ضحكات ببهضة وفضحكتها حيرة.. ممصدقة كيفاش خيوط القدر جمعاتهم فطريق وحدة وكل من سمع حكايتهم تترد عليه بتنهيدة خفيفة وفبالها تقول ..كان مقدر ومكتوب.. لاعب على أحاسيس قلبي وعقلي غالب مغلوب ..مالقيتلو حيلة ، وماظنيتو هو مكتابي واخا نفكر فيها ألف ليلة وليلة ..
كان #مقدر_ومكتوب
….
حطات كاس تأتاي سخون بالفوار ديالو جنبها على الكوافوز وتخشات ففراشها تتكسل ..ضربات على الساعة تتشير للجوج تاع الصباح وهزات تليفونها تلف بيه بيما النعاس زار جفونها وكاسها المنعنع مونسها ..رشفة ورا رشفة حتا وصلها ميساج فالخاص.. دخلات ولقاتو من سيدة تتعرفها فالگروب كقارءة للقصص لي تتحط الشي لي خلاها تستغرب للحظات وهي تتقراه
…..: السلام سكينة
-كيف راك لاباس
-نسولك واش من ورا قصة نسيمة ماعندكش فبالك مشروع قصة أخرى
حطات كاسها وكتبات: كاينين جوج ..ولكن موحال نكتبهم مباشرة
….-: الله يسر اختي
-عجبني اسلوبك ا كنت بغيتك تكتبي واحد القصة هي مئة فالمئة واقعية لكن خيرها فغيرها
-مرحبا بالعكس
-لهلا يخطيك
-حتى تشوفي شي وقت مناسب ا نعطيك تلخيص جاتك ممكن تكون قصة مشوقة نقول ليك لي ديطاي جاتك عادية نديرو بناقص
-منك نتي وتكون عادية ويلي لا هههه
دابة مازال النعاس ماجاني.. إلى نتي بغيتي تنعسي غدا ونتكلمو ومنها تبداي ليا من الأول
-مرحبا ههه تانا النعاس طاير عليا ..باش بغيتي نبدا ليك؟
تسرحات فبلاصتها وكتبات :واخا الالة بداي باشما حبيتي .. شنو سميتك بعدا !؟
السنة “2004” بمدينة مراكش الحمراء ..مدينة النخيل وسبعة رجال ..مدينة بهجاوا الضحك والنشاط القشابة واااسعة والشمس فصيفها حمرا تتشوط .. المدينة المعروفة بجامع الفنا ومن لايعرفه داخل الوطن وخارجه.. ناسها السخيين والرياضات (جمع رياض) ديالها التارخيين، شي باقي فيه ماليه عايشين شي تباع للنصارة شي رجع دار الضيافة للسياح والمسافرين من مدن أخرى ..
فواحد منهم وبالضبط برياض أو دار الضيافة “كيف تايسميه البعض” “Walter”
..الدخلة بابها العريض والمنقوش مفتوح ووسطو فالريسيبسيو جليسات عصريين وسط شتلات النخل وقدام الپيسين للكليان فين يبرك ويستراح.. الصداع عالي فجهة الاستقبال من طرف سيدة راقية خمسينية هازة فيدها كانيش بيض وكل دقيقة تشالي بيدها العامرة دهوبات وفولارها الخفيف تايزلق على زغب راسها الاشقر وحلقها بغا يخرج بالغوات
…: ايوا عيطي ليهاا تجي درووك وتشوف هادشي لي عاملينو فيااا.. وااش داابة هادي خدمة
تمتمات البنت لي فالاستقبال تنهدن السوق وتبرد: مرحبا امدام الوافي مرحبا راها خاارجة غير تقضي واحد الغرض ودغيا تجي
ميقاات تنتفخ وتنش: صباحاتوو لله اربي غاتنزلي الطونسيو.. وامشي مشي جيبلي كاس الما سخفت ..فين بعدا الباليزات ديالي فاااين هومااا
….:لي مكلف ينزلهم لقاهم مازال ممجموعين وممنوع يمس شي حاجة من اغراضك الشخصية امدام
جاوباتها مغددة: وشني نجمعهم وننزلهم يااناا.. لا صافي صفات ..عيطييلهاا دااابة تجي انا متانعرفك لا نتي لاهادااك لي حداك هي لي معاها الحساب
…: و واخا امدام قربات توصل قرباات
…….دخلات مع الباب متبسمة للكليان تترمش وصوت الصداع فودنها .. حيدات الكاسكيطة على وجهها تتقطر بالعرق ووراها وفد من الگور سياح جايباهم بنفسها من المطار وبطرف عين تتشوف فالمخاسمة لي واقعة فالاستقبال، واخا عيات البنت ماتهدن السيدة غيرما تتزيد فيه ..نشات على شعرها وهزات كاس الما بارد كان مدوزو سرباي من حداها شرباتو تروي بيه حلقها وترجع بيه الصوت قبلما عندهم تتوجه..
كانت بنت فمنتصف العشرينات ..متوسطة الطول وزينها مراكشي عادي بحال جميع البنات.. العيون عسليين مجبدين البشرة ماهي بيضة ماهي سمرة وطولها متوسط ..الشعر شاتان ديكراضي افيلي.. القصة الدارجة فعصر 2004 والماكياج خفيف مكتافية بكحيلة فالعين زادت جادبيتهم وعكر بارد ..جسمها متناسق والواضح عليه رياضي مع فخاضها العراض مزير عليهم الدجين وفوقو تيشورت بيض سامپل وسبرديلة فرجليها.. تبسماات بجدية وفالسيدة شافت تاضحك ناطقة بصوتها الهادئ ونبرتها خفيفة تتريح كلمن سمعها
….:واحد السلام عليكم ..مدام الوافي
مدام الوافي: مكاينما مدام ما عبوش ..علياء حبيبة اش هاد الخدمة تاع لويل واش تتبغيو تجريو على الكليان ولا
طلعات حاجبها فالبنت حداها وقالت: حاشا ..والى كان بحال وجهك خسارة كبيرة لينا
مدام الوافي: ايوا شنو هادا لي تتعملو.. الوراق تاعي علم الله فين هوما الفطور معطلينو باليزاتي ممنزلينهمش وانا الطيارة عندي مع الربعة
حلات البنت فمها تدوي لكن علياء خنزرات فيها وقالت: سارة، طلعي للاشومبر تاع السيدة جمعي ليها المسائل تاعها انا جاية نتفاهم معاك
مدام الوافي: عصباتني والطونسيو طاح مانعاودلكش
علياء: أنا غانتفاهم معاها.. تفضلي بركي غانقولهم يجيبو ليك الفطور تال عندك الالة غير ارتاحي ليا نتي
مدام الوافي: هادي ماخدماش اعلياء سمحيلي لكن هادي ماخدمااش
زادت بسمات قائلة: أنا غانحلها غير ارتاحي
مشات السيدة نافخة الريش وتتنفخ تبرك.. ضارت علياء ببرود للبنت فالاستقبال وقبلما تكلم سبقاتها والدمعة فعينها
سارة: والله امدموزيل علياء حتا ماعرفت مالها كل مرة تسيف
ردت عليها بصوتها الخفيف ونبرتها الهادئة: فكريني شحال ونتي خدامة هنا؟
سارة: ش شهرين امدموزيل.. ولكن والله هي لي ماعرفت مالها تتقلب غير على الصداع واخا عييت نبرد كل مرة وشنو تتقول وحتا وراقها راهم فساكها كاينين شفتهم بعييني خاشياهم وسط ضمسة الفلوس
علياء: الكليان عمرك تحكمي عليه من شنو لابس ولا شحال فجيبو ..غير عقلهم وشنو تايقولهم واخا يملكو مال هارون.. فهمتي
غوبشات بعدم فهم: ل لا
علياء: لي بغيت نقولك هو كاين لي تايبغي يسلت بالخلاص باشما كان، ولا غير ننقصو ليه فشي حاجة واخا قرعة الما هي القليلة.. بحال هاد خيتي نيت
حلات عينيها مصدومة: دارتها بلعاني
زفرات تتنش على راسها باقا تتحس بالصهد: طلعي فلي داك البيت وسايسي معاها حتا تخرج .. إلى تعاكسات عيطي عليا نتصرف الأهم هو ماتجاوبيش معاها لاتجيب سبتها عليك
سارة: و واخا امدموزيل هي دابة
علياء: سي والتر اليوم غايرجع من سويسرا هو وشي ضياف وماخاصوش يلقا الهيلالة نايضة فالرياض.. سمعتي
حركات راسها: كوني هانية
علياء: أنا طالعة تكلفي نتي بهاد الكليان بيما دوشت وهبطت عندكم
مشطات شعرها بعدما نشفاتو مغيرة ملابسها بدجين آخر وتيشورت خرا ديما معاها احتياط فساكها.. هاكدا مولفة باش براحتها تتحرك خصوصاً أنها فخدمتها حماسية كل مرة وفين خاصها تمشي ..
الرياض كبير وواسع بديكور ميكس للعصري الموضغن والتقليدي المتوارت.. معروف بين زقاق مراكش وناسها ..شراه گاوري سويسري من زمان صلحو وغير فيه بزاف من حيت الديكور حتا رجع دار الضيافة خمسة النجوم فمراكش سمعتو سابقاه
..قبل عاماين بدات فيه علياء الخدمة كجيروم وزادت طلعاتو بتفانيها فالخدمة وصرامتها أحيانا.. بنت بمئة راجل فينما حطيتيها تلقاها وبعفويتها وطيبة قلبها دارت بلاصتها وصبحات عند الكل عزيزة ..نزلات للأسفل تزامنا مع دخول مالك الرياض لي عاد رجع من السفر ..الگاوري والتر، رجل خمسيني فالعمر لكن هيأتو القوية تتبينو مازال صغير ومن شكلو تعرفو اجنبي واخا تايتحدت بالدارجة مزيان ..حولات انظارها لكرااسي الاستقبال متنهدة براحة ملي لقاات السيدة صاحبة المشكل مشاات بحالها بلا زيادة فالمشاكل وبسرعة تبسمات ليه وقالت
علياء: سي والتر ..مرحبا بيك
ضحك حتا بانو سنيناتو المستفين: الغزالة علياء “باس ايدها تايمرر عينيه فوجهها بإعجاب كبير تجاهلاتو بابتسامة خفيفة تترمش” كون تعرفي شحال اشتقنا لشوفتك
علياء: ههه حتا حنا اسيدي على سلامتك.. كيف كانت الرحلة؟
والتر: متعبة شوية لكن صاڤا ههه كيف غادة الخدمة؟
ردت : في أحسن حال.. كان قبيلة مشكل بسيط مع وحدة من ليكليون لكن حليتو دغيا، غير كون هاني
عرض ابتسامتو وفيها تايشوف: ملي دخلتي لحياتي وانا هاني ..
ضحكات بحرج تتفاداه: ههه ايوا لهلا يحشمنا اسيدي ..غانمشي نرتاح واحد الساعتاين حيت عندنا سهرة هاد العشية
والتر: خودي راحتك، بيما ارتاحيت فلاشمبر ديالي.. قادوها ليا ياك
علياء: فالصباح علمتهم وحتا حوايجك غاتلقاهم سبقوك
تبسم باعجاب: تبارك الله عليك
علياء: ماقلتيليش شكون جا معاك؟
رد بهدوء: جات الطليقة ديالي بغات تشوف الأجواء هنا كيف دايرة.. وولادي بزوج لسقو فيها ههه غايبرزطوك هاد الأيام
ظلام الحال والرياض حلا وزيان ..اجواء الليل ماشي فحال النهار.. الأضواء والشميعات مزينين الطوابل موسيقى العود الهادئة والاطباق التقليدية المغربية هي رقم واحد فالمونو بالنسبة لوفد الگور لي عاد جا ..مستمتعين بالموسيقى كالم كيف تايحبو
حتا نزلات علياء من الفوق متغيرة تماما .. لابسة فستان اسود حد الفخاض وصباط طالون عالي بيج مصايبة شعرها لكن وجهها خلاتو كيف هو، العيون مكحلة وعكر فشفايفها.. وقت الخدمة وجري عليا نجري عليك مكاين غير دجين والتيشورتات لكن فاش تتخرج من خدمتها أو لما تتبغي تبرك وتستقبل الكليان تتأنتك الحالة وتقلبها طالون بدل السبرديلة.. خلصتها مبرعة متتخليها مخصوصة من والو ..اللبسة لي تشهاتها تشريها الاكسسوارات المخيرين تتاخدهم والريسطوات الفاخرين تتبرك فيهم.. متتفضل حتا حاجة على نفسها ومتتفكرش جوج مرات لي عجباتها ديالها، إنسانة طموحة بزاف وخدمتها واخدة الأولوية فحياتها
علياء: بونجوغ ههه (وقفات على والتر والعائلة ديالو بابتسامة مسلمة عليهم وقالت بلغة إنجليزية فصيحة) مرحبا بيكم، إن شاء الله تكونو مرتاحين
ردت طليقة والتر بابتسامة هادئة جالسة جنبو، سيدة مهلية فراسها راقية وجمالها هادئ
لوسي: علياء الغزالة كيف ديما وكلما تاديرو غزال ههه
ميلات راسها تاضحك بمجاملة: نورتينا مرة خرا احبيبة (شافت فالبنت لي باركة جنب لوسي، قد علياء فالعمر ومع الموسيقى تتمايل) باربارا ..اش خبارك ارتاحيتي شوية
باربارا: هههه سي ..الجو غزاال هناا تايحمق
علياء: مازال يزيد يزيان.. أنّا ماري مابانتليش فين غبرات؟
ردت تاضحك: خرجات قبيلة مع شي بنات وقالت غاترجع بالليل ههه حتا هي توحشاتك بزااف
علياء: بصحتها الالة ههههه
نطق والتر داير ليها مكان حداهم: علياء بركي معانا
علياء: لا غير بالصحة بلاما نزعجكم ههه
رد بسرعة: ابدا .. الموضوع لي باغي نتكلم فيه أصلا تايخصك غير نتي.. بركي
رمشات فيهم محتارة وجلسات: تفضل امسيو والتر ..ياك لاباس
شاف فبنتو وطليقتو عاد نطق وقال: نتي ماشي برانية علينا، بالعكس وحدة من العائلة وعزيزة بزاف، سوا على بناتي أو ولدي أو حتا طليقتي .. وانا صدقا معجب بيك بزاف واخا بلاما نقولها واضحة فعينيا
حمار وجهها وفيهم بتلاتة تتشوف ماعارفة ماتقول: مسيو والتر…
نطقات طليقتو متبسمة: بلاما تحرجي مني.. والتر فارقاتنا الحياة سنين هادي وكل واحد وكيف رسم حياتو، حاليا حنا اصدقاء فقط وتكلملي عليك شحال من مرة.. ومانكدبش عليك نتي عزيزة عليا بزاف وتستاهلي كل الخير
والتر: تنبغيك اعلياء ..وباش تعرفي صدق نيتي.. قدام بنتي وطليقتي بغيت نطلب ايدك للزواج ..وتكوني مراتي
جمعات النفس وناضت عاصرة فمها: مسيو والتر ..واخا نتكلم معاك على انفراد
شاف فطليقتو عاقدهم وناض تبعها لجنب خالي تايتنهد …خاف لايكون تسرع فكلامو وترفض لكن قبلما يتكلم سبقاتو وقالت
علياء: سي والتر..الله يخليك هاد التصرف لي درتي دابة زعجني وبزااف
والتر: قلت غير الحقيقة و…
قاطعاتو بصوت خافت وجدي فنفس الوقت تتحاول تهدن: الحقيقة متاتقالش هاكدا.. هادا المغرب ماشي لاسويس.. دولة إسلامية ومسلمين ماشي نصارا ..إلى بغيتي طلب مني الزواج تتكون بالأصول ديالنا ومن بابا.. زائد على هادا انا مسلمة ونتا نصراني هادشي فديننا حرام ومستحيل
جاوب بسرعة ماسك ايدها لكن نتراتها بسرعة: عارف.. وأنا مستاعد ندخل للإسلام أو من غدا
بان الضيق على ملامحها وقالت تترمش فجنابها محرجة من الخدامة والكليان
علياء: هاد الهضرة ماشي دابة وقيتها.. من بعد نبركو ندويو فهاد الموضوع
تنهد مقطب حجبانو: ماقلتي عيب ..نتسنا غدا جوابك ولكن.. فكري فعقلك ..فكري مزيان
علياء: نخليك
فاتتو تتحك جبهتها وحجبانها مقرونين غادة للإستقبال ..هزات كاس العصير تتروي ريقها الجاف ومرة مرة تمشي تسلم على الكليان وتعطيهم صوابهم.. الأغلبية أجانب معاهم تترتاح فالخدمة عكس شي مغاربة خاص ضروري ينوض الصداع فالاخير وهي لي تتوحل فيها وتنوض تفك وتسايس وترطب
..طلات على الساعة و جمعات الوقفة تنوض هي توقف عليها گاورية شابة بكسوة قصيرة فوق الفخاض والتليفون فودنها تاتهضر منو وضحك، الشعر زعر قصير شابهة شوية فوالتر لما شافتها علياء رسمات الضحيكة على فمها وعنقاتها باشتيااق
علياء: عاش من شاافك ههه
أنا ماري: (بالانجليزية) توحشتك بزاف بزاف بزاف
ردت مميلة راسها : حتا انااا ههه معامن تتهضري
حطات ليها التليفون فودنها: هاكي شوفي شكون تايسول فيك
علياء: هيلو
رد عليها صوت رجالي تايضحك والدارجة عندو معلكة: عليااء الغزالة ديالي ههه
ضحكات موسعة عيونها: طوبياس ههههه
جاوبها تايضحك والضحك حداه: براافو لي عاقلة على صوتي
علياء: مالك ماجيتيش مع البنات ..مازال ماتوحشتي المغرب
طوبياس: بففف الواليد خلاني غارق هنا فالخدمة مالقيت كيندير.. ولكن ضروري ندوز
بسمات كتر وانا ماري معنقاها جنب تتسمع المكالمة: مرحبا بيك حتا انا ماتسالني غير نقاد لك بروگرام مخيير
رد تايضحك بنبرة صوتو المرحة: شوقتيني من داابة هههه ..ايوا ..كاين شي Love
علياء: كاينة الطنجية والحوت حيباني اللولين ولخرين
بعدات أنا ماري تتأفف: واصافي صافي حتا يتاصل بيك ودويو
علياء: ههه الزقرامة ديال ختك بغات تليفونها
طوبياس: لاشافت لافاكتور غاتحمق هههه
ضحكات تتردد: غاتحماق ماشي تحمق ههههه تهلا فراسك.. شدي عنداك تموتي
قطعات راداه لساكها: نتوما فاش تتشدو الهضرة متتساليوش اف ولاپيل غالية.. هههه ايواا يو ميس مي؟
جاوبات متبسمة: أكيد آه..
حسات بيها ماهياش وحركات ايدها فوق حناكها باهتمام: مالكي، وجهك ماعجبنيش؟
علياء: والو، غير عييت هاد النهار “شافت وراها لجهة والتر بارك مع بنتو التانية” وباباك صدمني بشي خبار
أنا ماري طلعات حاجبها تتبسم وقالت: بيني وبينك ..متايعجبكش بابا ؟
علياء: باباك خدامة عندو ومن غير رب عمل عمري شفت فيه بشي نظرة خرا
هزات كتفها متبسمة بمكر: كوميم، ماهواش شاارف بزااف تاني.. مهلي فراسو واهم حاجة عندو الفلوس.. ممم ممم
ضحكات علياء فعزة سهوتها وقالت: تاعت الله نتي بنتو ولا عدوتو
أنا ماري: انا صاحبتك حااليا هههه
هزات ساكها تتسدو: نخليك اصاحبتي.. غانمشي ننعس قبلما يجري عليا المكي
أنا ماري: مكي؟؟
قالت بتفسير: باباا ههه بون دودو
خرجات من الرياض مخلية عيون والتر وراها ..تتقربقب بطالونها بين أزقة مراكش الضيقة تتمشا وعقلها تايمشي معاها ويجي.. حتا خرجات فساحة جامع الفنا المنورة.. الدنيا عاد بدات تزها وتعمر الروايح ياسلام وصوت الحلايقية والتقيتيقات تايتسمع من منين ومنييين .. جمعات النفس وهي تتبرك حدا مول الحوت وقف عليها الولد لي تايسربي وقال تايضحك بلكنة مراكشية قحة
….: الكورية تاعنا مرحبا.. اش حب الخاطر المعلمة
ردت : كيف ديما اعزوز
رد: هي اللولة المعلمة دروك يكون عندك.. اااراا لهنا واحد الطبسيل مشكل لزين تمراكش
ضحكات هازة تليفونها تتميساجا من msn مع صديقتها الوحيدة سارة
علياء: اجي إلى كنتي مسالية بغيت نهضر معاك
ردت عليها: فاش بيتيني اختي ياك عندك سهرة اليوم؟
علياء: خرجت، هاني فجامع الفنا تانتسناك حنا با لحسن
سارة: مول الحوت؟
علياء: هو هاداك ماتعطليش
سارة: ضروك نكون تما
حطاتو مضورة وجهها تتفرج فالناس غادين جايين گور ومغاربة من بقاع المغرب والهوا تمراكش كايدخل مع ريتها بحال النسمة ..ماهي إلا دقائق بركات حداها صاحبتها لابسة غير سيرفيت غليوضة وقدها فالطول
سارة:فين اعليلوة هههه عزوز ديير بحسابي
رد عليها الولد: مرحبا بتقيتيقات مراكش هي ضروك
علياء: اختي جايا بعجاجتك
سارة: فيا الهيمري هههه مال الزين ..كي دازت السهرة؟
تنهدات: عادي كيف ديما
سارة: الگاوري جا
علياء: مممم جا
سارة: مممم ومالكي معوجاها
علياء: جا هو وفاميلتو.. وطلب مني الزواج قدامهم
ضحكات تتهز: هالي قاالت الشوافة ههههه واخا الله يسمح ليا قلت اخرتها يغتاصب طواسلك ساعة طلع معاك راجل مايتسالوش هههههه
طلعات حاجبها بجدية: واش دابة بنت ليك تانضحك
سارة: واش بيتيني ندير نبكي هههه صاحبتي بات تديه مليونير مرفح وتولي سويسرية نعام المعلم رااه كون علمتيني قبل كنت نجيب معايا التقيتيقاات هههه
علياء: من نيتك؟ السيد گاوري نصراني هاوحدة.. أو شارف ..أو البوص ديالي والمكي والله لابغاه ليا
سارة: باك حالو ساهل.. والاسلام رااه شوية بشوية يدخلو لراسو ..اما قضية شارف فيناودي بانت فيه دوك المرفحين گاااعما تايشرفو ابنتي كيتنا حنا الحازقين
زفرات تترمش بحيرة: واخا هاكاك ..عمري ظنيتها فيه
سارة: نتي عارفاه حاط عليك العين وتتعجبيه من زمان باااينة للعماا.. وشكون اختي بحالك ..بناتو مفاهمين معاك ولدو الصغير نتي وياه بحاال الحلاقم ديما ملاسقين فاش تايجي للمغرب، وحتا طليقتو اوپن مابند ماهياش هنا.. بقات العگوزة والسوسة الله اعلم حالك معاهم تما فكيها
علات فيها حاجب: وابااااز دغيا لحگتي ليهم
سارة: ههههه مس علياء والتر
سكتات قالبة وجهها وفدماغها تتهندس وتفكر..
سارة: أنا من عندي مانزيدك هي الله يربح القرار تايبقا ديالك.. ولكن تانعرفك مزيان، وهادي ماشي هي دجاجة بكامونها
حط ليهم الولد طبسيل الحوت تايشهي وقال: هادا الحوت بقواامو هههه
سارة: الرضااا هههه
.
الحيرة والتردد لازم قلب علياء طول الليل.. عيات ففراشها الأبيض تقلب معنقة مخدتها وغير تتفكر وتخمم فعرض والتر .. الزواج عمرو كان من مخططاتها وعمرها حطاتو فالحساب.. عزيز عليها تعيش الحياة بالطول وبالعرض دير مابغات فحدود طبعا مدام الأمر متايمسش شرفها أو كرامتها الله يربح وفور الشيفور.. لكن فاش تطرح موضوع الزواج.. تحلو عينيها وعقلها ترفع.. واكترية الشخص لي طلبو منها ماشي كأيها الناس …
صبح الصباح وهي تتسد السمطة تااع الدجين قدام مرايتها الطويلة.. زادت فوق من التيشورت بوليرو بيض مشبك لبسات سبرديلتها خدات ساك طويل دارتو للجنب هزات تتليفونها والبزطام تتخشيهم فيه وخرجات من البيت نازلة مع الدروج لوسط الرياض ديالهم فين متواجدة شتلة ديال المياه ضاير بيها النوار وقدامو گلسة بارك فيها باها بفوقيتو والتسبيح فيدو..
علياء: صباح الخير بابا
هزات ايدو باستها وهو تمتم بحنية: الله يرضي عليك ابنتي
ردت باركة جنب الباب تتلبس سبرديتها: آمين .. هاني مشيت
لمكي: فين غادة ضروك بركي تفطري بعدا عاد سيري لشغالاتك
ردت: درت مع سارة نفطرو بزوج عاد ندوز للرياض
لمكي: ديك عزيوة تالدرب هههه
ردت كاضحك: راها تتسلم عليك
لمكي: يسلم عليها الخير والرباح
خرجات ماماها من الكوزينة بصينية اتاي.. تتشبهها شوية فالملامح وقالت ببشاشة:
تهلاي فراسك الحبيبة ديالي
علياء: الله يعاون دعيو معايا
ناضت خارجة وفودنيها دعاويهم ليها بالخير حلات باب الرياض ولقات ختها الصغيرة مسخرة من المخبزة وعاد نوات دخل
علياء: القطيطة صباح النور “باستها وقالت” نجيبليك معايا شي حاجة
قالت مبسمة بخجل: لي بغيتي هههه
علياء: ليبيت ليبيت ههههه ..باي
خرجات من الرياض تتأنت فمشيتها واخا بلا طالون عندها مشية ملتوية بعفوية دون تصنع ..حتا وصلات للشاريع عاد تلاقات سارة وكملو الطريق بزوج غادين والحتيت ففامهم
سارة: أنا يادلي إلى جيتيني فرييي.. قولي ليه مانقبل بهاد التزويجة حتا تكتب ليا الرياض فسميتي
ضحكات علياء وفيها شافت طانزة: اها زيدي هههه
جبدات عينيها: وعلاه شكون طلعو ليه من غيرك نتي.. وفااش جاتوو گااع السيد عندو لي يتحرق مايتم
علياء: دارهم بدراعو مالي انا لي درتهم ليه ؟ نهار يسمعوها بناتو يقجوني
سارة: ومالكي جاتك عجب.. نهار بيموت هاوجهي لاعقلو علك مازال ..معامن تاندوي اهياتا
ضارت تتقلب على علياء لي ماعرفاتها فين زادت ..شافتها واقفة قدام بووتيك تاع الحوايج تتمنضر فواحد الكسوة كاروات ابيض واسود حد الركبة ومعاها ڤيسط كمامها قصار واصلة للخصر ومضور عليها حزام جلدي رقيق.. وقفات حداها سارة مطلعة حاجب وقبلما تهضر سبقاتها علياء داخلة للبوتيك
علياء: اجي معايا
تبعاتها: فيين بدااا تاااني بزطامك تايحكك
وقفات علياء تتلمس توبها وعليها حماقت: شحال فنة
سارة: ايه فنااا “ضورات بطاقة التمن ومع قشعات 2000 درهم حمارو ودنيها وقالت: ضوري زيدي قدامي
علياء: غاتخلصيها نتي اختي
جبدات عينيها مغددة: 2000 درهم مالها حرير الدودة اختي
ضحكات على ردة فعلها وقالت بهدوء تتفشش فكلامها: حمقااتني اختي.. تتشبه لديك اللبسة تاع نور فسنوات الضياع عاد شفتها وتفكرتها هههه
سارة: ونتي نور اختي؟
علياء: غاناخدها ماسوقيش
سارة: دابة بيتشري هاادي بااش تاخديها للفطور عند باكريمو ضربي الحسوة على قليبك واشاتا تسوطيتي
علياء: عارضة علك الالة غير هنيني
طلعات حاجب: فين؟
علياء: لواحد الريسطو عاد تحل هاد الايام
وشهوتي نطل عليه
ساارة: فين جا تاني هاد الريسطو
علياء: فالرحبة القديمة الحبيبة علاما كانظن سميتو Les épices ههه وغير بلاما تخلعي الفطور على حسااابي
حكات عنقها تتحنحن: واللى هاكا يالله طلقي راسك المعلمة راه فيا الهيمري
علياء: هههه باااز
سارة: الإقتصاد زيين
دخلات قيساتها وعلى قياسها جات من داكشي.. الكريشة والو والفخاض عراض بينوها تتحمق، خدات معاها ليبا موس فالاسود لي ضروري تلبسها تحت أي فستان، متبعة الموضة وتايعجبها الجديد دائما.. ماصدقات سارة بلي سالات
حطات ديك 2000 باردة وسارة عليها تتحصر.. ماقالت غايخرجو خلاص حتا بانت ليها دازت جهة الطالونات تتقيس وتعاود غير مبالية للتمن تتشوف الحاجة عاجباها تتهز تقيس وسارة تتقلب فالاتمنة والطونسيو بغا بطيح ليها بالفقصة ..ماجراتها من داك المحل حتا حطات فيه 3000 الدرهم كاش منزلاها معاها من الدار ..لبسات لي شراتو من المحل وحطات الدجين والتيشورت مع السبرديلة فساك كبير خداتو حتا هو جديد وكل مرة ضحك فوجه سارة ..حتا وصلو للريسطو فين غايفطرو ..مدور بمحلات الزرابي الملونة فينما ترمات عينك تلقا الالوان ..طلعات للاطيراس خدات طبلة وبركات مبسمة والنفس دغيا تفتحات.. رمات عينها للخارج تايبانو ليها العيالات لي تايبيعو القفاف وطباگي تالدوم مع أصحاب محلات العطارة لي ريحتها تخلطات مع ريحة القهوة عاطيين مزيج ياسلام ..
سارة: داكشي لي بقا فالبزطام طبيه هنا حتا هو
هزات كاس الما مبسمة ببرود تتفقصها: وعلاش كانعرق عليهم بالسلامة احبيبة
سارة: يادلي أنا الحمارة تانصحك ايه عطيني اخيتي عطيني
علياء: هاكي هاكي بردي بهاد الكويس هههه طالع ليك الدم بحالا خلصتيهم من جيبك
سارة: اختي حوايجك تايعجبوني وبيت نتسلف عندك شي كسوة اليوم خارجة مع عبد المولى.. ولايني هي تانلبسهم تايجيني تأنيب الضمير نحشم نخرج بيهم هاكاك
ضحكات من قلبها: ههههه علاش اودي
سارة: هه نلبس كسوة ت60 الف ريال باش نركب فوق باشكليط تصاحبي وفين ايديني گااع.. ناكل الببوش عند لاعبوش خايبة حتااال المعاودة
علياء: ياااك هههه ايوا ماتسلفييش من اللول
سارة: وباش بيت نمشي بسيرفيت كي عزوة الدرب على قولة لمكي
علياء: راه سلم عليك هههه
سارة: يسلم عليه الخير نهار يعرف فلوسك فين تايمشيو غاترگديه حدا السبعة رجال ههههه
علياء: مانا على فالك اختي فطري فطري
وصلات لخدمتها وفايدها قرعة الما.. هزات كتابها طالعة للبيرو ديال والتر مباشرة دقات عاد دخلات وكيف توقعات لقاتو تما بارك تايراجع الحسابات فغيابو
علياء: صباح الخير
تبسم لشوفتها وناض عندها تايشوف: صباح النور ” باس ايدها وقال” صباح الجمال
ضحكات جارة ايدها بلباقة: ههه ميغسي .. تعطلت عليك يمكن ياكما لقيتي شي غلط؟
سد الكتاب جالس قدامها وقال: خلي علينا هادشي دابة ..كيف صبحتي؟
علياء: الحمد لله
والتر: البارح مانعستش الليل كلو وانا تانفكر فحوابك
نزلات عينيها تتجمع النفس بحيرة: حتا أنا.. كنت كانفكر فنفس الموضوع
والتر: أنا ناوي المعقول اعلياء عطيني فرصة ونبين ليك
علياء: المشكل ماشي فيك نتا .. ماشي غير اجي وتزوج .. الزواج مسؤولية تتخلعني وعمري فكرت فيه واخا عندي 25 عام.. والى دخلتو لدماغي بغيتو يكون بنية صالحة ماشي على ود مصلحة أو يكون مؤقت وونتفارقو هادشي حرام عندنا ومدايمش لمولاه.. وحتا انك دخل للاسلام غير باش تسما مسلم وتكون قادر تزوج حرام وممقبولش
والتر: أنا باغي نكمل معاك مابقا من حياتي مكانتفلاش.. وسنين وأنا فالمغرب عايشت ناسو عرفتهم حق المعرفة وزدت حبيت الاسلام وبغيت ندخل ليه ونولي مسلم عن قناعة
تنهدات مالاقية ماتقول: ايوا الله يكمل عليك بالخير
رد كايضحك بأمل: آمين ههه شننو قلتي.. علياء عافاك قبلي.. عمرك تندمي على هاد القرار
سكتات لثواني حتا رجع قال: شنو قلتي؟ قابلة
جمعات النفس وطلقاتها: قابلة ..غير هو الري والشوار تاع واليدياا ..إلى قديتي تقنعهم مانزيدك انا غيير الخير
خدا ايدها باسها كايضحك بسعادة وهي مكتافية ببسمة خفيفة فوجهو: هههه فرحتيني.. عمرك تندمي على هاد القرار تانواعدك
علياء: إن شاء الله.. غانوض نبدا لشغالي
والتر: شنو بان ليك نفطرو بزوج
علياء: فطرت مع سارة قبلما نجي هههه
والتر: ماعليش ههه نعوضوها فالغدا
علياء: اوك ..نخليك
خرجات من عندو نازلة للأسفل تبدا خدمتها وبيها بدات تتناسا الموضوع وتلفو
وعليه.. مرات اسابيع على موضوع الزواج.. قدرات بستة وستين كشيفة تقنع عائلتها واخا عيا معاها باها ترفض لكن قرارها كان واحد زادت تمسكات بيه ملي فكرات فالموضوع اكتر وحسابها فراسها تايضور..
….
..صباح ككل الصباحات فالجو التغيير الوحيد كان بأحداتو.. بداتها بحريق الراس غادة جاية فباب الرياض شادة الدوا مدوب فالما بايد والتليفون فايد تاتاصل فالطرونسيور لي المفروض يجيب ليها كليان مهم من المطار ..تفتح الخط بعد مدة هي تنطق معصبة والقردة طاالعا ليها
علياء: صبااح الخيير الشريف ساعة وانا كانتاصل ونتااا حراام واش تجااوبني
رد: كان الزحام الالة علياء سمحيليا ماسمعتوش
زيراات عينيها مغددة: فين نتاا دابة.. فين وصلتي؟
رد: هاني هاني قربت
الكليان مع الربعة غاتنزل الطيارة ديالهم نبغيك الجوج تكون قدام الصاالون تتسناني.. سمعتي
رد: سعمتك الالة كوني هانية
قطعات سارطة داك الما ومدات الكاس للبنت فالاستقبال لي قالت قصد أنها تهدنها
…: هي بردي امدموزيل علياء مايكون هي الخير
كززات سنانها: طلعو ليا الدم بهاد خدمة الزمر عندهم تفوو.. عطيني عافاك ديك الساشي
ردت: لي فيها تكشيطتك
تنهدات: آه ..غانخلي حتال المطار ونلبسها
مداتها لها: هاهي ..الدقة المراكشية غاتلقايها قدام الصالون حتا هي تتسناك كيف تخرجي يتبعوك للمطار
علياء: مزيان.. ملي نقربو نوصلو غانتاصل بيك تخرجوا الحليب والتمر كيف قلت ليكم للباب.. الكليان لي كراو الرياض مهمين وعرسان جداد مع الفاميلة تاعهم خاص نفرحوهم شوية
ردت مبسمة: كوني هانية
علياء: هاد كوني هانية تتركب فيا بوتفتاف ..الله يعاون
خرجات غادة على رجليها للصالون فين مولفة تقاد حالتها ملي تايجي عندهم شي كليان مهم ونخوة..
دارت ماكياج خليجي دارج فالموضة بوكلات الشعر ونفخاتو مزياان ..دازت ساعة عاد سالات خارجة من الصالون حتا تتصدم بالهونضة تاع الدقة المراكشية فقط لي واقفة حدا الباب.. الشيفور لي المفروض يجيب معاها الكليان فين هو؟ سؤال برد ليها الما فالركابي هزات التليفون تاتاصل بيه والفوار فراسها
علياء: واش تتلعب معايا نتا ولا شنو هادي هي الجوج عندك؟
رد عليها تايتمتم: ا ا هاني هاني جاي
غوتات مفقوصة: فين جاي فيين تجيك فالرااس، واش راكب على البيض خايفو لايتهرررس
رد: لالة علياء.. مكاين مانخبي عليك.. الطموبيل وقفات ليا اونبان
وسعات عينيها وداتها عليها سخنات: عاود شنووو قلتي
رد: ماتخافيش راه صونيت على لي يرومپلاصيني غير هو غايتعطل عليك شي ساعة هكاك
علياء: واسير الله يلگيهااا لييك نتااا ودوك لي مخدمينك وجه النحس “قطعات”
اععععع
..بغات تحماق بالفقصة غادة جاية تما والدوخة قابطاها.. مالقات تاحل من غير طلع فالهونضة تاع الدقة المراكشية دارو ليها بلاصة القدام مكسيريين وعاطينها للزهو فالطريق وهي راسها بغا يتفرق… اش دير وكيفاش تتصرف؟
وحلة غرقات فيها حتال ودنيها ،الكليان عددهم كتير أقل حاجة 25 واحد وعلى الأقل خاصهم ميني بيس يوصلهم لباب الرياض.. لاجونص معامن تتعامل خوات بيها وفقصاتها وماشي اول مرة ديرها غير هااد المرة وحلات ديال بصح ومالقات مازال جهد ولات غير تتسرط الريق واحلة والبكية بغات تهبط ليها.. خلات الدقة المراكشية برا المطار حيت ممنوع يدخلو ونزلات هي كي الحمقة التليفون فايدها تااتاصل بالشيفور تالفة تترعد وريقها نشف.. رجعاات صونات لمولات لاجونص تتصوني وتصوني عاادما جاوبااتها ..خبراتها بشنو وقع وبلي هي فالمطار مابقا والو للكلياان يوصل وماعندها كيف دير توصلو ..هي ترد عليها
واخا انا نتاصل بيه ونشوفو فين وصل
علياء: سربي عافاك رااه تلفت هناا وماعرفت مازال ماندير
قطعات كادور وتقلب على شي حل ..بانو ليها الشياافر قدام المطار تايتسناو وتوجهات ليهم تتجري..
من خلال خدمتها وبحكم أنها ديما داخلة خارجة للمطار مع الكليان ولات حافظة الشيافر غير من الشوفة ومالقات لي يعتقها من غيرهم.. دازت عليهم وواحد واحد لقات الطموبيلات صغار حتا إلى بغاو يساعدوها وكلشي عامر خاصو يدي الكليان لي مكلف بيه
شدات راسهااا بغات تفقص ولي بانليها فمجال خدمتها تاطلبو يعاونها ويشوف ليها شي حل .. كيف الحمقة ولات وبحال الدوخة لي صابتها فديك اللحظة عمرها شافت: الله ياربي اش هاد الوحلة
…: ااالبنت
ضارت بسرعة لقاتها سيدة مولفة تشوفها فالمطار جيروم حتا هي بحالها جاية توصل شي كليان وملي شافت علياء فداك الموقف تأسفات ومشات ناحيتها وقالت: هانتي سيري للبنت فالاستعلامات هي تعتقك
ردت بلهفة: شكون فين كااينة!؟؟
ردت: فالاستعلامات غير قوليلها مشكلتك وهي غاتعتقك
علياء: الله يرحم بيها الوالديين اختي
…..مع غاضور تجري بانو ليها الكليان جايين والضحكة راسمينها من الودن للودن كلهم گور سويسريين واللغة عندهم مخلطة بين الفرنسية والألمانية..
بالبهضة والفقصة ضحكات محاولة متبين ليهم والو وبدات فالترحيب بيهم واخا داخلها معالم بيه إلا الله.. داتهم لاستراحة حدا الباركينگ فين خلات الدقة المراكشية تتسنا.. كيف شافوهم تعاللاات وجوههم الضحكات والترحيب ودخلو وسطهم تاينشطو ويصفقو
..سلتات علياء من وسطهم تتجري بسرعة للمطار ولات كيف الحمقة باغة حل وخلاص ماوقفات إلا عند البنت فالاستعلامات وعيون المسافرين عليها..كونما السبرديلة والدجين مع التيشيرت لي لابسة كون قالو هادي غير عروسة وهاربة من دار العرس خصوصا المكياج والشعر لي دارت غير تاع العرييسات
علياء: عافاك اختي عتقيني دغيا الله يحن عليك
تبهطات البنت مخلوعة وقالت: ياك لاباس اختي ماالك
جاوبات تترد النفس وبزز باش دوات: قالت ليا ..قالت ليا واحد السيدة تقدري ضبري ليا على شيفور يوصل ليا الكليان.. وحلت اختي وحدة تاع الكلاب لاجونص معامن تانتعامل الله يتبعها للبلا خوات بيااا وماباقي عرفت اش ندير، الكليااان هاهو وصل خليتو ملاهي بالدقة المراكشية وخاصني فااش نوصلو للرياض سااعة واالو مالقيت حتا حااجة
ردت: بردي بردي غير بشوية عليك.. هاكي شربي بيما قلبت ليك على واحد النمرة
علياء: سربي الله يستر عليك
بدات تشرب وترعد حتا جبدات ليها نمرة عطاتها لها وقالت: هاكي.. هادا هو لي غايعتقك
بلهفة دوات: شيفوور؟
ردت: لا..هادا مدير ديال واحد لاجونص مختصة فالنقل نيت ..سميتو سلمان راه هو لي غايعتقك فينما كنتي وااحلة يضبر ليك على لي يصوڤيك
هزات دغيا تليفونها تتاصل بيه ومع كل رنة قلبها بالخلعة تايخبط.. طوال الانتظار تاقالت موحال واش يجاوب عاد تفتح الخط وببحة خشنة جاوب
….:وي بونجوغ !
فتحات عينيها بسرعة: سيي سلماان هاداا؟
جاوبها: هو هادا.. شكون
معايا؟
تنهدات مرتاحة نسبيا وبلاما تشعر قالت: وحدة تتغرق والى معاونتيها نتااا مشات فيها
ضحك بعذوبة تايسمع ليها وقال: مرحبا ههه..اش حب الخاطر الالة الغريقة
علياء: عتقني اخويا راني واحلة فالمطار بالكليان ، مالقيت لي يصوڤيني ولاجونص معامن تانتعامل خوات بياا وحصلت هنا معارفة ماندير
رد بهدوء: بردي بردي بعدا رخفي النفس مايكون غير الخير.. شحال هاد الناس وفين جا الرياض ديالهم
تنفساات وباقا الخلعة شاداها: رياض”Walter” راه جا حدا جامع الفنا معروف تما.. والكليان كلهم 25 واحد بيا انا 26.. واخا أنا ماشي مشكل جيت فالهوندة مع الدقة المراكشية غانرجع معاهم المشكل فالكليان شكون يوصلو ليا
سلمان: واخا.. عطيني خمسة الدقائق ونرجع نتاصل بيك
علياء: واخا اخويا هاني كانتسنى
قطعات وقالت للبنت لي عطاتها نمرتو: سيري اختي لهلا يحرق فيك شي عضم
ردت: هههه آمين راه ..صوڤاك بعدا؟
علياء: هاني كانتسنى فيد الله.. بسلامة عليك وشكرا مرة خرا
ردت: العفو اختي مرحبا
خرجات مع الباب تتشرب فقريعة الما حتا رجع اتاصل بيها وبسرعة جاوبات
علياء: امضرا !!؟
سلمان: وصيت على لي يجي عندك كوني هانية
طلعات النفس هم ونزاح على قلبها: شكرا بزااف اخويا لهلا يخطيك..
رد: هانية الالة.. الدري لي غايجيبهم سميتو عبد العالي راه طويل و شوية سميمر.. والميني بيس مكتوبة فيها سمية لاجونص ..**** عرفتيها؟
ردت: عرفتها ..والخلاص؟
سلمان: الخلاص حتال من بعد ونتفاهمو عليه الأهم دابة هو توصلو على خير ..ولنفرض گاع هربتي ليا بفلوسي ماشي مشكيل الالة مسامح ليك
ضحكات اخيرا قائلة: لهلا يجعلنا نهربو والا تهرب لينا حتا نتا.. شكرا ليك بزاف
قطعات مبتاسمة ووقفات تترد النفس وترتبها.. عاد كتافها خفافو وحطات الهم للجنب مصيبة وتفكات منها واخا خدمتها كلها مصائب كل مرة وشنو تايخرج ليها، لكن ربي ديما معاها واقف وتتحمد الله عمرها مع شي حد تحاشمات..
وصلات على كليانها الگور.. عرسان جداد بغاو عائلتهم يفرحو بيهم وقررو يديرو لهم رحلة للمغرب سياحة لهادا فكرات توريهم فالتقاليد المغربية شوية وتفرح بيهم كما يجب بالدقة المراكشية والتكشيطة المغربية وفالرياض التمر والحليب والنگافة والزغاريت.. لكن البلان لي وقع تلفها على القبلة وتتحمد الله دازت على خير ..حتا الكليان تلها مع الدقة فينما يساليو يبداو من جديد بدون ملل الشي لي خلاها تربح مزيد من الوقت وهي كاضحك وتشوف.. شوية ومقاليها راسها غير تسوس شعرها بغنج ووسطهم تدخل مهاوشة وجوادها يصبرو على كلشي إلا الدقة تمراكشيت اوهوي.. خدات الطاقية لواحد فيهم حيدات ليه الطقيطيقات وبدات معاهم تلعب وتغني والگور متفاجئين منها وتايضحكو..
نشطاات وحاولات معاهم تبرح واخا سبحان الخالق صوتها هادئ حنين ولو تبغي تعليه ماتقدر ضربات وغنات على قلبها حتا تفاجات عاد وقف قدامهم على الشاريع الميني بيس المعلوم حبسات تتأكد واش هو كيف قرات سمية لاجون وخرج الولد لي صايگ نفس المواصفات لي عطاها سلمان ضارت تتبسم للكليان وتشير لي هم يطلعو والدقة وراها مازال تتقتق
.
وصلو للرياض هي راكبة فالهوندة مع الدقة تمراكشيت والطموبيل وراها بمسافة قليلة ..لقات كلشي كيفما طلبات جوج نگافات ففم الرياض وسطهم العمارية والرجال لي المفروض يهزوها بلباس تقليدي اسود موحد والعاملين مقابلين مع بعضهم هازين الحليب والتمر فأواني تقليدية مغربية
.. وقفات حداهم مبتاسمة وتتشوف ياكما شي حاجة ماهياش أو شنو ناقص ..كيف نزلو السياح تعااالات الصلا والسلام على رسول الله وزغاريت من القلب.. العروسة بركات مترددة تاضحك هزوها بحال الملكة والدقة المراكشية دايرة خدمتهاا وعليها ضايرين طالقين الفراجة
الگور تبهرو وفرحو حتا ولاو غير يشوفو كلشي عجبهم والمفاجأة سراتهم كيفما علياء تمنات وماهبطات العروسة حتاا داخت ..عطاتهم سوارت السويت بنفسها تترحب وتعاود مشاو يرتاحو وهي للبيرو الفوق توجهات تترد النفس، بركات تتقاد حساباتها هي دخل عندها البنت لي فالاستقبال جايبة ليها ساكها وتتبسم بحماس
البنت: هاكي امدموزيل .. الصراحة عجبهم الحال الفرحة بات تخرج ليهم من العينين ههه
خداتو تتهز منو الاجوندة ديالها: الحمد لله أما كنا غانطيحو فمصيبة
ردت: دازت على خير وصافي. انا غير شفت سمية اجونص خرا فالطونسبور لي جابهم عرفت الشيفور خوا بيك
زمات فمها بعصبية: الله يخليه بالخلا من عندي.. ديك لاجونص صافي درت عليها كروا من اليوم.. تانعيا مانسامح وندوز والا بغاو يحشمو ديما خدمتهم لاروب مغايتهناو حتا ينوضو فيا الشيب
بأسف: الصبر امدموزيل اشبيديري كحل الراس مابقا يحشم.. ديك لاجونص فين لقيتيها بعدا؟
علياء: إلى كتاب معاها غانبداو نتعاملو ..وغير صدفة عطاتني واحد السيدة نمرت المدير ديالها، اتاصلت وقلت ليه هاكاين وها كاين هو يرسل ليا لي يعاونني
ردت: ولد الناس.. شتي باقي لي فيهم الخير
حلات لاجوندة تتكتب وقالت: كانظن تايعرفو الرياض ديالنا.. فهاد الضومين مكاينش لي يصوڤيك لله في سبيل الله.. التعامل معانا غايربحو حتا هو شحال من زرقة ونيت يهنيني من ديك لاجونص.. فكرتيني خاصني نصوني عليه
جبدات تليفونها تادوز نمرتو والبنت قالت: ادا نخليك حتا تسالي
حركات ليها فقط راسها وقالت ملي جاوبها: الو سي سلمان.. ياكما برزطتك؟
رد: لا لا خودي راحتك.. تكلمت مع الشيفور وقاليا وصلتو
علياء: بفضلك.. خيرك عمري ننساه وعلى هاكدا نيت اتاصلت
سلمان: مرحبا الالة اش حب الخاطر
علياء: لاجونص القديمة سديت معاها الكتاب الله يجعل شي بركة.. مانقدرش مازال نتحمل بحال الأعصاب تاع اليوم
ضحك بهدوء وقال: كانظن تادوي على اجونص ***.. لي كانت شاداها مرا و راجلها
علياء: هي هاديك
سلمان: عرفتها.. هوما فهاد الآونة ولاو ديما مرونين حيت راجلها عاد توفى الله يرحمو، قليل فين ولات تمشي للاجونص ..ايوا وبداو تايرونو من راسهم، تايخرجو الطموبيلات مجموعين هادا هنا جوج لهيه هادا خسرات ليه الطموبيل مكاين لي يرومپلاصيه.. وهاكا غادة حتا تايطيحو غمشكل الروطار بحال لي وقع ليك نتي البارح
علياء: عصبوني مانكدبش عليك ..وماكرهتش نولي نتعامل معه لاجونص ديالكم من هنا للفوق
سلمان: مرحبا نهار كبير هادا
علياء: الله يكبر بيك ههه خاص بعدا نديرو تمن يناسبنا بزوج ونعرف شحال حسبتي ليا اليوم
سلمان: للأسف حاليا أنا مكاينش فالمغرب كاين ففرنسا
علياء: يعني اش
سلمان: يعني تسناي عليا حتا نرجع عاد نقادو الكونطرا ديالنا على خاطرنا، نشوفو شروطنا وشروطكم حتا نتوما
علياء: ماقلتي عيب اسيدي ..من هنا لتما معامن نتكلم إلى حتاجيت شي طموبيل
سلمان: دابة سمية لاجونص عندك ..غانرسل ليك العنوان حتا هو سيري وقلبي تما على واحد سميتو مهدي ..راه واحد الكحيل بحالي وتاهو طويل هههه
ضحكات قائلة: واخا.. غدا إن شاء الله نمشي عندو غير رسلي دابة الرقم ديالو إلى حتاجيت شي حاجة هاد العشية
سلمان: اوك ..يالله نخليك، ساعة مبروكة لي عرفناك فيها
علياء: وانا اكتر اسي سلمان شكرا مرة أخرى
سلمان: مرحبا الالة..الله يعاون
قطعات متنهدة وقالت: وهادا ضوسي فضيناه
هزات ساكها وخرجات على رجليها غادة للرياض ديالهم وكل من تلاقاها تتوقف ضحك ليه وتعطيه صوابو
..دخلات قالت السلام وطلعات للدوش مباشرة غسلات داك المكياج لكن شعرها عجبها بداك الشكل خلاتو وهزات حوايج السبور تتلبسهم حتا سمعات تليفونها تايرن وجاوبات
علياء: الو
والتر: مساء الخير حبيبتي.. فينك؟
علياء: لقيتيني غادة للاصال دابة.. نتا فالرياض؟
والتر: سي ..وبغيت نشوفك حيت عندي الطيارة اليوم بالليل
هزات حواجبها بتفاجأ: بصح.. راجع لسويسرا
تنهد وقال: آه الوالدة ديالي عيانة شوية غانمشي نحلو ونيت نبدا نوجد فالأوراق تاع العقد، مكاين لاش نزيدو نتعطلو
ردت بأسف: مايكون باس عند الأم ديالك
والتر: شكرا حبيبتي ..غاتجي دابة؟
علياء: واخا الستة نكون تما
والتر: ماتعطليش عليا ..je t’aime
علياء: بسلامة
قطعات تاتبسم وخرجات لابسة وهازا ساك كبير للاصال حتا تلاقات بباها ففم باب الرياض وقالت بمزاح
علياء: افين المعلم ههه
قلب وجهو غضبان: حيدي عليا
غوبشات تتمسكن: ياك ابابا
لمكي: انا البنت لي ماتسمع كلامي متانهضرشاي معاها
جمعات النفس وباستفسار قالت: دابة غير فهمني اسي لمكي مالك مع السيد.. ياك نتا النهار اللول لي شكرتيه ليا وضبرتي ليا على خدمة عندو وراه السيد زين والسيد معقول وهادي وهاديك .. جيتي تال دابة فاش بغا يتناسب معاك وكرهتيه
خرج عينيه فيها: حييت قدي ابنتي.. مانتي تتحبيه ماانتي من سهموو ومانسمحش ليك إلى تزوجتي بيه طمع
ردت: طامعة آه.. طامعة حتا انا نستقر وندير حياتي مع وااحد لي يفهمني ويخليني نعيش حياتي بالطول والعرض وكيفما بغيت.. مااشي يحطني وسط ربعة الحيوط ويسد علياا ..اللهم هو تانعرفو سنين هادي وعمرو تبسل عليا ولا شي حاجة محتارمني وعائلتو حتا هي الله يعمرها دار.. والا واحد معقد فراسو ويبغي يعقدني معاه حتا انا.. شنو السبب لي غايخليني نرفض؟
لمكي: كافر هااادي معمراتش ليك العين.. داابة اناا لمكي ومن لايعرفه بيتيني نتناسب مع نصراني سميتو واترر.. واطررر نييت
تنهداات تتبرد النفس وقالت: إلى على هاكاا ابابا راه اليوم مشا يسلم وسميتو انا لي ختاريتها ليه گاع
لمكي: أنا هاداك ماعجبنيش هي ماعجبنيش ..سااكت غير على وجهك نتي ولكن من هنا للقدام توقع شي حاجة دنوبك على راسك
هزات ايدو باستها مبسمة وتاطمنو: كون هاني اسي لمكي.. بنتك فران وگاد بحومة راك واالد وعارف راسك اش والد
رمش بنص عين: هاحناا انشوفو هادشي ديالك فين بايخرج
علياء: ههه بسلامة عليك ..اليوم يمكن نبات فالرياض
لمكي: علاش !!
علياء: جا واحد الكروب ريزيرفاو الرياض كامل راه قلتها لك.. هوما عرسان گور مع عائلاتهم وبغيت نقاد ليهم ليلة مغربية من داكشي ..ايوا غالبا مغانساليو حتال ديك الحضااش ولا نص الليل اللهم نبات فالشمبر ديالي
زفر وقال: لي بان ليك ..خلي تليفونك شاعل الله يرضي عليك
علياء: آمين قولها معاك لماما ملي تجي
قال واخا وخرجات غادة للاصال ..
شيرات لطاكسي وقف عند رجليها ركبات وقالت
علياء: ديني لماجوريل عافاك قدام ليدي فيتنس
حرك راسو وزاد غادي للوجهة لي طلبات..لاصال كبيرة تما فيها جهة النساء بوحدها جهة الرجال بوحدها والوسط ميكس بينهم ..الرياضة تتجري فدمها ضروري تخطف وقيتة تمشي ليها بحكم أنها عاشقة للسباحة والايروبيك والفتنس وتتختار الوقيتة فين تايكون الكوتش راجل حيت تايخدم معاهم من نيتو كتر من الكوتش مرا تتخفف عليهم الخدمة ومتتحس براسها دارت شي حاجة والو ملي تتكون ..
وصلات وهبطات مخلصة الطاكسي وللاصال داخلة ..سلمات على لي تتعرف تما معرفة سطحية فقط وبدات تريني ..منها تقاد جسمها لي تتحماق عليه ومتتبغيش تشوف راسها غلاضت ولا الفورمة عندها خسرات.. ومنها تخوي راسها من ستريس الخدمة وتنسا شوية ماوقع
.. سالات ودوشاات تما نيت عاد خرجات لابسة دجين سبرديلة مع شوميز حمرة قصيرة شوية.. توجهات هاد المرة للسمارين ..عند خياط معروف تما تاتحمقها خياطتو وليصوراتها ليه تايفصل ليها بحالها فوكو گوبي
علياء: سي العربي
العربي: أهلا أهلا بلالة عليا ..كيف غادة مع الوقت
ردت مبسمة: الحمد لله لسيدي.. امضرا وجدتيها؟
العربي: هاهي “مد ليها ساشي فيها كسوة سوداء مطوية” شوفي وردي عليا الخبار
بدات تخرجو تقلب فيها بحماس: ههه إن شاء الله تكون بحالها
العربي: ههه فين شفتيها بعدا العفريتة شكلها مضايرش فالسوق
علياء: راك عارفني مبلية بالاغاني تاع شادية وفاتن حمامة وحتا لبسهم تبليت بيه ههه شفت شادية لابساها قلت والو نديها لبا العربي يخرجلي بحالها ..الصراحة غزاالة
العربي: ايوا شنو تانلعبو هنا
علياء: حاشا خدمتك ديما متقونة “هزات بزطامها وخلصاتو” بسم الله
العربي: الله يخلف
علياء: خليت ليك الراحة ..تعجبني شي كسوة خرا نجيبها لك
العربي: مرحبا
رجعاات للرياض باغا غير ايمتا تقيسها وتشوف شكلها عليها.. كانت ولازالت عشاقة للبس والانتكة والتاويل..
دخلات مع بدا الحال شوية يضلام سولات على الخدمة شافت الكليان واش مرتاح وكلشي هو هاداك عاد طلعات للشومبر تتغير حوايجها بالكسوة لي خدات هو يتدق عليها الباب تاع الشومبر
علياء: شكون
والتر: أنا.. ندخل؟
ردت بسرعة: بلاتي بلاتي
سدات الطالون قادات شعرها بايدها وناضت تتشوف فالمراية..جاتها هي هاديك غزالة وعلى جسدها احلى، حلات الباب مبسمة وخرجات عندو ماباغاهش هو يدخل والموظفين تايشوفو
علياء: هاني ..ننزلو لتحت غاتكوون السهرة بدات
هز ايدها باسها حتا تحرجات: جيتي تتحمقي.. وأصلا ديما محمقاني
ضحكات بصوت خافت: الله يكملك بعقلك اش بغينا بشي حماق.. ايمتا الطيارة
والتر: بعد ساعة إن شاء الله
علياء: دابة إن شاء الله ولات تتخرج من قلبك حيت وليتي مسلم.. ماشي كيف شحال هادي ياك
والتر: أكيد ..والحمد لله فرحان لي دخلت للإسلام ..حتا من سميتي القديمة نسايها ولي تعيطي ليا ..سالم ههه
ضحكات هازة راسها وقالت: سليم هههه ماشي سالم.. عجباتني وهي لي جات فبالي ملي سولتيني ههه
والتر: خاصني شوية الوقت نولفها
علياء: ماعليش .. سمحليا نشوف الكليان ونرجع ععندك
دخلات للصالون الكبير عندهم بالرياض فين تايتقامو السهرات ..دازت على العرسان سلمات ورحبات بالعائلة ووقفت تتسمع منهم كلمات الغزل والشكر محافظة على بسمتها الراقية تترحب وتعاود..
مشات للمطبخ بعدها كلات لي بات مشبعة كرشها عاد هزات جوج كيسان كوكتيل بدون كحول وتوجهات عند والتر لي كان حدا البيسين واقف تايهضر فالتليفون بالالمانية ..ماقشبلت من كلامو والو ووقفات تتسناه حتا سالا عاد مداتلو العاصير وقالت باهتمام
علياء: كيف بقات
تنهد بأسى: شوية
علياء: الله يشافيها
والتر: آمين.. شنو بان ليك تمشي معايا؟
رمشت بتفاجأ: لسويسرا؟
رد : آه.. كاينة واحد الحفلة تما هاد الأيام سميتها la fête blanche ..عرض عليا صاحبي وأصر نديك معايا يتعرفو عليك
ضحكت قائلة: وعلاش سميتها بالضبط la fête blanche
غمزها: تمشي وتعرفي
علياء: تتشوقني زعما
والتر: غانتوحشك اللهم نديك معايا
سكتات شوية وبجنب عينها شافت فيه وقالت: وها أنا مشيت.. فين غاتسكن؟
رد: معايا “شافها هزات حاجب وقال” كاينة أناماري فالدار وباربارا حتا هي ..وطوبيااس حتا هو غايجي، كوني هانية
عوجات فمها تتفكر فالفكرة: خلي حتا نشوف.. نبدا الوراق نيت لي غايخصوني تما باش بابا يخليني
رد بسعادة: إن شاء الله يوافق ههه ..صونطي
…
شردات ببسمتها تتفكر كلامو على سويسرا وهو تايزيد يشوقها كتر وكتر.. مرت الليلة بسلام باتت تما ووالتر شد الطيارة ورجع لبلادو.. وطيارة خرا ناضت فوق راس المكي باش يخليها تمشي تلحق عليك.. تاضور من هنا يدوز للهيه وماوافق حتا مرت 10 ايام بالتمام
..كل يوم تبكي وتغبن بلي خاصينها وراق للعقد تديهم حتال سويسرا فرقات ليه الراس وقال ليها سيري ودنوبك على راسك
..جمعات حوايجها وتتسول على الطقس كيف داير مرة تهز الكساوي مع المونطويات مرة ضور ليها فالخوا وتخرج تشري الجديد فقط ..توادعات مع والديها بالبكا والتوصياات وصلها المكي حتال المطار و طلعات للطيارة قلبها تايضرب والتوتر عليها غالب.. غادة لبلاد غريبة وإحساس أغرب تايراود كلمن تايغادر التراب الوطني لوطن آخر..
لقات والتر مع أناماري فالمطار تايتسناوها شي لي خلاها تزيد ترتاح.. سلمات عليهم وطلعات عاطينها للحتيت فالطموبيل حول كيف كانت الرحلة وواش عيات مرة تجاوب مرة تتلاهاا مع المناظر لي تتشوف من السيارة
….وقفو قدام فيلا كبيرة فحي راقي مضخم ماشافت بحالو إلا فالافلام الأجنبية ومابغات تبين انباهرها قدامهم
اناماري: زيدي احبيبة مرحبا بيك فلاسويييس ههه
ضحكات نازلة: ههه شكرا ..عييت والله
والتر: من لأفضل دخلي ترتاحي حتا تفيقي ونبركو مجموعين.. طوبياس جاي فالطريق
أناماري: اجي نديك للشومبر تاعك
علياء: واخا
خداتها لغرفة حدا غرفتها وعلياء طاحت عليها الحشمة والتزنيگة ماقدرات حتا تبرگگ فالدار فخاطرها والعيا عليها غلب.. حطات الساك حيدات المونطو وتلاحت تترتااح وتنهد ..لكن مع بدات تسد عينيها رن تليفونها بنمرة سلمان لي غاب عن بالها طول هاد المدة وعاد دابة تفكراتو وجاوبات بابتسامة عيانة وصوت مرخوف
علياء: الو
سلمان: واحد السلام عليكم
ضحكات فعز عياءها وقالت: وعليكم بمتلها
رد باستفهام: جيتيني بحالا فيقتك من النعاس لا؟
علياء: عاد ناوية ننعس ههه اش حب الخاطر اسيدي
سلمان: ايوا الالة بغيت غير نسولك إلى مازال باغا ديك الكونطرا انا راه رجعت للمغرب
ضحكات وقالت: وانا خرجت منو ههه
سلمان: تادوي بالمعقول ههه لاعبين غميضة دابة واحد يدخل لاخر يخرج
علياء: ههه ايمتا وصلتي نتا.. على سلامتك بعدا
سلمان: الله يسلمك، رجعت البارح فالليل ..نتي إن شاء الله ايمتا راجعة؟
علياء: مغانطولش بزاف ويمكن هاد الأسبوع نيت ..بعدها غاندوز عندك مباشرة للاجونص
سلمان: مرحبا بيك
بسمات تتحك عينها بالنعاس: ميغسي
سلمان: يالله الالة نخليك ترتاحي ..تصبحي على خير
علياء: ونتا من اهلو
حطاتو جنبها وتكات تنعس هو يبدا يسرسر عاود..تأففات وهزاتو مجاوبة
علياء: الو
ردت عليها مها: الو علياء ..بنتي وصلتي
علياء: آه اماما الحمد لله وانا دابة دخلت لبيتي نرتاح شوية
قالت بخوف عليها: كيف داير الجو تما يااكما البرد بزاف
نغزها لمكي كايهمس: سوليها ايمتا بات ترجع اشمن جو
علياء: الجو عادي وكيف نسالي شغالي غانرجع اماما كونو هانيين
ردت: الله يجيبك على خير ابنتي حضي راسك حضي راسك ..وزيري تاني على فلوسك راه تما الحوايج غااليين
علياء: باش عرفتيها ههه
لمكي: اااري لهنا ..علياء
زيرات عينيها من صوتو العالي وقالت: نعام المعلم لمكي
رد بصرامة: شكون معاك فالدار
ضحكات قائلة: معايا أناماري بيتي حدا بيتها
لمكي: اها وداك ااسمو فين هو؟
علياء: سليم ابابا.. راه خرج مشغول بزاف مع مرض الأم ديالو محال گاع واش نشوفو
لمكي: ايوا ردي البال لراسك
علياء: واخا ابابا ..بسلامة عليك غانقطع
لمكي: اصبري فين غادة
تأففات باغة غير تنعس: راه التليفون غاطلع ليك غالية.. واخا النمرة بقات هي هي راكا عارفها كاضوبل إلى خرجتي من المغرب ههه فاش تلقا ميزانية فالفاكتورة ماسوقيش
لمكي: الله يرضي عليك ..الكبدة ابنتي الكبدة صعييية ..تهلاي فراسك
علياء: واخا ..الله يعاونك
قطعات وطفاتو فمرة حاطة راسها على المخدة وفسبات مشاات.. مافاقت إلا بعد مرور ساعتين ودقات خفيفة فالباب بعدها تحل ودخلات منو بنيتة صغيرة دو التمن سنوات ..طلعات حداها تاضحك بخفوت وباستها فحنكها حتاا تململات تتهمهم
علياء: زگااي
ردت بصوت طفولي حلو ولغة انجليزية: ههه فيقي فيقي
ضارت ليها تاضحك باستها وهزاتها معاها خارجين للجلسة وسط الڤيلا لقات اناماري باركة تتكلم مع باربارا لي عاد وصلات مع بنتها .. وقفات سلمات عليها وبركات قدامها علياء هازة البنيتة على رجليها وحناكها بالنعاس مزنگين
باربارا: ارتاحيتي شوية احبيبة
علياء: سي الحمد لله.. المدينة جوها زوين سعداتكم ههه
اناماري: غدا ونخرجك تساراي فيها.. واخا الصراحة بال مافيها مايتشاف من غير الخصورة فقط ههه
ضحكات ليها برقة: ماشي مشكل.. طوبياس مغايجيش؟
باربارا: كانظن حتال غدا عاد غايحضر للحفلة ديال كارلوس.. مبرزط مع الخدمة هاد الايام حيت بابا مشغول مع جداتي
علياء: إن شاء الله تولي بيخير
اناماري: كانتمنى ..
ناضو للكوزينة مجموعين تعاونو على العشاء وهوما تايتكلمو ..دخل والتر باس علياء فايدها وهز حفيدتو كايلعب معاها عاد بركو فجو مرح تايتعشاو، بعدها كل واحد لبيتو ناض
..تقلبات ففراشها بملل وناضت للشباك منو تاطل ..الهوا فيها ضارب ومناخ هاد المدينة أنعشها بهدوءو ونقاوتو ..مدة وهي على هاد الحال حتا عيات عاد رجعات لفراشها نعسات تترتاح ليوم غد
….
أناماري: آلياا.. يالله انا برا كانتسناك
حلات باب البيت وخرجات لابسة كسوة باكمام صوفية مرخوفة من الفوق على اكتافها نازلة شوية ومن الاسفل ضيقة حد الركبة باللون الاسود والدهبي.. لبسات تحتها ليبا موس مع سبرديلة قصيرة طلقات شعرها وهزات ساك اسود طويل خارجة عند اناماري لي قدام الباب تتسناها
علياء: سمحيليا تعطلت عليك
اناماري: نن ماعليش
علياء: المدينة غزالة
أناماري: مممم.. هادئة بزاف هادشي علاش شرا فيها بابا
علياء: بصح
بقات مع اناماري تتكلم وتشوف فالارجاء ..اختلاف جدري وواضح بين مدينة بال وبين مراكش المغربية، البيوت متفرقة كلها ودارو متفرقين بينهم جرادي ومنينما دزتي كاينة الخصورة والورد والأشجار والناس تايتمشاو ويديرو الرياضة..السيارات والدراجات النارية شبه منعدمة وطول ماهوما تايتمشاو مصادفات تاوحدة من غير شي جوج لي مبلاصيين قدام ديورهم ..داتها لجسر تحتو نهر فاصل بين مدينة بال ومدينة أخرى ..وقفات تاضحك عاجبها المنظر واناماري هزات كاميرتها الصغيرة تتصورها وتوصور معاها ناسيين الوقت حتا تاصل بيها والتر يرجعو استعدادا للحفل ديال صديقو كارلوس
ليل الليل وتزينات السماء بغطاءها الاسود متناقضة مع موضوع الحفل لي على ودو جات علياء لسويسرا ..
توقفات سيارة والتر وهي تتقاد عكرها الوردي قدام المراية حتا فاجأها ملي خدا ايدها بين ايديه وعطاها علبة مجوهرات مربعة الشكل.. بسمات بسعادة من عيونها تتفتحها
علياء: شنو هادي
رد ضاحك فوجهها: حليها وشوفي
فتحاتها وكانت ساعة يد فخمة تتبري وكلها عقيق أصلي باللون الأبيض ..حلات فمها قبلما تنطق خدا يدها ولبسها ليها بعدما باسها بجنتلمانية وقال
والتر: جاتك غزالة
ردت بأدب حمقاتها الساعة وعلى يدها الناعمة طلعات أحلى: عدبتي راسك ههه شكرا
والتر: تستاهلي احبيبتي ولا حاجة تغلا عليك.. نتمنى تكون عجباتك
علياء: غزالة ..دوقك ديما رائع
رجع باس ايدها وخدا علبة تانية حطها ليها فساكها تايتبسم: هادي للنسيبة كهدية مني ..يالله ننزلو
اكتفت بابتسامة وهو هبط بكومپلي ابيض.. حداء ابيض لامع وحتا من الپابييو بيضاء.. فتح عليها الباب وهبطات مسبقة طانوها باللون الابيض.. انيقة رقيقة وناعمة خلات عينيه ماينزاحوش عليها.. لابسة سالوپيط بيض لاسق على طايتها توب ايلاستيك نازل من الكتاف مع باپييو جنب الخصر ونص ضهرو عريان فيه ورييدة كبيرة من الوراء ونازل منها ديل مشبك طوييل..
زيناات عيونها بكحل بارزة عسوليتهم مشطات حواجبها وشعرها صايباتو بوكل وبدات بايدها تقادو شدات فوالتر متوترة وتتشوف الناس داخلة كلشي لابس الأبيض رجال ونساء
علياء: صافي ندخلو !؟
رد مطمأنها بإيدو: انا معاك احبيبتي علاش هاد الخلعة
ردت برجفة: ماعرفتش .. يمكن حيت أول مرة نحضر هاد النوع من الحفلات وماتانعرف حد تما
طبطب على ايدها داخلين وهي غير تترمش ماقادة حتا تركز فالمكان من التوتر
والتر: غاتعجبك تيقي بيا، وحتا الأصدقاء ديالي ههه
علياء: ولكن علاش بالضبط الأبيض !؟
جاوبها بابتسامة داخلين: لان كارلوس صاحب الحفلة قفل أربعين سنة.. وفالكنيسة لما تايقفلها تاايعاود الاعتمادة ديالو فالكنيسة، بحال كيفما دار فأول يوم تزاد فيه.. هادا علاش دار هاد الحفلة وموضوعها الأبيض تمنيا أن أيامو القادمة كلها تكون بيضاء..فهمتي
ردت بابتسامة: فهمت ..فكرة زوينة منو
شد فيها نازلين الدرج: بشوية عليك
نزلات بالمهل داخلين للجردة عاد تفتحو عينيها وفمها تسد بصدمة ..رمشات برموشها العلياء وضربات قلبها تزادت مبهورة كل الانبهار بلي تتشوفو
..دون مبالغة كان بيت كارلوس اشبه بالقصر ..كلمة فخم صغيرة فحقو وغير الحديقة الخلفية خلاتها توقع فحبها من النظرة الأولى وعلى حد العين وااسعة ..المعازيم كانو مايقارب 200 شخص منتاشرين لمجموعات وكارلوس بلباسو الانيق والابيض واقف فطاولة جنب المسبح كل مرة يجي يبارك ليه واحد وغير ضاحك وفرفوش مع راساتو
..البوفي عامر بجميع انواع المشروبات الكحولية ..وحداه بوفي اخر للأكل مشكل وملون تفتح ليه العين، البيسين كبير جدا وسط الحديقة وعامر ببالونات بيضاء.. الورود بيضااء والشرائط لي على الطاولات والأعمدة الضوئية بيضاء ..الاواني بيضاء ولي سيرڤور مكتاسيين اللون الأبيض كحال جميع المدعوين وحتا كؤوس الزجاج بيضاء متتبينش شنو فالكاس حتا تاطل عليه..
كانت حفلة برجوازية بامتياز عمرها بحالها شافت ولا تشوف وبعض أنظار المدعوين توجهات ليها حتا حشموها وقالت بهمس فودن والتر
علياء: غانمشي نشرب
ابتاسم ليها وقال: تما كاين غير الشراب ..اجي معايا عند اناماري انا غانوصيهم يقادو ليك عصير طبيعي
علياء: واخا
رافقاتو للطبلة فين متواجدة بنتو وولدو طوبياس.. شاب تايجيب شوية فباه شهب وعويناتو زورق أنيق ومرح تتلقا معاه علياء راحتها واخا صغر منها بتلت سنوات.. سلمات عليه بالتعناق رحب بيها واعتادر على البارحة لي ماجاش وكملها معاهم ضحك حتا وقف عليها والتر ماد ليها كاس عصير الليمون وهو هاز كاس فايدو ماعرفاات شنو فيه
والتر: تفضلي
علياء: شكرا
حطاتو قدامها تتمايل شوية مع الموسيقى والضحك حاضر بينها وبين ماري وطوبياس حتا بدا والتر يشير ليها.. مشات لعندو وبدا على معارفو وأصدقاءو يعرفها واحد واحد وهي برقة تتسلم وتجاوب بالفرنسية تارة أو الإنجليزية تارة أخرى حيت متتفهمش الألمانية وهو بيها مفتاخر وكل مرة يبوس ايدها ويعطيها من الغزل والابتسامات مايطيب القلب حتا وقفات عليهم سيدة مسنة
بفستان كم طويل ابيض كلون شعرها ومعاها زوج بنات شابات بفساتينهم البيضاء كدالك ..سلم عليها والتر بالالمانية وقال كايعرفهم على علياء
والتر: هادي خطيبتي علياء، حبيبتي هادي مادام جيس صديقة الأم ديالي، وهادو بناتها
علياء (بالفرنسية): مساء الخير ههه تشرفت بمعرفتك امدام
جيس: أنا اكتر الحبيبة ديالي “تأملاتها بلطف وطيبة قائلة” غزالة وعيونك بريئة وحلوة.. ڤالتر ختار وعرف اش ختار
ضحكات حشمانة وقالت: عيونك الغزالين امدام جيس ههه
ردت: مايكونوش اجمل من عيونك.. لكن حاسة أنني شايفاك فشي بلاصة غير ماعقلتش فين بالضبط
علياء: فعلا فايت تلاقينا، كنتي جيتي عندنا للمغرب وبركتي بالرياض تاع والتر..وانا لي مقابلاه تما فين شفتك أول مرة ههه
ردت بتدكر: آااه.. سمحيلي الذاكرة عندي بعتراتها السنين
علياء: ماشي مشكل ..نجيبلك تشربي شي حاجة؟
جيس: شنو واخدة نتي؟
وراتها كاسها: عصير برتقال !
ردت تاضحك: ادا جيبيلي بحالك
علياء: مرحبا
مشات قالت لسيرفور يقد ليها عصير تسناتو حتا وجد وخداتو ليها: تفضلي
جيس: شكرا احبيبتي ..
علياء: العفو ..نتي صديقة ام والتر ياك؟
تننهدات بأسف: آه ..راها مسكينة مريضة كل مرة تمشي للسبيطار
علياء: مسكينة.. الله يشفيها
جيس: العمر غادي وتايهرب.. وهي فاتت 100 سنة وعيات من الدنيا ..تعرفي فاش كنت فسنك، كنت متزوجة وقاهرة راسي فالزواج والولاد.. مانبغيكش تغلطي غلطي خوديها مني نصيحة، عيشي حياتك بقواعدك.. وقلبك خبيه للي يستحقو فقط
بسمات فوجهها: ربي عوضك ببنيتات غزالين
جيس: فعلا ..قوليلي، ڤالتر كيفاش تايتعامل معاك.. مازالتو عصبي وتايتسرع!
ضحكات على كلامها وجيس تتسناها تجاوب: عصبي فالخدمة شوية.. لكن تانحسو حنين وتايفكر فالغير بزاف
وقف عليهم مبتاسم هاز مشروب فايدو: هااني.. كنتو تتكلمو عليا ههه
ردت مدام جيس مبسمة فوجه علياء: ههه عندك un Petit Bonbon تهلا فيها
علياء: بون بون هههه!
شاف فعلياء بضحكة مستغربة وقال: علاش بون بون
جيس: حيت حلوة بلا قياس وتتدخل للقلب بسرعة
علياء: ههههه مانكونش احلى منك
شدات مع السيدة الكلام هي ووالتر ومرة مرة تحرك اكتافها.. حتا شدها الهيمري تالجوع ومالقات غير البوفيه قدامها.. دازت عليه مفاهمة اش داكشي ماراقهاش منظرو ومافاهماش شنو هو، الحوت خضر بزاف وداكشي غريب جاها فادازت لليسالاد ختارت وحدة ليگوم سوطي وسولات الشيف تما ياكما فيها الكحول حيت كاين لي تايسوطي السلطات بالخمر ..جاوبها بلا عاد هزاتها تتبنن فيها وبعصيرها حاضية بنادم كيفما هو حاضيها حتا شافت أناماري جاهة جيهتها تتبسم والموسيقى تغيرات للشرقي
.. الناس بدات تتحرك معاها شوية واناماري تتحاول ترقص عليها لكن تاواحد ماضبط الرقص الشرقي كما يجب غير فقصو وهاوشو علياء لي على مهل كملات طبقها وكأس عصيرها وقلبها مع الموسيقى كايتنغم ..توجهات عند اناماري مركزة عيونها على الشال لي فوق كتافها جراتو وماري ضارت جهتها بسرعة لقاتها على خصرها الرشيق تتلويه حتا قاداتو وقادات شعرها عاد بدات تتلوى بالمهل بادية بالتسخينات وتتحرك جنابها مع الطبلة ودبدباتها.. لوزة يمين لوزة شمال هازة شعرها وكتافها وصدرها على الموسيقى تايميلو ببطئ تارة وبسرعة تارة أخرى شاعلة الحرارة والبركان فالحفل، سرقاات نظرات كل من كانو واقفين رجال ونساء وهي نسات راسها فين والعالم ككل ..اناماري معاها تاضحك وترقص تتحاول تقلدها كحال النساء فالحفل وهي حركاتها خطيرة مثيرة وزايدة نغزة فالجرءة وضحكتها رنانة تتسرق العقل قبل القلب …
سالات الموسيقى بهزة خصر خطيرة منها ووقفات تتنهج مبسمة وتتهرب ليها الضحيكة على الفعلة لي دارت والكل عليها تايصفق خلات ريوگهم سايلين حتا من والتر حل فمو بإعجاب ماعاود سدو ..دخلو الگاطو بالشمع لصاحب الحفل غناو ليه وطفا الشميعات ختاما للحفل لأن الوقت تأخر وبدات الناس تعيا .. علياء رجعات مع والتر دايخة بالنعاس وتتحس بايدو مزيرة ايدها كل مرة يتغزل بيها وهي كلمة سامعاها كلمة لا حتا وصلو للڤيلا دخلات لغرفتها مباشرة بزز باش بدللات لبستها ببيجامة خفيفة ضارينها جنابها بالشطيح وتكات ترتاح وتنعس استعدادا لسفرها فالغد …
صبحية جديدة وهي فالطيارة لوحدها راجعة للمغرب ..نزلات فالمطار قلبات على الطرونسبور لي وصات يجي ليها وطلعات مخلياه يحط الباليزات فالكوفر والتليفون فايدها تاتاصل بواليديها تعلمهم بلي وصلات وفالطريق جاية
..ماعلمات حد فالرياض حتا توقف عليهم على غفلة تشوف الخدمة واش غادة هي هاديك ولا واخدينها راحة فاش هي مكايناش ودايرين مابغاو
…وصلات لدارهم سلمات على واليديها بالاحضان كأنها غابت عليهم سنين ماشي ايام قليلة وطلعات دوشات ولبسات كسوة سوداء طويل منقطة بالابيض وشفافة من الأكمام مع كعب عالي بيج .. خرجات من البيت تتسد الحلقات فودنيها وهازة ساك طويل لقات مها تتشطب شافتها ووقفات يدها على خصرها مغوبشة وقالت: افين غادة
علياء: نطل على الخدمة ونسالي شي أمور ضروري.. غانرجع للغدا ونيت نوريك اش جبت ليك
حكيمة: هادشي غاوصيت تشدي فلوسك عندك ياك
بسمات تترمش فيها: كادو من والتر الا حكيمة ماشريت واالو ..هانا مشيت
حكيمة: اييوااا الله يخلف عليه والله يرضي عليك ماتعطليش
علياء: اوك
خرجات متوجهة للرياض على رجليها ..تفاجؤو بعودتها وبداو بيها يرحبو، فرقات عليهم الشكلاط لي جابت معاها فالساك شافت الأحوال وطلعات للبيرو تتجمع الوراق وهازة التليفون فإيدها ..دوزات رقم سلمان حطاتو فودنها تايصوني بدون مجيب ..عاودات ونفس الشيء مامن مجيب عاد رداتو لساكها سدات عليه مع الوراق وعلبة شوكولا فخمة وخرجات دايرة شاپو على راسها من الشمس
خدات طاكسي عطاتو عنوان الأجونص وماهي إلا دقائق حتا كان قدامها وقف.. نزلات مخلصاه وداخلة نيشان لمكتب مهدي الولد لي وصاها سلمان تتعامل معاه فغيابو ..لقات الباب مفتوحة وهو كان واقف مع رجل طويل اسمر بلباس رسمي ..شوميز مزيرة على صدرو العريض فاتح صدفها العلويين وطاوي اكمامها مع سروال توب على فصالتو عاطيها بالجنب وهاز ملف تايدوز فأوراقو ويقراهم بتخنزيرة حادة فعينيه ومهدي واقف تايشوف.. دقات بهدوء مبسمة هز مهدي راسو ابتاسم ليها وشار ليها تبرك.. لكن الرجل لي كان معاه اكتفى يشوف فيها بطرف عينو فقط ورجع تايكمل الوراق بدون اهتمام.. زي زيرات على فكها وبركات تتشوف فالمكتب ومرة مرة طلع فيه وتهبط بوجه هادئ لكن تصرفو زعجها شوية كأنو ماعطاها قيمة ولو بهزة رأس فقط، حتا سالا وقال بصوت جدي خشن: غاندي هادو نراجعهم.. نتا جيب ليا الباقي نفكو هادشي هو اللول عاد ندوزو للخدمة
مهدي: هي اللولة.. غير نشوف مع السيدة ونجي وراك
رد خارج: ماتعطلش
مهدي: مرحبا بلالة علياء تفضلي ..اش خبارك الأمور هانية
جلسات قدام مكتبو وحاطة ساكها فوق الطبلة: الله يبارك فيك الحمد لله ههه نتا كيف دايرين الوليدات ومولات الدار
مهدي: هانية ونهار كبير هادا لي شرفتينا.. اش حب الخاط
ردت بجدية: جيت على ود سي المدير.. عرفتو هنا وبغيت “قاطعوها رنات تليفونها.. هزاتو ولقات علامن جات هو لي تايصوني بسمات قاطعة عليه وقالت” هاهو عمرو طويل ..كاين ياك فالمكتب ديالو ياك
رد تايضحك: سي سلمان.. راه هو هادا لي لقيتيني واقف معاه !
رفعات حواجبها بتفاجأ: بصح ..هه الصراحة يسحابلي شي كليان ولا غير خدام معاكم
مهدي: هو هاداك، لقيتيه هاد الايام عاد رجع من السفر ..انا نوض نشوفلك واش كاين
حركات ليه راسها: واخا شكرا ليك
خرج وهي بقات تدي فيها وتجيب فعقلها .. وماتوقعاتش هاداك لي كيف تاتاصل بيه ديما عاطيها للضحك والتقشاب فاش شافتو فاص حساتو متكبر ومعفر غير وحدو من التصرف لي دار معاها والحدة لي كانت مرسومة على وجهو
رجع عندها مهدي وقال: تفضلي راه فالبيرو ديالو ..ها الكاتبة توصلك
ناضت مع البنت: شكرا
تبعاتها وفاتو زوج بيروات كل واحد وشكون كان فيه،و التالت هو البيرو ديال المدير.. دقات البنت وتنحات مخلية علياء ببسمة جدية دخل هازة ساكها بطريقة راقية.. هز عينيه من الوراق طلع فيها ونزل بخفة عاد تفتحات الغوباشة ووقف بوجه بشوش صدمها بيه وزادها كلامو
سلمان: مرحبا مرحبا.. نهار كبير هادا الالة علياء هههه نورتينا
مدات ايدها تسلم: بارك الله فيك شكرا
… تفاجآت بجرة لطيفة ناحيتو سلم عليها بالحناك حتا زنكها وزادت بسمتو الوسيمة توسعات تايشير ليها تبرك.. حنحنات باركة تتحك حنكها وهو جلس مقابل معاها هاز الفيكس فيدو
سلمان: اشنو تشربي
علياء: مكاين لاش نبداو الخدمة حسن
اتاصل بالكاتبة وقال: سامية.. واحد العاصير بارد مع طارطة صغيرة وقهوة كحلة
حط الفيكس والضحكة ممفارقاش عينيه وعلياء بقات غير تتشوف وترمش بتقالة
سلمان: ايوا الالة علياء.. كيف غادة مع الخدمة.. على سلامتك بعدا
بسمات فوجهو وقالت بصوتها الهادئ: الله يسلمك اسي سلمان…
قاطعها بلطافة: سلمان فيها الكفاية
علياء: سلمان ..الحمد لله ونتا
رد: الحامدين الشاكرين ..سمحيليا قبيلة مارديتش لك البال كنت تانقاد شي خدمة مبرزطاني ..اما من باب لاجونص نستقبلك
حركات راسها مبسمة من قلبها هاد المرة وقالت: لا ابدا ماشي مشكيل خود راحتك
دخلات السكرتيرة هازة معاها بلاطو فيه الطلبية لي وصلها تجيب وبحكم كاينة پاتيسري تحت لاجونص دغيا سرباوها ..حطات ليهم داكشي فوق الطبلة وخرجات هي تفتح علياء ساكها وقالت
علياء: المهم..
قاطعها وهو تايكحز ليها الطارطة والعاصير وهز قهوتو عندو: المهم مغانبداو الخدمة حتا نشركو الطعام بعدا هادي اللولة وبالحلوف
ضحكات تتشوف فيه: الحلوف گااع ههه
سلمان: بسم الله ..نشركو الملحة باش ربي ينزل البركة، هادو من شروط العمل عندي
ضحكات مرة اخرى وهزات العاصير ناطقة بمزاح: ايوا ملي هاكة كنتي تعلمني نقولك تجيب شي گصعة كسيكسو بسبع خضاري هههه هاديك هي نشركو الطعام عندي أنا
ضحك حتا تهز صدرو: هههه مرة خرا تستلهليها ..
شركو الملحة والطعام تحت النظرات والابتسامات ..حطات كاسها ومد ليها كلينيكس مسحات فمها وقالت بأدب
علياء: الله يجعل شي بركة ويخلف
سلمان: آمين
..هز داكشي بنفسو نحاه من الطبلة وهي جبدات وراقها حطاتهم وقادات شعرها للجنب ..حتا برك مرة أخرى عاد قالت بجدية
علياء: الوغ ..كيف سبق ليا قلت ليك، بغيت نولي نخدم مع لاجونص ديالكم وكنت نتسناك غير تجي باش نقادو امورنا ونسنيو الكونطرا تاعنا
سلمان: مرحبا “شابك حواجبو واخد من عندها الوراق تايقراهم”
سلمان: مرحبا “شابك حواجبو واخد من عندها الوراق تايقراهم”
علياء: كنت تانسيفط لپروكرام ديال السيمانة تاعي فالايماي لمهدي، وحتا الخرجاات ديال هاد الشهر كامل عندي وجبت معايا التمن ديالهم.. إلا إلى كنتو زدتو عليا شي حاجة ..بقات ديك النهار ملي صوڤيتيني هي لي ماعرفتش شحال حسبتي ليا
رد بوجه جدي وصوتو هادئ تايشرح ليها: فهمت، غير هو التمن راك عارفة شحال.. جوج دالناس تانحسبو ليهم 100 درهم ..ربعة 150 درهم.. تمنية 300 درهم وفوق تمنية 400 ..فوق ربعطاش وسبعطاش 600 درهم حتال 800 درهم ..وهي غادة .. غير فاش تايكون خاص نوصلو الكليان لمدينة خرا متلا الصويرة أو الحاجب أو وشي مطار اخر فكازا ولا مدينة من غير مراكش ..تانجمعو الحساب بالكيلومتر ديك الساعة ماشي على حساب شحال هازين
حركات راسها: فهمت..
سلمان: وحنا الخدمة ديالنا تتكون للسيمانة ..يعني تتحطي الپلان لي عندك وتتعلمينا بالبروگرام لي نتي دايرة للكليان باش نوجدو الطرونسپور.. وحتا الكليان لي تايجي على غفلة ماعليش نصوڤيوك فيه غير هو هاداك حالة خاصة لينا وليكم حتا نتوما لأنه مولفين بالريزيرڤ قبل
علياء: داكشي لي مولفة ندير مع مهدي ..تانرسل ليه نهار الاحد البروگرام تاع السيمانة ديالي هافين غايدي ليا الكليان هاشحال عندي هاإمتا يردهم ..وهو تايتكلف.. غير هو هاد المرة بغيت نتعامل معاك نتا مباشرة باش نكون مرتاحة اكتر
سلمان: وعليه الالة ..
ناض حل ملف أزرق جبد منو زوج اوراق وحطهم قدامها تقراهم وقال: هادي هي الكونطرا ..خوديها قرايها على خاطرك نتي وسي والتر، من بعد يجي يسني عليها أو يسيفط لاسينياتور معاك نتي
قالت تتشوف فالورقة: هو حاليا برا المغرب ..غانتكلم معاه اليوم ونرد عليك
سلمان: مرحبا “صونا تليفونو الشخصي هزو شاف الرقم ولاحظات وجهو لي تهجم بانزعاج الشي لي خلاها تقول
علياء: ياكما شي مشكل
رد بسهوة خفيفة فيه تايفكر واش يجاوب أو بلاش: لا مكاين مشكل.. سمحيليا انا راجع
علياء: انا من الأفضل نمشي
سلمان: لا لا انا جاي
مشا للقنت ديال المكتب دوز الخط تايدوي بصوت خافت وايدو فجيبو بوقفة رجولية ..قلبات عينيها بفضول لعندو ومن الهيأة باش تايتنفس وكيفاش تايعض شفايفو بعصبية باينة فيه اتصال مقلق وتايتصادع مع مولاه.. طلات على ساعتها الجلدية شافت راسها تأخرات وناضت حتا تجر الكرسي باش تجمع الكونطرا الشي لي خلاه يضور ليها وجهو وباقي تايتكلم.. شافها هزات علبة الشكولا من ساكها حطاتها ليه فوق المكتب وهزات ورقة مربعة كتبات فيها شي حاجة وفوقها حطاتها
..سدات ساكها غادة للباب تلاقاو نظراتهم لثواني تبسمات ليه وهو حرك راسو عاد فتحات الباب خارجة.. قطع تايتنهد وداز للبواطا هز الورقة بطرف صباعو وبدا فيها يقرا “سڤونير بسيط من سويسرا.. نهارك مبروك”
تحل باب الرياض تاع سارة صاحبتها وخرجات لعندها بجلابة وشعرها مطلوق بحال الضحكة لي على فمها
سارة: افين المعلمة هههه “سلمات عليها وقالت” توحشنااك وتوحشااتك مراكش
علياء: تانا ههه..زيدي معايا نتوانسو فالطريق
سارة: غادة للخدمة
علياء: اياه .. كي دوزتي هاد الأيام
عوجات فمها حابسة الضحكة وهوما تايتمشاو: عبد الواحد بييجي يخطبني
علياء: ياااك “ضحكات فرحانة ليها” ايوا مبروك
سارة: الله يبارك فيك المعلمة اشتي هي ملي ترجل معايا ودارها رالاباس اما كنت بينبور معاه
علياء: ههه الله يكمل عليكم بالخير ياربي
سارة: آميين.. ونتي كيكانت سويسرا
ردت ببرود: زوينة واخا ماخرجناش بزاف ..ماشفت فيها والو صراحة ولكن ناوية نشوف فاش نرجع ليها ههه “وصلو للرياض دخلات ووجهات كلامها للبنت لي فالاستقبال” عيطتي للمعلم
ردت: هاهو جاي امدموزيل
طلعو للبيرو الفوق وسارة قالت: علاه نتي ناوية ترجعي
علياء: اختي غانبدا نوجد وراقيا شحال قدي نتعطل ..وضروري نمشي لتما مرة مرة على قبلهم
سارة: ايه مزيان نييت التعطال بلاش منو ..اجي وكيبان ليك هاد والتر ملي مشيتي لتما
هزات كتفها تتخوي ساكها من الوراق؛ كيف تانعرفو.. واخا ماشتوش بزاف كان مشغول مع مو مسكينة
سارة: !!!! علاه مو باقة حية.. ويلي الله يسمحلي هي سمعت السيد عندو حفيدة قلت كون راه مو الله يواليها برحمة الله
علياء: هههه واباز .. فكرتيني فيه نيت خاصو يسني شي وراق، وخاصني نكمل البيرمي باش نهرف على شي حديدة تانا ههه
سارة: اه آه وتركبيني حداك
علياء: نركباااك الالة ههه
سارة: الرضا ابنت المكي.. اييواا فين اختي الشكلاط والكادواات نسيتيني
رمشات فيها حابسة الضحكة: والصراحة جبت ليك باكية وكنت ناوية نعطيها لك هنا.. ساعة عطيتها لسلمان بلاصتك هههه تانمشي للدار ونجيب لك وحدة خرا
سارة: شكون اودي هاد سلمان
علياء: مدير لاجونص الجديدة “كمشات عينيها تتدكرو” عرفتي بحالا شبهتو لشي حد ولكن ماعرفتش شكون
ردت بفضول: كيداير هو كيداير
علياء: طويل شوية.. سمر ومگلضم وبحالا تايشبه لواحد الممتل.. ولكن شكون والله ماعقلت
تدق الباب ودخلات البنت قائلة: مدموزيل علياء المعلم راه وصل
علياء: واخا شكرا .. سارة يالله ننزلو
علياء: واحد السلام عليكم
رد المعلم: وعليكم السلام ابنتي علياء.. اش حب الخاطر قالو بيتيني فشي خدمة
علياء: اياه زيد معايا “بقات سارة تتسناها وهي سبقاتو للصالون تاع الرياض وقالت” هانتا، هادا هو الصالون فين مولفين نديرو السهرات فالرياض .. بغيتك تصاوب ليه شي باب يكون ديال الزاج ودوبل مايمسعش الصوت بالنسبة للكليان الى كانو ناعسين .. باش مانصدعوهمش بالموسيقى والهضرة، فهمتيني
رد: اها هي اللولة ..عندك شي شكيل فبالك ولا شي نقيشات فالجناب تبغي نزيدهم
ردت مبسمة: اسيدي بدع ليا مع راساتك عارفة خدمتك متقونة مايحتاجش نتدخل فيها.. ولكن بغيتو فأقرب وقت يكون واجد وعاطي للعين هانتا هاديكور الصالون والالوان ديالو عندك ..خليه يكون باب صحيح متايسمعش ويكون عاطي للعين فنفس الوقت
المعلم: بارك الله فيك الالة هي ضروك نبدا فيه الخدمة
علياء: ضروكة نعام اسيدي ههه ولي حسبتيه ليا تستاهل
المعلم: الله يخلف عليك.. سلمي على سي والتر وحتا سي لمكي
علياء: مبلغ الله يعاونك
مشا وهي رجعات عند سارة هازة ساكها من فوق الطبلة
علياء: يالله نمشيو، عييت بالمعقول
سارة: بيتمشي لداركم؟
علياء: آه حتال جوايه الخمسة ونرجع “شافت فساعتها تتنفخ” افف تعطلت حكيمة غاتشوطني
سارة: زيدي.. ايمتا بيتكملي الپيرمي تاعك؟
علياء: هاد الايام نيت.. احقا عرفتي لاجونص لي أنا دابة خدامة معاهم جات فالطريق لي تاندوز منها ملي تانكون نوجد الپيرمي
سارة: ياك
علياء: ههه ايااه عاد دابة تفكرتها.. إن شاء الله نشري شي حديدة فاعلة تااركة
سارة: اميين ..زيدي عرضي عليا توحشت طياب مك
علياء: ماتحتاجي عراضة مرحبا بيك
مرت يومين مليئة بالعمل ..رجعات للسيستيم ديالها العادي، الخدمة واستقبال الكليان ولي خصات بالرياض تتقادها وهي لي مكلفة بكلشي
.. الإتصال مع سلمان مستمر وجلو على الخدمة فقط ككل مرة
..حتا وصلات الليلة لي غاتدي فيه كليان ألمانيين يزورو علي بلفلاح المشهوور بمراكش ومن لا يعرفه وغايمشي معاها حتا سلمان صاحب لاجونص معامن تتعامل
.. لبسات فستان بني اللون سامبل توب خفيف بارد ..الكول مفتوح والاكمام طويلة.. مع كعب عالي فاللون الوردي كلون احمر شفاهها وكحل فالعين..
خلات شعرها مطلوق على راحتو وزادت ساك مربع طويل لبساتو وخرجات من بيتها نازلة للأسفل ..
تلاقات الكليان لي تايتكون من 14 لشخص منهم نساء ورجال ..باركين واجدين وحتا الطرونسپور عاد كيف وصل ووراه مباشرة وقفات كاك كاط كحلة تتبري ..هبط منها سلمان بدجين اسود مع تيشورت بيض لاسق على الفورمة ديالو ..هي حتا تأكدات أن الكليان كلو طلع عاد لعندو توجهات تتبسم برقة طلع فيها طلع وهبط وقال بعفوية تايتبسم فوجهها
سلمان: الزين لمن عطاه الله
علياء: ههه لعلياء
سلم عليها بلاپيز كيف ولفات وقال تايضحك: طلعي طلعي اعلياء ..هي الوجهة علي بلفلاح
علياء: يا بسم الله
سلمان: صاڤا بعدا هانية
علياء: هاانية.. ونتا
سلمان: الحمد لله الالة
وصلو وهبطو معاهم ..سبقاتو علياء بخطوات موزونة متقدمة الكليان ديالنا بابتسامة وهوما من المدخل بداو يصورو بالكاميرات ديالهم عاجبهم الجو والديكور..
الدخلة عبارة على باب كبيير من الطين منقوش ومكتوب عليه بالاضواء “علي” ..ومع تادخل تتلقا ترحيب من طرف جوج عودان تايحنيو ليك الراس كترحيب من طرفهم بعدها ناس أحواش ناس صحراوا ناس عيساوا ناس الفنتازيا وزيد وزييد من مختلف التقافات والرقص المغربي من طنجة للگويرة
..الخيامي كتار وكل خيمة مكلفين بيها السرباية ديالها لي ولات علياء حافضاهم واحد واحد وعارفة مزيان الخيمة لي فيها غايتعاملو مع الكليان ديالها معاملة خاصة لامن الترحيب والا التعامل خداتهم ليها مباشرة وقفات تتقولهم يدخلو، بركو قراب لباب الخيمة تايشوفو التبوريدة تتمر من حدااهم وهي توجهات عند شاب سرباي هو لي تايتكلف ليها بالفاكتورة
الولد: مرحبا الالة علياء
علياء: عادل اش خبارك
عادل: هانية ههه مرحبا بيكم
علياء: شوف حط ليهم الميني يختارو لي بغااو ..وجمع ليا الحساب تاع الماكلة بوحدها وليبواسون بوحدهم ماتخلطش
عادل: اااه هي فالخلاص تاع الرياض دايرين معاك هي الماكلة بوحدها
علياء: هنتا فهمتيني.. إلى بغاو يشربو شي حاجة عطيهم ماشي مشكل ولكن حسابو ماتخلطوش ليا مع الأكل.. صافي
عادل: كوني هانية
علياء: الله يعاون هانا مشيت ..وقعات شي حاجة علمني
توجهات لخيمة مخصصة للناس فمجال خدمتها فقط ..يعني مؤطري الرحلات أو لي تايجيبو ليهم الكليان تما تايستاراحو فانتظار السهرة تساالي ويردو كليانهم معاهم مرة أخرى
..لقات سلمان بارك تايتفرج فأحواش وحاط قدامو براد مشحر وليها هي كاس الليمون بارد ..جرات الكرسي باركة والساك حطاتو جنبها عاد ليها انتابه وقال تايكب اتاي
سلمان: قاديتي الأمور الشاف
علياء: راهم باركين تايتفرجو ههه
سلمان: مزيان.. نطلب ليك شي حاجة للعشا شنو مشهية
حركات راسها بالنفي: لا والو.. الموني أصلا كلو أطباق مغربية ماشي شي حاجة لي تعجبني
سلمان: لي بان ليك الالة
خدات البراد وهو فيها تايشوف كبات ليها كاس أتاي وهزاتو تتشرب منو قلبات عينيها عليه تتفرج فالاستعراض وهو قال
سلمان: بالصحة
بسمات تتشوف فيه بنص عين: الله يعطيك الصحة
جمع النفس ضاحك وقال مقرب جيهتها: ايوا اعلياء.. شنو تاديري فحياتك من غير تبركي قدامي وتشربي من البريريد ديالي
ضحكات وهو لضحكتها ضحك وقالت: خدامة جيروم المعلم
سلمان: واايلي ههه
علياء: ايااه
سلمان: وشحال فعمرك اسي الجيروم
سكتات تتشوف لعينيه وتحاول تقراهم عاد قالت: 25 عام
سلمان: متشرفين ..وانا كبر منك بتمن سنين هههه
شربات من كاسها: يعني عندك 33 عام.. بطولة العمر اسيدي
سلمان: الله يحفظك ..ومن ايمتا ونتي خدامة جيروم
حطات الكاس مبتاسمة لعينيه حتا سرح فيهم بالشوفة وقالت: عاماين تقريبا وانا خدامة مع والتر ..وحاليا مخطوبة ليه
سكت شوية صغر عينيه وقال: مخطوبة.. حلفي
رجعات اللور تاضحك لردة فعلو: لا طانزة هههه ونتا
سلمان: صبري نسرطها بعدا “شرب كاسها تاع العاصير وهي تاضحك حتا سالاه وقال تايمسح فمو” انا تاع راسي حاليا ومتاح لكلشي ههه
ميلات راسها تاضحك وحتا هو طالقها تسرح: بمعنى آخر زهوااني هههه
سلمان: الرضاا هههه
علياء: باااينة فيك غير من ديك حلاوة اللسان عندك وعينك لي مراصياش
سلمان: عيني انا مراصياش حشوومة عليك
علياء: هههه زعما حاليا ممصاحب ماوالو
تنهد مجبد حجبانو وقال: حاليا مربوط بواحد خيتي الله يفك معاها الطرح بسلام
علياء: شكون هادي هههه
صونا تليفونو طلات بطرف عينها وقرات اسم “مروى”
سلمان: هادي لي عمرها طويل .. “قطع قالبو على وجهو وفيها شاف مصغر عينيه
ضحكات مطلعة راسها وقالت: مالنا على هاد الشوفات هههه
قلب وجهو حتا هو تايضحك: واالو ههه
شربات كاسها متبسمة وبفضول اجتاحها قالت: من ايمتا ونتا هنا فمراكش.. حيت هضرتك مافيهاش اللهجة تاع المراكشيين
تبسم وقال: أنا من سلا الالة .. مراكش جابتني ليها الخدمة وصافي
علياء: هاكاك هي الاخ سلاوي ههه
سلمان: تماما ههه حتا نتي لهجتك مافيهاش حس تامراكشيت ههه
فرفرات برموشها العاليين تتكلم بحنية فصوتها كالعادة: انا اسيدي مراكشية زيادة وخلوق وحتا بابا مراكشي، غير ماما فاسية.. وفصغري كنت تانتجمع بزاف مع عائلتها واخا كنا ساكنين فرياض واحد مع عمي الله يرحمو، ايوا خديت منها انا وختي طريقة الهضرة
سلمان: عندك ختك
علياء: سي عندي ختي صغر مني ..اسمها ملاك
سلمان: الله يخليها ليك.. هي نتي الكبيرة
علياء: امين ههه آه الكبيرة مولات العقل نعاماس ههه ..ونتا ؟
تبسم وقال ببحة حنينة فصوتو: عندي خويا واحد كبر مني ..خدام فالبوليس حاليا الله يسهل عليه
علياء: آمين ..باينة فيه عزيز عليك
سلمان: بزاف ..وقف معايا وقفة صحيحة فاش كنت محتاجو الله يحفظو لولادو
علياء: هو ساكن هنا فمراكش
سلمان: هنا نيت .. غير هو ساكن بوحدو انا لا باقي مع الواليدة معمر عليها الدار
علياء: الله يخليها ليك “حنات عينيها تاضحك” فيا قوة الأسئلة ياك
سلمان: لا مزيان باش ندوزو هاد البراد هههه.. نتي كي درتي حتا وليتي جيروم
تنهدات وايدها على حنكها: قصة طويلة صراحة ومكنت دايرة حساب
سلمان: علاه اشمن باك عندك
علياء: أدب انجليزي.. وف 2002 خديت ديپلوم فالتسيير
سلمان: مزيان.. وعلاش ماكملتيش قرايتك
ضحكات قائلة: حيت خدمت ودخلوني الفلوس هههه ..ونتا
رد بهدوء : انا الالة درت الدراسات العليا فالقانون العام.. هي فاش سكنت مع خويا وهو ديك الساعة لي كان هاز مصروفي وكلشي
علياء: ايوا
جمع النفس وطلق تنهيدة سخونة قال بعدها: ايوا خديت الديبلوم ديالي الحمد لله ودفعت للكونكور ديال القضاة “تبسم ابتسامة باهتة وكمل كلامو” كان حلم أنني نولي قاضي . ساعة ماكتابش
جمعات حجبانها: علاش.. سقطتي فيه
سلمان: لا ..قالك خاصك تحط 7 المليون تاع اللبسة.. فوقها 7 اللمليون خرا رشوة للقاضي العام باش يدخلك هه خليت ليهم الزمر وخرجت فحالي
تنهدات مميلة راسها وتتشوف فيه بأسف وهو وتعكر مزاجو: فيها خير.. هادا هو المغرب كلشي فيه بالوجهيات والرشوة.. قليل لي تتلقاه خدام بنزاهة وشرف
سلمان: بصح
علياء: شنو درتي من بعد
تنهد وقال: صافي شفت راسي داكشي لي بنيت كلو راب.. وليت تانقلب غير باش نديپاني راسي ومانبقاش معول على خويا ..وأول خدمة خدمة الالة ففم باب واحد الاوطيل
ضحكات بصدمة ممصدقاش: خدمتي سيكيريتي هههه نتا
بسم وقال: هاد عبدو ربي لي قدامك
علياء: اها هههه
سلمان: ههه اها.. شافني واحد الدري خدام تما نيت لقاني عندي مع اللغات شوية تانعرف نتعامل، تما دوا مع مدير لوطيل ودوزوني لواحد البيرو خاص بالرحلات الداخلية لي تتم فالاوطيل ..ايوا من حاجة لحاجة حتا وليت مدير لاجونص لي نتي خدامة معاها
صفقات بايدها حتا ضحكاتو وهز كاس اتاي تايشرب منو
علياء: براافو اسيدي هادي هي البدية من الصفر
سلمان: شكراااا هههه ونتي.. كيفاش حتا وليتي جيروم وتخطبتي لمول شي
علياء: دابة واش نقولك كيفاش حتا خدمت معاه ولا كيفاش حتا خطبني
سلمان: لي حبيتي
علياء: هههه قصة طويلة شوية كيف قلت ليك، خليها لمرة خرا.. دابة خاصنا نرجعو
شاف لساعتو وقال مغوبش: الوقت دغيا داز..
علياء: “هزات ساكها وطلات على التليفون حاولات تشعلو ووالو” ويلي التليفون طفا.. ههه المكي اليوم غايجري عليا
ضحك وقال: هههه هادا باك
علياء: ههه اياه
سلمان: ايوا جمعي النوضة اختي يالله توصلي
ردت تاطنز: واخا ..اخويا
وقف معاها وقال: ماعندكش خوك وانا ماعنديش ختي..هي نتخاواو مالك
علياء: ههههه
سلمان: تلقاي حسن مني
علياء: لا حاشاا ههه
سلمان: وعليه هههه
خرجو من الخيمة تايتفرجو فالأجواء الأخيرة تاع علي بلفلاح.. داز من حداهم واحد من السربة راكب على عودو وهاز راية المغرب مع مشعل، ضار على الضورة تاع الساحة وبالمشعل لي هاز قاس فواحد البلاصة وفيها تكتبات بالعافية “مع السلامة”.. كنهاية للسهرة والامسية الدافئة لي قضاوها تما
…….
الأيام تتجري وعلياء على وراق العقد تتجري ..بين الرباط ومراكش كل مرة طالعة نازلة على شي ورقة تاطلع ترجمهم فالرباط بالالمانية وتترجع تديهم لوزارة الخارجية بااش تصادق عليهم والپيرمي حتا هو عاطياه وقتو
..خرجات من الصالون تاع الرياض بكسوة بيج بالكمام مشبكين ..واصلة حد الركبة مع ليبا موس وطالون اسود ..
هزات تليفونها لي بدا يصوني وجاوبات بابتسامة طالعة للمكتب
علياء: صباح النور
ضحك من وراء الخط وقال بمرح: افين شاداها امون شاف ..دوزي دوزي طلي علينا شوية
علياء: هههه خدامة اخويا
سلمان: تااناا اختي جيبي لياا فلووسي دابة دابة
علياء: قلنا العشية بيما ساليت الخدمة
سلمان: مغانكونش العشية.. طالع للرباط ضروري على ود شي خدمة
علياء: أيوا صافي نأجلوها حتا ترجع
سلمان: ايوا انا باغي نشوفك قبلما نمشي
ضحكات سادة الاجوندة وقالت: الله يديك على خير.. صافي اسيدي شوية ونكون عندك
ضحك بدورو وجاوب: الرضاا هههه هاني تانتسناك، تهلاي
علياء: باي هههه
قطعات معاه وجبدات ساكها هو يرجع تليفونها يصوني.. جاوبات ببسمة خفيفة وهي من المكتب خارجة
علياء: الو
والتر: حبيبتي ..اش خبارك
تبسمات قائلة: هانية الحمد لله.. ونتا.. الام ديالك كيف بقات
والتر: في تتحسن الحمد لله .. توحشتك بزاف هاد الصباح وبغيت نسمع صوتك
علياء: هههه غير هاد الصباح زعما
رد بالرومنسية لي تعودات تسمع منو وراء كل اتصال: بالعكس ديما فبالي الحبيبة ديالي وعارف طولت ..لكن مابقا والو ونرجع
علياء: الله يجيبك على خير .. انا لقيتيني غادة للأجونص عند سلمان نخلصهم ففلوسهم
والتر: مزيان ..الكونطرا خبريه كيف نرجع غانسني ليه عليها
علياء: قلتها ليه وماعندهم حتا مشكل ..قضي شغالك فخاطرك بلاما تهز الهم
والتر: الله يخليك ليا احياتي
علياء: آمين هههه باي
والتر: فاش ترجعي نتكلمو واخا احبيبة
علياء: اوك ..خليت لك الراحة
قطعات طالعة فالطاكسي ..
وصلها لباب لاجونص هبطات داخلة مباشرة عندو للمكتب بعدما سولات عليه السكرتيرة وخبراتها بلي تايتسناها من قبيلة
دقات شوية عاد فتحاتو داخلة بابتسامة وهو وقف تايضحك ضارب الكحل فالكحل شوميز مع دجين وسبرديلة
سلمان: أهلا أهلا
علياء: هههه السلام
سلم عليها بالحناك وبقا فايدها شاد: صاڤا هانية
علياء: الحمد لله غير الخدمة وتمارا
جرها وراه وقال:: اجي بعدا نتغداو قبل كل شيء
علياء: لا والله…
قاطعها: داير بحسابك مكاين كلام
داها لجهة الفطويات وفعلا لقاتو حاط جوج كراطن من الپيتزا مازال سخان وجوج كانيطات كوكا ..
بركات جنبو تاضحك وحلات الكرطونة: عندك الزهر تانحماق على الپيتزا
سلمان: عارف ههه بسم الله
علياء: بسم الله
بداو فالماكلة هو يبدا تليفونو يصوني طلات بعينها لقاتها مروى وهو بلاما يشوف شكون نفخ بضيق وقال
سلمان؛ هاحنا عاود
علياء::ههه جاوب ولا مغايسكتش داك التليفون
قطع وقال: وليتي حافضاها
سرطات الدغمة وقالت باستفسار: دابة واش نتوما مصاحبين ولا لا بغيت غير نفهمك والو
زفر مكره فاش عاود صونات طفاه وقال: لسقاا ديااال بصح
علياء: علاش مالك معاها
سلمان: نتي عارفاني كيفاش داير ..هي كراكطيرها مخربق عليا بزاف تتبغي تحكم فالواحد وحبها متملك ..من الشهر اللول فاش عرفتها وهي هاكا
علياء: ايوا على هاد الحساب جيها نيشان وتفارقو
رد ببرود تاينفخ: معامن غادوي
تفتح الباب بقوة قبل مايكمل كلامو ودخلات منو بنت قصيرة عامرة شوية ومحجبة لابسة كسوة طويلة سوداء سباط طالون وفولار احمر وفيهم مخنزرة بنظرات تتقتل خصوصا فعلياء حتا وحلات ليها الدغمة وبدات غير ترمش على الدخلة لي دخلات عليهم بلا استئذان وبلاما تعلمهم السكرتيرة أولا..
ضارت علياء شافت فسلمان لقاتو فيها مخنزر وهي دخلات ببرود وقالت : السلام
تحنات باستو لحنكو وبركات لاسقة فيه حاطة رجل على رجل متجاهلة علياء كليا.. تما عرفات أن هادي هي مروى ..حطات الپيتزا من ايدها تتحنحن مابقات عرفات اش دير حتا نطق سلمان موجه تخنزيرتو لجهة مروى والحدة فصوتو
سلمان: وعليكم السلام .. شهاد الدخلة صاڤا شوية !
ردت ببرود وعينيها مفقوصين جهة علياء: الحمد لله ونتا ..كانتاصل بيك من الصباح ومتتجاوبنيش؟
تنهد بضيق وعصبية: كنت مشغول.. مجاوبتش بدلي ساعة بخرا
مروى: مممم “طلعات فعلياء ونزلات” بااينة مشغوول
سلمان: سلمي على السيدة بعدا راه من الصواب
مروى: آه، ديزولي ..
علياء مدات ايدها بتبسيمة خفيفة محرجة وقالت: انا علياء
بنظرة سامة جاوباتها: مشرفين.. انا مروى خطيبتو
علياء: مشرفين
مروى: ايوا اسي سلمان.. فين مشغول هاد الوقت كامل ؟؟؟
علياء شافتو تزير ومن نظرات مروى ليها فهمات بلي تتقلب على الصداع لي سلمان تايحاول يتفاداه قدامها.. هزات من ساكها كلينيكس ديالها خاص وناضت طلع فيها سلمان الشوفة وهي قالت
علياء: سمحولي غانمشي نغسل ايديا
سلمان: مازال ماكملتي البيتزا ديالك
علياء: لا الحمد شبعت.. نخليكم
زادت شوية هي تنطق مروى
مروى: سدي وراك الباب
شافت فيها بهدوء وخرجات مخلية الباب مفتوح ولجهة الحمام دازت
..غسلات ايديها مغوبشة معاجبهاش تصرف مروى ووقفات تما متعمدة تتعطل وكل مرة تشوف لساعتها.. حسبات عشر دقائق بالضبط قبلما لعندهم ترجع لقات الكاتبة هاد المرة فبلاصتها واقفة، حركات ليها راسها ودخلات المكتب تترمش فيهم.. لقات مروى مخشية فيه كلها وعينيها حمرين بحالا باكية فحين هو حاط راسو على يدو تايتفخ بعصبية شديدة حتا شافها دخلات عاد طلعو وهي قالت
علياء: سي سلمان..شنو نكملو خدمتنا دابة ولا مشغول
سلمان: جيبي ليا عافاك الپيسي من فوق المكتب وتعالي
شافت فمروى بنظرة خفيفة وقالت: واخا
حطات البيسي وساكها فوق الطبلة وراما ناض سلمان وخواها من كراطن البيتزا وكانيطات كوكا ..بداو الخدمة وعطاتو البروگرام لي عندها هاد السيمانة والمدن لي بغاو الكليان يزورو والطرونسپور لي غايناسبها
..رسم ليها مخطط يسهل عليهم الخدمة وحط الكالكيلاتريس حداه تايحسب لأن الخلاص غايكون على حساب الكليموتر ماشي البلايص لي غايهز الطرونسپور
..زادت وضحات ليه التفاصيل وهو تايجمع الحساب ومرة مرة يتناقشو على أمر حتا يوصلو لحل يرضيهم بزوج ..ساعتاين وهوما محنيين فالخدمة مكاين غير كتب مسح زيد هادي نقص هاديك
..ساكتين وغير هوما لي تايتكلمو عكس مروى لي ماصدرات لاصوت ولا حركة ونهائيا ماناضتش من تما بل بقات بعناد تتسناهم يساليو..
أحيانا فاش علياء تاطلع راسها بالصدفة تتلقاها موجهة ليها تخنزيرة سامة وهي حدها تتبسم ليها بسمة صفراء وترجع تكمل خدمتها وتحاول معاه تركز
..فاتت ساعتين بالتمام عيات فيها بالمعقول وطلعات عنقها تتلويه بتعب
علياء: سلمان صافي اخويا عنقي تلوا وضهري تقسم
لاح الستيلو راد ضهرو اللور وايدو وراها: تقريبا سالينا.. بقا نجمع شحال جاتك فالخلاص وغانسيفطو ليك فالايماي هاد العشية
ردت جابدة شيك من ساكها: إن شاء الله.. هادا الخلاص القديم من عند والتر ..الجديد حتا نتفاهمو عليه من بعد
سلمان: وعليه
علياء: يالله الله يعاونكم
سلمان: انا جاي معاك
ناضت مروى: بلااتي…
قاطعها بحدة: غانرجع دابة ..هانة جاي
خرجات علياء وهو تابعها.. قشرات شفايفها تتفكر وفمها تياكلها باغة تقول لي فبالها حتا ماقدات تصبر وضارت عندو قائلة
علياء: الصراحة والله ماقديت نحبسها فخاطري ..ولكن فعواانك اخويااا فعوانك
حط ايدو على خصرو برجولية تايزفر بخنقة: لا هادي عيقات عليا وبزاف .. دابة كون كانت معايا شي وحدة خرا من البنات لي تانعرف ..كون دارت ليا الشوهة هنا
علياء: خاصك تلقا معاها شي حل هاكدا ممسلك تاواحد فيكم
حك رقبتو بحيرة: تخنقت بالله.. مانكدبش عليك عارف لسانها حار وخفتها غير لاتلوح ليك شي كلمة ماهياش وتاخدي موقف مني أنا
سدات عينيها مطمأناه: لا ابدا مغانديش عليها
سلمان: وديك خيتي لاش حاطها تما ملي ماتحضيش لي داخل ولي خارج
علياء: فاش رجعت للحمام عاد لقيتها تما قبل مكانتش، يمكن مشات للطواليط أو عيط عليها شي حد.. صافي دازت على خير ماديرش فبالك ..انا غانمشي
سلمان: العشية ندويو اوك
علياء: اوك .. بسلامة عليك
قرب باسها لجبتها بحنان كاعتدار منو تبسمات وهو زاد دخل للاجونص مخليها طالعة لطاكسي ولدارهم راجعة
خلصات ونزلات قدام بوتيك ديال الحوايج.. دخلات تتساري عينيها فليجوب هنا وهنا حتا لقات وحدة فالگرونة تتجي فوق الخصر لاسقة على الجسم ونازلة تحت الركبة.. جربات تقيسها قدام المراية عجباتها وخلصات تمنها لي طلع 400 درهم حطااتها باردة وخرجات من تما غادة للرياض ديالهم.. دازت على الپاتيسري شرات شوية الحلوة عاد طلعات للدار داخلة وتاتعيط
علياء: ماما ..ماماا
ردت عليها: أنا فالصالون زيدي
دخلات للصالون ولقاتها باركة مع مرت خالها الكبير بسمات بأدب وقالت
علياء: السلام عليكم
ردت: وعليكم السلام الغزالة ديالنا ههه
..تحنات بالصواب سلمات عليها وعلى ماماها وبركات حداها قائلة
علياء: نورتينا اخالتي .. واحد خالي شنو تايعاود
ردت: الحمد لله ابنتي كلشي هو هاداك ..ونتي كيف غادة مع الخدمة والمشاغل
ردت: الحمد لله .. هبة آش خبارها شحاال هادي ماهضرنا
ردت: ههه لا باس عليها ..راه على ودها نيت جيت لعندكم هههه هبة جاو فيها الخطاب وإن شاء الله هاد الشهر العرس مرحبا بيكم
بسمات اكتر وقالت: مبروك الله يكمل عليها بالخير
مرت الخال: آمين عقبال نفرحو بيك حتا نتي
علياء: آمين .. نخليكم دويو فراحتكم سلمي على خالي بزاف بزاف
ردت: مبلغ ابنتي الله يرضي عليك
حكيمة: بركي شربي لك كويس بعدا
علياء: ماقديتش اماما غير بصحتكم
خلاتهم ودخلات لبيتها.. غيرات الكسوة بدجين مع شوميز هابطة شوية وبركات تتمشط شعرها هو يتحل الباب ودخلات مها تاطلع فيها وتنفخ
حكيمة: هي خارجة عاود
ردت بهدوء مركزة فشعرها: عندي شي خدمة خاصني نكملها فالرياض، غانرجع مع ديك التسعود
حكيمة: ممم ايوا الله عوين “شافت الكيس فوق الناموسية حلاتو ومنو جبدات الجيب لي شرات” شنو هادي ..شريتيها تاني
علياء: ههه زوينة ياك
حكيمة: وبشحاال عاود
رمشات فيها من المرايا وقالت: غير 200 درهم
غوتات بصدمة: هااا.. هادي ربعالاف واش ابنتي لاقيينك حمارة عندك ماكنة الفلووس تما
علياء: وازوينة اماما ودايرين ليها الصولد من الفوق
خنزرات فيها: شويني فيك شرويطة بربعالاف ايوا خيااار ..كون شريتي غير شي سلسة هاكة على مزينااتها تجيك
علياء: واصافي اماما ماعليش
حكيمة: احيانا كون كنتي تديها فكلامي كون راه الكونط عندك غايطرطق والدهوبات هاكا هاكا عندك..ساعة معامن انا
ناضت تاضحك هازة ساكها: ايوا بنتك لي ضربها ضربها على الخروج والحوايج ههه بسلامة
حكيمة: فعواانو يابنتي هادا لي غاياخدك باز ليه مسكين
خرجات تاضحك وتردد: سعداتو بغيتي تقولي هههه
باست ختها الصغيرة فطريقها وخرجات من دارهم غادة على رجليها لخدمتها..مع دخلات مع تليفونها بدا بصوني ..هزاتو مجاوبة والتر وفالدروج طالعة
علياء: بون سوار
والتر: بون سوار حبيبتي ..ساليتي شغالك
بغات تجاوب هي تسمع الصداع لتحت ضورات راسها بدهشة وهبطات مسرعة مرة خرا .شافت فالباب داخلين تلاتة الدراري سياح اجانب تايتغاوتو ويهزو فايديهم معاجبهم حال
والتر: علياء.. شنو واقع
ردت مغوبشة وتتحاول تسمع مالهم: ماعرفتش.. هادو خرجتهم فالصباح على أساس مايرجعو حتال غدا مع السبعة
والتر: مخلصين النهار كامل ادا
ردت: آه ولكن شفتهم رجعو وأكيد وقع شي مشكل.. غانقطع نشوف مالهم ونرجع نتاصل بيك
والتر: داكوغ
قطعات غادة جيهتهم وهوما كيف شافوها زادو فيه مكملين على غواتهم وهي تتحاول تفهم اش واقع وبالانجليزية تتهضر
علياء: بليز غير واحد واحد نفهم شنو واقع على الأقل.. ياك خرجتو الصباح مع السبعة على أساس ماترجعو حتال غدا مع السبعة شنو وقع !!!؟
رد واحد فيهم مخرج فيها عينيه: خدمتكم ناقصة وعامرة تبرهيش وقلة احترام
زيرات فكها بعصبية لكن متحكمة فراسها وبهدوء جاوباتو: عفوا ..جمع فمك وهضر باحترام إلى وقع شي مشكل قولوه نحلوه ونعرفو الخلل فين
رد: حنااا مخلصين فلوسنا بااش نفوجو مااشي تبرهشو عليناا هناا
رد واحد آخر: نورماالمو خاصكم تكونو عمليين والكليون ملك عندكم أولى؟ مااشي تزمرو عليناا بالخوا الخاوي وحنا حاطين ليكم فلوس صحاح اطاابل.. دابة بغينا فلوسنا يتحطو على خدمتكم الناقصة
علياء: غانغمض عيني على هاد الكلام كامل ونعاود نسولكم ااشنو وقع.. كان المشكل فينا مرحبا نحطوه فوق الطبلة وناقشوه.. كان من الشيفور غانتاصلو بيه يحضر ونشوفو اقوالو حتا هو وشنو كاين…
قاطعها واحد تايقلب فساكو منيرڤيي بالجهد: مييغد الكاميرا دياالنا مشاات
علياء: فين مشاات .؟
رد: الكاميرا ديالنا شفرهاا داك السراق تاع الشيفور .. وداابة خاصهاا تحضر
رد التاني: عيطو للبوليس دابة
بقاو مني منك تاواحد ماعطاها راس الخيط وهي فيهم مصغرة عينيها تتشوف وتبلاني ومن حركاتهم والعصبية المفرطة باش تايدويو شمااااتهم وفهمات بلي غير تايطبخو عليها وناوين يسلتو بالخلاص كيف تايدير البعض لدالك مايخفاش عليها هاد النوع.. زفرات بضيق وراسها بدا يحرقها خلاتهم وهزات تليفونها تاتاصل بسلمان ..تسنات مدة عاد تفتح الخط وجاوبها بصوت عالي بحكم الموسيقى ضايرة بيه وصوت البنات تايضحكو حداه
سلمان: الزين المسراار هههه
#يتبع
شاركنا رأيك في هذا الفصل 🌹