سرطات الحلوة مصدومة وعلياء قدامها باركة تتشرب من كاسها بالمهل بعدما عاودات ليها على مرض سلمان
سارة: الله ياربي مسكيين.. هلكاتو بنت الهم بيت ليها دقة جدي، شفتي اش قلت ياااك شفتي.. رااه ديك خيتي مبيتهنا تتسيفطو للروضة الگنس القصييف
ردت بفزع: الله ينجيه ويحفظو
سارة: ايه ايه حگلك المعلمة هاد ليام وليت نشوفك هي غادة وماهياش.. قولي السيد مرض ونتي مرضتي معاه
تنهدات: بقا فيا بزاف ..ووالله مايستاهل كون غير كان داير ليها شي حاجة
لوات راسها بتأييد لكلامها : بصح.. اييه لقاتو حنيين.. كون كنت منوو نعطي لمها واحد جوج دقات تكره الرجال ومايجي منهم.. شتي كونما كتي مخطوبة لداك.. اش سمو؟
ضحكات: والتر
سارة: ايه هاداك.. كونما كتي مخطوبة ليه كون قلت ليك شدي فيه بسنانك هي ضد فيها
دفعاتها بشوية لرجلها: السيد بحال خويا كوني تحشمي
هزات من الحلوة تتاكل: وا الله يعزها اخوة اختي
علياء: الله يشافيه ياربي
سارة: امييين ..ايوا فين وصلتو نتي وداك.. شسماه الله؟
علياء: قولي غير الگاوري وبااااراكة من السكر واش باغة مايوصل العرس حتا تولي دبة
سارة: وا الحلوة لي جابو بنيينة ..عرفتي ههه ديك مو جاية ومعبسة محاملاش تجي، ضد فيها غاناكل گاع الپلاطو وندوز بالعاصير لي جاابو
علياء: وا السلامة ههه
سارة: ههه واماجاوبتينيش.. قاديتي وراق العقد ولا مازال
ردت متكية بايدها على الطبلة: كلشي مقاد من زمان.. ولكن مازال مادفعتهم
بتعجب: وعلاش اختي شتااسناي
ردت بحيرة: حاليا مدابزين، فضلت نرجع شوية اللور بيما لقيت حل و زيد عليها حاساه مخبي عليا شي حاجة.. شي حاجة مهمة وخاصني نعرفها
زادت بفضول: أما هي هاد الحاجة
شافت للباب ياكما جاي شي حد وهزات تليفونها تتوريها التصاور وسارة خنزرات وقالت
سارة: ماقشبلت واالو شمن لغة هادي
علياء: الألمانية.. نرجع للدار ونترجمهم فالبيسي ديالي.. تما غانفهم
ردت معيفة وجهها: يييع وماالو مصور قشاوشوو.. وااش هادا هتر ولا؟
بجدية قالت: عندو شي مشكل طبي .. ولكن شنو هو ماعرفتش، ومصارحني بوالو
سكتات ضوراتها فبالها وقالت: مايكونش ختن
ردات الاليفون لساكها وبهدوء قالت: هو اصلا مختن من صغرو اش غايختن مازال
سارة: وعلاه النصارا تايختنو؟؟
ضحكات وقالت: لا هو كانت عائلتو يهودية، وهوما تايختنو ولادهم بحالنا “كمشات عينيها تتفكر” كنت دويت مع طوبياس شحاال هادي فهاد الأمر, جبدناه غير صدفة وصافي
سارة: هي طلع يهوودي !!! ويلي ويعرفها سي لمكي هههه
ضحكات: مابقاش يهودي.. فاش كبر تبع صحابو وولا مسيحي.. وشفتي حتا ولادو راه كلها وشمن طريق شاد..عاقلة على باربارا واناماري؟
ضحكات وتتخشي ففمها: ديك باربا هي لي والدة مع صحيبها يااك
علياء: ههه هي.. هاديك يهودية
سارة: وانيت فعايلها تااعهم ههههه
علياء: واناماري كانت تبعات باها وولات مسيحية.. وطوبياس كان ملحد، فاش عرفتو المرة اللولة مكانتش تيآمن گاع بوجود الله
شهقات: ويلي على عااائلة ههههه غاتناسبي مع حطب جهنم شخصيااا ههههه ويلي استغفر الله العظيم اشاودي هادا والدري نقيقي والضرافات.. زدق قرد بلحيماري لاخر ههههه
علياء: عقلية الگور بسيف مايكون هاكداك.. ملي عرفتو ضريف وزدت تعرفت عليه تناقشنا انا وياه فهاد الأمر.. دوينا فيه شحاال حتا قنعتو
سارة: بالااسلام؟
ردت: بوجود الله أولا وبالفرحات غير ملي اقتانع.. الاسلام مازال حتال الفرصة المناسبة ونجبد معاه هاد الموضوع
سمعو سمية علياء من لتحت وقالت سارة: مك هادي لي تتعيط؟
ناضت: آه خاصني نمشي.. مبروك مرة خرا
سارو: نساي العرس هاد المرة صافي.. رااه غانجي بتكشيطتي نجرك
علياء: هههه ياك مازااال عليه الحال
سارة: ايوا هاني علمتك من داابة اختي
علياء: بسلامة هههه
تبعات حكيمة راجعين للدار..
بدلات حوايجها بسرعة وبركات قدام البيسي ديالها مخلية حكيمة لتحت فالكوزينة تتوجد العشا.
حطات التليفون حداها تتنقل منو وتكمل داكشي لي بداتو فالرياض.. ترجمات النص وبدات الامور تتوضاح وتبان حيت أصلا تتعرف تقرا صور الأشعة .. كان عندها فضول تتعلم تقراهم وفعلا ولات هي فالعائلة لي تتقرا الأشعة ديال جداها إلى جات من الطبيب وتتفههم اش كاين
بداو حجبانها بعصبية اجتاحتها تايتجمعو حتا رجعات تترعد ..خبطات داك البيسي على جهدو وناضت مزيرة شعرها
السيد طلع داير عملية قفل الأنابيب المنوية باش مايولدش، دازت بين عينيها اللقطة لي جبدو فيها الولاد وشحال كانت تتهضر بحماس وتحلم.. كلشي راب وتهد بسبب كدبتو لي تفضحات
صونا التليفون وعرفات شكون قبلما حتا تشوف فالشاشة.. حاولات ماتجاوبوش ولكن عرفاتو غايبقا مشوش، تنهدات فاتحة الخط وقالت
علياء: الو سلمان
رد بفرحة باينة فصوتو وصداع الطموبيلات حداه: مسا الخير هههه جاي نبشرك.. غدا إن شاء الله غانحل مكتب ديالي
تبسمات وسط عصبيتها: هاكدا دغياا ههه
سلمان: ايييوا شنووو حگرتينااا هههه السيمانة لي بركت قاديت فيها اموري كاملة انا وواحد الدري صاحبي.. مهم حتا دوزي ونعاودلك، فينك نتي دابة
سكتات تتفكر وقالت: لقيتيني غانمشي للرياض
سكت شوية وقال: صوتك ماهواش.. واقعة شي حاجة؟
تنهدات تتفرك شعرها: لا هانية ماديرش فبالك ..غير تبرزيط الخدمة وماما
سلمان: رخفيها شوية وتهلاي فراسك.. نسالي شي شغال ونعاود نتاصل بيك الى كنتي فايقة واخا
علياء: واخا إن شاء الله.. بسلامة
حلات سرجم بيتها وقفات قدامو تاطلع النفس وتفكر..
رجليها تياكلوها باش تمشي للرياض تواجهو وتحط ليه كلشي قدام وجهو، ولكن مايمكنش.. علياء بالعقل تتحل الأمور ومجاتش حتال هادي وتتسرع
..مسحات الترجمة من البيسي والتصاور حتا هوما لي صورات..
صبرات ديك الليلة وزادت فالصبر سيمانة آخرة لأن والتر رجع لسويسورا الغد ليه بعدما خبرها أنه غايرجع بعد أسبوع باش يحط الرياض فالبيع وهي بهدوء ودعاتو تتسنى الفرصة المناسبة .. كلشي فوقتو زوين
خطفها سلمان داك النهار خارج مدينة مراكش وبالضبط لباب دكالة فين فتح لاجونص ديالو
..دخلها تايوريها المكان بيرو ببيرو، مخلي المكتب ديالو هو الأخير دخلو ليه والضحكة فعينيه قال
سلمان: ايوا عطينا رأيك “فتح ايديه طالق البشرة” كيف جاااك المعلمة
ردت متبسمة بسعادة فرحانة لفرحو: تبارك الله عليك ههه .. واخا راه مصاريف صحيحة غايكونو تحطو فيها
حك مؤخرة راسو تايشوف فالمكتب ويتنهد: وايييه
علياء: هاد التنهيدة ملخصة كلشي ههه
سلمان: ملخصة شهراين ديال تمارة والفلوس الصحاح ههه ولكن الحمد لله ربي مخيبناش
تسارات على البيرو ديالو ووقفات قدام الشباك الزجاجي لي ورا كرسي المكتب تتشوف منظر زوين قدام عينيها.. الخضورة والخلا لابنايات لاوالو والدنيا مهدنة لاسائر يسير ولا طائر يطير
علياء: المنظر زوين من هنا
وقف حداها: هادشي علاش عجبني ..مكالمي وناس قلال لي ساكنين فهاد الجهة عكس الجهة لخرا عامرة شوية
شافت فيه بفضول: مروى قلتي ليها فين حليتي لاجونص؟
ضحك: مالي هبلت نعاود نفس الغلط جوج مرات
علياء: ادا مازال ماعرفات؟
رجع شاف فالشباك: لا عرفات ..ولكن فاش تتسول على العنوان تانتلفها، مقاد على مصايب مازال
علياء: أحسن.. وايمتا غادير الافتتاح ههه
سلمان: غدا الخدمة إن شاء الله مكاين لاإفتتاح لازميتة ههه .. تشربي شي حاجة بعدا
علياء: ليمون
سلمان: غانهبط نجيبو ونرجع دغيا
علياء: اوكي
بركات فالمكتب ديالو تتسناه وفنفس الوقت بالها شارد.. حتا رن تليفونها جبداتو شافت فالرقم وجاوبات بصوتها الهادئ
علياء: الو والتر.. على السلامة رجعتي؟
علياء: صباح النوور.. ممم.. لا والو غير مانعستش مزيان.. مع غاتوصل للرياض غانكون انا تما كون هاني ..بسلامة
قطعات تتزفر زامة شفايفها.. دخل سلمان بأكياس فيهم عصير وحليوات لاكريم مع قهيوة وشوية المسمن والحرشة..جر كرسي حداها قاد كلشي فوق المكتب بمساعدتها وبداو يفطرو ويدويو حتا نطقات بفضول
علياء: سلمان، قوليا.. شحال بالضبط خسرتي ديال الفلوس باش فتحتيها
رد تايشرب قهيوة: لاجونص ؟ بزاف ههه
علياء: شحال هاد بزاف
شاف فيها بنص عين تايطنز: علاش تتسولي، باغة تنافسيني فالميدان ولا
هزات كتفها ببسمة: لي تزادت فالراس زينة ..تايعجبني نكون فاهمة بحال هادشي
سلمان: ياك الالة ..واخا سمعي
علياء: عاود واختاصر حيت عندي الخدمة هههه
ضحك مجاوب: هههه واخا .. أول حاجة المعلمة انا درت اجونس طرونسبور توريستيك، وهي مختالفة على ليزاجونص لخرين .. الحاجة اللولة لي خاصاك هي واحد لخمسين مليون تكون مبلوكية فالبنك
غوبشات بتعجب: الله.. وعلاش
سلمان: حيت فاش تتمشي تاخد الگريمة ديال الطموبيلات متايعطيوهم ليك إلا لاكانت عندك 50 مليون فالبنك ومبلوكية.. غير هادا بلاما تحلم تاخدهم
علياء: اها
سلمان: زيد عليها لمينيموم خاصك خمسة الطموبيلات، يكونو ديال تمنية البلايص للفوق
..وتالتا يتسجلو على الأقل تلاتة الأشخاص من الخدامين معاك فلاسينيسيس بلا بيك نتا
لاقات حواجبها تتشوف فيه بشك: الطموبيلات علاما عارفة القليلة تايديرو تلاتين مليون للوحدة.. و50 مليون ديجا خاص تكون عندك فالبنك ! واش شفرتي بنكة ولا اشمن مصيبة درتي ؟
ضحك من قلبو وقال : ههههه خدمت دماغي اختي اش هااد الباطل ‘مسح فمو تايجمع داكشي وهي تتسمع”
علياء: واشنو درتي اسي المطور
رد: دويت مع صحابي المطورة يضبرو ليا على دراري يكونو عندهم طموبيلات .. تلاقينا وتفاهمنا، حتا عطاوهم للاجونص مقابل واحد المبلغ ..وسنينا معاهم كونطرا باش مايكونش عندهم حق التصرف فدوك الطموبيلات ونفس الوقت راهم ديالهم .. صافي جمعت خمسة هاكاك وكنت جامع شي صريف الحمد لله، زدتهم على فلوس البنك حتا كملت 50 مليون وبلوكيتها.. وبديت انا وواحد صاحبي تانكملو الاجراءات لي خاصين.. ايييوا وهاحناا ههه
ضحكات: وهاهي ولات عندك اجونص خاصة بيك
سلمان: كل حاجة فيها خير “تنهد براحة” الحمد لله
مشا رما داكشي فلپوبيل وهي ناضت هازة ساكها: ياربي تكون فاتحة خير عليك ..وطلع كيف بغيتي
عنقاتو مبتاسمة وقال برجاء: أميين ..وفاش تحسي راسك مرتاحة شوية تعالي عاودي ليا مالك
رمشات فيه وهو فيها تايشوف حس بيها ماهياش ومخبية
حركات راسها وقالت: إن شاء الله، خاص نمشي
باس جبهتها: على راحتك
خرجات شادة طاكسي للرياض.. وقفات على گروب ديال التوريس كان يالله وصلهم الطرونسپور لي رسلات ليهم للمطار حتا طلع لبيتو عاد هي بركات حدا البيسين تاترتاح، حتا علموها بلي والتر جا.. وناضت طالعة لعندو
علياء: على السلامة
سدات الباب وهو فوق سريرو كان بارك بفوقية بيضة ..كيف شافها تبسم وناض تايضحك
والتر: الله يسلمك الحبيبة ديالي
باس ايدها وجراتها بأدب غادة جهة الوراق فالمكتب تتقادهم .. تنهد وهز البيسي بوغطابل ديالو “لماك”.. يالله بانو وخرجو للأسواق وأول واحد تشوفو عندو هو والتر لكن ماركزاتش فيه بزاف بسبب شرود بالها ..وقالت بهدوء
علياء: هاد الوراق خلي حتا تشوفهم ..الرياض حطيتيه للبيع ؟
رد بإيجاب: حطيتو.. وتكلمات معايا واحد السيدة اجنبية، لكن باقي تاحاجة ممأكدة
علياء: مزيان.. الله يسخر
والتر: آمين .. الأمور هانية عندك
علياء: وي عادي.. غاتبقا محن بهاد الفوقية.. نجبد ليك بيجامة تلبسها؟
تبسم: واخا احبيبتي
ببسمة حلات البلاكار ..طلعات ايديها للفوق زعما غاتجر البيجامة وقاست الملف بلعاني حتا زلق ووراقو تشتتو فالأرض.. والتر من مكانو قفز لدرجة لماك طاح ليه من الناموسية للأرض، نزلات تتجمعهم ووقف عليها بسرعة تايهزهم بارتباك ويردد
والتر: بلاتي بلاتي غير خليك انا تانجمعهم
وقفات مطلعة حاجب فديك الصورة تاع العضو ديالو ..بقات شادة اوراق الأشعة مبعداهم عليه وقالت باستغراب مزيف
علياء: شنو هادشي؟
بتوتر مد ايدو ياخدهم وزادت بعداتهم: علياء اري لهنا راه غير وراق وصافي
طلعات حاجب بغضب مكتوم: هادو وراق الطبيب وعليهم سميتك اوالتر.. ادا.. شنو.. هادشي !؟
والتر: والو غير شي حاجة كانت ضاراني ومشيت للطبيب بلاما تحكري بزاف
علياء: ضاراك فين ؟
والتر: دابة بلا قوة الأسئلة ماشي شي حاجة
علياء: ملي ماشي شي حاجة مغاتبداش ترعد هاكدا.. هادشي تاايتعلق بتما ” أشارت ليه للقنات تاع الحيوانات المنوية” ياك !؟
والتر: علياء الله يهديك اش تتقولي اش هاد التخرميز
علياء: ماتستحمرنيش اوالتر.. ماشي حيت منانفهمس الألمانية صافي غادوزها عليا.. تانعرف نقرا التحاليل والأشعة مزيان وهادشي لي هنا ولي واضح وضوح الشمس غانعرفو بارادتك ولا بلا بيها
رمات عليه الوراق وخرجات خلاتو يضور كلامها فدماغو
مرت عليها يوماين ..ساكتة فيهم متتهضر معاه متتكلم الا قليل وكلمة ونص فقط مخلياه غير تايضور فعينيه ويحاول يطمر على الأمر ..
دخلات للكوزينة تاع الرياض بدجين وتيشورت وردي مخطط بالأبيض، مع طالون عالي وشعرهاا الاشقر مضفور للجنب ..حلات الپلاكارات تتقلب والبنت لي فالمطبخ تتشوفيها وقالت
البنت: محتاجة شي حاجة امدموزيل
علياء: بغيت نصيب واحد الحلوة عاد شفتها وشكلها عجبني، نشوفو واش تزدق ولا لا “بسمات ليها” غاتعاونيني ياك
ردت بقبول؛ معلوم ههه و طيابك امدموزيل علياء ديما ماشاء الله زوين غاطلع بنينة حيت صباعك أصلا فيهم البنة
ضحكات؛ شوية وصافي ههه
جبدات المكونات كاملين تتبع الطريقة بالحرف الواحد، قادوها ودخلوها طيب وبركو على كويس تاع العصير مدوزين بيه الكلام.. دخل والتر بنص تبسيمة تايشوف فيهم وقال
والتر: نتي هنا، ماتحطوش ليا معاكم؟
ناضت البنت تكب ليه عاصير وعلياء فمكانها تابتة بهدوء ..حطاتو ليه فوق الطبلة وناضت لشغالها فحين هو برك جنب علياء وهي تلفتات ليه ببرود ناطقة بالانجليزية حيت عارفة العاملين فالمطبخ متايفهموهاش
علياء: ايوا.. قررتي تقول اش كاين ولا مازال
رد بنفس اللغة: علياء الله يهديك حيدي هاد التخربيق من دماغك ..ماصدقنا غاننساو لي وقع فسويسرا تزيدي هاد المشكل حتا هو
علياء: المشاكل نتا لي تتقلب عليهم اوالتر “كملات كلامها بتقة” انا كيف قلت ليك درت.. قلبت على الأمر وعرفتك اش مخبي
توسعو مقلتي عينيه وقال: شنو تتقصدي
علياء: قول شنو كاين وتجي من عندك أفضل .. حسن مانقولها أنا.. نتا ختار
تنهد مدة تايمسح جبهتو ومباشرة اعتارف: أنا داير عملية ..
تنهدات من. اعماقها: ديالاش
والتر: ديال سد قنوات الحيوانات المنوية.. يعني مانولدش.. ولكن تيقي بيا تانحلف ليك لو دخلتي لحياتي فديك الوقت عمري كنت نديرها، ونهار عرفتك باغة الولاد جبت داك الملف من سويسرا وعرضتو على الأطباء ديالي تما وهنا.. وتانحاولو نلقاو حل مجموعين
خبطات العاصير تتحاول تخبي غضبها: دوينا فهاد الأمر ياك.. أنا عارفة العملية درتيها سنين هادي من التاريخ لي فالملف، ولكن لي قهرني هو حنا هضرنا وشفتيني بعينيك شحال كنت متحمسة للوليدات وشحال كنت باغاهم.. مع دالك مصارحتيني بوالو .. بقيتي ساااكت اوالتر ياااريت فقط صارحتيني ولا تبيني بليدة هاكدا..علااش هادشي علاش
رد وهو شاد فايديها: حيت تانبغيك وخفت نخسرك اعلياء هاااعلاش
باستهزاء: هه المحبة عندك هي هادي.. الخدااع التحاايل والكدوب من الفوق، حتال ايمتاا كنتي غاتخبي عليااا هاد الأمر.. ماشي حشومة عليك
رد بلهفة: غانلقاا حل كوني اكيدة.. شوفي “حل الملف لي حاط على الطبلة وكان باللغة الإنجليزية تايوريها شنو فيه والتاريخ لي فيه ديال هاد الشهر” جمعت الأطباء ديالي وتانحاولو نلقاو حل بااش نعاود نحلها وعاد درت تحاليل جداد
قاطعاتو بنفاد صبر: بااراكة.. كاضحك عليا ولا على راسك ..دوك القنوات الى مشاو حتى تسدو مستحيل يتحلو مرة خراا
والتر: كاين بديل حاليا ولا الطب مطور كاين اطفال الانابيب و..
قاطعاتو وناضت: والتر “تنهدات مترددة لفترة.. عاد نطقات” تالهنا وباراكة، عييت من كدوبك..
ناض بصدمة: كيفاش
علياء: كيف تتسمع، سالينا
شدها فاش بغات تخرج وبرجاء تايردد: علياء ماديرش شي حاجة لي نندمو عليها كاملين الله يخليك
علياء: لي غايندم هو نتا.. صافي سالينا “نترات ايدها منو” رد معاك البال للرياض امسيو والتر انا روپو هاد العشية
خلاتو تايعيط عليها وخرجات مخنوقة غير البنت لي خرجات ليها ساكها أما بالتلفة نساتو..
ضارو بيها الحيوط وخاطرها تزير ولات غادة بدون وجهة حتا وصلات لمطعم كيشامارا.. دخلات حطو ليها الغدا وهي بالها مرفوع.. تالف وحيران تتسول راسها وتعاود ..واش قرارها فمحلو؟ ولا تسرعات وغاتندم؟ اش هاد الزهر عندها و آش هاد قوة المشاكل لي تايطيحو عليها واحد ورا واحد
الحيرة كلاتها ومابقات عارفة اش دير.. ماحسات إلا وهي خارجة للشاريع اشارت لطاكسي وطلعات قائلة
علياء: باب دكالة عافاك
هزات تليفونها ورسلات رسالة لسلمان: انا جاية عندك للبيرو.. محتاجة نهضر معاك ضروري
جاوبها بعد ثواني: كانتسناك
حطات ليه كلشي فوق الطبلة.. عاودات وخوات مافقلبها مخلياه غير تايسمع مانطق ماتكلم حتا سالات وتنهدات تنهيدة عميقة جاية من الخنقة لي مزيرة ليها على صدرها وهمها فوق راسها ..شدات فشعرها وقالت محتارة
علياء: اش ندير دابة
تنهد بحنق وبكلام صريح هضر : علياء انا منكدبش عليك.. داك السيد النهار اللول لي شفتو عرفت بلي مايليقش ليك ومابغيتوش ليك صراحة لابغيتيني نهضر نيشان
علياء: لي ممرضني اسلمان هو انا ماتخطبتش باش نتفارق.. واخا كلشي كنت تانحاول نلقا حل معاه ونزيدو بهاد العلاقة للقدام، ولكن بهاد الفعلة كسرني.. ماعرفت كيفاش نفسر ليك…
حرك راسو بتنهيدة: فهمتك
علياء: من جهة تانقول ماشي دنبو حيت العملية مدارهاش فالفترة لي كنا مخطوبين فيها.. وهاهو تايحاول يلقا حل يفك بيه المشكل.. ومن جهة خرا مقادراش نسرط بلي خبا عليا موضوع مهم بحال هادا لا وكملها بالتخلويض
سلمان: لي مولف الكدوب صعيب العيشة معاه انا هادشي لي عارف “غوبش بتساؤل” لي محيرني دابة هو نتي علاش قبلتي عليه النهار اللول..
ماهو من سنك ماهو من ديانتك و حتا التفكير عندكم مبدل !؟ على أي أساس شفتي فيه شريك حياتك
تنهدات: حتا انا مغانكدبش عليك.. فاش سلم وشفت كيفاش تقاتل باش يطبق عاداتنا فالخطبة وشحال دار الخاطر لبابا حتا وافق يجي يخطبني.. قلت هادا هو لي بغيت
..شفت فيه عيشة زوينة وراقية كيفما كنت تانتمنى.. كنت بحال هاداك لي عايش فواحد المرتبة ديال سبعة على عشرة وتايطمح لما كتر.. وفعلا جاتو الفرصة يعيش فمرتبة ديال عشرة على عشرة داكشي لاش استاغلها.. وداكشي لي لي كان
غير فالفترة ديال خطوبتنا شفت بلايص وتلاقيت بناس عمري نحلم نشوفهم.. طلعت طلعة وحدة وكنت مخططة لكلشي وغادة درجة درجة تانقول الدنيا تاضحك ليك اعلياء ..حتا تانتصدم مرة بعد مرة
..قبل كنت تانقول حتا إلى تزوجنا ومتفاهمناش عادي.. كيفما ربي حلل الزواج حلل الطلاق ماعندي حتا مشكل المهم راحتي ونعيش كيف بغيت.. ولكن داابة…
زفرات مخنوقة وهو قال بجدية
سلمان: الراحة ماشي فالماديات اعلياء راك غالطة.. سمعي لنصيحتي الله يرضي عليك.. إلى مكنتيش مرتاحة مع هاد السيد وممأمناش ليه غاتعيشي غير فالهم والغم عمرك ترتاحي تيقي بيا “تنهد فاش شافها شاردة تتخمم” ونتي تعرفي تاني.. لي مسلكك
نصحها بلي يقدر عليه.. وكان بالمعقول وجديا تايتكلم .. حط ليها نصيحتو فوق الطبلة وخلاها هي تعرف لي مسلكها..
بعقلها وتاتعرف تصرف فأسوء المواقف واخا دوخ وعارف بلي يقول لي قال إلى كانت فراسها فكرة خرا مسلكاها غاطبقها والسلام.. وهاكدا هي مع الكل
الحاجة بانت ليها هي هاديك ماهي مضرة ماهي حرام.. تادخل فيها نيشان وحتا لي ولدوها متايقدرو يحكمو فقراراتها.. لمكي بنفسو لي هو اقرب الناس ليها يدوي ويدوي ويدوي وبلا فائدة راسها قاصح وفالاخير تايهز ايديه ويغسلهم…
لكن موضوع والتر خربق ليها گاع لي كاانت مخططة ليه وخربق ليها حتا الدماغ
…بقاو على الكلام حتا وصلات الخمسة ديال العشية.. توادعات معاه وخرجات على رجليها للاصال أول مكان جا فبالها تمشي ليه.. دخلات وبردات اعصابها مزيان فلونطريما جهد ساعتاين وهي غير تما حتا عراقت مزيان وجهدها تسالا ..
دخلات دوشات وشدات طاكسي من باب لاصال موصلها لدربهم ..دازت من حدا واحد التقويسة حدا التانوية، غادة والدنيا خاوية تما وراسها مرفوع..
حتا كايتحط عليها واحد ماعرفاتو منين بعت زيرها من اللور وحط ليها موس على جنبها فوق الحوايج حسات بالضو سرا معاها وريحة الگارو لي ففمو تاضربها للفم والنيف روعات ليها الخاطر.. كمل لي خاص فاش نطق
….: كلمة وحدة غانجبد لختي مصارنها.. زيدي معايااا
سرطات الريق وبدات تعرق بالخلعة: ع عافاك اخويا
زير عليها بالموس: متتسمعييش قلت لمك زييدي
ضورها وباقا عاطياه بالضهر غادي بيها ورجليها حاسااهم فاشلين.. داها لعند صاحبو فالدورة.. كان تما مقنت بعيد على أنظار المارة وباينة كان فيهم تايتسنا مع شافهم لاح الگارو عافس عليه وقال بضحكة مشرگة فمو لي تهلك بالحشيش
…..: اي هاي هاي شرفنا القمر هههه هانية؟
فمها يبس مادوات ماتكلمات وقلبها بغا يسكت
رجع قال مقرب عندها و تايفليها بعينيه: نحيدو ليك هادو بعدا ياك الانسة ههه
…نصل ليها خاتم المارياج لي كان فايدها.. المگانة لي كان جاب ليها والتر.. گورميط الدهب مع الحلقات وسلسلة تتبري فعنقها ..كلشي بالمهل حيدو تايضحك هو وصاحبو لي مازال شاد عليها الموس الى دارت هاكا ولا هاكا تودع
قال: ااري هاد الساك حتا هو نشوفو شنو فيه
حلو وهز منو كاع الفلوس لي فالبزطام كانو تقريبا 2000 درهم زائد التليفون و بدا يحلو: نتوما صحاب السياحة مراافحين .. مكاين غير الزرقة على ختها نعاماس
رما ليها الكارط سيم فالساك وقال عاطيه ليها: هانتي باش متقوليش حنا ماشي ولاد الناس
ضحك وقرب حتا سلم عليها بالحناك زاد علاما بيها وهي يابسة.. بغات طيح ليه تماا وهو قال: يالله الغزال شدي ساكك وغاتزيدي گووود لداركم “كمل بتهديد” غاتلفتي هاكا ولا هاكا الخبار فراسك
دفعها لاخر حتا تفافات: رووول
كملات طريقها تترعد.. ماشافت لايمين ولا شمال طلعات لدارهم مباشرة لي كانت خاوية.. دخلات لبيتها حطات الساك وتكات فوق السرير بحوايجها ساهية لفترة.. ماعقلات على راسها حتا بداو عينيها شوية بشوية يتسدو ونعسات ….
فاقت مع الادان فاتحة عينيها على ظلام البيت
..توگضات شوية ودغيا تفكرات گاع لي وقع حاجة بحاجة ..خاطرها تقبط وجهدها گاع رشا، ناضت بزز تتجر رجليها خارجة من البيت وتتسمع السقيل تاحد مكاين ..مها مشات مع خوها وختها لعند جداتها و باها فخدمتو .. هزات الفيكس لي وسط الدار تترتب انفاسها التقييلة ودوزات نمرة الفيكس ديال دار جداتها.. تواني فقط و جاوباتها منو مها
حكيمة: ااالو
ردت بصوت مرعود مازال مابغا يتسرح: ماما.. اجيو دابة للدار
ردت بخوف: بسم الله.. خبار الخير ياك لاباس ابنتي
طلعات النفس وقالت: تعرضو ليا الشفارة
ضربات فخدها مصدوومة: اويلي.. ااويلي فينك شداارو لك…يااكما ضربووووك ولا خسروو لك وجهاااك ف….
قاطعاتها مزيرة عينيها ومحاملة تسمع حتااشي صداع: مابيا والو امااما رجوع الله علاه منين تانعيط ليك دابة؟ انا فالدار و بيخير شفروني وزادو.. رجعو عافاك دابة وعلمي معاك بابا
ردت تاتفتف: بااك.. ا ايه وااخا
قطعات وبركات وسط الضلام فاشلة، حاطة راسها على ايديها وعينيها مغمضاهم.. فاتو دقائق عاد سمعات السوارت فالباب ونت
اضت بلا كلمة بلا جوج هزات سبرديلتها تتلبسها فحين حكيمة وسي لمكي وقفو تايسولو ويستفسرو.. وهي تتجاوب بصوت خاافت وتنهيداتها كتيرة
لمكي: الحمد لله لي مادارو لك والو ربي لطف
علياء: الحمد لله “ناضت خارجين جميع” واخا داو كلشي
حكيمة تابعاهم عاضة صبعها وتتحصر: الله على الفليساات الله دمرتي عليهم ودااوهم بااردين ..يااااك ابنتي تانقوولك ماتخرجيش معااك قوة الفلووس تانقوولك دي لي تحتاجي وصاافي.. ولكن متتسمعيلييش متتسمعيلييش
تنهدات: المكتااب اماما
لمكي: اهنينا ياهاد المراا
أوس: الوليد انا جاي معااكم
طلعو معاه فالطاكسي شادين الطريق للكوميسارية نيشان.. دخلات تابعينها ومكحلة بالعمى محاملاش توصل لهاد الماصل وحتا الكوميسير لي تايستجوبها كمل لي خاص وعرفاتو تايقلب عليها ضور معاه
الكوميسير: مممم.. عاودي وصفي ليا كيفاش دايرين ؟
زيرات عينيها بقلة صبر: راه وصفتهم ليك كتر من مرة
خنزر فيها: ايااه واا السموحات اختي لاديهاشااي منا قلة الصواب ..واش باغة نلقاوهم ولا؟ واهضري هادو كيف دايرين
ردات ليه التخنزيرة وهزات ساكها: دايرين كي خليقتك سبحاان الله شفتك وهوما يجيو فباالي
خرجاات مرعوودة بالاعصاب وتتسمع أوس مشاد معاه ولمكي تايفك.. كانو فديكلاراصيو ولاو فالدبازات وكل شوية يقول هاهوما غايهبطوه حتا جرو بالنترة مخرجو من تما
..ركبو مع علياء راجعين للدار وتايحاولو يبردو عليها بالهضرة وهي والو واش بغات تسرط ليها الشمتة.. رجعات السينتة لكلامهم وعرفاتهم كانو شادين عليها العسة مادام عرفوها خدامة فالسياحة ادا مدة وهوما مراقبينها حتا جابتها الوجيبة ودارو شرع ايديهم …
دازت ليلتها كلها تخمام في تخمام حتا صبح الصباح وناضت بزز عينيها مبوقين ووجهها مخطوف منو اللون
..دوشات ولبسات تيشورت بيض دخلاتو فجوب سوداء حد الركبة مع الطالون ..هزات ساكها حلاتو بعفوية على ود التليفون هي تفكر راه مشا وزيرات عينيها بحصرة حاسة الدموع غايتعصرو منهم وخرجات بمورال طاايح غادة للرياض.. مع جميع الظروف خدمتها أول حاجة وأهم حاجة
دخلات للكوزينة نيشان بركات طالبة منهم يحضرو ليها الفطور ودخل عندها والتر.. شافها ماهزاتش فيه حتا العين ووجهها صفر مهموم.. الشي لي خلاه يبرك حداها بخوف وقال
والتر: علياء مالك
ردت ببحة خافتة: والو
والتر: لا حالك معاجبنيش قولي شنو واقع
ردت بصوت مزير: تشفرت البارح
تصدم وقال: شنو.. شنو داو ليك !؟؟
ردت متتشوفش فيه وتتحصر: خداو ليا دهبي ..الخاتم دمارياج ” تنفسات حابسة البكية ” وتليفوني حتا هو
زفر بأسى ودوز ايدو على ضهرها: كلشي يتعوض احبيبة..غانجيب لك تليفون جديد ودابة، حتا الخاتم غانجيب لك ماحسن منو
علياء: تفقصت تفقصت منين تسلطو علياا منين
تدكر أمر سوارت الرياض لي عندها وقال بسرعة: سوارت الرياض عندك.. ياكما داوهم؟
علياء: لا
والتر: متأكدة !؟؟
تنهدات محركة راسها وهو سكت هز تليفونو متاصل بلي يبدل ليه القفل ديال الرياض هاد الليلة نيت.. الاحتياط واجب
عاد وقف شاد ايدها وقال
والتر: تعالي سبقيني للاطيراس يضربك شوية البرد.. انا راجع
بصوت باهت قالت: واخا
ناضت معاه وقال للطباخين تما: جيبو ليها فطورها لبرا
خرج هو من الرياض خلاها باركة تايضرب فيها هواء سيدي ربي والغصة على قلبها محطوطة ..رجع جايب ليها تليفون آخر وردي اللون نوعية سامسونج
..حتا تتسمع صوت سيارة سلمان وقشعاتو نزل داير نظاظر كحلين شوميز كحلة ودجين ..تدكرات بلي كل صباح تايتاصل يفيقها وهاد اليوم حيت تليفونها مشا غايكون تشوش عليها وجا بنفسو يشوف اش واقع
.. دخل سول عليها ونعتو ليه فين باركة عاد تنهد وتم جاي لعندها تايحيد نظاظرو وملاحظش والتر لي حداها جالس
سلمان: خلعتينا عليك، مال داك التليفون طافي
شافت فيه بحزن وهو تحنا سلم عليها وباس جبهتها هو يلمح والتر تايشوف فيه عاد بسم برسمية ومد ليه ايدو
سلمان: مسيو والتر
سلم عليه وقال: اهلا سي سلمان.. امورك بيخير كيف غادي مع العمل
برك مقابل معاهم وعينيه تايمشيو ليها حاس بيها بحالا مريضة
سلمان: الحمد لله هاحنا.. ونتوما
والتر: كدالك الحمد لله
حرك راسو وشاف فيها قائل : ياك لاباس ..واقعة شي حاجة
ردت مباشرة تتنهد: البارح تلقاو ليا الشفارة ..ومشا ليا التليفون
خرجو عينيه بصدمة والخوف ركبو: كيفاش.. فين هادشي؟
علياء: فالتقوبسة لي حدا دربنا “رجفات شاداها البكية” حط ليا موس فجنبي وداو كلشي.. عرفتي رجعت بزز للدار
شاف جنبها بهول وماحس غير هو نايض مخلوع وقال بأمر: نوضي
وقفها تتمسح دموعها وصدمها ملي طلع ليها التيشورت على خصرها تايقلب جنبها ياكما ضربوها تما ولا تجرحات ووالتر كلشي على عينيه تايدوز.. معاجبو حال وساكت
سلمان: فين حطو موس “شاف فيها عاقدهم” ضربووك !؟؟
ردت بنفي تتقاد حوايجها: ماتقاسيتش بيه الحمد لله بلاما تخلع
مسح وجهو لي حمار بالاعصاب: ولاد ال***** ..ديكلاريتي ولا مازاال !؟
مسح وجهو لي حمار بالاعصاب: ولاد ال***** ..ديكلاريتي ولا مازاال !؟
للحظة حطات مقارنة وبدات فيه تتشوف.. كيفاش والتر تصرف وأول ماسول عليه هو شنو داو وفين سوارت الرياض.. عكس سلمان.. اللهفة لي شعلات فعينيه زيرات قلبها وخلاتها بلا وعي منها تحطهم فكفتي ميزان وتسها فالمقارنة بينهم ..واخا لا مقال لدالك
سلمان: علياء معاك تانتكلم
تفافات فايقة من سهوتها وبالايجاب حركات راسها: اه.. اه ديكلاريت ..
سلمان: بركي حالتك معاجبانيش “حط قدامها الما ومسح وجهو تايبرد نفسو لي فارت بالفقصة ورجع قال” واخا كلشي الحمد لله.. ملي مجاتش فالصحة ينعل بو الفلوس بلا ماتهزي فخاطرك بالعكس ربي حفظك
ببسمة خفيفة: بصح .. داكشي نيت لي قال بابا، ربي لطف
تبسم: إلى على التليفون غانجيب لك ماحسن منو الالة ونتي تختاريه
بسمات قائلة: جابو ليا والتر
“هزاتو وراتو ليه” راك عارف ضروري يكون عندي فالخدمة واحد وبسرعة ..الحمد لله بعدا مداوش ليا الكارت سيم
شاف فوالتر لي مزير ساكت بزز.. هو ينوض
سلمان: بان ليا حسن نمشي
وقفات معاه: انا جاية معاك للباب
سبقها وهي وراه حتا وصل لسيارتو وضار نيشان عنقها خاشيها فيه وهي عليه زيرات تتسمع انفاسو
سلمان: الحمد لله لي ماوقع ليك والو ..مأكدة ماقاسوكش ماتجرحتي !!! ممخبية عليا والو ياك
شافت فيه متبسمة: لا كون هاني ..سير بلاما نعطلك على خدمتك
باس رااسها تايتنهد وقال برجاء: الله يرضي عليك ردي البال لراسك ..خودي كونجي ترتاحي فيه وجهك معاجبنيش
بايجاب ردت: واخا
سلمان: بيناتنا التليفون ..تهلاي
طلع لسيارتو ومشا.. مع دخلات لقات والتر فوجهها مزير بالأعصاب لدرجة ايدو تترعد عليه.. الفلاش لي وقع قدام عينيه ماعجبوش وحتا الكلام واهتمام سلمان الواضح بيها فيضات غيرتو.. مع دالك ماتسوقاتش ميقات و بغات تفوتو لكن حبس ليها الطريق تاينفخ بحال التور
والتر: شهااادشي كنت تاانشوووف.. هاداا هو لي تتسمييه نتي مجرد صدييق مأكدة من كلامك
خنزرات فيه: ماشي الغلط دياالي إلى الناس تايهتمو لياا كتر منك اسي والتر.. زائد هاد السؤال ماشي من حقك تسولو ليا.. إلى باقي عاقل راه البارح قلت ليك الله يعاون وساليناا
قاطعها تاايغلي: على ود هااااادااا يااااك.. دااابة عاااد فهمت ماالك تقلبتي لهااااد الدرجة كاااملة ..حيت لقيتي البديييل صااافي
خرجات عينيها بغضب: لزم حدك
والتر: ولكن قاالوهاااا لياااا ..قاالو ليا المغربيااات سحارااات وكداابااات وپوتاااس مع دالك تحديت كلشي وبغيييتك مراااتي.. ماافااام.. فالاخييير تجاازيني هاكااا الخااااينة.. ومع هاااااد الق****
خرجو گاع لي فالرياض تايطلو عليهم وغواتو وصل لفين وفين لكن علياء يبسات مكانها مصدومة ..كلامو والسبان لي تايعطيها خلاو نفسيتها المتضررة تزيد تجرح وهو اعصابو خرجات على السيطرة تايدوي بلا وعي
وسط كلامو قربات للطبلة.. حطات فوقها التليفون ..من تما للباب ..من الباب لعند كاتب عمومي ..كتبات الإستقالة ديالها ومشات گيلازاتها عاد رجعات عند الكونطابل قائلة بشوية الجهد لي بقا ليها
علياء: بغيت نديميسيوني عافاك
حطاتها ليه وخرجات لدارهم نيشان على رجليها مخلية وقع الصدمة فوجهو ..
.
دخلات وناضت عندها حكيمة هازة التليفون: على السلامة ههه “كملات بهمس” شدي هضري مع خالك على ود السرقة قالك غايدوي مع شي صحابو فالبوليس
خلاتها تتهضر وطلعات سدات عليها فبيتها وبركات .. نفسيتها مكسورة وزادو احدات اليوم كسروها ..تأزمات ديال بصح مابقات لاتتخرج والا تادرج والنعمة ماقدرات تاكلها..
فات داك اليوم وعند السرجم ديال بيتها صبحات جالسة قبلما يدخل عندها خوها وقال
أوس: ختي.. خطيبك لتحت
غمضات عينيها ساكتة وهو لعندها دخل.. دوز ايدو على شعرها وقال: واش مريضة؟ ياكما هو لي عصبك؟
علياء: انا هابطة غير سير
رد: واخا
ناضت بوجه شاحب زادت پينوار ساتان فوق پيجامتهاا ونزلات تابعة خوها ..كانت غير مها فالدار معمرة لوالتر الطبلة وبحشمة تترحب بيه وتعاود..
عندها عزيز حيت فبالها ديما مكبر ببنتها وبيها ..سخي ومرتبة عالية وتايدخل للخاطر..
ناضت ملي شافتها هابطة وقالت
حكيمة: ههه نخليكم خود راحتك الدار دارك
والتر: ربي يخليك الالة حكيمة
خرجات جارة أوس لي تايخنزر فيه محاملوش، بحالو بحال باه..
جلسات حداه بوجه بارد وساكتة معرفها علاش مطوية
والجميل فالأمر هو ملي تايوقع خلاف أو فاش تاتسمع كلام عصبي يجرحها.. بالصدمة متتعرف مازال ماتقول.. إنسانة مهدنة تتفضل دائما الحوار والمناقشة قوة الغوات والصداع تايمرضها ومتاتعرفش تجاوب عليه..
تتبقا ساكتة وتهندس..
هاكدا شخصيتها.. من بعد فاش تتفوت ساعة الغضب والعصبية الطرف الآخر هو لي تايولي فالعيب هو لي جرح وخسر الكلام وقال لي مخاص يتقال.. هادا كلو من جهة
..ومن جهة أخرى متتعطيهش الفرصة فين يقول حتا نتي قلتي ليا وقلتي ..بل تايتدكر بلي السيدة سكتات فقط الشي لي تايخليه في ندم وحشمان من راسو ملي تايجي يطلب السماحة..
كحال والتر دابة ..معارف مايسبق والا مايوخر تقب معاها الصفاحي وحشم حتا غرق….
والتر: سمحي ليا
قالها بعد صمت طويل ودهن شارد من طرفها هي
والتر: عارف راسي مدرت فيها مايصلاح..عارف “تايحك راسو بتوتر والندم غالبو” لساني باري مني اعلياء وعصبيتي خايبة راك عارفة
ولكن من غيرتي عليك.. ماقدرتش نتحمل تصرفات داك بناادم ومن قوة الأعصاب متانعرفش مازال اش نقول
قلبات ليه عينيها ببرود: دابة عرفتي راسك اش قلتي ؟
والتر: عارف وتيقي بيا نادم بزااف.. كنعتادر منك ..وماكنت قاصد حتا حاجة من الكلام لي قلت.. الله يخليك عطيني آخر فرصة وخلينا نصلحو لي تخرب تانواعدك مغايكون الا لي نتي باغة.. وخدمتك معندها حتا علاقة بينا مستحيل نقبل الإستقالة ديالك ..خدمتك حاجة وعلاقتنا حاجة خراا
بقا على الهضرة تايبرر ويعتادر ويكرر.. وهي شي سمعاتو شي نخلاتو ومرة مرة ضور تشوف فيه وترجع تقلبهم.. وجهو ولا يبان ليها كحل.. كحل بهاد المعنى..
حتا الاحترام لي كانت تتكنو ليه قبلما يولي خطيبها مابقاش.. واخا تبغي تشوفو كيف شافتو أول يوم أو بصفة البوص ديالها ماتقدرش.. ولا كحل تنفر منو العين ويتزير منو الخاطر بسبب گاع لي دار وفالحلق واحل .. لي هي قادرة تجبدها والا دوزها
والتر: أنا تنتقاتل باش نكونو بزوج وحتا العملية لي درت سنين هادي ماخليت حتا تحليلة باش نحل الأمر.. كلو على قبلك باش مانحرمكش من الأطفال.. بلا ماظلمينا اعلياء بقرارك.. تنبغيك احبيبتي.. عارف غلطت بزاف.. سمحيليا الله يخليك
ناضت دايزة من حداه: نهارك مبروك مسيو والتر
طلعات فالدروج وخلاتو غير تايشوف.. دخلات لسطحهم جارة كرسي للضل وبركات تتشم الهوا وتلوي عنقها..
راس يديها وراس يجيبها.. ديما افكارها مقسمين على جوج شي غادي شي جاي لهادا تتفضل دائما تخلي القدر هو لي يتصرف
..كلامو جرحها وافعالو كسروها ..وافكارها زادو تخربقو ..
ممشاتش للخدمة الغد ليه.. مخرجاتش من دارهم نهائيا ودازو ايام وهي على ديك الحال.. لا تليفون لا بيسي لا يديك لا يخليك قطعات التواصل مع العالم الخارجي وولات تاتلاها بالنعاس بالتلفازة ولا فالكوزينة مع مها لي نص عقلها فالشغل والنص فالهضرة مع العائلة لي تايجيو عندها مرة مرة..
وشحال من مرة علياء تتكون دايزة حتا تتسمعهم عليها تايديو.. زعمو ومرة مرة يقولو عليها بايرة.. زعما الناس هي لي تتقول وهوما وصلوها لمها بنية حسنة.. گرانتها ولي صغر منها تزوجو ايوا وهي ايمتا؟
مها تتحمار وتزير تتجاوب ببسمة صفرة وتقول قريب قريب.. وعلياء أول مرة مكانش كلامهم يأتر.. لكن مرة بعد مرة ولات تجرح وخاطرها تزير.. عوض البركة فالدار تريحها ولات مأزماها كتر
فاتت 15 ليوم لا خروج لا دروج.. خلالها والتر سافر لسويسرا ورجع تاني لعندها هبطاتها مها بزز وعند الباب لمحات قوة الاكياس والهدايا المغلفة هالمربع المستطيل هاليمارك ديال الصبابط ديال الكساوي ديال العطور..
شافت وبرگگات حتا شبعو عينيها.. عاد دخلات لعندهم دوات معاه ببرود مفاتتش جوج دقايق وعاود ناضت..دازت على الكدوات طالعة حتال نص الدروج
دوراتها فدماغها جوج مرات وفالمرة التالتة رجعات نازلة هزات كلشي تتعافر معاه حتا مابقات تبان وطلعاتو لبيتها حاطاه على السرير وبركات تاتحل فالشكلاط أول حاجة وتميق من كل حاجة حلاتها
علياء: كادواتو ماشي بحال وجهو بعدا
..شافتو جاب تليفون وردي صغير وحلو.. ناضت على ركابيها حتال الساك.. جبدات الكارط سيم منو ورجعات لكدواتها تتحلهم وتاكل فالشكلاط وتشعل فالتليفون.. مع شعل طرطق بالميساجات ..رمات حبة شكولا ففمها تتقرا هي تصدم وعينيها توسعو
مسحات فمها بسرعة وعينيها موسعين .. لقات القليلة عشرين مكالمة فاليوم الواحد من طرف سلمان .. طول هاد لأسبوعين وهو تايعيط ويعاود كل يوم لدرجة عمرها شافت داك الكم الهائل من الاعداد فتليفونها .. أما الرسائل فلMSN خلاص ..تادوزهم وتفلي بسرعة حتا صونا فايدها ومايكون إلا هو.. تبهضات ودوزات الخط عاضة شفتها بتوتر.. تلف ليها گاع اش تقول وهو من ورا الخط تايطلع النفس ويهبطها حتا نطق
سلمان: الو
ردت بهدوء: السلام.. لاباس عليك
سلمان: في أمان الله.. نتي فالدار؟
علياء: آه ..هاد الايام مكانش عندي تليفون وعاد دابة خدمتو
سلمان::واخا.. فاش نعيط ليك هبطي لعندي
قطع وهي تبسمات ودازت للرسائل تتقراهم بدون ترتيب وعينيها مرة يغوبشو مرة يتطلقو
“فين غابرة”
“علياء واش مريضة.. علاش طافية التليفون ياك خديتي واحد جديد”
” توحشتك فين غابرة عليا”
“توحشت صوتك.. حلي التليفون غير نسمعو”
“شوفي انا قدام داركم.. حشمت ندق ويخرج ليا باك مغانعرف شنو نقوليه نزلي نشوفك غير دقيقة ورجعي”
“علياء شعلي هاد المرض فيينك دازت عشر يام ..واش مريضة.. غير طمنيني عليك بعدا”
وساعت التبسيمة فعينيها وهي تتقراهم واحد واحد واخا كانو كتار بزاف مايقدهاش نهار على قدو باش تكملهم .. اهتمامو بيها الهف قلبها ولو عارفة أن طبيعتو هاكاك دايرة.. الناس العزاز عليه تايتصرف معاهم بقلبو وبعفوية زائد أنه حنين لدرجة لا تصور ..مايمكنش يشوف شي حد محتاج ولا خاصاه ومايعاونوش.. قلبو طيب وهش بزاف وعارفا بلي عندها فقلبو معزة خاصة تتشوفها فعينيه كلما فيها شاف وتتلمسها فتصرفاتو اكتر
..صونا التليفون فايدها ناضت بسرعة ببيجامتها المخططة بالابيض والاخضر لبسات كلاكيط قادات شعرها المطلوق فالمراية ورشات من ريحتها شانيل
..عاد خرجات تاتدردب فالدروج.. قالت غاتلقاه ففم الشاريع بحال ديما لاكن هاد المرة صدمها ملي حلات الباب و لقات الطموبيل قدامها مباشرة ..
لمحها من الزاجة وخبط باب سيارتو نازل لعندها بلهفة شديدة فعينيه ..مع شافها خارجة تاضور عينيها على الجيران جرها لحظنو بسرعة وعليها زير ..بلا مايتسنا منها لاتفسير لا تبرير الشي لي خلا صدرها عليه يترخا بتعب وعيونها يتسدو مدمعين تتسمع لأنفاسو السريعة وكلامو الملهوف
سلمان: توحشتك.. توحشتك “بعدها عليه تايبوسها فكل انش فوجهها مشاعرش براسو اش كايدير وعلى لسانو غير” توحشتك بزاف.. توحشتك.. توحشتك اعلياء توحشتك
ضحكات تتبعدو والرقة فصوتها: سلمان
سلمان: توحشتك
رجع عنقها وزيرات عليه تتسرق منها الضحكة وهو حس التبسيمة مكاينة ففمو.. تهجرات ليه ديال بصح
طلقها وزاد للطموبيل طلع.. ركبات حداه وبعدو من تما حتال جنب الطريق وحبس رجع جرها معنقها عندو حتا بدات ضحك وسط ايديه وهو ساكت
علياء: غاتبقا غير تعنقني.. هادا كلو وحش فيك ههه
مجاوبش وحساتو بغا ياكلها لكن معرف منين يبدا، كلما عنقها يزيد يزير ..كلما باسها يزيد يطول، وغير تنهيداتو عاطيينها البرهان قاد ليها شعرها وقال ببسمة خفيفة
سلمان: فين غبرتي
هزات كتفها: فدارنا
سلمان: وأنا !؟
سكتات بأسى ورجعات قالت: ماشي لخاطري.. داك النهار لي مشيتي وقع فلاش خايب ماعجبنيش
زاد جمع حواجبو: شنو كاين؟
نزلات عينيها بغصة وعاودات ليه كلشي.. ضار قدامو مزير ايدو على الڤلون حتا خرجو عروقها وقال تاينفخ
سلمان: ومزال عندو الوجه لي يجي يطلب منك السماحة؟؟
علياء: فهاد المواقف عرفت عصبيتو شحال خايبة، وأنا صراحة مغانقدرش نتحمل
زير عينيه متنهد وضار شاف فيها بجدية ونرڤسة فصوتو: علياء.. غانعاود ندوي ونقولك هاد بنادم مصالحش ليك.. باغة الهضرة لي تفيدك ؟ عطيه شبر التيساع والله يعاون رااه عمرك طفريها معااه
علياء: واصافي دابة مالك تعصبتي
تنهد بحصرة: علياء شوفي راسك كيف وليتي.. غير هاد ل15 ليوم وزنك نقص وباينة فوجهك الهم.. متايباانش ليك بلي هاد بنادم غير تايمرضك فصحتك وصافي
قلبات وجهها ساكتة.. عارفة كلامو صحيح وقوة التخمام مع قلة النعاس غيروها جسديا ..لكن مباغاش تسمعها ومباغاش حتا تفكر فالأمر
سكت وراما رما ليها كلامو وزاد بالطموييل لدربهم.. ردها فحالها ومخلاها تنزل إلا بالتعناق تاني وقبلة طويلة على جبينها نطق من وراها باهتمام
سلمان: ردي البال لراسك عافاك.. آخر مرة طفي داك التليفون ولا تعتاكفي فالدار هادي ماشي ديالتك.. ماشي علياء لي تانعرف
تنهدات: يكون خير
رجع باسها: تهلاي فراسك
نزلات طالعة لدارهم وتتخمم.. جمعات الروينة فبيتها ونزلات تغدات مع عائلتها ..باها ناض لخدمتو خوها خرج مع صحابو وهي بدات تجمع فالطبلة ودخل الماعن للكوزينة تغسلهم حتا تتهبط ليها ختها تليفونها لي تايصوني وقالت
ملاك: ختي.. خطيبك تايصوني
طلعات حاجب ومسحات ايديها: اري لهنا “جاوباتو ببرود” الو وي مسيو والتر
علياء: كمشات حواجبها: شكون
رد: هاداك لي حضرنا للعيد ميلاد ديالو..وسماه لافيط بلونش
ردت بتدكر: وي وي عرفتو.. جا للمغرب؟
والتر: جا و عرض علينا نخرجو نفوجو على برا.. قلت ليه واخا مجاتش نرفض وداير بحساب انني نجيبك معايا كيفما حتا هو غايجيب حبيبتو..راك تتعرفيها حتا هي
علياء: عرض عليك نتا صديقو واخا.. انا بصفتي شكون غانجي؟
تنهد: بصفتك المرأة لي حضرات عيد ميلادو وفرحاتو بمجيئها.. ممكن دابة ؟ ..15 ليوم ونتي غابرة وحاس أنك محتاجة لهاد الخرجة باش تصفي افكارك شوية
سكتات تتفكر: ماعرفتس.. نشوف امسيو والتر ونعلمك
والتر: ضروري تجي تيقي بيا هاد الخرجة غاتحسن من نفسيتك بزاف.. تهلاي فراسك وتنبغ..
قطعات حطاتو فجيب الطابلية وكملات غسيل الماعن فنفس الوقت تاضورها فدماغها…
…
صبح الصباح.. وهي من الطاكسي نازلة بكسيوة سميطات زرقاء وتوب خفيف، مع شاپو على شعرها المجموع شفنجة مرخوفة.. سنيديلة ونظاظر على عينيها وهازة ساك دائري طويل.. حطها الطاكسي قدام پيسين la plage rouge
بيسين فخم هاي كلاس.. الدخلة فابور ولكن الكنسوماسيون غالية بلا قياس ممكن طلبي حاجة خفيفة بزاف وتقام عليك بألف درهم ألفين.. مع الدخلة الى كنتي لابسة شي سبرديلة ولا طالون تايطلبو منك تحيديه ويعطيوك هوما كلاكيط اولا تجي نتي لابساها.. وممنوع دخلي بفوطة هوما يعطيوها ليك وتكون بالللون الارونج
دخلات علياء بعيون براقة وابتسامة مشعة تاتسمع لأغاني حماسية مطلوقين من طرف الديدجي لي كاين وسط البيسين ..المنظر غزال تايفتح النفس.. إضافة للرولاكسات لي قدام البيسين كاينين خوامي بحال شكل باراسولات مغطيين سرير بخديداتو تايتكاو عليهم الناس.. رغم الاكتضااض والناس الهاي كلاس إلا أنه متواجدين فيه السواعدة بالاكترية ..تايجيو مع صحاباتهم الشي لي مخلي سمعة هاد البيسين شوية ماشي حتال لهيه
وقفات تتشوف وتقلب عليهم.. شيرات ليها تمارا حبيية سايمون وناضت تتزرب لعندها.. تسالمو وداتها لفين باركين سلمات عادي وجلسات فرولاكس جنبهم جابدة لكاش مايو ديالها.. حيدات الكسوة ملي مشاو يعومو ..لبسات كاش مايو طويل مستور فوق دو پييس باللون الوردي وبركات مسرحة بعدما طلبات عصير بارد.. هو يصوني تليفونها
علياء: الو ههه
رد حتا هو تايضحك: صباح الضحيكة ههه هانية العسيلة
علياء: هانية ونتا
سلمان: الحمد لله.. تانسمع بشلاخ بشلاخ هههه فينك
ماطات شفايفها تتشرب من عصيرها: انا اسيدي فلاپلاج غوج
بتفاجأ: ياااك المعلمة
ضحكات قائلة: ايااه ههه عرض عليا صاحب والتر وخطيبتو .. كنت مشيت حضرت لعيد الميلاد ديالو فسويسرا دابة تاني عرض عليا ..قلت علاش لا
بضحكة: مزيان الالة.. فوجي مع راسك وبدلي الجو.. لكن فيغ اطونسيو راك عارفة سمعة ديك البلاصة كيفاش دايرة
علياء: لا لا متخافش اصلا مجموعين كاملين مكاينش لي يتبسل عليا
سلمان: واخا العسيلة.. تهلاي
علياء: بسلامة
قطعات وناضت .. حيدات نظاظرها غادة لجهة الپيسين وترمات فالما بحال الحوتة بكاش مايو ديالها .. عامت وتبردات وتراشقات بالما هي وتمارا حبيبة سايمون لي عرض عليها ..قالبينها ضحك فضحك وعزيزة عليها بزاف، عياو ورجعو لبلايصهم مجموعين.. تايهضرو ويضحكو ووالتر قاطعة عليه الكلام وباش تتفادا الاحراج مرة دير راسها مسامعاهش مرة تجاوب ببرود وتميك
طلبو لي گلاص وعلياء متكية حاطة نظاظرها على عينيها وبشرتها مع الشميشة وليكخون لي دهنات رجعات تتبري.. حتا فجأة توگضات وطلعات النظاظر بتركيز تتشوف وتعاود
كان سلمان لي جاي قاصدهم بابتسامتو الجدابة.. عريان لابس شورط ارونج فقط مع كلاكيطا هاڤاناس كحلة فيها سميطة فالجناب فالارونج ..محطوطة على كتفو فوطة فالارونج كدالك مع كاسكيط فراسو ونظاظر كحلين على عينيه ..لاحظات مرونة و طولة جسدو واخا ملي كاتوقف فجنبو حدها توصل لكتافو فقط .. كتافو عراض تقيل ووازن واخا ممعضلش تابت فالوقفة وجسدو متير
.وقف عليهم قالب الكاسكيط وايديه فجيابو بضحيكة زوينة
نطق بالانجليزية: اهليين اهليين ههه نتوما هناا
طلعو عينيهم فيه من غير علياء لي أصلا شافتو وبالصدمة بدات ضحك ..والتر غير شافو ومع هو زعر وبشرتو بيضاء رجع حمر حمر حمر كتر من الماطيشة ..سلمان دوز عليه عينيه ببرود ماتسوقش ليه بل غمز علياء وقال تايضحك
سلمان: صدفة زوينة انني نشوفكم هنا.. هاي انا سلمان
مد ايدو لسايمون وهو سلم عليه ببسمة وقال: بونجوغ انا سايمون
سلمان؛ مشرفين
سلم على البنت وطلع ايدو للسيرڤور تايشير ليه يجيب رولاكس لحداهم
سلمان: الحرارة اففف هههه شنو ماتعرضوش عليا نجي حداكم
حطو ليه رولاكس حدا علياء برك وقال سايمون تايضحك
سايمون: مرحبا اكيد.. صديق علياء هو صديقنا
سلمان: ميغسي هههه “نغز علياء لي باقا تتشوف فيه وقال تايطنز” ماتعرضيش عليا نتي
علياء: هههه لا حيت معلمتينيش جااي “تسوخرات حداه تاضحك فرحانة حيت جا”
سلمان: اري غير دوقيني بعدا
عطاتو معلقة من الگلاص كلا من ايديها شوية وشير للسيرڤور.. طلب كوكتيل ورجع حداها تكا كايتبرونزا
علياء: اش جابك اسي الزهواني ..ياك خليتك خدام
حيد الكاسكيط تايتسرح: غير صدفة وصافي
دفعاتو من الكتف: صدفة وانا عاد قطعت معاك وقلت ليك كاينة هنا
رد بتعجب مزيف: بصح واايلي ..مايسحابلييش هههه
علياء: باز لوجهك هههه
شدات الگلاص ديالها وهو خدا كوكتيل فايدو ..مرة مرة تايسرق من كاسها بالضحك حتا تاتدفعو عليها.. مرة يدرعها بتعنيقة ويبوس حناكها بضحكة جميلة على شفايفو وحتا هي تتاخد راحتها على كتفو العاري.. ..مرة يجبد ليها شي موضوع ويقلبوها ضحك ..مرة يتكا على رجليها وايدها على شعرو ..ومرة يهمس فودنها حتا تاطرطق بالضحك والأغلبية فيهم تايشوف ..كلو تحت عينين والتر وسلمان عارف.. رغم دالك تايتصرف معاها كيف بغا ممسوق لحد.. وهي تاتشوف معزتها الكبيرة فعينيه.. تتحسها فتعنيقتو ليها فكلامو معاها ..لكن مع حساتو تايديرها بلعاني وعينيه تايشوفو لوالتر كل مرة ضارت ليه حالة فمها ..ضرباتو للكتف وقالت عايقة بيه
علياء: يالشلااهبي علاش تتقلب على العافية هههه
شد كتفو تايتبوحط: اححح حشوومة عليك.. اش درت أنا
علياء: اش درتي؟ ! مسكييين وانا تانقول مالو كل مرة يوشوش ليا فودني
سلمان: الضرافات أنا والله ههه
جرها عنقها وحط كاسكيط على راسها بعدما باسها منو
سلمان: غاتشوطي العسيلة ماشي غاتبرونزاي
ببسمة رداتها ليه لراسو: جبت شاپو معايا غير خود الكاسكيط ديالك
سلمان: لا لا خليها “طلع فيها بإعجاب” جات معاك كتر مني
والتر: علياء
طلعو عينيهم فيه لقاوه واقف قدامهم مباشرة معاجبو حال.. زير عليها سلمان من خصرها متبت فيه الشوفة وهي قالت
علياء: وي مسيو والتر
بغضب تايخنزر: اجي نتكلم معاك
مشا وسلمان متبعو بعينو: هاد خينا ولا حمر بحالا شابعين فيه سليط
حمرات فيه الشوفة: سلمان حشومة
سلمان: هاهو سلمان نايض
مشات هي تابعة والتر وهو ناض لفين واقفة تمارا وسايمون شادين مشروباتهم.. تلفتو عندو وبدا يدي ويجيب معاهم فالكلام دغيا دار بلاصتو.. إنسان اجتماعي عزيز عليه الضحك والنشاط وفينما مشا خالقها
ربعات علياء ايديها بهدوء وقالت: نعام ..هاأنا
والتر: نتي لي عرضتي عليه؟
ردت ببرود: شكون تتقصد
تحت سنانو نطق: هاداك لي غير لاسق حداك
علياء: هاداك عندو اسمو امسيو والتر أولى؟
والتر: علياء راني اصلا معصب بلاما تزيدي عليا عافاك.. واش نتي لي عرضتي عليه!!؟
علياء: لا.. كون جيت بوحدي كنت نعرض عليه عادي
نفخ كاتم غضبو وقال: واخا.. ماعليش دابة يالله نتغداو.. سايمون عرض علينا للپيسين وانا غانعرض عليكم للغدا “هز ايدو بحدر” ولكن صديقك لا.. غير مرحب بيه معانا نهائيا
طلعات حاجبها وصوت الضحك ديال سايمون وتمارا تايتسمع حتال عندهم ..زاد والتر خنزر تايشوف كيفاش تايضحكو مجموعين ونطق بحروف خارجة منهم النار
والتر: هادا مالو غير تايتلصق
ردت ببسمة هادئة: هو هاكا فينما مشا تايدير بلاصتو.. والبلاصة لي ممرحبش فيها بصديقي حتا انا ماعندي ماندير فيها.. زائد أنه سلمان من الأصل ممحتاجش لعراضتك اسي والتر لو بغا هو كان غايشري هاد الپيسين بلي فيه ..ماشي تايسعاك
رد مزير على فمو: شوفتو تتعصبني اعلياء
هزات كتفها قبلما تمشي: ادا هادا شغلك نتا
خلاتو وتوجهات لعندهم.. حبسو الضحك فورما شافوها جاية وبداو يتغامزو بيناتهم .. سايمون مزير فمو وتمارا حاطة ايدها على فمها حابسة الضحكة فحين سلمان تايشرب من العصير ديالها ببرود ويرمش زعما تايتمنضر فالاجواء.. حسات بلي شي حاجة تما وقالت بضحكة
علياء: مالكم ههه
سلمان: والو “مد ليها كاسها” هاكي العسيلة
تمارا بعدم فهم: عسيلة؟
جاوبها وعينيه ضاحكين: كلمة مغربية ..تتقال للناس الحلوين بزاف
تمارا: اووه يعني لي زوين تانقولوها ليه
رد تايتبسم لعلياء: لا لا هادي خاصة غير بالعسيلة تمراكش
غمزها تاضحكات وبدات تلاها مع عصيرها وتشوف حواليها.. شوية ماحسات بيه إلا وهو هازها للبيسين مع غوتات مع رماها فالما وبداو يضحكو كاملين ..ترماو وراها واحد واحد سلمان بعدو سايمون وتمارا وراهم طلعات راسها تتشهق وتقلب عليه
علياء: إلى ماااقجيييتك اليوووم ..سلماااااان
عنقها تايضحك من اللور وحاكمها لاضربو: العسيييلة تسلمااان ههههه
نترات منو باغة تغرقو وهو ميت بالضحك: والله لابقات فييييك.. غيييير وقف
عامو .. ضحكو ولعبو واستمتعو تحت الما مبردين عليهم حرارة الجو بسبب شميشة مراكش الحارقة ..
طلعو تايقطرو بالما والشميشة ضاربة فيهم.. هز سلمان فوطة مدها لعلياء خداتها و جلسات مكانها تتمايل كتفها مع الموسيقى وتنشف شعرها .. ناض والتر بنرڤسة طالع ليه الدم وقال موجه كلامو لسايمون
والتر: سايمون يالله نمشيو طولنا
ردت تمارا ميلة شفايفها بحزن: نو والتر باقي شوية
سايمون: مازال الحال اصاحبي.. بلاتي غير نتغداو بعدا
نفخ من نيوفو وقال: لا من الأفضل نمشيو الجو تبدل وخسر.. نيت عندنا شي خدمة نقضيوها
ناض بتأييد: اوكي اسيدي لي بان ليك
ناضو جميع ووقف سلمان مع علياء دوز على كتافها الفوطة ونطق
سلمان: عنداك تبردي
علياء: لا عادي
سلمان: غانوصلك أنا صافي
علياء: واخا
جمعو مسائلهم خارجين.. حتا وصلو للباب ووقفهم سايمون بكلامو: بلاتي قبلما تمشيو هههه.. ليوم أنا عارض عليكم مرة أخرى نتعشاو على برا “شاف فسلمان لي حال الكوفر وتايهز منو مايلبس” وغانكون فرحان كتر إلى جا حتا مسيو سلمان ههه
سلمان شاف فيه وتبسم: اها مرحبا
نطقات علياء بأسف: انا منظنش نقدر نجي غير عفيوني ..وشكرا بزاف على هاد العراضة اسايمون داز نهار زوين بزاف
سايمون: غانفرح كتر إلى جيتي اعلياء السهرة غاتحلا بوجودك
تمارا: وي طبعا ههه بليز تعالي واخا غير شوية
تنهدات: مانواعدكم بوالو ولكن نحاول ..بسلامة عليكم
طلعات مع سلمان وهوما كملو طريقهم.. ديمارا متاجه لدارها وقال فالطريق
سلمان: واش مغاتجيش بصح؟
كسلات كتافها بتعب: باغا غير ننعس هاد الساعة مافيا لي يخرج
سلمان: ارتاحي مع راسك مازال الحال للعشية.. حتا تفيقي على راحتك واجي معانا
ردت باستهزاء: هه عرفتي شناهية يعرضك واحد بحال سايمون.. باينة المطعم غايكون شي حاجة ولي تما كيف غايكونو.. يعني خاصني حمام خاصني صالون خاصني شوبينگ.. حنا العيالات توجادنا ماشي بحالكم تتفيق تغسل وجهك تلبس وترش الريحة وهاانتا ساليتي
ضحك وقرسها من نيفها: زوينة فكل حالاتك ماتحتاجيش داكشي
علياء: مممم
سلمان: ههه إلى ممشيتيش مغانمشيش.. وتعالي عافاك
تنهدات وشافت فيه مطولة عاد قالت: واخا اسيدي
حبس عند راس دربهم سلم عليها وقال: تهلاي فراسك..العشية نلقاك واجدة
علياء: ههه اوك بسلامة
نزلات طالعة لدارهم.. دوشات و بدلات عليها عاد هبطات تغدا حاسة كرشها تتغرغر بالجوع.. دمقات شوية ودماغها تايبلاني ويخطط.. باش تبدا وشنو تقاد أولا؟ الخروج مع الناس البورجوا خاصو ماهي وما لونها نهار على قدو ومتايكفيش عاساك نصو.. غسلات سنانها لبسات كسيوة خفيفة وخرجات متوجهة للصالون لي ولفة ضور فيه بحالتها.. تتشوف فالساعة وتنفخ
مطعم لوزين بمراكش.. مطعم الناس الالبة والبورجوا.. سبعة النجوم ومايدخل ليه إلا من انت ومن والدك.. الموسيقى الهادئة والأجواء الدافئة والرومانسية الوردية.. ناس بخ بخ بخ (على قولة علياء) ..دوي بشوية وكول بشوية وتمشا بشوية وتحرك بشوية.. كلشي خفيف ظريف وبالقياس.. لكن فينما حطيتي علياء تحط.. هبطتيها للنيفو ديال الناس الضعفاء التغماس فالماكلة والهيلالا فالكلام العفوية في الحديت والتصرفات ..تحط.. تصرف كيفهم وتعيش مع اجواءهم حتا تحس بيها منهم
طلعتيها مع الطبقة المخملية.. تحط.. تاكل بريوس صباعها تهضر من طرف لسانها ومادوي إلا متل الأميرات…
.
توقفات قدام المطعم سيارة سلمان.. كانو ناويين يجيو فطرونسپور مجموعين لكن سلمان اقتارح يوصلهم جميع .. سايمون بارك حداه والللور باركة تمارا مع علياء ووالتر.. نزل وبداو ينزلو مجموعين.. لابس قميجة بيضاء توب حريري ..سروال اسود على فصالتو وفيسط عاد لبسها فاش هبط.. معندووش بزاف مع لي گغافاط تايفضل يخلي الصدايف محلولة ..شعرو خفيف حسانة وحدة واللحية مكايناش الشي لي تايزيد يخليه يشبه فالستار سلمان خان..
والتر وسايمون نفس الشيء لابسين الرسمي.. تمارا ضاربة كسوة حد نص فخضها تتبري باللون الفضي وعندها ايد وحدة الأخرى عارية.. مع مكياج صارخ وطالون عالي..
نزلات الأميرة بعدها وديل فستانها الاسود وراها.. وشحال لاق بيها الاسود..
توب ساتان على شكل قلب فصدرها ومن الضهر.. سميطات عراض فضيين وعلى الخصر ضاير حزام فضي.. قصير من الامام ومن الوراء طويل مجرور..
بوكلات شعرها خصلة خصلة حتا طلع تايبري ويقول ماحلاني.. مكياج بارد من غير احمر شفاه كرزي اللون برز شكل شفاهها الحلوة وتجبيدة الايلاينر فعيونها العسلية.. الضفيرات قاداتهم مسبغين فالاحمر وتايبانو حتا من الطالون حمرين ..بعدما ضارت بالحالة فالصالون ورجعات تتبري لي شافها يدوخ ولي مشافها ريحتها كافيو دوخو..
مد ليها سلمان دراعو تحت نظرات الإعجاب فعينيه ولخرين وراهم.. رمش وقرب لودنها قائل
سلمان: جيتي قرطاسة.. قلتها ولا مازال
بصوتها الناعم نطقات مبسمة: هادي رابع مرة
سلمان: نوصل لعشرة عرفي راك تلفتيني على القبلة
علياء: ههههه
فالدخلة عطاهم سايمون الأسماء قرب سيرڤور بأدب غادي بيهم لمكانهم.. كانت العراضة متتشملهمش هوما فقط.. إنما عارض على اربعة مازال وكانو تايتسناوهم.. جوج صحابو سويسريين.. والتالت مغربي مقيم بسويسرا وزوجتو سويسرية ..تعارفو بالقياس تسالمو بالقياس والبريستيج وجلسو فأماكنهم بهدوء.. على طاولة مليئة بالمشروبات كحولية وغير كحولية ..هزات كأس من العصير وسلمان كدالك رمشات فيه بعدما ارتاشفات من كاسها وقربات عندو قائلة
علياء: هي ديك المرة كنتي داوي بصح؟ ماتاشربش؟
ضحك وقال بهدوء: مولف نكدب عليك
علياء: ههه لا
سلمان: الحمد لله ملسقاتش فيا بليتو ايام التبرهيش ..اما دابة معندي ماندير بيه.. لا هو لا الگارو
علياء: أحسن
والتر: علياء
ضارت لعندو حيت حتا هو كان جالس جنبها.. سلمان على اليسار وهو على اليمين حداه واحد من الاصدقاء السويسريين والبقية امامهم جالسين
علياء: ؟شنو
تنهد وقرب تايتكلم بصوت منخفض: خلينا غدا نفطرو مجموعين.. نقادو امورنا ونصلحو لي خاص يتصلح
شافت راسها غاتبدا تدي وتجيب معاه فموضوع معصبها أصلا وقالت: ماشي وقتو اوالتر
والتر: وايمتا وقتو؟ فاش مايكونش هاداك لاسق فيك؟
نطق سايمون مقاطع شنو كانت غاتقول: اشنو تتوشوشو تما
علياء: هههه والو
تمارا::علياء جيتي وااو ..يورك دائما تايتكلم على أناقتك فالملابس وجات الفرصة أنني نشوفها ههه
قادات شعرها ببسمة حلوة: ميغسي.. لكن مانكونش فحالك هههه
تطلقات معزوفة هادئة وجميلة للرقص.. مع حطات كاسها تمدات قدامها يد والتر وسلمان وقالو بصوت واحد
…: ترقصي معايا
رمشات من الموقف بل شداتها الضحكة وكاع لي فالطبلة ضحك.. ناض سايمون سرق ايدها نوضها معاه وقال
سايمون: غااتنوض معايا انا ههه خليهم يرقصو مع بعضهم ههههه
تبعاتو وضارت تتضحك شافت جهة سلمان لي لعبها صح ومد ايدو لتامارا.. خداتها بفرح وبداو يرقصو جميع وليكوپل فالمطعم ناضو.. بعد لحظات مد لسايمون حبيبتو.. وخدا يد علياء لعندو قائل
سلمان: شديتك
ردت تاضحك: ههه باز
صغر عينيه: اجي قلت ليك جيتي قرطاسة ولا مازال؟
علياء: خامس مرة
سلمان: هاكاك كملي الحساب ههه
طلعات راسها تتضحك بصوت عالي وعيون من في الطاولة عليهم.. خصوصا والتر.. تتحس بالنار فنظراتو ومكرهش يغززهم بسنانو.. طول السهرة معاود تلفتات ليه كلامها مع سلمان ومرة مرة تاتشوفو غمز شي وحدة.. كونماا الپريستيج واللباقة لي بانت فتصرفاتو لهاد الليلة كون ناض يجيب النمرة وعلياء تتموت عليه بالضحك
علياء: مسكين محن ههه
غمزها وعينيه على الزعرة اللي فالطبلة قبالتو: نوضي عاوني خوك.. شوفي مسكينة كيفاش تتشوف فيا غاتبات بلا نعاس إلى مقلت ليها تصبحي على خير
غوبشاات وضرباتو لرجلو بالضحك حتا كان غايقفز: هي فاش تتبغي تنعس تتمسي عليهم كاملين وانا منهم الزهوااني ياك
سلمان: واقلة صبعي الصغير تهرس؟ هاد الطالون لابساه على دو تفرشخيني بيه ياك
تحت سنانها: سلماان
ضحك وقال تايطنز: لا لا نتي النمبر وان.. تانبدا بنمرتك هي اللولة عاد نكمل الحساب
بسمات ليه: عندك الزهر قدامي الناس أما نعطيك دقة تلفك على الحساب
سلمان: بهاد ليديدات “رجعات عطاتو لرجلو بطالونها” اححح رصااي غير تانضحك هههه
دفعات ليه ايدو وتتفلت ليها الضحكة: حيد عليا هههه
خلص ياسمون لي عليه وقال تايسد الفيسط ديالو: الوغ نمشيو
رد والتر بانزعاج: وي أفضل
ناضو مجموعين.. كانت فاتت الحضاش ديال الليل والجو برد.. خرجو من المطعم هو يسمطها البرد كونماا الڤيسط ديال سلمان لي حط على كتافها كون مرضات.. حل ليها الباب طلعو ووصلهم للرياض أولا.. وقبلما ينزل والتر قال
والتر: علياء اجي بغيتك
ميقات تاتنفخ ونزلات لعندو بعدما سايمون وتمارا طلعو لغرفهم
علياء: نعم امسيو والتر
والتر: غدا جاي گرووپ مهم من سويسرا وغاينزلو عندنا فالرياض..
قاطعاتو: عارفة.. صونيت هاد الصباح على الريسيپسيو وعرفت لي كاين غير كون هاني ..الطرونسپور واجد وغانجيبهم بنفسي من المطار.. حتا الپروگرام ديالههم موجود
حرك راسو وعينيه على سلمان لي تايتسناها.. خايفها طلع معاه ويمشيو يكملو القصارة فجهة أخرى واقرف الأفكار تتجي فبالو
والتر: مزيان.. ادا باتي هاد الليلة فلاشومبر ديالك بلاما تمشي وتجي والوقت اصلا معطل
ردت: لا امسيو مكاين باس مولفة
والتر: لا دخلي باتي افضل باينة فيك عيانة
علياء: بالعكس معياناش.. تصبح على خير
مشات ركبات. خلاو وراهم غير العجاج وهو تايشوف ومقادر يدير والو …
الرياض تحط فالبيع.. و سيدة گاورية كبيرة فالعمر هي لي نوات تشريه ومازال تتفاهم مع والتر على التمن المناسب ليهم بزوج.. الشراء غايكون للرياض والعاملين كدالك لي من بينهم علياء، لهادا استأنفات عملها بشكل عادي بعدما والتر رفض الإستقالة ديالها وقالت تصبر دوك الأيام لي غايكون فيهم فالرياض لأنه هاكدا أو هاكدا هو غايخرج مغايبقاش المالك و غاتخدم مع بوص آخر من غيرو..
حياتها مستمرة بخطوات بطيئة.. متتزرب متترجع اللور مخلية الامور للقدر والكلمة للمكتاب.. التواصل مع سلمان كما هو.. لقاءاتو كانت مفرقة مرة معاها مرة مع مروى وقليل فين تايجمعهم مكان واحد بتلاتة وصدفة فقط لانها ولات رافضة تتلاقا بيه وهي كاينة ولو يبقا يحكر عليها
..خدات الپيرمي وفرحات بيه.. ..ووصل اليوم لي غايكون فيه عرس وحدة من عائلة صديقة جداتها.. وكيف جميع الاعراس ولفات تمشي مع ماماها ضروري وحاولات ماأمكم تخصص وقت لهاد اليوم ..مشات للسپا اعتانات بجسدها من الأعلى للأسفل.. الخدمة حاولات تكلف بيها غير من التليفون كل مرة تتاصل وتشوف المستجدات تسول وتعطي فالتعليمات ووالتر مع دالك طلبها تمشي لعندو قصد يدوي معاها على موضوع مهم متعلق بالخدمة .. خرجات من الحمام تاتضوي لبسات وتقادات بكسيوة مفرقة على شكل جوج قطع جوب واسعة مع تيشورت ديالها منفوش من الكمام باللون الأزرق.. خدات رونديڤو عند الكوافورة باش العشية دوز عندها تقاد الميكاب والشعر وتلبس تكشيطتها تما نيت عاد تمشي مباشرة للعرس.. تمشات على رجليها للرياض دخلات للريسيپسيو وقالت باستفسار
علياء: مسيو والتر فالبيرو ؟
ردت البنت: آه امدموزيل وقال إلى وصلتي لحقي عليه.. نجيب لك قهوتك؟
علياء: لا اصلا جاية غير خمسة الدقايق نشوفو اش بغا ونعاود نخرج.. ياك كلشي هو هاداك!
ردت: كوني هانية امدموزيل
علياء: برافو ..لي كانت علميني
خلاتها وطلعات للبيرو.. دقات حتا ادن ليها تدخل ودخلات.. رجعات تتصرف برسمية كيف الأول الخدمة خدمة وغير الخدمة مكاين والو
والتر: تفضلي اعلياء
حطات ساكها وقالت بهدوء: هاأنا قلتي بغيتيني
والتر: بغيتك فواحد الخدمة خارج الرياض ومكاين لي غايعاونني فيها قدك نتي
علياء: لي هي؟
والتر: شريت دار ممجهز فيها والو وبغيت نقادها.. نتي عارفة معنديش مع هادشي تاع الديكور فابغيتك نتي تكلفي ليا بيها
ردت بهدوء وتقة: اها علاش لا.. ولكن خلاصي اطابل امسيو والتر
طلع حواجبو بتفاجأ وهي بجدية تتكلم: ومن ايمتا وليتي تتحاسبي معايا على هاد الأمور
علياء: هادي ماشي خدمتي امسيو والتر انا جيروم فقط.. وعلى هاد الخدمة تانتخلص كانت حاجة خرا مرحبا ماقلتش لا ولكن بخلاصي أكيد
والتر: هاديك الدار غاتكون دارك حتا نتي ماشي غير أنا ..شكون غايعيش فيها من غيرك
كملات ببرود مطلعة حاجب: هه أنا داري ساكنة فيها الحمد لله ..كنتي تتقصد حاجة أخرى لي مافراسيش، الله أعلم.. زائد الخدمة خدمة.. مابغيتيش تخلصني ماعليش، عندي كاغط ڤيزيت ديال مهندسة ديكور هي تفيدك اكتر مني
تنهد وقال مزير فمو: واخا.. شحال هاد الخلاص الالة
علياء: دابة دويتي.. الوغ “هزات ساكها” غانخليك تسول على مهندسة الديكور شحال غاطلع ليك.. وغاندير ليك خصم 25% ..ديك الساعة بينااتنا التليفون
تنهد محرك راسو ومابقا ليه مايتقال: ماقلتي عيب
ببسمة خرجات من الرياض تاتلبس نظاظها على الشمش.. خرجات تليفونها معيطة لسلمان كيف جاوب قالت
علياء: افين شادها
رد عليهاا: أنا فكيشمارا الزين تمراكش تانتقهوا مع راسي ..غادة للعرس ولا باقي
علياء: لا حتال العشية.. غانجي نشرب معاك قهيوة ونطلع نقاد راسي
ضحك: دوزي الالة انا كانتسناك
علياء: بلاتي معاك مروى !؟
زفر وجاوبها بشيء من الحدة: كاين بوحدي هاد الساعة
علياء: دابا عاد غاندوز ههه.. باي
قطعات مكملة على رجليها ودخلات للكافي تتقلب عليه.. كان جالس لداخل هاز تليفونو .. وقفات عليه عاد رد البال وناض ببسمة سلم عليها وجر ليها كرسي حداه
حط ليهم السيرڤور طلبيتهم خدا قهوتو تايحرك فيها وقال بعدما عاودات ليه كلشي
سلمان: ونتي شنو ناوية ديري؟ غاتخدمي معاها
ردت بهدوء: ماعندي علاش نخلي خدمتي.. لي كان عندي معاه مشكل غايخرج فحالو ومغاتولي رابطة بيناتنا حتا علاقة !
سلمان: بعدا غاتهناي منو.. وشوية بشوية حتا يفهم راسو واخا كون سعفتيتي عاودي كتبي استقالتك وخلي ليهم الزمر كامل.. بانليا السيد غايبقا لاسقك حتا تولي واحلة بحالي
علياء: وفين غانلقا بحال هاد الخدمة بهاد التمن؟.. على الأقل مانخرج منها حتا نكون ضبرت ماشي نبرك فالدار
سلمان: لي بان ليك “صونا تليفونو وجاوب” الو وي.. فكيشمارا ..علاش؟
نطقات بهمس: واش مروى؟
سلمان: هممم.. باي
قطع وقالت: مروى هادي؟
رد ببرود: قالت هاهي جاية “هزات ساكها وشدها” بركي عاد وصلتي وعندي مانقولك
ردت برفض خايفة من المشاكل: لا لا اخويا بلاش ..قول دابة اش عندك دغيا
نطق بعد مدة: بعد غدا مسافر
علياء: لخدمة ؟
حرك راسو: سي غانمشي للأوروپ.. فرانسا ألمانيا اسپانيا وزيد وزيد ..مهم واحد الدورة تما وغانتعطل شوية.. راك عارفة الاجتماعات ديال لي زاجونص تياخدو وقت
ببسمة أسى ردت: فهمت.. الله يديه على خير “قربات عنقاتو وعليها زير” وأكيد غانشوفك قبلما تمشي
رد تايضحك: نتي لي غاتوصليني للمطار گالاگ الله يديك على خير
علياء: هههه اسيدي نديك علاش لا
مروى: السلام
ماحسو إلا وهي واقفة عليهم بغات علياء تنوض وشد ايدها مزيرها وقال ببرود
سلمان: وعليكم السلام
بركات تتشوف فعلياء بشرانية من الفوق للتحت وقال عاضة سنانها وتتحرك رجلها بسرعة: عاش من شافك.. مانسحابكش هنا
ردت عليها ببسمة خفيفة وهادئة بحال ملامحها وحركاتها.. العكس كليا بالنسبة لمروى
علياء: شنو خبارك امروى صاڤا؟
مروى: بييخير
علياء: ايوا الحمد لله.. الله يدومها
خنزرات فيها : كنتي غادة فحالك لا؟
بغات تجاوبها ونطق سلمان: لا كانت غاتبقا معايا.. مازال مساخي بيها
حمراات فيه علياء يسكت ومروى وجها تزير مارضاتش وقالت: هاكدا فوجهي تتقولها
رد ببرود: إلى جيت نحسب شحال من مرة قلتها لك فوجهك مغانساليوش امروى
ناضت علياء: انا خارجة
رد ببرود: إلى جيت نحسب شحال من مرة قلتها لك فوجهك مغانساليوش امروى
ناضت علياء: انا خارجة
عطاها سوارت السيارة: تسنايني فالطموبيل “بغات ترفض وقال بصرامة” ولا غانوض ونخرجو بزوج
خدات السوارت ركبات اللور تتسناه حيت شاكة بلي غاتركب معاهم وتتفضل تخلي ليها القدام.. ايدها على جبهتها وتتسمع دبازهم وسط الكافي.. شوية شافتو خارج واحد تاني.. معصب للافان وهي وراه تتبكي وترعد.. ركب خابط الباب وركبات حداه ديمارا بسرعة عاد قال مخنزر
سلمان: هضري فين نوصلك
ردت مزيرة سنانها وعينيها حمرين كتر منو: علاه نتا فين غادي بالسلامة
غوت حتا قفز علياء اما حتا مروى مهمهاش الأمر: فينما قالها ليا ** غانمشي.. نتشاور معااك متلاااا
خرجات فيه عينيها وعلياء قلبات عينيها للزاجة عارفة الكومبا غاتنوض عاود
مروى: اااه معلوووم تشاااورني.. علاااش تتعامل معايااا هاكدااا علاش
سلمان: وكيفاش بالسلامة غانتعاامل معاااك.. شكووون نتي اااصلا امروى قلتها مامرة ماجوج ماااعشرة.. نتي بالنسبة ليا واالو حتا إلى جيت نعتابرك شي حاجة غاتكوني صديقة بحاالك بحال گاع الاصدقاء لي عندي سي نن عمرك.. عمرك توقعي مني شي حاجة إلا لاااكاانت شفقة مني ليييك
مروى: بااارااااكاااااا
…بالصعرة جراات زيفها حتا شعرهااا تشعكك ودااتها حماااارت وسخنات بالاعصاب: اناااا تنبغيييك تنبغيييييك واش متتفهمش
سلمان: واناااا لاااا واااش ابنت النااااس غااااانبغييييك بزاااز
طلعات عينيها تترعد للمراية وشافت علياء باركة مزيرة على عينيها.. كأنها عاد تفكرات بلي معاهم فالطموبيل وقالت ضااايرة عندها بشر
مروى: علاااش هاد خيتي هااادي هناااا علاااش.. علااااش لااااسقة فييييه واااش متتفهميييش راااسك
زيرها سلمان من يدها عين حمرة فاالطريق وعين حمرة عندهاا: حيت اناااا هنااا وفرقيها عليك حسنمااا ندير فيك شي مصييبة.. قسمااا بالله حتاااا نخليك هنا ونزيييد
مروى: صحييبتك ياااك ههه غير اعتارف تتخونني معااهاااا.. تتقضي فيهااا الغراااض
رد باشمئزاز وعلياء باقة ساكتة تتسمع وطلع النفس: نتي مرييضة.. مرييييضة وبززاااف علييييك تفكييرك مووسخ.. وهااادي المرييضة انقى من داك التفكير لي عندك وقلتها مليوون مرة علياااء ختي.. تتفهمي شنااهية ختي واااختي المريييضة
مروى: هههه ختك.. واااالدااها لك مك ولا واارتها بالسلاامة واش يسحابليك غاضحك علياااا بهاااد الكلااام “ضارت لعلياء لي مبردة وتترمقها ببرود الشي لي تايزيد يعصبها ويفور دمها” شووفي فيااا مزيااان وعقلي على كلامي.. والله العااالي العظيم لاخليتو ليييك.. والله واااخا نعرف نقتلووو ونقتل راااااسي وراااه لااخليتووو ليك سلماان دياااالي دياااالي ونتي غير لتدوااز الوقت الق***
هز ايدو ناااوي يعطيها كونما علياء لي شداتها بخوف وهو غوت صاااعر: مرواااااا
علياء: جمع ايييدك.. وقف غانزل.. وقااااف
استغلات مروى الفرصة وضرباتها للفم حتا رجعات مضروبة مع الكرسي وحسات بالدم ففمها.. سلمان بسرعة وقف الطموبيل وسط لوتوروت نزل دغيا حل الباب جهة مروى جرها من كول الشوميز و رماها عند الطريق حتا غوتات ورجع طلع بلاصتو وهي تتغوت وتخبط بالباب مقادراش توقف بسبب الطيحة وزيفها كلو تخسر
مروى: سلماااان.. لاااا مغاتمشيييش معاااها والله لاااكانت ليها.. نتااا ديااالي.. دياااالي والله. لاااخليتك ليهااا
ديمارا حتا تجرات مع الباب كونما حفظ الله كون مشات ليها شي ايد ولا رجع تحت الرويضة.. شاف ساكها باقي حداه بالصعرة رماه من السرجم وزاد هبط الزاجة تايترعد وعلياء شادة فمها والدمعة فعينها.. موقف عمرها توقعات تحط فيه وعمرها ظنات بلي مروى وصلات لهاد الدرجة من الجنون او أنه بحال هاد النوع من الناس بهاد الدل والتملك المرضي عايش فمجتمعنا !.. ركبها الخوف كتر من الصدمة وولات غير تاترمش وتفكر فهاد الموصيبة لي ترما فيها سلمان وشنو الحل حتا يطلع منها
وقف قدام سوپر مارشي هبط شرا قرعة ورجع فتح عليها الباب وقال بصوت مبحوح باقي تايترعد
سلمان: شربي شوية الما “طلع ليها راسها تايقلب فوجهها وهي تاتفتف” بلاتي نشوف فين ضرباتك
حيدات منو وجهها وخافت غير لايزيد يتعصب: ماعندي والو, الحمد لله مجاتش فيا الدقة ” شربات شوية وعينيها مازال مشرعين دوز ليها شوية الما على عنقها ونطقات بخوف
علياء: هاديك راها مريضة.. خايفة يجي نهار دير لينا شي مصيبة كحلة
زفر بغضب باغي ياكل حوايجو بالأعصاب: تتقلب تخرجني على طوعي.. عمري مديت ايدي على شي مرا وهاد المرض غاتخليني نديرها وعقلي فين قلتها لك
سد القرعة تايسب ويتمتم ورجع ركب: ميرد تفووو
هبطات ركباات حداه ديمارا الطموبيل وهي قالت تتنهد: الله يشافيها هادا مانقول
وصلها لدارهم وطلعات للحمام مخلية ساكها لتحت.. شللات فمها من الدم كلما تتفكر الموقف المورال تاينزل وتتزيد تخاف دخلات لبيتها جبدات التكشيطة لي غاتلبس حطاتها فساك كبير وهبطات تتسنا ماماها باش يمشيو للكوافورة بزوج..
نزلات عندها لابسة ومقادة خرجو على رجليهم للشاريع ونيشان للصالون.. بداو ليها بالمكياج هو اللول وعلى حسب لي كان دارج على الموضة هو المكياج الخليجي
فاتت ساعتين عاد خرجات لابسة تكشيطتها وهازة منها شوية واخا هاكاك مزال تتجرجر.. لونها ازرق ملكي كامل محجرة ومن لتحت توب حريري بالشيبي ومضمة دهبية تتبري بحال شعرها الأشقر لي بوكلات..
رن تليفونها هزاتو من الساك تتشوف شكون وقالت حكيمة قبلما تركب فالطاكسي
حكيمة: ازيدي خلاص غانتعطلو على الناس
ردت: الخدمة اماما غير ركبي انا جاية
طلعات تتمتم وهي دوزات الخط مجاوبة
علياء: الو وي سلمان
رد بصوتو الضاحك كيف تعودات كأنه ماشي هو لي كان فقمة عصبيتو هاد
الصباح ..حال وحوال دغيا يتقلب ودغيا يبرد
سلمان: العسيلة ..ساليتي التوجاد!
ردت تتزرب: آه لقيتينا غادين للعرس، ياكما واقعة شي حاجة.؟
سلمان: لا لا غير.. شي وراق خاصهم يتسناو ضروري.. شوفي دوزي عندي للبيرو خمسة الدقائق ونسيفطك مع الشيفور هو يوصلك فينما بغيتي
كمشات حجبانها: وراق ديالاش
رد تايتمتم: شي وراق وصافي تاع هادوك… اه خاصين بالكونطرا وداكشي.. غاتجي ياك
مافهمات والو ومها تتعيط: شوف اجلهم لمن بعد دابة مزروبة شوية.. غدا و نجي نسنيهم
رد بسرعة: لا لا مايمكنش خاص دابة تجي ..غير جوج دقايق غاتلقايني قدام لاجونص تانتسنى
علياء: فففف واخا يالله انا جاية.. ولكن جووج دقااايق ماما راها قربات تقجني
سلمان: ههه تانتسناك
حطها الطاكسي قدام لاجونص ودا مها للقاعة سبقاتها بما لحقات عليها.. هزات القفطان تتمشا بالتاويل والقياس طالونها تايتقرقب ورموشها العاليين تايرفرفو، غادة جهة لاجونص والناس القلال لي تايمرو من تما حاطين عليها العين خرج لعندها سلمان وماحدو جاي وهو تايطلع فيها وينزل نظرات الإعجاب فعينيه والضحيكة تاترسم على وجهو
علياء؛ هاهي جات ..فين الوراق !؟
فتح ايديه: شي تعنيقة زوينة بعدا
عنقها باس خدها بلطف وبقا واقف تايطلع فيها وينزل باعجاب وبسمة خفيفة على شفايفو ..ساكت تايتمعن فملامحها وهي تترمش فيه
علياء: سلمان راه تاناسنا
رمش و هز تليفونو مبعد شوية صورها وقال ضاحك: دابة مزيان.. بلاما تعصبي هاني غانعيك على الشيفور
علياء: والوراق؟
رد باستغراب مزيف: اينا وراق؟
خرجات فيه عينيها: دابة نتا جايبني لهنا باش تصورني !؟
سلمان: وشنو.. كون حضرتي للعرس بلاما نشوفك كيفاش جيتي كنت غانعواج ههه والصراحة تتصرعي المكياج تايجيك هبال
علياء: الهبال هو لي فيك والهبيلة هي انا لي دايرة فيك راسي .. عيط ليه دغيا راه مزروبة
رسل ليه رسالة ودرعها عندو تايضحك وهي قالبة وجهها: واصافي صافي هههه ولكن حشومة تمشي هاكدا واقلة
شافت فيه بنص عين: علاش مالي
غمزها: غاتخطفي الأنظار على العروسة مسكينة.. ويقدر گاع سي العريس يضور بيك تما بلاصتها
دفعاتو تاضحك: المسخ ههههههه
هز تليفونو بإعجاب: هالقمر كمل “صورها وهي تاضحك بعفوية والسيارة تاع الشيفور حبسات قدامها
علياء: حمق ههه “تنهدات وعنقاتو” ولكن غالي وعزيز ..غانتوحشك
تنهد: ماتحكيش على الضبرة.. سيري وشبعي شطيح ودجاج مع راسك كولي حقي وحقك ههه
علياء: هههه واخا اسيدي ..بسلامة
سد عليها الباب ودخل راسو من السرجم باسها على جبهتها عاد زاد بيها الشيفور وهي من المراية تترمش فيه ببسمة
بسبرديلة كحلة قصيرة على دجين بيض خاشية فيه شوميز باردة زرقة مع ساك صغير دايراه فالجنب باش تبقا خفيفة وتحرك براحتها..خرجات من عند النجار، مصغرة عينيها على الشمس ومكملة طريقها بعدما رصات معاه الأمور واتافقو على التمن والشكل لي بغات فالطبلة لي غاتكون وسط الدار مع كراسيها ..اما باقي الاتات دايرة فبالها تاخدو من كيتيا وتهني مخها
..لبسات شاپو بيج كانت شاداه تتمشا بين دروب مراكش الساخنة وهازة قريعة الما لي صبحات سخونة بفعل الحرارة.. جبهتها گاع عرقات..
الخدمة كتارت وولات مفرقة عقل مع الرياض وعقل مع الدار لي تتوجد لوالتر وبين هنا وهنا تتحاول تقاد ليها وقت فلاسال وانشطتها الأخرى…
دخلات لكافي جنب جامع الفنا حطات الشابو جنبها وطلبات اتاي منعنع مرخوفة على الكرسي وتاترتاح..
جسدها متعب من قوة سير واجي من الصباح.. لكن نشاطها وحماسها فخدمتها تايخليها تحتاج خمس دقائق فقط من الراحة وترجع تاني تنوض.. حركية وكاپابل تتخطط قبلما تصرف داكشي باش اي حاجة دارتها تتكون متقونة وماعندك ماتقول عليها.. تاتسول فأي حاجة مفاهماهاش عزيز عليها تعرف وفينما حطيتيها تحمر ليك وجهك ..
رن تليفونهاا بعدما ضربات النص فكاسها والابتسامة بدات تشق شفاهها الوردية
.. ولات حافظة اتصالاتو وعارفة مع تايوصل للأوطيل كايهز التليفون و يعيط ليها مباشرة.. ناهيك على أنه هو لي تايفيقها فاالصباح ولو يكون مزروب حدو يقول صباح الخير عسيلة نوضي ويقطع..
هزاتو من الساك بيد مزينة بساعة دهبية لونها أبيض وجاية مع معصمها الرقيق والناعم.. خاتم سامبل وردي فصبعها واضافرها مقلمة ومسبعة بغوز بارد بحال لون عكرها
علياء: بونجوغ .. ساليتو ولا مازال؟
رد تايزفر بتعب وتتسمع خطواتو فالشومبر: واييه.. عاد طلعت نرتاح شوية باغي غير ننعس
علياء: تفاهمتو بعدا على كلشي
سلمان: الحمد لله كلشي داز بيخير وربحنا كليان جداد.. هاد السيمانة إلى كتاب غاندوز لألمانيا
تبسمات: ايوا الله يديك ويجيبك على خير
سلمان: آمين.. نتي كيف غادة عندك الأمور
تتشرب من كاسها وتجاوبو بهدوءها المعتاد: كيف العادة سير من هنا لهيه وجري عليا نجري عليك.. عرفتي كون كنت كاندير هادشي فابور بحال شحال هادي كون عواجيت، الحمد لله خلاصي مسكتني ههه
سلمان: ههه “بغا يرد هو يتسمع صوت انتوي ناعم داز من جنبو: بون سلمان.. انا لتحت فلغيسطو إلى بغيتي نسهرو هاد الليلة ؟
رد تايتفوه: نرتاح شوية ونجي
قالت بالفرنسية: غانتسناك
تسد باب الشومبر وقالت علياء مصغرة عينيها: نسهرو هاد الليلة.. و مدخلها للبييت گاااع باااي بااي بااي
ضحك وقال كايتسرح ففراشو: ههه طلعات غير تدي وراقها
علياء: مممم
سلمان: هادي هي سلمى لي قلت ليك تلاقيتها فلافرونص.. بنت الدومين ديالنا نيت تاهي جاية على ود لغويينيو
علياء: هي جاية تجمع الكليان ونتا حل فيها فمك ورجع ايديك فجيابك
سلمان: هههه الخدمة الخدمة العسيلة.. والزهو زهو
علياء: ممم.. البارح مقصر معاها.. واليوم طالعة معاك ..اش تما اسلطان زمانك
خفاف صوتو وبدا النعاس يتسلل ليه مع دالك تايتعافر يدويو: هاد الساعة مخليين الأمور للوقت.. ولكن مانككدبش عليك البنت عاجباني
ضحكات: علاه فين عمر شي وحدة معجباتكش
رد بعفوية: لا لا هادي فشكل.. مختالفة على لي تانعرف خصوصا فاش زدت تعرفت عليها
علياء: من أي ناحية
رد عليها بخفوت: ماعرفتش ..مهم هي كالم بزاف، هادي اكتر حاجة عجباتني فيها.. ومافيهاش ديك الخفة الزايدة، يعني تقيلة.. زوينة صراحة تتسر العين.. وأنيقة ..وواعية
ردت مبسمة: باينة عاجباك نيت نيت
سلمان: معجب ومرتاح، بزوج
ماطات شفايفها بتردد وقالت: واخا هاكداك الموضوع معقد شوية، راك عارف مروى وفعايلها مغاتقبلهاش..
قاطعها منيرڤي: من عندي انا تمشي تق**
علياء: باغيني نقطع ياك؟
سلمان: ملي مباغاش نسب ماتجبديش ليا المرض.. من لخر تعاود لمخها هاديك مغاتفهم راسها حتا نحطها امام الأمر الواقع وتلقاني جار مراتي فايدي، ديك الساعة غاتجمع بزز منها وتعرف بلي مكاين أمل وفات الفوت
تنهدات: يمكن عندك الحق.. “تنهد وقالت ببسمة” صوتك بانلي عيان، نخليك ترتاح
رد: تهلاي اعسيلة
علياء: باي
قطعات معاه وبقات باركة شوية تادوز الوقت فتليفونها ..عاد ناضت راجعة للرياض ..كان تباع وخداتو گاورية كبيرة فالعمر مقطعة شعرها الرمادي كوپ گاغصون ولباسها رجالي أحيانا زائد انها جدية طول الوقت.. لقاتها فلاطيراس باركة تترتاشف من فنجان القهوة سلمات براسها ودخلات للكوزينة حلات التلاجة وهزات قرعة الما وكاس تتشرب.. هو يصوني تليفونها عاود وجاوبات
علياء: الو وي والتر
والتر: علياء صاڤا.. انا فالكافي لي قدامكم دوزي نتغداو بزوج
ردت: كانعتادر مشغولة شوية
تنهد وقال كايبرد: واخا ماعليش.. فين وصلتي فالدار
علياء: باقية شي خدمة ولكن هاد لاسومين نكون ساليت.. العشية غانطلع نشوف كيفاش ندخل لك المگانة ديال الضو والويفي
والتر: وي احسن ..بداي بالفراش المهم وكملي شوية بشوية عييت من هاد الاوطيل
علياء: فكرت ناخد كلشي من ايتيا ..سير نتا اختار لي عجبك حتا ندوز انا نرصي معاهم التمن ونعطيهم العنوان
والتر: لا غير تكلفي نتي تايق فدوقك وعارفك غاتقادي كلشي هو هاداك.. غاتكون الدار احلى باللمسة ديالك
علياء: لي بان لك.. بسلامة
قطعات وناضت لخدمتها ..
وقتها مشغول مرة يدوز بالزربة مرة بالتقالة وتاتمر معاه ايام واحدات مليئة بالعمل.. من طرفها ومن طرف سلمان كدالك …
تحت سماء مليئة بالنجوم مسرحة على الكرسي فسطحهم..حاطة شال تقيل على كتافها من البرد لي تايحرك كسيوتها البيضة وخصلات شعرها الأمامية.. التلييفون فودنها وكتاب على رجليها كانت تتقراه حتا قاطعها سلمان باتصالو وشدو السهرة بزوج
سلمان: صافي الله يجعل شي بركة.. غدا راجع فحالي
علياء: اخيييرااا هههه
سلمان: ايييه الناس توحشوناا
ضحكات قائلة: الله يجيبك على خير.. جاي فالصباح بكري؟
رد وهو تايتحرك فالبيت بأريحية: آه، مع ديك السبعة غانكون تما باش يالله نرتاح فخاطري.. فكرتيني بعدا ههه مبروك العيد
علياء: علينا وعليك اسيدي ههه تعيد وتعاود وبطولة العمر للوالدين
سلمان: آمين يارب ويحفظ ليك والديك العسيلة “تدق باب غرفتو وناض قائل” سلمى تتعيط.. نخليك
علياء: ههه تصبح على خير
سلمان: ارتاحي مزيان ..بسلامة
…
صبح صباح يوم جديد
..وقفها الطاكسي قدام المطار نازلة منو بفستان احمر نازل من الكتاف مجموع عند الخصر وايديه مطلوقين، مع طالون عالي فالاسود وشعرها مجموع بعود مكياجها خفيف كيف العادة والكحل مزين عينيها.. جاية ناوية تفاجؤو بقدومها وتكون اول وحدة يشوف.. لقات تما الشيفور لي وصا من لاجونص جاب لي طموبيلتو وحتا هو تايتسناه سلمات عليه ببسمة خفيفة ودخلات تتسنا وعينها كل مرة على ساعة يدها تترقب ايمتا غايخرج من الباب ..
محسات حتا فااتت عشر دقائق.. عرفات بلي طيارتو وصلات ..الناس تتخرج ناحيتها وهي عينيها تايقلبو عليه حتا لمحاتو من بعيد، بتريكو بلو غوا مع سروال توب اسود فصالة عليه وجاكيط كوير ..جار الڤاليز ديالو والناس مصرگينو عليها بزز باش قشعاتو وماحدو تايقرب، والصورة تتوضاح، وعيون علياء تايتجمعو بتفاجأ من البنت لي معاه.. مشابك ايديه باصابع ايديها وبضحكة عفوية على شفايفهم تايدويو..
حولات ليها علياء عيونها وفعلا..كانت انتى جميلة كيفما وصفها سلمان.. راقية انيقة والاهم عاطية للعين وزوينة بالجهد.. بشرة ناصعة البياض نقية وصافية، شعر اشقر فوق كتافها مصاوب ومقاد ونازل من الجناب على النظاظر لي لابسة مع شوميز مخططة بالابيض والازرق ودجين غايطرطق عليها.. طويلة وزادت طوالت بالطالون واصلة لنفس طول سلمان بالضبط الكتف عند الكتف، وساك ديور ڤري حاطاه على معصم يدها بلباقة.. علياء بقات مبلوكية مدة ورمشات فجنابها بتوتر.. ماعلمهاش بلي ممكن يجيو بجوج ومظناتش يديرها.. لهادا ماعرفات كيفاش تتصرف..
وكان ليه حتا هو جزء من الصدمة ملي رمش صدفة جهتها وشافها عند الباب واقفة ..مظنهاش تجي والبسمة من وجهو تمحات جاي والبنت تتشوف فيه وفيها وطلع وتنزل تحت النظاظر بشوفات خفاف
مان باستغراب: علياء !!!؟؟ هههه
طلعات البنت لي حداه حواجبها بحالا عرفاتها شكون وعلياء ببسمة صفرة قالت ملي وقفو قدامها: مفاجأة ههه
سلمات بعدا على البنت بالحناك: بوجوغ ههه.. مرحبا بيك سلمى ياك؟
ردت عليها بابتسامة والرقة فصوتها: وي سي سلمى ههه اي جوپونك كو نتي هي علياء
شافت فسلمان لي مطلع حاجبو فيها: وي ههه هي هادي
سلمى: اون شونطي ماشيغي
علياء: موا اوسي اي مرحبا بيك مرة خرا
سلمان: ساليتي.. شنو انا ماعليا سلام؟
ضحكات ناوية تسلم عليه بالوجه لكن جرها معنقها لعندو وتايضحك.. بعد باس راسها وقرات الفرحة فعينيه بعدما قال: توحشتك بزااف “عنقها مرة خرا وقال” نسحابك غاتبقاي ناعسة ههه داكشي باش وصيت على لي يجيبني
ردت ببسمة: قلت حشومة ..خاص نجي نستقبلكم خصوصا لي معاك هاد الغزالة “شافت فسلمى لي تتبسم ولكن كأنه التعنيقة معجباتهاش.. البنت تتفهم البنت داكشي باش بعدات منو باحراج حس بيه سلمان وقالت” ههه يالله نخليكم.. نهاركم مبروك
جرها مدرعها لعندو: كيفاش هاد نخليكم !؟ شفتك دايخة شوية هاد الصباح لا
سلمى: وي يالله معانا
علياء: عاد وصلتو ..نخليكم تمشيو ترتاحو انا غاناخد طاكسي
شاف فسلمى ببسمة: نمشيو ؟
شابكات ايدها معاه وقالت: وي ههه
خرجو ناحية السيارة وعلياء تترمش وحاسة بعيون سلمى عليها.. هو فقط متبسم تايزيرها لعندو ومرة مرة يبوس على راسها بعفوية.. نفس التصرفات تايحيد منها شوقو حتا وصلو للطموبيل ركبات اللور وهوما القدام
..الكلام كان قليل معظمو على السفر والخدمة..
لكن لاحظات فيه شحال سلمى مايعة فحركاتها وكلامها لي انتوي بزاف.. تقيلة ومتبتة وزينها زيين واشمن زين وفيها كترة الپروطوكول والتبعكيك كيف تانسميوه حنا.. الفرنسية فمعظم كلامها قليل فاش تتلوح شي كلمة بالدارجة والى غير بغات تهز كلينيكس تتهزو بطرف صبعانها
وصلوها علياء اولا لدربهم السقييل مع الصباح بكري قليل لي فايق.. نزل سلمان فتح ليها الباب خدا ايدها للكوفر تايضحك وهي ردات شعرها ورا ودنيها مهبطة راسها عندو وقالت بعتاب وصوتها منخفظ
علياء: علاش ماقلتيش ليا بلي غاتجي معاهااا
ضحك تايقلب فلڤاليزات: ههه علاش
علياء: كيفاش علاش على الأقل علمني
درعها عندو مغوبش وهي تاضور عينيها: وانا بااش غانعرفك جااية عندي مع السبعة الصباح باش توصليني ؟؟؟
علياء: ايوا نتا تتوصلني حتا انا بغيت نرد لوجيست
سلمان: انا عندي طموبيل اعسيلة “باس راسها”ولكن الله يحفظك ليا وخلاص ..ها رزقك ههه
هبط ليها ڤاليز سوداء صغيرة وساشي كبيرة وهي تتشوف وترمش.. سد الكوفر وقال تايطلع سروالو
سلمان: تعيطي لخوك يعاونك تهزيها ..ولا نطلعها معاك انا
جربات تهزها وكانت تقيلة: ههه واش جايب ليا اوروپا كاملة ولا مالك
سلمان: تستاهلي اعسيلة “حيد ايدها من الڤاليز وعنقها لتالت مرة ضحكها وفنفس الوقت تتشوف ياكما البنت حاضياهم ..باس راسها وقال” تهلاي فراسك، نرتاح شوية من العيا ونتلاقاو
علياء: اوك.. سلمى بسلااامة
خرجات ليها ايدها من الطموبيل وقالت: بون جوغني
حلات لاڤاليز وسط البيت، باركة فالارض مربعة رجليها تتجبد وضحك تجبد وضحك.. السيكان لي مارك بألوانها المفضلة.. كل ساك وياسااك زائد كاين لي جابهم مع ليطالون ديالهم كشكل واحد ولون واحد.. سبرديلات مريحين فاللبسة حيت عارفها ولات تتعيا وكتر عليها الشغل.. سبيبطات وكسيوات انتويين .. روايح ڤري وماركات عالمية من بينهم شانيل لي تتعجبها
..باكيات ديال الشكلاط مع شافتهم سالو ريوگها وحلات تادوق وتقرا الإسم.. لقاتو من كل بلاد جايب ليها بكية وبنكهة مختلفة عارف كرشها اولى من كلشي وهي والشكلاط حب لا متناهي
..لكن اغلى كادو واحلاهم كان اونصومبل فيه كوليي عقيق من اللؤلؤ ديال اليد و العنق .. مع خاتمو و حلقات مدورين .. ناضت نيشان للمراية لبساتهم تتضحك هي تحل مها الباب كانت عاد فايقة وتتقاد شعرها
حكيمة: اصباح الخير..شفتك رجعتي “شافت ديك الحالة فالبيت وقالت” اش هادا؟
ضارت ليها بحماس تتضحك: كيف جاني
قربات مبهورة تتقيسو: تبااارك الرحمان.. هادا بصح ياك؟
علياء: ومالو مزور
حكيمة: يابنتي وهاد خطيبك شحال ايدو سخية وشهوة منوو.. تبارك الله هادشي كلو جايبو ليك “هزات ريحة رشات فيدها شوية وعلياء تترد الكوليي للعلبة ديالو” الله على رويحة تتفاجي على القلب.. شنو هادي
حيداتها ليها: سميتها ابيوم وماشي والتر لي جابهم لي غير بلاما تفرحي
حكيمة: ايه وشكون
علياء: واحد الصديق .. وابلاتي نجمع هادشي اماما ماتعفسيش عليهم ..تأ غاتهرسيلي الشكلاط
حكيمة: لي ضربك ابنتي ضربك على داك الشكلاط شي نهار يطيحو سنانك
علياء: الله ينجيني ههه
حكيمة: جمعي هادشي جمعي وعنداك نلقاك لابسة هادا وخارجة بيه.. هاد المرة غايطيرو ليك حتا الرأس ماشي غير غايشفروك.. ولا نقولك اري انا نخبيه ليك قلبي ماهناني
علياء؛ والا واش انا صغيرة تخبي ليا
حكيمة: ايوا عندااك خبيه وطرقي عليه.. الله يرضي عليك
سدات الباليزة: آمين .. غانعس شوية حتال ديك العشرة
حكيمة: هبطي الله يرضي عليك فطري شوية مع باك راه غير تايسول عليك وقلبو ماهناه ..شحال مابقيتو بركتو فبلاصة وحدة بحالا كل واحد عايش فقنت
علياء: تمارا اماما تمارة
حكيمة: ايوا ابنتي الله يسهل امورك هادا مانقول
علياء: آمين
خرجات معاها للصالون.. باست يد لمكي لي بارك هاز التسبيح فايدو بركات حداه تايتعاطاو الكلام على الخدمة فحين حكيمة بدات توجد الفطور .. حتا شافها تتفوه بالعيا وطلقها طلعات لبيتها ترتاح شوية بيما وصلات الوقت فين خاصها تخرج تاني
رشات ريحتها قدام المراية ..قادات الڤيسط فوق سروال التوب باللون الاسود بحال لون الڤيسط وتيشورت ابيض سامبل مخشي فالسروال.. طالون متلت من الامام بيج.. مع ساك اسود ديور مربع وسمطتو قصيرة كان من الهدايا لي جاب سلمان
..دارت حلقات صغار وهزات ساعة يدها تتسدها فايدها وبالها بدا يديها للهيأة ديال سلمى ..لباسها وحركاتها الانتوية
شافت راسها فالمراية طلعات وهبطات قائلة: اليوم هانا بالكلاص.. ايوا وغدا نبدا نجري بالسبرديلة والدجين والشعر مشنتف ههه
خرجات من دارهم للرياض على رجليها
..لقات الطرونسپور ديال اجونص سلمان تايتسنى ركبات معاه للمطار عين فالطريق وودن مع التليفون تتهضر مع النجار ومع هادا وهاداك على قبل الدار.. باغة تكملها فأقرب وقت ممكن باش تهنا وتحط همها وفنفس الوقت مابقا ليها والو من غير لمسات خفيفة على الديكور
..نزلات مستقبلة الكليان ديالها بالابتسامات والترحيبات رجعاتهم للرياض ودخلو للريسطو يتغداو.. بقات عند راسهم واقفة تتقدم ليهم الاطباق المغربية ولي سولها على شي حاجة تجاوبو بلباقة ورقة.. الأدب والصواب والقبول مزين وجهها
..خلاتهم طلعو يرتاحو وخرجات تاتختار الديكورات لي مازال خاصين تفاهمات معاهم على النهار لي غايجيبو ليها كلشي ورسلات الفاكتورة لوالتر فالايميي.. حتا قاطعهم تليفونها لي بدا تليفونها وقالت ببسمة
علياء: سمحولي نجاوب
…: وي خودي راحتك
خرجات فاتحة الخط: اصباح الخير
سلمان: مسا الخير هادي ههه
ضحكات: ارتاحيتي شوية
تفوه: الحمد لله شوية وصافي.. فينك نتي
علياء: لقيتيني غادة للرياض
سلمان: دوزي عندي لكيشمارا نتغداو مجموعين
سكتات شوية بتردد عاد نطقات: لا لا بلاش.. سلمى غاتجي؟
رد مستغرب: بلاش؟ ياك ! مشفتينيش شهر وصافي دغيا مشيت من البال، ولات دابة بلاش
علياء: وادابة انا قلت هاكا؟ ففف واخا انا جاية
سلمان : يالله انا كانتسناك
قطعات وطلعات ايدها لطاكسي صغير عاد بغا يدور..
طلعات ووصلها بعد دقائق خلصاتو ودخلات تتقلب عليه بين لي جالسين.. كان بارك بوحدو فالقنت هاز التليفون فايدو وقدامو براد اتاي.. توحشات هاد الشوفة والبركة.. هي هي ماتبدل فيها والو وبراد اتاي قدامو ملي تايكون يتسناها.. تمات غادة جيهتوو وهو شم ريحتها وتبسم قبلما يطلع فيها عينو
سلمان: زين تمراكش
بركات حداه: هو نتا هههه “عنقاتو وزيرها لعندو تايردد”
سلمان: توحشتك.. ااه شحال توحشت كلامك ههه
علياء: ههه حتا انا “ضارت براسها تتقلب” فين سلمى.. مجاتش؟
ضحك تايكب اتاي: راها صاحبتي انا ماشي نتي واقيلة ههه
علياء: باز ..خود ليا عصير حلقي بح و عييت
شير للسيرڤور: واخا نبدا ندوي حتال غدا عاود.. عطي الراحة لراسك عطي الراحة لراسك
علياء: قربت نسالي.. شي حوايج بساط لي بقاو
سلمان: نكب ليك اتاي ؟ النعناع تايبرد
علياء: واخا .. واجاوبني بعدا فين البنت
مد ليها كاسها: البنت جاية فالطريق.. راه قلت ليك رباطية وصلتها ورجعت على أساس نتغداو جميع
عضات شفايفها تترمش باغة تسول وماباغاش: مممم.. .. سلمان، نسولك وتجاوبني؟
سلمان: هههه شنو
غوبشات فيه: والضحك لاش
حبسها بزز وقال: هانا يالله سولي
علياء: ماقالت لك والو عليا
سلمان: بحالاش !؟
قربات ايديها للطبلة ونطقات بجدية: باش نجيك نيشان.. البنت حسيتها بحالا تقلقات ملي شافتك عنقتيني ..ومن حقها تاني ماشي تانقول العكس، يعني شكون هادي لي غاتقبل تشوف الرجل لي تتبغي معنق شي بنت خرا
رد بهدوء: ونتي شي بنت؟
علياء: وادابة سؤالي واضح جاوب.. واش دوات على هاد الموضوع ولا لا
ضحك تايحرك راسو: آه دوات
علياء: وعلاش تتضحك
سلمان: حيت زهري غير مع المغيارات ..هاوحدة مريضة بالغيرة ووحدة مازال ماعرفنا اش تما
نزلات عينيها وقلبها تضيق: من حقها اسلمان.. حتا إلى قلقها الموضوع وخدات مني موقف راه ليها كل الحق
حط ليها السيرڤور العصير لي طلب وهو حك جنب فمو بجدية وقال: ممكن.. ولكن فاش عاد تلاقينا و بدات تعرف عليا دخلتك فالموضوع.. هي ديجا عارفة لي كاين وعارفة مكانتك عندي شحال كبيرة ..وتقبلاتها نورمال قالت ماعندها حتا إشكال بالعكس بغات تتعرف عليك.. غير هي دوات على التعنيقة حيت ماتوقعاتش تكون العلاقة بهاد المتانة كاملة
علياء: وشنو قلتي ليها نتا
شاف بهدوء وراها: هاهي جات
ضورات وجهها وشافتها جاية ناحيتهم ببسمة ناعمة، تتمشا كعارضات الأزياء خطوة قدام خطوة شوية بالشوية.. كسيوة انيقة مبينة لاطاي ديالها ..الشعر مقاد الدفيرات مقادين ومسبغين بالبوردو الطالون عاالي وفيسط خفيفة محطوطة فوق كتافها برقة.. حيدات النظاظر قائلة
سلمى: سالووو
هبطات باست سلمان وضارت سلمات على علياء
سلمان: هانية
سلمى: وي صاڤا ههه اي طوا
جلسات حداه وقال ببسمة: الحمد لله ..كيدازت الطريق؟
سلمى: صاڤا واخا عياتني شوية.. علياء اش خبارك
ردت موسعة بسمتها وتتشوفو كيفاش شد فايد سلمى وطلع ايدو للسيرڤور يطلب ليها ماتشرب
علياء: لاباس الحمد لله.. نتي ارتاحيتي شوية
سلمى: وي شوية ..حبيبة خودلي گلاص
رن تليفونو وهبطات علياء عينيها.. عاد لاحظات بلي ولاو عندو زوج تليفونات واحد طافي والتاني معيطين ليه من الخدمة الشيء لي خلاه بنوض
سلمان: جوج دقايق الغزالات ونرجع
علياء: خود راحتك.. احم
خلاهم شي تايشوف فشي والبسمة على وجوههم.. علياء خدات عصيرها تتشرب منو وعينها على الطالون لي لابساه سلمى ..شيك وجلدو منقوش بألوان ترابية حمقها وخلاص
علياء: الطالون ديالك غزال
شافت فيه تتضحك برقة: ميغسي ماشيغي عويناتك.. حتا نتي هاد الساك عندك طخي شيك ..دوقك غزال
علياء: ههه سي جوست ان كادو
سلمى: اووه بصحتك ههه
علياء: ميغسي الله يعطيك الصحة
سلمى: ههه.. فراسك سلمان تكلم ليا عليك .. تكلم بزاف صراحة
طلعات حواجبها: ممم بصح ههه بالخير بعدا
سلمى: بيان سوغ ههه ..وباينة عندك بلاصة كبيرة فحياتو ..كختو علاما قال
حركات راسها وفهمات الموضوع والنظرات كدالك لاش تايوحيو شي لي خلاها تقول: وي سي ڤغي.. حتا أنا سلمان عندي بحالو بحال اوس خويا ..مكانتهم وحدة عندي وسعادتهم اكتر حاجة تتهمني
سلمى: الله يحفظو ليك
علياء: آمين ههه “جمعات ساكها” العشاق غاتكونو باغين تتغداو بزوج . من الأفضل نخليكم
محات بسمتها تتمنعها تنوض: نو علاش بقاي معانا.. انا أصلا باغة نزيد نتعرف عليك
علياء: مرة خرا احبيبة.. الخدمة تتسناني وديجا تعطلت “ناضت شافت جهة سلمان وتتحاول تبسم فوق خاطرها” سلميلي عليه.. و، وتهلاي فيه اسلمى.. يستاهل الراحة وباينة فيه مرتاح معاك
شافت فيه بابتسامة دافئة: وي سي فغي.. ڤغيمو سلمان شخص مميز بزاف ..من أول لقاء حسيت بيه مميز من جميع النواحي
علياء: بصح ههه ..يالله بسلامة
خرجات تادير نظاظرها.. دازت من حداه بسرعة بلاما ينتابه خايفة لايشوفها حيت عارفة مغايطلقهاش تخرج..
شدات طاكسي للرياض دخلات للشومبر ديالها تتحيد الطالون وتنهد.. غصة فقلبها وخوف مجتاجها من المجهول ..دقت عليها المسؤولة مفيقاها من سهوتها، تنفسات مزياان عاد ناضت خارجة لعندها وهازة اجوندة فايدها تايتكلمو على السهرة لي غايدير للكليان ويتافقو ..منها تلف الوقت منها تريح بالها من قوة التفكير
الخنقة فصدرها وقلبها بيد صحيحة تعصر ..إحساس صعيب ومر فالحلق متاايسترطش.. شحال خايبة تحطي محط اختيار بين سعادتك وسعادة شخص عزيز عليك، وماشي اي شخص.. إنما واحد كان اعز ماعندك ..صديق رزق من الله واخ ولداتو لك الدنيا.. شخص كان سند وظهر مستقيم فينما طحتي فشي مشكل تتلقايه جنبك وعارفة عليه تعولي فأي حاجة
..ولكن سعادتو بين عينيها.. الاعجاب لي شافت فعينيه تجاه سلمى والراحة لي تايحسها معاها خلاتها تعيد النظر فكل شيء.. يستاهل السعادة ويلقا لي تفهمو وتليق بيه.. منها يستقر ويدير ولادو، ومنها مروى تبعد من طريقو وتعطيه شبر التيساع..
الى هي مابعداتش غايوقعو مشاكل وغايطيحو على راسها هي اللولة.. اصلا شكون تقبل بالرجل لي تتبغي يبوس ويعنق ويهتم بكل تفاصيل إنسانة تانية ولو تكون ختو من مو وباه.. عاساك هي
وهي كدالك واش الى من هنا للفوق تعرفات على شريك حياتها غايقبل علاقتها بسلمان ؟! لا متاظنش..
والاسوء هو آخر تفكير جا فبالها.. إلى سلمى طفح بيها الكيل وحطاتو محط اختيار بيناتهم.. اما سلمى أو علياء ..من حقها.. ومن حقو يختار لي غايكمل معاها حياتو.. احساس الخوف دب فقلبها وحالها مابقا حال ..خايفة تخسرو ومايبقاش فحياتها.. الولف مصيبة وكارتة كتر من الحب
تكورات على نفسها تادمع خايفة ومضيومة وخاطرها ضيق.. وسط كل اللخبطات لي فقلبها رن التليفون برقمو.. تنهدات مزيان تتمسح دموعها وجاوبات مخففة صوتها باش مايعيقش بيها كانت تتبكي
علياء: وي سلمان
سلمان: فين غاطسة تاني شحال وأنا تانصوني عليك؟
ردت: دخلت عيانة.. كانت عندنا سهرة اليوم مع جيت دوشت وتكيت ففراشي
رد تايحقق فصوتها: مالك ! واش مريضة؟
علياء: لا لا عادي
سلمان: علياء واش نجي نديك للطبيب
علياء: واقلت ليك لا غير خاصني نرتاح وصافي.. فينك نتا
سلمان: حنا باركين فالريسطو ديال ديما ..قلت تجي تتعشاي معانا انا وسلمى إلى كنتي باغة ..فيك لي ينوض !؟
علياء: لا غير بصحتكم
تنهد وقال مخفف صوتو كأنه تايحدرها: علياء ..ممخبية عليا والو.. ياك تتعاوديلي كلشي ؟
زفرات: مابيا والو اسلمان الله يهديك غير عيانة وصافي
سلمان: الله يهديك نتي على نفسك.. ارتاحي وخلي تليفونك حداك ..هاكي سلمى بغات تهضر معاك
سامى: وي علياء.. صاڤا احبيبة ياك لاباس
علياء: صاڤا غير العيا ديال الخدمة وصافي ههه استمتعو بوقتكم
سلمى: حنا غانستمتعو كتر إلى جيتي.. سلمان غايبقا بالو معاك
علياء: مع الأسف مانقدرش ههه مرة خرا.. يالله نخليكم بسلامة
سلمى: تهلاي فراسك ومايكون عندك باس
خدا سلمان التليفون وقال قبلما تقطع: علياء ..إلى حسيتي براسك ماهياش علميني نجي نديك للطبيب صافي
علياء: واخا.. تصبحو على خير
سلمان: تصبحي على خير
حلات باب الپارطمة والعمال وراها بداو يدخلو الاتات لي باقي خاص ..حطات ساكها على طبيلة بيضاء حدا الباب .. قدامها بلاكار لاسق فالحيط فيه علاقات لداخل والواجهة ديالو عبارة على مرايا وتاتبينها كلها.. لابسة جوب سوداء مزيرة على فخيداتها ونازلة حتال الأسفل من فتيحات قصار فالجناب.. تريكو نفس اللون خيط رقيق مزير وكمامو عراض منفوخين جاو حتال المعصم وتشدو ..مع سباط طالون وشابو بيج على شعرها المنسدل بأريحية ..
دخلات للدار تتوزع عليها نظرات خاطفة وحلات البالكو لي جا الوسط وتايطل على الاقامات.. بارطما كبيرة فحي گيليز.. من ارقى الاحياء فمراكش وعامر بالشركات ولي بوتيك كأنه السونطر ديال المدينة ومايسكن تما غير الهاي كلاس ..
تلفتات حاضياهم تايعلقو الساعة الحائطية ورادة البال.. حطو كل حاجة فبلاصتها كيفما وصاتهم وحتا قربو يساليو عاد دخل والتر تايشوف فالدار ويتبسم ..دوز عينيه على اللأاتات والتريات المعلقين فالسقف
..صالون مفتوح على صالون دارت فيهم نفس الالوان ابيض واخضر لكن مختلفين بعض الشيء.. واحد عصري وخديداتو بلديبن والتاني عبارة على ديفوطوي جوج طوال وجوج صغار فالجناب.. صالامونجي حدا المطبخ لي مفتوح على الصالونات بزوج وبيت النعاس حتا هي تاطل عليهم وبيت فالجهة الأخرى جنب الحمامات
..قادات كلشي وجا مواتي مع كل حاجة اختارتها ..سالاو الدراري وخرجو سدات وراهم الباب شادة الفاكتورة فايدها وقالت مربعة ايديها
علياء: ايوا شنو بان ليك.. شنو ناوي تغير ولا تزيد !؟
قرب هز ايدها وباسها بلطف جراتها وقال مبسم: أي حاجة تتكوني فيها نتي مايمكنش تكون خايبة ..تبارك الله عليك
علياء: هادي لافاكتور
خداها وجبد ليها شيك مكتوب ومسني من جيبو: وهادا الخلاص علاش اتافقنا.. واخا تستاهلي كتر احبيبتي
فتحاتو وكان مبلغ جوج المليون سنتيم التمن علاش اتافقو ..سداتو وقالت: نخليك ترتاح
والتر: بقاي نشربو شي حاجة
علياء: عندي الخدمة.. التلاجة عمرتها وكتبت ليك فورقة كل حاجة وفين محطوطة ..غاتلقاها معلقة فالبلاكار
بغات ضور وحبسها: علياء
طلعات حاجب تتسناه يدوي: وي مسيو والتر؟ باغي شي حاجة
رد بأسى: واش ماشي ممكن تعيدي النظر فقرارك.. على الأقل غير تعطيني فرصة أخرى أي واحد يستاهل فرصة خرا
ضحكات بجنب فمها والتليفون فساكها بدا يصوني: علاش ماعطيتكش فالفرص حتا عييت؟
والتر: عارف.. الله يخليك فكري مرة خرا
علياء: بسلامة
خرجات تتجبد تليفونها وقدام العمارة وقفات تجاوب
علياء: الو نعام ..
سلمان: فينك !!؟
ردت تاضحك وتشير لطاكسي: طالعة لخدمتي الاخ الله على العصبية ههه فينك نتا
سلمان: انا تانتسناك هنا كي الجن
باستغراب: فين هنا؟
تنهد معاجبو حال: ياك الصباح ملي فيقتك قلت ليك نفطرو بزوج !!؟ شنو نسيتي
عضات شفتها حيت مشا من بالها فمرة: الصراحة نسيت
سلمان: انا تانتسناك “بغات تدوي وقال باصرار” تانتسناك اعلياء
بدات ضور فعينيها فاش قطع.. راسو قاصح ولي فيه فيه تنهدات بقلة حيلة وخدات طاكسي لعندهم وحمدات الله بعدا كانت لابسة الكلاص .. كانو تايفطرو بزوج سلمى متكية على ايدو محيدة الفيسط حاطاها فوق الساك جنبها على الكرسي وبقات بتيشورت شيك اسود توب ساتان مع دجين وطالون كالعادة ..حبسو الضحك فاش شافوها داخلة ناض سلمان تايتبسم منيم عينيه و استقبلها بعناق طويل
سلمان: صباح الانواار ” باس راسها وشاف فيها بحالا تايدوي مع طفلة صغيرة” مال علياء مالها مقلقة مناا ولا شنو
علياء: ههه لا علاش
درعها للطبلة وجر ليها كرسي حداه: شوفي نتي.. هادي هي لي شهر مشافتني
علياء: الخدمة وصافي
برك وطلع حاجبو بشك: مأكدة
علياء: واماعندي والو ههه صاڤا اسلمى
سلمى: وي حبيبة ههه ونتي
علياء: طخونكيل
حطات حتا هي ساكها جنبها ودارت رجل على رجل، طلب ليها فطور كامل وخدا ليه ولسلمى مشروبات..
علياء معاه تااتكون على طبيعتها وعفويتها وتتخلي الپريستيج للخدمة بحال كيفما هو تايتصرف.. لكن بروطوكول سلمى ولباقتها فالكلام تايخليها بلاهواها ترجع علياء العملية وتتعاملها بنفس معاملتها
دفع ليها كاس العصير قدامها وپتيبان: هاكي ونتي وليتي صفرة.. شي نهار يقتلوك ليا
سلمى: شنو واش عندك الخدمة كتيرة؟
علياء: ههه كانت مي دابة الحمد لله ترخفات عليا الوقت “شافت فسلمان” ساليت فراش الدار غير ارتاح
سلمان: اخيرا هانتي تهنيتي ورخفتي فيا النفس حتا انا
قرسها من نيفها وهي عين معاه وعين فسلمى لي متايبان والو على وجهها ..تتشرب من مصاصة العصير فصمت وابتسامة ومرة مرة تشاركهم الحديت
جاه اتصال من الخدمة ناض كيف العادة متايتكلمش حداهم وفنفس الوقت علياء وصلاتها رسالة من والتر
(والتر: “علياء.. قلبي ليا عافاك على شي بنت تقابل ليا الدار والماكلة “)
علياء: اوه نسيت
نطقات سلمى باهتمام: ياك لاباس ؟
شافت فيها وتبسمات: هادا ميساج من خطيبي هو لي كنت تانفرش ليه الدار.. دارنا بغيت نقول ههه وكان المفروض نجيب فام دميناج تسيقها على الغبرة وتهتم بيها لكن نسيت
ضحكات بميوعة: سي پا گغاڤ تتوقع.. مي مكنتش عارفاك مخطوبة !فيليسيتاسيو
علياء: اييه مخطوبة الالة ههه وراكي معروضة
سلمى: ههه ميغسي ماشيغي وأحسن كادو ليك
علياء: هههه حضوركم هو احسن كادو
وقف عليهم سلمان وهوما تايضحكو سمن على عسل حط التليفون وبرك داير تبسيمة بجنب فمو: اياياي ..ضحكونا معاكم
سلمى: علياء ايتون بيل فام الهضرة معاها تتفوج
رد بعدما غمز علياء: طبعا .. راه عويناتي هااد البنت “جرها عندو تاضحك باس راسها وقالت”
علياء: هههه صافي اولدي راضية علك راضية
سلمى: ههههه
سلمان: الله يطول لينا فعمرك ههههه
الأيام تتجري والوقت تتجر بنادم كلها وفين لايحاه من الخدمة ومشاغلها لمشاكل الحياة وهمومها.. سلمان نوا المعقول وقرر يخطب سلمى، دخل معاه الصح شي لي خلى قرار علياء يتبت على نفسو.. تتحاول ماتبينش ليه انها تترجع اللور وفينما دوات مع سلمى تتجبد ليها موضوع خطيبها فالحساب.. خايفة وماباغاش غيرة مروى تتكرر فنفس الوقت تحيد عليها تهمة ان بينها وبين سلمان شي حاجة كيفما معظم الناس تاظن
..فالبيرو كانت هازة جوا تتحسب الفلوس وتحط فييه ..قدامها بنت عشرينية بجلابة بالية وزيف حياتي جالسة وتتفرك ايديها العرقانين بشرتها سمراء رقيقة وعينيها تايرمشو فدوك الفلوس
علياء: هانتي هاخلصتك.. راها من مسيو والتر، و غير حيت بقيتي فيا سبقتها لك اما نوغمالمو حتا تكملي سيمانة على الأقل عاد نعطيك
ردت بامتنان: واخت الالة الله يخلي ليك والديك الله يسهل عليك
علياء::آمين سميتي علياء.. التعليمات كلها كتبتهاا لك فالورقة لي عطيتك من الماكلة لي تتعجب مسيو والتر لحوايجو كيف تايبغيهم.. لي جاو قبل منك ماطولوش إن شاء الله نتي يعجبك الحال وتكون خدمتك متقونة
ردت: محتاجة للخدمة اختي علياء ربي يخليك
علياء: آمين… يالله سيري عاد توصلي
ردت: واخا الله يعاون
خرجات وخلاتها تتقاد فشي وراق فوق المكتب.. دخلات المديرة ديالها بعد والتر ..ديما مخنزرة معاجبها حال وعلياء مرة تميك مرة تهضر كلها على حسب المود
المديرة باللغة الإنجليزية قالت: علياء فين لي فاكتور
جاوباتها: فالبيرو لي فلاشومبر ديالك امدام جيرمي
جيرمي: ممم.. ايوا كملي خدمتك مزيان عاد خرجي.. راه غير خاصتك ميزانية عارفة؟ 5000 درهم شكون تايخلص بحال هاد الخلاص
ببسمة ردت: وكانظن نستاهلها !؟ وهاكدا متافقين النهار اللول
سكتات زامة فمها وخدات البيسي تتخدم فيه فحين هي خرجات من البيرو وهابطة للپيسين حتا تاطلع ليها وحدة من البنات تليفونها تايصوني.. لقات عدة مكالمات من طرف سلمان و جاوباتو ببسمة خفيفة
علياء: الو وي
سلمان: عسيلة.. أنا قدام الرياض..
طلات ولقاتو قدام طموبيلتوو واقف مطلع فيها راسو.. شوميز سوداء مع سروال توب اسود وسباط جلدي .ساعة فخمة فايدو وريحتو مجهدة تااضرب فالنيف على بعد طويل ..ببسمة هبطات عندو تتجري فتح عينيه بتبسييمة خفيفة عنقها
علياء: هههه الناس مزيزين ايهااي
سلمان: ضروري “باس ايديها وفتح ليها الباب” طلعي نبدلو السوايع
حكات جنب ودنها: وفين غادين
سلمان: غادي نخطفك مزيانة ؟
ردت تاضحك: مخيرة گااع
طلعات وهو ركب حداها وديمارا ..ماوقف حتال كافي فالخرجة ديال مراكش نزل حل ليها الباب وخدا ايدها داخلين بزوج ..من بعيد تايبانو بحال العشاق.. النظرات والابتسامات والمعانقات والقبل، لكن ماخفي كان أعظم
بركات قدامو خداو قهيوة وعاصير وقالت ببسمة: واحد سلمى اش تتعاود.. تلاقيتي مع باها مازال؟
سلمان: صاڤا الحمد لله.. هادي هي مجيتي من الرباط
حطات ايدها على حنكها: ايوا..دويتي معاه
سلمان: دوينا شوية على الخطبة.. على ماشفت باها انسان محترم الله يعمرها دار وحتا كلامو معقول.. قال بلي هوما فعاداتهم متايطولوش بين الخطوبة والعرس يعني أقل حاجة شهر يتجمع فيها كلشي
علياء: شهر !!!
سلمان: شهر الالة
علياء: وشنو قلتي نتا
رد: جيتو نيشان ..انا مازال ففترة تعارف مع بنتك وباش نبين ان قصدي شريف جيت نتكلم معاك نديرو خطوبة ونتسناو .. حيت باغي نشري داري أولا ونفرشها ماشي نسكنها مع مي .. هاكدا غانتفادا بزاف ديال المشاكل مستقبلا
علياء: ايوا
سلمان: قال نأجلو الخطوبة حتا نقاد اموري كلها.. عاد ندخلو فالرسمي خطوبة وزواج نيشان
بسمات بتعجب تتشوف فيه: سلمان غايتزوج هههه
ضحك وقرصها من حنكها: العقبة ليك.. واخا مكاين لي يستاهلك
رن تليفونو القديم وقالت تاضحك: ههههه مروى هاديك ياك
حرك راسو بالإيجاب: بلاتي نجاوب
..نعام.. مشغول مالك.. قلت مشغول.. شوفي حتا نعاود نعيط ليك باي
طفاه ورماه فوق الطبلة تايزفر: حريق الراس
علياء: حضي منها ..هاد السكات معاجبنيش
سلمان: وعلاش داير جوج تليفونات !؟.. قبل ماكنتش تانقدر نطفي النمرة على قبل الخدمة وتانضطر نجاوبها باش ماتبقاش مصدعاني.. دابة تهنيت درت وحدة جديدة للخدمة وهادي لي عندها تانطفيها وقتما رشقات ليا
علياء: ويسحابليك مغاتعيقش بهاد القلبة لي قلبتي عليها فجأة؟ مهم غير رد البال وصافي
تنهد راد ضهرو للكرسي: إن شاء الله “غمزها” ايوا نتي شنو مشكلتك
ردت بهدوء: فآش
ببسمة قال تايشوف فعينيها: أنا ماشي دري صغير اعلياء راه تانشوف ونميك ونحط اعدار.. ولكن راك كترتي لا؟
علياء: مافهمتش !
سلمان: شحال من مرة تانعيط ليك وتاديري راسك مسامعاهش.. وتاندوز حدا الرياض ونشوفك بعيني حاطاه حداك ومابااغاش تجاوبي.. تاتقول واخا الخدمة ماعليش.. مرة خرا اجي خرجي معانا اجي تغداي معانا ونتي لي فراسك فراسك مرة عيانة مرة خدامة ..شنو نفهم من هادشي !؟
نزلات عينيها كأنه حصلها وحط ليها كلشي اطابل.. سرطات الغصة بصعوبة وقالت: داكشي لي فهمتي
تنهد وقرب كرسيها عندو شاد فايدها وهي مهبطة راسها حابسة البكية بزز
سلمان: انا عارف مكانتي عندك من مكانتك عندي.. هادشي عمرو يتبدل حيت لي بيناتنا نقي وزوين.. ونادر ..شكون هادي لي تبكي عليا الى مرضت.. وتمرض الى غير دگيت برا فلحمي.. وفاش تانغبر تانتوحشها كتر من مي لي ولداتني ..ومارتاح حتا نعنقها عندي ..هه وماتفيق الا على صوتي ..وماتنعس حتا نمسي عليها ؟ صافي هادشي كلو باغا تعفسي عليه
تنفساات بضيق وطلعات فيه عينيها دامعين: هادشي مغاتفهموش صاحبتك اسلمان
سلمان: هي قالت لك شي حاجة !!
ردت بسرعة: لا نهائيا.. ولكن انا بنت وغانفهمها ..حتا وحدة مغاتبغي هاكدا ومن حقها ..اكيد غايدخلوها التناوي وهادشي غايضر علاقتكم
مسح عينيها وقال: هاد الافكار كاينين غير فراسك.. وليتي حساسة شوية هاد الايام لا هههه
علياء: راه تاندوي بصح.. آخر حاجة نبغيها هي نخرب سعادتك ولا نوقف فطريقك “سكتات شوية وهو تايسمع” واخا تكون على حساب فراقي عليك
سلمان: هاكدا ساهلة تقوليها !؟
نزلات راسها معاودش هضرات وهو عندو درعها وففروة شعرها باسها قبلة طويلة وبتنهيدة قال
سلمان: عرفتي اكتر حاجة بغيتها فيك هي قلبك الطيب ..نتي عندي غالية بزاف وحاسبك طرف مني.. خوي هاد الأفكار من راسك الله يرضي عليك.. مامنهم والو وغير تتمرضي بيهم راسك
علياء: مباغة نضر حد
سلمان: تاضري راسك وتاضريني معاك بلاما تحسي
شافت فيه: لمصلاحتك.. تيق بيا البنت والله مغاتفهم هادشي من غدا تقولك اختار بيني وبين فلانة.. علاش تعنقها علاش تزيدها معانا فينما مشينا علاش تشري ليها وتعاونها وعلاش تتبوسها وعلاش وعلاش .. غانتحطو فموقف خايب انا وياك اسلمان حتا واحد مغايبغي المضرة للتاني
طلع حاجب وبدا يطلع ليه الدم: واقلة زدتي فيه وكبرتي الموضوع زيادة عن اللزوم لا
علياء: هادي الحقيقة وتانفكر بواقعية وعلى هاد الأساس تانتصرف
سلمان: تبارك الله عليك الالة وشنو هاد التصرف الصح فنظرك
زيرات ايدها قائلة: نبعد شوية بشوية.. حتا تولف عليا سلمى على الأقل وتبقا علاقتي معاك فحدود
سلمان: هاكدا بان لك؟
حركات راسها متجنبة تشوف فعينيه::آه
وقف: واخا، نوضي نوصلك
عصرات دموعها ملي سبقها للطموبيل.. مسحاتهم بحرقة وتبعاتو ركبات راجعين فحالهم فصمت واحد متايتكلم مع لآخر.. وصلها للرياض وزاد وهي دخلات طالعة للاطيراس وهضرة الناس تادوز من حدا ودنيها بحال الريح ..تهز عقلها وترفع ولات باركة كجسد فارغ تاتخمم وفنفس الدائرة تادور..
ليلة صعيبة دازت عليها وكل مرة تشوف فالتليفون ..معاودش اتاصل والا سول ..واش تقلق ولا كلامها بدا يدور ليه فبالو.. واش اقتانع بلي قالت ولا بغا يعطيها وقت تراجع نفسها.. ولا نساها وتلاها مع حبيبتو
.. تزير خاطرها وحلف النعاس لاجا ..ناضت طيبات ماتاكل مع الستة الصباح بدات ضور فالدار حتا وصلات وقيتة الخدمة ولبسات قادات ميكاب خفيف خبات بيه التعب لي بان على وجهها وخرجات تتجر رجليها للرياض وراسها بالتفكير بدا يتشقق ..دخلات للمطبخ مباشرة حلات التلاجة وقالت تتهزز الماا
علياء؛ عافاكم واحد كافي نوار قاصحة سيفطوها ليا للاطيراس
رد الشيف: واخا امدموزيل علياء
علياء: شكرا
خرجات هازا ساكها وفطبيلة مغطية من الشميشة بركات تترمش فالورد وبالها سارح.. سمعات حس طموبيل ماتخفاش عليها.. مع طلعات عينيها للباب شافتو نازل من الطموببل مغطي عينيه بنظاظر كحلين ولابس تيشورت بيض مع دجين وسبرديلة كحلة.. فتح الباب حداه ونزلات سلمى وراه بدجين ابيض مزير مع شوميز قصيرة والفيسط فايدها مع ساك مربع ونظاظر على شعرها.. تمو داخلين تايقلبو عليها وهي عينيها تشرعو مافهمات والو حتا شافتهم قاصدينها نيشان وسلمان مبتاسم وحاجبو طالع من ديك القهيوة لي تتشرب
سلمان: صباح الخير
تحنا باس راسها وهي ببسمة صفرا تتشوف فيهم ..سلمات عليها سلمى بالحناك وقالت برقة
سلمى: بونجوغ علياء صاڤا ميو
علياء: وي صاڤا ههه نهار كبير هادا شنو تشربو.. بركو بعدا
سلمان: جينا نخطفوك هاد النهار يالله نوضي
ضحكات مستغربة: علاش
شاف فسلمى قائل: سلمى بغات تاخد شي أمور على قبل الخطبة، وبغاتك تكوني معاها
سلمى: غانفرح بزاف الى وافقتي رأيك فعلا تايهمني
شافت فسلمان بنظرات دات معنى وهو شاف سلمى وقال مبسم: سلمى كاين شي پخوبليم انها تكون معانا ؟
سلمى: ههه نن طبعا أنا لي اقتارحت الأمر أصلا
سلمان: مزيان.. يالله تهزي..
خدا ساكها ودرعها عندو خارجين..مالقات مازال كيف دير ترفض وخلاتها فيد الله، سلمى شادة فايدو وهو مدرع علياء لصدرو، منظر يلخبط العين أولا قبل العقل تايخليك غير تشوف وتخيط كيف بغيتي فالتوقعات.
..طلعو معاه وديمارا للسوق.. غادة معاهم بزز وغير دايرة الخاطر فرحانة ملي تتشوفو فرحان لكن فنفس الوقت خايفة فرحتو ماتكملش بسبابها وهادي عمرها تتقلبها
..
سلمى شرات امور بسيطة بعد رأي علياء أي بياسة تخاادت كانت تحت قرارها ..عياو ودخلو لكافي راقية بركو فلاطيراس يرتاحو وعلياء قالت ببسمة
علياء: الله يكمل كلشي بيخير.. انا غانخليكم
شدها مانعها تنوض: لا غاتبركي.. عندنا مانقولو لك
شافت فيهم بزوج: ياك لاباس
خدا يدها وسط ايديه مركز على عينيها بجدية وقال: علياء.. أنا فاش عاد عرفت سلمى وبديت ندوي على راسي قلت ليها عندي جوج عوينات.. وحدة مي، ووحدة علياء.. نتي “شاف فسلمى” وسلمى غاتكون فالقلب
سلمى تبسمات ليه وهو كمل تايشوف فعلياء لي بدات ترمش: عوينتي هي علياء لي عمري نتفرق عليها يكون لي كان..ويوقع ليبغا يوقع، ديما معاها وفجنبها واخا تعيط ليا نصايص الليل غانوض من فراشي على ودها، حيت عارف مغاتتاصل بيا إلا لاكانت محتاجاني ضروري.. إنسانة معقولة بقلب طيب وونعم الاخلاق .. وعمر بلاصتها عندي تبدل حيت حاطها فمقام كبير بزاف
شدات سلمى يدها التانية وقالت: نتي ختو لي ولداتها ليه الدنيا اعلياء ههه سلمان تايضحكو عينيه فاش تايبدا يتكلم عليك وصراحة علاقتكم مميزة بزاف
سلمان: حيت علياء مميزة، وحلات حياتي ملي دخلاتها
سلمى: ههه وماكرهتش تولي ختي حتا انا.. إلى قبلتي عليا
طاحو دموعها لي ماقدراتش تحبس وبدات تتخصص.. كلامهم بكاها وخلا دميعاتها شلال ينزل عمرها تصورات تكون عزيزة عليه لهاد الدرجة كاملة.. ماتحملش دموعها وناض تحنا على رجليه معنقها لعندو ومزيرها فضلوعو باغي يسكتها على البكا وهي غير متتزيد طيحهم
طلعات عينيها صدفة لسلمى ولقاتها عاطية وجهها للجنب متتشوفش فيهم وضفارها فوق الطبلة تايلعبو.. بعدها عليه سلمان تايمسح من وجهها الدميعات ويضحك معاها وهي غير تتفكر، عقلها ممعاهش وعاطياه ابتسامة خفيفة ..خداو مشروبات وسلمى تتمد ليها الحلوة وضحك ليها.. لكن علياء نفسها ضياقت، استنتجات بلي كلام سلمان بزز منها تقبلاتو وماشي من قلبها .. غير مابغاتش تعاكسو وتبان هي الخايبة ..أو ربما تهيء ليها وسلمى تصرفات بعفوية فقط.. كلشي ممكن
رجعها سلمان للرياض تفارقو بالابتسامات وطلعات تتكمل خدمتها لي خلات وموضوع سلمى شاغلها حتا وهي راجعة للدار.. تعشات مع والديها عادي وطلعات لبيتها ببيجامة وردية اللون، جمعات شعرها وبعد روتينها الليلي تكات ففراشها وعينها فالتليفون تتسنا اتصالو.. كالعادة كل ليلة قبلما تنعس ..رن هزاتو مبسمة فاش لقاتو هو وجاوبات
علياء: مسا الخير
رد تايضحك بصوت خفيف: مساء النور
علياء: وصلتي سلمى لدارهم ولا مشات بوحدها
رد: لا مشات فطموبيلتها.. انا نيت عاد دخلت لبيتي ننعس
طلعات حاجب: وكنتي فين ياباشا.. ازير زير راه دخلتي للمعقوول
سلمان: هالباطل ههه كونما كنت باغي نزير مانمشيش للباب ..الزهو تايطلع فالراس والواحد تايبغي يدير دارو وولادو
ضحكات بعفوية فاش تخيلاتو عندو الولاد: الله يكمل بالخير ونشوف وليداتك ياربي
سلمان: اميين
علياء: ايوا فين كنتي معطل
سلمان: هنا نيت، كنت شاد الجماعة مع الواليدة “تنهد مكمل كلامو” تعكسات فموضوع الزواج
غوبشات باستغراب: وعلاش
سلمان؛ سولاتني شنو اصل البنت قلت ليها الرباط.. قالت مايمكنش.. علاش! حيت حنا اصلنا من سلا.. و سلا والرباط متايتلاقاوش ومغانتفاهموش انا وياها إلى مشينا حتا تزوجنا
علياء: شنو!؟ المنطقة ماعندها حتا علاقة بالتفاهم كلو حسب فكر الإنسان وكيفاش عايش
سلمان: هادشي لي قلت ليها.. البنت قارية وواعية، وخدامة فالاجونص ديال الأب ديالها مع خوها.. ومحتارمة راسها ..اش جاب للهضرة رباطية ولا زمامية بالله مافهمت
علياء: غير شوية السياسة وصافي ..خليها دورها فبالها مزيان وقوليها على الأقل تتلاقا بيها بعدا ويديرو جلسة بزوج عاد تحكم
سلمان: حتال الصباح ونعاود ندوي ..دابة عياان
علياء: هههه سير سير تصبح على خير
رد ببحة خفيفة: تصبحي على خير اعسيلتي
قطعات تاطيب نعاسها حتا داتها عينها
الخدمة و جري عليا نجري عليك من هنا لهيه.. تشغلات مع التوريست فالرياض ومن الصباح ماتكلمات هي وسلمان ..لاهو اتاصل لاهي اتاصلات .. طلعو الكليان لليسويت ديالهم وحتا هي طالعة شادة فسيدة كبيرة فالعمر بشعر ابيض وملامح جميلة تايدويو بالفرنسية
علياء: حنا فالمغرب تانقولو.. ملي الزين تايمشي تايبقاو حروفو.. هادا متل مغربي عندنا وصدقيني تاينطابق عليك امدام ههه
ردت تتقيس شعر علياء: ههه نتي الغزالة احبيبتي.. لون شعرك غزال جاي مع ملامحك.. لكن كأنه غير سباغة !
ردت تتضحك: صحيح شعري مارو فالحقيقة.. ولكن ولفت نسبغو بالاشقر حتا من العائلة ولفوه فيا وفاش تايطلع شعري الحقيقي تايقولو ليا واش سبغتيه هههه الوحيدة لي عاقت هي نتي
ردت: ههه غزالة فكل الحالات ربي يحميك
علياء: مييغسي.. نخليك ترتاحي ونتلاقاو فالسهرة ديال العشية.. اوغوڤواغ
سلمات عليها وهبطات للاطيراس، بركات تترتاح وهازة تليفونها تتشوف فرقم سلمان.. قالت ربما يكون مشغول واستبعدات فكرة أن سلمى معاه حيت تتجي لمراكش فلويكاند فقط ..شربات من قهوتها ويالله بغاات تنوض هو يصوني وجاوباتو مبسمة
علياء: الغابر ههه
رد فعجلة من أمرو: اهلين الزين ..فينك فالرياض !؟
علياء: آه .. الأمور هانية
سلمان: دوزي عندي لكافي اليت بغيت نهضر معاك ضروري
قوسات حواجبها: علاش مالك
سلمان: واغير دوزي وتعرفي
ناضت بهلع تجيب ساكها: فين جا ؟
سلمان: عاد تحل فگليز قدام زارا ..دابة تكوني هنا
علياء: سلمى معاك !؟
سلمان: لا وعليها نيت بغيت ندوي معاك
علياء: واخا واخا..
نزلات تتجري بالطالون للشاريع.. اش واقع مالهم؟ تخاسمو ولا دابزو.. ولا ياكما شي مشكل من طرف مروى تاني؟
خدات طاكسي عطاتو العنوان والأفكار تتاخدها وتجيبها، هبطات تتقلب على الكافي ومع دخلات طرطقو فوقها النفاخات بشرائط ملونة ..تصدمات وتبهطات وهي تتشوف سلمان وسلمى قدامها
طاولة من الحلويات المشكلة والكافي مزين ..حاضرين للحفلة البعض من زملاء العمل وسلمان وسلمى.. حفلة عيد ميلادها لي مشا ليها من البال وتفكرو هو.. بسمات وهي تتشوف فيه جاي هاز كيكة العيد ميلاد مزينة الشموع فوقها شاعلين واغنية هابي پورديي تتغنا من طرف الكل..
تفكرو فاش هي نسات وكانت احلى مفاجأة.. حمدات الله بعدا بداية الأسبوع تتكون كلاس المانيكير والبيديكير والبروشينگ مازال مطارو مع تمارا اما كون جا عيد ميلادها فآخر الاسبوع كون تبهدلات قدام سلمى لي دائما وفينما شافتها تتكون فأبهى حلة ..
سلمان: واطفي الشمع ونتي حاضياني
قفزها حتا قالت تاضحك: هههه على زينك
سلمى: زين ابب مالو هههه
علياء: ها وزير الدفاع دوزتيه لصفك برافو
سلمان: هههه طفي الشمس الخايبة طفي
طفاتو وقطعات طرف صغير وكلات سلمان هو الأول وحتا هو هز من لكريم دوزها على حنكها والبسمة فعينيه
سلمان: العقبة لمية عام العسيلة هههه
علياء: هههه ليا وليك
سلمى: جوايو زاني ڤيغسيغ مابيل
خدات من الكيك وكلاتها وسلمان عليها: ميغسي ههه والله فرحتوني بزاف
سلمى: ههه تستاهلي
باركو ليها المدعويين وخدات ليكادو بعوينات تايبريو.. دازت الحفلة جميلة ممتعة ودافئة بوجودهم.. وصلها سلمان للدار تتضحك ماقداها فرحة هبط فتح ليها الباب ونزلات هازة ساك كبير جامع جميع الهدايا لي جاوها
باس راسها وقال مبتاسم: كل عام ونتي احلى
علياء: شكرا بزاف والله
رد تايضحك وغادي يركب: وااكوليها بزااف والله ههه
رجع طلع وهي دخلات لدارهم تتجري للبيتها.. بدلات حوايجها وبركات تحل هادي وطل على هاديك .. وصلات للكادو ديالو وكان عبارة على زوج علب بحماس فتحات الكبيرة وكانت عبارة على ساك اخضر جلدي مع طالون ديالو.. ضحكات تتقرا لامارك لي نفسها تتلبس منها سلمى فعرفات هي لي اختارتو وكان فعلا راقي وغزال.. حطاتهم فالبلاكار ديالها ورجعات حلات العلبة الصغيرة وبسمتها الرقيقة تتوسع ..كانت سلسلة من الدهب ..تتجي بحالا تلاتة السلسلات رقاق تايبريو كل سلسلة وسطها نجيمة وكل نجيمة اصغر من لي تحتها ..عجبتها بزااف وناضت في ساع قيساتها..
هزات كادو سلمى لي عبارة على گورميط رقيقة ديال الدهب فيها نجيمة بالاخضر.. راقية وأنيقة، دوقها مميز وجات على معصمها هو هاداك كأنها ليه تصممات
(قالت ليكم علياء هاد الگرميط وضراتها فالحمام اخواتاتي.. تفقصت بلاصتها)
فأحد الأيام الحارة كعادتها..جالسة بفستان ناعم باج بحزام فضي واكمام قصيرة، تتقهوا فكافي كيشمارا وعينها على التليفون تتسناه ..حتا تم داخل بوجه بارد هاز جاكيط فايدو ولابس بودي خيط اسود مع دجين وسبرديلة ..تبسمات ليه وهو حط سوارتو على الطبلة وتحنا باسها مداعب خدها
سلمان: الزين تمراكش
علياء: هههه وعليكم السلام ..
برك تايزفر وجر كاس الما شرب منو: عيان بالله
علياء: الخدمة عاود ههه
بتاسم: واييه .. هانية نتي
علياء: صاڤا هاحنا ..سلمى شنو خبارها
سلمان: لاباس عليها “سكت شوية وقال” مروى جات لعندي اليوم فالصباح
سرطات الدغمة بسرعة وقالت بهلع: عرفات شي حاجة !!؟
رد: لا ..جات تاتسول علاش متانجاوبهاش علاش مابقيتش تانتلاقاها وزيد وزيد ..ميكت عليها وجاني كليان مهم خليتها تما وخرجت
علياء: ايوا ياكما دارت ليك شي مصيبة تما؟
رد بشك: فاش رجعت لقيت البيرو ماشي كيفما خليتو ..الوراق والبيسي والمجورا كلشي مفتش
علياء: قلبات فيه ؟
سلمان: مممم.. من تما معاود بانت علم الله شنو فراسها
تنهدات وقالت محاولة أنها تطمأنو: مايكون إلا الخير تفاأل.. واخا مزيان تعرف يالله تعطيك بواحد شبر التيساع
ضحك مستزهئ: حتا تكون عندها شي نفس بعدا ..
صونا تليفونو وهوما تايدويو هزو بهدوء وقال
: هادي سلمى
علياء: سلم ليا عليها
سلمان: الو ‘تغيرات ملامح وجهو وتوگض جامع الحواجب” شنو شنو.. دوي بشوية وفهميني اش وقع
خرجو عينين علياء مخلوعة: مااالك
“قربات حداه تتسمع غواتها من التليفون”
سلمى: شوهااتني قدام لي فلاجونص كلهم خلات لي يسوا ولي مايسوا يدوي عليا.. سيپاا ڤغي انااا رداتني خطاافة الرجاال اناااا
غزز سنانو مفقوص: ايمتا جاات
سلمى: هادشي لي تايهمك امسيو سلماان.. ارتابطتي بوحدة مريضة جاات ورونات ليا خدمتي وحيااتي.. سمعة سنين وسخااتها فسااعة وقدام بابا وخويااا وليت تانبان مانسواش مانسوااااش
عضات علياء شفايفها بحزن بقات فيها وسلمان مزير على التليفون تاينفخ النار
سلمان: واخا دابة في كالم عاد نتكلمو.. انا غانتفاهم معاهااا كوني هانية
سلمى: كاالم ؟ هههه كيفاش غانتكالما ورا هاد المصيبة لي تسببتي ليا فيهااا.. عارف رااسك شنو درتي ولا لا
رد مخنزر ودمو تايفور: واناا شنو دنبي اسلمى ..فأول نهار قلت ليك لي كاين وبلي مريضة وتابعاني و انا عمري مازال نشوفها ..ووفيت بكلمتي حد الآن
سلمى: هادي فااتت المرض للهيه.. جاااية قداام لاجونص تتغوت بهستيرية كلشي خرج لعندها.. كونما السيكيريتي لي رماها براا كون قتلاتني ..وزايداها بالغوات والسباان، باباا من ورا هادشي لي شااف يستحيل يقبل عليك مازال يستحيل
رد بصوت منخفض: وشنو معنى هاد الكلام
سلمى: سمحيليا اسلمان ..مي سيفيني اڤيك نو
طلع النفس تايحرك راسو: داكوغ الالة سيفيني.. الله يسهل عليك بماحسن
قطع وبلوكاها فالبلاصة وعلياء مجبدة عينيها بصدمة ..شافتو ناض تايترعد جبد بسرعة الفلوس من جيبو وتم قاصد الباب بخطوات سريعة وعبياء تبعاتو تتجري وتعيط عليه
ركب وزاد.. عينيه معميين بالغضب غير من طريقة الصوگان ديالو بسرعة جبدات تليفونها بمحاولة تتاصل بيه لكن متايجاوبش ومعرفاتو فين غادي
علياء: الله يدوز هاد الليلة على خير
أدن عليها المغرب وشيرات لطاكسي ردها لدارهم .. طول العشية وهي تتصوني عليه بدون مجيب حتا فقدات الامل ودخلات لفراشها تنعس هو يتاصل
علياء: سلمان فينك عرفتي من ايمتا وأنا تانصوني
سلمان: بالتلفة خليتو فالطموبيل
تنهدات تتفرك شعرها وقالت: تلاقيتي بمروى
سلمان: لا غابر ليها الاتر، عارفة راسها اش دارت
دوراتها فدماغها تتفكر: قلتي الصباح جات للمكتب.. غاتكون قرات الميساجات لي بينكم ولقات عنوان لاجونص ..تما شدات ديك الساعة الطريق للرباط داكشي باش ماوصلات حتال ديك الستة السبعة
زفر والنار فصوتو: هادشي لي داارت زادت فيه وفوتات
علياء: خاصها وقت باش ترجع غالبا مغاتجي حتال غدا.. من هنا لتما حاول تبرد شوية
سلمان: الموقف لي حطاتني فييه ولا لا
سكتات شوية وقالت: تبغي نتكلم لك مع سلمى
رد: لا واياك
علياء: باش تفهم أن لي وقع ماعندك فيه حتا دخل..و غاتكون قالت داك الكلام فساعة غضب ودابة تتسنا خطوة منك
سلمان: ماشي فالرزق الله يعاونها كون بغات تفهم كانت غاتفهم.. غير ماكنتش باغي الفراق يكون بهاد الطريقة
تنهدات: الله يصاوب
سلمان: امين.. تصبحي على خير
علياء: تصبح على خير
صبحات فالرياض مشغولة مع خدمتها.. الكليان نزلو يمشيو رافقاتهم للباب في سلام ودعاتهم وحتا كانت داخلة هي تجي عندها البنت فريسيپشن هازة حقيبة نسائية مربعة
قالت: مدموزيل علياء ..السياح لي عاد مشاو دابة نساو هادي على الطبلة
خداتها تتفحصها بعينيها: تأكدتو بلي نساو غير هادي
ردت: آه.. نعيط لشي حد يلحق عليهم للمطار
علياء: لا بلاش انا غانوصلها ليهم ..كانت شي حاجة علميني
خرجات واخدة طاكسي وللمطار متوجهة ..غادة تتشوف فالطريق وفساعتها حتا تتلمح سيارة سلمان مبللاصية جنب الشاريع.. كمشات حواجبها باستغراب وطلعات راسها فالشركة لي قدام طموبيلتو هي تقول بسرعة
علياء: بلاتي بلاتي وقف هنا عافاك
نزلات بعدما عرفاتها شركة الهندسة لي خدامة فيها مروى ..وماحدها تتقرب وهي تتسمع الغوات والصداع
دخلات متبعة صوت الغوات وقدامها شافت واحد من صحاب سلمان لي تتعرف غادي جاي بتوتر.. غير هز فيها عينو مشات ليه تتجري وهو قال: عليااء عتقي اختي غاايقتلهاا ولا يدير فيها شي مصيبة
ردت بخووف تترعد: علاااش ااصلاا اا خليتيه يجي كنتي تعلمني بعداا
دفعات الموضفين من الباب حلاتو وشهقات بصدمة حتا قلبها بغا يطيح بين رجليها.. كان كلو معصور بالاعصاب وتايضربها كأنها رجل لي قدامو ماشي مرا بجسد هزيل.. يجرها من حوايجها ويلتخها من الأرض ويعاود يجرها والكروشيات تايتخشاو فوجهها حتا ولا كلو كدمااات وغواتها كاسر الدنياا حلفات لاسكتات وكلامها وقود لغضبو
مروى: عمري “بدات تتكح الدم” عمرري ..عمري نتفرق عليك غييير قتلني قتلللني قتتتتلنيييييي
سلمان: غاااتفرقييني بزز على الق***** مك “
دفعها برجلو حتا تزدح ضهرها بالحيط وغوتات” اللله ينعل النهااار لي عرفتك فييه
علياء: سلمااان حباااس ” لوات عليه ايديها من اللور تتبعدو عليها” طلق منهاااا بااراااكاا
شافتها مروى كيف تتجرو هي تصعر ودمهاا سخن، سلمان شانق عليها وهي عينيها حارين فعلياء
مروى: حيدي عليه ايديييك الكلبة متمسيييهش
تجاهلاتها وبدات تجرو: سلمااان زييد معااياااا وااش باغيهااا تموووت لك فايييدك
دخل حتا صااحبو: سلمان طلق من المرض غاتوسخ فيها ايديك اصاحبي
ضربها بايدو حتا تزدحات مع الفوطوي بغا يمشي ليها وجات علياء قدامو
سلمان: حييدي
علياء: ممحيدااااش قلت ليك زييدد معاايا
ضحكات مروى بلسان تقيل والسخفة بدات تجيها: هههه رااه كان غايتزوج الق**** ونتي فداار غفلووون .. سالا منك وبدا يقلب على البدديل ساعا والله لاكانت ليه ماحدي حية عمرو يحلم بغيييري
سلمان: نتي منييين طييينتك منين اصل مك وااااعطيني التيقااار فرقييني علييييك
مروى: عمرها تكون.. نتااا دياااالي
سلمان: اناااا ديااال ك**
دفع علياء على غفلة وتحنا صلاها حتا ضاار وجهها ..بغا يزيدها التانية وشداتو علياء تتجرو بكل جهدها وتغوت
علياء: منييييير جر معااايااا
تدخل صاحبو تايجرو معاها بزز بااش خرجوه من داك البيرو اما كان مازاال باغي يفدي فيها گاع الفقايس والمرض لي ركبات فيه ..تغشاو عينيه كلياا واستفزازها ليه زاد شعلو
..هوما خارجين وعلياء تتشوف فالموضفين باستغراب حلو لسلمان الباب اللوراني ركب و سداتو وراه قائلة
علياء: هادو علاش حتا واحد فيهم ماقد يدخل يفارق وااش لهاد الدرجة بنادم قلبو بارد
منير: علاه خلاتهم بعدا؟ لي بغا يتدخل تتقوليه دخل سوق راسك أما البنت لي بغات تجرو تتزدق هي ناتفاها.. مريضة هاديك بالله إلى انورمال
علياء: ياربي السلامة
منير: شوفي غير الحالة لي وصلاتو ليها
تنهدات قائلة: وصلنا للرياض عافاك
رد: واخا اختي طلعي
ركبات حداه وهو ديمارا غادين فصمت فقط نظراتها لسلمان من المرايا..راد راسو اللور وايديه على عينيه صدرو طالع هابط مازال مابرد ..
وصلو للرياض هبطو بزوج وفلاطيرات بركو.. طلبات ليه قهيوة كيف تايبغي يشربها وبركات قدامو مربعة ايديها
علياء: شوية دابة ؟
حرك راسو ساكت و قالب وجهو جهة الشاريع
علياء: تفكرتي اش درتي ؟.. باش بالسلامة غاتفكها إلى وصلات الخبار للبوليس
رد بصوت بارد: مغاتوصلش
تنهدات وقالت: سلمان نتاا فين عمرك مديتي حتا ايدك على مرا.. شفتي علاش قلت ليك ماتهضر معااها حتا تبرد.. كونماا فكينااك فين كنتي غاتوصل تقتلها عاد ترتاح ؟؟
ساكت فقط تايسمع ليها ومعارفاش راسو اش تايدور فيه ..سكتات بدورها وورا گاع لي وقع مابقات عرفات اش تتوقع أو شنو ممكن يوقع ..الاحتمال الوحيد لي جا فبالها قالتو بصوت عالي
علياء: من ورا هاد القتلة لي كلات، إلى عاود ضارت جيهتك راه لحمها رخيص عليها
سمعاتو ضحك بلاما يشوف فيها وقال ببرود: غاترجع.. غير يبراو دوك الضرابي وغاتشوفيها لاسقة فجنابي مرة خرا
علياء: انا صافي فكيت حماري معاها.. غير الله يدوز هادشي على خير وصافي
وقف تايحك عينيه بعياء وقال: غانمشي نرتاح شوية، حاس براسي غايتفرگع
علياء: تبغي نمشي معاك حتا توصل للدار
سلمان: لا مكاين لاش ..بسلامة
خرج تايجر رجليه وهي بأسى متبعاه ..إلى مخافت تكدب اسوء حاجة وقعات لسلمان ورا گاع السنوات لي مشاو من عمرو هي مروى.. بقصد او بدون قصد خربات أهم الأمور فحياتو ومازال العاطي يعطي الله اعلم الوقت اش مازال مخبية.. لكن اهم حاجة ، هي أنه ورا كل شيء تيباان لينا خايب وكحل مافيه مايتشاف، كاين خير.. وعوض كبير من الله سبحانه ماعارفو إلا هو.. أفضل بكتير من داك الشي لي كنا حنا باغينو وماصدقش.. ونعم بالله الوكيل
هزات كاس القهوة للمطبخ لقات الپاطرونة تما واقفة عليهم وقالت ضايرة عندها ببرود
المديرة: علياء، بعض اغراض مسيو والتر حطيتهم ليك فوق الطبلة تديهم ليه
ردت بتدكر: وي كان سيفط ليا ميساج.. فاش نكون خارجة غانديهم فطريقي
ردت: اوك
كملات خدمتها حتا وصلات الستة ديال العشية وخرجات هازة كرطونة مربعة للشاريع خدات طاكسي لگيليز فين متواجدة دارو ..وصلات وطلعات فالاسونسور وقفات قدام الباب تتدق وتسناه يحل.. كمشات حجبانها ورجعات دقات بدون مجيب.. جربات تحل بضوبل السوارت لي كان عندها لكن مبغاش مما يعنيه ان الباب مسدود من لداخل و بلي والتر كاين فالدار، عاود دقات ودقات ودقات عااد فتح اخيرا.. لابس ببينوار ديال الحمام ووجهو حمر شافها وقال بشيء من اللارتباك
والتر: اااه علياء ههه اهلا حبيبتي دخلي
غوبشات فيه: نص ساعة وانا تاندق ماسمعتينيش؟
والتر: كنت فالحمام كيف تتشوفي ههه
طلعات حاجبها داخلة، دوزات عينها للكوزينة وشافت الخدامة تتقاد صدايف اللباس ديالها وشعرها مخربق.. عوجات فمها وحطات الساك والعلبة فوق الطبلة
علياء: ممكن تجيب ليا كاس الما؟ ولا ندخل أنا نجيبو
وقف: لا لا انا نجيبو لحبيبتي ههه ارتاحي
علياء: شكرا
مشا وهي دخلات لبيت النعاس تادوز عينها على السرير لي مخربق فراشو.. شافت حاجة فازگة وسطو دوزات شوية ايدها على الطبعة وفهمات الامر.. خرجات بهدوء لقاتو جايب ليها الما بسمات ليه وفاتتو داخلة للكوزينة بلاما تشوف جهة الخدامة.. كبات الصابون على ايدها تتفرك وتغسل طلقات الما وشللات عاد رجعات لعندو
والتر: تشربي شي حاجة؟.. ولا شنو بان ليك نتعشاو اليوم بزوج
بركات قدامو مهدنة وبنظرات اشمئزاز تاطلع فيه وتهبط.. خرجات لعندهم الخدامة وقالت بميوعة: مسيو والتر بغيتي شي حاجة؟
علياء: هه، ياريت فقط بقيتي فصورة داك الإنسان لي كنت محتارماه.. ياريت
جمع حجبانو: شنو
طلعات فيهم وهبطات: وليتي تنعس مع الخدامات ، مع وحدة أنا لي جبتها ليك ووصيتك عليها !الدناءة وصلات لهنا عندك
زاد حمار وجهو وقال: علياء اش هاد الاتهام شنو تتخربقي
الخدامة: مسيو والتر انا غانمشي
خرجات وعلياء باستهزاء شافت فيه: كون غير شجاع بعدا وباراكة علك من الكدوب..
والتر: علياء راك فهمتي الموضوع غلط
لاحت عليه السوارت لي عندها وقالت بصرامة: من اليوم ماتعرفني مانعرفك.. اخر مرة تجبد سميتي على فمك وآخر مرة نشوف فيها وجهك تتسمع.. نمرتك غانضرب عليها وحسن ليك دير بحالي ..اوغوڤواغ
ناضت من تما وخرجات تتبلوكيه من تليفونها.. هنا اتاخدات قرارها.. كانت محتاجة لهاد اللقطة باش تحسم الأمر تجاهو وتحط النقطة على السطر.. نقطة النهاية وقلب الصفحة لاحدات جديدة دون تواجد شخص فحياتها اسمو والتر
غابت سيرتو على عقلها لكن طيف افعالو لازال ملاحقينها.. علياء كانت اليد اليمين ليه وسندو فخدمتو وحياتو قبلما تكون خطيبتو.. لكن نهار خلاتو فأشد وقت هو محتاج ليها وكان غايبدا مشروع جديد خاصو فيه العوين، متقبلهاش وتما بدات ريحتو تعطي وتبان..
وقف عليها فأحد الايام وهي فخدمتها.. دخل للرياض كأيها الناس حيد النظاظر تايتسناها وهي خلات الكليان خارجة لعندو وايديها مربعين ببرود
علياء: مرحبا امسيو.. كاين شي مانقضيو؟
تنهد وقال برجاء: ممكن على الأقل تبركي ندويو
جلسات قدامو فلاطيراس معلية حاجبها: تفضل
والتر: علياء ..عافاك خلينا نبداو صفحة جديدة، حتال ايمتا غاتبقاي سادة عليا التليفون ومراضياش دوي معايا، شوفي شحال من نهار داز خلينا نبداو من الزيرو انا وياك.. سيلطوبلي احبيبتي
ضحكات باستهزاء: انا وياك؟ .. شي حاجة سميتها انا وياك غير نساها، و إلى عاود سمعتها غانوض فحالي
والتر: شوفي “وراها اوراق القصبة لي ناوي يفتح” سميتها علياء.. ومستاعد نكتب ليك النصف فيها كمهر فعقد زواجنا
قلبات عليه عينيها: غير تتعدب راسك اولتر.. انا مغانقدرش نكون فعلاقة مع واحد ولا تايبان ليا مسخ.. توسختي فعيني ومابقاش داك الاحترام ليكنت تانكنو ليك ..
ناضت وقال بسرعة: علياء فكري مزيان حيت غاتندمي على هاد القرار
علياء: الله يعاون
خلاتو وهزات ساكها خارجة من الرياض والوجهة جامع الفنا ..على رجليها تتمشا وتشوف الدنيا بدات ظلام والشوارع تتعمر بالباشار، الجو تايبرد وفنفس الوقت دافئ بطريقة عجيبة ..دخلات لأحد المطاعم وريحة الماكلة عاطية كدالك الدعوة عامرة هالي جاي يتعشا هالي جاي يتقهوا وهي عيونها تتبحت على صديق الدرب، انيسها ومؤنسها لي عليه تتحط الراس وولا جزء لا يتجزأ منها، حتا شافتو عند احد الطاولات جالس تايتساناها ..وصلات عندو راسمة ابتسامة جميلة وهو طلع فيها راسو تحنات تسلم عليه و ايدو على خصرها جر ليها كرسي حداه تايضحك
سلمان: على السلامة
علياء: الله يسلمك.. شنو تعطلت ؟
سلمان: جيتي فوقتك ..اش تاخدي
طلبو العشا مشاركين الطعاام وتايتكلمو مرة
مرة على الخدمة حتا قالت
علياء: والتر جا اليوم يشوفني
سلمان: وشنو بغا !؟
بهدوء: تايدوي على نرجعو ونبداو صفحة جديدة وماعرفت اش مازال.. خليتو وخرجت ..
رد بجدية: حضي راسك من هاد النوع ..تايبدا يضرب غير من لتحت لتحت
علياء: لي فجهدو يديرو مخالعنيش.. بالعكس الحمد لله حليت عينيا على بزاف الأمور.. اكبر غلطة فحياتي هي كنت غانتزوج بيه
مروى: السلاام
تلفتو مصدومين بشوفتها بزوج ..الضحيكة فالوجه صافية لابسة كسيوة موردة وحجابها مع ساك على معصمها محطوط وواخا لابسة الطالون مازال تتبان قصيرة ..تحنات عند سلمان باستو فحنكو وقالت بغنج
مروى: بونسوار حبيبي “طلعات صباع ايديها لعلياء لي بدات تجيها الضحكة” هاي
جاوباتها بنفس طريقتها : ههههه هاي
قلبات وجهها تتضحك وسلمان لسانو تلجم هبط راسو تايحك جبهتو ويردد: لاحول ولاقوة إلا بالله
مروى: ايوا اش تاديرو
علياء: هههههه سلمان مد ليا الما حداك
هز كاس الما وسدات عينيها بمعنى واش نمشي لكن طلع فيها حاجب حتا بركات.. قاد جلستو ممسوقش لمروى وكمل معاها الكلام
سلمان: نتي غير ردي البال.. قلتي هو تايعرف هادي لي شرات الرياض؟
علياء: سي.. اصلا ممفاهماش معاها بزاف قالت لك التمن ديالي معاجبهاش
سلمان: ركزي فخدمتك وضبر لراسها .. يالله نمشيو ؟
علياء: اوك
ناضو ووقفات معاه حتا مروى تاتشد فدراعو ..جر علياء درعها وغادين لسيارتو بغات مروى طلع القدام وحبسها مطلع حاجب
سلمان: فين بالسلامة
مروى: مغاتوصلنيش !؟
سلمان: قلت ليك اجي؟
مروى: ياااك.. هادا جزائي حيت طفيت الغضب وجيت ندوي معاك.. على الأقل وصلني شنو فيها؟
رد ببرود: فين طموبيلتك
مروى: بقات عند السيكليس جيت غير فطاكسي
سلمان: حتا دابة سيري فطاكسي حنا عندنا مايدار
فتح لعلياء طلعات حداه وحاسة بنظارتها قرطاس ..طلع وديمارا نيشان لگيليز وقف قدام كافي تما ونزلو تايزفر
سلمان: هاهي رجعات “شاف فعلياء” كي دارت عرفاتنا تما؟
ردت تاضحك: هههه مانعرف
سلمان: وكاضحكي ههه
علياء: مافهمتهاش هاد البنت بالله
برك حداها رامي ايدو ورا ضهرها وطلع ايدو للسيرفور
سلمان: عصير بارد للغزالة وواحد براد ديال اتاي
علياء: غاتكون جات أما صدفة.. أما تبعاتك أما شي حد تايوصل ليها خبارك هههه وكلشي نتوقعو منها
تنهد قالب وجهو لشعرها: المرض الخاوي غايبدا عاود
علياء: ياك نتا ولد سلا ..تصاحب مع شي سلاوية وخليها بيناتهم هههه مع مروى تبغي تدخل بيناتكمم لخرا غاتقطعها لك طراف
ضحك: ونوحل أنا من مريضة لمشرملة
شافت فيه بنظرات مبتسمة وهو تايحرك ايديه بلطف مع شعرها: شفتي ياك غير مروى.. خاصاك شي مرا فحياتك عاد غاتعطيك بالتيساع اما هاكدا راه بحالا تتكب الما فالرملة ديما غايبقا عندها امل
سلمان: راك شفتي على عينك اش وقع
علياء: مرا تكون تتبغيك اسلمان ..وحتا نتا تتبغيها وتواجهو بحال هاد المشاكل بزوج .. ماشي وحدة تهرب عند أول مشكل ونتا عندك عادي فين الحب فهادشي
قرسها من حنكها: ههه الحب.. وأنا؟
علياء: هانتا غاتبدا تاني ..مالو الحب؟
تنهد: الحب مابيه والو ..الناس لي وسخوه بالخيانة والغدر، خلاوه يولي ضبابة اعلياء
علياء: ونتا شنو خالعك !؟
سلمان: كلشي ..الحب ورا الزواج احسن ..اما قبل صعيب و مافيه ضمانة
ضارت قدامها مرة خرا: انا فرأيي زوين تعرف على واحد الشخص وتبغيو بعضياتكم بعدا عاد تكملو داك الحب بالزواج..
ضحك ساهي: كان عندي واحد صاحبي عندو نفس تفكيرك
علياء: فين هو دابة
سلمان: ماعرفتش.. آخر مرة كان فسبيطار الحماق وعلاما سمعت من بعد تشد فالحبس
خرجات فيه عينيها: بسبب الحب
سلمان: بسبب الحب العسيلة..خرجات عليه وحدة كان تايبغيها بزاف
ردت بأسى: منين تتعرفو نتا؟
سلمان: كنا تانقراو فنفس لافاك ماشي شي صحاب ولكن كنا شلة وحدة وعزاز على بعضياتنا.. وكانت بيناتنا واحد البنت سميتها فاطمة.. صوتها واعر ومرة مرة تتغني لينا واخا كنا كبر منها تتجي تجمع معانا
علياء: اها
سلمان: شوية تصاحب معاها هاد الولد لي قلت ليك وكلشي عرف بعلاقتهم.. كان معاها راجل وتايبغيها بزاف.. لي حلات عليها فمها تحضر وتايصرف ليها على دارهم ..حتا قلبات عليه قلبة وحدة وبدا يسمع الناس تتهضر وبلي عرفات واحد الگاوري وتزوجات بيه
علياء: ايوا
سلمان: مشا لدارهم تايجري وخرجات ليه مها، قلبات عليه سيفتها و قالت ليه فرق عليك بنتي ونتا ماشي راجل ..قاليها واخا انا غانوريك الرجلة كيف دايرة، خلا حتال ليلة العرس كانت ديك البنت خارجة من الحمام مع صحاباتها هو يكب عليها ليصانص ورما عليها قرعة خرا فيها ليصانص شاعل خلاها تتولوا فالعافية
خيبات سيفتها: السلامة ..تفكرت هاد البنت شكون كانت كبر مني و قرينا فنفس ليسي.. وباقا نعقل فاش وصلاتني الخبار على لي وقع ليها تصدمت ..كانت زوينة بزاف
سلمان: وزينها غرها ..وهو مسكين ضيع حياتو، شدوه الناس تايغوت ويقوليها قولي لمك انا راجل ..هي داوها للسبيطار وهو للحبس ملي شافوه شوية ماشي حتال لهيه فعقلو داوه لسبيطار الحماق.. ولكن خرج ودخلوه للحبس يكمل العقوبة ديالو وهي الله أعلم فين صدات
تنهدت بضيق: سمعت داها راجلها يعالجها على برا
زاد تنهد حتا هو: لي وقع ليه كان صدمة لينا كاملين.. الحب صعيب يقدر يحمق بنادم ويصلو لشي أمور صعيب يتقبلها العقل
علياء: ماشي كلشي بحال بحال تاني
سلمان: ايوا الله يلاقينا مع لي حسن منا
علياء::آمين “بدا البرد يطلع معاها وقالت تتفوه” شحال فالساعة
طل على ساعة يدو وقال: تعطل الوقت.. يالله نمشيو؟
جبدات ايديها تتكسل: اوك يالله
خلص وهز مسائلو خارجين من المقهى ..وصلها للحومة ديالهم وتسنا حتا طلعات للدار عاد مشا.. بدلات حوايجها وتكات تنعس هو يتاصل مرة تانية دواو شوية مسا عليها ونعسات تستاعد ليوم آخر ..
صبحات فالبيرو تتقاد اوراق الضرائب وتحسب.. لابسة فستان اسود كمامو قصار تحت الركبة شوية مع ليبا موس وطالون متلت ..تفتح الباب و دخلات عليها المديرة حاجبها طالع
علياء: صباح الخير
مدام جيمري: صباح الخير
علياء: اليوم راس الشهر وخاصني ننزل للموضفين خلاصهم راك عارفة
بدات تتنفخ وحلات الكوفر ديالها: الخلصة ديالهم كم وديالك نتي كم اخر.. “هزات البراوات تتعاود تحسبهم” وزايدون كنتي تتخلصي بداك التمن فقط لأنك خطيبتو.. هادي مكنتش عارفاها
علياء عقدات حجبانها بانزعاج: كلامك غالط امدام جيرمي أنا تانتخلص على حسب خدمتي فقط
شافت فيها: هه متأكدة ؟ “هزات البيسي داخلة للايماي ووراتها الرسائل لي توصلات بيهم من والتر” خودي قراي.. غير حيت خطيبتو حدد ليك داك التمن وانا بزز وافقت عليه فاش بغيت نشري الرياض.. هادشي بزاف عليا اعلياء بزاف
زيرات على سنانها تتقرا كلامو، الأعصاب تايطلعو معاها وزادت فهمات بلي مابقاتش باغاها تخدم فالرياض وكلام والتر زندها.. سدات البيسي وناضت معلية راسها
علياء: واخا لي بان ليك.. بسلامة
مدام جيرمي: غاتخرجي من الخدمة!!!؟
علياء: انا على حسب خدمتي تانتخلص وعارفة نستاهل هاد التمن، ماشي غانرضا بزوج دريال وتاكليني فحقي.. مادام ماعجبكش الله يعاون
مدام جيرمي: لي بغيتي
خرجات من البيرو هازة ساكها وتتنهد.. وصلات للكونطابل لقات المديرة متاصلة بيه خدات اتعابها وشافت فالرياض لآخر مرة تتحصر.. الرياض لي علاتو درجة درجة وبنات عليه امال كتيرة هاهي خارجة منو وآخر مرة مازال ترجع ليه ولات شومور دابة وغاتبدا رحلة البحت عن عمل مرة أخرى.. هادي لي مكانت ضاربة ليها حساب
يتبع
شاركنا رأيك في هذا الفصل 🌹