تنهدات تتشوف جهة الكليان: سلمان.. واش سافرتي ولا مازال؟
رد بجدية: آه.. مال صوتك مبدل واقعة شي حاجة
علياء: وقع واحد المشكل ولابد تحضر
سلمان: بلااتي خليك معايا “ناض وسمعاتو قال لشي حد حداه” انا راجع الغزالة “جاوباتو بضحكة مايعة وعلياء تتسنا حتا بعد على الصداع وجاوبها
سلمان: ياك لاباس.. أش تما
علياء: الكليان لي خرج هاد الصباح بغاو يفتاعلو مشكل من والو وگالك خاص البوليس يحضر، حيت الشيفور مالشيفور ماتعاملش معاهم مزيان وزاد سرق ليهم الكاميرا
سلمان: الدراري تانعرفهم واحد واحد اعلياء مافيهمش هاد الفعايل، يعني واضح بغاو يديرو سلاتة وتايقلبو على السبة
علياء: نتا مايمكنش تجي دابة
سلمان: مغانجي نسالي قصارتي ونوصل حتا نلقاكم فرتكتوها ههه
ضحكات تتحرك راسها بلا حول: القصاير اسيدي نتا لي جات معاك
ضحك مجاوبها: لي حسدني يدير بحالي ههه مرة خرا نعرض عليك نقصرو بجوج
علياء: فكني بعدا ونشوفو القصارة من بعد
سلمان: شوفي، أولا غانصوني على الشيفور نفهم اش واقع ونسيفطو عندك ..نتي تبتيهم بيما جا وخليك معايا فالخط نسمعهم اش تايخربقو تم.. واخا
علياء: صافي واخا .. شكرا
سلمان: كوليها.. تهلاي
خلاتو يتكلم مع الشيفور وهي توجهات جهة الدراري، وقفات عليهم تتجمع النفس وتزفر مازال مابغاو يسكتو ومازال مافرزو كلاامهم على حاجة وحدة
نطق واحد فيهم بعصبية: حنا دقيقة مازال مابغيناش نبقاوها هنا صافي ردو لينا فلوسنا وآخر مرة نرجعو لهاد الخدمة دالزفت
رد التاني: وفلوس الكاميرا ديالنا حتا هي
زيرات عينيها ورجعات حلاتهم جامعة النفس: الشريف.. كانت عندكم ميزاديسپو 24 ساعة وتمنها معروف شحال.. ماشي مشكلتي انا إلى دوزتو فيه 12 لساعة فقط، واخا الله يجعلكم دوزو غير ساعة غاتخلصو التمن كامل هادو من لي غيگل الواااضحة فالرياض .. ومسألة نرد ليكم فلوسكم بسبب مشكل مازال للآن انا معارفاهش شنو هو راه بلاما تحلمو بيها .. زائد………
قاطعها رنين الهاتف لقاتو سلمان كايصوني هي تقول بهدوء
علياء: تفضلو گلسو نجاوب صاحب لاجونص ونجي نكملو كلامنا
رد: حنا ماعندنا مانكملو معاك بغينا فلوسنا
علياء: هاد التوتر والانفعال الزايد ممزيان لا ليك لا ليا.. حيت لدابة مازال تانتكلم معاك بأدب ..تفضل هاني جاية ندويو وأكيد كلامي غايروقكم وبزااف
خلاتهم وزادت للقنت ..جاوبات تاطلع النفس وقالت: الو.. كاين شي خبار
رد بجدية: دويت مع منصف الشيفور لي كان مرافقهم، حلف ليا بلي مكان واقع حتا مشكل بالعكس كانو تايحاولو يجبدو معاه شي بلان وهو غير ساكت وكانت معاهم واحد الگاورية حتا هي.. مهم الكاميرا قالك نساوها عندو عاد تأكد من الطموبيل فاش وصل للاجونص ولقاها تما، وراه وصيتو يجي لعندك ويجيبها معاه
علياء: ادا أما بالتلفة نساوها.. اما بغاو يبينو بلي هو لي سرقها
سلمان: كلشي ممكن
علياء: ماعليش، انا غانتصرف
سلمان: خلي الخط دايز نسمع كلامهم
ردت: اك ..
هبطات التليفون غادة للصالون لقاتهم باركين واحد جنب واحد ..قادات الكرسي وبركات مقابلة معاهم والتليفون فوق الطبلة حطاتو مقلوب وحاجبها طالع
علياء: ادا اسيادنا.. قلتو وقع ليكم مشكل مع الشيفور.. والخدمة ديالنا ناقصة ..والكاميرا تسرقات؟
رد الأول: تماما ..وعلى هاد الأمر بغينا تعويض لي حتا هو من ليغيگل الواضحة فالرياض امدموزيل.. مادرتوش خدمتكم هي هاديك غاتردو لينا فلوسنا ..اولى باغة تنكري هاد الأمر
غوبشات بهدوء: ىا ابدا.. ولكن علاش تعويض ؟ ..انا باش غانعرف ونتأكد انكم متتكدبوش ومتتفتاعلوش هاد الأمر؟
رد مطلع حاجب بحالا باغي يضربها: دابة حنا ولينا كدابين ؟؟
علياء: شوفو ..نكون معاكم وااضحة وصريحة بلا هاد اللف والدوران لي نتوما تاديروه.. حنا رياض محترم، وسمعتنا سنييين وهي محفورة ماشي عاد..وانا كدالك سنين وانا فهاد الضومين يعني دوااازت و شفت الكداب من النصاب من الصادق ..ايه كيف قلتي قبيلة الكليان سي تان غوا متافقة معاك.. ولكن كيف حنا كانكرمو الضيف وهاكدا معروف علينا كعرب عامة وكمغاربة خااصة، تانتسناو واحد المقابل بسيييط بزاف وهو الاحترام ..هاد الاحترام لي المفروض يكون متبادل وخاصو يحضر فأفعالكم وكلامكم ماشي تستحمرو الناس تحت مايسمى الكليان سي تان غوا..
رد: هاد الكلام الى طبقتوه يكون حسن ..وبلاما ماضيعي الوقت باش تفلتي من التعويض ديالنا حنا من هنا ممحركين حتاا ناخدو فلوسنا كامليين ولا لاپوليس يحضرو
زيرات سنانها مبسمة: ماقلتي عيب.. وحتا انا لي عندي وضحتو وهاد السنين كلها لي شفنا فيها نمادج متل اوجهكم الكرام خلاتني ندير كاميرات مراقبة فالطموبيلات ديال لاجونص معامن خدامة.. يعني غانطلبو الشيفور يحضر يورينا الكاميرا ونشوفو هاد المشكل لي وقع ليكم معاه فين وايمتا وعلاش وقع ..والكاميرا حتا هي فين غبرات.. وغانشوف الكاميرا لي مديورة قدام باب الرياض ونسمع شنو كنتو تتقولو ملي يالله هبطتو حتا دخلتو مع الباب وحتا فاش خليتكم انا ومشيت نجاوب فالتليفون ..اش بان ليكم؟
شافت وجوههم تغير فيها اللون.. شافو فبعضهم وبشك نطق واحد فيهم
رد: ملي كاينة الكاميرات علاش باركة معانا هنا كنتي تشوفيها من الأول
علياء: الكاميرا باش نشوفها خاصاني لوطوريزاسيو من عند مسيو والتر لي هو صاحب الرياض.. حاليا هو فسويسرا ومغايعطي لوطوريزاسيو حتا يعرف السبب ويحضر البوليس حتا هو..وانا كانتسنى كليان مهم هاد الليلة ماباغاش البلبلة توقع فالرياض بسبب امر مبرهش ماحسبتوش ليه حساب ..ولولا دوك الكاميرات كون عطيتكم فلوسكم من زمان مالي على هاد قوة البلا بلا من قبيلة وبرودة الدم ؟
دوزات عينيها عليهم تتسنا جواب.. سكتو وسقلو تايرققو عينيهم ومالقاو مازال مايقولو حتا دخل الشيفور هاز فايدو الكاميرا ديالهم
علياء: سي منصف عطيني ديك الكاميرا لهنا.. فين لقيتيها؟
منصف: كانت محطوطة على الكرسي فين كانو باركين امدموزيل حتا رجعت للاجونص عاد لقيتها ..وسي سلمان قال بلي غاتحتاجي الكاميرا لي فالطموبيل
..دكر سميتو هو يرن تليفونها باسمو ..عرفاتو قطع ملي سمع كلامها باش يوصي الشيفور شنو يقول وهي بدورها قطعات عليه تتشوف فيهم وبجدية قالت
علياء: ايوا تفضلو ..ايلا مازال عندكم شي تدخل مرحبا ؟
شاف فصاحبو وقال مكره: غانخلصو 12 لساعة لي ضيعنا وكمالة الايام لي بركنا فالرياض
ردت بحدة: الخلاص غايكون 24 ساعة كاملة، ماشي مشكلتي انا إلى طلعتو نصابين وماكملتوهاش.. وغانكون ممتنة إلى طلعتو وجمعتو قشكم مانعاودش نشوفكم عندي هنا فالرياض وإلا غادوزو لي بقا فالعطلة ديالكم فالحبس ديالنا تزوروه حتا هو وتشوفوه كيفاش داير.. اش بان ليكم
شافو فبعضهم وبداو يتكلمو بالاايطالية ويتناقشو ..هزات تليفونها والكاميرا ديالهم فايدها مخلياهم يدويو كيف بغاو ..اتاصلات بسلمان لي جاوبها فالحين وقال
سلمان: الو.. اش وقع تحل المشكل
ردت بارتياح : الحمد لله تحل، غايخلصو لي عليهم كامل مكمول ويدردبو عليا من هنا.. عصبوني بالله
سكت شوية وقال: الرياض فعلا فيه كاميرات !!؟
علياء: طبعا لا.. عرفتيهم شحال ساويين ولا لا هادا من غير أنك مغااتلقاهم إلا بستة وستين كشيفة
ضحك بدهشة وقال: عرفتها.. وفاش سمعتك دكرتي الشيفور والطموبيل قطعت باش نوصيه شنو يگول
علياء: شكرا ههه راه جا وجاب الكاميرات ديالهم.. هاهوما ناضو ينزلو قشهم لهلا يربح الما والشطابة
ضحك وضحكات بدورها قائلة: رجعتي لقصارتك
سلمان: لا.. بصراحة برافو عليك ..دكية ..كپابل.. وصعيب دار بيك
بسمات تتسمع لمجاملاتو: انا من العينين تانفهم بنادم بلاما تحگرني
سلمان: لا لا يتخاف منك اختي
علياء: ههه نخليك تسالي شغالك وانا غانمشي لشغالي.. ليلة سعيدة
سلمان: الله عوين ..فاش ترجعي لداركم نصوني عليك
علياء: واخا بسلامة
قطعات تتشوفهم هابطيل بليساك ديالهم ..تأكدات بلي خلصو گاع لي عليهم عاد ردات ليهم الكاميرا وزادو خارجين بوجه حمر مفقووص ..تنفسات مرتاحة وعلمات والتر باش طمأنو عاد هزات ساكها خارجة على رجليها وتتصوني على سارة
داوها رجليها لجامع الفنا فين مولفة تمشي وراما تخرج من خدمتها، تما بلاصتها ديما ومعروفة بين صحاب الماكلة والحلايقية
..دازت بين الگور الزوار والأجواء الحماسية لي ولفو عينيها يشوفو وعند مول الحوت بركات طلبات لي بغات حتا وقفات عليها سارة وعطاوها للكلام يقولوها ويضحكو عليها خصوصا ملي عاودات ليها المشكل ليوقع هاد اليوم ..غرگوها نيت وتناسات الأمر شوية عاد رجعات لدارهم.. ألقت السلام وطلعات لبيتها تتبدل حوايجها ببيجامة خفيفة زرقاء ..فركات شعرها بصباعها وحطات التليفون يتشارجا عاد تخشات ففراشها تاطيب نعاسها وتستاعد ليوم جديد ومعركة جديدة فخدمتها..
رن التليفون وسط صمت الغرفة وسقيلها، جراتو عگزانة قرات الاسم وجاوبات بصوت خفيف
علياء: الو
رد بصوت هادئ كهدوء هاد الليلة: مسا الخير ياكما فيقتك
علياء: لا عاد نويت ننعس .. كيف داير
سلمان: الحمد لله.. نتي كي بقيتي
ردت: الحمد لله ههه سالات قصارتك
ضحك وقال: مشيت على ود الخدمة وصافي كان عندي كليان مهم.. أما دوك الأجواء متايعجبونيش خصوصاً الموسيقى العالية …
تتبرزطني فمخي
عوجات فمها بشك: مممم.. زعما ماكنتيش فشي بار مدور بيك شي قريعات هاكا.. والنساء من هناك هههه عادي غير گر گر
رجع ضحك تايسمع ليها: لا لا الله عفانا من الشراب لا هو لا الگارو
ردت بطنز: لا العيالات ياك ههه
سلمان: العيالات بليتهم حلوة وحامضة، شي مرات تتلاقا بشي وحدة تتجيك على الگانة حتا تتسالي وقيتتها، وشي مرات تتلاقا بشي حمقة وراقها مقطعين، تتكرهك فيهم كاملين
علياء: ههه داوي على مروى
زفر من نيوفو وقال: واييه.. حرت معاها بالله
رمشات شوية وبعد تفكير قالت: مادام هاكا علاش مازال ماتفارقتي معاها.. نقولو لاسقة فيك وحبها متملك وخايب، ضور فيها شي نهار وأكيد غاتفهم راسها
رد بحيرة تايتنهد: درتها واحد المرة وقلت صافي تهنيت وهنيتها ، حتا تاتصوني عليا ختها تتبكي وقالت ليا بلي مروى فالسبيطاار وراما دارت محاولة انتحار.. من تما وانا خايف ندير شي ردة فعل تندمني عليها طول حياتي
غوبشات مزير عليها خاطرها: واش حمقة هادي.. لهاد الدرجة
سلمان: الحاجة فاش تتفوت القياس تتآدي مولاها بعدا، عاد لي ضايرين بيه
علياء: دنوب العيالات حارين اسلمان، رد بالك
رد بجدية: انا متانضحك على حد متانوهم حد بشي حاجة مكايناش، من الأول تانكون مفهمهم شنو باغي وعمري طمعت شي وحدة بشي حاجة ولا جبدت حس الحب على لساني.. من غير لاتخايلات ليها مانعرف
علياء: على سيرة الحب اسيدي ضروك طيح فلي تحدهم ليه وتخرج فيك دنوبهم كااملين غير صبر هههه
ضحك ضحكة خفيفة وقال: الله ينجيني منو ههه انا هو لي عمرو يحب غير هني داك الراس
طلعات حاجب تاضحك: الله ..وعلاش
سلمان: هاكاك
علياء: الا.. زعما ماتكونش كنتي تتحب شي وحدة وهرسات لك القليب حتا وليتي زهواني ههه
رد تايطنز: آه ومن تما وانا داير حداد ههه سيري ترتاحي سيري
علياء: تصبح على خير
قطعات راداه لمكانو ورجعات لفراشها تنعس وهضرتو فبالها تادور
طموحة وعقلانية، معقولة وهبيلة احيانا، هادئة وكلها حيوية وبقشابتها الواسعة عايشة حياتها كيف هي باغية .. إنسانة قلبها طيب هشيش ودماغها عامر وقاسح ..هاكدا كانت علياء ..البنت المراكشية لي خدمتها أولويتها وعائلتها هي حبها الأول والأخير فقط.. طموحة تعيش أفصل من لي عايشة فيه الآن ..باغة طلع عائلتها لمستوى أكبر من لي هوما فيه وبجدارة تاتستغل أي فرصة جات قدامها ..
حطات كأس قهوتها وهي لابسة كسوة سوداء مشبكة من العنق وسميطة رقيقة ضايرة على خصرها.. وعينيها مرة مرة على الشاريع… حتا شافت كاط كاط بنية حبسات قدام باب الرياض ومنها نزل والتر بدجين وتيشورت زرق، لابس نظاراتو وتايرد شعرو الشهب للور ..سلم على الخدامة من الباب وعلى بعض من الكليان كدالك علياء وقفات راسمة بسمة عريضة على شفايفها شافها ولعندها توجه عنقها وبالوجه سلمات عليه ناطقة برقة
علياء: على سلامتك
والتر: الله يسلمك احبيبتي “باس يدها بحنية وقال” توحشتك بزااف ..كلشي فيك توحشتو
بسمات: غبرتي بزاف هاد المرة.. نتمنى تكون صحات شوية
والتر: شوية وصافي راها تتحاول ..نسابي العزاز شنو تايعاودو هههه
ضحكات وقالت: الحمد لله راهم تايسلمو عليك ..ماما عارضاك تتغدا معانا هاد النهار
رد بأسف: ماقادرش احبيبتي جيت عيان بزاف .. نأجلوها لمرة خرا إلى مكان حتا حرج
علياء: لا لا ماشي مشكل.. طلع للشومبر ديالك ترتاح انا غلنقاد ليك المسائل ديالك
رجع باس ايدها: ميغسي بزاف مابيل ..غاناخد دوش بعدا من بعد ننعس شوية
علياء: بالصحة مسبقا هههه
خلاها وطلع فحين هي رافقات لي كايطلع الڤاليزات ..حلات الشانطة ديال حوايجو تترتبهم وخلات ساك الملفات ديالو على جنب فالبلاكار سالات وخرجات نازلة لخدمتها مرة أخرى باش تستقبل وفد جديد من الكليان غاينزل فالرياض ومخلية والتر فبيتو يرتاح من السفر
وقفات ليهم فالباب بالابتسامة الحلوة وصوتها العذب تترحب وتسول على رحلتهم كيف مرت وكيفاش جاوهم مدن المغرب الخلابة ..دخلات تتكلم معاهم عاطياهم وقت حتا طلعو يرتاحو وهي دازت للكوزينة، تفقدات الوجبات الغذائية ديال هاد اليوم ووقفات جنب الشيف قائلة بجدية
علياء: الشيف..رمضان على الأبواب داكشي باش السيستيم غانحاولو نقادوه للناس لي تايصومو ..وحتا الگور راك عارف غايبغي يكتاشف الوجبات التقليدية لي تاتكون فهاد الشهر الفضيل
الشيف: كوني هانية امدموزيل علياء قاديت موني مناسب لهاد الأمر، غانزيد فيه شي أمور ونرسلو ليك للبيرو ديالك
علياء: وعليه اسيدي ..الله يعاونكم
هزات شوية من البسطيلة خارجة من الرياض وتاتاكل منها .. خدات طاكسي ونيشان لمدرسة تعلم السياقة تكمل الپيرمي ديالها ..كلما سمحت ليها الفرصة تاتمشي باش تكملو والايام أو الاسابيع لي تتكون مشغولة فيها تتضطر تأجلو ..وصلات وهبطات سلمات عليهم وعلى الكوتش وطلعات كيف العادة مخلوعة شوية وتتبع تعليماتو كلما قالها شي حاجة تتقيدها فعقلها باش عليها تعقل ..غادة جاية ومن حدا لاجونص ديال سلمان تادوز دهابا وإيابا حتا سالات الوقيتة ووقفات السيارة جنب الطريق نازلة تترتب تنفسها المرتعش
علياء: الحمد لله، اليوم شوية ههه
رد: تبارك الله عليك ..إلى واضبتي على المجيء غاتاخدي البيرمي ديالك فأقرب فرصة
علياء: غير المشاغل وصافي ..شكرا ليك بزاف
رد: العفو
سلمات عليه بالايد وزادت هازة ساكها وللاجونص داخلة ..سلمات على مهدي فطريقها وعلى العاملين تما لي ولاو حافضينها وهي كدالك عاد توجهات للمكتب ديالو ومن الباب وهي تتسمع صوت أغنية “خاينة” للشاب أشرف وسمية
..دقات حتا سمعات الادن عاد دخلات شاداها الضحكة وهو مع الأغنية مازال تايدندن حتا طلع فيها عينو وقال
سلمان: زارتنا البركة
علياء: الله يبارك فيك
ناض يسلم عليها: اش خبارك هانية
علياء: عادي الحمد لله ونتا
سلم عليها بلاپيز كيف العادة وفجبهتها باسها: الحمد لله، غير مع الخدمة وتمارا ..واحد الخطيب وصل ولا باقي
بركات حاطة ساكها قدامها: سي .. أغنية جديدة هادي ههه
بسم تايلوي عنقو بعياء: وااييه ههه عجبوني الكلمات وحتا صوت لي تايغنيها زوين ..نوضي نمشيو ناكلو شي حاجة
علياء: اها هي دابة ..
طفا الأغنية وخدا سوارتو خارجين من المكتب جنب بعض ومسافة قليلة مباعدة بينهم ..طلعات فطموبيلتو ديمارا وشعل نفس الأغنية حتا ضحكات وليها تلفت تايدندنها بصوتو الرجولي
سلمان: خاينة ماعاد نصافيك
يلي خاب ظني فيك
علياء: هههه
سلمان: لازم من بالي نمحيك يالغدارة
خاينة وماعاد نصافيك
يالي خاب ظني فيك
لازم من بالي نمحيك يالغدارة
نزلو فجامع الفنا ولمقهى ارگانة توجهو داخلين ..لقا مروى تما باركة بسروال دجين ابيض مع شوميز زرقاء مخططة بالازرق والابيض مع فولار بني وطالون عالي فرجليها، حاطة كاس العاصير قدامها وساك فالكرسي جنبها.. شافتو جاي وناضت مبسمة لكن فورما شافت علياء وراه تجمعو حجبانها وعلى فمها زيرات مخبية انزعاجها
سلمان: السلام عليكم
باستو فحنكو وقالت معنقااه: توحشتك بزاف ..من قبيلة وأنا تانتسنا
برك تايجبد ايديه: من لاجونص لعندك نيشان
سلمات على علياء بالحناك وبركات فجنبو وعلياء قدامهم مبتاسمة بعفوية
علياء: مروى اش كاتعاودي.. كيف غادة مع الوقت ومع الخدمة
ردت بابتسامة: الحمد لله احبيبة ونتي.. خطيبك جا ياك؟
حركات راسها: آه عاد هاد الصباح وصل
نطق سلمان كايطنز: على سلامتو ..هي غاتبرعينا كادوات
علياء ضحكات وقالت: ياك هههه وعلاش اخويا؟
سلمان: وليت داخل معاكم فالفاميلة زعما، قولي ليه عندي خويا الكبير تاهو جيب ليه معايا
مروى: سلمان شنو تشرب
طلع راسو للسيرفور لي وقف عليهم وقال: شي عصير بارد الله يحفظك ..حلقي بح
علياء: حتا انا بحالو
طلعات فيه مروى حاجب وقالت بتبسيمة صفرة: باينة كترتي اللغا اليوم
ردت علياء كاضحك: كتر الغنا هههه وكون غير كان شي صوت
طلع حاجبو : ياك الاخت ..اها الله يحفظك
مروى: علياء ..علاش ماتعرضيش على خطيبك احبيبة نشوفوه ونتعرفو عليه
ردت بهدوء: اها مرحبا.. نسولو وإلى بغا نديرو شي جماعة لينا بربعة
مروى: ادا غدا نتغداو مجموعين
سلمان: ومنها نيت نتكلمو على الكونطرا مكاين لاش نزيدو نأجلو
علياء: واخا اسيادنا هههه صبرو نسولو ونرد عليكم
حط ليهم السيرڤور طلباتهم هزات علياء كاسها تشرب منو وتروي حلقها شوية تحت نظرات مروى الحادة، لكن فورما تهز راسها تتبدا ليها تتبسم
مارتاحتش لشوفاتها نهائيا وبقا خاطرها متضايق خصوصا أنها متتعرفش دوز الحاجة وتعطي البارد وبنادم من عينيه تتقراه
..شربات شوية من عصيرها وناضت بأدب قائلة
علياء: سيادنا، خليت ليكم الراحة انا غانمشي نرجع لخدمتي
رد سلمان مطلع حواجبو: خليك مازال شوية حتا نردك
علياء: مكاين لاش غير خليكم فراحتكم ..مروى تهلاي فراسك اختي بسلامة عليك
ردت ببرود معوجة فمها: حتا نتي احبيبة ..باي
سلمان: تهلاي
خرجات مخلياهم بزوج وشدات طاكسي صغير ردها للرياض ..دخلات مع الباب تتفقد الخدمة والأوضاع هي تنزل عندها وحدة من لي مكلفات بتنظيف لي شومبر وقالت فودنها
البنت: مدموزيل علياء.. سي والتر خلا لك واحد الهدية فبيتك
بسمات قليلا وردت عليها: واخا شكرا
البنت رجعات لخدمتها وعلياء طلعات الفوق باتجاه غرفتها والضحكة تتسرق من شفايفها.. دخلات ولقات فستان احمر محطوط على السرير.. مع علبة مستطيلة فيها طالون اسود بشرائط حمراء
..هزاتو وعينيها تايبريو سدات الباب وفالحين غيرات فستانها بيه ..سدات السلسلة من الجنب ووقفات تتشوف فالمراية شحال واتاها وزادها جمال على جمال ..فستان محتشم من الفوق بكمام قصيرة ومفتوح من الوراء لنص ضهرها وحد الركبة واصل.. خلات ليبا موس ديالها ولبسات داك الطالون، وقفات تتقاد شعرها بصباعها والكعر فشفايفها هو يتدق الباب وبسمات قائلة
علياء: دخل
فتحو والتر ودخل بشوميز بيضاء مع دجين اسود.. طلعها بإعجاب كبير وملامح منباهرة قرب بخطوات بطيئة ناحيتها تايتأملها بعينيه والبسمة على شفايفو وهي قالت تتضحك وتقيس فالكسوة
علياء: جات معايا ذ!؟
رد: فاش لبستيها ولات أجمل
قرب باسها فحنكها وهز ايدها باسها وقال متنهد: خاصنا نزربو على وراقنا باش نديرو العقد ديالنا ونتزوجو فأسرع وقت.. شحال قدي نصبر على الوريدة ديالي
ضحكات برقة منزلة عينيها وحناكها حمارو: كل حاجة فوقتها زوينة ..ولي بغاها الله هي لي تكون أكيد
والتر: فعلا.. مشينا؟
علياء: فين بعدا
والتر: سورپرييز
هزات ساكها تابعاه مد ايدو شدات فيها قدام انظار العاملين فالرياض حتا فتح ليها باب السيارة ركبات وركب جنبها مديماري
تقويسة قاعة بناهيض ..حي فالمدينة القديمة وفيها تايتواجد مطعم “الفندق” الفخم..
وقف بسيارتو نزل وفتح ليها الباب حتا هبطات وشدات فايدو ..وقفو قدام رجل كبير فالعمر لابس جلابة مغربية تقليدية بالابيض وهاز فلامة فايدو ..من لباسهم عرفهم جايين للمطعم حنا راسو مرحب بيهم بتامراكشيت ورافقهم لباب خشبي كبير ومنقوش دق فيه وحلات بنت بابتسامة.. رافقاتهم تجاه مكتب فيه شاب أجنبي مع بنت رحبو بيهم وقال الشاب تايتفقد واش كاينة اسماءهم فالحجز
الله يخليك الإسم
والتر: والتر وعلياء
تأكد وقال: مرحبا.. الطاولة ديالكم رقم 10 ..امسية سعيدة امدام
تبسمات ليه وعيونها تتبري بانبهار: ميغسي
رافقهم السيرفور للطاولة ديالهم جر ليها الكرسي بكل جنتلمانية وجلسات بأنوتة وبسمة أنيقة على شفايفها .. جلس قدامها والتر وهو حط قدامهم مناديل بالطرز الرباطي وفايدو هاز مريشة ماء الزهر ..رشها على ايديهم عاد مدلهم الميني وعلياء عيونها تتسارا على المطعم ككل حمقها الديكور الدافئ والجو الهادئ الناس كلاص وتصرفاتهم راقية بالجهد تتسمع صوت الكؤوس والفراشط فقط .. فاقت من سهوتها ملي والتر شد ايدها وطبع على راحتها قبلة عميقة وقال
والتر: عجباتك البلاصة احبيبتي
ردت بهدوء وسعادة: غزالة بزاف.. كنت محتاجة نيت نبعد شوية من ستريس الخدمة وهاد البلاصة تتحمق.. شكرا ليك
تبسم : مابيناتناش شكر احبيبتي.. دابة نرجعو لسويسرا ترتاحي شوية ونرجعو
علياء: إن شاء الله ..رمضان جاي فالطريق، الله يدخلو علينا بالصحة والسلامة
والتر: آمين.. اول رمضان ليا وانا مسلم ههه احساس مختالف
تبسمات مزيرة على ايدو وقالت: الصوم ماشي صعيب لديك الدرجة ..غير البداية فقط والى جهدتي على راسك، ولكن ربي تايجازيك على صبرك.. زائد أنه من الناحية الطبية مفيد بزاف للصحة وهادشي الأطباء الأجانب تايقولوها
والتر: عارف احبيبتي.. الله يوفقني ويدخلو عليها بالخيرات
علياء: آمين ههه .. آه فكرتيني.. تعقل على سلمان لي عاودت ليك عليه؟
والتر: مدير الاجونص معامن تانتعاملو ؟
علياء: سي هو.. عرضات علينا حبيبتو نتغداو مجموعين غدا الى كنتي مسالي
شابك حواجبو باعتدار: للأسف احبيبتي مانقدرش ..غدا غايجي صاحبي يورك للمغرب على ود شي أغراض مهمة وخاصني نتلاقاه
حط ليهم النادل طلباتهم وعلياء قالت باستفهام: شكون هادا.. تانعرفو؟
رد: يورك.. كان تايجي مع حبيبتو اليكس وطوبياس
طلعات حاجبها بتدكر: ااه صافي عرفتو.. جاي سياحة ولا خدمة؟
والتر: لا خدمة هاد المرة، غايفتح ريسطو تما فسويسرا وبغا الديكور يكون مغربي تقليدي.. غايشريه من هنا ويديه معاه
علياء: ايوا الله يعاونو “دارت المنديل وبدات فالاكل ” ماعليش انا غانعتادر منها .. ولكن ضروري نمشيو على قبل الكونطرا حيت بقات مأجلة دابة ربع شهور
حرك راسو تاياكل: إن شاء الله غدا فالصباح نمشيو ..دابة نساي علينا الخدمة وهاد سلمان وحبيبتو.. قولي ليا “خدا يدها باسها وقال بعيون هايمة فيها” توحشتيني؟
ضحكات تترمش فيه: هههه شوية
والتر: غير شوية؟
علياء: مممم ههه ونتا
والتر: ديما فالبال امابيل، وتانحلم بداك النهار لي نتجمعو فيه انا وياك ..تنبغيك احبيبتي “تبسمات مسروط لسانها وعلى هاد الكلمة ماعرفات باش تجاوب..سكت شوية فعينيها تايشوف وقال” ونتي تتبغيني اعلياء؟
.
بون نعيسة.. لكن لاتنعسوش فالتفاعل عاااد غانقولو بسم الله فلقاء والتر بسلمان والمفاجئات لي جاية لعلياء فهاد رمضان وبعدو ومع صديق والتر بالتحديد ..حلل وناقش واشهاراتكم اشهاراتكم راه تشهيت نشوف بناتي محيحات فالگروب تشهيييييت
جرات ايدها تترمش وتترتب الكلام لي بغات تقول حتا رجع سولها
والتر: متتبغينيش ياك
تنهدات قائلة: الحب كلمة كبيرة وشعور أكبر اسليم ..نتا تتعرفني مزيان معندي لامع الكدوب والا التخلويض، وحتا دابة غانصارحك ونقول لي كاين
جمع حواجبو ورجع اللور: الى كان كلامك غايزعج جلستنا بلاش منو
علياء: نتا معزتك فقلبي كبيرة بزاف ..ماشفت منك إلا الخير الحمد لله كيفما كنت تانحاول نكون عند حسن ظنك فيا وربي شاهد.. وكيف قلت ليك نهار طلبتي مني الزواج، نظرتي ليك كانت نظرة احترام من وحدة خدامة للبوس ديالها فقط
والتر: ودابة؟
علياء: حاليا مازال محاساش بهاد الأمر تغير.. ولكن الزواج حاجة خرا كلشي فيه تايتبدل.. غانشاركو حياة وحدة بتفكير مختالف.. غانشاركو وليدات إلى ربي كتب .. أولى؟
سكت شوية وقال: نتي باغة تولدي معايا؟
ردت بإصرار: أكيد آه ..انا قلت ليك النهار اللول زواجي منك مااهو مصلحة ولا متعة.. باغة الإستقرار معاك واحلى حاجة تتمناها اي مرا هي وليدات يحليو حياتها.. نتا كتب ليك الله ودرتي ولادك وشفتيهم قدام عينيك تايكبرو، وأنا كدالك باغة “كملات بنبرة شك” وكانتمنى تصارحني دابة ادا مابغيتيش
جاوبها بنفي مبتاسم: نهائيا بالعكس..باغي يكون عندي وليد ولا بنيتة منك ويكونو تايشبهو ليك
تبسمات براحة: إن شاء الله
والتر: غانتسنا داك النهار لي غاتبغيني فيه بفارغ الصبر وغاندير مافجهدي باش يجي بسرعة.. je t’aime
ضحكات حانية عينيها وخدودها موردة: كمل ماكلتك غاتبرد هههه
باس ايدها وكملو عشاهم بهدوء تايتكلمو فمسائل الخدمة مرة مرة ..سالات الأمسية وخرجو من الريسطو للسيارة ومن تما وصلها حتال باب دارها تسالمات معاه ونزلات فرحانة بهاد الخرجة ولبيتها مباشرة طلعات.. بدلات حوايجها بكسيوة خفيفة تخشات ففراشها و هزات التليفون حلاتو لقات سلمان متاصل بيها عدة مرات رسلات ليه ميساج بلي غدا فالصباح غاتكون عندو فلاجونص هي ووالتر وحطاتو جنبها تاطيب نعاسها في أمان الله
صباح مشمش جديد فمدينة البهجة.. الحرارة والشموشات تتحرق مع العشرة الصباح.. خرجات علياء رفقة والتر من كافي فرانس بجامع الفنا وراما فطرو تما ..لباسها كلاسيكي بسيط ويأسر العين كالعادة على جسدها الرشيق، فستان كاروات باللون الاخضر والاسود وحزام رقيق أسود ملوي على خصرها النحيف.. كمامو قصار وحد الركبة لبسات معاه ليبا موس سوداء وطالون رقيق اسود ..فتح ليها طلعات وركب جنبها حتا هو لباسو انيق مهتم بصحتو البدنية وبشكلو الخارجي بشكل كبير الشي لي تايخليه يبان صغر من عمرو وأحنبي بامتياز بسباب لون عينيه وشعرو الشهب..
ديمارا شاد ايدها وقال باستفسار: علمتيه بلي غادين عندو ؟ باش الى كان خارج أو ربما عندو شي شغل بلاما نمشيو حتال تما
ردت بهدوء: آه قلتها ليه فميساج البارح .. ولكن كانظن غانلقاوه مشغول شوية حيت فالصباح تايكون مبرزط مع الشيافر
والتر: اوك
وصلو قدام لاجونص ومع هبطات شافت سلمان خارج بشوميز بيضة طاوي كمامها ودجين كحل بحال تخنزيرتو الجدية وهو شاد وراق فيديه وباينة مبرزط مع الخدمة.. شافها مبتاسمة هو يفك الغوباشة شار لمهدي يتسناه وتوجه لعندها مباشرة بلاما ينتابه لوالتر لي نزل حتا هو
سلمان: الزين .. صباح الخير
سلم عليها قدام نظرات والتر وراسها باسو كيف العادة
علياء: صباح النور ههه “ضارت تعرفو على والتر لي واقف متعجب وقالت” هادا سليم.. ا بغيت نقول والتر
سلمان مد ايدو سلم عليه بابتسامة وقال بالفرنسية: متشرفين اسي والتر، نهار كبير هادا
رد : الشرف ليا اسي سلمان
علياء: يمكن مشغول ؟
سلمان: آه شوية.. تفضلو معايا للمكتب نسالي
دغيا ونجي للعندكم الى مكنتوش مزروبين
والتر: لا خود راحتك
رافقهم للبيرو رحب بيهم مرة أخرى ووصا السكرتيرة تجيب ليهم مايشربو عاد خرج عند الشيافر يوزع ليهم المهام ديالهم ويفرق الخدمة ديال هاد النهار سوا للكليان لي تايجيو عندو للاجونص مباشرة أو للكليان لي من طرف الرياضات وديور الضيافة
علياء جلسات حاطة رجلها على رجل ووالتر استراح وقال باستفهام
والتر: هاكدا مولف تايسلم عليك؟
ضحكات بهدوء: هو هاكاك داير
سكت وهي جبدات ملف الكونطرا من ساكها، حطات ليهم السكرتيرة مايشربو وخرجات خلاتهم تايتسناوه فصمت، دقائق قليلة مرت عاد دخل تايقاد كمامو والإبتسامة على شفاهو
سلمان: مرحبا “برك تايشوف فوالتر” شرفتينا اسي والتر كنا فانتظارك
رد عليه بنفس ابتسامتو: شكرا ليك اسي سلمان.. حتا انا كنت متشوق نشوفك .. سمعت عليك بزاف
حول نظراتو لعلياء تايضحك وهي مبتاسمة ليه: ايوا نتمنى تكون سمعتي غير الزوين ههه
والتر: أكيد طبعا
سلمان: ههه ادا نبداو بلاما نأخركم كتر من هاكا ..تفضلو معايا
دازو لجهة ليفوطوي برك هو وياهم وحطو وراق الكونطرا لي نسخات علياء وترجماتهم بالالمانية كدالك..
والتر قرا الشروط لي كتبات علياء ولي كتب سلمان، شاف لي مناسبو تناقشو عليهم وعاود شرح ليه سلمان أساسيات الخدمة الاتمنية والپروگرام لي تايخدمو بيه ..خلا كلشي كما هو عاد سناو كل من والتر وسلمان ..وقفو وتسالمو باليد
والتر: شكرا ليك ونتمنى خدمتنا تستمر
حرك راسو: بادن الله هادشي لي غايكون
علياء جمعات نسخة هزاتهم وقالت: حنا غانمشيو بلاما نعطلوك كتر.. الله يعاونك
رد والبسمة فعينيه: تهلاي فراسك
والتر: الى اللقاء
خرجو من تما تحت نظراتو ..ركبو فالسيارة زادو لمطعم كيشمارا ..فتح ليها ونزلات تتنش على راسها وبعفوية قالت
علياء: والله ماكرهت شي گلاص نرد بيه النفس هههه
شدات فايدو ودخلو طلبو شنو بغاو وقالت تترمش فيه وهو غير ساكت: مالك، شفتك مغير ؟
رد بهدوء: لا والو “حط ليهم السيرڤور الغدا عاد شاف فيها وقال باستفهام”
بغيت نسولك.. شنو طبيعة العلاقة بينك وبين هاد سلمان؟
سرطات العاصير لي شربات ونظرتها فيها استغراب من سؤالو: وشنو مناسبة هاد السؤال؟
والتر: كخطيبك تانظن من حقي نسول
ببرود قالت: هو مدير الاجونص معامن تانخدمو وبيناتنا صداقة أخوة.. يعني عزيزة عليه كيفما هو عزيز عليا… علاش؟
حرك راسو وبدا ياكل وحواجبو مجموعين: داك السيد جاني فشككل
علياء: واش على البوسة زعما؟ عادي صحابك دائما تايبوسو ايدي وتايسلمو معايا بالوجه فين الإشكال
رد تايفكر: ماشي غير السلام.. حتا شوفاتو ليك غير بريئة ..جاوني نظراتو فيهم شي حاجة تجاهك
ضحكات من كلامو بدون شعور: ههههه سلمان ههههه هاداك الزهواني
طلع حاجب: زهواني؟
علياء: هههه ايه اسيدي كون كنتي تتعرفو ماتقولش هاكدا
والتر: المهم أنا غير قلت واي حاجة غاتبان مستقبلا
بابتسامة قادات سربيتتها وقالت: غير خوي راسك من هاد الأمر كون كانت شي حاجة انا اللولة غانفهم..
و وهي كدالك سكتات غير مهتمة بالموضوع ومعمراتش بيه راسها ..ساالاو غداهم ومن تما دازو للكونطابل خلاها ومشا يجيب صاحبو من المطار ..تلاهات بالخدمة حتا رجع والتر جايبو معاه هو وحبيبتو وعلياء من شباك المكتب تاطل وتشرب قهوتها.. دخلو للرياض وبركو تايستاراحو ويضحكو عاد حطات فنجانها ونزلات عندهم بابتسامة عريضة فاتحة ايديها لأليكس حبيبة يورك وطالقة حلاوة لسانها بالانجليزية
علياء: اهلييين ههه مرحبا بجماال سويسرا عندها
وقفات اليكس السيدة التلاتينية بجمالها الأجنبي الهادئ: مابييل ههه
سلمو على بعضهم بلباقة ومدات ايدها برقة ليورك باسها وقال بإعجاب: Madame parisienne..تشرفنا بشوفتك مرة أخرى
ضحكات كيفما ضحك والتر وقالت: الشرف ليا امسيو يورك ههه
والتر: كيفاش زعما مرة يقولو ليك پتي بون بون مرة Madame parisienne
رد عليه يورك متبسم: أناقتها وجمالها تايشبه جمال نساء باريس اڤالتر ..نتا محظوظ بيها
علياء: عيونك اسي يورك.. تفضلو وجدت السويت تاعكم ترتاحو فيه
والتر: علياء ..لقيتينا نيت تانتكلمو عليك
يورك: والتر خبرك بلي غانفتح مطلعم فبال وبغيت الديكور يكون مغربي بامتياز.. من ديما هاد الفكرة فبالي حيت الصناعة التقليدية المغربية تتأسر العين فعلا
ردت ببسمة: اها مرحبا.. شنو المطلوب مني
يورك: الى كان ممكن تساعديني نلقا شي نجار مزيان يخدم ليا داكشي ليبغيت
شافت فوالتر لي ساكت مخلي ليها القرار وهي حشمات ترفض: واخا اسيدي كون هاني
ضحك بسعادة: تانشكرك بزااف
علياء: العفو مابيناتناش.. اليكس يالله نديك ترتاحي
اليكس: باغة شي دوش مغربي يرخيني شوية
علياء،ة مرحبا هههه
وجهاتها للسويت ديالها وهوما خرجو ..وصلها ميساج من MSN حلات مبتاسمة ولقاتو من سلمان
سلمان: نتعشاو هاد الليلة
علياء: مشغولة شوية مع اصدقاء والتر ..حتال غدا
سلمان: إن شاء الله ..رمضان مبارك المعلمة الله يدخلو عليك بالصحة والسلامة
ضحكات مجاوباه: علينا وعليك يارب آمين
قالت فخاطرها آمين وزادت لشغالها …
الله أكبر الله أكبر
ترفع الأدان معلن عن صلاة العشاء ..سي لمكي فالصالة بارك تايتفرج فالاخبار ومراتو حكيمة فالكوزينة تاتوجد للعشا والسحور بزوج
..نزلات من بيتها تتسد صدايف البيجامة دخلات باست ايد باها وحداه بركات
لمكي: الرضا
ردت وعينيها فالتلفزة: آمين.. امضرا قالو غدا؟(على رمضان)
لمكي: غدا إن شاء الله تعالى الله يدخلو علينا بالصحة والسلامة
علياء: آمين ياربي “شافت فيه بنص عين تترمش وتعض شفايفها” لمكي
حول حتا هو طرف عينو ليها: اش تما
علياء: محتاجاك
لمكي: يادلي داكشي باش گعدتي معانا هاد العشية أما مولفة تتعشاي فجامع الفنا ماعرفت ابنتي اش تايوكلوك تم
زفرات بحرج: واصافي دابة ابابا راه بصح محتاجاك فواحد الخدمة
لمكي: قولي المعلمة هاني تانسمع
علياء: دابة واحد السيد صاحب سليم…
قاطعها باستفهام: شكون هاد سليم
ردت: والتر خطيبي ابابا راه قلت ليك وراما سلم بدل سميتو لسليم
ضحك باستهزاء: هه هااكااوا.. وغايصوم بعدا ولا باقي ماحق عليه ؟
علياء: وابااباا واحشومة معلوم غايصوم
لمكي: ايوا ابنتي اش بيت نقوليك.. هاهو ساكت
علياء: وادابة سمعني عافاك
حط التليكموند وعطاها ودنيه: هاهو الالة تايسمع قولي نشوف
تقادات فالبركة : دابة هاد صاحبو ..بغا يفتح ريسطو تما فسويسرا وبغا الطبالي والكراسا والديكورات يديهم من المغرب ..شي حاجة كلاسيكية هاكدا وزوينة والخدمة تكون نقية ومتقونة
طلع حاجب بتركيز معاها: ايوا
علياء: ايوا قالي انا نتكلف ليه.. وجيتي فبالي غير نتا حيت كنتي نجار قبلما تاخد الگريمة تاع الطاكسي ونتا لي غاتعرف شي معلم زين وخدمتو متقونة
لمكي: وهاد صاحب الگاوري شحال جهدو
علياء: غير تعجبو الخدمة وشي لاخر ماترفد ليه هم
حرك راسو: واخا الالة.. كاين واحد السيد صاحبي سنين هادي.. عندو معمل صغير والخدامة كتار.. هو لي غايفيدك
طلع حواجبها بحماس: نمشيو عندو غدا؟
لمكي: وعليه الالة
ناضت مبسمة وباست ليه على راسو: الله يحفظ ليا ياربي
لمكي: آمين آمين.. احكييمة هاد العشا باقي مابايوجد واطلقينا خلاص
خرجات من الكوزينة ببيجامتها والطابلية حمرة هازة الطاجين وقالت: هاهو اسيدي هاهو..علياء جيبي الخبز ابنتي وعيطي لختك
علياء: هي دابة
ناضت عيطات لختها ملاك دازت جابت الخبز وبركو مجموعين على الطويجين والتلفازة خدامة
تحركو شوية وااهيا البنات
صباح جديد واول يوم فرمضان المبارك..
شدات الطريق هي وباها سي لمكي مع العشرة تالصباح عند النجار فالحي الصناعي تسيدي يوسف حدا العمالة
..ماهو محل ماهو شركة إنما معمل ديال رجل كبير شوية فالعمر قد سي لمكي ومخدم معاه جهد 20 واحد ..وقفو عليه وورا السلام وحلاوة الكلام دخلاتو علياء فالموضوع وقالت
علياء: والصراحة با لمكي ماختارك غير نتا بين گاع المعلمية حيت قال بلي خدمتك متقونة وغاتزرب ليا عليها
رد الرجل تايضرب فصدرو: باراك الله فيه ابنتي لهلا يحشمنا.. اش حب الخاطر
علياء: عندي ليك واحد الطلبية كبيرة شوية وبغيتها فأسرع وقت عافاك
رد: ايه مرحبا.. شنو بالضبط شي حاجة تالفراش فالدار ولا خاصاك للرياض
علياء: لاهادي لاديك، بغيت شي طوابل وكراسا لواحد الريسطو.. تقريبا خاصاني ديك 600 كرسي و400 طبلة.. بلا الديكورات لي غاتصاوب ليا معاهم
تحلو عينين السيد فجأة، همزة وااشمن همزة جابت ليه وبدا غير يردد: مرحبا يوجد يوجد ..شمن عود وشمن شكل ايمتا بغيتيه
شافت فباها لي ساكت تايشوف: بالنسبة للعود غانجيب لك مول الريسطو تتفاهمو عليه .. والأشكال وريني لي غايناسبني
رد: ايه هي ضروكا نيت انا راجع
مشا ولمكي قال: سيري ابنتي لشغالك انا غانشوف تصاور الشكيلات ونخليهم عندي ..ديك الساعة لي اختاريتيها نعلمو بيها
علياء: صافي واخا ..دعي معايا
باست على راسو وقال: الله يرضي عليك
خلاتو وعلى رجليها توجهات للرياض لي مابعيدش بزاف على المعمل ربع ساعة فقط.. الدنيا خاوية شيئا ما لأنه فرمضان متتعاملش مع الگروپات إنما غير مع ليكوپل والخدمة معاهم تتكون ساهلة ..طلعات تتفقد الأحوال وصلات جهة الفوق لي تاطل على الپيسين وبان ليها والتر بارك مع يورك وطبلة الفطور قدامهم تايفطر يورك ويدوي معاه
..صغرات عينيها مراقباهم حتا توسعو بصدمة ملي شافت والتر هز شوية المسمن وكلاه وزاد شرب من العاصير.. دور عيونو فجأة بحالا تاايقلب على شي حد هو يشوفها تتشوف فيه بنظراتها الحادة جمع دغيا فمو وبدا يكح فحين هي ضارت تتنهج بعصبية وللشومبر ديالو غادة
وقفات تتسناه وفعلا دخل تايمسح فمو وقال حابسها تهضر
والتر: خليني غير نشرح ليك ماتظلمينبش
ردت بعصبية وصوتها خافضاه: شفت كلشي بعينياا.. وااش عارف راسك اش درتي ولا لا رااه حرام ودنب كبير
رد بتبرير تاينفخ: جاااتني حشومة نخلي صاحبي يفطر بوحدو وماقاومتش فهميني حتا نتي الموضوع صعيب فالبدية
حلات فمها تاضحك متفاجئة: هه يعني ماشي حتا انك نسيتي؟ شنو يسحابليك هادشي لعب.. إلى ماباغيش الاسلام وماقادرش عليه حيد ماشي تنافقني وتنافق الله حيت فالاخير غاتلقا راسك تتنافق غير راسك فقط وحبل الكدووب قصيير بزااف اوالتر
والتر: انااا تانحااول وتااندير لي فجهدي كامل ماضغطيش عليا كتر
علياء: شنو تادير؟ شنووو هاد الحاجة لي حاولتي فيها وجاتك صعيبة؟ الصيام.. يالله العشرة تالصباح هادي والنهار الاول ماقديتي تصبروو
حك رقبتو حتا حمارت كايفكر وقال: واخا دابة لي وقع وقع.. شنو الحل
علياء: الحل سير قلب عليه لراسك
خرجات معصبة من الرياض وتوجهات لدارهم مباشرة ..دخلات توضات و صلاة صلاتها عاد تخشات ففراشها معصبة وتتخمم وتعطي فالاعدار .. السيد كبير خمسيني العمر وطول حياتو غادي على نمط واحد صعيب بين ليلة ونهار يبدلو ..ولكن واش على الأقل حاول؟
زفرات بحيرة وسدات عينيها تتحاول تنعس.. رن تليفونها هزاتو وطفاتو ملي عرفات والتر لي تايتاصل وبقات على داك الحال حتا دخل باها تايعيط باسمها، خرجات عندو متلفة معاه الوقت وبداو على الخدمة يدويو
……….
قادات جلابتها السوداء على كتافها ولبسات طالون عالي ..خرجات هازة ساك اسود أنيق لقات ماماها تتجمع طبلة الفطور مع ختها وقالت تتسد ساعة اليد فايدها
علياء: الله يعاون اماما انا مشيت
حكيمة: الله يسهل عليك ماصعاب ابنتي
ردت خارجة وتادوز رقم سلمان: آمين “جاوبها فالبلاصة وقالت مبتاسمة” افيناوا غابر
رد تايضحك: الناس توحشوني هانا هانا هههه
علياء: مممم بزاااف ههه فينك
رد: قدام الدار تانتسنا الواليدة تنزل.. غادين للتراويح انا وياها
علياء: مزيان اسيدي الله يقبل
سلمان: آمين
جمعات حجبانها تتحقق فصوتو وقالت: مالك.. جاني صوتك ماهواش
تنهد بعمق وقال: ساعة لله وصافي.. نتي طالعة للرياض؟
علياء: سي ..جاي واحد الگروپ اليوم فيه عائلة إسلامية خاصني نكون تما باش نستقبلهم
سلمان: هادو أجانب؟
علياء: باكستانيين علاما عرفت
سلمان: ايوا الله يوفق “نزلات الوالدة ديالو وسمعات صوتها حداه تتقول” هانا اوليدي وجدت
حب ليها الباب طلعات وسدو عاد قال: يالله الزين نخليك .. بالليل وندوي معاك
علياء: إن شاء الله.. بسلامة عليك
تلاقاتو فالريسيپشن واقف التليفون فايدو تايتاصل بيها والخوف فوجهو حتا شافها داخلة عاد طلع التنفس وارتاح.. تجاهلاتو كأنها مشافتوش وزادت للكوزينة طلات على ليپلا وبقات تما مجمعة مع الشيف باش ماتشوفش وجهو ولا يدوي معاها.. حتا علموها بلي العائلة لي تتسنا وصلات وخرجات لعندهم تستقبلهم بنفسها
..دخلاتهم للصالون ومباشرة حطو ليهم العشا ..كانت عائلة متدينة جدا من الوالد للوالدة بنقابها للأبناء كدالك.. رحبات بيهم ووقفات على راحتهم تحت نظرات والتر حتا طلعو يرتاحو.. ضارت تهبط هو يوقف عليها ماعرفاتو منين خرج
والتر: علاش تتهربي مني هاكدا
اصطانعات الهدوء وقالت : خدامة امسيو والتر ماعندي علاش نهرب منك
تنهد بضيق: شوفي.. انا عارف راسي غالط ودرت حاجة مخاصنيش نديرها ولكن تفهميني حتا نتي
علياء: الأمر كبر من هادشي كامل اوالتر.. فاش نحسك بصح عارف غلطك ديك الساعة عاد غايكون كلام تاني
خلاتو وزادت خارجة لجامع الفنا كيف عادتها.. بركات واخدة كويس منعنع هو يبدا تليفونها يڤيبري هزاتو وتبسمات مجاوبة
علياء: الو
رد عليها بضحيكة خفيفة: الزين تمراكش.. ساليتي؟
علياء: آه وجيت لجامع الفنا نرد شوية النفس
سلمان: علاش واقعة شي حاجة.. ياكما شي مشكل فالخدمة
ردت بكدب: لا لا عادي.. ضروري شوية من صداع الراس ولكن يفكها مولانا
سلمان: حاولي على راسك شوية.. رمضان عاد بدا وخاصك الجهد
بسمات: مممم.. نتا كيف غادي مع خدمتك
شربات من كاسها تتبسم ومعاه كملات الكلام حتا دازت ساعة عاد قطعات وناضت لدارهم.. طلعات ترتاح هو يعاود يصوني التليفون.. ضحكات فسرها وجاوباتو محشية ففراشها وعينيها مسدودين
علياء: عاد دوينا نسيتي ماتقول شي حاجة
سلمان: هي نقطع ياك اختي؟
علياء: ماقلتشاي اخويا هههه ..واحد خطيبتك اش تتعاود
ضحك تايطنز: لاباس عليها تتسلم عليك
علياء: واخا تحلف عليها مانتيق
سلمان: بلاما تقلقي من تصرفاتها ..هي هاكاك دايرة مع كلشي وحتا شوفتها من عند الله مخنزرة
علياء: متانديهاش فيها عادي عندي الأمر.. غير ..تتبقا فيا شوية
تنهد : هاد الساعة نبقا فيك غير أنا كاافي
ضحكات: مظلوم مسكيين ..اجي فيا الفضول نعرف كيفاش حتا تعرفتي عليها ..فين تلاقيتو؟
سلمان: راجل ختها صاحبي، وهو لي عارفنا النهار اللول ..قالك منها نجمع راسي وندخلو للمعقول
علياء: القضية عندك معقدة شوية المعلم، ماعليك غير تساعف معاها وماتعرف مع الوقت تولي متقبلها
سلمان: اش غانتقبل !!!؟ وحدة مريضة فراسها وتتقلب على شكون تمرض ؟
سكتات تتسمع لزفراتو المتكررة وباينة فيه تعصب: اش غانقوليك.. الله يدير شي تاويل ديال الخير وصافي
زفر بضيق: آمين.. تصبحي على خير نخليك ترتاحي شوية
علياء: ماديرش فبالك إن شاء الله كلشي غايتحل
سلمان: كانتمنى
علياء: بسلامة عليك ..
غمضات عينيها وحطات التليفون حداها ..مافاقت إلا على لمسات ملاك لي تتفيقها للسحور ناضت نقبات معاهم شوية ورجعات تتفوه لبيتها طاحت طيحة وحدة حتا صبح الحال وطلعات شميشة مراكش داخلة لغرفة علياء ..واقفة عند البلاكار تادوز على كساويها وتقلب على شنو تلبس
..خدات وحدة سوداء كمام عراض وطويلة لكن الكول V وبحزام بحال العباءة..
لبساتها مخلية شعرها مطلوق على راحتو وهزات مسائلها خارجة و الدار ساقلة كلشي باقي ناعس.. دازت طلات على الرياض قادات شي وراق تما وخرجات مرة أخرى غادة للاجونص عند سلمان ..خلصات الطاكسي وهبطات داخلة سلمات على لي عرفات وماحدها تتقرب للبيرو ديالو وغواتو فودنها تايتسمع
..بسرعة دقات مخلوعة وفتحاتو قبلما يعطيها الادن لقات معاه بنت تلاتينية هاكاك باركة ايدها على راسها وهو واقف مزير بالاعصاب.. شافها وقال بجدية تايلهت
سلمان: دخلي بركي نسالي ونبداو خدمتنا
حركات راسها ومترددة تدخل.. سدات الباب وبركات بعيدة عليهم تتحط الوراق وتسمع البنت تتهضر وتسايس معاه فالكلام
…: هي راها تتبغيك اسلمان سول غير عمر يقووليك.. وليتي غير نتاا لي بين عينيها ولولا حبها ليك ماديرش علك هاد الحالة كاملة
غوت معصب: وامااتبغيني مانبغيهااا واش عمري طمعتهااا بشي حاااجة.. عمري قلت ليها تنبغيك ولا راك شي وزة فحياااتي حتا تبدااا لاسقة ليا ف*** هااكاا هادااا رااه مرض دي ختك داوااا وفرقوني عليكم
وساعت عيون علياء أول مرة تسمعو تايسب وتشوفو هاكا تايترعد بالاعصاب عكس البنت لي بداو دموعها ينزلو وقالت تتفهمو بايديها: نتاا متتعرفش ختي بحاالي.. والله اسلمان حتا دير شي حاجة فرااسها راااك شفتي ديك المرة كانت غاتحاول كونما نتاا.. هاد المرة علم الله شنو غايكون ديك الساعة غانترزااا فختي ووالله مانسمح ليك.. علاااش ماتعطيهاش فرصة غير خطبها على الأقل وشوف كيفاش غاتولي معااك
غوت وفمو بيااض بالعصبية: واااتعاود ل*** وتفرق مني وااش صعيب تفهميها.. انااا مابااغيش ختك لاهي من سهمي والااا انا من سهمها والى كان على الانتحااار غير تعلمني نديهااا لأحسن جبل تق****
ناضت علياء مخلوعة وقالت: سلمان برد شوية عافاك حشومة ونتا فالخدمة
دار نهض فيها: علياء مادخليش “كيف نطق سميتها حولات ليها البنت راسها مصدومة” ونتي احسن حل ديري مع ختك هي تديها تدااوااا من المرض لي فييهاا حسن لينااا كاملين
وقفات تترعد ووجهها تحول للفقسة عكس علياء لي مافهمات والو من نظراتها وقبلما تفطن شافتها جااية هاجمة عليها: ااااجي ياللفعة يااا خطاااافة الرجاااال
وقفات تترعد ووجهها تحول للفقسة عكس علياء لي مافهمات والو من نظراتها وقبلما تفطن شافتها جااية هاجمة عليها: ااااجي ياللفعة يااا خطاااافة الرجاااال
شدها سلمان بسرعة قبلما عليها تلاح وعلياء فمها بالصدمة تفتح ولات غير تتشوف فهاد الهايشة لي قدامها بدون ماترمش..
دفعها مغدد ودمو تايفور بالغضب
سلمان: وااش المرض عندكم ورااتي فديك العائلة.. رصاااي المرض
تتشير لعليااء وسيفتها سيفة وحدة حمقة: على هادي دااااير هاد الحااالة وقلبتي على ختي على هاد الحمااارة هاااادي حييد
سلمان: قسما بالله لي شاانو عاالي وعظييم وتحطي عليها يديك حتا ننسا راك مراا ونهرسهم ليك سيييري دي ختك فين داوا وفرقووني عليكم
ردت: ختي شنووو صرفاااات فيك من غير الخييير شنوو صرفاات فييك ورااجلي ياااحصرة بحاال خووك.. تنووض دير فينا هاكاااا على ود ***
سلمان: غااااتسرطي فمك وتعرفي شكااتخرجي معااه ولا مايعجبك حاال
ترونات القضية فلاجونص ومع سمعو الغوات جاو الموضفين تايجريو تقريبا 12 لشخص تجمع عليهم تما مع دخلو ضرب كرسي برجلو حتا تخرشش خلا علياء تجمع فنفسها مخلوعة ورجعات اللور تترعد جات حداها السكرتيرة تتسولها واش بيخير جابت ليها الما ترش وجهها شوية واخت مروى خرجوها السيكيريتي تتغوت مصعورة وراكبها الجنون مخلية سلمان تايفك ازرار قميصو بغضب
سلمان: خرجوو براا “ضرب المكتب رافض يسمع شي دبانة تتزنزن حداه مازال” قلت براااا
خرجو كاملين وبقات علياء لي بركات تترد النفس وتفكر فگاع هادشي لي وااقع.. حتا بان ليها هز التليفون تايقفقف بالعاصاب ..فمو رجع بيض عنقو تنفخو فيه العروق وايدو تترجف، فهاد اللحظة كون كانت خت مروى راجل كون صفاها ليها ..هنا أول مرة تشوفو معصب لهاد الدرجة كلها وتعرف عصبيتو شحال خايبة
تفتح الخط وبنبرة تهديد نطق: الو عمر.. سمع .. غاااتشد مرااتك هو هادااك، ماغاتشدهاش مرة خراا غايعيطو عليك تجمعها من الكوميساارياا.. ..ااااش غاانشرح وااش أنا بااغي نتفارق مع الزبل لي خانقي فحيااتي تنووض هيااا تسيفط ليا مرتك باااش طلبني نخطبهاا ومنوضة ليا المشااكل فخدمتي!!!؟؟
..شوووف بلا قوة الهضرة الله يرحم بااك.. مرتك مرة خراا تجي فطريقي نسووط فيها.. والسلام عليكم
رماه وبرك على كرسي المكتب حاط راسو بين أيديه تاايتنفخ ويتفش وهي تتشوف فيه بصمت..
هزات ساكها بهدوء وخرجات بدون ماينتابه ليها ..لقات كلشي تما تايوشوش حتا المدابزة لي وقعات وعلى حالة سلمان لي عمرهم شافوه هاكاك خلاتهم وزادت خدات طاكسي لدارهم حاطة ايدها على راسها لي تايحرقها وتتخمم.. جات على ود الخدمة زدقات لاخدمة وجداتها لا مجاج بقا بلاصتو ….
………
وسعات سارة عينيها وعلياء على سريرها باركة بحوايج الخدمة والمخدة فوق رجليها
سارة: ويلي هجمااات عليك.. ويلي ويلي هادي واش مصعوراا
علياء: صدماتني .. السيدة تتبان كلاس تقولي هنا نبات حتا تانشوفها تقلبات مية وتمانين درجة
سارة: وانا تانعرفك المعلمة ماعندك مع هاد النوع ..كون هلي عيطتي علياا نجي نفرشخ والديها لاهي لاديك ختها ابالله وباليمين حتا يمشيو على البيض ماايهرسوه ..
تنهدات بضيق: ومادرت ليها واالو.. حدي دويت معاه هو يتهدن فقط حتا السلام ماقلتوش ليها
سارة: بنت المسوفجااا لخرااا كون هير عطيتيها علاش دور
علياء: كون حطات عليا ايدها نفرشها تم.. ولكن راك عارفاني هاد النوع دالهضرة متانعرفش نجاوب عليه تانبقا كي المصدومة تانشوف..
سارة: هادوك رااه مربيين مع الضبوعة يخخ الخ ريوة على ختها.. اش قاليها هو
تنهدات قابطاها الخنقة: بقا تايتراد معاها فالكلام وحسيتو شوية ويجمعها معاها.. عرفتي عمري فحياتي كنت نتصور عصيبيتو خايبة لديك الدرجة
سارة: اگالك الله ينجيك من هاداك لي تتشوفو ديما ضاحك نهاااار تايتقلب هير فرتح وشتريه ماحدو رخيص
علياء: عيط لراجلها حتا هو.. تانسمعو من التليفون تايقوليه واش مأكد مراتي جات عندك.. باينة فيه تصدم مسكين ومارضاش
سارة: عبر على والديها كون عيط للبوليس يجمعوهااا حسن “سكتات علياء تاضور السلسلة فعنقها وساهية فنقطة وحدة
سارة: فاش تتفكري اهيااتا.. هادوك راه مراضات السيد تايسول فيك لله و دايرك بحال ختو ومحتارمك وهاز بيك وتانتي عزيز عليك .. ايوا يضربو راسهم مع الحيط تاتكون مراتو عاد تحل دلقوشها
قالت بصوت باهت: هادشي مابقاش مسلك اسارة.. من الأفضل نعطيه بالتيساع
عطاتها ودنها: نعااام اختي خلعاتك الخر يوة ولااا ..هادي ماهية ديالتك ابنت المكي
علياء: إلى بقيت معاه غادة نخرج ليه على حياتو وخدمتو..سلمان عمري شفت منو إلا الخير وديما واقف معايا فأي مشكل تانلقاه جنبي، وحتا قبيلة على ودي بدا يتساب معاها
سارة: ومالكي نتي لي قلتي ليها تعالي تغاوتي معااه ويلي الشيطان نوضي نوضي لانجمعها معاك نيت تفيقي شوية
علياء: راك مافاهماش الضومين ديالنا شحال صعيب.. وماشي غير هاد الضومين فينما مشيتي و فأي خدمة واخا شكونما تكون ديما كاين واحد حاسدك وتايحفر ليك.. وهاد المدابزة لي وقعات اليوم عقلي فين قلتها لك اليوم تلقايها فخبار مول لاجونص وتما غايتجبد ليه صداع كبير الله يحفظ، داكشي أصلا علاش دويت و قلت ليه يبرد شوية من الصداع
سارة: ايوا خليهم يوصلو لداكشي ليبااوه تسحابيه غايرتاح والله وماعطاوه التيساع لاتهنى فحياتو
صونا تليفونها جراتو بملل شافت اسم والتر هي تزفر بضيق: افففف ..خاصني نمشي للخدمة ضروري
صونا تليفونها جراتو بملل شافت اسم والتر هي تزفر بضيق: افففف ..خاصني نمشي للخدمة ضروري
سارة: واخا سيري وخوي بالك.. رااه غاتخليهم يوصلو لداكشي لي بغااتو ديك المريضة.. هاهي بعداتو على صاحبو وخاسماتهم بسبب مراتو وهاهي غاتبعدك عليه نتي والنوبة على فاميلتو المرة الجاية.. ايوا وخليهم ديك الساعة يضوروه كيف بغاو
علياء: بسلامة
خرجات من الدار تتنهد مافيها لي يزيد جهدها حفا وزادها رمضان والحرارة علاما بيها.. وصلات للرياض لقات والتر ففم الباب هو ويورك تجاهلاتو حتا قلب وجهو منيرڤي ودخل معصب سلمات على يورك بابتسامة خفيفة وقالت
علياء: سمحلي تأخرت عليك ..يالله نمشبو
يورك: خودي راحتك الأميرة ديالك.. مال وجهك تايبان باهت
علياء: غير مع الصيام وصافي
يورك: اووه الأمر عندكم صعيب بزاف والحرارة تاتزيد تصعبو
كتافات تحرك ليه راسها مافيها مايجاوب وكملو مسيرهم لعند النجار ..كلمو ليها واحد من المتعلمية خرج وعارفاتهم على بعضهم ووقفات بحال المترجم تتفسر لهادا وتشرح لهادا
علياء: قالك اسي يورك مرحبا بيك نتا غير اختار العود لي حبيتي وهو الخدمة لي عجباتك غايديرها
يورك: برافو.. وايمتا تكون السلعة ديالي واجدة؟
وجهات علياء السؤال للنجار: ايمتا تسالي كلشي؟
النجار: قوليلو شهرين هاكاك
علياء: نخليوها شهر.. راه فلوس صحيحة محطوطة هنا ماعليك غير تشرط .. وماتنساش الجعيبة ديالي باش فينما كانت شي همزة بحال هادي نتفكرك نتا اللول
النجار: الله اودي نتي اللولة
ضارت ليورك بابتسامة: قلت ليه شهر يوجدها لك
ضحك عاجبو الحال: مزياان هههه احسن حاجة ..
علياء: يالله اسي المعلم.. عطيني داك الشكل لي ختاريت نوريه ليه
النجار: اها هي ضروكا هههه مرحبا مرحبا
دخل جاب الصور شافهم يورك وعجبو دوقها بزااف ..رجع زگا معاه الأمور جمعو الحساب وطلع المجموع 100 مليون وشي صرف ..عطاه العربون ورجعو مرة اخرى للرياض هو وعلياء طلع للسويت ديالو وهي دازت لخدمتها
تشغلات مع العائلة الإسلامية لي عندها فالرياض الگروب الوحيد لي وصلها فبداية رمضان أما الأغلبية كوپلات فقط .. دخلات طلات على فطورهم وتأكدات بأن الطرونسپور لي غايجي ليهم قرب يوصل حيت عندهم سفر للصويرة وبسرعة خرجات عند النجار تاطل على الخدمة لقات باها تما قايم بالواجب ومرة مرة گاع إلى لقا شي حاجة ناقصة تايعلي الفوقية ديالو ويصلحها بايدو..
طلات طلة سريعة ودازت تاني لمحلات الترياات تتهندس فدماغها الترية لي غاتجي مع الريسطو ومع الاتات لي تايصيب النجار ..حاولات تشغل بالها ماأمكن حتا ادن عليها المغرب وهي باقة غادة جاية غادة جاية مع خدمة يورك..
رجعات للدار تتزرب لقاتهم عاد بغاو يقولو بسم الله صبناتها حكيمة على التعطال وهي كسرات صيامها بتميرة وطلعات للبيت مباشرة بدلات وصلات صلاتها عاد نزلات باركة معاهم تتفطر وتدوي هي وباها على امور الخدمة حتا سالاو ورجعات طلعات لبيتها متكية تتحاول ترتاح..
صونا تليفونها وكانت عارفة هو لي تايتاصل.. بقات ساكتة شحال تتشوفو تايقطع ويعاود يصوني يقطع ويصوني
لمكي: علياء.. علياء
ناضت حلات باب البيت: نعام ابابا
لمكي: الى كنتي غادة لخدمتك زيدي معانا انا وختك غانديها لجامع الفنا شوية
علياء: واخا
بدلات حوايجها وخرجات لعندهم وصلوها للرياض وهوما لجامع الفنا كملو الطريق ..مع دخلات للمكتب لقات بوكي كبير ديال الورد وعليه رسالة طويلة قرات الخط وعرفاتو والتر لي كاتبها، طواتها وحطاتها فالساك والورد خلاتو كيفما هو وهبطات لتحت تشوف اش خاص
….
بعد ليلة من التفكير.. تهدنات شوية وبدات يومها الآخر بنشاط متناسية الأمر شوية .. خدات دوش ريح عضامها ولبسات كسيوة فاللون الازرق طويلة للأسفل وطالون اسود معاها.. بوكلات شوية شعرهاا دارت حلقات ساعة يدها وهزات الساك خارجة من دارهم ولخدمتها غادة
علياء: صباح الخير
ردت عليها البنت لي فريسيپشن: صباح النور مدموزيل.. سي والتر سول عليك
علياء: فين هو
البنت: كان فالمكتب قبيلة لكن جاتو اپيل وخرج يجاوب عليها
علياء: اوك
طلعات للمكتب حطات ساكها وبركات تترتب اوراق كانو فوق البيرو هو يصوني تليفونها.. شافت الرقم ومباشرة تبسمو ملامحها بسعادة وجاوبات
علياء: الحبيب ديالي ههه اش خبارك.. توحشتيني بعدا ولا والو؟ أحيانا عليك العفريت قول نسيتيني
فتح والتر الباب بالجهد وقال بعصبية: شكون هادااا؟ هضرري
خنزرات تتحنحن وقالت: لا لا والو الحبيب ديالي..شوف أوس.. هانتا غانقطع دابة شوية ونصوني ليك ..واخا؟ واخا غانقولها ليهم كاملين يالله تهلا فراسك وديها فقرايتك
قطعات وهو سد الباب كايزفر بضيق وقال متأسف: سمحيليا مايسحابليش خوك
وقفات تتكلم بهدوء والعتاب فصوتها: وشنو يسحابليك بالسلامة! شفتك بديتي تنسا انا شنو تانسوا لا
والتر: غير نسيت بلي عندك خوك صغير تايقرا فالداخلية، مشات من بالي وفاش سمعت داك الكلام ديرونجيت شوية
قلبات وجهها تتزفر: لا حول
والتر: علياء “شد فايدها تايقرب جيهتها” عاجباك حالتنا هاكدا..الحبيبة ديالي …
قاطعاتو جارة ايدها بانزعاج: والتر رمضان هادا
والتر: واخا هاني، ولكن عافاك سمحيليا.. تيقي بيا من ديك النهار ماعاود كليت شي حاجة
علياء: إلى صمتي راه لراسك ماشي ليا ..وكونما ديك الورقة لي تتبت إسلامك مانتيقش بلي سلمتي عن اقتناع
رد بأسى: الغلط كايوقع واش نتي عمرك غلطتي.. ربي وتايسامح عافاك ماتخلينيش نسافر وانا مشطوون من جيهتك
غوبشات بتساؤل: مسافر؟
والتر: عارض علينا صاحبنا انا ويورك كاين فاأگادير
علياء: ولكن راكم دايرين مع النجار يجي غدا فالصباح ..نتاصل. نعتادر منو
والتر: داكشي علاش غانمشيو اليوم ونرجعو غدا الصباح بكري ..شنو بان ليك تمشي معانا حتا نتي؟
سكتات شوية وقالت تتنهد: لا بلاش، جايين شي دراري باغين يدوزو عيد ميلاد فالرياض مايصلاحش نمشي.. ونيت مانقدرش على الطريق
تبسم: اوك حبيبتي.. ياك تصالحنا؟
علياء: طريق السلامة اوالتر
خلاتو وزادت بخاطر مضيق مابقا فيها لي يتكلم.. دخلات للمطبخ وقالت: اليوم عندنا عيد ميلاد وريونا حلاوة اايديكم
….: وي شيف
اربعة شبان أجانب فنصف العشرينات.. نزلو من الطموبيل تايضحكو ويتراشقو جابو لعلياء الضحك
علياء: هااي
سلمات عليهم وطريقة التواصل كانت الإنجليزية، حطات ليهم البروكرام ولقاتهم مرفحين نيت نيت اختارو أفضل سويت فالرياض وحيت صاحبهم عندو عيد ميلاد بغاو يسهرو فيه مجموعين.. قالت مرحبا عطاتهم السوارت طلعو يحطو مسائلهم هوما يجيو لي تايزينو الصالون تاع الرياض زوقوه كامل لحفلة العيد ميلاد وهي عند راسهم واقفة لي ماعجباتهاش تتغيرها ..ومرة مرة تتخرج برا طل على خدمة النجار تشوف فين وصل وتوصي باها ..
أدن ادان المغرب واضطرات تفطرو تما فالرياض مع الخدامة باش تحضي الأجواء خصوصا الحفلة ديال الدراري بدات وواحد منهم جبد قراعي الشراب وبداو يسكرو والسكرة عارفة من وراها تايوقعو المدابزات والمشاحنات
علياء: الله يجعل هاد الليلة دوز على خير وصافي
ردت البنت لي باركة حداها حتا هي تتفطر: هاكدا هوما دايرين امدموزيل العيد ميلاد عند النصارا هو الشراب هههه
علياء: فأي مناسبة ماشي غير العيد ميلاد ..انا غير مايديروليش التبرزيط والجيران ناعسين اما يشربو تالما القاطع
صونا تليفونها برقم النجار جاوباتو وهازة كأس العاصير فايدها: الو نعام
النجار: بنتي علياء.. عافاك غدا مايمكنليش نجي عند سي يورك غير خبريه يجي عندي هو للمحل إلى سالا حيت غدا انا مشغول بواحد الغرض
علياء: واخا ماعليش.. الخدمة في أمان الله؟
النجار: هاهي تانخدمو عليها كوني هانية
علياء: مزيان اسيدي الله يعاون و صحة فطورك
قطعات تتكمل ماكلتها بعدا عاد من بعد تخبر والتر بالامر وعينها تتمشي للدراري ..مارتاحت وتهنات حتا شبعوها سكرة وطلعو للسويت تايميلو يكملو سهرتهم تما عاد وقفات تتنهد براحة
علياء: هاهوما طلعو ينعسو.. جمعو ديك الحالة ونقيو الدنيا مانجيش فالصباح ونلقا شي حبة الزواق تادور
….: واخا امدموزيل
خرجات راجعة لدارهم ونيشان طلعات لبيتها، صلاة وتخشات ففراشها تاطيب نعاسها وتغرق فيه خصوصاً مع العيا دغيا مشات..
الساعة وصلات للجوج تاع الصباح هو يبدا تليفونها يصوني.. قفزها حتا فاقت مفزوعة تتردد ياربي السلامة طلات ولقات نمرة العساس ..عرفات شي حاجة واقعة مافيهاش زادت دقات قلبها وجاوبات مخلوعة
علياء: الو
رد تايغوت والصداع نايض حداه: لالة علياء داابة اجي للرياض دااااابة
علياء: ياك لابااس شنووو وااقع
العساس: غاطيح الرووح وتوقع مصيبة الى ماجييتيش داابة تعااالي
غوتات بعصبية: وااغير فهمني بعدااا.. واش الدراري لي خليت سكرو وداارو شي مشكل ولا شنوو
العساس: وااتي رااه هادوك اللوبياات طلعو سلاگط وجاايين يصورو ليك البورنو فالريااض.. طلقي راسك اجي رااه الروينة نااضت هنااا والجيران محيحين
قطع وخلاها فبلاصتها تترعد وقفات غادة جاية والبولة شاداها.. فين تمشي وكي دير فهاد الليل وشهاد المصيبة طااحت على راسها.. واش تفيق باها تخلعو ويمشي معاها يشوف المنكر حتا يكره خدمتها ومايجي منها ولا تمشي لراسها ويتلقا ليها شي مقطوع فالطريق؟
علياء: الله ياربي
شدات راسها قربات تبكي من الخلعة والعصبية هي تفكر مول الكروسة لي مولفة تتعامل معاه فاش تتبغي التقدية للرياض، صونات وصونات حلف لاجاوب.. وبعد تردد كبير دازت لنمرة سلمان اتاصلات بيه بزز وبقات تتسناه يجاوب حتا تفتح الخط بعد تواني وتكلمات بصوت باكي
علياء: سلماان
جاوبها بنبرة خوف وباين فصوتو عاد فاق: علياء.. مالك.. هضري مالك واقعة شي حاجة
علياء: عتقني عافاك ..الرياض ماعرفت شمن موصيبة واقعة تما وخاصني ضروري نحضر
سلمان: شمن مصيبة؟!!! تهدني نتي فالدار؟
علياء: آه ومانقدرش نمشي بوحدي، غانحاول ندوي مع شي مول الكروسة يوصلني نتا عافاك سير للرياض شوف ليا اش واقع تما
سلمان: واخا بردي ماتخافيش ..عشرة الدقايق وتلقاي الشيفور عندك يوصلك وانا غانوض نشوف اش واقع تما
جاوباتو تاتقفقف: واخا شكرا بزاف
سلمان: بردي لي كانت غانحلوها
قطعات تتمسح وجهها.. دخلات للحمام غسلاتو باش توگض شوية هزات بانضة تتجمع بيها شعرها والبانطوفة ليسرية معرفاتها فين زادت.. فالاخير لبسات سبرديلة وخرجات ملي سيفط ليها ميساج .. حلات باب دارهم تتسلت ماباغة تفيق حد وخرجات ساداه وراها بنفس الطريقة ..لقات جنب الشاريع واقفة سيارة سلمان ماشي الشيفور وهو داخلها بحوايج النعاس بحالها.. لابس توني وتيشورت خفيف مع كلاكيطة تايحك عينيه ويتسناها
طلعات جرات السمطة وهو قلع عين فالطريق وعين عليها هي لي تتاصل بالعساس لكنو متايجاوبش
سلمان: ياك لاباس شواقع
شافت فيه بعيون متأسفة: سمحليا عافاك فيقتك من نعاسك
رد بجدية فملامحو وتايحاول يزرب: هانية، قولي بعدا اش واقع ؟
ردت بصوت مرعود: مافهمتش قالك البورنو مالبورنو
خنزر وشاف فيها: نعام؟
علياء: شي دراري كان عندهم عيد ميلاد اليوم كراو السويت وطلعو تايسكرو تما.. انا خرجت فحالي وخليتهم قلت صافي يضبرو راسهم، ساعة شوف اش دارو ولاد الحراام بغاو يسيفطوني للحبس، والمشكلة قالك الجيران ساقو الخبار
نفخ بعصبية ووقف الطموبل حدا الرياض: هبطي نشوفو اش واقع
نزلات تتشوف گاع الجيران خارجين شي بالفوقية شي بالبيجامات الرياض مفتوح مشعولين الضواو ديالو ودوك الدراري لداخل واقف عليهم العساس وتايغوتو سكراانين ولابسين غير شورطات
..تصدمات وحفا ليها الكلام تتشوف واحد من الجيران رجل كبير بلحيتو تايغوت وكلشي ساكت تايسمعلو
الجار: بعيني شفتهم لعنة الله عليهم الى يوم الدين ..جاايين تايديرو لينا المنكر وسط الحي دياالنا وفهاد الشهر المبارك.. اللهم إن هاداا منكر.. اللهم إن هذا منكر
دخلات صفرة متوجهة عند العساس وخلات سلمان واقف على داك الرجل تايستفسر
علياء: اش وااقع شرح ليااا
عاد بغا يهضر ناض واحد من دوك الدراري تايتلوا بالسكرة ويدوي بالانجليزية: حنااا مخاارجيينش ندييرو لي بغينا مااسوقوش الشارف، السويت دياالنا ومخلصين فلوسنا فيييه
خنزرات فيه وجرات العساس: زيد معاياا عاودلي شنو وقع
داتو جنب وقال كايمسح العرق من جبينو: كنت بارك كيف العادة فبلاصتي حتا تانسمع الحاج تايغوت من السرجم ديالو وتايشوف فالرياض ..ضرت وشفت الشرجم الكبير تاع السويت محلول والضو شاعل ماعرفت اشنو شاف وماجيت نوض حتا لقيتو هابط تايغوت والجيران حتا هوما خرجو والروينة ناضت هنا
علياء: وشنو شااف؟
العساس: قالك تايديرو المنكر وبغا يعيط للبوليس حليت الرياض لقيت هادوك هابطين باغين يدابزو معاه بزز بركتهم وعيطت عليك.. ولكن راه باينة الآلة علياء كانو تايديرو شي حاجة ماهياش
تنهدات قائلة: بقا هنا معاهم انا راجعة
طلعات للفوق تتزرب وشعرها تفك.. بانو ليها عواد السوشي فوق واحد الطبلة هزات واحد لوات شعرها وجمعاتو بيه حلات السويت وعينيها بصدمة توسعو
..آلات التصوير السرير گاع مرون وعلى ملايتو آتار ديال أن شي حاجة جنسية طرات فوقو
.. دخل وراها سلمان دوز عينيه تما وتخنزيرتو زادت تعقدات مالقا مازال مايقول
علياء: الله ياربي “رجليها فشلو وبركات تترمش” ياربي اش هاد المصيبة
زير فكو وقال تايخمم: مصيبة وسكتي.. واش ماشكيتيش فيهم؟
ردت:’نهائيا “شافت فالسرجم الكبير فالبيت وناضت ليه” هادا اصلا كان مسدود ديما وحاطة هاد الفاز قدامو وانا لي شريتو تقيل باش مايتحلش حيت عارفاه تايطل على السرجم ديال الجيران ..ولكن شوف ولاد الحرام اشدارو.. اويلي على البورنو
سلمان: هادشي مغايسلكش على خير ..الجار قالك والو البوليس يحضر
شافت فيه باغة تبكي بالخوف: الى جا البوليس غانمشي فيها اسلمان غانمشي فيها أنا اللولة
سلمان: نتي ماعليك وااالو وماعندهم مايديرو ليك
جرات حناكها ودموعها نزلو: اويلي غير هاد الشهر رياض الزيتوني تسد لهاد السبب ..لقاو لي مكلفة بيه تتق*** للدعارة وشدوها بالحبس.. حتا انا غايقولو غير متافقة معاهم
خنزر فيها: قلنا لك هادشي مغايكونش ماتخافيش..حيدي من هنا يالله ندويو مع الجار على الاقل نقنعوه مايجيبش البوليس، بغا هو هاداك مابغاش غاتلقاو حل آخر وغاتفك بادن الله
علياء: ياربي شهاد المصيبة طاحت على راسي
نزلات غادة وراه تترد النفس وتحاول تبرد شافها الجار نازلة هو يقلب ليها وجهو بغضب
الجار: اش هادشي الالة واااش حناااا محتارمين رااسنا وولادناا وعايشين بشرفناا.. فالاخير تجيبو لينا المنكر حتااال قلب الحي
خنزر فيه سلمان: نعل الشيطان الحاج.. واش البنت عاد غاتعرفوها سنين وهي خدامة هنا عمركم شفتو منها شي عييب
الجار: واليوم تكشف المستور
قربات جيهتو وقالت: الظلم خايب وبزااف اسي الحاج تقدر على هاد الاتم؟ واش عمر شي واحد منكم شاف مني شي حاجة ماهياش؟ أغلبيتكم تايعرفني شنو ساوية وشحال معقولة فخدمتي وتتعرفو عائلتي ووسطكم تربيت.. جيتو لهنا وضربتو فعرضي
الجار: ايوا اش هادشي شفنااا
علياء: اناا بحالي بحاالكم جييت وتصدمت مابقيت عرفت اااشنو ندير ..بغيتو تعيطو للبوليس عيطو ..غايفتحو تقرير وأكيد غايعرفو بلي انا ما عندي دنب حيت هوما غايعتارفو بغلطهم والى كنت معاهم غايجروني داكشي علاش ماعندي علاش نخاف.. ولكن خايفة على هاد الرياض لي سنين وهو خدام ومخدم ولادكم وولادنا تناكلو منو طرف الخبز ومعيشين بيه عائلاتنا ..غايتسد وكون غير على شي حاجة.. إنما ظلما
رد بعصبية: الى كااانو غايصورو طرف الخبز من الحراام غييير بلاااش والى ولادي كاانو خدامين عندك هي خرجييهم من دااابة.. يموتو بالجووع والا يخدمووو مع دوك الحرام
جاوباتو بهدوء تتسايس وتفهمو بايديها: هاد النمادج الحاج ااول مرة يدوزو عندي فالريااض وكونما نتا لي شفتيهم عمري نعرف وربي على كلامي شاهد
الجار: الالة إلى هاكااا غاانعيط للبوليس بااش يمشيو فين يتربااو
علياء: واخا متافقة معاك.. ولكن راه الرياض هاكا غايسدوه ماسوقهمش واش كنا عارفين ولا لا.. ماتكونش اناني اسي الحاج.. تفكر غير هاد الحي كيفاش كان قبلما سي والتر يصلح الرياض ويردو دار الضيافة، يااك كان غير خرااب والازبال فكل جهة.. شكون تايخلي لي تايشطب يدخل حتال الحي يشطب جناب الرياض ويدوز على الحي كامل باش ديما يبان نقي للسياح.. ياك الرياض لي تايخلصهم ومكلف بهاااد المسألة وديما تتلقاو قدام ديورهم نقي وتتلاقاو مع ناس نقيين.. هاد الجرادي والورد والربيع والسباغة لي تانجددو كل عام شكون دارها؟.. ياك الرياض..
تيق بيا إلى عيطتي للبوليس غايتسد والحي غايضيع نعطيك عام واحد غايولي هاد الحي مزبلة والى ماصدقتيش سير طل على الاحياء لخرا كيفاش دايرين ودير مقارنة مع راسك.. الله يخليك فكر غير بالعقل اناا راه ليكم وللناس لي واكلين منو طرف الخبز تانفكر
سكتاات وسكت حتا هو تايشوف فالجيران لي اقتانعو بكلامها كليا تايشوفو فبعضهم ويرددو “عندها الحق “.. تنهد عاقد حجبانو دار ايديه وراه وقال
الجار: واخا الالة.. امانا بالله
خلاهم وزاد لدارو تايردد أستغفر الله العظيم ..شافت فسلمان متنهدة ايدها مدخلها للرياض وقال بهدوء: بردتي دابة.. ايديك مازال تايترعدو!
ردت بخوف: كون عيطو والبوليس…
قاطعها: ماعندو مايوقع ليك مالكي هاكا خووافة.. صافي دويت معاك تيقي فيا شوية
“شاف فدوك الدراري وقال” هادو مخاصش يبقاو هنا
علياء: مستحيل نخليهم هنا ورا هادشي لي وقع
سلمان: أنا غاندوي معاهم ونحاول نقنعهم يخرجو.. إلى لا غانتصرف
علياء: حدهم مخلصين التسبيق فقط.. لا العيد ميلاد خلصوني فيه والا السويت.. يعني فوق الشوهة واللليلة الكحلة لي دوزو عليا غايسلتو بالخلاص
سلمان: حمدي الله دازت سالكة اما كلشي يتعوض.. صوني على خطيبك بعدا علميه بشنو كاين هو اللول
خلاها وداكشي لي دارت شدات جبهتها تتصوني على والتر حتا جاوبها: الو وي حبيبتي.. ياك لاباس
تترد النفس: وقع مشكل كبير فالرياض ..كنا غانطيحو فمصيبة كبيرة كون حضر البوليسس
رد بصدمة: اش وااقع علاش؟
علياء: بعض الكليان دراري حصلوهم الجيران تايديرو أمور شادة فالسويت وتايصورو داكشي.. يعني البورنو
والتر: كيفااااش؟
شرحات ليه المشكل كامل وخبراتو بلي فكاتها على خير بقا غير تخرجهم من الرياض واخا من سيفتهم بانو ليها بااغين الصداع ..سلمان تتشوفو تايدوي معاهم مخنزر لكن صوتو منخفض وهوما تايغوتو عقلهم مرفوع و باغين غير معامن يدابزو
..قطعات وطلعات أولا عند الكليان تكلمات معاهم واعتادرات على لي وقع اغابيتهم تفهم الأمر لأنها فايت خدمات معاهم شحال من مرة وعارفينها هي واخلاقها..
دخلو لغرفهم عاد نزلات تتنش على راسها من العروقات وسلمان ناض عندها
تايزفر
سلمان: مابغاوش.. تاندوي معاهم كلمة يشدوها وعشرة لا
علياء: هادو بانو ليا فاتو الشراب للهيه يقدر واكلين شي حاجة.. شوف غير عينيهم قداش حمرين بحال نيفهم
تنهد بحيرة: مشكلة صافي، هددتهم بالبوليس قلت نخلص ليهم اوطيل غير يق*** من هنا ووالو واش بغاو يفهمو
ردت بعصبية: هادشي لي بقا غير نخلصو ليهم فين يباتو
سلمان: الى بقاو هنا غايديرو ماكفس.. تايقولو هادي حريتنا نديرو مابغينا ومخلصين فلوسنا على ود هاد الأمر عندهم هانية بحالا كانو تايتصورو سيلفي
علياء: ايوا وشنو الحل دابة !!!؟؟
سلمان: خطيبك شنو قال؟
تنهدات: عاودت ليه لي وقع وفاش عرف البوليس مغايجيش قاليا نتي تكلفي.. فالصباح بكري عاد غايرجع من السفر
قلب وجهو تايزفر عاقدهم..شاف فتليفونو وقال: احسن حل هو نعيطو للبوليس
شدات ليه التليفون بخوف: اويلي شنو تتقول واش باغي ليا الحبس
سلمان: تيقي بيا مغايوقع والو لا لك لاللرياض
علياء: غايجمعوني معاهم اسلمان
رد تايطمأنها: فايت قلت ليك عندي خويا فالبوليس ياك.. غانتاصل بيه ونشرح ليه لي كاين هو غايتصرف كوني هانية.. المشكل كان غايوقع كون الجيران عيطو عليهم ولكن إلى عيطتي نتي حاجة خرا ..غاتقولي ليهم هادو تايديرو شي امور مخالفة للقوانين ديال الرياض والحرمة ديالو.. بالعكس راك معاوناهم ومبرأة نفسك حتا إلى تكرر هاد الأمر لاقدر الله من هنا للقدام نتي ديما فنظر البوليس وحدة بريئة وتاطبقي خدمتك كما يجب
سرطات ريقها بتردد: واش متأكد؟
سلمان: ماتخافيش عارف اش كاندير
ربعات ايديها واقفة وهو اتاصل بخوه قدامها.. دقائق وجات السطافيط متقدهم رجل كبير شوية فالعمر شافو سلمان ولعندو توجه فحين هو بحدة قال: سلمان ..فين هاد *****
شير ليه جيهتهم: راهم فين باركين دوك الربعة.. والكاميرات ديالهم الفوق فالسويت باقي كلشي كيفما هو
رد: انا غانتكلف.. طلعو نتوما للسويت جمعو ديك الروينة ..فين لي مكلف بالرياض يعطينا الأقوال ديالو
رد: انا غانتكلف.. طلعو نتوما للسويت جمعو ديك الروينة ..فين لي مكلف بالرياض يعطينا الأقوال ديالو
سلمان ضار وراه جهة علياء لقاها مربعة ايديها وكيف القطة المخلوعة تتشوف فيه.. ضار شاف فخوه مقرب عندو وقال بيناتهم
سلمان: مول الشي غايجي غدا ويدوز عندكم بنفسو كون هاني
شاف فعلياء بنص عين وسلمان قال: ميك الساط هي اصلا بلا والو مخلوعة
رد: لي بان ليك اسيدي .. واحد الوالدة اش كاتعاود؟
سلمان: طل عليها تعرف
رد تايضحك: مقفرها عارف.. ولكن خدمتنا تتقهر الواحد
سلمان: الله يكون فالعوان
…مينطو كلشي وطلعوهم فالسطافيط داايخين صورو السويت وحجزو ليهم على الكاميرات تاعهم كدليل.. تفرتك السوق كلشي غبر وبقات هي وياه فباب الرياض تايشوفو السطافيط غادة وأخيرا المصيبة تفكات
علياء: الحمد لله تفكات على خير
سلمان: الحمد لله “شاف فيها” ياالله نمشيو
علياء: لا أنا غانبقا مانقدرش نرجع للدار دابة.. حتا السوارت نسيتهم بالتلفة
رد : عندك شمبر هنا؟
علياء: آه وفيها حوايجي
شاف فالساعة وقال: ايوا.. ماتعرضيش علينا نتسحرو معاك؟
طولات فيه الشوفة وقالت: ماتحتاجش عراضة ..زيد
تبعها للريسطو ديال الرياض بركو وراما وصات يحطو ليهم السحور مع الكليان لي تما صايمين .. عمرو الطبلة وبداو فالاكل فصمت مرة مرة تتلاقا نظراتهم ..حتا كسر سلمان داك السكون وقال
سلمان: من البارح لليوم وانا تانتاصل بيك.. مابقيتيش باغة تجاوبيني؟
تنهدات معارفة ماتقول: ماشي هاكاك
سلمان: وشنو؟ “خدا ايدها عندو عااقد بين عينيه” علياء.. نتي عارفة معزتك عندي بدات من نهار اعتابرتك ختي ..عارف تاندير ليك المشاكل وبسبابي سمعتي كلام تايجرح ولكن عمري هاكدا نويت
علياء: صافي نسا ماديرش فبالك
تنهد بضيق: كانعتادر منك بزاف ..سمحيليا على لي وقع
علياء: نتا مادرتي والو باش تعتادر .. وأنا ممقلقاش منك غير كنت شوية مبرزطة
ادن الفجر عليهم شرب الما وناض غادي ..خرجات معاه للباب ضار باس راسها وقال بحنية: طلعي ارتاحي شوية ورخفي على راسك
علياء: إن شاء الله “كملات بامتنان” خيرك عمري ننساه شكرا بزاف
سلمان: كوليها
طلع لسيارتو مخليها تتتبسم وزاد مع بزوغ الفجر والسما بدات تضوي.. مع هو مشا تمات سيارة والتر جاية ..ربعات ايديها بتعب شديد بزز باش تتحل عينيها حتا وقفات قدامها نزلو مسخسخين والتر دخل مباشرة ينعس ويورك كدالك مع حبيبتو حدهم سلمو عليها ودخلو.. تبعاتهم للشومبر ديالها مابقات تقشع والو من غير السرير نيشان تلاحت ناعسة والوجع فكرشها
خرجات من البيت غادة للمكتب ديال والتر قصد تدوي معاه على المشكل لي وقع..
مغيرة حوايجها بديال الخدمة راسها بغا يتشقق بالحريق والعيا و زادتها لي غيگل علاما بيها.. دقات ودخلات لقاتو مع يورك بارك والانزعاج على وجوههم ماعرفات مالهم على النبوري
علياء: صباح الخير
والتر: صباح النور
يورك: صباح النور.. أنا غانوض نمشي
رد عليه والتر تايبردو: تهدن يمكن غايكون مشغول وصافي دابة يجي
يورك: هادي ماشي خدمة اصاحبي حنا درنا معاه اليوم فالصباح وعلى ودو شادين الطريق بالليل ومسخسخين
بركات مغوبشة فيهم: علامن تتهضرو؟؟
والتر:’على النجار لي تايخدم ليورك
علياء: ااه “بأسف زيرات عينيها هادشي لي كان ناقصها” سمحولي الغلط ديالي أنا
شافو فيها ووالتر طلع حاجب: كيفاش!!؟
علياء: هو كان عندو شي شغل واتاصل بيا وعتادر بلي مغايجيش.. ولكن أنا مع المشكل لي وقع مشا من بالي نعلمكم
يورك تنهد ووالتر بعصبية قال: كيفاش مشا من بالك.. اش هاد الاستهتار ولا فيك
طلعات حاجبها مرمشة فيه: نعام
يورك: والتر صافي ماعليش
علياء: لا غير خليه يهضر ..اشمن استهتار بالسلامة؟؟؟
خنزر فيها والفرصة فين يرد صرف النخال لي تتنخلو جات حتال بين ايدييه: جمعي لسانك ..يمكن طغيتي وعند بالك وليتي نتي هي البوس هنااا.. وتتشاوري راسك تخبرينا ولا لا هاداا رااه استهتااار بخدمتك
ناضت تاضحك بالفقصة والأعصاب : خدمتتي؟؟؟؟ أنا ااامسيوو ممضطرا نخبر حد، خدمتي هنا جيرون فقط خدمة النجار ولا الحداد پليزيييير مني فقط وتانديرها بلا ريال بلا جوج ونجري ونجاري بااش فالاخير تجازيني هاكاااا
يورك: علياء ارجوك بلاما نكبرو الموضوع
خنزراات فيه ووالتر غير تايشوف صدماتو فيها حيت عمرو سمع صوتها عالي ولا شاف عصبيتها
علياء: لا خليه يكبر نيت.. البارح كلو وأنا فالمشاكل والصداعاااات من هاديك لهادي ماكلفتي رااسك اسي الخطيب حتاااا تسول كي بقيييت ودااابة تتحاسبني.. بأي وجه ..هضااار؟
والتر ناض تايبرد معاها: علياء..
علياء: طلق مني.. كون مااا انااا كون الرياض تسد الشريف وراك عند البوليس دابة.. ااصلاا خاااصك تمشي تفكهاا معاهم انا مابقيتش غانتدخل خدمتي لي غاندييير وبس مااالي على هاد المرض گااا……
تغشاو عينيها فلحظة بالضبابة مابقات تقشع والو و الصوت تايجيها بعيد بزاف، ماحسات إلا وهي طايحة للأرض سخفانة وفودنيها طنين مزعج
تفتحو عينيها وهي وسط فراشها متكية.. رمشات فسقف بيتها وحاولات تبرك رغم الالم لي سيطر على راسها والسخفة قتلاتها ..تفتح الباب ودخلات حكيمة مها مهولة هازة بلاطو تاع الماكلة وفصوتها خوف بركات حداها وقالت
حكيمة: الله ياعوينتي.. كي بقيتي شوية
حدها حركات راسها وخدات من عندها الما تشرب ..تفكرات والتر لي جابها حتال باب الدار وطلعات نيشان للبيت مافاقت حتا فات المغرب
حكيمة: شوية دابة.. خودي عتقي الروح
خدات من عندها الپلاطو تتنقب منو شوية وداتها مرخية عليها: بابا لتحت
حكيمة: مشا يصلي التراويح، راه مهول من جيهتك.. مالكي ابنتي اش طرا تاسخفتي ليهم
طلعات فيها عينيها: قالها ليكم والتر
ردت بخوف: ايه.. ياك لاباس كي وقع لك!!؟؟
تنهدات : غير مع الصيام وزادتني حق الشهر علاما بقا
تزير عليها خاطرها: احح ونتي تتجيك بالوجع ياربي السلامة.. ديزي كولي الله يرضي عليك وارتاحي لك، هاني تانوجد السحور فالكوزينة شوية ونطل عليك
جاوباتها بتحريكة رأس ..خلاتها تتنقب من الطباسل حتا شبعات وناضت تتعافر للحمام.. حيدات دوك الحوايج وطرفات شوية حالتها ..لبسات بيجامة قطنية مغيرة الفوطة الصحية جمعات شعرها عاد رجعات تنعس تتسنط لوجع ليغيگل لي فيها تايقطع ..مولفة تدق البرا فاليوم الأول لكن مع السخفة ماقداتش
….
رنين تليفونها ماهداش كل مرة بنمرة فشكل والشمس الحارة هي لي فيقاتها.. ماطات فمها بعدما فاقت بزز جراتو مدگدگة وصوتها شبه مسموع
علياء: الو
سلمان سكت شوية ورجع قال: صباح الخير
حمحمات بصوت باح وعينيها مدمعين: صباح النور.. شحال الساعة؟
رد: العشرة تالصباح هادي.. واش مريضة ولا؟
علياء: ممم.. فيا السخانة
سلمان: وايلي.. شربتي شي دوا
ردت بتعب: دابة يفوتني الحال.. سلمان غانقطع عافاك مافيا لي يدوي
سلمان: واخا .. نصوني ليك جاوبي
علياء: ..بسلامة
قطعات وتقلبات للجهة لخرا لدقائق تترمش ..طلعات النفس كارهة هاد المرضة ومايجي منها عافرات تنوض وبدات تجر رجليها جهة الحمام هو يرجع يصوني.. هزاتو وجاوبات باستغراب
علياء: نعام
سلمان : انا لتحت.. لوحي عليك شي حاجة وهبطي نديك للطبيب
زفرات بضيق: مكانش عليك تجي غير عدبتي راسك
سلمان: مافيها لا عداب لا والو غير نزلي
ردت بتتاقل: سلمان كون غير درتي بناقص مافياش
سلمان: وادابة جيت ولي عطا الله عطاه، الله يرضي عليك غير لوحي علك شي حاجة وهبطي مغانفوتوش ساعة ونرجعك
تنهدات: واخا
بكسل لاحت التليفون فوق السرير وناضت للپلاكار هزات كسوة صيفية بحال البينوار تتلبس وتوبها بارد.. حيدات البيجامة ولبساتها مع سندالة بلا هزات تليفونها وبزطام فيه وراقها عاد خرجات من الدار
… خارجة وآتار المرض والتعب على وجهها واضحين.. شافها ونزل لابس شوميز زرقة مع دجين زرق غامق عرفاتو كان فالخدمة وحجبانو معقودين سلم عليها وتحسس بفمو حنكها السخون
سلمان: افف طايبة ..ماشربتي والو؟
ردت: فاش صونيتي كنت عاد فقت
تنهد وحل ليها الباب: طلعي
ركب حداها وكسيرا لأقرب سبيطار.. هبطات معاه شادها من كتافها وعليه حاطة تقلها حاسة بعيا الدنيا والدين نازا عليها ..دخلات عند الطبيبة بوحدها وسلمان بقا برا تايتسنا عاينات حالتها أولا كتبات ليها الدوا عاد دارت ليها السيروم ووقفات عند راسها تتكلم
الطبيبة: خاصك هاد الايام تعطي الراحة لراسك حتا الطنسيو عندك طالع شوية.. فاش يسالي السيروم تقدري تخرجي وهاد الدوا لي كتبت ليك تبعيه ويكون خير إن شاء الله
تبسمات ليها بتعب وحطات الورقة جنبها: ميغسي
ردت: العفو ابنتي
خرجات مخلياها متكية وتترمش ..تدق الباب ودخل لعندها ضاحك هز ورقة الدوا لجيبو وبرك حداها
سلمان: هانية المعلمة؟ كي تتحسي
تنهدات تتشوف فيه: الحمد لله.. واخا السخانة باقا
سلمان: شي دوش بارد مع الراحة والاستراحة ترجعي حسن من اللول.. كونما رمضان نهربك معايا ونسافرو لشي قنت
رسمات ضحكة باهتة: ياريت
سلمان: مالك؟ مازال الموضوع تاع البارح مبرزطك
علياء: لا عادي نسيتو ..كنت سمعتك تتهضر مع الطبيبة وسولتيها على شي حد؟
سكت ملغية بسمتو وقال: كنت تانسول على حالة مروى ..راها هنا حتا هي
غوبشات: علاش مالها؟
تنهد بأسى: محاولة انتحار
بصدمة خرجات عينيها فيه: شنوو ..اويلي هادي حماقت!!!! ايمتاا هادشي وعلااش
سلمان: البارح ..علاما عرفت تغاوتات مع ختها حيت وصلات مع راجلها للطلاق وتتقولها نتي السبب.. وقالت زدتها حتا انا علاما بيها
علياء: ياربي واش هادي عندها شي عقل ولا والو
بتردد تنهد مرة اخرى باغي يهضر وتايحبسها: واخا نطلبك ؟
سلمان: بغيتك تمشي تشوفيها
علياء: نتا عارفها متتحملنيش وواخدة عليا فكرة غالطة.. غادة غير تزيد تعصب وتصرف شي تصرف ماهواش
رد بإصرار: خاصها تولف تشوفك معايا وتعرف طبيعة العلاقة لي جامعانا ..إلى فهمات بلي نتي صديقة قريبة ليا وفمتابة ختي غاتحيد من بالها دوك الأفكار وتجمع راسها شوية
طولات فيه الشوفة: على هاد الكلام بان ليا رجعتي معاها ؟
زفر بحيرة: مكاينش شي حل آخر، حاس براسي مربوط وعاد عرفت بلي إلى وقعات ليها شي حاجة بمسبتي مغانقدرش نعيش بتأنيب الضمير
علياء: نتا مداير ليها والو اسلمان راه البنت لي انورمال
سلمان: مانقدرش نغامر مرة خرا..حتا نلقا حل على الأقل
علياء: لي بان ليك، غانمشي نشوفها دابة بقات فيا والله مابغيتش ليها هاد الحالة.. غير الله يهديها على نفسها وصافي
سكت وعاونها حتا ناضت حيدات السيروم لي سالا وتبعاتو هازة مسائلها وغادين للشومبر تاع مروى.. دق ودخلو لقات ختها معاها تما واقفة عند راسها ومروى حاطة على شعرها فولار وملامحها باهتة.. حولو ليها عيونهم فصمت وهي كدالك شافت فختها وسكتات مخليين النظرات تتكلم، برك حداها سلمان متنهد
سلمان: كيف بقيتي
حركات راسها وعينيها تجمعو بالدموع: مزيان الحمد لله
علياء بلطف طبطبات على كتفها : الحمد لله على سلامتك.. الله ينوضك على خير
ردت بلاما فيها تشوف: آمين.. شكرا
سلمان: دويت مع الطبيبة ..قالت غدا ممكن تخرجي
جاوبات ختها: إن شاء الله ياربي.. وغانديها ترتاح عندي شوية
مروى: تبقا معايا اليوم ؟
سلمان: بلاش والديك غايكونو ..ولكن مرة مرة غانطل عليك
تبسمات: واخا احبيبي لي بان ليك
خلاتهم تايتكلمو وخرجات من تما فصمت ..شدات طاكسي لدارهم وفالطريق كتبات ليه ميساج
“رجعت للدار وغاناخد الدوا ديال السخانة من لافارماسي.. غير خليك معاها وساعف شوية.. نفسيتها غاتكون مأترة “
طفات التليفون ودخلات لدارهم سلمات على مها وعلماتها بلي مغاتمشيش للخدمة هاد الأيام عاد طلعات تنعس.. سخفانة وعضامها بحالا مهرسين ملي تتمرض تتهلك بالمعقول … اتاصل بيها والتر عدة مرات بعدما مرت يومان على مرضها.. تجاهلات اتصالاتو بدون جواب والسخاين دارو فيها مابغاو مرة الحرارة طالعة للسماا مع هاابطة
… حتا فاقت واحد الصباح دايخة على تعياط مها لي داخلة تتحيد الخوامي على سراجم البيت وتتقول
حكيمة: نوضي نوضي راه خطيبك جا يشوفك ..لبسي علك شي حاجة راه بارك مع باك لتحت.. واتي نوضي راه غانتحاشمو مع السيد ويلي مازااال خامرة
حكيمة: معامن داوية انااا ااتي نووضي
شافت فيهاا مدگوگة وصوتها تبح : واراني مريضة اماما الله يهديك خليك حتا يمشي بوحدو واش انا قلت ليه اجي
حكيمة: ايوا من الصواب جا يشوفك عيب عيييب تبقاي نااعسة اش غايقول عليييك.. واعلياء عافا بنتي ماديري غابوجهي ونوضي ساعة ورجعي تاني نعسي
تنهدات : ياربي تصبرني… واخا سيري انا جاية
ردت بتحدير: عنداك تنعسي
علياء: ماناعساش غير سيري
خرجاات سادة الباب هي تنفخ وناضت تتكسل ايديها لي تنملو عليها.. هزات بيجامة أخرى وخرجات للحمام نقات حالتها لبسات البيجامة وشعرها مشطاتو بالخف عاد عندهم نزلات دايرة الخاطر لمها فقط
.. فالصالون بارك والتر بابتسامة تايهضر مع ماماها أما لمكي شاد التسبيح وخنافرو للسما مهزوزين شافت للطبلة ولقاتو جايب الحلاوي والشكلاط بأنواعو عارفها تتحماق وتسطا عليه
حكيمة: زيدي ابنتي دخلي ههه
علياء: السلام
بركات مسلمة بفمها فقط وحكيمة ناضت فالبلاصة تتغمز لمكي ينوض معاها ساعة بالعما واش تحرك دار راسو مشافهاش بقا تم بارك ليهم حسكة ووالتر تايكح ملاقيش راحتو معاها بوجودو
والتر: ا علياء ..كيف بقيتي شوية
ردت ببرود: الحمد لله
خرجات حكيمة من الكوزينة تتعيط: سي لمكي.. اجي تكلم شي حد تايعيط ليك
لمكي: قوليلو مكاااينش مشيت نصلي “شاف فوالتر وقال جامع حجبانو فيه بشك” ااياكما نعمرو ليك شي صينية تأتاي ولا صايم؟
والتر: لا اسي لمكي صايم ههه
لمكي: همم فكرني اش سماك الله
نطقات علياء: والتر
شاف فيها والتر وعرف ملي قالت هاد الإسم إدا هازة فخاطرها نيت من جيهتو شي لي خلا الضيق يبان على وجهو وسي لمكي تايشوف
لمكي: ايه مشرفين اسي
حكيمة جعات تتبسم ليهم بسمة صفرة وتحنات عند لمكي محنزة فيه بينو وبينها بلاما يسمعوهم
حكيمة: نوض اسي لمكي خليهم يدويو
طلع فيها حجبانو: مااابيتش
حكيمة: اويلي على مابغيتيش تانوض
لمكي: مابيتش هي مابيتش حيدي عليا
حرات فيه الشوفة وماتهنات حتا جراتو بزز وراها غادي ويخنزر فوالتر ..مع خرج ناض هو تايتنهد وحداها برك بغا يشد فايدها لكن جراتها ووجهها قالباه عليه
والتر: حبيبتي “زفر وقال بنبرة قلق” حالتك معاجبانيش، تبغي نديك للطبيب
جاوباتو ببرود: مايحتاجش
والتر؛ على الأقل شوفي فيا
حولات وجهها ليه: نعام
والتر: علياء الله يخليك بلاش من هاد التقليقة واش مابقاتش فيك حالتي تلت ايام دابة وانا تانتاصل بيك النعاس مابقيتش تنعسو
طلعات حاجب: علاش هاماك حالتي
والتر: أكيد آه، نتي حبيبة قلبي وروحي ..كانعتارف غلطت معاك بزاف ولكن عدريني وعطيني فرصة خرا الله يخليك
حرك ايدو على ضهرها هي تجمع وتنهدات قائلة: والتر.. ختاريتي الوقت الغلط باش ندويو ماتصورش شحال مهدودة ومافيا لي يتكلم
حرك راسو مقلق: ماعليش ارتاحي المدة لي بغيتي، ولي حتاجيتيها فالبلاصة تحضر.. نتي غير امري
وقفات: ماباغة والو حاليا.. نرتاح فقط
خدا ايدها وهي تنهدات باسها وبنبرة شوق قال: متصوريش شحال ضلامت حياتي بلا بيك..كانتمنى نرجعو كيف كنا قبل ومتنسايش أنني تنبغيك
علياء: يكون خير.. سمحلي غانطلع نرتاح شوية
والتر: غدا نرجع عندك
علياء: لي بغيتي
ناضت معاه للباب سداتو وهي تتسمع نگير باها ومها من الكوزينة لمكي زعف نيت حيت خرجاتو من الصالون ..متسوقاتش وهزات داك الشكلاط طالعة لبيتها وتتاكل منو براحتها
.
.
مرت عشر أيام.. استراحة واستجمام رجع والتر اليوم التاني فعلا مخلا من الكدوات ماجاب حتا ولات حكيمة دور دور وتقول غير بنتي لي تخطبات وأغلاهم كوليي تقيل ديال الدهب ساوي الملاين وتايضرب على الشعا خطفاتو حكيمة للماريو نيشان تخبيه ليها وهي هزات الحوايج البارفانات والاكسسوارات لي جاب لبيتها متترد والو لي جاب تتقولها بسم الله واخا خاطرها منو مازال هارب وباقا مسامحات ليه ..
.
خرجات من لاسال هازة ساك فيه حوايجها وضاربة جوب سوداء عليها لاسقة ونازلة للاسفل مع تيشورت بيضة وفيسط سوداء توب خفيف، تمشات على رجليها قاصدة الكوافورة والتليفون فودنها
سلمان: صباح النور
بابتسامة: صباح الخير هههه مازال ناعس
تفوه تايضحك وقال ببحة صباحية: واييه ههه هاكيني على الضحيكة هي صاڤا اليوم
علياء: في احسن حال هههه
سلمان: غاندوش وندوز للخدمة ..نتي راجعة لخدمتك ولا مازال ؟
علياء: غانستاراح مازال شي يوماين ولا تلت يام هاكاك
سكت شوية وقال: مأكدة مواقع والو
بسمات: لي تزادت فالراس زوينة هادشي لي كاين هاد الساعة
سلمان: واخا المعلمة لي بان ليك
علياء: هههه واحد مروى اش خبارها.. تتلاقاو شوية
زفر وسمعاتو حل باب البيت: عندي الوقت حتا لمخي بقا غير مروى.. سيري خليني ندوش ونمشي لشغالي الي ماعندها مايدار
علياء: لي حسدني يدير بحاالي ههه
قطعات معاه ودخلات للصالون لي مولفة ليه تمشي، منو صالون ومنو سپا تتعرف البنات تما وحتا هوما حافضينها
..دخلات ضارت بالحالة من راسها لصبيعات رجليها ومااسالات حتا مابقا والو للمغرب ..العضام خفافو والمورال طلع خارجة مع الشاريع وشعرها الحريري زاد تسبسب ولونو الاشقر تايبري مع الشميشة ..
حلات باب الدار داخلة وكانو تجمعو يفطرو: السلام عليكم
لمكي: لا سلام على طعام بركي تاكلي
علياء: غير بداو انا جاية
طلعات صلاة صلاتها وبدلات حويجاتها ببيجامة عاد لعندهم هبطات ..
كانت محتاجة لبحال هاد العطلة ..النفسية لي ارتااحت بانت على وجهها وحتا الضحيكة لي مرسومة على شفايفها
.. جمعات مع حكيمة ماعن الفطور صيبات ليهم ديسير بارد وهزات طبسيلها طالعة للفوق سدات باب البيت وبركات فاتحة البيسي ديالها تتلاهي بيه الوقت حتا رن تليفونها وجاوبات بهدوء
علياء: صحة فطورك
سلمان: الله يعطيك الصحة ..غير باركة ياك؟
ضحكات: غير باركة ههه نتا مغاديش للتراويح؟
سلمان: لا غادي.. فاش نسالي فيك متيخرج
علياء: فين!
سلمان: واش فيك ولا لا
علياء: واا الصراحة فياا ولكن قولي فين
سلمان: ههه نسالي وندوز عليك ..تهلاي الوليدة نازلة
قالت بمزاح: سلم عليها
دارها ليها بصح وقال: الواليدة سلمات عليك علياء
علياء: ويلي ويلي
قطعات بسرعة تاضحك حطاتو مكملة شغالها فالبيسي.. حتا دازت جهد ساعة وناضت تتقلب بحماس علاما تلبس
علياء: ماما انا خارجة ….
هابطة من الدروج بدجين زرق مع تيشورت غوز بارد وهازة فايدها الساك والسبرديلة ..خرجات حكيمة من الكوزينة لابسة طابليتها وقالت
حكيمة: وفين غادة اختي
علياء: غير هنا، إلى سولك بابا قوليلو دابة نرجع
حكيمة: واخا وردي البال لراسك “تحنات علياء تتلبس سبرديلتها وهي رجعات لعندها” احقا فكرتيني، دوات معايا مرت خالك قبيلة العرس ورا العيد الصغير عاد غايديروه
علياء: مزيان الله يكمل
تنهدات: آمين.. والعقوبة ليك ابنتي
علياء: آمين، بسلامة اماما
خرجات من الدار وففم الشاريع لقاتو واقف بالكاط كاط ديالو و شاعل الضواو لداخل.. تبسم من الزاجة حاضيها وهي تاضور عوينااتها هنا ولهيه ياكما شي حد تايشوف بحكم الحي شعبي شوية
طلعات لقاتو تايضحك وقالت
علياء: واسير غانباتو هنا
ديمارا: هاربة من شي حد هههه
علياء: هاربة من الحضية ههه “قادات شعرها وهو ديمارا” فين غادين
شاف فيها بنص عين: واحد البيرمي خديتيه ولا باقي
علياء: مازال شوية
ضربها بخفة لراسها: ربع شهور الكسولة وباقي
علياء: وامع الخدمة متانساليش ليه “شافت فيه باستغراب” اجي باش عرفتي ربع شهور
سلمان: المدرسة حدا لاجونص ..نسيتي
ضحكات: ايه ولكن كي عرفتي ربع شهور
ضحك وشاف فيها: كنت تانشوفك شحال هادي فاش عاد بديتي تجي
جبدات عينيها: يعني فايت تتعرفني !!؟
سلمان: شوية ..فاش تنكون عيان من الخدمة تانبرك مع قهوتي وعينيا على السرجم ..وتما كاين غير لي تايبغي يدوز البيرمي مرة مرة تتباني ليا
علياء: قول حضااي تتبع هادي وهااادي
ضحك من قلبو وحبس الطموبيل: نزلي نزلي ههه
علياء: فين هنا
هبطات فطريق شبه خالية من الطموبيلاات قليل فاش تتمر شي وحدة.. ضار برك بلاصتها وقال تايشير ليها تركب مكان السائق
سلمان: يالله ركبي ورينا اش تعلمتي
تقلب وجهها متفاجأة: شنو.. تاضحك ياك نزل نزل
رجع سد الباب تايهضر معاها من السرجم: واش دابة وقت الضحك ..يالله راه تانتسنا
ركبات بتردد سادة من جيهتها الباب وقلبها بالخلعة كايزدح
علياء: رخيصة علك طموبيلتك واقلة
سلمان: ديري السمطة وتكايسي
دارتها وحطات ايدها على الڤولون تاطلع النفس: بسم الله
تقاد بلاصتو تايشوف فالطريق ياكما جاية شي طموبيل: على بركة الله اشهد ان لا اله إلا الله واشهد أن محمداً رسول الله
ضرباتو لكتفو: وا باز
ضورات الكونطاكط وهزات فران امان هو يقول: وركي على لومبرياج.. بشوية
ردت بتوتر: آه هاهو
سلمان: يالله بش…
عفطات من الديپار حتا غوت: وابشوية غادخليها فشي حيط
علياء: واابوحدهااا زااادت
سلمان: ساكنينها الجنون.. عنداك شوفي قداامك
ايدها بدات تترعد عليها فجأة حتا فلحظة تنسا ليها السوگان ومايجي منو
..حبسات باش الخلعة تخفاف منها شوية وهو حداها تايهضر ويشرح دوري ساروت باش ديماري وركي على لومبرياج وزي بروميار وهزي رجلك على لومبرياج غير بشوية عااد تكسيري واحد الشوية
.. دارت هضرتو من هنا دازت غير ضورات الساروت كسيراات نيشاان بلاما تهز فران امان ومكملاها تادوز الفيتاس بلا ماتورك على لومبرياج حمقاتو والطموبيلة حماقت كتر منو وبكلامو زاد تلفها كترما هي تاالفة..عاد غاضور فيه يسكت بان ليها رموك جاي قاصدها ولو مازال عليها بعيد شداتها الخلعة من صباع رجليها وتبلوكات
سلمان: عندااااك عندااك عنداااك
غوتاات محيدة اايديها وهو بسرعة عفط على الفران وسكتها بالزربة قدام كافي عائلية قبلما تدخل فشي بوطو ولا تقلب بيهم تما
سلمان: واااش الفوولوون تايحيدو منوو النااس ايدييهم
ردت مخلوعة تترعد: نتااا لي تلفتيني نتااا.. ديري هادي نقصي هااادي افففف مابغيتش نتعلم اناااا گاع بالناقص
سلمان: يااك اختي
نزلات داخلة للكافي تترعد بالخلعة وهو بلاصا الطموبيل وتبعها ..جر كرسي قدامها حط الساروت والتليفون وبرك فيها تايشوف وفوجهها لي ولا صفر
سلمان: شوية ؟
حركات راسها وقال: كنتي غاترزيني فطموبيلتي مسكينة
علياء: شوف ايديا مازال تايترعدو اففف راني حافضة والله غير ماعرفت مالي
ضحك وزاد فقصها: لا لا بااينة حافضة الله اودي
.
علياء: واصافي زدتي فيه
جا السيرفور ونطق سلمان تايضحك: شنو تشربي؟
صونا تليفونها برقم والتر قطعات وقلباتو عاد فيه شافت: عصير بارد
سلمان: ليمون بارد وواحد براد اتاي صغير
مشا وسلمان طلع حاجبو فيها بشك: ياكما مدابزين اش تما
تنهدات: شوية وصافي.. بعد غدا غانرجع للخدمة
سلمان: إن شاء الله، عاماين دابة ونتي خدامة معاه ياك؟
بتفكير : تقريبا ..قول عاماين وشوية الصرف ههه
تبسم: وقبل فاش كنتي خدامة.. اولا يمكن كنتي تتقراي؟
علياء: لا كنت خدامة نيت ولكن فجمال بعييييد على السياحة ههه باقة نعقل كانت شركة دخلت غير نجرب ونرجع لقرايتي، ساعة ملي الواحد تايدخلوه فلوس الخدمة متتبقا تبان ليه لا قراية لا جوج هههه
سلمان: اولى من الأول مكنتيش باغة تكملي قرايتك
ضحكات تتحرك راسها: لا نهائيا بالعكس، عمري فكرت فالخدمة ولا شي حاجة.. ولكن داك الصيف مات عمي الله يرحمو وكنت عاد شديت الباك
قاطعها بهدوء:’الله يرحمو
علياء: آمين.. كان عزيز عليا بزاف، تانقولولو بابا من كترة ماكنا تانبغيوه مسكين، ملي مات مسافرناش حيت مولفين كل صيف نسافرو مجموعين حنا وهو وبناتو، ولكن ديك المرة لا بقينا غير فمراكش.. وبناتو كانو خدامات فشركة ديال الخياطة.. قلت عوض مانبقا غير باركة ندخل نخدم هاد الشهرين تاع الصيف منها نتلف الوقت ومنها نضبر على مصيريف
سلمان: فشركة ديال الخياطة ههه نتي؟
ضحكات؛ اييه اسيدي و فالفينيسيو مازال ههه لقيتها ساهلة نيت
سلمان: ايوا
علياء: ايوا فاتت سمانة يمكن، والله معقلت.. آه يمكن سيمانة وكان جا عندنا واحد الگاوري تانقادو ليه شي خدمة.. جا بغا يشوف كيفاش دايرة الشركة والعمال على اساس نخدمو ليه واحد الموديل جديد .. المهم بدا تايضور وداز عند وحدة باركة حدايا تايسولها بالإنجليزية على الخدمة وشنو داكشي تتصاوب وكدا ..ولكن البنت مسكينة مافهمات حتا حاجة من كلامو ..وتاحد تما مكان تايهضر بلونگلي حتا من الشاف ديالنا كانت تتعرف للفرنسية فقط
رد: و نتي كان عندك ادب إنجليزي !
علياء: ايااه ونضت ندير خير زعما بديت تانشرح ليها اش تايقول وهو تانشرح ليه اش تتقول هههه وبقيت تابعاه فينما بغا يهضر مع شي واحد تما تايجرني حتاا سالا هو يضور عند المدير، قاليه بلي بغاني انا لي نتكلف بداك الموديل.. انا لي نخدمو وانا لي نراقبو من A حتال Z هههه
ضحك وقال: ايوا شتيي ترقية من السيمانة اللولة
علياء: هههه تصدمت.. ولكن تهجرات ليا مزيااان من بعد
جمع حواجبو: علاش !
تحطات طلبيتهم وهزات البراد تتكب ليه وليها اتاي: حيت ديك الساعة كنت باقة نية متنعرف واالو فالتخلويض لي تايكون فالخدمة ولا الحسادا والمغيارين.. وكانت خدمتي الشاف ديال الكنترول يعني انا لي تانقوليهم هاشنو ديرو وهاشنو لا، هادشي لي معجبهمش خصوصا ديك الشارفة لي كانت شاف ديالي واخا هاكاك عمري تسوقت مدياها فخدمتي والسلام، ايوا كان تما واحد البيرو تايوصلو منو لي فيشيي بالانجليزية كانت تتسيفطهم ديك الشركة.. انا كنت تاهزهم تانقراهم لي بغا يتشرح تانشرحو ولي بغا يترجم تانترجمو وتانمشي عند المدير .. كنا تانقولوليه الحاج كان رجل كبير فالعمر حاشا وجهك
سلمان: هههه
كملات كلامها وهو تايضحك: وكان ضروري نتعلم للخدمة فالانترنت تما فين جاتني الفكرة نقرا لانفورماتيك.. وليت نخرج مع الستة وتانمشي للمدرسة فالليل ..ديك الوقيتة بالضبط صافي حيدت المدرسة من بالي نهائيا هههه وباقا نعقل سي لمكي نوضنا انا وياه الحرب على هاد المسألة
سلمان: ماتقبلش تخرجي من القراية
علياء: فعلا كان باغيني نرجع نقرا وأنا مابغيتش ..ولكن كان قرار فمحلو عرفتي شناهية من 1000 درهم لي كنت تاناخد ل3500 درهم ههه حلفت بحلوفي مانرجع ههه وداكشي لي كان.. تانخدم بالنهار وبالليل مقابلة القرايا ولاصال حتا فاتت وقيتة القرايا بشحال وخديت ديبلوم تسيير مقولاتي معلوماتي بزوج
سلمان: شحال تقريبا ونتي خدامة معاهم
علياء: عاماين بالتمام
سلمان: وكي جرا حتا خرجتي من عندهم
علياء: التخلويض لي فيهم هو السبب.. كنت تاندير شي حاجة فالپيسي تانجي تانلقاها تمسحات.. تانحط شي ملف هنا تانجي متنلقاهش لدرجة ولاو تايديرو ليا المشاكل باش نتعطل، الناس تايخرجو مع السبعة انا متانخرج حتا تتفوق التسعود ديال الليل.. يعني فعلا لقيت صعوبات بزااف وكلو وأنا محاساش ولكن فييين طفح الكيل ديال بصح ..هو نهار كنت سهرانة على واحد الملف باقا نعقل كان ملف مهم بزااف وخدمة ديال شهور وتمارا.. ماخرجت من الشركة حتاال العشرة غير باش نساليه دخلتو للبيسي وخليتو فالمكتب ديالي وخرجت .. ايوا الصباح عاد دخلت تانقول بسم الله ..ضرت هنا وهنا مالقيتوش ههه.. عرفتي تانعاود لك وتانتفكر داك النهار الما جمد ليا فالركابي ههه
بسم ومد ليها العاصير شربات منو وقال: اي خدمة خاصك تكون فيها قافز حاضي قدامك ووراك.. التقة مكايناش نهائيا
علياء: بصح ..والحگرة خاايبة بزااف….
سلمان: اش وقع
علياء: دخل عندي داك الحاج حاشا وجهك حل الباب وبدا يتهز عليا تما….
شربات تبرد حلقها وهو فيها تايشوف مركز مع كلامها وفيما تعصب تايجمع حواجبو
علياء: تصدمت ماتصورش قداش، تجمعات عليا الخلعة والستريس والبكية وليت نضور فداك البيرو ونقلب واخا متأكدة بلي خليتو فوق المكتب.. وهاد الحاج مع دخل والطريقة باش بدا يغوت عليا نعطيه الملف عرفتو هو مولاها وهو لي خدا الملف
سلمان: وآاش درتي ؟
علياء: باقا نعقل دزت للانترنت قلت مادام مشا الملف غانلقا الاحتياطي تما.. ولكن والو بحالا عمري حطيت فيه شي حاجة كلشي تمسح والمشكلة هي أنه مسحو حتا من الكوغبيي يعني إلى بغيتي تردو خاصك تيكنيسيان ديال الانترنت نيت ونيت.. وكان فالشركة وااحد بالكشيفة باش كان تايجي
زفر راجع اللور وراسو ضرو: مشكلة واشمن مشكلة
علياء: عرفتي وليت تانترعد ..والملف كان مهم بزااف كان فيه تقرير على كل پباسة خرجات وخاصني نسني عليه انا والشاف والمدير باش السلعة تخرج، بلا بيه غايبقا الكاميو ديال السلعة مبلوكي مايمكنش يتحرك
سلمان: فهمت.. ونتي كنتي متأكدة بلي هاد الحاج هو مولاها
حركات راسها: متأكدة، هاد الحاج هادا كيف دخل وبدا يغوت عرفتو هو حيت نورمالمو فاش تتكون شي مشكل بيناتنا حنا ليكيپ تانتجمعو مجموعين وغير بيناتنا تانفكوه، هو لا تايبان ليا السيد حمار وجهل ولا تايغوت وباغي كلشي يسيق الخبار.. وفعلا نزلوا عندنا المدراء الموضفين العمال تايطلو وانا نيت تانغوت و حدي تانقوليه ماعنديش الملف مااعنديش ههه ..قاليا وفين مشاا هزيتوو اناا “هزات كتافها” وانا نلوحها ليه فوجهو نيشان قلت ليه ماكااينش من غيرك لي غايهزو.. اولا الساروت ديال المكتب عند جوج الناس فقط انا وهو.. تانيا كان فالشركة ديك الليلة وواخا خرجت معطلة خليتو ورايا.. زائد أنه حالفها فيا حسيفة وكان تايقلب غير على الفرصة منين يشدني
جمع حجبانو: وعلاش مالك معاه
شربات من العصير تترفرف بعيونها: كان بغا نتصاحب معاه اسيدي والصغيرة فبناتو قدي هههه تصور
قلب وجهو داير ضحكة الاستهزاء: لا حول
علياء: ملي مابغيتش ولا شاد معايا الصد حتا لقا الفرصة منين يشدني
سلمان: ايوا
علياء: صافي فاش فضحتو وبديت نقوليه حشومة عليك واش حيت مابغيتش ندير معاك علاقة ونتا مزوج وبولادك واش ماشي حشومة ضيعني فخدمتي لي سهرت عليها شحال، بدا السيد تايغوت مارضاش وحتا انا نيت ماسكتش ليه والبكية تتنزل لياا والخناين هههه وليت حالتي حالتي حالتي ولخرين تايشوفو.. حتا فلحظة هز ايدو صرفقني
سلمان: شناواا
ضحكات من ردة فعلو: والله ههه حتا انا ماحسيت براسي تاجمعت الدفلة مزياان وعطيتها ليه نيشان لوجهو
ضحك تايحرك راسو وهي كملات: جاني شارف أما نعطيه دقة وحدة نجيبو طايح هههه
سلمان: ايهااي هاي هاي
هزات كاسها تتشرب وترمش: وشنو.. انا المعيور وكترة البلا بلا لي معنديش معاه، من صغري لا انا لا خوتي تربينا هاكا.. حتا إلى بدات شي وحدة تتسبني وتعصبت تانوض نجرها من شعرها ونبدا نعطيها حتا نبرد ونوض ههه ديك الساعة تقول لي بغات متانتسوقش
ضحك فيها تايشوف: اصلا باينة لسانك مغايخرجش بحال هاد الكلام
علياء: لا لا مانقدرش وعمري زعمت هههه لمكي غايشوي ليا فمي نهار يسمع مني شي كلمة ماشي حتالهيه
سلمان: وخليك هاكدا.. مابنت ماوالو هاديك لي تايكون فمها خنز من الطواليط وتايسحابليها راسها واعرة إلى سبات
علياء: ماعرفتش كاين لي هاكاك مولف حتا بالضحك تايسب هههه ولا بحال مرت صاحبك صدماتني فيها ديك النهار، السيدة تتبان فشكل وكلاس ههه
رد ببرود: تريكتهم كلها هاكداك ..شفتي نيت فعايل مروى معايا وهاد التزيار لي مزيرة، حتا صاحبي تايعاني منو مع ختها ..وهادو من الأسباب لي تايخليوني مانبغيش نزيد معاها القدام
تنهدات بأسف::يعني مستحيل علاقتكم تزيد القدام شي نهار
سلمان::الى فكرات هاكدا راها تتحلم ..
علياء: بصراحة انا وياك مختالفين فالتفكير ديالنا.. انا تانفضل نعطي للشخص فرصة تانية وحتا تالتة الى شفت فعينيه الحب تجاهي.. نتسنا ونشوف ربما على قبلي يغير داك الطبع لي مكنحملوش فيه
سلمان: ممكن مع وحدة خرا.. ولكن مروى عمرها تبدل
علياء: ايوا غير شوف.. وباش نجيو الصراحة حتا نتا تصرفاتك تايعصبو.. واش معاها وداير طاشمة تاع البنات وراها
شرب من كاسو بهدوء: داير غير جوج اشمن طاشمة
ميلات راسها تاطنز : مسكين هههه راه ماشي غير الاعصاب لي غاتركب فيها شي حاجة كتااار
طلع فيها عينيه: المشكلة ماشي غير فالبنات وياريت كانت غير هاكا.. السيدة موسوسة وحبها مريض “سكت متدكر واحد الموقف” تصوري واحد النهار كنا باركين بجوج حتا صونات ليها ختها، مانعرف فاش كانو داويين وقالت ليها بلي غاتخرج مع راجلها.. هي تقول ليها وهاديك خارجة معاكم ؟ مالها غير لاسقة فيه يالاطيف وتانسمع ختها تتشكا انا قلت ربما ختو حيت عارف الأم ديالو مرة فشحال عاد تتمشي تزورهم وتبرك معاهم شوية .. فاش سالات سولتها وقالت ليا بلي دوات على عگوزتها، لي هي مو .. تما عرفت بلي حتا ختها عندها هاد المشكل يعني بجوج من النوع لي ممكن نكون بارك مع مي في أمان الله تجي هي وتبرك بيناتنا وتبدا تخنزر غير هاكاك.. والى دوينا تقول راه عليها هاضرين.. ولا إلى تشهيت شي نهار نمشي نتغدا عندها غانولي فمصائب ماشي غير المشاكيل
علياء: ماشي لهاد الدرجة عاود
تنهد: ااودي.. حتا انا جيتها نيشان قلت ليها انا نهار نبغي نتزوج هو النهار لي غانجمع راسي مكاين لا بنات لا جوج.. ولكن باش نقطع علاقتي بمي مستحيل والى كانت بنت المرا هي لي غادخل بينااتنا بالناقص منها أصلا
علياء: و هي شنو تتقول فهاد الأمر
سلمان: هي ماشي من النوع لي تايتمسكن تتحط ليك كلشي فوق الطبلة بلا زواق، وحتا فاش جبدنا هاد الموضوع قالتها ليا نيشان نهار نتزوج بيك افلان بغيتك ديالي بوحدي مكاين لا مي لا صاحبي، وتتبدا تعطي تبريرات ..تما حتا انا جيتها گود انا الحاجة لي مايمكنش نديرها هي هادي واخا نكون تانموت عليها.. حيت مي شافت العداب باش كبراتنا.. الواليد توفى وحنا مازال صغار وهي لي كبراتنا بدراعها بلاما تمد ايدها لحد والحمد لله كل واحد وحياتو وكلها وفين لايحاه الوقت ..حتا بقيت عايش معاها غير أنا
حركات راسها بتفهم: فهمتك، الله يخلي ليها صحيحتها و يطول ليك فعمرها
سلمان:آمين .. ماكملتيش ليا مازال ..شنو وقع؟
ضحكات: خليناها فالدفلة ياك
.. ايوا اسيدي ناضو المدراء وكلهم جاو من جيهتو وضارو فيا انا خصوصا الشاف ديالنا كاملين،ىقاليا نتي ممأدباش دايرة الغلط وزايداها بتخراج العينين ههه جيت نهضر وتاحد مابغا يتيق بيا وزادها قالي غانعاود الخدمة من الأول مغانخرج حتا نساليها
سلمان: وهاد الحاج اش قال
علياء: والو ساكت وتايشوف.. غوت وحلفت ليهم لاعاودتها انا خدمتي درتها وماخرجت من الشركة حتا نضيت اموري كلها، هو السبب هو لي يقلب على الحل
سلمان: ايوا
علياء: ايوا دفعني وسدو عليا باب البيرو بالساروت، قالك ممنوع نخرج إلا إلى ساليت الملف ..مانكدبش عليك بحال الحگرة لي حسيت ديك النهار عمري جربت للآن ..غوت وبكيت وخربقت داك البيرو من الفوق للتحت من الوراق للمكتب كلشي خشخشتو الا البيسي هههه رديتو زريبة
تبسم بأسى: الحگرة قاصحة.. حاس بيك حيت ياما تحگرت فالبداية ديالي
علياء:’ولكن ربي كبير.. باقا عاد كانبكي ونغوت هي تبدا دق عليا الفام دميناج تاع الشركة.. قلت ليها راه مايمكنش ليا نحل ليك سدو عليا الباب.. مشات مسكينة جابت ساروت حيت تايكونو عندها السوارت تاع گاع البيبان حلات ليا خرجت غسلت وجهي وهي واقفة على راسي حتا ساليت ونشفت حالتي.. اييوا هي تحط ليا كلشي اطابل.. قالت ليا بلي البارح فاش خرجت وبغات دخل دير الميناج للمكتب ديالي.. شافت الحاج دخل هز الملف فوق المكتب هو يقطعو ورماه فالپوبيل لي ورا الشركة ..عاد رجعت تاني خربق فالبيسي وخرج كأن شيئا لم يكن
سلمان: ولد الكلب
علياء: عرفتي كيف قالتها يا سلمان ههه ومع عارفة بلي الكاميو ديال الزبل تايدوز مع الصباح جريت جرية وحدة حتا كلهم ردو ليا البال سحابوني غانهرب هوما يتبعوني هههه انا نجري وهوما يجريو المدير الشاف تاعنا وداك الحاج معاهم ماوقفت حتال الطارو ههه وعرفتي بقوة الحگرة لي تحگرت جريتو كاااامل حتا تكب عليا كااامل “ضحك تايسمع ليها وهي كدالك” جاب الله فيه غير التواب والخيوط حيت خاص بالشركة فقط كون كان طارو عام كون تطليت بالزبل
سلمان: هههه لقيتي الملف بعدا
علياء: الحمد لله لقيتو ..مع تكبو التواب تكب معاهم وسبحان الله لقيتو مجموع الوراق ديالو باقين مع بعضهم غير هو مقطع على جوجد. هزيتو بهستيريا تانوريه ليهم وهوما غير تايشوفو مرة فيا مرة فيه والسيد تصدم ولا حمرررر كتر من العكر ليدايرة ههههههه
تسناها شربات ماتبقى من العاصير ديالها طلب ليها واحد آخر وبراد آخر ليه وهي كملات تتبسم
علياء: ايوا اسيدي وليت تانوريه ليهم ونهضر بحال شي حمقة ههه واش أنا غادة نقطع الخدمة لي دمرت عليها شهور.. واش غير غانمشي ونمسحها من البيسي واش ماشي حشومة تحگروني وظلموني وا حرام عليكم ههه.. خليتهم غير تايشوفو وقلت ليهم داابة تعيطو لتكنيسيان يجي يرد ليا الملف لي تمسح .. هو ينقز الحاج قالك انا نعيط ليه وانا نخرج فيه عينيا ..قلت ليه نتا آخر واحد يهضر والمدير العام هو لي يعيط ليه ..وفعلا داكشي لي كان.. عيط، جا التيكنسيان بزز ودخل للبيرو تايحاول يردو وانا الفوق فمكتب المدير، عطاتني الكاتبة ديالو نشرب وهوما بداو عليا بالبلا بلا بلا ديالهم
سلمان: اعتادرو منك!؟
علياء: هه قالك اسيدي حگا والواد خاص نتصالح مع الحاج ..ندير بحالا حتا حاجة ماوقعات ونرجع لخدمتي عادي.. ايوا نضت ليهم ديك الساعة
ضحك باستهزاء: تصالحي معاه هادشي لي بقا
تنهدات تتفكر الفقصة لي عاشت داك اليوم::واييه.. ماعقلتش شكون گالها ليا؟ كنت قلت ليهم قبل يجبدو ليا الكاميرات حيت فالشركة كانو عندنا جوج وحدة فالمدخل وحدة اللور.. وقلت ليهم إلى مازال متيقتوش بلي هو السبب جبدو الكاميرات شوفو شكون خرج من ورايا وفين توجه ..ولكن مابغاوش
سلمان: الفام دميناج ماعتارفاتش ليهم
علياء: لا لا مقدرتش نجبد سميتها ..تما دخل واحد تما كان خدام معايا ماانعرف سميتوو حميد يمكن.. آه هو .. وهو لي قاليا تصالحي معاه والسيد قد باك طلبي منو السماحة حيت دفلتي عليه وتصالحو الله يسامح وبلا بلا بلا
سلمان: ههههه
ضحكات؛ عرفتي غيير قالها.. فحالا كبيتي عليا ليسانص وشعلتي فيااا العافية هههه شعلت عليهم شعلة وحدة عمري عقلت انني تعصبت بحال ديك النهار
سلمان: نضتي عصيتيهم لا هههه
علياء: هههه نضت كانغوت.. شتي المكتب لي كنت فيه كان ديال المدير ياك.. اشغانقولك اعصاار داز من تما لپيسياات هوما لخرين شخشختهم هههه قالو هادي مسكونة ولا فيها الصرع ضهشرتهم كااملين وفالاخير بركت عاطياهها للبكا.. عرفتي حسيت بواحد الحگرة راه مايمكنش
مد ايدو ببسمة خفيفة ومسح دمعة عفوية من عينيها نزلات فورما تدكرات المشهد.. ضحكات تتمسح عيونها وهو قال
سلمان: كملي
طلعات النفس: ايوا تيقوني الحمد لله.. ولكن باش يجريو على هاد الحاج مايمكنش السيد خدام معاهم كتر من 20 عام وعندو معاهم حساب طوييل إلى بغاو يعوضوه.. يعني كنت عارفة بلي ممكن يستغنيو عليا انا وهو لا.. واصلا كرهت ديك الخدمة ومعاودش بغيتها ..قلت ليهم الله يعاون ناخد الاتعاب ديالي والله يربح..هوما يوقفو ليا فالباب مخلاونيش نخرج
طلع حاجب: مخلاوكش تخرجي؟
علياء: لا.. سدو عليا وقالك مانخرجش بداو معايا بالهضرة وحشومة وهاكا هاكا.. قلت ليهم بغيتو نبقا خدامة هنا.. بشرط، يعتادر مني الحاج قدام گاع الموضفين ونرد ليه التسرفيقة لي عطاني غير هاكدا والله لاسمحت ليه والى مسامحتوش مغانبقاش معاهم تما
سلمان: هههههه ايوا
علياء: أكيد مابغاش ..وحتا الاستقالة مابغاوهاش حيت عارفين مغايلقاوش بحالي، بغيت غير نخرج مخلاونيش نهائيا.. قلت ليهم واش باغين تخطفوني نتوما ولا شنو قالك مانخرج حتا نلقا لي تعوضني ونبقا معاها شهر نورييها الخدمة وكيفاش تشد بلاصتي ..شوية قالك خاصني نسني على شي وراق ..سايرتهم وطلعت نشوف اشمن وراق لقيتو عقد فيه ممنوع نخرج من الخدمة إلا إلى لقيت لي ترومپلاصيني وتكون بنفس الكفاءات ديالي.. وانا عاارفة واخا تجي لي بغات تجي يستحيل تتعلم فظرف شهر على الأقل واحد ست شهور عااد ممكن تشد كلشي وتولي فاهمة الخدمة مزيان
سلمان: وشنو درتي
علياء: قطعت دوك الوراق طبعا وبقاو شادين معايا العكس مخلاونيش نخرج.. حتا وصلات الوقيتة ديال الغدا.. عرفتي من الصباح وأنا فالاعصاب حتال وقيتة الغدا تهديت ديال بصح.. صافي قلت ليهم على الأقل خليوني نخرج للجامع نصلي ونرجع وأنا الله يسمح ليا مكنتش تانصلي ديك الوقيتة، تانصلي ونقطع الله يغفر ليا وصافي هههه
ضحك منغم بكاسو: سير عالله كملي هههه
علياء: هههه ايوا دخلت للجامع وبقيت عااسة على الباب غير هوما غبرو خرجت أنا وسلتت في حالاتي.. درت ليهم من هنا دازت هههه صافي وخرجت من عندهم
سلمان: ماخديتي التعويض ديالك ماوالو
ردت: لا ..وسيفطو ليا شحال من مرة نرجع لكن مابغيتش.. لدرجة رفعو عليا دعوة ولكن جاب الله كان عندي الشهود و شي بنات تما وقفو معايا ضد هاد الحاج هادا وشهدو ضدو ..والحمد لله حدهم كملو ليا خلصة الشهر ديالي وخرجت عندهم
سلمان: دازت على خير.. هادو ماشي بنادم حمير صافي وأحسن حاجة هي مطولتيش معاهم
ردت وايديها تايتحركو مع كلامها: واييه.. ايوا تما بركت مدة فالدار وعاد رجعت تانقلب على خدمة ..مرة هنا مرة هنا والصراحة كنت تانقلب غير فالشركات فقط، ولكن التمن مكانش تايعجبني يعني 1300 درهم 1500 درهم.. تانشوف راسي غانزل النيڤو من 3500 حتال 1500درهم جاتني قاصحة .. حتال واحد النهار جا بابا وقاليا لقيت لك خدمة .. وبابا كان ديك الساعة نجار وفنفس الوقت تايتلاها بالطاكسي لي عندو “كمشات عيونها تتفكر” ماعقلتش واش هاد السيد لي لقا ليا خدمة كان شي واحد تلاقاه عندو فالمحل باش يخدم ليه شي خدمة ولا كليان فطاكسي! والله ماعقلت المهم هاد السيد كان سمسار تاع الگور ..جا وقاليه راه تانقلب على شي حد كاپابل بغاه واحد الگاوري يقابل ليه الرياض ديالو .. ايوا وبابا اقتارحني عليه
سلمان: يعني الوالد ديالك هو لي لقاها لك
علياء: آه فعلا .. جا للدار خبرني بالأمر لبست ومشيت شفتو.. والحمد لله قادينا الامور وبديت ديك النهار نيت هههه إلى يومنا هادا
حرك راسو تايتنهد: عشتي مغامرة واشمن مغامرة
علياء: لي دازت على الراس زوينة، الحمد لله على كل حال.. غير فديك الوقت كنت نية بزاف وباقة معارفة بحق الزمان عكس دابة.. بنادم من عينيه تاتفهم اش تحت راسو
سلمان: الظروف تتعلم
علياء: ههه بصح “شربات الما حيت شحفات وقالت” شحال فالساعة؟
شاف لتليفونو وطلع فيها عينيه شاداه الضحكة: الوحدة ونص
خرجات عينيها: نعام.. ويلي خمرنا هههه نوض نوض اليوم حكيمة تنجرني
هزات مسائلها وهو تايضحك: باش تعرفي الوقت معايا متتحسيش بيه هههه
علياء: آه اودي غير زيييد .. “شافتو وقف وراما شاف واحد الگاورية داخلة للكافي وتتبسم ليه من تحت نيفها غمزها وقال
سلمان: هاي
نفخات علياء وجراتو جهة الطموبيل: واازيييد وصلني لدارنا ورجع كولها گاع نتا
ضحك حال ليها الباب: مانسلمووش السلام ديال الله
علياء: وسلام نتا مابحالو سلاام ههههه
سالا رمضان ودا معاه احداتو واتعابو ..رجعات لخدمتها وسيسطيم حياتها من جديد قابلات خدمة يورك مرة أخرى وراما منها اعتادر، حشمات تخليه فالنص ورجعات مقابلة ليه الاتات وفنفس الوقت تتقلب على ترية مناسبة للمقهى.. ترية مافحالها ترية تكون كبيرة من الكريستال الغالي وشكلها يكون خلاب ماخلات فين قلبات وكل مرة داخلة عند واحد فشكل حتا طاحت فيها كيف رسماتها فبالها وعلمات يورك بالمحل …
… مر الشهر لي دارت مع النجار سالا ليها الخدمة كيف اتافقو ..خلصاتو بحضور يورك وكيف هو داز من هنا جات من الجهة لخرا وعطاها جوا فيه الجعيبة ديالها لي كانت 8 المليون.. تسالمو وخرجات راجعة لدارهم تتزرب حيت لازمها ترجع للرياض طلعات تتعيط مباشرة
علياء: بابا “شافت مها تتشطب” ماما فين لمكي
غوبشات فيها: وعليكم السلام راه الفوق
باستها تاضحك: السلام ههه مزروبة احبيبتي داكشي علاش
حكيمة: مممم واسيري لاتعطليش
طلعات الفوق عند باها كان بارك تايشرب قهوتو.. باست ايدو وبركات مادة ليه الجوا
وتتنهد بالعيا
علياء: بسم الله
حط كاسو وشد الجوا: بسم الله.. اش هادا
علياء: الجعيبة ديالك اسي لمكي
حل الجوا وحسبهم لقا تما 4 المليون وشاف فيها: اهياتا ياكما شفرتي شي حد وجاية نتستر عليك
علياء: ايييه المعلم بهاد الصحة نيت هههه النجار تخلص فالخدمة وعطاني الپاي ديالي
لمكي: عطاك 4 ولد الهم
علياء: عطاني 8 ..4 ديالك و4 ديالي واخا قليلة ماقديت نقول والو.. خفتو يحطني بوجهي قدامهم ويقول خديت من عندو الفلوس ههه
سد الجوا: ماعليش الله يخلف .. شدي فلوسك وسيري لخدمتك
ردات ليه ايدو: فلوسك هادو ابابا راك خدمتي فيهم كتر مني واشد الله يحن عليك
لمكي: يااودي بحال عندك بحال عندي غير شدي
علياء: ملي هاكا هاهوما عندك الله يعاون
خلاتهم ليه يشدهم بزز وهبطات راجعة لخدمتها وتتشوف فالساعة كل مرة.. تلاقات يورك خارج مع الباب هو وحبيبتو مع لي ڤاليز على شوية كانو غايمشيو بلاما تشوفهم، ووالتر واقف فالجنب وراما ودعهم وفعلياء تايشوف بابتسامة ..سلمات مع اليكس بالاحضان ويورك باس ايدها وبابتسامة قال
يورك: غاتجي ياك !؟ نعول عليك
ردت بحيرة: غانحاول
يورك: ضروري تجي للإفتتاح ..ليك الفضل أنه هاد الريسطو يتفتح حشومة ماتحضريش وتشوفي نتيجة خدمتك فين غاتحط
علياء: ههه واخا امسيو نشوف ونرد عليك.. طريق السلامة
يورك: ميغسي
طلعو فالطموبيل تاع الاجونص وزادو للمطار.. بغات دخل وشد والتر ايدها شافت فيه باستغراب وقال
والتر: ممكن نتكلمو شوية
ردت بهدوء: واخا.. نطلعو للمكتب احسن
سبقاتو وهو تابعها حتا رن تليفونها برسالة.. فتحاتها ولقات ميساج من عند سلمان خلاها تتبسم “وقيتة للغدا مانسمحش ليك لاكليتي بلا بيا.. دوزي نتلاقاو فكيشمارا عارض عليك”
رداتو للساك بلاما تجاوبو ودخلات هي ووالتر للبيرو سادة الباب وقدامو بركات
گلسات تتشوف ملف فوق المكتب جامع النسخ تاع أوراق العقد ديالهم بزوج
..من بينهم شهادة الجنسية.. شهادة الطلاق بالنسبة ليه والعزوبة بالنسبة ليها
.. شهادة السكنى عقد الإزدياد صورة من جواز السفر مصادق عليه فسويسرا و شهادة طبية انو خالي من الامراض الجنسية وهي كدالك..
..ومن بين هاد الاوراق كانت نسخة من شهادة الإسلام ديالو ..سد البلاكار لي عندو فالمكتب وهي فديك الورقة تتشوف حطاتها متنهدة وهو برك قدامها وايدها شد بابتسامة
والتر: جمعنا كلشي احبيبتي.. مابقا والو وندفعو للعقد ديالنا وديك ااساعة غاتولي مراتي حبيبتي
قالت بهدوء مركزة فعينيه: وداكشي لي وقع فرمضان اوالتر؟ نسيتيه دغيا
نفخ بملل راد ضهرو اللور: وصافي اعلياء
علياء: انا هاد الموضوع لي نتا واخدو ببساطة منيرڤيني ..بغيتي بصح نكونو بزوج طبق الشرط الوحيد لي شرطت عليك النهار اللول ولكن على اقتناع.. ماشي قدام عينيا ديرلي خاطري وورا ضهري دير مابغيتي الا هادي مانقبلهاش
تنهد وهي بصوت خفيف تتشرح وتفسر: وشنو المطلوب
علياء: راكا عارف اوالتر ماشي عاد غانقولك
مرر ايدو على شعرها الأشقر: دابة مابقيتش سليم.. حشومة عليك
علياء: غانقولها ليك فاش تستحقها، هاد المسألة حساسة بالنسبة ليا ولو فعلا سلمتي عن اقتناع بزاف الأمور فيك غاتغير.. وبغيتها تكون فراجلي المستقبلي ..كيف أنا تانصوم رمضان حتا نتا صومو.. كيف انا تانصلي حتا نتا صلي كيف تانزكي حتا نتا حافظ على الزكاة ديالك وحتا من الحج كان حلمي أنني نمشي ليه.. وياحصرة كنت باغة نحقق معاك هاد الحلم ورا الزواج
زفر بضيق: شوية بشوية احبيبتي كلشي غايتقاد مع الوقت
تنهدات: ياريت “ناضت واقفة” غانمشي.. العشية و نرجع
وقف معاها وباس باطن ايدها بلهفة: توحشتك.. توحشت علياء الحبيبة ديالي والابتسامة ديالها
بتبسيمة خفيفة: لي عندي قلتو لك وتحط فوق الطبلة.. الكرة عندك دابة اوالتر
حرك راسو مبسم: واخا.. غاتمشي معايا لافتتاح الكروكوديل ياك
رمشات تتفكر: حتا نفكر ونشوف مع بابا
والتر: نتي دابة محسوبة عليا علاش تسولي باباك
علياء: العقد هو لي غايخليني نكون محسوبة عليك أما دابة مازال.. وضروري خاص نشاورو
والتر: ماعليش احبيبتي ..مابقا قدما فات ..ياك صافي الخاطر تصفا من جيهتي؟
سكتات فيه تتشوف وتبسمات: الله يسامح اسيدي ..يالله بسلامة
والتر: تنبغيك
خرجات وهو جمع دوك الوراق وحطهم فالكوفر ديالو عاد وراها خرج …خدات طاكسي تتاصل بسلمان ومع جاوبها كانت وصلات للريسطو فين دارو يتلاقاو
علياء: افينك المعلم راه وصلت
رد: انا لداخل ..زيدي هاني تانشوفك
قطعات بابتسامة داخلة وتدريجيا بدات من شفايفها تمحا ملي شافت مروى خارجة من الطواليط وحداه بركات شادة فايدو.. تحرجات وماعرفات واش ترجع منين جات ولا دخل، دارتها فيد الله وكملات طريقها لعندهم راسمة ابتسامة عريضة تتخفي بيها ارتباكها
علياء: السلام ..ياكما تعطلت عليكم
بركات متفادية تسلم على سلمان وهو قال بضحكة ففمو: لا هانيا تاحنا عاد وصلنا
طلعاتها مروى ونزلاتها قارمة فمها وساكتة
علياء: مروى صاڤا احبيبة لاباس عليك
مروى: الحمد لله
سلمان: ايوا اش تاكلو الغزال
علياء: انا بعدا بغيت بيتزا ههه
سلمان: كيف العادة ههه ونتي امروى
نفخات مجاوباه فوق نيفها: تسدات لي الشهية يالاطيف ..غاناخد غير كلاص
خدا السيرڤور طلبياتهم ..علياء شربات من الما تتلف الشوفة حتا سولها
سلمان: امضرا فكرتيني.. ساليتي ديك الخدمة على خير ؟
علياء باستفهام قالت: اينا خدمة.. آه تادوي على النجار هههه سالات
غمزها: جريتي شي حاجة من الخلاص ولا والو
ضحكات: طبعا خديت ههه وغير ملي سالاها ليا فالوقت بلاما نتح…
قاطعاتها مروى شادة فايد سلمان وتتبسم ليه: حبيبي.. اليوم ختي دايرة عراضة كيف قلت ليك وعلى قبلك.. غاتمشي معايا ياك؟
علياء طولات فيها الشوفة ساكتة وهو زفر وقال: لا امروى مغاديش، قلتها وعاودتها صافي فوتي الموضوع
غوبشات مقلقة: حشومة اسلمان وعمر باغي يتصالح معاك مسكين
رد ببرود: عمر مدارلي والو باش يتصالح معايا “غمزها” غير هو التيقار زوين
مروى: واخا اسيدي لي يريحك
تحطو ليپلا ديالهم مد لمروى الگلاص ديالها وقال: بسم الله “دفع لعلياء الپيتزا ” شدي المعلمة
علياء: شكرا ..احقا.. يورك رجع لبلادو اليوم وعرض عليا ل…
قاطعاتها مروى مرة أخرى::سلمان عطيني داك صوص عافاك..وراه حشومة ندويو وسط الماكلة قلة ادب هادي
تزير بعصبية ملي سمعها وهي ببرود بدات تبنن فالگلاص ديالها حتا تجر الكرسي ديال علياء وناضت هازة ساكها بنرڤسة لكن قبلما تخرج شدها شدة صحيحة ونطق تحت سنانو قبلما تهضر
سلمان: بركي نهضر معاك…
قاطعاتو بجدية: سلمان حسن لينا كاملين نبدل ساعة بخرا طلق مني عافاك
سلمان: دابة شكون عارض عليك انا ولا هي
جرات ايدها معصبة وصوتها مهدن كيف العادة مايقدرش طلعو: ملي اخويا عارض عليا نتا علاش هي تماا.. بااغين تغداو بزوج الله يربح علاش ديما خاشيني وسطكم عارفها متتحملني متتقبلي
رجع شدها تايزفر وحالف مايخليها تمشي: واصافي الله يسامح على وجهي الالة
علياء: ماشي اول مرة تاديرها اسلمان مافهمتكش والله
رد بصدق: والله مافنيتي شي حاجة بالله
علياء: المهم انا غانمشي، ماشي مسألة أنني تقلقت اصلا مكانديش عليها.. ولكن خايفة تزيد فيه وندير شي تصرف ماهواش.. غير طلق مني عافاك صافي بغيت نمشي
تنهد بضيق وجبد سوارت الطموبيل من جيبو: هاكي سيري تسنايني فالطموبيل نجيب تليفوني ونلحق عليك
طلعات حواجبها فيه: بغيتيها تبعني وتهرس عليا شي زاجة لا لا اخويا غير رجع تغدا معاها
سلمان: وامشكلة معاك صافي ..زيدي والى مازال دواتك غانوضك بيدي نمشيو
ضورات وجهها: لاحول
جر راسها باسو وتايطلب حتا ضحكها: الله يرضي عليك ديري غير بوجهي
علياء: حيد هههه بوس ايدي تاهي
ضحك : اري والله حتا نبوسهم
جراتهم تتشوف فجنابها: الناس الزمر هههه ياربي على حمق زييد يالله نشوفو هادشي ديالك باش غايسالي
سلمان: نتي والله مابحالك حد ههههه
علياء: ههه حيد عليا
دخلات دايرة بوجهو وهو شاد فايدها ومدخلها معاه ..برك حداها ماحي الابتسامة ومروى تتخنزر وطلع وتهبط
مروى: رجعتي
جاوب سلمان بلاصتها والحدة فصوتو: رجعات حيت انا لي طلبتها وبزز باش بغات دخل
مروى: وعلاش بزز ؟ مالها؟
سلمان: دابة هادي هضرة تقال.. من نيتك امروى
رمشات فيه::انا قلتها عادي هي لي علاش تحسسات
مسح وجهو تايحاول يبرد : الهضرة وسط الماكلة قلة أدب.. وتقاطعي الواحد وهو تايتكلم شنو نسميوها.. قلة الترابي
تجمعو فعينيها الدموع تتشير لنفسها وعلياء غير تتشوف ساكتة: هي انا دابة ممربياش ياك اسلمان
سلمان: فهميها كي بغيتي حتا انا قلتها عادي “غمزها” علاش تتحسسي؟
علياء: صافي خليونا ننساو الموضوع ماوقع باس
ضارت ليها بشوفة شرانية: اصلا نتي السبب فهادشي كامل غير سكتي
ضرب الطبلة بعصبية: مروى زدتي فيه
سكتات تتبكي والبركة فديك الطبلة حرارت ..هي مناضتش من تما باركة وتتبكي وعلياء قالبة وجهها كحال سلمان حتا اتاصلو بيه من الخدمة وناض عاقدهم تايجبد الفلوس يخلص
سلمان: الله يعاون
ناضت بسرعة تتمسح دموعها: وصلني لدارنا بعدا
خلص وجمع تليفونو بلاما يهضرها ..خارجين بتلاتة وضار عند علياء لي تتحك جنب ودنها وساكتة
سلمان: غادة لداركم ولا الرياض
ردت بخفوت: غانمشي للدار نرتاح شوية ..غير سيرو نتوما غاناخد طاكسي
ركبات مروى القدام خابطة الساك قدامها وهو فتح لعلياء الباب لوراني: طلعي نوصلك
علياء: ل..
قاطعها بجدية: وادويت
طلعات على مضدد تتحس بشوفات مروى من المرايا بغاو ياكلوها، قربها للدرب ديالهم ونزل بنفسو فتح ليها الباب وقال متنهد
سلمان: سمحيليا على هاد الديرونجمو
ردت بهدوء: عادي ماديرش فبالك
باس على راسها وتبسم: العشية وندويو واخا
علياء: اوك.. بسلامة
..كملات على رجليها لدارهم وهو ديمارا وزاد..
…
تلاقاات باها حتا هو عاد وقف بالطاكسي ديالو قدام الدار طلعو بجوج داخلين للصالون وتايتكلمو مرة على خدمتو والكليان لي تايهز مرة على خدمتها.. حتا زعمات وفاتحاتو بموضوع السفر لسويسرا باش تحضر لافتتاح “الكروكوديل” ناض ديك السااعة بعصبية تاينگر جنو وجنونو هاد سويسرا
لمكي: الالة لاكان بغا يشكرك يعطيهم لك فلوس ااش غاتربحي نتي لامشيتي لبلادات النااس وغييير بووحدك
دخلات حكيمة هازة اتاي وكان ليها رأي آخر: وااش فيها لامشاات اش فيها وتفوج على راسها شوية.. زايدون راها ماشي وحدها خطيبها معاها تما
ضحك تايطنز: ايييه الاا حكيمة ريحتي خاطري ملي عرفتو تم
علياء: اابابا صلي على النبي
هز ايديه: اللهم صلي عليييك ارسووول الله ..غيير هو هاد التسافيرة وكل مرة خيطي بيطي لديك بلاد الكفار انا معااجبانيشااي
علياء: واغانمشي غير يوماين ولا تلت ايام وغانبرك فاوطيل من الفووق
حكيمة: وياك بناتو ديما معاك فدارو لاش خسران الفلوس فلوطيلاات
ضار ليها لمكي بشوفات حاارين: عوجيها عوجيها ..داك النسيب نتي بقالك اااييديريه فكادر وتعلقيه لياااا هنااا
تنهدات علياء بتعب وهزات ساكها: غانطلع نبدل حوايجي ونزل
طلعات لبيتها وخلاتهم مناقرين ..غيرات حوايجها بكسوة خفيفة تاع الدار وشوية من المناقرة والصداع سمعات الدقان فالباب بعدها تقلب الجو للضحك والترحيب.. جمعات حواجبها باستغراب وفتحات البااب نازلة وتتشوف مها معنقة ولد مراهق بشعر اسود كتيف وفملامحو تايجيب شوية لعلياء
..ضحكات مكملة نزولها وضحك بسعادة ملي شافها وفحضنها ترما تايضحك وهي عندو مزيرااه باشتيااق
علياء: اااوس الجنين دياالي هههه
أوس: الخواادرية
ضرباتو لراسو تاضحك: قول ختي البرهوش هههه اااه شحال توحشتك صحاحيتي الپووكووص
قاد التيشورت تايضحك: ياك بعدااا ههه
ضحك لمكي هاز ليه ساكو: الجن مقال لحد راه جااي.. اهياا يااكما هربتي ليهم؟ قول من هنا نعرف اش كاين
أوس: الا الواليد دوزنا الجهوي صافي ودابة استراحة
حكيمة: الله يرضي عليك اولدي دخل ترتاح دخل
علياء: كاينة شي قراية بعدا
درعاتو داخلين للصالون وهو منزل عينيه تايضحك: ضروري مالنا تانلعبو
لمكي: وشي مشاكيل ؟
بدا يضور فعينيه ونطق لمكي لي جالس قدامو وتايضور فراسو
لمكي: معلوم معلوم كاينين علاه هي جيت اولدي ودخلتك تقرا فالداخلية ..تربية ايدي وحافظك
حكيمة: ولدي بعقلو الله يحجبو من العين.. باش بغيتي تعشا اكبيدتي شنو مشهي ليا نطيبو ليييك
أوس: شي گصعة بسبع خضاري الوليدة توحشنا طعامك ههه
ناضت تاطلع كمام بيجامتها: هي داابة ههه
دخلات للكوزينة وعلياء قالت تاضحك: ههه صافي حكيمة جا ولدها غاتنساانا كاملين
لمكي: ولدها وداك خنيفو تخطيبك تايقطرو ليها من عينيها
اوس شاف فيها أوس تايقلب: احقا فين ملاك
لمكي: فمدراستها تتقرا.. طلع استاراح لك طلع ومن بعد ندويو على داك الجهوي كي داز
علياء باستو فراسو: حتا انا غانطلع ننعس شوية حيت خدامة.. العشية ونسهرو مجموعين
رد عليها بابتسامة: واخا اختي
علياء: تهلا اسوسو ههه
طلعات تاضحك ولمكي بدا يخاسم على سوسو لي تتقوليه عكس أوس لي عندو عادي.. بالنسبة ليه علياء فمقام الوالدة تربا تحت ايديها تايحتارمها بزاف وتايحشم منها كحال ختو ملاك .. حتا هي فينما بغاوها تايلقاوها عمرها خصصاتهم من الحاجة ولا فضلاتها فوجههم
..
بدات الشميشة تغرب وعلياء قدام باب الرياض واقفة باناقة ولباقة كيف العادة.. تتشوف فساعتها وتنتاظر العائلة لي غاتبرك عندها فالرياض .. أم واب وولدهم كبير فالعمر لكن كان من دوي الاحتياجات الخاصة أي معاق دهنيا..
تبسمات تترحب بيهم يدخلو ..عطات السوارت للأم طلعات هي والولد وهي مع الأب بركات تتوريه الپروگرام لي قادات ليهم وعلى التمن تايتفاهمو.. نضات معاه الأمور تافقو وتفاهمو في سلام وتسناتو حتا طلع عاد هي هزات ساكها خارجة وهاد لمرة راجعة مباشرة للدار بلاما دوز لجامع الفنا
.. دازت من حدا بوتيك ديال الحوايج مخلط بين الرجالي والنسائي
..دخلات تتشوف وتقلب خدات ليها بوليرو صيفي فالازرق عجبها ووصات البنت تما على خوها عاد خرجات تتاصل بيه
علياء: أوس.. فينك خارج.. معاك حتا ملاك؟ …صافي مزيان شوف تتعرف البوتيك لي جا ورا الجامع.. آه هاداك دوز شوف شنو بغيتي نتا وياها راه وصيت علك واحد البنت تما، نتا غير خود غدا ملي غاندوز عليها غانخلصها .. هههه هانية الحبيب ديالي، يالله بسلامة
قطعات معاه واتاصل بيها سلمان فالحين، جاوباتو تتحل ساكها وتجبد سوارا الدار
علياء: مسا الخير
رد ببشاشة: مساء الورد ..هانية المعلمة
علياء: الحمد لله ونتا ههه
ضحك: صحة سلااام هههه رجعتي للدار ولا باقي
دخلات تتشمش فريحة كسكسو الفايحة والابتسامة فوجهها: عاد لقيتيني داخلة.. ريحة الطعام يااا سلام هههه
سلمان: تانسمع صوت السوارت داكشي باش سولت.. رجعتي بكري ياكما عيانة؟
حيدات الطالون طالعة لبيتها: لا لا الحمد لله.. غير جا خويا وبغيت نبرك معاه شوية
بنبرة تعجب: خوك؟
علياء: آه ههه عندي خويا مازال كبر من ملاك شوية
بقلق مصطنع: ياك الالة .. ايه وتانقول غير انا لي عندك
ضحكات: سبقك أوس احنيني.. ولكن كلها ومعزتو ماتخافش هههه
رد بهدوء: وفين كان هاد خوك.. شحال عندو بعدا؟
علياء: مازال صغير تايقرا فالكاطريام.. دخلو بابا للداخلية يكمل قرايتو تما حيت تايطير شوية ههه
ضحك ضحكة خفيفة وقال: اللهم يوفق ..ادا نخليك تهلاي
علياء: آه حقا.. غانسافر لسويسرا هاد الأيام
سكت شوية وقال: سويسرا ..علاش؟
علياء: باش نحضر للافتتاح ديال مطعم يورك.. هادا إلى مدارش ليا لمكي العصا فالرويضة
تنهد: عادي راه خايف عليك ..ومن حقو يخاف صراحة
علياء: غناخد اوطيل نبرك فيه وكيف يسالي الافتتاح غانرجع.. يعني تلت ايام الى طولت گااع
سلمان: اش غانقولك.. الله يديك ويجيبك بالسلامة الالة المهم هو تكوني على بال
علياء: آمين ههه ماما تتعيط
ببسمة؛ تصبحي على خير
ردت: تصبح على خير
سبقها والتر بيوم باغي يساعد صاحبو فتحضيرات الريسطو.. وهي بقات تتقاد بعض الأمور فالرياض كيف سالات قطعات البييي ودايرة فبالها الغد ليه تمشي
..فاقت نشيطة وجهها منور و عيونها تتبري كيف لا وهي تتحماق على السفر وتغيير الجو
لبسات دجين زرق باهت لونو مع تيشورت بيضة مكتوب فيها الوسط بالاحمر وطالون اسود قاعو حمر ..ضفرات شعرها للجنب دارت عكر حميمر مع كحيلة جبدات بيها عينيها هزات الساك نازلة للأسفل و تتأكد من اوراقها
..لقاتهم عند طبلة الفطور باركين تايفطرو
وقالت ببسمة مشرقة
علياء: صباح الخير
رد اوس هو الأول: صباح النور ختي
حكيمة: صباح النور ابنتي.. قهيوة ولا اتاي
علياء: اتاي
كبات ليها كاسها وبدات تفطر.. لمكي حداها بارك قارنهم على الصباح ومعاجبو حال.. سرطات الدغمة تترمش فيه وجاتها نغصة حارة تمشي وهو عليها مراضيش
علياء: بابا.. وعافاك غاتبقا هاكا مقلق
أوس: صافي الوليد علياء راه راجل وسيد الرجال ماتخافش عليها.. وتالا وقعات شي حاجة غير تعلمني وتفرج
حكيمة: إن شاء الله تاحاجة مغاتوقع شكيكو شكيكو
تنهد لمكي مغوبش وطلع راسو قائل: بعدا وراقك كلهم عندك؟
علياء: آه جمعتهم
لمكي: وفلوسك لي بيتحتاجي؟
علياء: حتا هوما
طلع حاجب: والتليفون مشارجي
علياء: كون هاني مشارجي للپلان
هز فيها صبعو: راه نصوني لك ومتجاوبيشاي غاتلقايني شاد الطيارة لتماا هاودني منك
حركات راسها مسايراه: واخا ابابا نتا غير رضي عليا وكون هاني
تنهد وقال: مغطيك ابنتي ومفرشك بالرضا ..الله ييسر ليك ويبعد من طريقك ولاد الحرام
باست راسو: اميين الله يطول ليا فعمرك “سلمات على ماماها و خوها” يالله بسلامة عليكم
حكيمة: تهلاي فراسك ابنتي الله يرضي عليك ويسهل ليك ماصعااب
أوس: جيبي ليا معاك شي حاجة هههه
علياء: علاه انا ننساك اسوسو ديالي ههه
لمكي: مأكدة ماباغاش نوصلك
بامتناع قالت: بلاش ابابا غير كمل فطورك.. دعيو معايا
خرجات هازة ساكها وساك حوايجها بحال الفاليز وساهل فالهزة.. فاتت شوية الدرب هي تبان ليها سيارة سلمان تتسناها فالراس، هبط حاني راسو ملي قشعها جاية فتح الكوفر حطات الساك وحداه بركات بابتسامة عكس ملامحو لي بان فيهم تغيير جدري.. ضحكات مطلعة راسها وقالت
علياء: واراه غييير تلت ايام وااه مالك كاعي
هز فيها صبعو بجدية مخنزر فالطريق: تلت يام.. تفوتيها ضربي عليا
علياء: يااك ههه
سكت لاهو فيها تايشوف لاهي زادت كلمة، وقف فالمطار وهبط حل الكوفر حتا هزات ساكها، دخلو تايتنهد ويخرج نفس تقيل مضيق عليه صدرو.. تسناها حدا الباب وهي دفعات وراقها لقات الطيارة مابقا ليها والو وتمشي رجعات عندو بسرعة تاضحك وقالت
علياء: غانمشي اسي الزهواني.. تهلا فراسك
قربات تسلم عليه لكن جرها لحضنو مزير عليها بالجهد وفرقبتها تايخرج نفس سخوون .. مغير حالو كليا حتا وترها بغات تبعد لكن بقا عليها مزير حتا قالت كاضحك
علياء: ههه غاتوحشني ياك
سكت بلا جواب وخلاتو على خاطرو حتا طلق منها ببطئ شافت فيه وتمحات البسمة من وجهها بصدمة ملي شافت عينيه حمرين ودمعة منهم بغات تسيل لكن مسحها قالب وجهو و تايزفر بخنقة
علياء: تتبكي؟ “شدات فايديه برجاء” سلمان عافاك
نفخ بحرقة وحاول يتبسم فوجهها: اش غاندير.. ولفتك
عنقاتو وقال تايتنهد فشعرها: غانتوحشك بزاف.. بزاف بزاف بزاف
علياء::ههه حتا انا
..فاجآتو فقبلة لجبهتو تبسم وسط دموعو لي تتنزل وهي تتمسحهم وتتحاول تغير المود حيت قلبها بدا عليها يتزير
علياء: غير تلت يام والله دابة نرجع ونصدعك بمشاكيلي عاود ههه شنو تبغي نجيب ليك
سلمان؛ جي غير نتي باراكا عليا
علياء: هههه “بدا النداء يتسمع مابقا والو وطيارتها طلع” خاص نمشي.. تهلا فراسك
شد فايدها تايوصي بجدية: ردي البال لرااسك ..تليفونك مايطفاش ولا غانتفاهم معاك
علياء: كون هاني ههه بسلامة
هزات ساكها غادة حتا قربات للباب.. ضارت لقاتو فبلاصتو واقف تايشوف فيها مزير
قلعات الطائرة والوجهة كانت سويسرا مرة أخرى .. دوزات الطريق مرة نعاس مرة تسرح الشوفة فشباك الطائرة حتا وصلات وهبطات فالمطار مختالطة مع الأجانب وتتقلب بعينيها على الشيفور لي وصاها يورك أنه غايجيبها من المطار..
خرجات للباب تتسنا حتا وقف قدامها رجل بالكومپلي ديالو وطربوش فوق راسو هاز لافتة فيها اسمها وقال بشك
(بالفرنسية): مدام علياء ياك؟
تبسمات مجاوباه: هي هادي
بابتسامة خدا لوازمها حطها فالكوفر وهي طلعات اللور تترتاح وفالحين شعلات تليفونها ..رسلات رسالة لسلمان تاطمأنو بوصولها ودوزات الإتصال للأب ديالها
علياء: الو بابا
رد بصوتو العالي وحكيمة حداه: الو المعلمة.. امضراا وصلتي على خير فينك داابة
علياء: آه ابابا الحمد لله ..انا مع الشيفور غادين للاوطيل بغيت غير نعلمكم بلي وصلت
لمكي: الله يرضي عليك راه حتا مك تتسلم عليك ..ردي البال لراسك
علياء: كون هاني اسي لمكي ههه يالله نخليك
لمكي: الله يعاون وخلي تليفونك خدام لاتشوشينشاي عليك
علياء: وااخا اسيدي .. بسلامة
ردات تليفونها للساك وتكات على الباب تتشوف الرصيف بنظرات تقيلة مستمتعة بغرابة الجو حتا وصلو للاوطيل تما ف”بال” ..خمس نجوم ومن الباب تتبان فيه الفخامة..
فتح ليها الشيفور هبطات مودعاه بامتنان وداخلة هازة سيكانها وتتجبد وراقها ..عطاتهم الإسم مع الباسبور وعطاوها رقم الشمبر لي حجزات وكلو كان على حساب يورك.. من الطائرة للشيفور للاوطيل كلشي عليه ملي خبراتو أنها غاتجي لسويسرا ..طلعات نيشان دوزات عينيها على الغرفة لي كانت كبيرة مريحة وديكورها خشبي دافئ، حلات الساك حطات حوايجها لي غاتلبس ودخلات هازة لاتروس ديالها للدوش.. طلقات السخون فالبانيو مع لييپرودوي لي لقات تما و تحمحمات نيت مرخية عضيماتها وراسها لي تنفخ بالخدمة والستريس، تعطرات وتأنتكات عاد خرجات ملوية فپينوار و هازة مشط تتسرح خصلات شعرها الفازگة ورقم طوبياس تايتاصل بيهاا
جاوبات مبتاسمة وكلامهم بالانجليزية: الو
طوبياس: مابييل ههه فينك قالولي وصلتي
علياء: فالاوطيل الشريف ههه صافا مزيان
طوبياس: هانية كلشي هو هاداك .. شوية ونكونو عندك أنا وأنا ماري نتعشاو جميع
علياء: اوك
رد تايضحك هو وانا ماري حداه: بابا مع الأسف مشغول مع يورك إلى كنتي غاتسولي عليه هههه
علياء: فيكم الكفاية اسيدي ههه غانبدل بيما جيتو توصل عيط ليا
طوبياس: اوك باي
علياء: باي
لبسات واحد من الفساتين لي جابت لونو اسود تحت الركبة وليبا موس كالعادة.. تعطرات وحطات مكياج خفيف خارجة من غرفتها بعدما رسل ليها طوبياس رسالة تايعلمها بلي فمطعم الاوطيل باركين تايتسناو..
ولو أن التعب لاعب عليها وكانت باغة غير تنعس لكن الجوع اكتر وتصبر لكلشي إلا كريشتها ..
هبطات عندهم سلمات وگلسات مكملين السهرة بتلاتة وراما اتاصل بيها والتر تأكد انها وصلات على خير عاد قطعات معاه
..مكملين هضرتهم بالضحك والتقشاب كيفما ولفاتهم مفروحين وطالقينها معاها حيت عزيزة عليهم كيفما هوما عليها عزاز وزادت عزازت كتر ملي قربات تولي وحدة من عائلتهم .. زوجة الأب والتر.
خلقات بلاصة كبيرة بيناتهم بطيبتها وتفانيها فخدمتها وكيفاش تتعامل الناس بمختلف عقلياتهم سوا كانو مأدبين أو لا.. والمعروف أن الإنسان الرزين المتخلق والمؤدب بطبيعتو تايملك هبة ربانية وقبول جميل تايعطيه ليه الله فوجهو زائد هدوء شخصيتو ولطافتها
.
صبح عليها الصباح فبييت ماهو بيتها وبلاد ماهي بلادها ومدينة لاتمت لمراكش الحمراء بصلة ..من الجو للازقة لصوت الفريخات فوق الشجر
.
فايقة تتلوا على الفراش وراما طلعات من المطعم معطلة ماعقلات ايمتا حيدات حوايجهاا وتلاحت فوق السرير بدوني وشورط شعرها تطلق تاتكور تحتو حتا گاع خبلاتو
..سرسر التليفون عدة مرات مفيقها عاد ناضت تتفوه بلاما تسوق ليه.. دخلات للدوش غسلات وجهها بما بارد تفيق من التبويقة وخرجات تتقلب علاما تلبس عارفة الغد ليه غاترجع للمغرب وباغا تستاغل كل دقيقة ليها فهاد المدينة .. عاود صونا التليفون مرة هزاتو وكان سلمان لي تايتاصل، فالحين عضات فمها عارفة راسها دايرة الفالطة وجاوبات بسرعة مسبقا ليه الكلام
علياء: الو، شوف راه كنت عيانة عرفتي جاوبت بابا تعشيت وطحت بالنعاس ماعقلت على راسي حتال دابة
زفر بضيق: كنت غانعطيك بالله
شدات الضحكة: تعطيني اش
سلمان: للعين.. وصلتي على خير بعدا ماوقع حتا مشكل؟
علياء: لا كون هاني، وصلني الشيفور حتال باب الاوطيل ودابة غاننخرج شوية مع انا ماري نتقدا مانلبس
سلمان: بالصحة ..الحفلة ايمتا غاتكون
كمشات عينيها تتدكر: وااقلة فالعشية .. يمكن ديك الستة ولا السبعة
سلمان: مزيان نيت باش مايتعطلش الوقت فاش تسالي.. وغدا غاترجعي ياك
ضحكات تتهز ماتلبس: واعاد وصلت
سلمان: قلتي تلت يام اعلياء
علياء: والله حتا توحشتيني ههه
ضحك وقال: اه توحشتك المعلمة هههه ونتي
علياء: بين اوبين هههه سير سير خليني نلبس
سلمان: بون كوغاج الالة ..شوفي جيبي ليا معاك بحال الشكلاط ديال ديك المرة
طلعات حواجبها: وياك قلتي باراكة عليك غير نرجع
سلمان: واتيقيني ..بغيت بحال هاداك، تقادا لي جبتي واخا حاولت نقتاصد عليه
ردت تاضحك: واخاا اسيدي شي حاجة خرا
سلمان: الله يجيبك على خير.. وتهلاي فراسك
علياء: حتا نتا
حطاتو فالساك وبدات تلبس تأكدات من فلوسها ووراقهاا عاد خرجات تتماطي العكر فشفايفها ووراها سدات الباب
أناماري: وعلاش ماتبركيش مازال شي ايام.. حتا ديك المرة دغيا مشيتي اصاحبتي خليني غير نشبع منك شوية
دخلو لبوتيك بزوج وقالت علياء بهدوء تتشوف فالمعروضات: راك عارفة الخدمة وتمارا ديالها.. وحتا بابا علمتو بلي غانبقا غير تلت ايام الى زدت طولت غايتقلق عليا ههه مرة أخرى ونبقا معاك كتر ههه
أناماري: ديما تتقولي هاكا وحتا إلى جيتي تتخرجي تساراي مع طوبياس ..هاد المرة غانخرجو غير بزوج صافي
ضحكات قائلة: واخا الالة تانواعدك .. بلاتي ندخل نقيص هادي
اناماري: لا هاد اللون متايناسبكش بزاف.. اجي معايا نشوفو الفوق
بدات فالملابس تتخير هي وماري حتا طاحت على فستان احمر مشبك من اليدين وعند الكوع مشدود.. قصير من الامام بديل طويل وقصة عريضة جهة الصدر وعند الخصر مشدود بحزام احمر ناعم.. عجبها وجا معاها هو هاداك لما قيساتو.. رسمي أنيق ولجسدها مناسب
..خلصات وختارت بعض من الاكسسوارات معاه وخرجو مرة أخرى تايتساراو على رجليهم حتا عياو وبركو فكافي تايتبادلو أطراف الحديت متلفين الوقت والساعات تايطيرو …
.
غربات الشمس وقدام مطعم بمساحة كبيرة واقفة الصحافة ويورك معاهم.. حاضرين لافتتاح مطعم “الكروكوديل” لي تايجمع بين التقافة السويسرية والمغربية، والعجيب أنه تسمى مطعم الكروكوديل لوجود كروكوديل حقيقي حي وسط حوض زجاجي بقلب المطعم..
الخدمة لي خدمات علياء مع النجار جات مواتية مع الديكورات لي ختارتهم نيت من شمعدان ڤيزان الى غير دالك..
زائد الترية لي بحال ضخامتها مشافت والا تشوف.. مكتاسحة نصف عرض الصالة وتتضمن أزيد من 60 لمبة إلى مشات حتا طاحت كلشي غايمشي فيها ..
…
توقفات سيارتها قدام المطعم.. نزلات قبلما يفتح ليها االشيفور الباب شعرها البلسمي والمتموج تاتحركو نسمات الهواء الباردة وفستانهاا مجرور معاها.. واتاها الاحمر وجا مع شفايفها اكتر وخدودها الناعمة ..تبسمات ليورك بسمة متوترة فاش شافتو تايشير ليها وهو تايتكلم مع الصحفي وقال باعجاب وفخر
يورك:: مدام پاغيزيان كيف تانحب انا نسميها ههه هي ليها الفضل انكم تشوفو هاد الفن اليوم فالمطعم وليها كل الشكر على تعبها معايا
تبعترات الكلمات فحلقها وعدسات الكاميرا عليها تكبات شي تايسول شي تايصور.. ارتابكات كليا مرة تجاوب مرة تتبسم حتا تحطات يد والتر ورا ضهرها تايرمقها باعجاب براق فعينيه وقال
والتر: خليو ليا خطيبتي شوية ههه ندخلو احبيبتي
حركات راسها ماقدراش تهضر وشدات فيه داخلين و تاتسرح النفس.. جاب ليها ماتشرب وقبل خدها قائل
والتر::جيتي بحال القمر كيف العادة.. وريحتك تتأسرني
تبسمات: ههه شكرا ..فين الحمام عافاك
والتر: فآخر الممر
توجهات فين نعت ليها قادات كحلها وعاودات العكر عاد رجعات تتوزع عينيها فالحفل بانبهار.. كان اكتر من فخامة عمرها بحالو شافت وكل حاجة فيه متقنة كل الاتقان، وقفات عند طوبياس ملي شافتو دخل مع صاحبتو، سلمات عليها ولحقات عليهم اناماري باربارا ووالتر مع يورك وحبيبتو اليكس مكملين الشلة ومستمتعين بالحديت ..
وصلو عامة الناس مكاين غير الطبقة البرجوازية والناس المخمليين لي مايليق ليهم إلا ريسطو بهاد الفخامة والمستوى الرفيع
..زائد طريقة الافتتاح ديالو خلا عيونها تترمش فقط لسانها تربط عن التعبير..
علياءصحيح انها بنت حي شعبي لكن عائلتها كلها هاي كلاس وتتحضر لعراسهم والحفلات ديالهم مايخليو لك ماتقولي فالنخوة .. لكن حفل بهاد الجمالية عمرها لحد الآن مشافت
.
الموسيقى هدات وجنب حوض الكروكوديل لي تايضور ويتسارا مع راساتو وقف يورك لاباس الرسمي هاز الميكرو فايدو والبسمة على شفاهو تايرحب بالحضور
يورك: مساء الخير جميعا “التفتو ليه بانتباه والموسيقى حبسات” تانبغي أولا نشكركم على تلبية الدعوة.. فرحتوني حيت بينتو محبتكم ليا وحضرتو لهاد الحدت المهم بالنسبة لي.. “الكروكوديل” كان حلم وتحقق ههه.. وحاليا تانحس بفرحة كبيرة فقلبي لأنه جا هاد اليوم لي تفتح فيه
صفقو بحرارة وقال بتأتر موجه انظارو لعلياء: بهاد المناسبة الجميلة ..بغيت الرقصة الأولى نفتاتحها مع وردة الحفل.. طبعا بعد ادن خطيبها صديقي الوفي ڤالتر “هز ليه والتر الكأس مبتاسم وهو كمل” ولي نبغي قدامكم كلكم نشكرها على دعمها ومساعدتها ليا .. لأنه فعلا لولاها مكانش هاد المطعم غايتفتح.. والمنتوجات المغربية لي أسرات عيونكم قبل قلوبهم كان اختيارها من ابداع هاد الجميلة.. فشكر كبير ليها.. ونتمنى تسمحلي لهاد الرقصة
وساعت بسمتها رغم الارتباك لي حسات بيه من نظراتهم.. عطاتو ايدها بلباقة هازة شوية فستانها والفرقة الموسيقية بدات عزف أول مقطع موسيقي لأول رقصة بينها وبين يورك ..خطواتها فالرقص متمكنة كأنها متعودة عليه وكالفراشة كانت بين ايديه تتحلق تارة يمين وتارة شمال..
انضمو ليهم باقي الحضور كل واحد خدا يد حبيبتو أو زوجتو ..حولات الرقصة من يورك ليدين طوبياس تايضحك رقصو بجوج حتا سخفها عاد رقصات مع والتر رقصة هادئة قصيرة قبلما يرجعو لطبلتهم تاتبسم فرحانة بالجو وهزات الما تتشرب.. وقف عليها رجل من الحضور مبتاسم وهاز كأس الشمپانيا فايد
قال: مساء الخير مدموزيل
حركات راسها مجاوباه: مساء النور
الرجل: سمحيلي على التطفل ولكن بغيت نهنئك.. فعلا عندك دوق وحس فني رائع رغم صغر سنك
ضحكات حشمانة تتقاد شعرها: شكرا ليك هادا من دوقك
ضحك: قلت الحقيقة.. وكنت بالمناسبة تانسول على شكون هاد المبدع لي عرف كيفاش يناسق بين تقافتين مختالفين.. حقا برافو.. والى سمحتي غانحتاجك حتا انا فواحد العمل
باستفهام: بحالاش
رد: باش نفسر ليك اكتر .. عندي اوطيل فمراكش يالله ناوي نفتحو.. وبغيت المساعدة ديالك
فهمات القصد وتبسمات بفرح: مرحبا اكيد
رد::هادي الكارت ڤيزيت ديالي ..امسية سعيدة
دارتها فالساك بابتسامة وهزات العصير ديالها عاجبها الحال وزاد هاد الكليان طلع ليها المورال
المجال ديال السياحة هاكدا داير، طالع واكل نازل واكل وهي اي حاجة صغيرة ولا كبيرة تتبغي تقطع منها البوغسونطاج ديالها.. لي بلغتنا حنا هو الجعبة
..خلصتها المضمونة فالرياض هي 5000 درهم وبالجعيبة لي تاضبر عليها من عند الكليان أو لي تتاخد من لاجونص أو أو أو… هي 3000 درهم، والمجموع 8000 درهم شهريا واحيانا اكتر..
مضورة الحركة مزيان وفينما بانت ليها الافادة تتمشي متتفلتش الفرص نهائيا
..
ضربات الساعة العاشرة مساءا..
سالات الأمسية الوردية بعدما كانت ماحساش بالوقت نهائيا معاهم ..
خدات يد والتر خارجين وطول الحفل ماتكلمو مانغزاتو.. الخاطر منو هرب رغم أنها تتقلب تعطيه فالفرص ربما رأيها يتغير ناحيتو، لكن سبحان الله فاش خاطرك تاينزاح على واحد الشخص صعيب يرجع للمكانة لي كان فيها قبل..
سبقها تايتكلم مع يورك واناماري عنقاتها من اللور قالبة شفايفها
اناماري: علياء بلييز غير نهار مازال نهار واحد
علياء: وماتحشمينيش عافاك ههه مانقدرش مرة أخرى ونرجع راه واعدتك صافي
جا طوبياس عنق ختو تايضحك وقال: ماري خليها فراحتها.. المهم اعلياء تهلاي فراسك العطلة الماجية وهانا عندكم فالمغرب نخربوها مسارية بحال ديما
علياء المهدي: كون هاني هههه
اناماري: وانا معاكم يااك
علياء: ضروري ههه يالله تصبحو على خير
توجهات جهة الشيفور ديالها هو يوقف عليها والتر ساد الباب وخدا ايدها
والتر: تعالي معايا انا نوصلك
ردت بتردد: خفت نبرزطك.. ماعليش هو يوصلني
باس ايدها بحب: مافيها حتا تبرزيط ..غير تعالي
تنهدات: اوك
فتح ليها الباب طلعات وسيارات طوبياس والبقية سبقوهم للفيلا يكملو احتفالهم تما مجموعين مع يورك واليكس..
تشغلات شوية مع الهاتف تتراسل مرة مع سلمان مع صاحبتها وتاضحك..
حتا حبسات الطموبيل هزات راسها تترمش بتفاجأ وراما حبس قدام الفيلا وبابتسامة بدا يحيد السانتور
ضارت ليه هازة حاجب: علاش جينا لهنا
دوز ايدو على خدها: باش الحبيبة ديالي تبات معايا اليوم ..شحال مادوينا بزوج وطولنا فالكلام ياك.. ويليتي بعيدة عليا بزاف
هربات وجهها منزاعجة من التصرف ديالو وبهدوء نطقات: انا غانبات فالاوطيل اوالتر قلتهاا لك قبلما نجي لسويسرا اصلا
والتر: وشنو فيها مال الفيلاا
علياء: مافيها والو! ..وزايدون حتا إلى وافقت يورك واليكس وطوبياس وحبيبتو تما.. يعني البيوت اكيد عامرين فين غانبات انا
رد ببرود: معايا فبيتي
ضحكات باستهزاء صدمها جوابو: هه بصح
بجدية نطق: نتي خطيبتي بلاش من هاد الاحتشام لي ممنوش.. هادشي من حقي بلغة خراا اعلياء
علياء: من حقك؟؟؟
والتر: آه.. من حقي تنعسي حدايا من هنا للفوق نعنقك كيف بغيت ونبوسك فينما بغيت حنا كانوجدو للعقد ادا تقريبا راك مراتي
علياء: تقريبا مااشي هي كليااا وهادشي لي تتقول غير فأحلامك غايوقع
ضرب الفولون حتا خلعها وبدا يغوت: وعلاااش.. شنووو الماانع بالسلااامة ولا ياااكماا معاجبكش؟
خنزراات فيه معصبة من طريقة كلامو معاها: والتر ماتغوتش علياااا.. احتارم رااسك واحتارم القرار ديالي
غوت وصوتو زااد علاااا من شدة العصبية: اداا هضري ..هادا رااه حقي كيفماا هو حقك.. وتيقي بيااا غايعجبك الحال غير جربي
دفعات ايدو مكرهة من الموقف: بعد مني زدتي فييه.. اناا خطيبتك ماشي مراتك ولا شي عااهرة جايبها من الزنقة
والتر: وحيت خطيبتي سكتت وصبرت شحاال ودابة تانوجدو للعقد دياالنا باش تولي مراتي.. فين المااانع.. يورك حبيبتو ديما بايتة معاه وولدي حتا هو وبنتي عندها حبيبها عااادي .. علاش تتعقدي الأمور وهي بسيطة
زادت ضحكات مفقوصة وتتشوف فيه: هي قول هاكدا التفكير ديالك!!
زير سناانو: التفكير ديال كلشي نتي لي مانعرف ماالك هاكداا
شارت ليه معصبة: انا مسلمة الشريف وعن اقتناع عكسك نتاا لي بينتي ليااا حقييقتك.. وحيت مسلمة هادشي عمرو يكون بلاما يكون بيناتنا عقد انا وياك
ضحك باستهزاء من كلامهاا صادمها بجوابو وردة فعلو: مسلمة !؟ الاسلااام والديين قهرتونااا غير بالكلام وكلكم عااامرين نفااق.. ملي مسلمة اش جاابك حتا ساافرتي بوحدك ..وعلااش تتلبسي هاااد اللبس ولا تتغطاااي بالاسلام غير وقتماا عجبك
حماارت وفمها بياض واحلة ليها الغصة فحلقهاا وكلامو صدمها ماعرفات مازال اش تقول
والتر: هضري يالله فين هاااد الاسلام دياالك.. فالسلام والبوساان والضحك مع الرجاال.. تمااا ماشي حراام عاادي ولكن فاش خطيبك تايبغي يدوز معاك وقيتة زوينة عاااد تايبااان “قلب وجهو” النفااق
حركات راسها تترعد وشداتها الخنقة فديك الطموبيل: انا لي حمااارة جيت وتقت فيك وطلعت معاااك.. وحيت عطيتك فرصة تهينني هاكدااا وتقلل مني.. انااا
حلات الباب خابطاها عليه نزل بسرعة شدهااا حتا نترات ايدها تتغوت وعينيها بغاو يدمعو
علياء: باااعد مني..
“تحل باب الفيلا وخرجو كلهم ملي سمعو الغوات والصداع خصوصا أن الحي مكالمي وهادئ دغيا تسمع عندهم الصوت
علياء: من اليوووم ماتعرفني مانعرفك كاااتسمع
رد بعصبية وولا حمر كلو: علاااش هادشي كااامل.. حيت دويت على حقي هااا
علياء: انااا وحدة منافقة ومانسوااش عطيني التيساااع
جا طوبياس بيناتهم مخلوع وقال: مالكم.. عليا مالك
نهضات فيه: سول باباااك
خلاتهم ومشاات تتزرب وبالطنين لي فودنيها معاودش سمعات غواتهم وراها ولا عرفات اش تايقولو
..قطعات الشاريع فداك الضلام حتا حبساتها سيارة طوبياس نزل فتح ليها الباب بأسف وقال
طوبياس: الله يخليك طلعي نوصلك
تنهدات مابقا فيها لي يتكلم: طوبياس عافاك…
قاطعها: مغاندويش نهائيا حتال غدا ونتكلمو.. غير طلعي نوصلك الوقت خاوية وصعيب تلقاي طكسي
شافت حتا شافت وطلعات معاه .. وصلها للاوطيل بلا كلمة بلا زوج هبطات طالعة لبيتها مباشرة مشافت لاهاكا لاهاكا.. جمعات حوايجها وسدات عليها فالدوش تتغسل وجهها بالنترة وكلامو بحال السيف طالع معاها ونازل.. جاها صعيب تسمع الاهانة منو وبهاد الطريقة بالضبط الماتها بزاف..
خرجات فبينوار مخشية ففراشها وقرار لارجعة فيه بين عينيها الباهتين..
سدات ساكها بعدما من اوراقها تأكدات وتليفونها.. عاد خرجات من الغرفة سادة بابها وللمصعد توجهات.. بين حجبانها معقودين تعيا ماتتناسى الكلام لي سمعات من والتر لكن فودنيها مازال تايتعاود والتصرف ديالو مابغاش يتسرط ليها نهائيا..
هبطات للأسفل متوجهة للباب.. باغة تخرج تتسارا شوية فبال تشم الهوا وتنفس خاطرها وفنفس الوقت تشري هدايا لعائلتها..
لكن صدفة شافت طوبياس حدا الريسيپسيون بارك تايتسناها حيت علموه بلي شوية وتنزل..
جمعات حجبانها مغوبشة وهو قشعها وناض هاز سوارت الطموبيل تايضحك
طوبياس: صباح التوت
بهدوء: صباح النور
سلمات عليه بنص تبسيمة وقال: غانفتارضك مازال مافطرتي وغانعرض عليك نفطرو بزوج واخاا
علياء: مافيااش والله غير أجلها
طلع ايديه كايضحك: ومالك على هاد الشوفات انا مادرت ليك والو
تنهدات تترمش: ماشي هاكاك انا صابحة ماهياش
رد بنفس هدوءها: حتاهو صابح ماهواش.. زلة الللسان خايبة وبابا واخا يبان ليك كبير فلاج عقلو شي مرات تايفرفر ههه
قاطعاتو بجدية: طوبياس عافاك ماباغاش نتكلم فهاد الموضوع.. سينو خليني نمشي نشوف شغالي
رجع وقف قدامها بأسف حابس عليها دوز: صافي انا ساكت مغانعاودش نجبد هاد الأمر
علياء: يكون أفضل
طوبياس: واصافي خلينا نمشيو مجاتش نسيفطوك مقلقة للماروك.. واعافاك حشومة تخسري ليا خاطري “شافها غاترفض وقال بسرعة” عافاك
تنهدات وهو بقا تايطلب حتا قالت بقلة حيلة: زيد اففف فاش كاتلسق الواحد
خرجو تايضحك معاها وباغي يضحكها ويخرجها من المود لي هي فيه..
فطرو فكافي جميلة تايدويو على الخدمة والسياحة حتا سالاو وناض معاها تايسرحو رجليهم فالطبيعة حتا قالت
علياء: فكرتيني.. عارف شي مول هنا زوين ويكون شامل.. يعني فيه حوايج الكبار والصغار
حرك راسو: سي.. باغة تشري شي حاجة
علياء: واضروري من الكادوات للعائلة ..وصلني ليه إلى كنتي مسالي
طوبياس: هي دابة الأميرة
سبقاتو للطموبيل تتقاد شعرها وتايبان ليها حدا الباب تايتاصل بشي حد.. سالا كلامو الخافت وطلع بابتسامة مزينة ملامحو الأجنبية شاد الطريق للمول وهي تكلمات مع سي لمكي طمأناتو عليها ومع وصلو قطعات هابطة ..حتا كاتتفاجأ بباربارا واناماري فالباب تايتسناوهم ومعاهم والتر تما شافها وتنهد بأسف واضح فعينيه..
ق زفرات معاجبهاش الموقف وماري عنقاتها تاضحك
اناماري: كنتي باغة ديري الشوبينگ بلا بياا يااكي
شافت فطوبياس بعتاب: ادا شكري خوك لي جابني عندكم
قال تايضحك: بلا ضرب.. هي وصاتني بغات تشوفك
علياء: الهضرة من بعد اطوبيش “اسم الدلع لي تتقوليه “
اناماري: واصافي غاتبقاي هاكدا مقلقة
ردت بنرڤسة: انا غانرجع فحالي الله يخليكم ماضغطوش عليا
عاد غايبداو يطلبو قربات باربارا.. الاخت الكبيرة فيهم وقالت بابتسامة ناعمة: علياء حبيبة.. ديري بوجهنا حنا عافاك مابغينا والو غير ندوزو نهار زوين مجموعين
اناماري: هاد التقليلة مستحيل نسيفطك ونتي بيها
طوبياس: حتا نسيفطها انا بعدا هههه
باربارا: شنو قلتي .. آه ياك
علياء شافت فيهم بحيرة وقالت: لي فراسكم فراسكم
عنقاتها اناماري من كتافها: مغانتفارقو معاك حتا تواافقي ههه
طوبياس: انا اليوم روپو ماعندي مايدار من غيرك
تنهدات مامخليين ليها ماتقول: اوك يالله
اناماري: ياااي هههه
باستها ودخلو للمول سابقينها شوية وهي تتأكد من فلوسها واش فالساك وبالزايد
. قالبة وجهها على والتر ورافضة حتا تكمل فيه الشوفة.. حتى شدها فلحظة وقال بضيق خانقو: علياء.. كانعتادر على الكلام وال…
قاطعاتو ببرود: طلق ايدي
حيد ايدو وببرود فيه تتشوف كرهاتو كتر فالتصرف لي دار وبدا غير يضور عينيه ويردد
والتر: عارف راسي خربقتها البارح.. زبلتها گاع.. كانعتادر منك بزاف
علياء: ساليتي؟ باي
خلاتو وزادت تابعة البنات للفوق وهو وراها متبعها بعينيه ومنينما دازت يدوز ..
فضلات تاخد ليهم ساعات وروائح كهدايا أفضل.. دازت حدا محل الشوكولا لأن سويسرا بالشوكولا تتميز وتفنن
دخلات ماصة شفايفها بشهية مفتوحة شرات ليها اولا ماتشبع لكريشتها فاش تكون فالمغرب..عاد خدات لواليديها ولأوس وملاك وخرجات لمحل الساعات والروائح ..تتشوف بعينيها وتختار
علياء: شحال هادو عافاك
شافها البائع هزات ساعة رجالية وقال ببسمة: 50 يورو
علياء: مممم.. وهادو حتا هوما نفس التمن
البائع: آه امدموزيل
هزات لماماها وملاك وحدة نفس الشكل فقط اللون مختلف.. ولأوس ولمكي ساعات رجالية
سارات عيوينها على المنتوجات حتا توقفو عند ساعة فاخرة محطوطة فالزاجة الغادي والجاي تايشوف فيها.. ضارت عند البائع وقالت معلقة عينيها عليها
علياء: الله يخليك جبد ليا هادي
وقفات حداها اناماري: خديتي السوايع اري نشوف .. غزالين بالصحة دوقك زوين
ردت بأدب: ميغسي
نطق والتر مرطب كلامو: حتا ناخد ليهم انا حاجة خرا ولكن على دوقك نتي
تجاهلات الهضرة لي تايقول وعطاتو النخال واخا حداها واقف وطوبياس مع باربارا من الجهة لخرا حتا هوما تايتقداو…
مد ليها البائع العلبة لي تتوسطها ساعة دهبية تتلمع بسمطة جلدية ..خداتها بين ايديها تترمش وللحظة جا سلمان بين عينيها وماعشقاتها إلا ليه..
رغم أنها نساتو ومن بالها مشا إلا أنه فهاد اللحظة كيف شافت الساعة ماخطر فبالها إلا هو والبائع تايزينها فعينيها كتر ويتكلم
البائع: ودوقك فعلا رائع.. الساعة ماركا افرسويس فالحلة ديالها الجديدة
قالت: شحال تمنها
رد: 1000 يورو
جاوباتو أنا ماري بتفاجأ: اووو غالية بزاف.. شحال هي مغربية ؟
رد والتر جامع بين عينيه وتاايشوف بفضول بالساعة: مليون سنتيم مغربية
وقفات عليهم بابارا وبابتسامة شافت فالساعة: فعلا غالية .. وساعة بحال هادي غاتكون لشخص غالي ههه اولى
علياء تبسمات بهدوء تتشوف فالساعة وقالت: فعلا ..غاناخدها لسلمان
والتر تحلو عينيه مزير سنانو واناماري قالت باستفسار: شكون سلمان؟
ردت تتسد العلبة ومداتها للبائع: سلمان هو اعز صديق عندي.. وماتغلاش عليه واخا تسوا كتر هههه جمعها ليا مع الحساب عافاك
البائع: طبعا
دازت لمكان الروائح بدات تقلب حتا لقاتها.. رائحة شانيل رجالية دوريجين.. وحدة ليه ووحدة نسائية حطاتهم بساشي وحدة.. زادت خدات ليها حتا هي ولواليديها وخوتها وعطاتو يجمع كلشي ووالتر مزير حجبانو حتا دازت من حداه تخلص وشدها من مرفقها قائل بعصبية مخفية
والتر: واقلة زدتي فيه.. شكون بغا يكون گاع هاد سلمان حتا تخسري عليه هاد المبلغ كامل
طلعات حاجب ناطقة ببرود: ونتا فااش تايهمك
رد بغيرة وغوت: تايهمني طبعاااا ومن حقي نعرف علاش تخسري عليه هاد المبلغ كامل وكيفاش هاد متغلاش عليه
علياء: ماكدبتش فعلا ماتغلاش عليه.. ونشريها حتا بعشرة المليون نتا ماشي شغلك
والتر: علياااء نسيتي راسك خطيبتي
نترات ايدها بحدة: لزم حدك اوالتر.. وراجع هاد الكلام لي قلتي فالاخير حيت بانلي مازال مافهمتي الامور مزيان
خلاتو تايضور كلامها فدماغو ساكت و معاودش هضر لايزيد يكحلهم فعينيها..
خلصات خارجة مع ولادو من المول وراما عمرات ايديها وايدين طوبياس بالساشيات واناماري شادة معاها الحديت عكس باربارا.. اقرب وحدة وصديقتها هي اناماري وهي لي قريبة ليها حتا فالعمر..باربارا كبر منها و بيناتهم الاحترام وصداقة لكن ماشي بديك القوة كاملة
وصلو لسيارة طوبياس وقال والتر:
عارض عليكم للغدا إلى قبللتو
اناماري: اكيد بابا
علياء فصمت طلعات مع طوبياس واناماري.. ووالتر قدامهم هو وباربارا سابقهم وطوبياس وراه
..داهم لمطعم فاخر الاستقراطية منو تتفوح.. كالعادة ضورات رقبتها عليه تترفرف بعويناتها هنا وهنا ماتنكرش عجبها ولكن وجهها متايبين والو سقلات قالبة وجهها للجنب وحدا طوبياس بركات مقابلة مع والتر لي كيف برك قرب ليها وقال بهدوء
والتر: تانتمنى تقبلي اعتداري اعلياء.. غلطت وبزااف عارف ..ولكن تيقي بيا بدون قصد
تجاهلاتو وقالت: مغايحطوش لينا الموني
سكت تايتنهد وتاحد فيهم ماتكلم والا بحرف ولو أنهم دواو كانت غاتخلي ليهم الطبلة وتنوض
..تحط الأكل لي طلبو تغدات على خاطرها تاتبنن مامسامحة لحتا حاجة تخسر آخر نهار ليها فسويسرا… تاتشوف الطرقات الخضورة لي فكل مكان رميتي ليه عينيك والجو لي تايأسر النظر ..من لما خرجو من المطعم على رجليهم وهي مبتاسمة بلطف تتشوف الأجواء و الناس ومرة مرة تجاوب الى شي حد كلمها.. من غير والتر
رن تليفونها ..جبداتو وكيف قرات الإسم تبسمات قائلة
علياء: سمحولي نجاوب
طوبياس: خودي راحتك
رجعات اللور وهوما سابقينها لكن نظراات والتر تتحسهم عليها وراما جاوبات
علياء: الو
دغيا قال بنبرة عتاب: حشومة تسولي إلاما سولت ياك.. حشووومة
ضحكات رادة شعرها ورا ودنيها: هههه مسااء الخير
سمعات ضحكتو الخفيفة وراما ضحكات هي وقال: مساء النور الزين تمراكش.. صاڤا هانية
علياء: الحمد لله ونتا
سلمان: في امان الله الالة.. كيف دازت السهرة؟
سكتات شوية وجاوباتو: زوينة .. الصراحة واعرة هههه وباش نصدمك راني بنت فالاخبار وصحف ومجلات
بتفاجأ بان فصوتو قال: باا باا باا
ردت بفخر: سيي ههه
سلمان: الناس طلعو للسما طلعة وحدة .. برااڤوو براااڤوو.. هي اليوم راجعة
بدات فعينيها ضور: ل لا
سلمان: لا!!؟
علياء: واعرفتي تعطلت وقلت نأجلها لغدا.. كنت ناوية نخرج نشري ليكادو ونرجع للاوطيل نجمع حوايجي ونجي فحالي ولكن عاد دابة يورك اتاصل بولد والتر وعرض عليا للعشا ..مالقيت مانقول حشمت نرفض
سلمان: آه مالقيتي ماتقولي ..سيري غانقطع سيري اودي على الكلمة اودي
ضحكات: وابلاتي عرفتي اش شريت ليك
سكت شوية وقال: اشنو
علياء: صافي غير سير قطع سير
سلمان: واهضري
ضحكات: نجي ونعطيه ليك، غدا نكون تما ههه باي
قطعات عاضة شفايفها ومشات لعندهم تتزرب: ياكما تعطلت هههه
درعاتها اناماري: نو حبيبتي.. يورك عاود اتاصل.. يالله نمشيو بلاما نتعطلو عليه
علياء: احسن.. باش حتا انا نرجع للاوطيل نرتاح ..غدا تابعني السفر
طوبياس: بابا مشا يجيب الطموبيل تسناوني حتا انا نمشي نجيب ديالي
ردو عليه بالايجاب وتسناوه لتواني حتا جا هو ووالتر.. ركبات بلاما تشوف ناحيتو وشدو الطريق لدار يورك
..حاسة أنه ماعرضهاش لله وطاحو فبالها احتمالين.. أما والتر لي طلب منو يتدخل فالمشكل لي وقع أو أنه عرف اش دار صاحبو بغا يصالح بينهم.. وهي كدالك وافقات باش تخوي ليه جوج كلمات فحلقها واحلين وترد ليه صرف الكلام لي هانها بيه فسيارتو
..غير دالك مايمكنش ترجع للمغرب مرتاحة وبالها هاني كليا
يورك: شرفتيني فداري اعلياء نهار جميل هادا ههه
اليكس: مرحبا بيك احبيبة ونتمنى الأكل يكون عجبك
تبسمات بادب تتنقب من صحنها واخا مافيها لي يزيد ياكل لكن الصواب ضروري منو
علياء: الله يعطيك الصحة غزال.. والشرف ليا
اليكس: طلعتي منورة فالمجلة بشهادة الكل هههه
سرطات اناماري دغمتها وقالت بشهقة: آه حقا نسينا ماشريناها اوف
علياء: ناوية حتال الصباح عاد نشريها ونديها معايا.. وحتا نتي االيكس كنتي غزالة فالحفل بحالكم كاملين
اليكس: من دوقك الحلو حبيبتي ههه
مسحات فمها بشبع وهزات كاس كوكتيل بدون كحول تتشرب منو ..حنحن يورك وراما شاف فوالتر بنظرات كايطمأنو وقال
يورك: مدام باغيزيان.. ممكن نتكلمو شوية
علياء: أكيد
ناضت داخلين لغرفة المكتب، جلسات بلباقة رجل على رجل ووراهم دخل والتر تايتنهد.. شافت فيهم بزوج ويورك قدامها برك عكس والتر لي بقا واقف تايشوف ويحك رقبتو
علياء: تفضل ايورك.. هاني تانسمع
شاف فصديقو وقال بأسف: والتر عاود ليا شنو وقع البارح.. سمعي أنا مغانقولش ماغلطش ومارتاكبش خطيئة كبيرة بالنسبة ليكم عامة كمسلمين ..بالعكس اداك بكلامو والتصرف لي تصرف.. ولكن تيقي بيا هو ندمان بززاف ولوما كان نادم مايتكلمش معانا باش نتدخلو فعلاقتكم ونصلحوها.. شوفي الموضوع من زوايا أخرى باش نحلو هاد الخلاف ومانطيحووش فغلط أكبر
ردت: الهضرة فاش تتقال صعيب ترجع “حولات نظراتها لوالتر” الكلام لي صرد منو كان كم ..والطلب لي طلب مني كم آخر ايورك صعيب ندير بحالا حتى حاجة ماوقعات
والتر تنهد محني على ركابيه عندها بغا يشد ايديها وبعداتهم بسرعة
والتر: انا عمري كنت غانبزز عليك شي حاجة ..عارف التصرف ماشي فمحلو ولكن حيت تانبغيك ماكنتش تانصبر هادا علاش اصلا كنت تانزرب على أوراق العقد
زيرات عينيها بضيق: والتر عافاك بلا كدوب.. حبك بان وصرفتيه ليا بأحلى الطرق بارك الله فيك
والتر: كلشي شاهد على كلامي العائلة كلهاا.. عمرك تشكي فحبي ليك يوقع لي بغا يوقع.. أنا تانبغيك ولولا حبي ليك ماكنتش نتجرأ ونطلب منك الزواج من الأساس
حركات راسها بعصبية مكبوحة وتتدوي بهدوء: واخا ..التصرف نحطوه على جنب، وكلامك السام بحق ديني شنو تقول عليه
والتر: نادم وبزاف
شافت فيورك وقالت بتأكيد: النهار اللول ايورك وقبلما حتا نتخطبو بركت معاه على الطبلة وحطيت ليه شرطي الوحيد وهو الدين ديالي..من هنا يفهم بلي الموضوع حساس بالنسبة ليا ومهم بزااف.. هو شنو قال “رجعات شافت فيه” شنو قلتي فاش قلت ليك انا ضروري الرجل لي غانتزوج بيه خاص يكون مسلم؟ وماخاصش تسلم على ودي حيت هاداك مغايكونش إسلام إنما تضليل ليه وغير تاضحك على راسك؟
والتر: عاقل وكلامي كان فعلا صحيح
علياء: صحيح؟ هه الاسلام بصح عرفتيه ونتا عايش وسط المسلمين وديما مسألة انك تسلم فبالك ! مأكد اوالتر
حك شعرو بتوتر تايسمع ليها وقال: الموضوع ومافيه خاصني وقت نتأقلم ونولف.. كلشي صعيب فالبدية عطيني غير فرصة
علياء: ديننا ماشي دين عسر امسيو والتر باش تقولي هاد الكلام تاع صعيب والبدية وكدا..ديننا دين يسر الحمد لله نتا لي كاتقول عشتي وسط المسلمين عاد اقتانعتي بيه وخاصاك غير الفرصة فين تولي مسلم هه.. ومادام جبدنا هاد الموضوع الى باقي تعقل نهار كليتي رمضان شنو درت؟ شفتك وبدلت ساعة بخرا ماجيت لعندك كانخاسم ماشوهتك ماوالو.. وحتا ملي جيتي تقلقت حيت قلتي حشمتي تخلي يورك يفطر بوحدو يعني المسألة ماهياش حتا مسألة أنه جاك صعيب أو نسيتي.. وهنا تايبان اليسر فديننا، الحاجة لي تآديك مكايناش إلى نسيتي الله يسامح والى كانت فالدين شي حاجة خطر على حياتك تاتسقط عليك.. تايسقط عليك كلشي الا الصلاة.. ونسولك اسي والتر انا شنو درت ديك الساعة باش تكافأني بهاد الطريقة
شاف فيورك تايتنهد بضيق ورجع قال بندم: تكلمتي معايا مرة خرا على موضوع الإسلام
علياء: اول حاجة عطيت لراسي ولك فرصة خرا.. عاد بركت معاك اطابل وشرحت ليك مرة أخرى الإسلام شنو هو.. عاقل مزيان ياك
والتر: الغلط ديالي عارف والله…
قاطعاتو بجدية مزيرة عينيها: خليني نكمل عافاك “تاتحس براسها بدات تخفاف وباغة تتكلم لآخر مرة فهاد الموضوع وتسدو فمىرة” انا نصحتك شحال من مرة فهاد الموضوع وفهمتك آااه.. لكن هادا متايعنيش بلي أنا معصومة من الغلط.. وكون كان المفروض فديننا صاحب النصيحة يكون شخص متالي تايمارس امورو الدينية على اتم وجه بدون اي غلط ..كان الأجدر يكون رسولنا الكريم صلى الله عليه وسلم ومن غيرو مكاينش.. أنا نهار دويت “هزات ايدها تتحسب” دويت على الصلاة لي هي ركن مهم وبيها تاندعي الله يغفر لي اغلاطي.. الصوم لي تانصوم ..الزكاة لي تانخرج.. واليديا لي أنا بارة بيهم وزيد وزيد ..إلى نتا بان ليك اسي والتر غير اللبس أو أني سافرت بوحدي وهاكدا بنت ليك منافقة .. فأنا والحمد لله عمري شفت راسي متالية ولا لعبت عليك المتالية وكون سولتيني ديك اللحظة على الحجاب والسفر كنتي غاتسمع نفس الجواب.. ولو كنت منافقة فديني كنت نرتاكب گاع الكبائر شنو فيها.. نزني حتا انا.. نشرب الشراب لي ديما بين عينيا فالحفلات وعمري حتا مسيتو بايدي ..نقبل طلبك للزواج كنتي مسلم ولا لا
قاطعها فاش حس بيها تتهضر بحرقة وقال متأسف: مكنتش باغي كلامي يجرحك لهاد الدرجة.. تيقي بيا خرجتو فساعة غضب وعصبيتي قاصحة مكنتش عارف شنو لي تانقول.. اما بالعكس اعلياء ماشي تانجاملك ولكن فعلا ونعم الاخلاق لي الواحد يخليه يحبك ويحب دينك كتر والدليل عائلتي لي تتبغيك واصدقائي وكل من
صادفتي من المعارف ديالي.. واكتر حاجة تانقدرها هي انك محافظة على العدرية ديالك ونتي فهاد العمر
ردت بهدوء: كان خاصك هادشي تفهمو من الأول.. ونزيدك، نحافظ ولا لا ؟..نبعد من الكبائر ولا نقرب ليهم؟ .. هادي حاجة تانديرها لوجه الله وباش مانسدش جميع البيبان لي بيني وبين الله .. هنا فين بغيت نزيد نوضح ليك بلي ديننا دين يسر .. ودخلها لدماغك اسي والتر، عمرها كانت وألا تكون بلي وحدة لابسة معري أو قصير ادا تمشي تزني ..ونهار قلت ليك تانحلم فاش نتزوج نمشي انا وراجلي نديرو عمرة قلتها بقلب خالص وموحال گاع واش فهمتي شنو بيها قصدت
والتر: واخا دابة سمحيليا ..غالط ونادم وتانعتادر
تنهدات وقالت: الله يسامح.. حيت الغلط كلو ماشي ديالك، كانعتارف حتا انا عندي جزء فيه لي عطيتك فرصة تفكر فيا كيفما بغيتي.. ولكن سمحلي نرجعو كيف الأول هادي لي عمرها تكون
قلب وجهو وناض منيرڤي تايتحكم فنفسو، كل الطرق معاها باءت بالفشل وهنا دوا يورك تايهدن الامور
يورك: لا اعلياء ماشي هاكدا تانحلو الخلافات ..والتر غلط آه وكيف قلتي نتي حتا انسان ممعصوم من الغلط.. هو راه غير ديانتو من المسيحية للاسلام طبيعي يبدا يغلط عاد بدا، و حتا الكلام لي قال واخا غالط راه مااقالو الا فاش حدا نظرة خايبة عند بزاف ديال الناس مسلمين ماشي منك نتي بالضبط
ضحكات مستهزئة: علاه المسيحية ممفروضش فيها الحجاب والللبس مستور متلا؟ ماشي حتا الشراب حرام فيها والزنى حتا هو لي نتوما عندكم عادي.. أنا كنت حاطة فبالي الإسلام يغير فيه بزاف الأمور لكن ياللأسف “شافت فوالتر بحصرة” خيبتي ظني فيك وبزاف
ناضت باغة تخرج وحاصرها شاد ايدها بزز: اعتادرت ونادم.. شنو ندير كتر.. شنو فهميني
نترات ايدها لي ولات ضرها بقوة ماشدها غصبا عندها هاد اليوم وقالت: انا لي غاندير.. تصبحو على خير
والتر: علياء الله يخليك ماتاخديش قرار خاطئ فلحظة غغضب.. انا عارف خاصك وقت كيف ديما وغانتسنى بفارغ الصبر حتا تسامحيني. ..الله يخليك
تجاهلاتو: يورك ممكن الشيفور ديالك يوصلني
حرك راسو: أكيد
علياء: شكرا
خرجات من المكتب للصالون سلمات على البقية بالاحضان مودعاهم وهزات ساكها خارجة ولعند الشيفور توجهات طالعة للسيارة وراما حط المشتريات ديالها فالكوفر..
وصلها للاوطيل بعد دقائق..
الوقت تأخر والعيا عليها بان حطات الاكياس حدا الساك ديال حوايجها تتشوف فيه وترمش، ضروري تشري ڤاليز تحطهم فيها الساك وحدو مغايكفيش..
دخلات للدوش بدلات وطرفات الحالة بحمام انعشها وزال تعب هاد اليوم المليء بالاحدات خرجات متكية ففراشها تتحاول تنعس وكل مرة ضور لقنت..
حتا ناضت حيدات خاتم الخطوبة من يدها رماتو حتا جا فالساك ورجعات سدات عينيها مرة أخرى تاطيب نعاسها
خارجة من المطار بكسيوة صيفية بنفسجية اللون خداتها من سويسرا وطالون اسود مع ساك.. جارة لفاليز بيد ويد هازة بيها ساك صغير اسود ..دارت نظاظرها ملي ضربات فيها شمس مراكش وتحسسات حرارتها واخا لابسة خفيف صهدات وهي غادة جهة الطاكسيات.. هزات ايدها معيطة لواحد من الشوافرية هو يوقف عليها سلمان بتيشورت ودجين جبهتو تايتقطر بالعرق تالصهد مازال ماضارت تشوف فيه هو يتحنا عند الطاكسي سد عليه الباب وقال
سلمان: صافي المعلم غير سير الله يسهل
ضحكات ببلاهة تتشوف فيه.. واخا خبراتو ايمتاا غاتوصل مدارتش فبالها يجي حتال المطار بااش يوصلها وهو ضار جر الفاليز غادي بيها لطموبييلتو وتاينگر
سلمان: ساعة وانا مشومر هنا تاناسناا سيادتها.. وفالاخير بغات تاخد طاكسي يالله هادي اااش خصها
حط الباگاج فالكوفر شاف فيها مبسم من عينيه وقال جاي جيهتها: خاصاها واحد التعنيقة بعداا
ضحكات لما جرها معنقها وتايمرر ايدو على ضهرها ..مشتاق ليها وواضحة فيه حتا نطق بتنهيدة
سلمان: على سلامتك الزين تمراكش
علياء: الله يسلمك ههه مايسحابليش غاتجي
باس جبهتها وقال: جابوني لارياح ههه طلعي
ركبات سد وراها الباب وزاد ديمارا فصمت والابتسامات على الشفاه لولا تليفونو لي غير تايصوني وكل مرة يقطع.. وقف قدام كافي قريبة لجامع الفنا نزلو يتقهوا وهي تفطر وترتاح شوية
علياء: الله ..توحشت مراكش وناسها ههه
ضحك ليها: حتا هي توحشاتك.. كيف دازت السفرية هانية؟
علياء: هانية “صونا تليفونو مرة خرا وكلما سمعو تايتزير ماباغيش يتعصب” مغاتجاوبش
سلمان: ماباغيش نطفيه كانتسنا اپيل مهمة
علياء: ادا جاوبها
تنهد بعمق: خلينا گالسين زوين حسن، مافيا لي يتنيرڤا دابة
حركات راسها بتفهم وعلاما فهمات أنه وقع شي صداع بسبب مروى تاني ونطقات مغيرة الموضوع
علياء: نتا كيف غادي مع الخدمة مزيان
ضحك بعصبية تايشرب فقهتو وقال: حاليا المعلمة وليت شومور
وسعات عيونها: شنو؟ علاش مالك وقع شي مشكل
سلمان: بحال هاكاك.. ماديريش فبالك
علياء: لاا قول مالك اش كاين
قطع مرة خرا بالزعفة وهي حولات عيونها من التليفون ليه وقالت: هي عندها يد فهادشي
حرك راسو: هي السبب اصلا
علياء: شنو جبدات ليك شي مشكل.. واعاود ليا صافي راتعصبت
قرب ليها تايتنهد وقال: تتعرفي مدام السميسري “كمشات عينيها تتدكر” هاديك من لي عندها رياض هي وراجلها ومؤخرا ولات هي الجيروم ديالو
علياء: آه تفكرتها.. مالها
سلمان: كنا خارجين من لاجونص غادين عند شي كليان.. حليت للسيدة الباب طلع وماعرفتش ديك خيتي منين بعتات وشنو قال ليها راسها.. شدات داك الباب وسداتو ليها بالجهد على صبعانها حتا ضفرها طار
تبورش لحمها وشهقات: اويلي هادي حمقة ولا مالها.. ايوا اش وقع
سلمان: وصلات لخبار للپاطرون.. تزايدنا فالهضرة وخرجت مخلي ليه كلشي
علياء: كنتي بعدا تدوي معاه بيناتكم نتا ماليك حتا دنب
سلمان: ولكن بسبابي وقع لي وقع، وهي كونما شديتها كون تلاحت على السيدة تكمل لي خاص
شدات راسها تاالفة وتتحاول تلقا حل: صدمتيني ماعرفت مازال اش نقول.. مدام السميسري شنو دارت؟
رد ببرود: هي لي وصلاتها للپاطرون وزادت فسخات الكونطرا لي بينااتنا.. ونتي عارفة الخدمة عندهم كيف دايرة ..ديما الكليان موجود ولاجونص تادخل من الرياض ديالها ميزانية كبيرة.. داكشي علاش مالقيت مانقول قدام الباطرون واصلا شحال من مرة وصلو ليه الدباز لي تايكون عندي فالمكتب معاها.. والمشكل ديال ختها حتا هي ..شفتو بدا يخربق الهضرة حطيت استقالتي وزدت فحالي
سكتات دايخة تتنهد بحالو ..رجعات مطلعة فيه عينيها وهو قالب وجهو وبين عينيه عاقدهم
علياء: هاد البنت انورمال.. وانك تبقا هاز هبالها ماشي لصالحك اليوم خدمتك غدا شنو؟
سلمان: علياء راك حاضرة وتتشوفي كلشي على عينيك .. دويت وقلت ليها الله يعاونني ويعاونك مامرة مااجووج ..بقا ليا غير نعطيها علاش دور وتجيب عليا سبتها
علياء: مشكلتك حنين بزاف اسلمان ..واحد آخر مايتسوقش تنتاحر ولا تبرك يفكر فراحتو وصافي
رد بعفوية: الضمير اعلياء ..مغانرتاحش.. خصوصا عارفها مريضة ..خاص شوية الوقت وندوي مع ختها ديها لشي طبيب إلى بقا فيها مايتعالج
علياء: والخدمة.. شنو ناوي دير
سلمان: عندي فلوسي الحمد لله ..قلت علاش لا مانفتحش اجونس ديالي..
ردت بتأييد : آه بصح.. درتي المعارف فهاد السنوات لي خدمتيهم مدير ووليتي ولد الضومين.. ماشي صعيب طلع الاجوونس “شدات فايدو مشجعاه” وانا اول كليان عندك اسيدي هههه
زير على ايدها مبسم: واحسن كليان
اتاصل بيها باها واضطرو يرجعو ..وصلها للدار ونزلات وراما سلمات عليه ممتانعة أنه يهز معاها الڤاليز حتال الدار خايفة شي حد يشوفها وتولي فسين وجيم
دقات حل ليها اوس وتلاح معنقها فرحان عاد طلعات تتسلم على باها ومها
حكيمة: گلسي گلسي هههه انمشي نجيب الصينية
بركات تتنش على راسها ولمكي طلع ليها الباليزة ونزل برك حداها: الله يرضي عليك ابنتي
علياء: آمين.. ملاك قارية
لمكي: اييه ولايني هي شوية ودخل.. أكيدازت التسافيرة فوجتي مع راساتك
علياء: الحمد لله هههه
دخلات ملاك فرحانة بعودة ختها من السفر عنقاتها تتردد بحماس
ملاك: جبتي ليا معاك شي حاجة يااكي
جبدات ليها حناكها تاضحك: وعلاه انا تاننساك
حكيمة: حيدي على ختك ترتاح وسيري بدلي حوايجك “حطات الصينية للمكي قال بسم وهز البراد تايكب فاتاي”
علياء: سيري احبيبتي حطي محفاضتك ونزلي عندي”عيطات على أوس ملي شافتو خارج” اجي نتا اداك السميمر ههه هلكاتك الشمش ياخويا
برك حداها ولمكي قال: هه بالسيف وهو تايدخل هي لابغا ياكل كي بوصفروط
أوس: واراني مدوز العطلة الوليد شبيتيني ندير هنا ننقي الزرع مع الواليدة
حكيمة: واصافي صافي خلي علك الولد ..نتي واحد خطيبك ماجاش معاك
مدات ليها كاسها وعلياء ماطات شفايفها ممترددة تهضر حتا طولو فيها الشوفة ونطق لمكي لي شمشم شي حاجة ماهياش
لمكي: اياك شي باس مكاين
حطاتهم ليهم فوجههم: انا ووالتر صافي وضعنا حد لعلاقتنا.. مابقيتش بغيتو والله يعاون
حكيمة وحل ليها اتاي ولمكي توسعو عينيه وضحكتو حتاناض تايهلل
لمكي: شااايلاه اسبعة رجااال هههه الله على راااحة الله
حكيمة: اااويلي.. الله يابنتي وقدااش قلتيهاااا واش غير اااجي وتفارق
ضار ليها لمكي عاقدهم: اللالة يعاود لمخوو.. ماهو من توبها ماهي من توبوو الله يربح هههه الرررضاااا المعلمة انااا راااضي علك
بقات غير تترمش فيهم واوس ساكت تايسمع
حكيمة: اشمن رضااااا واااش باغين طرطقووو مرارتي.. واش الشووهة ماهامكش شنو غانديرو مع النااس لي غايدويييو
قبلما يجاوبها نااض اوس مخنزر وقال: وايدوي شي حد فختي والا يجبدها على فمو لاما جبدت لمووو عينيه
لمكي: سكت نتا ماشغلكش
حكيمة بغات تنوض ليه وناض مخبي ورا السدادر علياء شدات راسها لي ضرها وحكيمة تتخبط جنابها وتغوت
حكيمة: الشووهة هادي الشوهة.. خالاتك وخواالك كللشي عااارفك تتسافري لعندووو ..داااابة اااش غايقولو؟؟؟ الهضرة ابنتي غااتكتر ووجهنااا فين غانحطووه
طلعات فيها علياء عينيها ولمكي دوا: واا لي عندو فمووو وبااا يدوي هي الله يربح طزز من عندي يااناا
غوت اوس تايعرعر: واااايدوي شي قندوووح من ديك تريكتك بكلمة على ختي إلى ماحطييت ليهم گاع الضواصاا ديال بنااتهم ..فييين تايتقنتووو وشحااال تايشبعو فيييهم بالتعباااز ومعاااااامن
زف عليه لمكي بديكور حداه جاب الله خوا ليه أما كون فلقو
لمكي: سييير قبح الله **عك البرهوووش ااايهاي على التعباااز مابقيتي تحشم .. خرج عليااا زيييد
خرج تايطاكي لاتجيه شي دقة وعلياء ناضت متعبة مافيها لي يزيد يسمع الصداع: جيت عيانة غانطلع نرتاح
حكيمة: سيري ابنتي نعسي وديري عقلك فراسك.. الله يرضي عليه
لمكي: عقلها عاااد رجع لراسها الله يرضي عليها
جاوباتو مغددة: واش انا تاندخل بخيط بيض ونتا تتكحلو الله يهديك ياهااد الراجل
لمكي: واشاتا بيتيني نتناسب مع داك الصفريط وجهو كي الستيدعة وسميتو تايطنزو بيها الناس.. ونصرااااني من الفوق
حكيمة: مالو مسكين عمرنا شفنااا منو العيب.. مخدمها معززة مكرمة ماناقصها خير اش داار حتا مابقات بغاتو
جبد فيها عينيه: وااماباتوش هي ماباتوش واش بزااااااز.. زوجيه لختك لابقا فيك انا بنتي مايقرب ليها مايجي جيهتها
…
سدات باب الدوش تتنشف شعرها بالفوطة وصداعهم مازال تايوصلها.. واخا دوشات وبدلات ودابة تخشات ففراشها تنعس وترتاح.. طلات على الساعة وكانت التسعود ديال الصباح، دارت لالارم على الحضاش وضارت سادة على عينيها لي دغيا تغمضو بالعيا نعسات والدقايق تايفوتو ..
فاتت ساعة ورن التليفون عاد قفزات تايتلصقو شفرانها وماساخياش تنوض.. حكات شعرها لي تشعكك طفات لالارم وناضت تتجبد وتفوه وبركات قدام المرايا تتسرحو بالمهل وتفكر شنو تلبس..
ضروري تمشي طل على الخدمة وتتسنا كليان مهم جاي لعندهم اليوم فالعشية ..
اختارت جوب زرقاء مع شوميز ديالها صونا التليفون وهي تاطلع السلسلة وهزاتو مجاوبة
علياء: الو وي سلمان
سلمان: صباح النور ..ياكما فيقتك
علياء: لا أصلا فايقة غانمشي للرياض نطل ونقاد شي خدمة عندي تما
رد بهدوء: اه ..الله يوفق, شنو بان لك نتغداو بزوج؟
حسات بصوتو مغير وقالت باهتمام: واخا ولكن مالك؟.. سلمان شنو بيك
وصلاتها تنهيدتو وقال ببحة: مخنوق.. قلبي مخنوق باغي نهضر ونخوي ولكن ماعرفت لمن
تزير خاطرها من جيهتو وقالت: ليا انا طبعا وديما معاك.. اجي لعندي عانتسناك حدا الشاريع
سلمان: واخا ..علياء
علياء: نعم
رد: شكرا
علياء: كولها
قطعات تتكمل لبسها ..هزات كيس جامعة فيه الكدوات لي خدات ليه وخرجات بلاما تقولها لحد تتزرب للشاريع وماحدها تتقرب وطموبيلتو تتزيد توضاح ليها
نزلو فالريسطو لي مولفين تايبركو فيه دخلو طلبات بيتزا وطلبات ليه معاها حتا هو لي غير تايتنهد ..باين فيه هاز هم كبير عافط ليه على قلبو ومحاصرو من كل جهة حتا مالقا كيدير يخرج راسو
..شدات ايدو مفيقاه من السهوة لي غرق فيها وقالت مميلة وجهها وبنبرة اسى
علياء: خاصك تلقا حل اسلمان.. حالتك معاحبانيش
زفر مهبط راسو وتايدوز على عنقو بحيرة: دخت بالله
علياء: خايفاها تتمادا كتر وتآديك قبلما تآدي راسها ..ومأكدة غاتكون دارت شي مصيبة خرا من غير هاديك لي قلتي ليا
سلمان: من نهار دخلتها لحياتي وأنا فالمصايب .. ودابة فاش عرفاتني خرجت من الخدمة وقطعت عليها التليفون ولات بحال شي حمقة تتلقا لگاع صحاابي وتاتسولهم عليا
طلعات النفس تتبرد حيت تفقصات بلاصتو: وشكون علمك بهادشي
سلمان: واحد بنادم تانعرفو “زفر بخنقة مخنزر” قاليا بالحرف هاد السيدة خاصك دير معاها شي حل ولا غاتقتلك وتقتل راسها.. ولي ممرضني هو عرفاتني فين سااكن.. اشنو ندير معاها شنو
خرجو عينين علياء بخوف: كيفاش عرفات ..جات عندك؟؟؟
كايحك شعرو بالفقصة: جات، كنت خارج أنا والواليدة نتقداو، مع غاندخلو هي تلاح عليا عنقاتني قدام مي.. هادي دابة شنو دير معاها؟ تصدمت وزادتني بهضرتها المرييضة نتا ديالي ماتخلينيش غانموت غانزمر غان… “زير فمو بغضب” تفووو
تنهدات: ايوا.. شنو وقع من بعد
سلمان: مرضت بالله حتا مرضت ودخت.. بغيتها غير طلق مني واالو وجات الواليدة تجرها هي دفعها كونما شدات فراسها كون جات طايحة.. تما جهلت ديال بصح دفعتها وبزز باش حبست راسي مانضربهاش
علياء: هادي حمقة صافي ..زادت فييه بزاااف
سلمان: جااب الله دخلت مي للدار وجريتها لطموبيلتها ..وصلتها للخلا وخليتها تاتهضر بوحدها حتا تفشات عاد رديتها لدارهم وجيت فطاكسي.. قلت ليها فوجهها فرقيني عليك عطيني التيساع ووالو واش بغات تفهم
علياء: لا حول ولاقوة إلا بالله.. ماماك غاتكون سولاتك عليها ياك
رد: سولات وعاودت ليها كلشي.. قالت ليا نسايس معاها ونبعد شوية بشوية حتا نحيد الشوكة بلا دم ..اما إلى جيت نبعد فمرة مايصلاحش البنت مريضة فراسها وغادير ليا شي مصيبة ماكفس
علياء: ماعرفت مانقول ..يمكن كلام ماماك صحيح.. ميك عليها شوية بشوية حتا تولف غيابك وتعطك بالتيساع
تنهد: الله يدير شي تاويل ديال الخير وصافي
علياء: آمين “بغات تغير المود شوية وقربات ليه الپلا ديالو” ماكلتك غاتبرد وباينة من القهوة لي شربتي فالصباح ماطاحت فكرشك النعمة
رد بشهية مسدودة: ماعندو منين يدوز
علياء: واديرلي خاطري عافاك.. باش نعطيك الكادو ديالك يالله ههه
بسم منزل عينيه للساك حداها: هاي هاي الناس تفكرونا.. اري لهنا نشوف اش جبتي ليا
خباتو وراها: لاء حتا تاكل
طلع حاجب: تتشرطي دابة
علياء: ههه بسم الله.. هاك دوك من الپيتزا ديالي
دمق شوية داير ليها خاطرها واخا ماعندو خاطر.. تغداو و تسناها حتا سطرات لي ففمها ومسحاتو عاد هزات الكيس لي فيه الكادوات حاطاه فوق حجرها و تتشوف فسلمان بحماس خايفة ماعجبوهش واخا كلشي فقمة الرقي.. جمعو الطبلة حاطين ليهم عاصير نحاتهم للجنب وجبدات اول حاجة.. الساعة بعلبتها
علياء: قول بسم الله .. آلي ماتنحسش معاه بالوقت هههه
علا حواجبو وخداها فتح العلبة تايرمش وهي قالت تتراقب تعابير وجهو
علياء: ماعجباتكش
تبشرت ملامحو وحيدها من العلبة تايدوز عليها عينيه: بالعكس ..دوقك واعر العلمة هههه
شافها حطات علبة أخرى وهزها مستغرب: شنو هادي
علياء: هادي لماماك ههه
تصدم وفتحها كانت ساعة راقية فاللون الأبيض نفس لي خدات لمها ..بغا يهضر ولجمات لسانو فاش جبدات الباقي.. ريحة شانيل ليه وللوالدة لي ماتوقعش نهائيا تتفكرها.. وعلبة شوكولا فاخرة ..ماخلات ليه مازال اش يقول واخا تتسنا تعرف واش عجبووه كيفما تمنات ولا لا
علياء: غاتبقا ساكت هههه
ضحك والفرحة بانت فعينيه قبل وجهو من لوجيست لي دارت: واش مشيتي تفوجي ولا تخسري يماهم (الفلوس)
علياء: هههه دابة واش عجبوك ولا لا
ناض ضاحك و تايتنهد: ههه اجي اجي
عنقها وهي باركة وباس بين عينيها: نتي والله مكاين بحالك.. هبلوني ماشي غير عجبوني هههه
بعدات تاضحك: بالحلوف گاع ههه
سلمان: بالحلوف الزين تمراكش هههه
شافت فساعتها بالصدفة وعضات شفتها قائلة: ويلي خاصني نمشي ..الكليان مابقالو والو ويوصل
خلص وبدا تايجمع داكشي بابتسامة مزينة ملامحو عكس كيفاش دخل للريسطو فالاول
: يالله نوصلك
علياء: واخا انا سابقاك للطموبيل
…
ركبات فبلاصتها تتاصل بالبنت لي فالريسيپسيون وتتأكد واش وصلو الكليان ولا باقي.. ركب حداها سلمان ديمارا وقطعات قائلة
علياء: باغين فين يتعشاو هاد الليلة واقتارحت عليهم علي بلفلاح
سلمان: مزيان
بطلب: غاتجي معايا ياك؟ حسنما تبقا غير ساد عليك ومنها تبدل شوية الجو
سكت تايفكر وشاف فيها بابتسامة؛ نمشي الالة ..معاش تكوني واجدة؟
وقف قدام الرياض سلم عليها وقالت: غانتاصل بيك ملي نقربو نمشيو.. تهلا فراسك
سلمان: بسلامة
هبطات غادة لشغالها وبالها معاه ..تتلف بالخدمة وفنفس الوقت تتفكر فحالتو وشنو الحل لي يناسبهم..
وصل الكليان رحبات بيهم وتلاهات حتا تعاشات العشية وطاح الظلام ..رسلات رسالة لسلمان يجي وبركات تاترتاشف قهوتنا وتتسنا فيه وفالكليان حتا نزلو لعندها هازين الكاميرات ديالهم وفرحانين ملي سمعو الأمر فيه علي بلفلاح.. الموكب السياحي الأول فمراكش ولي جامع بزاف من تقافتنا المغربية ..سواءا فالرقص (أحواش، التقيتيقات، گناوا، صحراوا، الشعبيي…..) ، أو العروض الفنتازية من التبوريدة إلى آخره.. أو اللباس و الاكل التقليدي وغيرو..
وصل الطرونسبور وخرجات معاهم حتا ركبو سدات عليهم الباب تزامنا مع وقوف الكاط كاط ديال سلمان قدامها.. نزل طاااالق البشرة.. مدوش ومريح ومبدل حوايجو بدجين زرق باهت وشوميز زرقة توبها خفيف حال صدايفها من الفوق ..سلم عليها وعنقها تايسمع لضحكها ولي فالرياض حاضينهم ..حل ليها طلعات عاد ركب تابع الطرونسپور
علياء: بغيت نسولك كي بقيتي ساعة من وجهك بااينة المورال طالع ههه
باس ايدها مبسم والمود عندو تغير: نحمدو الله ونشكروه “سكت شوية وأضاف” مكانش عليك تخسري دوك الفلوس كاملة
استنتجات من كلامو بلي عرف شحال المگانة ساوية وقالت متبسمة: تاحاجة ماتغلا عليك ههه عينيا نعطيهم ليك
تبسم ليها وسكت
…
وصلو لعلي بلفلاح ووقف ورا الطرونسبور ديال السياح
هبطو وجرها مدرعها لعندو والتبسيمة مفارقات لا عينيه والا شفايفو
..تعامل ممزير وبمشاعر صادقة شافت فتصرفاتو هاد الليلة، مابغاش تبعد عليه وضروري يخشيها فحظنو ويبوس راسها بزز طلق منها تمشي مع الكليان للخيمة ديالهم وهو برك فخيمة أخرى خاصة بليجيرون أو لي تايجيو مرافقين للسياح، حاط براد منعنع وبواطا مسدودة عامرة فقاص تايشرب ويشوف فالتبوريدة ومرة مرة يتلفت يتسناها والضحيكة فوجهو
علياء: هاني اسيدي
بركات وكب ليها كويس تأتاي: بسم الله.. تبغي نطلب لك العشا؟
برفض: لا لا مابغيتش ..شنو هادا
جرات البواطا فتحاتها وتفتحو عينيها بسعادة: البجماط (القفاص) ومخبيه عليااا يااك
هزات حبة تتاكل منو بشهية.. من بين جميع الحلويات المغربية الفقاص هو المفضل عندها وتتموت عليه
سلمان: بالصحة.. شفت الواليدة تتصيبو هي وختي وقلت ليها راك تتحماقي عليه.. هي تجمع ليا منو ووصاتني نجيبو ليك
علياء: بنين الله يخلف عليها هههه
سلمان: آمين “وسع تبسيمتو” عطيتها الكادوات لي جبتي ليها ..فرحات بيهم بزااف
علياء: فرحتيني ملي عجبوها ههه بالصحة
سلمان: الله يعطيك الصحة هههه فاش قلت نتي لي جبتيهم قالت ليا هادي هي المرا لي خاص ديرها زمانك.. ماشي بحال لخرا (على مروى) هههه
ضحكات علياء حتا تسدو عيونها. : ايوا هههه
سلمان: قلت ليها خسارة نهار عرفتها زدقات مخطوبة ههههه طاارو ليا بيهاا
علياء: مسكيين ههه
سلمان: ووريتها حتا تصاورك
بعدم فهم: تصاوري؟؟ ” تفكرات بلي ديما سلمان جابد التليفون وتايصورها.. مرة هاهي تتاكل مرة هاهي تتمشا مرة باركة تااضحك هي توسع عينيها وجبدات تليفونو تتقلب فيه”
علياء: ويلي عنداك تكون وريتيها هادوك لي تاناكل فيهم؟
لقات تليفونو عامر غير بوجهها وبدات تفلي ياكما شي وحدة فيهم ماهياش وهو قال تايضحك
سلمان: شافت كلشي المعلمة هههه ماتخافيش راها تتشكر زينك التصويرة لي شافت تتقوليا غزاالة الله يحجبها
قادات شعرها بحياء: مممم بصح
رد: واييه.. شديت ليها رونديڤو، الشهر الجاي نديها عند الطبيب يبدل ليها النظاظر
لاحت عليه تليفوونو وشدو تايموت بالضحك: داابا انا خايبة ياااك الزهوااني
سلمان: غير ضاحك لاتقلقيش الزين تمراكش.. علاه كونما كنتي زوينة نبرك معاك ؟مايمكنش هههه
علياء: ناكل فقاصي حسن ليا
رن تليفونو هزو قرا الاسم وتوسعات تبسيمتو: عمرها طويييل ..الو الوليدة (شاف فعلياء تايضحك وكمل الكلام) الحمد لله.. هاهي قداامي سبحان الله عاد كنا جابدينك
بدات تاكل فالفقاص ومنتابهة معاه تترمش حتا قال
سلمان: بغيتي ندوزها لك؟ اها واخا
حشماات حتا وحلات ليها وبدات تحرك راسها بالنفي وتهمس ليه: لا لا لا عافاك..واا لا
كايمدو ليها مصر تجاوب: واهاكي غير سلمي عليها بعدا
ردت ووجهها بغا يطرطق بالحمورية: والا عافاك بلاش
ردو لودنو تايضحك عليها: الو الوليدة هههه مابغاتش الالة حمشات.. كون تشوفيها كي ولات حمراا ههه
خنزرات فيه وقالت بصوت منخافض: واصاافي را غانوض
كمل كلامو مع مو: هههه.. آه عطيتو ليها وقالت لك بنين، الله يعطيك الصحة.. هاهي ضربات فيه النص هههه واخا الالة.. يالله بسلامة عليك، ماتنسايش دواك.. تصبحي على خير
قطع وحطو فوق الطبلة: راها تتسلم عليك
علياء: يسلم عليها الخير ..هههه طلقو أحواش نوض نشطحو شوية
وقفات سادة البواطا وناض معاها ..بدا تليفونو يصوني مرة خرا، ظناتها الوالدة ديالو تاني لكن من تعابير وجهو لي تغيرات قشعات شكون وهو شاف فيها تايتنهد وقال
سلمان: غانجاوبها لاتزدق فارعة ليا راسي بليزابيل
علياء: واخا
فاتتو بزوج خطوات تتمايل مع الموسيقى وكلامو تايوصلها
سلمان: نعام.. انا فعلي بلفلاح.. واش متتسمعيش الموسيقى؟ “حك وجهو بضيق” مروى.. بلا داك المرض ديالك الله يرحم باك.. بغيتي تيقي هو هاداك مابغيتيش بلاش.. وااادابة علاش تتبكي؟
قطع تايزفر وقلبها كاميرا من لmsn: هاهو شفتي ..تيقتي دابة
بان فلاكام جزء من كتف علياء ووجهها وهي تتشطح شوية بكتافها .. هي تنطق مروى بصوت عالي من الغضب حتا وصلها صوتها
مروى: وهااديك القح**** اش تادير معاااك؟ ياااك خرجتي من الخدمة علاااش مازااال لاسقة فييك اااش جااامعك معاااهااا…..
قطع مزير بالعصاب وعلياء بنص عين حاضياه.. سمعات الكلام لي تقال مع دالك ماتسوقاتش حيت ببساطة متاديرش فيها راسها.. لكن هو بانت فيه تزير وبقا واقف مدة تايحك وجهو ويزفر.. رد التليفون لجيبو جاي لعندها..شافت الموسيقى تبدلات للشعبي هي تجرو من ايدو تاضحك باغاه يفوج وينسا شوية الهم
علياء: تعالى تشطح شوية يخافو عضامك ههه
نزل عند ودنها وسط الصداع وقال بأسف بنبرة صوتو: سمحيليا على الكلام لي…
قاطعاتو تتنفخ وتشطح مع الموسيقى بسعادة: نسااها صاافي هههه فوج وشطح مع رااسك ونسااا شي وحدة سميتها مروى فهاد اللحظة.. كاين غيير حنااا.. عليااء وسلماان بووحدهم ههههه
ضحك مطول فيها الشوفة.. جبد تليفونو لي حسو تايفيبري طفاه وردو للجيب فحين هي زادت جراتو للداخل مع الناس والگور بدات ضور عليه وتشطح حتا زيداتو يشطح معاها بلهلا يطريه ليه.. ناسين العالام ومستمتعين باللحظة وضحكاتهم مزينة وجوههم.. ومزينة الليلة الدافئة فعلي بلفلاح
سالات السهرة فوقت متأخر من الليل حتا عيات وتهداات.. عناء السفر كمل ليها لي خاص وكيف طلعات للطموبيل تكات ناعسة بلاما تقشع حدها سمعاتو سد الباب وديمارا ..
مدة وهي على ديك الحال حتا للحظة تفتحو عينيها تترمش فراسها ..لقاتو هبط ليها الكوسان وغطاها بجاكيط جلدية عندو اللور وهو فبلاصتو بارك مسرح فيها الشوفة وبالتقالة تايرمش.. دارت ايديها تنوض وشافت فجنابها لقاتو فحومتهم واقف هي ضحك تاتفوه وصوتها عامر نعاس
علياء: مافيتينيش؟ ناوي نبقا هنا حتا يصبح عليا الصباح
سلمان: كنتي ناعسة بحال شي بنيتة صغيرة ..ماقديتش نفيقك
تبسمات فصمت وهزات ساكها قربات تسلم عليه باسها وقال ببسمة دافية: تصبحي على خير
علياء: حتا نتا
حلات الباب ونزلات وهو بقا متبعها بعينيه حتا طلعات لدارهم عاد زاد لدارو حتا هو يرتاح
….
دازت فترة ..دوزاتها فالخدمة واللقاءات بينهاا وبين سلمان إلى مافطرو بزوج يتغداو بزوج وإلى ماتغداو يتعشاو.. لكن قبلما تمشي تتسولو أولا واش معاه مروى ولا لا وإلى كانت تتعتادر وترجع اللور متفادية الصداع ..حتا حساتو ولا يتقلق وشحال من مرة كانو فالطموبيل غادين يتغداو حتا تتبان ليها مروى من الزاجة ديال الريسطو باركة ..
علياء ديك الساعة تتهز ساكها تمشي بحالها وا لو أنه سلمان تايحاول معاها تنزل معاه متتبغيش وتاهو تايزيد بالطموبيل يتغداو فقنت آخر وراما تايسيفط رسالة لمروى بلي ممساليش ولا يختالق ليها شي عدر ..
لقاءاتهم زادت والاتصالات اكتر..
إلا فواحد من الأيام .. غبر غبرة وحدة.. وراما كان مولف يصوني يفيقها من النعاس بصباح الخير.. هاد المرة فيقاتها حكيمة وناضت دايخة تتأكد ياكما التليفون لي طفا ليها و دوزات يومها حاضياه وخاطرها ممريحهاش حاسة شي حاجة ماهياش واقعة.. اتاصلات مرة وجوج وعشرة وتاحد متايجاوب وبالها ولا غير معاه واخا رجع والتر من السفر ماتسوقاتش ليه وهو فسرها على أساس أنها مازال مقلقة منو..
فالاخير ولات تشدها البواط ڤوكال وتايعطيوها بلي تطفا الشي لي خلا قلبها يزيد يتزير.. معرفات داك النهار كيفاش داز وخرجات راجعة للدار.. طلعات رافضة تتعشا معاهم والتليفون فودنها تتصوني وتعاود والو واش ارتاحت.. حتا اخيرا تفتح الخط وقالت بسرعة
علياء: الو سلمااان؟
رد عليها صوت رجل آخر: السلام عليكم !؟
سكتات وجات باركة بالخلعة حاسة بلي غاتسمع خبر يصدمها: و وعليكم السلام.. شكون معايا عافاك؟
رد متنهد وصوتو عيان: أنا الأخ ديالو أختي.. شكون معايا؟ “تتسمع صوت بكاء مرا حداه ..طاح لسانها وقالت بزز”
علياء: انا ك كنت معاه فالخدمة.. ياك لاباس.. فين هو سلمان واقعة ليه شي حاجة؟
.
.
تباتو فراحة الله.. (ديرو فبالكم القصة واقعية وتتهضر على الواقعية بجميع احداتها.. سواءا الزوينة ولا الخايبة ..لي تتفرحنا ولا لي تتبكينا .. وأنا عليا غير ننقلها ليكم كيف تتنقل ليا من فمها للاجوندة لعندكم …اراؤكن ..وميعادنا غدا إن شاء الله)
علياء: واش بيه شي حاجة اخويا.. مالو متايجاوبش فتليفونو؟؟
تنهد وقال بأسف: سلمان اختي فالسبيطار.. عاد خرجنا من عندو
نااضت بشهقة تتفتف وتجمعو فعينيها الدموع : السبيطار.. علاش ..مالو شنو واقع ليه ماالو عاااد البارح كاان هو هاداك ..واش شي حد دار ليه شي حاجة؟؟؟ وار كسيدة؟
قاطعها الرجل تايهدن: بردي اختي راه الحمد لله كايتحسن.. كلا شي حاجة هلكات ليه المعدة والمصران حتا طاح وجبناه عاد اليوم للسبيطار.. نتي خدامة معاه؟
حطات يدها على فمها باش مايسمعش بكاها: مممم.. عافاك كيف بقا دابة.. اينا سبيطار كاين؟
رد: راه شوية الحمد لله
علياء: عافاك اينا سبيطار!؟
رد: فكلينيك ابن طفيل
شمرات بنيفها وقالت: مايكون عندو باس
رد: شكرا.. الله يعاون
قطع معاها وبركات شادة راسها وتتبكي.. اش كلا وشكون وكلو وآش داه ياكل ماكلة غاضرو.. كيف دايرة حالتو دابة كيف بقا.. بغات تهبل فداك البيت وغير تتفكر بلي خوه قال ليها سلمان تهلكو ليه المعدة والمصران تتبغي تحماق..
خيطات داك البيت بسير وآجي حتا ماقدات تصبر وهزات تتلبس حوايجها بسرعة.. غير دارية بلي الجوج تالصباح هادي..
خرجات من بيتها مزيرة على الكاب ديالها وحاطة بزطامها تحت ايدها .. توجهات لبيت خوها بالحس ودخلات عليه تتفيقو بصوت مرعد
علياء: أوس.. أوس نووض.. اااوس
قفز مغزف: ااا “توگض حال عينيه بزز وتايشوف فيها لابسة” واش خارجا !!؟
تتحيد عليه الغطا بسرعة: آه عندي مانقضي نوض وصلني للطاكسياات
أوس: دابة !؟
علياء: وانووض هاني تانتسناااك غير لبس فرجليك وزيد
نفخ وناض كايقلب على سنضالتو.. فاش كان ساكن معاهم ولفها أحيانا تاتخرج بالليل الى وقع مشكل فالخدمة.. مرة يوصلها للطاكسيات إلى كانت غاتبات تما.. و مرة يمشي معاها حتال الرياض ويبقا معاها حتا ترجع..
خرجو بجوج غادي جنبها وتايتلوا بالنعاس وهي باغة غير ايمتا توصل..
بقا معاها حتا شدات طاكسي صغير ورجع للدار.. عطاتو سمية السبيطار منتابهة مع الطريق حتا وصلات هو يوقفها العساس حيت الزيارة ممنوعة.. شافت يمين ويسار جبدات 100 درهم لسقاتها ليه فجيبو وقالت
علياء: مزيانة هادي !؟
حنحن ودار عين ميكة حتا دخلات ..جبدات مئة الدرهم خرا عطاتها للبنت تما حتا وراتها لاشومبر ديالو فين هي وطلعات للفوق تتقلب فالارقام.. لقاتها وسمات بالله عاد دورات البواني داخلة
س بهدوء فوق السرير ومعلقين ليه الصيروم, وجهو صفار وباين فيه العيا .. حالتو خلات قلب علياء يتشتت قربات لعندو ومقادراش تحبس دموعها
..فنفس الوقت بغاتو يرتاح وتتحاول ماديرش الحس باش مايفيقش.. هزات كرسي لحداه بركات تتشوف فيه وتنخصص فصمت دموعها دايزين عينيها حمارو ونيوفها كل مرة تمسحهم بكلينيكس.. حتا فلحظة حل عينيه بزز تايتلسقو حاس بشي حد معاه فالغرفة.. لكن ابدا ماتوقعش تكون هي بانت فيه تصدم ملي شافها
قال ببحة خفيفة بصوتو: علياء؟ شنو كاديري هنا؟
ردت تتنخصص: جيت.. نشوفك
ماقداتش تكمل بالبكا وهو ميل راسو بتنهيدة وهز ايديه: اجي اجي ههه اجي عنقيني الخايبة ديالي
ترمات معنقاه حتا تگلع الصيروم من ايدو وهو خشا راسو فشعرها تايضحك: البكاية ههه مالي مت ؟
شافت فيه: الله ينجيك، كيفاش وقع ليك هادشي اش كليتي؟
رد تايمسح دميعاتها: ماشي وقتو ..خلي حتا نعاود ليك
ردت بعتاب: لا وقتو.. عرفتي حاالتي هاد النهار كيكانت ولااا لااا ..هضر؟
بسمو عينيه: كي كانت ؟
علياء: كي وجهك دابة
هبط راسو تايضحك وهي تتنخصص عليه وباغة ضروري تعرف: اش وااكل هضر
سلمان: واصاافي باراكة من البكاا “مسح وجهها وجرها داير ليها بلاصة حداها خشاها جنبو”
سلمان: ششش.. أنا بيخير بردي
علياء: باينة بيخير.. مشيتي لشي سناك اليوم ولا فين؟
رد بايجاب تايتنهد: ممم.. فطرت بالبيصارا على الصباح هههه هي لي دارت ليا هاد الحالة
علياء: وتاضحك من الفوق؟
طلعات تاني شافت فيه وهو غمض عينيه مابغاتش تفاك حتا تعرف مالو
علياء: نتا متتفطرش فالسناكات وممولفش بالماكلات تما “فكرات شوية وقالت” مروى ياك؟ هي السبب
سلمان: صافي نساي لي وقع وقع
علياء: خرجتو تفطرو بجوج؟ واعااود ليا راه مغانرتاح حتا نعرف اشوقع ليك
تنهد وقال : آه مروى معامن مشيت
علياء: تلاقيتو على الصباح؟
حرك راسو: خسرات ليها الطموبيل وصونات عليا نديها للسيكليس معامن تانتعامل.. وفاش مشيت لعندها و ديناها قالت ليا نفطرو تما عاد ندوزها للخدمة.. ايوا مابان ليا مايتكال من غير البيصارا ساعة شوفي فين ولينا
زيرات سنانها بعصبية: نتا ممولفش ديك الماكلة وماتعرف ديك البيصارا ديال اشمن نهار وااخا هاكاك غير غادي وتخشي فوجهك.. غير ديااال العصاا والله
جرها لحظنو: ههه هاد الساعة غير ديال التعنااق باش نبراا.. مالك خايبة فاش تتبكي ماالك
علياء: حيت تانبكي علك يااك
باس راسها ساد عينيه : الله يخليك ليا
تنهدات: شنو قال الطبيب؟
سلمان: مانعرف دوا مع الخوادري .. هو لي قالك انا هنا؟
علياء: آه.. عييت نصوني النهار كامل عاد جاوبني
غوبش: وجيتي بوحدك فهاد الوقت؟
علياء: ماقديتش نصبر.. تلفت وكونما جيت كنت غانحماق
زاد زيرها تايضحك عاجبو كلامها وقال: عسيلة نتي والله حتا عسيلة
ضحكات بدورها وطال الصمت بينهم حتا نعس ونعسات من وراه بسرعة.. صبح عليها الصباح فديك الحالة وناضت على صوت الكلام حدا الشومبر.. وسلمان تايهمس بسميتها حتا فاقت تترمش وشافت فيه
علياء: صباح الخير
رد كايقاد ليها شعرها: صباح النور.. الواليدة والخوادري غايدخلو دابة؟
ناضت واقفة بسرعة قادات شعرها و مخرجة عينيها: ويلي.. بلاتي نخ….
تحل الباب ودخل خوه مع الأم ديالو ..بجلابة بيج وفولار بيض على راسها ..مرا سميمرة شوية قصيرة و شادة فراسها ..هازة ساك كبير ومشوار تتمسح بيه عينيها، وخوه هو نفسو البوليسي لي عتقهم ديك المرة فالرياض كيف شافتو عرفاتو..
شافو فيها وقالو السلام عليكم وهي ردات عليهم حشمانة ..برك سلمان مبسم وقال
سلمان: علياء هادي الوالدة ديالي .. وهادا خويا الكبير.. غاتكوني عقلتي عليه
ردت بابتسامة مأدبة: آه .. مشرفين اخالتي
ردت المرا بطيبوبة: الله يكبر بيك ابنتي ويحفظك لواليديك ..سمحيلينا عدبناك
علياء: لا لا مكاين عداب “هزات بزطامها وقالت تتشوف فيهم” نخليكم خاصني نمشي
سلمان سيري وارتاحي شوية
علياء: واخا “طولات فيه الشوفة وقالت بخاطر مهانيش” تهلا فراسك
تبسم: حتا نتي
خلاتهم وخرجات تتمسح عينيها وتفوه.. شدات طاكسي للخدمة مباشرة وعينيها بالنعاس مبوقين كيف وصلات طلبات منهم قهوة قاصحة وطلعات للمكتب تترتاح ودير ماساج لراسيها لي عطاها الحريق .. تحل عليها الباب ودخل والتر عاد فايق حتا هو ومبدل حوايجو ..شاف حالتها وقال باهتمام
والتر: علياء.. مالك مناعساش مزيان؟
ناضت خلاتو يبرك فالكرسي وقالت: الحمد لله
بغا ينوض لعندها وهي تتقاد ليه فالوراق عادي وببرود
والتر: واقع لك شي مشكل حتا مانعستيش؟
تنهدات: سلمان مرض وبت معاه فالكلينيك هادا علاش.. غاننزل نطل على الكليان ونشوف الطرونسپورات فين وصلو
خرجات مخلياه معاجبو حال ..تغير وجهو ملي عرف بلي على ودو منعساتش لكن ماحكرش وخلاها فراحتها ترتاح عارف تقليقتها خايبة ومتتبردش دغيا.. فحين هي نزلات مراقبة الوضع وكل ساعة تتاصل للمشفى وتطمأن عليه حتا عيط ليها والتر لجهة لابيسين. ..بركات بجدية وقالت
علياء: وي هانا
والتر: علياء.. تانفكر ندير واحد المشروع.. وغانحط الرياض للبيع
ماتفاجآتش لأنها فايت سامعة شي تنقنيقات بلي باغي يشري أرض يدير فيها شي مشروع.. عارفة بلي مايقدرش يقابل جوج بلايص بهاد الكبر زائد المشاريع فالمدن لخرا ولي على برا.. وكدالك عارفة بلي خدامة معاه بوراقها صحاح حقوقها كاملة محفوظة ومخايفة من والو..
لاهو يقدر يجري عليها والا يدردبها من هنا لحتا يبيع وتلقا حل مع الشاري ..
بجدية قالت: متأكد الحل هو تحطو للبيع؟
رد : هادشي فاش تانفكر.. المشروع لي ناوي ندير كبير بزاف ومانقدرش نهز مسؤولية الرياض وتما
علياء: بصح ..اللهم تركز على حاجة وطلعها مزيان.. ولا جوج وبجوج يطيحو
والتر: داكشي باش هاد الايام غانحطو للبيع
بهدوء قالت: لي بان ليك.. ولكن شنو هاد المشروع؟
قاد جلستو وقال: مشروع ناجح مئة بالمئة.. كاينة واحد الأرض فالخرجة ديال مراكش طريق امزميز ..فيها عشرة گطارات غانشريها وندير فيها اوطيل
بتفاجأ: عشرة گطارات و اوطيل؟ ماشي بزاف
والتر: غايجي بحال شي منتجع سياحي.. ناوي ندير فيه ساحة ديال الخيل وليبيسين ودي سويت فخمة ..ويكون تقليدي فنفس الوقت
علياء: باينة غايكون شي حاجة زوينة واخا فيه الخدمة.. الله يكمل بالخير
والتر: آمين “شد ايدها” وغانديك معايا ليه فاش يتقاد ..تكوني نتي المديرة تما
جرات ايدها وناضت: نهارك مبروك مسيو والتر
وقع تايتنهد وقال: بلاتي علياء.. نتمنى الموضوع ديال…
قاطعاتو: مسيو والتر حنا حاليا بيناتنا الخدمة.. خلي الأمر هاكدا يكون حسن
حرك راسو سارطها: واخا.. بغيت نعلمك بلي يورك جا معايا وعرض علينا نتعشاو على برا مجموعين
علياء: اوك
طلعات الفوق ولقاتو معمر سريرها بالهدايا لي جاب ليها معاه ..تتفلي وتشوف وتقلب وكل مرة تهز تاكل من الشكلاط لي جاب مع الهدايا .. اشمن يا كساوي غير لي مارك وحدة تنسيك فلخرا.. اشمنك يا اكسسوارات لي من بينهم ساعة نسائية هبلاتها وكلشي ساوي التمن.. اش منك اروايح واشمنك امعطرات ..الملاين صحيحة محطوطة تما وكيف معروف على علياء ..نونو ياكحل العيون واش تقول لا لليكادو.. مقالت ليه لا جيب ليا والا محتاجة ..
ومادام جا الخير ادا بسم الله..
هزات داكشي جمعاتو حتا تديه معاها وزادت لشغالها..
تعاملها معاه بارد مخليا الأمور للوقت كيف مولفة دير.. تشوف القدر شنو مخبي ليها.. وليهم جميع
تحط العشا للكليان فالريسطو ديال الرياض.. علياء نزلات من الشومبر قصد أنها تخرج تعشا برا مع يورك كيف تافقو.. باغا تغير شوية الجو خصوصا نفسيتها ضياقت ومابقا ليها فين تزيد ..
لابسة ليبا موس كحلة.. فوقها شورط گري ساتان حد الركبة مزيير مع شوميز گري سامبل و ساتان حتا هي وفوقها ڤيسط گري مخططة.. مع طالون عاالي حتا مالقا فين يزيد
حيدات الفيسط شاداها بيد وقالت قبلما تخرج تتأكد واش الكليان مرتاح واش خاصة شي حاجة ولا لا..
دازت عليهم كاملين وبقات آخر طبلة تاع العائلة لي تتكون من الأب والام وولدهم العشريني لكن من دوي الاحتياجات الخاصة (كيف تايقول البعض مونگوليان)
علياء: بونسوار “الحوار بالانجليزية” مرتاحين
بدات تتكلم مع الأم بابتسامة بلاما تلاحظ الولد لي عينيه على المؤخرة ديالها..
غير مقاليه راسو هز ايدو حتااا هزها وعطاها لمؤخرتها نيشان حتا غوتات لربي لي خلقها عينيها دمعت بحر الدقة وشدات وراها .. باقا ماستوعباات اش وقع واش الضو لي ضربها ولا شنو شدها داك الولد من يدها حاالف منها مايطلق وتايردد
الولد: بابا بابا بغيتها بغيت نتزوج بيهااا.. بغيتها ابابا تانبغييهاا بغييتها بغيييتها
الأب والام تفافاو و ناضو بحرج تايحاولو يجرو ليه ايدو وهي تترعد مصدومة، ايد على مؤخرتها تتبردها وايد مزير عليها الولد والدموع فعينيها من الألم
الأم: بيتر.. طلق من البنت حشومة اولدي
رد بعناد وغيرما تايزيد يزيرها: لاااااا بغييتهاااا
الأب: بييتر غانتخاسمو.. طلق البنت
بيتر: لاااااا .. هادي مراااتي بغيت نتزوج بيهاااا مغاتمشيييش
الأب والام تايحاولو غير بالسياسة يطلق منها حيت إلى خدمو العين الحمرة غايزيد يجهل ويدير شي مصيبة وعلياء نقطات بشفايف تايرجفو خلعها
علياء: طلق مني عافاك غير طلق وغانبقاا هنا بااركة معاك
بيتر: لااااا لاااااا بغيييييتهااا
الكليان كلهم فيهم تايشوفو.. شي بقاو فيه الولد وعلياء لي تحطات فموقف ماتبغيه لعدوك شي بغا يموت بالضحك حيت لاحظ الفلم ملي هز الولد ايدو وصلاها معاها وشي غير تايتفرج ومكمل عشااه ..اما علياء وحلات وحلة وحدة ..
طلقها بزز وراما واعداتو تبرك معاهم وداكشي لي دارت.. گلسات حدااه تترعد بالخلعة وهو تايدوز ايدو على شعرها ويضحك
بيتر: شعرك زويين ههه.. غاتولي مراتي وتنعسي حداايااا مغانتفارقووش
حركات راسها بزز والاب تايسايس: بيتر ..خليها غير تمشي تشري شي حاجة وترجع
الأم: آه اولدي الحبيب ياك تتسمع لكلام ماماك
بيتر: لااااااا مغاتمشييييش غاتبقااا معااياااا مراااتي
عرقات جبهتها من الارتباك وهو مو وباه كلها ومنين داز ليه
..بغاتو غير يطلقها تانية وحدة باش تهرب ساعة شدها شدة العما فالضلمة وكل مرة تلوي ايدها وتقول ليه
علياء: بلاتي غير نحك ايدي.. راه مغانمشي فين غير نحك ايدي
غوت برفض باغي يدمع: لاااا.. بقاااي معاااياا
الأم: بيتر طلق منها راها غير حداك انا غانشدها ليك إلى بغات تمشي
بيتر: لااا لااا لاااا لااا
الاب شاف فمراتو متنهد وهز التليفون نايض من حداهم وعلياء تترمش فيه بأمل..
بدا يتكلم مع شي شخص بصوت خافت ..حتا حرك راسو وتم راجع لعندهم هاز التليفون وقال بابتسامة
الأب: بيتر.. العم سام بغا يتكلم معاك
بيتر: ش شنو بغا
الأب: هاكا تكلم معاه وتعرف
خدا التليفون متردد وقال: الو عمو سام
بدا الرجل تايتكلم معاه والولد تايجاوبو بآه.. جهد ربع ساعة وهو غير تايحاول يقنعو حتا طلق من علياء مقلق ومهبط راسو ..قطع وعطا التليفون للأب ديالو وهي كيف حيد عليها ايدو هزات الفيسط ديالها ودارت ليهم من هنا داز، خافت يغير رأيو ويرجع يشدها.. ماتنفسات حتا طلعات مع الشيفور وزاد بيها ناحية المطعم لي دارت تتلاقا فيه معاهم
..صونا تليفونها فالساك جبداتو وكان سلمان جاوبات وهي حاطة يدها على قلبها وتاضحك عاد سرا معاها اش وقع
علياء: الو هههه
رد تايضحك بصوت خافت حتا هو: مسا الخير هههه امالكي تاتكركري
علياء: وتعرف اش وقع ليا دابة تمووت عليا بالضحك هههه
سلمان: هههه خبار الخير المعلمة
بابتسامة: كل الخيير.. كي بقيتي بعدا شوية؟
سلمان: الحمد لله مازال عايش ههه مالك اش وقع ؟
علياء: بلاتي حتا نرجع للدار ونعاود ليك ..خديتي دواك ياك ؟ عنداك تكون تتهاون عليه
رد: خديتو خديتو.. تهلاي فراسك و امسية سعيدة توصلي لدارهم ڤيپي
بضحكة عالية: ههه سير سير
قطعات معاه وهبطات قدام مطعم الفندق وراما فتح ليها الشيفور الباب ..عطاتهم سميتها ووصلوها للطبلة لي حجزو لقاتهم تما حاطين مشروبات وتايتسناوها حتا توصل عاد يطلبو العشا
بابتسامة لبقة قالت: مساء الخير
سلمات على يورك وحبيبتو ومدات ايدها لوالتر باركة جنبو وبأدب نطقات
علياء: سمحولي تعطلت عليكم
رد يورك بتفهم: ماعليش الغزالة ..
طلع ايدو للسيرڤور وهي مع اليكس تتكلم وتايتبادلو أطراف الحديت …حداهم والتر ويورك جابدين موضوع المشروع الجديد تايتناقشو فيه وهي مرة مرة يدخلوها معاهم فالكلام وتاياخدو برأيها
كملات الأمسية بهناء ورجعات لدارهم بعدما وصلوها..
كملات السهير مع سلمان فالتليفون عاودات ليه لي وقع وكيفما قالت وقع.. طاح عليها بالضحك مرة يشد فيها مرة يواسيها حتا تايفقصها وتتبغي تقطع ويعاود يسد فمو ..ماحسات ايمتا نعسات وايمتا رجع صونا ليها فالصباح.. كيف مولف ديما خاصو يفيقها بصباح الخير من صوتو
…
مر اسبوع بالتمام بلاما تشوف سلمان.. الاتصال بينهم مستمر وحيت شدها بمرضة فدارهم مازعماتش تمشي تشوفو حدها تاتاصل بيه ويشدو الجموع بالسوايع ليل ونهار صباح وعشية
..حتال نهار تكلم معاها ودارو يتلاقاو فكافي ..توحشها وتخنق من البركة فالدار وحتا هي بكترة الشوق وصلات ساعة قبل وبركات على الجمر تتسناه .. قلعات طموبيلتو من بعيد كحلة تتبري بلاصاها قدام الكافي ..
تبشرات ملامحها وهو نزل بفوقية زرقة جار بلغة فرجليه وهاز التليفون مع سوارتو والنضاضر.. تصدمات فاش شافتو كيفاش ولى والدم فجسمها حبس
سلمان ضعاف بلا قياس ..الصفورية فوجهو وعينيه واخا مخبين بالتبسيمة لي داير فيها ولكن باينة كحوليتهم وكيفاش دخلو وتكمشو..
وقفات بزز جرها بلا يدوي وعنقها كايفدي فيها شوقو وقال تايضحك
سلمان: العسيلة دياالي هههه ناري شحاال توحشتك
كتافها حسهم تايتحركو وسمع بكاها لي ماقدراتش تسيطر عليه.. جمع حجبانو وبزز باش باعدها عليه هاز وجهها لعندو بخوف
سلمان: علياء ؟!! شوفي فيا ..تأ والبكا لااش أختي ؟؟
صونا تليفونو ولاحو فوق الطبلة بلاما يرد البال شكون وهي بركها تتنخصص خدا ليها قرعة الما شربات وعلى كتفو تكاها تايتنهد ويهدنها
سلمان: واش دابة مت ولا مالي.. الحمد لله ازمة وتفوت مالنا على هاد الحالة كاملة
ردت تتنخصص وقلبها ضارها من جيهتو: ماتقبلتش نشوفك هاكدا.. ياك مأكد الطبيب قال ماعندك حتا حاجة خايبة؟
رد تايطنز ويقاد ليها شعرها: كون قال اختي مانعاودش لك .. تولي طايحة ليا هنا ويسيفطني لمكي على شبابي للروضة
زادت تتبكي: حشومة عليك
تنهد مألم: علياء.. واعافاك باراكة
باس راسها وقلبو حكو فاش شافها تتبكي.. حتال للحظة ماحس إلا ودمعة منو نزلات بغا يمسحها وطلعات راسها مسحاتها ليه وهو فعينيها تايشوف مدة وقال هاز ايدو لخدودها الفازگين
سلمان: تتبكي عليا العسيلة
علياء: دنوب من خرجو فك الصگع
بسم بدفئ: عرفتي مي وختي ومابكاوش عليا قد هاكا.. باراكة ماتهلكي هاد العوينات
باس بين عينيها وهز سوارتو: اجي معايا
حل ليها باب الطموبيل طلعات تتمسح وجهها حابسة البكا وبردات شوية..
برك حداها وعاد غايديماري صونا تليفونو وجاوب فالبلاصة داير اوطباغلوغ وسكت تايشوف فالطريق ببرود.. مانطق بحتا حرف،
شافت فيه علياء مستغربة وشافت فالتليفون ساكتة ..حتا نطقات مروى وعلياء تجمعو حجبانها
مروى: خرجتي ؟
رد: مممم
مروى: علاش؟
سلمان: تخنقت فالدار وبغيت نبدل الجو
رجعات سكتات وحتا هو مبراااد وعلياء تتسمع وساقلة
مروى: معامن دابة نتا؟ فينك
ضحك باستهزاء: نورمالمو الناس تتسول كي بقيتي وباش تتحس
مروى: ملي راك خارج ادا وليتي بيخير.. عنداك غير تكون مع هاديك عاود
سكت مبسم والسقيل فالطموبيل حتا شاف فعلياء وقال غامزها
سلمان: مالك ساكتة.. شنو خفتي منها ههه
ظناتها قطعات وقالت تتحصر: اخويا فعواانك
جاوباتها فالبلاصة تتغوت وحلوقها بغاو يخرجو: كيفاااش فعواانو واااش الق*** مازااال ماباااغة تفهمي راااسك وتعطييه بالتيسااااع ..وااااش تتسنااااي يقووولهاااا بفمووو عاااااااد تفهمي راااسك ياااااك مابقااات جامعااااكم خدمة ااااش مازاااال تادييريييي معااااه.. هضري جاااااوبيني
قطعات ورجعات تتصوني.. جرو سلمان ببرود طفاه وعلياء قالت بصوت هادئ ماحرك فيها كلامها والو
علياء: هادي إلى مماتت بهاد الاعصاب لي فيها ماعندو مايقتلها
سلمان: نسايها و اجي لعندي
جرها تكات عليه بابتسامة وديمارا تايتسارا بيها دروب مراكش وتايتكلمو.. متلفين الوقت لي متايحسوش بيه من الأصل فاش تايتلاقاو وكل مرة تسول فحالتو وتتأكد واش تاياخد دواه فالوقت ولا لا
…
وصلها لدارهم تبدل حوايجها وبقا فالطموبيل تايتسناها.. دخلات تاضحك وعينيها فرحانين تبعاتها حكيمة للبيت تتمسح ايديها بفواطة وتقول
حكيمة: كاين عرس عند عائلة صاحبة جداتك هاد الأيام
ردت وهي تتلبس كسوة زرقاء مشبكة من العنق والكمام ومن لتحت طويلة
علياء: غايكون قبل عرس بنت خالي
حكيمة: ايه وخاصناا نحضرو ليه ..واهاني علمتك لاتقولي مادرت بحسابو
علياء: واخا الالة
قادات شعرها وباستها: خليت لك الراحة
شداتها وقالت برجاء: بلاتي، ياك ابنتي ماتفارقتيش مع خطيبك .. درتي عقلك فراسك ياك؟
علياء: مالي اماما بنت ليك هبيلة
حكيمة: هادا لي تاديري هو البهلان بعينوو ..واش مافكرتيش فالنااس ااش غايقولو علينا إلى عرفوك تفارقتي معااه ونتي ماخليتي سفرياات ماخليتي مباتات فداارو؟
زفرات: هاد الساعة ماتفارقت مع حد.. ولكن داك السيد صافي خاطري هربات ليا منو
حكيمة: ابنتي الله يهديك واش غير لي هربات لينا منو خاطرنا غانفرتكوها معاه بلاما نفكرو فلي جاي.. مالو اش دار لك بالسلامة اش دار حتا يستاهل بحال هاد الجزاء؟
علياء: دار تصرف ماعجبنيش وماشي بسهولة غاننساها ليه ..واخا تانحاول والو
ضمات ايديها تتسنا جواب: اش دار
تنهدات: صافي خليني نمشي غادة غير نتعصب
حكيمة: وا الله يرضي عليك فكري مزيان الله يرضي عليك ويكملك بعقلك
ردت وهي خارجة: آمين
…
ركبات معاه مبسمة وزاد للمطعم فين مولفين يبركو بزوج .. تغداو تما أولا عاد وصلها للرياض حيت عندها الخدمة، سلمات عليه وهبطات داخلة حتا وقفاتها وحدة من العاملات هازة بريات فيدها
البنت: مدموزيل علياء.. هاد لي فاكتوغ ديال مسيو والتر نساهم فوق الطبلة
قراتهم بعينها وكانو رسائل الضرائب فقط متعلقين بالخدمة: واخا ميغسي
طلعاتهم لبيتو وحطاتهم فوق الطبلة هي تنتابه للبلاكار ديالو محلول
..الشومبر بابها مفتوح ممكن يدخل أي واحد ويهز منو شي حاجة كلشي ممكن..
بغات تمشي تسدو هو يطيح منو ملف طبي اصفر بغلاف سميك ووراقو تشتتات فالارض.. تحنات تتنفخ هزاتهم ورقة ورقة.. حتا تتصدم فصورة لعضو دكري ..تهز حاجبها وهزات الوراق تتحاول تقراهم لكن كانو باللغة الألمانية فهمات فيهم فقط اسم ڤالتر.. مما اكد ليها أن الملف تايخصو.. ولكن شنو فيه مازال مافهمات
هزاتهم بسرعة لبيتها صورات كلشي ورقة بورقة.. عاد رداتهم لبلاصتهم ورجعات للمكتب جبدات البيسي ديالها تاع الخدمة وبدات طرجم فدوك التصاور كلمة بكلمة وتتحاول تفهم
سمعات خطاوي جنب الباب سدات البيسي وناضت مزيرة على التليفون فين كاينين التصاور ..خرجات من المكتب دايزة من حدا والتر ويورك لي تايتكلمو دخلات للريسطو عند الكليان تتكمل شغالها لي بقاو هاد النهار وبالها مع الملف، ضرها راسها تعرف شنو فيه وإحساسها تايقول بلي الأمر متعلق بيها حتى هي..
ادن المغرب و خرجات راجعة لدارهم تلاقات بمها حدا الباب تتسناها لابسة جلابة خضرة مليفة بالرانضة تحتها قفطان جوهرة خفيف هازة بزطامها وكادو مربع فايدها.. حكيمة غير شافها طلات على ساعة اليد فايدها وقالت
حكيمة: اتعطلتي
رمشات فيها تاتفكر واش معروضين عند شي حد ونسات: غادين لشي بلاصة؟؟ “شهقات متدكرة* الخطوبة ديال سارة !؟.. ويلي مافكرتيتيش
حكيمة: وعلاه مصوناتش ليك كاع اليوم؟؟
ردت بحزن: لا، غاتكون تشغلات مع التوجاد.. وحتا انا مشااات من بالي فمرة
جراتها: وازيدي زيدي، مزيان لي تانا معروضة معاك أما كون عولات على الخلا مسكينة
علياء: نمشي معاك هاكدا عادي؟
حكيمة: على مزيناتك جاتك الكسوة ..وحتا الكادو هاهو صواب وصافي واخا تعطاالنا
تنهدات باحراج فاش وقفو قدام باب دار سارة ومها تادق.. مرض سلمان والاحدات لي وقعات نساوها فخطوبة صديقتها المقربة وكونما مها كون عمرها تفكر حتا ايمتا عرضاتها
.
رحبات بيهم أم سارة ودخلو لقاوهم حطو اتاي تايديرو كسكروط.. غير العيالات بوحدهم والرجال خارجين ..سارة حدا مها باركة طايح عليها السر ولابسة لبيض ماقدات حتا توقف تحنات علياء سلمات على الكل عاد دازت عندها بابتسامة سلمات وقالت فرحانة ليها
علياء: الله يكمل كلشي مبارك ومسعود ههه والعقبة للعرس
سارو: اميين هههه “قالت بهمس”واا تعطلتي المعلمة تاقلت هاد خيتي مابات تجي
بركات حداها وقالت: غاسكتي كونما ماما كون نسيتك ههه
جبدات فيها عينيها: ايااه .. الخدمة ولات تنسيك فصحيبتك لا لا اهيااتا حالك مابقا عاجب
تنهدات: ماشي الخدمة.. بالي ممعياش بسبب شي مشاكيل وصافي
سارة: ياك لاباس اتا اش تما؟
علياء: حتال من بعد ونعاود ليك
سارة: عرفتي شنو نوضي نوضي نطلعو للبيت الفوق صهدت هنا
ناضت معاها: واخا زيدي
يتبع
شاركنا رأيك في هذا الفصل 🌹