شكون فينا تخيلات فيوم من الايام تاخد الثلث او حتى النص فقلب الرجل، لا انا ولا انتي تقبل بهاد القسمة اًو ترضى بيها .. انا عن نفسي لن اقبل. ابدا حتى ولو عشت عمري كله وحيدة .. هاذه قناعتي منذ طفولتي .. وهاذا ما كنت اقوله دائما ،. لاكن هاذا ما اقوله انا وليس ما يقوله القدر .
هاذه انا .. سارة .. البنت اللي الخلوقة المربية اللي تتمناها فكل دار .. ريفية الاصل ابا عن جد .. لاكن لا طالما كرهت هاذا ألاصل وهذا النسب وهاده العاىلة.. بالرغم من حبي رتقديسي لشيء اسمه العاىلة وتشبثت بيها لاكن كنت اتمنى من اعماق قلبي ان تتغير في يوم ما ولا زلت اعيش على املي هاذا .. اعرف ان الطباع والتقاليد المثوارثة يستحيل تغييرها لاكن املي كبير .. فإن تحقق مرادي. فلي ذلك .. وان لم يتحقق فقد عشت بذلك الامل .. افضل من اعيش بدونه . لم تفقهو كلامي اليس كذلك ؟ .. حسنا .. نزيد نوضح شوية واخا كولشي غيًوضاح من بعد ، قصتي اللي عمرني تخيلت فيوم من الايام تكون ديال .. عمرني تخيلت نكون من غير نفسي .. من غير سارة .. سارة الفتاة الناجحة و المهدبة و الخجولة ، انا اصغر اخواتي الاربعة والخامسة فبنات الامام .. ابي. امام المسجد .. الرجل الحكيم الحقاني والتابع للشريعة الاسلامية . تربت بناته احسن تربية وافتخر فكل مرة تضرب بنا المثل وسط العاىلة والحي والاقارب .
تزوجو اخواتي كلهم من خيرة الرجال لاكن بطريقة ربما تجيكم غريبة ،. لانهم ماختاروش ازواجهم بنفسهم او سبق وكانت بناتهم علاقة. كان الاب ديالي اللي كيختار الزوج وكيطلبو للزواج لوحدة من بناته .. واخا كنت كنكره هاد الطريقة لاكن جابت نتيجة وكان بابا كيجيب الاصابة فكل مرة وكل ازواجهم صدقو رجال ونعم الرجال ، لاكن انا .. اااه انا وشنو مصيري حتما معاديش نخرج من الجماعة وهادشي اللي خالعني ومخليني نكره اصولي الريفية .. التسلط. والحكام كيخليني نتمنى الموت ونحيا من جديد فشي وسط مختالف غير الوسط اللي عايشة فيه .
كرست حياتي فرضى والديا وكان طلبي الوحيد من ابي هوا يخليني نقرا ونكمل قرايتي و وافقني الراي وكان كيرضا فكل مرة طلعت فيها من الاواىل حتى خديت الدكتوراه ديالي وكان داك النهار اسعد يوم فحياتي .. حققت فيه نجاحي وحلمي وطموحي اللي كنت داىما متخوفة انه يترقف شي نهار بسبب راجل،. حيت كنت عارفة انه فور ما يبان الرجل اللي يشوفو بابا مناسب ليا غادي يزوجني ليه رغم انفي ، هادشي اللي كان داىما مخوفني ومخليني نلمح لبابا فكل مرة انني مستاعدة نقبل بالراجل اللي يختار ليا ومانتمردش او نخلق مشاكل لاكن يخليني حتى نسجل الهدف الاول فطموحاتي ونسايرو فقراراته في ما يخص حياتي …. حياتي اللي اصلا لا دخل لشي واحد فيها وانا اللي كيحق ليا نقرر فيها اللي يناسبني واللي مايناسبني ،، اااهًٍ.. حكايتي مرهقة ومتعبة بالنسبة لي … ستحبونني ثارة وستكرهونني ثارة اخرى .. لاكن تذكرو ان من يسبح في قعر البحر باحثا عن شاطىء النجاة ليس كمن يجلس على مقعد في الطاىرة .. ينضر للاسفل ويحدد الاتجاهات
رن هاتفي للمرة العاشرة وانا فقمة سعادتي بنجاحي ، فتحت المكالمة نستقبل المباركة التالية وابتسمت لصوته وحسيت بالفخر وهوا كيبارك ليا ويشجعني .. انه حبيبي منذ ثلاتة سنوات “يونس ” .طلعت بسرعة جريا للسطح باش نهضر فراحتي وختاريت الركن المناسب وفتحت الخط والضحكة متشنجة خدودي
قالي: اااححح عل صويت كنسمعو كيمحي ليا الستريس… توحشت هضرتك الحلوة
ضحكني قلت ليه : هضرتي غادي تسمعها لاكن وجهي اللي فالشك واش تقدر تشوفو
قالي: دابا ناي كتقولي وجهي فالشك تشوفو .. ونتي ماديريش محاولة تشوفي وجهي باش نحيد الشك حتى انا وتشوف وجهك ؟
فكرني فالحكام وتنهدت قلت ليه :بلا منشرح ليك من الاول راك عارف كولشي.. لقرانا بزز باش قريت والخروج بالمرافقة ونتا راك داري بشنو كاين … ماعندي مانخبي عليك
تنهد قالي : وايلي دابا مانشوفكش كاع زعما واخا غير دقيقة
بقيت ساكتة عييت من تكرار الهضرة وهاد الحجر فالطريق اللي مابغاش يتنقى وقلت وختاصرت ليه كولشي فكلمة وقلت ليه لا حتى الى خدمت ولا بديت شي سطاج ديك الساعة نقدرو نتلاقاو
قالي ديري شي محاولة باش نشوفك وتشوفيني
تنهدت وقلت ليه المحاولات اللي بقاو ليا يالله نقدر نخرج بيهم راسي من زواج با اللي فيكون كيفكو دابا باش يزوجني خصوصا مللي ساليت قرايتي .. يكون دابا كيقلب ليا على الراجل كي دار لخواتاتي
قالي واش هاد باك متأكدة بعقلو ماشي حمق!! يختار ليك الراجل ويحيبو ليك بزز
ماعجباتنيش هضرتو على بابا وتقلقت قلت ليه :حيت مابقاش الرجال فهاد الوقت داكشي علاش كيخطب لبنتو ماشي يعطيها لمن والا
خليت ليه ديك الهضرة فودنو وقطعت .. مهما كان منبغيش اللي يجبد ليا واليديا بكلمة دالعيب .. انا ليوم صحة سلام ومحفوظة بفضلهم من بعد فضل الله سبحانه وتعالى ، ربيت فبيت تحت جناحهم وكليت وشربت وعمر الخير خصني واخا الحكام القاصي والتسلط لاكن تعودنا عليه منذ الصغر .. كنحمد ربي عندي اسرة وبيت وجناح مخبية تحته ماعارفاش اللقمة كيفاش كتجي .. غير كنحل فمي وناكل وعندي سقف حاميني من حر الشمس وبرد الشتا وفراش نقي وملابس مدفياني .. معارفاش بحر الشقاء رالتكرفيس اللي عايشينو بزاف ديال الناس ، ماكليت عصا ما تعدبت ومرتاحة .. هاد النعم اللي مكتبانش لبزاف ديال البنات ومكيعرف بحقها غير اللي كبر يتيم وعاش الشقاء فحياته ، لاكن انا باينين ليا خصوصا فاش كنشوف وجهي فالنرايا والخير باين عليه ..شمس حارقاه ولا برد يمشق شفايفي ..معززة مكرمة وكما هزوني وتهلاو فيا مستعدة نفديهم بحياتي ..والى كنت رافضة شي راي او قرار فأنا رافضاه بالحسنى والمعروف ماشي بالطغيان و العنف .. واخا انا الوحيدة المتمردة فخواتاتي لاكن تمردي ينتهي عند تمرد والديا ولا يعلى صوتي على صوتهم او تبان جبهتي قدامهم واكثر من هادشي كنكره المشاكل والمشدات وكنحاول نتفاداهم باقل الاضرار ونسل شوكتي بلا دم ،. وهاد الطريقة هي اللي خالاتني نبقا بلا زواج ونكمل فقرايتي لحد الساعة .
– [ ] رنين هاتفي لا زال يصدر اصواته المزعجة .. خصوصا ان المتصل يونس اللي رجع يصلح الفاضه بحال ديما ، اللي مخليني متعلقة بيه هوا عقليته المتفتحة ومن الرجال اللي كيحررو المراة من قيودها ..ًعارفاه كيبغيني وعارفيني كنبغيه ، لاكن مابغاش يجبد ليا موضوع الزواج واخا عييت نلمح ليه وفكل مرة نلمح ليه كيلمح ليا انه مالقاش الخدمة اللي قرا على قبلها واللي باغي و مادام هوا مزال مالقاها ميقدرش يتزوج ويكون اسرة حتى يستاقر عمليا ،وكيلمح ليا كذلك باش نصبر عليه ونتستاه وانا مابيدي ماندرير والوقت مكايتسناش وماكرهتش نتسناه ونتزوج بيه .. معاه نقدر نخدم ونقدر نخرج بحرية اما مع بابا عمرني نحلم نخدم ولا نخرج لوحدي
– [ ] اااه ياربي شنو كيتسناني .. فرحي بنجاحي خيم عليه خوفي من زواجي ومصيري اللي كنشوفو كيقرب مني بحال الموت . ماقدرتش نستمتع بهاد النجاح واخا عارفة راسي مغنخدمش لاكن فرحانة حيت تبت داتي وحققت حلمي وعمرني سقطت او جبت نقطة قليلة خوفا من هيجان بابا عليا وعلى مستقبلي فالدراسة ويلقاها سبة ويجلسني والحمد لله عمرني خرجت على العشر الاوائل وهادشي كان كيسكتو وسياستي عاونتني بزاف .
– [ ] انتهت رحلتي الدراسة واهلا وسهلا بالمستقبل اللي ماعندي عليه حتى فكرة ،. من جهة كنبغي واحد ومتعلقة بيه ومن جهة عقلية الامام ابي وشنو راه كيخطط ليا ..كلشي غادي فتيار مغاير وكل يوم كنتيسنى نسمع خبر عليا وكل صباح كنصبح مخلوعة فكل مرة نقابل وجهه امي العزيزة .. وهاد الصباح اللي كنت كنتسناه صادفتو فاش دخلت الكوزينة صبحت على ماما .. كانت لابسة بيجامة بالبينوار طويل وسخون وشعرها الاشقر مجموع بمقبط .. احتلت بشرتها بعض التجاعيد الصغيرة حدا عينيها الجميلة العسلية وجنب فمها .. ابتسمت ليا وضار بيني وبينها حوار بالريفيه وانا كنوجد الفطور معاه وريحة القهوى كتفيق الناس فايحة من الكوزينة .. بالضحك والتعاويد وفرحتها بالنجاح ديالي كنا كنتبادلو. اطراف الحديث وقالت ليا فاش دخلي الكوزينة جمعي شعرك .. اقبح حاجة يطيح ليك الشعر ويلقاوه الناس فالماكلة
– [ ] رجعت اللور جمعت شعري الاشقر بالزربة خشيتو فالقب ديال بينواري وهزيت البلاطو وسولتها واش بابا رجع من الجامع قالت ليا راه ليوم الجمعة كيمشي مكيرجعش حتى كدوز العشا
– [ ] بديت كنضحك حيت نسيت شنو ليوم وقلت ليها من نهار شديت دكتوراه مابقيت نشد ايام الله كي كنت ولا حتى التاريخ .
– [ ] قالت ليا : كاين واحد الخبر
– [ ] حليت عيني حسيت بوجهي برد قلت ليها الله يسمعنا خبار الخير
– [ ] قالت ليا راه زياد عرض علينا للعرس
– [ ] فشلت حطيت البلاطو فوق الطبلة دالكوزينة وجلست حداه رديت النفس ..تخلعت حسابني غتقول ليا راه باك غيروجك .. رجع عقلي كيمشي نيشان لداك المنحى ورجعت مخلوعة عايشة فالرعب بلا خبار شي حد ،ضحكت قلت ليها واش صافي حدد لنهار. قالت صافي الجمعة الجايا ان شاء الله
– [ ] قلت ليها ولاش ماعلمناش قبل بشي شهر
– [ ] هزات يدها قالت ليا الله واعلم .. راه ماشي غير بوحدو اللي كيقرر عاىلة العروسة حتى هما كيقررو معاه
– [ ] ربعت يدي بغيت نعرف شوية على مرتو وشكون تكون حيت عارفاه خطب وكنسمع الهضرة ولا ابالي حيت كنت مشغولة بقرايتي مكنجلسش ندي ونجيب مع الناس وديما سادة عليا فالبيت . قلت ليها بنت من وشنو كدير وهي تشوف فيا باستغراب قالت ليا ماعرفتيش بنت من ؟.
– [ ] استغربت كنحاول نتذكر ياكلنا عارفة ونسيت لقيت راسي لا اعلم ولا اتذكر شيءا
– [ ] قالت ليا كانها مافكرني : بنت الحجوجي راه شحال هادي باش مشاو خطبو كاع العاىلة كاستنا فالعرس
– [ ] بقيت ساكتة كنتخايل عاىلة الحجوجي وفرحت ليه واخا مكنعرفهمش وكنسمع بيهم فين ما مشيت وقلت ليها
– [ ] تبارك الله الله يكمل عليه بلخير. هي غنحضرو للعرس .. متأ ولاكن موحال يبغي بابا يقولك العرس حرام ما حرام يحرمها علينا
– [ ] هزات حاجبها قالت ليا هانتي كضلمي. باك وهوا ماقال عيب وعارف الحجوجي مكيخلطوش العرس .. باك راه عزاز عليه الحجوجي باغي يمشي عندهم .. معقولين ومتدينين .. راه هصرت مع خالتك عيشة وسولتها قالت لي غايديرو الطلبة للرجال والعروسة غدير نهارها هي والعيالات فالقاعة ..
– [ ] قلت ليها مزيان حسن ماخلطوش باش نحضرو
– [ ] قالت ليا بسخرية. : اااش غيخلطو دابا يخلط ليك الحجوجي العيالات مع الرجال داكشي اللي بقا … مزال مكتعرفيش شكون هما الحجوجي
– [ ] قلت ليها ياكما متشددين حتى همًا كثر منا
– [ ] قالت ليا وشنو يحساب ليك
– [ ] سكت وهزيت البلاطو ومتشوقة نحضر للعرس ديال ديك العاىلة ، واخا مكنعرفهمش وماشي من عاىلتنا بل من عاىلة راجل خالتي وزياد ولد خالتي خطب بنتهم ،. اللي كنعرف عليهم من خلال شنو كنسمع انهم تبارك الله ميسرين ومعقولين وشادين طريق الله وكاع الذهايبية كيشكروهم ويشهدو على المعقول ديالهم. حيت عاىلة معروفين بالتجارة وكايتاجرو فالذهب .. مزال كنعقل اول مرة نسمع عليهم هوا فاش مشيت انا وماما عند واحد الذهايبي بغات تبيع واحد السنسلة و قاليها الذهب ديالها مخلط ماشي صافي ذهب الحجوجي اللي صافي ومزايان وكيفضلو يخدمو بيه .. ونهار كانت ختي كدهز راسها مشيت معاها انا وماما للقيسارية ديال الذهب كنشوفو ليها شي سرتلة. وسولاتو ماما واش زعما مزيانة قاليها بكل ثقة فالنفس هادا دالحجوجي ، تما فين عرفت هاد السمية و الصمعة ديالها وقالت لينا ماما راه كيجيو لراجل ختها شي حاجة وعايشين ففاس .. ولاكن واش بابا غادي يبغي يدينا حتى لفاس نحضرو للعرس ولالا .. حسب كلام ماما اعرس مقيوم تما وبابا ميمكن ليه يخلي الجامع ويمشي .. يحني احتمال نحضرو مستبعد بزاف واخا ماكرهتش نحضر فعرسهم .
– [ ] بحال كاع ايامي المملة فالدار دورت النهار حتى صلا بابا بالناس لعشا ورجع للدار ، والله يسمح ليا انا كنصلي ونقطع ونكذب على بابا اللي فكل مرة يسولني واش مزال كنصلي وكنكدب عليه باش نتفادى الهضرة ، ويا حسرة بنت الامام زعما ومكتصليش و مامقتانعاش بالحجاب اللي فرضو عليا بابا فاش كانت عندي ربعطاش لعام .. واخا ولفتو ومنقدرش نمشي براسي عريان لاكن كنتشها نصاوب شعري حتى انا ونطلقو ونلعب بيه .. وحتى الفولار بالنسبة ليا غير سترة وصافي ماشاداهش نيشان حيت ديما قصتي من لقدام كتبان الا فحضور بابا كنهبطو حتى لحجباني .. بصراحة عمرني عرفت شنو هوا السوشوار .. شنو هي الصباغة فالدفار .. شنو هي تقطيعة قصيرة ولا كوب مختالفة ،عمرني عرفت شنو هوا الصالون حيت بابا مانع عليا نمشي ليه او نصاوب شي حاجة .. لحسن حضي ونحمد الله ان حواجبي مرتبة من عند الله وزعرة الموسطاش عندي منعادم.. وشعري رطب لونو اشقر فاتح اما كن كنت شي مزغبة كوراه شوهتي شوهة ونبقا هاكاك بحال لقردة وجهي مشعر و حجباني وحالتي وشعري فالسما .♦️
– [ ] خليت بابا كيتعشا ومشيت بغيت نطلع لفوق حيت كنحشم نبقا مقابلة معاه ولا نجلس قدام .. وباش ناخد راحتي كنفضل نبقا فبيتي ، يالاه بغيت ندور مع الحيط نخرج ولابسة بانطوفة ماكديرش الحس سمعت سميتي فالحوار اللي كيدور بين بابا وماما ورجعت اللور بشوية قربت من المجمع كنتسنط
– [ ] بابا : لالاصافي هادا الجهد … البنت تبارك الله كبرات وصبرت عليها قلت خليها تقرا ومونسانا بلاش ماتخوا علينا الدار .. ولاكن دابا صافي غادي نزوجها
– [ ] سمعت ديك الكلمة اللخرة وشديت فمي فشلت وجلس فالارض حدا الحيط كنسمع ماما كتقولً ليه
ماما : ايوا البنت عاطية للعين ..
قاطعها: انا عييت كل مرة نرد فالناس ..كل نهار جاي عندي واحد باغي يتناسب معايا … صافي براكة ما نبقا نرد فالناس
ماما : ايوا حتااا انا راه كيجيو عندي لعيالات يخطبو … والبارح فالمارشي ديتها معايا والناس كيطلبو فيها …
بابا : حتى فاش قرات وخدات الدكتوراه قالو صافي مابقا مايشدها على الزواج ارا نمشيو نخطبو .. بلحق انا ماااباغيش نعطيها لواحد جاي غير حيت قارية .. غدا ولا بعدو يخدمها ويجلس يتحاسب معاها على المصروف
ماما: ولمن باغي تعطيها دابا؟
تنهد : انا كنت باغي تتناسب مع الحجوجي … معقولين وناس الجود والكرم
ماما : ولمن باغي تعطيها فلحجوجيين!! .. كاع ولادو مزوجين
تنهد وقال: فالحقيقة ماااكرهتش وهي اللي بقات ليا والله ماكرهت لوكان تناسب معاهم، نعم الاخلاق ونعم الرجال دوك الناس ماتلقاش اللي يقول فيهم كلمة دالعيب … كيديرو الخير فالمسكين ويعاونو الدرويش ويتهلاو فعيالاتهم. .. لوكان تشرفيهم تقولي سبحان الله واش مزالين الناس بحالهم .. هادو هما النساب اللي يتناسب معاهم الواحد … فاش مشينا نخطبو بنتهم هضرت معاهم وبقينا كنضحكو عجبوني
ماما: هأ ايوا وها هما الحجوجي عجبوك غتمشي عندهم بوجهك احمر الحاج تعصر على بنتك
بقا كيضحك قاليها : وشنو فيها الى كانو غيفهموني … زايدون قلتها ليهم تما كنضحكو فالخطوبة قلت ليهم انا بنات كاملين خطبت ليهم انا ماتسنيتشً الراجل عاد يدق عليا
ماما : اوييلي استغفر الله العضيم
بقا كيضحك قاليها : كنهضر معاك بصح … وكانو كلهم الحجوجي وكاع ولادو جالسين بقاو كيضحك والطلبة وكولشي قالي الحاج باهم راه هادشي اللي خصو يكون ..قلت ليه نخطب الراجل اللي تشوفو انا صالح لبنتي .. اما الولد يصبر راسو راه كتافو يهزوه … وكاع اللي ختاريتهم لبناتي طلعوا ولاد الناس .. انا مانمشي عند مسخوط الواليدين نعطيه بنتي ويعجبو راسو ويعنطز عليا
بدات ماما ضحك قالت ليه عبرتي والاهيلا
قاليها كيضحك: ايوا وشنو .. واش نعطي بنتي لواحد دق عليا مكنعرفوش ونضحي بيها!!!
ماما : ودابا غير قول ليا شنو بغيتي راني فهمتك كدور على الحجوجي
ضحك وقاليها : واقالي خسارة ماكناش عارفين عندك البنات ولاهيلا نسوبية معاك مخيرة وقلت ليه بقات عندي الصغيرة فيهم جابت الدكتورة هاد العام وحتى هي غادي نجيب ليها راجل من عندي الى كتب الله
ماما:يهديك الله اش كتقول وسط المجمع يقولو غير كيشهر فبنتو وباغي اللي يخطبها منو
ضحك بسخرية قاليها : كي شفتي انا غادي تعطيها ءءه … راه تما وقدام الناس طلبها ليا واحد قلت ليه لا ودخلتها ليه بالضحك قلت ليه راه عاد كنت كنقول ماباغي يخطب مني حد وانا اللي نجيب العريس راسي
ماما: يهديك الله اعاد الراجل راه الحجوجي كلهم مزوجين وعندهم التعدد بزاف ..باهم مزوج ربعة وكاع ولادو دايرين التعدد
قاطعها: ولاكن رجال. حسن من اللي عندو وحدة .. يكونو غير قادين بيهم وعندهم ليهم الجهد والله يزيدهم
ماما : اودي الله يهديك … راه التعدد كما كان صعيب .. زايدون راه كاع ولادو كبار فايتين ربعين عام
قاليها بنبرة سلسة كيطلق الفوطة بعفوية على جلابتو : باااقي عندو واحد تكون عندو شي كدا وثلاثين وزوين .. كان جالس معانا كاع مايحسابني ولدو فالاول مع هوا مكيشبهش ليهم كاع … بقيت كنتجمع انا وياه وعجبني ميعرف يهضر وباين عليه معقول ماعرفتوش ولدو حتى اللخر قلت ليه ولد من نتا بقا كيضحك قالي عرفتك ماعفرفتينيش .. قلت ليه ماكنعرفكش منعرف غير حكيم و كمال ورشيد ودوك التوام لخرين مايحسابنيش واش باقي عند الحاج شي واحد .. ايوا بقا كيضحك قتلتو بالضحك .. للحق عجبني هضرت معاه شوية فالدين كيعرف فالدين مزيان وحافظ القرآن وكيصلي ..بقيت انا غير كنجربو نشوف واش قاري شوية ساعا لقيتو تبارك الله عارف فالدين وكيجاوبني بالاحاديث والايات
ماما : ايوا دابا من هادشي كولو لمن باغي تزوج البنت نعرف بعدا غير شكون هادا
قاليها واالحقيقة بغيت نعطيها للحجوجي .. قلت ليه واش مناسب ولا عاد غادي تناسب اش ضهر ليك نتناسبو. بقا كيضحك قالي على الراس والعين ونعم النسوبية معاك السي علي والله يلاقينا مع مااحسن منا …
رجعت اللور ماقديتش نزيد نسمع اكثر و الا غادي نفضح راسي كنتسنط وطلعت للفوقي فين عندنا البيوت سديت عليا ومشيت كنجري هزيت تيليفون عيطت ليونس قلت ليه شنو كاين وقلت ليه باللي با غادي يزوجني .. صدمني الرد ديالو البارد قالي راه غير كيهضر مغاديش يزوجك وصبري عليا شوية حتى انا راه باغي نتزوج بيك ولاكن الخدمة ديالي ماشي شي حاجة .. الا الى كنتي غتعاونيني نتعاونو انا ونتي
قلت ليه غير اجي طلبني من عند بابا بعدا وفكني وغير نتزوجو غادي نخدم ونتعاونو المهم سربي قبل مايعطيني بابا راه صافي حطني فراسه
قالي الشهر الجاي نكون تخلصت و نجي نخطبك
شديت حنكي قلت ليه اوييلي على الشهر الجاي راه با هاد السيمانة غادي يعطيني على الاقل غير هضر معاه بعدا واخا ماتجيبش واليديك
قالي واخا وفين غادي نتلاقاه
قلت ليه سير عندو غدا مور لعاصر للجامع ودخل لداخل هضر معاه تما
لاول مرة فحياتي نطلب منو يجي يخطبني ونقولها بيه بصحيح العبارة. ،. لاكنني انتضرت وطال انتضاري. .. بالرغم من انه كسول ويتماطل في العمل وينتضر حدوث المعجزات لاكنني احبه .. احببت فيه ميزاته وعيوبه ولم اعد اهتم لبقية التفاصيل .. المهم نكون معاه وماشي عيب نتعاونو على الزمان .. كاين بزاف ديال الازواج كيتعاونو وعايشين حياة سعيدة .. لاكن المشكل الوحيد اللي كنعانيه مع يونس هوا الخدمة .. من نهار خدم فالبنكة صافي تماطل ومابقاش كيقلب على بديل .. ماقدرتش نفهم طريقة تفكيرو وهادشي كيعصبني ومابغاش يخرج من الناضور ويخدم فمدينة اخرى .. باغي يبقا فمدينتو ولاكن يخدم فالخدمة اللي قرا عليها او مايخدمش كاع بالمرة والصعوبة باش دفعتو يقلب وفالاخير صدمني بالعمل فالبنك .. هاد الخدمة اللي مستحيل يقبلها ليه بابا والمشكل مانقدروش نخبيو عليه او نكدبو عليه. ، سبق ليه دفع باش يخدم فالمجال دياله وبقا كيتسنا الرد وماجاهش ،. ودرا معاه محاولات كثيرة وتكلمت فالمرة الاولى مع اختي وتكلمات مع راجلها ودفع ليه سيفي بحجة انه ولد جيرانا المقربين وان امه طلباتنا وعيطو ليه من الدار البيضاء لاكن رفض يمشي لتما ويخدم وما بغاش يخرج من الناضور او يتعايش فمدينة اخرى وضاعت فرصة العمل الاولى ،. ومع ذلك ماياستش وبقيت انا كنصاوب ليه سيفيات ونرسل فالمواقع وتاصلو بيه من الرباط ورفض ينتاقل لتما .. جن جنوني وقالي باللي مانحلمش نخرجو من الناضور وباللي هوا مرتاح فالبنك والصالير كافيه والى كان البديل للاحسن فالناضور فغيكون مزيان والى مكانش فهوا قانع بالعمل والمدخول دياله .. حرت معاه وحيرني وفاش كنهضر ليه على الزواج كيقول ليا مزال مامستاقر باش نقدر نتزوج … ماعرفتش شنو ندير معاه ومع العكس دياله وكنشوفو مرتاح مامهتمش وكيحلم بعمل اللي باغي وفالمكان اللي باغي و اها عييت نشرح ليه انه ماشي اي واحد كيخدم فالمجال اللي قرا عليه .. لاكن المهم انه يوفر لقمة عيش ميسورة الاهم تكون خدمة حلال والباقي لا يهم ، لاكن بحال ديما كيادني فراًًيي ويدير اللي فراسه وماكيدير حتى مجهود وكنشوفو ماعندو حتى طموح او اهداف و ماكيدير حتى جهد .. صافي عندو خدمة وصالير كافيينو هوا كشخص يعني مافيه اللي يصدع راسه وهادشي كامل كنخاف يشوفو بابا فيه فاش يهضر معاه ويرفضو غادي تكون صدمة ليا وانا ماقاداش عليها واخا كامل عيوب قابلة عليه ومرتاحة معاه .
ضار عقرب الساعة على مسامع اذني حتى صلاة الفجر ، لم يغمض لي جفن ولم استطع اوقف تحليلاتي وتوقعاتي اللتي تشوش عقلي .. انضر الى الساعة وانتظر اذان صلاة العصر على اخر من الجمر .. لم اتكلم ولم انطق بكلمة .. ماقدرتش حتى نبلع لقمة او حتى التركيز مع امي اللتي تكلمني .. شارت بيدها قدام عيني وانا شاردة حداها فلكوزينة ويدي على خدي وقالت ليا
-مالك ابنتي من الصباح ونتي ساهية ياك لاباس
شفت فيها وكنجمع الجراًة باش نفتح معاها المووضوع و قلت ليها بصوت منهفض حشمانة نسمعو انا بنفسي ومكنقدرش نتكلم على مواضيع الزواج معاهم من شدة خجلي .. واش بابا باغي يزوجني
بقات ساكتة وعلى وجهها تعابير الابتسامة المخفية اللي مابغاتش تبينها ليا .. سكت لولهة وقالت ليا
اش ضهر ليك فعبد الحق ولد عم باك
ابتغربت من كلامها كنت كنتسنا نسمع اسم الحجوجي حتى تفاجأت بعبد الحق وقلت ليها مالو ؟
قالت ليا ايوا ابنتي باك راه بغا يعطيك لعبد الحق
اخترقت مسمعي جملتها الاخيرة كاالسكين الحاد ومن بعدها فقدت سمعي وانا انظر لشفتا امي تتحرك والقول يخرج من فمها .. لاكن كل ما اسمع هوا جملتها الاخيرة تتكر في اذناي وجذبت الى مخيلتي ذكرى سوداء من الماضي .. كنت سأسقط ارضا من شدة صدمتي فانسحبت مهرولة الى غرفتي واقفلت بابي وجلست ارضا اردد
عبد الحق … واش عبد الحق اللي كنعرف انا !!
ايعقل!!!
سمعت الدقان فالباب ونضت حليت لماما حت مكاينش من غيري انا وياها فالدار ، بقات كتشوف فيا من فوق للتحت وقالت ليا مالكي خرجتي من لكوزينة كتجري يام لاباس
بلا منزيد نفكر قلت ليها منتزوجش بعبد الحق واش ماكاينش من غيرو ؟؟. مالقا با لمن يعطيني غير لعبد الحق
قالت ليا : مالو عبد الحق راجل مزيان والله يعمرها دار و كايخاف الله .. علاش شنو فيه من عيب
تمردت عليها وقلت ليها نتزوج اي واحد الا عبد الحق
قالت ليا علاش ماعجبكش عبد الحق ياك مزيان وكاع الناس كيشهدو فيه والله يعمرها دار
دورت وجهي جاتني الغمة على قلبي وتقيت وسكت ماجاوبتهاش .. بقات كتسولني علاش مابغيتوش شنو ماعجبنيش فيه لاكن مارديتش عليها فالاخير مشات وجلست شديت راسي كنبكي بوحدي وعيطت على يونس نسولو اش دار قالي مزال فالدار عاد غيمشي .. بقيت كنبكي عليه باش يسربي راسو و قطعت جلست كنتسنا حتى سمعت صوت بابا كيأذن اذان العصر فمنطقتنا ومن ساعتها وانا كنفرد فيديا و نتسنا ونحسب الوقت ونتستا فالرد
صونا ليا تيليفون طلع يونس. وهزيتو بالزربة قلت ليه شنو درتي؟؟
جاوبني بصوت ضعيف غريب على العادة قالي واش بصح باك عطاك للعاىلة
قلت ليه بلهفة واش هضرتي معاه؟
قالي اه هضرت معاه قالي مابقاو عندي بنات للزواج اللخرة عطيتها
بقيت ساكتة مصدومة ورجعت ليه اللومة قلت ليه شفتي .. شفتي شنو كنقول ليك قلت ليك سربي راسك وطلق راسك
رد عليا باسى قالي انا حسابني كتفلاي كتقولي لي هاكاك باش نخطبك ماحسابنيش بالصح
شديت جبهتي وسديت عيني كنترعد وبحيت ماقدرتش نهضر قلت ليه صافي صافي بسلامة. وقطعت عليه وجلست كنبكي حتى شبعت ومانفعني البكا فوالو من غير زادني وجع الراس والم فالمفاصل ديالي المتشنجة .. جات ماما عيطات ليا نتعشا ومابغيتش بغيتها توصل لبابا بانني غضبانة ورافضة هاد الزواج وماقابلاش .. والى كان فعلا راجل دين فمغاديش يغصبني بزز مني ويعطيني بلا رضاي. رجعات دقات عليا ن جديد قالت ليا تكلمي لباك بغاك ..حدرت راسي وخرجت كنجمع شعري المطلوق احتراما قدام بابا ونزلت حادرة راسي ساكتة مشيت جلست فالصالون ديالنا ولزمت الصمت لقيت العشا باقي ما مبدي .
قالي كحزي تتعشاي
كحزت واخا ماعندوش منين يدوز وسمينا الله بديتا نتعشاو فصمت حتى سالينا ونضت بغيت نجمع الطبلة وقالي جلسي بغيت نهضر معاك ، حسيت بوجهي سخن ماعرفتش باش غتبدا هاد العضرة وباش غتسالي وبقيت كنشوف قدامي ونتستا شنو يقول ليا .. كان مزال بجلابتو ولحيتو طويلة مخلطة بالابيض والاسود .. طويل القامة وعريض كيلبس البلدي داىما بكل انواعه عمره بدلو وغلى وجهه الوقار وجبهتو كتقشر بالصلاة عليها علامة كحلة الوسط .. عينيه زورق بحال عيني وابيض البشرة واخا كبر باقي شاد تبارك الله وعلى ملامحه كتبان الجدية والصرامة لاكن فالحقيقة هوا ماشي صعيب ولا قبيح بدرجة داعش .. على العكس كاع الناس كيلجأو ليه للصلح ولا للزواج ولا لحل مشكل من مشاكلهم ومعروف بالقلب الطيب والرجل الحقاني ، فيه الضحك والتقشاب والصراحة فيما يرضي الله عكس تماما شنو كايبان عليه من صلابة وصرامة بالنسبة للناس اللي اول مرة تعرفو .. ربانا حنا خمسة دالبنات احسن تربية وعمرنا جبنا ليه العار او جبنا ليه شي نعت خايب وكان معانا الاب الحنون والعطوف والصارم والقاصي فنفس الوقت
بقا ساكت مطولا كنتسناه شنو يقول وانا كلي كنرجف من هبته وعضامته فالاوقات الجدية ومل ما كنتمناه انه ينتهي الحوار فالاخير برضاه عليا بحال ديما .جات ماما جلسات حدايا تسمع شنو بغا يقول وتنحنح وشاف فيا بنضرات خلاوني نغرق فحوايجي من الخجل وقالي
– سارة بنتي .. تبارك الله راك قريتي .. وصبرت عليه ودرت ليك الخاطر .. جا الوقت ديري ليا خاطري حتى انا ياك ابنتي
– حركت بيه راسي بلا تردد وقالي : اللي هرب للزواج هرب للطاعة .. والزوج الصالح هوا اللي كيخاف الله ويتاقي الله .. اشنو ضهر ليك فعبد الحق .. انا كيبان ليا راجل مزيان .. ومحسون فوجهه راه ماشي منشوف غير الدين .. حتى الهيءة والمستوى المعيشي والديني .. عاد نزوج بناتي .
– سكت كيتسناني نجاوب وانا ساكتة قاطعة الحس ماقدرتش نهضر وستحيت نناقشً معاه هاد الموضوع .. حطات ماما يدها على كتفي قالت ليا قولي ليه شنو قلتي ليا باش نعرفو شنو كاين
– ميلت راسي للجنب ماكرهتش نخشيه فالوسادة ونخبيه ..بلعت لساني وبديت نعرق حشمت نهز عيني فبابا . قالي شنو اللي ماعجبكش فعبد الحق غير قولي لي باش نعرف
– قلت ليه بصوت غائر منخفض: والو
– قالي وعلاش مابغيتيش تزوجي بيه ؟ قالت لي مك مابغيتيش
– بقيت ساكتة وماما حاطة يدها عليا ..ماكرهتش يجبد ليا حس يونس وماقدرتش نجبد ليه الموضوع وحتى هوا ماجبدوش حيت ماعارفش بعلاقتي معاه من الاساس ووصيت يونس مايبنيش ليه باللي كنعرفو .. طال الحوار بيناتنا وانا غير ساكتة وبابا كيعطيني فالمواعض وشرح ليا معنى الزواج واختيار الزوج الانسب وانا كنتسنط وكتنستاه يسحب اختياره لاكن ماسحبوش وقالي غادي نديرو الخطوبة وتجلسي تهضري مع عبد الحق باش تعرفيه مزيان .. راه راجل مزيان ويصلاح ليك ويتهلا فيك .. والى ماتفاهمتوش داري راه مفتووحة فوجه بناتي كلهم وحتى وحدة ما نجبرها تصبر على عيشة ماشي فمقدورها … والحمد لله كاع خواتاتك راضيين ومرتاحين وراكي كاتشوفي كيفاش عايشين مع الازواج ديالهم .. غير توكلي على الله ومايكون غير الخير ان شاء الله .
– بقيت ساكتة وهما كيشوفو فيا وحركت راسي بالايجاب ونضت مشيت للبيتي سديت عليا وعلى قلبي وانفاجرت فوق وسادتي خرجت الكبت اللي كنت كابتك فصدري
– كفاش نقول فوجه بابا لااا مابغيتش عبد الحق
– كفاش نقول ليه راني باغا واحد اخر وخطبني منك ورفضتيه
– كفاش نقول ليه راني غادي ننتاحر فهاد الزواج الى عطيتيني ليه
– كفاش غادي نواجهه ونقول ليه باللي داك عبد الحق اللي كيشكروه الناس وكيصلي الفجر ومتاقي الله تحرش بيا فاش كانت عندي ثمان سنوات
– كفاش غادي نقول ليه راني عفتو وكرهتو من نهار تحرش بيا وماحتارمكش وماقدركش وغدرك وتحرش ببتك ولو ما هربتش كان يقدر يتعدا عليا
– اااه ياربي سمح ليا مكنتفكر صلاتي حتى كضيق بيا عاد كنرجع ليك حشمانة من تقصيري نترجاك تخرجني من هاد الضيق وتفرجها عليا
– . طلقت سجادتي وتقبلت كنصلي ونبكي لربي اللي ماكينش من غيرو يفكني ،. صليت صلاة الاستخارة وكندعي ربي يبعدو عليا ويلاقيني بيونس ويجمعني معاه وبكيت حتى عييت وتيليفوني كايصوني … سلمت وهزيت تيليفون لقيت يونس كيصوني جاوبتو وحلقي مجروح بقا كيشكي عليا وانا كنشكي عليه قلت عاود دير محاولة اخرى لاكن هوا مارضاش قالي واجهي باك قولي ليه بغيتني الى كنتي فعلا باغاني وهنا نعرفك واش كتبغيني ولالا ! حطني قدام العافية ورجع اللور وخلاني كنفكر كيفاش نديرها ،. انا ماعنديش الجراة باش نواجهه بابا ونهز فيه العين ولا نقول ليه لا فوجهه وعمرنا هزينا فيه العين وحتى وحدة فالبنات ماعندها الجرأة ترد عليه الكلام .
– تاصلت بختي لكبيرة اللي فالدار البيضاء حكيت ليها كولشي وبكيت عليها وكانت هي الوحيدة اللي عارفة بعلاقتي معاه وعارفة اسراري وتوسطات ليه باش يخدم تما لاكن مع الاسف . طمناتني وقالت ليا انا غنحاول نعاونك ونعيط لماما نهضر معاها ونبين ليها شنو كاين ونرد عليك .
– قطعت معاه وتكيت معنقة وسادتي والهم متقل على كتافي حتى عاودات تاصلات بيا قالت ليا راني هضرت معاها وقالت ليا باللي بابا هضر ليها على يونس قاليها راه جا واحد كيطلب مني سارة ومابغاش ، مارتاحش ليه وماعندوش خدمة مستقرة وجاه ماشي قد المسؤولية وهوا باغي راجل اللي بحال الفاس فين ما مشا يحفر وبخيرو وخميرو يتهلا فيك. المهم راكي عارف هضرت بابا ديال ديما كيقول ليك المال والبانون زينة الحياة الدنيا وباغي لبنتي راجل ميسر ويخاف الله وقد المسؤولية و و و و راكي عارفاه .. ومابانش ليه فيونس وصدرو قاليه عطيتها
– شديت جبهتي قلت ليها واش عطا لكلمة لعبد الحق صافي؟
– قالت ليا مزال ولاكن بغا يرصي معاك الهضرة نتي اللولة عاد يهضر معاه واصلا عبد الحق راه ماكرهش راه ديما كيلمح ليه عليك غادي تجيه من الجنة والناس ويلسق عليك لسقة وحدة
– تزير خاطري قلت ليها ناري غادي يقولها ليه والى عطاه الكلمة اجا ماردها كي غاندير دابا انا
– قالت ليا هضري مع عبد الحق قولي ليه كتعرفي شي واحد باش يرجع اللور هادا هوا الحل
– خلاتني كنفكر فرايها سولتها واش عارفة شي حاجة على مخططات بابا وامتى ناوي يجبد ليه الهضرة باش نعرف فوقاش نتصرف وشنو ندير قالت ليا باللي ناوي يجبد معاه الموضوع مور لعرس ديال ولد خالتي مباشرة ويعطيه الكلمة ! تخلعت حيت بقات ليه ثلت ايام ومابقاش ليا الوقت ختى نزيد نفكر اكثر والحل اللي بقا ليا هوا نسبقها لعبد الحق باش فاش يهضر معاه بابا يرفض ولا يعطيه عذر .♦️
– صمت على الاكل والشرب وماكرهتش نقول لماما علاش مابغيتش عبد الحق وتقولها لبابا باش يعرف شنو كاين لاكن غادي توقع كارثة وينوض بابا يقتلو ولا ترقع ليه شي جلطة ويتصدم وكتمتها فالسر لمصلحتي ومصلحة بابا وصمعتنا واخا خاصني تفرش داك المتحرش اللي الناس كلها غالطة فيه .وانحبست الانفاس في حنجرتي وابدأالعد العكسي .. مترددة في قيامي بالهطو الاولى وخائفة من ردة فعل عبد الحق ، ومن جهة اخرى خاصني نبين يونس بأي طريقة و نسلط عليه الضوء وهادا هوا اللي فكرت نبدا وفاتحت ماما صبيحة اليوم الموالي فالكوزينة من بعد ما قلبت على طريقة نبدا معاها الموضوع وترددت لاكن تجرأت وقلت خفيت امر معرفتي بخطبة يونس ليا وقلت ليها.
– ماما راه واحد الولد بغا يتقدم ليا … وكنت كنعرفو غير بالشوفة ووقفني واحد المرة فاش كنت كنقرا سولني على بابا باش يهضر معاه وعطيتو عنوان الجامع
– مسحات يديها وضارت عندي قالت ليا شكون هادا وشنو كايدير ؟
– قلت ليها بتردد وخجل سميتو يونس وموضف فالبنكة ولاكن غادي يبدل الخدمة وعندو ديبلوم زوين ومستقبل زوين وبغا يهضر مع بابا
– صغرات عينيها فيها حشماتني قالت ليا ياكما داك يونس اللي جا عند باك ليوم للجامع ؟. ايلا كان هاداك راه سيفطو باك قاليه لا مكاين زواج وماعجبوش
– قلت ليها في حيرة ومالو ياك راجل علاش بابا مابغاهش شنو اللي خايب فيه؟؟
– قالت ليا مغاتعرفيش فالرجال خسن من باك .. صافي قالو لا هي لا هوا اللي عارف مصلاحتك واصلا دابا صافي رصا على عبد الحق غادي يعضر معاه
– انفاعلت بلا منشعر قلت ليها مابغيتش عبد الحق ومالو يونس مالو ماشي راجل
– شفت ماما كتشوف فيا مصدومة وانا ننتابه لطريقة جوابي وتراجعت حشمت قدامها وبقيت كندور فعيني قالت ليا شوفي ابنتي .. الى ماعجبكش قوليها لباك نيشان قوليه ها شنو ماعجبنيش فيه ونابينا عليه السلام .. راه سولك بغا منك جواب مقنع ونتي بقيتي ساكتة وانا ماشي مرسول نبقا نوصل الكلام بيناتكم .. جلسي نتي وياه وهضري على اللي عاجبك واللي معاجبكش
– دمعات وقلت ليها نتي عارفاني منقدرش نهضر فهادشي قدام بابا
– هزات يديها وقالت بي وانا بنتي ماعندي ما ندير ليك .. الى هضرت غادي يجيبك بحال لبارح ويجلسك معاه ويسولك وتبقاي تشوفي فيه .. اللهم قوليها ليه نتي نيشان من فمك لودنك
– تنهدت مسحت خدي ونساحبت كنفكر فموصيبتي ومنعازلة شادة تصويرة يونس وكنشوف فيها ونبكي عرفت راسي عمرني نتجمع بيه ورسلت ليه رسالة قلت ليه فيها باللي درت محاولة وفشلت بابا صافي اقتنع بالخطيب لاكن انا لا بغيتك نتا . رد عليا قالي الحل الوحيد اللي بقا هوا تهربي من الدار وتحطيهم امام امر الواقع
– تخلعت من فكرتو قلت ليه هاديك هي اللي منقدرش نديرها نفضل ندفن راسي حية ومانطيحش وجه بابا فالتراب قدام العاىلة واصلا مايستاهلش .. واخا حكامو قاصي وصارم لاكن فضلو عليا كبير وانا بلا عائلتي وواليديا منسوا والو
– قالي وانتي عاجبك راي باك واخليك فيه وصافي ضربي عليا كن بصح كتبغيني غادي ضحي معايا بسلامك
– قطع عليا خلاني مقطوعة بحال الحمقة وعقلي كيدي ويجيب حتى عييت بالتفكير .
– تحط العشا وحطيت راسي قدام بابا كناكل بزز باش مايقولش مالها ياك لاباس وتفاديت الاسئلة والاحراج وتعشيت ومشيت ننعس دوزت ليلتي كلها فالتفكير قررت فالاخير نهضر مع عبد الحق وهوا اول حاجة بديت بيها فاش فقت الصباح .. قلبت على نمرتو فواحد الذكرة ديال بابا حاطينها فالصالون حدا الفيكس وجلست كنقلب واستغليت غياب ماما اللي مشات مع خالتي تشري شال وصندالة باش يمشيو للعرس وبابا اللي مشا للجامع وجبدت نمرة عبد الحق وتاصلت بيه من الفيكس جاوبني كارهة نسمع صوتو قلت ليه راه بابا باغي يزوجني ليك وانا مقابلاش مواعدني واحد اخر بالزواج وكنتسناه وعيطت ليك نقولها باش تعرف شنو كاين حيت انا مانقدرش نقول هاد الهضرة لبابا
– بقا كيحماق عليا فالهضرة ومبرد دمو تقول ماعندو مايدار مسالي قالي واش بغيتني نقول لباك راك كتسناي واحد اخر
– قلت ليه لا بغيت تعطيه شي عذر ويجي منك داكشي علاش عيطت ليك
– قالي واانا باغيك للزواج باش حسن مني زعما هادا اللي بغيتي ؟ وزايدون مانقدرش نردها فوجه عزيزي الى قالها لي
– شفتو بدا كيتلوى باغي يشد فيا وجمعت وطويت معاه قلت ليه قوليه رشمتي شي بنت من شحال هادا المهم انا علمتك
– بغيت نقطع وشدني قالي انا مانقدرش نكدب نقول شي حاجة ماكايناش والى تزوجتيني راه غتعيشي بحال الاميرة
– رديت بجدية قلت ليه انا ماقابلاش بقا عاقل على هاد الهضرة ومابغيتش والسلام عليكم
– قالي غتولفي
– قاطعتو قلت ليه اللي كاين هاني قلتو ليك انا مقابلاش وبغيت واحد اخر ماشي نتا الله يعاون
– وقطعت وسديت موضوع عبد الحق وغير الى بغا يتغابا ويقبل بوحدة قالتها ليه نيشان ماباغاهاش.
– رجع امل افساد مخطط بابا من جديد ورجع يونس تاصل بيا كيعتاذر على كلامه لقا قلبي طايب بكيت عليه حتى شبعت قالي غادي نسيفط الواليدك تهضر مع مك قلت ليه حتى هاكا مزيان ولاكن دابا مكايناش ومشغولين مع العرس فعائلتنا خلي ختى نرجعو حيت الوضع غير مسموح ويقدر يرفضو باش يتهناو ،. انا غنشوف الوقت المناسب ونرد عليك فاقرب وقت
– تافقنا ورجعت لموضوع العرس .. جابت ليا ماما تكشيطة معاها من برا دايزها لكلام طلقاتها قدامي كانت زرقة وعامرة بالطرز فالالوان الباردة والحجر ومعاها الشال ديالها ، قلت ليها منين جبتي هاد التكشيطة كتحمق
– قالت لي باك اللي شراها ليك تحضري بيها فالعرس
– فرحت وهزيتها قدامي قلت ليا تبارك الله شحال كتحمق الى كانو غير العيالات بلا مانغطي شعري
– قالت ليا لا ابنتي غطي شعرك باش نتهناو وباك حتى هوا يبقا على خاطر
– قلت ليها. ايوا على الاقل خليني بعدا نصاوبو واخا مغاديش نطلقو غير نفرح بيه شوية
– قالت ليا شعرك زين ماعندك ماتصاوبي فيه
– تنهدت وسكت هزيت ديك التكشيطة ديتها علقتها وطويت الماريو ديالي. ، بالليل دوشت فالدار وحطيت الحوايج اللي غنلبس ونعست حتى صبح الحال وجات واحد خالتي وبناتها تجمعنا فالدار عندنا باش نمشيو كاملين وبدينا نصاوبو لبعضياتنا ونقادو ونلبسو ، جمعت شعري ودرت الفولار ديالي لونو بارد مع تكشيطة قاديتو وحزمات ليا بنت خالتي وشاركت معاها ماكياجها حيت ماعنديش انا وماكنشريهش اما هي مزوجة عندها كولشي وقادات ليا شوية وكحلت عيني كيجي معاهم لكحول كيبان لونهم الازرق وطراسيت حجباني شوية باش يبانو وصافي مادرتش لعكار باش مايدورش فيابابا . رشيت الريحة ودخلات ماما لابسة جوهرة ديالها والمضمة ديال الذهب جابت لي ذهبي درتو وخرجنا ركبت اللور فالمرسيديس ديال بابا انا وخالتي وبنتها وماما لقدام وطول الطريق وحنا مدرقين وجهنا حشمانين ماقرناش نهزو الراس حتى قربنا نوصلو لفاس وصونا تيليفون لبابا سمعتو قال سمية عبد الحق وقاليه وبدا كيهضر معاه ماعرفتش شنو كايقول ليه حتى سمعت بابا كيقول ليه اييه ااثه ان شاء الله. .. ان شاء الله غير نرجع من العرس ونهضرو .. امين اميين اولدي الله يعاون
– مافهمتش الحوار اللي ضار بيناتها ودخلني الشك من كلام بابا خفت يكون هضر ليه عليا وشنو غايكون قاليه كاع
– . من ساعتها وانا شاردة الدهن وراسي مرفوع وقلبي مقبوط ومابقا عندي خاطر ولا كانة وبقيت مهمومة ومشطونة وبالي مع الاتصال ديالهم وشنو فيه . نزلت من الطموبيل ونخزت ماما قلت ليها عفاك سولي با علاش عيط ليه عبد الحق وخليتها اللور ودخلت للقاعة مع خالتي وبنتها كانو غير لعيالات والقاعة بحال لقصر السقف كامل مرايات والورد مدلي ولونها مذهب ارقى من اي قاعة شفتها من قبل والنساء مدعوات فابهى حلتهم جالسين. . داتنا وحدة من المنضمين لداك العرس لواحد الطبلة فيها نساء اية فالجمال جالسين وجلست حدا واحد المرى دايرة الحجاب حروفها كوحل غزالة تكون فثلاتينات من عمرها باين عليها الخير والخمير هي واللي معاها .. درت صاكي حدايا من جهتي لاهرى خليت بلاصة لماما وابتسمت مع المراة اللي حدايا وبقيت كنتسنا ماما . غير جلسات شديت فيها سولتها وتنهدات دايرة يد على يد قالتي عيط ليه عبد الحق كيخطبك منو
– حليت عيني قلت ليها كيفاش كايخطبني!!!
– قالت لي راه قاليه بغا يهضر معاه عليك وبغا يجي للدار هاد الغشية ساعا باك قاليه راني شاد الطريق لفاس حتى نجي ونهضرو
– تصدمت درت يدي على فمي بقيت غير كنشوف قلت ليها انا مابغييتوش مابغيتش كاع نتزوج بيه واش بزز
– قالت ليا ااابنتي راه انا ماعندي ماندير ليك واش انا بززت عليك شي حاجة ؟. باك صافي دار فراسو غادي يعطيك ليه وكايقول مع راسو راه نتي مواقفة غير مامقتانعاش مع الوقت غادي تقتانعي
– ربعت يدي كنسوط تزيرت بغيت ندمع وهي تقوليا في حسرة وكتامل الحضور اللي فالقاعة .الصراحة الصراحة باك ماكرهش يعطيك ل آيت الحاج وبقاااو فيه مابغاتش تسرط ليه
– دورت وجهي بقيت كنشوف فيها وكاتماها فحلقي قلت ليها شكون هاد ايت الحاج عاوتاني
– قالت لي هما هادو .. الحجوجي ..ماكرهش يتناسب معاهم ولاكن مكتاب الله
ضحكت بسخرية قلت ليها ايوا ولمن كان ناوي يعطيني فايت الحاج؟؟
– قالت لي كان ناوي يعطيك لواحد من ولادو .. اللخر فالدرادي ..عيسى .. بلحق هما كايديرو التعدد قال بلاش من الخير .. بلحق الله يعمرها دار هاد الناس فاش ماجيتيهم والمعقووول مكاينش الدغانيش
– قلت ليها واش انا سلعة ولا شايطة باش يعطيني بحال شي لبسة
– قالت ليا كن كنتي شايطة كن عطاك لاول واحد دق فالباب ماشي يرد عرام دالرجال ويتشرط ويختار ليك الراجل المزيان .
– دورت وجهي سكتت بقيت كنشوف فالناس وعقلي مرفوع داز عليا العرس كحل زحل ماعقلت لا على ماكلة ولا على شطيح ولا عروسة ولا والو. .. واحد اللحضة نقلو لينا اخبار الرجال فالتلفازة كيلبسو للعريس وكان بابا وراجل خالتي جالسين حداه والرجال ضايرين بيهم جالسين .. تبارك الله كولشي باللحية والزين والقبول على وجههم كتحس بيهم رجال ديال بصح ماشي سمية راجل على الخاوي .. بقينا كنتفرجو والمصور كيدور الكامرة عليهم كانو فالقاعة اللي فوق منا شي لابس بذلات ديال المناسبات وشي لابس الجلالب بشتى انواعها فالالوان الزاهية والخياطةالرفيعة
– وبقيت مربعة يدي حتى جا واحد الولد صغير بيني وبين المراة اللي حدايا بغا يجلس عندها وجرني من تكشيطتي سمعت الحجر ديالها طرطق وشفت فيه بالزربة بقات ديك المراة كتعتاذز مني وابتسمت قلت ليها ماشي مشكل وبقيت كنهضر مع داك الولد تبارك شحال زوين وعاىلتهم شحال فيها ديال الزين نساء. ورجال واخا حتى حنا عندنا الزين تبارك الله كيبان من الناس اللي كيمدحوني انا وخواتاتي ديما . نسجمعت فالهضرة انا والمراة كنضحكو ونهضرو على العرس والدراري الصغار سولاتني واش مزوجة حدرت راسي كنضحك قلت ليها لا باقي
– قالت ليا هاد الزين كله مزال ماتزوج ؟ شحال عندك فالعمر
– قلت ليها لا حيت كنت كنقرا هاد العام خديت الدكتورة ديالي فالاقتصاد
– قالت ليا اااه تبارك الله ايوا الله يوفقك انا تزوجت على سبعطاش لعام
– قلت ليها تبارك الله تزوجتي صغيرة بحال ختي لكبيرة
– ضحكات وقالت ليا زواج ديال العائلة بلحق الحمد لله مزيان
– قلت ليها انا كنخاف من زواج العاىلة بلحق هادشي اللي غادي يكون ماعندناش ديك الصحبة والمعرفة قبل الزواج وكنخاف من الراجل مايصدقش
– قالت ليا توكلي على الله ومايكون غير لخير حتى انا فالاول ماكنتش عارفة راجلي وكنت صغيرة ماكنعرف والو .. تزوجت بيه وكان خارج الطريق منحرف
– استغربت قلت ليها واش كان كيفسد عليك!!!
– قالت ليا ماشي كيفسد ولاكن كيشرب كيسكر كيكمي كيخرج ماكيرجعش كان طايش وعقلو صغير وشنو عرفني انا واش كان كيفسد .. الراجل كيحكمو جيبو كما كان الحال راه غيبغي يبدل ويبغي يجرب خصوصا اللي بحال راجلي الى كان معطي ليه الجهد ماتقدوش وحدة
– درت يدي على فمي قلت ليها وصبرتي عليه !! سعداتك
– ضحكات وقالت ليا صبرت حتى عفا عليه الله اشنو غندير ليه !! هاهوا تاب وكبر وشرب عقلو وكولشي بقا غير تعاويد .. الصبر وصافي ولا غادي طلقي وهما اصلا كلهم مشابهين اللي كتيق فيهم وتقول ليك راجلي مايديرش راه هبيلة .. فاول فرصة ليه غادي يصدمها وحنا النساء كنقارنو راسنا بيهم وهادا غلط كبيير والمراة ماشي هي الراجل وكتقارن راسها بيه
– بقيت ساكتة تخلعت من كلامها قلت ليها لالا ماشي كلهم كاين اللي ماكيفسدش
– قالت ليا راني قلت ليك .. نتي وزهرك الو ديتي الراجل مجهد راه غادي يتزوج عليك ولا يخونك
– بقات كضحك عليا وانا كنشوف فيها مخلوعة قلت لقيها راه با بغا يزوجني ها لمن وها لمن وبقيت كنعاود ليها وقلت ليها على يونس والخطاب كاملين وقالت ليا الله يكون ليك فالعوان الى بغا يزوجك ولد عمو ونتي رافضاه احسن ديري المستحيل ماتديهش خصوصا قلتي عندك ذكرى خايبة
– قلت ليها راه بابا ماكرهش يعطيني لواحد اخر غير ماعرفتش شنو طرا بيناتهم وكاع الناس كيشكرو ديك العاىلة وكايعاودو عليهم غير لخير بلحق انا ماعرفتش شكون هادا وكي داير
– تعمدت نخفي اسم ايت الحاج او الحجوجي وتكون هي منهم وضرب ليا الطر ولا تنوي فيا شي خاجة الله واعلم عقل بنادم هادا .. وانا كنقلب لراسي على مخرج ماتعرف تعطيني شي نصيحة باينة فيها عندها خبرة فالحياة
– قالت ليا سولي علاش باك ماعطاكش لديك العائلة وشنو السبب
– قلت ليها الله واعلم انا دابا بغيت غيير نتفك من ولد عمو حيت غنرجع غايعطيه الكلمة والى عطاها ليه صافي ماعندي ماندير وحتى الولد اللي كنعرف رافضو بابا رفضا قاطعا وبقا عندي امل واحد هوا تجي مو عندنا للدار قبل مايهضر با مع ولد عمو
– وانا قبل مانسمع جوابها صونا تيليفوني طليت لقيت مسج من عند يونس قالي راه مو مشات تعزي شي ناس من العاىلة فالبلاد غتجلس تما سيمانة عاد تجي! الله يا ربي هادشي. اللي كان ناقصني غير مو تغبر سيمانة دابا صافي بابا غيعقد بيا على عبد الحق مافيهاش . ضاق صدري وتزيرت حسيت بالدنيا غادية ضدي. وكولشي معكس ليا وعبطت راسي شديت جبهتي وسكت كنقطر فالدموع على تكشيطتي فصمت حتى سمعت السيدة كتقول ليا رخفي على راسك راه حتى حاجة ماتستاهل .. انا اللي داز عليا نعاودو لحفار قبري ومزالة كنضحك ونفوج على راسي
– هزيت راسي قلت ليها عييت ماعرفت ماندير وعاودت ليها شنو قلت لعبد الحق وشنو طرا وشنو سيفط ليا يونس والامل اللي طفا ليا وبقات ساكتة كتشوف قدامها قالت ليا عرفتي شنو ديري .. هضري مع هاداك اللي كان باك حامق عليه قولي ليه يخطبك على الاقل تكسبي شوية دالوقت حتى تشوفي شنو ديري .. ياك كايعاودو عليه معقول .. قوليه نتي راكي باغاه تسنيتيه كاااع وباك بغا يزوجك واحد اخر .. مدام باك عاجبو وباغيه مغاديش يردو
– قلت ليها لالا منقدرش غادي نتورط معاه ومكنعرفوش اصلا شكون هوا وكيفاش داير ومانرضاش نطلبها منو واصلا بغيت يونس مابغيتو لا هوا لا غيرو
– قالت ليا لااا غير فالاول قولي ليه هاد الهضرة يجي يخطب باش تحيدي داك ولد عم باك من الطريق وفاش دوز الخطبك عاودي ليه شنو كاين ماتعرفي تصدق ليك هاد الطريقة .. هوا اصلا غادي تعجبيه كره هوا وحدة شو كيدايرة بالزين ! مغاديش يردها فوجهك
– قلت ليها والو لسق عليا حتى هوا كي ولد عمي
– قالت ليا اللهم نص خسارة ولا خسارة كلها نتي محاملاش ولد عم باك بدليه باش ما عطا الله المهم تفكي منو وتوكلي على الله يقدر الى قلتي ليه شنو كاين من بعد يعذرك ويمشي بحالو .. حيت اصلا حتى واحد مايفكك من باك من غيرو اصلا كان باغيه يعني مايرفضوش
– بقيت ساكتة قلت ليها حشمت
– قالي واتزوجي ولد عمك وسكتي الى حشمتي
– تنهدت قلت ليها والى ماصدقاتش
– قالت ليا ماتعرفي شنو كاين نتي جربي اي حاجة تفكك من داك المنحوس بعدا واللي شدات ليك مزيانة .. تفكي بعدا عاد شوفي كي ديري لهداك اللي نتي باغا ..دقة دقة حتى يحمل الواد
– ربعت يدي قدامي بقيت كنفكر شحال فهضرتها واخا ماعرفتش شنو اللي ضار بين بابا وبين ولد الحجوجي وشكون هوا وفين غادي نلقاه وكيفاش نقولها ليه .. فكرت نجيب تيليفون بابا نقلب عليه تفكرت سميتو اللي قالت لي ماما وضرت عندها قلت ليها طفا ليا تيليفون بغيت تيليفون بابا نصور بيه
– قالت ليا هاتيليفوني صوري بيه
– قلت ليها لالا بغيت تيليفون بابا كيصور احسن وبقيت كنرغبها ونعرنن عليها وناضت كتسوط خرجات لبرا كتقلب على شي واحد تسيفطو لباب ورجعات هازة تيليفون عطاتو لي وجلسات شديتو ودخلت كنقلب على نمرتو ولا كنيتو لقيت عندو عرام ديال الحجوجيين فتيليفون .. طلعت وهبطت ختى طلعات ليا نمرتو عيسى الحجوجي . هزيتها بالزربة قيدتها عندي بحرف اكس ورجعت تيليفون لماما وجلست كنفكر ونكتب حرف ونمسحو ..حشمت وترددت ماقدرتش نكتب وضرت حدايا عند المراة لقيتها كتاكل الحلوى قلت ليها بخجل وتردد عرفتي راني جبت نمرتو ولاكن ماقدرتش نسيفط ليه شي حرف
– بقات كتشجعني نزعم لاكن ماقدرتش وقالت ليا اري نكتب ليه انا … ديري النية ماتعرفي شنو كاين
– مديت ليها تيليفون بتردد شفتها كتكتب وانا كنتسنا وعطاتني تيليفون قالت ليا هاشنو كتبت ليه
– شديتو كنقرا ووجهي كايحمار تزننكت وحطيت يدي على حنكي كنقرا
– [ ] انا من انتظرتك و طال انتظاري .. انا من احببتك وسهرت الليالي .. لا تعلم انك الشخص الوحيد في قلبي ولا اقارنك بأحد ، لا أدري كيف احببتك وكيف جعلتني اتعلق بك لاكن كلما اعرفه انني انتضرك ….تزوجني حبيبي ، فلن اقبل غيرك
– الله الله الله اش هادشي لل من صافي هادشي اللي بقا كملات الباهية . قلت ليها لالالا هادشي تبرهيش مالي مكلخة لهاد الدرجة نجي ونقول ليه هاد الهضرة
[ ] بقات كضحك وقالت ليا وكفاش بغيتيه يخطبك راه حلاوة اللسان هي كولشي وشحال من وحدة تزوجات بهاد الطريقة سوليني انا نقول ليك راه مابقاتش فالقراية لقراية دبصح هي ديال الدنيا والتحارب الى بغيتي تنجحي فالحياة
– [ ] عضيت شنايفي جاتني الضحكك بقيت كنولول وقلت خلي نشوف هادشي فين غيوصل اجي نتبع رايها وكما قالت هي ره القراية دبصح هي ديال الدنيا اما انا راني قدامها مقارية والو ديبلومي علاش شديت دكتورة وقريت راه غاينفعني فليكونومي. ماشي فليكوزواجي وهي راه عندها ديبلوم فهادشي. . وحسيت براسي عمرني قريت شي حرف قدامها وهي واعية عليا فهاد الامور ماشي بحالي ماعندي خبرة ولا تجارب كنمشي نقرا قرايتي ونجي بحالي من نهار عقلت على راسي وانا كنبغي يونس عمرني شفت جنب كنمشي مع الطريق نيشان . رسلناه وبقات كل شوية تقول ليا واش جاوبك حتى سالا العرس ونضنا كنتسالمو مع العاىلة وتخلط شي بشي داخل القاعة عاد وصلني مسج حليتو لقيت مسيو اكس اللي اصلا انا مكنعرفوش شكون كتب ليا شكون معايا؟
– [ ] هزيت راسي كنقلب على ديك المراة لقيتها كتهز صاكها تخرج ومشيت عندها بالزربة جارة تكشيطتي كنقرقب بالطالون شديت فيها قلت ليها اجي اختي عاونيني عفاك راه رد عليا
– [ ] قالت ليا وا جاوبيه قولي ليه شكون نتي
– [ ] قلت ليها ماقدرتش هاكي قوليها ليه نتي عفاك
– [ ] عطيتها تيليفون وهي مشطونة مع الناس قالت ليه انا بنت الامام علي اللي عرضك بابا تزوج بيها .. جاوني خطاب لاكن كنفضل الانتحار على الزواج براجل من غيرك
– [ ] شديت تيليفون بقيت معجبة لهاد السيدة اللي قادرة تقول بحال هاد الكلام .. لاكن بصراحة انا بلاصتها نقول لعجب غير مايكونش القول باسمي .
– [ ] سلمات عليا ومشات خرجات وبقيت مع ماما حتى بدا تيليفوني كيصوني طلع ليا مسيو اكس وقلت لماما غنمشي للطواليط ونرجع ، مشيت كنجري لقيت واخد البيت فواحد الممر خاوي ودخلت ليه كنترعد ونقفقف حشمت نجاوبو لاكن يا ربحة يا دبحة ماعندي ماندير . فتحت الخط جاوبت بواحدة الرجفة فحلقي والتبوريشة شاداني حسيت براسي مشنجة كاملة. قلت ليه الو
– [ ] جاوبني بواحد الصوت حسيت بيه فيه واحد الهبة وواحد الرهبة قالي شكون معايا
قطعت عليه بالزربة متقدرتش نهضر ودرت يدي على فمي قلت مع راسي اوييلي شنو هادشي كندير كنعرض راسي على واخد اخر !! اوييلي ميمكنش!! وكملات وجملات عرفتي بنت الامام صافي تشوهت خايبة حتى للتعويدة .
خرجت من تما بغيت نهرب من ديك القاعة نمشي بحالي وعمرني نطوف بعائلة الحجوجي ولا نزطم عندهم . مشيت لحقت على ماما كنجري لبرا وكان النهار والرجال تفرقو علو برا كل واحد جاب سيارتو ياخد فيها عائلته ، شديت تكشيطتي فيدي هزيتها وكنزطم بالصباط فالغوز بيبي طالونو رقيق وعالي بزاف خايفة يطيحني ونجي على سناني قدام الناس .. وصلني مسج ووقف حدا الشانطي طلع ليا مسيو اكس قالي حشومة هادشي راك زعما دكتورة .
ويييلي على غدايدي شديت حنكي وعضيت شنايفي كنعصرهم وحتى انا نستاهل هاهوا عطاني خو جوابي داكشي اللي ماتوقعتش يقولو ليا هاوا قالها وطيحت براسي وحشمت راسي حسيت بنبضي تقاس ومارضيتش بديت كنزفر فبلاصتي متعرفت فين نعطي بالراس. وطموبيلت بابا مرسيديس كلاص كحلة قدامي وانا مشايفاهاش حتى عيط ليا قالي سااارة .. يالا ايوا خلينا نشدو الطريق مشا الحال . شفت جيته لقيت حداه واحد الطموبيل واقفة زرقاء كتبري فاخرة كلاص عمرني شفت بحالها وحداها واحد الراجل واقف عاطيني بضهرو كيهضر مع بابا لابس بذلة فبلو مارين تلفت جيهتي مباشرة فاش عيط ليا بابا .. هبطت راسي ماشفتش وجهه وماحققتش مزيان شفت الطريق فين كنزطم بالشوية ومشيت دزت حدا كتفو دايرة اسقاط النضر بان ليا من الجنب كيشوف فيا متبعني وطلعت للطموبيل بالزربة اللور سديت عليا خفت نتصادف مع السي عيسى ويعرفني فوجهي .
لقيت ماما كتسناني جالسة لقدام قالت ليا تعطلتي ، قلت واتا كنقاد الشال ديالي من لقدام كنغطي شعري اللي كان كيطل راني كنت كنقلب عليك .
قالت ليا باك تعطل ماجاش . ضرت ورايا كنقلب خلانا فطموبيل شحال عاد شفت القلدة ديالو جايا لابس الموف بلدي وسروال قندريزي ابيض وبلغة موف وتقاشر فتح الباب وطلع ديمارا طموبيل قالت ليه ماما فين كنتي تعطلتي قاليها كنت مع ايت الحاج كنهضرو فشي حاجة
– [ ] قالت ليه شنو هاد الحاجة ؟
– [ ] قاليها من بعد. . دابا خلينا نتوكلو على الله نمشيو تابعانا الطريق
– [ ] خرجات سيارتنا الفخمة بقيادة افخم اب واحن قلب السي بابا حتى للطريق ودازت حدانا السيارة الزرقاء خفضات السرعة كان عندها زاج فومي كحل والزاجة اللي جهة القائد كانت مهبطة للنص وزاد هبطها مولاها اكثر شفت غير يدو دلات كانت كتشعل بالتقاوة فيها شعر كحل رطب مهزوز عليها شوية كم القميجة البيضاء والساعة فضية كتشعل وخاتم فالخنصر وحداه خاتم اخر كحل مربع فصبعو الصغير سمعت بابا كيقول كيهضر معاه ويضحك ولاخر من السيارة لداخل قاليه طريق السلامة الحاج ونطلاقاو فساعة الخير ان شاء الله ..
قاليه بابا ان شاء الله السي عيسى الله يكمل بلخير
ضورت وجههي بالزربة شفت ورايا فاش سمعت سميتو شفت سيارتو دايرة السينيال للجنب بغات ضور وشديت حنكي قلت اويييلي واش هادا هوا السي عيسى ودزت حداه بوجهي حمر وتايقك فراسي !!!
تفكرت المسج اللي بهدلني بيه. ومارضيتش دخلت ديك الساعة مسحت نمرتو بقبت كندعي فديك المسخوطة اللي غرقاتني ومشات تنعس وبقيت انا كناكل فراسي فين ما نتفكر المسج اللي سيفطنا ليه والرد ديالو كنبدا نعرق تمنيت تشق الارض وتبلعني ومايشوفش وجهي . مارضييتش شدينا الطريق ونعست حتى فيقوني حليت عيني شفت على برا لقيت بابا واقف فالطرق فباحة استراحة خرج شرا لينا الشوا ومشروبات وجابها لينا حيت ماصلاحش لينا نخرجو بالتكاشط .. كلينا شوية وكملنا الطريق للدار ، وصلت لبيتي حيدت حوايجي وغشلت وجهي وطحت نعست فديت السهير ديال الليل وبديت نحلم شي احلام مخربقة مربوطة بالاحداث اللي عشت . ضرباتني الفيقة مع المغرب سمعت الاذان لاكن مكانش صوت بابا كان صوت مأذن اخر كيكون مع بابا فالمسجد ونضت خويت علي لحمي الماء باش نتوكض وخرجت لابسة بيجامتي وبينواري من البرد وبانطوفتي نزلت لتحت بلا مندير الحس سمعت صوت بابا كيهضر مع ماما بصوت منخفض فالصالون اللي كنجلسو فيه قاليها واشوف على زهر كنا دايرينها غير ضحك ختى صدقات بصح
– [ ] ماما: ياك قلتي لي صافي مكاين والو من داكشي رحعتو عاوتاني هضرتو عليه
– [ ] بابا: ايوا شغادير ؟.. ها هي جات فالهضرة قالك اسيدي. والله حتى نتناسب معاك صافي
ماما : دابا واش نتوما كتهضرو بصح ولا كتفلاو وضح ليا هادشي براكة من ديك الملاغة
ضحك قاليها وا الملاغة ولات بصح شفتو باغي يتناسب واخا كيضحك وخاف يمكن يقولها نيييشان ونقول ليه لا خلاها هاكاك
– [ ] ماما: لالالا السي علي لااا انا و مانوافقش هاد الزواج راه قلت ليك هما كايديرو التعدد ونسيفط ليهم انا البنت لالا مايصلاحش لوكان زوجتيها لهاداك اللي جا عندك للجامع احسن
– [ ] قاليها لااالالااااا هاداك صافي سيفطتو بحالو مصالحش ليها
– [ ] ماما: ايوا وشكون اللي صالح ليها الحجوجي ؟؟.
– [ ] بابا: راه ناس معقولين اهاد المرى حنا بغينا المعقول واللي يخاف الله ويكون ميسر تعيش معاه البنت فالعز ويكون راجل ونص .. الشي لاخر نكيهمنيش .. صافي غير تفيق جيبيها ليا لهنا انا اللي نهضر معاها فهادشي
– [ ] سمعتو قاليها جيبيها وانا نهرب جيت نطلع تعكلت درت الصوت وعاودت نزلت زعما راني فقت وخرجت قدامهم غادية جهة الكوزينة ، سمعت بابا عيط ليا ورجعت عندو تكلمت وجلست وانا متوثرك عارفاه غيجبد الموضوع المحرج قالي جلسي ديري كاسكروطً وجلست كليت شوية حتى ساليت وجيت نوض ورجع شدني قالي حلسي ابنتي نهضر معاك وجلست قدامو قلت ليه نعام
– [ ] قالي ليوم جا واحد السيد هضر فيك .. شفتو مزيان واصوله مزيانين ومايخصك معاه خير والى وافقتي عليه غادي نزوجك ليه
– [ ] هبطت راسي سخنت بالحشمة ونضت من قدامو بالزربة هربت بقا كيضحك عليا وسيفط ليا ماما دقات عليا فالطواليط كنت كنشوف وجههي الحمر فالمرايا ،خرجت عندها لقيتها دايرة يد على يد قاليت ليا هي عجبك الحال؟.
– [ ] ضحكت قلت ليها وشكون هادا ؟
– [ ] قالت لياعيسى الحجوجي هوا اللي رجع هضر مع باك ولاكن راه عندو ضروف
– [ ] قاطعتها قلت ليها راني عارفة داكشي ديال التعدد .. اللهم الحجوجي ولا عبد الخق
– [ ] هزات حاجبها فيها ودارت واحد الضحكة قالت ليا ايوا الاللة مللي بغيتي تمشي عند ايت الحاج الله يكمل عليك بلخير وغاتفرحي حتى باك اللي كان باغي يعطيك ليهم
– [ ] سكت قلت ليها اللي دارها بابا هي اللي تكون هوا اللي عارف مصلاحتي
– [ ] بقات غير كتشوف وترمش وقالت ليا هانا غادي نقول ليه هاد الهضرة
– [ ] مشات خرجات وبقيت جالسة فبلاصتي حتى سمعت الباب تحل ودخل عندي بابا عاجبو الحال عرفتو بغا يسمعها من فمي .. عاود سولن وقلت ليه اللي درتي ابابا
– [ ] عنقني وخرج مشا وبقيت بوحدي سيفطت مسج ليونس قلت ليه شارجي ليا راه ماقدرتش نقولها لمالين الدار رسيفط ليا روشارج عيطت ليه قلت ليه راني تفكيت من عبد الحق ولاكن بطريقة خايبة خاصني نتفك من واحد اخر لاكن كما كان الحال احسن من اللول وبقيت كنعاود ليه على الخطة اللي فراسي وكنهضرو شفتو منفخ عليا حيت بابا ماقبلش عليه ومارضاش وبديت نرطب معاه وانا براسي خاص اللي يصبرني ويوقف معايا ،، الايام كطير وبابا عطا الكلمة للحجوجي لاكن التيليفون بيناتنا منعادم ماسيفط ليا ماسيفطت ليه ومابقا عندي مانقول ليه كولشي كايدوز قدام بابا وماعرفتش علاياش كايتافقو ، حسيت بيدي مكبلين حتى واحد ما واقف جنبي وبين ليلة ونهار تبدل لعريس من واحد لواحد وماكرهتش نشوف وجه عبد الحق كي داير فاش قاليه بابا راني عطيتها لواحد اخر واكيد غايحساب ليه عطاني لهاداك اللي قلت ليه باغا انا ..تشهيت نشوف كمارتو نوريه يعيط لبابا زعما راني طالب راغب فبنتك ويقول ليه بابا اه ًً. باغي يزرب عليا ساعا فطرت بيه قبل مايتعشا بيا .
– [ ] على ذكر العشا دخلت كنعاون ماما فلكوزينة من بعد فترة على مرور العرس وقالت ليا راه ايت الحاج غايجيو السيمانة الجايا عندك
– [ ] رجعت اللور لسقت مع الحيط قلت ليها دغياا!!
– [ ] قالت ليا راه الزواج هادا ونتي عارفة باك مكيبغيش يطول خصوصا فمواضيع الزواج وديك الجران من هنا لهيه مكايعجبوش .. غادي يجيو نقراو فاتحة ويحن الله من بعد
– [ ] بلعت ريقي ضارت بيا الدنيا وخرجت مشيت للحمام بغيت نعلم يونس يجيب مو ولا نشوفو شنو نديرو ولا نصارح الحجوجي بشنو كاين وجبت تيليفون بزربة ويدي كترجف حاسة بقلبي غايسكت حليتو بالزبة وانا كنمشي ونجي ختى زلق من يدي جا وسط لاشاص وهزيتو عامر بالماء طافي كيقطر ،. تعصبت حسيت براسي فشلت وجلست خليت تيليفون وبقيت كنشوف قدامي ونهضر مع راسي. على هاد الزهر اللي عندي والتيار اللي غادي بيا عكس ما افكر به وما اريده .. احس بتعب شديد وارهاق والم في راسي وانهيار كاد ان يغمى علي ! تعبت من هذه الدنيا ومن الركض وراء عقد حياتي .. لا ادري كم مر من الزمن لاكنني كل ما اذكره انني كنت احاول الاتصال بأحدهم .. توقف تفكيري حركتي وغبت عن ارض الواقع .. الشرورد ثم الشرورد. ثم الشروود .. كنشوف ماما وخوالاتي كيتسارعو باش يجهزو الدعوة للحضور وبابا طول اليوم وهوا غايب فالجامع حتى تيليفونو اللي نهز منو رقم الحجوجي نصارحو قبل مايجي ماتاختش ليا فرصة نشدو واها درت اكثر من محاولة . وصل اليوم الموعود وكنشوف التجهيزات فدارنا والهبر انتشر وماقراش نصدق انه فرحي انها خطوبتي ، انه نهاري وغادي نكتب كتابي من بعد ايام قليلة ! كلشي بهاد السرعة وكلشي بترتيبات بابا وانا بحال الامانة فالدار حتى جات خالتي وماما لقاوني شاردة فالبيت وجالسة كما خلاوني فاش دوشو ليا فالحمام ولبسوني قفطان مليفة كريمي مايل للابيض بالراندة غليضة من الصدر والكمام بنفس لونه. كانني لابسة قطعة من الكريمة الورقية لشدة نقاوتها ولونها الناصع ، كان شعري
مطلوق اشقر نصفه جالسة عليه وملوية على راسي شال خفيف وريحتي فايحة بحال أي عروس طايح عليها السر .. لاكن انا طايح عليا غير الضيم والغبينة .. بقات معايا خالتي جالسة كتشوف فيا وتصلي على النبي في حين خرجات ماما تتكلم لبابا وقالت ليا خالتي
– [ ] – كوني مرى وقادة .. الضراير راه مساهلينش ابنتي
– [ ] شفت فيها وقلت ليها انا مابغيتش نتزوج راه هادشي فوق ارادتي
– [ ] استغربات قالت ليا واش حيت غادي تاخدي الراجل مزوج ؟؟
– [ ] حليت عيني قلت ليها كفاش مزوج ؟؟ واش مزوج !
– [ ] قالت ليا وشنو كنا كنقولو من الصباح على التعدد ما التعدد واش باك ماقالش ليك راه مزوج
– [ ] قلت ليها لا !!! كان كايحسابني كيهضرو على التعدد زعما يدير التعدد عليا انا ماشي نمشي انا على الضرة!!
– [ ] ضرباتني خالتي بهضرتها قالت ليا راه مزوج جوج عيالات اش كتقولي واش كدوخي عليا
– [ ] تصمكت وكنت كنتستا شي واحد يفيقني من صدمتي حتى جات الطامة الكبرى واتعترضت هاد الزواج وحليت عيني فقت من السهوة لقيت راسي عروسة لابسة الابيض وجالسة فالبيت ! جات ماما بقاتنا كنهضرو وانا كنبكي قلت ليها مابغيتش نتزوج وشديت فيها عنقتها وهي مافاهمة والو كتسول شنو واقع قالت ليها خالتي راه ماحسابش ليها مزوج جوج قال ليك
– [ ] قالت ليا ماما كفاش ماحسابش ليك مزوج جوج واش بعقلك راه عارفة وقابلة واش جيتي حتى للنهار بنهارو بغيتي تحشمي باك قدام الناس ؟ شنو نقولو لدوك الناس اللي جالسين فالصالون دابا يالاه ؟
– [ ] قلت ليها ديري اي حاجة المهم فكيني ماتزوجينيش رلا ندير شي حاجة فراسي.
– [ ] قالت ليا مايمكنشً راه باك عطا الكلمة مالقيتي لمن تقوليها غير الايت الحاج ديري فينا الضحك
– [ ] خرجات خلاتني ووصات خالتي تبقا حدايا جالسة وبقيت انا كناكل فراسي وفروحي ونرغبها ونبكي ونطيح عليها ووالو حتى عييت وسمعت الباب تحل ودخل بابا معصب شفتو وتقاديت فالجلسة قالي اشنو قلتي دابا لمك ؟؟
– [ ] قلت ليه والو ماقلت والو
– [ ] قالي لالا غير عاودي شنو قلتي ليها نسمع
– [ ] بقيت كنقفقف قلت ليه ماقلت ليها والو
– [ ] قطعت النفس فيا حتى تخنقت كنحس بكرشي كترعد وقمعتها فنفسي . قالي السيد غايدخل دابا للشوفة الشرعية والله ونطقتي بشي كلمة ماشي حتى لهيه حتى نسخط عليك ما انا باك ما نتي بنتي انا علمتك
– [ ] قطعت حسي حركت ليه راسي بالايجاب وسكت وخرج بقيت مع خالتي شدات ليا فيدي زيرات عليا باش نتهدن وعطاتني الماء شربت بزز ودعيت فخاطري فهاديك اللي عطاتني هاد الرأي علماتني درس عمرني ننساه وعمرني نتبع شي حاجة قالوها ليا الناس وندير داكشي اللي انا كنشوفو مسلكني ومناسبني وعمرني نحط نجاح خططي ودائما ندير قدام عيني انها كاينة ضروف كاين اقدار وعراقيل وتقلبات ممكن طرا عكس ما توقعت حدوثه كما وقع ليا . جلسات قدامي خالتي كتصبرني كنت محتاجة لحضهنا يدفيني ويهدئ من روعي . مسحات ليا وجهي من لكحول اللي ساح تحت عيني وقالت ليا صافي ابنتي سكتي قطعتي بي قلبي …ترجاي الخير ماعرفتيه فين كاين راه مزوجين غير وحدة ومشربينها المرار … راه هاد الراجل مزيان حسب ما كيعاودو عليه وعادل وبعقلو تبارك راه ماكبيرش عليك بزاف ولا شارف وموالمك .. شالله عندو ٣٨ سنة .. نساي لخرين حسبيه مامزوجش شوفي راسك نتي وصافي ونساي كولشي
– [ ] قلت ليها انا مابغيتش نتزوج بيه بغيت واحد اخر
– [ ] قاطع صوتي صوت الدقان ودورت وجههي مسحتو من الدموع قالت ليا خالتي صافي براكة من البكا هاهوا حا غادي يشوف وجهك حمر يعيق بيك وباك يغضب عليك
– [ ] هزيت راسي نتنفس نشوف شكون هوا هادا اللي والله واعلم غيكون راجلي بزز مني الى ماطراتتش معجزة تفكني منو . دخل بابا كيضحك وحدرت راسي كنشوف قدامي والشال مدلي على وجهي عشواىي وشعري محلول صاوباتو لي بنت خالتي بالبالييليز وحلاتو ليا واخا شد فيه غير شوية حيت ملمسه ناعم . شفت صباطو قدامي مسيري وسروال توب بلو مارين محدد طايح عليه وريحته واصلة حتى لعندي خلاتني نميز شخصيتو ودوقه الرفيع .. من خلال عطره حسيت بيه ماعزيزش عليه يلفت الانتباه او يخطف الاضواء وكيبغي الوسطية ماشي المبالغة فالشيء ولو كنت عارفة بهاد النوع من الرجال لا كنت بالغت فكلشي لعل وعسا ينفر ويتراج عن فكرة زواجهه مني لاكن مع الاسف حتى انا كنت طبيعية ما بالغت فحتى حاجة وحتى فعطري الفواح كان خفيف .. كنت متوقعة نشم ريحة المسك او العطور المجهدة ديال صحاب اللحية اللي كنكرهها ويهرب لي خاطري منها وهادا ماكنت اتوقعه لاكن وقع الكعس كان عطر فرنسي بنكهة سرية خفيف مريح ولطيف نسم الجو ديال الغرفة فين جالسة انا . خرج بابا ورد الباب شوية وراه وبقيت على وضعيتي كما انا كاتمة مشاعري فصدري ، جلس قدامي على واحد الكرسي شفت ركابيه تثناوحديت الشوفة حد صباطو وبقيت ساكتة كنفكر شنو نقول. واش نصارحو ماحدو قدامي ويمشي ونرتاح .. شنو غيرقع الى قلت ليه الحقيقة واش غيتفهمني ؟ واش غايوقف معايا او العكس.
– [ ] حنحن بصوتو وقالي السلام عليكم
– [ ] رديت بخفوت قلت ليه عليكم السلام
– [ ] بقا ساكت شوية وقالي لاباس ؟
– [ ] قلت ليه لاباس الحمد لله
– [ ] قالي هزي راسك شوية … نشوفوك وتشوفينا
– [ ] جمعت النفس تنهدت وشفت جنب ومارضيتش نهز راسي تفكرت الكلام المعسول اللي رسلات ليه ديك الموصيبة نهار العرس وغرقت فحوايجي مالقيتش الكمارة اللي نهزها قدامو وفوق هادشي عارضاه عليه الزواج وجا دارها ليا على قد فمي ونزيد نقوليه لا مقابلاش!!!
– [ ] قالي هزي راسك خلينا نشوفوك !
– [ ] هزيت راسي بتردد وبلا منشعر غرست دفري فيدي وشفت فيه فإذا بي اصعق اصعق برجل تفوح منه راىحة الرجولة فجلستو فنضراته شفت فملامح وجهه بنضرة خاطفة بلمح البصر خديت ليه صورة سريعة ، كان ليه حواجب مربعة مسحوبة للأعلى وعيون لوزية كبيرة سوداء اللي عطات نضرة حادة جذابة .. والشوارب طويلة قوية داكنة اللون خفات شفاهه بين شعيراتها السوداء بجوانبه لحية سوداء ما كثيرة ما خفيفة وشعر محسن حسانة بعقلها مطراسية على جبهتو بحال شي شرطي كيتوسطها دليل الصلاة على شكل بقعة صغيرة بنية مايلة شوية للسواد ..هيبة ووقار وعضمة خلاوني نحشم من راسي على شنو رسلت ليه من قبل مباشرة فور ماشفتو قلت مع راسي مزوج جوج علاش بغا يزيد الثالتة ؟. واش ماقنعوهش جوج عيالات ؟. واش. من النوع اللي كيبغي التعدد والعيالات؟ ممكن !
– [ ] قال بصوت منخفض الله ما بارك. وهبط عينيه سكت شوية و قالي واش عندك شي شروط تقوليهم؟
– [ ] بقيت ساكتة ماكرهتش نقوليه مابغيتش هاد الزواج اصلا اما الشروط ماتسناش ليا اافرصة نقولهم وبقيت ساكتة قلت ليه شوف مع بابا هوا عارف مصلاحتي
– [ ] قالي باباك شرط عليا نسكنك بوحدك وتبقاي هنا فالناضور وانا شرطت عليه ديري الخمار واش قابلة على هاد الشرط ؟
– [ ] رديت بسرعة وقلت ليه لا اسيدي لا انا ماقابلاش ندير الخمار وحتى الحجاب مامقتانعاش بيه غير ولفتو
– [ ] بقا كيشوف فيا وسكت قالي مقابلاش على شرطي؟
– [ ] لقيتها سبة وقلت ليه لا اسيدي ماقابلاش عليه .
– [ ] بقا ساكت مطولا وهزيت شالي اللي على كتافي رديتو عل راسي بديت كنخبي شعري وضرت جنب جلست بغيت نبين ليه باللي ماراضياش ،. مسح على ركابيه من بعد ما طول فالجلسة كيفكر وناض خرج بخطوات بطيئة دار يديه فجيابو. ،. قلت الله ياربي صافي تهنيت حمدتك ياربي وشكرتك جا السبب اللي كنت كنقلب عليه
عرفت راسي انه مايصلاح ليا غير يونس. اللي كيفهمني ونفهمو ومعاه نقدر نعيش حياتي مرتاحة ، تنفست الصعداء وخرجت من باب البيت هربت من ريحتو اللي بقات منتاشرة تما ومشيت فاتجاه الحمام اللي جات جيهة الدروج حتى كنتصدم بصوت بابا القوي والفقهاء. والرجال كايقراو فاتحتي بصوت بابا وهوا كيجود ومن بعدها قرا بابا الدعاء. ودعا معايا حسيت بيه كيدعي من قلبو .. هوا كيدعي وانا كنبكي حتى نشفو دموعي ومشا الدم من وجهي كأنني ازف لقبري وليس لزوجي … ماحطيتش النعمة ففمي من عشا الخطوبة وتركنت كنبكي فوق ناموسيتي حتى مشاو الناس ودخل بابا عندي لقاني كنبكي .. غير شفتو دخل مسحت وجهي من الدموع وقلبت وجههي .. جلس حدا رجلي كان باقي بلباسه اللي استقبل بيه الضياف وريحت المسك والعود كتفوح منو ولحيته كتبري ، قالي علاش تقلب ليك الراي ؟؟؟ قولي ليا باش نعرف شنو اللي عاجبك وشنو اللي معاجبكش ؟
درت يدي على نيفي مربعة يدي كنسمخ نيفي والنخصة فيا ماكنهرضرش.
قالي السيد بغا يتزوج على سنة الله ورسوله ومزيان ! يتزوج حتى عشرة ماشي شغلك فيهم شوفي راسك نتي ونساي عليك التعدد
لاول مرة نهضر ونعطي رأيي لاكن حسيت بابا فتح بيا فرصة نهضر ومبرد دمو. قلت ليه علاش هاد التعدد علاش؟ صافي حيت مزيان صافي واخا يكون عندو التعدد علاش اصلا جا عندي مللي مزوج
عقد حجبانه قالي فاش توقفي غدا قدام الله قولي علاش درتي التعدد وعلاش عطيتي للراجل ربعة وقولي انا ماراضياش بهاد القسمة اللي درتي !! اابنتي نعلي الشيطان واش الله عز وجل حلل ربعة. ماشي غير جوج ربعة وعارف علاش حللهم ونتي كتقولي علاش التعدد!! بغا يدير التعدد هوا وخالقه عارفين علاش نتي مالكي كدخلي فشرع الله .. الزواج راه عندو شروط. ماشي الشروط ديالكم التافهة .. شفتي الراجل الله يعمرها دار غادي تعيشي معاه مزيان وانا عارف شنو كنقول راه والله مايخصك معاه خير ومايفسد عليك ما يخون وكايخاف الله وعاادل وراني شرطت عليه تبقاي هنا بعيدة كااع على لخرين وتفاهمت معاه وحطيت ليه شرووط .. توكلي على الله راه عائلة مزياانين مال هادوك اللي قبلو بالتعدد باقين لدابا لاسقين تما علاش ماهربوش؟
قلت ليه كنبكي علاش انا بالضبط زعما علاش ماشي شي وحدة فخواتاتي
قالي نتي لعزيزة عليا درت ليك خاطرك وقريتك واديري ليرخاطري ماتخشمينيش قدام الناس .. ماهي عيب ولا حرام هادشي حللو ربي .. السيد مزيان ماشي خايب ومعقولكوني غير نتي معقولة .. قال الرسول (ص) تنكح المرأة لاربع ،، لجمالها و لدينها ولحسبها ومالها .. والسيد عجبو الحسب والنسب والجمال والدين جا ها علاش جا
درقت وجهي تزنكت كنكره نجلس قدام بابا وهوا كيهضر فالدين مكيحشمش كيدخل فالهضرة طول وعرض واخا يكون فين ما كان .. بقيت كنقول ليه صافي صافي وصافي. غير باش يسكت يفكني وناض عنقني قالي الله يرضي عليك ابنتي وماتعمريش راسك بتخربيق تبعي الدين ديالك عمرك تلفي
وكلت امري لله وماراضياش على هاد الزواج وخصوصا نكون ضرة على جوج عيالات مساكن يعلم الله كفاش غادي يكونو دابا وهما غيستقبلو ضرة ثالتة .. انا شخصيا منقبلهاش وماقابلاش نمشي ضرة ومنقبلش تجي عليا الضرة ابدا لاكن اغلب رجال الدين كايديرو التعدد وهادشي مناش كنت كنتهرب دائما ونخاف وحتى بابا واحد منهم كان فواحد الوقت غايجيب الضرة على ماما وماقبلاتش طلبات الطلاق وهادشي خلا بابا يتراجع على قرره ومايتزوج لاكن بقات فيه حرقة وكانت عنده رغبة باش يتزوج وقاليها انا ماباغيش نطلقك وباغي نتزوج مللي مابغيتيش صافي مغاديش نتزوج بلحق منك لمولاك فاش تمشي عندو يحاسبك . من تما ماعاودش ذكر الزواج وماما ختى هي رفضات واخا هضرو معاها الناس وقالو ليها حرام عليك وشنو غادي تديرمن هاد الدنيا رأفي بحاله مسكين وخليه يتزوج لاكن كانت متشبتة بقرارها وهوا ختار يبقا معاها وتخلى على فكرة التعدد . كنت فديك الوقت كنقرا فالباك وبقا فيا بابا قلت ليها خليه يضبر راسو ياك عشتي معاه اللي قسم الله صافي خليه لاكن غضبات عليا وكرهاتني على هضرتي وماكنتش حاسة بيها ساعتها كنت كنشوف الامور من زاوية المتفرجين اما دابا حسيت بحرها وشحال قاصحة وصعيبة .. واخا ماجربتش حر تجير عليا الضرة لاكن دقت من كاس التعدد مابغيتش نمشي انا ضرة وهاد الموضوع خدا ليا تفكيري وطاقتي نساني فيونس والزواج بصفة عامة حيت طغا على وضعي وضع اكبر من اللي كنت كنتخيل خلا مشاكيلي تبان لاشيء قدام موضوع التعدد.
قطعت حسي مابقيتش كنشوف الزنقة وصوتي مابقاش مسموع ساق ليا بابا لخبار مشا ليا تيليفون و – [ ] جاب لي بابا تيليفون جديد بعد ذلك باش نتواصل مع خطيبي او بالاخرى سكينيي الحاد لاكنن عمرني تاصلت بيه او استقبلت مكالمته ، ربما كان كيضن انني خجولة لاكنني كنت كنحاول نبين ليه الجفاء باش يتراجع ونحسسه بعدم اهتمامي لاكن مع الاسف فشلت وتحدد يوم عقد قراني بينو وبين بابا وهادشي كامل سببه الغزل والكلام الجميل اللي رسلت ليه اول مرة. ، كان اعتراف قوي بالرغم من انه كاذب لاكن شكون يقدر يكذبه الا كنت انا شخصيا منقدرش وكنتحارب مع القدر بدون اسلحة .. كانو اتصالاتي مع يونس المتكررة تنتهي بمشاجرة فكل مرة بحيث كان كيضغط عليا نفسخ الخطوبة ويحملني نسؤلبتها وكل مرة يطلب مني نهرب معاه لاكن كنت كنرفض. .. نعم نرفض لانه ليس من تربيتي واهلاقي ومبادئي. نخون الثقة اللي حط فيا بابا وماما ونطعنهم فضهرهم وندوس على كبرياىهم ونسحق كرامة بابا ورجولته ونهرب مع راجل ماهوا زوجي او خطيبي. واخا كنبغيه ومتعلقة بيه حد الجنون لاكنني لا استطيع تجاوز الخطوط الحمراء وليس بمقدوري القدوم على عمل كهذا ، فضلت الصمت وحطيت امري بيدي الله ورجعت لصلاتي مرة اخرى حشمانة من خالقي بسبب تقصيري فطاعته .. استنجدت ربي يخرجني من هاد الضيق ويشوف من حالي ووكلت امري. واستسلمت وفضلت نعيش على ذكرى يونس ونرضي واليديا على انني نغضبهم ونفضحهم قدام الناس ونرضي نفسي ، سايرت بابا وجمعت اوراق زواجي وكانت امي مثل ضلي ماكتفارقنيش حتى لحضة خارج البيت وماخلات ليا حتى فرصة نشوف يونس ولو لبضع ثواني .
– [ ] استقبلنا بابا فالعشية بحال العادة كان جد سعيد بسنوبية ايت الحاج وفرحان بيها وغرقني فخيرو ورضاه واللي طلبتها كيجيبها ليا حتى من الدهاز ديالي اللي كنت كنحلم بيه وبتفاصيله شرطو على لعريس يجيبو بالضوبل وفعلا تفاجأت بداك الدهاز اللي شرا ليا وداكشي فوق الوصف حضرت لبزاف ديال لعرايسات ماشفتش عندهم بحال داكشي اللي سيفط ليا للدار دهزني من راسي لرجلي داخليا وخارجيا بقيت غير كنشوف فداشي وهوا معمر ليا بيت النعاس ديالي كامل .. شي فالارض وشي فرق الفراش وزاد قالي بابا الى كنتي مزال باغا شي حاجة قوليها
قالت ليه ماما فين الذهب ديالها شفت هنا غير لحوايج يغرق هنا بنادم
قاليها غايجيبوه نهار العرس
سمعت العرس صفار وجهي قلت ليه العرس!
قالي واه العرس غادي نديروه نهار العقد
سمعت حس العرس قلت ويلي على العرس هادشي فيه حتى العرس !! اتا كنحاول نتقبل الزواج كزواج ونزيد نبرز فوق خاطري !! لزمت الصمت خليت بابا كيتصرف سمعتو قال لماما مانحرمها من حاجة قلت ليه فهاطري حرمتيني من كولشي. وماقدرت نستمتع بحاجة من داكشي اللي جاني واخا كنت كنحلم حتى انا نكون عروسة وندير داكشي اللي ماقدرتش نديرو وانا عزبة ونشري حتى انا كاع اللي نفسي فيه .. مافرحت بحتى حاجة وبديت نستف فداكشي كامل فوق نفسي وماحليتو نا طليت عليه كما وصل خليتو هاكاك كانت كل حاجة فالعلبة ديالها وكل حاجة مرتبة ومتولة فمكانها .. حسيت بكولشي جا مزورب وشي مور ماحسيتش براسي حتى شفت بابا فالصالون جالس وشاد واحد اللائحة كيقيد فيها الناس المدعوين للعرس ومن موراها بدات الدار كتعمر عندنا وخوالاتي وبناتهم وعماماتي جاو والكل كيعنقني ويبارك ليا ..!الله يكمل بلخير .. الله يجعل كولشي مبارك ومسعود .. الف مبروك .. الله يسخر .. سيمانة كلها ديال المباركات حسسوني عروسة بزز مني وعطاني بابا لأوكي ندير اللي بغيت .. دارو ليا التقاليد على حقها وطريقها وداوني للحمام والسبا تهلاو فيا وضارو بيا خواتاتي هما كيبكيو وانا كنبكي فالصالون عارفيني ماباغاشرنتزوج وبنات العاىلة كيصبرونا عند بالهم غير البكا العادي ديال كل عاىلة فعرسهم لاكن مامطالع بقلوبنا غير الله عز وجل . مديت يدي لاول مرة نصاوب الدفار بحال الفنانات ونقشوهم ليا بالحجر وطولوهم ليا وانا غير معبطة راسي وكنبكي حتى طبت مكنشوفش كاع فداشي اللي كيصاوبو ليا . . دوزنا النهار ديال الحمام بوحدو دوروني البنات خواتاتي بالليل كيصبروني وينصحوني نشد تيقاري ومانحبد عيب مع حتى واخد صافي صافي المكتاب كتاب عليا ماعليا غير نشوف شنو جاي من هنا القدام
فقت نواجه مصيري وكان نهار الحنة جهزوها ليا فالدار بتقاليدها كلها وخرجوني من البيت كنجر رجليا بزز وخواتاتي جنبي .. لابسة قفطان جوهرة حرة ديال لعرايس بالراندة غليضة وسروالو جوهرة مضور بالراندة من لتحت وطلقو ليا شعري ضورو بسبنية وجلسوني فالصالة وسط العيالات ديال عاىلتنا بالزغارت كانو مفرشين ليا الجلسة بالطرز فالابيض والاخضر والطبالي قدامي ديال الحنة ورق والورد و السواك والحنة معجونة . جلست بلاصتي كنحس بصدري كيتنخصص وخواتاتي حدايا لابسين وكيصليو على النبي قربات ليا ماما وهي لابسة البلدي هي وعماتي طبق الحنة وراق وعراو ليا على يدي ليمنية وعطو ليا كوع يدي وسط داك الطبق وهزيت كمشة فيدي من نفس البلاصة لحتها فواحد الصينية قدامي ديال النحاس فيها الماء دزمزم و الورد شدوها قدامي رميت فيها ديك الحفنة وانا كنشهق كنطبق ديك الطقوس بزز وخالتي كتصبرني كتقول ليا ماتبكيش. وكتهضر ماسمعتش شنو كتقول مع الزغارت والغنا ديال الحنة بصوت العيالات .. من بعدها مدو ليا ايناء قدامي كبير فيه الحنة معجونة ديال اللحم وشدات ليا ماما يدي بجوج غطساتهم ليا تما وهزاتهم مسحاتهم وانا كولي كنترعد حسيت بالسخفة بغيت نهرب كرهت راسي عروسة وكنشوف ختي هزات خيوط الصوف من اناء الحنة كانت فيهم واحد لكميميسة خضراء معمرة وحداها ودعة دورات ليا دوم الخيوط على معصم يديا وعاودات غطساتهم ليها فنفس الاناء اللي سبق لحت فيه الحنة شللاتهم ليا ومسحتهم ونفس الطريقة دار ليا لرجلي كنت لابسة شربيل مطروز كامل ديال الصم فالخضر ماكي الباج ودارو ليا نفس الطقوس وعقدو ليا لخيوط وشللوهم ليا وجلسات حدايا ختي نقات ليا دفاري مزيان رجع داك لفرانش نقي كي كان عاد بدات النقاشة تنقش ليا يدي عمراتهم بيا كاملين بالنقش وهبطات لرجلي بدات تنقش ودخل اثنائها بابا بسرعة خادر راسو تصور معايا بقا كيسكت فيا وخرج شفت عينيه غرغرو وخواتاتي كيبكيو حدايا دوزت لعشية كلها مرة نبكي مرة نسكت حتى ساليت ونقشو خواتاتي من مورايا وسالات العشية وبداو يقشرو ليا ديم الحنة جمعوها وقلت لختي لكبيرة طلعني لبيتي ننعس نتسنط لعضامي .. لاكن دخل عندي بابا للبيت خرجني لابسة جلابتي البيضاء والشال ديالي والحنة مزال لاسقة فيديا خرجني بالتخبية على العاىلة انا وختي الكبيرة وحنا كنشوفو فبعضياتنا مافهمتا والو حتى وصلنا عند واخد النوطير ودخلني لقيت تما السي عيسا جالس شفت فيه نص شوفة ماخققتش وجلست عطاوني وقعت على دار كتبها السي عيسى بسميتي
وقعت وخرجت من تما كنرد الشال اللور وقفت برا وختي لكبيرة عاجبها الحال قالت ليا وهانتي شكون بحالك كتب ليك الدار بسميتك غير الى مابغيتيش
حولت عيني قلت ليها هوا عطاني شوية من داكشي اللي عندو شايط وغادي ياخد ليا النص من عري وجهدي وحياتي ماتقارنيش شي بشي. .. راه اصلا خانزين فلوس شابع تلقايه هاد الدار ماتسوا عندو والو مصدقها عليا … انا اللي غنفني عمري عندو باين عليه قويصح مع راسو وعولي الرابعة جايا فالطريق بنفس الطريقة
دارت يد على يد قالت ليا وهادوك المغربيات اللي كياخدو الراجل مزوج من الخليج ودير ليك عرس مطرطق هنا وتمشي لتما مالها ماقالتش هاد الهضرة وعايشة بييخير وعلى خير .. شدي تيقارك وصافي ماتوصليهم مايوصلوك
خرج بابا كينفض كتافه مشطون قال لينا عنداك تمد ليه شي وحدة فيكم يدها راه مكيسلمش ونتي براسك ماحدك مزال ماعقدتي خلي يدك عندك
قلت ليه فخاطري ماغنمد ليه ما يمد ليا انا بالله وبالشرع معاه . قالت ليه ختي ياك قراو الفاتحة
قاليها ايوا الله واعلم ماتعرف انا غير وصيتكم
خرج السي عيسى كان لباسه عادي مكتبانش عليه اخواني ولا متدين كاع بلعكس لباسه زوين انيق بزاف اول مرة تشوفو ختي وابتسم لينا بنص عين وقالينا بابا سيرو سبقوني للطموبيل حتى نجي ومشينا طلعنا شدات فيا ختي قالت ليا عرفتي فاش دخلتي كي بقا كايدير فيك. ماشعرش براسو
دفعتها قلت ليها خليني عليك مابغيتش كاع نسمع عاد الهضور راه ماحاملاش هاد الزواج وكرهتو هوا براسه
قالت ليا شنو اللي ماعبكش فيه مالو ؟؟. .. انا غيير شفتو قلت شهاد الزين .. فشكل ماشي عادي وجا داير داك الموسطاش خلاه تجبد جاه فن ومكيهزش العين
سديت عيني قلت ليها يهز لعين ولا كاع لا يهزها هاهوا هز كولشي دابا وناض يزيد الثالتة .. بلحق كوولشي مني انا سبب هادشي
قالت ليا نتي اللي سيفطتي ليه ديك الهضرة بوجهك حمر والله ماعندك علاش تحشمي .. قال مع راسو هادي كتبات تحلم بيا معدبة مسكينة اجي ندير فيها خير نهنيها .. كملتيها وجملتيها قلتي ليه الى ماكنتيش نتا مايكونش واحد اخر من غيرك وزيد على هادشي عاجبو يتناسب مع با بلا والو وجا شي فشي حتى صدقتو غتزوجو بصح
سديت ودني قلت ليها هالعار خليتي عليك مابغييتش نسمع هادشي وماتفكرينيشً راه كولشي من ديك الموصيبة اللي كتبات داكشي
قالت ليا راه الموصيبة هي نتي اللي سلاطيتي عليه ختاريتيه غير هوا من بين رجال ترمي عليه حبك وغرامك وجبتيه كيعتر فجلايلو السيد غير شافك دخلتي ترفع مابقا لا دين ولا ملة فتنتيه حتى من داك النوطير تلف بقا كيقول ليك سني هنا للالا هنا
جاتني الضحكة تعاويد ختي وطريقتها كيقتلو بالضحك بقينا كنهضرو حتى رجع بابا طلع شاف فينا فالمرايا قالي الله يكمل بلخير
خبيت وجهي حشمت وسولاتو ختي قالت ليه فين جات الدار بقا كيضحك ضور راسو وهوا سايق بينا قاليها. واه واه واه على دار تبارك الله رفيعة الله يدخلها عليها بزايد الرزق والتيسير .. تبارك الله كبيرة فيها مية وخمسين ميترو فمارتشيكا
قالت ليه ختي بصح !!
قاليها بلحق زوينة من داكشي الرفيع
بقيت ساكتة كنسمع حتى صونا ليا تيليفون فيدي طلع ليا يونس ماقدرتش نجاوبو خليت حتى نزلت وجاوبت قاليا بغيت نشوفك.
قلت ليه ماعندي كي ندير صافي مامكتابينش لبعضياتنا مكتاب الله تصرف
بقا كيبكي قالي بغيت غير نشوفك لأخر مرة قلت ليه راك عارف شنو كاين ماعندي كي ندير
قالي الى ماخرجتيش نشوفك غندير شي كارتة فراسي.
بقيت كنشوف كيفاش ندير والعشا كياذن بغيت نسلت قبل ما ندخل للدار حتى ماكرهتش نشوفو لأخر مرة ونودعو. .. خليت الناس كولشي مشطون وسلت مع الباب خرجت بالزربة كنضرق بين طموبيلات مغطية وجهي وكنزرب حتى سمعت سميتي ورايا
ضرت لقيت ختي مورايا تبعاتني قالت ليا فين غادية فهاد الليل ماخفتيش على راسك ونتي عروسة بقات ليك ربعة وعشرين ساعة تمشي عند راجلك
سكت بقيت كنتمتم مالقيت مانقول ورجعت معاها للدار طلعت لبيتي سديت عليا وطفيت تيليفون باش مانشوفش مكالمة يونس ويأثر عليا . حطيت راسي على المخدة فقفطاني بغثت نرتاح حتى سمعت ساارااا بصوت مرتفع على برا وتهزيت مخلوعة قلت لختي شهادشي !!
ناضت كتجري طلات من السرجم ودفعتها طليت لقينا يونس كيغوت برا عليا ويضرب قصدور سكران شوهني. بديت كنضرب فوجهي ونغوت وختي كتولول مشات كتحري هبطات وهوا كيعيط ليا ويضرب بالحجر فالحومة كيقول ليا كنبغييك اسارة .. والله ماتزوجي بشي واحد من غيري. .. باش حسن مني .. باش حسن مني ؟؟. مالي انا ماشي راجل
بقا كايتمايل ويغوت وانا كنغزل فبلاصتي بالخلعة خرج ليه بابا بسروال قندريزي وصندالة مشمر على كمام يديه مع تبارك الله طويل مكلضم شدو بواحد اليد لسقو مع الحيط قاليه ها سارة يا سلكوط . خرجو ليه خوالي وعمامي وولاد عاىلتي شدو بابا دخلوه كان غايقتلو خلا دمو كيشرش وجروه خوالي حيدوه من الحومة بعدوه وطلع عندي بابا دمو حامي فرع الباب عليا وماما تابعاه وخواتاتي وعمامي ماعجبهمشً الحال نتشوه قالي بابا شكون هادا كتعرفيه
لسقت مور ختي قلت ليه عمرني شفتو فحياتي
قالي عمي وفين كيعرف سميتي قالت ليه عمتي نعلو شيطان راه ساهل يعرف سميتها البنت ماكتعرفوش جا راسو كيغوت
زعف واخد عمي حتى هوا قبيح بحال بابا قاليها كن ماكان يعرفها كاع مايجي يفضحنا فهاد الليل
قلت ليه ولساني كيشطخ بين سناني عمرني شفتو ولا كنعرفو عمرني عرفت شي حد انا
قالي بابا ايوا الله يعميها ليك لا نتي لا هاد قراناتك كلهم اللي كيسمعو .. الله يعميها لشي وحدة فيكم والله حتى نعلقها من شعرها
خرجو من البيت ولسقنا كاملين لا انا لا بنات العاىلة مع الحيوط تخبينا ونزلو كيهضرو طالع ليهم الدم كنسمع صوتهم كيزلزل الحيوط. واحد اللحضة عم الصمت كولشي قطع الحس وتكمش شي ما كيهضر مع شي بغيت نوض لطواليط ماقدرتش حتى هدات الوضعية وسمعت بابا والعاىلة كيديرو الذكر فالصالون وخرجت مشيت لطواليط سديت عليا ورديت النفس كان قلبي غيسكت بالخلعة .. رتاحيت وخرجت يالاه حليت الباب لقيت ولد عمي كايتسناني فالباب وعينيه كيتحلفو فيا هز صبعانو بجوج قالي حتى هوا بالريفيك حيت مكدورش عندنا الدرجة فالدار .. والله ياوالديك وماتشدي الطريق حتى نكرج ليك دوك الرجلين .. يحساب ليك دوزيها علينا راني ديتو قالي كيعرفك تلت سنين هادي .. بلحق غادي ندوزها ليك والى خرجو رجليك الشواري. عاد ديك الساعة غتكونالفراجة سمعتي
بلعت ريقي ماجاوبتوش ومشيت مهبطة راسي دزت قدامو وهوا متبع ليا لعين قالي هاي هاي هاي خرجو رجليكم الشواري قلتو ماهنا رجال ولا !
تحدو ليا صافي دخلوني سوق راسي عارفة عاىلتي يلا مشاو حتى حصلو عليا شي حاجة يمحيوني على وجه الارض من كبيرهم لصغيرهم اما بابا يدبحني من رقبتي ومايحنش فيا .. كولشي الا العرض والشرف والصمعة دالعاىلة كطيح عليها الروح وانا البهلان ديالي نساني شكون انا ومنين انا وشكون هي عائلتي .. عندي الزهر كيهرس الحجر دزت فالضو قدام ولد عمي وسكت خلا الليلة دازت على خير لاكن بقا حاضيني فين مشيت وفين جيت هوا وواحد اخر ماخلاونيش نتنفس وجالسين لينا فباب الدار اللي طلات كيقولو ليها فين غادا ويردوها للدار وماتقدرش تهضر الى هضرات ينوض ليها باها يكمل عليها ولا خالها ولا عمها . جمعو معايا الحوايج والدهاز كامل فالباليزات ودوشت فالدار تحميمة خفيفة وخرجت وصلونا للقاعة فين غندير العرس وبقاو تما كيدورو البق مايزهق ،. كانت اول مرة نشوفو القاعة كي دايرة. .. كانت كبيرة فيها جوج طبقات لفوق غايديرو النسا ولتحت الرجال كانت كتبهر كلها زاج كتبري والارض رخامة وحدة دخلنا لواحد البيت جابو ليا نكافة من برا معروفة عندنا كتنكف فالخاريج للجالية المغربية اللي لاباس عليهم وكتعرف غير الريفية ولغتها باش كتواصل على برا . جابت ليا جوج برزات كل وحدة فشكل والتكاشط كلهم تقال ومعاها اللي كيصايبو الشعر جلسوني صاوبر ليا المكياج باش غندخل والمشطة و ولبساتني تكشيطة فالابيض كريمي كتهبل ديالي جاتني فالدهاز كلها حجر ديال العرايس وطويلة واسعة من لتحت وزادتني النكافة الفوال على راسي وليزاكسيسوار والتاج وحطات ليا المرايا شفت راسي ماعقلتش كاع على راسي وشكون انا تصدمت حطيت يدي على حناكي كانت الحنة قهوية فيدي ودوك الخيوط باقا دايراهم قلت ليها واش هادي انا !! عمرني درت المكياج تبدلت بزاف
عجبني راسي اول مرة نطلع بهاد الشكل تصدمت وخواتاتي اللي معايا فالبيت حتى هما تصدمو بقاو غير كيشوفو فيا .. بغات النكافة تصورني لاكن مابغيتش قلت ليها لا مانقدرش بلاش وضرت سمعت الدقان فالباب ماعرفتش شكون دوك العيالات اللي دخلو كانت مرى كبيرة بيضاء رقيقة دايرة نضاضر الشوف والسنسلة مدلية من الجناب وحداها بنت قدي بالتكشيطة والشعر كحل مصاوباه ولايحة عليها الشال من الفوق ومرو اخرى معاهم غليضظة شوية دخلو بابتسامة وكيهضرو بشوية ومتولين دخلات معاهم ماما جابتهم عندي. قالت ليا هادي عكوزتك كانت فالعمرة
نضت نسلم حشمت منها وشارت ليا على كتفي كتشوف فيا وضحك معايا قالت ليا لالا غير جلسي ابنتي .. الله يكمل بلخير .. تبارك الله والصلاة على النبي الله يحجبك من العين
حدرت عيني قلت ليها امين وقالت ليا ماما كتشير لديك البنت. هادي لوستك .. هادي عمت عيسى
رتبو على كتفي ماسلموش عليا باركو ليا شفتهم كيشوفو فيا منباهرين وكيقولو مشاء الله .. قالت ليا عموزتي شيخك بغا يشوفك ويسلمك عليك قالت ليها ماما اه مرحبا
انا تزنكت رجع وجهي حمر وانا تحت الانضار ديالهم مشات بشوية عليها خرجات جابتو وراها كان لابس جلابة بيضاء وبلغة داير طربوش احمر على راسو ابيض البشرة .. اخيرا شفت السي الحجوجي شخصيا نضت نسلم قالي خليك بلاصتك غير جلسي .. كيضهر ولسانو ملوي مكينطقش بالراء نيشان ولحيتو بيضاء وجبهتو كحلة بالصلاة .. قرب ليا كيدعي معايا وينصحني كان حكيم فكلامو وضحك معايا وخرج مشا وخرجات معاه عكوزتي. ورجعات عندي بواحد الباليزة فيدها صغيرة مربعة مداتها لماما قالت ليها هادا الذهب ديالها .. حتى الى بغيتو تندلوه فالطيافر
شداتو ماما واستاذنو خرجو وحلاتو قدامي بغات تشوف شنو فيه .. تصدمت شفت تما جوج مضمات ملويين وحدة حدا ختها كبار وحدة صفراء وحدة بيضاء. محطوين بترتيب وطقم فعلبة بوحدو ابيض كيشعل بالديامون ابيض وواحد اخر اصفر بالحجر فالغوز بارد ماعرفتش واش حتى هوا دياموند كان كل واحد بوحدو فعلبة زرقاء بحوالقهم واسوارهم وعلبة اخرى فيها شوكة ديال الصدر بلدية بوحدها حداها نبالة بلدية ديالها وعلبة اخرى فيها ساعة ديال اليد كتشعل الوسطاني ديالها اكحل وعاد الخاتم فعلبة بوحدو مربع ابيض.
بقات ماما كتشوف فداكشي وتقرا المعودات وحمعات قالت ليها ختي خليه نحطوه مع الدفوع يشوفوه الناس. قالت ليها ماما اش غايشوفو ابنتي العين خايبة غايعطيوها ليها مقادة
قالت ليها ختي ياك محصنة صافي ماعندهاش مناشً تخاف
قالت ليها ماما خفت عليها من لعين
بقاو مني منك حتى سمعت هزة ديال التعشاق فودني بغات النكافة تخرجني باللبسة اللولة ونضت خرجت هزوني فالعمارية دخلوني بيها كانو غير لعيالات وكاع اللي خدامين عيالات حس الراجل ماكيدورش تما . بقيت كنشوف فالناس من لفوق شي كنعرفه شي مكنعرفوش والخلعة فيا ماعقلتش على ديك الدخلة اللولة كي درت ليها حتى لقيت راسي راجعة للبيت من جديد وجلست على واحد الفطوي. اهضر كبير قدامو طبلة جابت ليا ماما شال طويل لواتو عليا قالت ليا غيدخل باك وراجلك معاه العدول
شديت فيها قلت ليها عنداكم تمشيو تخليوني بوحدي
شدات فيا قالت ليا لالا مانمشيوش. حنا معاك
طلعو شيلانهم على راسهم وانا كنترعد دخل بابا بالبلدي هبته كتبعت ليا الفخر والطمأنينة فاش كنشوفو قدامي كنحس بالراحة والامان . كان معاه عيسى وهاد المرة لابس البلدي على حقه وطريقه سرقت الشوفة ماخققت مزيان فحتى واحد بقيت جالسة والشال مدلي عليا حسيت بيه جلس حدايا وبابا حتى هوا جلس حدايا داروني الوسط وباه جس جيهتو ودخلو شي عمامي وخوالي حتى هما حسيت بالسند والدفئ دالعاىلة وكنشوف خواتاتي معايا وماما واقفة مورايا حاطة يدها على كتفي .. بدا بابا كيهضر دار واحد المقدمة دينية وافتتحها بآية قرآنية قراها بالتجويد واكل ساكت .. حسيت بلحمي تبورش عليا داك بديك الاجواء حسيت براسي فديك اللحضة فطور الانتقال والتحول من حياة لحياة اخرى .. لخضة تخول مهمة فحياتي وتقاتها ختي بكامرة لحضة بلحضة ، سولوني واش قابلة حشمت نهضر قدام كولشي. وقالي بابا هادشي مافيهش حشومة. وقلت ليه قابلة وعاودو سولني ثلاتة دالمرات كنجاوب وسولوه جاوبهم حتى هوا وعطاوه وقع وكحز ليا لكتاب نوقع شديت الستيلو كنترعد وراوني فين نوقع ونسيت على توقيعي بالخلعة والدهشة بقيت كنتفكر كي كنديز ليها وسنيت والستيلو كيزلق من يدي. وتمت المباركات وشي كيستسالم مع شي وتقرات الفاتحة من جديد وخرج الكل بقا حدايا عيسى تلفت هز ليا الشال على وجهي
– [ ] رفع على وجهي اشال وانا مهبطة راسي ماشفتش فيه حسيت بيدو تحطات على كتفي وقبل جبهتي تحت الزغارت ديال النكافات .. خرج كولشي واحد اللحضة بقبت غير انا وياه جالسين كنشوف غير يدو على رجلو فيها كم الجلابة وتحتها كم اخر بتوب شفاف مدرو بالراندة والساعة فيدو والخاتم صغير مربع فصبعو الصغير .. كانت يدو كتشعل بالنقا وابشرته قمحية والكف دياله وصابعه حمرين .. جمعت يدير كتفردهم مع بعضياتهم كنشوف فداك النقش اللي مزين اصابع يدي فصمت وكنتسنا فديك لحضة الجلوس تحت الضغط دوز بزربة لاكن دازت طويلة اكثر من حياتي اللي دوزت فقرايتي .. قالي بصوت منخفض مبروك
– [ ] ردبت عليه قلت ليه الله يبارك فيك
– [ ] بقا ساكت مالقا مايقول وانا ساكتة حسيت بمعدتي كترعد ويدي بداو كيرجفو وفمي كيجري بالماء عرفت راسي غادي نستفرغ وحطيت يدي على فمي ماعرفت شنو ندير وتقيلة بالحواية التكشيطة فيها قلاتة الطبقات ها حرير الدودة لتحت والطبقة الشفافة والكريب من لفوق والحجر وزدتها بواحد الطالون رقيق جابوه ليا فالدهاز قدو قداش والمضمة مزيرة عليا .. قالي مالكي شنو عندك
– [ ] بقيت سادة فمي كنشوف فجنابي ماقديتش نشدها وقلبت وجهي تكيت على يد الفوطوي اللي حدايا تقيت فالارض وقلت مسارني .. ماكنتش واكلة حتى حاجة رديت غير الماء وناض بالزربة جا قدامي شد ليا الفوال اللي كان مدلي على وجهي وشعري اللي دلا عليا ردهم اللور وانا كنتعصر ريدي على قلبي حتى سخفت رجعت اللور ومشا حدا واحد الطبلة فيها المنادل هز البكية عطاها ليا وخرج للباب دخل ختي لكبيرة جات كتجري عندي لقاتني منوضة قلبي بالردان ومشات كطير جابت بانيو صغير وجاو وراها ماما وخواتاتي كيتجاراو ضارو بيا كيشمو ليا الريحة وهوا بوحدو اللي راجل وسط منهم كيشوف فيا قال لماما الخلعة يمكن
– [ ] قالت ليه واه راه كاع البنات كيوقع ليهم هاكا
– [ ] قاليها عطيوها تاكل واقيلا ماكلات والو
– [ ] قالت ليه ماما هاهي ختها غتجيب ليها شي حاجة
– [ ] بقا واقف معانا شحال حتى توكضت عاد قرب ليا قالي صافا شوية؟
– [ ] حرت ليه راسي بالايجاب وبقا شوية وخرج لبرا حتى رتاحيت ورجعات كرشي لبلاصتها بغيت ندخل الطواليط كانت عندنا فالبيت وجاو النكافات حيدو ليا كولشي بقيت لابسة واحد الشورط ابيض ديال لعرايس قصير والديباردور ديالو لحت عليا واحد البينوار خفيف جبداتو ليا ختي من داك الدهاز اللي كان محطوط فالطيافر وعطاتني بانطوفة بيضاء خشاتها ليها فرجلي بالزربة ومشت دخلت الطواليط جاني الاسهال ولقيت الدم هبطات عليا وماشي وقتها عرفتها جات بالخلعة وبدلات ليا الخاطر وشوشات عليا وتقلب مزاجي . حليت الباب كانت ختي واقفة عليا قلت ليها هاشنو كاين ومشات كتجري للباليزة جابت ليا محموعة جديدة بدلت كولشي ودرت فوطة صحية وخرجت قدام واخد المرايا كبيرة فين واقفة هي عطاتني كينة تهدأ اعصابي و تحيد ليا الوجع اللي ممكن يجيني من بعد حيت عارفاني كنبدا نتقطع بيها وكنضرب عليها ليباري باش نرتاح من حريقها . سمعت النكافات على برا كيهضرو بيناتهم قالت ليهم ماما ولاهيلا تخلعنا قلنا ياك لاباس مالها
– [ ] قالت ليها النكافة حنا قلنا ياكما العروسة صبحات دخل عليها لعريس وجاو خواتاتها كيجريو ماحسابش لينا طاح ليها طونسيو مسكينة .. تخلعات
– [ ] قلت لختي شوفي لخرين حتى هما فين مشا عقلهم قالك حسابهم لعروسة صبحات
– [ ] قالت ليا ختي حتى حنا داكشي اللي قلنا فاش قالو لينا سخفات قلنا ياكما يكون دخل عليك ماتعرف شخال من وحدة طرات ليها
– [ ] قلت ليها ها الدم دخلات عليا اراك للوجع من دابا واحد شوية.. عاد عتبدا عندي انا الفراجة سربي يالاه ندوزو هادشي دغيا قبل مايشدني الوجع البدية ديالي فهاد الزواج باينة من حموريتها .مانقدرش نكمل جوج لبسات اللي بقاو
– [ ] خرجت بالزربة عندهم لبسوني تكشيطتي الثانية كانت فنوازيط بارد مخيطة بالصم والخدة دالمعلم محجرك بحجر الخاتم كلها فالبرونز والدوغي والالوان الزاهية حتى هي كانو فيها ثلاتة الطبقات التحية تليجة فالباج بالسفيفة صدرها واسع وزواق الملعم والشبكة عليها عاد الفوقية كلها محجرك جات الشيكة خارجة من اليدين والمول ناعسة على صدري قالت ليا النكافة واش نكف ليك بالدهب ديالك قلت ليها واخا ولبساتني المضمة الصفرا والشوكة فالصدر و درت الطقم ديالي ديال الذهب بحوالقو طوال زادتني غير التاج وبدلو ليا المكياج بنت بشكل مختالف جديد تفننو فيا ولبست صباط اخر دوغي دايرين ليا التخليلة هزوني فالطيفور وانا كنشير بيديه وجلست فالمنصة دخلات عندي عكوزتي وعائلتها دخلو داك الدهاز مع العيساوا عيالات والطيافر بقيت كنتفرج فواحد تابع لاخر حطوهم قدامي شفت خواتاتي كيفاش ستفو داكشي وقادوه طلع ملكي وعلب الماركات باينين .. لفت انتباهي واحد المصحف صغير الوسط مذهب فواحد الصندوق بوحدو ماشفتوش مع الدهاز قلت يمكن عاد جابوه. .. حطوه فالمقدمة بقاو كيصورو داكشي ورجعو هزوه تبعتو انا من بعد العشا وبقات ليا لبسة وحدة ونتفك حيت الوجع بدا كيدور بيا غايبداني ميخلينيش حتى نوقف على رجلي
– [ ] طليت على تيليفوني لقيت ليزابيل ديال عيسى ونمرة اخرى ماعرفتش ديالمن خفت تكون ديال يونس حيت صونات شحال من مرة .
– [ ] فضلت نبقا فالبلدي مابغيتش اللبسة البيضاء وكانو فالدهاز ثلاثة ديال التكاشط لبستهم غير هما صدقت منكفة بحوايجي مالبست حتى حاجة من داكشي اللي جابت النكافة بقات غير كتكمل ليا بالفوال وصافي . لبساتني تمشيطتي كانت فالابيض ناصع بحال الثلج محجرك بالابيض والزعري بارد وتحتها ثليجة فالزعري والدوغي باارد كتموج وتحت منها كاع توب شفاف زهري لاكن كيبان ابيض حيت خفيف كتبان غير الشفيفة ديالو هابطة رقيقة لبسوه ليا منو للحم وحزمات ليا بمضمتي البيضاء ولبست مجوهراتي البيضاء كلها وطلقو ليا شعري كامل دارو ليا تاج خفيف على راسي وطرحة توبها شفاف مرشوشة بالحجر وبدلو ليا المكياج كله دارو ليا الوان زاهية خفيفة وعكر زهري بارد كيلمع خرجت بالورد عند الناس لقيت كولشي داير الشال ورجال عاىلتي المحارم دخلو مع العريس لقيتو حدا الحلوى كيتسنا لابس بدلة كحلة وربطة عنق داير يدو فالجيب. . انيق كيبان جنتلنام بحال شي بطل ديال شي فيديو كليب رمنسي .. كان كيضحك مع عمي ويهضر معاه اما بابا ماشفتوش كيدور تما عييت نقلب عليه بعيني مابانش ليا لا هوا لا ماما ..تاثرت بديك الاجواء شفت خوتاتي كيبكيو وجاتني البكية حبستها فحلقي رتزيرت بقيت رادك البال مع الارض انا كنجر فديك التكشيطة قدها قداش .. مشيت وقفت حدا العريس دار يدو ورا ضهري تعرض ليا بحال معرض لشي حلوة دلاكريم خافها تزلق تخسر .. عطاوني سكين طويل شديتو وحط يدو على يدي شفت بيه بنص عين فرحان عاجبو الحال كيضحك قلت ليه فخاطري سعداتك عطاك الله كولشي غير الى مابغيتيش توب وتشد الارض !
– [ ] دار يدو على يدي فوق السكين قطعت الحلوى وكولشي واقف معايا وجلست بلاصتي كانت النكافة بدلات البرزة حطات كراسا كلاسيكية ضخمة كبار فالخزي ملكين مضورين بالنحاس وقدامنا طبلة ديال الزاج حاطين عليها التمر الحليب الخواتم بدينا فطقوس تركاب الخواتم شفت فيدي على يدو كيدخل فصبعي المشنقة وانا صابرة ومستحملة دايرة بالي مع بابا وماما مادخلوش عندي. . عطاوني خاتم رقيق منحوت شديتو بجوج صبعان دخلتو فصبعو الخنسر كان فارغ مافيه حتى خاتم ركبتو ليه وشربنا الحليب والتمر دوزنا ديك الطقوس وانفاجرت ماقدرتش نكبت حزني بديت كنبكي وكنشوف خواتاتي كيسكتو بعضياتهم وانا فالبرزك بوحدي.. انتابه ليا عيسى وتقلب جيهتي كيهضر معايا ويسكتني ماسمعتش شنو مان كيقول كانت الموسيقى مجهدة . شد واحد المنديل حطو على خدي كيمسح ليا الدموع ويواسيني قدام كولشي وكيشد ليا فيديا وانا كنهربهم حشمت قدام عاىلتي وعمومي غير اللحية على خوه واقفين جهة الباب مصافين .. جاو خوتاتي كيعنقوني ويبردو على قلبي حتى تهدنت شوية وبغيت نوض حسيت بكرشي كتزدح والحريق مشا ليا مع رجليا وضهري لحسن حضي جا مع الختام ونضت خرجت دايرة سلهام طويل ابيض مليفة كيتجر معايا القب ديالو كبير غطا وجهي كامل ولحتو على كتفي تغطيت وخرجت لقيت بابا فباب القاعة هوا وماما هزيت عينيه شفت فيهم لقيت عينيهم حومر ورجعت تزيرت من جديد .عنقني حسيت بالدفئ فصدرو ماسخيتش نهز راسي وماما مسكينة كطبطب على كتفي .. تفكرت فديك اللحضة كلام يونس فاش قالي هربي واستغربت لتفكيرو يمكن هوا ماحاسش بحنان الواليدين ماشي بحالي انا على قبل هاد الحضن نضحي بحياتي .. واخا بابا صعيب وصارم ومتشدد لاكنني كنبغيه وكنموت عليه منقدرش نتخلا عليه ولا نصدمو فيا وحتى الهبة ديالو مهمة فحياتي كيحسسني انني عندي سند وعندي علامن نعول ونلتجأ فأوقات ضعفي وعندي بطل كيتضرب ليه الف حساب نفتاخر بيه قدام الناس ودرع حامي ليا وسقف آواني منذ نعومة ادافري عمر البرد ساط فيا ولا ضار بجنابي .. لاكن الخرجة ديالي كانت قاصحة بالنسبة ليا حسيت براسي كنخرج من بين ديك الجذران الدافئة وكنتسل من تحت جناح بابا وكنبعد القلوب على بعضها بالقوة .. حسيت بصدرو كترعد من لداخل كانه مخبي وسطو بركان وزدت زيرت عليه كأنني كنقول ليه خليني هنا مابغيتش نخرج .. جراتنب يد عيسى من دراعي شوية ونترتها لسقت فبابا وماما كتبكي قالت ليا صافي ابنتي الله يرضي عليك واش بغيتي باك يطيح ليه الطونسيو رأفي شوية
– [ ] هزيت راسي وحط ليا بابا يدو على حنكي كيضحك حسيت بيدو بمثلجة وكترجف ماقدرش يتحكم فيها وكيبين ليا ديك الضحكة فوق خاطرو ووجه صفر مخطوف خفت يطيح ليا وضحكت فوجهه وعنقت ماما بقات كترضي عليا وتلاحو عليا خواتاتي ب فاياج من الحنان بزز باش فارقنا خالي قالينا صافي نعلو الشيطان خليوها تمشي راجلها كيتسنا برا
– [ ] جرني خالي من يدي خرجت ضربني برد الصباح لنيفي حتى سال لقيت الدنيا مقلوبة على برا بالرجال وعيسى واقف فالجنب كان كيهضر مع شي راحل اخر حتى هوا بالكوستيم وكل شوية يشوف فالساعة.. تعرض ليا فتح بابا واحد السيارة بيضاء لاسقة مع الارض كتشعل فيها جوج بيبان ومجبدة بحال الحوتة صالونها احمر كامل طلعت لداخل جلست وطلع حدايا ركب سد البيبان وداني حيت لا ادري .. تبعوني سيارات عائلته من اللور شفت فيهم من ضضضض كان صف ديال السيارات الفاخرة كانه موكب ملكي وكانت من بين دوك السيارات وحدة مورايا مباشرة كحلة من نوع بي ام على سطح مقدمتها راية البلاد حمراء بنجمة خضرا مسطحة ومن سقفها كيطل واحد الولد فيدو هاتف كبير كل شوية يشوف فالسماء .. رفعت راسي بعفوية لقيت واحد الدرون تابعنا فالسماء بحال شي طبسيل طائر .. بقيت ساهية كنتفرج وهوا حدايا جر ديك الربطة دالعنق بواحد اليد حيدها وفتح صدايف القميجة وبدا كيسوط من تعب السهير .. تكيت راسي على الزاجة فصمت والنخصة فيا ماشعرتش بالطريق حتى وصلت لمجمع سكني بمساحات خضراء راقي ومنازل فاخرة دخلت وسط المجمع بالسيارة وتبعاتني السيارة الكحلة بوحدها من اللور دخلات معايا كان محمع مأمن بالحراسة استقبلونا بالتحية واتاجهنا نحو القبو مباشرة كانت مساحته كبيرة بزاف ووقفنا نزل اللور مشا لديك السيارة السوداء كيهضر مع نفس الشخص اللي كان واقف معاه قلت غيكون غير خوه . شفت ختو حتى هينزلات وقلت يمكن غيكون راجل ختو . عطاتو الشنطة ديالي وديالو جرهم وفتح عليا الباب تبسم ليا قالي ماسخيتيش ؟ نردك للقاعة !
– [ ] ماجاوبتوش ونزلت جات عندي ختو عاوناتني هزيت جلايلي ومشينا طلعنا فالاسانسور كنقول ياربي غير فوقاش نوصل ندخل فالكاشة ونحط راسي على المخدة يهدا الوجه مابقيتش قادرة نصبر وقلبي كيضرب بقوة الصبر اللي صابرة كنحس براسي مفصلة كاملة . فتح ليا الباب دخلت ضرباتني ريحة العطر المنزلي والسخونية كانت مضلمة شوية عاد رفع ليها الستائر بواسطة زر حدا الباب لقثت راسي فشقة عصرية بحال لعروسة كبيرة فيها صالون كبير قدامي بكنبات فالموطارد والازرق من الجوانب وبيناتهم جدار كبير وطويل من نوافد زجاجية واحد حدا واحد من الاعلى للاسفل فارق بيناتهن جوج ساريات كبار وباب كبير الوسط كيطل على شرفة دائرية كبيرة مدورة بجدار من رجاج كلها لمحتها من الدخلة دالباب .. لوحات فنية بألوان رائعة ومرايا فكل بلاصة واتات عصري مرتب وكل حاجة فمكانها وشاشة كبيرة بزاف وراها جدار من رخام ابيض .. شقة مبهجة بعتات على قلبي السرور كان ليها ممر واسع فالجنب وقفت حداها ودعت ختو مشات وسد الباب رجع عندي كيشوف فالجذران قالي كي جاتك الدار ؟
– [ ] دورت عيني فجنابي قلت ليه زوينة تبارك الله
– [ ] قالي دخلي شوفي البيوت وشوفي الكوزينة
– [ ] ميلت راسي قلت ليه واخا ومشيت دزت على داك المرر لقيت نضرة خفيفة ماركزتش مزيان كان الوجع هالكني ومطيح ليا النقطة وراني بيت النعاس وفتح ليا الباب دخلت لقيت بيت كبير عندو جدار حتى هوا من زجاج كيطل على شرفة مربعة كبيرة داير بيها الزاج والضوء داخل لقلب الغرفة .. كان فيها ممر واسع مربع فيه باب كبير قالي هادا الحمام وشار بيدو لباب اخر مقابل معاه كان عبارة عن مربع فارغ من اي باب قالي هادا دريسين ..حركت ليه راسي وجلست طرف الناموسية دخل ليا القائب لداك الدريسين وانا كنسد عيني ونحلهم بغيت نترخف ونرتاح لاكن ماقديتش . ماقدرتش نشوف حتى البيت كي داير كل ما حسيت بيه انه مريح مشمش ريحته زوينة وفراشه والوانه مريحة ، تفكيت من صباطي خلا الاثار ديالو على رجلي وحيدت السلهام عليا بان ليا انعكاس صورتو فواحد المرايا على برا مقابلة مع داك الدريسين شفتو لداخل حيد لافيست وكيتكسل ويرمي التعب ديالو تما وفتح ازرار القاميجة حيدها بقيت كنشوف فيه كان مختالف على يونس بزااف .. انا كنكره الراجل اللي فيه الشعر وهوا فيه كلشي زوين وحتى جسده كان مخدوم وكان وافي فالطول والعرض ماعندوش الكرش والوقفة ديالو مرجلة وزوينة لاكن عندو الشعر منتشر فصدرو وكرشو ماحملتووووش وكحل ناعس ليه مع صدرو ، كان عليا نتوقعها فاش شفت يديه وصبعانه ناعس معاهم الشعر كان خاصني نوحد نفسيتي لاكن ماقدرتش ماحملتش نشوف فيه ودورت وجههي بقيت كنقول مع راسي وييلي كي غندير نسلم ليه راسي ونخليه يحط صدرو عليا .. ماقدرتش حتى نتخيلها كرهتو واخا عييت نقلب على شي نقشة تحببني فيه والو فاللخر عاد مازدت نفرت .. رجعت دورت وجهي شفتو جالس شاد تيليفون بواحد اليد وكيحل صباطو باليد الاخرى وحط رجليه على الزربية كيصوني فتيليفون وبدا كيهضر بصوت منخفض ماقدرتش نسمع شنو كايقول ورجع قطع ومشا هز فوطة دخل للحمام وسد عليه . غير دخل نضت بالزربة فكيت راسي خيدت كولشي عليا بدلت قبل مايخرج حيدت كولشي وبديت نقلب شنو نلبس مزال ماسيفطوش ليا حوايجي كاملين وحتى الدهاز ماقلبتوش كله نشوف شنو فيه . لقت. شي حوايج ديالو مطويين فواحد الرف ومعلقين منهم شي وحدين اخرين وسبرديلة محطوطة قلت مع راسي كان جالس هنا يمكن كايتسنا يجيب ليها العروسة ولاهيلا، حليت الباليزة كنقلب من زهري لقيت ختي دايرة بحساب العادة حطات ليا تما المساىل كلها وهزيت كولشي مشيت للطواليط اللي على برا بدلت ولبست واخد الانسومبل سروال طويل قهوي وبينوارو ناعم وبانطوفة وديباردور لحت فيه شبكة رقيقة على الصدر ختاريتو تحسبا لاي حدث محرج ولونو شوية داكن ما باج ما بني المهم يستر شوية . مشطت شعري مسحت وجهي وغسلتو بواحد الغاسول قريت سميتو كانت ماركة شانيل جا فالدهاز حتى هوا كنت كنشوف الماركات غير فالتلفازة ودوك الاغراض الانثوية حتى وليت حتى انا كنستعنل منهم شكون قال غنتحول من سارة اللي عندها ريحة و كريم دالوجه لسارة عندها محل ديال الماركات عاد خاصني نجلس شي جلسة ونشوف داك الدهاز حاجة بحاجة
– [ ] خرجت طالقة شعري وراشة الريحة وبانطوفة فرجلي مشيت للبيت لقيتو فالبالكون كيهضر فتيليفون لابس واحد الشورط باج وتيشورط بيضاء فرجليه بانطوفة كحلة ومتكي على الزاج عاطيني بضهرو قلت ماسمعنيش بعيد ساعة سمعني وضار عندي شاف فيا وقطع دخل ورد الستائر على الزاج من وراه هزني كيشوف فيا من رجلي لوجهي قلت ليه فخاطري اييه هي هاديك شخصيا اللي سيفطات ليك الشعر بشحمها ولحمها وشعرها واقادمها ارا ماتفرج دابا .
– [ ] تبسم كيشوف فتيليفونو قالي كولشي جا بالزربة ياك
– [ ] درت ليه ضحكة بزز قلت ليه امم. وسكت بقا كيشوف فيا مرة ويشوف فتيليفونو مرة وحطو هز واحد العباية خليجية بيضاء ناصعة لبسها وطلق السجادة قدامو كيستاعد يصلي .. شفتو كيتقل الحركة يمكن كيتسناني نلبس و نوض نصلي معاه ونضت هزيت فيدي واحد اولويزة ودزت قدامو حطيتها على طبلة طويلة ديال التلفازة وزدت خليتو واقف لمحها وكبر بدا كيصلي ومشيت للفراش كان مطلوق عليه كوفرلي باج غليض وتحتو ليزار ابيض هزيتهم ودخلت تغطيت كندور فبلاصتي بالوجع ونتقلب من جهة لجهة بقا جالس بلاصتو عاطيني بضهرو طليت نشوف شنو كيدير فتيليفون من باب الفضول لقيت الشاشة فيها قرآن كان كيقرا فصمت ، رجعت حطيت راسي كنتسنط لوجع كرشي حتى داتني عيني
نضت حتى للخمسة سخونة فبلاصتي حناكي سخان لا حومر وفمي احمر شفت وجهي فمرايا مقابلة معايا فاش جلست .. استوعبت قين انا عاد تفكرت راسي عروسة فداري زعما وتلفت حدايا لقيت بلاصتو مزالة مسرحة مانعسش حدايا والسكات فالدار جو مريح مكنسمع حتى صوت . لحت الغطا عليا ولبست بانطوفتي خرجت للشرفة طليت منها لقيت قدامي ارض خضراء وبحيرة طويلة على حد الشوف وهضبات فالاخضر بحال شي ارض ديال الكولف وتحت مني نفس البالكون ونفس الديور واخد حدا واخد فارق بيناتنا الشجر والخضورية طويلة حتى للسطح .. عجبتاني الطلة وبقيت شحال كنتفرج من تما بانو ليا الناس جالسين فالشرفات ديالهم كيتبردو واستمتعت بالحو شوية ورجعت دخلت كنقلب عليه نشوف فين مشا ولا فين مخشي لا يخرج ليا من شي قنت على الاقل ندير بحسابو ،. ضربت دورة فالدار كلها شفت الحمامات والبيوت وواخدرالصالون اخر فجهة اخرى بحال اللي فالدخلة جا فاللهر ديال الممر فيه شرفة قدها قداش حتى هي كطل على وسك المجمع .. عجباتني الدار كطل على ربعة ديال الاتجاها مالاسقة معايا حتى دار .. دخلت للكوزينك حتى هي ماعندي منقول عليها منضمة ومتولة ناقصينها ماعن بزاف مافيها حتى قجاقاجة كدور .. سمعت تيليفون كيصوني مشيت لقيت يونس كيعيط ودخلت للبيت سديت عليا جاوبتو بقا كيبكي قطع ليا قلبي وماكرهتش كون تزوجنا لاكن القسمة ماشي بيدينا تعصب فاش قلت ليه منقدرش نهضر معاك انا مرت راجل اخر كناخد دنوبو صافي نساني خليني باش حتى انا نقدر نساك . لاكن مابغاش تعصب قالي ماتبقايش تقولي ليا مرت راجل نتي مرتي انا انا اللي غناخدك .قلت ليه راني قلت ليك صافي راه تزوجت
قالي واش نتي مقتانعة واش عاحبك الحال
قلت ليه ماشي مقتانعة ماشي عاجبني الحال ولاكن هادا الزواج ماشي اللعب. وانا عمرني ننساك اصلا نتاخرت فهاد التزويجة هادشي كاافييني
قطعت عليه وحلست كنسوط. كنشوف شنو ندير .. كنت كنسمع على الحجوجي حتى وليت مرتو بالشرع والقانون عمرني حلمت بيها وكولشي جا على غفلة . بقيت شاردة حتى عييت ونتهدت نضت بغيت ناكل شي حاجة جاني الجوع مشيت للكوزينة لقيتها كتسفر وخرجت سمعت الباب تحل ضرت كان عيسى اللي دخل لابس دجين رتيشورط كحلة فيدو قفة صغيرة شافني وتبسم قالي صباح الخير
ابتسمت قلت ليه مساء الخير .. جا عندي عطاني وجهه بغا يسلم عليا ومديت ليه حنكي قاصني بلحيتو وقالي عيطي لماماك هضري معاها راه عيطات ليا كتسول فيك
حركت ليه راسي ومشيت لبيت النعاس عيطت ليها سولاتني مي بقيت مع الوجع قلت ليها مزيان وسولاتني واش كولشي هوا هاداك قلت ليها الحمد لله قالت ليا واحد الثلت ايام ونجيو نشوفوك نجيبو ليك لحوايج ديالك والكادويات وهضرنا شوية وقطعت معاها ماعرفت ماندير وكيفاش نتصرف وتيليفوني كل مرة يصوني ليا يونس. حتى تعصبت خفت يبقا يزن فيه وحتى كنقول صافي غادي ننساه كيرجع يفكرني فيه ماخلاشربيا فرصة ننساه وثلت سنين صعيبة نساها بين ليلة ونهار وكنحاول نتعايش مع وضعي الحديد ونتقبل زواجي وزوجي ونبدا حياة جديدة . حيدت نمرتو فمرة ورجع كيصوني ليا بنمرة اخرى وخلاني حتى جلست حدا عيسى ناكل وصونا جاوبت ماحسابنش هوا .. غير سمعت صوتو وقطعت بقيت كنقول الو الو وطفيت تيليفون فمرة حسيت ساعتها بقلبي غيسكت بالخلعة . كنت كناكل ساهية مابيا ماعليا حتى حسيت بيد عيسى شدات ليا فيدي وهزها حطها على رجلو وتلفت شفت فيه قالي فاش ساهية
ارتبكت هبطت عيني حشمت منو كيجيني فارض الاحترام وكنوقرو وكنحتارمو كنحس بيه بحال بابا ماعرفتش كفاش نوصف هاد الاحساس اتجاهه حتى من الشكل ديالي كنحاول نخليه عادي قدامو ومحتارم بلا نتلفت الانتباه .. سليت يدي من بين يديه قلت ليه والو وقالي واش مرتاحة هنا ؟. كنحس بيك مامرتاحاشر
بلعت ريقي قلت ليه لالا مرتاحة الحمد لله
عبط راسو فالارض شوية وجع تقلب جيهتي هاز واحد الرجل على الفوطوي ودار يدو على ضهر الفوطوي وقالي زواجنا حا بطريقة تقليدية .. مكنعرفوش بعضياتنا مزيان وماعارفينش الطباع ديال كل واحد فينا .. بغيت نقول ليك .. خودي راحتك فهاد الزواج .. ماتابعنا والو وعندنا فرص فين نتعرفو على بعضياتنا مزيان ونولفو الطباع ديال بعضياتنا .. نتي دابا فدارك تصرفي كما بغيتي ويمكن ليك تشوفي عائلتك فالوقت الي بغيتي .. تمشي عندهم .. يجيو عندك انا ماعندي حتى مشكل من هاد الناحية .. ماعندك علاش تبقاي مزيرة
ابتسمت حركت ليه راسي بالايجاب وبقيت ساكتة قالي بابتسامة كيشوف فيا !
هضري .. قولي شي حاجة
حركت راسي بغيت نهضر ومالقيتش باش نعبر ميلت راسي على كتفي وابتسمت
قاس بيا بصبعو على شعرة مدلية على وجهي قالي كولي ماكليتيش
مسحت يدي قلت ليه الحمد لله كليت . وماكرهتش نقول ليه راه ماشي انا اللي كتبت المسج راه داك الشعر ماشي من ابداعي ومكنعرف منين نجيه غير زرفتك معايا والى كنتي كتسنا شي كلمة زوينة راه ضيعتي حياتك وحتى المشاعر اللي يخليوني نعبر بالفطرة ماعنديش اتجاهك من غير الاحترام و الهيبة ديالك والزين اللي فوجهك اللي كيخليوني نحشم منك
سمعت لكلامو كان كيحاول يخليني نرتاح لاكن انا مامرتاحاش .. كنسترجع ذكرياتي مع يونس كنمرض .. كنحس بقلبي كيتقطع تمنيت من اعماق قلبي نتجمع معاه لاكن تخطفت ماحسيتش براسي حتى لقيت راسي مزوجة براجل اخر وعندي الضرايرات .. اخر ماكنت كنفكر وعمرني تقبلت فكرة الضرايرات واخا غير بيني وبين نفسي ، قاطع سهوتي تيليفونو كيصوني وقطع هزو فيدو وخرج من لدار بقيت بوحدي تنفست على خاطري وحمعت الطبلة ومشيت لبيتي بغيت نشغل راسي وجبدت حوايجي كلهم شتتهم جلست كنطوي فيهم .. يااااه الزواج كي داير !!! ممل مافيه حتى حاجة زوينة من غير تبدلي دار بدار وراجلك بباك وتكملي على روتينك وحياتك المملة .. كنتمنى نخدم ونكون حتى انا شي حاجة مهمة فحياتي لاكن عمرني نحلم بيها وواخا نبغي نديرها غنلقا بابا واقف فوجهي وفصف راجلي .. لو كنت جبت الراجل لراسي كان بكون حسن كان غيبقا بابا ديما فالجنب بعيد على حياتي الخاصة وقراراتي لاكن مدام ان العلاقة بين راجلي وبابا قوية وجمعاتهم صداقة قبل ماتجمعهم النسوبية فمن المستحيل نبعد بابا من طريقي وهوا تكلف بكل صفيرة وكبيرة فهاد التزويجة هادي كلها .
قهرني التفكير وقهرني بعدي على يونس توحشت نشوفوً توشحت نمشي انا وياه فالطريق واخا كنت كناخد احتياطاتي من العاىلة. ، توحشت نهضر معاه ونضحك انا وياه كنت حرة معاه وكنت مرتاحة دوزنا ثلت سنين كلها عمرنا تفارقنا فيها عشنا فيها المرك والحلوة وكنت باغا نصبر عليه حتى يدير عقلو ولا يخدم لاكن تصرف المكتاب .
تفكرتو وبديت كنبكي بوحدي ماشعرتش براسي حتى لقيت التيليفون فيدي كنصوني عليه جاوبني ملهوف قلت ليه انا ماقدرتش. ايونس. .. ماقدرتش على هاد الزواج كنموت وقلبي كيضرني
قالي فتحي كامرة نشوفك انا اللي كنموت انا اللي مفصل هنا عادي يخرج ليا عقلي .
فتحت الكامرة وشعري عريان اول مرة يشوفو كان ديما كيشوفني بالحجاب ومانتابهتش ليه واصلا مابقا كيهمني والو ساعتها بغيت غير شي جغمة تبرد عليا شفتو جلس فاش شافني قالي مانسمحش لباك اللي داك ليا مانسمحش ليه وعمرني ننساك ولا نفكر نتزوج وليت كنتمى الموت صباح وليل
قلت ليه حتى انا صافي عييت … الدنيا كدور بيا مابقيت عارفة راسي من رجلي بغيت نتفك وعييت نتلف عييت ننسي والو ماشي بيدي
قالي شنو نقول انا اللي عارفك مع واحد اخر فداك البيت ولابسة ليه داك اللبسة وطالقة ليه الشعر !! هي حتى نتي عاجبك الحال
جيت نجاوبو وسمعت الباب تحل عليا وقعت طيحت تيليفون فالارض طفا فمرة وضرت شفت فعيسى وهوا كيقلب بعينو وسط حوايجي اللي حطيت فوق الناموسية والارض قالي فين السجاد اسارة ؟. عطيتها ليه وطلقاها مورايا كبر بصوت مرتفع كيصلي العشا
يتبع
التعليقات 0