ملات من نضام حياتها لي رجع متعلق غير بياسين وماكرهاتش تشوف حياتها لا تابع لا متبوع وماقدراش تتخيل راسها مزوجة مرة اخرى وكتتقلب تتفك منو بطريقة حبية بلا صدع بلا مشاكل. تكات ديك الليلة ترتاح والتعب متقل عليها ومادراش تنعس مرتاحة واخا سدات عليها باب بيت النعاس بقات مبرزطة لليل كامل حتى صبح الحال وفاقت مهدودة ماعندهاش الطاقة .. ضربات ضورة فالدار بان ليها حسو مقطوع ولا يمكن مجاش اصلا وماباتش تما من لبارح فاش خرج . خلات كلشي ودوشات خفافت ولبسات حوايجها الانيقة لاستقبال زبنائها فالعيادة ومشات لخدمتها راكبة ديك السيارة لي خلا عندها وعاجبها الحال ومرتاحة فيها .
اما هوا صبح خاسر ولي زغبو الله يطوف بيه ديك الصباح ، كان جالس مع المقهى فالطابق الاعلى مقابل مع الزاج لي كيطل على الشارع والدنيا خاوية فداك الصباح من غير الناس لي جاو يفطرو تما وشي طلبة كيليميني كيصبحو فديك شكولاطي كيراجعو .كان جالس متكي بضهرو على الكرسي العريض وهاز رجلو قدامو على واحد العتبة بين الارض والجدار الزجاجي الخارجي للمقهى وساهي كيخمم وبين صباعو كارو معول وتحت عينيه مضلم وزرق شوية ،،عابس وكيشوف فنقطة وحدة بعيونو القرمزية وعاطي ضهرو للعالم وودنيه كيسمعو لعتاب عبد الحق لي كان جالس حداه كيعاتبو بنبرة مهمومة ومغبونة وغير بشوية كل مرة يلوح ليه كلمة وعينيه فداك المنضر الخاريجي كيتأمل
عبد الحق: ساط الدخان) هه(بسخرية) شكون بحالها جبرت البنكة كتجبد منها الفلوس فوياخ ما بغات وكطحيك عليك ونتينا لاسق فيها .. الكلبة دلخلا (سكت مطولا) ………………..:: عملت الثروة ونتينا فاتح دقمك (فمك) لي طلباتها تنزلها ليها وعيييت ما نهضر معاك ……….. حتى طارق سخط عليها خصو غييير فوقاش يبرد فيها الغدايد ……..جامع ليها من داك الساعة لي طلقاتك ونتينا فالحبس(سكت مطولا) ……………….. ساهل حالها غير نتينا منعرف شنو عاجبك فيها ……… جالس كتحط ليها فالفلوس وتابعها ………….. شني ناقصك اصاحبي ماتعيش الحياة ديالك وتتمتع ها كولشي عندك………… غير هي لي مرى ولا ؟؟
ياسين: بنفور)طيبتي لي لكررر ديالي اعبد الحق بهاد الليستة دالهضرة كل ساعة….صافي (نفض يدو )
عبذ الحق:بعد سكوت طويل) قرانك عااايشين معندهمشي المشاكيل….لي قدك راه كيدور فأروروبا مفطح الطموبير المخيرة راكب عليها والبنات هااايدا كينقزو قودامو ……نتينا شوووو الحالة ديالك كيف عاملة تقول عندك اربعين سنة وغارق لك الباركو ……….. كجات عليا كعملتي لها شي مسحة ميعرفو فين طارت
عبد الحق مابغاش يسالي وياسين مكهوم ومخيخ من اللي كيوقع وغير ساكت وقالب وجهه كيتأمل ويتنهد وساكت ، عطاه عبد الحق داكشي لي غيعطيه وكن ماقاطعو تيليفون لي بدا كيصوني وهزو كيتنهد فتح الخط رد في حين ياسين بقا على حالو قالبو وجهه كيتأمل
عبد الحق: الو طارق….لاباس الحمد لله……………..جبرتيني معاه شا الله جلسنا كنهضرو ……….. هاك هاهوا
(مد ليه تيليفون) شبر هضر مع طارق خصو يهضر يهضر معاك
تلفت ياسين شد تيليفون بملامح كتوحي انه مافيه لي يهضر معاه لاكن احترامو لطارق كان كيفوق جميع الضروف وبمثابة الاب ديالو حيت البنت لي عندو قد ياسين فالسن وعندو النص فتربيتو
ياسين:االو
طارق: بصرامة) هضر عبد الحق
ياسين: بملل)هضااار معايا عبد الحق
طارق:صافي متعاود غير الصلاة على النبي
ياسين:كيفاش مفهمتشي؟
طارق: طلق الزمر تمشي بحالها وزول لها كوولشي داكشي لي عطيتيها … عتخليها ماتكساب ما تعلام كما كانت النهار الاول
ياسين:ماعندي ماااا منعمل بداكشي لي عطيتيها
طارق:انا عندي منعمل بيه…. يا اما ترجع كلشي وتمشي فين بغات يا غنعرف شغلي معاها
ياسين: خليني عليك هاد الساعة مااا عنديييشي الخاااطر
طارق: سمعني اياسين ) نتينا معارفشي شنو كتعمل تقول ساحرة لك ….عمرك كنتي هااايدا شني كااين؟؟ شني واااقع لك فتح عاايناك تشوف شني كتعمل…. هزيتيها للسمااا ها العيادة ها الطموبيرات ها ماعرف شني ااخر …. حتى وااحدة فالعائلة ديالنا ما وصلات فين وصلات هاد خييتنا !!…….انااا لي دوزت مع المرى عشرين سنة دزواج ماعمري كتبت لها شي حاجة من غيير ديك الدار بوااحدا وغيير حيت عندي العيال معاها…..وساكنين فيها ونتينا ماعندك عواول ما عندك حتى حاجة وخدام كتشتت عليها وغادي فاتح دقمك ماعارفشي شنيييي كتعمل(تعصب) وبنت السوق طلقات لك ونتينا فالحبس هادو هما بنات الناس؟؟؟ المرى لي متوقفشي مع الراجل ديالا فالشدة ينعل طاااسييلة ديماها والله متبقا عندي
ياسين: كانو مشاكيل ديك الساع عملت هايدا حيت تزوجت صاحبتها وصافي هادشي
طارق:(تفقص) كتخخوووووووور اياسين غير كتخوووور راه طلقااتك واش كتعرف شي زعما طلقاتك ولالا؟؟؟ صافي ساللت منك. عملت المستقبل ديالها ومابقاتشي مختاجك ليلك فهمتي…. وافهم راه طلقاااااتك حشااات لك انا مارضيتهاشي ليلك اياسين. ….. (بنفاد الصبر) ادا مابررردتشي قلبي فيها على الاقل زول ليها داكشي لي ملكتيها وخليها ديك الساع
ياسين: انا عنشوف انا نشوووف
طارق: واشوف ادا باقي عندك الشووف بعدا حيت انا صافي جيتيني مابقيتي تقشع والو غير كتزحف وتخربق
ياسين: صافي انا غنشوف
تفكع طارق وقطع بقلبو عاامر حقد لذكرى وفهضرتو كتحس بيه محروق وجاامع ليها جهد لي يخليه يغبرها ويفش قلبو
كانت فالعيادة جالسة خدامة فعيادتها مقابلة شغلها ومرتاحة والبنات فالاستقبال والباب مفتوح بحال الكلينيك وتيساع تقول فيلا فطبقة فعمارة . كلشي هوا هاداك كلشي كيشوف شغلو والاطباء لي معاها كل واحد فغرفتو خدام وحاني راسو على زبونتو والدنيا هانيةوالكليان مرتاح جالس شي كيشرب قهوة شي كيقرا مجلة والهدوء حتى فجأة دخل مع الباب بداك الصدر ودوك الكتاف ووجهه مكهرب ماشاف لا هاكا ولا هاكا والبنات غير شافوه دخل هبطو عينيهم ودخلو راسهم ماهضرو مانطقو بقاو متبعين ليه العين حتى دف باب المكتب دخل وسدها عليه
غير سمعات صوت الباب تحل وتسد وقفات حركة يدها وهي على نفس الوضعية بالبافيط والقفازات والشوكة فيدها وبقات طالقة ودنها جاتها ديك الحلة والسدة ماشي ديال الممرضات وحسات بيه يكون هوا –الحس مقطوع — رمشات وعينها كتمشي للجنب جهة كتفها مركزة مع الباب لي وراها لي كيدخلها للمكتب ديالها — عاودات رمشات ورجعات كملات خدمتها وتركيزها اللور حتى كملات وتبسمات بمجاملة للزبونة لي ناضت كتشوف وجهها وتشكرها عجبها الحال وخرجات مع الباب الثاني ديال الزبائن لي محلول على كولوار واسع قصير كيوصل للاستقبال عاد ناضت هبطات البافيط ومسحات وعقمات يديها وناضت دخلات للبيرو ديالها وهي كلها فضول وحدسها كيقولها راه كاين تما -داكشي لي كان نيت — لقاتو جالس فالبيرو الفخم ديالها كامل عود بني وزاج اسود وهوا هاز رجل على ركبتو وساهي حتى وقفات قدامو بطابلية ديالها متفاجأة
ذكرى: ياسين!!!!
هزها من سبرديلتها الساوية جوج ملاين دلوي فيتون كلها كحلة وهوا طالع حتى لعينها وبقا غير كيشوف فيها وويدو حدا دقنو
ياسين: جلس (شار بعينو للكرسي)
مشات للكرسي مستغربة جلسات كتشوف فيه وكتسول غير بعينيها حتى قرب من المكتب وحط يديه عليه وقال كيميق فيها بعينيه
ياسين: لي عنطولوه نقصروه ،، عطيني ااخر لكلام ؛ عترجع لي ولا لا؟
ذكرى: تنهدات وقلبات وجهها مربعة يديها) دابا وقت الخدمة انا مشغولة ما…
قاطعها بصوا اكثر حدة: جوج كلمات — ترجع ولالا
ذكرى: باستغراب) نتينا دابا قاطعتيني على لخيدمة فاجأتيني
باسين: هز حاجبو) عنزيد نسولك مرة اللخرة ،، بلا فضيحة، جاوبني نفضيو هاد لخرا كامل—وااششش عترجع لييي ولالا
ذكرى: قلبات عينيها) يالاه نخرجو برا (كتحيد طابلية) يالاه نهضرو على برا صافي انا بيدي ساليت الشغل
باسين: تكا اللور)هنااا عتجاوبني ، كنتي راجعة لي من هنا عند لعدول نيشان ماكنتشي راجعة شغلك هاداك ؛؛ بلحق الجواب نسمعو هنا
ذكرى: رجعات جلسات) انا هضرت معاك دييك المرة (بسياسة)قلت لك صافي هاكا مرتاحة
ياسين: يعني مرتاحة هايدا شي رجوع مكاين
ذكرى: بلحسنى،، يعني بلا منعملو المشاكيل
ياسين: اخر هضرة بلحسنى
ذكرى: (حركات راسها بحذر) مرتاحة هايدا
ياسين: لا
ذكرى: حركات راسها بالنفي
ياسين: كد يدو لسوارت السيارة ) ارا هاد المفتاح لهنا(رجع تكا) وا سمع اخر هضرة عندي بلحسنى، عتخرج دابا من هاد العيادة لللدار دباك نيشان .وعتهز لاوراق دلملكية ديال العيادة والطموبير وتمشي قدامي (ناض هاز خنافرو) سالينا من العقود وكلشي غتحطو وتزيد بحالك بلحسنى(وقف قدامها ) بلا صدع بلا روينة تندم عليها(مد يدو لعنقها بشوية شد ريفيير ديال ديامون ونترو بالجهد) هادا انا شريتو لك (شار بيدو لشنو فيدها)قلع هادشي
تفعفعات وحلات عينيها مصدومة تخطف اللون فوجهها بغاا تهضر ونتر من يدها ريفيير الصغيير وشار بصبعو
ياسين: الساعة ساوية عشششرين دلميون(هز حجبانو) وهاد الخاتم ساوي خمسة دلملاين ،،، ودوك لحوالق فودنيك عاملين حطااااش دلمليون (ديامو) بلاااا لي عندك فالدار وبلاااا الحوايج و صيكان وزييييد وزيييييد منهضرشي عليهم
ذكرى: بتوثر)شني كتقول؟؟(بصوت ضعيف) تزوجنا انا ونتينا وهاد العيادة صداق ديالي وطموبير نتينا هديتيهالي وهادشي بلخاطر ديالك زعما شريتيه لي!!!علاش كتحاسب معايا ؟!!!
ياسين: نفكرك ولا نسيتي؟؟ نفكرك فشني قلتي ااااول مرة؟ انا ولي عطيتيني ديالك! عقلتي عليها(هز حاجبو كيأكد) وانوووض بلخاطر عمل شنو قلت لك عليه والله يعاون ماتشوفتي فطريقك منشوفك فطريقي حسن ليا وليك
ذكرى: وقفات كتشوف فيه مصدومة تحجرو الدموع فعينها)انا شنييي عترجع لي؟؟؟ انا بيدي عطيتاااك ،،، عطيتك كلشيييي كولشي رجع لي داكشي ديالي حتى يانا ،،، جع ليك ذكرى العايلة لي ماشفت ماتشوفت ما طلات على دونيااا —رجعلي ذكرى ديال راسها ورجع لي البرائة ديالي لي عطيتاااك !!! يالاه رجع لي شغلي حتى يانا ادا قدرتي وخوود هادشي ديالك(خرجات عينيها كتبكي) متقدرشي ،،، حيت هادشي كاامل مايسواشي حتى حاجة من داكشي لي عطيتاك انا فهمتي(حركات راسها) واخا هايداك ماجيتشي قلت لك رجعلي وعطيني وتحاسبت معاك!!! ادا كان داكشي مايسواشي عندك نتينا انا يسوا عندي بزاااااف،،،،كامكانشي كيسوا كشحاااال هادي فرقتو … ماكنتيشي تجبر عندي الصفا والتربية والمبادئ والبرائة حتى هي ولعينين مغااامطيين والشرف والعرض
كان قلبها غيسكت بداك الخبر من كثرة ما صدمها تبلوكات وقلبها كان غيوقف وكانت عيانة اصلا بالخدمة ودارت مجهود كبير كان حتى النفس ماعندهاش، جاتها السخفة وكتافها تقالو ورجليها فشلو وضاق عليها صدرها بقات كتهضر وصوتها كيقلال حتى مابقاتش قادرة تخرج حتى كلمة وبدات كتفتف على كرسي تجلس فيه ويدها على قلبها وعينيها طايحين كانت غطيح كن ماشدات فلكرسي وجلسات كتنهج وتسد عينيها كأنها كترتاح ، اما هوا سكت وبان الحزن فبريق عينيه ورجع اللور كيشتت النضر هنا ولهيه وكيرجع يشوف فيها فشلانة ويعاود يعطيها بضهرو ، نشف ليها الفم والحلق تقول تالفة فالصحرا وجرات الماء كتشرب ويدها كترعد، سكت مطولا عاطيها بالضهر كيخمم ورجع ضار عندها وقال بنرفزة
ياسين: نتينا لي وصلتينا لهادشي،،، وصلتينا لكتااااااار من هادشي (جمع فمو) نسكت حسن حيت ادا هضرت موصيبة
ذكرى: بتعب) كطحيك معايا يااك
ياسين: عزييتي عليا اقسم بالله كا كانت شي وحدااااخرا طلق وانا فالحبس واحق الرب منعقل عليها ولا نوقفها فحلقي،،، اما نتينا عملت معاك الخاااطر وصبرت لك ، بلحق دابا غتختار يا هادشي يبقا لك يا ترجع داك العقد دزواج كيف كان وتشد معايا الطريق
ذكرى: بأسى) ونتينا يعجبك الحال تبزز عليا الرجوع ؟
ياسين: زفر من مناخرو) ماعرفتشي شنوو نعملك معاك … كاااع لهاد الدرجة ماقدراشي ترجع
ذكرى: هبطات راسها كترمش شادة البكية والنخصة فيها وقالت بفشل) صافي،، نرجعو ،،، خصك نرجعو نرجعو
شار بيدو: تحرك قدامي
ناضت والدموع كيهبطو بوحدهم فصمت وتخبيهم لاحت الطابلية وخرجات قدامو مهبطة راسها على الناس ودارت النضاضر قبل متخرج قدامهم ومشات نيشان للباب والممرضات متبعين ليها العين حتى خرجات وهبطات فالمصعد ساكتة وهوا قالب وجهه حتى واحد نكيهضر مع لاخر
— تم الصلح وجلسات فالفيلا لي كراو لهاد المناسبة بقفطان اببض والشال على راسها حداه وهوا عابس وعقلو كيقرا روياااات مكاينش كاع فداك العالم غير عينيه لي كيشوفو وصافي انا ودنيه مسدودين، لابس دجينز زرق وشوميز سماوية برزات عضلات صدرو ودراعو وشعرو اشقر كثير ماشطو اللور ومحسو شوية من الجناب الحسانة ديال السن ديالو ومن الوسط قوي ومقلوب اللور وللجنب بستيل اجنبي ، حجبانو عراض مهزوزين نن الجناب وعينيه كبار كيشوف هنا ولهيه ويديه قدامو كيلوي فواحد الورقة ويعاود مسافر بتخمامو حتى هضر العدول طلب ليه لاكارط ناسيونيال عاد نتابه ومد ليها ليه ومدات ليه ذكرى حتى هي لاكارط وعينيها فلارض قلبها طايب كيتفركع ، كانت الصالة كبيرة وعبد الحق وماريا والامين جالسين جيهة ياسين وسعيد والبقية جالسين جهة ذكرى،، كاين لي فرح برجوعهم وكاين لي ساكت على خزبت بحال عبد الحق والامين لي دارو الواجب معاه فوق الخاطر .. يالاه وقعو ناضو الزغارت وناض عبد الحق والامين خرجو برا مابغاو يشربو حتى كاس داتاي وتبعهم ياسين حتى هوا وقف ووقف ليه الامين على قلبو كمل عليه وخرج فيه كاع داكشي فقلبو
الامين: والله كا كنثي ماتكساب ما ثعلام لا رجعت لك اييييه… — عاجبك الحال هايدا رديتيها بلا خاطر ؟ غير باش ماطلقشي داك السبيطار لي عملتي لها وداكشي لي عطيتي لها ؟؟
عبد الحق: صافي(كيشعل كارو) هضرنا وعاودنا وعاودنا دابا صاافي شد دقمك ا الامين
الامين: انا موطعك منرضاهاشي (كمش سيفتو وهبط شلاقمو من الجناب) واخا عارف المرى عتقبل عليا حيت عندي باش بلحق عتقبل عاجبا الحال مكحلة عينها … نتينا والو (دوز يدو على وجه) وتقوووول .. منرضاهاشي ليلك والنسا عطا الله
رد عليه ياسين والكرو وسد شفايفو كيلطع ويهبط جالس على ركسي ويديه على ركابيه شاد بريكة
ياسين: مشي قود ا الامين …. مشي قود ما تمرضنيشي بهاد الحبس عنقلب فيك
الامين: ها!! (شاف فعبد الحق) ولاهيلا غزات فيك تستاهل كتر
ياسين هز راسو فجأة : ضرب الباكية مع الارض)مشي يا الامين متشعلينيشي ناقصني نتينا
عبد الحق: غمز الامين) صافي دور طهرك صافي
الامين: انا ماقلت عي الحق مالو ماعارفشي زعما بالبوهالي لاسق فالبوتا غير هي لي عندها ط٠٠٠٠
تهز ياسين ضرب داك الكرسي حتى لسق مع الصور ىخرج من تما كيسب ويلعن بوحدو خلاهم
عبد الحق: وا هضااارنا صافي … هضر طارق عيا يعملو عقلو حتى كان علاين يخرج من تيليفون وخلاه يضبر شغلو
الامين : قرب منو بخفوت) انا مزال واقفة لي تطليقة لي عملات لو،،، كا جيتو تجمعوها بشي خمس سنين دلحبس مزيانة فيها تتربا وبنسا عليها الكامبو بعدا
عبد الحق: الكارو فمو) قالك ادا لفقتو لها شي تهمة عيقول للمخزن هوا السبب ستوببدو(المكلخ) خليه
الامين: طرنووون عندو دكون عاملت لو شي سحور .. دكون رمات لو شي حاجبات طيرات لباباه العقل
عبد الحق: بحال والو
الامين: يد على جنبو ويد على فمو)جاني بحال الى ثالف ودايخ ومجعور … ااه ومجعور هادي عدكون عملت لو السحور طمست لباباه العاينين.. (حل عينيه) هوا ديما كينقز من هنا لهنا والبنااوت هاايدا ها اكرام ها نجلا ها منعرف شني بحال للبغل عمرو تركن … دابا ترجع بحال الكلب
العشية دازت باشما عطا الله ، جلسات لبنى كتنصح بنتها بداكشي اللي كتفهم والخال كذلك ،، اما سعيد السبسي والشقف بحال ديما فباب الدار وكاس دالقهوى مكاينش فداك العالم معارف اش كيطرى فالدنيا . جمعو وطواو ورجعات لدارها مكمداهاومضيومة وهوا وراها هاز ليها حقائبها وحوايجها بلا ميهضر ،، جلسات فجنب الفوطوي مهبطة عينيها كتحيد صباطها من رجلها حتى دخلها الشنط للبيت ورجع وقف قدامها هاز مناخرو وقال
ياسين: بلا متنزل الصباط ديالك خليك بيه عنمشيو عند جينيكو دابا
هزات راسها فدهشة: شنو؟؟ جينيكوو علاش؟
ياسين: نشوفو شنو للمشكل اللي عندك علاش مزال ما هزيتي حتى لدابا
ذكرى: ماخضنيشي لولاد انا !
ياسين: بدا يسخط) ومعامن تشاورتي؟؟ شربتي شي حاجة باش متولديش؟
ذكرى: دورات عينيها) لااء عمري شربت شي حاجة
ياسين: يالاه تحرك قدامي عند لجينيكو
هز سوارتو من فوق الطبلة مرة اخرى وهي كدور عينيها يالاه جلا تهضر سكتها مابغاش يسمع ليها وفتح الباب خرج وخرجات وراه ساهية والغبينة قاتلاها وكتفكر فداكشي واقول مع راسها فيين غنولد ؟؟ اش غيزيد هاد الولد لهاد المجتمع اصلا وباه مقطع الاوراق وغير غيتكرفس وتتكرفس معاه حتى هي وترجع حاصلة حصلة دبصح وتكبر الولد فالعقد والمشاكيل.
الطريق كلها وهي كتخمم وتفكر حتى وصلها عند طبيية نسائية وصاوه بيها ودخلو نيشان للفحص بجوج وهوا واقف كيسمع وذكرى ناعسة كتفحصها الطبيبة وتشوف الحوض ديالها فالشاشة ووكل مرة تسولها واش خدات شي مانع من قبل وذكرى كتنكر حتى سالات وجلسو فالبيرو معاها وهي كتبسم
الطبيبة: ان شاء الله ميكون غير الخير مدام ذكرى، خصك تعمل لي واحد سكانير ..
شدات ذكرى الورقة كتقراها وياسين كيتسائل
ياسين: شنو كاين ؟؟ عندها شي مشكيلة؟
ذكرى: باستغراب) علاش سكانير؟؟ ياك عملت الايكو كغافي وسناكير علاش زعما؟
الطبيبة: منقدروشي نشخصو الحالة بلا منتأكدو ،، ماتخافشي
هضرة الاطباء لا تنطلي على ذكرى طبعا وعارفة داك الرد حتى هي وقالت
ذكرى: بجدية؟من شنو عتأكد غير قولي خصني نعرف
الطبيبة: مامتأكداشي من والو خصني عاذ نتأكد امدام ذكرى خصك تعمل السكانير
ذكرى: شني شوفتي خلاك تعطيني السكانير وضح لي… غير هضر هضر
ياسين: بغا يسخط) شعندك مابغيتيشي تقولينا شنو كااين ولاا؟؟ خصك تمرضنا حتى نتينا عاود(قلب وجهه)بناقص من المجية بقيتي ناقصة غي نتينا
الطبيبة: وا شعنقول لكم انا بان ليه الحوض ماشي عادي داكشي علاش طلبت منك السكانير واخا مخصنيشي نقول هايدا باش منخلعكمشي على والو
ياسين:نايض) يالاه يالاه… يالاه نعملو هاد سكانير هادا
ذكرى: كيفاش ماشي عادي زيد وضح لي
بدات تشرح ليها الطبيبة الحالة بالفرونسي وخرجات ليهاتصاور الاكيو كغافي بقات ذكرى كتشوف فيهم ولون وجهها كيتبدل . اما ياسين مافهم والو فالفرونسي دالاطباء وماسولش كاع. جرها نيشان وهي غادية فالسيارة حداه كتقرا الاوراق وساكتة وعينيها معلقين بالخوف من اللي جاي.
جري يامات تجري عاوتاني وطلع وزيد دير سكانير وفين كان مخبي هادشي عمرها قالت غنوصل نعمل سكانير ونطلع ونهبط على الاولاد وهي كانت كتشرب موانع الحمل بتخبية حسي مسي ومعارفاش اصلا بلي عندها مشكل كبير غيغير حياتها كليا.
خرج السكانير وعطاوه ليها فملف مع ثمنية دصباح وهي واقفة بسورفيت دنايك كحلة وكاسكيطة على راسها وحداها ياسن لابس شورط كحل درياضة وسبادري بيضا عريضة دريلضة وتيشورط كحل وحاط كاسكيطة بحال الى كان كيلعب تينيس. كانت كتسنا غير تشدو. و فالباب ديال لكلينيك قبل متخرج حدها شداتو حلاتو بالزربة كتقرا وتشوف ولونها كيتخطف ودازو الدموع فعينيها
ياسين: كيشوف فالملف مافهم والو) شعندك ؟؟؟ شننو كاين؟؟
بقات ساكتة ويدها. بدات تشطح حتى طير ليها الملف من يدها وجرها كتبكي والدموع كيطيحو بوحدهم ، هي مابغاتش تهضر وهوا ملهوف باغي يعرف وعينو فالطريق مشات كيطير بحال البرق فالطريق للعيادة عند الطبيبة ونزل شاد الملف وهي نازلة شادة قرعة دالماء ومزال ماستوعبات تبعاتو للعيادة ومباشرة عند الطبيبة جلسو قدامها وهي كتبسم ليهم وتفتح الملف
ياسين: بنفاد الصبر) ماضور عليا عليا ما ندور عليك عتهضر نيييشان بلا منتعصب راني اصلا معاااصب
الطبيبة: كتبسم )يكون خير ان شاء الله
كتهضر وتشوف فذكرى المصدومة بنص عين وتشوف فالملف وقالت بتنهيدة طويلة
الطبيبة: شوفتي السكانير ديالك بان لي قبل ماتجي عندي.. (شافت فياسين) كيبان عندها تغيير خلقي..فقنات فولوب
ياسين: انا هضر معايا لعربية نيشاان اشمن قناة هادي
الطبيبة: قنات فالوب هوا واحد الممر كيكون بين الرحم و المبيض.. هاد القناة كتكون مفتوحة بحال انبوب كيدوز منها السائل دراجل للمبيض هادا العاادي.. لي ماشي عادي دابا هوا هاد القناة مشدووودة ماشي ممر لحمة وحدة ماشيا نيشان حتى للمبيض ميمكنشي تحمل والقناة مشدودة
الطبيبة كتهضر وذكرى شادة راسها وكترجف .. عطاتها الممرضة كاس دالماء في حين ياسين كيسمع تصدم وبقا ساكت شحال وقال
ياسين: تعمل العملية ..ميمكنشي؟
الطبيبة: خصها باقي فحوصات عند طبيب جراحي هوا يعرف نوع الالتساق وواش غيخصو العملية ولالا.. انا نصردكم عند مختص
ياسين: عيط لو قولو حنا جايين داابا عندو ماعندنا مانستناو.
من الاول مكانتش عندها رغبة فالامومة ومكتشوفش راسها مسؤولة على شي واحد ومشغولة به .. المتعة ديالها والسعادة والفرحة عندها فالنجاح والمشاريع والسفر وامها تكون فرحانة ومرتاحة وتبقا ديما تشوفها.. كانت رافضة فكرة الامومة وباطنية عندها نفور ومابغاش نهائيا تعيش داك الجو ديال الحمل والولادة والرعاية والتربية وتحصل فشي برهوش من بعد ماتلقا كي دير ليه .. كبدتها وماعليها غير تكمل الى الابد وتبقا تابعها . لاكن بالرغم من هادشي كامل عمرها تخيلات راسها تكون عقيم وعندها مشكل .. أثر عليها هاد الخبر وعلى نفسيتها واخا ماعندو مايغير فعقليتها وحتى التراجع على فكرتها بخصوص الاولاد ماندماتش عليها لاكن كمشكل عضوي ماعمرها تمناتو راسها . دخلات فصدمة مزال ماستوعبات باش تفكر فالحل والعلاج -اماياسين كان موكض استوعب كلشي وعندو امل فالحل وفالعمليات وكيشوف بلي يقدر يفك داك المشكل ومتحمس باش يتفك واخا حتى هوا اه تأثر ومكانش كاع متوقع تسلاط عليه ديك الموصيبة وهوا ديما كان كيشوف راسو عندو الاولاد مع ذكرى وغيولد وكيتسنى وفالاخير تكسرات ديك الثقة لي كان ثايق بزاف ومرتاح . لاكن توقعه فالعلاج والعملية كبير بزاف وكيشوف ان اي حاجة عندها الحل الى كانت المادة متوفرة.
استقبلهم الطبيب المختص وشاف الاوراق وشاف كلشي لاكن العملية لبحال هاد المشاكل مكتكونش ناجحة مية فالمية ومستعصية اصلا واللحم ميمكنش يتقبو حيت ماشي التساق غقط بل هوا مسدود بالكامل والعملية خطيرة تقدر تحرمها من المبيض فمرة .
غير سمعات هادشي جاتها الدوخة وشدات راسها وبدات كتبكي بغات تموت .. بين ليلة ونهار لقات راسها هاتحاليل ها العملية ها الويل لكحل . مرضات نفسيا وحتى ياسين تغير حالو هبطات عليه الكآبة وبقا غير ساكت ويدو على البيرو كيدورها على راسو وعلى وجهه وقال
ياسين: ادا مشات على برا يعملو ليها عملية؟
الطبيب: منقدرش نقوليك شي حاجة … انا شخصيا منقدرش نغامر ونعملها لها
تلفت ياسين شاف فدكرى مطولا ووجهها شاحب وعينيها منفوخين .. اسبوع ديال طلع وهبط فالاخير مكاين والو
ناض شد ليها فيدها وخرجو مشاو للسيارة ركبو وسدو عليهم وبقاو جالسين .. هي عاطية وجهها للزاج كتبكي وهوا حاط يدو قدامو على المقود وكيشوف فنقطة وحدة وعينيه طايحين وقال
ياسين: تمشي لاروبا تبع تما ؟
سدات عينيها مطولا وضارت شافت فيه بتعب وعينيها حومر
ذكرى: نمشي
ياسين: كيديماري السيارة بفشل) ماتقول لحتى واحد هادشي –خليه بيناتنا
ذكرى: نتينا عاندك العايلة وقادر تعمل العيال … ماعندو علاض يبقا فيك الحال
دورات وجهها كتنخصص وتلفت شاف فيها باحزن شديد وجرها عنقها كيسكتها ويبوسها فراسها
ياسين: غايتحل هاد المشكل هانتينا عتشوف .. هنا الاطباء ماشي شي حااااجة .. عنمشيو على برا وكلشي غيكون مزيان
ذكرى: بعدات وجهها بتعب) انا خصني نرتاح عييت
ياسين: يالاه تمشي للدار ترتاح
ديمارا نيشان للدار وطول الوقت وهي مرفوعة راسها على الزاج حتى وصلات ومشات نيشان للبيت نعسات بحال عادتها من نهار رجعات وهي فالضيم والغبينة طايحة وعاطياها للبكى مكتبغي لا تاكل لا تشوف الضوء وماقدراتش حتى تقولها لامها باش متمرضهاش وتتفقص عليها وماعندها علامن تشكي وتخوي قلبها .
خلاها ناعسة وخرج مشا وراسو مرفوع عطا راسو للقهوى وجلس غلاتيراس هوا وفاتح .. غير ساكت وكيبرم فالجوانات كل شوية وفاتح كيهضر بوحدو
فاتح : من الصباح وانا نهضر بواحدي شعندك اصاحبي
ياسين: عندي الله
فاتح: مالك؟
ياسين. موصيبة تابعها ختاها الله يحفض وصافي
فاتح : ياك رجعتي المرى لي كنتي مشعوط عليها
سد ياسين عينيه وتنهد وقلب وجهه ساكت وكيتأمل وفاتح كيهضر بغايقصر هوا وياه .. دوزو ديك العشية فالقهوى حتى عيط ليه طارق غير شاف السمية مابغاش يرد وخلاه كيصوني حتى صونا ليه عبد الحق وفتح الخط رد بتعب وبلاخاطر
ياسين: ااالو
عبد الحق : شعندك مكتردشي فتيليفون
ياسين: واالو شنو كاين
عبد الحق: الشغل كيستنا فيك نبقاو نستناو حنايا
ياسين: عثد حجبانو) صافي انا مابقيتشي عنبقا داخل خارج شوف شي واحد اخر لسقو ليه انا معنبقاشي نحط رجلي تما
عبد الحق: ايوا وشنو عنقول انا لطارق؟
ياسين: قولو لي عجبك انا صافي معنبقاشي داخل خارج مامساليشي .
عبد الحق: واقولها لو نتينا
ياسين: قولها لو نتينا نيت انا معنفتحشي ليه .. السخرة نوصلها ونرجع بحال .. ضبر على لي يجلس حدايا لفق ليه
عبد الحق: وماانعرف.. انا نقولها لطارق ونشوف.. يالاه الله يعاون
قطع ياسين ولاح تيليفون فوق الطبلة وفاتح فهم كلامو وقال
فاتح: ماجبرتوشي شكون تكاو عليه
ياسين: كيسوط فجهة اخرى) ماشي شغلي يانا يعاودو لكرهم
فاتح: انا هنا موجود
تلفت ياسين شاف فيه وقال: راه مووجودين اصاحبي .. الثقة لي مكيناشي
فاتح: شكتعرف عليا
هز ياشين تيليفور ضور لعبد لحق: ها فاتح مسالي كرو خصو يخدم اذا خصك علامن تكا
عبد الحق: فاتح ديالنا؟
ياسين: اه ..قالك هوا يمشي معايا
عبد الحق: صافي دابا نعيط لو
ياسين: الله يعاون
قطع وتلفت لفاتح: غيعيط لك … بلحق اصاحبي نزل ديك الكرش .. نتينا داااغيا يشبرووك
فاتح: داكشي لي خصك نتينا وخاك
ياسين: دور وجهه) عاود لكرك
وصلها مسج وهي ناعسة مخبية حتى راسها وطلات بعيون متعبة قراتو ” زايني رتاحلي مع راسك وجمع حوايجك على خاطرك انا عندي الشغل عنتعطل حتى نجي ونسافرو ” تنهدات سادة عينيها ورسلات رسالة نصية لمديرة اعمالها. ماشي حاجة غريبة على ذكرى لانها اصبحت مشهورة وعندها العديد من الاعمال خارج التجميل وخصها لابد مدبرة اعمال بالخبرة تقابل ليها حسابها و تقاد ليها امورها وتهز المسؤلية كلها عليها باش تقدر حتى هي ترتاح ” يسرى انا عيانة شويوش متشبر لي حتى خيدمة دابا وتكلف بالباقي” سيفطاتو رجعات نعسات في حين ياسين منوضها هوا ومو فالدار على قبل البنت لي مزالة كترضع وعيا يطير ويتهز فالاخير خضغ لكلام مو وخلاها ضبر راسها مع نورة تجيبها ولا تدي ليها البنت هي تعرف.. المهم هوا مشا يشوف بنتو ويجلس شوية معاها باش يشد الطريق ويسافر. دازت اربع ايام على ذكرى فالدار مكتستقبل حتى مكالمة من غير مكالمة مها فقط .. واخا استوعبات الموضوع لاكن رفضاتو نفسها وعيات تصبر راسها وتقول مافيهم نفع ومن الخير واصلا مكانتش باغاهم ومزالة متشبتة بقرارها لاكن بالرغن من كلشي مقهورة وبغات تفركع من الداخل وكتحاول تتقبل الامر وتبززو على نفسها باش ترتاح وتنسى الموضوع وترجع لحياتها الطبيعية. ضغطات على نفسها بزز وقالت نوض نخدم ونشغل راسي حيت ادا بقيت غير ناعسة ما منساش ومنحرجش من هاد الحالة . داكشي اللي دارت مشات سبقات لواحد مولاي حمام سبا وضارت بالحالة كاملة من راسها لرجليها داك النهار ودازت دارت شوبينغ خدات ملابس جديدة يطلعو ليها المورال ورجعات للدار بدات تجبد وتعلق وتقاد حوايجها وكانت محتاجة تسافر بشدة ولي جاها جاها على باريس حسات براسها خصها تمشي ليها وتبدل ستيل الحياة ديالها واحد الفترة معينة وتعيش شي حاجة عمرها عاشتها باش دخل على احساسها احساس اخر جديد وفرعة وسعادة كذلك — مشات للعيادة لكن مقادراش تخدم .. مشات على قبل الاجتماع فقط واجتمعت مع الاطباء لي معاها على قبل العطلة لي غتاخد والغياب لي غتغيب وقادات امورها وختارت تمشي لديفيلي دروميو الخاص لي مدعوة ليه وطبعا يسرى لي قبلت الدعوة بالموافقة ديالها ، تجهزات وقادات وكانت من الصفوف اللولى جالسة لابسة الاسود بحال كلشي ودايرة رجل على رجل كتفرج وتتعرف على ناس اكثر ومعارف جداد قدرات بيهم تنسا موضوع العقم ونساتو فاش تشغلات وبقات متناسياه حتى سالا الحفل ورجعات بحالها عاد تفكراتو وطاح عليها الضيم،. الصباح كذلك صبحات كتوجد راسها باش تخرج للافتتاحات ومن حفل لحفل وافتتاح لافتتاح منها مدوزة الوقت ومنها مدخلة فلوس صحيحة وكتعامل غير بالملاين وهي غير ضيفة ويسرى لي شادة كلشي.دوزات سائر الايام ديالها على نفس الحال حتى رجع ياسين وعوال على السفر لقاها جامعة الشنط بقا غير هوا وبدا يجمع فالبيت والزوهرة كتمد ليه وتقلب ليه الحوايج
حطات الطيارة فمطار باريس. وذكرى رجعات كتعيش حياة الاغنياء فوق ما كانت كتصور وتتنمى ووطلات لواحد المستوى عمرها تخيلات راسها توصل ليه اصلا وكانت كطمح توصل غيير للمستوى اغنياء المغاربة لي فاش كيوصلو شي مدينة كيشدو طاكسي من المطار .. اما هي غير حطات رجلها فالمطار ركبات فسيارات النقل الخاص ،سيارة كحلة فخمة هزاتها من المطار حتى للاوتيل لي مقابل مع برج ايفل ومن افخم الاوتيلات وحتى هي مابقاش كيقنعها اوتيل عادي ،خصها اوتيل بجودة عالية وخدمات بمستوى عالي ورجعات كتعيش الحياة الغنية لدرجة نسات على الزلط والفقر والاحتياج ،. وواخا كارهة زواجها لاكن احيانا فاش كتبقى تشوف فياسين وتحقق فيه مزيان كتحمد الله لي مرافقها شاب صغير وزوين تقدر تخضر عينيها بيه ويدوز ليها ، اما كن كان شي شارف فيه بوتفتاف ومعاها فديك البلاصة الراقية وكيرافقها فدوك الاماكن الغالية كوراه ضاق عليها صدرها بيه وهازة ليه الهم ليه ونهار ، هاذا علاش كتبقا جالسة وتتأمل فياسين خصوصا فاش كيكون مامسوقش ليها وكيدير شي حاجة ولا متكي شاد تيليفون وقاطع الحس بحال دابا،غير وصل ماشافش كاع فداك السويت الكلاسيكي كي داير يكفي هي شافت ورتاحت فراه كلشي هوا هاداك وتعرف هي حسن منو ، اما هوا دخل نيشان تلاح على واحد الكرسي مطبز ورطب وهز رجلو فسما وتكا على ضهرو شد تيليفون وفرجلو حداء رياضي غليض ابيض وساعة يدوية فخمة وخدام كيتراسل حتى كنل وتنهد بعفوية هز عينو لقاها جالسة مربعة يدها قدامو وساهية فيه وقال كيرمش فيها باستغراب
ياسين: وااالو (هز تيليفون) كنهضر مع القواد دعبد الحق وصافي !مالك؟
ذكرى: ضحكات وقلبات وجهها) شني قلت لك انا ؟ هضر شكون شدك
ياسين: هز حاجبو) يحسابلك خدام كنهضر مع شي وحدة
ذكرى: حلات عينيها) ها؟؟ هههه
ياسين: سرح عينو فالمكان) عجبك؟ مزيان؟
ذكرى: مزيان حتى المنضر مزييون من هنا
ناضت كتحل فحوايجها مشات للدوش وبدات دوش تحت الرشاشة غير تخفاف وصافي حتى تحل الباب ودخل عاض شنايفو كيفرنس عريان مشا ليها نيشان دخل حداها تحت الماء عنقها وبدا يدور بيها من هنا ومن هنا حتى تكاها تما والماء كيشرشر وكمد ليها واحد قديم جامعو من زمان حتى قالت نشلل نخرج ورجع قنتها فالثاني الجديد كيكمد ليها وهي صابرة كتقول ياربي يطلقني حتى بدات ترغب فيه عاد طلقها وتقلب عطاها بالضهر كيغسل شعرو وقال
ياسين: الامواج رجعو عندي انا معاك
راحة واستراحة فداك الاوتيل دوزو العشية غير تما رتاحو وجلسو فديك الشرفة ..كان الليل ومنضر برج ايفل مضوي رائع والجو هادي ومريح ..كانت لابسة بينوار خفيف ومتكية على كنبة قدامها طبلة عامرة فواكه جافة وفواكه طرية وبلاطو دالفرماج وياسين جالس بشورط قصير كحل وتيشورط ديال الدار شاد فيدو كاس دلويسكي وهي قدام كاس الروج وساهية كتتأمل ويذاكرو على موضوع العملية
ذكرى: ماعرفتشي حاسة بالخوف من هاد العملية
ياسين: ماعرفناشي واش اصلا غتعمل شي عملية ولالا حتى للصباح نمشيو عند الطبيب نشوفو شنو يقول،،كلشي كيقول عليه مزيان. مكاينش فحالو
ذكرى:تكات يدها تحت حنكها) دابا ادا ماكنتشي عنولد مرّاا (فمرة) شني عتعمل نتينا
ياسين:هز كتفو)انا ماعندي منعمل ها فيد الله
ذكرى: زعما شني الفكرة لي عندك،، انا مانبززشي عليك تبقا معايا خصك تعمل العيال
ياسين: زعما العواول هما لي عيبدلو لي الحياة ديالي هه،،، العواول فجهة وانا وانا ونتينا فجهة
ذكرى:فهمتشي؟
ياسين: (غنزها) واخا متقدرشي تولد معنخليكشي انا ،، ماشي لبز لي عيخليني نبقا معاك ..البز بووحدو ونتينا بووحدك
ذكرى: ان شاء الله عتولد
ذكرى:تنهدات) ادا ماكان والو من هاد الجرا لي كنجريو صافي معنيقاشي انا تابعة العيال،صافي عييت عنجربو هاد التجربة ادا فشلات صافي عنزول فكرة العيال من بالي
ياسين:شنو خاسرين حنا … نبقاو نقلبو حتى نوصلو
ذكرى: بنفور) لالالا انا ماخصنيشي نمشي فهاد الطريق ديا ل. العمليات والادوية .. صافي بديت نتقبل هادشي صراحة
١٠. بعد برهة، بدأت تُلقي بكلماتٍ لتعرف ما يُفكّر فيه وما يُمكنه أن يُدبّره للمستقبل، لكنه لم يكن يعرف كيف يُفلت، ومن يُخاطب قلبه لا يُحبّ الحديث ولا يجد سبيلًا للهروب منه. كانت تلك الليلة طويلة، ومع هذا المنظر والجو، أصبحت أطول وأكثر جمالًا. أخرجت إلى السطح قصصًا ورواياتٍ ودفاترًا كثيرةً لتكشف خيوطها، وبدأت تُحلّل الروايات حتى وصلت إلى طليقته وقالت: “ذكرى: لقد أحببت زوجتك الأولى وتركتها بسهولة”. أجاب وهو يُدير الكأس حوله ويُفكّر: “لا علاقة لي بها. لديّ أفكاري الخاصة”. ضحكت وقالت: “وما زال هذا الاسم على صدرك”. » قلب عينيه بلا مبالاة وقال: “هذا الاسم رائعٌ حقًا!!” ، وكل ساعة نعود للقاءها إلا هي حتى تُصبح وحدها معنا، يفتقد كل شيء. ذكرى: ليش ما عملتيها أصلاً؟ ياسين: (يملأ الكأس) ما راح أعملها ولا مرة. ذكرى: (رفعت حاجبيها) حتى أنا؟؟ ياسين: هز رأسه بغرور) حتى نتينا معهم. ذكرى: ياااااك؟؟ شكراً. ياسين: (أدار رأسه) لا، شكراً، هذا واجبي. استمرت تنظر له بصدمة وهو يفكر ويحرك الكأس طويلًا ويقول. ياسين: فعلاً، هل جربتي شي مرة بحياتك؟ قلبت عينيها وقالت: “لا”. ياسين: فمررة ؟ ذكرى :مرررة ،، كنت داياها فالقرايا ديالي مكنخرجشي حتى تزوجتك نتينا اول واحيد. ياسين: صغر عينو) وفاش طلقتي؟ ذكرى: راك عامل الواجب ديالك زعما . . كنت كنحييس بسي واحيد تابعني كيراقبني. ياسين: كتنكنتيشي مراقبة زعما كنتي تعمل لي عجبك. دكرى : فحدود ونتينا عاارفني .. انا والفساد عوومرنا نتلاقاو .. نعيش الحياة ديالي فالحدود.. بلحق الخطوط الحمرة الي بيني وبين والناس كلهم ممنوع شب واحيد يتجاوزها ويقرب لعندي
شاف فيها بنص عين وقلب وجهه وكملات الليلة بالتعاويد حتى صبح الحال . صبح الحال على اجمل منضر من ديك الشرفة وهي لابسة لبسة كحلة خفيفة ضريفة وشعرها حر طليق فالهوا كتعلب بيه باطراف اصابعها وتتمنضر عطرها فواح كيناسب الجو والمنضر والمكان ، كانت جميلة من قبل وزادت زيانت وغادية وكتتبدل ومع العناية والاهتمام بالنفس كيزيد الجمال يبان وينور . كانت واجدة تبدا رحلة العلاج المملة بالنسبة ليها وفير دايرة الخاطر لباسين وصافي حيت شافتو متحمس وكيهضر فتيليفون مع الطبيب ويمهتم اكثر منها. ، اما هي غير كتتمنضر وتشوف وساكتة ومرة مرة تقول فنفسها علااش دابا ملهوف على الولاد وهوا اصلا باقي صغير وباقي بريهيش .. باقي ماشي وقتو وماشي السن ديال يولد الاولاد وهوا فسن المغامرات والطيش والحياة وتلاقات ليه مع الترفيحة جات هي هاديك خصو ميكونش كيفكر فالاولاد بمرة ولي بحالو مزال اصلا مامزوجينش ومكيفكروش فالزواج وعاطيينها للزهو هاك بالاك مع قفة دالبنات .كيفاش هوا زعما بهاد التبوكيصة وهاد الفورمة مقالش اجي نتبرع بشبابي حتى نشبع .. مالو لاسقني ولاسق على الولاد تقول عندو خمسين عام ، دورات الهضرة مرارا وتكرارا فراسها وكل مرة كتوصل لطريق مسدوذ وطرد دوك الافكار وتكمل مشوارها، مشات معاه عند طبيب عندو شهرة كبيرة فميدان الطب النسوي ومتمكن و خضعات للفحص وهي مخنوقةمن جو العيادات والادوية والفحوصات كارهة المنضر وضاغطة غلى تفسها وباغا غير تمشي بحالها ومابقاش اصلا عندها هدف باش تعرف التفاصيل وبغات غير تعيش حياتهاوتكمل مشوارها ، اما الاولاد ضربات عليهم وزادت كملات الباقي فاش عرفات راسها مكتولدش كمداتها ونقزاتها وسكتات وقالت من الخير نيت . لاكن ياسين عندو رأي اخر ، وحتى هي ماعترضاتش ومسايراه من فحص لفحص ومن تحليلة لتحليلة وغادية جايا وكتسوط بوحدها حتى داز اسبوع على طلع وهبط ووصلو للنتيجة وهي انها دير محاولة ولي هي العملية الجراحية . واخا نسبة النجاح ضعيف لاكن تحاول علاش لا
الليلة دلعملية ماداهاش النعاس وبان الجانب المخفي من شخصيتها وهي الخوف من العمليات .. ماقدراتش تنعس وتوترات وخافت وبقات غادية جايا كتخمم فديك الشرفة وباين الخوف والندم على القبول فعينيها ، جلسات كتهضر مع مها فتيليفون كتحاول تشبع منها كأنها غتودعها لاكن مقالتش ليها الحقيقة وخلاتها فالسياحة وصافي باش متخلعهاش اكتفت تسمع صوتها ودعواتها فقط حتى جلس حداها ياسين وريحة الشمبوان كتعطعط منو لاح يدو ورا ضهوها ونشر رجلو على واحد الكرسي وشعرو فازك مخربق مزال شي قطرات كينقطو منو وهوا كيسمع هضرتها مع امها لي كلها وصيات باش تهلا فراسها وتعيش فرحانة والحياة متستاهلش نحزنو فيها كأنها غتودعها حتى كملات مكالمتها وقطعات وتنهدات مهمومة
ذكرى: انا مخصنيشي العملية كا عملت بنااقص حسن لي .. انا ربي هناني وانا كنفتش على العداب نراسي
ياسين : عنقها بيدو) قالك الطبيب مغيفتحشي لك غيعملو غيير تقبة صغيرة فكرشك منها يدخلو داك الليزر لي يعملو بيه العملية لداخل
دكرى: وعلاش يتقبو لي كرشي وعلاش نمشي نعمل العملية ؟؟ انا صافي مابقيتشي بغيت
ياسين: وشنو غنخليو الكرون هااايداك مخنوقين(بدا يتعصب)
ذكرى: بتوثر) خليهم
ياسين: جمع يدو) ماعنديشي الخاطر هاد الساعة نهضر معاك صافي
ناض مشا ينعس وبقات هي جالسة كتدي وتجيب مع راسها عاد قالت اويلي شكندير ولمن غنعطي راسي وانا غنغيب منعرف اش يديرو فيا وعنداك يتافقو عليا وبداو كيجيوها افكار مميتة عدبوها حتى هربات من العملية ودارت بناقص منها ولي بغا يوقع يوقع ومشات نعسات حداه حتى صبح الحال وصبح هوا وياها مشادين على العملية . كشاكشو خارجة وهي متشبتةبقرارها وجالسة وحالفة ماتمشي ديرها
كان لابس ومقاد وسوارتو وتيليفونو فيدو وكيتسناها غير تزيد قدامو لاكن هي مشات جلسات وريعات يديها وخلاتو غيطرطق
ذكرى : مانعملشي العملية نغامر براسي على قبل البز
ياسين: خرج عينيه ) واش عتحمقني دابا؟؟ علااش جينا هنا وعلاش طلعنا ونزلنا ودابا مابقيتيشي خصك العملية
ذكرى: صافي مابقيتشي بغيت نعملها انا حرة
بقا واقف كيشوف فيها مطولا ويترعد عليها ومشا عندها هزها من شعرها نوضها حتى وقفات وجرها عندو حدا ودنها وقال بغضب
ياسين: غتعمل العملية هي غتعمل العملية (باسها بقوة فخدها) وازيد ولا قدامي تحرك
دفعها وهي يدها على راسها واعدى حاجة عندها هوا داك التعامل المزفت لي كيخليها تكرهو وتكره خليقتو وتكره راسها حتى هي
ذكرى: بغضب) خصك لعيال مشي عملهم فجهة اخرى وبعد منيييي بعد منيي مغنعملشي العملية ومافيكشي الثقة .. ماخصنيشي لعيال بعد مني
حلات الباب كتنخصص غادية وهوا تابعها مع الكولوار دلوتيل باغي يقتلها وعينيه خارجين رجع حمر لي شافو يقول غيرتاكب شي جريمة فديك اللحضة وفعلا حتى كيشدها يبغي يعجنها وكيرجع يطلقها ويعوج صبعانو بالفقصة ويحك سنانو
ياسين: غنعمل فيك شي مصيبة
ذكرى: هاد المصيبة هي العملية
ياسين: فشل) منااااش خايفة مناااااش قالك طبيب مافيهاشي الفتيح
ذكرى: منعسشي فسبيطار ومتخصنيشي العملية مابغيتش العواول
ياسين: قنتها مع الحيط) بوووحدك لي كتقرر زعما انا ماعندي قرار صافي قلتي ماخصك والو نربع يدي نشوف فيك
ذكرى: عندك العايلة ديالك شني خصك دابا؟؟ انا مكنولدشي عمري معنولد صافي داكشي دالله والطبيب قالك تقدر متنجحشي
ياسين: نعملوها ولهلا فين تنجح
بقاو مني منك كيزيدو خلفة ويتشادو حتى خرجو للسيارة مدابزين وكملو الطريق بزز حتى وصلو وبزز منها دخلات لابسة اللبسة دالعملية ومخلوعة ومتوثرة وكتشوف وراها وهوا تابعها لابس بحال الطبيب وكيدفعها تزيد
ياسين: داخل معاك غي زيدي .. زيدي يالاه
دخلات كترعد وسكتات بقات غير كتشوف وكل مرة تتلفث كتراقب شنو كيدير الطاقم الطبي حتى دخل البناج عندها وقادوها فالجلسة وعينيها مدمعين وشعرها مجموع فالبوني .. وقف قدامها ياسين شد ليها فيديها وقال
ياسين: عادي ماشي شي حاااجة
نترات يديها مابغاتش تشد فيه والخلعة شاداها وكلشي كيهضر معاها تتهدن وبداو العمل . خدرو ليها النص ونعسات كدور عينيها فااسقف وكتسول والطبيب خدام وكيشرح وهي كل شوية كتبغي طل تشوف اشنو كيديرو لاكن ماكيخليوهاش. بقات شوية وبدا الضغط يطلع ليها والتنفس يتقطع فيها وبدا كترجف حتى قالت الموت هادي وعينيها بداو يتسدو وبداو كيزربو يعتقو الموقف وياسين كيشد فيها ويهضر معاها توعى وتهدا ..
تمارة دازت فديك العملية واخا ماشي خطيرة لاكن الضروف اللي مرت فيها هي لي جعلاتها تكون قريبة من ااخطر
دوزاتها ونعسات فغرفتها كترتاح بعد العملية وكانت عارية كلها مغطية بالغطا فقط والسيرون معلق وتيو دالبولة وشعرها محلول وحناكها حومر واخا مريضة كانت منورة تشها تبقا تشوف فيها . كان واقف كيدور حداها ويديه على السمطة دالسروال كل مرة يغطي ليها رجلها فاش كترحك وهي ساكتة كتنهد وتسوط بتعب وحتى هوا ساكت مكيهضرش حتى لواحد اللحضة عيات بغات يهز بيها البياص ومشا طلعو ليها شوية تكات وتكا بيدو حدا راسها وضحك معاها
ياسين: ماوقع واالو … ها العملية دازت مزيانة
بقات كتشوف فيه مطولا وقالت : حيت ماشي نتينا لي فموطعي مجبد هايدا ومهلوك … (صغرات عينيها)علاش نتينا اناني علاش؟
ياسين: تصدم)اناني انا؟؟
ذكرى: اناني .. خصك تولد وصافي انا ماعندي حتى رأي
ياسين : بهدو)قلت لك ادا قدرنا نعملوهم مزيان ماقدرناشي صافي
ذكرى: بأسى) كخليتني مهنية ومشيتي عملتي ولادك فجهة اخرى
ياسين: هز حاجبو)نتينا واش مكتغيرشي عليا عاادي عندك نجيب مرى اخرى
ذكرى : انا كنحتارم الحقوق ديالك بلحق نتينا مكتحترمشي الحقوق ديالي … ومكتعرفشي تتعامل
ياسين: كتعصبيني
ذكرى : نتينا تعامل ديالك خااايب كيفاش بغيتي نغير عليك
ياسين: كيفاش خايب شنو كنعمل لك كنسوطك ؟
ذكرى: ااه .. مكتعرفشي تتفاهم
ياسين: ناض من حداها)نتينا لي مكتعرفشي تتفاهم كطلع ليا ليا الخرا.. كا كانت شي واحدة اخرا كشافت التعامل دبصح بالحق نتينا مكتحمدشي الله
خلاها وخرج كيبركم وتكات تسنط لعضامها مافيها نيت لي يتعاطا معاه . بغات غير ترتاح وتخرج من داك لكلينيك للاوتيل تبدل الجو والمنضر باش تبرا دغيا.
خرجات من لكلينيك للاوتيل ونعسات ففراشها مكتنوضش واحيانا كيشدها الحريق بحال الم الدورة وكتبدا تتقطع فصمت .. لاكن فهاد الفترة بدات كتلاحظ تصرفات ياسين الغريبة وعمرها توقعات تلقاه حداها وكيعاونها واخا بديك العصبية وهضرتو منفخة لاكن التعامل حاجة اخرى وفيه ريحة الحنان. ماشي شي حنان لاكن كاين شي لقطات فيهم الحنية وكتحس بيه بالليل كيعنقها تعناق مختالف على عناق الشهوة ، ومهتم لاحساسها وكل مرة يسولها واش كضرها شي حاجة ولا كتحس بشي حاجة .. مرة يقاد ليها المخدة مرة يغطيها مرة يعاونها تبدل حوايجها وحتى الدوش فاليوم الثاني عاونها فيه حتى فاتها الحال ودازت المدة دالراحة والوقت لي خصهم يرجعو فيه للفحص باش يعرفو واش نجحات العملية ولالا . كانو متخوفين من فشل العملية خصوصا من بعد المجهود لي دارو وطلع وهبط لي مابغاش يسالي .. لاكن مع الاسف الشديد الفحوصات بينو ان العملية فشلات ورجع اللحم تلاحم ولتاسق فهاد الفترة وبحال الحالة الناذرة ديال ذكرى قليل فين كتنجح شي عملية وحالتهم مختالفة على باقي الحالات الاخرى .
كان خبر مأسف سكتهم شحال فالطموبيل وكل واحد فين ساهي حتى تكلمات وقالت بتعب
ذكرى: اول عملية وااخر عملية … ماباقيشي تكرفسني وانا قلت لك فالاول راه معتنجحشي
تلفت شاف فيها مطولا وقال: واش ماخصكشي الاولاد؟
دورات وجهها وقالت: خليني هاد الساعة لي فيا يكفيني
دور وجهه بقا كيشوف شحال قدامو ودور المقود بقوة رجع للاوتيل وبدا يجمع الحوايج بنرفزة وهي كذاك .. شافتو كيجمع عرفات راسها غترجع بحالها وجمعات حوايجها حتى هي وواحد مكيهضر مع لاخر الطريق كلها حتى رجعو للدار .. مع الدخلة من السفر لاح ديك الشنطة فالبلاكار وخرج غبر مابقاش رجع ولا سول ولا عيط حتى طرا ليها العجب فيه .. استأنفات العمل ديالها عادي ورجعات لحياتها لاكن ماجاها منو حتى اتصال او خبر وبالرغم من تراكم الاعمال عندها ومكتجلسش الا انها منساتش الغبرة لي غابر و قالت نعيط لمو نسولها عليه
ذكرى: الو
ماريا: االو دكرى كيف نتيناك لاباس
ذكرى: الحمد الله ونتينا
ماريا: لاااباس على السلامة ديالك
ذكرى: بدهشة)الله يسلمك!!!
ماريا: قالي ياسين كنتي عيانة وسافرتو فرنسا شوية
ذكرى: تنفسات)ااااه .. الحمد لله دابا لاباس.. معاك ياسين؟
ماريا: ياسين فهولاندا مقالكشي عيمشي
ذكرى: لاء ماقالي والو!!
ماريا: ايوا شعنقولك … نتينا كنتي عزيزة عندي بلحق دابا متبقاشي تعيط لي.. سمعتي؟ صافي ماتبقاشي تعيط لي
ذكرى: بصدمة)علاش؟
ماريا: نتينا طلقتي ياسين استعليتيه وهوا فالحبس
تنهدات ذكرى وشدات فجبهتها كتسوط عاوتاني غتبدا الشرح والتفصيل لهاد مو لي عاد فاقت من القلبة وجاها تحاسب وفين كان عقلها شحال هادي فاش كانت كتوصل لهضرة من ياسين ليها فاش كان فالحبس. هي عاد فاقت من النعاس ولا شي واحد فيقها وعمرها وخصها الوقت باش تشرح وتخبر ليها حتى هي والوقت مكاينش
ذكرى: نتلاقاو ونهضرو ديك الساعة تعرف كولشي وتعرف علاش طلقت راسي واخا نتينا عشتي معانا كولشي.. ماشي مشكل نعاود نشرح ليك
ماريا: ايوا المهم .. انا دابا عنقطع تهلا فراسك
ذكرى: بسلامة عليك
قطعات ماريا وفرحجرها جالسة لينا كتراري بيها باش تنعس ونورة جالسة حداها شادة تيليفون
نورة: شني خصها هادي عاود
ماريا: نتينا ماتجبدشي الصدع على راسك صافي.. خليك فتيييساع .. بالدرع باش خلاني نرجعك لبنتك ولاهيلا دزتي فوجه العايلة(كتصوني فتيليفون) ماتعملشي المشاكيل نراسك… الو ياسين
ياسين: الو ماّمّاا لاباس
ماريا: حمد لله.. عيطت لي ذكرى كتسقسي عليك
ياسين: شني عندها مريضة؟
ماريا: لااء غير كتسقسي قالت لي واش معاك ياسين
ياسين: صافي غير هادشي؟
ماريا: صاافي.. فوياخ ترجع؟
ياسين: مع تيسير الله
ماريا: الله يعاون الحبيب
قطعات وكان حوارهم بالاسبانية ونورة كتسمع .. اما دكرى يالاه هزات صاكها جات خارجة من العيادة صونا ليها وهزات تيليفون ردات عليه
دكرى: الو
ياسين: شعندك ياك لاباس؟
دكرى: والو علاش؟
ياسين: عيطتي لمامّا سقصيتيها عليا.. كاين شي مشكل؟
ذكرى: لااء لاء غير سقصيتها وصافيي.. قالت لي فهولاندا
ياسين: مكاين والو؟
ذكرى: مكاين والو الحمد لله
ياسين: وا الله يعاون
قطعات وبقات مستغربة غير كدور فعينيها جاها بحال الى غضبان ودغيا قطع .. اما هوا لاح تيليفون كيسب فيها فنفسو ويلعن جد بات النهار لي عرفها فيه وتشارك معاها الحياة .. تقرقب داك تيليفون فوق الطبلة وسط واحد البار فقلب ماربيا مع عشرانو وصحابو كانو مقصرين وشافو واحد فصحابو كيسب ويلعن وكحز عندو كيضحك ويوريه فتيليفون
احمد: شعندك اصاحبي زعفان … شني ضهر لك نعيطو لهاد فاتن تقصر معانا … اناااضية اميكو
ياسين: كيشوف فتيليفون: هادي شاارفة اصاحبي
احمد: وا احسن من برهوشات… هادي مشهورة فالمغرب داكشي ديال لوكس…نجيبوها عندنا هنا …(غمزو)هادو نقيين اصاحبي ماتحمل ما تزمر … عيش كما عجبك
ياسين: شاارفة… ماعنديشي مع هاد النوع هادا اخاي
احمد: نتينا عندك مع النوع الرطب الهشيش… واشوف لك هادو … موجودين اصاحبي
جلس حمد يوريه فالفاشيونيستات المغربيات دولوكس وبقا يطلع ويهبط حتى وصل للكونط ديال ذكرى وقال
احمد: هاادي اللوز… اللوز والبيسطاش اصاحبي تفرج كيف عاملة
تلفت ياسين يشوف وتخطف اللون فوجهه وشاف فيه وقال
ياسين: كتعرف هادي؟
حمد: بعجرفة)كنعرفهم كااملين اصاحبي.. رمي لها واحد عشرالاف دلاورو تطلع عندك لهنا ماربيا دوز معاك السيمانة
ياسين: كيقلب على تيليفونو)نتينا طلعتي هادي؟
احمد: طلعتها ما مرة ما جووج هه!! كنقول لك اللور اصاحبي… اللوز هايدا عاااملة تعمل لك لي خصك ..شني يحساب لك هه
تسيفات ليه الكمارة بقا غير كيشوف وقال هاز حاجبو وعينيه خارجين
ياسين: عيط لها تجي يالاه
احمد : كيشوف فتيليفون ويضحك) نعيط لها وتجي من غدا
ياسين: عيط دابا نشوف
احمد: بلاتي نفتش على نيمرة ديالهاااا(كيقلب) مشات لي خصني نفتش عليها
ياسين: وقف) تفتش عليها ؟؟ مشات ليك؟
احمد: واقيلا بقات عندي فتيليفون ااخر
مزال ماكملهاش تقلب عليه ياسين وقلب ديك الجلسة وداك الجو ودتك البار ودوك الناس والموسيقى حتى هي بحال الى ضرب الزلزال ولي جالسين بعيد كيشوفو من بلايصهم والروينة نايضة فديك الطبلة وداك الاشقر البوكوص طالع فوق الفوطوي على لاخر كيخشي ليه فالبونويات والطبلة مقلوبة والدراري كيفكو والفيادر داخلين كيدافعو والصدع ناض مكاين غير سبليونية كتشاير.. كيبان ليهم الاشقر كيجر بزز وكشاكشو خارجة والمنضر كيخلع تقول الروح بغات طيح ولي جالسين حداهم هربو ومكاين زداااف كتسمع الطيحة والتهراس تقول قبيلة وهما راه غير جوج مشادين فوق داك الفوطوي حتى فوكوهم الفيادر واراك للسبان بعدو داك الاشقر شوية ولاخر كحزوه لاكن الاول كان ثور هايج مكيقشع والو حتى قالو صافي فكوهم ونواو يجلسو لاكن فجأة جيد داك الاشقر فردي من اللور وجهه مباشرة لصاحب دعوته والفيادر حداه ضهشرهم وتسمعات طلقات النار.. الرعب قلب داك البار كلشي ناض كيتجارا وشي كيزطم فشي والغوات والطلقة الاولى والثانية والثالتة والناس بغاو يتسطاو كلشي هرب وكلشي تهرس وكلشي تقلب والدمايات وترونات الدعوة وها الشرطة حضرات والاسعاف حضر والبار تسد والقصاير الملاح اللي ميساليوش فالسبطارات والكوميساريات ماقصاير ما والو .. ودائما وابدا .. فين ما كثرات الفلوس كيكترو المشاكيل وفين ما تحطات القرعة كيحضرو الشياطين .. حسبلاك القصاير دالبزناسة لي كل واحد منوي من جهة وعلى رمشة كتقرقبل
هي جالسة فالدار فوق ناموسيتها متكية ومهنية عايشة الحياة والدلع مجايبة خبار ومافراسها ميتعاود وشادة طابليط كتفرج فنيتفليكس وتسنط لعضامها.. ممنوع عليها لقصاير والخرجات والسهير .. حدها حد الخدمة واللفتتاحات وشي ملاقية في اطار العمل فقط . من غير هادشي متقدرش تخرج السطر واحساسها كيقولها راه حاط عليك العسة … ولاباس الى كات غير عساس ماشي كروب حيت لي بحالو كيحط عشرة دلميلاين فليلة وتجيه قليلة وميغلبوهش العساسة خصوصا انها هي من الخصوصيات ديالو وكيضل غابر وفاقد الثقة فجنس النسا واخا كتعيا تبين ليه راه بريئة وصاينة راسها ، لاكن لي عضو الحنش كيدير بحساب الحبل واخا راه قج داك الحنش لي عضو بداك الحبل نيت وبرد الكية وزاد مع الطريق . حياتها رجعات روتينية والوقت عامر وبدات كتشوف البنات سهرانين وخارجين وتوحشات حتى هي شي قصارة وشي لبسة واخا مافيهاش التقزقيز لي ينوضها تشطح وتحماق ولاكن عزيز عليها الليل وعزيز عليها تخرج مع ياسين وتبان بيه كيبان بحال شي برجوازي ومهييب كيهيب ليها على الجلسة واخا كينكدها على طاسيلتها لاكن عندو بلاصتو حتى هوا
منتف تلاح فيه ماضربش حسابو … الروح زهقات فالبلاصة ويحال هاد المصايب صعيب لشي واحد يحضر فيهم عقله وشحال من ضحك صفى بندامة وها الضحك الباسل زهقات فيه الروح وصدق مشدود وفمنتف قد الويل ماعندو كي يدير يتفك منو .. مينطوه وداوه وواخا كيتشراو البوليس بالفلوس والضباط حتى هما فجميع البلدان لاكن ماشي فبحال هاد المشاكيل لي كتكون بالشوهة والفضيحة وقشلة دالشهود وعاد الدعوة دالبار اي تسد والكامرات كتصور ماعندو ما يفك فيها واخا يحط فلوس العالم كاملة .. اما القتيلة والمصايب لي كدوز حسي مسي وفيها البحث كيقدرو يتشراو بالفلوس حتى هما ويقللو البحث ويكتبو لي بغاو ومشافهم حد. لاكن ياسين هاد المرة ضبر عليها بالمعقول وماعندو فكاك.. وحتى جلس وبرد وسط مركز الشرطة بالمينوط مابغاوش يطلقوه كاع ستوعب اش دار وعرف راسو قودها بالمعقول والحبس فيه فيه بغا ولا كره . كحالت الدنيا فعينيه عاد عرف اش خلا وراه واش كيتسناه ومابغا لا يهضر لا ينطق ورافض يتكلم حتى يحضر المحامي ديالو ومن حقو يلزم الصمت وهرا عارف هادشي ومن كثرة دخل وخرج والمناتف لي داز منهم حفظ القانون بلا مايقراه وقرر يلزم الصمت فديك الحالة اللي اصلا مامركزش فيها ومشوش من شنو وقع وفجأة لبس جريمة قتل علني ماضربش ليها الحساب. بقا جالس كينهج ويشوف فنقطة وحدة ورجلو كتشطح ويديه على ركابيه بالمينوط كيتسنا المحامي يحضر من بعد ما عمل مكاملة هاتفية لعبد الحق قاليه على الكارثة ولي استقبلها الاخير بالنديب وضريب الحظ ووصلها لطارق حتى هوا ضرب على ايامو وحياتو وزهرو لي لاقاه مع ياسين فهاد الدنيا ما قدر يتهنى ولا يعيش كي الناس.. وماعندو حد لي يجيب ليه المشاكيل ومهني عندو غير البنات وعطاه الله اخ بحال ولدو فيه عشرين الف ولد يكره اي اب فالولاد ومايجي منهم ، ماهي قضية مخدرات ولا قضية فساد ولا قضية يدوزها الواحد ويشوف كي يدير ليها .. هاد المرة قضية قتل وغطس حتى للودنين خلاتهم ينوضو من مشاغلهم ويخليو لي وارهم ولي قدامو ويجريو عند ياسين لي تشد فسبانيا بمنتف
وصل عبد الحق كيجري عند ياسين زرق بهول الخبر وطلب يشوفو وخرجوه ليه باقي بنفس الحوايج وملامح وجهه باردة ،، كانه رجع ليه عقلو من بعد ديك الليلة لي دوز فسيلول عندهم واخا سيلول عندنا حالتو وايامو مافيه حتى كرسي ، لاكن فاوروبا على الاقل كيحتارمو السجين وحاطين كراسا طوالا نقيين على شكل بياصات بكويطات يقدر لواحد يتكى فيهم والدنيا نقية والحيوط مصبغين تقول جالس فسبيطار الحومة لي عندنا فالمغرب ،،واشووف على ديكور دابا ! رجعو سبيطارات فالشكل بحال سيلول اوروبا ! تخيل المرا كتولد فسيلول فاوروبا تبقا فيك تقول مسكينة ولدات فسيلول! وهي فالحقيقة بحال الى ولدات عندنا فسبيطار الشعب وبلا منهضرو على هاديك لي كتولد فالارض بقوة ما كنشوفوها رجعات عادية .
مهم ماعلينا نقولو بحال الى كان جالس فسبيطار كيدوز على الصدر حيت خرج نقي وحتى الريحة تنا نقية ، اما سيلولات المغرب راه طواليطات ماشي سيلول واخا حتى هما زارهم وشافهم
تقابل مع عقد الحق اللي بغا يتسطى وجايب معاه عرام دالاسئلة واخا راه سبق وتاصل بصحابو لي فماربيا وعاودو ليه على شنو طرا وكيفاش وقع حتى وصلو للفرادا لاكن بقا خاصو يسمع من ياسين السبب الحقيقي اللي دار بينو وبين احمد حتى نوضوها صباط ، عيا يضغط عليه ومابغاش ياسين يقوليه السبب علاش وبدا يدخل ويخرج فالهضرة وعبد الحق بغا يحماق ، اما طارق شد للطيارة نيشان لماربيا لاكن مامشاش للمركز وبحالو كيبقاو بعاد وجوههم مامعروفاش بلخصوص هوا عايش فاوروبا واغلب اعمالو كاينة فسبانيا وهولاندا ماشي بحال عبد الحق مكيعرفو حد فاوروبا.
بقا كينكر وحتى البوليس ماوصلو معاه لوالو حتى حضر المحامي وااالشمن محامي !! محامي ديال القضايا العملاقة ومن اقوى المحاميين مكيخرح من البيرو ديالو غير الى كان موكله شي شخصية ولا شي حد كبير . جلس مع ياسين الراس فالراس باغي يسمع منو باش يعرف يخرجو من داك المأزق لاكن ياسين ماجبدش السبب الحقيقي وبقا كيطرح عليه المحامي الاسئلة باش يعرف شنو لي مخليه متخفظ على اسبابه الحقيقة وبطبيعة الحال محامي بحال هادا عندو اسلوبو الخاص لي يخليه يعرف التفاصيل وبقا شاد معاه الخط مني منك سؤال من هنا جواب من هنا حوار من هنا حتى عرف القضية قضية شرف ووصل لراس لخيط وكان لابد من الموضوع يتفضح واخا يعيا ياسين يتهرب من الحقيقة لاكن لابد ليها ما تبان طال الزمان ولا قصار
اللي هرب منو طاح فيه،، داكشي اللي ما بغاش يوقع هوا نيت اللي وقع وكان عارف خوتو مشارجيين على مرتو وكملات الباهية دابا جات سببه فخرابو وعقد الحق غير سمعها شعلات فيه العافية، العافية دكوكب الشمس شعلات فيه فار والفوار بدا يطلع من ودنيه وغير شاف ياسين غالمكتب جالس بدا عليه للراس هاك بالاك وعلاش مكتسمعش. واشنو عطاتك هاد المرى من غير المصايب وهاهيا خرجات على باباك واش بغيتي بالمشوهة المغرب كله عارفها وهاشنو جانا من هاد لانترنت وها الرجال رجعو ينعتو فيها بلي كاين ولي مكاينش وهانا رجعتي قتال وصافص ضاع عمرك و خليت البنت وخليتي مك وخليتي وخليتي وبقا عليه كيبرد على قلبو وحتى ياسين مكانش من العاكزين كملة منو كلمة من عبد الحق نوضوها فداك البيرو وبغا ونفاجر عليه عبد الحق حتى ضرب راسو مع الحيط واخد الضربة حتى تزعزع داك الحيط كان غيشق راسو بالفقصة والغدايد لي كيغددو ياسين وميزيد يدافع عليها وجلس عليه هي ما عملت والو هي داخلة راسها هي ل فيها كافيها وبنادم تابعنا وبنادم حاضينا ومايهضرش عليها ومايجبدهاش ومايقولش عليها ديك الهضرة وانا تعصبت وانا مابقيتش عارف اش كندير وبقا حتى هوا كيعطيه والمحامي كيبرد السوق بيناتهم والرعد ضارب داك البيرو الصغير ليه فيه طبلة وكرسي وبولة فالسقف . مافراوها حتى صونا طارق على عبد الحق لقاه كيبحبح وصوتو مشا والرغوة فجناب فمو الازرق وعينيه مفركعين فيه العروق وقرجرطتو كطلع وتهبط حلقو نشف والخطوط مصافين واحد فوق واحد فجبهتو العرقانة والقطاري نازلين حدا ودنيه الى قربتي ليه يتيري فيك ،، كان صاعر وتلاقا مع طارق مع جاوبو جلس عليه ديك القحبة ما القحبة هاهيا هرجات عليه ها الانستغرام فين وصلو وها اللي يتزوج القارية والفاهمة وبغات طير وبغات ماعرفت شنو ومزوجة ودايرة فضيحة وحنا ماعندناش هادشي وحنا طلقنا ليه وحنا خليناها كتلعب بيه وياسين كيسمع وكيجاوبو حتى هوا ويرد عليه مكاين غير السهام الحادة كلمة جوج انا قاد بشغلي وشغلي هاداك كيزيد يفقص عقد الحق ماكرهش يقتلو يتهنى من كمارتو
الخبار مادخلاتش للمغرب بقات محصورة فسبانيا وحتى واحد معارف اش كيوقع تما .. حتى واحد معارف الخوت مجموعين تما فديك البلاد اصلا وكلشي تابت فبلاصتو ومكاين حتى تغيير وشادين التوازن كيشوفو كيفاش يفكو المشكل بيناتهم بلا متوصل لخبار لمو وخوتو وبلا ميكبرو الموضوع ويدخلو فيها اطراف اخرين .
داز الوقت فداك الصراع مع القانون لاكن مع الاسف القضية لابساه من ساسو لراسو وعمرهم وصلو لداك المستوى فالحصلة وشحال دالمحاميين وشحال دروينة دخلو فبزاف دالامور فالاخير لقاو الحل الوحيد هوا يتقاتلو معاه يدخل للبلاد يتحاكم فيها واخا عندو الجنسية والقضية مستعصية دخلو فيها الانسانية والجمعيات ودارو بلي مو مريضة وعندو مشاكل شخصية ونفسية ومن الاحسن يتحاكم فبلادو يبقا قريب من حبابو يشوفوه ويشوفهم وبمشقة النفس وللوقت باش يحكو راسهم عاد قدرو يرحلوه للبلاد واخا كانت عندو فكرة اخرى حمقة وكان كيخطط غير بينو وبين راسو يدير شي هروب عمرهم ينساوه وكان هاد الحل هوا الحل اللي بين عينيه فاش استعصى الامر عليه و فقد للامل فالدخول للبلاد وبدا يقطع الامل لعبد الحق حتى هوا ويقنعو بالحل الامثل لي هوا الهروب ، ماعليهم غير يدرسو ليه شي فيلم نيت يهربوه فاش يكون فطريقو للسجن وكان كيخطط فشي هيلو كوبتير باش ميتقساش بالقرطاس فداك الحرب لي غتنوض فالهروب لاكن عبد الحق كان كيصبرو باش يبقاو حتى يرصلو لاخر الخيط وحتى مايبقا عندو حتى شي حل من غير للهروب عاد يشوفو كي يديرو ليه .
ترحل للمغرب ودخل معاه عبد الحق وطارق رجع لهولاندا. وماشافو ماتلاقاه طيلة ديك المدة لي كان فيها فسبانيا غير باش مايفقدش اعصابو معاه وياسين حتى هوا ماشي شي واحد كيحدر الراس وعندو السنطيحة وكيتقابح وكيهضر تقول عندو الحق وهادشي مكيقدرش طارق يصبر ليه والى ناض ليه وسخط عليه غيدير سي مصيبة يندم عليها .. مربي عليه كبدة الابن ماشي الاخ وحتى ياسين كيتعامل معاه بحال باه ماشي خوه عكس الامين وعبد الحق كيبدا يتعاطا معاهم كلمة بكلمة .
وصل للمغرب عاد تفرغ طارق لشغالو وحل عينيه فجوايه اخرى وبدا بذكرى هي اللولة ، كان محروق عليها ومشوط وكيشوفها بحال الى كتلعب بيهم وهما مربعين يديهم كيشوفو وهي سبب المشاكيل وماتليقش بيهم وبياسين .. هي شخصية مشهورة وتشهرات بزاف وهما بعاد كل البعد على الشهرة وكيبغيو يعيشو فالخفاء معارفهم حد وياسين واخد منهم وقريب ليها ومخيط معاها كل مرة كيتجبد فشي موضوع وهي مابقاتش عايشة حياة شخصية رجع كلشي كيتفضح وحاضيينها بحالها بحال غيرها خصهم غير باش يديرو البوز وهادشي مايصلاحش ليهم . هز تيليفون باش يصوني عليها من بعد ماتفرغ مزيان وعول عليها لاكن صونا ليه ياسين فديك اللحضة بالضبط،، ماتوقعش كاع يصوني ليه ياسين ويسمعو صوتو من بعد الكارثة لي طاح فيها وكيتهرب منو الوقت كامل لي دوز فسبانيا كيحاول يتفادا الحوار معاه. لاكن لي سنطيحة سنطيحة ولي منو ومن دمو غيكون كيشبه ليه ويفكر بحالو خصوصا راهم تريكة وحدة عارفين بعضياتهم اش كيسواو وكيفاش كيفكرو
شافو كيصوني وتيليفون فوق البيرو ومابغاش يجاوبو خلاه حتى قطع .. اما ياسين كان جالس فواحد الغرفة مع الحباسا شاد تيليفون وحجباو مدابزين الوسط وبنادم كينمم فيه حسي مسي حتى واحد مكيطوف بيه واخا الحبس خايب وصعيب ولاكن صعيب على البوجادي الجديد، اما ياسين ولي بحالو مقطع فسيفة كيليميني وهادشي لي غشش بزاف دلحباسة وجوه الشر وبغاو يحكروه .. واخا الموضفة ( شرطة السجن) كيعرفوه مايخفاش عليهم لاكن كيسكتو مكينبهوش الحباسات باش يتفادار الصدع، بلعكس كيعجبهم الحال تنوض ويتفرجو ويضحكو وفنفس الوقت يبردو غدايدهم فشي واحد .. مرضى نفسيين حتى هما واخا مطالع ليهم والو من داك الصدع لاكن المتعة عندهم فداكشي. كان شاد تيليفونو كيكتب المسج من بعد ما قطع عليه طارق وسيفط ليه مسج مطرطق فيه ريحة الموت وهز راسو لقا واحد واقف عليه .. كان ثلاتيني كرشو مدلية ومخطط وسمر محروق بالشمس وسنانو مخززين وهضرتو تقيلة سيفتو ختخلع الله يستر وكيبان قدامو ياسين بديك النقا والسورفيت د اديداس والساعة ساوية والسنسلة ولعينين بحال شي كانيش ميريكاني واخا الفورمة والطولة لاكن كيبان ولد ماما غطيني
وشحال وداك الحباس كيحوم عليه وشحال صعاب بحال داك النوع ماتعرفو صديق ولا عدو .. جلس حداه وبدا كيشوف فيه كيقراه كيفاش داير وكيضرب على حواجيو وريحتو وبدا يهضر معاه باغي يتصاحب معاه وهادي هي الدخلة لي كيبداو بيها فاللخر كيجلسوك على القرعة ويخوروك
دخلو بالهضرة وفين صافا ومتخافش وحنا خوت وبقا عليه بالهضرة وياسين كيسمع وعينيه فتيليفون كيكتب مسج لذكرى مداهاش فيه حتى سيفط داك المسج وتلفت طالع ليه الدم وقال
ياسين: فرعتي لي كري بالهضرة ..مشي عطيني تيساع مشي..تحرك
قالها ليه بواحد الطريقة بحال الى حتاقرو وناض الحباس وقف ودار فيه واحد الشوفة هاز حاجبو وتحنا عندو شدو من لكول داقميجة بغا يهزو وكيهضر بتهديد وصوتو تقيل لاكن ياسين وقف نتر ليه يدو بالجهد ودفعو من العنق وفنفس الوقت شدو وعاود جرو حتى لعندو وقال مخرج عينيه
ياسين: غنح٠٠٠ مك انا ادا بقيتي دور بيا وا غيرها
دفعها ولاخر كان هوا الزعيم تما مارضاش وناض بغا يضربو لاكن تدخلو الحباسا فكوهم وكل واحد شد قنت حتى ضلام الحال وشي نعس شي باقي عساس،،خلاه حتى داتو عينو وناض هز ليه حوايجو من حدا راسو ودخلهم للطواليط وشعل فيهم العافية خلاهم كيتشواو ورجع نعس بحالا حتى حاجة ماطرات حتى ناض واحد شم ريحة لحراق ومشا حل الباب مع ثلاتة دليل لقا العافية شاعلة فالطواليط وبدا يعيط للموضفة وكلشي ومنهم ياسين لي غير شاف حوايجو كيتحرقو سخط وبغا يموت بقا كيشوفيهم ويغلي فبلاصتو ، فكوها طفاو العافية. واخا شي كيسبيها فشي ماعرفوش شكون وخرجو الحراس طفاو الضو ورجع كلشي نعس وشي كيضحك وشي كيطنز وياسين كيغلي ماداهش النعاس ، بقا سهران متكي كيدور فعينيه فنص ليل حتى بان ليه كلشي تسهط وكلشي نعس وناض كيقلب باغي يعرف شكون حرق ليه حوايجو حيت حتى واحد مافيه الثقة فيهم، ومع كلشي محشش وكلشي حال فمو مع جوايه الفجر حتى واحد ماحس بيه .. وحتى هوا كان مسخووط ماديرهاش بيه ومتلعبش معاه ،، بدا كيقرب ويشم الصبعان ديالهم واحد واحد حتى وصل لصاحب دعوتو مع شم فيه الريحة ديال الشعلة دلحراق والريحة مكتكونش فأي واحد غير اللي كيحرق شي حاجة ويحركها باش تحرق وديك الريحة مكتحيدش الى متغسلاش .. عرفو هوا وناض جمع حوايج الحباسا كاملين دخلهم لديك الطواليط حتى هوا وها لي هز ليه صباط ها لي هز ليه سروال. وكل واحد اش هز ليه الاا صاحب دعوتو ماهز ليه حتى حاجة ومشا حرقهم وشلل يدو ورجع بحالو نعس
صبح الحال وتقلب البيت كلشي لقا حوايجو مشوطين والحراس دخلو دارو خدمتهم بقاو كيقلبو شكون مول الفعلة واخا عرفوه ياسين لاكن لاجهد فوق جهدو ولي بحال صحاب للفلوس ديال بصح راه كيعيشو ملوك فالحبس وداكشي جاي من الإدارة وهادا هوا القانون عندهم وكيحميو مول الفلوس حيت بلاصتو تنا مشرية بالثمن، بقا جالس لور كيشوف مامسوقش ودار حركة بصبعو حدا نيفو للحارس باش يفهمو وفعلا فهمو وبداو يشمشمو الصبعان وجرو مسخوط الواليدين بي ساخطة عليه مو خرجوه من تما داوه ومصيره كحل زحل الى مشا حتى دخلوه الانفرادي وجلس ياسين تجبد كيشوف فالحباسا كيتحلفو فيه باش يرجع يسلخوه سليخهم الخاص، هز ياسين وتحد سورفيت لاحها لواحد منهم مالقا ما يلبس وكان ناعس بالشورط بوحدو ،، شدها الحباس وتزعط فيها عجباتو ولبسها وبدا يتودد لياسين وهادا حال الحبس، الفلوس لي كتهضر اما قوة العضلات ماتقضي والو .
كانت كتقرا المسج وهي فالعيادة ماعاجبها حال وزايدها بالحكام وكيقول ليها تجمع حوايجها وتمشي عند مو للدار تجلس عندها !! كيفاش هاد جمعي حوايجك وسيري عند مي للدار؟!! زوينة هادي ، بقا ليه غير يسكنها مع مو
شافت المسج وميكات عليه لاكن اتصال جديد دخل على هاتفها من رقم غربي وفتحات الخط مستغربة تعرف شكون وردت قائلة
ذكرى: الو؟
طارق: عيجي عندك شي واحد ، يعطيك شي اوراق خصك توقع عليهم
دكرى: وراق؟ ديالاش؟
طارق:فاش يجي عندك ديك الساعة عتعرف ديالاش،، بلحق هادشي منبغيهشي يوصل لياسين ولا شي واحيد اخر فهمتيني
ذكرى : مافهمتشي؟؟ اشمن وراق؟
طارق: غتعرف من بعد ،، بلا منوصيك هادشي يبقا بايناتنا ، يالاه الله يعاونك
قطع عليها وخلعها بهاد الاتصال مافهمات والو وبقات كتفكر وتشطنات مالقاتش الراحة ، عااد رجعات لمسج ياسين كتحاول تفهم اش واقع وعلاش حتى هوا خرج ليها بهاد البلان دمو وشدات تيلي تاصلات بيه مباشرة ورد عليها
ذكرى : ياسين
ياسين: مشيتي عمد مامّا ؟
دكرى : هادشي علاش عيطت لك. . علاش عنمشي عندهاشنو واقع؟
ياسين : مشي عندها كما قلت لك ماتعاودشي الهضرة معايا
ذكرى : مافهمتشي !!
ياسين: مكتفهمشي الهضرة؟
دكرى : واقولي شنو واقع؟؟ خلعتيني!!
ياسين: مشي دابا حتى نجي ،يالاه
ذكرى : نتينا فينك؟
ياسين : مشغول ،، عنتعطل شوية يالاه مشي دغيا عند ماما
ماداتهاش فهضرتو ونخلاتو وكملات شغلها ماجايبة للدنيا. خبار حتى تعاشات لعشية ويالاه وقفات بغات تهز صاكها تخرج من عيادتها حتى كتفاجأ بشي واحد جا وكيطلب يقابلها ، لستغربات فالاول ضنت انه زائر فقط وبغات تخليه تما مع الزوار لي فالعيادة لي غيدوزو عند الاطباء لخرين لاكن امتنع ورسل ليها خبر انه موضوع خارج المهنة ديالها ، قبلات تشوفو ورجعات جلست ودخل عندها وهي كتفحصو بعينيها من رجليه لراسو وكتسائل اش بغا؛ جلس وابتسم ومد يدو فاجأها وقال
— انا محامي السيد طارق
تخطف فوجهها للون فور ما سمعات سميتو ،، وجودو فحياتها كيوثرها وما مخليهاش ترتاح وسميتو كتخنقها وتفزعها .. تبسمت بمجاملة وفعقلها مية سؤال على نوع الاوراق لس جايب معاه ولي سبق وعلمها بيهم طارق باش توقعهم بلل مايعطيها حتى تفسير ، وحتى المحامي مدهم ليها وقال
—وقعي ليا مدام هنا الله يخليك
شدات الاوراق فيدها تعرف ديالاش ويالاه بدات تقرا تبدل لون وجهها وعينيها تدعقو وفمها تحل من الصدمة وقال بدوت شعور
ذكرى : اشمن تنازل؟!!!! واش بصح هادشي !!! اويلي
المحامي: هادا طلب الشي طارق امادام
ذكرى: رداتهم ليه) لالالا ميمكنشي هادشي مكيدخلشي للراس، انا منقدرشي نوقع!!! هادشي فيه تنازل على كلشي !!وعلاس؟؟ شني عملت مع طارق
المحامي: كيجبد تيليفون) ادا غنتاصل بالسي طارق نخبرو
ذكرى: رجعات لور ) عيط لو — هادشي لي كيطلب مني ماشي معقول!!! نتنازل على العيادة والسيارة !! والدار !! لالا مستحيل
هوا جبد تيليفون يتاصل بطارق وهي هزات تيليفون كتعيط لياسين لاكن بدون رد حتى مد ليها المحامي تيليفون شداتو كتفتف ردت
ذكرى: الو السي طارق شني عملت لك انا اشمن عيب عملت معاك صردتيلي هاد الاوراق؟؟
طارق: بصرامة) دابا ماعنديشي الوقت ليلك،، وقع الاوراق لي فيدك بلا منخرجو للعيب دبصح
ذكرى: علاااش؟؟؟ اواعدي واش عرفتي شني هادا هادا راه مستقبلي
طارق: عملتيه مع ياسين ،، كلشي عملو لك ياسين ماعملتي حتى حاجة بدراعك ،، ياسين لي وقف مور ضهرك وهزك وعملك العز والقيمة حتى رجعتي كتستقوى عليه وتبان بالشهرة ديالك … سمع مزياان شني كنقول وعقل عليه،،،، ياسين مايصلاحشي لك ونتينا ماتصلاحشي لياسين وهادشي نتينا عااارفاه … دابا عملتي الفلوس وعندك باش تعيش الحياة ديالك مشييكة ومعناخدشي كلشي منك.. عتوقع على الاوراق ومنعاودشي معاك هاد الهضرة كاملة
تصمرات بلاصتها عاد فهمات علاش عيط ليها ياسين قاليها سيري للدار .. قطع عليها طارق لاكن متنعت على التوقيع ورفضات تحط يدها تما .. حتى المحامي ماعتارضش وتاض تبسم ليها خلاها دايخة كتشوف فقنات العيادة ومخنوقة وبدات تبكي بوحدها وتصوني لياسين لي كان فهاد الاثناء فزيارة وجالس مع عبد الحق كيهضرو . اما المحامي غير فات العياذة وصل لخبار لطارق وماجات هي فين تخرج وتركب سيارتها حتى طيروها من باب العمارة فسيارة كحلة وخضروها من نيفهاحتى غابت وحطوها فالسيارة وزادو . ماحلات عينيها حتى فات الفوت ولقات راسها فواحد الدار فالعروبية خارج المدينة فوق الجبل ، ماعرفات راسها فين هي ومعامن هي!! بوحدها بين جوج رجال فقلب ديك الدار لقديمة جالسة بقميجتها البيضاء الناعمة ودجينز ازرق انيقة ورقيقة وشديدة الجمال وهي كترتاجف من الخوفو وفعينيها بريق كيشع والدموع محجرة وكل شوية تقفز بلاصتها وهي معنقة يديها كتشوف فجنابها وقناتها – ماكلمها حتى واحد وماقربها حتى واحد ،، فقط ربطو اتصال مع طارق علموه وعطاوها تيليفون ترد عليه وشداتو بخوف وقالت بصوت باكي
ذكرى : ياسين ميعجبوشي هادشي لي عملتي معايا .. اديتيني بزااف
طارق: ياسين عمرو مايشوفك ونتينا عمرك تشوف ياسين ،، وقع عاى ديك الاوراق كاملة بزربة ولا نجيب حتى يماك وخاك عندك يونسوك
ذكرى: ببكاء) علاش كتآديني شني بيني وبينك
طارق: اخر انذار) ادا موقعتيشي عيوقع لك قبيح
كمداتها كتبكي وكتشوف فالاوراق قدامها محطوطين ومتقدراتش توقع لاكن خوفها على عائلتها بالدرجة الاولى خلاها تحط توقيعها وكأنها كتحط احشائهاوكتدمر وكتنهار وفوق كل هاذا كتفاجأ بورقة زايدة وملي قراتها لقاتها ورقة طلاق . تما زادت انهارت وتدمرات كليا وطلبات يدوزو ليها طارق تهضر معاه لاكن رفضو وتبعو تعليمات لي مطلوبة منهم وبداو التهديد عاد وقعات ويدها كترجف والدموع كيطيحو على دوك الاوراق. خسرات كلشي . . بين ليلة ونهار خسرات هدفها وخسرات تعبها وخسرات حماسها وخسرات شغفها فالحياة وخسرات حتى نجاحها وخرجات خالية الوفاض،، لاول مرة تحس بغصة الحزن على طلاقها من ياسين ولاول مرة تحس بالفقدان وتحس باحتياجها ليه وتشبت بيه لاكن كلشي فوق طاقتها وفوق قوتها.. كلشي تبخر وكما جا كلشي فدقة مشا كلشي فدقة.. انهارت بالبكاء والحزن وكانت فمة ضعفها وحسات براسها وحيدة.. تمنات كن كان ياسين فجنبها .. على الاقل كانت مرتاحة وعايشة مطمئنة و كتحس بيه سند وكتحس بوجودو وحمايتو وخا كان فنفس الوقت خطر عليها ، تعرات ومالقات مسند تسند عليه والدياب كيطوفو بيها ومكاين لي يحميها . بكات حتى سخفات .. ربقات سخفانة حتى دخل عبد الحق وكان كيسوف فيها بحقد وقرف وجلس جنبها خلاها حتى رجعات لوعيها وهزات راسها مهدودةة شافت فيه ونزلو دموعها وقالت بتعب
رجعوني بحالي
عبد للحق: باقي ماسليناشي
ذكرى : شني باقي؟؟ اكتر من لي عملتوخ فبا
عبد لحق : غيصوني لك ياسين يسقصي فيك،، عتقولو انا عرفتك نتينا مشدود فالحبس ..
ذكرى : بصدمة الحبس؟!!
عبد الحق : اييه ومعمرو يخرج منو .. متهموم بالقتل..وقولو اك عرفتي كلشي وغطلق راسك منو كما عملتي المرة لي فاتت .. يالاه سربيني
رفضات فالاول لاكن شافت راسها فالخطر وخافت على راسها وخضعات لاحكامهم عليها ، لاول مرة تحس براسها ضعيفة ولاول مرة تعرف الله وتعرف بلي مكاين حتى واحد يفكها من غيرو وعاد بدات طلب الله يسلكها على خير ، صونا فديك الاثتاء ياسين وجبدات تيليفون كترجف وتشوفسميتو وشافت فعبد الحق بترجي باش يعفيها لاكن هوا كان جالس مقابل معاها ببرودة وقال
علد الحق: يالاه قولو شني قلت لك بالحرف
ذكرى: بترجي) مايستاهلشي غادي يتصدم
علد الحق: ماشي شغلك فيه حنا قااادين بيه .. مسح ديك الكمارة وقاد هضرتك مايعرفكشي كتبكي يالاه
شافت حتى عيات وفتحات الخط كتنخصص وتشوف فعبد الحق وبلعات ريقها كتنفس عاد ردت وعبد الحق كيخزر فيهابشي شوفات كتخلع ونتر تيليفو كبر الصوت وحطو قدامها
ياسين: فاين نتينا مشيتي عند مامما
ذكرى: كتستجمع قوتها) مامشيتشي
ياسين : بغضب) علااااش ماشيتيشيشنوو كتسناي
ذكرى: كتشوف بنص عين فعبد الحق)اناعرفتك مشدود فالحبس بالروح…. و.. انا صافي مابقيتشي قادرة على هاد الحياة دالحباسات والمشاكيل خصني نطلق
ياسين: بعد صمت طويل رد بصوت غاضب)خصك الطلاق وماعرفتيش علاش انا فالحبس وعلاش طيحت الروح … كتعرف غير طلاق …كتسنا غيرالفرصةفي ن طلق ياك
ذكرى: عييت عييت…(شداتها البكية وحبساتها) انا صافي عييت … غنعمل التنازل على كلشي (عبد الحق كيحرك راسو بالايجاب) غنخلي ليك كلشي وكل واحيد يشوف راسو… خديت قرار صافي والعيادة والطموبيل عنخليهم لك ومعاهم الورقة دطلاق وكيف تلاقينا خوت نتفارقو خوت
ياسين : بصوت مسموم) نتي وااااحد بنت لق٠٠٠٠٠ وانا عيييت نصبر لك وندوز لك وطيحت الروح فطريقك وكنقول دييما .. ديما كنقول ادا شي واحد قرب لك ولا غييير نعت فيك نقتل لق٠٠٠٠ يماه … بلحق علامن ؟؟؟ الكلبة دلخلا .. الكلبة دالفرنك كتعرف غير الفلوس …
غمضات عينيها كتبكي فصمت
ياسين: حتى الاولاد معطاهمش لك الله ورضيت بيك وقلت ماااشي مشكل تبقا لي هيا تولد ولا ماتولدش الدنياااا هااانيااا… نعمل اللازم ونجري معاها وادا مكتابش الدنيا هااانيا..ورخييييت لك وضسرتي وكندوز لك …بلحق غنقولك كلمة وحدة … كااع هاد الخاطر لي عملت معاك وماصدقتيش غتشوف العكس ديالوو… هانتينا غتشوف شكون هوا ياسين دبصح حيت مزال ماعارفاش بين تزوجتي وعلامن كتلعبي .. عمل لي عجبك دابا صافي سالا معاك الخاطر
قطع عليها وعبد الحق جالس كيسمع وهي كتشوف فيه مخلوعة وبدات كتبكي وقالت
ذكرى: انا شني عملت علاش عملتي معايا هايدا نتينا وطارق… صافي ياك عملت التنازل على كلشي صافي شني خصكم
عبد الحق: سمع شعنقولك .. نتيناماضربتيشي لحساب لهادشي وميكنا عليك بزااف … بلحق دابا عتخلص على كاع داكشي لي داز كله… وادا عندكشي زهر ومنعتي من ياسين غير عمل شي عملية دتجميل بدل السيفة ديالك ادا بغيتي تكمل الحياة ديالك
ذكرى: بغات تحماق) شني كيوقع لي يا ربي .. ياربي واش كنحلم ياا ربي فيقني ياربي خرجني من هاد الموصيبة
عبد الحق: جمع للاوراق) دابا مابقا عندك ماتعمل هنا … ادا جبرك ياسين والله ماتبقا بالروح
ذكرى: كافهمتشي؟؟
عبد الحق: جمع حوايجك وخرج مشي لشي بلاد اخرى … جيت طارق مزال عندو بيك الغرض فهمتي دابا يالاه تحرك وماتسولشي بزاف
مابقات عارفة اش كيوقع وضارت بيها الدنيا وداخت .. تقالت ودخلات فاكتآب وحزت عميق وبقات غير هضرة ياسين كدور ليها فراسها .. اما عبد الحق عطاها حريتها المؤقتة ومشات للدار كتبكي وتتحسر على خسارتها ومامتيقاش انها عمرها ترجع لعيادتها ابدا وكلشي تبخر تقول كانت فشي حلمة زوينة .. حتى من السيارة لي كتسوق صعيب بزاف على اي واحد يوصلها .. بدات كتحس بأن حياتها كتبدل وتنخافض . مشات لبيت النعاس تكات وعطاتها للبكا وحسات براسها انها تفارقات مع ياسين الى الابد،، واخا مكاينش حب لاكن الولف صعيب وماعرفاتش منين تبدا وفين كانت حتى بدات ووصلات فين هي، حزنات اشد الحزن على طلاقها من ياسين ولاول مرة ترفض الفراق وتحس بالفراغ والخوف والوحدة،، واخا عارفاه من النوع الخطير لاكن كانت مرتاحة معاه حيت حتى واحد ميقدر يوصلها ويآديها .
خدات حزنها كعلاج ليها تخرج مشاعرها فيه وحتى تنصص ليل عاد صونات ليه لاكن بدون رذ … حتى هوا كان عايش الحزن والخدلان واحساسه مضاعف على احساسها هي خصوصا فاش داز عندو المحامي ديك العشية نيشان وخبرو بالطلاق وبلي راه ولات حرة ديال راسها والقاضي طلقها . تما تأكد انها كانت عارفة وكتجري فالطلاق وكتهضر معاه عادي فتيليفون .. لاكن فالحقيقة كلشي من تدبير طارق، هوا لي جاب الطلاق من عند القاضي فرشمة عين وحطو ليها مضات عليه بلا جلسة والو … كان فغرفة خاصة بوحدو بعيد على البشر وجالس ساهي وجامع الحقد ديال الدنيا والدين … كيشوف راسو فين ومنين كيدوز وعلى قبل وحدة ملتستاهلش اصلا .. كان الليل وكلشي طافي من غير واحد النافدة عنذو كدخل الضوء وتيليفون لي كل مرة يصوني .. كان ضوء القمرةكيبرق فعينيه الغاضبة الملتهبة ويديه على ركابيه كيزيرهم ويرخيهم هز داك تيليفون شافها كتصوني وضربو مع الحيط حتى تشتت ورجع هبط راسو وشد رقبتو كيشوف فالارض والنار كتاكل فيه .. نار الشمتة والخذلان للمرة الثانية وهاد المرة ليست هينة بحال الللي سبقاتها.. هاد المرة تبين ليه بزااف ديال الامور من بيهم نفورها منو واستغلالها لاي فرصة للتخلص منه واخا تكون هاد الفرصة بسببها، تعرررق وسخن ومرض وكانت اخر حاجة يتوقعها هي ديك الطعنة … الطعنة لي خلاتو يطج ويبغي يخرج من تما فأقرب وقت مهما كان الثمن ، دازو عندو السوايع بالسنين ولايقدر يغمض ليه جفن بسبب العافية لي شاعلة فيه وكل مرة يمسح على صدرو ويسوط بألم حتى عينيه تدمعو وه ا غادي جاي فداك البيت مرة يبان عليه الحقد والغضب والتوعد بالانتقام ومرة يبان عليه الحزن والضعف والفشل..كل مرة يعيش احساس فشكل حتى صبح الحال وصبح جالس قدام المحامي وعينيه طايحين بالتعب ومريض ومقهور ومن طريقة التنفس كتحس بيه طايب .. هدنو المحامي وواعدو بالخروج وحتى خوتو جبدو الفلوس لي مكانتش كتبان عليهم كاع … فلوس كتخلع عرضوها قدام القاضي غير بيناتهم فجلسة مغلقة كان وكيلهم فيها هوا عبد الحق … شراو القضية بأموال طائلة غير بيناتهم ودارو للجلسة ديالو طريق باش دوز عند القاضي نفسو وحكمو القضية بكل مافيها من ثغرات واسباب للدفاع وطلعوه برائة بحال الشعرة من العجين من الجلسة الاولى وعطاو الدية لعائلة المرحمو باش يطويو الصفحة بلا مايوصلو للاستأناف وطلع وهبط وجمعو وطواو وحد متساق الخبار . مافرحش بزاف حيت كان عارف راسو غيخرج غير المسألة كان خصها وقت وهوا فحالة مكتسمحش ليه يتسنا ..كان مراقب خطواتهاولاحظ غيابها على السوشل ميديا فديك الفترة لي كان مشطون بالجلسة حتى لنهار لي خرج فيه عاد طلعات فسطوري كضحك وفرحانة كاتبة اسم طارق وكنيتو وكتناشد الناس يصوتو عليه وكان من بين المرشحين للرئاسة وكان خصها تقربو من الناس وتبينو فالصورة هي والزملاء ديالها فالسوشل ميديا وبما انها محبوبة عمد الناس والكل كيتيق فيها فمكاين ما حسن منها تقدمو كرجل اعمال كبير وتصنعليه صورةمحترمة وتليق بيه وتخلي الناس تيق فيه وبغيه وتقربهم من الصورة اكثر
تحكرات بزااف وخضعات لاوامر طارق بزز منها ودوزات مايكفي من الوجع والهم والنكد والاكتآب ومابقاتش قادرة تستمر وتصبر لداك الوضع لي هي فيه .. جلسات مطولا مع راسها وشافت انها ماخسراتش كلشي ، العيادة والسيارة ماشي شي حااجة مقارنة مع علاقاتها الاجتماعية ومكانتها وشهرتها وخصوصا فاش دخلات مع طارق فأمور سياسية ودعماتو وخلات اكثر من مليون متابع ليها يروم ليه ويدعمو . فأكيد صوتها غيكون وصل للجهات الاخرى واخا راه كلشي كيعرفها وصارت معروفة عند الكبير والصغير بسبب الضجة لي ناضت عليها من قبل وحديث المؤثرين عليها والصحافة وكسبات بزاف ديال الناس والمتباعين وبفضلهم رجعو كيستاضفوها فبرامج تقيلة على قبل المشاهدات . فهادشي فحد داتو نجاح وخصها تستغلو لصالحها افضل ليها ما تبقا جالسة كتبكي وخايفة من طارق وياسين .. كما استغلها واستغل شهرتها لصالحو فهي الى فكرات غير شوية ولقات ليهاطريق راه غادي تستافد من هاد الاستغلال خصوصا وتيليفونهامكيحبسش وكلشي باغي يعرف علاقتها بطارق وشكون يكون وكفاش فجأة ضهر فالترشيح وهوا بعيد وماعندو علاقة بالسياسة ، واخا هي متأكدة بلي عندو يد فسياسة ومعارف تقال وخمم ليها من بزاف ديال الجهات باش يقدر يسيطر بلا مايعول على حتى واحد.
خممات مزيان ودوراتها فراسها حتى هي وفكرات تشوف ليها شي شخصية تكون قوية ومهمة باش تقدر تقوى .. كان هذفها الكبير هوا المكانة الاجتماعية والقوة والسلطة من غير الفلوس حيت عارفة كيفاش تجيبهم وشهرتها راه تغنيها .. لاكن الى ماستغلاتش هاد الشهرة لصالحها وهاد الضجة ديال الانتخابات فراه غتمشي على عينها ضبابة وغطول عليها الطريق .
اشنو دير باش دير ضجةجديدة تكون مكسب ليها .. قررات دير بودكاست تهضر فيه وتحط فيه النقط المهمة.. لتاجأت لمعارفها خبراتهم انها كتفكر دير بودكاست وكل واحد بيمن نصحها وطبعا اسهل حاجةبالنسبة ليها هي جلسة بودكاست فهي كذلك كانت مقدمة برنامج وحبسات وغيبغيو يجالسوها .. شي قالها لشي وشي توسط لشي وخدات موعد ومشات تجهزات لتصوير حلقتها وحطات ليهم الاسئلة المهمة بالنسبة ليها لي باغاتهضرعليهم وتوضح فيهم وجلسات فكامل نعومتها … شعرها طبيعي ناعم فيه لمعة ومدرج طويل وزاد طوال اكثر ومكياج ناعم كأنها ماحاطاش ووجه مجبد بلار وقميجة قرمزية فاتحةاللون وباردة واكسسوارت خفيفةفاليدين والعنق اغلبها الماس. سجلات الحلقة وطلعات كما بغات وخداو ليها موعد باش يحطوها . فديك الوقيتة كانت يالاه دخلات للدار جاها اتصال مباشر من عند طارق وغيرشافت سمتو ترعبات وتوقعات شي طلب اخر عاوتاني،فتحات الخط بدون ارتياح وردت قائلة
ذكرى : الو
طارق: مزيانة ؟
ذكرى : الحمد لله
طارق: ياسين راه خرج … متقولوشي عملتي الدعاية دالانتخابات باطل فهمتي… غيقول تافقنا.. غادي تقولو انا تنازلت لك على كولشي باش نطلق ونرتاح وطارق خلصني باش نعملو الدعاية فهمتي .. والفلوس راني صردتها لك باسمي باش ادا شك وريه التوصيل قولو فالاول خلصني فيدي والثاني صردهم لي حيت مكانشي فالمغرب
ذكرى: مخرجة عينيها) اوااعدي?!!! ياسين خرج !!!قلتي عتحميني منو ونعمل شني قلتي لي وكلشي
طارق: اييه اييه هانا علمتك دابا باش ترد بالك … من الاحسن هضر معاه فتيليفون شرحلو باش مايبقاشي فراسو الشك حيت كيسول بزاف .. مهم نتينا هضر معاه ورد بالك لشني كتقول مزيان
ذكرى : مخلوعة) ياسين ميدوزهاشي هايداك والله حتى ينتاقم مني
طارق: مايعمل والو وصيت عبد الحق نتينا مشي خرج برا شوية بعد حتى ينساك
ذكرى: لااالا انا متأكدة ياسين عيخرج لي من شي موطع متعرفره لا نتوما لايانا
طارق: اللي كاين هوا هادا عمل شني قلت لك يالاه .(قطع)
جالسة وراسها مقطوع ،وشحال صعييب داك الاحساس ! صعيب بزاف ،،صعيب تعيش ونتا ورام شي واحد كيتحلف فيك ..صعيب دوز نهارك ونتا كل دقيقة كتقول غتوقع ليا شي حاجة فأي لحضة، صعيب تطمأن ونتا عندك حساب مع شي واحد وعارف راسك غتدفع الثمن،،والاسوء هوا انك معارفش كيفاش غتدفع هاد الثمن والوقت اللي غدفعو فيه، شكون ما كنتي سواء راجل او مراة. غادي تخاف ومتقدرش تخرج حيت عارف راسك تحت التهديد وتقدر تجيك الدقة اللي عمرك توقعتيها،، واخا تكون واعر وكتحسب فراسك قوي غتخاف على راسك،،شحال من واحد خاف على راسو غير من ولد حومتو او صاحبو لي حالف فيه، .. هادا انسان عادي والخوف من انتقامو يقدر يبيتك بلا نعاس،، فما بالك فاللي بحال ياسين،، تعرف راسك مهدد من طرف شخص اللي قادر يدمرك بلا خوف بلا تردد وبلا ميضرب حساب ليك ولا للي كيعرفك..والاسوء تخاف حتى على عائلتك ونتا عارف باللي القانون مع هادو ماعندو باش ينفعك .
جميع انواع الانتقام طاحو فبالها وهي جالسة شادة راسها وكتبكي بوحدها وعارفة باللي حتى حاجة متشفع ليها دابا معاه وماشي صعيب عليه يلقاها ولا يشدها ولا يحط ليها كمين ..يقدر يسيفط ليها شي واحد وهي معارفهاش ..احتمالات كثيرة طاحت فبالها حتى قاطع خوفها تيليفون اللي صونا وقفزات من بلاصتها لقات المندجر ديالها وردت عليه ويدها على قلبها
ذكرى: شني كاين
المندجر:مالك تخلعتي ياك لاباس؟
ذكرى: والو غير كنت ناعسة قولي شنو كاين دغيا
المندجر: عيط ليا المخرج صديقنا قالي بغيت ذكرى تمثل معاهم فالمسلسل كيوجدو البرامج للرمضان
ذكرى: شني بيني وبين الثمثيل انا ؟!!
المندجر: كاع المممثلين دابا اللي فالتلفازة مكيعرفوش للثمتيل..نتي عندك متابعين كتار وجمهور كبير وعملتي ضجة فالاونة الاخيرة ..الى مثلتي دابا غينجح المسلسل عندك بزاف دالمتابعين غيتبعوك..ومزيانة ليك هانتي كتزيدي تكبري وطلعي اكثر..ياك قلتي مابقاتش عندك العيادة ..ايوا قلبي الحرفة اش غتخسري
ذكرى: انا راسي غيطرطق عليا دابا منقدرشي نقولك والو
المندجر :انا غنبقا نتسناك حتى يبرد لك الراس ؟؟راه الخدمة هادي
المندجر كيعرف الخدمة هي الخدمة وهادي هي خدمتو ، بزز عليها تنوض توكض حيت الى خسرات حتى هوا خاسر .. خدمتو يجيب ليها اكبر قدر من الاعمال فشتى المجالات وتكتاسح الساحة وهادي خدمة اي مندجر ، السباق بناتهم لشكون يخطف اكثر الاعمال للمشاهير ديالهم ومكيهمش واش مناسبة ولا ..المهم يبقا حاضر فالساحة الفنية وذكرى دخلات معاهم حتى هي واخا ماشي فنانة لاكن فطريقها لشي حرفة جديدة اما الشهرة راه تشهرات وكلشي كيعرفها ونافعاها حتى لقب الدكتورة اللي بقات غير سميتو .
وسط الخوف والرعب اللي عايشة وواخا عيات تتهرب باش متخرجش ناضت فالاخير جمعات ما تبقا من قوتها ..فكل مرة كطيح وتتهرس عمرها قالت صافي خسرت كلشي ..بلعكس طموحاتها كبيرة واهدافها كثيرة وكتشوف بعيد وأملها فالحياة قوي..كتتأمل بزاف ومكتبغيش تفكر بسلبية وديما كتفكر بإيجابية وهادشي لي خلاها تطرد الافكار الخبيثة من بالها وتنوض توقف على رجليها من جديد وهاد المرة ماشي من نقطة الصفر..وانما من القمة غتكمل وتبدا مشوار جديد.
كان البرد شوية وكان عزيز عليها فصل الشتاء اكثر .. جبدات فيست دالكوير حتى لاسفل المؤخرة بحزام مشدود على الخصر ولبسات ليبة شفافة كحلة ولبوط الجلد محل عالي على للفخاد بكعب عالي ودارت قفازات الدان فيديها وهزات صاك برادا فيدها ونضراتها السوداء ونزلات .
جلسات فسيارتها وسرحات عينيها مزيان فالسيارة البنتلي لي خلا ليها و كتنهد والغصة فقلبها .شافت مطولا فيها وهزات تيليفون وتكات اللور كتسنى الخط يتفتح
ذكرى: الو
ياسين: شكاين؟
ذكرى: خصني نهضر معاك..متغوتشي عليا سمعني حتى نكمل
ياسين: هانا كنسمع
ذكرى: انا خصني نتلاقا انا ونتينا ونهضرو شني قلتي؟
ياسين: ماخصنيش نشوف كمارتك اذا شفتك غنطرطق لق٠٠يماك عنقك
عضات شنايفها مكمداها وقالت
ذكرى: خلينا نهضرو بشويييوش انا ماشي بنت لحراام كاع لهاد الدرجة
ياسين: قلت لك ادا طحتي فيدي نطحنك..كتسمع…مزال مابغيتيش تفهم الهضرة اللي كنقول..عند بالك كنضحك معاك
ذكرى: نتينا معصب مني انا عذرتك من حقك.. انا ماقلت والو خصنا غير نوضحو الامور ماتضلمنيشي
ياسين: ضلمتي راسك بيدك ماتعدا عليك حتى واحد، ضبرتي عليها وغطيح فيدي غطيح غير نسا شي حاجة اسمها الحياة وودع يماك وباباك
ذكرى:غمضات عينيها) وتسخى بيا؟؟ بهاد السهولة سخيتي بيا؟؟
ياسين:نتي سخيتي بيا اللولة ماطلعليش الدم على الصباح باقي عاد فتحت عيني…ماتجيشي تقولي تسخا بيا ونتي فرطتي فيا هادي الثانية من المرات ودخلت للحبس بالسبة ديالك..انا نقتل عليك اذكرى..بلحقك متخورينيش حيت تخويرة ديالي قاصحة متقدريش تصبري لها
ذكرى : خلينا نهضرو بالعقل ..وادا غلطت فحقك نخلص الحق شني قلتي؟؟ نتينا اللي عجباتك انا نعملها بلحق ماتبقاشي هايدا حاقد عليا مادوزناشي القليل
ياسين: بغضب)شوف متفرعليش كري دابا ..طلعتي لي فكري مابقا عندي منعمل بيك ..نتي واحد الق٠٠٠ كتبغي غير الفلوس .. كلبة خانزة .شنو يحسابك راسك كاع زعما ..عندك ط٠ الذهب ؟ بحااالك بحال لق٠٠اب وهما كاااع حسااان منك .. صافي وسعتك شرررركت لق٠٠ يماك مابقا فيك والو نجيبها حسن منك بنت سطاش لسنة بيضة زوينة ماتبانيش قدامها شغنعمل بيك نتي الواسعة بقات لك عماين تعاودي تجمعي داك الط٠٠٠عندك نخشي فيه راسي
هوا كيهضر وهي عاضة صبعها خلاتو حتى كمل وقالت شادة البكية
ذكرى: دابا قول لي عجبك نتينا بالك غير مع داكشي ، انا كنقول لك نصفيو الخواطر ..كنهضر على العشرة والحب اللي بيناتنا زعما ..
قاطعها: شمن حوووب ولاق٠٠٠ تيقتي راسك؟؟ انا عمري حسييت بيك من نهار عرفتك ،، تزوجتك على لح٠٠٠ دابا مابقيتيش صالحة لي وانا ماندوزلكش هاد التخويرة هادي واخا نرجع عليها للحبس عشرين عام.. انا نقتل عليك وعلى الشرف ديالك القح٠٠٠ ونمشي للحبس بالجنايات وراسي فالسما مرفوع ياك ونتي يا بنت القحح ٠٠٠ طلقي غيابي وتحشي لي زعما نتي مق٠٠٠ دة ؟ هاا؟ بلاااتي..بلاتي انا مزال دابا مامساليش لك نسالي وهانا معاك .. ادا مابقيتيش تبوسي الارض باش نرحمك ..غيير تموتي تتهناي انا ماشي ياسين..
ذكرى: ياسين نعل الشيطان الله (تفقصات) ياسين شني خصك مني قولي انا نخلص الحق غير خليني …
قطع عليها وبدات كضرب فخادها بالجهد وتبكي وعيطات لطارق كتبكي وتشكي وترغب
قطع عليها وناض وقف بواحد شورط قصير داخل بين حجرو وحجبانو بحال الجناح فالسما طالع الدم وفمو مايل معبس للجنب كتب ليها مسج
ياسين: ليوم تكون عندي لبنتلي الق٠بك
لاح داك تيليفون وزاد خلفة كيسب فيها غير بوحدو مشا للبلاكار حلو بغا يجبد الفوطة يدوش وهوا يلقا حوايجها مزال معلقين تما وجرهم معصب بدا يشرك ويلوح خرجهم من البلاكار كلهم لاحهم فواحد السلة ورجع هز تيليفون عيط لكونسييرج يطلع يرميهم كأنهم زبل .
اما هي بقات غير كتشوف فداك المسج وتتنهد ..لا طارق رد عليها ولا عبد الحق ، بقات جالسة قدام واحد الباب دلاوتيل فالطموبيل حتى دق عليها المندجر ديالها ونزلات كتنهد ، اللي شافها يحسدها وقول هي اللي عايشة.. كتبان نازلة من ديك السيارة الفاخرة بداك اللباس والشعر قهوي مايل للزعورية الرمادية ولاطاي حوتة منحوتة والنخوة وللمشة بلعبار كتبان مفششة وعايشة فالخنات..اللي شافها يتمنى عيشتها وهي بينها وبين القبر خطوة وحدة وعايشة فالجحيم النفسي مقادراش تتمتع وتشوف الحياة بنضرة اخرى .واخا داكشي كامل محاساش بالراحة ومامطمأناش ومفرحناش وحياتها اللي كيتمناه واحد اخر رجعات عندها هي روتينية ومملة .سلمات على المندجر اللي كان قدها فالطول وهي بداك الطالون الحاد الى زطمات بيه على لحم شي واحد تقبو ليه.. كان وسيم وشبابي واخا اربعيني لاكن ستيلو بالقميجة ولافيست مليوحة عليه والشال على عنقو داير وحلقة فردنو كيبان مستيلي وشبابي..شعرو كحل جامعو اللور بلاستيك لاكن لحيتو بيضة وطويلة وكيلبس المجوهرات الرجالية بزاف والخواتم الفضية رديما لابس نضرات بضلام ازرق ديال الشوف سواء بالنهار او بالليل.
شاكر:بونجوغ..على السلامة اش هاد التعطيلة
دكرى: بتعب)انا راه كنحس براسي قريبة نمشي عند الله صافي
بدر: مالك(كيطلع ويهبط فيها) صحيحة غزالة بحال الحمامة اش واقع معاك
ذكرى:مقبوط لي قلبي
شاكر : شعندك الشمالية ديالي خوي قلبك
ذكرى: ماعنديشي الخاطر للملاغة اشاكر
شاكر: ومالكي اش واقع ليك ؟ جايب ليك مادة كيتهافتو عليها فالميدان ونتي مرخية ..بنتي ليا مابقيتيش بغا تخدمي؟؟
ذكرى: تنهدات)ماشي بخاطري
شاكر: هز حاجبو وطلع فيها) جايب ليك البطولة الاللة.. عرفتي شنو هي البطولة ؟؟ عرفتي كي تجي معاك نتي بعدا بطلة دشي مسلسل بنت شي مافيوزي ولا شي واحد لاباس عليه..يجيييو عليك قصص الحب نتي بعدا واحق الرب.. ديال شي فيلم رمنسي مع نتي رطبة بلا قياس وهاكا حساااسة فراجيل ..تصرعيها
ذكرى: ربعات يديها) انا بيني وبين التمتيل غير الخير والاحسان كيفاش ما نعمل انا نمثل دور البطولة نيشان
شاكر: سااهل داكشي مالو صعيب..كلشي رجع كيمثل دابا انا نوريك الطريق ماعندكش مناش تخافي…غنشوفو العقد اللي جايب لينا هادا الى تافقنا معاه ووقعنا معاه غتمشي دوزي واحد الشهر فالمسرح تدربي على التعابير والاحاسيس وردود الافعال واخا غير شهر بعدا ..تحيدي الخلعة بيدمن بديتو تورناج ..بااقي مايبداو بااقي .. مزال عاد يشوفو الممثلين ويدوزو ليكاستينك ويقلبو على مكان التصوير واملابس وزييد وزييد عاد تبداو ..مايجيو فين يبداو تكوني تطلقتي شوية بعدا نتي راه المسرح غيعاونك بزاف
تشجعات وزاد حمسها شاكر ودخلات هي وياه لأحد المقاهي الفخمة المتواجدة باحد الفنادق تما وتما غادية حداه كتقرقب بداك الطالون وتتمايل حتى وصلو عند المنتج والمخرج بجوج ، كانو بجوج جالسين حالتهم حالة بحال الطلابة تقول حماق ولا هاربين من شي سبيطار بديك الحالة. ها اللي شعرو مشعكك وعلى كتفو شال قديم وكوستيم كبر منو وها لي لحيتو منتوفة وكيهضر غير بوحدو ،بقات مصدومة كتشوف فيهم ماعرفات اشمن طباع تعطي عليها من اول نضرة ومافهمات والو، بقات غير كتفرنس وتشوف فيهم وجلسات بينما شاكر كيهضر معاهم ويتفاهم معاهم نيابة عنها
شاكر: فصلب الموضوع) هادشي كله لي قلتي لحد الساعة مزيان،، ولاكن خصنا نشوفو السيناريو ونشوفو شنو كاين
ذكرى: ميكونش غير شي لقطات ماشي هنا هادوك
المخرج: لالالا هادا غيدوز فرمضان غيتعرض على الامبيسي وعمل كبير .. ماشي مسلسل من دوك المسلسلات المدرحين
شاكر: عطيني فكرة نعرف شوية على الشخصية اللي غتلعبها والى كان ممكن (بتأكيد) بغيت نعرف علاش بالضبط هي ختاريتو ليها البطولة نيشان
المخرج : كيطلع ويهبط فيها) الشخصية هي نفس شخصيتها تماما عليها كنقلبو وماتحتاجش تصنع وكتبان ليا فالسطوريات ديالها كيفاش كتهضر وتبعت المشاكل ديالها استلهمت منهم قصة وقصة غتكون ناجحة مية فالمية..والى لعبات الدور المسلسل غينجح بامتياز،، هي دكتورة كتقن اللغة الفرنسية والانجليزية منوحلوش معاها فالحوار..كي كتعرف صعيب تلقا ممثل مكمل القراية ومثقف وعندو هاد السلاسة فاللسان اللي عندها
المتنج:تحيد الخلعة وما تصنعش..الدور اللي غتلعبي راه ديالك نييت والقصة مستلهمة من القصة اللي عشتي
ذكرى: هزات حاجبها) وشنو فهاد القصة؟؟ تحمست نقرا السيناريو
المخزج:جبد كتاب) ها السيناريو ديالك..قرايه تمعني فيه على خاطرك .. مكاينش من غيرك اللي يلعب هاد الدور حيت ماديال حتى واحد.. الدور من الاول كان معطي ليك والمسلسل مكتوب ليك ..شوية درامي شوية فيه البرجوازية ..يعني طالقين فيه فلوس صحيحة
شاكر:نشوفو السيناريو ونردو عليكم
هما كيتناقشو وهي كتقرا الصفحة الاولى فالاخير ناضو توادعو وخرجات جلسات فسيارتها وشاكر حداها كيتنهد
ذكرى: هادشي غيجبد المشاكيل اشاكر
شاكر: اشمن مشاكل؟؟ السيد كيقولك كانبين المسلسل ليك نتي..شكون بحالك
ذكرى: ماسمتعتيهشي كيقول استلهمناه من مشاكلك! السيد شاف مشاكيلي عملو البوز ناض كتب عليهم قصة!! وكن يعرف بعدا القصة دبصح اللي كنعيش يوقف ليه الشعر
شاكر: دابا اشمن مشاكل غينوضو ليك راه هادا غير مسلسل
ذكرى: انا مخصنيشي المشاكل.. اللي فيا كافيني
شاكر:دور يديه) دابا عاد الخوف كووولو من طليقك..اش بغا يكون هاد طليقك فملك الله كاع
دورات وجهها عندو وهبطات نضاضر على عينيها دورات راسها وضحكات ضحكة ساخرة ورجعات للكتاب حلاتو كتلقط لقطات منو وشاكر كيشوف فيها
شاكر : كيسرح عينيه فالسيارة) هادي تجي معاك فالمسلسل..عمر شي واحد مثل بيها
ذكرى:وهي كتشوف فالاوراق)ديال ياسين..ماشي ديالي…وغنرجعها ليه
شاكر : هاد طليقك ميكون غير شي غباق نييت داكشي علاش كتقفقفي منو
ذكرى: ياسين مامعاهش اللعب اشاكر ،، داكشي علاش قلت خايفة من هادشي يخلق ليا مشكل ..غيجيب ليه بحال الى كنستافزو
شاكر: هادي خدمة ماشي استفزاز مالو هادا مصطي
ذكرى: كيتسرع ..كينفاعل ومكيفكرشي فالعواقب..انا كنخاف من الانفعال ديالو ..هوا ماشي غيجلس يخطط ليا كيفاش يعملي ، هوا غيهزو الحال بلا عقل ميعقلشي على راسو شني كيعمل
شاكر: شحال فعمرو هاد ياسين هادا
ذكرى: رجعات كتشوف فالاوراق) تكون عندو ديك سبعة وشعرين..واخا هايداك مكيفكرشي باقي طايش مكنأمنشي ليه
شاكر: باااقي برهوش..انا حسابني شي واحد عندو شي ربعين عام ولا خمسين .. شفت الطموبيل قلت غيكون شي غباق كبير عندكم تما ساعا برهوش
ذكرى: هه… (شافت فيه)هاد البرهوش راه هوا طنجة كاملة…ادا مفخباركشي..هاد البرهوش يشري هاد كازا ويشريك نتينا والمخرج والمنتج والافلام درمضان..بااقي مكتعرفشي البرهوش شني كيسوا اشاكر..(تنهدات) غنمشي نقرا هاد السيناريو فشي موطع مهدن بشوية عليا ..دابا ماخصني خدمة مع حد بلا ماعيط لي خليني خصني نرتاح ونشوف هاد المساسل كيف عامل
موسم العمل عند ياسين ووقت الخدمة هوا هادا ماخلاش ليه الوقت يفكر جهة ذكرى، كانو مطارقو كثار وخوا البلاد وحتى الطموبيل معاودش سول فيها ومامساليش وهاد الفترة دالشتى كتكون الحركة عندهم كثيرة وشدوه المطارق ومشاكيلهم فأروبا فين تبان كرى ومشاكلها قدام اهرامات المشاكيل لي كيدوزو وكيعيشو ياسين واللي بحالو .
اما هي شافتو ميك عليها وتيليفونو طافي قالت صافي قطع البحر ..هادا طبعو وولات حافضاه وملي ماعيطش ليها ولا يجاوبها يسبها ويعطيها على ودنيها اذا راه مشطون فالصحيح ومامساليش .
وحتى هي لي فيها ما مهنيها ..كانت غتسيفط ليه طموبيل ملي ما ردش عليها قالت نخليها عندي خليه ينساها وتبقا ليها ،، اصلا ديما كينسى والى تناسا وداتو الوقت غتبرد الشمتة ويقدر يتفاوض معاها ويتهدن من بعد. غير ملي ماقصدهاش فاش خرج من الحبس سخون يرتاكب فيها شي جريمة فراه ميدير ليها والو من بعد ما يبرد لاكن باش ينساها فمرة يستحيل.. ولابد يمرضها فحياتها واخا غير بالتهديد .قالت صافي ملي رجعات ليه رزقو فراه غيبرد شوية ماشي كلات كلشي وهربات. تنازلات على العيادة بالدار وبكلشي بللي فيها وحتى الطموبيل ..كن ما ديك البنتلي لي خلا ليها واخا فاسمو كوراه كتكري طموبيلات دابا..طارق ماخلا ليها حتى حاجة فسميتها من غير داك لكونط لي ضارب ربعة دلمليون فالانستاغرام هازها على كفوف الراحة واخا مستحيل تعيش فنفس النيفو لي كانت فيه لاكن على الاقل يعاونها تشق طرقانها وتزيد لقدام
قرات السيناريو وكملاتو وكان بعيد على قصتها الحقيقية من غير بعض الاجزاء اللي فيهم التخويف والتهديد . هي فتاة بنت عائلة ثرية كيموتو واليديها فخادثة سير وكيجي عمها يستولي على تروتها وكيهددها ويخوفها بالقتل باش تحدر الراس ،لاكن كونها دكتورة وقارية قررات تاخد حقها بيديها وتوقف ليه فوجهو حتى كتفاجأ بولد هاد عمها كيوقع فحبها وكيوقف فصفها ضد باه وكتبدا قصة الصراعات بين العم وولدو وبنت خوه وبزاف ذالشخصة .
عجباتها الفكرة وقبلات العرض ووقعات العقد وبدات التدريب فالمسرح كما قاليها شاكر باش تتعود على الكامرة والمشاهدين وتحيد الحشمة والدهشة.
داكشي اللي دارت وخدا ليها الوقت كامل حتى وصل النهار اللي غيبداو فيه اول حلقة وكانت. حاضرة فالفيلا وبدات الحلقة بالموت .. الكنازة والناس فالفيلا وخصها تجي باش يصورو ضهور البطلة فمشهدها الاول وهي جايا من لندن تحضر جنازة واليديها . قبل ما يبدا المشهد اللي صورو من قبل منو مشاهد فالعزاء كيهضرو على بنت المرحوم ويذكروها باش يحمسو المشاهد يعرف شكون وهاكا تكون صدمة للمشاهد فاش تطلع هي بطلة المسلسل ..حتى فاشهارات المسلسل اللي كانو كيطلقو كانو مخليين غموض كبير حول البطلة باش المشاهد يتسائل على شكون البطلة ويحط احتمالات كثيرة وفنانين دازو باش هاكا تكون المفاجأة كبيرة ويشدو المشاهد يتبع المسلسل من اول حلقة. ونضرا لضعف المادة باش يجسدو صورة الفتاة الثرية فالمسلسل استعنو بسيارتها البنتلي لي كتزيد تخلي المشاهد يتيق وبحال هاذ السيارات مكيقدرش المنتج يحضرهم فالافلام والمسلسلات..وبما ان البطلة عندها كل ما يخليها تلعب الدور على اصوله لا من سيارة ولا ملابس فاخرة ولا مجوهرات وحقائب فخلاو ليها حرية الاختيار من ملابسها وبدات تمثيلها بملابسها وسيارتها ومن اول حلقة لبسات من عندها ما خسرو حتى درهم عليها باش يكونو ديك الصورة دالفتاة الثرية..وحتى هي مابغاش تلبس ليهم حوايجهم وفضلات خنازتها وكان احسن قرار وفكل حلقة كتجيب حوايج كتخليهم مصدومين من اولها لاخرها
كان النهار الاول فرمضان وجابتو الوقت يالاه دخل للمغرب صايم مع اذان المغرب وكلشي كيتسناه للفطور ..مدخل اخر وحش فالسيارات الفخمة بعد ثلت شهور فأوروبا.طلع مع الدروج للدار فطنجة فين كاينة مو وختو سارة ومرتو وبنتو وكلشي فرحان كلشي كيتجارا يوجدو الطبلة دالفطور والاضواء شاعلة والتلفازة قدها قداش من لحيط للحيط.كان النهار لكبير عند نورة لابسة قميص خفيف بلدي وطالقة الشعر وفرحانة والجو سخون والصهد ورمضان جا فشهر سبعة .. دخل مقطوع ومدكدك مع الطريق وارهاق الباطو مافيه اللي يهضر..تعرضات ليه ماريا فرحانة وسارة ختو حتى هي كتسلم ويفرقو الصيام لقاهم مجموعين كلهم ودخلات بيناتهم نورة مدات وجهها سلمات عليه حتى هي خدا من عندها البنت هزها فالسما وهبطها كيبوس فيها ويعنقها ويضحك معاها وهي كتفركل فرحانة كتردد ب ب ب ببب
فرق الصيام معاهم ومشا توضى ولبس واحد الفوقية ودخل لواحد لبيت صلى المغرب..اييه !! حاجة غريبة !! لاكن عادية حيت شحال من واحد بحالو كيدير كولشي ..حتى الصلاة والصوم داخلين فكلشي وتلقاه كيصلي الفجر فوقتو؟ بحال ياسين تماما ..هاد النقطة ماختالفش فيها وماخرجش من الجماعة .. مور الصلاة نيشان خرج للبالكون جلس حط كاس دالقهوة وشعل كارو بوحدو وطلع ديك القشابة على فخدو وجبد تيليفون وتكا اللور طلع نمرتها هي اللولة في حين الكل لداخل كيفطر ويتفرج من برنامج لبرنامج حتى فجأة قلبات سارة لاداعة قائلة
سارة: هاد دوزيم رجعت باسلة مافيها مايتشاف..امبيسي خمسة بعدا كتعمل برامج غالية
نورة: ولاهيلا خلي خلي نشوفو هاد المسلسل كيف عامل كيبان مزييون
سارة: صافي خليه..جينا معاه نيشان
نورة: كتفرج) عيكون مزييون باين من البداية
سارة: البداية بالعزو ههه.
نورة: صافي خليه ..شعندهم المغاربة ديالنا وجعو حتى هما كيلبسو الكحل فالعزو هادشي ماشي ديالنا
سارة: زعما الناس لاباس عليهم هه!!
وهما جالسين كيتفرجو فالناس فداك العزو وكيتسناو بنت المرحوم توصل حتى فجأة بدا تصور من الارض صورو ديك البنتلي فواحد المشهد لا مثيل له بقات ماريا مغرقة عينيها كتفرج وقالت
ماريا:بحال الطموبير دياسين..متقول غير هي
سارة: انتبهت)اااه دبصح!!
نورة: كتشوف فيهم)ياسين عندو بحال هاد الطموبير؟!! وفاين هي؟
ماريا:كتشرب لحريرة)راه عطاها لذكرى الحمق..
ماجات فين تكملها حتى بدات الكامرة تصور رجل البطلة خارجة من ديك السيارة من الارض شاداها فصباط كحل عالي ميقد عليه غير ذكرى نيت وليبة موس كحلة والصيكان كي دايرين !! طالع مع الرجل للركبة ولحس الحظ كانت غير فتحة دجلابة كحلة خاجة منها الرجل ..وجلابة واشمن جلابة ديال التضخيم والكامرة كتصور التفاصيل حتى وصلات لاطراف الشعر وطرف شال كحل مدلي وطلعات مع العنق كتصور المجوهرات اللي كتبان حقيقية ماشي مزيفة ديال الثميتل..شوية بدات الكامرة تبعد على التدقيق وشدات النصف الفوقاني للبطلة كامل وهي واقفة لابسة جلابة كحلة بالتحتية ساتان كحلةوالشال كحل على راسها مغطي نص شعرها المطلوق والضارات كحلة شمسية على عينيها وكتبان بدون مكياج .شدها مزيان حتى بدات مارية تحقق وقالت
ماريا: البطلة مزييونة باينة
سارة:اواعدي اماما انا جاتني كتشبه ندكرى !! تقول هي
ماريا : كتحقق) ااه دبصح !! كتشبه ليها
هما كيهضرو والكامرة كتصورها من لور كتحرك وكيفاش كتتمشى بحال الحمامة وديك الثقة فالنفس
سارة: هي هيااا..اواعدي الطموبير براسها هي نفسها البنتلي دياسين لي راها عندها
نورة:بيناتهم رجعات زرقا وماريا تخلطو عليها الصدمة مع الدهشة،.اما سارة ناضت كتجري للبيت عنندو ماعرفات تضحك ولا تغوت ولا شنو دير حتى دخلات عليه البالكو كي الرعدة
سارة: بالاسباني)ياسين اجي اجي دغيااا دغيااا اجي
ياسين:شعندك ياك لاباس
سارة:جراتو) اجي سربي داغياااااجي تشوف
جراتو كتجري وقفاتو قدام تلفازة وداك المشهد دالبطلة داخلة على الناس للفيلا وكلشي كيشوف فيها ويطلعها
ياسين:هاز حاجبو)شعنشوف شني كاين
ماريا:شوف شوف..شوف شكون شوف
دور وجهه كيشوف عاقد غوباشتو مافهم والو وواخا شافها ماتوقعهاش حتى حيدات نضاضر هازة راسها فمشهد مثير للمشاهد خلا تعابير ياسين يجمدو بقا كيشوف فيها وسارة كتنقز كضحك
سارة: قلت لك هياااا هيا ولا ماشي هيااا !!! عرافتها
قطعو المسلسل فديك اللقطة بالاشهار
خلاو ليهم فين يتنفسو ويتحمسو بداك القطعة دالاشهار .شي مصدوم شي باغي يموت بالغيرة بحال نورة اللي ضارت بيها الدنيا وكتشوف فيه كيفاش تصدم وتخطف اللون من وجهو لاكن تلفت وقال
ياسين: شكتوريني زعما؟؟ بنت السوق شغنشوف فيها انا جايا عندي اجي اجي اجي
لاح يدو ومقلز حجبانو خلاهم ورجع جلس فالبالكو كيكمي ويصوني ليها خلاهم كيتفرجو فالمسلسل بعينيهم خارجين
ياسين:شعند لق٠بة يماك مكتجاوبش فتيليفون
ذكرى: بصوت انثوي) ماسمعتوشي ؟؟عاد صونيتي لي!
ياسين: ماسمعتيهش!
ذكرى: سمح لي والله مسمعتو،.كيف نتينا لاباس؟؟ رمضام كريم
ياسين:تراجع اللور) هز قهوة) جبرتي الحرية ولا؟
ذكرى: لاالا والله ماكاين شي حرية انا مع الوقت وصافي..كنتقاتل ..خالتي ماريا لاباس؟؟ وسارة؟
ياسين:كيتفرجو فيك ..رجعتي فراجة
ذكرى: مافهمتشي؟
ياسين: راك فهمتي!!
ذكرى :سلم عليهم .
ياسين: جيتي لطنجة؟
ذكرى: جييت ندوز رمضان مع ماما ..جيبت لك الطموبير بلحق صونيت عليك ما جاوبتيشي ..قلت عتكون مسافر
ياسين: يالاه دوزها لي للدار دابا
ذكرى: واخا انا نقولها لراجل ماما يجيبها لك
ياسين:انا عطيتها لك نتي ..ماعطيتهاش لراجل مااماك
ذكرى: اذا قدرتي تجي عندنا اجي ..مرحبا بك .اجي وخود مفاتح معاك
ياسين:خفتي مني ولا؟؟ غير جيبها واجي ماعندي منعمل لك..رمضان هادا غدوزي فوجهه
ذكرى: وشني خصك بيا!
ياسين:خصني نشوف الكمارة ديالك ..يالاه تحرك جيب الطموبيل عندي للدار
ذكرى: بتردد) اشمن دار؟
ياسين:الدار ديالنا انا ونتي
ناض من البالكو طفا داك الكارو ودخل عليهم لقاهم مخرجين عينيهم فتلفازة وقال
ياسين:قلب عليا هادشي ماجبرتو فاش تفرجو غير فهاد الحبس قلب عليا
قلبات سارة كتنهد وغير مشا طلع للفوق مع الدروج رجعات المسلسل وقالت
سارة:كتعررررف تمتل تشووو كيف كتبكي تقول بصاااح
ماريا:كتنهد )هيا زوييينا..شنو ما عملت كيجي معاها..(هزات حاجبها)
نورة:عااادية..كا مكانشي ياسين عمرها توصل هادشي
ماريا: عينيها تقال)توصاال..دابا صافي وصلااات..عترجع نجمة
تم هابط مع الدروج لابس صبادري كحلة ودجينز وتيشورط وروايحو كتعطي منين ومنين ..ريحة من داكشي الرفيع والشعر ممشوط ومبوكص شهوة منو..تلفت من الباب شار بيدو
ياسين:انا خارج
نزل مع الدروج ركب سيارتو وقلع من تما بسرعة الضوء والشوارع مزالة خاويةكيطير للدار وفرانا قدام العمارة و البنتلي واقفة مقابلة معاه وهي لداخل جالسة .نزل وهز راسو كيضحك بالجنب مشا حتى لعندها فتح الباب ووقف حط يدو على السيارة كيشوف فيها..كانت لابسة جلابة مخزانية فبلوسييل وشعرها محلول وريحتها خفيفة حلوة وباينة خايفة وكترعد بوحدها واخا كتحاول تخفي خوفها وحدرها بتبسيمة
ياسين:كيطلع فيه) فين اا..الممثلة ديالنا ..مبروك عليك الثمتيل
ذكرى: بابتسامة) الله يبارك فيك ..كيف نتينا لاباس
نزلات كتبسم بلا متشعر مدات وجهها سلمات عليه بلحنان و رجعات لور مدات ليه السوارت
ذكرى: هاك ..ها الطموبير ديالك
شد السوارت وشد يدها حتى هي وتقلب بضهرو جرها وهي مخلوعة
ذكرى: فاين ماشي
ياسين:سد الطموبيل ) غنطلعو نجلسو ..نداكرو شوية
ذكرى: كتجر يدها) لالا خصني نمشي ماما خليتها فالباب كتستنتاني
بغات تجر يدها وضار عنقها كيهضر بشوية
ياسين:غنبقاو هنا كنتشادو وسط الشارع والناس كدوز
ذكرى: لالا خليني نمشي انا نتعطل(شداتها البكية)
قربها حتى خشا راسها فعنقو
ياسين:بلا فضيحة .. صافي قلت لك غنجلسو نداكرو غنجلسو
ذكرى: رمضان هادا حشومة والله كيشوف فينا
ياسين:مالنا حنا غنكفرو..زيد يالاه
جرها ودخل العمارة وهي طالعة فالاسانسور والدموع كيهبطو بوحدهم ويديها كيترعدو حتى للباب وقالت صافي انا مشيت .سلمات امرها لله ودخلات قدامو حتى سمعات الباب تطرق وراه
دورات وجهها جهة الباب كتفرد يديها بتوثر وقالت
ذكرى: كخليتيني نمشي حسن
فتح الباب عاوتاني كيطلع فيها وقال
ياسين:يلاه سير
تفاجآت وخرجات مع الباب بالزربة وخرج وراها سد الباب وهبط معاها فالاسانسور خاشي يديه فالجياب وهي كدور فعينيها حتى للزنقة ووقفات كتشوف فالشارع على اساس تركب فطاكسي لاكن فتح باب البنتلي وقال
ياسين:زيد نوصلك
ذكرى:لا بلا منعدبك ها طاكسي
ياسين:طلع براكة من تقحح يين طلع
مشات طلعات وربعات يديها وحتى قالت صافي فك الله سراحها وخرجات من الدار سالمة عاوتاني تقطعات فيها النفس فالطموبيل وهوا صايك كيطير حتى كتهز بيها الطموبيل فالسما ..شافت للطريق من غير طريق دارهم وقالت مخلوعة
ذكرى: فاين ماشي؟؟ هادي ماشي طريق دماما
ياسين:الطريق ديالي..بالسمية ديالي
قالها وكيشوف قدامو ..اما هي تزاد معاها الزايد وهي كتشوفو داخل لمارينا عرفاتو غادي لليخت ..كانت الدنيا كتصففر مزال مابداو الناس يخرجو من غيرهم هما وشي ناس كانو كيفطرو فالباطوات ذيالهم
نزلو وتم غادي جارها من يدها حتى لليخت وقال
ياسين: طلع ستناني تما حتى نرجع
ذكرى: لالا غصني نمشي ندار
ياسين:شار بعينيه)طلع طلع..زعما مخلوعة!! طلع يالاه كن بغيت نآديك كآديك شحاااال هادي..طلع
تنهدات وطلعات بينما تلفت غادي وقال
ياسين:غنمشي هنا للمسجد نصلي التراويح ونرجع..بقا تما
زاد وخلاها واقفة حالة فمها فيه وجلسات على واحد الكنبي كدور عينيها مابقات فاهمة حتى زفتة،، نزل عليه الايمان سبحان الله بحالو بحال شي وحدين كيربيو اللحية غير فرمضان ويجيهم الخلود فالدين
ربعات يديها بقات جالسة وتيليفون مكيسكتش بحال الى عندها العرس..كاع اللي كتعرف كيعيطو على قبل المسلسل ،ها اللي كيبارك وها اللي باغي يجمع ويعرف التفاصيل وها اللي باغي يبركك . كلهم عندهم هدف معين. ردات على اتصال شاكر بوحدو وجلسات كتجمع معاه
شاكر : متقوليش ليا مدخلتيش للانستا تشوفي الضجة لي ناضت عليك
ذكرى: شني عنشوف انا دابا مع ياسين فبابور ماعندي كيف نعمل نجيد تيليفون
شاكر: تصالحتي نتي وياه هه .. على سلامتك
ذكرى: لالا غير جينا نداكرو وصافي
شاكر: مهم المسلسل راه دار البوز ،،عيط لي المخرج قالي نديرو شي فطور مجموعين غدا ..نتلاقاو كاملين ونفطرو
ذكرى: منعرف الصراحة حتى نشوف ونرد عليك
شاكر:ضاروري تجي. حيت غنضربو تصيورات وكدا ونبارطاجيوهم..بنادم دابا خصو يعرف كلشي ماخصناش نغبرو على الساحة فهمتي..صافي شدينا الخيط خصنا نبقاو جارين منرخيوش
ذكرى: مهم حتى نشوف ويحن الله الصباح نرد عليك.ادا كنتي عنجي عنجشبر طريق الصباح لكازا ولا تيجي في احسن
شاكر: مهم باش ما كان ردي عليا
قطعات معاه وضربات دورة فالمواقع لقات كلشي ناشر تصاورها وشي كيشكرها شي كيسبها وفين ما دخلات كتلقا السالب والموجب وكتقبل طاك ناس لي كتعرف وهزات تيليفون ضربات سيلفي فداك اليخت حطاتو فسطوري كتبارك للناس الفطور.ضاروري خصها تشارك اللحضات حيت كلشي كيتزلع عليها يبغي يعرف ردتها من بعد البوز لي دارت ..كاين من الممثلين لي بغا يربط معاها صداقة ورسل ليها رسالة وكاين لي كرهها ماحملهاش خايف تشد البلاصة فالساحة وتلصق ليهم تما واخا راه لسقات ولي عطا الله عطاه والمندجر ضبر ليها فالاعمال خصها غير تركز، مع الهزة دعينها بان ليها ياسين جاي ونقز لليخت
ذكرى: بابتسامة ) الله يقبل
ياسين:كيديماري اليخت )اميين.
ذكرى:شافت الباطو كيقلع)فاين عندخلو!! للبحر؟
ياسين:حصلك الشرف عنصفيها لك وانا موضي ومصلي غتمشي بالبركة ديالك
وقفات كتشوفيه وتشوف فالباطو داخل تزاد معاها الزايد ماقدراتش تهضر بقات مصمرة وكتشوف ،اما هوا دخل لداخل حتى ولات كتبان مارينا من بعيد مضوية عاد سكت اليخت وناض مشا عندها اللور فين جالس كيطلع فيها ويهبط وقال
ياسين: ماصدقتييييش
ذكرى: ماشي بخاطري ..ياك كتقولي طماعة ومنعرف شني
ياسين:طماااعة ومالك ماشي طماعة
ذكرى:وقفات)علاش شنيي عملت باش جيتك طماعة؟؟ علاش كتقولي طماعة؟
ياسين:على الفلوس تعمل المستحيل
ذكرى: بلحق مانعملشي الحرام ..كنهدم بدراعي
ياسين :لحرام عايشة فيه وبيه وصلتي لهادشي .. عندك الزهر ماشديتك ديك الساع ..عندك الزهر
ذكرى:شني خصك مني قولي؟؟ ياك كولشي رجع لك نتينا ماخاسر والو!! رجعات ليك الدار والعيادة والطموبير…وانا من حقي نفتش على راسي ونعاود لحياة ديالي
ياسين: عادي عندك ندخل للحبس وداخل فالسبة ديالك ..قاتل الروح بالسبة ديالك وتجي نتي طلقي وتمشي هادا هوا الخير
ذكرى: كتفتف) انا خفت..فاش قالو لي قتل ..بب بلحق ماقالوليشي علاش قالو لي قتل وصافي..خفت منك
ياسين:صغر عينيه(ماخفتيشي نخرج ندوز عليك خفتي غير مني حيت قتلت
ذكرى:ماعرفتشي شنيي وقع لي والله
ياسين: سرح عينيه فالبحر)هانا دابا غير انا ونتي فهاد البحر..شكون يجيب خبارك
وصلها مسج فتيليفون لي فيدها وشاف جيهتو بعينيه وخداه من يدها
ياسين:فتح هاد لق٠٠٠وي
كان مبرد وهي مخلوعة كترعد فتحاتو ليه كتفتف وقراه
شاكر: شوفي انا دويت مع المخرج دكامرة كاشي غيزيد حلقة دوزي فيها ..قلت ليه عليك وكدا وبغا يزيد حلقة طلع ليه المشاهدة، مهم انا علمتك فكري وردي عليا
ياسين :شكون هاد شاكر؟
ذكرى :هادا غير مندجر ديالي كنخدمو وصافي
ياسين: لق٠٠اد ديالك اللي كيجيب ليك البلانات د ز٠٠
كتب ليه مسج:سير تح٠٠
بقات كتبقلل فعينيها ماقدراتش تاخد تيليفون. اما شاكر عيط فالبلاصة وشدو ياسين رد عليه بداك الصوت والدخان خارج من فمو
ياسين:شعندك از٠٠
شاكر : الو؟؟ الو؟؟ ااالو دكرى..الو
قطع شاكر وياسين كيشوف فتيليفون ويتكيف عليها وهز يدو بكل برودة لاح داك تيليفون فالبحر حتى شهقات
ياسين:غتهضري غتبعيه
جلسات وجمعات رجليها قلبات وجهها كتبكي فصمت وحسها مقطوع ،،اما هوا مشا وخلاها بعد وتكا بيدو على واحد الحديدة كيتأمل فداك الضلام حتى طفا الكارو ورجع تلاح حداها وتكا وهز رجلو بسبرديلتو فوق الفطوي ونزل على فخدها بيدو
ياسين:مالك مع طارق
تلفتات بزربة: هاا؟
ياسين: هاا .. دابا غير هضر هضر فرااسي كوولشي
ذكرى: حلات عينيها)شني فراسك؟؟ مافهمتشي
ياسين: واغير هضر داكشي كامل لي وقع راه فراسي
ذكرى:مافهمتشي شني عارف؟؟
ياسين:زير على فخدها)خايفة من طارق ولا؟؟ كاااع هادا خوف فيك خالعك طارق
ذكرى:ماعرفتشي علاش كتهضر
ياسين:كنهضر على الطلاق وعلى العيادة وعلى كلشي
ذكرى:ضارت مخرجة عينيها بغضب)ايوا نتينا مني عااارف كوولشي وعااارف شني وقع وشني داز عليااا علاش ماهضرتيشي؟؟ بقيتي كتهدد فياا(ناضت وقفات) انا شني هاد الزهر عندي يا سيدي ياربي..شني عملت فدونيا طيحتيني فهاد الزمر
ياسين: جرها بالجهد جلسات) عرفتي كن درتي هادشي منك لراسك هه..كن شديت مك نعدددبك
ذكرى: ناضت ساخطة)انا اصلا راني فالعدااب كتر من هاد العداب هادا!! ماخليتي فيا لي نسيتي بالمعيور
ياسين: كنت معصب
ذكرى: وخاك ما قلتيلوشي علاش عملتي وعملتي ؟؟ ولا هاداك حيت طارق متقدرشي تهز الراس قدامو
ياسين:هز رجل فوق رجل وبدا يشعل كارو) كيخاف عليا.. ماشي بخاطرو حتى هوا
ذكرى: ياااك؟؟؟
ذكرى: ودابا شني خصك مني؟؟ مكتسالني مكنتسالك شني بغيتي ؟؟ رجعني فحالي لدارنا
ياسين: هز حاجبو) شعندك كترعرع عليا صافي غير قلت شنو كاين نضتي كتحل فمك
ذكرى: بغضب)نتينا عاااارف شني واااقع وانا عايشة فالرعب مكناكلشي النيعمة مابقيتشي فيك
ياسين:نتي مثلتي مسلسل فيه تلاتين حلقة والزلال جايب لك كامرة خفية وكتقولي مكناكلش النعمة؟؟ جبرتيها سبة فديك كازا عملتي اللي عجبك
ذكرى: وشني كتسالني؟؟ نتينا كاتب عليا وانا مافخباريشي؟؟ اسيدي بعد مني انا بالله والشرع معاك نتينا والطاسيلة ديالك..طلعتو لي فالكررررر ديالي بعدو مني ديالكم خديتوه شني باقي ليك عندي؟
ياسين:وقف هاز يدو) هضر بشوية ولا نسرفق لق٠٠ديماك ..وعاريتي زعما ولا
ذكرى: وابعد مني..(قمشات حناكها) بعد منننيييي عطيني بتيساع حمقتيني
ياسين:يالاه زيد ..زيد غوت فالسمااا
مشا جلس خلاها واقفة كتبخ الدم بغات تموت وهز تيليفون كيشوف فيه
ذكرى: رجعني فحالي
ياسين:ماراجعش
ذكرى: علاش جيبتيني ليهنا؟؟
ياسين:جينا نهضرو
ذكرى:هضرنا مابقا عندي منقول..داكشي لي عنقول راك نتينا عارفو
ياسين:هز عينو) ماوقع والو دابا سوء تفاهم بينك وبين طارق وانا فهمتو شنو كاين
ذكرى: ربعات يديها) شنو كاين بالسلامة؟
ياسين:طارق كان كيحسابلو كتعرفي هاداك اللي وقع لي معاه المشكل
ذكرى: انا اصلا مافهمتشي شني واقع دوختي لي راسي
ياسين:هاداك لي دابزت معاه فسبانيا طلع لي لحساب ديالك قالي كتعمل وكتعمل وعملتي معاه شي حوايج..انا تعصبت نضت ضربتو ودابزنا صدقت ضاربو بالفردي ومات ، وفالمحكمة فاش بداو يهضرو ويحللو هاد لق٠٠ي طارق عرف علاش وقع هادشي وحقد عليك عند بالو دبصح فهمتي
ذكرى: اهاه؟؟ ايوا
ياسين: عيت نغطي عليك فاللخر كلشي تفضح فالمحكمة مابقا ما يتستر ..هادشي علاش عمل معاك هايداك ..وانا حسابني نتي طلقتي راسك حقدتك عليك وكنت كنسبك وصافي. فاش خرجت هضرت مع هبد الحق قالي ها اللي كاين ها لي كاين ..
ذكرى: تبارك الله عليكم…انا الطاجين دلغدا اللي معارف شكون الضياف
تعصبات وتفقصات فاللخر جلسات مهبطة وجهها على يدها وسكتات كتراجع اش دوزات واشنو داز عليها.. بقات هاكاك شحال وهوا ساكت جالس حداها وشاد تيليفون حتى لواحد اللحضة هزات راسها وشافت فيه بتمعن وقالت
دكرى: عرفتي شنو اياسين.. كرهت النهار اللي تلاقيت بيك فيه نتينا وخوتك ، ادا كنت عملت شي دنب في حياتي ربي زاني بيك نتينا..من نهار عرفتك وحياتي مخربقة تقول كنعيش فالحوولم
حط داك تيليفون وشافها كيفاش قالها وتنهدات تنهيدة تقول هازة جبل على قلبها.بقا كيشوووف فيها بدوك العينين ويتأمل وقال
ياسين: آديتك؟ جاك مني شي أدى ؟؟
ر عات لور ربعات يدها تنخصصات وقالت بحزن
ذكرى: اديتيني بززاف.. بزززاف اياسين ايوالله .. عييت من هادشي صافي
ياسين.بأسى) ماعملت لك وااالو..مناش عيتي؟ واخا طلقتي المرة اللولة ماعملت معاك والو.. ما ضربتك (كيحسب) ما جرحتك..ما خديت ليك شي حاجة
ذكرى: الله ياودي واش نسيتي نفكرك؟؟ نتينا مكصربنيشي بلحق كتمرططني.. نسيتي شني دوزتي عليا دلعداب كن علاين نحماق!! نسيتي الراجل اللي صردتي لي للدار يقلتني ونسيتي الرموكة اللي تعرضات لي فالطريق ونسيتي الغبرة اللي عملتي لي فالدار !! هادشي كاامل نسيتيه؟؟
ياسين: كنت غير كنخوفك وصافي..ما نويتش نآديك
ذكرى: بحزن) انا مرطت..مريييطة كنحيس براسي وكنجاهد باش نكمل الطريق ومنخليشي هاد الهم يأثر عليا وهاد الخوف وكنحاول نتسا
ياسين:عنقها بيدو) نتي حسااااسة بزاف انا غير كنت كنهضر
ضحى:بعدات ليه يدو) دابا صافي الحمد لله خرجات سالمة، صافي رجعني فحالي ننعس مرتاحة..حتى الفطور مافطرتوشي فخاطري
ياسين:عاود عنقها) صاافي دابا ماوقع والو .
سدات عينيها ودارت يدها على وجهها كترتاح وهوا معنقها ومتكي على الكنبي ..مابقا فيها اللي يتجابد معاه ويتشاد معاه وهوا عندو الجهد اللي ماعندهاش ..سكتات وبقات شوية متكي غير باش مايبقاش كل شوية يجر فيها وهي تبعد فاللخير هزات راسها وقالت
ذكرى: صافي رجعني الله يرحم ليك الواليدين
ياسين: ها حنا جالسين شنو عندك تابعك؟
ذكرى: ماما عتخلع عليا
ياسين:مد ليها تيليفون)هاك هضر معاها
ذكرى:عندها النيمرة ديالك وعتقول منعرف شني كاين صافي بلاش
ياسين:صافي صفات الخواطر بيناتنا؟
ذكرى:انا مصفية خاطري مع كلشي ماكنحقدشي..خصني غير نعيش مهنية
ياسين: باسهافخدها) الله يسامح
ذكرى:المسامحة..يالاه نرجعو
ياسين:وماك زربانة ؟
ذكرى: خصني نمشي نرتاح
ياسين: مامرتاحاش معايا؟
ذكرى: خصني نرجع.رجعني اياسين
بقا كيوروف فيها وناض قلع اليخت راجع وهي جالسة اللور كتسوط باغا تمشي بحالها حتى وصلات لمارينا وغير بلاصا اليخت نزلات بالزربة تمات غادية وشارت ليه بيدها قبل مينزل
ذكرى:بسلامة اياسين الله يعاون
ماجات فين تزيد خلفة حتى لقاتو حداها شدها من يدها جرها
ياسين:الله يعاون؟
ذكرى:غنمشي فطاكسي ماشي مشكل
ياسين:مكيشوفش فيها) زيد زيد الطاكسي
جرها طلعها وكانت تقريبا جوج دليل ،ركبات حداه ماهضراتش حتى وقفو قدام القهوى دشكولاطي ونزلو عادي بحال ايها الناس، كانت فيها لانيمسايو (نشاط موسيقي) كانت فرقة غجرية بداك اللبس والكيتار دايرينهم فديك الليلة فالقهوى منشطين بيها الحركة وحتى للدنيا كانت عامرة ،،سرحات عينيها فالاجواء ومشات جلسات هي وياه فطاولة بالكنبات وكانت بوحدها اللي طبيعية لابسة جلابة وخارجة بلا مكياج اما البنات واغلبية كلهم تقول خارجين لبواط،،اللي شاف داك المنضر ميصدقش انه رمضان ، كاين اللي كيسالي عندو الدوران مع طناش دليل وكاين اللي مكيسالي عندو حتى للصحور ..وكاين اللي كيعجبو رمضان غير على قبل داك الجو والنشاط ديالو كيكون سبيسيال والسهرات ديالو عندها طعم خاص. تلقاه كيصلي ويصوم ومور التراويح كيقصدش القنات تقول الشياطين كيتضاعفو فداك الشهر الفضيل ماشي كيتربطو ..كيجيهم شي نشاط وشي سعادة غريبة وعاد كيبان ليه الزهو عكس الايام العادية ..كتلقاه ملهوف كيتسنى غير فوقاش يضبان الليل ويخرج يديع وميقدرش يفلت شي ليلة كأن داك للزهو غيتقطع مور رمضان واخا كلشي غيبقا كما هوا لاكن داك الاحساس باللهفة امره غريب.
جلسو يتصحرو بجوج وتم جاي عندهم واحد كيفرنس ويطلع ويهبط فذكرى لاكن مع السلام وعليكم مع ناض معاه ياسين بعدو على الطبلة مسلم عليه من يدو من يدو وقال
ياسين:عروب؟؟ شني كاين لاباس؟
عروب:والو اخاي ديالي بنتي لي جالس بواحدك قلت نجلس معاك
ياسين:معايا المرى حتى نكون بواحدي
عروب:حشم)ااه سمح لي والله غير سمح لي مايحسابنيشي معاك المرى ديالك قلت شي عايلة وصافي
ياسين:هانيا خود راحتك
ودعو وشير للجيرو لي واقف كيتمشى تما جابو حتى لعندو وقال
ياسين:مايجيشي عندي شي واحد هاد الساعة ..معايا المرى ماخصنيشي شي صدع(تم غادي وكيكلن جملتو)تقوود مع شي واحيد شي ساعة
كينفخ ويتهز بوحدو مولف النفخة والكبرياء ساعة جاب ليه الله اللي يوريه الحدود .مشا جلس حداها وكان مجييف مسدودة ليه الشهية لافطور لا والو ..باغي ياكل وماعندوش منين يدوز ليه..باغي يفضي معاها الموضوع قبل ماتمشي وماعرفش منين يبداه ..فين ما يبغي يبداه كيسكت خايف يبدا بشي جملة ولا طريقة تفشل ليها الركابي وتكره حياتها عاوتاني..سكت حتى عيا وتلفت كيطلع فيها وقال
ياسين: دبا شنو غتعمل غنبقاو هايدا
ذكرى :شافت فيه)شني غنعمل مافهمتشي؟
ياسين: انا نتي شنو عنعملو فهادشي ديالنا
ذكرى:ربعات يديها) ماعندنا منعملو غدا غنجيرر راسنا منشورين فشي صفحة ..كلشي كيدور يشوف فيا واش هي ولا ماشي هي
ياسين:عاد نتابه) بدل البلاصة نوضي
ناض جلس بلاصتها وجلسات بلاصتو عطات بالضهر للجميع وتقابلو مع الحلئط الزاجاجي اللي كيطل على مدخل المقهى والشارع وتهنات جلسات كتشوف انعكاس صورتها فديك الزاجة
ياسين:تنهد)دابا شنو؟
ذكرى:شني مافهمتشي؟
ياسين:فاااهمتي
ذكرى:دورات وجهها)داكشي اللي كتفكر فيه نتينا ؟؟ فالحقييقة هايدا مرتاحة ..مكنفكرشي فشي علاقة(بتوثر) اصلا من الطلاق ما عرفت شي واحييد وما خصنيشي ..مركزة مع المستقبل ديالي وصافييي
ياسين:وانا بيدي ماعرفتشي وماعندي منعرف..عادشي اللي وقع ماشي بلخاطر ديالنا
ذكرى:تنهدات)الصراحة انا هايدا مرتاحة
ياسين:اللي عجبك
رجع اللور تكا وهز رجلو شعل كارو وسكت وبقات هي جالسة ومتوثرة تحرجات ماعرفات مادير..بقات غير ساكتة حتى تكلم
ياسين: شنو دابا كتعمل؟؟ شنو الخطط اللي عندك؟
ذكرى: فالصراحة واالو غير الخيدمة
ياسين:عرفت ..شنو زعما كتنوي ..غترجع للتجميل ولا غتبقا فالتمثيل ولا غتولي تغني؟؟
ذكرى:بنص عين) مانعرف شني يعمل الله..حنا مع الوقت
ياسين: وغتبقا فديك كازا
دكرى:ادا كانت عندي الخيدمة
ياسين: كريتي تما ولا شريتي ولا شنو؟
دكرى: لااء كنت ساعة ساعة كنطلع وصافي كنصور ماكريت ناشريت غير لأوتيل
ياسين:امم..مزيان
ذكرى:شافت الساعة) خصني نمشي مشا الحال
ناضت وناض وراها خرجات كتشوف قدامها نيشان للطمويل ركبات وزاد وصلها حتى لباب دارهم ونزل هوا وياها فدقة وقال كيمد ليها سوارت
ياسين:شد..خليها عندك غتحااجها
ذكرى:تراجعات)لاالا بلاض غتعملي المشاكيل ..ماخصنيشي الصدع مع خوتك
ياسين:مكاين حتى مشكل..هاد المرة ادا وقعات شي حاجة اجي عندي علمني بيها..سمعتي
ذكرى:لا مغناخدشي طموبير صافي والله مناخدها حلفت
مابغاتش تاخدها وقلباتها ضحك باش ميتقلقش ومشات طلعات للدار كتجري..حشمات تدخل فديك الساعة وراجل مها فالدار يكون ناعس وبقات كتفتف حلات الباب بشوية لقات الضلام ..يالله جات تسد الباب وهوا يكاليها برجلو خلعها وهزات فيه عينيها مخلوعة
ياسين:مرة اخرى نقولك هاك هااك
مد ليها السوارت دالسيارة شداتهم مخلوعة وضار مشا فالبلاصة خلاها مصدومة
أنا بلاصة ما يمشي لدار مو مشا للدار ديالو يبات فيها وبقات الزوجة المصونة المحفوضة فالبيت كتسناه ..بغات غير تشوفو ماشبعات حتى شوفة مسكينة.. مازال كاع معارفاه كي داير ولا كيدايرة شخصيتو ولاشكون هوا،،شنو كيبغي شنو كيكره؟ بغات تتعرف عليه عن قرب لاكن متاحتش ليها الفرصة وديما غابر ديما مكاينش. كانت كضن مع راسها انها فاش غتزوج بيه زعما وواخا تسكن مع مو او بوحدها كاع غيدخل ويخرج عليها كسائر الاسر والعائلات ،، وتعيش معاه عادي يفطرو يتغداو يباتو فدار وحدة. واخا كاع يغبر نهار كامل فالاخير فيرجع للدار ..على الاقل تشوفو جالس وكيدرر فالدار وكيهضر وعايش معاهم ..ديك الساعة مع الوقت غادي تتصلح الامور شحال ما طال الوقت فالاخير كتبقا جامعاهم بنية وولابد مايهضر معاها ويتناقش معاها وشحال ما طال الزمان واحد النهار غتبان ليه. ماصدقات رجع من السفر وغيجلس شوية فالمغرب واخا لا هي لا مو ما عارفين شحال غيجلس.. كل مرة فين ماعندوش استقرار فمكان واحد، بغات غير شي حاجة تشدو يجلس فالدار ساعة والو!! ااو واش هاد السيد معندو علئلة ؟؟ رمضان كااع اللي قالت صافي غيدوزو فالدار ماعندو فين يمشي وماعندو مايدار والشهر كامل تبقا تشوفو ساعة والو!! من الساعة اللي وصل فيها وهوا بوحدو!! لا فطور فطرو معاهم لا جلاس جلس يتجمع لا مواضيع عندهم يهضرو فيها كي الناس!! ناشفين الله يستر كل واحد عايم بحرو فهاد العائلة!! وهادي الثلاتة والاذان كيأذن وهوا مادخلش كاع!! فين مشا الله واعلم ومو سعداتها ضارباها بنعسة شخيرها كيتسمع منين ! كن شي أم اخرى ماتنعسش وولدها ماشي فالدار وماعارفهاش فين بايت!!
تفكعات مسكينة فاللخر مشات طلات على بنتها اللي ناعسة حدا مارية اللي ولفات الحفيدة ولف خايب ورجعات ضرب ليها ميات تخميمة وربات الكبدة عليها رجعات تراري وتسكت وكلشي ناعس وهي مرة حاملاها فالضهر مرة هازاها مرة دافعاها فالكروسة واللي تلاقاها كيسولها وا بنتك
طلات عليهم نورة ومشات تنعس بحال العزبة فالبيت مهنية تقول ماولداتش وحتى تربية مارباتش وطاحت فماريا مشواقة فالحفايد شداتها منها البنت وغرقات فاربيتها وحتى البنت ولفاتها كتبكي عليها ومتنعسش الى مكانتش حداها.
النهار الثاني فرمضان .صبحات فالصالون كتصاوب الشعر وجالسة مهمومة كتعاود مشكلتها للبنت اللي خدامة بحال ديما حتى رجعات البنت مشاركاها مشاكيلها تقول عايشة معاها
نورة: كتنهد) مابانشي ياختي
حسنة:كتجبد الشعر) اواعدي!!! مابانشي مررة فاين مشا؟؟
نورة:ماعرفتشي ..من الساعة اللي شاف الموصيبة فالتلفازة ماضهرشي
حسنة: مشا عندها زعما؟؟ (نخزاتها) نتينا ياصوحبة تلفو لك زعما!! ماععرفشي تجر الراجل جيهتك صافي تقاداو ليك؟؟شعندك تكلختي اواعدي!!
نورة: تكلخت ياصووحبة مابقيتشي عارفة منعمل نزلا يدي مابقيتشي عارفة شننو نعمل ايوالله
حسنة:كتغمز)نتينا دابا بواحدك مابقاتش عندك الشريكة ،،طلق الله سراحك !!ايوا تقاد مع راسك ماتبقاشي جالسة وحشمانة وخوفانة !! شعندو ميعمل كااع !! عمل براسك بريئة وخطأتي (كتغمز) تلفتي ..فهمتييي
نورة:مكنقدرشي يا صوحبة والله ..كنخاف يقولي شي كلمة طيح بيا
حسنة:بالفقصة)اواعدي يانا على العايلة كي رجعت!! كمكنتيشي مزيونة واخا ! نقولو متايقشة فراسك!نتينا بلااارة ..هااايدا عاملة خصو يشوفك يدوووخ ..تيقي فراسك الصو حبة شويوش !! ادا كان غيرجع للدار خصو علاش يرجع (كتغمز) مايبقاشي دايع فالزناقي..كااع كااع ادا بقيتي بهاد التفكير غتجي وحدة اخرى وتديه منك ومن هاديك اللي طلق
نورة:شكون حسن قولي الصراحة انا ولا هي
حسنة:حتى نتينا مزييونة الصراحة كتعجبنييي..
نورة:واقولي شكرن لي حسن زعما
حسنة:تشووو..هوا فالخقيقة ميمكنش تعمل مقارنة حيت نتينا زينك مختالف على زينها ..كل وحدة كي عاملة..غير هيا زايد فيها تحلوين والمشية هاايداا وكتعرف ..فهمتي شنو كنقصد نشرح لك..كتعرف تحرك داكشي لي عطاها الله هه..نتينا درييوشة وبريئة..هي كتبان عليها صعيبة يا صوحبة ! باينة فيها حتى فاش مثلات فهاد المسلسل
نورة:هي راه مكانت تكساب ماتعلام كانت عاااادية كتسكن حدانا وباها سكايري ديما مشوههم
حسنة:اييوا هانتنا قلتيها..مكان عندها والو وعرفات كيفاش توصل،،صاافي دابا وصلات للنقطة دالانطلاق مابقا رجوع للور صافي..بحالها هيا دغيا كيطلعو ويعملو لفلوس..راني قلت لك مساهلاشي
نورة:وكانت داااخلة سوق راسها مكتعاودشي!!
حسنة: ماشي بحالك هبيلة..يحسابك الراجل كتعجبو المرى الهبيلة!!خصوصا الراجل ديالك نتينا كيعرف هايدا دلبهلات طلعولو فراسو .
نورة: زعما يكون كيعرف شي وحدة اخرى
حسنة:ودي عايزة كلام!! اواعدي شهاد السؤال
نورة:زعما!
حسنة: ادا مكانوشي عشرة راه لاباس،!!! هه طبعا الحبيبة راه غيدور بيه البنات واخا مانعرف شني يعمل ..واخا يشد عينو هايدا هما يغريوه!! باقي صغيير والعايل هاايدا عامل الصوحبة ماشي غير يغريوه هادا!! واخا يحون مزلوط يديوه هما يصرفو عليه فما بالك دابا بالفلوس !! جمعهم بجوج
نورة.ضارت بسرعة)هييي ماقلت لكشي!!! ذكرى مكتولدشي يا الصوحبة عاقرة
هادا حالها وحوالها ديما لاكن هاد المرة دارت بنصيحة حسنة ، مشات للدار لقات ماريا واقفة كتعطر فالبايلا يحطوها للفطور وبوحدها فلكوزينة كدوق من هنا ومن هنا ..مكتصومش حيت فيها السكر وكتشرب الدوا واخا لي شافها مايقولش فيها شي مرض..من داك النوع للي كيبان صحيح وبقوة ما بيضا رجعات حمرا بحال الكور فاش كيتقروزاو ..جلدها لونو حمر من العنق والصدر وكتافها عراض ..ماغليضاش لاكن صحيحة وطويلة تبارك الله بحال الى كانت عايشة مع الجبل والعروبية..مشيتها وشغلها مرجل وحار وحتى جلستها مرجلة وكتزيدها براسطة وتكركبها فوق الراس وتبقا غادا جايا فالدار كتلبس تونيات دالبارصا ديما لا علاقة ليها بالمرأة المغربية لا من اللور ولا من لقدام ..وحتى فاش كتبغي تلبس شي قشابة ديال الدار كتجيها بحال ياسين فاش كيلبس الدراعية ..هضرتها وتعابير وجهها لا علاقة ليهم بالصفات اللي عند المرأة وعقليتها مختالفة ماعندها لا مع عرف رلا تقاليد ولا هادي مرت ولدي توجد وتحط ولا هادي بنتي تخدم عليا ولا ولدي نحكم فيه.مهنية راسها حاسبة كل واحد مسؤول على راسو وهي بحال الى غير عايشة معاهم تنصح الى لقات لي يسمع.دخلات عليها نورة لقاتها يالاه سدات عليها ومسحات يديها وقالت ليها
ماريا: غنمشي مخبزة دابا ..تعطلنا لبارح باعو كلشي وخلاونا
نورة:نتسخر ليك
ماريا:غنمشي انا شوف معاك باهيا عندك تنشف
زادت وخلاتها مشات لاحت عليها قشابتها ..واحد لقشابة بحال لعباية كتسخر بيها وواحد الصابو بحال دالسبيطار ولوات عليها الشال لوية عشوائية ماعرفاتش ليه ونزلات مع الدروج جرات شكولاطي بنتها معاها وزادت خلفة .يالاه خرجات وصل ياسين وقف الطموبيل قدام الباب وجلس شحال كيهضر فتيليفون شي نص ساعة عاد نزل طلع للدار كيدور عينو شم ريحة الماكلة ومشا للكوزينة
دخل للمطبخ لقا نورة واقفة ودور عينيه وقال
ياسين:فاين مامّا(مع الغط على حرف الميم)
نورة:تلفتاة نتفاجأة)مشات تسخر..خلعتيني ههه
ياسين: والعايلة فاين خليتيها؟
نورة:عاد نعسات راها مع سارة فالبيت .. خصك شي حاجة نعملها لك
ماهضرش معاها مشا طل على المقلة دالبايلا كيشوف شنو فيها ورجع غطاها ونورة كتشوف فيه بنص عين.دخلات ماريا هازة السخرية عليهم فديك اللحضة وقالت
ماريا:ياسين جيتي! هااا الباهيااا..
ياسين: شني خصك نمشي نجيب لك
ماريا: صافي جيبت كلشي هنا ..
بقا كيدور ويهضر مع ماريا وشوية مشا للبيت تكا حدا بنتو بدا كيبوس فيها حتى فيقها وعطاها لسارة ورجع للكوزينة كيتلف الوقت حتى يأذن .. هز الديسير بدا كيطحن العصير ونورة متبعة ليه العين شوية طلبات ليه ماريا تيليفون تهضر فيه وعطاه ليها وخرج من تما خلاها كتهضر حتى كملات وماجات فين تحطو حتى نقزات عليه نورة
نورة:انا نديه ليه
شداتو دغيا قبل مايطفا ليه الضور مشات بيه للدروج كأنها مطلعاه ليه وطلات فيه دغيا كتقلب ملهوفة شافت المكالمات طلعو ليها
ذكرى
ذكرى
عبد الحق ذكرى
معزوز
ذكرى عبد الحق
هند
عبد الحق
هند
هند
وشي نوامر اخرين ،،رجعات حمرة مزييرة ودخلات للواتساب كتقلب طلعات ليها ذكرى هي اللولة اخر جملة فيها
ذكرى:كنعدل لفطور مع ماما
صورات ليه الكوزينة والروينة وقبل من الجملة خطفات نضرة على المحادثة فثها افتتاح الكلام وصافي ..نزلات كتقلب طلعات ليها هند تحت ثلاتة دالمحادثات مصورة ليه الصالون
هند: كي جاك
ذكرى : الو شاكر
شاكر: الو؟(بصوت ناعس)
ذكرى: معاك ذكرى
شاكر: ااه ذكرى
ذكرى: انا ماجا نكازا دابا علاين ندخل..ضهرلي نتينا ناعس ؟؟ نخليك حتى نوصل دابا
شاكر : واخا
قطعات وكملات طريقها فالبنتلي لي خلا ليها حتى وصلات لكازا وشدات اوتيل حطات فيه حوايجها وستفاتهم ،،واخا عندها بزاف دابصحاب والصحابات لاكن عمرها حطات رحالها عند شي واحد فيهم .. فيها عزة النفس لي مابقاتش فهاد الوقت والفابور والعيش على ضهر الناس كيخلي الانسان يطمع ويتنازل على كبريائه ، ربما الحاجة اللي خلاتها دير بلاصتها وتعطاها قيمة هي هاد عزة النفس . واللي شحال من واحد عندو الفلوس والى لقا الفابور وشي جلسة عند شي صديق بلا ميخلص الاوتيل علاش لا.
تكات رتاحت حتى صونا ليها تيليفون وناضت بقات شاكر ،،ردت عليه ودارت معاه يجي يفطرو بجوج .بقات للفطور دقائق قليلة ونزلات بجليليبة خفيفة انيقة وشعرها محلول طبيعي للمطعم لي كان فيه بوفي افولونتي والدنيا عامرة ، جلسات على اريكة جهة الزاج كيطل على الشارع حتى أذن المغرب واجواء الفطور كانت رائعة والناس كيهزو الماكلة والبوفي طويل لا نهاية له بكل انواع واشكال الاطعمة والحلويات. ناضت تشوف شنو تاخد حتى دخل شاكر مفركس والشعر كيبري مشا نيشان سلم عليها وهز الماكلة وهما كيتجمعو
شاكر: بوحدك؟؟ ماجا معاك تا واحد
دكرى: شكرن مش يجي معايا؟؟
شاكر: فكرتيني.. مال داك خونا ديالك واش مريض ؟؟ كيسب ولا منعرف اش يحساب ليه راسو
ذكرى: هزات كتفها) ماديشي عليه.. خليه انا اصلا جيبت نمرة ديالي الثانية ماعندوشي هوا .. رما لي ايليفون فالبحر خلاني هايداك كنشوف
شاكر:مالك نتي ماعندك شخصية توقفيه عند حدو ولا شنو؟ كيخلعك !
ذكرى: لاالا مكيخلعنيشي غير انا صافي توالفت عليه.. راني قلت لك مزال طايش مزال عقلو صغير كيعمل داك الفعايل دالبراهش
شاكر: وا الى مالقاش اللي يوقفو عند حدو نوقفوه.. مالو يخلعنا
ذكرى: هازة طبسيبل) يالاه يالاه نجلسو اش داك ليه الله يهديك
شاكر: تابعها) راك غير نتي اللي كيبان ليك بووعو .. خالهك غا نتي ..كيحساب لك شي لعباا
ذكرى:جلسات) واا بعد من البلا عندو يطليك اش عندك ما تعمل بيه ..ماتعملشي عقلك فيه
شاكر:تحمس) لا والله ونشوفو تا نربيه البرهوش
ذكرى: كتقلب فالماكلة) اااش عندك ما تربي .. خلينا نفطرو خلينا ،، وادا شي مرة ..شيييي مرة ماتعرف تلاقيتو ولا جا عندي ولا جيتي نتينا طنجة عمل عقلك ..ماتديهاشي فيه..هوا قد ما كبرتيهالو كيتفرعن ..حسن خليه عمل راسك مكتفهمشي حيت هاداك مزنزن. ماعندو ما يخسر ومايصلاحشي لك ..والله مايصلاح لك بلا ماتشوف فيا هايدا تقول كنقص منك.. انا كنقول لك الحقيقة حيت ما بصح ماعندو ميخسر والعالم ديالو بوااحدو عايش فواحد الكوكب غير هوا واللي بحالو وفيه النغزة دالزعفة ماعندوشي اداب الحوار
الفطور داز على الهضرة وكانت عندها خدمة ولقائات مكانتش مساليا ووقتها عامر .اما ياسين ماعرفها فين طارت وعاد تفكر بلي رما ليها تيليفون ومشا ما مرة ما جوج جهة دارهم مابانتش ليه حتى فقد الامل انه يلقاها ورجع للدار عند مو للكوزينة وهي كتوجد الفطور وهوا كيدور بيها بواحد الشورط قصير وتيشورط وكلاكيطة وشاد تيليفون كيدورو فيدو غير هوا وياها
ياسين: سمعتي كلشي على لسان عقد الحق قالك هي ماطلقاتشي راسها طارق اللي عمل كلشي
ماريا: نتينا دابا عندك المرى والعايلة فالدار وتجيبها حشومة
ياسين: هز حاجبو) شمن مرى ولا … هاديك ماكنعرفهاشي انا كنعرف بنتي بووحدها
ماريا: عمل عقلك .. عمل عقلك راه بنتك كتكبر وشي نهار تجبرها كبرات ماترضاشي هادشي نماماها
ياسين: حتاااا تكبر ونشوفو اما دابا بااقا يااالاه كتوقف بالدرع… وا يالاه عيط ليماها قولها دوزها لك يالاه
تكا على البوطاجي كيمسح على شعرو وماريا كتسوط فاللخر هزات كتفها خرجات سوقو وعيطات لام ذكرى وياسين حداها كيسمع حتى قطعات وقالت
ماريا: مكايناشي..هانتينا سمعتي شنو قلت لها ..قلت لها دوزي دكرى نهضر معاها وتجي تفطر معانا نشوفوها قالت لي هادي سيمانة باش مشات لكازا
ياسين: صغر عينو) يااك!!
ماريا: هزات يديها) ايوا هاشي لي كاين
باسين: تزير) مشات لكازا ما تشاورات ما والر زعما !!
ماريا: هزات كتفها) هي حرة ديال راسها غتعمل لي كيقولها عقلها
ياسين: حرة وتعمل لي قالها راسها(كيحرك راسو) عيط ليماها قولها تعطيك نمرة ديالها قولها بغيتيها فشي حاجة
ماريا: نعاود نعيط؟!
ياسين:عاود
هزات تيليفون عاودات عيطات ومكتعرفش تمثل عندها نيشان نيشان بزز باش كملات ديك المكاملة كتعاود النمرة بفمها وياسين مرحز معاها شدها فدماغو وجبد تيليفون دخلها وخرج خلاها قبل ما تقطع نزل مع الدروج كيصوني
ذكرى: الوو؟؟
ياسين: كطيري زعما ديال راسك كتعمل لي قالك عقلك
ذكرى: قلبات عينيها) ياسين!! كيف نتينا لاباس
ياسين: شكتعمل فدبك كازا شنو عندك تما
ذكرى: لخيدمة وصافي جبرتيني راجعة فطريق
ياسين: فين وصلتي؟
ذكرى: سي ساعة وصافي نكون فطنجة
ياسين: مزياان .. انا كنتسناك فالدار
ذكرى:الدار!!
ياسين: الدار عند مامّا ..اجي نيشان نفطرو هنا
ذكرى: اواعدي !! كتهضر بصح؟؟
ياسين: مافيا لي يهضر معاك دابا .. انا كنتسناك. يالاه
ذكرى: شوف ..تلاقاني فشكولاطي بعدا تلاقاني ..انا عنمشي تما عاد نشوفو الفطور وهادشي …. صافي
قطع ورجع طلع عند مو لكوزينة
ياسين: غتجي دكرى تفطر معانا صافي هانتينا معلومة
ماريا: قلتي دكرى فكازا
ياسين: خارج من لكوزينة ) جايا عتجي مع الفطور نيشان
مشا طلع بحالو لبيتو دوش وتفكركس وتم خارج من البيت لقا نورة هازة بنتها فيدها كطلع فيه وتهبط وريحتو كتعطعط. ..قرب منها حتى قالت غيبوسها ولا يعنقها ..حتى وصلاتها نفسو لاكن خشا وجهو فبنتو كيضحك معاها ويبوسها ونزل فحالو ماهضرش نع نورة خلاها كتسوط بغا تموت والغيرة كتشوي فيها وتحرق ..نزلات كتبكي للكوزينة وتشهق مابقات قادرة تتحمل الوضع وكل مرة كتصبر راسها وتقول غيتبدل والبنت غتجمعهم وشحال ما طال الزمان غيروم جيتها ويتفكر انه عندو زوجة وعندها حقوق عليه وتعيش حتى هي بحال باقي الزوجات وتكون عندها كلمة مسموعة
دخلات كتبكي للكوزينة على ماريا حتى صدماتها قائلة
ماريا: ياسين قالك عتجي ذكرى تفطر معانا
نورة. بصدمة) شنييي؟؟؟
ماريا: ايييوا هادشي اللي قال
نورة: بغضب) وهي باشمن صفة تبارك الله ماجيا تفطر عندنا ؟؟
ماريا: هزات كتفها) ما جبرت منقول قالك تجي تفطر صافي ضبر راسو
نورة: والقيمة ديالي يانا اللي ماجي ليا بالق٠٠ة للدار شني انا هنا شايطاا
بقات ماريا ساكتة غير حتهز فكتافها بقلة حيلة وكتوجد الفطور ونورة بغات تموت بقات كتغوت ماخلات فذكرى غير اللي نسات ..بالحرقة وقلة الاحترام اللي حسات بيه مشات لواحد البيت جلسات وعيطات لخالتها بقات كتبكي وتشكي عليها وتطلبها تجي تفطر معاهم ختى سخفات بالهضرة وهاضت مشات للكوزينة كتنفخ غادية جاية
نورة: خالتي ماجا تشوفني وطلل عليا ..هضرت معاها قلت جبراتني مقبوطة قالت لي انا ماجا نشوفك.
ماريا: ببرودة) ماتعصبشي راسك صافي .. ياسين هوا هادا مايمكنشي نبدلوه
هزات نورة خنافرها خرجات من لكوزينة بينما دخلات ذكرى للقهوى لابسة نضاضر وجلابة مخزانية كحلة مع بليغة مطروزة بالالوان وصاك صغير وشعرها مطلوق مشات مباشرة للطبلة فين كان جالس ومهبط راسو على تيليفون مشافهاش حتى وقفات عليه كتبسم بخال عادتها وجلسات على الكنبة وهوا كيطلع ويهبط فيها
ياسين: على السلامة
ذكرى: الله يسلمك(دارت رجل على رجل) عييت والله..عييت بالطريق
ياسين: بتشكيك) طالعة نازلة لهاد كازا شعندك فيها
ذكرى: قربات ) عندي فيها لخيدمة راه مكنجبرشي الوقت مرررة نرتاح
ياسين: ربع بديه على رجليه) شنو هاد الخدمة مافهمتهاشي ؟؟ كيفاش عاملة هاد الخدمة ديالك
ذكرى: كان عندي تصوير ديال الكامرة الخفية هادشي علاش مشيت
ياسين : دابا هادي هي الخدمة ديالك ؟ كل ساعة تصوير كل ساعة لقائات؟؟
ذكرى : هادي هي الحياة ديال الناس المشهورين ..ها التصوير ها اللقائات ها هادي
ياسين : هاديك شنايها؟؟ الخلوة؟؟
ذكرى: اواعدي شني كتخربق
ياسين: وهاد الناس غيعملو معاك هادشي كامل باطل؟
ذكرى: اه حيت انا بيهم ولا بلا بيهم مشهورة وعاااندي متابعين ينجحو المسلسل والفيلم..مواقفاشي على شي واحد يعمل فيا الخير (بانفعال) عندو يقولك عقلك انا سايبة زبالة لي داز يخوي سطل الزبل ديالو
ياسين: علاش كاينة التيقة فالبنات ؟؟!
ذكرى: هزات حاجبها) كاينة فبنات الناس بحالي وبحال ختك رؤية وبحال ختك سارة.. ماشي بحال للبنات اللي كتعرف نتينا مافيهم حتى بنت الناس
ياسين: تكا اللور كيطلع فيها) اللي شافك يخلف عليك ما بنت شي ناس
ذكرى: هه وعلاااش يحلف ؟؟ ميصدعشي راسو براكة عليا غير ربي عارفني بنت الناس وعارفة راسي بنت الناس ،، شغنعمل انا بالبشر يحلف ولا يقسم زعما كيهموني ولا؟؟
ياسين: بقا فير كيشوف فيها) شنو دابا كتغمق عليا؟؟
ذكرى: قولي علاش غنغمق عليك؟؟ بغيت غييير سبب يخليني نكدب عليك نتينا وهاد الرباعة دالناس اللي كنهمهم كتر من الحياة ديالهم؟ علاش انااا غادي نكدب عليكم ونخبي عمايلي ونبان ليكم الشريفة العفيفة؟ شني غتزيدوني في الدونيا. يالاه قولي
ياسين: نايض) يالاه يالاه قريبة تأذن المغرب ،،حتى نرجع عقلي ونكمل معاك المفيد ..زيد يالاه
ناضت هزات صاكها ومشات معاه ركبات فسيارتو حداه وطار نيشان للدار جابها مع الاذان فالباب . طلعات حشمانة قدامو وكل شوية دور وراها تشوف فيه وتردد
ذكرى: حشمت ندخل ..شكون لداخل؟
ياسين: علاش غتحشمي ونتي كتمتلي قدام الملاين دالناس وسبعين الف كامرة ..زيد زيد
زاد فيها حتى كحزات لقدام ودخلات مع الباب حشمانة لقات كلشي فالطبلة جالسين ..مو وختو سارة ونورة وحداها خالها واحد الزعرة تكون فثلاتينات باينة فيها حويرة ومتولة وكتسبل فعينيها وتشوف فيها ..تقدمات مزنكة وسلمات عليها ماريا عادي وسارة حتى هي تبسمو ليها..اما نورة بقات جالسة كدير فيها شي شوفات بحال ناهد دوران ..وراخا هاكاك سلمات عليها ذكرى من الوجه ونورة كتقلب فعينيها وتسبل وخالتها كذلك وجلسات حدا ماريا لي دارت ليها بلاصة لداخل ..اما ياسين جلس فالطرف على اريكة صغيرة معزولة معاهم سول على بنتو قالو ليه ناعسة.. رحبات بيها ماريا وسارة حتى هي كتشوف فيها وطلع وتقرب ليها..جاتهم تبدلات وتزادت عليها الشهرة..جاتهم فشكل تفطر معاهم وحدة مشهورة فنيا ، اما هي حشمات بقات جالسة ماهضرات مانطقات .. تبسمات خالة نورة وقالت كتشوف فيها
سميرة: شحال ما تلاقينا ..مابقيتيشي ساكنة مع باباك واقيلا؟
ذكرى: ساكنة فكازا دابا
سميرة: خليتي باباك بواحدو؟؟ مسكين .. كعمرتي عليه الدار بالعيال بعدا يونسووه ..كيونسووو.. شني كيربح الواحد من الزواج غير العيال
نورة: كيونسو تبارك الله
بقات ذكرى غير كتشوف رجعات حمرة وياسين كيفطر رد عليها وقال
ياسين: كتربيني انا .. انا فيا عشرة
سارة: هههه
سميرة: هزات حجبانها فيه) اواعدي الحياة هي العائلة،، زينة الحياة دنيا هي المال والبنون
ذكرى: مكيتلاقاوشي بجوج …ختار وحدة فيهم يا المال يا لبانون .. وهاد الساعة كاين غير المال فالرزق ..البانون مكاينشي
سميرة: بلعكس..العيال اهم حاجة ..الانسان كيكبر كيجبر العائلة دايرة بيه
ذكرى: حتى واحيد ماضامن راسو ،،الواحد يطلب السلامة ماتعرف الخير فاين مخبي
ماريا: فطر فطر .. واقيلا عاد وصلتي من الدار البيضا
ذكرى: امم
ياسين: شاف سلمى قلبات لمسلسل ذكرى) حيد عليا هادشي..رجع فين كان
سلمى: كنتبعو ..
ياسين: طلع لبيتك وتبعو
بقات ذكرى غير كتشوف فيه سد ليها الشهية وناض للبالكو هز كاس دالقهوى ومشا جلس تما خلاها جالسة وسلمى عاجبها الحال جالسة معاها وقلبات للمسلسل ..اما نورة طاح عليها الضيم مكانتش قادرة تهضر فضور ياسين حتى ناض عاد شافت فيها وقالت
نورة: الثمتيل دابا رجع ساهل اي واحد يقدر يدخلو .. كلشي بالمقابل
شافت فيها ذكرى بنص عين ومسحات يديها طلعات فيها وهبطات وناضت
ذكرى: فاين مشا ياسين؟
ماريا: كتشرب الحريرة) جالس فبالكو
ذكرى: انا ماشا عندو
مشات خلاتهم جالسين فحمى الله ورسول الله الا نورة اللي معالم بيها غير الله بغات طرطق بالفقصة وقالت. كترعد
نورة: عوووممممري شوفت الراجل مدخل الصاحبة على مراتو حتى شفتها دابا!!! وماقدراشي نهضر ماقادراشي اعباد الله عملو شي حاجة راه حراام هادشي!!! اا خالتو ماريا واش عاجبك الحال؟ عاجبك شني كيعمل بنك (ولدك)؟ عملو شي حاجة يا الناس راه الراجل مدخل الصاحبة فقلب دارو والمرى ديالو كتشوف
ماريا: دلات شنايفها ببرودة) ماعندي منعمل انا ماشي شغلي
نورة:مصدومة) ادا عاجبك شنو كيعمل نتينا راضية عليه
ماريا: كدور المعلقة وتخمم) بيناتكم .. انا بعدا ماااشي شغلي ..يجيبها مايجيبهاشي يضبر راسو معاها
نورة: بحرقة) وعاادي يجلس يصرف عليها ويشتت عليها فالفلوس ويمشي ويجي هوا وياها هاايداك !!
ماريا: تنهدات) انا بعدا فلوسي كيعطيهم لي .. الى بغا يصرف عليها يصرف ولايجلس..راه كيصرف على البنات ديما
نورة: اواعدي يانا عتحمقوني
ماريا: هزات كتفها) مالو زعما مكيصرفشي؟؟ راه كل مرة شني شاري لوحدة بقالو غير ذكرى زعما يحير فيها.. راه عطاها طموبير البنتلي مابقيتشي كنشوف ديك الطموبير مرررة
نورة:شافت فخالتها) اواعدي يانا عنموت !! جاك هادشي عادي
سميرة: ماعديشي انا جاني هادشي عجب!! الصراحة ماعمل فيها مايصلاح ماجي بالصاحبة
ندار عند مراتو وفاميلتو
ماريا: كانو مزوجين باقي ماكملاتشي العدة
نورة: كاانو ..كاانو دابا صافي مابقاوشي
ماريا: مهم كانو مزوجين شني فيها والو
سميرة: نتينا هادي العقلية ديالك اماريا. الدم فيك بارد بااز لك !
ماريا: كتقشر واحد الليمونة قد راس سميرة) انا ماعندي مانعمل يضبر راسو ..مابقاشي عايل ستيتو
سارة:ساهية فتلفازة)خليونا نتفرجو صدعتولنا راسنا !! اواعدي مابقا حد يجلس يتفرج معاكم
سميرة: هزات يديها) انا مابقا عندي منقول هزيت يدي..هادشي كيخلع
نورة: كتحك يديها) عنمشي عندو نعملو شي فضيحة ..المرى جالسة فالدار والراجل فبالكو مع الصاحبة
ماريا: عتيمشي تجبد راسك الصدع وصافي
نورة: والله حتى نمشي(ناضت مفقوصة مشات)
مشات كتجري سخونة لداك البالكو ويالاه بغات دخل حصلاتو مقنتها وكيتناكرو بخفوت ..تلفت بعينيه تقال طلع فنورة وهبط وقال
ياسين:شكاين؟؟ مالك؟
نورة:بغضب) كيفاش مالي؟؟
تقلب بضهرو كامل) مالك ياك لاباس؟
نورة: مالي؟؟ شني خصك نشوف المنكر ونبقا ساكتة؟؟ (شافت فذكرى) نتينا مابغيتشي تعطينا تيساع خصك تشتت لينا الشمل عاد تتهنى ؟؟ خصك تفرق ديك عايلة على باباها ويماها عاد ترتاح !! ماعندكش الوجه علاش تحشم ماجا برجلك مع الراجل مزوج وغندو البنت
ياسين: هز يدو كان غيضربها) المشي تق٠٠د عليا ولا نعمي ليماك دوك العينين …نتينا لي بقيتي لي دابا تفرع لي ك٠٠
ماريا: دخلات كتجري) صافي صافي .. الجيران كيسمعو
ياسين:يسمع لي بغا يسمع ..
نورة:خليهم يسمعو ..يعرفو الراجل لي مدخل الصاحبة على مراتو ويشوفو المنكر لي كنشوف انا
ياسين: هزو يدو مشي حييد من قدامي مكاينشي شي منكر قدك
سميرة:دخلات كتجري) ايواا ايوا صافي بقا لك غير ضرب مراتك والصاحبة كتشوف …واعيب عليك وحراام هادشي اللي كتعمل ..وفهاد العواشر ماخفتيشي الله ؟؟ ماحترامتي يماك ولا بنتك ولا مراتك ماحتارمتي حتى واحيد
ياسين:دور وجهه كيسوط) شو هادي حتى هي عاود (تلفت بسرعة مخرج عينيه) خرج تق٠د عليا من داري ودي معاك هادي حتى هي ..مشي معاها يالاه ماعندي منعمل بك طلعتي لي فك…
ذكرى: جراتو) صافي صافي بلا صدع ..صافي يالاه وصلني للدار
نورة:كذل عليها مفقوصة وماريا شاداها) هاي هاي زعما البريئة !! علاش ماجا لعندي ؟؟ هاا؟؟ ماخفتيشي الله مابقاتشي فيك العايلة ستيتوة مسكينة
ياسين: وا مامزوشي يانا لا بك لابيها .. صاافي دراسي ويالاه مشي تق٠٠د
داز فيهم وجر ذكرى كتعتر ودور فعينيها داها ونزل كيتهز فدروج حتى للطموبيل وطلع شعل كارو وتكا
دكرى.ركبات حداه) قلت لك من الاول مانجيوشي ..وعندها الصح اشمن صفة جايبني زعما ؟؟ الدل بعينيه
ياسين: ماتزيدشي عليا حتى نتي ..براكة داك البروصي اللي نزل عليا كندوزو فوجه بنتي نزيدك حتى نتي عليها
ذكرى:ماتزيدني مانزيدك انا كنكره تجرجير
ياسين: انا اللي مجرور معاك فهاد الجرة دززززز(دور وجهه)
ذكرى: وصلني عند با للدار (تنفضات كتسد السمطة)وصلني
ياسين: زيدي تق٠٠٠حتى نتي ..يالاه ..(ديمارا بالزعفة)
الناس كتصلي التراويح وسعيد جالس كيضبر الشقوفة فالسطح وحداه كاس دالقهوى والميكة ملوية دلكيف والصهد ،،سمع الحس فالدروج وناض كيجر فالبلغة والقشابة لابساه طل وقال
سعيد:شكووون؟؟
ذكرى:غير انا ..وياسين قالك جا يشوفك
طلع عندو ياسين بداك الصوت غليض
ياسين:سسسلاام عليكم
سعيد: ااه ياسين!! كيف نتينا لاباس يماك لاباس
ياسين: لاباس الحمد لله
سعيد : زييد زيد(كيعيط) ذكراااا..ااذكرا ..جيب شي كاس دالقهوى لياسين جيب…جلس جلس مرحبا
جلس حداه ياسين على واحد الكرسي قدام ديك الطبلة اللي حاط وجلسو بجوج واحد شعل جوان ولاخر كيضرب الشقوفة
سعيد: خوتك لاباس كيف ماشيين مع الشغل
ياسين: الشغل مكيساليشي..رجل فالدنيا ورجل فالقبر
سعيد: كاملين هايداك لا لي بالشغل لا لي بلاشغل…كعملتي شي بيعة وشرية نعاونك نخدم معاك ..انا غير جالس جالس
ياسين: شاف فيه بنص عين) ماعنديشي الخاطر هاد الساعة
سعيد: تنهد) انا من الساعة لي جلست من لخيدمة ماجبرتشي خيدمة اخرى..واالو.. ذكرى مسكينة لي هازة كلشي..كتعز عليا
ياسين:فين مشا ولدك ؟ من نهار خشا رجلو فالغيس ماعاود ضهر
سعيد: راه في فرانسة كيدور ماجبر والو ..قالك مابقاتشي لخيدمة..مكاين والو
ياسين: شار براسو) شعندو مخلوع ؟؟ خايف يدخل للمغرب ولا؟
سعيد: وقالك انا ماعملت فيها ماينفع مع ياسين وغرني الشيطان ..وتبعت ذكرى وهي ماعندها عقل وهوا ماشوفت منو غير الخير ..مابقاليشي الوجه باش نرجع
ياسين: واقولو رجع رجع .. فوجه سي كيدوز شي ..كن كان شي مسخوط اخر كانت عتكون هضرا خرا
سعيد: ااودي..(تنهد) كتشوف العايلة دابا مشهورة وخدامة وباباها تشو كيف عامل..كنحشم بيها ..لاشغل لا والو لازهر لا والو
ياسين: طلع فيه) حسن ليك تبقا بلاشغل ولا تبقا بلاشغل وفالحبس من لفوق
تمسكن عليه سعيد حتى تمكن،، وقا ياسين يدو متقوبة حتى هوا لي قاليه عاوني كيعاونو ولي قاليه عطيني كيعطيه وواخا ماعندو غرض بشي مشروع مشا كيفكر وبقا سعيد تابعو بتيليفون كل مرة يملي عليه بلان حتى بانت ليه فالقهوى وقال اجي ندخل القهوى من سبانيا ويبدا يفرقها على المحلات ونيت يخذم فيها سعيد اللي جالس مسالي .. داكشي لي دار نيت وذكرى مافخبارها والو .
نهار العيد صبح كلشي معيد والعيد فطنجة كيدوز على حقو وطريقو بكل تفاصيلو والزينة ديالو..ميمكنش يدوز بلا شي جلابة دو بياس دايزها الكلام بالخدمة داليد والراندة على شعرة والكمام واسعين والفتاحي فالجناب وفالصالة مخزاينة.. وشي لون فلكرونة دم الغزالة ياسلام كل طلعات مع شي صندالك عالية حتى فلكرونة والشعر مطلوق حتى للمؤخرة ويفًي والروايح كتعطعط ، هاكا عيدات ذكرى مع مها ونورات عليهم الدار بالضحكة والبهجة وهاكا تشاركات العيد والمباركات مع متابعينها وطلعات لياسين فسطوري وهوا كيرش الريحة قدام المرايا والحوايج جداد تقول معيد حتى هوا ، واقف شاد ريحة وكيدوز فدوك سطوريات حتى داز عليهم كاملين ودوز ابيل فتيليفون
ياسين: وصلتيها ؟؟ …. وشنو عملتي معاهم ؟ ….. ايوا هاحنا نشوفو
قطع ورجع تاصل بذكرى
ياسين: ماشيري .. فاين نتينا ؟
ذكرى: انا فالدار
ياسين: وشنو ندوز عندك نخرجو
ذكرى: انا غنمشي نطلل على با ماعيدتشي عليه عاد نشوف شني نعمل
ياسين: وا تتلاقاو عند باك يالاه
داز حدا نورة وهي معيدة بالازرق والشعر مطلوق كحل والزين شهوة منها لاكن شكون شافها! تقول معمي الله يستر ومابانش ليه لونها نهائيا ولا شاف فيها !! جلس شوية ولعب شوية مع بنتو وعيات غادية جايا كتشالي بشعرها لاكن والو حرام واش هز فيها العين حتى وصلو مسج وهوا جالس ضاحك ناشط لقا مسج من ذكرى
دكرى: انا عند با دابا الدار عامرة بفاميلا
ياسين: صافي بلا نطلع هبط نتي فاش نعيط لك
ناض خلا الدار عامرة شي داخل شي خارج العائلة وخواتاتو مجموعين تما والهضرة وكلشي ملهي ومشا ركب سيارتو غادي وتيليفون كيصوني
ياسين:فتح فمكبر الصوت دالسيارة ) الوو
البنت: ياسين لاباس؟ مبروك العيد
ياسين.علينا وعليك
البنت: فاين نتينا غير فطنجة
ياسين:غيير هنا
البنت:ايوا شنو نتلاقاو هاد العشية؟
ياسين: حتى نعيط لك مامساليشي هاد العشية عندي الشغل
البنت: ايوا عمل حسابك نتلاقاو وصافي
ياسين:نشاء الله
البنت: اجيتشوف الدار كيف تفرشت غتعجبك
ياسين: حتى نسالي ونعيط لك
البنت: واخا زايني انا نستناك
قطع معاها ومشا كمل طريقو في حين جالسة ذكرى كتهضر فتيليفونو هادي ساعة والهضرة اللي خلات مع امها كملاتها فتيليفون واخا الدار عامرة مشات للسرجم ووقفات كتهضر
ذكرى: عندك الحق هادشي اللي خصني نعمل
الام: اااايوا خصك طلع لو فراسو .. نتينا كتعمل العكس داكشي علاش مابغاشي يتفاك معاك.. غيحس بالشمتة ادا نتينا سمحتي فيه.. عمل شني قلت لك وشوف واش غيجيب نتيجة ولالا
ذكرى: لا راه دبصح عندك الحق كعملت هايدا شحال هادي كراه هرب ..بلحق ماطاحتشي فبالي
الام: كلشي بلعكس..جرب وشوف شني يخرج منو
ذكرى: صافي عنقلب الورقة من دابا ونشوف ،، يالاه تهلالي فراسك اماما بسلامة
قطعات وبان ليها وقف حدا الباب لتحت وقبل مايصوني نزلات كتجري فالدروج وتقرقب خرجات زربانة لقاتو يالاه هز تيليفون يصوني ليها! طلعات وطلع فيها جاتو فشكل تنزل بلا ماتنشرو واحد نص ساعة على الاقل وقال
ياسين: سنيورا!
ذكرى: معبسة) تعطلتي من الصباح وانا فالسرجم كنستناك
شافيها معجب وقال
ياسين: متعطلتشي درت معاك الربعة عادي ربعة ونص
ذكرى: ايوا شني عملتي ليوم كنتي جالس غير فالدار
ياسين: الدار والعائلة شي داخل شي خارج والصدع وصااااافي ..فرعو لي لكرر ديالي
ذكرى: امم العائلة ولا نورة؟؟
ياسين: شكون نورة عاود؟؟
ذكرى:نورة الزوجة الصاالحة العفيفة ،رجعتي جالس فالدار بالنهار وبالليل
ياسين:خسر وجهه)شعندك العايلة رجعتي كتغير ولا؟
ذكرى: مكنغيرشي غير كنسول
ياسين: واسكتنا من تخسار دالهضرة..(دور المقود) نورة ولاا للل…
زاد مع الطريق غادي وطالق الموسيقى حتى شوية دور وجهه شاف فيها وقال كيحط يدو على فخدها ويدير
ياسين:جات معاك الجلابة
ذكرى: اااااي اااي يااي(شدات فخدها) قصحتييني
ياسين. قصحتاااك(دبل عينيه)
ذكرى:دفعاتو) عمل عقلك شعندك مابغيتيشي تكبر
ياسين: عااجبني راسي ..(تجبد ) مرتااااح الحمد لله
ذكرى: قولي (ربعات يديها) حتى نورة قلتي لها جات معاك الجلابة وطلعتي معاها واحد القرصة هاااايلة ياك
ياسين: دور وجهه ليها ) طلعت معاها واااحد الليلة هااااايلة …منعسناش حتى طلع النهار
ذكرى : تصدمات) اياااه!!
ياسين: عمممري نسا هاد الليلة … دور راسو) مادوزتهاش حتى معاك نتي
ذكرى:مصدومة)
ياسين: صبحت ناااشط …خليتيها عطير بالفرحة
ذكرى: رجعات حمرى)وا حبس هنا قبل منطير انا ونتينا وهاد الطموبير فالهوا …حبس لي نزل ورجع عند الهايلة ديالك
ياسين: نطيييرو فالهوا نقلبوها دااابا
دور المقود بقا كيدي فطموبيل ويجيب وزاد فالسرعة بالجججهد بدا كيتسمع صوت الطموبيل بحال الطيارة تقول نازلين من السما حتى بغا قلبها يخرج بدا تغوت وهوا زاد اكثر ولات طموبيل كطير فوق الارض ومرة مرة يدير سي فرانات ويدوز بين طموبيلات ويدخل بيناتهم. حتى كتقول غيدخل فشي طموبيل يطيرها بلخلعة كتسد عينيها ، قطعات النفس مغمطة عينيها وهوا كيطير طيران الصقر ماوقفش حتى وصل لمارينا عاد نقص السرعة ودخل وقف بين السيارات وتلفت عندها وزير على فخدها عاوتاني
ياسين:جبتي المايو
ذكرى: قول واش جبتي الكفن
ياسين:حنهضر معاك!! جبتيه ولا غتعومي بطانكة لي لابسة تحت جلابة
ذكرى:صغرات عينيها) باش عرفتيني انا لابسة طانكة!!
ياسين: هز يدو)هوااية !! سبحان الله
نزل خلاها حالة فمها هز واحد الصاك من الكوفر وهزات صاكها الصغير وصاك اخر كبير عليه مشات كتعوج وهوا غادي كيلعب بالسوارت مشاو طلعو لليخت ودخلو للبحر غير هما بينما مارينا كتعج بالناس لي معيدين وليكوبل خارجين والمزوجين دايرين اليد فاليد بجلالب وكل واحد معيد على طريقتو
دخلو لداخل حتى بعدو مسافة على انضار الناس ووقفو اليخت وناض من بلاصتو فين كاين سايق رجع اللور لقاها جالسة شادة تيليفون كتبادل التعييدة مع الاصدقاء ، تلاح حداها ولاح يدو طل على تيليفون لاكن بعداتو وقالت كتمد يدها لجيبو
ذكرى: ارا نشوف نتينا شني عندك فهاد تيليفون
ياسين: ماعندي واالو
ذكرى: ايوا ارا نشوف هاد واالو بعيني
ياسين: كحز عليها) واالو مافيه والو
ذكرى: نتينا تقلبلي تيليفون وترميه فالبحر عندك عادي! وانا لا زعما ..عطيني نشوف
مدات يدها بغات تاخد تيليفون وخطفو وهز يدو كيضحك
ياسين:ي غير الخدمة لي فيه مافيه والو
ذكرى:ارا نشوف الخدمة
ياسين: لا معندك ما تعمل بيها بعييد عليك هادشي
ذكرى: مغندهلشي نحقق فالخيدمة ديالك غنشوف غير المكلمات والميساجات والتصاور
ياسين: ناض هرب
لقاتها من الجنة والناس تمكد على طواسلو العيد حتى يكره علاش خرجها وناضت قالت بغضب
ذكرى: شعندك هربتي شني عامل فداك تيليفون؟ عطيني نشوف
ياسين: والو ماعندي والو(دارو مور ضهرو وطفاه) صافي طفا تهنيتي دابا!
ذكرى: وامشي رجع عند نورة ،،عمل عليها لحماق ديالك هي لي قابلة عليك وكمل معاها اللي بقا ليك لبارح
ياسين:كيضحك) ماخليت حتى حااجة مورايا كملت كووولشي الحمد لله
قالها وهوا كيحيد حوايجو وتلاح على ضهرو فالماء كيغمزها وغطس خلاها جالسة مربعة يديها كدور فعينيها ، مالقات منين تشدو وشدات تيليفونها جلسات تنشر فسطوريات وتحط فالثراء وتفقص عديانها فالميدان حتى طلع من الماء كيشير بيدو رشها لوجها وقال
ياسين:نقص نقاااص من التصاور والتقحبين فالسطوريات .. صافي نزلتي تصاور الصباح باركتي العيد وصافي غبري خليهم يتوحشوك
ذكرى: دورات راسها) اممم نتينا زعما الشيخ !! الكونط ديالك رجع فيه التفاعل كتر من ديالي بالتصاور لي دابا وساعة تنزل فيهم ها الطموبيرات ها الطيارات ها الفلوس قد الثلاجة شي فوق شي
ياسين: هز حاجبو كيفرنس) مكنزلشي وجهي ازايني مكيعرفني تا واحد
ذكرى: مكيعرفوكشي بلحق عللموك بداك الخاتم باين فكاع التصاور وكاع الفيديوات ! حتى نتينا تبليتي (كدور راسها) رجعتي تصور وتنزل وعملتي المتابعين !! هااي هاي هاي دغيا وصلتي اربعين الف
ياسين: جلس حداها) حسدتيني ولا؟ نعطيها لك
ذكرى: دابا البنات تجبرهم هااايدا عليك!! كي دووود
ياسين:مسح لحيتو ) والله العضيم الى كي دوود مكدبتيشي
ذكرى: عاارفة عارفة .. داكشي علاش كل مرة منزل فيديو .. مرة كتسوق مرة فالبيران ومصور لفخاد عريانين ..شوفوني جالس مع مع لبنات
ياسين: اااه ولاهيلا..ميقولوشي هادا محروم …ولا يقولو لوبيا
ذكرى.دابا هادا هوا تفكير عندك؟!! على عقلية
ياسين: ماعندك ماتعمل بلعقلية ديالي (جرها) ارا نشوفو داك الطانكة ..نعوطها لك عواجت لك
مني منك مني منك بغا يجر ليها الجلابة خافت يقطعها وناضت حيداتها لبسات واحد المايو ياسلام من برادا كحل دو بياس والجسم مشدود ومنحوت والشعر مطلوق والنضاضر ومشات عندو كان شاد كارو فيدو وغير جلسات جرها وعنقها بديك اليد اللي فيها كارو وهز تيليفون بغا يتصور لاكن هربات وجهها وقالت
ذكرى: لالا متصورنيشي
ياسين: شعندك ؟؟خفتي نشرك؟
ذكرى: لا مانزلاشي
ياسين: عندي تصاورك على الجهد كن بغيت نشر ليك شي تصورة(طلع وهبط فيها) فين تبان هاد تصويرة نسيتي ولا؟
ذكرى: كنا مزوجين ديك الساعة
ياسين: (بسخرية)مزوجين، شكون عرفك كنتي مزوجة
عنقها وهي كتخبي وجهها وقالت
ذكرى:ماتبينشي وجهي
ياسين: لا
بعد تيليفون وهي كتشوف فلكاميرة وبغفلة شلقمها وضرب ليها واحد الصورة من داااكشي الرفيع وبدا كيضحك وهي مصدومة بغات تاخد تيليفون وبقات كتجبد فاللخر جلسها وشد الصورة حطها فسطوري وقطعها خلا غير كتفها باين ويدو فيها كارو معنقاها وداك الخاتم فصبعو وحطها واحتافظ بالصورة المكمولة فتيليفونو .
لاكن هايهات ثمن هايهات مع المتابعين والصفحات دغيا شدو ديك الصورة لي حط وشدو سطوري ديالها نفس الفوطوي ونفس اللون وكانت فيه اسم منقوش فالجلد فالضهر تشد فسطوريات بجوج وناضت عليها الحيحة والبارطاج والقيامة قامت على داك السطوري واول واحد سيفطو ليها هوا شاكر .. مع تحطات فاول صفحة هزو سيفطو ليها وطارت كتولول بسرعة نوضات العافية فياسين ودخل مسحو دغيا عاد تهدنات لاكن عاد مازادو الصفحات تأكدو بأنها فعلا حقيقية وهي فعلاقة مع مول داك الكونت وبدا القيل والقال والفضول وكلشي بغا يعرف وكلشي فالتعاليق كيسول شكون لي حط تصويرة ،،شي كيقول مسحو وشي كينشر حسابو وهوا حسابو مسدود ..ضرب ضورة هوا وذكرى ورجع دخل لقا جبل ديال الناس مسيفطين ليه متابعة كلشي بغا يدخل واولهم شاكر هوا اللول وبوسطات اخرين منشورين عليهم كل واحد حاط عنوان من راسو وناشرين الكونت دياسين ، هزوه فالعمارية بلا خلاص وبداو يبارطاجيو حسابو اللي داخل بيه بسمية ya.sombra على اساس حط داك السطوري ورجع مسحو
خدا الموضوع ضحك وصافي لاكن هي تحسسات من البوسطات اللي كيتحطو عليها ورجعات عاوتاني موضوع الساعة وهاد السيمانة مغتهنى حتى تبان شي شوهة اخرى ديال شي واحد. واخا ولفات ديك الشوشرة ومابقاتش كتأثر بزاف لاكن تقرصات ًشوية ومشات كتعوم وتتلف الجو هي وياه . كانت كتعوم مابيها ماعليها حتى مشات للدروج بغات طلع وهوا يلسقها معاه وقرب عنقها وشد فالدرجة الللوة اللي وراها وهي بين يديها كترجع شعرها لور وتقادو
ذكرى: علاياش كتقلب؟
ياسين: باسها فعنقها) توحشتك
ذكرى: لبارح بايت خدام ماعيتيشي
ياسين: شافيها بعينين دابلين) تيقتي؟؟ غنمشي بحال الكلب نشمشم فنورة
ذكرى: ماعرفتشي مناين نشبرك ؟؟ دوختي لي راسي متبقيتشي عارفة الضحك من المعقول
ياسين: واغير كنضحك معاك ازايني (باسها فعنقها من الجهة لاخرى)
ذكرى: كتتهرب) عييت..الضغط على قلبي الماء تقيل
ياسين: عبس) حتى كنجي انا نبوسك عاد كيتقل لك القلب وتجيك البولة ويطلع ليك الضغط
ذكرى : نتينا خصك هااه.. انا منقدرشي ..وهادشي كيوصل لداكشي .
ياسين: زيرها بقوة) رخف راسك براكة من تعصار د ززز… يوصل مايوصلشي عيشي اللحضة شوية مالك على هاد الاعصاب
ذكرى: ونتينا مالك على هاد التبرهيش..انا خصني سي واحد تقييقل ..شي واحد شارب عقلو
ياسين: ها نتي معايا حتى نوصل ربعين عام وغنتقال ونشرب عقلي..دابا غنشرب الدم ديالك الى ما رصيتيشي
ضرب ليها واحد البوسة وشدها تما كيبوس فيها مص ليها عنقها وصدرها خلاها زرقة كلها تحشم تعري عنقها . ماطلقها حتى نشفها عاد طلعات كتجري ومشات هبطات للطواليط دفعات الباب بزربة وشافت المرايا لقات حالتها حالة مشوهة ..بقات كتشوف ودوز يدها
ذكرى : هيييه!!ً اواعدي على فضييحااا!!!
رجعات طلعات لقاتو جالس شاد تيليفون وقالت بأسى
ذكرى: شني عملتي لي اياسين تشوو على منضر
ياسين: هز عينو ) يالاه تستر دوك البزازل شوية
ذكرى: اواعدي وشني عنقول لماما
ياسين:رجع شاف فتيليفون) قولها ياسين
بقات غير كتشوف فيه ومشات كتنفخ جمعات شعرها وسمعاتو كيعيط ليها
ياسين: لبس حوايجك ادكرى غنرجعو
كانت نيت كتلبس وتجمع حوايجها فداك وجبدات فوندوتان بدات كدهن وتعاود درقات شوية ديك الشوهة ومشات جلسات كتشوف تيليفون لقات الروينة مزالة نايضة .
وصلات لمارينا ونزل لابس حوايجو مبوكص وشد ليها فيدها هبطها وهي مهبطة راسها والشعر على وجها باش ميعرفوهاش الناس.
لاكن شكون خلاك تعيش هاني وضريبة الشهرة ضريب تقييلة.فاعلة خير صوراتها منزلها من اليخت وشاد فيدها وناضت سيفطاتها لصفحة كبيرة مولفة تشوه المشاهير وكان فيها اكبر عدد من المتابعين.واخا عمر ديك الصفحة ما جبداتها لاكن هاد المرة ميمكنش تزكلها..الهضرة والضجة عليها نايضة والصفحة معروفة كتجيب الاخبار النكغة لي ماطاح عليها حتى واحد وديما فالصدارة ودينا خالقة الجدل.وهاد المرة حطات ليهم الصورة ديال مول الكونت شخصيا وذكرى حتى هي وكاتب بسخرية ( هانا وضحك ليكم الصورة ديال الدكتورة ذكرى .. ومزال نحط ليكم الجديد تسناو الاخبار )
صورة كانت كافية تشعل العضب فياسين وطيح السكر لذكرى من شدة الصدمة .
شد الفران فالجنب وهوا فطريقو يوصلها لدارهم وحبس كيشوف فتيليفون ذكرى اللي ن جنونها وبدات كتغوت وتشد فراسها
ذكرى: اوااعدي شني هاد الفضيييحة صافي تفضحت صافي
ياسين :كيشوف فتيليفون ) شكون هادا ولا هادي اللي نزل التصويرة ؟؟؟
ذكرى: شدات وجهها) صاافي مشات الصمعة ديالي والكاريير وكلشي مشالي كلشي اللي تعبت فيه وخدمت فيه ضربو لي فالزيرو هاد الكلب الله ياخد فيه الحق
ياسيني خزر فيها) كتعرف هاد الز٠٠ هادا؟
دكرى: كتبكي) مكنعرفوشي هوا معروووف داائما كيفضح الناس بلحق حتى واحيد ماكيعرفو شكون ..حتى نتينا دابا بنتي معايا تفضح وجهك (شدات راسها) صافي غيجبر طارق مناين يشبرني عاود غيرجع يمرطني فحياتي
ياسين: بتوعد جبد تيليفونو )شنو اسمو هاد الكلب كتعرف عليه سي حاجة ؟
ذكرى: مكنعرفوشي (كتمسح دموعها) بلحق شاكر كيعرف بزاف دناس يقدرو يكونو كيعرفوه
ياسين: هاد شاكر ديالك نتيقو فيه؟
ذكرى : شافت فيه باستغراب)مافهمتشي؟
ياسين : عيط لو هضر معاه (صغر عينيه قدامو كيطقطق بصباعو على المقود) هضر معاه نسمع (صونا ليه تيليفون) طارق كيصوني(نفخ)
ذكرى: ببكاء ) قلتها لك ..قلت لك طارق غيرجع يمضني فحياتي
ياسين: عيط لهاد شاكر وبراكة من البكا
ذكرى: ربطات الخط) الو شاكر (شافت فياسين وكبرات الصوت)
شاكر: لقيتيني يالاه غنعيط لك
ذكرى: شفتي شني وقع ،،بقيت لو غير انا ،،انا خصني نعرف غيير شنو عملت لو؟؟ شني انا عملت فالدونيا فاين كيعرفني ينزل عليا الفضايح وانا ماعنديشي العداوا مع حتى واحيد
شاكر : عادي راه كيبغي يبان واعر ويخلع بنادم ..اصلا مافيها والو عاادي مالو حطك عريانة
ذكرى: راه نزل الصورة دياسين وياسين مكيبانشي ماعندوشي الحق دابا كلشي رجع عارف ياسين
شاكر: وااا ختي شغنقولك ..والله ماعرفت منقول
ذكرى: كتعرفو نتينا شكون؟؟ كتعرف هاد المسخوط شكون يكون
شاكر: مكنعرفوش شكون بالضبط ولاكن لي عارف عليه معايش هنا
ذكرى: فاين عايش هاد مسخوط الواليدين
ياسين :خدا ليها تيليفون) الو ..معاك ياسين مزيان الخاوا كلشي لاباس
شاكر: الحمد الله خويا الله يحفضك
ياسين: الحمد لله .. نسولك الخاوا كتعرف شي واحد قريب منو ولا كيعرفو
شاكر: الصراحة لا..لي عارف هوا عايش برا
ياسين: انا معندي معندي منعمل به هوا..انا خصني الجدوور ديالو فين ما كانو .. العروق ديالو اما هوا ماخصنيش حتى لبلاد فين عايش
شاكر: زعما عائلتو؟
ياسين: اه خصني عائلتو وغادي نجبدها غير مافيا لي يصبر هاد الساعة ، ادا قدرتي تعاون معايا نعرف شي حاجة عليه دغيا
شاكر: انا غنشوف ونرد عليك باش ما كان ..الصراحة ماشي بلان هادشي اللي دار ماشي منحقو
ياسين: نتا غير شوف لي الريحة ديالو فين عاطية وصافي،، حقي غنجيبو منو بالروح ولا بالدم والا قدرتي توصلو هاد المسج هادا مزيان
هبطات وجهها كتسمع ماحملاتش راسها خلاتو حتى قطع وقالت
ذكرى: شنيي غتعمل معاه ولي عطاه الله عطاه صافي ، تصاور منشورين والمشكلة عملناها بيدينا ، نتينا نشرتي تصويرة ديالنا والكتفة ديالي عريانة باااينة للعمى مبحرين وجالسة معاك بالبيكيني
ياسين: كيشوف قدامو ) مافيها وااالو كاع الناس مبحرين كاع الناس كيتصاحبو كاع الناس كيتح٠٠٠او كاع الناس مخورة للنخاع بلا متفرع لي كري دابا،، انا بالي مع التصويرة لي نزل ديالي بالكمارة باينة وغنرجع للمشاكيل بسبب هاد القلا٠ي
ذكرى: يااك ؟؟ انا مكنهمكشي نتشوه ونتفضح يالك كيهمك غير راسك
ياسين: كيصوط) انا راه مسجل عند الدولة فالحبس فهمتي ولالا..دااابا راني مزال مسجل كندوز فالحبس على التهمة دلقتل وهاداشي علاش طارق كيعيط من الصباح مكنجاوبوش ، المشكل ديالي قود من ديالك وماخصنيش الصدع غيتجرو فيها الناس بزاف ادا ناضت الضجة عليا وبداو ينبشو غيبداو يمشيو فيها منالكوميسارية وهما طالعين كيجمعو حتى للمدير دلحبس ويقدرو يوصلو لطارق وشحال من يد (دور وجهه كينهج) هاد ولد لقح٠٠٠ نعرفو شكون نمحي ط٠٠مو من فوق الارض
دكرى: وانا(مصدومة) شني غنبرر للناس؟؟ ادا نتينا جبدو لك هادشي كامل انا شني غنبرر للناس والنيفو ديالي غيطيح قدام الناس
ضار شافيها واحد الشوفة عميقة وجرها من رقبتها حتى لعندو كيحنزز فيها وقال
ياسين: الفلوس هما النيفو كتفهم ؟؟ المصايب مكيتحلوشي بالمناصب وبالفهامة الخاوية ديالك وهاد القلا٠٠ي لي عندك فراسك…الفلوس هي اللي كتعلي المقامات وطلع فنيفو واللي راجل من هادوك نيفوات ديالك لي كتعرفي يجي بلاصتي .. المخيير فهادو يوقف قدام المافيات يخرا فالسروال سمعتي..المخيير فيهم تحطلو لكراطن دلجيني الاسترليني يتسطا وميشي سبيطار ..المخير فيهم تقولو صرفهم يتشد مع الصرف ..جيب لي واحد يعمل هاد الدورات هادو كاملين ويبقا حي(طبطب على خدها) النيفو هوا هادا لي نتي جالسة معاه ماتعاودشي تعمل مقارنات العايلة
خربق ليها تركيزها خلاها جالسة وكدور فعينيها وهوا كيخمم وصبعو حدا فمو حتى صونا تيليفون للمرة لمليون وهزو جاوب باحترام
ياسين: Hola, ¿qué tal? Todo bien
مع غيبدا طارق يسب خرج ياسين من طموبيل كيهضر الاسبانية وخلاها جالسة دايرة يد على حنك وكتخمم وطالعة نازلة كتشوف راسها فوق العمارية وكل واحد اش كيقول عليها ، كاين لي عاجبو الحال وفرحان وكاين لي عامر عقد نفسية وحقد وسم وبلا صحاب حلال وحرام تقول غيخلصو عليها الجنة بحسناتهم ، اما اللي تزعطو فياسين لا كلام عليهم جهلو فالتعاليق وخرجو الكبت اللي خلا الدراري مصدومين مابقاو فاهمين والو فالبنات ! التحرش والمدح والتزلال بالعلالي ، جلسات شحال كتخمم وحتشوف فداكشي والمساجات على الجهد مرة مرة كطل تشوف وحسابها كيطلع والمتابعين كيتزادو حتى لواحد شوية دارت ليها الطق فالراس وقالت مع راسها
ذكرى: انا ماالي على هاد الحالة ؟ مزيانة ليا هاد الطلعة وهاد البوز والناس كتخلص عليه الفلوس وكتعمل الفضايح بيديها وانا كيجيوني بلا مجهود وكل فضيحة كدير بوم بحال شي قنبولة ، من بعد؟؟ هاهما حطوني انا وياسين ياك بعدا ماتصوتشي مع شي واحيد شااارف هاتر يقولو عليا كتبيع لحمك ويهزو عليا عطاية وام شنطة
شافت حتى عيات وتقبلات الفضيحة من بعد تخمين عميق وطلات من النافدة لقات ياسين مزال كيهضر فتيليفون وطالع ليه الدم ماعرفاتش شنو غيدير حيت كما كان الحال فضيحتو هوا كبر من فضيحتها وفيها المشاكيل من غير الشوهة غادي يتمحن فيها ، اما هي تهز يديها وتقول مكنتش عارفة ما وراء الثراء ديالو والمشاريع الحرة لي عندو وتعرفات عليه فشي دولة ومعايش كاع فالمغرب وتخرج من باب واسع ، فحرات وشبعات تنهيدات ورجعات تاصلات بشاكر
ذكرى: شاكر فاين نتينا ؟
شاكر: جالس مع شي عشران وصافي هانية؟ اش درتي مع ياسين؟
ذكرى: والو غير كنشوف هاد الفضيحة غادي تعمل ليه المشاكيل
شاكر:تنهد) واايلي تانتي لشمن مشاكيل هادشي عاادي .. كان غيبان واحد النهار مالو غيبقا مخبي ديما
دكرى: تنهدات) نتينا ماعارف وااالو..المشكلة ماشي فهادشي..المشكلة ياسين مسجل فالحبس بلي راه داخل للحبس فهمتي؟؟ يعني هوا مقيد سجين دابا وخرج حسي مسي ماعارفو تا واحيد وهادشي غيجيد ليه الصدع ادا جبدوه ونبشو فحياتو وخوه دابا راه مرشح للرئاسة وهادشي فيه المشاكيل عيخرج كولشي
شاكر: اوااااه!!!! خوه مرشح للرئاسة كاع؟هادشي مشا بعيييد
ذكرى: ااااه وخوه ماشي واحيد لي ساااهل.. فاين يبان ياسين قدامو..ياسين راه والو قدام خوه .. وهاد خوه هادا راه يقلع اي واحيد من طريقو شكون ما كان باش متكبرشي الفضيحة
شاكر:وشكون هاد الاسطورة هادا ؟؟
ذكرى: بلا متعمل راسك فالمشاكيل اشاكر..انا كنهضر معاك نتينا حيت عارف ياسين شني كيسوا ومتبغيشي تخرج على راسك.. بلا متسولني كتر والمهم راك عرفتيه..دابا هادا لي عمل هادشي فينا موحال عارف راسو فاين تورط وخدام كيضحك ويلعب نا عندو شغل
شاكر: وااع على بلان..دابا شنو ناوي ياسين يدير معاه ؟ شنو قالك؟
ذكرى: ماعرفتشي شني تحت راسو مكيقول والو بلحق انا متأكدة غنسمع شي خبار فهاد سوشل ميديا كاملين بينا.. هوا دابا كيبان ليا مركن مكنضنشي غيتحرك يعمل شي حاجة حيت كيتسنا العفو باش يخرج زعما فهمتي..ماتبقاشي السمية ديالو مسجلة كسجين
شاكر: وراه اليوم غيقولو شكون عفا عليه الله فالاخبار
ذكرى: وحتى هوا شفتو مركن كيتسنا حتى للاخبار دلعشية (شافت جهة النافدة) من بعد نهضرو ..المهم لي بغيت نقولك انا مابقاشي كيهمني البشار يعرف ولا يجلس ومابقاتشي كتهمني الشوهة ..خصني نصور شي حاجة مور هاد الفضيحة
شاكر:دابا اي سطوري حطيتي غيضرب ليك للمليون فراسك
ذكرى:ضبر ليا فشي استضافة فبرنامج ممتاز مابغيتيشي نهضر فسطوري.. بغيت شي حاجة ما حسن من بعد عاد نشوفو مع سطوريات خلي الناس تتسنى شوية
شاكر:وجدي اش تقولي اما البرامج دابا لي دويت معاه يقول ليا مرحبا ..غا وجدي باش تردي ضبري على شي سيناريو مشوق تزيدي طلعي بيه طوندونس وتبقا تما
ذكرى:صافي بسلامة حتى نعيط لك
قطعات وشافت فياسين لي فتح الباب وطلع كيسوط لاح تيليفون وقال
ياسين: صافي جا العفو ..غنتوالا هاد ولد الق٠٠٠ دابا
ذكرى :خرجات عينيها) شكون قالها لك ؟؟ بصح؟
ياسين:كيشعل كارو) طارق كان فخبارو عاد قالها لي دابا
ذكرى: فلعشية غيعلنو عليها ياك
ياسين: يعاودو لك٠٠هم يعلنو مايعلنوشي انا دابا خصني الورقة فيدي نجيبها ونسالي شغلي مع المخزن هادشي لي شاغلني
ذكرى: انا غدا غنمشي لكازا
ياسين:تلفت شاف فيها) شغتعمل فكازا غدا عاد تاني عيد شمن شغل عندك تما
ذكرى: عندي الشغل والله خصني نمشي..نتينا عندك شغلك مع المخزن خصك تمشي طرق المسامر ديالك
ياسين: ماعنديفلين نمشي انا المحامي غيطرق لي مسامري.. غنمشي معاك غدا
رجعات لدارهم راسها منفوخ ولحسن حضها لقات غير امها فالدار اما راجل امها مشا عند مو يبارك ليها العيد وشدو للعشا. دخلات هازة خنافرها وطالع ليها الدم لقات مها جالسة كتفرج وناضت من بلاصتها بسرعة فاششافتها رقالت
الام:ذكرى؟؟ على السلامة ديالم الحبيبة فاين تعطلتي مكتجاوبشي ف
تيليفون
ذكرى: جلسات كتصوط) كنت مع لكريمين دياسين عيدنا بالمصايب
الام: شووفت داكشي اللي نزلو شووفتو صرداتو لي عمتك
ذكرى: زعما شو ذكرى شني عاملة زعما الدل (كدور راسها) زعما الترابي وقلة الترابي زعما حشمات بينا
الام: ماجاوبتاشي عيات تعيط وعياو يعيطو لي ماجاوبت حتى واحيد (رجعات جلسات) هنيت راسي
ذكرى: كتحيد الجلابة) انا مابقاشي كيهمني البشار طلعلي فالراس الطانطو دلمخ ديالي،، (هزات كتافها ) مااالي انا هازة الهم لهاد ناس شني عطاوني وشني عيعطيوني ؟؟ مزيانة ولا خايبة شني جابت لي الوقت فالربح كن نا الفضايح باش طلعت وعملت البلاصة ديالي مكنتشي عنبان !! شحال وانا فداك كلينيكة خدامة ماكيعرفني حتى واحيد وكنشبر جوج دلفرنك وماعملت والو.. حتى بداو الفضايح كيجيو عااد انا ترقيت وطلعت لفوق وبداو يجيوني الاعمال ويجوني الفلوس وزيانت لي الحياة
الام: تشوو نتينا عمل لي مسلكك ماديهاشي فالناس.. عمل لي ترتاح فيه
ذكرى: تخايل دابا كبقيتي مع با باش الناس ميهضروشي عليك شني كنتي غتعيش يالاه؟؟ كبقيتي فديك الدار عايشة كمرضتي بشي مرض الله يستر ..دابا مهنية مع الراس ديالك عملتي اللي بغيتي نتينا ماشي اللي بغاو الناس
الام: اي والله عندك الحق كبقيت نسمع للناس كن راني صابرة تقول هاد الناس ولدتهم من كرشي نهز ليهم الهم (تنهدات) شني عمل ياسين دابا؟ بقا كيطير حتى جاتو الضربة دابمعقول
ذكرى: لااااسق(شدات راسها) لاسقنيييييي امامّا لاسقني قالك خصو يمشي معايا لكازا مابقالو شغل غير انا
الام: وعملتي داكشي اللي قلت لك
ذكرى: عملت ماخليت ما عملت والو الرييح سايط ليه فمخو ..(شافت فيها بفشل) هادا مايتقل ويرزن حتا يوصل اربعين سنة وشووف تشوف..حتى يرجع واقيلا قد طارق عاد يتقال ويختر ويرزن (تنهدات) اما دابا ادا بقيت عاملة فيه راسي غيخرج لي عقلي
الام: شني غنعملو دابا (هزات يديها) فات الفوت مابقا فاين نرجعو ..من الاول مكانش علينا نعملو يدنا فيدو ..دابا صافي اللي عطا الله عطاه نشوفو القدام وصافي
ذكرى: انا اعباد الله مكنبغيييهشي..عووومري نبغيييه وعمري نبغي شي واحيد اصلا ..انا كنبغي راااسي راااسي وبسس مقادراشي نتوحشو ونحن عليه ..كنحيس براسي والفتو وصاافي .. شي مرات كنقول نكدب عليه نعملو الافلام باش منشوفوشي وكنرجع نقول ماشي مشكل مونسة معاه وكيونسني بالهبال ديالو واخا مخصنيشي صراااحة نتلاقاه
لام: مشي ترتاح متفكرشي بزاف مشي ..مشي وشوف المصالح ديالك هما اللولين
ناضت ذكرى مشات لبيتها ورمات الهم وراها وضرباتها بنعسة . وشي ناعس وشي غواه الشيطان وعمراتو تفسو ولقا الفرصة فين يشفي غليلو
هادي نورة اللي شادة الفراش فبيتها بوحدها كتفرج وتعاود وتقلب وتبحث على الصور لايكون شي واحد حاط شي حاجة جديدة ومشافتهاش. طالعة نازلة وكتغدد وتكبر واصغر فديك الصورة للي كان حط ياسين فيها يدو معنقة حتف ذكرى وكتحاول تحللها وترجع للصورة اللي نشرو ليهم نازلين من اليخت وتكبر وتصغر ..كيبان ياسين من خلال الصورة ونضرتو انسان متكبر ومتعجرف والطريقة اللي نزل بيها ذكرى ماشي ديال شي واحد عاشق ولهان ،،شاد ليها فيدها وكيشوف فجهة اخرى كأنه موالف يخرج معاها ديما ماشي ملهوف ولا باين عليه كيشوفها مرة فشحال ،،وهي كذلك كتبان كأن داك لجو اللي عايشة هي وياه روتيني بالنسبة ليهم .. هادشي اللي حكاتو الصورة كامل تمنات نورة تعيش منو غير شوية وتكون بلاصة ذكرى حيت هي اولى بديك الخرجة وهي الزوجة وهي اللي عندها روابط قوية بياسين ..عندها بنت وعقد زواج وعائلة جامعاهم .اما ذكرى مجرد عشيقة مخفية مخبية ماعندها حتى روابط وفوق هادشي معيوبة وعيبها كبير وحتى راجل مايقبل عليها .. وحدة عاكرة اشمن فايدة فيها ..مرى ناقصة واخا تكون كما بغات تكون .. واخا زوينة وكيوت وكلاص وطبيبة وممثلة ومشهورة لاكن هادشي ميجيش قدام الامومة وعيبها غطا على كاع دوك الميزات ..هادشي كيبرد القلب لنورة وكتشوف راسها حسن من ذكرى ، كتشوف راسها مرى كاملة مكمولة عكس ذكرى اللي عيبها كيقلل منها كامرأة ومكتشوفهاش كاع مرى . العكر كخليها تشوف وضحك وتقول ايوا صافي فاللخر مكتولدش واخا تكون كما بغات تكون .
باش تزيد تبرد على قلبها وتهبط ذكرى اكتر وتشوفها تخت منها ناضت حلات حساب جديدة ودخلات عند الصفحة اللي فضحاتهم وكتبات ليه جريدة فيها تفاصيل حياتها كلها قائلة
انا كنعرف دكرى شخصيا كنعرف كلشي عليها،،هاداك اللي مصورة معاه بزناس فطنجة ومزوج وعندو بنت وهي كانت مزوجة بيه وطلقها حيت مكتولدش ودابا رجعو يتلاقاو فالسر بلا خبار مرتو وعندي الدليل على شني كنقول
وصلات لكازا وشد ياسين اوتيل ..افخم اوتيل تقول قصر والدخلة ديالو واحة من الشجر والخضورية والنافورات.. استقبلوها فالباب هزو الشنط وهي داخلة ولفات ديك الحياة وداك التعامل وداك الرفاهية رجعات كتبان ليها الحياة فداك المستوى شيىء طبيعي ..نسات الزلط ونسات الفقر والبيت فالسطح كأنهم عمرهم كانو ..رجعات حياتها بالنسبة ليها روتينية و هاديك هي الحياة العادية اللي كتعرف حتى من طباعها تبدلو بزااف واخا كانت فالحقيقة فحياتها السابقة عايشة بحال الاميرة فكرا واحساسا وشعورا وكانت عارفة غيجي واحد النهار غتبدل حياتها للحياة المناسبة ليها وتلقى راسها فالمكان المناسب ..حتى من دوقها كان خصو الفلوس وغالي وكانت كتعدب فاقتناء ملابسها بالمال القليل اللي كان عندها . حتى من ماكلتها كانت كتشرط بزاف ولاكن قلة الشيء كانت كتبزز عليها ديباني راسها .باختصار كانت معدبة فحياتها .. كترقع قدر الامكان وحتى مها كانت ديما كتقولها ليها وتردد جملتها المعروفة ” نتي بلاصتك ماشي هنا ابنتي .. معدبة فالحياة ديالك” كانت كتقولها فكل مرة كتشوفها ناضت طيب شي حاجة من غير المرقة والطواجن ديما اللي كيعرفو ليهم وتبدا تقاد ماكلة تاكلها خفيفة واحيانا مكلفة واحيانا كدير بناقص فاش مكتلقاش باش تعتق راسها كتمشي تنعس وتتهنى
هاد الحياة كلها تنسات وكأنها عمرها عاشتها ومكتذكرهاش نهائيا وكأنه حلم وصحات منو . وحياتها الحقيقية هي لي كتعيش حاليا وخصوصا فاش كتكون على حساب ياسين كتعيش الرفاهية بطولها وعرضها
دخلات للغرفة ديالها اللي حجز وكانت كبيرة بزاف وجدرانها دائرية بالزاج ومزيج بين الاصالة التقليدية والمعاصرة ، وبحال الفنادق الفخمة مكيسلاطو عليهم بوليس مكيسولو على عقود زواج ..واللي عينزل عندهم ريشد بحال ديك الغرفة راه خصو يكون ميليونير او ميليالدير وحتى باش يطرحو عليه سؤال مخجل ميقدروش لانه ماشي من اللائق وماشي مستوى عادي ..بل بحال هاد الزبناء الاغنياء كيتحدر ليهم الراس وكيتعامل معاهم الجميع معاملة خاصة ولا مكان للفقراء او الناس العاديين فداك الاوتيل. واللي دخل مع الباب كيدخل فسيارة فارهة واقل غرفة عندهم لليلة الواحدة هي راتب مدير فمدرسة ،،فما بالك بباقي الغرف الفخمة والعالية فالجودة والسرفيس الخاص بيها
اول ما دخلات مشات نيشان جلسات على كنبة كتسوط وقلبات شعرها للجنب كتحلو بصبعانها والموضف كيستف ليها ملابسها فالخزانة ..اما ياسين بقا لتحت كيهضر فتيليفون .جبدات تيليفونها وتكات بالجنب على مخدة مريحة تربطات الخط مع شاكر
ذكرى:شاكر لاباس..
شاكر: الحمد لله وصلتي
ذكرى :عاد وصلت دابا
شاكر: شفتي الحلقة ديالك ديال كامرة كاشي شحال ضربات دالمشاهدات
ذكرى: ماشفت والو الصراحة راسي مرون هاد الساعة
شاكر: فينك اشمن اوتيل نزلتي فيه
ذكرى :انا فرويال منصور
شاكر:واايلي نزلتي فرويال منصور؟ غتخسري فلوسك اذكرى
ذكرى:كدوز يدها على عنقها)احمم معايا ياسين
شاكر : مهم ..انا نسقت ليك لقاء ماحد الحال حامي فهاد اليوماين .. خصنا نتلاقاو نشوفو شنو غتقولي فعاد اللقاء
ذكرى:نتلاقاو هنا فالاوتيل نتغداو مجموعين
شاكر: ماعنديش مشكل.. ياسين غيكون معانا؟
ذكرى:غالبا غيكون معانا
شاكر: صافي نديرو جوج؟
ذكرى: مزيانة (شافت الساعة) ماعندنا منضيعو فالوقت اصلا جيت على هاد الشغل
شاكر: مهم نتلاقاو ونتفاهمو .
ذكرى:صافي مزيان
قطعات وناضت خلات الموضف كيرتب ليها الحوايج وهزات تيليفونها ودارت كاسكيطتها ونزلات بسورفيت عبارة عن كومبين بني اللون لاسق باليدين وعندو سنسلة لقدام ورجليه واسعين مع حداء رياضي وكاسكيظة كحلة وفيست من لفوق قصيرة وواسعة رياضية بالكول عريض.دايرة نضاضر رقاق الشمش مدورين وفيدها تيليفون مشات كطلق رجليها تشوف روعة الاوتيل وفخامتو اللي لامثيل لها ..مزيج بين التقليدي والزخرفة والحداثة والمعصارة. الاسقف العالية الزجاجية والمرايا العملاقة والديكورات الفخمة شيء ولا فالاحلام. كان كبير بزاف فوق ما تصورات ماتسراتش فيه كامل فقط البلاصة اللي قريبة ليها ورجعات لقاتة الاستقبال اللي ابوابها كبيرة كطل على نافورات وحدائق كبيرة وسيارات فخمة كتوقف قدام الباب .سرحات عينيها لقات ياسين جالس على كنبكي فواحد الجهة فيها الطبالي والكراسا كيهضر فتيليفون ومشات عندو جلسات كتشوفيه وتسمع كيهضر الاسبانية وهضرتو كلها الغاز مافهمات والو ..اللي بان ليها هوا الموضوع متعلق بشغلو وشد ليه الوقت فالحوار حتى كمل على خاطرو وحط تيليفون كيسوط
ذكرى:شاكر ماجي يتفدا معانا..انا قلت لو نتلاقاو هنايا نهضرو على موضوع اللقاء لي قلت عاودت لك فالطريق
ياسين:هز حاجبو كيشوفيها) وشنو غتقولهم على العلاقة اللبي بيني وبينك؟
ذكرى: ضاروري يسقصيوني اصلا هادشي علاش عملت هاد اللقاء..(حكات جبهتها) ماعرفتشي باش نجاوب
ياسين: قولهم مزوجين
ذكرى: تصدمات) اواعدي على كيدبة!! والعائلة ديالي ؟
ياسين:تمشي تق٠
ذكرى: عيخرج شي واحيد يفضحنا عاود..نبقاو حنا مقابلين غير هادو
ياسين: سبك صبعانو) اييه وباش عترض عليهم؟
ذكرى.نتسناو شاكر يجي هوا موالف بهادشي فعاد الميدان ..يجبر لي شي تخريجة …شني عملتي خديتي العفو ؟
ياسين: حابو لي المحامي لبارح
جات ترد لقات مسج وصلها فالواتساب وبداو لينوتيفيكسيو كيوصلوها فحسابتها وهزات تيليفون دخلات تشوف لقات الطاك على الجهد فصفحة صاحب دعوتها ناشر ليها الغسيل الجديد فسطوريات ديالو بالادلة
جاتها صعقة كهربائية شدات فصدرها وحلات فمها مصدومة بتعابير بريئة وجميلة
ذكرى: شني هادشي؟؟؟ اوااعدي ياسسيين….صافي تشوهت اياسسييين
ياسين:شكاين ياك لاباس؟
ناض كيتسائل من بلاصتو جلس حداها وشد تيليفون فيدو بقا غييير كيشوف حتى بداو ودنيه كيصفرو وقال
ياسين: ولد لقح٠٠ااااا
وصل على اثرهم شاكر باين عليه كاين جاي كيطير مع وقف اول مرة يتعرف على ياسين لقا كشاكشو خارجة وذكرى شادة وجهها كتبكي ..بقا واقف كيشوف فيهم ومع الصلام مع قال
شاكر : شنو وقع واش صافا؟
ذكرى: هزات عينها فيه وناضت كتبكي) مشييت فيها اشاكر مشييت فيها
بلا متحس عنقاتو كتبكي خلات ياسين كيشوف فيها ويشوف فيه زاد زند مزياان
ذكرى:ياسين ..هادا شاكر المندجر ديالي
شاكر مد ليه يدو) شاكر رجل اعمال ومدير اعمال
ياسين:مد يدو بتحدير) ياسسييين
بقا شاكر كيشوف فيه بنص عين وجلس كيشوف اش واقع ضرب طلة على ديك الفضيحة لقا العنوان مكتوب بالطنز كتهديد لذكرى ” دكتورة ذكرى طلعتي ماساهلاش ماقلتيش لينا مزوجة بارون ديال العشبة ،اه بغيت نقول زعما طليقك ههه ومدوخاه على مرتو وبنتو طلعتي ماسويهلاش عندك شلااا اسرار هادشي ديالك مشوق نتي اللي نقولو عليك معللمة فين يبانو قدامك الباطرونات دالانتسا ههخخ
فاض الكاس عند ياسين من التهديدات اللي مرة طلع ليه وكثرة الاستفزازات خلاتو يشعل ويفيض الغضب من صدرو والغيض بغا يقتلو .ناض خلاهم جالسين وخرج لواحد لاتيراس شعل كترو لاحو ففمو وجبد تيليفون وجلس يدور تما حتى شد ليه الخط وبدا يتكلم الهولاندية ومن خلال كلامو كيتبين انه كيتكلم مع شي واحد اللي قد المسؤولية وكيتيق فيه وبدا يعاود ليه اشنو واقع ومكاينش من غير هاد المافيات لي كيحلو بحال هاد المشاكيل حسي مسي.مع قطع الاتصال سيفط ليه سكرين ديال الصفحة العدوة ورجع بحالو عند ذكرى من يديه ليها نوضها
ياسين:يالاه نمشيو بحالنا
شاكر:وقف؛شنو غنديرو دابا مع هاد خونا
ياسين: بالايجاب) ماشي مشكل.. كل حاجة فوقتها مزيانة
ذكرى:وقفات كتشوف فيه)كيفاش ماشي مشكل اواعدي راني تشووهت عمل شي حاااجة (جاها نهيار عصبي) فاين هي القوة ديالك والحماية زعما ماقدرتيشي عليه تقاداو لك معاه عولت عليك …
ياسين :جرها من يدها وعينيه فشاكر وعي كتغوت ) شكرا الخاوا صافي انا نتكلف متصدعشي راسك ..الله يعاونك
جرها وهي كتغوت خرجها لواحد الساحة كتبان من للعيد اولد موني ايقونة الجمال والاناقة والنقاوة وهي فلحقيقة غارقة فالوحل حتى لودنيها
ذكرى:مغتعمل والو !!! تخليه يمسح بينا الارض كيما بغا
ياسين: فرعتي لي كريييي رجعتي ستيييريو …سكتنا من الغوات برااكة
ذكرى:كيفاش برااكة!! دابا عاود عينشر شي فضيحة علينا نتينا اللي عتمشي فالرجلين ضبر راسك انا انا ولفت الشوهة
مشات وخلاتو واقف فبلاصتو
باش تبعد عليها الشبهات وتبان عادية مامتتأثراش بالموضوع خصها تحط سطوريات جداد وبدات بداك لاوطيل الفاخر اللي الاثمنة ديالو كتناسب غير الاغنياء فقط اما حتى مشهورين السوشل ميديا ميقدو على قهوة فيه الا الى شي غني جاب شي وحدة فيهم لتما.تماما نيت. بحال ذكرى..هي كصورة وواجهة واختيارها لملابسها والشكل ديالها وطريقة كلامها كتبان ثرية واخا فلحقيقة تجمع فالفلوس حتى تعيا وشحال دلاشهارات وشحال دلخدمة والشهرة ومع ذلك ماقدراش تخلص لملاين فالليلة باش تبات ليلة وحدة تما .على عكس ياسين فالصورة كيبان عادي حتى لباسو وشكله كتبان فيه البساطة واخا يدو ساوية مليار ولي مكيعرفش فالسوايع مايعرفهاش حيت كتبان عادية وكشكل كيبان بسيط الرغم من وسامتو ووقفتو كيبان مهييب لاكن اللي شافتو تقدر طمع فيه كشكل وزين وتبوكيصة وطيح فيه لاكن باش طمع فيه ماديا لا..مكتبانش عليه فاش كيكون على وجلو وحتى اسلوبو فالتعامل جد عادي ..ربما لانه حل عينيه على الدرهم عمرو اشتاق لشي حاجة الشيء اللي كيخليه متواضع فحياتو وكاع الفوحان والعياقة والتكبر دالعالمين معانو ذكرى حبة بحبة .
مادازتش ربعة وعشرين ساعة جاه اتصال وهوا جالس فالخديقة دالاوتيل كيكمي مع الطناش دليل وفتح الخط رد بالهولاندية وبدا يضحك بوحدو وقال
ياسين: صرد لي التصاور ديالو نشوف الكمارة ديالو كيفاش عاملة
المتكلم: واخا ..الى بغيتي تقوليه شي كلمة فنسيفط ليك النمرة ديال لي شادينو هضر معاه
ياسين: خليه تما يعطيوه واحد الطحنة مزياانة قولهم يتهلاو فيه مزيان واحد السيمانة حتى يعمل عقلو..وطلقوه يمشي بحالو
المتكلم:هادشي كامل ونطلقوه؟ داك المسخوط مقيوم بالتمن
ياسين: كلشي غيوصلك الخاوا ..غير قولو يطلقو ..عندو المتابعين بزاف كيتيقو فيه خليه يخدم تحت الصباط
المتكلم:ااه مزيانة .
ياسين:منين ضبرتي على اللي يقلب عليه؟
المتكلم:كريتو من الديب الخوا لقاوه مكسل فالتايلاند كيدوز الصيف مع راسو مشاو ليه لتما
ياسين: مزيانة خليه يترقد مزياان باش يتعلم يلعلب مع اللي قدو. قطعو لينه واحد جوج صبعان باش يبقا عاقل ماينساش
المتكلم: كن هاني قطعو لو واحد الودن
ياسين:الصبعان باش كيكتب فين ما يهز تيليفون يتفكرهم
دخل للغرفة على اساس غيلقاها تما متكية دايرة شي ماسك ولا كريم ضد الهلات ولابسة بيجامة ومتكية شادة تيليفون لاكن مع الدفعة مالقاهاش فالبيت..شاف الساعة لقاها طناش دليل .قلب عليها فديك الغرفة كلها مالقاهاش وهز تيليفون بدا كيصوني ليها ويعاود لاكن هي مكايناش فداك العالم ..زاهية وناشطة مع البنات ومقصرة مع راسها كتشطح وضحك وتلعب مع راسها ..قولها وضحك عليها مابقا عندها غرض .قصرات حتى شبعات ولابسة ليك غوب فالكحل من ديور صدرها عريان ولاطاي مطراسية والشعورات والمكياج والروياح وصندالة عالية قدها قداش.
حتى كملات سهرتها ورداتها صاحبتها حتى لباب الاوتيل ونزلات كتعوج عاجبها راسها داخلة وكتمنضر حتى لقاتو قدامها جاي جيهتها كيطلع ويهبط فيها ،غير شافتو بدات تقلب عينيها
ياسين: جرها تحرك قدامي
شدها من دراعها كتعتر حالة فمها دخلها فالاسانسور كتغوت حتى للغرفة ديالها وعاود جرها من دراعها كتعتر لاحها فالغرفة لداخل وسد الباب عليهم وانفاجر
ياسين: قااااححححباااا….وانا تابعك
ذكرى: بزااف عليك(لاحت الصاك للجنب) شني خصك نبقا عاملة يدي على خدي ونبكي..ولا نعيش ليك غير نتينا ..عييت صافي عيييت بغيت نحرج من هاد روتين الحياة حياتي رجعات فيها غير ياسين..ياسين والفضايح تفضحك معاك
بلا ميشعر هز يدو كن جات فيها ديك الضربة كن هرسات ليها وجهها لاكن ضرب الحيط اللي وراها حتى غوتات وقال بغضب
ياسين:حياااتي انا شكون فيها؟؟؟ هااااا؟ شكون فيها حياتي اناااا وشكون شاغلي بالي من غيرك؟؟ مخلي كلشي وجالس هنا مع لاللة ذكرى حتى تكمل الشغل ديالها عااااد ياسين يشوف شغلو
ذكرى:ماقلت لكشي تبعني وخلي الشعالات ديالك وحديني يانا
ياسين جرها من دراعها بتهديد وخرج عينيه)سمع مزيان…حل ودنيك اذكرى وعقل على هضرتي…كتلعب بالعافية وماعلابالكشي بواالو..ادا راسك كدب عليك قالك غتعمل اللي عجبك وانا كنشوف راك غالطة بزاف
ذكرى:طلق مني قصحتيني..انا حررة نعمل لي بغيت
ياسين:حسااابك حرة…نتي ماشي حرة..وغنصبر للحماق ديالك حتى نعيا ونهار طلع لي الخرا لهاد الراس غتعرف علاش كنقولك راك كتلعب بالعافية
ذكرى:شني بغيتي مني مافهمتشي؟؟ رجعت ليك كلشي …رجعت ليك كااااع لي عطيتني رجعتو شني كتسالني دابا صافي
كان صدرو كينهج ويشوف فيها بغضب لاكن تكسرات ديك نضرة الغضب لأسى وقال كيشوف فيها بنضرة فيها الغضب والحسرة
ياسين: مارجعتيشي كلشي…نهار نرجع كلشي عمرررك تشوف وجهي
دفع ليها دراها ومشا خرج زدح الباب وخلاها واقفة غير كتشوف وترمش شادة علي دراعها
نهار جديد على ذكرى ،هزات راسها والدوخة شاداها وشعرها مدلي على رنين تيليفون ..ناضت جلسات لابسة سوميج دونوي كحلة عريانة من الضهر والصدر كامل كيبان من الوسط واقف مشدود بلا سوتيانات ..ردات شعرها للجنب وشافت تييليفون لقات شاكر اللي على اتصال
ذكرى:احمم..الوو
شاكر:وافين الفنون غبرتي من ول لبارح ما سمعناك
ذكرى:شدات جبهتها) جالسة غير فالاوتيل وصافي..لبارح ماخرجتش درت سبور غير هنا وحمام ومساج وبقيت فبلاصتي هادشي لي كاين
شاكر: انا قلت غنصوني ليك دابا غنلقاك كتلعبي الكولف وناشطة بحال ديما
ذكرى: ماعنديشي الخاطر
شاكر:واايلي..كاع الضجة اللي نايضة عليك دابا وماعندكش الخاطر
ذكرى:شدات قلبها)شني واقع ؟!!
شاكر:وخونا صاحب دعوتك صابح كيشكر فيك هه… شي صهد وصلو
ذكرى:جرات تيليفون اخر حداها حلاتو ) شني؟؟ مافهمتشي
شاكر:غا دوي دوي طحتو عليه؟؟ شكون هوا؟؟ كنعرفوه؟
ذكرى:ستنا شويوش
شاكر:دابا غا بيني وبينك قولي شكون؟؟ حيت ميمكنش فربع ايام راجع كينكف ليك ويعتاذر
ذكرى:كتقلب فتيليفون)بحالي بحالك مابقيتشي كنفهم واالو
دخلات كتقلب وهي تلقا الاعتذارات كل مرة لايح بوسط كيمدح فيها ويشكر فيها بطريقتو الخاصة اللي تخلي بنادم يتيق ويمشي مع الموجة بحال العادة .
حسات انه شي حاجة مور هادشي ماشي طبيعية وردت بسرعة
ذكرى: شاكر قطع من عندك دغيا
قطع وتاصلات بياسين فالبلاصة لاكن تحل باب الغرفة ودخل عليها هاز الكارطة دالباب فيدو وتيليفون كيصوني حتى هوا وبسرعة دارت يدها على صدرها مخلوعة
ذكرى:كترمش)كنصوني ليك
ياسين: حتى انا كن جاي عندك
ذكرى:بتسائل) شني عملتي مع داك المسخوط عرفتيه شكون هوا
ياسين: تكا على واحد الطبلة)يكون شكون ما بغا يكون حنا ماشي شغلنا..صافي تحل المشكل ديالك ايوا نوض رجعو بحالنا
ذكرى: بنص عين)فاين عنرجعو انا يالاه عنبدا الخيدما
ياسين: قلب عينيه) بلااا متمرضني دابا..يالاه نوض انا كنستناك لتحت
ذكرى: انا مابغيتشي نرجع لطنجة دابا ماعندي منعمل فيها
ياسين:هز حاجبو) وشمن شغل عندك هنا؟
ذكرى:انا عاارفاك مكتحملشي كازا تقول علملين لك فيها السحور الله يستر
ناضت لاحت لغطا بدات كتمشي وتجي وتنفض معصبة في حين رد فتيليفون وبدا الحوار بالاسبانية كيهضر ويشوف فيها غادية جايا حتى دازت حداه وعطاها واحد تخويرة دايزها الكلام نقزات من بلاصتها ويدها وراها دخلات للحمام وتما بدلات حوايجها
خرجات من جديد وبحال العادة ديما كتصدمنا وتحفنا بلباسها واناقتها وذوقها وستايلها واخا تكون فايقة من النعاس كتشوف عندها شي موديلات اللي مكتشوفهمش ديما .
وقفات حدا واحد لمجر وهوا مزال كيهضر فتيليفون وبدات ترش فالروايح ودوز ورا ودنيها وترش شعرها ودهن يديها حتى قطع وقال
ياسين: تمشي لسبانيا؟
خرج من الاسانسور مهبط عينيه على تيليفون حتى تضرب كتفو بكتف نحيف وهز راسو لقا بنت قوقة برقوقة كدوخ،،داك الزين الساطع وشعور كحلة ولاطاي مانكا بحال الريشة والروايح كتعطي والعيون مرمشة!! الى قلتي قوقة قوقة والضحيكة وسنينات طلعها وهبطها وعي كضحك واخا ضربها..ديك الضحكة خلاتو يضحك وغمزها قال
ياسين:سمحي لي
كملات طريقها كتلوى وتتغنج داخلة للاسانسور وشارت بصبعها دارت بيه باي باي وهوا كيدور فبلاصتو ويضحك دار ليها بيدو حدا ودنو اشارة بمعنى نمرتك . لاكن تسد الاسانسور وهي كضحك معاه ومشات طلعات ورجع مخرج لسانو كيفرنس بوحدو كمل طريقو كأن شيئا لم يكن..تقول هوا زوين ونقي داز حداه وصافي طلع ليه المورال ،كان داك النهار هوا اللخر فالاوتيل وداز يخلص الحساب .وبينما هوا واقف متكي بيدو على لكونطوار رجع الزين بو شعور كحل ووقفات حداه مدات ليهم لكارطة كتبسم وتلفت شاف فيها وهي غير كضحك بشوشة جدا وكيوت
ياسين: اجي لهنا
البنت:ضارت شافت فيه كضحك) انا؟
ياسين:مع غميزة ) نتي
رجعات وقفات قدامو كتلعب بشعرها والموضفة كتشوف فيهم والورقة فيدها خلاتو حتى ضحك وهمس ليها فالودن وضحكات ليه حتى هي تقول عشاق جداد وخدا نمرتها قيدها فتيليفون وصونا ليها ومشات دارت ليه باي باي عاد تلفت كيفرنس للموضفة وكيرجع يتبع ليها لعين ، دفع لحساب وجا خارج بحالو كيصوني على ذكرى معبس
ياسين: غنباتو هنا ؟؟
ذكرى:انا فالاسانسور
ياسين: انا برا طلق راسك
قطع مغوبش ونافخ صدرو كيمشي ويجي برا شاعل كارو حتى وقفو ليه الطموبيل قدامو ومدو ليه السوارت مشا طلع ودار نضاضرو عاد تمات ست الحسن والجمال التحفة خارجة وكتقاد شعرها للجنب ونضاضر فعينيها لابسة كولون مزيير وتيشورط دبالونسياغا وكاسكيط. وهازة صاكها والموضفين كيهزو ليها شنطتها فالسيارة..طلعات وشافت فيه قائلة
ذكرى:فوياخ ماشي نسبانيا؟
ياسين:كيديماري) غدا
ذكرى:بيه فيه؟؟!! دغيا ؟
ياسين: هاز حاجبو) جالس معاك هنا غيير بزز..حساب لك مسالي كري ماعندي شغل
ذكرى: انا خصني عاد نمشي نشوف ماما ونشوف حوايجي ..
قاطعها: عاد كنتي غتزيدي تجلسي هنا فهاد كازا رجعتي خصك تشوفي يماك وتشوفي حوايجك ؟ لحوايج ماكاينينشي فاسبانيا؟
ذكرى: كترمش) خصني ضاروري حوايجي!!
ياسين: فاللخر ماتهزي حتى شرويطة وغتمشي تما تبقا شري شري شري فالشراوط .
ذكرى:ربعات يديها) صافي حتا لتما نيت
وصلو طنجة وحطها فدارهم عند مها نزلات وزاد مع الطريق جبد تيليفون صونا على النمرة الجديدة ومتشوق للجديد،،شحال بينو وبين البنات والتنوع كان عندو روتين يومي لدرجة رجع ممل وكيعرف عدد من البنات اشكال انواع ..لاكن دابا فرق كبير وشاسع وحتى الاحساس تغيير وتوحش الجديد ورجع عمدو شغف ومتشوق يعرف البنت الجديدة وحيا فيه الشغف للحياة من جديد ويحيا وينتاعش . بقا غادي سايق وكيطقطق بصبعو حتى ردت بداك الصويت ياسلام على اول مكالمة كيخرج فيها الصوت ذهبي من الحنجرة
ياسين: الو زايني
صابرين : ههه كيفاش زايني
ياسين :الزين ديالي زعما ..حنا طنجاوة هايدا كنقولو
صابرين:امم نتا طانجاوي؟
ياسين:ماعجباتكشي طنجاوي؟
صابرين: باينة من هضرتك ..الصوت حرش والكلمات حنان
ياسين: اه حناان حنا (شعل كارو) كتسكن فكازا؟
صابرين:لا انا فأكادير ..جيت غير مسافرة وصافي
ياسين: ااامم رجعتي ولا باقا تما
صابرين : باقا ..حتا نتا باقي هنا؟
ياسين: رجعت لطنجة
صابرين: صافي مشيتي؟ على زهر عندي
ياسين:ههه الا عندك شي زهر غتسافر معايا
صابرين:باستغراب)كيفاش؟؟ نسافر معاك؟؟
ياسين: الى غندك باسبور يالاه تمشي معايا لسبانيا اتا غدا غادي
صابرين: بضحكة طويلة) عندي فيزا شينغن ههه ماشي غير باسبور ولاكن مكنعرفكش منقدرش نسافر معاك..نتا بي حسيتك كتهضر معايا بحال الى كتعرفني من شحال هادي
ياسين:سبحان الله والله لعضيم من شوفة اللولة
صابرين:وشنو كدير بعدا فاش كتخدم وشحال فعمرك؟نتعرف عليك شوية
ياسين: عمري سبعة وعشرين وعندي خدمة ديالي
صابرين:بحالاش؟
ياسين: عندي قهوى فاسبانيا ووحدة فطنجة و كراج دالبياس طموبيلات فهولاندا..شي بركة وصافي
صابرين: ايوا راك نتا مول البركة نيت ههه
ياسين: شنو دابا تمشي؟
صابرين:حتى نعرفك بعدا مزيان
ياسين: ماعندك ماتعرف فيا ..نقطع لك فالطيارة نيشان لمايوركا بالاوتيل ديالك بالبيي ايدا ي بويلطا بحال الا مشيتي مسافرة راسك
صابرين:كايفاش ايدا بويلطا هه
ياسين:كيتقاتل فالشرح) زعما تمشي وترجع
صابرين: ااه االي وروتور
ياسين:مهم دابا خصك تفهم الهضرة ديالي ..تتعلم
صابرين:خليني نفكر ونرد عليك
ياسين: فكر على خاطرك
صابرين:الصراحة فاجأتيني..وانا كنخاف من طنجاوة ..خصوصا اللي داخلين خارجين معروووفييين
ياسين: بابلو اسكوبار واحد مشا عند الله بقاو غير الملائكة ديالو
صابرين:ايوا خليني نفكر اباباو اسكوبار ههه
ياسين: ههه فكر مع راسك
كل واحد عايم بحرو وكل واحد كيفاش عايش ومرتاح فحياتو..
ضرب دورة للدار كما العادة ماشافش جهة نورة تقول صنمة تما ولا شي دكور طلع فالراس.حدو طل على بنتو ومو وقلب الطريق لتطوان منين غيقلع بحالو لاسبانيا.
صبح الحال وصبحات ذكرى شادة الطريق حتى هي..رجعات من صحاب الباسبور والفيزا ماتحيدش حتى هي وديما تجدد.لقاتو كيتسناها فالباطو ومع الطلعة جراتو من ودنو وقالت
ذكرى:غادي بشي كارثة مية فالمية
ياسين:جاتو الضحكة)ولفتي دابا مابقيتيشي كتخاف
ذكرى: قول الصراحة
ياسين:مكاين والو عاد غادي
ذكرى:نقولك حلف منتيفكشي نتينا اصلا يهودي
ياسين/كيضحك) وشنو دابا غنبقاو هنا ؟
ذكرى:قولي باش يرتاح قلبي
ياسين:باش تبلغ عليا يابنت لق٠٠٠
ذكرى: هزات حاجبها) راني غاديا معاك لجهنم والضحكة ففمي
ياسين:غمزها )شي بركة وصافي
ذكرى:وا مشي وصلها بوحدك
جات تنزل وجرها مخرج عينيه :ها اللي مابغيناش
ذكرى: كتخلعني
ياسين: فييين عمرررك وقعات لك شي حاجة؟؟ مشيتي وجيتي وبييخير
ذكرى: وانا شنيي غيطلع بي من هاد المغامرة الحولة ديالك ؟؟ نتينا عندك الربح فيها اما انا يدي وريح والحبس فوق الخطية
ياسين:عنقها)كولشي ديالك ازايني
ذكرى: شريلي الدار فسبانيا
ياسين:طمعتي
ذكرى:هادشي اللي عطا الله (هزات يديها)
ياسين:نشريها ليك بلا والو علاش زعما حتى لدابا
ذكرى:هزات كتفها)كنغامر معاك .بعدا يحون عندي الربح فشي حاجة
ياسين:عنقها ولكارو ففمو)جااتك
ذكرى:بعدات)حلف؟
ياسين: ياك انا يهودي
ذكرى:مشات كضحك)نسيت(ضارت شافت فيه كتلوى) عنداك تنسا واعدتيني
ياسين:كتيقي فالوعود دليهود
ذكرى: غنجرب هاد المرة
مشات خلاتو متكي على واحد لحديدة كيشوف فيها وتبعها لمقدمة اليخت قين جلسات ونشرات رجليها بحال الحورية وقال كيتأمل فيها باستغراب
ياسين: رجعتي تابعة غيير لفلوس ها؟؟
ناضت جلسات وهزات حاجبها كتشوفيه مبسمةوقال
ذكرى:شني خصك نتبع؟؟ هاا؟ نتينا دابا غادي بالمنتف علاش؟ على الفلوس؟ ديك المرة قلتي لي المستوى شنو هوا؟ هوا الفلوس؟ وخدام اقبح خدمة مايقد عليها غيير سيدي ومولاي علاش؟ على قبل الفلوس !! ادا انا ادا تبعت الفلوس مامزياناشي؟؟ ادا عملت شي حاجة على قبل الفلوس مانسواشي؟ ادا غامرت على الفلوس ماشي بنت الناس؟ ههه(رجعات تكات) هادا ماعطا الله صافي الفلوس لي كاينة هاد الساعة ..ماعندي ولاد ماعمرهم يكونو عندي وكاينة غير انا فهاد الدنيا ..بقا لي الفلوس هانا كنغامر معاك عليهم
ربعات يديها وقلبات وجهها ولاحت شعرها خلاتو غير كيشوف حتى عيا ..تبدلات عليه مابقاتش هي نفس البنت اللي عرف اول مرة .. نهائيا وتقول واش هي ..النضرة للي خدا عليها اول مرة ماشي هي نفس النضرة وحتى الشخصية تقلبات عليه مافهمش اشنو بغات تقصد من كلامها الاخير.
خلاها ومشا جلس بلاصتو باش يقلع..دار نضاضرو ويالاه قلع صونا ليه تيليفون وطلعات صابرين ..تلفت شاف جهة ذكرى لقاها ناعسة وشادة تيليفون ونضاضر فعينيها وفتح الخط..كان صوت اليخت مع البحر والهوا طاغي على اي صوت داكشي علاش فتح الخط ودار ايربودز فودنو
ياسين:زايني
صابرين:هاد زايني جديييدة عليا هههه خصني نولفها
ياسين:غتولف على كلشي..جاي الخير لقدام
صابرين:ناري كتخلعني ..الطريقة باش كتهضر قاصحة شوية
ياسين:قلتي حنينة
صابرين: الكلمات اه اما النقرة دصوتك لاااااا هههه
ياسين:خفض السرعة)شنو عملتي دابا؟ نقطع لك فالطيارة؟
صابرين:نقطع راسي ..هاكا نرتاح اكثر..نشوف البيي ولاوتيل لي بغيت
ياسين:واصردلي لحساب ديالك قبل مندخل دابا للبحر ريزو مايبقاشي عندي
صابرين: انا غنسيفطو لك خليك معايا
وصلو مسج فتيليفون من نمرة اخرى وهي كتهضر
صابرين:هاديك نمرتي حتى هي فيها واتساب
ياسين: كيدوز الفلوس) الفيين دلاورو صردتلك دابا شوف واش وصلاتك
صابرين :ااممم..وصلاتني..صافي غنقطع راسي دابا من المطار فاش نكون غادية احسن
ياسين:انا حتى لغدا عاد يشد بي ريزو ليوم غيتقطع نهار كامل
صابرين:صافي غدا ان شاء الله نشد طيارة..اجي واش ماشي مشكل نجيب معايا صاحبتي
ياسين: ماتقتيشي فيا
صابرين: اول مرة ..(بتردد)وحنا مزال ماتلاقينا وجلسنا فهمتي
ياسين: لي بغيتي ..عمل لي يريحك
صابرين: ايواا..طريق السلامة زايني هههه
ياسين: ياك هه
صابرين:حتى لغدا ..باي باي
لاح تيليفون للجنب وتكا غادي باليخت
ياسين:ذكرااا…اجي مالك جالسة بوحدك
ذكرى: شابرة تيقاري هه
ناضت كضحك لابسة كسوة قصيرة ناعمة غير بلخيوط فلكتاف مشات عندو وعنقها من خصرها جرها قدامو بغا يجلسها لاكن غطات مؤخرتها وقالت
ذكرى: خليك شابر الطريق ديالك حساااان ليلي وليلك
ياسين:جلسها بالحنان) بغيت نتونس معاك وصافي مالك
ذكرى: مغنرتاحشي …كنعرفك
ياسين:جلس جلس اش عندك متعرف
عنقها وهي قدامو شعرها كيضرب اللور ..شدات المقود كتسوق هي وهوا وراها كيتأمل البحر ويدوز يدو على جنابها بمداعبة وقال
ياسين: شحااال ماسافرنا انا وياك
ذكرى: شني مزالة كتعمل ديك الوشمة عندك فصدرك ماسخيتيشي بيها
ياسين: ماساليتشي ليها وصافي
ذكرى: ماسخيتيشي بيها وصافي..خليتيها ذكرى
ياسين: دور وجهها جهة عنقها والشعر كيتطاير) الذكرى هي نتي
ذكرى:هههه شعندك مع الرومنسية ؟
ياسين:ماعنديشي معاها
ذكرى: البحر كيخلعني اياسين كنحيس بيه كيتكلم معايا
ياسين: سد عينيه كيتسنط فوق كتفها) كتو كيقولك
ذكرى:شادة المقود) كيقولي اللي دخل مايضمنشي يخرج..نتينا وزهرك..وكيقولي متيقشي بزاف فيا..واخا تشوفني هادي النوضة عندي خاايبة ماتقدرشي تقاومها..تعيا تستقوى نجيبك فالقاع غير بالضحك..انا بيدي نوصلك وبيدي نغرقك ادا بغيت
ياسين:حل عينو فالبحر كيتأمل)مكدبشي عليك
ذكرى: بصح كاين اللي كيسمع اصوات فالبحر..هادوك اللي كيحركو قالك كيسمعو الاصوات وكيرميو راسهم
ياسين:البحر كيعمل هادوك الاصوات غير بنادم كيتخيل حوايج اخرا وصافي..وكيعمل الدوخة ..ماخصكشي تحقق فيه فجنابك بزاف باش ميجركش عندو
ذكرى:كيفاش
ياسين:خليك من البحر وشوف الموجة اللي وراك شوف معاها شي حل
تلفتات مخلوعة:فييين؟
ياسين:هاد الموجة (عنقها)
ذكرى: خلعتيني(شدات قلبها)شبر كمل نتينا فشلت
ياسين:كمل كمل راك غاديا مزيان
ذكرى: دغدغتيني
ياسين:بهمس)توحشتك …(بتعب) غير شوف شي حل
ذكرى: تنهدات)انا عطيت لعاهد نراسي فاش كنت صغييرة..عوومري نعطي لشي واحيد يطفي فيا الشهوة ديالو شننو مابغا يكون..وكل ما زيدت كبرت كنعزاز عند راسي وكنبغيني كتر وكنرتاح ونزيد نتشبت فالقرار ديالي..مسألة مبدأ وصافي منقدرشي نجي نغيرو
ياسين: انا راجلك ماشي غريب عليك
ذكرى:لااا ..هاداك احساسك ولاكن الحقيقة نتينا الطليق ديال..ماشي راجلي.. صافي طلقنا انا غنطيح فالمضاعجة خارج اطار الزواج دابا واخا كنتي راجلي وعادي بلحق مع نفسي منبغيشي
ياسين: غنبقاو هايدا منشورين شهاد الحياة؟
ذكرى:خليني مرتاحة معاك ..انا هايدا مرتااحة اكثر..وادا فتحت هاد الباب غيرجع عندي هادشي عادي ..حتى انا عندي شهوات وغنرجع نطلق لاي واحد عجبني ورتاحيت لو
ياسين:عبس)عاود عاود
ذكرى:غيير شرحت ليك ازايني متعصبشي.. قلت ليك عندي مبدأ صافي ماشيا عليه .. مابغيتيش نصغار فعيني ونرخاص
ياسين:هادشي غيير تخربيق.
ذكرى:مرتاحة فيه..هادي هي ذكرى
ناضت كضحك وخلاتو شد المقود ومشا طلعات لفوق فوق لاعلى قمة تجبدات فوق واحد الطابي كتمشمش
وصل لمايوركا بعد طريق طويل لاكن غير متعب..السفر باليخت مريح وكان كيتناوب هوا وذكرى على السياقة واحيانا كيبرمجو على الطريق يمشي بوحدو .وصل اليخت في امان وقبل مايوصل للشط تعرضو ليه بلانشات كبار خرجو السلعة وذكرى فوق اليخت متكي وكتفرج من لفوق..مانتابها خوف نا جاتها رجفة تقول القلب مات عكس اول يوم. خواو اليخت وكمل ياسين طريقو دخل للمدينة ..كانت عبارة عن جزيرة كبيرة ضاير بيها البحر من كل جهة ومريحة وهادية والجو زوين فيها.. نزلو مع اول وصولهم يتمشاو شوية ومشاو لمطعم واسع على البحر كان عامر بالناس والحياة والسياحة منتاعشة تما،جو جديد وحماس جديد ..جلسو يتغداو ويالاه بغا ياكل جاه اتصال فالواتساب من نمرة صابرينا وناض خلا ذكرى جالسة بحال الملاك اللي شافها يقول ما تحركش البيضة من بلاصتها، خرج لبرا وفتح الخط
ياسين:الو..
صابرين:زاينيييي هههه انا وصلت
ياسين: مزيان ..صرد لي الاوتيل ديالك
صابرين:واخا.. نتا اينا بلاصة
ياسين: عاد وصلت ..غير صرد لي لاوتيل ديالك
صابرين:واخا ..مهم غير بغيت نقولك راه جات معايا صاحبتي اوك
ياسين: عملتي لي فراسك
صابرين:لي تافقنا عليه بزووج ههه
ياسين:لي عجبك.نتينا تعرف
صابرين:فاش تكون جاي علمني عنداك تغفلني
ياسين: عمل حسابك للعشا وصافي
صابرين:ان شاء الله
ياسين:يالاه نخليك
صابرين:باي باي
قطع ورجع عند الزين الخلاب جلس حداها ولاح يدو وراها باسها فحنكها وقال
ياسين: كتخليني نعمل شي حوايج انا بيدي ماباغيهمشي
ذكرى:شافت فيه بنص عين)شني عملتي غير قول
ياسين: مزال عاد ناوي
ذكرى:علاياش ناوي؟ تجيب شي مصيبة لراسك
ياسين:فين خصك تشري الدار هنا ولا فين؟
ذكرى: تلفتات مصدومة) ام!؟؟(بارتباك) مافكرتشي
ياسين: فكر ورد عليا
ذكرى: بصح غتشريلي الدار ؟
ياسين: ماتغلاشي عليك امي ايرموسا
ذكرى: غتقتلني الفرحة(حطات يدها على فمها)اواعدي كنموت بالفرحاااا
برقو عينيها بقات كتشوف فيه بغات تبكي بالفرحة وطلرت عليه عنقاتو كضحك وتنقز بلاصتها
ذكرى:نتينا احسسسن حاجة فحياتتيييي…مكتخصرليشي خاطري مرررة
تلهات مع الدار ولات كتخمم فيها غير هي وتقلب فين تشري عوالة على شي دار كتعيط ياليل ياعين وماباغاش تزرب ..بغات تاخد وقتها وتقلب على خاطرها باش متندمش من بعد..واش تشري على البحر ولا فشي سونطر فيل ولا شنو دير .
جلسات فاليخت بالليل كتبرد شادة تيليفون وتقلب هنا ولهيه بينما ياسين لتحت فبيت النعاس واقف قدام مرايا مفركس ..لابس كوتشي معروفة غير بعلامة صغييرة فالكم ديال تيشورط لكحل لي لابس ودجينر وحداء كوتشي والساعة فاليد فاخرة والريحة فيدو مبعدها وكيرش من لبعيد..لعيون كبار زورق ولحجبان عراض الشرفة واضحة وجريئة والوسامة اوروبية واللون حنطي مغربي، الطولة والفورمة افريقية عضم ولحم من عند الله والضهر عريض .الشعر اشقر رمادي واللحية غامقة مزيج بين الرجل الافريقي والاروبي. طلع شاد تيليفون فيدو حتى لعندها وهي ناعسة على كرشها شمات ريحتو وهزات عينيها طلعات فيه وهبطات وقالت
ذكرى:صاحبك اول مرة يشوفك؟
ياسين:عندي الشغل اللي جيت عليه هنا.. ويقدر نتعطل ولا نرجع بالليل
ذكرى:بقا حتى للصباح علاش تعدب راسك
ياسين: المهم اللي جا فالطريق غنديرو
تحنا باسها جنب فمها وشدها بزز شلقمها مزيان وقال
ياسين:دااابا تعطيني الطوع ندير بناقص من هاد الخدمة
ذكرى:دورات وجهها :مشي للخدمة راه تابعاك الدار تشريهالي
ياسين.هز حاجبو)يااك!
عض على شنايفو غادي كيبعد ويتحلف فيها حتى نزل من اليخت مشا وهي متبعة ليه العين كدور راسها
ذكرى: اممم … عامل كاع المجهود باش تشوف الخيدمة يا لق٠واد الله يجعلني نتييقق
ركب فسيارة بي ايم رياضية كحلة وتيليفون فودنو
ياسين:صافي وجد راسك انا فالطريق
صابرين:واخا ههه..حتى صاحبتي غتجي معانا صافي
ياسين: كن جبتي يماك تفوج حتى هي
صابرين: هههه
ياسين:يالاه يالاه انا فالطريق
قطع وعض على شنايفو غادي ويدو مدلية فيها كارو على برا ..وصلو مسج من ذكرى هزو قدامو وعينو فالطريق
ذكرى: ماتنساشي تعمل القشابة طريقك فيها التوالد امي يامور
بدا كيضحك وحط تيليفون كمل طريقو وفكراتو نيت ضرب يدو لجيبو كيقلب ونزل فطريقو خدا الواقي ورجع كمل طريقو حتى وصل للاوتيل ولاح عينيه على برا متشوق يشوف ديك البنت وهي نازلة، مع الهزة دلعين بانت ليه جايا لابسة لاحمر !!صاروخ كتبان والمشية حمامة وحداها صاحبتها مركبة واحد الكر ضرب عليه ياسين عرفو مركب عند شي طبيب عور ، من بنات دباي وجايا لاسبانيا بداك الطركة ماجاتش نهائيا مع داك المحيط كتبان حالتها حالة واخا هي فالواقع منها عداد لاكن كتبان زوينة غير فالخليج والمغرب.حدها تفوت عاد المناطق صافي كتولي تبان بحال عندها تشوه خلقي فوجهها وجسمها حتى هوا. دور وجهه قدامو حتى ركبات حداه صابرين ولاخرا ركبات لور هبطات بيه الطموبيل تقول مركب ربعة موراه .ماضارش كاع جيهتها وشاف فصابرين كيتبسم وقال
ياسين:زايني..
صابرين:سلمات عليه بالوجه)جيت ولا ماجيتش؟
ياسين: جيييتي
داخت فيه صابرين وصاحبتها ضرباتها اللقوة ..عيت جديد عاوتاني بعيدا على هلا عاشو اللي كيحسابهم غير هما اللي عندهم الفلوس،،واخا فطنجة كاين ماكتر غير غابرين كيبانو فالاماكن لي بحال اوتيل رويال منصور فين تلاقاتو صابرين.. اما كن قالو ليها طنجاوي فطنجة ها كيدااير ونقلبو معاك عليه طنجة كلها ماتلقاهش .
بقات صابرين غير كتشوف فيه وفالتفاصيل طيراتو من الدقة اللولة بزنس مان وكبيير عاد ماشي عادي.هي واخا زوينة وكيوت ورهيفة وضحوكية لاكن باينة عليها دات وجابت عندها خبرة عميقة فالحياة مع ليبورجوا وكتعرف تميز فيهم
شد ليها فيدها وهوا غادي حتى وصلو لكازينو كبيير من برا بحال القصر ونزل مد ليها يدو وعنقها تقول مصاحب هوا وياها عام هادا، اما صاحبتها تابعاهم من اللور بحال النكافة ماداهاش فيها وصابرين نساتها حتى هي حتى دخلو للكازينو وكانو تما رباعة ديال رجال غرب مجمعين فواحد القنت شي غير جالس شي كيلعب ركل واحد كي داير ..ماشي عاديين ..غرب من النوع دالواشامات والسناسل والشلاغم طوال وكلهم زوعر والقوامج فاللوان ، عالم اخر بدات تشرف فيه صابرين وها اللي هاز صيكار ها اللي هاز كاس وكانت هاد المجموعة عشيرة ياسين اللي جامعاهم خدمة وصحبة ومخلطة بيناتهم الدعوة وفبحال هاد الاماكن كتم الصفقات وكيبانو البلانات باليد والكتف سلم عليهم ياسين وهما فرحانين بوصولو وكانو معاهم بنات اخرين حتى وحدة ماعربية تشها الدارجة تشم غير ريحتها ماتلقاهاش، لاصابرين لا صاحبتها فاهمين شي حاجة من الهضرة اللي كتقال، جلسو على كنبات كيتفرجو ويسمعو ويتغامزو بيناتهم ويضحكو
صابرين:ناري البزناسة بشحمهم ولحمهم
رباب:يتافقو علينا وحنا كتضحكو مافاهمين اش كيقولو
صابرين: على قلة البنات يتافقو علينا حنا !!
رباب:ها حنا غنشوفو اش غيطرا
بان ليهم ياسين هز كاس فيدو ومدو لصابرين شداتو ورجع هز كاس لصاحبتها تبسم ومشا وقف حدا واحد الطبلة كيلعبو فيها كيتفرج ومكروازي رجليه كيشوف فيهم لاعبين وفنفس الوقت داخل فحوار مع اللي حداه على الشغل لي بيناتهم سالات اللعبة وتبدلو البلايص وجلس هوا واللي كانو معاه كلهم لاعبين على بيعة وشرية ..هادي مقابل هادي..منها متعة فاللعب وفنفس الوقت ربح للي غيربح .
بقاو البنات غير كيتفرجو ماعرفو شكون الرابح من الخاسر وماعارفنيش حتى كيفاش كيلعبو وكيفاش داكشي غادي حتى بانو ليهم نايضين كيضحكو هازين كيسانهم ومشاو رجعو جلسو كاملين على الطبلة..رباب ماداها فيها حد ولا سوق ليها حيت بكل بساطة مجالساش فالعزلة مع الشيوخ ، هادر الغرب عندهم زايد ناقص مولفين البنات وطلعو ليهم فالراس.
دازت ديك القصارة ماهضرش فيها ياسين بزاف مع صابرين وانما كان مشغول بالمطارق ديالو حتى كملو الاجتماع ديالهم وناض جرها من يدها حتى تلاحت على صدرو وعنقها من خصرها وقال كيشوف فيها ونيفو حدا نيفها
ياسين: زايني..عيتي
صابرين: مافهمت حتى كلمة اشكنتو كتقولو
ياسين:باسها فمن شفايفها) غير كنهضرو..قول لصاحبتك تشبر طاكسي ترجع للاوتيل
صابرين:علاش؟
ضرب ليها واحد جوج بوصات صحاح كعدو ليها الاعضاء وقال
ياسين:نبقاو بوحدنا شوية
صابرين:بلعات ريقها كترمش)بلاتي
مشات عند صاحبتها تحنات عليها وقالت
صابرين:نااري غنطيح فهاد خونا جمع كلشي.سيري لاوتيل غيشد ليك طاكسي قالي نبقاو شوية
رباب:اختي نتي مكتخافيش كتغامريتبقاي بوحدك
صابرين: واغير سيري ودعي معايا خافية غير نطيح فيه طيااح هاد لق٠٠وي
جرها من يدها طلعو فالاسانسور شابكينها بوسان حتى وصلو ..كان اوتيل وكازينو فنفس الوقت ، دخلو للشومبر على نفس الوضعية شابكينها بوسان ومع سدة الباب قنتها مع الحيط ملهوف وهي كتلوى ماقدراتش تنفس وغلب عليها ماخلاش ليها فرصة ترد النفس. شدها شدة وحدة افتارسها وعرا ليها البادر صدمها بديك الوشمة اللي مزال على صدرو لاكن ماتعطاتهاش فرصة تسول ،،لاح ديك تيشورط للجنب وحتى هي عجبها ومن عينيها باينة الزعية دخلات معاها ولات كتشوفو ديالها مكاينش اللي يحيدو ليها ، دابت فيه بحال الحبيب حتى ولات تقوليه حبيبي ولي شافهم يقول عشاق رابطهم حب كبير.
دوزات معاه ساعات ولا اروع ناضت من بعدهم مزعوطة وقلبها كيرفرف وكتشوفو غير هوا ومكاينش من غيرو..كيبان ليها ملكها وديالها ومشات فالهوى وهزات دقة مابقا ليها فين ترجع .شافتو وقف كيلبس حوايجو وناضت لاوية عليها ايزار وقفات قامو وحطات يدها على وجهه باستو
صابرين:فين غادي؟
ياسين:كيسد سمطة) غنرجع ، تيليفون بيناتنا
صابرين:كدوز يدها وجهه)عندمن جيت انا ؟ قلتي نسافرو انا وياك
ياسين: اه غير نسالي شي غرض وانا معاك
صابرين:عنقاتو)غنتوحشك
مع ديك تعنيقة باستو فعنقو لاكن دغيا حط يدو على عنقو عرفها غطراسيه وداكشي لي كانت عوالة دير
ياسين:بلاش هاد الفعايل ..خلينا نبقاو مزيانين انا وياك
دورات عينيها كترمش ورجعات قالت
صابرين:المهم غنتسناك غدا..مغنرجعش للاوتيل حتى تجي نتا ترجعني
ياسين:لي بغيتي… مهم تيليفون بيناتنا
باسها على فمها مع غميزة ومشا بحالو ركب سيارتو وحط تيليفون قدامو شغل كامرات اليخت شاف اش واقع تما وبدا يقلب عليها من بلاصة لبلاصة حتى بانت ليه ناعسة فبيت النعاس رجلها على لغطا وضهرها عريان وقال كيسوط
ياسين:الناس كطلقو المرة وكطلع ليهم فالكر وانا هادي مطلقها جوج مرات ومزال كتبان لي نجمة ..هاد بنت لق٠٠٠هادي مرضاتني فحياتي
ضرب ديك المرايا هبطات وبدا يشوف وجهه وعنقو ويفلي راسو وشد الطريق رجع بحال ..قبل مينزل من الطموبيل جبد الريحة بدا يرش عاد نزل ومشا لليخت نيشان للدوش واخا دوش فالاوتيل لاكن ضاروري من المراقبة.حيد حوايجو ولبس شورط قصير كحل بالسيور ومشا لاح حوايجو فالمطبخ فالماكينة عاد مشا لبيت النعاس دخل لقاها ناعسة ولايحة تيليفون حداها ، مشا تكا حداها بشوية يالاه غيعنقها بان ليه تيليفون وهزو بغا يقلب فيه لاكن لقاه بالكود ولاحو كينفخ ونعس حداها لاح رجلو عليها ويدو حتى هي
فاقت الصباح لقاتو طايح عليها بحال الميت خنقها ،،بزز باش كحزاتو بغات تنوض لاكن غير تقلب على كرشو لفت انتابهها خدوش على ضهرو وضارت تقادات فالجلسة كتشوف اثار اضافر مخططة مع ضهرو وجهة دراعو .بقات غير كتشوف ولاحت عليه ليزور قائلة
ذكرى: الله يمسخك اسلكوط نتا والاجتماعات ديالك
ناضت خلاتو ناعس حتى شبع نعاس عاد ناض كيمسح راسو ويحك عينيه مشا للدوش ويالاه شاف فالمرايا بانو بيه الخطوط مزيان ..صبحو مطراسيين تقول بايت مع المشاش ومفضوح بقا كيدور فبلاصتو ويشوف ويقلب ياكما باينة شي فضيحة اخرى .سخط سخطة وحدة ووزح عليه الباب لداخل.
خرج مدوش لايح على كتفو فوطة وعلى صنو فوطة جلس كيدور فبيت نعاس ويخمم حتى سمعها هابطة ودغيا جر واحد شوميز بيضا توبها ديال لولان لاحها عليه .
حلات عليه الباب لقاتو واقف مصدوم وطلعاتو وهبطاتو هازة حاجبها فيه شوية حاجة حتى بدا اللون يتبدل فوجهه ،لاكن دغيا تبسمات ردات فيه النفس وقالت
ذكرى: انا بالفرحة ددار ماقدرتشي نعس لبارح … تعطلتي ماجيتي؟
ياسين: بارتباك) ماشي بزاف ..رجعت قلت مع راسي نجلسو نقصرو ساعة جبرتك نااعسة
ذكرى: ماشي مشكل المهم انا صافي جبرت الدار حتى تفطر نوريها لك
مشات كضحك خرجات حدها عطاتو بالضهر جمعات الضحكة وخنزرات وزادت فحالها .
تجمع هوا وياها على الطبلة دلفطور كانت عامرة فواكه كانت لابسة دو بياس وواحد الكاش مشبك طويل فيه فتحة لوسط وقالت كتلعب فشعرها
ذكرى: ماكرهتشي نمشي نجلس فالرمل..توحشت الرمل الصراحة
ياسين : نمشيو
ذكرى: انا غنجمع الطبلة
ناضت جمعات للدنيا وهزات صاكها مشات هي وياه يتبحرو جيهة الرمل وكانت الدنيا زاهية ونقية والرمال بيضا صافية ..بلا فوطة بلا والو كانت باغا تتشمس وصافي. حيدات لكاش وبقات بدوبياس فالاسوط مجبدة على كرشها وهي بيبضا لونها مقمح شوية صافي وزادتها بالصباغة فالحمر فيديها ورجليها ولخلخال كتبان سيكسي وداك الشعر كتلعب بيه هنا ولهيه.. تطلق حداها علط ضهرو منو للرملة حتى شدات فيه حتى تكا على جنبو جهتها داير نضاضر .
كانو مستمتعين بالجو لاكن سبحان الله فاش كتعرف على شي واحد كيدير لك ربي مليون صدفة تعاود تشاوفو..شكون قال صابرين غتجي للبحر وتكسر القاعدة وتمشي تعيش الحياة هي وصاحبتها ، ما حطها ربي غير فداك البحر نيت لي جامع ديم المنطقة كلها هوا لي قريب اكثر لدوك الاحياء فين هما وهوا حسن كيفضلوه الزوار.تمات غادية على سبعة وربع حتلعب بشعرها وصاحبتها حداها دافعة كرويلة وحالتها حالة بديك المؤرخة وداك لفصالة العمية ديال الحوالة، زادتها جبدات لكويديمة رجع وجها شبح منحرف ولحجبان غلاض كتبان وسط الكور بحال الجن . كتعفس فديك الرملة وتنده فداك الجسم تقول كتحرت ..اما صابرين خفيفة رشيقة جميلة فااتنة كلشي فيها حلو عاجبها الحال وكتقلب فين تجلس حتى بان ليها !! تقول كيشبه بيه حيت الفورمة بحال ديالو والشعر لاكن فاش شافت البنت حداه وهوا خاشي وجهه حدا وجهها مكيبانش ومعنق مؤخرتها وخاشي يدو لداخل فالسليب قالت ماشي هوا..دورات وجهها وحطات فوطة جيهتهم جلسات ويالاه بدات تدهن قالت
صابري:شوفي دوك الجوج عايشين الحياة
رباب: هادو لكور اختي كيعرفو يعيشو
صابرين: نعيط لياسين نقوليه يجي عندنا
رباب: بلاش اصاحبتي خلينا جالسين
هزات صابرين تيليفون بدات تصوني ليه وتتمنضر وتشوف جيهتهم حتى فجأة هز راسو وخرج يدو من سليب دخرى دور وجهه شاف فتيليفون سكتو ورجع حطو.فهاد اللحضة شافت صابرين كلشي ..كانت الصدمة قوية حسات بالخيانة والغدر ودبحة فالقلب خلاتها تهبط داك تيليفون وعينيها فيه حتى بغاو عينيها يدمعو
ماتقبلاتهاش صابرين،، مابغاتش تسرطها وحلات ليها فالحلق ومرضات فديك اللحضة وضارت عند رباب وقالت
صابرين:هوا هاداك ياسين
رباب:كطل)اويلي
صابرين:حابسة البكية) تخيلي قطع عليا
رباب:شون ديك الق٠٠بة اللي معاه
صابرين:قاطعة النفس) مانعرف
رباب: طلعات فيها) اوييلي اختي مالكي غتموتي صافي يم٠٠يق٠٠٠ مالنا هاحنا مسافرين ..مالو راجلك
صابرين: طحت فيه ارباب(هبطات راسها كتبكي)وليت كنبغيه..اصلا من الشوفة اللولة وانا كنفكر غير فيه وحاسة بالفرحة حيت دخل لحياتي
رباب:مسلسل تا نتي اصاحبتي صافي ..فتخي مو راه باين لابااااسون عليه ،فتخي جد مو وحتى لابغا يمشي مع السلامة
صابرين: وراه كنبغيييه
هبطات راسها كتبكي بلا هواها وكل مرة دور تشوف فيه وتحلل ديك العلاقة وتسائل مع راسها واش شي وحدة دايزة ولا شي علاقة طويلة..بقات كتحلل بوحدها وتشوف بان ليها من خلال اسلوبهم مع بعض جامعاهم شي شعرة طويلة.. وناعسين فديك الشمس كل واحد كيتسنط لعضامو فجهة والزوينة هي ناعسة على كرشها عاطيا وجهها لهيه وهوا لتحت حدا رجليها موسد طرمتها ومدرق وجهه بيدو من الشمس وناعس،بقات شحال كتشوف فيهم وكل مرة تجبد كارو معصبة تكميه حتى لواحد اللحضة ناض تكا على ضهرو ودراعو وناضت دكرى وقفات كتلوي شعرها غادية جهة الماء ودخلات تعوم وبقات داخلة حتى بعدات على البشار وبدات تعوم لداخل
رباب:ماعرفت فييين شفتها
صابرين:مصدومة) هادي هي ذكرى (دارت يدها على فمها) نااري هادا هوا اللي كانو صوروه هوا وياها
رباب:لعااار واش هوا نيت
صابرين:والله تا هوا .. كل مرة يهزوها فالعمارية مكتفرجيش؟
رباب: شتهم ..على زهر!! قالك طليقها
صابرين: مافهمتش!! واش مزوج ولا مطلق(بادراك) داير خاتم فيدو!!
رباب: شعلات كارو)اختي انا خليني نعيش مافيا لي يصدع دماغي
بقات صابرين جالسة وكتشوف حتى صونا ليها تيليفون هزاتو لقاتو هوا اللي كيعيط وشافت فيه متكي وكيصوني ليها
صابرين:فتحات الخط) الووو
ياسين : زايني لاباس
صابرين :كتشوف فيه)الحمد لله.. ونتا كي صبحتي
ياسين: مزيان ..مزالة فالاوتيل لي فكازينو؟
صابرين: اه
ياسين: فلعشية ندوز عندك
صابرين: علاش متجيش دابا نخرجو شوية
ياسين: دابا مشغول شوية
صابرين: اوك ماشي مشكل
ياسين: يالاه بسلامة
قطع وقطع فيها النفس تقجات بقات حاضياه حتى رجعات ذكرى لوات عليها فوطتها وهزات صاكها ومشاو مشادين فاليدين .
من زهر ذكرى وشكون قال غادي يجي شي نهار تشري الدار فاسبانيا وماشي اي دار، شقة في ابيزا ومشات اختارت ليه الحي الراقي والطلة الراقية وخلاتو يخلصها بالزبابل دلفلوس ومضات على عقد الشراء وهاهيا ولات عندها شقة فخمة تمشي الوقت الي بغات لسبانيا واستثمار مربح جدا وعقار فاخر وحلم كان من المستحيل يتحقق..لاكن الدنيا كتعطيك الى عرفتي كيفاش تسايرها .صورات الشقة والطلة والمنضر وبدات فسطوريات كتصدم فالبشار وتحط خلات كلشي حال ما مو وكلشي باغي يدير بحالها وكلشي كيبارطاجي ليها وحتى من صاحب دعوتها اللي فاضحها حط سطورياتها كيبارك ليها الدار فايبيزا ويمجد ليها ويمدحها بطريقة نضيفة وراقية الشيء لي خلا مأثرين السوشل ميديا يطلعوها عليها بالضحك وعلى راسهم وعلى عباد الله وكل واحد حاط فيديو كوميدي كيقصدها ويختمها فالاخير بمقولته”ماحسدناكش اختي ذكرى الله لا حسد غا هوا قرينا راه كلنا مكلخين..ياريت ديري لينا كورسات كيفاش نديرو الديور فايبيزا والله يخليك ركزي لينا على الديور الفخمة ..داكشي دلهيييه اختي نستافدو منك حتى حنا”
الحاصول كلشي مطلعها عليها وحتى من باها صونا ليها ضارب الضو مالقاهاش مساليا تعاود ليه ولا ترد على شي واحد واخا تيليفون مكيحيدشمن ودنها لاكن فاش كتكون مع ياسين كتميك شوية باش مايهرسوش ليها وهوا عدوه تكون معاه وشادا تيليفون كتهضر فجهة اخرى .
ركبات هازة الاوراق فيديها كتفرنس وضحك وهوا يدو على المقود كيشوف فيها وقالت كتغمزو
ذكرى:قولي الصراحة ..زعما ماجاتكشي قاصحة
ياسين:علاش تجيني قاصحة؟
ذكرى:زعما بخاطرك؟
ياسين: بلا خاطر منشري لك حتى مسكة
ذكرى:هههه زعما تقول مع راسك كنخسر عليها الفلوس اممم
ياسين:تبسم وقال ببرود) كلشي ديالي… نتينا واللي عندك (شار بعينو لداك الملف) عرفتي بداكشي اللي فيدك وداكشي اللي غيجي من بعد..كل مرة كتوقع على شي ورقة عرف بلي كتأكد على الحياة ديالك معايا
ذكرى:شني دابا كتخلعني؟
ياسين:سولتيني جاوبتك
ذكرى:الرعب هادا!! (هزات كتفها) اصلا انا ونتينا مانعرف باش تسالي هاد رواية ديالنا
ياسين: ماحدنا فالدنيا وانا ونتي بحال ليمن وليسر.. طلب لي عجبك وشري لي عجبك وعيش كما عجبك..بلحق حاجة وحدة نرصيك عليها..الغدر لا.. الكدوب.. والخيانة
شافت فيه مطولا كيفاش كيهضر وقالت
ذكرى: لخيانة؟!! عليا بواحدي ولا عليا انا ونتينا؟
تقلب كيشرف فيها وحيد نضاضر وقال بوضوح
ياسين: ادا خنتك بقلبي من حقك تحاسبني..شي حاجة اخرى كنتريض بيها ماعندك علاش يبقا فيك الحال
ذكرى:ياك!! هه… اذا حتى منخونكشي بقلبي..ونعمل الرياضة مع راسي
ياسين: شاف فيها مطولل وجبد كارو كيشعلو) ماتقارنشي راسك بهاد الكارو ..غتجبر راسك فالاخير طفاية ويطفيو فيك كاع النواع دالكارو (شدو بين صباعو) هاد الكارو نقدر نطفيه فهاد الطفاية وفهاديك وهادي وهادي..ويبقا نقي مايتوسخشي..كيرمي وسخو فكاع الطفايات ويبقا نضيف،،بلحق الطفاية ادا طفيتي فيها هادا وهادا وهادا كترجع خانزة..عامرة وجامعة كاع الخنز . (لبس نضاضرو) ونخلييو هاد الطفاية وهادشي كلو، انا ماعنديشي المرى لي تخون وادا شي نهار عملت لي فراسها كنعمل ليها بحال هاد الكوييروس (شدو رفسو فالطفاية) كنعمل ليها هايدا..طفية وحدة
السطوريات والتصاور وصلو لصابرين !! ورجعات حاضية ذكرى بحال ضلها وخيالها ،،جاتها الغيرة منها وبغات حتى هي دير بلاصتها واسنتجات من خلال شنو كانت كتشوف انه على علاقة بيها م مدة طويلة..يعني ماشي انسانة عابرة فحياتو بحالها، اش عندها مادير وهي انسانة بسيطة ماشي شي وحدة عندها نفود وقوة ، فمن الاحسن بلا مادير راسها فراس ذكرى وتجبد عليها النحل ودخل فالمشاكيل ،،هي ماشي مراهقة ولا برهوشة..راه بعقلها وماخصهاش تخلي قلبها يسيطر عليها ،تعيش داكشي اللي وصلها فحقها وتحاول متتعلقش بيه بزاف حيت اللي بحالو عمرو يكون لوحدة وفالاخير كيبقا بوحدو بلا مرى وهاداك اختيارو
تكالمات شوية وبقات متبعة ذكرى فسطوريات وهي كتسارا من ماركة لماركة وتشري فالحوايج دلوكس والديامو وتصور اليخت والمناطق اللي كتمشي ليها،معيشة متابعينها مسلسل من داكشي الرفيع .
وصلات ساعتو اللي كيخرج فيها وتفركس بحال العادة وتم طالع عند ذكرى وهي جالسة كتحسب فديك الفاكتورة وتعاود .طلعات فيه وهبطات وقالت
ذكرى:قصار مع صحابك
ياسين:كيستناوني
ذكرى:ديني نقصر معاك
ياسين:غير بزناسة لي تما فين غتقصر مع وجوه الشر
ذكرى: ايوا ماعطلشي عليا كنبقا بواحدي هنايا
ياسين:عنقها)منتعطلشي عليك ا ميامور غنرجع بكري
زاد خلفة مشا وخلاها جالسة متبعة ليه العين وهزات راسها كتتأمل فالنجوم وقالت
ذكرى:يا ربي…انا شعندي قلبي برد هايدا تقول ميتة
ضربها فديك اللحضة واحد النسيم على وجهها طير شعرها وغمضات عينيها تكات كتشوف فالنجوم وهزات تيليفون عيطات لمها بدات تهضر معاها على الدار وتتجمع ..شوية بدات تعبر على باش كتحس وقالت
ذكرى:حاسة براسي انا ماشي هي انا
الام :نتينا ماشي هي نتينا ههه
ذكرى: ايوالله…واخا شريت دار هنايا مافرحاناشي بيها..كلشي رجع باسل..مابقاتشي شي حاجة كتفرحني فهاد الدنيا
الام:هاديك شي عين ضرباتك ونتينا كتنزل فسطوريات كل نهار هاك بالاك
ذكرى:حتى داكشي اللي كنزل ماخايفاشي عليه من العين مررة.
في حين كانت كتهضر وتتجمع كان ياسين دفع الباب ودخل لقا صابرين مقادة وواجدة عوالة تخرج لاكن عنقها من اللور وقال
ياسين:كنتي خارجة؟
صابرين:كنتسناك نخرجو انا وياك
ياسين:عيان مافياشي اللي يخرج ..عندي الكانة نجلس معاك وصافي
عنقاتو بقوة : توحشتك
مع ديك تعنيقة بدات تفكر واش تقوليه شفتك ولا بلاش وعقلها مشوش طول السهرة وفالفراش اللي جامعهم بجوج لاكن قررات ماتقول والو ..احسن حيت ماعندهاش الحق تحاسبو ويقدر ينفر ويزيد فحالو.
دوز معاها نص الليلة وكان متكي حداها كيرتاح حتى جاه اتصال من عند عبد الحق وناض وقف فالبالكو فتح الخط
ياسين:الحوار بالاسبانية)شعندك اعبد الحق
عبد الحق:قالك طارق رد بالك فالرجعة الحساب مزال ما سالاشي وماعملناش قليل فكاميلو ورباعتو بحال والو يدوز من الجهة ديالك
ياسين:شعند ط٠٠بون دمياه ما يعمل ادا كان راجل يبان قدامي
عبد الحق:مهم رد بالك ماتعرف شني تجيب الوقت ..قولي غدخل شي حاجة؟
ياسين:كنتسنا فابيو يرد عليا لبارح تلاقينا وجلسنا قالك غيضبر فشي ربعين دلكيلو وصافي
عبد الحق:صاافي!
ياسين:بزز باش جبرناها اصاحبي ومخلصة بالثمن
عبد الحق في رد بالك وصافي
ياسين: ماتخافشي كن هاني (شاف الساعة) قالي غيرد عليا ليوم كنتسناه
عبد الحق: ايوا هوا هادا تهلا فراسك
قطع ويالاه جا يدخل صونا ليه تيليفون من جديد ورجع فتح الخط بالاسبانية من جديد
ياسين:الو فابيو
فابيو: السلعة جايا فالطريق غتكون عندك دابا واحد ساعتاين
ياسين:مزيان انا نيت خصني نرجع للمغرب ماعنديشي الوقت
فابيو:جوج توصلك كون هاني
سالا الاتصال ورجع كيلبس حوايجو دغيا
ياسين: انا غنمشي دابا حتى نعيط لك
صابرين: ناضت وقفات) ياسين… انا رجعت كنتوحشك بزاف
ياسين:انا بيدي مكرهتشي نزيد. نبقا معاك ولاكن ماعندي منعمل
دغيا لبس حوايجو وباسها ومشا على وجه السرعة رجع لليخت وطلع ديمارا باش يدخل لداخل للبحر .. طلعات كتجري مخلوعة كانت لابسة سوميج حمرة وكان نازل عليها واحد السر عجيب..عيونها براقة كتلمع وبلا مكياج كانت كتفتن
ذكرى : ياسين!!! خلعتيني!!! فين ماشيين؟
شاف فيها وبقا مطول الشوفة بزاف وقال
ياسين:شعندك جمعتي الزين دليل كامل هاد الليلة
ذكرى:ههه ..وقولي فاين ماشيين
ياسين: غير غندخلو شوية ونرجعو
جرها جلسها قدامو عنقها ودخل باليخت لداخل حتى بعد على مارينا وحبس وتلفت عندها كيداعبها
ياسين:انا كنموووت عاجبك هاد العداب
ذكرى: ياسييين..(شمات فيه ريحة البنات) مشي تحمم مشي ريحتك عاطية
ناضت خلاتو جالس كيشوف فيها بنص عين يالاه غيتبعها لاكن بان ليه ضوء جاي جيهتو كيقرب ومشا طل عليها من لفوق
ياسين/خليك لتحت ماتطلعشي عندي شي ناس غنشوفهم
لاح ليها الهضرة ومشا رجع يشوف شغلو وكان يخت غير صغييرر فيه شي رباعة جايبين باليزة كبيرة فيدهم ..تلاقهم فاللور ديال اليخت حلو ليه ديك الشنطة وكانت عامرة غبرة ..شدها تدوقها وشار براسو بالايجاب وخدا الشنطة فيدو في حين رجعو الاخرين لليخت ديالهم مشاو .يالاه غيدخل بديك الشنطة جاه اتصال من عبد الحق ورد ببرودة لاكن صوت عبد الحق كان خارج
عبد للحق:ماتشبرشي من عندهم السلعة عنداك تشبرها رجع بحالك ماتاخدشي من عند فابيو
وقف ياسين بلاصتو كيستوعب والشنطة فيدو لاكن سرعان ما سمع صوت بلانشا وجيت سكي فالماء وتلفت بانو ليه ملتمين وفيدهم فرادة وعبد الحق كيقول
ياسين:متافق هوا وكاميلو ..فابيو يعطيك السلعة وكاميلو يتعرض ليك ياخدها رد بالك رد بالك
جا اتصال عبد الحق متأخر وطلع فابيو غدار واخا شحال من عام كيتعامل مع ياسين لاكن فهادي شتت الشمل ديال ديك المجموعة وهادو هما المافيات..نتا منهم وحضي منهم .بدا القرطاس ونقز لداخل كيجري طار على واحد الفردي وبدا عطيني نعطيك
بالخلعة سمعات صوت القرطاس وطلعات مخلوعة كتعيط “ياسين ياسين
لاكن مع الطلعة جاوها جوج قرطاسات فالضهر وقفوها فبلاصتها حتى شهقات ..تلفت ياسين بسرعة يقوليها هبطي لاكن تبلوكات قدام عينيه وجاوها جوج اخرين فالكرش متابعين ووحدة فالصدر طاحت طيحة وحدة خلاتو مصدوم ..لاح ديك الشنطة فالبحر وناض كيجري عندها لاكن جاتو رصاصة فالكتف ومع ذللك كمل وطاح عليها بحال الحمق كيمخضها وهي غارقة فدمها ، اما العصابة قلبو الطريق مشا وبقا هوا كيتفتف ويشد راسو ديمارا داك اليخت راجع وتلاقا البوليس داخلين تعرضو ليه لقاو اصابات ولقاو ذكرى باقي فيها عرق كيزدح فعنقها..ربما الرصاص جا فالعضلات ماقتلهاش فالبلاصة. ام ربما هي متشبة بالحياة وقوية
اسوء ما يمكن يوقع لشي انسان.. هوا تصيبو مصيبة فشي حد قريب ليه وعزيز عليه..
وقف على رجليه ويدو معلقة وحالتو حالة .. بغا يشوفها ويطمن عليها وماقادرش يتقبل فقدانها بديك الطريقة البشعة وفطريقو هوا ، بعد ما خدات الشرطة اقوالو مالقاو عندو والو ركان هوا الضحية فديك المعركة خلاوه ومشاو .ناض مشا للانعاش يشوفها ودخل لقاها ناعسة في حالة حرجة والاكسيجين على نيفها وقوة الانابيب ..نهار حداها وبدا كيبكي على يدها وكره حياتو وكره الدنيا باللي فيها ، كسرة مستحيل تبرا وعمر جرحها يتداوا..بقا جالس وكيبكي حتى حس بيها حركات يديها وهز راسو شاف فيها لقاها كتشوف فيه وترمش ..ماتوقعهاش ..ماتوقعش تحل عينيها حيت كانت جثة هامدة ..لاكن كل حاجة كطرى فحياة الانسان ليها معنى .هزات يدها بزز حيدات الانبوب على نيفها وقالت بصعوبة
ذكرى :ياسيين
وقف متلهف كيشوف فيها وفرح واحد اللحضة بغا يطلب السماحة ويهضر لاكن ردت كتباع ريقها وقالت
ذكرى:سمعني… انا كنت حاسة …عنمشي صغيرة ..
قاطعها:لالالا متقولشي هاد الهضرة غتصح وغنساو كلشي وغنهزك واخا تكوني مشلولة عمري نخليك
سدات عينيها قاطعاتو: سمعني…انا عنمشي.. بلحق ..كنآمن بواحد الحاجة..الروح ديالي..غترجع ..غترجع فانسانة اخرى وغنتلاقاو.. ادا بصح بغيتيني من قلبك ومانسيتينشي ..غنرجع..ونتينا لي قادر ترجعني..ادا بصح كنتي تبغيني..غتقربني منك .(تبسمات)غتشوفوني وتعرفني..بلحق ماشي فذكرى…
جن جنونو بهاد الهضرة اللي كتقول وكتبسسم من لفوق .. مشات كضحك وعينيها محلولين كتشوفيه ماحسابش ليه صافي مشات..بقا كيحركها وهي كتشوف فيه حتى تجمعو الاطباء كيجريو شدوه لاكن كان بحال الحمق تينيه حومر والدموع هابطين وكيغوت ويضرب جر داك ليزار شركو وبدا يضرب راسو ويغوت انا السبب انا السبب..تقفل داك الباب دالانعاش على صوتو المجروح وهوا كيغوت للي خلقو مقادرش يصدق لي وقع..مقادرش يدخل لراسو انه هادشي تقلب فثانية وخسر ذكرى ..ماقدرش يستوعب لاكنه تحطم بكل معنى الكلمة وفقد الشخص اللي بغا وكان كيقول مزال الحياة طويلة غنبقاو عايشين مجموعين شحال . عمرو توقع شي نهار يفقد ذكرى او حتى حلم بيها فمنامو
يتبع
شاركنا رأيك في هذا الفصل 🌹