي طاحت ليهم كيفاش ميديوهمش و هوما اللي مولفين يمشيو ياخدو على دوقهم و كولشي خلاوهم محشرات فالزاوية مضحكات فيهم عيالات الولاد و اللواس ملقاوش فين يبردو سمهم دارو على عيالات الدراري بداو يآمرو و ينهيو ولكن معامن هوما اميمة معاهم كلمة بكلمة ما حتى خولة جارة راسها لتيساع طلعات هي و حياة لسطح مع بعض المكسرات يدردشو و يقرقبو الناب يشوفو اجدد صيحات الموضة و يفكرو اش غيلبسو للخطبة و العرس فرحانين لمحمد اللي عندهم عزيز بحيت عمرو قلل عليهم الاحترام و ديما مفكرهم فالمناسبات و مبرعهم بالكادوات و حتى سميرة عزيزة عليهم بطيبتها و طبعها المسالم مقالو علاش ميديوناش ولا كيفاش اكتفاو انهم يتمناو ليهم الحظ الجيد و يدعيو معاهم و بس على عكس اميمة اللي بقات مع عدوزتها و لوستها فالمعيار و حشيان الهضرة و شي كيبرد غدايدو فشي مخليين نسرين و سهام و صفاء (بنات عم محمد عمر) غير مقابلينهم و كيضحكو على حالهم اللي تعودو عليها….
دازو يوماين اخرين و وصل اليوم الموعود يوم الشوفة او التعارف او الرشيم تتعدد الاسماء و المعنى واحد…..
اليوم اللي غيضمن فيه محمد ياسمين و غيدير اول خطوة باش ترجع حلالو كان يوم استثنائي عند الطرفين محمد اللي كانت الدنيا مسايعاهش بالفرحة و اخيرا غيشوف ملاكو و يرجعها ديالو بالشرع و فيما يرضي الله……
ناض على بوصبيح دار شوية الرياضة باش يبقى اونفورم و داز عند مو اللي كانت تقدات كولشي اللي خاصها و حتى هي مقاداها فرحة و داز عند الحلاق سكسف على الحالة و خدا حوايج جداد و الفرحة غامراه و شوية ديال التوتر اللي ضروري منو عند الطرفين غير هو عند ياسمين كان التوتر و الخجل غالبين على جميع المشاعر لوخرى ناضو حتى هوما بكري كانت بايتة عندهم دعاء و خالتهم الصغيرة مريم شخص مقرب ليهم بزااااف بحكم انها مزال صغيرة و عاد شخصيتها الطيوبة و المرحة كانو وجدو فالامس كولشي بما انهم جايين للعشا فقررو انهم يديرو صواريات و مملحات مع العواصر عاد يحطو ليهم العشا فصباح فاقو بكري تكلفات دعاء و مريم بطياب بداو بالسلاد اللي كانو وجدو كولشي بقا ليهم غير الحطان كانت عبارة عند سلاد رويال او سلطة ملكية بفواكه البحر و الروز و الماييس و تقريبا جميع الخضر صاوبو كولشي فطبسيل بيضاوي الشكل و طرفوها و دازو لدجاج اللي ختارو انهم يديرو الدجاج البلدي طيبوه بالعشق و الدغيمرة و موراه نص حولي مشوي تكلفات بيه ام ياسمين دارتو يطيب اما ياسمين فهبطات تسيقة للدار كاملة و عاودات جبدات الصالة مقررين انهم يجلسو مجموعين بما انهم ماشي بزاف بيهم سالات و دازت لتمر معمر بالكركاع قاداتو فبلاطوه و ستفات الكويسات ديال الحليب بالزهر للاستقبال و طلقات العود فالدار كاملة حتى ولات كتشم الريحة من برا سالاو كاملين مع الوقيتة ديال الغدا و كان مازال عندهم الوقت مغايجيو حتى للمغرب تغداو و صيفطو ياسمين دوش و دوشات و رخات عظامها خرجات دارت روتينها رطبات و تعطرات و لبسات بيجامتها تكلفات دعاء بشعرها نشفاتو ليها و صاوباتو و فهاد الاثناء مشا بالها لآخر مكالمة دازت بيناتهم اللي كانت البارح فليل و سهات كتبتاسم و تفكر
<فلاش باك>🌺
متكية ياسمين فوق ناموسيتها بعد يوم شاق مليوحة بتعب و بالها عند محمد اللي مابقاش كيفارق خيالها ولات ديما كتفكر فيه و بالها مشغول بيه حتى وصلاتها ابيل من عندو…
📱محمد: الو ياسمين
📱ياسمين: احم…. الو سلام
📱محمد:(بابتسامة حب) لاباس عليك اياسمين
📱ياسمين:(التامسات الحب و الحنان فهضرتو و ابتسمات حتى هي) الحمدلله بيخير و نتا
📱محمد:فاحسن حالاتي (تنهد و كمل) فرحانة؟
📱ياسمين:(ولفات على جوابو بحيت فينما كيهضرو كيكون هذاك هو جوابو لكن اللي حشمها هو سؤالو مكرهاتش تزعم و تقوليه غنطير بالفرحة ولكن طبعا متقدرش) احم… اه
📱محمد: كون تشوفي انا (توقف للحظة و كمل) حاس براسي مالك الدنيا مابقا والو و غتكوني ليا…
📱ياسمين:(فرحات بهضرتو كثر ماحشمات خصوصا ملي سمعات غتكوني ليا قلبها قفز جراء دوك الكلمات البساط ولكن كان الوقع ديالهم على قلبها كيف النار خلا قلبها يضرب بعنف و فراشات تلعب فكرشها مكاينش ماحسن من انك تجمعي مع حبيبك و توجو علاقتكم فالحلال خصوصا اذا كان شي واحد فحال محمد، معرفاتش متقول اكتفت انها تهمهم بصوت خفيف) اممم
📱محمد:(بنبرة مازحة) اممم عاوتاني اختي ههههه دابا نشوفو قدية هاد اممم غي بلاتي مابقا قد ما فات
📱ياسمين:(بصوت خفيف بورشو) و وراه مالقيت مانقول
📱محمد:(بحب و نبرة لعوبة كيتغزل بيها على طريقتو) خلينييي انا اللي نقول نتي راه غير تسكتي و الناس اللي يقولو اغزالي
📱ياسمين:(حشمات من ديك غزالي بزاف و طلعاتها التزنيكة و فنفس الوقت عجباتها هضرتو و نبرتو اللعوبة اللي واخا كيتغزل بيها ولكن بشكل رجولي خاتر محساتش بانها محملاتوش او شي حاجة) احم…. نقدر نقطع دابا
📱محمد:(مساخيش بيها ولكن كيصبر راسو بكلمة مابقا قد ما فات) سيري اياسمين تصبحي على خير
📱ياسمين: تصبح على خير (قطعات و رجعات تكات على ظهرها كتشوف فسقف و تفكر فحياتها اللي غتقلب كيفاش غتشارك حياتها مع واحد اخور تشارك معاه كولشي حتى انه غيولي شريك العمر كيفاش غتنتاقل من مرحلة لمرحلة هي معارفة عليها والو ولكن اللي مصبرها هو حبها لمحمد)
<العودة>🌺
رجعات للواقع على صوت دعاء اللي كانت علماتها بيلا سلات ليها صبغات ليها ضفيراتها بلون بيج بارد و بقاو كيتبادلو اطراف الحديث حتى وصلت الستة و كان صيفط ليها محمد انهم خرجو من الدار كان هذاك هو الوقت باش….تنوض تلبس و توجد راسها جبدات ليها دعاء كندورة بيضة خفيفة جاية فصالتها مخزانية لبساتها….
طلقات شعرها اللي كانت صاوباتو ليها دعاء سامبل الشيء اللي خلاه يزيد يطوال كثر حتى ضرب ليها فالتحت ديال ظهرها
دازت لوجهها و كيما ديما رطباتو مشطات حواجبها دارت مسكرة و فاراجو و عكير خفيف دارت سنيسلة ديال الذهب خفيفة مع كورميطتها و حلاقتها و خاتمها رشات ريحتها و ضربات اخر طلة فالمرايا و خرجات من البيت وهي راضية على طلتها
كانت بسيطة و راقية ولكن بانت فيها زوينة و فاتنة لقات دعاء لابسة حتى هي كنيديرة و ماماها و خالتها لابسين قمايص كانو حطو الحليب و التمر فوق الطبلة و حطو حتى الحلويات و المملحات و العواصر و عاودت مها بخرات الدار بالعود….❤️
نخليوهم و نمشيو لعند محمد اللي كانو واجدين داز للرياض لقا غير اللي غاديين و البنات اللي فالباحة اما حفيظة و شيماء فكانو فالبيت كيخططو هز محمد و عمو داكشي اللي تقداو و اللي كان عبارة على جوج كراطن دالسكر و بوكي ديال الورد راقي بلاطو مشكل باجود انواع الشوكولا و بواطة ديال المجوهرات عبارة على كوليي خفيق معاه حوالقو مرصع بالالماس ختارو محمد من الكوليكسيون اللي مازال ما خرجاتش و ساعة نسائية راقية…..
خرجو داكشي النص حطوه فطوموبيلة ديال باه و النص فديالو طلقاتها حكيمة بتزغريتة قبل ما يخرجو و هزات الزهر كترشو عليهم عاد خرجو من الرياض لابسين احسن مكاين ماماه سميرة بجلابة بقميسها و صبيبيط دومي طالون و ماكياج خفيف مزينها و حكيمة بحالها اما لالة كلثوم فكانت لابسة جلابة بيضة ديال سوسدي مخدومة بالراندة كتبان منورة وصطها و احلام لابسة جلابة حتى هي زوينة مع صباط طالون و هازة وليدها اللي كانت فعمرو تسع اشهر مصلاحش ليها تخليه
اما مولاي السلطان الملحة والسر عليه كان لابس شوميز بيضة حال الصدفة الفوقانية و ثاني الكمام مع سروال كلاص كحل و صباط حتى هو كلاس كحل داير ساعة فخمة و ريحة عطرو يا سلام و الاب و العم كانو بجلالب تفرقو على الطوموبيلات و شدو الطريق ضاحكين فرحانين وصلو مع اذان المغرب نيشان
سبق محمد اللي كان عارف الدار و عاد باه وقفو الطوموبيلات و نزلو منهم فرحانين و وجوههم مزينين بالضحكة و عينين كيبريو حاضينهم من الشرجم ماشي من عادتها طل من الشرجم و عمرها دارتها واخا تسمع حس الصداع ولكن ليوم و بلاما تحس لقات راسها كطل عليهم و نظرها معلق على اللي ساكن قلبها بطلتو و وسامتو اللي كتخليها تزيد تغرق فيه
دقو فالباب و تسناو بعض الثواني حتى حل عليهم الاب ديالها بجلابة خفيفة مبينة شنو تحتها ضاحك و مبشور سلم عليهم و زاد قدامهم كيرحب و يعاود حتى دخلو مع باب الفصيل كيشمو فريحة العود لقاو ثورية و مريم و دعاء فاستقبالهم تسالمو سلام حار و خدات دعاء و مريم من عندهم داكشي اللي هازين و حطوه فواحد الطبيلة فالصالة نيت دخلو جلسو فصالون و جلسات معاهم ثورية و هوما كيتبادلو الاسئلة على الحال و الاحوال و كيرحبو و يعاودو بيهم
و اهل محمد عاجبهم الحال على الصواب و الادب و الترحيب اللي تلقاو هزات دعاء التمر و مريم الحليب و فرقوه عليهم و جلسو كيتعارفو بيناتهم…
مصطفى:(بابتسامة ووجهو مبشور) مرحبا بيكم و الف مرحبا اسيدي
حسن:(حتى هو مبشور عجبو مصطفى اللي كبر بيه) ترحب بيك الجنة اسي مصطفى الله يكبر بيك
ثورية:(كانت تكلفات بالترحيب بالعيالات) مرحبا بيكم اختي اهلا و سهلا
سميرة:(برزانة و الضحكة خارجة ليها من وذنيها) ترحب بك الجنة الالة الله يجعل هاد الدخلة مباركة مسعودة
ثورية: ان شاء الله ياربي اختي انا ثورية و هادي بنتي الكبيرة دعاء مزوجة و عندها وليد و هادي ختي مريم
حكيمة:تبارك الله و صلى على النبي متشرفين الالة ثورية انا حكيمة عمة محمد و هادي سميرة ماماه و كلثوم الام ديالي
ثورية: الله يبارك فيك اختي حكيمة متشرفة بيكم
مصطفى:(كيرحب بمحمد اللي ملي دخل وهو مكتافي بالابتسامة حشمان و متشوق يشوف حبيبتو اللي مكرهش يخليهم جالسين و يمشي يعنقها و يشبع منها) مرحبا بولدي محمد زارتنا الخير والبركة
محمد:(حط يدو على قلبو بابتسامة) ترحب بيك الجنة اعمي ربي يحفظك
ناضت مريم و دعاء فرقو عليهم الصواري و العواصر ضاحكين حتى تكلمات لالة كلثوم بصوت رزين و حنين مع ثورية
كلثوم: ايوا ابنتي فيناهيا عروستنا جيبوها لينا نشوفوها
ثورية:(بابتسامة) هي اللولة الحاجة (دارت عند دعاء) سيري ابنتي جيبي ختك
استاجبات ليها دعاء ومشات لعند ياسمين اللي لقاتها غتسخف كترعد و الحناك مزنكين و حشمانة بزاااف
دعاء:(كضحك) اتي مالك كتقفقفي عليا
ياسمين: ناري يا صاحبتي حشمانة بزاااف
دعاء: ههههههه تهدني راه مازال مغايدخل علك
ياسمين:(ضرباتها لذراعها) سكتي من هاد الهضرة يالماسخة
دهاء:(كدور راسها بمعنى احياني) اممممم عليا انا هاد الهضرة هههههه وا تهزي قدامي راه بغاو يشوفوك
ياسمين:(جلسات فوق ناموسيتها ممتانعة) اويلي اش بغاو يشوفو فيا سيري بعدي مني
دعاء:(فقصاتها) بغاو يشوفو سي التبون واش غوز ولا زرق اتيييي نوضي تكعدي راه تعطلنا
ياسمين:(محاملاش تنوض) واكواك تفوووو هانتي شوفي واش كولشي هو هذاك
دعاء:(بابتسامة) ما شاء الله عليك قل اعود برب الفلق نخاف غير تهزي شي عوينة (هزات حاجبها و غمزاتها) و عوينة المحبة قاصحة ههههه ولايني حتى هو زين و قلدة و صواب…
ياسمين:(ابتاسمات بخجل و حدرات راسها ملي جابت دعاء سيرتو) هههه
دعاء:(جراتها من ذراعها) زيدي نتي غديري ليا فيلم
خرجات من البيت و رجليها مهازينهاش لابسة كندورتها و بليغة كحلة ديال الجلد مع خلخالها اللي مكيخطاهاش و الشعر مطلوق مسبسب كتبان كيف الحورية دخلات بشوية للبيت فين كانو جالسين كانو داوين حتى هزو ريوسهم فيها و سكتو….
هزو ريوسهم فيها و سكتو كيشوفو فهاد الملاك اللي جاي و مولاي السلطان عينيه حوالو شاف حتى عيا فالنسا بالبلدي و الرومي و حتى وحدة مدارت فيه حالة….
ياسمينتو اللي عجباتو بالرومي و هبلاتو بالبلدي سها و محسش براسو و هو كيشوف فيها من راسها لرجليها كيحاول يقلب على شي عيب لكن والو ربي خلقها و تفنن فيها من شعرها اللي كيعجبو طولو و قوتو للونها اللي زاد بان لعويناتها اللي مهزاتهومش لا فيه لا فغيرو لحنيكاتها لمزنكين كولشي شافو و كولشي عجبو فيها مكرهش ينوض يعنقها قدامهم ولكن….
للاسف لكل مقام مقال و حتى ياسمينة مكانتش حسن منو دخلات هزات عينيها جوج ثواني تاخد نظرة و فعلا خداتها توجهات عند العيالات سلمات على ماماه اللي عجباتها كثر من نهار اللقاء سلمات عليها بحرارة وهي كتردد….
“تبارك الله مشاء الله”
و حتى ياسمين سلمات عليها بصواب و الادب و الحشمة و دازت عند حكيمة اللي حتى هي عجباتهاااا سلمات عليها حتى هي و دارت لكلثوم اللي غير كتصلي على النبي سلمات عليها و باست ليها يدها بادب عجباتهم كاملين و دخلات ليهم لخواطرهم دازت لاحلام اللي ضاحكة بفرحة وقفات هاد الاخيرة سلمات عليها بفرحة و ياسمين عجبها الحال و حشمات….
باست الوليد و دازت للرجال باه و عمو باست ليهم يديهم واخيرا وصلات عندو غير وقفات دخلات مع الانف ديالو ريحتها الخفيفة اللي من نهار التعنيقة و هي لاصقة فنيفو مد يدو ليها و هي بزز باش سلمات عليه بطراف صبعانها و جرات يدها بزربة مخلاتش ليه الفرصة فين يستمتع بملمس يديها الناعم خلاتو غير كيضحك و عينيه تينقزو بالاعجاب و الحب اللي عندو من جيهتها هبلاتو و مخلاتش ليه فين….
جلساتها سميرة بينها و بين حكيمة و عنقاتها بالجنب فرحانة بيها و مكرهاتش تعنقها ماهي عروسة الغالي و حتى صوابها و حشمتها خلاتها دخل لخواطرهم بزربة….
كلثوم: تبارك الله ماشاء الله عليك ابنتي الله يحفظك و يحجبك من كل عين حامية
ثورية:(عرفات بنتها دابا مغتجاوبش جاوبات هي فبلاصتها فرحانة و ضاحكة عجبوها و خصوصا ملي شافتهم كيفاش دارو على ياسمين طمنات عليها معاهم) الله يبارك فيك الحاجة الله يطول فعمرك
حكيمة: ايوا ابنتي ياسمين كيدايرا لاباس عليك
ياسمين:(بصوت خفيف بزز باش خرجاتو) الحمد لله اخالتي و نتوما
حكيمة:(بابتسامة بشوشة) الحمد لله ابنتي ربي يحفظك انا عمة محمد حكيمة و هادي ماماه سميرة و هادي جداه و ميمتي كلثوم
ياسمين: متشرفين اخالتي
كملو بيناتهم الهضرة على الحال و الاحوال اما الرجال فجبدو كاع المواضيع دواو فيهم و محمد غير ساكت و عينيه معلقين على ياسمين….
شداتو الصهدة و مكرهش يجرها و يتخبا هو وياها و يشبع شوقو منها ساهي فيها مرة يبتاسم مرة يغوبش هي اللي كانت غير حادرة راسها و شعرها مغطي وجهها كتجاوب بصوت خفيف يادوب كيسمعوه اللي حداها و دعاء و مريم حاضينو و كيتغامزو عليه حتى سمعات دعاء صوت الباب و كان راجلها جا دخل سلم عليهم و تعرف عليهم حتى طاب محمد و نغز باه اللي نسا راسو….
حسن:(حابس الضحكة على ولدو اللي ما بقا عندو صبر) سيادنا تعرفنا عليكم و تعرفتو علينا و حنا مشرفين بيكم تبارك الله و نعم الناس
مصطفى: بحسبك اسي حسن حتى حنا مشرفين بيكم
حسن:الله يكبر بيك اسي مصطفى الولد شفتوه و عرفتوه بخدمتو بدارو برزقو ولله الحمد مغنشكرش ليكم ولدي سولو عليه و عرفوه سمعتو سابقاه و البنت شفناها تبارك الله عليها الله يخليها ليكم و من استقبالكم لينا باينة تربيتها تبارك الرحمن و دابا حنا طالبين راغبين فيد بنتكم المصون لالة ياسمين لولدي محمد…
مصطفى:(بابتسامة فخر) ايه اسي حسن مرحبا بيكم و الف مرحبا يشرفنا نتناسبو و نكونو عائلة و من جيهتي انا موافق واخا غنعطيكم طرف من قلبي (غرغرو عينين ياسمين على اثر الهضرة اللي قال باها بحنان) يشهد عليا الله انني غنعطيكم عويناتي باش كنشوف الحنينة ديالي و الحشومية ماشي حيت بنتي غنشكرها والله العظيم حتى كنقول ليكم الحق راه يلا ديتوها غتديو القلب الصافي و الحنينة ديال الدار
حسن: تبارك الله اسي مصطفى باينة فيها بنت الاصل و الحشمة وحتى حنا راه نحطوها فوق رموش عينينا و راه غتولي وحدة منا سهمها من سهم بناتي
مصطفى: ربي يخليك اسي حسن انا من جيهتي لا انا لا مها منعطيوكم مانحيدو ليكم كيبقا الراي و الشوار ديال البنت و ايلا بغات هي مانزيديكم غير الله يجعل كولشي مبارك و مسعود
حسن: تبارك الله عين العقل (شاف جيهة ياسمين اللي كانت حاطة يدها على ركبتها و مكمشة على كندورتها بحر الحشمة) اش قلتي ابنتي
ياسمين:(كون كانت دايزة فالصواب تنوض تجري لبيتها و تخليهم ولكن مجاتش صبرات راسها وهي كتحس بالانظار كاملين عليها و بصوت خفيف قالت) اللي بان لك ابابا
حسن:(بابتسامة عجباتو ياسمين بحشمتها و صوابها) ضروري نسمعوها منك ابنتي راه معندك مناش تحشمي
ياسمين:(شداتها البكية ولكن معنها مدير ضروري تهضر) احم…. موافقة
عمر:(فرحان حتى هو) سيادنا الله يجعل كولشي مبارك و مسعود….
ياسمين:(بكثرة ما متمنية قربو بكثرة ما كرهاه دابا و باغا تبعد منو بسباب حشمتها بغات تبعد و هو يشدها من يدها حتى جلسات بلهلا يحزقو ليها) طلقني عافاك دابا يجي شي واحد..
محمد:(كيمرر صبعانو على يديها و كيستشعر ملمسهم الناعم و عينيه على وجهها و شعرها) شششش مكاين اللي يجي (قرب ليها كثر حتى ولا وجهو فوجهها و قال بهمس) هزي عينيك اياسمين (تسنى منها تهزهم ولكن والو بقات على حالها حابسة البكية حتى عاودها مرة اخرى) ياسمين… هزي فيا عينيك..
استاجبت ليه هاد المرة و هزاتهم ببطئ حتى توقفو على عينيه و غرق فلون عيونها اللي كيجيبو لضس طايح على زنافرو من صفاوتووو و بريقهم اللي عمرو شافو فشي وحدة فيهم بريق فشكل كيلمعو فحالا حابسة البكية سها فعويناتها و حتى هي سهات بعويناتو اللي كانو كيشعو بالحنان و الحب واخا تكون عمية غيبان ليها الحب اللي عندو من جيهتها فعينيه خصوصا ابتاسمتهم الحنينة مقوسين على شكل هلال كل واحد ساهي فالاخر العينين كيتكلمو فحين الفام ساكتة و القلوب تتعزف سمفونية العشق اللي تترقص عليها الفراشات فكرش كل واحد عاق محم براسو و دور نظرو على وجهها كامل و قال بصوت خافت حتى ضربو انفاسو فوجهها بفعل القرب ديالهم
“ما شاء الله”
ابتاسمت بلا ارادتها بخجل و هبطات راسها قلبها كيضرب ولكن فرحانة و عاجبها راسها و كونها انثى بغزلو المحترم و شوفاتو قدر يرضي غرورها كإمرأة و يزيد من ثقتها بنفسها و شكون فينا متبغيش تكون الاحسن فعيون حبيبها بقات كتفكر حتى حسات بيديه على وجنتيها وجر عندو راسها طابع قبلة شغوفة على جبهتها موصل ليها بزاف الرسائل بحكم ان للقبل رسائل و اللي وصلها من قبلتو رسالة حب و احترام و تقدير والاكثر رسالة ديال الامان، الامان اللي حسات بيه معاه بوحدو حتى ملي قرب ليها محساتش بشي شعور خيب بالعكس تمنات اللحظة متساليش و المثل عندو هو اللي مقدرش يصبر قدام هاد الخجولة الفاتنة اللي سلباتو عقلو و قلبو و تفكيرو و برهنات ليه انها الانثى الوحيدة اللي كيخضع ليها و ميقدرش يسيطر على نفسو قدام انوثتها الطاغية و خجلها البريئ و جمالها الخلاب…
مد يدو بدون تردد لحنيكاتها و هنا كانت الصاعقة ملي استشعرو يديه ملمس حنيكتها اللي كانو رطبين و سخان و حومر و طبع قبلة بريئة على جبينها وهو مساخيش بيها ولكن تفكر انهم تعطلو عليهم ولازم يتكلمو فالاجراءات طلق من وجهها مساخيش و شد يدها وقال بصوت حنين…
محمد: ياسمين (تسناها للحظة حتى شافت فيه) قولي ليا شنو تبغي ديري خطبة و ضريب الصداق و عرس او شنو
ياسمين:(تالفة و معارفة والو فهادشي اللي عارفة انها مباغاش العرس و عارفة تاني ان مها غتبزز عليها دير العرس قررات تخلي كولشي عليه) احم انا….. انا معرفتش اللي بان لك
محمد:(بمزاح) انا اختي لا جيتي عليا نهبط دابا نجيب العدول نديك فيدي هههههه (رجع للجدية ديالو) غير قولي اللي باغا متحشميش
ياسمين:(تالفة و حشمانة) غيير اللي بان لك نتا والله
محمد:ههههه واخا الالة اشنو بان لك نديرو خطبة و ضريب صداق من هنا ل15 يوم و موراها بشهر العرس (شاف فيها كيحاول يقرا ملامحها) اش بان لك
ياسمين: مزربتيش شوية؟
محمد:(طاااايب و واصلة فيه للعظم) اشمن زربت راه مكرهتش من غدا تكوني فداري ولكن ضروري من العادات جاوبيني دابا شنو بان لك.
ياسمين:(باغيا غير تفك) واخا صافي حتى هكا مزيان (ناضت تالفة و حشمانة) يله نمشيو تعطلنا
محمد:(كيشوف فيها سبقاتو كتفتف و ترعد غا بوحدها ناض حتى هو تبعها حاى قرب حداها وقال) الله يرزقني معاك الصبر ابنت الناس (ضحك و حتى هي ضحكات و مشات سابقاه حناكها حمرين و حشمانة من الانظار اللي توجهات ليهم)….
كان الكل مبتاسم وهوما كيشوفو فيهم داخلين متواتين مع بعضياتهم و كيبانو كيحمقو بجوج جلسو و قال ليهم محمد على القرار بغات تعتارض الام ديالها بحجة زربتو لكن قاطعها السي مصطفى بالقبول حيت مجاتش تعتارض و هوما قررو مع بعضياتهم….
انهالو عليهم كاملين بالمباركات و تحط العشا….السلطة فالمقبلة اللي عجباتهم و كلاو فيها نيت و هوماا فرحانين بالاستقبال و الكبرانية اللي كبرو بيهم حسسهوم انهم فرحانين بيهم تهزت السلاد اللي رجعات خاوية و تحط الدجاج البلدي بزيتون و البيض البلدي و اللوز مقلي عجبهوم المنظر و كيف كنقولو العين كتاكل قبل الكرس كلاو فيه حتى هو و تهز حتى تحط نص الحولي مشوي مزين بالبرقوق و المشماش و الزنجلان مرشوش عليه عاد اخر حاجة الديسير اللي كان عبارة على صينية كبيرة اوفال فيها جميع انواع الفواكه اللي متواجدة فالسوق فهاد الفترة و الطبقة الفوقانية فيها طورطة ديال الكراميل باردة حلاو و بردو على قلبهم و تهزت الطبلة شكرو الطياب و الاستقبال الرائع و توادعو معاهم الى اللقاء القادم….
ودعو النسا ياسمين بحرارة و تبادلت مع سميرة و احلام ارقام الفون و سلمات على الرجال بقبلة على يدهم و هوما كيرضيو و يعاودو و بقا محمد اللي شد فيدها مبقاش بغا يطلق حتى هزات فيه عينيها مخرجاهم فاجأها بغمزة و بوسة من فمو تلفاتها و صدمتها و طلق من يدها كيضحك مخليها وراه كيف الصنم عينيها كيرمشو و قلبها كيضرب بعنف…..
مرة على مرة كتكتاشف جانب جديد منو و اليوم اكتشفت الجانب الجريئ منو و الزلال و الغريب فالامر انها بينها و بين نفسها مقدراتش تنكر انها عجبها الحال دخلات على صوت مها كتنگر على الزربة ولكن هي اخر همها عقلها معلق بيه حتى بداو كيشكرو و يعاودو فيهم بدلو حوايجهم كاملين و حلفات ثورية ماتكمخ شي وحدة حتى يجمعو الروينة فعلا جمعوها و تجمعو فالصالون حاطين الديسير و بداو كيحلو فالكادوات من البوكي ديال الورد اللي عجب ياسمين للشكلاط اللي كان بنين و غالي داقو منو كاملين حتى تصدمو بالطقم ديال الالماس اللي جابو عمرهم شافو ولا تصورو انهم غيجيبو ليها الذهب فالرشيم عجبهم الجيست بزاااف و تأكدو انهم ولاد الخير و ناس كرماء جمعات ليها مها الطقم فسامسونيط ديال ذهبها خوفا عليه و بقاو قصارين مخلية تيليفونها فالبيت اللي كان كيصوني بنمرة ديال محمد….
نرجعو عند محمد اللي مشاو مجموعين فالطريق فرحانين طالقين المواسق و ناشطين عجباتهم العشية و الاكثر عجبتهم ياسمين بل حمقاتهم سيرتو جداه بقات غير كدعي معاها و تشكر فيها على صوابها و حشمتها اللي قلالت فوقتنا وهو كيسمع و يزيد يغرق فيها….
وصلو للدار ناشطين رغم ان الوقت متأخر الا انهم محسوش بالعيا بفعل الجلسة اللي كانت زوينة بعيدة على اي طاقة سلبية تجيب ليهم العيا و هنا فهم باه علاش رفض محمد انه يجيب حفيظة او شيماء حيت عارفهم اشنو كيسواو و عارف هضرتهم و افعالهم كانت غتنوض شي مشكلة ايلا مشاو….
دخلو للرياض حتى لقاوهم فوجههوم فجليسة ديال المرح حفيظة و شيماء و اميمة و خولة و عيالات العمام اما سلوى كانت بايتة عند صاحبتها مقدراتش تشوف المنظر كانو داوين غير سمعوهم و هوما يسكتو حتى زعزعاتهم حكيمة بتزعريتة حااااارة جامعة فيها فرحة و فقصة و قليان السم خلاتهم غير كيتخنزو….
حسن دخل لبيتو و خوه مشا لبيتو و محمد باس لجداه راسها و باس مو و عمتو و خرج يبات فدارو معندو گانة يجلس معاهم يسممو فرحتو بشي كلمة….
جلسو النسا كيتعاودو بيناتهم و يعاودو للبنات و عيالات العمام على ياسمين و اهلها يشكرو و يعاودو….
حكيمة: تبارك الله و صلى على النبي عليها عمرني شفت فحال زينها تقول حورية ماشاءالله و اش منك يا حشمة و يا صواب الله يحجبها..
كلثوم:(بتأييد لكلام بنتها) اه ابنتي و حتى اهلها ناس مزيانين و معقولين جيدين و موجودين..
حفيظة:(بسم) ايوا صافيييي ضحكو عليكم و بينو ليكم الوجه المزيان اليوم دابا تشوفو مغيخرج فيكم البراني تمشيو عند اللي طامع ليكم فرزقكم و تخليو القريب..
سميرة:(كرهاها و محاملاهاش مكرهاتش تنوض تخنق بحيت كتحاول تنغص عليهم فرحتهم) ايلا كنت انا تقلب و خرجت العار فناسي راه تا ديك بنت الناس غتخرح فيا العار و زايدون يخرج البراني حتى يخرج و ميكونش فحال القريب و فاش غتطمع البنت و الخير اللي عايشة فيه البنت مغرقها و غرقنا معاها غير العراضة ديال اليوم هماوية من داكشي
كتمعني عليها و على اميمة اللي غير ساكتة و دايرا بيها واحد الهالة ديال الهدوء غريبة كتخوف و فداخلها كتسمم بكل كلمة و كتزيد تكره هاد المتطفلة كيما سماتها هي و تحقد عليها….
شيماء:(كتغدد و تسوط كيما سبقلي ذكرت هي انانية و متسلطة مريضة بجنون العظمة و كيبان ليها راسها حسن من كولشي فمرضاتش يتسلطو الاضواء على ياسمين و تخطف منها كولشي) ايوا صافي كتشكرو فيها بحالا معرفت شكون و شنو دايرا غير ملي خلا نجاة باين البرهان كيف غتكون متكون غير شي برهوشة زقزقت حتى عيات و لصقت فيه راه كيقولوها مسمار الدرب يديها ق**ة….
احلام:(هاد الاخيرة اللي شخصيتها قريبة بزااااف لياسمين من ناحية السكوت و الهدوء و البعد عن بنادم الفرق بيناتهم ان احلام شخصيتها قوية وهي اختارت الهدوء عكس ياسمين اللي تفرض عليها قالت ببرود) حتى واحد مطلب رأيك اختي و مازال غتوصل الوقيتة فين تشوفوها و غتشوفو واش غتقولو هاد الهضرة و تخسار الهضرة مكاين لاش معاجبكش الحال نوضي نعسي و متسمعيش لهضرتنا..
حفيظة:(بغات تهضر شيماء وهي تسكتها عارفاها لا دوات كتجبد صداع و تغوت غيخرج باها و تبت التهمة عليهم نغزاتها وقالت) اش قصدك تقولي ء بنت سميرة..
احلام:(بنفس البرود ممكلفاش راسها حتى تشوفيهم) داكشي اللي فهمتيه ء مراة با..
حفيظة:(عصباتهاااا و جننتها والاكثر برودها تمالكات نفسها بزز و ناضت ووقفات معاها بنتها غاديين حتى دارت عندهم و قالت) مازال غتندمو و مازال الايام بيناتنا مازال تبغيو نجاة بنت ختي لدوا و متلقاوها (كملت بصوت خافت لكن مسموع) بالحق البعرة تتقلب على ختها سبعين عام فالبحر تا تلقاها
ودارت مكملة طريقها هي و بنتها و تبعاتهم اميمة اللي بكثرة مع معصبة مكتفية بالصمت و التخطيط بهدوء و روية…
خلاو موارهم احلام يله بغات تهضر وهي تسكتها مها اللي مداتهاش فهظرتهم و كملات هضرتها مع حكيمة و كلثوم مدة لا بأس بها و طلع كل واحد لبيتو….
نخليو هاد رياض عباس الغوتة و نمشيو لعند محمد اللي غادي فطريق مخدم راديو مونسو و بالو مع ياسمينتو و احداث اليوم كيتعاودو قدام عينيه بحال السينتة مدازتش حتى جوج سوايع باش تفارق معاها و توحشها حتى وصل لدارو دخل ناشط كيصفر ضربها بتدويشة خفيفة و هز تيليفونو كيصوني و يعاود حتى صونا خمس مرات ملي مجاوباتش عرف انها غتكون مشغولة حط تيليفونو و استسلم للنعاس و صورتها بين عينيه……
صباح جديد على ابطالنا و احداث جديدة كتسناهم بداية من عند محمد اللي فاق ناشط و فرحان غير حل عينيه جات صورة ياسمين فبالو و ابتاسم بحب هز تيليفونو بدون تردد صيفط ليها مسج فيه
“صباح الخير للخير ديالي ❤️ صباحك مبروك ياسمينتي”
متسناهاش تجاوب عرفها غتكون باقا ناعسة لبس حوايجو ديال السبور و خرج للبحر دار سبور ديالو و رجع لدارو لبس و تأنق كالعادة و قرر يمشي يفطر فدارهم….
دخل لقا الكل جالسين من غير نسرين و سهام و دراري الصغار سلم عليهم و باس راس جداه و جلس كيفطر بالضحك مع عمتوو و مو حتى تكلمات حفيظة اللي ملي دخل وهي كترمي عليه القرطاس من عينيها و كتخزز فيه…
حفيظة:(بصوت مرتافع) ايوا ء محمد الله يجعل كولشي مبارك و مسعود
محمد:(بعدم اهتمام) الله يبارك فيك
حفيظة:(بكره محاملاهش) ايوا عنداك تزوج و تقلب علينا وجهك
شيماء:(بغا يهضر و قاطعاتو) من ديما قالب علينا وجهو و مكبر علينا
محمد:(ببرود) كنقلبو غير على اللي مكيدوزوش ليا اختي
شيماء:(فقصها محسات حتى غوتات فوجهو) انا كثر منك اولد با
محمد:(رفع حاجبو فيها بنظرة قاصحة و قلب وجهو بلا ما يجاوبها مخليها غتنتف شعرها بالفقصة)
حسن:(شاف فيهم بهدوء و رجع دار عند ولدو) ولدي محمد خاصك تعرض على نسابك باش نحددو يوم الخطبة بالضبط…
حفيظة:(بفضول و فنفس الوقت غيض حيت اول مرة مغتكونش هي اللي كتقرر موالفة هي صاحبة القرار مرضاتش) و علاش هوما اللي يقررو حنا نشوفو اللي مناسبنا و نعلموهم….
حسن:(بغات تهضر سميرة وهو يقاطعها بصوت عالي) خرجي داك السوق نتي احفيظة محمد بعقلو و عندو مو اللي تقوليه اش يدير داكشي دابا بينا و بين نسابنا (دار عند سميرة بصوت منخافض) دوي مع لالة ثورية علميهم باش يجيو غدا يتغداو هوما و بنتهم البكرة و راجلها (شاف فمحمد اللي غير ساكت فحظور باه) انا غنتكلف بسي مصطفى…..
سميرة:(بابتسامة فرحانة بنسابها و فرحانة بقليان السم لحفيظة) واخا الحاج ميكون غير خاطرك غير هو صيفط لينا بوشعيب (المتعلم ديالو) يجيب لينا التقضية و السخرة كاملة…
حكيمة:(بتأييد لكلام سميرة) ايه اخويا صيفطو غنتكلفو انا و سميرة بالطياب نديرو لنسابنا شي عراضة معتبرة…
حسن: وا عليه (ناض وقف) يله السلام عليكم..
خرج و تبعوه خوتو بزوج بقاو النسا و الدراري بربعة حتى دوات اميمة….!
اميمة:(عينيها خارج منهم السم) غتبداو من دابا بالعراضات غادين غير ضسروهم
حفيظة:(مفقووووصة و معاجبها حال) خليها دابا تركب فوق ظهرهم وترجع عليييهم هادشي مزياااان
حكيمة: بنات الاصل باينين و بنات الحرام باينين و مكاين لاش نطولو فالهضرة (دارت شافت فشيماء اللي غير مخنزرة) نتي معوالاش ترجعي لدارك…
شيماء: مابقيتش راجعة لديك الدار..
حفيظة:(بجقات فيها عينيها المكحلين) وعلاش اختي..
شيماء:(بنرفزة) خليه ولد مو مازال مو تحكم فيه قلت ليه متبقاش تجيبها عندي خلاها تا مرضات و جابها ليا نقابلها ليه بحالا خدامة..
سميرة:(برزانة) ايوا لاواه ابنتي راه ميمتو و معندو لاين يخليها واش يديها لدار العجزة حتى نتي راه تتمشي عندك مك..
شيماء:(هازة حاجبها) مي ماشي هي مو مي تجلس عندي تا عام كتبقى مي اما مو باش يجيبها ليا نقابلها مالو واخدني مراة ولا خدامة نترس ليه على تريكتو…
حفيظة:(بتأييد لكلام بنتها) ايه لهلا يحييه ولا يطول الزمان على عينيه حتى يرجع شيماء بنت السي حسن تاج الدين خدامة لمو جلسي ابنتي حتى تمشي مو..
اميمة:(بعدم صبر) و ملي كاع هادشي فيكم علاش حنا اخالتي ساكنين معاك (قفزات ملي صهل فيها راجلها باش تسكت)…
يوسف:(غوت فوجهها) جمعيييي فمك ء اميمة (شافت فيه واحد الشوفة ديال كتغوت دابا و ناضت غادية حتى دارت قالت ليه)…
اميمة:(باستهزاء) تبارك الله على اللي ماشي ولد مو (و كملات مشيتها متمخترة بغات تنوض ليها شيماء و حبساتها مها)…
محمد:(كيشرب فقهوتو بهدوء منغم بيها و قال بنبرة مستهزئة) عمرني ماشفت هاد اللوجيك ديالكم نتوما تحكمو فعيالاتكم و ترجعوهم عبيد عندكم يخدموكم و يخدمو مكم و ختكم و نتي (شاف فشيماء) تحكمي فراجلك و تحرميه من مو (بضحكة استهزاء) هههههه نتوما اللي والداكم مراة…!
وقف هز سوارتو و تيليفونو و تحنى على راس مو باسو هي و جداه و عنكش امنية حتى وقفو صوت يوسف الغاضب…!
يوسف: اش كتقصد نتا (تسنى محمد يجاوبو ساعة لاخر كأنه مسمعوش كمل طريقو كيصفر مخليه كيغلي موراه ومو كتهدن فيه وفنفسها كتشحت و تعطيه)…
شيماء:(بكره لمحمد) ضسارة الواليد و جدي هاديك ولا باغي يركب فوق ريوسنا…
كلثوم:(بصوت قوي) شيماااااء جمعي فمك…
سكتات هاد الاخيرة كيما كولشي سكت مكمدينها فقلوبهم…!
شد محمد طريق المحل ديال الذهب عندو فيه الخدمة بحكم غيخرجو الكوليكسيون اللخرة طلع فالطوموبيل و دوز نمرة ياسمين….!
هاد الأخيرة اللي كانت فاقت مع العشرة دارت روتينها و هبطات فطرات يله بغات تنوض تجمع الماعن وهو يصوني تيليفونها بنمرة محمد طلعات لبيتها و جاوبت بصوت حنين…
📱ياسمين: الو صباح الخير
📱محمد:(راشقاليه) صباح الحليب فكاسو، والشكلاط فطاسو، والعسل فتغماسو، واللوز فتهراسو، والحرير فتلماسو، والصديق فتوناسو، وصباح الخير وناسو، والزين لي عاد فاق من نعاسو ❤️❤️ كيصبحتي الزين….
📱ياسمين:(صدمها بردو و حشمها حتى ماقدات وهي كتشوف فالجرأة الخفيفة ديالو و الحواحز اللي كيحيد نهار على نهار) الحمد لله بيخير و نتا…
📱محمد: بيخميرين اودا ختي ناعس مزيان واكل مزيان شاد طريق لمحالي خاصني غير نتي..
📱ياسمين:(ضحكها) ههههه مزيان (سكتات شوية و كملات) انا ليوم غندوزو غي فالدار..
📱محمد:(كيضحك) هههههه نتي طالبة عليها غير جلسي فالدار وجدي ليا راسك لغدا..
📱ياسمين:(باستغراب) علاش شنو كاين غدا..
📱محمد: غيعرضو عليكم الدار باش يتافقو على نهار الخطبة و ضريب الصداق بالضبط..
📱ياسمين: اه واخا صافي
📱محمد:(كان وصل للمحل) يله الزين نخليك ندخل نخدم على ولادنا
📱ياسمين:(حشمها حتى ماعرفات ماتقول) احم…. و واخا الله يعاونك
📱محمد: امين ازيني (قال بصوت خفيف و حنين دخل مع قلبها كيف السهم) ياسمين (تسناها حتى همهمات و قال) تهلاي فراسك..
📱ياسمين:(دخلات ليها نبرتو مع العروق و بورشاتها) حتى نتا..
قطعات عليه و بقات شادة التيلي و حاطاه على قلبها كانها معنقاه هو….و هكا كملو ابطالنا نهارهم عادي بعدما عيطو واليدين محمد لاهل ياسمين و عرضوهم و الاخرين قبلو بفرح دوزو نهارهم عادي فليل دواو غير بمسجات هضرة عادية كل واحد كيحاول يتعرف على الاخر اكثر و يولف عليه….
و صبح الصباح على العائلات بزوج…🤍
فرياض تاج الدين كانت ريحة ديال الطياب عاطية و التخمال ديال الصالونات الهرج نايض و كل مرة طلقها حكيمة بتزغريتة فاقصة بيها حفيظة و شيماء و اميمة و سلوى و مها هاد الاخيرات اللي غير جالسات و كيمقو فيهم و يتغددو على التوجاد و الاستقبال اللي دايرين ليهم….
محمد سالا خدمتو فالمحل و جا لرياض هاز فيديه بواطة متوسطة حمراء مخملية ديال المحل قشعاتها شيماء و تغامزت هي و مها غير بالريط طلع لبيتو لبس و تأنق كيفو كيف مالين الدار كاملين كولشي لابس احسن معندو من الكبار حتى للصغار و العيالات مزيرزين بذهوباتهم باغيين يفوحو بيهم و يبانو…..
دار ياسمين كانو هوما بدورهم كيوجدو و يتقادو…فاقت ياسمين على صوت محمد اللي صونا ليها كالعادة مابقاش كيقدر يبدا نهارو مزيان ايلا ماصوناش ليها و خدا من عندها الطاقة….
فاقت و صحصحات هبطات تفطر و رجعات دوشات و تعطرات و رطبات لحمها كامل صاوبت شعرها سامبل على طولتو و جات حتى للتحت و بوكلاتو و مع قوي بانت فيه واحد الكثافة و واحد الجمال العين اللي شافتو و ماصلات على النبي تعمى علماتها مها باش توجد راسها بدات فماكياجها البسيط دارت بيبي كريم و فراجو خوخي مشطات حواجبها و دارت خط رقيق فوق عينها جبدهم كثر ماهوما مجبدين رجعو كيف ديال القطة رفعات شفارها بمسكرة و اكتفت بكلوس نيود برز شفايفها مع سالات كانت دخلات عليها دعاء لابسة و مأنقة بجلابة فالازرق الملكي بالطرز الرباطي صبغات ليها ظفارها بالبوردو اللي خلا يديها يبانو بوووويض و كيحمقو لبسات ياسمين جلابتها اللي كانت من داكشي الرفيع بثوب ديال الكريب باللون البنفسجي الفاتح بطرزات من الكمام و هابطين من الكتاف على الصدر بتدرجات البنفسجي و اللون الاصفر الفاتح جاتها ملبوسة و زادتها جمال على جمال……
دارت معاها براصليات خفاف و خاتم رقيق مع سنيسلة رقيقة فعنقها و حلقات خفاف لبسات فرجلها سندالة باج ديال الدان مبينة صبيعاتها و كديماتها حمرين و الظفيرات مصبغين بالبوردو يا سلام رشات ريحتها……
ختها كتقرا عليها فالقرآن لانها فعلا جات زوينة خرجو بزوج بيهم و كان مصطفى و ثورية و خليل و ياسين و اويس جالسين غير شافوها و بداو كيصليو على النبي و ثورية اللي لا تقل عن بناتها اناقة طلقاتها بزغروتة….
نزلو كاملين ناشطين طلعو فطوموبيلاتهم و شدو الطريق و قبل مايخرجو على المدينة دازو لوحدة من افخم المخبزات فالمدينة خداو بلاطو مشكل من الحلوة ديال اللوز و بلاطو اخر ديال لي ماكارون عاد بواط ديال الشوكولا يدخلوها فيديهم و شدو الطريق ناشطين حتى وصلو للعاصمة الادارية و شدو طريق الرياض بعدما كانو نعتو ليهم مزيان حتى وصلو لتما و سولو حتى وصلو ليه….
مع النزلة تبهضو غير من الباب الخشبي الكبير و المنقوش…. دق باها وتسناو شوية حتى تحل الباب من طرف محمد فرحان و ضاحك سلم عليهم كاملين بحرارة و مسخاش يطلق من ياسمين اللي هبلاتو بهاد المعنى دات ليه عقلو….
دخلو مع الرياض كيشمو فرائحة العود خرجو للوسط الرياض اللي تفاجئو بالفخامة ديالو و عرفو انهم ناس لاباس عليهم و واصلين و هنا توسعات ابتسامة ثورية و تنهدات بارتياح على مستقبل بنتها و حمدات الله اللي متزوجاتش بنجم اللي اصلا ميوصلش للغنى ديال هاد العائلة……
تلقات ليهم سميرة فالباب بالحليب و التمر و حكيمة رشات عليهم الزهر كتزغرت و تعاود فرحاني بيهم دخلو للصالون فين كانو كل اهل الدار جالسين تصدمات دعاء و ياسمين عند بالهم عارضين على الناس و بداو رحلة التسلام شي كيسلم عليهم بحرارة و شي بنفخة و شي عادي و الاعين كلها متوجهة لياسمين بعدما عرفو انها العروسة….
بهراتهم بجمالها و تأكدو انهم مكذبوش ملي قالو عليها حورية ولكن واحد الزوج ديال الاعين كانو كيشوفو فيها شوفات حاقدين بطريقة خايبة كثر من شيماء و حفيظة اللي كانو حتى هوما كارهينها ولكن اميمة كانت زايدة عليهم مكرهاتش تخنقها و تقتلها بيدها كتشوف فيها و كتحاول تقارن بيناتهم و تقول علاش فضلها عليا….
اما واحد شيماء فمرضها هو مرضها رغم ان ياسمين حسن منها بالف درجة الا انها مازال كتشوف فيها بنظرات استحقار و دونية و مها زايدة ليها فيه كتخنزر فيهم كاملين و تعبر فيهم هاد الأخيرين اللي كانو كيتبادلو اطراف الحديث مع بعضهم…..
ياسمين حشمانة حيت جلسوها حدا محمد اللي جالس متكي ظهرو على الوسادة و مدوز يدو على الوسادة لوخرى من جيهة ياسمين مفرق رجليه و واخد راحتو على عكس ياسمين اللي جالسة مجموعة فبعضها خايفة تقيسو و حادرة راسها وهو مستمتع بقربها و ريحتها اللي كطلع مع انفو و كيستنشقها كيف المخدر بالنسبة ليه للحظة شاف انهم مشغولين كاملين تحدر عندها غير مبالي بالاعين اللي حاضينو بحقد و قال بصوت هامس خفيف….
محمد: جيتي كتهبلي اياسمينة قلبي
ياسمين مجاوباتوش اكتفت انها تهز عينها فيه باش يلاحظ احمرار خدودها اللي كيقتلو ابتاسم فوجهها بحنان و هز يدها لعند فمو كيستمتع بملمسها الرطب طبع عليها قبلة سخونة بلاما يديها فالاخرين المهم كان عندو هو يعيش اللحظة و يبرهن لهاد الصغيرة اللي قدامو على الحب اللي هاز من جيهتها و اللي كيتزاد كل نهار فقلبو….
هاد القبلة اللي كان مفعولها بحال السحر بحال تعويذة حب لقاها محمد على ياسمين سكتاتها و خرساتها لدرجة ان انفاسها تحبسو بالخجل اللي حسات بيه…..فديك اللقطة كانت عمرها حشمات بحال هكاك من جهة حشمانة من نظراتو الشغوفة اللي كيبينو انه لو كان المكان و الزمان يسمحو كان غيتمادا و يدير ماكثر و من جهة حشمات من الموقف اللي طرا قدام كولشي واخا فئة قليلة اللي شافوه و كرهووووو انهم شافوه ولكن بالنسبة ليها هي بحالا العالم شافو حدرات راسها و بقا هو شاد فيدها و مو و عمتو كيقراو عليهم القرآن فخواطرهم…..حتى جا ولد شيماء اللي فعمرو ثلاث سنوات سميتو ياسر اللي متقولش واش ولد شيماء كان شابه باه بيض و حروفو كحلين كيشبه لياسمين كربوز و هضرتو حلوة عزيز على محمد و تا محمد عزيز عليه توجه عند محمد اللي طلق من يد ياسمين و جلسو على ركابيه…..
محمد:(كيبوس فيه و يتكو بلحيتو و لاخر كيضحك) هاهو ولدييي انااا بوس ابابا خالتو (حتى قاطعو صوت شيماء الحاد اللي اغلب من فالبيت سمعوه)
شيماء:(بصوت قوي) غير خليه راه ممولفش على البراني كيخلعووووه….
الكل تصدمو من جوابها و باها بالزربة خنزر فيها هو و محمد اللي طلق من الدري حتى نزل و مشا يلعب معارف والو و شد يد ياسمين اللي كانت تصدمات و تزنكات بالحشمة من الموقف و عرفات ان هادي اول وحدة محاملاهاش فالدار و مازال معارفة الباقي شحال بقات حادرة راسها حتى سمعات صوت..
دعاء:(هاد الاخيرة ملى دخلات وهي مقابلاهم كيخزرو و يسوطو مخفاش عليها طبعا انهم محاملينهومش ولكن مهمهاش طبعا حتى سمعات هضرة شيماء اللي شعلاتها و عرفات انها مغتجاوبهمش تكلفات هي و قالت رافعة حاجبها) اه سبحان الله حتى انا ولدي ممولفش البراني مقربش لجيهتكم خلعتوووووه…!
اشارت بحاجبها لولدها اللي كان جالس بينها و بين باه و عطاتها ضحكة صفرا خلات الكل عاجباه هضرتها من غير واليديها اللي مابغاوش يبداو هكا و البنات غير حابسين الضحكة اما ياسمين ابتاسمات على شقاوة ختها و كانت متأكدة انها غتجاوبها و متخليش حقها….
عند شيماء اللي كان قصدها تبين ليها انها برانية حتى انقلب السحر على الساحر و صدقات مبينة راسها برهوشة وسط كولشي و تحلفات فدعاء اللي طيحات بيها بقاو كيتبادلو النظرات النارية…..!
تحط الغدا اللي كان عبارة على بسطيلة ديال الحوت بداو الماكلة و اميمة اللي كانت جلسات معهم فنفس الطبلة اكسبري كل مرة تمد لمحمد شي حاجة او تسولو….
“محمد نقطع لك، محمد كاسك خوا، محمد زيدك”…!
و الكل ملاحظها و مستغربين لتصرفاتها معاه هاد الاخير اللي تزنك و ماحملش راسو ولكن صبر راسو بزز قدام الناس مابغاش يدير شي تصرف يندم عليه يكفي انه كل مرة كيقصح فيها الشوفة….
تهزت البسطيلة و تحط طبسيل ديال الكوكلي كلاو حتى هو فيه و الطبق الاخير كان اللحم بالبرقوق و المشماش و اللوز و البيض البلدي كلاو و شبعو الكريشة و دازو للديسير وهوما كيشكرو الطياب و العراضة تهزت الطبلة و تحط اتاي يهضمو بيه حتى تكلم سي حسن و سي مصطفى و قررو انه الخطبة و ضريب الصداق غيكونومن بعد 15 يوم بالضبط….
استأذن منهم محمد باش يهضر مع ياسمين شوية و وافق باها واخا هي كون صابت الارض تنشق و تبلعها بالحشمة بحيت كولشي انتابه ليهم و رد ليهم البال حشمات وبزز باش وقفات تبعاتو غير خرجو من البيت و درگو عليهم شدها من يدها و جرها للدروج خلعها و دهشرها معرفات مالو قالت بصوت مرعود خايفة…
ياسمين: محمد فين غادي بيا
محمد:(ضحكاتو خلعتها) ههههههه اغير بشوية علك اختي (بنظرة لعوبة) بغيت نتخلوا بيك ازين…!
ياسمين:(زاد خلعهاااا و حشمها غوتات بصوت منخافض) اويلي خليني نزل..
محمد:(شادها من يدها جرها شوية حتى لصقات معاه و قال بصوت خفيف و حنين) غير كنضحك معاك (كيشوف فعويناتها دايخ) بغيت غير نطلعو للسطح نوريه لك..
ياسمين:(ارتاحت بعدما سمعات هضرتووو و تلبكات ملي شافت عيونو مركزين فععيونها كانه تايه فيهم و كيقلب على خلاصو حدرات عيونها بالزربة حتى زاد و جرها موراه بشوية شوية توقف و دار عندها)..
محمد: تمشي معايا للبيت نجيب شي حاجة ولا تبقاي هنا (قال هكاك ايكسبري واخا عارفها مغتبغيش ولكن مكانش يقدر يمشي و يخليها)
ياسمين:(بعفوية) لا لا ويلي…. غير سير هانا تنتسناك هنااا….
هز محمد راسو بايجاب و طلق من يدها وهو مساخيش خلاها موراه و دخل للبيت مشا للمجورة ديال الكوافوز خدا منهم البواطة اللي دخل معاه و خرج عندها طاير لقاها كتشوف الزرابي اللي مفرشين فالكولوار حنحن حتى هزات واسها فيه مد ليها يدو زعما حطي يدك حطاتها بلهلا يحزقو ليها و الاغرب انها فرحانة و عاجبها الحال خدا يدها زير عليها و زادو لدروج حتى وصلو للسطح…..!
ياسمين تبهرات بالجليسة اللي دايرين عجباتها بزاااف خصوصا انها كتبغي تجلس بوحدها حسات بيلا هادي هي البلاصة اللي ارتاح فيها قلبها شاف فيها محمد لقاها كتشوف مبتاسمة ابتاسم بدورو و جرها لجليسة جلسها و جلس حداها و يديها بين يدو مساخيش يطلق من يدها لاحظ برودة يدها وقال….
محمد: يدك باردين بزااف…
ياسمين: اه ديما هكاك باردين واخا فالصيف..
محمد:(بحنان هزها لعند فمو باسها و قال) انا غنكون معاك دييما باش ندفيها..
ياسمين:(حشمااات عاوتاني و حدرات راسها حتى حسات بيدو على ذقنها هز ليها راسها بحنان حتى شافت فيه و قال)
محمد: ياسمين بغيت نعتارف لك بشي حاجة (حركات ليه راسها بلا حتى كلمة و كمل هو بصوت حنين) اشنو درتي فيا اياسمين (كيشوف فوجهها و كيرجع نظرو لعينيها و حنيكاتها الحمرين) قلبتيلي حياتي (تنهد و كمل) رجعتي شي حاجة مهمة و اساسية فحياتي…. غير قولي ليا شنو درتي ليا هممم؟..
ياسمين:(كتسمع فكلماتو وقلبها كيضرب بعنف و الفراشات كيلعبو فكرشها غتكون كذبات ايلا قالت هي مكتحسش بهادشي اللي كيقول حتى هي بحالو و كثر منو شافت انه كيتسنا جواب فقالت بصوت خفيف) معرفتش..
محمد: وشكون عرف اختي (شاف فيها بجدية و كمل) انا اياسمين بغيتك و تمنيك حلالي و دابا مبقا والو و تولي على اسمي (زير ليها على يدها و قرب وجهو لوجهها وقال) نعطيك عهد الله ابنت الناس اني غنبغيك و نصونك و عمرني نخونك ولا نغدرك و الله شاهد عليا…
مخلاش ليها فرصة فين تستوعب هدرتو طبع قبلة على جبينها و ضمها ليه بحنان كيستنشق ريحتها و كيدخلها مع انفاسو كيحاول ياخد الكمية اللي تكفاه ولكن والو معنقها و موحش فيها باغي يربطها حداه و عمرها تبقى تفرقو..
هز يدو الثانية و حطها على شعرها كيحاول يحقق واحد من المتمنيات ديالو من نهار شافها و شاف شعرها غلغل يدو فشعرها و حك ليها فروة راسها بحنان حتى ترخات فحضنو و حتى هي مامنعاتوش بالعكس كانت فرحانة و مرتاحة بين يديه و زاد كبر فعينها وعرفات انها نهار قبلات عرضو لزواج كانت خدات القرار الصحيح اللي عمرها غتندم عليه…
شافت فمحمد باها و كل فتاة بابيها معجبة هكاك ياسمين حياتها كاملة وهي كتمنى راجل بحال باها و فعلا لقات محمد مجموعين فيه كاع الخصايل الزوينة اللي تمناها اي بنت ففراس احلامها و شريك عمرها شافت منو الجانب الحنون و شافت الجانب الكوميدي و الجانب الرومانسي و الجانب الجدي و كل مرة كتبغيه كثر من المرة اللي فاتت…
ممنعاتش نفسها من انها تمد يدها حتى هي لضهرو و تعنقو غير حس بملمس يديها على ضهرو زير عليها كثر و دفن قبلة فشعرها…
دام عناقهم مدة لا بأس بها حتى حسو بالوقت و رخاو من بعضهم مساخينش ببعضياتهم ولكن لضرورة احكام رخا منها و هي حدرات راسها حشمانة حتى سمعات صوتو كيقول..
محمد: ياسمين شوفي فيا (هزات راسها فيها حتى شافتو ماد ليها بواطة ديال المجوهرات حمراء)
ياسمين:(عقدات حواجبها باستغراب) احم….. شنو هذا
محمد:حليه و شوفي شنو فيه (حلات ياسمين البواطة لقات فيها ثلاثة ديال البراصليات عصريين كل واحد و شكلو من الذهب الاصفر عجبوها لكن حشمات تقبلهم و فنفس الوقت مقدراتش تردهم فوجهو شافت فيه و قالت) علاش هادو امحمد…
محمد:(بابتسامة حنونة) كادو صغير للحبيبة ديالي ولا متستاهلوش؟؟
ياسمين:(بابتسامة) ولكن بزاف يكفي غير داك نهار شنو جبتي
محمد:(قبط يدها حطها على قلبو و قال بصوت هامس) حتى حاجة مابزاف علييك….. طلبي عيني نعطيها لك ازيني
ياسمين:(خفق قلبها جراء الكلام اللي سمعات و للحظة مكرهاتش انها تعبر ليه حتى هي ولكن للاسف متقدرش طبعها كيغلب عليها) شكرا بزاااف
محمد:ششششش مابيناتناش هاد الكلمة…. كولشي ديالك (مد يدو خداهم من عندها و خدا يدها حيد البراصليات اللي كان دايرا و دار ليها هادوك و بقا كيشوف فايدها باعجاب) ايديك زوينين بزاااف (خداها باسها وكمل) اصلا كلك زوينة اختي ديال نديرك فشي فيترينة و نبقا غير نتفرج فك..
ياسمين:(ضحكاتها هضرتو ماحسات حتى طلقاتها بضحكة عالية) هههههههههههههههه (ملي حسات براسها شافت فيه لقاتو كيشوف فيها و يبتاسم مغروم بضحكتها و عينيه حوالو عليها مبقات كتبان ليه حتى وحدة من غيرها) احم نقدرو نهبطووو….
محمد:(عاق براسو و حك لور ديال عنقو و قال بجدية) بلاتي بغيت نقولك شي حاجة….. نتي عارفة بيلا الدراري خوتي و كولشي مجموعين هنا فالرياض و انا مساكنش معاهم عندي ابارطومون ديالي بوحدي كنجي هنا غير شي مرات…
ياسمين:(بتفاجئ) مكانتش فخباري بيلا مساكنش معاهم
محمد: وي مساكنش معاهم و كنت كنفكر ملي نتزوج نستقر معاهم بحال الدراري ولكن (شاف فيها بحب و فنفس الوقت ضاحك) ملي شفتك اختي نتي و نويتك حلالي قررت اني غنبقا ساكن بوحدي هههههههه
ياسمين:(بعدم فهم) و علاش؟؟؟
محمد:(بغمزة) باش نستفرد بيك ازين ههههههه (شافها تزنكات تاني و حشمات و كمل) المهم الدار عندي راه مفرشة و كلشي ولكن ملي نديرو العقد ان شاء الله تمشي ليها تشوفي اللي معجباتكش تبدليها و حتى هنا تشوفي بيت نعاس واش عاجبك ولا لا….. واخا ازين
ياسمين:احم و واخاا….. يله نهبطو تعطلنااا
محمد:سخيتي بيا الخايبة (وقف و وقفها معاه) يله اختي يله بالحق صبري…
وقفات و وقف هو قدامها و قرب ليها بزاااااف و نزل وجهو عند وجها حتى تشاركو انفاسهم خرجات عينيها فيه و حناكها طلعاتهم الحموريك فحين هو نيم عينيه فيها كينقلهم من عينيها لشفايفها حتى زاد قرب ليها وهي كترجف و…..
طبع قبلة على خدها الناعم اللي كان مشهي يقيس ملمسو بشفايفو و يعضووو دگها بلحيتو و بوشها ببوستو اللي مكانتش منتاظراهااااا زاد قرب لودنها و قال….
محمد:هادي دوايا ديال الايام الجاية…مبقيتش صابر ابنت الناس….
عاود طبع قبلة حدا وذنها و هز راسو بزز عينيه حمرين منيمين فيها و وجهو تزنك انفاسو ضربو فوجهها سخان و حبات ديال العرق تكونو فجبهتو و الغريب انه استعجب فراسو بحيت عمرو ماوصل لهاد الدرجة ديال الاثارة او السخونية بلغة اخرى حتى وصلتها ليه ياسمينتو اللي كانت مازال كتحاول تستوعب الصدمة…
متسنا منها محمد حتى كلمة حيت عارف حالتها دابا جرها من يدها و نزلو حتى للتحت طلق يدها احتراما لواليديها و واليديه (فين الاحترام ملي كان يبوس فيها ههههههه)….
مد ليها البواطة اللي كانو فيها براصلياتها لقاهم كيدويو غير دخلو كولشي شاف فيهم و نيشان مشات عين شيماء للبواطة اللي هازة دارت عند مها غمزاتها بالريط حتى قشعات البلان و تغامزو بيناتهم…
جا وقت الوداع واخا طلبوهم يجلسو يتعشاو ولكن رفضو بادب و طلب محمد من اب ياسمين يبدا فتوجاد الوراق اجاب بالقبول و توادعو العائلات و محمد مساخيش بياسمين ولكن كيصبر راسو بمابقا والو…
غير هوما خرجو من هناااا دوات حفيظة من هنا بسم و حقد…
حفيظة: هادي هي باش بدلتي نجاة امحمد تا الدم ما فيها مسقطرة تقول فيها فقر الدم
شيماء:(كتغدد بالفقصة) و مسلوتة تقول اللحمة مافيها و شابعة نفاخة معرفت علاش جاتها بقات فالعينين خضرين
سميرة:(كتشوف فمحمد غير ساكت و كيشوف فيهم و عارفة ولدها لا بقا تاهضر غيجمع حب و تمن دوات بصرامة) ياك هو عاجباه ايوا سوقو هداك نتوما اش دخلكم
حفيظة:(خنزرات فسميرة) هاي هاي على سويميرة تانتي تحل لك الفم
محمد:(عصبوه و لكن ملي شاف الطريقة باش دوات مع مو بحالا ركبات فيه بريز عينيه حمارو و هضر بصوت مرتافع) حاااااافيظة….. جمعي فمك و عرفي اش كتقولي….
سمعوه الرجال و باقي النسا اللي كانو فالبيت و تمو خارجين غير شافتهم حفيظة وهي دير فيها دور الضحية بدات كتبكي و تغبن خلات سميرة مصدومة فيها…
حفيظة: اهئ اهئ ياك اولدي محمد هئ هئ هذا ما نسوا عندك…
يوسف:(شاف مو كتبكي عرف انو الغوتة كانت عليها مشا كيجري شنق على محمد بغيض) شكون نتا حتى تغوت على الواليدة الحمار..
محمد:(تعصب بزاااااف و رغم ذلك مزال مسيطر على نفسو مبغاش يغلط فيه) طلق راه مزال داير بحساب خويا الكبير…… طلااااااق قبل ما تندم….
حسن:(بصوت صارم غوت) يوساااااف طلاااااق من خوك واش تصطيتييي
يوسف:(باقي شانق عليه مخرج فيه عينيه و كيدوي بشررررر و حرقة) ماطاااالقش تا نشوفو الضسارة ديال هاد محمد اللي مابقا كيحتارم حد تغوت على مي اشمااااتة….
سعيد و امين مشاو كيجريو يجروه وهو غير مازاد شنت و من هنا تعرف الراجل من المرية الراجل عمرو يضارب وسط النسا و الراجل يلا دوا الكبير كيسكت و يحدر الراس واخا تكون الدقة فيه اما المريوة كتجيه المضاربة غير وسط النسا وهوما كيتغاوتو و كلما فرقو شي واحد كيزيد يشنت و يضسر، محمد داك شوية ديال السيطرة اللي كانت عندو مابقاااش….
محمد داك شوية ديال السيطرة اللي كانت عندو مابقاااش تنفض منو بجهد حتى طلقو بلهلا يحزقو ليه و غوت فوجهو….
محمد: دير فبالك راني راعيت للدم اخوووويا (شاف فحفيظة ممسوق لحد) و نتي راعيت لعمرك…. ولكن مازال تهضري مع الواليدة هكاك غنسا اصلي و تربيتيي و غنولي فخووو فعايلكم المرض تفووووو…
دفل فالارض و زاد خارج طالع ليه الخز مخلي مو و عمتو كيعيطو ليه و سميرة كتبكي اما الحاجة كلثوم ملي شافتهم مشانقين شداتها السخفة حتى جلساتها امنية خلا حفيظة غير تتخنز فيه حتى تمشى حسن لعند يوسف….
حسن:(هز يدو حتى للسما و نزلها عليه بطرشة قاصحة حتى دار وجهو و غوتات حفيظة طرشو قدام مرتو و النسا و كولشي حاضر من غير محمد) الناس والدين الولاد وانا والد رعواني….. مابقيت ساوي عندك والو الحمااار هضرتي ماتسوا عندك والو ضارب وسط النسا و مع خوك هادي تربيتي ليك…
يوسف:(كانت ديك الطرشة بمثابة وقيدة رماها عليه باه شعلات فيه العافية حتى ولا كيترعد غير بوحدو و عروق راسو برزو بالاعصاب و صاح فوجه باه) حاشا واش نكون ولدك…. نتا والد غير محمد و بنات سميرة و حنا لاقينا فالطارو فين عمرك اعتابرتيييينا ولادك..
حفيظة:(مرضاتش حسن يطرش ولدو قدام كولشي و فنفس الوقت مابغاتش ولدها يقول لباه هكاك حيت بداكشي باش فايتينهم ولاد سميرة بالرضى و التبحليس) يوسف حشم من باااااك…
يوسف:هههههههه لاش غنحشم لاش حياتي كاملة وانا حشمان اش قديت حياااتي كاملة و انا غادي كيما باغيني نتوما تمشي اشنو درت كنحني الراس باش يديها ولد سميرة باااردة…
شيماء:(كتزيد تشعل فالعوافي و تحقد على محمد) خليه اماما يهضر على حقو راه بصح ضسر بزاااااف و زاد على حدو الشمكار لاخر..
سميرة:(محساتش حتى غوتات عليها و صدمات الكل) جمعي فمك اشيماء راك معارفاش علامن داوية تزيدي كلمة أخرى عليه نخرج ليك شي حاجة عمرك شفتيها…
خلاتها كتبرق فيها عينيها و زادت مخلياهم لبيتها كتبكي و عقلها مشغول على محمد لاتكون بيه شي حاجة عارفاه بقد ماهو رزين و حنين بقد ما تعصيبتوووو خاااايبة و حااااارة…..
فحين شيماء متسرطاتش ليها كيفاش غوتات عليها دارت عند مها مخرجة عينيها و كتهز و تحط كيف السخط ديال سيدي ربي كترعد كولها بالاعصاب حتى رجع العرق هابط معاها…
شيماء: شفتيها كيفاش غوتات عليا واششش شفتيها الموسخة انااااااا تغووووت عليا هكااااك (مع قالتها سمعات باها صاح بصوت قوي)
حسن: شيماااااااااء جمعي خنزك (خرج عينيه فحفيظة اللي محاملاش ولادها على الموقف اللي حطوها فيه) تبارك الله على تربيتك الالة حفيظة (دار شاف فالكل معصب) يله فرتكو عليا المجمع كل وااااحد يقصد مكااااانو خليو الباقي فاليوم يدوز مزيااااان (توجه عند مو) الواليدة واش نتي بيخير…
كلثوم:(بصوت متعب متكية على السداري) بيخير اولدي دوز ليا غير محمد نطمن عليه..
حسن:(باس راسها) متخافيش الواليدة راه راجل غيكون بيخير نوضي لبيتك (دار منادي على بنتو) تيسير…. اجي ابنتي وصلي جداك للبيت عاونيها ابنتي امنية…..
طلع لبيتو عند سميرة مخلي الشياطين مجموعين بعدما مشات كلثوم و حكيمة للبيتها و سعيد جر مرتو هارب لتيساع هو و امين و مرتو و الاعمام و عيالاتهم مخليين شيماء و حفيظة و يوسف و اميمة كيسوطو بالاعصاب حتى واحد مادوا حتى قاطع سكوتهم صوت اميمة بصوت شبعان سم و بغض…..
نخليوهم و نمشيو لعند محمد اللي خرج معصب و واصلة ليه العظم تلوح وقيدة يتفرگع…
طلع فطموبيلتو مشا مكسيري كيسوط حتى لجنب البحر وقف الطوموبيل و هز الباكي ديال الكارو و نزل مخلي التيلي فالطوموبيل ووقف قدامها شعل الكارو كيكمي و يشوف لبعيد مركز فالخط الفاصل بين السما و البحر…
عقلو مسافر من ديما كان كيلاحظ معاملة حفيظة الدونية لسميرة رغم ان سميرة صغر من حفيظة و قارية عليها و زوينة و طيبة عليها و الاكثر ان حسن تزوجها عن حب على عكس حفيظة اللي تفرضات عليه من طرف الاب ديالو اللي كانت بنت صاحبو و كانت عايشة ظروف خايبة فباش يعاون صاحبو فرض على حسن يتزوج بيها لكنها كانت كتبين الوجه الزوين غير قبلما تزوج ملي ضمنات حسن بينات على وجهها الحقيقي و دوزات عليهم المرار خصوصا ان الحاجة كلثوم كانت سيدة طيبة متعرف لمضاربات ولا فعايل النسا و اللفعات كااانت خبز ربي فطبقو لقات حفيظة خمرها و دوزات عليهم الحر حتى ندم باه و باش يكفر على ذنبو زوجو بسميرة…
اللي كانت بنت الخير مها نصرانية و باها مغريبي ولدو غير سميرة و ختها سامية قرات فاحسن المدارس و عاشت احسن عيشة حتى تلاقات بحسن اللي بغاتو رغم انو مزوج ولكن ملي حكى ليها قصتو تألمات عليها و صبرات معاه….
زادت حفيظة شر فشر و طغات و مخلات مدارت و زادت زرعات فولادها داك الحقد و كرهاتهم فولاد سميرة و كبرات فيهم واحد الحقد من جيهتهم خصوصا يوسف مع محمد اللي كانت ديما كتبين ليه انه حسن منو باش يزيد يحقد عليه…..
حتى ملي بغات تزوجو باميمة زوجاتو بداعي انو كيتحرش بيها و عينو فيها حتى حقد يوسف على محمد مكانتش حفيظة عارفة ان سحرها كينقلب عليها و انها فحين هي كتكره الخوت فخوتهم كانت سميرة كتعلم ولادها الحنان بيناتهم و المودة و الرحمة الشيء اللي كان كيكبر قيمة سميرة عند الكل حتى جات ساعة الحق و مات الجد تاج الدين و خلا فقلوبهم كية و فراق كبير خصوصا محمد اللي كانت بينو و بين جدو علاقة كثر من وطيدة كان كيف صاحبو…
من نهار عقل وهو فجنبو تعلم منو كولشي و خرج فحالو فكلشي حتى أنه خدا حرفتو فمات الجد وخلا الصدمة لمحمد اللي زاد تصدم كثر ملي تقرات الوصية و لقاو انو كتب المحل ديال الذهب لمحمد و فيرمة صغيرة فمراكش بسميتو تقبلها حسن و الاعمام و امين برحابة صدر لانه حق الجد و رزقو وليه الحق يخليه لمن بغا الا ولاد حفيظة اللي مرضاوش و تمردو و تهمو محمد بتزوير الوصية حتى تتبت العكس و تاهموه تاني بيلا ضحك على الجد و قنعو باش يكتبهم ليه و حتى محمد محاولش يبدل رأيهم كان داير اللي عليه و قايم بواجبو كأخ و لكن اللي كان ضارو فراسو هو كره يوسف ليه اللي كان كثر من كولشي كيحاول يفسر تا يقنع و والو عمرو وصل لسبب الحقيقي….
ارتاح محمد و قدر يبرد شوية بعدما كما ربعة الگوارو بلاما يحس حتى بدا كيكحب بعنف و تحرك واحد البرد لقاه الغروب و قرر انه يحضر ليه باش يرتاح كثر و فعلا كانت للغروب قدرة على تهدئة محمد طلع لطوموبيلتو هز التيلي تصدم بعدد المكالمات من باه و مو و خواتاتو عيط على مو و باه طمنهم و شد طريقو لدارو يرتاح بوحدو…..
عند ياسمين اللي غبرنا عليها بعدما خرجو من عندهم مشاو فالطريق ناشطين فرحانين حتى هوما بالعراضة وصلو للدار و كانت دعاء طلبات من راجلها تبات معاهم طبيعي حيت كاينة جلسة طويلة نسائية يحللو و يدرسو فيها كولشي طلعو كل واحد لبيتو بدل عليه و هبطو عمرات دعاء براد ديال اتاي منعنع و حطو المكسرات بقرقبو بيهم الناب….
نزلات ياسمين مبدلة عليها ببيجامة و دايرا براصلياتها الجداد فرحانة بيهم رغم انها عندها بزاف ديال المجوهرات و ما مشتاقاش فيهم ولكن الهدية اللي من عند حبيبها و رفيق عمرها و اللي ركبهم بيدو حلفات لا حيداتهم كتحس بيلا يديه شادين فيديها جلسات معاهم بسعادة ظاهرة على وجهها حتى غمزات دعاء مها كيضحكو و قالت….
دعاء: شي ناس فرحانين و ناشطين (هبطات عينيها لبراصليات) و فرحانين بذهوباتهم….. انشوف اختي
ياسمين:(مدت ليها يدها بسعادة) هاكي شوفي
ثورية:(كتشوف غير من بعيد و حتى هي فرحانة و ناشطة بالنسوبية الزينة اللي غير مزادت حلات فعينيها مورا ما شافت الرياض و الاثاث و اللباس و كولشي) عطاهم ليك ملي مشيتو دويو (حركات ياسمين راسها بايجاب) ولد الخير تبارك الله و حتى دارهم ناس مزيانين و لاباس عليهم عندهم مناش..
دعاء:(كتقلب فالبراصليات) زوينين و تقااال ياختي سعداتك تبرعي غا ذهوبات..
ياسمين:(ضحكات) و مالك نتي ناقصك ههههه
دعاء: لا لا الخير موجود (دارت عند مها) ناس مزيانين سيرتو مو و جداه و عمتو الحلاوة من غير دوك ثلاثة اللفعات اللي ملي دخلنا و هوما يطلعو و يهبطو و يميقو..
ياسمين:(عقدات حجبانها باستغراب) شكووون ؟؟
ثورية: اممممم شكون يادلي تتكوني تتهزي راسك باش تشوفي اش داير بيك نتي تتشوفي غي عند رجليك
دعاء: ههههههه والله العظيم ما كذبتي غير حادرة داك الراس…. يمكن ختو من باه و مراة باه و مراة خوه لفعات ياختي يخنزرو و معاجبهم حال و ديك ختو (كتعيب فيها) ممولفش بالبراني نينينيني..
ياسمين: هههههههه ماديتهاش فيهم گاااع مناقصنيش بحالهم
ثورية: حسن ابنتي عطي لبنادم النخال نوصيك غير على مو و عمتو و جداه و باه اما لوخرينات خرابهم فقرابهم..
ياسمين:(بتبرير) راه مغنسكنوش معاهم..
دعاء و ثورية:(خرجو عينيهم) كيفاااش
ياسمين:(قفزوها) امالكم…. راه اصلا مساكنش معاهم و قالي عندو دارو مفرشة مقادة غنسكنو فيها و نبقاو ندوزو معاهم غير شي يامات..
دعاء: هههههه وا هانتي ياختي سعدك صدق حسن من سعدي شكون بحالك…
ثورية: ظاهرة فيه ولد الناس و مربي ايوا مزيان بعدا تبعدي على الصداع نيت معندكش معاه و متقديش عليه حرب الضرار ابنيتي وااااعرة و صعيبة و ديك مرات باه من وجهها باينة حاااارة قطران كيدها في نحرها…
ياسمين: انا بعيدة على داك الصداع و گاع الحاجة اللي تقلق راحتي ندير منها خيرة…
~~~~~~~~~~~~~🤍
نرجعو فين خلينا حفيظة و ولادها جالسين حتى هضرات اميمة بسم و حقد و قالت…
اميمة: اصلا مكاينش اللي ضسرو قد جدكم و باك اللي دخلو شريك فالمحل دارو ليه الرزق اعلى منكم حتى رجع يشوف راسو فوقكم كولكم و نتوما غي حشرات تحتو..
يوسف: هداك راه ضحك على جدي و سناه بزز على الوراق و لكن متبقاااااش فيه..
شيماء:(عينيها كيقطرو بسم) قالت الصح فلوسو مضسرينو..
حفيظة:(بابتسامة شر) غيخلي كولشي غير تسنتو ليا نتا ايوسف……… (من بعد و نشوفو اش غيديرو)..
مشات ايام و جات دازت 13 يوم بحلوها و مرها ولكن حلوها كثر من مرها 13 يوم دازت على العائلات بزوج فالتوجاد…
عائلة ياسمين اللي بعد اخد و رد و عدة مشاورات قررات مها انها تكلف طريطور بكولشي من ماكلة ديكور و كولشي ولكن هادشي ممنعهاش انها تاهية تكون مشغولة صاوبات الحلوة بيديها و و خملات الدار من الفوق تال التحت واخا عاد تخملات و تقدات و مخلات مدارت….
خرجات على مصطفى بغسيل الفندق عاد قررو ان ياسمين غتلبس جوج لبيسات اللولة غتكتب بيها العقد و الثانية غدوز بيها الليلة و ناضت ثورية قالت ليهم نونو كحل عيونو واش تكري وحدة خيطاتها و وحدة شراتها جاهزة و باعت واحد الحصيرة ديالها و خدات بيها لياسمين بروش بلدي ديال الذهب…
الحاصول سيزات مصطفى و هادشي مازال العرس ولكن ملي جات فبنتو كيعطي بلاما يحسب و حتى هو مخلاش من جهدو نظرا لمعرفتو بمجال الحوايج برعها بيجامات حريرية ديال العرائس و خدا ليها جوج بينوارات بالفوطة الكبيرة و الموايان و الصغيرة و بانطوفة مطروزين و غاليين واحد ابيض مطروز بالذهبي و واحد موف بارد مطروز بديگرادي ديالو…
تبرعات ياسمين و حلفات عليها مها لا حطات يدها فشي حاجة واخا عيات فيها تعاونها ولكن رفضات و أصرت عليها ديها غير فراسها و فعلا داكشي اللي دارت…
عتاكفت فالدار و عطاتها للوصفات حتى ولات منورة كثر من الاول و طيلة هاد الايام كانت كتهضر مع محمد كل ليلة فالتيلي مرة وحدة صونا فيديو و ندم ملي شافها نوضات عليه المواجع بلاما تقصد حتى فاق باني الخيمة و هي اللي عمرها وقعات ليه من تما حلف لا باقي دوا معاها فيديو يكفي غير صوتها راه تيشعل فيه العوافي….
مخلاو فاش دواو حتى شي مرات مكيلقاو ميقولو و كيقول محمد شي نكتة او كيحشمها بشي كلمة خصوصا انها زعمات عليه وولات كتهضر معاه عادي و فجميع المواضيع تقريبا بلاما تحشم او ترتابك و هادشي ريحو و خلاه حتى هو ياخد راحتو معاها فالهضرة و يزعم عليها كثر….
كل مرة مغرقها فالكلام الحلو و الزين و مكيبخلش عليها بتعبيرو على لهفتو ليها بحيت كيوصل ليها صبرو اللي تقادا من جيهتها بطريقة لبقة ماشي سوقية تكرهها فراسها و هادشي كان كيزيد من ثيقتها فنفسها و كيرضي غرورها كإمرأة و حتى هي قدرت تزعم و تبين ليه ولو بنسبة قليلة مكانتو فقلبها و كيفاش كتشوفو على انه سيد الرجال….
عند عائلتو هو ما كان حتى جديد يذكر شيماء رفعات دعوة ديال الطلاق اللي كان طلاق اتفاقي حيت حتى هو صبر ليها ولكن مخلاتش ليه ففضل انهم يتفارقو بالحسنى و يكفيه شرها الحضانة ديال الطفل كانت ليها و كان موافق على النفقة و كولشي الا ان الجلسة مازال ماتمات و بهكا جلسات شيماء فدارهم فرحانة بانجازها كأنها ملكة زمانها و العيب راكبها من ساسها لراسها…
هنا انا مكنعيرش الامرأة المطلقة بل كنقصد الامرأة اللي كتكون عايشة بيخير مع زوج مزيان و موفرين ليها جميع ظروف العيش المثالية و كتنوض طلق بلا سبب و هادي هي حالة شيماء اللي دارها ليها غرورها و حبها فالسيطرة و التملك حتى جلسات حدا مها تيتي نيني و الاغرب انها قالك بغات تخدم معاهم فالمحل مرفضوش لأنها بالغة اما حفيظة فهي هي و غير مزادت حقدات على سميرة و ولادها دوزاتها عليها فهاد الايام بحشيان الهضرة و المعيور و مختلف انواع الاهانات ولكن سميرة مكانتش فايقة ليها من النعاس مخلاتش ليها الفرصة فين تنغص عليها فرحتها بولدها اللي مخلات مدارت على ودو و غير دور و ترضي دوزات هاد الايام غير فالتقدية و الشريان ديال هدايا الخطوبة طلعات هي و حكيمة و احلام سبرديلات و كيخرجو مرة تمشي كلثوم مرة تيسير و نسرين مرة امنية دوموندات على الثواب الرفاع و على الروايح الغالين و الماكياج دوليكس اما المجوهرات تكلف بيهم محمد اللي كان مشا لأگادير للمحل ديالو تم فين كانت غتخرج حتى هو فيه كوليكسيون جديدة شاف منها اللي بغا و تكلف هو بالخاتم ديال ياسمين اللي خلات ليه الاختيار هو…
فكل خرجة كتخرجها سميرة عمرها حاشاتها لحفيظة ولا شيماء اللي كيموتو بسمهم بعدما كانو راس ولا رجلين على قولتهم بعدما كانو هوما اللي يخرجو و يشريو على دوقهم و الحاجة الزينة ياخدوها لريوسهم ولاو يشوفو التقضية دوز من قدامهم و كيزيدو يتغاضو ملي كيشوفو الثواب و الحوايج اللي خدات سميرة غير داكشي الغالي و الرفيع و هوما اللي مولفين ياخدو غير السواقي حگا ما حگا ميضسروش المرة و ميخسروش عليها الفلوس ماعرفوها تصدق ولا ماتصدق….
جات سامية اخت سميرة من فرنسا فين مستقرة هي و راجلها و وليداتها توام عندهم 17 عام و حتى هي جات محملة مجملة بالهدايا للكل و الاكثر ياسمين ماهيا خطيبة الغالي على قلبها محمد اللي كتعزو بزاف…
جابت ليها باك ديال كوتشي بلوم فيه ريحة و مينياتيغ صغيرة و كريم للجسم و باك اخر ديال شانيل فيه جوح روايح و عكر و مسكرة و ايلاينر كانو لي باك بجوج الاصليين ماشي خصارة فياسمين اللي بقد ما سمعت ختها كتشكرها بغاتها و دخلت ليها لخاطرها….
جات قبل بسيمانة باش تشبع من ختها و كانت باغا تمشي للدارها حتى اصرت عليها ختها و حسن باش تبقا معاهم و فعلا استاجبت ليهم و جلسات مع ختها ولكن حفيظة تشوف هادشي و تسكت طبعا لا…
فالطلعة و النزلة تسممهم بالهضرة و واخا دارو ان الخطبة غيحضرو ليها غير اهل الدار دارت اللي فبالها و عيطات لخواتاتها ثلاثة و ولادهم كل وحدة والدة طاشمة كاملين جاو….
مكاين غير هز ساكك و زيد حتى ولات الدار كتنغل الشيء اللي عصب سميرة و حتى حسن اللي نوض مع حفيظة نهار و هي مخرجة عينيها بحجة عائلتي يحضرو و اهل الدار كلهم معجبهومش الحال جايين قبل بسيمانة واكلين شاربين محممين و عاد كيف غيديرو للناس يمشيو عندهم بزايد حشمو حتى ما قدووو و حتى كان محمد غيدور فالحزاق كامل و نعل الشيطان….
هزو الحوايج اللي خداو كاملين و الكادوات و كولشي داوه لدار محمد خوفا من شي سرقة او شي حاجة و قررو انهم يقادو كولشي تما وولات حفيظة و خواتاتها و ولادهم جالسين تيتي نيني ميحطوش يديهم فوالو حتى تقهرو الخدامات و ناضو عاونوهم ماليات الدار…
عاد 3 العزارة تيضلو جالسين فالوسط ديال الرياض منعو على البنت الجلسة ولاو غا مجموعين فبيت شي وحدة مكيحتارمو تا واحد حاضيين غير التزلال و قلة الحيا الحاصول حررات حفيظة فسميرة فرحتها و هجراتو ليها……..
و هكا دازت هاد 13 اليوم كيما قلت بالزينة و الخايبة….
فاقت ياسمين على صوت ختها اللي جات دوز معاهم هاد اليوماين اللي بقات بما انه الخطبة بعد غدا دارت روتينها و هبطات لقات خالتها مريم وولدها جاو و حتى خالتها الكبيرة فاطمة و وحدة فبناتها اما لوخرين فحتى لنهار الخطبة و يجيو سلمات عليهم بالتعناق فرحانة و حتى هوما فرحانين ليها فطرو بنشاط و الضحك و علماتها دعاء تلبس حوايجها باش يمشيو لصالون….
طلعات لبيتها جبدات جينز ازرق مع ديباردو اسود و عبايا سوداء هابطة حتال للتحت محلولة من القدام و فيها رشيمات بالذهبي لبسات معاها صبيبيط بلا و اكتفت بايكرون هزات ساكها و هزات ساك صغير ديال الحوايج هازة فيه ملابس داخلية و برودوياتها و نزلات طلبو من بنت خالتها تمشي معاهم ولكن رفضات بحجة انها مشات قبل ماتجي عندهم فمشاو غير هي و دعاء ومريم ركبو فالطوموبيل و مشاو لواحد الحي شعبي و مريم غير مصدومة فيهم…
وقفو قدام واحد الگاراج عادي بابو فيه خامية بداو داخلين حتى وقفاتهم….
مريم:(تتشوف فيهم بصدمة) اويلي ابنات ختي فين جايين مالقيتو غير هاد البلاصة..
دعاء:ههههههه زيدي امريم زيديي و غتشوفي على عينيك..
و فعلا هزو الخامية و دخلو لقاو جوج بنات جالسين شادات تيلي حتى دوات دعاء
دعاء:تبارك الله على سعيدة طالقة لينا اللحومات…
سعيدة: اش هادي حوبي دعاء (تسالمو و سولو على الاحوال و مريم غير تتشوف)..
دعاء: ياختي فينما دخلت عندك كنقول غتجي شرطة الاداب تجمعناااا هههههه
سعيدة:(دارت ضحكة ديال الباطرونات) ههههههههههههه ضحكتيني الشيخة (ضارت عند ياسمين) ايوا لالة العروسة نبداو بلاصير..
ياسمين: واخا اختي..
فعلا مشات ياسمين نصلات حوايجها و لوات عليها فوطة و بدات كدير ليها فلاصير حتى تشوطات من بيطانها مع بشرتها حساسة ما سالات ليها حتى عينيها رجعو حمرين و منفخين بالدموع دهنات بيافين للحمها كامل و بقات تا بردات عاد دخلاتها لواحد الدوش بحيت الصالون كان مطلوق على الدار دوشات و عاد خرجات بدات ليها سعيدة فالسوان نقات ليها وجهها حتى رجع منور و كيشعل و مريم مصدومة فخدمتها…
حگراتها فاللول ساعة بهراتها كملات ليها سوان و دازت لشعرها اللي اكدات عليها متقطعوش بطلب من محمد اللي ملي قالت ليه غتمشي لصالون قالها كولشي تال الشعر….. و فعلا نقصات ليها غير لي بوانت و دارت ليها واحد الماسك مغدي…
صاوبات ليها ضفيراتها ديال ايديها و رجليها بينما عطى المفعول و غسلاتو ليها و اكتفت تنشفووو كانت ديك ساعة وقيتة ديال الغدا خرجات دعاء للسناك جابت غدا ليهم كاملين كلاو و دازو لدعاء اللي دارت غي سوان و قادات ظفارها و مريم قطعات شعرها…
سعيدة: تبارك الله على العروسة منورة
ياسمين:(بابتسامة طلعات حنيكاتها الحمرين) ربي يخليك اختي حتى نتي فنانة الله يحفظك
دعاء: ايوا شنو سعيدة راه طووووب يله اختي ميعادنا السبت و جي شوية بكري..
سعيدة:متخميش احوبي السبت شديتكم غير نتوما..
و هكا خرجو من عندها مسهوطين خصوصا ياسمين تقول كانت كتهز فالملحة ههههه مشاو نيشان للدار لقاو نعيمة و رانيا كاينين شربو اتاي و هضرو شوية و مشاو و استأذنات ياسمين باش تمشي تنعس بعدما رفضات تعشا دخلات بدلات حوايجها و هزات تيليفونها لقات راسها دايرا ليه طيارة و ناسية غير حيداتها لقات عشرين ابيل من عند محمد و جوج من عند مها و بزااف المسجات تكات و دوزات ليه لابيل مكانتش دقيقة حتى جاوب بصوت مرتفع شيئا ما..
📱محمد: اتبارك الله على مدام….. داك التيلي غا لوحيه ملي مناوياش تهضري فيه
📱ياسمين:(عرفاتو تعصب بحيت فهاد الايام قدرات تعرف انه بقدر ماهو مزيان و ظريف كيتعصب بالزربة و عاد هي كيتعصب عليها فحالة وحدة ملي كيصوني و مكتجوبوش ضحكات بدلع و حشمة و قالت) ههههه غير سمحليا راه كنت دايرا ليه مود افيون و نسيتها..
📱محمد:(سمع ضحيكتها وهو يتهدن و قال بصوت خافت) لافيون هي اللي شداتني….. كيداير الزين ديالي..
📱ياسمين:(عضات على جنب شفتها و قالت بنفس مستوى صوتو) الحمدلله و نتا..
📱محمد:(نيم عينيه بسخونية على صوتها اللي كيدخل مع شرايينو و نعل الشيطان من التخيلات اللي جاوه فبالو كون كانت قدامو و قال) يوماين ازين ديالي و نولي بيخير (سكت شوية حتى سمعاتو تنهد و قال) موحشك بزاااف اياسمين..
📱ياسمين:(طلعات معاها الصهدة بصوتو و حناكها حمارو حتى رجعات كتحس بيهم سخان معرفات متقول اكتفت ب) احم ممم
📱محمد:(بضحكة) ممممم عاوتاني… ياسمين(قالها بنبرتو الجدية اللي ولفاتها ياسمين فينما كيبغي يعلمها بشي حاجة او يبغيها تركز معاه كيقول اسمها بجدية حتى ولفات عليها تسناها حتى همهمات ليه بالايجاب و كمل) شنو بان لك نسافرو واحد اليوماين مورا الملاك (العقد او ضريب الصداق)..
📱ياسمين:(تصدمات متصورتاش غيقول ليها هاد الفكرة كانت ماسحة من بالها هاد القضية و كانت ناسية حتى امر الدار و كذا و دابا دهشرها معرفاتش متقوليه من جيهة حشمانة حيت باغي يمشي معاها الراس فالراس و العالم الله فاش عينو و من جيهة تتقول راه غيولي راجلها و حلالها و من حقو عليها طيعو) احم…. معرفتش فين بعدا
📱محمد: واش تتعرفي نتي ازين هههههه نمشيو لمراكش
ياسمين: غتكون سخونة دابااا
📱محمد: الدار كليماتيزي اصلا مغتخرجيش منها ههههههههههه (سمعها صقلت) ابتي نتي غا يالاه مالك خايفة غناكلك..
📱ياسمن:(تالفة و معارفا شنو تقول قالت بقلة حيلة) نتشاور مع ماما و نعلمك
📱محمد: ماما….تشاوري امومو مع ماما تشاوري تاوكان طيحي فيدي..
📱ياسمين:حشومة ههههه
📱محمد: مراة الشيطان احبيبي كنعرفها مالها (سمع ضحكتها و كمل) …. مشيتي للصالون..
📱ياسمين: مشيييت و تسخسخت بزاف عييت
📱محمد: مالك على حالتك نتي زوينة بلا والو خاليا عشتي بداك الزين اللي فيك و ماديا ليا العقل شنو مازال باغا ديري..
📱ياسمين:هههههه صافي عافاك (حشمااااات تا ماقدات)
📱محمد: وايلي على صافي حنا عاد غنبداو….. سيري اختي تنعسي وكلت فك الله
📱ياسمين: علاش شنو درت
📱محمد:(كيحس بذاتو سخونة كتفور و واحد الشوق عندو من جيهتها بزاااف) مادرتيش ازين على نتي كديرييي….. سيري احبيبي الله يصبحك فراحتو..
📱ياسمين:(ضحكات بصوت عالي على هضرتو و قالت بدورها) تصبح على خير ء…. ميمو….
يتبع
التعليقات 0