-ماما انمشيو عند الميمة؟؟
-غادي نمشيو عند الميمة توحشتيها ؟
-بزااااف الميمة كنبغيها بزااف و كنبغي البلاد و كنبغي المعيزات و البقيرات و الفروج..
-و ياختي اخلي ليا البقيرات و المعيزات
بدات كتعيط
– آدم آدم يلاه اولدي… جا آدم كيجري شد لختو فيديها و سبق ماماهم للطموببل
جرات الباليزة و سدات الباب.. حطات الباليزة فالكوفر و طلعات حدى راجلها..
سي محمد : اتدي غير باليزة وحدة؟؟
– اه غير وحدة باركة الحال سخون و مع البلاد ايكون الموت ديال الصهد داكشي باش ديت غير حوايج خفاف ليا و لدراري..
سي محمد : و الله الى كنت بغيت نكلس معاكم مكاينش بحال العروبية لاهم هي و لا المدينة..
– كول و كان كيعجبك الماكلة 😂..
سي محمد : و نكرو كتحل ليا الشهية تم و حتى الدراري كيلقاو راحتهم.. بديعة شنو بان ليك حنا كاع نرحلو و نسكنو تم..
بديعة : كتكولها 100مرة زيد و كان راه مي كتسنا… دارت الصمطة و طلات على وليداتها آدم و ريم واش بخير.. ديمارا سي محمد و شدو طريق لتارودانت… مدينة بديعة و فين تزادت واخا هوما ساكنين فالخرجة شوية حدا واحد الزاوية ضاير بيهم الطبيعة و حداهم واحد الرياض معروف تما..وصلو بالنهار طنطينة و شمس و دنيا خاوية حاونت واحد لقاوه مسدود جاب الله تقدات بديعة فالطريق باش مدخلش بيديها خاويين على مها و مرات خوها و وليداتو…
وقفات بيهم الطموبيل قدام الباب.. يلاه ايخرجو تحل الباب خرج خوها.. عنق سي محمد هو اللول عاد عنق ختو..
سي محمد : اهلا اهلا بسي رشيد لباس عليك اخويا توحشناك..
رشيد : حتى حنا توحشناكم اخويا… بديعة كي دايرة اختي.. شاف جيهة ولاد ختو.. اهلا اهلا بحباب عمو (عنقهم)..
بديعة :خويا توحشناك زعمة الما جينا حنا ماتجيش نتا و تجيب دراري و نعيمة؟؟
رشيد : راكي عارفة اختي الى مقابلت المسايل دياولي و الخدمة مكاين لي يقابلها ليك..
خرجات نعيمة دايرة طابلية و كرشها بدات كتبان و تكبر..
نعيمة :مرحبا بختي بديعة مالكم كالسين على برا اويلي دخلو… عنقات بديعة و سلمات علة سي محمد و باست دراري..
دخلو كاملين للداخل الدار كانت بلدية تقليدية كبيرة و باردة على برا.. خرجات واحد المراة قصيرة شوية و ملامح ديال الزين مزال باينة فوجهها تكون فديك 60 من عمرها.. غير شافوها ولاد بديعة مشاو كيجريو عندها عنقوها… عنقاتهم بالجهد وقفات تنحات عليها بنتها عنقاتها… و سي محمد باس ليها يديها..
بديعة : ماما توحشتك بزااف والله إلى توحشتك..
– حتى انا ابنتي توحشتكم كاملين.. كي درتو مع الطريق و مع شموشات..
سي محمد : و شميشة اخالتي حورية
حورية : و هادي وقتها اولدي الحمد لله على عطية الله…
سي محمد : الحمد الله.. علاش مجلستوش فالرياض ايكون بارد ليكم على هنا..
رشيد :عارف الوليدة مكترتاح غير هنا
– على الطبلة ديال الغدا تجمعو العائلة على طبسيل بدجاج البلدي و الزيتون مع خبز افارنو مخلاو فيه والو المكلة الصحية كتاكل و عارف اش كتاكل…
آدم : لميمة تعاودي لينا الخبير توحشناه..
بديعة : خلي جداك اولدي حنا يلاه جينا..
حورية (ضارت فيها) : و ليتي تهضري فبلاصتي ابنتي.. نعاود لوليدي حبيبي و لكن خلي تال الليل يدخلو الفريرجات ينعسو و الطيور يدخلو لعشهم و لبكيرات يدخلو لكوري ديالهم و نبقى غير انا او وليداتي نخبر عليهم حتى يطيب نعاسهم
آدم (فرحان) :
– انبقى نحسب نحسب حتى يجي الليل و نطل على البقيرات واش نعسو و طويرات و على دجيجات..
بديعة : ولفتيهم اماما قاعدة ولاو حتى الهيه فدارمينعسوش إلى محاجيت ليهم و كاع القصص لاحوهوم كيقولو ليك لا بغينا حجايات الميمة مبغيناش هادشي..
حورية (كضحك) :
– و علاش كاين ما حسن من خبير زمان و كلام زمان الموزون الحلو بحال الشهدة ابنتي اما دابا واهلي مبقا لا كلام زين لا والو..ولات الهضرة مافيها لا فايدة لا معنى خليني و كان ساكتة..سلاو الغدا و وليدات بديعة او وليدات خوها كيتسناو الليل امتا يوصل باش الحنانة حورية تعاود ليهم الخبير.. لي كيجلس و يقابلها و يشوف فوجهها عينيها الصغار المرمشين و فمها الصغير واخا كبرات مزال زينها باين سالفها لي مزال طويل كطليه بالحنة و ظفرو و كاين لي كيتوسد ركابيها و تبقا دوز ليه على راسو و ظهرو حتى كيطيب نعاسو.. حتى من لكبار كيتسنطو ليها كديهم بكلامها الحلو و الموزون و ضحكتها البشوشة كاع جيرانها كيحماقو عليها و نهار زين فاش يكلسو معاها على طبلة وحدة و تعاود ليهم… من ورا الظهر دخلات بديعة تريح راسها و ترتاح هيا و سي محمد باش ورا العصر يتوضى يصلي و يشد الطريق يرجع لخدمتو.. اما حورية كتكا فبيتها هازة تسبيح كتسبح حتى كيديها النعاس… لي يسمع هاد الكلام يكول راه المرا فالتمانين و هيا يلاه قفلات 65 عام.. عندها ربعة ديال الولاد بنت وحدة و 3 ديال الدراري واحد معاها و جوج فالمدينة واحد خدام لاخور كيقرا هاد العام عندو لاخر فلتفاك… اذن العصر ناض سي محمد توضى صلى صلاتو تسيفط معاهم و مشا… وجدات نعيمة كسكروط القهوة او واحد الكيكة كد الرويضة و مسمن مدهون.. كليو مجموعين على الطبلة ياكلو و يهضرو هضرة تجبد هضرة اما الوليدات الصغار غير همهم امتا تبدا جداهم تحاجي تابعينها من بيت لبيت لاصقين فيها.. ادن العشا صلاتو حورية و خرجات على برا كاينة واحد الكلسة مفرشين زرابي و سدادر مسقف بالخشب تما كيكون بارد بالليل… حيت الجو سخون… مع جلسات تجمعو حفايدها حدا رجليها… ريم تحت يديها.. و آدم حط راسو على رجليها.. اما كوتر و نعمة كلسو مربعين يديهم مقابلين مع وجها و الحماس باين على وجههم…
ريم :ميما بكيرات نعسو و دجيجات نعسو و عاودي لينا.. خرجات بديعة كالسة جنب مها كتكونيكطا مع راجلها…
بديعة : منساوش كيتسناو فيك ههه
حورية : كالتها الكبيرة تبارك الله.. تكاو ولاد بديعة على رجليها اما ولاد ولدها تجمو عليها بشوق كيتسناو امتا تبدا… شافت فيهم و تبسمات و نطقات
حورية : كان يا مكان.. واحد التاجر سميتو مومن عايش بخير و على خير هو و مراتو الغالية حتى جا نهار و ربي رزقهم…
رزقهم الله ببنية وحدة سماوها حورية … بحالي (ضحكات)…كانت عزيزة و غالية عليهم و المخيرة ديالها خاصها غير تكول بغيت…دازت ايام و حورية بدات كتكبر و تبان…سالفها واصل لظهرها و ضحكتها تفتن العباد…بنات القبيلة فينما دازت يتهامسو بيناتهم و يضربو عليها المعنة…و هيا دغية كانت كتفهم…الحر بالغمزة و العبد بدبزة و هي حرة غرة… قلبها بيض و صافي بحال الحليب و لي فقلبها على لسانها بعد المرات تقول هادي غير هبيلة و تشالي بالحجر.. و مرات تقول هادي عقلها يتوزن بالذهب… اوا الغالية مكملاتش فرحتها ببنتها كانت متمنية تشوفها عروسة… ساعة مكمل الله خدا روحها لعندو و خلات حورية امانة فرقبة مومن… باها التاجر عقلو كان يوزن قنطار شي ناس كانو مسميين عليه حديدان دكي و بعض المرات ميكساب غرام دالعقل لا نصو… بقا هو و حورية الراس فالراس… يجيبها من فم السبع و يوكل بنتوو يكسيها
كبرات حورية و وصلات لسن الزواج… كانت كتبغي الخير و تبغي ديرو و تبغي تعاون الناس و لكن مسكينة خيرها كيطيح فبير نيتها و قلة نية ديال الناس متلقاوش… هيا كتمشي بقلب صافي و هوما كيمشيو بموس حافي … اوا كطرا فيهم و تخرج فيهم عند بالهم باللي حورية الزغبية هيا مولات دعوتهم… اوا هما لي كيقلبو على جوة منجل و طربوش لعجل و سروال الجمل… اما حورية مسكينة مامنها والو سير مع خوك بالنية تبان فيه تبان فيه و هما و هما كيدخلو على الطمع باش يضحكو فيها الناس و ربي كيعطيهم على قد نيتهم…
¶¶¶¶
حدا الواد جالسة مسندة ظهرها على الشجرة شادة عندها و كتلعب بواحد الوركة… حاطة رجليها الصغار البيضين على بلغتها لي عامرة تراب و شادة حنكها باليد لوخرا كتخمم… مرة تنهد تنهيدة طويلة و تشوف فالواد… مرة تهز راسها و تشوف فالشمس دغيا كتخطف عنيها و تهبط راسها… لابسة واحد القفطان لونو باهت مغطياه بواحد الحايك بهت منو… مكحلة عينيها و كدور فيهم… تمو البنات جايات غير سافة و كلسو يتغامزو عليها و يضحكو… غير شافتهم او وقفات…
يلاه اتعطيهم بظهر وقفاتها وحدة فيهم:
-حورية ا حورية فين غادية اشفتينا و بغيتي تمشي ياك لاباس ؟…ضارت حورية عندهم..
-الجو تبدل و الشمس غابت و غاب معاها نورها …و مكاين لاش نبقى كالسة نخاف دركني الشتا و العجاجة فطريق ..و حتى انت افطيطيم حسن ليك ارجعي لداركم لا درك العجاجة و طيري و ملقاو مانجمعو فيك ..
فطيطيم بدات كتكدد و مرضاتهاش على راسها حيت ضعيفة و سم كيقطر منها … و قدام صحاباتها الكلام لي عطاتها حورية كيطلع و يهبط فحلقها بحال السم..
فطيطيم (كتعوج فمها):
-ايوا انا بعدا إلى طرت مسيري نرجع لداري ..اما انت و باك سي مومن كابقا ليكم رجوع لا لداركم لا للقبيلة ههههههه ( بداو البنات كيضحكو)… غوبشات حورية و قربات لفطيطيم لي رجعات خطوة لور …
حورية: كفاش؟
فطيطيم : مسكينة على مفخباركش لالة العالية مرات السلطان امرات باش تجيب راسك انت و باك و لا تخويو لقبيلة مبقاتش بغات تشوف وجهكم من ديك الفعلة الكحلة لي درتي ليها لشعرها و خليتيه ليها رطب من الركبة يا الهبيلة😂😂…حورية وحلات ليها فحلقها ماكرهاتش تنتفها و دير فيها يديها و لكن ماشي وقتها دابا خاصها درك باها قبل مايجي عوين السلطان و يديوها هيا و باها و تأكد واش هضرت فطيطيم بصح و لا غير كذوب … ضارت و خلاتهم ..
فطيطيم (كضحك وراها ) :
– وسربي عنداك لا تعطلي هههههههههه …
مداتهاش فيها حورية جرات حايكها و شدات الطوالة لدارهم … قربات لحدى دارهم أو وقفات كطل ياكما يبان ليها حتى واحد من مالين القصر ..مابان ليها حتى واحد شداتها جرية لدار …كدق تحل الزكروم و حل باها جبدها من يديها طل وراها و سد الباب بالزكروم ..
مومن: افين كنتي اهاد البنت مخليت فين قلبت عليك؟
حورية(باستغراب):
-جنب الواد أبا علاش؟
مومن (خلاها و دخل تبعاتو كيبان ليها جوج قفاف و حوايجهم مجموعين فرزامي ):
-زيدي معندناش الوقت لملاغة مولاي الحاكم كيقلب علينا على ديك الفعلة لي درتي لمراتو لالة العالية …
حورية: هي كلام فطيطيم بصح ؟
مومن: القبيلة كلها كتهضر علينا مبقا عندنا كعاد فهاد القبيلة…
حورية ( كتغبن ):
-أنا مدرت والو هي لي نياتها خايبة شادة فيا مع الخدم ديالها و منين كالو ليها حورية سالفها طويل و زين و تخليطة لي كدير ليه هيا لي خلاتو ليها هكاك ضحكات فيا مخلات المقملة و المعمشة …و سيفطات ليا باش تعرف شنو كندير باش شعرها لي بحال الحلفة دالحمير يرجع بحالو بحال العيالات … صدقات نيتي خرجات فيها هوما لي نيتهم خايبة أما أنا معليا والو…
مومن(كيشوف فيها بعينيه لي بحال إلى مكحلين و هوما هكاك دايرين شعرو الشايب و لحيتو عاطياه واحد الوقار و نفس الوقت تشوف عينيه يبان ليك الدها):
-ازيدي كدامي تكون نية و لا قلة النية ماشغلي شاي دابا خاصنا نخرجو من هنا الوجه المشروك عمرو مايتنقى… و كل واحد ابنتي ايتخلص على فعالو و عمالو اتهناي… زيد عليها بلا بيهم مابقا لينا كعاد من بعد المرحومة … كاع ركاني كيفكروني بيها و الله أعلم نلقاو الخير فبلاصة خرى يلاه يلاه ابنتي … سكتات حورية و حنات الراس …عاونات مومن حتى دارو المونة وزاد و رزمات ديال الحوايج على ظهر الحمار … و خرجو من الدار خلاو غير الحيوط … جوج مانطات و جوج حصاير لي كانو يكسابوهم باعهم مومن و زادهم على الفلوس لي عندو باش يقضيو إلى حصلو فشي بلاصة …خرجو بلاما يشوفهم شي حد و شدو الطريق … سامحين فدارهم و قبيلتهم و الناس لي كبرو معاهم …شادين الرحال ..لقبيلة مامعروف يمينها من شمالها و لا ساروت بابها..
حورية عيات مامولفاش بالمشي بزااف البلغة لي كتكساب تقدر فاي وقت تقطع و تبقى بلاش … قطعو طريق طويلة و لا طريق بغات تبان و لا دار و لا دوار … حتى من الما لي عندهم باغيين يتكايسو عليه باش يكفيهم … وقفات حورية و كلسات مفرقة رجليها … ضار مومن عندها لقاها جلسات كتنهج …
مومن: شتك جلستي ..
حورية ( كتلهت):
-واعييت بزااف انا غير قليلة الصحة و مخلية عليا واش بغيتني نكمل أبا بغيتي يخرج ليا الفكيع فوجهي بالشمس و انا كنفتن و على مزيناتي حرام عليك ..
مومن (شد راسو ):
-كتفتني زينك انحصدو بيه و لا نزرعوه و ينبت لينا قمح و شعير انوضي قبل لا يروح علينا الليل و يتلكاو لينا القطاطعية و يديو لينا هاد الفليسات لي كنكسابو و ديك ساع نكلسو نداليو بالحجر نصدقو لا تيتي لا حب الملوك ..حورية وقفات بزز كتسخف و تجر فرجليها … و تبعات مومن من اللور ..دركهم الليل و ملقاو فين يباتو غير جنب الواد بانت ليهم واحد الخربة باينة كانت دار و تخلات غير حيوطها لي مزال واقفين ..
مومن: غادي نباتو هنا بعدا هاد الحيوط غادي يحميونا من البرد و من القطاطعية … فرشو حدا دوك الحيوط … ناضت حورية جمعات شي عواد شعلو بيهم العافية باش يدفاو …تقاسمو شوية دالخبز و زبدة ..و بالعيا توسدو الريوس و نعسو …
فاقت حورية على النغيز و الهضرة ديال شي رجال مافهماتش منها والو بدوخة ديال النعاس … حلات عينيها مزيان بانو ليها جوج رجال كيشوفو فيهم باستغراب .. فاق مومن و جمع الوقفة …
مومن : ياك لاباس؟
اسيادي اش كديرو هنا شكون نتوما و شنو كديرو فهاد المكان ؟
مومن : دركنا الليل انا و بنتي و مالقينا فين نباتو من غير هاد المكان علاش هاد الحساب و كثرة التسوال ..؟
-اسيدي حنا بغينا غير نصحوكم و نصيحة ماتقتل ما تحيي ما ترشي … هاد البلاصة لي نتوما ناعسين فيها راها مامزيانة شاي راها ملعونة ..
مومن ( شاف فحورية و جاتو الضحكة ) :
-الله يهديك اسيدي شكون مزال كيتيق بهاد الخرايف ..
اسيدي كنهضر معاك هاد الحيوط لي كتشوفو كانو دارها سميتها لالة زهور مرات التاجر سي عبد الكريم الله يواليه برحمة الله لا هو لا هيا واخا مدارت علاش ترحم … كانت هاد المرة كتفتن بزين … و مع سي عبد الكريم كيخرج لسواق و كيغبر ليلة و ليلتين كانت كدير مابغات … تخرج و دير راسها تنقي الزرع و تغربل الشعير … و هيا بهكاك كانت كتصيد كل راجل من رجال القبيلة … و نهار توفى راجلها الله يرحمو
مومن : الله يرحمو
مشداتش حق الله مزيان … و كالو بلي تلعنات أو ولات بغلة بنهار تكون بحال العيالات .. و بالليل كتولي بهيمة دور القبيلة على قدها وتقلب على شي فريسة ..
مومن ( ما متيق والو ):
اوا الله يحفظ الله يحفظ كوليا اشريف الله يجازيك بيخير شحال بعيدة القبيلة لي قريبة من هنا ..؟
-قبيلة بنشريف ما بعيدة شاي بزااف إلى تحركتو دابا الظهر تكونو تما …
مومن : الله يرحم بيها الوالدين … خلاوهم دوك جوج الرجال مشاو فحالهم و مومن كيضحك عليهم و على خرايفهم …
مومن : لا حول ولا قوة الا بالله كاليك كتولي بغلة استغفر الله العظيم .. ضار كيقلب على حورية لقاها حدى البغلة ما عرفت شنو كدير ..
مومن : وا حورية افينك اهاد البنت الله يرزقني الصبر ياربي.. ضارت عندو و تمات جاية قصداه..
حورية : با شنو كانو كيقولو ليك دوك. الرجال.. ؟
مومن : زيدي نمشيو فحالنا كيخرفو عليا عند بالهم انا غشيم ايديروها بيا.. و يخلعوني… جر مومن الحمار ديالو حتال جنب الواد.. مد يديه و خدا شوية ديال الما غسل بيه وجهو و يديه دوز على راسو و رجع لبس الرزة ديالو… و رجعو شدو الطريق هو و حورية… لي كل شوية تسخف عليه… وقفها مومن… حدا ظل واحد الشجرة جبد شوية ديال الخبز عطا ليها و ليه و كلس يرتاح … سرح عينيه بعيد كيفكر و يخمم 100 تخميمة و تخميمة وحدة تديه و لوخرا تجيبو… دار عند حورية لقاها عقلها غايب مفرقة رجليها و هازة غربال فيديها.. غربال كبير و صفر واخا من الشوفة دايز عليه شحال و لكن كيبان مزال فيه ميدار.. كتهز التراب من حداها و ديرو وسط الغربال و تغربل فيه و الحجر تعزل كتلاوحو و تخلي غير التراب الرقيق…
مومن : بعد المرات كنشك واش بعقلك و لا هارب عليك ابنتي واش ملقيتي ميدار و منين جبتي داك الغربال؟.. هزات فيه حورية عينيها :
غير لي كيغربل التراب راه معندو عقل ابا ولا هبيل مكاين ميدار كنحرك اديا شوية مفيها باس…
مومن : و فين لقيتي داك الغربال ؟
حورية : فاش كنتي كتهضر مع دوك الرجال لقيتو حدى الحمار و هزيتو مزال صحيح فصيح كلت متعرف نحتاجوه فشي حاجة و ينفعنا…
مومن : نوضي وكان نووضي خلينا نكملو الطريق… وقفات حورية كتسوس حوايجها… ساست الغربال و نفضاتو ساطت عليه باش تحيد منو الغبرة و التراب لي لاصق فيه.. مع اتهز راسها مبان لا باها لا الحمار… دورات راسها يمين و شمال مكاين حتى واحد غير هي و الغربال لي فيديها… بدات كتعيط على مومن و ملقات جواب…
حورية ( مخلوعة) :
بااا و بااا فينك وا بااا واش درتيها بصح و خليتني بااا… جاتها البكية و حسات بالخوف فقلبها… كلسات و عنقات الغربال… حاطة يدها على خدها و دموعها هابطين.. معرفات باها هرب و خلاها و لا داوه الخاطفة… و هيا كتبكي حسات بالبرد قدامها علات راسها لقات مومن قدامها هو و الحمار … وقفات كتغوت بالفرحة… جات عندو كتجري..
حورية : الله ابا خلعتيني عليك ما عرفت ليك طريق فين خليتيني.. ؟
مومن ( مصدوم عينيه خارجين مكيهضر مكيتكلم تقول تقطع ليه اللسان)
حورية ( باستغراب) :
با مالك ابا واا با الله يهديك وليتي كتبان بحال داك طلع للسماء و رجع طاح على قفاه..
مومن ( هز عينيه فيها و نطق) :
داكشي لي وقع ليا ابنتي بحال الى طلع للسماء و طحت على كفايا كفاش معرفتش ابنتي إلى كان هادشي من الله مرحبا بيه و الى كان من عند الانس الله ياخد الحق اما الى كان من الجن انا طالب التسليم التسليم أناس المكان انا تايب متادوني متاديو بنتي تسلييييم…
حورية مافهمات من خبير باها والو واش الشمس ضرباتو و لا السخانة سكناتو..
حورية : با ا با الله يهديك لي شافك يكول لالة عيشة سكناتك رجوع الله فين مشيتي حليت عيني لقيتك طرتي..
مومن ( كيعاود و هو مزال مبهوض) :
-ما عرفتش اكذب عليك الكداب ابنتي.. كنت هنا حتى لقيت راسي فواحد السوق كبيير كترت التجار و البراح كيبرح.. بلي السلطان اسماعيل مراتو ولدات بنية… و بلي ايعرض على كاع التجار و الناس.. تما ابنتي سمعت واحد السيد كيكول لواحد السيد معاه.. واش جبتي السم لي وصيتك عليه كاليه التاني جبتو و مضمون كاليه الاول بلي المرة اللولة لسي اسماعيل اتولي تعطيه كل قطرة فصباح… و اتعطيه ليه على انو دوا كيخلي الراجل واقف واخا يزيد يكبر فالعمر و هكا ايولي اذوب كل نهار حتى يدي مول الامانة امانتو.. و هكا مولاي اسماعيل يموت و تبقى المرة اللولة مع بنتها طريبية او ولدها لي ايكون خليف السلطان.. هكا ابنتي سمعت حتى شفتيني قدامك..
حورية ( استغربات و مفهمات والو) :
با راه يسمعوك الناس يقولو اوليتي تشالي بالحجر و حفى ليك العقل و انت كنتي سيد العقال..
مومن ابنتي بحال الى شفتي هادشي بعويناتك و الله مزدت عليك كلمة…
حورية : و خرجان العقل هادا متكونش الشمس ضرباتك؟
مومن (خرج فيها عينيه) :
و هيا رضيتيني هبيل و غشيم
حورية : حاشا ا با و لكن هاد الكلام راه ميتقبلوش العقل..
مومن ( شاف الغربال لي فيديها) :
كتليك لوحي داك الغربال مسمعتيش ليا اريه لهنا..
حورية ( كتغبن) :
علاش ابا علاش؟
مومن ( خطفو ليها من يديها) :
كلت ليك اري لهنا… لاحو بعيد و جرها من يديها و كملو الطريق..
مومن : استغفر الله العظيم أعوذ بالله من الشيطان الرجيم و هادي هيا ديال مشات عيشة تجيب القزبر، جات حبلا من سبع شهور، لوكان مخافت من الطلاق، كون بقات حتى يخلاق… مكرهتش كون بقيت حتى نسمع كاع الكلام و لكن الزمان و الوقت خطفوني… ضار عند حورية لقاها حادرة الراس و ساكتة… هز راسو لقدامو بانو ليه شي ديور…
مومن : واقيلة راه وصلنا.. هزات راسها و فرحات حيت و اخيرا غادي ترتاح عيات من الطريق و الشموشات… بداو الناس يبانو ليهم… محسو بريوسهم حتى كانو وسط القبيلة… غاديين كيتمشاو و يكتاشفو المكان علا و عسى يلقاو فين يباتو و لا يامن ليهم شي واحد المكان..
حورية : با كون اهبطنا لسوق بلغتي تقطعات الله يخلف عليك و يجود عليك من عندو.. شاف فيها طلعها و هبطها و سلم امرو لله…
مومن : زيدي كدامي.. تبعاتو من اللور فرحانة… حتى وقف باها و وقفات وراه هزت راسها فين كيشوف كيبان ليها السوق… سوق و اشمن سوق اشمنك يا عطارة و يا تجارة التواب غير مكفحين العسولات و شهد و خيورات الله مبغاهم حد… كل تاجر واقفين عليه كترة النسا يعزلو و يختارو و مومن حلف لا يتحرك… حارت فأمرو و مفهمات فيه والو… ضارت عندو كتشوف فيه…
حورية : با مالك وقفتي؟
مومن ( مخرج عينيه بحال العقل تخطف ليه و بلا عقل نطق) :
هدا هو السوق لي كنت فيه هنا فين كنت جنب داك التاجر من النحاس… شافت فيه كيشوف كيبان ليها واحد الراجل كبير هاز واحد العود طوييل و كالس حدى المحال ديالو هو واحد السيد قدو فالعمر…
قرب مومن و تابعاه حورية من اللور جارة الحمار و متبعاه بالعين حتى وقف حدى دوك الرجال… سكتو و دارو شافو فيه…
التاجر : سي مومن شفناك رجعتي هربتي قبل متكمل لينا حجايتك و حكايتك و لا ياكما خفتينا منخلصوكش ههههههه… بداو الرجال كيضحكو بيناهم… حورية دخلها الشك و بدات تيق باها…
مومن : اسيادي انا مبقيت عارف شنو وقع ليا محسيت براسي حتى خرجت من السوق و مبقيت عقلت لا شنو درت و لا قلت نوروني الله يفتحها فوجهكم واش كنت هنا؟…
شاف فيه مول النحاس و مدخلاتش ليه للراس..
كفاش زعمة وقع ليك انت الصباح كنتي هنا صحة سلام داير الحلقة مع الناس… واخا هضرنا و منعناها عليك قدرتي بحيلتك تخلي سيد الشيخ يخدمك فسوق و بسكات ماشي بالغوات… و انت نضتي جمعتي قشك و حجاياتك لي بديتيها للناس و طرتي ما سميتي… مومن ( مبهوض) :
انا كنت هنا؟
التاجر : و لا إله إلا الله و بالامارة كلتي لينا اول مرة تزور قبيلة بن شريف و تجرب زهرك و بلي عندك اسيدي بنت و خاص تمشي تجيبها معاك و لا نسيتي؟.. شاف مومن فحورية و رجع شاف فدوك الرجال ضار و خلاهم و تم غادي تبعاتو بنتو و رجال وراه كيتهامسو…
حورية : با تسنا وا با… سيكلات او وقفو لعاد على السوق شوية..
مومن ( كيشوف فالارض مبهوض) :
سمعتي كلامهم دابا باك مزال هبيل و لا ولى من العقال…
حورية : انا مبقيت فاهمة والو واش كنحلم و لا راني فايقة… دور وجهو لجيهة الحمار… تصدم و عينيه بان فيهم الخوف و الحيرة..
مومن: كتحدايني ابنت مومن ياك؟
حورية ( مفهمات والو) :
_ علاش مالي ا با شنو درت تاني؟
مومن ( شاف فيها و عينيه شاعل فيهم النار) :
كتليك لوحي عليا داك الغربال خليتيني حتى عطيتك بالظهر و مشيتي جبتيه… شافت فين كيشوف بان ليها الغربال فوق البردعة لي فوق الحمار… تعجبات كثر من باها و تخلعات شافت فمومن و عينيها كيزاوكو فيه…
حورية : و الله ا با ما جبتو معايا ياك انت جريتيني و زيدتيني قدامك كون تفاوت عليك كون بنت ليك تيق بيا ا با و الله مجبت غربال و لا هزيتو ربي شاهد عليا… مومن تاق بحورية حيت الكذوب عمرهم دارو بيها و هوما سباب نيتها و قلبها البيض… هز مومن الغربال كيضورو فيديه مفهم والو شنو سر هاد الغربال و كيف حتى تبعهم ياك هو بيديه لاحو مايمكن يكون هزو شي حد و ردو ليهم كانو غادي يشوفوه لا لا بزاف هادشي… فعز تخمامو جا صوت لوذنيه حديت سمعو من قبل البراح كيبرح… بلي مولاي السلطان تزادت عندو بنت و بلي داير واحد الوليمة و معيط على التجار… شاف فحورية لي عينيها كانو مطرطقين كتسمع و مامتيقاش ودنيها كلام باها كيتحقق شوية بشوية… و بحال ولو تسمع الرجال لي كيتافقو على السلطان دابا… و داكشي لي وقع مجات فين تكمل تخمامها حتى سمعات بوذنيها جوج رجال وراها كيتافقو على السلطان اسماعيل.. لحمها بورش عليها و ملقات شنو دير… مشات لعند باها جراتو لواحد الخوية…
حورية : سمعتي ا با شنو دار بين الرجال؟
مومن : الى عليا ابنتي راه سمعت جوج مرات تيقتيني دابا عرفتي باك محفاليهشاي القرشال و لا ولى يشالي بالحجر… سكتات حورية كتفكر و تخمم… وساعو عينيها و شافت فباها
با فين بتنا البارح؟
مومن : فقصر السلطان فين انكونو بتنا فالخلا و القيفار..
حورية ( قربات ليه) :
حضر معايا عقلك مزيان… ياك بتنا حدى دار مرت التاجر عبد الكريم لالة زهور لي كالو ليك الرجال بلي مخداتش حق الله مزيان و تلعنات بالليل كتولي بغلة و بنهار مرا بحالها بحال أيتها الناس… بالامارة كانت كتنقي الزرع و تغربل الشعير…
مومن : و انت تيقتي دوك الخرايف واش جابهم لهادشي لي حنا فيه دابا الناس فالناس و القرع فمشيط الراس
حورية : ا با واا با و رد معايا بالك الله يهديك ا با الغربال فين لقيتو انا؟
مومن : نسولك انت مالي انا لي لقيتو..
حورية (شدات جنابها و حدرات راسها كتزفر بحال العود) :
ا با سمعني مزيان الغربال لقيتو حدى دار لالة زهور حدى حيوطها و بيبانها… و يقدر كلام دوك الرجال يكون صحيح و تكون دار لالة زهور ملعونة كيف كالو… و منين هزيتو انا وسط فيه 3 دالسوطات و طرتي و لا نسيتي؟…سكت مومن و سها فكلام حورية لقاه معقول مية فالمية كفاش زعمة كلام دوك الرجال صحيح فصيح و الغربال لي فيد بنتو ملعون زعمة يكون تلعن حتى هو… غوبش و شاف جيهة حورية… شوفاتو خلعوها و عرفوها شنو باغي يدير… بدات تبعد عليه و هو نزل هز بلاغتو و جرها كيعطيها لجنابها و هي كتبرد بلاصة الضريب…
هالي ما يسمع الكلام هالي يهز وساخت غيرو من طريق و يردها شريك… شي نهار ادفنيني ابنتي و انا حي اش بغيتي عندي على آخر يامي نولي ممسوس
حورية ( كضور بيه جاراه و تبرد حر الضرابي) :
و صافي ا با و لله منويت فيها شي حاجة كلت نغربلو بيه حنا و ينفعنا…
مومن ( مزال كيخبط فيها) :
و ابنتي اش بغيت ليك انا تغربيلة لداك العقل انا فهمو ندادي و هو يكطع فوتادي…
حورية ( بغات تنشط الجو) :
-با حنا معندنا خيام لي يتقطعو و تادهم و لا نسيتي..
مومن : و الله يا ربي اش درت تحت انا صافي تهديت مبقا ليا جهد ليك… لاح بلغتو و كلس موسد واحد النخلة شاد فراسو…
مومن : تعلمو يا الحجامة فراس ليتامى.. هيا هادي ابنتي فاخر يامي انتمس من غربال و شكون سبابي ابنتي الله ياربي الله…
كلسات حداه حورية واخا عارفاه ايعطيها لراس.. بقات ساكتة كتكمد عظامها لي كلاهم ليها عصا.. شافت فيه لقاتو كيشوف فيها بنص عين..
مزال عندك الوجه لي تجي تجلسي حدايا..
حورية : با ياك كنتي كتقلب على ما دير باش نلقاو فين نباتو و نشريو ما نحتاجو و جات الفرصة تال عندنا و من ذهب..
مومن : اشمن فرصة ابنت حديدان نولي ملعون بسباب غربال محشمتيش ابنتي خاصني نقرا على راسي القرآن..
حورية : و دابا نسا داكشي لي وقع ليك هاد الصباح مابقا وقع ليك والو وراه متكبرهاش عاوتاني.. غ
خنزر فيها و شدات ليه فيديه عارفاه يديه سابقاه..
حورية : الى حضرنا لهاد الوجيبة و عاونا السلطان و نبهناه فنظرك مغاديش يتهلا فينا و يعطينا فين نباتو و يوكلنا و يكسينا 😌..
مومن : ايه انتيا هيا شامهاروج نوضي من حدايا راه وليتي دخلي و تخرجي فالكلام..
حورية : و الله مكندخل و نخرج فالكلام… تسنا هنا و سمع بودنيك باش تعرف بنتك حورية علاش قادة… دارت حايكها و قصدات بيبان التجار… وقفات بحال كاع العيالات باغة زعما تقدا من التواب و الجوهر…
حورية ( بغات تجبد الحديث مع العيالات) :
تبارك الله هاد التوابات و شحال زينين…
جاوباتها المرة لي حداها :
سي جعفر عندو غير التواب الملاح مشافتهم عين مامساتهم يدين…
حورية : و هيا غير ناخذ عندو باش نحضر لسبوع مولاي السلطان… قربات منها ديك المرة و بكلام خافت همسات ليها..
ياك كالو بسي سي إسماعيل مريض مفهمتش لاش هاد الزردة… مسكين بقا فيا لا دا مول الامانة امانتو اتبقى فيا امرتو اللولة…
حورية : و علاش ؟
علاش مفخباركش نهار تزوج لالة صفية ما ولدش فاللول اوا عند بالو صفية مكتولدش واخا كلسو شحال مولدوش… صبر حتى عيا و جاب عليها الضرة صغاار منها و صغر لالة غيتة ايوا نهار روح لالة غيتة خرجات لالة صفية كتوحم بمولاي عدنان و صدقات المرة التانية لي مكتولدش… و تبارك الله مولاي عدنان كبر و لا راجل و زينت الرجال و وصل سن الزواج… السلطان اسماعيل واخا كبر مزال طامع يجيب البنت… اوا بقاو الحكام مع لالة صفية حتى حملات سبحان الله واخا كبرات خرجات حبلة كتوحم… خلاوها ماليها حتى شاب عاد علقو ليه ححاب ههههه… ايوا منكولش ليك لالة غيتة و لات بحال ديك اللفعة غير غادية و تبخ سمها منين ساقت الخبار بلي ضرتها لي كبر منها و شرف منها حملات…
حورية : و نسات بلي قدرة الله كبيرة..
ايااه الحبيبة… و علاما كالو الله اعلم منديش تقليد ( عضات صبعها) عضيت فلحمي معضيت فلحم حد كالو بلي لالة غيتة و لات عينها فولد راجلها حيت زين و صغير و عند بالها بلي هيا مزال شابة و تغصبات فشبابها مع راجل بو لحية بيضة الشارف لخشين ههههههه….
حورية : اوا الله يستر الله يخرجنا من دار العيب بلا عيب … غير خليها تقلب عليها متلقى لا لحاج لا مول التاج خلاوها ماليها جا يهز الدجاج لقا غير العجاج..
خليت ليك الراحة و بصحتك العراضة…
حورية : الله يعطيك الصحة… خلات المرا مشات و تلفتات عند باها لي حاضيها من بعيد قدات لحافها و تمات جاية عندو كتنخوى.. وقفات حداه..
مومن( علا راسو فيها) :
واش جبتي معاك؟
حورية : شلااا ميتكال ا با شلاا ميتكال و لكن ماشي هنا( شافت فجنابها ناس غادية و جاية) ..
اجي معايا ا با.. يد جارة بيها الحمار و يد جامعة بيها اللتام كيبانو فيها غير العينين.. جابت باها حتال. واحد البلاصة خاوية من الناس او وقفات… مبان ليها حد عاد زولات اللتام على وجهها..
حورية ( شافت لباها فعينيه و بالمعقول هضرات) :
و دابا سمعني ا با مزيااان و حل معايا ودنيك…
-سها مومن فهضرتها كل كلمة و حرف نطق بيها فمها و كل حكمة جاد بيها عقلها حتى سلات…
مومن ( شاف فيها بنص عين) :
ايوا دخول قصر السلطان و ساهل اوا كيغاندير حتى نوصل ليه خبار مراتو التانية هاه…
حورية : ساهلة ماهلة انت سمعتي بودنيك الرجال و هما كيكولو بلي كتعطيه الدوا على قبل يكون ديما راجل و سيد الرجال بصحتو و براحتو اتكول لولد السلطان يقطع عليه داك الدوا إلى برا باه راه عندنا الحق و دار القاضي تسنا فديك السوسة اما الى كنا غالطين باش ما حكمو علينا قابلييين فهمتي دابا ا با…
مومن ( صغر عينو كيفكر فهضرة بنتو لي دخلات ليه لعقلو فكر فيها و يخطط كيشوف قدامو الفلوس و لجاه يستاغل الفرصة ما حدها جاتو…)
مومن : اوا ا لالة نفرضو قبلت و انت فين اتكوني؟
حورية : ماتخاف ا با مدهش انكون احداك و بجنبك..
مومن : لا لا ابنتي انا عارفاني مرعود و نقدر نغلط فشي كلمة و نصدق واحل اللسان مافيها عضم و انا فمي ايجيب ليا الخلا و الجلا…
حورية : مغاتمشيش بوحدك ا با كلتليك انكون معاك غير هو كاين واحد الحاجة مزال مكلتهاش ليك…
مومن ( شاف فيها) :
اشنو تاني؟
حورية : دابا هو راه… الغربال ا با..
مومن : مالو تاني و الله متلوحيه حتى نوريك ابنت مومن..
حورية : با راه جربتي فاش لحتيه اشنو وقع رجع الغربال بوحدو و كي غنديرو ليه انا عارفة راسي متعوسة بحال ديك المعزة لي كتبقى دور فجبل حتى تولي من سعد الصيادة..
مومن : كولي شنو كاين بلا كثرة الفهامة..
حورية ( شافت فيه) :
الغىبال هو لي فيه السر ا با و هادشي دوينا عليها باش ندخلو لدار السلطان خاصك تغرب فيه تراب و تسوط عليا غبارو باش نطير و منبقاش نبان و هكا اندخلو انا و انت لدار السلطان… اندخل لبيت مرات السلطان و نقلب بين حوايجها و بين نقرتها و ذهابها و نحاسها و نعرف شنو مخبية و نجي نخبرك بيه ا با.. و لي كلتها ليك علم بيها السلطان لي همست ليك بيه فوذنيك خبرو بيه..
مومن ( غوبش) :
انت يمكن البرد ساط ليك فالراس و الى طرتي لشي جايحة كحلة ما عندها رجعة و باش عرفتي بلي اطيري و متبقايش تباني و بلي صوت هو لي ايبقى مسموع و بلي اطيري غير فدار السلطان ا كتخرفي ابنت مومن…
حورية : نجربو ا با مخاسرين والو و زايدون انت فاش طرتي كنا قراب للقبيلة ما طرتيش لحد الدنيا الواحد يجرب ا با.. يديها يا زعيم يا كريم و لا مرضي الوالدين…
-فقصر باهي نخلو مدلي و زهرو ريحتو عاطية و فاحي الخدم و الحشم كلهم واقفين على رجل وحدة كيوجدو لسبوع بنت مولاي السلطان المعجزة وقعات و لالة مرت سيدي السلطان واخا كبرات كرشها فرخات او ولدات بنية زينها يصر العيان… واخا السلطان مريض و شاد الفراش و لكن بغا سبوع بنتو يتقام و يكون على احسن مقام… و هادشي لي وقف عليه مولاي عدنان.. لالة صفية بذهب محلية و لحرير لابسة و مطلية.. واخا كيكولو عليها كبرات و لكن كتبان بحال بنت العشرينات و هازة بنتها فيديها و كتشوف فيها… كالسة عند راس السلطان مرة فرحانة مرة محصرة على صحة راجلها لي خانتو و مخلياه ميحضرش لسبوع بنتو… فصلاتها ترجات ينزل الرحمان معجزة من عندو و يخلي ليها راجلها تاج راسها لي بلا بيه الدنيا مظلمة… اما واحد غيتة لي واقفة عند السرجم و عينيها يقتلو بالسم كتسنا و تمنى امتى الله يقبط روح السلطان… و هيا تنعم بالحبيب لي طاح قلبها عليه عدنان علاش لا شنو خاصها مزال صغيرة و زينة فنات شبابها مع الشيباني العجوز لي مافيه لا فايدة لا كاينة … عوجات فمها و خيبات سيفتها و تبسمات من الشر و لحقد لي هازة فقلبها… بان ليها عدنان دايز.. ضحكات ليه و بينات ليه سنانها لي بحال الحليب شفايفها الموردة لي مزيناهم خالة فالجنب… اما عدنان لي طولتو بحال نخلة مزينة قصر السلطان شعرو بحال سواد الليل خنزر فيها و عقد غوباشتو.. مكيحملها مكيقبلها ميشمها بتصروفاتها و الخبث ديالها و لوكان عارفها كتفكر فيه و باغية تادي باه الحنين كون نسفها و نفاها و دفنها تحت الارض…
الحفلة بدات و بيبان قصر مولاي السلطان إسماعيل تحلات.. تجار قبيلة بن شريف و ناسها دخلات… زغاريت علات… ضحكاتهم تسمعات… و العيالات تخرشيش دهبهم تسمعات.. وحدة تبان على وحدة بحريرها و لباسها و ذهبها… هادي جابها ليا التاجر فلان و هادي جابها ليا من بلاد البلقان… الله يعطيهم شي عقل هههههه… ايوا واحد سي مومن و حورية فين مخبيين مزال مبان ليهم الاثر…
*****
مومن ( هاز الغربال فيديه و داير فيه التراب) :
شنو المعمول دابا؟
حورية ( شدات راسها) :
و با وراه هادي المرة العاشرة و انا كنوريك شنو دير ساهلة ماهلة… غربل التراب و الغبرة لي بقات فالغربال سوط بيها عليا ها العار…
مومن : صافي صافي فهمنا.. يلاه ايبدا و هي تقاطعو..
حورية : سمي الله بعدا
مومن : بسم الله… غربل التراب و ساط غبارو على حورية… تحرك واحد البرد حتى نخل تحركات وراقو… دار مومن بجنابو مبانتش ليه حورية تخلع و تفزع… سرط ريقو و رجع جوج خطوات اللور… وقف الريح و رجع كلشي كيف كان شوية سمع خطوات حداه.. ضار بالزربة ملقا حد…
مومن ( مخلوع) :
شكون هنا شكون هنا… جاه الجواب ديك الساع..
حورية : غير انا ا با… بدا يضور بجنابو مبان ليه حد..
مومن : بسم الله الرحمن الرحيم…
حورية : وا با واش بنت لك من الجن الله يهديك واش ادير هكا قدام السلطان حضر معايا الإيمان… مكانبانش ليك ياك ؟..
مومن : واش انا مخلوع غير هكاك حتى هدا سؤال…
حورية : صافي ا با سمعني مزيان كنت فقصر السلطان و تشوف ا با على خير و خمير و اللبسة من الحرير دابا ادخل بحالك بحال الناس مكاين لي يسولك لا شكون لا منين… بارك لولد سي اسماعيل و انا غادي نسرح فالفقصر و نعرف شكون هي المرا التانية ليه نحضيها و نسمع لكلامها و نجي عندك ما دهش ماتقفز و لا تفتف خليك متبت و رزين خلق الهضرة بين الناس و منخافشاي عليك ا با قبيلتنا كانو مسميينك حديدان و لا نسيتي…
مومن : بلاما توصي فيا بحال شي هبيل عارف اش كندير و غير الدهشة لي خلاتني نخاف انبقاو نهضرو بزااف هنا…
حورية : يلاه ا با على الله يطلع هادشي بالفايدة.. شدو طريق حورية و مومن لقصر السلطان ليبان ليهم من بعيد… بكترة الانوار لي خارجة فيه و صوت الطرب و الآلات الموسيقية لي كتعزف اجمل الالحان… دخل مومن بحال شي تاجر كبير بفوقيتو لي كان مخبيها من نهار تزوج علاش لا و هو مكيلبسهاش مصنوعة من الحرير مكايلبسها غير شكون و شكون خلاها لدواير الزمان و ها الوقت جا باش يستغل الفرصة و يبان.. دخل بحال مول الدار.. تيق راسو بلي هو تاجر كبير.. مابقاش سمع حس بنتو هنا عرفها تسللات بحال نور الشمس بين شقوق القصر.. و هو جا الدور ديالو يدير بلاصتو بين التجار و هكا يدي الخبار و يعرف شكون ولد السلطان.. بداها مع شي رجال كيهضرو على التجارة و مع هو عندو دراية دغيا دار بلاصتو بيناتهم و عرف على راسو بلي كان كيعرف السلطان هذا شحااال و جابتو لوجيبة لقبيلة و كال علاش لا ايجي يزورو و يبارك ليه.. تاقو بيه و داروه وسطهم.. دخل عدنان و نور باين على وجهو معاه لالة صفية هازة التربية فيديها و كتلقى التبريكات من عند الناس.. هنا مومن بلاما يكولوها ليه الناس عرف هذا هو سي عدنان ولد مولاي السلطان.. خاطرو ماهناتو على بنتو حورية لي تعطلات و مزال مجات… كاع ناس باركو للالة صفية او ولدها و كيطلبو الشفاء للسلطان.. دور راسو بانت ليه وحدة من وجهها لي باين مشرار بلي هي مرات السلطان التانية و لي كانت هي هادي فين هي حورية.. نقز من بلاصتو منين حس بشي حد شد ليه فكمامة يدو..
حورية ( بهمس) :
ياك ا با قلت ليك مدهش..
مومن : شداني من كمامتي بحال العفريت و بغيتيني مندهش فين تعطلتي ياهاد البنت…
حورية : غير بشوية ا با دابا يسمعوك يكولو غير عقلك طار سير بعد شوية و نعاود ليك على مشافت عينيا و سمعات وذنيا… بعد مومن شوية او وقف فبلاصة معزولة..
مومن : اش وقع ؟
حورية : دخلت لبيوت القصر كنقلب و نفتش.. بان ليا باب كبير و عريض فتحتو بان ليا السلطان ناعس بحال الامانة مسكين وجهو صفر بحال الخرقوم البلدي… عرفت ايكون هداك بيت نعاسو.. خرجت كنتسلت حتى بانت ليا واحد الخادم واقفة و كتهضر… مبانش ليا فاللول معامن حتى قربت مزيان عرفتي ا با لقيت مراتو التانية … كالتليها و انا كنسمع..
يطو الى مشيت حتى سقت الخبار لهادشي داع بين الناس انتبعك ليه سمعتي و لا لا غذا هبطي للسوق و عنداك يشوفك شي حد مع تبرك الشمس اتمشي عندو دي ليه رزقو و جيبي ليا القرعة التالتة لي اتصفيها ليه و يمشي يرتاح فقبرو نتهنا منو…
يطو : واخا ا لالة غيتة ميكون ا خاطرك ا تهناي..
غيتة : يلاه غبري من كدامي… ( بدات كضحك بواحد الضحكة ديال الهبال)..
دورات راسها فجنابها علات راسها و زادت خلفة مع طريق..
خرج مومن عينيه مصدوم..
كاع هادشي خرج فمرات السلطان لي شاف العينين يكول كيفتنو بالزين و هما كيقطرو بالسم و الخديعة…
حورية : و دابا ا با جات نوبتك تبارك لمولاي عدنان و سير سير لتعطل شاي.. هز مومن راسو و قصد سي عدنان لي كان واقف مع شي رجال غير وصل عندهم مومن الرجال نساحبو و خلاو عدنان ياخد راحتو فالكلام…
مومن : سي عدنان مبروك الزيادة تربا فعزكم و فخيركم و خميركم و بين حضانكم..
عدنان ( معرفوش) :
امين الله يكبر بيك شكون انت و منين عمري شفتك فالقبيلة و انا كنعرف ماليها واحد بواحد…
مومن : انا غير واحد السيد من الرحال بوهالي و شريف جاتني لوجيبة و جيت قصدت بابكم ضيف الله…
عدنان : مرحبا بضيف الله نوكلوه و نشربوه و نبيتوه و نكسيوه و نغطيوه اش حب الخاطر..
مومن : سي عدنان عندي ليك شلا ميتقال و لكن نبعدو شوية على الناس الحيطان عندها ودان.. ستغرب عدنان و شاف فمومن شوفة طويلة كال يتسنط ليه و يعرف شنو مخبيه سبقو و مومن وراه و حورية تابعاهم من اللور… وقفو على برا حدى واحد الساقية..
عدنان ( عقد غوباشتو كيتسنى مومن يتكلم) :
شنو واقع اش سماك الله؟
مومن : مومن
عدنان : تكلم ا مومن كنسمع..
مومن : سمعت بلي سي السلطان اسماعيل مريض شاد الفراش و بلي شحال من حكيم زارو و معرفوش دواه..
عدنان : اييه هاد الخبار كاينة و باش اينفعك انت هادشي؟
مومن : انا عارف اتجيك غريبة و اتكول هدا شلاهبي باغي غير يضحك عليا و لكن سمعني مزيان و عطيني سمعك اسي عدنان..
عدنان : هضر تكلم كنسمعك..
مومن : سي سلطان معندو حتى مرض اسي عدنان و لكن سم لي كيشرب كيقتلو ا بالحيلة و مكيبانش فدات واخا يجي الف حكيم و حكيم مغيلقا عندو والو…
عدنان : اش كتخرف انت اش كتكول..
مومن : لالة غيتة مرت السلطان هي مولات هاد التنوعيرة كاملة و هيا لي كتجيب السم و تعطيه ليه و كتوهمكم بلي غير دوا كتخلي الصحة مجبدة…
عدنان حتار معجبو حال متقبلهاش و باش عرف هاد البوهالي هاد الهضرة…
عدنان : و باش عرفتي انت هاد الهضرة؟
مومن : تيق بيا و لا لا كنت فسوق هاد النهار و سمعت جوج الناس كيهضرو على مولاي السلطان و جبدو مراتو لالة غيتة ( عاود ليه كاع لي وقع و حورية كتسمع)… مكنتسناكش تيق بيا ا سي عدنان و لكن جرب جرب ماتخليش لالة غيتة دوز بالسلطان هاد تلتيام واش اترجع ليه صحتو و لا لا الى ولى بيخير و على خير و تشافى و تعافى داكشي لي بغينا اما الى بقا هو هو نقدم ليك رقبتي قطعها كيفما بغيتي.. نغزات حورية باها و همسات ليه فوذنيه باش يمشيو بحالهم و داكشي لي كان خلى مومن عدنان حاير فكلامو و مشا…
مومن : زعما يتيق بيا..
حورية : و غير إلى مبغاش يتيق بيك ا با… مسافة و هما غاديين دار مومن ليمن ديالو كتبان ليه غير الكسدة ديال حورية راسها مزال مبان جاتو ضحكة ضحك حتى شبع و حورية مستغربة فضحك باها اش وقع ليه..
حورية : با ياك لاباس مالك؟
مومن : انت ابنتي لي ضحكتيني و زدتيني فهمي كسدتك بانت و راسك مزال مبان…
حورية ( تنهذات تنهيدة طويلة) :
وابلية هادي تبلينا بيها ا با ماعرفت فين مشات هاد مرت التاجر لي تلعنات و بسبابها تلعنا حتى حنا..
مومن : بسبابك ابنتي و بسباب خفت يديك لي دارتها لينا معارفاش بلي الخلا بماليه لاش تهزيه لاش هاد المرة تلقاي الحاجة فطريق خاوية عمرك ماتهزيها الطريق بملوكها ابنتي و بماليها ماتعرفي شنو فيها…
حورية : عمر داود ميعاود ا با اكون هاني… رجعو لحدا الشجرة فين خلاو حمارهم مربوط حطو حوايجهم و تما كانت ليلتهم اللولة
فصباح بكري ناضت غيتة و بحال عادتها تقادات و تصايبات و تسنات الخادم حتى رجعات من السوق و فيديها قرعة السم ضحكات و غمزات لراسها فالمراية… جابت الخادم الفطور فصينية و مداتو لغيتة لي خلطات سمها مع كاس الحليب حلات باب بيتها و مشات بحال الحوريات حتال باب بيت السلطان دقاتو و حلات… وقفات مبهوضة و تفاجات منين شافت عدنان عند راس باه..
عدنان : ياك لاباس شفت وجهك صفار..
غيتة : لا لا نشوفو مولاي عدنان و يتبدل فينا اللون بالعكس شوفة فيك تسر الانظار…
عذنان : غير حطي داك الفطور انا انفطر السلطان…
غيتة ( تقرصات) :
و لكن خاصو ياخد حليب الطاقة باش يرجع كيف كان ديما كياخدو هاد الوقت كل صباح..
عدنان : اتهناي لالة غيتة مرت السلطان انا انشربو ليه بيدي غير تهناي… بقات واقفة كتشوف مبغاتش تعيق و لا تفضح راسها حطات الفطور و خرجات… وقف بزربة حدا الباب حتى سمع المشية ديالها و هز داك الحليب خواه فواحد النبتة… و حتى من داك الفطور رجعو مع الخادم ديالو و امرو يجيب ليه فطور اخور و توجدو ليه لالة خناتة بيديها و مايشوفها حد و لا يشوف الخادم شي حد
دازت 3 ايام على مشية مومن من عند سي عدنان… و مزال مومن و حورية كينعسو فالعرا صابرين راضيين بحكم الله و قدره كيتسناو خبار من عند سي عدنان…
مومن : كيبان ليا نهزو قشنا و نزيدو خلفة مع الطريق قبل لا يلقاونا و يجلدونا و انا لحمي هشيش انت لي يتبعك يتبع البلا بسبابك خرجنا من القبيلة و دابا باغية تخرجي علينا تاني واش نبقى انا غير جوال فبلادات الناس و لا..
حورية ( هزات راسها فيه) :
عايرني ا با عايرني نهار حتاجيتك ا وجهي قبشوك المشاش رخف عليا ا با رخف حاول على حمارك تحج عليه…
مومن ( نعت ليها جيهة الحمار) :
ها هو واقف مسكين محاول عليه اتهناي يلاه نمشيو فحالنا…
حورية : با سولو سم باش كتقتل كاليهم بالتقالة و سولو بالجمل باش كتاكل الشوك كاليهم باللسان الحو و شوية دالصبر ا با..
مومن : فين هو الصبر زعما ايكون عندنا الزهر فهاد البلاد و مع ناس الجواد…
حورية ( تنهدات) :
كون زهر هندو الزهر كاعما ينبت فالشجر نتمناو خير و مدبرها حكيم ا با..
هزات حورية راسها كيبانو ليها شي رجال دايرين الخناجر فجنابهم و قاصدين مومنو هيا…
حورية وقفات :
با نوض واقلة جا الفرج و جانا المطلوب…
وقفو عليهم الحراس و الجدية باينة على وجههم…
سي عدنان بغا يشوف سي مومن و بغاه دابا..
مومن ( شاف فحورية و رجع شاف فيهم) :
معرفتوش علاش بغاني؟
حنا ماعندنا وذنين مكنشوفو بعينين لي كالها سيدي خاصها تكون زيد معانا أسيدي… شاف مومن فبنتو حدر راسو و مشا معاهم… بقات مقابلاه حورية حتى غبر هو و العوين دالقصر…
#القصر
فبيت كبير كالس عدنان على كرسي السلطان لابس جلابة و سلهام و خاتم كبير فيديه كيفكر و يخمم دايرين بيه الشيخ و القاضي و القايد.. كيتسناو منو الكلام..
عدنان : عندكم عليه شي خبار سولتو التجار فالسوق؟
الشيخ : أسيدي سولنا و سيفط موحا جاب ليا كاع الخبار على ما سمع بلي هاد السيد من الرحال و يمكن بوهالي و شريف و مكاينش غير هو كاينة معاه واحد المرة واقلة بنتو…
عدنان : و علاش لي متكونش مرتو؟
الشيخ : لاواه اسيدي باقي صغيرة و كتشبه ليه و كالو ليا بلي راها بنتو و ماعندهم فين يباتو كيوسدو الارض و معاهم واحد البهيمة هدا مكان اسيدي… تدق الباب و تحل… دخلو عوين السلطان معاهم مومن حادر راسو…
عدنان : تفضل اسي مومن… قرب مومن عند عدنان و على فيه راسو…
مومن : طلبتيني اسيدي ؟
عدنان : كلس اسي مومن ماتخاف ماتدهش… قرب مومن و كلس على واحد الكرسي خاوي و حدر راسو كيشوف غير بنص عين دوزها على كاع الحاضرين لي باينة فيهم منصبهم كبير..
عدنان : سي مومن كلامك كان على صواب و صدق و بغيت نبشرك بلي السلطان بدا يتعافى و بدات ترجع ليه صحيحتو..
مومن ( فرح) :
الحمد الله اسيدي على سلامتو…
عدنان : و لكن اسي مومن مبغاتش دخل ليا لعقلي قضية الشريف و داك الكلام باش عرفتي مرات با هي مولاتها…
مومن : اسيدي انا لي عندي كلتو انا غير هبيل و لي كنشوفها فمنامي كنكولها و شفاء راه جا من عند الله كيكولو السبب يا عبدي و انا نعاونك و انا مكنت غير سبب…
عدنان ( حتار فمومن و باين من عينيه بلي راسو يبس من الحجر) :
واخا ا سي مومن تقدر تعرف ليا هاد الرجال لي عاونو مرات السلطان؟
مومن : نميزهم من لين الف واحد اسيدي و ماشي غير هوما حتى الخادم ديال هاد القصر معاهم…
عدنان ( غوبش) :
شكون كتقصد اسي مومن؟
مومن : خدامة مرت مولاي اسيدي…
عدنان ( كيفكر) :
يطو ؟
مومن : اه اسيدي هي لوسيط بين مرات مولاي و بين دوك الرجال و هيا لي تقدر تجيب لينا دوك الجوج امولاي…
عدنان : الغدر داير بينا و حنا مسايقين خباار وااااخا…
امر عدنان باش يجيبو الخدامة يطو… لي ولات كتصفار و تخضار و كلها كترعد… وقفوها قدام عدنان… مقدراتش تعلي فيه الشوفة…
عدنان : دوي الغدارة دخلناك بيناتنا و كليتي من طعامنا و لؤتي تغدرينا بلا حشما بلا حيا…
يطو ( كتفتف) :
مدرت والو اسيدي شنو درت كفاش غدرتكم؟
عدنان ( قاطعها بالغوات حتى تفزعات) :
السكات قطعي الحس انكول ليك جوج كلمات مغاديش نعاودهم… شكون الرجال لي عطاوك السم تجيبيه لالاك غيتة و بلاما تحاولي تنكري القصة كلها عندي ياتكولي و تكري يا الحبس و قطيع الراس كيتسناك… بدات كتبكي و تشهق بالخوف…
يطو : لا أسيدي عفاك لا انا انا مدرت والو لالة اسيدي امراتني و الى مدرتش لي بغات حلفات حتى تقطع راسي و تغبرني…
عدنان : بلا ملاغة و كترة الهضرة الخاوية شكون هادو لي عطاوك السم ا يطو؟
يطو : العطار العطار قشبال هو او واحد السيد صاحبو كايجيب ليه السلعة من القبيلة لي حدانا..
عدنان ( شاف فالقايد) :
سي القايد جات خدمتك بغيت هاد العطار و صاحبو يكونو عندي هنا… رجع شاف فيطو…
انت انتاقة فيك وجه الله حيت كنتي غير رقاص ديال لالاك بغيتك تجمعي عليا حاجتك و تغبري من هاد القبيلة منبقاش نشوف وجهك…
يطو ( تلاحت ليه على رجلو) :
لا اسيدي عفاك اسيدي ( هزوها الحراس مخرجينهاو هي كتبكي و تزاوك )…
الشيخ : سيدي و طرات باك شنو ادير معاها؟
عدنان : هادي لفعة بلا خاصو يخرج من هاد المكان و يتنفى… انا لي انعرف شنو اندير معاها… وقف مومن منين شاف بلي القضية تحلات و مابقى عندو لاش يبقى دارو خير ماكسبو منو والو الهم يمشي فحالو…
مومن : مولاي سمح ليا مبقى عندي لاش نبقى و خليت بنتي حدى شجرة كتسنى بوحدها الحمد الله على سلامتكم و لهلا يدخل شر لقبيلتكم و لا بيناتكم الجرة تحلات و المراد تقضى و انا لي عليا درتو و دابا خاصني نمشي… شاف فيه عدنان بمحبة و عينيه فيهم شكر كبيير ليه..
عدنان : لا اسي مومن ماعندك فين غادي تمشي اتبقاو هنا دار لي محاديا للقصر من هاد النهار اتولي داركم و متجي فين تجيب بنتك حتى تكون كاملة مكمولة بماكلتها و فراشها و حتى حوايجك لي بغيتوها اسي مومن اتحضر حتال عندكم من هاد النهار نتوما ضيافنا و منا و لينا و كاع لي فالقصر والقبيلة معاكم و لي حتاجيتوها حسبوها تقضات ليكم… و زيد عليها مولاي إسماعيل ناوي يشوفك و يشكرك و حتى عمي السلطان هلال… لي ايحط الرحال عندنا غدا منين سمع بلي خوه الكبير تعافى و تشافى و عرف بلي انت كنتي سبب باغي يشكرك براسو و يشوف هاد السيد لي كان سباب بلي السلطان رجعات ليه صحتو… دابا سير و جيب بنتك و مرحبا بيك بيناتنا… مومن فرح و بلغ مقصودو شكون بحالو ايسكن فدار مجاورة للقصر و كاع لخدم و الحشم ايكونو تحت امرو مكرهش يشطح و يضرب الرش و لكن لا خاصو يبان متبت و حصين و رزين…
مومن ( حذر راسو و تبسم) :
الله يجازيك بالخير امولاي اهم حاجة السلطان رجعات ليه صحتو الله يطول فعمرو و انا هادشي مدرتوش طامع فشي حاجة درتو بحسن نية …
عدنان : عااارف و داكشي حتى انا باش جازيتك على نيتك سير اسي مومن لاتخلي شاي بنتك تحت الشمس بلا محمية… حدر مومن راسو و رجع باللور عطاهم بالظهر و خرج… غادي بشوية عليه بالتقالة غير هو خرج من القصر و ضربها بجرية غادي و يشطح و يضرب الرش فرحان… غير شافتو حورية تهزات من بلاصتها حلات عينيها و تبسمات…
حورية : سيع و لا ضبع ا با؟
مومن ( كيشطح) :
سبع بدارو و بسوارو…
حورية : هي بلغنا المقصود؟
مومن : بلغناه و دابا غادي نمشيو برجلينا لدويرتنا الجديدة لي لاصقة على القصر و مجهزة من كل ما لزم بمونتها و كساتها و فراشها…
حورية ( كتشطح) :
زدك تاو زدكاتاو زدك تاو زدكتاو….
الميمون تكعد الضحكة مبغاتش تفرق الوشوش… الدهشة و الفرحة مخطاتش حورية و مومن و هوما داخلين للدار لي عطاهم مولاي عدنان… فين تبان دارهم القديمة هاديك كانت غير خربة اما هادي… كلها رخام و زليج و الساقية وسط دار المصرية ( صالون) كدو كداش مفرش باحسن فراش و ريحة البخور كتعطي فقلب الدار… البيت لي كانت كتشاركو حورية و باها.. ولاو عندهم دابا 3 دالبيوت بفراشهم بكوايجهم بكلشي ليهم… حورية ضور و تساري عينيها.. الفرحة مقداتها… دخلات غسلات حالتها تزينات و تعطرات و تقادات ولات كتبان وحدة اخرى… و حتى ميمون و لا كيبان بحال واحد من التجار الكبار… داز الوقت… و تدق الباب حل ميمون و لقا جوج من الخدم هازين صنيات كباار…
سيدي هادو من القصر رسلهوم مولاي عدنان…
مومن ( خوا ليهم الطريق) :
مرحبا مرحبا حطوهم الداخل… دخل الخادم و حطو الصواني و خرجو… تمات خارجة حورية كتجري :.
شنو هادشي ا با؟
مومن ( فرحان كيضحك) :
جابوهم من القصر صيفطهوم مولاي عدنان… عراو على الصواني و نباهرت عينيهم… اللحومات مشوية و الخبز سخون… اما الديسير غير مكفح… حتى من اللوز و الكركاع محطوطين… كلسات حورية هي و مومن على دوك الصواني دخلو فيهم عميين اللحم مذاقوه من حياة مها فاش كانو كيعيدو… مسلاو حتى خلاو غير العظام رجعو اللور و حطو الراس على الحيط كيرتاحو.. ناضت حورية هزات دوك الصواني الخاوية داتهم لبيت الطياب فين كاين الماعون ( الكوزينة) حطاتهم شمرات على يديها غسلاتهم و حطاتهم يتسقطرو و رجعات عند باها…
حورية : عرفتي ا با شنو دابا ديال شي براد ديال اتاي اش بان ليك ؟
مومن : لقيتيني كنفكر فيها… شعلات حورية الفاخر و ردات الما يطيب… عمرات براد ديال اتاي على حقو و طريقو حطات صينية قدام باها و تكات حداه… هيا هازة كاس و هو كاسو كيتنشوا عليه و يفكر ليعيد…
مومن : غدا عم سي عدنان ايكون هنا و كاليك بغانا نكونو فالقصر باش يتشكرني بنفسو…
حورية : اوا مزيان ا با دير بلاصتك و انا انتسلت و نخرج لقبيلة نعطي نيا و عينيا و نسمع هضرة الناس و مطاري بيهم و لي فقلبو الغدر لشي واحد اخور نحدروه و لي عندو شي مشكيل نحلوه…
مومن ( شاف فيها) :
يااااك حلينا مشكل السلطان اش بغينا من ناس القبيلة؟
حورية ( تقادات فالكلسة) :
_ ا با ا با فهمني و سمعني خاصنا نديرو بلاصتنا فالقبيلة و نعرفو شنو كيدور فيها مافيها باس نديرو الخير و صيتنا يعلا و يطير و يولي الكبير و الصغير يهضر علينا…
مومن : ياخوفي يعلا تا يعلا و يطيح على حجرة انسيتي بلي خيرك ديما كيرجع بومزوي نسيتي بلي اي حاجة دخلتي ليها و بغيتي دري يدك فيها كترجع عليك…
حورية ( دورات راسها و جغمات من كاسها و هزات راسها لسما) :
ماشي انا لي مني العيب ا با ناس لي قلبهم عامر بشر و الغبينة و مول النية و قليل النية مكيتلقاوش و انا نيتي كتغلب نيتهم اشنو ندير ليهم …
مومن : دخلي سوق راسك و خلينا هانيين مزال مسخنا بلاصتنا بلاما تخلينا ندوحو من قبيلة لقبيلة بحال ابن بطوطة لي مخلا بلاد..
حورية : تبعني ا با و غادي تربح ياك تبعتيني فمولاي السلطان و بسباب الغربال لي عايرتيني عليه حنا فهاد الخير زين نيتك ا با شوية… و زيدون حنا بغينا انديرو الخير و نعيشو على قد حالنا مبغينا قصر ما بغينا خدم خلاوها ماليها على قد فراشك مد رجليك…
_ الليلة دازت عند مومن و حورية زينة نعسو مزيان علاش لا و هما مفرشين وسايد بحال ريش النعام و مغطيين بغطا بحال الحرير… الغد فصباح و على طبلة الفطور… تسمع صوت البوق و الطبل كيتضرب… شافت حورية فمومن باستغراب..
با اش واقع ؟
مومن : ميكون غير عم سي عدنان وصل و هكا كيستقبلوه…
حورية : اييه اوا مزيان و خاصك تنوض توجد راسك ا با خاصك تكون كد المقام…
مومن : مغتجيش معايا؟
حورية : لاواه ا با مفيا لي يمشي اتكونو غير نتوما الرجال اش غادي ندير بيناتكم مكاين لاش…
مومن : و لاواه اتكون مرات السلطان تعرفي بيها و ديري بلاصتك حتى انت و متعرفي تكون حتى مرات عم سي عدنان…
حورية ( جغمات من كاس داتاي) :
لواه اعفيني ا با انهبط لسوق شوية ندور و نسقي عينيا…
مومن ( شاف فيها بنص عين) :
و لا كولي تجيبي الخبارات و تحركي النوادر تاني حورية ها حجر العافية مدخلي فحد و متهضري مع حد دخلي سوق راسك مافينا لي تيصادع مع شي حد تاني…
حورية : متخافش عليا ا با كون هاني مغانهضر مع حد و لا غادي نجبد حد… انوض انت وجد ليا الحالة باش تلاقا بسي السلطان و لي معاه… ناض مومن لبيتو.. كيعزل و يتخير فشنو غادي يلبس و يناسب هاد النهار.. أما حورية جمعات الفطور داتو للكوزينة غطاتو.. جمعات الدار و دارت بيها.. و دخلات لبيتها جبدات واحد القفطان فالغوز مع واحد الحايك… قدات الحالة و دارت الحايك عليها و شبيكة غطات بيها وجهها بحال النكاب… هزات واحد الكموسة فيها شي فلوس… لبسات شربيلها و خرجات… لقات باها جاي لعند ها يوريها شنو لبس او واش حا معاه… وقف قدامها كيدور و يوريها الجلابة ديال المليفة فلون الاخضر لي لابس..
حورية ( عجبها باها و كيف كيبان) :
ماعندي منسالك ا با كتبان بحال العريس فليلة عرسو واقلة حتى نهار عرسك مع مي مبنتي هاكا هههههههه
مومن : إلى مشى الزين ابنتي كيبقاو حروفو راه خاص غير الفلوس هوما لي كيزينو الواحد…
حورية : لي كيزين الواحد ا با هو عقلو و فهامتو و قلبو واش كحل و لا بيض اما راه فدفلة و حااار…
مومن : و كيجيت و كان باركة من الفهامة خلاوها ماليها المرة الفاهمة نقمة..
حورية : واخا حكرتي المرا ا با معليش نساها ليك و يجي نهار و نفكرك فشنو تقدر دير المرا اما كيجاتك الجلابة شهوة منها.. و خليني نمشي دابا..
مومن : لفين ( باستغراب)…
حورية : واش انبقاو غير نهضرو حنا ا با الله يهديك راه هضرنا… و يلاه انا مشيت ساروت الباب معاك و التاني معايا تهلا فراسك و عرف شنو كتكول انا مشيت…
مومن ( حورية غادية و هو كيوصي) :
و عنداك ا حورية ديري شي زبلة انا نبهتك اودني منك..
حورية ( من بعيد) :
وسير ا با متخافش الله يعاونك… خلات حورية مومن فطريقو لقصر اما هي هبطات جيهة السوق تسوق و تدي لخبار…
نزلات حورية لسوق كتسارا و تشوف و تسقي عينيها من موالين تواب… و ذهايبية و زيد و زييد حتى وقفات عند واحد العطار.. لقات عندو جوج عيالات دايرين النكاب و شادين معاه تقرقيب الناب… من الشوفة باينين بلي كيتقداو من عندو شحال هذا و معرفة و باينة بلي غادي يطولو بزااف…
حورية : اشريف الى كنتي مزال مطول نشوف محال اخور.. نتابه ليها العطار خلا العيالات و خرج عندها..
ولواه اش خلاك تكولي هكا الالة امري الله اوديي؟
حورية : اييييوا مدام وقفنا قدام بابك لازم عليك تسولنا شنو حبينا تهضر معانا و تعطينا وقت ماشي تنخلنا و لالة بحال هكا ماغادي تكسب ناس ليك و تجري عليهم بيديك و انا غير نصحتك…
لا لا الالة كاع الحاجة لي تخصر الخواطر معندنا منديرو بيها اش حب الخاطر امري شنو بغات لالة..
حورية : ديرلي واحد الحفنة ديال الحنة و زيدلي معاها حفنة ديال القرنفل و عطيني العكر الفاسي و لكن يكون حر راه نقلعو من الشوفة اللولة… و حفنة ديال الخزامة حتى هي و حفنة ديال الغاسول ميكونش مسقي… و صابون البلدي و حفنة دالورد البلدي حتى هو و لخرقوم بلدي يكون حقيقي الله يخليك…
العطار : واخا يا لالة هي اللولة ( بدا كيعبر)… هو كيعبر و حورية كدور عينيها فالمحال و تشوف شنو مزال خاصها… خرجو العيالات او وقفو قراب منها شادين الهضرة…
عييت اختي و غصت فمحايني الى كان هادشي من الله مرحبا بيه و الى كان من العبد الله ياخد فيه الحق مكنتش بحال هكا الى عريت ليك على وجهي و لا حالتو بالكلف..
انت اختي لي مكتصنطيش عييت نقول ليك ديري وراق السدر و لكن نيتك الناقصة هيا لي خارجة عليك.. ( ضارت وحدة فيهم و شافت فحورية طلعاتها و هبطاتها).. شوفي هاديك لي واقفة تم تبارك الله بحال النوارة المفتحة وجهها باين من نكابو كيبري.. غير من يديها باين العربون..
خلاص عليا ( كتعوج فالهضرة و طلع و تنزل فحورية) انا كونما حبالتي و الكلف لي خرجليو تشوفي وجهي كيف كان بحاال الكمرة مضوية بالليل فين تبان هادي لي واقفة هنا تلقايها ظل نهار و مطال و هي مقابلة المرايا و الكحل… خلاوها ناسها لعكر فوق الخنونة هههههه..
ولاواه لاواه شنو بان ليك نسولوها تبارك الله بان ليا عندها مع هادشي شوف غير هادشي لي طلبات لحمان…
سوليها انت الى بغيتي اما انا منسولهاش منهضرهاش… حورية سمعات كلشي على ودنيها قلة النية و القلب الكحلو سم لي فالواحد كيوصلو لمواصل كتيرة…
قربات منها ديك السيدة او وقفات عليها…
السلام عليكم الالة واخا نسولك؟.. ضارت عندها حورية نزلات النكاب و تبسمات :
ايااه الالة مرحبا سولي..
جارتي فيها الكلف فوجهها مخلات مدارت و لا هو بغا يزول و تبارك الله عليك من كلامك مع العطار باينة عندك تجربة داية و جايبة… الله يخليك واش كتعرفي شي حاجة لهادشي… شافت حورية فديك خيتي لقاتها كتقلب فعيينها معاجبها حال…
حورية ( تبسمات) :
الى على كلف الوجه يداوا ارا ليا كلف القلب واخا تحكو بحلفة عمرو يزول و لكن مافيها باس قصدتيني و المقصود الله منردكش بلاش … اوا عطيني ودنك و سمعيني مزيان… خودي الودعة راها عند العطار.. تاخديها و ديها و زيدي عليها شوية دالحامض.. و ديريها فبلاصة متقربها شمس و تكون باردة باش متخسر… ايوا الالة و نسايها واحد تلتيام ورجعي ليها اتلقايها دابت و داك الحامض ولى بيض… و كل ليلة تحطيها على موضع لي فيها الكلف… لبلاصة لي فيها الكلف ولا فيها شي امارة تحطيه فوقها… سمعيني مزيااان و طلقي وذنيك معايا و ياااك تحطيها على الوجه كاامل لاا… حطيها غير على البلاصة المضرورة و لغد غسلي وجهك مزيان و يااك تخرجي للشمس راه وجهك يكحال و تحرقو الشمس و هدا مكان…
الله يجازيك بالخير الالة اش سماك الله! ؟
حورية ( مبسمة) :
حورية..
مشرفين الالة حورية انا الباتول و هادي رقية جارتي..
حورية : مرحبا
الباتول : عمري شفتك هنا…
حورية : اااه جينا ضياف عند مولاي السلطان… قاطعاتها رقية :
الباتول تعطلنا يلاه خلاص..
الباتول ( شدات على يد حورية) :
الله يجازيك بيخير الالة حورية نتلقاو من بعد.. خداو الودعة من عند العطار و عطاو بظهر لحورية و تمو غاديين…
رقية ( و على مسمع حورية) :
كاتليك جاية عند مولاي الكذابة لوخرى تلقايها كاتليك منديرها لوجهي و منخرج فشمس غير باش منبياضش او وجهي ميصفاش شحال فيها…
حورية سمعات كلشي على وذنيها… ضحكات من هضرة هاديك السيدة حدرات راسها و شدات التقدية من عند العطار خلصاتو و تمات راجعة كتفكر فهاد الناس بنادم سير معاه غير بنية… هيا دارت خير و كملات فيه.. و لوخرا الى نيتها لي ناقصة متلومهاش على لي غيوقع ليها..
سلات حورية التقدية ديالها و ضارت و شبعات دوران و و تمات راجعة لدار مدات خبار مجابت خبار… واخا هكاك السوق كان خاوي و مكانت لا جماعة لا لمة… مع دخلات بان ليها الحس مقطوع عرفات باها بلي مزالو عند السلطان.. زولات الحايك حطاتو… خلطات واحد تلبيخة ديال الحنة بالعشوب طلاتها لراسها و جلسات فالشميسة لي مضوية قاع الدار… ناضت سخنات الما حتى سخن و دخلات ضرباتها بفركة دايزها الكلام… لبسات حوايجها و ظفرات شعرها و عقدات بيه راسها… و تكات باش ترتاح… معرفاتش شحال دالوقت داز و هي داتها الغمضة حتى تسمع حس الباب و صوت باها كيعيط… جمعات الوقفة و خرجات عندو مبسمة…
مومن ( فرحان و الضحكة خارجة ليه من العينين) :
فين ابنتي الحنينة لي مضوياها عليا..
حورية ( كضحك) :
باين ليا فرحان و ناشط مع راسك ا با هيا شي مزية..
مومن : باك ولى من الناس لي عندهم الهمة و الشان ولات طبلتي مع مولاي السلطان ايييه ابنتي ناس الجود و الكرم اما خوه اش غادي نكول ليك ابنتي الحكمة و الفهامة و التباتة و رزانة و العقل لمن عطاه الله يحنتك ابنتي…
حورية : كثر من بنتك ا با…
مومن ( كلس) :
و هداي عليا ابنتي حتى لهادي منعرفشاي امضرا جبتي شي خبار و لا والو…
حورية : السوق كان خاوي مكان لا جماعة لا لمة و سمعت من التجار بلي حتى نهار السبت عاد كيعمر السوق انتسنى حتى لداك النهار و نهبط و نشوف…
مومن : سولات عليك مرات السلطان كانت باغية تعرف عليك و تشوفك…
حورية : مكاين باس ا با مرة خرى منين تجيبها لوجيبة… اوا نوجد ليك العشا دابا و لا حتى لبلاتي؟
مومن ( حط يدو على كرشو) :
لا لا ابنتي عمرت كرشي لي يكفيني اسبوع و زيادة..
حورية : مزيان ا با خلينا نيت نديرو شم و لم على زاد اليوم عندنا و غدا الله لي عالم بحالنا…
مومن : انا اندخل نريح واحد الشوية…
حورية : سير ا با مد ليا رجليك تحت اللحاف و غطي راسك مزيان و رتاح… دخل مومن لببتو يرتاح ليه… اما حورية رجعات لبيتها و جلسات حدى السرجم كتشوف فالنجوم لي بداو يبانو مع غروب الشمس.. غربات الشمس و طلع بلاصتها القمر نور المكان و راح الليل و حل مكانو نهار و الشمس زهرات…
و قدام باب السلطان علا الصوت و بسميت السلطان تعياط و نواح…
اسي مولاي ا عتقوني عتقوني واكواك اعباد الله عتقوني مشا ليا وجهي الشلاهبية دارتها بيا عتقوني…
على طبلة طويلة عامرة بما لذ و طاب مجموع عليها مولاي إسماعيل و عائلتو حتى كيسمعو صوت الغوات جاي من برا جمع يديه و ستغرب شكون تجرا و جاي قدام باب القصر كيغوت.. شوية تحل الباب و دخلو الحراس وقفو قدامو حادرين الراس..
إسماعيل : شنو واقع اش هاد الغوات ؟
سيدي واحد المرا عند الباب كتغوت و كتكول بلي وحدة من القصر و من عائلتكم امولاي خرجات ليها على وجهها…
عدنان ( غوبش و شاف فباه و عمو لي كالس رافع حجبانو و كيشوف مستغرب) :
و لكن حنى مامعانا حتى مرا من العائلة من غير الخدم..
الحارس : اسيدي مبغاتش تمشي و حلفات تبقى حتى تشوفكم امولاي..
هنا هضر عم عدنان :
خليوها دخل نشوفو مالها و شكون هي..رجعو الحراس حادرين الراس… اما السلطان وقفو فطورهم لي كان دايز يخير و على خير… ناضت مرات السلطان ستاذنات و مشات لبيتها ترضع بنتها.. بقاو غير الرجال حتى دخلو عليهم الحراس من جديد فيديهم مرا لابسة حايك فالاخضر و مغطية وجهها… وقفوها و رجعو باللور..
عدنان ( غوبش) :
ياك لاباس الالة مهجمة بلا موجب شرع و لا عجبك حلقك و سخيتي بعظامك.. علات فيه عينيها لي بحال اللفعة و بدات كتمتم فالهضرة :
حاشا اسيدي سمحو ليا و لكن لوكان تعرفو ما بيا كون تعذروني..
هلال ( شاف عند ولد خوه سكتو بعينيه و ضار شاف فيها) :
_ كنسمعوك الالة اش حب الخاطر شكون لي اداك مدام جيتي تال قدام القصر و كتغوتي على الصباح الا و كاينة شي حاجة ؟
اسيدي الحكاية و مافيها كنت فسوق و تلاقيت مع واحد السيدة عند العطار كتكول بلي جاية من القصر و من عائلة مولاي سولتها على نيتي و مدرت فيها والو شنو سر بياضها عطاتني واحد الوصفة و كالت ليا بلي تخلي وجهي صفا من الحليب و نورو بحال القمرة المضوية و مع انا بحال الهبيلة و بحال البهيمة لي فينما كودوها تحني الراس درت بكلامها و فاش سولتها واش نخرج بيها كالت ليا احسن مغاديري تخرجي بيها للشمس و درت بكلامها اوا وجهي و لا محروق اسيدي بحال الفاخرة ولات شفايتي فالقبيلة و سيرتي على كل لسان..
هلال : مكتعرفيش سميتها و لا شكوون هي واش من الخدم ديال القصر؟
لا لا اسيدي هي لباسها ماشي ديال الخدم هيا قصيرة و بيضة وباينة فيها لفعة مقطرة و كالت ليا بلي هي ضيفة عند مولاي…
عدنان : و حنا مالنا بينك و بينها حتى واحد مضربك على يدك و ديري بكلامها…
اسيدي انا بغيتكم تاخدو ليا حقي ياك نتوما هوما كلشي هاد البنت هادي دايرة ما بغات و الى دارت لبناات القبيلة كاملات هكا و الى تلاقات شي مرة بمرات مولاي خاصكم توقفوها عند حدها و تاخدو ليا حقي منها..
هلال : الى شفتيها تعرفيها؟
اه اه اسيدي نميزها بين مياات مرا و مرا…
هلال ( موجه كلامو لحراس) :
جيبو كاع الخدم ديال القصر لا لكبارات لا صغارات ماتخليو حتى وحدة.. نفكو علينا هاد الجرة طريق العيالات كلو شوك و حفاري الى مارديتي بالك ماتعرف رجلك فين تزلق و طيح..
وقفو كاع الخدم قدام السلطان… جامعين يديهم و حادرين الراس…
هلال : يلاه تاملي مزيان فوجوهم او ورينا شكون لي خرجات عليك و على وجهك… هزات راسها فيهم وقفات قدامهم صغرات عينيها بدات دوز على وحدة بوحدة و ترجع من جديد حارت و حتارت حتى وحدة فيهم ماهي رخات شفايفها و راسها و ضارت عند مولاي هلال و حركات راسها يمين و شمال…
حتى وحدة فيهم اسيدي ماهي..
هلال : اوا واش المعمول الالة راه جبنا ليك كاع النسا لي فالقصر مابقى حد…
أسيدي حتى وحدة فيهم هادي قصيرة و شعرها طويل و كحل و عينيها صغاار و مشفرين و بياضها بحال الحليب و بفمها كالت اسيدي من القصر… قاطعها عدنان..
مكاين حد من غيرنا و سي مومن ضيفنا هو و بنتو..هلال شاف فيه و غوبش..
و شكون هاد بنتو؟
عدنان : الله اعلم عمري ماشفتها و لا ريتها و نهار الحفلة محضراتش مع باها…
هلال ( شاف فالحراس) :
جيبو سي مومن و بنتو و اكدو عليه يجيب بنتو و تكون معاه.. حدرو الحرس الراس و مشاو…
*****
#بيت_حورية
زول باها الرواق و دخل كيتفافا مخلوع…
غير شافتو من بعدما كانت متكية و تكادات فالكلسة و شافت فيه غوبشات…
با ياك لاباس مالك داخل مخلوع و لونك مخطوف…
مومن : شنو درتي تاني ابنت الهم شنو درتي مخلي السلطان مسيفط لحراس و العوين ديالو لينا باش يدينا ليه…
حورية : مدرت والو ا با انت ديما تاهمني و لايح عليا الباطل و زايدون انا عمري وصلت لقصر و ناسو كوراه طلعنا ليهم فالراس و دايرين شي فخ باش يجريو علينا…
مومن : نوضي عليا من الفهامات الخاوية ديري حايكك عليك و يلاه زيدي قدامي نشوفو السلطان شنو بغا يلاه هاد المرة مكنعرفك مكتعرفيني…
حورية ( خرجات فيه عينيها مصدومة) :
يااااك ا با دغيا نكرتيني سري سري دغيا بعتيني…
مومن : عيييت عيييت و مبقا فيا جهد لفعايلك و غرايبك و مصايبك يلاه زيدي كدامي…
حورية ( وقفاات) :
واخا ا با هاهي غادة دابا تندم عليا دابا تشوف… هزات حايكها دارتو عليها و خرجات مع باها… غاديين بيهم الحرس بحال شي جوج سراقة متبتين و حادرين الراس واخا لخلعة الداخل ميعلم بيها غير الله..
****
#فالقصر
دخل لعوين و حدر راسو لمولاي السلطان :
سيدي جبنا سي مومن و بنتو…
عدنان : كوليهم يدخلو دخل و مومن و حورية لي دايرة اللتام على وجهها…
عدنان : سمح لينا اسي مومن و لكن عمي بغا يشوفك انت و بنتك…
مومن : اه اسي مولاي مرحبا ياك مكاين باس؟
هلال ( مصغر عينيه و كيشوف فحورية لي مباين فيها غير لعينين ) :
اش سماك الله الالة؟
حورية ( حادرة راسها) :
سميتي حورية…
هلال : تقدري تزولي النكاب ؟
حورية ( هزات عينيها فيه) :
سمح ليا امولاي ما انت بعمي ما لا بما و لا خويا و لا راجلي باش نزول اللتام و تشوف وجهي…
شاف فيها باها ملقا ميغمز فيها :
سمح ليها امولاي زولي النكاب ابنتي كيف كال مولاي السلطان…
حورية : و انا كلت منزول النكاب غير قدام با و لا عمي ولا خويا و لا راجلي باش نزول النكاب قدام الرجال…
هلال : و ديك المرا الواقفة معمرات ليك العين… دورات حورية راسها عند المرا و عرفاتها و عرفات لاش هي هنا واخا ماتحركات فيها شعرة…
حورية : نخرج قدام الباب اسيدي انا و السيدةو هي لي من حقها تشوف وجهي و لكن حتى نعرف لاش انزول النكاب..
عدنان( موجه كلامو لمومن ). :
سي مومن هاد السيدة… عاودليه كلشي مومن شاف فحورية و عاق بيها هي مولاتها مكاينش من غيرها… قاطعاتهم حورية بلاما تخاف و لا تحرك فيها شعرة من الخوف :
بلاما نزول نكابي و لا يسمع شي حد عياطي انا هي مولات الوصفة و انا هي لي لقيت هاد السيدة قدام العطار… بدات لوخرا تهلل و تغوت حتى سكتها هلال بغواتو….
سكااااااات…. شاف فحورية :
مخايفاش من هادشي لي درتي لهاد المرا مسكينة ؟
حورية ( و عينيها كلهم تحدي) :
مخايفاش اسيدي قول ليا علاش؟
هلال : علاش ؟
حورية : حيت هاد المرا كذابة و الى بغيتي اسيدي تجيب المرا لي كانت معاها و هي تشهد بشنو وقع…
هلال : قولي لينا انت شنو وقع و شنو الصح من الغلااط … عاودات ليهم حورية لي وقع بتفصيل بلا زيادة..
و دابا اسيدي شكون الغالط انا و لا هي حد مهضرهم و لا ساومهم و منين درت الخير و نصحتها عند بالها كنضحك عليها هيا نيتها ناقصة و فهامت المرا اسيدي نقمة واخا تكون بحال الدالية. و بحال الكمرة المنورة فالسما… و فهامت هاد السيدة الزايدة هي لي خرجات ليها على وجهها ماشي انا اسيدي حد محط عليها سيف و لا هددها نيتها الناقصة لي دارتها ليها… شاف هلال فديك السيدة حدرات راسها و سكتات..
هلال : ضيعتي لينا وقتنا و جايا تنوحي كونما جيتيني ولية كنتي الليلة اتباتي بين الحديد مرمية تاقينا فيك وجهك الله سيري فحاالك… زيرات على حايكها و مشات متلفتاتش وراها…
عدنان : سي مومن سمح لينا…
حورية ( شافت لهلال فعيينه) :
مولاي نقدر نمشي؟
هلال ( محتار فامرها عينيها كيبان فيها بزاف دالحوايج)
شطارة و الفهامة و القفوزية) :
تقدري تمشي… متلفتاتش وراها و خرجات..
مومن : سمح لينا اسيدي… غادي راجع باللور دار و تبع بنتو..
هلال ( و ضحكة منورة وجهو لي مزين باللحية بحال سواد الليل و عينين كوحل متوجين برموش طوال و سنين فالبياض بحال بياض الهلال) :
خويا مولاي إسماعيل كيبان ليا انزيد فالجلسة ديالي هنا جا معايا الهوا و حسيت بالراحة..
إسماعيل : كلشي ديالك اخويا و إلى مهزاتك الأرض نهزك انا على كفوف الراحة..
هلال : ربي يخليك اخويا و يطول لينا فعمرك..
//////
مومن ( داير يديه ورا ضهرو غادي جاي قدام الخصة) :
الالة عطي تيساع لناس القبيلة الالة بغيتي تنصحي نصحي راسك هاحجر العافية لما دخلي سوق راسك.. شافت فيه حورية و مغوبشة كتلعب بطرف قفطانها و كالسة :
ايوا كيكولو سيادنا اللوالة دير الخير و نساه و انا كندير غير الخير وااه السيدة كتسولني اش كديري لوجهك ليداير بحال البلارة المصفيةو منكولش نبقا ساكتة و حشومة ولاواه ا با لاواه قلة النية نيتها الناقصة لي خرجات ليها فداك الوجه… ( بدات ضحك) بيني و بينك ا با عجبنييي الحال و برد ليا قلبي السم كيقطر ليها من العين و يكول انا فين هي لي قلبات عليها باش تعرف مول النية و قليل النية مكيتلاقاو و انا ربي شاهد عليا عطيتها الوصفة بنيتي و نصحتها من نيتي و ربي شاهد عليا ايوا ا با قلبها الكحل لي عامر بالسم هو لي خرج ليها على وجهها ماشي بنت مومن… ايوا دابا شكون لي غالط انا و لا هي؟
مومن ( وقف كيشوف فيها معندو حيل معندو قوة) :
انا ليغالط ابنتي انا لي غالط ها العار ها العار خلينا هانيين مهنيين مابغينا تطبال على ريوسنا بحال الغربال خلينا مستورين واكلين لي مقسم الله و هانيين عظامي مابقاوش ديال الترحال من بلاد لبلاد ياربي و ياربي تجيب لهاد البنت شي ولد الناس لي يجمعها و يلمها…
حورية ( كتشوف فيه من فوق نيفها) :
واااه واااه اجي و تزوج بحورية و غير تهنى ا با انا هنا معاك بت نبت زرعة و نابتة فقاع الدار جدوري قاصحين اما عروقي صعيب يتكلعو واخا تجيب الفاس و تعيا متحفر من حداك ا با الحبيب ما نتهز مانتكلع… انا نمشي نوجد ليك واحد الكاس دتاي تقاد بيه المجاج و تخوي ليا بيه داك الراس… ناضت و خلاتو مسكين فحيرة فهاد البنت لي زبايلها و مصايبها مكايساليوش واخا هي مقصداش و لكن باركة تسرج اللجام و تعقد لسانها بعقدة صحيحة حيت مجايب ليها غير الهم و الغم و ضيقة و ديما راجع ليها بفضيحة…
مومن ( تنهد تنهيدة طويلة) :
اخليك ابنتي راه كالو ناس زمان كاع لي دكدكاتو المعزة فراس الجبل كتخلصو عند دار الصياد و لحجلة الخفيفة من سعد الصياد… طلات عليه حورية مبسمة :
المعزة ا با كانت كترعا مخلات جبل و ماخلات زرع و منين عيات عطات راسها لصياد نفعاتو شبعات ليه كرشو و بجلدها كسات ليه ظهرو غير حيت هي بغات ا با ماتحكرش المعزة لي دكدكات فراس الجبال العود لي تحكرو ا با يعميك..
مومن : الله يهديك الله يهديك…
فديك الليلة خرج مومن من بيتو لقا حورية جالسة جامعة قدامها حفنة ديال التراب و تغرب فالغربال… الحجر تلوحو و التراب الرقيق تخليه…
مومن : اش كديري تاني ياهاد البنت واش هاد الغربال مغايخطيناش ؟
حورية : علاش ايخطينا ا با واش نسيتي بلي هو سبابنا حتى وصلنا لهنا و حتى جلسنا فهاد الدار او ولينا فضيافة السلطان ؟
مومن : خلاص عليا مبقات ليه لزمة حيديه عليا مبقيت حامل نشوفو قدامي الله يتبعو البلا… مع آخر كلمة نطقها مومن.. الرعد دوا فالسما و كاع السحاب تجمعات و دنيا تغمات.. و ضحكة رنانة كتخلع تسمعات.. مومن تخلع و تدهش معرف باش تبلا.. كيحس بريح قوية عند وذنيه بحال الى معاه الزايد… صوت تردد فوذنيه عمر بحالو سمعو انثوي رنان :
صعييب تهنى مني انا بحال الكمرة فالسما كيتشوفني تلقاني قريبة و كيف تبغي تمسني انا بعيدة… صعيييب تهنا مني صعيييييييييييب هاهاهاهاهاهاهاهاهاهاهاهاهاهاهاها….
مومن ( مومن كيحاول يتعود من الشيطان الرجيم و يقرا القرآن) :
أعوذ بالله من الشيطان الرجيم بسم الله الرحمن الرحيم… فلحظة رجع كلشي كيف كان فالأول الريح مشات و الرعدة هدات… بلع مومن ريقو كيشوف فجنابو… مابقات بانت ليه حتى حورية بنتو لي يلاه كانت كالسة قبالتو…
ح ح ححورية و و وااا حورية…
نعام ا با اش كاين…
مومن ( تخلع و غوت و نقز من بلاصتو) :
أعوذ بالله من الشيطان الرجيم فينك ابنتي؟
حورية : با انبقاو انعاودو الهضرة انا حداك و لكن متقدش تراني واش نسيتي فعايل الغربال انا نمشي نجيب خبيرات و نرجع…
مومن ( وقفها) :
ب ب بلاتي بلاتي و و واش مشفتي والو مسمعتي والو ؟
حورية : اش غادي نسمع واش غادي نشوف و علايش كتهضر خليني نمشي قبل ميروح الليل و ينعسو الناس راه مبقا والو و هاد الوقت لي كيحطو الناس راسهم و يخويو قلبهم و يفيضو همهم…
مومن : د د ديني معاك
حورية ( باستغراب) :
لفين انديك ا با بقا هنا و ماتعطلنيش الله يرحم ليك الوالدين و انت وجهك صفر اكن قلت النعاس عرفتي شنو دخل لبيتك و حاول ترتاح بينما رجعت واخا انا مشيت… خلات حورية و خرجات… مومن مفهم والو واش هادشي لي سمع حلم و لا علم و لا خيال و لا غير تأثير الغربال و علاش حورية بنتو بضبط مسمعات و مرات…علاش هو بضبط كيطرا ليه هادشي و هادي تاني مرة و غير فاش كيبغي يتهنى من داك الغربال…
مومن ( راجع باللور و غادي لبيتو رجليه مهازينو) :
انا بالله و بالشرع انا متايب ليك يا سيدي ياربي أعوذ بالله من الشيطان الرجيم بسم الله الرحمن الرحيم.. مع دخل لبيتو سد عليه الباب و تخشى فالفراش…
فعز نعاسو كيحس بيد كتحرك فيه و صوت بعيد كيعيط ليه… كمز من نعاسو مخلوع كيشوف فجنابو و يتعود من الشيطان الرجيم…
حورية : ا با بسم الله عليك فايق مخلوع تكول ا عفريت بان ليك..
مومن ( خنزر فيها) :
ياك لاباس مالك مفيقاني فعز الليل ؟
حورية : با واش موالفة لك تنعس فهاد الوقيتة داخلت عليك بوجه الله مبقيتي عاجبني…
مومن ( تقاد فبلاصتو) :
اش كاين تم اوكان فين كنتي خارجة دايعة بحال سحيحت الليل…
تقادات حورية فالكلسة و تبسمات :
سمعني مزيان جايبة ليك خبار تسوا قنطار ايه و تسمعها تدعي معايا حتى يصبح الحال و هاد المرة ماشي غير ايكون وزنا صوف هاد المرة سومنا ايتوزن بالحرير و اللوبان و الذهب ا با اييه ايولي كلشي يصبح و يمسي بسي مومن و حورية مولات الغربال..
مومن : اوا اشمن خبار جايبة معاك هاد المرة سمعينا و دوقينا و فيقينا من هاد النعاس…
حورية ( ربعات رجليها و تقابلات مع مومن و عينيها باين فيهم تشيطين و ضحكة) :
دخلت لقصر.. قاطعها مومن مخرج فعينيه و كيضرب ففخاضو :
اش داك اهاد البنت لشي قصر و لا لماليه واش مكتحشميش مكترمشيش وجهك هداك و لا مسلفاه واش باغية تخرجي علينا و تخلينا جارين جلايلنا فالدواور…
حورية ( غوبشات) :
و خليني انكمل كلامي ا با بشوية عليا بحال الى قتلت قتيلة و زايدون مشافني حد و خليني نكمل و لا نوض نمشي بحالي حسن ليا و هادي هي دير الخير مايطرا ليك باس..
مومن ( شد راسو) :
كملي الالة كملي نشوفوك فين اتلوحينا..
حورية : سمعت مولاي هلال خو مولاي إسماعيل كيتكلم مع مولاي عدنان.. تنهدات و سرحات رجليها و تبسمات و تفكرات كلستو.. و كلامو الحلو زين تبسيمتو و النخوة ديالو زينو لي كيسلب العقول و حروفو الكحلين لي كينافسو الليل و ظلامو…
مومن ( كيتسناها تكمل) :
كملي…
حورية ( عاد وعات على راسها) :
لي سمعت بلي مولاي هلال المرا لي كينوي يتزوجها مكتصدق ليه حتى ليلة عرسو علامو واقف و كولشي كيتفرتك يا المرا كتهرب و لا كطرا ليها شي موصيبة كحلة الله يستر… ودابا كاع بنات القبيلة عينيهم فيه و لكن ماكيزعمو عليه كيخافو منو حتى ولاو مسميين عليه المنحوس… و تاجر لي طرق بابو و طلب بنتو يا يتحجج و يكدب عليه بلي بنتو هاضرين فيها و لا مخطوبة و لا مقري كتابها… حتى يأس و قطع الياس و حيد الزواج من راسو و بالو…
مومن : مسكيين كاعما يستاهل…
حورية : مولاي عدنان باغي يشوف ليه شي بنت من هاد القبيلة و لكن مولاي هلال مبغاش و رفض خايف من الفضيحة و يتحاشم و يدل مع ناس القبيلة و يوقع ليه كيما وقع ليه هذا شحال..
مومن ( كيفكر) :
واش فيدينا منديرو حنى ابنتي لمولاي هلال تلقاي نيت تابعو شي نحس و لا تابعاه شي تابعة..
حورية : ا با الله يهديك مكاينش شي تابعة قد بنادم واش انا جاية نعاود ليك باش تخدم ليا داك العقل و لا باش تكول ليا راه منحوس…
مومن : اوا اش بيدينا منديرو.. ؟
حورية ( كتحرك فعينيها و تشيطين راكبها) :
انحركو الغربال و نعرفو شنو طاري ورا البيبان و شكون قفل مولاي هلال على الزواج و خلاه منكوس فعينين الناس؟؟
مومن : انا هادشي مداخلش ليا لراس و خاطري ما مرتاحة ليه اش فداك الراس ابنت مومن… تنهدات حورية و دارت يديها و را راسها و تكات..
حتى يصبح ا با و تعرف اش تحت هاد الراس اما دابا خليني نعس و نرتاح و نعرف شنو لي مخبي على مولاي هلال… حطات حورية راسها على المخدة و صورة مولاي هلال بين عينيها مفارقاتهاش حاسة براسها طايرة فالسما و ضحكة مخطاتش وجهها كتحس بقلبها تسرق منها… يكون هذا هو العشق و الغرام لي كتحس بيه حورية و لي حسو بيه بنات القبيلة؟؟؟… داتها عينيها على صورتو كتحلم بيه و تخمم فيه…
( صبح الحال و الشمس ضوات و على طبلة الفطور تجمعات حورية و مومن)
حورية ( كتغمس الخبز فالزيت) :
با سديتي الباب مزيان طرقتيه؟
مومن : سولتيني الف مرة هاد السؤال و كلنا ليه ياه سديناه واش وليتي تنساي و لا حفا ليك القرشال…
حورية : لا هادي لا ديك غير بغيت نتاكد و صافي يجي يدخل علينا شي واحد من هنا و لا لهيه نصدقو واحلين .. و تراب جبتيه..
مومن ( شاف فيها) :
واش اتخلينا ناكلو هاد الطرف ديال الخبز و لا اتوحليه لينا؟
حورية : صافي هاهي سكتات… كملو فطورهم ناضت حورية جمعات الطبلة و رجعات عند باها قربات ليها الغربال و تراب لي جاب…
حورية : نوصيك ا با متغوت عليا عوتاني متذهش متخاف هاد المرة انا لي انمشي و انا لي انسمع و انت لي اتوصل الكلام لمولاي هلال و لي كلتها ليك كولها ليه باش نكونو مفاهمين و مايعيقشاي بينا و نصدقو فسين و الجيم… و عنداك نطير قدام و تبدا تمتم و تغوت و يسمعونا راه الحيوطة عندها وذان..
مومن : هادشي سمعناه و حفظناه غير سربينا خلاص هادشي طلع ليا فالراس…
حورية ( هزات الغربال و كبات فيه داك التراب) :
يا بسم الله… بدات التغربال تغرب حتى بقى غير الحجر فداك الغربال مداتو لباها.. شد الغربال بين يديه هبط راسو و ساط عليه حتى طارت الغبرة لي فيه على حورية… هنا تبدل الجو و السما لي كانت صافية ضبات بحال الشتوية.. هز راسو لسما كيشوف فالحال لي تبدل رجع راسو لعند بنتو لقاها طارت متبقات بانت… كلس الارض و شد حناكو كل مرة كيطيح فيه النص هادشي بدا كيطلع ليه فراسو و كيحس بحال الى كيادي فالناس و كيدخل فشي حوايج ماليه ااه نقد حياة السلطان و لكن بإذن الله سبحانه…كونما دخل كان السلطان ايتشافى باي طريقة… و مراتو كانت اتفضح بيه و لا بلا بيه خاصهم يساليو هاد اللعب باركة منو ربي جاب ليهم رزق و دويرة مكانوش يحلمو بيها و لا على البال اش بغاو بدخول الشبوقات شي نهار اترجع عليهم و ديك الساع متنفع ندامة…
حط مومن يدو على حنكو كيفكر و يخمم و المقوسة كيتراقصو على راسو مابيدو حيلة و معارف شنو غادي يدار… وقف و تم غادي جاي كيتسنى فحورية امتى تبان و هي مزال غابر ليها الاتر تعطلات عليه و خاف عليها الخوف تزرع فيه.. لتكون ماتلات اترجع و لا الأرض سرطاتها… يلاه تم غادي لجيهة الباب حتى سمع صوت الفازة طاحت و تهرسات دار مخلوع لقا حورية مفرشة و شادة فظهرها :
الله ياربي الله الله على ظهري الله تهرست الله…
مومن ( تم جاي عندها) :
شي نهار ابنت الهم اتسكتي ليا القلب فين تعطلتي؟
حورية : با شريبة ديال الما بعدا راه شحفت شحفت و لساني لسق على لهاتي… مشا باها جاب الكلة كب ليها الما شربات و بقات مسرحة فبلاصتها…
مومن : اتبقاي لاصقة تما بحال النبتة مغاتهضريش و تكولي اش واقع؟
حورية : اسكت ا با اش سمعت غير سكت راه مزال مصدومة و عقلي مخطوف ا با الناس مابقات تخاف و لا تحشم و لا دير بحساب القبر الناس مابقات فيها رحمة مابقاو يخافو و لا يرمشو اللفعة بسمها كثر من سمهم ا با…
مومن : و ها هي بدات تهضر بالالغاز تاني اش شفتي ابنت حديدان…
حورية : سمعني مزيااان و حل وذنيك معايا باش تعرف اش خاص مولاي يدير و شنو خاصك تكول ليه… مولاي السلطان كان هذا شحال كيبغي بنت واحد التاجر حجرتو تقيلة فالبلاد ايوا ليلة عرسهم ناضت ختها لي كبر منهم سحرات ليهم فديك الليلة و تفرتك ليهم الشمل ايوا مسكينة البنت شد فيها داكشي ميزاان بقات غادية و كدباال حتى دا مول الامانة امانتو…
مومن : الله اكبر ابلاتي و انت منين عرفتي هادشي ووفين كنتي؟
حورية ( كتبقلل فعينيها) :
حطني الغربال فدار التاجر…
مومن : الله و ياربي و فين كان ليا هادشي مخبي كملي الهويعة كملي…
حورية : تحطيت فقاع الدار و سمعت مولات الفعلة لمها كيشتي دابا ختها الصغيرة من المرا التانية ماتت مها على نفاس و رباتها المرا اللولة و البنت كالو زينة و سمعت هاد خيتي لي سميتها نوارة كتعاود لمها على السلطان بلي مزالو بلا زواج و سمعتهم كفاش حتى تقفوه و سحرو ليه اييه ا با تافقات هي و مها و سحرو لسلطان فوسط دار خالية جات فالخرجة ديال القبيلة بين جوج نخلات…
مومن ( تخلع) :
ياربي تسترنا و هاد لالاهم نوارة اش بغات؟
حورية : اش اتكون ا با باغية عينيها فالسلطان و تكون مراتو ايه ا با خلاوها ناس زمان الله ينجيك من الوجه لي كيضوي و قلب كيشوي يد تسبح يد تذبح لي يشوف وجه و سميت نوارة يكول هنا نبات و هي فعايلها فعايل ابليس..
مومن ( تنهد) :
كالوها زين الوجه كيزول و زين العقل كيطول و لي خاف زينو يدبال يسقيه بالمعقول… ايوا مكلتيش ليا شنو الحل و شنو خاصنا نديرو مع مولاي هلال…
حورية ( قربات منو و دور فعينيها) :
جاب الله ربي حطني فهاد الوقت فوسط دارهم سمعت نوارة كتكول لمها بلي سلطان حالو ساهل او واعر ولي خاصو يفهمو خاصو يكون فهيم و مرضي الوالدين… و لي اتحل ليه عقدتو تكون مربوعة القد بيضة و عينيها يكونو كحلين بحال الليل و شعرها طويل… و زواجو بيها مخاصو يعرفو حتى واحد من خلق الله مستور غير هي و هو و مايعرف بيه لا خدم لا حشم… و لكن هاد الزواج ميمكنش ليه يكمل ا با و تكون هاد المرا كاملة لهاد الراجل حتى يتفسخ داك السحر لي دايرة نوارة و عاقداه بزغبة من شعرها..
مومن : ايوا و الزواج انحلوه و لكن كفاش هاد الزواج مغايكمل..؟
حورية ( شدات براسها) :
ابا ابا واش انا انبقا نشرح ليك الله يهديك زعمة، راه مسميينك حديدان..
مومن : ايييييييه ايوا بلاتي و كفاش قضية زغبة نوارة لي مشدود و معقود بيها السحور لي مديور…
حورية : و سمعني مزيااان باش السحور يتبطل خاص زغبة من شعر نوارة تحرق الى تحرقات زغبة نوارة السحر ايتحل و نقدرو نبطلوه و لكن قبل منحرقو زغبة نوارة خاص نقلبو على دار خالية لي جات بين جوج نخلات نقلبو فيها و نجبدو العجب المردوم و ديك الساع نحرقو زغبة نوارة و السحور يتحل.. هادشي لي سمعت بهاد الوذنين نوارة كتخبر بيه مها و ضحكتها واصلة لسما..
مومن : هادشي ابنتي فيه العذاب كيفاش انوصلو لشعر نوارة و نحرقو زغبة من شعرها…
حورية ( كضحك) :
هادشي ا خليه عليا ا با انا دابا انت خاصك توالى مولاي هلال و كوليه بلي هادشي جاك فالمنام و بلي خاصو يتزوج و زواجو وحلة عقدتو بيد مربوعة القد بيضة الوجه و كحلة العيان يتزوج بيها بلاما تسيق القبيلة الخبار و لبقية اتكوليه حنا انتكلفو بيها… و كوليه الى متاق يتبع كلامك صدق ليه زواجو داكشي لي بغينا وربي غنانا مصدقش كلامك يدير فينا مابغا تفاهمنا ا با ياك سمعتيني مزيان يلاما نعاود كلامي ا با يااك…
مومن : عليا باليمين ابنت مومن هادي الآخرة ليك راه كالو لولة عسيلة و تانية سمينة و تالتة حصيلة اخر مرة ندير معاك يدي و غير يسالي هادشي داك الغربال انحرق بوه و انا كلت ليك…
حورية : سير ا با سير و عرف كفاش تهضر و دير راسك مدهوش و مضهشر بلاما نوصيك… وفاش ترجع كوليا شنو كاين… وقف مومن دار سلهامو على ظهرو و لبس بلغتو سلم امرو لله و خرج لقصر عند مولاي السلطان…
حدا داليا ديال العنب فوسط القصر كان كالس السلطان اسماعيل مع عدنان و خوه مولاي هلال… حاطين قدامهم صينية ديال النحاس.. ضايرة بكيسان ملونين و براد منشوق ديال اتاي… شادين بيه النغمة… مولاي هلال بجلابة فالاخضر مخيطة بالابيض شعرو مدلي على جبهتو رجل مسرحها و رجل موقفها.. شاد كاس فيديه كيشوف فيه و سرحان…
إسماعيل : اييه على ليام هاد الجلسة كان مولاي عابد الله يرحمو كتعجبو كان كيكلس هو و لالة سلطانة… هي تغني ليه و هو كيتنغم بصوتها و انا وياك كنا نلعبو تحت داك الدالية…
هلال ( تنهد تنهيدة طويلة) :
ايه فاش فكرتيني كانت ايام زينة مبحالها ايام الوالدين لا مشاو كتمشي الركيزة و كيخليو بلاصتهم كبيرة واخا لولاد و لوتاد عمرهم ميعمرو بلاصتهم… دخل واحد من الحراس حدر راسو و عطا السلام…
إسماعيل : اش كاين تما امسعود ؟
مسعود : مولاي سي مومن على برا…
إسماعيل : خليه يدخل هاد المرة لجا متخليهشاي على برا..
مسعود ( حدر راسو) :
واخا امولاي… خرج مسعود و شوية دخل مومن..
مومن ( حدر راسو) :
مولاي يمكن جيت فوقت ماشي هو…
إسماعيل : بالعكس اسي مومن جي الوقت لي بغيتي. انت وليتي من اهل الدار جلس لا تبقاشاي واقف.. كلس مومن و ربع.. حيد رزتو و حطها على ركبتو…
إسماعيل : سي مومن كيبان ليا فعيينك شلا كلام… ياك لاباس ياكما مامرتاح و لا خاصك شي حاجة متحشمش كول لي كاين…
مومن : لا لا اسي إسماعيل انت مول الخير و دار لكبيرة غير هو هادشي لي باغي نقول صعييب يتصدق و يتيقوه العقال…
تقاد إسماعيل فالكلسة ديالو و هلال شاف مزيان فمومن و قاد كلستو و حط كاسو و الاهتمام بان على وجهو…
إسماعيل : ياك لاباس اسي مومن شنو هاد الحاجة لي صعيب العقل يتقبلها…
مومن ( شاف فهلال و بلع ريقو) :
هاد الحاجة لي غادي نقول كتخص مولاي هلال… هلال عقد غوباشتو و ركز شوفتو على مومن…
هلال : شنو كاين اسي مومن هضر يلاه تكلم سمعنا كلنا كنسمعوك…
مومن : ليلة ديال البارح و انا ناعس زارني زائر فمنامي خبرني و حكالي على سي هلال و خبرني بلي اي تزويجة حط فيها يديه مكتكملش و كتسالي قبل الوقت…
هلال ( ضحك) :
هاد الخبير عارفو الكبير و الصغير و هدا شحال سالة و فضات حكايتو…
مومن : سمح ليا امولاي انا من نهار حطيت رجلي فهاد القبيلة و عمري سمعت هاد الحكاية و زيد عليها ممخالط مع حد مكنجمع مع حد شاد تيقاري اسيدي..
إسماعيل ( قاطع هلال لي كان باغي يهضر) :
كمل اسي مومن…
مومن : مولاي هلال متاقش بكلامي الى بغيتي امولاي انا نكول ليك سميت العروسة لي حبيتيها و بغيتيها تكون مرات و عمارت دارك غير باش تيق و تفرز العدو من الصديق…
إسماعيل : غير كمل اسي مومن..
مومن ( تنهد تنهيدة طوييلة و مد رجليه) :
لي زارني امولاي و عطاني هاد الخبار و قص عليا هاد الحجاية خبرني بلي مولاي هلال من بعد بنت التاجر لي حجرتو تقيلة فالقبيلة… مبقات تصدق لا تزويجة لا عروسة حتى مكيبقا والو العرس و كيمشي كلشي فالواد حتى ولاو الناس يخافو من مولاي سمحليا عليها كلمة ولاو يسميوك المنحوس و المتعوس سمح ليا امولاي انا مقلت والو و لوكان بيدي نقطع لسان كاع لي يكول عليك حاجة خايبة…
إسماعيل : كمل اسي مومن شوقتينا و شوشتينا…
مومن : اسيدي هادشي لي واقع لمولاي ماشي من عند الله… لا من عند العبد امولاي ناس خيابت او ولات فقلبها الغبينة و الخديعة..
إسماعيل : و هذا لي زارك مكاليكشاي شنو خاصنا نديرو باش يتفك هلال… ؟
مومن : لا كالي انا جايك لكلام امولاي كاليا الحل بين يدين مولاي هو يشوف شي بنت الناس مربوعة القد حروفها كحلين و سالف بحال ظلام الليل يتزوج بيها بلا خبار حتى واحد لا ناس القبيلة لا خدم لا حشم غير هي و هو و اهلو و اهلها بشرط متخرجش للقبيلة و ميسمع بيها مخلوق…
هلال ( مامتيقش هاد الكلام) :
و مكالش ليك شكون لي داير ليا و فين دافنو و مخبيه؟
مومن ( تبسم) :
كاليا امولاي فالخرجة ديال القبيلة فواحد الخربة جات بين جوج نخلات و بلي زواجك مغايكمل على حقو و طريقو حتى يتفك هاد المعمول و هاد المعمول مغيتفك غير بزغبة من شعر لي عملات هاد المعمول…
إسماعيل : و شكون هاد اللفعة لي متخاف لا الله لا عبدو و كتأدي الناس..؟
مومن ( شاف فهلال) :
نوارة اسيدي…
تقاد هلال فالجلسة و جمع غوباشتو : قلتي نوارة..
مومن : اييه اسيدي نوارة نوارة لي غارت من ختها و بغاتك ليها و بطريق السحر و الشعوذة فرقاتك عليها و بسبابها ختها ماتت و شبعات موت و ترزات فشبابها مسكينة بسباب ختها و مرات باها…
إسماعيل ( شاف فهلال) :
سي مومن مكيكدبش باش عرف هو نوارة و باش عرف هاد الكلام بحال الى كان معانا سي مومن هو سبابي من بعد الله سبحانه حتى تشافيت و تعافيت… شريف و بوهالي ولي كطرا كيجي يقولها و كلامو كيكون صحيح فصيح…
عدنان : هاد نوارة خاصها تعاقب خاصها تشد اليوم قبل من غدا…
مومن : لا اسيدي لاواه الى مشات حتى تشدات مغانقدوش ناخدو شعرة من زغب راسها تقدر تحرقو و لا تقطعو لا اسيدي…
عدنان : يتشدو يديها بحبل معندها كيف دير…
إسماعيل : عندك الحق اولدي…
مومن : لا اسيدي الحيلة حسن من العار سولو السم باش كتقتل كاليهم بالتقالة الى كانت حاجتك عند الحمار حشاك قولو سيدي…حنى خاصنا مانسيقو ليها خبار مناديوها و هي فشعرها خلاص مولاي هلال لا هي لا مها و لا المشعوذ لي يعاونها مخاصنا نخاطرو امولاي..
هلال : واش المعمول اسي مومن.. ؟
مومن : سمعني مزيان امولاي لي دير دابا تشوف شي بنت الناس فاهمة واعية لبيبة و تكون كيف قلت مربوعة القد بيضة و شعرها بحال ظلام الليل و زواجكم مايسيق ليه حد الخبار… حيت لي مديور ليك مكيخلي زواجك يكمل و هذا هو الحل…
إسماعيل : وديك اللفعة لي تلدغ و تنشر فسمها…
مومن : هاديك غادي نخليوها على بنتي حورية هيا اتعرف ليها مخفاك شاي امولاي بنتي لبيبة عقلها يوزن بلاد و كدخل الواحد غير بلطافة و بلسان الحلو تخليه يولي يامن ليها و يعاود ليها الشادة و الفادة تكسب محبة الكبير و الصغير دغيا يامن ليها و يديرها بير مغطي ميدخلو ذبان و لا ناموس… هي اتعرف كفاش تجيب لينا شعرة من راس نوارة الى تحرقات ديك الشعرة… المعمول ايتبطل و غايتفك و مايبقى ليه اتر و مولاي اتفك عكدتو و يكمل زواجو…
إسماعيل سكت شاف فولدو… مومن هز عينيه فيهم حدرهم و هز راسو فمولاي هلال… لقاه كيشوف فيه بشوفات فيهم الشك و فيهم الحيرة…
هلال : عندي ليك واحد الحل اسي مومن الى قبلتي بيه و كنتي باغي تكمل خيرك و تفك عكدتي كيف قلتي…
مومن : على لعين و راس امولاي امر و انا نفد امولاي…
هلال : تعطيني يد بنتك حورية هي تكون مراتي اش كلتي اسي مومن ؟؟
بقى مومن كيدور فعينيه مولاي هلال صدمو ماعرف مايكول مايقدم و لا يوخر اشنو غادي يدير
هلال ( كيشوف لمومن فعينيه) :
اش كلتي اسي مومن مزال مسمعت جوابك ياكما خفتي و لا تخلعتي و لا كاينة شي حاجة و حنى مافخبارنا شاي…
مومن : لواه اسيدي انا لوكان بيدي نعطيك بنتي هداك هو النهار الكبير واحد فمقامك و مكانك اي واحد يتمناه لبنتو و لكن اسيدي بنتي حورية هي مولات الراي و الشوار و هي لي بيديها تكول اه و لا لا…
إسماعيل : و لكن اسي مومن خطب لبنتك الوالدين كايبغيو الحاجة المزيانة لبنتهم و لا لا و كنظن اسي مومن بنتك مغاديش ترفض مولاي سلطان بلاما نشكر ليك خويا و لا لا…
مومن : الله اودي اسي إسماعيل هداك هو النهار الكبير…
هلال : هي نقراو الفاتحة…
مومن ( وحل حس براسو وحل فهادشي كان باغي يحل المشكل صدق غايس فيه) :
بسم الله… قراو الفاتحة جميع…
هلال : دابا تقدر تخبر بنتك و لا عرفتي شنو اسي مومن خليني انا غادي نخبرها بنفسي…
وقف هلال بطولتو و تجريدتو ورجولتو لبس بلغتو خلاهم و مشا… بقا مومن متبعو بالعين و كيبلع ريقو و لا يحمار و يصفار شنو غادي تكول حورية و لكن هي لي جابتها ليه و لراسها على و عسى دير عقلها و دخل سوق راسها و تحيد منها التشيطين و دخول الشبوقات…
/////
حورية كانت كالسة على نار كادية معارفاش اش كالو و شنو دار باها واش يكون هضر مع السلطان واش تاقو بيه و لا لا ياكما يكون خلاها على راسو و عليها… ولات خايفة يمكن هادشي خاصو يسالي و تسالة هاد الحكاية اش ذاها لشي غربال و سرارو اش داها تهزو نهار اللول كانت هانية مهنيية مهازة هم مامحزمة بيه و لكن طيشها و قلة عقلها و فضولها داروهم بيها و خلاوها غايسة فهاد الوحلة كيف خلاها باها هادي هي لاخرة ليها صافي تفوت هادي على خير و بيخير هاد الغربال اتلوحو فالواد و تهنى و يبردو ودنيها ادخل سوق راسها و تجمع راسها و لي بغا شي خير يديرو فراسو هو لول عاد يشوف الناس…
بقات حورية كالسة على نار باها تعطل يكون زعما خلاها ولاحها فالواد… قفزها الدقان فالباب من بصلاتها مشات كتجري زولات الزكروم و فتحات الباب يلاه اتنطق عند بالها باها لي دق حتى لقات مولاي هلال يمكن متاقش بكلام باها و جاي يديها يلوحها فشي واحد و لا يتبعها لباها صافي هادي هي لاخرة ليها… نسات راسها و خرجات بلا لحاف لا نكاب شعرها عريان ورا ظهرها موج بحال ماج البحر عينيها الكحلين مزينين بمرود ديال الكحلة و شفايفها حمرين من عند الله… و شعرها مزين بحوهر فالبيض و قفطانها بلا كمام و يديها البيضين بحال شمعة فبياضها… هلال تسحر بيها عجباتو ملامحها لي من عند الله مشاء الله سبحان من خلقها و بدعها مكرهش يغني ليها و يكول فيها الشعر نسا شنو جاي يكول و لا كفاش غادي يهضر…
هلال ( بصوت تقيل و رزين) :
نقدر نتكلم معاك..؟
حورية ( تزنزنات و مقدراتش تهضر) بعدات على الباب او وقفات حدى واحد الخصة جات فقلب الدار… عطاتو بظهر ماقداتش ضور و تشوف فيه…
هلال : حورية و بحال الحورية…
ضارت عندو مبهوضة و ممتيقاش شنو سمعات واش غلطات فالسمع و لا كلامو وصلها كيما هو…
حورية : مفهمتش كلامك امولاي…
هلال : ماشي مهم تسمعيه و ماشي مشكيل تفهميه كلامي طار بين جناح طير لي هاجر من بلاد لبلاد و ماولى…
حورية : بحال اللغز صعيب يتحل مامعروف مفتاحو…
هلال (ضحك) :
كلام العشاق مامفهومش بحال لغز حير العلماء و العقال…
حورية ( باستغراب) :
علاش مولاي عاشق ولهان؟.
هلال : يقدر يكون مغروم و يقدر يكون موهوم..
حورية : فهمتك معارفش واش لي كتحس بيه موجود و ملموس و لا بحال الوهم مبخر…
هلال : خلينا من هاد الكلام و خلينا فلي يفيد…
حورية : الله يسمعنا خير امولاي…
هلال : قبل ميخبرك باك قلت نعلمك و منها نهضر معاك و نتشاور معاك و نشوف شنو غادي تكولي…
حورية ( كلسات) :
مرحبا امولاي كنسمعك…
هلال : ماكيعجبنيش الدخول و الخروج فالهضرة كلامي واضح بحال الشمس فسما صافية… طلبت يديك من باك عطاني كلمتو و قرينا الفاتحة و دابا جيت نخبرك و نعلمك و نسمع رايك و كلامك…
حورية ( تبسمات) :
لوكان بغيتي كلامي كنت اتجيني فاللول و تسمعو ماشي حتى قريتو فاتحتي و نضيتو لكلام دابا امولاي مابقا لكلامي فايدة مغانفعكم مغانضركم انحني الراس و نكول مرحبا و بنت الناس امولاي لي مخلقة واعية و بنت الدار الكبيرة متردش كلام باها و تحشمو بين الناس خصوصا مع واحد بمقامكم اسيدي…
هلال : معرفت واش نفهم من كلامك بلي قابلة و راضية و لا غير كديري صواب ؟
حورية : كلامي مفهوم امولاي و لي دارها با انا قابلة عليها و لكن عندي شرط…
هلال : اما هو؟
حورية : حتى انا بحالي بحال اي بنت فالقبيلة نبغي لي يكبر بيا و بمقامي ماشي غير حيت بنت عبد فقير معندوش نرضا بلي كان… حتى انا نبغي لي يكبر بيا و يخطبني بالتقاليد…
هلال : و لكن باك قال بلي هادشي خاص يبقا بيناتنا…
حورية : عارفة امولاي و حتى انا داكشي لي كلت مازدت مانقصت غير بالتاويل…
هلال : مكلتي عيب… عطاها بالظهر و خرج…
حورية ( عاد تنهدات و رتاحت) :
واخا ا با واخا حتى تجيني انا تعطيني بلاما تشاورني سيفطك تحلها عقدتيها واخا ا با خلاوها ناس زمان حتى لمتعوس ليلة عرسو منحوسة…
مشا الحال و مومن مزال مدخل للدار… حورية عيات من الصباح غادية جاية و تسنى فيه و مزال مبان ليه الاتر… عارفاه فاش كيديرها قدها قد راسو كيغبر… مبقات قادة تسنا دخلات لبيتها و تكات… حتى داتها عينيها…
مد مومن يدو للباب لقاه محلول حمد الله و شكرو دخل هاز بلغتو فقبو كيتسلت… دخل لبيتو لاح الرواق و مشا كيجري لفراشو… تخشا فبلاصتو غمض عينيه و نعس…
ديك الصباح صاح و شمس برقات و ضوات… فاق مومن توضا و صلى هز بلغتو و جلابتو لبسها يلاه كيتسلت يخرج حتى وقفو صوت بنتو…
حورية ( بصوت قوي) :
بااا فين غادي فصبحية كتسلت بحال شفار البهايم… ضار مومن راسم على وجهو ضحكة كيتبلحس بعينيه…
مومن : والو ابنتي ابغيت نمشي رجيلاتي شوية لبارح مخلاوني نعس بتغزاز و لبرودة قتلاتني ابنتي البرودة عظامي كيضروني و كيكرطقو عليا و كلت مافيها باس نمشي رجيلاتي واحد الشوية…
حورية : بغيتي تمشيهم ا با و لا باغي تهرب… اكوليا ا با واش تلفتي و لا عقلك مشا ليك مع الواد عاطيني بلا خباري لسلطان واش انا سيفطك تبلغو المرسول صدقتي خاطبني ليه وا با وا با حرام عليك ا با…
مومن : و الله ابنتي معرفت باش تبليت راه متاقش بكلامي و حبسني و طلبك مني مالقيت منكول و حتى مولاي إسماعيل حاصرني بكلامو و انا اعبد ضعيف ملقيت منقول…
حورية : ملقيتي متكول تلوحني ا با..
مومن : و حتى انت متزيديش فيه مولاي هلال الف وحدة تمناه كاع بنات القبيلة ايحسدوك عليه جمال و اخلاق و حجرتو كبيرة فالبلاد اتولي مرات السلطان..
حورية : داكشي لي قاتلك ا با داكشي لي قاتلك… الله يهديك ا با…
مومن : الله يرضي عليك ابنتي ديري بوجهي متحشميني شاي مع السلطان عطيتو الكلمة مخاصش نبان صغير…
حورية : عارفني نرد كلامك ا با اكون هاني و لي كلتيها اتكون..
مومن ( فرح) :
الله يرضي عليك ابنتي… شوية تغير الحال و ضلامت السما و ضباب تجمع الحال تزمت و نقيطات شتا بدات كتصب و صوت ضحكة علات فسما… خلات حورية و مومن مبهوضين و مصدومين ماعرفو باش تبلاو… شوية رجع الجو صافي كيف كان بحال الى حتى حاجة موقعات…
مومن : شفتي لي شفت..؟
حورية : سبحان الله سبحان لي يتليها فشان و يصبحها فشان…
مومن : هادشي ماشي عادي…
حورية : با باركة من الاوهام دير عقلك و تبت حصن و زرع فقلبك الايمان…
مومن : و نعمة بالله ابنتي ايوا دابا منين القلوب صفات وجدي لينا شي براد دتاي من يديك و يكون بحال وجهك الزين ابنتي البلارة حورية البلارة…
نهار جديد و حكاية جديدة تغنات فالقصر و لكن غير بالهمس بلا كلام السلاطين التلات إسماعيل هلال و عدنان و سلطانة الام… جاو محملين باحسن تواب و اغلى دهب الياقوت و المرجان و الجوهر و الحرير… دقو على باب مومن طالبين راغبين فحورية بنت حديدان… لي تلكا ليهم باها بالبسمة و الضحكة و الفرحة فالعين اما حورية لي الحشمة و السر نازل عليها تخبات و مقدراتش تبان و من تقشاب السلطانة مسلمات… تقرات فاتحتها و تكتب كتابها على السلطان او ولات السلطانة حورية مرات مولاي هلال… و جا الوقت لي يختالي بيها و يكلس معاها…
هلال ( مسحور بيها و بزينها العربي) :
مبروك علينا…
حورية ( بتباتة) :
الله يبارك فيك..
هلال : انا عارف زواجنا جا بالزربة و ماشي من مقامك و لكن ان شاء الله اندير ليك فرح يتسمع فكاع البلاد و يحضر ليه الكبير و الصغير…
حورية ( و هي مزال حادرة راسها) :
ماعليش مكاين باس امولاي…
هلال : مابقا لاش نتعايطو بالألقاب انت مني و انا منك ولا لا؟
حورية ( هزات فيه عينيها) :
صعيب امولاي مجاتش من الدقة و الحين نعلي الراس و نزول كلمة مولاي من لساني…
هلال ( منزلش عينيه من عليها) :
كلشي ساهل احورية كلشي ساهل…
حورية : مولاي عندي ليك شي كلام كنتمنى منك تسمعني و تفهمني…
هلال ( بانت عليه الجدية) :
كنسمعك…
حورية : مدام زواجنا مزال مكمل منقدشاي نمشي معاك انبقا فدار با..
هلال ( غوبش) :
كفاش و علاش؟
حورية : الخدم لي فالقصر امولاي مخاصهوم شاي يعرفو بلي تزوجتي باش السحر لي مخدوم ميبطلش زواج و نرجعو من جديد امولاي بحال الى حتى حاجة مدرناها و لا نسيتي.. وزيد عليها نوارة مخاصهاش تعرف بلي انا مراتك و لا قريبة منك… غير شوية دالصبر امولاي راه كلشي مكتوب و مقدر…
هلال ( سكت و سها كيفكر شنو كاليه بالو نسا راسو و نسا ماجاري ليه عند بالو تزوج بحالو بحال ايها الناس) :
واخا الالة حورية ميكون اخاطرك عندك الحق نسيت كيفاش تزوجنا ولاش تزوجنا عند بالي بحالي بحال ايها الناس ماقصدتش ناديك و لا نحكر عليك كيف قلتي كلشي مكتوب و مقدر نخليك ترتاحي… وقف و خرج من البيت بغات توقفو تبعو تهضر و توقفو و لكن مقداتش حسات برجليها نبتات و تزرعات فالارض مكالت ليه حتى عيب… كالت غير لي كاين علاش هو تزوجها على سود عينيها و لا قلبو مال ليها حتى هو لقا لي كال باها فيها و باش يحصل كدوبو طلب يديها لزواج منو حتى واحد مخاصو يهرب من كلمة الحق و لي كاينة خاصها تكال و مايدوم الحق و المعقول…
من بعدما راحو دار اهل السلطان بقى غير مومن و حورية راس فراس.. حتى نقز عليها مومن و جرها من ودنيها..
اكولي ليا ياهاد المتعوسة مغاديش ديري عقلك خلاص محشماني مع السيد… لا تاعي بقا لا وجهي تنقا..
حورية ( هربات منو) :
وا با اش درت تاني ياك لاباس؟
مومن ( كلس لارض) :
لا مدرتي والو لا انا ابنتي لي درت انا صافي عييت و مبقا عندي جهد ليك… السيد دخل يهضر معاك خرج واحد خور و باش كملها كيكول ليك نخليو لالة حورية فدار باها…
حورية : اه ا با عندو الحق انا لي قلتها ليه واش نتوما مخبوطين بفاس عوج ندخل لقصر باش يبداو الخدم يهضرو و سرنا يتفضح…
مومن ( سكت و حدر راسو)..
حورية : شفتك سكتي ا با سلطانك يسحاب ليه انا سلعة دليلة ورخيصة فسوق دلالة…
مومن : حاشا ابنتي انت حرة غرة زينة و سلاحك هو عقلك الف واحد يتمناك يديرك فدارو و بجنبو و شكون عرف ابنتي لايكون السلطان بغاك و هواك…
حورية : الغرام المزروب كلو عيوب ا با.. و سلطان كونما حاجتو فيا و حيت متاقش بكلامك داكشي باش سومك بيا باش حتى الى طلعتي كذاب يعاقبك بيا ا با كون فهيم و حكيم زعما كانو يكولو ليك حديدان مكانوش كيعيطو ليك الغشيم… و نزيدك ا با بلاما دير شي حاجة فبالك و تكول بلي قطعنا الواد و نشفو رجلينا نهار تفك عقدة السلطان… ايرجعني ليك فتوب من الحرير و يكوليك ها بنتك رجعت ليك… و ديك ساع يمشي عند واحد من التجار الكبار يختار وحدة من بناتو زين و الحاجب و العين و بنت الاصل و المفصل لي تليق بيه و بمقامو ماشي بنت مومن لي جاي هو و بنتو من قبيلة بعيدة بنتو الهبيلة الغشيمة لي نية و نيتها كديرها بيها و كتخلي لي جا فطريقها يجري عليها و ينعت فيها بلي منحوسة ولي حطات فيها يديها تخسر ا با فييييق ا با و سمعني مزياااان تفك عقدة السلطان داك الغربال ايتلاح فالواد مابقيت حاملاه و ندمت على النهار فاش جات ايدي عليه… نمشيو ا با نرجعو لخيمتنا واخا نتوسدو خدية وحدة و نفرشو حصيرة وحدة خيمت ميمتي الله يرحمها كنا واخا هكاك بعزنا او وسط ناسنا واخا شي ينعت فيها و شي يبغينا مايهم ا با و حتى الى بغاو ياخدو حقهم براكة من الخوف و حنيان الراس هو لي خرج علينا و خلانا هاربين… مومن سكت و تنهد تنهيدة طويلة و حكر راسو ايد بنتو فكلامها و كاع لي خرج لسانها عندها فيه الحق حتى هو عيا و كبر و جهدو تهد مابقات عندو قوة مزال اللهم يرجعو لخيمتهم ياكلو لي قسم الله و يعيش هو و بنتو… شاف بعيييييد و لكن بنتو فيقاتو… خلاوها ناس زمان على قد لحافك مد رجليك و عمر العين مكتعلى على الحاجب..
سعدي في لسعاد ماهو سعد سعود يا المسعود…
عقب ما ولا شاش الخاطر و العقل مني مفقود يا المسعود بالحب تبلى مقوى قلبي و خاطري بيها مصهود يا المسعود ناري في شعلة واجب على حبها نعمل مجهود يا المسعود تشفى دالعلا ماني طامع فالرزق ما هو محدود يا المسعود آزماني تلا ما ظنيت من قلبها نضحى مطرود يا المسعود نومي في جفلة ربي عالم و الملاك معاه شهود يا المسعود ماني فوهلا برقي شالا في الليالي فيه رعود يا المسعود في ظلمة كحلة غيمي كندر في شتاه شحال برود يا المسعود جات على غفلة اشعاب ويدان كبت في لسدود يا المسعود من واد الحملة في طحطاحة خالية و الناس رقود يا المسعود ليله ميحلا صاق رحيلي دايمن قشي مرفود يا المسعود طوول فالرحلة شاش الخاطر و العقل مني مفقود يا المسعود بالحب تبلى شوفتها مثل الرمح جاني مقصود يا المسعود عازم ما ولا و فراسين صحاح مفجعهم بارود يا المسعود حبة موكحلة و يقرصو لقراص فحد المحدود
يا المسعود طمعو بالوصلة واش داني الحبها ذوقه ملذوذ
يا المسعود كي عسل النجلة نحلة حط رحيقها في ورق العود يا المسعود تجمع بالقلة هجهج قلبي عندها عشى مرعود يا المسعود و العقل اتجلى رحماني رشيد و معاه الميلود يا المسعود لحيا و الخصلا و شوعرا الكل كي متل الاسود يا المسعود و شيوخ الفحلة بصلاة الرسول نختم ذالمنشود يا المسعود سعد اللي صلى و سلام على صحابه ناس الجود يا المسعود و تباعو جملة….
حار العاشق السقيم اش يكون العشق و اش يكون فخزاينو من لاسرار
و علاش طلاسمو واعرة
مايفكها حكيم ناجي قاري
اش تكون فعايلو مجرد سيفوساير يطعن فالخلق يمين و يسار
والدي صابو ليس يبرا
يضحى مسقوم فليعتو يداري
اش تكون حقيقتو و اش يكون ريح من هبت عليه يلوى و لونو يصفار
ماتعود ورقتو زاهرة
و الدمع فنجالو يسيل جاري
اش يكون فصالو يتقلب لعشيق فاجمارو ما تفيد فيه مشايخة و لا تحزار
ماتفيد حيلتو فما جرى
و يقول يا ترى تخمد ناري
ميمتي واش قدني نوصف ياحياني
قد وجيد و محاسن تجبد البلا
بستان مرونق بلوان محتاج لجاني
كل جهة تجود و تعطي فهون غلة
لله غير زور رصامي و قوليا هاني
او شكون هذا حمو الساكن فسلا
لو تدري لعباد بما نقاسي و نعاني
كانوا عذرو فالهوا قيس و عنتر عبلا…
لو شفتو متلي لهلال فنوارو ساني
يا و لبدر فكماال بهاه يوم تجلا
يا وجبين عمال يباهي قواس و انف سباني
طار عقلي بيهم كيف حال السبلا *
الشعر المسندل
يا و العيون ا يا ويحي طيحو ميزاني
عاد مرة يحدر و مرة يعلا
لونها فالصفاوة عسلي للفتوحة داني
و البشرة شهدة منسجتها نحلة
كلام كتبو بريشة فوق جلد مطروز… كتب كلام ملاه عليه عقلو و حكاه قلبو… بلاما يحس كفاش هز الريشة و كتب لي جاه على بالو و ينطق بيه لسانو… كلام حورية خرق قلبو بحال خنجر ماضي بحال السم.. اش كان عند بالك اهلال… قبلات تكون سلطان زمانها غير باش تفك عقدتك ماشي هايمة فحبك كفاش ادير تبغيك و هي شافتك مرة وحدة مكتعرفك مكتعرف طبعك معاشراتك متقربات منك… ماتكونش زربان و غير بالمهل اتخليها تبغيك و تفتح ليك قلبها و تربع على عرشو… تفكيرو كيدي و يجيب و الف تخميمة و تخميمة جات على بالو الف سؤال و سؤال مالقاش جوابو حاجة وحدة لي متيقن منها بلي هو هايم فحبها و مغروم بيها من اول نهار طاحت عينو عليها غرامو هو لي خلاه يحط العين عليها و خلاه يطلب يديها و يدير العذر بباها و لكن هو غالط قلبو لي متحكم فيه من بعد سنين و سنين و قلبو مقفول بقفل من الحديد جات حورية و حلات قلبو بساروت من ذهب تفوت هاد المحنة هي غتكون ليه هي مراتو على سنة الله ورسوله و مغاديش يخليها تضيع من يديه…
صاح الديك و بصياحو فيق الكبير و الصغير… نهار مشمس من عند الخالق سبحانه… دخل مومن من بعدما خرج يمشي رجليه لقا حورية جالسة و حاطة قدامها ربطة دالسواك قراعي ديال الكحل و قرعة عامرة بزيت فالاخضر و معاها شي عشوب…
مومن : اش هادشي قدامك يكفيك ابنتي على طول العام…
حورية ( معلاتش راسها فيه كتقاد فرباطي دسواك كتفرقهم على ربعة و تربطهم بخيط) :
ماشي ليا ا با غير تهنا…
مومن ( كلس) :
و لمن هادشي ابنت مومن؟
حورية ( هزات عينيها فيه) :
لنوارة ا با هاد الصبحية انهبط للسوق و نفرش فراشتي و نبيع…
مومن : اش جاب نوارة لبيع و شرا…
حورية : ا با يهديك الله ا با حل معايا وذنيك و سمعني مزيان نوارة سحارة كتموت على الكحلة و سواك واخا يدوز العطار مول الحمار قدام باب الدار على الصباح تشري من عندو و تحمل و تنكل و تهبط للسوق و الى بانت ليها سلعة زينة خرى كتشري منها فهمتي دابا…
مومن : ايوا ابنتي منين الواحد كيكبر فالعمر كيحفا ليه قرشالو و يتوضر..
حورية : مزال ا با مغيحفا ليك القرشال مزال بصحيحتك ايوا خليني خليني نوض نقضي شغالي و بلاما تخاف عليا انا حافظة سوارية و عارفة لي ليا و عليا… جمعات الوقفة و دخلات لبيتها و شوية خرجات ملوية فحايك بيض و منكبة بنكاب كحل كبيبانو فيها غير العينين… هزات قفة السوق دارت فيها توب و سلعة لي خدات و هزات كرسي صغير من الخشب… هزات القفة فيد و اليد لوخرا شدات بيها النكاب… خشات رجليها فبلغتها و حلات الباب…
حورية : انا مشيت ا با اتاي راه فوق الطبلة… خرجات حورية و مومن تابعها بدعاويه… شدات طريق السوق وصلات يلاه مالين دكاكن كيحلو و يخرجو سلعتهم… مشات جنب واحد الشجرة مقنتة فرشات الفراشة و حطات التخليطة لي كدير لشعرها و زايدة عليها عشوب خرا… جلسات على الكرسي… حاضية لي غادي و لي جاي مكاينش شي حد لي مكاينزل لسوق نهار التلات يتقدا كتكون السلعة جديدة تواب ها الحرير ها الكتان الزين كاع بنات القبيلة كينزلو يتقداو… بدا سوق يعمر و بدات الناس تقدا و حورية ساكتة مكتهضر منطقات بكلمة مزال مبانت ليها لي فبالها باش تجلبها لعندها… بقات على داك الحال شحال حتى ياسات و كالت على بالها بلي موحال نوارة سحارة كيما سماتها جاية … يلاه نوات تجمع قشها و ترجع فحالها… هزات عينيها بانت ليها نوارة هي و مها خارجين من عند مول التوب… رجعات جلسات و تبسمات بدها… بدات تعيط و تشالي بصوتها :
ها كحل شفار الغزال ديريه فعينيك يوليو بحال ليل فسوادو و بحال النور فظلامو… كحلة مدقوقة على يدين شريفة مولات الغربال… تمو شي بنات جايبن عندها عزلو جوج قريعات عجباتهم الريحة… خلصوها و مشاو… ماحسات بنوارة حتى وقفات عليها…
حورية : مرحبا مرحبا بعينين الغزال لي دات عقل الحكماء و العقال…
نوارة ( عجبها الحال و دارت جنحين) :
كولي لي الالة بشحال هاد الخير؟
حورية : غير ختاري و الله منتساوم معاك لي بغيتيه موجود و كاين غير حطي يديك و عزلي و ختاري…
نوارة ( تحنات هزات قرعة الزيت) :
اش هدا ؟
حورية ( تبسمات بخبت تحت النكاب) :
هاديك تخليطة مولات الغربال
نوارة ( باستغراب) :
مولات الغربال كفاش ؟
حورية : هاديك القرعة لي كتشوفي فيه توزن بذهب على فعايلها و شنو كدير كتخلي الشعر بحال لون الليل فسوادو طوييييل و بحال الحرير و لي شاف زغبة منو يبقا تالف بحال الهبيل ( ضحكات)..
نوارة : اوا هي فيه شي قبول؟
حورية : بحال الى علمك الله….
نوارة : و هاد الكحل سمعتك كتقولي من شفار الغزال؟
حورية : ايه الالة كنجيب شفار الغزال من عند واحد العشاب معرفة قديمة هادي شحال فواحد المدينة بعيدة كيبيعو ليا بتماااان كنحرقو و نخلطو مع عشوب مدكوكين تحت يديا و منكولش ليك كي كيخلي العين يخلي الكبير و الصغير يتجلى فدوك العينين…
نوارة : عمري مشفتك هنا؟
حورية : اوا هادي اول مرة و اخر مرة اتشوفيني غير تقداي محدي هنا..
نوارة ( باستغراب) :
وعلاش.. ؟
حورية : مولات الغربال بلاصتها فالقصر ماشي هنا… نوارة تقرصات و قلبها ضرب فالمية..
نوارة ( ضحكات) :
واش دا مولات الغربال لقصر مولاي السلطان..؟
حورية ( حتى هي ضحكات) :
ويلي يا لهبيلة وهاديك هي بلاصتي و تما مكاني و بجنب مرات سيدي تسدت الركنة…
نوارة ( جمعات الضحكة) :
– علاش انت خدم فالقصر؟
حورية : مالك تخلعتي او وجهك هرب منو اللون وليتي صفرة بحال عود الخرقوم انا هي لي خليت مولاي السلطان عندو مرة وحدة انا لي زولت التانية من طريق و خليت ليه ا وحدة…
نوارة ( قربات منها) :
كفاش زعما انت هي سباب المرا التانية حتى تشدات فالحبس و مبقاتش تما ؟
حورية : ايه هي انا…
نوارة : و لكن القبيلة كلها سمعات بلي واحد البوهالي هو لي كان سباب السلطان حتى تشافى و تعافى…
حورية : هههههههه مومن لهبيل و شكون لي كال لمومن على مرات السلطان التانية من غيري انا كنعرف شنو لي مخبي ورا الحجر فالما و نخلي موكة تلف تولي دور و تكول انا طاوس… نوارة سكتات و حدرات الراس…
حورية : هزي عينيك فيا و قولي اش مخبية مكوية بنار قوية نار العشق و غرامو و هلالك مضوي فسما ليلك ولا لا انوارة… هزات نوارة راسها و اللون من وجهها تخطف ماعرفات باش تبلات..
نوارة : شكون كاليك سميتي..
حورية ( ضحكات) : متديوش عليها سمحو ليها اجوادي هبيلة و غشيمة و معارفا شاي ( خنزرات فيها و كات فيها الشوفة) متبقايش تحكري و تسولي بزااف تعياي متجريو طيري و تنزلي مولاي السلطان لوصلتي ليه و لا ديتيه غلطتي بزاف و ماجيتيش بالطريق صحيحة ديتيها فالفقهة لي كلاوك و داو ليك لي قدامك ولي وراك انا غير قلت ليك حسبيني هبيلة و لا غشيمة و لا غير كنخرف… هاد القرعة دالكحلة و دزيت عطيتهم ليك هدية انا خصني يلاه نرجع للقصر قبل ما لالة مرات سيدي تعرفني مكايناش… بدات تهز قشها فالقفة تقدات فالوقفة شافت فنوارة لغير ساهية و صدومة لون غاب من وجهها… خلاتها و عطاتها بظهر يلاه خرجات من باب السوق حتى سمعات المشية وراها و صوت نوارة كتعيط ليها… وقفات حورية و حطات القفة حتى وصلات عليها نوارة او وقفات قدامها…
نوارة : شنو خاص ندير الالة مولات الغربال امري و انا نفد و علاشما حليتي فمك تلقايه موجود…
حورية ( سكتات شحال عاد نطقات) :
الزغبة لي من شعرك باش كفنتي السحور دمولاي السلطان و ختك عقلتي عليه و لا لا… نوارة خرجات عينيها ولات كلها كترعد وجها ولا صفر و فمها بياض…
حورية : مالك مخلوعة تبتي و رزني اصلا ختك متستاهلش مولاي السلطان مالقى غير ختك و مخلي زين و طولة و الحاجب و العين و لكن الما تفك تقاف السلطان عمرو ميشوف فيك و لا يتزوج بيك زغبة باش معكود السلطان هي لي خاص نخيطو بيها راس سلهامو…
نوارة : كفاش ؟
حورية ( قربات منها) :
التقاف لي دار لسلطان و معكود بزغبة من شعرك دار ليك العكس و دار ليك حتى انت العكس لا انت تزوجتي لا هو يشوف فيك السحور الى قدام كيرجع عكس كيبغيتي السلطان يشوف فيك و هو معكود… ايخصنا زغبة من شعرك جديدة و زغبة لي معكود بيها السحور لول يتعقدو مع بعضياتهم و يتخيط بيهم راس السلهام…
نوارة : و علاش راس السلهام زعما؟
حورية : حتاش هو لي كيدخل فيه السلطان راسو لول تم كيتفك التقاف..
نوارة : و عكسي انا؟.
حورية : زيت لي عطيتك كتعمري بيها راسك مزيان فليلة لي تكون الكمرة مضوية كتجيبي ليا مقص جديد و كنمشي انا و ياك للحمام كنزول ليك زغبة من شعرك و كنقطع ليك بالمقص الجديد من بعدما كنبيتو تحت النجوم نص فشعرك و متخافي شاي فيوماين بتخليطة لي عطيتك كيطوال و يولي بحال سالف عبلة و لكن سمعيني مزيان نكوليك ( خرجات فيها عينيها حتى خلعاتها و خلاتها ترعد فبلاصتها)…
كلامنا يبقى هنا وياااك يسمع بيه شي واحد كيما بغا يكون وياااك تكوليها لمك و لا لباك و الله و يخرج كلامنا. من فمك تمى تبقاي معكودة حتى ظفري الشيب…
نوارة ( مخلوعة) :
لا لا و الله منكولها صافي اندير لي كلتي ليا و لكن فين نلقاك؟
حورية : بحال هاد النهار من ورا المغرب نلقاك هنا يلاه سيري و متلفتيش وراك…
نوارة ( كتحرك فراسها)…. ضارت و مشات بزربة مبقاتش تلفتات وراها…
حورية ( ميتة بضحك) :
الجهل معشش ليكم فالدماغ لي جبد ليكم حس السحور و الشعوذة تبعوه بحال الى لاح عليكم الطلامس واخا يكولو ليكم بلي دجاجة مابقاتش كتبيض و راها ولدات تيقوهوم بعينيكم مغمضين… هبطات عليها داك النكاب و هزات القفة و رجعات لدار…
دخلات حورية لدار فرحانة حطات النقاب و الحايك و كلسات لارض… خرج مومن من بيتو كيقاد فرزتو…
مومن : اوا امضرا سبع و لا ضبع؟
حورية ( تنهدات تنهيدة طوييلة ورجعات راسها لور مبسمة) :
سبع ا با سبع…
مومن : اوا اش وقع… عاودات ليه حورية كاع لي وقع من الالف للياء…
مومن ( ضحاااك) :
معندي منسالك ابنتي تربيت يدي احديدانة..
حورية : و اشنو ا با كنلعبو حنى هنا و لا…
مومن : اوا اش ناوية ديري دابا ؟
حورية : سمعني ا با نهار تلات الجاي من ورا المغرب الحمام انكريوه و نخليوه محلول حتى يظلام الحال باش لالاهم نوارة متعيق شاي بينا… ناخود ليها زغيبة من شعر راسها باش تيق بكلامنا و هي ببديها اتدينا لبلاصة لي مدفون سحور السلطان و هي براسها اتفك زغبة باش معكود السحور و هي لي اتحلو براسها بلاما نوسخو فيه حنا يدينا ايوا هنا السحور ايتحل و يتبطل و نوارة اطيح فالحفرة لي حفراتها لغيرها و دوز لي بقا فيامها محبوسة…
مومن : و ديك الساع ابنتي حنى انتفكو من هاد الغربال و نرجعو بحالنا و نتهناو… مجا فين يكمل كلامو حتى سما تغممات و تبدلات و صوت رعد دوات… سمع صوت ضحكة قوية تردخات… مومن و حورية معرفو باش تبلاو هادي تالت مرة يوقع هادشي و عند بالهم غير الجو لي تبدل… رجعليهم الصوت و هاد المرة كان واضح و باين :
عند بالكم ساهل تهناو مني واخا ترميوني فالف واد و لا ترموني بين لجبال مفعولي عمرو لا تبطل و ديما انبقا بينكم و معاكم… نهار تجرح اليد لولا ليا و يسيل دمها عليا ديك الساع مغانبقى نافع فوالو و حاجتي ماشي مقضية… غبر الصوت و رجع الجو كيف كان حورية و مومن بقاو مصدومين و مخلوعين و مفاهمينش صوت هاد المرة شكون هي و منين جات تكون هي مولات الغربال و لا كفاش…
مومن ( شاف فحورية و عينيه كيضورو) :.
سمعتي لي سمعت…
حورية : سمااعت ا با سمعت واخا نرميو الغربال فالواد مغنتهناو منو…
مومن : كاليك خاص تجرح اليد اللولة لي هزاتو و يسيل دمها عليه باش يتبطل مفعولو كيغادي نديرو ليها واش نجبدو المرا من القبر و هي رشاو عظامها اش هاد المصيبة لي صابتنا يا ربي الحنين…
حورية : با سمعني مزيان حتى حاجة ماعندها حل و لي بيد الله مقدر و لي مكتاب علينا انشوفوه نفكو حريرة مولاي هلال ( تنهدات) و ديك الساعة نشوفو حكاية الغربال…
مومن : خاصنا نسولو امام دالجامع هو لي ايفتي علينا الري والشوار نحكيو ليه لحكاية من لول لاخر و هو يكولينا شنو كاين….
حورية : ان شاء الله ا با من تما لتما يحن الله لهلا يحاشمنا…
مومن : امين ابنتي اميييييين….
فداك النهار جا العوين علم مومن بلي سلطان اسماعيل عارض عليه هو و بنتو لالة حورية..
حورية : و الله ا با الى مافيا لي يمشي…
مومن : واش انت مرعودة و لا ريح ساط ليك فالراس مهما كان ابنتي انت دابا على دمة مولاي السلطان و خاصك تحضري و تكوني… نوضي ابنتي نووضي الله يرضي عليك لبسي شي حاجة من دوك الحوايج لي جابو ليك او وجدي راسك راه الشمس مبقا ليها والو و تغرب…
-ناضت حورية لبيتها تبدل عليها لبسات قفطان فلون سما مخيط بالصقلي مع مضمة فالصقلي ركبات عقيق الجوهر على شعرها و ظفراتو و دوراتو على جوهر و غطاتو بتوب مشبك فالغوز هزات السلهام لي جابو ليها كان لونو زرق و دارتو عليها… جبدات البلغة لي كانت حتى هي فصقلي لبساتها… دوزات المرود ديال الكحلة فعينيها… و حطات نقطة من العكر الفاسي على فمها… شافت راسها فالمرايا و طولات الشوفة تنهدات تنهيدة طوييلة… و هي كتهضر مع راسها و غارقة فتفكيرها و سارحة…
ايه لوكان كان السلطان مكتوبي و مقدر لوكان يعشقني و يبغيني و فدارو يهنيني ايييه امعشوقي من نهار شفت عينيك ماجفى النعاس عينيا و لكن انت فييين و انا فين انا بنت التاجر القديم مومن حديدان المتعوسة و لمنحوسة لي تبغي دير الخير و يتقلب عليها نيتها كطيحها غير فالمصايب من نهار مشات ميمتها و هي لمصايب اتبعاها من غير باها الحنين لي يحن فيها و يبغيها بعيوبها ايه ا مي و شحال توحشتك و كون كنتي حدايا كون توسدت ركبتك و كون حاجيت ليك و انت تحكي ليا على شعري كون ولي طرق بابي تخرجي ليه بعصا و دافعي عليا و تكولي ليهم هاديك بنتي و ضو دحياتي و نور عينيا… خرجات تنهيدة طوييلة خرى منها و عينيها غرغرو بالدموع و سالت دمعة سخونة منهم خلاتها هبطات بحال شي واد شق طريقو بين الجبال… مسحات دمعتها دغية.. بينها و بين راسها عرفة بلي كتحلم بيه غير حلمة غادي تفيق منها دغيا فين عمر شي سلطان خذا بنت تاجر صغير راجل بسيط مايكساب مايعلام غير جلابتو لي فوق جلدو و لخطوط لي فوجهه ديال سنين تاجر بنسبة ليها هي دنيا و مافيها واخا يوزنوه بذهب مايقدوش على مدار عليها منين مشات ميمتها… فيقها صوت باها كيعيط عليها دارت قب ديال السلهام على راسها و خرجات عندو… مومن لابس جلابة فالموطارد و داير سلهام فالقهوي…
مومن ( كيشوف ليها فوجهها و عينيها شكون يحس بيها من غيرو عارفها باش كتحس و حاس بيها) :
( بضحكة على لوجه كاليها) :
رخي بشاشتك ابنتي راه لي عند الله مشافها حد الله يرضي عليك…
حورية : امييييين ا با… خرج هو و ياها و سد الباب بساروت طويل دالحديد و شدو هو و ياها طريق القصر….
#القصر
فصالة كبيرة لي كانو سراجمها كيطلو على الجردة و بفراشها العتيق الزين كلها مضوية تكول كاين فمتحف قديم… واقف هلال بجبادور فالكحل مطروز بالبيج داير عليها سلهام فالبيج و رزة فنفس اللون لحيتو الكحل كضوي و رموشو سود كتحكي… مقابل باب القصر و شكون ايدخل منو… حس بيد تحطات ليه على كتفو فيقاتو من سهوتو.. ضار بان ليه عدنان واقف حداه مبسم ليه…
هلال ( برزانة) :
مالك؟
عدنان : نسولك اانت اعمي هاد السؤال…
هلال ( تنهد) :
مكاين ميتكال…
عدنان : عينيك كالت كلشي اعمي مايحتاج لسانك ينطق و يكول… مجاوبوش هلال و بقا مركز الشوفة على الباب و يديه وراه…
عدنان : لهاد الدرجة العشق و الغرام صعيب كنتمنى مندوقش من مرارو…
هلال ( دار عندو و شاف فيه) :
مغايتشاورش معاك و يدق بابك يتسناك تحل ليه يتسناك تخليه يدخل و لا تجري عليه… العشق و الغرام يدخل ليك من تحت الباب متكون حاس و لا عالم يدخليك تحت الجلد و يسرح مع عروق داتك و مع دمك و يمشي كيجري لقلبك و يسكن فيه مكتكون لا ظان و لا عالم عليه حتى كتولي كتحس بيه و صعيب تخرجو من قلبك و تجري عليه خاصو غير يكون صادق و صافي بحال الما خلاوها ناس زمان صفي تشرب هكاك الحب الى كان صافي غادي يروي عطشك…
عدنان : شوف وحدة ليها اعمي خلاتك تغرم بيها..؟
هلال ( شاف فالسرجم) :
شوفة وحدة فيها الف شوفة كتخلي قلبك ينبض و يحس بالحياة انت لي كتسال دابا تجرب…
عدنان : و علاش لي منحكيوش و نرويو و نخرجو لي فقلوبنا علاش اعمي لي متكلم و تبوح بلي كاليك قلبك وراه راها مراتك قدام و حلالك قدام الله…
هلال : صعييييييب تعرف شنو تحت الراس و تعرف واش داكشي لي كتحس بيه كيحس بيه غيرك الله بوحدو لي عالم بشنو مخبي فالقلب و راس.. بان ليه الباب تحل و داخلة حورية و مومن.. قلبو تفاجا و عينو برقات و ضوات حس بالبرودة فداتو كلها و الفرحة ركباتو من ساسو لراسو.. حورية و دايرة بحال الحورية زينة كضوي سلبات ليه قلبو و عقلو و بغرامها و حبها سكنات داتو يقدر العشق المزروب لي كيكولو كلو عيوب، مرة يصدق و يكون صافي… طلق الرواق ديال السرجم ورجع باللور تحل الباب و دخلات حورية معاها مومن.. سلم عليه هلال و عينيه على حورية دخلهم عدنان لداخل و هلال تابعهم من اللور حورية حاسة بعينيه عليها شداتها الخلعة و قلبها كيضرب شحال زوين و شحال رزين و كيحبو القلب و العين… كلسو و معاهم هلال… هنا هضر مومن :
حورية تلاقات بنوارة و قنعاتها ( بدا كيعاود ليه كلشي و هلال عينو غير على حورية لي بحال الى غريبة عليه ماشي مراتو)…
هلال ( رجع من احلامو رجعو مومن للحاضر و بلي تزوج بحورية على قبل توقف معاه) :
واخا تلات الماجي انخلي الحمام محلول بحال الى مواقع والو و لكن مغاتعيقش و تكول بلي الحمام ديما يسد فهاد الوقت علاش هاذ النهار بضبط بقا محلول…
هنا حورية علات عينيها فيه لي سحروه و سكتوه…
متخافش امولاي و مضرب حساب انا عارفة شنو خاصو يدار و شنو خاصو يتكال.. مابقى والو و تولي حر و تفك من السحر الملعون… سكت هلال و حرك راسو و تبسم… هبط إسماعيل و معاه مرتو… ستقبلوهم بترحاب و لبسمة على وجوه الحباب… من بعد القيل و القال تجمعو على طبلة وحدة و تحط العشا الطبلة عمرات و باحسن خيورات الله تزينات.. حورية حادرة راسها و كتاكول بالمهل و من بلاصة قريبة محضية من عينين مولاي السلطان… مسالة العشا و العراضة حتى حورية مابقا والو و قلبها يخرج.. من بعدما سلاو العشا و طلعات السلطانة ترضع بنتها و بقاو الرجال هزات حورية جلايلها و خرجات تمشى فالجردة تحت ضو القمر… طلقات سلهامها وراها و بقا غير التوب المشبك مزين فوق راسها… وقفات حدا الشجر مقابلة مع ضو القمر و مع الورد لي فالحمر و الصفر… محساتش بيه حتى وقف حداها و غطاها بظلو توترات و جمعات الوقفة و دارت لقاتو بجنبها…
هلال ( كيشوف فيها) :
ياكما خلعتك ؟
حورية : لا… دورات راسها وتفادات تشوف فيه ..
هلال : حتال هاد الدرجة كنخلع؟… تصدمات من السؤال ديالو دارت عندو و هزات عينيها فيه…
حورية : علاش كتكول هكا ؟
هلال :حيت دورتي وجهك و مقدرتي تبتي شوفتك فيا…
حورية ( شافت ليه فعينه) :
بالعكس امولاي انت بحال هاد القمر لي مضوي المكان و كيسر لعيان حاشا واش تكون كتخلع..
هلال : إلى كان هكاك علاش مكتشوفيش فيا ؟
حورية ( حشمات و تبسمات و حدرات راسها حسات بيدو تحت وجهها و هز ليها راسها و قابل عينيها مع عينيه) :
هضري احورية مالك سكتي متحدريش راسك و تخبي عينيك من عينيا ماتحرمينيش من شوفتك و من عينيك و من صوتك لي كيطرب وذنيا…
حورية تصدمات من كلامو حسات بقلبها ايخرج من بلاصتو ممتيقاش وذنيها و لا شنو كيكول ليها… الى كان هادشي لي كتحس بيه هو الغرام فراها مغرومة بسلطان من راسها لساسها اول مرة تحس بقلبها دق من شوف جوج نظرات سحرها و خلى قلبها لي جامد يدووب… قرب منها هلال و شد وجهها بين يديه و هيا مسحورة بيه.. نزل راسها و حط قبلة على جبهتها قبلة لي طالت و طالت… حورية فرحات و قلبها طار و على واش هي فحلم و لا علم… خداها بين يديه و عنقها حط راسها على صدرو و صوت ضربات قلبو مسموعة… عنقها بحال شي كنز غالي خايف عليه لايضيع.. و هيا ساكنة بين يديه تفكرات الغربالو تفكرات هاد الكدبة حسات بدنيا ظلامت تحركات بين يديه و بعدات عليه كتشوف ليه فعينيه عينيه لي مفاهمين اش واقع هزات جلايلها و مشات كتجري هربانة و صوتو وراها كيردد سميتها…
فتحو ليها الحراس الباب و مشات كتجري لدار حلات بابو لي من حسن حظها ساروت عطاه ليها باها و دخلات سدات… قلبها كيضرب دخلات لبيتها زولات السلهام و حيدات التوب من شعرها و خلات دموعها يهبطو بحال الشلال.. دخلات لبيتها و نزلات الرواق نعسات بحوايجها على لحافها مفاقت حتى برقات شمس الصباح.. خرجات لبرا غسلات وجهها شمات ريحة اتاي كتعطي دورات راسها بان ليها باها حاط طبيلة صغيرة و كالس مقابلها…
حورية : با صباح الخير كاعما حسيت بيك…
مومن : اجي الوريدة ديالي تفطري و تشربي ليك واحد الكاس داتاي كي صبحتي بعدا ؟
حورية ( بتعجب) :
الحمد الله ا با العجب كي طرا و جرا حتى فقتي و عمرتي اتاي؟
مومن : والو ابنتي اجاتني على الكانة و كلت ندير لبنتي ضو عينيا كاس دتاي… بقات كتشوف فيه معجبة مجبد معاها هضرة مكاليها والو على البارح و حتى هي سكتات مجبدات معاه حتيت السلطان لي كتحاول تنساه من البارح كتحاول توهم راسها بلي داز غير حلمة و فاقت منها…
مومن : مالك ساكتة ابنتي ياك مطاري باس؟
حورية( وقفات) :
انا خارجة ا با خاصني نتقدا شي حاجة…
مومن : اهاه سيري ابنتي سيري… بقات حورية اكتشوف فيه سبحان الله ماهضر مكال والو… خرجات حورية تقدات فسوق على قبل نهار التلات… رجعات للدار ملقاتش باها وجدات الغدا… جا مومن تغذاو جميع و دخل لبيتو يريح واحد الشوية…
دازو ليام طايرين بحال الطير… وجا نهار لي لازم حورية تبين شطارتها فيه… لبسات قفطان فالكحل و عليه حايك فالكحل و بشوية ديال الجير دهنات شي زغيبات من شعرها هزات سطيلة فيها محكة ديال الكدام و مشطة جديدة و شي عشوب و سواك دارتهم فالقفة وجداتهم تحزمات و ترزمات تكبات هزات قفتها و خرجات من بيتها…
مومن : الله يدوز هاد النهار على خير و بيخير…
حورية : دعا معايا ا با فاش كنفكر كنقول اشداني لشي قرع نمشط ليه راسو و لكن كنفكر بلي كندير الخير و ربي يكافي كل واحد على خيرو….
مومن : كانت تكولها المرحومة الله يرحمها دير الخير و رميه فبحر جاري إلى ضاع عند العبد ميضيع عند العالي… هزات قفتها و حلات الباب لقات هلال يلاه ناوي يدق الباب… مشافتو من ديك الليلة حسات بقلبها طار شحال مشافتو توحشاتو و قلبها دق ليه الف دقة و دقة…
هلال ( منزلش عينو عليها) :
-نويتي ؟
حورية ( حدرات راسها)
اه…
هلال : ايضلام الحال انصيفط معاك جوج من الحراس بلاما تخافي و دهشي ديريهم بحال الى من الخدام ديالك قدامها..
حورية : واخا كون هاني…
هلال : حورية ردي البال لراسك مكيهمني لا تبطال لا هاد الكلام لي كيهمني هو ترجعي ليا سالمة غانمة عافاك ردي البال مدبحيش قلبي بموس ماضي.. هزات عينيها فيه مافهمات فمو اش كيخرج واش كلامو صحيح و لا هي مبقاتش كتسمع مزيان… بلعات ريقها و اشرات براسها و كملات طريقها… تبعوها الحراس من اللور لابسين لباس البوهالي ماتعطيهمش حراس.. بقات غادية حتى وصلات فين درات مع نوارة حطات قفتها و تخبات ورا شجرة اشرات للحراس لي معاها حتى هوما تخباو ورا الشجر و بقاو واقفين كيتسناو… الشمس غربات و الدنيا بدات كظلام حورية خافت لتكون نوارة خلفات الميعاد… حتى بدات تفقد الامال و هي تبان ليها جاية هازة صرة و ملتمة و كتشوف فجنابها بحال الى خايفة… وقفات نوارة كتشوف فجنابها و تسنى فحورية تبان…
محسات نوارة حتى خرجات ليها حورية قفزاتها من بلاصتها و خرجو الحراس من ورا الشجر… بقات نوارة كتشوف و مخلوعة..
حورية ( رققات صوتها):
بلاما تخافي و لا دهشي هادو غير ولادي…
نوارة ( باستغراب) :
ولادك؟
حورية : متفكريش بزاف و تخممي فالحاجة واجدة ياكما كلتيها لشي واحد؟
نوارة : لا مكلتها لحتى واحد…
حورية : و يلاه خاصنا نساليو قبل لا يفجر الحال تبعيني.. ،تمات غادية حورية و نوارة وراها كتشوف فجنابها او وراهم الحراس… وصلو لباب الحمام و دخلو و لحراس بقاو على برا… حطات حورية القفة ديالها… و شافت فنوارة :
– و يلاه بالي جبتي قرعة زيت لي عطيتك؟( خرجات فيها عينيها)
نوارة ( مرعودة) :
اه اه جبت جبت… زولات نوارة حوايجها بقات ابتحتية و دورات عليها ليزار هزات قفتها و دخلات .. الحمام كان عامر بالعيالات بحال الى موقع والو… خذاو القباب ( السطولة) عمرو الما كلسات حورية و شدات نوارة بين رجليها.. نوارة محكراتش على حورية علاش محيداتش حوايجها و بقات بنكابها … خذات حورية سواك عطاتو لنوارة مدغاتو كحلات ليها بالكحل و حلات ليها شعرها بالمشطة كتحل ليها و تحل و تحل هزات زغبة طويييلة من شعرها و نطراتها من بلاصتها و دارتها فكموسة و خباتها… كملات جميع الطقوس بحال الى راه بصح و هي راه غير كالسة تكدب عليها و تخرف عليها داكشي كامل مكاين منو والو… حتى سلات ليها..
دابا جمعي هادشي و تبعيني… جمعات نوارة كاع داك القش و خرجات تابعة حورية لبسات حورية لنوارة حوايجها خاصو و خرجو كان ظلام الحال و ظلام و فات العشا و فات… خرجو من الحمام و وراهم الحراس..
حورية : دابا عرفتي فين غادي تدينا ؟
نوارة : اه عراافت تبعوني… تمو غاديين على رجليهم و كيبعدو الطريق كانت طويلة و غير الخلا مكاين لا دار لا دوار غير الشيح و الريح من غير صوت الخطا لي كيتسمع فعز البرد بقاو على داك الحال غاديين و كيبعدو حتى وصلو لواحد الخلا فيه جوج شجرات بالحساب او واحد نص حيط مبني… مكايبان والو من غير شمع لي هازين الحراس…
نوارة ( ضارت عند حورية و الخوف فعينيها) :
ه هنا…
حورية ( غوتات حتى قفزاتها) :
و يلاه حفري و جبديه و لا معولة عليا انا… ضارت نوارة مخلوعة كتقفقف… سبقاتهم و تحنات او واحد من الحراس مضوي عليها بدات كتحفر و تنبش بيديها تنبش حتى عياات و كلسات ترتاح و كملات الحفير…
شوية جبدات كموسة ملوية فتوب كحل حطاتها.. شدات حورية شمعة و قربات من نوارة و نزلات… هزات نوارة عينيها لقات حورية كتخنزر فيها تخنزيرة ديال الغدايد… حورية كان قلبها محروق على هاد التخلويض و الاذية…
حورية ( غوتات على نوارة) :
حليه اش كتسناي ؟… بدات نوارة تحل فالكموسة و هي كترعد حلاتو و عطات ريحة كتعيف خانزة بحال شي جيفة ميتة و زغبة طويلة ملوي بيها…
حورية ( مدات ليها شمعة و امراتها و هي مخرجة عينيها) :
هاكي حرقي زغبة راسك…
نوارة : ياك كلتي… قاطعاتها حورية :
كتليك حرقي زغبة راسك…
نوارة ( وقفات) : كضحكي عليا انت كضحكي عليا… طارت نوارة على حورية طيحاتها… هزوها الحراس و هي كتركل و كتغوت… ناضت حورية كتجري هزات الشمعة من بعدما طفات شعلاتها و قرباتها بزربة لديك الكموسة و حرقات الزغببة باش ملوية الكموسة… الزغبة شعلات فيها العافية و تسمع غوات نوارة كتغوت ربي لي خلقها و شعرها شاعل فيه العافية طلقوها الحراس و شدات فراسها كتحاول طفي العافية متبغاتش طفا ليها حورية تخلعات… بداك الحر دالعافية نوارة هجمات على حورية لي تعترات و طاحت و شعلات ليها العافية فالقنت ديال الحايك ديالها… ماعرفاتش كفاش و ايمتا تحيد عليها الحايك و تلاح و شي يد هزاتها و قرباتها لعندو عنقاتها… بقات واقفة مخلوعة كتشوف فشعر نوارة كيتحرق و وجهها كيتحرق غادية كتجري و تغوت.. تسمع صوت بحال البارود تطرق… تحرقات الكموسة و رجعات بحال الرماد… ورجع كلشي كيف كان صقيل غير صوت قلب حورية كيضرب بجهد… فيقها صوت السلطان :
حورية انت بيخير موقع ليك والو.. ؟
علات فيه راسها و اشرات ليه براسها :
كي كتحس… ؟
هلال : مدامك انت معايا انا بييخر و على خير..
حورية : دابا على سلامتك تهنيتي و رتاحيتي…
هلال ( كيشوف ليها فعينيها و ضو القمر مضوي عليهم) :
عينيك سحروني و هلكو داتي و محنوني الله يا بنت مومن رفقي بحالي و لعشقي ليك لا تلوميني…
حورية ( بقات مبهوضة فيه ممتيقاش شنو كيكول ماقداتش تهضر و لا تكلم)
هلال : قلبي ديتيه و ربحتيه لله حني عليا…
حورية : ك كفاش..؟
هلال ( تبسم و تبسيمتو ضوات المكان) :
من صباح و انا نخبر عليك فالخبير و نحكي ليك على لي فقلبي و انت كتكولي ليا كفاش واخا يالالة حورية قلبي بغاك و تغرم بصوتك و. بعينيك نهار شافك و زاد كمل فاش كلس معاك وراك واش تقبلي تكوني ليا و تكوني ام وليداتي نزرعو زرع و زريعة و تكوني معايا تصونيني و تكوني ليا المرا لي بغيت تفهميني و تحتارميني و تبغيني ديريني فقلبك قبل عينيك؟؟… حورية سكتات بحال الى لقط قطع ليها لسانها…
هلال : بغيت نسولك سؤال و جاوبيني عليك الامان… حورية : واخا…
هلال : واش قلبك فيه هاز شي حاجة ليا واخا غير شوية؟؟… بقات حورية ساكتة و بلاما تحس و هزات راسها و جوبات باه… حس هلال بقلبو تنفض و دق حس بفرحة كبيرة مبحالها فرحة تبسم تبسيمة كبيرة و شد ليها يديها علاها لشفايفو و باسها…
هلال : هادشي لي كنت كنتسنى و دابا مبقات هضرة…
حورية ( مع راسها خاصها تكوليه حكاية الغربال) :
و لكن تسنى عندي ليك ميتكال…
هلال ( جرها من يديها غادي بيها) :
ماشي وقت الهضرة دابا…
وصلات حورية و هلال لقصر…
حورية : خاصني نمشي لدار ا با ايكون مخلوع عليا مشا الحال…
هلال : مومن لداخل فالقصر…
حورية : كيفاش شنو كالس كيدير تماك ؟
هلال : دخلي و غادي تعرفي شنو كاين…
تفتح باب القصر و دخلات هي و هلال لداخل ناض باها جا عندها مخلوع مسكين كان السلطان اسماعيل و لالة سلطانة…
مومن : الله ابنتي و شحال خفت عليك…
حورية : مكاين لاش تخاف ا با دابا مولاي السلطان تهنا و تفكات عقدتو و هادشي ماشي بيدي بيد الله و الإيمان القوي…
إسماعيل : الله يكملك بعقلك و يرحم من رباك مومن ربيتي و عرفتي اش ربيتي…
حورية : با عييت خلينا نمشيو… ضارت عند هلال :
مقصودك بلغتيه ودابا خاص نمشيو انا و با قررنا نهار تفك عقدتك انرجعو لدوارنا و جا لوقت لي خاصنا نمشيو و نساليو فيه هادشي…
هلال ( عقد غوباشتو و برزانة قال) :
ايوا و زواجنا شفتك خديتي كلامي ضحك و غنا…
حورية : لا بالعكس شحال من وحدة تمناك و ترجات مولاها تكون من سعدها و لكن امولاي عمر العين تعلا على الحاجب..
هلال : ايوا و شنو غاديري فالغربال لي لاصق ليك فظهر.. حورية خرجات عينيها و شافت فباها ممتيقاش وذنيها… مومن رجع باللور و حدر الراس..
هلال : مالك سكتي هدا هو الكلام لي كنتي اتكولي سي مومن عاود لينا من بعد مامشيتي و هربتي داك نهار عاود لينا سر الغربال و بلي هو سباب خويا إسماعيل و سبابي و عاود لينا على الكلام لي سمعتو و داكشي لي شفتو… كلسي الى بغيتي تسمعي الكلام.. حدرات حورية راسها و كلسات… هنا نطق إسماعيل:
مرات التاجر علال مولات الغربال لي لقيتو غربالها مليوح فالخلا كانت ختي الكبيرة…
هزات حورية راسها فمولاي اسماعيل مبهوضة…
إسماعيل : اييييييه ختارت التاجر علال و مدارت لينا قيمة لا للوالدين و لا للقببلة تزوجات بيه كلنا تفتن بالزين شاءت الأقدار و مات علال و بقات هي وحيدة… ايييه تغرات بزينها و كانت… سكت و حنا راسو…
ايوا كالو ناس القبيلة بلي مخداتش حق الله مزيان و نزلات عليها لعنة و ديك اللعنة سكنات فالغربال… ختي ماتت الله يرحمها و دات معاها سر الغربال… و لكن ابنتي احورية نوصيك متيقيش بصوت لي سمعتي و لا كلامو هادوك تخاريف بغاو تكملي فيهم مكاين لا قطيع يدين لا دم كاين كلام الله وحدو هو لي يداوينا مكاين محسن من القران شفيع لينا.. لغد اتجيبي داك الغربال و نجيبو امام الجامع يقرا عليه القران.. و مايكون الخير ابنتي ايه غلطتي لا انت لا سي مومن منين تبعتو هاد الخرايف و مدرتو ليهم حل و لكن بنادم كيغلط الله يسامح لكل واحد… باتو هاد الليلة هنا مجموعين و منين يصبح الحال يفتحها الله علينا…
شدات السلطانة لحورية فديها :
اجي معايا خلي الرجال مع بعضهم… داتها سلطانة و طلعاتها مع الدروج بحال شي قطعة تمينة غالية فتحات واحد الباب و دخلاتها كان مفرش باحسن فراش…
هذا بيتك تقدري تبدلي حوايجك و ترتاحي كاع لي تحتاجيه اتعطيه ليك مرجانة…
بدات تعيط مرجانة مرجانة… جات واحد البنت صغيرة و زوينة :
نعام الالة…
سلطانة : خليك مع حورية و شوفيها شنو بغات خليها مرتاحة واخا..
مرجانة : واخا الالة…
السلطانة : تباتي فراحة الله احورية…
حورية : حتى انت امولاتي… خرجات السلطانة و خلات حورية قامت بيها مرجانة و عطاتها تحتية لبساتها و خلاتها ترتاح و خرجات تكات حورية او وسدات يديها و تفكيرها مشا لبعيد تبسمات منين تفكرات كلام هلال ليها… كال كيبغيها و الله حتى كيبغيها تقلبات على جنبها الليمن و تنهدات تنهيدة طوييلة السرجم محلول و الرواق كيذيه لبرد.. ضو ديال لقمر داخل و سما صافية و نجومها واضحة… شحال هادي محسات حورية بهاد الراحة بحال الى جبل تزال من فوق راسها… علم الله بحال نوارة مشات كتجري ياتكون طاحت و لا داها الواد و لا نهشوها كلاب الغابة هذا جزات لي قاطع يديه من الرحمان و معارفش بينو و بين الله و مقاريش القران و معارفش شنو حرم الخالق سبحانه غير غادي فهاد الدنيا مكفح و مكدم… بقات حورية تشوف فالنجوم او وجه هلال بين عينيها مرسوم حتى داها النعاس…
///// هاد نهار غير خاصو يحكيه الكبير لصغير… فاقت حورية على الزغاريت.. فاقت معالمة معارفة فرح شكون و لاش هاد وغاريت فتحات الباب و خرجات.. تلقاو ليها الخدامات كلشي كيشوف فيها و يضحك.. و يبارك ليها..
مبروك الالة…
زين رجال ديتيه الالة…
الله يتاويك الخير الالة… مافهمات والو و رجعات لبيت و سدات غادية حاية مفهمات.. . دق الباب جوج دقات و صوت مومن سمعات…. حلات ليه الباب و دخل..
حورية : با اش واقع لخدم لي فلقصر كلشي يشوف فيا بحال شي وحدة هبيلة يباركو ليا..
مومن : تبتي ابنتي و بلاش من ديك الزربة مولاي سلطان علن زواجهم فالقصر و سيفط لبراح باش يعلم القريب و البعيد و يدير ليكم ليلة دايزها الكلام…
حورية : ياك ا با كلنا خاصنا نمشيو ملي نتهناو من الغربال..؟
مومن : سمعيني ابنتي مزيان مولاي السلطان كيبغيك و شاريك لاتفرطي فيه مبقاتش انك انت بنت التاجر مومن بنت السلطان انت سلطانة ابنتي بعقلك و برزانتك و كلامك نعلي الشيطان ابنتي و حضري الايمان الفرحة جات حتى لعندك و دقات بابك مكتوبك مقدر فهاد المكان و لوكان تشوفي السلطان اش دار على قبلك متسناش و تبعك حيت كيبغيك و مقدش يخليك و حتى انت خاس بيك و عارف شنو مخبي قلبك و عينيك فتحي ليه قلبك ابنتي و خليك يشد بيديك غادي يصونك و يهنيك و لوكانت المرحومة حية كانت اتكول ليك نفس كلامي و تبغيك تكوني فرحانة و مهنية… هبطات دمعة من عينين حورية و هبطات على يد باها باستها…
مومن ( مبسم) :
يلاه هبطي الامام مابقا ليه وابو و يجي وراها الغربال جبتو معايا…
حورية : صافي ا با كون هاني.. خرج مومن و خلى حورية غسلات وجهها من واحد المقراج دنحاس مشطات شعرها و دوزات مرود دالكحل فعينيها.. حلات الباب و تمات هابطة… هز هلال عينو فلي هابط بانت ليه هابطة بحال شمس مضوية جا لعندها و شد ليها فيديها…
هلال : صباح الخير…
حورية( حشمات) :
صباح النور…
هلال ( منزلش عينيه عليها) :
رتاحيتي مزيان ؟
حورية : الحمد الله… دخلو الحراس و خبرو مولاي إسماعيل بلي الامام وصل… كلسات حورية و حدا هلال باها و مولاي إسماعيل و عدنات و معاهم لالة سلطانة… دخل الامام و كلس جنبو جنب مولاي إسماعيل لي حكا ليه الحكاية من اولها لاخرها…
تبسم الامام و شاف فحورية :
ليد لي هزات الغربال ابنتي هي ايدك انت اول ايد اتمس الغربال و صوت لي جاك هو صوت عبانة السحارة..
حورية ( باستغراب) :
كفاش ؟
الامام : عبانة واحد السحارة مكتخاف الله ابنتي و قاطعة يدها من الرحمان مكتفرق لا بين الخايب و لا زين عبانة هادي شحال كانت دارها محادية لدار التاجر علال الله يرحمهم بجوج عبانة مرة مكانتش كتخاف الله و مكتعرف لا راجل مزوج لا لي ممزوج كانت باغية طيح تاجر علال فشباكها هادي شحال و لكن علال كان راجل الله يعمرها دار عارف بينو و بين الله كيبغي دارو و مراتو… ايوا ملي كان كيشد الرحال كانت عبانة كتسلف من عند مراتو لحافها و حايكها و تخرج بيه و تلقا برجال هكا الناس و لاو يهضرو و كثر القيل و القال بلي مرات تاجر علال مرا فاسدة… عبانة مخلات مدارت باش. تفرقهم و اخرتها هي الغربال لي جابتو هدية لمرات علال باش تهنيها من تنقية دزرع مسكينة مرات علال فرحات بيه و كانت دايراها ختها و جارتها هداك الغربال كل خيط مخيط بيه مسحور و لي شدو فيديه كيتلعن بداك السحور السحر ابنتي كاين و مذكور فالقرآن و لكن الشعودة و الجهل و بنادم كيلجا لمشعودين و دجالين و كاينسى الواحد لي خلقو…
إسماعيل ( مصدوم من هاد الهضرة) :
و لكن اسيدي باش عرفتي انت هادشي ؟
الامام ( ضحك ). :
عبانة كانت مرات با الله يرحمو من بعدما ماتت مي الله يرحمها كال يتزوج و تعرف على عبانة و جابها لدار تكرفسات علينا و هي سباب با حتى مات وكلاتو و لغجاتو حتى طابو مصارنو و معدتو و مات مسكين و انا داني جارنا حماد الاه يرحمو قراني القران و رباني حتى تزوجت و درت وليداتي و دا مول الامانة امانتو كانعرف عبانة مزيان و كنعرف تحرايميات ديالها و شرها..
إسماعيل : هي دابا مرات التاجر علال غير مظلومة؟..
الامام : اييه مظلومة عاشت مظلومة بين ناس و تهموها ناس القبيلة بلي تلعنات حيت مخداتش حق الله مزيان عاشت مظلومة مسكينة فديك الركينة حتى ماتت الله يرحمها… سلطان اسماعيل وقف و عينيه هبطو بالدموع خت وحدة كانت عندو تظلمات و هو مكانش معاها ماوقفش بجنبها بحالو بحال ناس القبيلة ظلمها و خلاها… تبعو هلال وقف جنبو و شد فيه…
هلال : بنادم خطاء و معند الواحد ميدير…
إسماعيل : ظلمناها بزااف خاصنا نديرو شي حاجة..
هلال : ان شاء الله… رجعو عند الامام..
هلال : و اشنو المعمول دابا اسيدي؟
الامام : عبانة مرا مبقا بينها و بين القبر غير شبر مرا كبيرة و شيبانية و بنقطة من دم حورية شابة لغربال ترجع ليها شوية من صحتها و مغادبال حيت الخيط لي مخيط بيه الغربال هو زغب راسها…
مومن : هادي هادي معرفت فين اتحط جنابها الله يحفظنا و يلطف بينا يااربي…
حورية : و شنو خاصني ندير اسيدي ؟
الامام : نهار الجمعة بإذن الله جيبو ليا هاد الغربال للجامع قبل لوقف دالجمعة و ديك الساع الحل بيد الله سبحانه… مشا الامام رجع بحالو و حورية غير كالسة و كتخمم ماهمها لا عرسها لي قرب يتقام و لا والو من غير تفك من حريرة هاد الغربال…
جا نهار الجمعة و حورية بحال مكلسينها على نار هزات الغربال هي و باها و معاهم السلطان و شدو طريق لعند الإمام داك النهار كانت الريح قوية بزاااف هما غاديين و الريح كتردهم ماوصلو للجامع غير بشق النفوس… لقاو الإمام كيتسناهم شاد تسبيح تلقا ليهم بتبسيمة هز واحد طبسيل فيه التمر و مدو ليهم…
الامام : حليو لسانكم… هز كل واحد فيهم تمرة و دخلهم لدارو لي جات لاصقة على الجامع… دخلو واحد البيت مفرش على قد الحال كلسو على الحصير و الحنبل تقييل.. شد الإمام الغربال حطو قدامو و حط عليه يديه… ريح قوية كدخل من سرجم هز الإمام راسو فالسرجم و تبسم.. بكل تقة فنفس بتباتة و رزانة و بصوت رنان بدا كيتلي ايات الرحمان و يقرا القرآن… كل مكيعلى صوتو و يقرا سرجم البيت كيرتدخ حتال السما.. طاحت الكلة ديال الما و تهرسات و سال ماها و حورية شادة فباها و مخبية مخلوعة… رزة الإمام تحلات و طاحت كيحس بحال شي واحد باغي يهزو و يردخ بيه.. صوت الغوات تسمع فالمكان بحال شي انسان كيصارع شي حيوان لغوات غادي و كيعلى و يعلى غوات ميتحملو انسان.. بداو سلوك الغربال كيطرطقو واحد ورا واحد… طارو السلوكة من الغربال و بدا يتحل كولو حتى رجع كلو مشتت… الصوت مشا و البرد هدا و رجع كلشي كيف كان.. ختمها الإمام…
صدق الله العظيم… مع دار الإمام و هلال عند حورية بانت ليهم سخفانة… ناض هلال كيجري مخلوع كيفيق فيها…
الامام : متخافو شاي عليها شوية و غادي تنوض… ناض من حداهم ورجع فيديه قرعة دزهر عطاها لهلال يشمها ليها.. شوية بشوية بدات كتفيق مدارية معالمة بلي وقع ليها…
الامام : على سلامتك ابنتي تهنيتي من الغربال و من مولا الغربال…
مومن : الله يسلمك اسيدي الله يرحم بيها الوالدين…
هلال : الله ينورك اسيدي…
الامام : هدا واجب امولاي.. هز هلال حورية من يديها وقفها على رجليها و خرج هو و ياها و مومن من عند الامام… وقف بيها على برا و ضو و شميسة المنورة ضاربة فيهم…
هلال ( كيشوف ليها فعينيها) :
واجدة ليلتنا؟ شافت فيه و تزنكات بالحشمة حركات راسها بالايجاب و حدرات راسها… شد ليها باها فيديها ليسرا وهلال فيديها الليمنية جوج ديال الحيوط فينما تعكلات تسند جنبها على واحد فيهم…
#الواقع
حورية : و هكا اوليداتي حورية لقات زمانها لي تحط عليه الراس و تحكي ليه و تشكي ليه همها ياخد ليها حقها و يدافع عليها…
مي و عرسها كي داز ولدات معاه شي وليدات و فينهوما دابا و فين هي حورية و عمي مومن ؟
حورية ( تبسمات كتلعب فشعر حفايدها و سرحات بعينيها لي واخا زمان و لكبورية مزال يسحروك بكحوليتهم و رموشهم)…
#زمان
هلال ( شاد ليها فيديها و كيشوف فيها) :
فرحتي هاد النهار مبحالها فرحة لي ترجيتو من الله لقيتو الله يخليك ليا نور عينيا..
حورية ( مبسمة و حشمانة) :
عشقي ليك معندو حد و حبي ليك قد لي بين السنا و الأرض…
هلال : شحاااال و انا كنتسنى و نتمنى بحال هاد الكلام الحمد الله لي كتبك ليا و كنحلف ليك بالله لي خلقني و خلقك عمر كلام العيب تسمعيه مني و لا نجرحك بجلام يدمي الليلة ليلتنا و اليوم فرحتنا كنتمنى من الله يكون منك زريعة صالحة لي تنبت فكل و تكبر فكل مكان و تسرح بعروقها الزينة و تخلي سمعة طيبة فالقبيلة و بين الناس بعد منها واحد الشوية و مشا جيهت واحد الصندوق كبيير حلو و جبد منو ورقة ديال التوب لي كتب فيها كاع باش كيحس نهار عرف و تيقن بلي قلبو مغروم بيها مدها ليها و كاليها :
بغيتك فهاد الليلة و قبل متكوني ليا تقراي هادي شدات من عندو داك التوب لي مجموع و مسدود
هلال : ماشي دابا حتال هاد الليلة… قرب منها و خدا وجهها بين يديه و باس ليها راسها و عنقها و نور شميسة ضاربة فيهم و مضوية عليهم كيما كيما حبهم ايضوي نهارهم و لياليهم…
#الواقع
حورية عاشت فرحانة مع مولاي السلطان واخا تعطلات حتى حملات و خافت لتكون مكتنبتش الزريعة و لكن صبار يكافي ليه الله لي كفاهم على صبرهم و عطاهم ربعة ديال الوليدات بنية و 3 ديال العزارة مومن بقا معاهم حتى كبر و كبر و. دا مول الامانة امانتو و مات شحال بكات عليه حورية و تمحنات و لكن بصبر و بالايمان و مع الركيزة لي هو السلطان قدرات تغلب على البكا و صبرات و عاشت هانية مهنية مع راجلها تاج راسها او وليداتها بربعة… و مشات خبيرتي من واد لواد و انا بقيت مع وليداتي ولاد الجواد… نعسو حفايدها فوق ركبتها تنهذات و هزات راسها فبنتها لقات عينيها دمعو…
حورية ( بتبسيمتها المعهوذة) :
علاش ابنتي مدمعة ؟
بديعة : تفكرت با الله يرحمو كنتي كتعاودي على راسك امي ياك..
حورية : باك ابنتي كنز مبحالو كنز و لكنز عمرو ميتنسا الله يرحمو و يوسع عليه ايبقى فقلبي ديما مخبي حتى يلاقينا الرحمان… هزات راسها و شافت فالهلال…
حورية ( ضحكات) :
باك ديما فالسما كنخرج لهنا و نتقابل معاه و نعاود ليه و نحاجي ليه باش كلت ليك بلي باك معايا و عمري مغنساه…
الحب الحلال مبحالو متيل نهار نهار لي تختاري عرفي تختاري لي يكون ليك الظهر و السند فاش تبغي طيحي تلقايه واقف وراك و ديما معاك ماشي عليك…
صبح صباح جديد شمس مشوية فيه و باركة و صياح ديك على فاقت مرات رشيد وجدات الفطور… لي تجمعو عليه جميع من ورا الفطور خرجو لوليدات يلعبو فم الباب و بديعة فالبيت مع نعيمة و حورية كتوريهم تواب لي جابت ليهم… حتى دخل ادم كيغوت و يعيط…
مي مي مي شوفي اش لقيت… دخل عليهم هاز واحد الغربال فيديه بالي و قديم..
ادم : مي بحال هداك لي عاودتي لينا عليه ياكي بحال غربال حورية ياكي ؟… حورية بحال الى تكب عليها ما بارد جلسات للارض و شدات فراسها كدور فيها يمين و شمال :
الله ياربي الحنين واش انا عمري مغنتهنا خلاوها ناس زمان تيدور الزرع حتى كيدور و كيرجع لعين الرحا…
#النهاية
نلتقي عند الموسم الثاني للقصة : بندير خميسة
شاركنا رأيك في هذا الفصل 🌹