الفصل الأخير: زماكرية في العروبية

دينا نزلات راسها وتنهدات وعاود رجعات شافت فيه:انا مكذبتش عليك ان هداك نسيتو وشفتي لبارح كلشي بعينيك انا مهضرتش عليه قدامك حيت مبغيتش نجبد حاجة خايبة لشي شخص غالي عندي بزاف

خليفة حط يدو على خدها:انا زربت بلاما نسول ولا نسمع داكشي باش حسيت خلاني مواعيش بشنو كنخرج على فمي المهم كنطلب السماحة وكلامي والله مكان من القلب سمحيليا

كانت كتشوف فيه كهضر ونبرة كلامو كيف دايرة وديك سمحيليا طاحت كيف العسل على قلبها غتفرفر الا مشدهاش قلبها كتهز وهي كتسمع الاعتذار وما اجمل اعتذار الحبيب

بدون سابق انذار قربو لبعض وتعانقو عناق دافي صفى القلوب بينهم هي فرحات بحنيتو وكيف عتارف بغلطو واعتذارو خلاها تنسى وهو فرح بحاجة لي هي قلبها بيض من لفوق مهزاتش فيه مو جيهتو واخا يعتارف بلي هضرتو قاصحة وتسرع زيادة على انها ضريفة وزوينة قلبها نقي بعدو وحمد الله انه لبارح حضر لكلشي سمع ومتسرعش هادشي لي خلا مشكلهم يتحل دابا بعدو على بعض بشوية حط يديه على خدها مجا فين ينطق وهي تسبقو:انا مبغيتش تقلق مني على داكشي لي لقتيني كندير انا والله مكنكمي غير تعصبت والله

خليفة شدو وجها بيديه بزوج:صافي شووو نساي سالا داكشي عارفك ومزيان كن كان العكس مكنتش انديرك فبالي

اعترافو خلاها تنزل عويناتها للارض وهي مبتاسمة وابتسامتها زادت عراضت فاش حسات بقبلة تطبعات على جبهتها كتعلن على صفاء القلوب وبلي صافي تم الصلح ورجعات المياه لمجاريها بعد عليها شوية وجرها من يديها لواحد الجيهة وسط داك الورد نيت وجلسو كهضرو شحال

دينا: عرفتي انا مكانش كحسابلي قاري

خليفة قاطعها مطلع حاجب:كنت حاݣراني ولا شنو

دينا:لا لا ماشي هكاك غير زعما معمرنا هضرنا على القراية وصافي ههه

خليفة بدا كعاود ليها على قرايتو وكيفاش دوزها ايام فالكلية بلي خدا الاجازة فجامعة القاضي عياض وهي كتسمع ليه

خليفة:صافي شديتها ورجعت لحرفة الوليد وجدودي وانا فرحان هكا وانا كنشوف راسي خدام وكنكمل شنو بدا جدي

دينا تتسمع ليه كيفاش كهضر وكيفاش كلامو كولو عبارة عن تقدير لباه وجدودو لي دار الاراضي وكيف هو دابا لي شاد داكشي بعدما باه عيا وتكلف بدار الضيافة

دينا:انا كملت هاد العام وقريب نشد الديبلوم ديال فdigital marketing

خليفة بشوية حيد ليها رمشة كانت على خدها:مزيان شنو ناوية ديري من بعد

دينا:المدرسة دافعة لينا لسطاجات وغير غادي يخرج ليا الديبلوم غادي نمشي نيشان للسطاج اجي بغيت نسولك كيفاش حتى حفضتي القرآن كنت بغيت نسولك شحال هدا

خليفة:انا قريت فالمسيد لي هو الجامع وتما حفظتو نت دابا غير بوحدك بالتيليفون بشوية بشوية حتى تحفضي كلا مرة شدي سورة اجي بعدا كتصلي

دينا شافت فيه ونزلات راسها كضور عينيها وباين لجواب وحركات راسها بلا:صراحة مرة كنصلي ومرة لا كان وراني بابا كيفاش ندير ولكن كنساها قولي نت شنو خلاك تبقى ديما تصلي وانا ندير بحالك

خليفة:مين وانا صغير وانا كنصلي كان الفقيه ديال المسيد نهار كعرفني ولا وصليه الوليد راني ترخيت فيها كبقى عليا بواحد القطيب غلرجلين وكنرجع نشدها ثاني بشوية بشوية وانا كنكبر وكنوعى بالدين بالقرآن عرفت بلي هي عماد الاسلام شحال من حاجة تبانليك مستحيلة ولكن اذا دعيتي فصلاتك ربي كيسير فيها وكخليها تحقق كيفما كانت ادا كانت ضايقة بيك ومعندها لمن تشكي بالصلاة تقدر تشكي للخالق ويفرجها عليك فنفس الوقت اول ما يسأل عليك المسلم في قبره هي الصلاة

دينا كانت تتسمع ليه كيف كهضر فالدين وكيف كنصحها ويحببها فالصلاة واعي بكل حاجة فلحظة تفكرات داك مراد لكان كعلمها تنطق تخسار الهضرة دغيا ساستو من بالها وكملات وهي تتسمع ليه وتسولو ويجاوبها وسط كلامهم صونا تيليفونها كانت زوي دغيا جاوبات:الو زوي فقتي

زوي:فيقني التيليفون صوناو ليا من المدرسة الديبلوم خرج والسوطونونس ديالو غتكون نهار التنين ادينا بقاتلينا ربعيام هنا وغادي نرجعو بحالنا كاملين

بشوية بشوية بدات كتخطف ابتسامتها وعينيها عليه وهي كتسمع كلام زوي كيفاش ربعيام وغترجع وتمشي من الدوار اول حاجة طاحت فبالها فاش سمعات هضرة زوي هي انها ماتبقاش تشوف هدا لي قدامها لي بدورو لاحظ كيفاش تبدل عقد حجبانو تتسناها تسالي باش يعرف شواقع

زوي:الو دينا كتسمعيني؟

دينا:اه اه شوفي انا جاية دابا سيري

قطعات معاها ودارت عندو وهي تتحس بالغصة وهو لاحظ هادشي لونها تخطف شد فيديها ونطق:مالكي اشواقع ياك لباس

دينا بلعات ريقها ونطقات:غادي نرجع بحالي نهار التنين

خليفة حس بحال شي تصرفيقة صفعاتو تاهو دار نفس ردة فعلها كان عارفها ايجي واحد الوقت وتمشي ولكن ماشي بهاد الغفلة وهو عاد زيانت ليه معاها مسح على ذقنو ونطق:علاش؟

دينا:خرج ليا الديبلوم والسوطونونس ديالو غتكون نهار تنين ومن موراه غيكون السطاج

دارت يديها على جبهتها حاسة بالبكية دغيا وهو حداها دار يدو على خدو ملقى ميقول وميدير لانه تاهو تصدم وتقاس كان متوقع هاد النهار وعارفو ايجي مامنو هروب ولكن ماشي بهاد الغلفة والزربة حط يدو بشوية على خدها حسات بيها هي دافية وغمضات عينيها تتنهد كانت فرحانة حتى خرجليها هادشي شدات فيه وناضت وقفات:انا خاصني نمشي دابا نشوف هادشي ونعلم ماما وبابا

خليفة تنهد لسانو تربط وملقى ميقول نزل عينيه للارض وحرك راسو باه بانت فيه حتى هو بلي معجبو حال ولكن معندهم ميديرو يلاه بغات تزيد وهو يشد فيها رجعات وقفات وشافت فيه بشوية تحنى قطف وردة ورجع ساقيها بلا حتى كلمة غير كحدقو فبعضهم قرب بشوية ولصقها ليها فشعرها حدا وذنيها تبسمات فعز الحزن وتاهي قربات ليه بشوية تعلات على ريوس صبعانها وطبعات قبلة على خدو خلات كبرياء عشقو تتهز بعدات عليه وهما كشوفو فبعضهم حتى ضارت ومشات تتجري خلاتو متبعها خط يديه بشوية على خدو وهو مزال عينيه عليها تتبعد خرج تنهيدة طويلة وهو كحس براسو بحال كان فشي حلمة زوين وقريب يفيق منها مسح على شعرو وهو مزال فبلاصتو وتتنهد

شادية:اذن خاصنا نقطعو مجموعين

دينا معبسة:وانا كنت مزال مبغيتش نمشي دابا

بوبكر:ابنتي لقراية هادي وزيد ماشي آخر مرة دابا مين عجبك الحال اتبداي تنزلي معانا ديما

رحمة بحزن:ولفنا ابنيتي

دينا راسها على صدر جداها وهي تعطيها للبكى ودغيا خرجو لها الدموع خلات واليديها كضحكو وبلي راه غيعاودو ينزلو قريب فعلا ولفات الدوار اجوائو وناسو ولكن هو بالذات كان السبب الرئيسي لمخليها تبكي اتمشي وهي عاد حلات ليها معاه زوي نزلات لقاتها تتبكي مين عرفات السبب تاهي جلسات فالارض: صراحة تانا عجبني الحال هنا والله

بوبكر:ان شاءالله المرة الجاية نعاودو نزلو مجموعين ونمشيو لمراكش

دانييلا جاية داخلة تاعي زادت حكات على الضبرة:واش شفتي الݣروب غنمشيو

سليمة شدات فدينا:ولفتك اصاحبتي اتخلي بلاصتك

دينا لي كانت حاطة راسها على صدر رحمة لي تتسكت فيها:صافي اميمتي راني على سبة مزال تجيو عندي ثاني وتجلسو كثر من شهر ميكون تابعك والو ان شاءالله

بوبكر شد فبنتو وداها خرجها يهضر معاها عرفوها ولفات بزاف ولكت معارفينش سبابها الثاني لي مخليها تاهو كطيح فالدموع

رحمة: مرحبا بيكم اوليدي فوقما تكون جاية دينا جيو معاها

معتز ناض وطبع قبلة على راسها زوي ودانييلا تاهما باسوهزأا لانهم شافو فيها الحنان ومثال الجدة المغربية وكيف استقبلاتهم لاهي لا الحاج احمد لا العائلة كاملة وعرفو الكرم المغربي ولكن ضروري الواحد كرجع منين جا والعطلة كيف كل عام كجي وقتها وكسالي زوي ودانييلا ومعتز كانو عارفين السبب الثاني علاش دينا تتبكي وبداو كخممو ليها من دابا حيت شافو كمية التعلق لي كانت بينها وبينو كيفاش ايديرو دابا وكلا واحد فجيهة جوليا كانت نازلة تتفوه خبروها تاهي اصلا هي كانت غادية هي وواليديها يرجعو لخدمتهم وغيخليو دينا وراهم شهر آخر ولكن الديبلوم لي خرج قبل وقتو خربق ليهم كلشي

اسمهان بحزن:وياختي ولفناك والله

دينا وجها كان حمر سكتات من الدموع وكانو باينين فيها اثارو:هادشي لكاين تانا والله متخايليش شحال وليتو عندي عزاز وولفت كلشي

اسمهان: شوفي خاصنا ندوزو وقت بزاف مجموعين اصلا انا جاية نقوليك اجي باتي معانا نت وصحابك راه غادي نباتو فالسطح كلنا

دينا بلاما تحس:حتى خليفة؟

اسمهان:كلنا ولاد عمامي ولا عماتي كلشي

حركات راسها باه وتفارقات معاها رجعات للدار وهي تتشوفو كهضر مع باها وجدها مشافهاش ولكن هي بقات تتشوفيه تنهدات ودخلات

داز الوقت كانو جالسين فالسطح مفرشين ومنهم للسما مخشيين فبلايصهم شي حدا شي دينا خبات شوية الدموع بنت بعد تبخوفيطي هاد الوقت لي بقى معاهم وتنسى الهم او تتحاول تناسى حتى يجي النهار الموعود هما براسهم كانو حازنين على فراق ختهم غير صابرين كانت الوسط بين اسمهان ومقابلة معاها دانييلا وبشرى وسليمة ولبنات لآخرين اما نجية كعما جات وحتى جوليا وفالنص لآخر كانو الدراري خليفة لي مقابل مع دينا كشوف فيها وتشوف فيه حداه معتز والدراري وشي وحدين من ولاد عمامها كانت الهضرة والضحك والنشاط جو زوييين واحسن حاجة انهم ناعسين منهم للسما ومجموعين دينا وصحابها كانو جايبين معاهم السقاطة فرقو على كلشي وجلسو مقصرين

حاطين حتى الديسير والموناضة شي كهضر مع شي شي شاد التيليفون شي طالق الموسيقى كانت سليمة تتوري التصاور لاسمهان:هادي كنا فميلانو كنت هنا صغيرة شوفي السنة طايحة وهادي فباريس هنا مشيت مع المدرسة هاهي زوي مصورة معايا

اسمهان تتشوف فالتصاور:وهاذي فين زينة هاد لبلاصة

دينا:هادي فمدريد مشينا مع بابا تفرج فريال مدريد بابا كتعجبو كورة الا كان مسالي كيمشي يسافر يشوف الماتشات

الدراري كانو كهضرو غير سمعو الريال بدا كسمعو ليها وهي تتوري لاسمهان تصاور هادي هنا هادي لهيه وكيشوفو فبعضهم هادي ضايرة العالم وناعسة معاهم فالسطح بكل روح رياضية

اسمهان خرجات عينيها:تي واش هادي في قطر

دينا:اه مشينا انا وماما وبابا وجوليا هاهو معتز ودانييلا زوي مكانتش فهاد الماتش جات حتال فاش لعبنا مع برتغال

هنا كلشي ولا كقول ليها اري نشوف اري نشوف فاش سمعو كاس العالم ملحمة التاريخ المغربية معتز جبد تيليفونو وبدا كوري لخليفة والدراري التصاور ديال التيران وكسولوه على الاجواء وكعاود ليهم

خليفة كانو عينيه على دينا فواحد التصويرة مصورة مع معتز فالتيران بالتوني والحمر كيف جاها خلاو كلشي كشوف فيهم هادو نيڤو هربان ضايرين النص فالدنيا وجالسين معاهم فالسطح وكياكلو معاهم فالارض قيم التواضع زادو عزازو عندهم لانهم منهار عرفوهم مفيهم لا تكبر بل نفخة سبحان الله مكتوحلش مع هاد النوع الشبعان كتحول غير مع صحاب النخوة على لخوى

دينا:هادي فargentina كان بابا مشى يشوف ماتش ديال ميسي منتخب ديالو ومشينا ولكن مبقيناش بزاف

سليمة لي كانت مرة تشوف عند زوي مرة تشوف عند دينا نعتات فواحد التصويرة ونطقات:زوينة هادي تاهي فين؟

دينا كانت كدوز التصاور وتقولهم على كل وحدة:هادي فكاليفورنيا وهادي كنا نجحنا ودانا بابات زوي ليونان وهادي مشينا عند عائلة مامات دانييلا فهولندا حيت هي ميريكانية هولندية

دانييلا طلات:انشوف توحشت جدة بزااف

ولد عم خليفة:دينا اينا مدينة عجباتك في هادشي كامل

دينا:صراحة مكاينش بحال مغريب ولكن حتى إسبانيا وهولندا زوينين

ولد عم خليفة كان كشوف مع معتز:هادي فين

معتز:روسيا مونديال 2018

ولد عمو:هاي هاي تيراه هادشي زوين ولد حيمود العربي مشى غير لداربيضا ولا يقطع عليها التيليفون

سليمة:ولاهيلا بغيت ليه ضربة

كلشي ضحك وسط هادشي خليفة كان كشوف فيها كيف تتهضر كلا نهار ككتاشف فيها حاجة جديدة ودابا عرف انها قمة التواضع واخا عرفو فيها شحال هدا ولكن دابا تأكد تنهد فاش عرف راسو انه مخطأش الاختيار ولكن كبقى شبح فراق المسافات زارهم وكقرب نهار على نهار بقاو مجمعين حتى لعبو واحد اللعبة لي هي غادي يقولو لشي حد كلمة ويقول ليهم سمية الشخص لي كعنيه بيه

ولد عم دينا:دابا نوبة معتز يلاه اسي معتز

معتز:هانا واجد على بركة الله

دينا:مثلك الاعلى

معتز:مارادونا من الفقر الى المجد

ولد عم دينا:الصحبة

معتز:زوي دينا كيڤن

ولد خليفة:الكورة

معتز:الريال_بايرن ميونخ_الرجاء مرة مرة

خليفة:اعز انسان؟

معتز: صراحة ݣاع لي قراب ليا واليديا خويا وصحابي

زوي:الحب؟

معتز نعت فدانييلا:الشهبة

دانييلا لي بدات تعيوج وتباهى بعدما ترجمو ليها وهما جالسين يصفقو ويغوتو سيفطات ليه بوسة فالهوى وهو بدورو بادلها خلاوهم كقولو لهم واتكايسو هما النص قاتلاه الوحدانية

خليفة لي حط عليه ولد عمو يدو ونطق:سي خليفة اشخبارك

خليفة فهم بلي نوبتو وصلات:سير عالله

معتز:الكورة؟

خليفة:الريال_الوداد

زوي بالانجليزية:الصداقة

خليفة:ولاد عمي عبد الله وعبد الرحمان وصاحبي عزالدين

ولد عمو:متلك الاعلى

خليفة:فالصبر الوليد الوليدة_فالدين محمد عليه الصلاه والسلام

دانييلا:اعز انسان

خليفة:مي با وخواتاتي وواحد ثاني راه عارف راسو شكون

كلشي بدا كضحك هنا دينا تقرصات حيت كانو عينيه عليه زوي نغزاتها عاقت وحتى سليمة لكن جمعات وطوات ولاد عمو بدا تتغامزو عليه فواحد السؤال لي ضارهم راسو من جيهتو نقز واحد فيهم ونطق:الحب او الزعطة

خليفة نيشان وعينيه كانو مفيكسيين عليها: دينا

جوابو صدم النص فولاد عمو لي كانو متوقعين يسمعو وحدة من بنات الدوار ساعة بانليهم مشى بعيد كلهم تكرشخو بالضحك وهي دارت يديها على وجها مزنݣة

وصحاباتها كضحكو عليها وهو عينيه عليها مبسم معندوش مشكل يعتارف ماشي عيب لواحد يقول شنو كحس كيفما كقول هو حيدات يديها على وجها وهي تتشوف فيه مزنݣة وحمرا حابسة الضحكة طلعات بديعة وتورية بعدما نعسو ولادها وتكاو فبلايصهم قالو ليهم بلي خوهم مزعوط وعتارف وهما يضورو لدينا

بديعة:هانت اخيتي خويا راه معقول ميكذبش عليك

ثورية:يهزك فوق كتيفاتو

دينا حشموها تخشات فبلاصتها وتغمات خلاتهم شادين فيها اما هو ݣعما تزعزع طلقها وجلس تتفرج عادي

بديعة:مبقيتيش ساهل يا ولد ميمتي

خليفة:ايوا القلب ميشاور اختي

بقاو على الضحك وحديث الساعة دينا وخليفة صافي تضربلهم الطر وكلشي عرف حشموها حتى تغمات وصدقات نعسات قبل منهم بقاو هكاك حتى لنص الليل تحت الݣمرة ونجوم الليل مجموعين كيضحكو الفكاهة طاغية على الموقف وما احلى جموع الليل

صبح صباح جديد شمس ساطعة والسما صافية صوت الفروج كاسر الدنيا تݣعدات بشوية وهي تتكسل كانت بوحدها لي بقات ناعسة عقدات حجبانها لاش مفيقوهاش معاهم ناضت طوات فين نعسات وخلاتو بلاصتو حيت بانو ليها فراشات فين نعس كلشي مزال كاينين نزلات لقات الناس فايقين وناس العرس باقين معاهم جالسين

اسمهان:زين صباح الخير

بديعة:الصديقة سيري غسلي وجهك واجي تفطري

دينا:لا غاذي نمشي مشاو وخلاوني ولاد الحرام

بديعة حركاتها:والله ما تمشي حتى تفطري

بزات عليها حتى بقات فطرات معاهم ويزة تترحب بيها لاحظات انه مكاينش ولكن يمكن فاق بكري حيت كخدم هادشي لي قالت فبالها قطرات معاهم ومن بعد ناضت مشات بحالها دخلات لقات باها جالس شاد بيسي قدامو

دينا:بابا شنو كدير؟

بوبكر عينيه فلبيسي:كنقطع ابنتي الطيارة الوحيدة لي كاينة بلا ليسكال غتمشي نهار الجمعة

دينا:وقطعتي فيها

بوبكر:معندنا منديرو احبيبة هي لي كاينة نيشان حنا زربانين منقدروش نزلو فكندا وزيد تاني كاينة وحدة غادية نيشان معطلة ولكن غادية تال نهار التلات

دينا بحزن تنهدات:واخا ابابا

بوبكر شد فيها:انا كنواعدك غنرجعو قريب راه بنت عمك غادي تزوج حتى هي ونحضرو لعرسها انشاءالله انا بالفرحات عليا بنتي تبغي العروبية وتبغي أصلنا

دينا تبسمات بزز عليها وحطات راسها على صدر باها وهو كطبطب عليها الغصة فحلقها ولكن حابساها بزز بقات معاه شوية من بعد طلعات تتقلب على صحابها خرجات تتسول ولاد عمامها والو رجعات دخلات:ماما فين هما الدريات

شادية: معرفتش خرجو قبيلة مقالو لي والو

دينا زفرات مفيقوهاش ودابا مشاو بلاما يقولو ليها طلعات لبيتها بدات تتصوني لهم واحد مكجاوبوهاش حتى من ختها فقصاتها مكتجاوبش عمرها دارتها صونات لخليفة حتى هو نفس الشي تعصبات دارت يديها على خدها وهي مربعة رجليها ونطقات:شنو زعما يكونو نساو

حتى ماماها وياها بانو ليها عادي مجبدوش ليها الموضوع يكونو تاهما نساو لبارح تلهات مع الخبر لي طاح عليها انها غتمشي قريب مقالت لهم والو ومابوسطات تحاجة ولكن ميمكنش ينساوها تنهدات ودارت يديها على خدها فاش تفكرات كيفاش تنقصات المدة وبقات يومين

نزلو دموعها فصمت مقادراش توصف شحال مساخيااش بالدوار بجدودها عائلتها وبيه معمرها مكانت كتخايل بلي هاد العطلة غدوز هكا وغادي طلاقا بحب جديد زوين كان من بين احسن الحوايج لي وقعات فحياتها كانت حزينة ودوا قلبها الحروج كان بحال شي دوا بحال شي بلسم لقاتو شد بيديها لطريقو لي كانت اجمل حاجة تمشي فيها خشات وجها فالمخدة وهي تتبكي فصمت كان حلم زوين ومبغاتش تفيق منو بقات هكاك حتى غفات واخا يلاه فايقة حلات عينيها على زوي ودانييلا كفيقو فيها

دينا تݣعدات:فين كنتو علاش مفيقتونيش؟

زوي:مشينا لدوار آخر شفنا الناس ورجعنا

دانييلا:بنتي لينا بقيتي ناعسة ومبغيناش نفيقوك

دينا تتحك عينيها:كنصوني مكتجاوبوش فقصتوني والله وزيد غير فيقوني مالكم حنا موالفين نمشيو لشي بلاصة بلا شي حد اويلي جوليا تاهي كانت معاكم؟

دانييلا وزوي شافو فبعضهم ونطقات دانييلا:اه هي ومعتز نوضي نوضي اصاحبتي نقيسو الحوايج

دينا:شنو شمن حوايج كاين غا حوايجنا لي جبنا

زوي:نوضي نختارو شي وحدين زوينين ونخرجو نتصورو راه مبقى لينا والو هنا يومين اصاحبتي

دينا تنهدات وناضت جبدو داك الماريو كامل كل وحدة تقيس كل وحدة تلبس حتى طاحت على واحد اللبيسة فالغوز المغلوق مزوقة مكونة من زوج بياسات السروال لي كان طويل وفضفاض طالع حتال السرة والفوق ديالو قصير شوية طالع على الكرش بقاو هكاك يجبدو ويحطو حتى رونو البيت نزلو شربو اتاي ورجعو طلعو تاني وتخشاو وسط كومة الشراوط

دينا:راه الليل طاح اشمن تصاور باقيين

دانييلا كدير فغاجو:وغير لبسي اصاحبتي نتصورو فالظلام مالك الجو زوين فالليل هنا

زوي:انا سالييييت انا جاية

دينا:فين غادية صبري نخرجو مجموعين

زوي وهي خارجة:انا جاية انا جاية

دانييلا:فراسك غنديرو التريب ليوم جايبين معانا الخيام

دينا:بصح وفين ناري هنا كنشوف الارض من بعيد غير الظلام

دانييلا:معتز ديجا دوا مع الحب ديالك هو لختار لينا بلاصة مزيانة وغيشعل لينا العافية

دينا:امتى هضر معاه انا وياه مدويناش ݣاع ليوم مكجاوبش

دانييلا:لبارح هضر معاه يقدر يكون مشغول راه العرس المغربي علاما شفت فيه الخدمة بزاف واخا سالا شفت الناس كاينين

دينا تنهدات فعلا واخا سالا العرس مزال عندهم الناس كملات دانييلا وبززات عليها تعكر بواحد العكر بارز وهي اصلا مفيها مايخرج باغية غير تجلس وتخمم فهاد الغفلة لي جاتها غتخلي كلشي زوين وراها هنا

دانييلا جارها:زيد اصاحبتي خاصنا نبخوفيطيو فهاد اليومين لي بقاتلينا نستاغلوها باش نهار نمشيو نبقاو نتفكرو اي حاجة زوينة دوزناها هنا

دينا تنهدات مع خرجو بانت ليها سليمة وراهم خارجة تاهي لابسة بيجامة جديدة وحازمة الزيف اللور ودايرة طاونݣ الصقلي وعكر ديال 24ساعة

دينا:يلاه يلاه زيدي معانا نخرجو

سليمة تتشوف فدانييلا لي غمزاتها:سليمة سمعت كاين شي اوطيل هنا ياك

دينا:اه داير ضيافة كقولو لها مشيت ليها زوينة

سليمة:زيدي يلاه نمشيو ليها

زادو غادين ويهضرو دينا غادية تاهي ربما طلقاه فيها وتشوفو غبر عليها هاد النهار كامل مشافتو مهضرات معاه

وصلو لدار الضيافة سبقات سليمة هي الاولى دفعات لباب ودخلو دينا كضور فعينيها مبانليها حد فالريسيبسيو دخلو بانلهم الناس جالسين فالجليسة لي حدا النافورة مشاو نيشان لجيهة لاخرى لي كانت بحال شي قهيوة صغيرة بالطوابل دالخشب تقليديين منقوشين كان كقربو لها وكبان لهم الضو طافي

دينا:راه واقلة مكاين حتى حد

سليمة:وغير زيدي نجلسو شوية

مع حطو رجليهم فيها وهو يشعل الضو كانت كلها مزوقة وكلهم غوتو دقة زوي دانييلا وسليمة معتز جوليا وماماها وباباها:happy birthday

ولاد عمها بداو كزمرو بالزمارات وكلشي ضاااار بيها وهي مصدومة وكضحك كان كحسابليها نساو اخر حاجة توقعها يفاجئوها وتما

دينا:كان كحسابلياااا نسيييتو

زوي عنقاتها:كاين شي حد ينسى عيد ميلاد البيست فريند ديالو

بوبكر جاي قاصدها عنقها:كاين شي حد ينسى نهار تزاد عندو وريدة joyeux anniversaire ma belle

عنقات باباها وهي فرحانة وسط حزنها شادية جات هاهي تتعنق فيها:الله يخليك ديما حياتك زوينة وتكوني فرحانة احبيبتي عيد ميلاد سعيد

دينا تتبوس وتعنق فيها:الله يخليك ليا اماماتي

كتعنق كلشي عيالات عمامها ولاد عمامها كلشي كان حاضر الا نجية طبعا عنقات ختها عناق حار هي سندها كانو لبنات بديعة بشرى اسمهان تاهما فراسهم

دينا ضربات سليمة:كنتي عارفة ومقلتيش ليا ياك ياك

سليمة عنقاتها:وانا اختي قالو ليا سكتي سكت عيد ميلاد سعيد احبيبتي عيد ميلاد سعيد

مجات فين ضور تشوف شكون نوبتو فتعناق كان هو عينيه عليها وراسم ابتسامة صغيرة وهو كشوف فيها تبسمات تاعي وعنقاتو بحالهم ولكن عناقو هو كان غير كبان عادي ولكن بينهم لا

دانييلا:خليفة كان اكثر واحد عاونا هو لي دانا لمراكش منين خدينا هادشي كامل وبقى معانا تقضينا كلشي ورجعنا

بوبكر طبطب عليه:شكرااا اولدي

دينا عويناتها كبريو:شكرا بزااااف

خليفة:مكاين حتى مشكل مرحبااا

وهنا كلشي بدا كغني happy birthday to you فاش معتز دخل الحلوة ضوروها وهي فرحانة غطير كانت كحسابليها نساوها كغنيو وولاد عمها البراهش الصغار مخسرين اللحن بالزمارات حط معتز الحلوى لي كانت كبييرة وفيها happy birthday Dina والشموع شاعلين برقم 20 سلمات عليه بلابيز وهو كبارك ليها تحت انظار خليفة لي عارفو غير صديق وعندو صاحبتو لكن القلب ومدار عض على شفايفو وسرطها بزز قدام واليديها والخلق طفات على الشمس بعدما امتار امنية تحت تصفيق كلشي وهنا بداو كعطيوها الكادوات

مرات عمها سعاد:وغا سمحيلينا ادينا جينا بيدينا خاويين علمونا غير دابا وزيد مخرجناش من الدار

تيحانية:نرضوها ليك فساعة الخير

دينا:انا مبغيت منكم غير تفكرتوني وفرحتوني صافي

سناء عطاتها واحد الريحة:ماشي شي حاجة غير قبلي عليا

دينا عنقاتها:متقوليش هكا مهم تفكرتيني

زوي هزات واحد الكادو:هاكي مكانش عارف شحال تتلبسي حتى شراه عاد سولنا وطلع تقديرو هو هداك

كلشي بدا كضحك وكشوف فمول داك الكادو لكان خليفة لي نطق وهو مبسم:وغير قدرت عالله مكان معايا حد وصدقات

دينا حلاتو وغير شافتو حمقها كادو متميز حيت تقليدي كان عبارة على شربيل فالغوز مطرز فنفس اللون ديال داكشي لي لابسة جاب ليها التناسق هو هدا هزات فيه عويناتها ونطقات:شكراااا بزااااف

شادية شافت فخليفة:شكرا الله يخلف عليك

خليفة:مكاين حتى شي مشكل بالصحة

شادية:لبسيها لبسيها نشوف

وداكشي لي كان قيساتها جاتها مع رجليها هي هاديك حمقاتها خصوصا معندها ݣاع شربيل هزات فيه عينيها وهي مبسمة وكأنها وتاهو عينيه عليها تتشكرو كانو عينيهم لكهضرو فهاد اللحظة تنهدات وهي حاسة براسها فرحات شوية تتعاود وتقول بلي مكاينش ماحسن من لمة العائلة والصحاب جاو عمها محجوب وجدها احمد ورحمة وجلسو كقطعو الحلوى هزات طريف وعطات لكل وحدة حتى وصلات عندو مدات ليه بشوية وعينيها فعينيه تتحاول متبين والو قدام واليديها اما لي كانو معاهم لبارح فاش عتارف وصلاتهم لخبار هادوك

تفرقات الحلوى وبقاو جالسين تما مجموعين جا الحاج عبد الغني جلس مع الحاج احمد كهضرو وناشطين دينا وصحابها وختها شبكوها تصاور واكيد تصورات معاه حتى هو بقاو شحال مدردشين حتى تعطل الوقت وتفرتكات الجماعة هما لي كانو ايباتو فالخيام سبقهم خليفة ومعتز قادوهم اما هي ولبنات مشاو يبدلو حوايجهم دغيا

سليمة:كن غير مشيتي اصاحبتي داز داكشي زوين

نجية قلبات وجها داكشي لي بقى ليها ولكن فنفسها كان باغية تمشي ولكن مرضاتش وزيد شعلو عوافيها فاش عرفاتو كان تما وهو لي دا صحابها يشريو لها الحلوى وداكشي لمراكش

فجيهة اخرى كانت سبقاتهم وخرجات تتسلت فالخلا الظلام ومضوية بلبيل وغادية جيهة العافية لي تتبان لها شاعلة من بعيد غير شافت معتز جا للدار يدي شي حاجة عرفاتو خلاه بوحدو تما موحشاه وباغية تشوفو الراس فالراس وداكشي لي كان لقاتو بوحدو جالس بعدما شعل لهم العافية وعاون معتز دارو الخيمات تبسمات ليه ودارليها اشارة بيدو تجي تجلس حداه وداكشي لي كان جلسات قريبة منو وسط العافية وظلام الليل الراس فالراس كان جو زوين وشيئا ما رومانسي

هز يديه بشوية وحيد لها خصلة من على وجها:عيد ميلاد سعيد تكوني حياتك كاملة فرحانة

دينا بقات ساكتة شحال عينيها فعينيه وهي تنطق:ونكون معاك

خليفة حس بكلامها كتاسح قلبو تاهو ربي لي عالم بيه من جيهتها وكيف غيكون فراقها وهو ولفها وشي حاجة كثر من الولف بغا ينطق وهي تسبقو:انا بغيت نبقى معاك

خليفة:ربي لي عالم بيه من جيهتك(نعت فقلبو)وراني نتمنى تكوني من مكتابي

دينا كلامو خلا قلبها يتهز وهي تتشوف فيه الشوق بداهم من دابا وعلاش لا لي داز بينهم مكانش قليل كانو قراب عينيه على بعض والقلوب كتنبض الاحاسيس الهايجة لي كتحاول تغطي على داك الفراق لي قريب يجي خلاتو بداو كقربو كثر بشوية بشوية بلاما يحسو قلبو لي خدامة كدفع كل واحد يقرب جيهة لاخر حتى تلاصقو ولتاحمو شفايفهم لاول مرة

فاقت من سهوتها قافزة فاش حسات بيديه دافية تحطات على خدها شافت فيه عاد وعات بجنابها وبلي غير كانت تتخايل وهو لعمرو حسات بيه شاف فيها بشي شوفة ماشي تلهيه ولا قاصها فجسدها ابدا وتخايلات معاه هادشي حشمات من براسها ولكن كلامو لقال فيه بلي بغاها من مكتابو وشوفاتو لي كتحس بعينيه الكوحل عالام آخر خلاوها تغوص فبحر المشاعر حتى عقلها مشى فداكشي تنهدات ودارت يديها على جبتها طلعات النفس ورجعات شافت فيه:انا غادي نمشي بعد غدا ݣاع الطيارات غادي يديرو ليسكال وكاينة وحدة غادية نيشان نهار الجمعة

خليفة حس بالضو شعل معاه ديك ربعيام ومكانتش مسروطة ليه ودابا كتقوليه بقاتلي نهار وليلة معاك ومعارفهاش امتى تقدر ترجع ثاني مسح على شعرو دار يدو على خدو وجلس كخمم ملقى ميقول كانو متوقعين هاد النهار ولكن كان بالنسبة ليهم بعيد حتى غفلهم كانو بزوج بيهم عايشين فواحد الحلم زوين ودابا فاقو منو من بعد مدة ديال الصمت حدا العافية والصقيل تلفت عندها

خليفة:واش معندكش كيف ديري راك غفلتيني وحنا عاد حلات لينا العشرة

دينا بحزن:معندي مندير معندي حتى حل انا مبغيتش نمشي مبغيتش

ومع نطقات كلامها تفرݣعات بالبكى وبدات تشهق وهي دايرة يديها على وجها هو دغيا ضور يديه عليها وجرها عندو معنقها كسكت فيها واخا ربي لي عالم بيه تاهو عنقاتو وكرزات عليه تتبين ليه قداش متعلقة بيه ومباغياش تمشي لكن معندهم ميديرو الظروف اقوى والوداع ضروري ميجي واحد النهار بعدها عليه بشوية شد وجها بين يديه وهي تتنخصص نيفها حمر ودموعها سايلين مسحهم ليها بصباعهم ونطق بصوت رجولي سايدة عليه نبرة كلها حنية:ضروري مكجي واحد الوقت باش كلا واحد فين كمشي يبني حياتو ويرسم مستقبلو وهادي راه هضرتك نت مدام دخلتي هنا(حط يدو على قلبو ورجع شد فوجها)مغاديش يفرقني عليك البعد سيري بني مستقبلك هو الاول وفأي وقت جيتي غادي طلقايني كنتسناك ݣاع هادشي لي وقع هنا غير البداية

ومع ختم كلامو قرب وطبع قبلة على راسها خلاتها هي وكلامو تحس بالدوا تحط على قلبها كان من اكبر مخاوفها انها تمشي وينساها ولا تبدل شي حاجة فعلاقتهم لي تعلقات بيه فيها بزاف ولكن كلامو لكانت كتحس وقادرة تشوف فيه كمية من الصدق خلاها ترتاح وتنفس شوية وزيد كيف كشجعها تمشي تقاد وتبني مستقبلها المعنى الحقيقي للسند

دينا: كان احسن قرار خديت هو نجي لهنا

خليفة:ونت غتبقاي احسن حاجة جات عندنا وطلاقيت بيها

كمية من المشاعر ومن الاحاسيس بينهم دابا كتقال باللسان وكتحس حتى بالتصرفات رجعو تعانقو هاد المرة ثاني عناق دافي مخلي القلوب تحس شوية بالراحة بعدما عرفات بلي مغيتبدل والو من مور الفراق وان الطريق او المسافة معندها ما تدي منهم بعدو على بعض وهما جالسين فداك الجو الهادئ والعافية خداو وقت ليهم بوحدهم الراس فالراس باش يحيدو الشوق من دابا كانو كهضرو بزوج تتسناو صحابها يجيو نزلات يديها بشوية وشبكاتها مع يديه كانت حركة تلقائية منها خلاتو هو يكرز على يديها الصغيرة وسط يديه كانت حركة تتخليها تحس بالامان وهي معاه يديها الصغيرة وسط يديه كتحس كيفما مغطي على يديها غيغطي عليها تاهي ويحميها وداكشي لي كان معمرها محسات بالنقص ولا الخوف وهي معاه ادق تفاصيلها كان راد ليهم البال كدير لها الحاجة قبل متقولها ولا تنطق بيها

يديها الصغيرة وسط خشونة يديه كتحس كيفما مغطي على يديها غيغطي عليها تاهي ويحميها وداكشي لي كان معمرها محسات بالنقص ولا الخوف وهي معاه ادق تفاصيلها كان راد ليهم البال كدير لها الحاجة قبل متقولها ولا تنطق بيها مدة قليلة وهما يلتاحقو بيهم البقية جلسو مجموعين ضايرين بالعافية جوليا كانت هازة فيديها واحد الكاميرة من النوع لي مخرج التصاور ديك الساعة

دينا:وااااو زوييييينة بزاااف

جوليا:شريتها الصباح فاش مشينا لمراكش

دينا شافت لخليفة:صوريني صوريني انا وخلييفة

وداكشي لي كان تبسمو لتصويرة بزوج كانو قراب لبعضهم وضو ديال العافية عطو Vibeزوين للتصاور لي تلتاقطو جبداتهم جوليا وشافتهم:جاو زوينين

دينا خداتهم من عندها:عطيني عطيني نشوف

خداتهم من عندها كانو تلاتة تصيورات تجمعو فيهم بزوج فلحظة زوينة غتبقاو ذكرى خليفة كان كشوف معاها وهي تتفحص كلا وحدة وتقول عليها زوينة بزاف

خليفة نعت فوحدة:عطيني هادي

دينا مداتها ليه:اه هاك غادي يبقاو عندي غدي نلصقهم فواحد الكتاب كنكتب فيه اي حاجة زوينة

كان كلشي مشغول بالهضرة حيت اصلا عارفين علاقتهم مبقى ميتخبى الا جوليا لي كانت تتشوف فيهم وعينيها عليه بالضحك متنكرش انه فعلا كبان ولد الناس تصرفاتو وكيف كهضر وزيد اهم حاجة سماهم على وجوههم وزيد سولات معتز لي كبقى وبحالو وكقراو بعضياتهم واكد ليها انه دري مزيان جرات اللسان لسليمة وسناء وحتى واحد زوج ولاد عمامها كلشي كشهد بأخلاقو الزوينة تتشوف فختها شحال فرحانة وكيف تتهضر معاه مبسمة عويناتها كبريو فعلا الرجل كلعب دور كبير فحياة الانثى بعدما كانت حزينة مع هداك لي قبل شوف دابا كيف البهجة والسرور مرسومة على وجها وهي مع هدا واحد طفاها وهرسها وواحد كيفما عاودات ليها عاود جمع قلبها المهرس وبعث فيه الامل ونور جديد خلاها تحب ثاني بقاو مجموعين معتز جبد الغيتار وجلس كضرب ويغني جوليا تتصورهم وهما كصفقو ويغنيو معاه الا خليفة لي عينيه على دينا كيف فرحانة وكل مرة يتنهد ولفها بزاف مينكرش هو صبرها ولكن براسو محاملش الوضعية جا الوقت فين ستأذن منهم خاص يمشي واخا عياو يشدوه ولكن ميمكنش يخلي خواتاتو وواليديه بوحدهم واخا الناس دالعرس كاينين ولكن ضروري يكون حتى هو ناضت معاه وزادو شوية

خليفة:ردي لبال لراسك مين دخلي سدي عليك

دينا:ياك مكاينش حنش هنا

خليفة حرك راسو بلا:معندك مناش تخافي مكاين والو قاتلك سدي عليك على ود القنفود كبقى يضور مكآديش ولكن فيه الشوك

حركات راسها باه وهي مبسمة شوية: تصبح على خيير

خليفة بابتسامة صغيرة:ونت من اهل الخير

وداعا وزاد خلاها واقفة متبعاه ورجعات عند صحابها مع جلسات غمزاتها ختها شي لخلاها تبسم عيط ليها بوبكر كسولهم واش بخير بقاو هكاك شحال حتى طفاو العافية ودخلو ينعسو

صبح صباح جديد كانو بالضبط فدار الحاجة يزة عرضات عليهم للفطور هي وعائلتها كان كلشي كهضر عليهم حيت غيمشيو وبلي هادي هي الحياة فيها المشاغل دابا يرجعو ثاني من بعد وكان الكلام موجه لدينا لي كان باين فيها الحزن

بديعة:خلي لينا نمرتك تاحنا والله مسخينا بيك اختي

دينا تنهدات:انرجع ان شاءالله قريييب

خديجة:وتاحنا مبقى لينا والو ونزيدو

بديعة:متفكرينيش مساخياش بدار با

جلسو الهنا يتنهدو حيت صافي سالا عرس ختهم وهما المزوجات خاص كلا وحدة ترجع لدار راجلها وهما مساخينش بدار واليديهم لا اصلا ميمكنش شي حد يسخى بيها

يزة:سيري ابنيتي قراي قرايتك ويجي الصيف ثاني وجي عندنا مرحبا بيييك

دينا حركات راسها باه وهي مبسمة شوية رجعات كبات ليها ياك اتاي وهي تتهضر مع رحمة:ولفات مسيكينة

رحمة ضورات يديها على دينا:ولفات بنيتي

حطات راسها صدر جداها وهي تتنهد فهاد الوقت كانو عيالات عمامها فطرو ورجعو للدار ينصبو الغدا ومعاهم حتى شادية وجوليا وزوي ودانييلا يلاه يجمعو الحوايج ويقادو

اسمهان:مين تكملي اجي عندي انا حدا الفران

دينا حركات راسها باه وهي تترشف من كاسها لبنات ناضو لشغالهم بقاو غير لعيالات كيهضرو بينهم ودينا حداها بنت خديجة تتلعب كانت لالة يزة براسها حزينة على فراق بنتها تتهضر ليهم على هاد الموضوع وفنفس الوقت كهضرو على العرس وكيف داااز

يزة:وصراحة حطيت العين على وحدة نهار عرس بنتي لولدي خليفة وغتكوني تتعرفيها اختي رحمة

دينا محساتش براسها:لااااا

رحمة شافت فيها:مالك ابنيتي

دينا عضات على شفايفها محساتش براسها حتى نقزات عليهم:لا اميمة والو غير كنت تنفكر ومحسيتش حتى هضرت بالصوت

يزة:متبقايش تخمي ابنيتي راك مزااال صغيرة التخمام خليه لينا حنا كملي كاسك واري نزيدك

رحمة:كملي كملي شكون هادي بنت الدوار ولا شي دوار اخر

دينا ودنيها تقلشو وهي تتسمع هاد الهضرة راسها زند عليها حطات الكاس عقدات حجبانها وجلسات تتسمع وتتڤيبري بلاصتها بحالا جالسة على العافية

يزة:هي من دوار فتيحات بنت مباركة التيجاني راه تعرفيها مهم لبنية هيو الصغيرة فخوتها

رحمة:عرفتها اختي عرفتها البنت زينة ومها الله يعمرها دار ولكن باها واحد الجلاخة منقولكش اما خوتها خلاااص كل واحد قال لخوه فالبلية متعرف شاي

يزة:ياك اختي وحايدي عليا بلاش الزواج هو النساب اختي

رحمة:وانت رخفي فيك النفس ولاد ليوم ولاو هما يقلبو على العروسة خليه هو يختار راسو ويجيب لي تحلى ليه عليها عينيه

يزة:وراه داكشي اختي تتقول خليك يختار هو لي بغاها قلبو ولكن كبانلي خاوي راسو والعمر كدوز وديك الدار تبقى غير مسدودة والدوار كولو بنات اشكتسنا

رحمة:وراه كبقى راجل ارحمة العمر معندو ميدي منو وقتما كتاب ليه غيتوكل عالله لا زربة على صلاح

يزة تنهدات:ونعمة بالله

دينا لي شبه رتاحت فاش سمعات جداها زمطات مو وحيدات لها فكرة الزواج ديالو من راسها حتى يختار هو ناضت بعدما كملات فطورها وخرجات مكانت توحدة فخواتاتو كلشي ملاهي مبغاتش تمشي تجمع حوايجها دابا بقات غادية تتمشى بشوية وكضور فراسها وكتشوف بحالا كتلقي نظراتها الاخيرة على الدوار

تنهدات وبقات تتمشى دوزات ايام زوينين هنا متنساهمش مدة قصيرة حتى خرجات على الدوار ووصلات جيهة الدرݣ مطلاقات غير مع نجية هازة سطل ديال الكرموس مطولاتش فيها الشوفة زادت مخطياها ولكن هي مقالتهاش وقفاتها بصوتها بكلامها السخون: هانت غتمشي بحالا عمرك ما كنتي

دينا تلفتات عاقدة حجبانها وهي تتشوف فيها نجية كملات على كلامها باستهزاء: عنداك يتحساب ليك تتقطع لبارح ويبقى مفكرك كن راه مو ضبرات ليه فشي وحدة من العرس حيت ميبغيوش ليه لي مربية مع النصارى

نطقات كلامها باستهزاء وهي تتبسم وباغية تفقصها ضارت غتزيد بحالها مع خطوات خطوة وحدة وهي تحس براسها تجرات من اللور من شعرها وهبطات دينا كانت دايرة يديها بزوج فشعر نجية لي بدات تتغوت وتعاير اما دينا تتدي وتجيب فيها اصلا مفقوصة حيت اتمشي وزادت عليها دابا دازتها وجابتها مزيان وضوراتها من شعكوكها حتى طاحت للارض عاد طلقاتها تتلهت دينا:مبغيتيييش تبعدي مني ياك

نجية مزال ممتيقاش ان الكيليميني نتفاتها وشطبات بيها الارض دغيا بدات تغطي فشعرها لي وقف كيطلب الشتى وتعاير:والله لبقات فيك السفرييطة

ناضت بغات طلاحت عليها وهي تشدها من عنقاها ودفعاتها جابت تاني طايحة للارض معرفاتش الجهد مين جاها ولكن الفقصة لدارت لها مع مراد طلعات معاها دابا وخلاتها تخرجها منها عاود طلاحت على شعرها وجراتها منو وهي تتغوت مع طاحت للارض حكماتها دينا الفقصة رفعاتها خلاتها جاراها من شعرها مع الارض وهي تتفكر فعلتها وكلامها دابا جمعات ليها كلشي حسات بشعر نجية غيبقى لها فيديها عاد طلقات منها خلاتها كلها تراب وشعرها واقف كي الكلبة

دينا:اتعاودي تحلي عليا فمك لخانز اتشوفي كثر من هادشي

لاحت عليها كلامها وزادت مبردة تتسوش يديها تتحس بواحد الراحة نفسية حيت خرجات ديك الفقصة مزيان بداك الجهد لي عطاها ربي مخلية نجية تحزم فشعرها وتعاير وتتبكي فنفس الوقت متوقعاتهاش منها ابدا ساعة صدماتها فيها ايه كيليميني ولكن غتكتري عليها متغبقاش كيليميني حكات عليها ولقاتها عطاتها جوابها ختمات بيها السهرة فالدوار دينا لي بقات تتمشى راجعة الدوار طلاقات بشرى جاية من طريق دار الضيافة

دينا:مبانش ليك خليفة؟

بشرى:توحشتيه ولا غتوحشيه امسخوطة اتمشي علينا

دينا تنهدات وبقات ساكتة شي لخلا بشرى تكمل كلامها:سيري راه هو كاين فدار الضيافة ولكن مدخليش من الباب القدامي سيري من اللور اطلقايه فواحد لبلاصة تم

حركات راسها باه وزادت بخطوات صغيرة لي داز من حداها تشوفيه ويشوفيها حتى وصلات كيفما قالت ليها بشرى ضارت مع اللور ديال دار الضيافة حتى بانتليها واحد لبريريكة صغيرة مبنية ولباب ديالها مردود قربات بشوية ودقات مع طلات شافتو وهو تلفت وشافها تبسم ونطق:زيدي دخلي

دخلات وهي تتبسم وتتشوف فديك لبلاصة من الداخل وواحد ريحة عاطية عجباتها بقات تتقرب فاش شافت شنو كدير عاد عرفاتها ريحة الطين شافت فيه بابتسامة ونطقات:زوينة بزاف معمرك مقلتي ليا بلي راك كدير هادشي

خليفة:شحال مصايبت شي حاجة تدهيت مع عرس ختي

دينا:كلا مرة كنكتاشف فيك شي حاجة جديدة وزوينة

خليفة جاوبها بابتسامة عريضة ورجع كشوف فشغلو كان كصايب واحد الكويس من الطين دينا تتشوف كيفاش كضور ديك اللعيبة وهو داير يديه بزوج فداك الكاس مع كحط يديه فشي بلاصة وهاديك كضور كزيد يوضاح مركزة وتتشوف بلا حتى كلمة وهو مرة مرة كهز راسو يشوفيها كيف مركزة ضورات عينيها على الارجاء بانو ليها بزاف ديال الحوايج زوينين مصايبهم ونفسهم شافتهم فدار الضيافة

دينا:نت لي صايبتي هادوك لي كانو لداخل واش كتبيعوهم

خليفة:لي عجباتو شي حاجة كشريها

دينا هزات واحد الطبسيل كان منقوش وزوين بزاااف رجعات حطاتو وهو ينطق:هزي لي عجبك باش تفكريني لهيه

تبسمات وتنهدات رجع نزل راسو مركز مع كاسو حتى قربات حداه بشوية حطات يديها على خدو حتى هز راسو فيها وهي تنطق:ديما غادي نكون مفكراك بلا حتى حاجة

مع كملات كلامها هز يديه لي عامرة شد بيها يديها بلا حتى كلمة طبع قبلة عليها خلاها غير تتشوف ومبسمة كحاولو ما امكن ميبنوش لحزن ديال الفراق لبعضهم حسات بقبلتو دافية على يديها لي عمرات بالذين تبسمات على حالها شي لخلاه يتاكحز شوية اللور هي فهماتو جات قدامو تقابلات مع الكاس شد ليها فيديها بشوية ورجع كضور ديك لعيبة لي عليها كاس وبدا خدام بيديها هي كانت كضحك وعاجبها الحال وتتشوف فالكاس كيف غادي وكتقاد كانو قراب لبعضهم خالقين لحظات زوينة قبل ميمشيو تتحس فانفاسو على عنقها ريحتها تغلغلات فنيفو لي ولا كعرفها جاية غير بيها بقاو هكاك هي كضحك وهو شاد فيديها دايرها على الطين توسخات حالتها كاملة واخا هكاك عاجبها الحال وتقولو انا واعرة على اساس قاداتو بوحدها كمل داك الكاس وحطو برا فالشمس ورجع هز واحد المزهرية صغيرة كانت ناشفة مصاوبها شحال خلط الصباغة وهز الشيتا وبدا ككتب فيها مخليها هي غاطسة يديها فالطين حتى كمل وناضت تاهي يديها كلهم عامرين وهي كضحك غسل ليها يديها ومع بغاو يخرجو مد ليها ديك المزهرية لكانت كتب ليها فيها سميتها وقادها ليها خلاتها بلا عقل

دينا:شكرا بزاااف معمرني مغادي نفرط فيها

خليفة:قلت ليك باش تبقاي تفكريني

دينا:غذا ضروري نشوفك قبل منمشي

خليفة تنهد:معاش غاديين نتوما

دينا:مع العشرة التسعود نشوفك واخا

حرك راسو باه وحط يديه على خدها كرجع لها شعرها ورا ودنيها باغي غدا يطوال باغيه ميجيييش ݣااااع

داز الوقت وظلام الحال كانو فالصالة تتعشاو مجموعين والهضرة كلها عليهم بلي مسخاوش بيهم وكدا وفعلا تاحد مكسخى بشي فرد من العائلة كدوز معاك بزاف خصوصا الا كان خفيف على القلب ودريويش بحال دينا تعشاو جلسو دردشو مزياااان مرة مرة كانت تتجي عينيها فنجية كطلع فيها حاجب تكضور وجها خلات ليها باش تفكرها بقاو سهرانين شحال كشبعو منهم من بعد تفرقو كلا واحد طلع ينعس بحالو طلاحت فوق الناموسية بغات تنعس فلبيت فآخر ليلة لها تما كعجبها بزاف ودوزات فيه وقت زوين زوي ودراري بقاو لتحت فالصالة ناعسين هزات تليفونها وكيف ديما لقاتو مسيفط ليها بقاو كهضرو لآخر مرة وهما قراب من بعد غتكون بيناتهم مسافات

نهار جديد تبسمات ابتسامة عريضة فاش شافتو واقف تتسناها كيفما دارت معاه وعلاش لي ميجيش هو براسو باغي يشوفها قربات عندو وتعانقو شحال حتى بعدو على بعض بشوبة

خليفة:كصبحتي

دينا حركات راسها باه وهي تتنهد باين حالها جرها من يديها بشوية ونطق:اجي معايا

تبعاتو وهما غادين تتمشاو كان مرة مرة كضور يشوفيها نادرا فاش شافها باللباس العصري كان ديما كشوف فيها بتقليدي بيجامة ديال 30درهم تتبان كيوت ودابا بالدجين والتيشرت شكل آخر بقاو غاديين وكهضرو وتتمناو ديك الساعة لي بقات ليهم بزوج تزيد تطوال كثر كانو طالعين مع واحد التلة صغيرة وهو شاد فيها بشوية عليها حتى كطلع مدة قصيرة حتى وصلو لفوق ديالها مع جرها شوية وطلات وهي تشهق بجمالية المنظر كان كبان الدوار كامل من الفوق الشميسة ساطعة والاراضي والخضورية منظر واعر من ابداع الخالق والطبيعة ضور يديه بشوية عليها وحتى هي كانو ملاصقين فبعض حاطة راسها على صدرو وكتأملو ابداع الخالق فهاد المدك القصيرة لي جامعاهم كشوفو فالدوار البلاصة فين تجمعو وطلاقاو لاول مرة ودوزو هاد الوقت الزوين لي غيبقى محفور فعقولهم بزوج مدة ديال الصمت حتى بعد عليها شوية تقابل معاها ونطق

خليفة:واعديني مغاديش تبكي

دينا بحال كان عالم عليها وعارف تنهدات ميمكنش وصعيب عليها متبكيش نزلات راسها هنا هو مدي يديه بشوية تحت دقنها وطلع لها وجها حتى تقابل عيونهم ثاني ونطق:سيري بني مستقبلك قرايتك هي الاولى ووقتما جيتي غادي طلقايني كنتسناك

كلامو كان محفز ليها وفنفس الوقت مطمن انه كقول ليها غترجع وطلقاه كتسناها طلاحت عليه عنقاتو للمرة الاخيرة وكذلك هو كارز عليها مساخيش بيها لابعد درجة كحس بقلبو مقبوط ولكن المكتاب متوقع هادشي من اول نهار عرفها فيه معانقين كشمو ريحة بعض للمرة الاخيرة كشبعو من بعض واخا مكيمكنش تشبع من محبوبك ولي ضرب قلبك ليه ابدا وهما فديك المدة اجسادهم ملتاحمين كتمناو المدة طوال ويبقاو هكاك قاطع وداعهم تيليفونها لي صونا بعدات عليه بشوية تتشوف فتيليفون وهي كقاد لها شعرها بشوية كانت ماماها دغيا جاوباتها:الو ماما

شادية:دينا وصل الوقت الطوموبيل واجدة إماما غنشدو الطريق المطار فينك اجي

دينا عضات على شفايفها ونطقات والغصة فحلقها:واخا اماما

قطعات معاها وشافت فيه:خاصني نمشي

ومع كملات كلامها عويناتها غرغرو خلاتو يتنهد ويهز راسو السما هو براسو تقاداو ليه فهاد اللحظة رجع شافيها شد وجها بين يديه ومسح دموعها:بالي غيبقى معااك وغتخليني مشوش من ورااك

دينا بدات تتمسح دموعها دغياا:صافي انا ساكتة صافي

رسم ابتسامة صغيرة على وجهو تصرفاتها الطفولية هي باش كسباتو النهار الاول عاود ضمها لصدرو وحتى هي كرزات العناق الاخير كوصيها ترد البال لراسها وتديها فقرايتها

خليفة:عنداك تمشي للقيتيه تبقاو على السلام بلا موجب شرع

دينا ضحكات وحركات راسها بلا وعويناتها كبريو بالدموع قرصها فنيفها ضروري ميضحكها متمشيش مقلقة حطات يديها على خدو ونطقات:تهلا فراسك

خليفة شد يديها بشوية براسها:متهزيش ليا الهم الا عيطت جاوبيني صافي

حركات راسها باه وهو كقاد ليها شعرها رجعو تشادو وزادو نازلين من التلة وغادين كل مرة كشوفو فبعض عينيهم مستغلة كل ثانية كدوزوها دابا حيت البعد غيكون مار وطويل دينا كضور عينيها على الارجاء لآخر مرة متنساش الايام لي دازت كان احسن شهر دوزات فحياتها وعمرها تنساه قربو شوية للدوار وهنا تفارقو باش متبانش كانت معاه بقات غادية وكضور عندو وهو متبعها لها العين وقلبو مقبوط عليه من جيهتها البعد غيكون صعيب دخلات لحياتو وولفها دينا غادية وبحالا تتعفط على الشوك مباغياش توصل وتوادع معاهم وتبكي وصلات كان قدام الدار عامر باها ومها وجوليا وصحابها كعنقو خدا ويعنقو لاخر حاسة بدموعها غينزلو ويخونوها مع وقفات طلاحت على جداها تتعنق فيها وتاخد من حنانها رحمة خانوها دموعها وبدات تبكي شي لخلا دينا تاهي طيح الدموع طلاحت على جدها تاهو تعنق وتبوس فيه وهو يسكت فيها كلشي بدا يطيح فالدموع غتخلي بلاصتها كبيرة مفيها عياقة مفيها تكبر كلشي كان وكلشي توادعات معاه الا نجية طبعا لي تاحد اصلا مارد لبال لغيابها سلمات على خواتات خليفة وحدة وحدة وهما كودعوها وكضربو موعد انه غيطلاقاو فالقريب ودعات كلشي واحد واحد حتى شي ناس من الدوار دايزين ووقفو سلمو عليهم

دانييلا عينيها مغرغرين:شكرا ليكم بزاااف على كلشي

معتز:شكرا بزااااف وسمحولينا

رحمة:سمحولينا نتوما اوليدي الا قصرنا

الحاج احمد:مرحبا بيكم عندنا فاي ساعة

خليفة لكان جاي وشاف المشهد قصد بوبكر تعانق هو وياه تعانق مع معتز سلم على شادية وعلى زوي دانييلا وصل حتال عندها هي وسلم عليها بحالهم وعينيهم على بعض لي حضرو ليلة السطح كانو كشوفو فيهم وجاريين مع الموقف لي طاغي فيه الحزن على كل واحد فيهم

خليفة شاف ابوبكر:طريق السلامة

بوبكر طبطب عليك:الله امين تهلا فراسك

سليمة لي تاهي دموعها فعينيها طلاحت على دينا:غنتوحشك بزاااف اختي والله شكرا على كلشي

دينا:تهلاي فراسك الا شريتي تيليفون سيفطي ليا

من بعدما ودعو كلشي فجو من الحزن لي كرافق لحظة الوداع تفرقو على زوج طوموبيلات وركبو كاملين وهما كودعوهم دينا قبل متركب ضارت لآخر مرة عند كلشي وهي كدير ليهم بيديها باي باي وعينيها مغرغرين:ميما بااا بسلامة بسلاامة عليكم كاملين

كلهم بداو كديرو ليها باي باي بيديهم حولات عينيها ليه كان واقف وكشوف فيها مقدراتش تبقى تصبر طاحو دموعها ودخلات دغيا وسدات الباب ضارت من الزاجة تتشوف فيه وفنفس الوقت كدير باي باي هي وزوي لبديعة سليمة اسمهان وكتسيفط بوسات فالهوى لجداها وجدها بعدات الطوموبيل ومع ذلك وبقات تتشوف فيهم ومرة تتحول عينيها لعائلتها ومرة تتشوف فيه كيف كان واقف وغير كشوف والصمت لي حاكمو ضارت كانت راكبة مع صحابها وعمها راجل سناء هو لي صايݣ دموعها كنزلو فصمت وهي تتشوف فالدوار والاراضي لي دوزات فيهم شلا وقت معاه قلبها كضرها ولحظة الوداع صعيبة بزاااف زوي ضورات يديها عليها وهي تتسكت فيها بصمت وتتنهد تاهي ولفات وعجبها الحال بزاف احسن صيف دوزاتو تفكرات فاش كانت يلاه جاية مكانتش ابدا تتخايل ان طرفها الثاني اطلقاه فالدوار وغتعيش معاه مواقف زوينة غتحفر فقلبها وذاكرتها طول عمرها مسحات دموعها وخلات المكاتب يتصرف مزال تعاود ترجع ومزال تعاود تشوفو ولكن لي قاتلها هو الايام لي بغاتها تدوز دغيا وتعاود تجمع بيه

داز الوقت كانو فواحد من لي ريسطو ديال مطار مراكش كانو عمامها مزالين معاهم وصلوهم وبقاو تغداو مجموعين حيت الطيارة كلشي ملاهي بالهضرة الا هي لي تتخمم وتتفكر دايرة يديها على خدها ومهمومة وتتنهد بزاف الحلم ديالهم الطيارة والمطار والاجواء ولكن هي لا فهاد اللحظة حاسة براسها مباغياش ميريكان لي الحلم ديال نصف الكرة الارضية هزات راسها بشوية وطلقات تنهيدة طويلة فاش سمعات الاعلان على ان الطيارة لي غادية لميريكان غتنزل بعد زوج دقايق ولي هي طيارتهم طبعا ناضو خلصو وخرجو توادعو مع عمامها تاهما بالتعناق ومشاو دخلو وهما كودعوهم من بعيد غادية قدام زوي جارة باليزتها وفيديها باسبورها مرة مرة تتشوف فيه وتتنهد كل خطوة تتحس بيها ثقيلة على قلبها

رجعات راسها اللور متكية وهي تتحس بالطيارة تهزات عينيها على السرجم وهي تتشوف الطيارة تعلات فالسما وسط السحاب قربات وهي تتشوف المغرب من الفوق لي قريب يخويوه كتودعو وهي مغبونة طايح عليها الضيم حسات بشي يد تحطات عليها كانت يد ختها تلفتات شافت فيها وهي تبسم شوية جوليا دوزات يديها بشوية على خد ختها ونطقات:مزال تعاودي تشوفيه ان شاءالله غير صبري

دينا حطيأات راسها بشوية على كتف ختها لي عنقاتها وهي تتصبر وتواسيها بلي قريب غيرجعو وكدا قايمة بدورها مع ختها والاخت سند فالمواقف والمحن غمضات عينيها من بعد مدة مخلية الايام ضور وتعاود طلاقيها بيه ومخلية مكتابها للدنيا تصرف فيه واش البعد غيهرس علاقتهم ولا يبدلها معرفاتش لي عارفة هو انها غادية وقلبها خلاتو فالمغرب فالدوار خلاتو معاه هو

فجيهة اخرى فالدوار بالضبط كان هو جالس فالارض مربع رجليه بهايمو قدامو كسرح يديه على ذقنو وبالو شارد مكاملاش ربعة السوايع باش مشات وتأكد كثر بلي بلاصتها بقات كبيرة كانت فهاد الوقيتة كشوفها جاية تتجري عندو بالتخبية تتشوف فجنابها تنهد تنهيدة من الاعماق كيفاش غيصبر على الايام لي جاية حتى طلاقيه بيها ثاني

حلات عينيها بشوية وهي تتكسل وعات مزيان وعرفات راسها فبيتها هاد المرة لي كبرات فيها وماشي لبيت لي فدار جدها تنهدات وهي تتشوف فالسقف تتحس براسها عيانة ومدݣدݣة رحلة طويلة بزااااف دازت عليها غير تخمام مرة تسهى مرة طيح شوية الدموع حتى وصلو وطاحو كاو كاملين صحابها تفرقو ولا واحد مشى لدارو تݣعدات بشوية تتحك فشعرها حلات السرجم دخل الضو طلعات النفس من البريد اي ضرب فوجها وهي تتشوف فالزنقة الديور الطموبيلات الكلاكسون وبنادم غادي جاي دارهم جات على الشارع كانت منظر حضري عكس لي ولفات كان منظر ديال الطبيعة كريح النفس تنهدات ومشات جبدات لي خاصها ودوشات جلسات تتنشف شعرها غير كملات شعلات تيليفونها رجعات نمرتها ديال ميريكان وهنا سيفطات ليه دغيا كانت عندهم 3دالعشية وفارق الوقت كبير بينهم وبين المغرب هدا غيخلق ليهم مشكل مكاملاش بزاف حتى جاوبها

خليفة:كي وصلتي شحال وانا كنتسناك

دينا:الحمدلله وصلت عيانة من لبارح وانا ناعسة يلاه فقت

خليفة: الحمدلله ياك بخير بعدا نت مزيانة

دينا خرجات تنهيدة وهي تتكتب ليه هاد المرة كانو بعاد وهما كهضرو صورات ليه السرجم وسيفطاتو ليه:ولفت نحل السرجم ونلقى الارض خضرا وصوت البݣيرات وصوت قوقوعو

خليفة:قوقوعو😂😂😂😂

دينا:😂😂😂😂😂

ضحكات على راسها بعدما كانت مهمومة غير هضرات معاه وهي تضحك ورجع فيها اللون بقات شحال تتهضر هي وياه حتى تحل لباب

جوليا:حوباي فقتييي نوضي نتغداو

دينا:واخا انا جاية ابب

بقات تتهضر معاه شوية من بعد نزلات جمعات فطور وغدا هي وختها اما باها ومها في فاقو كلا زاد لخدمتو صونات ابيل فيديو على زوي كانت براسها يلاه فايقة بقاو كهضرو شحال وهي جالسة قدام التلفازة

القاعة عامرة والتصفيق حار من جيهة الحضور لي كانو كلهم يا اصدقاء ولا اباء الطلبة لي تخرجو كان واقفين صف بالشواهد ولبسة التخرج والكاميرة كتصور فيهم والمدير كخطب وكهضر ويشكر وفرحتو باينة تخرج فصل جديد من المعهد

كانت واقفة برا مع واليديها ومامات زوي وشي اصدقاء كانو كقراو معاهم كهضرو شي كضحك شي كتصور وشي فرحتو مخلياه راكب فالطوموبيل مع صحابو وغادي ككلاكصوني شافت التيليفون كصوني لها نساحبات وبعدات عليهم عاد جاوبات كانت ابيل فيديو وكان هو تبسمات وهي تتوريه لبسة التخرج وطربوش ديالها وهزات الديبلوم ووراتو ليه:طااارااااااا

خليفة بابتسامة عريضة:مبرووووك

دينا:صورت كلشي وكيف كهضرت وكيف عطاوه ليا باش نوريهم ليك

خليفة:اياه سيفطي ليا كلشي نشوف

دينا:انا فرحانة بزااف بزاف

خليفة:وانا فرحان حيت نت فرحانة

تبسمات وسيفطات ليه بوسة فالهوى وفنفس الوقت قلبات ليه الكاميرة يشوف الاجواء

خليفة: زاهية الدعوة قوليليا امتى عندك السطاج

دينا:نهار لاربع بعد غدا غادي نبدا

خليفة:ان شاءالله الله يسر ليك ركزي مزيان توكلي على الله وان شاءالله ميكون غير الخير

دينا حركات راسها باه وهي مبتاسمة كلامو شحال زوين لبارح شحال نصحها على ليون وبقى عليها متخلعيش قراي القرآن قبل ما طلعي وبشوية عليك متبانيش متوترة قدام الميكرو نفسو الكلام لي قالو لها واليديها وختها كانو سندها كاملين فهاد اللحظة

بوبكر: دينا يلاااه ابنتي غنمشيو

دينا ضارت عند باها:واخا ابابااا(رجعات شافت فالتيلفون)يلاه نخليك دابا غير نوصل للدار ونهضرو

خليفة:واخا متنسايش سيفطي ليا نشوف

دينا: لا غير نوصل للدار وانا معاك يلاه بيزو

قطعات معاه ومشات مع واليديها بعدما ودعات صحابها لي جمعاتها بيهم القراية من ورا الباك دابا كلا واحد غيشق طريقو بوحدو دارت مع زوي ومعتز ودانييلا يطلاقاو غدا مع وصلو للدار طلعات لبيتها تتجري سيفطات ليه كلشي مكانش داخل وجلسات تتبدل حوايجها تنهدات وهي تتفكر دوزات يومين دابا ومزال تتشوف الدوار بين عينيها فاي حاجة حتى فاش كتحل السرجم الصباح ولفات تشوف ابداع الطبيعة والهدوء عكس المنظر الحضري لي عندها قدام سرجمها هنايا تنهدات ونزلات لكوزينة وهي تتسناه يجاوبها خربقات لها شي حاجة دغيا ومشات قدام التلفازة وهي تتسناه يجاوبها وداكشي لي كان ماشي بزاف حتى جاها الرد ديالو

خليفة:احسن وحدة وسطهم كاملين

دينا مبسمة:ونت احسن واااااحد عرفتو فيهم كاملين😍

خليفة:خليك ديما هكا هازة راسك وتايقة فنفسك توكلي على الله ومتخافيش اي حاجة بغيتيها اتوصلي ليها

دينا:هضرتك تتجيب ليا واحد الطاقة زوينة بزاااف

خليفة:راه قلتها ليك ديك النهار واخا تبعدي غنبقى معاك🤍

تكات بشوية وهي شادة طيليفونها وهي تتبسم المعنى الحقيقي ديال السند هو هدا وشحال زوين يكون لي كبغيه قلبك هو سندك فأبسط الحوايج حاجة كانت ديما تتسمعها ودابا جرباتها بعد المرات التعويض ديال الله لينا على شي مأساة دوزنا على شكل انسان من نهار كدخل لحياتنا والفرحة والبهجة كتبعث معاه وهادشي لي طرا معاها هي منهار عرفاتو وهي فرحانة

فجيهة اخرى كان هو الدنيا مظلمة فالدوار والصقيل كيف ديما فاش كطيح الظلام كان متكي على حيط الكوري داير يد فجيب ويد شاد بيها التيليفون كهضر معاها وراسم ابتسامة صغيرة على وجهو كشوف فتصويرتها مع باباها وماماها وختها بلبيسة ديال التخرج وابتسامتها الغزالة وكيوت زوينة فكلشي تنهد تنهيدة طويلة يلاه دازت يومين وحس بغيابها معساك الايام لي جاااييين بحال هاد الوقت كان كدخل كلقاها مع خواتاتو مجمعين كتجلس حداه وكتعشاو مجموعين وجودها كان قوي معاهم هادشي لي خلا غيابها يكون واضح ودغيا يبان

نهار جديد بالضبط فالدوار كانو فالبيت كطويو الحوايج سليمة مرة مرة كانت تتشوف فختها لي مخنزرة وطوي وتخبط تنهدات وهي تنطق:دينا خلاااات بلاصتها

نجية غير سمعات سميتها شربنات وتفكرات النتفة لي عطاتها نطقات بصوت جاف:ذكرنا السمن والزفر

سليمة:مالك معاها اصاحبتي من نهار جات ونت هكا بنت عمنا كنشوفوها مرة فشحال مشفنا منها غير الخير شوفي شحال خلات لينا دالحوايج والماكياج هي وصحاباتها

نجية:بقى ليكم غير شوية وتعبدوها دينا دينا دينا طلعات دينا نزلات دينا خرات دينا نعسات دينا تفرݣعات بقات ليكم غا ديرو صلاية تحتها وتعبدوووهاا مالها غاهي لي قاطعة البحر زدتو فيه وطيحتو الدل

سليمة كطوي سروال:لا حول ولا قوة الا بالله على الاقل كان عليك غا تسلمي عليها فاش كانت غادية عيقتي اصاحبتي

هنا سعاد ماماهم كانت داخلة غير سمعات كلام سليمة وهي ضور لنجية:مسلمتيش على بنت عمك الحرامية

نجية بلاما تشوفها:موحشة فيهااا مشات راه الطريق

سعاد:لا حول ولا قوه الا بالله هاد العناد الخاوي نوضي ديريه فراسك وضوري بحالتك باك وجدك راه دواو مع سعيد عندك ضريب الصداق من مور 15يوم تهزي

نجية هنا شربات كثر ماهي حاقدة وقفات وبدات تتهلل عليهم اصلا جاهلة وزادت جهلات فاش سمعات سيرة سعيد:واش هداك الرجل مافيه نفس ما مرة ما زوج قلت ليه ومزال تتلصق انا ممزوجاش الا بغاوه هما يمشيو يتزوجو بييه انا مباغياه لا هو لا غيرو انا باااغية خليييييييفة

سعاد بدات تندب:كوني تحشمي يا لمسخوووطة كوني تحشمييي بااااك كاين غيسمعك غتفضحينا

نجية:يكوووون انا بغيتو يسمع الفضيحة خايفين لا نديرها غير انا مخايفيينش من ديك دينا لي النهار ومطال وهي تخيط فالاراضي والخلاوااات هاديك مبانتش ليكم

مع كملات كلامها محسات غير بتصرفيقة نزلات للارض خلات حنكها كوزوز معرفات باش تبلات هزات راسها غير شافت باها لونها تخطف تخاف ما تحشم محجوب لكان حاقد سمع كلامها كامل سليمة تكمشات فبلاصتها وهي تتنهد هاهي جبدات عليها صداع ثاني بسباب لسانها السليط

سعاد:سمعتي البرهوشة مبقاااااااتش تحشم صوتها ولا واصل للدوار وهي سايرة تقول فالمسخ

محجوب عينيه قرطاس على بنتو:سمعتها نقجها حتى تزهق روحها وما تبردش ليا دوي يا بنت الحرااام وليت تهزي علينا حلوقك احمدي الله قبل بيك داك الرجل ونت شوية فضيحتك تولي على لسان ݣاع الدوار اياكما يحسابليك كانبو واصلاني خبارك تمشي تزوقي ديك الكمارة وتحومي على السيد متاقي الله وداخل سوق جواه كان حابساني عليك غالدار عامرة اما من شحال وانا سناني عليك لوبيا قاتليك بغيت خليفة بلا حشمة بلا عراااض الله يسمخك خليفة كن هو جا بغاك منعطيكش ليه الشاطا ماطا لوخرا نلصق ليه وحدة حس الحيا والحشمة معندهاش

سعاد:باغية تعاند مع بنت عمها المدلووولة لاخرا هاديك محسوبة على النصارى عندها واليديها يحكمو فيها اما نت محسوبة علينا فعايلك هما وجهنا قدام الناس

محجوب اصلا كان عارف علاش دينا تتمشي عند خليفة وشاف بعينيه داكشي باش مداش على هضرتها:بنت خويا كنشوفوها مرة فخمس سنين خرجتي فيها العجب الكافرة

نجية ولات كي الكليبة وهي تتسمع على ودنيها طلع باها عارف فعايلها يديها على خدها ودموعها نازلين محجوب مسح على وجهو شاف فمرتو ونطق:باغية غا الزكير حنا ماليه سعيد مدروك وخدام قاليا يديها غا بحفيلة صغيرة تالسبوع ويدير الفيجطة قلتلو لا انا راجع فكلامي دابا(شاف فنجية تتحلف فيها)والله العرس لا درتيه ولكان ليك غتمشي هكاك يكوغطك وزيدي شايطين عليا فلوسي ندير بيهم لقليلة الحيا وموسخة الفعايل العرس وزيد ياك مباغاهش معندك لاش طلعي فالعمارية(رجع شاف فسعاد)من غدا نعطيك ديها لسوق شري لها الشرويط والقجاقج لي خاصينا حوشيهم لها فباليزة ونهار يضرب بيها لاكط تمشي الله يعرضها السلامة غير زبلة حيدناها على راسنا وغنحطوها ليه فوق راسو

سعاد تنهدات:هو لي بغا ولي دار الذنب يستاهل العقووووبة

بقى مخنزر فيها وزاد كعاير مخلي خبار بحال الصاعقة تنزل عليها ولي هو مكاين عرس لي تحلم بيه اي بنت لكن فعايلها لي دارو لها ولسانها السليط تكمشات بلاصتها وعطاتها لبكى عارفك واخا يتدخل جدها باها ميرجع فكلامو سعاد هزات الحوايج وخرجات وهي تتنطق:المدلولة هدا حالها لݣاي دابا ديما نقولك ديري عقلك هانت صدقتي غتمشي سكوتية لا غياط لا زغاريت يتسمعو ورااك

سليمة تنهدات تاهي على ختها ولكن هي لي دارتها لراسها محمداتش الله بولد الناس لي جاها بقات تعلق فين تفلق وتهبش على غيرها حتى لݣاتها الدقة العروسة بلا عرس بحال الحديث بلا فايدة جات خارجة تاهي ولاحت ليها كلامها: لسانك لي دارها ليك اختي مبغيتيش ترضاي وتحمدي الله على مكتوبك

خلاوها وراهم تتبكي بحرقة البنت كيفما كانت تبغي العرس وتفرح براسها وتمشي بعزها لكن هي لي قلبات على هاد الحال وادارتها لراسها مدارها ليها حد

دازو يومين طايرين عاديين بلا حتى شي حاجة جديدة كانو بالضبط فواحد نايت كلوب الموسيقى مجهدة والشطيح كانو جالسين مجموعين الكليكة ومزيودين عليهم دراري وبنات جداد بالضبط من البرومو ديالهم محتافلين بالتخرج ديالهم كلشي ناشط كلشي فرحان معتز ودانييلا نايضين يشطحو زوي كضحك مع الدراري لي معاهم الا هي لي جالسة وساهية مسن دخلات معاجبها حال صافي بوانتات شوية بغات تنوض تمشي

فاقت من سهوتها فاش واحد من الدراري حط يدو على كتفها تبسمات شوية ونطقات:كيڤن

كيڤن قرب لودنيها ونطق باش تسمعو:مالك شفتك ما فرحاناش

دينا:لا لا ماشي هكاك غير عيانة شوية وصافي غنوض نمشي

وداكشي لي كان وقفات وتلفتات عند زوي قالتها ليها

زوي:اويلي علاش اصاحبتي شحال متجمعنا هنا وبغينا نشطو

دينا:والله حتى عيت اصاحبتي راك عارفة السطاج ليوم داز النهار طويل وعاد غدا ثاني صافي تالويكاند ونعاودوها

زوي تنهدات:واخا لي بانليك نوصلك؟

كيڤن حتى هو نطق فنفس اللحظة:دينا نوصلك قادرة تصوݣي

دينا:لا لا اويلي ماشي لديك الدرجة

زوي:انا نخرج معاك لباب

داكشي لي كان قبل متخرج قصدات دانييلا ومعتز لي كانو عايشين الحياة قالت ليهم شكاين واخا عياو يشدوها بقات مصرة معتز بغا يوصلها تاهو ولكن رفضات قادة براسها وزيد مبعيداش بزاف خلاوها على خاطرها وخرجات هي وزوي تسالمو بحرارة وتوادعات معاها بقات حاضياها حتى ركبات وزادت وهي متبعة الطوموبيل بعينيها عارفة صاحبتها مالها معياناش وانما مزال مقادراش تولف البعد لي صعيب

سدات الباب بتعب وضورات عينيها فالدار لي خاوية ماماها وباباها خدامين بزوج كتعطلو فالخدمة جوليا كتجي عيانة كطلع تنعس قالت فنفسها هاهي رجعات لحياتها لعادية بكثرة ما عقلها لهيه معجبهاش التجمع مع صحابها ديال هنا ونساحبات طالعة بشوية وهي تتفكر ولفات البساطة والجماعة مع بنت عمها وخواتات خليفة يا فالسطح يا فاش كتعشاو مجموعين وهاذي غير ايامها الأولى هنا عاد خلي لي جاي حبساتها لبكية وهي تتبدل فحوايجها ومشات جلسات فلبيرو ديالها حلات واحد المذكرة ديالها وبدات تتكتب

وتتعبر بلي كانت احسن عطلة فحياتها واجمل حاجة وقعات هي انها طلاقات بيه لدرجة رجعات وعقلها بقى لهيه يلاه دوزات ايامها الاولى فالمدينة لي كبرات فيها واخا هكاك تتحس براسها شي حاجة فشكل تتكتب وهي حزينة وكلامها كولو عليه هو بالضبط كانت بحالا تتخوي قلبها فسطور الدفتار هزات راسها بشوية وهي تتشوف فالتصويرة لي تصورو بزوج وتنهدات يديها على خدها ضوراتها وكتبات فظهرها: كنتي وغتبقى احسن حاجة وقعات فحياتي

تنهدات وحطات الستيلو وهي تتشوف فالكتبة لي كتبات وعبرات فيها بالحزن لي كاسي قلبها شنو غادي يكون كدير دابا فهاد اللحظة سدات الكتاب دغيا فاش سمعات الدقان والباب تحل تلفتات غير شافتو تبسمات:بابا

بوبكر:حبيبتي يلاه جيتي

دينا حركات راسها باه وقصداتو سلمات عليه مع بعدات حط يدو على وجها:حيدي هاد التقليقة وانا كنواعدك بلي غنعاودو نرجعو فاقرب وقت ان شاءالله

حركات راسها باه وهي مبسمة تتحاول متبينش ولكن واليديها عارفينها مسخاتش جلسات هي وباباها كهضرو شحال وكسولها كداز السطاج وكدا مع بغا يمشي لبيتو ساقيها:دينا الله يرضي عليك ابنتي نسيت السوارت ديال الطوموبيل فوق البوطاجي

دينا حركات راسها باه ومشات تجيبو ليه مع خرجات جبد واحد الشكلاطة حطها لها فوق لبيرو ديالها مع جا بغا يضور يمشي وهي طيح عينيه فواحد التصويرة طايحة تحنى هزها نيشان عينيه قراو شنو فيها عقد حجبانو شوية وضورها هنا ضورها وشاف بنتو مع واحد الشخص جالسة حداه ملتاقطة ليهم صورة وهي الفرحة باينة فعينيها والبسمة واصلة لودنيها اما لي كان حداها كانو عينيه مفيكسين عليه حتى هو نظراتو باين شنو كنباعث منها وفهاد اللحظة غيكون مكلخ الا مستنتجش انو جواب حالة بنتو دابا كاين فهاد التصويرة

مع سمع خطواتها رجع التصويرة لبلاصتها دخلات وعينيها عليه مدات ليه السوارت خداهم من عندها بابتسامة وقبل مايمشي لاح ليها زوج كلمات:عمر الحب مكان عيب مع الشخص المناسب

مع كمل كلامو زاد وخلاها تتشوف فيه رجعات شافت فالبيرو ديالها بقات شكلاطة محطوطة وحداها تصويرتها هي وخليفة تنهدات اكيد شافها هزاتها بشوية وهي تتأمل فيها شحال كانت فرحانة وهي حداه وهو كيف كشوف فيها جلسات فوق ناموسيتها عينيها مغرغرين وحطات التصويرة على قلبها لهاد الدرجة وكثر نزلو دموعها فصمت كاتمة شهقاتها وكاتمة حبها لي كتحس بقلبها مريض وهاد البعد أثر عليه بزاااف

فنفس الوقت فالدوار كانو يلاه تعشاو ومجمعين على براد دأتاي كانو باقين عندهم شي ناس من العرس كان جالس بوحدو فلبيت بين يديه تصويرتها معاه عينيه عليها كيف ضاحكة وضحكتها سالبة عقلو وهي كاملة سالبة قلبو فاش كانو كتعشاو مرة مرة كشوف فجنبو وكتنهد فين كانت كتجلس حداه كحس بيها بحالا بقى معاهم مرة مرة تتخايل ليه دايزة كان كدوز ابهامو على وجها وكتأمل فوجها وملامحها الزوينة شي حاجه فوق الولف من جيهتها ومعتارف بيها لراسو كان متوقع هادشي انه واحد غتجي لكن كان معطلو ومأجلو وزيد دائما كان كفكر شنو نهايتها معاه باش غيختموها وهو عمرو نوى يضحك ولا يتفلى عليها احاسيسو من جيهتها كانت صادقة ولكن الظروف والاختلاف لي بينهم كن مكانش هاد البعد كان من غدا يطلب يديها وهي لي يعمر بيها دارو لكن اقدارهم مختالفة ميقدرش يخوي البلاد ويخلي واليديهم وهي كذلك متأكد ومستحيل تخلي فين كبرات وتجلس فالدوار رجع راسو اللور كخمم ومغمض عينيه كتمنى من كلا قلبو وكدعي الله احاسيسو متمشيش غير هكاك مبغاش تفرقو بيها الوقت وهاد البعد يؤثر على عشرتهم مبغاش ليام تطفي وتبرد داكشي لي كانو كحسو بيه مع بعضهم لانه مينكرش القضية بيناتهم صعيبة ولكن كاين الله لكسهل ما صعاب تمتم بشوية ومن كل قلبو كترجى الخالق:ياربي تكون من مكتابي

كانت هادي جملة كفيلة تعبر على شنو كحس كدعي فيها القدرة الالاهية تسهل امرهم وتشوف من حال علاقتهم تمناها من مكتابو وكتمنى ربي ميخيبوش بشوية شد التصويرة وخشاها فالبوشيطة ديال تيليفونو يبقى ديما يشوفها مسوقوش فلي غيلاحظ وانما همو راسو هو الاول حيت فوقما غيشوفها غادي يفرح وباغيها تكون هي مصدر فرحتو رجع راسو اللور وشرد ببالو للحظات والاوقات لي دوزاتهم معاه من اول مرة شافها ولمحوها عينيه

كانو بزوج فنفس اللحظة وفنفس الوقيتة كفكرو فبعضهم وهدا حال القلوب المتاصلة واخا البعد واخا المسافة الحب اقوى من كلشي هز تيليفونو ودخل عندها نيشان كتب ليها وسيفط ليها ميساج

خليفة:I miss you

مدازش وقت طويل حتى جاوباتو:I missed you to🥺💔

خليفة:يلاه كنتي فباليي

دينا:حتى انا والله واخا نعيط ليك؟

مع قرا ميساجها هو لي صونا ليها دار التيليفون فودنيه متسناتش ثانية حتى جاوباتو

خليفة فرز صوتها:كنتي كتبكي

دينا تنهدات وتصويرتهم قدامها:كنت كنشوف تصويرتنا انا وياك وتفكرت شنو داز

خليفة:دابا غتبرزطيني علييك معندك علاش تبكي عارف صعيبة ولكن هاحنا مزال بزوج وكيف قلت ومزال نقوليك انا معاك وغنبقى كنتسناك

دينا مسحات دمعتها بشوية وهي تتطل من السرجم الصقيل والظلام فالشارع كانت فهاد الوقت كتسمع صوت الصرصور ولا شي كلب نطقات بصوتها الرقيق كلام من قلبها:معرفتش شنو درت حتى ربي لاقاني بيييك

خليفة:تانا نفس الحاجة من ديما كنت كنقول الله يلاقيني بما حسن منييي والحمدلله ستاجب

دينا حطات يديها على قلبها:كنت ديما كنتمنى وكنقول بغيت شي حد لي يكون سندي قبل ما يبغيني منحسش براسي خايفة وانا معاه مبغيت نفكر فحتى حد وهادشي كامل لقيتو فيك نت

خليفة كان كسمع لكلامها بتأني وفعلا هادشي كامل لي قالت كاين وهي معاه مباغيهاش تخاف يحميها يهتم بيها يشوف شنو خاصها قبل متنطق كان كفهمها يكون سندها ويشجعها وهادشي حيت غالية عندو مع كملات كلامها نطق وتيرا فيها بدون مقدمات عندو غير نيشان

خليفة:كنبغيييك وراه كان كلشي باين

دينا حسات بتوازنها ترون جلسات بالجهد فوق الكرسي دمكتبها وحطات يديها على قلبها كان باين كلشي من تصرفاتو ولكن الاعتراف كان عندو طعم آخر كانت هي السباقة تعتارف ليه باعجابها ولكن الاعتراف الاكبر كان منو هو لي هو اعتراف الحب وما اجمل اعتراف الحبيب تزنݣات وكأنهم قدام بعض دابا دارت يديها على خدها لي حسات بيه سخووون وغيطرطق ونطقات:بلاتي هادشي بزاف عليا

خليفة ضحك بشوية دار يديه على وجهو وكحرك راسو بلاا كانو غير بالتليفون مدوزين ليلة من ليالي الغرام كلها هضرة زوينة واعترافات بالشوق وبلي لي داز زوين وصعيب يخليهم يولفو البعاد دابا كان كل واحد كعبر على شوقو بطريقتو

🤍بــعــد مـــرور شــــهــــــــر🤍

توالات الايام يام مشات ويام جات حتى كملات مدة لبعاد شهر عندها هي كانت خارجة من الشركة فين كتسطاجي بالضبك ديالPringles قسم الاشهارات والماركتينغ بحال اغلبية الموظفين لي خارجين تاهما ميكاب خفيف طالقة شعرها ولابسة لبيسة رسمية فيست كحلة وسروالها فنفس اللون لتحت بودي بيض وسباط ديال الطالون حسات بيه ضرها النهار كامل وهي من حاجة لحاجة شعلات تيليفونها النهار كامل مطلاتش عليه تبسمات فاش قرات ميساجو الزوين

خليفة:❤️Good luck, my love

كيف كلا صباح كتلقاه مخلي ليها كليمة زوينة جاوباتو بميساج تاهي:توح صح شتك بزاااف احبيبي نوصل للدار ونعيط ليك مساليتش النهار كااامل

طفات التيليفون ودارت نظاظرها ديال الشمس وزادت تبسمات فاش شافت ماماها واقفة كتسناها بالطوموبيل قدام الشركة طلعات تسالمو بلابيز وديمارات شادية للدار سالات بكري وطرݣاتها هزاتها معاها حيت طوموبيلتها كتصاوب غاديين تتشوف من الزاج وساهية تتشوف الزحام ناس غاديين وقتهم مدروك الكلاكصون لي منهار جات من المغرب وهي تتحس بيه كضرها فراسها حيت ولفات الكالم والهدوء فالشركة بزاف ديال الرسمية لدرجة تتحس براسها مخنوقة بعد المرات عكس الدوار كلشي تلقائي وكلشي بسيط شافت فيها شادية ورجعات شافت فالطريق ونطقات:دينا معايا هنا فسان دييغو ولكن عقلها بقى فالمغرب

دينا شافت فماماها وتبسمات ورجعات عينيها للطريق هنا شادية كملات كلامها

شادية:وحتى قلبها

دينا ضارت دغيا شافت فيها هنا شادية بدورها ضارت وقابلات عيون بنتها ورجعات شافت فالطريق دينا تنهدات من ديما ماماها تتحس بيها اكيد عرفات من جوليا او بأي طريقة المهم غتكون عرفااات

شادية:لي عرفت هو ان هدا حسن من لي قبل منو

دينا نزلات راسها:بزااااف مفيه حتى شي حاجة خايبة اماما معاه كنحس براسي بحال شي غالية عندو وخايفها تهرس قبل ما نطق كنلقاه فهمني وعرفني باش كنحس

حسات بدموعها غادي يخونوها توحشاتو بزاف وهاد الشهر داز عليها ثقيل وكلشي لاحظ انها مبدلة غير ساهية ومرفوعة حتى السطاج لقات فيه صعوبة رغم انها عقلها خفيف وديبلومها واخداه بميزة متفوقة الا وان عقلها غايب شادية وقفات الطوموبيل بشوية حيت وصلو كانو قدام الدار ضارت شافت فبنتها ونطقات:نت دابا مبقيتيش صغيرة عارفة شنو لي مزيان ليك وشنو لي لا يلاه بادية فلكاغييغ ديالك دالخدمة داكشي باش كنقولك فكري مزيان وشوفي الطريق لي غادي تسلكي

دينا شافت فيها وهي تتحاول تفهم كلام ماماها وتلميحاتها شادية حطات يديها على خد بنتها وكملات كلامها:عمر الحب مكان عيب وكنت قلتها ليك قبل متمشي ضروري مغيجي واحد الوقت وغنطلاقاو بالشخص المناسب انا هاد السيد مطلاقيتوش بزاف ولكن شوفة وحدة فالواحد كنقراه ويمكن كبانلي هذا هو لي كنا كنتسناوه وزيد حتى الحال لي كنشوف فيه بنتي دابا راه باين عربون داك السيد من عندي كنقولك فكري والخطوة لي غادي ديري غادي طلقايني معاك فيها ومسانداك وكيف كنقولك ديما الحب ماشي عيب خاص غير نختارو الشخص المناسب

دينا من ديما تتحس بماماها كتقراها وتتحس بيها مزيااان وعلاش لا راه خارجة من جسدها علاش لي مغاديش تحس بيها وتعرف شنو بيها قربات عندها بشوية وعنقاتها مخشية فيها وهي كطبطب عليها وتقويها

داز الوقت هاد المرة فالمغرب وبالضبط فدار خليفة داخلين بزوجات كتسلتو كل وحدة كتشوف وراها

اسمهان:سربي امسخوووطة دروك خويا يجي ويتقلق علينا

بشرى:ياربي تسمح ليناااا

اسمهان:وسربييييييي شوفي شداكشي فين خشاها

بشرى:يمكن فالماريو بلاتي نقلب

اسمهان حاضية لباب وبشرى تتقلب فالماريو ديال خوها متأكدة شافتو خشاها هنا مفيهمش هاد لبلان ولكن داكشي لي شافت خلاها يركبها الفضول مشات قالتها لختها وزعمو بعضياتهم يجيو يشوفو بقات تبقشش حتى لقاتها تحت حوايجو:هااااهي

اسمهان جات عندها تجري مع ضوروها شافو فبعضياتهم كانو متوقعينها حيت اصلا ديجا معتارف قدام كلشييي

بشرى:الله على خويا مسيكين حالتو صعيبة

اسمهان:مين ولا يبوس فالتصويرة حالتو فاتت سعدية لهيه

بشرى تنهدات:البعد صعييييب والفراق موصيبة

اسمهان:رديها رديها لبلاصتها وزيدي ندركو كمامرنا نقولوها لمي

بشرى:لا بلاااش اصلا هي باغية تخطب ليه ومين تعرفو باغي دينا مغيعجبها حال

اسمهان:تخايلي يتبعها لميريكان

بشرى:هادشي علاش قلت ليك مي متعرفي تمشي يدخلها لوسواس وزيد اختي لكان باغيها راه ميحبسو عليها حد راه ال الحال صعيب هو فجيهة وهي فجيهة

اسمهان:لا اختي انا منقدش نعيش بلا خويا

بشرى:زيدي تخراي تانت بحالا هو كوموندا دابا قوالب دالسكر من عند عبد اللطيف وغادي يخطب

اسمهان:كن سمعتها نجية كن طرطقاااات

بشرى:ذكرنا السمن والزفر دارو مزية زوجوها وخوات الدوار هناونا من سيفتها

بقاو غاديين بزوجات ملاصقين كيف ريا وسكينة هزو التيليفون وحطوها لبديعة وخواتاتهم المزوجات سخونة خونا كبوس دينا فالتصاور

داز الوقت عندها هاد المرة كانت فبيتها حاطة حداها واحد الطبسيل ديال سباكيتي مربعة رجليها فوق ناموسيتها بزاف ديال التصاور طلبات واحد الولد معاها فالشركة يخرجهم لها كلا وحدة وفين ولكن قاسم مشترك جامعهم وهو انهم تلتاقطو الدوار كانت هازة كولا فيديها وهازة تصويرتها مع واحد الحولي فالكوري ديال جدها لصقاتها هزات وحدة اخرى هازة قنية تاهي كانو هاد الصفحات خصصاتهم لتصاور مع الحيوانات تصويرتها مع الفلوس لي عطاها خليفة وكان هو لي صورها تاعي دارتها معاهم وهي تتفكر ديك اللحظة كل تصويرة عندها حدث زوين دازت للصفحات دالعائلة طبعات قبلة كبيرة على تصويرتها مع جداها وكذلك وحدة اخرى مع جدها عمرها شافت أحن واطيب منهم حتى هما شوقهم فقلبها كحرقها لصقات كلشي تصويرتها مع سليمة مع ولاد عمها مع سميحة فالعرس كلشييي اي فرد من تما جمعاتها بيه شي تصويرة لصقاتها تما كانو عندها لفيطرات كتكتب نويطات وكتزوق بلقلوب وترسم حدا كل تصويرة شافت فالتصاور لي بقاو هنا تنهدات كانو تصاورها معاه لي عزلاتهم فصفحات بوحدهم ولي هما صفحات الحب تتلصق وتشوف كل وحدة عندها معاها حدث صورتهم قدام العافية صورتهم فالعرس سيلفيااات فاش كانت تتمشي عندو وهو سارح شبعات صفحاتو قلوب وكلام زوين كتباتو بحب مع لصقات آخر تصويرة كانت كملات البوم التصاور لاحسن شهر 8 وصيف دوزات سداتو وهزات فيطر وكتبات فالواجهة ديالو summer of 2024❤️ هزاتو وضماتو لقلبها فيه احاسيسها وكلشي دوزات شهر بلا ما يخفى عليها الدوار الحياة تما البسيطة تعامل الناس التلقائي والسالب قلبها معرفاتش حتال امتى ولكن كلام ماماها خلاها تبعث امل من جديد ولكن من جيهة اخرى كاين باباها يقدر ميوافقش على الخطوة لي فكرات دير رجعات حلاتو وهي تتشوف وتأمل كلا تصويرة عندها بلاصة فقلبها شافت تصويرتها مع سليمة تبسمات شحال حلوة ديك لبنت وعزيزة عندها ولا علاقة لها بختها طاحت فبالها نجية وشنو دوزات هي وياه تنهدات وهي تتفكر بلي وصلاتهم خبارها بلي تزوجات ومشات بلا عرس فقط عشى جمعو فيه الناس ديال الدوار ومشات حيت راجلها خدام ومعندوش الوقت مموالفاش كدابز تنادم معاها الحال شوية على ديك النتفة لي عطاتها ولكن هي لي هبشات وحكرات عليها تمنات ليها الخير فزواجها وكملات التصفح بين وراق داك الالبوم

نهار جديد كانت خارجة ثاني من الشركة مع ركبات فالطوموبيل ودارت السمطة صونا تيليفونها تبسمات فاش شافت شكون ودغيا جاوبات:هيلوووو حوبيييي

خليفة كمسح على شعرو:زين ديالي كدوزتي نهارك

دينا فيكسات التيليفون قدامها وهي تتقاد شعرها:الحمدلله السطخيس والصداع اشغنقوليك ونت

خليفة:قلت ليه غير رتاحي وريحي عقلك حاولي على راسك

دينا:داكشي لي كاين بكثرة ما ولفت الدوار والهدوء ولا غير صداع الطوموبيلات كديرونجيني

خليفة:بلاصتك بقاااات قداااااش

دينا:حتى انا توحشتكم اجييي لعندييي هناااا نوريك حتى انا امريكا كيف دايرة ونخرجو وندخلو

خليفة ضحك:اودي غير اجي وخوي البلاد

دينا:زعما متقدرش تجي

خليفة:منقدرش نخلي مي وبا وخواتاتي بوحدهم

دينا تنهدات وتبسمات فنفس الوقت وهي تتشوف فيه باش كقتلها هو حبو لواليديه وخواتاتو وكقولو كيفما تعامل مع مو غيتعامل معاك حتى نت تتشوف شداير عليهم وشدار عليها حتى هي فاش كانت واخا البعد اهتمامو منقصش خليفة شافها سكتات وهو ينطق:والله من ماكنتي كتخوي لبلاد كن ضربت ليك الكاغط دابا

دينا واخا شدات الدارجة شوية مزال مكتفهمش كلشي:كيفااااش

خليفة:فكل صلاة كندعي تكوني مكتابي والله يسهل ما صعاب

دارت يديها على قلبها وفنفس الوقت شبكات يديها وكتقول آمين ياربي امين خلاتو ضحك على حالها وحتى هي مبقاتش كتحشم بزاف وهي معاااه

خليفة مطلع حاجب: لبستي داكشي لي وريتيني لبارح

دينا هزات التيليفون وقلبات الكاميرة وراتو بلي لابسة سروال:لا والله ما لبستهاااش

خليفة:ايوا هكاك نخليك دابا متصوݣيش ونت هازة التيليفون

دينا سيفطات ليه بوسة فالهوى:غير نوصل نعيط ليك

قطعات معاه وديمارات وهي تتبسم تفكرات لبارح فاش وراتو لoutfit لي بغات تلبس وكانت فيه صاية وتحلف عليها متلبسهاش حيت قصيرة وتاهي دارت بكلامو تفكرات فاش وراتها ليه كيف بقى مخنزر وكشوفيها بقات غادية كضحك وتتفكر وفنفس الوقت تنهدات على كلامو لي قالي فيه كدعي باش تكون معاه زعما كن مكانتش الغربة كانت تكون مصيرها معاه ماشي هو هدااا وزيد هو قاليها انه ميقدرش يخوي البلاد ويخلي عائلتو لي معولين عليه سدات باب الطوموبيل وهي تتخمم لقات التحية على واحد الجارة دايزة تتجري بكلبها ومشات دخلات كانت جوليا يلاه جات من الخدمة تسالمو وطلعات بدلات حوايجها من بعد دخلو الكوزينة بزوج كتسولها على السطاج وكيف دايز وكدا مهم هضرة عادية بينهم خرجو من الكوزينة ومشاو جيهة التلفازة بزوج كياكلو وكتفرجو حتى نطقات جوليا:دينا نت مبقيتيش صغيرة اذن قادرة تختاري وتعرفي لي مزيان ليك ولي لا الحاجة الوحيدة لي نقدر نقوليك هو قبل مديري اي خطوة تفكري بلي الحياة هنا بعيدة كل البعد على الحياة لهييه يا تكملي هنا ولا تسلكي طريق آخرة انا مبغيتكش تبقاي بهاد الحال من نهار جينا من المغرب ونت مبدلة الحياة تجارب وخطوات فكري قبل مديري اي وحدة

دينا بقات تتشوف فيها ختها وشادية لمحو ليها دابا بقى غير باباهم وداك الساع تشوف واش غادي طبق لي فبالها ولا لا ديك الحياة لي كتقول عليها ختها مختالفة هي لي عجباتها هي وحسات فيها بالدفئ العائلي عرفات معنى اللمة و التعاون عكس هنا كلا ساد عليه بابو كلا كجري مع الوقت هداك الجو تما خلاها تحل عينيها على بزاف دالحوايج مكاينينش هنا وفآخر المطاف كبقى بلادها وأصلها ديك اللمة البسيطة فالسطح مع البنات والدراري خلاتها تطفش من التجمعات ديال هنا الشطيح والحياة والحرية بساطة البادية وريحة البلاد خلاتها عاد تعرف المعنى الحقيقي ديال الغربة وتحس بإحساسو

جوليا قربات عندها بشوية وضماتها عندها اختها سندها مبغاتش تشوف ختها الصغيورة حزينة وكلشي لاحظ هادشي غير مرفوعة غير ساهية جات مبدلة ماشي دينا لي كتعرف وهي متبغيش هكا تبغي ختها تكون مرتاحة وفرحانة

داز الوقت فجيهة اخرى كانو واليديهم جالسين فواحد الريسطو كتعشاو او كهضرو فواحد الموضوع خلاهم يتعزلو بزوج ويقررو فيه

شادية:صحابها كلهم كشهدو ان فهاد الشهر البنت مبدلة غير ساهية وتتفكر كعيطو ليها يخرجو مجموعين والو واش دينا شحال هدا كانت كترفض السفر والخروج مع صحابها ونت براسك شفتي غير تتجي تجلس معانا وتمشي تسد عليها اخر مرة شفتها فرحانة نيت وبزاااف هي فالمغرب

بوبكر كياكل وكفكر وهادشي تاهو لاحظو وعرفو وعارف السبب ديالو:راني كنشوف كلشي على عينيا وعارف علاش وشنو السبب

شادية:انا هضرت معاها بقيتي غير نت لبنت مبقاتش صغيرة واخا صعيب علينا ولكن كبانلينا هاد الطريق فيها سعادتها

بوبكر حرك راسو وهو كفكر:مدام هي هكا اذن راه عارفة الاختلاف لي كاين هنا ولهيييه خطوة كبيرة هادي ولكن كيف قلتي لكانت فيها سعادتها وهي لختارتها معندنا منديرو وانا بالفرحات عليا بنتي تبغي بلادها

شادية تبسمات شوية:حتى حنا دزنا من هاد الايام

بوبكر تبسم بشوية وشد ليها فيديها:تاحنا ختارينا طريق الحب فوقتنا انا داك السيد كنعرفو مزياااان وعارف نسبو عائلتو وهادشي لمخليني راجع اللور وغنخلي لها حرية الاختيار فين تحط رجليها واخا صعيب علينا فراقها

شادية:من شحال وحنا كنتهربو من فكرة اننا ندخلو لمغرب فمرة ولكن كبانلي بدات كتقرب

بوبكر تنهد شكون يكره بلادو يستقر فيها وحدا واليديه ولكن من جيهة اخرى دار كلشي هنا بنى حياتو دار مشروعو مستقبل بناتو كلشي ولكن هادشي لخرج ليه كبانليه غيبدل النص فداكشي لي خطط ليه

شادية:هضر معاها مبقيتش قادرة نشوفها هكاك من بعد جوابها غنشوفو شغنديرو

بوبكر حرك راسو باه وكرز على يديها وهو تتنهد حتى هما

دوزو الحب وحتى هما ختارو الطريق ديالو بزوج وعارفين مزيان هاد المرحلة لي كذوز منها بنتهم واخا الطريق لي غتختار هي صعيبة عليهم هما لانها هاد المرة غتكون بعيدة عليهم ولكن معندهم ميديرو سعادتها هي كلشي بالنسبة لهم

نهار جديد فبلاصة اخرى بعيدة عليهم كاملين بالضبط فالدوار جاي جار واحد البغل لاصق فيه برميل عامر ما مشى سݣى وجاي بحالو وهو راجع داز من حدا دارهم فلحظة تخايلها جالسة فوق العتبة كيف كانت كدير ديما ولف مع كخرج من دارهم كتبان ليه جالسة وعى على نفسو حدر راسو مع تنهيدة طويلة وزاد دخل للدار باس على راس ميمتو ومشى لبيت فين كاينين حوايجو كقلب وكيف ديما قبل ما يسد الماريو جبد تصويرتهم بقى كتأمل فيها شحال عاد رجعها لبلاصتها وسد وهو كبدل فحوايجو كخمم حتى شي حاجة متبدلات كهضرو النهار كامل كشاركو اي حاجة مع بعض ولكن التيليفون ممقنعوش مطفاش ليه داك الشوق شهر داز وباقية بلاصتها كبيرة كيفما خلاتها كتخايل ليه فالبلايص لي كانت تتكون فيهم كجيه صوتها فوذنو كتعيط ليه بسميتو ساكنة فقلبو وفأي بلاصة دوزات معاه فيها وقيتة

داز من حدا الكوزينة ونطق:مي هانا مشيت

يزة:سيري اوليدي الله يفرشك ويغطيك بالرضى

خليفة:اللهم امين

سد لباب وراه وزاد لدار الضيافة بعدما عيط ليه باه بلي شي سياح جداد جاو مشى يرصي معاهم فالكوزينة كانت يزة واسمهان كينصبو الغدا

يزة:ولدي بيه شي حاجة انا حاسة منعرف مالو

اسمهان:مالو امي

يزة:غير ساهي ومرفووووووع نسولو يقولي والو

اسمهان هزات راسها فيها:ولدك مزعوط امي وبفمو قالها لينا قدامنا وقدام صاحبة دعوتو

يزة دغيا ضارت دغيا:اناري امتى هادشي وشكون هي مفراسي ميتعاود

اسمهان نيشان:دينا بنت ولد الحاجة رحمة

يزة بدهشة:اهيا ربي اشداااه ليهاااا عليها ولا هكا من نهار قطعات البحر

اسمهان: ايوا القلب ميشاور امي السيدة زادت علام الله بيها تاهي تما راه تاهي تموت عليه

يزة دارت يديها على خدها:عنداك شي نهار وليدي يتبعها ويخلينا وحدنا معندنا علامن نحطو الراس من غيرو انا وباه

اسمهان:اويلي امي لعني الشيطان هو خوا لبلاد تنهار جابلية داك النصراني الخدمة في طاليان بقى غير دابا يخويه البغو

يزة تنهدات:بالفرحات عليا تكون مولات قليبو من دار الشرفة والجود ختي رحمة والحاج احمد ناس ديال القلب عليها السيمانة لي فاتت جبدت ليه بنت البودالي قالي انا مباغي زواج دابا

اسمهان حركات راسها باه:ايوا نشوفو آخرتها غا خوي عقلك امي خليفة معاك هنا بوت نبت بقات غير باش غيسالي هو وبنت ولد الحاج احمد

يزة: وصراحة هي زييينة تبارك الله ولكن تربية لهييه متوافقش هنا اودي لي دارها الله هي لكاينة

اسمهان:داكشي الله يجعل المكتاب فيه خير

فجيهة اخرى بعيدة لي هي سان دييغو كانت الشميسة ساطعة جو زوين ودافي الناس غادين جايين هالي جار كلبو هالي كدير شوية السبور هالي غير غادي صافي وسط واحد المنتزه كولو خضر ومنفس مناسب للاستجمام ولا لي باغي يجلس يرد مجاجو ودماغو وسط الشجر والورد لوليدات كلعبو شي جالس هاز جوغنال شي كتمشى وكانو حتى هما بزوج غاديين كضور فعينيها وتتشوف حتى نطق باباها وكسر الصمت بعدما جرها من يديها وجلسو فواحد الكرسي

بوبكر:انا مقلق منك

دينا شافت فيه عاقدة حجبانها:علاش ابابا شنو كاين

بوبكر بقى كشوف فيها شحال:عاودات ليا ماماك كلشي ماشي من عوايدك تخبي علياا ابنتي

دينا هنا وكأنه قاص ليها الضبرة نزلات راسها وهي تتنهد:خفت تقلق ولا ميعجبكش الحال هي هاد الخطوة صعيبة ابابا ومنقدرش نديرها بلاما موافقتكم واخا انا

سكتات عاضة على لسانها ومنزلة راسها خلاتو كمل الكلام مخاطبها باغي يسمع كلشي منها:نت شنو؟

دينا عينيها غرغرو تتحس بقلبها عامر وخاصها تخوي وفنفس الوقت مبقاتش قادرة على هاد الحال نطقات نيشان وعينيها مدمعين:انا كنبغيييه بزااف اباباااا يقدر هاد الهضرة مغتعجبكش ولكن انا جيت ولكن قلبي وعقلي بقاو فالدوار واخا معمرني مشيت ليه ولكن نهار مشيت حسيت براسي بلي هاديك هي بلاصتي ميريكان عطاتني كلشي واي حاجة نتمناها ولكن المغرب عطاني الحب ديك البساطة فالعيش والناس ظريفين ودراوش هي لبغييييت مبقيتش كنشوف راسي هنا ابابا نت بديتي فالمغرب وكملتي هنا وانا بديت هنا وبغيت نكمل فالمغرب حيت هداااك بلادي وأصلي

دوزات يديها على عينيها وكملات كلامها:سمحلي ابابا اذا تقلقتي مني ولكن بصح غادي نكون فرحانة انا لهيه حدا ميما وبا سيدي

نزلات راسها وهي عاضة على شفايفها خوات ݣاع لي فقلبها وتتسنى دابا جوابو لي تتمنى ميكونش قاصح ويزيد عليها لانها عتارفات قدامو وحطات كلشي

بوبكر:علاش غادي نتقلق وانا كنشوف بنتي كتختار الطريق لي باغية تكمل فيها

دينا هزات فيه عويناتها مدمعين وهي تتسمع كلامو قرب بشوية وهو حاط يديه على خدها

بوبكر:علاش غادي نتقلق وحتى انا واحد الوقت كنت بحالك مكنتش كنشوف راسي فشي بلاصة الا مع ماماك كلنا سلكنا طريق الحب هادشي علاش غادي نقوليك تقدمي فهاد الخطوة حيت انا براسي كنشوفها غادي تسعدك وسعادتك من مسؤوليتي بالفرحات عليا بنتي تبغي بلادها وبالضبط الدوار اصلنا ومنين جينا وبدات حياتنا(تنهد تنهيدة طويلة ونطق وهو هاز كتافو)سيري

دينا عينيها تحلو وهي تتسمع كلام باها وكيف بسهولة قبل وعلاش لا وهو كشوف سعادتها تما وفعلا من نهار رجعات من تما رجعات طافية وهاهي دابا كتسمع ان العودة قريبة رجعات ليها البهجة على قلبها طلاحت على باها عنقاتو وهي فرحانة غادي طييير

دينا:كنبغيييك بزاااف ابابا متخايلش قداااش

بوبكر بعدها عليه وشدها وجها بين يديه:بغيت نشوفك فرحانة اذا كان هادشي لي غيفرحك قابل بيه مدام نت لختاريتي وعارفة مزيان بلي الحياة تما ماشي هنا معنديش لاش نخليك وزيد انا براسي فرحان بيك حيت بغيتي بلادك

دينا تعلات وباستو على راسو:كنبغييك بزاف ابابا

بوبكر:محظوظ هدا وسعداتو بيك زهرو طالع فالݣانار

دينا ضحكات على كلامو فرحانة غطير حسات بقلبها تفاجا وهي كضحك بوبكر:عيطي ليه وعطيني نهضر معاه

دينا:لا لا ابابا بغيت نديرها ليهم مفاجأة حتى نمشي ونخلي ليك نمرتو

بوبكر كيف حتى هو دار مفاجأة لماماها فاش جا عندها وتبسم فعلا الدنيا كضور والايام كتعاود حرك راسو باه وهو مبسم:واخا اللالة ميكون غير خاطرك

عنقات باها مخشية فيه حاطة راسها على صدرو فعلا الاب سند ونعم السند تنهدات براحة وهي فرحانة بزاااف تتشوف فالناس وكضور عينيها فأرجاء المدينة وكأنها كطلقي نظراتها الاخيرة عليها صح كبرات هنا ولكن داكشي لي بغات لقاتو فالمغرب ديك لبساطة العيش خلاتها تشوف الزحام حنا ضغط ديك اللمة خلاتها تشوف كلا واحد ساد عليه بابو هنا داك الكرم فالناس خلاها تعرف انه الاسلام هو لخلاها تحس بديك الحلاوة لان الاسلام وصى على الجار وصى على صلة الرحم وصى على بزاف دالحوايج هما لي حلو ليها عينيها على بزاف دالحوايج منعادمين فامريكا لهي بلد الحضارة بلد التطور بلد الاحلام ديال بزاف اما هي دابا حلمها ترجع لداك الدوار البسيط الزوين تعيش فلمة عائلتها وتكون قريبة لفارس احلامها تتشوف فالناس لي دايزين وتتهضر فداخلها شوف هاد البنت البنت الزعرة لي دايزة اكيد امريكية الاصل والجنسية هي فبلادها وفبلاد كتنتامي ليها شوف هاد الولد الافريقي لي دايز اكيد حتى هو بحالها امريكي الجنسية فقط هاد الناس كاملين اغلبهم لي دايز من امريكي الاصل والجنسية فبلادهم وفبلاصة كنتاميو ليها وديالهم اما هي فقط تولدات وكبرات تما وتعطات ليها الجنسية

اما اصلها وعروقها فالمغرب فبلادها لي نهار حطات رجليها فيها وعاشت بين المغاربة لي بحالها تحركات فيها احاسيس الاصل والتمغرابيت الواحد يعيش فينما بغا يعيش فالاخير كرجع لأصلو🇲🇦❤️

دازو ايام طايرين بالضبط فالدوار

هز ديك الفصة لي حش وحطها لبهايم جلس حداهم وختو بشرى حداه كتحش معاه جبد التيليفون كشوف واش جاوباتو وهو يزفر فاش شافها اصلا مزال مداخلاتش من لبارح الصباح وهي غابرة حتى ليوم نهار ونص مدخلات خاف غير تكون بيها شي حاجة وزيد هاد لخمسيام لي دازت بانتليه فشكل مشغولة بزاف ومكدخلش تهضر معاه قليل وقالت ليه غنخرج من السطاج ولكن مقالتش ليه السبب تنهد باغي يعرف مالها الا كانت بيها شي حاجة يعاونها كبغيها تقوليه وتعاود ليه شنو بيها ولكن دابا بعدا غير يعرف فين هي مسح على وجهو تبرزط عليها ومعندوش نمرة شي حد فصحابها يسول فيها زفر وناض ككمل شغلو وبالو معاها مدة وهو كحش هو وختو هزو داكشي يلاه غيتحركو للدار من تما وهو يسمع سميتو شي حد كعيط ليها تلفت هو وختو دقة وحدة غير لمح شكون جاي عندو تصرفق خرج عينيه بصدمة كتأكد وكحقق مزيان واش بصح ولا كحلم قلبو بدا كضرب بالجهد وهو كشوف فيها تتقرب هي ومكحلمش هيي حس بالضو صرفقو فهاد اللحظة يلاه كانت فبالو ودابا هاهي جاية تجري لعندو تلفت شاف فختو تأكد ليه شنو كشوف لي هي بدورها مصدومة نطقات ببسمة وصدمة فدقة وحدة:ديناااا رجعاااات

وقفات قدامو وهي تتلهت عويناتها كبريو وهي تتشوف فيه ضحكتها عرييضة وفرحتها لا توصف هو فهاد اللحظة بقى غير كشوف فيها مزال ممتيق واش كتخايل بحال ديما ولا هي بصح هز يديه بشوية وحطها على خدها بحالا كتأكد بشرى طلاحت عليها تعانقو بزوووج وهما كتسالمو

بشرى:توحشتك بزااااف

دينا:حتى انا والله توحشتكم كاملين وتوحشت الدوار

خليفة عينيه مزال عليها:بشرى هزي الفصة وسيري انا تابعك

بشرى فهمات بلي بغا يتعزل معاها:واخا اخويا مين تسالي ادينا تعالي عندنا نجمعو شوية

دينا عينيها عليه:واخا

مشات بشرى وخلاتهم بزوج مع غبرات من حداهم رجع حط يديه على خدها ونطق بصوت شبه بالهمس:توحشتك

دينا حطات يديها على يديه:انا جيت انا غادي نبقى هنا معاك مغاديش نعاود نرجع صافي اخليفة قررت نسكن معاكم هنا

خليفة كسمع فكلامها لي حس بيه بحال الثلج طاح على قلبو وهي تتحرك راسها باه وكتأكد ليه على كلامها بالفرحة مسولهاش علاش وكيفاش جرها لعندو بالجهد معنقها وحتى هي ضامين بعضهم كحيدو الشوق والفرحة انه تجمعو ثاني بعد عليها وهو شاد وجها بين يديه كضحك وفرحتو باينة فعينيه نطق مخاطبها:كيفاش؟

دينا:متسولنيش المهم انا جيت هنا رجعت باش نكون معاااك

احساس فرحتو هاد اللحظة مقادرش يوصفو وهو كسمع كلامها وشافها وحس بيها قريبة ليها قرب عندها بالجهذ طبع قبلة على راسها وهز يديها نفس الشي قبلة فيها بزاف دالمعاني كانت نصيب كلا وحدة وهو كسمع انها رجعات وجات باش تكون قريبة ليه كيفما كانت وهو لي دوز شحال مغبون حتى ولا كتخايلها التيليفون مكان مبرد جوفو ولكن هاهي قدامو يݣلع منها شوقو

دينا عقدات حجبانها شوية ونطقات:ولكن انا منعرفش نطيب المرقة

خليفة ضحك حتى بانو سنانو وهو كدوز يديه على خدها ونطق:عادي نبقى نطيبها انا حتى تعلمي سادين علينا بابنا مشافنا حد المهم باغيك نت ماشي المرقة

دينا ضحكات حتى تسدو عينيها وحتى هو نفس الشي رجع عنقو ضامها لصدرو وطبع قبلة على شعرها وهو كحمد الله لي رزقو بهاد بنت لي دارت خلاها تربع على عرش قلبو خلات العز وجات لعندو كان كسمع بالتضحية وهاهو عاشها دابا وشهد عليها وكانت من نصيبو

داخل فرحان طاير كقلب على مو سمع صوتها فالكوزينة قصدها نيشان بعدما دخل طبع قبلة على راسها

يزة:الله يرضي عليك اوليدييي

خليفة وهو طائر بالفرحة:لقيت بنت الناس امي

يزة وصلاتها الخبار بلي دينا جات يلاه غادي تنطق وهو يسبقها وكأنه عارفها فاش تتفكر:خلات لهيه غادي تبقى معايا هنا جات على ودي

يزة هادشي لي كان شاغل بالها كانت خايفة هادشي يتطور ويولي ولدها خاوي عليها البلاد ولكن لي سمعات دابا خلاها ترتاح وتنفس نطقات والابتسامة على وجها:الله يكمل عليك بلخير اولدي الله يسهل عليك

تحنى وباش يد مو وهي تترضى عليه وتمنى ليه الخير معندها متقول مدام ختار اخيرا هو كبير وعارف شنو كدير معندها لاش تعتارض بشرى واسمهان وتورية كانو واقفين فباب الكوزينة مبسمين وفرحانين بهادشي لي كسمعو خوهم غادي يكمل دينو اخيرا لقى المختارة والمناسبة ولي مكانتش غريبة وعزيزة على قلوبهم

دينا تتعنق فجدها وتبوس راسو وهو فرحان حيت فاش دخلات فالاول ملقاتوش حتى مشات عند خليفة ورجعات عاد لقاتو جا:انا غادي نبقى هنااا ابا معاكم

الحاج احمد:وفرحي وسعديييي وهدااااك هو النهااااار الكبييير

محجوب:شتي كيفما قلتي ليا نديرو المفاجأة تانا مقلتها لحد

دينا عنقات عمها لي عيط ليه باها باش يتلقى لها وطلباتو انه ميقول والو حتى وقفات عليهم جداها بالفرحة زغرتات فاش شافتها داخلة مع لباب

سليمة مضورة يديها عليها:وشحال فرحتيني فاش غتبقاي واخا مزال ممتيقاش

دينا:غير تيقي انا ديما معاك دابا

سليمة بهمس:قبيلة غير سلمتي وخرجتي تجري مشيتي عندوو وانااا نفهااام

دينا ضرباتها على كتفها وهي كضحك عاقت بيها الحاجة رحمة كانت كدوي مع بوبكر فالتيليفون فرحانة مقاداها فرحة غطيييير بنت ولدها دخلات لبلااد عقبال ولدها

رحمة:وقلبي غيخرج بالفرحة مين شفتها ياوليدي وبلاصتها شحال بقات كبيرة

بوبكر:ولفات بزاف كان طالع لها الدم هنا تانا فرحان اميمتي بالفرحات عليا بنتي تبغي اصلها وتعيش فين كبر باها

رحمة:العقبة ليك اوليدي حتى نت دخل بحالك ونتجمعو

دينا كانت تتسمع كلام جداها ومبسمة ولاد عمها كدخلو كسلمو عليها كلشي فرحان بيها ثاني وخصوصا انها جات غتسكن معاهم فمرة مزال معرفو سبب قرارها ولكن ياما سمعو شي ݣاوري عجبو المغرب واستقر فيه ياما سمعو ناس دوزات حياتها فالغربة وفالاخير دخلات لبلاد تاهي وحدك منهم غاهي دخلات شوية بكري هزات تيليفونها بالخوف وسيفطات ليه نمرة باباها مع ميساج

دينا:هادي نمرة بابا باغي يهضر معااك

مدازش بزاف دالوقت وهي تتهضر مع ولاد عمها والعائلة حتى جاها ميساج منو

خليفة:كنت غادي نقول لك بغيت نمرة ولكن سبقيتيني المهم وجدي راسك راني قريب نجي😉❤️

دينا بتاسمات وحطات التيليفون وهي غتفرفر مزنݣة وكتقول غير اه لسليمة لي بالكاد سمعات كلامها

سناء:كااااينة شي حاجة وراااا هاد المجية وراني عارفاه واقلة

سليمة:ياتي داكشي لي عاودت ليك سيد راه ݣر وعتارف غالسطح منو النجوم

دينا ضحكات وهي وسط منهم مضورينها رجعات ضحكتها من جديد الصالة عامرة وكثرة الهضور وشي داخل وشي جاي هادشي لي بغات الجو والدفئ العائلة بقات تحس بطعم اللمة دالبلاد وفنفس الوقت بغات الحب هادشي لي خلاها تخلي كلشي وراها وتجي فين فعلا لقات راحتها وسعادتها واخا غيكون صعيب عليها البعد على واليديها عقباليهم حتى يفكرو فهاد الموضوع براكة عليهم من بلاد الناس صافييي

🤍بــــعــــد أيـــام قــلـــيـــلـــــة🤍

الزغاريت والصلاة والسلام فأرجاء الدار جو الفرحة دق الباب واعلن ان العرس الجاي غيكون ماليه هما اهل هاد الدار الصالة عامرة بالكبير والصغير كتناقشو وكهضرو فالموضوع لي تجمعو عليه وكلهم فرحانين بالعلاقة الطيبة لي جامعة العائلات لا عائلة العروسة على ود شكون جا يطلب يديه على عائلة لعريس على ود العائلة لي ختار ولدهم يتناسب معاها عائلتها هي من بعدما عرفو السبب علاش بنتهم جات تستقر وهو جا هضر مع كبار العائلة جدها وعمامها مرفضووش ابدا وهادشي زادهم فرحة كثر بنتهم غتجلس معاهم وفنفس الوقت غتكون من نصيب ولد الناس لي عزيز عندهم

الحاج احمد:اسيادنا نهار كبييييير زادتنا فرحةعلى فرحة رجوع البنية

الحاج عبد الغني:الله يجيبوا فالصواب اسي احمد الحمدلله تافقنا على كلشي

الحاج احمد:ها باهاا انا منزيدكم غير الله يكمل بلخير

بوبكر لي كان مبسم وهو كشوف فبنتو كيف جالسة وحشمانة وديك الفرحة لي كانت جاتها حتى غبرات ليها هي رجعات حيات فيه من مور رجوعها جا حتى هو وماماها باش يحضرو معاها يشوفو الناس والولد لي تقدم لها وفنفس الوقت يشوفو بنتهم كبرات وجاو فيها الخطاااب وفالمغرب من الفوق شاف فخليفة ونطق:انا بالفرحات عليا بنتي تكون من نصيب ولد الناس مغربي وتعيش فالمغرب حتى انا كلامي من كلام الوليد منزيد على هادشي غير الله يكمل بلخييير

خليفة مبسم وبهدوء كهضر وكتعامل:اللهم امين بنتكم غتكون امانة عندي مدام ختاريتها وحتى هي ختارتني جهدي كولو يتحط باش متخصها حتى حاجة وتكون فرحانة

دينا كانو عينيها فالارض لابسة قفيطين جوهرة ابيض قلبها كضرب وهي تتعيش هاد الاجواء غتولي عروسة وغادي تزوج بلي ختار قلبها وضحات على قبلو كتسمع صوتو وكلامو كيف نقاطي لعسل على قلبها تفكرات كيف بلعات ريقها قبيلةوالاحساس لي جاها فاش سولوها على رأيها وحركات راسها باه وهي تتسمع جداها تزغرت وعݣوزتها المستقبلية تاهي وعيالات عمامها

يزة:غتكون امانة عندنا وغتكون وحدة من بنياتي ان شاءالله والله يكمل كلشي بخير نتوما بلا هادشي حبابنا وحاسبينكم من القراب لي شاهد بالفرحات عليا تدخل علينا نسوبيتكم وتكون لي ختارها ولدي منكم

رحمة:ربي خليك العزيزة الله يدومها محبة وفرح ياااارب

فنفس الدار لي مخيم عليها الفرح وكلشي ناشط وكلشي ملاهي مع النسوبية الجديد ومع الزفة لي قريب تكون فدارهم لي غتعمربالحباب والقراب لي غيجيو يشركوهم فرحتهم لي غتكون مرافقاها زغاريت ومباركات نجية بالضبط فالكوزينة نجية واقفة هازة قريعة صغيرة ويديها تترجف موجهاها لواحد من الكيسان دالحليب لي فبلاطو دالخواتم المزوق والمقاد قطرة وحدة فكل كاس ويسالي كلشي ولي ليها ليها قبل متجي ختها لي كلفوها تحضيه وغفلات دقيقة ولي لقاتها نجية مناسبة فين تنفذ شنو تتخطط

شادية:يمكن وصل الوقت ياك

رحمة:اياه الحمدلله تافقنا تفاهمنا سيري جيبي ابنتي الخويتمات الله يجعلهم فيهم الرزق والسعادة والفرح

كلشي:اللهم امين

دارو ليه بلاصة فين يجلس حداها غير قرب جنبها قلبها زاد كضرب بالجهد وهي منزلة عينيها مقادراش تشوفيه هاد المرة غير ماشي كيف قبل كانت راسمة ابتسامة صغيرة وخدودها موردين غادي يطرطقو كان كشوف فيها مبسم عينيه لي كبريو كعبرو شحال هو فرحان مكجهيش النعاس بكثرة هاد الفرحة لي كساتو وهو كشوف شنو دارت على ودو باش يتجمعو الا كان شي حد فضلو من بعد الله فأنه تجمعو فراه هي لي ضحات وهي لي عطات كثر باش انهم يتجمعو واخا ميعرف شنو يدير ولا يدير بحالها فرحات قلبو برجوعها ليه وحيدات عليه حمل ثقيل كان عليه لي هو انه تحط فموقف صعيب بزاف جا فيه واليديه لي ميقدرش يفرقهم ولا يخليهم وراه وهو وحيدهم من جيهة ومن جيهة اخرى كانت هي لي باغيهاااا وشحال دعى فصلاتو تكون من مكتابو وهاهي غادية كتحقق هادشي لدارت عمرو ينساه ليها خلاتو تكون كبيييرة وغالية على قلبو فوووق القياس

خليفة قرب ليها بشوية وهمس:فرحانة؟

دينا وهي منزلة راسها حركات راسها باه كيفاش مغاديش تكون فرحانة كيفاش واخا تبغي تعبر متقدرش اما هو عينيه مزال عليها كتفحصوها خجلها ابتسامتها عينيها كلشيي غتكون فرحانة اكيد ولكن مغتكونش قد فرحتو هو لي مضوبلة اضعاااااااف خرج تنهيدة ولكانت هاد المرة تنهيدة راحة وهو كفكر كيفما ضحات وتضحيتها كبيرة بزااف خلات حياتها وجات عندو كطلب الله يقدرو عليها ويكون قدها عمرو مغيخليها تندم على اختيارها لان هادشي لي دارت مقادرش يوصف احساسو عليه من غير انها تزاااااد حبها فقلبو بزااااااف وكردد كلمة الحمدلله حياتو كاملة فموضوع الزواج كان كطلب بنت الناس لي تبغيه وتكون بيه ويكون بيها والحمدلله ربي مخيبوش واستاجب

تمات داخلة سناء مرات عمها هي وسليمة بالبلاطو ديال الخواتم والصلاة والسلام على النبي معتز لي جا غير هو وزوي دانييلا مقدراتش كان كصور وكوثق هاد اللحظة زوي كانت هازة التيليفون دايرة ابيل فيديو لي جوليا لي مقدراتش تجي هاد المرة بالخدمة كانت حزينة ولكن مبسمة وهي تتشوف فختها جالسة مع لي بغات قلبها على وشك إعلان علاقتهم للعلن وهاذي هي الخطبة كانو ديجا هضرو العيالات بوحدهم والرجال بوحدهم وتافقو بما انهم قابلين واصلا كعرفو بعضهم النهار يجيو يتفاهمو يديرو تركاب دالخواتم والخطبة وكلشي لان معندهمش ديك كثرة سير واجي فالدوار حتى لنهار الكبير لي هو لعرس

كان لبلاطو قبالتهم فالطبلة مزوق مقاد كلشي دينا هازة راسها تتشوف فمعتز لي كصور فيهم فهاد اللحظة الزوينة لي تسناوها شحال عاشو مع بعضهم بزاااف وشهدو على بزاف داللحظات فصداقتهم وهاهما كعيشو مع اول واحد فيهم غيتزوج شادية بشوية هزات الخاتم وعطاتو لي خليفة لي خداه من عندها وضار بشوية عند دينا شد يديها بشوية بين يديه ودخل لها الخاتم فصبعها لحظة بزوووج فالاول مكانوش كتخايلو غيوصلو لها ولكن من بعد ولاو كتمناوها بزوج انهم يتجمعو والحمدلله هاهو الخاتم دابا كلعن على ان علاقتهم توجات بالحلال والقلوب تاحدااات واكبر دليل ان مكتابك واخا يكون بعيد عليك غطلقاه طلقاه هزات الخاتم هي وضارت بشوية ركباتو ليه وهو كيف يديها كترجف هادشي لي جذبو فيها النهار الاول غير الخجل لي فيها تنهد وهو كقرب بشوية وطبع قبلة غالية على راسها كعتارف فيها بحبو بغلاوة وبالجميل لي دارت هزات بشوية الكاس دالحليب ومداتو ليه وهي تترجف هنا هو حط يدو على يديها بشوية وحكمها هي والكاس وعينيه عليها كان حركة مخلياه كمعني لها بيها انه معاها فأبسط الامور رشف منو شوية ورجعات حطاتو وحتى هو نفس الشي شربها بشوية تحت تصوير معتز لي وثق كلشي لحظة بلحظة هو وزوي بعدما شربات بشوية حط الكا وهز لكلينكس ومسح لها جنب فمها خلا قلبها مفرفر وغيزيد يفرفر كثر تحت انظار كلشي هادشي لي كقتلو فيها اهتمامو

كلشي كصفق والزغاريت والصلاة والسلام فقاع الدار لي دخلات ليها الفرحة كما جرات العادة هزو يديهم قراو الفاتحة وهما كدعيو معاهم ربي يسر ليهم ويسهل ويتمم هاد الزواج وهاد الفرح على خير مع كملو وتقالت ديك امين بداو العائلات كتسالمو بيناتهم بوبكر كسلم على الحاج عبد الغني شادية مع الحاجة يزة لي كدعي وتطلب يكمل بلخير وتعانقات بحرارة هي والحاجة رحمة ناض جدها سلم على خليفة لي باس راسو ضار عند دينا لي عنقاتو وهو كيبوس فيها

الحاج احمد:فرحتيني الله يرضي عليك دنيا وآخرة غندير لبنتي عرس يدويو عليه ݣاع الدواور

دينا باست راسو:الله يخليك ليا ابا

ناض بوبكر كسلم على خليفة وكهضر معاه كلام دالرجال بينهم ضار عند بنتو وهنا تعانقو بحرارة كان حزين وفرحان فنفس الوقت حزين على فراقها لكن هادي سنة الحياة وهو دعم اختيارها وفرحان فرحتين الاولى عاش حتى شاف بنتو كبرات وغتولي عروس وفرحان حيت كان من ديما متخوف تختار شي حد لي نصراني ينسيها فأصولها ودينها ولكن الحمدلله طلعااات كيفما بغا كلشي نايض كسلم على دينا وخليفة وكباركو لهم معتز كصور فيهم بزوج وهي هازة يديها تتبين الخاتم وهي فرحانة نزلات عينيها تتشوف فيه مبسمة وتتفكر فاش كان غيشريه لها ممشاتش معاه ولكن بقى كصور ويسيفط ليها حتى عجبها هدا هزات عينيها فيه بشوية كان كهضر مع باها لي جالس من لهيه عويناتها عليه وتتشوف فيه هدا هو لي بغات هو لي حبات وهاهي تجمعات معاه تمناتو وضحات وهي منادماش كان ناوية ترجع لبلاد كان هو من اكبر الاسباب لي دفعوها تاخد قرارها تدخل لبلادها واصلها حمدات ربي لانه جاها العوض على شكل انسان كن سمعات هادشي من عند شي وحدة كانت مغتيقش ومغيعجبهاش الحال وحدة خلات كلشي وراها على قبل واحد ولكن هي عاشت هادشي وهدا لي قدامها بالنسبة ليها يستاهل حيت كيفما بغات الحب بغات الاستقرار بغات نهار تموت دفن فبلادها متدفن فقبر ترابو غريب عليها لي داز من حداه يعرفها غير مجنسة وماشي من داك البلاد بغات تبقى فين كتنتامي وفين كاينين عروقها واصولها فلبلاصة فين بدا باها حياتو هي غتكمل فيها حياتها مع الشخص لي كتبغيه غتكنأمل طموحاتها واحلامها كيفما كانت غتخدم لهيه عند الناس حتى هنا غتخدم ولكن هنا كاين فرق هنا بلادها واخا كلشي جا بالزربة وفرمشة عين عمرها كانت تخايل تخوي ميريكان بهاد الزربة وبهاد السهولة ولكن منادماش حيت بدلاتها ببلادها وبأصلها

فجيهة اخرى وبالضبط فلبيت كانت نجية واقفة تتشوف فلمراية وهي تتمسح دموعها وتتحاول تقاد وجها باش متبانش كانت تتبكي وتنحط تتحس بواحد الاحساس خايب كعاير فيها ويسب فيها على فعلتها وشنو كانت غدير شافتهم كيف ركبو الخواتم وشربو من داك الحليب وهما مبتاسمينوفرحانين لي كن كملات شنو كانت غدير كن الفرح تحول لكارثة وقرح لكن تراجعات فآخر لحظة ضميرها فاق عليها تمتمات بشوية وعينيها فالمراية

نجية:الله يسمح ليا ياربيي

هي صح مسمومة وفينما كان شي سلوكة لاقاتهم ولكن ماشي لهاد الدرجة انها تقتل تراجعات فآخر لحظة يمكن شي حاجة فاقت عليها واخا خلاتها شرات داك الويل باش تفرتك الجقلة ولكن مدارتوش فآخر لحظة شافت تيليفونها كصوني كان سعيد راجلها تنهدات و جاوباتو:الو

سعيد:الو نجية فينك خاصنا نمشيو

نجية:غير ضرني راسي وطلعت نتكى شوية انا نازلة

سعيد:مالك ياك لباس نجيب ليك شي دوا

نجية:لا بلاش انا وليت شوية انا نازلة

سعيد:واخا بشوية عليك

قطعات معاه وهي تتشوف فالتيلفون تنهدات ورجعات تتشوف فالمراية باش متبين والو

ناضو خواتاتو بتلاتة بعدما تصورو معاهم كانو اخر وحدين يتصورو معاهم فهاد اللحظة الزوينة فوسط الهضرة والغفلة هزات تيليفونها تتشوف التصاور لي سيفط لها معتز ختارت وحدة زوينة هي وياااه ولاحتها فالسطوري وهي كاتبة عليها:I Said yes💍❤️

شافت فيه مورياه التيليفون ونطقات:شوف شحال جاو زوينين

خليفة وهو كشوف فالتصاور:حيت نت زوينة

ومع نطقها حول عينيها ليها هنا تبسمات وهي حشمانة بشوية شد فيديها بشوية مطلعها لشفايفو وطبع قبلة عليها ممسوقش لي دايرين بيهم ابدا كيفما هي رجعات ليه حتى هو عندو عادي يبين حبها ليه قدام الناس كانو بلا هادشي مبين كلشي باهتمامو لها قدام خواتاتو ولاد عمو معساك دابا لي غتولي حلالو وديالو

مبسمين كلهم الكاميرة وكلا وحدة فيهم هازة اليد لي ناقشة فيها ومزينة بلبراصلي دالحنا الاخضر المهداة من طرف العروس كان وسطهم مبسمة حتى هي هازة يديها بزوج مزينين بنقش الحناء وبراصلي دالحناء الابيض باش كتميز العروس مزين بخميسة ذهبية جوليا ضارت طابعة قبلة على خدها وزوي كتصور فهاد اللحظة تلتاقطات الصورة لي غتلقى ذكرى يوم فرح ختها بعدات عليها شوية وهي تتشوفيها ختها الصغيورة ولات عروس نطقات وعويناتها كبريو:متخايليش شحال فرحااااااانة لييييك الله يسهل عليك ويخليك ديما فرحانة احبيبتي

دينا نيشان عنقات ختها واخا الحنا حابسين الدموع بزوج رجعات بعدات عليها وهي تتمسح لها عينيها:متبكيش نت عروسة اليوم يوم فرحك

دينا طبعات قبلة على خد ختها وهي فرحانة غطير تتشوف فالحنا لي مزينة يديها ورجليها لي مسرحة فوق واحد الطبيلة ضايرين بيها البنات والنقاشة مزال تتنقش لهم العيالات ديال الدوار والحباب لجالسة فالارض ولي نايضة تشطح كيطبلو ويغنيو على العروسة لي عينيها مغرغرين بالفرحة وهي كتشوف هاد لمرة نوبتها وهاد المرة الفرح فرحها وهاد المرة العرس عرسها ومغربي من الفوق تتشوف فكلشي فالعيالات لي كانت تتبقى تشوف فيهم دايزين وهي جالسة فتعبة دارهم هاهما دابا معروضات يشاركوها فرحتها الدوار لي جات ليه النهار الاول تشوف عائلتها هاهي دابا عروسة فيه وغتسكن فيه وسط عائلتها وحبابها شادية لي مكانت قاداها كانت تتشطح هي وجوليا وسليمة زوي خواتات خليفة غير لعازبات لي سبقوه لاخرين غيجيو معاه كلشي ناشط وفرحان وهما فوسط الصالة الكبيييرة

دينا لي كان عاجبها راسها بالتقليدي جالسة فالبرزة لي كلها اخضر وذهبي قفطان نفس الشي اخضر ومنبث بالذهبي ديال الحنة كما جرات العادة طالقة شعرها الطويل نازل على كتفها خويط بخميسة ضاير على جبهتها ماكياج خفيف واكيد السر لي مخلية زينها فتان ابتسامة عريضة على وجها وهي تتشوف فالناس وضحكتها الغزالة مزينة وجها البراهش يجريو والعيالات يغنيو قلبها بدا كضرب فاش سمعات العريس جاي والصلاة على النبي برا شافت باها والرجال دعائلتها دازو من قدام الصالة خارجين يستقبلوه شدها التوتر وفنفس الوقت باغى تشوفو

برا كان كسلم بحرارة على بوبكر لي على فمو كلمة الله يكمل بلخير الحاج احمد كدعي معاهم وفنفس الوقت كيسلم عليه خليفة وكيبوس على راسو الحاج عبد الغني كذلك كسلم على بوبكر وكباركو على بعضهم العلاقة لي توطدات وزادت كبرات غير وصل عند الحاج احمد لي صاحبو تعانقو عناق حار كان سلام واستقبال عائلة العريس خرجات سناء بلاطو ديال التمر والحليب كيفما عادتهم كستقبلو بيها العريس نهار الحناء الغنا والشطيح وخليفة الوسط بجبادور ابيض مواتي طولتو وكتافو العراض ولايح عليه الفوق ديالو لي كان اخضر بثوب شفاف وبلغة فرجليه مفرز عريس من الطيارة وبحالو بحال ݣاع عرسان الدوار نهار الحنا حتى هو كان جاي لعروستو ولعائلتها ببݣرة بلدية نيت غير الشوفة فيها تعطيك خبار علفها على مزينها خلات البراهش يتناقزو حداها والعينين عليها كان جارها ولد عمو لي هو الوزير ديالو وراه خواتاتو وعائلتو كغنيو ويشطحو جايين بالفرح لدار العروس

كان باغي غير فوقاش يدخل باش يشوفها وهي عروسة ليه كان كبتاسم ويرد المباركة للناس ببشاشة وابتسامة زوينة مرسومة على فكو مزينة وجهو الوسيم وزايداها وسامة كثر على محياااه دخل برجلو اليمنى والغنا والتطبال والطرح حمى والدار عمرات هزات عويناتها بشوية وطلاقاو عينيهم وهو فباب الصالة يلاه داخل عندها قلبها تهز وفرفر وهي تتشوف فيه بالجبادور لي واتاه ووتى طولتو وتجرديتو وكتافو العراض خلاو الجبادور يبان عليه خلاتها نعيمة كتافو عراض وديال السلهام تتشوف فيه سهات وهي مبسمة هازة يديها وهو عريسها كتقدم عندها كلما كقرب احاسيسها من جيهتو كيزيدو يفيضو ويهيجو اما هو جاي وعينيه مفيكسيين عليها وهو كشوف كتلة من الجمال الفائض التقليدي شي حاجة من واتااااها والسر لي طايح والزين بزاف عليه هادشي خلاتو يحط يديه على قلبو وكيقول ليها باشاراتو بزاف عليا خلاها تضحك على يتسدو عويناتها تحنى بشوية وطبع قبلة مطولة على جبهتها خلاتها تسد عويناتها وهي تتحس بيها وكأنه كعلن بيها غلاوتها عندو وقدام الناس جلس جنبها وهو كشوف فيها مقادرش يحيد عينيه عليها ولا مقادرش يبعد عينيه عليها لسانو تربط مخليه غير كشوف فيها ديالو ومحيدها ليه حد سميتها منقوشة فقلبها وهي متربعة على فؤاذو

دينا شافت فيه ونطقات بصوتها الرقيق:انا فرحانة بزاف

خليفة:لي خلقني شاهد عليا تلفتليا الهضرة ومبقيت لقيت منقول من غير راك دياليييي

دينا نزلات عينيها حشمانة وهي هازة يديها تحنى بشوية وكحز ليها الطبلة تحت سيݣانها حيت بدات تتهرب ليها من تحت رجليها خلاها غير تتشوف فيه اهتمامو باش طيحها النهار الاول وهاهو مزال مواصل جات عندها جداها رحمة عنقاتها وباست على راسها ونفس الشي خليفة ناض باس على راسها وهي كدعي معاه ومقاداها فرحة هي والنݣافة حيدو ليها الحنا فدبليج من النقرا حكوها ليها وخباتها رحمة فواحد الزويف حنا دالعروس مخاصش طيح فيد اي واحد

ابياتها بليغة وهو كقربها ليها تخشيها فرجليها شدات فيه وهي تتشوف فالحنا كيف خرجات حمرا وغزالة على لحمها لي كان بيض فرحانة بكلشي بالحناء بالحمام لي دوزو لبارح بالتقاليد فرحانة بقفطانها لي لابسة دابا بالناس لي حاضرين كفرحو معاها بعرسها لي كاين غدا بكلشي واهم حاجة بعريسها وحبيب قلبها لي شابكة يديها مع يديه بلاما تخاف هاد المرة يشوفها شي حد حيت صافي ملكها بالحلال وماعليهم حرج ضايرين بيهم الحباب زوي ومعتز هما لي مكلفين بالتصوار كصورو فيهم بزوج دانييلا تتشطح هي وجوليا ولبنات شي جالسة تغني وشي تشطح وشي تتمنى تكون هي العروسة الجاية وسط جو من الفرحة ولمة الحباب كاين لي ولد الدوار وكاين لي من بعيد جاي يفرح ويفرح معاهم كانو وسط هادشي كامل كشوفو فبعضهم شابكين يديهم فأبحى حلة بزوج وعلاش لا هما عرسان حتى بعدو على بعض وداقو مرارة البعد وعاود تجمعو كانو المعنى الحقيقي ديال ان مكتابك فينما كان يجيك هي جاية للدوار تفوج من ورا البحور حتى صدقات مضبرة على عريس وهو ناعس ماعليه مابيه معارفش مولاتو راه شادة الطريق وجاية وهي نفسها لي نعتاتو بأغرب معيارة سمع فحياتو ولي هي نت قزيبة الحب طرائف الحب تضحيات الحب مواقف وفالاخير الحب خاصو يسالي بالحلال

هز يديها وطبعة قبلة عليها قدام الخلق ونطق عينيه فعينيها الكلمة دالرجال لي مكطيحش بنبرة صوتو المتحجرة:نواعدك ووعد الرجل دين عليه معمرني نسى شنو درتي وعمرك غتندمي ربي لي شاهد عليا وعلى كلامي

مــراكـــش قــاعـــة الأفــراح قــصــــر الـــســـعـــادة🤍

شادة الستيلو بيديها لي لون حنتها زاد برز كثر وظفيراتها المصبوغين بالابيض قلبها كضرب وعقلها كدون هاد اللحظة اللحظة لي سينات فيها تحت التصفيقات الناس وهو كشوف فيها تتبان ليه غير هي وسط الخلق كامل العدول هز الكتاب من عندها ومدو لخليفة:هنا اولدي

نيشان هز الستيلو بعدما سمى الله وسينا خلا العدول جمع كتابو ونطق:سيدنا الله يجعل كلشي مبارك و مسعود الله يرزقهم السعادة والرفاهية

كلشي هاز يديه:اميييين

العدول:اللهم أنر دربهما وبارك لهما وارزقهما الذرية الصالحة

كلشي:اللهم امين

كضحك ويديها على فمها وهو واقف وسط العمارية دالميدة باغي يبوسها كقولها قربي وهي تتموت بالضحك شداتها الهيستيرية خلات حتى الحاضرين كضحكو معاها وحتى هو لي واقف والناس لي هازينو داق بيهم الحال ولاو باغينو غا يفك خلاص خخخ قربو العماريات بزوج هنا قربو حتى هما خليفة كشوف فهاد الهبيلة هادي لي حتى نهار عرسها مخلاش من الطرائف قرب عندها بشوية وهي منزلة عينيها حابسة الضحكة بزز طبع قبلة راسها خلاها هزات فيه عويناتها كبريو فاش بعد الشطيح والرديح والحاضرين كلشي واقف كشطح وكهتف لي شاد التيليفون راه كصور طالعين فعمارية الميدة بزوج وهي باللبسة الرباطية الحمرا واخا ماشي رباطية ولكن حمقاتها وختارتها ميكاب خفيف ولكن مركزين لها على شفايفها التاج على راسها مع مشيطة جامعة بيها شعرها كانو كشيرو بيديهم للناس صحابهم وحبابهم زوي ومعتز ودانييلا عقلهم خارج عليها وهما يشيرو لها ويسيفطو لها بوسات فالهوى معتز كان مكلف غير بالتصوير تتسيفط بوسات لماماها وختها وسليمة لي كانو واقفين فجيهة واحدة مد ليها يديه وشدات فيه وهما مهزوزين بزوج فالعمارية غيطيرو بالفرحة بزوج وقلوبهم خلاص شكون فوقت قصير يتحابو وهاهما وتثبيت ݣاع للعراسية لي كلها نشاط وشطيييح عينيه عليها وكبان غير من تصرفاتها واهتمامو شحال غارق وطايح كشوف فيها عروستو بحال شي ملكة فليلتهم وعلاش لاش وهي ملكة قلبو وهي كذلك كتشوف فيه بالجلابة بيضة رجالية لي مواتياه مع وسامتو وطولتو فارس احلامها لي كانت ديما كتحلم بيه وكتقول شكون هو حتى لاقاتها بيه الاقدار وهاهما كتوجو علاقتهم بالحلال بعرس مغربي لي لطالما عشقاتو وحلمات وعاد خلي الاحتفالات فالدوار بالتقاليد والعادات حاسة براسها طايرة فالسما بالفرحة عمرها كانت تخايل حياتها غقتلب وغتشد طريق آخر من نهار ركبات فالطيارة جاية لمغرب تشوف جدودها

عرس مغربي اسطوري بكل ما تحمل الكلمة من معنى فرحو معاهم الخيال والصحاب لي من الدوار ولي مقطع طيارة وجاي كلشي نشط وشطح وردح وسط جو عائلي زوين وقصة حب توجات بالحلال واخا تعارفو فوقت قصير الاقدار لي كانت مكتابهم لبعض خلاتهم يسالي بالحلال ويكتبو كتابهم كانو الوسط وكلشي ضاير بيهم دينا شادة فيها ماماها تتشطح معاها وبديعة سميحة كتشطح مع خوها دينا جرات باباها وجداها تتشطح معاهم ونوضو بزز الحاج احمد تاهو داروه وسط منهم

الحاج احمد:الله يهديكم راه معندي ركابي

شداتو دينا وهو يبدا يتمايل بكتافو خلا كلشي كيهتف ولاهيلا بصح الحاج كيطشح خليفة لي جر مو وطبع قبلة على راسها وهي كترضى عليه وعلى مراتو ومعتز كصور فيهم لينا هزات جلايلها بشوية وشدات فالحاجة يزة تتشطح هي وياها كلشي فرحان وكلشي ناشط جو زوين ولحظات دالفرح اجمل وهنا دينا جراتو عندها شادة فيه تتمايل فكتافها شوية عارفااه زريين فوق القياس داكشي باش كطلب فيه وداكشي لي كان دار ليها خاطرها ليوم ماشي عادي ليوم عرسهم وفرحهم غيبقاو ديما يتفكرو النهار لي توجو فيه علاقتهم بالحلال قدام الناس ونشرو وشاركو فرحتهم بدا كشطحو بزوج تحت التصفيقات دالحاضرين وشي كشطح معاهم معتز هنا دخل معاهم وبدا كشطح بكتافة هو وخليفة على انغام الرݣادة خلاها هي غير تتصفق وواقفة تتشوف وكضحك كيف كشطح بكتافو وشاد الريتم مع معتز فين كان مخبي عليها هادشي زوي دخلات معاهم هنا جابو القعدة لي طلع فيها واحد ولد عم خليفة وهنا بدا نشاط من نوع آخر خصوصا العراس لي ككونو فيهم الشباب كدوزو يا سلام لا من نشاط لا من ضحك كلشي رجعات للبرزة هي وياه شابكين يديهم بزوج مع بعض جلسو ومرة مرة كدوي ليها فوذنيها وهي تتبسم ولا كضحك

خليفة:شاداني واحد الفرحة بزز تابث فبلاصتي

دينا:حتى انا كنت خايفة فالاول صراحة ولكن دابا عجبني الحال بزااااف

خليفة:ان شاءالله ديما غتكوني ضاحكة وفرحانة ونت معايا الله يقدرني نعوضك على لي درتي معايا

دينا شافت فيه بعويناتها كبريو:انا درت هادشي حيت انا بغيت بغيتك نت وبغيت نكون معاك

كلامها خلاتو يكرز على يديها وكأنه كقوليها نت ديالي وليا هز يديها بشوية قدام الخلق مكتسوقش كتهمو هي وطبع قبلة عليها خلاها مبسمة ومزنݣة فنفس الوقت هنا بداو كطلعو حبابهم وصحابهم كتصورو معاهم جالسة حداها زوي وجوليا الوسط ومن جيهتو هو جلسات دانييلا ومعتز وقف واللور تستفو ولاد عمها كان الجو من الضحك بيناتهم شادين فدينا حيدو وجاو خواتات خليفة بشرى وسميحة واسمهان مضاربين على شكون غيجلس حدا دينا من هاد الجيهة وشكون غيجلس حدا خليفة من الجيهة لوخرا تصورو تاهما وناضو جاو لبراهش دعائلتها وعائلتو خليفة هز بنت حتى خديجة فحضنو حيت صغيرة كذلك دينا هزات بنت عمها الصغير راجل سناء فحضنها تصورو جات سليمة جلسات حدا بنت عمها كهضرو فلودنين وكضحكو هنا دينا جمعات الضحكة شوية فاش شافت نجية قاصداها شافت فيها وقفات عليها هنا نجية تحنات بشوية وعنقاتها بالجهد

نجية:الله يكمل عليك بلخير الله يسهل عليك والله يسامح

دينا تنهدات عرسها هدا وفرحها هذا مبغاتش تحكر وزيد في غلب يعف سليمة غير تتشوف وتتنهد بعدات عليها وهي مبسمة شوية شافت فخليفة ونطقات:الله يكمل بلخير اخويا خليفة

خليفة ضار شافيها ونطق عادي:الله يبارك فيك اختي

هنا جا راجلها من اللور سلم على العرسان بزوج وشد نجية بشوية من ذراعها:اجي نوقفو هنا

حركات راسها باه ووقفو جنب البرزة جاو عيالات عمامها تاهما سعيد شاف فنجية مراتو بشوية دخل ليها شوية الشعر كان خارج من زيفها شافت فيه وهو ينطق:قادي الزيف ديالك

حركات راسها باه وبدات تتقاد فيه قبل ميتصورو قرب عندها بشوية وهمس ليها:جيتي زوينة ليووم طيرتي ليا العقل اشتما

شافت فيه لقاتو مبسم شوية كلامو خلاها حتى هي تبسمات وهو كمدحها وماشي اول مرة متنكرش تعامل ديالو زوين ومفيهش قوة النݣير كراعي قايم بواجباتو من جيهتها واخا باقين يلاه شهر ونص دالزواج والحاجة لي عجباتها فيه هو اهتمامو ليها خلاها تبدا تقرب ليه شوية بشوية واخا كانت رافضة هاد الزواج تصورو حتى هما ودابا جات نوبة الواليدين جات شادية مقصدة بنتها تجلس حداها مع قربات عندها دينا حلات يديها لها وهما يتعانقو كارزين على بعض وهي كدعي معاها وترضي عليها وخليفة كشوف فيهم مبسم محساتش وهي بين احضان مع حتى عينيها غرغرو وبداو كطيحو دموعها بعدات عليها شادية وهي كتمسح لها دموعها لي براسها هي كاتماهم وحابساهم

شادية:شوووو لا اماما لا حنا دابا فرحانين مكاين لاش البكى

بدات كتمسح ليها فدموعها وهي جالسة حداها شادة فيها خلاتو هو كشوف وتنهد دابا عاد غتحس بفراق واليديها لي غيكون صعييييب وبزاااف خاصة هما لي مين غيساليو غيخويو البلاد دينا شدات فماماها شابكة يدين بعض تحنات بشوية وطبعات قبل على يديها وراسها وشادية كذلك تتبوس فبنتها لي غتخوي عليها الدار بعدما خوات عليها البلاد تتكابر باش متبكيش حيت عارفاها قداش فرحانة بزواجها جا بوبكر طبع قبلة على راس بنتو وعنقها وحتى كذلك سلم على خليفة بحرارة وجلس حداه جوليا تاني نفس الشي عناق حار مع ختها وصافحات خليف وتتصورو مجموعين تصويرة تبقى خالدة وتبقى ذكرى جاو واليديه هو الحاجة يزة لي جلسات حدا دينا فرحانة بيها حيت شافت ولدها شحال فرحان بزواجو وبمراتو وعاد زيد عائلتها عزاز دينا باست راس عݣوزتها لي كترضي عليها وسلمات على شيخها وتصورو مجموعين عاد جات الحاجة رحمة والحاج احمد وعمامها جلسات حداها جداها لي يمكن فرحانة كثر منها فهاد العرس تتعنق وتبوس فيها وترضى عليها خليفة كذلك ناض باس على راسها وهي كدعي معاه نفس الشي مع جدها هو يعنق وهي تعنق ويدعي معاهم ويعاود تا شحف وجلس حدا خليفة يتصور تصاور يبقاو ذكرى لهاد النهار الزوين لي كان احتفال وتتويج لعلاقة حبهم بالزواج وبطريق الحلال لي سلكوها بزوج

جاية شادة في باها وهي بلاغوب بيضة والتاج فوق شعرها المطلوق الطايح على كتافها ونازل مع ضهرها انثى متكاملة لا من ناحية الجمال ولا أناقة اللبيسات لي ختارت فهاد النهار خلاوها ملكة فعين راجلها ومحطة أنظار للحاضرين كانت تتقرب عندو وهو واقف بالكوستيم بطولتو الفارعة مخلياني حتى هو متكامل لا من ناحية البنية والوسامة الرجولية لي كملك وقفو قدامو وهو كعطيها ليه بوبكر لي نطق مبسم:منوصيييكش

خليفة:كن هاني ومرتاح أمانة عندي

دينا كانت تتشوف فيهم اكثر زوج دالرجال حبات فحياتها

باها لي حلات عليها عينيه كبرها وقراها ومخلاها مخصوصة من والو لي كن مكانش متفهم وحس بيها مكانتش اتعيش هاد اللحظة كان الاب والصديق فنفس الوقت والثاني لي عرفاتو كان دوا ليها داوا جروحها ملك قلبها وحباتو وكان هو فارس احلامها لي كتسناه من شحال خليفة ضور يديه على خصرها وهما كشوفو فبعض كانت زادت طوالت شوية بفعل الطالون ولكن مزال تتهز راسها تشوف فيه رجع ثاني طبع قبلة على جبهتها كل مرة كعبر لها على حبو ليها وعلى غلاوتها عندو واخا يعيى يدير مغيقدرش يدير لي دارت هي لانها هي لي تنازلات وضحات وهو مواعد وحالف عمرو يخليها تندم على قرارها وهي معاه لان بلا هادشي راه حلالو ميقدرش يغبنها ولا يكسر خاطرها ولا تخصها شي حاجة وهي معاه وهادشي كان فداكشي لي جاب ليها ممنوش زوج لا من ناحية صداقها لا من ناحية الهدايا لي جاوها من عندو كان كلشي كامل مكمول

هز بشوية كلينيكس لي وهو كمسح ليها جنب شفايفها لي عمر بلا كريم بعدما قطعو الحلوى وكلشي ضاير بيهم بعدما كلاو هما هزات طريف كتوكل ماماها باباها ختها صحابها وهو كذلك مع عائلتو فآخر لحظات عرسهم لي داز غزال وعلاش لا وهو محليييه الحب

معنقة ماماها وباباها دقة وحدة وهي تتبكي على فراقهم لي عاد حسات بيه سوا كانو غيخويو لبلاد او لا لانها بنت ودار البنات خاوية كيفما كقولو ضروري مكتجي واحد النهار فين كتخوي دار باها باش تمشي لدار راجلها تأسس حياتها شادية لي عيات صابرة ولكن طلقات لعنان لدموعها فاش تعانقات هي وبنتها الصغيورة لي كان بالنسبة لها مزال معطل وقت فراقها عليهم ولكن المكاتيب خلاو الصغيرة هي لتخوي بعدات عليها وهي تتمسح لها دموعها:متبكيش نت عروسة تحقق شنو كنت باغية ابنتي خاصك تكوني فرحانة انا متخايليش قداش فرحانة ليك غير خانوني دموعي الله يسر ليك ويحفضك يارب

دينا تتبوس يد ماماها:امين ياااااربييي احبيبتي اميين الله يخليك ليا نت وبابا وجوليا

بوبكر:دينا امانة عندك اولدييي

خليفة معنقو بحرارة:كن هاني راه فعينيا

شادية كذلك كتوصي فيه وهو كسلم عليها وكطمنها تنعس على جنب الراحة لانها مراتو حتى هي واجب عليه يتهلا فيها ويكون بيها دينا لي كانت معنقة باها ولي كان سندها حياتها كاملة غتوحشو بزااف كان نعم الاب ونعم الصديق

بوبكر:ردي لبال لراسك احبيبتي معاك ميما وبا سيدي مغيكون حتى فرق ان شاءالله متبكيش

كمسح ليها دموعها وهو براسو حزين على فراقها ولكن معندو كيدير ضروري من سنة الحياة البنت كتخرج من جناحو وتمشي لجناح راجلها لي مفرحو ومطمنو كثر هو انها غتكون حدا واليديه وماشي بوحدها وحاجة اخرى انها ختارت مغربي كان ديما مدرونجياه هاد لقضية خافت تمشي تجيب شي نصراني هما فديك البلاد معندو حق يتدخل فيها وهي مكملة السن القانوني ولكن الحمدلله مكتابها زويين

زوي بصوت باكي:غنتوحشك بزاااف متبكييش بليييز

تعانقو بحرارة وجات حتى دانييلا تعانقات معاهم كانو المعنى الحقيقي ديال الصداقة دوزو بزاااف دالحوايج مجموعين وبزاف دالمواقف سلمات على معتز بلا عناق لانها صافي مبقاتش ديال راسها واخا اعز صديق عندها تاهو تفهم هادشي سلم حتى على خليفة وهو كوصيه يتهلا فيها

جوليا وهي كتقاد ليها شعرها وعويناتها مدمعين:مكنحملش لحظات الوداع ولكن مقادراش نحبس دموعها ختي غتمشي عليا

دينا بلا حتى كلمة طلاحت على ختها عنقاتها حتى هي فراق الاخت حتى هو بوحدو وخصوصا انهم بنات وكانو مفاهمين بعدات عليها وهي تتمسح ليها دموعها

جوليا:غنبقى ديما نصدعك بليزاااابيل فالصباح باش تفيقي انعااااسة دابا صافي مبقاش الفشوش

دينا ضحكات وهي تتمسح عويناتها وباست ختها بوسة كبيرة جوليا شافت فخليفة ونطقات:الا عصباتك سد عليها فالظلام راه كتخاااف

خليفة ضحك ودينا حتى وهو مضور يديه على خصرها تاهو كان كسلم على حبابو وصحابو سلمو على كلشي من بعد ركبو فالطوموبيل لغيمشيو فيها هو وياها وهما كودعوهم معتز صورهم بزوج وهما راكبيين من بعد ديمارا وودعوهم وهما كدعيو لهم بالخير والتيسير والرفاهية والذرية الصالحة غادي صايݣ بيد وعينيه على الطريق ويدو لوخرا شاد بيها يديها ضار شافيها مبسم حتى هي تلفتات عندو مبسمة وعويناتها كانت كتبان بلي باكية نطق بصوت هادئ:فرحانة؟

دينا حركات راسها باه:بزااااااف

خليفة هز يديها وباسها طلق تنهيدة كدل على راحتك وسعادتو:فرحتي انا ميوصفها لسان

دينا وهي تتشوف فيه تبسمات ابتسامة عريضة كثر وكتافات غير بالسكات وهي شادة فيديه بيديداتها بزووج احسن نهار داز عندهم بزووج هو عرسهم وفرحتهم لي كملات فاش تجمعو واخا كترات الهضرة فالدوار واش هاد العروسة غتصبر فالدوار واش خليفة غيخوي لبلاد كيسولو يزة واش ولدها غيجلس هنا ولا غيسلك الطريق مع مرتو لبلاد فين كابرة واش واش الدراري حتى هما واخليفة طلع عندو الزهر وفقيهو صحيح بزاف دالهضرة والكلام وهو آخر همو الوراق بنادم غير داوي وضروري من الهضرة معارفينش لي داز بينهم ومعارفينش مسألة الاقدار لي تحكمات فمكتابهم شكون قال هي راه جاية لمغرب اول مرة باش طلاقا بلي غيديها وهو كذلك دوزو شلا طرائف وشلا مواقف هاهي تختمات ليهم بالزواج المكاتيب كتقرب القلوب واخا منعرف فين تكون كدير اسباب باش يتجمعو الا كان مقدرهم لبعض والله يلاقي كل واحد ما حسن منى هزات تيليغونها وبدات كدير السيلفيات وهي عروسة وفينما يوقفو فشي فيروج تقولو تقاد نتصورو

دينا تتغني مع الاغنية ودايرة سيلفي فنفس الوقت:مسيطرة انا مسيطرة

خليفة شافيها ونطق:شتك داخلة سخونة امداام

هنا هي ضحكات عرفاتو علاش معنى ليها هما باقين تمسخنو بلاصتهم وهي باركة عليه مسيطرة تبسم شوية ورجع كشوف فالطريق وكعاود يشوفيها كيف كضحك فرحانة وحتى هو فرحان ويمكن فرحتو كثااار منها هي فرحان بزواجو وبدينو لي كمل بلبغا قلبو ولي تمناها وفرحان بيها هي شنو دارت باقي لداباا مرة مرة عقلو مكتيقش بلي خلات كلشي وجات عندو كانت غالية وزادت غلات كثر وكثر مزادت غير حبو ليها وهو كواعد راسو عمرو يخسرلها الخاطر ولا يغبنها على هاد التضحية لي ميديرها غير لي ديال القلب نيت من الاول قراها بفعايلها وتصرفاتها بنت الناس والحمدلله ربي مخيبوش دعا فصلاتو وهاهي كتبها ليه من نصيبو دوز ايام صعيبة فبعدها ونهار مشات عليه ولكن هاهي حداه وكتابت ليه

وهما فطريقهم أذن اذان الفجر جو زوين فداك الصباح لي يلاه بدا كطلع وهما غادين بوحدهم وسط داك الشانطي وصوت الاذان لي أذن وهما فطريقهم لبداية حياتهم نطق بصوت هادئ كدل على الراحة وهو كسمع هاد الفال دالخير عليهم بزوج:الله اكبر الحمدلله يارب

دينا كانت تتشوف من الزاج داك الجو دالصباح وصوت الاذان لي ريح قلبها معرفتها فالدين قليلة ولكن وهي عروسة وغادية تبدا بداية جديدة مع راجلها عرفاتها اتكون شي حاجة زوينة شافت فيه ومبسمة حتى عويناتها تسدو ونطقات:صوتو زوييييين بزاااف

خليفة رجع شد فيديها وباسها وسط الرحى ديال يديها: قدامك قدام الربح عليا

تتشوف فالمراية بعدما مسحات الماكياج وحيدات عليها لاغوب بمساعدتو هو لي حل ليها السنسلة وحسات بواحد الاحاسيس جديدة عليها منها قشعريرة سرات معاها البرودة لي تحولات ليها سخونية نبضات قلبها لي تسارعو تحل لباب وخرج كنشف شعرو لابس عليه سروال دالكيطمة وتيشرت لاصق عليها هزات راسها وتبسمات شوية ورجعات شافت فالمراية كانت لابسة كسيوة بيجامة من الحريرة سميطات فالغوز بارد طالعة على ركابيها شوية خلاتو كشوف فيها من المراية مبسم وهو كمسح شعرو توترات وبلعات ريقها شوية وهي دايرة براسها تتقاد داكشي لي فوق الطبلة وهو حس بهادشي وحس بتوترها قرب عندها بشوية خلاها تلفتات عندو مد ليها يديه فهمات قصدو حطات يديها فيدو وقفات كانو كشوفو فبعضهم عيونهم فيها بزاف قلوبهم فرحانة وهما مجموعين فدار وحدة الراس فالراس الليلة غتكون هي بداية حياتهم الزوجية كان كفحصها بعينيه من ملامح وجها حتى لعنقها وصدرها لي كان بارز شوية لون لحمها زوين لونو موحد وبيض وكيبان نقي وصافي باين بلا تحضيرات العرس كتهلا فراسها كيسقي عينيه كيفما بغا وعلاش لا وهي حلالو دابا وديالو غير كفكر فهاد الكلمة قلبو كبدا يتهز بالفرحة اخيرا تجمع بيها تحت سقف واحد اما هي كان توترها واضح وهاذي حاجة عادية واخا كبرات فبلاد فيها الجنس عادي سوا بالزواج ولا بلا زواج ولكن عمرها جربات ياما سمعات شي وحدين كقراو معاها كهضرو كل واحد على تجربتو ولكن هي كمسلمة وكا بنت كتحشم ضروري من ما تخاف وتحشم وتخاف فهاد الليلة والحلاوة فهاد التوتر وفهاد الحشمة شد وجها بيديه بزوج وهو مفيكسي عينيها فعينيه نطق كلام من القلب كعني فيه كل كلمة بصوت رجولي ونبرة هادئة

خليفة:ديتي القلب والعقل لي درتي مكديرو غير بنت الناس والحلال وطول ما انا حي عمرني نساه لانني تحطيت فموقف خايب وحمل ثقيل كان على قلبي واش نختار بين لي بغاها قلبي ولا واليديا ولكن نت حيدتي هاد الحمل كنواعدك عمرني نغبنك ولا تسمعني من لي ضرك قبل ما تكوني مراتي وحلالي راه فيك ختي وصاحبتي وكلشي

ومع ختم كلامو لي حسات بيه بلسم وعسل على قلبها نطق بكلمة كبيرة وغالية وهاد المرة قالها بالحلال

خليفة:كنبغيك اسالبة الروح والقلب

دينا غتسخف بكونها حساسة كان كلام بحال هدا من حبيب قلبها ممكن يخليها تفقد الوعي بالفرحة كتافات فقط بابتسامة وعويناتها كبريو عارفاه قد كلمتو لانهم مكانت جامعاهم لا ورقة لا زوج وشنو كان داير عليها ومعساك دابا وهي مراتو قولو لبعض وتعانقو عناق حار زوين جامع القلوب كان كدوز يديه على شعرها كتحس بيها لمسات حنينة وهي حاضناه ضايقة معنى الامان ولقاتو فمواقف كثيرة خلاوها تبغيه عمرو جبد ليها حس الوراق ولا بين لها انو طامع بحال لي قبلو وهادشي لي زاد خلا تعلقها بيه يتزااااد كثر نهار لا نهار وعاد اهتمامو ظرافتو كلشي خلاها يكون هو مول قلبها بعدو على بعض

خليفة:يلاه نصليو واحد زوج ركيعات باش ربي يبارك لينا

حركات راسها باه مشات حلات باليزتها وجبدات واحد اللبيسة ديال الصلاة كان ديجا قالها ليها تجيبها معاها حيت صافي معاه هو غتشد طريقها لبساتها وبدات تتضور الفولار ديالها معرفاتش ليه مزيان هو كان كفرش الصلايات ديالها قاد ليها ديالها وراه بعدما لبس فوقية شافها معنكشة مع الفولار قصدها ووقف قدامها وهو كصايب ليها وكدخل ليها شعرها حيد من قدام المراية ونطق:شوفي صافي مزيان دابا

حركات راسها باه وجرها بشوية جيهة الصلايات وقفو مع القبلة هو قدامها وهي وراه عينيه فالارض مع نطق الله اكبر بدا كقرا القران بصوت هادئ وزوين كريح القلب خلاها تخشعات فهاد الركيعات لي كطلبو يكونو بداية زوينة لحياتهم بداو بطريق الله باش تكون عاد الطريق طريق نور ليهم هما بزوج مع سالا التحية ضار سلم يمين وشمال وحتى هي كذلك هزو يديهم للسما للخالق وكدعيو بزوج فنفسهم كيفما جمع قلوبهم ينور لهم طريقهم ويكون ديما سالكين طريق طاعتو هو كان كدعي الله يقدرو عليها ويكون بيها فجنبها حاميها وسند ليها ويكون نعم الزوج يعوضها غير شوية على لي دارت وميوريهاش فيه العيب وهي كانت كطلب انه يكون ديما معاها وعمرهم يتفارقو

وقفات بشوية وهي شادة فيه حيدات اللبيسة وطوات الصلايات وهو طرفهم شافت فيه ونطقات:كنحس بواحد الاحساس عمرني حسيت بحالو زوين بزاف الراحة حيت صلينا والفرحة حيت تزوجنا

خليفة وهو شاد فيديها وحط يديه على خدها:ان شاءالله تكوني ديما معايا فرحانة

تبسمات وعلاش لا لي مغتكونش فرحانة وهي معاااه راجل بكل ما تحمل الكلمة من معنى مكان كجمعها بيه والو ولقاتو معاها فمواااقف كثيرة معساك دابا شنو غيدير على ودها وهي مراتو جامعهم عقد وحلال

خليفة:اجي ترتاحي غتكوني مدݣدݣة ديال بصح

جرها بشوية جيهة الناموسية شافها النهار كامل كيف كانت السفر من الدوار لمراكش والنݣافة والمكياج داكشي باش شاف انه من الاحسن يؤجل داكشي واخا فداخلو باغي ولكن راحتها هي الاولى اما هي جلسات بشوية وهي تتبلع ريقها مجبدش معاها الموضوع وهي واخا متوترة فداخلها باغية شنو تكون المبادرة منها هي وتبين ليه بلي راه باغية ومعياناااش كان هاز التيليفون كشوف غير شي حاجة بلخف قبل ميتكى حتى هو بقات تتشوف فيه وهي تتشجع راسها وباغية تخوض هاد التجربة من ديما لهيه كتسمع انه عادي المراة تجي منها المبادرة فالجنس عادي وزيد هو راه راجلها يعني عادي قربات عندو بشوية وهو منزل راسو حس بانفاسها ضار على غفلة وهي طبع قبلة على شفايفو فالوقت لي كانت تحطها على خدو

بعدات عليه وهي مخرجة عينيها وتتشوف ردة فعلو بقا غير كشوف فيها بلاما يتحرك ولا ينطق بدات تتفتف وتزنݣات وتلفات ليها الهضرة

دينا:انا مكنتش كنت بغيت نبوسك هنا

وحطات يديها على خدها خلات حرك راسو بلا وهو راسم ابتسامة صغيرة ونطق بصوتو رجولي:بوسيني فينما بغيتي انا كلي ديالك

كلامو خلاها ضحكات بلاما تحس وسط خجلها وهي تتبلع ريقها حسات بالسخونية طلعات معاها من مور هاد الموقف معرفات ما تسبق ما توخر ولا شنو دير هز يديه بشوية رجع بيها خصلة من شعرها اللور وهو كقرب ليها حتى بقات مسافة قريبة بينهم:مزال ناوية تسهري

دينا نزلات عينيها وهي تتفرك فيديها عايشة صراع مع نفسها من جيهة باغية حيت كبقى خلال ومن جيهة خايفة ومتوترة هزات كتافها بشوية ونطقات:لي بغيتي

خليفة ميخفاوش عليه تصرفاتها وحركاتها من نهار عرفها كفهمها وكطيرها فالسما حتى هو باغي وحتى هو مكارهش ومقادرش يتسنى خلاها فالاول على راحتها ولكن دابا جاتو من الجنة والناس مجات فين تهز عينيها حتى كان كقرب لها بشوية بشوية قلبها كان كضرب بالجهد ولكن احاسيس معرفاتش كيفاش نباعثو خلاوها ترجع بشوية اللور حتى تكات وهو جا فوق منها كانو عينيهم على بعض تتحس بلمساتو خفيفة وبحال الريش على لحمها خلاوها طلعات معاها واحد التبوريشة لي فنفس الوقت خلاتها بشوية حطات يديها على خدو وهو جاي كقرب غمضات عويناتها تلقائيا وهي تتحس بانه مبقى كفرق بينهم والو ترون عليها كلشي وهي تتحس بشفايفو دافيين على شفايفها ويديه كتسارا على سائر لحمها بلمسات خفيفة مخلياها تحس بالدغدغة وسط ديك القبلة لي كانت دافية وحنينة خلاتها بشوية بشوية تجاوبات معاه وسط موجة من الاحاسيس العاطفية لي دفعات باجسداهم للالتحام وخوض اول ليلة من ليالي الحلال بينهم ولي هي ليلة العمر كيفما هي كانت باغية حتى هو كان باغي مراتو وحلالو فديك الليلة يدخل معاها بالجانب الاخر من الحب لي غيكون زويين اكيد بحبهم لبعض وبالحلال

حلات عينيها بشوية وهي وسط نعاسها تقلبات بشوية على جنبها وهي مكايسة على راسها مع ضارت جاو عينيها عليه كيف متكي على كرشو وغارق فالنعاس عريان من الفوق ومغطي مصر لتحتاني بليزار تنهدات براحة على هاد الاحاسيس لي كتحس بيهم شحال زوينين وشحال زوين الحلال مع الشخص لي كتبغي وشحال زوين تشارك فراش واحد مع حبها هزات يديها بشوية وهي تتشوف فخاتم زواجها والحنا لي كانت حمرا فيديها تفكرات احداث من قبيلة وهي تبسم بخجل على تعامل تعامل معاها حيت خافت فشي لحظات واحد الحنية واحد الجنتلمانية واحد التفهم راه ميمكنش هاد السيد ولكن كانت لحظة زوينة مارسو الحب وعرفات شنو هي لحظاتو واحاسيسو تشاركو الاجساد وتلاحمو الشفاه وتشاركو الشهوة بزوج كلشي داز زوين وعمر تنسى هاد الليلة ابدا ليلة العمر مع حبيب قلبها

ضورات عينها جبهة الكوافوز وهي تتشوف المنديل بيض فيه قطيرات من دمها واخا مكانتش عارفة علاش جداتها قالت ليها تمسح بيه وتخبيه عندها ديما ولكن ديك اللحظة فاش خرج دم عذريتها وطبع قبلة على راسها وهو منطق بهمس الله يرضي عليه تنهدات وهي مبسمة الله على احاسيس وعلى جو زوين مزين بالحلال عمرها تنساه بقات تتفكر هكاك وهي مبسمة طبعات قبلة على خاتم زواجها ورجعات غفات ثاني

شميسة غتغرب والحال بدا شوية كضلام جاي وقدامو عدد كبير من ريوس دالبهايم قصد دار واليديه حل الكوري ودخل ديالهم وسد عليهم مجا فين يزيد بلهايمو هو لدارو حتى خرجات عندو يزة:خليفة واش مراتك ممشاتش عندك اوليدي للفصة

خليفة عقد حجبانو شوية:لا اميمتي علااش؟

يزة بخوف:عصرت ليها قبيلة شي ليمونات قاتلي تشهات العصير سيفطتو لها مع اسمهان ملقاتهاش من قبيلة وحنى نبريو مبغيتش نخلع رحمة مقلت ليها والو سولت غا ولد تيجانية قاليا مكايناش عندهم راه شي ساعة وهي غايبة

خليفة تنهد وقرب عند مو طبع قبلة على راسها:متخافيش امي مواقع باس انا غنمشي نقلب عليها غا دخلي نت

يزة حركات راسها باه وهي مشوشة الدرية ساعة وهي غايبة مخلاو فين قلبو عليها مبغاتش تخلع جداها اما هو زاد بالبهايم لدارو حل لكوري خشاهم دغيا سد عليهم وزاد غادي فين عارف يقلب عليها وهو كسوس يديه وكتنهد على حالها ولكن وقيتة وغادي دوز ولكن مينكرش كتبقى فيه بزاف وهو كشوفها غير عيانة مرة تبكي مرة تشدها الدوخة مرة تمشي تقيا كدخل معاها كتبقى تقيا حتى كتبغي تخرج روحها وتتفشل كولي غير هازها مسح على شعرو وهو كتمتم الله يسمح لينا من الوالدين هكذا حتى هو ولداتو مو وݣاع الامهات كدوزو من هاد الحال داكشي هو باش هو مو مقطرة ليه من عينيه صبرات على هاد الحال لكشوف فيه مراتو سبعة دالمرات هما وخواتاتو تفكر كيفاش كانو طايرين بالفرحة كانو الاعراض خفاف ولكن دابا صعاب عليها الحال بدات تتبان ليه جالسة على حجرة فوحدة من الاراضي ديالهم نفس البلاصة سيمانة هادي وهي تتجي تجلس هنا يبقى يضرب فيها البرد بحال كتجيها الطجة هو بوحدو لي عارفها تتجي هنا عيط لمو دغيا فتيليفون طمنها بلي راه لقاها باش متبقاش مشوشة ومن بعد قصدها بشوية حتى وقف وراها جلس القرفصاء وحط يدو على كتفها كانت ساهية قفزات شوية وتلفتات كان وجها صفر وتتبان فيها السخفة غير شافتو طلاحت عليه وبدات تتبكي وتشهقروهي تتعنق فيه

دينا:علاش مشيتي ياك قلت ليك متعطلش بقى معايا دابا متمشيش هئ هئ

خليفة وهو معنقها شاد ليها بخاطرها:صافي شووو هانا معاك احبيبة صافي مشيت غا نسرح

دينا بعدات عليها ودموعها سايلين دغيا طيحاتهم حطات يديها على خدو وهي تتفحص ملامحو وتتشوف فيه ورجعات عنقاتو وهي تتشم ريحتو كتستنشقها بالجهد وكطلعها مع جوفها كتحس بيها تغلغلات ليها مع العروق مخليها على راحتها حتى بعدات عليه وبدا كمسح ليها دموعها بصباعو وهو شاد ليها بخاطرها وكقاد ليها شعرها والفولار لي لايحاه عليها

خليفة:هاد المرة خلي حتى نجي ونجي معاك هنا صافي؟

دينا:تخنقت بزاف كنت باغية غير نخرج محسيتش والله

خليفة تنهد ويديه على خدها قرب بشوية وطبع قبلة على راسها ونطق:ان شاءالله كلشي غادي يفوت واخا صعيب بزاف

دينا كلامو هو بلسمها وراحتها متنكرش عيانة ومقتولة بزاف وغير على سبة ولكن غير تتفكر غيولي عندها بيبي وغتولي ماما كترتاح وتنسى كلشي شافت فيه ونطقات:يلاه نمشيو لدار راه طيبت نمشيو نسخنو ليك

خليفة:غنسخنو انا سيري غا تنعسي

شدات فيه وهو مضور يديه على خصرها وغادين بزوج فالخلا تتشوف فيه مبسمة كيف مراعي وكعاونها خصوصا فهاد الاشهر الاولى علاما تولف حتى لقات راسها حاملة وسط رحلة التأقلم لي متنكرش انها تتشتاق لواليديها ولكن مساندها هو ومراعي وبالوحم زاد كثر

كتبغيه وزادت كتر وكتر وخاصة الوحم خلاها تزيد تحبو فوق القياس ثاني يمكن الوحيدة لي معافتش ولا جرات على راجلها هي لا ريحتو تتبغي تتشمها تتبقى تشوفيه وتفلي فيه من راسو لصباع رجليه فالليل تمخشش فيه عاد تنعس والا خرج وتعطل تجلس تبكي بحال شي بنية صغيرة وباباها غادين بزوج بيهم للدار وهي غادة و تتعكل مع الحجر ولابسة واحد الصندالة ديالو كبيرة عليها هي باش خارجة مخلياها معنكشة فالمشية نزل عينيه بعدما وقفو جا قدامها وتحنى شوية وهو ماد ليها يديه:طلعي طلعي

دينا:اويلي الناس اخليفة

خليفة ضار عندها شوية:كيفاش الناس مالنا كنشفرو هاز مراتي مريضة مالها عيب يلاه طلعي

تنهدات وهي مبسمة هادشي باش كيقتلها ويسالي معاها كبين حبو وكبين اهتمامو شدات فيه وطلعات بعدما حيدات الصندالة تݣعد وهو مركبها فظهرو شاد الصندالة فيديها وغادين وكهضرو وهو هازها فظهرو بحال الريشة ممسوقش حطات راسها على ضهرو ومضورة يديها على عنقو حسات بالدوخة تاني غير قربو لدار عݣوزتها نطقات:ندخلو عند خالتي شوية

حرك راسو باه ونزلها بشوية كيف طلبات دخلو عند يزة جلسو معاها شوية رتاحت بعدما كانت مهولة عليها عاد رجعو لدارهم داز الوقت وظلام الحال جات عندهم رحمة طل عليها وجابت ليها شوية الدجاج محمر تعشاو ومشات طلاحت فوق الناموسية وراسها مقلوب عليها شعلات التلفازة وهي تتفرج تتسمع فيه كغسل الماعن تنهدات ولد الناس ومكاين بحالو حتى باباها كان كعاون ماماها ولكن هما كانو فبلاد الغرب بلاد التفتح عكس هنا الدوار تتسمع اكثرية العيالات مكعاونهمش رجالاتهم وعيب الرجل يعاون وكدا ولكن هو فشكل وحتى عمها راجل سناء ماشي بحال شي رجال ديال الدوار تاهو ظريف بحالو الناس طوب وحجر وداكشي فالتربية كيفما حنين فخواتاتو ومو وفاش كان معاهم مكانوش كخدمو وحتى دابا واخا تزوج باقي معاهم كيفما هو معاها حتى هي راجل بمعنى الكلمة مراعي انها يلاه كتوالم مع الجو والمحيط وحياتها فالاول فالدوار ماشي هي دابا ولات مزوجة وعندها دار ضورات وجها فاش دخل لبيت هاز فيديه كاس ديال الطين مدو ليها تݣعدات بشوية وخداتو من عندو:شكرا

بدات تتشرب وتتبنن فداك الما لي فيه بنة القطران هاهي تتجيها على قلبها متكرهش تاكل داك الكاس جلس حداها من لهيه ونطق:عضيتي منو

حركات راسها باه بطريقة فكاهية خلاتو تبسم ونطق شاد فيها:الا بقيتي هكا غتكملييه

ضحكات شوية معندها مدير وحمها لي دار هادشي كانو غاديين فالسوق حتى شافتو ولصقات عليه شراه ليها هو والقرعة ديالو ريحة القطران شيراتها حطاتو فوق الكوافوزة وضارت عندو كان تتفرج وكياكل فواحد النص ديال الخبز فيه المرقة لي طيبات ليوم وجات مسوسة واخا هكاك كلها فالغدا وشاطت وكلاها دابا مخلاهاش ترميها هاد ليجيست كزيدو يحببوها فيه بشوية بدات تتعلم طيب المرقة وداكشي لي غيبغي رجل تقليدي واخا الايام الاولى كانت كطيبها رحمة تتجي تنصب ليها وحتى يزة تتعلمها ولكن خاصها تعتامد على راسها كلا مرة وكيف تتخرج مرة بيضة بلا صفرة بلا قياس مرة حارة مرة وكلا مرة فيها شي عيب واخا هكاك كياكلها مسكين ويشجعها وكاين شي مرات كطيب هو الطجين كجي حسن من ماكلتها بدرجات

بقات تتشوف فيه تاني وتفلي فيه بعينيها حتى ضار وطلاقاو عينيهم سرح يديه على المخدة شي لخلاها تقرب وتحط راسها عليها وتخشى فيه بدا كدوز يديه على شعرها وهي حاطة يديها على صدرو هزات فيه عينيها ونطقات:كليتيها واخا مجاتش زوينة كيف ديما كندير ݣاع داكشي لي كتقولي ماما فتيليفون وميمة وخالتي ومكتخرجش بحال ديالهم

خليفة وهو كحيد لها واحد الرمشة طايحة لها على خدها وهو متكي على جنبو وكشوف فيها:مخايباش ݣاع نعمة الله زينة غا رتاحي

تبسمات شوية وهي تتفلي ليه فلحية ذقنو وقراب لبعضهم بشوية نزل يديه وحطها على كرشها وهو كتحسسها نزلات عينيها تاهي وهي تتحس بملمس يديه على كرشها لي كل شهر غتبقى تكبر تكبر وولدهم ولا بنتهم لي غيجي ويكمل العائلة ويكون ثمرة حبهم كان كحس بواحد الاحساس زوين ويديه على كرشها مخلي قلبو رهيف وهو كتفكر انه غيولي اب احساس الابوة بداه من دابا غيربي ولدو ولا بنتو كيف ما تربى هو على الدين على الاحترام على الرحمة واهم شي الرجولة حطات يديها على خدو:بغيتو يخرج بحالك فكلشي قالتلي ميمة رحمة الله يجعلو يكون خليفة ديالك فكلشي

خليفة تبسم وزاد قربها عندو عينيه فعينيها ونطق:تكون صورتو كاملة اول حاجة الا كانت بنت بغيتها تاخد من عندك نت الزين والحشمة

تبسمات بخجل واخا تزوجو مزال تتحشم ضورات يديها على عنقو وطبعات قبلة على خدو شي لخلاها يجرها عندو كثر حتى ولات ملاصقة معاه وهو كلعب ليها فشعرها وضامها عندو حتى قرب وطبعة قبلة على شفايفها جاو موراها سلسلة من القبلات الدافية بيناتهم وهما ملتاحمين بزوج بيهم بأجسادهم وبقلوبهم عايشين حياتهم فهدوء وكتسناو مولود جديد يكبر عائلتهم ويكون ديك الثمرة لي جناو من حبهم❤️

حلات السرجم بشوية وهي تتنفس الهوا ديال العشية لي خلا نفسيتها تحسنات وبزاف تتشوف فالجبال لي كانو دايرين منظر زوين من ابداع الطبيعة تتصبح وتمسي عليه كل نهار من سرجم بيت نعاسهم كطل وكتأمل وكترد مجاجها بداك الجو ديال الخمسة العشية ريحة القهوة عاطية من الديور والناس غاديين جايين وحركة فالدوار منظر الطبيعة قدامها ويديها على كريشتها لي كبرات ولات قد الكورة آخر شهور حملها لي خلا وزنها يتزاد كانت لابسة كسيوة طويلة وشادة شعرها من اللور بقراصة لايحة عليها فولار لي فور ما بعدات على السرجم حيداتو هزات تيليفونها لكان كصوني كانت عشيرتها زوي لي واخا البعد بقات العلاقة كيفما هي كهضرو النهار كامل هضرو شوية من بعد هضرات مع ماماها وباباها كسولوها على حالها وحال حملها والمولود الجديد لي كان جاي فالطريق وفرحة استقبالو تتزاد نهار على نهار سمعات شي حد كعيط لها من السرجم لاحت عليها فولار ومشات طلات كانت اسمهان لوستها:هااااي حوبييي

اسمهان:كبييدة بغيت البوماضة ديال المسام غير شوية ندهنو دابا لعطيتيني كملات

دينا:طلعي خوديها اويلي ونجلسو شوية

اسمهان:زربانة راني باغية نحلب غير نسالي ونجي نحلب ليك

دينا:واخا شكراااا بزااااف

مشات دغيا جابت ليها البوماضة لاحتها ليها من السرجم وبقاو مجمعين شوية:فين هو خليفة ملقيتوش فالفصة وحتى فجنان التفاح

دينا:ماما وبابا سيفطو ليا شي حوايج ومشى لمراكش يجيبهم عيطت ليه غير قبيلة قالي وصل لاݣار

اسمهان بابتسامة:كداير ولد خويا اختشي

دينا بابتسامة عريضة حطات يديها على كرشها:هاهو من الصباح وهو كضربني

بقاو مجمعين حتى مشات اسمهان وهي دغيا طارت لكوزينة فاش شمات ريحة الكيكة حلات الفران وجبداتها كانت منفوخة من داكشي وريحتها تتشهي قاداتها فطبسيل مع المسمن والبغرير لي تعلمات لهم من داكشي الوقت والايام لي خلاوها تتعاود الحاجة بزاف حتى تقناتها كيفما كان الحال غتعلم تعلم قادات داكشي فالطبلة غيجي عيان خاصو يلقى اتاي حطات كلشي جابت اخر حاجة لي هي الزيت العود لي كانت شي حاجة مهمة عندو هو هزات واحد السليلة وخرجات سدات لباب وراها ونزلات فالدروج كانو ساكنين الفوق ولتحت الكوري لي كان وراه ݣرياج كبير فيه الدجاج والفليلسات والفرارج لي غير حلات عليهم تجمعو عليها وهي تترمي لهم الذرة

دينا لاحت الذرة لواحد الدجاجة:هاكي اصحيبتي

بقات تترمى لهم تما لي داز تلقي عليه التحية وكاين لي كقول سبحان مبدل الاحوال فنفسو لان شحال من واحد كان كقول هاد لبنت موحال تصبر فهاد الدوار غا الحب وقلة العقل ديال الدراري لي خلاتها سمحات فلهيه وجات ولكن من الاول كان اختيارها جدي واخا تتوحش واليديها وصحابها ولكن هاهي دابا تعلمات وشدات شحال من حاجة من عندهم راسها صغير وكتسمع خلاوها دارت بلاصتها واخا شحال من حاجة كديرها راجلها هو لكسݣي باش يورد لبهايم هو لي كسرح هو لي كحش الفصة تتمشي معاه وتبقى جالسة تتجمع مكخليهاش تهز المنجلة كخاف ضرب يديها كيفما كان داير لخواتاتو معاها هي مخلي ليها حاجة وحدة لي طلباتو عليها واصلا ساهلة هي البيض والدجاج تبقى توكلو حيت تتحماق على الفلالس شي لخلاها تأقلم كثر هي البساطة والاعتماد على النفس اي حاجة كديروها بوحدهم رتاحت من الضغط رتاحت من بزاف دالحوايج واخا كتبقى امريكا هي لبلاصة فين تولدات عاشت طفولتها ومراهقتها وجزء من شبابها كانت مثال حي انه معمرك متحكم على لواحد جات حتى العربية مكتعرفش ليها وهاهي دابا يعول عليها كملات ورجعات طلعات مجات فين دخلات حتى حسات بشي وخز فضهرها لي ولا كعطيها الصداع فهاد الشهر الاخير عارفة بلي وقت الولادة قريب ويقدر يجيها المخاض فأي وحدة تتطلب غير متكونش بوحدها الا جاها الوجع يلقاه معاها فالدار هو بعدا تحل لباب بشوية غير شافتو تبسمات قصداتو وهو مع سد الباب حط الكوليا فالارض وحل ليها يديه وتعانقو طبع قبلة على عنقها وبعد:كنت خارجة

دينا يديها بزوج على وجهو:يلاه طلعت هبطت غير عند الدجاج عيتي

خليفة:عذابك راحة ها لكوليا

دينا:ديها لبيت نحلوهااا داباا

خليفة تحنى بشوية وطبع قبلة على كرشها:كداير ولدي

دينا:هاهو ضربني زوج مراات ولا ثلاتة حتى قفزت

خليفة يديه على كرشها:تكايس اولدي الله يرضي عليك ماماك مبقى فيها والو الله يسمح ليا وليك منها

ضحكات وتعلات على ريوس صبعانها طبعات قبلة على خدو جرها لبيت وهما كحلو فالكوليا لي سيفطات شادية وبوبكر من لهيه كانت عامرة حوايج لبيبي بألوان مختالفين لي كان سايد عليهم الزرق حيت عندهم وليد واخا شراو ليه وموجدين ولكن واليديها منساوش كان كلشي لبيسات الكريمات الزيوت سبيبطات رضاعات وسكاتات كلشي عينيها غرغرو وهي فرحانة وزيد مع الهرمونات وزادت حماس على حماس فأنه يجي فأقرب وقت تشوفو وتهزو بين يديها

دينا:كلشي زوين وكلشي واجد بغيتو غير فوقاش يجي

خليفة شد فيديها وطبع قبلة عليها:الله يجيبو بالصحة والسلامة

تبسمات ووقفات تتشوف فالمراية فكريشتها لي كبرات تتحس باحساس زوين احساس الامومة بداها قبل ميتزاد وعلاش لا وهي هازاه طرف منها قبل متحضنو راه كان فداخلها متاصل مع قلبها واحاسيسها مشارك معاها كلشي جا وراها وحضنها يديه على كرشها وهو معنقها من اللور طبع قبلة عنقها ونطق:خاص نعيطو لسي بوبكر ولالة شادية نقولو ليهم شكرا

حركات راسها باه وهي تتشوف فالمراية لي كبانو فيها بتلاتة هي وسندها وولدها فلذة كبدتها لي مزال مجاش فالدنيا وتتمنى يجيها على خير وفأكمل صورة تلفتات عندو وطبعات قبلة على شفايفو وهو مزال معنقها كستنشق ريحة عطرها وريحة شعرها لي مهبلينو هي كلها واخدة عقلو وزايدة وهاهي دابا هازة طرف منو وولدو دوز معاها فترة الحمل كاملة ولي تتشهد بيها هي انه كان معاها نعم السند والزوج سندو خلاها شوية يخفاف عليها ديك مضاعفات الحمل والنفسية المزفتة شحال هز هبالها شحال تعصبات عليه ومداهاش فيها هز هبالها نيت حيت كان عارفها فترة وغدوز فترة صعيبة لي دازو منها ݣاع الامهات مو هو ماماها هي واي ام فهاد الدنيا بقاو هكاك على حالهم فرحانين مع بعضهم حبهم ككبر وكتزاد مع مرور الايام وهما كتسناو أعظم نعمة من عند الخالق ولي هي الذرية الصالحة❤️

🤍مـــراكـــش🤍

داخل بشوية وهو كحس برجليه كرجفو ماشي من الخوف وانما من الفرحة وقف شوية الفرملية كتقاد ليه اللبسة من اللور غير كملات دخل قلبو كضرب بالجهد الفرحة كحس بيها بلوكات ليه العقل غير دخل لبلوك ولمحها او لمحهم بزوج قلبو تهز وهو كشوف فمراتو الحب ديالو وكشوف فولدو لي اخيرا خرج ولمحو دينا لي كانت كتنهج هي لي طلبات منهم يدخلوه ليها تستمد قوتها منو لانه ديما كان سندها تحنى على ركابيه وهو كشوف فيه لبسوه اللبيسة لي ختارت ليه هي جاتو كيوت وهو مكيمش حاطينو على صدرها عويناتها عامرين دموع بفعل الالم لي عاشت والفرحة كذلك شافو فبعض وتبسمو احساس لا يوصف عايشينو دابا بزوج ترزقو بأحسن هدية من الخالق

حط يديه على ضهر ولدو بشوية لي مغمض عويناتو وهو كشوف فيه عينيه كبريو فرحتو ميقدرش يوصفها كلام ضار عندها وطبعا قبلة كبيرة على جبهتها مع بعد شوية وهو يهمس:شكرا على كلشي ربي غيجازيك على صبرك

كانت عيانة واخا هكاك كتكابر باش تبقى حالة عينيها وتعيش هاد اللحظة الزوينة وهي مع راجلها حبها وسندها لي طول فترة الحمل معاها فكلشي واهتم بيها ومع مولودها لي غير شافتو نسات كلشي شدو فبعض وكرزات على يديه بيديها معلقة السيروم وعيانة واخا هكاك فرحانة وبزااف وهي تتحس بيه على قلبها صغيور وناعس جا باش يزيد حبهم جا باش يكبر عائلتهم جا باش يقوليها ماما وهو بابا

دينا بصوت حنين:جلال جلال هانا ماما هانا هاهو بابا(شافت لخليفة)شكرا ليك نت كنت معايا فكلشي

خليفة:داكشي والو قدام لي درتي نت نت راك ضحيتي

ومع ختم كلامو هز يديها وباسها مخليها متندمش ابدا على قرارها وكيفما واعدها النهار الاول انها عمرها تندم هاهو راه وفى ومزال كوفي مسحات عينيها وهي تتحمد الله عطاها الزوج الصالح لي لطالما تمنات وعطاها الذرية الصالحة مكرهاتش حاجة وحدة هي واليديها يقربو لها كانو عائلتها كلهم مرة كتسناو جاو جلسو فالدار ديالو دمراكش باش تولد فيه والحمدلله كلشي داز على خير

الشميسة ساطعة فالدوار صوت الفروج كاسر المكان الجو صافي ومعتدل يوم زوين من ايام فصل الربيع واقف هاز واحد التيو ديال الما كسقي المحيبقات دالورد لي دايرين قدام الدار كانو عدد كبير عاطي منظر زوين قدام الدار وكلا واحد شنو فيه ها الخزامى هالحبق وعاد فصل الربيع الدنيا خضرا والطبيعة زينة هاد العام بفعل الشتى لي صبات وخلات العام لفلاحة وليه هو يكون زوين والحمدلله كسقي وهاز وليدو لي كمل خمس شهور كشوف بعويناتو وهو كهضر معاه

خليفة:كبرتي وليتي تتخرج ديع تانت

جلال كشوف فالمحابق والالوان جدبوه وكرجع يشوف فباه كهضر معاه وكتبسم ابتسامة خلاتو يبوسو بوسة كبيرة على خدو وهو كبجغط بيديداتو وبغا يقيس

الما شي لخلا خليفة يبعد التيو:لا لا بارد ابابا بارد

ورجع باسو ثاني تصرفاتو مخلياه كبان شحال كحماق عليه ومهتم بيه وعلاش لا وهو كبدتو واول مولود جاه وثمرة الحب ديالو هو وماماه ربحهم بزوج ربح بنت الناس وربح وليد منها يكون خليفتو فالمستقبل ويكون ذرية صالحة كتمناها فصلاتو جاية من عند عݣوزتها غير شافتو طلعات حاجب ودازت من حداه بلا ما تهضر معاه خلاتو ضار متبعها وراسم ابتسامة على وجهو وهو كشوف فيها وفحركاتها حتى دخلات وسدات لباب جلال حتى هو كشوف فيها عارفها هي ماماه خليفة سد الروبيني وحيد التيو وشافيه وهو طالع:يلاه نحزرو ماماك راه اليوم تسلخنا

حل لباب ودخل كانت فالكوزينة غير شافتو جات قاصداه مطلعة حاجب خدات من عندو جلال لي كبجغط ويدير اصوات طفولية كيوت مع بغات تزيد وهو يشد فيها

خليفة:مال الزين قالب عليا وجهو مخليني مقطوع

دينا:طلق طلق ديرها قد راسك وقولي مال الزين

خليفة:دابا داكشي دلبارح جاك عادي؟

دينا شافت فيه:كنت تقدر تهضر معايا بشوية ماشي قدام الناس وقدام ولدك وقدام با جاب الله كان كهضر فالتيليفون كنت فالطوموبيل وحدا الدار هنا مشافني حد من غيرك ومحسابليش مجهد من نهار جيت هنا وانا محتارمة كلشي واي حاجة قلتيها لي كان شرطك الوحيد ندير الفولار ودرتو وانا مقتانعة بيه غلط واحد مفيها باس تهضر معايا غير بشوية ماشي هكاك

خليفة تنهد عارف بلي غلط لبارح وكانت غير حدا الدار فاش دارت شوية العكر كان مجهد وهو جا شافو ونهض فيها كان اصلا معصب وجات هي فديك اللحظة وزيد داكشي دالغيرة وكدا مسح على ذقنو ونطق:المسامحة دابا راني عرفت راسي كحلتها كلشي درتيه على راسي وعيني غير دابا خلينا نتسامحو

دينا كعجبها الحال فاش كبدا يحزرها وكدا بغات تزيد تخليه يطلبها كثر بلاما تجاوبو ضارت بغات تهز سكاتة ولدها لي طول المدة وهو غير تتفرج فيهم مسكين مفاهم والو مع بغات تهزها خطفها هو وهز يديه الفوق تأففات وشافت فيه:ارا لهنا ارا

بدات تتعلا باش تاخدها والو اصلا طول منها وهاز يديه مستحيل توصل بقاو تتجابدو تما وهو باغي يعصبها مقصد:قولي لي تصالحنا ونعطيها ليك

دينا:واراا راه الولد غيبدا يبكي ارا لهنا

خليفة قرص ولدو من نيفو:ولدي سااااكت وداير عقلو غانت مقصحة راسك

دينا تفقصات:وخليفة ارا لهناااا متعصبنييييش

خليفة:بوسيني وتاخديها شفتي دابا شحال وانا كنزاوݣ غديري لي شي حاجة تانت غنزيد عند الوليدة نغضب عندها تانا نتفشش مالني

تفقصات ولكن كلامو دابا ضحكها حيت هو ماشي بحالها كتقلق تتبقى عليه بزوج كليمات دغيا كرجع ودغيا كبرد عكسها هي لانها تتبقى انثى تبغي الحزارة وتبغي الدلال ضحكات وسط فقصتها شي لخلاه يجرها عندو ويعنقها ويعنق ولدو حتى هو لي غير كشوف مسكين

خليفة باسها فخدها:سمحيلياا

بعدات عليه وهي مبسمة ضارت عند ولدها لي كضحك وسطهم وكبجغط سمعو الدقان مداتو ليه ومشات تحل غير شافتهم شهقااات طلاحت على ماماها تتعنقها ممتيقاش وخليفة كذلك كسلم بحرارة على بوبكر لي هز حفيدو كبوس فيه مشافوهش من السبوع والطهارة

دينا غطير بالفرحة وهي تتعنق فماماها: توحشتك بزااااف علاش معلمتووونيش علاش

شادية:مفاجأة ههههه ويني يختي ويني على ولدي كبر

سلمات على خليفة بحرارة وهي هازة جلال لي عرف بلي جو دالفرحة هدا وبدا يشالي بيديداتو دخلو للصالة مجموعين وهي فرحانة غطير احسن مفاجأة

دينا ضربات خليفة فذراعو: كنتي عارف ومقلتيش ليا

بوبكر:كان عارف انجيو حتال غدا وكان غيجي لينا للمطار هو وعمك حتى صدقنا جايين ليوم تاهو غفلناه

دينا:وانا نفهم علاش ميما كانت كتصايب الحلوى كلشي فراسو الا انا جوليا مغاديش تجي

بوبكر:جوليا غارقة فالخدمة اما حنا صافي جينا

دينا جمعات الضحكة شوية:كيفاش؟

بوبكر وشادية شافو فبعضهم ورجع شافيها بوبكر ونطق:بهادشي لي درتي نت خليتينا نفكرو مزيان من شحال وحنا كنتهربو من فكرة ندخلو فمرة لبلاد حيت بنينا كلشي تما ولكن نت شجعتينا كثر فكرنا وقلنا هدا هو الوقت بدينا فبلادات الناس لي واخا كانت الفلوس داخلة كنا كنعاودو نستثمروها عندهم اذن كنخدمو ليهم اللهم داكشي لي درنا لهيه نديروه لبلادنا واخا غنبداو من جديد ولكن عادي بلادنا عاديي ماشي خسارة فيها

شادية:عطى الله ميدار بلادنا زويينة

دينا قلبها تهز وهي تتحس بواحد الفرحة الحاجة الوحيدة لي كانت باغية هي واليديها وهي تحققات هاهما غيوليو حداها غيرجعو للاصل ناضت طلاحت عليهم تتعنق وتبوس فيهم بزوج وهي فرحانة غطير وحتى هما فرحانين بقرارهم وزيد ايتجمعو مع بنتهم لي كانت هي نقطة الانطلاقة ليهم واخا جوليا ختارت تبقى وتكمل حياتها لهيه وحتى سانداتهم فقرارهم حتارمو قرارها تاهي كيفما عطاو لحرية لدينا لي دابا مبقى خاصها والو غير ختها

خليفة:الرجوع للاصل فضيلة

بوبكر:ويااااه الله يجعل لبركة من الغربة نوبة لبلاد دابا غنحتاجك بزاف اخليفة

خليفة:اناا معاك

بقاو شحال مجمعين وسطهم جلال كلعب فالارض من بعد ناضو ومشاو لدار جدها لي كان طاير بالفرحة هو ورحمة اخيرا ولدهم دخل لبلادو وسط خوتو يخدم حتى هو فخير باه وعطى الله ميدار فلبلاد دارو علاش يرجعو ودابا غتكون الانطلاقة فبلادهم وأصلهم مجموعين فدار جدها الداخل كثر من الخارج وجو دالفرحة طاغي بهاد الخبار لي طاحت عليهم ان ناس عزاز عندهم رجعو ودخلو من الغربة جات عندهم الحاجة يزة وبناتها وراجلها سي عبد الغني وجلسو كتعشاو مجموعين فجو عائلي ولمة زويينة خلاو دينا تفكر ايام جاو فيها صحابها معاها وتجمعو هنايا ختها وكلشي ايام زوينة دازت فهاد الدوار ومزال كدوز زوينة بلمة العائلة ودفئ الاسري واهم حاجة فبلادهم الغزالة🇲🇦❤️

دينا واقفة قدام السبورة:يلاه نعاودو كاملين هادشي لي درنا

قلباتها انجليزية هي وتلامذها كتسولهم وكجاوبوها دقة وحدة بݣاع داكشي لي داروه فالحصة حتى كملو صفقات عليهم ونطقات بفرحة:Very good(حسن جدا)

كلشي صفق ومشات حلات صاكها جبدات منو بواطة وبدات تتفرق عليهم الشكلاط تشجيعا ليهم حيت خدمو مزيان ليوم صونا الجرس نيشان وكلشي خرج وهما كودعوها محبوبة عندهم حيت ضريفة وشادة معاهم الخاطر فالانجليزية لي شحال من واحد لاقي صعوبة فيها

كان واقف برا متكي على الطوموبيل هاز جلال لي حطو بشوية فالارض وهو شادو يلاه تتعلم يمشي وعينيه على الاعدادية هنا فين قرا وفين دوز اولى ايام مراهقتو كان كضربها طوالة من الدوار على رجليه بحالو بحال ݣاع ولاد الدوار والليسي بعد منها حتى هي واخا هكاك قرا وتخرج وهاهي ضارت ليام ولا كجيب مراتو دير الدعم لوليدات بعدما جا عندها رئيس الجماعة لي تابعين ليها والمدير الإقليمي لي كان عندو معرفة بواحد من عمامها جاو تلعندها قتارحو عليها تكون استاذة ديال الدعم والتقويم فمادة الانجليزيه بعدما عرفوها كانت لهيه وغتكون طيارة فالانجليزية بلاما تحتاج الكونكور وهي طبعا مرفضاتش خارجة وهي تتقاد فلفولار ديالها غير شافتو تبسمات وقصداتو جلال غير شافها حل ليها يديه هزاتو تتعنق وتبوس فيه:هانا ماما توحشتيني

خليفة قرب عندها وطبع قبلة على راسها:زين ديالي كداز الصباح

دينا:حمدالله احبي ونت كبقيتي راه خليت ليك الصباح الليمون معصور مع المخينزة

خليفة حرك راسو باه وهو كحل ليها لباب:شربتو الله يرضي عليك

طلعو وهي شادة ولدها فحضنها وزادو للدوار كهضرو بزوج ولدها نعس فحضنها فالطريق شافيها ونطق:مقرية غدا؟

دينا:اه عندي السيزيام خاص نخدم معاهم عندهم الفرض قريب

حرك راسو باه مدة عاد وصلو للدوار طلعو تغداو بالزربة جات سليمة دات جلال وهو ناعس كانت جالسة حالة البيسي وتتشوف فلاباج ديال دار الضيافة تتجاوب على الناس لي بغاو يريزيرڤيو بعدما تزادو عليها شلا إضافات خرجات تتشوف التصاور لي حاطين وكتركز فشنو خاصها تزيد جا هو واقف عند راسها وكشوف معاها كتناقشو فشنو خاص يدار هي لي مكلفة بكل ما كخص الماركتينغ والاشهار ديال دار الضيافة تصاور ديال كلا بلاصة فيها مصوراهم وحاطاهم فلاباج دانستغرام فايسبوك وحتى التيك توك لي غادين وكطلعو

خليفة:يلاه زيدي راني مخلي الدراري غيكون الطين لي شكلت الصباح جف يلاه نصبغو

حركات راسها باه وناضت خرجو بزوج شادة فذراعو وهو مضور يديها عليه ضارت شافت فدار واليديها لي غادية تتبنى طلعات بقات ليها غير لفينيسيو جدها عطى لباها الارض لي كتب ليه وطلع فيها دارو هو ومراتو وقفو قدام دار الضيافة لي زادو عليها اضافات كثيرة ولات معروفة كثر بفضل الاشهار والمركتينغ لي قرات برا وضفاتو وطبقاتو عليها دخلات هي لقات سي عبد الغني جالس فريسيبسيو سلمات عليه مشى هو يرتاح وهي شدات بلاصتو اما خليفة قصد اللور ديال الدار فين كانت تما ورشة ديال الطين معاه زوج دراري بعدما كان غير بوحدو كبرو الورشة فاش كبرو حتى دار الضيافة جلس كصبغ فشنو صايب الصباح مزهريات وكيسان طبيسلات صغار وحتى طواجن ديكور صغيورين كملهم وناض هز كلشي وخرجو برا ستفو وقفو شي سياح نازلين فدار الضيافة نيت وبدا خدام معاهم وتزادو عليهم وحدين آخرين

فجيهة اخرى بالضبط فالكوزينة داخلة اسمهان هازة كتاب صغير لكوزينة لي كانت شادة متوسطاها حاضية كلشي كلا طباخ تتشوف معاه كي غادي حتى وقفات عليها اسمهان

اسمهان:خالتي طجين بالدجاج والزيتون براد ديال اتاي وزوج بسطيلات ديال الدجاج صغار

شادية خدات ورقة الكوموند:واخا ابنتي هاهو اللحم بالبرقوق وجد

اسمهان هزات البلاطو ديال ديك الكوموند وخرجات تديه من بعد جا واحد من ولاد عم خليفة كان تاهو قاري شوية وتطوع يخدم سرباي تاهو عطاها كوموند آخرة وهز لي واجدة برا دينا كانت تتهضر مع واحد الزوج من السائحات نازلين تما

سائحة:عفاك فين كاين المحل ديال المواد الطبيعية

دينا:هاهو غير هنا انا نخرج معاكم نوريكم (قلباتها عربية)عبد الخالق وجد اخويا زوج جليسات فالسطح وحدة ديال الغدا ووحدة بآتاي

عبد الخالق:واخا اختي هي الاولى

خرجات مع دوك سائحات وضارو من الجيهة لوخرا لmagasine ديال المواد الطبيعية كان بوبكر خدام مع شي ناس لي تزادو عليهم دوك السائحات كشوفو مواد التجميل طبيعية من الزعفران من زيت الزيتون عاد داكشي لي بيو النيلا الغاسول الصابون البلدي الحجر ديال الرجلين الما ورد ولاقين اقبال كبير لا من عند السياح لا من المغاربة نيت كلشي دايرينو قدام لmagasine فبرامل مزخرفين تقليديين وقفات عليها خديجة هازة طبݣ كبير:دينا ها الصابون ساليتو وها النيلا دݣاتها مي

دينا:صافي اختي دخليهم

خديجة:عمي بوبكر ها الصابون النيلا انا غنكبها فالبرميل

بوبكر ملاهي مع واحد السائحة:واخا ابنتي شكرا

تمات جاية سليمة هازة الغسول مطحون هازة جلال يلاه فايق غير شاف مو طلاح عليها هزاتو وزادت خلات سليمة دخلات ليهم الغاسول اما دينا غادية وكضحك مع ولدها وفنفس الوقت قطعات مع زوي ودانييلا ومعتز فابيل فيديو شافت عمها محجوب حط شي سياح جابهم من السوق دخلو حتى هما تبسمات بفرحة وهي تتهز راسها وتتشوف فالدار الضيافة لي تدارت غير هكاك ولكن فالاخير ولات خدمتها جلسو مجموعين وتافقو يطوروها وكلا واحد خدا مهمة حتى من الحاجة يزة والحاجة رحمة تطوعو يبقاو يدݣو المواد الطبيعية بحال الغاسول النيلة روح التعاون لي طاغية عليه لمة العائلة خلاهم يزيدو القدام وسط الدوار لي كان كلشي قاليها مغدير فيه والو الدوار لي تجمعات فيه مع راجلها حب حياتها وسندها الدوار لي عشقاتو اول محطات فيه رجليها وكان سبب فأن حياتها تغير ومندماتش هي مسمحاتش فاحلامها على ود الحب هي حولات احلامها لبلادها وحققاتهم فيها فعوض بلادات الناس هي دابا استاذة وفنفس الوقت خدمات بديبلومها فمشروع بابات راجلها لي رحب بعائلتها وليها بصدر حب بداو بالنية ولقاو اقبال ومشروعهم نجح حسات بشي يد تحطات عليها تلفتات كان خليفة تبسمات ليه حطات راسها على صدرو وهما واقفين كشوفو الناس كدخل وتتخرج وولدهم معاهم كبجغط الدوار شهد على قصة حبهم شهد على شلا احداث بينهم ضحات وجات وهو كان السند خلاها تخدم وخلاها دير بزاف دالحوايج لانه مكخافش من المرأة المثقفة بلعكس فرحان حيت ساندها وكان معاها باش يرد لها شوية من التضحية لي دارت وحتى هو داير يديه معاهم وكان جزء فالمشروع لي دارو والبداية لي بداو مجموعين

خليفة قرص ولدو فنيفو:الحب مشينا؟

دينا حركات راسها باه وزادو داخلين يكملو خدمتهم فمشروعهم لي كانت طاغية عليه اللمة العائلية ولي جمعهم فبلادهم وفوسط الدوار ديالهم🇲🇦❤️

#الــنـهــايـــة🧡✨