“الزواج بالنية والحرث بالنية”
عناو بيها ناس زمان بالي الزواج الى كانت حاضرة فيه النية الزينة غايكون كيما قسمو رب العالمين…
وقاليك ثاني…
“كَيّلْ زرع بلادك واخا يكون شعير”
وهنا المعنى قد ماجلستي وشحال مادرتي وشكون ما جربتي وعشتي ومعامن تعاشرتي…فلاخر دي بنت بلادك كتبقى حسن من البرانية…
وقاليك “فرحي يا موكة بلارج دار العرس”
ومعناه أن لكل شخص نصيب في الزواج، فسواء الجميل أو القبيح، ..و كايقول واحد المثل عمييييق…وليه معنى كبير..رمى سهامو ونتا وماجادت بيه فهامتك…“العروسة فوق الكرسي ما عرفها حد فين ترسي”
والمعنى يا الفاهم ان المراة الي تدخل بيت الزوجية، لا هي عارفة زواجها كامل وزين ولا كامل وعامر بالشين”الخايب”…ولا مكاملش گاااع من بين هاد الاثنين…
وفالاخير زواج قسمة ونصيب…نتا ومعامن لاقاك ربي وجمعك بيه…كان زين ولا خايب راه مكاتيب…
ولكن ماشي كاع المكاتيب زينة..
وانا كنقول..“حل عينيك قبل الزواج أما بعده غير غمضهم..والى عطاك العاطي ماتحرث ماتواطي”…
#المدينة_الحمراء_مراكش
#الرميلة_المدينة_القديمة…
7:00 صباحا شهر يوليو الحراارة المفرطة كيف العادة فهاد الفصل فمراكش…حلات عينيها من بعد ساعة ديال النوم مورا الفجر..مدات ايدها لطابل دونوي عند راسها شعلات التيليفون شافت ساعة واستغفرات مولاها وناضت كتفوه وتجمع فشعرها بقراصة حيث كطلقو فالنعاس وفالاصل قصير…سمعات صوت تقرقيب عرفاتو الحاج حيث من الفجر كيبقى فايق…دخلات لدوش غسلات وجهها وجددات الوضوء وخرجات صلات زوج ركعات الصبح سلمات وتحات وناضت كطوي فالسجادة حتى تم داخل شاد تسبيح فايدو بوجهو البشوش كيف عادتو ضراعية فالگرونة كمايمها مخزانيين حد المرفق وتوبها بارد مع صهد مراكش …وطاقية فنفس لونها..لحيتو الي متخللها الشيب والنور الي عاطيه ربي فداك الوجه يخليك تدخليه لخاطرك صحة واخا هو انسان صارم و عصامي….الهيبة والقبول من عند الله…لون بشرتو الي سمارت بتمارة الخدمة فالمحلات والجلود ودار الدباغ والحمام…وكيِّل من هنا وتسنى هذا وجيب هذا وشموشات تا دا منو زمان نييييت…شاف فيها وبابتسامة صبح عليها….
“صباح الخير الحاجة ناديا…تعطلتي مامولفة ليك هههه”
ناديا مراتو او الزوجة الثانية من بعد ماتوفات اللولة الي عاش معاها سنيييين لكن الاجل وصل…حزن على مراتو وعلاش لا وهي كانت رفيقتو لكن ربي بغى امانتو وسالات معاها رفاگتو…عامين ديال العدة الي عطا لراسو من جيهتها وبين فلان وفلان وتدخل الواليدين والاحباب وبين اقناع واقناع يا فلان را خاصك تزوج..صبرتي مع فلانة بلا ولاد عطيتيها حقها من رفاگة(العشرة اي الرفقة).. وصبرتي ونتا بلا ولاد ها ربي كتب عليك المكتاب وعطاك فرصة دير ولادك و دير ليك سلالة تبعك تكون من دمك ولحمك الى بغى الله…حتى قنعوه صحابو من رجال الدين وكيف ممعروف عليه انسان ملتزم بدينو صلاة ماتفوتو وحق مايضيعو…عطا الكلمة وكلف ختو تقلب ليه..وفداك الوقت كان كلامها كالتالي :..
هي : مولاي حفيظ….فيك مايدير الاجر فسبيل الله “حيث هي امرأة حقانية وعقلانية ونيتها زينة “..دي الي من د.مك ومنها دير الخير…
مولاي حفيظ : شكون اختي لطيفة…
لطيفة : بنت عم با ناديا يتيمة الواليدين الي عند خالتها عايشة…راك عارف الحالة..كسب فيها لاجر…و بلا منفهمك الى بغيتي تستر ربي يسترك ويحسبها ليك عندو اجر يوقف معاك غذا يوم الدين…
مولاي حفيظ”قاطع كلامها هاز ايدو بلا متكمل حيث عارف بنت عمو اش كانت كدير..” : كلامك هو الكبير اختي الكبيرة..الي لازم ديريه والي خصك”ضرب قفاه” ضربيه على حسابي…من غذا فالصباح رسلي ليا عزوز راجلك نرسليك معاه شي بركة..منها نشوفو نيت…
الحاجة حبيبة : الله يرضي عليك اولدي..وهادي ترابينا وربي مايخيبنا…
لطيفة : على الراس والعين”هزات البراد تالفوق وسط دار اشبه برياض قديم..دار الورثة…حدا الحوض ديال لغرس..انذاك كان حوض اما دابا رجعو سقاية بالالوان وفسيفساء بتصميم رياضات… وريحة تراب فازگ حيث ساقيين داك الغرسات..كبات ليه كاس اتاي بالرزة…
ناديا”زينها كيفتن وخا شوية تقدمات فالسن…. وكيف كيقولو لا مشى زين كيبقاو حروفو…. عينيها كبار سبحان من زينهم بدوك رموش السوداء…مواتيين مع الحجبان السوداء..فيها من الرومي الي تجلى فلون عينيها الاخضر..زينها باقي شاد وعلاش لا وهي فاواخر الاربعين…واخا شعرها قاسو الشيب الا انها كتصبغو بالاسود..محافظة على راسها ومهلية فراسها…تبسمات ليه ابتسامة حنونة” : عگزاتني نعسة الحلوة الي مورا الفجر هههه…
م.حفيظ(حرك راسو ببطء خااتر) : ماكاين باس ماكاين باس..
ناديا : انا خارجة نرد الفطور اليوم للا رقية غاتجي معطلة من عطلتها…اييه وكاين ايوب لفوق مادخل حتى ل ستة صباح..
م.حفيظ”غوبش” : هاد خدامي العراسات راهم ماعاجبيني اناديا..نهيه قبل مانهيه انا…
ناديا”قربات ربتات ليه على كتفو” : راك عارفو هادشي الي قرا..ومدخل بيه صريف لراسو بالحلال ونتا هادشي الي كتبغي ونهار لول خليتيه يدير اش بغى…
مولاي حفيظ : خليتو يدير الي بغا..مايجيني تالاش من وقت فالفجر مرة الصباح..مرة يومين منشوفوه مسافر لقنات..يخدم غا هنا هاد ساعة…
ناديا : ولا تزيدش فيه الحاج….وزايدون را بطوموبيلتو ماكيتنشر فحتى قنت…
مولاي حفيظ : ماقلناش اناديا ماقلنا والو..را ولد خويا الله يرحمو..وراه ولدك وخو ولادك الي هما ولادي..تربية ايدي ملي كانت عندو ربع سنين…وليني راه باقي صغير الحاجة…راني نخاف عليه كي نخاف على كبدتي..وايلي..وزايدون شكون زيدو ياخذ طوموبيل ؟ ياك انا الي درتها ليه بزز…
ناديا : واخا ميكون غا خاطرك..
خرجات من البيت نيشان لكوزينة بدات توجد فالفطور….اليوم الاثنين كاتكون السيدة الي كتشقى وطيب معاها عطلة الاحد وكاتجي الاثنين معطلة كتبغي دوز لسوق الاسبوعي تقدا لولادها عاد تجي…
سمعات صوت الباب تسد عرفات الحاج خرج يجيب الكومير كيف العادة باش يجي يفطر ويتيسر لمحلاتو…بمجرد ماكملات حطان الفطور كان هو دخل قال السلام وحط دوك الكوميرات باقين يفرفرو بالسخونية هما وكرطونة اخرى..ولقاها حطات الملوي وحطات زيتون مشرمل كحل والبيض..زيت الزيتون..فرماج زبدة دايبة وعسل..الخ
ناديا”طلات على ساشية لقات فيها اميريكان رولز بكريمة الفستق وابتاسمات” : الكرواصون الي كتعجبها…
م.حفيظ”تبسم كيحرك راسو بثقالة” : خليها تاوكان تفيق هي وخوتها و ايوب را الباگيط الي كيبغي وحطيها ليهم هزي لا بغيتي نتي…
ناديا : لا الحلاوة زايدة بلاش..هادشي خليه لايوب وليها و لوردة ومعتز…
سمات الله وكبات ليه كاس اتاي..مدات ليه الكومير..وليها كاس قهوة مخلطة بالحليب معطرة ريحتها فاحت فالدار كاملة..الرياض الي تصميمو نوع القديييييم…وخا صلحوه حافضو ليه على تصميم…بحكم ديال الورثة بقى ساكن فيها غا هو وحتى ختو كتجي عندهم من سمارة دوز معاهم العطل…كانت معاه تا مو وباه وحتى خوه بات ايوب لكن ملي توفاو توخر فيها غا هو…وفالاعياد والمناسبات كيتجمعو كاملين باش يخليو ديك الدار فيها الحياة وريحة الواليدين…
جالسين فدخيلة محطوطين فيها سدادر بتلقانهم ملمطين بالموبرا الستيل اللولاني محفرة…وديك دخيلة سقفها منقوش وحايطها بزليج المغربي البلدي والارض فسيفساء…
م.حفيظ : نهار سبت مع صباح نتيسرو لعرس..عارضين علينا لغذا..
ناديا : اييه فكرتيني خلي ليا لفلوس نجيب داك الكادو الي وصيت عليه…مابقاش عندي ومافيا مايطلع تالبنك نتيري…
م.حفيظ : هزي من الكوفر من فلوس السلعة…غاديا معاك ؟
ناديا : بالكشايف،،مابغاتش تمشي لعروبية..شوية وتفيق خاصها تمشي فين قلتي ليها…
م.حفيظ : تبدل الجو شوية..(ناض وقف)…يلاه اليوم ممساليش عندي المحاسب وغانمشي لحمام تاهو نشوف الكاميو ديال الفيتور (بقايا زيتون الي تطحن فالمعصرة كيسخنو بيه الحمام) وحتى ديال العواد ونشوف معاه الحساب را شحال هادي ماخلصتو…ومن تم لدار دباغ نشوف دراري..
ناديا : وراه صبرو معاك الحاج…
م.حفيظ”تنهد مخرج هم قداش” : داروها بيا الكريديات..هذا هو حال التجار…هادشي الي عطا الله..
“فطر وناض غسل ايديه وفمو وخرج كيذكر الله…تنهد وبدا عقلو يغيب فالي غايواجه برا..”
م.حفيظ : هاني مشيت…عمر غايجيب ليك المقدية..انا مزيرة عندي الوقت…وغايجي الحسبن عشية بطوموبيل يديكم فين بغيتو…لاساليت ندوي معاك دوزو عندي لمحل فالسمارين…
“حركات ليه راسها وهز سوارت طوموبيل وتيسر لواحد من محلاتو الي واحد فالقنارية(بلاصة حدا سمارين) …والحمام العمومي رجال ونساء الي فالمحاميد ومحل البازار ديال جلود وزرابي فالسمارين لداخل…بالاضافة لمحلات اخرى فگيليز كاريهم وهادشي كامل هو مكلف بيه حيث ديالو وديال خوتو…
الحداش ديال نهار..وصلات المقدية على بكري وبدا الغذا كايتنصب..جات السيدة الي كتعاون ناديا فالشقا والطياب،،
ناديا : للا رقية طلي على الخبز و.شوفي داك زعلوك خلطيه باش يجي عمر يدي الغذا لحاج ويدي ليه تا دواه را نساه…انا طالعة الفوق نفيق ايوب….
خلاتها وطلعات كاتقاد فشعرها بالقراصة حيث كانت دايرة زيف فالكوزينة فاش كتكون فيها كديرو كاتخاف ييطيح شعر على الماكلة..نقية فماكلتها فلباسها فتاويلها فدارها خصوصا هاد رياض مرجعاه يشعل وراقي ففراشو الهماوي….باقي شاد فالاصالة ديالو باقي بنفس ديزاين رياضات القدااام ماشي ديال دابا الي بدايزن لوطيلات…نفس زليج الفسيفساء فالصالونات تبدلات غير صباغة الي دارو الي جددوها وصلحو بعض البيوت…وبعض البلايص..فنفس الوقت مفرشاه بذوق راقي وبلدي تقليدي. ومن افخم انواع الفراش من طلامط الخريب موبرا وفوطويات الجلد الاصلي وزرابي ها تركية ها رباطية..وتريات البلدية العتيقة والفوانيس فالجناب حتى من الشبيك ديال شراجم بزواقات البلدية..وزاج ديالهم من نوع الزجاج العراقي (بحثو ف غوغل تعرفوه)..علاش لا وهما عائلة قديييمة فمراكش وخا اصلهم ماشي مراكشي…وميسورين الحال مزيان….
..طلعات لفوق اول بيت هو ديال ايوب كاينعس فيه. عايش عندهم ومرة كايمشي عند امو يشوفها ف ايت اورير…. حيث من نهار مات باه اي اخ مولاي حفيظ مشات لدارهم وتزوجات وهو تربى عندهم كيمشي عندها غير فالعطلة حيث كان كيقرا فمراكش…
ناديا”دقات الباب” : ايووب…
ايوب”كااع مكاين فهاد العالم كي وصل نعس فلارض تا الناموسية مابقات بانت ليه…”
ناديا”حلات الباب وطلات عليه براسها تا بان ليها منشور فلارض” : ارسول الله..هذا كيف دار لهاد النعسة !! ايوب !!….”تحنات عندو بدات تفيق فيه”
ناديا : ويلي ايوب..نوض بسم الله عليك…
بقات تشوف فيه….بعدا التنظيم هو التنضيم جا لبس بيجامتو البيتوتية سروال وفوقي ديال ديال كارويات فالبيض وگري وتقيشرات فرجليه العادة ديالو…باش يحافظ على رطوبة رجليه ونقاوتهم الاهتمام بالمضهر ديالو ماتحديهش فيه والنقاوة عشرة لضص..الحمام عندو من سيمانة لسيمانة خلي عليك تدواش كل نهار فهاد الحرارة…شعرو رططططب لدرجة كيبان كيبري وعلاش لا وهو داير ليه الكيراتين…وخا ناقصو بزاف دغيا كيطوال ليه وقهوي مايل لكحولة…لحية مقادها مسطرة…الوجه نقي ويبريييي من كثرة مامهتم بيه…..حل واحد العين فحال الغمزة بنعاس…حيث بدات تفيق فيه وتحرك…
ايوب”هرنط ماشي نطق..” : هنننننننننن…
ناديا : نوض من لارض ويلي استغفر الله..كاع هذا عيا من العرس…
ايوب”نطق بداك صويت رطب من كثرة ما عاشر العيالات فخدمتو” : الباتري اميمتي هنا سكت ليه الحس…اشوا بيتي بيا دابا خليني نعس…
ناديا : قرب الظهر ياذن بغيتي تولي تشرك نهار مع الليل ؟..نوض تگعد تفطر..نوض را سول فيك الصباح وراني سكتو بالكشايف…
ايوب”حل فيها نص عين” : قاليك نهيه قبل منهيه ؟
ناديا : ههههه ياك حفضتيه…
ايوب”هز ايدو كيشالي بيها كي الولية” : ايوى ياختي راه هو الي بيحفضني…ويلي راه رزقي هذاك..راني خدام فلوس كدخل وتخرج…بيتي نجري على رزقي ؟؟… بغاني نجلس حداه نزند لعواد لحمام ولا نش عليهم يزندو ولا نحك سگايط عباد الله !! اععع يخرج الوسخ وانا فرحان حيث خرج الوسخ باش نبرد واحد ثلاثين ولا خمسين درهم ويعطيها بحال خاريها صحة…ديك ثلاثين درهم راني تنبردها فالعرس فدقيقة…وبشااان والمرشان يالالة ويعيطو بايوبينو طلع وايوبينو هبط..وبالمواعيد..ماشي نحك لعباد الله زكا…”كان غايكملها تا تفكر غاتنزل عليه صلية من حيث لا يحتسب” ووو م ومايخسرو عليك تا سمح لينا…
ناديا : علاه باك عندو غير الحمام ؟ الحمام راه مقابلو ليه العرابي..وزبيدة (رجال وعيالات)…باك كثيرتو فالمحلات الي فالمدينة ديال التوب والي فسمارين ودار دباغ…وكرا المحلات لاخرا..را رزقك حتى نت اولدي…(حيث الورثة)..
ايوب : ياك هو كيخدم كثيرتو مع العيالات فمحل تواب ؟ ياك تاهو كيتبدا يتبوزق مع سياح؟ ايوى تانا مع العيالات غا هو تايصلي العشا ويسد وانا تنتسنى الامام يسد الجامع مع الفجر..الفرق غا فتوقيت…ميمة ياا خاليني بينعس يرتاح ليا وجهي وليسيغن مايبانوش ولا نتعقد ليك هنا…
ناديا : ايوووووب “عيطات بواحد الصوت كيفهمو هو وبناتها كيعرفو ماتعاودش الهضرة”…
ايوب”ناض واقف كيقاد فقميجة بيجامة” : نوض ندير روتيني اليومي…تانا بينقول الصباحي ديال وجهي وندوش راني مدوشتش البارح كي جيت بزربة بدلت ونعست…
ناديا : يلاه طلق راسك هاني مشيت نصوني ختك نشوفها اش دارت…”مشات”
ايوب : تاهي قولي ليها سيري خدمي كسالة عند العيالات عاوني للا نجاة العزية…سيري لاما توضرت ليك وسط دوك الكسدات..هانتي قلبي بين فلاقي للا نجاة الكسالة تلقايها تم…”خشا نيفو تحت طابقو كيشم شم ريحة حموضة العرق وهو يخسر سيفت “
ايوبينو : اييييففف..تفووو لصقت فيا ريحة الصنان ديال العيالات فالعرس..كايشطحو مايبدلو سليباتهم صنان ريحة الكراصن العرق ديال الشعر وتلواز عشرة لضص هذا مايحد باباهم فيه حد…
مشى يجري هز حوايجو ولاتخوس ديال برودوي دوجهو وجسمو..وخرج لبرا لدوش الي فالطوالة…
هبطات لتحت لقات رقية كتشقى ودارت اشنو قالت ليها…
ناديا : يالاطيف على ولد ولا هو يكبر…. معتز ووردة…
جات وردة الي هي ومعتز توأم…
وردة : ماما هاني..
ناديا : اش كديرو ؟…
وردة : كنتفرجو ف رسوم انا وحويا معتز…
ناديا : هههه وانتي قادي الحروف..خاااء ماشي حاء..ويلي هادو شي نهار يحطوني بوجهي فشي جماعة…سيري هزي تيليفوني جيبيه ليا نعيط لعمك عمر يجي يدي الماكلة لباباك..يلاه..
بقاو يضحكو عليها الخاء معندهاش مستبدلاه بالحاء…..مزالين كيهضرو حتى هبط ايوب كيغني بدوك الحلوق باقي ليه اغنية فراسو من عرس البارح الي كان خدام فيه…سمعاتو ناديا وبدات دور فراسها اما رقية ترعت فمها بالضحك..من ديما قاتلهم بالضحك مكايتقاداش من الغنا يكون جالس صحة سلام اتايبدا يغني…عارفينو هكاك داير طبعو وهضرتو خصوصا خدمتو مع العيالات كيهضر ويسبل ويحرك ايديه ويعطيك نصائح لبشرتك ولا راسك ولا لباسك..غير حركاتو وهضرتو هكاك اما هو رجولة فالمواقف وكلشي عارف بالي هكاك طبعو وعارفينو ماشي لوبيا او كيف كيقولو زام***…كون مكان عارف عمو المعدن ديالو كون تبرا منو شحال هادي….
ايوب”جا بيناتهم ووبقف معنقهم” : عيالاتي كاين شي مايتحنجر..
ناديا : الحجر…
ايوب : ماعندي ليه سنان الي يندغو وماعندي ليه قاع الي يخرجو “نزلات عليه بدقة لجبهتو تا غوت”
ناديا : الله يقلل حياك..
رقية”عضت فمها بخجل” : ويلي ويلي يعطيه الويل…
ناديا : سير جلس فالبيت تاتفطر..
ايوب”مشى لاماشين دار كبسولة القهوة صييك” : نووو بلاش نشرب هي قهيوة نحل بيها دماغي راسي بيتفرگع…حتى وكان نتغذا معاكم…بان ليا دايرين شي غذا معكرط دايزو الكلام…
ناديا : مادويتيش مع للا فاضمة…
ايوب : دويت معاها..سلمات عليك..مزال ممسالي باش نطلع نشوفها تخوا عندي الدعوة هاد الايام ونضرب تال عندها…..
شرب من قهوتو رشفة حس بيها تسللات ليه مع عروق راسو تا طلق حلوقو
ايوب : واااااا رضاك يا مي را غطاني رضاك يا مي را غطاني..وطيش الشباب وين داني وطيش الشباب وين داني.واا البلية والهم وعدياني….واا مي يا مي راي وشوار..مي يا مي” واحد اللحظة صوتو تطرب ولا قريب لصوت اكرام العبدية…اصلا صوتو زوين..مشى لناديا عنقها حتى هي” ونتي مولاتو..مي يا مي..سواكة لسناني مي يا مي ياا وحنة لگدامي مي يا مي…واااابابابابابابااااااو….
ناديا : ههههههه الله يستر….
رقية : ههههههههه….
ايوب : نغمة نغمة داكشي تعرفيش ليه اناديوش…اححح…اهيااا فين جدرة لاخرى؟!
ناديا : مشات تجيب الباك ديالها ومن تم تشوف سيارة تعليم وتشوف البنات وتجي..
ايوب : وخلاها الواليد تمشي بلا شيفور…ليسي بعيدة الواليدة راها فازلي..
ناديا : مشات فطاكسي…
ايوب : اوى لباس..”شاف فساعتو”.. شوية وتوصلني واحد الكوموند ….
يلاه كيهضر تا تسمع صوت الباب تحل وتسد وهي تسبق ريحتها ديال الفانيليا الي كيعرفوها بيها والي مفضلة عندها وشكون فيهم مايعرفهاش وهي كتموت على بارفان tobacco vanille من tom ford واخا عندها تستيفة عطور كلهم غير مستخلصات الفانيليا وكديرهم لكن هو كيبقى مميز عندها…
ايوب : ها حبقلبي جااات…
حساب ليهم غاتجي عندهم اتا سمعوها كاتهضر مع خوتها وتبوس وخطاويها طالعين فررر مع الدروج….وقالت فطريقها “ماما هاني نحط قشي ونازلة”..
ايوب : ها الاكس ديالي مشات “ماشي عنا بيها اكس غير حيث قال حبقلبي ملي كشماتو رجعها اكس ههه..جهد صوته باش تسمعو”…نعليك جدود…
حط فنجانو الي خواه وخرج من الكوزينة تا بدا تيليفونو البروفيسيونيل كايصوني…الناس كتاخذ المواعيد بكثرة من عندو..وعلاش الي ميكون عندو لي كليون وهو معروف بخدمتو المتقونة وايديه الي كيرجعو الفتاة العادية ل اميرة بجمالها…ومن سيدة لملكة على عرشها…قادر يغير ليك الملامح دوجهك وقادر يضيف لمساتو السحرية باش يضيف الجمال…عارف فين يخطط بالكونتور وفين يصغر ويكبر…فين ينحت..فين يورد ويلمع فين يخلي الخشن ناعم والناعم ساحر…والى جمعتو هاد الجمل وهاد الاوصاف غايتوضح ليكم اننا كنحكيو على وضيفة الميكاب ارتيست…عندو صالون ديالو كبييير ف گيليز واحد من محلات الي خلا جدو وتوراثوهم…كيمشي ليه غير الى بغى ياخذ الماتريال او احتاج ليه الباقي كلشي مكلف بيه تما الفريق ديالو الي كياخذ منهم زوج او واحد باش كيمشيو معاه لعرس او شي مناسبة قليل فين كيخدم فالمحل…من نهار وعى وهذا هو حلمو هاد المجال…ملي خذا الباك كيف شرط عليه عمو دخل لمدرسة ديال التجميل والحلاقة تخرج منها وتخصص فالميكاب..سطاجا عند محترفين شحاال حتى كون معارف وكسب الحرفة بامتياز وعطاه عمو من فلوس الورث الي من باه هو الي طلب من حصتو شي بركة وزاد عليها شنو جمع وفتح صالون صغير غير فين يحط ماتريالو ويكون فيه ليكيب ديالو…
فبين شيگلام ومايبيلين..بين سيفورا وفلوغماغ…بين ديور وكيكو…وبين برودويات العناية بالبشرة قبل الميكاب..بين البلاشز والگليترز..وبين گلوص و احمر الشفاه..وبين المرطب والمثبت…وبين موعد وموعد مواعيد…وبين السحر والساحر فعالم الميكاپ…كاين الميكاب ارتيست ايوب المعروف بايوبينو…
يلاه قطع معاها اتا مشا وجا على شوي يجي على فمو…تلاحت عليه تاتعلقات فضهرو كي القشة….حتى حس بقلبو خرج من بلاصتو ورجع..
ايوبينو : امصلي عليك ارسول الله…”هز راسو لسما غوت بالفقصة الي ديما دايراها بيه” واااااااااا القشة وااالقشة…
ياربي بغيت ليها عگر السبعيام….
البؤبؤة خضرة وخضوريتها كتزين العين…والضحكة ب شنايفها كتخطف القلب…
ضحكات ناديا على شقاوتهم ودعاوي ايوب الي معندها لا ساس لا راس…جيب يا فم وقول…والي خرجو اللسان رافضو القلب يعني را دعاويه غا خارجين كيبرد بيهم غدايدو…بقات معنقاه تا رطاب وعنقها وجلسو غير فصالامونجي ديال القصب مقابلة مع سقاية ديال الما الي خدامة عاطية غريبي فهاد الصهد…حط تيليفوناتو يلاه بغى يهضر معاها وهو يصوني ليه تاني تا قندش….
ايوبينو : ايوب الصافي..وي ايوبينو…
هي : خذيت طون نيميغو من باج انسطاغرام…شفت بالي داير باك برومو فيه سوان دفيزاج عندك فالصالون وفيه ميكاب ..واش باقي ؟
ايوبينو : شحاال اليوم ؟ 23 يونيو..وي مزال مي غايسالي غذا…
هي : داكوغ اليوم فالعشية ندوز باش نستافذ منو…
ايوب : الميكاب ماغاديش نديرو ليك انا غاديرو ليك نسرين…انا “هز ايدو كيشوف فضفيراتو ويمسح” عندي روپو..الباك اصلا مداخلش فيه انا دايرو صالون عندي نورمال انا مكنديرش البرومو…الوغ الى نتي انتيغيسي نيت بالپاك دوزي لصالون نوصيهم..عطيهم كود برومو الي شفتي فسطوري وهما يتكلفو..الخلاص باغ كارط بونكيغ مادام…
هي : دوموزيل…
ايوب : ويلي الشهر جاي تولي مدام”دوز صبعو على لسانو وحطو عالطابلة مأكد” وگولي ايوبينو ماقالهاش هههه..
بدات تضحك..كمل معاها الهضرة وقطع وهو يمشي لمود افيون اكتيفاها وحط التيليفون بزعفة وذنيه باقين كيزنزنو من العرس دالبارح…يلاه غايهضر وهو يوصلو ميساج فتيليفونو بيرسونيل لقى ليفرور وصل سمع لانتيرفون وهو يوقف ناديا ومشى بزرررربة حل الباب شد كوموند ديالو سالا اجراءات وتم داخل ضحكتو وصلات لوذنيه…حط الكرطونة فوق طابلة…وهو عينيه فيها هزهز حجبانو وهي بدورها هزهزات ليه حجبانها…..
ايوب : وصلات الامانة وصلااات…ااااحاااوو…
ردات عليه بصوت انثوي فيه بحة رقيقة وحنين فنفس الوقت كتحسي بيه دافي..
هي”هزات حاجبها” : فيها الكادو ديالي ديال نجاح ؟؟؟
ايوب : نوووو
هي : ياااااك “خرجت عينيها”…ديرها فين تجيك..
ايوب : كادو ديالك حتى لغذا عاد يوصل..دابا سكتيني خليني نتنغم فهادشي…
هي : شيگلام ؟!
ايوب : ممممم…” هز راسو فيها” جاني العطش كاين شي عصير ؟
هي : دادااا باقي عصير من البارح ولا درتو واحد جديد” ردات عليها ب اه” عافاك زوج كيسان…وهي خليهم انا نجيبهم احبيبتي..
ايوبينو “بدا يحل فالكرطونة ويحيد ف لصاقة” : packaging (لومبالاج) بعدا مقاااااااواد..
كتبغي تقلب معاه كيبعد ليها ايديها فحال مش من كتقربي ليه على ماكلتو…تا غوبشت فيه…شوية جات للا رقية هازة ناضت شداتو من عندها ومدات ليها شنيفاتها زعما بوسيني…
هي : يخالي ليا دادا ديالي…را قلت ليك انا نجيبهم..
رقية : ههه بصحتك كبيدتي..
جبد داكشي كيقلب فيه حاجة بحاجة. وكايتيستي فايدو…
هي : اش طلبتي من هاد شيگلام نتا…
ايوبينو : واحد الگليتر خرج جديد..و blash ليكيد..ورسلو ليا الپاك جديد ديالهم ديال هاري بوتر…نشوف اش فيه باش ندير كولابوغاسيون (اشهار) ليهم فسطوري انسطا…ففف شافني الله “كيقلب فضفار ايديه” اووو خاصني مينيكير لهاد ضفران ولاو حالتهم بتصاويب لعباد الله…
حركات راسها كضحك عليه..وهي تخرج ناديا هازة ساشية فيها غذا صالح حلات الباب عطاتو لعمر داه ليه ورجعات وقفات حداهم..شافت ف ايوب خارج تغطية والله مايجاوب وهو خدام كيتيستي…
ناديا : حيد هادشي غادي نحطو الغذا..”شافت ف بنتها”…يبرد الحال شوي ونخرجو نتقداو ونجيبو قفطانك الي غاتحضري بيه لعرس لهيه…
هي : خفت غير يتوسخ ليا تما..
ناديا : اويلي مالك غاتجلسي فتراب را تاهما مفرشين ودارهم قد الخلا تبارك الله…من طوموبيل لدار..ونيت غاديين فالصباح عارضين علينا لغذا…
ايوبينو “هز عينيه بزربة” : ويل شيطان وليتي بغيتي تمشي معاها لعرس “حركات ليه راسها”… حبيييبة ؟…..habiba…
بقى يرمش فيها برموشو…مافراسو عرس مافراسو مشيان…هز داكشي من تما تايكمل تيست فبيتو…خشاه فكرطونتهم وحطهم فوق حويط حداهم وربع ايديه كيتسناها تستفسر…
ايوبينو : فين هاد العرس…
حبيبة : قلتها ليك الزمر البارح فواتساب…كنتي فالعرس فاش جا بابا وعلمنا وقالت ليا ماما عيطات ليها شي حاجة اسميتها عيدة…
ناديا”خنزرات فيها” : كنقولو خالتي اا حبيبة خااالتي..تأدبي…
حبيبة : واااخالتييي عيدة هههه…
ايوب”هز عينو فناديا” : ودابا دخلنا عليك بالله عيدة سمية ؟..
“قبل ماتجاوب غمق عليها وضار عند حبيبة..مشات ناديا كتحرك راسها بلا حول..” ماعلينا عرس من…
حبيبة”عوجات شنايفها” : ماعرفتش سولت بابا قاليا دووك الناس الي كيجيونا من بعييييييييد…داك الراجل الكبير الي كيدير ديك اللعيبة فوق راسو… “هزات ايدها الي مزينها كورميط ذهب مضفور معاه گورميط رقييق فيه نجيمات مدليين كانت كادو من باباها بمناسبة نجاحها ف سيزيام”
ايوب : ااه الحاج الرحماني الي كايجيب ليه الكاميوات ديال الفيتور ديال زيتون باش يسخن الحمام فالمحاميد وجلود البگر…قولي تريكة الرحامنة….
حبيبة”حركات راسها” : وووييي…كنتي مشيتي عندهم فاش كنتي صغير قلتيها ليا ديك المرة…
ايوب : اييييه الي ف سيدي بوعثمان…الاطييييف عرس فهاد صهد…والعگارب باتزرد (عندها زردة) هههه…”هز راسو عند ناديا لهيه حيث عارف هي الي غاتجاوبو”. اهيا وين شكون مزوج عندهم ؟
ناديا”واقفة على رقية كتقطع فالخبز” : ولد الحاج الرحماني..الي ف برا…رضوان…
ايوب : همممم…
حبيبة : يلاه معانا ونسني مكنعرف حد تما والعروبية ماعنديش معاها وصهد تمشي تخرج ليا شي عقرب ولا حنش…
ايوب : وانا داياني نصيدهم ليك ؟ سيري ابنتي بعدي مني..بحرا داير سوان لوجهي..وضفاري تكرفصو…انا السبت طالع عند الواليدة ندي ليها شي بركة وشي مقدية…
حبيبة”دارت ايديها على حناكها بتافف” : فففف وغاديين فالصباح والعرس ميسالي حتى لاش من وقت وغانباتو تما وافففف…خاصني ندي معايا ليلانجيت معقمين..
ايوب : دي معاك دوش تاهو…
ميقات فيه وناضت كتمختر فمشيتها قصيورة وطلعات لفوق تبدل حوايجها حيث طلعات حطات وراقها وهبطت..قبل ميحطو الغذا خاصها تبدل وتغسل حالتها…
هي البكر ديال ناديا مولاي حفيظ…الي فعمر 18 سنة….وقفات كتشوف بين رموشها الي ساكنين فيهم زوج بؤبؤات كيف اللؤلؤات كيبان لونهم المميز نفس لون عينين ماماها الاخضر غي هي فاتح…نفس الكثافة الي فحجبان امها…الغلاض وخا مبعثرين مقادين انثويين….الزين فوجهها كايحمق ويفتن..وعلاش مايفتن وهي شابهة امها الحسناء الي كانت فواحد الزمن فشبابها عينين رجال مقاتلين عليها وسوقها كان عامر بزاف رغم الضروف الي كانت فيها والي حطات راسها بارادتها فيها…حتى تسترات وولدات الي شبهات ليها فزينها…و الفرق كان فالضروف فقط…
الفم او الشفاه الممتلئة….كل هاد الملامح الفاتنة مزينة وجه دائري وخدود وبشرة بيضاء عادية مايلة شوية لحنطية….بشعرها البني القوي الغامق المايل للسواد..والي واصل وسط ضهرها…حيدات حوايجها باش خرجات ووجدات حوايج اخرين ماتلبس …بقات بسوتيان ديال بونج بيضين فحال كيلوط.. مشات لمجر هزات حمالات صدر اخرين بلا بونج حيث كتستعملو غير برا..حطاتهم تما ودخلات لدوش الي باب ديالو غير تما فبيتها…توجهت لافابو وحلات المراية جبدات جيل نيطوايون ديال وجهها ديال لاغوش بوزاي ايفاكلار…غسلات بيه وحكات سنانها وخرجات وقفات وضارت كتشوف فالمري الطويلة…كتشوف فراسها قصيرة القامة…عندها لتحت ملفت ليهونش زايدين على لزوم …وهادشي كتحس بيه عيب خلقي هههه ومسبب ليها شوية الاحراج حيث كايلفت ليها العيون لكن ماكيمنعش انها ماتلبسش الي بغات… شوي لباسها بين وبين…عندها شوي الكريشة..هزات عينيها وعوجات شنايفها فداك الصدر صغير…كتقول كون غير هاد ليهونش زايدين بزاف كون تنقصو وبانو غير فصدرها…وزايدها تا قصر القامة وواخا هكاك فورمتها زوينة رجيلاتها قصيورين وغليوضين ولكن حنا ديما مع الاسف مكنقنعوش…تاففات وجبدات من ماريو بيجامة نص كم عريضة واصلة حد ركابيها فالابيض وبلومارين….بالخف لبستهم دارت ديدورن…هزات تيليفونها ودازت لكوافوز الي على شكل مرايا ضاير بيها عود بيض والبولات بيضين حداها طاجيراتها فجنابها بيضين وتحت مجورة كبار وكرسي مغلف بالجلد بيض من بازار باها تحتو طابية فالگري فيها الفرو رطب….قلبات لعويدات الي فقرعتهم كانو لتحت رجعاتهم لفوق باش يطلقو ريحتهم كمعطر الجو فبيتها وخرجات..نزلت كدردب مع دروج ودندن بصوتها…لقاتهم حطو الغذا وجرات الكرسي وجلسات…
ايوب : وخا نسولك ؟
حبيبة : ممم…
ايوب : تبغي تلبسي واحد طالون داك الي محطوط عندي ديكور فالصالون ” حاط طالون ديكور طوييييييل ههه…شافها خنزرت” صافي صافي…ونتي غاديا لرحامنة وديك تريكة اقصر واحد فيهم فيه ميترو وسبعين…
حبيبة : تانا طويلة…
ايوب : ايه القشة … الي كتحارب الحياة ب ميترو و تسعووود وخمسين…جري جري الواليدة ديك زيتونة لهادجيه…
رقية”جرتها نخششاتها فيها ودارت ليها ندغة فيها اللحم وكلتها” : اهيا وين اش بيتي بيها…تفرق ليا على قشتي…اداك المسلگم..
فارض من اراضي الرحمٰن…و في زمن فاااات…عند ناس جداد نهار فنهار كان عندهم فحال العيد..النهار الي غايولي عيد ميلاد من بعد…نهار الفرحة…اليوم الولادة على مشارف عندهم..صوت غواتها والم المخاض الي هي فيه..العيالات داخلين معاها ورجال على برا يدعيو…ومكانوش داريين انه هاد نهار غايكون من الفرحة ل القرحة…جا من بعد الفرحة وخبار الزينة…
كان طالع شاب فعمر 18 ملامحو خشنة حرشة سابقة عمرها… حتى هو كيضحك وضحكتو فشي شكل….كيزرب لقا باه الي هو راجل المراة الي كتولد فهاد الاثناء ولد او بنتو اخ او اخت الشاب الي طلع عندو…لقاه واقف كيلبس لباس التبوريدة باش يلبسو ويمشي عند الخيالة باش يضرب طلقات للمولود…و حيث الغذ ليه بداية الموسم عندهم تما باش يوجدو …كيقاد فالعمامة على راسو من بعد ما توضى حيث الخيال خاص يكون على وضوء..واصلا صلى الفجر والصبح وزاد ركعات اخرين دعى مع مرتو الي هي دابا رجل فالدنيا ورجل فلاخرة…..كيقاد ومركز حجبانو غلاااض كحلين جامعهم فحال مغوبش وهي را نظرتو العادية…لحيتو كثيفة هابطة تالتحت كحلة مرشوشة بزغيبات شيب..هو العلام او المقدم ديال الصربة ديال تبوريدة …المقدم نور الدين…يلاه ضار يهز التُّماك (البوط ديال جلد الخاص بيهم) وهو يهز عينيه لقاه واقف كيقلب فالمكحلة…كاع ماحس بيه امتى دخل…تبسم بافتخار…
نور الدين : عجباتك ولا…ههه (ضحك ضحكة خااترة وجلس تالبس التماك عاد ناض لبس سلهامو كيقاد فيه والبخور مطلوق خلاتو مو فالبيت…ضار عندو كيشوف فولدو مركز مع المكحلة ويقاد فيها طل عليها بعينيه من لداخل جمع حجبانو وهز عينيه فباه وتبسم بشر ووجه ليه المكحلة تا بدا نور الدين يضحك…
نور الدين : بشارة الخير هههه…”جهد صوته فحال الى راه فالميدان ديال تبوريدة” : وحدااا وحداااا…
وقف ولدو وتبند ضار هنا وهنا فحال الى راه فوق الخيل وكيشوف فجنابو باش يتاكد من الامان….وكانو هادو الجمل الي كيتفاهم بيهم المقدم او العلام مع الفرسان الي وراه فالتبوريدة…
نورالدين : التيساع لهيه…”كحاز ولدو” گاد هنا وهناااااا…. (حط المكحلة على الكتف ليسر وعاد الكتف ليمن)
نورالدين : آآآآآ آآآآآآآآآآآآآآآآآآآآ المكاحل….عمروووو….(هزها لفوق عمر وقادها معاه.) خييييييييييييييييل….شاااااااااااااااد…ااااااااااااااا لمكاحل…آآآ حفييييييييييييظ…اااااضرررب…..وبدا يضحك عااادي…هاني مهني الامان راه كاااااين..مطمن….
بشارة الخير ماجوبوش بقى موجهها ليه كيضحك حتى ورك بصبعو وهو يخرج البارود على شكل طلقة نيشان جات لصدر نور الدين للقلب مباشرة…توقف الزمان مع الطلقة عند نور الدين وعند ولدو…وعند حتى صحاب المكان الي تسمعات تال عندهم…وعند ختو الي كانت واقفة فالباب كانت جايبة ليه بنتو يلاه زايدة فوسط مانطتها باش يوذن ليها حيث يلاه تفكات مرتو…..كتشوف فصدر نور الدين فلحظة تغمق وعمر بالد.م…
تحولات الفرحة لقرحة..وتحول اليوم الابيض ليوم الاسود…ويوم تولد فيه انسان مات فيه انسان…وتحول بشارة الخير لبشارة الشر…الشاب فريعان شبابو من مرضي لمسخووط بمعنى الكلمة….
كيف العادة الي مولفينها اغلب الاحيان كايتغذاو يا هما ب زوج يا بثلاثة مع للا رقية يا كلهم حتى م.الحفيظ ف يوم الجمعة الي كيكون عندو روپو…كملو غذاهم ولملمو طابلتهم او جات البنت الي كتشقى فالدار تسيقها وتجمع البيوت وتمسح الغبرة…كاتجي زوج مرات فالسيمانة…لقاوها مغذية وصلات ولبسات حوايج الشقا وبدات بالطابلة مع رقية اما هما كل واحد دخل لبيتو…ناديا لبيتها لتحت وايوب طلع يبدل اصلا خارج و حبيبة دخلات تلهي راسها فشي فيلم او رواية من الي كتقرا…حتى فات العصر بساعة وردات للا رقية القهوة واتاي الگوتي حيث غايخرجو ..بزربة كلاو ورجعات كل وحدة لبيتها تلبس…حبيبة عاود حكات سنانها وخرجات لبسات سروال دجين سليم مطوي حد الكعبة فالبلومارين طالع تالصرة بوهيمين ستيل زاد برز دوك ليهونش..لبسات فوقو بودي نص كم بيض لاصق…مشات لكوافوزها دارت ليپ كلوص مايبيلين فالغوز خفيييف فقط مدارت تاحاجة من غير هادشي..ذهنات ليكخون ديالها ومشات جلسات فجنب ناموسيتها رشات على رجليها سپراي ديال ليكخون صوليغ حيث خارجين وشمس باقي شي شوية ووقفات رشات بارفانها هاد المرة بدلات رشات كوكوشانيل هزات نضاضرها ديور من بواطتهم لان غروب الشمس وشمس كضرها فعينيها حتى كيدمعو ليها بزاف هزات باندة جمعات شعرها لفوق اسفنجة جاها صهد ومافيها مايجلس يدير ليه مشيطات…هزات بارفان صغيور لاحتو فصاكها مشات لواحد الطويويلة صغيرة جبدات صنيديلتها بيج صبع فيها حجيرات لامعين خشات فيها رجيلاتها كيبرييو بلبيوضة والنقاوة وضفارها نقيين علاش لا وهي مهليا فيهم ديما مانيكير عند ايوب…صابغاهم بالغوز باارد…عوجات رجليها كتشوف فيهم تاكد نقيين… خرجات كتفيريفيي فلباسها تاهبطات لتحت…
حبيبة الي يلاه ثلاث ايام باش تعلنات نتيجة نجاحها فالباكالورية ب الثانوية التقنية محمد السادس المتواجدة بازلي مراكش..تخصص اقتصاد بنقطة مستحسن…هي من شخصيات الي عايشين سنهم…عايشين شخصيتهم كيف ترباو…مرة حنينة مرة معصبة وخا الى فات تا تعصبات صعييييب ترجع دغيا خاصها شحال…الي فقلبها على لسانها كيما كانت تخرجها ليك فوجهك….شخصيتها ومزاجها وردود افعالها بحسب سنها وبحسب على شنو ولفات وطبعها…..عزيز عليها تخرج دور تمشي ليكافي مع صحاباتها ولكن اكثر وحدة كتخرج معاها بزاف هي نائلة البنت الي تعرفات عليها من سانكيام…. الي تشهاتها تاخذها….خصوصا مع باها مفششها بلااا قياس تقولي هي الي عندو حيث تولدات من بعد ما كان يقول عمرو يعرف معنى الكبدة خصوصا لان المراة لولة مكانتش كتولد وكان معول وناوي يبقى معاها لو ما الضروف والمرض خذاوها…
هبطات لقات ماماها واقفة بجلابتها المخزانية فالخزي توب بارد وشال لايحاه بعشوائية على راسها المهم مغطي ليها شعرها.. دايرة نظارات شمسية فوق من راسها ايديها مزينيين ببراسليات ذهب ومگانة رقيقة ذهب…وخاتم زواج وليد لاخرى كورميط نفسو الي عند حبيبة غير هذا غليض عليه شوي… وصاكها هازاه فايدها كبير…كتهضر وهي تهز عينيها ف حبيبة طلعتها وهبطتها وتنهدات…وكتهضر فالتيليفون…
ناديا. : واخا الحاج ندوزو هو لول…ماعرفتش سولها…
حبيبة”جاوبتها” : قولي ليه وصلني الفلوس فالكونط غا مابغيتش نقولها ليه حتى نجي نشوفو…
ناديا : يلاه سمعتي…واخا…”قطعات وطلعتها وهبطتها” البنت هاد اللبسة را باباك يشوفها ويتقلق منك وتبداي تهرنني حيث تخاصم معاك….حشمي شوية..
حبيبة”دفعتها شاداها من دراعها تاتمشات ناديا كتقرقب بصندالتها طالون كحلة” : وماماااا تانتي راني عايشة سني…
ناديا : اشمن سن گرانك راهم تزوجو…
حبيبة”خرجات عينيها” : اويلي انا قاصر ماديال زواج…الله يحفظني…
ناديا : قاصر ؟ “حركت راسها” و را قاليك التيساع رحمة والديق نقمة..رحمي راسك وماتقلقيهش منك…”طلات على للا رقية” للا رقية ردي معاك البال غادي نتعطلو شوية برا غير دوشي نتي لوردة ومعتز….الى جاعو عطيهم ياكلو ويطلعو لبيتهم…
حبيبة : علاش منديوهمش معانا !!
ناديا : ويلي بغيتي منقضيو والو معارفاهمش كيتشيطنو فزنقة ؟؟ زيدي دغيا يلاه نبداو بذهايبي ونطلعو عند باباك…
حبيبة : يلاه يلاه توحشتو ماشفتوش من البارح…
حتى تمات غاديا هي وياها وبدات تفكر حبيبة بالي بصح باها مغايعجبوش الحال خصوصا ان لتحت عندها ملفت بزاف واخا لفوق ضعيفة…وهي قصيرة مكملة…وقفاتها وطلعات كتزرب جرات باب بلاكار جيهة ليكاپ هزات واحد بيج باارد معندوش الكمايم لبساتو عليها ونزلات كتجري لحقات عليها خرجو لقاو الشيفور برا خلاو التوام مع للا رقية وركبات هي وياها لور سلمات على الحسين الي رسلو الحاج هو الي يسوق بيهم فين بغاو…
الحسين : الحاجة ذهايبي هو لول ؟
ناديا : ايه اولدي..الله يرضي عليك..
خشات حبيبة وجهها فالتيليفون داخلة لانسطا دخلات لواحد الكونط كتبرگك فيه هادي اكثر من اسبوع وهي كدخل ليه تبرگك وتخرج..بقات هاكاك كتبقشش هنا وهنا عندها غير انسطا فقط…كونط فيس بوك تقريبا من نهار فتحاتو كتدخل ليه مرة فشحال…حتى لقاو راسهم وصلو لملاح وقفهم عند صاحب المجوهرات الي كيعرفوه..خذاو شنو وصاتو عليه ناديا خلصاتو ورجعهم الحسين القنارية بلاصة طوموبيل فباركينغ بعيد شوية تا دخلو على رجليهم…مشاو عند واحد الخياط تما جبد ليهم قفاطنهم خصوصا ديال حبيبة الي تعطل حيث حطاتو معطل مكانتش باغيا تمشي لعرس…
حبيبة : ابابا صافي هاحنا جايين عندك حنا حداك احبيبي…اوكااي…”قطعات وشافت فماماها” بابا كاين هنا فالمحل الي هنا كيتسنا…
كان فالمحل الكبيير ديال تواب الفخمة كيتقداو من عندو غير ناس الميسورة والمعروفة فمراكش وحتى الناس المتوسطة وكيتعامل حتى مع الي مافحالوش فحال العرسان الي مافحالهمش كيتعاون معاهم…دخلات حبيبة هي لولة بان ليها كيتخلص من عند زبونة والمتعلم كيقاد ليها فساشيات…ضارت نيشان دخلات ورا الكونطوار تا كمل وهي تعنقو من لور حطات راسها على ضهرو…
حبيبة : تاج راسي…
م.الحفيظ : فرحتي لولة هههه جيتو ..
حبيبة : لا باقي هاحنا فالدورة قربنا عندك…
م.الحفيظ : الله يمسخك هههه…تزول الجبال ماتزول طبايعك ههه…”شاف فناديا الي كتضحك” مولات العش دخلو دخلو..
غير دخلو لمكتب ديالو الي قدامو فوطويات جلد الاصلي متوسطاهم طبيلة من تصميم الارابيسك…جلسات حبيبة فكرسي المكتب وهو وناديا فوق الفوطوياوت..
ناديا : وصهد هو يا الحاج…
م.الحفيظ : الحمد لله…اش بيديرو دابا…
ناديا : ديار ديار الله…لا كتاب غانعيط للا نجاة الكسالة تخوي لينا الحمام غذا بالليل…بقى غير الفاكية نديروها معانا حتى تاخذها نتا من فحل الزفريتي (بلاصة حدا جامع الفنا)..
م.الحفيظ : وعليه..”شاف ف حبيبة” اقشتي ماشيا برضاك ولا صحة عليك..الي تقلق ليا راحة فرحتي لولة ماعندي مابيت والديها…
حبيبة”تبسمات” : لا لا غاديا معاك ومنرضاش..خايبة خايبة الحبيب ديالي..
ناديا : ياك لوالديك انا غرستك فمحبق ؟..
حبيبة : هههه نتي الحب نتي..”شافت فباباها” واش غانباتو تما ؟
م.الحفيظ : يادلي ويخيلوك تجي..يسبقو ليك الحلوف ونتي يلاه بيتي تحلي فمك تقولي بسلامة هههه..
ناديا : العرس بالعشية سير على مايساليو…نحاولو نرجعو بكري..
حبيبة : عميتو امتى غاتجي ؟ گالت ليا يسالي عيسى الامتحانات وتجي…
م.الحفيظ : حتى يدخل شهر جاي ان شاء الله..
عمتها لطيفة الي عايشة فالسمارة عندها ثلاثة الولاد زوج بنات زوجاتهم وواحد هو الصغير كيقرا فلافاك…كاتجي فالصيف دوزو معاهم ولا الاعياد حيث محافضين على تجمعهم ورابط الاخوة الي بيناتهم وهي سباب زواج م.الحفيظ بناديا هي الي اتقارحاتها عليه باش يتزوج بيها وكيف قالت يستر…حنينة بزاف وحقانية…
بقاو معاه شوية وخرجو مع الشيفور الي داهم تال المحاميد لحمام العمومي فيه جيهة نساء وجيهة رجال كبير وديما تبارك الله عامر…حاط فيه ناس يقابلوه الي منهم الي مقابلين لاكيس والكسالة وفيهم الي كيحضي حوايج ناس اي صحاب رزمة…خلات شيفور معاه حبيبة ودخلات لعند الكسالة واحد المراكشي سمرااء تبارك الله مگدرة الى طحتي فايديها تكردنك وهي الي عزيزة بزاف عند حبيبة حيث كتخرجها تبري هههه…
للا نجاة”شافت ناديا ناضت تزرب وتضحك” : امرحباااا مرحبا ب للا الحاجة…زارتنا البركة..تلعي للا ناديا لفوق تنغمي معانا بكويس تاتاي…
ناديا”ربتات على كتفها” : ربي يخليك اللا نجاة”طلات على الجلسة بانت ليها مطرطقة بناس شي يلبس شي سخفان شي ياكل فالليمون وشي كيحط باغي يدخل” تبارك الله عامر اليووم..
نجاة : ايه دعوة تبارك الله عامرة…ياكما بيتي دخلييي ؟
ناديا : لا الى كان تخويه لينا غذا بالليل قولي مع ديك تمنية ولا تسعود تالليل نجيو…
نجاة : وعليه..دابا نيت بنعلمهم غذا يحبسو التدخال مع الخمسة هي هاديك…شكون بايجي ياكما نتي والحاج ههه..
ناديا : لا غانجي انا ووردة وحبيبة وللا رقية تاهي…قولي للا ربيعة تاهي تكون تعاونك ف وردة وللا رقية وانا خلاص راك نتي الي غاتكلفي بيا اما حبيبة متخطايهاش..
نجاة : ههههه جدرة فالصيف كتنقص من المجي شوية تخليني نتوحشها ههههه…
ناديا : كتعوم هي فالدار تيقيقت والصهودات متقدش عليهم…صافي هو هذا ؟
نجاة : وعليه للا ناديا مع تيسير الواحد القهار..ساعة سعيدة..وبوسي ليا النوارة هههه…
غير خرجات ناديا وهي تجهد نجاة صوتها…
نجاة. : واااللا نزهااااا…وغذا بتحبسي تدخال ناس مع ديك الخمسة الخمسة ونص تالعشية…(ردات عليها من عند لاكيس)
اشاوا كاين !؟ علاااه…
نجاة : بايجيو مالين الشي….
كملو شغالهم برا ورجع بيهم الشيفور لرميلة اي لدار…نزل معاهم المقدية تا هبطو لواحد الدرب تما فالرميلة سميتو درب الراوية…دخل معاهم فدوك دروبة الي اغلبهم تصميم رياضات الي تما كاين اوطيل الي ريسطو مخبية تم…والي ساكنين فيه ناس تما شي مالين البلاد شي نصارى…تا وصل بيهم لدار الي الباب ديالها ديال الخوخة كيف كيقولو ليه ديال العود كبييير وعندو دقاقة على شكل راس اسد ديال النحاس كيدقو بيها يدويا وجنب الباب كاين لانتيرفون بالكاميرا…كيف دخلات حبيبة لقات خوتها كيتفرجو لابسين بيجاماتهم باستهم وطلعات هازا ساشيات ديالها الي فيهم قفطانها والي فيهم شنو خذات من ايفغوشي شي گوماجات وباندوش وحليب الجسم باش تديهم غذا لحمام حيث تقاداو ليها…نيشان بدلات عليها ولبسات بيجامتها ودخلات دارت روتينها ديال الوجه…رتبات داكشي هزات تيليفونها ونزلات لتحت طلات عليهم فالكوزينة لقات رقية كتحرك فالحريرة ديال بلبولة بغات ديرها بالحليب كيبغيها الحاج فالليل او شي حاجة خفيفة باش يتعشى…لقاتو جالس فالجليسة شاد القرآن الكريم كيقرا فيه داير نضيضراتو مهبطهم شوي وغير بتيشرت قطن بيض وسروال قندريسي توبو بارد مهوي..السقاية خدامة وهو كيقرا…جايا شادة فايدها باندة وكتراسل مع ايوب الي قاليها شوي ويدخل باش ميخاصمش عليه حيث ماخدامش هاد اليومين…
حبيبة”جلسات حداه تا شافتو كمل سد المصحف وحط فوقو نضيضرات” : بابا حياتييي…
م.حفيظ : ا قشيشتيييي…اشكاا…
حبيبة”مدات ليه باندة وجات حدا عاطياه بضهرها” : ضفر ليا شعيراتي هههه…
م.حفيظ : ههههه نضفر لكبيداتيييي هههه (بدا يضفر ليها شعرها وهادي عادة عندو معاها يمشط ليها شعرها يغسل ليها وجهها..مقرب ليها بزاااف هو عقلها ومفششها بزااف الي بغاتها مكيقولش لا عمرها عرفت معنى كلمة لا فحياتها..وتاهي مربية على القناعة وخا هكاك)…وا بنتي قربتي ديري وليداتك وبغيتي نبقى هي نضفر ليك…
حبيبة. : انا مابغيتش ندير داري ووليداتي انا بغيت نبقى غير حداك تانضفر شيب…
م.حفيظ. : ايه ونتي من بضفري شيب انا نقي من عضامي دود…انا دايم ليك البالا !!
حبيبة”شدتها غصها فقلبها حتى صوتها تقج..لان كلشي تفكر فيه الا يخطاها باها تحماق..باها عندها شي حاجة محظورة مقدسة..علاقتهم بزااف” : ل لا لا بابا عافاك ماتبقاش تقول هاكا..صافي نسى “عينيها حمارو” ضفر ليا عافاك ضفر…
م.حفيظ “واخا عاطياه بالضهر حس بيها وقلب الموضوع” : وكااان…فين داك جدر ؟ شفتو تعطل…
شوي سمعو صوت الباب كيتحل وهو يدخل حادر راسو متبت تحلفي على باباه ماهو الي كيكون معاهم رطب كايتميزاجورا فالبلاصة فاش كيكون عمو…(م.حفيظ عمو خو باه اشقاااء..بابات ايوب توفى من كانت عند ايوب اربع سنوات كان ديك ساعة ناديا يلاه طاح ليها البيبي لول قبل من حبيبة..رباتو هي وصالح حتى دازت عام عامين هاكاك وحملات ب حبيبة وبقات معزة ايوب هي هي)…
ايوب”تحنى مد ايدو خبط ليه حفيظ فوق ايدو وباسها ليه” : عمي عاش من شافك…(حبيبة حابسة ضحكة)..
م.حفيظ”مغوبش فيه” : عاش من شافك نتا نيت..فين غاطس وخاشي راسك فعراسات ناس..ياك نهيتك ماتشد العراسات البعاد ؟ ياك خليتك تقرا اش بغيتي وحللتي رزقك !؟..لاش كتمشي لعراسات الخلياني..اشمن عرس كنتي فيه ولبارح ؟؟ تكلم ؟
ايوب”حادر راسو” : كاين ف اگافاي…
م.حفيظ (خرج فيه عينيه) : ليوم اگفاي وغذا الواحات !؟..وبعدو داخلة…
ايوب : لاهما كرهت “شافو زاد خنزر فيه” كرهت اعمي..
حبيبة : هههههههههههههههههههه (كون مكان باها كون قبسها تا عنقت الحايط)….
م.حفيظ (كيشوفو حادر راسو هكاك كيعز عليه..حيث يتيم وماعارفش طعم يكون عندو باه وخا رباه وعوضو ببزاف الحاجات) : ياهاد الجدر را لمصلاحتك…ماتكترش دنيا مافيها امان وانا هي خايف عليك…وحاول ترجل شوية عشرة العيالات ترجعك منهم…
ايوب : واخا عمي كون هاني..(قرب باس ليه راسو) منك سماحة منك السماحة…
م.حفيظ : واكل شي ؟!
ايوب : يلاه ناوي نطلع نبدل وندير روتيني اليومي…
حبيبة وسعات عينيها ومولاي الحفيظ مافهم والو…
م.حفيظ : اشنو ؟؟؟
ايوب : نبدل ابا نبدل اعمي تانا..نغسل حالتي ونهبط نحنجر..تانا ناكل..وعمي نقص من تخنزير كتخليني ندخل شكلي فالعكلي والعكلي تالف…اكتخلعني كتفزعني…
حبيبة : وااامي هههههههههههههههههههه
ايوب”بالحس” : تهجريه نتي…
ضار دورة وطلع فررر كي زواق طار من قدام عينيه لا هاد المرة يجبد لوالديه سمطة نيشان لمصاصطو وعارفو يديرها لا زاد فيه هههه..
اما حبيبة ناضت من حدا باها مشات لتيليفونها الي كان محطوط فوق طابلة لهيه…جلسات حدا باها الي هز تاهو تيليفونو كيقرا فالاخبار ديال دنيا…دخلات لانسطا وهي تلقى الكونط لاخور دار ليها متابعة وهي تخرج عينيها..
حبيبة : اوووو عرفني دخلت لكونط ديالو هذا ولا كيفاش ؟ (طلعات معاها واحد مولاتي تزنيگة ديال الفرشة حتى وقفات وهز فيها باها عينيه ورجعات جلسات خافت لا يكون حس بيها تجسسات عليه)…
فلاخر طمنات راسها بالي غير صدفة زعما..ولكن الي فيها ماهناها خاصها تمشي لعشيرها الي طلع الفوق الي الى بانت ليه ياكلها بلا ملحة….رسلات ليه ميساج…
حبيبة : ساليتي دوز ل جليسة لتحت…
ايوب : هاني نازل..اطوندي موا…
شوية تا نزل ضار لقى ناديا حطات لحاج بلاطو ديالو فيه زلافتو دالحريرة وتميرات وكاس الحليب باش يشربو ويمشي ينعس…اما هما عشاهم كيوجد كيبغيو يغلقو…جلس حداها وحط تيليفونو بيرسونيل…
ايوب : اشكا…
حبيبة : قول ليا واش الى دخلتي لبروفايل شي حد فانسطا يقدر يعرفك…
ايوب : كون كاينة هاد لعيبة كون حصلت واحد ميكاب ارتست نقال خراه ميجمعوه شراوط معايا فسطوريات..حق رب المعبود الى شوف تيفي تورينا طلامط دارهم…من لاخر عندمن دخلتي..
حبيبة”لولبت عينيها” : اا ؟ الا مادخلت يا..خرجت..تت مادخلتش ازمر..لاش ندخل ؟ وراه عادي تندخلو نبقششو واصلا انا مكندخلش لبروفيلات ناس “رمات ضفيرتها وراها بغرور” هووما الي تيدخلو…
ايوب “خلاها تا كملت” : دار ليك ابوني اجدرة ؟
حبيبة”بلا متحس” : وي دار ليا ابوني…”خرجااات عينيها تا ضربو فسقاية سلمو عليها ورجعو لوجهها”…
ايوب “هبط راسو مزياااان فوق ايدو الي طاويها وصغر عينيه تا ولاو قد شقات وبدا يدور فراسو” : سوقك عامر وحالك ساهل..والي جا يدرها بيك امول القوس…بلا ميسخف معاك الواحد نية اوجه اللفت نية اكركدانة…بلا متلوني بصح مكايناش تجسس الا اذا كان هاكر..ونوضي احبيبتي نوضي شوفي فين وصلو لينا فداك العشا نحنجرو…السهرة لكم ؟
حبيبة”كتحك فجبهتها” : نووو حاسة فيا نعاس…سهر هي نتا..
هذا هو حالهم وهذا هو مزاحهم…اخوتهم زوينة وعشرتهم افضل…تعشاو وكل قصد بيتو…وسبحان الي بيتها فشان وصبحها فشان…اليوم يوم الخميس…اليوم الي قبل العرس…كيف عادتو صبح هو لول فايق فطر ولكن بقى شوية كيتسنى حتى تدق الباب وناض كيضحك فرحان الي وصلات الكوموند الي جابها ليه شيفور الي هو واحد من متعلمين عندو كل واحد منهم كيشد طوموبيل باش يتحركو بيها مالين دار والي هي عبارة على.4×4 volkswagen tiguan الى كان مشغول اما لاكان مسالي كيخرج معاهم ولا يخرجهم مرة يديرو خريجة ولا كل جمعة يمشيو لمطاعم على برا او يسافرو…حل عليه الباب كيضحك عطاه الساشية…
عمر : هو هذا هههههه…
حرك ليه راسو ودخل لقى ناديا خارجة من دوش كتمسح فايديها لابسة ضراعة فالشيبي فيها رسمة الوسط عريضة مهوية وفنفس الوقت مستورة…شافتو هاز الكرطونة وهي تبسم تا بدات ضحك ودور فراسها…حتى مدها ليها….
م.حفيظ : هاهو كادو ديالها…طلعيه دابا حطيه عند راسها مايصلاح ليا ندخل انا وهي ناعسة (حيث كتكون شبه عريانا وغير هذا كتبقى خصوصية بنت واخا باها)…
حركات راسها كضحك وطلعات كتشوف فيه كرطونة ديال ايفون اخر ماخرج..كادو نجاح ديالها ديال الباك الي فرحاتو بيه..حلات البيت بشوي لقاتها منشورة لابسة شوط قصير بيض قطن فيه وريدات فالغوز وديباردو ديالو حد صرة فلون وريدات (اونسومبل)..شعرها مجموع الفوق والكليما مطلوقة…حطاتو ليها عند راسها وخرجات من البيت نزلات لتحت ودعاتو على امل مايتشاوفو تايجيو من حمام حيث هو مكيجي تايوذن العشاء…خرج هو لقى طوموبيل فالشارع ركب وسمى الله وزاد اول وجهة هي دار الدباغ…البلاصة فين كيغسلو الجلود ديال حيوانات عبر مراحل فالحفاري او المجارير والسواني (سميات الحفاري).عاد مراحل تكراط من زغب عاد عاد…وهي الي عندو فيها بلاصة ديالو حيث شي جلود كيبيعهم فدلالة وشي كيصايبهم فالورشة ديالو حتى كيخرجو منهم صيكان ولا كيبيعهم لشركات ديال ملابس او صحاب الاثاث…دار الدباغ فمراكش الي جات ف طريق سيدي يوسف عين ايطي حدا باب الخميس..كاين باب قشيش عاد باب دباغ هي الي فيها دار دباغ…كيف كدخلي كتعطيك ريحة الجلد وريحة الغسيل…المراحل فين كيدوزو دوك الجلود الي كيتنقعو لاسابيع ابتاء من لمرحلة لولة الي كيتنقع فيها الجلد لمدة اسبوع فمادة البازو المرحلة لولة كيحيدو بيها شعر ورطاب جلد…والثانية كيحولو جلود لحوض اخور فيه روت الحمام اي بزق الحمام لمدة بين يوم حتى لسيمانة على حسب حرارة الجو…يعني كيما كان الجو سخون كتنقص المدة.. المرحلة ثالثة هي فالحوض لاخور كينقعوهم فلاسيد والملح ونخالة…والمرحلة رابعة هي مرحلة دباغة هي فين كيرقدوهم فمواد خاصة لمدة ثلاث اسابيع…وجلد البقر كيكون مختلف على باقي الجلود حيث كيخضع لعملية ازالة شحوم من بطانتو..هو وحدو عندو مرحلة خامسة من بعد رابعة..كيحيدو شحوم بواحد الحديدة ماضية تا كيتكرط مزيااان…عاد كيمشي مع باقي الجلود لورشة تكراط غير تما كل تاجر عندو بيت تم ولا بيت مشروكين فيه تجار ولا الي كيكريه باش يقضيو ولا الي ورث…المهم بيت كتكون فيه مرحلة ازالة شوائب بواحد الالة اسميتها صدرية كيكرطو بيها..كاينة تقنية دباغة جلود بدون ازالة شعر ك جلود الارانب..بخلاصة بزاف الجلود كدوز من تم من ارخصها لاغلاها وهاد طرق باش يخرجو لينا فالاخير سترات جلدية سماطي صنادل كل مايخص جلد اثاث الخ…وعلاش ثمنها غالي مقارنة مع باقي الانسجة حيث كتدوز من مراحل وتمارة وفلوس كتخسر على مواد ديالها. كاين من وراها طاقم الي تعب عليها فحال دوك المعلمية الي فالحفاري او الاحواض الي ايديهم كلاهم لاسيد والما والملح وبزق الحمام وهالي ماتو بديك ريحة وهالي جاه مرض جلدي سرطان…علاش حيث طرف الخبز صعييييييب….
غير وصل طل على المعلمية من بعيد سلم عليهم…وعطاهم صوابهم..وداز لقى المحاسب كيتسناه كان كيحسب تما سلم عليه هز وراق وخرج هو وياه مشاو لمكتب ديالو حيث هو لامين ديال تجار جلد…
م.حفيظ : اش تما دعوة هانيا زاكية ابا سمير…
سمير : هانيا زاكيا..والحسابات مزيانة..حسبت ليك الكريديات اعمي…
م.حفيظ”بدات ضحكتو كتجمع وبداو تنهيدات كيخرجو..حرك ليه راسو مثقل” : گول اولدي اش تما..عطيني علاش بغيتك…
سمير : الموهيم اعمي حساب الضو والما ديال عام هما هادو..(كحز ليه الورقة شدها كيقرا فيها..كانت فيها خمسة المليون) وهادي ديال ضريبة بقات ليك هي ديال هاد العام قبل مايدخل العام جاي ضروري بتخلصها…هاهي ( شدها قراها فيها ضريبة الحمام ضريبة المحالات الي مكريين فكيليز وضريبة البازار ديال سمارين…وضريبة دارو فين ساكن وديور كاينين فديور المساكين فداوديات…و واحد لفيرما صغيرة) هادي تالفيرما الي فاغوطيم طريق تاحناوت…هادي…
مولاي الحفيظ قرا دوك الاوراق والحسابات الي تم…بزاااف ما تلى عليه وشي مسلف من عندو..همو تزاد على هموووم…ايه هادشي ديالو ولكن را ماشي ديالو غير وحدو را ديال ورثة الي خلاو ليه كلشي كيعطيهم الارباح كيقسمها عليه وعلى ختو وايوب..امانات عندو..حاول يقسم الورث وكل يضبر راسو وميهزش المسؤولية ولكن هما مابغاوش حتى من ايوب رفض بغاه يتمتع ويبقى داكشي هاكاك حيث الى تقسم كيف قالت لطيفة…ديك الوقت فاش ماتو الواليدين…انذاك…
~~
لطيفة : الى قمستي لورث تقسمنا…والى تفرق تفرقنا..الورث جامعنتا وريحة والدينيا تما…خليه مجموع ببراكتو تحت براكتك وهاحنا خوت…مالك كااع هانتاا طبيتي فيه هههه وبصحتك وغزيتي يلاه اش بيتي ؟!!
م.حفيظ : لواه اعوذ بالله…مابغيها ربي. ولا عبدو…وخا كاين العبد الي ميخاف ربو بقى غي عبدو هههه….
لطيفة : تانموتو حنا ويتقسم على ولادنا…هادي وصية مي و صيتي تانا مكاين ماحسن من ولد مراكش وولد الحرفة هو الي يتهلى فيه..خير ربي هنا عندنا كثير اللهم لك الحمد وليني خليه مجموع تحت ايديك وحنا نصيبنا فالارباح راك غاتعطيه لينا الى مازدتي لينا فيه راك ماتنقص…
~~
غمض عينيه وتزير خاطرو وهو كيتفكر هاد الهضرة..تنهد تنهيدة طويييييلة الي حتى خرجها لدرجة سمير حدر راسو حيث عارف اش غايزيد عليه وكيفاش يقولها ليه ؟…ماهناه من هاد تلخبيط كيفاش يبدا تا نقص عليه نص وسولو نيشان…
م.حفيظ : الرحماني شحال كيتسال ؟!! “هز ايدو موقفو” نيشان اولدي نيشان…
سمير : احم “كحز ليه الورقة الي فيها طوطال كامل” 100 مليون بين العواد والفيتور وبين جلود لدوك سنوات كاملة الي تم…و 100 الف درهم (عشرة المليون) بقات من كريدي قديم الي خلصتي…
م.حفيظ سكت..سكت نيييييت بقى ساكت وسمير كيشوف فيه وحدر راسو حيث عارف ايخصو يبيع شي حصة من الورث باش يخلص…والى غايبغي يبيع ايخص تدار عدة الورثة ويتجمعو باش يتقسم الورث عاد يخلص منو…والقسيم مابغاهش حيث عاطي الكلمة لختو…مابغيش يشتت شمل ماباغيش شتات باغي لمة تبقى كيف ماهي وكيف طلباتو ختو…اش غايدير ؟ الى باع من شغلو ماعنظوش كلشي ديال الورثة حتى من دار الي ساكن فيها !! تاهي ديال الورثة…
داز الوقت ووصل ظهر خرج من تما ومشى نيشان لسمارين دخل لمكتب لدااخل كان مراد خدام كيهضر بالالمانية مع شي سياح..شير ليه بحركة بمعنى جيب ليا براد اتاي..يلاه جلس وهو يصوني ليه تيليفونو هزو مكمش عينيه كيشوف شكون كان اسم لحبيبة…تبسم ونسى همو الي معندو حل…نساتو فيه كيف ديما…وغير طلق الخط غمض عينيه وبعد تيليفون وبدا يضحك نييييت عرفها شافت تيليفون…
حبيبة : احلى مولاي الحفيظ فيك امراكش ورحامنة…
م.حفيظ : ههههه صمكتي لباك وذنيه…بصحتك واهلي تانتي تستاهلي علاه شكون قرا وحفظ وداها فقرايتو وفرح باباه…
حبيبة : انا هههه…حتى تجي ونعنقك مكافينيش تيليفون..واعر واعر ابابا الله يخليك ليا ياربي ويخليك لينا انا وخوتي…
م.حفيظ : ويخليكم ليا بنتي..بصحتك وبصحتكم (حيث خوتها جاب ليهم كادو قبل منها…مكيفرزش بيناتهم ابدا…غير هو معزة حبيبة زايدة شوي حيث هي البكرة الي جات على عگر سنين من مرتو لولة…وحتى هي مقربة ليه بزاف علاقتهم زوينة بزاف)…
قطع معاها مخليها فرحانة كون لقات تخرج ليه من تيليفون متكرهش…وهاكا رجع لهم ورجع لمشكيل الي مخليه يبات يخمم ويضل يخمم وهادشي لاحضاتو فيه ناديا غير هي مخلياه على خاطرو تا يحطو راس عالراس ويخوي ليها لمزيودة كيف العادة…
تماسى الحال وغربات شمس نهار…فات المغرب والحوايج تجمعو ديال لحمام..كانت فبيتها معاها رقية كتعاونها فجميع..جمعات حوايج بيجامة وكاب فوق منها صافي وفوطة شعرها حيث غاترجع فطوموبيل..واكيد برودوي ديالها اتروس قداش…كلشي تجمع ونزل لتحت دارتهم هي ورقية فكوفر طوموبيل تسناو تا خرج الحاج وناديا من البيت وتمو غادين بقى غير ايوب كيشوف مواعيد عراسات….
حبيبة” قربات ليه” : فكر. ويلاه معايا غذا لسيدي بوعثمان…
ايوب : لا…
حبيبة : يعطيك لوا…”مشات”
ايوب”بدا يشالي بايديه” : ونتي ضربة فالكلوا اوجه ل… ” بان ليه لحاج جاي” نوض نصلي الظهر اعمي ؟!..
م.حفيظ : الظهر مع العشاء ؟ “حرك راسو بقلة حيلة” لا حول ولا قوة الا بالله…
ايوب ” خرج عينيه وناض كيزرب فدروج داير راسو كيهضر فتيليفون. تا تعكل فدرجة زگل يتكركب” : سيحت القزازب…
فوحدة من بلاد الله..قريب وليس بعيد على مدينة مراكش…منطقة من مناطق الرحامنة والي تعرفات وباقا باسم #سيدي_بوعثمان …التابعة لاقليم الرحامنة ومركز الرحامنة…وهي المنطقة الي .وقعت فيها معركة سيدي بوعثمان يوم 6 سبتمبر 1912، وهي أول معركة كبرى خاضها المغرب بعد معاهدة الحماية بقيادة أحمد الهيبة…
بعيدا على الفيلاج بمسافة ربع ساعة فالبيست…واحد الدوار تما معروف بدوار الهاشميي الرحماني.(عنوان وهمي)…دوار فيه غير هما كيجيو لبعضياتهم ها عمي ها ولد عم با ها بن عم مي…شي كيجي لشي ومفرقين كل ودارو كل وبيت تراب هالي صالح نص دار هالي ساكن فيها بالمرطوب…وقريب ليهم واحد المسافة اراضي كلها قداش تما متوسطاهم واحد الفيرما قدااااش جامعة ثلاثة ديور كبار فدار وحدة محاوطها السور بعيييييد وفيها ارض لا بأس بيها وضاير بيها اراضي…تحل الباب الكبيير ودخلات سيارة.audi 4×4 q5 فالكحل…حتى وقفها بعيد ونزل منها رجل كبير فالسن…لابس جلابة سوسدي گري تحت منها سروال قندريسي بيض وفوقي ديالو..وفوق منها سلهام خفيف فالگري..داير عمامة فالصفر وبيض..لحيتو بيضة وحجبانو كحلين الحجبان الي بقاو كحلين…ملامحو حرشة وباين عليه فايام شبابو كان زين غير من ملامحو وطولة ديالو شيباني ومگضر مهيب…عينيه كحليين…هز عينيه بانت ليه دنيا عامرة شي داخل شي خارج وعلى برا كيقادو فالخزاين ديال العرس شادين داك الخلا كااامل تما ويقادو فتراب بطراكس ويرشو فيه ويقادو جناب…ريحة طيابات عاطية حيث تريكة كاملة تكبات عليهم هادي عادتهم…فاذ يكون العرس سيمانة ودار كتبقى تعمر كل نهار جاي شي حد هالي قريب ريحة شحمة فشاقور ولد عمي بن عم با وووو…مكيفوتوش بعضياتهم فالفرح والقرح…مهم يجيو..وعاد فالايام العادية كل نهار يجي شي حد على غفلة وخاص العيالات يكون على قدم وساق فالكوزينة القليلة يعمرو صواني اتاي وطيابات….ساس سلهاموو وضار بغى يدخل لدار…حتى سمع صوت كيعيط ليه فاش سمع با وضار لمصدر الصوت كان واحد الشاب فعمر 30 عام تاهو ملامحو حرشة وسميمر شوي..لحيتو كحلة وحجبانو كثاف كيشبه شوي ليه…لابس تيشرت نص كم ووشورط كحل جاي يجر رجليه فكلاكيط كحلة غير رجليه مشعرين بزاف…شعرو رطب ومخربق…جاي ومبسم…يلاه وصل من طاليان من بعد طريق ثلاث ايام بطوموبيل….تا سرح الشيباني ايديه الي فيهم العكاز…وقال…رضوااان العريس عالسلامة عالسلامة وكاان…
رضوان”سلم عليه وباس ليه راسو وايدو حشمان وحادر راسو” : الله يسلمك ابا…
هو : هي نويتي دير دراري هههه…
رضوان : ههه وفحياتك ابا…
هو : وشفتي العروسة ؟!
رضوان : مزال تاليوم بالليل ان شاء الله…
هو : ياك عجباتك بعدا ولا لا ؟!..
رضوان : وشفتي اصلها ابا والحاجة ومي توريا شافوها وعجباتهم..براكة عليا غا نتوما ورضاكم وربي يكمل علينا بالخير…
هو : لا لا بنت الاصل اولدي راهم ناس اصلهم زين شكون ميعرف التجار المشاوري..وزايدون راها من تريكة مك توريا ومك توريا تعطيك الخبار…
رضوان : والنعم ابا…
هو : معاش وصلتي ؟!
رضوان : مع قرب الفجر ياذن وصلت وطلعت نعست مابغيتش نبرزطهم حدي سلمت على مي عيدة وختي سعيدة…الله الى باگاج باقي ماهبطتو من طوموبيل كنتسنى فحسام يجي من مراكش و زكرياء يعاونوني فيه وخويا سيحمد….
هو : ماعليش ماعليش…”ربت ليه على كتفو” على سلامتك اولدي…تاوكان تسالي ولحگ عليا نذاكرو فامور غذا…جايين نيت شي ناس من مراكش..
حرك ليه راسو خلاه مشى يهضر مع واحد رباع تما..ودخل الحاج عبد القادر الملقب بالحاج الهاشيمي رحماني…وصل لدار لوسط يلاه بغى يدخل لبيتو يحط عكازو وسلهام. باش يدخل يجدد الوضوء حتى سمع صوتها…قايلة…سيدي…هز عينيه…
ع.القادر : توريا بنتي (هابطة امرأة فعمر الخمسينات غير هي باقي حروفها كوحل مافيهاش نقطة شيب..من نوع الي مكيبانش فيه شيب لا فكبر لا ف صغر… لابسة كلشي بيض وشال بيض كلشي)..
توريا”باست ليه ايدو” : سيدي(كتقوليه سيدي حيث شيخها وعندهم شيخ كيقولو ليه سيدي والعگوزة لالة) سولت عليك لالة گالت ليا ماتجي تاليوم…
ع.القادر : اييه ابنتي يلاه سالينا انا وسيحمد شي فياجات ف بني ملال وشدونا دوك ناس…خاصك شي حاجة ابنتي…ولا خاصكم شي لعرس غذا (دار كتروج شي داخل شي خارج كانت نيت مرات ولدو لاخور واقفة تهضر فتيليفون وشافتهم من بعيد)…
توريا : لا اسيدي…الي بغيتو مابغيتو يجيكم غريب وماتعجبو فيه…
ع.القادر : خبار الخير…
توريا : بغيت نمرة و “صوتها مشى واحد لحظة وتقج” نمرة ولدي الحاج “ودورات وجهها لهيه مكمشة حجبانها.”…
ع.القادر”جاتو فحال هضرتها غريبة” : ياك عندك…
توريا : لا الحاج…سقت الخبار لشي حوايج ماعجبونيش..مراضياش عليهم…تعطيها ليا ولا نشدها من عند هاشم !؟…
ع.القادر : لاش بغيتيه ؟
توريا : خاصو يجي…
هما كيهضرو حتى سمعو انييين ديال صوت انثوي شوي غادي داك الانين كيتزاد تا ارتافع وضارو كلهم منهم تا سيدة لاخرى الي كانت كتهضر فتيليفون…وحتى ورا واحد الباب الي تا ضار البواني ديالو وبقى مبلوكي…
توريا : الحسنية !!!
الحسنية : انننن ببب باااباعههم عععععع باابااي نننن
“كتحرك راسها بهستيريا..كتفيبري بشكل ماشي عادي..وتحرك راسها كترجاهم تا بدات فحال كتغوت حيث بكمة مكتهضرش من كان فعمرها 13 عام نتيجة صدمة صابتها فداك العمر…شوي حتى بان ليهم بول ديالها هابط فلارض ووجهها ولا مزنگ..”…
جاتها واحد الهيستيرية ديال الخوف..الخوف من شي حاجة الي كانت سبابها فواحد الوقت فااات من زمن وهي فعمر 13 سنة..من طفلة عايشة سنها لليلة غيرات حياتها 360 درجة..نقطة تحول وصلاتها لما هي عليه الان…دازو سنين والحسنية الي كانت طفلة ولا امرأة كاملة ولكن غير ناضجة…عقلها توقف فديك الليلة…وكل مكتسمع بيه كتجيها حالة الرعب..يا كتهرب يا كتعطي ردات فعل ولكن باش تعرف انهم بغاوه يجي فهذا يدل على انها غاترجع تشوفو…تشوف داك الوجه الي عمرها ماتنساه كان اخر وجه حلات عليه عينيها ديك الليلة قبل متغيب ثاني وتفيق وهي فهاد الحال…
قطعات السيدة تيليفون وجات لعندها كتزرب..بقات توريا كتشوف ماعرفات مادير ليها والحاج ضار لهيه….
ع.القادر : ياعوذ بالله يا عوذ بالله…لا حول ولا قوة الا بالله…ديها بنتي سعيدة ديها شوفي اش ديري ليها…
توريا : ديها غير هنا لعند زكية..انا نشوف ليها من حوايج اشراق ماتلبس…
سعيدة : اجي بنتي الحسنية اجي..
حسنية : ببببابا بابا اهى باببابا…”كتحرك راسها بهيستيريا”..
سعيدة : غير اجي مكاين والو تعالي…
بقات معاها بزز باش هدنتها تا داتها لواحد من البيوتة الي تم كان فراشو فالارض وحداه دوش وصات واحد البنت تما من البنات الي خرجو كيشوفو فيها ويتنهدو على حالها…
نزهة : سعيدة نعيطو لالياس ولدها ؟!
سعيدة : بلاش مبرزط مسكين مع سيحمد لوسي كيعاون فيه…بقاي معاها نحل شوفو ندوش ليها الى جات توريا شدي من عندها الحوايج…
بقات كتشوف فيها كيفاش باقيا كترعد وتبكي وتنين..واش عند البكمة مادير من غير الانين….”ارحمو قلوبا تتاالم ولا تتكلم”…تنهدات سعيدة على حالها خلاتها مع مريم ومشات لدوش شعلات الشوفو وخلات سطل يعمر بالما..تلاقات توريا جايا هازا فايدها حوايج بنتها اشراق الي غايقدوها ماشي حيث اشراق قدها فالسن ولكن قدها فالجسم والطول…وعطاتها زيف حيث اصلا بغاو يعوموها وقيتها نيت والعرس كاين اللهم يحيدوها…حركات سعيدة راسها لتوريا وردات ليها تاهي..ومشات بقات سعيدة واقفة كتشوف فتوريا غاديا وضهرها تقوس بالهم والحزن من كاع جوايه وكتقول فنفسها واش صافي !!…
خلات سعيدة من وقتها الي ماعندهاش هاد النهار كونها الكنة الثانية من بعد توريا…باش توجد للكنة الرابعة من بعد مرات سيحمد…والكنة الرابعة هي الي غاتكون مرات رضوان اصغر واحد فالخوت..الولد الي هاجر لايطاليا فسن صغيير على 16 سنة…وهاهو كبر ودار وريقاتو واستقر وغايتزوج البنت الي اختارها ليه باه والي ماشافهاش حتى لهاد نهار قبل عرسو عاد غايشوفها حيث بالليل غايديرو العقد عند دار العروس..كوحدة من العادات ان العقد يدار فدار العروسة والعرس يا ديرو العروسة والعريس لا يا العريس تاهو يديرو ولكن فدار الرحماني طبعا غايديروه ليه را فيه سبعيام ديال العراضات…
كملات ليها ولبساتها تهدنات نوعا ما تا طمنتها سعيدة..يمكن حسات بالامان يمكن نسات حيث عقلها ولا على قد الحال..يعلم الله بحالها…خلاتها فالبيت مع البنات كينشطو شافت بنات صغار فعمر 13 عام نسات اش سمعات واش وقع…دخلات مع بنات صغر منها بزااااف هي شافتهم قدها عقلها حبس فسن 13 سنة…
وخرجات سعيدة كاتقاد فشالها لابسة قفطان جوهرة فالگرونة ومدورة عليها طابلية بيضة مطروزة بالطرز رباطي خاشية فيها تيليفونها..امرأة تكون عندها ديك 43 سنة بلقة لدرجة شهبة وعينيها فواحد لون گري مغلوووق حتى كتحققي فيهم عاد كيبان عندها زبيبة فوق فمها وحجبانها قهوييين وشفارها كذلك..كدخل لخاطر بزااف وحنينة..وقفات فواحد ضليلة على برا تا بانت ليها سيارة فورد فييسطا فالكحل داخلة…وقفات وخرج منها واحد الشاب فعمر 25 سنة طويل مكضر…شعرو قهوي مغلوووق وعينيه هما كبار ولكن مبطنين كيبانو مغرزات هههه ولون قهوي فاتح…نزل كيقاد فسروالو وقميجتو گرونة حل صدايف كمايمها وطلعهم مع معصمو…حنحن وضار هنا وهنا…تا سمع واحد من بعيد كيعيط ليه ب حسام…
حسام”دار ايدو على عينيه من شمس” : واش الفريدو…كاين شي مايتكال تم ؟ مكاينش ؟ ولاش معيط ؟ تا سيييير كي متنتن..
ضار كيضحك وهو يقرب لقا سعيدة واقفة كتمشي وتجي…تا وقف عليها…
حسام : مرت ولد الرحماني اش كاين !؟ (باس راسها)…
سعيدة : كنتسنى ف هاشم يجي !…
حسام : هاشم !! وهاشم را ميجي تالعشية…
سعيدة : لا صونيت ليه وجاي…
حسام : نااااري قاااايد على گدو مايگد عليه حد فرحامنة جيتي نتي جايباه بلهلا يحزقو لوالديه…تي فين طايحة على فقيهك فين…اوووو ” هبطات عليه بدقة لقرفادة على شوي يزغرت”…
يلاه كيهضرو وهي تخرج توريا تبسم ليها حسام باس راسها..حيث هي الكبيرة فالكناين الجيل اللول حلو عليها عينيهم كاملين حتى من رضوان حل عليها عينيه سيحمد لقاتو صغير وهاشم كذلك غير البنت الكبيرة الي اسميتها مليكة لقاتها مخطوبة داك الوقت…
حسام. : الحنانة صباح الخير…
توريا”تبسمات ليه وطبطبات على ضهرو حيث معنقها جنبو” : صباح الخير ونواور اولدي..”شافت فسعيدة” سعيدة النقاشة مزال ماجات !؟
سعيدة : را جايين ربعة ولا خمسة..هادي رجلهم..خاصك شي حاجة اختي توريا !؟
توريا : شوفي شي وحدة گولي ليها تجي عندي وطلع عندي لفوق البيت…
سعيدة”على نيتها” : بغات تنقش اشراق !؟
توريا : لا انا وياها..تبدا ليا انا لولة باش تنشف ونحيدها بغيت نشوف مع يوسف خاصو يعوم…
دخلات لداخل وخلات وراها زوج ناس مدهشرين سعيدة ترمش وحسام يرمش ههههه….
حسام : هامصلي عليك ارسول الله…
دخلات توريا..بالها عامر وخاطرها ماهانيش بالمرة..ضارت هنا وهنا دار تركش بالناس الغادي يضحك ليها والجاي يسلم عليها…وعقلها مرفوع…وبعييييد فواحد صالون طويييييل مفرش بفراش البلدي..جالسين فيه الحباب والقراب وصحاب…عيالات يهضرو وجماعة تضحك وجماعة تبرگك…ووسط منهم مقابل مع الباب ديالو امرأة عجووز دا منها زمان والهم وضهرها فواحد الوقت تهرس…عينيها كحلين ومزيناهم بالكحل وخا فيهم لمعة الهم وزمان وشلا ماداز على داك الراس…بزيف حياتي على راسها بيض وفوقو شال ذهبي مناسب مع الدفينة (تكشيطة) ديال ثليجة ملونة ومرشوسة بالذهبي محزمة بحزام الصم وجالسة جلسة القياد…طوانگ لويز فوذنيها يبانو من بعيد اما العنق مزين بعقيق كحل مابين عقيقة وعقيقة لويزة…شادة تسبيح فايدها الي ميخطاها وتردد فنفسها ولا تمتم…عينيها كانو مصغرين كيشوفو ف توريا واقفة تالفة بيها الوقت ودنيا وعلى عادتها جاتها حالة من سكون كان الوقت توقف عندها لثواني معدودة حتى تنهدات وضارت كتشوف ماتجي عينها فعينين المراة شيبانية الي هي عگوزتها حركت ليها راسها بواحد طريقة بطيييييئة وحدرات توريا راسها وقصدات دروج طلعات معاهم نيشان لبيتها وسدات عليها…
جلسات جنب ناموسية …وداك الصدر الي عيا…كتشوف ناس زوجو ولادهم ودارو حفادهم وهي مزال زوج حداها وواحد سنين وهو غابر ليه ساس..لا شوفة مقادة كي الام مع ولدها ولا هضرة كاملة القلوب مشحونة على بعضياتها…الفم فيه العار ساهل والكلمة طيبة صعب منها مكاين… حتى لامتى ؟!!…
توريا”حيدات شال البيض على راسها وحيدات زيف حياتي وبان شعرها الكحل الليلي القويي…كبرات والشيب موصلها وزينها الحرش بان..حجبانها غلاض لدرجة فوسط جبهة كتبان مزغبة عينيها صغار وزادو صغروهم حتى شفار…من نوع الي مزغب وكيبان حتى فوق فمها وواخا هكاك زينة زينها عربي اصييل..شدات براصليات الي فايدها ستة ديال ذهب كتحرك فيهم طلع وتهبط وتخمم اش غادير واش غاتلبس..وقفات ومشات لباب ماريو حلاتو وبانت تستيفة تكاشطها..بانت ليها وحدة بيضة ثليجة فيها وريدات بيج..وحداها وحدة گرونة..هزات البيضة هي الي غاتحضر بيها لعقد..عقد القران الي غايكونو فيه غير هما قلال..هي وسعيدة الكنات الكبارات..وعگوزتها والعريس وخوه هاشم وسيحمد…اما لاخرين غايبقاو منهم ربيعة مرات سيحمد حيث خاص يبقى شي حد منهم فدار…وجدات ديك اللولة حطاتها بعيد..ورجعات درات زيفها حتى تدق الباب وسمعات صوته…
توريا : دخل ايوسف دخل هههه…
تحل الباب بشوية وهو يطل عليها..واحد من اجمل وانقى واطهر قلب فالكون وعندهم فديك الدار…احب شخص واحن شخص…ولدها يوسف فعمر 20 سنة من اصحاب متلازمة داون…شعرو كحل تاهو بلحية خفييفة وغير كيبتاسم….
يوسف”حرك راسو كيضحك” : ميمة اه يوسف هههه..گلتي احم گلتي ليا ندوش نعوم نعوم !!…
توريا : ايه تعوم اولدي..ليوم ضريب صداق ديال عمك رضوان الي كيجيب ليك شكلاط والحوايج هههه…
يوسف”حرك راسو مبتاسم فرحااان ماقاداه فرحة فاش كيكون شي فرح كتلقايه كيدير ردات فعل كثيرة حيث فرحان وكيعبر بديك طريقة” : ديوني معاكم امي !!.
توريا : هو الي گاليك بغا يديك..گاليك تحضر ليه فاش يسني العقد ويعطيك من تمر ياك هادشي الي بغيتي…
يوسف : اه اه بغيت…
توريا : يلاه اجي نهبطو..را داخل نيت رضوان كيعوم..وصاني ندخلك عندك يحك ليك معاه جابو نيت الكسال العرابي الي كيحك ليكم…
رجعات زيفها وشالها لراسها ودازت لبيت حدا بيتها كينعس فيه هو وحسام وزكرياء…جبدات ليه حوايجو الي تم وخرجات معاه تا وقفات لقات حسام واقف خلاتو ليه …دخلات بالخف دوشات دوش خفيف حيث علماتها سعيدة بالي نقاشة جات خلاتها فبيتها كتوجد الحنة والشغل….
فهاد اللحظة عاود تاني دخلات واحد سيارة داسيا دوستر فيها ماتريكيل ديال الجماعة نوع خاص…زادت لهيه وقلبات دورة تقابلت مع الباب الكبير حيث ماعندوش الوقت جاي وراجع فالبلاصة جاب غير مقدية وجاي نيت عند سعيدة الي لقاها واقفة خاشية ايدها فجيب طالية…تا تم نازل بلباس القياد فالخزي وكاسكيط على راسو ونضاضر شمس فعينيه..تم جاي هاز شي ميكات…
هاشم”شاف حسام واقف خاشي ايديه فجيابو وكيشوف فيه وتقول واش قال نجي نهز عليه ميكات كيشوف فيه فحال شاف جن” : ياخيري ياخويتي مزيناتها واقفة ليا تم..نقشتي ابنيتي..
حسام : نعل جدر بو والدين شيطان..
هاشم : شيطان عندو واليدين ؟!
حسام : شقالو ؟!.
هاشم : زيد شد عليا الميكات..صحبة ديال الحبس…
حسام : عشرة لاروب…ارا لهنا مالك ضل مسرسط ليا راسي بشباب شباب..زيد زيد…ارا…”شدها عليه وتم غادي ويبغم…اما هاشم مشى نيشان كيفرنس ليها”
هاشم : عش زوجيتي..هاني الحب اش بغيتي…
سعيدة”تزنگت” : ياعوذ بالله…
هاشم”ضار هنا وهنا وحيد نضاضرو كيحك فلحيتو الي بدات تنبت وخاصو يحيدها حيث ممنوعة عليهم..شعرو غزاه شيب كيبان مزركش بين كحولة وشيب…وصغر فيها عينيه كثر ماهما صغار…” : وعلى بالي ماشي هنا كتزنگي…
سعيدة”خرجات عينيها بغات تموت.وهي تغمق عليه قبل ميسيح حتى تلفها” : ولد خوك بغى نمرة مو…
هاشم : اعااااو…
سعيدة : ومك بغات نمرة هاشم..ياعوذ بالله ياعوذ بالله..توريا بغات نمرة ولد خووووووك…ولدهااااا…على ما قال لسان قلبها…
هاشم : ايناهو را عندي گلفة ضمصة ديال خوت…
سعيدة”تبسمات بقلة حيلة” : الي كتگولو ليه خويا..الي كبر معاكم فحال خوكم…”شافتو حل فمو” اييييه هي الي بغات نمرتو هي…
تاهو خذا حقو من صدمة…ايييه بغات نمرة ولدها من حقها ولكن را الي صدمو ولجم ليه فمو هي انه هي الي طلبات نمرتو هاد المرة….
هاشم : هي ؟ هي الي كان يطلب نمرتها تكحل بالعمى…الي يبغي يشوفها ترجع تحزن بالسيمانات وحنا نهدنو…علاش زعما ؟!…
سعيدة”بقات تشووووف فيه شحال” : شكون وصل ليها الخبار را باغي يخطب ديك البنت الي لهيه !؟…
هاشم”بقى كيشوف ويتفكر ويحرك فراسو ب لا” : ماعرفتش..ماعرفتش اسعيدة..فراسي غير انا ونتي..وجن ديال حسام..وحسام يموت ميگول..
سعيدة : فراس لالة ؟ “عگوزتها”..
هاشم : هي هي ميحيدهاش طبيب مي…”ضرب ايديه اخماس فاسداس”…جا ياخذ براكتها بزقت ليه…ففففف…”ضار شاف فيها” وهي مالها اش بغاتو تبارك ليه ؟!…
سعيدة : والله والله يا هاشم ياديك البنت الي بغى لا خلاتها ليه..توگضت فيها العادة…وفاق ليها ضمير..راني شحااال هادي ملي هضرنا واحد نهار..گالت ليا بغات تعيش العادة تاهي..ولالة كملات ليها…بغاو يرجعوه لهنا ويدگو ليه وتادو هنا…
هاشم. : هههههه معامن…وبويا اش يگول…
سعيدة : تاهو ضهشراتو..وتاهو عزيزة عليه توريا الكنة المخنتة (المفششة)…(عاودات ليه اش وقع ملي توريا هضرات مع ع.القادر شيخها)…
هاشم : وفين هي الحسنية !!؟…
سعيدة”كانت كتشوف لهيه بانت ليها واحد البنت” : وااااا جميييييلة..وتي ركشي لهيه وشطبي حدا بيت المونة..لا تخلي دنيا زفرة بدجاج وعلمي الفاطمية طلق ايدها لغذا…”شافت فيه” لا لباس راها مع البنات…
هاشم”شاف ساعتو” : هاني نسالي شي مشاغيل ونرجع نعوم يلاه نوجد..والهضرة من بعد ونشوفو هاد الحريرة…
حركات ليه راسها وباس ليها راسها ومشى تا قرب لجيهة حسام قبسو تا تشبح وسط واحد الدكة ديال تبن خلاه يحسبن وزاد..على يهضر معاه وهو لابس لبسة القايد ! وتقووول…سعيدة رجعات لشغالها..تا جاو نقاشات ضارو على تريكة كاملة بقات غير سعيدة اجلات تايجيو من العقد وطلبات وحدة تبات باش تنقش ليها ملي تهدن دار باليل ميبقى شقا…تعاشات العشية ودار مزال تنغش الصواني ديال اتاي غادين جايين الخاوي رجع يعمر والعامر مشى يخوا…طباسل الفاكية الحلوة المسمن…الكوزينة تنغل وجاب الله عندهم جوج كوزينات وحدة عصرية لداخل كبييييرة ووحدة على برا بلدية تاهي كبيرة…العيالات معاونين…تا خرج العريس لابس تريكو نص كم بيضي تحتي قطن وشورط..جلس حدا السيدة العجوز وقبل ايديها….
رضوان : مي عيدة (مرات باه حيث مو الي ولداتو ماتت يعني ضرت عيدة المراة الثانية ل عبد القادر)…
عيدة”السيدة الي كانت تشوف فتوريا قبيلة..طبطبات ليه على ايدو” : مبارك ماغادير ومادرتي..والله يتبت الغرس..ويعطيك ساس فين تحط عليه راس..يهز الهم ويحط راحة البال…بسم الله…
حرك ليها راسو وبداو زغاريت..شدات سعيدة ايزار بيض من هنا وتوريا من لهيه سرحوه وغطاوه…عطاتو عيدة الفوقية حيد شورط بقى غير ببوكسر ضورات راسها تالبسها وحنحن وهي تعطيه جلابة وقفات كتنهج حيث غليضة…عاونها تالبسلتو جلابة بيضة فيها صفر فحال جوهرة…وجبدات واحد المرود حكاتو فوق لسانها وسمات الله وحدر راسو تا كحلات ليه عينيه وزاد بانو عينيه كثر كحلين…جابت سواك عطاتو ليه رماه ففمو يحك بيه سنانو وحطت ليه بلغة صفرة خشا فيها رجليه…وزغاريت وصلا عالنبي محابساش…جابت ليها واحد البنت تكون فعمر 30 عام…زوينة بزاااف لابسة تشامير زرق وتاهي مدورة عليها طابلية بيضة ايديها منفوخين بشقى فهاد سيمانة كاملة…عطاوها مبيخرة…وتوخرات لهيه كتشوف فيه فرحان وكتقول سعدات هاد البنت الي غاتزوج وانا باقي نتسنى فنوبتي…كتخيل راسها راهي عروسة مع الي خطبوه ليها من وهي صغيييرة…باها من الجزارة الكبار فسوق الاسبوعي…وساكنين حداهم نيت تم. وكتجيهم تاهي ريحة شحمة فشاقور…من عرضو عليهم جات تشقى معاهم زعما راها مرات الولد الكبير الي هو فالاصل الحفيد الكبير…مافراسهاش الغايب شنو حجتو والجاي شنو هاز ليها…والايام اش مخبية ليها والي خاصها صبر ايوب باش تفيق منها…جات حداها سعيدة من بعد ما كملو العريس الي غايخرج يركب تايمشيو معاه…وقفات هازة جلايل تكشيطتها وهي تشوف فيها وحدرات راسها اش غاتقول ليها !؟…عيات تقوليها تزوجي متسنايش را الي مشا ماجاي ومناويش…ماعاقلش عليك تا فين كاينة وهي مصرة تبقى الخطيبة الواهمة راسها والوفية…
سعيدة”تنهدات وحطات ايدها على كتفها” : زكية بنتي تردي ليا البال ل منار وريهان !؟..
زكية : سيري اختي كوني هانية…
سعيدة : الله يرضي عليك…توريا يلاه را كيتسناو..
توريا. : واخا”ضارت هنا وهنا وهي تبان ليها واقفة بعيد لابسة قفطان جوهرة كحل طالقة شعورات كحلين ومكحلة العينين لكبار وصابغة ضفارها بالحمر..كتصور بواحد تيليفون صيفطو ليها خوها مع هاشم.” اشراق…ردي البال ونقصي من داك المشقوف…
شافتها ماعارتش اهتمام حركت راسها يمين شمال…وهزات جلايل تكشيطتها البيضة وشدات فايد عگوزتها وخرجو لقاو الرجال برا…هاشم حسام سيحمد الشيخ الكبير عبد القادر…بزغاريت والكلاكسون خرجو طوموبيل…نشان لواحد دوار غير حداهم تما…
العرسان تشاوفو والهضرة هضرو والعقد تكتب وزغاريت تعالات ونساب جداد تزادو فعائلة الهاشمي رحماني…
صباح جديد……شادة تيليفون فايدها وجالسة لابسة سالوبيط دجين بلومارين تحت منو تيشرت بيض لاصق…مبوقة بنعاس مفيقينها بكري..خدامة تخندش فتيليفونها جديد باقي كاع ما خدماتو…خدامة تبقشش طالعة نازلة فانسطا غا كتشوف العقل الي يقرا ناعس…تا سمعات باها كيعيط وهي تهز ديك الفاليز وخرجات هي ورقية…هبطات لتحت لقات خوتها كيلعبو…
حبيبة. : علاش ملابسينش !؟
معتز : مغانشيوش غانبقاو مع دادا وخويا ايوب…
حبيبة : واجي بوسني نتا وياها وسيرو…
“جاو يجريو عنقوها شبعوها بوسان تا بدات تصحك ومشاو…شوية بانت ليها ناديا خارجة كتعقد فساعتها لابسة عباية بيج وتحتي ديالها عاقداها عقدة خفيفة ولايحة شالها على راسها…يلاه غاتهضر وهو يكلاكصوني حفيظ خرجو كاملين ركبو والوجهة كانت سيدي بوعثمان الي اول مرة غاتحط فيها حبيبة رجليها اما تا باها وامها كانو كيمشيو سابقا…مسافة 32 كلمتر حتى دخلو لفيلاج…وقف حفيظ فجنب وصونا لحاج…
ع.القادر : ودخل دخل الحاج هاني فالفيرما مرحبا مرحبا بالي جا وجاب هههه…
قطع عليه ودخلو لبيست…حاجة راسها على زاج كتشوف فالاراضي والخلا والكلاب تجري عشرين كلب عشرة زوج…المشاش البهايم وناس غاديا جايا تا سمعات باها كيقول ها الفيرما وهي دور راسها كتشوف بانت ليها وسعة كااااملة فيها الخزاين ودنيا مسقية. ومرشوشة الارض بالما…صوت الغنا وضريب ديال العيالات واصل وزغاريت…بان ليها بنادم كثيييير تم وطوموبيلات مصافات…تا بدا قلبها يضرب اه هي اجتماعية ولكن هاد الدنيا الي بانت ليها عامرة دعقتها…
حبيبة : اماما واش كاين مهرجان ؟؟!
حفيظ. : ههههه ايه كاين الموسم…هاد البلاد ابنتي وهاد العائلة هكا دايرين شي كيجي لشي وفالفرح مجموعين والقرح كذلك…كثير شي هاد الحاج معروووف عند رحامنة تبارك الله خيورات ربي عندو…ومناسب مع عائلات مأصلة ولباس عليها…عندهم الخير ويشيط تبارك الله…
ناديا : تبارك الله…..
مسافة طريق حتى كانو قدام الباب الكبيييرة الي لقاوها محلولة اصلا دخلو بان ليهم الحاج كيشير من بعيد وحداه سعيدة وهاشم…نزل الحاج هو لول تسالم مع ع.القادر سلام خااتر..سلم عليه هاشم وسيحمد الي شبه ديالو بين هاشم ورضوان وسيحمد كبر من رضوان عندو ولد واحد سميتو زكرياء…سلم عليه هاشم وسعيدة مشات نيشان عند ناديا سلمات عليها وهي تهبط حبيبة جات حدا امها مع قصيورة حساب ليهم بنية صغيرة…
سعيدة”شافتها وهي تسمي الله” : تباارك الله وماشاء الله..هادي بنتك…”سلمات عليها”
ناديا : ههه ايه هادي الكبيرة حبيبة…
سعيدة : تبارك الله” بقات تشوف فيها سعيدة حمقتها…حتى جا ع.القادر سلم من بعيد وجات حبيبة باست ليه ايدو هاد الحركة سطاتو حيث من رجال الكبار الي كيبغيو الاحترام يكون ليهم..سلمات على هاشم ووجهها مزنگ ناس غاديا جايا داخلة خارجة يشوفو فيها حيث زينها باين وعاطي لعين…سبقات سعيدة تابعاها ناديا وحبيبة الي شادة فامها وكتشوف فدار قداش بالكبر وبالبيوت والفيرما كلها…خلاو رجال بيناتهم..تا وصلات بيها لواحد الصالون صغير مفرش مقاد فيه غير هما رحبت بيهم وخلاتهم جالسين تا شوية جات سعيدة وربيعة تاهي سيدة فواخر ثلاثينيات شادة راسها بزيف حياتي ولويز فوذنيها وعنقها خلي عليك سراتل والسنسلة ذهب…
سعيدة. : هادي ربيعة مرات لوسي سيحمد…
“سلمات عليهم..تا شوي جات توريا شادة ف عيدة وجايين تا دخلو لصالون عندهم وقفات ناديا وحبيبة وتقدمو سلمو عليها هزات توريا عينيها فحبيبة وهي تسهى عجبتها بضحكتها وخجلها عجبتها بثباتها وكيفاش لاصقة فامها وتسلم وحشمانة بجهد..خلي عليك زينها..
سعيدة : خلاص راك كتعرفي لالة…وهادي راها توريا عقلتي عليها…
ناديا : وايلي راني جيت شحاال من مرة ونيت داك العام فاش طحنا عندكم زيت بقيت معاها نهار كامل تا كمل الحاج…خيرة ناس خيرة ناس…
توريا : هادي بنتك !؟
ناديا : هادي بنتي الكبيرة حبيبة…
عيدة”مكمشة فيها عينيها طلعها وتهبط” : سبحان من زين الحروف فوجهها..وعطاها من عندو وخلا سوقها عامر والطمعية تجيها (الطمعية هي يطمعو ناس فخطبتها)…مربية وحنينة تبارك الله تسلم وتبوس…والخدود عمرو ود.م زارهم…فهمتيني شي ابنيتي هههه…
حبيبة”زمات فمها كتبتاسم بخجل وحركات راسها ب لا”…
عيدة : وراكي شييينة…
حبيبة. : اشنو هي شينة اخالتي…
سعيدة : ههههه شينة هي خايبة…وگالت ليك شينة زعما خايبة باش تحيد عليك العين يعني عكسي الخايبة را هي نتي تبارك الله….
تبسمات ليهم وجلسات عيدة. وناديا كيهضرو وهي هزات تيليفونها كتقلب على ريزو كان قليل بزاف فداك البيت…سعيدة وتوريا خرجو من بيت يعلمو النسا الي فالكوزينة يوجدو اتاي بينما يوجد الغذا…وتوريا تمات طالعة تا سمعات صوت هاشم عند الباب كيعيط ليها…نزلات عندو…
هاشم”جبد ورقة من جيبو” : ختي توريا هادي فيها نمرتو هنا جوج نماري…وحدة را مخدم بيها واتساب الى بغيتي تعيطي ليه فيه وثانية مافيهاش الى بغيتي تعيطي عادي…”اكد ليها بعينيه” ماكدة اختي ؟!..
توريا” حركات راسها مغوبشة” : هذا جهد عييييت….17 عام ديال لخصام والحزن وحق الله (العدة)…خوتو محتاجينو جداه باغا تشوفو…بغيت راجل يكون فضهري..بغيت نجرب الكبدة المعاودة…خاصني نجرب نبرك على نفسي وخاص نهضر معاه يتراجع على داكشي الي بغى يدير…
هاشم : علاش يتراجع ياك حلال ؟!..
توريا”شدات من عندو الورقة بجهد نترتها” : كيل زرع بلادك وخا يكون شعير…
كل مكتزيد تهضر وتعمق كلامها يا كيجرح يا كيضمد…ماعرف يفرح ولا يتقلق هي من جيه وولدها من جيه منقولوش مرفوع القلم ولكن واحد الوقت كان ترفع عليه القلم…
جالسة حبيبة حدا امها حتى سمعات ميساج وصلها طلات لقاتو من انسطا…كمشات عينيها لقات داك الكونط راسل ليها ميساج فيه…salut…بقات كتشوف فيه واش تجاوب ولا لا واش تجاوب ولا ثقل راسها خصوصا ان داك الي فالكونط عاجبها زوين جنتل مان وتصاورو قلاااال في داك الكونط…غير الى حط سطوري مرة ولا زوج فشحاااال ومكيحطش وجهو بتاتا…هزات عينيها على اثر واحد سؤال سولاتو ليها عيدة قايلة….
عيدة. : شحال فعمرك اكبيدتي…
حبيبة : يلاه درت 18 عام اخالتي…
عيدة”شدت ليها ايديتها وكمشت عليها كطبطب” : سميني مي عيدة…من شينك يا بنيتي ودخلتي لقلب مابقيتي تخرجي…
سعيدة”غمزتها” : راك عجبتيها ولالة مكيعجبها حد دغيا غير الى كان همة وشان وزييين نييييت…
حبيبة”حشمت” : ههه شكرا..
عيدة : ههه مشينها بضحيكة…وماتفكري تجوجيش (تزوجي زعما)…
حبيبة”شهقت” : لا لا الله يحفظ لالا…
عيدة”كمشات حجبانها ماعجبها حال من ردة فعلها” : عيب ابنتي نشهگو (نشهقو) على جواج…الشهگة كتجري على رجال وتخوي سوق نسا…راجعي راسك اكبيدتي…
ناديا (ماعرفت فين تدي وجهها ولات غاتفرنس)….
ازمة بعد ازمة وصدمة بعد صدمة ولدات الخصام وفرقات شمل الي كان واحد الوقت محظور وكانو يقولو هادو هما والا فالا…نساو بالي العين حق والقلب كحال وحقد…وراسةالكحل خايب ومني وجبد…مالقى ميقول وميقدرش يهضر حيث توريا الي كبر قدامها وكيحسبها ختو الكبيرة لانها جات ولقاتو صغير يلاه كيقرا فالاعدادي…الى جينا ندققو را تربى على ايديها تاهي..مكيقدرش يهز فيها العين كيحتارمها بجهد وميقدش يزيد معاها فالهضرة…تنهد بجهد وضار خرج لخزانة فين كاينين رجال حيث دايرين طلبة بنهار…جلس حدا حسام والحاج وبابات حبيبة…
اما هي كمشات ديك الورقة فايدها وتمات غاديا حتى وقفاتها ربيعة مرت لوسها…
ربيعة : ختي توريا نحطو لناس مراكش فطور بلدي ولا غير دواز اتاي…
توريا : كبري بناس اربيعة ونتي وفهامتك الله يرضي عليك…(زعما ديري فطور ملكي)…
قالت ليها واخا ومشات لكوزينة…اما هي خشات ورقة فجيب طابلية مدوراها على بيجماتها البيضة وطلعات الفوق…قبل مدخل لبيتها مشات لبيت الي فيه اشراق دقات وجات تحل الباب لقاتو مسدود…
توريا : اشراق حلي الباب علاش سادة عليك ؟؟؟
اشراق : هاني تسناي كنبدل خفت يدخل عليا شي حد من الهجيج الي برا…
توريا”تسناتها تا حلات وهي دفع الباب وسداتو بجهد مخنزرة فيها” : اش هاد القاعيدة الخايبة !؟ اش هاد قلة ترابي ولاو فيك ؟ كيفاش هجيج ؟ هضري ابنت الكلبة ؟!!…
اشراق : وامي را كيوصلو ويدخلو نقدر نكون ملابساش ولا شي حاجة وزايدون هذا را بيتي…
توريا : بيييتك نتي وبنات عمك…نتي وبناااات عمك…والهجيج الي برا را فيهم تريكتي اهلي وناسي…فيهم جدك فيهم خواتاتي وخوتي الي هما خوالك…فيهم خوك فيهم عمامك وولادهم..”شدتها بقرصة تا غوتات بغات تبكي” ماتواطيش ترابيك ماتواطيهمش بزاف وتخليني نطيح الكواري ونتدل و نعيط ليه يتكلف بيك…
اشراق”شدتها البكية” : حرام عليك اهى اهى…
طلقتها بجهد مخنزرة فيها وااااحد تخنزيرة خاااايبة ولاخرى بقد ما عينيها كبار صغارو بالخوف ووجهها الحنطي تزنگ كانت طالقة شعرها على طولو فايت مؤخراها فازگ مخلياه ينشف…شافت ليها ضفارها لقاتهم مصبوغين بالحمر وهي تشد صبع وعضاات على داك ضفر بسنانها تا جرحاتو ليها بالغدايد..خلاتها تغوت…
توريا”كتهضر مغزفة” : نعاود لقى هاد صباغة شيخات نزيدهم يشعلو فيك العافية ومايحنو…”جهدات صوتها تا قفزت” يلاه طيري من وجهي…الله ينعل ترابيك…
خرجات كتنهج حاسة براسها ضهرها بصح تقسم..كتشوف فراسها كبرات ومكاينش علامن تعول…يوسف خاصو الي يقابلة والبنت صغيرة خاصها الي يقابلها…جدها مفششها عمامها كل ملهي مع ولادو…كلشي تلاقى عليها وسنين ضغطو عليها تا بدات طيح كواريها…حاسة بدموع بغاو يهبطو ومراضياش تهبطهم حيث الى هبطتهم عليه غاتضطر تدير بحلفتها وهي الي حاسة براسها غاديرها وتصوم ستين يوم…
مشات جددات الوضوء وخرجات من دوش كتسد فشالها حيدات طابلية وبقات بديك بيجامة البيضة وتقاشر بيضين…فرشات صلاية وصلات شي ركيعات لله تا حسات براسها تهدنات وبقات تدعي وتدعي ربي يسمح ليها….كملات وهي تهز عينيها جيهة تيليفون من بعد ماتردد العقل الخاطر قاليه نعل شيطان…تنهدات وجبدات الورقة من جيب ركبات رقم كيف علمتها اشراق ولواسها حيث هي أمية ماقارياش…كتكتب فيه ومكمشة عينيها قالت تتاصل بيه طلع ليها تتاصل واتساب الى بغات وطلعات نمرة نيشان صونا وصونا وصوووونا تا قالت مغايجاوبش وهي تسمع الخط تطلق وسمعات تحنحينة ديالو حسات بيه ضاربو البرد حيث صوت مدعدع وحرش بزاف…ماعارفاش بالي هذاك صوتو اصلا…كيقول “شكون معايا”
توريا : الو. #بشار…. انا توريا ماعرفتينيش ؟…” خرجاتها ثقييييلة فحال ماراضياااش “….مك !!!…
“شافتو سكت مجاوبش حتى قالت تقطع الخط !!!…ولكن لو تقطع الخط احسن من هاد الجواب والي كان “…
بشار : لا ماكنعرفكش…. “وقطع الخط بصح”…
#بشار…
لا جينا نشوفو تصرفاتها وهضرتها نقولو جوابو ماحرك فيها والو…ولكن لا دخلنا لقلبها غانقولو حر.قها وصدمها…ماعطات اشارة بملامحها ماتكلمات ما صدرات صوت ماقالت اي لاخرة…دازت ثواني بالحساب وهي تنهد مخرجة نفس سخووونة وطويلة كتحر.ق الي جا قدامها كانها حبسات نفس وانعازلت حتى استوعبت وعاودت الكرة فالاتصال من جديد وبدا كيصوني على امل يجاوب وخا فقرارة نفسها كتقول راه مغايجاوبش…وفعلا صدق العقل الباطني صحيح وماجاوبش بقى كيصوني حتى عيات وقطعات….من جيهة عطاتو الحق فهاد رد الفعل ومن جهة اخرى ماعجبهاش الحال وكمدات القمعة من ولدها !!!….
كمشات التيليفون فايدها وغمضت عينيها تا نزلو زوج دمعات غفلوها هي صبرات متبينش حزنها وتبين البرود لكن هما بغاو صراحة وخرجو…صرطات ريقها وقالت…
تورية : اعوذ بالله من شيطان الرجيم…
كانها كتحاول مترجعش تفكر فالماضي الي فات وشنو دارت واش دارت ليه ودار ليها…البكر فرحتها اللولة من زوجها الي كان حب حياتها والي كبرات على ايديه نور الدين الي تزوج بيها وهي فعمر 16 حلات عليه عينيها وكان هو الزوج الاب الحبيب الاخ كلشي..
مافيقها من سهوتها غير صوت الباب كيتدق حنحنات ونطقات عاطية الاذن حتى طلات عليها براسها عينيها حمرييين منفوخين ومزال فيها تنخصيصة…
تورية”تنهدات” : دخلي لهنا نشوف…
اشراق”دخلات مورياها صباعها” : حيدتهم…
تورية : اجي عندي لهنا جلسي…
قربات ليها مترددة حتى جلسات وهي تجرها توريا وحطات ليها راسها على صدرها كتدوز ليها على شعرها…
اشراق : غاتعيطي ليه ؟!…
توريا : مممم…
اشراق”هزات فيها راسها” : مابغيتوش يجي مم مابغيتوش امي..
توريا”غوبشت فيها” : علاش ؟ باغيا تسيبي ولا اش ؟ “خنزرات فيها” ترابيك قلالو…اليوم حاضياك بعدو عيني غافلة عليك ؟ جهدي تقادا معاك ماقريتي مابغيتي تقراي مابغيتي تخرجي من القراية…نهار يجيو فيك ناس ترجعيهم ببغيت نقرا…عامين ونتي واحلة مازدتي مانقصتي…(عاودات الثالثة اعدادي) هاد لعام دزتي بوجه عمك هاشم…مابغيتش نحط عليك الحضية..مخلياك بالخاطر وزاية لترابيك الفشوش بغيتي طلعي ليا فراس ؟ ضهري تگوس تا تهرس مابقيت وماتليت نگد عليك..غاديا وتكبري وتفوتي فيا لهيه…ورايا رجال وليني خاصني الي من صلبي..انا وتهرست وحنيت راس ونتي كتگولي منعيطش ليه ؟…هذا مسواه الي كل مرة مصيفط مع عمك حوايج وفلوس ليك وليوسف…على بالك ماعالماش ومفخباري ؟!…جمعي عليا عينيك وخناينك وتركني لارض…برجك ماعاجبني جنابك فاضو عليا…العادة عليا مشات وكون بقى بوك “صوتها تقج” كون زدت وراك ترابي ومنحني ليه الراس….”دفعتها” تگعدي عليا..سيري عاوني عيالات عمامك ولا بليمين وبحلوفي لا عتبتي فالعرس نسد على جد مك فالبيت ونوريك الهجيج اش كيسوا…”غوتات تا طارت ونزلت وخرجات كتجري من البيت حيث عارفاها الى حلفت را بصح كتدييييييييير بحلفتها بمعنى الكلمة والعربون من خوها”
فلتحت دنيا ناشطة…ريحة البخور كتعطي والند فكل سارية مخشي…ريحة طياب فالطناجر الكبار على الفورنويات..ربعة الطيابات خدامات على قدم وساق…والكنينات معاونين فالشقا والي عندها شي ولد را كيتقدا وعلى رجال يسربي…والبنات على العيالات بحداگتهم يبانو…تصلى الظهر وخرجو رجال من جوامع دواور الي حداهم الي معروض صلى غير حداهم والي عندو باش يتحرك را تيسر لعندهم…الدنيا برا فالخزاين برجال عمرات والطلبة شدو بلايصهم وقدامها دنيا تطوقات بطوموبيلات والي جا من السوق ب الكاميو ديالو حطو تم ومنو الكاميو ديال سيحمد خو العريس وهاشم ولاد عبد القادر الرحماني…الي جالسين دابا مع الحاج بات حبيبة وحسام وشي رجال فطابلة وحدة…واحد الشوي حتى تم جاي واحد الولد ف عمر 15 سنة كيشبه لسيحمد بزاف وعلاش لا وهو ولدو الوحيد الي مابقى ولد من وراه والو. حيث ماجابش الله…سميمر شعرو قوي ومنوض ليك نباتات فلحية تاهو يلاه عليه اعراض البلوغ حلقو بدا يتغير ليه صوت واصلا هو مع طويل وغليض ديما خالعهم وهضرتو تقولي عندو ربيعن عام خاااتر وهبيل كثر من حسام…الي تحنى ليه على وذنيه وبدا يهضر مجهد تا قفز هو وهاشم…
حسام : ياربي را بقات 1 فالمية ونكردن مو..اش بغيتي را كنسمع را باقي مكاين لا غنا لا والو كلشي مضصص…
زكرياء : جماعة النسا علموني نعطيك السؤال ورمي ليا الجواب..
حسام : هضر مگاد اداك برطال…اش بغاو…
زكرياء : گالت ليك مي سعيدة (مرت عمو كيقوليها مي سعيدة وتوريا تا هي مي توريا) واش يبداو فتفراق اتاي…
حسام : صبر نسول..”ضار عند جدو” با سيدي نبداو باتاي ودوازو…
ع.القادر : اتاي ودوازو يسد ليهم النفس عالماكلة..سربيو الصواني وجيبو العدة لعندي يعطينا الحاج مولاي حفيظ براكتو فواحد الدكة ياك الحاج…
م.الحفيظ : هي الي متعاود ههههه….
حسام”حرك راسو وضار عند زكرياء يلاه بغى يهضر وهو يلقاه هاز ايدو زعما وقال مضهشرو”…
زكرياء : لا زيادة فالكلام على كلام الكبار…الكلام وصل والنية بلغت…
حسام : ونتا بلغتي كلك..سير يا بالمتنىتن سير لا نقرا حسابك نيت ماحد طلبة كاينين ندوزوك…سير را غانطرش مك…
هاشم : امالو !!…
حسام : صارط طالب فعمرو ربعين عام….
العيالات نقصو صواتهم بامر من الرجال حيث الطلبة سماو الرحمن الريحم وبداو فتلاوة الذكر الحكيم على الطريقة القديييمة ديال طلبة..مجموعة من حفظة الدين من كبار عجايز ومن صغار شبان والي فالقياس…رجال ربعو ايديهم وحدرو راسهم كيسمعو فيهم كيتليو…على برا فالخزاين جالسين وطوابل مفرقين…وعلى لداااخل فالصاللونات دنيا عااامرة بالعياالات نصهم الى ماقلنا كلهم غير تريكة وحدة…
سعيدة”دخلات وتحدرات لعند عگوزتها عيدة..كتهضر بصوت فحيح حيث امرت العيالات يسكتوو يسمعو للطلبة” : لالة شكون نزيد معاكم هنا ؟!
عيدة : نتي وتوريا واشراق ولا تزيدي الغاشي…
سعيدة : صافي غير ستة بينا ؟! …”هزت ايدها وشيرت بصباعها بمعنى سيري لا هضرة فوق كلامي…تعجبات سعيدة وماتعجبت عارفاها بغات تكبر بيهم بزيادة على باقي الناس الي فالصوالونات لاخرين لدرجة صالون خلاتو ليهم غير هما مايجلس فيه من غيرهم…هادشي عجب ناديا وعجباتها تكبيرة زينة الي دترو ليها وكبرو بمقامها…خرجات سعيدة ووقفات عند العيالات فالكوزينة تا تمات جايا ربيعة مرات سيحمد لوسها…
ربيعة”فعمرها 34 عام هي ام زكرياء..عمرها صغير ولكن زمان والشقا الحار والزواج على سن مبكر على 17 سنة كيبينها كبر من عمرها..قربات ليها بهمس كتضحك” : لالة گرناتهم ف ناس مراكش هههه…
سعيدة”عضات شفايفها وغمزتها مخرجة عينيها” : سكتي تسمعك زكية ولا شي حد يوصلها ليها…
ربيعة : ايوى لاش…مكاين من يسمع الواضح واضح والمعنى باين..وليني البنية را عاطية بزين وطمعية مجهدة عليها…”طلات هنا وهنا” شوف شكون جاها فالسبوب (زعما شوف لمن تبغيها او تخطبها)..رضوان هو الي بقى هاهو دار الكاغط يامس (البارح)…ههههه ايوى حسام را باقي صغير..زكرياء ولدي يلاه ناوي يبلغ…ههه ياكما الغابر ليه ساس الي نسمعو غا بيه…
سعيدة : ربيعة…جمعي سوق وشوفي شغالك لا دخلتي فهادشي مانتي فخير سيري دخلي سوق راسك…”هزات عينيها ونطقات مجهد” ياا صابيييحة ردي دجاج يتقلى الوقت هي هادي…
ربيعة دورات راسها ورجعات تقدي شغالها…وصل وقت الغذا وسكتو الطلبة تقادو الطوابل…تحط الغذا على برا لرجال…وتحط لعيالات الي حاضرين تما خشاو شي مع شي صالون فيه ربعة طوابل مصافة وصالون فيه ثلاثة ومدكوكين ناس والخير موجود ضحك واصل تالعندهم فداك صويلين صغير الي فيه غير عيدة وسعيدة الي عيطات ليها تجلس معاهم وحبيبة وناديا…يلاه هزات عيدة راسها…
عيدة : نابي على توريا (عيطي ليها)…
توريا(داخلة تسمح فايديها الي حنتهم ولات قهوييية كحلة..قادت حزام القفطان ديال جوهرة وهزات ليه كمايمو شوية تا بانو دوك الدبالج ذهبهم يشعل) : هاني لالة هاني..تدهيت مع يوسف تا لبس وصيفطتو مع زكريا…ووگفت على اشراق تا لبست هاهي جايا….
عيدة”شدات ليها ايدها ودوزات ليها على الحنة كتشوف فيها” : تبارك الله نضارت يبان ليا…
سعيدة : جاتها عامزيناتها…
توريا”شافت ف حبيبة مخشية ورا امها” : بنتي اجي قربي لطابلة لهنا…
حبيبة”طلات” : ها..”خشات تيليفون فصاكها وقربات كتضحك” هاني خالتي…
تمات جايا زكية جايبة طبسيل طوس فيه ثلاثة دجاجات محمرين دغميرتهم كثيرة معسلة بزيتون…تا تبعتها اشراق هازة طبق الخبز…
عيدة : سيري زكية لكوشينة (كوزينة) جيبي المشروبة (موناضة) ل شينة… (كتقوليها شينة هي خايبة زعما تحيد عليها العين هخخهه)…
زكية حركات راسها وهي ترمق حبيبة نوضاتها عيدة قربتها حداها دارتها بينها وبين ناديا قول نخششاتها فيها…بقات تشوف واحد لحظة وولات مشات جابت بلاطو فيه زوج قراعي ديال ايس كحلة وحمرة…وكيسان كانو مستفينهم خصيصا لضياف..حيث را كاينين نسابهم وكل نسيب همة وشان…غير توريا را من تجار الكبااار فوقتو وخوتها وامها تاهي تريكتها معروفة…غا هي زكية جات دور مغاتجي عينها فعيدة قطعات فخد محمررر مگرمل مداتو ليها وتكحز ليها فالخبز وحبيبة كضحك….
عيدة : كولي بنيتي كولي كسبي صحتك مشينك بطفلة هههه…
حبيبة” باستها فحنكها” : ربي يخليك اخالتي (جاتها عالگانة)..عجبني دجاج بنين هههه…
ناديا : عقلها هو دجاج محمر…
توريا : كولي بصحتك…
سعيدة : تغذاي وسيري مع اشراق لفوق غاتجي نقاشة تنقش لنص الي باقي منقش حيث تناوبو فشقا…ياك تبغي ؟…
حبيبة”حركات راسها” : اه واخا شكرا….
سعيدة : ههههه شكرا زيديها فيك ههههه…
عيدة : وياربي كي نخششت ليا الگليب…كولي بصحتك..وسيري نقشي عمري هاد قوالب سكر (على ايديها)..زيدي الحاجة زيدي…
واحد الاهتمام لقاتو ناديا وبنتها بالخصوص حبيبة كان ملفت وعيدة مكتعطيش اهتمام بحال هذا الا اذا كان ولدها ولا ولاد ولادها…اخر اهتمام كان هو الي دارتو ل عروسة رضوان..زكية قلبها تنغص فلحظة حسات بيه كيضرب بزاف على غير العادة…ولكن فقراراة نفسها قالت را بغاتها وحاطة عليها لعين ل حسام…بقات ساهية على وقفتها كتشوف فيهم تا نغزاتها وحدة فالكنينات الكبار وهي تقفز وشافت فيها…
توريا : سيري شوفي ماتقضي…
يا وعاجبااااااني عاجباني زينة البناات…عاجباااااني يا وعاجباني زينة شهبات….عاجبااااني…
وحدة من العيالات طلقات حلوقها للغنا…وتبعوها العيالات هالي داخلة هازة طعريجتها كانت فالكوزينة تسخن فيها وتبعتها اخرى مركبة دري فضهرها عشوائيا لمهم را لاصق فالضهر لابسة تشامير غوزانديان مطروز بالصم نحاسي ولاوية عليها شال فلون صم كيبان شوية من عنقها عريان…وتاهي كتضرب ووحدة جايبة صينية ومعالق حطتهم قدام وحدة تاهي موجدة ايديها وحلوقها تبع الرايسة..ماشي لعابات ماسي عونيات وماشي شيخات هما غير بنات دوار فاش ما جيتيهم تلقايهم فالفرح يغنيو وفالعزو يندبو ويبكيو…بدات هي وتبعوها تا تمات جايبة وحدة جفنة (بانيو من بانيوات قدام كبار ديال حديد) رماتو بالمقلوب…
صابرين (العروبية را سميات جداد يحنتوك فيهم) : وا زيدي يا مباركة حطي الفال ههههه…
مبارك. : مصاصطي عياو…فلاقيا كرمو …شوفي مريم الطرف يحنت عشرة حزميها تخلي رجال يهزهم بوقيام
خلات كلشي يضحك…جات وحدة گفضات قفطانها جوهرة خضر تا بان كولون كحل وتبارك الله واحد سيگان عندها كي القالب تا بدات تشتف وتهيتف وهادشي كامل داز قدام حبيبة الي بقات حالة فمها تا عيطات ليها اشراق وضارت تبعاتها طلعو لفوووق البيت الي كتنعس فيه اشراق وبنات عمها هاشم…دخلات البيت كتشوف فيه ثلاثة سدادر ب تلقانهم وماريو تم كبير كشروك..ماعندهمش ديك الثقافة ديال كل وناموسبتها ولا كل وبيتها…الي كيتزوج كيتدار ليه بيت فحال بيت الي صبغوه وصايبوه وفرشوه على حقو وطريقو لرضوان وعروستو اي الكنة جديدة…والبنت را بيتها فدار ناسها ولا دارها…وماعندهمش الولد يخرج يدير دارو حالف عليهم بوهم وعيدة مايخرج حد من هاد الفيرما الي اصلا تبدلات كلها من ورا الواقعة والكارثة الي طرات هادي 17 سنة…عمر تبدل فيه كلشي الوجوه الولاد كبرو ودارو دراري ودوك دراري را دارو ديورهم وكاين الي قريب…ولكن تبداويت (حياة العروبية) مزال فيهم…
النقاشة : شكون بغا ينقش تاني اختي اشراق من ورا هاد زوينة..
اشراق : غير هي الي قالت ليا مي…
نقاشة : بغيتي ايدك ولا صبيع اختي…
حبيبة : غييير صبعاني بزوج تايديا…
حركات ليها راسها مبتاسمة…ناضت اشراق خرجات هازة تيليفونها كتشوف شنو وصلها ضارت هنا وهنا وهي تدخل لبيت رضوان الي موجدينو ليه فالليلة الي غايدخل بمرتو…
بدات نقاشة كتنقش ل حبيبة الي متبعة معاها وفنفس الوقت كتهضر اوديو مع صاحبتها ولا ايوبينو الي لقاتو غادي شاد طريق ل واحد الفيلا خارج مراكش فدوك الواحات كاين عرس تما….
حبيبة : هي تاع الي يصيفط لبابا لوكاليزاسيون ديالك…
ايوبينو : بغيت نقول جحمومة مالقيت ليك جهد..بغيت نبلوكي مك صباعي فشلو عليا…بغيتي تقتعي رزقي وصافيي…
حبيبة : ههههه…”كتشوف فصبيعاتها عجبها نقش ديك البنت” ماكرهتكش كون جيتي هنا عجبني هههه…
ايوبينو : مازال ماسلمتي على شي عقرب تم…
حبيبة : مكاين عقرب گدك…شوف صور ليا الفيلا الي تما…
قطعات معاه لقات النقاشة كملات ليها وبدات تجمع فماتريييل تا بدات تحس بايدها كتحرقها شي شوية وجناب النقشة بداو يحمارو عرفات الى كترات دوليو وبدات تنفخ ….
نقاشة : غير تيبس هبطي يديرو ليك سقوة.. بصحة اختي جاتك زوينة…
حبيبة : يعطيك صحة شكرا بزاف…
خرجات نقاشة وهي بقات تشوف تا جبدات تيليفونها وبدات تصور فيها ومع مطلعة گورميط و مگانة لفوق جا منضر زوين…لاحت صورة فسطوري انسطا ووحدة ف واتساب دارت ايموجي عينيه فيهم قلوبة بمعنى عجباتها…شوي ودخلات اشراق وجهها مزنگ…
اشراق. : احم..كملتي اختي…”شافت ايديها طلعتهم وهبطتهم”..
حبيبة : اه جات زوينة عجباتني…
اشراق : مممم…يلاه نهبطو باش يديرو ليك سقوة ملي تنشف..انقول لزكية ديرها ليك…
حركات ليها راسها وناضت هي وياها نزلو لتحت مشات ديريكت لصالون لقات امها جالسة كتسمع فالعيالات ناشطات دايرة رجل فوق رجل وكتحرك فصباعها المزينين بخواتم ذهب..كتبان سيدة مخملية راقية وهماوية فلباسها وحتى فطريقة جلوسها…شافتها جايا فرحانة وهي تبتاسم جلسات حداها كتشوف ليها فايديها…
ناديا : غزالة جاتك ابنتي…هي هو بانت ليا قوات ليك دوليو شوفي جناب ايديك كيف حمرين…
حبيبة”هزات كتيفاتها” : ماشي مشكيل نصبر…ههه…
توريا : الى نشفات ابنتي ها زكية تسقيها ليك…”ضارت لقات زكية واقفة مع البنات كيشطحو وهي مبندة بافتخار حيث كلشي عارفها مرشومة لولد توريا حيث ملي تزوج اصغر الخوت غايباليو ب ولد توريا”….زكيااااا وااازكية…
زكية”تمات جايا مبتاسمة بخجل” : نعااام اخالتي…
توريا : دي معاك البنت سقي ليها بالسقوة الي بقات علينا البارح…
زكية : واخا خالتي هي لولة…اجي معايا…
داتها لكوزينة قالت ليها وقفي ومشات لواحد الرف تما هزات زلافة بيضة كبيرة…هزات كلينيكس من باكية تما الي لقات وبدات تسقي ليها فالنقشة…حبيبة كتشوف فيها كتسقي ليها بتمعن وحدر وتقلب فالنقشة الى خضرة مكتوصلهاش..حتى كملات ليها وهي تنقط زكية بادية كلامها…
زكية : ايديك زوينين تبارك الله…
حبيبة”تبسمات بفرحة وتقدير” : شكرا احبيبة حتى نتي غزالة كلك ماشي غير ايديك هههه…
زكية : ربي يخليك…بصحتك اختي…يلاه اجي جلسي حداهم حتى تنشف وحيديها وذهنيها بشوية زيت ولا شي كريم ورشي ريحة باش تنضار ليك…غير يوذن العصر وطلعي لبسي حيث غايبداو بكري العرس…
المعروضين من النسا خرجو لخزاين ..خواو الدار بكبرها من الناس عمرات تا قالت اخااايت فين نحط الباقي المياوات من بنادم تاحد ما تقال يجي…كلشي فرحان باغين غير فين ينشطو ويجيبو الخبارات ومزيودة سيمانة ديال النميمة راها كتجمع….ناديا وحبيبة الي عطاتهم عيدة بيتها يا لالة فين يلبسو باش ينزلو لتحت يحضرو لجوق وشيخات الي بداو يسخنو فماتريييل وشيخات فواحد صالون لتحت كيلبسو حدا الدراري ديال لجوق عادي جدا…والي كتكمي باش تگاد مجاجها مع شطيح والشافة الكبيرة مولات الحلوق راها كتشرب فقهوة وترطب حلقها…
جالسة فجنب ناموسية كتقاد شعرها ببابيليس تا كملاتو ونفشاتو ليها ناديا باش عطاها فوليم ويڤي…ومدات ليها قفطانها الي كان ثوب ديالو كريپ فالبيج مايل لذهبي…مخيط بسفيفة صم ذهبي رقيقة وحزامو ديال صم ذهبي رقيق سااامبل مافيه تا اضافات حطاتو ليها لبساتو من بعيد مالبسات تحتي ديباردو قطن بيج وبيرميدا تاهي وسوتيان ديال بونج باش يهزو ليها صدر صغير الي عندها..لبسات قفطانها وحزمات بالحزام…وزادو تبرزو دوك ليهونش الفايضين…ضارت جبدات صندالة بلا مذهبة فيها اسطراس بيض كيلمع لبساتها وضارت كتقاد…
ناديا. : مابغيتي ديري والو لوجهك…
حبيبة”عوجات فمها” : نووو بلاش..طبيعية حسن..عطيني غير بوماليفغ ديالك كيعجبني…
عطاتها اتخوس ديالها دارت مرطب شفاه وخلاتها تاهي كتقاد ف تكشيطتها ثليجة يلاه خيطاتها جديييدة فالفيولي قادت مضمتها ديال ذهب عاونتها عقداتها ليها ولاحت شالها صايباتو على شعرها…جبدات حبيبة ريحتها tobacco vanille رشات منها ورماتها فصويك صغير…وناديا رشات من ريحتها Si..لبسات بلغة ذهبية عالية بشوشة ديالها..هزات صويكها تاهي ودارت واحد البروش على شكل بوكيه دياال لورد فيه اسطراس بالالوان…وعاونتها حبيبة تا لبسات شمار ديال صم خذاتو من فاس فواحد العطلة مشاو ليه فيها…شوية تا سمعو صوت كلاكسون والزغاريت عالجهد..مشات حبيبة كطل من شرجم نيشان لتحت حتى بان ليها العريس خارج من طوموبيلتو golf 9 gti ماتريكيل ايطاليا…مزوقة بالسينتة ولوسط بابيون وفوق بارشوك كاين بوكي ديال ورد صغير…حل الباب وهو يمد ايدو تا بانت ليها ايد صغيرة تمدات وهي تخرج العروسة لابسة تكشيطة بيضة ومشطة شعرها لفوق مهزوزة ومغطية بفوال كيبان تاج لتحت ايدها منقوشة حنة كتبان ليمونية فيها…
حبيبة : زوينة العروسة عجباتني…عرا ليها على وجهها…وينوو. حروفها صغيورين هههه كتحمق…
ناديا : ويلاه نشدو بلاصتنا قبل متدها الحاجة منعرفو فين نجلسو…
خرجو لقاو سعيدة داتهم نيشان لطابلتهم….حمى العرس ودخلو شيخات كيحركو فداك طرف وحزام الموزون كيتسمع…توسطو الخزانة…والكيادر ديال دوار بدات سكرة كطلع مع عينيهم ولكن بعاد غير كيشوفو ميقدو يديرو والو حيث الرحماني وكاين القايد ولدو…تاحد ميگد عليهم…دخلات العروسة مگيداها نگافة حتى لبرزة جلسات وجا العريس حداها…دازت لبسة لولة وثانية حطو العشا الشوا وتبعوه دجاج محمر…وديسير…وقبل مايفرقو الحلوة بدات الغرامى بالعلام…هز واحد الميكرو وبداو العيالات يحطو زرورة ويقول اش حطت كل وحدة….
العلام : هادي مانطة باييير من عند مرت طالب معاشو…وهادو اش هادو الالة (هضرات ليه فوذنيه) هادو زينة كيسان من عند خالة العروسة نجية…وهادي 2000 درهم من عند عمها تبااارك الله تبارك الله….(جات زكية الي رسلاتها سعيدة تقول اش عطات ناديا وراجلها) جوج بلاطويات تمر معمر باللوز و جوج براسليات ذهب و 2000 درهم من عند عايلة الصافي..تبارك الله الخير هذا تاع الي يتجوج ويعرض على هاد تريكة هههه بخ بخ بخ…سيييير….
بقى كيقول فالغرامة ورا كاين الي عطا عشرين درهم وفرحان را زرر وعطا….قرب الوقت يسالي وناس يمشيو… العرسان طلعو الفووق والغنا رجع….شوية حبيبة بدات تحس بوجيعة تحت كرشها عرفات الى العادة بغات تزورها…لوذن امها قربات ونطقات باش تسمعها…
حبيبة : ماما بغيت نمشي لطواليط…”شافت فيها مها لقاتها مكمشة عينيها”…
حبيبة : الباكية را فجيب الفاليز دخلاني…شوفي ديك البنت زكية ولا اشراق تمشي معاك…
حركات راسها وهي تبان ليها اشراق واقفة مشات عندها طلبات منها تورينا طواليط…مشات معاها تالفوق وراتها فين تمشي وخلاتها وطلعات مشات لبيت هزات الباكية ديال فوطة صحية جبدات وحدة وخرجات غاديا تقلب عالطواليط الي قالت ليها اشراق فين كاينة…تا صونا ليها ايوب وجاوبت…
ايوب : عار الله مراجعينش دابا ؟!
حبيبة : لا تالغذا علاش…
ايوب : ويييكويك نسيت ساروت ومابيت نفيق دادا…
حبيبة”يلاه كتهضر تا بدات تسمع غوات خفيف وهضرة” : اش هذا ؟!!
ايوب : اش تم ؟!
حبيبة : غوات…فهاد البيت واقلة…
ايوب : قربي نسمع…شكون كيضارب…
قربات حاطة وذنيها اتا بدات تسمع….
هي : اممم عافاك عافاك غا ضرني…
رضوان : ماغانضرك والو…رخفي راسك ماتخلينيش معلق…ونقصي صوتك غايسمعونا…
هي : اعععع…لا اهى اهى…قاصح قااصح…فففف…حححححح..
ايوب”غا سمع ديك حححح وهو يقلش وذنيه وحبس فجنب طريق وعطا تركيزو وطاقتو وراسو وزكو وكلشي فالاستماع” : الغااااشي الغاشي با يزور المكان لقى البيبان بلا طرقان والساقتة سادة…وان خطكم مقطوع…اگولي ليه را البنت فتية وسنان الحليب…
حبيبة : كيفاش !! اش كيديرو !؛؟
ايوب : كيوطدو العلاقات ديبلوماسية بين شفتين…
على كرسيها جالسة..كتشوف فالناس تشطح…كتشوف فعيدة فرحانة ل ربيبها رضوان الي بقى صغير وهاهو عرس مع راسو غايخلي ليها كنة واخا ماشي ولدها ولدها من ضرتها الي توفات وهو فعمر صغير…عيدة الي تزوجها عبد القادر وهو صغير وخا كانت كبر منو لكن بحكم كانت هي وحيدة باها (عيدة) الي كانو عندو املاك الي تحرق ماتم…كان عندو عزيز وتزوجها ولدات ليه الكبير الي توفاه الله فضروف كارثية من اعز ناس عندو…تبعاتو البنت الي ضروف ماخلاتها تقدر تجي تحضر لعرس خوها حيث ففرنسا هي…تزوج عبد القادر المراة ثانية ولدات سيحمد و رضوان وماتت بالمرض…
كتشوف فيها فرحانة الي تهنات عليه وهي ماعايشاش هاد الاحساس…تاهي بغات تعيشو فضروف عادية مع راجلها وتفرح تاهي بالبكر السباعي…الي لو تزوج شحاال هادي كون راه هازة كفيدها فايدها…تشهات وبغات تعيش معاه العادة…العادة الي كتمناها الحنانة لمحنونها…لام لفلذة كبدها…فهاد البلاصة وهاد المكان وهاد ناس عارفين وكابرين وعلى العادة عينيهم حالين…تخطب ليه تمشي ليه بدفوع…تزغرت ليه وتشوفو عريس فبرزتو…وتزغرت فضريب صداقو…وتشوفو فصباح دخلتو…تضرب وتشطح ويقولو فلانة بنت المشاوري جوجات ولدها وحيدات لومة عليها…تشهاتها هاد العادة والي زاد كمل عليها خبارو الي وصلو ليها…ولدك افلانة را بغا الحلال مع البرانية…واش راضية ولا ماسمعو وذنيك الخبار !!!…سهوتها نساتها فين هي وفين جالسة واش كدير حتى تمتمات حدا سعيدة. الي سمعتها وكمشات عينيها….
توريا : لا خذاها نزيد سخطي على سخط فات…
فالزمان الي فات…من بعد الكارثة الي وقعات…فات عليها عام ديك الساعات…عام ديال الحزن…عام ديال الغم والايام الكحلة..فغذاهم يحطو ندغة اللولة ويخليوها فجوف حناكهم كدور…لا هما قادرين يصرطوها لا هما قادرين يندغوها…مع يتفكرو مع الغوات والبكا يتعالى…لو كانو دولة كانو رايات بقاو نازلين على طول العام…لو كانو خيم لو بقاو رايبين…لو كانو لون بيض لو بقا كحل…قلبهم طاب…مصدومين وهي كثر منهم…ترزات فيه فالحنين الي تگولي ليه سلام يضحك تگولي ليه تشهيت يحضر…تحطيه على جرح يبرا…مسمينو ب المقدم والخنات الي كان مخنت بيه ولدو جات عليه مفششو فوق القياس…حتى الي فششو رزا عائلتو وهو براسو…وبنتو الي ماعرفاتوش كيداير نهار زيادتها نهار موتو…
الكاس فايدو كيدور وماحرمو الله فيه كيتحرك…الشراب الي كيخلي ناس تنسى..هو كيهدن بيه راسو صحة…هز راسو لفوووق والعينين الحرشين والحادين فالنظرة شافو لفووووق وسهاو حمريييين العافية شاعلة فيهم تا رداتهم جمر….القلب مهرس كيضرب غير هكاك للحياة…والعقل غاااب ومشى لعام من ورا المرض والغم…عام من ورا الكارثة فداك الوقت…كان فالعمر 19 على قرابة يكمل العشرين…
كانت جالسة عند راسو…جالسة عند الشاهد الي مكتوبة فيه اسم نور الدين الهاشيمي…من نهار وعات من صدمتها حزنات وبقات لابسة عليه البيض…حتى حسات بشي رجلين وقفو عند راسها…ضارت وعينيها حمريييين منفوخين وجهها ولا كحل بالغبينة والحزن…بان ليها راجل مكضر ماتعطيهش عشرين عام لحية كثيفة وشعر حرش وقوي لكن مبعثر الكتاف هابطين تحنى على ركابيه…كيدور راسو بواحد طريقة فحال كيحك فلحيتو على كتفو….يلاه غاينوض يرجع فين كان غادي وهي تدير صبعها فوذنيها وغوتات بحر جهدها تا تم جاي سيحمد وهاشم…هاشم الي شافو وهو يخرج عينيه… مشاو كيجريو اما هو بقى هكاك غمض عينيه تا كمشهم وحجبانو الغلاض مبعثرين…كيحرك راسو ب لا بطريقة غريبة…دار ايديه فوق وذنيه….مدة ماسمع ومابغى يسمع….
سيحمد. : تعوذي بالله اختي توريا…
توريا : ويييييييييييويويويويويويووييو اش جابو اااااااااااااش….اش جابو الي رزاني فيه….اش جاب المسخوط…وگلتها ليه گلت ليه ولدك مادير فيه ثقة ماتعطيهش دابا ماتعطييييييييييييهش…وخلااااني تا ثقت وگلبي تهنى عليه وعما ليا عينياااااا….واااااااا….
“هبطات لتراب وهزاتو وهي تندب بيه حناكها تا طوشو بالد.م وهو ينوضها سبحمد وترجع طيح وتمرمغ فتراب…حرقتها مايعلم بيها حد من غير الله والي مجربة وحدة كبرات قدام راجلها كبرها على ايدو وربات عليه كبدة حاااارة…كتموت وتحماق عليه…زوجوها ليه صغيرة بزاف…بقات هكاك تا جا خوها الي كان واقف عيط ليه وهاشم جر بشار غادي كي الجماد وتقول واش تحرك حدو سمعها عيطات ليه بالمسخوط ماضارش حدو وقف وسمعها نطقات بالي مايبغيه لا خايب طبع ولا زين طبع ماتبغيه لا لعدوك لا لصديقك يسمعو…والى ما هرس ليك خاطرك يطحنك وينجرك….”
توريا : كيف مارزيتيني فيه بغيت ربي يرزيك فكبدتك…عمر النهار البيض ماتشوفو….غاضبة عليييييييك “كتشهق وشهقة طوييييلة وعينيها خرجو تا تجيفت” غااااضبة عليك الى يوم الدين….
تعاودت المجية وتعاودت…القلوب بقات عامرة وحاقدة…هازة بزاااااف….حتى رجع بعقلو للواقع وللحظة الي هو فيها دابا لايح ذكرى داك النهار…نفخ داك صدر تا نفخو وغزز سنانو تا تورمو عروق نواضرو وقال بنفس الصوت…
بشار : مزال تحني ليا الراس وتعاودي ابنت المشاوري ( مو)…
هي بقات فسهوتها كتشوف ناس ناشطة ضاحكة كتشطح…وهو خرج بذاكرتو ورجع للواقع ورجع يكمل خدمتو…يمكن من نهار سمعات بخبار زواجو بوحدة ماشي من لبلاد وممكن تكون ماشي من نفس الدين…مافيقها من سهوتها غير ايد عيدة الي عيات ونغزتها قايلة…
عيدة. : طلعيني لفوق…
توريا : شوري ا لالة حتى يعيط رضوان…
عيدة : مازال ماعيط ولا ؟!…
توريا”حركات راسها كتنهد” : مزال لالة مزال…
عيدة : وديني غا لبيت تحتاني نحط راسي..فوت فالقياس..صباح نايضين على بونبر يبغيو يجيو اهل العروسة بالفطور ويلاه يلاه…
حركات ليها راسها وهي تنوض ونوضاتها معاها…باش تدخل حيث عيات لانها لا هي لا هما مولفين يسهرو نعاس بكري والفياق بكري ولكن هاد ليام حيث كان الفرح ماعليش لو شاركو الفرحة والسهرة ويفرحو بيه ايام عرسو فايتة باش ماعطى الله…وصلاتها تال داك صويلين صغير الي تم ضارت هنا وهنا وهي تبان ليها حبيبة نازلة من دروج وجهها مخطوف مزنگ كمشات حجبانها كتشوف مالها يلاه غاتعيط وهي تستوقفها عيدة طالبة منها تغطيها وتطفي عليها ضو حتى يصبح ويفتح…
العرس راه كمل كل دار حقو فيه الي صبرو را بقاو تافرقو الحلوة وكل صد لبلادو…والي غير تما را مشاو…والي بعاد شوية ومايصلاحش ليهم يتحركو فداك الليل المعطل را غايباتو فحال عايلة مولاي حفيظ… وبطلب من الحاج عبد القادر الي مخلاهمش يمشيو وسبقها ل حفيظ قبل كاع مايجي…وجد ليه بيت هو ومرتو وبنتو خاص ليهم…تحركو البنات وجدوه ليهم على حقو وطريقو كان فيه الكليمة الي مكيطلقوهاش بزاف غير حيث كاينين طلقوها ليهم…محاولين جهدهم يفرشو ليهم راحة ويغطيوهم بالضحكة…
ناديا”هازة ايزار خفيف بغات تغطي بيه الحاج” : معاش ميسرين الحاج…
م.حفيظ : نتغذاو ان شاء الله…الحاج عندي معاه شي هضرة على ماعلمني البارح…
ناديا : بغا شغلو ؟!…
م.حفيظ : باينة…
ناديا”ضارت جيهة بنتها لقاتها مشاااات سرحات عجول لاخرة من بعد ما بدلات حوايجها ولبسات بيجامة نص كم بسروالها..” : هادي الي مجايبة خبار لا لدنيا لا لاخرة…
حفيظ : ههههه خليها مزال ماعندها الي يسهرها ولا يلمها…دوزي نعسي وكان يصبح ويفتح باذن الواحد القهار “وتنهد”…
صوت الفروج كيقوقع وصوت رواج فالدار ظع بونبر الي سمعهم هاكا فايقين مايقول را فالليل بايتين ساهرين حتى لفجر عاد ناعسين…هادي هي دار العرس حتى تفوت سبعيام وكل يقصد وتادو وبلادو…يلاه جات تدور لديك جيه حتى بدات تفيق فيها تنوض قبل مايكثر المشي فدار…حلات عينيها منفوخين ماشابعاش نعاس ابدا…نطقات بصوت مبحوح مسالي بنعاس والعيا…
حبيبة. : ماما مزال الحال…
ناديا : حتى نرجعو لدار ونعسي مع راسك..نوضي غسلي قبل ميكتر بنادم شوي ويبغيو يجيبو لفطور لعروسة…نوضي الله يرضي عليك…
حبيبة : والله حتى كررفصتوني اماما واه مناعساش ونوض على بونبر…”بدات تحك فعينيها وتفوه وهي تنوض…شوية حتى بدات كتسمع صوت زغاريت عالجهد” اشنو كاين ؟!…
ناديا : على ما قالت ليا سعيدة مشاو يطلو على العروسة ههه باينة شافو صباح…
حبيبة : صباح ؟ كيفاش صباح…
ناديا”حكات ليها على ضهرها وطبطبات” : نوضي ماما غسلي تاتوصلي لديك الوقيتة ونشرح لبنتي نوضي ههههه…
ماعارتش هضرتها اي اهتمام…مافهماتش اشنو صباح الي قصدت ولو قالت ليها د.م عذرية العروسة او دخلتها كان تفهمها…شكون الي فجيلها مايعرف هادشي..تفوهات وناضت حيدات عليها العگز شافت فساعتها لقاتها سبعة ديال صباح…ااااي وابكريييي هو عندها نيت..طوات فراشها فين كانت ناعسة سولات على باها عرفات بالي مع الحاج خارجين…جمعو داك البيت هي وياها عاد حلو الباب حيث موصين…تاحد مايحل عليهم الباب بان ليها بنادم لهيه داخل خارج غير القراااب بزاف كيوجدو باش يجيو اهل العروسة يجيبو الفطور…اول دوش دخلات ليه كان غير حدا البيت فالطوالة تم هازة اتخوس و حوايج ماتلبس..ديالها ودخلات سدات عليها قضات حاجتها بدلات الفوطة صحية جمعاتها فساشيتها عاد بلاستيكتها حطاتها حتى تخرج وترميها فزبل برا فين وصاتها ماماها…غسلات مزيان ودارت وحدة جديدة..كتوشف فالدوش مصلوح ولكن صليح عادي فايونص وطواليط البلدية ماشي لاشاص ماشي الي مولفة هي…فيه مراية وفيه واحد ماكينة صابون حاطينها فيه ولافابو…حطات لاتخوس واول حاجة نيطوايات وجهها بجيل ديالها حكات سنانها وشللات فمها ب باندبوش وذهنات وجهها بكريم مرطب نهاري غسلات ايديها ورطباتهم تاهما ورشات واحد سبراي منعش باش يبقى وجهها منتاعش..جمعات داكشي بدلات حوايجها ولبسات حوايج الخروج باش كيف يتغداو تكون واجدة..كسيوة ديال دجين على شكل سالوبيط من فوق وتحتها تيشرت بيض رشات ديودرنت وجمعات كلشي وخرجات هازة بيامتها مطوية عطاتها لمها دارتها فالفاليز هي وقشها وهي تخرج مستاذنة منها باش تمشي تسول على زبل (حاشاكم) برا وداكشي الي كان…الملاقيا كانت مع توريا الي جايا ولقاتها كتقلب بعينيها مكمشة على ميكة فايدها…
توريا : خاصك شي حاجة بنتي….
حبيبة”تبسمات ليها” : بغيت نرمي هادي ف الزبل حاشاك برا ماعرفتش فين…
توريا”هبطات عينها لايدها الي مكمشة فحال فهمت بالي الوليز هاديك..حركات راسها وقالت” : برا كاينة بركاسة تما لوحيها…
عطاتها وقتها وباحترام ضارت والباب قصدات مخليا وراها عينين توريا كيشوفو فيها…زين هاد البنت كيسحر وكلامها كيدخل للقلب وتربيتها واحترامها كيسلب…
الرحامنة اراضيها الفلاحية موجودة…الخير كثير من عند رب العالمين…ناس تموت على فلاحتها وارضها..جايد عليهم ربي بالخير…كيف كيقولو زيادة الخير خيرين…ناس جايا بجرارها وناس غاديا ب بيدوات الما فوق بهيمتها…والي معمرة ستيرينة تقضي بيها…
هز ايدو كيشير على واحد من الفلاحة فواحد الارض مع داك صباح الي لايح نسمة خفيفة باردة وهوا نقي…تا نطق واحد قايل ” وا صباح الخير الحاج رحماني…ومبارك مادار رضوان”
ع.القادر : الله يبارك فيك..دزتي شي البارح ولا ؟!..
هو : ودزت دزت مع رجال فالضباح والمراة ودراري را كانو مع نسا…الله يقوي الخير…
ع.القادر”شير ليه ورجع كيهضر مع م.حفيظ مسند على عكازو” : واش نگوليك الحاج…تاندير شي وقيت هاد تنين (الاثنين) ونشوفو دوك الحسيبات الي عندنا…يكون خير…بعد غذا كاين سوق عندي شلا فياجات مع سيحمد ولدي…تما تما يحن الله…
م.حفيظ”ريقو نشف” : ايه مرحبا…هي تنين الغذا عندي”هز ايدو” والله الحاج ماتزيد معايا كلام…نتا وسيحمد على ضيافتي..
ع.القادر”وقف” : ولا كان شي طنجية نشركوها بيها طعام مرحبا..
م.حفيظ : اسيدي بقوامها طنجية نااضية كناادية داكشي متوت هههه…
تعالاو ضحكاتهم تما…ضار بيه فدوك الفدادن علاش ما قدو ماسلاو…خيرهم كثييير مايتحد مصرفينو فاراضي فلاحة وبهايم وشلا…
وصل الغذا و من بعد ماجاو اهل العروسة جابو الفطور ودخلات عندها امها سلمات عليها وشافت الصباح الي كانت حاطاه فوق صينية سروال محطوط فوق القالب..شافوه غير العايلات والعيالات زغرتو ورجال راه فهمو…العريس راه فرحان كيدور مع رجال وخوتو ناشط…دازو طقوس العادة وتقاليد فهاد الصباح..تحط الغذا لداخل لعيالات ولرجال فالخزانة الي بقات خلاوها تايساليو…كان جالس م.حفيظ والحاج وسيحمد وهاشم وحسام وقف كيتسخر كتعطيه سعيدة من لداخل وهو كيخرج هو ودراري على برا…تا تمات جايا تجري وتلعب وهو يوقفها…
حسام : اجي لهنا…فين ياسين واشرف ؟!…
حسنية”كتشير ليها بايديها تعبر بالاشارة” : اببب ابببب با ابا…
حسام”شافها كتوريه فحال الفاس” : اشرف فالفدان !! وياسين فمراكش ؟! اييييه مزال امتحانات لافاك…وياك اشرف گلت ليه جي تغذا…
حسنية هزات كتافها ومشات دخلات تجري…بارح بايتة تلعب فالعرس مع البنات…وحدة ف سن 29 عام…عقلها حبس ف 13 فالحادثة الي تعرضات ليها وصدمة الي عاشتها…كان الوجه الوحيد الي مخليها فهاد الصدمة هو وجهو…شكوون هو ؟ ووعلاش…اش فعل ليها واش ترك…لاش وصلات لهاد الحالة وربي الي عالم بيها…توقفات فسنها وفوجه الي عمرو يتنسا ليها…واليها تخلاو عليها وزادو هاجرو دوار…تكلفو بيها المحسنين وناس الخير منهم عايلة رحماني من كبيرها لصغيرها…
جات داخلة وهي تساطح مع حبيبة تا كانت شوي طيح كون ماشداتها…
حبيبة : اييي سمحي ليا ياكما قصحتك ؟!!!…
حسنية”حركات راسها ب لا وهي تلاح عليها عنقتها تا مشات حبيبة وجات مافهمات والو…باستها فحنكها وهي تبعد تبسمات ليها ومشات دخلات خلات حبيبة كتشوف”…
خرجات حبيبة كتقلب وتبحث بعينيها تا تم جاي حسام شافها كتقلب هنا وهنا…
حسام : كتقلبي على شي حاجة اختي !!…
حبيبة”هزات راسها بزربة وهي تزنگ على بالها شاف الويز نيشان ماشي مكمشة فايدها وفوسط ساشية مخبية…لااا عقلها قاليها را شافها هكاك مسرحة…لهضرة وحلات والحلق نشف” : مم زب زببب…
حسام”خرج عينيه” : ها رسول الله…”هز راسو شاف لهيه وتكلم زعما را عيط ليه شي حد” ا كفاش اييه هاني جاي…
حبيبة”شافتو غاادي غادي بجنب ههه” : ا لا بغيت بركاسة…
حسام : وقولي زبل اختي..الفران عندك مقطع..”هز صبعو وضار شير ليها لهيه” راه فين هي…”ضار عندها وحدر راسو نيييت حيث قصيرة…” لوحيها ودخلي را كاين واحد شيان بوليس داه العساس ياكل الى رجع وماعرفكش ماحنا فخير…
حبيبة”وجهها صفار” : ويلي..عافاك يلاه معايا غير نلوح هادشي ونرجع…شوف را كنموووت منهم عافاك اخويا…
حسام : يلاه غا سيري هاني واگف..
مشات بجرا لاحتها ورجعات كتجري كاتبان ليه قشة غاديا جايا جابت ليه ضحك…شكراتو ودخلات خلاتو واقف يلاه غايمشي وهو يصوني ليه التيليفون جاوب فالحين…
حسام : فين غطستي اولد رحماني…الى ضبرتي فشي بلاصة لبقص بلا خباري رانس ساخط ساخط…
هاشم : تا البلاصة هي الي لگاتني…وشور يا شغانگوليك…
حسام : اتيني…
هاشم : راني ف المامونية…
حسام”جناوح منخرو فرفرو عينيه خرجو” : مامونية !؟ لوطيل ؟…وحدك وحدك ياك…ياربي يااااربي “عض ايديه بالفقصة” مانصيبش ندعي مانصييييبش…
هاشم : لا غا دعي دي رضى نيت…واش انا راجل مك انااا…عطيني وذنيك وعقلك وسمع اش كاين..البارح باليل يلاه تخشعت مع شياخ وبغيت ندير الصواب شي شطيحات وتلويزات فخاطر الخواطر وخويا رضوان….اتا جاني ميساج فيه قضي نيشان ماشي عافاك لااا قضي…جوج كلمات مافاتوهم…من لاخر…
حسام : فلوس كي روز…
هاشم : اموال تترعرع…
حسام : هاراوكااان…
بقى هو وياه عطيني نعطيك فالقوافي والالغاز…الي شافهم يگول صحاب…والي عاشرهم يگول الفردة وديالو…والي عرف معدنهم يگول راه ميفوتوش بعضياتهم…صحبتهم تعدات الاخ وخوه…صحبتهم مابحالها صحبة صحبتهم الي ما يگد البراني يدخل بيناتهم حيث فطريا را ميفوتوش بعضياتهم…الي سول وتاكد اش كيجيو لبعضياتهم يگولو ليهم هاشم البو وحسام ولدو…حيث بصح حسام ولد هاشم وسعيدة البكر….وقرابتهم فاتت البو والولد..
عرس ليلة تدبيرو عام كيف قالو ناس زمان…العرس الي كان مخطط ليه شحاال هادي وكان المنتظر يتدار فهاد الشهر…هاهو تقام والعادة دازت وعادات جايا فالطريق…البادية عاداتها فيها من زمان صعيب يتخلاو عليها كابرين وحالين عينيهم عليها ومطبقينها…وصل وقت رجوع ووقت سلام كيكون طويل كيف معروف…
عيدة”قبطات ايد حبيبة وزيرات عليها” : ماتحرمينا من وجهك الشين…
حبيبة”حركات راسها” : ان شاء الله امي الحاجة…”باست ليها ايدها”…
ضارت سلمات على سعيدة وتوريا وربيعة مرات سيحمد تاهي…سلمو عليهم كاملين وتمو خارجين فرحانين بحسن الاستقبال. والضيافة…خرجات معاهم سعيدة الاجتماعية البشوشة تال برا بانو ليها رجال مع م.حفيظ..وهي دور وعيطات..
سعيدة. : وااا ربيييعة..وطلقي راسك الله يرضي عليك…
حبيبة : خالتي واحد البنت زكية واشراق مابانوش ليا…
سعيدة : زكية رجعات لدوارهم مع واليها…واشراق تكون غير هنا
حبيبة : سلمي عليهم…
تمات جايا ربيعة هازة شي بيدوات وميكات معاها وحدة من البنات…فيهم بيض بلدي حليب وزبدة وحتى سمن وزيتون مشقوق مرقد…من خيرات البادية…
ناديا : الله يا ختي سعيدة كون ماشقيتو راسكم..الله يكثر خيركم…
سعيدة : وخلاص الحاجة ماشي شي حاجة…حليب وزبيدة را من لالة ل حبيبة گالت ليك ديالها ههههه…
حبيبة حدها تبسمات وصافي…سلمو عليهم وباركو ليهم ومشاو قصدو بلايصهم فطوموبيل تسالمو رجال وخرجات سيارة مولاي حفيظ على امل الرجوع مرة اخرى ومرات عديدة لزيارة ولعلا القادم اكثر من زيارة…
تعاشات العشية فالرحامنة…دخلات سيارة هاشم من الباب الكبير…نزل منها وشاف قدامو بان ليه حسام وسعيدة واقفين كيهضرو شادة كاسها ديال القهوة معطرة فايدها وحسام حداها تاهو كيهضرو جالسين فواحد ضليلة تما…هز عينيه لشرجم ديال بيت مرات خوه نورالدين وهي تبان ليه واقفة كتشوف لهيه…سرح بعقلو اش غايقول ليها ؟!…واش يخبرهم ولا يسكت..
تمنى لو الي وقع ما وقعش…تمنى وترجى من الرحمن يرحمو ويفيقو من هاد الحلم ويقوليه را خوك ماماتش وغير كتحلم…خوك الي هادي ازيد من 17 عام ماوقع ليه والو..فرحتو كملات وبنتو تزاد وفوذنيها اذن وعطاها سميتها اشراق الي شرقات ليه حياتو ملي سمع بخبر حمل مراتو الي عاشت مشاكيل ف حمالاتها الي فاتو…واحد فلت باعجوبة…وثاني من بعد 16 عام ديال حمل وطيح كتب ليه ربي يكون ناقص…والاخيرة الي حتى تفتح فوجه توريا الي قالت موحال نقدر نحمل حمل كامل…شلا ما داز على راس هاد هاشم وشلا ما حضر…
نرجعو بالزمان لور ل 17 قبل…ونشميو لنهار الولادة الي خرجت فيه حياة ومشات فيه حياة…فالنهار القهار الحرارة تشوي فالعباد شهر ستة مطنطنة فيه الوقت…توريا تزاد عليها الحال والمخاض خدام خدمتو…فرشو ليها فالبيت فلارض…علمو القابلة تجي…
سعيدة : سگية (ماء المشيمة) طرطقات الالة…
مليكة(بنت عبد القادر الي تابعة نورالدين والي تزوجات ودابا هي ففرنسا) : سيري سعيدة شوفي اش يخص وجديه اختي ل قرشية دروك تجي…
توريا : وااااااااربييييييييييي واااااميمتيييييي واربيييييي كون معايا…وااااااا…وااااا نور الدين…واااااا تاج راااسييييي…مممممم
“العرق هابط من وجهها ونواضرها…ماكتشوفش قدامها الماس يحسكو فجنابها وضهرها…الله وحدو والي دازو من حالتها هما الي يعرفو الامها…نطقات عيدة الي جالسة حداها عرات ليها على تحتها وطلات وهي تهز راسها”
عيدة : فين القرشية…
سعيدة : هاني هابطة…”ضارت عند ربيعة الي كانت واقفة كانت يلاه عروسة باقي جديدة…” بقاي حداهم الي خاصات نابي عليا هاني نشوف مي قرشية…
حركات ليها راسها وخرجات توريا هبطات نيشان لتحت خرجات على برا وهي تصادف ب قرشية جايبها هاشم طلعاتها لفوق ورجعات نزلات تا تم جاي نورالدين هاز فايدو الجويجة…
هاشم : تا فين سبتي…
نورالدين : جبت جويجة من عند سالم… خبار الخير !!..
سعيدة : عزيزي..ختي توريا جاها الوجع..حسب وقيتها ويجيب الله تيسير…
نورالدين”بفرحة قلبو رفرف” : تبارك الله تبارك الله…الله يفك الوحايل…الي سول راني لفوگ نتوضى ولبس لباس الصربة (لباس التبوريدة)..يكون فك الفكاك…
“تم غادي طالع فدروج ديك الوقت دار كانت فالتصميم لول قبل ميبدلوها كلها ويشركو معاها ديور…يلاه وصل لنص وهو يدور عند هاشم”
نورالدين : بشار فين سامر !!…
هاشم : مشى ل ثانوية الحاج يشوف واش علقو…
نورالدين”هز ايديه لسما داعي لله” : يارب بجاه نبي جود علينا بخبار الخير…وفرح ولا تقرح…
عطا بضهرو لهاشم وهاديك طلعتو بقى هاشم شحال كيشوف فيه تا تمات جايا سعيدة هازة فايدها مقراج ما طايب وبانيو نزلات ربيعة مداتو ليها طلعهم وهي تنزل كان حسام مزال صغير…خرجات على برا وجلسات فطابلة هي وهاشم…جا سيحمد كيجري ينهج…
سيحمد : تا بصح ولا ؟!
هاشم : وايه…
سيحمد : الله يفك الوحايل…فين با…
هاشم : الفوق فالبيت كيقرا فالقرآن…
سعيدة : تعطل بشار اهاشم ماعرفت اش دار..خاطري مقبوض عليه…علاش مامشيتي معاه ونتا عارفو باقي عيان…
هاشم : كل خير كل خير نشاعلاه(ان شاء الله)…سعيدة دري ولا راجل كلشي يلغط عليه لا تعيقوش…
سعيدة. : واش عارفني نلغط عليه !!…
دخل نوراادين لبيتو قبل داز على البيت فين كتوجع توريا طل عليها كتعصصصصررر وطلب الله…تاحد ما رد ليه البال من غيرها ضارت وهي تشوف فيه ودارت فيه نضرة كضر فالخاطر…دعي معايا ربي يوقف معايا ويكون ليا عوين…الولادة كانت عسيرة بزاف…حرك ليها راسو وغمض عينيه بحركة كانت كتفهمها غير هي وياه..تفاهم كان بيناتهم خطييير…شافتو كيتمتم عرفاتو كايدعي معاها ورجع سد الباب…
هاشم خرج على برا مع سيحمد وقفو حدا الكاميو كيهضرو وسيحمد كايكمي حداه…حتى ضار هاشم وبان جاي كيزرب فرحان عينيه كيلمعو…لدرجة عيط ليه ماسمعوش ومشى…دخل حتى وقف على سعيدة كينهج…
سعيدة : خبار الخير…”بشار حرك راسو فرحان علمها بالخبار تا عنقاتو وباست ليه جبهتو بفرحة وافتخار.” سير را باك لفوق طلع…
بشار”سمع الغوات” : مزال ماولدات ؟؟…
سعيدة : مزال اولدي…سير بشر باك وشوف معاك يوسف خوك خليتو ناعس فالبيت دابا يفيق على الغوات ويخاف…الى فاق هبطو لعندي نشدو تا تفك ميمتك…
كان طالع بشار فعمر 18 ملامحو خشنة حرشة سابقة عمرها… حتى هو كيضحك وضحكتو فشي شكل علاش لا والفرحة متمكنة منو من بعد عناء طوييييل وتكرفيص وعذاب نفسي مع القرايا…هو مضغوط بيها من جيه ولغيط عليه من مو من جيه وحالتو كانت ماتسمحش باي ضغط والا غايتنكس ويرجع لحالتو…كايزرب باغي يوصل ليه الخبار …يلاه وصل لبيت.لول بغى يحل الباب يسبق مو هي لولة وهي توقفو مليكة عمتو جايا هازا گمامط فايديها وزيوفة…
مليكة : افين داخل…
بشار : مزال معطل هادشي ؟؟
مليكة : دعي معاها قربات قربات….
حرك ليها راسو وهو يقلب دورة ومشى تا لبيت باه ومو… ولقاه واقف كيلبس لباس التبوريدة باش يلبسو ويمشي عند الخيالة باش يضرب طلقات للمولود…و حيث الغذ ليه بداية الموسم عندهم تما باش يوجدو …كيقاد فالعمامة على راسو من بعد ما توضى حيث الخيال خاص يكون على وضوء..واصلا صلى الفجر والصبح ملي مرتو بدا يزاورها الوجع… وزاد ركعات اخرين دعى مع مرتو الي هي دابا رجل فالدنيا ورجل فلاخرة…..كيقاد ومركز حجبانو غلاااض كحلين جامعهم فحال مغوبش وهي را نظرتو العادية…لحيتو كثيفة هابطة تالتحت كحلة مرشوشة بزغيبات شيب..هو العلام او المقدم ديال الصربة ديال تبوريدة …المقدم نور الدين…يلاه ضار يهز التُّماك (البوط ديال جلد الخاص بيهم) وهو يهز عينيه لقاه واقف كيقلب فالمكحلة…كاع ماحس بيه امتى دخل…تبسم بافتخار…
نور الدين : عجباتك ولا…ههه (ضحك ضحكة خااترة وجلس تالبس التماك عاد ناض لبس سلهامو كيقاد فيه والبخور مطلوق خلاتو مو فالبيت…ضار كيشوف فولدو مركز مع المكحلة ويقاد فيها طل عليها بعينيه من لداخل جمع حجبانو وهز عينيه فباه وتبسم بشر ابتسامة التحدي…ابتسامة الثقة…الابتسامة الي كيبتاسم كتبان شر وهي را نضرتو هكاك دايرة.ماهي مقصودة ولا فالبال شي حاجة…..وخا هكاك مع حالتو نفسية سابقة مخلية شوية شكوك عليه……عينيه قاصحين فشوفتهم…كيبين بالي راه مستعد زعما….ووجه ليه المكحلة تا بدا نور الدين يضحك…ورجع وقفها عند رجليه كيشوف فباه…
بشار”نطق بداك الحلگ الي غلاض ليه بجهد” : جويجة مليحة….جابها ليك عباس !!!
“كيضهر وعينيه كيلمعو فرحتهم ضاهرة…رجع كايشوف فجويجة الي عارف ومتأكد راها خاوية حيث حتى لوقت الصربة عاد كيعمرها واحد من الفرسان ولا المقدم فالبلاصة فين كيتبوردو…”
نورالدين : ايه يلاه هادي رجلي من عندو..صايبها ليوم فالصباح…
بشار”كيقاد فيها تا هزها لفوق عند كتفو وتبسم بجنب” : جبت ليك خبار الخير…نگولها ليك ولا نتحي ليك هو لول…
نور الدين”عرفو بغا تا يدير تحية الفرسان فتبوريدة باش يطلق ليه الخبار زينة” : بشارة الخير هههه…”جهد صوته فحال الى راه فالميدان ديال تبوريدة” : وحدااا وحداااا…
وقف بشار وتبند ضار هنا وهنا فحال الى راه فوق الخيل وكيشوف فجنابو باش يتاكد من الامان كيف كيديرو فرسان تبوريدة…..وكانو هادو الجمل الي كيتفاهم بيهم المقدم او العلام مع الفرسان الي وراه فالتبوريدة…
نورالدين : التيساع لهيه…”كحاز ولدو” گاد هنا وهناااااا…. (حط المكحلة على الكتف ليسر وعاد الكتف ليمن)
نورالدين : آآآآآ آآآآآآآآآآآآآآآآآآآآ المكاحل….عمروووو….(هزها لفوق عمر وقادها معاه.) خييييييييييييييييل….شاااااااااااااااد…ااااااااااااااا لمكاحل…آآآ حفييييييييييييظ…اااااضرررب…..وبدا يضحك عااادي…هاني مهني الامان راه كاااااين..مطمن….
بشّار او بشارة الخير كيف مسميه باه…ماجاوبوش بقى موجهها ليه كيضحك حتى ورك بصبعو وهو يخرج البارود على شكل طلقة نيشان جات لصدر نور الدين للقلب مباشرة…توقف الزمان مع الطلقة عند نور الدين وعند بشار…وعند حتى صحاب المكان الي تسمعات تال عندهم…وعند ختو مليكة الي كانت واقفة فالباب كانت جايبة ليه بنتو يلاه زايدة فوسط مانطتها باش يوذن ليها حيث يلاه تفكات مرتو…..كتشوف فصدر نور الدين فلحظة تغمق وعمر بالد.م…وبشار واقف كيرمش وكيقلب ف ديك الجويجة فحال الى ممثيقش بحال الى موقع والو…واحد صدمة فشي شكل وقعات ليه…فحال الى ضرب بيها وصافي نزلو االفرسان من فوق خيلهم…
بشار “كمش حجبانو فحال الى تفاوت” : ديها عند عباس يشوف مالها…وديها ل سالم يعمرها بالبارود…
مليكة هازة التربية بين ايديها…وذن البنت الي كان يتاذن فيها…ويدخل ليها مع العروق.. للاسف كان نصيبها صرخة فاتت ليها طبل لهيه…لحيمة حمرة باقي د.مها سخون لا هي لا باها….
تحول بشار الي جايب البشارة…بشارة انه نجح وجاب اعلى معدل جهويا ووطنيا بميزة حسن جدا…الميزة الي ما وصلها حتى تكرفص بالمعقول نفسيا وجسديا….يلاه ضحكات ليه دنيا سااااعة الزمان وهجراتو ليه لاعوااام…نهى حياة باه ودا سخط مو…وحتى عمتو غضبات عليه فواحد الوقت….من مرضي لمسخوط…
فلحظة طلعو كلشي لفوق هاشم وسيحمد.. لقاو مليكة كاتغوت لربي الي خلقها حطات البنت فوق ناموسية وهبطات عند نورالدين وتجر فيه وتطلي فحناكها بد.مو حلقها خرج بالغوات…
مليكة : وااااااا رزاني فخويا الحنين…وااااا رزاني فيه الله ياخذ فيه الحااااااااااق….
سعيدة شافت نورالدين فداك المنظر وهي تشهق وهزات عينيها ف بشار لقاتو كيهضر غير مع راسو شدات على صدرها وتكات على الباب بجهد….
سعيدة : الله ياااربي الله….
كارثة هي واشمن كارثة مكانتش لا على البال ولا طيح فالبال…مافكرو فيها حتى تفكير…حتى انهم يفقدو نورالدين ف موت عادية مافكروش فيها…على بالهم نهار الولادة حتى صدق يوم المامات…البنت فينما يوصل عبد ميلادها يتقلب عندهم حزن…
نرجعو من الزمان الي فات ونحطو رحالنا فالواقع الحالي…تنهد هاشم وهو ساهي…حتى قفز من صوت حسام المرتفع كيعيط ليه ب ولد الرحماني…
هاشم” مشى جلس حداهم…غوبش فيه” : واش راجل مك انا…تا گول بابا…
حسام”ضار عند مو جامع حجبانو” : اشناهي هادي بابا تاني…
سعيدة : كنشك فيه واش بوك….والداك غا انا بالدعا ديال الواليدين والنية…كنشك اولدي كنشك…
هاشم : تا شوف ليك هاد مغرز العينين هاد…الله يقلل لبوك العراض…
حسام : ياك بويا بعدا الي يقلال ليه العراض !!…
هاشم : ايه وشكون…
حسام : نتا…
هاشم : ايوى لباس…”ضار بزربة” دابا يقلل ليا العراض انا دروك ؟
حسام”هز ايدو وحطها” : ايوى يلاه اسي…يولدوهم ويوحلو فيهم….
هاشم : فين منال وريهان ؟!
سعيدة”ضارت كتعيط” : وا ريهان منال…تكلمو لباباكم…
جاو زوج بنيات…بنات الي شافهم يقول توام حيث اصلا هما بنات الغيال..يعني بيناتهم عام ديال الفرق…وحدة فعمرها 12 ووحدو 11…وحدة نسخة من سعيدة بشهوبيتها وبياضها وثانية تقولي والدها حسام الي اصلا تايشبه لمزيج بين باه ومو…تلاحو على باهم شبعو وشبع فيهم بوسان عاد مشاو كيلعبو برا مع بنات دوار….جات ربيعة مرات سيحمد خو هاشم هازة بلاطو فيه ابريق طويل ديال حليب وواحد فحالو ديال قهوة معطرة حطاتو تما…
سعيدة : عيطي لبناتي يهزو معاك…فين اشراق تعاونك…
ربيعة”طبطبات عليها” : خليها را معايا فتيحة…
سعيدة : واجي تشربي قهيوة تانتي من صباح ونتي مع الطياب وجميع ماعيييتيش..دوزي بركي لارض هاو…
ربيعة : وشربو نتوما دابا نجي..نشوف غا لالة نعطيها دواها..وسيدي بغى يتوضى نخلي ليه سطيلة سخونة…هاو نجي..
سعيدة : وصيفطي الماكلة مع بناتي..مالهم اش سايرات يديرو ليا گرانهم معريين دراعهم لشقى فالصيف يحنتو ليا عشرة وهما خارجات يلبعو “شربنت وهي تعيط بصوت عالي تا طار حسام من بلاصتو و هاشم كحز لكرسي عارفينها كتعيشر مع بناتها والى كانو حداها سالفهم يتلوى على دراعها بنتفة مشنشطة” رييسهاااااااان منااااااااال….
جاو يجريو خرجات فيهم عينيها وقالت ليهم يطيرو يعاونو مرت عمهم..فالبلاصة نقزو يجريو دخلو عينيهم خارجين بالخلعة…كتشوف ربيعة الي تلات فالشقا..حتى هي شقات ولكن تدهات فجوايه اخرى…اما ربيعة بزاف كاع كلشي تكب عليها هاد نهار..بناتها اش كيديرو الي مينوضو..ربيعة ولد واحد الي تكساب را مسكين كيعاون مع حسام فالرجال وتاهو كيتسخر مع عمامو…
سعيدة : اخايت اخااايت…
حسام”خاف دور ليه شاف فهاشم” : بابا نكب ليك قهوة ؟!..
هاشم : شكون بابا ؟!..
حسام : ياك يلاه گلتي ليا گول بابا تا مالك دابا مالك باغي تلگيها لينا صحة..شد شرب وهنينا اصاحبي…
سعيدة : كب لينا قهوة خلاص تانتا ياك اودي شي باس مكاين..
حسام : هاني هاني هاهي…تي مالك تتخلعي فينا…ياناري…
جابو البنات صينية فيها زيت زيتون وزيتون مشرمل كحل…وعسل وزبيدة بلدية مملحة…وطبسيل من الحلوة ديال العرس…كانو غير هما هاد ساعة توريا الفوق…عيدة فبيتها كتشرب دواها…الحاج كيتوضى بغى يصلي العصر الي فاتو…العروسة فبيتها لفوق ممخلينهاش تدير والو حتى تكمل سبعيام ديالها…را مخشي معاها العريس كيلعبو لاستيك…
ريحة البهايم وريحة الروت ديال البقر الي فالكوري حدا دار واحد الكوري قد سخط…وريحة الغبار (سماد متكون من براز البقر والبهايم وهو نفسو كيحميو بيه الخباز من تحت وحتى الحمام)…ريحة دخاخن الخباز ريحة القهوة معطرة وريحة تراب فازگ..راشين ناس دنيا تما ومشطبين…
حسام : اناري كرشو غا من سعد الحناش والعگارب…ونامس لگيت وحدة فالبيت الفوگ…
سعيدة : هاويلي..ومالك ما گلتيها نگولها لسيدي ولا گولها ليه يعيط ل حاج يعزم عليها ماتبقى دخل…(يعزم هي يقرا عليها ماتبقاش تعتب) ولا يرشو الگطران…نيت فكرتيني نرشو راسي..
هاشم : اش درتي ليها…
حسام : تانعطيها ليك كادو تلسعك شي لسيعات…بجغت والديها اش درت…كانت فالحايط من جيهة بلاصة يوسف اصحبي وهو ماعارفش كون تا سمرت ليه…
هاشم : الاطيف…فكرتيني فين هو مابانش ليا من بارح العرس بقى حدايا كي الامانة…
حسام. : دابا يبان…يمكن ناعس مانعسش البارح…انا كلي خاصني واحد تدويشة يلاه نجيب العيد فالليل…ماعلينا…اش مشيتي دير فالمامونية…
سعيدة. : ماكملتيش ليا…
هاشم : مامونية مشيت شفت شي ناس يلاه جاو…ودزت ل oberoi (اوطيل خارج مراكش)…شديت شي وراق رسلهم ليا مع واحد السيد باش نخرج ليه شي عقود ازدياد بغاهم …وشفت واش كاين شي بلاصة خاوية يريزيرفي فيه…
حسام : ايه ؟!
هاشم”هز راسو شاف شرجم ديال بيت توريا وشاف وراه ورجع شاف فيهم بجوج بملامح جدية…” : جاي…
رجع كل واحد فحالو…الي خلا شي دويرة را رجع ليها…المغرب كاياذن…م.حفيظ دخل يتوضى وخرج كينشف لقى ناديا فرشات ليه صلاية ودخلات هي الاخرى توضى…مع قالت بسم الله وهي تلقى شي وسيخات عرفات بالي العادة شهرية جاتها…كل شهر كتگول تمشي عليا حيث هي فمرحلة سن اليأس فاي وقيتة يجيها خصوصا بدات كتحس بدوك الصهدات كيطلعو معاها من اعراض هاد المرحلة…تنهدات وناضت جبدات فوطة صحية تاهي دارتها…غسلات ونضفات حالتها وهي تسمع صوت لانتيرفون كيصوني يلاه غاتمشي وهي تسمع حبسبة كتقوليها انا نشوف…
حبيبة”غير شافت وهي تخرج عينيها وغوتات بجهد تا قفزو” : عميييييييييييتوووووووووووو هههههههههههه وييييلي جات والله…
مشات كتجري لباب حلات الباب على سيدة خمسييينية كتشبه لمولاي الحفيظ بزاف عينيها كحلين ومكحلاهم لابسة جلابة مخزانية فالصفر وشال بيض وجهها يضوي وسبحان الله مع تشوفها تدخل ليك لخاطر…مزرزرة تاهي ذهوبات ومعاها بنية فعمر 16 عام وولد فعمر 25 عام…وبنت اخرى هي الكبيرة مزوجة فالداخلة…
لطيفة : اهلا اهلا بالبلارة ديال مولاي حفيظ…
تخشات فيها حبيبة تعنق. تبوس…سلمات على ديك البنت والولد…
حبيبة : سناء حبيبة توحشتك…اهلا فيصل…
فيصل : هانيا زاكيا ههههه ياك هاكا هههه…
حبيبة : ايييه هاكا هههه…
ناديا : اهلا اهلا بحباب دار اهلا…”عنقاتها شحااال عزيزة عليها لطيفة بزاف…كتحس بيها قريبة ليها وعمرها تنسى خيرها الي جمعاتها ولماتها وستراتها…والهضرة سداتها…فحال مكاين والو من داك زمان لهاد زمان…”
دخلو كاملين تسالمو معاها ومع ولادها…مانگول رحبو بيهم ولكن ناكد بالي فرحو ليهم من القلب واللمة تاني رجعات فهاد رياض الي مجموع بالاخوة وولادهم…جلسات لطيفة كتسالم وتضحك تا جا مولاي حفيظ…
لطيفة “باست ليه كتفو كتبرك بيه واحترام كبييير ليه..ماتگد تخز العين فيه” : خويا الحنين..
مولاي حفيظ : اهلا اهلا بصحاب دار…
لطيفة : بماليها وحبابها خويا…
فيصل”باس ليه راسو وايدو” : حبيبي (خالهم كيقولو ليه حبيبي) لباس دعوة هانيااا…
سناء : حبيبي “تاهي باستو فحال فيصل”…
م.حفيظ”باس لسناء جبهتها” : ياوني بيكم هههه
سناء : وخيرت هههه…
جاو معتز و وردة سلمو عليها خشاتهم تحت باطها وبداو جماعتهم الي عامرة ضحك والحال والاحوال وتحياد الشوق ديال عام…حبيبة مامحيداش من حدا لطيفة امنخششة فيها..تا جا ايوب تلاح عليها تاهو يبوس ويعاود ويطرش ففيصل وينتف ف سناء تا نهض فيه حفيظ عاد تكمش خلاهم حابسين ضحكة عليه ولا اساكت ومربع ايديه زعما را انسان خجول ومحترم…ناضت لطيفة بدلات عليها لبسات ضراعة من ضرارع خمسين درهم ديال مراكش مهوييين ديال صهد…تحط العشا وجلسو فالبيت دخلاني الي جا لدااخل طويييل مفرش فراش بلدي ولداخل فيه دخيلة دايرين فيها ناموسية ودايرين ليها خامية مضرگينها…ستيل رياض القدااام مزال باصالتو…تعشاو فجو حميمي مرح اتا ناض فيصل وسناء مشاو ينعسو حيث غايمشيو لازيلال فالصباح بكري لعند دار جدهم دايرين شي عرس بغاوهم يحضرو حتى تلحق عليهم لطيفة ملي يجي راجلها من سمارة….
ناضت حبيبة طالبة منهم سماحة وطلعات لبيتها…حطات تيليفونها على ضهرو فوق طابل دونوي يتشارجا حيث طابل دونوي عندها فيها خاصية الشحن…جبدات من المجر فوطة صحية ودخلات لدوش دارت روتين وجهها الليلي وبما ان فيها ليغيگل استغلاتو فماسك ليلي تاتمشي عليها و تمشي الحمام يبان فيها…خلاتو فوجهها وخرجات هزات واحد رواية بادياها ديال اماريتا ( من سلسلة ارض زيكولا 2 ) للكاتب عمرو عبد الحميد…كتقرا بينما ينشف الماسك وتغسلو وتحك سنانها وترجع تكا تايطيب نعاسها…سمعات صوت النوتيفيكاسيون ضارت بعينيها بان ليها صاحبتها لاحت ليها واحد البيبليكاسيون ديال انسطا…دخلات جاوبتها بقلب فقط..ورجعات بغات تخرج وهو يبان ليها فبلاصة ميساجات مول رسالة “salut”…عقلها مشى وجا بيها خيالها سرح وعطا لجامو للقرار…حتى عطاها الموافقة وهي تدخل وردات عليه ب سلام…حطات تيليفون ورجعات تخشعات فرواية كان داخل تاهو…دار ليها جادوغ ل سلامها رد عليها بطريقة ولاد اليوم…وبالصدفة شاف سطوري ديالها كانت لايحاها لابسة قفطانها فالعرس ومصورة غير جنب وجهها ماحطاتوش…دار ليها جادوغ وعاود رسل ليها…
هو : Are you really Moroccan ؟ “باستغراب”…
حبيبة”شافت ميساج بقات شحااال كتشوف فيه تعجبات” : yes..
شوية طلع ليها بالي ديكونيكطا…رجعات كتشوف ودخلات بروفيل ديالو كتشوف فصورة وحدة لايحها جالس وشاد قواحد الهاسكي حداه وفايدو لاخرى تيليفون حادر راسو ومركز مغوبش…شافت اسمو الي فانسطا ja1985
تاهي حطات تيليفون وكملات اش كتقرا وناضت من بعد ما نشف الماسك غسلاتو ورطبات وجهها ورجعات تخشات ففراشها دخلات شافت والو سد كاع هو…عوجات شنيفاتها ودخلات كتفرج فتصاور الي دارت فالعرس ديال العروبية تا داتها عينها…
صباح جديد عليهم وعلينا وعلى الصالحين والطالحين…بلاد صبحو فيها ضياف وبلاد مشاو منها ضياف وبقاو صحاب المكان…الرجال فطرو مع فوت الفجر وزادو منهم الحاج وسيحمد الي مشاو فالكاميو الي هاز البقر باش يبيعو فالسوق فين داير مع الشراية…فسوق الاثنين ديال قلعة سراغنة…
ع.القادر : سالي هادشي وزيد بينا لمراكش عند مولاي حفيظ…
سيحمد : امضرا اش گال على الفلوس…
ع.القادر : نشوف الحساب واش هو الي جمعنا بالبونات الي عندي ولا ناقص…تالتم ونيسرو..”بدا يكحب بصوت مزعزع” ابرد هذا زارني…
سيحمد : نوصلو لسوق عند العشاب حميد يعطيك من عندو…
طلق راديو الي فالكاميو كيسمعو لقرآن لي مطلوق هو لول باقي دنيا مضلمة…اما فرحامنة فطرو رجال وتبعوهم العيالات الي فاقو تاهما بكري باش يبداو شغالهم…مجموعين فالمراح تما حاطين قهوة وحليب واتاي وطبسيل كبير طاوس مستفين فيه المطلوع (بطبوط) جهد الي يعمر العين..تستيفة العشر بطبوطات وواحد بحالو تاهو غير هو واحد بزبدة بلدية دايبة وثاني بزيت العود…التريكة حاضرة والواليدين حاضرين…حتى تمات العروسة نازلة حشماانة مزنگة حريفاتها صغاار وضعيفة ولكن زوينة واصلها زين ونسوبية واليديها همة وشان…جايا حدا توريا حيث بنت ختها الصغيرة…(مرات رضوان كتجي لتوريا…توريا عندها ختها صغيرة هادي بنتها فعمرها 17)…تا بدات ربيعة وسعيدة يزغرتو ويصليو عالنبي ورضوان هز عينيه فيها وتبسم…تا جلسات حداه…
عيدة”باست ليها العروسة ايدها” : زيدي بنتي زيدي. مرحبا بيك وسط اهلك ودارك لاخرة…
سعيدة : زيدي كريمة بسم الله..قهوة ولا اتاي…
كريمة”بصوت شبه مسموع” : اتاي..
رضوان”ضربها بركبتو تا تزنگت” : تي هضري سمعيهم صوتك..
كريمة : ههههه…
توريا : حشمتي هاني حداك..گولي ليهم خالتي كاينة مايهضر معاك حد هههه…
حسام : زيدي اختي كلنا خوتك هنا الا با رضوان “صلاها معاه لقرفادة تا وحلت ليه القهوة وتقج صوته” عمي رضوان…”ضار غوبش فيه ” تا شور را بيني وبينك غا خمس سنين ديال فرق نگوليك عمي..وبويا ما گلت ليه با اصحبي…
رضوان : شحال هادي دابا راني “تكى مسرح ايدو ورا كريمة عروستو وطبطب على ضهرها” درت دراري وكااان…
حسام”بنص عين” : ابشااااخ قنعتيني…”شاف ف هاشم” هاشم نوض تخدم…
هاشم : ليوم الحد مكاين حد…
فطرو فشد ليا نقطع ليك…والي قشابتو واسعة دخل والي خاطرو ضيق بعد…والي فهمو رجع يهزو من جديد…حتى كل ناض يقضي اش بغى يقضي…والعيالات ناضو للشقى لداخل وعلى برا…حتى تم هاشم نازل من بيتو هو وسعيدة كيقاد فقميجتو محسن لحيتو حيث بدات تغوفل وخدمتو متسمحش ليه ينوضها…يلاه غايخرج وهو يسمع صوت توريا كتنادي عليه..
توريا : هاشم فطريگك لمراكش ؟
هاشم : الى بغى الله اختي توريا…خاصك شي حاجة !؟…
توريا”ضارت شافت اشراق نازلة مغوبشة…لابسة قميجة طويلة وسروال دجين وضافرة شعرها تالتحت..رجعت شافت فيه” : الشيفور الي يديني مشى دا طوموبيل تصايب…وبغيت نمشي لعند طبيب…
هاشم : ياك لباس ؟…
توريا : والو غير بغيت ندوز…دير اش گلت ليك لا تكثر معايا لغى وتسوال…فيك مايقضي قضي معايا مافيك عطا الله كاكسيات والي بفمو مايتلف…
هاشم”عقد غوباشتو ماعاجبو حال” : وايلي اختي توريا اش وصلنا لكلام العيب…نديك فينما بغيتي…يلاه زيدي…
حركات راسها طبطبات على كتف سعيدة…موصياها ترد البال ليوسف وتدير عينها عليه وجرات اشراق الي غاديا بيها مافاهماش علاش…وقفات فنص طريق تروي فضولها…
اشراق : علاش غانمشي معاك امي…
توريا : نبقى على طول ليام والعوام نمشي وحدي ؟..كبرتي كوني فضهر مك…راني عيانة وغاديا نشوف مالي ومال حالي الي مال معاكم…ناس والدة الي يسندها انا والدة الي يطيح بيا ويقسم ليا الضهر…”دفعتها بجهد تا شوي طيح على فمها” زيدي زيييييدي…
ركب هاشم فطوموبيل فورد فييسطا الي كيسوقها هو وولدو…قاد سانتيغ وهز عينيه كيشوف فالمري ديك ساعة بانت ليه كتهضر مع سعيدة…حدر عينيه يشوف الساعة شحاال وصلات لقاها تسعود ونص ديال صباح…هز تيليفون شعلو كيشوف واش كاين شي اتصال لقاه مزال……خبار وصلاتو منها بالي قطع عليها وماعطاها جواب ولا ريحها…من تم مابقات عاودات الاتصال…شكات عليهم وسكتات وغصتها فقلبها تكتمات…تنهد على هاد الحال…هو عارفها قاصحة وخايبة وعارف لاخور قاصح وخايب…
توريا”ركبات حداه وقادت الحزام وضارت عندو…بلا سلام ولا توجاد..نيشان هضرات” : ماشي عند هذاك ؟!
هاشم”هز حاجبو” : شكون ؟!…
توريا : الي مسمينو خوكم فواحد الوقت “مستهزأة”…
هاشم”جمع حجبانو كياكد ليها بنظرة عتاب” : ولدك اا توريا ولدك..
توريا”ضحكت من قلبها ضحكة خفيفة ودغيا جمعاتها” : الولد الي نكر مو…
هاشم”تنهد مبدل الموضوع” : فين بغيتي تمشي وكان ؛؟!..
توريا”جبدات من صاكها واحد كارت فيزيت..كمشات عينيها كتاكد واش هي معلماها غير بالوان الي فيها غوز وبيض حيث هي ماقارياش” : شوف هادي !!
هاشم : دكتورة ****..”حرك راسو” واخا…
مسافة طريق حتى دخلو لمراكش…زاد بيها نشان لعند الاختصاصية…جبدات تيليفون وعطاتو يصوني يشوف واش وصلاتها نوبة حيث هي متعرفش تهضر زيدات غييير حسام الي شد ليها رونديفو…لقى بالي باقي زوج ناس وتدخل هي…
هاشم : نخليك تنرجع ليك ولا نتسناك ؟!
توريا : سير قضي شغالك…نحتاجك التيليفون قاضي غراض..
هاشم : الله الله عليها…
حلات الباب على اشراق الي لحد ساعة مافاهمة والو…هبطات وهزات عينيها كتقرا فاسم دكتورة وهو يبدا قلبها كيضرررب مافهماتش علاش جاو لهنا ريقها نشف ووجهها صفار…طلعو بجوج لعند طبيبة…قالت اسمها وجلسو كيتسناو…كتشوف فالعيالات وحدة كرشها كبيرة وثانية وجهها مخطوف باين عليها الوحام…ولاخرى جايا تدوز على سن اليأس وكل وهمو ومرضو الي بغى ليه دوا ويتهنى بالو…مدة تا وصلات نوبتهم وسمعات النداء كيعلم ب ” توريا الهاشيمي” كنية زمانها الي حاطة…تاج راسها وسندها الي تخطف منها وسخطات بسبابو على اقرب ناس ليها وضلع منها…
توريا” ناضت لعندها ونوضات بنتها” : انا توريا الهشيمي…
البنت : دخلي الالة…
اشراق قلبها طلعو دقاتو تالحلقها…وغي راسها وقف وكثير شي ملي شافت الماتريييل ديال طبيبة كيداير…وقفات طبيبة بابتسامة لكل مريض عندها…كبيرة شوية فالسن وبشوشة الوجه…شيرات ليهم يجلسو بابتسامتها كتسنى الكلام باش تعرف دير خدمتها…
توريا. : جيت ندير شهادة…
طبيبة : لاشنو بالضبط الالة…
توريا”شيرات لبنتها” : لبنتي…بغيت نشوفها ونهني بالي ونتي باينة عندك الولاد وعارفة كبدة الام وهولها على تريكتها…فهمك كفاية…
طبيبة : ممم “حركات راسها” واخا تفضلي ابنتي معايا…
اشراق”بخوف” : انا ؟ علاش ؟ م مم مامريضاش “صرطات ريقها وسط الهضرة تا تسرطات”…
توريا”جهدات صوتها تا قفزات” : اشراااااق… نوضي بلا هضرة ولغيط…نقصي عليا تمارة هني بالي ولا ندير الي مايعجبك..”خنزرات فيها تا غوبشات طبيبة وخا متفهمة لان هاد الحالات جاو وجاو” تگلعييييي….
طبيبة ماهضراتش حيث ماشي شغلها…الي شغلها را خدامة كتقوم بيه…دارت ليگانت وشيرات ليها…
طبيبة. : اجي بنتي تكاي هنا…ماتخافيش كلشي ان شاء الله غايدوز بيخير…
.طلبات منها تكا وتحط سروالها والكيلوط…عاونتها توريا تا حطاتو وغطاتها بالايزار بيض…جات طبيبة دارت البافيط ونضاضرها…
طبيبة : وقفي رجليك ابنتي وفرقيهم…هااكاك…ودابا نقوليك كحبي كحبي…يلاه كحبي…
اشراق”بدات تكحب بشوي” : ك كح..
طبيبة : لا كحبي مزيان بجهد…
اشراق : كح كح…كحكح…ايييي ضريتيني…
طبيبة : غير صبري بنتي ماعليش…عاودي…
اشراق : كحكح…
دارت خدمتها خاشية راسها ودارت بيل كتشوف…حتى كملات وطلبات منها تلبس وتبعها لمكتب…جات توريا عطاتها كيلوطها وسروالها…تا لبسات واشراق كتنخصص بالحس وتوريا كطلع فيها وتهبط..حالها حال اي ام عصامية واكثرية فالبادية كلمة جوج عليك تديك مك لطبيب…وتوريا خلااااص ثقتها فبنتها انعادمت تقريبا…كملات وتبعاتها جلسو قدام طبيبة اشراق حادرة راسها وتنخصص بالحس الى تسمعات تصليها معاها مها…تا نطقات طبيبة كتكتب فديك شهادة…
طبيبة : قبل منعمر هنا بنتي عندك لاكارط ؟!
توريا : ايييه كاينة “جبداتها من صاكها…بان ليها تيليفون كيصوني وكيقول (هاشم…كيديروها ناس فتيليفوناتهم بالنسبة لناس الي ماقارينش او الكفيفين) قطعات عليه ورماتو فالصاك تتسالي مدات ليها لاكارط ديال اشراق…كتبات اسمها”
طبيبة : ماعندك مناش تخافي الالة هزي راسك بنتك باقة بنت تبارك الله…”تبسمات ليها وهبطات راسها مخليا قلب الام تنهد براحة…وبنت زاد خوفها ماشي حيث خافت متكونش بنت ولكن الامر اكبر من هذا…اش مخلي هاد لام فقدات ثقة فيها تاهي…واش مخلي الي ضايرين بيها غايبداو يديرو بالهم معاها…واش مخلي من فوق هاد الحجاية كاملة تهبط توريا راس وتحنيه على قولة ولدها وترجى باش يجي يقابل خوتو ومنهم هادي الي رفعات ايدها عليها وضهرها تهرس ومابقات تگد عليها…تسالات التدويزة وتعمرات الورقة باسمها وتحطات فيها…
Vierge عذراء…او كيف كنگولو بنت بنوت….
لداااخل فالسمارين عند صحاب البازارات الكبار…تم داخل الحاج عبد القادر وولدو سيحمد الي مكيتفارقش معاه ماشي بعكازو كيشوف فدنيا تم…وسيحمد داير ايديه وراه كيهز فراسو يشوف تاهو ويقلب فتواب المعلقين ….
م.حفيظ : اهلا وسهلا اهلا…مرحبا مرحبا…بلا ماتجلس يلاه دابا لدار ونجلسو فرساحتنا…اشكا ؟!..
ع.القادر : هي الي متعاود ماحد دم.نا سخون…
شير مولاي حفيظ لواحد متعلم عندو يتكلف وخرجو كاكلين كيهضرو تا وصلو لباركينغ الي حدا فحل زفريتي…يلاه غايمشي سيحمد يجيب الكاميو حتى وقفو مولاي حفيظ باش يمشي غير على رجليهم لانهم ساكنين غير فدورة تما فالرميلة تحتاج غير رجلين.. وهي هاديك يفتحو الموضع فالطريق حتى وصلو لدرب وسيحمد مبهوض…هز عينيه فواحد رياض مكتوبة فيه اسم ريسطو بانت ليه واحد خيتي عندها طرف لابسة عباية خليجية فخمة دخلات تم كتهز فطرفها بقى حاضيها تا خرج فالحايط جاب الله ماشافو حد..دخلو فدروبة تا وصلو لدار الي قدامها زوج محابق كبااار ديال نخيلات…سرسر فلانتيرفون باش يعلمهم بالي جاو الي عندو شي زيف يرميه على راسو…وحل بساروت..رحب بيهم ودخلهم لصالون الكبيييير مفرش بموبرا محفرة فخمة وحيوطو كلهم فسيفساء وسقفو منقوش وفيه حيط فيه حويط محطوطين فيه ديكورات فخار ونحاس…ريحة البخور فمبيخرة مطلوقة وصوت سقاية كيتسمع وريحة تراب الغرس عاطية يلاه مسقيين…مع زاج شراجم الملون الزاج العراقي عاطي واحد الجو بلدي قديييم…
م.حفيظ”عطاتو ناديا صينية فيها برارد كبار وكيسان بلار ملونين خاوييين…وجاب المجامع فيهم نعناع اتاي وسكر مهرس…وجاب مقراج طايب” : وعطينا دابا براكتك الحاج تانتا ههههه…
ع.القادر”ضحك بختورية” : هههههه وايلي مولاي خفيظ مانسيتيهاش…بالفرحة فالگلب والضحكة فالفم…(زعما مرحبااا)..
سمى الله وبدا يقاد فبرارد اتاي بالضحك…تا شوية شمو ريحة شوا واصلة…عرفو راه شاري شي دوارات ملاح(الكبدة وشحمة ورية كتسمى دوارة هي عادة كتكون فيها تا الكرشة والقلب وطيحان)…عمرو برارد اتاي وهو يدخل طبسيل عامر بقتبان زنان (كبدة ملوية فشحمة فقتيب ومشوية كاين الي كيدير تا الرية) مرشوشين بالكمون والملحة فطباسل الي بغى يديرها…
عبد القادر : الخير هذا تبارك الله…
مولاي حفيظ : اهيا..دير شي فين يجي شي…وجد ليا راسك واحد طنجية ناضية كنادية متوتة من ايديا لعند الفرناتشي(هو بلاصة فين كاين العواد محمييين جمر..يا عند الي كيطيب الخبز برا يا عند الحمام العمومي فين كيسخنو الما لحمام لداخل)…
تحط الغذا ثاني تاهو الي حتى ولا يقول عبد القادر اخااايت مكاين فين نزيد اللهم لك الحمد…سيحمد تشتح كرشو تنفخت تاجمعو دنيا وتحط طبسيل ديسير باش يهضمو…وعليه بدا الحتيت (الحديث)…
ع.القادر”حط ليه البونات” : هما هادو الحاج…شحال تما…
م.حفيظ : 110…
عبد القادر : هي الي تم…بغيتي تقسمها مثالثة ولا مرابعة شوف اش يجيك مليح سلك بيه…
م.حفيظ : تعطيني من وقتك شي ايام نهضر مع شي ناس(مابغاش يقول ختو وولد خوه) ونعطيك الوقت الي تشد فيه رزقك…
ع.القادر : جهد الي يريحك الحاج…دير بحساب عندي شي فياجات خاصني نخلصهم…وشي تجار تانا كيتسالوني…تزيرات بيا الوقت انا وياك اما نصبر مابيناتناش عائلة وحدة مانخليو الغاشي يدخل بيناتنا…
م.حفيظ”تنهد كيحرك فراسو..عينيه ولاو حمرين وحس بغصة فقلبو وصدرو عمر وتزير عليه غير صبر وصافي…”
ملي سالاو من العيادة خرجات توريا مرفوعة راس ببنتها وواخا هكاك بالها ماهاني وقلبها مقبوض من جيهتها…علاش الي جاها ترفضو والقرايا هي سبتها…وسبتها ما طفراتو فيها…عامين وهي كتعاود وتحلف هاد العام تجمع راسها…جدها حلف عليها الى عاودت دار راجلها ماتفلت والي جاها يعطيها ليه….ناس بالهمة وشان جاوها والرفض جوابها……بعدا لا خرجاات فيها الهضرة تلوح ليهم ورقتها وتهز راسها بنتي بنت شرف وشللو بيها فامكم…رجعو لبلادهم…العصر اذن وخرج هاشم كينشف فايديه باغي يمشي يصلي…حتى صونا ليه التيليفون جبدو من جيبو وطلق الخط…حرك راسو وهو يمشي لجامع صلى العصر مع حسام ورضوان ورجعو لدار…
هاشم : اشرااق…
اشراق”كانت فالبيت شادة تيليفون كتضحك تا هزات عينيها” : نعام اعمي…
هاشم : اجي لهنا…
ناضت لعندو عنقها بجنب وخرجو على برا…جبد التيليفون ودوز الخط ليه نيشان بعد رنات طويلة هادي هي العادة الي ولفها هاشم فيه ديما خاصهم يصونيو بزااف تا كيبغي لخط يتقفل عاد كيتطلق الخط…
هاشم : ها اشراق…”شاف فاشراق” بغى يهضر معاك…بشار..
اشراق”خرجات عينيها وصرطات ريقها…شدات تيليفون وسمعات صوته” : الو…
جاوبها بلا كثرة الهضرة…قايل ” تيليفونك فايدك ؟”
اشراق : ممم اا اه…
بشار” واقف خاشي ايد فجيب وايد هاز بيها تيليفون طالق ليه سپيكر…ديك الايد زغب دراعها كثييف كحللل..وفيها شريطات قدام ديال ضرابي بغازواغ…حك شفتو تحت بسنانو ونطق بصوته بنبرة ثقييييييلة…مهدن هدنة مافيها ثقة” : دااابا يتطفى …”سكت شوية تا قالت را قطع وهو ينطق” خليه طافي حتى نجي ونشوف بلانو وبلان دعوتك كيفاش…دعي ربك مانعصر مك دعيييي…
“قطع الخط مازاد ما نقص اما هي فالبلاصة طفاتو وماتقدرش تشعلو واخا مكاينش ماتشعلوش قالها ديرها بلا زيادة بلا نقصان. ..الى گالها يدير بيها…لهاد درجة الخوف منو متمكن نييييت..طفيه تطفيه وسدينا…”
البنت حالها مابقااااش ابدا يعجب…لا شقا كتشقاه مع عيالات عمها…لا ركنة شدتها..برجها مال…والهضرة عليها بدات تبان…ويمكن وصل الحال باش يتوالاو ليها..فششوها تا فات القياس..وبما انها رفضات عرسان بزاف بحجة القرايا..القرايا الي ماطفراتو فيها حتى هاد العام…گرانها وصلو للباك وهي واحلة ف السنة الاخيرة من الاعدادي…
هاشم”شد من عندها تيليفون كيهضر ويشوف فيها مدهشرة وجهها ولا صفر..زير ليها على كتفها باش تبقى حداه تايكمل الهضرة” : صافي كون هاني…”شاف فساعتو” بيناتنا تيليفون…
قطع معاه وضار لقاها مزيرة على تيليفونها…شد وجهها ودورو عندو باش تشوف فيه…ويفيقها حيث بانت ليه تخلعت وغابت..
هاشم : شش شوفي فيا شوووووفي فيا…”شافت فيه وغمزها بفضول” ياك مدايرة والو…
اشراق”صرطات ريقها وديك لا خرجات مقجوجة” : ل لااا لا مادايرة والو…
هاشم : ايوى مال وجهك ؟؟؟؟”بشك”
اشراق : مم م گاليا طفي تيليفون وو…
هاشم : اربه خليه عندي..
اشراق”خرجات عينيها وفمها فالت” : لا لا لا گاليا يبقى عندك طافي…و واش جاي ؟!..
هاشم : گالها ليك ؟!. “حركات راسها بزربة وتنهج”..ملي مدايرة والو لاش هاد الحالة…”شدها من كتفها وزيييير عليه تا بغى يتقطع” ملي مكاين والو تكوني وسكتي…لا قرايا طفرتيها فيها..را ساق ليك الخبار…داكشي الي يضل يرسليك مالك ماطفرتيه فيها ؟…
اشراق : ماتدينيش عندو..عافاك شوف كيف دير مابغيتش نشوفو اهى…
هاشم : اهاااه…عند المشرا والكادويات عينيك خرجو وعند صح عينيك دخلو…مادايراش ماتخافيش…
اشراق : وهو بب باشمن حق يشد ليا تيليفون ؟ باشمن حق يتدخل فيا…ماسوقوش دابا نگولها ل مما مي…”كتهضر وترعد”
هاشم : وشعلي داك تيليفون غا شعليه…مكاين باس..”زاد اكد بعينيه” شعلي…
اشراق”كتصرط فريقها وتعاود وترمش بزربة..طلقها وهي دور دخلات لدار تجرييييي”…
تنهد وبدا يدوز بايدو على وجهو بقلة حيلة…ماباغيش هو يهضر حتى يجي خوها اصلا لاقيها سبة باغي هادشي يتحد الفراق بين الام والولد خاصو مواجهة لعلا وعسى تصافا القلوب..ربما !!.
نخليو الهموم فالرحامنة ونحطو رحالنا فهموم مراكش..المغرب كاذن فجوامع المدينة الحمراء…صوت السقاية كيتسمع فالرياض…وصوت الهضرة وضحك ديال نساء الصافي…هبطات حبيبة يلاه مبدلة لبسات تيشرت طويييل تحت ركبة وصندالة صبع..ضفيرات يشقشقو يبريو…لقات عمتها جالسة كتكب فبراد اتاي برزتو وحداها ناديا وللا رقية كتحط دواز اتاي…
لطيفة. : بسم الله على زينة البنات القشة البيضة…
حبيبة”ضحكات ومشات حداها وعلى كتفها تكات وراحة زايرة بالها” : ههههه منجيش بلاصتك اعميتو…كبي معاك واحد الكويس…”شافت ف مها” اهيا ماما فين جدر…
ناديا : كيدوش گاليك….
لطيفة : البالا گاليك شميت ريحة بيطاني طلع يجري…
بقاو يضحكو عليه تا شوي سمعة صوت ساروت الباب تحل وهو يدخل كتافو طايحين..راحتو مهدودة والهم تمكن منو…تعجبو من مجيتو فهاد الوقت تا وقفات ناديا مشوشة وعلى حالو مسولة…
ناديا : الحاج ياك لباس
م.حفيظ”كيهضر وصوته عيان واكل دق المرض” : عيان شي شوية…
حبيبة”على طولتها وقفات وبالها تشوش وراحتو مشات” : ب بابا…مم مالك..وجهك مزنگ…”مشات تجري لعندو قاستو بايدها وباست راسو بفمها كيف كيدير ليها الى بغا يقيس سخانة”. بابا راسك سخون واقلة…
لطيفة. : ياربي سلامة..كي طرا ليك الحاااج…
م.حفيظ. : وايلي ههه وهادي هي صحة الشارف بينبقا هي واقف وضروري شوي طيح وشوي نوض ههههه…”كيكحب”
حبيبة : بابا نتا مكتمرضش دغيا الا لا نيت ضربك البرد ولا كنتي مقلق…مكنعرفكش !!..
ناديا : ايوى خليه يمشي يبدل ويتكى…نعطيه دوليبران…
حبيبة : وحتى سيرو سمعي الكحبة…”مخسرة سيفتها…قلقتها حالتو كتكهره شي حاجة سميتها المرض فباها”
م.الحفيظ : هاهي بغات تبات حدايا اليوم…عقلي هههه…”مشى لبيت وتبعاتو ناديا تاهي مشوشة”
حبيبة : ماتشوف هي فيها…
لطيفة : هههه گعدي گعدي باك را بمرتو…ههههه…
حبيبة : بابا مكيمرضش بزاف والى مرض كيمرض نيييت..مكنحملوش يمرض…
لطيفة : ويل شيطان راه انسان ابنتي…الى ماخانتو صحة ليوم تخونو غذا…شدي شربي اتاي دابا يولي لباس ان شاء الله…
شدات حبيبة البكر داك الكاس جغمتو تصرطها وجغمة دورها في فمها…كبدتها حااارة من جيهة باها…
ناديا”عطاتو تيشرت بيض قطن داخلي..ولبس سروال قندريسي..سمى الله وجلس فطرف الناموسية” : بلاتي متشرب دوا بنجيب ليك تعشى هو لول…
م.حفيظ”هز ايدو موقفها” : ماعندو منين يدوز..عطيني هي شي مانطة التبوريشة هلكتني…
ناديا : وايلي كاع مانطاا ؟؟…واخا هي تكا نجيبها ليك…
تنهدات على حالتو…جابت ليه مانطة من واحد دخيلة كاينة برا شافتها حبيبة غاديا بيها وقلبها طاح بين رجليها…غطاتو بيها وزادت عليه تاني..
ناديا”تحنات عند راسو مسولاه مال همو” : مالك الحاج ماهي بعوايدك…
م.حفيظ : هههه والعمر كيدوز وصحة كتقلال الحاجااا…وبيتي نبقى هي صحيح !! ولواه الشبان وطاحو بالمرض هي انا ماشي انسان…
ناديا : حااشا اتاج راسي…عشرتنا طويلة خلاتني نعرف مرضك من همك…ياك لباس ؟!…
م.حفيظ : ايوى دعي ربك الستار…
ناديا : حتى توگض وبيناتنا كلام..كيف العادة حط راسك على كتفي وشكي…
م.حفيظ : مكاين من غيرك من بعد الله…
ناديا”طبطبات عليه وباست جبهتو بحب” : الله يشافي…انا نجيب ليك واخا هي باش تقوت ودوليبران وسيرو كحبتك واعرة…
ملي غطاتو وجابت ليه ماياكل…كلا غي شوية بززز باش يدوز داك الوا…جات لطيفة طلات عليه لقات سخانتو تقلب فيه وتعاود…حبيبة العشا ماحلا ليها غير شادة تيليفونها داخلة لانسطا طالعة هابطة حتى من روايتها ماجا على بالها تقرا وتنغم بيها…غير كتقول صافي را نعس ولقى راحتو كاتجي الكحبة تگوليها فين هي راحت…كحبتو كضرب ليها فصدرها…هزات عينيها بانت ليها ختها وردة ومعتز متكيين على بعضياتهم شادين طابليط كيتفرجو ويكمعو وهي تنطق…
حبيبة : وردة…
وردة”شافت فيها” : نعام احبوبتي (كيقولو ليها حبوبتي)…
حبيبة : سيري احبيبتي نتي ومعتز نعسو…ها دادا بتمشي معاكم.
رقية : ايه يلاه تنعسو الحال تعطل…
حبيبة”جاو لعندها باسوها وباسو عمتهم اما ناديا داخلة عند الحاج كتدهن ليه صدرو بالبومادا” : الله على ريحة..تصبحو على خير…
داتهم رقية لبيتهم غير تم حدا بيت باهم ومهم…نزل ايوب من فوق كان كيهضر ويقاد فمواعيدو…حتى جلس حداهم لابس تيشرت وسروالو كارويات بيجامة رجالية..نازل وكيدهن فايدو بواحد الكريم وينقي فضفيراتو…اتا سمع كحبة الحاج وكمش وجهو…
ايوب : اهيا كحبة ناضية هاديييي…ضربو البرد !؟؟..
لطيفة : ويادلي را ضربو البرد واخا تقيقت…
حبيبة. : لا بابا ماشي البرد..بابا ضاراه شي حاجة..هاد اليومين مقلق وقبل كاع هيي مكيبينش…”سدات تيليفون ولاحتو بملل” نوض نشوفو…
لطيفة : وصبري تاتجي ماماك من عندو…
حبيبة : ندق عليهم…
بالها ماهناش..خاطرها دا ليها رجليها لعند الحنان عليها…لعند باها وصديقها…لعند تاج راس امها وسندها هي…الي حلات عليها عينيها يجيببها ليها غير تبقى ليه حبيبة على خاطر خاطرها وميقلق ليه حد البكرة ديالو…الكبدة من بعد شوق سنيييين فالولاد…الي عاش معاها معنى الابوة والي نغمات ليه وذنيه ب “بابا”…والي فرحاتو فقرايتها وهزات ليه راسو…
دقات الباب وبالصدفة ناديا حلاتو كانت خارجة…شافت فيها وشافت فعينيها الحزن والخوف…حركات ليها راسها وگالت ليها دخل ريحي قلبك…لقاتو متكي على كرشو كيف قالت ليه ناديا باش تحبس عليه الكحبة…حطات ايدها على جبهتو وهو يحل عينيو على شكل غميزة…معسلة بالسخانة…
حبيبة : عرقاااان ابابا…
م.حفيظ”غير كينين حدو حرك ليها راسو”…
حبيبة : واشنو ندير ليك…
م.حفيظ : شربت دوا درت بومادا نعطي المرض ايامو وبيفوتني..سيري نعسي صباح بنديك لسيارة التعليم…
حبيبة”فرحات” : الى هاكا صافي نمشي نعس هههه…”باستو فجبهتو وباست ليه ايدو تا تبسم وهي تخرج مخليا يقلب على راحتو”…
الليل على جهدو وطولو والكحبة مخلات فيه غير الي نسات…ناديا نعاس ماشافتو مع هاديك الكحبة والسخانة وتبوريشة حتى تمكنات منو وخلاتو يگول اش ضارو…واخا مافهماتش حدها كتسمع غير…”حلها يا حلال”…
الفجر اذن…صوت تقرقيب على برا…الحاج خرج من بيتو كيحنحن وبصوته العالي القوي كيقول “الله اكبر…لا اله الا الله…يااا الله اللهم لك الحمد”…هبطات توريا بغات تشعل ليه شوفو باش يلقى ما سخون فروبيني…بانت ليها البوطة عيطات..
توريا : سيدي البوطة تقادات نسخن ليك المقراج…
سعيدة : انا راداه يسخن دابا نعطيه ليه…”بان ليها يوسف هابط كيحك فعينيه ومبتاسم القلب البيض فهاد دار” يوسف فقتي ههه
توريا”ضارت شافت فيه ورجعات شافت فشيخها” : سيدي يوسف بغا يمشي يصلي معاكم الفجر…
ع.القادر”ضحك بفرحة وعنقو بجنب” : الله الله مرحبااا الله اودي الغاالي هذا هههه…توضيتي…
يوسف”للتذكير راه من ذوي متلازمة داون” : ت وو ضيت اباسيدي…نصلي معاكم…
ع.القادر : تسناني نتوضى ونمشيو جماعة…”ضار غادي كيحنحن ويذكر الله” الله الله الله اكبر…لا اله الا الله…
شوي تم نازل هاشم غير بفوقية بيضة وتابعو رضوان تاهو وسيحمد حيث كي يصليو غايمشيو لسواق ديالهم حيث كيبيعو ويشريو فالبهايم…وكاين الي كيكريهم باش يديو ليه شي فياجات…كل واش كيبغي يهز فالكاميو للسوق ولا محلات…ولا كيدي الغلة يبيعها..عطى الله خيورات العاطي…
هاشم”نازل كيدوز على وذنو ويتمتم حيث يلاه موضي..شاف ف توريا” : ختي توريا…
توريا : نعام اولدي…
هاشم”حك لحيتو بتفكير منين يبدا لغاه واش فبالو يخرجو” : الحالة المدينة عندك…ولا عطيني غير نمرة…
توريا”جمعات حجبانها بفضول مروي قبل..غير بغات تاكد” : لاش بغيتيها ؟!
هاشم”حنحن محرج” : شي عقود ازدياد ناوي نخرجهم هاد نهار..ومحتاج فشي وراق…”شاف فيها بعينيه زعما فهمي”
توريا : هاشم…الحالة المدينة ماعرفت فين لحتها ونامسينا(ولبارح) ملي قضا ليا باك غراض وراق يوسف…ماعرفتها فين “بشوفات ديال هادشي الي عطا الله”…
هاشم : وغا شوفي محتاج بيها…
توريا”هزات حاجبها وبشافت فيه بجنب” : محتاج بيها ؟ داخل مع ولادي فيها ؟!..هاشم الي بغى الحالة المدنية يجي يديها من ايدي لايدو…”يلاه غادور تمشي وهي تسمع اسمها بلسان عگوزتها تا ضارت لعندها..لقاتها جامعة حجبانها ومصغرة عينيها فيهم”…
عيدة : عطيه الحالة المدنية…عطيييه خليه يقضي شغلو…الي ضرك را مضرورة كثر منك ولازمة حدي ومكمداها فگلبي حيث هذا معطا ربي جات على يد العبد…عطيه..والي فبالك نقضيوه ليك معاه..حطي جنبك ليمن على راحتو…
حركات راسها وهي تشوف فهاشم وعطاتو االاشارة بعينيها والمعنى من بعد…الي فراسها فراااسها..تنهد هاشم بقلة حيلة معاها ومشى لجامع يلقى الله…اللهم مع الله ولا مع العبد..كحل راس خايب مغايزيدو غا هم…
توريا : لالة الحالة المدنية تانسالي ونعطيها لهاشم غير هناي..
عيدة : ونتي مالك شديتي بني عكس…ماهو من مسواك هاد الحرة…قضي شي فين يجي شي…ياك بغيتيه يتجوج ويدير العاد وندگو ليه وتادو هنا ؟!
توريا”ضحكات باستهزاء” : هههه وتادو دگهم ليا مع الكاف.رة بالله…
ع.القادر”جاي داخل ووذنيه رماو ليه الحديث لاخير” : سيري هضري معاه…شوفي اش فراسو والي بغاه حنا فيه معاه…
توريا : عيطت ليه فتيليفون عطاني جوابي..هذا ماعطى الله…
ع.القادر : والي بغا العسل يصبر لدقة نحل…والي بغى غراضو يصبر لعراضو…حدري راس وطيحي الكواري تا توصلي فين بغيتي…رخفي ابنتي شوية رخفي لا تقويش ولا ديري العصا فرويدة…نمشيو معاه بالخاطر تايدير لينا خاطر ولا “خبط عكازو منرفز” نبقاو بلا خاطر…كي گالت الحاجة ديري بوجه شي فين يجي شي…لا تعكسيشاي الله يرضي عليك…
توريا”تنهدات مالقات من غير كلامو الي دايز وعندو الحق” : واخا سيدي واخا ميكون غا خاطرك…
ناضت توريا محاولة تهبط كواريها وتمشي بالخاطر تايحاولو معاه يدير ليهم الخاطر ويشوفو حل والحل باش يتدگ ليه الوتاد فالمغرب هي يتزوج ببنت بلادو وهذا هو معنى ” كيل زرع بلادك وخا يكون شعير”…
ع.القادر”عينيه بقاو عليها تا مشات لكوزينة وضار عند الحاجة” : راه جاي هاد اليومين شوفي لاما وصل اليوم فالليل”هز كاس اتاي شرب منو”
عيدة : دوا عماك (معاك)…
ع.القادر : هاشم الي گالها ليا…يضهر ليا مناوي يهضر تايجي يبغي يشوفني ويشوفك…شحاال هادي ماشفتو ربع سنين وجدر…جا يومين مالحگت نشوفو قضى مع هاشم اش داكشي بغا هاو صد لديك البلاد…يبان ليا مطول فهادي…
عيدة : فهادي حاول معاه ولاگيني بيه…الهضرة فاالقجاقل (تيليفون ههه).. ماتبرد الجوف…يهضر معاك اليوم وسير لاما غب عليا بشهورة…
ع.القادر : ماگادش ماگادش الحاجة…طبعو خيب وزاد خياب را حنا شادين غالخاطر حيث عارفين مسواه…عارفين الوقت حسكاتو وضبرات جرح والملحة ترشات وباقا ترش…مكاين دوا من غير يفوض امرو لله…
عيدة : لاگيني بيه نجبد معاه جواج…يدير ليا خاطري…وتا ديك الكاف.رة بالله الي بغى منين حتى عليها منين….
ع.القادر : وشكون عرف !! هاشم الي يجيب الخبار تاهو ماعارفش…يدير الله خير…وهاهو بغا ليك منين تجيبي ليه العروسة ؟ حاطة عينك على شي وحدة من بنات دوار ؟!…
عيدة : هاو وكيف العادة عيني على بنت الاصل والمعدن التقيل…گليبي رتاح لبنت خت المشاوري هاهي تبارك الله دازت يومين خشات راسها مع عيالات لواسها…
ع.القادر : وهاد المرة الخاطر فين زاد وحط وسادو ههههن
عيدة : بنت المراكشي تاجر صاحبك…
ع.القادر”جمع حجبانو” : اناري بنت مولاي حفيظ…
عيدة : ايييييه…ديك سنان الحليب زينها يحنت عشرين…دخلت ليا هن لگلبي وعششت…
ع.القادر : موحااال تبغي جواج هاديك…
عيدة : مالها الي متبغيه ؟ مها گالت باغيا تكمل علامها (قرايتها) طمعها ببرا تحل عينيها وتگول واخا گبل (قبل) ماتبحث جوابها…مزينها نسوبية لا كملت…هاديك هي الي تدگ ليه الوتاد وتعلم…عيدة كتگول اش شافت عيدة را داز عليها زمان شيب الراس…
ع.القادر : وعرفتي زين نسوبية بوها شحاال نتسالوه !؟…
عيدة : حسبو صداقها والفاهم يفهم…
ع.القادر : واخا تكون توزن بذهب مايجيها داك صداق…فلوس صحيحة الحاجة…
عيدة : تنگوليك ونتا دير بالري. وشوار…”حركات ليه راسها مصغرة عينيها فحال كتفكر”. وراها تزون بذهب…
ع.القادر : ماعليها لين ؟(زعما منها ماتخلاقي)…
عيدة : جواج مكتاب…الى ماكتابتش ليه ماعندنا منگولو گدام الله…جاب الله تيسير راها مكتابة ليه فالسما ومعند العبد مايفرق…هي الي بغيت…”طبطبات ليه على كتفو”…شوف لينا شي نهار عندهم…علمهم ولا كتب ليا نمرة نعيط لحسام ولا سعيدة ينابيو (يعيطو ليهم) عليهم فتيليفون…وانا نهضر معاهم وديك ساعة دينا…
ع.القادر : وتوريا اش تگول فهادشي…
عيدة : باغا دگ ليه وتادو وتبرد عافيتها…علاه هي لاش دايرة هاد الحالة “خرجت عينيها واكدات براسها كتحركو” گالت هذا طفى من جيهتي مابقى يجي يطلب ولفات طيح عليه دل بطليب..شافتو غبر هاد ربع سنين كل عام تگول هاهو يعيط لهاشم يگوليه جيبها ولا لاگيني بيها وتشبعو هضرة ماعندها ساس ولا راس…حتى سمعات راه بغا يدير المراة برا بلادو حمات البيضة وكوات القاع…وهذا الي كان…
ع.القادر : ياعوذ بالله ياعوذ بالله…”حرك راسو كيطمنها” كوني هانية نشوف كيفاش ونعطيك الخبار…
عيدة : لا تعطلش هادي هي الوجيبة….
ايييوى فاللحظة الي الحريرة كتصايب ليها…دازو ساعات وهاهي جالسة كتشرب كاسها ديال اتاي الي كتعشق…لبسات سروال توب طاي هوت بصديقات مذهبين وزوج سماطي ديالو فوق كتافها وتحتو قميجة بيضة نص كم صدايفها ءهبيين تاهي ديال داك سروال…وصندالة صبع كحلة مذهبة..مخلية ضفار رجليها طبييعييين رسات ليهم ليكخون سبراي على شمس وضافرة شعرها سبولة تالفوق..ريحة الفانيليا تعطي منها…مكتافية غير باسكخون شمس صافي ومرطب شفاه…هزات عينيها الخضرييين وتبسمات وخا بان ليها عيااان باقي غايكحب…ناضت تزرب لعندو باستو فراسو وايدو…
حبيبة : على سلامتك بابا…
م.حفيظ : الله يسلمك كحكح كحكح…واجداااا ؟
ناديا : معندك فين غادي راك غير كتمشي وتبغي طيح…ايوب يوصلها…
ايوب : فين غاديا اجدرة ؟
حبيبة : لسيارة تعليم هي هنا فجبل لخضر (بلاصة فالمدينة القديمة نيت حداهم فرميلة)…
ايوب : تگلعي..انا بيندوز ل محل فگيليز..”شاف فعمو” اعمي الله يشافي ماتيجيش معاك المرض…
م.حفيظ”ضربو بخفة لراسو” : هي صبر نتوگض ليك ونتوالا ليك..
داز نهار خور وجا نهار جديد…سمعات دقان فالباب وهي تنوض من فراشها كتفوه زعما راني ناعسة…حلات الباب وهي توقف مقادة…شافتو واقف بلبستو ديال القياد…حيد كاسكيط من راسو حكو ونطق…
هاشم. : لبسي حوايجك هاني كنتسناك لتحت…
اشراق : علاش فين غاديين…
هاشم : جا خوك بغى يشوفك نتي ويوسف…
اشراق”قلبها هبط لارض فلول من بعد تقاد ورتاح ملي قال ماين تا يوسف..حركات راسها” : فراس مي ؟ خفتها تبدا تعاير كيف ديما…
هاشم : ماعندك سوق…مك فخبارها طلقيني مزال راجع نمشي لخدمتي راني غير شاد هاد نص نهار بزز…
حركات راسها وضار هو مشى وهي دخلات مشات كتجري لماريو جبدات قميجة طويلة حد ركبة وسروال دجين…لبساتهم ومشطات شعرها جمعاتو اسفنجة…شافت ضفارها خافت لا تكون فيهم صباغة وتنسى وتخليها…يلاه غاتخرج وهي تضرط ريقها ووقفات رجعات لماريو حلات المجر جبدات تيليفون الي متشعلش وتگووول من نهار قالها ليها ماقربت ليه…دارتو فصاكها صغير وسمطتو طويلة…لبسات صبيبيطها..وخرجات نزلات لتحت بان ليها حسام تاهو لابس وخارج…مابانش ليها يوسف قالت را فسيارة خرجات وهي تلاقا امها…
توريا : فين صادة ؟!
اشراق : مم مع عمي گاليا يلاه معايا حي..حيث…ممم
توريا : گادي هضرتك…غاديا تشوفيه ؟! علاش مالو جا ؟
اشراق”هزات كتفها ب معرفتش فقط”.
توريا : ممم” لوات شالها البيض مزيان وحركات راسها..يلاه بغات تگوليها رحعي وهي تفكر را ماشي فصالحها تعاند وتشد ضد…” ممم سيري وماتعطليش…باش طلعي تحكي لامينيو (ماعن اليمينيوم) مع بنات عمك ومرت عمك ربيعة…”شافتها بغات تبدا تهرنن وهي تخنزر” عمتك مليكة جايا هاد ليام هي وولادها…يلاه تعاونو باش نخملو دار ونحكو زرابي…
ضارت ومشات خلاتها بغات تهرنن بالفقصة حيث را دار قد سخط بفراشها غاتخمل…لقات عمها كيهضر فالتيليفون ويوسف مكاينش !!…ركبات معاه لور وحسام حداه…خرجو من الفيرما وطريق طرقان الي ضربو تا وصلو لمراكش…خذاو طريق اگفاي حتى وصلو لواحد الواحة ووقفو…
حسام”خشا تيليفون فجيبو” : هاهو جاي فطريق…
هاشم”ضار شاف ف اشراق الي كتشوف فشرجم. ورجع شاف قدامو وتنهد..مدة حتى بانت ليه سيارة jeep wrangler 4xe فالگري..ماتريكيل ديال برا D » matricule deutschland”(المانيا)…جايا وتطلع وتهبط مع العقبات…تا وقفات حداهم..نزل هاشم من بعد ما ضار عند اشراق…فلول قاليه يجيب تا يوسف ولكن فلاخر قاليه تالغذ ليه…نزل تا حسام ووقفو مبسمين حيث مدة ماشافوه اخر مرة كانت قبل ربع سنين…وقف شوية تا سكت طوموبيل..
كان لداخل عينيه حادييين كحلييين وحجبانو طوال مبعثريين تا بغاو يوليو مگرونين منفوخين داك نفاخ الي مخليهم متورمين حتى عطاهم تغوبيشة حارة….حروشيتو ملفتة…ولحيتو كحلة مبعثرة مطول شوي مسطاجو الي غطا ليه ندبة جرح قديم الي جا بين شفاه الفواقنية وشفاه تحتانية ديجا مخيطة…وقف مدة تا قاد تريكو قطن كحل صيفي بالكمايم الي تجَعْلك شوية بالطريق طويلة.الي ضرب….من قبل مايحط رحالو فهاد لارض الي وقف فيها مصايب طريف كلينيكس فيه شي عشوب مهدئة وطواه وجر شوي شنافتو تحتانية تا دارو بين سنانو وشنافتو وهنا الحديث كايدينا لمعنى واحد وهي الكالة!!..شاف فمعصم ايدو الكثيفة الشعر تا من صباعو مشعرين…لقى الساعة الحداش..
هز عينيه بانو ليه واقفين وحل الباب تا سبق رجلو بينما يهز تيليفونو…رجلو الي مخشية ف بروتكان كحل طالع على سروال زيتي ديال ميليتيغ(ستيل عسكري)….نزل وبطول ديك الجيپ العالية هو فاااتها فالطول…شعرو كثييف وخا ناقص منو كيبان قوي…بنيتو الجسدية قوية…كيبان ليك من بعيد طوييل ومگضر نيت…طلع كمايم تريكو عند مرفقو تا بانو الضربات فايدو ليمنى.. الي داير فيها نيت ساعتو الجلدية….دار نضاضر رايبان على عينيه..بانو حجبانو طالعين الي اصلا طالعين وزادو طلعو بالتركيز فالشمس…تم جاي لعندهم هز عينيه فهاشم الي قرب ليه تا تعانقو كيخبط ليه ضهرو بجهد…قرا ليه هاشم الحساب وسولو…
هاشم. : علاش مجيتيش فطيارة ودرتي الباطو…
بشار : مايصلاحش ليا طيارة دابا…
حادرة عينيها…كتشوف غير داك البروتكان ديالو بوحدو رعبها خلي عليك فاش يهضر بصوته الي نبرته مدعدعة فيها بحة مزعزعة…تا عيشها الله وسمعات صوته الي قال بيه منادي اسمها ب ” اشراق”…
اشراق”هزات عينيها فيه وتبسمات تا دعمو عينيها..قربات ليه” : خويا بشار…
بشار”جرها عنقها حط راسها على صدرو محاوطها كيبوس ليها فراسها…مدة وهو كيقنع من حضنها..حضن ختو الي كتفكرو بفعلتو والي كتخليه يزيد يكتم غصتو وفقصتو…وعلاش هو دار ديك الكالة…من اصلو…نهى العناق ورويان الشوق بكلامو” : لباس ؟!..كبرتي…
اشراق”تبسمات” : شوية هههه…
هز عينيه شاف فخوه هاشم…مولفينو خوهم حيث كبر معاهم..قرابين لبعضياتهم فالعمر…تبسم بجنب..وبدا كلامو موجهو لهاشم…سول على الحال والاحوال..مدة بين الاخذ ورد وتسوال…عطا لكل واحد وقتو…وجر اشراق معنقها بجنب تا وصلو لطوموبيلتو خلا هاشم هو وحسام دخلو لطوموبيل خلاوه يهضر معاها…
بشّار”هز عينيه كيشوف قدامو ورجع حدر راسو عندها مقرب ليها نظرا لفرق طول ربي” : خليتي يوسف فالدار ؟!
اشراق : ممم…يمكن مشى مع باسيدي…يمكن مع “حكات راسها” م مم مي…
بشار”حرك راسو” : مزياان…ونتي اش درتي ؟!
اشراق : ف فااش !!
بشار : سمعت مانجحتيش ثاني هاد العام..اشنو المشكيل عندك..”كيهضر بطريقة عاااادية مبردة وخا صوته قاسح” خاصك السوايع الاضافية !؟
اشراق”الصمت”
بشار : جاوبي ماتردميش فمك..عطيني اش كاين باش نعرف اش ندير…
اشراق : مااعرفتش…والله حتى حفضت والله..ضلموني فالنتيجة والله…كاينين شي استاذة مكيحملونيش شادينها فيا حسيفة…
بشار : ضلموك ليا ولاد لكلاب…”حك لحيتو مثقل”….دابا نشوف معاهم خرجي نتي السوق…فين تيليفونك عطيه ليا..
“مد ليها ايدو كتشوف فصباعو كيتحركو بمعنى عطيني..اش عندها ماتگول..فالبلاصة جبداتو من صاك كيف الامانة الي رجعات لماليها…من ايدها لايدو…شافو قلبو من وجه وضهر وخشاه فجيبو..عاود عنقها بجنب وقرب اكثر لسيارة حتى تكات ضهرها عليها..كتهز فيه عينيها كيضرها عنقها غير وقفتو كتخلعها…
بشار”ببرووود تام” : العام لول اش گلت ليك فاش عطاه ليك هاشم ؟!
اشراق : الى نجحتي العام جاي نجيب ليك سيري لاخرة فيه..
بشار”عوج راسو والمعنى” : مزياان معندي ميتسالك…العام ثاني؟
اشراق : بيسي بورطابل…
بشار : تبارك الله…فين هو النجاح فهادشي ؟”حرك راسو كيأكد” سيري كملي… عطيني جوابي…
اشراق : م مانجحتش فالعام لول ولا ثاني…
بشار”بصوت خفيييف” : ماجاااابش الله….ضلموك گلتي…”سكت مطول فسكاتو ماتعرفي ساسو من راسو..تا نطق ثاني”…فالدوار باش مسميني ؟..
يلاه بغات تجاوب تا جمعها معاها بواااحد مولاتي صلية بضهر ايدو لحنكها..طارت ونزلت والبكية تكتمت…عينيها خرجو ولكن باقي واقفة فبلاصتها…ماتصيبش تحرك ولا تغوت ماتصيبش..والجواب عطاتو واخا صلاها معاها…
اشراق : مسمينك ب “تنخصيصة حابساها تا تقجت” الغابر ليه ساس…ولد الرحماني الغايب…
بشار : وفداركم ؟!..وعند مك ؟…
يلاه غاتجاوب عاودها بصلية لحنك لاخور تا بان ليها ضو كيشير فديك البلاد…مابكات مغوتت..رجليها كيترعدو…قلبها يمكن سكت وعاود دق…وجهها تجيف وماتقدر تبكي…هاشم دار صباع ايدو فوق فمو كيشوف.من سيارة..حسام تاهو كيشوف…
اشراق : دارنا مسمينك ولد نور الدين ولا و ولد “زلقت ليها البكية وصرطتها..وجهها سخن” توريا …ومي ب ل م مسخوووط…
بشار : تبارك الله… ياا اشراق… ندييييه هاد سخط ندي عدو ربو ماعنديش مشكيل..نتي ؟ “بصوت منخفض مقرب ليها وكيهضر باارد” غير قراي وتمتعي…عيشي ونشطي وفرحي كوني حسن من بنات دوار..مابغيتيش ديري دارك مكاين الي يبزز عليك…قراي شدي الباك ونجيبك لعندي تقراي…ياك ؟..
اشراق”حركات راسها…زادها صلية اخرى تا نقزو دموعها هبطو بالحس وبانت طرشة فوجهها تا تگعد هاشم”
بشار : مزال مابردتيش ليا فضولي..اش محتاجة باش نفهم”طرطق صباعو بزربة” طلقيني عندي ميدار من بعد…اش خاصك ؟!….
عطاها الخاطر الي ما بعدو خاطر… مبراااااد..مكاينش ديك “غوت تا بح صوته” عارف اش كيدير…مكيبردش بالغوات…شافها حادرة عينيها وتنهج بغات تبكي وماقدراتش..عطاها وقتها…ضار دوز بلسانو على ديك الكالة ودفلها من فمو عطاها بضهرو ورجع ضار مع ضار مع قجها من قرجوطتها جيفها وخبط ليها حنكها مع البارشوك ديال طوموبيل تا غوتت وخرج هاشم من طوموبيل…
بشار”ببرود غمز بعينو” : اش خاص زبور مك تانتي ؟؟؟…
يا الله لو تعرف ماداز على الراس وداك القلب تا لونو كحال وشراييينو بخات النار بلاصة د.م….لو جربات ربع من الي داز على داك القلب والعقل لو طرطق اللول وخرج الثاني وشوف تشوف واش تصبر فهاد الحياة…بغاها تعيش فضل منو وتكون حسن منو…فضل يبقى مسخوط ويدي العيب على هي تكون العيب كلو…بغا يفرش ليهم الراحة ويغطيهم بالسعادة ويوسد ليهم راسهم بالهنا…ما على بالوش هو بشنو كيگولو عليه ناس واش هو…هو الي فاااات فات والي عطا الله عطاه…القلب ولا حجرة والكبدة مشات…
هاشم”تم جاي كيجري هو وحسام يفك الى كاين شي مايفك” : بشار تهدن الله يحفظك…
اشراق : اهى اخء ممم صافي صافي اهى…
زاد ضغط ليها على راسها مبقج ليها حنكها…كان داير فيها امل هي الي تقرا حيث يوسف ماقدرش يكمل قرايتو ماشي حيث من متلازمة داون وانما هو مريض كيمرض بزاف مناعتو ضعيفة شوي. وخاصو رعاية والاعتناء واهتمام بزااف..خاص العين تكون عليه والقلب معاه. والبال ضاير بيه…ماطلقها تا گالت الموت كتسناني…ضار لهيييييه كيدلك فنواضرو بشويييية كيحاول يسيطر على صداع الي فراسو من طريق طويلة الي ضرب وصل بالليل لاوطيل الي نزل فيه وفاق بكري مكاملاش ساعتين ديال نعاس الي نصو غير متكي كيفكر وصافي…هاشم غمز حسام يديها لطوموبيل ويجلس معاها وداكشي الي دار…
هاشم”كيشوف فيه كينهج بالحس” : رجعتي لكالة ؟!!!
بشار : لا…
هاشم : وايلي !!
بشار”هز ايدو” : مارجعتش..مابغيتش نهضر معاها بريحة شراب…مابغيتش نسب ليها الملة وانا مرفوع… ماغاندير والو…”جمع نفس وخرجها على شكل زفير طوييييل”
هاشم : ماهضرتيش مع با…
بشار : مزال…
هاشم : امتى ناوي تشوفو هو ومي..خوك رضوان وسيحمد سولو…
بشار”ضحك بجنب مستهزأ” : يسول فيهم الخير…”خشى ايدو فجيبو جبد تيليفون سمع صوت ميساج شافو ورجعو..هز عينيه ف هاشم بادي لغاه” خدام غذا ؟!
هاشم : نشوف وقيت بغيتي شي حاجة..
بشار : بغيت نشوف سعيدة.. مي وبا ويوسف…يوسف اهاشم يوووسف…ماحدي عندي سيمانة هنا..
هاشم : سيمانة !! واش هبلتي ولا مالك…
بشار : عاد غانهبل !!! “دار فيه ديك شوفة ديال هذا كينكت عليا ويخبر ليا فحجايات ضحك”
هاشم : وايلي اصحبي…ثلثيام ديال طحين فطريق وزيد تلتيام رجوع…قويتي على راسك…حاول تزيد…
بشار “زاد جمع حجبانو بتخنزيرة الي بانت من ورا نضاضر قاات.لة..شاف جيهة ختو الي فسيارة كتنخصص..ماجاوبوش اكتفى بديك نضرة وصافي..هو ك شخص ماعندوش قوة الهضرة بزاف..الى غايزيد كيقولها الى شاك كيسكت..الى راجع مكيعطلكش…”
بشار : دوك الوراق !؟!!
هاشم : موجودين…صايبت اش بغيتي مزال واحد الورقة غذا نجيبها ليك معايا هي والوراق فاش نجيب يوسف وبا ومي…
بشار حرك راسو وصافي…ضار جيهة طوموبيل دخل راسو جبد قرعة الما ديال سيدي علي وگوبلي (كيسان جوطابل) جبد واحد ساشية ديال دوا دارها فكاس معاها معيلقة صغيرة دالميكا للاستعمال الواحد مع ساشيات…خلط الدوا وتكا عليه كااامل حيث حس براسو بدا كيدوخ ليه مطنطن ليه بصداع…
هاشم : ياكما نسوگ بيك وحسام يتبعنا ؟!
بشار : لا بلاش…ماعندي والو…”رجع طبطب ليه على كتفو بشكر” يتوب عليك…
هاشم”شد ليه كتفو تاهو” : راك خويا اصحبي…خليني هاني عليك عافاك..دير بوجه هاد شيبات الي بانو…
بشار : نتشاوفو من بعد…
هاشم : وضروري كاين مايتگال…نسالي شي خدمة فالعشية وندوز نتعشاو على برا…
حرك ليه راسو وصافي…بقاو يهضرو ويتبادلو الحتيت الي كلو غير حديث هاشم اما بشار جواباتو على قد سؤال وصافي…حاول يتهدن ويتكالما…وهاشم خاطرو ماهناش عليه تا خلاه يوافق يتبعو تايوصل لوطيل ويدخل عاد يرجع اشراق لدوار…اشراق الي بقات تنخصص بالحس وحناكها تورمو بطريش عطاها صليات تموت متنساهم بدون مايرف ليه جفن ولا يندم…تا ضار عندها حسام قايل…
حسام : فين منخرك…
اشراق”كتنخصص ماتقدش تجاوبو تنفخ عليه كتخاف لا يرجع ليها خوها”
حسام”لقاها وجيبة يدير مابغى” : اااه هاهو على رقبتي لا حساب ليا فمك قول منخرك هاذ…ههههه خربق ليك لافيشور وطير ليك الكوادر…عطيتيه تيليفون ؟…هادشي غا مزال ماشافش اش فالتيليفون علم الله لا لقى شي عجب يلاه يلاه نوصي على الخزاين…
اشراق : وااااااااا دخل سوق رااااااسك “قالتها بالغوات تا ضار هاشم كيشوف اش كاين وبشار كان حادر راسو كيسمع لهاشم تا هز راسو”
حسام : هااااا سمعك…هاهو جاي يعاود الضالة لحنك لاخور..
اشراق : عافاك اهى اهى صافي سمح ليا سمح ليا…عافاك غايقتل.ني…ماتخليهش يجي اهى اهى….
حسام”مد ليها ايدو” : بوسي ايدي….
دارت صبعها ففمها عضاتو كتشوف فيه كيشوف وهاشم بقى كيشوف فيهم شوية ضار عندو ورجعو كيهضرو تا تنفسات اما قالت هاهو راجع يعاودني من جديد…باقي حناكها كيشنشنو ووذنيها كيسوطو…حسام عاد لقى فين يبرد غدايدو ويزيد…مدة وهما فالسيارة وهاشم كيهضر مع بشار…جهد ربع ساعة هاكاك تا بان ليها تصافح معاه وتعانق معاه بجنب خاشي ايد فجيب داك سروال الي عامر جيوب…تا قالت الله طلق ربي السراح وهاشم جاي حدرات راسها وبقات هاكاك كتبكي حتى حسات بالباب تحل وريحتو تشمات فنيوفها وهي تقفز لقاتو مخنزر كيشوف فيها بينو وبين ملك الموت غا شقة…
بشار : مالك ؟!!
اشرااق”مسحت دموعها بزربة وكتحرك فراسها ب لا بهيستيريا..هو كاع مسولها علاش كتبكي وهي جاوبات” : لا لا مكنبببكيش …
بشار : سي عارف مكتبكيش..مالك ؟؟
اشراق : ماماليش…
بشار : مزيان…تهلاي فراسك وردي معاك البال ليوسف..حتى نعاود نشوفك مرة جايا دوزو معايا نهار كامل…من هنا لداك الوقت ماتخرجيش من دار…سمعتيني !!؟
“ديك سمعتيني تقالت بنبرة تهديد والفاهم يفهم…حركات ليه راسها بواخا…ماشي غير احترام ليه حيث خوها الكبير…وانما حتى خوف منو….خوف من ردات الفعل الي عندو لا ارادييين…
سد عليها داك الباب…سلم على حسام وتواعدو باللقاء…وقف هاشم تا شافو ركب فسيارتو دغيا هز سانتيغ حطو عليه ديجا راكب…وانطالق غادي بشوااايا مع دوك العقبات بالخاطر داير مرفقو على شرجم وايدو كتدوز على شعرو بتعب…تبعو هاشم فالطريق تا وصل لوطيل oberoi…تا بان ليه داخل عاد ضرب دورة ورجع لدوار غادي فالطريق وكيشوف ف اشراق من المرايا ماهضر معاها ماتكلم وتا حسام حمر فيه يسكت…هاديك طريقهم تا دخلو لدوار وهو يدخلها تا نزلات كتزرب دخلات للدار وهو زاد هو وحسام…مع دخلت كانت غاديا طالعة تجرييييي تا تساطحت مع مها وهي تشهق…
توريا. : ياك لباس !؟…مالك كتنهجي ؟؟
اشراق : م ماماليش…
توريا : وكان ؟
“كتهصر وتصغر فعينيها كتشوف فوجهها وحناكها وجنب فمها الي تجرح شي شوي…يلاه غا توجد تطلع وهي تجرها وشداتها من ذقنها كتقلب فيها”
توريا : اش هاد الحالة…شكون دار فيك هادشي ؟؟ اويلي تغيس فيه هذا شتو ضرب ؟ شكون ضربك ؟!!!…
اشراق : ه هو اهى اهى…هذاك ولدك هو الي ضربني حيث منجحتش…
توريا : هو الي ضربك !؟..
اشراق : اه حيث منجحتش مادرتش اش بغا…الله ياخذ فيه الحق اهى اهى…ماشي سوقو نجح ولا منجحش انا مابغيتش نقرا بغيت نخرج ندور بغيت ندير الي بغيت…مابغيتش نتجوج…وزاد كملها شد ليا تيليفون وگاليا منخرجش و اهى اهى…” مزال مكملتها تا صلاتها معاها تاهي تا غوتت كتبكييي”
توريا : عطاك هاني عاودتك…انا لاش طيحت براسي وطيحت عليا دل وعيطت ليه لاش ؟…كتافي تهرسو وحملي ثقاااااال عليا قهرتيني وقهرتوني لاكانو الولاد بحالكم الله يگطعكم عليا…طلعي ابنت لحرام لبيت سدي عليك..هو گاليك متخرجيش انا نگوليك بيتك ماتخرجيش منو…”غوتات تا نقزت اشراق طارت لفوق…وهادشي داز على مسامع سعيدة الي لتحت”
سعيدة : لا حول ولا قوة الا بالله…
واخا كيشوفها على مدة طويلة كان بيناتهم اتصالات كثيرة…كبرات على الخوف منو والي زاد خوفها هو من حلات عينيها وهي عايشة وكابرة وفاطرة ومغذية ومعشية فواحد الوقت كانو شحنات مشحونة والقلوب مزال حقودة…تربات فطريا على ان “بشار المسخوط القت.ال”…
فواحد من افخم الفنادق في مراكش…فندق oberoi Marrakech المتواجد خارج مراكش طريق ورززات…يمكن اختيارو لهاد الفندق جاي من الهدوء الي باغي يكون بيه دماغو…باغي يرتاح من ضجيج الدنيا من بركان العقل وطوفان القلب…باغي يرتاح من تعب السفر طرييييق هي ضرب مجبدة من المانيا لهنااا…انسان قليل فين كيشد الطيارة…من غير مرضه ماعندوش مع البلايص العامرة بالبشري…قوة سير وجي شي غادي شي جاي كيتبرزط…
قدام جنان الخضورة على طولو متوسطاه ضاية غاديا فطويول ديال الماء بالسقايات…جالس قدام واحد طابلة فريسطو التابع لهاد الفندق…حاطين ليه فنجان قهوة سييييك مقطرة حااارة فيها جغيمة ديك جغيمة كيخصك ليها مدة باش تنغم بيها…ويخصك دماغها غير ريحتها كتقاد الراس وترجعو لبلاصتو وهنا المعنى كيمشي لعشاق القهوة بصح…قدامو طفاية ديال الكارو الي فيها سيجارة قربات تكمل وتحطات مزيال شاعلة…وقرعة ديال الما مع كاسها…فوق منو سواري بتقاوس طابع الفندق ديال رياضات الفسيفساء القديييم والزليج المغربي العريق والاصيل…كتحس براسك دتخل لقصر القايد ولا سلطان السلاطين…فزمان الف ليلة وليلة…
جالس جلسة مفرق رجليه وداير نضاضر شمس فعينيه..حاط مرفقو على ركبتو وايدو لفوق كتدوز على لحيتو بتفكييير…وبين صبع السبابة والبنصر كاين سيجارة دخانها طالع وجمر فيها شاعل…عااااايش فدوامة تفكير….هاديك جلستو..مرة مرة كيهز فنجانو يشرب منو…حتى سمع صوت التيليفون ضور راسو غير بشوية وهزو شعلو لقاه ميساج منها…الاسم كان اسم على مسمى…anzada…
هانزادا : .Ich warte dass du mit mir redest… Du bist so spät… (“كنتسنى تهضر معايا..تعطلتي عليا”)..
شاف رسالتها…قراها كانت فالواتساب…مجاوبش ماشي فالمزاج يجاوب….فاش كياخذ وقته وكيبغي يتخلوا مكاين الي يقلق ليه راحتو….سد تيليفون حطو بكل برود ورجع تاني لقوقعة التفكير….هز غير صبعو وتم جاي الناذل باليونيفورم صميجة بيضة وسروال كحل فوق منو جيلي بتصميم زي التقليدي هاد النهار كان هاد الطقم هو الي حاضر…حط ليه الفاكتيغ وسط بوشيط..جبد كارط بونكيغ visa الي كاتخدم فاي بلاصة فالعالم…خلص بيها وناض هز تيليفونو وكونطاكت سيارة وخرج من ريسطو…طلع نيشان لفوق حاس براسو طاقة باش يفكر ولا يتبرزط مكايناش راسو بدا يزنزن وماشي فمزاج يبقى حيث الحالة تقظر تجي فاي لحظة…
العشية تعاشات…المغرب اذن…وسط سرير لايح الكسدة عاطي بالضهر عريااات كتافو عراض ووسط ضهرو كاينة واحد شحطة طوييييلة تا دارت سيكاتريس هكاك بقى ليه فضهرو باين…تيليفون كيصوني وشكون يجاوب !! شكون يسمع وهو خاشي راسو بين المخاد وتيليفون اصلا على الوصع الصامت غير كيشعل وصافي….
هاشم را عند باب لوطيل واقف…زاد تشغل بالو وزاد تهول وتشطن…اش غايدير ؟!!..يتسنى تايعيط ليه حيث مولفو هاكا..ايه ولكن مولفو وهو بعيد…ماشي وهو حداه بينو وبينو غير امتار قليلة…من بعد ماداز وقت من زمان عاد بدا كيتحرك…هز راسو عينيه حمرييييين وعروقاتو تكب تا طلقات منو السخانة الي خاف منو وقع…كااايعرف راسو غير كيحط رحالو هنا ولابد ماتزورو…ضار تكا على ضهرو وحط دراعو على عينيه كيتنفس بشهيق زفير…حتى ضار وشعل ساعتو سمارت لقى الساعة تمنية وفالساعة بان ليه بالي هاشم صونا ليه حطها وهز تيليفونو دوز ليه الاتصال فالبلاصة جاوب هاشم مخلوع…صوته مبين رجفتو والهول الي شدو…حتى قال “الله يا خويا الله”
بشار : مالك ؟!
هاشم : من صباح وانا هنا مكتجاوبش خلعتيني اصحبي…
بشار : وايلي تانتا…فينك ؟!!..
هاشم : لتحت…تسنيتك وليت دخلت ل ريسطو هنا….نتسناك ولا باغي ترتاح مزال !!…
بشار” صوته واخا قوي…غالب عليه العيا التعب” : لا… جاي عندك…
بقى عشرة دقايق تا قاد مزاجو مرخي مسنط لعضامو وتزنزين الي فدماغو…قصد الدوش…حك سنانو مزيان وجبد واحد ساشية فيها غبرة بيضة فيها ريحة فليو تحنى على لافابو كيدوز على شنايفو وسنانو بصباعو خلاها مدة …عاد مشى دوش غسل من العرق الي تصبب عليه…وخرج كينشف فحالتو وشعرو…رش ديودرنت عليه كامل باش تنعش ليه ذاتو وميعرقش بزاف حيث را طنطيييينة وصهد رب العالمين فمراكش…لبس عليه تيشرت زيتي لاصق…وسروال دجين كحل..جلس فجنب تالبس داك البروتكان…هز تيليفونو ودار ساعتو حل الباب بالكارط بلوثوت وخرج…غادي بشويا واخا كل خطوة فيها متر قياس الخير الا ان مشيتو ثقيييلة يلاه يلاه الي بغا يربح العام طويييييل…تا نزل لقى هاشم عند طوموبيل ديالو…
بشار “لاح ليه ساروت سيارتو فهم بالي بغاه يمشي معاه فسيارتو jeeep” : سوگ نتا…راسي مفرووع بجهد…
شد من عندو ساروت…لمح فوجهو التعب..التعب المكتوووم الي مكيبغيش يبينو لشي حد…همو كيلمو غير مع راسو براسو…واخا كيكبت ويكتم فمرضو وغصتو كيبقى انسان والانسان عبد ضعيييف والقوي هو الله وحده تعالى…يعيى يبان جبار كيبقى مخلوق ضعيف قدام الله…تنهد هاشم مابغاش يحكر فتسوال. وخلا انه يروي الفضول حتى يحس بيه بخاطره حيث كيبان ليه ماعندوش گرام ديال الخاطر غير مكابر ومعدي…
هاشم”ديمارا طوموبيل وكيقلب فيها جاتو فشكل تا ضحك مبدل ساعة باخرى” : تا هاد الخير يلاه خذيتيه !؟…” ضار شاف فيه حرك ليه راسو” تبااارك الله…
زاد فالطريق خارجين من تما وكيضهر…
هاشم : الوراق بقاو فطوموبيل خليتها دابا…
بشار : ماشي مشكيل…
هاشم : فين نتحركو ؟!
بشار : شوف شي بلاصة مهدنة فيها الوقت…
هاشم : ياكما بغيتي البار ؟!
بشار”جاوبو بغمزة بجنب بمعنى تت…لا ونطق” : ماعلى باليش دابا…
حرك هاشم راسو وزاد مع الطريق…لمراكش المدينة…فنفس اللحظة وفنفس المدينة… فالرميلة حلات الباب بساروت ودخلات لقاتهم جالسين فديك الجليسة ف قاع الدار…سلمات عليهم وشافت هنا وهنا مابان ليها…تهولات وعينيه وساعو…وقالت بابا فين هو !!!
ناديا : خرج مع صاحبو مولاي البشير للقهوة بغى يتنفس من المرض…
حبيبة : ولكن راه عيان علاش خليتوه…
لطيفة : اخليه ينسي المرض يلاه تگعد منو بالكشايف
..اكيداز نهارك هانييي…سگتي ؟
حبيبة : مزيان…بديت بالكوغ ديال الكود..مازال سوگان تال سيمانا جايا…”كتجر فتيشرت على صدرها مقلقة بصهد” هفففف صهد اعميتو صهد بزاااف…غادي نطلع نحط قشي وندوش ونهبط…غادي نعيط ليه يجي مايگعدش بزاف فالقهوة عامرة دخاخن الكارو…
طلعات وخلاتهم جالسين كيقرقبو ناب وبالهم مع مولاي الحفيظ…حيدات حوايجها كلهم لاحتهم ف سلة ديال وسخ يتصبنو حيث قاسهم العرق ودخلات هكاك عريانا كيما خلقها مولانا تحت رشاشة دوشات..كانت مشات منها العادة مابقاتش فيها بزاف ليام ايامها دوزاتهم…خرجات من دوش لاوية عليها فوطة فالغوز كتعقد بصديقات وفوطتها ديال شعر كتعقد القدام…لبسات كيلوطها وسوتيان بلا بونج و لبسات ضراعية عرييضة بلا كمايم فالبيض وفوسطها وجه مطروز بالصم ذهبي تحت ركبة فصالتها مخزانية…ذهنات شعرها بسيروم وجمعاتو لفوق اسفنجة…ذهنات وجهها بكريم مرطب…هزات واحد الحكيك صغيير فيه مرطب فازلين بنكهة الفريز ذهنات بيه فمها وذهنات ايديها بكريم مرطب ومنعش فنفس الوقت من ايفغوشي رشات عليها ريحة الفانيليا..ضارت هزات تيليفونها شعلاتو وهي تلقى نوتيف ميساج من انسطا من داك الشخص الي ايام وهو ساد يلاه حل وجاوبها….هاد المرة بصوته ف رسالة صوتية…قايل فيها…
هو : i am jad…ميي تو من المغرب..ولاكن ايش (عايش) و مولود ف Londres (لندن)…اي ثينك يو اندرستاند مي…ماي ارابيك لانگويج ڤيري باد…ف همتيني !!…
حبيبة”جاب ليها ضحك بهضرتو..صوته مبحوح ومقاتل مع ديك الهضرة لكنة البريتيش غالبة عليه بزاف…جاوباتو مرزنة بجملة وحدة” : لا فهمتك…نايس تو ميتيو تو…
هزات تيليفونها وخرجات هابطة حتى سمعات صوته وهي تزرب فخطوايها وتوجهات ليه تخشات تحت باطو معنقاه من كرشو وحاطة على صدرو راسها…
حبيبة : شوية بابا اليوم ؟!!…
م.حفيظ : نگولو نقزتها ههههه…كي دوزتي هاد العشية مزيان !
حبيبة : مزيااان هي بدا توجد لطوموبيل نهزها ليك…
م.حفيظ : منوگفو حتى لداخلة ههههه…
ناديا : ههههه ايه ولا وصلنا لداخلة هههههه….
م.حفيظ”تنهد” : نهار ثلاث ان شاء الله را بايجيونا ضياف…
ناديا : شكون !!!
م.حفيظ : الحاج والحاجة ديال رحامنة…
حبيبة : واش ديك السيدة الي مشينا لعندهم لعرس !! خالتي عيدة…
م.حفيظ : ايييه هي هاديك…جايين لشي غراض وگالو بايدوزو يشووفونا…ايوى هي هاديك وجدي بحسابهم…
ناديا : مرحبا بالي زار..ايييه وصي على شي طور تالدجاج يلاه يطراو…ويمكن ندير بسطيلة…
م.حفيظ : الپلا ثاني انا الي بنديرو…عجبتهم طنجية الي صايبت ليهم…
لطيفة : اييييه شي تصايب ليه بسطيلة وشي تلقم ليه شوية تالشعرية بمطيشة ههههه ياك الحاااج..
م.حفيظ : ونتي را مولات دار من مالين شي…هما ضياف ربي هههه…والى درت ليك شعرية بمطيشة غزيت ههههه وزيديك تاليوم شعرية بمطيشة وگولي اخاايت ههههه…
حبيبة. : عميتو انا نطيب ليها الي بغات بعدو منها…
ناديا. : هههههه ويلي لا طيبتي بيضة ماتگوليها لحد…
وقف سرباي بابتسامة وتحنى كيهز من عند سرباي اخور شاد صينية فايدو وكيحط ليهم…حط ل هاشم پلا ديال سباگيتي بصوص بلونش وباغميزون…وبشار صالاد فخوي ب صوص دبس رمان هي باش بغى يتعشى غير بغا يدير معاه صواب اما هو مكيتعشاش كاع…حطو الماء المعدني ليه ولهاشم عصير موخيتو دالحامض…حرك ليهم هاشم راسو بشكر ومشاو…
هاشم. : شوية دابا…
بشار”غمزو كيشوف فتيليفونو” : مخير…
هاشم : مزيان…والى گلت ليك شي حاجة تولي مخير…
بشار : غانولي خاااايب ثاني…خايب اهاشم…ماعنديش مع هاد تخوشيف وكثرة الهضرة نجيك نيشان…بنت المشاوري الى بغاتني تجي عندي…
هاشم : يا هاد الراجل…
بشار : ولفت السخط…
نهى كلامو بكلمة وحدة اختاصرات الكلام ولجمات لهاشم فمو…وهي “بالصحة”..مازاد مانقص عليها…القلب كحال وتطحن…ود.مو من بعد ماكان حمر ولا كحل…القطران ولا يمشي ليه فعروقو من جيهة هاد الموضوع…ماعندوش ذكريات زوينة مع امو…عندو غير العذاب والحزن…والمرض…
بقى كيشوف فيه هاشم..مابقى لقى ميقول…ولكن حتى لين !! حتى لامتا هاد الحال وهادشي خاص يتحط ليه حد…الدنيا فايتة ليوم معاك وغذا عليك…سكت..سكت وكمل ماكلتو فهدوء عاطيه وقت فين ياكل ويتنغم فكل دغمة..واخا را غير كينقب داير الخاطر لهاشم وصافي…حتى كملو وتهز الطباسل وتحط لكل واحد فيهم اش بغى اكتفى بشار بفنجان قهوة معصرة بلا سكار وهاشم كذلك…
هاشم”نطق اسمو مزيير عليها بطريقة خاااترة” : بشاااار…ماشي براكة !!!
بشار : هاشم..دماغي مرون…بدل الساعة بغيرها…
هاشم : دابا الى بغات تجي عندك وتهضرو كاين مشكيل “شافو شاف فيه بشوفة باردة عرفو غايشعل بطريقتو” غير سؤال جاوبني والله ماباقي نهضر…
بشار : الي جا مرحبا بيه…
الخاطر ضيق فهاد اللحظة حيث راسو مزال مريض حاس بيه سخون وكيبرد يتكب عليه العرق حتى كيمسح بكلينيكس…حاس براسو خاصو يدوش ثاني حيث غايدعقو العرق…خلصو وخرجو من داك ريسطو الي كان كاااالم بواحد طريقة كترخيييييي…وصلو لوطيل تسالم معاه على امل اللقاء غذا فاش يجيب واليديه يشوفو بشار وخوه يوسف لي شوق قتلو من جيهتو…كيحس بيه هو انقى واحد واصدق واحد واطهر واحد تما…هو الي كيلقى معاه راحتو…وخا كان بعيد عليه دار ليه تيليفون غييير ليه كيهضر معاه فيديو وخا يعرف يبقى معاه بسوايع مكيملش منو…مشى لاستقبال عطاوه البطاقة ديال غرفتو…مشى ليها حل الباب مهلوووووك…لاح تيليفون كونطاكت بطاقة وحيد حوايجو وعاود رجع دوش ينتاعش…خرج بفوطتو جبد شورط قصير وملابس داخلية لبسهم وتلاح فوق ناموسية على كرشو…هز راسو وهو على وضعية نعاسو…هز تيليفون ورسل ليها ميساج يلاه جاه فالمود يرسل حتى يزگي راسو وافكارو ويستقر فنفسو ويهنى البال الي معمرو يهنى…رسل ليها رسالة….” ماشي دابا” هادشي باش سخاه الله وجاد بيه…
الشمس شرقات وفمراكش طنطنات…الحاج واخا مزال عيان صدرو ضيق عليه ماحدو كيفكر فهمو ماحد الكحبة كاتجاهد عليه…وباش ينسي هم المرض مشى لرزقو ورزق خوتو باش ينسي مرضو….وهذا الله…
صوت التوام مجهد شابعين ضحك مع راسهم مجمعين على ديك طابليط كيتفرجو…مرة ينوضو يتسخرو لناديا غير كتشغلهم وصافي باش ميتعلموش يدمنو على ديك طابليط اما را عندها الي يشقى ليها…كل سيمانة كتجي البنت او سيدة تسوس ليها صالونات ولا تخملهم…وكل نهار تسياق والمسبح دار كتشعل ريحة نقى والمعطر والبخور تعطي منها…جالسة لطيفة مبندة ف فالوطوي لابسة جلابة خزية مخزانية بسفيفة ملكية وشالها فنفس اللون…وصندالة طالون فرجليها كتشرب فكويس اتاي وكتسنى ولدها يجي باش تمشي لازيلال لعرس…حتى سمعات صوت كلاكيط هيرميس من رجليها فالكحل نازلة كتفوه يلاه فايقة لابسة حوايج الخروج وصاك لوي فيتون فكتافها صغير وواحد دفتر حجم كبير فايدها دايرة اير بودز فوذنيها…هبطات باست عمتها وجلسات كبات ليها كاس اتاي وهزات طريف الحلوة كيكة تمر وكركاع كتدوز بيهم…
حبيبة. : امتى بترجعي ؟؟؟
لطيفة : يومين هكاك ثلاثة ندير الواجب ونرجع…
حبيبة : وسناء وفيصل ؟!
لطيفة : فيصل راجع لسمارة…و سناء غاتبقى تم مع عمتها يلاه جات من سويد…
حبيبة : گولي ليها واخا عليك الهرابة ههههه “وقفات كتسوس فحوايجها تيشرت بيض طويل مكتوب بالكحل كتابات مبعثرين وهابط من جيهة الكتب باين سماطي ديباردو كحلين و كولون كحل…سلمات عليها” طريق سلامة عميتو ورجعي دغيا عندي منگوليك…
لطيفة : داكشي الي بيت ههههه سيري فامان الله…
مشات سلمات على ماماها دادا ديالها دارت تيليفونها فصاكها طلقات اغنية شيرين ولسيارة تعليم قصدات فين تدوز اليوم الثاني…خرجات من دروبة الرميلة ووصلات لشارع الي كيدي لجبل الخضر قريب لواحد لوطيل ديال مامونية المصنف من اوائل احسن اوطيلات العالم….قربات توصل لفيروج وكدندن
حبيبة : انا لا جايا قولك ارجع اسمع علشان انا صبري قليييل…كل مرة تهرب قرب على اييييه….
عينيه على التيليفون كيتسنى اشارة المرور تعطيه الحق يدوز ويتيسر لوجهة فين غادي…دار تيليفون فوذنو من بعد ما بقى كيشوف فيه كيصوني بزاااف تا قاليه راسو جاوب عاد جاوب…
بشار : يااا هاااااشم نتا وفريع راس مشاركين الد.م….مزااال…
هاشم : فين نجلسو فديك الفيرما الي فالخرجة (فيرما ريسطو)…
بشار : يوسف كاين !!!…
هاشم : اسيدي راه جلس حدايا فطوموبيل…جاي شاد كاسو دياال العصير وناشط…
بشار : شد الخاطر…”قال هاد الجملة وقطع عليه…حط تيليفون وتبرونشات شاشة اوطوماتيكمون مع gps شاف الوجهة الي حدد…حتى شوي بدا كيكمش فحجبانو حس براسو ضرو ثاني..هادشي كثر ممولفش بيه لهيه…فين وفين….شوية حبس وتهدن… هز عينيه من فوق نضاضر شمس بان ليه الضو خضر شعل وهو يكسيري….يلاه زاد تا بانت ليه مدورة راسها وقاطعة وهو يضرب كلاكسون وغااادي مكسير تسمعات ديك طييييييييييييييييط….
هي مع كان باقي ضو حمر شاعل يلاه وصلات لنص وهي تسمع كلاكسون مجهد وسيارة jeeep ديالو گري جايا بجهد تا انحارفات خارجة من مسارها فاتها بشوييييييي طارت ونزلت وهي تغوت لربي الي خلقها كتسب….
حبيبة : واااااااعععع…حييييواااااااااااااااااااااااااان حيوان….
حاطة ايدها على صدرها كتنهج بالخلعة تا ضارو ناس… مع لفضات من فمها ابشع الالقاب….”حيواااااااان” طوموبيل فرانات وتمات راجعة ليها ماغش اغيييغ (راجعة باللور)….
شوية حتى وقفات السيارة ديالو ورجعات ماغش اغييغ…رجع بشوية من سمع غير صوت غواتها كان فحال شي زواية رنان رقيييق…كمش حجبانو وشاف من المراية بانت ليه كتنهج وقطعات…كيشوف فيها هكاك قصيورة وقليلة حسا ليه برهوشة…اش غايهضر معامن يهضر ماعندو خاطر لهادشي ف زحامات الطرقان كيكوونو ناس صاعرين خارجين يسبو وهو من نوع الي مبرد مع هادشي سيركيلاسيون طرقان…شافها قطعات وغاديا وتشالي بايديها..ماسمعش سبانها.. اما كان غايسمع غا تغجويط…سمع صوت كلاكسون من وراه ديال سيارات الي عرقل ليهم سير…رجع كسيرا ونطق لسانو بصوت مرخييي…
بشار. : براهش برااهش…
حرك حجبانو بشوية وزاد مع طريق…كانت الوجهة لواحد الفيرما فيها ريسطو عائلي شعبي ماشي المطاعم راقية…دخل مع البيست تا وبلاصا حدا طوموبيلة هاشم…حيد سانتيغ وبقى واحد شوية…من عادتو ياخذ وقتو…يشوف اش غايهز واش يخلي وحدد اش غايدير…من الوقت كياخذ الوقت الي يقدو الي بغى يربح العام طوييييييل…ماتزربوش والى زربتيه يتعطل ليك بلعاني وسير يا بني ادم نطح داك راس مع اقرب حايط….
ترجل من طوموبيل كيقاد فتريكو القطني الخزي الي ناحث صدرو نحت والي مطلع كمايمو لعند المرفق كيف العادة…وسروال ميليتيغ بيج…غادي كيشوف فتيليفون فواحد الخدمة خاص يقادها…وايدو ضارت جيهة سيارة بكونطاكت الي فيها سدها وخشا ساروت فجيبو..ريحة بارفانو قويية وباااردة فالشم…يمكن شبهات لطبعو ويمكن هي صدفة ولا طبعو مخليه يختار هاد نوع من العطور…دخل لدااخل تا لقى هاشم واقف كيتسناه باش يگيدو لفين جالسين حبابو الي نساو حزتهم ووقفو معاه وقفة ماينساوها ومايتفكروها…وخا دازت عليهم ودوزوها عليه طلق الله سراح المحنة فقلوبهم من جيهتو…هز عينيه بزربة ملي شم ريحة بارفان المحبوب عندو بزربة توسعات الابتسامة جااانبيا تا تعسلو عينيه خشا تيليفونو فجيبو وسرح ايديه عاطيه الضو فين يجي لعندو بتعنيقة حاااارة دايزها لكلام…”يوسف” المحبوب عند الكل شخصية شااارية تيقارها…شافو ولا نگولو هو الي بقى حاضي الباب اما هاشم كان كيهضر فتيليفون مع القيادة…يوسف الي كانت على فمو جملة وحدة “خويا بشار” ماسكتش منها من الي جيتي يا دري ونتا تنطق بيها الي حتى شافو…
بشار”عنقو بجهددد حاط ليه راسو عند كرشو مزير عليه بايديه وخاشي راسو فشعرو كيستنشق عبير المحبة عبير الصدق وعبير المحنة والقلب البيض…مدة وهو معنقو باغي يگلع منو الشوق وباغي ياخذ واحد الجرعة ديال الراااحة..بقبلة على الجبين..شاف فيه وغمزو كيعنكش ليه فلحيتو” : كبرتي اسي يوسف…
يوسف”تبسم تا تسدو عينيه وحرك راسو بزربة” : هههه حتى ن نتا كبر كبرتي هههه…ت توحشتك خويا ” عاود حط راسو على كرش بشار وعاود عنقو وباسو كيدوز ليه على ضهرو تا طبطب عليه جرو معنقو بجنب سلم على هاشم…
تبع هاشم لفين جالسين..مشااا جهد امتااار تا دخلو لحدا شي شجر تما كانت واحد الطبيلة عائلية…واحد اللحظة حس ب صدرو ضيااق ونفس قلالت ونهجة فطريقها ليه…قبل مايشوفهم وقف ثواني محسوبة تا غمض عينيه وهز نفس وطلقها بلا مايشعرو بيه…الوحيد الي يمكن حس بيه هو يوسف الي كان جنبو معنقو حيث وقف…من بعد تيسر فخطاويه حتى وقف هاشم وحيد من قدامو وهما يبانو ليه…الحاج واقف. شاد عكازو وسلهامو على كتافو والحاجة جالسة مدورة شالها على فمها مغطياه ومكمشة عينيها مع قلة شوف يلاه يلاه جالسة مشتحة بغلضها… بجلابتها وكتشوف فيه واش هو..بان ليها زاد تگضر على اخر مرة وزاد صحاح فجسدو….نفس تخنزيرة نفس تغوبيشة…واحد لحظة جا لبالها نورالدين وااقف عليها فهيئة بشار ماحسات براسها وهي كتشوف حتى نطقات بشوويييييية..
عيدة : وليييدي…
ع.القادر : اه اه اه بشار هذا ولا هههههه…
طلق من يوسف ووقف قدامو خاشي ايديه فجيابو..شاف فيه شحااال وهو يقرب وشد ليه ايدو خشاها بين ايديه طبطب عليها وتحنى باسها وباس ليه راسو…ما على ملامحو حتى تعبير فقط البرودة غرييييييبة…طبطب عليه جدو وخلاه ياخذ راحتو مع جداه…جداه الي قرب لعندها وهي مزال كتشوف نور الدين قدامها تا كمشات فشالها بايدها الموشومة عند المعصم…مصغرة عينيها فحال الى خافت ايدها ترعدت تا شدها ليها وهي تفيق بشهقة خفيفة وشافتو محني على ركابيه لعندها…
بشار : مي…
عيدة. : اااولدي الغايب…ااااولدي ولد الغالي…
بشار”جاوب ببرود مبدل الموضوع” : ااش خبار صحتك !؟..
عيدة. : اش خبار صحتك..انا صحتي عاشت ايامها مكاين غالعيا دابا…اش خبارك نتا..وكيداير فديك بلاد الكفرة بالله…علاش طولتي الغيبة اش سوينا فيك من ايمان تا درتي فينا هاد الحالة !! هذا هو مسوانا !!..
بشار : لا مسوايا انا…
عيدة : جي لداركم لدار باك جي لرزقك…جي گبل مايديني ربي عندو…علجبك هاد ملاگية زوافرية…نشوفك نهار وتغب (تغب هي تغييب) ادوي…
بشار : ماعندي رزق وماعندي دار…داري عند الي ماعاجبينك..حمدي الله امي حمدي ربك راني كنجي ندير صوابي معاكم…حمديييه امي…
عيدة : ياااك !!..”دفعت ليه ايدو الي فوق ايدها” وبعد عليا ماعندي مابغايت بشوفة نهار…17 عام وانا مشوگة فيك تعطيني جغمة ساعة وتعطشني عوااام…واش حنا دامين فهاد دنيا…دير بوجهنا كي درنا بوجهك ولا تخليني تانا نغضب عليك…
شافها تعصبت وهي قليل فين كتعصب..دفعات ليه ايدو ودورات وجهها لجنب مابقات بغات تشوف فيه…
ماهضر ماتكلم خلاها على خاطرها وناض هز عينو من فوق نضاضر شاف فجدو الي حرك ليه براسو بمعنى غااا ساعف…رجع يوسف لجنبو عنقو وهو يدور حيد نضاضر حطهم فوق طابلة هما وتيليفونو وجلس جر كرسي ليوسف قربو ليه تكاه على كتفو وجلس مفرق رجليه حتى جلس شبه متكي على الكرسي…حاط كرفقو على جنب الكرسي وكيشوف قداامو تا نطق عاوتاني موجه كلامو لهاشم…
بشار : علاش ماجاتش سعيدة ؟!
هاشم”شاف فساعتو” : وگبييييلة خرجو هي وحسام هادي رجلهم…
حرك راسو وبقاو كيهضرو معاه الحاج سول فيه وعلمو بالي سيحمد ورضوان ماقدروش يجيو لضروف وتاهو متسوقش ليهم حيث ببساطة هما ممسوقينش ليه مكيسولو ماعلمو على خبارو…اللغا بيناتهم طلع وعيدة باقيا قالبة وجهها ماخلاو كيدارو يهضروها والو كتعطي كلمة وتنخلهم بشار ماهضر معاها ما قرب كيهز عينو يشوف فيها بنص عين كيسمع اش كتقول وسااااكت…حتى رمى الحاج سهام كلامو…
ع.القادر : نهار سبت غاتصبح عمتك مليكة “حدر عينيه كيتاكد” ناوي تشوفها ؟!
بشار”قال لا بغمزة جنب عينيه” : لا..سبت غانشد طريق…
هاشم. : مابغيتيش تشوفها !؟ را شحال ماتشاوفتو…
بشار”هز حاجبو مغوبش بحجبانو ونطق بصوت مبرد” : فرنسا حدودها المانيا…
ع.القادر. : عمتك تجي عندك اولدي ولا كيفاش !!..
بشار : مكنجي عند حد ا با…”ضار باس يوسف فراسو وابتاسم ليه ابتسامة خفيييفة بالكاد كيبان وغمزو” اش بان ليك نتا ؟!
يوسف : ههههه “حرك راسو كيضحك”
هاشم”هز ايدو وخبطها بشوي فوق ايدو” : هههههه وليني هذا تاهو…هههههههه عالاااام لاكان غانتا…
ع.القادر : ايوى اش نگوليك هذا الله…بصح اولدي شوف من حالك وحالنا…”شير ليه لجداه الي جالسة غاضبة”
بشار كمش عينيه مصغرهم كيشووووف باس يوسف وناض وقف مخلي جدو بلاكة خههه..ووقف كيشوووف فيها…ااااايه ماحدو كيشوف فيها ماحد ذكرياتو زوينة معاها ووقفة رجال الي دارت معاه يموت مينساهم…يمكن هي سبابو تا وصل بهاد المواصل وقف على رجليه رغم حالتو النفسية سابقة ورغم الحزن كتمو فقلبو وكمل حياتو تا وصل فين وصل…
العقل ساااافر لداك نهار سافر لنهار الي خرجااات عينيها فاش داو باه لسبيطار وتجاراو كلهم تبعوه وهو بقى وحدو مسدود عليه فبيت…سمعات بالي غايديوه لجوندارم وهي تخرج عينيها فهاشم وشنقات عليه من الكول ديال تريكوه…كانو عينين هاشم حمريييين منفوخين بالغوات والبكا على خوه…تا شافها شانقة عليه وعينيها خاااارجييييين فمها بياض وزراق وهي مزيرة عليه…
سعيدة : هااااااااااشم هاشم عاون ولد خوك اهاشم…هاشم ولد خوك را مالقى الي يوقف معاه…هاااشم وقف معاه ودير بحسابو تا هو…لااااااا اله الا الله اهاشم من جيهة داك الدري…
هاشم”بقلة حيلة دوا وصوته عيااان عامر حزن الموت” : اش بايدي مندير…
سعيدة : واخا تعرف تهربو تحرگو ماسوقيش…انا الي عارفة اش بيه داك الولد…را مالقى علامن يحط راس الا عليا…واخا يكون حيوان ميديرو ليه هادشي….وااااااااا بعااااد الله واش كاين الي كيقت.ل باه…واااا عباد الله را المشة كتاكل ولادها بالخوف لا قرب ليهم بني انسان وهو لاحتو لوحة الكلااااااااب “عينيها خارجين وكتنخصص” وراااه كان فرحان حيث جا لول فالبلاااااد كلها سميتو تحطات فجورنالات وتلفازات وفين هو هاد الولد الي يشوفوه !! سادين عليه !!؟ كلب هو اهاشم كلب !!! الله ياخذ فيهم الحق والله ياخذ فيكم الحق…نتوما الي وصلتوه لهاد الحالة تاواحد ما گد يهضر مع توريا تاواحد واخا تكون موكلاكم مخ الضبع اضبوووعة…وااا بحلوفي يا هاشم وماتدير ليه حل حتى نحل عليه ونزيد انا وياه وحسام ونغبر عليك وحهي الى يوم الدين….داااابا….
رجع ليه عقلو من الماضي وهو كيشوف فيها جايا وتزرب باغيا امتى تشوفو ومادا ايديها فرحااانا وتعيط ب بشار يا بشار تا كانت شوي طيح كون ما شدها حسام وبشار قرب بزربة…تلاحت عليه عنقها تا هزها رجليها يلعبو فالهوا…معنقاااه تعنيقة حارة وهو كذلك…
سعيدة : الله ياربي على ولدي الله…غبرتي غبرة حارة”طلق منها ونزلات عليه لكتفو زعما را قصحاتو” نعل ليك طاسيلة…
بشار : الله يلعنها هاد طاسيلة…
سعيدة : ههههههه من گلبك يا هااا…
سلم على حسام وعنقها بجنب…تمشاو تالطابلة جلسات حدا راجلها وحداه هو…معنقها هي تحت باطو ومعنق يوسف تحت باطو لاخور براكة عليه غا هادشي…تسول فيه وتعاود وترجع تعنقو وتبوس تاهو مخليها على خاطرها دير مابغات مامحرك مامقرب…جداه ماضارش جيهتها كاع ماطلبها ماقرب حيث عارف اش باغيا…
بشار”ضار عند هاشم” : اشراق فالدار ياك ؟؟؟…
حسام”نطق بلاصة هاشم” : امتى تحل عليها !؟
بشار : نشوف داك التيليفون مزال ماشفتوش ماساليتش…الى شفتو الليلة صباح رجع ديه عندك حتى نگوليك اش دير…
حرك ليه راسو…ناض هاشم وصى على الشوا متكون من كفتة كوطليط و صوصيط وحتى بروشيط لحم…وشلايض الي معاهم والمرافقات من ما واتاي ومونادا ليوسف…تبادلو الحديث مرة يجاوب ومرااات يحرك غا راسو…تحط الغذا والخبز وسماو الله تاهو كياكل معاهم ولكن اكثرية مقابل غا يوسف كيوكل فيه ويعطيه مونادا…
ع.القادر” شاف الحاجة عيدة على نفس جلستها” : والحاجة گولي بسم الله..تي جيتي دوري علينا وجهك ولواه لعني شيطان…
عيدة”الصمت”
بشار”حك شنافتو تحتانية بسنانو بشواااايا” : مي..كولي…
عيدة : والله لا جا في فمي…
بشار : الي بغيتي…
عيدة : نوضو ديوني لخيمتي فضل ليا…
بشار : ديوها لخيمتها ترتاح…
شمس مراكش طنطنات..الاذان تاذن على زوج مرات مرة لولة اعلان وثانية تذكير وهادي عادة فمراكش قديمة وباقية لحد الان وخصوصا فالمدينة القديمة…خرجات من سيارة تعليم دايرة نضاضر مغوبشة وباقي كتفكر ديك طوموبيل الي حنا ورب العباد عارفين مولاها شكون وهي راها ماغاتعرف شكون على بالها را واحد من العباد كان على شوي يصفيها ليها…كانت ناوية تجي غا على رجليها حيث مابعيداش سيارة تعليم على دارهم تالقات سيارة باها واقفة وهو فيها لداخل داير نضاضر شوف كيشوف فتيليفونو ويقيد بستيلو فشي حسابات فالمذكرة استغل الفرصة يشوف منين يضبر ليه وخا غير فشي بركة بلا مايقيس الورث والو المبلغ كبييير وزيد قدامو مسؤليات ضرائب وفواتير الحمام والمحلات المكرية وشلاااا وشلالي عندو وداك راس شحاال قدو يهز…فالاخير تنهد والحل الوحيد الي بقى قدامو هو يجمع الورثة فوق طابلة ويحطهم بالصورة باش يبداو اجراءات “عدة الورثة” الي كتدار باش يتعرف شحاال عدد الاشخاص الي عندهم الحق يورثو حلالهم فشرع الي حللو ربي والقانون الي حددو العبد…
تبسمات البكرة ديالو الي كتنسيه هموم دنيا هي وولادو لاخرين وضارت جيهة شرجم دارت مرفقها عليه وحطات ذقنها فوقو ومدات ايدها لاخرى جمعات من حناكو شوية البركة وباست صباعها تا قفزاتو…
حبيبة : اس موقف زين ؟…
م.حفيظ ” تاهو ماغلاتش عليه الحركة الي دارت وطبقها بالحرف عليها وضحك” : تايتسنا فزييين…واطرني عندي زين يا خويا وماجايب خبار ههههه…
حبيبة : ايوى شنوووو زين يحنت عشرين ياك هكااا هههه…
م.حفيظ : ركبي نعل والديك ههههه…ركبي نوصلك كنت دايز وعرفتك بتخرجي دابا وقفت گبيلة…
حبيبة : احسن مفاجأة درتي والله..توحشت تجيبني من ايام ليسي ماخذيتيني…”ضارت ركبات حداه وانطالق”
م.حفيظ : واش بغيتي ديري بعدا هالباك ولله الحمد شديتيه..
حبيبة : غييير لافاك ديال ايكونومي ناخذ ليصونص من بعد ماستر مابغيتش مدارس ومعاهد..لافاك كاتجيني حسن الى عطيت فيها…
م.حفيظ : شهادتها مقبلوة هي لولة…وفين رتاحيتي ديريه…
حبيبة : وبنزيد سونطر ديال لغات..باش لا بيت نكمل برا مورا ليصونص يكون عندي شهادة فيه…
م.حفيظ : ياك اجدرة ناوية تخلي باباك وحدو…
حبيبة : معاك وردة ومعتز هههه ومعاك مولات العش هههه…
م.حفيظ : واخا يا البالا واخااا ههههه…
حبيبة”حطات ايدها على جبهتو كاتقيس فيه” : سخانة شوية بعدا…
م.حفيظ : لا بيييخير…
حبيبة : عرفتي گبيلة واحد طوموبيل على شوي تجمعني هي ستر الله… باقي الخلعة فيا لدابا…
م.حفيظ”كمش حجبانو بخوف” : الاطيف اش هذا ؟ امتى هادشي ؟!
حبيبة : مع صباح…هانتي هي هنا فهاد الفيروج انا قاطعة وماسمعتش مع دايرة ايربودز فودني “خبطات ايديها كتعبر بطريقة سنان الحليب..طريقة البنيييتات صغار…” وهووب مع سالات موسيقى مع سمعت كلاكصون..خلعني تا عايرتو…اوووففف حيوان مامربيش…
م.حفيظ : ايوى تانتي كنتي تردي البال…حيدي داك العجب من وذنيك فاش تكوني خارجة…ايييه الغلط منك تانتي…هادي هي سيركيلاسيون ابنتي ماعندك ماديري هذا هو مراكش الي قطع بصحتو والي بقى غزا فيه الله…غادييين غا فسخرة الله…
بقاو مجمعين كيف العادة عاودات ليه على نهارها كيف داز حطات ليه تقرير مفصل ومعامن تلاقات وشكون دوا معاها الا صاحب الحساب…وهادي را خدمة الحنانة الي تنصحها بحسب تجربة…دخل طوموبيل من تقاوس الي لور ودخلو لدرب…بانت ليها جارة جايا هازا فوق كتفها وصلة ديال الخبز…هزات ايدها ولاحت سلامها قايلة ” واكيدايرة حبيبة هانيا ؟؟”
حبيبة : هانيا خالتي زبيدة…فين هي سهام ؟!
زبيدة : طلعات ل محاميد عند خالتها شي يامات راكي عارفة كاينين بناتها جاو من سپانيا و گعدات معاهم…
حبيبة : سلمي عليها…
حركات راسها وتبعات باها لدار دخلو…لقاو ناديا واقفة على البنت كتسيق فصالون وتسوس وتمسح حيث جايين ضياف رحامنة خاصها ولابد تقوم بدار ودير المهام باش يبان نقى وتفرش ليهم الراحة وتضايفهم بالترحاب والضحكة فالفم والفرحة فالقلب..هاكا هي دايرة هاكا هما دايرة ال الصافي…الجود والكرم والابتسامة فوجه البراني والقريب…وخا هاد ناس رحامنة را من عائلتهم وقبيلتهم…
حبيبة”باستها” : ايييي يا الحبيبة كتخمل…خالتي منال هانيااا..
منال : هانيا حبيبتي…لباس عليك ؟!
حبيبة : نحمدوووه…ماما هاني لفوق نبدل ونزل…”شافت فباباها” بابا ابيت نخرج انا ونائلة لسمارين هانيا ؟؟
م.حفيظ : هانيا..هي متعطلوش تايفوت العشا…
حبيبة : غير ياشن العصر نخرجو ماحتاال يفوت المغرب نجي…
ومن عندهم لعند ولاد الناس الجواد الي تسالا غذاهم وتلجمو فامهم من كلام بشار…عيدة مالقات ماتقول تقادا ليها الكلام الحيلة لولة علاش كانت معولة فشلات…والكرش الي تعمر وتقول لراس غني باش يفكر فالحيلة الثانية راها خاوية…ايوى تسنا مكتوبها تا ترجع تفكر كي دير تشد ليه لجام وتخليه يدگ وتادو…بهاكا كاتگول را اخرتو يرجع لزرع بلادو ويتدگ فيه وتادو…والمعنى هنا هو الى زوجاتو ببنت بلادو را اخرتو يرجع ومايرجعش لديك البلاد..كانو بانييين امال حتى جات البرانية تديه ليهم ويشدو فالريح…كسر تفكيرها صوته مخلي كاااع الي سايرة تدير ليه فالضالة يريب على البناية تا جاو على قاعهم مشتتين…
بشار : ماعلينا…فراسكم البلان الي ناوي…نزيد نخليها فبالكم بلا تشاش…ناوي ندير داري مع واحد بنت الناس لهيه…باش تكون فبالكم…
عيدة ” بلا ماتشعر نقزات وبفمها نطقات” : ياااعوذ بالله…ياعوذ بالله…
بشار : مافراسك والو ؟!
عيدة : اش هادشي كنسمع ؟ اشمن برانية ماعرفنا اصلها من مفصلها بنت بلادك عايشة تما…
بشار : لا ماشي بنت البلاد…گولي لقيت فيها الخير على بنت البلاد…قااابلة عليا وعلى مابيا..ياك بغيتي غير تهناي عليا…تهناي اعيدة تهناي…
عيدة”جهدات صوتها تا قفزو الا بشار الي باقي على وضعيتو” : ماهانيااااااااش ماهنيااااش…عمري نهنى لا انا لا مك…بغيتي رضى انا راضية عليك دنيا واخرة عسفت على گلبي وكمدت حرگة كبدتي على جال كبدتي المعاودة…لا تخليني نغضب عليك تانا…لا تخليني نمرص وصحتي طيح…
بشار : ماشي مشكيل غضبي اعيدة..دنيا هانيا..
عيدة”شافت فالحاج” : ديني لداري گلت ليك…واش گلت ليك ديني علاش مكتواجب (ماكتجاوب) من صبح ربي وانا نابي…ديني لخيمتي..
بشار : گدامك گلتها ليهم..ماسمع ليا حد…بعدا راني قاري حسابك وهاز ليك الهم…ياك اعيدة…
عيدة : صاحبتك انا الي تسميني عيدة.؟…
بشار” ساكت ماهضر ماتكلم ماسمعات منو ايييخ…غاااا كيشوف فيها كطير وتنزل ومخليها تطرطق كي الگلية…حيث حاسب حسابو..جا علمهم وصافي..عجبكم مرحبا ماعجبكم مرحبتين…”
عيدة : وهانتا ولينا گد القب گد سطلتو…ضحك عليا وخليني صحكة وخليني ندي منعاود الله ينعل الي يخلي بلاصتو زينة
“تقج صوتها جاتها البكية دغيا بدات دمع…دنوعها هاد المرة كانو بصح…دموع العيا والقهرة حاسا براسها لا تزوج لهيه صعييييب مزال يجي يسوفهم فيييين وفين…وتاني لا فات تا غضب مغايبقاش يجي…والى قجرو عليه يشد معاهم ضد خاااايب ويرد ليهم الحر بالفعايل…ولا يشمتهم…ضرب ع.القادر بعكازو فوق لارض وناض جمع الوقفة…علمهم ينوضو مابقى مايتقال…سلم عليه حادر عينيه تاهو ماعجبو حال…زاد بالحاجة شاد فيها حسام بقا غير هاشم ويوسف وسعيدة…
بشار : خليه معايا (يوسف) بالليل رجع ديه…
هاشم : واخا…”يلاه سلم عليه وهو يسمع صوتها وهاد المرة صوتها كان جدي بزاااف…يمكن اول مرة يشوفها هاكا…حاس بيها مقلقة منو هاد المرة وهادشي مغايعجبوش الوحيدة الي مايبغيهاش تقلق منو”
سعيدة : بشااار…”هز فيها عينيه” هرس الخصام ودير طريق الصلح…مابقى غا نجيبو ليك دبيحة ونرميو عليك العار…دير بوجه العزاز عليك الى كانت شي معزة هضر مع مك شوفها اش بغات را بصح الحمل ثقال والكتاف تگوسو. والضهر تهرس…دير الخاطر ابشار…
بشار”شاف قدامو كيحك فلحيتو…سكت واحد دقيييقة عينيه منيشين لهيييييييه..ورجع ضار عندها ماقال والو لا لا لا اه…سلم عليها وباس ليها راسها…سلم على هاشم..شافو تا عياو وتيسرو خلاو معاه يوسف…”
داه معاه لكاري ايدن (مركز تسوق فگيليز) وخا بشار معندوش مع هادشي ديال تسوق وبلايص عامرين ضغط على راسو….ورجع كايشوف فين كيوريه…كينعت ليه فين ويدخلو لديك البلاصة يدور الى عجباتو شي حاجة كياخذها ليه…طلعو لكارفور خذا اشنو بغا …خذا الي عجبو وعيا من دوران زنزلو لباركينغ حل ليه الباب لقدامي قاد ليه سانتيغ وباس ليه راسو وداك يوسف غييير فرحان بجهد…خلاه فالسيارة ومشى وراها تكى عليها جبد گارو شعلو وبدا يكمي فيه حس براسو بغا يتفرگع بالرغم ان ديك سيجارة الي كتكالميه ولا احياااانا الكالة ولا شراب الا انهم خطر على صحتو…ومضرة بحالتو…ولااا اله الا لله سبحانه…جبد تيليفون وبايدو الي فيها سجارة كيحك فصدرو تا حيد المود افيون وهما يبانو ليه كمية الاتصالات وفيييرة منها ومن معارف اخرى…من الي مشى بالها تشغل بزاااف عليه…مطالعة بحالتو وقارية عيبو…وقابلة عليه…عرفها تشطنات عليه وجاوبها فواتساب…
بشار : انا مزيان…ردي البال لراسك نتي….فاش نكون هنا متبرزطينيش بزاف…
هادي الرسالة…خشا التيليفون فجيبو وهو يكمل سيجارتو ورجع ركب حدا خوه…خرج هو وياه ضار بيه حس بيه عيا وداه معاه لوطيل……خلا المقدية فسيارة وطلعو معاه لبيت حيد ليه سبرديلتو وتقاشرو داره غسل ليه رجليه ورجع تكاه فناموسية…خلاه مرتاح بان ليه نعس وهو يحيد داك تريكو الي لابس بقى عريااان صدرو مبندر مشعر حتى هبط ليه تال تحت صرة على شكل خط عريض رطب…مشى لاتخوس ديال دوا جبد داك دوا الي فالعادة خاص يشربو مع 12 ديال نهار وهو دابا غايشربو تا قرب المغرب…لاح ديك الحبة ففمو وتبعها الما من القرعة عاد حلها…حتى هو دار حقو من النضافة…غسل رجليه ووجهو وحك سنانو….جلس فوق الفوطوي متكي داير مرفق ايدو فجنب وحاط رجل فوق رجل مفرقها…جبد داك التيليفون المجدام…من بعد ما شارجاه شعلو..كان اخر مكاين فوقتو قبل عامين…ايفون كيف بغات وطلبات ملي نجحات وطلعات لثالثة اعدادي….لقاه بلا ساروت كيف وصاها…قلب الواتساب فيه غير بنات كتهضر معاهم گال فبالو وعقلو را بنات دوار…وفيه امها وحدها تريكة ممسجلاش ليها نمرة وهادشي عرفو وقراه غير بنمرة حسام وهاشم الي تصويرة بروفيلهم كاينة ولكن مدخلين غير بنمرة…الواتساب راه نقي مافيه لا قلة العراض ولا قلة الحيا…هادي نفساتو وريحات شوية من بالو…ايوى داز لانسطا لقاه مكاينش…تيكتوك تاهو مكاين كاين غير يوتيب دخل لبلاصة البحث مكاين غيييير داكشي ديال القرايا…مكاين والو فداك تيليفون نقييي…واش ضالمها ولا قارية حسابها !!!…واش يريح بالو ولا يمرض راسو ويشوف اش تحت راسها هي…علاش مرضخات لقرايا ولا زواج…علاش غا سادة عليها وحالها مايعجب كيف وصلو…علاش قرايتها ماقراتها…واش لهاد درجة تيليفون شغلها…مافيهش الي يخلي عقلو يقول راه دمنات عليه…لا لا هادشي مايدخلش لراس…
بشار : اشراااق ياا اشراق….”عض على شنايفو وعينيه غااايبين لبعيييد كيفكر اش يديييير”…
حط داك تيليفون وناض لبس عليه تيشرت وبدل سروال…وخرج عارف خوه نعس…غطاه وخلاه وخرج من الغرفة حتى يطمن عليه بالتيليفون…الصبر كيضبر والعقل بدا يقول كلامو….يمكن حس براسو خاصو يذوق ليه جغمة فين يحس بالنغمة..مالقى من غير ينزل لتحت لباار…جلس فطابلة حتى جا الناذل عطاه اش بغى…حط ليه الكاس لول من الخمر الي حرمو ربي…حطو ليه بلا زيادات…وكيف كيقولو صحاب الصونطي…”سيييك” ينزل حااار ويطلع لعقل يحرق ويخليه رماد..والعينين لونهم يتبدل من البيض لجمر…هكا عينيه ولاو من بعد مازاد الكاس ثالث وهز صبعو موقف ناذل بمعنى براااكة هنا جهد هاد ساعة…خلص ضريبة الحرام حتى يثبتها عند الله يوم الحساب…خاص ميعيقش حيث واحد الملايكة لفووووق…مابغاش يشرب ولكن را عبدو ربي الراس الكحل فتريكتوو وصلوه لهادشي…هو كيقول نوقف على رجلي وهما كيقولو ليه بلاتي نحشوهم ليك….وقف عينيه حمرين معسلين شاد فراسو…الي دازت من حداه يخليها حالا فمها فريحتو وريحة شر الي خارج من عينيه…”يالاطييييييييف على شوفة عندو”…
طلع الفوق طل على خوه لقاه ناااعس عز عليه يخليه يمشي…صونا ليه هاشم مبلغو بمجيتو…علمو يخليه يبات ولكن هاشم كان ليه كلام غير…ترجاه ينزل لعندو..ماحكرش نزل فالبلاصة وماااتسوق لواش شارب يشمو فيه ولا يحس بيه حيث بااااين لعمى فعينيه…لقاه قدام لوطيل واقف وحادر راسو…
بشار. : ياك لباس…
هاشم”تنهد ودور راسو كيحك فورا وذنيه حشمان ولا محرج ولا اش..ماعندو مايدير ترمى عليه العار وحلفات عليه مالقى مايدير كشم وحتارمها ولبى رغبتها…تحل الباب ونزلات الي سنيييييييين ماشافها الي خاصها تصبح وتمسي على وجهو حرماتو منو…والي ترضي عليه عطاتو سخط…واللقاء المنتظر وصل بلا موجب شرع..تا وقفات بلباس البيض ديال العدة استقصدات…وقفات وشافت فيه شوفة عادية. وشافها شوفة باااردة قحال شي وحدة مكيعرفهاش..”
بشار : .سبحاانك يا جليل…
توريا”لمحات عينيه حمرين وصوته مرخيييي مرخون وخا مدعدع وغليض..ريحة المشروب المحرم عطات تا وصلات لنيفها وحجبانها تكمشو..جات تقاد الاحوال..شمتها لسانها المجدام” : هههه السخط وشراااب من فوق ؟!…
بشار”كان كيحك بسنانو شنايفو بحركة عادية..تا كملات” : و ياااا بنت المشاوري… سوقك ؟
المواجهة مكانتش تخطر عالبال…يمكن هادي هي الي كيقولو البدية الواعرة…يمكن هادي الي اعتامداتها توريا باش تواجه مع البكر ديالها الي كان خاص يكون فحالو فحال الولاد بار بمو وهي فرحانا بيه وعاطياه رضاها…لكن واقع العكس حالو حال بعض البناء الي ممفاهمينش مع واليديهم…شنو الي خلا توريا تنازل من بعد ماكانت مصرة وحالفة بحلوفها ماترضى عليه…شنو الي خلاها كيف كنگول بلغتنا “طيحات كواريها”…واش بصح حملها ثقاال وضهرها تهرس مابقات قدات على ولادها…يوسف مهنية من حيهبو شاد تيقارو الله الي عالم بيه…اشراق البنت الي حسات بيه كتخرج من تحت منها ويمكن تخرج ليها من جناب ودير شي منكر وقلبها حاااااس بيها غاتخرج ليها بشي منكر قدو قداش…حاسة بيها ماااشي على برجها وخا يميل البرج نقدرو ندوزوها ولكن البرهوشة برجها مااال بزاف وقرب يطيح…
توريا عيات من انها تبقى هازة شوكتها ومدورة راسها لجنب…او يمكن حسات بيه صافي مابقاش غايرجع ويسد عليهم بمرة هنا كمل ليها الباقي والي زاد كمل هو غايتزوج ب برانية الي تديه بمرة وحتى ديك الايام الي كيجي فالعام مغايبقى يجيها…يعلم الله اش تحت راس هاد الام من خبايا غااابرة…
هاشم”غمض عينيه من جواب بشار ودور وجهو لهيه كيتنهد ويسووووط…نطق بصوت كايسمعو غير هو” : لا حول ولا قوة الا بالله….
توريا : ياك !!!
بشار : اش كتسناي مني ؟!..
توريا : الفم الي يگول تمر يگول زمر…
بشار سكت ماعندش خاطرو لخاطر الي يتجابه معاها وعطيني نعطيك…خاشي ايديه فجيابو وكيشوووف فيها بعينين معسلهم شوية شراب..راسو ثقييييييييل…هاشم كيشوف فيهم واحد عينيه جمرات لاضية…وثانية عينيها نااار حامية…واخا توريا لسانها سليط وكلامها مواس ماضية الا انه عارف بشار مغاديش يقوي عليها فالكلام الناقص الا اذاااا حكات عليه…عارف ان بشار را سنييييين وهو كان ميت على رضاها وهي بقات تعطيه فالكلام سام ودعا الي من القلب وبلاصة الرضى شبع سخط حتى گنف وشبع وفاض عليه…ينسى تا يعيا ومينساش اخر نهار الي دور فيه وجهو وهاديك مشيتو وقطعتو عليها…
توريا : عندك الگانة للهضرة والكلام…
بشار : اش نزل محبتك فهاد الوقت !!!
توريا : تلات بيا ليام وقوا عليا الحمل من جيهة خوتك…عطيني وقت للكلام والي عجبك ديرو…
بشار : راضية بكواريك يطيحو !!
توريا”حتى كانت غاتقوليه الي يخليه يرجع منين جا وهاد لمرة بسنين وهي ترجع كتمات ما يتكتم تا تشوف واش غراضها غايتقدا ولا لا…تنهدات تنهيدة باااينة” : كون ما طاحو ااا ولد كرشي تلقاني فوجهك !؟..
بشار”شاف قيها بواحد نضرة دياال ياا سبحان الله.” : ولد كرشك !! سبحاانك يا جليل…
توريا : فَوت على لسانك كلام الله راك مشبعو الحرام…
بشار للمرة ثانية كايسكت…الفم لاجمو والعقل مثقلو والوقفة شديدة والكتاف جبال ميهزها ريح…الا القلب الي هاز مايهزوه لا جبال ولا ريح…شافتو كيشوف قيها بمعنى هضري…
هاشم. : دخلو لريسطو بشار البرد هنا عليها “غمزو”
بشار”شحال وهو عينيه مرمشوووش كيشووووف فيها..يمكن شوفتو غرييييبة هو وحدو الي عارفها…حجبانو كيف العادو مجموعين..هز عينيه كيشوف لقدام فالعدم..تا نطق كلمة وحدة” : دخلي…
توريا شافت فهاشم الي قاليها بعينيه سيري تبعيه…اما هو فضل يبقى ويخليهم بيناتهم…تبعاتو وفلحظة هزات عينيها كتشوف فضخامتو قدامها…فطولتو ومشيتو الي مثقلة وشعرو من لور رغم كثافتو وكحوليتو الليلية الا ان شعيرات خفاااااااف شايبين..هازا حاجبها فيه كطيلعو وتهبطو..وفلحظة كتمثل فثانية دارت ضحكة مستهزأة وهي تحدر راسها…تا وقف وشير ليها لكرسي حدا طابلة منعازلة فقنت تحت سواري ديك ريسطو الي اشبه بقصر سلاطين…جلسات وبقى واقف كيشووووف فيها واحد المدة وهو جامد غير حاضيها..شي حاجة فلداخل ديالو كتقوليه هادشي فشكل…فجأة سيدة حنات وجات تهضر معاه !!
توريا : اش موقفك ؟!
بشار”حك لحيتو ودور عينيه لهيه تا جر كرسي وجلس فيه مفرق رجليه وكيتسنى البادرة منها فالكلام وتبدا تلغي بشنو جايبها لعندو والي خلاها تنازل..” : كنسمع…
توريا”حطات صاكها فوق طابلة” : ختك مابقى ليا عليها حكام…خرجت ليا من حناب…
بشار : ياك نتي گادة بيها هي ويوسف براكة نبعد عليك كمارتي الي جايبة ليك نحس دنيا ودين..اش بدل گلبك عليا وامتى نزلات محبتك فيا !!…”طلعها وهبطها مطلع واحد الحاجب” بان ليا قويتي فالعدة ؟….”حيث جات لابسة البيض”…
_توريا : البيض راه يتلبس باش يعرفوني فالعدة ورجال ميقربو ليا…ونبقى لزماني وفية..توريا كانت لولد رحماني وولد رحماني مولات دارو توريا المفششة عندو …بقيت بلباسي باش يبقاو مخليني فتيقاري ميسلم عليا حد ومندخلش لطمعية (يطمعو فيا اي زعما رجال).. وجدك ميمشيش لبالو يجوجني لواحد فولادو الي هما عمامك…بقيت بيه كثر من 17 عام
_ رجعات جمعات حجبانها فيه مصغرة عينيها الي كيطلعوه ويهبطوه.وهازة منخرها نوعا ما بنفخة…..
توريا : نويت نحيدو…
بشار”هز حاجبو..كاتم الي صعيب يتكتم” : هي تحل گلبك و نويتي يطمعو فيك ا بنت المشاوري..
شوفتها تبدلات وفمها تزكم…وعينيها رجعو لشرار ديالهم…على شوي تقلب عليه ديك طابلة وترجع لكلامها الجارح..وهي ترجع كتمااات تاني وصبرات كيف موصييينها…الى بغات الغراض يتقدا..كيف قال عبد القادر رحماني…الي بغى لعسل يصبر لقريص نحل…
توريا : يضهر ليا راني مك لا تنسى راسك..
بشار دار فيها ديك الشوف ديال يا راااجل…حنحن منضف حلقو عطا وقت كثييير للطنز…خرج لسانو طواه وعض عليه بثقااااالة..ورجع نطق…
بشار : اش جابك من غير كتافك الي طاحو وحملك الي ثقاال..هادشي ماقنعش عدو ربي فهاد الليل الي مابان ليا فأصل مو ليل…طلقييييني اتوريا طلقي ملتي الخاطر شقة والراس كيفور…
توريا : جيت نرمي عليك العار توقف ورايا..كون ضهري…حكم معايا ختك عاوني فخوك…شد وتادك هنا ودگهم هنا..مترجعش تگطع عليهم بالسنين…ماتسمح ليا منسمح ليك..السماحة مع زمان..تاواحد فينا مازين لا انا لا نتا..نكون معاك نيشان ابكر الرحماني…
كيسمع ليها وكلامها جاه غرييييييب ماعرفش علاش مثايقش فهضرتها…عينيه مخسرين فيها وحجبانو مخربقين معاها…مكمش فيها شوفة وداك الحاجب سبحان من طلعو للسما مركز مع ديك الهضرة…العقل ترفع ومشاااا رجع بيه لواحد زمااان صعيييييب يتنسى…زمان الصغر الطفولة الي كانت صخر وخلات الكبدة حجر…من تم والمعانات النفسية بادية والطبع كيصعاب والقلب كيعمر…
جاو بين عينيه شضيات الزمان الفايت…والهضرة القاصحة الي صعييب تنسى…والعصا ديال الصغر. الي اثرها محفور وباين…
_ گرانك راهم فالسروية كلعو لفدادن…مشاو لصربات…جمعو رزقهم تا ولاو تجار يحلفو بيهم الرجال..سميتهم معروفة وكلمتهم مسموعة…بقى ليك غا الورقة والقلم…بزاف عليك الرجلة وصعيب عليك ترجل…
العينين زادو زندو ومحيطهم تكمش كيشوف فيها وهي كتهضر…من بعد ما عقلو سرح رجع باخر كلمة قالت فيقاتو من دوامة الزمان الفايت (هو الفلاش باك)…
توريا : هاني جيت برجليا وطيحت كواريا…مانگوليك نسى الي فات..الي فات محفور ومنصيبش نكذب عليك…عييييييت وجهدي تقادا…جدك مابقى يگد عليها وجداك صحتها على گدها..عمامك كل مدهي فركانيه وشغلو…كون ما تقسم ليا الضهر منجي عندك…
بشار”ساكت”
توريا : بغيتي سماحة !! بغيتي نجيب ليك دية السماحة !! (تجيب سكار وترمي ليه العار)…
بشار : اش وصلنا لهاد المواصل !؟؟..ماعندي منقضي بسماحتك ولا ديتك…
توريا : عاجبك تشبع سخط !! عاجبك هاد الحالة.
بشار”غمزها بجنب” : جهنم وبئس المصير…تكوي وتبخي مع راسك…”بنبرة خااااترة ثقيييييلة وصوت مدعدع”… تكوي وتبخي…
توريا: تقسمت…تهرست…”عينيها غرغرو وهي ماحاساااااش بيهم كون حسات كون مسحتهم فالبلاصة…” جهدي عياااا..رجع لفيرما..هاني جيت لعندك..ايوى رجع.. شوف اش خاصو يدار ولا را “عينيها خرجو تا فاتو الحد جاهلة” الهضرة تكثر عليا من جيهة ختك…شوفها علاش ماباغيا تجوج ماباغيا تقرا اش بيها راني مها “هزات ايدها على شكل بونية كضرب جيهة قلبها تا تسمعو دقاتو لوذنيه ب لا شعور كمش حجبانو بشوي” راني حاسا بيها شي حاجة…لا ديرش بوجهي لا دير بوجه حد من غير الله ورجع خليها تعرف راك كاين وقف وراها…علاش لا دگ وتادك تما…
بشار : ندگ وتادي !؟؟…
توريا : وصلاتني خبارك ناوي تجوج…
بشار : وصلاتك خباري ناوي نضرب عليك..حسيتي ب المسخوط ناوي يگلب عليك وماتلقاي الي يرجع يطلب سماحتك ويطيح براسو..ولفتي طليب ورغيب والمزاوگة ويدخلو عندك الكبار يطلبو ونتي هازة مناخرك…نهضر معاك كلمة تشبعي عدو ربي بالمسخوط ودعا عالجهد !!…ولفتي تهزي مناخرك لسما وتعفري وترديني جفاف وگلبك حجر…علاااااش !! علااااااش هادشي ؟!..
خبط فوق طابلة بجهد وملامحو الي شافهم يقول مامعصبش وهي را طابلة شوي تقسم على زوج..تا قفزات هي تهزت وتحطت والي ضايرين جالسين بعاد ضارو يشوفو…تا جا سرباي عندو”
الناذل : كاين شي مشكي” قبل ميكملها نطق بشار هاز ايدو وشير ليه بصباعو يمشي”
توريا : خوي خوي اش بيك…
بشار : الي بيا مايهزوه جبال..الي بيا عالم بيه الله…اش جابك عندي…البارح بايتة بولد لحرام وصباح صابحة بولد الحلال…وحدة فجوج يا قرب المامات يا تحت راسك شي عجب…
توريا : كاين شي عجب من العجب الي خرجاتو فيا ختك !!؟..ختك الي نحل عيني فالليالي لقاها شاعلة تيليفةن وسادة عليها البيبان…عينيها يلوبو ماهم خوت…صوتها على ونيابها خرجو فيا وفاتوني لهيه…ونامسينا ضارت ف الصغير غذا فالكبير وهاهي من تحت جناحي خرجات…
بشار”واحد العين غامزة فيها مركز معاها وكيشوف فتعابير وجهها..”
توريا : بقا ليا نرمي العار نرميه عليك….شد وتادك فبلادك…
بشار : عندي بنت الناس الي كاتسنى فيا ندير معاها وتادي !!
توريا”خرجات عينيها محافضة بزز على هدوئها”. : تجوج يهو.دية !!…
بشار”نطق مثقللل” : لا شيعية…
لجم ليها الفم..المجية هادي ماخرجات بيها بفايدة…هزات صاكها…غمضات عينيها وصرطات ريقها..كتحس بالكلام خارج ليها فحال عافية يحر.ق..ولكن خاصها ولابد توصل لاش بغات..دارت ايدها على قلبها..الحيلة اللولة زعزعات الحاجز…والثانية…حطات ايدها على عينيها و شدات فطراف الطابلة شوي طيح كون ما نقز بلا مايحس وشدها تا تكات عليه…غا هي تكات عليه ماحسش براسو حتى تبوووورش… تا غمض عينيه من هاد الحضن الي عمرو ماعاشو معاها…
“حضن الام وطن..لكن حضنك يا أمي غربة”
بقى متكيها عليه…بالرغم من ذلك حضنها وهي متكية عليه جاه فشكل….عيا ينكر فعقلو لكن قلبو متعطش لهاد الحضن الي مكيعرفوش كيفاش داير…رجع بيه زمان دغياااا ثاني لمرات العديدة الي كان فيهم فعمر العشر سنوات…كايجي من مدرسة..لايح عليه ميكة مغطي بيها راسو كامل وشكارتو وخاشي رجليه فبوط الميكة باش يقطع الوديان…حيث الجدود مابغاينو يقرا والبو الي داير ليه الخاطر كيغيب لمواسم ديال صربة او التبوريدة…بعض الوقات كيغيب لشهر هاديك هي حياة الفرسان صحاب تبوريدة…غيابهم كثر من حظورهم…
بشار”دخل من باب لوراني كيغسل بوطو بالما باش ميدخلش بغيسو ولا يسمع المنقي خيارو مع جداه وهي نيت اكثر واخا جداه را معيورها حالها حال الناس العادييين متوسخش ماديرش..البسالة لا…حيد الميكة حطها فواحد دخيلة تما هي وشكارتو وسد عليها ودخل لدار كيجريييي وينقز تالسما ويجب لارض كي جن الكحل…لقاها واقفة فالكوزينة كتفور فكسكسو يلاه ردات تفويرة وهو يدخل بزربة تلاح عليها عنقها تا دفعاتو بجهد…
توريا : حيد عليا لهيه…ياك گلت ليك عاون جدك فالكسيبة الي باغي يدي لسوق.!!!
بشار”هز كتافو” : اكنت قاري امي منصيبش…
توريا : طفرتيه…الي قراو طفروه ياك اخرتهم جراو عليهم المخازنية گدام القيادات والعمالات….تعلم صنعة بوك همة وشان ماشي جاري ليا ورا الكنانش…شلا ماقضيتيه ليا..دوز حيد عليا من لهيه ترجلتي بكري عليا…
بشار : فيا جوع…
توريا : تايجيو من جاموعة (الجمعة) وجغدد…”تمات غاديا” تا كرش بغات تسگم ليا (زعما صعوبة الحمل الي كانت عندها)…اما كون راني والدة وراك طاشمة رجال…سباعي وزايدها بنفخة من الفوق (سباعي حيث ولداتو على سبع اشهر)…
خرجات مخنزرة وهي تلاقا ب سعيدة الي كانت يلاه رايحة عروسة…وراتها اش دير بحكم توريا البكر فالكنينات…مفششة فدارهم وتفششات تا عند راجلها…طبعها صعيييب ولفات الفشوش ديال الخير والخمير الي قالتها تكون حيث دارهم خانزين فلوس…دخلات سعيدة لقاتو واقف حادر راسو وكتافو طايحين…
سعيدة : بشار مالك اكبيدة…
بشار”كيعض فسنانو..جاتو فحال كريز وهو فهاد العمر…دقيقة وهو جامد وكيعض فسنانو تفقص تفقص وهو صغير وكيجمع فالفقايص…تا حركاتو سعيدة الي خلعها حيث بان ليها.وجهو تجيف مكنزز”
سعيدة : بسم الله عليك اولدي مالك…
بشار”هز عينيه فيها من بعد ماكانو حمرييين رجع فيهم لون وغرغرو” : فيا جوع…
سعيدة : هههه وكااان !!! دوز تجلس نعطيك خبيز وزيتون وزويتة وليني متاكلش بزاف باش تغذا كسكو ماتقفلش فالماكلة واخا !!!
حرك ليها راسو بثقاااالة كيشوف فيها تا تبسم…تبسم وهو كيحرك فراسو…كيحرك فراسو يحرك تا رجع من قوقعة زمان الفايت للوقت الحالي هبط عينيه هاز حاجبو شاف فيها الي بقات متكية عليه !!! وكيف قال هو سبحااانك يا جليل…قاد ليها الوقفة…
بشار : مزيانة دابا !!
توريا : مزيانة مزيااانة اش عندي مندير نزيان صحة…نكر تانعيا حيلي تهد وصحتي مشات فالغبينة….”تنهدات” خاصني نمشي تعطل الحال عمك خدام غذا كثرت عليه…وخوك..
بشار”بقى ساكت..كيدوز على لحيتو بتفكيير..كيشوف لهيييه فالعدم..تا نطق (تت)” : تكاي حدا يوسف وصباح سيري فحالك..
توريا”هزات حاجبها” : گلبك حن..
بشار : كندير الواجب…الي فالگلب ماشغلك فيه…
توريا : لا…خلي يوسف معاك صباح يجي ليه ولد عمو…نمشي فحالي دابا حسن…
بشار : ياك مابيك والو ؟!…
توريا : لا مزيانة…مرة مرة كتشدني…
بشار : شفتي طبيب ؟!…
توريا : كلهم جمعهم فكلمة وحدة گاليك طانسيو (طونسيون زعما)…
حرك ليها راسو لا غير…تمات غاديا قدامو وهي تحول عينيها لشوفات غريييييبة…رجعات تبسمات وهي دور عندو وقلبات شوفتها ل ترجي…حطات ايدها فوق فوق ايدو وطبقات عليها لايد ثانية دايرة ليه ايدو بين ايديها تا هبط عينيه كيشوف فايديها وكيتحسس بملمسهم…قلبو بلا شعور رفرف وخا محافض على الوجه الصارم البارد…
توريا : فكر فكلامي…وحط لغانا فراسك…نديرو معاك الي بغيتي غا كون ضهر وشوف فحال ديك البرهوشة گبل (قبل) ماطيح ليا راس وتخشي ليا وجهي فترباني (التراب)….
مجاوبهاش..دورات راسها وزادت قدامو.. تا خرجو لقاو هاشم لداخل فسيارة غير شافهم وهو يخرج مافهم والو ماعرفش لاياش وصلو فهضرتهم…حركات ليه راسها وزادت دخلات لطوموبيل مخلياه مع هاشم سدات عليها وتنهدات وهي صحك باستهزاء….
توريا : بحلوفي لا داتك الكاف.رة بالله…اخر ايامي نولي شفاية غابر ليك ساسك وزاديها بجواج من الشيعية…ماشي بنت المشاوري الي يتحنى ليها الراس…شلاه مابغي تاخذ ودگ وتادك…
هاشم. : صافي تيسر رتاح..وجهك ماعجبني…
بشار : يوسف خليه معايا صباح يجي ليه حسام…
هاشم”تنهد وهو يجرو عندو وعنقو كيضرب ليه على كتافو بجهد…ضربة كتقول فيها الله يفرج وصافي” : عندي خدمة فمراكش غذا نجي نديه ونفطر معاكم نيت…
بشار : الله الله عليها…”ضار غادي راجع لوطيل ورجع ضار نصف دورة ماشافش وراه..حدو عيط وعينيه فلارض مخنزر” هااشم..
هاشم”رجع شاف فيه” : نعام ابشار…
بشار”هز نفس بشوية ممبينش هو الي حاس وصافي..نطق بكلام قلبو ماشي عقلو” : رد ليها البال…يمكن عيانة…
هاشم : تهنى اخويا تهنى…
دازو ليام…كل واش دار فشغالو واش كيدير…مع العصر كياذن خرجات من دوش غاسلة وجهها وحالتها حيث جات من سيارة تعليم بكري على دوام العشية…وهي تسمع صوت التيليفون كيصوني..هزاتو ولقات ايوب…
حبيبة : فينك !!
ايوب : يلاه حطيت رجلي فدار…هبطي راه جات واحد الكوموند من سيفورا فيها حتى شغلك جي ديها عليا من هنا…
حبيبة : هاني جايا…
قطعات عليه وهبطات كدردب صوت كلاكيطتها نايك كيتسمع…لقات عمتها الي جات صباح اليوم من ازيلال جالسة كتشوف مع ايوب وايوب كيترعد خايفها طمع ليه فشي برودوي خراه ميجمعوه شراوط بالفقصة…هز عينيه…
ايوب : اجي شوفي شغلك خليني نحيد هادشي…
لطيفة : عجبنيييي هاد الايلاينر…
ايوب”خافها تديه ليه وغوبش” : عندك عينيه ؟….
لطيفة”خنزرت فيه” : اييييوا زاااك…اهيا ؟!
ايوب : ااا متديش عليا…مايليقش ليك هذا ايلاينر ديال زرگات نتي بيضة وزينة بيخصك ايلاينر ديال شيگلام حتى نجيبو ليك من المحل…
حبيبة”كتشوف فالكوموند ديالها” : ايلاينر…
لطيفة : هاهو بحال هذا..وحبيبة بلقة بحالي !!
ايوب : بلقاااا ؟؟ عمتيييي ابيخصك دوزي على عينيك هادي راها زرگة…
لطيفة : كترعد ترعد على شغلك…
حبيبة : گلوص كيكو…بوماليفغ فخومبواز…ماسكارا بوغجوا..فين هو…
ايوب”عينيه كيلوبو” : مكاينش…
حبيبة”غوبشت فيه” : باش عرفتيني علامن كنهضر ؟!
ايوب : حسيت…
حبيبة”يااااااا خوتي ماعرفها كيدارت طاااارت نقزات عليه شانقة عينيه خرجو”. : والله والله وماتحط ليا فوندوتان ليكيد kiko حتى نتشامو تقاشر…
ايوبينو”كوشر خسر سيفتو” : اييييييف ايف ايف…خرااا..”جبد كرطونة لاحها ليها” شدي خراك…بزاف عليك راهم ضمصة عندي نصدقهم..
حبيبة”وسعات عينيها” ولاش طامع ليا فديالي…”شداتو كتبتاسم” اححح واعر واعر…
لطيفة : اشنو الفرق بينو وبين لاخرين !!!
ايوب : يالالة كيكو كيحتااارم البشرة…كتحطيه كتحسي براسك ناعمة بصح ماشي مجخطنة ليا وجهك…كتباني لناس”كيوريها بصبيعاتو الي يبريييو بنقاوة” كي البلارة…كيجي فوقو الميكاب شهوة اعمتي شهوة…
حبيبة : واااعر صراحة…
ايوب”كيشوف فحبيبة كتهضر وهو كيصغر فعينيه كيشوف ليها منخرها…ماحسو بيه تا طار وشد ليها منخرها عاااصرو وهي كتركل وتغوت ليه” : سكتيييييييي سكتيييييي يا بنتلحرااااام..ساكتة على هاد المنخر العامر ريش !!؟ من اكتر ماجيتي درتي سوان عندي ؟!..”كيعصر وهي كتغوت جات ناديا تشوف اش كاين ولطيفة تفك فيها من ايديه وهو ووالو كرم..تا دور رجليه وفيكساها خنقها قت.لها وجهها ولا حمررر تا زراق..اما وجهو خلاص تجيف مات عليها….وااالو يحيد ليها ريش من المنخر وطارت معزة…
حبيبة : مممممممم…وا بعد منيييييي وباباااااااا…واععععععت…واااالحما.ر وبعد مني..واااا اعى…عمتييييي حيديه عليا…
لطيفة : يا ويل شيطان كي تسكف عليها…
ايوب : والله لا حيدت ومحيدو هاد ريشات…ويلي ويلي ويلي…شوفي ياختييي قدااش…ويلي هذا ريش دجاج المسخة…اوووعق نعل والديك…
ناديا : بعد منها اجدر…
رقية : ويلييييي هههههههه…
ايوب”ضار بزربة لعند رقية” : ابلاتي انا جايك نتي..منخرك من عند راس درب كيبان ليا فيه ريش بيبي ماشي ريش عادي..
سمعاتو رقية وطارت لكوزينة هربات حيث عارفاه ميتفرق تايحيد ريش…حبيبة تغوت وهو والو يحيد وينعل فيها ويسب…ماطلقها تا سخفات ومنخرها ولا مطييييشة ديال الحك بالحمورية تا غرغرو عينيها…
حبيبة : تفوووو عليك..بعد مني الكلب…
ايوب : شلااا…منخرك يعمر ريش وانا نشوف ااا بالله تانريش…”شاف فلطيفة” عمتيييي…
لطيفة : تقرب ليا نطلع نهرس ليك شغلك (برودويات ميكاب)..
ايوب”جمع فمو وعوجو وشير ليها بايدو حاط رجل فوق رجل”
حبيبة : ااااااح منخري مبقيتش كنحس بيه اااح…اااااح امنخري ححححح…
ايوب : اهيا نعلي شيطان داكشي ماشي هكاك وتم لتم ربي يحن.
لطيفة : اش كتبرگم تم…
بقات كتنش على راسها سخفها…تا جات ناديا هازة صنية ديال قهوة كحلة ولابد يشربوها مع العصر حتى لعشية يديرو گوتي…حبيبة معندهاش مع قهوة كحلة جابت ليها رقية عصير كيشربو ويتهاودو…
حبيبة : اهيا امتى بديتي براوليفت(.browlift)
ايوب : سيمانة جايا عاد يكون…البنت الي مختصة فيه تبدا لاسومين جايا…
حبيبة : فخبارك ماكرهتش ندير ندير “دوزات على شفارها” فوسيل وحق الله يكونو هكاك طووال…
لطيفة : ولوااااه…ويلي..
ايوب: يجيوك غزيييييزنين (غزالين)…اتا شوي كمش عينيه تلفت ليه جرية” : تي كيفاش فوسيل اشني هادي فوسيل…
حبيبة : مالك ميكاب ارتيست قد الخلا ماعارفهاش !!؟؟.
ايوب”وسع عينيه” : يااا فايضة الجناب بقيت عارف معاك شي لعبة ؟…لاااا اختي ماعارفهمش ماكنعرفهمش…اويلي شفارها يعمرو صالون وگالت ليك بادير فوسيل…ويلي نمشي نحط انا فراشة فالاحباس ونعطي لتكوافريييت تيساع..اويلي يااا ناديا بنتك جنابها فاضو وفاض الخير عالزعير قالت ليك بغات دير شفار…تي فين غاتحطيهم فين…وتي يشدو من عندك يعمرو لملطة ولام شعور ومزال الخير….
ناديا : من نيتك نتي ؟؟!!…
حبيبة : وايه وبغيت ندير بيرسينغ لمنخري…
ايوب” بلا مايحس صعراتو تا نسى راسو فين هو ومعامن” : وييييلي ويلي ويلي ويلي من هاد لقحووووووووب….
خرج عينيه وحبيبة خرجت عينيها ورقية دارت شالها على فمها كتولول لطيفة جاب ليها ضحك…ناض على وقفتو هز شغلو وطااااار لا تصليها معاه ناديا….
ليل الليل…حط راسو على المخدة مگعد شوية داير نضاضر شوف شاد تيليفونو كيتفرج فالاخبار والسعلة مزال كتزور فيه…سمع صوتها كتنادي عليه وهي جالسة عند الكوافوز كتذهن فايديها بكريم مرطب بنكة الزهر…
ناديا : صباح سير لطبيب…
م.الحفيظ : اش بنگجدر بيه !! عارف اش عندي…
ناديا : وايلي…اش عندك ؟!
م.حفيظ : عندي للا ناديا نوارة الدار والگلب ههههه…
ناديا”احمرو خدودها ونطقات بصوت ناعم” : الحااااج نهاك الله هههه…
م.حفيظ : وارب عليها شي ميزان هههه الي عندو ناديا عندو دوام كا ولا ما كا…
ناديا : الي خاطيه الحاج خاطيه الهنا…كااا هههه…”ناضت كتحيد فحزام بينوار ساتان بيض مورد وبقات غير بفوقي ساتان بسماطي وسروالو تابعين لپينوار…جلسات حداه كتقاد فوسايدها” اهيا ناس الرحامنة ما هضروش ؟!
م.حفيظ : ايه را علمني الحاج عبد القادر اجلو المجية قاليك جا شي ولدهم من المانيا وتدهاو معاه…
ناديا : اينا ولد…
م.حفيظ : الولد الكبيير ولد نور الدين ولد الحاج الي گلت ليك كان غابر مغرب مكيجيش بزاف…
ناديا : وجا…
م.حفيظ : ايييه جا..گاليك ناوي يتزوج…والحاجة عيدة عيات البارح ماصابوش يجيبوها وهي محنة…
ناديا : مسكينة الله يشافيها…الله يعمرها دار كلهم صراحة…القلب الكبير وخيرهم كثير تبارك الله…اش دارت على حبيبة ملي مشات…
م.حفيظ : وراه حبيبة بنت مولاي حفيظ…نسمة والدوا عالجرح…هاديك راها القشة تاع باها…طفي معاك داك ضو واجي حدا راجلك هههههه….
صباح الصباح….فالبيت ديالها مع بنات عمامها..دخلات كتنهج من بعد ما تاكدات انهم لتحت مدهييين فالحلوة حيث جايا البنت البكر لحاح عبد القادر من فرنسا…مشات كتزرب لتحت سداري حيدات واحد زليجة وهي تجبد تيليفون قدييييييم مشخشخ تاع امها كان عندها قبل متبدل هذا…صونات وقطعات وهي ترسل ميساج…
اشراق : را خويا دا ليا تيليفون…رسل ليا تعبييئة باش نهضر معاك…
فالبلاصة صونا ليها وهي تقفز طارت سدات عليها ومشات لواحد القنيتة قريبة لشرجم كتشوف فيهم جالسين قدام طابلة معاونين وكريمة مرات رضوان لابسة بوط ديال ميكة تال فوق ولاوية عليها طابلية وشادة بزيف حياتي عاكفة بيه راسها وشادة شطابة وتهضر مع سعيدة تتوريها اش دير….جاوبات وعينيها عليهم…
اشراق : متعيقش بتعياط ا حميد…
حميد : تي خاصنا ندخلو صريف امتر يعطيه ليك…
اشراق : ماعرفتش ماعرفتش احميدد ونامس مي داتني لطبيبة قلبتني…ماخاصنيش نعيق جاب الله تيليفون كي سمعت عمي هاشم گال راه جاي وانا نحيد كلشي…راه عندو هاني مركنة فدارنا تانشوف اش بغى يدير…
حميد : والله يا بنت القحب.ة وماديري حل تنقودو سوايع هنا…سيري شوفي كي ديري…عندك شهر ماقضيتيش ندير شغلي..ماتحبسيش علينا لعاقة…
اشراق : وا رحمني تانتا..الى عاقو بيا ماتبقى لا لعاقة لا شهر…صبر نگاد الضواصا مع خويا را واعر راه واعر احميد والله حتى كي.قتل را معندوش العصا عندو القتي.لة…
حميد : تي سيري تقاودي…مهم راه هضرت…يلاه تلاحي…
قطع عليها وبقات جالسة شوية تا وصلتها روشارج من عندو…طفات تيليفون وخباتو وسدات عليه وهي تجمع شعرها…وهزات طابيلة شقا لواتها عليها ولبسات البوط باش تهبط تعاون كريمة فتسياق دار وصالونات لتحت حيث خملو ونيت متعيقش بيها امها حيث خاصها تقاد معاهم ضواصا..هبطات لتحت وهي تلاقا بامها خارجة من بيت عيدة هازة بلاطو الماكلة كي دخلاتو خرجاتو…
اشراق : كي بقات مي !!؟
توريا : شوية وصافي شوية…مابغاتش تاكل تاني…
سعيدة”جايا داخلة” : وهاد الحال غايبقى هاكا ؟؟!..
توريا : هانتي تشوفي..هانتي تشوفي اسعيدة درنا الي فجهدنا..حنينا راس…رمينا العار…اش بقى ندي ليه زيف الكفن وسيف نحطو ليه عند رجليه ؟!! هي الي بقات…
سعيدة : ياعوذ بالله…ولا تقجريس اتوريا راك يلاه بديتي درجة بدرجة…صبري…(ماجاوبتهاش دات البلاطو ودخلات الكوزينة)…
تماسى الحال فالبلاد وبلدان الرحمن…يلاه خرج من القيادة ومشى نيشان شاد طريق مراكش لعندو…شغل ليه بالو..من بارح وهو كيجرب يصوني ليه تيليفونو طافي…ما قاليه لا خليني وحدي لا متعيطش ليا…شك واش مشى شد الطريق ولكن الشك الاكبر هو خوفو لا تكونو جاتو الحالة…غادي منير فالطريق حتى دخل لمراكش ووصل لوطيل دخل لاستقبال يلاه غايسول تا بان ليه جاي خطاويه ثقال…
هاشم : بشار !! الله يا خويا الله…
بشار : مالك !!
هاشم : ها ؟ ماماليش غا توحشت نلعب غميضة الله اودي…مال تيليفونك طافي ؟!!…
بشار : ملي كنطفيه عرف راني محتاج نتكوانا وحدي…
هاشم : ماعارفش مابغيتش نعرف اصحبي…رسل ميساج تعلم ترسل اصحبي راني مشوش عليك…ماعلينا ياك غا هاني ؟!
بشار”حرك راسو” : هااني هاد ساعة…خرجت من هنا يومين مشيت خارج مراكش كان عندي منقضي…
هاشم : بصح راجع غذا ؟!
بشار : سي راجع…”حك شنايفو بسنانو شوية ورجع هز ايديه لفوق وحطهم” هذا جهد…قضيت غراضي شفت لحباب…نشوفو المجية جايا امتى تكون…
هاشم : الي فراسك فرااسك ياك…
بشار : هاااشم يااا هاشم…سد الباب وشمع وراه…صباح جيب ليا اشراق ويوسف وحسام وسعيدة…وسلم على با كان فيه مايجي مرحبا مكانش ماعليش…
حرك هاشم راسو…زفر بعمق ماحملش يمشي…واخا شايفو مرتاح بالبعد الا وعارفو هااااز…كان عندو بصيص امل بسييييط ان الاوضاع تقاد مع مو. ويرجع لكن كان المتوقع والعكس…طبطب ليه بشار على كتفو..هز هاشم عينيه شاف فيه بان ليه فشكل ماشي هو هذاك…رجح انه خاطرو ضاق وبغى يرجع رجح ان التفكير انهك عقلو…شلا ترجيحات وفرضيات والله وحده الي عالم…شوية صونا تيليفون هاشم بانت ليه سعيدة متاصلة جاوب فالحين…
هاشم : نعام سعيدة…
سعيدة”كتبكييي” : هااااشم هاشم جي را مك محنة بزاااف…فمها تسد وعينيها غيبو…جريييي شوفها اهاشم يمكن الموت هادي اهى اهى واااا هاشم شوف كي دير اهاشم…
هاشم”عينيه خرجو وقلبو نزل بالخلعة…عارف ان مو قطعات الماكلة وشراب ومن بيتها ماخرجات…ماعرف باش تبلى…هز عينيه فبشار الي سمع بكاء سعيدة حيث كان طالق مكبر صوت…قطع” : بشار…
بشار”فالبلاصة جاوبو مصدرو بهاد المعنى”. : تيسر اهاشم تيسر…انا ديييت ووفيت فهاد دنيا…الوجه الي عطا بالضهر مابقى يرجع…
ماجا هاشم فين يستوعب باش يجاوب حتى لقاه ضار عاطيه بالضهر…شاف بجنب ورجع شاف قدامو غادي مخنزر شوفته مشراارة…الشوفة الي باينة لناس لكن الشوفة الاصلية صعييب تبان لشي حد…مشى لغرفتو الي حاجز والي قطع الحجز يومين مشى لخارج مراكش ورجع ثاني حجز…سمع تيليفونو كيصوني…شافو بانت ليه هانزادا كتتاصل وراسلة ميساج فيه راني مشوشة عليك…هز راسو لفوق وساط نفس سخووونة وجويلة..ماعندوش خاطر يجاوب عينيه حمريييين…دخل لغرفتو شير بتيليفون…شير بالكونطاكت…حيد التيشرت بقى عريان من فوق…قلبو بغا يطرطق وراسو بغا ينفاجر…كيشوف بعيييييد. داير ايديه على خصرو عينيه فنقطة بعيدة وحجبانو ملاقيين مخنزررر…رجع ضار وتحنى على واحد الماريو تما فيه ديكورات ومرايا…بقى محني وكيحس بدوخة كتشدو وترجع تمشي…غمض عينيه وعاود حلهم نفس ثقااالت…تا هز واحد الفاز فالبلااااصة شير بيه تا تشتتتت شقوووفة….هز راسو الفوق تااا هزو…..ودار ايدو وراه كيحك فراسو بجهالة…بطريقة غريبة…كيتزنزن ويهضر غا وحدو…
بشار : بوووويا الي ولدني ورسلتو عند مولاه…مي نفرتني…تهميني نتي ؟…موتي وتبعيه موووتي تانتي وحطوها عليا.. حطووو يااولاااد القحاااب….
ضار مغزز سنانو وجهو عرقااان ومجيف…تلاح فوق ناموسية على ضهرو حس بيها،، حس بالنوبة غاتجيه…ماكاملاش دقيقة حتى تقلبو عينيه وبدا يتهز ويتحط فحال شي حد كيديرو ليه الصعقات الكهربائية…راسو كايتهز ويتحط ورجل ليمنى كتحرك لفوق تحت…النوبة الي جاتو زوج مرات فاقل من اسبوع…النوبة الي كيعاني منها هادي ست سنوات…بقى هكاك دقااائق معدودة تا بدا يتهدن وجسمو يثبت…الجسم والراس الي كيعانيو من نوبة “الصرع”…
طريق كلها وهو غادي طاااير…مشى طاير وراجع طاير..جا بين البينات…بين بشار الي عارف حكايتو وواقف معاه من زمان الزمنات…وبين النصف الاخر الي بقى فالدوار…
اول ما وصل لسيدي بوعثمان بان ليه رضوان تاهو جاي بسيارتو تلاقاو عند راس الطريق المؤدية لقبيلتهم او دوارهم…زاد هاشم وتبعو رضوان غادين طايرين منوضين الغبابر حتى حل الرباع (الي مقابل ليهم الارض الي محاوطة الفيرما من داخل والكوريات..تقريبا كاينين زوج ديال الرباعة تما)…كيف وقفو خرجو من سياراتهم تا بانت ليهم كريمة خارجة جايا فاتجاه راجلها وعينيها مدمعين…
رضوان : ياك لباس (حساب ليه ماتت طاح منو النص)…
كريمة : لالة عيانة بزاااف…سادة فمها وغا مغمضة متجاوب متكلم ماوالو قرا عليها سيدي القرآن..شوية بدات ترجع وسخفاات…
هاشم”طار يجري لداخل لقى سعيدة وزكراء وسيحمد وربيعة مرات سيحمد وعبد القادر…جالسين كيتسناو” : ياك لباس ؟؟
سعيدة : داخل عندها طبيب جابو حسام هاحنا كنتسناو نشوفو..معاها ختي توريا…
هاشم ماتسناش تايخرح طبيب…دق وهو يفتح الباب ودخل..لقى توريا واقفة ودايرة ايدها على حنكها وتبكي بالحس..وحسام واقف لهيه كيشوف فطبيب كيعبر ليها طونسيون ويشوف حالتها…تا كمل ووقف…
طبيب : طونسيون طايح بزاف…نورمال اسي القايد (كيعرفو هاشم حيث هو القايد ديال منطقة رحامنة)..وكيف كتعرف هي سيدة كبييرة فالعمر هادشي ممساعدش وقلة الماكلة وصحة غادية فالحضيض…و..
هاشم”كمش حجبانو بخوف” : و اش ؟!!…
طبيب : مانقدرش نضمن ليك واش تبقى مزيانة…”حك لحيتو” الاعمار بيد الله ولكن غانحطكم بالصورة غادي نمشي مع حسام نجيب سيروم ونعلقو ليها ديال القوة…ولكن الى ماعاونتش مع الوقت جسمها والعروق مغايتقبلوش مزال سيروم…الوضع صحي ديالها حرج…من هنا لتما اذا مكانش تحسن نقلوها ل عناية المشددة…”قرب ربت ليه على كتفو حس بيه خاوووي على شفة الانهيار”
خلاه ومشى خرج مع حسام الي بدوره غمز لزكرياء يتحرك معاه…هاشم بقى كيشوووف فمو مغيبة فمها مزكم تقولي مغرزاااه..وجهها صفر…تحنى جلس جنبها مغطينها بمانطة وخا الحال سخون حيث لقاوها باردة غطاتها توريا…قبط ايدها لقاها دافية شوية…
هاشم”شاف فتوريا” : ها ايدها دافية علاش مغطينها !؟
توريا”تنهدات” : كتبرد مرة مرة كتجيها تبوريشة…كتنيين كنحس بيها مبورشة داكشي باش غطيتها…لا صهدت نعريها…
هاشم”ضار شاف فيها..باس ايدها وعاود” : واااامي واااامي كوني مع الله يكون معاك…لاش هاد الحالة واااامي…وااامي خلي الي بغى يجي مرحبا بيه والي مبغاش مرحبتين…
توريا”مشات معاه فالخط” : الگلب فاض اهاشم فاض…ناس صبرت تا صبرت وعيات…
هاشم”حدو دور وجهو نصف دورة بدون ميشوف فيها” : ونتي ماعييتيش !!
توريا : مك مرضت انا ديتها فگلبي لعند الله…رمينا العار وطلبنا سماحة ا هاشم…اش مزال ؟ الى حلوفي راني حلفت يحط رجليه هنا نحيد الحزن عليا ونلوح حق الله ونجمع العيالات ونكفر الحلوف…
هاشم”ضحك مستهزأ” : ههههه…واااا توريا الى نتي الگلب فاض..گلبو هو فاض وكرمت فيه الفيضة…حتى ناس را كتعرف تحقد وتشد ف قلبها ماشي غا نتي واااااا مرت نور الدين…
توريا : كتجبد سمية الغالي الحنين باش تحش ليا رجلين !!…
هاشم : هانتي گلتيها الغالي الحنين…الغالي الحنين ديما سيرتو فاللسان…ديما مجبود باش يترحمو عليه العباد حيث حنين…والي كبدتو حجرة ودمو گطران (قطران) وگلبو كحل…
توريا”هزات فيه حاجبها” : هاشم !! هضرتك كبر منك لا ؟!!
هاشم : راني بشيبي ولدي غذا ولا بعدو يدير دارو ونولي جد..حسبي من هنا لتم!!!…هضرة الحق اختي توريا مكتعجبكمش !!
توريا”سكتت شي دقيقة هكاك…هازة حاجبها وهضرتو كطلع وتنزل فيها..من ناحية متاكدة ان هضرتو صحيحة…قلبها قاصح وزاد قصاح وكبدتها حجرة..واخا تنكر تتعيا هضرتو صحيحة…ومن ناحية ماعجبهاش الحال…شافتو ضار كيشوف فمو على الله وعسى تحل عينيها ولكن والو صدرها كيطلع وينزل صافي…تنهدااات نيت وهي تنطق تا حرك راسو كيسمع ليها” : مااادير بحسابي انا..مايدير بحسابي لا يسامحش اهاشم الى مابغاش…
هاشم : خاصو وقتو اتوريا…قويتو عليه تا مرض فصحتو…
توريا”كمشت حجبانها” : كيفاش مرض فصحتو !! اش بيه !؟
هاشم”الصمت”…
توريا : اش بيه اهاشم !!..
هاشم : مريض اتوريا…مرض فراسو مرض فراااسو اتوريا…هادشي خاص هو يگولو ليك..ماعندك ماتعرفي مني..حاولي كي حاول هو معاك…ساعي رجاه وسعاي المسامحة ماشي بين ليلة ونهار يگوليك مرحبا…ماعجبك حال حيث ماسمحش لمو !! وهو عجبو الحال حيث مو كدعي عليه وتشحت وتسخط عليه دنيا واخرة !!…حلال عليك وحرام عليه…”ناض وقف من بعد ما باس لمو ايدها وجبهتها وتم غادي وهي توقفو”
توريا : الى مابغاش يدير بوجه جداه..جداه الي مسامح ليها وهاهي سعات شوفتو..ترجات يرجع لخيمتهم…گوليه را اليوم حياة وغذا ممات…گوليه يرجع فوجهها..الى ماتت وهي ماشافتو رجع يزيدها فالحساب اهاشم !!…
هاشم كمش سيفتو من هضرتها..ماجاوبهاش وهو يمشي خرج..خرج باغي يتنفس حس براسو هو كلو باغي يغوت ويحقد على زمر كااامل…دار ايديه على نصو كياخذ النفس قبل مايجبد تيليفون ويدوز الخط…كيف العادة وكيف الولف…الخط راه دايز وشكون يجاوبك ياا عبد…مرات عدية تعاودت وتعاود حتى تسمع الخط تطلق..وتسمع هاد المرة صوت الغليض وتسمعات البحة ولكن البحة عيااانة واكلة دق كيقول ” نعاام اهاشم”
هاشم : بشار !!..
بشار : ماتت ؟؟!…
#عبادان او بالفارسية #آبادان
…المدينة الي كتواجد في محافظة خوزستان جنوب غرب إيران على جزيرة عبدان..والي تعرفات فالعصر العباسي على انها ميناء رئيسي…وهي حاليا مركز اساسي عالميا لتكرير النفط وهي متصلة مع آبار النفط الإيرانية بواسطة أنابيب…والي كاتضم بزاف من المنشآت البترولية بدءاً من مصفاة النفط الي تشيدات وتبنات أثناء حكم الشيخ خزعل بن الشيخ جابر المردا. حتى ان فيها حاليا مطارا دوليا….
الساعة الثامنة مساء…بتوقيت هاد البلاد لانها متأخرة على المغرب ب ثلاثة السوايع حيث المغرب كيسبق…
واقفة بنت فعمر 33 سنة…جمال اخاااذ…متمثل فملامح ساحرة وحنييينة…عينيها سوداوتين حكاية ليل مضلم..وشفارها حكاية ثانية…بيضاء البشرة وناعمة الملمس…زينها ايراني مميز…كانت واقفة قدام البوطة جامعة شعرها اسفنجة مهملة…كتحرك فديك صوص طوماط بعقل غاااايب…واقفة حافيانة ورجل موقفاها على روس صباعها فيها خلخال بنجيمات كديرو غييير فالدار ولا فالمانيا ماتقدرش ديرو فبلادها على برا حيث تقريبا من الممنوعات زينة ديال نساء فاغلب مناطق ايران…لابسة بيجامة ساتان مخططة خطوط طوال بين صومو والبيض…تا سمعات اسمها فيقها من سهوتها…
هي : هانزادا…ناااارگيلز ( جوزة الهند..كيقولوها فحال دلع..فحال زمردتي فراشتي…فريزتي..هما عندهم هادي بالدلع هاكا بالفارسية)…
هانزادا”طفات على صوص وضارت عندها وتبسمات” : فريال..
فريال : چه کار میکنی ؟ (اش كديري)…
هانزادا”وراتها صوص وعرات على سباغيتي” : شام بیار..ماما کجاست؟ ( كنصايب العشا..فين ماما)…
فريال”تبسمات ودارت ايدها على نصها” : هانزادااا اغوووه…”رجعات دارت ايدها على حنكها مخرجة عينيها بمزاح”…یادت رفت تهران رفت؟ (نسيتي بالي مشات ل طهران)
هانزادا : ييييي…
فريال : ههههههه…اييييي…”تنهدات وقربات ليها” چه چیزی در ذهن شماست؟ ( اش مخلي بالك مشغول)…
هانزادا” تنهدات وهي تشير ليها بعينيها جيهة تيليفون” : بشار…
فريال”تنهدات مغمضة عينيها” : هففففف…مگه حرفای دیروز پدرم رو نشنیدی؟مگه نفهمیدی…(ماسمعتيش هضرة البارح ماسمعتيش هضرة بابا)…بشار مسلمان سنی است و تو شیعه.. تو به فرقه خودت یقین داری.. پدرم اجازه نمی دهد با او ازدواج کنی…حتی اگر شما در دکترین خود باقی بمانید و او نگذارد، پدرم آن را نمی پذیرد (بشار مسلم سني ونتي شيعية…ميمكنش ليك تزوجي بيه حيث بابا مغايبغيش الا اذا اقتانع بمذهبك..ونتي لا بابا مغايبغيش…
هانزادا”هزات كتافها” : به محل کار و اقامتم در برلین برمی گردم و تا پدرم قانع نشود برنمی گردم… (غانرجع لخدمتي وسكنتي فبرلين حتى يقتانع بابا…
هزات عينيها مغرغرين…وجاوبت…
هانزادا : بشار محتاجني وانا غانوقف معاه…مشى لبلادو باش يجيب وراق زواج وغانتزوجو ف بلدية برلين..
فريال : هازادااه…نتي ولفتيه حيث وقف معاك ففترة الطلاق..حيث قريتو بزوج فنفس الجامعة…وقف معاك فضروف قاسية تعلقتي بيه…اما هو غير بغى يبقى معاك وميرجعش لبلادو…ياك هادشي الي قلتي ليا ؟ ياك ؟..كيبغيك كيف ما نتي كتبغيه ؟!
هانزاده : ماشي قليل وانا معاه…
فريال : اصدقاء…تقرب ليك فضروف قاسية عليكم بزوج…نتي مغاتقظريش تغيري المذهب ديالك وهو كثر… واذا كان تاهو باغيك علاش مكيهضرش معاك ؟ كيجاوبك غير بميساجات وفيييييين وفين…
هانزاده : هو هكاك طبعو…
فريال”بنظرة شك” : هانزاااداااه…الي كيبغي يتحدا الطباع الي فيه…الي كيهتم كتبان عليه…
هانزاده : الي كيبغي كيتزوج الي كيبغيه…وهادشي الي واقع دابا…بشار هذاك طبعو انسان بارد من برا ولكن بركان وسط جبال من لداخل…واخا بارد د.مو حااامي…بشار حنين وخا قاسي…بشار محتاجني وانا محتاجاه…و بابا باغي نرجع ل الحسين والحسين هو الي معمري نرجع ليه…خمس سنين باش تفارقنا..براكة…فريال والعلي والعلي ماتبقايش تجبدي ليا هاد الموضوع…والا والعلي حتى نقطع ونرجع…واصلا بقيت بزاف هنا…
فريال : اوغوووه !!!…تهدني…انا نصحتك غير متعلقيش…وبشار را مغايبدلش المذهب على قبلك…
هانزاده : مع الوقت يقدر يقتانع…
فريال : الى ماقتانعش…
هانزاده”الصمت”
تنهدات فريال وهي تحرك راسها وضارت خرجات من المطبخ… رجعات كتقاد فالطباسل باش تحطهم فصلامونجي الي تما..حتى سمعات صوت رنة رسالة من هاتفها جايا…ضارت بزربة كتمسح ايديها بفوطة وهي تلقى ميساج منو…بالالمانية باش كيتواصلو…
بشار : عيان اليوم..غذا نهضر معاك…بعدو راجع لبرلين…امتى راجعة من داركم….وشنو درتي ؟!
هانزاده : رجعات ليك نوبة !!…
“حطات تيليفون كتسنى يجاوبها حطات طباسل ووجدات يلاه بغات تعيط لختها وهي تمشي تشوف واش جاوب..لقاتو قراه ومجاوبش…تنهدات وهي تعاود كملات الهضرة”..
هانزاده : جمعت وراقيا..دارنا مع الاسف مغايقدروش يجيو…
بشار : المشكيل ؟!
هانزاده”بينها وبين راسها..حيث عرفاتو عاق بيها” : اش غانقوليه اااش…”جاوباتو” حتى نجي لبرلين ونهضرو…
رسلات رسالة شافتو قراها ومجاوبش…هو فديك اللحظة سخانة كانت يلاه طلقاتو ناض دوش ومشا لفراشو تكى…كان بالو فبلاصة اخرى…غمض عينيه وتيليفون فوق كرشو مخلييييها تسافر بافكارها تخلط وتجلط تبني وتريب..وهو ناااعس الي بغى يموت يموت الي بغى يربح العام طويييييل…
لداخل جالسين على برا البيت الي فيه عيدة…خرجات سعيدة هازة بلاطو فيه داكشي باش كيمسحو ليها وهي توقف شافت ف الحاج…وحشمت تقول اش خاص تا خرجات توريا وهي تنطقها…
توريا : الحاج…غايخصنا لكوش…”تنهدات وحدرت راسها”
ع.القادر”بحزن وملامح حزينة” : لهنا وصلت ولا !!! (زعما لهاد درجة)…
سعيدة : وانعديو الحاج نعديو…
رضوان : وهذاك خينا الي دارت عليه هاد الحالة فينهو “توريا هزات فيه عينيها”
كريمة”نغزاتو ونطقات بالحس” : رضواااان…
رضوان : زمي عليا فمك نتي…”شاف فباه” فين هو ؟ واسيد قالب وجهو على كلشي البارح مسخوط والصباح طلبو فيه يرجع دغيا رجع مرضي !!!
توريا : رضواااااان….
رضوان : ختي توريا سمحي ليا هادشي ماهوكاكش…هاهو قالب وجهو مرضات بسبابو…لاش هادشي ؟؟!!..
ع.القادر : وزن كلامك ارضوان وزن كلامك….
رضوان : لاش نوزن كلامي ابا !! هضرة الحق مابغاها حد !!!
كيهضر وهما كيسمعو ليه…حتى نطق واحد صوت موراهم كان سااااكت وكيشوف…
سيحمد : علاش ماعندوش الحق…
ع.القادر : ولاكون دخلو سوق راسكم !!!
سيحمد : علاش ؟!…را عمامو تاحنا….
ع.القادر”غوبش وضرب بعكازو تا قفزت كريمة اما لاخرين مولفين” : وملي نتا عمو مالك ماكنتي تسول فيه…ونتا اداك السويكت مالك ماكنتي تسول فيه…ياك كان غا حداك ها طاليان ها لالمان…عارفينو مفاوت فراسو سولو…هادي الر جينا نديرو بوجه راكم عمامو…اما الوجه لاخور دخلو سوق راسكم…وراني هضرت…
سيحمد مطمط بشفايفو وهز ايدو بمعنى يلاه اسي..ناض هو كاع وتبعاتو ربيعة…اما رضوان شاف تا عيا وناض من بعد ما صونا ليه تيليفون ومكالمة ميقدرش يهضر حداهم…كل يلغي بلغاه فهاد دار…توريا بقات تشووووف وهازا حجبانها مخنزرة…
ع.القادر”شاف فسعيدة” : هاشم فينهو ؟!…ونتي (توريا) بنتك فينهي…
سعيدة : هاشم فالقيادة…واشراق الفوق مع يوسف تايجي هاشم يديهم لخوهم…
توريا : لا مايمشيوش…
سعيدة : كيفاش !!!
توريا : كي سمعتي…گلب وجهو خليه…مادار بوجه جداه الي بغى الي عليا درتو…
سعيدة : هذا حد جهدك !!! ” ماخلاتهاش تاتهضر وهي دور حلات البيت عند عيدة ودخلات”…
عبد القادر”ضرب بعكازو وناض” : ديرو بالكم مع مليكة بين ساعة وساعة توصل…ونتي لا تزهزايش (ماتفاوتيش) ولاتيأسيش شدي فلجام ويكون خير…را ولدك هذاك وهادشي الي عطانا الله هذا المكتاب اتوريا…را كبدتنا الي ترزات قبل ميكون راجلك وهاحنا عاضين فالصبر…
جايا تجري وتلعب تا وقفات وهو يبان ليها زكرياء..الي فعمر 15 عام…واقف داير ايديه فجيابو كيهضر مع حسام زعما را الولد خاااتر فعقلو وكيناقش فالامور العائلية مع حسام…الي شافو من بعيد هادشي الي يقول والي قرب ليهم ؟….
حسام : واش نتا فيييو…وتا سير مع بوك با سيدي مغاديش مدهي مع مي لالة…وباك خاص يدي الفاياجات لماليهم…
زكرياء”حط ايدو على صدرو” : نصيبش الله مانصيب..مي لالة عيانة ودار عامرة محتاجة الي يقوم بيهم…راك عارف ابا حسام الوقت…
حسام”كيرمش” : با حسام !! تا كيفاش با حسام معاشر معاك من سنين !! وتا رجع لعقلك..تا مال هضرتك گارحة…تا سير مع بوك ينعل بوك…
زكرياء”كمش عينيه ورجع شاف فيه” : يااا عوذ بالله ياعوذ بالله منها سلعة…تا لا منصيبش…بويا طريگو بعيدة وانا عندي منقضي..
حسام : خايف يفوتك قشقاش مع دراري !!! يا ويلي…
زكرياء : وايلي اصحبي حضر عقلك…”تنهد كيحك فصدرو بختورة زعما را شااايب…قهرهم قهر مو بهاد الفعايل متختخ مرخون مساااالي…شاف حسام منيش بعينيه وهاد نضرة تيعرفها زكرياء بالي موراها واحد صلية يبين ليه القبيلة الي حداهم اش كدير” اودييييي…نمشيييي نشوف بويا اش باغي…صافي تخدن اصحبي…
حسام : دردف يلاه…”مشا وهو متبعو بعينيه” يالاطيف…(ضار وهو يشوف حسنية واقفة) حسنية عاش من شافك…فين غبرتي…
حسنية”كتجاوبو باشارات” : اببب بب ببب…
حسام : ياسين !! وياسين شهر هذا ماشفناه…ولاخور غطس فمراكش قاليك كيخدم عليك الالة اش بغيتي ههههه…
حسنية”غمضات عينيها كتبتاسم وضحك…شوي عطاتو بالاشارة” : اببببب…
حسام : شكون !! شرحي مزيان مافهمتش…اااه بغيتي منار ختي…مشات هي وريهان لدار جدي فدوار صوالحة تما يبقاو تاتجي عمتي الليلة ولا غذا فالصباح…ودوزي نذوقك من شكلاط صافي ههههه
تبسمات ليه وهي ترجع فحالها…مع ضارت تا سمعات صوته كينادي عليها…ولد فعمر 16 سنة وزيادة….كلو عامر غبابر وهاز فاس فوق كتفو واحد الخنشة عامرة تفاح…جاي وكيضحك فرحان…وصل عندها وقال…
ياسين : مي خرجتي تاني…ماجاش تشرف من مراكش !!
حسنية”كتحرك راسها بلا” : ابببب…
ياسين : صونيت ليه فالسروية قاليا جاي..كان عندو امتحان لاخر….اجي تشوفي جبت ليك التفاح الي كيعجبك امي…
اشرف الي كيقرا فتكوين شعبة نجارة…لضروف مقدرش يكمل قرايتو وثاني كيخدم فالفلاحة باش يدخل قوتهم اليومي لان عائلة الحسنية كلها نكرتها فاش عرفات ما جرا ليها وخرجات كرشها…دورو عليها وجههم ورماوها وتبراو منها…بلغات فعمر صغيييير والعام الي بلغات فيه عاشت فيه المحنة…وتزرعات فكرشها الروح…عطاها الله توام يتشد بيهم الضهر…واحد كيخدم فالفدادن وتاني ولا قرر يكمل فالتكوين ويكسب حرفة وهو فعمر صغييييير…اطفال بالعمر ورجال بالدراع والعقل…حكاية الحسنية ماشي غريبة حكايتها طرات لبزاااف الاعمار مختالفة حكاية الحسنية قاسية…قسات عليها الوقت ولكن عطاتها زوج دراري يتشد بيهم الضهر…
وصلات الخبار ل مراكش لعند مولاي حفيظ الي كان كيتغذا فالدار بحكم يوم الجمعة عندو روپو…
م.حفيظ : الله اكبر…الله يشافيها اودا الحاج الله يشافي..دابا ندوز ان شاء الله فالعشية انا والحاجة نشوفوها..يالاطييف مكاين باس الحاج مكاين باااس…”قطع” لا حول ولا قوة الا بالله.
ناديا : كي بقات مسكينة…
م.حفيظ : وا كيطلبو الرجا من الله والرجى فالله…محنة الحاجة محناااا…
حبيبة : مسكينة…الى مشيتو نمشي معاكم !!”شافو فيها باستغراب حيث ممولفاش هي تقتارح تمشي لعروبية” عزات عليا عمري نسى اش دارت معايا نهار العرس…ضريفة بزاف وكتكحز ليا الماكلة وتهلات فيا فاش بنجي لهنا…دخلات ليا لقلبي ابابا…
م.حفيظ : واخا ان شاء الله…ونساليو وطلعي لبسي هذا هو الوقت باش نرجعو بكري نديرو الواجب…
ايوى هذاك هو حال دوار ودار الرحماني الي لحزن غيم عليهم…وهذا هو حال رميلة الي حزنو على حال الحاجة عيدة…
دار الرحماني عمرات…تكبو عليهم الحباب الي من تريكة عيدة حيث عندها همة وشان فدووار حيث الاراضي كلهم تما دياولها وخير فسميتها والحاج كيتصرف فيه…من غير كاميوات الي ديالو هو وولدو سيحمد اي ربيبها (سيحمد ورضوان ماشي ولاد عيدة…امهم ماتت يعني ربايبها)…ها من تريكة سعيدة ها من تريكة توريا تاهي ها من حباب الحاج…الفطورات غاديا جايا الغديان ها كسكسو ها شلاااا….
صافية”اخت توريا وام كريمة…جايا داخلة هي وبنتها الي هي اخت كريمة صغيرة..بانت ليها توريا وهي تشالي بايديها مزرزرين ذهوبات” : واااا خويتي وتي شهادشي سمعت..وتي عگوزتك كي طرا ليها واااا خويتي…
توريا”سلمات عليها عينيها حمرين” : مكتاب اختي صافية مكتااااب…
صافية”حطات ايدها على صدرها بجهد تا تسمعات الخبطة” : الله ياربي الله وعلى الحاجة ومانبغي ليها ديك التمغيطة الله…ديني ليها اخويتي ديني نشوفها….
توريا : واخا صبري تخرج الفرملية وربيعة وسعيدة كيبدلو ليها ليكوش…زيدي معايا لصالون تشوفي نيت الحاجة هنية…
صافية : ايه نوفها ايه…فين كريمة بنتي…وفين مليكة طفلتك (هي لوستك كيقولو ليها طفلتك)…
توريا : وا شنگوليك اختي مليكة كل ساعة نگولو هادي طوموبيلة ولدها…مزال ملحگت لهنا…
صافية”تا قربو لصالون وهي دور هنا وهنا وصدرت بنتها ونطقات بصوت منخفض” : تي ولدك مابغاش يجي !!
توريا”حركات راسها ب لا”
صافية : ما قويتيش عليه اختي ها ؟! “حطات ايدها على صدرها” غا ساعفي ورطبي كبدتك اختي مالكي حارة على ولادك..نقصي ااااااخويتي راه العمر فايت كية الي مشتاقهم مالگاهم…كية الي مشتاق الكبدة ماصابها…ولواه اخويتي نتي الكبيرة ومولات العقل…لا تخليهشاااااي غابر عليكم بزاف اخويتي كول بزاااف فالغيبة…
توريا : يحن الله اصافية يحن الله…دخلي اختي دخلي…
دخلاتها وجلسات معاها…ناس داخلة خارجة وعيالات لواس من الكوزينة ماخرجو ضهورهم تقسمت غا بطياب..ها اتاي ها القهاوي…تريكو تسمع غير عطسة يتكبو كلهم…خاصهم يبقاو داخلين خارجين خاص العيالات يكون على قدم وساق باش يوجدو الماكلة…قصاري كسكسو جوج يدخلو لهاد صالون الي فيه رجال وثلاثة لصالون الي فيه العيالات…
واحد شوي تا بداو يسمعو الغوااات وقوم ربي العالمين تجمعات العيالات بداو يولولو حساب ليهم الحاجة ماتت.وربي دا امانتو.. لكن الي وقع هو دخول مليكة من بعد يومين ديال طريق يلاه وصلات وكانت عارفة امها مريضة وبلغوها فطريق بالي تمحنات واليوم زادت تا وصلات يديرو ليها ليكوش…طلو عليها تا بانت ليهم جايا لابسة جلابة شيبية وغليييضة وشعرها دايرة ليه ليميش وايديها غلاض وعامرين…ومعمرين تا بذهوبات كل ايد فيها ستة البراصليات من ذهب فرنسا…وعنقها فيه ثلاثة سنسلات وحدة مضفورة غليضة وثانية متوسطها مصحاف ولاخرة رقيقة فيها حجيرة كتلمع…حجبانها غلاض ومصايباهم مع دخلة طلقاتها بغوتة…
مليكة : واااااا مي تي كي طرا ليك ااااامي…واااااا مي فينك الحنينة مي ماهي من مسواك…ياك امي گلتي ليا نتلگا ليك بالتمر والحليب وااا بنتي مليكة راكي غبتي عليا غيبة سنين…وااامي را غير ثلت سنين درت فيهم وراقيا باش نجي نطل عليك بالهمة وشااان…وااامي را ولادي تشوگو يشوفو جداهم…وااامي لا تغدريني كي غدرني الحنين نور الدين ما سمى ماعلم تا داوه مع طريق…وااااااا مي وااااااا….
تمات جايا سعيدة وتوريا وسبحمد شدوها وهي سخفانة مع غليضة من فوق وتحت وهي طيح وصندالة ديال طالون تلوات ليها…تا بانو سيگانها غلاااض…نوضها سبحمد تعاون معاه رضوان كلشي خلاتو يبكي…بغاو يخليوها تستاراح مخلاتهم تا خلعات ولادها وراجلها عاد دخلوها تشوف مها…لقات هاشم معاها…
مليكة”غا هي دخلات شافت مها مغطة” : واا ميمتي وااا ميمتي اهى اهى…واااا الحنينة المسولة فيا…
توريا : مليكة كوني مع الله يكون معاك…لا تزيدي عليها الله يرضي عليك…
مليكة : دات فقصتها معاها !!؟..فقصها المغضوب فقصها !!! مالو على هادشي مااااااالو…
هاشم : نعلي شيطان امليكة راك يلاه جيتي…بلاتي وهضرو فهادشي.. وسكتينا من الهضرة..واش بغينا نوگضوها ولا نزيدو على ما بيها !!؟…
خلاها واقفة كتنخصص وخرج…
خرج برا لوطيل عاد دار ففمو فيه سيجارة شعلها وخلاها فيه دخانها طالع ونضاضر شمس ففعينيه…بنفس ستيل لباس ميليتغ غير هاد المرة كلشي كحل فكحل…جابو ليه طوموبيل دار الفاليز فالسيارة وزاد خرج من لوطيل…
غادي فطريق كيكمي وحداه كانيطة ديال شراب…شرب منها وعينيه حمريييين…كيكمي بواحد البطء عينيه على طريق…تا صونا ليه تيليفون هبط عينيه لشاشة بان ليه هاشم…مد ايدو بكل برود وقطع عليه…ملي قاليه بالي ماقدرش يجيب اشراق ويوسف مابقاش هضر ولا دار حتى ردة فعل خلاهم على خاطرهم…عاود صونا ليه هاد المرة خلاه يصوني تايعيااااا….
حبس صدرها من تنخصيص وهي شادة فيد امها الي مغيبة ومعلقين ليها سيروم…تا دخل عبد القادر وهي دور شافتو وهي توقف ومشات عنقاتو كتنخصص وتبوس ليه بايدو…
مليكة : با لباس…
ع.القادر : نعلي يا شيطان…واش حنا باغييين نهنيو الوقت…لاتخليهاشاي تسمعك الله يرضي عليك امليكة…وسيري شوفي ولادك خليتيهم مخلوعين مالك على حالتك !!
مليكة”بدات تبكي” : وا با عزت عليا الحنينة…جايا معولة ندوز كونجي معاكم تالقيت الي مانويتو يااااا با…
ع.القادر : والى هذا مكتاب الله اش ديري ؟! تعاندي مع مولاك…سيري الله يرضي عليك…را جاي طبيب بغا يشوفها….
مليكة : الغابر ماطيحش كواريه…
ع.القادر : مليكة…الهضرة ماشي هنا.. ووقتها ماشي دروك…سيري نعلي شيطان ماهو بوقتو هادشي…
تنهدات وهي دور وخرجات تشوف ولادها تا بانت ليها توريا واقفة بعييييد….عاود شافتها باقي بلبسة البيض تا لحمها بورش من جديد وعقلها رجع لاكفس ذكرى عاشت وهي ذكرى وفاة خوها الي تق.تل على ايد ولدو والي حضرااات لواقعة…مزال بين عينيها الكارثة عمرها تنسى ليها…شهووور وهي طايحة فالفراش…شهور وهي تبكي وتدعي الله ياخذ الحق…شهور وهي فصدمة مافاقت منها غا بالكشايف تا تزوجات وعاشت فدار ناسها عاد قدرات تمشي لبرا وتعيش حياتها…كترجع لدارهم كيتعاود كلشي من جديد تا بدلو الدار كلها عاودوها من جديد جمعو فيها ثلاثة ديور فدار وحدة وبدلو الواجهة وحوطو على بلدانهم….عاد تبدلات دار والبيوت وكلشي…ولكن غا كتشوف توريا باقيا بالبيض فلباسها كاترجع ليها ذكرى…
مليكة”قربات لعند توريا الي كانت هازة منها بهضرتها وهي تعنقها وتما عطاوها لبكا بجووووج…تا قربات لوذنيها” : مرات المغدور…
توريا : رضينا بالمكتاب امليكة…الكتاف تهدة والكواري طاحو…
مليكة : مااااشي ساهلة اخويتي ماشي ساهلة…مزال كيتو هي هي من جيهة خوييي…
توريا : الله يلاگينا بيه فالجنة اجمعين…”تنهدات وطبطبات على ضهرها” سيري رتاحي فبيتك نتي وراجلك…
سعيدة”سلمات عليها” : وااا خويتي كوني مع الله يكون معاك…سيري رتاحي…حسام يسالي ويعاون المعطي راجلك وولدك اليزيد فالباگاج (حيث دخلو ب رينج روفر كاتكات محملة من فوق ولداخل)…سيري بعدا بدلي حوايجك ورتاحي فشي بيجامة…اشرااااق…سيري مع عمتك عطيها بيجامة ولا تشامير تبرد بيه…
مليكة”كتهضر سخفانة” : غير نبدل ونجي منصيبش نخلي مي…
غا هي ضارت شدوها ناس بتسلام تا حنكها طاب وهي تسلم وتعطي فالصواب…شي ربعين واحد الي جات هاد صباح ومزال الخير كيتكب…
العشية بغات تبدا تعاشى والعصر قرب ياذن…غااادي مهاااادن عينيه حمريييين طاوي درعانو الصحاح على النافذة وحاط مرفقو موقف ايدو الي فيها سيجارة….هز الكانيط ورشف منها جغمة تنغم بيها شافها كملات وحطها تايرميها ف شي بركاسة…كمل سيجارة وطفاها فطفاية سيارة وضرب المجر قدامو خرجت ليه باكية ديال حلوة فليو رماها ففمو…تا عاود صونا ليه هاشم هاد المرة بقى مصر تا كان غايقطع وهو يجاوب…
بشار.: هاااشم راجع فحالي..صديت اهاشم صديت…قويتو عليا بزاااف….
هاشم. : بشار الى عمري طلبتك ودرت بخاطرك…بوجهي ابشار جي شوفها وااااا بشار مي غاتمشي عند الله ابشار “صوته بح وهرب ليه”…وراني اخويا باقي فهاد الدار على جالها وجال با اما راني بدااااري ندير عشرة وليني الواليدين اخويا مي هي البركة…
بشار”لاقا حجبانو بتغوبيشة” : اش كاين ؟؟؟…
هاشم : مي ابشار ميييييي…مي الى بقات على هاد الحال صباح يعيطو لفقيه يقرا عليها وتجي مي هنية تگطر ليها….الى بقات من هنا لصباح ربي يدير تاويل….دير بوجهي ابشار دير بوجه سعيدة وبوجه جدك الي خلاك بخاطرك…انا رامي عليك العار ابشار خليها تحس بيك وديك ساعة رجع فين بغيت نعل الي يگوليك يخ….وااااا بشار…
مخلاهش تا يكمل قطع عليه وهو كيهضر…ضار جيهة شرجم وبدا يتمتم غا بفمو بسبان بشوية وعينيه مخنزرين فطريق…
بشار”غمض عينيه وضار لهيه” : ينعل بو مها حياااة معاكم…
بقى غادي وطوموبيل كسيراتور فيها كينزل برجلو وسرعة كاتزيد تعلى…غادي منير فديك طريق وعينيه جامدين بنفس الشوفة الحادة….غادي غااااادي غااااااااااادي….فجأة ضرب واااااحد مولاتي فران سييييييييك تا تسمع والعباد ضارو كيتمتمو طالبين سلامة على بالهم كسيدة غاطرا كيتسناو يسمعو صوت الاصطدام….لكن هنا هو فرانا وضرب واحد دورة ومع كانو طوموبيلات وراه كلشي فرانا على شوي يتساطحو….
ضرب الدورة والوجهة الي سنيييييين موصلها…الوجهة الي ضرب عليها…والي غادي صدرو عامر وعينيه كي جمر مايبشرو بخير… خلا وراه عجاجة ديال بنادم كتغاوت ونعل بو الي داها فيكم…مشاااا هو شد طريق ووجهتو هي…
“سيدي بوعثمان”….
#يتبع
شاركنا رأيك في هذا الفصل 🌹