الفصل 1

أنا أخوتشي وأعوذ بالله من قولة أنا الى ماكدبتش فالنهار شي 10 ديال الكذبات يفتركو شمل ويهزو جناوى ويطيحو الرواح مايدوزش عليا النعاس ..أنا الشيطان مكايدورش بيا كايصيفط عندي غير ولادو ندير ليهم حصص الدعم وتقوية .. أنا هي هاديك لي كل أم كادعي الله يبعدها على ولادها .. انا هي الابنة سيئة و الأخت القذرة والحفيدة المنبودة والتلميذة المشاغبة و قائدة رفقاء سوء بگراد جينيرال .. بقات ليا غير الزوجة نعمر الخانة ديالها فسيفي ولكن تاوحدة ماترضى تزوجني لودها بالسيف أنا راه غير ففترة الخطوبة كانقلب العائلة سفاها على علاها تاكايوليو هازين سيوفة على بعضياتهم .. گاع لي كايشوفني فمديتنا كايشير ليا بصباعو راهي بنت الحرام من فعايلها غادة .. راه هي بنت الحرام من فعايلها جايا .. كلشي كايقول عليا غانموت كارمة والما مايسخنوش ليا وقبري يلقاوه كلو لفاعي يعظوهم ان شاء الله … مانكدبش عليكم أنا راه بغيـــــت نتوب ونشد طريق الله ونكون تا انا بنت صالحة غادة ونور مشعشع مني ولكن راه الغالب الله لي فيا مامهنيني … لواليد شحال من مرة كواني على الكدوب لدرجة واحد المرة كان على شوية مايقطع ليا لساني كن ماحفظني الله ..حيت سخطات عليه مو وهي كاتموت بعدما قلت ليها راه شرا ليك الكفن من جوطية كلو تقابي وحفر ليك قبر شوكة جا على جرف غاتودعي من دنيا ومن لاخرة .. وراه جاب لعدول يفرق من وراك الورت كايتسناك غا توكلي على الله .. جاب الله جاب ليها الفقيه كايحلف معاه قبل ماتنطق الشهادة .. أما مانقولش ليكم كن مات ساخطة عليه كن انا لي غايحفر ليا قبر شوكة و يبقا يجي يخوي عليا ليصانص من جمعة لجمعة .. ديما كايقول ليا كاع المساخط كاطرا ليهم شي حاجة إلا انت وكلت عليك الله .. ونقطة لي فيضات الكاس معاه .. هو ملي شريت صداع لختي مع راجلها وجات بستة ديال الولاد قرقات ليه فدار وراجلها حلف مايعطيها النفقة .. هنا الواليد والواليدة كشكشو .. سخط ؟ سخطو من زمان .. دعوة ؟؟ دعاو من هدا شحااال .. تبرية ؟ تبرااااو لعام لي قلت فيه واع .. بقا ليهم حل وواحد ووحيد هو يجريوا عليا من الدار

ايوا اخوتشي جراو عليا من الدار شغانقوليك الدرية زوينة فزناقي كي دجاجة كاتقاقي .. سمعت بلي البنت ملي كايجريو عليها دارهم كاتمشي لدار الحرام .. داكشي لي درت أنا أصلا جهنم مسنية ليا عليها من زمان .. سخط الواليدين الكذوب والبهتان .. النميمة والفوحان واش غاتزيدني الزنى شي حاجة من غير تعلي مقامي فجهنم .. مهم مشيت بالنهار قالك الخدمة عندهم ماكاتبدا تا ليل .. قلنا مكاين باس نضت كانتعرف على الزميلات وسابقاتي فالحرفة ايوا خوتشي بربي مكملت ساعة بيناتهم تا ناضت الحرب .. بلا ماتشوفو فيا أنا مادرت والو قلت ليهم غير شكون الباطرونة فيكم ؟؟ أتا بديت كا نشوف شعر طاير والدم سايل .. هزيت قلوعي وخرجت على بونت مكانو غايجمعوني الصطافيط معاهم حفظني الله .. ايوا رجعت مشردة تاني أودي الى ماقبلوش عليا واليديا شكون لي غايقبل عليا يا سيدي ياربي .. مهم درت بمقولة ” تحركو ترزقو ” مشيت الحمام درت مع الكسالة ترتاح هاد النهار وأنا نرومبلاصيها بشرط داكشي لي جمعتو نعطيها منو النص من بعد ماقبلات .. شمرت على دراعي هزيت السطل وبديت ندور على العيالات .. ولساني شديتو بسناني .. لايفضحني تاني .. (هانا على القوافي )..مهم بقيت حك يا ماتحك واحد الغليضة الله يسمح ليها سخفاتني دعيتها لمولانا ..و باش نتفك منها قلت ليها ” بغيت نسولك وماديريهاش مني قلت الصواب “.. قالت ليا سولي .. قلتليها ” راه كوووولشي لي فالحمام كايقول عليك بلاصتك حدا البرمة .. وانت جالسة بعيــدة عليها كيفاش ؟؟؟ ” أو هيا نتوض وبلا مانعاود ليكم العيالات الله يهديهم كايديرو من الحبة قبة .. داك البرمة لي جبدات صداع صلقات نص فيهم .. مهم الى كانت دار الحرام جمعاتهم صطافيط فعيالات الحمام جمعاتهم لومبيلونص .. ايوا اخوتشي وخواتاتشي خرجت تاني لزنقة .. شريت واحد رايبي جميلة بردت بيه .. وجلست جنب واحد طريطوار كنتسنط لعظامي وكنخمم واش نمشي ديكلاري بالواليد عند جدارمية ولا غير عند القايد يرجعوني لبيت الزوجية ديالو هو و الواليدة .. وانا مزالا كانفكر وهي دوز من حدايا واحد سيارة نقل الأموات تابعينها الناس … قنيت على واحد خونا وانا نسولو ” خويا الميت راجل ولا مرا ؟؟” قالي “مرا” قلتلو ” الله يرحمها الى رحموها فعايلها .. الدار العزو فين جات ؟” قالي ” فالقلعة ” ماكملها تالقاني ضربت فالطريق النص

وصلت لدار العزو .. كانو يالاه حاطين الكراسة باقي مداروش الخزانة .. لقيت الباب محلولة دخلت مانخرج غير فواحد الصالة عامرة عيالات كلشي بدا يشوف فيا .. عرفت غير العائلة لي مجموعة تم .. ولا مكان للغريب .. ايوا هزيت يدي لسما مرة نضرب فحناكي مرة نضرب فركابي .. و بديت نووْح ونهرنن ” أأأيا الحاجة ولمن خليتيني .. فين مشيتي يالحاجة وفقلبي كويتيني .. الله يا ربي الله كن غير ديتيني .. فين هيا؟ فين هيا ؟ نبرد بيها شوف عينيا .. وريوها لي نبرد بيها النار لي شاعلة فيا .. الله ياربي شوف من حالي .. كانت مسكينة واخا مريضة تجي عندي وتقولي بنتـــــي لي ماولدتهاش من كرشي ديما كانت كاتحلفني واش شبعانة واش عطشانة .. تا ملي قاليها طبيب عندك الكونصير (شفت كلشي خرج عينو فيا عرفت راسي زدت فيه) ماقالتهاش ليكم ؟؟؟ بالسيف مسكينة كانت انا الوحيدة لي كاتعاود ليا أسرارها وتشكي عليا همها .. الله يرحمك ألحاجة الله يوسعها عليك الحاجة ” نغزاتني واحد الشارفة

– تي اينا حاجة كاتهضري عليها ؟؟ راه المرحومة مزال نفيسة

– (كان كلشي مزال كايشوف فيا ) وسعي وسعي

كحزات وجلست حداها وبديت كنوشوش ليها فودنيها (ماتت فلولادة ؟ هانا هانتي الى مجابهاش راجلها من العزايا قبل ماتكمل الربعين ) بزقت فيدي وعلمتها فالحيط .. باقي مانشفاتش عالامتي تا شنق عليا شي حد من لور كانت امت المرحومة بدات تمرمق فيا وتغوت .. مافكوني منها غابلكشايف .. تفو مشيت ناكل كسكسو على شوية ما ياكلو عليا كسكسو وسفة ورفيسة بالدجاج البلدي .. رماوني لزنقة تاني .. اينا تاني هادي راه رابع مرة وانا كانتلاح لزنقة فنفس نهار .. تفووو على زهر بقا ليا غير نمشي نمد يديا للمحسنين .. بلاتي بلاتي لقيــــــتها هاد المرة الى كمل الله بيخير غادي نتعشى بالمشوي أححححح شحال تشهيت بولفاف … مهم خطتي كانت كالتاالي غانمشي لمحطة و فين ماانشوف شي حد دايز نبدا نبكي عليه بلي گريساوني ومالقيت باش نرجع لدارنا .. و داكشي لي درت جمعت عليا جوقة ودرت الحلقة .. نبكي ونزاوك .. ولكن لي مادرتش ليه حساب هو واحد من داك جوقة كان شيفور .. جا سولني فين غادية ؟ .. مالقيت مانقول وهو فالأصل خصني نقول ولا داك جوقة لي جمعت غايجمعوني بنص ويعيطو لجدارمية يجمعوني لبنيقة .. ايوا قلت على الله وااحد المدينة .. ايوا من زهري لي طالع مع طلوع شمش .. قاليا بلي تاهو غادي لتما ويالاه نديك فابور .. بدات جوقة كاتصفق لتدخل النبيل .. وانا فداخلي كاندب .. ايوا أخوتشي طلعوني لكار بحال شي دبيحة .. ويلي وحدي شغاندير كنت بغيت ندبر على فلوس عشيوة .. طلعت أنا هي لعشيوة … وكن غير هنا بقات وصلنا لنص طريق وهو يحبس شيفور لكار وجا عندي قاليا نزلي .. قلت ليه فين غانزل ؟ .. قاليا قلتلك نزلي .. مابغيتش .. ايوا هو يجر وانا نجر تا رماني من الكار ولد الحرام وقبل مايديماري طل عليا من سرجم وقاليا بلي هو بات حليمة ايوا وديمارا الكار .. ولكن شكون حليمة ؟؟؟؟؟ … آآآآآآآه حمدتك ياربي وشكرتك لي مامعسنيش بالكار .. حليمة لي ضيعت ليها عرسها بليمارة كانت مزالا لابسة اللبسة الفاسية .. ولكن أنا كان عندي الحساب مع الحمار ديال راجلها .. مهم خليونا منهم فين حطني بعدا .. وشكون عرف راه مكاين لا ضو لا ما لا خش لا تخرشيش ويلي حي شغاندير ؟؟؟؟؟ ياربي غير مايكونوش ذياب ولفاعي اما لي كان يفكني لساني منو الى مزادش غرقني

واقلة نعست بكترة العيا .. حليت عيني على شي براهش كايطلو على وجهي كايتأكدو واش حية ولا ميتة ؟ .. كانو غادين يقراو قلت ليهم نمشي معكم وانا كلي أمل نلقا المدير ولا شي معلم ننصب عليه تا هو واخا يعطيني غافلوس المركوب .. ونرجع ندعي الواليد باش يرجعني لدار اما بالخاطر والله لا فيها لا عفطت .. ايوا اخوتشي ما وصلنا لمدرسة حتى عراجيت بالمشي .. يالطيف شحال بعيدة .. ايوا مع دخلة كانو جوج رجال كنظن واحد مدير حيت باينة كبير فالعمر واحد معلم في مقتبل العمر لابس طابلية

– المدير : الأستاذة زوبيدة ؟؟؟ (لواه فريدة)

– المعلم : (باستهزاء) عاد طفات عليها شمعة .. ياك عاد صيفطتي شهادة طبية فيها 15 يوم لاش جايا

– أنا : (لقضية فيها 15 يووووم مممم) اه حسيت براسي قادرة نجي عليها

– المعلم : (محاملنييييش او بالأحرى محاملش الأستاذة زبيدة) وفين كنتي هادي عامين ؟؟ مكاتسالي شهادة طبية تا كاتعاودي تصيفطي وحدة واخرى

(بان ليا هادو عمرهم ماشافو هاد الأستادة زوبيدة .. ما طاح ليا فبالي غير داك لمسلسل تركي ديال حب لا يفهم الكلام .. وقلت والله تانكمل بحالو ولكن بالنسخة المغربية)

– أنا : أش غانقوليكم أسيادي .. واخا مكانبغيش يشفقو عليا الناس ونستعطفهم ونعاود ليهم مشاكلي الخاصة وهادي أعدى حاجة عندي .. ولكن من حقكم تعرفو حيت نتوما بحال عائلتي المهنية طبعا .. كان عندي لكونصير فالورك (الله يستر يااااربي) وهما يحيدو ليا الرجل .. هادي ليكاتشوفو غير اصطناعية ..أما رجل لي عطاني سيدي ربي راها فتراب سابقاني لجنة .. ايوا لهلاااااااااا يوريكم أش داز على هاد الكمارة لي قدامكم .. كانت رجلي كاتقطع وقلبي كايتقطع ملي كانتفكر هاد الوليدات ماعندهم لي يقريهم … دوزت شي ايام لهلا توريها ياااربي لشي مسلم

– المدير: الله الله على الاستاذة زبيدة سمحيلينا على سوء الظن لي ظنينا بك

– أنا : الله يسمح لينا وليكم .. سمحو ليا نمسح دموعي باقا متأترة واخا كانبغي ديما نبين راسي قوية ولكن ….. الله يجعلها بمغفرة الذنوب

– المدير : شوفي الأستادة زبيدة .. فين ماتحتاجي شي حاجة مرحبا بيك ماتحشميش .. وحتى الأستاذ طارق كانظن مايبخلش عليك بالمساعدات

– أنا : عارفة لي كاين لقلوبة مخبية .. وليني النية صافية ظاهرة على وجوهكم

– المدير :ايوا نخلي الأستاذ طارق يوريك قسمك .. خليت ليكم الراحة

– أنا : ويلي على فين غادي ؟؟

– المدير :الأستاذ طارق يشرح ليك

مشا وخلاني انا والأستاذ المصون لي ماحملني ماقبلني .. ماكرهش يتيري فيا كن عندو باش

– المعلم : انا غانعطيك تقري القسم الأول .. الى مكانش عندك مانع حيت الأفواج الأخرى داير معهم بروكرام .. باش حتى الى مشيتي مرة أخرى نلقى ما نعتق

– صافي واخا

– الى حتاجيتي شي حاجة أنا فالقسم لي جنبك

مشا وخلاني .. ناااري من دار الحرام لحمام لدار لعزو للمحطة ودابا مدرسة .. العبث صافي

ايوا أخوتشي دخلت كان قسم فيه 20 بزقول .. الحيوطة مقشرين سبورة دايزة عليها لاندوشين وطباشير ديال المغرب ”الحرش” انا يسحابني انقرض .. ساعة انقارضو نتوما وهو يبقى .. ايوا وقفت قدام سبورة وكاع العوينات كايشوفو فيا .. أش ندير ؟؟ قلت نبدا نعرف راسي

– أطفالي الكرام .. قبل مانبداو .. غانديرو ليوم حصة تعريفية .. نعرف ليكم راسي وتعرفوني عليكم .. باش نوالفو بعضياتنا ونرتاحو لبعضياتنا وأهم شيء نحبو بعضياتنا .. مهم أنا سميتي الأستاذة زوبيدة.. إيييه ألياااااام مزالا عاقلة على نهار حليت عينيا فهاد دنيا سمعت الواليد بهاد الودينات لي ياكلهم دود .. قاليهم للقابلات بلي هاد البنية كي زبيدة لبلدية بحااالو فياماتو .. ايوا صافي سماوني زوبيدة (كلشي حال فيا فمو ماعرفت تاواش كايفهموني اش كانقول لداكشي قلت نقلب الموضوع ) تا انا كنت بحالكم واحد نهار جالسة بلاصتكم وكانسمع الخبير ديال الأستاد وكانقول أش كايقول هادا وكانتسنى تزوي الساعة باش نخرج نقز فالساحة .. ولكن أوليداتي سمعو مني .. هادوك لحريفات لي قدامكم غير تكبرو يرجعو ليكم دريهمات هدا الى دخلتهم فعقلكم .. حيت كل ماعمر راسكم بالقرايا كايعمرو يديكم بالفلوس وكل ما خوا راسكم كايعمرو يديكم بالطوب والياجور .. كلام مؤتر ماغاتفهموهش دابا ولكن ملي تكبرو توليو تعطيو عليه الفلوس باش تسمعوه احم احم بالا شك جاكم نعاس .. لداكشي غانتوضو لسبورة واحد بواحد تعرفو راسكم حيت غدا فالمستقبل نتوما لي غاتوليوا بلاصتي حيت نتوما لي غاتهزو بالبلاد القدام

بعد كلامي المؤثر والجميل والأكثر من رائع .. لي انا شخصيا تصدمت من راسي وانا كانقولو .. بربي تا كنت حاگرة راسي ماكانش يسحابني بلي أنا هاكا .. سمحوليا نمحي دموعي تأترت .. عندي مواهب دفينة خصني غير الفرصة قسما بالله تا نعجبكم .. مهم مهم مكايعجبنيش نشكر راسي بزاف وتواضع من شيمي والأخلاق كاتبان ماشي كاتقال .. فين كنا أه من بعد نوضتهم واحد واحد لسبورة يقول لينا سميتو وطموحاتو وأهدافو طبعا بمساعدة مني .. مهم رجعت القسم كلو مهندسين وأطباء و علماء و وزراء .. من بعد كل تقديم دارو أحد تلاميذ كاتبعو تصفيقات حارة مني ومن زملائو هادشي علاش ؟؟ باش نقويوا تقتهم فنفسهم ونحاربو الرهبة لي كاتخليهم ديما مخبيين ونقويوا فيهم حس المواجهة .. باش يقدرو مستقبلا يوصلو صوتهم بدون خوف للمسؤولين وللحكومة وللعالم و يوصلوه حاضرا للمعلم لي حدانا .. باش يعرف راسو معامن .. مكاين غير زوبيدة ومكاين ماحسن

ايوا اخوتشي وخواتشاشي سالات الحصة وأنا كرشي لاوية بجوع من داك رايبي جميلة ديال البارح .. غادة كنمييل .. أتا وقف عليا واحد السيد رسلو ليا سيدي ربي من سما .. قاليا بلي داز عندهم المدير لدوار وبشرهم بلي الأستادة زوبيدة جات وهما حيت معروفين بالكرم والقلب الكبير قالك بغا يرحبو بيا والأهم من هادشي كامل هي الوليمة لي موجدين ليا .. ناري عرفتو لعابي سال غا بمجرد التفكير وطبعا بحضور الأستاد طارق …. مهم هداك سيد شفتو كايتمازح مع واحد الولييد كايقرا عندي وماخفاكم حال بغيت ندير فيها لالات الأساتدة ونطرطرق العينين لشي حساد

– أنس ولدك أسي احمد ؟؟

– ايه ألالة

– تبارك الله وصلى على النبي مااااشاء الله .. تلميذ ونعم التلاميذ .. عرفتي نوضتو لسبورة كلشي بدا يصفق عليه قالك بغا يكون طبيب ويعالج الفقراء والأهم بغا يصيفطك أسي احمد الحج .. دري غزاااال الله يصلحو ويكوّن منو الزرع والزريعة يا مولانا .. عرفتي اسي احمد ودير معاه جهدك وتحط راس مالك كلو عليه .. بربي تا يكون أحسن استثمار فحياتك .. ذكي ماشاء الله وراسو خفيف دغيا كايتعلم غايكون ناااااابغة الى بغا الله

– شنو هي نابغة ؟؟

– احم ماعرفتيش شنو هي نابغة .. نخلي زميلي الأستاذ طارق يشرحها لك .. خليت ليك راحة الله هاد ساعة

بديت كنجري ونعيط لتلاميذي الكرام قبل ماتضرب كرامتي مع عرض الحائط .. ايوا اخوتشي وصلنا لدوار لي كان بعييد بعد طنجة على الكويرة .. رحبو بيا ناسو وتهلاااو فيا عرفتو كليت تا وقفت وقلت ليهم داكشي لي بقا على الأستاد طارق يديروه ليا فمويكة كي شفتو انا مابقا مني والو .. شيء لي خلا كاع ناس دوار يحلو فيا فوامهم ماعرفوني استادة ولا دحشة .. لداكشي قلت ندوور ليهم الفريكونص

– الله يعطي الصحة لي طيب .. والله يخلف عليكم .. هاكا يكونو الناس الملاح .. بغيت ربي يخليكم ديما لفوق لفوق .. بغيت ربي يكبر بيكم كي كبرتو بيا وكبرتو بالعلم والعلماء ..(هنا ماعرفوني استاذة ولا طلابة لداكشي قلت ندور ليهم الفريكونص تاني لجهة واخرى) أجي مال هاد البنت مكاتقراش عندي ؟؟

– اب البنت : وراك عارفة أستاذة طريق بعيدة والأساتذة مكاينينش

– ويلي على مكاينينش ؟؟؟ أنا والأستاذ طارق أش كانديرو كانقيوا زعبول ؟؟ هاد العبد لي قدامك واخا مكانبغيش نهضر على راسي بزاف .. ولكن راه قارية فجامعة اوكسفورد واش عرفتي فين جات هاد الجامعة ولا لا ؟؟ قراو فيها غير العلماء ولكن أنا مابغيتش نكون عالمة بغيت ولاد بلادي هما لي يكونو العلماااء ديال المستقبل و ترفع راية بلادي فالعالم كامل (هنا قلبتها قسم 😎 انت أسي مصطفى الى كانت بنتك عندها ماتلبس .. أنا مكانش عندي كنا كانباتو غير فالقصدير فراشنا الأرض و غطانا السما ولكن با كان رااااجل كان كايدمر ويتقاتل وكايقوليا بنتي نخليك بجوع فكرشك ولا نخليك بجوع فعقلك .. عرفتي .. بلاتي نمحي دموعي .. عرفتي أسي مصطفى باش يصيفطني نقرا برا أش دار ؟؟؟؟ باع لكلوة ديالو مسيكين .. وكان يقولي كن كان يتباع القلب كن بعتو تاحاجة ماتغلا عليك أبنتي .. سير يا لواليد لهلا يحرق فيك شي عظم ( يحرق فيك غا جلدة) قولو أمين أسيادي .. ديما كاندعي معاه مسكين وكانطلب تلاميذي كاملين يدعيوا معاه .. شفتي هادي هي لي قال عليها سيدنا رسول الله صلى الله عليه وسلم الصدقة الجارية

– كلامك معقوووووول ولكن أ أستاذة راه طريق بعيدة و كانخافو عليها من ولاد الحرام يغتاصبوها

– ودابا أسي مصطفى انت مكاتغتاصبهاش .. ملي مخليها فالدار ماتعرف تقرا ماتعرف تكتب .. وملي تبلغ تزوجها بهداك لي كان غايغتاصبها نهار ويولي يغتاصبها مدى الحياة .. نديرو قضية كاتخاف عليها من حقك .. أجي نسولكم شحال من راجل فهاد دوار 12 المينمون .. تبقاو ديرو نوبة كل نهار يمشيوا 2 رجال معاهم يوصلوهم ويردوهم .. نهار فسيمانة مادا ماجاب .. كاتعرفو غا تحضيوا غنمكم وولادكم تخليو الجهل والدياب ياكلوهم حشووووومة .. الى كان غنمكم يصور عشاكم راه ولادكم يصورو ليكم الأجر وغداكم وعشاكم ملي يرشاو عظامكم .. واش مابغيتيش أسي مصطفى وكاع السامعين بناتكم يقراااو ويخدموا ويصيفطكم للحج تغسلو عظيماتكم من ذنوب وتشوفو مقام سيد النبي .. ولايني على هاد الفعايل راه ماشي نتوما لي ماباغينش تمشيوا لحج راه ربي لي مابغاش يشوف وجوهكم

ناااري قلت هاد الكلمة وتخبيت مور طارق لا يشنقو عليا ساعة بان ليا كلامي أتر فيهم

ايوا فرقنا المجمع وسالات زردة وطاح ظلام وهنا خصني نقلب فين نبات

– الأستاذ طارق فين نباتو ؟؟

– أنا كانبات فواحد البيت مور المدرسة .. انت سيري شوفي باتي عند شي عائلة من دوار

– ويـــــلي خايبة تا لمعاودة من صباح وأنا كانلقي عليهم فخطابي المؤتر وفلخر ماعندي فين نبات .. وانا لي من صباح وانا نشكر فراسي … زيد زيد نمشيوا

– كيفاش نمشيوا ؟ واش تصطيتي كي نديرو ليها

– انا نبات تحتك وانت بات فوقي أويلي على كينديرو ليها أنا نبات فبيتك وانت راه طوابل عطاهم الله … زيد زيد بلا ماتفرج فينا عباد الله (بقينا كانتمشاو وكانهضرو) ومال هاد البيت مافيهش جوج سدادر .. ومال هاد المدرسة مافيها دار المدير مافيها دار الحارس .. أجي فيناهو الحارس بعدا ؟؟؟

– ههههه ماشفتيهش ؟؟

– أولا يخليلي ضحيكة تانيا لا ماشفتوش

– راه كايقيل دايع فنهار تا ليل عاد كايجي

– كيفاش ؟

– دابا تشوفيه ملي نوصلو

– ايوا مزيان .. وانت أطارق سمحي لي الأستاذ كاتعدبني فالكتابة

– أشنو ؟؟؟

– ماعلينا مامزوج ماخاطب ما داوي فشي وحدة ؟ قدك راه بولادهم

– لا مامزوجش

– شوف ليك بنت الفقيه غزااالة فنة حطات الفخض ديال دجاجة جهتك .. قاصداك ألعفيريت .. شوف ماتحمش مني .. الى كنتي باغيها كيف هي باغياك نمشي غدا نخطبها ليك باش نعاودو شي زردة بحال ليوم أحححح شحال كانت الرفيسة بنينة

– سمحي ليا نقولك .. ولكن دخلي سوق راسك

– هاهيا داخلاه .. واش بصح مكاتبغياش؟؟ .. أنا بنت وبغيتها الله يسمح ليا كن كنت راجل والله اما نزكلها .. الزين والحداكة وشعر مسبسب .. ماشي بحال هاد الشطابة لي لاصقة ليا فالراس (بدون تعليق من طرفو) أجي هداك المدير شفتو معاودش بان ؟

– كايجي من اتنين لتنين

– وعلاش بظبط اتنين ؟

– نهار سوق الأسبوعي

– اه ليوم اتنين عليها (تفو كنت ناوية نهرب نهار سوق باقا سيمانة ) الأستاذ طارق واحد سؤال من صغري وأنا محيرني

– لي هو ؟؟

– طارق ابن زياد فاش كان قاليهم البحر ورائكم والعدو أمامكم .. شنو دارو ؟؟

– ههه قارية فجامعة الاوكسفورد وماعارفاش الجواب ؟

– خصك تعرف علاش ؟ الأستاذ لوكاس الله يرحمو ويوسع عليه بيبان جهنم أأ جنة … كان عزيــــز عليه سي محمد رويشة كان فين ما يتذكر المغرب يقوليا زوبيدة بنتي نوضي لسبورة سمعينا ايناس ايناس .. عرفتي ملي كانبدا نغنيها ليهم وااااياااا خويااا طارق .. تقول غير حادة وعكي فجبال الأطلس .. مزالا نعقل كان كايقوليا الأستاذ دانييل الله يذكرو بالخير بورشتي ليا لحمي .. علـــــى رقبتي .. ولكن أنا عارفاك ماغاتيقش لداكشي سمع وحكم

ايوا أخوتشي بقيت كانغني وحنا غاديين فطريق ومع كاتعرفو الاحساس العالي كايجي ملي كاتسد عينك وكاتكونسونطرا مع الأغنية .. ماحليت عيني حتى ساليت لقيت راسي غادة بوحدي .. انا وريح اما الأستاذ طارق بحالا عمرو ما كان .. كنت عارفاه غايتبورش لحمو واقلة تبورشو تا رجلو وتنساتلو المشية ……………………………………..هادو هما الأجزاء ديال ليوم ماتنساوش تعطيوني رأيكم ؟ وشكرااا

ايوا بقيت غادة بوحدي فداك ظلام حتى وصلت المدرسة .. ايوا أخوتشي مانعاودش ليكم على الحارس لي لقيت عند الباب ريوگو سايلين .. غير شافني بدا كاينبح ويجري عندي .. انا من طبعي مكانخافش من الكلاب ولكن ملي شفتو جاااي عندي قاصدني هنا الخلعة شداتني من الصبع صغير ديال رجلي .. وااااعيط جبد

– (كانجري ونغوت) وا تسنى غير نشرح ليك .. راه أنا هي الأستادة زوبيدة …زوبيدة لكبيدة … واااااامي شدوه عليا .. قولولو يحبس يعطيه الحبس

ايوا اخوتشي ماحبس تا تحبسات فيا النفس وجا الأستاذ طارق عتق الموقف .. اما كن اختكم رجعات بحال الگديد ديال نهار العيد .. تفو داك الرفيسة لي ضربت كلها تهضمات بالخلعة باقا كاع ماتبننات بيها معدتي

ماقلتش ليكم حيت حشمت منكم ولكن نتوما خوتشي مانخبيش عليكم والله تاحشمت نقولها غير سمحو ليا .. ملي شفت الأستاذ طارق .. بالخلعة عنقتو بحال داكشي ديال الأفلام .. صراحة حشمت ومرگت وماكرهتش الأرض تشق وتبلعني .. لداكشي مشيت كنجري لبيتو وسديت عليه الباب .. يمشي يقلب فين يبات ههههه .. وبصراحة أكتر هو لي حشم أما أنا ضربت ليها الحساب من لول ودرت فيها بنت دارنا .. أما انا لهلا يوريه ملي جراو عليا دارنا فين مشيت .. المهم طلع صباح .. بدلت حوايجي بحوايجو حيت أنا فاش جرا عليا الواليد ماعطاني تا شرويطة من غير جلابة لي لاحتها ليا الواليدة من السرجم .. ايوا ولبست طابليتو وخرجت .. دابا عاد وليت أستادة زوبيدة لبارح كنت بحال شحادة عوبيدة .. ايوا أخوتشي خارجة كانقاد فحالتي صراحة هاد الحوايج واسعين عليا تا الاستراحة ونقص منهم المهم نقيين نقضي بهم .. ماحسيت غير ب مولاهم واقف عليا بدا كايطلع فيا ويهبط .. وهو في قرارات نفسه ماكرهش يطلعني لسما سابعة فجهنم تامنة كن كانت ..

– علاش لابسة ليا حوايجي ؟؟ واش تصطيتي؟؟

– علاااااش ؟؟ (مصدومة بحالا ماعارفاش علاش) ياك البطل والبطلة فاش كايباتو تحت سقف واحد .. كاتصبح لابسة حوايجو .. (بدا كايخنزر فيا ) ايوا صافي بلا ماتعقدها راه غير بغينا نتمازحو معاك .. خفت داك الكلب تاني يهجم عليا وقلت اللهم نتنكر بلباسك صراحة جينا كي توام ههه ماعليش نبقا نعيط ليك أوباااا ولا خويااا ؟؟؟ …(والو مأتراتش فيه شعرة .. تفو مكانبغيش نكدب على صباح ولكن للضرورة أحكام) بصرااحة أخويا طارق مابغيتش نقولها ليكم البارح .. خفت نبقى فيكم وانا من طبعي مكانبغي تاحد يهز ليا لهم ديما كانعول على راسي .. هاكا رباني المرحوم .. بلا شك لبارح شفتي بلي جيت طويلة ماهزا فيدي تا يطرو ديال الحليب … حيت وأنا جايا تعرضو ليا شفارة فالمحطة كانو ربعة كل واحد فيهم هاز مقدة قد الخلا .. قالو ليا بلي نعطيهم كاع لي كانملك … فلول قلت ليهم لااا مستحيل وأنا لي كنت جايبة لتلاميذي الحلوة والأدوات كهدية بمناسبة تعارفنا .. ولكن هددوني بحياتي وبحياة الناس لي عزاز عليا .. كانو أخويا طارق غايخسرو ليا وجهي .. ويقطعو ليا رجلي التانية .. خفت وحاااشة لله نخاف على حياتي وهي بيد رب العالمين .. ولكن هددوني بلي غايغتاصبوني وينشروني فاليوتيوب .. واخا هكاك ماخفتش على راسي خفت يتنشر لفيديو برا لبلاد وتشوه سمعة بلادي مصاب غير كن مكانوش عندنا الحساد .. سمح ليا نمسح دموعي .. أنا عارفة راسي تعديت حدودي معاك ولكن راك كاتبشه للمرحوم تا هو كان معلم .. عليها خليت دنيا ومافيها وبغيت نكمل داكشي لي كان كايحلم يديرو فحياتو هو يشوف تعليم فبلادو فأرقى المراتب

– صافي صافي لبسي لي بغيتي غير بعدي مني سلوگيتك

– أنا : (بكل براءة) شنو هي سلوگية ؟؟؟

– هي لي من لبارح وانت طالقاها

ايوا أخوتشي فين خليناها .. أه جاو تلاميذي الأعزاء .. ودرنا حصة دايزها الكلام ضحكنا وقرينا ونشطنا وشطحنا و بكينا ملي سالات الحصة ماسخيناش ببعضياتنا .. حسيت بهم طرف من كبدتي وهما كذالك حسو بيا امهم لي ماولداتهمش من كرشها .. على ذكر كرشها ولات كاتزغرت بجوع غير خليوها على الله .. مشيت للكوزينة ديال الأستاذ طارق لقيتها كاتصفر ولقيتو هو نيت خارج قالك بغا يمشي للمدينة يتقضى .. كاتعرفو داك الكولى ديال ايهي صفرة هي لي درت ليه

– أنا : خويا طارق ديني معاك ؟

– هو : (بسُخط) واش غاتبقاي تابعاني فين مامشيت ؟؟؟

– أنا : (بتمسكين ) لا على خاطرك .. غير هو غدا غايجيني حق الشهر وانا ماعنديش الاحتياط .. مهم غير ســــير انا نضبر باش نقضي .. بلا مانصدعك

– كيفاش ؟؟؟ زيدي قدامي

ايوا أخوتشي كان عندو واحد المويطير ديال عام الفيل .. ركبنا عليه بزز باش زاد .. وهنا بدا عقلي كاينتج رومانسية .. دابا واش نشد فيه ؟ ولا نشد فراسي ؟ ولكن أنا مكانتيقش فراسي قد ما كانتيق فيه .. ولكن خفت نشد فيه ويقول كانتحركش بيه .. وخفت مانشدش فيه وانجي على قرفادتي .. دابا أش غاندير أخوتشي ؟ .. نشد فيـــــــــه ؟؟ والى قال أنا مامزياناش وكيما شديت فيه نشد فعشرة ؟ خوتشي شنديــــــــر ؟؟؟؟ وانا مزالا كانفكر لقيت راسي وصلنا .. ايوا نزلنا وبدينا كانتمشاو كانت شميشة بدات تغرب وسماا رجعات ليمونية وانا وطارق غاديين جنبا لجنب كانتقضاو الخضرة .. شعور زوين يكون غادي راجل فجنبك لي حليتي فمك عليها يشريها لك .. تمنيت كن كان راجلي وبات ولادي لي باقين مكسلين فجنة .. عافاكم ماديوش عليا انا لي كايعطيني حبة اهتمام كانعطيه فقلبي حب العمر .. مع اختشكم ناقصة حنان .. عمر شي حد قاليها شي كليمة زوينة وحسسها بالأنوثة التي تفيض في داخلها اما خارجها خلينا ساكتين جعفر وبوشعيب بواگص عليها .. مهم نسكت قبل مانبدا نبكي عليكم واخا قلبي يبكي ويدمي لحالي ولا يدري بحاله سوى خالقه ..مهم فين كنا ماسالينا تقضية تا قالت المغرب الله أكبر .. خليتو هو يمشي يصلي وأنا مشيت عند واحد الخياطة كانت حدا جامع .. صيرات ليا شي سريولات وقومجات ديال الأستاذ طارق نقضي بيهم هاد سمانة ناري يسيق ليا الخبار يطرطق ليا العظام .. ايوا من بعد ماسالا صلاة لقاني جمعت وطويت وكانتسناه موراها مشينا لواحد الكافي .. شربنا العصير فكاس كبير هه.. ومن بعدها رجعنا ولكن فطريق الرجعة حبس الموطور فنص طريق وظلام طاح ..

– أنا : مالو ؟؟

– مانعرف

– ياكما يكون خوا منو ليصانص

– بحال والو .. واش تقدري تمشاي من هنا لتما حيت مابقاش بزاف

– على مالي معطوبة .. انا راه نضرب المغرب كلو ومانقولش أححح (بدا كايشوف فيا وانا كانشوف فيه ضاحكة و حالا فمي تايقة فراسي زعما .. عااد تفكرت كذبتي تفو انا لعيب ديالي هو كا نكذب وننسى هادشي لي ديما خالي دار عشتي) آآآآه كاتقصد رجلي اصطناعية .. ماضرب ليها حسبة مصايباها فألمانيا فيكس مكاتزعزعش .. ندوش بيها نعوم بيها نجري بها نركلك بيها الى بغيتي

– صافي اختي قهرتيني بالكذوب .. واش مكاتقاضايش ؟؟

– واش كاتاهمني بالكذوب أطارق الله يعطيك السقوط الى عمري كدبت عليه

– صافي صافي غير يالاه (بدينا كانتمشاو هو جار الموطور وانا جارة رجلي)

– والله أخويا طارق الى ماعرفت علاش رتاحيت ليك .. أنا عادة مافياش الهضرة بزاف وحدودية وداااخلة سوق راسي .. ولكن معاك سبحان الله كانحس بحالا كانهضر مع راسي كاتدخل لخاطر دغيا تقول داير ليا لفيفرور للساني مكايسكتش معاك من الهضرة ..و انا عارفاك وحداني وبعيد على عائلتك وناسك .. لداكشي حسبني ختك الكبيرة (واخا أنا صغيرة عليه) فين ما تكون محتاج تخوي قلبك وتفضفض .. لعاااااار الى ماجيتيش عندي وعاودتي ليا .. يبقى فيا الحال

– لا باينة .. شوفي الأستاذة زوبيدة من الأحسن نخليوا علاقتنا فالإطار المهني فقط .. وهاد لهضرة كاملة راك غاكاضيعي الحجر (قصفني)

ممممم هدا باينة جرحو عميق وحتى الى مكانش مجروح أنا نجرحو .. كاع الأبطال خصهم يكونو مجروحين باش تكون عندهم كاريزما وباش تلقى البطلة شقة لي دخلها منها لقلبو واحححح شحال كانحماق على رجال لي كايكونو مرزنين ومكايضحكوش مع أي واحد ونهار كايضحكو كاتحس بضحكتهم صادقة خاالية من الكذب وتملق .. أححح ختكم طاااحت طيحة زغبية ماشي فيه .. فشانطي جيت على راسي تفو تسنسرت مع ظلام والخيال مابقيتش نشوف طريق قدامي

ايوا اخوتشي من بعد طيحة ديال البارح كرامتشي مزالا طايحة فالأرض .. لداكشي درت راسي تا حاجة ماطرات ونضت صباااح بكري لبست حوايجي أو حوايجو المهم ماعلينا وجلست حدا الباب كنتسنى أطفالي الأعزاء لي تعطلو حتى تشوشت عليهم .. مشيت كنجري عند الأستاذ طارق لي لقيتو يالاه فايق وكايتجبد

– (مخلوعة) الأستاذ طارق مال تلاميذ مجاوش ياكما وقعات شي حاجة فدوار ؟؟

– واش بصح مزال مجاوش ؟؟ ياكما يكون جا زلزال لدوار

– أويلي وحدي

– اه ويقدر يكون جاهم تا الإعصار والفياضانات ويقدر تا البركانين لي تحت الأرض تكون فاضت ماشي بعيد مع الكدوب لي عطيتينا هاد اليومين يزعزعو الأرض ويطرطقو الغلاف الجوي

– (بتمسكين) حرام عليك دابا كاتقول عليا أنا كدابة فاش عمري كدبت عليك؟ .. واش غانتسافد الى كذبت عليك ؟ فخبارك جرحتيني بهاد الهضرة .. منك لله يا عبد الله

– صافي صافي صباح هدا.. ليوم ذكرى المسيرة الخضراء عليها مجاوش

– كيفاش ذكرى المسيرة الخضراء ؟؟؟ وانا مغانقريش ؟؟؟ وهما مالقاو امتى يحررو صحرا تالنهار لي أنا كتب عليا الله ندير فيه الخير .. ودابا نبقاو أنا واياك الراس فالراس شوف فيا نشوف فيك أطجين الحوت .. اجي مغايديروش بهاد المناسبة شيخات ؟؟؟ نموت أنا فشيخات

– ( باستهزاء) لا غايديرو عيساوى

– لا لا فيا عيشة مانحملوهمش

– لاحول ولا قوة الا بالله

شافني مكانتقاضاش لداكشي مشا دخل لقيسمو مع واحد الكاس ديال القهوة وجبد شي وراق ديال الامتحانات يصححهم .. اما أنا اللصقة ديال ايهي باقا ماسالاتش عندي

– أنا : هيي كاتصحح ليهم الفروض ؟؟؟ أنا عمري درت ليهم شي فرض غدااااا ندير ليهم شي فرض فجائي مع الدخلة .. ايوا نبداابا نوجد الأسئلة ديال الامتحان .. ولكن أنا قريتهم غير جوج حصات الحصة لولى عرفت ليهم فيها غير راسي .. ندير لهم متلا عرف الأستادة زوبيدة عليها عشرة دنقاط خخخخ مجاتش … مهم نعاااونك ؟؟؟

– لا شكرااا

– واادير معاهم مزيان راك مكاتخلصش من جيبك

– سوقك ؟؟ انا نعطي لكل واحد نقطة لي كايستاهلها

– وراه كلهم كايستاهلو .. مساكن هاد طريق كلها لي كايضربو ماشفتيهاش .. شتا فيهم البرد فيهم شمش فيهم .. هما أصلا واليديهم بزز باش كايصيفطوهم علم الله ملي يشوفوهم كايسقطو غايجلسوهم فدار .. وآآآآصلا الى مجابوش مزيان راه العيب ماشي منهم العيب منك لي ماقريتيهمش مزيان

– شفتك كاديري عليا محاضرة ؟؟ واش غانعطي نقطة لواحد مافاهمش الدرس .. ايوا نبقاو غير نجحو نجحو فلخر كلشي غايطلع خاوي .. والى عرفو راسهم ناجحين بدون أي مجهود .. فعمرهم مايجتاهدو .. واش عمرك شفتي شي طالب طب كاينجح غاحيت كايحضر .. ماعرفتش علاش غير النقطة والنجاح فلخر ديال العام هو لي كايهمكم ومكايهمكمش واش الراس عامر واش استافدتي شي حاجة .. التكرار ماشي عيب مافهمتيش الحاجة تعاودها باش تفهمها .. الدراسة ماشي سباق على النجاح .. ماشي ضروري تكون فعمر محدد مجبر عليك تكون فمستوى محدد .. الضروري هو تكون ناجح وفاهم وعندك باكاج فعقلك تقدر تخدمو وتخدم بيه .. شحال من واحد ناجح فلوراق وفاشل فالواقع

– كاتمعني عليا أطارق واديرها فين تجيك

– مالكي انت شنو حرك شطاطتك

– (بديت كندور فعيني ) والو .. واخا هكاك تا حد ما فاشل فحياتو وماخصكش تقولها .. غير مازال ماعرفش فين كتب ليه الله رزقو .. كان كايقولها لينا الأستاد دانييل الله يرحمو

مشيت وخليتو وأنا هازة راسي ..زعمة عزة نفسي ما بتسماحلي انسى جرحي واركض ليك مع انك قلبي … احم احم ماديوش عليا اخوتشي فين خليناها اه خرجت ومشيت لقسمي كانشطبو ونقادو .. وانا قلبي مكوي على تلاميذي افتقدتهم بزاااف .. يكونو زعمة كايفكرو فيا كي كانفكر فيهم .. ايوا ساليت من قسمي قلت نشطب تا القسم لاخور لي فيه لاخور مع انا مكانديرش الفرزيات كاع تلاميذ وليداتي .. ايوا مشيت هو كايصحح وأنا كانشطب

– هو : مالك كاتخنزري فيا .. قلت ليك شطبي ؟؟؟ درت ليك سيف على عنقك ؟

– كانخنزر فيك انت هو خنزير بنكرير .. أجي ليوم المسيرة الخضراء ياك ؟؟؟

– اه

– ايوا اخصنا نحتافلو

– اهاه وكيفاش بسلامة ؟؟

– نطلقو صوت لحسن ينادي .. نفخو نفاخات ونجيبو شيخات .. نطلقو الألعاب نارية .. ندومونديو الكيكة وجوج كوربات ديال الموناضة .. ونديرو تبوريدا.. نهزو العلام والحاجة الحمداوية تزيد بنا الگدام .. نديرو رزيزة ونعيطو تلفازة … نديرو مسابقات وجوائز نشجعو بيها الأولاد صغار .. ويبقى لهم هاد نهار مرسخ فالدهن .. ويبقى يتسناوه من العام لعام .. حنا عندنا المسيرة لخضراء هي سيرو جلسو فديوركم

– (بدا كايصفق عليا) سمحي ليا نمحي دموعي تأترت

– كاطنز عليا ؟؟؟

– لا حاشة كلامك فمحلو .. والى كان فجيبك شي درهم ورينا حنة يديك

– كاتخشي ليا الهضرة .. حيت تلقاو ليا شفارة وكشطوني .. أودي سري لي كانعاود ليك .. انا كن تعرف الخير لي كنت عايشة فيه ومزالا الحمد لله .. غير مابغيتش نخلي هاد الوليدات بلا قرايا كانتسنى لعطلة باش نمشي نجيبو ونجي .. ولكن أنا لاش كانعاود لواحد بحالك .. تافلوسك لي سلفتيني لبارح راني مقيداهم فالكارني دابا نرجعهم ليك بتاني ومتني .. الحمدلله المرحوم الله يوسع عليه فهاد فنهار .. علمنا العز والنخوة باش مانبقاوش ندلو على الخوة .. خلالنا ديور والفيلات ..الفوارم والكاطكاطات .. وتبرعنا بيهم غير لجمعيات باش يدي أجرهم لهيه .. اما لي عندو كتافو ودراعو مايهمو الكلب وصداعو

خليتو حال فمو ومشيت .. تفو على باشار الى ماينكدها عليك مايرتاح .. وتأنا أخوتشي مامرتاحاش .. ماكذبت تا كدبة ليوم خاطري ضرني الى بقيت على هاد الحال النعاس مايجيش فعيني .. لداكشي قلت نمشي لدوار نشفي غاليلي فالكدوب وانا غادة تلاقيت فطريق واحد البيكوب كانو فيها جوج رجال غير شافوني نزلو عندي .. قالو ليا الأستادة زوبيدة ياكما غادة لمدينة نوصلوك ؟ قلت ليهم لا وانا حادرة راسي

– لا أسيادي .. وليني عندي غرض تما .. الى قضيتوه ليا بغيت قاضي الحاجات وقاضي الأرض وسماوات يقضي ليكم ماتمنيتو فخاطركم ويسهل عليكم دنيا وآخرة .. دابا كي شفتو دراري صغار مساكن عطلة ليوم بغيت نجيب ليهم شي نفاخات نزين ليهم القسم باش دخل لهم القرايا فراس .. وشي حليوات باش نشجعهم على القرايا والمنافسة .. كي شفتو هادي دراسة علمية درناها أنا والأستاذ العربي لوكاس والأستاد جعفردانييل ملي كنت كانقرا فواحد الجامعة فكاليفورنيا .. وعرفتوا شنو اكتاشفنا أن طفل مكايكزش كتر من ساعة متواصلة ولكن مع الهدايا وتحفيزات والأجواء نفخاتية يقدر يركز 4 سوايع بلا استراحة

– صافي واخا أستادة لي بغيتيها نقضيوها لك

– سيرو بغيت ربي ينصركم كي كاتنصرو العلم والعلماء (كنقصد راسي) وبلااااتي نجبد ليكم الفلوس من البزطام … أيييي نسيتو فالمدرسة تسناوني داااااابا نمشي نجيبو ونرجع ليكم طايرة

– لا أويلي أأستادة حنا نجيبوهم

– بغيت ربي يجيب ليكم العز والنصر وسكنة فالقصر

ايوا مشيت وخليتهم بعد ماقلت ليهم نتسناهم فدوار .. ايوا أخوتشي مشيت لدوار .. صراحة لي كدبتو هاد نهار فحياتي عمري كذبتو الله يسمح لي ومع عارفيني أستاذة متيقيــــني يسحابهم معصووومة من الخطأ منزلني الله كاملة مكمولة .. صراحة عاااد فهمت علاش كانصوتو على المخرويضين كايجيوا لابسين الكومبليات وفيدهم شواهد الورقية خلاها الاستاد طارق ..وكايبداو يقراو علينا الزابور وحنا حالين فمنا يسحابنا داكشي لي فشواهد راه بصح فراسهم .. مهم خليونا أخوتشي من سياسة نخاف يجمعوني وحتى القفة مابقاتش .. ماعلينا جاو ناس لي وصيتهم على نفاخات ومشيت المدرسة خليت الأستاد طارق ينعس فبيتو .. وانا ابت كانفخ فنفاخات تانفخو حلاقمي .. علقتهم وقاديت الأقسام .. وصبح الصباح أحححح تمنيتكم تشوفو حال طارق ملي شافهم حل فمو تابانو ضراسو .. ايوا جاو تلاميذ وعجبهم الحال وبالخصوص ملي فرقت عليهم الحلوة هه .. وباش مايصفاروش عدياني دوقتهم تحت شعاار “حلي، باش بحال الاستادة زوبيدة تولي “

بس : هادو هما الأجزاء ديال اليوم كنت كنتمنى نكتب كتر ولكن ضيق الوقت لم يسمح شكرااا على المتابعة

ايوا اخوتشي داز داك نهاار غزال .. فرحنا فيه ونشطنا فيه أنا وتلاميذي فلدة كبيدي صراحة ولاو يدخلو ليا لقلبي باينة فراقهم غايصعاب عليا غير الله يستر .. مابقيتش كانحس بالوقت معاهم وهما كذالك لدرجة ولاو كايفضلوني على الأستاذ طارق جيت فيومين ديت ليه شعبية ديالو .. هادشي أخوتشي لي ولا كايسبب ليا مشاكل .. على ماقلتش ليكم ولا كايغير مني ومكايخلي مايدير باش يطييرني .. لدرجة ولا كايقلل عليا الاحترام و كايقول ليا حيدي ليا سروالي .. مابقى يحشم أخوتشي 4 ديال سريولات دار ليا عليهم الشوهة .. أش فيها الى لبست ليه حوايجو ياك انا وياه واحد وهدفنا واحد هو نرفعو بتعليم فالبلاد .. وانا اخوتشي كن كان عندي مانلبس والله ماندور بسراولو ولكن مايمكنش نبان قدام تلاميذي بهندام غير لائق وانا لي قلت ليهم بلي شركة كوكا ديال عمي بوشتى لي نجح فيهم يصيفطلو صندوق ديال الموناضة يبدا يغرغر فيه حتى الصباح … ولكن كنصبر راسي بلي ديما الانسان ناجح كايكون عندو أعداء .. ايوا اش غاندير أخوتشي الى كانت حاجتك فالكلب قولو سيدي .. وانا قلبي هشيش دغيا كانسامح شفتو واحد ليلة جالس مهموم قلت نمشي نفاجي عليه واش فيها شي عيب أخوتشي

– الأستاذ طارق مالك جالس مهموم ياك لباس ؟

– والو باس شكراا

– انا حااسة بلي بك شي حاجة .. ماشي عادتك تجلس بوحدك

– على فين كاتعرفيني باش تعرفي عادتي جيتي 5 ايام وليتي كاتعرفي كولشي وليتي انت هي الأم طيريزا .. بعدي مني الله يحن عليك

– زيد خوي حقدك وفش غليلك .. ماتبقاش تجمع فقلبك راه شي نهار غاتفركع .. غير هو دير فراسك الى كنتي معصب من شي حاجة ماتجيش طرطق عليا أنا كي البوطة الله يرحم باك … تا انا عندي مشاكلي وعندي همومي .. ماتشوفنيش ضاحكة وناشطة وتقول هادي راها ضاربة دنيا بركلة .. انا المرحومة الله يرحمها ويواليها برحمة الله .. ماتت شهر لي فات ففرانسا دفنوها تم مابغاوش يجيبوها لينا المغرب حيت عندها جنسية فرنسية .. باقي قلبي مكوي عليها ونارها شاعلة فصدري تاحد مايقد يطفيها .. هي لي كنت كانشم فيها المرحوم .. تسنى نمسح دموعي .. كانت فينما تشوفو تمشي تجري عندو تعنقو وتلحسو وت ..

– أشنو ؟؟

– شنو لي شنو ؟ أه لكانيشة ديال الواليد عرفتي ياخويا طارق كانت شهبة وعينيها خوضر تقول غير شي نصرانية

– كانيشة ؟؟؟؟

– على مالك أش يسحابك ؟؟

– وقلتي المرحومة يسحابني غا مك

– كاتعايرني أطارق مال الرحمة نزلات غير على البشر .. نزلات على العالمين … ولكن انت بغيتي تقوليا بطريقة غير مباشرة بلي أنا بنت الكلبة تحت هاشطاك #مقصودة_لشي_قرودة.. فهمتك أطارق ايوا الله يكتر خيرك

– لا والله ماقصدت

– لا غير قصد .. انا كانشكي عليك همي وانت كا تشفى فيا .. اصلااااا انت قلبك عامر من جيهتي من شحال هادي كاتقلب غير منين دوز ليا

– لا والله ماهكاك معصب غير حيت لواليدة شوية عيانة وماقدرتش نمشي نشوفها مع الخدمة .. هادشي لي كايخليك تحس براسك بحالا منفي مكاتشوف عائلتك والناس لعزاز عليك غير من العطلة لعطلة بعيـــد على كلشي .. وكلشي بعيد عليك .. هادشي فلول كايكون ساهل ولكن ملي كايطول لوقت كاتلقى راسك وليتي معزول شيب كايغطي راسك وانت .. (سكت وماكملش هضرتو)

– ايوا صافي بلا مايبقى فيك الحال كاع لي خدام بعيد على حبابو هدا هو حالو .. ولكن عندي لك الحل .. علاش ماتزوجش وديرحباب جداد ؟؟

– هه شكون هادي لي غاتقبل تعيش معايا هنا ؟

– انا وأعوذ بالله من قولة .. هانا زين والعقل والفوورما ديال الفورماج

– لا لا انت .. أنا لي مانقبلش عليك

– ايوا اخويا تقبل عليك جنية وتخشي فيك جنوية انا لي دالا راسي على واحد بحالك .. الكوفرة لاخور

– زعمة مارضتيش ؟؟

– اصلا انا كنت غير بغيت نتمازح معاك ونرفع ليك المعنويات أما أنا ولد الأستاذ دانييل عاطيني العهد الصيف جاي نديرو العقد

ايوا اخوتشي من بعد داك القصف الذي دمر كرامتشي .. دازو ليام طايرين وليوم كملت سيمانة من نهار لي جيت فيه وهو نهار لي ناوية نرجع فيه منين جيت .. حيت كلما زدت جلست كلما زدت غرقت .. من جهة تلاميذ لي ولاو كايدخلو ليا لقلبي ومن جهة الأستاذ طارق والمدير وناس الدوار الى مشاو حتى حصلوني بلي أنا ماشي هي الأستاذة زوبيدة يقدرو يقدموني عند جدارمية بتهمة انتحال الشخصية .. اللهم نفك سلتي بلا عنب .. ماكناش مقريين داك صباح ايوا مشينا انا وطارق للمدينة وهنا بغيت نعتارف ليه

– طارق بغيت نقولك واحد الحاجة

– قولي الله يسمعنا خير

– بغيت نمشي لدارنا هاد نهار .. نجيب حوايجي وداكشي لي خاصني ماشي معقول نبقى ديما سارقة ليك حوايجك وطالبة منك كل مرة تسلفني لفلوس .. والله مابقيت قادة نهز راسي قدامك بكترة الحشمة .. لداكشي واش تقدر تقري تلاميد ديالي هاد اليومين على مانرجع

– ماشي مشكل .. واش متأكدة غاترجعي ماغاتمشيش بحال ديما ؟

– لا غانرجع .. ماشي معقول بعدما تعرفت عليك انت وتلاميذي نخليكم بعد ماربيت عليكم الكبدة .. وليت كانحس بحالا لقيت داك القطعة لي ناقصاني فقلبي ولي تعوض ليا الفراغ لي خلاه المرحوم فحياتي

– صافي واخا نتسناك (عطاني لفلوس باش نمشي .. شديتهم وانا حشمانة) ماتعطليش صافي

– غادي نتوحشكم سمحلي نمحي دموعي تأترت .. واخا غير يومين ماعرفت علاش حاسة بقلبي محروق .. طارق واخا غانمشي .. راه غير جسدي لي بعيد اما روحي وفرحتي غاتبقى معكم بسلامة تهلا فراسك وتغطى مزيان من البرد وسلم ليا على الوليدات .. والى لقيتي شي وقت جير داك البيت راه كايدخل البرودة وسد تقبة لي فسقف راها كاتقطر .. ودي سروالك الكحل للمصبنة يصبغوه ليك راه قاصو ليا جافيل

– اشنو ؟؟؟؟؟؟؟؟؟؟

– خليت ليك راحة الله

مشيت طلعت لكار وخليتو حال فمو مسكين باينة ماسخاش بيا .. أصلا انا تاحد مكايسخى بيا حلوة وضريفة وخفيفة على القلب ونية فين ما حطيتيني تلقاني .. مهم راكو عارفين ماعزيزش عليا نشكر راسي تواضع من شيمي والأخلاق كاتبان ماكاتقالش .. بحال شيفور بات حليمة لي بان ليا واقف على راسي كايتسناني ننزل بكرامتشي .. هو نفسو شيفور لي جابني وحطني فنص طريق .. ايوا اخوتشي ماعاودتش معاه الهضرة لا يعاود يحطني فشي خلا تاني .. نزلت لقيت الأستاذ طارق مزال واقف فبلاصتو

– أنا :احم الأستاذ طارق مزال كاتسناني .. رجال البلاد مابغاوش يطلقوني .. ماسخيتش بيك يالاه نرجعو عند وليداتنا .. ينعل لوقت لي تفرقنا على بعضياتنا

شديت فيه ومشينا وهو مسيكين مزال مصدوم مافاهم والو .. ايوا وصلنا للمدرسة لقينا سي المدير كايتسنانا وجايب البشارة

– المدير : الأستاذ طارق جاتك البشارة لي كاتسنى من هدا شحال .. راه تقبل انتقالك .. مع انتهاء الدورة لولى تقدر تمشي تبدا حياة جديدة فمدينة لي كاتحلم بها

– أنا : (مصدوومة) كيفاش وشكون لي غايقري تلاميذ ؟؟؟؟

– المدير: الأستاذ طارق قبل مايعرف بخبر انتقالو .. عيطلو وسولتو عليك وعلى كفاءتك التي أشاد بها باش نتأكد من مستقبل تلاميذ بلي غايكون فأيدي أمينة

– أنا : لواه فأيدي خديجة .. واخا هكاك انا مانقدرش نقري تلاميذ كاملين

– طارق : تقدري غير مزالا حاكرة راسك

– أنا : واش كاتبيعوني العجل دابا ؟؟؟

– المدير : لا حاشة أ الأستاذة زوبيدة هاهو الأستاذ طارق 5 سنين وهو كايقريهم بوحدو وعمرو قال أحح

– أنا : عليها طلب الانتقاال

– المدير : (كيفرنس) معذورة ظاهر ليا ماسخاتش بك ألاستاذ طارق .. ههه على أي مبروك عليك وكانتمنى ماتنساناش .. وتبقى تزورنا مرة مرة راه دار دارك

– طارق : شكراا الله يبارك فيك

– المدير : بغيت نديرو سلفي بهاد المناسبة السعيدة

– أنا : (معصبة) ماندروهش (بداو كايشوفو فيا بتعجب) طليقي فالغربة كانتسناه يدخل للمغرب باش نكمش عليه يعطيني النفقة .. الى عرفني فالمغرب غايعلق

– المدير : واخا ألالة

مشا وخلانا المدير ..الأستاذ طارق فرحان وانا بحالا تضربت بطرشة ولا ببونية كاع.. أويلي حي مابقاش فيا الأستاذ طارق بلعكس فرحت ليه ولكن دراري شكون غايقريهم .. وواخا نبغي انا ماعندي تا صفة قانونية باش نتكلف بيهم .. عارفة كذوبي مكايتغفروش ولكن هاد لكذبة مانقدرش نكملها حيت غايتحرم شحال من واحد من القرايا وهادشي عمرهم غايسمحو ليا عليه

– طارق : الأستاذة زوبيدة مالك سهيتي .. انا عارف بلي عندك تخوف .. ولكن أنا تايق فقدراتك تقدري تنجحي فهاد المهمة بالإصرار ديالك وطيبة قلبك

– كاضحك عليا أولد العبد .. انا راه مانقدرش

– غاتقدري كيف قدرتي دخلي لقلوب تلاميدك فأسبوع وغيرتي شحال من حاجة حتى عقول ناس دوار لي انا كانحاول من 5 سنين معاهم .. كلشي بغا ولادو يكون بحالك

– حيت ماعارفين والو عليا … شوف أنا كانبغيك والى مشيتي قسما عظما حتى نتاحر .. ولا نولي بحال البرتقالة المرة

– ههههههه انا عارفك غاكاتكدبي باش مانمشيش

– أولا يخليلي ضحيكة تانيا واش قدرتي تعرف بلي كانكذب ملي قلت ليك كانبغيك وماعرفتينيش كانكدب ملي قلت ليك بلي انا هي الأستاذة زوبيدة

– أشنو ؟؟ كيفاش ؟؟

– كيف كاتسمع .. انا جراو عليا والديا من الدار .. ومالقيت فين نمشي قررت نبدا حياة جديدة فمدينة جديدة ولكن الشيفور ديال الكار لاحني فنص الطريق حيت ما عنديش باش نخلصو .. تلاقيت دراري صغار فصباح وقلت نجي معهم للمدرسة نطلب المساعدة من الكبار .. ولكن انتوما كنتو كاتسناو الأستاذة زوبيدة شفت الأمل فعينيكم وشفت النجاة بين يديكم وقلت نبقى معكم واخا غير على ماتكمل شهادة طبية ديال الأستاذة زوبيدة منها نيت نداوي جروحي بفرحة دراري الصغار .. عافاك سمح ليا

– (معصــــب) كدبتي عليا وعلى دوار كامل وكاطلبي دابا سماحة ؟ بإينا وجه ؟؟

– ماتخرجش فيا عينيك الله يرحم باك .. كلشي كايكذب والى بغيتي تلوم شي حد سير لوم هاديك الأستاذة زوبيدة لي مكسلة ليا فدارها وكاتوصلها المانضة من شهر لشهر .. ولا هداك لي صوتو عليه ناس دوار وماقدر يجيب تا شي معلم يعاونك … أنا أش درت ؟؟؟ شفت دراري صغار مساكن كايضربو جبدة ديال طريق باش يقراو ومكايلقاو شكون يقريهم كن ماكنتيش انت الله يكتر خيرك لي كاتجمعهم كن تشردو بالأمية وزايدون انت معذب وهما معذبين بقيتو فيا قطعتو ليا قلبي وكذبتي مقارنة معهم غير نقطة من فيض

– وبااااز الجبهة والكذوب الله يعطينا وجهك

– الله يعطينا وجهك انت ندخلو بيه الحمام رجال أما أنا وجهي ماغايدخلك غالحبس

– (كيغلي بالسيف خسرة عليه فرحتو) شوفي مابغيتش نشوف وجهك مرة واخرى درگي عليا زلافتك

– ها هيا غادة .. (بتمسكين) ودابا واش غاتجلس تقري دوك دراري مساكن .. ندير معاك قضية أنا نقريهم وانت تبقى تجي تصح ليهم فروضهم وترجع .. غير على مايكمل لعام ويجيبو لي قريهم

– واش يسحابك سايبة .. سيري أختي عطيني تساع

– واغابقيتو فيا .. صافي هانا غادة تهلا فيهم عافاك وداعا .. هداك سروال زرق راه طارتلو سنسلة عنداك شي نهار تلبسو

وأنا غادة بحالي تلاقيت المدير يالاه غايركب فطنوبيلتو .. شفتو ودرت راسي بحالا كاع ماشفتو .. تابدا كايعيط ليا وعلى وجه الملحة والطعام ضرت عندو

– الأستاذة زوبيدة فين غادة ؟

– غادة لدارنا

– وشكون قلقك أزوبيدة ؟؟؟؟

– قلقني طارق و (ناري غانقلبوها مصطفى بوركون) اودي اسي المدير ماعندي مانخبي عليك

بديت كانعاود ليه لي كاين ولي مكاين وصراحة أترت فيه تا خليتو بكدوبي يتمخصص .. مابغيتش نكتب ليكم الحوار خفت عليكم تا انتوما تبداو تمخصصو ونتوما أخوتشي بحال خوتشي .. مهم اقتارح عليا نرجع نكمل نقري قسمي واخا غير كسطاجير و كمساعدة للأستاذ طارق .. إيوا أخوتشي نفسي حارة مارضيتش .. أنا بقامتي ومقامي نولي مساعدة ديال هداك الكوفرة .. ايوا قلت ليه ناهي ناهي ماتسمحش ليا كرامتشي .. كلشي الا الكرامة .. وكن كانت تدوي هاد الكرامة تقوليكم الله ينعلها الى يوم الدين .. ملي قلت ليه ” شي توصيلة معاك أعمي ؟ “

ايوا اخوتشي بلا ماانطول عليكم وصلني للمحطة خديت الكار ورجعت الدار دقيت على جيرانا حلو ليا الباب طلعت لسطح ونقزت لسطحنا ونزلت لبيتي بتخبية وضربتها بنعسة ماردو ليا البال تال صباح ديال لاغيده ملي خرجت كنشمشم الطوبة على الفطور مع الخرجة مانتلاقى غا مع الواليد لي غير شافني شنق عليا شنقت العما فظلمة

– انت أش كاديري هنا ؟؟

– كيفاش اش كاندير هنا ألواليد ؟ (درت راسي ما فراسي مايتعاود) لواليد ياك لباس ؟ .. ياكما جاتك الحالة تاني ؟ شربتي دوا لي عطاك طبيب لبارح ؟ .. ياكما نعاود نعيطلو ؟؟ أجي أجي جلس راه مامزيانش الوقوف بزاف فالحالة ديالك ؟

– اينا طبيب ؟؟؟ (شككتو فراسو)

– أويلي ألواليد ياك ديناك لبارح لطبيب وقالك فيك زهايمر و الخرف واش ماعقلتيش .. صافي أبا ماديرش فبالك راه غير تبع طريطمون ومايكون غير الخير ان شاء الله .. انا ألواليد عمري نتخلا عليك واخا نبيع كلوتي عليك (بست ليه يدو) … واش باقي راسك ضارك بحال لبارح ؟؟

– شوية

شد فراسو و ركابيه فشلو عليه ..تا لفيلم بدا ينجح وهي تجي نبع لحنان ضرباتها ليا بواحد النتفة و ضربات ليا كلشي فزيرو .. أما الواليد ملي عاق بلقالب ناض ضربني بواحد القالب ديال السكر كان حداه لراس أش غانقوليكم أخوتشي داوني إنعاش مافقت من الكومة تادازت 4 أيام و 12 ساعة .. اما عينيا بقاو مقلوبين سيمانة … رجعوني لدار من بعد مادار ليا طبيب سيرتيفيكا فيدي قاليا امتى ما بغيتي ديكلاري .. ايوا أخوتشي شاي الله أداك سيرتيفيكا اما والله لا عاودت عتبت فداك دار .. ايوا رجعت لحياتي لعادية مابقيتش كانكدب بزاف من بعد ما شفت الموت.. تبت أخوتشي .. وحتى حلاوة الكذوب مابقاتش …. بحال هداك البريق لي كايكونو فعوينات دراري صغار ملي كاتبدا تكدب و كايبقى يلمع .. توحشتهم جلست معهم سيمانة بحالا جلست معهم عمر .. لداكشي قررت أنني هاد العام ندفع لكونكور ديال التعليم وندير مافجهدي باش ننجح مع اختشكم عندها الاجازة غير مالقيتش الفرصة فاش نقولها ليكم .. وندير بحال هاداك لفيلم ماعقلتش على سميتو لي دخل خو لبطلة لحبس ومشات قرات القانون وولات محامية وخرجاتو هيهيهيهي

بعدما نجحت فلكونكور ديال التعليم وختاريت المدرسة لي نقري فيها .. ماتخيلوش فرحتي قداش كانت .. ولي كبرات ملي وصل لول ديال العام ولقيت تلاميذي لي كانو فالقسم لول ولاو فالقسم تاني من بعد ماقراهم الأستاذ طارق من بعدي ولي فرحتي ماكملاتش ملي عرفت بلي كمل معهم الدورة التانية وخدا الإنتقال ديالو ومشا بحالو .. وهنا رجعت كانقري فالمدرسة بوحدي كي طبل فلول كانو الناس دوار مقلقين مني ولكن من بعد تقبلو الأمر ورحبو بالفكرة ديال انني رجعت بصيفتي الحقيقية باش نرجع نقري ولادهم .. واخا عرفو سميتي الحقيقية بقاو كايعيطو ليا الأستاذة زوبيدة الكديديبة .. واخا ديما كانقوليهمم بلي راني تبت .. مهم ماعلينا فمهم هداك يقولو لي بغاو .. ايوا أخوتشي قريت عام كاع تلاميذ بوحدي ماقلت لا أح لا أي بلعكس لقيت معهم راحتي .. واخا بعد المرات كانبقى نفكر فالأستاذ طارق وكانقول يكون تزوج فالصيف و تكون مراتو حملات فالخريف وكانبقى نحسب شهر لي غاتكمل فيه 9 شهور .. غاتكون ولدات وغايكونو فرحانين مع هو حنين سعداتها به .. ماغايكون عاقل تا على شكون أنا .. اما أنا وليت كنشوفو فكل بلاصة وحتى تلاميد الله يهديهم ديما كايفكروني به دار معانا الأستاذ طارق هاد طريقة وخدم معانا الأستاذ طارق بهاد طريقة أوووف الله يطرطق ليه العظام كي طرطق ليا القلب .. خوتشي أنا خايفة لا نولي بحال البرتقالة المرة ونولي نزاوط بحوايجي لزنقة .. مهم خليونا منو وخليوه غير فقلبي .. كنت يالاه بدات السنة الدراسية التانية .. كنت كانعاود لتلاميدي لكرام على رحلتي الأخيرة لستوكهولم و باريس ولندن لي بضبط تلاقيت فيها بالأستاذ دانييل وولدو سيباستيان ومشينا نترحمو على الأستاذ لوكاس بعد ما شرينا جوج قراعي ديال الما زهر رشيناها على قبرو وقرينا عليه ماتيسر من القرآن الكريم .. هادشي مكانعاودوش ليهم افتخارا حاشة لله ولكن فقط باش يعرفو قيمة الأستاذ الصالح فقلوب زملائو و تلاميذو لي كايبقاو يترحمو عليه تال الرمق الأخير فحياتهم .. قاطعني السيد المحترم مدير المدرسة .. لي قلت ليه وااالو مانهضر معاك ولا نشوف فيك تا توصل وقت الاستراحة .. وقت تلاميذي ضيق ودقيقة من عمرهم كاتساوي دياموند المرصع بالألماس .. قاليا الله يهديك هاد الهضرة لي قلتي كنت غانعاود ليك فيها قصة حياتي ويشيط الخير … ايوا ماعلينا قلت أش بغيتي

– كنبشرك ألأستاذة زوبيدة

– بحال داك البشارة ديال داك النهار دعيتك الله

– ديري النية وباتي مع الحية

– وانتا لي طلقني دغيا ولا غانباتو انا وياك عند جدارمية

– راه جا الأستاذ جديد

– داخلنا عليك بالله .. شوف الى مكانش عندو الغمازات غا رد زمر لمو ..ويكون طويل وحبذا يكون عندو اللحية و العضلات

– الله يهديك ألأستاذة زوبيدة واش أنا جايب لك أستاذ يعاونك فالقرايا ولا عريس يعاونك على الزمان

– واتا راه بحال بحال .. واخا تجيب ليا دابا البابا نخليه يكفر ويتزوج بيا .. راني أسي المدير برت والله كن ماكنت كانعرف مراتك لي الله يعمرها دار .. تا ندور بيك انت نيت

– ههه ايوا هاهو الأستاذ جاي

شغانقوليكم أخوتشي المخرج طلع هندي .. ملي طلع الأستاذ طارق ضاربلو البرد شعرو على أنغام دقات قلبي .. خوتشي قرصوني راه واقلة الكذوب طلعو ليا المخ ودارو ليا ضبابة على عيني .. ايوا وجا مد ليا يدو يسلم عليا .. لااااا أنا مش بتاعت الكلام أنا طول عمري جامدة .. خليت يدو معلقة فالهواء طلق

– شكون هاد خونا أسي المدير لي مشعشع علينا بالكرونة … فين كان تالدابا عاد جاي .. ضربوه لحيوطة تاحد ماقبل عليه .. ماعلينا قسم تحضيري ديالو والأقسام لوخرا أنا لي انتكلف بها حيت دايرة بروكرام تا الى مشا مايخلينيش حاصلة

ايوا اخوتشي سالا ليوم دراسي .. وماهضرني ماهضرتو وحيت نفسي فنيفي وقيس ليا عيني وماتقسهاش هي .. وراكم عارفين أخوتشي أنا كي دايرة .. مشيت عندو كانطير هازة فيدي واحد الكارني دايزة عليه لاندوشين

– ذكرني بسميتك ؟؟ نرد لك داكشي لي كاتسالني

– هههههههه عقلتي على الكريدي وماعقلتيش على سميتي ؟؟

– أولا تهجرو تانيا باش تعرفني بنت الناس مكانساش ديون لي فعاتقي .. مهم باالمجموع عندك 200 درهم ياك ؟؟

– اه هادوك لي عطيتهم من يدي ليدك .. أما الخسائر لي بديت كنصلح من موراك راه لا تقدر بتمن

– شحال كاع 4400 دريال ؟؟؟

– واخا ألالة طلقينا لفراجة وطلقيها

– سير تا لراس شهر دابا أنا حازقة أأأأ زعمة ما عنديش صرف (ويلي ويلي أش قلت)

– ماعندكش لوجه علاش تحشمي .. واش باقي مابغيتيش توبي ؟؟

– نتوب ؟؟ .. مالي أخويا كانشطح مع عبيدات الرمى ولا مع وليدات البوعزاوي

– جوج ميترو فلسان وعشرة مترو فجبهة والى ماتزادو ماينقصو

– هاي هاي على عباااار القبورة وتا دخل سوق جواك حظيني ما عندك شغل من غيري .. تا قلنا تفكينا لاش راجع لاش ؟؟؟

– تفكيتي ؟؟ سبحان الله ..قاليا المدير بلي طبختي ليه راسو بتسوال عليا

– واغا باش نرجع ليك رزقك .. ياكما يسحابك مزعوطة فيك .. شوف وجهك كي زرق تقول كاضرب شقوفة

– ههههه على انتي لي يتلاقى معاك غير يضرب شقوفة .. يضرب راسو مع الحيط على الله وعسى يهدن ليه بكدوبك

– وماتزيدش فيه غير كديبات بويض وغير للضرورة أما كن ماكنتش مضطرة والله من فمي لاخرجو

– هاهيا بدات تاني .. شوفي دابا أنا واياك غانقريوا هنا ديما يعني خصنا نعلنو الهدنة باش مانبقاوش ديما نتطاطحو كي البقر

– كنت هانية بوحدي .. مهم ماعلينا موافقة

– ونقصي من الكذوب شوية الله يرحم باك

– احم وااااخا أسيدي ماغانبقاش نكدب أصلا داوي فيا الفقيه جديد ديال دوار قالك بغا يكمل دينو وهو عندو 4 شرعيين و2 قاري معاهم غير الفاتحة .. ايوا أش غانقولك أخويا طارق وانت بلاصتك كبيرة فقلبي وربي شاهد عليا .. وكن ماكنتيش عزيز مانعاودلكش .. الواليد بززو عليا قاليا انت كاتبقاي بوحدك فداك المدرسة مكانعرفوك أش كاديري .. وقاليا الى ماتزوجتيش فهاد شهر لي حنا فيه يابيه يا بغيرو لمهم ماتبقايش على مسؤولتي .. ولا غانجيبك لدار تكمشي .. وأنا قلبي كايتقطع من لداخل ماحيرتي لوليداتنا لي غانخلي ماحيرتي لنتزوج راجل كبر من با .. سيدي طارق قوليا اش ندير ؟؟؟

– دار ليك ودار ليا لي راجع عندك وداير فيك عقلي

– ماعلينا نتزوجو ونضحي بشبابي في سبيل العلم وأبناء بلدي … تسنى نمسح دموعي .. أجي حقا جبتي معاك شي سريولات جداد .. والله تا عييت مانقلب على بحالهم فالبال وتقول واش لقيتهم ؟؟ ياكما كاتشريهم من البوتيك ؟؟؟

– وااااالعفوووووو … طالب تسليـــــــــــــم .. أجي وااحد الحاجة ضراتني فراسي شنو سميتك بعدا ؟؟؟

– حْبيبة مع السكون على حرف الحاء .. وتقدر تعيط ليا حُبي كاختصار ماعنديش مشكل

– واااااباااااز

– وصافي ماديرش ليا فيها الحاجة عفيفة .. سميتي إيمان

– باين الإيمان على وجهك هه … عاد فهمت منين ورتي الكذوب قولي واليديك لي كذبو عليك من نهار سماوك

– شوف تبقى تجبد واليديا على فمك نخلي دار عشتك .. لواحد تضحكلو شوية يطلع ليك فوق راس كي القردة .. ايوا هاودني منك .. أنا أصلا لاش كاندي معاك ونجيب فالهضرة .. أش بيني وبينك .. شحال قلتي كاتسالني ؟؟؟

ايوا اخوتشي فين وصلنا اه دازو داك شهرين لولى شد ليا نقطع ليك .. دايرين كي القط والفار .. زفر عليا نزفر عليك .. بالحق فرحت ملي رجع وحتى هو قالها ليا واحد المرة قاليا فرحت ملي لقيتك رجعتي ايوا أخوتشي من داك نهار وشي حاجة كاضرب بيناتنا بحال سلوكة ديال ضو .. ولاو حناكي يحمارو فين ما نشوفو … وهو ولا كايعيط ليا فاش كانكونو بوحدنا زبيبيدة كاتخرج من فمو كي زبيدة البلدية .. ومرة مرة كايبغي يقول زوبيدة وكاتخرجلو كوبيدة … أخخخ حشمت منكم أخوتشي واحد نهار جيتو فاص لعب دراري صغار ماعندنا ماندير به

– سمع أطارق الى كنتي كاتبغيني .. زرب عليا راه يطيرو بيا وتبقى ضرب فحناكك أصكع

ايوا اخوتشي سمع الهضرة وزير السنطة وماكملات 24 ساعة تا عرض عليا زواج .. كان نهار الأحد باقا عاقلة بحال ليوم .. كنت فايقة من نعاس مبوقة وأنا نلقى تلاميذ عند الباب هازين الألواح وكل لوحة فيها حرف .. صف لول فيه جملة i love you zoubida lkbiiida » والصف التاني فيه جملة will you marry me zoubida وهو كان واقف موراهم هاز بوكي ديال البقولة مزوقة بلعمان ولبابونج .. جا عندي وتحنى على ركابو وقدم ليا الخاتم وكاع دراري كايقولو ليا قبلــــي … قبلـــي .. وقلبي كايقول ليا باركة من الكدوب واش ماباغاش تحشمي … ولكن كان غايكون من الأحسن كن عرض عليا الزواج هاكا ياكو أخوتشي ؟؟ مهم الحقيقة هي واحد نهار كانت آخر حصة فالدورة الأولى مشيت عندو منفخة للقسم نطلبلو طباشير وهو يعطيني الخاتم وسط من شقافو .. واخا هكاك ختكم قنوعة .. بديت كانقز فالقسم كي الحمقة .. كلشي بدا يضحك عليا ههه .. مهم شدينا العطلة ومشا جاب واليديه وجابهم لدارنا خطبوني عادة أب العروس .. كايسول العروسة واش موافقة ؟؟ أنا الواليد عندي بدا كايسول العريس .. واش موافق أولدي ؟؟ .. واش متأكد أولدي ؟؟ .. عاود فكر أولدي ؟؟؟ شوف وكان أولدي ؟؟ .. تاكان طارق غايرجع فقرارو كن مكانش كايبغيني ومزعوط فيا زعطتي فالبابوش .. إيوا اخوتشي درنا العرس فالدوار فاعل تارك .. كاع ناس هضرو عليه .. ايوا من بعد ما خلينا عائلتنا مع ناس دوار طلعنا لبيتنا لي فلمدرسة باش راكو عارفين أش كايتبع العرس .. وحيت نتوما اخوتشي غانعاود ليكم بتفاصيل باش تستافدو ملي تزوجو .. وباش ماتقولوش حكا تزوجت وقلبت عليكم وجهي ومابقيتش نتعاود معاكم .. حاااشة لله .. يالاه نبداو كان الوقت فليل وأنا وطارق بوحدنا فلبيت أنا حشمانة مزنكة فواحد القنيت كنضرب فواحد طبسيل ديال الحلوة .. وهو كان كاياكل فواحد شدق ديال الخبز عمروه ليه ناس دوار بدجاج ديال العرس .. يالاه سالينا الماكلة وبدينا كانشوفو فبعضياتنا ..وحنا نسمعو دقان فالباب

– طارق حياتشي ياكما تكون خدمة الغرف هادي ؟؟

– أه أعمري مع راحنا فأوطيل سانك إيطوال

ايوا حلينا الباب وحنا كانضحكو .. وحنا نلقاو واحد المرة شارفة عند الباب هازة عكاز فيديها .. بقينا أنا وطارق غير حالين فمنا

– سلاااام عليكم بلا شك نتوما هما الأساتذة لي كاتقريوا فهاد المدرسة .. نقدم ليكم راسي أنا هي الأستاذة زوبيدة .. سمحو ليا عاد جيت من الولايات الأمريكية المتحدة من بعد ماكملت واحد براءة الاختراع .. لداكشي راني عيااااانة .. فغاتسمحو ليا نرتاح شوية (دفعاتنا على برا ودخلات سدات الباب )

– طارق ؟؟؟؟؟

– الاستاذة زوبيدة ؟؟؟؟؟؟؟؟؟؟؟

– طارق حياتشي ..أش غانديرو فقلة الحيا ؟؟؟

– ههه كنا فليلة الدخلة ولينا فليلة الخرجة ههه

ايوا اخوتشي بتنا فالزنقة كي المشردين فالبرد وشتا .. مارضيناش نرجعو لدوار .. صراحة مابقاتش فيا ليلتي لي خسرات ليا … ولا سمعتي فالكدوب لي دات ليا ( لا بصراحة هي مكاتكذبش هي كاطلق صواريخ الجوية هادي قالت ناسا ماتعرفوش) بقا فيا أخوتشي صباح لي كانو جايبينو ليا حطوه قدام الباب ديال البيت وهزاتو الأستاذة زوبيدة تفوشطات عليه

النهاية